GEN 1:1 सुरू म परमेसर ह अकास अऊ धरती ला रचिस।
GEN 1:2 अऊ धरती ह बेडौल अऊ सुनसान परे रिहिस, अऊ गहिरा पानी के ऊपर अंधियार रिहिस, अऊ परमेसर के आतमा पानी के ऊपर किंदरत रिहिस।
GEN 1:3 अऊ परमेसर ह कहिस, “अंजोर हो,” त अंजोर हो गीस।
GEN 1:4 परमेसर ह अंजोर ला देखिस कि येह बने हे, अऊ ओह अंजोर ला अंधियार ले अलग करिस।
GEN 1:5 परमेसर ह अंजोर ला “दिन,” अऊ अंधियार ला “रात” कहिस। अऊ सांझ होईस, फेर बिहान पहा गीस—ये किसम ले पहिला दिन हो गीस।
GEN 1:6 फेर परमेसर ह कहिस, “पानी के बीच म एक अइसने अंतर होवय कि पानी ह पानी ले अलग हो जावय।”
GEN 1:7 तब परमेसर ह अकास-मंडल बनाईस अऊ अकास-मंडल के खाल्हे के पानी ला एकर ऊपर के पानी ले अलग कर दीस। अऊ वइसने हो गीस।
GEN 1:8 परमेसर ह ओ अकास-मंडल ला “अकास” कहिस। अऊ सांझ होईस, फेर बिहान पहा गीस—ये किसम ले दूसर दिन हो गीस।
GEN 1:9 फेर परमेसर ह कहिस, “अकास के खाल्हे के पानी ह एके जगह म माढ़ जावय, अऊ सूखा भुइयां दिखय।” अऊ वइसने हो गीस।
GEN 1:10 परमेसर ह सूखा भुइयां ला “धरती” कहिस, अऊ जऊन पानी माढ़ गीस, ओला ओह “समुंदर” कहिस, अऊ परमेसर ह देखिस कि येह बढ़िया हे।
GEN 1:11 फेर परमेसर ह कहिस, “धरती म हरियर घांस, बीजावाले पऊधा अऊ फर देवइया रूख, अऊ रूख के फर म अपन-अपन किसम के मुताबिक बीजा होवय।” अऊ वइसने हो गीस।
GEN 1:12 ये किसम ले धरती म हरियर घांस, अऊ पऊधा, जेमा ओमन के जाति के मुताबिक बीजा होथे, अऊ फरवाला रूख, जेमा ओमन के जाति के मुताबिक बीजा होथे, ये जम्मो हो गीन। अऊ परमेसर ह देखिस कि येह बढ़िया हे।
GEN 1:13 अऊ सांझ होईस, फेर बिहान पहा गीस—ये किसम ले तीसर दिन हो गीस।
GEN 1:14 फेर परमेसर ह कहिस, “दिन ला रात ले अलग करे बर अकास-मंडल म अंजोरमन होवंय, अऊ ओमन पबितर समय, अऊ दिन अऊ बछरमन ला जाने बर चिनहां के रूप म काम करंय,
GEN 1:15 अऊ धरती ऊपर अंजोर देय बर ओमन अकास-मंडल म अंजोर बन जावंय।” अऊ वइसने हो गीस।
GEN 1:16 परमेसर ह दू ठन बड़े अंजोर बनाईस—ओमा के बड़े अंजोर ला दिन ऊपर परभूता करे बर अऊ छोटे अंजोर ला रात ऊपर परभूता करे बर बनाईस। ओह तारामन ला घलो बनाईस।
GEN 1:17 परमेसर ह ओमन ला अकास-मंडल म एकर बर रखिस कि ओमन धरती ऊपर अंजोर देवंय,
GEN 1:18 दिन अऊ रात ऊपर परभूता करंय, अऊ अंजोर ला अंधियार ले अलग करंय। अऊ परमेसर ह देखिस कि येह बढ़िया हे।
GEN 1:19 अऊ सांझ होईस, फेर बिहान पहा गीस—ये किसम ले चौथा दिन हो गीस।
GEN 1:20 फेर परमेसर ह कहिस, “पानी ह जीयत जन्तुमन ले भर जावय, अऊ चिरईमन धरती के ऊपर अकास म उड़ंय।”
GEN 1:21 परमेसर ह समुंदर के बड़े-बड़े जीव-जन्तुमन ला बनाईस, अऊ जाति-जाति के ओ जम्मो जीयत चीजमन ला बनाईस जेमन ले पानी भर गीस अऊ ओमन पानी म चलंय-फिरंय, अऊ किसम-किसम के पंखवाले चिरईमन ला घलो बनाईस। अऊ परमेसर ह देखिस कि येह बढ़िया हे।
GEN 1:22 परमेसर ह ओमन ला आसीस दीस अऊ कहिस, “फूलव-फरव; गनती म बाढ़व अऊ समुंदर के पानी म भर जावव, अऊ चिरईमन धरती ऊपर बहुंत हो जावंय।”
GEN 1:23 अऊ सांझ होईस, फेर बिहान पहा गीस—ये किसम ले पांचवां दिन हो गीस।
GEN 1:24 फेर परमेसर ह कहिस, “धरती म किसम-किसम के जीयत परानी होवंय: याने कि घरेलू-पसु, अऊ भुइयां म रेंगइया जन्तु अऊ बन पसु, हर एक अपन जाति-जाति के मुताबिक होवंय।” अऊ वइसने ही हो गीस।
GEN 1:25 परमेसर ह किसम-किसम के बन पसु, किसम-किसम के घरेलू-पसु, अऊ भुइयां ऊपर रेंगइया किसम-किसम के जम्मो जन्तुमन ला बनाईस। अऊ परमेसर ह देखिस कि येह बढ़िया हे।
GEN 1:26 तब परमेसर ह कहिस, “हमन मनखे ला अपन सरूप, अपन समानता म बनावन, ताकि ओमन समुंदर के मछरी, अकास के चिरई अऊ घरेलू-पसु अऊ जम्मो बन पसु अऊ भुइयां म रेंगइया जम्मो जीव-जन्तु ऊपर अधिकार रखंय।”
GEN 1:27 तब परमेसर ह मनखे ला अपन खुद के सरूप म बनाईस, अपन ही सरूप म परमेसर ह ओमन ला बनाईस; नर अऊ नारी करके ओह ओमन ला बनाईस।
GEN 1:28 अऊ परमेसर ह ओमन ला आसीस दीस अऊ ओमन ला कहिस, “फूलव-फरव अऊ गनती म बढ़व; धरती म भर जावव, अऊ येला अपन बस म कर लेवव। समुंदर के मछरी अऊ अकास के चिरई अऊ भुइयां ऊपर रेंगइया जम्मो जीव-जन्तुमन ऊपर अधिकार रखव।”
GEN 1:29 तब परमेसर ह ओमन ला कहिस, “सुनव, धरती के जम्मो बीजावाले पऊधा अऊ जम्मो रूख, जऊन म बीजावाले फर होथें, ओ सबो ला मेंह तुमन ला देवत हंव। ओमन तुम्हर जेवन बर अंय।
GEN 1:30 अऊ धरती के जम्मो पसु अऊ अकास के जम्मो चिरई अऊ भुइयां ऊपर रेंगइया जम्मो जीव-जन्तु—जेमन म जिनगी के सांस हवय—मेंह जम्मो हरियर-हरियर पऊधा ला जेवन बर देवत हंव।” अऊ वइसने ही हो गीस।
GEN 1:31 तब परमेसर ह अपन बनाय जम्मो चीज ला देखिस, अऊ येह बहुंत बढ़िया रिहिस। अऊ सांझ होईस, फेर बिहान पहा गीस—ये किसम ले छठवां दिन हो गीस।
GEN 2:1 ये किसम ले अकास अऊ धरती अऊ ओमा के जम्मो चीज के बनई पूरा हो गीस।
GEN 2:2 परमेसर ह अपन काम, जेला ओह करत रिहिस, सातवां दिन म पूरा करिस अऊ ओह अपन जम्मो काम ले सातवां दिन बिसराम करिस।
GEN 2:3 तब परमेसर ह सातवां दिन ला आसीस दीस अऊ येला पबितर ठहिराईस, काबरकि ओ दिन ओह अपन सिरिस्टी के जम्मो बुता ले बिसराम करिस।
GEN 2:4 अकास अऊ धरती के बिबरन ये अय जब ओमन रचे गीन, मतलब कि जब यहोवा परमेसर ह अकास अऊ धरती ला बनाईस।
GEN 2:5 तब धरती म न तो कोनो झाड़ी उगे रिहिन, अऊ न ही कोनो पऊधा निकले रिहिन, काबरकि यहोवा परमेसर ह धरती म पानी नइं बरसाय रिहिस, अऊ भुइयां म खेती करे बर कोनो नइं रिहिन,
GEN 2:6 पर कुहरा धरती ले उठत रिहिस, जेकर ले जम्मो भुइयां पानी ले पलत रिहिस।
GEN 2:7 तब यहोवा परमेसर ह भुइयां के माटी ले एक मनखे ला रचिस, अऊ ओकर नाक म जिनगी के सांस फूंक दीस, अऊ मनखे ह जीयत परानी बन गीस।
GEN 2:8 अऊ यहोवा परमेसर ह पूरब कोति अदन म एक बगीचा लगाईस, अऊ उहां ओ मनखे जेला ओह रचे रिहिस, रख दीस।
GEN 2:9 अऊ यहोवा परमेसर ह भुइयां म जम्मो किसम के रूख, जो देखे म मनोहर अऊ जेकर फर खाय म बने लगथे, उगाईस, अऊ बगीचा के मांझा म जिनगी के रूख अऊ भला अऊ बुरा के गियान के रूख ला घलो लगाईस।
GEN 2:10 ओ बगीचा ला पलोय बर, एक नदी अदन ले बहत रिहिस अऊ उहां ले आघू जाके ओह चार धारा म बंट गीस।
GEN 2:11 पहिली धारा के नांव पीसोन ए; येह हवीला नांव के पूरा देस ला, जिहां सोन मिलथे, घेरे हवय।
GEN 2:12 (ओ देस के सोन चोखा होथे; उहां खुसबूदार धूप अऊ गोमेदक घलो मिलथे।)
GEN 2:13 दूसर नदी के नांव गीहोन ए; येह कूस नांव के पूरा देस ला घेरे हवय।
GEN 2:14 अऊ तीसर नदी के नांव तिगरीस ए; येह अस्सूर के पूरब कोति बोहाथे। अऊ चौथा नदी के नांव फरात ए।
GEN 2:15 तब यहोवा परमेसर ह मनखे ला लेके अदन के बगीचा म रख दीस कि ओह ओमा काम करय अऊ ओकर देखभाल करय।
GEN 2:16 अऊ यहोवा परमेसर ह मनखे ला ये हुकूम दीस, “तें बगीचा के कोनो घलो रूख के फर बिगर रोक-टोक के खा सकत हस,
GEN 2:17 पर भला अऊ बुरा के गियान के जऊन रूख हवय, ओकर फर तें कभू झन खाबे, काबरकि जब तें ओकर फर ला खाबे, त निस्चित रूप से तेंह मर जाबे।”
GEN 2:18 फेर यहोवा परमेसर ह कहिस, “मनखे के अकेला रहई बने नो हय। में ओकर बर एक अइसन मददगार बनाहूं, जऊन ह ओकर ले मेल खावय।”
GEN 2:19 यहोवा परमेसर ह भुइयां ले जम्मो जाति के पसुमन ला अऊ अकास के जम्मो चिरईमन ला बनाय रिहिस अऊ ये देखे बर ओमन ला मनखे करा लानिस कि ओह ओमन के का-का नांव रखथे; अऊ जऊन-जऊन नांव लेके जीयत परानीमन ला मनखे ह बलाईस, ओह ओमन के नांव हो गीस।
GEN 2:20 ये किसम ले मनखे ह जम्मो घरेलू-पसुमन के, अकास के चिरईमन के अऊ जम्मो बन पसुमन के नांव रखिस। पर आदम बर कोनो अइसने सहायक नइं मिलिस, जेकर संग ओकर मेल खावय।
GEN 2:21 एकरसेति यहोवा परमेसर ह आदम ला भारी नींद म डार दीस; अऊ जब ओह सुतत रिहिस, तब परमेसर ह आदम के एक पसली निकालके ओकर जगह म मांस भर दीस।
GEN 2:22 तब यहोवा परमेसर ह आदम ले निकाले ओ पसली म ले एक माईलोगन बनाईस, अऊ ओला आदम करा ले आईस।
GEN 2:23 तब आदम ह कहिस, “अब येह मोर हाड़ा म के हाड़ा अऊ मोर मांस म के मांस अय; एकरसेति येला ‘नारी’ कहे जाही, काबरकि येह नर म ले निकाले गे हवय।”
GEN 2:24 एकरे कारन आदमी ह अपन दाई-ददा ला छोंड़के अपन घरवाली संग मिले रहिही, अऊ ओ दूनों एक तन होहीं।
GEN 2:25 आदम अऊ ओकर घरवाली दूनों नंगरा रिहिन, पर ओमन लजात नइं रिहिन।
GEN 3:1 यहोवा परमेसर ह जतेक बन पसु बनाय रिहिस, ओ सब म सांप ह जादा धूर्त रिहिस। ओह माईलोगन ले पुछिस, “का परमेसर ह सही म कहे हवय, ‘तुमन ये बगीचा के कोनो रूख के फर ला झन खाहू’?”
GEN 3:2 माईलोगन ह सांप ला जबाब दीस, “हमन ये बगीचा के रूखमन के फर खा सकत हन,
GEN 3:3 पर जऊन रूख ह बगीचा के मांझा म हवय, ओकर फर के बारे म परमेसर ह कहे हवय कि न तो तुमन ओला खावव अऊ न ही ओला छुवव, नइं तो तुमन मर जाहू।”
GEN 3:4 तब सांप ह माईलोगन ला कहिस, “तुमन निस्चय नइं मरव।
GEN 3:5 बरन परमेसर खुद जानत हे कि जऊन दिन तुमन ये फर ला खाहू, ओहीच दिन तुम्हर आंखी ह उघर जाही, अऊ तुमन भला अऊ बुरा के गियान पाके परमेसर के सहीं हो जाहू।”
GEN 3:6 त जब माईलोगन ह देखिस कि रूख के फर ह खाय बर बढ़िया अऊ देखे म मनभाऊ, अऊ बुद्धि देय बर पसंद के लईक हे, त ओह ओमा ले कुछू ला टोरके खाईस, अऊ कुछू अपन घरवाला ला घलो दीस, जऊन ह ओकर संग रिहिस, अऊ ओह घलो खाईस।
GEN 3:7 तब ओ दूनों के आंखी उघर गीस, अऊ ओमन ला महसूस होईस कि ओमन नंगरा हवंय; एकरे बर ओमन अंजीर के पानमन ला जोड़-जोड़के अपन बर ढपनी बना लीन।
GEN 3:8 तब यहोवा परमेसर, जऊन ह दिन के ठंडा समय बगीचा म घुमय, ओकर अवाज ओमन ला सुनई दीस। तब आदम अऊ ओकर घरवाली बगीचा के रूखमन के बीच म यहोवा परमेसर ले लुका गीन।
GEN 3:9 पर यहोवा परमेसर ह हांक पारके आदम ला पुछिस, “तें कहां हस?”
GEN 3:10 ओह जबाब दीस, “में बारी म तोर अवाज ला सुनके डर गेंव, काबरकि में नंगरा रहेंव; एकरसेति में लुका गेंव।”
GEN 3:11 परमेसर ह कहिस, “तोला कोन कहिस कि तें नंगरा हस? जऊन रूख के फर खाय बर मेंह तोला मना करे रहेंव, का तेंह ओकर फर ला खाय हस?”
GEN 3:12 आदम ह कहिस, “जऊन माईलोगन ला तेंह मोर संग रहे बर देय हस—ओही ह ओ रूख के फर मोला खाय बर दीस अऊ मेंह ओला खांय।”
GEN 3:13 तब यहोवा परमेसर ह माईलोगन ले कहिस, “ये तें का करे हस?” माईलोगन ह जबाब दीस, “सांप ह मोला बहका दीस, त मेंह खांय।”
GEN 3:14 तब यहोवा परमेसर ह सांप ला कहिस, “काबरकि तेंह अइसने करे हस, “एकरसेति तें जम्मो घरेलू-पसु, अऊ जम्मो बन पसु ले जादा सरापित अस! तेंह पेट के बल म रेंगबे, अऊ तेंह जिनगी भर माटी खावत रहिबे।
GEN 3:15 अऊ मेंह तोर अऊ ये माईलोगन के बीच म, अऊ तोर बंस अऊ एकर बंस के बीच म, बईरता उपजाहूं, ओह तोर मुड़ ला कुचरही, अऊ तें ओकर एड़ी ला डसबे।”
GEN 3:16 फेर माईलोगन ला ओह कहिस, “में तोर गरभवती होय के समय के पीरा ला अब्बड़ बढ़ाहूं; अऊ छेवारी होय के समय, तेंह पीरा सहके लइका जनमाबे। तोर लालसा तोर घरवाला बर होही अऊ ओह तोर ऊपर परभूता करही।”
GEN 3:17 अऊ आदम ला ओह कहिस, “काबरकि तेंह अपन घरवाली के बात ला माने, अऊ जऊन रूख के बिसय म मेंह तोला हुकूम देय रहेंव कि तें ओकर फर ला झन खाबे, ओला तेंह खाय हस। “भुइयां ह तोर कारन सरापित हे; तें एकर ऊपज अपन जिनगी भर दुख के संग खाय पाबे।
GEN 3:18 अऊ येह तोर बर कांटा अऊ कंटिला पऊधा उपजाही, अऊ तें खेत के ऊपज ला खाबे।
GEN 3:19 अऊ अपन माथा के पसीना के कमई तेंह खाय पाबे, अऊ आखिर म माटी म मिल जाबे; काबरकि तोला ओही म ले लिये गे हवय, तें तो माटी ही अस, अऊ माटी म ही फेर मिल जाबे।”
GEN 3:20 आदम ह अपन घरवाली के नांव हवा रखिस, काबरकि जम्मो जीयत मनखेमन के ओही ह दाई होईस।
GEN 3:21 अऊ यहोवा परमेसर ह आदम अऊ ओकर घरवाली बर चमड़ा के पहिरावा बनाके ओमन ला पहिरा दीस।
GEN 3:22 फेर यहोवा परमेसर ह कहिस, “मनखे ह भला अऊ बुरा के गियान पाके अब हमर म के एक झन सहीं हो गे हवय। एकरसेति अब अइसने झन होवय कि ओह हांथ लमाके जिनगी के रूख के फर ला घलो टोरके खा लेवय अऊ सदाकाल तक जीयत रहय।”
GEN 3:23 एकरसेति यहोवा परमेसर ह ओला अदन के बगीचा ले निकाल दीस कि ओह ओ भुइयां म काम करय, जेमा ले ओह बनाय गे रिहिस।
GEN 3:24 आदम ला निकाले के बाद, ओह जिनगी के रूख के रसता के रखवारी करे बर, अदन के बगीचा के पूरब दिग म करूबमन ला अऊ चारों कोति किंदरनेवाला आगी के तलवार ला घलो रख दीस।
GEN 4:1 जब आदम ह अपन घरवाली हवा संग सुतिस, त ओह आसरा म होके कैन ला जनम दीस अऊ कहिस, “मेंह यहोवा के मदद ले एक झन पुरूस पाय हंव।”
GEN 4:2 बाद म ओह ओकर भाई हाबिल ला जनम दीस। हाबिल ह भेड़-बकरी के चरवाहा बन गीस, अऊ कैन ह खेती-बारी करत रिहिस।
GEN 4:3 कुछू दिन के बाद, कैन ह यहोवा करा भुइयां के कुछू फर चढ़ावा के रूप म लानिस।
GEN 4:4 अऊ हाबिल घलो अपन भेड़-बकरी के कुछू पहिलांतमन ला लानिस अऊ ओमन के चरबी ला चढ़ावा के रूप म चघाईस। यहोवा ह हाबिल अऊ ओकर चढ़ावा ला तो गरहन करिस,
GEN 4:5 पर कैन अऊ ओकर भेंट ला गरहन नइं करिस। एकरसेति कैन ह अब्बड़ गुस्सा होईस अऊ ओकर चेहरा ह उतर गीस।
GEN 4:6 तब यहोवा ह कैन ले पुछिस, “तेंह काबर गुस्सा होवत हस? तोर मुहूं ह काबर उतरे हवय?
GEN 4:7 जऊन ह सही ए, यदि तेंह ओला करते, त का तोर भेंट ह गरहन नइं होतिस? पर जऊन ह सही ए, यदि तेंह ओला नइं करस, त पाप ह तोर दुवारी म ठाढ़े हवय; ओकर लालसा तोला पाय बर होही, पर तोला ओकर ऊपर जय पाना जरूरी ए।”
GEN 4:8 एक दिन कैन ह अपन भाई हाबिल ला कहिस, “चल हमन खेत डहार जाबो।” जब ओमन खेत म रिहिन, त कैन ह अपन भाई हाबिल ऊपर हमला करके ओला मार डारिस।
GEN 4:9 तब यहोवा ह कैन ले पुछिस, “तोर भाई हाबिल कहां हे?” त कैन जबाब दीस, “में नइं जानंव; का मेंह अपन भाई के रखवार अंव?”
GEN 4:10 यहोवा ह कहिस, “तेंह का करे हस? सुन! तोर भाई के लहू ह भुइयां ले मोला नरियावथे।
GEN 4:11 अब तेंह एक सराप के अधीन हस अऊ ओ भुइयां ले निकाले जावत हस, जऊन ह तोर भाई के लहू तोर हांथ ले पीये बर अपन मुहूं फारिस।
GEN 4:12 जब तेंह भुइयां म खेती करबे, त ओह अब तोला अपन फसल नइं देवय। तेंह धरती म बियाकुल होके इहां-उहां भटकत रहिबे।”
GEN 4:13 तब कैन ह यहोवा ला कहिस, “मोर सजा ह मोर सहे के बाहिर ए।
GEN 4:14 आज तेंह मोला ये भुइयां म ले निकालत हस, अऊ मेंह तोर नजर के आड़ म हो जाहूं; अऊ धरती म अस्थिर होके इहां-उहां भटकत रहिहूं, अऊ जऊन कोनो मोला पाही, ओह मोला मार डारही।”
GEN 4:15 पर यहोवा ह ओला कहिस, “अइसने नइं होवय; जऊन कोनो कैन ला मारही, ओकर ले सात गुना बदला लेय जाही।” तब यहोवा ह कैन बर एक चिनहां ठहिरा दीस ताकि कोनो मनखे कैन ला पाके ओकर हतिया झन कर देवय।
GEN 4:16 तब कैन ह यहोवा के आघू ले चल दीस अऊ नोद नांव के देस म, जेह अदन के पूरब कोति हवय, रहे लगिस।
GEN 4:17 जब कैन अपन घरवाली संग सुतिस, तब ओकर घरवाली ह आसरा म होईस अऊ ओह हनोक ला जनम दीस। कैन ह तब एक सहर बसावत रिहिस, अऊ ओह ओ सहर के नांव अपन बेटा के नांव म हनोक रखिस।
GEN 4:18 हनोक ले ईराद जनमिस, अऊ ईराद ह महूयाएल के ददा रिहिस, अऊ महूयाएल ह मतूसाएल के ददा रिहिस, अऊ मतूसाएल ह लेमेक के ददा रिहिस।
GEN 4:19 लेमेक ह दू झन माईलोगन ले बिहाव करिस, जेमा के एक झन के नांव आदा, अऊ दूसर के सिल्ला रिहिस।
GEN 4:20 आदा ह याबाल ला जनमिस; याबाल ह ओमन के पुरखा रिहिस जऊन मन तम्बू म रहिथें अऊ पसु-पालन करथें।
GEN 4:21 ओकर भाई के नांव यूबाल रिहिस; जऊन ह जम्मो किसम के सितार अऊ बंसी बजइयामन के पुरखा रिहिस।
GEN 4:22 सिल्ला घलो तूबल-कैन नांव के एक बेटा ला जनमिस; जऊन ह कांसा अऊ लोहा ढारके औजार बनइया होईस। तूबल-कैन के बहिनी के नांव नामा रिहिस।
GEN 4:23 लेमेक ह अपन घरवालीमन ला कहिस, “हे आदा अऊ सिल्ला, मोर गोठ ला सुनव; हे लेमेक के घरवालीमन, मोर बात ऊपर कान लगावव। मेंह एक मनखे ला, जेह मोला चोट पहुंचाय रिहिस, मार डारेंव। एक जवान, जऊन ह मोला घायल करे रिहिस।
GEN 4:24 यदि कैन के बदला सात गुना लेय जाथे, त लेमेक के सतहत्तर गुना लेय जाही।”
GEN 4:25 आदम फेर अपन घरवाली संग सुतिस, अऊ ओकर घरवाली ह एक बेटा ला जनम दीस अऊ ओकर नांव ये कहिके सेत रखिस, “परमेसर ह मोला हाबिल के बदला म, जेला कैन ह मार डारिस, एक अऊ बेटा दे हवय।”
GEN 4:26 बाद म, सेत के घलो एक बेटा होईस; ओह ओकर नांव एनोस रखिस। ओही बेरा ले मनखेमन यहोवा ले पराथना करे के सुरू करिन।
GEN 5:1 येह आदम के खानदान के लिखित बिबरन अय। जब परमेसर ह मनखे ला बनाईस, त ओह अपन ही सरूप म ओला बनाईस।
GEN 5:2 ओह ओमन ला नर अऊ नारी करके बनाईस अऊ ओमन ला आसीस दीस, अऊ ओमन के बनाय के दिन ओकर नांव “मनखे-जात” रखिस।
GEN 5:3 जब आदम ह 130 बछर के होईस, त ओकर एक बेटा ओकर समानता अऊ ओकर सरूप म जनमिस। ओह ओकर नांव सेत रखिस।
GEN 5:4 सेत के जनमे के बाद, आदम ह 800 बछर जीयत रिहिस, अऊ ओकर अऊ घलो बेटा-बेटी होईन।
GEN 5:5 ये किसम ले आदम के कुल उमर 930 बछर होईस, अऊ तब ओह मर गीस।
GEN 5:6 जब सेत 105 बछर के होईस, त ओह एनोस के ददा होईस।
GEN 5:7 एनोस के जनम के बाद, सेत ह 807 बछर तक जीयत रिहिस, अऊ ओकर अऊ बेटा-बेटी होईन।
GEN 5:8 ये किसम ले सेत के कुल उमर 912 बछर होईस, अऊ तब ओह मर गीस।
GEN 5:9 जब एनोस 90 बछर के होईस, तब ओकर ले केनान के जनम होईस।
GEN 5:10 केनान के जनम के बाद, एनोस 815 बछर तक जीयत रिहिस, अऊ ओकर अऊ घलो बेटा-बेटी होईन।
GEN 5:11 ये किसम ले एनोस के कुल उमर 905 बछर होईस, अऊ तब ओह मर गीस।
GEN 5:12 जब केनान 70 बछर के होईस, त ओकर ले महललेल के जनम होईस।
GEN 5:13 महललेल के जनम के बाद, केनान 840 बछर तक जीयत रिहिस, अऊ ओकर अऊ घलो बेटा-बेटी होईन।
GEN 5:14 ये किसम ले केनान के कुल उमर 910 बछर होईस, अऊ तब ओह मर गीस।
GEN 5:15 जब महललेल 65 बछर के होईस, त ओकर ले येरेद के जनम होईस।
GEN 5:16 येरेद के जनम के बाद, महललेल 830 बछर तक जीयत रिहिस, अऊ ओकर अऊ घलो बेटा-बेटी होईन।
GEN 5:17 ये किसम ले महललेल के कुल उमर 895 बछर होईस, अऊ तब ओह मर गीस।
GEN 5:18 जब येरेद 162 बछर के होईस, त ओकर ले हनोक के जनम होईस।
GEN 5:19 हनोक के जनम के बाद, येरेद 800 बछर तक जीयत रिहिस, अऊ ओकर अऊ भी बेटा-बेटी होईन।
GEN 5:20 ये किसम ले येरेद के कुल उमर 962 बछर होईस, अऊ तब ओह मर गीस।
GEN 5:21 जब हनोक 65 बछर के होईस, त ओकर ले मतूसेलह के जनम होईस।
GEN 5:22 मतूसेलह के जनम के बाद, हनोक 300 बछर तक परमेसर के संग-संग चलिस, अऊ ओकर अऊ भी बेटा-बेटी होईन।
GEN 5:23 ये किसम ले हनोक के कुल उमर 365 बछर होईस।
GEN 5:24 हनोक ह ईमानदारी से परमेसर के संग चलिस; तब ओह गायब हो गीस, काबरकि परमेसर ह ओला उठा लीस।
GEN 5:25 जब मतूसेलह 187 बछर के होईस, त ओकर ले लेमेक के जनम होईस।
GEN 5:26 लेमेक के जनम के बाद, मतूसेलह 782 बछर जीयत रिहिस, अऊ ओकर अऊ भी बेटा-बेटी होईन।
GEN 5:27 ये किसम ले मतूसेलह के कुल उमर 969 बछर होईस, अऊ तब ओह मर गीस।
GEN 5:28 जब लेमेक 182 बछर के होईस, त ओकर ले एक बेटा होईस।
GEN 5:29 ओह ओकर नांव ए कहिके नूह रखिस, “यहोवा ह धरती ला जऊन सराप दे हे, ओकर बारे म, ये बाबू-पीला ह हमर काम म अऊ जऊन कठोर मेहनत हमन करथन, ओमा हमन ला सांति दीही।”
GEN 5:30 नूह के जनम के बाद, लेमेक 595 बछर तक जीयत रिहिस, अऊ ओकर अऊ बेटा-बेटी जनमिन।
GEN 5:31 ये किसम ले लेमेक के कुल उमर 777 बछर होईस, अऊ तब ओह मर गीस।
GEN 5:32 जब नूह 500 बछर के होईस, त ओकर ले सेम, हाम अऊ येपेत के जनम होईस।
GEN 6:1 जब मनखेमन धरती म गनती म बाढ़े लगिन अऊ ओमन के बेटीमन जनमिन,
GEN 6:2 त परमेसर के बेटामन देखिन कि मनखे के बेटीमन सुघर हें अऊ ओमन जे-जे ला पसंद करिन, तेमन ले बिहाव कर लीन।
GEN 6:3 तब यहोवा ह कहिस, “मोर आतमा ह मनखे संग सदाकाल बर नइं रहय, काबरकि मनखे ह अमर नो हय; ओमन के उमर एक सौ बीस बछर होही।”
GEN 6:4 ओ समय धरती म नेफिलीम रहत रिहिन, अऊ एकर पाछू जब परमेसर के बेटामन मनखे के बेटीमन संग संबंध बनाईन, त ओमन के मेल से जऊन लइका जनमिन, ओमन ओ समय सूरबीर अऊ जाने-माने मनखे रिहिन।
GEN 6:5 यहोवा ह देखिस कि मनखेमन के बुरई धरती म बहुंत बढ़ गे हवय, अऊ ओमन के हिरदय के जम्मो बिचार ह हर समय सिरिप बुरई के ही होथे।
GEN 6:6 त यहोवा ह धरती म मनखे ला बनाके पछताईस, अऊ अपन मन म बहुंत दुखी होईस।
GEN 6:7 एकरसेति यहोवा ह कहिस, “मेंह मनखे ला, जेला मेंह बनाय हंव, धरती म ले नास कर दूहूं—अऊ ओमन के संग पसु, चिरई अऊ भुइयां म रेंगइया जन्तु, ओ जम्मो ला नास कर दूहूं—काबरकि मेंह ओमन ला बनाके पछतात हंव।”
GEN 6:8 पर यहोवा के दया-दिरिस्टी नूह ऊपर बने रिहिस।
GEN 6:9 नूह अऊ ओकर परिवार के बिबरन ये अय। नूह एक धरमी अऊ अपन समय के मनखेमन म निरदोस रिहिस, अऊ ओह ईमानदारी से परमेसर के संग चलिस।
GEN 6:10 नूह के तीन झन बेटा रिहिन: सेम, हाम अऊ येपेत।
GEN 6:11 ओ समय धरती ह परमेसर के नजर म खराप हो गे रिहिस अऊ हिंसा ले भर गे रिहिस।
GEN 6:12 परमेसर ह देखिस कि धरती ह बहुंत खराप हो गे हे, काबरकि धरती के जम्मो मनखेमन अपन चालचलन ला बिगाड़ ले रहंय।
GEN 6:13 एकरसेति परमेसर ह नूह ला कहिस, “मेंह जम्मो मनखे के अन्त करइया हंव, काबरकि ओमन के कारन धरती ह हिंसा ले भर गे हवय। मेंह निस्चित रूप से ओमन ला धरती समेत नास करइया हंव।
GEN 6:14 एकरसेति तें गोपेर रूख के लकरी के एक पानी जहाज बना ले; ओकर भीतर म खोलीमन ला बनाबे, अऊ ओकर भीतर-बाहिर राल लगा देबे।
GEN 6:15 तें ओला अइसने बनाबे: जहाज ला तीन सौ क्यूबीट लम्बा, पचास क्यूबीट चाकर अऊ तीस क्यूबीट ऊंच बनाबे।
GEN 6:16 जहाज के एक छत बनाबे अऊ छत खाल्हे एक क्यूबीट ऊंच खिड़की जहाज के चारों कोति बनाबे। जहाज के बाजू म एक कपाट रखबे अऊ जहाज ला तीन तल्ला बनाबे।
GEN 6:17 काबरकि देख, में धरती म जल-परलय करके जम्मो चीज ला जेमन म जिनगी के सांस हवय, अकास के तरी ले नास करइया हंव। धरती ऊपर जऊन कुछू हवय, सबो चीज नास हो जाहीं।
GEN 6:18 पर मेंह तोर संग करार करहूं, अऊ तेंह जहाज के भीतर जाबे—तोर बेटामन अऊ तोर घरवाली अऊ तोर बेटामन के घरवालीमन घलो तोर संग जहाज के भीतर जाहीं।
GEN 6:19 अऊ जम्मो जीयत परानी म ले, तें हर एक जाति के दू-दू ठन याने कि एक नर अऊ एक मादा ला जहाज भीतर लानबे अऊ ओमन ला अपन संग जीयत रखबे।
GEN 6:20 हर किसम के चिरई, हर किसम के पसु अऊ भुइयां म रेंगइया हर किसम के जीव म के दू-दू ठन तोर करा जीयत रहे बर आहीं।
GEN 6:21 तें आनि-बानि के खाय के जिनिस जेला खाय जाथे, अपन करा जमा कर लेबे, जऊन ह तोर अऊ ओमन के जेवन बर होही।”
GEN 6:22 परमेसर के हुकूम के मुताबिक नूह हर चीज ला करिस।
GEN 7:1 तब यहोवा ह नूह ला कहिस, “तें अपन पूरा घराना समेत जहाज म जा, काबरकि मेंह ये पीढ़ी के मनखे म तोला अपन नजर म धरमी पाय हंव।
GEN 7:2 हर किसम के सुध पसु म ले, तें सात-सात जोड़ी याने कि नर अऊ मादा ले, पर हर किसम के असुध पसु म ले एक-एक जोड़ी याने कि नर अऊ मादा ले,
GEN 7:3 अऊ हर किसम के चिरई म ले घलो सात-सात जोड़ी याने कि नर अऊ मादा ले ताकि ओमन के बंस बांचके जम्मो धरती म बने रहंय।
GEN 7:4 सात दिन के बाद, मेंह धरती म चालीस दिन अऊ चालीस रात तक बरसा करहूं, अऊ मेंह जम्मो जीयत परानीमन ला धरती म ले नास कर दूहूं, जेमन ला मेंह बनाय हवंव।”
GEN 7:5 अऊ जइसे यहोवा ह हुकूम देय रिहिस, ओकरे मुताबिक नूह जम्मो चीज ला करिस।
GEN 7:6 नूह के उमर छै सौ साल रिहिस, जब धरती ऊपर जल-परलय आईस।
GEN 7:7 नूह ह अपन बेटा, घरवाली अऊ बहुमन के संग जल-परलय ले बांचे बर जहाज भीतर गीस।
GEN 7:8 सुध अऊ असुध दूनों किसम के पसु, चिरई अऊ भुइयां म रेंगइया जम्मो जन्तु म ले एक-एक जोड़ी
GEN 7:9 याने कि नर अऊ मादा, नूह करा आईन अऊ जहाज भीतर गीन, जइसने कि परमेसर ह नूह ला हुकूम दे रिहिस।
GEN 7:10 अऊ सात दिन के बाद, जल-परलय धरती म होय लगिस।
GEN 7:11 नूह के जिनगी के छै सौवां साल के दूसरा महिना के सतरहवां दिन गहिरा समुंदर के सोतामन फूट गीन अऊ अकास के पानी के झरोखामन घलो खुल गीन।
GEN 7:12 अऊ चालीस दिन अऊ चालीस रात तक धरती म लगातार बरसा होते रिहिस।
GEN 7:13 ठीक ओही दिन नूह अपन बेटा सेम, हाम, येपेत अऊ अपन घरवाली अऊ तीनों बहुमन संग जहाज भीतर गीस।
GEN 7:14 ओमन के संग हर किसम के जंगली पसु, हर किसम के घरेलू-पसु, हर किसम के धरती ऊपर रेंगइया जन्तु, अऊ हर किसम के उड़इया चिरईमन के एक-एक जोड़ी जहाज म गीन।
GEN 7:15 जम्मो परानी जेमा जिनगी के सांस रिहिस, ओमा के एक-एक जोड़ी नूह करा आईन अऊ जहाज भीतर गीन।
GEN 7:16 जऊन पसुमन भीतर जावत रिहिन, ओमा हर किसम के जीव-जन्तु के नर अऊ मादा रिहिन जइसने कि परमेसर ह नूह ला हुकूम दे रिहिस। तब यहोवा ह नूह के भीतर जाय के बाद जहाज के कपाट ला बंद कर दीस।
GEN 7:17 धरती म चालीस दिन तक पानी के परलय होते रिहिस, अऊ जइसे-जइसे पानी बढ़त गीस, वइसे-वइसे जहाज ह धरती ले ऊपर उठत गीस।
GEN 7:18 पानी बढ़त-बढ़त धरती ऊपर बहुंत हो गे अऊ जहाज पानी ऊपर तउंरे लगिस।
GEN 7:19 पानी ह धरती ऊपर अतेक भर गीस कि धरती के जम्मो बड़े-बड़े पहाड़ घलो बुड़ गीन।
GEN 7:20 पानी ह अऊ बढ़के पहाड़मन के ऊपर पंदरह क्यूबीट ले घलो जादा भर गीस।
GEN 7:21 भुइयां म रहइया जम्मो जीव—चिरई, घरेलू-पसु, जंगली पसु, धरती के जम्मो उड़नेवाला जीव, अऊ जम्मो मनखे नास हो गीन।
GEN 7:22 सूखा भुइयां म रहइया हर ओ चीज जऊन म जिनगी के सांस रिहिस, ओ जम्मो के जम्मो मर गीन।
GEN 7:23 धरती के ऊपर जम्मो जीयत चीज के नास हो गीस; मनखे अऊ पसु अऊ भुइयां म रेंगइया जीव अऊ चिरई जम्मो के जम्मो धरती ले मर मिटिन। सिरिप नूह अऊ जतेक झन ओकर संग जहाज म रिहिन, ओमन बांचिन।
GEN 7:24 अऊ पानी धरती ऊपर एक सौ पचास दिन तक भरे रिहिस।
GEN 8:1 अऊ परमेसर ह नूह अऊ जतेक जंगली पसु अऊ घरेलू-पसु ओकर संग जहाज म रिहिन, ओ जम्मो के सुधि लीस, अऊ परमेसर ह धरती ऊपर हवा बहाईस, अऊ पानी अंटाय लगिस।
GEN 8:2 अब गहिरा समुंदर के सोता अऊ अकास के पानी के झरोखामन बंद कर दिये गीन, अऊ अकास ले पानी गिरे के बंद हो गीस।
GEN 8:3 अऊ पानी ह धरती ले लगातार कम होवत गीस। एक सौ पचास दिन के बाद पानी ह कम होय लगिस;
GEN 8:4 अऊ साल के सातवां महिना के सतरहवां दिन जहाज ह अरारात नांव के पहाड़ म टेक गीस।
GEN 8:5 पानी ह दसवां महिना तक अंटात गीस, अऊ दसवां महिना के पहिला दिन पहाड़ के चोटीमन दिखे लगिन।
GEN 8:6 ओकर चालीस दिन के बाद नूह ह अपन बनाय जहाज के एक खिड़की ला खोलिस
GEN 8:7 अऊ एक ठन कऊआ ला उड़ा दीस, अऊ जब तक पानी ह धरती ऊपर ले नइं सूखा गीस, ओ कऊआ ह धरती ऊपर एती-ओती उड़ते रिहिस।
GEN 8:8 तब ओह एक ठन पंड़की ला ये देखे बर उड़िया दीस कि पानी धरती ऊपर ले अंटाईस कि नइं।
GEN 8:9 पर ओ पंड़की ला बईठे बर कोनो ठिकाना नइं मिलिस, काबरकि जम्मो धरती ह पानी ले भरे रिहिस, एकरसेति ओह लहुंटके नूह करा जहाज म आ गीस। तब नूह ह हांथ लमाके ओला वापिस अपन करा जहाज म ले आईस।
GEN 8:10 तब ओह सात दिन तक ठहिरके ओ पंड़की ला जहाज ले फेर उड़िया दीस।
GEN 8:11 जब ओ पंड़की ह सांझकुन नूह करा लहुंटके आईस, त ओह देखिस कि पंड़की के चोंच म जैतून के एक नवां पान हवय! तब नूह ह जान डारिस कि पानी धरती ऊपर ले अंटा गे हे।
GEN 8:12 ओह सात दिन अऊ ठहिरके ओ पंड़की ला फेर उड़िया दीस, पर ये समय ओह फेर लहुंटके नूह करा नइं आईस।
GEN 8:13 नूह के उमर के छै सौ एक बछर के पहिला महिना के पहिला दिन, पानी ह धरती ऊपर ले सूखा गीस। नूह ह तब जहाज के छानी ला खोल दीस अऊ देखिस कि धरती ह सूखा गे हे।
GEN 8:14 दूसर महिना के सत्ताईसवां दिन धरती ह पूरा सूखा गीस।
GEN 8:15 तब परमेसर ह नूह ला कहिस,
GEN 8:16 “तें अपन घरवाली, बेटा, अऊ बहुमन के संग जहाज ले निकल आ।
GEN 8:17 चिरई, पसु, अऊ जम्मो किसम के धरती ऊपर रेंगइया जन्तुमन ला घलो अपन संग निकालके ले आ ताकि धरती ऊपर ओमन बहुंत फूलंय-फरंय अऊ धरती म ओमन के गनती बढ़य।”
GEN 8:18 तब नूह, अपन बेटा, घरवाली अऊ बहुमन संग निकल आईस।
GEN 8:19 जम्मो पसु अऊ भुइयां म रेंगइया जम्मो जन्तु, अऊ जम्मो चिरई अऊ जम्मो जीव-जन्तु, जऊन मन धरती म रेंगथें-बुलथें, अपन जाति-जाति के मुताबिक जहाज ले निकल आईन।
GEN 8:20 तब नूह ह यहोवा बर एक बेदी बनाईस, अऊ जम्मो सुध पसु अऊ जम्मो सुध चिरई म ले थोर-थोर लेके बेदी ऊपर होम-बलिदान करिस।
GEN 8:21 यहोवा ह सुख-देवइया सुगंध ला सुंघके अपन मन म कहिस: “मनखे के कारन, में फेर कभू भुइयां ला सराप नइं दंव, हालाकि मनखे के लइकापन ले जऊन भी बिचार ओकर मन म आथे, ओह खराप ही होथे। पर जइसने मेंह जम्मो जीवमन ला नास करे हंव, वइसने अऊ फेर कभू नइं करंव।
GEN 8:22 “अब ले जब तक धरती ह रहिही, तब तक बीजा बोय अऊ लुये के समय, जाड़ा अऊ गरमी, धूपकाला अऊ जड़काला, दिन अऊ रात लगातार होवत रहिहीं।”
GEN 9:1 फेर परमेसर ह नूह अऊ ओकर बेटामन ला आसीस दीस अऊ ओमन ला कहिस, “फूलव-फरव अऊ गनती म बढ़व अऊ धरती म भर जावव।
GEN 9:2 तुम्हर डर अऊ भय धरती के जम्मो पसु, अऊ अकास के जम्मो चिरई, अऊ भुइयां म रेंगइया जम्मो जीव, अऊ समुंदर के जम्मो मछरीमन ऊपर बने रहय; ये जम्मो ला तुम्हर बस म करे जावथे।
GEN 9:3 जम्मो जीयत अऊ रेंगइया जन्तुमन तुम्हर खाय बर हवंय। जइसने मेंह तुमन ला हरियर पऊधा दे रहेंव, वइसने मेंह अब तुमन ला हर चीज देवत हंव।
GEN 9:4 “पर मांस ला तुमन परान सहित याने कि लहू समेत झन खाहू।
GEN 9:5 अऊ मेंह तुम्हर लहू याने कि परान के जरूर बदला लूहूं। मेंह जम्मो पसुमन ले बदला लूहूं। अऊ हर एक मनखे ले घलो मेंह दूसर मनखे के परान के बदला लूहूं।
GEN 9:6 “जऊन कोनो मनखे के लहू बहाही, ओकर लहू मनखे के दुवारा बहाय जाही; काबरकि परमेसर ह मनखे ला अपनेच सरूप म बनाय हवय।
GEN 9:7 अऊ तुमन फूलव-फरव अऊ गनती म बढ़व; धरती ऊपर बहुंत बढ़व अऊ येमा भर जावव।”
GEN 9:8 फेर परमेसर ह नूह अऊ ओकर बेटामन ला कहिस,
GEN 9:9 “सुनव, में अब तुम्हर संग अऊ तुम्हर पाछू तुम्हर होवइया संतानमन संग करार करत हंव;
GEN 9:10 अऊ जम्मो जीयत परानी जेमन तुम्हर संग हवंय—चिरई, घरेलू-पसु अऊ जम्मो जंगली पसु, अऊ धरती ऊपर जम्मो जीयत परानी, जऊन मन तुम्हर संग जहाज ले निकले हवंय, ओमन संग घलो।
GEN 9:11 में तुम्हर संग अपन ये करार करत हंव: फेर कभू जम्मो परानी जल-परलय ले नास नइं होवंय; फेर कभू धरती ला नास करे बर जल-परलय नइं होवय।”
GEN 9:12 फेर परमेसर ह कहिस, “जऊन करार मेंह तुम्हर अऊ जतेक जीयत परानी तुम्हर संग हवंय, ओ सबो के संग करत हंव, येह अवइया तुम्हर जम्मो पीढ़ी बर होही अऊ ओकर ये चिनहां होही:
GEN 9:13 मेंह बादर म अपन मेघ-धनुस रखे हवंव, अऊ येह मोर अऊ धरती के बीच म करार के चिनहां होही।
GEN 9:14 जब भी में धरती ऊपर बादर लानंव अऊ बादर म मेघ-धनुस दिखय,
GEN 9:15 त मेंह जऊन करार तुम्हर अऊ जम्मो किसम के जीयत परानीमन संग करे हंव, ओला में सुरता करहूं। फेर कभू अइसन जल-परलय जम्मो परानी के बिनास बर नइं होवय।
GEN 9:16 जब भी बादर म मेघ-धनुस दिखही, त मेंह ओला देखके ओ सदाकाल के करार ला सुरता करहूं, जऊन ला परमेसर अऊ धरती के जम्मो किसम के जीयत परानीमन के बीच करे गे हवय।”
GEN 9:17 फेर परमेसर ह नूह ले कहिस, “जऊन करार मेंह धरती के जम्मो परानीमन संग करे हंव, ओकर ये चिनहां अय।”
GEN 9:18 नूह के बेटा, जेमन जहाज ले निकलिन, ओमन के नांव सेम, हाम अऊ येपेत रिहिस। (हाम ह कनान के ददा रिहिस।)
GEN 9:19 येमन नूह के तीन बेटा रिहिन, अऊ येमन के संतानमन जम्मो धरती म बगर गीन।
GEN 9:20 नूह ह भुइयां ले जुड़े मनखे रिहिस अऊ ओह अंगूर के एक बारी लगाईस।
GEN 9:21 एक दिन ओह अंगूर के मंद ला पीके मतवार हो गीस, अऊ अपन तम्बू के भीतर नंगरा पड़े रिहिस।
GEN 9:22 तब कनान के ददा, हाम ह अपन ददा ला नंगरा देखिस अऊ बाहिर आके अपन दूनों भाईमन ला बताईस।
GEN 9:23 तब सेम अऊ येपेत एक कपड़ा लेके अपन खांधा म रखिन अऊ उल्टा रेंगत अपन ददा के नंगरा देहें ला ढांप दीन। ओमन अपन मुहूं ला आने कोति करे रिहिन ताकि ओमन अपन ददा ला नंगरा झन देखंय।
GEN 9:24 जब नूह के नसा उतरिस, त ओह जान डारिस कि ओकर सबले छोटे बेटा ह ओकर संग का करे हे।
GEN 9:25 एकरसेति ओह कहिस, “कनान ला सराप लगय! ओह अपन भाईमन के दास म सबले छोटे दास होवय।”
GEN 9:26 ओह ये घलो कहिस, “सेम के परमेसर यहोवा के महिमा होवय! कनान ह सेम के दास होवय।
GEN 9:27 परमेसर ह येपेत के इलाका ला बढ़ाय; येपेत ह सेम के तम्बू म रहय अऊ कनान ह येपेत के गुलाम बनय।”
GEN 9:28 जल-परलय के बाद नूह 350 बछर जीईस।
GEN 9:29 ये किसम ले नूह के कुल उमर 950 बछर होईस, अऊ तब ओह मर गीस।
GEN 10:1 येह नूह के बेटा सेम, हाम अऊ येपेत के बंसावली अय। जल-परलय के बाद ओमन के ये बेटामन जनमिन।
GEN 10:2 येपेत के बेटामन: गोमेर, मागोग, मादै, यावान, तूबल, मेसेक अऊ तीरास होईन।
GEN 10:3 गोमेर के बेटामन: असकनज, रीपत अऊ तोगरमा होईन।
GEN 10:4 यावान के बेटामन: एलीसाह, तरसीस, कित्ती अऊ रोदानीमन होईन।
GEN 10:5 (येमन ले समुंदर तीर के मनखेमन अपन-अपन छेत्र म अपन गोत्र, अपन जाति अऊ अपन भासा के मुताबिक अलग-अलग हो गीन।)
GEN 10:6 हाम के बेटामन: कूस, मिसर, पूत अऊ कनान होईन।
GEN 10:7 कूस के बेटामन: सबा, हवीला, सबता, रामा, अऊ सबतका होईन। रामा के बेटामन: सेबा अऊ ददान होईन।
GEN 10:8 कूस ह निमरोद के ददा रिहिस; निमरोद ह धरती म पहिला बड़े बीर होईस।
GEN 10:9 ओह यहोवा के नजर म एक बड़े सिकारी रिहिस; एकर खातिर ये कहे जाथे, “निमरोद के सहीं, यहोवा के नजर म एक बड़े सिकारी।”
GEN 10:10 ओकर राज के पहिली केन्द्रमन सिनार देस म बेबिलोन, ऊरूक, अक्कद अऊ कलने रिहिन।
GEN 10:11 ओ देस ले, ओह निकलके अस्सूर देस म गीस, अऊ उहां नीनवे, रहोबोत-ईर अऊ कालह सहर बसाईस,
GEN 10:12 अऊ नीनवे अऊ कालह के बीच म रेसेन सहर बसाईस—जऊन ह बड़े सहर अय।
GEN 10:13 मिसर ह लूदी, अनामी, लहाबी, नपतूही,
GEN 10:14 अऊ पतरूसी, कसलूही (जेकर ले पलिस्तीमन आईन) अऊ कपतोरी मनखेमन के ददा रिहिस।
GEN 10:15 कनान के बड़े बेटा सीदोन रिहिस, तेकर पाछू हित्ती,
GEN 10:16 यबूसी, अमोरी, गिरगासी,
GEN 10:17 हिब्बी, अरकी, सीनी,
GEN 10:18 अरवदी, समारी अऊ हमातीमन घलो होईन। (बाद म कनानी कुल के मनखेमन बगर गीन
GEN 10:19 अऊ कनानीमन के सीमना ह सीदोन ले लेके गरार के तरफ गाजा तक, अऊ फेर सदोम, अमोरा, अदमा अऊ सबोईम के तरफ लासा तक होईस।)
GEN 10:20 येमन हाम के बंसज रिहिन, अऊ येमन अपन गोत्र अऊ भासा के मुताबिक अपन-अपन इलाका अऊ जाति म अलग हो गीन।
GEN 10:21 सेम जऊन ह येपेत के बड़े भाई रिहिस, ओकर घलो बेटामन होईन, अऊ सेम ह जम्मो एबेर बंस के पुरखा रिहिस।
GEN 10:22 सेम के बेटामन: एलाम, अस्सूर, अर्पछद, लूद अऊ अराम होईन।
GEN 10:23 अराम के बेटामन: ऊस, हूल, गेतेर अऊ मेसेक होईन।
GEN 10:24 अर्पछद ह सेलह के ददा अऊ सेलह ह एबेर के ददा रिहिस।
GEN 10:25 एबेर के दू झन बेटा होईन: एक के नांव पेलेग रखे गीस, काबरकि ओकर समय म धरती ह बंट गीस; ओकर भाई के नांव योकतान रिहिस।
GEN 10:26 योकतान के बेटामन अलमोदाद, सेलेप, हसरमावेत, येरह
GEN 10:27 हदोराम, ऊजाल, दिकला,
GEN 10:28 ओबाल, अबीमाएल, सेबा,
GEN 10:29 ओपीर, हवीला अऊ योबाब रिहिन। ये जम्मो योकतान के बेटा रिहिन।
GEN 10:30 (ओ जगह जिहां येमन रहत रिहिन, ओह पूरब दिग के पहाड़ी देस म मेसा ले लेके सपारा तक फईले रिहिस।)
GEN 10:31 येमन सेम के बंसज रिहिन, अऊ येमन अपन गोत्र अऊ भासा के मुताबिक अपन-अपन छेत्र अऊ जाति म अलग हो गीन।
GEN 10:32 अपन-अपन संतान अऊ जाति के मुताबिक, येमन नूह के बेटामन के बंसज अंय। जल-परलय के बाद, जाति-जाति के मनखेमन येमन ले निकलके धरती म बगर गीन।
GEN 11:1 जम्मो धरती म एके ठन भासा अऊ एके किसम के बोली रिहिस।
GEN 11:2 ओ समय जब मनखेमन पूरब दिग कोति जावत रिहिन, त ओमन ला सिनार देस म एक मैदान मिलिस अऊ उहां ओमन बस गीन।
GEN 11:3 तब ओमन एक-दूसर ला कहिन, “आवव, हमन ईंटा बना-बनाके ओला आगी म बने करके पकावन।” ओमन पथरा के बदला ईंटा अऊ चूना के गारा के बदला डामर के उपयोग करिन।
GEN 11:4 फेर ओमन कहिन, “आवव, हमन अपन बर एक सहर अऊ एक मीनार बनावन, जेकर चोटी अकास तक हबरे, ताकि हमर नांव होवय; नइं तो हमन ला जम्मो धरती ऊपर बगरे बर पड़ही।”
GEN 11:5 जब मनखेमन सहर अऊ मीनार बनाय लगिन, त यहोवा ह ओ सहर अऊ मीनार ला देखे बर खाल्हे उतर आईस।
GEN 11:6 अऊ यहोवा ह कहिस, “ये जम्मो झन एकेच दल अंय, अऊ येमन के भासा घलो एके ठन अय, अऊ येमन ये काम ला सुरू कर डारे हें; अब येमन जऊन कुछू भी बनाय के योजना करहीं, येमन बर कुछू भी असंभव नइं होही।
GEN 11:7 एकरसेति आवव, हमन उतरके येमन के भासा म गड़बड़ी कर देवन ताकि येमन एक-दूसर के बात ला झन समझंय।”
GEN 11:8 अइसने करके यहोवा ह ओमन ला उहां ले जम्मो धरती ऊपर बगरा दीस, अऊ ओमन ओ सहर ला बनाना छोंड़ दीन।
GEN 11:9 एकरे बर ओ सहर के नांव बेबिलोन पड़िस—काबरकि उहां यहोवा ह जम्मो धरती के भासा म गड़बड़ी करिस, अऊ उहां ले यहोवा ह मनखेमन ला धरती के जम्मो जगह बगरा दीस।
GEN 11:10 सेम के परिवार के बिबरन ये अय। जल-परलय के दू बछर के पाछू, जब सेम ह 100 बछर के होईस, त ओह अर्पछद के ददा होईस।
GEN 11:11 अर्पछद के जनम के पाछू, सेम ह 500 बछर जीयत रिहिस अऊ ओकर अऊ भी बेटा-बेटीमन होईन।
GEN 11:12 जब अर्पछद 35 बछर के होईस, त ओकर ले सेलह के जनम होईस।
GEN 11:13 अऊ सेलह के जनम के पाछू, अर्पछद ह 403 बछर अऊ जीयत रिहिस अऊ ओकर अऊ भी बेटा-बेटीमन होईन।
GEN 11:14 जब सेलह 30 बछर के होईस, त ओकर ले एबेर के जनम होईस।
GEN 11:15 अऊ एबेर के जनम के पाछू, सेलह ह 403 बछर अऊ जीयत रिहिस अऊ ओकर अऊ भी बेटा-बेटीमन होईन।
GEN 11:16 जब एबेर 34 बछर के होईस, त ओकर ले पेलेग के जनम होईस।
GEN 11:17 अऊ पेलेग के जनम के पाछू, एबेर 430 बछर अऊ जीयत रिहिस अऊ ओकर अऊ भी बेटा-बेटीमन होईन।
GEN 11:18 जब पेलेग 30 बछर के होईस, त ओकर ले रू के जनम होईस।
GEN 11:19 अऊ रू के जनम के पाछू, पेलेग 209 बछर अऊ जीयत रिहिस अऊ ओकर अऊ बेटा-बेटीमन होईन।
GEN 11:20 जब रू 32 बछर के होईस, त ओकर ले सरूग के जनम होईस।
GEN 11:21 अऊ सरूग के जनम के पाछू, रू 207 बछर अऊ जीयत रिहिस अऊ ओकर अऊ बेटा-बेटीमन होईन।
GEN 11:22 जब सरूग 30 बछर के होईस, त ओकर ले नाहोर के जनम होईस।
GEN 11:23 अऊ नाहोर के जनम के पाछू, सरूग 200 बछर अऊ जीयत रिहिस अऊ ओकर अऊ बेटा-बेटीमन होईन।
GEN 11:24 जब नाहोर 29 बछर के होईस, त ओकर ले तेरह के जनम होईस।
GEN 11:25 अऊ तेरह के जनम के पाछू, नाहोर 119 बछर अऊ जीयत रिहिस अऊ ओकर अऊ बेटा-बेटीमन होईन।
GEN 11:26 जब तेरह 70 बछर के होईस, त ओकर ले अब्राम, नाहोर अऊ हारान के जनम होईस।
GEN 11:27 तेरह के परिवार के बिबरन ये अय। तेरह ले अब्राम, नाहोर अऊ हारान के जनम होईस। अऊ हारान ले लूत के जनम होईस।
GEN 11:28 हारान अपन ददा तेरह के जीते जी कसदीमन के ऊर नांव के नगर म, जऊन ह ओकर जनम भुइयां रिहिस, मर गीस।
GEN 11:29 अब्राम अऊ नाहोर दूनों झन बिहाव कर लीन। अब्राम के घरवाली के नांव सारै, अऊ नाहोर के घरवाली के नांव मिलका रिहिस; ओह हारान के बेटी रिहिस, जऊन ह मिलका अऊ यिसका दूनों के ददा रिहिस।
GEN 11:30 सारै के कोनो बाल-बच्चा नइं रिहिन, काबरकि ओला कभू गरभ नइं ठहिरिस।
GEN 11:31 तेरह अपन बेटा अब्राम, अपन पोता लूत, जेह हारान के बेटा रिहिस, अऊ अपन बहू सारै, जेह ओकर बेटा अब्राम के घरवाली रिहिस, ये जम्मो झन ला लेके कसदीमन के ऊर नगर ले कनान देस जाय बर निकलिस। पर जब ओमन हारान नांव के देस म आईन, त उहेंच रहे लगिन।
GEN 11:32 तेरह 205 बछर जीईस, अऊ ओह हारान देस म मर गीस।
GEN 12:1 यहोवा ह अब्राम ला कहिस, “अपन देस, अपन मनखे अऊ अपन ददा के परिवार ला छोंड़के ओ देस म चले जा, जेला मेंह तोला देखाहूं।
GEN 12:2 “मेंह तोर ले एक बड़े जाति बनाहूं अऊ मेंह तोला आसीस दूहूं; मेंह तोर नांव ला बहुंत बड़े करहूं अऊ तेंह आसीस के कारन होबे।
GEN 12:3 जऊन मन तोला आसीस दीहीं, ओमन ला में आसीस दूहूं अऊ जऊन ह तोला सराप दीही, ओला मेंह सराप दूहूं; अऊ ये धरती के जम्मो मनखेमन तोर जरिये आसीस पाहीं।”
GEN 12:4 यहोवा के ये बचन के मुताबिक अब्राम ह चल पड़िस; अऊ ओकर संग लूत घलो गीस। अब्राम ह पचहत्तर बछर के रिहिस, जब ओह हारान देस ले निकलिस।
GEN 12:5 अब्राम अपन घरवाली सारै, अपन भतीजा लूत, जऊन धन ओमन जमा करे रिहिन अऊ जऊन मनखेमन ला ओमन हारान म पाय रिहिन, ओ सबो ला लेके कनान देस जाय बर निकलिस अऊ ओमन कनान देस म आ गीन।
GEN 12:6 ओ देस म ले होवत अब्राम ह सकेम म मोरे के बड़े रूख तक गीस। ओ समय ओ देस म कनानीमन रहत रिहिन।
GEN 12:7 तब यहोवा ह अब्राम ला दरसन देके कहिस, “तोर संतान ला में ये देस दूहूं।” एकरसेति ओह उहां यहोवा बर, जऊन ह ओला दरसन दे रिहिस, एक बेदी बनाईस।
GEN 12:8 फेर उहां ले चलके ओह ओ पहाड़ करा आईस, जऊन ह बेतेल के पूरब कोति हवय, अऊ उहां ओह अपन तम्बू गाड़िस, जेकर पछिम कोति बेतेल अऊ पूरब कोति अई नगर हवय। उहां घलो ओह यहोवा बर एक ठन बेदी बनाईस अऊ यहोवा के अराधना करिस।
GEN 12:9 तब अब्राम उहां ले निकलके नेगेव कोति चल दीस।
GEN 12:10 कनान देस म अकाल पड़िस, एकर कारन अब्राम ह खाल्हे कोति मिसर देस म चल दीस अऊ उहां कुछू समय तक रिहिस, काबरकि देस म भयंकर अकाल रिहिस।
GEN 12:11 जब ओह मिसर देस म हबरनेचवाला रिहिस, त ओह अपन घरवाली सारै ला कहिस, “सुन, मेंह जानत हंव कि तें एक सुघर नारी अस।
GEN 12:12 जब मिसर देस के मनखेमन तोला देखहीं, त कहिहीं, ‘येह ओकर घरवाली अय।’ तब ओमन मोला तो मार डारहीं, पर तोला छोंड़ दीहीं।
GEN 12:13 एकरसेति ये कहिबे कि तें मोर बहिनी अस, ताकि तोर कारन मोर संग बने बरताव होवय अऊ मोर परान ह तोर कारन बच जावय।”
GEN 12:14 जब अब्राम मिसर म आईस, त मिसर देस के मनखेमन देखिन कि सारै ह बहुंत सुघर हे।
GEN 12:15 अऊ जब फिरौन के अधिकारीमन ओला देखिन, त फिरौन के आघू म ओकर बड़ई करिन, एकरसेति सारै ला फिरौन के महल म लाय गीस।
GEN 12:16 फिरौन ह ओकर कारन से अब्राम के संग बने बरताव करिस, अऊ अब्राम ला भेड़-बकरी, गरूवा-बईला, गदहा-गदही अऊ दास-दासी, अऊ ऊंट मिलिस।
GEN 12:17 पर यहोवा ह फिरौन अऊ ओकर परिवार ऊपर अब्राम के घरवाली सारै के कारन बड़े-बड़े बेमारी लानिस।
GEN 12:18 तब फिरौन ह अब्राम ला बलाके कहिस, “तेंह मोर संग ये का करे हस? तें मोला काबर नइं बताय कि ओह तोर घरवाली ए?
GEN 12:19 तेंह काबर कहे कि ओह तोर बहिनी ए? एकरसेति मेंह ओला अपन घरवाली बनाय बर ले गे रहेंव। पर अब अपन घरवाली ला ले अऊ इहां ले चले जा!”
GEN 12:20 तब फिरौन ह अपन मनखेमन ला अब्राम के बारे म हुकूम दीस, अऊ ओमन ओला अऊ ओकर घरवाली ला, ओकर जम्मो धन-संपत्ति सहित बिदा कर दीन।
GEN 13:1 तब अब्राम अपन घरवाली अऊ अपन जम्मो संपत्ति ला लेके मिसर देस ले नेगेव गीस, अऊ लूत घलो ओकर संग म गीस।
GEN 13:2 अब्राम ह घरेलू-पसु अऊ सोन अऊ चांदी म अब्बड़ धनी हो गे रिहिस।
GEN 13:3 नेगेव ले चलके जगह-जगह होवत ओह बेतेल के लकठा म हबरिस, बेतेल अऊ अई नगर के बीच म, जिहां पहिली ओह अपन तम्बू ठाढ़ करे रिहिस
GEN 13:4 अऊ जिहां ओह पहिली बार बेदी बनाय रिहिस, उहां अब्राम ह यहोवा के अराधना करिस।
GEN 13:5 लूत, जऊन ह अब्राम संग चलत रिहिस, ओकर करा घलो भेड़-बकरी, गरूवा-बईला अऊ तम्बू रिहिस।
GEN 13:6 पर ओ जगह ह ओ दूनों ला नइं पूरत रिहिस। काबरकि ओमन के धन-संपत्ति अतकी जादा हो गे रिहिस कि ओमन एक संग रह नइं सकिन।
GEN 13:7 अब्राम अऊ लूत के चरवाहामन के बीच म झगरा होय लगिस। ओ समय कनानी अऊ परिज्जीमन घलो ओ देस म रहत रिहिन।
GEN 13:8 तब अब्राम ह लूत ला कहिस, “मोर अऊ तोर बीच, या मोर चरवाहा अऊ तोर चरवाहामन के बीच झगरा झन होवय, काबरकि हमन नजदीकी रिस्तेदार अन।
GEN 13:9 का पूरा देस तोर आघू म नइं ए? एकर खातिर मोर ले अलग हो जा। यदि तें डेरी कोति जाबे, त में जेवनी कोति जाहूं, अऊ यदि तें जेवनी कोति जाबे, त में डेरी कोति जाहूं।”
GEN 13:10 तब लूत ह चारों कोति देखिस कि सोअर कोति यरदन नदी के मैदान ह यहोवा के बगीचा अऊ मिसर देस सहीं पानी ले बने सिंचाय हवय। (येह ओ समय के बात ए, जब यहोवा ह सदोम अऊ अमोरा ला नास नइं करे रिहिस।)
GEN 13:11 एकरसेति लूत ह अपन बर यरदन के पूरा मैदान ला चुनके पूरब कोति गीस। अऊ ओ दूनों एक-दूसर ले अलग हो गीन:
GEN 13:12 अब्राम ह कनान देस म रह गीस, जबकि लूत ह ओ मैदान के सहरमन म रहे लगिस अऊ अपन तम्बू सदोम के लकठा म ठाढ़ करिस।
GEN 13:13 सदोम के मनखेमन दुस्ट रिहिन अऊ यहोवा के बिरूध बहुंत पाप करत रिहिन।
GEN 13:14 जब लूत ह अब्राम ले अलग हो गीस, तब यहोवा ह अब्राम ला कहिस, “जिहां तेंह ठाढ़े हस, उहां ले आंखी उठाके उत्तर, दक्खिन, पूरब अऊ पछिम चारों कोति देख।
GEN 13:15 काबरकि जतेक भुइयां तोला दिखत हे, ओ सब ला मेंह तोला अऊ तोर संतान ला सदाकाल बर दूहूं।
GEN 13:16 अऊ में तोर बंस के मनखेमन ला धरती के धुर्रा के कन सहीं बहुंत करहूं, ताकि यदि कोनो धरती के धुर्रा ला गने सकही, त फेर ओह तोर संतानमन ला घलो गने सकही।
GEN 13:17 उठ, अऊ ये देस के लम्बई अऊ चौड़ई म जतकी रेंग सकथस रेंग, काबरकि में येला तोला देवत हंव।”
GEN 13:18 एकरसेति अब्राम ह हेबरोन म ममरे के बड़े रूखमन के लकठा म रहे बर गीस अऊ उहां अपन तम्बू ठाढ़ करिस। अऊ उहां यहोवा बर एक ठन बेदी बनाईस।
GEN 14:1 ओ समय जब सिनार के राजा अमरापेल, एल्लासार के राजा अरयोक, एलाम के राजा कदोरलाओमेर अऊ गोयीम के राजा तिदाल रिहिस,
GEN 14:2 त ये राजामन सदोम के राजा बेरा, अमोरा के राजा बिरसा, अदमा के राजा सिनाब, सबोईम के राजा सेमेबेर अऊ बेला के राजा (जऊन ला सोअर कहे जाथे) के बिरूध लड़ई करिन।
GEN 14:3 ये पांचों राजामन सिद्दीम नांव के घाटी म (जऊन ला मिरतू सागर घाटी कहे जाथे) जूरिन।
GEN 14:4 काबरकि बारह बछर तक येमन कदोरलाओमेर के अधीन रिहिन, पर तेरहवां बछर म येमन ओकर बिरूध बिदरोह करिन।
GEN 14:5 चौदहवां बछर म कदोरलाओमेर अऊ ओकर संगी राजामन एक संग आईन अऊ असतरोत-करनेम म रपाईमन, हाम म जूजीमन, साबे-किरयातैम म एमीमन
GEN 14:6 अऊ सेईर के पहाड़ी म होरीमन ऊपर चढ़ई करिन अऊ ओमन ला हरावत-हरावत मरू-भुइयां के लकठा म एल-पारान तक हबर गीन।
GEN 14:7 तब उहां ले ओमन लहुंटके एन-मिसपात (जऊन ला कादेस कहे जाथे) म आईन, अऊ ओमन अमालेकीमन के जम्मो देस ला अऊ संग म ओ अमोरीमन ला घलो जीत लीन, जेमन हससोन-तामार म रहत रिहिन।
GEN 14:8 तब सदोम के राजा, अमोरा के राजा, अदमा के राजा, सबोईम के राजा अऊ बेला के राजा (जऊन ला सोअर कहे जाथे) निकलिन अऊ सिद्दीम नांव के घाटी म
GEN 14:9 एलाम के राजा कदोरलाओमेर, गोयीम के राजा तिदाल, सिनार के राजा अमरापेल अऊ एल्लासार के राजा अरयोक के बिरूध म लड़ई करे बर ठाढ़ होईन—चार राजामन पांच राजामन के बिरूध म रहंय।
GEN 14:10 सिद्दीम के घाटी ह डामर के खंचवामन ले भर गे रिहिस, अऊ जब सदोम अऊ अमोरा के राजामन भागिन, त कुछू मनखेमन ओ खंचवामन म गिरिन अऊ बांचे मनखेमन पहाड़ी ऊपर भाग गीन।
GEN 14:11 तब ओ चारों राजा सदोम अऊ अमोरा के जम्मो सामान अऊ खाय के चीजमन ला लूटके चल दीन।
GEN 14:12 ओमन अब्राम के भतीजा लूत, जऊन ह सदोम म रहत रिहिस, ओला अऊ ओकर धन-संपत्ति ला घलो अपन संग ले गीन।
GEN 14:13 तब एक मनखे जऊन ह भागके बांच गे रिहिस, ओह जाके इबरी अब्राम ला ये बात बताईस। अब्राम तो अमोरी ममरे जऊन ह एसकोल अऊ आनेर के एक भाई रिहिस, ओकर बड़े रूखमन के लकठा म रहत रिहिस; येमन के संबंध अब्राम के संग संगवारी के सहीं रिहिस।
GEN 14:14 जब अब्राम सुनिस कि ओकर भतीजा ला बंधुवई म ले गे हवंय, त ओह 318 लड़ई करे बर सिखोय मनखेमन ला, जेमन ओकर परिवार म जनमे रिहिन, लीस अऊ दान नगर तक ओमन के पीछा करिस।
GEN 14:15 रथिया के बेरा अब्राम ह ओमन ऊपर हमला करे बर अपन मनखेमन के अलग-अलग दल बनाईस अऊ दमिस्क सहर के उत्तर म होबा तक ओमन के पीछा करिस, अऊ ओमन ला हराईस।
GEN 14:16 अऊ ओह जम्मो सामान ला, अऊ अपन भतीजा लूत अऊ ओकर धन-संपत्ति ला, अऊ माईलोगन अऊ दूसर मनखेमन ला छोंड़ाके ले आईस।
GEN 14:17 जब अब्राम ह कदोरलाओमेर अऊ ओकर संगी राजामन ला हराके लहुंटत रिहिस, तब सदोम के राजा ह साबे नांव के घाटी म (जेला राजा के घाटी घलो कहे जाथे) अब्राम के संग भेंट करे बर आईस।
GEN 14:18 तब सालेम के राजा मलकिसिदक रोटी अऊ अंगूर के मंद लेके आईस। ओह सर्वोच्च परमेसर के पुरोहित रिहिस,
GEN 14:19 अऊ ओह ये कहिके अब्राम ला आसीस दीस, “सर्वोच्च परमेसर ले, जऊन ह अकास अऊ धरती के रचइता ए, तोला आसीस मिलय।
GEN 14:20 अऊ सर्वोच्च परमेसर के महिमा होवय, जऊन ह तोर बईरीमन ला तोर बस म कर दीस।” तब अब्राम ह ओला हर एक चीज के दसवां भाग दीस।
GEN 14:21 तब सदोम के राजा ह अब्राम ला कहिस, “मनखेमन ला तें मोला दे अऊ धन ला तें अपन बर रख।”
GEN 14:22 पर अब्राम ह सदोम के राजा ला कहिस, “यहोवा, सर्वोच्च परमेसर जऊन ह अकास अऊ धरती के रचइता ए, ओकर करा मेंह हांथ उठाके किरिया खाय हंव
GEN 14:23 कि जऊन चीज तोर अय, ओमा ले में कुछू नइं लेवंव, न एक ठन सूंत, न जूता के एक बंधना घलो, ताकि तें ये कभू झन कहे सकस, ‘मेंह अब्राम ला धनी बनांय।’
GEN 14:24 पर जऊन कुछू मोर मनखेमन खा ले हवंय अऊ ओमन के बांटा, जऊन मन मोर संग गे रिहिन याने कि आनेर, एसकोल अऊ ममरे के बांटा, में तोला नइं लहुंटांव। ओमन ला अपन बांटा रखन दे।”
GEN 15:1 एकर पाछू, यहोवा के ये बचन दरसन के दुवारा अब्राम करा आईस: “हे अब्राम, झन डर। मेंह तोर ढाल अऊ तोर बड़े ईनाम अंव।”
GEN 15:2 पर अब्राम ह कहिस, “हे परमपरधान यहोवा, तें मोला का दे सकथस, जब में बिन लइका के हंव अऊ मोर घर के वारिस दमिस्क के एलिएजेर होही?”
GEN 15:3 अऊ अब्राम ह कहिस, “मोला तो तें कोनो लइका नइं दे हस; एकरसेति मोर परिवार म एक दास ह मोर वारिस होही।”
GEN 15:4 तब यहोवा के ये बचन ओकर करा आईस, “ये मनखे ह तोर वारिस नइं होवय, पर तोर खुद के मांस अऊ लहू ले जनमे बेटा ही तोर वारिस होही।”
GEN 15:5 ओह ओला बाहिर ले जाके कहिस, “आंखी उठाके अकास कोति देख अऊ ये तारामन ला गन—का तें येमन ला गन सकथस?” फेर ओह ओला कहिस, “तोर संतान ह अइसने होही।”
GEN 15:6 अब्राम ह यहोवा ऊपर बिसवास करिस, अऊ परमेसर ह येला अब्राम बर धरमीपन के बात मानिस।
GEN 15:7 परमेसर ह अब्राम ला ये घलो कहिस, “में ओही यहोवा अंव, जऊन ह तोला कसदीमन के ऊर नगर ले बाहिर लानेंव ताकि तोला ये देस ऊपर अधिकार देवंव।”
GEN 15:8 पर अब्राम ह कहिस, “हे परमपरधान यहोवा, में येला कइसे जानंव कि मेंह ये देस के ऊपर अधिकार रखहूं?”
GEN 15:9 त यहोवा ह ओला कहिस, “मोर बर तीन-तीन बछर के एक बछिया, एक बोकरा अऊ एक मेढ़ा लान अऊ संग म एक पंड़की अऊ एक परेवा के पीला लान।”
GEN 15:10 अब्राम ये जम्मो ला ओकर करा लानिस, अऊ ओमन के दू-दू कुटा करके ओ कुटामन ला एक-दूसर के आघू म मढ़ा दीस, पर चिरईमन ला ओह दू कुटा नइं करिस।
GEN 15:11 तब ओ मुरदामन ऊपर मांसाहारी चिरईमन झपटिन, पर अब्राम ओमन ला हंकाल दीस।
GEN 15:12 जब बेर ह बुड़त रिहिस, त अब्राम ह भारी नींद म सो गीस, अऊ भारी अऊ भयानक अंधियार ओकर ऊपर छा गीस।
GEN 15:13 तब यहोवा ह अब्राम ला कहिस, “ये बात ला निस्चय जान ले कि तोर संतानमन आने देस म चार सौ साल तक परदेसी होहीं अऊ उहां ओमन गुलाम बनाय जाहीं अऊ ओमन के ऊपर अतियाचार करे जाही।
GEN 15:14 पर जऊन देस के ओमन गुलाम के रूप म सेवा करहीं, ओ देस ला में दंड दूहूं, अऊ ओकर बाद ओमन उहां ले अब्बड़ धन लेके निकल आहीं।
GEN 15:15 पर, तें सांति से अपन पुरखामन संग मिल जाबे अऊ बने डोकरा होय के बाद तोला माटी मिलही।
GEN 15:16 पर चौथा पीढ़ी म, तोर संतानमन इहां फेर वापिस आहीं, काबरकि अमोरीमन के पाप के घड़ा ह अब तक नइं भरे हवय।”
GEN 15:17 जब बेर ह बुड़ गीस अऊ अंधियार छा गीस, तब एक अंगीठी म, जेमा ले धुआं उठत रहय, एक बरत मसाल दिखिस अऊ ओ मसाल मांस के कुटामन के बीच म ले निकल गीस।
GEN 15:18 ओ दिन यहोवा ह अब्राम के संग एक करार करिस अऊ कहिस, “मिसर के नरवा ले लेके फरात नांव के बड़े नदी तक—
GEN 15:19 याने कि केनी, कनिज्जी, कदमोनी,
GEN 15:20 हित्ती, परिज्जी, रपाई,
GEN 15:21 अमोरी, कनानी, गिरगासी अऊ यबूसीमन के देस ला में तोर संतानमन ला देवत हंव।”
GEN 16:1 अब्राम के घरवाली सारै के कोनो संतान नइं रिहिस। पर ओकर हाजिरा नांव के एक झन मिसर देस के दासी रिहिस;
GEN 16:2 एकरसेति सारै ह अब्राम ला कहिस, “देख, यहोवा ह मोर कोख ला बंद कर दे हवय, एकरसेति तें मोर दासी के संग सुत; हो सकत हे कि ओकर दुवारा मोर परिवार आघू बढ़य।” सारै के ये बात ला अब्राम मान लीस।
GEN 16:3 अब्राम ला कनान देस म रहत दस साल होय के बाद ओकर घरवाली सारै ह अपन मिसर के दासी हाजिरा ला अपन घरवाला अब्राम के घरवाली होय बर दे दीस।
GEN 16:4 ओह हाजिरा संग सुतिस, तब हाजिरा ह आसरा म हो गीस। जब ओह जानिस कि ओह आसरा म हवय, त ओह अपन मालकिन ला तुछ समझे लगिस।
GEN 16:5 तब सारै ह अब्राम ला कहिस, “मोर संग जऊन अनियाय होवथे, ओकर जिम्मेदार तें अस। में तो अपन दासी ला तोर हांथ म दे देंव, पर जब ओह ये जानिस कि ओह आसरा म हवय, त ओह मोला तुछ समझत हे। एकर बर यहोवा तोर अऊ मोर नियाय करय।”
GEN 16:6 अब्राम ह सारै ला कहिस, “देख, तोर दासी ह तोर हांथ म हवय; जइसने तोला बने लगय, वइसने ओकर संग कर।” तब सारै ह हाजिरा ला दुख देय लगिस। एकरसेति ओह ओकर करा ले भाग गीस।
GEN 16:7 यहोवा के स्वरगदूत ह ओला सुनसान जगह म सूर के रसता म पानी के एक सोता करा पाईस।
GEN 16:8 अऊ ओह कहिस, “हे सारै के दासी, हाजिरा, तें कहां ले आवत हस, अऊ कहां जावत हस?” ओह जबाब दीस, “मेंह अपन मालकिन सारै करा ले भागके आय हंव।”
GEN 16:9 तब यहोवा के स्वरगदूत ह ओला कहिस, “अपन मालकिन करा लहुंट जा अऊ ओकर बस म रह।”
GEN 16:10 यहोवा के स्वरगदूत ह ओला ये घलो कहिस, “मेंह तोर संतान ला अब्बड़ बढ़ाहूं, इहां तक कि ओमन के गनती करई मुसकिल हो जाही।”
GEN 16:11 यहोवा के स्वरगदूत ह ओला ये घलो कहिस: “देख, तें आसरा म हस अऊ तें एक बेटा ला जनम देबे। तें ओकर नांव इसमायल रखबे, काबरकि यहोवा ह तोर दुख के बात ला सुन ले हवय।
GEN 16:12 ओह एक जंगली गदहा के सुभाव के मनखे होही; ओकर हांथ जम्मो झन के बिरूध उठही अऊ जम्मो झन के हांथ ओकर बिरूध उठही, अऊ ओह अपन जम्मो भाई-बंधुमन संग बईरता के संग जिनगी जीही।”
GEN 16:13 तब हाजिरा ह यहोवा के ये नांव रखिस, जऊन ह ओकर ले बात करे रिहिस: “तेंह ओ परमेसर अस, जऊन ह मोला देखथस,” काबरकि ओह कहिस, “मेंह अब ओला देख डारे हंव जऊन ह मोला देखथे।”
GEN 16:14 एकरे कारन ओ कुआं के नांव बेर-लहाय-रोई परिस, येह अभी घलो कादेस अऊ बेरेद के बीच म हवय।
GEN 16:15 हाजिरा ला अब्राम के दुवारा एक बेटा होईस, अऊ अब्राम ओ बेटा के नांव इसमायल रखिस, जेला हाजिरा जनम दीस।
GEN 16:16 जब हाजिरा ह अब्राम के दुवारा इसमायल ला जनम दीस, ओ समय अब्राम छियासी बछर के रिहिस।
GEN 17:1 जब अब्राम ह निनानबे बछर के होईस, त यहोवा ह ओला दरसन देके कहिस, “में सर्वसक्तिमान परमेसर अंव; बिसवासयोग्यता के साथ मोर संग चल अऊ निरदोस बने रह।
GEN 17:2 त में तोर अऊ मोर बीच म अपन करार करहूं अऊ तोर बंस ला अब्बड़ बढ़ाहूं।”
GEN 17:3 तब अब्राम ह मुहूं के बल गिरके ओला दंडवत करिस, अऊ परमेसर ह ओला कहिस,
GEN 17:4 “देख, तोर संग मोर करार ये अय: तेंह बहुंते जाति के मनखेमन के ददा होबे।
GEN 17:5 एकर बर अब ले तोर नांव अब्राम नइं रहय, पर तोर नांव अब्राहम होही; काबरकि मेंह तोला बहुंते जाति के मनखेमन के ददा ठहिराय हंव।
GEN 17:6 मेंह तोला बहुंत फलवंत करहूं; मेंह तोर ले जाति-जाति के मनखे बनाहूं अऊ तोर बंस म राजामन जनमहीं।
GEN 17:7 में तोर संग अऊ तोर पाछू तोर अवइया पीढ़ी-पीढ़ी के संतान संग सदाकाल के ये करार करहूं कि में तोर अऊ तोर पाछू तोर संतानमन के घलो परमेसर होहूं।
GEN 17:8 मेंह तोर अऊ तोर पाछू तोर संतानमन के अधिकार म, ये जम्मो कनान देस, जिहां तेंह अभी परदेसी होके रहिथस, सदाकाल बर दे दूहूं; अऊ मेंह ओमन के परमेसर होहूं।”
GEN 17:9 फेर परमेसर ह अब्राहम ला कहिस, “ये जरूरी ए कि तहूं घलो मोर करार के पालन कर, तें अऊ तोर पाछू अवइया तोर पीढ़ी-पीढ़ी के संतानमन घलो ये करार के पालन करंय।
GEN 17:10 तोर संग बांधे गय करार, जेला तोला अऊ तोर पाछू तोर संतानमन ला माने बर पड़ही, ओ ये अय: तुम्हर बीच म हर पुरूस के खतना करे जावय।
GEN 17:11 तुमन अपन-अपन खतना करवा लव, अऊ येह मोर अऊ तुम्हर बीच म करे गय करार के चिनहां होही।
GEN 17:12 पीढ़ी-पीढ़ी तक सिरिप तोर बंस के मनखे ही नइं, पर जेमन तोर घर म जनमे हें या जेमन ला कोनो परदेसी करा ले बिसाय गे हवय—जेमन तोर संतान नो हंय, अइसन जम्मो पुरूस के ओमन के जनमे के आठवां दिन म खतना करे जावय।
GEN 17:13 जऊन मन तोर घर म जनमे हवंय या फेर रूपिया देके बिसाय गे हवंय, ओमन के जरूर खतना करे जावय। मोर करार, जेकर चिनहां तोर देहें म होही, येह एक सदाकाल के करार होही।
GEN 17:14 कोनो बिगर खतना के पुरूस, जेकर चमड़ी के खतना नइं करे गे हवय, ओह अपन मनखेमन के बीच म ले अलग करे जाही, काबरकि ओह मोर करार ला टोरे हवय।”
GEN 17:15 फेर परमेसर ह अब्राहम ला कहिस, “तोर जऊन घरवाली सारै हवय, तेला अब तें सारै झन कहिबे; ओकर नांव सारा होही।
GEN 17:16 में ओला आसीस दूहूं, अऊ तोला ओकर दुवारा एक बेटा दूहूं; अऊ मेंह ओला अइसन आसीस दूहूं कि ओह जाति-जाति के मनखेमन के मूल महतारी होही, अऊ ओकर ले मनखेमन के राजामन आहीं।”
GEN 17:17 तब अब्राहम ह मुहूं के बल भुइयां म गिरिस; ओह हंसिस अऊ अपन मन म कहिस, “का सौ बछर के मनखे के घलो संतान पईदा होही? का सारा, जऊन ह नब्बे बछर के अय, एक लइका ला जनमही?”
GEN 17:18 अऊ अब्राहम ह परमेसर ला कहिस, “सिरिप इसमायल ह तोर आसीस म बने रहय, येह मोर बर बहुंत अय।”
GEN 17:19 तब परमेसर ह कहिस, “सही म, तोर घरवाली सारा ले तोर दुवारा एक बेटा होही, अऊ तें ओकर नांव इसहाक रखबे। में ओकर संग अइसन करार करहूं, जऊन ह ओकर बाद ओकर बंस बर घलो सदाकाल बर होही।
GEN 17:20 इसमायल के बिसय म घलो, में तोर बिनती ला सुने हंव: में ओला घलो आसीस दूहूं; में ओला फलवंत करहूं अऊ ओकर संतान ला बहुंत बढ़ाहूं। ओकर ले बारह सासन करइया पईदा होहीं अऊ में ओकर ले एक बड़े जाति बनाहूं।
GEN 17:21 पर में अपन करार इसहाक संग करहूं, जऊन ह अगले साल इही समय म, सारा ले तोर दुवारा जनमही।”
GEN 17:22 जब परमेसर ह अब्राहम के संग गोठिया लीस, तब ओह ओकर करा ले चल दीस।
GEN 17:23 तब अब्राहम ओहीच दिन अपन बेटा इसमायल अऊ ओकर घर म जनमे जम्मो पुरूस या ओकर घर म रहइया बिसाय गे जम्मो पुरूस ला लीस अऊ परमेसर के कहे मुताबिक ओमन के खतना करिस।
GEN 17:24 जब अब्राहम के खतना होईस, तब ओह निनानबे बछर के रिहिस,
GEN 17:25 अऊ जब ओकर बेटा इसमायल के खतना होईस, तब ओह तेरह बछर के रिहिस।
GEN 17:26 अब्राहम अऊ ओकर बेटा इसमायल दूनों के खतना एके दिन म होईस।
GEN 17:27 अऊ ओकर घर म जतेक पुरूस रिहिन, जेमन ओकर घर म जनमे रिहिन या जेमन परदेसीमन के हांथ ले बिसाय गे रिहिन, ओ जम्मो पुरूस के खतना ओकर संग होईस।
GEN 18:1 अब्राहम ह ममरे के बड़े रूखमन के लकठा म, घाम के बेरा अपन तम्बू के दुवारी म बईठे रिहिस, तब यहोवा ह ओकर करा परगट होईस।
GEN 18:2 ओह आंखी उठाके देखिस, त तीन झन पुरूस लकठा म ठाढ़े रहंय। जब ओह ओमन ला देखिस, त ओह ओमन ले भेंट करे बर तम्बू के दुवारी ले दऊड़िस अऊ भुइयां म झुकके ओमन ला दंडवत करिस।
GEN 18:3 ओह कहिस, “हे परभू, यदि मोर ऊपर तुम्हर दया-दिरिस्टी हवय, त अपन दास करा ले झन जावव।
GEN 18:4 मेंह थोरकन पानी लेके आवत हंव, अऊ तब तुमन अपन गोड़ ला धोके ये रूख खाल्हे म सुसतावव।
GEN 18:5 मेंह तुम्हर बर कुछू खाय बर लानत हंव ताकि ओला खाके तुमन तरो-ताजा होवव अऊ तब आघू अपन रसता म जावव—काबरकि तुमन अपन दास करा आय हवव।” त ओमन कहिन, “येह बने बात ए; तेंह जइसने कहय, वइसने कर।”
GEN 18:6 तब अब्राहम ह तुरते तम्बू म सारा करा गीस अऊ कहिस, “जल्दी कर, तीन सेआ बढ़िया पीसान ले अऊ ओला गुंथके कुछू रोटी बना।”
GEN 18:7 तब अब्राहम ह दऊड़के अपन गरूवा-बईला के झुंड म गीस अऊ एक बढ़िया, नरम बछवा ला छांटके अपन दास ला दीस, जऊन ह जाके जल्दी से ओला पकाईस।
GEN 18:8 अब्राहम ह तब कुछू दही अऊ दूध अऊ ओ रांधे गय बछवा के मांस ला ओमन के आघू म परोस दीस। जब ओमन खावत रिहिन, त ओह ओमन के लकठा म रूख खाल्हे म ठाढ़े रिहिस।
GEN 18:9 ओमन ओला पुछिन, “तोर घरवाली सारा कहां हवय?” ओह कहिस, “ओह तो तम्बू भीतर हवय।”
GEN 18:10 त ओमा के एक झन ह कहिस, “में अगले साल इही समय म तोर करा फेर आहूं, अऊ तोर घरवाली सारा के एक बेटा होही।” सारा तम्बू के दुवारी म अब्राहम के पाछू कोति रहिके ये बात ला सुनत रिहिस।
GEN 18:11 अब्राहम अऊ सारा दूनों बहुंत डोकरा-डोकरी हो गे रिहिन, अऊ सारा के माहवारी भी बंद हो गे रिहिस।
GEN 18:12 एकरसेति सारा ह मन म हंसके कहे लगिस, “में तो डोकरी हो गे हंव अऊ मोर घरवाला घलो डोकरा हो गे हे, त का मोला ये सुख मिलही?”
GEN 18:13 तब यहोवा ह अब्राहम ला कहिस, “सारा अइसन कहिके काबर हंसिस, ‘में अब अतकी डोकरी हो गे हंव अऊ का सही म मोर एक बेटा होही?’
GEN 18:14 का यहोवा बर कोनो काम कठिन ए? मेंह अगले साल ठहिराय समय म तोर करा फेर आहूं, अऊ सारा के एक बेटा होही।”
GEN 18:15 तब सारा डर के मारे ये कहिके अपन बात ले मुकर गीस, “में नइं हंसे रहंय।” पर ओह कहिस, “नइं, तें हंसे तो रहय।”
GEN 18:16 जब ओ मनखेमन उहां ले जाय बर उठिन, त ओमन खाल्हे सदोम नगर कोति देखिन, अऊ अब्राहम ह ओमन ला बिदा करे बर ओमन संग गीस।
GEN 18:17 तब यहोवा ह कहिस, “अभी में जो करइया हंव, का ओला मेंह अब्राहम ले छुपाके रखंव?
GEN 18:18 अब्राहम ले सही म एक बड़े अऊ सक्तिसाली जाति पईदा होही, अऊ धरती के जम्मो जाति के मनखेमन ओकर जरिये आसीस पाहीं।
GEN 18:19 काबरकि मेंह ओला चुने हंव कि ओह अपन बाद अपन बेटा अऊ परिवार के मनखेमन ला हुकूम दीही कि ओमन सही अऊ नियाय के काम करे के दुवारा यहोवा के रसता म अटल बने रहंय, ताकि यहोवा ह जऊन परतिगियां अब्राहम ले करे हवय, ओला पूरा करय।”
GEN 18:20 फेर यहोवा ह कहिस, “सदोम अऊ अमोरा नगरमन के बिरूध नरियाई ह बहुंत बढ़ गे हवय अऊ ओमन के पाप ह बहुंत दुखदाई हो गे हवय,
GEN 18:21 एकरसेति में उतरके देखहूं कि ओमन के बिरूध जऊन नरियाई मोर कान म हबरे हे, ओकर मुताबिक ओमन के काम वइसने खराप हवय कि नइं। यदि नइं, त में ओला जान डारहूं।”
GEN 18:22 तब ओमा के दू झन उहां ले लहुंटके सदोम कोति जाय लगिन; पर अब्राहम ह यहोवा के आघू म ठाढ़े रिहिस।
GEN 18:23 तब अब्राहम ओकर करा जाके कहिस: “का तें दुस्टमन के संग म धरमीमन ला घलो नास करबे?
GEN 18:24 सायद ओ नगर म पचास धरमी मनखे होवंय, त का तें सही म ओ जगह ला नास कर देबे, अऊ ओ पचास धरमी जन के कारन ओला नइं छोंड़बे?
GEN 18:25 अइसन काम करई तोर ले दूरिहा रहय—कि दुस्ट के संग धरमी ला घलो मार डार अऊ धरमी अऊ दुस्ट दूनों के एके दसा होवय। अइसन काम तोर ले झन होवय! का जम्मो धरती के नियायी ह सही नियाय नइं करही?”
GEN 18:26 यहोवा ह कहिस, “यदि मोला सदोम सहर म पचास धरमी मिलहीं, त ओमन के कारन ओ जम्मो जगह ला छोंड़ दूहूं।”
GEN 18:27 तब अब्राहम ह फेर कहिस, “हे परभू, देख, में तो माटी अऊ राख सहीं अंव, तभो ले में हिम्मत करके तोर से गोठियावत हंव।
GEN 18:28 यदि ओ पचास धरमी म पांच कम रहंय, त का तें पांच धरमी के कम होय के कारन ओ पूरा सहर ला नास कर देबे?” ओह कहिस, “यदि उहां मोला पैंतालीस भी मिलहीं, त में ओला नास नइं करंव।”
GEN 18:29 एक बार फेर अब्राहम ह परमेसर ला कहिस, “यदि उहां सिरिप चालीस धरमी मिलंय त?” ओह कहिस, “में चालीस के कारन भी अइसने नइं करंव।”
GEN 18:30 तब अब्राहम ह कहिस, “हे परभू, नराज झन हो, पर मोला कुछू अऊ कहन दे। यदि उहां सिरिप तीस धरमी मिलंय त?” ओह ये जबाब दीस, “यदि मोला उहां तीस भी मिलंय, त में अइसने नइं करंव।”
GEN 18:31 फेर अब्राहम ह कहिस, “हे परभू, देख, में हिम्मत करके तोर ले गोठियावत हंव; यदि उहां सिरिप बीस धरमी मिलंय त?” ओह कहिस, “त फेर में बीस के कारन ओकर नास नइं करंव।”
GEN 18:32 तब अब्राहम ह कहिस, “हे परभू नराज झन हो, पर मोला सिरिप एक बार अऊ कहन दे। यदि उहां दस झन धरमी मिलंय त?” ओह जबाब दीस, “त फेर दस झन के कारन ओकर नास नइं करंव।”
GEN 18:33 जब यहोवा ह अब्राहम ले गोठिया लीस, तब ओह उहां ले चले गीस, अऊ अब्राहम अपन घर लहुंट गीस।
GEN 19:1 सांझकुन दू झन स्वरगदूतमन सदोम करा आईन, अऊ लूत ह सदोम के कपाट करा बईठे रिहिस। जब ओह ओमन ला देखिस, त ओह ओमन ले भेंट करे बर उठिस अऊ मुहूं के भार भुइयां म झुकके दंडवत करिस अऊ कहिस,
GEN 19:2 “हे मोर परभूमन, अपन दास के घर म आवव, अऊ अपन गोड़ धोके रात भर अराम करव अऊ तब बड़े बिहनियां उठके अपन डहार म चले जावव।” ओमन कहिन, “नइं, हमन चऊक म ही रथिया बिताबो।”
GEN 19:3 पर ओह बहुंत बिनती करके ओमन ला मनाईस, एकरसेति ओमन ओकर संग ओकर घर म आईन। ओह ओमन बर जेवन तियार करिस, अऊ बिगर खमीर के रोटी बनाके ओमन ला खवाईस।
GEN 19:4 ओमन के सुते के पहिली सदोम सहर के जम्मो पुरूसमन आके—जवान ले लेके सियान तक लूत के घर ला घेर लीन;
GEN 19:5 अऊ ओमन लूत ला चिचियाके कहिन, “जऊन मनखेमन आज रथिया तोर करा आय हें, ओमन कहां हवंय? ओमन ला हमर करा बाहिर ले आ कि हमन ओमन संग भोग करन।”
GEN 19:6 तब लूत ह ओमन ले मिले बर घर ले बाहिर निकलिस अऊ कपाट ला बंद करके
GEN 19:7 ओमन ला कहिस, “हे मोर भाईमन, अइसने गंदा काम झन करव।
GEN 19:8 देखव, मोर दू झन बेटीमन हें, जेमन कभू कोनो पुरूस के संग नइं सुते हें। मेंह ओमन ला बाहिर तुम्हर करा ले आवत हंव, अऊ तुमन ला जइसने बने लगय, वइसने ओमन के संग करव। पर ये मनखेमन संग कुछू झन करव; काबरकि येमन मोर छानी के तरी म आय हवंय।”
GEN 19:9 ओमन कहिन, “हमर रसता ले हट जा। ये मनखे ह एक परदेसी के रूप म इहां आय रिहिस, पर अब नियायी बनत हे! हमन तोर संग ओमन ले घलो जादा खराप बरताव करबो।” अऊ ओमन लूत ऊपर दबाव डारे लगिन अऊ कपाट ला टोरे बर आघू बढ़िन।
GEN 19:10 पर ओ पहुनामन हांथ लमाके लूत ला अपन करा घर के भीतर खींच लीन अऊ कपाट ला बंद कर दीन।
GEN 19:11 तब ओमन का छोटे का बड़े, जम्मो मनखे ला, जेमन घर के दुवारी म रिहिन, अंधरा कर दीन, एकरसेति ओमन कपाट ला खोजे नइं सकिन।
GEN 19:12 तब ओ दूनों पहुनामन लूत ले पुछिन, “इहां तोर अऊ कोनो हवंय—दामाद, बेटा-बेटीमन, या अऊ कोनो ये सहर म तोर हवंय? त ओ जम्मो झन ला लेके इहां ले निकल जा,
GEN 19:13 काबरकि हमन ये जगह ला नास करइया हन। यहोवा करा ये जगह के मनखेमन के बिरूध नरियाई अतेक जादा हो गय हे कि ओह हमन ला एकर सतियानास करे बर पठोय हे।”
GEN 19:14 एकरसेति, लूत ह निकलके अपन दामादमन ला, जेमन संग ओकर बेटीमन के मंगनी हो गे रहय, कहिस, “जल्दी करव अऊ ये जगह ले निकलव; काबरकि यहोवा ह ये सहर ला नास करइया हे!” पर ओकर दामादमन सोचिन कि ओह ठट्ठा करत हे।
GEN 19:15 जब बिहान पहात रिहिस, त स्वरगदूतमन लूत ला कहिन, “जल्दी कर! अपन घरवाली अऊ अपन दूनों बेटी ला, जेमन इहां हवंय, अपन संग ले जा, नइं तो तुमन घलो ये सहर के दंड म नास हो जाहू।”
GEN 19:16 पर ओह झिझकत रिहिस, एकरसेति ओ पहुनामन ओकर अऊ ओकर घरवाली अऊ ओकर दूनों बेटीमन के हांथ ला धरिन अऊ सही-सलामत ओमन ला सहर के बाहिर ले गीन, काबरकि यहोवा के दया ओमन के ऊपर रिहिस।
GEN 19:17 जब ओमन ला बाहिर निकाल लीन, त ओमन ले एक झन ह कहिस, “अपन परान लेके भागव! पाछू पलटके झन देखहू, अऊ मैदान म कहूं मेर झन रूकहू! ओ पहाड़ ऊपर भाग जावव, नइं तो तुमन घलो नास हो जाहू!”
GEN 19:18 पर लूत ह ओमन ला कहिस, “हे मोर परभू, अइसन झन करव।
GEN 19:19 देख, तोर दास ऊपर तोर दया-दिरिस्टी होय हवय, अऊ तेंह मोर जिनगी ला बचाके मोर ऊपर अब्बड़ दया करे हस। पर में ओ पहाड़ ऊपर नइं जा सकंव; ये बिपत्ति ह मोर ऊपर आ जाही, अऊ में मर जाहूं।
GEN 19:20 देख, ओ नगर ह बहुंत लकठा म हवय अऊ मेंह उहां भाग सकत हंव, अऊ ओह छोटे घलो हवय। मोला उहां भाग जावन दे—का ओह बहुंत छोटे नगर नो हय? तब मोर परान ह बच जाही।”
GEN 19:21 ओह लूत ला कहिस, “ठीक हे, मेंह तोर ये बिनती ला घलो मानत हंव; जऊन नगर के बारे म तेंह कहत हस, ओला में नास नइं करंव।
GEN 19:22 पर जल्दी करके उहां भाग जा, काबरकि जब तक तेंह उहां नइं हबरबे, तब तक में कुछू नइं कर सकंव।” (एकरे बर ओ नगर ला सोअर कहे गीस।)
GEN 19:23 जब लूत ह सोअर नगर म हबरिस, त बेर ह धरती ऊपर उग गे रिहिस।
GEN 19:24 तब यहोवा ह अपन कोति ले सदोम अऊ अमोरा म अकास ले बरत गंधक बरसाईस।
GEN 19:25 ये किसम ले, ओह ओ सहरमन ला अऊ ओ जम्मो मैदान ला अऊ सहर म रहइया जम्मो मनखेमन ला—अऊ भुइयां के घांस-पूस अऊ रूख-रई जम्मो ला नास कर दीस।
GEN 19:26 पर लूत के घरवाली ह पाछू कोति मुड़के देखिस, अऊ ओह नून के खंभा बन गीस।
GEN 19:27 दूसर दिन बड़े बिहनियां अब्राहम उठके ओ ठऊर म गीस, जिहां ओह यहोवा के आघू म ठाढ़े रिहिस।
GEN 19:28 ओह खाल्हे सदोम अऊ अमोरा अऊ ओ मैदान के जम्मो भुइयां कोति देखिस, त ओह का देखिस कि ओ जम्मो जगह ले धधकत भट्ठी ले निकलत धुआं सहीं घना धुआं उठत रहय।
GEN 19:29 अऊ जब परमेसर ह ओ मैदान के सहरमन ला नास करिस, त ओह अब्राहम ला सुरता करिस, अऊ ओह उहां रहइया लूत ला ओ संकट ले बचा लीस, जऊन ह ओ सहरमन ला उलट-पलट दीस।
GEN 19:30 लूत अऊ ओकर दूनों बेटीमन सोअर ला छोंड़ दीन अऊ पहाड़ ऊपर रहे लगिन, काबरकि लूत ह सोअर म रहे बर डरत रिहिस। ओह अऊ ओकर दूनों बेटी गुफा म रहत रिहिन।
GEN 19:31 एक दिन बड़की बेटी ह छोटकी ला कहिस, “हमर ददा त डोकरा हो गे हे, अऊ इहां आसपास म अइसन कोनो पुरूस नइं ए, जऊन ह संसार के रीति के मुताबिक हमन ला लइका दे सकय।
GEN 19:32 एकरसेति आ, हमन अपन ददा ला मंद पीयाके ओकर संग सुतन अऊ अपन ददा के दुवारा अपन परिवार के बंस ला बंचावन।”
GEN 19:33 त ओमन ओहीच दिन रथिया अपन ददा ला मंद पीयाईन, अऊ तब बड़की बेटी जाके अपन ददा संग सुतिस, पर ओकर ददा ह नइं जानिस कि ओह कब ओकर संग लेटिस अऊ कब ओह उठ गीस।
GEN 19:34 ओकर दूसर दिन बड़की ह छोटकी बहिनी ला कहिस, “देख, कल रथिया मेंह अपन ददा संग सुतें। आ, आज रथिया हमन ओला फेर मंद पीयाबो, अऊ तब तें जाके ओकर संग सुतबे ताकि हमन अपन ददा के दुवारा अपन परिवार के बंस ला बचा सकन।”
GEN 19:35 एकरसेति ओमन ओ दिन घलो रथिया अपन ददा ला मंद पीयाईन अऊ छोटकी बेटी जाके अपन ददा संग सुतिस, अऊ फेर ओकर ददा ह नइं पता पाईस कि ओह कब ओकर संग लेटिस अऊ कब ओह उठ गीस।
GEN 19:36 ये किसम ले लूत के दूनों बेटी अपन ददा कोति ले आसरा म हो गीन।
GEN 19:37 बड़की बेटी के एक बेटा होईस, अऊ ओह ओकर नांव मोआब रखिस; ओह आज तक के मोआबीमन के जनमदाता होईस।
GEN 19:38 अऊ छोटकी के घलो एक बेटा होईस, अऊ ओह ओकर नांव बेन-अम्मी रखिस; ओह आज तक के अमोनीमन के जनमदाता होईस।
GEN 20:1 फेर अब्राहम उहां ले निकलके नेगेव के छेत्र म आईस अऊ कादेस अऊ सूर के बीच म रहे लगिस। कुछू समय तक ओह गरार नगर म ठहिरिस,
GEN 20:2 अऊ उहां अब्राहम ह अपन घरवाली सारा के बारे म कहिस, “ओह मोर बहिनी अय।” एकरसेति गरार के राजा अबीमेलेक ह दूत पठोके सारा ला अपन करा बला लीस।
GEN 20:3 पर रथिया परमेसर ह सपना म अबीमेलेक करा आके कहिस, “सुन, तेंह मर जाबे, काबरकि जऊन माईलोगन ला तेंह रख ले हस; ओह एक बिहाता माईलोगन अय।”
GEN 20:4 पर अबीमेलेक ओकर करा नइं गे रिहिस, एकर बर ओह कहिस, “हे परभू, का तें एक निरदोस जाति ला मार डारबे?
GEN 20:5 का ओह खुद मोला नइं कहिस कि ओह मोर बहिनी अय? अऊ ओ नारी ह घलो खुद नइं कहिस कि ओह मोर भाई अय? में तो अपन सुध बिबेक अऊ निरदोस हांथ ले ये काम ला करे हंव।”
GEN 20:6 तब परमेसर ह ओला सपना म कहिस, “हव, में भी जानत हंव कि सुध बिबेक से तेंह ये काम ला करे हस, अऊ एकरसेति मेंह तोला मोर बिरूध म पाप करे बर रोकके रखे हंव। एकरे कारन मेंह तोला ओला छुए नइं देंव।
GEN 20:7 अब ओ मनखे के घरवाली ला लहुंटा दे, काबरकि ओह एक अगमजानी अय, अऊ ओह तोर बर पराथना करही अऊ तें जीयत रहिबे। पर यदि तें ओला नइं लहुंटाबे, त जान ले कि तें अऊ तोर जतेक मनखे हें, ओ सब के सब मर जाहीं।”
GEN 20:8 दूसर दिन बड़े बिहनियां अबीमेलेक अपन जम्मो करमचारीमन ला बलाईस, अऊ जब ओह ओमन ला ओ जम्मो बात बताईस, त ओमन बहुंत डरा गीन।
GEN 20:9 तब अबीमेलेक ह अब्राहम ला बलाके कहिस, तेंह हमर संग ये का करे हस? मेंह तोर का बिगाड़ेंव कि तें मोर अऊ मोर राज ऊपर अइसने बड़े दोस डाल दे हस। तेंह मोर संग ओ काम करे हस, जऊन ह उचित नो हय।
GEN 20:10 फेर अबीमेलेक ह अब्राहम ले पुछिस, “तेंह का समझके अइसन काम करय?”
GEN 20:11 अब्राहम ह कहिस, “मेंह ये सोचेंव कि ये ठऊर म परमेसर के डर-भय नइं होही, अऊ मनखेमन मोर घरवाली के कारन मोला मार डारहीं।
GEN 20:12 एकर छोंड़, सही म ओह मोर बहिनी अय, मोर ददा के बेटी, हालाकि ओह मोर दाई के बेटी नो हय; अऊ फेर ओह मोर घरवाली बन गीस
GEN 20:13 अऊ जब परमेसर ह मोला मोर ददा के घर ला छोंड़के निकले के हुकूम दीस, त में ओला कहेंव, ‘तें ये किसम ले अपन मया मोर बर देखा सकथस: जिहां-जिहां हमन जाबो, उहां-उहां तें मोर बारे म कहिबे, “ये मोर भाई अय।” ’ ”
GEN 20:14 तब अबीमेलेक ह भेड़-बकरी, गरूवा-बईला ला, अऊ दास-दासीमन ला लेके अब्राहम ला दीस अऊ ओकर घरवाली सारा ला घलो ओला लहुंटा दीस।
GEN 20:15 अऊ अबीमेलेक ह कहिस, “देख, मोर देस तोर आघू म हवय; जिहां तोला बने लगय, उहां रह।”
GEN 20:16 सारा ला ओह कहिस, “देख, में तोर भाई ला एक हजार सेकेल चांदी देवत हंव। तोर बिरूध जऊन अपराध मेंह करे हंव, तोर संग के मनखेमन के आघू म, येह ओकर भरपई ए; तोर संग पूरा नियाय करे जावथे।”
GEN 20:17 तब अब्राहम ह परमेसर ले पराथना करिस, अऊ परमेसर ह अबीमेलेक, ओकर घरवाली अऊ ओकर दासीमन ला चंगा करिस कि ओमन फेर लइका जनमे लगंय,
GEN 20:18 काबरकि यहोवा ह अब्राहम के घरवाली सारा के कारन अबीमेलेक के घर के जम्मो माईलोगनमन के कोख ला बंद कर दे रिहिस।
GEN 21:1 यहोवा ह सारा के ऊपर अनुग्रह करिस जइसने कि ओह कहे रिहिस, अऊ ओह सारा बर वइसने करिस जइसने कि ओह परतिगियां करे रिहिस।
GEN 21:2 सारा ह अब्राहम ले गरभ म होईस अऊ ओकर बुढ़ापा म, ओही ठहिराय समय म परमेसर के परतिगियां के मुताबिक ओह एक बेटा जनमिस।
GEN 21:3 अब्राहम अपन ओ बेटा के नांव इसहाक रखिस, जेला सारा ह जनम दीस।
GEN 21:4 जब ओकर बेटा इसहाक ह आठ दिन के होईस, त अब्राहम ह परमेसर के हुकूम के मुताबिक ओकर खतना करिस।
GEN 21:5 अब्राहम ह एक सौ बछर के रिहिस, जब ओकर बेटा इसहाक के जनम होईस।
GEN 21:6 सारा ह कहिस, “परमेसर ह मोला खुसी दे हवय, अऊ जऊन कोनो भी एकर बारे म सुनही, ओह खुस होके हंसही।”
GEN 21:7 फेर ओह ये घलो कहिस, “का कोनो कभू अब्राहम ले ये कहे सकत रिहिन कि सारा ह लइकामन ला दूध पीयाही? पर देखव, मेंह ओकर बुढ़त काल म ओकर एक बेटा ला जनम दे हवंव।”
GEN 21:8 ओ लइका ह बढ़त गीस अऊ ओकर दूध छोंड़ाय गीस, अऊ इसहाक के दूध छोंड़ाय के दिन अब्राहम ह एक बड़े भोज करिस।
GEN 21:9 पर बाद म सारा ह देखिस कि मिसरी हाजिरा के बेटा, जऊन ह अब्राहम दुवारा जनमे रिहिस, ओकर हंसी उड़ात रिहिस,
GEN 21:10 त ओह अब्राहम ला कहिस, “ये गुलाम माईलोगन अऊ ओकर बेटा ला निकाल दे, काबरकि ये माईलोगन के बेटा ह मोर बेटा इसहाक के संग कभू हिस्सा नइं पावय।”
GEN 21:11 ये बात अब्राहम ला बहुंत खराप लगिस, काबरकि ये बात ओकर बेटा के बारे म रिहिस।
GEN 21:12 पर परमेसर ह अब्राहम ला कहिस, “ओ लइका अऊ अपन दासी के बारे म दुखी झन हो। जऊन बात सारा ह तोला कहत हे, ओला मान, काबरकि इसहाक के जरिये तोर बंस ह चलही।
GEN 21:13 मेंह दासी के बेटा ले घलो एक जाति बनाहूं, काबरकि ओह तोर संतान अय।”
GEN 21:14 ओकर दूसर दिन बड़े बिहनियां अब्राहम ह उठके कुछू जेवन अऊ पानी ले भरे चमड़ा के थैली लीस अऊ हाजिरा ला दीस। ओह जेवन अऊ पानी के थैली ला हाजिरा के कंधा म रखिस अऊ ओला अऊ ओकर बेटा ला बिदा करिस। ओह अपन रसता म चल दीस अऊ बेरसेबा के सुन्ना जगह म भटकत रिहिस।
GEN 21:15 जब चाम के थैली के पानी सिरा गीस, तब ओह अपन बेटा ला एक झाड़ी तरी म छोंड़ दीस।
GEN 21:16 अऊ तब अपन खुद तीर चलाय भर के दूरिहा म गीस अऊ ये सोचके बईठ गीस, “में अपन बेटा के मरना नइं देख सकंव।” अऊ ओह उहां बईठके रोवन लगिस।
GEN 21:17 परमेसर ह ओ छोकरा के रोये के अवाज ला सुनिस, अऊ परमेसर के स्वरगदूत ह स्वरग ले नरियाके हाजिरा ला कहिस, “हे हाजिरा, का बात ए? झन डर; जऊन करा तोर बेटा हवय, उहां ले ओकर रोये के अवाज ह परमेसर करा हबरे हवय।
GEN 21:18 उठ अऊ अपन बेटा ला अपन हांथ म उठा, काबरकि में ओकर दुवारा एक बड़े जाति बनाहूं।”
GEN 21:19 तब परमेसर ह ओकर आंखी ला उघार दीस अऊ ओला एक ठन पानी के कुआं दिखिस, तब ओह जाके थैली म पानी भरिस अऊ लइका ला पीयाईस।
GEN 21:20 परमेसर ह ओ लइका संग रिहिस, जब ओह बढ़े लगिस। ओह सुन्ना जगह म रहत एक धनुस चलइया बन गीस।
GEN 21:21 जब ओह पारान के सुन्ना जगह म रहत रिहिस, त ओकर दाई ह ओकर बर मिसर देस ले एक घरवाली लानिस।
GEN 21:22 ओ समय म, अबीमेलेक अऊ ओकर सेनापति पीकोल अब्राहम ला कहिन, “जऊन कुछू तें करथस, ओमा परमेसर तोर संग रहिथे।
GEN 21:23 एकरसेति, अब मोर संग इहां परमेसर के आघू म किरिया खा कि तें न तो मोर संग, न मोर लइकामन संग अऊ न ही मोर अवइया संतान संग कोनो छल करबे। पर जइसन दया मेंह तोला देखाय हवंव, वइसन ही दया तें मोर अऊ ये देस ऊपर देखाबे, जिहां तेंह अभी एक परदेसी के रूप म रहत हस।”
GEN 21:24 अब्राहम ह कहिस, “में किरिया खावत हंव।”
GEN 21:25 तब अब्राहम ह अबीमेलेक ले एक कुआं के बारे म सिकायत करिस, जेला अबीमेलेक के दासमन जबरन लेय ले रिहिन।
GEN 21:26 पर अबीमेलेक ह कहिस, “में नइं जानंव कि कोन ह ये काम ला करिस। तें मोला नइं बताय, अऊ आज मोला ये बात के पता चलत हे।”
GEN 21:27 तब अब्राहम ह भेड़-बकरी अऊ गरूवा-बईला लानिस अऊ अबीमेलेक ला दीस, अऊ ओ दूनों झन आपस म करार करिन।
GEN 21:28 अब्राहम ह सात ठन मेढ़ा-पीला ला झुंड ले अलग रखिस,
GEN 21:29 त अबीमेलेक ह अब्राहम ले पुछिस, “ये सात ठन मेढ़ा-पीला, जेमन ला तें अलग रखे हस, तेकर का मतलब अय?”
GEN 21:30 ओह कहिस, “ये सात ठन मेढ़ा-पीला ला ये बात के साखी जानके मोर हांथ ले लेय ले कि मेंह ये कुआं ला खने हंव।”
GEN 21:31 ओ दूनों झन ओ ठऊर म आपस म किरिया खाईन, एकर कारन ओ जगह के नांव बेरसेबा परिस।
GEN 21:32 बेरसेबा म करार करे के बाद, अबीमेलेक अऊ ओकर सेना के सेनापति पीकोल पलिस्तीन देस ला लहुंट गीन।
GEN 21:33 अब्राहम ह बेरसेबा म एक झाऊ के रूख लगाईस अऊ उहां यहोवा ले, जेह सनातन परमेसर अय, अराधना करिस।
GEN 21:34 अब्राहम ह पलिस्तीन देस म बहुंत साल तक एक परदेसी के रूप म रिहिस।
GEN 22:1 कुछू समय बाद, परमेसर ह अब्राहम के परिछा लीस। ओह अब्राहम ला कहिस, “हे अब्राहम!” अब्राहम ह कहिस, “में इहां हंव।”
GEN 22:2 तब परमेसर ह कहिस, “अपन बेटा याने अपन एकलऊता बेटा इसहाक ला, जेला तें मया करथस, अपन संग लेके मोरियाह छेत्र म जा। उहां ओला एक पहाड़ ऊपर होम-बलिदान करके चघा, जेला में तोला देखाहूं।”
GEN 22:3 अब्राहम बड़े बिहनियां उठिस अऊ अपन गदहा ऊपर सामान लादिस। ओह अपन संग म दू झन सेवक अऊ अपन बेटा इसहाक ला लीस। जब ओह होम-बलिदान बर लकरी फोर लीस, त ओह ओ जगह बर रवाना होईस, जेकर बारे म परमेसर ह ओला बताय रिहिस।
GEN 22:4 तीसर दिन अब्राहम ह आंखी उठाके ओ जगह ला दूरिहा ले देखिस,
GEN 22:5 अऊ ओह अपन सेवकमन ला कहिस, “गदहा के संग इहां ठाढ़े रहव; ये लड़का अऊ में उहां जावत हन। हमन अराधना करके तुम्हर करा लहुंट आबो।”
GEN 22:6 तब अब्राहम ह होम-बलिदान बर लकरी ला लीस अऊ अपन बेटा इसहाक के कंधा म रखिस, अऊ अपन खुद आगी अऊ छुरी ला धरिस। जब ओ दूनों एक संग जावत रिहिन,
GEN 22:7 त इसहाक ह अपन ददा अब्राहम ला कहिस, “हे ददा?” अब्राहम ह कहिस, “का बात ए, बेटा?” त इसहाक ह कहिस, “देख, आगी अऊ लकरी तो हमर करा हवय, पर होम-बलिदान बर मेढ़ा-पीला कहां हे?”
GEN 22:8 अब्राहम ह कहिस, “होम-बलिदान बर मेढ़ा-पीला के उपाय परमेसर ह खुद करही, बेटा।” अऊ ओ दूनों संगे-संग आघू बढ़त गीन।
GEN 22:9 जब ओमन ओ जगह म हबरिन, जेकर बारे म परमेसर ह ओला बताय रिहिस, तब अब्राहम ह उहां एक बेदी बनाके ओकर ऊपर लकरी ला छांट-छांटके रखिस, अऊ अपन बेटा इसहाक ला बांधके बेदी के लकरी ऊपर लेटा दीस।
GEN 22:10 तब ओह अपन बेटा ला बलि करे बर अपन हांथ म छुरी ला धरिस।
GEN 22:11 पर यहोवा के स्वरगदूत ह स्वरग ले ओला नरियाके कहिस, “हे अब्राहम! हे अब्राहम!” ओह कहिस, “में इहां हंव।”
GEN 22:12 परमेसर के दूत ह कहिस, “ओ लड़का ऊपर हांथ झन बढ़ा; ओला कुछू झन कर। अब में जानत हंव कि तें परमेसर के भय मानथस, काबरकि तें मोर बर अपन बेटा याने अपन एकलऊता बेटा ला घलो नइं छोंड़े।”
GEN 22:13 तब अब्राहम ह आंखी उठाके देखिस, त ओकर पाछू म एक मेढ़ा रहय, जेकर सींग झाड़ी म फंसे रहय। अब्राहम ह जाके ओ मेढ़ा ला लानिस अऊ अपन बेटा के बदला म, ओला होम-बलिदान के रूप म चघाईस।
GEN 22:14 एकरसेति अब्राहम ओ जगह के नांव, “यहोवा ह दीही” रखिस। अऊ आज घलो ये कहे जाथे, “यहोवा के पहाड़ ऊपर परबंध होही।”
GEN 22:15 यहोवा के स्वरगदूत ह दूसर बेर स्वरग ले अब्राहम ला नरियाके कहिस,
GEN 22:16 “यहोवा के ये बचन अय कि में अपनेच ही किरिया खावत हंव कि तें जो ये काम करे कि अपन बेटा याने अपन एकलऊता बेटा ला घलो नइं छोंड़य,
GEN 22:17 एकर कारन मेंह तोला जरूर आसीस दूहूं अऊ तोर संतानमन ला अकास के तारामन अऊ समुंदर तीर के बालू सहीं अनगिनत करहूं। तोर संतानमन अपन बईरीमन के सहरमन ला अपन अधिकार म ले लीहीं,
GEN 22:18 अऊ तोर संतान के जरिये धरती के जम्मो जाति के मनखेमन आसीस पाहीं, काबरकि तें मोर बात ला माने हस।”
GEN 22:19 तब अब्राहम अपन सेवकमन करा लहुंट आईस अऊ ओमन एक संग बेरसेबा गीन। अऊ अब्राहम ह बेरसेबा म रहत रिहिस।
GEN 22:20 कुछू समय के बाद, अब्राहम ला ये संदेस मिलिस, “मिलका ह घलो दाई बने हे; ओह तोर भाई नाहोर कोति ले लइकामन ला जनमे हे।
GEN 22:21 ओकर बड़खा बेटा ऊस अऊ ओकर भाई बूज, कमूएल (जऊन ह अराम के ददा होईस),
GEN 22:22 केसेद, हजो, पिलदास, यिदलाप अऊ बतूएल।”
GEN 22:23 ये आठों बेटामन ला मिलका ह अब्राहम के भाई नाहोर कोति ले जनम दीस।
GEN 22:24 नाहोर के रूमा नांव के एक रखैल रिहिस; जेकर ले तेबह, गहम, तहस अऊ माका पईदा होईन।
GEN 23:1 सारा ह एक सौ सत्ताईस बछर के रिहिस,
GEN 23:2 तब ओह कनान देस के किरयत-अरबा (जेला हेबरोन कहे जाथे) म मर गीस। एकरसेति अब्राहम ह सारा बर सोक मनाय अऊ रोये बर गीस।
GEN 23:3 तब अब्राहम ह अपन घरवाली के लास के बाजू म ठाढ़ होके हित्तीमन ला कहिस,
GEN 23:4 “मेंह तुम्हर बीच म एक परदेसी अऊ अजनबी अंव। मोला इहां मरघटी बर कुछू जमीन बिक्री म देवव ताकि में अपन मनखेमन के लास ला माटी दे सकंव।”
GEN 23:5 तब हित्तीमन अब्राहम ला कहिन,
GEN 23:6 “हे महोदय, हमर बात ला सुन। तेंह हमर बीच म एक बड़े आदमी अस। हमर कबर म ले, जेह तोला बने लगय, ओमा अपन घरवाली के लास ला माटी दे। तोला अपन मनखे के लास ला माटी देय बर हमन म ले कोनो भी अपन कबर देय बर तोला मना नइं करय।”
GEN 23:7 तब अब्राहम उठके ठाढ़ होईस अऊ ओ देस के मनखे हित्तीमन के आघू म मुड़ नवाके कहिस,
GEN 23:8 “यदि तुम्हर मन हवय कि इहां में अपन घरवाली ला माटी देवंव, त मोर बात ला सुनव अऊ मोर कोति ले सोहर के बेटा एपरोन ले बिनती करव
GEN 23:9 कि ओह अपन मकपेला के गुफा, जेह ओकर नांव म हे अऊ येह ओकर भुइयां के छोर म हवय, ओकर पूरा दाम लेके मोला बेच देवय कि ओह तुम्हर बीच म मोर अऊ मोर मनखेमन बर मरघटी होवय।”
GEN 23:10 एपरोन हित्ती ह अपन मनखेमन के बीच म बईठे रिहिस अऊ ओ जम्मो हित्ती, जऊन मन ओकर नगर के कपाट करा आय रिहिन, ओमन के सुनत म ओह अब्राहम ला कहिस,
GEN 23:11 “हे मोर परभू, अइसन नइं, मोर बात ला सुन; ओ भुइयां ला में तोला देवत हंव, अऊ ओमा जऊन गुफा हवय, ओला घलो तोला देवत हंव। मेंह येला अपन मनखेमन के आघू म तोला देवत हंव। तें अपन मनखे के लास ला उहां माटी दे।”
GEN 23:12 तब अब्राहम ह ओ देस के मनखेमन के आघू म फेर मुड़ नवाईस
GEN 23:13 अऊ ओमन के सुनत म एपरोन ला कहिस, “यदि तोर अइसन मन हे, त मोर बात ला सुन। ओ भुइयां के जऊन दाम हे, तेला मेंह दूहूं। ओला तें मोर करा ले लेय ले, ताकि में अपन मनखे के लास ला उहां माटी दे सकंव।”
GEN 23:14 एपरोन ह अब्राहम ला जबाब दीस,
GEN 23:15 “हे मोर परभू, मोर बात ला सुन; ओ भुइयां के दाम तो चार सौ सेकेल हवय, पर तोर अऊ मोर बीच म येह कुछू नो हय। अपन मनखे के लास ला उहां माटी दे।”
GEN 23:16 अब्राहम ह एपरोन के बात ला मानके ओला ओतकी चांदी तऊलके दे दीस, जतकी ओह हित्तीमन के सुनत म कहे रिहिस, याने कि चार सौ सेकेल, जऊन ह ओ समय बेपारीमन म चलत रिहिस।
GEN 23:17 ये किसम ले एपरोन के भुइयां, जऊन ह ममरे के लकठा म मकपेला म रिहिस—ओ भुइयां अऊ गुफा, अऊ ओ जम्मो रूख जऊन मन ओ भुइयां के सीमना म आवत रिहिन,
GEN 23:18 ओ जम्मो संपत्ति, ओ सबो हित्ती, जऊन मन सहर के कपाट करा आय रिहिन, ओमन के आघू म अब्राहम के हक म पक्का हो गीस।
GEN 23:19 ओकर बाद अब्राहम ह अपन घरवाली सारा के लास ला मकपेला के भुइयां के गुफा म माटी दीस, जऊन ह ममरे के, याने कि हेबरोन के लकठा म कनान देस म हवय।
GEN 23:20 ये किसम ले ओ भुइयां ह गुफा समेत हित्तीमन कोति ले मरघटी बर अब्राहम के अधिकार म पक्का हो गीस।
GEN 24:1 अब्राहम अब बहुंत डोकरा हो गे रिहिस, अऊ यहोवा ह ओला सब बात म आसीस दे रिहिस।
GEN 24:2 अब्राहम ह अपन पुराना सेवक ला, जऊन ह ओकर जम्मो धन-दौलत ऊपर मुखिया रिहिस, कहिस, “अपन हांथ ला मोर जांघ के तरी म रख,
GEN 24:3 अऊ मोर ले यहोवा, जऊन ह अकास अऊ धरती के परमेसर ए, ओकर ये बात के किरिया खा कि तें कनानीमन के बेटीमन ले, जेमन के बीच म मेंह रहिथंव, कोनो ला मोर बेटा के घरवाली बनाके नइं लानबे,
GEN 24:4 पर तें मोर देस अऊ मोरेच रिस्तेदारमन करा जाके, मोर बेटा इसहाक बर एक घरवाली लानबे।”
GEN 24:5 तब दास ह ओकर ले पुछिस, “मान ले ओ नोनी के मन ह मोर संग ये देस म आय के नइं होही, त का मोला तोर बेटा ला ओ देस म ले जाय बर पड़ही, जिहां ले तें आय हस?”
GEN 24:6 अब्राहम ह ओला कहिस, “ये बात के धियान रहय कि मोर बेटा ला उहां कभू झन ले जाबे।
GEN 24:7 यहोवा, जऊन ह स्वरग के परमेसर ए, ओह मोला मोर ददा के घर ले अऊ मोर जनम भुइयां ले बाहिर लानिस अऊ मोर ले गोठियाईस अऊ कसम खाके मोर ले ये परतिगियां करिस, ‘में ये देस तोर संतान ला दूहूं,’ त ओहीच ह अपन स्वरगदूत ला तोर आघू-आघू पठोही कि तें मोर बेटा बर उहां ले एक घरवाली ले आन।
GEN 24:8 पर यदि ओ नोनी-पीला ह तोर संग नइं आय चाहही, तब तो तें मोर ये किरिया से छूट जाबे; पर मोर बेटा ला उहां झन ले जाबे।”
GEN 24:9 तब ओ दास ह अपन मालिक अब्राहम के जांघ के तरी म अपन हांथ रखके ये बिसय म ओकर ले किरिया खाईस।
GEN 24:10 तब ओ दास ह अपन मालिक के दस ठन ऊंट ला लीस अऊ ओमा अपन मालिक के जम्मो किसम के बने चीजमन ला जोरके अरम-नहरैम जाय बर निकलिस अऊ ओह नाहोर के नगर करा हबरिस।
GEN 24:11 ओह ऊंटमन ला नगर के बाहिर कुआं के लकठा म बईठाईस। ओ सांझ के बेरा रहय, अऊ ओ समय म माईलोगनमन पानी भरे बर आवंय।
GEN 24:12 तब ओह ये पराथना करन लगिस, “हे यहोवा, मोर मालिक अब्राहम के परमेसर, आज तें मोर काम ला सफल कर अऊ मोर मालिक अब्राहम ऊपर दया कर।
GEN 24:13 देख, में पानी के ये सोता के बाजू म ठाढ़े हंव, अऊ नगर के मनखेमन के बेटीमन पानी भरे बर निकलके आवत हें।
GEN 24:14 एकरसेति अइसन होवन दे कि जऊन जवान नोनी ला में ये कहंव, ‘अपन घघरी ला मोर कोति नवा कि में पानी पी सकंव,’ अऊ ओह कहय, ‘ले पी ले, अऊ में तोर ऊंटमन ला घलो पानी पीयाहूं’—त ओही ह ओ जवान छोकरी होवय, जेला तेंह अपन दास इसहाक बर ठहिराय हस। एकर दुवारा, मेंह जान डारहूं कि तेंह मोर मालिक ऊपर दया करे हस।”
GEN 24:15 एकर पहिली कि ओकर पराथना खतम होतिस, रिबका ह अपन कंधा म घघरी बोहके आईस, जऊन ह अब्राहम के भाई नाहोर के घरवाली मिलका के बेटा बतूएल के बेटी रिहिस।
GEN 24:16 ओह बहुंत सुन्दर अऊ कुंवारी रिहिस, अऊ कोनो पुरूस के संग नइं सुते रिहिस। ओह पानी के सोता करा उतरिस अऊ अपन घघरी ला भरके फेर ऊपर आईस।
GEN 24:17 तब ओ दास ह जल्दी करके ओकर ले भेंट करे बर गीस अऊ कहिस, “किरपा करके अपन घघरी म ले मोला थोरकन पानी पीया दे।”
GEN 24:18 ओह कहिस, “हे मोर परभू, ले, पी ले,” अऊ ओह जल्दी से घघरी ला उतारके हांथ म धरे-धरे ओला पीया दीस।
GEN 24:19 जब ओह ओला पानी पीया डारिस, तब कहिस, “में तोर ऊंटमन बर घलो तब तक पानी भर-भरके लानहूं, जब तक ओमन पी नइं डारहीं।”
GEN 24:20 तब ओह तुरते अपन घघरी के पानी ला कोटना म ढारके फेर कुआं म पानी भरे बर दऊड़िस अऊ ओकर जम्मो ऊंटमन बर पानी भर दीस।
GEN 24:21 ओ मनखे ह ओकर कोति चुपेचाप धियान से देखत, ये जाने के कोसिस करत रिहिस कि यहोवा ह ओकर काम ला सफल करिस हे कि नइं।
GEN 24:22 जब ऊंटमन पानी पी डारिन, तब ओ मनखे ह एक बेका सोन के नकफुली निकालके ओला दीस, अऊ दस सेकेल सोन के दू ठन कंगन ओकर हांथ म पहिरा दीस;
GEN 24:23 अऊ पुछिस, “तें काकर बेटी अस? मोला बता, का तोर ददा के घर म हमर बर रथिया ठहिरे बर जगह हवय?”
GEN 24:24 ओह जबाब दीस, “में तो नाहोर के घरवाली मिलका के जनमाय बेटा बतूएल के बेटी अंव।”
GEN 24:25 फेर ओह ओला कहिस, “हमर घर म पैंरा अऊ चारा बहुंत हवय, अऊ रात बिताय बर जगह घलो हवय।”
GEN 24:26 तब ओ मनखे ह मुड़ नवाके यहोवा के अराधना करिस
GEN 24:27 अऊ कहिस, “यहोवा, मोर मालिक अब्राहम के परमेसर के महिमा होवय, जऊन ह अपन दया अऊ सच्चई ला मोर मालिक ऊपर ले नइं हटाईस। यहोवा ह मोला सही रसता म लेके मोला मोर मालिक के भाई-बंधुमन के घर म पहुंचा दीस।”
GEN 24:28 तब ओ जवान नोनी ह दऊड़के गीस अऊ अपन दाई के घर के मनखेमन ला ये बात बताईस।
GEN 24:29 रिबका के भाई लाबान ह तुरते दऊड़के ओ मनखे करा कुआं म गीस।
GEN 24:30 जब ओकर नजर अपन बहिनी के नकफुली अऊ हांथ म पहिरे कंगन म परिस, अऊ ओकर ये बात ला सुनिस कि ओ मनखे ह रिबका ला का कहे रिहिस, त ओह तुरते ओ मनखे करा गीस, जऊन ह कुआं के तीर म ऊंटमन करा ठाढ़े रहय।
GEN 24:31 लाबान ह कहिस, “हे यहोवा कोति ले आसीसित मनखे, मोर संग आ। तें काबर इहां बाहिर म ठाढ़े हस? मेंह तोर बर घर ला तियार करे हंव, अऊ ऊंटमन बर घलो जगह तियार करे हंव।”
GEN 24:32 त ओ मनखे ह घर म गीस, अऊ ऊंटमन के काठी खोलके ओमन ला चारा-पानी दिये गीस, अऊ ओकर अऊ ओकर संगीमन के गोड़ धोय बर पानी लाने गीस।
GEN 24:33 तब ओला खाना परोसे गीस, पर ओह कहिस, “में जब तक अपन आय के कारन नइं बता दंव, तब तक कुछू नइं खावंव।” लाबान ह कहिस, “त फेर बता।”
GEN 24:34 तब ओह कहिस, “में तो अब्राहम के दास अंव।
GEN 24:35 यहोवा ह मोर मालिक ला अब्बड़ आसीस दे हवय, अऊ ओह धनी मनखे हो गय हे। परमेसर ह ओला भेड़-बकरी, गाय-बईला, सोन-चांदी, दास-दासी, ऊंट अऊ गदहामन दे हवय।
GEN 24:36 मोर मालिक के घरवाली सारा ह अपन बुढ़त काल म ओकर बर एक बेटा जनमाय हे, अऊ ओ बेटा ला अब्राहम ह अपन सबो कुछू दे देय हवय।
GEN 24:37 अऊ मोर मालिक ह मोला किरिया खवाके ये कहिस, ‘तें कनानीमन के बेटीमन ले, जेमन के देस म मेंह रहिथंव, कोनो ला मोर बेटा के घरवाली बनाके झन लानबे,
GEN 24:38 पर मोर ददा के परिवार अऊ मोर अपन गोत्र म जा अऊ मोर बेटा बर एक घरवाली लान।’
GEN 24:39 “तब में अपन मालिक ले पुछेंव, ‘मान ले ओ नोनी ह मोर संग नइं आही त?’
GEN 24:40 “मोर मालिक ह मोला कहिस, ‘यहोवा जेकर पाछू में ईमानदारी से चलत आय हंव, ओह तोर संग अपन स्वरगदूत ला भेजके तोर यातरा ला सफल करही, अऊ तें मोर गोत्र अऊ मोर ददा के परिवार ले मोर बेटा बर एक घरवाली लाय सकबे।
GEN 24:41 तेंह मोर किरिया ले तभे छूटबे, जब तें मोर गोत्र के मनखेमन करा जाबे, अऊ ओमन यदि तोला अपन नोनी ला देय म इनकार करहीं, त तें मोर ये किरिया ले छूट जाबे।’
GEN 24:42 “जब में आज ओ पानी के सोता करा आयेंव त पराथना करेंव, ‘हे यहोवा, मोर मालिक अब्राहम के परमेसर, यदि तें मोर यातरा ला सफल करथस,
GEN 24:43 त देख, में पानी के ये सोता के बाजू म ठाढ़े हंव। यदि कोनो जवान छोकरी पानी भरे बर आवय, अऊ में ओला कहंव, “मोला अपन घघरी म ले थोरकन पानी पीया,”
GEN 24:44 अऊ यदि ओह मोला कहय, “ले, पी ले, अऊ में तोर ऊंटमन ला घलो पानी पीयाहूं,” त ओहीच ह ओ नोनी होवय, जेला यहोवा ह मोर मालिक के बेटा बर ठहिराय हवय।’
GEN 24:45 “एकर पहिली कि मेंह अपन मन म करत पराथना ला खतम करतेंव, रिबका ह अपन कंधा म घघरी बोहके आईस, अऊ ओह खाल्हे सोता करा जाके पानी भरे लगिस, त में ओला कहेंव, ‘मोला पानी पीया दे ओ।’
GEN 24:46 “अऊ ओह तुरते अपन घघरी ला कंधा ले उतारके कहिस, ‘ले, पी ले, अऊ में तोर ऊंटमन ला घलो पीयाहूं।’ त मेंह पानी पीयेंव, अऊ ओह ऊंटमन ला घलो पानी पीयाईस।
GEN 24:47 “तब मेंह ओला पुछेंव, ‘तेंह काकर बेटी अस?’ “ओह कहिस, ‘में तो नाहोर के घरवाली मिलका के जनमाय बेटा बतूएल के बेटी अंव।’ “तब मेंह ओकर नाक म नकफुली अऊ ओकर हांथ म कंगन पहिरा देंव।
GEN 24:48 फेर में मुड़ नवाके यहोवा के दंडवत करेंव। मेंह यहोवा, मोर मालिक अब्राहम के परमेसर के महिमा करेंव, काबरकि ओह मोला सही रसता म लानिस कि में अपन मालिक के बेटा बर ओकर भाई के नतनीन ला लान सकंव।
GEN 24:49 एकरसेति अब, यदि तुमन मोर मालिक बर दया अऊ ईमानदारी देखाय चाहत हव, त मोला बतावव; अऊ यदि नइं चाहत हव, त ओला घलो बतावव, ताकि में जान सकंव कि मोला कोन कोति जाना हे।”
GEN 24:50 तब लाबान अऊ बतूएल जबाब दीन, “येह यहोवा कोति ले होईसे; एकरसेति हमन तोला न हां कहे सकन, न ना कहे सकन।
GEN 24:51 देख, रिबका इहां हवय; ओला ले जा अऊ ओह यहोवा के बचन के मुताबिक तोर मालिक के बेटा के घरवाली हो जावय।”
GEN 24:52 ओमन के ये बात ला सुनके, अब्राहम के दास ह भुइयां म मुड़ नवाके यहोवा ला दंडवत करिस।
GEN 24:53 तब ओ दास ह सोन अऊ चांदी के जेवर अऊ कपड़ा निकालके रिबका ला दीस; अऊ ओकर भाई अऊ दाई ला घलो ओह मंहगा-मंहगा चीज भेंट म दीस।
GEN 24:54 तब ओ अऊ ओकर संग के मनखेमन खाईन-पीईन अऊ उहां रथिया अराम करिन। जब ओमन दूसर दिन बिहनियां सोके उठिन, त ओह कहिस, “मोला मोर मालिक करा जाय बर बिदा करव।”
GEN 24:55 पर रिबका के भाई अऊ दाई कहिन, “नोनी ला हमर करा कुछू दिन, याने कि कम से कम दस दिन अऊ रहन दे; तब तें ओला ले जाबे।”
GEN 24:56 पर ओह ओमन ला कहिस, “यहोवा ह मोर यातरा ला सफल करिस हे, एकरसेति मोला झन रोकव। अब मोला बिदा करव कि में अपन मालिक करा जावंव।”
GEN 24:57 तब ओमन कहिन, “हमन नोनी ला बलाके एकर बारे म पुछथन।”
GEN 24:58 तब ओमन रिबका ला बलाके पुछिन, “का तें ये मनखे संग जाबे?” ओह कहिस, “हव, में जाहूं।”
GEN 24:59 तब ओमन अपन बहिनी रिबका अऊ ओकर धाई अऊ अब्राहम के दास अऊ ओकर संग के मनखेमन ला बिदा करिन।
GEN 24:60 अऊ ओमन रिबका ला आसीरबाद देके कहिन, “हे हमर बहिनी, तोर संतानमन हजारों लाखों के संखिया म होवंय; तोर संतान के मनखेमन अपन बईरीमन के सहरमन ला अपन अधिकार म करंय।”
GEN 24:61 तब रिबका अऊ ओकर सेविकामन तियार होके ऊंट के ऊपर चघिन अऊ ओ मनखे के संग चल दीन। ये किसम ले ओ दास ह रिबका ला लेके चल दीस।
GEN 24:62 इसहाक ह बेर-लहाय-रोई ले लहुंटके आय रिहिस, अऊ नेगेव देस म रहत रिहिस।
GEN 24:63 एक दिन सांझ के बेरा ओह मैदान म मनन-चिंतन करे बर निकले रिहिस, अऊ जब ओह आंखी उठाके देखिस, त का देखिस कि ऊंटमन आवत रहंय।
GEN 24:64 रिबका ह घलो आंखी उठाके इसहाक ला देखिस, अऊ ओह अपन ऊंट ऊपर ले उतरिस,
GEN 24:65 अऊ दास ले पुछिस, “जऊन मनखे मैदान ले हमर करा भेंट करे बर आवथे, ओह कोन अय?” ओ दास ह जबाब दीस, “ओह तो मोर मालिक अय।” तब रिबका ह अपन घूंघट लेके अपनआप ला ढांप लीस।
GEN 24:66 दास ह इसहाक ला अपन यातरा के पूरा कहानी बताईस।
GEN 24:67 तब इसहाक ह रिबका ला अपन दाई सारा के तम्बू म ले आईस, अऊ ओकर संग बिहाव करिस। ये किसम ले रिबका ह ओकर घरवाली बनिस, अऊ इसहाक ह ओला मया करिस; अऊ इसहाक ला अपन दाई के मऊत के पाछू सांति मिलिस।
GEN 25:1 अब्राहम ह एक झन अऊ माईलोगन ला अपन घरवाली बनाय रिहिस, जेकर नांव कतूरा रिहिस।
GEN 25:2 ओकर ले जिमरान, योकसान, मदान, मिदयान, यिसबाक अऊ सूह जनमिन।
GEN 25:3 योकसान ले सेबा अऊ ददान पईदा होईन; अऊ ददान के संतान अस्सूरी, लतूसी अऊ लुम्मीमन रिहिन।
GEN 25:4 मिदयान के एपा, एपेर, हनोक, अबीदा अऊ एलदा नांव के बेटामन होईन। ये जम्मो कतूरा के संतान रिहिन।
GEN 25:5 इसहाक ला अब्राहम ह अपन जम्मो कुछू ला दे दीस।
GEN 25:6 पर अपन रखैलीमन के बेटामन ला कुछू भेंट देके अपन जीते जी अपन बेटा इसहाक करा ले ओमन ला दूरिहा पूरब देस म पठो दीस।
GEN 25:7 अब्राहम के कुल उमर एक सौ पचहत्तर बछर के होईस।
GEN 25:8 तब अब्राहम के पूरा बुढ़ापा म परान छूट गीस; ओह पूरा उमर के एक डोकरा रिहिस; अऊ ओह मरे के बाद अपन पुरखामन संग जा मिलिस।
GEN 25:9 ओकर बेटा इसहाक अऊ इसमायल ओला हित्ती सोहर के बेटा एपरोन के भुइयां म, ममरे के लकठा म जऊन मकपेला के गुफा रिहिस, ओमा माटी दीन,
GEN 25:10 याने कि जऊन भुइयां ला अब्राहम ह हित्तीमन करा ले बिसाय रिहिस; ओही म अब्राहम ला ओकर घरवाली सारा के संग माटी दीन।
GEN 25:11 अब्राहम के मरे के बाद, परमेसर ह ओकर बेटा इसहाक ला आसीस दीस, जऊन ह ओ बेरा बेर-लहाय-रोई के लकठा म रहत रिहिस।
GEN 25:12 अब्राहम के बेटा इसमायल, जऊन ह सारा के दासी, हाजिरा मिसरी ले जनमे रिहिस, ओकर ये बंसावली अय।
GEN 25:13 इसमायल के बेटामन के नांव ओमन के जनम के मुताबिक ये अय: इसमायल के बड़े बेटा नबायोत, तब केदार, अदबेल, मिबसाम,
GEN 25:14 मिस्मा, दूमा, मस्सा,
GEN 25:15 हदद, तेमा, यतूर, नापीस अऊ केदमा।
GEN 25:16 इसमायल के बेटा येमन रिहिन, अऊ ओमन के बसावट अऊ छावनीमन के मुताबिक ये बारह जाति के परधानमन के नांव अय।
GEN 25:17 इसमायल के कुल उमर एक सौ सैंतीस बछर होईस। तब ओह मर गीस अऊ अपन मनखेमन संग मिल गीस।
GEN 25:18 ओकर संतानमन हवीला ले लेके सूर के छेत्र म बस गीन, जेह मिसर देस के पूरबी सीमना के लकठा म, अस्सूर के रसता म हवय। ओमन अपन जम्मो गोत्र के भाई-बंधुमन के बईरी के सहीं रहत रिहिन।
GEN 25:19 अब्राहम के बेटा इसहाक के परिवार के बिबरन ये अय। अब्राहम ले इसहाक जनम लीस,
GEN 25:20 अऊ इसहाक चालीस बछर के रिहिस, जब ओह रिबका ले बिहाव करिस, जऊन ह पदन-अराम के निवासी, अरामी बतूएल के बेटी अऊ अरामी लाबान के बहिनी रिहिस।
GEN 25:21 इसहाक के घरवाली बांझ रिहिस, एकरसेति ओह अपन घरवाली बर यहोवा ले पराथना करिस अऊ यहोवा ह ओकर पराथना ला सुनिस, अऊ ओकर घरवाली रिबका ला गरभ ठहिरिस।
GEN 25:22 लइकामन ओकर गरभ म एक-दूसर ला धक्का देय लगिन, त ओह कहिस, “मोर संग अइसन काबर होवथे?” एकरसेति ओह यहोवा ले पुछे बर गीस।
GEN 25:23 तब यहोवा ह ओला कहिस, “तोर गरभ म दू ठन जाति हवंय, अऊ तोर म ले दू किसम के मनखेमन निकलके अलग-अलग होहीं; एक दल के मनखेमन दूसर मनखेमन ले जादा बलवान होहीं, अऊ बड़खा बेटा ह छोटे के सेवा करही।”
GEN 25:24 जब रिबका के छेवारी होय के समय आईस, त पता चलिस कि ओकर गरभ म जुड़वां लइका हवंय।
GEN 25:25 जऊन ह पहिली जनमिस, ओह लाल रिहिस, अऊ ओकर जम्मो देहें ह बाल से भरे रिहिस; एकरसेति ओकर नांव एसाव रखे गीस।
GEN 25:26 एकर बाद, ओकर भाई अपन हांथ ले एसाव के एड़ी धरके पईदा होईस; एकरसेति ओकर नांव याकूब रखे गीस। जब रिबका ह ये लइकामन ला जनमिस, तब इसहाक साठ साल के रिहिस।
GEN 25:27 ओ लड़कामन बढ़त गीन, अऊ एसाव ह खुला भुइयां म रहइया, एक चतुर सिकारी हो गीस, पर याकूब ह तम्बू के बीच घर म रहिके संतुस्ट रहय।
GEN 25:28 इसहाक ह सिकार के मांस ला खाना पसंद करय, एकरसेति ओह एसाव ले मया करय, पर रिबका ह याकूब ला मया करय।
GEN 25:29 एक दिन जब याकूब ह कुछू रांधत रिहिस, त एसाव ह खुला मैदान कोति ले आईस अऊ ओला बहुंत भूख लगत रहय।
GEN 25:30 त ओह याकूब ला कहिस, “जऊन लाल चीज ला तेंह रांधत हस, जल्दी करके ओमा के कुछू मोला दे, काबरकि मोला बहुंत भूख लगत हे!” (एकरसेति ओला एदोम घलो कहे जावय।)
GEN 25:31 याकूब ह कहिस, “पहिले तें अपन पहिलऊठा के अधिकार मोर करा बेच दे।”
GEN 25:32 एसाव ह कहिस, “देख, में तो मरइया हंव, त पहिलऊठा के अधिकार ले मोला का फायदा?”
GEN 25:33 पर याकूब ह कहिस, “पहिले तें मोर करा किरिया खा।” त ओह किरिया खाके याकूब करा अपन पहिलऊठा के अधिकार ला बेच दीस।
GEN 25:34 तब याकूब ह एसाव ला कुछू रोटी अऊ रंधाय दाल दीस। ओह खाईस-पीईस अऊ उठके चल दीस। ये किसम ले, एसाव ह अपन पहिलऊठा के अधिकार ला तुछ जानिस।
GEN 26:1 कुछू समय के बाद, ओ देस म अकाल परिस, एकरे बर इसहाक ह पलिस्तीमन के राजा अबीमेलेक करा गरार म गीस। ये ओ अकाल ले अलग रिहिस, जऊन ह अब्राहम के समय म परे रिहिस।
GEN 26:2 गरार म यहोवा ह इसहाक ला दरसन देके कहिस, “मिसर देस म झन जा; मेंह तोला जऊन देस म रहे बर कहथंव, ओही देस म रह।
GEN 26:3 तें ये देस म कुछू समय तक रह, अऊ में तोर संग रहिहूं अऊ तोला आसीस दूहूं। ये पूरा देस में तोला अऊ तोर संतानमन ला दूहूं; ये किसम ले जऊन किरिया में तोर ददा अब्राहम करा खाय रहेंव, ओला पूरा करहूं।
GEN 26:4 में तोर संतानमन ला अकास के तारामन सहीं अनगिनत करहूं अऊ ओमन ला ये जम्मो देस ला दूहूं, अऊ तोर संतान के जरिये धरती के जम्मो जाति के मनखेमन आसीस पाहीं,
GEN 26:5 काबरकि अब्राहम ह मोर बात मानिस, अऊ जऊन हुकूम, नियम अऊ निरदेस, में ओला दे रहेंव, ओ जम्मो के पालन करिस।”
GEN 26:6 एकरे बर इसहाक ह गरार म रह गीस।
GEN 26:7 जब ओ ठऊर के मनखेमन ओकर घरवाली के बारे म ओकर ले पुछिन, त ओह कहिस, “ओह मोर बहिनी अय।” काबरकि ओह ये सोचके डरत रिहिस कि यदि में ओला अपन घरवाली कहिहूं, त इहां के मनखेमन रिबका के कारन मोला मार डारहीं, काबरकि ओह सुन्दर हवय।
GEN 26:8 जब ओला उहां रहत बहुंत दिन बीत गीस, तब एक दिन पलिस्तीमन के राजा अबीमेलेक ह खिड़की ले झांकके देखिस कि इसहाक ह अपन घरवाली रिबका के संग प्रेमालाप करत हे।
GEN 26:9 तब अबीमेलेक ह इसहाक ला बलाके कहिस, “ओह सही म तोर घरवाली अय! फेर तें काबर ओला अपन बहिनी कहय?” इसहाक ह जबाब दीस, “मेंह सोचेंव कि ओकर कारन मोला अपन परान गंवाना पड़ सकत हे।”
GEN 26:10 तब अबीमेलेक ह कहिस, “तेंह हमर संग ये का करे हस? अइसन म तो कोनो भी मनखे तोर घरवाली संग आसानी से कुकरम कर सकत रिहिस, अऊ तें हमन ला पाप म फंसाते।”
GEN 26:11 एकर कारन अबीमेलेक ह जम्मो मनखेमन ला हुकूम दीस, “जऊन ह भी ओ मनखे अऊ ओकर घरवाली संग गलत बेवहार करही, ओह खचित मार डारे जाही।”
GEN 26:12 फेर इसहाक ह ओ देस म खेती करिस, अऊ ओही बछर म सौ गुना फर पाईस, काबरकि यहोवा ह ओला आसीस दीस।
GEN 26:13 अऊ ओह धनी हो गीस, अऊ ओकर धन लगातार बढ़त गीस अऊ ओह बहुंत धनी हो गीस।
GEN 26:14 जब ओकर बहुंत भेड़-बकरी, गरूवा-बईला, अऊ नौकर-चाकर हो गीन; तब पलिस्तीमन ओकर ले जलन करे लगिन।
GEN 26:15 एकर कारन जतेक कुआंमन ला ओकर ददा के सेवकमन ओकर ददा अब्राहम के जीते जी खने रिहिन, ओला पलिस्तीमन माटी पाटके बंद कर दीन।
GEN 26:16 तब अबीमेलेक ह इसहाक ला कहिस, “हमर पास ले चले जा, काबरकि तें हमन ले बहुंत बलवान हो गे हस।”
GEN 26:17 एकरे बर इसहाक उहां ले चल दीस अऊ गरार के घाटी म अपन तम्बू ठाढ़ करके उहां रहे लगिस।
GEN 26:18 तब जऊन कुआंमन ला ओकर ददा के समय खने गे रिहिस, अऊ अब्राहम के मरे के पाछू पलिस्तीमन पाट दे रिहिन, ओमन ला इसहाक ह फेर खनवाईस, अऊ ओमन के ओहीच नांव रखिस, जे नांव ओकर ददा ह रखे रिहिस।
GEN 26:19 फेर इसहाक के दासमन घाटी म खोदई करिन अऊ उहां ओमन ला ताजा पानी के एक ठन कुआं मिलिस।
GEN 26:20 पर गरार के चरवाहामन इसहाक के चरवाहामन संग झगरा करिन अऊ ओमन कहिन, “ये पानी हमर अय।” एकरे बर ओह ओ कुआं के नांव एसेक रखिस; काबरकि ओमन ओकर संग झगरा करे रिहिन।
GEN 26:21 तब ओमन आने कुआं खनिन, पर ओमन ओकर बर घलो झगरा करिन; एकरे बर ओह ओकर नांव सितनाह रखिस।
GEN 26:22 तब ओह उहां ले निकलके एक अऊ कुआं खनवाईस, अऊ ओकर बर उहां कोनो झगरा नइं करिन। ओह ओकर नांव ये कहिके रहोबोत रखिस, “अब यहोवा ह हमन ला बहुंत जगह दे हवय अऊ हमन ये देस म फूलबो-फरबो।”
GEN 26:23 उहां ले इसहाक ह बेरसेबा चल दीस।
GEN 26:24 ओ रथिया यहोवा ह ओला दरसन देके कहिस, “मेंह तोर ददा अब्राहम के परमेसर अंव। झन डर, काबरकि मेंह तोर संग हवंव; में अपन दास अब्राहम ले करे परतिगियां के कारन तोला आसीस दूहूं अऊ तोर संतानमन के गनती ला बढ़ाहूं।”
GEN 26:25 तब इसहाक ह उहां एक ठन बेदी बनाईस अऊ यहोवा के अराधना करिस। उहां ओह अपन तम्बू ठाढ़ करिस, अऊ उहां ओकर दासमन एक ठन कुआं खनिन।
GEN 26:26 ये बीच म, अबीमेलेक ह अपन सलाहकार अहुज्जत अऊ अपन सेना के सेनापति पीकोल के संग गरार ले इसहाक करा आईस,
GEN 26:27 त इसहाक ह ओमन ले पुछिस, “तुमन मोर ले बईरता करके मोला अपन बीच ले निकाल दे रहेव, अब मोर करा काबर आय हवव?”
GEN 26:28 ओमन जबाब दीन, “हमन सच म देख डारेंन कि यहोवा ह तोर संग रहिथे; एकरे बर हमन सोचेंन कि हमर बीच म किरिया खाके करार होना चाही—हमर अऊ तोर बीच म। आ, हमर संग करार कर
GEN 26:29 कि तेंह हमर कोनो हानि नइं करबे, जइसन कि हमन तोर कोनो हानि नइं करेंन, पर तोर संग हमेसा बने बरताव करेंन अऊ तोला सांति से बिदा करेंन। अऊ अब तें यहोवा के दुवारा आसीसित अस।”
GEN 26:30 तब इसहाक ह ओमन बर एक भोज करिस अऊ ओमन खाईन-पीईन।
GEN 26:31 दूसर दिन बड़े बिहनियां ओ मनखेमन एक-दूसर ले किरिया खाईन। तब इसहाक ह ओमन ला बिदा करिस, अऊ ओमन सांति से उहां ले चल दीन।
GEN 26:32 ओही दिन इसहाक के दासमन आके ओ खने गय कुआं के बारे बताईन। ओमन कहिन, “हमन ला पानी मिल गे हवय।”
GEN 26:33 तब ओह ओकर नांव सिबा रखिस, अऊ आज तक ओ नगर के नांव बेरसेबा परे हे।
GEN 26:34 जब एसाव ह चालीस बछर के होईस, त ओह हित्ती बेरी के बेटी यूदीत, अऊ हित्ती एलोन के बेटी बासमत ले बिहाव कर लीस।
GEN 26:35 ओमन इसहाक अऊ रिबका के दुख के कारन रिहिन।
GEN 27:1 जब इसहाक ह डोकरा हो गीस अऊ ओकर आंखी ह अतेक कमजोर हो गीस कि ओला दिखना ही बंद हो गीस, तब ओह अपन बड़खा बेटा एसाव ला बलाके कहिस, “हे बेटा।” ओह कहिस, “में इहां हंव।”
GEN 27:2 इसहाक ह कहिस, “सुन, में तो डोकरा हो गे हंव अऊ नइं जानंव कि कब मर जाहूं।
GEN 27:3 एकरसेति, अब तें अपन साज-सामान—तीर-धनुस लेके खुले मैदान म जा, अऊ मोर बर कोनो जंगली पसु सिकार करके लान,
GEN 27:4 अऊ मोर मन के लईक सुवादवाला जेवन बनाके मोर करा लान कि में ओला खाके मरे के पहिली तोला आसीस देवंव।”
GEN 27:5 जब इसहाक ह अपन बेटा एसाव ले गोठियावत रिहिस, त ओ बात ला रिबका ह सुनत रिहिस। जब एसाव ह सिकार करे बर खुला मैदान म चल दीस,
GEN 27:6 त रिबका ह अपन बेटा याकूब ला कहिस, “देख, मेंह तोर ददा ला तोर भईया एसाव ले ये कहत सुने हंव,
GEN 27:7 ‘तें मोर बर सिकार करके लान अऊ सुवादवाला जेवन बना कि में मरे के पहिली ओला खाके तोला यहोवा के आघू म आसीस देवंव।’
GEN 27:8 एकरसेति, हे मोर बेटा, धियान से सुन अऊ मोर बात ला मान:
GEN 27:9 पसुमन के झुंड म जाके दू ठन बने-बने बोकरा-पीला ले आन कि में तोर ददा बर ओकर मन के लईक सुवादवाला जेवन बनावंव।
GEN 27:10 तब तें ओला अपन ददा करा ले जाबे कि ओह ओला खाके मरे के पहिली तोला आसीस देवय।”
GEN 27:11 याकूब ह अपन दाई रिबका ला कहिस, “देख, मोर भईया एसाव तो रूआंवाला मनखे अय, पर में तो बिन रूआं के अंव।
GEN 27:12 कहूं मोर ददा मोला छूही, तब का होही? में तो ओकर नजर म धोखा देवइया हो जाहूं अऊ आसीस के बदला म मोला सराप मिलही।”
GEN 27:13 ओकर दाई ह ओला कहिस, “हे मोर बेटा, सराप तोला नइं, मोला मिलय। में जऊन बात कहत हंव, ओला कर; जा अऊ बोकरामन ला मोर करा ले आन।”
GEN 27:14 तब याकूब ह जाके बोकरामन ला अपन दाई करा ले आईस, अऊ ओकर दाई ह ओकर ददा के मन के लईक सुवादवाला जेवन बना दीस।
GEN 27:15 तब रिबका ह अपन बड़खा बेटा एसाव के सबले सुन्दर कपड़ा ला लीस, जऊन ह कि ओकर करा घर म रिहिस अऊ ओला लेके अपन छोटे बेटा याकूब ला पहिरा दीस।
GEN 27:16 अऊ ओह बोकरा के खाल ला लेके याकूब के हांथमन म अऊ ओकर चिकना घेंच म लपेट दीस।
GEN 27:17 तब ओह सुवादवाला जेवन अऊ अपन बनाय रोटी ला अपन बेटा याकूब के हांथ म धरा दीस।
GEN 27:18 याकूब ह अपन ददा करा गीस अऊ कहिस, “हे मोर ददा।” ओकर ददा ह कहिस, “हव, मोर बेटा, तेंह कोन अस?”
GEN 27:19 याकूब ह अपन ददा ला कहिस, “मेंह तोर बड़खा बेटा एसाव अंव। जइसे तेंह मोला कहे रहय, वइसे मेंह करे हंव। बईठ जा अऊ मोर दुवारा सिकार करके लाने गे मांस ला खा अऊ मोला आसीस दे।”
GEN 27:20 इसहाक ह अपन बेटा ले पुछिस, “येह तोला अतकी जल्दी कइसे मिल गीस, बेटा?” ओह जबाब दीस, “यहोवा तोर परमेसर ह मोला सफल करिस।”
GEN 27:21 तब इसहाक ह याकूब ला कहिस, “मोर लकठा म आ कि में तोला छुवंव, मोर बेटा, अऊ जानंव कि तें सही म मोर बेटा एसाव अस कि नइं।”
GEN 27:22 याकूब ह अपन ददा इसहाक के लकठा म गीस; तब इसहाक ह ओला छुईस अऊ कहिस, “अवाज तो याकूब के अवाज अय, पर हांथमन एसाव के हांथ अंय।”
GEN 27:23 इसहाक ह याकूब ला नइं चिन्हिस, काबरकि ओकर हांथमन ओकर भईया एसाव के सहीं रूआंदार रिहिन; एकर बर इसहाक ह ओला आसीस देय के सुरू करिस।
GEN 27:24 अऊ ओह पुछिस, “का सही म, तें मोर बेटा एसाव अस?” ओह कहिस, “हव, में अंव।”
GEN 27:25 तब इसहाक ह कहिस, “हे मोर बेटा, सिकार के मांस ला मोर करा ले आ कि में ओला खावंव अऊ तोला अपन आसीस देवंव।” ओह मांस ला इसहाक करा ले आईस अऊ ओह खाईस; अऊ याकूब ह ओकर करा अंगूर के मंद घलो लानिस अऊ ओह खाईस-पीईस।
GEN 27:26 तब ओकर ददा इसहाक ह ओला कहिस, “हे मोर बेटा, इहां आ अऊ मोला चूम।”
GEN 27:27 याकूब ह ओकर करा गीस अऊ ओला चूमिस। जब इसहाक ह ओकर कपड़ा के गंध पाईस, त ओला आसीस दीस अऊ कहिस, “अहा, मोर बेटा के सुगंध ह अइसन खेत के सुगंध सहीं अय जऊन ला यहोवा ह आसीस दे हवय।
GEN 27:28 परमेसर तोला अकास ले ओस अऊ धरती के उत्तम चीज— बहुंत अकन अनाज अऊ अंगूर के नवां मंद देवय।
GEN 27:29 जाति-जाति के मनखेमन तोर सेवा करंय अऊ मनखेमन तोला झुकके दंडवत करंय। तें अपन भाईमन के सुवामी हो जा, अऊ तोर दाई के बेटामन तोला दंडवत करंय। जऊन मन तोला सराप देवंय, ओमन खुद सराप पावंय अऊ जऊन मन तोला आसीस देवंय, ओमन आसीस पावंय।”
GEN 27:30 जब इसहाक ह याकूब ला आसीस दे चुकिस, अऊ याकूब ह अपन ददा इसहाक करा ले निकले ही रिहिस कि ओकर भाई एसाव ह सिकार करके घर आ गीस।
GEN 27:31 ओह घलो सुवादवाला जेवन बनाके अपन ददा करा लानिस अऊ कहिस, “हे मोर ददा, बईठ जा अऊ मोर दुवारा सिकार करके लाने गे मांस ला खा अऊ मोला अपन आसीस दे।”
GEN 27:32 ओकर ददा इसहाक ह ओकर ले पुछिस, “तें कोन अस?” ओह कहिस, “मेंह तोर बड़खा बेटा एसाव अंव।”
GEN 27:33 इसहाक ह बहुंत थरथरात कहिस, “फेर ओह कोन रिहिस, जेह सिकार करके मोर करा लानिस? अभी तोर आय के पहिली ही ओ सिकार के मांस ला में खायेंव अऊ ओला आसीस देंव—अऊ सही म ओला आसीस मिलही।”
GEN 27:34 अपन ददा के ये गोठ सुनके एसाव ह दुख के मारे नरियाके अऊ फूट-फूटके रोईस अऊ अपन ददा ला कहिस, “हे मोर ददा, मोला आसीस दे—मोला घलो आसीस दे!”
GEN 27:35 पर ओह कहिस, “तोर भाई धोखा से आईस अऊ तोर आसीस ला ले लीस।”
GEN 27:36 एसाव ह कहिस, “का ओकर नांव याकूब सही नइं रखे गे हे? येह दूसर बार ए, ओह मोर ले फायदा उठाय हवय: ओह मोर पहिलऊठा के अधिकार ला ले लीस, अऊ अब ओह मोर आसीस ला घलो ले गीस!” तब ओह अपन ददा ले पुछिस, “का तेंह मोर बर कोनो आसीस नइं रखे हस?”
GEN 27:37 इसहाक ह एसाव ला जबाब दीस, “मेंह ओला तोर ऊपर सुवामी ठहिराय हंव अऊ ओकर जम्मो रिस्तेदार ला ओकर सेवक बनाय हंव, अऊ मेंह ओला अनाज अऊ अंगूर के नवां मंद ले आसीसित करे हंव। अब हे मोर बेटा, में तोर बर का कर सकत हंव?”
GEN 27:38 एसाव ह अपन ददा ला कहिस, “हे मोर ददा, का तोर करा सिरिप एके ठन आसीस हवय? हे मोर ददा, मोला घलो आसीस दे!” तब एसाव चिचिया-चिचियाके रोईस।
GEN 27:39 ओकर ददा इसहाक ह ओला जबाब दीस, “तोर निवास ह धरती के उपजाऊ भुइयां ले दूरिहा होही, ऊपर के अकास के ओस ओमा नइं पड़ही।
GEN 27:40 तेंह तलवार के बल म जिनगी जीबे अऊ तेंह अपन भाई के सेवा करबे। पर जब तेंह बियाकुल हो जाबे, त तेंह ओकर सेवा करई छोंड़ देबे।”
GEN 27:41 एसाव ह ओ आसीस के कारन याकूब बर बईरता के भावना रखय, जऊन ला ओकर ददा ह याकूब ला देय रिहिस। ओह अपन मन म कहिस, “मोर ददा के मरे के दिन ह लकठा म हे; तब में अपन भाई याकूब ला मार डारहूं।”
GEN 27:42 जब रिबका ला ओकर बड़खा बेटा एसाव के ये बात बताय गीस, त ओह अपन छोटे बेटा याकूब ला बलाके कहिस, “सुन, तोर भईया एसाव ह बदला लेय बर तोला मार डारे के योजना बनावत हे।
GEN 27:43 एकरसेति हे मोर बेटा, मोर बात ला मान: तुरते मोर भाई लाबान करा हारान नगर म भाग जा।
GEN 27:44 अऊ कुछू समय तक ओकरे संग रह, जब तक कि तोर भईया के गुस्सा नइं उतर जावय।
GEN 27:45 जब तोर भईया के गुस्सा ह खतम हो जाही अऊ जऊन काम तेंह ओकर बिरूध करे हवस, ओला भुला जाही, तब में तोला खबर भिजवाके उहां ले बला लूहूं। अइसन झन हो कि एके दिन म, में तुमन दूनों झन ला गंवा दंव।”
GEN 27:46 तब रिबका ह इसहाक ला कहिस, “ये हित्ती माईलोगनमन के कारन, में अपन जिनगी ले असकटा गे हंव। यदि याकूब ह ये देस के कोनो माईलोगन ला याने कि ये हित्ती माईलोगनमन ले कोनो ला अपन घरवाली बना लेथे, त फेर मोर जीये के कोनो मतलब नइं होही।”
GEN 28:1 एकरसेति इसहाक ह याकूब ला बलाके आसीस दीस, अऊ ओला हुकूम दीस: “तें कोनो कनानी छोकरी ले बिहाव झन करबे।
GEN 28:2 तें तुरते पदन-अराम म, अपन नाना बतूएल के घर जा। उहां तोर ममा लाबान के कोनो बेटी ले बिहाव कर ले।
GEN 28:3 सर्वसक्तिमान परमेसर ह तोला आसीस देवय अऊ तोला फूलाय-फलाय अऊ तोर गनती ला बढ़ाय, जब तक कि तें मनखेमन के एक समाज नइं बन जावस।
GEN 28:4 ओह अब्राहम ले करे गे परतिगियां के आसीस तोला अऊ तोर बंस ला देवय, ताकि तें ये देस के मालिक बन जा, जिहां अभी तें एक परदेसी के रूप म रहिथस, अऊ जेला परमेसर ह अब्राहम ला दे रिहिस।”
GEN 28:5 तब इसहाक ह याकूब ला बिदा करिस, अऊ ओह पदन-अराम म अरामी बतूएल के बेटा लाबान के घर गीस। लाबान ह याकूब अऊ एसाव के दाई रिबका के भाई रिहिस।
GEN 28:6 जब एसाव ला ये पता चलिस कि इसहाक ह याकूब ला आसीस दे हवय अऊ ओला पदन-अराम पठोय हवय कि ओह उहां बिहाव करय, अऊ ओला आसीस देके ये हुकूम दे हवय, “तें कोनो कनानी माईलोगन ले बिहाव झन करबे,”
GEN 28:7 अऊ याकूब ह अपन दाई-ददा के बात मानके पदन-अराम ला चल दे हवय।
GEN 28:8 तब एसाव महसूस करिस कि कनानी छोकरीमन ओकर ददा इसहाक ला कतेक नापसंद रिहिन;
GEN 28:9 एकरसेति ओह अब्राहम के बेटा इसमायल करा गीस, अऊ इसमायल के बेटी महलत ले बिहाव कर लीस, जऊन ह कि नबायोत के बहिनी रिहिस। एसाव के अऊ घलो घरवाली रिहिन।
GEN 28:10 याकूब ह बेरसेबा ला छोंड़के हारान जाय बर निकलिस।
GEN 28:11 जब ओह एक जगह म हबरिस, त उहां रात काटे बर रूकिस काबरकि बेर बुड़ गे रहय। उहां एक पथरा ला लेके अपन मुड़ खाल्हे तकिया के रूप म रखिस अऊ सुत गीस।
GEN 28:12 ओह सपना म देखिस कि एक सीढ़ी धरती म ठाढ़े हे अऊ ओकर दूसर छोर ह स्वरग तक हबरत हे, अऊ परमेसर के स्वरगदूतमन ओमा चघत-उतरत हवंय।
GEN 28:13 ओकर ऊपर म यहोवा ह ठाढ़ होके कहत हे: “में यहोवा, तोर दादा अब्राहम के परमेसर अऊ तोर ददा इसहाक के परमेसर अंव। जऊन भुइयां म तेंह सुते हस, ओला में तोला अऊ तोर बंस ला दूहूं।
GEN 28:14 तोर संतानमन भुइयां के धुर्रा सहीं अनगिनत होहीं, अऊ ओमन पछिम, पूरब, उत्तर, दक्खिन, चारों कोति बगर जाहीं। धरती के जम्मो मनखेमन तोर अऊ तोर संतान के जरिये आसीस पाहीं।
GEN 28:15 सुन, में तोर संग हवंव अऊ जिहां कहूं तें जाबे, में तोर रकछा करहूं, अऊ मेंह तोला ये देस म लहुंटाके लानहूं। मेंह तोर ले जऊन परतिगियां करे हंव, जब तक ओला पूरा नइं कर लूहूं, तब तक में तोला नइं छोड़ंव।”
GEN 28:16 जब याकूब ह नींद ले जागिस, त ओह सोचिस, “सही म, ये ठऊर म यहोवा हवय, अऊ में ये बात ला नइं जानत रहेंव।”
GEN 28:17 ओह डर के मारे कहिस, “ये ठऊर ह कतेक बढ़िया हवय! येह परमेसर के घर के छोंड़ अऊ कुछू नइं हो सकय; येह स्वरग के कपाट अय।”
GEN 28:18 बड़े बिहनियां याकूब ह ओ पथरा ला लीस, जऊन ला ओह अपन मुड़ के खाल्हे तकिया के रूप म रखे रिहिस अऊ ओला खंभा के रूप म ठाढ़ करिस अऊ ओकर टीप म तेल रितो दीस।
GEN 28:19 ओह ओ ठऊर के नांव बेतेल रखिस, हालाकि ओ सहर के नांव लूज रिहिस।
GEN 28:20 तब याकूब ह ये मन्नत मानके कहिस, “यदि परमेसर ह मोर संग रहिही अऊ ये यातरा म मोर रकछा करही अऊ मोला खाय बर रोटी अऊ पहिरे बर कपड़ा दीही
GEN 28:21 अऊ में अपन ददा के घर म सही-सलामत लहुंटके आहूं, त यहोवा ह मोर परमेसर ठहिरही
GEN 28:22 अऊ ये पथरा जेला मेंह खंभा के रूप म ठाढ़ करे हवंव, परमेसर के घर होही, अऊ जऊन कुछू तें मोला देबे, ओ जम्मो के दसवां हिस्सा में तोला दूहूं।”
GEN 29:1 तब याकूब ह अपन यातरा म आघू बढ़िस अऊ पूरब दिग के मनखेमन के देस म आईस।
GEN 29:2 उहां ओह मैदान म एक कुआं देखिस, जेकर लकठा म भेड़-बकरीमन के तीन झुंड बईठे रहंय, काबरकि ओमन ला ओ कुआं ले पानी पीयाय जावय। कुआं के मुहूं के ऊपर के पथरा ह बहुंत बड़े रिहिस।
GEN 29:3 जब जम्मो झुंड ह उहां जमा होवय, त चरवाहामन कुआं के मुहूं ले पथरा ला हटाके भेड़-बकरीमन ला पानी पीयावंय, अऊ तब ओमन पथरा ला फेर कुआं के मुहूं ऊपर जइसन के तइसन मढ़ा दें।
GEN 29:4 याकूब ह चरवाहामन ला पुछिस, “हे भाईमन, तुमन कहां के अव?” ओमन जबाब दीन, “हमन हारान के अन।”
GEN 29:5 तब ओह ओमन ले पुछिस, “का तुमन नाहोर के पोता लाबान ला जानथव?” ओमन जबाब दीन, “हव, हमन ओला जानथन।”
GEN 29:6 तब याकूब ह ओमन ले पुछिस, “का ओह बने हवय?” ओमन कहिन, “हव, ओह बने हवय, अऊ देख, ओकर बेटी राहेल ह भेड़मन ला लेके आवत हे।”
GEN 29:7 ओह कहिस, “देखव, अभी तो दिन बहुंत हे; अभी पसुमन के जूरे के बेरा नइं होय हे। भेड़मन ला पानी पीयावव अऊ फेर ले जाके चरावव।”
GEN 29:8 ओमन कहिन, “हमन अइसन नइं कर सकन; जब जम्मो झुंड ह जूरही अऊ पथरा ह कुआं के मुहूं ले टारे जाही, तब हमन भेड़मन ला पानी पीयाबो।”
GEN 29:9 जब ओह ओमन ले गोठियावत रिहिस, तभे राहेल ह अपन ददा के भेड़मन ला लेके आईस, काबरकि ओह पसु चराय के बुता करय।
GEN 29:10 जब याकूब ह अपन ममा लाबान के बेटी राहेल, अऊ अपन ममा के भेड़मन ला देखिस, त ओह उहां जाके कुआं के मुहूं ले पथरा ला टार दीस अऊ अपन ममा के भेड़मन ला पानी पीयाईस।
GEN 29:11 तब याकूब ह राहेल ला चूमिस अऊ चिचिया-चिचियाके रोये लगिस।
GEN 29:12 ओह राहेल ला बता दे रिहिस कि ओह ओकर फुफेरा भाई ए, याने कि ओकर फूफू रिबका के बेटा ए। एकरसेति राहेल ह दऊड़के गीस अऊ अपन ददा ला बताईस।
GEN 29:13 अपन भांचा याकूब के खबर पाते ही, लाबान तुरते ओकर संग भेंट करे बर गीस। ओह ओला पोटारके चूमिस अऊ ओला अपन घर ले आईस, अऊ उहां याकूब ओला अपन जम्मो बात बताईस।
GEN 29:14 तब लाबान ह ओला कहिस, “तें तो मोर खुद के मांस अऊ लहू अस।” याकूब के लाबान संग एक महिना रहे के बाद,
GEN 29:15 लाबान ह ओला कहिस, “रिस्तेदार अस तभो ले तोला सोझे म बुता कराना मोला बने नइं लगय, त मोला बता कि बुता करे के बदला म में तोला का देवंव?”
GEN 29:16 लाबान के दू झन बेटी रिहिन; बड़की के नांव लिआ अऊ छोटकी के नांव राहेल रिहिस।
GEN 29:17 लिआ के आंखीमन कमजोर रिहिन, पर राहेल ह रूपवती अऊ सुघर रिहिस।
GEN 29:18 याकूब ह राहेल ले मया करय, एकरसेति ओह कहिस, “में तोर छोटे बेटी राहेल बर सात बछर तोर काम करहूं।”
GEN 29:19 लाबान ह कहिस, “ये बने बात अय कि ओला कोनो अऊ मनखे ला देय के बदले तोला देवंव। इहां मोर संग रह।”
GEN 29:20 याकूब सात बछर तक राहेल ला पाय बर सेवा करिस, पर ये सात बछर ह ओला सिरिप कुछू दिन सहीं लगिस काबरकि ओह राहेल ले मया करय।
GEN 29:21 तब याकूब ह लाबान ला कहिस, “मोर घरवाली ला मोला दे। मोर समय ह पूरा हो गीस, अऊ अब मेंह ओकर मेर जाय चाहत हंव।”
GEN 29:22 तब लाबान ह उहां के जम्मो मनखे ला इकट्ठा करिस अऊ ओमन ला एक भोज दीस।
GEN 29:23 पर जब सांझ होईस, त ओह अंधियार के बेरा अपन बेटी लिआ ला याकूब करा लानिस, अऊ याकूब ओकर संग संबंध बनाईस।
GEN 29:24 लाबान ह अपन बेटी लिआ के दासी होय बर अपन दासी जिलपा ला दीस।
GEN 29:25 जब बिहान होईस, तब पता चलिस कि ये तो लिआ ए। एकरसेति याकूब ह लाबान ला कहिस, “तें मोर संग ये का करे हस? का में तोर सेवा राहेल बर नइं करेंव? तें मोला काबर धोखा दे हस?”
GEN 29:26 लाबान ह जबाब दीस, “हमर इहां अइसन रीति नइं ए कि बड़की बेटी के रहत छोटकी बेटी के बिहाव करन।
GEN 29:27 बेटी के बिहाव उत्सव के ये हप्ता ला पूरा कर; फेर हमन छोटकी ला घलो तोला देबो, तेकर बर तोला अऊ सात साल मोर काम करना पड़ही।”
GEN 29:28 तब याकूब ह वइसनेच करिस। ओह लिआ के संग हप्ता पूरा करिस, अऊ तब लाबान ह ओला अपन बेटी राहेल ला घलो दीस कि ओह ओकर घरवाली होवय।
GEN 29:29 लाबान ह अपन बेटी राहेल के दासी होय बर अपन दासी बिलहा ला दीस।
GEN 29:30 याकूब ह राहेल ले घलो संबंध बनाईस, अऊ ओकर मया लिआ ले जादा राहेल बर रहय। अऊ ओह लाबान बर अऊ सात बछर काम करिस।
GEN 29:31 जब यहोवा ह देखिस कि लिआ ह मया नइं पावत हे, त ओह ओला गरभ ठहिरे के आसीस दीस, पर राहेल बांझ रहय।
GEN 29:32 लिआ ह आसरा म होईस अऊ एक बेटा ला जनमिस। ओह ये कहिके ओकर नांव रूबेन रखिस, “यहोवा ह मोर दुख कोति धियान दे हवय। अब मोर घरवाला ह खचित मोला मया करही।”
GEN 29:33 ओह फेर आसरा म होईस, अऊ ओकर फेर एक बेटा होईस, त ओह कहिस, “काबरकि यहोवा ह सुनिस कि मोला मया नइं मिलत हे, तेकर खातिर ओह मोला ये बेटा घलो दीस।” अऊ ओह ओकर नांव सिमोन रखिस।
GEN 29:34 ओह फेर आसरा म होईस, अऊ ओकर फेर एक बेटा होईस, त ओह कहिस, “अब मोर घरवाला ह मोला मिल जाही, काबरकि ओकर दुवारा मोर तीन बेटा होईन।” एकरसेति ओकर नांव लेवी रखे गीस।
GEN 29:35 ओह फेर आसरा म होईस, अऊ ओकर एक अऊ बेटा होईस, त ओह कहिस, “अब के बार में यहोवा के परसंसा करहूं।” एकरसेति ओह ओकर नांव यहूदा रखिस। तब कुछू समय तक ओला लइका नइं होईस।
GEN 30:1 जब राहेल ह देखिस कि याकूब कोति ले ओला कोनो लइका नइं होवथे, त ओह अपन बहिनी ले जलन करे लगिस। ओह याकूब ला कहिस, “मोला लइका दे, नइं तो में मर जाहूं।”
GEN 30:2 याकूब ह राहेल ऊपर गुस्सा होके कहिस, “का में परमेसर अंव? तोर कोख ला तो ओही ह बंद रखे हवय।”
GEN 30:3 तब राहेल ह कहिस, “ये दे मोर दासी बिलहा इहां हवय। ओकर ले संबंध बना ताकि ओह मोर बर लइका जनमे अऊ में घलो ओकर जरिये एक परिवार बनावंव।”
GEN 30:4 त ओह अपन दासी बिलहा ला ओकर घरवाली होय बर दीस। याकूब ओकर करा गीस,
GEN 30:5 अऊ बिलहा ह आसरा म होईस अऊ याकूब ले ओला एक बेटा होईस।
GEN 30:6 तब राहेल ह कहिस, “परमेसर ह मोर नियाय करे हवय; ओह मोर बिनती ला सुनके मोला एक बेटा दे हवय।” एकर कारन ओह ओकर नांव दान रखिस।
GEN 30:7 राहेल के दासी बिलहा फेर आसरा म होईस अऊ याकूब ले ओकर एक अऊ बेटा होईस।
GEN 30:8 तब राहेल ह कहिस, “मोर बहिनी के संग मोर बहुंत संघर्स होईस, अऊ में जीत गेंव।” त ओह ओकर नांव नपताली रखिस।
GEN 30:9 जब लिआ देखिस कि अब ओकर लइका नइं होवथे, त ओह अपन दासी जिलपा ला याकूब के घरवाली होय बर दीस।
GEN 30:10 अऊ लिआ के दासी जिलपा ले याकूब के एक बेटा होईस।
GEN 30:11 तब लिआ ह कहिस, “कतेक बढ़िया किस्मत!” त ओह ओकर नांव गाद रखिस।
GEN 30:12 लिआ के दासी जिलपा के याकूब ले एक अऊ बेटा होईस।
GEN 30:13 तब लिआ ह कहिस, “में बहुंत खुस हंव! माईलोगनमन मोला धइन कहिहीं।” त ओह ओकर नांव आसेर रखिस।
GEN 30:14 गहूं लुवई के समय, रूबेन ला मैदान म कुछू दूदा फर मिलिस, जेला ओह अपन दाई लिआ करा ले गीस। तब राहेल ह लिआ ला कहिस, “तोर बेटा के दूदा फर म ले कुछू महूं ला दे।”
GEN 30:15 पर लिआ ह ओला कहिस, “तेंह जो मोर घरवाला ला लेय ले हस; का येह छोटे बात अय? अऊ अब मोर बेटा के दूदा फर ला घलो लेय चाहत हस?” राहेल ह कहिस, “ठीक हे, तोर बेटा के दूदा फर के बदला म, आज रथिया हमर घरवाला ह तोर करा सुतही।”
GEN 30:16 सांझकुन जब याकूब ह खेत ले आईस, त लिआ ह ओकर ले भेंट करे बर गीस अऊ ओला कहिस, “तोला मोर करा आय बर पड़ही, काबरकि मेंह अपन बेटा के दूदा फर के बदला म तोला लेय ले हंव।” त याकूब ह ओ रथिया ओकर संग सुतिस।
GEN 30:17 परमेसर ह लिआ के सुनिस, अऊ ओह आसरा म होके याकूब बर पांचवां बेटा जनमिस।
GEN 30:18 तब लिआ ह कहिस, “में जो अपन दासी ला अपन घरवाला ला देंव, एकरे बर परमेसर ह मोला ईनाम दे हवय।” त ओह ओकर नांव इस्साकार रखिस।
GEN 30:19 लिआ फेर आसरा म होईस अऊ याकूब ले ओकर छठवां बेटा जनमिस।
GEN 30:20 तब लिआ ह कहिस, “परमेसर ह मोला बढ़िया ईनाम दे हवय। अब के बार मोर आदमी मोर संग आदर के बरताव करही, काबरकि मेंह ओकर दुवारा छै बेटा जनमे हंव।” त ओह ओकर नांव जबूलून रखिस।
GEN 30:21 कुछू समय के बाद, ओकर एक झन बेटी घलो होईस अऊ ओह ओकर नांव दीना रखिस।
GEN 30:22 तब परमेसर ह राहेल के घलो सुधि लीस; ओह ओकर गरभ ठहिरे के आसीस दीस।
GEN 30:23 ओह आसरा म होईस अऊ एक बेटा जनमिस अऊ कहिस, “परमेसर ह मोर बेजत्ती ला दूर करे हवय।”
GEN 30:24 ओह ये कहिके अपन बेटा के नांव यूसुफ रखिस, “यहोवा मोला एक अऊ बेटा देवय।”
GEN 30:25 जब राहेल ह यूसुफ ला जनमिस, त याकूब ह लाबान ला कहिस, “मोला बिदा कर कि में अपन देस वापिस जा सकंव।
GEN 30:26 मोर घरवाली अऊ मोर लइकामन ला मोला दे, जेमन बर में तोर सेवा करे हंव ताकि में इहां ले चले जावंव। तें तो जानत हस कि मेंह तोर कतेक सेवा करे हंव।”
GEN 30:27 पर लाबान ह ओला कहिस, “यदि तोर नजर म में दया पाय के लईक हंव, त रूक जा। काबरकि मेंह अनुभव ले जान डारे हंव कि यहोवा ह तोर कारन से मोला आसीस दे हवय।”
GEN 30:28 फेर ओह कहिस, “तें अपन बनी बता अऊ में तोला तोर बनी दूहूं।”
GEN 30:29 याकूब ह ओला कहिस, “तेंह जानत हस कि मेंह तोर कइसन सेवा करे हंव अऊ तोर पसुमन मोर देखरेख म कइसन बढ़िन हें।
GEN 30:30 मोर आय के पहिली ओमन थोरकन रिहिन, अऊ अब कतेक बढ़ गे हवंय, अऊ जिहां कहूं मेंह हांथ लगांय, यहोवा ह तोला अब्बड़ आसीस दीस। पर अब, में अपन परिवार बर कब कुछू करहूं?”
GEN 30:31 ओह पुछिस, “में तोला का देवंव?” याकूब ह कहिस, “तें मोला कुछू झन दे; पर यदि तें मोर बर एक काम करबे, त में फेर तोर भेड़-बकरी ला चराहूं अऊ ओमन के देखरेख करहूं:
GEN 30:32 मोला आज तोर जम्मो भेड़-बकरी के बीच म ले होके जावन दे, अऊ जऊन भेड़मन धारीवाले या चितकबरी हवंय, अऊ जऊन मेढ़ामन करिया हवंय अऊ जऊन छेरीमन धारीवाले अऊ चितकबरी हवंय, ओमन ला अलग करन दे। ओमन मोर मजदूरी होहीं।
GEN 30:33 अऊ अवइया समय म मोर ईमानदारी के सबूत ये होही कि जऊन मजदूरी तेंह मोला दे हस; जब तें ओकर जांच करबे; त यदि कोनो बकरी धारीवाले या चितकबरी नइं होही या कोनो मेढ़ा-पीला करिया रंग के नइं होही, त ओह चोरी के समझे जाही।”
GEN 30:34 लाबान ह कहिस, “में राजी हंव। तोर कहे के मुताबिक होवय।”
GEN 30:35 ओहीच दिन ओह जम्मो धारीवाले अऊ धब्बावाले बोकरा, अऊ जम्मो धारीवाली अऊ धब्बावाली बकरी (सफेद धब्बावाली) अऊ जम्मो करिया मेढ़ा-पीलामन ला अलग करके अपन बेटामन के देखरेख म कर दीस।
GEN 30:36 तब ओह अपन अऊ याकूब के बीच म तीन दिन के यातरा के दूरी बना लीस, अऊ याकूब ह लाबान के बाकि भेड़-बकरीमन ला चराय लगिस।
GEN 30:37 तब याकूब ह चिनार, बादाम, अऊ अरमोन रूख के हरियर-हरियर छड़ी लेके ओकर छिलका ला जगह-जगह छिलके धारीदार बना दीस, जेकर से ओ छड़ीमन के सफेदी ह दिखे लगिस।
GEN 30:38 तब छिलाय छड़ीमन ला पानी पीये के जम्मो कोटना म अइसे रखिस कि जब भेड़-बकरीमन पानी पीये बर आवंय, त ओमन सीधा भेड़-बकरीमन के आघू म रहंय। जब भेड़-बकरीमन गाभिन होय के समय पानी पीये बर आईन,
GEN 30:39 त ओमन छड़ीमन के आघू म समागम करिन अऊ गाभिन होके भेड़-बकरीमन धारीवाला या चित्तीवाला या चितकबरा पीला जनमे लगिन।
GEN 30:40 याकूब ह मेढ़ा-पीलामन ला अलग-अलग करिस, पर बाकि बचे भेड़-बकरीमन के मुहूं ला लाबान के चित्तीवाले अऊ करिया भेड़-बकरीमन कोति कर दीस। ये किसम ले ओह अपन भेड़-बकरीमन के अलग झुंड बनाईस अऊ ओमन ला लाबान के भेड़-बकरीमन संग मिले नइं दीस।
GEN 30:41 जब भी मजबूत भेड़-बकरीमन के गाभिन होय के समय होवय, त याकूब ह ओ छड़ीमन ला कोटना म ओमन के आघू म ठाढ़ कर देवय, जेकर से ओमन छड़ीमन के लकठा म गाभिन होवंय,
GEN 30:42 पर जब कमजोर भेड़-बकरीमन गाभिन होवंय, त ओह ओमन ला छड़ीमन के आघू म नइं रखय। ये कारन से कमजोर पसुमन लाबान के होईन अऊ मजबूत पसुमन याकूब के हो गीन।
GEN 30:43 अइसन करके याकूब ह भारी धनवान हो गीस। ओकर खुद के अब्बड़ भेड़-बकरी, अऊ दास-दासी, अऊ ऊंट, अऊ गदहामन हो गीन।
GEN 31:1 लाबान के बेटामन के ये बात याकूब के सुने म आईस, “याकूब ह हमर ददा के जम्मो चीज ला लेय ले हे, अऊ हमर ददा के धन के कारन ओह ये जम्मो धन-संपत्ति कमाय हे।”
GEN 31:2 अऊ याकूब ह धियान दीस कि लाबान के बरताव ह ओकर बर पहिले सहीं नइं ए।
GEN 31:3 तब यहोवा ह याकूब ला कहिस, “तेंह अपन पुरखा अऊ अपन रिस्तेदारमन के देस म लहुंट जा, अऊ मेंह तोर संग रहिहूं।”
GEN 31:4 एकरसेति याकूब ह राहेल अऊ लिआ ला बाहिर मैदान म आय बर खबर भिजवाईस जिहां ओकर भेड़-बकरीमन रहंय।
GEN 31:5 ओह ओमन ला कहिस, “में देखत हंव कि तुम्हर ददा के बरताव ह मोर बर पहिले सहीं नइं ए, पर मोर ददा के परमेसर ह मोर संग हवय।
GEN 31:6 तुमन जानत हव कि में तुम्हर ददा के सेवा पूरा मेहनत से करे हंव,
GEN 31:7 तभो ले तुम्हर ददा ह दस बार मोर बनी ला बदलके मोर ले छल-कपट करिस। पर परमेसर ह ओला मोर हानि करे बर नइं दीस।
GEN 31:8 जब ओह कहिस, ‘चित्तीवाला बोकरामन तोर मजदूरी होहीं,’ त जम्मो भेड़-बकरीमन चित्तीवाला जनमे लगिन; अऊ जब ओह कहिस, ‘धारीवालामन तोर मजदूरी होहीं,’ त जम्मो भेड़-बकरीमन धारीवाला जनमे लगिन।
GEN 31:9 अइसन करके परमेसर ह तोर ददा के पसुमन ला लेके मोला दे हवय।
GEN 31:10 “भेड़-बकरी के गाभिन होय के समय म एक बार मेंह सपना म देखेंव कि जऊन बोकरामन बकरी ऊपर चघत हवंय, ओमन धारीवाला, चित्तीवाला या चितकबरा हवंय।
GEN 31:11 तब परमेसर के स्वरगदूत ह सपना म मोला कहिस, ‘हे याकूब।’ में कहेंव, ‘में इहां हंव।’
GEN 31:12 अऊ ओह कहिस, ‘आंखी उठाके देख कि ओ जम्मो बोकरा, जेमन बकरीमन ऊपर चघत हवंय, ओमन धारीवाला, चित्तीवाला या चितकबरा हवंय, काबरकि में ओ जम्मो चीज ला देखे हवंव, जऊन ला लाबान तोर संग करत हवय।
GEN 31:13 में ओ बेतेल के परमेसर अंव, जिहां तें एक खंभा के अभिसेक करे रहय, अऊ मोर मन्नत माने रहय। अब तें ये देस ला तुरते छोंड़ अऊ अपन जनम भुइयां ला लहुंट जा।’ ”
GEN 31:14 तब राहेल अऊ लिआ कहिन, “का हमर ददा के संपत्ति म अब भी हमर कुछू बांटा या हिस्सा बांचे हवय?
GEN 31:15 का ओह हमन ला परदेसी नइं समझत हे? ओह सिरिप हमन ला बेचे ही नइं ए, पर हमर बदले दिये गय रूपिया ला खा डारिस हे।
GEN 31:16 सही म, ओ जम्मो धन जऊन ला परमेसर ह हमर ददा ले लेय लीस, ओ हमर अऊ हमर लइकामन के अय। एकरसेति जइसन परमेसर ह तोला कहे हवय, वइसने कर।”
GEN 31:17 तब याकूब ह अपन लइका अऊ घरवालीमन ला ऊंट म चघाईस,
GEN 31:18 अऊ जतेक पसु अऊ सामान ओह पदन-अराम म कमाय रिहिस, ओ जम्मो ला अपन आघू म रवाना करके, अपन ददा इसहाक करा कनान देस जाय बर निकलिस।
GEN 31:19 जब लाबान ह अपन भेड़मन के ऊन कतरे बर गे रिहिस, त राहेल ह अपन ददा के घर-देवतामन ला चोरा लीस।
GEN 31:20 याकूब ह लाबान अरामी करा ले चोरी से चले गीस; ओला नइं बताईस कि ओह भागके जावत हे।
GEN 31:21 ओह अपन जम्मो कुछू ला लेके भागिस, अऊ फरात नदी ला पार करके गिलाद के पहाड़ी देस कोति गीस।
GEN 31:22 तीसर दिन लाबान ला खबर मिलिस कि याकूब ह भाग गे हवय।
GEN 31:23 अपन रिस्तेदारमन ला लेके, ओह सात दिन तक याकूब के पीछा करिस अऊ गिलाद के पहाड़ी देस म ओकर करा हबरिस।
GEN 31:24 पर परमेसर ह रथिया सपना म आके अरामी लाबान ला कहिस, “सावधान रह! तें याकूब ला न तो भला कहिबे, न बुरा।”
GEN 31:25 जब लाबान ह याकूब करा हबरिस, तब याकूब ह गिलाद के पहाड़ी देस म अपन तम्बू गाड़े रिहिस, अऊ लाबान ह घलो अपन रिस्तेदारमन संग उहां अपन तम्बू गाड़िस।
GEN 31:26 तब लाबान ह याकूब ला कहिस, “तेंह ये का करे हस? तेंह मोला धोखा दे हस, अऊ मोर बेटीमन ला अइसने लाने हस, जइसने लड़ई के समय दूसरमन ला बंदी बनाके लानथें।
GEN 31:27 तेंह काबर चुपेचाप भागके मोला धोखा देय? तेंह मोला काबर नइं बताय, नइं तो में तोला आनंद के संग गावत अऊ मिरदंग अऊ बीना बजावत बिदा करे रहितेंव?
GEN 31:28 तेंह तो मोला अपन नाती-नतनीन अऊ बेटीमन ला चूमे तक नइं देय? तेंह गंवारी करे हस।
GEN 31:29 तोला नुकसान पहुंचाय के ताकत मोर करा हवय, पर बीते रथिया, तोर ददा के परमेसर ह मोला कहिसे, ‘सावधान रह! तें याकूब ला न तो भला कहिबे, न बुरा।’
GEN 31:30 तें अपन ददा के घर के मोह के कारन चले आय। पर तें मोर देवतामन ला काबर चोराके ले आने हस?”
GEN 31:31 याकूब ह लाबान ला जबाब दीस, “में ये सोचके डरा गे रहेंव कि कहूं तें अपन बेटीमन ला मोर ले जबरदस्ती झन छीन ले।
GEN 31:32 पर जेकर मेर तें अपन देवतामन ला पाबे, ओ जीयत नइं बांचय। मोर रिस्तेदारमन के आघू म, तें खुद देख ले, कहूं तोर कोनो चीज मोर करा हवय त; यदि हवय, त ओला लेय ले।” याकूब ह नइं जानत रिहिस कि राहेल ह देवतामन ला चोराके ले आने हे।
GEN 31:33 एकरसेति लाबान ह याकूब के तम्बू अऊ लिआ के तम्बू अऊ दू झन दासीमन के तम्बूमन म गीस, पर ओला कुछू नइं मिलिस। लिआ के तम्बू म ले निकलके, ओह राहेल के तम्बू म गीस।
GEN 31:34 राहेल ह घर-देवतामन ला लेके अपन ऊंट के काठी के भीतर म रखे रिहिस अऊ ओकर ऊपर बईठ गे रिहिस। लाबान ह ओकर जम्मो तम्बू म खोजिस पर ओला कुछू नइं मिलिस।
GEN 31:35 राहेल ह अपन ददा ला कहिस, “हे मोर परभू, गुस्सा झन कर कि में तोर आघू म ठाढ़ नइं हो सकेंव; काबरकि मोला माहवारी होवत हे।” ओह खोजिस पर ओला घर-देवतामन नइं मिलिन।
GEN 31:36 तब याकूब ह गुस्सा होके लाबान ले बिबाद करे लगिस अऊ लाबान ले पुछिस, “मोर का दोस ए?” में तोर का गलत करे हंव कि तें मोर पीछा करत आय हस?
GEN 31:37 तें मोर जम्मो सामान ला खोजके देख डारे; इहां तोला अपन घर के सामान म ले का चीज मिलिस? कुछू पाय हस, त ओला तोर अऊ मोर रिस्तेदारमन के आघू म रख, अऊ ओमन ला हमन दूनों के नियाय करन दे।
GEN 31:38 “मेंह तोर संग बीस बछर तक रहेंव; अऊ ये दौरान न तो तोर भेड़-बकरीमन के गरभ गिरिस, न कभू में तोर झुंड के मेढ़ा के मांस खायेंव।
GEN 31:39 तोर जऊन पसुमन ला हिंसक पसुमन मार डारिन, ओमन ला में तोर करा नइं लानेंव; ओकर हानि में खुद उठांय। कोनो चीज, चाहे दिन के चोरी जाय या रथिया, तें ओकर भरती मोर ले मांगे।
GEN 31:40 मोर तो ये दसा रिहिस: दिन के समय घाम ले अऊ रथिया ठंड के मारे मरत रहेंव, अऊ नींद ह मोर आंखी ले कोसों दूर रिहिस।
GEN 31:41 मेंह ये दसा म तोर घर म बीस बछर तक रहेंव। में चौदह बछर तक तोर दूनों बेटी बर अऊ छै बछर तक तोर भेड़-बकरीमन बर सेवा करेंव, अऊ तें मोर मजदूरी ला दस बार बदले हस।
GEN 31:42 कहूं मोर ददा के परमेसर, याने कि अब्राहम के परमेसर, जेकर भय इसहाक घलो मानथे, कहूं ओह मोर संग नइं होतिस, त खचित तें मोला जुच्छा हांथ पठो दे रहितय। पर परमेसर ह मोर दुख अऊ मोर हांथ के मेहनत ला देखे हवय, अऊ बीते रथिया ओह तोला डांटिस।”
GEN 31:43 लाबान ह याकूब ला कहिस, “ये माईलोगनमन तो मोर बेटी अंय, अऊ ये लइकामन मोर लइका अंय, अऊ ये भेड़-बकरीमन भी मोर अंय। जऊन कुछू तेंह देखत हस, ओ जम्मो मोर अंय। पर अब में मोर ये बेटीमन के का कर सकत हंव, या येमन के दुवारा जनमे लइकामन के का कर सकत हंव?
GEN 31:44 अब आ, हमन एक करार करन, तें अऊ में, अऊ येह हमर बीच म एक गवाही के काम करय।”
GEN 31:45 तब याकूब ह एक पथरा लीस अऊ ओला एक खंभा के रूप म ठाढ़ करिस।
GEN 31:46 ओह अपन रिस्तेदारमन ला कहिस, “कुछू पथरा संकेलव।” त ओमन पथरा संकेलके कुढ़ो दीन, अऊ ओही कुढ़ा मेर जेवन करिन।
GEN 31:47 ओ कुढ़ा के नांव लाबान ह यजर-सहादुथा, पर याकूब ह गलीद रखिस।
GEN 31:48 लाबान ह कहिस, “ये कुढ़ा ह आज तोर अऊ मोर बीच म एक गवाही ए।” एकरसेति ओला गलीद कहे गीस।
GEN 31:49 येला मिसपा घलो कहे गीस, काबरकि ओह कहिस, “जब हमन एक-दूसर ले अलग हो जाबो, त यहोवा के नजर तोर अऊ मोर ऊपर रहय।
GEN 31:50 यदि तें मोर बेटीमन ला दुख देबे या मोर बेटीमन के छोंड़ अऊ कोनो ला घरवाली बना लेबे, हालाकि हमर संग कोनो मनखे नइं ए, त सुरता रख कि परमेसर ह तोर अऊ मोर बीच म गवाह हे।”
GEN 31:51 लाबान ह याकूब ला ये घलो कहिस, “ये कुढ़ा ह इहां हवय, अऊ ये खंभा ला में तोर अऊ मोर बीच म ठाढ़ करे हंव।
GEN 31:52 ये कुढ़ा अऊ ये खंभा दूनों ये बात के गवाह रहंय कि तोर नुकसान करे के बिचार ले, न तो में ये कुढ़ा ला नाहकके तोर तरफ आहूं, अऊ न ही मोर नुकसान करे के बिचार ले, तें ये कुढ़ा या खंभा ला नाहकके मोर तरफ आबे।
GEN 31:53 अब्राहम अऊ नाहोर अऊ ओकर ददा के परमेसर ह हमन दूनों के बीच नियाय करय।” तब याकूब ह अपन ददा इसहाक के भय के नांव म किरिया खाईस।
GEN 31:54 अऊ ओह उहां पहाड़ ऊपर एक बलि चघाईस अऊ अपन रिस्तेदारमन ला जेवन करे बर बलाईस। जेवन करके ओमन उहां रात बिताईन।
GEN 31:55 ओकर दूसर दिन बड़े बिहनियां लाबान ह उठके अपन नाती-नतनीन अऊ बेटीमन ला चूमिस अऊ ओमन ला आसीस दीस। तब ओह ओमन ला छोंड़के अपन घर लहुंट गीस।
GEN 32:1 याकूब ह घलो अपन डहार धरिस, अऊ परमेसर के स्वरगदूतमन ओकर ले मिलिन।
GEN 32:2 जब याकूब ह ओमन ला देखिस, त ओह कहिस, “येह तो परमेसर के डेरा अय!” एकरसेति ओह ओ जगह के नांव महनैम रखिस।
GEN 32:3 याकूब ह सेईर देस याने कि एदोम के देस म, अपन भईया एसाव करा अपन आघू दूतमन ला पठोईस।
GEN 32:4 ओह ओमन ला ये हुकूम दीस, “मोर मालिक एसाव ला तुमन ये कहिहू: ‘तोर दास याकूब ह अइसन कहिथे, मेंह लाबान के संग रहत रहेंव अऊ अब तक उहां रहेंव।
GEN 32:5 मोर करा गरूवा-बईला अऊ गदहा, भेंड़-बकरी, अऊ दास-दासीमन हवंय। में अपन परभू करा एकर खातिर खबर पठोत हंव कि तोर दया-मया मोर ऊपर होवय।’ ”
GEN 32:6 जब ओ दूतमन याकूब करा लहुंटके आईन, त ओमन कहिन, “हमन तोर भईया एसाव करा गे रहेंन, अऊ ओह तोर करा भेंट करे बर आवत हे, अऊ चार सौ मनखे ओकर संग आवत हंय।”
GEN 32:7 याकूब ह अब्बड़ डरा गीस अऊ चिंतित होके ओह अपन मनखेमन ला दू ठन दल म बांट दीस, अऊ वइसने गरूवा-बईला, भेड़-बकरी अऊ ऊंटमन ला घलो दू ठन दल म बांट दीस।
GEN 32:8 ओह सोचिस, “यदि एसाव ह आके एक दल ला मारही, त सायद दूसर दल ह बांच जाही।”
GEN 32:9 तब याकूब ह पराथना करिस, “हे मोर दादा अब्राहम के परमेसर, मोर ददा इसहाक के परमेसर, यहोवा, तेंह तो मोला कहे रहय, ‘अपन देस अऊ अपन रिस्तेदारमन करा लहुंट जा, अऊ मेंह तोला बढ़ाहूं,’
GEN 32:10 तेंह ओ जम्मो दया अऊ किरपा मोर ऊपर करे हस, में ओकर लईक नो हंव। जब में ये यरदन नदी ला पार करेंव, त मोर करा सिरिप मोर छड़ी रिहिस, पर अब मोर करा दू ठन दल हवय।
GEN 32:11 में बिनती करत हंव कि मोला मोर भईया एसाव के हांथ ले बंचा, काबरकि मोला डर हवय कि ओह आके मोर ऊपर, अऊ लइकामन सहित दाईमन ऊपर घलो हमला करही।
GEN 32:12 पर तेंह कहे रहय, ‘मेंह सही म तोला बढ़ाहूं अऊ तोर संतान ला समुंदर के बालू के सहीं करहूं, जऊन ला गने नइं जा सकय।’ ”
GEN 32:13 ओह ओ रथिया उहां काटिस, अऊ जऊन कुछू ओकर करा रिहिस, ओमा ले ओह अपन भईया एसाव ला देय बर ये भेंट ला छांटके निकालिस:
GEN 32:14 याने कि दू सौ बकरी अऊ बीस ठन बोकरा, दू सौ भेड़ी अऊ बीस ठन मेढ़ा,
GEN 32:15 तीस ठन माई ऊंट ओमन के पीला सहित, चालीस ठन गाय अऊ दस ठन बईला, अऊ बीस ठन गदही अऊ दस ठन गदहा।
GEN 32:16 ओह येमन ला दल-दल करके अपन दासमन ला सऊंप दीस अऊ ओमन ला कहिस, “मोर आघू-आघू चलव, अऊ हर एक दल के बीच म कुछू जगह रखव।”
GEN 32:17 जऊन ह सबले आघू के दल म रिहिस, ओला ओह ये हुकूम दीस: “जब मोर भईया एसाव तोर ले मिलही अऊ पुछही, ‘तें काकर दास अस, अऊ कहां जावत हस, अऊ तोर आघू म ये जो जम्मो जानवर जावत हंय, ओमन काकर अंय?’
GEN 32:18 तब तें ये कहिबे, ‘येमन तोर दास याकूब के अंय। हे मोर मालिक एसाव, येमन तोर बर एक भेंट के रूप म भेजे गे हवंय, अऊ ओह खुद हमर पाछू-पाछू आवत हवय।’ ”
GEN 32:19 याकूब ह दूसर, तीसर अऊ ओ जम्मो झन ला घलो ये हुकूम दीस, जेमन जानवर के दलमन के पाछू-पाछू चलत रिहिन: “जब तुमन एसाव ले मिलहू, त तुमन घलो अइसनेच कहिहू।
GEN 32:20 अऊ ये जरूर कहिहू, ‘तोर दास याकूब ह हमर पाछू-पाछू आवत हे।’ ” काबरकि ओह ये सोचिस, “ये भेंटमन ला आघू भेजके, मेंह ओकर गुस्सा ला सांत कर लूहूं; अऊ बाद म, जब में ओकर ले मिलहूं, त सायद ओह मोला स्वीकार कर ले।”
GEN 32:21 एकरसेति याकूब के मनखेमन भेंट ला आघू लेके गीन, पर ओह खुद डेरा म ओ रथिया काटिस।
GEN 32:22 ओ रथिया याकूब उठिस अऊ अपन दूनों घरवाली, अपन दूनों दासी अऊ अपन गियारह बेटामन ला लीस अऊ यब्बोक नदी के घाट के ओ पार हो गीस।
GEN 32:23 ओह ओमन ला नदी नहकाय के बाद, अपन जम्मो चीज ला घलो ओ पार भेजवा दीस।
GEN 32:24 याकूब ह एके झन उहां रह गीस, अऊ एक मनखे ह आके बिहान पहात तक ओकर संग कुस्ती लड़िस।
GEN 32:25 जब ओ मनखे ह देखिस कि ओह याकूब ला नइं जीत सकत हे, त ओह याकूब के जांघ के हाड़ा के जोड़ ला छुईस, तब कुस्ती लड़त याकूब के जांघ के हाड़ा ह चढ़ गीस।
GEN 32:26 तब ओ मनखे ह कहिस, “मोला जावन दे, काबरकि बिहान पहा गे हवय।” पर याकूब ह कहिस, “जब तक तें मोला आसीस नइं देबे, तब तक में तोला जावन नइं दंव।”
GEN 32:27 ओ मनखे ह ओकर ले पुछिस, “तोर का नांव ए?” ओह जबाब दीस, “याकूब।”
GEN 32:28 तब ओ मनखे ह कहिस, “तोर नांव अब याकूब नइं, पर इसरायल होही, काबरकि तें परमेसर अऊ मनखेमन संग कुस्ती लड़े हस अऊ जीते हस।”
GEN 32:29 याकूब ह कहिस, “किरपा करके मोला अपन नांव बता।” पर ओह कहिस, “तेंह मोर नांव काबर पुछत हस?” तब ओह ओला उहां आसीरबाद दीस।
GEN 32:30 एकरसेति याकूब ह ये कहिके ओ जगह के नांव पनिएल रखिस, “परमेसर ला आमने-सामने देखके घलो मोर परान ह बांच गीस।”
GEN 32:31 जब ओह पनिएल ले जावत रिहिस, तब बेर निकल गे रिहिस, अऊ ओह जांघ के हाड़ा के कारन खोरवात रिहिस।
GEN 32:32 एकरसेति आज घलो इसरायलीमन जांघ के हाड़ा ला जोड़नेवाला नस ला नइं खावंय, काबरकि ओ मनखे ह याकूब के जांघ के जोड़ के नस के लकठा ला छुये रिहिस।
GEN 33:1 याकूब ह नजर उठाके देखिस कि एसाव चार सौ मनखेमन संग चले आवत हे; एकरसेति ओह लइकामन ला लिआ, राहेल अऊ दूनों दासीमन के बीच म बांट दीस।
GEN 33:2 ओह सबले आघू म दूनों दासी अऊ ओमन के लइकामन ला, ओकर बाद लिआ अऊ ओकर लइकामन ला, अऊ सब के पाछू म राहेल अऊ यूसुफ ला रखिस।
GEN 33:3 ओह खुद आघू-आघू चलिस अऊ जब ओह अपन भईया करा हबरिस, त सात बार भुइयां म गिरके दंडवत करिस।
GEN 33:4 पर एसाव ह याकूब संग भेंट करे बर दऊड़िस अऊ ओला छाती ले लगा लीस; ओह ओला बाहां म पोटारके चूमिस। अऊ ओ दूनों रोईन।
GEN 33:5 तब एसाव ह माईलोगन अऊ लइकामन ला देखिस अऊ पुछिस, “तोर संग येमन कोन अंय?” याकूब ह जबाब दीस, “येमन तोर सेवक के लइकामन अंय, जेमन ला परमेसर ह अनुग्रह करके दे हवय।”
GEN 33:6 तब दासी अऊ ओमन के लइकामन हबरिन अऊ आके दंडवत करिन।
GEN 33:7 फेर लिआ अऊ ओकर लइकामन आईन अऊ दंडवत करिन। सबले आखिरी म यूसुफ अऊ राहेल आईन, अऊ ओमन घलो दंडवत करिन।
GEN 33:8 एसाव ह पुछिस, “ये जो गाय-बईला अऊ भेड़-बकरी के दलमन रसता म मोला मिलिन, एकर का मतलब ए?” ओह कहिस, “हे मोर मालिक, ये जम्मो चीज एकरसेति अय कि तोर दया मोर ऊपर होवय।”
GEN 33:9 पर एसाव ह कहिस, “हे मोर भाई, मोर करा पहिले ही बहुंत हवय। जऊन कुछू तोर करा हवय, ओह तोरेच रहय।”
GEN 33:10 याकूब ह कहिस, “नइं, नइं! यदि तोर दया मोर ऊपर हवय, त मोर ये भेंट ला गरहन कर। काबरकि तोर चेहरा देखई ह परमेसर के चेहरा देखे सहीं अय, अऊ तेंह मोला खुसी से गरहन करे हस।
GEN 33:11 तोर करा जऊन भेंट लाय गे हे, ओला गरहन कर, काबरकि परमेसर ह मोर ऊपर अनुग्रह करे हवय अऊ मोर करा मोर जरूरत के जम्मो चीज हवय।” अऊ जब याकूब ह बहुंत बिनती करिस, त एसाव ह ओ भेंट ला गरहन कर लीस।
GEN 33:12 फेर एसाव ह कहिस, “आ, अब हमन चलन; में तोर संग चलहूं।”
GEN 33:13 पर याकूब ह ओला कहिस, “हे मोर मालिक, तेंह जानत हस कि मोर संग नान-नान लइकामन हवंय अऊ ओ भेड़ अऊ गायमन के देखभाल करना जरूरी ए, जऊन मन अपन लइकामन ला दूध पीयावत हें। यदि येमन एक दिन भी जादा खेदे जाहीं, त जम्मो के जम्मो पसु मर जाहीं।
GEN 33:14 एकरसेति मोर मालिक ह अपन सेवक के आघू चलय, अऊ मेंह ये पसु जऊन मन मोर आघू म रेंगत हवंय, ओमन के मुताबिक अऊ लइकामन के रेंगई के मुताबिक धीरे-धीरे चलहूं, अऊ सेईर म अपन मालिक करा हबरहूं।”
GEN 33:15 एसाव ह कहिस, “त मोर कुछू मनखेमन ला तोर संग छोंड़ देवत हंव।” याकूब ह कहिस, “पर अइसने काबर करबे? सिरिप मोर मालिक के दया मोर ऊपर बने रहय, अतकेच ह बहुंत ए।”
GEN 33:16 तब एसाव ह ओही दिन वापिस सेईर जाय बर निकलिस।
GEN 33:17 पर याकूब ह उहां ले सुक्कोत गीस, अऊ उहां अपन बर एक घर अऊ अपन पसुमन बर कोठा बनाईस। एकरसेति ओ जगह के नांव सुक्कोत परिस।
GEN 33:18 याकूब ह पदन-अराम ले आय के बाद, कनान के सकेम सहर म सही-सलामत हबरिस अऊ सहर के लकठा म अपन डेरा ठाढ़ करिस।
GEN 33:19 भुइयां के जऊन भाग म, ओह तम्बू गाड़े रिहिस, ओला ओह सकेम के ददा, हमोर के बेटामन के हांथ ले एक सौ चांदी के टुकड़ा म बिसाय रिहिस।
GEN 33:20 उहां ओह एक बेदी बनाईस अऊ ओकर नांव एल-एलोहे-इसरायल रखिस।
GEN 34:1 एक दिन लिआ के बेटी, दीना जेह याकूब ले जनमे रिहिस, ओ देस के छोकरीमन संग भेंट करे बर निकलिस।
GEN 34:2 जब ओ इलाका के हाकिम, हिब्बी हमोर के बेटा सकेम ह ओला देखिस, त ओह ओला ले जाके ओकर संग कुकरम करिस।
GEN 34:3 ओकर दिल ह याकूब के बेटी दीना म लग गीस; ओह ओ जवान छोकरी ले मया करिस अऊ ओकर ले गुरतूर बात करिस।
GEN 34:4 अऊ सकेम ह अपन ददा हमोर ला कहिस, “ये छोकरी ला मोर घरवाली के रूप म लान दे।”
GEN 34:5 जब याकूब ह सुनिस कि ओकर बेटी दीना ह असुध हो गे हे; त ओ समय ओकर बेटामन ओकर पसुमन संग मैदान म रिहिन; एकरसेति ओह ओमन के घर आवत तक, एकर बारे म कुछू नइं करिस।
GEN 34:6 तब सकेम के ददा हमोर ह निकलके याकूब करा बातचीत करे बर आईस।
GEN 34:7 इही बीच म, जइसने ही याकूब के बेटामन ये बात ला सुनिन, त ओमन मैदान ले घर आ गीन। ओमन ला ये बात ला सुनके धक्का लगिस अऊ ओमन बहुंत गुस्सा हो गीन, काबरकि सकेम ह याकूब के बेटी संग कुकरम करके इसरायल के घराना ले गंवारी के काम करे रिहिस—एक अइसने काम, जेला नइं करना रिहिस।
GEN 34:8 पर हमोर ह ओमन ला कहिस, “मोर बेटा सकेम ह तोर बेटी ऊपर दिल लगा बईठे हे। किरपा करके अपन बेटी ला मोर बेटा के घरवाली के रूप म देय दे।
GEN 34:9 हमर संग सादी-बिहाव करव; अपन बेटीमन ला हमन ला दव अऊ हमर बेटीमन ला अपन बर लव।
GEN 34:10 तुमन हमर बीच म रह सकत हव; ये देस ह तुम्हर बर खुला हवय। इहां रहव; काम-धंधा करव, अऊ अपन बर इहां संपत्ति बनावव।”
GEN 34:11 तब सकेम ह दीना के ददा अऊ भाईमन ला कहिस, “मोर ऊपर तुमन दया करव, अऊ जऊन कुछू भी तुमन बोलहू, मेंह दूहूं।
GEN 34:12 दुलहिन के जो भी दाम बोलहू, मेंह दूहूं अऊ जतेक बड़े भेंट तुमन पसंद करव, मेंह लानहूं, अऊ जऊन कुछू घलो कहव, मेंह दूहूं। पर ओ जवान छोकरी ला मोर घरवाली होय बर मोला दव।”
GEN 34:13 काबरकि ओमन के बहिनी दीना ह असुध हो गे रिहिस, याकूब के बेटामन सकेम अऊ ओकर ददा हमोर ला छल करके जबाब दीन।
GEN 34:14 ओमन कहिन, “हमन अइसन काम नइं कर सकन; हमन अइसने मनखे ला हमर बहिनी नइं दे सकन, जेकर खतना नइं होय हवय। येह हमर ऊपर एक कलंक होही।
GEN 34:15 हमन तुम्हर संग सिरिप एक सर्त म सहमत होबो अऊ ओ ये अय कि तुम्हर जम्मो पुरूसमन खतना करवाके हमर सहीं हो जावंय।
GEN 34:16 तब हमन अपन बेटीमन ला तुमन ला बिहाव म देबो अऊ तुम्हर बेटीमन ला अपन बर बिहाव म लेबो। हमन तुम्हर बीच म रहिबो अऊ तुम्हर संग एक जात के मनखे हो जाबो।
GEN 34:17 पर यदि तुमन अपन खतना करवाय बर राजी नइं होहू, त हमन अपन बहिनी ला लेके इहां ले चले जाबो।”
GEN 34:18 ओमन के ये बात हमोर अऊ ओकर बेटा सकेम ला बने लगिस।
GEN 34:19 सकेम ह अपन ददा के जम्मो घराना म सबले जादा नामी रिहिस, अऊ ओमन के कहे काम ला करे बर ओह देरी नइं करिस, काबरकि ओह याकूब के बेटी ला अब्बड़ चाहत रिहिस।
GEN 34:20 एकरसेति हमोर अऊ ओकर बेटा सकेम अपन सहर के कपाट करा जाके सहर के मनखेमन ला अइसने समझाय लगिन,
GEN 34:21 “ओ मनखेमन हमर संग संगवारी के रूप म रहे चाहथें; ओमन ला हमर देस म रहिके लेन-देन करन देवन; ये देस म ओमन बर बहुंत जगह हवय। हमन ओमन के बेटीमन ले बिहाव कर सकत हन अऊ ओमन हमर बेटीमन ले बिहाव कर सकथें।
GEN 34:22 पर ओमन सिरिप एक सर्त म हमर संग एक मनखे के रूप म रहे बर तियार हवंय, अऊ ओ ये अय कि ओमन के सहीं हमर जम्मो आदमीमन के खतना होवय।
GEN 34:23 का ओमन के भेड़-बकरी, गाय-बईला, ओमन के धन-संपत्ति अऊ ओमन के जम्मो आने पसुमन हमर नइं हो जाहीं? एकरसेति आवव, हमन ओमन के बात ला मान लेवन, त ओमन हमर संग रहिहीं।”
GEN 34:24 ओ जम्मो मनखे, जऊन मन सहर के कपाट ले बाहिर निकले रिहिन, ओमन हमोर अऊ ओकर बेटा सकेम के बात ला मान लीन, अऊ सहर म हर आदमी के खतना करे गीस।
GEN 34:25 तीन दिन के बाद, जब ओ जम्मो झन पीरा म रिहिन, तब सिमोन अऊ लेवी, याकूब के दू झन बेटा, जेमन दीना के भाई रिहिन, अपन-अपन तलवार लेके सहर के मनखेमन के बिगर जानत हमला कर दीन अऊ जम्मो आदमीमन ला मार डारिन।
GEN 34:26 ओमन हमोर अऊ ओकर बेटा सकेम ला तलवार ले मार डारिन अऊ दीना ला सकेम के घर ले, ले गीन।
GEN 34:27 याकूब के बेटामन लासमन के ऊपर होवत आईन अऊ ओ सहर ला लूट लीन, जिहां ओमन के बहिनी ला असुध करे गे रिहिस।
GEN 34:28 ओमन भेड़-बकरी अऊ गाय-बईला अऊ गदहा अऊ सहर अऊ मैदान के ओमन के जम्मो चीज ला लूट लीन।
GEN 34:29 ओमन उहां के जम्मो संपत्ति अऊ जम्मो माईलोगन अऊ लइकामन ला ले गीन, अऊ उहां के हर घर के सामान ला घलो लूटके ले गीन।
GEN 34:30 तब याकूब ह सिमोन अऊ लेवी ला कहिस, “तुमन ये देस के निवासी कनानी अऊ परिज्जीमन के मन म मोर बर घिन पईदा करे हव, अऊ मोला तुमन संकट म डार दे हव। हमन गनती म थोरकन मनखे हन, अऊ यदि ओमन एक संग आहीं अऊ मोर ऊपर चढ़ई कर दीहीं, त में अऊ मोर घराना नास हो जाही।”
GEN 34:31 पर ओमन कहिन, “का ओला हमर बहिनी संग एक बेस्या के सहीं बरताव करना सही रिहिस?”
GEN 35:1 तब परमेसर ह याकूब ला कहिस, “इहां ले निकलके बेतेल म जा अऊ उहां बस जा, अऊ उहां परमेसर बर एक बेदी बना, जऊन ह तोला ओ समय दरसन दीस, जब तें अपन भाई एसाव ले डरके भागत रहय।”
GEN 35:2 तब याकूब ह अपन घराना अऊ अपन संग के जम्मो झन ला कहिस, “तुमन जऊन पराय देवतामन ला अपन संग रखे हव, ओमन ला निकाल फेंकव, अऊ अपनआप ला सुध करव अऊ अपन कपड़ामन ला बदल डारव।
GEN 35:3 तब आवव, हमन इहां ले निकलके बेतेल जाबो; उहां में परमेसर बर एक ठन बेदी बनाहूं, जऊन ह संकट के दिन म मोर बात सुनिस अऊ जिहां घलो में गेंव, ओह मोर संग म रिहिस।”
GEN 35:4 एकरसेति ओमन अपन जम्मो पराय देवता अऊ अपन कान के कुंडलमन ला याकूब ला दे दीन, अऊ ओह ओ जम्मो ला सकेम म बलूत रूख के खाल्हे म गड़िया दीस।
GEN 35:5 तब ओमन आघू बढ़िन, अऊ ओमन के चारों कोति के नगरमन के निवासी के मन म परमेसर के डर हमा गीस, जेकर कारन कोनो ओमन के पीछा नइं करिन।
GEN 35:6 याकूब अऊ ओकर संग के जम्मो मनखेमन कनान देस के लूज नगर म आईन। लूज ला बेतेल घलो कहे जाथे।
GEN 35:7 उहां ओह एक ठन बेदी बनाईस, अऊ ओ जगह के नांव एल बेतेल रखिस, काबरकि येह ओ जगह रिहिस, जिहां परमेसर ह ओकर करा परगट होईस, जब ओह अपन भईया के डर ले भागत रिहिस।
GEN 35:8 रिबका के धाई दबोरा ह मर गीस, अऊ ओला बेतेल के बाहिर बलूत रूख के खाल्हे म माटी दिये गीस। एकरसेति ओ रूख के नांव अल्लोन-बकूत रखे गीस।
GEN 35:9 याकूब के पदन-अराम ले लहुंटे के बाद, परमेसर ह ओला फेर दरसन देके आसीस दीस।
GEN 35:10 परमेसर ह ओला कहिस, “तोर नांव याकूब ए, पर अब ले तोला याकूब नइं कहे जाय; तोर नांव इसरायल होही।” अऊ परमेसर ह ओकर नांव इसरायल रखिस।
GEN 35:11 फेर परमेसर ह ओला कहिस, “में सर्वसक्तिमान परमेसर अंव; तें फूल-फर अऊ गनती म बढ़। तोर ले एक जाति अऊ जातिमन के एक समुदाय बनही, अऊ तोर बंस म राजामन पईदा होहीं।
GEN 35:12 जऊन देस मेंह अब्राहम अऊ इसहाक ला दे रहेंव, ओला में तोला घलो देवत हंव, अऊ तोर पाछू ये देस तोर बंसमन ला घलो दूहूं।”
GEN 35:13 तब परमेसर जिहां याकूब ले बात करत रिहिस, उहां ले ऊपर चल दीस।
GEN 35:14 जऊन जगह म परमेसर ह याकूब ले बात करे रिहिस, उहां याकूब ह पथरा के एक खंभा ठाढ़ करिस, अऊ ओह ओकर ऊपर पेय-बलिदान के चढ़ावा चघाके तेल घलो डारिस।
GEN 35:15 जऊन मेर परमेसर ह याकूब ले बात करिस, ओ जगह के नांव याकूब ह बेतेल रखिस।
GEN 35:16 तब ओमन बेतेल ले आघू बढ़िन। जब ओमन एपराता सहर ले थोरकन दूरिहा म रिहिन, तभे राहेल ला छेवारी होय के बहुंत पीरा होय लगिस।
GEN 35:17 अऊ जब ओला भारी पीरा होय लगिस, तब धाई ह ओला कहिस, “निरास झन हो, काबरकि तोर फेर एक बेटा होय हवय।”
GEN 35:18 राहेल के मरे के घरी आ गीस, पर परान छूटत-छूटत ओह अपन बेटा के नांव बेन-ओनी रखिस। पर ओकर ददा ह ओकर नांव बिनयामीन रखिस।
GEN 35:19 ये किसम ले राहेल के मऊत हो गीस अऊ एपराता याने कि बैतलहम के डहार म ओला माटी देय गीस।
GEN 35:20 याकूब ह ओकर कबर ऊपर एक खंभा ठाढ़ करिस, अऊ आज तक ओ खंभा ह राहेल के कबर के चिनहां ए।
GEN 35:21 इसरायल ह फेर आघू बढ़िस अऊ मिग्दल-एदेर के बाहिर अपन तम्बू ठाढ़ करिस।
GEN 35:22 जब इसरायल ह ओ छेत्र म रहत रिहिस, तब एक दिन रूबेन ह जाके अपन ददा के रखैल बिलहा संग कुकरम करिस, अऊ ये बात इसरायल ला पता चल गीस।
GEN 35:23 ओमा ले लिआ के बेटा येमन रिहिन: याकूब के बड़े बेटा रूबेन, फेर सिमोन, लेवी, यहूदा, इस्साकार अऊ जबूलून।
GEN 35:24 अऊ राहेल के बेटा येमन रिहिन: यूसुफ अऊ बिनयामीन।
GEN 35:25 अऊ राहेल के दासी बिलहा के बेटा येमन रिहिन: दान अऊ नपताली।
GEN 35:26 अऊ लिआ के दासी जिलपा के बेटा येमन रिहिन: गाद अऊ आसेर।
GEN 35:27 याकूब अपन ददा इसहाक के घर ममरे म आईस, जऊन ह किरयत-अरबा याने कि हेबरोन के लकठा म हवय; ममरे म अब्राहम अऊ इसहाक परदेसी होके रहे रिहिन।
GEN 35:28 इसहाक के उमर एक सौ अस्सी बछर के होईस।
GEN 35:29 तब ओह आखिरी सांस लीस अऊ मर गीस अऊ डोकरा अऊ पूरा उमर के होके अपन पुरखामन संग जा मिलिस। अऊ ओकर बेटा एसाव अऊ याकूब ओला माटी दीन।
GEN 36:1 एसाव जेला एदोम घलो कहे जाथे, ओकर परिवार के बिबरन ये अय।
GEN 36:2 एसाव ह कनानी माईलोगनमन ले बिहाव करे रिहिस: याने कि हित्ती एलोन के बेटी आदा, अऊ अना के बेटी ओहोलीबामा, जऊन ह हिब्बी सिबोन के नतनीन रिहिस।
GEN 36:3 अऊ ओह इसमायल के बेटी बासमत ले घलो बिहाव करे रिहिस, जऊन ह नबायोत के बहिनी रिहिस।
GEN 36:4 एसाव के घरवाली आदा ह एलीपज ला, अऊ बासमत ह रूएल ला जनम दीस।
GEN 36:5 अऊ ओहोलीबामा ह यूस, यालाम अऊ कोरह ला जनम दीस। एसाव के ये बेटामन कनान देस म पईदा होईन।
GEN 36:6 एसाव ह अपन घरवाली अऊ बेटा-बेटी अऊ घर के जम्मो मनखेमन, अऊ अपन भेड़-बकरी अऊ गाय-बईला अऊ जम्मो दूसर पसुमन अऊ कनान देस म कमाय जम्मो संपत्ति ला लीस, अऊ अपन भाई याकूब करा ले एक-दूसर देस म चल दीस।
GEN 36:7 काबरकि ओमन के धन-संपत्ति अतेक हो गे रिहिस कि ओमन एक संग नइं रहे सकिन; ओमन करा अतेक पसु हो गे रिहिन कि जिहां ओमन रहत रिहिन, उहां ओमन के चारा-पानी के परबंध नइं हो सकत रिहिस।
GEN 36:8 एकरसेति एसाव याने कि एदोम ह सेईर नांव के पहाड़ी देस म रहे लगिस।
GEN 36:9 सेईर नांव के पहाड़ी देस म रहइया एदोमीमन के पुरखा एसाव के बंसावली ये अय।
GEN 36:10 एसाव के बेटामन के नांव ये अय: एसाव के घरवाली आदा के बेटा एलीपज, अऊ एसाव के घरवाली बासमत के बेटा रूएल।
GEN 36:11 एलीपज के बेटामन: तेमान, ओमार, सपो, गाताम अऊ कनज।
GEN 36:12 एसाव के बेटा एलीपज के तिमना नांव के एक रखैल रिहिस, जेह एलीपज कोति ले अमालेक ला जनम दीस। एसाव के घरवाली आदा के नाती येमन होईन।
GEN 36:13 रूएल के बेटामन: नहत, जेरह, सम्मा, अऊ मिज्जा। एसाव के घरवाली बासमत के नाती येमन होईन।
GEN 36:14 एसाव के घरवाली ओहोलीबामा, जऊन ह अना के बेटी अऊ सिबोन के नतनीन रिहिस, ओह एसाव कोति ले ये बेटामन ला जनम दीस: यूस, यालाम अऊ कोरह।
GEN 36:15 एसाव के बंस म येमन मुखिया होईन: एसाव के पहिलांत बेटा एलीपज के बेटामन: मुखियामन—तेमान, ओमार, सपो, कनज,
GEN 36:16 कोरह, गाताम अऊ अमालेक। एलीपज के बंस म ले, एदोम देस म येमन मुखिया होईन अऊ येमन आदा के नाती रिहिन।
GEN 36:17 एसाव के बेटा रूएल के बेटामन: मुखियामन—नहत, जेरह, सम्मा, मिज्जा। रूएल के बंस म ले, एदोम देस म येमन मुखिया होईन अऊ येमन एसाव के घरवाली बासमत के नाती रिहिन।
GEN 36:18 एसाव के घरवाली ओहोलीबामा के बेटामन: मुखियामन—यूस, यालाम, कोरह। एसाव के घरवाली ओहोलीबामा, जेह अना के बेटी रिहिस, ओकर बंस म येमन मुखिया होईन।
GEN 36:19 एसाव याने कि एदोम के बेटामन येमन रिहिन, अऊ येमन ओमन के मुखिया रिहिन।
GEN 36:20 सेईर, जऊन ह होरी जाति के रिहिस, ओकर ये बेटामन ओ इलाका म रहत रिहिन: लोतान, सोबाल, सिबोन, अना,
GEN 36:21 दीसोन, एसेर अऊ दीसान। एदोम देस म, सेईर के येमन ही होरी जाति के मुखिया होईन।
GEN 36:22 लोतान के बेटामन: होरी अऊ होमाम। तिमना ह लोतान के बहिनी रिहिस।
GEN 36:23 सोबाल के बेटामन: आलवान, मानहत, एबाल, सपो अऊ ओनाम।
GEN 36:24 सिबोन के बेटामन: अय्या अऊ अना। येह ओही अना अय, जेला सुन्ना जगह म अपन ददा सिबोन के गदहामन ला चरात बेरा गरम पानी के झरना मिलिस।
GEN 36:25 अना के लइकामन: अना के दीसोन नांव के बेटा अऊ ओहोलीबामा नांव के बेटी होईस।
GEN 36:26 दीसोन के बेटामन: हेमदान, एसबान, यितरान अऊ करान।
GEN 36:27 एसेर के बेटामन: बिलहान, जाबान अऊ अकान।
GEN 36:28 दीसान के बेटामन: ऊस अऊ अरान।
GEN 36:29 होरी जाति के मुखिया येमन होईन: लोतान, सोबाल, सिबोन, अना,
GEN 36:30 दीसोन, एसेर, दीसान।
GEN 36:31 कोनो इसरायली राजा के एदोम म राज करे के पहिली, येमन ओ राजा रिहिन, जेमन एदोम म राज करिन:
GEN 36:32 बेओर के बेटा बेला ह एदोम के राजा बनिस। ओकर सहर के नांव दिनहाबा रखे गीस।
GEN 36:33 बेला के मरे के बाद, बोसरा के रहइया जेरह के बेटा योबाब ओकर जगह म राजा बनिस।
GEN 36:34 योबाब के मरे के बाद, तेमानीमन के देस के हूसाम ओकर जगह म राजा होईस।
GEN 36:35 जब हूसाम ह मर गीस, त बदद के बेटा हदद ह ओकर जगह म राजा होईस: येह ओही अय, जऊन ह मोआब के देस म मिदयानीमन ला हराईस। ओकर सहर के नांव अबीत रखे गीस।
GEN 36:36 हदद के मरे के बाद, मसरेका नगर के रहइया समला ह ओकर जगह म राजा होईस।
GEN 36:37 जब समला ह मर गीस, त साऊल ह ओकर जगह म राजा होईस, जेह नदी के तीर म बसे रहोबोत नगर के रिहिस।
GEN 36:38 साऊल के मरे के बाद, अकबोर के बेटा बाल-हानान ओकर जगह म राजा होईस।
GEN 36:39 अकबोर के बेटा बाल-हानान के मरे के बाद, ओकर जगह म हदद राजा होईस। ओकर सहर के नांव पाऊ रखे गीस, अऊ ओकर घरवाली के नांव महेतबेल रिहिस, जऊन ह मतरेद के बेटी अऊ मे-जाहब के नतनीन रिहिस।
GEN 36:40 अपन कुल अऊ इलाका के मुताबिक एसाव के बंस के मुखियामन के नांव ये रिहिस: तिमना, अलबा, यतेत,
GEN 36:41 ओहोलीबामा, एला, पीनोन,
GEN 36:42 कनज, तेमान, मिबसार,
GEN 36:43 मगदीएल अऊ ईराम।
GEN 37:1 याकूब तो कनान देस म रहत रिहिस, जिहां ओकर ददा रहत रिहिस।
GEN 37:2 याकूब के परिवार के बिबरन ये अय। यूसुफ सतरह बछर के एक जवान रिहिस अऊ अपन भाईमन संग भेड़-बकरी चरात रिहिस; ओकर ये भाईमन ओकर ददा के घरवाली बिलहा अऊ जिलपा के बेटामन रिहिन; अऊ यूसुफ ह अपन भाईमन के खराप काम के खबर अपन ददा ला बताय करय।
GEN 37:3 इसरायल ह यूसुफ ला अपन जम्मो दूसर बेटामन ले जादा मया करय, काबरकि ओह ओकर बुढ़त काल म जनमे रिहिस; अऊ इसरायल ह ओकर बर एक रंग-बिरंगा अंगरखा बनाय रिहिस।
GEN 37:4 जब ओकर भाईमन देखिन कि ओमन के ददा ह ओ जम्मो झन ले जादा यूसुफ ले मया करथे, त ओमन ओकर ले नफरत करे लगिन अऊ ओकर ले ठीक से बात घलो नइं करत रिहिन।
GEN 37:5 यूसुफ ह एक सपना देखिस, अऊ जब ओकर बारे म, ओह अपन भाईमन ला बताईस, त ओमन ओकर ले अऊ नफरत करे लगिन।
GEN 37:6 ओह ओमन ला कहिस, “जऊन सपना मेंह देखे हंव, ओला सुनव:
GEN 37:7 हमन खेत म अनाज के बीड़ा बांधत रहेंन, त मेंह देखेंव कि मोर बीड़ा ह उठके ठाढ़ हो गीस, जबकि तुम्हर बीड़ामन मोर बीड़ा के चारों कोति जूर गीन अऊ ओला दंडवत करिन।”
GEN 37:8 ओकर भाईमन ओला कहिन, “का तेंह हमर ऊपर राज करे के इरादा करत हस? का तेंह सही म हमर ऊपर राज करबे?” यूसुफ के सपना अऊ ओह जऊन कुछू कहिस, ओकर कारन ओमन ओकर ले अऊ जादा नफरत करे लगिन।
GEN 37:9 तब ओह एक ठन अऊ सपना देखिस, अऊ अपन भाईमन ला ये सपना के बारे म घलो बताईस। ओह कहिस, “सुनव, मेंह एक अऊ सपना देखे हंव, अऊ ये बखत सूरज अऊ चंदा अऊ गियारह तारामन मोला दंडवत करत रिहिन।”
GEN 37:10 जब ओह अपन सपना के बारे म अपन भाईमन ला अऊ फेर अपन ददा ला बताईस, त ओकर ददा ह ओला घुड़कके कहिस, “ये का सपना तेंह देखे हस? का सच म, तोर दाई अऊ में अऊ तोर भाईमन आबो अऊ तोर आघू म भुइयां म गिरके तोला दंडवत करबो?”
GEN 37:11 ओकर भाईमन ओकर ले जलन करे लगिन, पर ओकर ददा ह ये बात ला अपन मन म रखिस।
GEN 37:12 यूसुफ के भाईमन अपन ददा के भेड़-बकरीमन ला चराय बर सकेम के लकठा म गे रिहिन,
GEN 37:13 तब इसरायल ह यूसुफ ला कहिस, “जइसे कि तेंह जानथस, तोर भाईमन सकेम के लकठा म भेड़-बकरी चरावत हंय। एकरसेति आ, में तोला ओमन करा पठोहूं।” त ओह जबाब दीस, “बने बात ए।”
GEN 37:14 तब इसरायल ह ओला कहिस, “जा अऊ देख कि तोर भाई अऊ भेड़-बकरीमन कइसन हवंय, अऊ आके मोला ओमन के खबर बता।” तब ओह ओला हेबरोन के घाटी म ले पठोईस। जब यूसुफ ह सकेम हबरिस,
GEN 37:15 त एक मनखे ह ओला मैदान म एती-ओती भटकत देखके ओकर ले पुछिस, “तेंह का खोजत हस?”
GEN 37:16 ओह कहिस, “मेंह अपन भाईमन ला खोजत हंव। का तें मोला बता सकत हस कि ओमन अपन भेड़-बकरीमन ला कहां चरात हवंय?”
GEN 37:17 ओ मनखे ह जबाब दीस, “ओमन इहां ले चल दीन हंय, अऊ मेंह ओमन ला ये कहत सुने हंव, ‘आवव, हमन दोतान जाबो।’ ” एकरसेति यूसुफ अपन भाईमन के पाछू गीस, अऊ ओमन ला दोतान के लकठा म पाईस।
GEN 37:18 एकर पहिली कि ओह अपन भाईमन करा हबरतिस, ओकर भाईमन ओला दूरिहा ले आवत देख डारिन, अऊ ओला मार डारे के उपाय करिन।
GEN 37:19 ओमन आपस म कहे लगिन, “देखव, ओ सपना देखइया आवत हे।
GEN 37:20 आवव, हमन ओला मारके कोनो खंचवा म फटिक दन अऊ ये कहन कि कोनो हिंसक पसु ओला मारके खा लीस। तब हमन देखबो कि ओकर सपना के का होथे।”
GEN 37:21 जब रूबेन ह ये बात ला सुनिस, त ओह ओला ओमन के हांथ ले बंचाय के बिचार करिस अऊ कहिस, “हमन ओकर परान नइं लेवन;
GEN 37:22 लहू झन बहावव। ओला इहां सुन्ना जगह के ये खंचवा म फटिक दव, पर ओकर ऊपर हांथ झन उठावव।” रूबेन ह ओला ओमन के हांथ ले बचाके अपन ददा करा वापिस लाने चाहत रिहिस।
GEN 37:23 एकरसेति जब यूसुफ अपन भाईमन करा हबरिस, तब ओमन ओकर रंग-बिरंगा अंगरखा ला उतार लीन, जेला ओह पहिरे रिहिस,
GEN 37:24 अऊ ओमन ओला लेके खंचवा म फटिक दीन; ओ खंचवा ह खाली रिहिस अऊ ओमा पानी नइं रिहिस।
GEN 37:25 जब ओमन रोटी खाय बर बईठिन, त देखिन कि इसमायलीमन के एक दल ह गिलाद ले आवत रहय। ओमन के ऊंटमन ऊपर मसाला, मलहम अऊ गंधरस लदाय रहय, अऊ ओमन ओला लेके मिसर देस जावत रिहिन।
GEN 37:26 तब यहूदा ह अपन भाईमन ला कहिस, “अपन भाई ला मारके ओकर खून ला छुपाय ले हमन ला का फायदा होही?
GEN 37:27 आवव, हमन ओला इसमायलीमन के हांथ म बेच देवन अऊ अपन हांथ ओकर ऊपर झन उठावन; काबरकि ओह हमर भाई, हमर अपन मांस अऊ खून अय।” अऊ ओकर भाईमन ओकर बात ला मान लीन।
GEN 37:28 एकरसेति जब मिदयानी बेपारीमन ओमन के लकठा म हबरिन, त यूसुफ के भाईमन ओला खंचवा ले बाहिर निकालिन अऊ इसमायलीमन के हांथ म चांदी के बीस सेकेल म बेच दीन, अऊ ओमन यूसुफ ला मिसर देस ले गीन।
GEN 37:29 जब रूबेन ह खंचवा करा लहुंटिस अऊ देखिस कि यूसुफ ह उहां नइं ए, त दुखी होके ओह अपन ओनहा ला चीरिस,
GEN 37:30 अऊ अपन भाईमन करा वापिस जाके कहिस, “छोकरा तो उहां नइं ए! अब में कहां जावंव?”
GEN 37:31 तब ओमन यूसुफ के अंगरखा ला लीन, अऊ एक ठन बोकरा ला मारके ओकर लहू म ओला बोर दीन।
GEN 37:32 ओमन ओ रंग-बिरंगा अंगरखा ला अपन ददा करा वापिस ले जाके कहिन, “येह हमन ला मिले हे। तेंह जांचके देख ले कि येह तोर बेटा के अय कि नइं।”
GEN 37:33 ओह ओला चिन डारिस अऊ कहिस, “येह तो मोर बेटा के अंगरखा ए! कोनो हिंसक पसु ह ओला मारके खा डारिस। सही म, यूसुफ के कुटा-कुटा कर दे गे हवय।”
GEN 37:34 तब याकूब ह दुख म अपन ओनहा ला चीरिस, बोरा ला पहिरिस अऊ अपन बेटा बर अब्बड़ दिन ले दुख मनाईस।
GEN 37:35 ओकर जम्मो बेटा-बेटीमन ओला सांति देय बर आईन, पर ओला सांति नइं मिलिस। ओह कहिस, “नइं, मेंह तब तक दुख मनात रहिहूं, जब तक में अपन बेटा करा कबर म माटी नइं पा जावंव।” ये किसम ले ओकर ददा ह ओकर बर रोते रिहिस।
GEN 37:36 ये बीच म, मिदयानीमन यूसुफ ला मिसर देस ले जाके पोतीफर के हांथ म बेच दीन। पोतीफर ह फिरौन राजा के एक हाकिम याने कि राजा के अंगरछकमन के मुखिया रिहिस।
GEN 38:1 ओ समय अइसन होईस कि यहूदा ह अपन भाईमन करा ले चल दीस अऊ हीरा नांव के अदुल्लाम गांव के रहइया मनखे करा रहे लगिस।
GEN 38:2 उहां यहूदा ह सूआ नांव के कनानी मनखे के बेटी ला देखिस; अऊ ओकर ले बिहाव करके ओकर संग सुतिस।
GEN 38:3 ओह आसरा म होके एक बेटा ला जनम दीस, जेकर नांव एर रखे गीस।
GEN 38:4 ओह फेर आसरा म होईस अऊ एक बेटा ला जनम दीस अऊ ओह ओकर नांव ओनान रखिस।
GEN 38:5 ओह एक अऊ बेटा ला जनमिस, जेकर नांव सेलह रखे गीस। जऊन समय एकर जनम होईस, ओ समय यहूदा ह कजीब म रहत रिहिस।
GEN 38:6 यहूदा ह तामार नांव के एक माईलोगन ले अपन बड़े बेटा एर के बिहाव कर दीस।
GEN 38:7 पर यहूदा के बड़े बेटा एर ह यहोवा के नजर म दुस्ट मनखे रिहिस; एकरसेति यहोवा ह ओला मार डारिस।
GEN 38:8 तब यहूदा ह ओनान ला कहिस, “अपन भौजी संग सुत अऊ ओकर संग देवर के धरम पूरा करके अपन भाई बर संतान पईदा कर।”
GEN 38:9 पर ओनान जानत रिहिस कि जऊन संतान जनमही, ओह ओकर नइं होवय; एकरसेति ओह जब भी अपन भौजी संग सुते, त अपन बीर्य ला ओह भुइयां म गिरा दे, ताकि ओकर भाई के नांव ले कोनो संतान झन होवय।
GEN 38:10 जऊन कुछू ओह करत रिहिस, ओह यहोवा के नजर म दुस्टता के काम रिहिस, एकरसेति यहोवा ह ओला घलो मार डारिस।
GEN 38:11 तब यहूदा ह ये सोचके कि कहूं सेलह ह घलो अपन भाईमन सहीं मर न जावय, अपन बहू तामार ले कहिस, “जब तक मोर बेटा सेलह जवान नइं हो जावय, तब तक तें अपन ददा के घर म बिधवा के रूप म रह।” एकरसेति तामार ह अपन ददा के घर म जाके रहे लगिस।
GEN 38:12 बहुंत समय के बाद, यहूदा के घरवाली याने कि सूआ के बेटी मर गीस। जब यहूदा ह दुख ला भुला गीस, त ओह अपन भेड़ के ऊन कतरइयामन करा तिमना नगर गीस, अऊ संग म अपन संगी अदुल्लाम के रहइया हीरा ला घलो ले गीस।
GEN 38:13 जब तामार ला ये खबर मिलिस, “तोर ससुर ह अपन भेड़मन के ऊन कतरे बर तिमना जावथे।”
GEN 38:14 त ओह अपन बिधवा के पहिरावा ला उतारिस अऊ घूंघट डारके अपन ला ढांप लीस, अऊ एनैम नगर के कपाट करा जाके बईठ गीस, जेह तिमना के डहार म हवय। काबरकि ओह देख डारे रिहिस कि सेलह ह जवान हो गे हवय, पर ओला ओकर घरवाला बने बर नइं दिये गे हवय।
GEN 38:15 जब यहूदा ह ओला देखिस, त ओह ओला बेस्या समझिस, काबरकि ओह अपन मुहूं ला ढांपे रिहिस।
GEN 38:16 ये बिगर जाने कि ओह ओकर बहू अय, यहूदा ह ओकर करा सड़क-तीर म गीस अऊ ओला कहिस, “आ, मोला तोर संग सुतन दे।” ओह पुछिस, “तोर संग सुते के बदले, तें मोला का देबे?”
GEN 38:17 ओह कहिस, “में अपन छेरी के झुंड म ले एक ठन छेरी-पीला तोर मेर पठो दूहूं।” तब ओह पुछिस, “ओला भेजत तक, का तेंह मोला गिरवी के रूप म कुछू देबे?”
GEN 38:18 यहूदा ह कहिस, “गिरवी के रूप म, तोला में का दंव?” ओह जबाब दीस, “तोर मुहर अऊ एकर डोरी, अऊ अपन हांथ म धरे लउठी।” तब ओह ओ चीजमन ला ओला दे दीस अऊ ओकर संग सुतिस, अऊ ओह ओकर कोति ले आसरा म होईस।
GEN 38:19 उहां ले जाय के बाद, ओह अपन घूंघट ला उतार दीस अऊ फेर अपन बिधवा के ओनहा ला पहिर लीस।
GEN 38:20 ये बीच म, यहूदा ह अदुल्लाम के रहइया, अपन संगी के हांथ म एक ठन छेरी-पीला पठो दीस, ताकि ओह ओ माईलोगन ले ओकर गिरवी रखे चीजमन ला ले आवय, पर ओला ओ माईलोगन नइं मिलिस।
GEN 38:21 ओह उहां रहइया मनखेमन ले पुछिस, “ओ मंदिर के बेस्या कहां हवय, जऊन ह एनैम के सड़क-तीर म बईठे रिहिस?” ओमन कहिन, “इहां कोनो मंदिर के बेस्या नइं रिहिस।”
GEN 38:22 एकरसेति ओह यहूदा करा वापिस जाके कहिस, “मोला ओह नइं मिलिस; अऊ उहां रहइया मनखेमन कहिन, ‘इहां कोनो मंदिर के बेस्या नइं रिहिस।’ ”
GEN 38:23 तब यहूदा ह कहिस, “ओला ओ चीजमन ला रखन दे, नइं तो हमर हंसी उड़ाय जाही। मेंह तो ये छेरी-पीला ला ओकर करा पठोय रहेंव, पर ओह तोला नइं मिलिस।”
GEN 38:24 करीब तीन महिना के बाद, यहूदा ला ये बताय गीस, “तोर बहू तामार ह बेभिचार करे हवय, अऊ ओकर कारन से ओह आसरा म हवय।” यहूदा ह कहिस, “ओला बाहिर लानव अऊ जलाके ओला मार डारव!”
GEN 38:25 जब ओला बाहिर लाने जावत रिहिस, त ओह अपन ससुर करा ये खबर पठोईस, “जऊन मनखे के ये चीजमन अंय, ओकरे कोति ले मेंह आसरा म हंव,” ओह ये घलो कहे रिहिस, “देख अऊ चिन ले कि ये मुहर अऊ डोरी अऊ लउठी काकर अंय।”
GEN 38:26 यहूदा ह ओ चीजमन ला चिन डारिस अऊ कहिस, “ओह तो मोर ले कम दोसी अय, काबरकि मेंह ओकर बिहाव अपन बेटा सेलह के संग नइं करेंव।” अऊ ओह ओकर संग फेर कभू नइं सुतिस।
GEN 38:27 जब ओकर छेवारी होय के बेरा आईस, त पता चलिस कि ओकर कोख म जुड़वां लइकामन हवंय।
GEN 38:28 जब ओह छेवारी होवत रिहिस, त एक लइका के हांथ ह बाहिर आईस; एकरसेति धाय ह लाल सुत लेके ओ लइका के कलई म बांध दीस अऊ कहिस, “येह पहिली जनमिस।”
GEN 38:29 पर जब ओ लइका ह अपन हांथ ला भीतर तीर लीस, त ओकर भाई ह जनमिस, तब ओ धाय ह कहिस, “ये किसम ले, तेंह जबरदस्ती निकल आय!” अऊ ओकर नांव पेरेस रखे गीस।
GEN 38:30 तब ओकर भाई, जेकर कलई म सिन्दूरी सूंत बंधाय रिहिस, जनमिस। अऊ ओकर नांव जेरह रखे गीस।
GEN 39:1 जब यूसुफ ला मिसर देस म लाय गीस, त पोतीफर नांव के एक मिसरी, जेह फिरौन के एक हाकिम याने कि अंगरछकमन के मुखिया रिहिस, ओला ओ इसमायलीमन करा ले बिसा लीस, जेमन ओला उहां लाने रिहिन।
GEN 39:2 यूसुफ ह अपन मिसरी मालिक के घर म रहत रिहिस, अऊ यहोवा ह ओकर संग रिहिस, एकरसेति ओह उन्नति करत गीस।
GEN 39:3 जब यूसुफ के मालिक ह देखिस कि यहोवा ओकर संग रहिथे अऊ जऊन काम ओह करथे, यहोवा ह ओमा ओला सफल करथे,
GEN 39:4 त ओकर किरपा के नजर यूसुफ ऊपर होईस अऊ यूसुफ ला ओकर सेवा-टहल करे बर ठहिराय गीस। पोतीफर ह ओला अपन घर के जिम्मा देके अपन जम्मो चीज ला ओकर भरोसा म छोंड़ दीस।
GEN 39:5 जब ले ओह अपन घर के जिम्मा अऊ अपन सबो चीज ला ओकर भरोसा म कर दीस, तब ले यहोवा ह यूसुफ के कारन ओ मिसरी के घर म आसीस देय लगिस। पोतीफर के जम्मो चीज म, ओकर घर अऊ खेत दूनों म यहोवा के आसीस होय लगिस।
GEN 39:6 एकरसेति पोतीफर ह अपन जम्मो चीज ला यूसुफ के देखरेख म कर दीस, इहां तक कि यूसुफ के कारन अपन खाय के रोटी के छोंड़, ओह अपन कोनो चीज के फिकर नइं करत रिहिस। यूसुफ ह सुन्दर अऊ ओकर कद-काठी बहुंत बढ़िया रिहिस,
GEN 39:7 कुछू समय के बाद, ओकर मालिक के घरवाली ह यूसुफ ऊपर नजर लगाईस अऊ कहिस, “आ, मोर संग सुत!”
GEN 39:8 पर ओह इनकार करके अपन मालिक के घरवाली ला कहिस, “जम्मो चीज ला मोर जिम्मा म देके, मोर मालिक ह घर म कोनो चीज के फिकर नइं करय; जऊन कुछू ओकर हवय, ओ जम्मो ला मोर भरोसा म छोंड़ दे हवय।
GEN 39:9 ये घर म मोर ले बड़े कोनो नइं ए। ओह तोला छोंड़, अपन करा अऊ कुछू नइं रखे हे, काबरकि तें ओकर घरवाली अस। तब में अइसन दुस्ट काम करके परमेसर के बिरूध म कइसे पाप कर सकथंव?”
GEN 39:10 अऊ हालाकि ओह रोज-रोज यूसुफ ले बात करय, पर यूसुफ ह ओकर संग सुते बर इनकार करय, अऊ त अऊ ओकर संग रहे बर घलो नइं चाहय।
GEN 39:11 एक दिन अइसन होईस कि यूसुफ ह अपन काम-धाम करे बर घर भीतर गीस, अऊ घर के कोनो सेवक भीतर म नइं रिहिन।
GEN 39:12 तब ओ माईलोगन ह ओकर ओनहा ला धरके कहिस, “मोर संग सुत!” पर ओह अपन ओनहा ला ओकर हांथ म छोंड़के घर के बाहिर भाग गीस।
GEN 39:13 जब ओ माईलोगन ह ये देखिस कि ओह अपन ओनहा ला ओकर हांथ म छोंड़के घर के बाहिर भाग गे हे,
GEN 39:14 त ओह अपन घर के सेवकमन ला बलाके कहिस, “देखव, ओ इबरी मनखे ला मसखरी करे बर इहां लाने गे हवय! ओह तो इहां मोर संग सुते के मतलब से भीतर आय रिहिस, पर में जोर से नरियांय।
GEN 39:15 मदद खातिर जब ओह मोर नरियाई ला सुनिस, त ओह अपन ओनहा ला मोर करा छोंड़के घर के बाहिर भाग गीस।”
GEN 39:16 ओह ओकर ओनहा ला ओकर मालिक के घर आवत तक अपन करा रखे रिहिस।
GEN 39:17 जब ओह आईस, त ओला ये कहानी बताईस, “ओ इबरी दास, जेला तें हमर करा लाने हस, ओह मोर करा मसखरी करे बर आय रिहिस।
GEN 39:18 पर जब में मदद खातिर नरियांय, त ओह अपन ओनहा मोर करा छोंड़के घर के बाहिर भाग गीस।”
GEN 39:19 जब ओकर मालिक ह अपन घरवाली के ये बातमन ला सुनिस, “तोर दास ह मोर संग अइसन बेवहार करे हवय।” त ओह गुस्सा के मारे भड़क गीस।
GEN 39:20 यूसुफ के मालिक ह ओला पकड़के जेलखाना म डार दीस, जिहां राजा के कैदीमन बंद रिहिन। पर जब यूसुफ ह जेलखाना म रिहिस,
GEN 39:21 त यहोवा ह ओकर संग रिहिस। ओह ओकर ऊपर दया करिस, जेकर कारन जेलखाना के दरोगा के किरपा यूसुफ ऊपर होईस।
GEN 39:22 एकरसेति जेलखाना के दरोगा ह यूसुफ ला उहां जम्मो कैदीमन के मुखिया बना दीस, अऊ जऊन काम-बुता उहां करे जावत रिहिस, ओकर जिम्मेदारी घलो यूसुफ ला दे दीस।
GEN 39:23 यूसुफ के देखरेख म जऊन कुछू रिहिस, ओमा के कोनो बात के फिकर दरोगा ला नइं रिहिस, काबरकि यहोवा ह यूसुफ के संग रिहिस अऊ जऊन कुछू यूसुफ ह करय, ओ जम्मो म ओला सफल करत रिहिस।
GEN 40:1 कुछू समय बाद, अइसन होईस कि मिसर के राजा के पीयानेवाला अऊ जेवन पकानेवाला अपन मालिक, राजा के बिरूध म कुछू अपराध करिन।
GEN 40:2 फिरौन ह अपन ओ दूनों हाकिम याने कि पीयानेवालामन के मुखिया अऊ रंधइयामन के मुखिया ऊपर नराज होईस,
GEN 40:3 अऊ ओमन ला पकड़के अंगरछकमन के मुखिया के घर के ओही जेलखाना म डलवा दीस, जिहां यूसुफ कैदी रिहिस।
GEN 40:4 तब अंगरछकमन के मुखिया ह ओमन ला यूसुफ के हांथ म सऊंप दीस, अऊ ओह ओमन के देखरेख करे लगिस। ओमन के कुछू समय तक जेलखाना म रहे के बाद,
GEN 40:5 ओमा के दूनों मनखे—मिसर के राजा के पीयानेवाला अऊ रंधइया, जेमन जेलखाना म बंद रिहिन—एके रात म सपना देखिन, अऊ हर सपना के अलग-अलग मतलब रिहिस।
GEN 40:6 बिहनियां जब यूसुफ ओमन करा आईस, त देखिस कि ओमन उदास हवंय।
GEN 40:7 एकरसेति फिरौन के ओ अधिकारीमन ला, जेमन ओकर संग ओकर मालिक के घर म बंद रिहिन, यूसुफ ह पुछिस, “आज तुम्हर मुहूं काबर उतरे हवय?”
GEN 40:8 ओमन जबाब दीन, “हमन दूनों झन सपना देखे हन, अऊ ओकर अर्थ बतानेवाला कोनो नइं ए।” यूसुफ ह ओमन ला कहिस, “का सपना के अर्थ बतानेवाला परमेसर नो हय? मोला अपन-अपन सपना बतावव।”
GEN 40:9 तब पीयानेवालामन के मुखिया ह अपन सपना यूसुफ ला अइसन बताय लगिस, “मेंह सपना म देखेंव कि मोर आघू म एक अंगूर के नार हे,
GEN 40:10 अऊ ओ अंगूर के नार म तीन ठन डंगाली हवंय। जतकी जल्दी ओमा कली फूटिस, ओमा फूल लगिस, अऊ गुच्छामन म अंगूरमन पाक गीन।
GEN 40:11 फिरौन राजा के कटोरा ह मोर हांथ म रिहिस, अऊ मेंह ओ अंगूरमन ला लेके फिरौन राजा के कटोरा म निचोंय अऊ कटोरा ला ओकर हांथ म दे देंव।”
GEN 40:12 यूसुफ ह ओला कहिस, “एकर मतलब ये अय—तीन डंगालीमन के अर्थ तीन दिन अय।
GEN 40:13 अब ले तीन दिन के भीतर फिरौन राजा ह तोला जेलखाना ले निकलवाही अऊ तोला तोर पद मिल जाही, अऊ तें फिरौन राजा के कटोरा ओकर हांथ म देबे, जइसने कि पहिली तें करत रहय, जब तें ओकर पीयानेवाला रहय।
GEN 40:14 पर जब तोर संग सब ठीक हो जाही, त मोला सुरता करबे अऊ मोर ऊपर दया देखाबे; मोर बारे म फिरौन राजा ला बताबे अऊ ये जेलखाना ले मोला बाहिर निकालबे।
GEN 40:15 असल म, मोला इबरीमन के देस ले जबरदस्ती लाय गे हवय, अऊ इहां घलो मेंह अइसन कुछू काम नइं करे हंव कि मोला ये जेलखाना म डारे जावय।”
GEN 40:16 जब रंधइयामन के मुखिया ह देखिस कि यूसुफ ह सपना के बने अर्थ बताय हवय, त ओह यूसुफ ला कहिस, “मेंह घलो एक सपना देखे हंव: मेंह देखेंव कि मोर मुड़ ऊपर रोटी के तीन ठन टुकनी हवंय।
GEN 40:17 सबले ऊपर के टुकनी म फिरौन राजा बर जम्मो किसम के चुरे-पाके चीजमन हवंय, पर चिरईमन मोर मुड़ म के टुकनी म ले ओ चीजमन ला खावत हवंय।”
GEN 40:18 यूसुफ ह कहिस, “एकर मतलब ये अय: तीन ठन टुकनी के मतलब तीन दिन अय।
GEN 40:19 अब ले तीन दिन के भीतर फिरौन राजा ह तोर मुड़ ला कटवाके तोर देहें ला एक ठन खंभा ऊपर टंगवा दीही। अऊ चिरईमन तोर मांस ला खाहीं।”
GEN 40:20 तीसर दिन फिरौन राजा के जनम दिन रिहिस, अऊ ओह अपन जम्मो करमचारीमन ला एक जेवनार दीस। ओह अपन करमचारीमन के आघू म पीयानेवालामन के मुखिया अऊ रंधइयामन के मुखिया ला जेलखाना ले बाहिर निकलवाईस।
GEN 40:21 ओह पीयानेवालामन के मुखिया ला फेर ओकर पद दे दीस, ताकि ओह फिरौन राजा के हांथ म कटोरा देवय—
GEN 40:22 पर रंधइयामन के मुखिया ला ओह सूली म टंगवा दीस, जइसने कि यूसुफ ह ओमन ला सपना के अर्थ बताय रिहिस।
GEN 40:23 तभो ले, पीयानेवालामन के मुखिया ह यूसुफ ला सुरता नइं करिस; ओह ओला भुला गीस।
GEN 41:1 जब पूरा दू बछर हो गीस, त फिरौन राजा एक सपना देखिस: ओह नील नदी के तीर म ठाढ़े रिहिस,
GEN 41:2 अऊ ओ नदी म ले सात ठन सुन्दर अऊ मोट-मोट गाय निकलके कछार के कांदी ला चरे लगिन।
GEN 41:3 ओमन के बाद, सात ठन आने कुरूप अऊ कमजोर गाय नील नदी ले निकलिन अऊ नदी के तीर म ठाढ़े दूसर गायमन के बाजू म ठाढ़ हो गीन।
GEN 41:4 अऊ जऊन गायमन कुरूप अऊ कमजोर रिहिन, ओमन ओ सात ठन सुन्दर अऊ मोट-मोट गायमन ला खा डारिन। तब फिरौन ह नींद ले जाग गीस।
GEN 41:5 ओह फेर सुत गीस अऊ एक आने सपना देखिस: एक ही डंठल म ले सात ठन मोट अऊ बने बीजा के पीकमन निकलिन।
GEN 41:6 ओमन के बाद, सात ठन अऊ बीजा के पीकमन निकलिन, जेमन पातर अऊ पूरब दिग के हवा ले मुरझा गे रिहिन।
GEN 41:7 ओ बीजा के पातर पीकमन ओ सातों मोट अऊ दाना ले भरे पीकमन ला लील डारिन। तब फिरौन ह जाग गीस; येह एक सपना रिहिस।
GEN 41:8 बिहनियां फिरौन के मन ह बियाकुल हो गीस, एकरसेति ओह मिसर के जम्मो जादूगर अऊ पंडितमन ला बुलवाईस, अऊ ओमन ला अपन दूनों सपना ला बताईस, पर कोनो घलो ओला ओ सपनामन के अर्थ नइं बता सकिन।
GEN 41:9 तब पीयानेवालामन के मुखिया ह फिरौन ला कहिस, “आज में अपन गलती ला सुरता करत हंव।
GEN 41:10 जब फिरौन ह अपन सेवकमन ले नराज रिहिस, अऊ ओह मोला अऊ रंधइयामन के मुखिया ला अंगरछकमन के मुखिया के घर म कैद करके रखे रिहिस।
GEN 41:11 तब हमन दूनों झन एके रथिया एक-एक सपना देखेंन, अऊ हर सपना के अपन म अलग अर्थ रिहिस।
GEN 41:12 उहां हमर संग एक इबरी जवान रिहिस, जऊन ह अंगरछकमन के मुखिया के सेवक रिहिस। हमन ओला अपन-अपन सपना बतायेंन, अऊ ओह हमर सपनामन के अर्थ हमन ला बताईस; हमन के एक-एक के सपना के अर्थ ओह बता दीस।
GEN 41:13 अऊ जइसने-जइसने अर्थ ओह हमन ला बताय रिहिस, एकदम वइसनेच होईस घलो: मोला मोर पद फेर मिल गीस, पर रंधइयामन के मुखिया ला सूली ऊपर लटका दिये गीस।”
GEN 41:14 तब फिरौन ह यूसुफ ला बलाय बर पठोईस, अऊ ओला तुरते जेलखाना ले बाहिर निकाले गीस, अऊ ओह चुंदी कटवाके अऊ कपड़ा बदलके फिरौन के आघू म आईस।
GEN 41:15 फिरौन ह यूसुफ ला कहिस, “मेंह एक सपना देखे हंव, अऊ कोनो ओकर अर्थ नइं बता सकत हें। पर मेंह तोर बारे म सुने हवंव कि तें सपना ला सुनके ओकर अर्थ बता देथस।”
GEN 41:16 यूसुफ ह फिरौन ला जबाब दीस, “में ये नइं कर सकंव, पर परमेसर ह फिरौन ला ओकर ईछा के जबाब दीही।”
GEN 41:17 तब फिरौन ह यूसुफ ला कहिस, “में अपन सपना म नील नदी के तीर म ठाढ़े रहेंव।
GEN 41:18 तब नदी म ले सात ठन मोट-मोट अऊ सुन्दर गाय निकलिन अऊ कछार के कांदी ला चरे लगिन।
GEN 41:19 ओमन के बाद, सात ठन गाय अऊ निकलिन, जेमन दुरबल, बहुंत कुरूप अऊ पातर रिहिन। मेंह पूरा मिसर देस म अइसन कुरूप गाय कभू नइं देखे रहेंव।
GEN 41:20 ये पातर अऊ कुरूप गायमन ओ पहिली के सात ठन मोट-मोट गायमन ला खा डारिन।
GEN 41:21 पर ओमन ला खाय के बाद घलो कोनो ये नइं कह सकत रिहिन कि ओमन अइसन करे हवंय, काबरकि ओमन पहिली के सहीं जस के तस कुरूप दिखत रिहिन। तब में जाग गेंव।
GEN 41:22 “फेर में दूसर सपना म देखेंव कि एक ही डंठल म सात ठन बने-बने अऊ बीजा ले भरे पीकमन निकलिन।
GEN 41:23 ओमन के बाद, अऊ सात ठन पीक निकलिन, जेमन कमजोर अऊ पातर अऊ पूरब के हवा ले मुरझा गे रिहिन।
GEN 41:24 बीजा के ये पातर पीकमन ओ बने सात ठन पीकमन ला लील डारिन। मेंह येला जादूगरमन ला बतांय, पर ओमा के कोनो मोला ओकर अर्थ नइं बता सकिन।”
GEN 41:25 तब यूसुफ ह फिरौन ला कहिस, “फिरौन के सपनामन एके ठन अऊ ओहीच अंय। परमेसर जऊन काम करे बर चाहत हवय, ओला ओह फिरौन ऊपर परगट करे हवय।
GEN 41:26 ओ सात बने गायमन सात बछर अंय, अऊ ओ बीजा के सात ठन बने पीकमन घलो सात बछर अंय; येह एके ठन अऊ ओहीच सपना अय।
GEN 41:27 जऊन सात ठन पातर अऊ कुरूप गायमन निकलिन, अऊ जऊन सात ठन बेकार अऊ पूरब के हवा ले मुरझाय पीकमन निकलिन: ओमन अकाल के सात बछर अंय।
GEN 41:28 “येह ओही बात अय, जेला में फिरौन ला बता डारे हंव: परमेसर जऊन काम करनेवाला हे, ओला ओह फिरौन ला देखाय हवय।
GEN 41:29 सुन, जम्मो मिसर देस म सात बछर तो अब्बड़ ऊपज होही।
GEN 41:30 पर ओकर पाछू, सात बछर अकाल पड़ही, अऊ मिसर देस के मनखेमन ओ जम्मो बने ऊपज ला भुला जाहीं, अऊ अकाल ले देस ह नास हो जाही।
GEN 41:31 ओ अब्बड़ ऊपज ला कोनो सुरता नइं करही, काबरकि ओकर बाद जऊन अकाल पड़ही, ओह बहुंत भयंकर होही।
GEN 41:32 फिरौन ला ये जो सपना दू किसम ले देखाय गीस, एकर कारन ये अय कि ये बात परमेसर कोति ले ठहिराय जा चुके हवय अऊ परमेसर ह येला जल्दी पूरा करही।
GEN 41:33 “एकरसेति अब फिरौन ह कोनो समझदार अऊ बुद्धिमान मनखे ला खोजके ओला मिसर देस ऊपर मुखिया ठहिराय।
GEN 41:34 फिरौन ह देस भर म अधिकारीमन ला ठहिराय, जेमन सुकाल के सात बछर रहत तक मिसर देस के मनखेमन ले ऊपज के पांचवां भाग ला लेवंय।
GEN 41:35 ओमन अवइया बने समय म जम्मो खाय-पीये के चीज ला संकेलंय, अऊ फिरौन के अधिकार ले सहरमन म अनाज ला जमा करंय, ताकि खाय बर भोजन-बस्तु रहय।
GEN 41:36 ये भोजन-बस्तु ला देस बर बचाके रखे जावय, ताकि मिसर देस ऊपर अवइया अकाल के ओ सात बछर के समय एकर उपयोग करे जा सकय, अऊ देस ह अकाल ले नास झन होवय।”
GEN 41:37 ये बात फिरौन अऊ ओकर जम्मो करमचारीमन ला बने लगिस।
GEN 41:38 एकरसेति फिरौन ह अपन करमचारीमन ला कहिस, “का हमन ला ये मनखे सहीं कोनो मिल सकत हे, जेमा परमेसर के आतमा रहिथे?”
GEN 41:39 तब फिरौन ह यूसुफ ला कहिस, “जब परमेसर ह तोला ये जम्मो बात बताय हवय, त तोर सहीं समझदार अऊ बुद्धिमान मनखे अऊ कोनो नइं एं।
GEN 41:40 एकरसेति तेंह मोर महल के मुखिया होबे, अऊ मोर जम्मो मनखेमन तोर हुकूम ला मानहीं। सिरिप सिंघासन के आदर के कारन मेंह तोर ले बड़े रहिहूं।”
GEN 41:41 फेर फिरौन ह यूसुफ ले कहिस, “देख, में तोला पूरा मिसर देस ऊपर अधिकारी ठहिरात हंव।”
GEN 41:42 तब फिरौन ह अपन अंगरी ले मुहरवाला मुंदरी निकालके यूसुफ के अंगरी म पहिरा दीस। ओह ओला सुघर मलमल के ओनहा पहिराईस अऊ ओकर गला म सोन के माला पहिरा दीस।
GEN 41:43 ओह ओला अपन बाद दूसर अधिकारी के रूप म रथ म चघाईस, अऊ मनखेमन ओकर आघू-आघू चिचियाके ये कहत रिहिन, “ओला दंडवत करव!” ये किसम ले, ओह ओला मिसर के जम्मो देस के ऊपर अधिकारी बना दीस।
GEN 41:44 तब फिरौन ह यूसुफ ला कहिस, “फिरौन तो में अंव, पर जम्मो मिसर देस म कोनो घलो तोर हुकूम के बिना कुछू नइं कर सकंय।”
GEN 41:45 फिरौन ह यूसुफ के नांव सापनत-पानेह रखिस अऊ ओन नगर के पुरोहित पोतीपेरा के बेटी आसनत ले ओकर बिहाव करवा दीस। अऊ यूसुफ जम्मो मिसर देस म दउरा करिस।
GEN 41:46 जब यूसुफ ह मिसर के राजा फिरौन के सेवा म आईस, त ओह तीस बछर के रिहिस। अऊ यूसुफ ह फिरौन करा ले जाके जम्मो मिसर देस म दउरा करिस।
GEN 41:47 सुकाल के सातों बछर अब्बड़ फसल होईस।
GEN 41:48 यूसुफ ह मिसर देस म सुकाल के ओ सातों बछर म जम्मो किसम के जेवन के चीज-वस्तु ला संकेलिस अऊ सहरमन म रखत गीस। हर सहर के चारों कोति के खेत म पईदा होय खाय-पीये के चीज ला ओह ओहीच सहर म जमा करत गीस।
GEN 41:49 अइसन करके यूसुफ ह अनाज ला समुंदर के बालू सहीं भारी तदाद म जमा कर लीस; अनाज अतकी जादा हो गीस कि ओह ओकर हिसाब रखे बर छोंड़ दीस, काबरकि येह गनती के बाहिर हो गीस।
GEN 41:50 अकाल परे के पहिली, यूसुफ के दू झन बेटा, ओन सहर के पुरोहित पोतीपेरा के बेटी आसनत ले होईन।
GEN 41:51 यूसुफ ह अपन बड़े बेटा के नांव ये कहिके मनस्से रखिस, “परमेसर ह मोर ले मोर जम्मो दुख अऊ मोर ददा के जम्मो घराना ला भुला दीस हे।”
GEN 41:52 दूसर बेटा के नांव ओह ये कहिके एपरैम रखिस, “मोर दुख भोगे के देस म परमेसर ह मोला फलवंत करे हे।”
GEN 41:53 मिसर देस म सुकाल के सात बछर सिरा गीस,
GEN 41:54 अऊ यूसुफ के कहे मुताबिक सात बछर के अकाल सुरू हो गीस। दूसर जम्मो देसमन म घलो अकाल परिस, पर पूरा मिसर देस म खाय के चीज-वस्तु रिहिस।
GEN 41:55 जब पूरा मिसर देस अकाल के चपेट म आईस, त मनखेमन फिरौन ले नरिया-नरियाके खाय बर मांगे लगिन। तब फिरौन ह जम्मो मिसरीमन ला कहिस, “यूसुफ करा जावव अऊ जऊन कुछू ओह तुमन ला कहिथे, वइसने करव।”
GEN 41:56 जब अकाल ह जम्मो देस म फईल गीस, त यूसुफ ह जम्मो गोदाममन ला खोल दीस अऊ मिसरीमन ला अनाज बेचे लगिस, काबरकि जम्मो मिसर देस म भयंकर अकाल परे रिहिस।
GEN 41:57 अऊ जम्मो संसार के मनखेमन मिसर देस म यूसुफ करा अनाज बिसाय बर आय लगिन, काबरकि जम्मो जगह भयंकर अकाल परे रिहिस।
GEN 42:1 जब याकूब ला पता चलिस कि मिसर देस म अनाज हवय, त ओह अपन बेटामन ला कहिस, “तुमन काबर सिरिप एक-दूसर ला देखत हवव?”
GEN 42:2 फेर ओह कहिस, “मेंह सुने हंव कि मिसर म अनाज हवय। तुमन उहां जावव अऊ हमर बर कुछू अनाज बिसाके लानव, ताकि हमन झन मरन, पर जीयत रहन।”
GEN 42:3 तब यूसुफ के दस भाईमन अनाज बिसाय बर मिसर गीन।
GEN 42:4 पर याकूब ह यूसुफ के भाई बिनयामीन ला ओमन के संग नइं पठोईस, काबरकि ओह डरात रिहिस कि बिनयामीन ऊपर बिपत्ति आ सकत हे।
GEN 42:5 ये किसम ले जऊन मन अनाज बिसाय बर गीन, ओमन म इसरायल के बेटामन घलो गीन, काबरकि कनान देस म घलो अकाल परे रिहिस।
GEN 42:6 यूसुफ ह मिसर देस के राजपाल रिहिस, अऊ ओह ओ देस के जम्मो झन ला अनाज बेचत रिहिस। एकरसेति जब यूसुफ के भाईमन आईन, त ओमन भुइयां म मुहूं के भार गिरके ओला दंडवत करिन।
GEN 42:7 यूसुफ ह अपन भाईमन ला देखत ही ओमन ला चिन डारिस, पर ओह अनजान बने रिहिस अऊ ओमन ले कड़ई से पुछिस, “तुमन कहां ले आय हव?” ओमन कहिन, “हमन कनान देस ले अनाज बिसाय बर आय हन।”
GEN 42:8 हालाकि यूसुफ अपन भाईमन ला चिन डारिस, पर ओमन ओला नइं चिन्हिन।
GEN 42:9 तब ओह ओमन के बारे म देखे अपन सपना ला सुरता करिस अऊ ओमन ला कहे लगिस, “तुमन भेदिया अव! तुमन ये देखे बर आय हव कि हमर देस म कते करा पहरेदारी नइं होवत हे।”
GEN 42:10 ओमन जबाब दीन, “नइं, नइं, हे हमर मालिक, तोर सेवकमन भोजन-बस्तु बिसाय बर आय हवंय।
GEN 42:11 हमन जम्मो झन एके मनखे के बेटा अन। तोर सेवकमन ईमानदार मनखे अंय, भेदिया नो हंय।”
GEN 42:12 ओह ओमन ला कहिस, “नइं! तुमन ये देखे बर आय हव कि हमर देस म कते करा पहरेदारी नइं होवत हे।”
GEN 42:13 पर ओमन कहिन, “तोर सेवकमन बारह भाई रिहिन, अऊ जम्मो झन कनान देस म रहइया एके मनखे के बेटा अंय। सबले छोटे ह अभी हमर ददा करा हवय, अऊ एक झन ह काल कर डारिस।”
GEN 42:14 यूसुफ ह ओमन ला कहिस, “मेंह तुमन ला कह डारे हंव कि तुमन भेदिया अव!
GEN 42:15 अऊ तुम्हर ये किसम ले जांच होही: फिरौन के जिनगी के कसम, जब तक तुम्हर छोटे भाई ह इहां नइं आ जाही, तुमन इहां ले नइं जा सकव।
GEN 42:16 तुमन अपन म ले एक झन ला पठोवव कि ओह तुम्हर भाई ला लेके आवय; बाकि तुमन इहां कैद म रहिहू, ये किसम ले तुम्हर बात ह परखे जाही कि तुमन सच कहत हव कि नइं। यदि तुम्हर बात ह सच नइं होही, त फिरौन के जिनगी के कसम, तुमन सच म भेदिया अव!”
GEN 42:17 अऊ ओह ओमन ला तीन दिन तक कैद म रखिस।
GEN 42:18 तीसर दिन यूसुफ ह ओमन ला कहिस, “एक काम करव, त जीयत रहिहू, काबरकि में परमेसर के भय मानथंव:
GEN 42:19 यदि तुमन ईमानदार मनखे अव, त तुम्हर भाईमन ले एक झन इहां जेलखाना म रूके, अऊ बाकि झन अपन परिवार के मनखेमन के भूख मिटाय बर अनाज ले जावव।
GEN 42:20 पर तुमन अपन सबले छोटे भाई ला मोर करा ले आवव, ताकि तुम्हर बात ला सच साबित करे जा सकय, अऊ तुमन झन मारे जावव।” तब ओमन वइसनेच करिन।
GEN 42:21 ओमन एक-दूसर ला कहिन, “सच म, हमन अपन भाई के कारन दंड पावत हन। हमन देखे रहेंन कि ओह कतेक दुखी रिहिस, जब ओह हमर ले अपन जिनगी बर बिनती करत रिहिस, पर हमन नइं सुनेंन; एकरसेति ये बिपत ह हमर ऊपर परे हवय।”
GEN 42:22 रूबेन ह कहिस, “का में तुमन ला नइं कहे रहेंव कि छोकरा के बिरूध म पाप झन करव? पर तुमन नइं सुनेव! अब हमन ला ओकर लहू के हिसाब देना पड़ही।”
GEN 42:23 ओमन नइं जानत रिहिन कि यूसुफ ह ओमन के बात ला समझत हवय, काबरकि ओमन के संग गोठियाय बर यूसुफ ह एक दुभासिया के उपयोग करत रिहिस।
GEN 42:24 तब ओह ओमन करा ले हट गीस अऊ रोये लगिस, पर ओह फेर वापिस आईस अऊ ओमन ले फेर बात करिस। ओह ओमन ले सिमोन ला लीस अऊ ओमन के आघू म ओला बांधके कैदी बना लीस।
GEN 42:25 तब यूसुफ ह हुकूम दीस कि ओमन के बोरामन ला अनाज ले भर देवव अऊ हर एक झन के बोरा म ओकर रूपिया ला घलो रख देवव, अऊ रसता बर ओमन ला भोजन-पानी दे देवव। ओमन बर अइसने ही करे गीस।
GEN 42:26 तब ओमन अपन गदहामन ऊपर अनाज लादके उहां ले चल दीन।
GEN 42:27 रसता म ओमन एक जगह रात बिताय बर रूकिन, त ओमन के एक झन ह अपन गदहा ला चारा देय बर अपन बोरा ला खोलिस, त ओह देखिस कि ओकर रूपिया ह अनाज के ऊपर म रहय।
GEN 42:28 तब ओह अपन भाईमन ला कहिस, “मोर रूपिया तो लहुंटा दे गे हवय; देखव, येह मोर बोरा म हवय।” तब ओमन के जी म जी नइं रिहिस अऊ ओमन डर के मारे एक-दूसर कोति देखके कांपे लगिन अऊ कहिन, “परमेसर ह हमर संग ये का करे हवय?”
GEN 42:29 जब ओमन कनान देस म अपन ददा याकूब करा आईन, त जऊन कुछू ओमन के संग होय रिहिस, ओ जम्मो बात ओला बताईन। ओमन कहिन,
GEN 42:30 “जऊन मनखे ह ओ देस के हाकिम अय, ओह हमन ले बहुंत कड़ई से बात करिस अऊ हमर ले अइसन बरताव करिस, जइसन कि हमन ओकर देस के भेद लेवत रहेंन।
GEN 42:31 पर हमन ओला कहेंन, ‘हमन ईमानदार मनखे अन; हमन भेदिया नो हन।
GEN 42:32 हमन बारह भाई, जम्मो एके ददा के बेटा अन। एक भाई ह काल कर डारिस, अऊ सबले छोटे ह अभी कनान देस म हमर ददा करा हवय।’
GEN 42:33 “तब ओ मनखे, जऊन ह ओ देस के हाकिम अय, हमन ला कहिस, ‘ये किसम ले मोला मालूम हो जाही कि तुमन ईमानदार मनखे अव कि नइं: तुमन अपन म ले एक भाई ला मोर करा छोंड़ जावव, अऊ अपन परिवार के मनखेमन के भूख मिटाय बर भोजन-बस्तु लेके जावव।
GEN 42:34 पर अपन छोटे भाई ला मोर करा लेके आवव, तब मेंह जानहूं कि तुमन भेदिया नइं, पर ईमानदार मनखे अव। तब में तुम्हर भाई तुमन ला सऊंप दूहूं, अऊ तुमन ये देस म लेन-देन कर सकहू।’ ”
GEN 42:35 जब ओमन अपन-अपन बोरा म ले अनाज निकाले लगिन, त देखिन कि हर एक के रूपिया के थैली ओकर बोरा म हवय! जब ओमन अऊ ओमन के ददा ह रूपिया के थैलीमन ला देखिन, त ओमन बहुंत डरा गीन।
GEN 42:36 तब ओमन के ददा याकूब ह ओमन ला कहिस, “तुमन मोर ले मोर लइकामन ला छीन ले हव। यूसुफ तो नइं ए अऊ सिमोन घलो नइं ए, अऊ अब तुमन बिनयामीन ला घलो ले जाय चाहत हव। ये जम्मो बिपत्ति मोर ऊपर आ गे हवय।”
GEN 42:37 तब रूबेन ह अपन ददा ला कहिस, “यदि में ओला तोर करा वापिस नइं लानहूं, त तें मोर दूनों बेटा ला मार डारबे। तें ओला मोर हांथ म सऊंप दे, अऊ में ओला वापिस लेके आहूं।”
GEN 42:38 पर याकूब ह कहिस, “मोर बेटा ह तोर संग उहां नइं जावय; ओकर भाई ह मर चुके हे अऊ ओह एके झन बांचे हवय। जिहां तुमन जावत हव, यदि डहार म ओकर ऊपर कोनो बिपत पड़थे, त तुमन के कारन, मेंह ये बुढ़ापा म दुख म मर जाहूं।”
GEN 43:1 कनान देस म अभी घलो अकाल ह बहुंत भयंकर रिहिस।
GEN 43:2 जब मिसर ले लाने जम्मो अनाज सिरा गीस, त याकूब ह अपन बेटामन ला कहिस, “मिसर देस वापिस जावव अऊ हमर बर थोरकून अऊ अनाज बिसाके लानव।”
GEN 43:3 तब यहूदा ह ओला कहिस, “ओ मनखे ह हमन ला चेताके कहे रिहिस, ‘यदि तुम्हर भाई तुम्हर संग नइं आही, त फेर तुमन मोर आघू म नइं आ सकव।’
GEN 43:4 यदि तें हमर भाई ला हमर संग पठोबे, त हमन जाबो अऊ तोर बर अनाज बिसाबो।
GEN 43:5 पर यदि तें ओला नइं पठोबे, त हमन नइं जावन, काबरकि ओ मनखे ह हमन ला कहिसे, ‘यदि तुम्हर भाई तुम्हर संग नइं आही, त फेर तुमन मोर आघू म नइं आ सकव।’ ”
GEN 43:6 तब इसरायल ह पुछिस, “तुमन ओ मनखे ला ये बताके कि तुम्हर एक झन अऊ भाई हवय, काबर मोर ऊपर ये समस्या लानेव?”
GEN 43:7 ओमन जबाब दीन, “ओ मनखे ह बड़े सावधानी से हमर अऊ परिवार के बारे म अइसने सवाल पुछिस, ‘का तुम्हर ददा ह अब तक जीयत हवय? का तुम्हर अऊ भाई हवय?’ तब हमन सधारन रूप म ओकर सवाल के जबाब देंन। हमन कइसे जान सकत रहेंन कि ओह ये कहिही, ‘अपन भाई ला इहां ले आवव’?”
GEN 43:8 तब यहूदा ह अपन ददा इसरायल ला कहिस, “ओ छोकरा ला मोर संग म पठो दे अऊ हमन तुरते चले जाबो, ताकि हमन अऊ तें अऊ हमर लइकामन जीयत रहंय अऊ मरंय झन।
GEN 43:9 में खुद ओकर सुरकछा के जमानत अंव; तेंह मोला ओकर बर जिम्मेदार ठहिरा सकथस। यदि में ओला तोर करा लानके इहां तोर आघू म ठाढ़ नइं कर देवंव, त मोर जिनगी भर, में तोर अपराधी ठहिरहूं।
GEN 43:10 यदि हमन देरी नइं करतेंन, त अभी तक दू बार जाके लहुंट आय रहितेंन।”
GEN 43:11 तब ओमन के ददा इसरायल ह ओमन ला कहिस, “यदि येह जरूरी अय, त अइसने करव: ये देस के सबले बने चीजमन ले थोर-थोर अपन बोरा म रखव अऊ ओ मनखे बर भेंट के रूप म ले जावव—जइसे कि थोरकन मलहम अऊ थोरकन मंधरस, कुछू मसाला अऊ गंधरस, कुछू पिसता अऊ बादाम।
GEN 43:12 अपन-अपन संग म दू गुना रूपिया ले जावव; काबरकि जऊन रूपिया तुम्हर बोरामन के मुहूं म रख दिये गे रिहिस, ओला लहुंटाना जरूरी अय। सायद गलती से अइसने होय होही।
GEN 43:13 अपन भाई ला घलो ले लव अऊ ओ मनखे करा तुरते वापिस जावव।
GEN 43:14 अऊ सर्वसक्तिमान परमेसर ह ओ मनखे ला तुम्हर ऊपर दयालु करय, ताकि ओह तुम्हर दूसर भाई अऊ बिनयामीन ला तुम्हर संग वापिस आवन दे। यदि में बिगर बंस के हो जावंव, त हो जावंव।”
GEN 43:15 तब ओ मनखेमन ओ भेंट अऊ दू गुना रूपिया, अऊ बिनयामीन ला संग म लेके चल दीन, अऊ मिसर म हबरके यूसुफ के आघू म ठाढ़ होईन।
GEN 43:16 जब यूसुफ ह बिनयामीन ला ओमन के संग देखिस, त ओह अपन घर के देखरेख करइया ला कहिस, “ये मनखेमन ला मोर घर म ले जा, अऊ एक पसु मारके जेवन तियार कर; काबरकि येमन मंझनियां मोर संग जेवन करहीं।”
GEN 43:17 ओ मनखे ह यूसुफ के कहे मुताबिक करिस अऊ ओ मनखेमन ला यूसुफ के घर ले गीस।
GEN 43:18 जब ओमन ला यूसुफ के घर म लाने गीस, त ओमन डरा गीन। ओमन सोचिन, “जऊन रूपिया पहिली बखत हमर बोरामन म लहुंटा दिये गे रिहिस, ओकरे कारन हमन ला इहां लाने गे हवय। ओह हमर ऊपर हमला करके हमन ला अपन बस म करे चाहत हे अऊ हमन ला गुलाम के रूप म पकड़के हमर गदहामन ला लेय चाहत हे।”
GEN 43:19 एकरसेति ओमन यूसुफ के घर के देखरेख करइया करा गीन अऊ घर के कपाट करा ओकर ले ये कहे लगिन,
GEN 43:20 “हे हमर मालिक, हमन ला छेमा कर; हमन पहिली बार इहां अनाज बिसाय बर आय रहेंन।
GEN 43:21 पर वापिस जावत बेरा, जब एक जगह रात बिताय बर रूकेंन अऊ अपन-अपन बोरा ला खोलेंन, त का देखेंन कि हर एक के पूरा-पूरा पईसा ओकर बोरा के मुहूं म धराय रहय। एकरसेति हमन ओला अपन संग लेके आय हन।
GEN 43:22 हमन अपन संग अऊ रूपिया अनाज बिसाय बर लाने हन। हमन नइं जानन कि हमर रूपिया ला हमर बोरा म कोन रखे रिहिस।”
GEN 43:23 घर के देखरेख करइया ह कहिस, “कोनो बात नइं ए; झन डरव। तुम्हर परमेसर, जऊन ह तुम्हर ददा के घलो परमेसर अय, ओही ह तुम्हर बोरा म तुमन ला धन दे हवय; तुम्हर रूपिया तो मोला मिल गे हवय।” तब ओह सिमोन ला निकालके ओमन करा ले आईस।
GEN 43:24 तब ओ सेवक ह ओ मनखेमन ला यूसुफ के घर भीतर ले आईस, अऊ गोड़ धोय बर ओमन ला पानी दीस अऊ ओमन के गदहामन बर चारा दीस।
GEN 43:25 ये सुनके कि आज हमन ला इहां जेवन करना हे, ओमन यूसुफ के आय के समय, याने कि मंझनियां तक, अपन-अपन भेंट ला तियार करके रखिन।
GEN 43:26 जब यूसुफ ह घर म आईस, त ओमन घर के भीतर लाय अपन भेंट यूसुफ ला दीन, अऊ भुइयां म गिरके ओला दंडवत करिन।
GEN 43:27 ओह ओमन के हालचाल पुछिस अऊ कहिस, “तुम्हर सियान ददा कइसने हवय, जेकर बारे म तुमन मोला बताय रहेव? का ओह अभी घलो जीयत हवय?”
GEN 43:28 ओमन कहिन, “हव, तोर सेवक, हमर ददा ह अभी घलो जीयत हवय अऊ बने हवय।” अऊ ओमन मुड़ नवाके ओला दंडवत करिन।
GEN 43:29 जब ओह आंखी उठाके अपन भाई बिनयामीन ला देखिस, जऊन ह ओकर खुद के दाई के बेटा रिहिस, त ओह पुछिस, “का येह तुम्हर सबले छोटे भाई अय, जेकर बारे म तुमन मोला बताय रहेव?” अऊ ओह कहिस, “हे मोर बेटा, परमेसर तोर ऊपर अनुग्रह करय।”
GEN 43:30 अपन भाई ला देखके यूसुफ के आंखी भर आईस, अऊ रोये बर सुन्ना जगह देखे लगिस। ओह अपन निजी कमरा म गीस अऊ उहां रोये लगिस।
GEN 43:31 अपन मुहूं ला धोये के बाद, ओह बाहिर निकलिस अऊ अपनआप ला सांत करके कहिस, “जेवन परोसव।”
GEN 43:32 तब ओमन ओकर बर अलग, ओकर भाईमन बर अलग, अऊ जऊन मिसरी मनखेमन ओकर संग खावत रिहिन, ओमन बर घलो अलग जेवन परोसिन, काबरकि मिसरी मनखेमन इबरी मनखेमन संग जेवन नइं करंय; ओमन बर अइसन करई ह घिन के बात रिहिस।
GEN 43:33 यूसुफ के भाईमन ला ओकर आघू म ओमन के उमर के हिसाब से बईठाय गे रिहिस, पहिले बड़खा, फेर ओकर बाद वालामन अऊ आखिरी म सबले छोटे; अऊ ओमन चकित होके एक-दूसर ला देखे लगिन।
GEN 43:34 तब यूसुफ के मेज म ले ओमन ला भोजन-बस्तु परोसे गीस, पर बिनयामीन ला ओकर भाईमन ले पांच गुना जादा भोजन-बस्तु परोसे गीस। ओमन यूसुफ के संग खुलके खाईन-पीईन।
GEN 44:1 तब यूसुफ ह अपन घर के देखरेख करइया ला ये हुकूम दीस: “ये मनखेमन जतेक जादा भोजन-बस्तु अपन बोरा म ले जा सकथें, ओतेक जादा भरव, अऊ हर एक के रूपिया ला ओमन के बोरा के मुहूं म रख देवव।
GEN 44:2 तब मोर चांदी के कटोरा ला सबले छोटे के बोरा के मुहूं म ओकर अनाज के रूपिया के संग रख देवव।” अऊ ओह वइसने करिस, जइसने यूसुफ ह कहिस।
GEN 44:3 बिहनियां होते ही, ओ मनखेमन ला ओमन के गदहामन के सहित बिदा करे गीस।
GEN 44:4 ओमन सहर ले जादा दूरिहा नइं गे होहीं जब यूसुफ ह अपन घर के देखरेख करइया ला कहिस, “तुरते ओ मनखेमन के पीछा कर, अऊ जब ओमन तुमन ला मिल जाहीं, त ओमन ला कह, ‘तुमन भलई के बदला म बुरई काबर करे हव?
GEN 44:5 का येह ओ कटोरा नो हय, जेमा मोर मालिक पीथे अऊ अगम के बात कहे बर घलो एकर उपयोग करथे? तुमन एक दुस्ट काम करे हव।’ ”
GEN 44:6 जब ओला ओमन मिल गीन, त ओह ओमन ले वइसनेच कहिस।
GEN 44:7 पर ओमन ओला कहिन, “हे हमर मालिक, तें अइसन बात काबर कहत हस? अइसने काम करई तोर सेवकमन ले दूरिहा रहय!
GEN 44:8 देख, इहां तक कि जऊन रूपिया हमन ला हमर बोरामन के मुहूं के भीतर म मिले रिहिस, ओला हमन कनान देस ले तोर करा वापिस ले आयेंन, त फेर तोर मालिक के घर ले चांदी या सोन, हमन काबर चोराबो?
GEN 44:9 यदि तोर दासमन ले जेकर करा घलो ओ चीज निकलही, ओह मार डारे जाही; अऊ बाकि हमन, हे हमर मालिक, तोर गुलाम हो जाबो।”
GEN 44:10 ओह कहिस, “तब, ठीक हे। तुम्हर कहे मुताबिक होवय। जेकर करा ओ चीज निकलही, ओह मोर दास हो जाही; अऊ बाकि तुमन दोस मुक्त हो जाहू।”
GEN 44:11 ओमन जल्दी-जल्दी अपन-अपन बोरा ला भुइयां म उतारके ओला खोले लगिन।
GEN 44:12 तब यूसुफ के घर के देखरेख करइया ह खोजे लगिस; ओह सबले बड़े के बोरा ले सुरू करके सबले छोटे के बोरा म खतम करिस। अऊ कटोरा ह बिनयामीन के बोरा म मिलिस।
GEN 44:13 येला देखके ओमन अपन-अपन ओनहा ला चीरिन। तब ओमन जम्मो झन अपन-अपन गदहा ऊपर बोरा लादके सहर म वापिस आईन।
GEN 44:14 जब यहूदा अऊ ओकर भाईमन आईन, त यूसुफ ह घरेच म रिहिस, अऊ ओमन ओकर आघू म भुइयां म गिरिन।
GEN 44:15 यूसुफ ह ओमन ला कहिस, “तुमन ये कइसन काम करे हव? का तुमन ये नइं जानत हव कि मोर सहीं मनखे ह अगम के बात कहे के दुवारा चीज के पता लगा सकथे?”
GEN 44:16 “हमन हमर मालिक ला का कह सकत हन?” यहूदा ह कहिस। “हमन का कह सकत हन? हमन कइसे अपनआप ला निरदोस साबित करन? परमेसर ह तोर सेवकमन के अपराध ला देखा दे हे। अब हमन हमर मालिक के गुलाम अन—हमन खुद अऊ ओह घलो, जेकर करा कटोरा मिले हवय।”
GEN 44:17 पर यूसुफ ह कहिस, “अइसन करई मोर ले दूरिहा रहय! जेकर करा कटोरा निकले हवय, सिरिप ओहीच ह मोर दास होही। बाकि के तुमन सांति से अपन ददा करा वापिस जावव।”
GEN 44:18 तब यहूदा ओकर करा जाके कहे लगिस, “हे मोर मालिक, अपन सेवक ला छेमा कर; मोला एक बात कहन दे। तोर गुस्सा तोर सेवक ऊपर झन भड़के, काबरकि तें तो फिरौन के बरोबर अस।
GEN 44:19 हे मोर परभू, तेंह अपन सेवकमन ले पुछे रहय, ‘का तुम्हर ददा या भाई हवय?’
GEN 44:20 अऊ हमन जबाब देय रहेंन, ‘हव, हमर डोकरा ददा हवय, अऊ ओकर बुढ़त काल म जनमे एक बेटा हवय। ओकर भाई ह मर गीस, अऊ अब ओह अपन दाई के एके झन बेटा बांचे हवय, अऊ ओकर ददा ह ओकर ले मया करथे।’
GEN 44:21 “तब तें अपन सेवकमन ला कहे, ‘ओला मोर करा ले आवव ताकि मेंह खुदे ओला देख सकंव।’
GEN 44:22 अऊ हे मोर मालिक, हमन कहेंन, ‘ओ लड़का ह अपन ददा ला नइं छोंड़ सकय; नइं तो ओकर ददा ह मर जाही।’
GEN 44:23 पर तें अपन सेवकमन ला कहे, ‘यदि तुम्हर छोटे भाई तुम्हर संग नइं आही, त फेर तुमन मोर आघू म नइं आ सकव।’
GEN 44:24 जब हमन तोर सेवक हमर ददा करा गेंन, त हे मोर परभू, जऊन कुछू तेंह कहे रहे, हमन ओला बतायेंन।
GEN 44:25 “तब हमर ददा ह कहिस, ‘वापिस जावव अऊ थोरकून अऊ भोजन-बस्तु बिसाके लानव।’
GEN 44:26 पर हमन कहेंन, ‘हमन नइं जा सकन। हां, यदि हमर छोटे भाई हमर संग होही; त हमन जाबो। यदि हमर छोटे भाई हमर संग नइं होही, त हमन ओ मनखे के आघू म नइं जा सकन।’
GEN 44:27 “तब तोर सेवक मोर ददा ह हमन ला कहिस, ‘तुमन तो जानत हव कि मोर घरवाली दू झन बेटा जनमे रिहिस।
GEN 44:28 ओमा ले एक झन तो मोर ले दूरिहा चले गीस, अऊ मेंह सोचेंव, “निस्चय ही ओला पसुमन चीर डारे होहीं।” अऊ तब ले ओला, में नइं देखे हंव।
GEN 44:29 यदि तुमन येला घलो मोर आंखी ले दूरिहा ले जाथव, अऊ कोनो बिपत एकर ऊपर पड़थे, त तुम्हर कारन, में ये बुढ़ापा के समय दुख म मर जाहूं।’
GEN 44:30 “एकरसेति, तोर सेवक मोर ददा करा जब में वापिस जाहूं, अऊ यदि ये लड़का हमर संग म नइं होही, अऊ जब मोर ददा, जेकर परान ये लड़का म लटके रहिथे,
GEN 44:31 देखही कि लड़का ह उहां नइं ए, त ओह मर जाही। तोर सेवकमन के कारन, हमर ददा ह बुढ़ापा म दुख म मर जाही।
GEN 44:32 तोर सेवक ह मोर ददा ला ये कहिके लड़का के सुरकछा के जमानत ले हवय, ‘यदि में येला तोर करा वापिस नइं लानहूं, त मोर जिनगी भर, में तोर अपराधी ठहिरहूं!’
GEN 44:33 “एकरसेति, हे मोर मालिक, किरपा करके तोर सेवक ला ये लड़का के बदला म तोर गुलाम के रूप म इहां रहन दे, अऊ ये लड़का ला अपन भाईमन संग वापिस जावन दे।
GEN 44:34 यदि ये लड़का ह मोर संग नइं जाही, त में कइसे अपन ददा करा वापिस जा सकथंव? नइं! मोला अपन ददा ऊपर अवइया दुख ला झन देखन दे।”
GEN 45:1 तब यूसुफ ह अपन जम्मो सेवकमन के आघू म अपनआप ला नइं रोक सकिस, अऊ चिचियाके कहिस, “इहां के जम्मो मनखे बाहिर चले जावव!” अपन भाईमन के आघू म अपनआप ला परगट करे के बेरा उहां यूसुफ के संग अऊ कोनो नइं रिहिन।
GEN 45:2 अऊ ओह चिचिया-चिचियाके रोय लगिस, जेला मिसरीमन सुनिन, अऊ फिरौन के घर के मन ला घलो एकर खबर मिलिस।
GEN 45:3 यूसुफ ह अपन भाईमन ला कहिस, “में यूसुफ अंव! का मोर ददा अभी तक ले जीयत हवय?” पर ओकर भाईमन ओला जबाब नइं दे सकिन, काबरकि ओमन ओकर आघू म घबरा गे रिहिन।
GEN 45:4 तब यूसुफ ह अपन भाईमन ला कहिस, “मोर लकठा म आवव।” जब ओमन ओकर लकठा म आईन, त ओह कहिस, “मेंह तुम्हर भाई यूसुफ अंव, जेला तुमन मिसर अवइयामन के हांथ म बेच दे रहेव।
GEN 45:5 अब तुमन दुखी झन होवव, अऊ मोला इहां बेच देय के कारन, अपनआप ले गुस्सा झन होवव, काबरकि परमेसर ह परान बचाय बर मोला तुम्हर आघू इहां पठो दीस।
GEN 45:6 दू बछर हो गे, ये देस म अकाल परे हवय, अऊ अवइया पांच साल तक अइसने ही होही—न तो नांगर चलही अऊ न ही फसल लुये जाही।
GEN 45:7 पर परमेसर ह मोला तुम्हर आघू ये खातिर पठोईस कि ओह तुम्हर बर तुम्हर एक भाग ला बंचाके रखय अऊ एक बड़े छुटकारा के दुवारा तुम्हर जिनगी ला बचावय।
GEN 45:8 “एकरसेति, मोला इहां पठोइया तुमन नइं, पर परमेसर अय। ओही ह मोला फिरौन के ददा सहीं अऊ ओकर जम्मो घर के मालिक अऊ जम्मो मिसर देस ऊपर सासन करइया ठहिराय हवय।
GEN 45:9 अब तुमन जल्दी करके मोर ददा करा जावव अऊ ओला कहव, ‘तोर बेटा यूसुफ ह अइसन कहत हे: परमेसर ह मोला जम्मो मिसर देस के मालिक बनाय हे। तें बिगर देरी करे मोर करा चले आ।
GEN 45:10 तें गोसेन के इलाका म रहिबे—तें, तोर लइकामन अऊ नाती-पोतामन, तोर भेड़-बकरी अऊ गाय-बईला, अऊ जऊन कुछू तोर करा हवय, ओ जम्मो सहित मोर लकठा म रहिबे।
GEN 45:11 अकाल के जऊन पांच बछर अऊ होही, ओमा में उहां तोर पालन-पोसन करहूं। अइसन झन होवय कि तें अऊ तोर घराना अऊ तोर करा जऊन मन हवंय, ओमन भूखन मरंय।’
GEN 45:12 “तुमन खुद अपन आंखी ले देख सकत हव, अऊ मोर भाई बिनयामीन घलो देख सकत हे कि में जो तुम्हर ले गोठियावत हंव, सही म यूसुफ अंव।
GEN 45:13 ओ जम्मो आदरमान, जऊन ह मोर करा मिसर देस म हवय अऊ जऊन कुछू तुमन देखे हव, ओ जम्मो बात मोर ददा ला बतावव। अऊ तुरते मोर ददा ला इहां ले आवव।”
GEN 45:14 तब ओह अपन भाई बिनयामीन ला पोटारके रोईस, अऊ बिनयामीन घलो रोवत ओला पोटार लीस।
GEN 45:15 अऊ यूसुफ ह अपन जम्मो भाईमन ला चूमके रोईस। एकर बाद ओकर भाईमन ओकर संग गोठियाय लगिन।
GEN 45:16 जब ये खबर फिरौन के महल म पहुंचिस कि यूसुफ के भाईमन आय हवंय, त फिरौन अऊ ओकर जम्मो करमचारीमन खुस होईन।
GEN 45:17 फिरौन ह यूसुफ ला कहिस, “अपन भाईमन ले कह कि ओमन अइसन करंय: ‘अपन पसुमन ऊपर सामान लादके कनान देस वापिस चले जावंय,
GEN 45:18 अऊ अपन ददा अऊ अपन घर के मनखेमन ला लेके मोर करा आवंय। मेंह मिसर देस के सबले बने भुइयां तुमन ला दूहूं अऊ तुमन ला देस के उत्तम से उत्तम चीज खाय बर मिलही।’
GEN 45:19 “तोला ये घलो हुकूम दिये जावत हे कि तें ओमन ला बता कि ओमन अइसन करंय: ‘मिसर देस ले कुछू गाड़ी अपन लइका अऊ घरवाली अऊ तोर ददा बर ले जावंय, अऊ ओमन ला लेके आवंय।
GEN 45:20 अपन सामान के चिंता झन करंय, काबरकि मिसर म सबले बने चीजमन तुम्हर होही।’ ”
GEN 45:21 इसरायल के बेटामन वइसने ही करिन। यूसुफ ह फिरौन के हुकूम के मुताबिक ओमन ला गाड़ी दीस, अऊ रसता बर ओमन ला भोजन-बस्तु घलो दीस।
GEN 45:22 ओमा के हर एक झन ला ओह एक-एक जोड़ा ओनहा दीस, पर बिनयामीन ला ओह तीन सौ चांदी के सेकेल अऊ पांच जोड़ा ओनहा दीस।
GEN 45:23 अऊ अपन ददा बर ओह ये सामान पठोईस: मिसर देस के सबले बने चीजमन ले लदाय दस ठन गदहा, अऊ अनाज अऊ रोटी अऊ ओकर ददा के रसता बर आने भोजन-बस्तु ले लदाय दस ठन गदही।
GEN 45:24 तब ओह अपन भाईमन ला बिदा करिस, अऊ जब ओमन जावत रिहिन, त ओह ओमन ला कहिस, “डहार म झगरा झन करिहव!”
GEN 45:25 मिसर ले निकलके, ओमन कनान देस म अपन ददा याकूब करा आईन।
GEN 45:26 ओमन ओला ये बताईन, “यूसुफ अभी तक ले जीयत हे! अऊ जम्मो मिसर देस म ओही ह राज करत हे।” ये सुनके, याकूब ह हक्का-बक्का हो गीस; ओह ओमन के बात ला बिसवास नइं करिस।
GEN 45:27 पर जब ओमन ओ जम्मो बात ओला बताईन, जेला यूसुफ ह ओमन ले कहे रिहिस, अऊ जब ओह ओ गाड़ीमन ला देखिस, जेला यूसुफ ह ओला लाने बर पठोय रिहिस, तब ओमन के ददा याकूब के मन ह सांत होईस।
GEN 45:28 अऊ इसरायल ह कहिस, “मोला बिसवास हो गे हे! मोर बेटा यूसुफ ह अभी तक जीयत हे। एकर पहिली कि में मर जावंव, मेंह जाके ओला देखहूं।”
GEN 46:1 तब इसरायल ह अपन जम्मो संपत्ति लेके निकलिस, अऊ जब ओह बेरसेबा म हबरिस, त उहां ओह अपन ददा इसहाक के परमेसर ला बलिदान चघाईस।
GEN 46:2 अऊ परमेसर ह रथिया इसरायल ला दरसन म कहिस, “हे याकूब! हे याकूब!” ओह कहिस, “में इहां हंव।”
GEN 46:3 परमेसर ह कहिस, “में परमेसर अंव, तोर ददा के परमेसर। तें मिसर देस जाय बर झन डरा, काबरकि में उहां तोर ले एक बड़े जाति बनाहूं।
GEN 46:4 मेंह तोर संग म मिसर जाहूं, अऊ निस्चित रूप से, में उहां ले तोला फेर वापिस ले आनहूं। अऊ यूसुफ ह अपन हांथ ले तोर आंखीमन ला बंद करही।”
GEN 46:5 तब याकूब बेरसेबा ले चल दीस, अऊ इसरायल के बेटामन अपन ददा याकूब अऊ अपन लइकामन ला अऊ अपन घरवालीमन ला ओ गाड़ीमन म चघाके चल दीन, जेला फिरौन ह ओमन ला लाने बर पठोय रिहिस।
GEN 46:6 ये किसम ले, याकूब अऊ ओकर संतानमन अपन भेड़-बकरी, गाय-बईला, अऊ कनान म कमाय अपन जम्मो धन-दौलत ला लेके मिसर देस गीन।
GEN 46:7 याकूब ह अपन संग अपन बेटा-बेटी, पोता-पोती, याने अपन जम्मो संतान ला मिसर म ले आईस।
GEN 46:8 इसरायल (याकूब अऊ ओकर संतान) के बेटामन के नांव ये अय, जऊन मन ओकर संग मिसर देस गीन: याकूब के बड़खा बेटा रूबेन।
GEN 46:9 रूबेन के बेटामन: हनोक, पल्लू, हेसरोन अऊ करमी।
GEN 46:10 सिमोन के बेटामन: यमूएल, यामीन, ओहद, याकीन, सोहर अऊ कनानी माईलोगन ले जनमे साऊल।
GEN 46:11 लेवी के बेटामन: गेरसोन, कहात अऊ मरारी।
GEN 46:12 यहूदा के बेटामन: एर, ओनान, सेलह, पेरेस अऊ जेरह (पर एर अऊ ओनान कनान देस म ही मर गे रिहिन)। पेरेस के बेटामन: हेसरोन अऊ हामूल।
GEN 46:13 इस्साकार के बेटामन: तोला, पुआ, यसूब अऊ सिमरोन।
GEN 46:14 जबूलून के बेटामन: सेरेद, एलोन अऊ यहलेल।
GEN 46:15 येमन याकूब के घरवाली लिआ ले पदन-अराम म जनमे बेटामन रिहिन। ओकर दीना नांव के एक बेटी घलो रिहिस। ओकर ये बेटा अऊ बेटीमन कुल तैंतीस झन रिहिन।
GEN 46:16 गाद के बेटामन: सिफियोन, हाग्गी, सूनी, एसबोन, एरी, अरोदी अऊ अरेली।
GEN 46:17 आसेर के बेटामन: यिमना, इसवा, इसवी, बरीया। ओमन के बहिनी के नांव सेरह रिहिस। बरीया के बेटामन: हेबेर अऊ मलकीएल।
GEN 46:18 येमन याकूब कोति ले जिलपा ले जनमे लइकामन रिहिन, जेला लाबान ह अपन बेटी लिआ ला दासी के रूप म देय रिहिस। येमन कुल सोलह झन रिहिन।
GEN 46:19 याकूब के घरवाली राहेल के बेटामन: यूसुफ अऊ बिनयामीन।
GEN 46:20 मिसर देस म, ओन के पुरोहित पोतीपेरा के बेटी आसनत ले यूसुफ के दू झन बेटा होईन—मनस्से अऊ एपरैम।
GEN 46:21 बिनयामीन के बेटामन: बेला, बेकेर, असबेल, गेरा, नामान, एही, रोस, मुप्पीम, हुप्पीम अऊ अर्द।
GEN 46:22 येमन याकूब के घरवाली राहेल ले जनमे बेटामन रिहिन। येमन कुल चौदह झन रिहिन।
GEN 46:23 दान के बेटा: हूसीम।
GEN 46:24 नपताली के बेटामन: यहसेल, गूनी, येसेर अऊ सिल्लेम।
GEN 46:25 येमन याकूब कोति ले बिलहा ले जनमे बेटामन रिहिन, जेला लाबान ह अपन बेटी राहेल ला दासी के रूप म देय रिहिस। येमन कुल सात झन रिहिन।
GEN 46:26 ओ जम्मो, जऊन मन याकूब के संग मिसर म गीन अऊ ओकर खुद के बंस रिहिन—ओमन कुल छियासठ झन रिहिन अऊ येमा ओकर बहुमन ला नइं गने गे रिहिस।
GEN 46:27 यूसुफ के दू झन बेटा मिसर म जनमिन; येमन अऊ याकूब के घराना के जऊन मनखेमन मिसर म गीन, ओ जम्मो मिलाके कुल सत्तर झन रिहिन।
GEN 46:28 याकूब ह यहूदा ला अपन आघू यूसुफ करा पठोईस कि ओह ओकर ले गोसेन के डहार के पता करय। जब ओमन गोसेन के इलाका म आईन,
GEN 46:29 तब यूसुफ ह अपन रथ फंदवाके अपन ददा इसरायल ले भेंट करे बर गोसेन गीस। जब ओह अपन ददा करा हबरिस, त ओला पोटारके बहुंत देर तक रोईस।
GEN 46:30 इसरायल ह यूसुफ ला कहिस, “में अब मरे बर तियार हंव, काबरकि में खुद देख चुकेंव कि तें जीयत हस।”
GEN 46:31 तब यूसुफ ह अपन भाईमन ला अऊ अपन ददा के घर के मनखेमन ला कहिस, “मेंह जाके फिरौन ले गोठियाहूं अऊ ओला बताहूं, ‘मोर भाईमन अऊ मोर ददा के घर के मनखे, जेमन कनान देस म रहत रिहिन, ओमन मोर करा आ गे हवंय।
GEN 46:32 ओमन चरवाहा अंय; ओमन पसु-पालन करथें, अऊ ओमन अपन संग अपन भेड़-बकरी, गाय-बईला अऊ अपन जम्मो सामान लेके आय हवंय।’
GEN 46:33 जब फिरौन ह तुमन ला बलाके पुछही, ‘तुमन का धंधा करथव?’
GEN 46:34 तब तुमन ये कहिहू, ‘तोर सेवकमन लइकापन ले लेके आज तक पसु-पालन करत आय हन, अऊ हमर पुरखामन घलो अइसने ही करत रिहिन।’ तब तुमन ला गोसेन के इलाका म रहे बर मिलही, काबरकि मिसरीमन जम्मो चरवाहामन ले घिन करथें।”
GEN 47:1 यूसुफ ह फिरौन करा जाके ये समाचार दीस, “मोर ददा अऊ भाईमन अपन भेड़-बकरी, गाय-बईला अऊ अपन जम्मो सामान सहित कनान देस ले आ गे हवंय अऊ अभी ओमन गोसेन म हवंय।”
GEN 47:2 ओह अपन भाईमन ले पांच झन ला चुनिस अऊ ओमन ला फिरौन करा लानिस।
GEN 47:3 फिरौन ह ओकर भाईमन ले पुछिस, “तुमन के का धंधा अय?” ओमन फिरौन ला कहिन, “तोर सेवकमन चरवाहा अंय, अऊ हमर पुरखामन घलो चरवाहा रिहिन।”
GEN 47:4 ओमन ओला ये घलो कहिन, “हमन इहां कुछू समय तक रहे बर आय हन, काबरकि कनान म भारी अकाल परे हे अऊ तोर सेवकमन के पसु बर कुछू चारा नइं बचे हे। एकरसेति, किरपा करके अपन सेवकमन ला गोसेन म रहे के हुकूम दे।”
GEN 47:5 फिरौन ह यूसुफ ला कहिस, “तोर ददा अऊ तोर भाईमन तोर करा आय हवंय,
GEN 47:6 अऊ मिसर देस तोर आघू म हवय; ये देस के सबले बने भाग म अपन ददा अऊ अपन भाईमन ला बसा दे, याने कि ओमन ला गोसेन म ही रहन दे। अऊ यदि तें जानत हस कि ओमा के कोनो म बिसेस योग्यता हवय, त ओला मोर पसुमन के ऊपर मुखिया ठहिरा दे।”
GEN 47:7 तब यूसुफ ह अपन ददा याकूब ला फिरौन करा लेके आईस। जब याकूब ह फिरौन ला आसीस दे डारिस,
GEN 47:8 तब फिरौन ह याकूब ले पुछिस, “तोला कतेक साल होवथे?”
GEN 47:9 याकूब ह फिरौन ला कहिस, “मेंह एक सौ तीस बछर परदेसी होके अपन जिनगी जी डारे हंव। मोर जिनगी के उमर ह थोरकून रिहिस अऊ कठिन रिहिस अऊ मोर पुरखामन परदेसी होके जतेक बछर तक जीयत रिहिन, में ओतेक बछर के नइं होय हंव।”
GEN 47:10 तब याकूब ह फिरौन ला आसीस देके ओकर आघू ले चल दीस।
GEN 47:11 तब यूसुफ ह अपन ददा अऊ अपन भाईमन ला मिसर देस म बसा दीस, अऊ फिरौन के हुकूम के मुताबिक देस के सबले बने भाग, याने कि रामसेस नांव के जिला म ओमन ला जमीन दीस।
GEN 47:12 यूसुफ ह अपन ददा ला अऊ अपन भाईमन ला अऊ अपन ददा के घर के जम्मो मनखेमन ला ओमन के लइकामन के गनती के मुताबिक भोजन-बस्तु घलो दीस।
GEN 47:13 ओ जम्मो देस म खाय बर कुछू नइं रिहिस, काबरकि बहुंत भारी अकाल परे रिहिस; मिसर अऊ कनान म बहुंत कठिन समय रिहिस।
GEN 47:14 मिसर अऊ कनान के मनखेमन जऊन रूपिया-पईसा देके अनाज बिसात रिहिन, ओ जम्मो रूपिया ला यूसुफ ह जमा करके फिरौन के महल म ले आवत रिहिस।
GEN 47:15 जब मिसर अऊ कनान देस के मनखेमन के रूपिया ह सिरा गीस, त मिसर के जम्मो मनखेमन यूसुफ करा आईन अऊ कहिन, “हमन ला भोजन-बस्तु दे। का तोर रहत ले हमन मर जाबो? हमर जम्मो पईसा सिरा गे।”
GEN 47:16 यूसुफ ह कहिस, “यदि रूपिया नइं ए, त अपन पसुमन ला लानव, अऊ में ओकर बदला म तुमन ला भोजन-बस्तु दूहूं, काबरकि तुम्हर पईसा ह सिरा गे हे।”
GEN 47:17 एकरसेति ओमन अपन पसुमन ला यूसुफ करा लाय लगिन, अऊ ओह ओमन ला ओमन के घोड़ा, भेड़-बकरी, गाय-बईला अऊ गदहामन के बदला म भोजन-बस्तु देय लगिस। ओ साल ओह ओमन के जम्मो पसुमन के बदला म भोजन-बस्तु देके ओमन के पालन-पोसन करिस।
GEN 47:18 ओ बछर तो अइसने कट गीस, तब अगले साल ओमन ओकर करा आके कहिन, “हमन अपन मालिक ले ये बात ला छिपा नइं सकन कि हमर रूपिया-पईसा खतम हो गे अऊ हमर पसुमन तोर हो गे हंय; अब हमर मालिक के आघू म हमर करा हमर देहें अऊ जमीन के छोंड़ अऊ कुछू नइं बांचे हे।
GEN 47:19 हमन तोर देखत म काबर मर जावन, अऊ हमर जमीन ह काबर उजाड़ हो जावय? हमन ला अऊ हमर जमीन ला भोजन-बस्तु के बदला म बिसा ले, अऊ हमन अपन जमीन सहित फिरौन के गुलामी म रहिबो। हमन ला बीजा दे कि हमन जीयत रहन अऊ मरन झन, अऊ जमीन ह उजाड़ झन होवय।”
GEN 47:20 तब यूसुफ ह मिसर के जम्मो जमीन ला फिरौन बर बिसा लीस। मिसर के जम्मो मनखेमन अपन जमीन बेच दीन, काबरकि उहां भयंकर अकाल परे रिहिस। जम्मो जमीन ह फिरौन के हो गीस,
GEN 47:21 अऊ यूसुफ ह मनखेमन ला मिसर देस के एक छोर ले लेके दूसर छोर तक गुलाम बना दीस।
GEN 47:22 पर ओह पुरोहितमन के जमीन ला नइं बिसाईस, काबरकि ओमन ला फिरौन कोति ले नियम के मुताबिक बांटा मिलत रिहिस अऊ फिरौन के दुवारा दिये गय बांटा म ओमन बर परयाप्त भोजन के परबंध रिहिस। एकरसेति ओमन अपन जमीन नइं बेचिन।
GEN 47:23 यूसुफ ह मनखेमन ला कहिस, “सुनव, मेंह आज तुमन ला अऊ तुम्हर जमीन ला फिरौन बर बिसा ले हंव; देखव, तुमन बर इहां बीजा हवय; येला लेवव अऊ भुइयां म बोवव।
GEN 47:24 पर जब फसल होथे, त ओकर पांचवां हिस्सा फिरौन ला देवव। बाकि के चार हिस्सा तुम्हर होही, जेला तुमन खेत म बोये बर अऊ अपन अऊ अपन घर के मनखे अऊ लइकामन के खाय बर उपयोग करव।”
GEN 47:25 ओमन कहिन, “तेंह हमर जिनगी ला बंचाय हस; हमर परभू के किरपा के नजर हमर ऊपर बने रहय; हमन फिरौन के गुलामी म रहिबो।”
GEN 47:26 ये किसम ले, यूसुफ ह मिसर के जमीन के बारे म येला कानून के रूप म कर दीस, जऊन ह आज तक लागू हवय कि फसल के पांचवां हिस्सा फिरौन के अय। सिरिप पुरोहितमन के जमीन ह फिरौन के नइं होईस।
GEN 47:27 इसरायलीमन मिसर देस के गोसेन के इलाका म बस गीन। ओमन उहां धन-संपत्ति कमाईन अऊ फूलिन-फरिन अऊ गनती म बहुंत बढ़ गीन।
GEN 47:28 याकूब ह मिसर देस म सतरह बछर तक जीयत रिहिस, अऊ ओकर जिनगी के कुल उमर एक सौ सैंतालीस बछर होईस।
GEN 47:29 जब इसरायल के मरे के समय ह लकठा आईस, तब ओह अपन बेटा यूसुफ ला बुलवाईस अऊ ओला कहिस, “यदि तोर किरपा मोर ऊपर हवय, त अपन हांथ ला मोर जांघ के तरी म रख अऊ परतिगियां कर कि तें मोर ऊपर किरपा करके सच्चई से ये काम ला करबे। मोला मिसर म माटी झन देबे,
GEN 47:30 पर जब में अपन पुरखामन के सहीं मर जावंव, त मोला मिसर ले बाहिर ले जाबे अऊ उहां माटी देबे, जिहां मोर पुरखामन ला माटी दे गे हवय।” तब यूसुफ ह कहिस, “में तोर बचन के मुताबिक करहूं।”
GEN 47:31 फेर याकूब ह कहिस, “मोर ले किरिया खा।” तब यूसुफ ह ओकर ले किरिया खाईस, अऊ इसरायल ह अपन लउठी के मुठ के ऊपर निहरके परमेसर के अराधना करिस।
GEN 48:1 कुछू समय के बाद, यूसुफ ला ये बताय गीस, “तोर ददा ह बेमार हे।” तब ओह अपन दूनों बेटा मनस्से अऊ एपरैम ला अपन संग लेके ओकर करा गीस।
GEN 48:2 जब याकूब ला बताय गीस, “तोर बेटा यूसुफ ह तोर करा आय हवय,” त इसरायल ह अपनआप ला संभालके बिस्तर म बईठ गीस।
GEN 48:3 याकूब ह यूसुफ ला कहिस, “सर्वसक्तिमान परमेसर ह कनान देस के लूज नगर म मोला दरसन दीस, अऊ उहां ओह मोला आसीस दीस,
GEN 48:4 अऊ कहिस, ‘देख, में तोला फलवंत करहूं अऊ गनती म तोला बढ़ाहूं। मेंह तोला मनखेमन के एक समाज बनाहूं, अऊ तोर पाछू तोर संतानमन ला ये देस सदाकाल बर दे दूहूं।’
GEN 48:5 “अब, तोर दूनों बेटा, जऊन मन मिसर म मोर आय के पहिली जनमे हवंय, ओमन मोर गने जाहीं; जइसने कि रूबेन अऊ सिमोन मोर अंय, वइसने ही मनस्से अऊ एपरैम घलो मोर होहीं।
GEN 48:6 ओमन के बाद, तोर कोनो लइका जनमथें, त ओमन तोर होहीं; पर अपन बंटवारा म, ओमन अपन भाईमन के नांव म गने जाहीं।
GEN 48:7 जब में पदन ले वापिस आवत रहेंव, त मोर बर दुख के बात ये होईस कि डहार म ही एपराता हबरे के थोरकून पहिले, राहेल ह कनान देस म मर गीस। एकरसेति मेंह ओला उहां एपराता (बैतलहम) जाय के डहार तीर म माटी दे देंव।”
GEN 48:8 जब इसरायल ह यूसुफ के बेटामन ला देखिस, त ओह पुछिस, “येमन कोन एं?”
GEN 48:9 यूसुफ ह अपन ददा ला कहिस, “ये मोर बेटामन अंय, जेमन ला परमेसर ह मोला इहां दे हवय।” तब इसरायल ह कहिस, “ओमन ला मोर करा लान कि में ओमन ला आसीस देवंव।”
GEN 48:10 इसरायल के आंखीमन बुढ़ापा के कारन धुंधला गे रिहिन, अऊ ओला बहुंत कम दिखत रिहिस। एकरसेति यूसुफ अपन बेटामन ला ओकर लकठा म ले आईस, अऊ ओकर ददा ह ओमन ला चूमिस अऊ ओमन ला पोटार लीस।
GEN 48:11 तब इसरायल ह यूसुफ ला कहिस, “में कभू आसा नइं करे रहेंव कि में तोर चेहरा फेर देखहूं, पर देख, परमेसर ह मोला तोर लइकामन ला घलो देखाईस।”
GEN 48:12 तब यूसुफ ह अपन बेटामन ला इसरायल के माड़ीमन के बीच ले हटाईस अऊ अपन मुहूं के भार गिरके दंडवत करिस।
GEN 48:13 अऊ यूसुफ ह ओ दूनों ला लीस, अऊ एपरैम ला अपन जेवनी कोति, याने कि इसरायल के डेरी हांथ कोति अऊ मनस्से ला अपन डेरी कोति, याने कि इसरायल के जेवनी हांथ कोति रखिस, अऊ ओमन ला इसरायल के लकठा म लानिस।
GEN 48:14 पर इसरायल ह अपन जेवनी हांथ बढ़ाके एपरैम के मुड़ ऊपर रखिस, हालाकि ओह छोटे रिहिस, अऊ अपन डेरी हांथ बढ़ाके मनस्से के मुड़ ऊपर रख दीस, हालाकि मनस्से ह पहिले जनमे रिहिस।
GEN 48:15 तब ओह यूसुफ ला आसीस दीस अऊ कहिस, “परमेसर जेकर आघू म मोर बाप-ददा अब्राहम अऊ इसहाक सच्चई से चलिन, ओ परमेसर, जऊन ह मोर जनम ले लेके आज तक मोर चरवाहा बने हे,
GEN 48:16 ओ स्वरगदूत, जऊन ह मोला जम्मो बुरई ले बचाय हे —ओही ह ये लड़कामन ला आसीस देवय। येमन मोर नांव अऊ मोर बाप-ददा अब्राहम अऊ इसहाक के नांव से जाने जावंय, अऊ येमन धरती ऊपर गनती म बहुंत बढ़ंय।”
GEN 48:17 जब यूसुफ ह देखिस कि ओकर ददा ह अपन जेवनी हांथ एपरैम के मुड़ ऊपर रखे हे, त ये बात ओला खराप लगिस; एकरसेति ओह अपन ददा के जेवनी हांथ ला ये बिचार से धरिस कि ओला एपरैम के मुड़ ले हटाके मनस्से के मुड़ ऊपर रखय।
GEN 48:18 अऊ यूसुफ ह अपन ददा ला कहिस, “नइं, हे ददा, येह पहिले जनमे हे; अपन जेवनी हांथ ला एकर मुड़ ऊपर रख।”
GEN 48:19 पर ओकर ददा ह मना करिस अऊ कहिस, “में जानत हंव, मोर बेटा, में जानत हंव। एकर दुवारा घलो मनखेमन के एक समाज बनही, अऊ येह घलो महान होही। तभो ले एकर छोटे भाई एकर ले जादा महान होही, अऊ ओकर बंस ह कतको जाति के मनखेमन के एक झुंड हो जाही।”
GEN 48:20 ओ दिन, ओह ओमन ला आसीस दीस अऊ कहिस, “तोर नांव म इसरायल ह अइसन आसीस दीही: ‘परमेसर तोला एपरैम अऊ मनस्से के सहीं बनाय।’ ” ये किसम ले ओह एपरैम ला मनस्से के पहिले रखिस।
GEN 48:21 तब इसरायल ह यूसुफ ला कहिस, “देख, में तो मरनेवाला हंव, पर परमेसर ह तुमन के संग रहिही, अऊ तुमन ला तुम्हर पुरखामन के देस म वापिस ले जाही।
GEN 48:22 अऊ मेंह तोला तोर भाईमन ले एक ठन जादा पहाड़ी जमीन देवत हंव, जेला मेंह अमोरीमन ले अपन तलवार अऊ धनुस के बल म ले रहेंव।”
GEN 49:1 तब याकूब ह अपन बेटामन ला बलाके कहिस: “ये मेर जूरव ताकि में तुमन ला बता सकंव कि अवइया दिन म तुम्हर ऊपर का होवइया हे।
GEN 49:2 “हे याकूब के बेटामन, ये मेर जूरव अऊ सुनव; अपन ददा इसरायल के बात ला सुनव।
GEN 49:3 “रूबेन, तें मोर पहिले जनमे बेटा अस, तें मोर सक्ति अऊ मोर ताकत के पहिली फर अस, तें आदर के लईक, अऊ ताकत म उत्तम अस।
GEN 49:4 तें जो पानी के लहरा सहीं उफननेवाला अस, तें अब उत्तम नइं ठहिरबे, काबरकि तें अपन ददा के बिछौना ऊपर चघे, मोर खटिया ऊपर चघे अऊ ओला असुध करे।
GEN 49:5 “सिमोन अऊ लेवी तो भाई-भाई अंय— ओमन के तलवारमन हिंसा करे के हथियार अंय।
GEN 49:6 मोला ओमन के सभा म झन जाना पड़य, मोला ओमन के संगत म झन रहना पड़य, काबरकि ओमन अपन कोप म मनखेमन ला मार डारे हवंय अऊ अपन खुसी बर बईलामन ला खोरवा कर दे हवंय।
GEN 49:7 धिक्कार ए ओमन के कोप ला, जेह भयंकर रिहिस, अऊ ओमन के कोरोध ला, जेह बहुंत निरदयी रिहिस! मेंह ओमन ला याकूब म फईला दूहूं अऊ इसरायल म तितिर-बितिर कर दूहूं।
GEN 49:8 “हे यहूदा, तोर भाईमन तोर परसंसा करहीं; तोर हांथ ह तोर बईरी के घेंच म होही; तोर ददा के बेटामन तोला दंडवत करहीं।
GEN 49:9 हे यहूदा, तेंह सेर के पीला अस; हे मोर बेटा, तें सिकार करके लहुंटे हस। सेर के सहीं, ओह बरताव करके बईठ जाथे, सेरनी के सहीं—कोन ह ओला छेड़े के हिम्मत करथे।
GEN 49:10 राजदंड ह यहूदा करा ले नइं जावय, अऊ न ही सासन करइया के छड़ी ह ओकर बंस ले अलग होही, जब तक कि ओह नइं आ जाही, जेकर ये चीजमन अंय अऊ जाति-जाति के मनखेमन ओकर बस म नइं हो जाहीं।
GEN 49:11 ओह अपन गदहा ला अंगूर के नार म, अऊ अपन गदहा के पीला ला उत्तम नार म बांधही; ओह अपन ओनहा ला अंगूर के मंद म, अऊ अपन पहिरावा ला अंगूर के रस म धोही।
GEN 49:12 ओकर आंखीमन अंगूर के मंद ले जादा गहिरा रंग, अऊ ओकर दांतमन दूध ले जादा सफेद होहीं।
GEN 49:13 “जबूलून ह समुंदर के तीर म निवास करही अऊ पानी जहाजमन बर बंदरगाह के काम करही; ओकर सीमना ह सीदोन कोति बढ़ही।
GEN 49:14 “इस्साकार एक बलवान गदहा अय, जेह भेड़मन के भेड़साला म ढलंगे रहिथे।
GEN 49:15 जब ओह देखथे कि ओकर सुसताय के जगह ह कतेक बने हे अऊ ओकर जमीन ह कतेक मनोहर हे, त ओह बोझा ला लेय बर अपन कंधा ला नवाथे अऊ बंधुवा मजदूर बन जाथे।
GEN 49:16 “दान ह इसरायल के एक गोत्र के रूप म अपन मनखेमन के नियाय करही।
GEN 49:17 दान ह सड़क के तीर म एक सांप, रसता के तीर म एक जहरिला सांप सहीं होही, जेह घोड़ा के एड़ी ला डसथे, जेकर ले ओकर सवार ह पाछू कोति गिरथे।
GEN 49:18 “हे यहोवा, में तोर दुवारा छुटकारा पाय के बाट जोहत हंव।
GEN 49:19 “गाद के ऊपर हमला करइयामन के एक दल ह चढ़ई तो करही, पर ओह ओमन के पाछू कोति ले ओमन ऊपर हमला करही।
GEN 49:20 “आसेर के भोजन-बस्तु ह उत्तम होही; अऊ ओह एक राजा के पसंद के सुवादवाला भोजन देय करही।
GEN 49:21 “नपताली ह खुले म घुमनेवाला एक हिरनी सहीं अय, जऊन ह सुघर पीला जनथे।
GEN 49:22 “यूसुफ एक फलवंत अंगूर के नार सहीं ए, ओह एक झरना के लकठा म एक फलवंत अंगूर के नार सहीं ए, जेकर डालीमन भीथी ऊपर चघके बगर जाथें।
GEN 49:23 धनुसधारीमन दुखी होके ओकर ऊपर हमला करिन; अऊ बईरता करके ओकर ऊपर तीर चलाईन।
GEN 49:24 पर ओकर धनुस इस्थिर रिहिस, याकूब के सक्तिसाली परमेसर के हांथ के कारन, ओ चरवाहा, इसरायल के चट्टान के कारन, ओकर बाहांमन फुरतिला होईन,
GEN 49:25 काबरकि तोर ददा के परमेसर ह तोर मदद करथे, काबरकि सर्वसक्तिमान ह तोला आसीस देथे, ये आसीस ह अकास के ऊपर के अय, ये आसीस ह गहिरा झरना के खाल्हे के अय, अऊ ये आसीस ह छाती अऊ गरभ के आसीस अय।
GEN 49:26 तोर ददा के आसीसमन पुराना पहाड़मन के आसीस ले, पुराना पहाड़ीमन के दान ले घलो बड़े अंय। ये जम्मो आसीस यूसुफ के मुड़ म आवय, जऊन ह अपन भाईमन ले अलग होके राजा बन गीस, ओकर ललाट म आवय।
GEN 49:27 “बिनयामीन ह एक भूखा भेड़िया सहीं अय; बिहनियां ओह सिकार ला मन भरके खाथे, अऊ सांझ के लूट के सामान ला बांट लेथे।”
GEN 49:28 ये जम्मो इसरायल के बारह गोत्र अंय, अऊ ये ओ बातमन अंय, जेला ओमन के ददा ह ओमन ले कहिस जब ओह ओमन ला आसीस दीस; जइसने हर एक बर उचित रिहिस, वइसने ओह ओमन ला आसीस दीस।
GEN 49:29 तब याकूब ह ओमन ला हुकूम दीस: “बहुंत जल्दी मेंह मरके अपन पुरखामन संग मिलनेचवाला हंव। मोला हित्ती एपरोन के खेत के गुफा म मोर पुरखामन संग माटी दूहू,
GEN 49:30 याने कि ओ गुफा म जेह कनान देस म ममरे के लकठा म मकपेला के खेत म हवय, जेला अब्राहम ह हित्ती एपरोन ले खेत सहित एकरसेति बिसाय रिहिस कि ओला मरघटी बनावय।
GEN 49:31 उहां अब्राहम अऊ ओकर घरवाली सारा ला माटी देय गे रिहिस; उहां इसहाक अऊ ओकर घरवाली रिबका ला माटी देय गे रिहिस; अऊ उहां लिआ ला घलो माटी दे हंव।
GEN 49:32 ओ खेत अऊ ओमा के गुफा ला हित्तीमन ले बिसाय गे रिहिस।”
GEN 49:33 जब याकूब ह अपन बेटामन ला हुकूम दे डारिस, त ओह अपन गोड़ ला खटिया ऊपर करके अपन परान ला छोंड़ दीस अऊ अपन पुरखामन संग जा मिलिस।
GEN 50:1 यूसुफ अपन ददा ला पोटारके रोईस अऊ ओला चूमिस।
GEN 50:2 तब यूसुफ ह अपन अधीन सेवा करइया बईदमन ला हुकूम दीस कि ओमन ओकर ददा इसरायल के लास म सुगंधित लेपन लगांय। तब बईदमन ओकर लास म सुगंधित रसायन लगा दीन।
GEN 50:3 ओमन पूरा चालीस दिन तक सुगंधित रसायन लगाईन, काबरकि कोनो लास म सुगंधित रसायन लगाय बर अतेक दिन के जरूरत परय। अऊ मिसरी मनखेमन ओकर बर सत्तर दिन तक बिलाप करिन।
GEN 50:4 जब बिलाप करे के दिन पूरा हो गीस, तब यूसुफ ह फिरौन के घर के मनखेमन ला कहिस, “यदि तुम्हर किरपा मोर ऊपर हवय, त मोर कोति ले फिरौन ले बात करव। ओला कहव,
GEN 50:5 ‘मोर ददा ह मोर ले किरिया खवाके कहे रिहिस, “देख, में मरनेचवाला हंव; मोला ओ कबर म माटी देबे, जेला मेंह अपन बर कनान देस म खनवाय हंव।” एकरसेति अब मोला उहां जाके मोर ददा ला माटी देवन दे; ओकर बाद, में वापिस आ जाहूं।’ ”
GEN 50:6 फिरौन ह कहिस, “जा अऊ अपन ददा के खवाय किरिया के मुताबिक ओला माटी दे।”
GEN 50:7 तब यूसुफ ह अपन ददा ला माटी दे बर गीस। फिरौन के जम्मो करमचारी याने कि ओकर घर के सम्मानित मनखे अऊ मिसर देस के जम्मो सम्मानित मनखेमन ओकर संग गीन,
GEN 50:8 संग म यूसुफ के घर के जम्मो झन अऊ ओकर भाईमन अऊ ओकर ददा के घर के जम्मो मनखेमन घलो गीन। सिरिप ओमन के लइका अऊ भेड़-बकरी अऊ गाय-बईलामन गोसेन के इलाका म छूट गीन।
GEN 50:9 रथ अऊ घुड़सवारमन घलो ओकर संग म गीन। येह मनखेमन के एक बड़े दल रिहिस।
GEN 50:10 जब ओमन यरदन नदी के लकठा म, आताद के कोठार करा हबरिन, त ओमन उहां दुख ले भरे भारी बिलाप करे लगिन; अऊ उहां यूसुफ ह अपन ददा बर सात दिन तक सोक मनाईस।
GEN 50:11 जब ओ कनानी, जऊन मन उहां रहत रिहिन, आताद के कोठार करा बिलाप करत देखिन, त ओमन कहिन, “येह मिसरीमन के दुख ले भरे गंभीर बिलाप ए।” ओकरे कारन यरदन नदी के लकठा म ओ जगह के नांव आबेल-मिसरैम परिस।
GEN 50:12 इसरायल के बेटामन ठीक वइसने करिन, जइसने ओह ओमन ला हुकूम दे रिहिस:
GEN 50:13 याने कि ओमन ओला कनान देस म ले गीन अऊ ममरे के लकठा म, मकपेला के खेत के ओ गुफा म ओला माटी दीन, जेला अब्राहम ह हित्ती एपरोन ले खेत समेत एकरसेति बिसाय रिहिस कि ओह ओमन के मरघटी होवय।
GEN 50:14 अपन ददा ला माटी देय के बाद, यूसुफ ह मिसर देस लहुंट गीस, अऊ ओकर संग ओकर भाई अऊ ओ जम्मो झन, जेमन ओकर ददा ला माटी देय बर गे रिहिन, ओ जम्मो मनखे घलो मिसर देस लहुंट गीन।
GEN 50:15 जब यूसुफ के भाईमन देखिन कि ओमन के ददा मर गे हे, तब ओमन कहे लगिन, “यदि यूसुफ के मन म हमर बर बईरता होही, अऊ जतेक खराप काम हमन ओकर संग करे रहेंन, ओह ओकर बदला लीही, त का करबो।”
GEN 50:16 एकरसेति ओमन यूसुफ करा ये खबर भेजिन, “तोर ददा ह मरे के पहिली हमन ला ये हुकूम दे रिहिस,
GEN 50:17 ‘तुमन यूसुफ ला अइसने कहिहू: मेंह कहत हंव कि तोर संग गलत बरताव करके तोर भाईमन तोर बिरूध म जऊन पाप अऊ अपराध करे रिहिन, ओकर बर तें ओमन ला छेमा कर।’ अब किरपा करके अपन ददा के परमेसर के सेवकमन के पाप ला छेमा कर।” ओमन के ये बात ला सुनके यूसुफ रो डारिस।
GEN 50:18 ओकर बाद, ओकर भाईमन आईन अऊ ओकर आघू म गिरके कहिन, “देख, हमन तोर गुलाम अन।”
GEN 50:19 पर यूसुफ ह ओमन ला कहिस, “झन डरावव। का में परमेसर के जगह म हंव?
GEN 50:20 तुम्हर इरादा मोर संग हानि करे के रिहिस, पर परमेसर ह एकर दुवारा भलई करे के बिचार करिस, जऊन ह अब बहुंते झन के जिनगी बचाय के दुवारा पूरा होवत हे।
GEN 50:21 एकरसेति, अब झन डरावव। मेंह तुम्हर अऊ तुम्हर लइकामन के पालन-पोसन करहूं।” अऊ ओह ओमन ला फेर बिसवास देवाईस अऊ ओमन के संग बने ढंग से गोठियाईस।
GEN 50:22 यूसुफ अपन ददा के जम्मो घराना समेत मिसर म रहत रिहिस। ओह एक सौ दस बछर जीईस
GEN 50:23 अऊ तीसर पीढ़ी तक एपरैम के लइकामन ला देखे पाईस। मनस्से के बेटा, माकीर के लइकामन घलो जनम के बाद यूसुफ के कोरा म रखे गीन।
GEN 50:24 तब यूसुफ ह अपन भाईमन ला कहिस, “में तो मरनेचवाला हंव। पर परमेसर जरूर तुम्हर मदद करही अऊ तुमन ला ये देस ले निकालके ओ देस म ले जाही, जेकर परतिगियां ओह किरिया खाके अब्राहम, इसहाक अऊ याकूब ले करे रिहिस।”
GEN 50:25 अऊ यूसुफ ह इसरायलीमन ला किरिया खवाईस अऊ कहिस, “परमेसर जरूर तुम्हर मदद करे बर आही, अऊ तब तुमन मोर हाड़ामन ला ये जगह ले ओ देस म जरूर ले जावव।”
GEN 50:26 ये किसम ले यूसुफ ह एक सौ दस बछर के उमर म मर गीस। अऊ ओमन ओकर लास म सुगंधित लेपन लगाईन, अऊ ओला मिसर म मुरदा रखे के एक सन्दूक म रख दीन।
EXO 1:1 ये इसरायल के बेटामन के नांव अंय, जऊन मन याकूब के संग अपन-अपन परिवार ला लेके मिसर देस गे रिहिन:
EXO 1:2 रूबेन, सिमोन, लेवी अऊ यहूदा;
EXO 1:3 इस्साकार, जबूलून अऊ बिनयामीन;
EXO 1:4 दान अऊ नपताली; गाद अऊ आसेर।
EXO 1:5 याकूब के संतानमन सत्तर झन रिहिन; अऊ यूसुफ ह पहिलेच ले मिसर म रिहिस।
EXO 1:6 समय के बीतत यूसुफ अऊ ओकर जम्मो भाई अऊ ओ पीढ़ी के जम्मो झन मर गीन,
EXO 1:7 पर इसरायलीमन बहुंत फूलत-फरत, संखिया म बहुंत हो गीन, गनती म बढ़त ओमन अतेक जादा हो गीन कि देस ह ओमन ले भर गीस।
EXO 1:8 तब मिसर देस म एक नवां राजा ह राज करन लगिस, जऊन ह यूसुफ ला नइं जानत रिहिस।
EXO 1:9 ओह अपन मनखेमन ले कहिस, “देखव, इसरायलीमन गनती म अऊ बल म हमर ले बहुंत जादा हो गे हवंय।
EXO 1:10 आवव, हमन ओमन संग चतुरई से बरताव करन, अइसन झन होवय कि ओमन अऊ बढ़ जावंय अऊ, कहूं लड़ई सुरू हो जावय, त ओमन हमर बईरीमन संग जाके मिल जावंय, अऊ हमन ले लड़ंय अऊ देस छोंड़के चले जावंय।”
EXO 1:11 एकरसेति ओमन इसरायलीमन ऊपर मेटमन ला रखिन ताकि ओमन इसरायलीमन ले बंधुवा मजदूरी करवाके ओमन ला दुख देवंय अऊ ओमन फिरौन बर पितोम अऊ रामसेस ला भंडारघर के सहर के रूप म बनाईन।
EXO 1:12 पर जतेक जादा ओमन इसरायलीमन ला दुख दीन, ओतेक जादा इसरायलीमन बढ़त अऊ बगरत गीन; एकरसेति मिसरीमन इसरायलीमन ले डरे लगिन
EXO 1:13 अऊ मिसरीमन इसरायलीमन ले निरदयता से बुता कराय लगिन।
EXO 1:14 ओमन गारा अऊ ईंटा बनवा-बनवाके, अऊ खेती के जम्मो बुता करवाके ओमन के जिनगी ला दुख ले भर दीन। ओमन ले जऊन कुछू बुता करवात रिहिन, बहुंत कड़ई ले करवात रिहिन।
EXO 1:15 तब मिसर के राजा ह इबरी धाईमन ले, जेमा के एक झन के नांव सिपरा अऊ दूसर के नांव पुआ रिहिस, कहिस,
EXO 1:16 “जब तुमन इबरी माईलोगनमन ला छेवारी होय के बेरा म मदद करथव, त कहूं बाबू-पीला होवय, त ओला मार डारव, पर कहूं नोनी होवय, त ओला जीयत छोंड़ देवव।”
EXO 1:17 पर ओ धाईमन परमेसर के भय मानंय, एकरसेति मिसर के राजा के हुकूम ला नइं मानके बाबू-पीला ला घलो छोंड़ देवत रिहिन।
EXO 1:18 तब मिसर के राजा ह ओ धाईमन ला बलाके पुछिस, “तुमन अइसन काबर करथव कि बाबू-पीलामन ला घलो जीयत छोंड़ देथव?”
EXO 1:19 ओ धाईमन फिरौन ला जबाब दीन, “इबरी माईलोगनमन मिसरी माईलोगनमन कस नो हंय; ओमन अतेक दमदार हवंय कि धाईमन के हबरे के पहिली लइका जनमा लेथंय।”
EXO 1:20 एकरसेति परमेसर ह धाईमन ऊपर दया करिस अऊ इसरायली मनखेमन बढ़त गीन अऊ गनती म अऊ जादा हो गीन।
EXO 1:21 अऊ काबरकि धाईमन परमेसर के भय मानंय, त ओह ओमन के घर बसाईस।
EXO 1:22 तब फिरौन ह अपन जम्मो मनखेमन ला ये हुकूम दीस, “इबरीमन के जतेक बाबू-पीला जनमहीं, ओ जम्मो ला नील नदी म फेंक देवव अऊ जम्मो नोनीमन ला जीयत छोंड़ देवव।”
EXO 2:1 लेवी के गोत्र के एक मनखे ह लेवी गोत्र के ही एक माईलोगन ले बिहाव करिस,
EXO 2:2 अऊ ओह देहें म होईस अऊ एक बेटा ला जनम दीस। जब ओह देखिस कि लइका ह सुघर हवय, त ओह ओला तीन महिना ले लुकाके रखिस।
EXO 2:3 जब ओह ओला अऊ जादा लुकाय नइं सकिस, त ओह ओकर बर सरकंडा के एक ठन टुकनी लीस, अऊ ओमा डामर अऊ राल के लेप लगाईस। फेर ओह लइका ला ओमा सुताके नील नदी के खंड़ म नरकट कांदीमन के मांझा म छोंड़के आ गीस।
EXO 2:4 ओ लइका के दीदी ह दूरिहा म ठाढ़ होके देखत रहय कि ओकर का गती होही।
EXO 2:5 तब फिरौन के बेटी ह नहाय बर नील नदी म गीस, अऊ ओकर सेविकामन नदी के तीर म चलत रिहिन। तब ओह नरकटमन के मांझा म टुकनी ला देखिस अऊ अपन सेविका ला पठोके ओ टुकनी ला लाने बर कहिस।
EXO 2:6 तब ओह टुकनी ला उघारके देखिस, त लइका ह रोवत रहय, अऊ ओला ओ लइका ऊपर दया आईस। ओह कहिस, “येह कोनो इबरी के लइका अय।”
EXO 2:7 तब लइका के बहिनी ह फिरौन के बेटी ले कहिस, “का मेंह जाके इबरी माईलोगन म ले कोनो धाई ला ले आवंव कि ओह तोर बर लइका ला दूध पीयाय?”
EXO 2:8 फिरौन के बेटी ह ओला कहिस, “जा।” त ओ छोकरी ह गीस अऊ ओ लइका के महतारी ला ले आईस।
EXO 2:9 फिरौन के बेटी ह ओला कहिस, “तें ये लइका ला ले जा अऊ मोर बर येला पाल-पोस, अऊ मेंह तोला येकर बनी दूहूं।” तब ओ माईलोगन ह लइका ला ले गीस अऊ ओकर पालन-पोसन करिस।
EXO 2:10 जब लइका ह बड़े हो गीस, त ओह ओला फिरौन के बेटी करा ले गीस अऊ फिरौन के बेटी ह ओला अपन बेटा मान लीस। ओह ओकर नांव ये कहिके मूसा रखिस, “मेंह ओला पानी म ले निकाले हंव।”
EXO 2:11 जब मूसा ह जवान होईस, त एक दिन ओह उहां गीस, जिहां ओकर खुद के इबरी मनखेमन रिहिन अऊ ओह ओमन के कठोर मेहनत ला देखिस। तब ओह देखिस कि एक मिसरी मनखे ह एक इबरी मनखे ला याने कि ओकर मनखेमन के एक झन ला मारत रिहिस।
EXO 2:12 तब मूसा ह एती-ओती देखिस, अऊ जब कोनो नइं दिखिन, त ओह ओ मिसरी मनखे ला मार डारिस, अऊ ओकर लास ला बालू म तोप दीस।
EXO 2:13 ओकर दूसर दिन, मूसा ह बाहिर निकलिस, त दू झन इबरीमन ला झगरा करत देखिस। ओ दूनों म के जेकर गलती रिहिस, ओकर ले मूसा ह पुछिस, “तेंह अपन इबरी संगी ला काबर मारत हस?”
EXO 2:14 त ओ मनखे ह कहिस, “तोला कोन ह हमर ऊपर हाकिम अऊ नियाय करइया ठहिराय हवय? जइसने तेंह ओ मिसरी मनखे ला मार डारे रहय, वइसने का तेंह मोला घलो मार डारे चाहत हस?” येला सुनके मूसा ह डर गीस अऊ सोचिस, “जऊन कुछू मेंह करे हंव, ओला जरूर मनखेमन जान डारे होहीं।”
EXO 2:15 जब फिरौन ह ये बात ला सुनिस, त ओह मूसा ला मार डारे के कोसिस करिस, पर मूसा ह फिरौन करा ले भाग गीस अऊ मिदयान देस म रहे बर गीस, उहां एक ठन कुआं के तीर म बईठ गीस।
EXO 2:16 मिदयान देस म एक पुरोहित के सात झन बेटी रिहिन, जऊन मन अपन ददा के भेड़-बकरीमन ला पानी पीयाय खातिर ओ कुआं करा कोटना म पानी भरे बर आईन।
EXO 2:17 तभे कुछू चरवाहामन आईन अऊ ओमन ला उहां ले भगा दीन, पर मूसा ह उठिस अऊ ओ छोकरीमन के बचाव करिस अऊ ओमन के भेड़-बकरीमन ला पानी पीयाईस।
EXO 2:18 जब ओ छोकरीमन अपन ददा रूएल करा लहुंटके आईन, त ओह अपन बेटीमन ले पुछिस, “आज तुमन अतेक जल्दी कइसे लहुंटके आ गेव?”
EXO 2:19 ओमन जबाब दीन, “एक मिसरी मनखे ह हमन ला चरवाहामन ले बचाईस, अऊ त अऊ ओह हमर बर पानी भरके हमर भेड़-बकरीमन ला पानी घलो पीयाईस।”
EXO 2:20 रूएल ह अपन बेटीमन ले पुछिस, “ओह कहां हवय? तुमन ओला काबर छोंड़ देव? ओला बलाके कुछू खाय बर देवव।”
EXO 2:21 मूसा ह ओकर संग रहे बर राजी हो गीस, अऊ ओह अपन बेटी सिप्पोरा के बिहाव मूसा के संग कर दीस।
EXO 2:22 सिप्पोरा ह एक बेटा ला जनम दीस, अऊ मूसा ह ये कहिके ओकर नांव गेरसोम रखिस, “मेंह परदेस म एक परदेसी अंव।”
EXO 2:23 बहुंत समय बीते के बाद, मिसर देस के राजा ह मर गीस। इसरायलीमन गुलामी म कलहरत रिहिन अऊ छोंड़ाय बर चिचियाके गोहारत रिहिन, अऊ ओमन के मदद के पुकार ह ओमन के गुलामी के कारन परमेसर करा हबरिस।
EXO 2:24 परमेसर ह ओमन के कलहरई ला सुनके अपन करार ला सुरता करिस, जेला ओह अब्राहम, इसहाक अऊ याकूब के संग करे रिहिस।
EXO 2:25 अऊ परमेसर ह इसरायलीमन कोति देखिस अऊ ओमन ऊपर धियान दीस।
EXO 3:1 मूसा ह अपन ससुर यितरो, मिदयान देस के पुरोहित, के भेड़-बकरीमन ला चरात रिहिस; ओह बहुंत दूरिहा तक सुन्ना प्रदेस म भेड़-बकरीमन ला चराय बर ले गीस, अऊ परमेसर के पहाड़ होरेब मेर आईस।
EXO 3:2 उहां झाड़ी के बरत आगी म यहोवा के स्वरगदूत ह परगट होईस। मूसा ह देखिस कि झाड़ी म आगी तो लगे रिहिस, पर ओह जलके भसम नइं होवत रिहिस।
EXO 3:3 एकरसेति मूसा ह सोचिस, “मेंह ओ पार जाके ये अद्भूत चीज ला देखहूं कि झाड़ी ह काबर जलके खतम नइं होवत हे।”
EXO 3:4 जब यहोवा ह देखिस कि ओह देखे बर उहां आवत हे, त परमेसर ह झाड़ी म ले ओला बलाईस, “हे मूसा! हे मूसा!” अऊ मूसा ह कहिस, “मेंह इहां हंव।”
EXO 3:5 यहोवा ह कहिस, “लकठा म झन आ, अऊ अपन पांव के पनही ला उतार ले, काबरकि जऊन ठऊर म तेंह ठाढ़े हस, ओह पबितर भुइयां ए।”
EXO 3:6 फेर ओह कहिस, “मेंह तोर पुरखामन के परमेसर, अब्राहम के परमेसर, इसहाक के परमेसर अऊ याकूब के परमेसर अंव।” ये सुनके मूसा ह अपन मुहूं ला छुपा लीस, काबरकि ओह परमेसर कोति देखे बर डरात रिहिस।
EXO 3:7 यहोवा ह कहिस, “मेंह सही म अपन मनखेमन के दुरगति ला मिसर देस म देखे हंव। अऊ मेटमन के दुख देय के कारन ओमन के रोवई ला घलो सुने हंव, मेंह ओमन के पीरा ला घलो जानत हंव।
EXO 3:8 एकरसेति मेंह ओमन ला मिसरीमन के हांथ ले बचाय बर उतरके आ गे हंव, ताकि ओमन ला ओ देस ले निकालके एक बढ़िया अऊ बड़े देस म ले जावंव, जिहां दूध अऊ मंधरस के भरमार हवय—जऊन ह कनानीमन, हित्तीमन, अमोरीमन, परिज्जीमन, हिब्बीमन अऊ यबूसीमन के घर अय।
EXO 3:9 अऊ अब इसरायलीमन के चिचियाई ह मोर करा हबरिस हवय, अऊ मेंह देखे हंव कि मिसरीमन ओमन के ऊपर कइसे अतियाचार करत हवंय।
EXO 3:10 एकरसेति अब, मेंह तोला फिरौन करा पठोवत हंव, तेंह जा अऊ मोर मनखे इसरायलीमन ला मिसर देस ले निकालके ले आ।”
EXO 3:11 पर मूसा ह परमेसर ला कहिस, “मेंह कोन अंव कि फिरौन करा जावंव अऊ इसरायलीमन ला मिसर देस ले निकालके ले आवंव?”
EXO 3:12 तब परमेसर ह कहिस, “मेंह तोर संग म रहिहूं। अऊ येह तोर बर चिनहां होही कि येह में अंव, जऊन ह तोला पठोय हवंव: जब तें ओ मनखेमन ला मिसर देस ले निकालके ले आबे, त तुमन इही पहाड़ म परमेसर के अराधना करहू।”
EXO 3:13 मूसा ह परमेसर ला कहिस, “कहूं मेंह इसरायलीमन करा जाके ओमन ला कहंव, ‘तुम्हर पुरखामन के परमेसर ह मोला तुम्हर करा पठोय हवय,’ अऊ ओमन मोर ले पुछंय, ‘ओकर का नांव अय?’ त मेंह ओमन ला का जबाब दूहूं?”
EXO 3:14 परमेसर ह मूसा ला कहिस, “मेंह जो अंव सो अंव। तें इसरायलीमन ले कहिबे: ‘जेकर नांव में अंव, अय, ओही ह मोला तुम्हर करा पठोय हवय।’ ”
EXO 3:15 परमेसर ह मूसा ला ये घलो कहिस, “तें इसरायलीमन ला कहिबे, ‘यहोवा, तुम्हर पुरखामन के परमेसर—अब्राहम के परमेसर, इसहाक के परमेसर अऊ याकूब के परमेसर ह मोला तुम्हर करा पठोय हवय।’ “सदाकाल बर मोर नांव ह इहीच अय, अऊ पीढ़ी-पीढ़ी तक ले तुमन मोला इही नांव ले पुकारहू।
EXO 3:16 “जा, अऊ इसरायल के अगुवामन ला इकट्ठा करके ओमन ले कह, ‘यहोवा, तुम्हर पुरखामन के परमेसर—अब्राहम, इसहाक अऊ याकूब के परमेसर ह परगट होके मोला कहिस: मेंह तुम्हर ऊपर नजर करे हंव अऊ देखे हंव कि मिसर देस म तुम्हर संग का बरताव करे गे हवय।
EXO 3:17 अऊ मेंह वायदा करे हंव कि तुमन ला मिसर म होवत दुरगति ले बाहिर निकालके कनानी, हित्ती, अमोरी, परिज्जी, हिब्बी अऊ यबूसीमन के देस म ले जाहूं, जिहां दूध अऊ मंधरस के भरमार हवय।’
EXO 3:18 “इसरायलीमन के अगुवामन तोर बात ला सुनहीं। तब तें अऊ इसरायलीमन के अगुवामन मिसर देस के राजा करा जाके ओला कहव, ‘यहोवा, इबरीमन के परमेसर ह हमन ला दरसन दे हवय, एकरसेति हमन ला तीन दिन के यातरा के दूरी म एक सुन्ना जगह म जावन दे, ताकि हमन यहोवा हमर परमेसर बर बलि चघा सकन।’
EXO 3:19 पर मेंह जानत हंव मिसर देस के राजा ह तुमन ला जावन नइं दीही, जब तक कि एक ताकतवर हांथ ह ओला बिबस नइं कर दीही।
EXO 3:20 एकरसेति मेंह अपन हांथ बढ़ाहूं अऊ मिसरीमन के बीच ओ जम्मो अद्भूत काम करके ओमन ला मारहूं, ओकर बाद, ओह तुमन ला जावन दीही।
EXO 3:21 “अऊ मेंह मिसरीमन ला अइसे कर दूहूं कि ओमन मोर ये इसरायली मनखेमन संग नरम बरताव करहीं, ताकि जब तुमन उहां ले निकलव, त जुच्छा हांथ झन निकलव।
EXO 3:22 तुम्हर हर एक माईलोगन अपन मिसरी परोसिन अऊ ओकर घर म रहइया माईलोगन ले सोन अऊ चांदी के जेवर अऊ कपड़ामन ला मांग लीही, जेला तुमन अपन बेटा-बेटीमन ला पहिरा दूहू। अऊ ये किसम ले तुमन मिसरीमन ला लूट लूहू।”
EXO 4:1 मूसा ह जबाब दीस, “मेंह का करहूं यदि ओमन मोर ऊपर बिसवास नइं करहीं या मोर बात ला नइं सुनके ये कहिहीं, ‘यहोवा ह तोला दरसन नइं दे हवय’?”
EXO 4:2 तब यहोवा ह ओला कहिस, “तोर हांथ म का हवय?” ओह जबाब दीस, “एक ठन लउठी।”
EXO 4:3 यहोवा ह कहिस, “ओला भुइयां म फटिक दे।” मूसा ह ओला भुइयां म फटिक दीस अऊ ओह एक सांप बन गीस, अऊ मूसा ह भागे लगिस।
EXO 4:4 तब यहोवा ह ओला कहिस, “अपन हांथ बढ़ाके ओकर पुंछी ला धर ले।” तब मूसा ह हांथ बढ़ाके ओ सांप ला धर लीस अऊ ओ सांप ह फेर ओकर हांथ म लउठी बन गीस।
EXO 4:5 यहोवा ह कहिस, “येला देखके ओमन बिसवास करहीं कि यहोवा, ओमन के पुरखामन के परमेसर—अब्राहम के परमेसर, इसहाक के परमेसर अऊ याकूब के परमेसर ह तोला दरसन दे हवय।”
EXO 4:6 तब यहोवा ह कहिस, “अपन हांथ ला अपन कपड़ा के भीतर छाती म रख।” अऊ मूसा ह अपन हांथ ला अपन कपड़ा के भीतर रखिस, अऊ जब ओह अपन हांथ ला बाहिर निकालिस, त देखिस कि ओकर हांथ के चमड़ी ह कोढ़ ले बरफ कस सादा हो गे हवय।
EXO 4:7 यहोवा ह कहिस, “अब अपन हांथ ला फेर अपन कपड़ा के भीतर रख,” मूसा ह वापिस अपन हांथ ला कपड़ा के भीतर रखिस, अऊ जब ओह अपन हांथ निकालके देखिस, त ओह पहिली कस जस के तस बने हो गे रिहिस।
EXO 4:8 तब यहोवा ह कहिस, “कहूं ओमन तोर बिसवास नइं करहीं या पहिली चिनहां ऊपर धियान नइं दीहीं, त दूसर चिनहां ऊपर बिसवास करहीं।
EXO 4:9 पर कहूं ओमन ये दूनों चिनहां ऊपर बिसवास नइं करहीं या तोर बात ला नइं सुनहीं, त तें नील नदी ले थोरकन पानी लेके सूखा भुइयां म डाल देबे। जऊन पानी ला तेंह नील नदी ले लेबे, ओह भुइयां म पड़ते ही लहू बन जाही।”
EXO 4:10 तब मूसा ह यहोवा ले कहिस, “हे परभू, अपन सेवक ला छेमा कर। मेंह कभू बने गोठियाय बर नइं जानेंव, पहिली घलो नइं जानत रहेंव, अऊ जब ले तेंह अपन सेवक ले गोठियावत हस, तब ले घलो। मेंह गोठियाय म धीमा अऊ जीभ के भद्दा अंव।”
EXO 4:11 यहोवा ह ओला कहिस, “मनखेमन के मुहूं ला कोन बनाईस? कोन ह ओमन ला भैंरा या कोंदा बनाथे? कोन ह ओमन के आंखी म रोसनी देथे या ओमन ला अंधरा बनाथे? का ये में यहोवा, नो हंव?
EXO 4:12 अब तें जा; मेंह तोर गोठियाय म मदद करहूं अऊ मेंह तोला बताहूं कि तोला का कहना हे।”
EXO 4:13 पर मूसा ह कहिस, “हे परभू, अपन सेवक ला छेमा कर, अऊ किरपा करके कोनो आने मनखे ला पठो दे।”
EXO 4:14 तब यहोवा के गुस्सा ह मूसा ऊपर भड़किस अऊ ओह कहिस, “अपन भाई हारून के बारे म का सोचथस, जऊन ह लेवी अय? मेंह जानत हंव कि ओह बने गोठियाथे। ओह तोर ले भेंट करे बर आवत हे अऊ रसता म हवय, अऊ ओह तोला देखके खुस होही।
EXO 4:15 तें ओकर ले गोठियाबे अऊ बातमन ला ओकर मुहूं म डालबे; मेंह तुम्हर दूनों झन के गोठियाय म मदद करहूं अऊ तुमन ला बताहूं कि का करना हे।
EXO 4:16 ओह तोर कोति ले मनखेमन संग गोठियाही, अऊ येह अइसने होही कि मानो ओह तोर मुहूं होही अऊ तेंह ओकर बर परमेसर कस होबे।
EXO 4:17 पर ये लउठी ला अपन हांथ म लेय ले; येकर दुवारा तेंह चिनहांमन ला देखाबे।”
EXO 4:18 तब मूसा ह अपन ससुर यितरो करा वापिस गीस अऊ ओला कहिस, “मोला लहुंटके मिसर देस म रहइया मोर अपन मनखेमन करा जावन दे ताकि मेंह पता लगावंव कि ओमन ले कोनो अब तक उहां जीयत बांचे हवंय कि नइं।” यितरो ह कहिस, “तेंह जा, अऊ मेंह तोर खुसी के कामना करत हंव।”
EXO 4:19 यहोवा ह मिदयान देस म ही मूसा ला कहे रिहिस, “मिसर देस ला वापिस चले जा, काबरकि ओ जम्मो झन मर चुके हवंय, जऊन मन तोला मार डारे बर चाहत रिहिन।”
EXO 4:20 तब मूसा ह अपन घरवाली अऊ अपन बेटामन ला गदहा ऊपर बईठाईस अऊ वापिस मिसर देस जाय लगिस। अऊ ओह परमेसर के लउठी ला अपन हांथ म ले लीस।
EXO 4:21 यहोवा ह मूसा ला कहिस, “जब तेंह मिसर म हबरबे, त देख, फिरौन के आघू म ओ जम्मो अद्भूत काम ला देखाबे, जेला देखाय के सक्ति मेंह तोला दे हवंव। पर मेंह ओकर मन ला कठोर कर दूहूं, जेकर कारन ओह इसरायलीमन ला जावन नइं दीही।
EXO 4:22 तब तें फिरौन ले कहिबे, ‘यहोवा ह ये कहत हे: इसरायल ह मोर पहिलांत बेटा अय,
EXO 4:23 अऊ मेंह तोला कह चुकेंव, “मोर बेटा ला जावन दे, ताकि ओह मोर अराधना करय।” पर तेंह ओला जावन नइं देवत हस; एकरसेति मेंह तोर पहिलांत बेटा ला मार डारहूं।’ ”
EXO 4:24 डहार म, एक ठन धरमसाला म यहोवा ह मूसा ले मिलिस, अऊ ओला मार डालनेवाला रिहिस।
EXO 4:25 पर सिप्पोरा ह एक धारवाला पथरा लीस अऊ अपन बेटा के खलड़ी ला काटिस अऊ ओ खलड़ी ला मूसा के गोड़ म छुआ दीस अऊ कहिस, “सही म, तेंह लहू बहानेवाला मोर दूल्हा अस।”
EXO 4:26 एकरसेति यहोवा ह मूसा ला छोंड़ दीस। (ओतेक बेरा सिप्पोरा ह खतना के हवाला देवत कहिस, “लहू बहानेवाला दूल्हा।”)
EXO 4:27 तब यहोवा ह हारून ला कहिस, “मूसा ले मिले बर निरजन प्रदेस म जा।” एकरसेति हारून ह मूसा ले मिले बर परमेसर के पहाड़ म गीस अऊ ओला चूमिस।
EXO 4:28 तब मूसा ह हारून ला ओ जम्मो बात बताईस, जेला बताय बर यहोवा ह ओला पठोय रिहिस, अऊ ओ जम्मो चिनहांमन के बारे म घलो बताईस, जेमन ला देखाय के हुकूम ओला दे रिहिस।
EXO 4:29 तब मूसा अऊ हारून इसरायलीमन के जम्मो अगुवामन ला इकट्ठा करिन,
EXO 4:30 अऊ हारून ह ओमन ला ओ जम्मो बात बताईस, जेला यहोवा ह मूसा ला कहे रिहिस। ओह मनखेमन के आघू म ओ चिनहांमन ला घलो देखाईस,
EXO 4:31 अऊ ओमन बिसवास करिन। अऊ जब ओमन सुनिन कि यहोवा ह ओमन के बारे म चिंतित हवय अऊ ओमन के दुरगति ला देखे हवय, त ओमन मुड़ नवाके यहोवा के अराधना करिन।
EXO 5:1 एकर बाद मूसा अऊ हारून फिरौन करा जाके कहिन, “यहोवा, इसरायल के परमेसर ह ये कहत हे: ‘मोर मनखेमन ला जावन दे कि ओमन निरजन प्रदेस म मोर बर एक तिहार मनावंय।’ ”
EXO 5:2 त फिरौन ह कहिस, “यहोवा ह कोन अय कि मेंह ओकर हुकूम ला मानंव अऊ इसरायलीमन ला जावन दंव? मेंह यहोवा ला नइं जानंव अऊ मेंह इसरायलीमन ला नइं जावन दंव।”
EXO 5:3 तब मूसा अऊ हारून कहिन, “इबरीमन के परमेसर ह हमर ले मुलाकात करे हवय। अब हमन ला तीन दिन के यातरा के दूरी म एक निरजन प्रदेस म जावन दे कि हमन यहोवा हमर परमेसर बर बलिदान चघावन, अइसन झन होवय कि ओह हमन ला महामारी या तलवार ले नास करय।”
EXO 5:4 पर मिसर देस के राजा ह कहिस, “मूसा अऊ हारून, तुमन मनखेमन ला ओमन के बुता ले काबर दूरिहा करे चाहत हव? तुमन वापिस अपन काम म लग जावव!”
EXO 5:5 तब फिरौन ह ये घलो कहिस, “देखव, अब देस म मनखेमन बहुंत हो गे हवंय, अऊ तुमन ओमन ला बुता करे बर रोकत हव।”
EXO 5:6 ओहीच दिन फिरौन ह बेगारी करानेवाला अऊ मनखेमन के ऊपर मेटमन ला ये हुकूम दीस:
EXO 5:7 “तुमन अब मनखेमन ला ईंटा बनाय बर भूंसा झन देवव; ओमन जावंय अऊ खुद अपन बर भूंसा संकेलंय।
EXO 5:8 पर जतेक ईंटा ओमन पहिली बनात रिहिन, ओतकेच ईंटा अब भी बनवाव; ईंटा के ठहिराय गनती म कमी झन करव, ओमन आलसी अंय; एकरसेति ओमन चिचियाके कहत हवंय, ‘आवव, हमन जावन अऊ हमर परमेसर बर बलिदान चघावन।’
EXO 5:9 ओ मनखेमन के काम ला अऊ बढ़ा दव ताकि ओमन काम म ही लगे रहंय, अऊ लबारी गोठमन म धियान झन लगावंय।”
EXO 5:10 तब बेगारी करानेवाला अऊ मेटमन बाहिर निकलिन अऊ इसरायली मनखेमन ला कहिन, “फिरौन ह ये कहत हे: ‘मेंह तुमन ला अब भूंसा नइं देवंव।
EXO 5:11 जावव अऊ तुमन अपन खुद के भूंसा लानव, जिहां कहूं भी येह तुमन ला मिलथे, पर तुम्हर काम म कोनो भी किसम ले कमी नइं करे जावय।’ ”
EXO 5:12 एकरसेति इसरायलीमन फसल के खूंटी संकेले बर पूरा मिसर देस म बगर गीन ताकि भूंसा के जगह म ओकर उपयोग कर सकंय।
EXO 5:13 बेगारी करवइयामन ये कहिके ओमन ऊपर दबाव बनाय रखिन, “हर एक दिन बर ठहिराय गे काम ला अब भी वइसने ही पूरा करव, जइसने तुमन पहिली करत रहेव, जब तुम्हर करा भूंसा रिहिस।”
EXO 5:14 फिरौन के बेगारी करवइयामन अपन दुवारा ठहिराय इसरायली मेटमन ला मारंय-पीटंय अऊ पुछंय, “तुमन काबर ठहिराय गय ईंटा के संखिया के मुताबिक कल या आज ईंटा नइं बनाय हव, जइसे कि पहिले बनात रहेव?”
EXO 5:15 तब इसरायली मेटमन फिरौन करा जाके गोहारे लगिन, “तेंह अपन सेवकमन के संग अइसने बरताव काबर करत हस?
EXO 5:16 तोर सेवकमन ला भूंसा नइं दिये जावत हे, तभो ले हमन ला कहे जाथे, ‘ईंटा बनावव!’ तोर सेवकमन ला मारे-पीटे जावत हे, पर गलती तो तोर खुद के मनखेमन के अय।”
EXO 5:17 फिरौन ह कहिस, “तुमन आलसी अव, आलसी! एकरसेति तुमन कहत रहिथव, ‘हमन ला जावन दे कि हमन यहोवा बर बलि चघावन।’
EXO 5:18 अब जावव अऊ अपन काम करव। तुमन ला कोनो भूंसा नइं दिये जावय, तभो ले तुमन ला अपन निरधारित भाग के ईंटा बनाना जरूरी अय।”
EXO 5:19 इसरायली मेटमन समझ गीन कि ओमन परेसानी म पड़ गे हवंय, जब ओमन ला कहे गीस, “हर दिन बर ठहिराय गय तुम्हर ईंटा के गनती ला कम नइं करे जावय।”
EXO 5:20 जब ओमन फिरौन करा ले मिलके आईन, त मूसा अऊ हारून ओमन के डहार देखत रिहिन,
EXO 5:21 अऊ ओमन मूसा अऊ हारून ला कहिन, “यहोवा ह तुमन ला देखय अऊ तुम्हर नियाय करय! तुमन हमन ला फिरौन अऊ ओकर अधिकारीमन के नजर म घिन करे के चीज बना दे हव अऊ हमन ला मारे बर ओमन के हांथ म एक तलवार देय दे हव।”
EXO 5:22 मूसा ह यहोवा करा गीस अऊ कहिस, “काबर, हे परभू, तेंह काबर ये मनखेमन ऊपर ये समस्या लाने हस? का एकर खातिर तेंह मोला पठोय रहय?
EXO 5:23 जब ले मेंह तोर नांव म फिरौन करा गोठियाय बर गेंव, तब ले ओह ये मनखेमन ऊपर समस्या लाने हवय, अऊ तेंह अपन मनखेमन के कुछू बचाव नइं करे हस।”
EXO 6:1 तब यहोवा ह मूसा ला कहिस, “अब तेंह देखबे कि मेंह फिरौन के का करहूं: मोर सक्तिसाली हांथ के कारन ओह इसरायलीमन ला जावन दीही अऊ ओह ओमन ला अपन देस ले भगा दीही।”
EXO 6:2 परमेसर ह मूसा ला ये घलो कहिस, “मेंह यहोवा अंव।
EXO 6:3 मेंह सर्वसक्तिमान परमेसर के रूप म अब्राहम, इसहाक अऊ याकूब ला दरसन दे हंव, पर अपन नांव यहोवा के दुवारा मेंह अपनआप ला ओमन ऊपर पूरा परगट नइं करेंव।
EXO 6:4 मेंह ओमन संग करार घलो करेंव कि ओमन ला कनान देस ला दूहूं, जिहां ओमन परदेसी के रूप म रिहिन।
EXO 6:5 अऊ मेंह इसरायलीमन के कलहरई ला सुने हंव, जेमन ले मिसरीमन गुलामी करवात हें, अऊ मेंह अपन करार ला सुरता करे हवंव।
EXO 6:6 “एकरसेति इसरायलीमन ले कह: ‘मेंह यहोवा अंव, अऊ मेंह तुमन ला मिसरीमन के गुलामी ले बाहिर निकालहूं। मेंह तुमन ला ओमन के गुलामी ले छोंड़ाहूं, अऊ मेंह अपन बढ़ाय भुजा अऊ बड़े नियाय के दुवारा तुमन ला छोंड़ा लूहूं।
EXO 6:7 मेंह तुमन ला अपन खुद के मनखे सहीं अपना लूहूं, अऊ मेंह तुम्हर परमेसर होहूं। तब तुमन जान लूहू कि मेंह यहोवा तुम्हर परमेसर अंव, जऊन ह तुमन ला मिसरीमन के गुलामी ले बाहिर निकालिस।
EXO 6:8 अऊ मेंह तुमन ला ओ देस म लानहूं, जऊन ला मेंह अब्राहम, इसहाक, अऊ याकूब ला देय बर हांथ उठाके किरिया खाय रहेंव। मेंह ओला तुम्हर अधिकार म कर दूहूं। मेंह यहोवा अंव।’ ”
EXO 6:9 मूसा ह इसरायलीमन ला ये बात बताईस, पर अपन निरासा अऊ कठोर मेहनत के कारन ओमन मूसा के बात ला नइं सुनिन।
EXO 6:10 तब यहोवा ह मूसा ला कहिस,
EXO 6:11 “जा अऊ मिसर के राजा फिरौन ला कह कि ओह इसरायलीमन ला ओकर देस ले बाहिर जावन दे।”
EXO 6:12 पर मूसा ह यहोवा ला कहिस, “यदि इसरायलीमन मोर बात ला नइं सुनिन, त फेर फिरौन ह मोर बात ला काबर सुनही, जबकि बात करे म, मेंह हकलाथंव घलो?”
EXO 6:13 तब यहोवा ह मूसा अऊ हारून ले इसरायली अऊ मिसर के राजा फिरौन के बारे म बात करिस, अऊ ओह ओमन ला हुकूम दीस कि ओमन इसरायलीमन ला मिसर देस ले निकालके ले जावंय।
EXO 6:14 येमन अपन परिवारमन के मुखिया रिहिन: इसरायल के पहिलांत बेटा रूबेन के बेटामन: हनोक, अऊ पल्लू, हेसरोन अऊ करमी।
EXO 6:15 सिमोन के बेटामन: यमूएल, यामीन, ओहद, याकीन, सोहर अऊ साऊल जऊन ह एक कनानी माईलोगन के बेटा रिहिस।
EXO 6:16 ओमन के लिखाय बंसावली के मुताबिक येमन लेवी के बेटा रिहिन: गेरसोन, कहात अऊ मरारी।
EXO 6:17 गोत्र के मुताबिक गेरसोन के बेटामन: लिबनी अऊ सिमी।
EXO 6:18 कहात के बेटामन: अमराम, ईसहार, हेबरोन अऊ उजीएल। (कहात ह 133 बछर तक जीईस।)
EXO 6:19 मरारी के बेटामन: महली अऊ मूसी।
EXO 6:20 अमराम ह अपन फूफू योकेबेद ले बिहाव करिस, जेकर ले मूसा अऊ हारून पईदा होईन।
EXO 6:21 ईसहार के बेटामन: कोरह, नेपेग अऊ जिकरी।
EXO 6:22 उजीएल के बेटामन: मिसाएल, एलसाफान अऊ सितरी।
EXO 6:23 हारून ह अमीनादाब के बेटी, नहसोन के बहिनी एलीसेबा ले बिहाव करिस, अऊ ओह नादाब, अबीहू, एलिआजर अऊ ईतामार ला जनम दीस।
EXO 6:24 कोरह के बेटामन: अस्सीर, एलकाना अऊ अबीआसाप।
EXO 6:25 हारून के बेटा एलिआजर ह पूतीएल के एक बेटी ले बिहाव करिस, अऊ ओह पीनहास ला जनम दीस।
EXO 6:26 ये हारून अऊ मूसा रिहिन, जेमन ला यहोवा ह हुकूम दे रिहिस, “इसरायलीमन ला ओमन के दल के मुताबिक मिसर देस ले बाहिर निकालके लानव।”
EXO 6:27 ये मूसा अऊ हारून रिहिन, जेमन इसरायलीमन ला मिसर देस ले बाहिर लाने बर मिसर के राजा फिरौन ले बात करिन।
EXO 6:28 जब यहोवा ह मिसर देस म मूसा ले गोठियाईस,
EXO 6:29 त ओह मूसा ला कहिस, “मेंह यहोवा अंव। जऊन कुछू मेंह तोला कहत हंव, ओ जम्मो बात तेंह मिसर के राजा फिरौन ला बता।”
EXO 6:30 पर मूसा ह यहोवा ला कहिस, “देख, मेंह बात करे म हकलाथंव, त फिरौन ह मोर बात ला काबर सुनही?”
EXO 7:1 तब यहोवा ह मूसा ला कहिस, “देख, मेंह फिरौन बर तोला परमेसर के सहीं बना दे हंव, अऊ तोर भाई हारून ह तोर अगमबानी करइया होही।
EXO 7:2 तोला ओ हर बात हारून ला कहना हे, जेकर हुकूम मेंह तोला देवत हंव, अऊ तोर भाई हारून ह फिरौन ला कहिही कि ओह इसरायलीमन ला अपन देस ले जावन दे।
EXO 7:3 पर मेंह फिरौन के मन ला कठोर कर दूहूं, अऊ हालाकि मेंह मिसर देस म बहुंते चिनहां अऊ अद्भूत काम ला देखाहूं,
EXO 7:4 पर ओह तोर बात ला नइं सुनही। तब मेंह मिसर देस ऊपर अपन हांथ डालके दंड दूहूं अऊ नियाय के बड़े काम के संग मेंह अपन दल, मोर मनखे इसरायलीमन ला मिसर देस ले निकाल लानहूं।
EXO 7:5 अऊ जब मेंह मिसर देस के बिरूध अपन हांथ बढ़ाहूं अऊ इसरायलीमन ला उहां ले निकाल लानहूं, त मिसरीमन जान लीहीं कि मेंह यहोवा अंव।”
EXO 7:6 मूसा अऊ हारून वइसनेच करिन जइसने यहोवा ह ओमन ला हुकूम दे रिहिस।
EXO 7:7 मूसा के उमर अस्सी साल अऊ हारून के उमर तिरासी साल रिहिस, जब ओमन फिरौन ले बात करिन।
EXO 7:8 यहोवा ह मूसा अऊ हारून ला कहिस,
EXO 7:9 “जब फिरौन ह तुमन ले कहिथे, ‘अपन कोनो चमतकार देखावव,’ तब हारून ला कह, ‘अपन लउठी ला ले अऊ फिरौन के आघू म फटिक दे,’ अऊ ओह एक सांप बन जाही।”
EXO 7:10 मूसा अऊ हारून फिरौन करा गीन, अऊ वइसने ही करिन, जइसने यहोवा ह ओमन ला हुकूम देय रिहिस। हारून ह अपन लउठी ला फिरौन अऊ ओकर अधिकारीमन के आघू म फटिक दीस, अऊ ओह सांप बन गीस।
EXO 7:11 तब फिरौन ह मिसर के पंडित अऊ जादूगरमन ला बुलवाईस, अऊ मिसर के जादूगरमन घलो अपन जादूगरी ले वइसनेच करिन।
EXO 7:12 हर एक झन अपन लउठी ला खाल्हे म फटकिन अऊ ओह सांप बन गीस। पर हारून के लउठी ह ओमन के लउठीमन ला लील लीस।
EXO 7:13 तभो ले फिरौन के मन ह कठोर बने रिहिस, अऊ ओह ओमन के नइं सुनिस, जइसे कि यहोवा ह कहे रिहिस।
EXO 7:14 तब यहोवा ह मूसा ला कहिस, “फिरौन के मन ह कठोर हो गे हवय; ओह मनखेमन ला जावन नइं देवथे।
EXO 7:15 फिरौन ह बिहनियां जब नदी कोति जाथे, तब नील नदी के तीर म ओकर सामना कर, अऊ अपन हांथ म ओहीच लउठी ला धरे रहिबे, जऊन ह सांप बन गे रिहिस।
EXO 7:16 तब ओला कहिबे, ‘यहोवा, इबरीमन के परमेसर ह मोला तोर करा ये कहे बर पठोय हवय: मोर मनखेमन ला जावन दे, ताकि ओमन निरजन प्रदेस म मोर अराधना करंय। पर अब तक तेंह मोर बात नइं सुने।
EXO 7:17 यहोवा ह ये कहत हे: मेंह नील नदी के पानी ला अपन हांथ के लउठी ले मारहूं अऊ ओह लहू म बदल जाही। एकर दुवारा तेंह जान लेबे कि मेंह यहोवा अंव।
EXO 7:18 अऊ नील नदी के मछरीमन मर जाहीं, अऊ नदी ले बदबू आय लगही; अऊ मिसरीमन येकर पानी ला पी नइं सकहीं।’ ”
EXO 7:19 यहोवा ह मूसा ला कहिस, “हारून ले कह, ‘अपन लउठी ला ले अऊ मिसर देस के पानी याने कि उहां के नदी, नरवा, तरिया, नहर, अऊ जम्मो बांधामन कोति अपन हांथ ला लमा, जेकर से जम्मो पानी ह लहू म बदल जाही।’ मिसर देस म जम्मो जगह खूने-खून हो जाही, अऊ त अऊ लकरी अऊ पथरा के बने बरतनमन म घलो।”
EXO 7:20 मूसा अऊ हारून वइसने ही करिन, जइसने कि यहोवा ह हुकूम दे रिहिस। ओह अपन लउठी ला फिरौन अऊ ओकर अधिकारीमन के आघू म उठाईस अऊ नील नदी के पानी ला मारिस, अऊ जम्मो पानी ह लहू बन गीस।
EXO 7:21 नील नदी के जम्मो मछरीमन मर गीन, अऊ नदी ह अतेक बदबू मारिस कि मिसरीमन येकर पानी ला पी नइं सकिन। पूरा मिसर देस ह लहूच लहू हो गीस।
EXO 7:22 मिसर के जादूगरमन घलो अपन जादूगरी ले वइसनेच करिन, अऊ फिरौन के मन ह कठोर बने रिहिस; ओह मूसा अऊ हारून के नइं सुनिस, जइसे कि यहोवा ह कहे रिहिस।
EXO 7:23 ये जम्मो बात के फिरौन ऊपर कोनो असर नइं होईस अऊ ओह लहुंटके अपन महल म चल दीस।
EXO 7:24 अऊ जम्मो मिसरीमन पीये के पानी बर नील नदी म खंचवा खने लगिन, काबरकि ओमन नदी के पानी ला पी नइं सकिन।
EXO 7:25 यहोवा के दुवारा नील नदी के पानी ला लहू बनाय सात दिन हो गे रिहिस।
EXO 8:1 तब यहोवा ह मूसा ला कहिस, “फिरौन करा जा अऊ ओला कह, ‘यहोवा ह ये कहत हे: मोर मनखेमन ला जावन दे, ताकि ओमन मोर अराधना कर सकंय।
EXO 8:2 कहूं तेंह ओमन ला जावन नइं देबे, त मेंह तोर जम्मो देस म मेचकामन ले महामारी पठोहूं।
EXO 8:3 नील नदी ह मेचकामन ले भर जाही। ओमन तोर महल अऊ तोर सुते के खोली म अऊ तोर दसना म, तोर करमचारीमन के घर म अऊ तोर मनखेमन ऊपर, अऊ तुम्हर चूल्हा अऊ तुम्हर पीसान गुंथे के बरतनमन म भर जाहीं।
EXO 8:4 मेचकामन तोर अऊ तोर मनखे अऊ तोर जम्मो करमचारीमन ऊपर चघ जाहीं।’ ”
EXO 8:5 तब यहोवा ह मूसा ला कहिस, “हारून ले कह, ‘हांथ म लउठी ला लेके अपन हांथ ला पानी के सोता अऊ नहर अऊ तरियामन ऊपर कर, अऊ मेचकामन ला मिसर देस म ले आन।’ ”
EXO 8:6 त हारून ह मिसर के पानी के जगहमन ऊपर अपन हांथ ला लमाईस, अऊ मेचकामन आके मिसर देस म भर गीन।
EXO 8:7 पर मिसर के जादूगरमन घलो अपन जादूगरी ले वइसने ही करिन; ओमन मिसर देस म मेचकामन ला ले आईन।
EXO 8:8 फिरौन ह मूसा अऊ हारून ला बलाके कहिस, “यहोवा ले पराथना करव कि ओह मेचकामन ला मोर ले अऊ मोर मनखेमन ले हटा ले, अऊ मेंह तुम्हर मनखेमन ला जावन दूहूं कि ओमन यहोवा बर बलि चघावंय।”
EXO 8:9 मूसा ह फिरौन ला कहिस, “मेंह तोर ऊपर छोंड़त हंव; तेंह मोला बता कि कतेक बेरा तोर अऊ तोर करमचारी अऊ तोर मनखेमन बर पराथना करंव कि ये मेचकामन तुमन अऊ तुम्हर घर ला छोंड़के चले जावंय, अऊ ओहीच मेचकामन रहंय, जेमन नील नदी म हवंय।”
EXO 8:10 फिरौन ह कहिस, “कल।” मूसा ह कहिस, “वइसने ही होही, जइसने तेंह कहत हस, ताकि तेंह जान लेबे कि यहोवा हमर परमेसर के सहीं अऊ कोनो नइं ए।
EXO 8:11 मेचकामन तुमन अऊ तुम्हर घरमन ला, तोर करमचारी अऊ तोर मनखेमन ला छोंड़के चले जाहीं; ओमन सिरिप नील नदी म ही रहिहीं।”
EXO 8:12 जब मूसा अऊ हारून फिरौन करा ले चल दीन, त मूसा ह ओ मेचकामन के बारे म यहोवा ले गोहारिस, जऊन ला ओह फिरौन के ऊपर लाने रिहिस।
EXO 8:13 अऊ यहोवा ह मूसा के पराथना के मुताबिक करिस। मेचकामन घर म, अंगना म अऊ खेत म मर गीन।
EXO 8:14 ओमन ला कुढ़ोय गीस, अऊ ओमन ले देस म बदबू फईल गीस।
EXO 8:15 पर जब फिरौन ह देखिस कि अब अराम मिल गे हवय, त ओह अपन मन ला फेर कठोर कर लीस अऊ मूसा अऊ हारून के बात ला नइं सुनिस, जइसे कि यहोवा ह कहे रिहिस।
EXO 8:16 तब यहोवा ह मूसा ले कहिस, “हारून ला कह, ‘अपन लउठी ला लमा अऊ भुइयां के धुर्रा ला मार,’ अऊ पूरा मिसर देस म धुर्रा ह कीरा बन जाही।”
EXO 8:17 ओमन वइसने करिन, अऊ जब हारून ह लउठी लेके अपन हांथ ला बढ़ाईस अऊ भुइयां के धुर्रा ला मारिस, त मनखे अऊ पसुमन ऊपर कीरामन आ गीन। पूरा मिसर देस म धुर्रा ह कीरा बन गीस।
EXO 8:18 पर जब जादूगरमन अपन जादूगरी ले कीरा बनाय के कोसिस करिन, त ओमन नइं कर सकिन। कीरामन हर जगह मनखे अऊ पसुमन म बने रिहिन,
EXO 8:19 त जादूगरमन फिरौन ला कहिन, “येह परमेसर के काम अय।” पर फिरौन के मन ह कठोर बने रिहिस अऊ ओह नइं सुनिस, जइसे कि यहोवा ह कहे रिहिस।
EXO 8:20 तब यहोवा ह मूसा ले कहिस, “बड़े बिहनियां उठ अऊ जब फिरौन ह नदी कोति जाथे, त ओकर आघू म जाके ओला कहिबे, ‘यहोवा ह ये कहत हे: मोर मनखेमन ला जावन दे, ताकि ओमन मोर अराधना करंय।
EXO 8:21 कहूं तेंह मोर मनखेमन ला जावन नइं देबे, त मेंह तोर अऊ तोर करमचारीमन ऊपर, तोर मनखेमन ऊपर अऊ तुम्हर घरमन म दल के दल कीट-पतंगामन ला पठोहूं। मिसरीमन के घरमन कीट-पतंगामन ले भर जाहीं; अऊ त अऊ भुइयां ह ओमन ले तोपा जाही।
EXO 8:22 “ ‘पर ओ दिन मेंह गोसेन प्रदेस ले अलग बरताव करहूं, जिहां मोर मनखेमन रहिथें; उहां कीट-पतंगामन के कोनो दल नइं होही, ताकि तेंह जान लेबे कि में, यहोवा, ये देस म हवंव।
EXO 8:23 मेंह मोर मनखे अऊ तोर मनखेमन के बीच एक अंतर करहूं। ये चिनहां ह कल दिखही।’ ”
EXO 8:24 अऊ यहोवा ह वइसनेच करिस। फिरौन के महल म अऊ ओकर करमचारीमन के घरमन म कीट-पतंगामन भर गीन; पूरा मिसर देस ह कीट-पतंगामन के दुवारा नास हो गीस।
EXO 8:25 तब फिरौन ह मूसा अऊ हारून ला बलाके कहिस, “तुमन जावव अऊ अपन परमेसर बर इही देस म बलि चघावव।”
EXO 8:26 पर मूसा ह कहिस, “येह ठीक नइं होही। जऊन बलिदान हमन यहोवा हमर परमेसर ला चघाबो, ओह मिसरीमन बर घिन अय। अऊ कहूं हमन ओ बलिदान ला चघाबो, जऊन ह मिसरीमन के नजर म घिन अय, त का ओमन हमर ऊपर पथरवाह नइं करहीं?
EXO 8:27 हमन ला तीन दिन के यातरा के दूरी म एक सुन्ना जगह म जाना जरूरी अय, ताकि हमन यहोवा हमर परमेसर बर बलिदान चघा सकन, जइसे कि ओह हमन ला हुकूम दे हवय।”
EXO 8:28 फिरौन ह कहिस, “मेंह तुमन ला जावन दूहूं ताकि तुमन सुन्ना जगह म जाके यहोवा अपन परमेसर बर बलिदान चघावव, पर जादा दूरिहा झन जावव। मोर बर पराथना करव।”
EXO 8:29 मूसा ह जबाब दीस, “जइसे ही मेंह तोर इहां ले जाहूं, मेंह यहोवा ले पराथना करहूं, अऊ कल कीट-पतंगामन फिरौन अऊ ओकर करमचारी अऊ ओकर मनखेमन ला छोंड़के चल दीहीं। पर फिरौन ह ये बात के निस्चय करय कि ओह फेर धोखा देके मनखेमन ला नइं रोकही कि ओमन जाके यहोवा बर बलिदान चघावंय।”
EXO 8:30 तब मूसा ह फिरौन करा ले चल दीस अऊ यहोवा ले पराथना करिस,
EXO 8:31 अऊ यहोवा ह मूसा के पराथना के मुताबिक करिस। कीट-पतंगामन फिरौन अऊ ओकर करमचारी अऊ ओकर मनखेमन ला छोंड़के चल दीन; एको ठन घलो उहां नइं रिहिन।
EXO 8:32 पर ये बेरा घलो फिरौन ह अपन मन ला कठोर कर लीस अऊ इसरायली मनखेमन ला जावन नइं दीस।
EXO 9:1 तब यहोवा ह मूसा ला कहिस, “फिरौन करा जाके ओला कह, ‘यहोवा, इबरीमन के परमेसर ह ये कहत हे: “मोर मनखेमन ला जावन दे कि ओमन मोर अराधना कर सकंय।”
EXO 9:2 यदि तेंह ओमन ला जावन नइं देबे अऊ ओमन ला रोके रहिबे,
EXO 9:3 त यहोवा के हांथ ह मैदान म तोर पसुमन ऊपर भयंकर महामारी ले आही—याने कि तोर घोड़ा, गदहा अऊ ऊंट अऊ तोर गाय-बईला अऊ भेड़-बकरीमन ऊपर।
EXO 9:4 पर यहोवा ह इसरायलीमन के पसु अऊ मिसरीमन के पसु म एक अंतर बनाही, जेकर ले इसरायलीमन के कोनो भी पसु नइं मरहीं।’ ”
EXO 9:5 यहोवा ह ये कहिके एक समय ठहिरा दीस, “कल यहोवा ह ये काम ला ये देस म करही।”
EXO 9:6 अऊ दूसर दिन यहोवा ह येला करिस: मिसरीमन के जम्मो पसुमन मर गीन, पर इसरायलीमन के एको ठन पसु नइं मरिन।
EXO 9:7 फिरौन ह खोजबीन करवाईस, त ओला पता चलिस कि इसरायलीमन के एको ठन पसु नइं मरे हवंय। तभो ले ओकर मन ह कठोर बने रिहिस अऊ ओह मनखेमन ला नइं जावन दीस।
EXO 9:8 तब यहोवा ह मूसा अऊ हारून ले कहिस, “एक ठन भट्ठी ले अपन हांथ म मुठा भरके राख ला लेवव अऊ मूसा ह फिरौन के आघू म ओ राख ला हवा म उड़िया दे।
EXO 9:9 येह पूरा मिसर देस म बारिक धुर्रा म बदल जाही, अऊ पूरा देस भर के मनखे अऊ पसुमन म फोड़ा निकल आही।”
EXO 9:10 एकरसेति ओमन एक ठन भट्ठी ले राख ला लीन अऊ फिरौन के आघू म जाके खड़े हो गीन। मूसा ह ओ राख ला हवा म उड़िया दीस, जेकर ले मनखे अऊ पसुमन म फोड़ा निकल आईस।
EXO 9:11 जादूगरमन ये फोड़ामन के कारन मूसा के आघू म ठाढ़ नइं हो सकिन, काबरकि ओ फोड़ामन न सिरिप जम्मो मिसरीमन के देहें म निकले रिहिन, पर जादूगरमन के देहेंमन घलो फोड़ा ले भर गे रिहिन।
EXO 9:12 पर यहोवा ह फिरौन के मन ला कठोर बना दीस, अऊ ओह मूसा अऊ हारून के बात ला नइं सुनिस, जइसे कि यहोवा ह मूसा ला कहे रिहिस।
EXO 9:13 तब यहोवा ह मूसा ला कहिस, “बड़े बिहनियां उठके फिरौन करा जाबे अऊ ओला कहिबे, ‘यहोवा, इबरीमन के परमेसर ह ये कहत हे: मोर मनखेमन ला जावन दे ताकि ओमन मोर अराधना कर सकंय,
EXO 9:14 नइं तो ये बेरा, तोर बिरूध अऊ तोर करमचारी अऊ तोर मनखेमन के बिरूध मेंह पूरा सक्ति से महामारी पठोहूं, जेकर ले तेंह जान लेबे कि जम्मो धरती म मोर सहीं अऊ कोनो नइं ए।
EXO 9:15 काबरकि अब तक मेंह अपन हांथ लमाके तोर अऊ तोर मनखेमन ऊपर महामारी लानके तुमन ला धरती ले नास कर सकत रहेंव।
EXO 9:16 पर मेंह तोला एकरसेति राजा बनाके उठाय हवंव, ताकि मेंह तोला अपन सामर्थ देखा सकंव अऊ धरती भर म मोर नांव के परचार होवय।
EXO 9:17 पर तेंह अब भी अपनआप ला मोर मनखेमन के बिरोध म रखके ओमन ला जावन नइं देवत हस।
EXO 9:18 एकरसेति, कल इही बेरा म, मेंह करा के अइसन आंधी पठोहूं, जइसन कि मिसर के नीव डारे के दिन ले लेके अब तक कभू नइं आय हवय।
EXO 9:19 एकरसेति अब हुकूम देके अपन पसु अऊ जऊन कुछू खेतमन म हवय, ओ जम्मो ला सुरकछित जगह म करवा ले, काबरकि हर ओ मनखे अऊ पसु, जऊन मन नइं लाय जाहीं अऊ खेत म रहिहीं, ओमन ऊपर करा गिरही, अऊ ओमन मर जाहीं।’ ”
EXO 9:20 फिरौन के ओ करमचारी, जऊन मन यहोवा के बचन के भय मानिन, ओमन लकर-धकर अपन गुलाम अऊ पसुमन ला भीतर ले आईन।
EXO 9:21 पर जऊन मन यहोवा के बचन ऊपर धियान नइं दीन, ओमन अपन गुलाम अऊ पसुमन ला खेत म ही रहन दीन।
EXO 9:22 तब यहोवा ह मूसा ला कहिस, “अपन हांथ ला अकास कोति बढ़ा ताकि जम्मो मिसर देस म करा गिरय—मनखे अऊ पसुमन ऊपर अऊ मिसर के खेत म होवइया हर फसल के ऊपर करा गिरय।”
EXO 9:23 जब मूसा ह अपन लउठी ला अकास कोति उठाईस, त यहोवा ह बादर के गरजन अऊ करा, अऊ बिजली के कड़क भुइयां म पठोईस। ये किसम ले यहोवा ह मिसर देस म करा के बारिस करिस;
EXO 9:24 करा गिरत रिहिस अऊ बार-बार बिजली घलो चमकत रिहिस। जब ले मिसर देस ह बसे रिहिस, तब ले लेके आज तक अइसने आंधी पूरा देस म कभू नइं आय रिहिस।
EXO 9:25 पूरा मिसर देस के खेत म के हर एक चीज ऊपर करा गिरिस—मनखे अऊ पसु दूनों के ऊपर; येह खेत के जम्मो फसल ला नास कर दीस अऊ रूखमन टूट गीन।
EXO 9:26 सिरिप एक ठन जगह म करा नइं गिरिस अऊ ओह गोसेन प्रदेस रिहिस, जिहां इसरायलीमन रहत रिहिन।
EXO 9:27 तब फिरौन ह मूसा अऊ हारून ला बलाईस अऊ ओमन ला कहिस, “ये बेरा, मेंह पाप करे हंव। यहोवा ह सही अय, अऊ में अऊ मोर मनखेमन गलत अन।
EXO 9:28 यहोवा ले पराथना करव; काबरकि बादर के गरजई अऊ करा के गिरई बहुंत हो गीस। मेंह तुमन ला जावन दूहूं; तुमन ला अब रूकना नइं पड़य।”
EXO 9:29 मूसा ह जबाब दीस, “जब मेंह सहर ले बाहिर निकलहूं, त मेंह अपन हांथ उठाके यहोवा ले पराथना करहूं। तब गरजन बंद हो जाही अऊ करा फेर नइं गिरही, तब तेंह जान लेबे कि धरती ह यहोवा के अय।
EXO 9:30 पर मेंह जानत हंव कि अभी घलो तें अऊ तोर करमचारीमन यहोवा परमेसर के भय नइं मानत हव।”
EXO 9:31 (सन अऊ जौ के फसल ह नास हो गे रिहिस, काबरकि जौ ह छटक गे रिहिस अऊ सन म फूल धरत रिहिस।
EXO 9:32 पर गहूं अऊ कठिया गहूंमन नास नइं होईन, काबरकि ओमन के फसल ह बाद म पाकथे।)
EXO 9:33 तब मूसा ह फिरौन करा ले निकलके सहर ले बाहिर चल दीस। ओह यहोवा कोति अपन हांथ उठाईस; तब गरजन अऊ करा के गिरई ह बंद हो गीस, अऊ देस म बारिस घलो रूक गीस।
EXO 9:34 जब फिरौन ह देखिस कि पानी अऊ करा के गिरई अऊ गरजन ह बंद हो गे हवय, त ओह फेर पाप करिस: ओ अऊ ओकर करमचारीमन अपन मन ला कठोर कर लीन।
EXO 9:35 फिरौन के मन ह कठोर हो गीस अऊ ओह इसरायलीमन ला जावन नइं दीस, जइसे कि यहोवा ह मूसा के जरिये पहिले कहे रिहिस।
EXO 10:1 ओकर बाद यहोवा ह मूसा ले कहिस, “फिरौन करा जा, काबरकि मेंह ओकर अऊ ओकर करमचारीमन के मन ला एकरसेति कठोर कर दे हंव, ताकि मेंह अपन ये चिनहांमन ला ओमन के बीच म देखावंव
EXO 10:2 अऊ तुमन अपन लइका अऊ अपन नाती-पोतामन ला बतावव कि कइसे मेंह मिसरीमन के संग कठोर बरताव करेंव अऊ कइसे मेंह ओमन के बीच म चिनहांमन ला देखांय, अऊ ये कि तुमन जानव कि मेंह यहोवा अंव।”
EXO 10:3 तब मूसा अऊ हारून, फिरौन करा गीन अऊ ओला कहिन, “यहोवा, इबरीमन के परमेसर ह ये कहत हे: ‘तें कब तक मोर आघू म अपनआप ला नम्र नइं करबे? मोर मनखेमन ला जावन दे, ताकि ओमन मोर अराधना करंय।
EXO 10:4 कहूं तेंह ओमन ला जावन नइं देबे, त कल मेंह फांफामन ला तोर देस म ले आहूं।
EXO 10:5 ओमन भुइयां ऊपर अइसे छा जाहीं कि ओह नइं दिखही। जऊन कुछू करा गिरे ले बांच गे हवय, ओला घलो ओमन खा जाहीं, अऊ खेतमन म बाढ़त जम्मो रूखमन ला घलो खा जाहीं।
EXO 10:6 ओमन तोर अऊ तोर जम्मो करमचारी अऊ जम्मो मिसरीमन के घर म भर जाहीं—जब ले तोर दाई-ददा अऊ तोर पुरखामन ये देस म बसे हवंय, तब ले लेके अब तक ओमन अइसने चीज नइं देखे होहीं।’ ” ये कहिके मूसा ह मुड़िस अऊ फिरौन करा ले चल दीस।
EXO 10:7 फिरौन के करमचारीमन ओला कहिन, “कब तक ये मनखे ह हमर बर फांदा बने रहिही? मनखेमन ला जावन दे, ताकि ओमन यहोवा अपन परमेसर के अराधना कर सकंय। का तेंह अभी घलो नइं समझत हस कि मिसर देस ह बरबाद हो गे हवय?”
EXO 10:8 तब मूसा अऊ हारून ला फेर फिरौन करा लाने गीस, अऊ ओह ओमन ला कहिस, “जावव, अऊ यहोवा अपन परमेसर के अराधना करव, पर मोला बतावव कि कोन-कोन तुम्हर संग जाहीं।”
EXO 10:9 मूसा ह जबाब दीस, “हमर संग हमर लइका अऊ हमर सियानमन, हमर बेटा-बेटीमन, अऊ हमर पसु अऊ भेड़-बकरीमन जाहीं, काबरकि हमन यहोवा बर एक तिहार मनाबो।”
EXO 10:10 फिरौन ह कहिस, “यहोवा ह तुम्हर संग रहय—कहूं मेंह तुमन ला तुम्हर माईलोगन अऊ लोग-लइकामन सहित जावन देथंव, त मोला लगत हे कि तुम्हर मन म बुरई हवय।
EXO 10:11 नइं! तुमन सिरिप मरदमन जावव अऊ यहोवा के अराधना करव, काबरकि इही बात के मांग तो तुमन करत रहेव।” तब मूसा अऊ हारून ला फिरौन के आघू ले बाहिर निकाल दिये गीस।
EXO 10:12 तब यहोवा ह मूसा ला कहिस, “मिसर देस ऊपर अपन हांथ लमा ताकि फांफामन आके मिसर देस म भर जावंय अऊ खेत म बाढ़त हर एक पऊधा ला खा जावंय, हर ओ चीज जऊन ह करा के गिरे के बाद बांच गे हवय, ओ जम्मो ला खा डारंय।”
EXO 10:13 तब मूसा ह अपन लउठी ला मिसर देस ऊपर बढ़ाईस, अऊ यहोवा ह जम्मो देस म ओ दिन अऊ रात भर पुरवई हवा चलाईस, अऊ बिहनियां ओ हवा ह फांफामन ला ले आईस;
EXO 10:14 ओमन जम्मो मिसर देस म छा गीन, अऊ बड़े संखिया म देस के हर भाग म फईल गीन। येकर पहिली अइसे फांफामन के महामारी कभू नइं आय रिहिस, अऊ येकर बाद फेर कभू नइं आही।
EXO 10:15 ओमन जम्मो भुइयां ऊपर अइसन छा गीन कि ओह करिया दिखे लगिस। करा गिरे के बाद जऊन कुछू बांच गे रिहिस, ओ जम्मो ला ओमन खा गीन—ओ जम्मो चीज जऊन ह खेतमन म बाढ़त रिहिस अऊ रूखमन के फर, ओ जम्मो ला खा लीन। पूरा मिसर देस म रूख अऊ पऊधा म कोनो किसम के हरियर चीज नइं बांचिस।
EXO 10:16 फिरौन ह तुरते मूसा अऊ हारून ला बलाके कहिस, “मेंह यहोवा तुम्हर परमेसर अऊ तुम्हर बिरूध पाप करे हवंव।
EXO 10:17 अब मोर पाप ला एक बार फेर छेमा करव अऊ यहोवा तुम्हर परमेसर ले पराथना करव कि ये मिरतू के महामारी ला मोर ले हटा ले।”
EXO 10:18 तब मूसा ह फिरौन करा ले चल दीस अऊ यहोवा ले पराथना करिस।
EXO 10:19 अऊ यहोवा ह हवा के दिग ला बदलके एक बड़े पछिमी हवा चलाईस, जऊन ह जम्मो फांफामन ला लाल-समुंदर म डार दीस। पूरा मिसर देस म एको ठन फांफा नइं बांचिन।
EXO 10:20 पर यहोवा ह फिरौन के मन ला कठोर कर दीस, अऊ ओह इसरायलीमन ला जावन नइं दीस।
EXO 10:21 तब यहोवा ह मूसा ला कहिस, “अपन हांथ ला अकास कोति लमा, ताकि मिसर देस म अंधियार छा जावय—अइसन अंधियार जेला महसूस करे जा सकय।”
EXO 10:22 तब मूसा ह अपन हांथ ला अकास कोति लमाईस, अऊ जम्मो मिसर देस म तीन दिन तक घोर अंधियार छा गीस।
EXO 10:23 तीन दिन तक न तो कोनो एक-दूसर ला देख सकिन, अऊ न ही कोनो कहीं आ जा सकिन। पर ओ जम्मो जगह म अंजोर रिहिस, जिहां इसरायलीमन रहत रिहिन।
EXO 10:24 तब फिरौन ह मूसा ला बलाके कहिस, “जावव, अऊ यहोवा के अराधना करव। तुमन अपन संग अपन लोग-लइकामन ला घलो ले जावव; सिरिप अपन पसुमन ला छोंड़ देवव।”
EXO 10:25 पर मूसा ह कहिस, “तें हमन ला बलिदान अऊ होम-बलिदान ले जाय के अनुमति दे ताकि हमन येमन ला यहोवा हमर परमेसर के आघू म भेंट चघा सकन।
EXO 10:26 एकरसेति संग म हमर पसुमन ला घलो ले जाना जरूरी अय; ओमन के एक ठन खुर तक घलो नइं छूटना चाही। हमन ओमा के कुछू चीजमन ला यहोवा हमर परमेसर के अराधना म उपयोग करबो, अऊ जब तक हमन उहां नइं हबर जावन, तब तक हमन नइं जानन कि यहोवा के अराधना म का चीज के उपयोग करबो।”
EXO 10:27 पर यहोवा ह फिरौन के मन ला कठोर कर दीस, अऊ ओह ओमन ला जावन नइं दीस।
EXO 10:28 फिरौन ह मूसा ला कहिस, “मोर नजर ले दूरिहा हट! अऊ धियान रख कि मोर आघू म फेर झन आबे! जऊन दिन तेंह मोर मुहूं ला देखबे, ओहीच दिन तेंह मार डारे जाबे।”
EXO 10:29 मूसा ह जबाब दीस, “जइसे कि तेंह कहत हस, मेंह तोर आघू म फेर कभू नइं आवंव।”
EXO 11:1 यहोवा ह मूसा ला कहे रिहिस, “मेंह फिरौन अऊ मिसर देस ऊपर एक ठन अऊ महामारी लानहूं। ओकर बाद, ओह तुमन ला इहां ले जावन दीही, अऊ जब ओह अइसन करथे, त ओह तुमन ला पूरा-पूरी भगा दीही।
EXO 11:2 इसरायलीमन ला कह कि हर एक मरद अऊ माईलोगन अपन-अपन परोसी ले सोन अऊ चांदी के चीजमन ला मांग लेवंय।”
EXO 11:3 (यहोवा ह अपन मनखेमन बर मिसरीमन के मन म दया के भाव उपजाईस, अऊ मूसा ला खुद मिसर देस म फिरौन के करमचारी अऊ मनखेमन बहुंत आदर के नजर ले देखंय।)
EXO 11:4 मूसा ह फिरौन ला कहिस, “यहोवा ह ये कहत हे: ‘मेंह आधा रथिया पूरा मिसर देस के बीच ले होके जाहूं।
EXO 11:5 मिसर देस के हर पहिलांत बेटा ह मर जाही, सिंघासन ऊपर बईठइया फिरौन के पहिलांत बेटा ले लेके जांता चलइया गुलाम माईलोगन के पहिलांत बेटा तक, अऊ पसुमन के जनमे जम्मो पहिलांत पसु घलो मर जाहीं।
EXO 11:6 पूरा मिसर देस म बहुंत रोये के अवाज सुनई दीही—अतेक खराप बात न कभू होय रिहिस, अऊ न फेर कभू होही।
EXO 11:7 पर इसरायलीमन के बीच म कोनो मनखे या पसु ऊपर कोनो कुकुर घलो नइं भूंकही,’ तब तेंह जान लेबे कि यहोवा ह मिसरी अऊ इसरायलीमन के बीच म एक अंतर रखथे।
EXO 11:8 तोर ये जम्मो करमचारीमन मोर करा आहीं, अऊ मोर आघू म मुड़ नवाके कहिहीं, ‘जावव, तें अऊ तोर पाछू चलइया जम्मो मनखेमन जावंय!’ ओकर बाद मेंह चल दूहूं।” तब मूसा ह बहुंत गुस्सा होके फिरौन करा ले चल दीस।
EXO 11:9 यहोवा ह मूसा ला कहे रिहिस, “फिरौन ह तोर बात ला नइं सुनही—ताकि मिसर देस म मोर अचम्भो के काम बहुंत होवय।”
EXO 11:10 मूसा अऊ हारून, फिरौन के आघू म ये जम्मो अचम्भो के काम करिन, पर यहोवा ह फिरौन के मन ला कठोर कर दे रिहिस, अऊ ओह इसरायलीमन ला अपन देस ले बाहिर नइं जावन देत रिहिस।
EXO 12:1 यहोवा ह मिसर देस म मूसा अऊ हारून ला कहिस,
EXO 12:2 “ये महिना ह तुम्हर बर पहिला महिना होही, याने कि येह साल के पहिला महिना होही।
EXO 12:3 इसरायल के पूरा समाज ला बता दव कि ये महिना के दसवां दिन तुमन म के हर एक झन अपन-अपन परिवार बर एक-एक ठन मेढ़ा-पीला लेवय।
EXO 12:4 यदि कोनो परिवार ह एक ठन मेढ़ा-पीला बर बहुंत छोटे हवय, त ओमन अपन सबले नजदीक के परोसी संग ओ मेढ़ा-पीला ला ओ घर के गनती के मुताबिक बांट लेवंय। हर मनखे ह कतेक खाही, ओकर मुताबिक ही ओ मेढ़ा-पीला के बांटा करे जावय।
EXO 12:5 जऊन पसु ला तुमन चुनथव, ओह एक साल के निरदोस नर पसु होवय, अऊ तुमन ओला भेड़मन ले या बकरीमन ले लेय सकत हव।
EXO 12:6 इही महिना के चौदहवां दिन तक ओकर खियाल रखव, तब इसरायली समाज के हर सदस्य गोधूलि के बेरा म ओला पूज देवय।
EXO 12:7 तब जऊन घर म ओ मेढ़ा-पीला ला खाहू, ओकर चौखट के दूनों कोति अऊ चौखट के ऊपरी भाग म ओकर थोरकन लहू ला लगा देवव।
EXO 12:8 ओहीच रथिया ओकर मांस ला आगी म भुंजके करू साग अऊ अखमीरी रोटी के संग खावव।
EXO 12:9 कइंचा मांस या पानी म उसने मांस ला झन खावव, पर ओकर गोड़, मुड़, अऊ पेट के भीतर के भागमन ला आगी म भुंजके खावव।
EXO 12:10 अऊ ओमा के कुछू चीज ला बिहनियां बर झन बचावव; कहूं ओमा के कुछू चीज ह बिहनियां तक बच जाथे, त तुमन ओला आगी म जला देवव।
EXO 12:11 तुमन ओला अइसे खावव: तुम्हर ऊपर के पहिरावा ह कमरपट्टा म बंधाय रहय, अपन गोड़ म पनही पहिरे रहव, अपन लउठी ला हांथ म धरे रहव अऊ ओला जल्दी-जल्दी खावव; येह यहोवा के फसह अय।
EXO 12:12 “ओही रथिया मेंह मिसर देस म ले होके निकलहूं अऊ मिसर देस के जम्मो पहिलांत ला मारहूं—चाहे ओह मनखे होवय या पसु, जम्मो पहिलांत ला मारहूं, अऊ मेंह मिसर के जम्मो देवतामन ला सजा दूहूं। मेंह यहोवा अंव।
EXO 12:13 जऊन घरमन म तुमन रहत हव, ओमा ओ लहू ह एक चिनहां होही, अऊ जब मेंह ओ लहू ला देखहूं, त ओला नाहकके आघू बढ़ जाहूं। जब मेंह मिसरीमन ला मारहूं, त तुम्हर ऊपर कोनो नास करइया महामारी नइं आही।
EXO 12:14 “ये दिन ह तुम्हर बर एक यादगार दिन होही; अऊ पीढ़ी-पीढ़ी तक तुमन येला यहोवा बर एक तिहार के रूप म मनाहू—ये नियम ह हमेसा बने रहय।
EXO 12:15 सात दिन तक बिगर खमीर के बने रोटी ला खावव। पहिलीच दिन अपन घर ले खमीर ला हटा दव, काबरकि कहूं कोनो पहिली दिन ले लेके सातवां दिन तक कोनो खमीर मिले हुए चीज ला खाथे, त ओला इसरायल ले अलग करे जावय।
EXO 12:16 पहिली दिन एक पबितर सभा करव, अऊ सातवां दिन घलो एक सभा करव। ये दूनों दिन कोनो काम-बुता झन करव, जम्मो झन के खाय बर सिरिप जेवन पकाय के काम करे जावय; ये दूनों दिन तुमन सिरिप येहीच काम करव।
EXO 12:17 “तुमन अखमीरी रोटी के तिहार मनावव, काबरकि येह ओ दिन अय, जब मेंह तुमन ला दल के दल मिसर देस ले बाहिर निकालके लानेंव। हमेसा के नियम के रूप म ये दिन ला अवइया पीढ़ी-पीढ़ी तक मानव।
EXO 12:18 पहिली महिना के चौदहवां दिन के सांझ ले इक्कीसवां दिन के सांझ तक तुमन अखमीरी रोटी खावव।
EXO 12:19 सात दिन ले तुम्हर घर म कोनो खमीर झन रहय। यदि कोनो मनखे खमीर ले बने कुछू चीज ला खाथे, चाहे ओह देसी मनखे होवय या फेर परदेसी, ओला इसरायल के समाज ले अलग करे जावय।
EXO 12:20 खमीर ले बने कोनो भी चीज ला झन खावव; जिहां कहूं भी तुमन रहव, अखमीरी रोटी ही खावव।”
EXO 12:21 तब मूसा ह इसरायल के जम्मो अगुवामन ला बलाके कहिस, “तुरते जावव अऊ अपन-अपन परिवार बर एक-एक ठन पसु छांट लेवव अऊ फसह के मेढ़ा-पीला के बलि करव।
EXO 12:22 तुमन जूफा के एक ठन गुच्छा लेवव अऊ ओला तसला म रखे लहू म बोरव अऊ लहू ला चौखट के ऊपर अऊ चौखट के दूनों तरफ लगावव, अऊ बिहान के होवत तक तुमन म ले कोनो अपन घर के मुंहटा ले बाहिर झन निकलय।
EXO 12:23 काबरकि जब यहोवा ह देस म ले होके मिसरीमन ला मारत जाही, त ओह चौखट के ऊपर अऊ चौखट के दूनों तरफ लगे लहू ला देखही, अऊ ओ मुंहटा ले नाहकके आघू बढ़ जाही, अऊ ओह नास करइया ला तुम्हर घरमन म जाके मार डारे के अनुमति नइं दीही।
EXO 12:24 “ये निरदेस ला तुमन अपन अऊ अपन लइकामन बर एक अटल हुकूम के रूप म मानव।
EXO 12:25 जब तुमन ओ देस म हबर जावव, जेला यहोवा ह अपन परतिगियां के मुताबिक तुमन ला दीही, त ये रीति-बिधिमन ला मानव।
EXO 12:26 अऊ जब तुम्हर लइकामन तुमन ले पुछंय, ‘तुमन ये बिधिमन ला काबर मानथव?’
EXO 12:27 तब ओमन ला बतावव, ‘येह यहोवा बर फसह के बलिदान अय; जऊन ह मिसर देस म इसरायलीमन के घर के आघू ले निकलिस अऊ हमर घरमन ला छोंड़के मिसरीमन ला नास करिस।’ ” तब मनखेमन मुड़ नवाके अराधना करिन।
EXO 12:28 इसरायलीमन वइसे ही करिन, जइसे यहोवा ह मूसा अऊ हारून ला हुकूम दे रिहिस।
EXO 12:29 आधा रथिया यहोवा ह मिसर म जम्मो पहिलांतमन ला मार डारिस, सिंघासन म बईठे फिरौन के पहिलांत ले लेके जेल म रहइया कैदीमन के पहिलांतमन ला, अऊ संग म पसुमन के जम्मो पहिलांत ला घलो मार डारिस।
EXO 12:30 रथिया के बेरा ही फिरौन अऊ ओकर जम्मो करमचारी अऊ जम्मो मिसरीमन जाग उठिन, अऊ उहां मिसर म बहुंत हाहाकार होवत रिहिस, काबरकि उहां अइसन एको ठन घर नइं रिहिस, जिहां कोनो मरे नइं रिहिस।
EXO 12:31 रथिया के बेरा ही फिरौन ह मूसा अऊ हारून ला बलाके कहिस, “मोर मनखेमन ला छोड़के, तुमन इसरायलीमन के संग चले जावव! तुमन जावव, अऊ यहोवा के अराधना करव, जइसे कि तुमन बिनती करे हव।
EXO 12:32 अपन कहे मुताबिक अपन भेड़-बकरी अऊ गरूवा-बईला ला संग म ले जावव। अऊ मोला आसीरबाद देवत जावव।”
EXO 12:33 मिसरीमन इसरायलीमन ला देस छोंड़के जल्दी से जल्दी चले जाय बर बिनती करिन। ओमन कहिन, “नइं तो हमन जम्मो झन मर जाबो!”
EXO 12:34 तब इसरायलीमन बिगर खमीर डाले गूंधे पीसान ला बरतन म धरके कपड़ा म लपेटिन अऊ ओला कंधा म बोहके ले चलिन।
EXO 12:35 इसरायलीमन मूसा के कहे मुताबिक मिसरीमन ले सोन अऊ चांदी के जेवर अऊ ओनहा ला मांग लीन।
EXO 12:36 यहोवा ह मिसरीमन ला इसरायलीमन बर दयालु कर दीस, अऊ ओमन जऊन कुछू मिसरीमन ले मांगिन, ओमन ला दिये गीस; ये किसम ले इसरायलीमन मिसरीमन ला लूट लीन।
EXO 12:37 तब इसरायलीमन रामसेस सहर ले चलके सुक्कोत सहर आईन। माईलोगन अऊ लइकामन के अलावा ओमन लगभग छै लाख पैदल चलइया आदमीमन रिहिन।
EXO 12:38 बहुंते आने मनखेमन घलो ओमन के संग गीन, ओमन के संग भेड़-बकरी अऊ गरूवा-बईला के बड़े दल घलो रहय।
EXO 12:39 जऊन साने गय पीसान, इसरायलीमन मिसर ले लाने रिहिन, ओकर ले ओमन बिगर खमीर के रोटी बनाईन। साने गय पीसान ह बिगर खमीर के रिहिस, काबरकि ओमन ला मिसर देस ले निकाल दिये गे रिहिस अऊ ओमन करा अपन बर खाना बनाय के समय नइं रिहिस।
EXO 12:40 इसरायलीमन मिसर देस म 430 साल तक रिहिन।
EXO 12:41 430 साल के आखिरी म, ओहीच दिन, यहोवा के जम्मो मनखेमन मिसर देस ले निकल गीन।
EXO 12:42 काबरकि यहोवा ह इसरायलीमन ला मिसर देस ले निकाल लाने बर रतजगा रखिस, ये रथिया जम्मो इसरायलीमन यहोवा के आदर म रतजगा करंय अऊ येला अवइया पीढ़ी-पीढ़ी के मनखेमन मानंय।
EXO 12:43 यहोवा ह मूसा अऊ हारून ला कहिस, “फसह के भोज के बिधि ये अय: “कोनो भी परदेसी येला झन खावय।
EXO 12:44 कोनो गुलाम, जेला तुमन बिसाय हवव, अऊ ओकर खतना करवाय हवव, त ओह येला खा सकत हे।
EXO 12:45 पर कोनो अस्थायी रूप म रहइया मनखे या कोनो बनिहार येला झन खावय।
EXO 12:46 “येला घर के भीतरेच म ही खाय जावय; मांस के एक टुकड़ा घलो घर के बाहिर झन ले जावव। कोनो हाड़ा ला झन टोरव।
EXO 12:47 जरूरी अय कि पूरा इसरायली समाज येला मनावय।
EXO 12:48 “तुम्हर बीच म रहइया कोनो परदेसी यदि यहोवा के फसह ला मनाय चाहथे, त ओकर घर के जम्मो मरदमन के खतना कराना जरूरी अय, तब ओह ओ देस म जनमे मनखे के सहीं येमा भाग ले सकथे। कोनो भी बिगर खतनावाला मनखे येला झन खावय।
EXO 12:49 येहीच कानून देसी मनखे अऊ तुम्हर बीच म रहइया परदेसी मनखे, दूनों बर लागू होथे।”
EXO 12:50 जम्मो इसरायलीमन वइसे ही करिन, जइसे यहोवा ह मूसा अऊ हारून ला हुकूम दे रिहिस।
EXO 12:51 अऊ ओहीच दिन यहोवा ह इसरायलीमन ला दल-दल करके मिसर देस ले निकाल लानिस।
EXO 13:1 यहोवा ह मूसा ला कहिस,
EXO 13:2 “हर पहिलांत मरद के मोर बर संस्कार करव। इसरायलीमन के बीच म हर गरभ के पहिली फर ह मोर अय, चाहे ओह मनखे होवय या पसु।”
EXO 13:3 तब मूसा ह मनखेमन ला कहिस, “सुरता करके ये दिन म उत्सव मनावव; येह ओ दिन ए, जब तुमन मिसर देस ले, गुलामी के देस ले बाहिर निकलेव, काबरकि यहोवा ह अपन सक्तिसाली हांथ के दुवारा तुमन ला उहां ले निकालके ले आईस। एकरसेति खमीर मिले हुए कोनो भी चीज ला झन खावव।
EXO 13:4 आज, अबीब नांव के महिना म, तुमन निकलके जावत हव।
EXO 13:5 जब यहोवा ह तुमन ला कनानी, हित्ती, अमोरी, हिब्बी, अऊ यबूसीमन के देस म लानही—ओ देस जेला तुमन ला देय बर, ओह तुम्हर पुरखामन के संग सपथ खाय रिहिस, एक अइसन देस जिहां दूध अऊ मंधरस के भरमार हवय—त तुमन इही महिना म ये उत्सव के पालन करव:
EXO 13:6 सात दिन तक तुमन बिगर खमीर के बने रोटी खावव अऊ सातवां दिन यहोवा बर तिहार मनावव।
EXO 13:7 ओ सात दिन तक अखमीरी रोटी ही खावव; तुम्हर बीच येमा कोनो भी किसम के खमीर झन दिखय, न ही तुम्हर सीमना के भीतर कहूं मेर कोनो किसम के खमीर दिखय।
EXO 13:8 ओ दिन तुमन अपन बेटामन ला बतावव, ‘जब मेंह मिसर देस ले बाहिर निकलेंव, त यहोवा ह जऊन कुछू मोर बर करिस, ओकर सेति मेंह येला मनाथंव।’
EXO 13:9 येकर पालन करई ह तुम्हर बर तुम्हर हांथ म एक चिनहां अऊ तुम्हर माथा म एक सुरता करइया के सहीं होवय कि यहोवा के ये कानून ह तुम्हर मुहूं म रहय। काबरकि यहोवा ह अपन सक्तिसाली हांथ के दुवारा तुमन ला मिसर देस ले बाहिर निकाल लानिस।
EXO 13:10 एकरसेति हर साल ठहिराय गे समय म ये बिधि के पालन करव।
EXO 13:11 “जब यहोवा ह तुमन ला कनानीमन के देस म ले आथे अऊ ओला तुम्हर अधिकार म दे देथे, जइसे कि ओह तुम्हर अऊ तुम्हर पुरखामन ले सपथ खाके परतिगियां करे रिहिस,
EXO 13:12 त तुमन हर एक कोख के पहिली संतान यहोवा ला दे दव। तुम्हर पसुमन के पहिलांत नर बछरू ह घलो यहोवा के अय।
EXO 13:13 गदहा के हर एक पहिलांत ला एक ठन मेढ़ा-पीला देके छोंड़ा लेवव, पर यदि तुमन ओला नइं छोंड़ावव, त ओकर घेंच ला टोर देवव। अपन जम्मो पहिलांत बेटामन ला बलदा देके छोंड़ा लेवव।
EXO 13:14 “अवइया दिन म जब तुम्हर बेटामन तुमन ले पुछहीं, ‘येकर का मतलब अय?’ त ओमन ले कहव, ‘यहोवा ह अपन सक्तिसाली हांथ के दुवारा हमन ला मिसर देस के गुलामी ले निकाल लानिस।
EXO 13:15 जब फिरौन ह जिद्द करके हमन ला नइं जावन देवत रिहिस, त यहोवा ह मिसर देस म मनखे अऊ पसु दूनों के पहिलांत ला मार डारिस। एकरसेति हमन हर एक के कोख के पहिली नर संतान ला यहोवा बर बलिदान करथन अऊ अपन पहिलांत बेटा ला बलदा देके छोंड़ा लेथन।’
EXO 13:16 अऊ येह तुम्हर हांथ म एक चिनहां अऊ तुम्हर माथा म एक टीका सहीं होही कि यहोवा ह अपन सक्तिसाली हांथ के दुवारा हमन ला मिसर देस ले निकाल लानिस।”
EXO 13:17 जब फिरौन ह मनखेमन ला जावन दीस, त परमेसर ह ओमन ला पलिस्तीमन के देस के डहार म ले नइं ले गीस, हालाकि ओ डहार ह छोटे रिहिस। पर परमेसर ह अपन मन म कहिस, “अइसन झन होवय कि ओमन लड़ई होवत देखंय अऊ अपन मन ला बदलके मिसर देस लहुंट जावंय।”
EXO 13:18 एकरसेति परमेसर ह इसरायलीमन ला सुन्ना जगह के रसता म ले होके लाल-समुंदर कोति ले लेय गीस। मिसर देस ले निकलके इसरायलीमन लड़ई बर तियार होके आघू बढ़िन।
EXO 13:19 मूसा ह अपन संग यूसुफ के हाड़ामन ला घलो ले गीस, काबरकि यूसुफ ह इसरायलीमन ले ये कहिके किरिया खवाय रिहिस, “परमेसर ह जरूर तुम्हर मदद करही, अऊ जब तुमन ये जगह ले जावव, त मोर हाड़ामन ला अपन संग जरूर ले जावव।”
EXO 13:20 सुक्कोत ले आघू बढ़े के बाद, ओमन एताम म डेरा डालिन, जऊन ह सुन्ना जगह के तीर म रिहिस।
EXO 13:21 यहोवा ह ओमन ला दिन म डहार देखाय बर बादर के खंभा अऊ रथिया अंजोर देय बर आगी के खंभा म होके ओमन के आघू-आघू चलय, ताकि ओमन रात अऊ दिन यातरा कर सकंय।
EXO 13:22 परमेसर ह न तो बादर के खंभा ला दिन म अऊ न ही आगी के खंभा ला रात म मनखेमन के आघू ले हटाईस।
EXO 14:1 तब यहोवा ह मूसा ला कहिस,
EXO 14:2 “इसरायलीमन ला कह कि ओमन पाछू घुंचके मिगदोल अऊ समुंदर के बीच, पी-हाहीरोत के लकठा म डेरा डालंय। ओमन समुंदर तीर, बाल-सपोन के एकदम सामने म डेरा डालंय।
EXO 14:3 फिरौन ह सोचही, ‘इसरायलीमन घबराहट म आके देस म चारों कोति भटकत हवंय, सुन्ना जगह म फंस गे हवंय।’
EXO 14:4 अऊ मेंह फिरौन के मन ला कठोर कर दूहूं, अऊ ओह ओमन के पीछा करही। पर मेंह फिरौन अऊ ओकर जम्मो सेनामन के दुवारा अपन महिमा कराहूं, अऊ मिसरीमन जान लीहीं कि मेंह यहोवा अंव।” अऊ इसरायलीमन वइसनेच करिन।
EXO 14:5 जब मिसर के राजा ला बताय गीस कि इसरायलीमन भाग गे हवंय, त फिरौन अऊ ओकर करमचारीमन के मन ह ओमन के बारे म बदल गीस अऊ ओमन कहिन, “हमन का कर डारेंन? हमन इसरायलीमन ला जावन देंन अऊ अब हमन ला ओमन के सेवा नइं मिलत हे!”
EXO 14:6 तब फिरौन ह अपन रथ ला तियार करवाईस अऊ सेना ला अपन संग लीस।
EXO 14:7 ओह छै सौ बढ़िया-बढ़िया रथमन ला लीस, अऊ संग म मिसर देस के आने जम्मो रथमन ला घलो लीस अऊ ओ जम्मो रथ म अधिकारीमन रहंय।
EXO 14:8 यहोवा ह मिसर के राजा फिरौन के मन ला कठोर कर दीस, जेकर कारन ओह इसरायलीमन के पीछा करिस, जेमन बेधड़क आघू बढ़त रिहिन।
EXO 14:9 मिसरीमन—फिरौन के जम्मो घोड़ा अऊ रथ, घुड़सवार अऊ सैनिक दल इसरायलीमन के पीछा करत ओमन करा हबर गीन, जेमन समुंदर के तीर, पी-हाहीरोत के लकठा म, बाल-सपोन के सामने डेरा डाले रिहिन।
EXO 14:10 जब फिरौन ह लकठा म आईस, त इसरायलीमन देखिन कि मिसरीमन ओमन के पीछा करत आवत हंय। त ओमन अब्बड़ डरा गीन अऊ चिचियाके यहोवा ले गोहारे लगिन।
EXO 14:11 ओमन मूसा ला कहिन, “का मिसर देस म कबर नइं रिहिस कि तेंह हमन ला इहां सुन्ना जगह म मरे बर ले आय? तेंह हमर संग काबर अइसे करय कि तेंह हमन ला मिसर देस ले निकाल लानय?
EXO 14:12 का हमन मिसर म तोला नइं कहे रहेंन, ‘हमन ला इहेंच रहन दे; हमन मिसरीमन के सेवा करबो?’ ये सुन्ना जगह म मरे के बदले बने होतिस कि हमन मिसरीमन के सेवा करत रहितेंन!”
EXO 14:13 मूसा ह मनखेमन ला जबाब दीस, “झन डरव। खड़े रहव अऊ ओ छुटकारा के काम ला देखव, जेला यहोवा ह आज तुम्हर बर करही। जऊन मिसरीमन ला आज तुमन देखत हव, ओमन ला तुमन फेर कभू नइं देखहू।
EXO 14:14 यहोवा ह तुम्हर बर लड़ही; तुमन सिरिप चुपेचाप रहव।”
EXO 14:15 तब यहोवा ह मूसा ला कहिस, “तुमन काबर चिचियाके मोला गोहारत हव? इसरायलीमन ला कह कि ओमन आघू बढ़ंय।
EXO 14:16 पानी ला दू भाग करे बर लउठी ला उठाके अपन हांथ ला समुंदर कोति बढ़ा, ताकि इसरायलीमन समुंदर के सूखा भुइयां म ले होके जा सकंय।
EXO 14:17 मेंह मिसरीमन के मन ला कठोर कर दूहूं अऊ ओमन इसरायलीमन के पीछा करत आहीं। अऊ मेंह फिरौन अऊ ओकर जम्मो सेना के जरिये, अऊ ओकर जम्मो रथ अऊ ओकर घुड़सवारमन के जरिये महिमा पाहूं।
EXO 14:18 जब मेंह फिरौन, ओकर रथ अऊ ओकर घुड़सवारमन के जरिये महिमा पाहूं, त मिसरीमन जान लीहीं कि मेंह यहोवा अंव।”
EXO 14:19 तब परमेसर के स्वरगदूत, जऊन ह इसरायली सेना के आघू-आघू चलत रिहिस, घुंचके ओमन के पाछू म चल दीस। बादर के खंभा ह घलो आघू ले हटके ओमन के पाछू म आ गीस।
EXO 14:20 ये किसम ले, स्वरगदूत अऊ बादर के खंभा ह मिसर के सेना अऊ इसरायलीमन के बीच म आ गीन। बादर के कारन रात भर एक तरफ अंधियार अऊ दूसर कोति अंजोर रिहिस; एकरसेति रात भर दूनों तरफ के कोनो भी एक-दूसर के तीर म नइं आ सकिन।
EXO 14:21 तब मूसा ह समुंदर कोति अपन हांथ ला बढ़ाईस, अऊ यहोवा ह ओ पूरा रथिया पूरब ले बहुंत हवा चलाईस, अऊ समुंदर के पानी ह हट गे, अऊ उहां सूखा भुइयां हो गीस; पानी ह दू भाग हो गीस,
EXO 14:22 अऊ इसरायलीमन सूखा भुइयां म समुंदर म ले होके चल दीन, अऊ पानी ह ओमन के डेरी अऊ जेवनी दूनों कोति दीवार सहीं हो गे रिहिस।
EXO 14:23 मिसरीमन ओमन के पीछा करिन, अऊ फिरौन के जम्मो घोड़ा, रथ अऊ घुड़सवारमन ओमन के पीछा करत समुंदर म आ गीन।
EXO 14:24 रथिया के आखिरी बेरा म यहोवा ह आगी अऊ बादर के खंभा ले खाल्हे मिसरी सेना के ऊपर नजर डालिस, अऊ ओमन म गड़बड़ी कर दीस।
EXO 14:25 ओह ओमन के रथ के चक्कामन ला जाम कर दीस, जेकर कारन ओमन ला रथ चलाना मुसकिल हो गे, अऊ मिसरीमन कहे लगिन, “आवव, हमन इसरायलीमन के पीछा करई छोंड़के दूरिहा भाग जावन! यहोवा ह ओमन के खातिर मिसरीमन के बिरूध लड़त हवय।”
EXO 14:26 तब यहोवा ह मूसा ला कहिस, “अपन हांथ ला समुंदर कोति लमा ताकि पानी ह मिसरी अऊ ओमन के रथ अऊ घुड़सवारमन ऊपर फेर बोहावय।”
EXO 14:27 मूसा ह अपन हांथ ला समुंदर कोति लमाईस, अऊ बिहनियां होवत समुंदर ह फेर पहिले के सहीं जस के तस हो गीस। मिसरीमन भागे लगिन, पर यहोवा ह ओमन ला समुंदर म बुड़ो दीस।
EXO 14:28 पानी ह वापिस बहे लगिस अऊ रथ अऊ घुड़सवार—फिरौन के ओ जम्मो सेना ला बुड़ो दीस, जेमन इसरायलीमन के समुंदर म पीछा करत रिहिन। ओमा के एको झन भी नइं बांचिन।
EXO 14:29 पर इसरायलीमन समुंदर म ले होके सूखा भुइयां म रेंगत निकल गीन, अऊ पानी ह दीवार के सहीं ओमन के जेवनी अऊ डेरी कोति ठाढ़े रहय।
EXO 14:30 ओ दिन यहोवा ह इसरायलीमन ला मिसरीमन के हांथ ले बचाईस, अऊ इसरायलीमन मिसरीमन ला समुंदर के तीर म मरे पड़े देखिन।
EXO 14:31 अऊ जब इसरायलीमन यहोवा के सक्तिसाली हांथ ला मिसरीमन के बिरूध काम करत देखिन, त ओमन यहोवा के भय मानिन अऊ ओमन ओकर ऊपर अऊ ओकर सेवक मूसा ऊपर भरोसा करिन।
EXO 15:1 तब मूसा अऊ इसरायलीमन यहोवा बर ये गीत गाईन: “मेंह यहोवा बर गीत गाहूं, काबरकि ओह महान परतापी अय। घोड़ा अऊ घुड़सवार दूनों ला ओह समुंदर म फटिक दे हवय।
EXO 15:2 “यहोवा ह मोर बल अऊ मोर सुरकछा अय; ओही ह मोर उद्धार अय। ओह मोर परमेसर अय, अऊ मेंह ओकर परसंसा करहूं, ओह मोर ददा के परमेसर अय, अऊ मेंह ओकर महिमा करहूं।
EXO 15:3 यहोवा ह योद्धा अय; ओकर नांव यहोवा अय।
EXO 15:4 फिरौन के रथमन ला अऊ ओकर सेना ला ओह समुंदर म फटिक दे हवय। फिरौन के सबले बढ़िया अधिकारीमन लाल-समुंदर म बुड़ गे हवंय।
EXO 15:5 गहिरा पानी ह ओमन ला ढांप ले हवय; ओमन गहरई म पथरा कस बुड़ गीन।
EXO 15:6 हे यहोवा, तोर जेवनी हांथ ह ताकत म सानदार रिहिस। हे यहोवा, तोर जेवनी हांथ ह बईरीमन ला चकनाचूर कर दीस।
EXO 15:7 “अपन बड़े महानता म, तेंह अपन बिरोधीमन ला खाल्हे फटिक देय। तोर भयंकर गुस्सा ह भड़किस; येह भूंसा के सहीं ओमन ला भसम कर दीस।
EXO 15:8 तोर नाक के फूंक ले पानी ह संकला गीस। पानी के लहरा ह दीवार के सहीं ठाढ़ हो गीस; गहिरा पानी ह समुंदर के मांझा म जम गीस।
EXO 15:9 बईरी ह ये कहिके डींग मारिस, ‘मेंह पीछा करहूं, मेंह ओमन ला धर लूहूं। मेंह लूट के सामान ला बांट लूहूं; मेंह ओमन ला अपन बर ठूंसके भर लूहूं। मेंह अपन तलवार ला खींचके निकालहूं अऊ मोर हांथ ह ओमन ला नास कर दीही।’
EXO 15:10 पर तेंह अपन सांस फूंके, अऊ समुंदर ह ओमन ला ढांप लीस। ओमन अथाह पानी म सीसा के सहीं बुड़ गीन।
EXO 15:11 हे यहोवा, देवतामन म तोर कस कोन हवय? कोन हवय तोर कस— पबितरता म सानदार, महिमा म अद्भूत, अऊ अचम्भो के काम करइया?
EXO 15:12 “तेंह अपन जेवनी हांथ ला बढ़ाथस, अऊ धरती ह तोर बईरीमन ला लील लेथे।
EXO 15:13 अपन बड़े मया म तेंह ओ मनखेमन के अगुवई करबे, जेमन ला तेंह छोंड़ाय हस। अपन ताकत ले तेंह ओमन ला अपन पबितर निवास म ले जाबे।
EXO 15:14 जाति-जाति के मनखेमन सुनके कांपे लगहीं; पलिस्ती के मनखेमन म डर हमा जाही।
EXO 15:15 एदोम के मुखियामन भयभीत हो जाहीं, मोआब के अगुवामन कांपे लगहीं, कनान के मनखेमन के मन ह पिघल जाही;
EXO 15:16 आतंक अऊ भय ओमन म छा जाही। हे यहोवा, जब तक कि तोर मनखेमन निकल नइं जावंय, जब तक कि तोर बिसाय मनखेमन निकल नइं जावंय, तोर भुजबल के दुवारा ओमन पथरा के सहीं इस्थिर बने रहिहीं।
EXO 15:17 तेंह ओमन ला लानबे अऊ अपन निज भाग के पहाड़ म ओमन ला बसाबे— हे यहोवा, येह ओ जगह अय, जेला तेंह अपन निवास बर बनाय, हे परभू, येह ओ पबितर-स्थान अय, जेला तेंह अपन हांथ ले इस्थिर करे हस।
EXO 15:18 “यहोवा ह सदाकाल बर राज करथे।”
EXO 15:19 जब फिरौन के घोड़ा, रथ अऊ घुड़सवारमन समुंदर म आ गीन, त यहोवा ह ओमन ऊपर समुंदर के पानी ला वापिस ले आईस, पर इसरायलीमन सूखा भुइयां म समुंदर ले होके रेंगत निकल गीन।
EXO 15:20 तब हारून के बहिनी, मिरियम अगमजानी ह अपन हांथ म डफली धरिस, अऊ ओकर संग जम्मो माईलोगनमन डफली धरके नाचे लगिन।
EXO 15:21 मिरियम ह ओमन बर ये गीत गाईस: “यहोवा के गीत गावव, काबरकि ओह महान परतापी अय। घोड़ा अऊ घुड़सवार दूनों ला ओह समुंदर म फटिक दे हवय।”
EXO 15:22 तब मूसा ह इसरायलीमन ला लाल-समुंदर ले सूर के सुन्ना जगह म ले गीस। तीन दिन तक ओमन सुन्ना जगह म चलिन, पर ओमन ला पानी नइं मिलिस।
EXO 15:23 जब ओमन मारा नांव के ठऊर म आईन, त ओमन उहां के पानी ला नइं पी सकिन, काबरकि ओ पानी ह करू रिहिस। (एकर कारन ओ ठऊर ला मारा कहे जाथे।)
EXO 15:24 तब मनखेमन मूसा के बिरूध बड़बड़ाय लगिन अऊ कहिन, “हमन का ला पीबो?”
EXO 15:25 तब मूसा ह यहोवा करा गोहारिस, अऊ यहोवा ह ओला एक ठन लकड़ी के कुटा देखाईस। मूसा ह ओला पानी म फटिक दीस, अऊ ओ पानी ह पीये के लईक हो गीस। उहां यहोवा ह ओमन बर एक ठन नियम अऊ हुकूम बनाईस अऊ ओमन ला परखिस।
EXO 15:26 ओह कहिस, “कहूं तुमन यहोवा अपन परमेसर के बात ला धियान देके सुनहू, अऊ जऊन कुछू ओकर नजर म सही अय, ओला करहू, कहूं तुमन ओकर हुकूम अऊ ओकर जम्मो नियममन ला मानहू, त जऊन महामारी मेंह मिसरीमन ऊपर लाने रहेंव, ओमा के एको ठन ला तुम्हर ऊपर नइं लानंव, काबरकि मेंह यहोवा अंव, जऊन ह तुमन ला चंगा करथे।”
EXO 15:27 तब ओमन एलीम नांव के जगह म आईन, जिहां पानी के बारह ठन सोता अऊ सत्तर ठन खजूर के रूख रहंय, अऊ ओमन ओ सोतामन के पानी के तीर म अपन डेरा डालिन।
EXO 16:1 तब पूरा इसरायली समाज ह एलीम ले आघू बढ़िस अऊ ओमन सीन नांव के निरजन जगह म आईन, जऊन ह एलीम अऊ सीनय पहाड़ के बीच म हवय। मिसर देस ले निकले के दूसरा महिना के पंदरहवां दिन इसरायलीमन उहां हबरिन।
EXO 16:2 ओ निरजन जगह म जम्मो इसरायली समाज ह मूसा अऊ हारून के बिरूध बड़बड़ाय लगिस।
EXO 16:3 इसरायलीमन ओमन ला कहिन, “बने होतिस यदि हमन यहोवा के हांथ ले मिसर म ही मर गे रहितेंन! उहां हमन मांस ले भरे कढ़ाही के तीर म बईठके अपन ईछा के मुताबिक जम्मो किसम के जेवन करत रहेंन, पर तुमन हमन ला ये निरजन जगह म एकरसेति लाने हवव कि ये पूरा समाज भूख के मारे मर जावय।”
EXO 16:4 तब यहोवा ह मूसा ला कहिस, “मेंह तुम्हर बर स्वरग ले रोटी बरसाहूं। मनखेमन हर दिन बाहिर जाके अपन दिन भर के रोटी संकेल लेवंय। ये किसम ले मेंह ओमन ला परखहूं अऊ देखहूं कि ओमन मोर हुकूम ला मानथें कि नइं।
EXO 16:5 हप्ता के हर छठवां दिन ओमन आने दिन ले दू गुना जेवन संकेलंय, अऊ ओला रांधंय।”
EXO 16:6 मूसा अऊ हारून जम्मो इसरायलीमन ला कहिन, “सांझ के तुमन जान जाहू कि येह यहोवा अय, जऊन ह तुमन ला मिसर देस ले बाहिर निकाल लानिस,
EXO 16:7 अऊ बिहनियां तुमन यहोवा के महिमा ला देखहू, काबरकि ओह अपन बिरोध म तुम्हर बड़बड़ई ला सुने हवय। हमन कोन अन कि तुमन हमर बिरूध म बड़बड़ावव?”
EXO 16:8 मूसा ह ये घलो कहिस, “तुमन जान लूहू कि येह यहोवा अय, जऊन ह तुम्हर खाय बर सांझकुन मांस अऊ बिहनियां तुम्हर जरूरत के पूरा रोटी देथे, काबरकि ओह अपन बिरूध तुम्हर बड़बड़ई ला सुन ले हवय। हमन कोन अन? तुमन हमर बिरूध नइं बड़बड़ावत हव, पर यहोवा के बिरूध बड़बड़ावत हव।”
EXO 16:9 तब मूसा ह हारून ला कहिस, “जम्मो इसरायली समाज ले ये कहि दे, ‘यहोवा के आघू म आवव, काबरकि ओह तुम्हर बड़बड़ई ला सुने हवय।’ ”
EXO 16:10 जब हारून ह जम्मो इसरायली समाज ले गोठियावत रिहिस, त ओमन निरजन जगह कोति नजर करिन, अऊ उहां बादर म यहोवा के महिमा परगट होवत देखिन।
EXO 16:11 यहोवा ह मूसा ला कहिस,
EXO 16:12 “मेंह इसरायलीमन के बड़बड़ई ला सुने हवंव। ओमन ला बता, ‘सांझकुन तुमन ला मांस अऊ बिहनियां के बेरा तुमन ला भरपेट रोटी खाय बर मिलही। तब तुमन जानहू कि मेंह यहोवा तुम्हर परमेसर अंव।’ ”
EXO 16:13 ओ दिन संझा के बेरा बटेरमन आईन अऊ छावनी ह बटेरमन ले भर गीस, अऊ बिहनियां के बेरा छावनी म चारों कोति ओस के एक परत दिखिस।
EXO 16:14 जब ओस ह सूखा गीस, त पाला के सहीं एक पतला परत निरजन जगह के भुइयां म पड़े दिखिस।
EXO 16:15 जब इसरायलीमन येला देखिन, त ओमन आपस म कहे लगिन, “येह का ए?” काबरकि ओमन नइं जानत रिहिन कि ओह का रिहिस। मूसा ह ओमन ला कहिस, “येह ओ रोटी ए, जेला यहोवा ह तुमन ला खाय बर दे हवय।
EXO 16:16 येह यहोवा के हुकूम अय: ‘हर एक झन अपन जरूरत के मुताबिक खाय बर संकेल लेवय। अपन तम्बू म हर एक मनखे बर एक-एक ओमेर संकेलव।’ ”
EXO 16:17 इसरायलीमन वइसनेच करिन, जइसे ओमन ला कहे गीस; कोनो मन थोरकन, त कोनो मन जादा संकेलिन।
EXO 16:18 अऊ जब ओमन येला ओमेर म नापिन, त जऊन ह जादा संकेले रिहिस, ओकर करा बहुंत जादा नइं रिहिस, अऊ जऊन ह थोरकन संकेले रिहिस, ओकर करा कम नइं होईस। पर हर एक झन अपन जरूरत के मुताबिक ही संकेले रिहिन।
EXO 16:19 तब मूसा ह ओमन ला कहिस, “कोनो भी मनखे बिहनियां होवत तक येमा के कुछू चीज ला बचाके झन रखय।”
EXO 16:20 पर ओमा के कुछू मनखेमन मूसा के गोठ ला धियान नइं दीन; अऊ येमा के कुछू भाग ला बिहनियां बर रख लीन, पर ओमा कीरा पर गे अऊ ओह बस्साय लगिस। एकरसेति मूसा ह ओमन ऊपर गुस्सा होईस।
EXO 16:21 रोज बिहनियां हर एक जन अपन जरूरत के मुताबिक ओला संकेलंय, अऊ जब घाम होवय, त ओह टघल जावय।
EXO 16:22 हप्ता के छठवां दिन, ओमन आने दिन के तुलना म दू गुना संकेलिन—हर एक मनखे बर दू ओमेर—अऊ समाज के अगुवामन आके मूसा ला ये बात के सूचना दीन।
EXO 16:23 ओह ओमन ला कहिस, “यहोवा ह ये हुकूम दे हवय: ‘कल बिसराम दिन अय, यहोवा बर एक पबितर बिसराम दिन। एकरसेति, जऊन कुछू तुमन रांधे बर चाहत हव, ओला रांध लव अऊ जऊन कुछू तुमन उसने बर चाहत हव, ओला उसन लव। जतेक ह बांच जाही, ओला बिहनियां होवत तक रख लेवव।’ ”
EXO 16:24 तब ओमन मूसा के हुकूम के मुताबिक ओला बिहनियां होवत तक बंचाके रखिन, अऊ ओह बास नइं मारिस अऊ ओमा कीरा नइं लगिस।
EXO 16:25 मूसा ह कहिस, “आज तुमन इही ला खावव, काबरकि आज यहोवा बर बिसराम दिन अय। येमा के कुछू भी चीज आज तुमन ला मैदान म नइं मिलही।
EXO 16:26 हप्ता के छै दिन तुमन येला संकेलव, पर सातवां दिन बिसराम दिन अय, अऊ ओ दिन येह तुमन ला नइं मिलय।”
EXO 16:27 तभो ले, कुछू मनखेमन सातवां दिन घलो ओला संकेले बर गीन, पर ओमन ला कुछू नइं मिलिस।
EXO 16:28 तब यहोवा ह मूसा ला कहिस, “तुमन कब तक मोर हुकूम अऊ निरदेसमन ला नइं मानहू?
EXO 16:29 अपन मन म ये बात ला रख लव कि यहोवा ह तुमन ला बिसराम दिन दे हवय; एकरसेति ओह तुमन ला छठवां दिन दू दिन के पुरता जेवन देथे। सातवां दिन हर एक झन घर म रहंय; कोनो बाहिर झन निकलय।”
EXO 16:30 एकरसेति मनखेमन सातवां दिन बिसराम करिन।
EXO 16:31 मनखेमन ओ जेवन के नांव मन्ना रखिन। ओह सफेद धनियां के बीजा सहीं रिहिस, अऊ ओकर सुवाद ह मंधरस ले बने छोटे पातर मीठा पपड़ी सहीं रिहिस।
EXO 16:32 मूसा ह इसरायलीमन ला कहिस, “यहोवा ह ये हुकूम दे हवय: ‘एक ओमेर मन्ना अवइया पीढ़ी के मनखेमन बर रख लेवव, ताकि ओमन ओ जेवन ला देखंय, जेला मेंह तुमन ला निरजन जगह म देय हवंव, जब मेंह तुमन ला मिसर देस ले निकालके लानेंव।’ ”
EXO 16:33 तब मूसा ह हारून ला कहिस, “एक ठन बरतन ले अऊ ओमा एक ओमेर मन्ना ले अऊ ओला यहोवा के आघू म मढ़ा दे ताकि ओह अवइया पीढ़ी के मनखेमन बर रहय।”
EXO 16:34 यहोवा के मूसा ला दिये हुकूम के मुताबिक, हारून ह मन्ना ला करार कानून के पटियामन के संग रख दीस, ताकि ओला बचाय जा सकय।
EXO 16:35 इसरायलीमन चालीस साल तक मन्ना खाईन, जब तक कि ओमन ओ देस म नइं हबर गीन, जिहां ओमन ला बसना रिहिस; ओमन तब तक मन्ना ला खाईन, जब तक कि ओमन कनान देस के सीमना म नइं हबर गीन।
EXO 16:36 (एक ओमेर ह एक एपा के दसवां हिस्सा होथे।)
EXO 17:1 पूरा इसरायली समाज ह सीन नांव के निरजन जगह ले आघू बढ़िस, ओमन जगह-जगह के यातरा करत गीन, जइसे कि यहोवा ह ओमन ला हुकूम दीस। ओमन रपीदीम नांव के जगह म डेरा डालिन, पर उहां मनखेमन के पीये बर पानी नइं रिहिस।
EXO 17:2 एकरसेति ओमन मूसा ले झगरा करे लगिन अऊ कहिन, “हमन ला पीये बर पानी दे।” मूसा ह जबाब दीस, “तुमन काबर मोर संग झगरा करत हव? तुमन काबर यहोवा के परिछा लेवत हव?”
EXO 17:3 पर मनखेमन पानी बर पीयासन रिहिन, अऊ ओमन मूसा के बिरूध बड़बड़ाय लगिन। ओमन कहिन, “तेंह काबर हमन ला मिसर देस ले बाहिर निकालके ले आय कि हमन अऊ हमर लइकामन अऊ पसुमन पीयास के मारे मर जावन?”
EXO 17:4 तब मूसा ह यहोवा ले चिचियाके गोहारिस, “मेंह ये मनखेमन के का करंव? ओमन मोर ऊपर पथरवाह करे बर लगभग तियार हवंय।”
EXO 17:5 यहोवा ह मूसा ला जबाब दीस, “मनखेमन के आघू म जा। अपन संग इसरायल के कुछू अगुवामन ला ले अऊ जऊन लउठी ले तेंह नील नदी ला मारे रहय, ओला अपन हांथ म ले अऊ जा।
EXO 17:6 मेंह उहां तोर आघू म होरेब पहाड़ ऊपर चट्टान के बाजू म ठाढ़े रहिहूं। तेंह लउठी ले ओ चट्टान ला मारबे, अऊ मनखेमन के पीये बर ओमा ले पानी निकलही।” अऊ मूसा ह इसरायल के अगुवामन के आघू म वइसनेच करिस।
EXO 17:7 अऊ ओह ओ ठऊर के नांव मस्सा अऊ मरीबा रखिस, काबरकि इसरायलीमन उहां झगरा करे रिहिन, ये कहिके यहोवा ला परखे रिहिन, “यहोवा ह हमर बीच हवय कि नइं?”
EXO 17:8 रपीदीम म अमालेकीमन आईन अऊ इसरायलीमन ऊपर हमला कर दीन।
EXO 17:9 मूसा ह यहोसू ला कहिस, “हमर म के कुछू मनखेमन ला छांट ले अऊ जाके अमालेकीमन ले लड़ई कर। कल मेंह परमेसर के लउठी ला अपन हांथ म धरके पहाड़ी के ऊपर म ठाढ़े रहिहूं।”
EXO 17:10 मूसा के हुकूम के मुताबिक यहोसू ह अमालेकीमन ले लड़िस, अऊ मूसा, हारून अऊ हूर, पहाड़ी के टीप म चघ गीन।
EXO 17:11 जब तक मूसा ह अपन हांथ ला ऊपर करे रहय, तब तक इसरायलीमन जीतंय, पर जब-जब ओह अपन हांथ ला खाल्हे कोति करय, त अमालेकीमन जीतंय।
EXO 17:12 जब मूसा के हांथ ह थक गीस, त ओमन एक ठन पथरा ला लेके ओकर बईठे बर मढ़ा दीन अऊ ओह ओकर ऊपर बईठ गीस। हारून अऊ हूर ओकर हांथमन ला उठाय रखिन—एक झन ह एक कोति अऊ एक झन ह दूसर कोति—जेकर ले ओकर हांथमन बेर बुड़त तक इस्थिर रिहिन।
EXO 17:13 अऊ यहोसू ह अमालेकी सेना ला तलवार के बल म हरा दीस।
EXO 17:14 तब यहोवा ह मूसा ला कहिस, “ये बात ला एक ठन चामपट्टी म लिख ले ताकि येला सुरता करे जावय, अऊ येकर घलो धियान रख कि यहोसू ह ये बात ला सुनय, काबरकि मेंह धरती ले अमालेकीमन के नामोनिसान मिटा दूहूं।”
EXO 17:15 मूसा ह एक ठन बेदी बनाईस अऊ ओकर नांव रखिस—यहोवा ह मोर झंडा ए।
EXO 17:16 मूसा ह कहिस, “यहोवा ह पीढ़ी-पीढ़ी तक अमालेकीमन के बिरूध लड़ई करत रहिही, काबरकि ओमन यहोवा के सिंघासन के बिरूध हांथ उठाय हवंय।”
EXO 18:1 मूसा के ससुर, मिदयान देस के पुरोहित यितरो ह ओ जम्मो बात ला सुनिस, जऊन ला परमेसर ह मूसा अऊ अपन इसरायली मनखेमन बर करे रिहिस, अऊ ये कि यहोवा ह कइसे इसरायलीमन ला मिसर देस ले निकालके लानिस।
EXO 18:2 मूसा ह अपन घरवाली सिप्पोरा अऊ अपन दू झन बेटा ला अपन ससुर यितरो करा पठो दे रिहिस।
EXO 18:3 मूसा ह ओमा के एक झन बेटा के नांव ये कहिके गेरसोम रखिस, “मेंह परदेस म परदेसी हो गे हंव”;
EXO 18:4 अऊ ओह ये कहिके दूसर बेटा के नांव एलिएजेर रखिस, “मोर ददा के परमेसर ह मोर मददगार रिहिस; ओह मोला फिरौन के तलवार ले बचाईस।”
EXO 18:5 मूसा के ससुर यितरो ह मूसा के घरवाली अऊ ओकर बेटामन ला लेके मूसा करा ओ निरजन जगह म आईस, जिहां ओह परमेसर के पहाड़ के लकठा म डेरा डाले रिहिस।
EXO 18:6 यितरो ह ओकर करा ये खबर पठोईस, “मेंह तोर ससुर यितरो, तोर घरवाली अऊ तोर दूनों बेटामन ला लेके तोर करा आवत हंव।”
EXO 18:7 तब मूसा ह अपन ससुर ले भेंट करे बर बाहिर निकलिस अऊ ओकर दंडवत करके ओला चूमिस। ओमन एक-दूसर के हालचाल पुछत तम्बू के भीतर गीन।
EXO 18:8 मूसा ह अपन ससुर ला ओ जम्मो बात बताईस, जऊन ला इसरायलीमन के हित म यहोवा ह फिरौन अऊ मिसरीमन के संग करे रिहिस, अऊ ओ जम्मो कठिनई के घलो बखान करिस, जऊन ह यातरा के बखत ओमन ऊपर परिस अऊ यहोवा ह कइसे ओमन ला बचाईस।
EXO 18:9 यितरो ह यहोवा के ओ जम्मो भलई के काम ला सुनके खुस होईस, जऊन ला ओह इसरायलीमन बर करे रिहिस याने कि ओह कइसे ओमन ला मिसरीमन के हांथ ले छोंड़ाय रिहिस।
EXO 18:10 यितरो ह कहिस, “यहोवा के परसंसा होवय, जऊन ह तुमन ला फिरौन अऊ मिसरीमन के हांथ ले छोंड़ाईस, अऊ जऊन ह मनखेमन ला मिसरीमन के हांथ ले छोंड़ाईस।
EXO 18:11 अब मेंह जान डारेंव कि यहोवा ह आने जम्मो देवतामन ले महान अय, काबरकि ओह येला ओमन के संग साबित कर दीस, जऊन मन घमंडी होके इसरायलीमन संग खराप बरताव करिन।”
EXO 18:12 तब मूसा के ससुर यितरो ह परमेसर बर होम-बलिदान अऊ आने बलिदान चघाईस, अऊ हारून ह इसरायलीमन के जम्मो अगुवामन संग मूसा के ससुर यितरो करा आईस, ताकि ओमन ओकर संग परमेसर के आघू म जेवन कर सकंय।
EXO 18:13 दूसर दिन मूसा ह मनखेमन के नियाय करे बर नियायधीस के आसन म बईठिस, अऊ बिहान ले लेके सांझ तक मनखेमन मूसा के चारों कोति ठाढ़े रिहिन।
EXO 18:14 जब मूसा के ससुर ह ओ जम्मो ला देखिस, जेला मूसा ह मनखेमन बर करत रिहिस, त ओह कहिस, “येह का अय, जऊन ला तेंह मनखेमन बर करत हस? नियाय करे बर तेंह एके झन काबर बईठथस, जबकि ये जम्मो मनखेमन बिहान ले सांझ तक तोर चारों कोति ठाढ़े रहिथें?”
EXO 18:15 मूसा ह ओला जबाब दीस, “काबरकि मनखेमन मोर करा परमेसर के ईछा जाने बर आथें।
EXO 18:16 जब भी ओमन म कोनो झगरा होथे, त ओमन मोर करा आथें, अऊ मेंह ओमन के फैसला करथंव अऊ ओमन ला परमेसर के नियम अऊ बिधिमन ला बताथंव।”
EXO 18:17 मूसा के ससुर ह जबाब दीस, “जऊन कुछू तेंह करत हस, ओह सही नो हय।
EXO 18:18 अइसन म तेंह अऊ ये मनखे, जेमन तोर करा आथें, तुमन जम्मो अपनआप ला बहुंत थका डारहू। ये काम ह तोर बर बहुंत जादा हे; तेंह एके झन येला नइं कर सकस।
EXO 18:19 एकरसेति मोर बात ला सुन; मेंह तोला कुछू सलाह देवत हंव, अऊ परमेसर ह तोर संग रहय। तेंह परमेसर के आघू म ये मनखेमन के परतिनिधि बन अऊ ओमन के झगरा ला परमेसर करा लान।
EXO 18:20 ओमन ला ओकर नियम अऊ बिधिमन ला सिखोय कर, अऊ ओमन ला देखा कि ओमन कइसे जिनगी जीयंय अऊ ओमन कइसे बरताव करंय।
EXO 18:21 पर ये जम्मो मनखेमन ले योग्य मनखेमन ला छांट ले—अइसन मनखे, जऊन मन परमेसर के भय मानथें, ईमानदार मनखे, जऊन मन बेईमानी के कमई ले दूरिहा रहिथें—अऊ येमन ला हजार-हजार, सौ-सौ, पचास-पचास अऊ दस-दस मनखेमन के ऊपर अधिकारी ठहिरा दे।
EXO 18:22 येमन ही जम्मो बेरा मनखेमन बर नियायधीस के रूप म काम करंय, पर ओमन कठिन मामला ला तोर करा लानंय; सधारन मामला के फैसला ओमन खुद करंय। येह तोर बोझा ला हल्का करही, काबरकि ये बोझा ला ओमन तोर संग बांटहीं।
EXO 18:23 कहूं तेंह येला करथस अऊ परमेसर ह अइसने करे के हुकूम देथे, त तेंह बुता ला सही ढंग से करे के लईक रहिबे, अऊ जम्मो मनखेमन संतोस मन से अपन-अपन घर जाहीं।”
EXO 18:24 मूसा ह अपन ससुर के गोठ ला मानिस अऊ जऊन कुछू ओह कहिस, वइसने ही करिस।
EXO 18:25 ओह जम्मो इसरायलीमन ले योग्य मनखेमन ला चुनिस अऊ ओमन ला मनखेमन के अगुवा, हजार-हजार, सौ-सौ, पचास-पचास अऊ दस-दस मनखे ऊपर अधिकारी ठहिराईस।
EXO 18:26 ओमन जम्मो बेरा मनखेमन बर नियायधीस के रूप म काम करिन। कठिन मामला ला ओमन मूसा करा लानंय, पर सधारन मामला के फैसला ओमन खुद करंय।
EXO 18:27 तब मूसा ह अपन ससुर ला बिदा करिस अऊ यितरो ह अपन देस ला लहुंट गीस।
EXO 19:1 इसरायलीमन के मिसर देस ले निकले के तीसरा महिना के ठीक पहिला दिन ओमन सीनय के सुन्ना जगह म आईन।
EXO 19:2 रपीदीम ले आघू बढ़े के बाद, ओमन सीनय के सुन्ना जगह म हबरिन अऊ इसरायलीमन उहां पहाड़ के आघू म डेरा डालिन।
EXO 19:3 तब मूसा ह ऊपर पहाड़ म परमेसर करा गीस, अऊ यहोवा ह पहाड़ ले ओला बलाके कहिस, “तें याकूब के संतान अऊ इसरायल के मनखेमन ला ये बात बता:
EXO 19:4 ‘तुमन खुद देखे हवव कि मेंह मिसर देस के का हाल करेंव, अऊ कइसे तुमन ला गिधवा सहीं डेना म बईठाके अपन करा लानेंव।
EXO 19:5 अब यदि तुमन मोर गोठ ला पूरा मानहू, अऊ मोर करार ला बनाय रखहू, त जम्मो जाति के मनखेमन म तुमन मोर कीमती निज भाग होहू। हालाकि जम्मो धरती ह मोर अय,
EXO 19:6 तुमन मोर बर पुरोहितमन के एक राज अऊ एक पबितर जाति होहू।’ ये बात तेंह इसरायलीमन ले कह।”
EXO 19:7 तब मूसा ह वापिस गीस अऊ मनखेमन के अगुवामन ला बलाईस अऊ ओ जम्मो बात ओमन के आघू म रखिस, जेला कहे के हुकूम यहोवा ह ओला दे रिहिस।
EXO 19:8 तब जम्मो मनखेमन एके संग जबाब दीन, “हमन ओ जम्मो काम करबो, जेला यहोवा ह कहे हवय।” मूसा ह मनखेमन के ये बात वापिस जाके यहोवा ला बताईस।
EXO 19:9 यहोवा ह मूसा ला कहिस, “देख, मेंह एक ठन घिटके बादर म होके तोर करा आहूं अऊ तोर ले गोठियाहूं, अऊ मनखेमन मोला तोर ले बात करत सुनहीं अऊ हमेसा तोर ऊपर भरोसा करहीं।” तब मूसा ह मनखेमन के कहे बात यहोवा ला सुनाईस।
EXO 19:10 अऊ यहोवा ह मूसा ला कहिस, “मनखेमन करा जा अऊ ओमन ला आज अऊ कल पबितर कर। ओमन अपन-अपन कपड़ा ला धोवंय
EXO 19:11 अऊ तीसर दिन तियार रहंय, काबरकि ओ दिन यहोवा ह जम्मो मनखेमन के देखत म सीनय पहाड़ म उतरही।
EXO 19:12 तेंह मनखेमन बर पहाड़ के चारों कोति एक सीमना बना देबे अऊ ओमन ला कहिबे, ‘सावधान रहव अऊ कोनो पहाड़ करा झन जावय अऊ न ही कोनो ओकर सीमना ला छुवय। जऊन कोनो पहाड़ ला छुवय, ओह मार डारे जावय।
EXO 19:13 ओला पथरवाह करे जाही या तीर चलाके ओला मार डारे जाही; कोनो ओ मनखे ला झन छुवंय। चाहे ओह मनखे होवय या पसु, ओला जिंदा नइं छोंड़े जावय।’ जब तुरही फूंके के लम्बा अवाज सुनई दीही, तब मनखेमन पहाड़ के लकठा म आवंय।”
EXO 19:14 तब मूसा ह पहाड़ ले उतरके मनखेमन करा गीस अऊ ओमन ला पबितर करिस, अऊ ओमन अपन-अपन कपड़ा ला धोईन।
EXO 19:15 तब मूसा ह मनखेमन ला कहिस, “अपनआप ला तीसर दिन बर तियार करव; कोनो माईलोगन संग झन सुतहू।”
EXO 19:16 तीसर दिन के बिहनियां बादर गरजिस अऊ बिजली चमकिस; पहाड़ ऊपर कारी घटा छा गीस, अऊ तुरही के तेज अवाज सुनई दीस। डेरा म जम्मो झन कांपे लगिन।
EXO 19:17 तब मूसा ह परमेसर ले भेंट कराय बर मनखेमन ला डेरा ले बाहिर ले आईस, अऊ ओमन पहाड़ के खाल्हे म ठाढ़ हो गीन।
EXO 19:18 सीनय पहाड़ ह धुआं ले भर गे रिहिस, काबरकि यहोवा ह आगी म होके उहां उतरे रिहिस। धुआं ह अइसे ऊपर उठत रिहिस, जइसे कोनो भट्ठी ले धुआं उठथे, अऊ पूरा पहाड़ ह बहुंत जोर से कांपे लगिस।
EXO 19:19 जब तुरही के अवाज ह तेज होवत गीस, त मूसा ह गोठियाईस अऊ परमेसर के अवाज ह ओकर जबाब दीस।
EXO 19:20 यहोवा ह सीनय पहाड़ के ऊपर म उतरिस अऊ मूसा ला पहाड़ के ऊपर म बलाईस, त मूसा ह ऊपर गीस
EXO 19:21 अऊ यहोवा ह ओला कहिस, “उतरके खाल्हे जा अऊ मनखेमन ला चेता दे ताकि ओमन यहोवा ला देखे बर अपन सीमना ला झन लांघंय, नइं तो बहुंते झन नास हो जाहीं।
EXO 19:22 अऊ त अऊ जऊन पुरोहितमन यहोवा करा आथें, ओमन घलो अपनआप ला जरूर पबितर करंय, नइं तो यहोवा के कोप ओमन ऊपर घलो भड़कही।”
EXO 19:23 मूसा ह यहोवा ला कहिस, “मनखेमन सीनय पहाड़ ऊपर नइं आ सकंय, काबरकि तेंह खुद ये कहिके हमन ला चेताय हस, ‘पहाड़ के चारों कोति सीमना बांध दे अऊ पबितर रूप म येला अलग रख।’ ”
EXO 19:24 यहोवा ह जबाब दीस, “तेंह खाल्हे जा अऊ अपन संग हारून ला ऊपर लेके आ। पर पुरोहित अऊ मनखेमन यहोवा करा ऊपर आय बर सीमना ला झन लांघंय, नइं तो ओकर कोप ह ओमन ऊपर भड़कही।”
EXO 19:25 तब मूसा ह खाल्हे उतरके मनखेमन ला यहोवा के कहे जम्मो बात ला बताईस।
EXO 20:1 अऊ परमेसर ह ये जम्मो बात कहिस:
EXO 20:2 “में यहोवा तुम्हर परमेसर अंव, जऊन ह तुमन ला मिसर देस ले, याने कि गुलामी के देस ले निकाल लानिस।
EXO 20:3 “तुमन मोर छोंड़ अऊ कोनो ला ईस्वर करके झन मानहू।
EXO 20:4 तुमन अपन बर कोनो भी चीज के कोनो किसम के मूरती झन बनाहू, न तो ऊपर अकास के, न खाल्हे धरती के अऊ न ही पानी म के कोनो चीज के।
EXO 20:5 तुमन ओमन ला न तो दंडवत करहू अऊ न ही ओमन के अराधना करहू, काबरकि में यहोवा, तुम्हर परमेसर ह जलन रखइया परमेसर अंव; अऊ जऊन मन मोर ले घिन करथें, ओमन के पाप के दंड मेंह ओमन के लइकामन के तीसरा अऊ चौथा पीढ़ी तक देथंव,
EXO 20:6 पर जऊन मन मोर ले मया करथें अऊ मोर हुकूममन ला मानथें, ओमन के हजार पीढ़ी तक मेंह अपन मया देखाथंव।
EXO 20:7 तुमन यहोवा अपन परमेसर के नांव बेमतलब के झन लूहू, काबरकि जऊन ह यहोवा के नांव के दुरपयोग करही, ओला ओह दोसी ठहिराही।
EXO 20:8 बिसराम दिन ला पबितर मानके सुरता रखहू।
EXO 20:9 हप्ता के छै दिन तुमन मेहनत करव अऊ अपन जम्मो काम करव,
EXO 20:10 पर सातवां दिन यहोवा तुम्हर परमेसर बर बिसराम दिन ए। ओ दिन तुमन कोनो काम झन करहू, न तो तुमन, न तुम्हर बेटा या बेटीमन, न तुम्हर सेवक या सेविकामन, न तुम्हर पसुमन, अऊ न ही तुम्हर नगर म रहइया कोनो परदेसी।
EXO 20:11 काबरकि छै दिन म यहोवा ह अकास अऊ धरती, समुंदर, अऊ ओमा के जम्मो चीजमन ला बनाईस, पर सातवां दिन ओह अराम करिस। एकरसेति यहोवा ह बिसराम दिन ला आसीस दीस अऊ ओला पबितर ठहिराईस।
EXO 20:12 तुमन अपन दाई-ददा के आदरमान करव, ताकि ओ देस म तुमन बहुंत साल तक जीयव, जेला यहोवा तुम्हर परमेसर ह तुमन ला देवत हे।
EXO 20:13 तुमन कोनो मनखे के हतिया झन करहू।
EXO 20:14 तुमन बेभिचार झन करहू।
EXO 20:15 तुमन चोरी झन करहू।
EXO 20:16 तुमन अपन परोसी के बिरूध म लबारी गवाही झन दूहू।
EXO 20:17 तुमन अपन परोसी के घर के लालच झन करहू। तुमन अपन परोसी के घरवाली के लालच झन करहू, न ही ओकर सेवक या सेविका, न ओकर बईला या गदहा, अऊ न ही ओकर कोनो अऊ चीज के लालच करहू, जऊन ह तुम्हर परोसी के अय।”
EXO 20:18 जब मनखेमन बादर गरजत अऊ बिजली चमकत देखिन अऊ तुरही के अवाज सुनिन अऊ पहाड़ ले धुआं उठत देखिन, त ओमन डर के मारे कांपे लगिन, अऊ दूरिहा म ठाढ़े रिहिन
EXO 20:19 अऊ ओमन मूसा ला कहिन, “तेंह हमन ले गोठिया अऊ हमन सुनबो। पर परमेसर ह हमन ले झन गोठियावय, नइं तो हमन मर जाबो।”
EXO 20:20 मूसा ह मनखेमन ला कहिस, “झन डरव। परमेसर ह तुमन ला परखे बर आय हवय, ताकि परमेसर के डर ह तुमन म बने रहय, अऊ तुमन पाप झन करव।”
EXO 20:21 मनखेमन दूरिहा म ही ठाढ़े रिहिन, जबकि मूसा ह घोर अंधियार के तीर म गीस, जिहां परमेसर ह रिहिस।
EXO 20:22 तब यहोवा ह मूसा ला कहिस, “इसरायलीमन ले ये कह: ‘तुमन खुद देखे हव कि मेंह स्वरग ले तुम्हर से बात करे हंव:
EXO 20:23 तुमन मोर बाजू म कोनो आने देवता झन बनावव; तुमन अपन बर सोन या चांदी के कोनो देवता झन बनावव।
EXO 20:24 “ ‘मोर बर तुमन माटी के एक बेदी बनावव अऊ ओमा अपन होम-बलिदान अऊ मेल-बलिदान, तुम्हर भेड़ अऊ बोकरा अऊ पसुमन ला चघावव। जिहां कहूं में अपन नांव के आदर कराथंव, उहां में तुम्हर करा आहूं अऊ तुमन ला आसीस दूहूं।
EXO 20:25 कहूं तुमन मोर बर पथरा के एक बेदी बनाथव, त ओला गढ़े गय पथरामन ले झन बनावव, काबरकि यदि तुमन ओमा औजार के उपयोग करहू, त ओह असुध हो जाही।
EXO 20:26 अऊ मोर बेदी करा निसेनी लगाके ऊपर झन आहू, नइं तो तुम्हर नंगरा देहें ह दिख जाही।’
EXO 21:1 “येमन ओ कानून अंय, जेमन ला तें ओमन के आघू म बता:
EXO 21:2 “कहूं तुमन कोनो इबरी सेवक ला बिसाथव, त ओह छै साल तक तुम्हर सेवा करय, पर सातवां साल ओह बिगर कोनो दाम चुकाय सुतंतर होके चले जावय।
EXO 21:3 कहूं ओह एके झन आय हवय, त ओह अकेला सुतंतर होके चले जावय; पर कहूं ओकर आय के समय ओकर घरवाली ओकर संग म रहय, त ओकर घरवाली घलो ओकर संग चले जावय।
EXO 21:4 कहूं ओकर मालिक ह कोनो माईलोगन ला ओकर घरवाली के रूप म देथे अऊ ओह बेटा या बेटीमन ला जनमथे, त ओ माईलोगन अऊ लइकामन मालिक के हो जाहीं, अऊ सिरिप ओ मनखे ह एके झन सुतंतर होके जावय।
EXO 21:5 “पर कहूं ओ सेवक ह ये कहय, ‘मेंह अपन मालिक, अपन घरवाली अऊ अपन लइकामन ले मया करथंव, अऊ सुतंतर होके जाय बर नइं चाहत हंव,’
EXO 21:6 तब जरूरी अय कि ओकर मालिक ह ओला नियायीमन करा लानय। मालिक ह ओला कपाट या चौखट करा ले जावय अऊ एक ठन सूजा ले ओकर कान ला छेदय। तब ओह जिनगी भर ओ मालिक के सेवक हो जाही।
EXO 21:7 “कहूं कोनो मनखे ह अपन बेटी ला सेविका के रूप म बेच देथे, त ओ सेविका ह एक सेवक के सहीं सुतंतर होके झन जावय।
EXO 21:8 कहूं ओकर मालिक ह ओकर ले खुस नइं ए, जऊन ह कि ओला अपन बर बिसाय रिहिस, त फेर जरूरी अय कि ओह ओ सेविका ला छोंड़ देवय। ओला अधिकार नइं ए कि ओह सेविका ला परदेसीमन करा बेच देवय, काबरकि ओह सेविका के संग बिसवास ला टोरे हवय।
EXO 21:9 कहूं ओह ओ सेविका ला अपन बेटा बर चुनथे, त फेर जरूरी अय कि ओह ओ सेविका ला एक बेटी के अधिकार देवय।
EXO 21:10 कहूं ओह आने माईलोगन ले बिहाव कर लेथे, तब येह जरूरी अय कि ओह ये सेविका के जेवन-पानी, कपड़ा अऊ ओकर बिहाव संबंधी अधिकार के खियाल रखय।
EXO 21:11 कहूं ओह ओ सेविका के ये तीनों चीजमन के पूरती नइं करय, त फेर ओ सेविका ह बिगर कुछू दाम चुकाय सुतंतर होके जा सकत हे।
EXO 21:12 “यदि कोनो मनखे ह आने मनखे ला अइसन जोर से मारय कि ओ मनखे ह मर जावय, त ओ मनखे घलो मार डारे जावय।
EXO 21:13 पर यदि जानबूझके ये हतिया नइं करे गे हवय, पर परमेसर ह येला होवन दीस, त ओह एक अइसन जगह ला भाग जावय, जेला मेंह ठहिराहूं।
EXO 21:14 पर यदि कोनो मनखे ह ताक धरके अऊ जानबूझके आने मनखे ला मार डारथे, त ओ मनखे ला मोर बेदी ले हटाय जावय अऊ मार डारे जावय।
EXO 21:15 “कहूं कोनो मनखे ह अपन दाई या ददा ला मारथे-पीटथे, त ओला मार डारे जावय।
EXO 21:16 “कोनो मनखे ह कोनो आने मनखे के अपहरन कर लेथे, त चाहे अपहरन करे गय मनखे ला बेच दिये गय हो या फेर ओह अपहरनकर्ता करा होवय, दूनों स्थिति म अपहरनकर्ता ला मार डारे जावय।
EXO 21:17 “जऊन ह अपन दाई या ददा ला सराप देथे, ओला घलो मार डारे जावय।
EXO 21:18 “कहूं दू झन म झगरा होथे अऊ एक झन ह दूसर ला पथरा म मारथे या मुटका मारथे, जेकर ले ओ दूसर मनखे ह मरय तो नइं, पर खटिया धर लेथे,
EXO 21:19 अऊ यदि ओह लउठी के सहारा म चले-फिरे लगथे, त फेर चोट पहुंचानेवाला मनखे ला जिम्मेदार झन ठहिराय जावय; पर ओह चोट खाय मनखे के नुकसान के भरपई करय अऊ ओकर पूरा ठीक होवत तक ईलाज के खरचा उठावय।
EXO 21:20 “कहूं कोनो मनखे ह अपन नर या नारी गुलाम ला लउठी या छड़ ले मारथे, जेकर ले ओह मर जाथे, त फेर ओ मनखे ला जरूर सजा मिलय,
EXO 21:21 पर कहूं ओ गुलाम ह एक या दू दिन के बाद ठीक हो जाथे, त फेर ओ मनखे ला सजा झन दिये जावय, काबरकि ओ गुलाम ह ओकर संपत्ति अय।
EXO 21:22 “कहूं मनखेमन झगरा करत रहिथें अऊ ये दौरान ओमा के कोनो के दुवारा कोनो देहें म रहे माईलोगन ला चोट लगथे अऊ समय के पहिली ओकर लइका ह जनमथे, पर कोनो गंभीर चोट नइं लगय, त ओ चोट पहुंचानेवाला मनखे ह माईलोगन के घरवाला के मांग अऊ अदालत के फैसला के मुताबिक जुरबाना भरय।
EXO 21:23 पर कहूं ओला गंभीर चोट लगथे, त फेर तुमन परान के बलदा परान,
EXO 21:24 आंखी के बलदा आंखी, दांत के बलदा दांत, हांथ के बलदा हांथ, गोड़ के बलदा गोड़,
EXO 21:25 जरे के बलदा जलाके, घाव के बलदा घाव देके अऊ चोट के बलदा चोट पहुंचाके लव।
EXO 21:26 “कहूं कोनो मालिक ह अपन नर या नारी गुलाम ला ओकर आंखी म मारथे, जेकर ले ओकर आंखी ह फूट जाथे, त ओह ओ गुलाम के आंखी के भरपई के बलदा म ओला छोंड़ दे।
EXO 21:27 अऊ कोनो मालिक ह अपन नर अऊ नारी गुलाम ला अइसे मारथे कि ओकर दांत ह टूट जाथे, त ओह ओ गुलाम के दांत के भरपई के बलदा म ओला छोंड़ दे।
EXO 21:28 “कहूं कोनो बईला ह कोनो आदमी या माईलोगन ला मारथे, जेकर ले ओह मर जाथे, त फेर ओ बईला ला पथरा फेंक-फेंकके मार डारे जावय, अऊ ओकर मांस ला झन खाय जावय। पर ओ बईला के मालिक ला जिम्मेदार झन ठहिराय जावय।
EXO 21:29 पर कहूं कोनो बईला ला सींग मारे के आदत हवय अऊ ओकर मालिक ला चेताय के बाद घलो ओह ओला बांधके नइं रखय अऊ ओ बईला कोनो आदमी या माईलोगन ला मार डारथे, त ओ बईला ला पथरा फेंक-फेंकके मार डारे जावय अऊ ओकर मालिक ला घलो मार डारे जावय।
EXO 21:30 पर यदि बईला के मालिक ले छुड़ौती बर पईसा के मांग करे जावय, त मालिक ह मांगे गय रकम के भुगतान करके अपन परान ला बचा सकथे।
EXO 21:31 यदि बईला ह काकरो बेटा या बेटी ला मार डारथे, तब भी इही कानून लागू होथे।
EXO 21:32 कहूं बईला ह कोनो नर या नारी गुलाम ला मार डारथे, त बईला के मालिक ह ओ गुलाम के मालिक ला तीस सेकेल चांदी देवय, अऊ ओ बईला ला पथरा फेंक-फेंकके मार डारे जावय।
EXO 21:33 “कहूं कोनो खंचवा के ढकना ला खोलथे या खंचवा खनके ओला नइं तोपय अऊ ओमा कोनो बईला या गदहा ह गिर परय,
EXO 21:34 त जऊन ह खंचवा ला खोले या खने रिहिस, ओह ओ पसु के मालिक ला नुकसान के भुगतान करय अऊ बलदा म मरे पसु ला ले लेवय।
EXO 21:35 “कहूं काकरो बईला ह कोनो दूसर के बईला ला चोट पहुंचाथे अऊ ओ बईला ह मर जावय, त ओ दूनों झन ओ जीयत बईला ला बेचंय अऊ ओकर दाम अऊ मरे पसु दूनों ला आधा-आधा बांट लेवंय।
EXO 21:36 पर कहूं पहिलीच ले ये पता रहय कि ओ बईला म आने ला मारे के आदत हवय, तभो ले ओकर मालिक ह ओला बांधके नइं रखय, त फेर मालिक ह ओ बईला के बलदा म बईला देवय अऊ बलदा म मरहा पसु ला ले लेवय।
EXO 22:1 “कहूं कोनो मनखे बईला या भेड़ के चोरी करके ओला मार डारथे या ओला बेच देथे, त ओह ओ बईला के बलदा म पांच ठन बईला अऊ ओ भेड़ के बलदा म चार ठन भेड़ देवय।
EXO 22:2 “कहूं चोर ह चोरी करत पकड़े जावय अऊ ओला मारत बखत ओह मर जावय, त चोर ला मारनेवाला ह खून के दोसी नो हय;
EXO 22:3 पर कहूं ये काम बेर निकले के बाद होथे, त चोर ला मारनेवाला ह खून के दोसी अय। “कोनो मनखे चोरी करथे, त जरूरी अय कि ओह नुकसान ला भर दे, पर यदि ओकर करा कुछू नइं ए, त फेर चोरी के भरपई करे बर ओला बेच दिये जावय।
EXO 22:4 कहूं चोराय पसु ह चोर करा जीयत पाय जावय—चाहे ओह बईला या गदहा या भेड़ होवय; त चोर ह ओकर दू गुना भुगतान भरय।
EXO 22:5 “कहूं कोनो मनखे अपन पसु ला खेत या अंगूर के बारी म चराथे अऊ ओमन ला खुला छोंड़ देथे अऊ ओमन आने के खेत ला चर देथें, त ओह अपन खेत या अंगूर के बारी के सबले बने फसल ओला बलदा म देके नुकसान के भरपई करय।
EXO 22:6 “कहूं कोनो मनखे आगी धराथे, अऊ ओ आगी ह झाड़ीमन म फईल जाथे, जेकर ले अनाज के बीड़ा या खड़े फसल या फेर जम्मो खेत ह जर जावय, त आगी धरइया ह ओकर नुकसान के भरपई जरूर करय।
EXO 22:7 “कहूं कोनो मनखे ह अपन परोसी ला चांदी या आने चीज संभालके रखे बर देथे अऊ ओ चीज ह परोसी के घर ले चोरी हो जाथे, अऊ चोर ह यदि पकड़ म आ जावय, त ओह ओकर दू गुना भरय।
EXO 22:8 पर यदि चोर ह पकड़े नइं जावय, त जरूरी अय कि ओ घर के मालिक ला नियायीमन करा लाने जावय, अऊ ओ नियायीमन पता लगावंय कि कहीं घर के मालिक ह तो ओ आने मनखे के संपत्ति म हांथ नइं डारे हवय।
EXO 22:9 गैरकानूनी तरीका ले कब्जा करे गय जम्मो मामला म, चाहे ओह एक ठन बईला या एक ठन गदहा या एक ठन भेड़ या एक ठन कपड़ा या फेर कोनो आने गंवाय चीज हो, जेकर बारे म यदि कोनो मनखे ये कहिथे, ‘येह मोर अय,’ तब ओ दूनों झन अपन मामला ला नियायीमन करा लानंय। जऊन ला नियायीमन दोसी ठहिरावंय, ओह दूसर मनखे ला दू गुना भर देवय।
EXO 22:10 “कहूं कोनो मनखे अपन परोसी ला बईला या गदहा या भेड़ या अऊ कोनो पसु संभालके रखे बर देथे अऊ ओकर बाद ओ पसु ह मर जाथे या ओला चोट लगथे या काकरो देखे बिगर कोनो ओला खेदके ले जाथे,
EXO 22:11 त ओ दूनों झन के बीच ये मामला के निपटारा यहोवा के आघू म ये सपथ खवाके करे जावय कि परोसी ह आने मनखे के संपत्ति म हांथ नइं लगाय हवय। संपत्ति के मालिक ह ये बात ला मान लेवय, अऊ नुकसान के भरपई करे के जरूरत नइं परय।
EXO 22:12 पर कहूं ओ परोसी ले पसु ला चोराय गे हवय, त फेर मालिक ला नुकसान के भरपई जरूर करे जावय।
EXO 22:13 कहूं ओ पसु ला कोनो जंगली पसु ह चीर-फार डारय, त परोसी ह ओ पसु के बांचे-खुचे चीज ला सबूत के रूप म लानय अऊ ओला ओ चीर-फार करे गे पसु बर कोनो भरपई करना नइं पड़य।
EXO 22:14 “कहूं कोनो मनखे अपन परोसी ले मांगके कोनो पसु ला लानय अऊ मालिक के नइं रहे म ओ पसु ला चोट लगय या ओह मर जावय, त ओ मनखे ह नुकसान ला जरूर भरय।
EXO 22:15 पर कहूं मालिक ह पसु संग म रहय, त मांगके ले जानेवाला मनखे ला नुकसान भरना नइं पड़य। यदि पसु ला भाड़ा म लाने गे रिहिस, त नुकसान के भरपई ओकर दिये गय किराया म हो जाही।
EXO 22:16 “कहूं कोनो मनखे ह कोनो कुंवारी कन्या ला भूलवार के ओकर संग कुकरम करथे, जेकर कि बिहाव के बात नइं लगे रिहिस, त ओकर बर ये जरूरी अय कि ओह दुलहिन के दाम चुकावय अऊ ओकर ले बिहाव करके ओला घरवाली बना ले।
EXO 22:17 पर कहूं ओकर ददा ह ओला देय बर मना करथे, तब भी ओला कुंवारी बर दुलहिन के दाम चुकाना जरूरी अय।
EXO 22:18 “जादूगरनी ला जीयत झन रहन दव।
EXO 22:19 “कहूं कोनो मनखे ह पसु संग कुकरम करथे, त ओला मार डारे जावय।
EXO 22:20 “जऊन कोनो यहोवा के छोंड़ अऊ कोनो आने देवता बर बलि चघाथे, ओला नास कर दिये जावय।
EXO 22:21 “कोनो परदेसी के संग अतियाचार झन करव या ओला झन सतावव, काबरकि तुमन घलो मिसर देस म परदेसी रहेव।
EXO 22:22 “कोनो बिधवा या अनाथ लइका ले फायदा झन उठावव।
EXO 22:23 कहूं तुमन अइसन करथव अऊ ओमन मोला गोहारथें, त मेंह ओमन के गोहार ला जरूर सुनहूं।
EXO 22:24 मोर कोरोध ह भड़कही अऊ मेंह तुमन ला तलवार ले मार डारहूं; अऊ तुम्हर घरवालीमन बिधवा अऊ तुम्हर लइकामन अनाथ हो जाहीं।
EXO 22:25 “कहूं तुमन अपन बीच रहइया मोर कोनो मनखे ला उधार म पईसा देथव, जऊन ह कि जरूरत म हवय, त येला एक धंधा के रूप म झन लेवव; ओकर ले बियाज झन लेवव।
EXO 22:26 कहूं तुमन अपन परोसी के कपड़ा ला गिरवी के रूप म अपन करा रखथव, त ओला बेर बुड़त तक लहुंटा दव।
EXO 22:27 काबरकि तुम्हर परोसी करा ओढ़े बर सिरिप एके ठन कपड़ा हवय। ओह अऊ का ला ओढ़के सुतही? जब ओह मोला गोहारही, त मेंह ओकर सुनहूं, काबरकि मेंह दयालु अंव।
EXO 22:28 “परमेसर के निन्दा झन करव या अपन मनखेमन के हाकिम ला सराप झन देवव।
EXO 22:29 “अपन खेत के फसल या रसकुंड म ले भेंट ला रोकके झन रखव। “तुमन अपन बेटामन म के पहिलांत ला मोला देवव।
EXO 22:30 अइसने ही तुमन अपन पसु अऊ भेड़मन के संग घलो करव। सात दिन ले ओ पीलामन अपन दाई के संग रहंय, पर आठवां दिन तुमन ओमन ला मोला दे दव।
EXO 22:31 “तुमन ला मोर पबितर मनखे बनना हे। एकरसेति ओ पसु के मांस ला झन खावव, जेला कोनो जंगली जानवर ह मार डारे हवय; ओला कुकुरमन के आघू म फटिक दव।
EXO 23:1 “लबारी बात झन फईलाहू। लबारी गवाही देके दोसी मनखे के मदद झन करव।
EXO 23:2 “गलत काम करे म भीड़ के साथ झन देवव। जब अदालत म तुमन गवाही देथव, त भीड़ के तरफ होके नियाय ला झन बिगाड़व,
EXO 23:3 अऊ मुकदमा म कोनो गरीब के तरफदारी झन करव।
EXO 23:4 “कहूं तुम्हर बईरी के भटकत बईला या गदहा ह तुमन ला मिलय, त ओला ओकर मालिक करा जरूर अमरा दव।
EXO 23:5 कहूं तुमन कोनो गदहा ला बोझा ले दबे देखथव, जेकर मालिक ह तुम्हर ले घिन करथे, त ओला उहां वइसनेच झन छोंड़व, पर ओकर मालिक संग मिलके ओकर जरूर मदद करव।
EXO 23:6 “अपन गरीब मनखेमन के मुकदमा म ओमन के नियाय ला झन बिगाड़व।
EXO 23:7 झूठा आरोप ले दूरिहा रहव अऊ निरदोस या ईमानदार मनखे के हतिया झन करव, काबरकि मेंह अपराधी ला निरदोस नइं छोड़ंव।
EXO 23:8 “तुमन घूस झन लेवव, काबरकि घूस ह देखइया मनखे ला अंधरा कर देथे अऊ निरदोस मनखे के गोठ ला बिगाड़ देथे।
EXO 23:9 “कोनो परदेसी के ऊपर अतियाचार झन करव; तुमन खुद जानत हव कि परदेसी होय के का मतलब होथे, काबरकि तुमन मिसर देस म परदेसी रहेव।
EXO 23:10 “छै बछर ले तुमन अपन खेत ला बोवव अऊ फसल ला लुवव,
EXO 23:11 पर सातवां बछर ओला झन जोतव अऊ परिया रहन दव। तब तुम्हर मनखेमन के बीच के गरीबमन ओमा ले खाय बर पावंय, अऊ ओमा के बांचे-खुचे ला जंगली पसुमन खावंय। अपन अंगूर के बारी अऊ जैतून के बगीचामन ला घलो अइसनेच करव।
EXO 23:12 “हप्ता के छै दिन तुमन अपन काम करव, पर सातवां दिन काम झन करव, ताकि तुम्हर बईला अऊ गदहामन अराम करंय, अऊ तुम्हर परिवार म जनमे गुलाम अऊ तुम्हर बीच रहइया परदेसीमन तरो-ताजा हो सकंय।
EXO 23:13 “जऊन कुछू मेंह तुमन ला कहे हवंव, ओला धियान देके करव। आने देवतामन के नांव मदद बर झन लेवव; ओमन के नांव घलो तुम्हर मुहूं ले झन निकलय।
EXO 23:14 “साल म तीन बार तुमन मोर बर तिहार मनावव।
EXO 23:15 “अखमीरी रोटी के तिहार मनावव; जइसे कि मेंह हुकूम दे हवंव, सात दिन ले बिगर खमीर ले बने रोटी खावव। येला ठहिराय गे समय अबीब के महिना म करव, काबरकि इही महिना म तुमन मिसर देस ले निकलके आय रहेव। “कोनो भी मनखे जुच्छा हांथ मोर करा झन आवय।
EXO 23:16 “जब तुमन खेत म फसल लगाथव, अऊ ओह तियार हो जाथे, त ओकर पहिली-फसल लुवई के तिहार मनावव। “बछर के आखिरी म फसल संकेलई के तिहार मनावव, जब तुमन खेत म ले फसल ला संकेलथव।
EXO 23:17 “हर बछर तीन बार तुम्हर जम्मो मरद परमपरधान यहोवा करा आवंय।
EXO 23:18 “कोनो बलिदान करे गय पसु के लहू ला कोनो खमीर मिले हुए चीज के संग झन चघावव। “मोर तिहार-बलिदान के चरबी ला बिहान होवत तक झन रखव।
EXO 23:19 “अपन भुइयां के सबले बने पहिली-फसल ला यहोवा अपन परमेसर के घर म लानव। “कोनो छेरी-पीला ला ओकर मियारी के दूध म झन रांधहू।
EXO 23:20 “देखव, मेंह एक स्वरगदूत ला तुम्हर आघू-आघू भेजत हंव, ताकि रसता म ओह तुम्हर पहरेदारी करय अऊ तुमन ला ओ जगह म लानय, जेला मेंह तियार करे हंव।
EXO 23:21 ओकर ऊपर धियान दव अऊ ओकर बात ला मानव। ओकर बिरूध बिदरोह झन करव; ओह तुम्हर बिदरोह ला छेमा नइं करही, काबरकि ओमा मोर नांव हवय।
EXO 23:22 कहूं धियान लगाके तुमन ओकर बात ला सुनहू अऊ मोर कहे गय जम्मो चीज ला करहू, त मेंह तुम्हर बईरीमन के बईरी अऊ तुम्हर बिरोधीमन के बिरोधी बनहूं।
EXO 23:23 मोर स्वरगदूत ह तुम्हर आघू-आघू जाही अऊ तुमन ला अमोरी, हित्ती, परिज्जी, कनानी, हिब्बी अऊ यबूसीमन के देस म ले जाही, अऊ मेंह ओमन ला नास कर दूहूं।
EXO 23:24 ओमन के देवतामन के दंडवत झन करहू या ओमन के अराधना झन करहू या ओमन के रीति-रिवाज म झन चलहू। तुमन ओमन के देवता ला गिरा दव अऊ ओमन के पबितर पथरामन ला फोरके कुटा-कुटा कर दव।
EXO 23:25 यहोवा अपन परमेसर के अराधना करव, अऊ ओह तुम्हर जेवन-पानी ला आसीस दीही। मेंह तुम्हर बीच म ले रोग-बेमारी ला दूरिहा कर दूहूं
EXO 23:26 अऊ तुम्हर देस म कोनो माईलोगन के गरभ ह नइं गिरही या कोनो बांझ नइं होही। मेंह तुमन ला पूरा जिनगी जीये बर दूहूं।
EXO 23:27 “मेंह अपन आतंक ला तुम्हर आघू-आघू पठोहूं, अऊ जऊन जाति के भी तुमन सामना करहू, ओमन म घबराहट फईला दूहूं। मेंह अइसे कर दूहूं कि तुम्हर जम्मो बईरीमन पीठ देखाके भागहीं।
EXO 23:28 मेंह तुम्हर आघू-आघू बर्रामन ला पठोहूं, जेमन हिब्बी, कनानी अऊ हित्तीमन ला तुम्हर आघू ले भगा दीहीं।
EXO 23:29 पर मेंह ओमन ला एकेच बछर म नइं भगावंव, काबरकि ओ देस ह उजर जाही, अऊ जंगली पसु बहुंत होय के कारन तुमन परेसानी म पड़ जाहू।
EXO 23:30 धीरे-धीरे करके मेंह ओमन ला तुम्हर आघू ले भगाहूं, जब तक कि तुमन गनती म बढ़के ओ देस ऊपर अधिकार नइं कर लूहू।
EXO 23:31 “मेंह लाल-समुंदर ले लेके भूमध्य सागर अऊ निरजन जगह ले लेके फरात नदी तक तुम्हर सीमना बनाहूं। ओ देस म रहइया मनखेमन ला मेंह तुम्हर हांथ म कर दूहूं, अऊ तुमन ओमन ला अपन आघू ले भगा दूहू।
EXO 23:32 तुमन ओमन के संग या ओमन के देवतामन के संग कोनो करार झन करहू।
EXO 23:33 तुमन ओमन ला अपन देस म रहे बर झन दूहू, नइं तो ओमन तुमन ला मोर बिरूध पाप करवाहीं, काबरकि ओमन के देवतामन के अराधना करई ह जरूर तुम्हर बर एक फांदा बन जाही।”
EXO 24:1 तब यहोवा ह मूसा ला कहिस, “तें अऊ हारून, नादाब अऊ अबीहू, अऊ इसरायल के सत्तर अगुवामन यहोवा करा ऊपर आवव, अऊ दूरिहा ले अराधना करव,
EXO 24:2 पर सिरिप मूसा ह यहोवा करा आवय; आने मन लकठा म झन आवंय। अऊ मनखेमन ओकर संग ऊपर झन आवंय।”
EXO 24:3 जब मूसा ह मनखेमन करा जाके यहोवा के जम्मो बात अऊ नियम-कानून ला बताईस, तब ओमन एक संग कहिन, “हमन यहोवा के कहे गय हर काम ला करबो।”
EXO 24:4 मूसा ह तब यहोवा के कहे गय जम्मो बात ला लिख लीस। ओह दूसर दिन बड़े बिहनियां उठिस अऊ पहाड़ के खाल्हे एक ठन बेदी बनाईस अऊ इसरायल के बारह गोत्र के मुताबिक बारह ठन पथरा के खंभा घलो बनाईस।
EXO 24:5 तब ओह जवान इसरायली मनखेमन ला पठोईस, अऊ ओमन यहोवा बर होम-बलिदान चघाईन अऊ बछवामन ला मेल-बलिदान के रूप म चघाईन।
EXO 24:6 मूसा ह आधा लहू ला कटोरामन म रखिस, अऊ आधा ला बेदी म छिंच दीस।
EXO 24:7 तब ओह करार के किताब अपन हांथ म लीस अऊ मनखेमन ला पढ़के सुनाईस। ओमन कहिन, “हमन यहोवा के कहे गय हर काम ला करबो; हमन ओकर कहना मानबो।”
EXO 24:8 तब मूसा ह लहू ला लीस अऊ ओला मनखेमन ऊपर छिंचके कहिस, “येह ओ करार के लहू ए, जेला यहोवा ह ये जम्मो बातमन के मुताबिक तुम्हर संग करे हवय।”
EXO 24:9 तब मूसा अऊ हारून, नादाब अऊ अबीहू, अऊ इसरायल के सत्तर अगुवामन पहाड़ ऊपर गीन
EXO 24:10 अऊ इसरायल के परमेसर के दरसन करिन। ओकर गोड़ खाल्हे नीलमनि ले बने चौंरा के सहीं एक चीज रिहिस, जऊन ह अकास के सहीं एकदम नीला रिहिस।
EXO 24:11 पर परमेसर ह इसरायल के ये अगुवामन के बिरूध अपन हांथ नइं उठाईस; ओमन परमेसर के दरसन करिन अऊ खाईन-पीईन।
EXO 24:12 यहोवा ह मूसा ला कहिस, “पहाड़ ऊपर मोर करा आ अऊ इहां रूक, अऊ मेंह तोला ओ पथरा के पटियामन ला दूहूं, जेमा मेंह कानून अऊ हुकूममन ला लिख दे हंव ताकि तेंह येला ओमन ला सिखा।”
EXO 24:13 तब मूसा ह अपन सहायक यहोसू के संग चल दीस, अऊ मूसा ह परमेसर के पहाड़ ऊपर गीस।
EXO 24:14 जाय के पहिले ओह अगुवामन ला कहिस, “जब तक हमन तुम्हर करा लहुंटके नइं आवन, तब तक तुमन इहां रूके रहव। हारून अऊ हूर तुम्हर संग इहां हवंय, अऊ कहूं काकरो झगरा होथे, त ओह ओमन करा जा सकत हे।”
EXO 24:15 तब मूसा ह पहाड़ ऊपर गीस, त बादर ह पहाड़ ला ढांप लीस,
EXO 24:16 अऊ यहोवा के महिमा ह सीनय पहाड़ म छा गीस। छै दिन ले बादर ह पहाड़ ला ढांपे रिहिस, अऊ सातवां दिन यहोवा ह मूसा ला बादर म ले बलाईस।
EXO 24:17 इसरायलीमन ला यहोवा के महिमा ह पहाड़ के ऊपर म एक भसम करइया आगी सहीं दिखिस।
EXO 24:18 जब मूसा ह पहाड़ ऊपर गीस, त ओह बादर भीतर हमा गीस। अऊ ओह चालीस दिन अऊ चालीस रात उहां रिहिस।
EXO 25:1 यहोवा ह मूसा ला कहिस,
EXO 25:2 “इसरायलीमन ले कह कि ओमन मोर बर भेंट लानंय। तेंह मोर बर हर ओ मनखे ले भेंट लेबे, जऊन ह अपन ईछा ले देथे।
EXO 25:3 “येमन ओ भेंट अंय, जेला तेंह ओमन ले लेबे: “सोन, चांदी अऊ कांसा;
EXO 25:4 नीला, बैंगनी, अऊ सिन्दूरी रंग के सूंत अऊ सुघर मलमल के कपड़ा; बोकरा के रूआं;
EXO 25:5 लाल रंग ले रंगाय मेढ़ा के खाल अऊ आने किसम के टिकाऊ खाल; बंबरी के लकड़ी;
EXO 25:6 अंजोर करे बर जैतून के तेल; अभिसेक के तेल अऊ कहरवाला धूप बर मसाला;
EXO 25:7 अऊ एपोद अऊ छातीबंध म जड़े बर गोमेदक के पथरा अऊ आने किसम के रत्न।
EXO 25:8 “तब ओ सामान ले मोर बर एक ठन पबितर-स्थान बनवाबे, अऊ मेंह ओमन के बीच म निवास करहूं।
EXO 25:9 ये पबितर-तम्बू अऊ येकर जम्मो चीजमन ला एकदम वइसे ही बनाबे, जइसे मेंह तोला बताहूं।
EXO 25:10 “ओमन ले बंबरी लकड़ी के एक ठन सन्दूक बनवाबे—जऊन ह अढ़ई क्यूबीट लम्बा, डेड़ क्यूबीट चौड़ा, अऊ डेड़ क्यूबीट ऊंचा रहय।
EXO 25:11 अऊ ओ सन्दूक के भीतर-बाहिर दूनों कोति चोखा सोन लगवाबे, अऊ ओकर चारों कोति सोन के एक पट्टी लगवाबे।
EXO 25:12 सोन के चार ठन कड़ा बनवाके ओमन ला ओकर चारों खुरा म बांध देबे, एक तरफ दू ठन अऊ दूसर तरफ दू ठन।
EXO 25:13 तब डंडामन ला बंबरी लकड़ी के बनवाबे, अऊ ओमन ला घलो सोन ले मढ़बे।
EXO 25:14 ओ डंडामन ला सन्दूक के दूनों कोति कड़ामन म लगाबे, ताकि सन्दूक ला उठाके ले जा सकंय।
EXO 25:15 ओ बल्लीमन सन्दूक के कड़ामन म लगे रहंय; ओमन ला कड़ा ले झन निकाले जावय।
EXO 25:16 तब करार कानून के ओ पटियामन ला सन्दूक म रख देबे, जेमन ला मेंह तोला दूहूं।
EXO 25:17 “चोखा सोन ले पछताप के एक ढकना बनवाबे—जऊन ह अढ़ई क्यूबीट लम्बा अऊ डेड़ क्यूबीट चौड़ा होवय।
EXO 25:18 अऊ ढकना के दूनों छोर बर हथौड़ा ले पीटके सोन के दू ठन करूब बनवाबे।
EXO 25:19 एक ठन करूब ला एक छोर म अऊ दूसर करूब ला दूसर छोर म बनवाबे; दूनों छोर म करूबमन अऊ ढकना ला सोन के एके कुटा ले बनाय जावय।
EXO 25:20 ओ करूबमन के डेनामन ऊपर कोति अइसन फईले रहंय कि पछताप के ढकना ह ओमन ले ढंकाय रहय। करूबमन के मुहूं ह एक-दूसर के आमने-सामने रहय अऊ ओमन ढकना कोति देखत रहंय।
EXO 25:21 ढकना ला सन्दूक के ऊपर लगाबे अऊ करार कानून के ओ पटियामन ला सन्दूक म रख देबे, जेमन ला मेंह तोला दूहूं।
EXO 25:22 ढकना के ऊपर, ओ दूनों करूबमन के बीच, जेमन करार कानून के सन्दूक ऊपर होथें, उहां मेंह तोर ले मिलहूं अऊ तोला मोर जम्मो हुकूम इसरायलीमन बर दूहूं।
EXO 25:23 “बंबरी लकड़ी के एक ठन मेज बनाबे—जऊन ह दू क्यूबीट लम्बा, एक क्यूबीट चौड़ा अऊ डेड़ क्यूबीट ऊंचा होवय।
EXO 25:24 मेज के ऊपर चोखा सोन लगाबे अऊ ओकर चारों मुड़ा सोन के एक पट्टी लगाबे।
EXO 25:25 ओकर चारों कोति हथेली भर चौड़ा सोन के एक ठन चक्र लगाबे अऊ ओ चक्र म सोन के एक ठन पट्टी लगाबे।
EXO 25:26 मेज बर सोन के चार ठन कड़ा बनाबे अऊ ओमन ला ओ चारों कोना म बांध देबे, जिहां चारों खुरामन हवंय।
EXO 25:27 ये कड़ामन पट्टी के लकठा म रहंय, ताकि ओमा ओ डंडामन ला फंसाय जा सकय, जेमन के उपयोग मेज ला उठाके ले जाय बर होथे।
EXO 25:28 ओ डंडामन ला बंबरी लकड़ी के ही बनाबे, अऊ ओमन ला सोन ले मढ़बे अऊ ओकर दुवारा मेज ला उठाके ले जावव।
EXO 25:29 अऊ ओकर थाली अऊ बरतनमन ला चोखा सोन के बनाबे, संग म बलिदान ला रितोय बर ओकर घघरी अऊ कटोरामन ला घलो चोखा सोन के बनाबे।
EXO 25:30 मोर आघू म ये मेज ऊपर चघावा के रोटी हमेसा रखे जावय।
EXO 25:31 “चोखा सोन के एक ठन दीवट बनाबे। ओकर आधार अऊ मुठिया ला हथौड़ा ले पीटके बनाबे, अऊ ओकर फूल असन कटोरा, कली अऊ पंखुड़ीमन ला एके ठन कुटा म बनाय जावय।
EXO 25:32 दीवट के किनारे ले छै ठन डारामन निकले रहंय—तीन ठन डारा एक कोति अऊ तीन ठन डारा दूसर कोति।
EXO 25:33 हर एक डारा म बादाम के फूल सहीं तीन ठन कटोरी, कली अऊ पंखुड़ीमन रहंय, तीन ओकर बाद वाले डारा म, अऊ अइसनेच दीवट ले निकले जम्मो छै ठन डारा म होवय।
EXO 25:34 दीवट म बादाम के फूल सहीं चार ठन कटोरी अऊ ओमा कली अऊ पंखुड़ीमन ला बनाय जावय।
EXO 25:35 दीवट ले निकले छै ठन डारा म ले एक-एक जोड़ी डारा के तरी म एक-एक ठन कली रहय—ये किसम ले कुल तीन ठन कली छै ठन डारा के तरी म रहंय।
EXO 25:36 कली अऊ डारामन ला दीवट के संग एके कुटा म बनाय जावय अऊ चोखा सोन ला पीटके येमन ला बनाय जावय।
EXO 25:37 “तब ओकर बर सात ठन दीया बनवाबे अऊ ओमन ला दीवट ऊपर मढ़ाबे, ताकि ओमन दीवट के आघू कोति अंजोर करंय।
EXO 25:38 ओकर बाती ला ठीक करे के चिमटा अऊ थालीमन घलो चोखा सोन के होवंय।
EXO 25:39 दीवट अऊ ये जम्मो चीजमन ला बनाय बर एक टेलेन्ट चोखा सोन के उपयोग करे जावय।
EXO 25:40 धियान रहय कि जऊन नमूना तोला ये पहाड़ ऊपर देखाय गीस, ओकरे मुताबिक ही तेंह येमन ला बनाबे।
EXO 26:1 “पबितर-तम्बू ला दस ठन परदा ले बनाय जावय; ये परदामन सुघर बंटे मलमल अऊ नीला, बैंगनी अऊ सिन्दूरी रंग के सूंत ले बनाय जावंय, अऊ कुसल कारीगरमन के दुवारा ये परदामन म कढ़ई करके करूबमन ला बनाय जावय।
EXO 26:2 जम्मो परदामन एकेच आकार के होवंय—अठाईस क्यूबीट लम्बा अऊ चार क्यूबीट चौड़ा।
EXO 26:3 पांच ठन परदा ला एक संग जोड़ दिये जावय, अऊ बांचे पांच ठन परदा ला घलो अइसने ही करे जावय।
EXO 26:4 एक समूह के आखिरी के परदा के धरी म नीला रंग के चीज के फांस लगावव, अऊ वइसने ही दूसरा समूह के आखिरी के परदा म घलो करव।
EXO 26:5 एक समूह के आखिरी के परदा म पचास ठन फांस अऊ दूसर समूह के आखिरी के परदा म पचास ठन फांस लगावव, अऊ ये फांसमन एक-दूसर के आमने-सामने रहंय।
EXO 26:6 तब पचास ठन सोन के कड़ा बनवाव अऊ ओमन के उपयोग परदामन ला एक संग बांधके रखे बर करव, ताकि पबितर-तम्बू ह एक हो जावय।
EXO 26:7 “पबितर-तम्बू के ऊपर बोकरा के रूआं के परदा बनवाव—कुल गियारह ठन परदा बनवाव।
EXO 26:8 जम्मो गियारह परदामन एके नाप के होवंय—तीस क्यूबीट लम्बा अऊ चार क्यूबीट चौड़ा।
EXO 26:9 ओमा के पांच ठन परदा ला जोड़के एक ठन परदा बना लेबे अऊ आने छै ठन ला घलो जोड़के एक ठन अऊ परदा बना लेबे। छठवां परदा ला तम्बू के आघू म मोड़ के दू पुरूत कर देबे।
EXO 26:10 एक समूह के आखिरी परदा के धरी म पचास ठन फांस बनाबे अऊ वइसने ही पचास ठन फांस दूसर समूह के आखिरी परदा के धरी म घलो बनाबे।
EXO 26:11 तब पचास ठन कांसा के कड़ा बनवाबे अऊ तम्बू ला बांधे बर कड़ामन म गांठ लगाबे ताकि ओ पूरा तम्बू मिलके एके ठन हो जावय।
EXO 26:12 जिहां तक तम्बू के परदामन के अतकिहा लम्बई के बात हे, याने कि ओ आधा परदा जऊन ह बांच जाथे, ओह पबितर-तम्बू के पाछू कोति ओरमे रहय।
EXO 26:13 तम्बू के परदामन के लम्बई दूनों कोति एक क्यूबीट होही; जऊन ह बच जाथे, ओह पबितर-तम्बू के किनारे म ओरमत रहिही अऊ ये किसम ले ओह ढंपे रहिही।
EXO 26:14 तम्बू ला ढांपे बर लाल रंग ले रंगाय मेढ़ा के खाल के एक ठन ओढ़ना बनाबे, अऊ ओकर ऊपर लगाय बर आने टिकाऊ खाल के एक ठन ओढ़ना बनाबे।
EXO 26:15 “पबितर-तम्बू बर बंबरी लकड़ी के खड़े ढांचामन ला बनवाबे।
EXO 26:16 हर एक ढांचा दस क्यूबीट लम्बा अऊ डेड़ क्यूबीट चौड़ा होवय,
EXO 26:17 एक-दूसर के समानांतर दू-दू ठन खूंटी रहय। पबितर-तम्बू के जम्मो ढांचामन ला इही किसम ले बनवाबे।
EXO 26:18 पबितर-तम्बू के दक्खिन कोति बर बीस ठन ढांचा बनवाबे
EXO 26:19 अऊ ये ढांचामन के खाल्हे म रखे बर चांदी के चालीस ठन आधार बनवाबे—हर एक ढांचा बर दू ठन आधार, हर एक खूंटी के खाल्हे म एक ठन आधार।
EXO 26:20 पबितर-तम्बू के दूसर कोति, याने कि उत्तर दिग बर, बीस ठन ढांचा
EXO 26:21 अऊ चालीस ठन चांदी के आधार बनवाबे—हर एक ढांचा के खाल्हे म दू ठन आधार रहय।
EXO 26:22 आखिरी छोर याने कि पबितर-तम्बू के पछिम छोर बर छै ठन ढांचा बनवाबे,
EXO 26:23 अऊ आखिरी छोर म, कोनटामन बर, दू ठन ढांचा बनवाबे।
EXO 26:24 ये दूनों कोनटा म ढांचामन खाल्हे ले लेके टीप तक दू परत के रहंय अऊ एके ठन कड़ा म जुड़े रहंय; दूनों वइसने रहंय।
EXO 26:25 ये किसम ले आठ ठन ढांचा होहीं अऊ सोलह ठन चांदी के आधार—याने कि हर ढांचा के खाल्हे म दू ठन आधार।
EXO 26:26 “बंबरी लकड़ी के मियारमन ला घलो बनवाबे: पबितर-तम्बू के एक तरफ के ढांचामन बर पांच ठन,
EXO 26:27 दूसर तरफ के ढांचामन बर पांच ठन, अऊ पबितर-तम्बू के आखिरी छोर म, पछिम तरफ के ढांचामन बर पांच ठन मियार बनवाबे।
EXO 26:28 मांझा के मियार ह ढांचामन के बीच म तम्बू के एक छोर ले दूसर छोर तक रहय।
EXO 26:29 ढांचामन ला सोन ले मढ़वाबे अऊ मियारमन ला पकड़े बर सोन के कड़ा बनवाबे। अऊ मियारमन ला घलो सोन ले मढ़वा देबे।
EXO 26:30 “पबितर-तम्बू ला ओ योजना के मुताबिक बनाबे, जेला पहाड़ ऊपर तोला देखाय गे रिहिस।
EXO 26:31 “फेर नीला, बैंगनी अऊ सिन्दूरी रंग के सूंत अऊ सुघर बंटे मलमल ले एक ठन परदा बनवाबे, जऊन म एक कुसल कारीगर दुवारा करूबमन के कढ़ई करे गे होवय।
EXO 26:32 सोन ले मढ़े बंबरी लकड़ी के चार ठन खंभा म सोन के खीलामन ला ठोंक अऊ ये परदा ला ओमा टांग दे; बंबरी के खंभामन चांदी के चार ठन आधार म खड़े रहंय।
EXO 26:33 परदा ह खूंटीमन ले खाल्हे तक ओरमे रहय अऊ करार कानून के सन्दूक ला उहां परदा के ओधा म रखबे। ये परदा ह पबितर स्थान ला महा पबितर स्थान ले अलग करही।
EXO 26:34 पछताप के ढकना ला महा पबितर स्थान म करार कानून के सन्दूक ऊपर ढांप देबे।
EXO 26:35 परदा के बाहिर पबितर-तम्बू के उत्तर कोति मेज ला रखबे अऊ दक्खिन कोति मेज के आघू म दीवट ला रखबे।
EXO 26:36 “तम्बू के प्रवेस दुवार बर नीला, बैंगनी अऊ सिन्दूरी रंग के सूंत अऊ सुघर बंटे मलमल के ओनहा ले एक ठन परदा बनवाबे—येह एक कढ़ई करइया के काम होवय।
EXO 26:37 ये परदा बर सोन के खूंटी अऊ सोन ले मढ़े बंबरी लकड़ी के पांच ठन खंभा बनवाबे। अऊ ओमन बर कांसा के पांच ठन आधार बनवाबे।
EXO 27:1 “बंबरी लकड़ी के एक बेदी बनवाबे, जेकर ऊंचई तीन क्यूबीट रहय; ओला वर्गाकार बनवाबे, पांच क्यूबीट लम्बा अऊ पांच क्यूबीट चौड़ा।
EXO 27:2 ओकर चारों कोनटा म एक-एक ठन सींग बनवाबे; सींग अऊ बेदी एके कुटा म बनंय, अऊ बेदी ला कांसा ले मढ़वाबे।
EXO 27:3 बेदी के जम्मो बरतन याने कि ओकर राख उठाय के बरतन, अऊ ओकर बेलचा, छिंचे के कटोरा, मांस बर कांटा अऊ करछूल ला कांसा के बनवाबे।
EXO 27:4 ओकर बर कांसा के एक ठन जालीवाला छननी बनवाबे, अऊ छननी के चारों कोनटा म कांसा के चार ठन कड़ा लगवाबे।
EXO 27:5 ओ छननी ला बेदी के निकले भाग के तरी म अइसन लगाबे कि ओह बेदी के आधा ऊंचई तक आवय।
EXO 27:6 बेदी बर बंबरी लकड़ी के डंडा बनवाबे, अऊ ओ डंडामन म कांसा मढ़वाबे।
EXO 27:7 डंडामन ला कड़ामन म अइसे लगाय जावय कि ओमन बेदी के दूनों कोति निकले रहंय, ताकि जब भी बेदी ला ले जावंय, त ये डंडा के निकले भाग ला पकड़के उठावंय।
EXO 27:8 बेदी के तखतामन ला अइसने बनवाबे कि ओमन भीतर ले खोखला रहंय। येमन ला वइसने ही बनवाबे, जइसने कि तोला पहाड़ ऊपर देखाय गे रिहिस।
EXO 27:9 “फेर पबितर-तम्बू बर एक ठन अंगना बनवाबे। दक्खिन कोति अंगना ह एक सौ क्यूबीट लम्बा रहय अऊ ओमा सुघर बंटाय मलमल के परदा रहय,
EXO 27:10 ओ परदा बर बीस ठन खंभा अऊ बीस ठन कांसा के आधारमन रहंय अऊ खंभामन म चांदी के कांटा अऊ पट्टीमन रहंय।
EXO 27:11 अइसने ही अंगना के उत्तर भाग ह एक सौ क्यूबीट लम्बा रहय अऊ ओमा परदा लगे रहय, अऊ ओकर बीस ठन खंभा अऊ कांसा के बीस ठन आधार होवय, खंभामन के कांटा अऊ पट्टीमन चांदी के होवंय।
EXO 27:12 “अंगना के पछिमी छोर ह पचास क्यूबीट चौड़ा रहय अऊ ओमा परदा लगे रहय, अऊ ओकर दस ठन खंभा अऊ दस ठन आधार रहंय।
EXO 27:13 पूरबी छोर म, सूरज निकले कोति घलो अंगना के चौड़ई पचास क्यूबीट रहय।
EXO 27:14 प्रवेस दुवार के एक तरफ परदा के लम्बई पंदरह क्यूबीट रहय, अऊ ओकर बर तीन ठन खंभा अऊ तीन ठन आधार रहंय,
EXO 27:15 अऊ प्रवेस दुवार के दूसर तरफ घलो पंदरह क्यूबीट लम्बा परदा लगे रहय, ओकर तीन ठन खंभा अऊ तीन ठन आधार रहंय।
EXO 27:16 “अंगना के प्रवेस दुवार बर बीस क्यूबीट लम्बई के परदा देबे, जऊन ला एक कढ़ई करनेवाला के दुवारा नीला, बैंगनी अऊ सिन्दूरी रंग के सूंत अऊ सुघर बंटे मलमल के कपड़ा ले बनाय गे रहय—अऊ ओकर चार ठन खंभा अऊ चार ठन आधार रहंय।
EXO 27:17 अंगना के चारों मुड़ा के जम्मो खंभा म चांदी के पट्टी लगे रहंय अऊ ओकर कांटामन चांदी के, अऊ आधारमन कांसा के रहंय।
EXO 27:18 अंगना के लम्बई एक सौ क्यूबीट अऊ चौड़ई पचास क्यूबीट रहय, ओकर परदा के ऊंचई पांच क्यूबीट रहय, अऊ ओह सुघर बंटे मलमल कपड़ा के बने रहय, अऊ ओमा कांसा के आधारमन रहंय।
EXO 27:19 पबितर-तम्बू म बउरे के आने जम्मो बरतन, चाहे ओमन के कुछू भी उपयोग होवय, इहां तक कि तम्बू के जम्मो खूंटी अऊ अंगना के जम्मो खूंटीमन—ये सब कांसा के बने रहंय।
EXO 27:20 “इसरायलीमन ला हुकूम दे कि ओमन अंजोर करे बर जैतून के पेरके निकाले सुध तेल लानंय, ताकि दीयामन हरदम बरत रहंय।
EXO 27:21 मिलापवाला तम्बू म, ओ परदा के बाहिर, जऊन ह करार कानून के सन्दूक ला ओधा करथे, हारून अऊ ओकर बेटामन दीयामन ला यहोवा के आघू म संझा ले बिहान होवत तक बरत रखंय। येह इसरायलीमन के बीच म पीढ़ी-पीढ़ी तक हमेसा के बिधि होवय।
EXO 28:1 “तें इसरायलीमन के बीच ले अपन भाई हारून अऊ ओकर बेटा नादाब अऊ अबीहू, एलिआजर अऊ ईतामार ला अपन करा ले आ, ताकि ओमन पुरोहित के रूप म मोर सेवा करंय।
EXO 28:2 अपन भाई हारून के मान अऊ आदर के खातिर ओकर बर पबितर पहिरावा बनवा।
EXO 28:3 ओ जम्मो कुसल कारीगरमन ला कह, जऊन मन ला मेंह ये काम करे बर बुद्धि दे हंव कि ओमन हारून बर पहिरावा बनावंय, ताकि ओकर संस्कार करे जावय अऊ ओह पुरोहित के रूप म मोर सेवा करय।
EXO 28:4 येमन ओ पहिरावा अंय, जऊन ला ओमन बनावंय: एक सीनाबंध, एक एपोद, एक चोगा, एक ठन बुने हुए कुरता, एक पागा अऊ एक गमछा। ओमन तोर भाई हारून अऊ ओकर बेटामन बर ये पबितर पहिरावा बनावंय, ताकि ओमन पुरोहित के रूप म मोर सेवा करंय।
EXO 28:5 कारीगरमन सोन, अऊ नीला, बैंगनी अऊ सिन्दूरी रंग के सूंत, अऊ सुघर मलमल कपड़ा के उपयोग करंय।
EXO 28:6 “एपोद ला सोन, अऊ नीला, बैंगनी अऊ सिन्दूरी रंग के सूंत, अऊ सुघर बंटाय मलमल के कपड़ा के बनवाबे अऊ येह कुसल कारीगर के दुवारा बनाय जावय।
EXO 28:7 येकर दू ठन कंधा के टुकड़ामन येकर कोना म जुड़े रहंय, ताकि येला बांधे जा सकय।
EXO 28:8 कुसलता से बुने गय कमरबंध ह अइसने होवय—येह एपोद के संग एके टुकड़ा म बने रहय अऊ येह सोन, अऊ नीला, बैंगनी अऊ सिन्दूरी रंग के सूंत, अऊ सुघर बंटाय मलमल के बने रहय।
EXO 28:9 “दू ठन गोमेदक के रत्नमन ला लेके ओमा इसरायल के बेटामन के नांव ला खुदवा देबे,
EXO 28:10 अऊ ये नांवमन ला ओमन के जनम के मुताबिक खुदवाबे—छै झन के नांव एक ठन पथरा म अऊ बांचे छै झन के नांव दूसर पथरा म।
EXO 28:11 दूनों पथरा म इसरायल के बेटामन के नांवमन अइसने खुदवाबे, जइसने कोनो सुनार ह नक्कासी करके मुहर ला बनाथे। तब पथरामन ला सोन के जरी के काम सहीं मढ़ देबे
EXO 28:12 अऊ ओ दूनों पथरा ला इसरायल के बेटामन बर यादगार पथरा के रूप म एपोद के कंधावाले टुकड़ा म बांध देबे। हारून ह यहोवा के आघू म ओ नांवमन ला एक स्मारक के रूप म अपन दूनों कंधा म लगाय रहय।
EXO 28:13 सोन के जरीवाला काम के खाना बनवाबे
EXO 28:14 अऊ डोरी के सहीं चोखा सोन के दू ठन गुंथे हुए जंजीर बनवाबे, अऊ ये जंजीरमन ला ओ खानामन म लगवाबे।
EXO 28:15 “फैसला करे बर छातीबंध बनवाबे—ओला कुसल कारीगर के हांथ ले बनाय जावय। ओला एपोद के सहीं सोन, अऊ नीला, बैंगनी अऊ सिन्दूरी रंग के सूंत, अऊ सुघर बंटे मलमल के बनवाबे।
EXO 28:16 छातीबंध ह चौकोर रहय—याने कि ओह एक स्पान लम्बा अऊ एक स्पान चौड़ा—अऊ दू बार मुड़े रहय।
EXO 28:17 तब येमा चार ठन कतार म कीमती पथरा लगवाबे। पहिली कतार म मानिक, पुखराज अऊ पन्ना रहय;
EXO 28:18 दूसर कतार म मरकत, नीलमनि हीरा अऊ पन्ना रहय;
EXO 28:19 तीसर कतार म नारंगी रंग के लसम, सूर्यकांत अऊ नीलम रहय;
EXO 28:20 चौथा कतार म फिरोजा, गोमेदक अऊ यसब होवय। येमन ला जरी के काम करे गे सोन म जड़े जावय।
EXO 28:21 ये पथरामन बारह ठन होवंय, याने कि इसरायल के बेटामन के हर एक नांव बर एक-एक ठन पथरा होवय, अऊ हर एक म बारह गोत्र के एक-एक नांव ला मुहर सहीं खोदे जावय।
EXO 28:22 “छातीबंध म डोरी के सहीं चोखा सोन के गुंथे गय जंजीर बनवाबे।
EXO 28:23 येकर बर सोन के दू ठन छल्ला बनवाबे अऊ दूनों छल्लामन ला छातीबंध के दू ठन कोनटा म बांध देबे।
EXO 28:24 तब सोन के दूनों जंजीर ला छातीबंध के कोनटामन म ओ छल्लामन के संग बांध देबे,
EXO 28:25 अऊ जंजीरमन के दूसर छोरमन ला दूनों खानामन म बांधबे, अऊ येमन सामने म एपोद के कंधावाले टुकड़ा म जुड़े रहंय।
EXO 28:26 सोन के दू ठन अऊ छल्ला बनाके ओमन ला छातीबंध के आने दूनों कोनटा के भीतरी किनारा म एपोद ले संटके लगवाबे।
EXO 28:27 सोन के अऊ दू ठन छल्ला बनाबे, अऊ ओमन ला एपोद के सामने म कंधा के टुकड़ामन के खाल्हे म जोड़ देबे अऊ ये जोड़ ह एपोद के कमरबंध के ऊपर के जोड़ के लकठा म होवय।
EXO 28:28 छातीबंध के छल्लामन ला एपोद के छल्लामन ले बांधे जावय अऊ येला कमरबंध ले जोड़त नीला डोरी ले बांधे जावय, ताकि छातीबंध ह एपोद के बाहिर झन ओरमय।
EXO 28:29 “जब भी हारून ह पबितर स्थान म जावय, त ओह फैसला करे के छातीबंध म अपन हिरदय के ऊपर इसरायल के बेटामन के नांवमन ला लगाय रहय, जेकर ले यहोवा के आघू म ओकर सुरता ह हमेसा बने रहय।
EXO 28:30 छातीबंध म ऊरीम अऊ तुम्मीम ला घलो रख, ताकि जब भी हारून ह यहोवा के आघू म जावय, त ओमन हारून के हिरदय ऊपर रहंय। ये किसम ले हारून ह इसरायलीमन बर फैसला करे के चीज ला अपन हिरदय ऊपर यहोवा के आघू म हमेसा धरे रहिही।
EXO 28:31 “एपोद के खाल्हे के लबादा ला पूरा नीला रंग के कपड़ा ले बनवाबे;
EXO 28:32 ओकर मांझा म मुड़ी खुसेरे बर एक जगह होवय। ओ जगह के चारों कोति पट्टी के सहीं बुने गय किनारा होवय, ताकि ओह झन चिरावय।
EXO 28:33 कपड़ा के खाल्हे के घेरा के चारों कोति नीला, बैंगनी अऊ सिन्दूरी रंग के सूंत ले अनार बनवाबे, अऊ अनारमन के बीच-बीच म सोन के घंटी लगवाबे।
EXO 28:34 लबादा के खाल्हे के घेरा म अनार अऊ सोन के घंटीमन एक के बाद एक रहंय।
EXO 28:35 हारून ह सेवा-टहल करत बेरा येला जरूर पहिरे। जब ओह पबितर स्थान म यहोवा के आघू म जाही अऊ उहां ले निकलही, त घंटीमन के अवाज सुनई दीही, अऊ ओह नइं मरही।
EXO 28:36 “चोखा सोन के एक ठन तस्तरी बनवाबे अऊ ओमा मुहर के सहीं ये सबदमन ला खुदवाबे: यहोवा बर पबितर।
EXO 28:37 ओला पागा म जोड़े बर ओमा एक ठन नीला डोरी बांधबे; ओह पागा के आघू म रहय।
EXO 28:38 येह हारून के माथा म रहय, अऊ ओह इसरायलीमन के दुवारा चघाय गे पबितर भेंट के दोस ला अपन ऊपर उठाही, चाहे ओह कोनो भी किसम के भेंट होवय। ओह हमेसा हारून के माथा म रहय ताकि ओह यहोवा ला गरहनयोग्य होवय।
EXO 28:39 “कुरता अऊ पागा ला सुघर मलमल के कपड़ा ले बनवाबे। कमरपट्टा ला कढ़ई करनेवाला ह बनावय।
EXO 28:40 हारून के बेटामन ला आदर देय बर कुरता, पटका अऊ टोपी बनवाबे।
EXO 28:41 अपन भाई हारून अऊ ओकर बेटामन ला ये कपड़ा पहिराय के बाद, ओमन ला अभिसेक अऊ नियुक्त करबे। ओमन के संस्कार करबे ताकि ओमन पुरोहित के रूप म मोर सेवा करंय।
EXO 28:42 “ओमन के उघरा देहें ला ढांपे बर मलमल के कच्छा बनवाबे, जऊन ह कनिहां ले लेके जांघ तक रहय।
EXO 28:43 जब भी हारून अऊ ओकर बेटामन मिलापवाला तम्बू म जावंय या पबितर स्थान म सेवा करे बर बेदी करा जावंय, त ओमन ओ कच्छामन ला जरूर पहिरंय, ताकि ओमन ऊपर दोस झन लगय अऊ ओमन झन मरंय। “येह हारून अऊ ओकर संतानमन बर हमेसा के आदेस होवय।
EXO 29:1 “हारून अऊ ओकर बेटामन के संस्कार करे बर तोला ये करना हे, ताकि ओमन पुरोहित के रूप म मोर सेवा करंय: एक ठन निरदोस बछवा अऊ दू ठन निरदोस मेढ़ामन ला ले।
EXO 29:2 अऊ बिगर खमीर के गहूं के बढ़िया पीसान ले गोल रोटी बनवा, मोटा रोटीमन ला जैतून तेल मिलाके बिगर खमीर के बनवा, अऊ पातर रोटीमन ला बिगर खमीर के बनवा अऊ ओमा जैतून तेल ला चुपर दे।
EXO 29:3 ये जम्मो ला एक ठन टुकनी म रखके बछवा अऊ दूनों मेढ़ा संग चघाबे।
EXO 29:4 तब हारून अऊ ओकर बेटामन ला मिलापवाला तम्बू के मुंहटा करा लानके ओमन ला पानी ले नहवाबे।
EXO 29:5 पहिरावा ला लेबे अऊ हारून ला अंगरखा, एपोद के बागा पहिरा देबे, एपोद अऊ छातीबंध घलो पहिरा देबे। एपोद ला सुघरता से बुने गय कमरबंध के दुवारा हारून म बांध देबे।
EXO 29:6 ओकर मुड़ म पागा घलो रखबे अऊ पबितर मुकुट ला ओमा जोड़ देबे।
EXO 29:7 अभिसेक के तेल ला लेबे अऊ ओला ओकर मुड़ म रितोके ओकर अभिसेक करबे।
EXO 29:8 तब ओकर बेटामन ला घलो लानके ओमन ला अंगरखा पहिराबे
EXO 29:9 अऊ मुड़ म टोपी ला पहिराबे। तब हारून अऊ ओकर बेटामन के कनिहां म कमरबंध बांधबे। पुरोहित के पद ह ये आदेस के दुवारा हमेसा बर ओमन के अय। “तब हारून अऊ ओकर बेटामन के अभिसेक करबे।
EXO 29:10 “बछवा ला मिलापवाला तम्बू के आघू म लानबे, अऊ हारून अऊ ओकर बेटामन ओ बछवा के मुड़ म अपन हांथ रखंय।
EXO 29:11 तब बछवा ला यहोवा के आघू म मिलापवाला तम्बू के प्रवेस दुवार करा बलि कर देबे।
EXO 29:12 बछवा के थोरकून लहू ला लेबे अऊ ओला बेदी के सींगमन म अपन अंगठी ले लगाबे, अऊ बांचे लहू ला बेदी के खाल्हे म रितो देबे।
EXO 29:13 तब भीतरी भाग के जम्मो चरबी, करेजा के लम्बा निकले भाग, अऊ चरबी सहित दूनों गुरदा ला घलो लेबे अऊ ओमन ला बेदी म जला देबे।
EXO 29:14 पर बछवा अऊ ओकर खाल अऊ मांस अऊ ओकर पोटा ला डेरा के बाहिर जला देबे। येह एक पाप-बलिदान अय।
EXO 29:15 “तब एक ठन मेढ़ा लेबे, अऊ हारून अऊ ओकर बेटामन ओ मेढ़ा के मुड़ म अपन हांथ रखंय।
EXO 29:16 तब ओ मेढ़ा ला बलि करबे अऊ ओकर लहू ला लेके बेदी के चारों मुड़ा म छिंच देबे।
EXO 29:17 तब ओ मेढ़ा ला कुटा-कुटा करके काटबे अऊ ओकर भीतरी भाग अऊ गोड़मन ला धोके ओमन ला मुड़ अऊ ओकर आने कुटामन संग रख देबे।
EXO 29:18 तब ओ पूरा मेढ़ा ला बेदी म जला देबे; येह यहोवा ला चघाय बर एक होम-बलिदान अय, अऊ यहोवा ला चघाय बर एक सुख-देवइया सुगंध, एक जेवन-बलिदान अय।
EXO 29:19 “आने मेढ़ा ला लेबे, अऊ हारून अऊ ओकर बेटामन ओ मेढ़ा के मुड़ म अपन हांथ रखंय।
EXO 29:20 तब ओ मेढ़ा ला बलि करबे, अऊ ओकर कुछू लहू ला लेके हारून अऊ ओकर बेटामन के जेवनी कान ऊपर, ओमन के जेवनी हांथ के अंगठा ऊपर, अऊ ओमन के जेवनी गोड़ के अंगठा म लगा देबे। तब बांचे लहू ला बेदी के चारों मुड़ा म छिंच देबे।
EXO 29:21 अऊ बेदी ले थोरकन लहू अऊ अभिसेक के थोरकन तेल लेके ओला हारून अऊ ओकर बेटामन के ऊपर अऊ ओमन के पहिरावा ऊपर छिंच देबे। तब ओ अऊ ओकर बेटा अऊ ओमन के पहिरावामन संस्कारित हो जाहीं।
EXO 29:22 “ये मेढ़ा के चरबी, चरबीवाला पुंछी, पेट के भीतरी भाग के चरबी, करेजा के लम्बा निकले भाग, चरबी समेत दूनों गुरदा अऊ ओकर जेवनी जांघ ला लेबे। (येह अभिसेक के मेढ़ा अय।)
EXO 29:23 टुकनी के बिगर खमीर के बनाय गे रोटी, जऊन ह यहोवा के आघू म माढ़े हवय, ओमा के एक गोल रोटी, जैतून तेल म सनाय एक ठन मोटा रोटी, अऊ एक ठन पातर रोटी लेबे।
EXO 29:24 ये जम्मो ला हारून अऊ ओकर बेटामन के हांथ म रख देबे अऊ ओमन येला यहोवा के आघू म एक हलाय-बलिदान के रूप म हलावंय।
EXO 29:25 तब ओमन के हांथ ले ओ चीजमन ला ले लेबे अऊ ओमन ला होम-बलिदान के संग यहोवा बर एक सुख-देवइया सुगंध के रूप म जला देबे। येह यहोवा बर चघाय गे एक जेवन-बलिदान अय।
EXO 29:26 हारून के अभिसेक के मेढ़ा के छाती ला लेय के बाद, येला यहोवा के आघू म एक हलाय-बलिदान के रूप म हलाबे, अऊ येह तोर हिस्सा होही।
EXO 29:27 “मेढ़ा के अभिसेक करे गय ओ भागमन के संस्कार करबे, जऊन ह हारून अऊ ओकर बेटामन के अय: याने कि हलाय गे छाती अऊ भेंट चघाय गय छाती ला संस्कारित करबे।
EXO 29:28 येह इसरायलीमन के दुवारा हारून अऊ ओकर बेटामन ला हमेसा दिये जानेवाला भाग होवय। येह इसरायलीमन के अंसदान अय, जेला ओमन अपन मेल-बलिदान म ले यहोवा बर देवंय।
EXO 29:29 “हारून के पबितर पहिरावामन ओकर संतानमन के होहीं, ताकि ओ पहिरावा म ओमन के संस्कार अऊ अभिसेक करे जा सकय।
EXO 29:30 ओकर बेटा, जऊन ह ओकर जगह म पुरोहित होही अऊ पबितर स्थान म सेवा करे बर मिलापवाला तम्बू म आही, त ओह सात दिन तक ओ पहिरावा ला पहिरय।
EXO 29:31 “अभिसेक के मेढ़ा के मांस ला लेबे अऊ ओला एक पबितर स्थान म रांधबे।
EXO 29:32 हारून अऊ ओकर बेटामन मेढ़ा के ओ मांस अऊ टुकनी के रोटी ला मिलापवाला तम्बू के प्रवेस दुवार म खावंय।
EXO 29:33 हारून अऊ ओकर बेटामन भेंट के चीजमन ला खावंय, जेकर दुवारा ओमन के अभिसेक अऊ संस्कार बर पछताप करे गीस। पर कोनो आने मनखे ओ चीजमन ला झन खावंय, काबरकि ओमन पबितर चीज अंय।
EXO 29:34 अऊ बिहान तक कहूं अभिसेक वाला मेढ़ा के जऊन मांस अऊ रोटी बांच जाथे, त ओला जला देवंव। ओला झन खाय जावय, काबरकि ओह पबितर अय।
EXO 29:35 “हारून अऊ ओकर बेटामन बर ओ जम्मो काम करव, जेकर हुकूम मेंह तुमन ला दे हंव, याने कि सात दिन तक ओमन के अभिसेक के ये बिधिमन ला पूरा करव।
EXO 29:36 प्रायस्चित करे बर हर दिन एक ठन बछवा पाप-बलिदान के रूप म चघावव। प्रायस्चित करे के बेरा बेदी ला सुध करव, अऊ ओला पबितर करे बर ओकर अभिसेक करव।
EXO 29:37 सात दिन ले बेदी बर पछताप करव अऊ ओला पबितर करव। तब बेदी ह महा पबितर ठहिरही, अऊ जऊन कुछू चीज बेदी ला छूथे, ओह पबितर हो जाही।
EXO 29:38 “बेदी म जऊन चीज तोला रोज चघाना हे, ओह ये अय: एक-एक बछर के दू ठन निरदोस मेढ़ा-पीला।
EXO 29:39 एक ठन ला बिहनियां, अऊ दूसर ला सांझ के चघाबे।
EXO 29:40 पहिली मेढ़ा-पीला के संग एक एपा उत्तम पीसान के दसवां भाग ला पेरके निकाले गय एक हीन जैतून तेल के चौथा भाग म मिलाके चघाबे, अऊ एक हीन अंगूर के मंद के चौथा भाग ला एक पेय-बलिदान के रूप म चघाबे।
EXO 29:41 दूसर मेढ़ा-पीला ला सांझ के बेरा चघाबे, येला घलो बिहनियां के बेरा चघाय गे अन्न-बलिदान अऊ पेय-बलिदान के सहीं चघाबे—येह यहोवा बर चघाय एक सुखदाई सुगंध, एक जेवन-बलिदान अय।
EXO 29:42 “पीढ़ी-पीढ़ी तक यहोवा के आघू म, मिलापवाला तम्बू के मुंहटा करा ये होम-बलिदान ला नियमित चघाय जावय। उहां मेंह तोर ले मिलहूं अऊ तोर ले गोठियाहूं।
EXO 29:43 उहां मेंह इसरायलीमन ले घलो मिलहूं अऊ ओ जगह ह मोर महिमा ले पबितर करे जाही।
EXO 29:44 “वइसने ही मेंह मिलापवाला तम्बू अऊ बेदी ला पबितर करहूं अऊ हारून अऊ ओकर बेटामन ला पुरोहित के रूप म मोर सेवा करे बर संस्कारित करहूं।
EXO 29:45 तब मेंह इसरायलीमन के बीच म निवास करहूं अऊ ओमन के परमेसर होहूं।
EXO 29:46 ओमन जानहीं कि मेंह यहोवा ओमन के परमेसर अंव, जऊन ह ओमन ला मिसर देस ले निकाल लानिस, ताकि मेंह ओमन के बीच निवास करंव। मेंह यहोवा ओमन के परमेसर अंव।
EXO 30:1 “धूप जलाय बर बंबरी के लकड़ी ले एक ठन बेदी बनवाबे।
EXO 30:2 ओह वर्गाकार होवय, एक क्यूबीट लम्बा अऊ एक क्यूबीट चौड़ा, अऊ दू क्यूबीट ऊंचा—अऊ ओकर सींगमन ला ओ बेदी संग एके कुटा ले बनाय जावंय।
EXO 30:3 बेदी के ऊपर अऊ जम्मो कोति अऊ सींगमन ला चोखा सोन ले मढ़बे, अऊ येकर चारों कोति सोन के एक किनारी लगाबे।
EXO 30:4 बेदी बर किनारी के खाल्हे म दू-दू ठन कड़ा बनवाबे—ये कड़ामन एक-दूसर के आमने-सामने होवंय, ताकि येमा डंडामन ला घुसावंय अऊ उठाके ले जा सकंय।
EXO 30:5 डंडामन ला बंबरी के लकड़ी ले बनवाबे अऊ ओमन ला सोन ले मढ़बे।
EXO 30:6 बेदी ला ओ परदा के आघू म रखबे, जऊन ह करार कानून के सन्दूक ला ओधा करथे—याने कि पछताप के ढकना के आघू म, जऊन ह करार कानून के पटियामन के ऊपर हवय—जिहां मेंह तोर ले मिलहूं।
EXO 30:7 “हारून ह बिहनियां जब दीयामन ला ठीक करथे, त ओह रोज बिहनियां बेदी म सुगंधित धूप जलावय।
EXO 30:8 फेर जब हारून ह संझा के बेरा म दीयामन ला बारथे, त ओ बेरा घलो धूप जलावय, ताकि अवइया पीढ़ी-पीढ़ी तक यहोवा के आघू म हमेसा धूप ह जलत रहय।
EXO 30:9 ये बेदी म अऊ कोनो आने किसम के धूप झन जलाबे या येमा कोनो होम-बलिदान या अन्न-बलिदान झन चघाबे, अऊ येमा कोनो पेय-बलिदान झन रितोबे।
EXO 30:10 हारून ह साल म एक बार ओकर सींगमन म प्रायस्चित करय। साल म एक बार करइया ये प्रायस्चित ला अवइया पीढ़ी-पीढ़ी तक प्रायस्चित के पाप-बलिदान के लहू के संग करे जावय। येह यहोवा बर महा पबितर अय।”
EXO 30:11 तब यहोवा ह मूसा ला कहिस,
EXO 30:12 “जब तेंह इसरायलीमन के संखिया ला जाने बर गनती करबे, त हर एक जन अपन गनती के बेरा यहोवा ला अपन जिनगी बर छुड़ौती के रकम देवय। तब ओमन ऊपर कोनो महामारी नइं आही, जब तेंह ओमन के गनती करबे।
EXO 30:13 हर एक मनखे, जब अपन गनती के बाद गने गय मनखेमन कोति जाथे, त ओह पबितर-स्थान के सेकेल के मुताबिक आधा सेकेल देवय, जेकर वजन बीस गेरा होथे। ये आधा सेकेल ह यहोवा बर एक भेंट अय।
EXO 30:14 ओ जम्मो जेमन के गनती होथे अऊ बीस साल या ओकर ले जादा के रहिथें, ओमन यहोवा ला भेंट देवंय।
EXO 30:15 जब तुमन अपन जिनगी बर प्रायस्चित के भेंट यहोवा ला देवव, त चाहे ओह धनी होवय या गरीब, हर एक मनखे आधा सेकेल ही देवय; कोनो भी न तो आधा सेकेल ले जादा अऊ न आधा सेकेल ले कम देवय।
EXO 30:16 तेंह इसरायलीमन ले प्रायस्चित के रूपिया लेबे अऊ ओकर उपयोग मिलापवाला तम्बू के सेवा बर करबे। येह तुम्हर जिनगी के प्रायस्चित करे बर यहोवा के आघू म इसरायलीमन बर एक स्मारक होही।”
EXO 30:17 तब यहोवा ह मूसा ला कहिस,
EXO 30:18 “धोये बर तेंह कांसा के एक तसला बनाबे अऊ ओकर पाया ला घलो कांसा के बनाबे। ओला मिलापवाला तम्बू अऊ बेदी के मांझा म मढ़ाके ओमा पानी भर देबे।
EXO 30:19 हारून अऊ ओकर बेटामन ओमा के पानी ले अपन हांथ अऊ गोड़ धोवंय।
EXO 30:20 जब कभू ओमन मिलापवाला तम्बू म जावंय, त ओमन पानी ले हांथ-गोड़ धोवंय, ताकि ओमन झन मरंय। अऊ जब कभू ओमन यहोवा ला जेवन-बलिदान चघाय के दुवारा सेवा करे बर बेदी करा जावंय,
EXO 30:21 त ओमन अपन हांथ-गोड़ ला धोवंय, ताकि ओमन झन मरंय। येह हारून अऊ ओकर संतानमन बर अवइया पीढ़ी-पीढ़ी तक हमेसा के एक बिधि होवय।”
EXO 30:22 तब यहोवा ह मूसा ला कहिस,
EXO 30:23 “ये बढ़िया मसालामन ला लेबे: 500 सेकेल तरल लोहबान, 250 सेकेल खुसबूवाला दालचीनी, 250 सेकेल खुसबूवाला तेजपान,
EXO 30:24 500 सेकेल दालचीनी—अऊ एक हीन जैतून तेल।
EXO 30:25 येमन ले तेंह एक पबितर अभिसेक के तेल बनाबे, येह एक सुगंधवाला मिलावट होवय अऊ येह एक अंतर तेल बनानेवाला के काम होवय। येह अभिसेक के पबितर तेल होही।
EXO 30:26 तब इही तेल ले तेंह मिलापवाला तम्बू, करार कानून के सन्दूक,
EXO 30:27 अऊ मेज अऊ येकर जम्मो सामान, दीवट अऊ येकर जम्मो सामान, धूप के बेदी,
EXO 30:28 होम-बलिदान के बेदी अऊ येकर जम्मो बरतन, अऊ तसला अऊ ओकर खुरा के अभिसेक करबे।
EXO 30:29 तेंह ये जम्मो के संस्कार करबे ताकि येमन महा पबितर हो जावंय, अऊ जऊन कुछू येमन ला छुही, ओह घलो पबितर हो जाही।
EXO 30:30 “तेंह हारून अऊ ओकर बेटामन के अभिसेक करबे अऊ ओमन के संस्कार करबे, ताकि ओमन पुरोहित के रूप म मोर सेवा करंय।
EXO 30:31 तेंह इसरायलीमन ले ये कहिबे, ‘येह अवइया पीढ़ी-पीढ़ी तक मोर पबितर अभिसेक के तेल होवय।
EXO 30:32 येला कोनो आने मनखे के देहें म झन रितोहू अऊ इही नुसखा के उपयोग करत कोनो आने तेल झन बनाबे। येह पबितर अय, अऊ येला तुमन पबितर समझव।
EXO 30:33 जऊन कोनो येकर सहीं अंतर तेल बनाथे अऊ ओला पुरोहित के छोंड़ कोनो आने मनखे ऊपर डारथे, त ओला अपन मनखेमन के बीच म ले अलग करे जावय।’ ”
EXO 30:34 फेर यहोवा ह मूसा ला कहिस, “ये सुगंधित मसालामन लेय ले—गंधरस, कस्तुरी गंधिका अऊ बिरोजा—अऊ सुध लोहबान; ये जम्मो ला बरोबर मात्रा म लेबे,
EXO 30:35 अऊ ये जम्मो ला मिलाके धूप के एक सुगंधित मिंझरा बनाबे; येह एक अंतर तेल बनानेवाला के काम होवय। येह नूनचूर अऊ सुध अऊ पबितर होवय।
EXO 30:36 येमा के थोरकन ला पीसके चूरन बना लेबे अऊ ओला मिलापवाला तम्बू म करार कानून के सन्दूक के आघू म रखबे, जिहां मेंह तोर ले मिलहूं। येह तुम्हर बर महा पबितर होही।
EXO 30:37 इही नुसखा के उपयोग करत अपन बर कोनो आने धूप झन बनाबे; येला यहोवा बर पबितर समझव।
EXO 30:38 जऊन कोनो ये किसम के धूप येकर खुसबू के आनंद उठाय बर बनाथे, ओला अपन मनखेमन के बीच ले अलग करे जावय।”
EXO 31:1 फेर यहोवा ह मूसा ला कहिस,
EXO 31:2 “देखव, मेंह यहूदा के गोत्र ले हूर के नाती, ऊरी के बेटा बसलेल ला चुने हंव,
EXO 31:3 अऊ मेंह ओला परमेसर के आतमा, बुद्धि, समझ, गियान अऊ जम्मो किसम के हुनर ले भर दे हंव—
EXO 31:4 ताकि ओह सोन, चांदी अऊ कांसा के कलात्मक नमूना बनावय,
EXO 31:5 पथरामन ला काटे अऊ मढ़ाय, लकड़ी के काम करय, अऊ जम्मो किसम के सिल्पकारी करय।
EXO 31:6 येकर अलावा, मेंह दान के गोत्र ले अहीसामाक के बेटा ओहोलीआब ला नियुक्त करे हंव कि ओह बसलेल के मदद करे।
EXO 31:7 “मिलापवाला तम्बू, करार कानून के सन्दूक अऊ ओकर पछताप के ढकना, अऊ तम्बू के आने जम्मो चीज—
EXO 31:8 मेज अऊ ओकर जम्मो चीज, चोखा सोन के दीवट अऊ ओकर जम्मो चीज, धूप के बेदी,
EXO 31:9 होम-बलिदान के बेदी अऊ ओकर जम्मो बरतन, तसला अऊ ओकर खुरा—
EXO 31:10 अऊ बुने गय पहिरावामन घलो, हारून पुरोहित के पबितर पहिरावा अऊ ओकर बेटामन के ओ पहिरावा, जब ओमन पुरोहित के रूप म सेवा करत बेरा पहिरहीं,
EXO 31:11 अऊ अभिसेक के तेल अऊ पबितर स्थान बर सुगंधित धूप।
EXO 31:12 फेर यहोवा ह मूसा ला कहिस,
EXO 31:13 “तेंह इसरायलीमन ला ये कहिबे, ‘तुमन मोर बिसराम दिन ला जरूर मानव। येह अवइया पीढ़ी-पीढ़ी तक मोर अऊ तुम्हर बीच म एक ठन चिनहां होही, ताकि तुमन जानव कि मेंह यहोवा अंव, जऊन ह तुमन ला पबितर करथे।
EXO 31:14 “ ‘बिसराम दिन ला मानव, काबरकि ये दिन ह तुम्हर बर पबितर अय। जऊन कोनो येला अपबितर करथे, ओह मार डारे जावय; जऊन कोनो ओ दिन कोनो बुता करय, ओह अपन मनखेमन के बीच ले अलग करे जावय।
EXO 31:15 काबरकि हर हप्ता छै दिन काम-बुता करे जावय, पर सातवां दिन बिसराम के दिन अऊ यहोवा बर पबितर अय। जऊन कोनो बिसराम दिन म कुछू बुता करय, ओह मार डारे जाय।
EXO 31:16 इसरायलीमन बिसराम दिन ला मानंय; ओमन येला अवइया पीढ़ी-पीढ़ी तक हमेसा के एक करार के रूप म मानंय।
EXO 31:17 येह मोर अऊ इसरायलीमन के बीच म सदाकाल बर एक चिनहां ठहिरही, काबरकि छै दिन म यहोवा ह अकास अऊ धरती ला बनाईस, अऊ सातवां दिन ओह बिसराम करिस अऊ तरो-ताजा होईस।’ ”
EXO 31:18 जब यहोवा ह सीनय पहाड़ ऊपर मूसा ले बात कर चुकिस, त ओह मूसा ला करार कानून के दू ठन पटिया ला दीस, येमन पथरा के ओ पटियामन रिहिन, जेमा परमेसर ह अपन अंगठी ले लिखे रिहिस।
EXO 32:1 जब मनखेमन देखिन कि मूसा ला पहाड़ ले उतरके आय म बहुंत समय लगत हे, त ओमन हारून के चारों मुड़ा जूरिन अऊ कहिन, “आ, हमर बर एक देवता बना, जऊन ह हमर आघू-आघू जाही, काबरकि ओ मनखे मूसा, जऊन ह हमन ला मिसर देस ले निकालके लाने रिहिस, ओला का होईस, हमन नइं जानत हन?”
EXO 32:2 त हारून ह ओमन ला जबाब दीस, “तुमन अपन-अपन घरवाली, अपन बेटा अऊ अपन बेटीमन के कान म पहिरे सोन के बालीमन ला हेरके मोर करा लानव।”
EXO 32:3 तब जम्मो मनखेमन अपन-अपन कान ले सोन के बालीमन ला हेरिन अऊ ओला हारून करा ले आईन।
EXO 32:4 हारून ह ओमन ले ओ सोन ला ले लीस, अऊ ओह ओला ढालके एक औजार के दुवारा बछवा के रूप म एक मूरती बनाईस। तब ओमन कहे लगिन, “हे इसरायलीमन, येह तुम्हर देवता ए, जऊन ह तुमन ला मिसर देस ले बाहिर निकालके लानिस।”
EXO 32:5 जब हारून ह येला देखिस, त ओह ओ बछवा के आघू म एक ठन बेदी बनाईस अऊ ये घोसना करिस, “कल यहोवा बर एक तिहार होही।”
EXO 32:6 एकरसेति दूसर दिन मनखेमन बड़े बिहनियां उठिन अऊ होम-बलिदान चघाईन, अऊ मेल-बलिदान लाईन। ओकर बाद ओमन खाय-पीये बर बईठिन अऊ उठके उछल-मंगल करे लगिन।
EXO 32:7 तब यहोवा ह मूसा ला कहिस, “खाल्हे उतर जा, काबरकि तोर मनखेमन, जऊन मन ला तेंह मिसर देस ले निकालके लाने हस, ओमन बिगड़ गे हवंय।
EXO 32:8 जऊन बात के हुकूम मेंह ओमन ला देय रहेंव, ओमन ओमा ले बहुंत जल्दी हट गे हवंय अऊ ओमन अपन बर बछवा के आकार म एक ठन मूरती बना ले हवंय। ओमन ओला दंडवत करिन अऊ ओकर बर बलिदान चघाईन अऊ ये कहिन, ‘हे इसरायलीमन, येह तुम्हर देवता अय, जऊन ह तुमन ला मिसर देस ले निकालके लाने हवय।’ ”
EXO 32:9 फेर यहोवा ह मूसा ला कहिस, “मेंह ये मनखेमन ला देखे हंव, येमन ढीठ मनखे अंय।
EXO 32:10 अब तेंह मोला अकेला छोंड़ दे ताकि मोर कोरोध ह ओमन ऊपर भड़के अऊ मेंह ओमन ला नास कर दंव। तब मेंह तोर ले एक ठन बड़े जाति बनाहूं।”
EXO 32:11 पर मूसा ह यहोवा अपन परमेसर ले दया के कामना करत ये कहिस, “हे यहोवा, तेंह काबर अपन मनखेमन ऊपर कोरोध करत हस, जेमन ला तेंह अपन बड़े सामर्थ अऊ सक्तिसाली हांथ ले मिसर देस ले निकालके लानय?
EXO 32:12 मिसरीमन काबर ये कहंय, ‘ओह ओमन ला गलत उदेस्य ले निकाल लानिस ताकि ओह ओमन ला पहाड़ म मार डारय अऊ धरती ले ओमन के नामोनिसान मिटा दे?’ एकरसेति अपन कोरोध ला छोंड़; दया कर अऊ अपन मनखेमन ऊपर बिपत्ति झन लान।
EXO 32:13 अपन सेवक अब्राहम, इसहाक अऊ इसरायल ला सुरता कर, जेमन ले तेंह अपनेच कसम खाके कहे रहय: ‘मेंह तुम्हर संतानमन ला अकास के तारामन सहीं अनगिनत कर दूहूं अऊ मेंह तुम्हर संतानमन ला ये जम्मो देस दूहूं, जेकर वायदा मेंह ओमन ले करे हंव, अऊ येह सदाकाल बर ओमन के निज भाग होही।’ ”
EXO 32:14 तब यहोवा ह दया करिस अऊ अपन मनखेमन ऊपर ओ बिपत्ति नइं लानिस, जेकर धमकी ओह दे रिहिस।
EXO 32:15 तब मूसा ह मुड़िस अऊ पहाड़ ले खाल्हे उतरिस; ओह अपन हांथ म करार कानून के दूनों पटिया ला धरे रिहिस। ओ पटियामन के आघू अऊ पाछू दूनों कोति लिखाय रिहिस।
EXO 32:16 ओ पटियामन ला परमेसर ह बनाय रिहिस; अऊ ओ पटियामन म जऊन लिखावट रिहिस, ओला परमेसर ह खोदके लिखे रिहिस।
EXO 32:17 जब यहोसू ह मनखेमन के चिचियाय के अवाज ला सुनिस, त ओह मूसा ला कहिस, “डेरा ले लड़ई के अवाज आवत हे।”
EXO 32:18 मूसा ह जबाब दीस: “येह जीत के अवाज नो हय, येह हार के अवाज घलो नो हय; पर मोला तो गीत गाय के अवाज सुनई देवत हे।”
EXO 32:19 जब मूसा ह डेरा करा आईस अऊ बछवा ला देखिस अऊ मनखेमन ला नाचत देखिस, त ओकर गुस्सा भड़किस अऊ ओह अपन हांथ के पटियामन ला फटिक दीस अऊ पटियामन पहाड़ के खाल्हे म टूटके कुटा-कुटा हो गीन।
EXO 32:20 अऊ ओह मनखेमन के बनाय ओ बछवा ला लीस अऊ ओला आगी म जला दीस; तब ओला कुचरके चूर-चूर कर दीस अऊ चूरा ला पानी म छिंच दीस अऊ ओ चूरा मिले पानी इसरायलीमन ला पीयाईस।
EXO 32:21 तब मूसा ह हारून ला कहिस, “ये मनखेमन तोर संग का करिन कि तेंह येमन ले अतेक बड़े पाप करवाय?”
EXO 32:22 हारून ह जबाब दीस, “हे मोर मालिक, तें गुस्सा झन कर; तेंह तो जानत हस कि येमन बुरई के काम करे बर कतेक लालायित रहिथें।
EXO 32:23 ओमन मोला कहिन, ‘हमर बर एक ठन देवता बना, जऊन ह हमर आघू-आघू जाही। जिहां तक ओ मनखे मूसा के सवाल हे, जऊन ह हमन ला मिसर देस ले निकालके लानिस, हमन नइं जानन कि ओकर का होईस?’
EXO 32:24 एकरसेति मेंह ओमन ला कहेंव, ‘जेकर करा भी सोन के कोनो जेवर हवय, ओमन ओला हेरके ले आवंय।’ तब ओमन मोर करा सोन ले आईन, अऊ मेंह ओला आगी म डारेंव, अऊ ओमा ले ये बछवा निकलिस!”
EXO 32:25 मूसा ह देखिस कि मनखेमन एती-ओती भागत हें अऊ हारून ह ओमन ला अपन काबू ले बाहिर कर दे रिहिस अऊ एकरसेति ओमन अपन बईरीमन के ठट्ठा के कारन हो गे रहंय।
EXO 32:26 त मूसा ह छावनी के मुंहटा म ठाढ़ होके कहिस, “जऊन कोनो यहोवा कोति हवव, ओह मोर करा आवव।” अऊ जम्मो लेवीमन ओकर करा जूर गीन।
EXO 32:27 तब मूसा ह ओमन ला कहिस, “यहोवा, इसरायल के परमेसर ह ये कहत हे: ‘तुमन म ले हर आदमी ह अपन बाजू म एक तलवार बांध लेवय। सिविर के एक छोर ले लेके दूसर छोर तक आती-जाती हर एक झन अपन भाई अऊ संगवारी अऊ परोसी ला मार डारव।’ ”
EXO 32:28 लेवीमन वइसे ही करिन, जइसे मूसा ह हुकूम दीस, अऊ ओ दिन लगभग तीन हजार मनखे मारे गीन।
EXO 32:29 तब मूसा ह कहिस, “आज तुमन ला यहोवा बर अलग करे गे हवय, काबरकि तुमन अपन खुद के बेटा अऊ भाईमन के बिरूध म रहेव, एकरसेति यहोवा ह तुमन ला आज आसीस दे हवय।”
EXO 32:30 दूसर दिन मूसा ह मनखेमन ला कहिस, “तुमन एक बहुंत बड़े पाप करे हव। पर अब मेंह पहाड़ ऊपर यहोवा करा जावत हंव; सायद मेंह तुम्हर पाप बर प्रायस्चित कर सकंव।”
EXO 32:31 तब मूसा ह यहोवा करा वापिस गीस अऊ कहिस, “हाय, हाय, ये मनखेमन बहुंत बड़े पाप करे हवंय! ओमन अपन बर सोन के देवता बना ले हवंय।
EXO 32:32 पर अब, तेंह किरपा करके ओमन के पाप ला छेमा कर दे—यदि नइं, त फेर मोर नांव ला ओ किताब म ले मिटा दे, जऊन ला तेंह लिखे हस।”
EXO 32:33 यहोवा ह मूसा ला जबाब दीस, “जऊन कोनो मोर बिरूध म पाप करे हवय, मेंह ओकरे नांव ला मोर किताब ले मिटा दूहूं।
EXO 32:34 अब तेंह जा, अऊ ये मनखेमन ला ओ ठऊर म ले जा, जेकर बारे म मेंह तोला बताय हंव, अऊ मोर स्वरगदूत ह तोर आघू-आघू जाही। तभो ले जब मोर सजा देय के समय आही, त मेंह ओमन ला ओमन के पाप के सजा दूहूं।”
EXO 32:35 अऊ यहोवा ह ओ मनखेमन के बीच एक महामारी लानिस काबरकि ओमन हारून के दुवारा बछवा बनवाय रिहिन अऊ ओकर अराधना करे रिहिन।
EXO 33:1 तब यहोवा ह मूसा ला कहिस, “तें अऊ जऊन मनखेमन ला मिसर देस ले निकालके लाने हस, तुमन जम्मो झन ये जगह ला छोंड़के ओ देस म चले जावव, जेकर वायदा मेंह अब्राहम, इसहाक अऊ याकूब ले सपथ खाके करे रहेंव, ‘मेंह ओला तुम्हर संतानमन ला दूहूं।’
EXO 33:2 मेंह तुम्हर आघू एक स्वरगदूत ला पठोहूं अऊ कनानी, अमोरी, हित्ती, परिज्जी, हिब्बी, अऊ यबूसीमन ला भगा दूहूं।
EXO 33:3 ओ देस म जावव, जिहां दूध अऊ मंधरस बहुंतायत म मिलथे, पर मेंह तुम्हर संग नइं जावंव, काबरकि तुमन ढीठ मनखे अव अऊ अइसने झन होवय कि मेंह तुमन ला डहार म ही नास कर दंव।”
EXO 33:4 जब मनखेमन ये दुख के समाचार ला सुनिन, त ओमन बिलाप करे लगिन अऊ कोनो भी अपन जेवर ला नइं पहिरिन।
EXO 33:5 काबरकि यहोवा ह मूसा ला कहे रिहिस, “इसरायलीमन ला ये कह, ‘तुमन ढीठ मनखे अव। कहूं मेंह तुम्हर संग एक घरी घलो चलंव, त हो सकथे मेंह तुमन ला नास कर दंव। एकरसेति अब तुमन अपन जेवरमन ला उतारव अऊ मेंह फैसला करहूं कि तुम्हर संग का करना हे।’ ”
EXO 33:6 एकरसेति इसरायलीमन होरेब पहाड़ म अपन जेवरमन ला उतार दीन।
EXO 33:7 मूसा ह एक ठन तम्बू ला लेके छावनी के बाहिर थोरकन दूरिहा म खड़े करय, अऊ ओला मिलापवाला तम्बू कहय। जऊन कोनो ला यहोवा ले कोनो बात पुछना रहय, त ओह छावनी ले बाहिर ओ मिलापवाला तम्बू करा जावय।
EXO 33:8 अऊ जब भी मूसा ह मिलापवाला तम्बू करा जावय, त जम्मो मनखेमन उठके अपन-अपन तम्बू के मुंहटा म ठाढ़ हो जावंय, अऊ मूसा ला तब तक देखत रहंय, जब तक ओह तम्बू के भीतर नइं चले जावय।
EXO 33:9 मूसा के तम्बू म जावत ही बादर के खंभा उतरके तम्बू के मुंहटा म ठहर जावय, अऊ यहोवा ह मूसा ले गोठियावय।
EXO 33:10 जब भी मनखेमन बादर के खंभा ला तम्बू के मुंहटा म खड़े देखंय, त ओ जम्मो झन अपन-अपन तम्बू के मुंहटा म अराधना करंय।
EXO 33:11 यहोवा ह मूसा ले आमने-सामने गोठियावय, जइसन कोनो मनखे अपन संगवारी ले गोठियाथे। तब मूसा छावनी म लहुंटय, पर ओकर जवान सहायक नून के बेटा यहोसू ह तम्बू ला बिगर छोंड़े उहां बने रहय।
EXO 33:12 मूसा ह यहोवा ला कहिस, “तेंह मोला कहत आय हस, ‘ये मनखेमन के अगुवई कर,’ पर तेंह मोला ये नइं बताय हस कि मोर संग तेंह कोन ला पठोबे। तेंह कहे हस, ‘मेंह तोला तोर नांव ले जानत हंव अऊ तोर ऊपर मोर किरपा हवय।’
EXO 33:13 यदि तेंह मोर ले खुस हवस, त तेंह मोला अपन रसता के बारे म सिखा, ताकि मेंह तोला जानंव अऊ तोर किरपा मोर ऊपर हमेसा बने रहय। ये बात के सुरता रखबे कि ये जाति के मनखेमन तोरेच मनखे अंय।”
EXO 33:14 यहोवा ह जबाब दीस, “मोर उपस्थिति तोर संग बने रहिही, अऊ मेंह तोला बिसराम दूहूं।”
EXO 33:15 तब मूसा ह ओला कहिस, “कहूं तोर उपस्थिति हमर संग बने नइं रहय, त हमन ला इहां ले अऊ आघू झन भेज।
EXO 33:16 जब तेंह हमर संग नइं रहिबे, त कोनो मनखे ह ये कइसे जानही कि तेंह मोर ले अऊ अपन मनखेमन ले खुस हवस? का आने चीज अय, जऊन ह मोला अऊ तोर मनखेमन ला ये धरती के जम्मो मनखेमन ले अलग करही?”
EXO 33:17 अऊ यहोवा ह मूसा ला कहिस, “मेंह ओ हर काम ला करहूं, जेला तेंह कहे हस, काबरकि मेंह तोर ले खुस हंव अऊ मेंह तोला तोर नांव ले जानत हंव।”
EXO 33:18 तब मूसा ह कहिस, “मोर बिनती हवय कि तेंह मोला अपन महिमा देखा।”
EXO 33:19 अऊ यहोवा ह कहिस, “मेंह अपन जम्मो भलई तोर आघू म देखाहूं, अऊ मेंह अपन नांव यहोवा के घोसना तोर आघू म करहूं। जेकर ऊपर मेंह दया करे चाहंव, ओकर ऊपर दया करहूं, अऊ जेकर ऊपर मेंह तरस खाय चाहंव, ओकर ऊपर तरस खाहूं।”
EXO 33:20 ओह आगे कहिस, “पर तेंह मोर चेहरा ला नइं देख सकस, काबरकि कोनो भी मनखे मोला देखे के बाद जीयत नइं रह सकय।”
EXO 33:21 फेर यहोवा ह कहिस, “मोर लकठा म एक जगह हवय, जिहां तेंह एक चट्टान ऊपर ठाढ़ हो सकत हस।
EXO 33:22 जब मोर महिमा ह उहां ले होके जाही, त मेंह तोला चट्टान के एक दरार म रख दूहूं अऊ तोला अपन हांथ ले तब तक ढांपे रहिहूं, जब तक कि मेंह उहां ले निकल नइं जावंव।
EXO 33:23 तब मेंह अपन हांथ ला टार दूहूं अऊ तेंह मोर पीठ ला देखे बर पाबे, पर मोर चेहरा ह नइं दिखय।”
EXO 34:1 यहोवा ह मूसा ला कहिस, “पहिली के पटियामन सहीं पथरा के दू ठन पटिया काटके बना ले, अऊ में ये पटियामन म ओ बचनमन ला फेर लिख दूहूं, जेमन पहिली के पटियामन म रिहिन, जेमन ला तें टोर देय।
EXO 34:2 बिहनियां तियार होके सीनय पहाड़ के टीप म चघके मोर करा ठाढ़ होबे।
EXO 34:3 तोर संग कोनो अऊ चघके झन आवय, पहाड़ ऊपर कोनो कोति कोनो झन दिखय; इहां तक कि कोनो भेड़-बकरी अऊ गरूवा-बईला घलो ओ पहाड़ के आघू म झन चरत रहंय।”
EXO 34:4 मूसा ह काटके पथरामन के दू ठन पटिया पहिली सहीं बनाईस, फेर ओह यहोवा के हुकूम के मुताबिक बिहनियां उठिस अऊ पथरा के दूनों पटियामन ला अपन हांथ म धरके सीनय पहाड़ म चघिस।
EXO 34:5 तब यहोवा ह बादर म उतरिस अऊ ओकर संग ठाढ़ होके अपन नांव यहोवा के घोसना करिस।
EXO 34:6 अऊ यहोवा ह मूसा के सामने ले होके निकलिस अऊ ये कहत गीस, “यहोवा, यहोवा, दयालु अऊ किरपा करइया परमेसर, कोरोध करे म धीमा, मया ले भरपूर अऊ बिसवासयोग्य अय,
EXO 34:7 हजारों झन ला सदा मया करइया, अधरम, अपराध अऊ पाप छेमा करइया; फेर दोसी ला ओह निरदोस नइं छोंड़य, ओह दाई-ददा के पाप बर ओमन के लइकामन ला तीसरा अऊ चौथा पीढ़ी तक दंड देथे।”
EXO 34:8 मूसा ह तुरते भुइयां कोति झुकिस अऊ अराधना करिस।
EXO 34:9 अऊ ओह कहिस, “हे परभू, कहूं तोर दया-मया ह मोर ऊपर हवय, त परभू ह हमर संग चलय। हालाकि ये मनखेमन ढीठ अंय, पर तें हमर पाप अऊ अधरम ला छेमा कर अऊ हमन ला अपन मानके गरहन कर।”
EXO 34:10 तब यहोवा ह कहिस: “सुन, मेंह एक ठन करार करत हंव। मेंह तोर जम्मो झन के आघू म अइसन अचम्भो बुता करहूं, जइसन जम्मो धरती म कोनो जातिमन के आघू म कभू नइं करे गे हवय, अऊ ओ जम्मो झन, जऊन मन के मांझा म तेंह रहत हस, ओमन यहोवा के बुता ला देखहीं, काबरकि जऊन कुछू मेंह करइया हंव, ओह अद्भूत बुता अय।
EXO 34:11 जऊन हुकूम आज मेंह तुमन ला दूहूं, ओला तुमन मानव। मेंह तुम्हर आघू ले अमोरी, कनानी, हित्ती, परिज्जी, हिब्बी अऊ यबूसी जाति के मनखेमन ला निकाल दूहूं।
EXO 34:12 एकरसेति धियान रहय कि ओ देस म रहइयामन के संग कोनो करार झन करव, जिहां तुमन जवइया हव, कहूं अइसन झन होवय कि ओमन तुम्हर बर फांदा बन जावंय।
EXO 34:13 पर तुमन ओमन के बेदीमन ला टोरके गिरा दव अऊ ओमन के पबितर पथरामन ला कुटा-कुटा कर दव, अऊ ओमन के असेरा के खंभामन ला काट डारव;
EXO 34:14 कोनो आने देवता के अराधना झन करव, काबरकि यहोवा जेकर नांव जलन रखइया अय, ओह जल उठइया परमेसर अय।
EXO 34:15 “धियान रहय कि ओ देस म रहइयामन के संग कोनो करार झन करव; काबरकि जब ओमन अपन देवतामन के अराधना करके बेभिचार के सहीं काम करथें अऊ ओकर बर बलिदान चघाथें, त ओमन तुमन ला नेवता दीहीं अऊ तुमन ओमन के बलिदान करे गय चीज ला खाहू।
EXO 34:16 अऊ जब तुमन ओमन के बेटीमन ला अपन बेटामन के घरवाली होय बर लेथव अऊ ओ बेटीमन खुदे अपन देवतामन के पाछू चलके बेभिचार करथें, त ओमन तुम्हर बेटामन ला घलो वइसनेच करे बर ले जाहीं।
EXO 34:17 “अपन बर कोनो देवता झन बनाहू।
EXO 34:18 “अखमीरी रोटी के तिहार मनाहू, ओमा तुमन मोर हुकूम के मुताबिक अबीब महिना के नियत बेरा म सात दिन ले अखमीरी रोटी खाय करहू, काबरकि तुमन अबीब महिना म मिसर देस ले निकलके आय रहेव।
EXO 34:19 “हर एक कोख के पहिली लइका ह मोर अय। चाहे ओह बछवा होवय चाहे भेड़; तुम्हर पसुमन म ले घलो पहिली नर पीला ह मोर अय।
EXO 34:20 गदहा के पहिली पीला के बलदा मेढ़ा-पीला देके ओला छोंड़ाहू, फेर कहूं तेंह ओला छोंड़ाय बर नइं चाहस, त ओकर घेंच ला टोर दूहू। पर अपन जम्मो पहिलांत बेटामन ला बलदा देके छोंड़ाहू। “कोनो मोला जुच्छा हांथ अपन मुहूं झन देखावंय।
EXO 34:21 “हर हप्ता छै दिन ले कमाहू, अऊ सातवां दिन अराम करहू; नांगर जोतई अऊ लुवई के बखत घलो अराम करहू।
EXO 34:22 “तुमन हप्तामन के तिहार मनाहू, मतलब कि गहूं के ऊपज के पहिली-फसल के तिहार अऊ बछर के आखिरी म संकेलन तिहार घलो मनाहू।
EXO 34:23 साल म तीन बार तुम्हर जम्मो आदमीमन परमपरधान यहोवा, इसरायल के परमेसर के आघू म उपस्थित होवंय।
EXO 34:24 काबरकि मेंह आनजातमन ला तोर आघू ले निकालके तोर सिवाना ला बढ़ाहूं अऊ जब तुमन एक बछर म तीन बार अपन यहोवा के आघू म ठाढ़ होय बर जाहू, तब कोनो तोर भुइयां के लालच नइं करही।
EXO 34:25 “कोनो बलिदान करे गय पसु के लहू ला कोनो खमीर मिले हुए चीज के संग झन चघावव अऊ फसह तिहार के बलिदान म ले बिहान तक ले कुछू ला झन बचाहू।
EXO 34:26 “तुमन अपन भुइयां के सबले बने पहिली-फसल ला यहोवा अपन परमेसर के घर म लानव। “तुमन कोनो छेरी-पीला ला ओकर मियारी के दूध म झन रांधहू।”
EXO 34:27 फेर यहोवा ह मूसा ला कहिस, “ये बचनमन ला लिख ले, काबरकि मेंह इही बचन के मुताबिक तोर ले अऊ इसरायल ले करार करे हंव।”
EXO 34:28 मूसा ह यहोवा संग उहां चालीस दिन अऊ चालीस रात रिहिस, ओह रोटी नइं खाईस अऊ पानी घलो नइं पीईस, अऊ ओह ओ पटियामन म करार के बचन याने कि दस हुकूममन ला लिखिस।
EXO 34:29 जब मूसा ह करार कानून के दूनों पटिया ला हांथ म धरे सीनय पहाड़ ले उतरत रिहिस, त यहोवा संग गोठियाय के कारन ओकर मुहूं ह चमकत रिहिस, पर ओह ये बात ला नइं जानत रिहिस।
EXO 34:30 जब हारून अऊ जम्मो इसरायलीमन मूसा ला देखिन, कि ओकर मुहूं ह चमकत हवय त ओमन ओकर करा आय बर डराईन।
EXO 34:31 पर मूसा ह ओमन ला बलाईस; अऊ हारून अऊ समाज के जम्मो अगुवामन ओकर करा आईन, अऊ मूसा ह ओमन ले गोठियाईस।
EXO 34:32 ओकर बाद, जम्मो इसरायलीमन ला घलो तीर म बलाके मूसा ह ओमन ला ओ जम्मो हुकूम ला माने के हुकूम दीस, जऊन ला यहोवा ह सीनय पहाड़ म ओला कहे रिहिस।
EXO 34:33 जब मूसा ह ओमन ले गोठिया लीस, त ओह अपन मुहूं म ओढ़ना ला डार लीस।
EXO 34:34 मूसा ह जब-जब यहोवा करा ओकर ले गोठियाय बर जावय, त ओह बाहिर निकलत ले ओढ़ना ला हटाय रहय; अऊ जब-जब ओह बाहिर म आके परमेसर के दिये गय हुकूम इसरायलीमन ला बतावय,
EXO 34:35 त इसरायलीमन मूसा के मुहूं ला देखंय कि ओकर मुहूं ह चमकत रहय, अऊ जब तक मूसा ह यहोवा ले गोठियाय बर भीतर नइं जावय तब तक ओह अपन मुहूं म ओढ़ना डारे रहय।
EXO 35:1 मूसा ह जम्मो इसरायली समाज ला इकट्ठा करिस अऊ ओमन ला कहिस, “जऊन बुतामन ला यहोवा ह करे के हुकूम तुमन ला दे हवय, ओमन ये अंय:
EXO 35:2 हर हप्ता छै दिन बुता करहू अऊ सातवां दिन ह तुम्हर पबितर दिन, यहोवा बर एक बिसराम के दिन ठहिरय। ओ दिन जऊन कोनो कुछू बुता करय, ओला मार डारे जावय।
EXO 35:3 बिसराम के दिन तुमन अपन-अपन निवास के ठऊर म आगी घलो झन बारव।”
EXO 35:4 फेर मूसा ह जम्मो इसरायली समाज ला कहिस, “जऊन हुकूम यहोवा ह दे हवय, ओह ये अय:
EXO 35:5 तुमन अपन करा ले यहोवा बर भेंट संकेलव; जऊन मन अपन ईछा ले देय बर चाहथंय, ओमन यहोवा बर ये चीजमन के भेंट लानंय: “सोन, चांदी अऊ कांसा;
EXO 35:6 नीला, बैंगनी अऊ सिन्दूरी रंग के सूंत अऊ सुघर मलमल के कपड़ा; बोकरा के रूआं;
EXO 35:7 लाल रंग ले रंगाय मेढ़ा के खाल अऊ आने किसम के टिकाऊ खाल; बंबरी के लकड़ी;
EXO 35:8 अंजोर करे बर जैतून तेल; अभिसेक के तेल अऊ कहरवाला धूप बर मसाला;
EXO 35:9 अऊ एपोद अऊ छातीबंध म जड़े बर गोमेदक के पथरा अऊ आने किसम के रत्न।
EXO 35:10 “तुमन म जऊन मन कुसल कारीगर अंय, ओमन आवंय अऊ यहोवा के हुकूम के मुताबिक ये चीजमन ला बनावंय:
EXO 35:11 “पबितर-तम्बू के संग ओकर तम्बू अऊ ओकर ओढ़ना, अऊ ओकर घुंडी, ढांचा, बल्ली, खंभा अऊ आधारमन;
EXO 35:12 सन्दूक अऊ ओकर डंडामन, पछताप के ढकना अऊ ओ परदा, जऊन ह ओला आड़ करथे;
EXO 35:13 मेज अऊ ओकर डंडा अऊ ओकर जम्मो सामान अऊ चघावा के रोटी;
EXO 35:14 अंजोर बर दीवट, अऊ ओकर जम्मो सामान, दीयामन अऊ अंजोर करे बर तेल;
EXO 35:15 डंडा समेत धूप के बेदी, अभिसेक के तेल, सुगंधित धूप, अऊ पबितर-तम्बू के प्रवेस दुवार बर परदा;
EXO 35:16 होम-बलिदान के बेदी के संग ओकर कांसा के जाली, ओकर डंडा अऊ ओकर जम्मो बरतन, कांसा के तसला अऊ ओकर पाया;
EXO 35:17 अंगना के परदामन के संग ओकर खंभा अऊ आधारमन, अऊ अंगना के प्रवेस दुवार के परदा;
EXO 35:18 पबितर-तम्बू अऊ अंगना के खूंटीमन, अऊ ओमन के रस्सीमन;
EXO 35:19 पबितर-स्थान म सेवा-टहल करे बर बुने गय पहिरावा—येमा हारून पुरोहित के पबितर पहिरावा अऊ ओकर बेटामन के पहिरावा रिहिस, जेला पुरोहित के रूप म सेवा करत बेरा ओमन पहिरंय।”
EXO 35:20 तब पूरा इसरायली समाज मूसा करा ले लहुंट गीस।
EXO 35:21 हर एक मनखे, जेमन के मन ह ओमन ला उत्साहित करिस अऊ हर एक मनखे जऊन मन के आतमा ह ओमन ला उभारिस, ओह मिलापवाला तम्बू के बुता अऊ ओकर जम्मो सेवा करे अऊ पबितर ओनहा ला बनाय बर अऊ यहोवा बर भेंट लेके आईन।
EXO 35:22 तब जम्मो मरद अऊ माईलोगनमन, जऊन मन के मन ह ओमन ला उत्साहित करे रिहिस, ओमन सोन के कान के बाली, नाक के नथनी, अंगठी के मुंदरी अऊ हांथ के कंगनी आदि जम्मो किसम के जेवर लानिन; ओ जम्मो झन हलाय-बलिदान के रूप म यहोवा ला अपन सोन के भेंट चघाईन।
EXO 35:23 अऊ हर ओ मनखे, जेकर करा नीला, बैंगनी अऊ सिन्दूरी रंग के ओनहा, सुघर मलमल अऊ छेरीमन के बाल अऊ लाल रंग ले रंगाय भेड़ के खाल अऊ आने टिकाऊ खाल रिहिस, ओह ओ चीजमन ला ले आईस।
EXO 35:24 जऊन मनखेमन चांदी या कांसा के भेंट लाने सकत रिहिन, ओमन यहोवा बर भेंट लानिन। अऊ जऊन मन करा सेवा करे के कोनो बुता बर बंबरी के लकड़ी रिहिस, ओमन ओला लानिन।
EXO 35:25 जतेक कुसल माईलोगनमन रिहिन, ओमन अपन हांथ ले रेसम के सूंत बनाईन अऊ ओमन नीला, बैंगनी अऊ सिन्दूरी रंग के सूंत, अऊ महिन मलमल के बनाय गे सूंत ला लेके आईन।
EXO 35:26 अऊ जऊन माईलोगनमन के ईछा रिहिस अऊ सूंत कांते म कुसल रिहिन, ओमन छेरीमन के रूआं के घलो सूंत बनाईन।
EXO 35:27 अऊ मुखियामन एपोद अऊ सीनाबंध बर सुलेमानी मनि अऊ जड़े बर मनि लानिन।
EXO 35:28 ओमन अंजोर करे बर अऊ अभिसेक के तेल बर अऊ सुगंधित धूप बर मसाला अऊ जैतून तेल लानिन।
EXO 35:29 जऊन बुतामन ला करे बर यहोवा ह मूसा ला हुकूम दे रिहिस, ओकर बर जम्मो इसरायली माईलोगन अऊ मरद, जेमन के हिरदय ह ओमन ला भेंट लाने बर उभारिस, यहोवा बर स्वेच्छा-बलिदान लेके आईन।
EXO 35:30 मूसा ह इसरायलीमन ला कहिस, “देखव, यहोवा ह यहूदा के गोत्र ले हूर के नाती, ऊरी के बेटा बसलेल ला चुने हवय,
EXO 35:31 अऊ ओह ओला परमेसर के आतमा, बुद्धि, समझ, गियान अऊ जम्मो किसम के हुनर ले भर दे हवय,
EXO 35:32 ताकि ओह सोन, चांदी अऊ कांसा के कलात्मक काम,
EXO 35:33 पथरामन ला काटे अऊ मढ़ाय, लकड़ी के काम अऊ जम्मो किसम के कलात्मक सिल्पकारी के काम करय।
EXO 35:34 अऊ यहोवा ह ओकर संग दान के गोत्र ले अहीसामाक के बेटा ओहोलीआब ला घलो योग्यता दे हवय कि ओ दूनों झन आने मन ला सिखोवंय।
EXO 35:35 ओमन के हिरदय ला यहोवा ह अइसन हुनर ले भरे हवय कि ओमन गढ़नेवाला अऊ कलात्मक नमूना बनानेवाला नीला, बैंगनी अऊ सिन्दूरी रंग के ओनहा म अऊ महिन मलमल के कढ़ई अऊ बुनई म जम्मो किसम के कलात्मक जिनिसमन के नमूना के काम अऊ कारीगरमन के जम्मो बुता करंय।
EXO 36:1 बसलेल, ओहोलीआब अऊ ओ जम्मो कुसल कारीगर, जेमन ला यहोवा ह हुनर अऊ योग्यता दे हवय कि ओ पबितर-स्थान ला बनाय के जम्मो काम ला कइसे करना हे, ओमन ये काम ला वइसने ही करंय, जइसने कि यहोवा ह हुकूम दे हवय।”
EXO 36:2 तब मूसा ह बसलेल, ओहोलीआब अऊ ओ जम्मो कुसल कारीगर, जेमन ला यहोवा ह योग्यता दे रिहिस अऊ जऊन मन अपन ईछा ले आके काम करे चाहत रिहिन, ओ जम्मो झन ला बुलवाईस।
EXO 36:3 अऊ मूसा ह ओमन ला ओ जम्मो भेंट के चीजमन ला दे दीस, जेला इसरायलीमन पबितर-स्थान ला बनाय के काम बर लाय रिहिन। अऊ मनखेमन रोज बिहनियां स्वेच्छा-बलिदान लाते रिहिन।
EXO 36:4 तब ओ जम्मो कारीगर, जेमन पबितर-स्थान ला बनाय के जम्मो काम ला करत रिहिन, ओमन अपन-अपन काम ला छोंड़ दीन,
EXO 36:5 अऊ आके मूसा ला कहिन, “मनखेमन जरूरत ले जादा चीज ओ काम ला करे बर लानत हें, जेला करे के हुकूम यहोवा ह दे हवय।”
EXO 36:6 तब मूसा ह हुकूम दीस अऊ ये बात के घोसना पूरा सिविर म करे गीस: “कोनो भी मरद या माईलोगन अब पबितर-स्थान बर भेंट के रूप म कोनो चीज झन लानंय।” अऊ ये किसम ले मनखेमन ला अऊ भेंट लाने बर रोके गीस,
EXO 36:7 काबरकि जतेक चीज ओमन करा आय रिहिस, ओह जम्मो काम बर जरूरत ले घलो जादा रिहिस।
EXO 36:8 काम करइयामन के बीच म ले जम्मो कुसल कारीगरमन पबितर-तम्बू ला दस ठन परदा म ले बनाईन; ओमन ये परदामन ला सुघर बंटे मलमल अऊ नीला, बैंगनी अऊ सिन्दूरी रंग के सूंत ले बनाईन अऊ कुसल कारीगरमन के दुवारा ये परदामन म कढ़ई करके करूबमन ला बनाय गे रिहिस।
EXO 36:9 जम्मो परदामन एकेच आकार के रिहिन—अठाईस क्यूबीट लम्बा अऊ चार क्यूबीट चौड़ा।
EXO 36:10 ओमन पांच ठन परदा ला एक संग जोड़ दीन अऊ बांचे पांच ठन परदा ला घलो वइसने ही करिन।
EXO 36:11 तब ओमन पहिला समूह के आखिरी के परदा के धरी म नीला रंग के चीज के फांस लगाईन, अऊ वइसने ही दूसरा समूह के आखिरी के परदा म घलो करे गीस।
EXO 36:12 ओमन एक समूह के आखिरी के परदा म पचास ठन फांस लगाईन अऊ दूसर समूह के आखिरी के परदा म घलो पचास ठन फांस लगाईन, अऊ ये फांसमन एक-दूसर के आमने-सामने रिहिन।
EXO 36:13 तब ओमन पचास ठन सोन के कड़ा बनाईन अऊ ओमन के उपयोग दूनों समूह के परदामन ला एक संग बांधके रखे बर करिन, जेकर ले पबितर-तम्बू ह एक ठन हो गीस।
EXO 36:14 ओमन पबितर-तम्बू के ऊपर बोकरा के रूआं के परदा बनाईन—कुल गियारह ठन परदा बनाईन।
EXO 36:15 जम्मो गियारह परदामन एके नाप के रिहिन—तीस क्यूबीट लम्बा अऊ चार क्यूबीट चौड़ा।
EXO 36:16 ओमन पांच ठन परदा ला जोड़के एक ठन बना दीन अऊ आने छै ठन परदा ला घलो जोड़के एक ठन कर दीन।
EXO 36:17 तब ओमन पहिली समूह के आखिरी परदा के धरी म पचास ठन फांस लगाईन अऊ वइसने ही दूसर समूह के आखिरी परदा म घलो पचास ठन फांस लगाईन।
EXO 36:18 ओमन परदामन ला जोड़े बर कांसा के पचास ठन कड़ा बनाईन ताकि ओ पूरा तम्बू मिलके एके ठन हो जावय।
EXO 36:19 तब ओमन तम्बू बर लाल रंग ले रंगाय मेढ़ा के खाल के एक ठन ओढ़ना बनाईन अऊ ओकर ऊपर लगाय बर आने टिकाऊ खाल के एक ठन ओढ़ना बनाईन।
EXO 36:20 ओमन पबितर-तम्बू बर बंबरी लकड़ी के खड़े ढांचामन ला बनाईन।
EXO 36:21 हर एक ढांचा दस क्यूबीट लम्बा अऊ डेड़ क्यूबीट चौड़ा रिहिस,
EXO 36:22 अऊ ओमा एक-दूसर के समानांतर दू-दू ठन खूंटी रिहिन। ओमन पबितर-तम्बू के जम्मो ढांचामन ला इही किसम ले बनाईन।
EXO 36:23 ओमन पबितर-तम्बू के दक्खिन कोति बर बीस ठन ढांचा बनाईन
EXO 36:24 अऊ ओ ढांचामन के खाल्हे म रखे बर चांदी के चालीस ठन आधार बनाईन—हर एक ढांचा बर दू ठन आधार, हर एक खूंटी के खाल्हे म एक ठन आधार।
EXO 36:25 दूसर कोति याने कि पबितर-तम्बू के उत्तर दिग बर ओमन बीस ठन ढांचा
EXO 36:26 अऊ चालीस ठन चांदी के आधार बनाईन—हर एक ढांचा के खाल्हे म दू ठन आधार।
EXO 36:27 ओमन आखिरी छोर याने कि पबितर-तम्बू के पछिम छोर बर छै ठन ढांचा बनाईन
EXO 36:28 अऊ पबितर-तम्बू के कोनटामन बर आखिरी छोर म दू ठन ढांचा बनाईन।
EXO 36:29 ये दूनों कोनटा म ढांचामन खाल्हे ले लेके टीप तक दू परत म रिहिन अऊ एके ठन कड़ा म जुड़े रिहिन; दूनों एक जइसे बने रिहिन।
EXO 36:30 ये किसम ले आठ ठन ढांचा अऊ चांदी के सोलह ठन आधार रिहिस याने कि हर ढांचा के खाल्हे म दू ठन आधार।
EXO 36:31 ओमन बंबरी लकड़ी के मियारमन ला घलो बनाईन: पबितर-तम्बू के एक तरफ के ढांचामन बर पांच ठन मियार,
EXO 36:32 पबितर-तम्बू के दूसर तरफ बर पांच ठन मियार अऊ पबितर-तम्बू के आखिरी छोर म, पछिम तरफ के ढांचामन बर पांच ठन मियार बनाईन।
EXO 36:33 ओमन मांझा के मियार ला अइसने बनाईन कि ओह ढांचामन के बीच म ले होके एक छोर ले दूसर छोर तक पहुंचय।
EXO 36:34 ओमन ढांचामन ला सोन ले मढ़िन अऊ मियारमन ला पकड़े बर सोन के कड़ा बनाईन। ओमन मियारमन ला घलो सोन ले मढ़िन।
EXO 36:35 ओमन नीला, बैंगनी अऊ सिन्दूरी रंग के सूंत अऊ सुघर बंटे मलमल ले परदा बनाईन, जऊन म एक कुसल कारीगर के दुवारा करूबमन के कढ़ई करे गे रिहिस।
EXO 36:36 ओमन येकर बर बंबरी लकड़ी के चार ठन खंभा बनाईन अऊ ओमन ला सोन ले मढ़िन। ओमन बर सोन के खूंटीमन ला बनाईन अऊ ओमन बर चांदी के चार ठन आधार ढालके बनाईन।
EXO 36:37 तम्बू के प्रवेस दुवार बर ओमन नीला, बैंगनी अऊ सिन्दूरी रंग के सूंत अऊ सुघर बंटे मलमल के ओनहा ले एक ठन परदा बनाईन—येला एक कढ़ई करइया ह बनाईस;
EXO 36:38 अऊ ओमन पांच ठन खंभा बनाईन अऊ ओमन बर खूंटी घलो बनाईन। ओमन खंभामन के टीप अऊ ओमन के पट्टामन ला सोन ले मढ़िन अऊ ओमन के पांचों आधार ला कांसा के बनाईन।
EXO 37:1 बसलेल ह बंबरी लकड़ी ले सन्दूक ला बनाईस—जऊन ह अढ़ई क्यूबीट लम्बा अऊ डेड़ क्यूबीट चौड़ा, अऊ डेड़ क्यूबीट ऊंचा रिहिस।
EXO 37:2 ओह ओला भीतर-बाहिर दूनों कोति चोखा सोन ले मढ़िस, अऊ ओकर चारों कोति सोन के एक पट्टी लगाईस।
EXO 37:3 ओह सन्दूक बर चार ठन सोन के कड़ा बनवाके ओमन ला ओकर चारों खुरा म बांध दीस—एक तरफ दू ठन अऊ दूसर तरफ दू ठन।
EXO 37:4 तब ओह डंडामन ला बंबरी लकड़ी के बनाईस अऊ ओमन ला सोन ले मढ़िस।
EXO 37:5 अऊ ओह करार के सन्दूक ला उठाके ले जाय बर डंडामन ला सन्दूक के दूनों कोति कड़ामन म डालिस।
EXO 37:6 फेर बसलेल ह चोखा सोन ले पछताप के ढकना ला बनाईस—जऊन ह अढ़ई क्यूबीट लम्बा अऊ डेड़ क्यूबीट चौड़ा रिहिस।
EXO 37:7 तब ओह ढकना के दूनों छोर बर हथौड़ा ले पीटके सोन के दू ठन करूब बनाईस।
EXO 37:8 ओह एक ठन करूब ला एक छोर म अऊ दूसरा करूब ला दूसर छोर म बनाईस; दूनों छोर म करूबमन अऊ ढकना ला सोन के एके कुटा ले बनाईस।
EXO 37:9 करूबमन के डेनामन ऊपर कोति फईले रहंय, अऊ पछताप के ढकना ह ओमन ले ढंकाय रहय। करूबमन के मुहूं ह एक-दूसर के आमने-सामने रहय अऊ ओमन ढकना कोति देखत रहंय।
EXO 37:10 ओमन बंबरी लकड़ी के एक ठन मेज बनाईन—जऊन ह दू क्यूबीट लम्बा, एक क्यूबीट चौड़ा अऊ डेड़ क्यूबीट ऊंचा रिहिस।
EXO 37:11 तब ओमन ओला चोखा सोन ले मढ़िन अऊ ओकर चारों मुड़ा सोन के एक पट्टी लगाईन।
EXO 37:12 ओमन ओकर चारों कोति हथेली भर चौड़ा एक ठन चक्र बनाईन अऊ ओ चक्र म सोन के एक ठन पट्टी लगाईन।
EXO 37:13 ओमन मेज बर सोन के चार ठन कड़ा बनाईन अऊ ओमन ला ओ चारों कोना म बांध दीन, जिहां चारों खुरामन रिहिन।
EXO 37:14 ये कड़ामन पट्टी के लकठा म लगाय गे रिहिन, ताकि ओमा ओ डंडामन ला फंसाय जा सकय, जेमन के उपयोग मेज ला उठाके ले जाय बर होथे।
EXO 37:15 मेज ला उठाके ले जाय के डंडामन बंबरी लकड़ी के बने रिहिन अऊ ओमन ला सोन ले मढ़े गे रिहिस।
EXO 37:16 मेज ऊपर रखे जाय के सामान ला ओमन चोखा सोन के बनाईन—याने कि येकर थाली, बरतन, कटोरा अऊ पेय-बलिदान ला रितोय बर येकर घघरीमन ला।
EXO 37:17 ओमन चोखा सोन के दीवट बनाईन। ओमन ओकर आधार अऊ मुठिया ला हथौड़ा ले पीटके बनाईन, अऊ ओकर फूल सहीं दिखइया कटोरा, कली अऊ पंखुड़ीमन ला एके ठन कुटा म बनाईन।
EXO 37:18 दीवट के किनारे ले छै ठन डारामन निकले रहंय—तीन ठन डारा एक कोति अऊ तीन ठन दूसर कोति।
EXO 37:19 हर एक डारा म बादाम के फूल सहीं तीन ठन कटोरी, कली अऊ पंखुड़ीमन रिहिन, तीन ठन ओकर बाद वाले डारा म, अऊ अइसनेच दीवट ले निकले जम्मो छै ठन डारा रिहिन।
EXO 37:20 अऊ दीवट म बादाम के फूल सहीं चार ठन कटोरी बने रिहिन अऊ ओमा कली अऊ पंखुड़ीमन रिहिन।
EXO 37:21 दीवट ले निकले छै ठन डारा म ले एक-एक जोड़ी डारा के तरी म एक-एक ठन कली रिहिस—ये किसम ले कुल तीन ठन कली छै ठन डारा के तरी म रिहिन।
EXO 37:22 कली अऊ डारामन ला दीवट के संग एके कुटा म बनाय गे रिहिस, अऊ चोखा सोन ला पीटके येमन ला बनाय गे रिहिस।
EXO 37:23 ओमन येकर सात ठन दीया अऊ संग म ओकर बाती के कतरनी अऊ थालीमन ला चोखा सोन के बनाईन।
EXO 37:24 ओमन दीवट अऊ येकर जम्मो चीजमन ला एक टेलेन्ट चोखा सोन ले बनाईन।
EXO 37:25 ओमन बंबरी लकड़ी ले धूप के बेदी बनाईन। येह वर्गाकार रिहिस, एक क्यूबीट लम्बा, एक क्यूबीट चौड़ा अऊ दू क्यूबीट ऊंचा—अऊ ओकर सींगमन ओ बेदी संग एके कुटा ले बने रिहिन।
EXO 37:26 ओमन बेदी के ऊपर अऊ जम्मो किनारा अऊ सींगमन ला चोखा सोन ले मढ़िन, अऊ येकर चारों कोति सोन के एक किनारी बनाईन।
EXO 37:27 ओमन किनारी के खाल्हे म दू ठन कड़ा बनाईन—दू-दू ठन एक-दूसर के आमने-सामने, ताकि येमा डंडामन ला घुसावंय अऊ उठाके ले जा सकंय।
EXO 37:28 ओमन डंडामन ला बंबरी लकड़ी ले बनाईन अऊ ओमन ला सोन ले मढ़िन।
EXO 37:29 ओमन पबितर अभिसेक के तेल अऊ सुध, खुसबूवाला धूप घलो बनाईन। येह अंतर तेल बनानेवाला के काम रिहिस।
EXO 38:1 फेर ओमन बंबरी लकड़ी ले होम-बलिदान के बेदी ला बनाईन, जेकर ऊंचई तीन क्यूबीट रिहिस; अऊ येह वर्गाकार रिहिस—पांच क्यूबीट लम्बा अऊ पांच क्यूबीट चौड़ा।
EXO 38:2 ओमन चारों कोनटा म एक-एक ठन सींग बनाईन, अऊ ये सींग अऊ बेदी एके कुटा म बने रिहिन, अऊ ओमन बेदी ला कांसा ले मढ़िन।
EXO 38:3 ओमन येकर जम्मो बरतन ला कांसा के बनाईन—बरतन, बेलचा, छिंचे के कटोरा, मांस बर कांटा अऊ आगी हेरे बर करछूल।
EXO 38:4 बेदी बर, ओकर चारों कोति के कंगनी के खाल्हे, ओमन कांसा के जाली के एक छननी बनाईन, जऊन ह बेदी के आधा ऊंचई तक लगे रिहिस।
EXO 38:5 ओमन कांसा के छननी के चारों कोना म चार ठन कड़ा लगाईन, ताकि येमा डंडामन ला फंसाय जा सकय।
EXO 38:6 ओमन बंबरी लकड़ी के डंडा बनाईन अऊ ओ डंडामन म कांसा मढ़िन।
EXO 38:7 ओमन डंडामन ला कड़ा म घुसाईन, ताकि बेदी ला उठाके ले जाय बर येमन बाजू ले निकले रहंय। बेदी ह भीतर ले खोखला रिहिस अऊ येह तखतामन ले बने रिहिस।
EXO 38:8 ओमन तसला अऊ ओकर पाया ला कांसा के बनाईन अऊ येमन ला ओ माईलोगन के दरपनमन ले बनाय गीस, जऊन मन मिलापवाला तम्बू के प्रवेस दुवार करा सेवा करंय।
EXO 38:9 ओकर बाद ओमन अंगना ला बनाईन। दक्खिन कोति अंगना ह एक सौ क्यूबीट लम्बा रिहिस अऊ ओमा सुघर बंटाय मलमल के परदा रिहिस,
EXO 38:10 येकर बीस ठन खंभा अऊ बीस ठन कांसा के आधारमन रिहिन, अऊ खंभामन म चांदी के कांटा अऊ पट्टीमन लगे रिहिन।
EXO 38:11 उत्तर कोति घलो अंगना ह एक सौ क्यूबीट लम्बा रिहिस अऊ येकर बर बीस ठन खंभा अऊ बीस ठन कांसा के आधारमन रिहिन; खंभामन के हुक अऊ पट्टीमन चांदी के रिहिन।
EXO 38:12 अंगना के पछिमी छोर ह पचास क्यूबीट चौड़ा रिहिस अऊ ओती के परदा म दस ठन खंभा अऊ दस ठन आधार रिहिन अऊ खंभामन म फंसाय के चांदी के कांटा अऊ पट्टी लगे रिहिन।
EXO 38:13 पूरबी छोर म, सूरज निकले कोति घलो अंगना ह पचास क्यूबीट चौड़ा रिहिस।
EXO 38:14 प्रवेस दुवार के एक तरफ परदा के लम्बई पंदरह क्यूबीट रिहिस अऊ ओकर बर तीन ठन खंभा अऊ तीन ठन आधार बनाय गे रिहिस,
EXO 38:15 अऊ अंगना के प्रवेस दुवार के दूसर तरफ घलो पंदरह क्यूबीट लम्बा परदा रिहिस, जेकर बर तीन ठन खंभा अऊ तीन ठन आधार बनाय गे रिहिस।
EXO 38:16 अंगना के चारों कोति के परदामन सुघर बंटाय मलमल के बने रिहिन।
EXO 38:17 खंभामन के आधारमन कांसा के रिहिन। खंभा म फंसाय के कांटा अऊ पट्टीमन चांदी के रिहिन, अऊ ओमन के ऊपर के भाग ला चांदी ले मढ़े गे रिहिस; ये किसम ले अंगना के जम्मो खंभा म चांदी के पट्टी रिहिस।
EXO 38:18 अंगना के प्रवेस दुवार के परदा ह नीला, बैंगनी अऊ सिन्दूरी रंग के सूंत अऊ सुघर बंटे मलमल के कपड़ा ले बने रिहिस—येह कढ़ई करनेवाला के काम रिहिस। येह बीस क्यूबीट लम्बा अऊ अंगना के परदामन सहीं पांच क्यूबीट ऊंच रिहिस;
EXO 38:19 येमा चार ठन खंभा अऊ कांसा के चार ठन आधार रिहिन। ओमन के फंसाय के कांटा अऊ पट्टामन चांदी के रिहिन, अऊ ओमन के ऊपर के भागमन चांदी ले मढ़े रिहिस।
EXO 38:20 पबितर-तम्बू के जम्मो खूंटी अऊ अंगना के चारों कोति के खूंटीमन कांसा के रिहिन।
EXO 38:21 मूसा के हुकूम ले पबितर-तम्बू, करार के कानून के पबितर-तम्बू बर उपयोग म लाय गय सामान के मात्रा ला लिखे गीस अऊ येला हारून पुरोहित के बेटा ईतामार के निरदेस म लेवीमन लिखिन।
EXO 38:22 (जऊन चीजमन ला बनाय के हुकूम यहोवा ह मूसा ला देय रिहिस, ओ जम्मो चीज ला यहूदा के बंस के बसलेल ह बनाईस, जऊन ह ऊरी के बेटा अऊ हूर के पोता रिहिस;
EXO 38:23 अऊ ओकर संग दान के बंस के अहीसामाक के बेटा ओहोलीआब रिहिस, जऊन ह एक नक्कासी करनेवाला, सिल्पकार अऊ नीला, बैंगनी अऊ सिन्दूरी सूंत अऊ उत्तम मलमल के कपड़ा म कढ़ई के काम करे म माहिर रिहिस।)
EXO 38:24 पबितर-स्थान म जम्मो काम म उपयोग करे बर जऊन सोन हलाय-बलिदान म चघाय गे रिहिस, ओकर मात्रा पबितर-स्थान के सेकेल के मुताबिक 29 टेलेन्ट अऊ 730 सेकेल रिहिस।
EXO 38:25 समाज के मनखेमन ले जऊन चांदी मिले रिहिस, ओकर गनती पबितर-स्थान के सेकेल के मुताबिक 100 टेलेन्ट अऊ 1,775 सेकेल रिहिस—
EXO 38:26 जऊन इसरायलीमन बीस साल ले जादा उमर के रिहिन, ओमन के संखिया 6,03,550 रिहिस, अऊ ओमा के हर एक जन पबितर-स्थान के सेकेल के मुताबिक आधा सेकेल याने कि एक बेका दीन।
EXO 38:27 पबितर-स्थान के आधार अऊ परदा बर चांदी के 100 टेलेन्ट उपयोग होय रिहिस—100 ठन आधार 100 टेलेन्ट ले बनिस, एक ठन आधार बर एक टेलेन्ट लगिस।
EXO 38:28 जऊन 1,775 सेकेल चांदी बच गीस, ओकर ले खंभामन बर फंसाय के कांटा बनाईन अऊ खंभामन के ऊपरी भाग ला मढ़िन अऊ ओमन के पट्टी घलो बनाईन।
EXO 38:29 हलाय-बलिदान म चघाय गे कांसा लगभग 70 टेलेन्ट अऊ 2,400 सेकेल रिहिस।
EXO 38:30 ओमन ओकर ले मिलापवाला तम्बू के प्रवेस दुवार बर आधार, कांसा के बेदी अऊ ओकर कांसा के जाली अऊ बेदी के जम्मो बरतन,
EXO 38:31 अंगना के चारों कोति के आधार अऊ ओकर प्रवेस दुवार के आधार अऊ पबितर-तम्बू के जम्मो खीला अऊ अंगना के चारों कोति के खीलामन ला बनाईन।
EXO 39:1 ओमन पबितर-स्थान म सेवा करइयामन बर नीला, बैंगनी, अऊ सिन्दूरी रंग के सूंत ले बुने पहिरावा बनाईन। जइसे यहोवा ह मूसा ला हुकूम दे रिहिस, ओकर मुताबिक ओमन हारून बर घलो पबितर पहिरावा बनाईन।
EXO 39:2 ओमन सोन अऊ नीला, बैंगनी अऊ सिन्दूरी रंग के सूंत, अऊ सुघर बंटाय मलमल के कपड़ा ले एपोद बनाईन।
EXO 39:3 ओमन सोन के पातर चद्दर ला पीटके काटिन अऊ ओकर तार बनाईन, ताकि येला नीला, बैंगनी अऊ सिन्दूरी रंग के सूंत अऊ सुघर मलमल के कपड़ा म बुने जा सकय—येह कुसल कारीगर के दुवारा बनाय गे रिहिस।
EXO 39:4 ओमन एपोद बर कंधा के टुकड़ामन ला बनाईन, जेमन येकर दू ठन कोना म जुड़े रहंय, ताकि येला बांधे जा सकय।
EXO 39:5 येकर कुसलता से बुने गय कमरबंध ला एपोद के संग एके टुकड़ा म बनाय गे रिहिस अऊ येह सोन, अऊ नीला, बैंगनी अऊ सिन्दूरी रंग के सूंत, अऊ सुघर बंटाय मलमल के सूंत ले बने रिहिस, जइसे कि यहोवा ह मूसा ला हुकूम दे रिहिस।
EXO 39:6 ओमन गोमेदक के रत्नमन ला सोन के जरी म जड़िन अऊ ओमा इसरायल के बेटामन के नांव मुहर सहीं खोदके लगा दीन।
EXO 39:7 तब ओमन, ओमन ला इसरायल के बेटामन बर यादगार पथरा के रूप म एपोद के कंधावाले टुकड़ा म बांध दीन, जइसे कि यहोवा ह मूसा ला हुकूम दे रिहिस।
EXO 39:8 ओमन छातीबंध ला बनाईन—येह एक कुसल कारीगर के काम रिहिस। ओमन येला एपोद के सहीं सोन, अऊ नीला, बैंगनी अऊ सिन्दूरी रंग के सूंत, अऊ सुघर बंटे मलमल के बनाईन।
EXO 39:9 येह चौकोर रिहिस—एक स्पान लम्बा अऊ एक स्पान चौड़ा—अऊ दू बार मुड़े रिहिस।
EXO 39:10 तब ओमन येमा चार ठन कतार म कीमती पथरा लगाईन। पहिली कतार म मानिक, पुखराज अऊ पन्ना लगाईन;
EXO 39:11 दूसर कतार म मरकत, नीलमनि हीरा अऊ पन्ना लगाईन;
EXO 39:12 तीसर कतार म नारंगी रंग के लसम, सूर्यकांत अऊ नीलम;
EXO 39:13 अऊ चौथा कतार म फिरोजा, गोमेदक अऊ यसब लगाईन; येमन ला जरी के काम करे गे सोन म जड़िन।
EXO 39:14 उहां बारह ठन पथरा रिहिन; याने कि इसरायल के बेटामन के हर एक नांव बर एक-एक ठन पथरा रिहिस; हर एक म इसरायल के बारह गोत्र के एक-एक नांव ला मुहर के सहीं खोदे गे रिहिस।
EXO 39:15 छातीबंध म, ओमन डोरी के सहीं चोखा सोन के गुंथे गय जंजीर बनाईन।
EXO 39:16 ओमन सोन के काम करे दू ठन जाली अऊ दू ठन सोन के छल्ला बनाईन, अऊ ओ छल्लामन ला छातीबंध के दूनों कोनटा म बांध दीन।
EXO 39:17 ओमन सोन के दूनों जंजीर ला छातीबंध के कोनटामन म ओ छल्लामन के संग बांध दीन,
EXO 39:18 अऊ जंजीरमन के दूसर छोरमन ला दूनों खानामन म बांध दीन, अऊ येमन सामने म एपोद के कंधावाले टुकड़ा म जुड़े रिहिन।
EXO 39:19 ओमन सोन के दू ठन छल्ला बनाके ओमन ला छातीबंध के आने दूनों कोनटा के भीतरी किनारा म एपोद ले संटके लगाईन।
EXO 39:20 तब ओमन सोन के अऊ दू ठन छल्ला बनाईन अऊ ओमन ला एपोद के सामने म कंधा के टुकड़ामन के खाल्हे म जोड़िन; येमन एपोद के कमरबंध के ऊपर जोड़ के लकठा म रिहिन।
EXO 39:21 ओमन छातीबंध के छल्लामन ला एपोद के छल्लामन ले बांध दीन अऊ येला कमरबंध ले जोड़त नीला डोरी ले बांधे गीस, ताकि छातीबंध ह एपोद के बाहिर झन ओरमय। ये जम्मो काम यहोवा के दुवारा मूसा ला दिये गय हुकूम के मुताबिक करे गीस।
EXO 39:22 ओमन एपोद के खाल्हे के लबादा ला पूरा नीला रंग के कपड़ा ले बनाईन—येह एक बुनकर के काम रिहिस—
EXO 39:23 गला के पट्टी के छेदा सहीं, ये कपड़ा के बीच म एक छेदा रहय, अऊ ये छेदा के चारों कोति एक पट्टी लगे रहय, ताकि येह झन चिरावय।
EXO 39:24 ओमन ये कपड़ा के खाल्हे के घेरा के चारों कोति नीला, बैंगनी अऊ सिन्दूरी रंग के सूंत अऊ सुघर बंटाय मलमल के सूंत ले अनार बनाईन।
EXO 39:25 अऊ ओमन चोखा सोन के घंटीमन ला बनाईन अऊ ओमन ला खाल्हे के घेरा के चारों कोति अनारमन के बीच म जोड़ दीन।
EXO 39:26 लबादा के खाल्हे के घेरा के चारों कोति घंटी अऊ अनारमन ला एक के बाद एक बनाय गे रिहिस ताकि येला पहिरके सेवा के काम करंय, जइसे कि यहोवा ह मूसा ला हुकूम दे रिहिस।
EXO 39:27 हारून अऊ ओकर बेटामन बर, ओमन सुघर मलमल के कुरता बनाईन; येह एक बुनकर के काम रिहिस—
EXO 39:28 अऊ सुघर मलमल के पागा, मलमल के टोपी अऊ महिन बराय मलमल के कच्छा बनाईन।
EXO 39:29 पटका ह महिन बराय मलमल अऊ नीला, बैंगनी अऊ सिन्दूरी रंग के सूंत ले बने रिहिस—येह एक कढ़ई करनेवाला के काम रिहिस—जइसे कि यहोवा ह मूसा ला हुकूम दे रिहिस।
EXO 39:30 ओमन तस्तरी, पबितर प्रतीक ला चोखा सोन के बनाईन अऊ मुहर म खोदे लिखावट सहीं येमा खोदके ये लिखिन: यहोवा बर पबितर।
EXO 39:31 तब ओमन पागा म जोड़े बर ओमा एक ठन नीला डोरी बांधिन, जइसे कि यहोवा ह मूसा ला हुकूम दे रिहिस।
EXO 39:32 ये किसम ले पबितर-तम्बू, मिलापवाला तम्बू के जम्मो काम पूरा होईस। इसरायलीमन ओ जम्मो काम करिन, जेला करे बर यहोवा ह मूसा ला हुकूम दे रिहिस।
EXO 39:33 तब ओमन पबितर-तम्बू ला मूसा करा लानिन: तम्बू अऊ येकर सामान, येला जकड़के रखइया सामान, ढांचा, बल्ली, खंभा अऊ आधारमन;
EXO 39:34 लाल रंग ले रंगाय मेढ़ा के खाल के ओढ़ना अऊ आने टिकाऊ खाल के ओढ़ना अऊ आड़ करइया परदा;
EXO 39:35 करार कानून के सन्दूक के संग येकर डंडामन अऊ पछताप के ढकना;
EXO 39:36 मेज के संग येकर जम्मो सामान अऊ चघावा के रोटी;
EXO 39:37 चोखा सोन के दीवट के संग येकर दीयामन के कतार अऊ येकर जम्मो सामान, अऊ अंजोर करे बर जैतून तेल;
EXO 39:38 सोन के बेदी, अभिसेक के तेल, सुगंधित धूप, अऊ तम्बू के प्रवेस दुवार बर परदा;
EXO 39:39 कांसा के बेदी के संग येकर कांसा के जाली, येकर डंडा अऊ येकर जम्मो बरतन; तसला अऊ येकर पाया;
EXO 39:40 अंगना के परदामन के संग ओकर खंभा अऊ आधारमन, अऊ अंगना के प्रवेस दुवार के परदा; रस्सी अऊ अंगना बर तम्बू के खूंटीमन; पबितर-तम्बू, मिलापवाला तम्बू बर जम्मो सामान;
EXO 39:41 अऊ पबितर-स्थान म सेवा-टहल करे बर बुने गय पहिरावा, येमा हारून पुरोहित के पबितर पहिरावा अऊ ओकर बेटामन के पहिरावा रिहिस, जेला पुरोहित के रूप म सेवा करत बेरा ओमन ला पहिरना रिहिस।
EXO 39:42 यहोवा ह जइसे हुकूम मूसा ला दे रिहिस, ओकर मुताबिक ही इसरायलीमन जम्मो काम ला करिन।
EXO 39:43 मूसा ह ओ जम्मो काम के जांच करिस अऊ देखिस कि ओमन बिलकुल वइसे ही करे रिहिन, जइसे यहोवा ह हुकूम दे रिहिस। तब मूसा ह ओमन ला आसीस दीस।
EXO 40:1 तब यहोवा ह मूसा ला कहिस:
EXO 40:2 “पहिला महिना के पहिला दिन पबितर-तम्बू याने कि मिलापवाला तम्बू ला ठाढ़ कर।
EXO 40:3 ओमा करार कानून के सन्दूक ला रख दे अऊ सन्दूक ला परदा के ओधा म कर दे।
EXO 40:4 मेज ला भीतर ले आ अऊ ओकर सामान ला सजा दे। तब दीवट ला लान अऊ येकर दीयामन ला बार दे।
EXO 40:5 धूपवाला सोन के बेदी ला करार कानून के सन्दूक के आघू म रख अऊ पबितर-तम्बू के प्रवेस दुवार करा परदा ला लगा दे।
EXO 40:6 “पबितर-तम्बू, मिलापवाला तम्बू के प्रवेस दुवार के आघू म होम-बलिदान के बेदी ला रख;
EXO 40:7 मिलापवाला तम्बू अऊ बेदी के बीच म तसला ला रख अऊ ओमा पानी भर दे।
EXO 40:8 येकर चारों कोति अंगना ला स्थापित कर अऊ अंगना के प्रवेस दुवार म परदा लगा दे।
EXO 40:9 “फेर अभिसेक करे के तेल ला लेके पबितर-तम्बू अऊ येमा के हर एक चीज ला अभिसेक कर; पबितर कर अऊ येकर जम्मो सामान अऊ येह पबितर हो जाही।
EXO 40:10 तब होम-बलिदान के बेदी अऊ येकर जम्मो बरतन ला अभिसेक कर; बेदी ला पबितर कर, अऊ येह महा पबितर हो जाही।
EXO 40:11 तसला अऊ येकर पाया ला अभिसेक कर अऊ ओमन ला पबितर कर।
EXO 40:12 “हारून अऊ ओकर बेटामन ला मिलापवाला तम्बू के प्रवेस दुवार म लान अऊ ओमन ला पानी ले नहवा।
EXO 40:13 तब हारून ला पबितर पहिरावा ला पहिरा, ओकर अभिसेक कर अऊ ओला पबितर कर, ताकि ओह पुरोहित के रूप म मोर सेवा करे।
EXO 40:14 फेर ओकर बेटामन ला लानके ओमन ला कुरता पहिरा।
EXO 40:15 अऊ ओमन के अभिसेक घलो वइसे ही कर, जइसे ओमन के ददा के करे रहय, ताकि ओमन पुरोहित के रूप म मोर सेवा करंय। ओमन के अभिसेक ह एक पुरोहित के पद बर होही, जऊन ह ओमन के पीढ़ी-पीढ़ी तक चलही।”
EXO 40:16 मूसा ह ओ जम्मो काम वइसने ही करिस, जइसने यहोवा ह ओला करे के हुकूम दे रिहिस।
EXO 40:17 ये किसम ले, मिसर ला छोंड़े के दूसरा साल के पहिला महिना के पहिला दिन पबितर-तम्बू ला स्थापित करे गीस।
EXO 40:18 जब मूसा ह पबितर-तम्बू ला स्थापित करिस, त ओह आधारमन ला जगह म रखिस, ढांचामन ला खड़े करिस, छड़मन ला बईठाईस अऊ खंभामन ला खड़े करिस।
EXO 40:19 तब ओह पबितर-तम्बू के ऊपर तम्बू ला फईलाईस अऊ तम्बू के ऊपर ओढ़ना ला लगाईस, जइसे कि यहोवा ह ओला हुकूम दे रिहिस।
EXO 40:20 ओह करार कानून के पटियामन ला लीस अऊ ओमन ला सन्दूक म रखिस, अऊ सन्दूक म डंडामन ला लगाके ओकर ऊपर पछताप के ढकना ला धर दीस।
EXO 40:21 तब ओह पबितर-तम्बू म सन्दूक ला लानिस अऊ ओधा करइया परदा ला टांग दीस अऊ करार कानून के सन्दूक ला आड़ करिस, जइसे कि यहोवा ह मूसा ला हुकूम दे रिहिस।
EXO 40:22 मूसा ह मेज ला मिलापवाला तम्बू म परदा के बाहिर पबितर-तम्बू के उत्तर दिग म रखिस
EXO 40:23 अऊ रोटी ला ओकर ऊपर यहोवा के आघू म सजाके रखिस, जइसे कि यहोवा ह ओला हुकूम दे रिहिस।
EXO 40:24 ओह दीवट ला मिलापवाला तम्बू म मेज के सामने पबितर-तम्बू के दक्खिन कोति रखिस
EXO 40:25 अऊ यहोवा के आघू म दीयामन ला बार दीस, जइसे कि यहोवा ह ओला हुकूम दे रिहिस।
EXO 40:26 मूसा ह सोन के बेदी ला मिलापवाला तम्बू म परदा के सामने म रखिस
EXO 40:27 अऊ खुसबूवाला धूप ला ओमा जलाईस, जइसे कि यहोवा ह ओला हुकूम दे रिहिस।
EXO 40:28 तब ओह परदा ला पबितर-तम्बू के प्रवेस दुवार म लगाईस।
EXO 40:29 ओह होम-बलिदान के बेदी ला पबितर-तम्बू, मिलापवाला तम्बू के प्रवेस दुवार के लकठा म रखिस, अऊ ओमा होम-बलिदान अऊ अन्न-बलिदान चघाईस, जइसे कि यहोवा ह ओला हुकूम दे रिहिस।
EXO 40:30 ओह तसला ला मिलापवाला तम्बू अऊ बेदी के बीच म रखिस अऊ धोये बर ओमा पानी भर दीस,
EXO 40:31 अऊ मूसा अऊ हारून अऊ ओकर बेटामन अपन हांथ अऊ गोड़ ला धोये बर ओकर उपयोग करंय।
EXO 40:32 जब भी ओमन मिलापवाला तम्बू म या बेदी करा जावंय, तब ओमन अपन हांथ-गोड़ ला धोके जावंय, जइसे कि यहोवा ह मूसा ला हुकूम दे रिहिस।
EXO 40:33 तब मूसा ह पबितर-तम्बू अऊ बेदी के चारों कोति अंगना ला लगाईस अऊ अंगना के प्रवेस दुवार करा परदा लगाईस। अऊ ये किसम ले मूसा ह काम ला पूरा करिस।
EXO 40:34 तब बादर ह मिलापवाला तम्बू ला ढंक लीस, अऊ यहोवा के महिमा ह पबितर-तम्बू म भर गीस।
EXO 40:35 मूसा ह मिलापवाला तम्बू के भीतर जा नइं सकिस काबरकि बादर ह येकर ऊपर छाय रिहिस, अऊ यहोवा के महिमा ले पबितर-तम्बू ह भर गीस।
EXO 40:36 इसरायलीमन के पूरा यातरा म जब भी बादर ह पबितर-तम्बू के ऊपर ले उठ जावय, तब ओमन आघू बढ़ंय;
EXO 40:37 पर यदि बादर ह पबितर-तम्बू के ऊपर ले नइं उठय, त ओमन ओ जगह ला तब तक नइं छोंड़ंय, जब तक कि बादर ह उठ नइं जावय।
EXO 40:38 ये किसम ले इसरायलीमन के पूरा यातरा के बेरा ओ जम्मो के नजर म यहोवा के बादर ह दिन के बेरा पबितर-तम्बू के ऊपर, अऊ रथिया के बेरा ओ बादर म आगी दिखय।
LEV 1:1 यहोवा ह मूसा ला बलाईस अऊ मिलापवाला तम्बू ले ओला कहिस,
LEV 1:2 “इसरायलीमन ले गोठिया अऊ ओमन ला ये कह: ‘जब तुमन म ले कोनो मनखे यहोवा बर कोनो बलिदान चघाय बर लानथे, त ओह बलिदान के रूप म कोनो पसु ला, गाय-बईला या भेड़-बकरी के झुंड म ले लेके आवय।
LEV 1:3 “ ‘कहूं बलिदान ह गाय-बईला के झुंड म ले होम-बलिदान ए, त तें निरदोस नर पसु ला बलिदान करबे। ये बलिदान ह मिलापवाला तम्बू के प्रवेस दुवार म चघाय जावय, ताकि यहोवा ह येला गरहन करय।
LEV 1:4 तें अपन हांथ ओ होम-बलिदान के पसु के मुड़ ऊपर रखबे, त ये बलिदान ह तोर कोति ले तोर पछतावा के रूप म गरहन करे जाही।
LEV 1:5 तेंह यहोवा के आघू म बछवा ला बलि करबे, अऊ तब हारून के बेटामन, जऊन मन पुरोहित अंय, ओकर लहू ला लानहीं अऊ ओ बेदी के चारों कोति छिंचहीं, जऊन ह मिलापवाला तम्बू के प्रवेस दुवार म हवय।
LEV 1:6 तब तें होम-बलिदान करे गे ओ पसु के चमड़ी ला निकाल देबे अऊ ओ पसु के कुटा-कुटा कर देबे।
LEV 1:7 हारून पुरोहित के बेटामन बेदी म आगी जलाहीं अऊ आगी ऊपर लकरी ला रचहीं।
LEV 1:8 तब हारून के ओ बेटामन, जऊन मन पुरोहित अंय, ओ पसु के कुटामन ला मुड़ अऊ चरबी समेत बेदी ऊपर बरत लकरी म रखहीं।
LEV 1:9 तेंह ओ पसु के पेट भीतर के चीजमन ला अऊ गोड़मन ला पानी म धो डारबे, अऊ पुरोहित ह ये जम्मो ला बेदी म जला देवय। येह यहोवा बर एक महकत सुख-देवइया, एक होम-बलिदान, अऊ एक जेवन-बलिदान होही।
LEV 1:10 “ ‘कहूं बलिदान ह भेड़-बकरी के झुंड म ले एक होम-बलिदान अय, त तें भेड़ या बोकरा म ले बिगर दोसवाला नर ला बलिदान करबे।
LEV 1:11 तेंह येला बेदी के उत्तर कोति यहोवा के आघू म बलि करबे, अऊ हारून के बेटामन, जऊन मन पुरोहित अंय, ओकर लहू ला बेदी के चारों कोति छिंचहीं।
LEV 1:12 तब तें ओ पसु के कुटा-कुटा कर देबे, अऊ पुरोहित ह ओ पसु के कुटामन ला मुड़ अऊ चरबी समेत बेदी ऊपर बरत लकरी म रखय।
LEV 1:13 तेंह ओ पसु के पेट भीतर के अंगमन ला अऊ गोड़मन ला पानी म धो डारबे, अऊ पुरोहित ह ओ जम्मो ला लानके बेदी म जला देवय। येह यहोवा बर एक महकत सुख-देवइया, एक होम-बलिदान, अऊ एक जेवन-बलिदान होही।
LEV 1:14 “ ‘कहूं यहोवा बर बलिदान ह चिरई के होम-बलिदान अय, त तें पंड़की या परेवा पीला के बलिदान चघाबे।
LEV 1:15 पुरोहित ह ओला बेदी म लानय अऊ ओकर घेंच ला मुरकेट के मुड़ ला अलग करय अऊ ओला बेदी म जलावय; ओकर लहू ला बेदी के बाजू म गिरावय।
LEV 1:16 ओह घेंच के थैली अऊ पांखी ला निकालय अऊ ओमन ला बेदी के पूरब कोति राख डारे के जगह म फटिक देवय।
LEV 1:17 तब ओह दूनों डेना ला धरके चीरय, पर पूरा अलग झन करय, अऊ तब पुरोहित ह ओला बेदी म रखके बरत लकरी म जलावय। येह यहोवा बर एक महकत सुख-देवइया, एक होम-बलिदान अऊ एक जेवन-बलिदान होही।
LEV 2:1 “ ‘जब कोनो मनखे यहोवा करा अन्न-बलिदान लानथे, त ओकर बलिदान ह बहुंत चिक्कन पीसान के होना चाही। ओह ओकर ऊपर जैतून तेल डारके ओमा धूप घलो रखय,
LEV 2:2 अऊ ओला हारून के ओ बेटामन करा ले जावय, जऊन मन पुरोहित अंय। पुरोहित ह ओ तेल अऊ धूप मिले मैदा ला एक मुठा भरके निकालय, अऊ ओला एक सुरता-देवइया हिस्सा के रूप म बेदी म जलावय कि येह यहोवा बर एक महकत सुख-देवइया, अन्न-बलिदान ठहिरय।
LEV 2:3 बाकि बांचे अन्न-बलिदान ह हारून अऊ ओकर बेटामन के अय; येह जेवन-बलिदान के सबले पबितर भाग अय, जेला यहोवा ला चघाय जाथे।
LEV 2:4 “ ‘यदि तें भट्ठी म पके अन्न-बलिदान लानथस, त येह बहुंत चिक्कन पीसान के होना चाही: येह जैतून तेल म सनाय अखमीरी मोटा रोटी होवय या फेर जैतून तेल म चुपराय अखमीरी पातर रोटी होवय।
LEV 2:5 यदि तुम्हर अन्न-बलिदान ह तवा म पके हवय, त येह तेल म सनाय बहुंत चिक्कन पीसान के बने अखमीरी रोटी होवय।
LEV 2:6 तुमन ओला कुटा-कुटा करके ओकर ऊपर तेल डारव; येह एक अन्न-बलिदान अय।
LEV 2:7 कहूं तुम्हर अन्न-बलिदान ह कढ़ई म चुरे हवय, त ओला बहुंत चिक्कन पीसान अऊ थोरकन तेल म बनाय जावय।
LEV 2:8 ये चीजमन ले बने अन्न-बलिदान ला यहोवा करा लानव; ओला पुरोहित ला सऊंप देवव अऊ पुरोहित ह ओला बेदी मेर ले जावय।
LEV 2:9 पुरोहित ह अन्न-बलिदान म ले सुरता-देवइया हिस्सा ला निकालय अऊ ओला बेदी म जला देवय कि ओह यहोवा बर एक महकत सुख-देवइया, जेवन-बलिदान ठहिरय।
LEV 2:10 बाकि बांचे अन्न-बलिदान ह हारून अऊ ओकर बेटामन के अय; येह जेवन-बलिदान के सबले पबितर भाग अय, जेला यहोवा ला चघाय जाथे।
LEV 2:11 “ ‘यहोवा करा लाने गय हर एक अन्न-बलिदान बिगर खमीर के बनाय जावय, काबरकि यहोवा ला चघाय जेवन-बलिदान म, तुमन ला कोनो खमीर या मंधरस जलाना नइं ए।
LEV 2:12 तुमन येमन ला पहिली फर के बलिदान के रूप म यहोवा करा लान सकत हव, पर ओमन ला एक महकत सुख-देवइया बलिदान के रूप म बेदी ऊपर झन चघाय जावय।
LEV 2:13 अपन जम्मो अन्न-बलिदान ला नूनचूर करव। अपन परमेसर के संग बांधे करार के नून ला अपन अन्न-बलिदान ले अलग झन करव; अपन जम्मो बलिदान म नून मिलावव।
LEV 2:14 “ ‘कहूं तुमन पहिली-फसल के अन्न-बलिदान यहोवा करा लानथव, त आगी म भूंजे नवां अनाज के कुचरे बालीमन ला अन्न-बलिदान करव।
LEV 2:15 तुमन येमा तेल अऊ धूप डारव; येह एक अन्न-बलिदान ए।
LEV 2:16 तब पुरोहित ह तेल अऊ जम्मो धूप के संग कुचरे अनाज के सुरता-देवइया हिस्सा ला जला देवय कि येह यहोवा बर जेवन-बलिदान ठहिरय।
LEV 3:1 “ ‘कहूं तुम्हर चढ़ावा ह मेल-बलिदान ए, अऊ ओला बरदी म ले चघावव, चाहे ओह नर या मादा होवय, त यहोवा के आघू म निरदोस पसु ला ही चघावव।
LEV 3:2 ओह अपन हांथ ला चढ़ावा पसु के मुड़ म मढ़ावय अऊ ओला मिलापवाला तम्बू के प्रवेस दुवार म पूजय; फेर हारून के बेटा, जऊन मन पुरोहित अंय, ओकर लहू ला बेदी के ऊपर जम्मो कोति छिंच देवंय।
LEV 3:3 अऊ ओह मेल-बलिदान के चढ़ावा म ले यहोवा बर होम-बलिदान करय याने ओ चरबी जेकर ले पोटामन ढंकाय रहिथे अऊ ओ जम्मो चरबी जेकर ले पोटामन लपटाय रहिथें,
LEV 3:4 अऊ दूनों गुरदा अऊ ओमन के ऊपर के चरबी जऊन ह कनिहां के तीर म रहिथे, अऊ गुरदा समेत करेजा के सबले बने भाग, ये जम्मो ला ओह अलग करय।
LEV 3:5 हारून के बेटामन ये जम्मो ला बेदी म ओ होम-बलिदान के ऊपर जला देवंय, जऊन ह आगी के ऊपर के लकरी म हवय। येह यहोवा बर महकत सुख-देवइया एक जेवन-बलिदान ठहिरही।
LEV 3:6 “ ‘कहूं तेंह यहोवा बर कोनो पसु म ले मेल-बलिदान चघाथस, त ओ चढ़ावा ह बिगर दोसवाला नर या मादा पसु हो।
LEV 3:7 कहूं तेंह मेढ़ा-पीला चघावत हस, त ओ चढ़ावा ला यहोवा के आघू म चघा।
LEV 3:8 मिलापवाला तम्बू के आघू म अपन हांथ ला चढ़ावा पसु के मुड़ ऊपर मढ़ाके ओला पूज दे। फेर हारून के बेटामन ओकर लहू ला बेदी म चारों कोति छिंचंय।
LEV 3:9 तें मेल-बलिदान म ले यहोवा बर एक जेवन-बलिदान लान: येह चरबी अय, याने कि मंझरेटा हाड़ा के तीर ले अलग करे गय चरबी भरे पुंछी, अऊ ओ चरबी जेकर ले पोटामन तोपाय रहिथें, अऊ ओ जम्मो चरबी जऊन ह पोटामन म लपटाय रहिथे।
LEV 3:10 अऊ दूनों गुरदा अऊ ओकर ऊपर के चरबी जऊन ह कनिहां के तीर म रहिथे अऊ गुरदा समेत करेजा के सबले बने भाग, ये जम्मो ला तेंह अलग करबे।
LEV 3:11 अऊ पुरोहित ह येमन ला लेके बेदी म जलावय; येह यहोवा बर एक जेवन-बलिदान ठहिरही।
LEV 3:12 “ ‘कहूं तोर चढ़ावा ह बोकरा होवय, त ओला यहोवा के आघू म चघा।
LEV 3:13 तेंह मिलापवाला तम्बू के आघू म चढ़ावा पसु के मुड़ म अपन हांथ ला मढ़ाके ओला पूज दे, अऊ हारून के बेटामन ओकर लहू ला बेदी म जम्मो कोति छिंच देवंय।
LEV 3:14 तें ओमा ले अपन चढ़ावा ला यहोवा बर जेवन-बलिदान करके चघा, याने ओ चरबी जेकर ले पोटामन तोपाय रहिथें, अऊ ओ जम्मो चरबी जऊन ह पोटामन म लपटाय रहिथे,
LEV 3:15 अऊ दूनों गुरदा अऊ ओकर ऊपर के चरबी जऊन ह कनिहां के तीर म रहिथे, अऊ गुरदा समेत करेजा के सबले बने भाग, ये जम्मो ला तेंह अलग करबे।
LEV 3:16 तब पुरोहित ह ओमन ला बेदी म जेवन-बलिदान के रूप म जलावय; येह सुख-देवइया सुगंध ठहिरय। जम्मो चरबी ह यहोवा के ही अय।
LEV 3:17 “ ‘जिहां कहूं भी तुमन रहव, येह अवइया पीढ़ी-पीढ़ी बर हमेसा के एक बिधि ठहिरय। तुमन चरबी अऊ लहू ला कभू झन खाहू।’ ”
LEV 4:1 फेर यहोवा ह मूसा ला कहिस,
LEV 4:2 “इसरायलीमन ला ये कह: ‘जब कोनो अनजाने म कोनो पाप करथे अऊ ओ काम करथे, जऊन ह यहोवा के कोनो हुकूम के बिरूध अय—
LEV 4:3 “ ‘कहूं अभिसिक्त पुरोहित ह अइसने पाप करय, जेकर ले मनखेमन दोसी ठहिरंय, त अपन पाप के खातिर, ओह यहोवा करा एक निरदोस बछवा पाप-बलिदान के रूप म लानय।
LEV 4:4 ओह ओ बछवा ला मिलापवाला तम्बू के प्रवेस दुवार म यहोवा के आघू म लानय अऊ ओकर मुड़ म अपन हांथ रखय अऊ बछवा ला यहोवा के आघू म बलि करय।
LEV 4:5 तब अभिसिक्त पुरोहित ह बछवा के थोरकून लहू ला लेके मिलापवाला तम्बू म जावय।
LEV 4:6 ओह अपन अंगठी ला लहू म बुड़ोके पबितर-स्थान के परदा के सामने यहोवा के आघू म सात बार छिंचय।
LEV 4:7 तब पुरोहित ह ओ लहू म ले थोरकून ला लेके कहरत धूप के बेदी के ओ सींगमन म लगावय, जऊन ह मिलापवाला तम्बू म यहोवा के आघू म हवय। बछवा के बांचे जम्मो लहू ला, ओह होम-बलिदान के बेदी के खाल्हे म रितो देवय, जऊन ह मिलापवाला तम्बू के प्रवेस दुवार म हवय।
LEV 4:8 ओह पाप-बलिदान के बछवा के जम्मो चरबी ला निकाल देवय—याने कि पेट भीतर के अंगमन के जम्मो चरबी,
LEV 4:9 अऊ दूनों गुरदा अऊ ओकर ऊपर के चरबी जऊन ह कनिहां के तीर म रहिथे, अऊ करेजा के सबले बने भाग, जऊन ला ओह गुरदा संग अलग करही—
LEV 4:10 जइसने कि मेल-बलिदान के बलि के बईला ले चरबी ला अलग करे जाथे। तब पुरोहित ह येमन ला होम-बलिदान के बेदी म जला देवय।
LEV 4:11 पर बछवा के खाल अऊ ओकर जम्मो मांस, अऊ मुड़, गोड़मन ला, पेट भीतर के अंग अऊ पोटा ला—
LEV 4:12 याने कि बछवा के जम्मो बांचे भाग ला ओह डेरा के बाहिर ओ जगह म ले जावय, जेला बिधि-बिधान ले सुध करे गे हवय अऊ जिहां राख ला डारे जाथे, अऊ उहां राख ऊपर लकरी रखके ओमा येला जला देवय।
LEV 4:13 “ ‘कहूं जम्मो इसरायली समाज अनजाने म कोनो पाप करथे अऊ अइसने काम करथे, जऊन ह यहोवा के हुकूम के बिरूध अय, हालाकि पूरा समाज ये बात ले अनजान रहिथे, पर जब ओमन अपन अपराध ला जानथें
LEV 4:14 अऊ ओमन ला अपन करे गे पाप के पता चलथे, त जम्मो समाज ह एक ठन बछवा ला पाप-बलिदान के रूप म मिलापवाला तम्बू के आघू म लेके जावय,
LEV 4:15 अऊ समाज के अगुवामन यहोवा के आघू म ओ बछवा के मुड़ म अपन हांथ रखंय अऊ यहोवा के आघू म ओ बछवा के बलि करे जावय।
LEV 4:16 तब अभिसिक्त पुरोहित ह बछवा के लहू म ले थोरकून ला मिलापवाला तम्बू म ले जावय।
LEV 4:17 ओह अपन अंगठी ला लहू म बुड़ोके परदा के सामने म सात बार यहोवा के आघू म छिंचय।
LEV 4:18 ओह ओ लहू म ले थोरकून लेके बेदी के ओ सींगमन म लगावय, जऊन ह यहोवा के आघू म मिलापवाला तम्बू म हवय। बाकि बांचे जम्मो लहू ला ओह होम-बलिदान के बेदी के खाल्हे म रितो देवय, जऊन ह मिलापवाला तम्बू के मुंहटा म हवय।
LEV 4:19 ओह बछवा के जम्मो चरबी ला निकाल लेवय अऊ ओ चरबी ला बेदी म जला देवय,
LEV 4:20 अऊ ओह ये बछवा के संग ठीक वइसनेच करय, जइसने पाप-बलिदान के बछवा ला करे रिहिस। ये किसम ले पुरोहित ह इसरायली समाज बर प्रायस्चित करय, अऊ समाज के पाप छेमा करे जाही।
LEV 4:21 तब ओह बछवा ला डेरा के बाहिर ले जावय अऊ ओला वइसने ही जलावय, जइसने ओह पहिली बछवा ला जलाय रिहिस। येह समाज बर पाप-बलिदान अय।
LEV 4:22 “ ‘जब कोनो अगुवा ह अनजाने म पाप करथे अऊ ओ काम करथे, जऊन ह यहोवा, ओकर परमेसर के हुकूम के बिरूध अय, पर जब ओह अपन अपराध ला महसूस करथे
LEV 4:23 अऊ ओला अपन करे गे पाप के पता चलथे, त ओह एक ठन निरदोस बोकरा ला बलिदान के रूप म लानय।
LEV 4:24 ओह बोकरा के मुड़ म अपन हांथ ला रखय अऊ ओला यहोवा के आघू म ओ जगह म बलि करय, जिहां होम-बलिदान के पसु ला बलि करे जाथे। येह एक पाप-बलिदान अय।
LEV 4:25 तब पुरोहित ह अपन अंगठी म पाप-बलिदान के पसु के थोरकून लहू ला लेवय अऊ ओला होम-बलिदान के बेदी के सींगमन म लगावय अऊ बाकि बांचे लहू ला बेदी के खाल्हे म रितो देवय।
LEV 4:26 ओह जम्मो चरबी ला बेदी म वइसने जलावय, जइसने ओह मेल-बलिदान के चरबी ला जलाय रिहिस। ये किसम ले पुरोहित ह ओ अगुवा के पाप बर प्रायस्चित के बिधि ला पूरा करही, अऊ परमेसर ह ओकर पाप ला छेमा करही।
LEV 4:27 “ ‘यदि समाज के कोनो मनखे अनजाने म कोनो पाप करथे अऊ ओ काम करथे, जऊन ह यहोवा के हुकूम के बिरूध अय, पर जब ओह अपन अपराध ला महसूस करथे
LEV 4:28 अऊ ओला अपन करे गे पाप के पता चलथे, त ओह अपन करे गे पाप के खातिर एक ठन निरदोस छेरी बलिदान के रूप म लानय।
LEV 4:29 ओह अपन हांथ ला ओ पाप-बलिदान के पसु के मुड़ म रखय अऊ येला होम-बलिदान करे के जगह म बलि करय।
LEV 4:30 तब पुरोहित ह अपन अंगठी म ओकर थोरकून लहू ला लेवय अऊ ओला होम-बलिदान के बेदी के सींगमन म लगावय अऊ बाकि बांचे लहू ला बेदी के खाल्हे म रितो देवय।
LEV 4:31 ओ मनखे ह जम्मो चरबी ला अलग करय, जइसने कि मेल-बलिदान के पसु के चरबी ला अलग करे जाथे, अऊ पुरोहित ह ओला बेदी म जला देवय ताकि ओह यहोवा बर सुख-देवइया एक सुगंध होवय। ये किसम ले पुरोहित ह ओ मनखे के पाप बर प्रायस्चित के बिधि ला पूरा करही, अऊ परमेसर ह ओकर पाप ला छेमा करही।
LEV 4:32 “ ‘कहूं कोनो अपन पाप-बलिदान बर मेढ़ा-पीला के झुंड म ले कोनो पसु ला लानथे, त ओह एक निरदोस भेड़ी-पीला ला लानय।
LEV 4:33 ओह ओ भेड़ी-पीला के मुड़ म अपन हांथ ला रखय अऊ ओला पाप-बलिदान बर ओ जगह म बलि करय, जिहां होम-बलिदान के पसु ला बलि करे जाथे।
LEV 4:34 तब पुरोहित ह अपन अंगठी म पाप-बलिदान के पसु के थोरकून लहू ला लेवय अऊ ओला होम-बलिदान के बेदी के सींगमन म लगावय अऊ बाकि बांचे लहू ला बेदी के खाल्हे म रितो देवय।
LEV 4:35 तब ओ मनखे ह जम्मो चरबी ला अलग करय, जइसने कि मेल-बलिदान के मेढ़ा-पीला के चरबी ला अलग करे जाथे, अऊ पुरोहित ह ओला बेदी म यहोवा ला चघाय जेवन-बलिदान के ऊपर जलावय। ये किसम ले पुरोहित ह ओ मनखे दुवारा करे गे पाप ले प्रायस्चित के बिधि ला पूरा करय, अऊ परमेसर ह ओकर पाप ला छेमा करही।
LEV 5:1 “ ‘कहूं कोनो मनखे ह कोनो घटना ला देखे रहिथे या ओ घटना ला जानत रहिथे, पर जब गवाह के रूप म ओकर ले ओ घटना के बारे म पुछे जाथे, अऊ यदि ओह कुछू नइं बतावय, त ओह पाप करथे, अऊ ओला जिम्मेदार ठहिराय जाही।
LEV 5:2 “ ‘कहूं कोनो मनखे ला पता चलथे कि ओमन दोसी अंय—यदि ओमन असुध चीज ला अनजाने म छू लेथें (चाहे असुध जंगली पसु के लास या घरेलू-पसु के लास होवय, या भुइयां म रेंगइया कोनो असुध जीव-जन्तु के लास होवय) अऊ ओ मनखेमन नइं जानंय कि ओमन संस्कारिक रूप ले असुध हो गे हवंय, पर जब ओमन अपन दोस ला जानथें;
LEV 5:3 या कहूं ओमन मनखे के कोनो असुध चीज ला अनजाने म छूथें (कोनो घलो चीज, जऊन ह ओला असुध करथे), पर जब ओमन ला ये बात के पता चलथे अऊ अपन गलती ला महसूस करथें;
LEV 5:4 या कहूं कोनो मन बिगर सोचे-बिचारे अनजाने म कोनो काम ला करे के किरिया खाथें, चाहे ओ भलई के काम हो या बुरई के (दूनों बात म लापरवाही से किरिया खाथें), पर जब ओमन ला ये बात के पता चलथे अऊ ओमन अपन गलती ला महसूस करथें।
LEV 5:5 जब कोनो मनखे ला पता चलथे कि ये बातमन के कोनो एक ठन म घलो ओह दोसी अय, त ओह जऊन गलती करके पाप करे हवय, ओला मान लेवय।
LEV 5:6 जऊन पाप ओह करे हवय, ओकर दंड के रूप म, ओह बरदी म ले एक ठन मेढ़ी-पीला या छेरी, यहोवा करा पाप-बलिदान के रूप म लानय; अऊ पुरोहित ह ओकर पाप के खातिर पछताप के बिधि ला पूरा करय।
LEV 5:7 “ ‘पर कहूं कोनो भेड़ी-पीला नइं चढ़ा सकय, त अपन पाप के दंड के रूप म, ओह यहोवा करा दू ठन पंड़की या दू ठन परेवा पीला ले आवय—एक ठन ला पाप-बलिदान बर अऊ दूसर ला होम-बलिदान करे बर।
LEV 5:8 ओह ओमन ला पुरोहित करा ले आवय अऊ पुरोहित ह पहिले एक ठन ला पाप-बलिदान बर चघावय। ओह ओ चिरई के घेंच ले ओकर मुड़ ला मुरकेट देवय, पर ओला पूरा अलग झन करय,
LEV 5:9 अऊ ओह ओ पाप-बलिदान के लहू म ले थोरकून लेके बेदी के बगल म छिंचय; बाकि बांचे लहू ला बेदी के खाल्हे म रितो देवय। येह एक पाप-बलिदान अय।
LEV 5:10 पुरोहित ह तब दूसर चिरई ला बताय गे बिधि के मुताबिक होम-बलिदान के रूप म चघावय अऊ पुरोहित ह ओकर करे गे पाप बर प्रायस्चित के बिधि ला पूरा करय, अऊ परमेसर ह ओकर पाप ला छेमा करही।
LEV 5:11 “ ‘पर कहूं ओह दू ठन पंड़की या परेवा के दू ठन पीला घलो नइं दे सकय, त ओह अपन पाप के खातिर चघाय बर एपा के दसवां भाग बहुंत चिक्कन पीसान पाप-बलिदान के रूप म ले आवय। ओह ओमा जैतून तेल या धूप झन डालय, काबरकि ओह एक पाप-बलिदान अय।
LEV 5:12 ओह ओला पुरोहित करा लानय अऊ पुरोहित ह ओमा ले अपन मुठा भरके सुरता-देवइया हिस्सा के रूप म लेवय अऊ ओला बेदी म यहोवा ला चघाय अन्न-बलिदान के ऊपर जलावय। येह एक पाप-बलिदान अय।
LEV 5:13 ये किसम ले, पुरोहित ह ओकर खातिर, ओकर दुवारा करे गय येमा के कोनो पाप बर प्रायस्चित के बिधि ला पूरा करही, अऊ परमेसर ह ओकर पाप ला छेमा करही। बाकि बांचे बलिदान ह पुरोहित के होही, जइसने कि अन्न-बलिदान के बिधि म होथे।’ ”
LEV 5:14 फेर यहोवा ह मूसा ला कहिस:
LEV 5:15 “कहूं कोनो यहोवा के कोनो पबितर चीज के संबंध म अनजाने म पाप करथे, अऊ यहोवा के नजर म बेईमान ठहिरथे, त ओमन भेड़-बकरी के झुंड ले, दंड के रूप म एक ठन निरदोस मेढ़ा यहोवा करा लानंय अऊ पबितर-स्थान के सेकेल के मुताबिक, ओह चांदी म उचित दाम के होवय। येह एक दोस-बलिदान अय।
LEV 5:16 जऊन पबितर चीज के बिसय म ओमन पाप करे हवंय, ओमन ओकर भरपई जरूर करंय; दंड के रूप म, ओ चीज के दाम म पांचवां भाग अऊ बढ़ाके ओमन ओ जम्मो ला पुरोहित ला देवंय। पुरोहित ह ओमन बर मेढ़ा ला दोस-बलिदान के रूप म चघाके प्रायस्चित के बिधि ला पूरा करही, अऊ परमेसर ह ओमन के पाप ला छेमा करही।
LEV 5:17 “कहूं कोनो पाप करथे अऊ ओ काम करथे, जऊन ह यहोवा के हुकूम के बिरूध अय, चाहे ओह ओ काम ला अनजाने म करय, तभो ले ओह दोसी अय अऊ ओह ओ काम बर जिम्मेदार ठहिरही।
LEV 5:18 एकरसेति ओह दोस-बलिदान के रूप म बरदी म ले एक ठन निरदोस मेढ़ा पुरोहित करा लानय अऊ ओह उचित दाम के होवय। ये किसम ले, पुरोहित ह ओकर बर, ओकर दुवारा अनजाने म करे गय गलती खातिर प्रायस्चित के बिधि ला पूरा करही, अऊ परमेसर ह ओकर पाप ला छेमा करही।
LEV 5:19 येह एक दोस-बलिदान अय; ओह यहोवा के बिरूध म गलत करके दोसी ठहिरे हवय।”
LEV 6:1 फेर यहोवा ह मूसा ला कहिस:
LEV 6:2 “कहूं कोनो मनखे ह पाप करथे अऊ यहोवा के नजर म बेईमान ठहिरथे, याने कि अपन परोसी ला धोखा देथे या ओकर सामान के गलत उपयोग करथे या ओकर सामान के चोरी करथे, या अपन परोसी ला ठगथे,
LEV 6:3 या ओह कोनो गंवाय चीज ला पाके ओकर बिसय म लबारी मारथे, या मनखेमन के करे गे कोनो पाप के बारे म झूठ-मूठ के किरिया खाथे—
LEV 6:4 जब ओह येमा के कोनो घलो पाप करथे अऊ अपन दोस ला महसूस करथे, त जरूरी अय कि जऊन चीज ला ओह चोराय रिहिस या लूटे रिहिस, या ओकर भरोसा म रखे चीज ला ले लेय रिहिस, या ओ गंवाय चीज जऊन ला ओह पाय रिहिस,
LEV 6:5 या कोनो चीज जेकर बारे म झूठ-मूठ के किरिया खाय रिहिस, ओ जम्मो चीज के पूरा भरपई करय, अऊ ओ चीज के जऊन कीमत होही, ओकर पांचवां भाग ओमा जोड़के ओकर मालिक ला ओ जम्मो चीज ओ दिन दे देवय, जऊन दिन ओह अपन दोस-बलिदान चघावय।
LEV 6:6 अऊ दंड के रूप म, यहोवा ला चघाय बर ओह अपन दोस-बलिदान पुरोहित करा लानय, अऊ ये दोस-बलिदान बरदी म ले एक ठन निरदोस मेढ़ा होवय अऊ ओह उचित दाम के होवय।
LEV 6:7 ये किसम ले, पुरोहित ह ओकर बर यहोवा के आघू म प्रायस्चित के बिधि ला पूरा करही, अऊ जऊन घलो काम ला करके ओह दोसी ठहिरे होही, परमेसर ह ओला ओकर बर छेमा करही।”
LEV 6:8 फेर यहोवा ह मूसा ला कहिस:
LEV 6:9 “हारून अऊ ओकर बेटामन ला ये हुकूम दे: ‘होम-बलिदान करे बर ये नियम अय: होम-बलिदान ह बेदी के चूल्हा म रात भर, बिहनियां होवत तक रहय, अऊ बेदी म के आगी ह बरत रहय।
LEV 6:10 पुरोहित ह तब अपन मलमल के ओनहा ला पहिरय अऊ अपन देहें म मलमल के कच्छा घलो पहिरय अऊ बेदी म जलाय होम-बलिदान के राख ला उठाके बेदी के बाजू म रखय।
LEV 6:11 तब ओह अपन ओनहा ला उतारके आने ओनहा पहिरय, अऊ राख ला डेरा के बाहिर अइसन जगह म ले जावय, जऊन ह बिधि के मुताबिक साफ हवय।
LEV 6:12 बेदी के आगी ह बरत रहय; येह झन बुतावय। पुरोहित ह रोज बिहनियां ओमा लकरी डालय अऊ होम-बलिदान ला आगी म सही ढंग ले रखय अऊ ओकर ऊपर मेल-बलिदान के चरबी ला जलावय।
LEV 6:13 बेदी म हमेसा आगी बरतेच रहय; येह कभू झन बुतावय।
LEV 6:14 “ ‘अन्न-बलिदान करे बर ये नियम अय: हारून के बेटामन ओ बलिदान ला बेदी के आघू म यहोवा करा लानंय।
LEV 6:15 पुरोहित ह ओ अन्न-बलिदान म ले अपन मुठा भरके बहुंत चिक्कन पीसान अऊ थोरकून जैतून तेल अऊ संग म जम्मो धूप ला लेवय, अऊ सुरता-देवइया हिस्सा ला बेदी ऊपर जलावय, जेह यहोवा बर सुख-देवइया एक सुगंध होही।
LEV 6:16 ओमा के बाकि बांचे चीज ला हारून अऊ ओकर बेटामन खावंय। पर येला ओमन पबितर-स्थान के छेत्र म बिगर खमीर के खावंय; ओमन येला मिलापवाला तम्बू के अंगना म खावंय।
LEV 6:17 येला खमीर के संग झन पकाय जावय; मोला चघाय गे जेवन-बलिदान के ओमन के बांटा के रूप म, मेंह येला दे हवंव। येह पाप-बलिदान अऊ दोस-बलिदान सहीं महा पबितर अय।
LEV 6:18 हारून के बंस म के कोनो घलो पुरूस येला खा सकत हें, तुम्हर अवइया जम्मो पीढ़ी बर, यहोवा ला चघाय गे जेवन-बलिदान म ले, येह हमेसा ओमन के बांटा होही। जऊन कुछू घलो ओ बलिदान के चीजमन ला छू लेथे, ओह पबितर हो जाही।’ ”
LEV 6:19 यहोवा ह मूसा ला ये घलो कहिस,
LEV 6:20 “जऊन दिन हारून अऊ ओकर बेटामन म ले काकरो अभिसेक करे जावय, ओ दिन ओह अपन बेटामन के संग यहोवा करा ये बलिदान लेके आवय: एपा के दसवां हिस्सा के बरोबर बहुंत चिक्कन पीसान नियमित अन्न-बलिदान के रूप म, आधा बिहनियां अऊ आधा संझा के बेरा चघावय।
LEV 6:21 येला तेल के संग तवा म चुरोय जावय; येला बने करके मिलाय जावय अऊ ये अन्न-बलिदान ला कुटा-कुटा करके चघावय; येह यहोवा बर सुख-देवइया एक सुगंध होही।
LEV 6:22 ओकर जऊन बेटा ह अभिसिक्त पुरोहित के रूप म ओकर जगह ला लीही, ओही ह ओ बलिदान ला तियार करय। येह यहोवा के हमेसा के बांटा अय अऊ येला पूरा जलाय जावय।
LEV 6:23 पुरोहित के हर एक अन्न-बलिदान ला पूरा जलाय जावय; येला झन खाय जावय।”
LEV 6:24 फेर यहोवा ह मूसा ला कहिस,
LEV 6:25 “हारून अऊ ओकर बेटामन ला कह: ‘पाप-बलिदान करे के नियम ये अय: पाप-बलिदान के पसु ला यहोवा के आघू म ओही जगह म बलि करे जावय, जऊन जगह म होम-बलिदान के पसु ला बलि करे जाथे। येह महा पबितर अय।
LEV 6:26 जऊन पुरोहित ह पाप-बलिदान ला चघाथे, ओही ह ओला खावय। ओला पबितर-स्थान के छेत्र म याने कि मिलापवाला तम्बू के अंगना म खाय जावय।
LEV 6:27 जऊन कुछू घलो ओकर मांस ला छू लेथे, ओह पबितर हो जाही, अऊ यदि लहू के कोनो छींटा ह ओनहा म लग जावय, त ओला पबितर-स्थान के छेत्र म धोय जावय।
LEV 6:28 जऊन माटी के बरतन म ओ मांस ला रांधे जाथे, ओला टोर दिये जावय; पर कहूं ओ मांस ला कांस के बरतन म रांधे जाथे, त बरतन ला मांजके पानी म धोय जावय।
LEV 6:29 पुरोहित परिवार के कोनो घलो मरद ओला खा सकत हें; येह महा पबितर अय।
LEV 6:30 पर जऊन पाप-बलिदान के पसु के लहू ला मिलापवाला तम्बू के भीतर पबितर स्थान म प्रायस्चित करे बर लाय जाथे, ओकर मांस ला झन खाय जावय; ओला आगी म जला दिये जावय।
LEV 7:1 “ ‘दोस-बलिदान करे के ये नियम अय, अऊ ये बलिदान ह महा पबितर अय:
LEV 7:2 जऊन जगह म होम-बलिदान के पसु ला बलि करे जाथे, ओही जगह म दोस-बलिदान के पसु ला घलो बलि करे जावय अऊ ओकर लहू ला बेदी के चारों कोति छिंचे जावय।
LEV 7:3 ओमा के जम्मो चरबी ला चघाय जावय: याने कि चरबीवाला पुंछी अऊ ओ चरबी, जऊन ह पेट के अंगमन ला तोपे रहिथे,
LEV 7:4 दूनों गुरदा अऊ ओमन के ऊपर के चरबी, जऊन ह कनिहां के तीर म रहिथे अऊ करेजा के निकले भाग, जऊन ला गुरदामन समेत अलग करे जावय।
LEV 7:5 पुरोहित ह ओमन ला बेदी म यहोवा ला चघाय जेवन-बलिदान के रूप म जला देवय। येह एक दोस-बलिदान अय।
LEV 7:6 पुरोहित के परिवार के कोनो घलो मरद येला खा सकत हे, पर येला पबितर-स्थान म खाय जावय। येह महा पबितर अय।
LEV 7:7 “ ‘पाप-बलिदान अऊ दोस-बलिदान दूनों म ओहीच कानून लागू होथे: येमन ओ पुरोहित के होथें, जऊन ह ओमन के संग प्रायस्चित के बिधि ला पूरा करथे।
LEV 7:8 जऊन पुरोहित ह काकरो बर होम-बलिदान चघाथे, ओ पुरोहित ह बलिदान के पसु के खाल ला अपन बर रख सकत हे।
LEV 7:9 हर अन्न-बलिदान, जऊन ह चूल्हा के आंच म सेंके जाथे या कढ़ई या तवा म पकाय जाथे, ओह ओहीच पुरोहित के होही, जऊन ह ओला चघाथे,
LEV 7:10 अऊ हर एक अन्न-बलिदान, चाहे ओह जैतून तेल म सनाय होवय या सूखा होवय, ओह हारून के जम्मो बेटामन ला बरोबर-बरोबर बांटा म मिलय।
LEV 7:11 “ ‘जब कोनो मनखे यहोवा ला मेल-बलिदान चघाथे, त ओकर नियम ये अय:
LEV 7:12 “ ‘कहूं ओह येला धनबाद देय बर चघाथे, त ये धनबाद-बलिदान के संग, ओह जैतून तेल म सनाय बिगर खमीर के बने मोटा-मोटा रोटी, बिगर खमीर के बने तेल म चुपरे पातर-पातर रोटी, अऊ बने ढंग से गुंथाय अऊ तेल म सनाय बहुंत चिक्कन पीसान के बने मोटा-मोटा रोटी चघावय।
LEV 7:13 धनबाद के मेल-बलिदान के संग, ओह खमीर मिले मोटा-मोटा रोटी के चढ़ावा चघावय।
LEV 7:14 ओह हर किसम के रोटी म ले एक-एक ठन रोटी बलिदान के रूप म लानय; येह यहोवा के हिस्सा होही; येह ओ पुरोहित के अय, जऊन ह मेल-बलिदान के लहू ला बेदी के चारों कोति छिंचथे।
LEV 7:15 धनबाद के मेल-बलिदान के मांस ला ओहीच दिन खाय जावय, जऊन दिन ओला चघाय जाथे; बिहनियां होवत तक ओमा ले कुछू झन बांचय।
LEV 7:16 “ ‘पर, कहूं, ओकर बलिदान ह बदना के कारन या स्वेच्छा-बलिदान होवय, त जऊन दिन बलिदान चघाय जावय, ओहीच दिन ओला खाय जावय, पर कुछू बांच जावय, त ओला ओकर दूसर दिन खाय जावय।
LEV 7:17 यदि बलिदान के कुछू मांस ह तीसर दिन तक बांचे रहिथे, त ओला आगी म जला दिये जावय।
LEV 7:18 कहूं मेल-बलिदान म के कोनो मांस ला तीसर दिन खाय जाथे, त ओ बलिदान चघोइया ला गरहन नइं करे जावय। येला ओकर हित म नइं गने जावय, काबरकि येह असुध हो गे हवय; जऊन मनखे ह येमा के कुछू चीज ला खाथे, ओला ओकर बर जिम्मेदार ठहिराय जाही।
LEV 7:19 “ ‘यदि मांस ह कोनो अइसने चीज ले छू जाथे, जऊन ह बिधि के मुताबिक असुध अय, त ओ मांस ला झन खाय जावय; ओला आगी म जला दिये जावय। दूसर मांस ला बिधि के मुताबिक सुध मनखे ह खा सकथे।
LEV 7:20 पर कहूं कोनो मनखे असुध होके यहोवा ला चघाय गे मेल-बलिदान के मांस ला खाथे, त ओह अपन मनखेमन के समाज ले अलग करे जावय।
LEV 7:21 अऊ कहूं कोनो असुध चीज ला छूथे—चाहे मनखे के असुधता होवय या असुध पसु होवय या भुइयां म रेंगइया कोनो असुध जीव होवय—अऊ तब यहोवा ला चघाय गे मेल-बलिदान के मांस म ले खाथे, त ओ मनखे घलो अपन मनखेमन के समाज ले अलग करे जावय।’ ”
LEV 7:22 फेर यहोवा ह मूसा ला कहिस,
LEV 7:23 “इसरायलीमन ला कह: ‘तुमन कोनो पसु के चरबी ला झन खावव, भेड़ होवय या बोकरा।
LEV 7:24 जऊन पसु ह अपनआप मर गे हे या जऊन पसु ला कोनो जंगली पसु चीर-फार दे हे, ओकर चरबी ला कोनो आने काम म लाय जा सकत हे, पर तुमन ओला झन खाहू।
LEV 7:25 जऊन मनखे ह ओ पसु के चरबी ला खाथे, जेकर ले यहोवा बर जेवन-बलिदान चघाय जा सकथे, त ओ मनखे ह अपन मनखेमन ले अलग करे जावय।
LEV 7:26 अऊ तुमन जिहां कहूं घलो रहव, कोनो चिरई या पसु के लहू ला झन खावव।
LEV 7:27 ओ मनखे, जऊन ह लहू ला खाथे, ओह अपन मनखेमन ले अलग करे जावय।’ ”
LEV 7:28 फेर यहोवा ह मूसा ला कहिस,
LEV 7:29 “इसरायलीमन ला कह: ‘ओ मनखे, जऊन ह यहोवा बर मेल-बलिदान लानथे, ओह मेल-बलिदान के एक भाग ला यहोवा बर अपन बलिदान के रूप म लानय।
LEV 7:30 ओह अपनेच हांथ ले यहोवा बर जेवन-बलिदान चघावय; ओह चरबी ला छाती के समेत लानय, अऊ छाती ला हलाय-बलिदान के रूप म यहोवा के आघू म हलावय।
LEV 7:31 पुरोहित ह चरबी ला बेदी म जलावय, पर छाती ह हारून अऊ ओकर बेटामन के अय।
LEV 7:32 तुमन अपन मेल-बलिदान के जेवनी जांघ ला पुरोहित ला ओकर हिस्सा के रूप म देवव।
LEV 7:33 हारून के जऊन बेटा ह मेल-बलिदान के लहू अऊ चरबी ला चघाथे, ओह जेवनी जांघ ला अपन बांटा के रूप म रखय।
LEV 7:34 इसरायलीमन के मेल-बलिदान म ले, हलाय गय छाती अऊ चघाय गय जांघ ला, मेंह लेय हंव अऊ येमन ला हारून पुरोहित अऊ ओकर बेटामन ला देय हंव कि इसरायलीमन कोति ले, येह हमेसा ओमन के बांटा होवय।’ ”
LEV 7:35 येह यहोवा ला चघाय गे जेवन-बलिदान के ओ बांटा अय, जऊन ला हारून अऊ ओकर बेटामन ला ओ दिन दिये गीस, जऊन दिन ओमन पुरोहित के रूप म यहोवा के सेवा करे बर लाने गीन।
LEV 7:36 जऊन दिन ओमन के अभिसेक करे गीस, ओहीच दिन यहोवा ह हुकूम दीस कि इसरायलीमन येला पीढ़ी दर पीढ़ी ओमन ला ओमन के बांटा के रूप म हमेसा देवंय।
LEV 7:37 येमन होम-बलिदान, अन्न-बलिदान, पाप-बलिदान, दोस-बलिदान, अभिसेक-बलिदान अऊ मेल-बलिदान के नियम अंय,
LEV 7:38 जेला यहोवा ह मूसा ला सीनय के सुन्ना जगह म सीनय के पहाड़ ऊपर ओ दिन दीस, जऊन दिन ओह इसरायलीमन ला यहोवा करा ओमन के बलिदान लाने के हुकूम दीस।
LEV 8:1 फेर यहोवा ह मूसा ला कहिस,
LEV 8:2 “हारून अऊ ओकर बेटामन ला, ओमन के ओनहा ला, अभिसेक के तेल ला, पाप-बलिदान बर एक ठन निरदोस बछवा ला, दू ठन निरदोस मेढ़ा अऊ ओ टुकनी, जऊन म बिगर खमीर के बने रोटी हवय, ये जम्मो ला ले आन,
LEV 8:3 अऊ इसरायल के पूरा सभा ला मिलापवाला तम्बू के मुंहटा म बला ले।”
LEV 8:4 मूसा ह यहोवा के हुकूम के मुताबिक करिस, अऊ सभा ह मिलापवाला तम्बू के मुंहटा म जूर गीस।
LEV 8:5 मूसा ह सभा के मनखेमन ला कहिस, “जऊन काम करे के हुकूम यहोवा ह देय हवय, ओह ये अय।”
LEV 8:6 तब मूसा ह हारून अऊ ओकर बेटामन ला सामने लानके ओमन ला पानी ले नहवाईस।
LEV 8:7 ओह हारून ला अंगरखा पहिराईस, अऊ ओकर कनिहां म कमरबंध लपेटिस, ओला बागा पहिराके ओकर ऊपर एपोद पहिराईस। ओह सुघरता से बुने गय कमरबंध ले एपोद ला कसके बांध दीस।
LEV 8:8 तब ओह छातीबंध ला ओकर ऊपर लगाके छातीबंध म ऊरीम अऊ तुम्मीम लगा दीस।
LEV 8:9 फेर ओह ओकर मुड़ म पागा घलो पहिराईस अऊ पागा के आघू म सोन के पट्टी याने कि पबितर मुकुट ला लगाईस, जइसने कि यहोवा ह मूसा ला हुकूम देय रिहिस।
LEV 8:10 तब मूसा ह अभिसेक के तेल ला लीस, अऊ पबितर-तम्बू अऊ जऊन कुछू ओमा रिहिस, ओ जम्मो ला अभिसेक करके ओमन के संस्कार करिस।
LEV 8:11 ओह थोरकून तेल लेके बेदी के ऊपर सात बार छिंचिस, बेदी अऊ ओकर जम्मो सामान ला अऊ तसला अऊ ओकर खुरामन ला घलो पबितर करे बर ओमन के अभिसेक करिस।
LEV 8:12 ओह अभिसेक के कुछू तेल ला हारून के मुड़ म रितोईस अऊ ओला पबितर करे बर ओकर अभिसेक करिस।
LEV 8:13 तब ओह हारून के बेटामन ला आघू म लानके ओमन ला अंगरखा पहिराईस, कनिहां म कमरबंध बांधिस अऊ मुड़ म टोपी पहिराईस जइसने कि यहोवा ह मूसा ला हुकूम देय रिहिस।
LEV 8:14 ओह तब पाप-बलिदान बर बछवा ला लानिस, अऊ हारून अऊ ओकर बेटामन पाप-बलिदान के बछवा के मुड़ म अपन हांथ रखिन।
LEV 8:15 मूसा ह ओ बछवा ला बलि करिस, अऊ अपन अंगठी म बछवा के थोरकून लहू लेके बेदी के जम्मो सींगमन म लगाईस, अऊ बेदी ला सुध करिस। बाकि बांचे लहू ला ओह बेदी के खाल्हे म रितो दीस। ये किसम ले ओह प्रायस्चित करे बर बेदी ला पबितर करिस।
LEV 8:16 मूसा ह पेट के भीतरी भाग के जम्मो चरबी ला लीस अऊ करेजा के लम्बा निकले भाग, अऊ चरबी सहित दूनों गुरदा ला घलो लीस, अऊ ओमन ला बेदी म जला दीस।
LEV 8:17 पर बछवा अऊ ओकर खाल अऊ ओकर मांस अऊ ओकर पोटा ला डेरा के बाहिर जला दीस, जइसने कि यहोवा ह मूसा ला हुकूम देय रिहिस।
LEV 8:18 ओह तब होम-बलिदान बर मेढ़ा ला लानिस, अऊ हारून अऊ ओकर बेटामन ओ मेढ़ा के मुड़ म अपन हांथ रखिन।
LEV 8:19 तब मूसा ह मेढ़ा ला बलि करिस अऊ ओकर लहू ला लेके बेदी के चारों मुड़ा छिंचिस।
LEV 8:20 ओह मेढ़ा ला कुटा-कुटा करिस अऊ ओकर मुड़ अऊ कुटामन ला अऊ चरबी ला जला दीस।
LEV 8:21 ओह पेट भीतर के चीजमन ला अऊ गोड़मन ला पानी म धोईस अऊ पूरा मेढ़ा ला बेदी म जला दीस। येह यहोवा ला चघाय बर एक होम-बलिदान, एक सुख-देवइया सुगंध, एक जेवन-बलिदान होईस, जइसने कि यहोवा ह मूसा ला हुकूम देय रिहिस।
LEV 8:22 ओह तब दूसर मेढ़ा ला याने कि अभिसेक करे के मेढ़ा ला लानिस अऊ हारून अऊ ओकर बेटामन ओ मेढ़ा के मुड़ म अपन हांथ रखिन।
LEV 8:23 मूसा ह ओ मेढ़ा ला बलि करिस अऊ ओकर कुछू लहू ला लेके हारून के जेवनी कान ऊपर, जेवनी हांथ के अंगठा ऊपर अऊ जेवनी गोड़ के अंगठा ऊपर लगाईस।
LEV 8:24 मूसा ह हारून के बेटामन ला घलो आघू म लानिस अऊ कुछू लहू ला ओमन के जेवनी कान ऊपर, ओमन के जेवनी हांथ के अंगठा ऊपर अऊ ओमन के जेवनी गोड़ के अंगठा ऊपर लगाईस। तब मूसा ह बांचे लहू ला बेदी के चारों मुड़ा म छिंच दीस।
LEV 8:25 ओकर बाद, ओह चरबी, चरबीवाला पुंछी, पेट के भीतरी भाग के चरबी, करेजा के लम्बा निकले भाग, चरबी समेत दूनों गुरदा अऊ ओकर जेवनी जांघ ला लीस।
LEV 8:26 अऊ यहोवा के आघू म माढ़े बिगर खमीर के बनाय गे टुकनी के रोटी म ले ओमा के एक गोल रोटी, जैतून तेल म सनाय एक ठन मोटा रोटी, अऊ एक ठन पातर रोटी लीस, अऊ ओह येमन ला चरबीवाले भाग अऊ जेवनी जांघ ऊपर रख दीस।
LEV 8:27 तब ओह ये जम्मो ला हारून अऊ ओकर बेटामन के हांथ म रखिस अऊ ओमन येला यहोवा के आघू म एक हलाय-बलिदान के रूप म हलाईन।
LEV 8:28 तब मूसा ह येला ओमन के हांथ ले लेय लीस अऊ येला होम-बलिदान के ऊपर बेदी म यहोवा बर एक सुख-देवइया सुगंध के रूप म, अभिसेक-बलिदान, एक जेवन-बलिदान करके जला दीस।
LEV 8:29 मूसा ह छाती ला घलो लीस, जऊन ह अभिसेक मेढ़ा के ओकर बांटा रिहिस, अऊ ओला यहोवा के आघू म एक हलाय-बलिदान के रूप म हलाईस, जइसने कि यहोवा ह मूसा ला हुकूम देय रिहिस।
LEV 8:30 तब मूसा ह बेदी म ले कुछू अभिसेक के तेल अऊ कुछू लहू लीस अऊ ओला हारून अऊ ओकर ओनहामन म अऊ ओकर बेटामन अऊ ओमन के ओनहामन म छिंचिस। ये किसम ले ओह हारून अऊ ओकर ओनहामन के, अऊ ओकर बेटामन अऊ ओमन के ओनहामन के संस्कार करिस।
LEV 8:31 मूसा ह तब हारून अऊ ओकर बेटामन ला कहिस, “मिलापवाला तम्बू के प्रवेस दुवार म ओ मांस ला रांधव अऊ ओला अभिसेक-बलिदान के टुकनी के रोटी संग उहां खावव, जइसने कि परमेसर ह हुकूम देय रिहिस: ‘हारून अऊ ओकर बेटामन भेंट के चीजमन ला खावंय।’
LEV 8:32 तब जऊन मांस अऊ रोटी बांच जाथे, ओला जला देवंव।
LEV 8:33 तुमन सात दिन तक मिलापवाला तम्बू के मुंहटा के बाहिर झन जावव, जब तक कि तुम्हर अभिसेक के दिन ह पूरा नइं हो जावय, काबरकि तुम्हर अभिसेक ह सात दिन तक चलही।
LEV 8:34 आज जऊन कुछू करे गीस, येला करे के हुकूम यहोवा ह देय रिहिस, ताकि तुम्हर प्रायस्चित के बिधि पूरा होवय।
LEV 8:35 तुम्हर बर ये जरूरी ए कि तुमन मिलापवाला तम्बू के मुंहटा म रात अऊ दिन सात दिन तक ठहिरव अऊ यहोवा जइसने कहे हवय, वइसने करव, ताकि तुमन झन मरव; काबरकि मोला अइसने ही हुकूम दिये गे हवय।”
LEV 8:36 हारून अऊ ओकर बेटामन ओ जम्मो चीज करिन, जेकर हुकूम यहोवा ह मूसा के दुवारा देय रिहिस।
LEV 9:1 आठवां दिन मूसा ह हारून अऊ ओकर बेटामन ला अऊ इसरायल के अगुवामन ला बलाईस।
LEV 9:2 अऊ ओह हारून ला कहिस, “पाप-बलिदान बर एक ठन बिगर दोस के बछवा अऊ होम-बलिदान करे बर एक ठन बिगर दोस के मेढ़ा ला लेके यहोवा के आघू म चघा।
LEV 9:3 तब इसरायलीमन ला ये कह: ‘तुमन पाप-बलिदान करे बर एक ठन बोकरा अऊ होम-बलिदान बर एक ठन बछवा अऊ एक ठन बिगर दोस के मेढ़ा-पीला ला ले आवव।
LEV 9:4 अऊ यहोवा के आघू म चघाय बर मेल-बलिदान के खातिर एक ठन बछवा अऊ एक ठन मेढ़ा अऊ जैतून तेल म सनाय अन्न-बलिदान ले आवव, काबरकि यहोवा ह आज तुमन करा परगट होही।’ ”
LEV 9:5 मूसा ह जऊन कुछू लाने के हुकूम देय रिहिस, ओमन ओला मिलापवाला तम्बू के आघू म ले आईन, अऊ पूरा सभा ह लकठा म आके यहोवा के आघू म ठाढ़ हो गीस।
LEV 9:6 तब मूसा ह कहिस, “येह ओ काम ए, जऊन ला करे के हुकूम यहोवा ह तुमन ला देय हवय, जेकर ले यहोवा के महिमा तुमन म परगट होवय।”
LEV 9:7 तब मूसा ह हारून ला कहिस, “यहोवा के हुकूम के मुताबिक बेदी करा आ अऊ अपन पाप-बलिदान अऊ अपन होम-बलिदान ला चघा अऊ अपन अऊ मनखेमन बर प्रायस्चित कर; मनखेमन बर चढ़ावा ला चघा अऊ ओमन बर प्रायस्चित कर।”
LEV 9:8 अऊ हारून ह बेदी करा आके ओ बछवा ला जऊन ह ओकर पाप-बलिदान के खातिर रिहिस, बलि करिस।
LEV 9:9 हारून के बेटामन ओकर करा लहू ला ले गीन अऊ ओह ओ लहू म अपन अंगठी ला बुड़ोके बेदी के सींगमन म चुपरिस अऊ बांचे लहू ला बेदी के खाल्हे म रितो दीस।
LEV 9:10 पाप-बलिदान के चरबी, गुरदामन ला अऊ करेजा के सबले बने भाग ला ओह बेदी म जला दीस, जइसे कि यहोवा ह मूसा ला हुकूम देय रिहिस,
LEV 9:11 पर ओह मांस अऊ खाल ला डेरा के बाहिर म जलाईस।
LEV 9:12 तब ओह होम-बलिदान के पसु के बलि चघाईस अऊ हारून के बेटामन लहू ला ओकर हांथ म दीन अऊ ओह ओला बेदी के ऊपर जम्मो कोति छिंच दीस।
LEV 9:13 तब ओमन होम-बलिदान के पसु ला कुटा-कुटा करके मुड़ समेत ओकर हांथ म दे दीन अऊ ओह ओमन ला बेदी म जला दीस।
LEV 9:14 ओह पेट के भीतरी भागमन ला अऊ गोड़मन ला धोके ओमन ला होम-बलिदान के ऊपर बेदी म जला दीस।
LEV 9:15 तब हारून ह मनखेमन के बलिदान ला लानके अऊ पाप-बलिदान के बोकरा ला, जऊन ह मनखेमन के खातिर रिहिस, लेके ओला बलि करिस अऊ पहिली बलि असन ओला पाप-बलिदान खातिर चघाईस।
LEV 9:16 तब होम-बलिदान के पसु ला घलो लकठा म लानके बिधि-बिधान के मुताबिक बलिदान चघाईस।
LEV 9:17 फेर ओह बिहनियां के होम-बलिदान के अलावा अन्न-बलिदान ला लकठा म लानके ओमा ले मुठा भर बलिदान ला बेदी म जला दीस।
LEV 9:18 ओकर बाद ओह बछवा अऊ मेढ़ा ला, जऊन ह मनखेमन कोति ले मेल-बलिदान रिहिस, बलि करिस अऊ हारून के बेटामन लहू ला ओकर हांथ म दीन अऊ ओह ओला बेदी म जम्मो कोति छिंच दीस।
LEV 9:19 पर ओमन बछवा अऊ मेढ़ा के चरबी, मोटहा पुंछी, अऊ चरबी के परत, गुरदा अऊ करेजा के सबले बने भाग—
LEV 9:20 येमन ला छाती म मढ़ा दीन, अऊ तब हारून ह ओमन ला बेदी म जला दीस।
LEV 9:21 छाती अऊ जेवनी जांघ ला हारून ह मूसा के हुकूम के मुताबिक हलाय-बलिदान के रूप म यहोवा के आघू म हलाईस।
LEV 9:22 तब हारून ह ओमन कोति हांथमन ला लमाके ओमन ला आसीस दीस, अऊ पाप-बलिदान, होम-बलिदान, अऊ मेल-बलिदान ला चघाके बेदी करा ले खाल्हे उतर आईस।
LEV 9:23 फेर मूसा अऊ हारून मिलापवाला तम्बू म गीन। जब ओमन उहां ले निकलिन, त ओमन मनखेमन ला आसीस दीन; अऊ यहोवा के महिमा जम्मो मनखेमन ऊपर परगट होईस।
LEV 9:24 तब यहोवा के आघू ले आगी निकलके चरबी समेत होम-बलिदान ला बेदी म भसम कर दीस। जब मनखेमन ये देखिन, त ओमन जय-जयकार के नारा लगाईन अऊ मुहूं के भार गिरके यहोवा ला दंडवत करिन।
LEV 10:1 तब नादाब अऊ अबीहू नांव के हारून के बेटामन अपन-अपन धूपदान ला लेके ओमन म आगी भरिन अऊ धूप डारिन; अऊ ओ आगी ला यहोवा ला चघाईन, जेकर हुकूम यहोवा ह नइं देय रिहिस।
LEV 10:2 एकरसेति यहोवा करा ले आगी निकलिस अऊ ओमन ला जला दीस अऊ ओमन यहोवा के आघू म मर गीन।
LEV 10:3 मूसा ह तब हारून ला कहिस, “येह ओ बात ए, जऊन ला यहोवा ह कहिस: “ ‘जऊन मन मोर लकठा म आथें ओमन के आघू म में पबितर साबित होहूं; जम्मो मनखेमन के आघू म मोर आदर होही।’ ” हारून ह तब चुपेचाप रिहिस।
LEV 10:4 मूसा ह हारून के कका उजीएल के बेटा मिसाएल अऊ एलसाफान ला बलाईस, अऊ ओमन ला कहिस, “इहां आवव, अऊ अपन चचेरा-भाईमन के देहें ला पबितर-स्थान के आघू ले उठाके डेरा के बाहिर ले जावव।”
LEV 10:5 तब मूसा के हुकूम के मुताबिक ओमन आईन अऊ ओमन ला ओमन के अंगरखा समेत डेरा के बाहिर ले गीन।
LEV 10:6 तब मूसा ह हारून अऊ ओकर आने बेटा एलिआजर अऊ ईतामार ला कहिस, “तुमन अपन मुड़ के चुंदी ला खुला झन छोंड़व अऊ अपन ओनहा ला झन चीरव; नइं तो तुमन घलो मर जाहू अऊ जम्मो मनखेमन के ऊपर यहोवा के गुस्सा भड़कही। पर तुम्हर रिस्तेदार, याने कि जम्मो इसरायलीमन ओमन बर सोक मनावंय, जऊन मन ला यहोवा ह आगी म नास कर दे हवय।
LEV 10:7 तुमन मिलापवाला तम्बू के मुंहटा के बाहिर झन जावव, नइं तो तुमन घलो मर जाहू, काबरकि यहोवा के अभिसेक के तेल तुमन ऊपर लगे हवय।” ओमन मूसा के कहे मुताबिक करिन।
LEV 10:8 तब यहोवा ह हारून ला कहिस,
LEV 10:9 “जब कभू तें अऊ तोर बेटामन मिलापवाला तम्बू म जाथव, त तुमन अंगूर के मंद या कोनो अऊ किसम के मंद पीके झन जावव, नइं तो तुमन मर जाहू। येह तुम्हर अवइया पीढ़ी के मनखेमन बर हमेसा के बिधि-बिधान अय,
LEV 10:10 ताकि तुमन पबितर अऊ सधारन म, सुध अऊ असुध म फरक कर सकव,
LEV 10:11 अऊ इसरायलीमन ला ओ जम्मो बिधिमन ला सिखो सकव, जेमन ला यहोवा ह मूसा के दुवारा ओमन ला देय हवय।”
LEV 10:12 मूसा ह हारून अऊ ओकर बांचे बेटा एलिआजर अऊ ईतामार ला कहिस, “बिगर खमीर ले बने जऊन जेवन-बलिदान यहोवा ला चघाय गे रिहिस, ओमा के बांचे अन्न-बलिदान ला लेवव अऊ ओला बेदी के बाजू म खावव, काबरकि ओह महा पबितर अय।
LEV 10:13 येला तुमन पबितर-स्थान के छेत्र म खावव, काबरकि येह यहोवा ला चघाय जेवन-बलिदान म ले तोर अऊ तोर बेटामन के बांटा ए, अऊ मोला अइसने हुकूम मिले हवय।
LEV 10:14 पर हलाय गे छाती अऊ अरपन करे गे जांघ ला तुमन अऊ तुम्हर बेटा-बेटीमन खा सकत हें। ओमन ला बिधि के मुताबिक साफ करे गे जगह म खावव; काबरकि ओ चीजमन इसरायलीमन के मेल-बलिदान के तुम्हर बांटा के रूप म, तुमन अऊ तुम्हर लइकामन ला दिये गे हवय।
LEV 10:15 चघाय गे जांघ अऊ हलाय गे छाती ला जेवन-बलिदान के चरबीवाले भागमन के संग लाय जावय, अऊ येमन ला हलाय-बलिदान के रूप म यहोवा के आघू म हलाय जावय। येह तुम्हर अऊ तुम्हर लइकामन के हमेसा के बांटा होही, जइसने कि यहोवा ह हुकूम दे हवय।”
LEV 10:16 जब मूसा ह पाप-बलिदान के बोकरा के बारे म पुछताछ करिस, त पता चलिस कि ओला तो जला देय गे हवय; येकरे कारन ओह हारून के बांचे बेटामन एलिआजर अऊ ईतामार ऊपर गुस्सा होईस, अऊ ओमन ले पुछिस,
LEV 10:17 “तुमन पाप-बलिदान के मांस ला पबितर-स्थान के छेत्र म काबर नइं खायेव? येह महा पबितर अय; येह एकर खातिर देय गे रिहिस कि यहोवा के आघू म सभा बर प्रायस्चित करके ओमन के दोस ला दूर करे जावय।
LEV 10:18 जब एकर लहू ला पबितर स्थान के भीतर म लाने ही नइं गीस, त तुमन ला बोकरा के मांस ला पबितर-स्थान के छेत्र म खाना रिहिस, जइसने कि मेंह तुमन ला हुकूम देय रहेंव।”
LEV 10:19 हारून ह मूसा ला जबाब दीस, “आज ही ओमन अपन पाप-बलिदान अऊ होम-बलिदान यहोवा के आघू म चघाय हवंय, पर अइसने बात मोर संग होईस। कहूं में आज पाप-बलिदान के मांस ला खाय रहितंय, त का यहोवा के आघू म ये बने बात होतिस?”
LEV 10:20 जब मूसा ह ये सुनिस, त ये बात ओला बने लगिस।
LEV 11:1 यहोवा ह मूसा अऊ हारून ला कहिस,
LEV 11:2 “इसरायलीमन ला कहव: ‘भुइयां के ऊपर जतेक जीयत पसुमन हवंय, ओमा ले तुमन येमन ला खा सकत हव:
LEV 11:3 तुमन कोनो भी अइसने पसु ला खा सकत हव, जेकर फटे खुर हवय अऊ ओह पागुर करथे।
LEV 11:4 “ ‘कुछू पसुमन होथें, जऊन मन या तो सिरिप पागुर करथें या फेर सिरिप फटे खुर के होथें; ओमन ला तुमन झन खाहू। ऊंट—हालाकि येह पागुर करथे, पर येकर खुर फटे नइं रहय; येह तुम्हर बर बिधि के मुताबिक असुध अय।
LEV 11:5 कबर-बिज्जू—हालाकि येह पागुर करथे, पर येकर खुर फटे नइं रहय; येह तुम्हर बर असुध अय।
LEV 11:6 खरगोस—हालाकि येह पागुर करथे, पर येकर खुर फटे नइं रहय; येह तुम्हर बर असुध अय।
LEV 11:7 अऊ सूरा घलो—हालाकि येकर खुर ह फटे रहिथे, पर येह पागुर नइं करय; येह तुम्हर बर असुध अय।
LEV 11:8 तुमन ये पसुमन के मांस झन खावव या ओमन के लास ला झन छुवव; ओमन तुम्हर बर असुध अंय।
LEV 11:9 “ ‘समुंदर अऊ नदी के पानी म जतेक जीयत जीव-जन्तु हवंय, ओमा के जेकर पंख अऊ बिस्सर छिलका होथे, ओमन ला तुमन खा सकत हव।
LEV 11:10 पर समुंदर अऊ नदी के ओ जम्मो जीव-जन्तु, जेकर पंख अऊ बिस्सर छिलका नइं होवय—चाहे उड़नेवाला जीव होवंय या पानी के दूसर जीयत जीव-जन्तु होवंय—तुमन ओमन ला असुध समझव।
LEV 11:11 अऊ जब तुमन ओमन ला असुध समझथव, त तुमन ओमन के मांस ला झन खावव; तुमन ओमन के लास ला घलो असुध समझव।
LEV 11:12 पानी के कोनो घलो जीयत जन्तु, जेकर पंख अऊ बिस्सर छिलका नइं होवय, ओह तुम्हर दुवारा असुध समझे जावय।
LEV 11:13 “ ‘येमन ओ चिरई अंय, जेमन ला तुमन असुध समझव अऊ झन खावव, काबरकि ओमन असुध अंय: चील, गिधवा, करिया गिधवा,
LEV 11:14 लाल चील, कोनो भी किसम के करिया चील,
LEV 11:15 कोनो भी किसम के कऊआ
LEV 11:16 सींगवाला उल्लू, चिचियानेवाला उल्लू, समुंदरी चिरई, कोनो भी किसम के बाज,
LEV 11:17 छोटे घुघवा, हाड़गील, बड़े घुघवा,
LEV 11:18 सफेद घुघवा, सुनसान जगह के घुघवा, समुंदरी बाज,
LEV 11:19 सारस, कोनो भी किसम के कोकड़ा, टिटहरी अऊ चमगीदड़।
LEV 11:20 “ ‘जम्मो उड़नेवाला कीरामन, जऊन मन चारों गोड़ म रेंगथें, ओमन तुम्हर बर असुध अंय।
LEV 11:21 पर कुछू उड़नेवाला कीरा, जेमन चारों गोड़ म रेंगथें, ओमन ला खा सकत हव: जेमन के गोड़मन भुइयां म कूदे-फांदे बर जूरे होथे।
LEV 11:22 येमन ला खा सकत हव—कोनो घलो किसम के टिड्डी, फनगे, झिंगुर अऊ फांफा।
LEV 11:23 पर आने जम्मो किसम के उड़नेवाला कीरा, जेमन के चार गोड़ हवय, ओमन ला तुमन असुध समझव।
LEV 11:24 “ ‘तुमन ये काम करे के दुवारा अपनआप ला असुध ठहिराहू; जऊन कोनो ओमन के लास ला छूथे, ओह संझा के होवत तक असुध ठहिरही।
LEV 11:25 जऊन कोनो ओमन के कोनो लास ला उठाथे, त ओह अपन ओनहा ला धोवय, अऊ संझा के होवत ले असुध ठहिरय।
LEV 11:26 “ ‘हर ओ पसु, जेकर खुर फटे नइं ए या जेह पागुर नइं करय, ओह तुम्हर बर असुध अय; जऊन कोनो ओमन के कोनो घलो लास ला छूथे, ओह असुध ठहिरही।
LEV 11:27 चारों गोड़ म रेंगइया जम्मो पसु, जेमन अपन पंजा म रेंगथें, ओमन तुम्हर बर असुध अंय। जऊन कोनो ओमन के लास ला छूथे, ओह संझा के होवत ले असुध ठहिरही।
LEV 11:28 जऊन कोनो ओमन के लास ला उठाथे, ओह अपन ओनहा ला धोवय, अऊ संझा के होवत ले असुध ठहिरय। ये पसुमन तुम्हर बर असुध अंय।
LEV 11:29 “ ‘भुइयां म रेंगइया पसु म ले, येमन तुम्हर बर असुध अंय: नेवला, मुसवा, कोनो घलो किसम के बड़े टेटका,
LEV 11:30 छिपकली, गोइहा, भीथी के टेटका, सांडा अऊ छोटे टेटका
LEV 11:31 भुइयां म रेंगइया जम्मो पसुमन ले, येमन तुम्हर बर असुध अंय। जऊन कोनो येमन के लास ला छूथे, ओह संझा के होवत ले असुध ठहिरही।
LEV 11:32 जब येमन म के कोनो ह मर जाथे, अऊ ओह कोनो चीज के ऊपर गिरथे, त ओ चीज ह असुध ठहिरही, ओह कोनो घलो चीज होवय, चाहे ओह कठवा के बने होवय, या ओनहा, या खाल, या बोरा के बने होवय। ओला पानी म डारे जावय अऊ संझा के होवत ले ओह असुध ठहिरही, अऊ तब ओह सुध हो जाही।
LEV 11:33 यदि ये पसु म के कोनो ह माटी के कोनो बरतन म गिरथे, त ओ बरतन के जम्मो चीज ह असुध ठहिरही; तुमन ओ बरतन ला टोर देवव।
LEV 11:34 कोनो किसम के जेवन, जेला तुमन खा सकत हव, पर यदि ओह अइसने बरतन के पानी म छू जाथे, त ओ जेवन ह असुध अय, अऊ कहूं अइसने बरतन म कोनो पीये के चीज हवय, त ओह घलो असुध अय।
LEV 11:35 ओमन के लास म के कोनो भाग ह येमा के कोनो चीज म गिर जावय, चाहे ओह चूल्हा होवय या रांधे के बरतन, ओला टोर दिये जावय। ओमन असुध अंय, अऊ तुमन ओमन ला असुध समझव।
LEV 11:36 पर सोता या तरिया, जेमा पानी ह संकलाथे, यदि कोनो मरे पसु ओमा मिलथे, त ओ पानी ह सुध रहिथे, फेर जऊन कोनो येमन के लास ला छूथे, ओह असुध ठहिरही।
LEV 11:37 कहूं कोनो लास ह कोनो किसम के बीजा ऊपर गिरथे, जेला बोये बर रखे गे हवय, त ओ बीजा ह सुध बने रहिही।
LEV 11:38 फेर कहूं बीजा ऊपर पानी डारे गे हवय अऊ कोनो लास ह ओमा गिर जाथे, त ओ बीजा ह तुम्हर बर असुध अय।
LEV 11:39 “ ‘कोनो पसु, जेला खाय के अनुमति तुमन ला हवय, यदि ओह मर जाथे, अऊ जऊन कोनो ओकर लास ला छूथे, ओह संझा के होवत ले असुध ठहिरही।
LEV 11:40 जऊन कोनो ओकर लास म ले कुछू खाथे, ओह अपन ओनहा ला धोवय, अऊ ओह संझा के होवत ले असुध ठहिरही। जऊन कोनो ओकर लास ला उठावय, ओह घलो अपन ओनहा ला धोवय, अऊ ओह संझा के होवत ले असुध ठहिरही।
LEV 11:41 “ ‘भुइयां म रेंगइया जम्मो जीव ला असुध समझे जावय; ओमन ला झन खाय जावय।
LEV 11:42 तुमन भुइयां म रेंगइया कोनो जीव या परानी ला झन खावव, चाहे ओह पेट के भार रेंगथे या चारों गोड़ म या अब्बड़ अकन गोड़ म रेंगथे; येह असुध अय।
LEV 11:43 येमा के कोनो घलो जीव के दुवारा अपनआप ला असुध झन करव। तुमन कोनो घलो हालत म अपनआप ला ओमन के दुवारा असुध झन करव या ओमन के दुवारा असुध झन होवव।
LEV 11:44 मेंह यहोवा तुम्हर परमेसर अंव; अपनआप ला सुध करव अऊ पबितर बनव, काबरकि मेंह पबितर अंव। भुइयां म रेंगइया कोनो घलो जीव के दुवारा अपनआप ला असुध झन करव।
LEV 11:45 मेंह यहोवा अंव, जऊन ह तुमन ला मिसर देस ले निकालके लाने हंव कि मेंह तुम्हर परमेसर होवंव; एकरसेति तुमन पबितर बनव, काबरकि मेंह पबितर अंव।
LEV 11:46 “ ‘पसु, चिरई, पानी म रेंगइया-बुलइया जम्मो जीव अऊ भुइयां म रेंगइया जम्मो परानी के बिसय म इही ह नियम अय।
LEV 11:47 येह जरूरी अय कि तुमन सुध अऊ असुध म भेद करव, अऊ खाय जानेवाला जीयत परानी अऊ नइं खाय जानेवाला परानीमन ला जानव।’ ”
LEV 12:1 यहोवा ह मूसा ला कहिस,
LEV 12:2 “इसरायलीमन ला कह: ‘ओ माईलोगन, जऊन ह देहें म होके बेटा ला जनम देथे, ओह सात दिन तक बिधि के मुताबिक असुध रहिही, जइसने कि ओह माहवारी के समय म असुध रहिथे।
LEV 12:3 जनमे बेटा के आठवां दिन म खतना करे जावय।
LEV 12:4 ओकर बाद ओ छेवारीन ह अपन बहत लहू ले सुध होय बर तैंतीस दिन तक अगोरय। जब तक ओकर सुध होय के दिन ह पूरा नइं हो जावय, तब तक ओह न तो कोनो पबितर चीज ला छुवय अऊ न ही पबितर-स्थान म जावय।
LEV 12:5 कहूं ओ माईलोगन ह बेटी ला जनम देथे, तब ओह दू हप्ता तक असुध रहिही, जइसने कि माहवारी के समय म रहिथे। तब ओह अपन बहत लहू ले सुध होय बर छैंसठ दिन तक अगोरय।
LEV 12:6 “ ‘जब ओ छेवारीन के सुध होय के दिन ह पूरा हो जावय, चाहे ओला बेटा होय रहय या बेटी, ओह होम-बलिदान बर एक बछर के मेढ़ा-पीला अऊ पाप-बलिदान बर एक ठन परेवा पीला या एक ठन पंड़की मिलापवाला तम्बू म पुरोहित करा लानय।
LEV 12:7 तब पुरोहित ह ओ माईलोगन बर प्रायस्चित के नियम ला पूरा करे बर ओमन ला यहोवा के आघू म चघावय, अऊ तब ओह अपन बहत लहू ले बिधि के मुताबिक सुध हो जाही। “ ‘येमन छेवारीन बर बिधि अंय, जऊन ह कोनो बेटा या बेटी ला जनम देथे।
LEV 12:8 पर कहूं ओ छेवारीन ह मेढ़ा-पीला नइं दे सकय, त ओह पंड़की के एक जोड़ा या दू ठन परेवा पीला लेके आवय, जेमा के एक ठन ह होम-बलिदान अऊ दूसर ह पाप-बलिदान के रूप म चघाय जावय। ये किसम ले, पुरोहित ह ओकर बर प्रायस्चित के बिधि ला पूरा करही, अऊ ओह सुध हो जाही।’ ”
LEV 13:1 यहोवा ह मूसा अऊ हारून ला फेर कहिस,
LEV 13:2 “जब कोनो मनखे के चमड़ी म सूजन या चकत्ता या चमकत कोनो दाग होवय, जऊन ह चमड़ी के कोनो असुध करइया बेमारी हो सकत हे, त ओला हारून पुरोहित या ओकर पुरोहित बेटामन म ले एक झन करा लाने जावय।
LEV 13:3 पुरोहित ह ओकर चमड़ी के बेमारी के जांच करय, अऊ यदि बेमारी के जगह के रूआंमन सफेद हो गे हवंय अऊ बेमारी ह ओकर देहें के चमड़ी ले गहरा दिखय, त येह एक चमड़ी के असुध करइया बेमारी अय। जब पुरोहित ह ओ मनखे के जांच कर लेवय, तब ओह ओला बिधि मुताबिक असुध ठहिरावय।
LEV 13:4 कहूं ओ चमकत दाग ह सफेद हवय, पर चमड़ी ले गहरा नइं दिखथे अऊ उहां के रूआंमन सफेद नइं होय हवंय, त पुरोहित ह ओ बेमारीवाला मनखे ला सात दिन तक अलग रखय।
LEV 13:5 सातवां दिन, पुरोहित ह ओला फेर जांचय, अऊ यदि ओह देखय कि दाग म कोनो बदलाव नइं ए अऊ बेमारी ह चमड़ी म नइं बगरे हे, त पुरोहित ह ओला अऊ सात दिन तक अलग रखय।
LEV 13:6 सातवां दिन, पुरोहित ह ओला फेर जांचय, अऊ कहूं दाग के चमकई ह कम हो गे हवय अऊ चमड़ी म नइं बगरे हवय, तब पुरोहित ह ओला सुध ठहिरावय; येह सिरिप एक चकत्ता अय। ओह अपन ओनहा ला धोवय, अऊ ओह सुध हो जाही।
LEV 13:7 पर पुरोहित ला देखाय अऊ सुध ठहिराय के बाद, यदि ओकर चमड़ी म चकत्ता ह बगर जाथे, त ओ मनखे ह फेर पुरोहित करा जावय।
LEV 13:8 पुरोहित ह ओ मनखे के जांच करय, अऊ कहूं चकत्ता ह चमड़ी म बगर गे हवय, तब पुरोहित ह ओला असुध ठहिरावय; येह चमड़ी के एक असुध करइया बेमारी अय।
LEV 13:9 “जब कोनो मनखे ला चमड़ी के असुध करइया बेमारी हवय, त ओला पुरोहित करा लाने जावय।
LEV 13:10 पुरोहित ह ओला जांचय, अऊ कहूं चमड़ी के सूजनवाले जगह ह सफेद हो गे हवय अऊ उहां के रूआंमन घलो सफेद हो गे हवंय, अऊ ओ सूजन के जगह म मांस दिखथे,
LEV 13:11 त येह एक पुराना चमड़ी के रोग अय, अऊ पुरोहित ह ओला असुध ठहिरावय। ओह ओला अलग झन रखय, काबरकि ओ मनखे ह पहिले से ही असुध हवय।
LEV 13:12 “कहूं बेमारी ह मनखे के जम्मो चमड़ी म बगर गे हवय, अऊ पुरोहित ह देखथे कि ओ मनखे के मुड़ ले लेके गोड़ तक जम्मो चमड़ी म बेमारी हो गे हवय,
LEV 13:13 त पुरोहित ह ओला धियान से जांचय, अऊ यदि बेमारी ह ओकर जम्मो देहें म हो गे हवय, त ओह ओ मनखे ला सुध ठहिरावय। जब ओकर पूरा देहें ह सफेद हो गे हवय, त ओह सुध अय।
LEV 13:14 पर जब कभू ओकर चमड़ी म मांस दिखे लगय, तब ओह असुध ठहिरही।
LEV 13:15 जब पुरोहित ह ओमा मांस देखथे, त ओह ओ मनखे ला असुध ठहिरावय। खुला मांस ह असुध अय; ओला एक असुध करइया बेमारी हवय।
LEV 13:16 कहूं ओ खुला मांस ह ठीक होके सफेद हो जाथे, त ओ मनखे ह पुरोहित करा जावय।
LEV 13:17 पुरोहित ह ओकर जांच करय, अऊ कहूं घाव ह सफेद हो गे हवय, त पुरोहित ह ओ बिमरहा मनखे ला सुध ठहिरावय; तब ओह सुध हो जाही।
LEV 13:18 “जब काकरो चमड़ी म फोड़ा हवय अऊ ओह बने हो जाथे,
LEV 13:19 अऊ ओ फोड़ा के जगह म सफेद सूजन या लाल-सफेद दाग दिखथे, त ओह अपनआप ला पुरोहित ला देखावय।
LEV 13:20 पुरोहित ह येकर जांच करय, अऊ कहूं ओ दाग ह चमड़ी ले जादा गहिरा दिखय अऊ येमा के रूआंमन सफेद हो गे हवंय, त पुरोहित ह ओ मनखे ला असुध ठहिरावय। येह चमड़ी के असुध करइया बेमारी अय, जऊन ह फोड़ा म ले फूटके निकले हवय।
LEV 13:21 पर यदि, जब पुरोहित ह येकर जांच करथे, अऊ ओला येमा सफेद रूआं नइं दिखय अऊ येह चमड़ी ले गहिरा नइं ए अऊ ओकर चमक ह कम हो गे हवय, त पुरोहित ह ओला सात दिन तक अलग रखय।
LEV 13:22 पर कहूं येह चमड़ी म बगरत हवय, तब पुरोहित ह ओला असुध ठहिरावय; येह एक असुध करइया बेमारी अय।
LEV 13:23 पर कहूं दाग ह नइं बदले हवय अऊ येह नइं बगरे हवय, त येह सिरिप फोड़ा के एक दाग अय, अऊ पुरोहित ह ओ मनखे ला सुध ठहिरावय।
LEV 13:24 “जब कोनो मनखे के चमड़ी ह जर जाथे अऊ ओ जरे जगह के मांस म लाल-सफेद या सफेद दाग दिखथे,
LEV 13:25 तब पुरोहित ह ओ दाग के जांच करय। अऊ कहूं दाग म के रूआंमन सफेद हो गे हवंय अऊ येह चमड़ी ले गहिरा हो गे हवय, त येह एक असुध करइया बेमारी अय, जऊन ह ओ जरे के जगह म फूटके निकले हवय। पुरोहित ह ओ मनखे ला असुध ठहिरावय; येह एक चमड़ी के असुध करइया रोग अय।
LEV 13:26 पर कहूं पुरोहित ह येकर जांच करथे अऊ ओ दाग म कोनो सफेद रूआं नइं दिखय अऊ यदि येह चमड़ी ले गहिरा नइं हवय अऊ येकर चमक ह कम हो गे हवय, त पुरोहित ह ओ मनखे ला सात दिन तक अलग रखय।
LEV 13:27 सातवां दिन पुरोहित ह ओ मनखे के जांच करय, अऊ कहूं बेमारी ह चमड़ी म बगरत हवय, त पुरोहित ह ओ मनखे ला असुध ठहिरावय; येह चमड़ी के एक असुध करइया बेमारी अय।
LEV 13:28 फेर कहूं ओ दाग ह नइं बदले हवय अऊ चमड़ी म नइं बगरे हवय अऊ ओकर चमक ह कम हो गे हवय, त येह जरे के कारन एक सूजन अय, अऊ पुरोहित ह ओ मनखे ला सुध ठहिरावय; येह जरे के सिरिप एक दाग अय।
LEV 13:29 “कहूं कोनो आदमी या माईलोगन के मुड़ या थोथना म कोनो घाव हवय,
LEV 13:30 त पुरोहित ह ओ घाव के जांच करय अऊ कहूं येह चमड़ी ले गहिरा दिखय, अऊ येमा के रूआं ह पीला रंग के अऊ पातर दिखय, त पुरोहित ह ओला असुध ठहिरावय; येह मुड़ या थोथना म चमड़ी के एक असुध करइया बेमारी अय।
LEV 13:31 पर यदि, जब पुरोहित ह घाव ला जांच करथे, अऊ येह चमड़ी ले गहिरा नइं दिखय अऊ उहां करिया रूआं नइं ए, त पुरोहित ह ओ मनखे ला सात दिन तक अलग रखय।
LEV 13:32 सातवां दिन, पुरोहित ह ओकर घाव के जांच करय, अऊ कहूं येह नइं बगरे हवय, अऊ येमा कोनो पीला रंग के रूआं नइं ए अऊ येह चमड़ी ले गहिरा नइं दिखय,
LEV 13:33 त ओ आदमी या माईलोगन ह ओ घाव के जगह ला छोंड़के अपन बाल मुड़ा लेवय, अऊ पुरोहित ह ओला अऊ सात दिन तक अलग रखय।
LEV 13:34 फेर सातवां दिन, पुरोहित ह ओ घाव के जांच करय अऊ कहूं येह चमड़ी म नइं बगरे हवय अऊ चमड़ी ले गहिरा नइं दिखय, त पुरोहित ह ओ मनखे या माईलोगन ला सुध ठहिरावय। ओह अपन ओनहा ला धोवय, अऊ ओह सुध हो जाही।
LEV 13:35 पर सुध ठहिराय जाय के बाद, कहूं घाव ह चमड़ी म बगरथे,
LEV 13:36 त पुरोहित ह ओकर जांच करय, अऊ कहूं ओह देखथे कि घाव ह चमड़ी म बगर गे हवय, त ओला घाव के जगह म पीला रूआं देखे के जरूरत नइं ए; ओह असुध अय।
LEV 13:37 पर कहूं पुरोहित ह देखथे कि घाव ह नइं बदले हे, अऊ यदि येमा करिया रूआं जाम गे हे, त फेर ओ आदमी या माईलोगन ह बने हो गे हवय। ओह सुध अय, अऊ पुरोहित ह ओला सुध ठहिरावय।
LEV 13:38 “जब कोनो आदमी या माईलोगन के चमड़ी म सफेद दाग हवय,
LEV 13:39 त पुरोहित ह ओकर जांच करय, अऊ कहूं ओकर दागमन हल्का सफेद हवंय, त येह नुकसान नइं करइया दाग अय, जऊन ह चमड़ी म निकले हवय; ओ मनखे ह सुध अय।
LEV 13:40 “कोनो मनखे के मुड़ के चुंदी ह झर गे हवय अऊ ओह चंदुआ अय, त अइसने मनखे ह सुध अय।
LEV 13:41 कहूं कोनो मनखे के मुड़ के आघू के चुंदी झर गे हवय, त ओह माथा के चंदुआ अय; ओह सुध अय।
LEV 13:42 पर कहूं ओकर चंदुआ मुड़ या चंदुआ माथा म लाल-सफेद रंग के घाव हवय, त येह ओकर मुड़ या माथा म निकले एक असुध करइया बेमारी अय।
LEV 13:43 पुरोहित ह ओ मनखे के जांच करय अऊ कहूं ओकर मुड़ या माथा के फूले घाव ह लाल-सफेद रंग के चमड़ी के एक असुध करइया बेमारी सहीं अय,
LEV 13:44 त ओ मनखे ला बेमारी हो गे हे अऊ ओह असुध अय। ओकर मुड़ या माथा म घाव के कारन, पुरोहित ह ओला असुध ठहिरावय।
LEV 13:45 “जऊन मनखे म अइसने असुध बेमारी हवय, ओह चिरहा-फटहा ओनहा पहिरय; ओकर चुंदी ह छरियाय रहय अऊ अपन चेहरा के खाल्हे भाग ला तोप के ओह चिचियावय, ‘असुध! असुध!’
LEV 13:46 जब तक ओ मनखे म बेमारी हवय, तब तक ओह असुध रहिथे। ओह अकेला रहय; ओह डेरा के बाहिर म रहय।
LEV 13:47 “जब कोनो ओनहा ह असुध करइया बेमारी ले खराप हो जावय—चाहे ओ ओनहा ह ऊन के होवय या मलमल के होवय,
LEV 13:48 मलमल या ऊन के बिनाय या गंथाय कोनो चीज होवय, चाम या चाम के बने कोनो चीज होवय—
LEV 13:49 कहूं ओ ओनहा, चाम, बिनाय या गंथाय चीज, या कोनो चाम ले बने चीज के ओ बेमारीवाला भाग ह हरियर या लाली रंग के दिखय, त येह असुध करइया फफूंदी अय अऊ येला पुरोहित ला देखाय जावय।
LEV 13:50 पुरोहित ह बेमारी लगे भाग ला जांचय अऊ ओ चीज ला सात दिन तक अलग रखय।
LEV 13:51 सातवां दिन पुरोहित ह येकर फेर जांच करय, अऊ कहूं ओ बेमारी ह ओनहा, बिनाय या गंथाय चीज म, या चाम म बगर गे हवय, चाहे ओकर कोनो घलो उपयोग होथे, येह लगातार बने रहइया एक असुध बेमारी अय; ओ चीज ह असुध अय।
LEV 13:52 ओह ओ ओनहा, ऊन या मलमल के बिनाय या गंथाय चीज, या कोनो चाम के बने चीज, जऊन ह खराप हो गे हवय, ओला जला देवय; काबरकि ओ असुध करइया फफूंदी ह लगातार बने रहिथे; ओ चीज ला जला दिये जावय।
LEV 13:53 “पर कहूं पुरोहित ह येला जांच करय, अऊ फफूंदी ह ओ ओनहा म, बिनाय या गंथाय चीज म, या चाम के चीज म नइं बगरे हवय,
LEV 13:54 त पुरोहित ह हुकूम देवय कि जऊन चीज ह खराप होय हवय, ओला धोय जावय। तब ओह ओ चीज ला सात दिन तक अलग रखय।
LEV 13:55 ओ चीज ला धोय के बाद, पुरोहित ह ओला फेर जांच करय, अऊ कहूं फफूंदी म कोनो बदलाव नइं दिखय, अऊ हालाकि येह नइं बगरे हवय, तभो ले येह असुध अय। येला जला देवय, चाहे ओ चीज के कोनो घलो भाग खराप होय हवय।
LEV 13:56 पर यदि पुरोहित ह येला जांच करथे, अऊ ओ चीज ला धोय के बाद, फफूंदी के चमक ह कम हो गे हवय, त ओह ओ ओनहा, चाम, या बिनाय या गंथाय चीज के ओ खराप हिस्सा ला चीरके अलग कर देवय।
LEV 13:57 पर कहूं ओ बेमारी ओनहा म, बुने या गंथाय चीज म, या चाम के बने चीज म फेर दिखथे, त येह एक बगरनेवाला फफूंदी अय; अऊ ओ फफूंदीवाले चीज ला जला दिये जावय।
LEV 13:58 कहूं कोनो ओनहा, बिनाय या गंथाय चीज, या चाम के कोनो चीज ला धोय गे हवय, अऊ ओमा के फफूंदी ह खतम हो गे हवय, त ओ चीज ला फेर धोय जावय। तब येह सुध होही।”
LEV 13:59 ऊन या मलमल के ओनहा, बिनाय या गंथाय चीज, या चाम ले बने कोनो चीज म लगे फफूंद ला सुध या असुध ठहिराय के नियम येमन अंय।
LEV 14:1 यहोवा ह मूसा ला कहिस,
LEV 14:2 “जब कोनो बिमरहा मनखे ला पुरोहित करा लाय जाथे, त ओकर बिधि के मुताबिक सुध होय के नियम ये अंय:
LEV 14:3 पुरोहित ह डेरा के बाहिर जावय अऊ ओकर जांच करय। यदि ओह असुध करइया चमड़ी के बेमारी ले बने हो गे हवय,
LEV 14:4 त पुरोहित ह हुकूम देवय कि ओ मनखे ला सुध ठहिराय बर दू ठन जीयत अऊ सुध चिरई, देवदार के लकरी, लाल रंग के सूंत अऊ जूफा लाने जावय।
LEV 14:5 तब पुरोहित ह हुकूम देवय कि माटी के बरतन म ताजा पानी के ऊपर एक ठन चिरई ला बलि करे जावय।
LEV 14:6 ओह तब ओ जीयत चिरई ला लेवय अऊ ओला देवदार के लकरी, लाल सूंत अऊ जूफा के संग ताजा पानी के ऊपर बलि करे गय चिरई के लहू म बुड़ोवय।
LEV 14:7 तब ओह ओ मनखे ला असुध करइया बेमारी ले सुध ठहिराय बर ओकर ऊपर सात बार छिंचय, अऊ तब ओला सुध ठहिरावय। ओकर बाद, ओ जीयत चिरई ला खुला जगह म छोंड़ देवय।
LEV 14:8 “तब ओ मनखे जऊन ला सुध ठहिराय जाथे, ओह अपन ओनहा ला धोवय, अपन जम्मो चुंदी ला कतरावय अऊ पानी म नहावय; तब ओह बिधि के मुताबिक सुध होही। एकर बाद, ओह डेरा के भीतर आ सकत हे, पर सात दिन तक, ओह अपन तम्बू ले बाहिर रहय।
LEV 14:9 सातवां दिन ओह अपन जम्मो चुंदी ला मुड़वावय; ओह अपन मुड़, अपन दाढ़ी अऊ अपन भौंह के चुंदी अऊ बाकि चुंदी ला कतरावय। तब ओह अपन ओनहा ला धोवय अऊ पानी म नहावय, अऊ तब ओह सुध होही।
LEV 14:10 “आठवां दिन, ओह एक-एक बछर के दू ठन निरदोस मेढ़ा-पीला अऊ एक बछर के एक ठन निरदोस भेड़ी-पीला लेके आवय अऊ अन्न-बलिदान बर संग म जैतून तेल म सनाय एक एपा के तीन-दसवां भाग बढ़िया पीसान लानय अऊ लोज भर तेल घलो लानय।
LEV 14:11 ओ पुरोहित जऊन ह सुध ठहिराथे, ओह ओ मनखे ला अऊ ओकर बलिदानमन ला यहोवा के आघू म मिलापवाला तम्बू के मुंहटा करा लानय।
LEV 14:12 “तब पुरोहित ह एक ठन मेढ़ा-पीला ला लेवय अऊ ओला दोस-बलिदान के रूप म, आधा लीटर तेल के संग यहोवा ला चघावय; ओह हलाय-बलिदान के रूप म ओमन ला यहोवा के आघू म हलाय।
LEV 14:13 ओह मेढ़ा-पीला ला पबितर-स्थान के छेत्र म बलि करय, जिहां पाप-बलिदान अऊ होम-बलिदान के पसु ला बलि करे जाथे। पाप-बलिदान सहीं, दोस-बलिदान ह घलो पुरोहित के बांटा अय; येह महा पबितर अय।
LEV 14:14 पुरोहित ह दोस-बलिदान के कुछू लहू ला लेवय अऊ सुध होवइया मनखे के जेवनी कान के टीप म, ओकर जेवनी हांथ के अंगठा म अऊ ओकर जेवनी गोड़ के अंगठा म लगावय।
LEV 14:15 पुरोहित ह तब ओ आधा लीटर तेल म ले थोरकून लेवय अऊ अपन डेरी हांथ के हथेली म ढारय,
LEV 14:16 अऊ ओह अपन जेवनी हांथ के अंगठा के बाद वाले अंगठी ला डेरी हांथ के हथेली के तेल म बुड़ोवय, अऊ अपन अंगठी ले ओमा के कुछू तेल यहोवा के आघू म सात बार छिंचय।
LEV 14:17 अपन हथेली म बांचे कुछू तेल ला पुरोहित ह ओ सुध होवइया मनखे के जेवनी कान के टीप म, ओकर जेवनी हांथ के अंगठा म अऊ जेवनी गोड़ के अंगठा म, अऊ दोस-बलिदान के लहू के ऊपर म लगावय।
LEV 14:18 अपन हथेली म बांचे तेल ला, पुरोहित ह सुध होवइया मनखे के मुड़ म डार देवय अऊ यहोवा के आघू म ओ मनखे बर प्रायस्चित के बिधि ला पूरा करय।
LEV 14:19 “तब पुरोहित ह पाप-बलिदान चघावय अऊ ओ मनखे ला ओकर असुधता ले सुध करे बर प्रायस्चित के बिधि ला पूरा करय। ओकर बाद, पुरोहित ह होम-बलिदान के पसु ला बलि करय
LEV 14:20 अऊ येला अन्न-बलिदान के संग बेदी म चघावय, अऊ ओ मनखे बर प्रायस्चित के बिधि ला पूरा करय, अऊ ओह सुध ठहिरही।
LEV 14:21 “पर, कहूं, ओह गरीब अय अऊ अतेक नइं दे सकय, त ओह अपन प्रायस्चित करे बर एक ठन मेढ़ा-पीला दोस-बलिदान के रूप म हलाय बर लेवय, अऊ संग म अन्न-बलिदान बर तेल म सनाय एपा के दसवां भाग बहुंत बढ़िया पीसान अऊ आधा लीटर तेल लेवय,
LEV 14:22 अऊ अपन हैसियत के मुताबिक, ओह दू ठन पंड़की या दू ठन परेवा पीला लानय; येमा के एक ठन ह पाप-बलिदान अऊ दूसर ह होम-बलिदान बर होही।
LEV 14:23 “आठवां दिन ओह ये जम्मो ला अपन सुध होय बर मिलापवाला तम्बू के मुंहटा म यहोवा के आघू म पुरोहित करा लानय।
LEV 14:24 पुरोहित ह दोस-बलिदान के रूप म मेढ़ा-पीला ला आधा लीटर तेल के संग लेवय, अऊ ओमन ला हलाय-बलिदान के रूप म यहोवा के आघू म हलावय।
LEV 14:25 ओह दोस-बलिदान बर मेढ़ा-पीला ला बलि करय अऊ येमा के कुछू लहू ला लेवय अऊ सुध होवइया मनखे के जेवनी कान के टीप म, ओकर जेवनी हांथ के अंगठा म अऊ जेवनी गोड़ के अंगठा म लगावय।
LEV 14:26 पुरोहित ह कुछू तेल ला अपन डेरी हांथ के हथेली म ढारय,
LEV 14:27 अऊ अपन जेवनी हांथ के अंगठा के बाजू वाले अंगठी म हथेली के कुछू तेल ला लेके यहोवा के आघू म सात बार छिंचय।
LEV 14:28 तब पुरोहित ह अपन हथेली के कुछू तेल ला लेके ओ जगह म लगावय, जऊन जगह म ओह दोस-बलिदान के लहू ला लगाथे—याने कि सुध होवइया मनखे के जेवनी कान के टीप म, ओकर जेवनी हांथ के अंगठा म अऊ जेवनी गोड़ के अंगठा म लगावय।
LEV 14:29 अपन हथेली म बांचे तेल ला पुरोहित ह ओ सुध होवइया मनखे के मुड़ म ढारय, ताकि यहोवा के आघू म ओ मनखे के प्रायस्चित के बिधि ह पूरा होवय।
LEV 14:30 तब ओह अपन हैसियत के मुताबिक पंड़कीमन या परेवा-पीलामन ला चघावय,
LEV 14:31 एक ठन ला पाप-बलिदान अऊ दूसर ला होम-बलिदान के रूप म, अन्न-बलिदान के संग चघावय। ये किसम ले, सुध होवइया मनखे के तरफ ले, पुरोहित ह यहोवा के आघू म प्रायस्चित के बिधि ला पूरा करही।”
LEV 14:32 येमन ओ मनखे बर सुध होय के नियम अंय, जऊन ला असुध करइया चमड़ी के बेमारी हवय अऊ ओमन गरीब अंय।
LEV 14:33 यहोवा ह मूसा अऊ हारून ला कहिस,
LEV 14:34 “जब तुमन कनान देस म हबरहू, जेला मेंह तुमन ला तुम्हर अधिकार म देवत हंव, अऊ कहूं मेंह ओ देस म कोनो घर म बगरनेवाला बेमारी भेजंव,
LEV 14:35 त ओ घर के मालिक ह जाके पुरोहित ला बतावय, ‘मेंह अपन घर म अइसन चीज देखे हंव, जऊन ह असुध करइया फफूंदी सहीं लगथे।’
LEV 14:36 एकर पहिली कि पुरोहित ह ओ घर म जाके बेमारी के जांच करय, ओह घर के सामान ला खाली करे के हुकूम देवय, ताकि घर के कोनो चीज असुध झन ठहिरय। एकर बाद, पुरोहित ह घर भीतर जाके जांच करय।
LEV 14:37 ओह भीथीमन म बेमारी के जांच करय, अऊ यदि येह हरियर या लाल रंग के हवय अऊ भीथी के सतह ले धंसे सहीं दिखय,
LEV 14:38 त पुरोहित ह घर ले बाहिर मुंहटा म जाके, ओ घर ला सात दिन बर बंद कर देवय।
LEV 14:39 सातवां दिन, पुरोहित ह आके ओ घर के जांच करय। कहूं बेमारी ह घर के भीथीमन म बगर गे हवय,
LEV 14:40 त पुरोहित ह हुकूम देवय कि जऊन पथरामन दूसित हो गे हवंय, ओमन ला निकालके सहर के बाहिर कोनो असुध जगह म फटिक दिये जावय।
LEV 14:41 ओह घर के भीतर के चारों कोति के भीथी ला खुरचय अऊ खुरचे माटी ला सहर के बाहिर, कोनो असुध जगह म डार देवय।
LEV 14:42 तब ओह निकाले गे पथरामन के जगह म आने पथरा लगावय अऊ ताजा गारा लेके घर ला छाबय।
LEV 14:43 “घर के पथरामन ला बदले, घर ला खुरचे अऊ छाबे के बाद, कहूं असुध करइया फफूंदी ह फेर दिखथे,
LEV 14:44 त पुरोहित ह घर भीतरी जाके जांच करय। अऊ, कहूं फफूंदी ह घर म बगर गे हवय, त येह लगातार बने रहइया असुध करइया फफूंदी अय; ओ घर ह असुध अय।
LEV 14:45 ओ घर ला गिरा दिये जावय—ओकर पथरा, लकरी अऊ घर के जम्मो मलमा ला सहर के बाहिर कोनो असुध जगह म ले जावय।
LEV 14:46 “जब घर ह बंद रहिथे, ओ समय यदि कोनो घर के भीतर जाथे, त ओह संझा के होवत तक असुध ठहिरय।
LEV 14:47 ओ मनखे जऊन ह ओ घर म सुतथे या खाथे, ओह अपन ओनहा ला जरूर धोवय।
LEV 14:48 “पर कहूं पुरोहित ह भीतर म आके जांच करथे अऊ देखथे कि घर ला फेर से छाबे के बाद, फफूंदी ह नइं बगरे हवय, त ओह ओ घर ला सुध ठहिरावय, काबरकि असुध करइया फफूंदी ह खतम हो गे हवय।
LEV 14:49 अऊ ओ घर ला सुध करे बर, ओह दू ठन चिरई, देवदार के लकरी, लाल सूंत अऊ जूफा लेवय।
LEV 14:50 ओह एक ठन माटी के बरतन म ताजा पानी के ऊपर एक ठन चिरई ला बलि करय।
LEV 14:51 तब ओह ओ जीयत चिरई के संग देवदार के लकरी, जूफा, लाल सूंत ला लेवय अऊ येमन ला बलि करे गे चिरई के लहू म अऊ ताजा पानी म बुड़ोवय अऊ घर म सात बार छिंचय।
LEV 14:52 ओह ओ घर ला चिरई के लहू, ताजा पानी, जीयत चिरई, देवदार के लकरी, जूफा अऊ लाल सूंत के दुवारा सुध करय।
LEV 14:53 तब ओह जीयत चिरई ला सहर के बाहिर खुला जगह म छोंड़ देवय। ये किसम ले ओह घर बर प्रायस्चित के बिधि ला पूरा करही, अऊ ओ घर ह सुध हो जाही।”
LEV 14:54 कोनो असुध करइया चमड़ी के बेमारी, घाव,
LEV 14:55 ओनहा या घर म असुध करइया फफूंदी,
LEV 14:56 सूजन, चकत्ता, या चमकत दाग के बिसय म ये नियम अंय।
LEV 14:57 ये बिधिमन के दुवारा पता चलथे कि कोनो चीज ह सुध हवय या असुध। असुध करइया चमड़ी के बेमारी अऊ असुध करइया फफूंदी के बिसय म ये नियम अंय।
LEV 15:1 यहोवा ह मूसा अऊ हारून ला फेर कहिस,
LEV 15:2 “इसरायलीमन ले गोठियावव अऊ ओमन ला कहव: ‘जब कोनो मनखे के देहें ले असामान्‍य रूप म कुछू चीज निकलथे, त ओ चीज ह असुध अय।
LEV 15:3 चाहे ओ चीज ह ओकर देहें ले लगातार निकलत रहय या बंद हो जावय, येह ओला असुध करही। ये किसम ले, ओकर देहें ले निकले चीज ह ओला असुध करही:
LEV 15:4 “ ‘जऊन बिस्तर म धातवाले ह सुतथे, ओह असुध हो जाही, अऊ जऊन कोनो चीज म ओह बईठथे, ओह घलो असुध हो जाही।
LEV 15:5 जऊन कोनो ओकर बिस्तर ला छूथे, ओह अपन ओनहा ला धोवय अऊ पानी ले नहावय, अऊ ओह संझा के होवत तक असुध ठहिरही।
LEV 15:6 जऊन कोनो ओ चीज म बईठथे, जेमा धातवाले ह बईठे रिहिस, त ओह अपन ओनहा ला धोवय अऊ पानी ले नहावय, अऊ ओह संझा के होवत तक असुध ठहिरही।
LEV 15:7 “ ‘जऊन कोनो धातवाले ला छू लेथे, ओह अपन ओनहा ला धोवय अऊ पानी ले नहावय, अऊ ओह संझा के होवत तक असुध ठहिरही।
LEV 15:8 “ ‘कहूं कोनो धातवाले ह कोनो सुध मनखे ऊपर थूक देथे, त ओह अपन ओनहा ला धोवय अऊ पानी ले नहावय, अऊ ओह संझा के होवत तक असुध ठहिरही।
LEV 15:9 “ ‘धातवाले ह जऊन चीज म बईठके सवारी करथे, ओ आसन ह असुध ठहिरय,
LEV 15:10 अऊ जऊन ह कोनो चीज ला, जेह ओकर खाल्हे म रिहिस, छू लेथे, त ओह संझा के होवत तक असुध ठहिरही; जऊन कोनो ओ चीजमन ला उठाथे, ओह अपन ओनहा ला धोवय अऊ पानी ले नहावय, अऊ ओह संझा के होवत तक असुध ठहिरही।
LEV 15:11 “ ‘जऊन कोनो मनखे ला धातवाले ह पानी म हांथ धोये बिगर छू लेथे, त ओह अपन ओनहा ला धोवय अऊ पानी ले नहावय, अऊ ओह संझा के होवत तक असुध ठहिरही।
LEV 15:12 “ ‘धातवाले ह माटी के कोनो बरतन ला छू लेथे, त ओ बरतन ला फोर दिये जावय, अऊ कठवा के बने जम्मो चीज ला पानी म धोय जावय।
LEV 15:13 “ ‘जब धातवाले ह अपन तकलीफ ले बने हो जाथे, तब ओह बिधि मुताबिक अपन सुध होय के सात दिन गन लेवय; तब ओह अपन ओनहा ला धोवय अऊ ताजा पानी म नहावय, अऊ ओह सुध हो जाही।
LEV 15:14 आठवां दिन ओह दू ठन पंड़की या दू ठन परेवा पीला लेवय अऊ मिलापवाला तम्बू के मुंहटा म यहोवा के आघू म जाके ओमन ला पुरोहित ला देवय।
LEV 15:15 पुरोहित ह ओमा ले एक ठन ला पाप-बलिदान बर अऊ दूसर ला होम-बलिदान बर चघावय। ये किसम ले, पुरोहित ह ओ मनखे बर ओकर धात के रोग के कारन यहोवा के आघू म प्रायस्चित के बिधि ला पूरा करही।
LEV 15:16 “ ‘जब कोनो आदमी के बीर्य ह निकल जावय, त ओह पानी म पूरा नहावय, अऊ ओह संझा के होवत तक असुध ठहिरही।
LEV 15:17 कोनो ओनहा या चाम के चीज, जऊन म बीर्य लगे हवय, ओला पानी म धोय जावय, अऊ येह संझा के होवत तक असुध ठहिरही।
LEV 15:18 जब कोनो आदमी के सारीरिक संबंध कोनो माईलोगन के संग होथे अऊ बीर्य निकलथे, त ओ दूनों झन पानी म नहावंय, अऊ ओमन संझा के होवत तक असुध ठहिरहीं।
LEV 15:19 “ ‘जब कोनो माईलोगन ला मासिक धरम होवय, त ओ समय म ओह सात दिन तक असुध ठहिरही, अऊ जऊन कोनो ओला छूथे, ओह संझा के होवत तक असुध ठहिरही।
LEV 15:20 “ ‘अपन मासिक धरम के समय, ओह जऊन चीज म सुतथे, ओ चीज ह असुध ठहिरही, अऊ जऊन चीज म ओह बईठथे, ओह घलो असुध ठहिरही।
LEV 15:21 जऊन कोनो ओ माईलोगन के बिस्तर ला छूथे, ओह असुध ठहिरही; ओह अपन ओनहा ला धोवय अऊ पानी म नहावय अऊ ओह संझा के होवत तक असुध ठहिरही।
LEV 15:22 जऊन कोनो अइसने कोनो चीज ला छू लेथे, जेमा ओ माईलोगन ह बईठे रिहिस, त ओह असुध ठहिरही; ओह अपन ओनहा ला धोवय अऊ पानी म नहावय, अऊ ओह संझा के होवत तक असुध ठहिरही।
LEV 15:23 चाहे येह बिस्तर होवय या कोनो अऊ चीज, जेमा ओ माईलोगन ह बईठे रिहिस, जब कोनो येला छू लेथे, त ओह संझा के होवत तक असुध ठहिरही।
LEV 15:24 “ ‘कहूं कोनो आदमी ह ओकर संग सारीरिक संबंध बनाथे अऊ ओ माईलोगन के मासिक धरम के लहू ह ओला लग जाथे, त ओ आदमी ह सात दिन तक असुध हो जाही; अऊ जऊन बिस्तर म ओह सुतथे, ओह घलो असुध ठहिरही।
LEV 15:25 “ ‘जब कोनो माईलोगन ला ओकर मासिक धरम के समय ले जादा दिन तक लहू बोहावत रहिथे या ओकर मासिक धरम के समय के बाद घलो ओकर लहू बोहावत रहिथे, त जब तक ओकर लहू बोहावत रहिही, तब तक ओह वइसने ही असुध ठहिरही, जइसने कि अपन मासिक धरम के दिन म ठहिरथे।
LEV 15:26 जऊन बिस्तर म ओह अइसने लहू बोहाय के दिन म सुतथे, त ओ बिस्तर घलो असुध ठहिरही, जइसने कि ओकर मासिक धरम के समय म असुध ठहिरथे, अऊ ओ माईलोगन जऊन चीज म बईठथे, ओ चीज ह घलो असुध ठहिरही, जइसने कि ओकर मासिक धरम के दिन म ठहिरथे।
LEV 15:27 जऊन कोनो ओ चीजमन ला छूथे, ओह असुध ठहिरही; ओह अपन ओनहा ला धोवय अऊ पानी म नहावय, अऊ ओह संझा के होवत तक असुध ठहिरही।
LEV 15:28 “ ‘जब ओ माईलोगन ह अपन लहू बोहाय ले सुध हो जाथे, त ओह सात दिन गनय, अऊ ओकर बाद बिधि के मुताबिक ओह सुध हो जाही।
LEV 15:29 आठवां दिन ओह दू ठन पंड़की या दू ठन परेवा पीला लेवय अऊ ओमन ला मिलापवाला तम्बू के मुंहटा म पुरोहित करा लानय।
LEV 15:30 पुरोहित ह एक ठन चिरई ला पाप-बलिदान अऊ दूसर ला होम-बलिदान के रूप म चघावय। ये किसम ले, पुरोहित ह ओकर लहू बोहाय के असुधता के सेति यहोवा के आघू म ओकर बर प्रायस्चित के बिधि ला पूरा करही।
LEV 15:31 “ ‘तुमन इसरायलीमन ला ओ चीजमन ले अलग रखव, जऊन चीजमन ओमन ला असुध करथें, नइं तो ओमन मोर निवास के जगह, जऊन ह ओमन के बीच हवय, ओला असुध करहीं अऊ ओकरे कारन अपन असुधता म मर जाहीं।’ ”
LEV 15:32 धात के बिमरहा, अऊ जऊन आदमी के बीर्य ह निकल जाथे, जेकर ले ओह असुध ठहिरथे,
LEV 15:33 ओ माईलोगन जऊन ह मासिक धरम के कारन असुध हवय, कोनो आदमी के बीर्य निकलय या माईलोगन के लहू बोहावय, या कोनो आदमी, जऊन ह असुध माईलोगन संग सारीरिक संबंध बनाथे, ये जम्मो बर ये बिधिमन अंय।
LEV 16:1 जब हारून के दू झन बेटामन यहोवा के आघू म जाके मर गीन, त एकर बाद यहोवा ह मूसा ले गोठियाईस।
LEV 16:2 यहोवा ह मूसा ला कहिस, “अपन भाई हारून ला कह कि ओह सन्दूक के ऊपर बने प्रायस्चित के ढकना के आघू, परदा के भीतर महा पबितर स्थान म, घेरी-बेरी झन आवय, नइं तो ओह मर जाही, काबरकि मेंह प्रायस्चित के ढकना के ऊपर बादर म परगट होहूं।
LEV 16:3 “हारून ह महा पबितर स्थान म ये किसम ले आवय: जरूरी अय कि ओह पहिले पाप-बलिदान के खातिर एक ठन जवान बछवा अऊ होम-बलिदान के खातिर एक ठन मेढ़ा ला लेके आवय।
LEV 16:4 ओह मलमल के पबितर अंगरखा अऊ अपन देहें म मलमल के कच्छा पहिरय अऊ मलमल के कमरबंध कसके मलमल के पागा बांधय। येमन पबितर ओनहा अंय। ओह पानी म नहाके ही येमन ला पहिरय।
LEV 16:5 फेर ओह इसरायली समाज ले पाप-बलिदान के खातिर दू ठन बोकरा अऊ होम-बलिदान के चढ़ावा खातिर एक ठन मेढ़ा लेवय।
LEV 16:6 “तब हारून ह ओ पाप-बलिदान के बछवा ला जऊन ह ओकरे खातिर अय, चघाके अपन अऊ अपन परिवार बर प्रायस्चित करय।
LEV 16:7 तब ओह ओ दूनों बोकरामन ला लेके मिलापवाला तम्बू के मुंहटा म यहोवा के आघू म ठाढ़ करय।
LEV 16:8 हारून ह दूनों बोकरामन बर चिट्ठी डालय, याने कि एक चिट्ठी यहोवा बर अऊ दूसर चिट्ठी अजाजेल बर।
LEV 16:9 जऊन बोकरा बर यहोवा के नांव के चिट्ठी निकलय, ओला हारून ह पाप-बलिदान बनाके चघावय।
LEV 16:10 पर जऊन बोकरा बर अजाजेल के नांव के चिट्ठी निकलय, ओला यहोवा के आघू म जीयत ठाढ़ करे जावय ताकि ओकर दुवारा प्रायस्चित करे बर ओला सुन्ना जगह म अजाजेल के रूप म भेजे जावय।
LEV 16:11 “तब हारून ह पाप-बलिदान के ओ बछवा ला, जऊन ह ओकरेच बर अय, लानके अपन घराना बर प्रायस्चित करय। ओह ओ पाप-बलिदान के बछवा ला, जऊन ह ओकरेच बर अय, बलि करय।
LEV 16:12 अऊ ओह यहोवा के आघू बेदी म के बरत कोइला ले भरे धूपदान अऊ दू मुठा चिक्कन पिसे खुसबूवाला धूप ला लेके परदा के भीतर जावय।
LEV 16:13 ओह ओ धूप ला यहोवा के आघू म आगी के ऊपर डारय, जेकर ले धूप के कुहरा ह करार कानून के पटियामन ऊपर प्रायस्चित के ढकना ला भर लेवय, ताकि ओह झन मरय।
LEV 16:14 फेर ओह बछवा के लहू म ले थोरकून ला लेके अंगठी ले प्रायस्चित के ढकना के ऊपर सामने म छिंचय अऊ ओ लहू म ले थोरकून ला प्रायस्चित के ढकना के आघू म घलो अंगठी ले सात बार छिंचय।
LEV 16:15 “तब ओह पाप-बलिदान के ओ बोकरा ला, जऊन ह मनखेमन बर अय, बलि करय अऊ ओकर लहू ला परदा के भीतर लावय अऊ ये लहू के संग वइसनेच करय, जइसे बछवा के लहू के संग करे रिहिस। ओह येला प्रायस्चित के ढकना के ऊपर अऊ ओकर आघू म छिंचय।
LEV 16:16 इसरायलीमन के असुधता अऊ बिदरोह के कारन, अऊ जऊन कुछू पाप ओमन करे हवंय, ओकर कारन, ओह ये किसम ले महा पबितर स्थान बर प्रायस्चित करय। ओह मिलापवाला तम्बू बर घलो, जऊन ह ओमन के असुधता म ओमन के बीच म रहिथे, अइसने ही करय।
LEV 16:17 जब हारून ह प्रायस्चित करे बर महा पबितर स्थान म जावय, त जब तक ओह अपन, अपन घराना अऊ इसरायल के जम्मो समाज बर प्रायस्चित करके बाहिर नइं निकलय, तब तक कोनो मनखे मिलापवाला तम्बू म झन रहय।
LEV 16:18 “तब ओह बाहिर निकलके ओ बेदी के तीर म जावय, जऊन ह यहोवा के आघू म हवय अऊ ओकरे बर प्रायस्चित करय, याने बछवा अऊ बोकरा दूनों के लहू म ले थोरकून ला लेके बेदी के सींगमन म जम्मो कोति लगावय।
LEV 16:19 अऊ अपन अंगठी ले ओ लहू म ले थोरकून लेके बेदी ऊपर सात बार छिंचके, ओला इसरायलीमन के असुधता ले सुध अऊ पबितर करय।
LEV 16:20 “जब हारून ह महा पबितर स्थान, मिलापवाला तम्बू, अऊ बेदी बर प्रायस्चित कर डारय, तब ओ जीयत बोकरा ला तीर म लावय।
LEV 16:21 तब हारून ह जीयत बोकरा के मुड़ के ऊपर अपन दूनों हांथ ला मढ़ावय अऊ ओकर ऊपर इसरायलीमन के जम्मो अधरम अऊ ओमन के जम्मो अपराध अऊ पाप ला मान लेवय। ओह ओमन ला ओ बोकरा के मुड़ म डारके ओला एक झन मनखे के हांथ ले, जऊन ला इही काम बर रखे गय हवय, सुन्ना जगह म भेज देवय।
LEV 16:22 ओ बोकरा ह ओमन के जम्मो अधरम ला अपन ऊपर बोहके कोनो सुन्ना जगह म चल दीही। ओ मनखे ह ओ बोकरा ला सुन्ना जगह म छोंड़ देवय।
LEV 16:23 “तब हारून ह मिलापवाला तम्बू म आके मलमल के ओ जम्मो ओनहा, जऊन ला ओह महा पबितर स्थान म जाय के बेरा पहिरे रिहिस, ओमन ला ओही मेर छोंड़ देवय।
LEV 16:24 फेर ओह पबितर-स्थान के छेत्र म पानी ले नहाके अपनेच ओनहा ला पहिर लेवय अऊ बाहिर म आके अपन बर अऊ मनखेमन बर घलो होम-बलिदान चघाके अपन बर अऊ मनखेमन बर प्रायस्चित करय।
LEV 16:25 अऊ पाप-बलिदान के चरबी ला ओह बेदी म जलावय।
LEV 16:26 “जऊन मनखे ह बोकरा ला अजाजेल के रूप म छोंड़े हवय, ओह अपन ओनहा ला धोवय, पानी ले नहावय, तभे डेरा के भीतर आवय।
LEV 16:27 पर पाप-बलिदान के बछवा अऊ पाप-बलिदान के बोकरा, जेकर लहू ला महा पबितर स्थान म प्रायस्चित करे बर लाने गे रिहिस, ओमन ला डेरा के बाहिर म ले जाके ओकर खाल, मांस, अऊ गोबर ला आगी म जलाय जावय।
LEV 16:28 तब ओमन ला जरोइया ह अपन ओनहा ला धोवय अऊ पानी ले नहावय। एकर बाद ही ओह डेरा के भीतर आवय।
LEV 16:29 “येह तुम्हर बर एक ठन सदा के बिधि ठहिरय: हर साल सातवां महिना के दसवां दिन तुमन अपनआप के इनकार करव। ओ दिन कोनो मनखे, कहूं ओह देस म जनमे मनखे होवय या तुम्हर बीच म रहइया परदेसी, कोनो काम-बुता झन करहू।
LEV 16:30 काबरकि इही दिन तुमन ला सुध करे के खातिर तुम्हर बर प्रायस्चित करे जाही, अऊ तुमन अपन जम्मो पापमन ले यहोवा के आघू म सुध ठहिरहू।
LEV 16:31 ये दिन ह बिसराम के दिन अय, अऊ जरूरी अय कि तुमन अपनआप के इनकार करव। येह सदा के एक बिधि अय।
LEV 16:32 अऊ जऊन पुरोहित ला अपन ददा के जगह म महा पुरोहित के रूप म काम करे बर अभिसेक अऊ संस्कार करे गे हवय, ओही ह प्रायस्चित करय। ओह मलमल के ओनहा याने पबितर ओनहा ला पहिरके
LEV 16:33 जम्मो महा पबितर स्थान, मिलापवाला तम्बू, अऊ बेदी बर प्रायस्चित करय। ओह पुरोहित अऊ समाज के जम्मो सदस्य बर घलो प्रायस्चित करय।
LEV 16:34 “येह तुम्हर बर सदा के बिधि ठहिरय कि इसरायलीमन बर एक बछर म एक बार ओमन के जम्मो पाप बर प्रायस्चित करे जावय।” अऊ जइसे यहोवा ह मूसा ला हुकूम देय रिहिस, वइसनेच करे गीस।
LEV 17:1 यहोवा ह मूसा ला कहिस,
LEV 17:2 “हारून अऊ ओकर बेटामन ला अऊ जम्मो इसरायलीमन ला कह: ‘यहोवा ह ये हुकूम दे हवय:
LEV 17:3 यदि कोनो इसरायली मनखे कोनो बछवा, मेढ़ा-पीला या बोकरा ला डेरा के भीतर या डेरा के बाहिर बलि चघाथे,
LEV 17:4 पर ओला मिलापवाला तम्बू के मुंहटा करा यहोवा के पबितर-तम्बू के आघू म यहोवा ला बलि चघाय बर नइं लानय, त ओ मनखे ह लहू बहाय के दोसी समझे जाही; ओ मनखे ह लहू बहाय हवय; ओला अपन मनखेमन के समाज ले अलग करे जावय।
LEV 17:5 ये बिधि के कारन ये अय ताकि इसरायलीमन अपन बलिदान यहोवा करा लानंय, पर खुला जगह म बलिदान झन करंय। ओमन अपन बलिदान ला मिलापवाला तम्बू के मुंहटा म पुरोहित करा लानके मेल-बलिदान के रूप म यहोवा ला चघावंय।
LEV 17:6 पुरोहित ह लहू ला मिलापवाला तम्बू के मुंहटा म यहोवा के बेदी के चारों कोति छिंचय अऊ चरबी ला यहोवा बर सुख-देवइया सुगंध के रूप म जलावय।
LEV 17:7 ओमन बोकरा के मूरतीमन ला कोनो बलिदान झन चघावंय, काबरकि अइसने करके ओमन बेभिचारी के सहीं ठहिरथें। येह पीढ़ी दर पीढ़ी ओमन के हमेसा के बिधि ठहिरय।’
LEV 17:8 “ओमन ला कह: ‘कोनो इसरायली या ओमन के बीच म रहइया कोनो परदेसी ह होम-बलिदान या बलि चघाथे,
LEV 17:9 अऊ ओला मिलापवाला तम्बू के मुंहटा म यहोवा करा लानके नइं चघावय, त ओ मनखे ला इसरायली मनखेमन के समाज ले अलग करे जावय।
LEV 17:10 “ ‘कोनो इसरायली या ओमन के बीच म रहइया कोनो परदेसी, जऊन ह लहू ला खाथे, त मेंह ओला मनखेमन के बीच ले अलग कर दूहूं।
LEV 17:11 काबरकि परानी के परान ह लहू म रहिथे, अऊ येला मेंह तुमन ला एकरसेति दे हंव कि तुमन बेदी म अपन बर प्रायस्चित के बिधि ला पूरा करव; काबरकि ये लहू ही मनखे के जिनगी के प्रायस्चित ला पूरा करथे।
LEV 17:12 एकरसेति मेंह इसरायलीमन ला कहिथंव, “न तो तुमन, अऊ न ही तुम्हर बीच म रहइया कोनो परदेसी लहू ला खावय।”
LEV 17:13 “ ‘कोनो इसरायली या तुम्हर बीच म रहइया कोनो परदेसी कोनो अइसने पसु या चिरई के सिकार करथे, जऊन ला खाय जा सकत हे, त पहिले ओकर लहू ला बहाके माटी म ढांप दिये जावय,
LEV 17:14 काबरकि हर एक जीव के परान ह ओकर लहू म होथे। एकरसेति मेंह इसरायलीमन ला कहे हंव, “तुमन कोनो जीव के लहू ला झन खावव, काबरकि हर एक जीव के परान ह ओकर लहू म होथे; जऊन कोनो ओला खाथे, ओला समाज ले अलग करे जावय।”
LEV 17:15 “ ‘कोनो मनखे, चाहे ओह देस म जनमे होवय या परदेसी, यदि ओह पहिले से मरे पसु या कोनो जंगली पसु के दुवारा चिरे-फारे पसु के मांस ला खाथे, त ओला अपन ओनहा ला धोना अऊ पानी म नहाना चाही, अऊ ओह संझा के होवत तक बिधि मुताबिक असुध रहिही; तब ओह सुध होही।
LEV 17:16 पर कहूं ओह अपन ओनहा ला नइं धोही अऊ नइं नहाही, त ओह दोसी ठहिरही।’ ”
LEV 18:1 यहोवा ह मूसा ला कहिस,
LEV 18:2 “इसरायलीमन ले बात कर अऊ ओमन ला कह: ‘मेंह यहोवा तुम्हर परमेसर अंव।
LEV 18:3 तुमन वइसने झन करव, जइसने ओमन मिसर देस म करथें, जिहां तुमन रहत रहेव, अऊ तुमन वइसने झन करव, जइसने ओमन कनान देस म करथें, जिहां मेंह तुमन ला लावत हंव। ओमन के रीति-रिवाज म झन चलव।
LEV 18:4 तुमन मोर कानून ला मानव अऊ धियान से मोर बिधि-बिधान म चलव। मेंह यहोवा तुम्हर परमेसर अंव।
LEV 18:5 मोर बिधि-बिधान अऊ कानून म चलव, काबरकि जऊन मनखे ह ओमन के पालन करही, ओह ओमन के दुवारा जीयत रहिही। मेंह यहोवा अंव।
LEV 18:6 “ ‘तुमन म ले कोनो अपन नजदीकी रिस्तेदार के संग सारीरिक संबंध झन बनावय। मेंह यहोवा अंव।
LEV 18:7 “ ‘अपन दाई के संग सारीरिक संबंध बनाय के दुवारा अपन ददा के अनादर झन करव। ओह तो तुम्हर दाई ए; ओकर संग सारीरिक संबंध झन बनावव।
LEV 18:8 “ ‘अपन सौतेली दाई के संग घलो सारीरिक संबंध झन बनावव; येह तुम्हर ददा के अनादर होही।
LEV 18:9 “ ‘तुमन अपन बहिनी के संग सारीरिक संबंध झन बनावव, चाहे ओह तुम्हर ददा के बेटी होवय या तुम्हर दाई के बेटी, चाहे ओह ओही घर म जनमे होवय या कहूं मेर अऊ।
LEV 18:10 “ ‘अपन बेटा के बेटी या अपन बेटी के बेटी संग सारीरिक संबंध झन बनावव; एकर दुवारा तुम्हर अनादर होही।
LEV 18:11 “ ‘यदि तुम्हर ददा ह आने घरवाली लानथे अऊ ओह बेटी जनमथे, त ओ बेटी संग घलो सारीरिक संबंध झन बनावव; ओह तुम्हर बहिनी अय।
LEV 18:12 “ ‘अपन फूफू के संग सारीरिक संबंध झन बनावव, काबरकि ओह तुम्हर ददा के नजदीकी रिस्तेदार अय।
LEV 18:13 “ ‘अपन मौसी के संग सारीरिक संबंध झन बनावव, काबरकि ओह तुम्हर दाई के नजदीकी रिस्तेदार अय।
LEV 18:14 “ ‘अपन कका के घरवाली संग सारीरिक संबंध बनाय के दुवारा अपन कका के अनादर झन करव, काबरकि ओकर घरवाली ह तो तुम्हर काकी अय।
LEV 18:15 “ ‘अपन बेटा के घरवाली संग सारीरिक संबंध झन बनावव, ओह तो तुम्हर बेटा के घरवाली अय। ओकर संग सारीरिक संबंध झन बनावव।
LEV 18:16 “ ‘अपन भऊजी या भाई-बहू के संग सारीरिक संबंध झन बनावव, एकर दुवारा भाई के अनादर होही।
LEV 18:17 “ ‘कोनो माईलोगन अऊ ओकर बेटी दूनों के संग सारीरिक संबंध झन बनावव। न तो ओ माईलोगन के बेटा के बेटी, अऊ न ही ओ माईलोगन के बेटी के बेटी संग सारीरिक संबंध बनावव; काबरकि ओमन ओकर नजदीकी रिस्तेदार अंय। अइसने करई ह दुस्टता अय।
LEV 18:18 “ ‘अपन घरवाली के जीते-जीयत अपन साली ला घलो घरवाली बनाके ओकर संग सारीरिक संबंध झन बनावव।
LEV 18:19 “ ‘कोनो माईलोगन के मासिक धरम के असुधता के समय, ओकर संग सारीरिक संबंध झन बनावव।
LEV 18:20 “ ‘अपन परोसी के घरवाली के संग सारीरिक संबंध बनाके अपनआप ला अऊ ओला असुध झन करव।
LEV 18:21 “ ‘अपन लइकामन ले कोनो ला भी मोलेक देवता बर बलि झन चघावव, काबरकि एकर ले तुम्हर परमेसर के नांव अपबितर होही। में यहोवा अंव।
LEV 18:22 “ ‘तुमन कोनो आदमी के संग सारीरिक संबंध झन बनावव, जइसने कि तुमन कोनो माईलोगन के संग बनाथव। येह घिनौना काम अय।
LEV 18:23 “ ‘कोनो पसु के संग पसुगमन करके अपनआप ला असुध झन करव। कोनो माईलोगन ह कोनो पसु के संग सारीरिक संबंध बनाय बर अपनआप ला झन देवय; येह अपनआप ला अपबितर करई अय।
LEV 18:24 “ ‘अइसने कोनो घलो काम करके अपनआप ला असुध झन करव, काबरकि अइसने काम करके जऊन जाति के मनखेमन अपनआप ला असुध करे हवंय, ओ जम्मो जातिमन ला मेंह तुम्हर आघू ले निकालनेवाला हंव।
LEV 18:25 इहां तक कि देस ह असुध हो गीस; एकरसेति मेंह ओला ओकर पाप के सेति दंड दे हंव, जेकर ले ओ देस ह उहां के रहइयामन ला स्वीकार नइं करिस।
LEV 18:26 पर तुमन मोर बिधि अऊ कानूनमन ला मानव। तुमन म ले कोनो घलो, चाहे ओह कोनो देस म जनमे मनखे होवय या तुम्हर बीच म रहइया कोनो परदेसी, ये घिनौना काम झन करय,
LEV 18:27 काबरकि जऊन मनखेमन तुम्हर पहिली ये देस म रहत रिहिन, ओमन ये काम करत रिहिन, जेकर ले देस ह असुध हो गीस।
LEV 18:28 अऊ यदि तुमन देस ला असुध करथव, त येह तुमन ला घलो स्वीकार नइं करही, जइसने येह ओमन ला स्वीकार नइं करिस, जऊन मन तुम्हर पहिली इहां रिहिन।
LEV 18:29 “ ‘जऊन मनखे ह येमा के कोनो घलो घिनौना काम करथे, ओला अपन मनखेमन के समाज ले निकाल दिये जावय।
LEV 18:30 एकरसेति मोर हुकूममन ला मानव अऊ कोनो ओ घिनौना रीति-रिवाज ला झन मानव, जऊन ला मनखेमन तुम्हर आय के पहिली मानत रिहिन अऊ ओमन के संग अपनआप ला असुध झन करव। मेंह यहोवा तुम्हर परमेसर अंव।’ ”
LEV 19:1 फेर यहोवा ह मूसा ला कहिस,
LEV 19:2 “इसरायलीमन के जम्मो सभा ले गोठिया अऊ ओमन ला कह: ‘पबितर बनव, काबरकि में, यहोवा तुम्हर परमेसर ह पबितर अंव।
LEV 19:3 “ ‘तुमन म ले हर एक झन अपन दाई अऊ ददा के आदर करव, अऊ तुमन मोर बिसराम दिनमन ला मानव। मेंह यहोवा तुम्हर परमेसर अंव।
LEV 19:4 “ ‘तुमन मूरतीमन कोति झन लहुंटव अऊ अपन बर धातु के देवता झन बनावव। मेंह यहोवा तुम्हर परमेसर अंव।
LEV 19:5 “ ‘जब तुमन यहोवा ला मेल-बलिदान चघावव, त अइसने चघावव कि येह तुम्हर खातिर गरहन करे जावय।
LEV 19:6 जऊन दिन तुमन ओला चघावव, ओही दिन या ओकर दूसर दिन ओला खाय जावय; कोनो चीज तीसर दिन तक बांच जावय, त ओला आगी म जला दिये जावय।
LEV 19:7 यदि ओमा के कुछू ला तीसर दिन खाय जाथे, त ओह असुध अय अऊ ओला नइं गरहन करे जावय।
LEV 19:8 जऊन कोनो ओला खाथे, ओह दोसी ठहिरही, काबरकि ओह यहोवा के पबितर चीज ला अपबितर करे हवय; ओला अपन मनखेमन के समाज ले निकाल दिये जावय।
LEV 19:9 “ ‘अपन देस म रहे के बाद, जब तुमन अपन भुइयां के फसल ला लुवव, त अपन खेत के कोना-कोना तक जम्मो ला झन लुवव या लुवाय फसल के गिरे-परे बालमन ला झन संकेलव।
LEV 19:10 तुमन अपन अंगूर के बारी म दूसर बार अंगूर टोरे बर झन जावव या अंगूर के बारी म झरे अंगूरमन ला झन संकेलव। ओमन ला गरीब अऊ परदेसीमन बर छोंड़ दव। मेंह यहोवा तुम्हर परमेसर अंव।
LEV 19:11 “ ‘तुमन चोरी झन करव। “ ‘लबारी झन मारव। “ ‘एक-दूसर ला धोखा झन देवव।
LEV 19:12 “ ‘मोर नांव म लबारी किरिया झन खावव अऊ ये किसम ले अपन परमेसर के नांव ला अपबितर झन करव। मेंह यहोवा अंव।
LEV 19:13 “ ‘अपन परोसी ला झन ठगव या ओला झन लूटव। “ ‘बनिहार के बनी रात भर याने कि बिहनियां तक अपन करा रोकके झन रखव।
LEV 19:14 “ ‘भैंरा मनखे ला सराप झन देवव या अंधरा के आघू म हपटे बर कुछू झन मढ़ावव, पर अपन परमेसर के भय मानव। मेंह यहोवा अंव।
LEV 19:15 “ ‘नियाय ला झन बिगाड़व। गरीब के संग पखियपात या बड़े मनखे के मुहूं-देखी नियाय झन करव, पर अपन परोसी के सही-सही नियाय करव।
LEV 19:16 “ ‘अपन मनखेमन के बीच म लबारी बात झन फईलावव। “ ‘अपन परोसी के हतिया करे के उपाय झन करव। मेंह यहोवा अंव।
LEV 19:17 “ ‘अपन मन म अपन संगी इसरायली ले घिन झन करव। अपन परोसी ला खुले मन से डांटव, ताकि तुमन ओमन के अपराध म भागी झन होवव।
LEV 19:18 “ ‘काकरो ले बदला झन लेवव या अपन मनखेमन के बीच म कोनो बर बईरता झन रखव, पर अपन परोसी ले अपन सहीं मया करव। मेंह यहोवा अंव।
LEV 19:19 “ ‘मोर बिधिमन ला मानव। “ ‘आने-आने जाति के पसुमन म संबंध झन करावव। “ ‘अपन खेत म दू किसम के बीजा एक संग झन बोवव। “ ‘दू किसम के चीज ले बने ओनहा ला झन पहिरव।
LEV 19:20 “ ‘कोनो गुलाम माईलोगन, जेकर मंगनी कोनो मनखे के संग हो गे हवय, पर ओ कुंवारी ला दाम देके नइं छोंड़ाय गे हवय या ओला सुतंतर नइं करे गे हवय; ओकर संग यदि कोनो मनखे ह सारीरिक संबंध बनाथे, त ओमन ला दंड तो दिये जावय, पर ओमन झन मार डारे जावंय, काबरकि ओ कुंवारी ला सुतंतर नइं करे गे रिहिस।
LEV 19:21 ओ आदमी ह मिलापवाला तम्बू के मुंहटा म यहोवा करा दोस-बलिदान बर एक ठन मेढ़ा लेके आवय।
LEV 19:22 पुरोहित ह ओ दोस-बलिदान के मेढ़ा ला यहोवा के आघू म चघाके ओ मनखे के पाप के प्रायस्चित के बिधि ला पूरा करय, तब ओह जऊन पाप करे हवय, ओह छेमा करे जाही।
LEV 19:23 “ ‘जब तुमन कनान देस म आवव अऊ उहां कोनो किसम के फर के रूख लगावव, त ओकर फर ला बरजे कस समझव। तीन बछर ले ओ फर ला तुमन बरजीत समझव; ओला झन खावव।
LEV 19:24 चौथा साल ओकर जम्मो फर यहोवा के इस्तुति के बलिदान बर पबितर ठहिरही।
LEV 19:25 तब पांचवां साल तुमन ओकर फर ला खा सकत हव। ये किसम ले तुम्हर फसल म बढ़ोतरी होही। मेंह यहोवा तुम्हर परमेसर अंव।
LEV 19:26 “ ‘तुमन कोनो घलो मांस ला लहू के संग झन खावव। “ ‘जादू-टोना झन करव या सुभ-असुभ घरी ला झन मानव।
LEV 19:27 “ ‘अपन मुड़ के किनारे के चुंदी ला झन कटावव या अपन दाढ़ी के तीर के बाल ला झन कतरावव।
LEV 19:28 “ ‘कोनो मरे मनखे बर अपन देहें ला झन काटव या अपन देहें म गोदना झन गोदावव। मेंह यहोवा अंव।
LEV 19:29 “ ‘अपन बेटी ला बेस्या बनाय के दुवारा ओकर अपमान झन करव, नइं तो देस ह बेस्या के काम के कारन बुरई ले भर जाही।
LEV 19:30 “ ‘मोर बिसराम दिनमन ला मानव अऊ मोर पबितर-स्थान के आदर करव। मेंह यहोवा अंव।
LEV 19:31 “ ‘बईगामन अऊ भूत-परेत साधोइयामन करा झन जावव, काबरकि तुमन ओमन के दुवारा असुध हो जाहू। मेंह यहोवा तुम्हर परमेसर अंव।
LEV 19:32 “ ‘डोकरामन के आघू म उठके ठाढ़ हो जावव; सियानमन के आदर करव अऊ अपन परमेसर के भय मानव। मेंह यहोवा अंव।
LEV 19:33 “ ‘जब कोनो परदेसी तुम्हर देस म तुम्हर संग रहिथे, त ओकर संग गलत बरताव झन करव।
LEV 19:34 जब कोनो परदेसी तुम्हर बीच म रहत हवय, त ओकर संग वइसने बरताव करव, जइसने कि तुमन देसी मनखे के संग करथव। ओकर ले अपन सहीं मया करव, काबरकि तुमन घलो मिसर देस म परदेसी होके रहेव। मेंह यहोवा तुम्हर परमेसर अंव।
LEV 19:35 “ ‘जब तुमन कोनो चीज ला नापथव, तऊलथव या गनथव, त ये काम ला ईमानदारी से करव।
LEV 19:36 लम्बई नापे के सही पैमाना, भार तऊले बर सही तराजू, मात्रा जाने बर सही एपा अऊ सही हीन के उपयोग करव। मेंह यहोवा तुम्हर परमेसर अंव, जऊन ह तुमन ला मिसर देस ले निकालके लानिस।
LEV 19:37 “ ‘मोर जम्मो बिधि-बिधान अऊ मोर जम्मो कानून ला मानव अऊ ओमन के पालन करव। मेंह यहोवा अंव।’ ”
LEV 20:1 फेर यहोवा ह मूसा ला कहिस,
LEV 20:2 “इसरायलीमन ला कह: ‘इसरायल म रहइया कोनो इसरायली या कोनो परदेसी, जऊन ह अपन कोनो लइका ला, मोलेक देवता ला बलिदान चघाथे, त ओह मार डारे जावय। समाज के मनखेमन ओला पथरवाह करके मार डारंय।
LEV 20:3 मेंह खुद ओ मनखे के बिरोध म होके ओला ओकर मनखेमन ले मिटा दूहूं; काबरकि मोलेक ला अपन लइका बलिदान करके, ओह मोर पबितर-स्थान ला असुध अऊ मोर पबितर नांव ला अपबितर करे हवय।
LEV 20:4 कहूं समाज के मनखेमन अपन आंखी मुंद लेथें, जब ओ मनखे ह अपन कोनो लइका मोलेक ला बलिदान करथे अऊ यदि ओला मार नइं डारंय,
LEV 20:5 त मेंह खुद ओ मनखे अऊ ओकर परिवार के बिरोध म होके ओमन ला ओमन के मनखेमन ले अलग कर दूहूं अऊ संग म ओ जम्मो झन ला घलो, जऊन मन ओकर संग देके मोलेक के पाछू चले के दुवारा बेस्या सहीं काम करथें।
LEV 20:6 “ ‘जऊन मनखे ह बईगा अऊ भूत-परेत साधोइयामन के पाछू चलके बेस्या सहीं काम करथे, ओकर बिरोध म होके, मेंह ओला ओकर मनखेमन ले अलग कर दूहूं।
LEV 20:7 “ ‘एकरसेति अपनआप ला पबितर काम बर अलग करव अऊ पबितर बनव, काबरकि मेंह यहोवा तुम्हर परमेसर अंव।
LEV 20:8 मोर बिधि-बिधान ला मानव अऊ ओमन के पालन करव। मेंह यहोवा अंव, जऊन ह तुमन ला पबितर करथे।
LEV 20:9 “ ‘जऊन मनखे अपन ददा या दाई ला सराप देथे, ओह मार डारे जावय। ओह अपन ददा या दाई ला सराप देय हवय, एकरसेति ओकर लहू के दोस ओकरेच मुड़ म पड़ही।
LEV 20:10 “ ‘कहूं कोनो मनखे कोनो आने मनखे के घरवाली संग—अपन परोसी के घरवाली संग बेभिचार करथे, त ओ बेभिचारी अऊ बेभिचारिन दूनों झन मार डारे जावंय।
LEV 20:11 “ ‘कहूं कोनो मनखे ह अपन ददा के घरवाली के संग सारीरिक संबंध बनाथे, त ओह अपन ददा के अनादर करे हवय। ओ मनखे अऊ ओ माईलोगन दूनों झन मार डारे जावंय; ओमन के लहू के दोस ओमन के मुड़ म ही पड़ही।
LEV 20:12 “ ‘कहूं कोनो मनखे अपन बहुरिया संग सारीरिक संबंध बनाथे, त ओ दूनों झन मार डारे जावंय। ओमन असुध काम करे हवंय; ओमन के लहू के दोस ओमन के मुड़ म ही पड़ही।
LEV 20:13 “ ‘कहूं कोनो आदमी ह कोनो आदमी संग सारीरिक संबंध बनाथे, जइसने कि कोनो माईलोगन संग बनाय जाथे, त ओ दूनों झन घिन काम करे हवंय। ओमन मार डारे जावंय; ओमन के लहू के दोस ओमन के मुड़ म ही पड़ही।
LEV 20:14 “ ‘कहूं कोनो मनखे ह कोनो माईलोगन अऊ ओकर दाई दूनों ले बिहाव करथे, त येह दुस्ट काम अय। ओ मनखे अऊ ओ दूनों माईलोगन ला आगी म जला दिये जावय, ताकि तुम्हर बीच म दुस्ट काम झन होवय।
LEV 20:15 “ ‘कहूं कोनो मनखे ह पसु के संग सारीरिक संबंध बनाथे, त ओ मनखे ह मार डारे जावय, अऊ ओ पसु ला घलो मार डारव।
LEV 20:16 “ ‘कहूं कोनो माईलोगन ह कोनो पसु करा जाके ओकर संग कुकरम करथे, त ओ माईलोगन अऊ ओ पसु दूनों ला मार डारव। ओमन मार डारे जावंय; ओमन के लहू ह ओमन के मुड़ म ही पड़ही।
LEV 20:17 “ ‘कहूं कोनो मनखे ह अपन बहिनी ले बिहाव करथे—चाहे ओह ओकर ददा के बेटी होवय या ओकर दाई के बेटी, अऊ ओकर संग सारीरिक संबंध बनाथे, त येह एक कलंक ए। ओ दूनों झन ला खुलेआम ओमन के मनखेमन ले अलग करे जावय। ओह अपन बहिनी के अनादर करे हवय अऊ ओह दोसी ठहिरही।
LEV 20:18 “ ‘कहूं कोनो मनखे ह कोनो माईलोगन के मासिक धरम के समय ओकर संग सारीरिक संबंध बनाथे, त ओह ओ माईलोगन के लहू बहई ला उघारे हवय, अऊ ओ माईलोगन घलो अपन लहू बहई ला उघारे हवय। एकरसेति ओ दूनों झन अपन मनखेमन ले अलग करे जावंय।
LEV 20:19 “ ‘अपन मौसी या फूफू के संग सारीरिक संबंध झन बनावव, काबरकि ओह एक नजदीकी रिस्तेदार के अनादर होही; अऊ ओ दूनों दोसी ठहिरहीं।
LEV 20:20 “ ‘कहूं कोनो मनखे अपन काकी के संग सारीरिक संबंध बनाथे, त ओह अपन कका के अनादर करथे। ओमन दोसी ठहिरहीं; ओमन बिगर संतान के मर जाहीं।
LEV 20:21 “ ‘कहूं कोनो मनखे अपन भाई के घरवाली ले बिहाव करथे, त येह एक असुधता के काम अय; ओह अपन भाई के अनादर करे हवय। ओमन के कोनो संतान नइं होवय।
LEV 20:22 “ ‘मोर जम्मो बिधि अऊ हुकूममन ला मानव अऊ ओमन के पालन करव, ताकि जऊन देस म मेंह तुमन ला रहे बर लावत हंव, उहां ले तुमन अलग झन करे जावव।
LEV 20:23 तुमन ओ जाति के मनखेमन के रीति-रिवाज के मुताबिक झन चलहू, जेला मेंह तुम्हर आघू ले निकालनेवाला हंव। काबरकि ओमन ये जम्मो काम करे हवंय, एकरसेति मेंह ओमन ले घिन करथंव।
LEV 20:24 पर मेंह तुमन ला कहे हंव, “ओमन के देस ह तुम्हर अधिकार म होही; मेंह ये देस, जेमा दूध अऊ मंधरस बहुंतायत म हवय, तुम्हर अधिकार म दे दूहूं।” मेंह यहोवा तुम्हर परमेसर अंव, जऊन ह तुमन ला आने देस के मनखेमन ले अलग करे हवय।
LEV 20:25 “ ‘एकरसेति तुमन सुध अऊ असुध पसु म, अऊ सुध अऊ असुध चिरईमन म भेद करव। तुमन कोनो अइसने पसु या चिरई या भुइयां म रेंगइया जीव के दुवारा अपनआप ला असुध झन करव, जऊन मन ला मेंह तुम्हर बर असुध ठहिराके अलग करे हंव।
LEV 20:26 तुमन मोर बर पबितर बने रहव, काबरकि में यहोवा ह पबितर अंव, अऊ मेंह तुमन ला आने देस के मनखेमन ले अलग करे हंव कि तुमन मोर बने रहव।
LEV 20:27 “ ‘कोनो आदमी या माईलोगन, जऊन ह तुम्हर बीच म बईगा या भूत-परेत साधे के काम करथे, ओह मार डारे जावय। तुमन ओला पथरवाह करके मार डारव; ओकर लहू के दोस ओकरेच मुड़ म ही पड़ही।’ ”
LEV 21:1 फेर यहोवा ह मूसा ला कहिस, “हारून के बेटा, जऊन मन पुरोहित अंय, ओमन ला कह: ‘कहूं तुम्हर मनखेमन ले कोनो मर जावय, त ओकर कारन पुरोहित ह अपनआप ला असुध झन करय;
LEV 21:2 सिरिप अपन नजदीकी रिस्तेदार, याने कि अपन दाई या ददा, अपन बेटा या बेटी, अपन भाई,
LEV 21:3 या अपन कुंवारी बहिनी, जऊन ह ओकर भरोसा म हवय काबरकि ओकर घरवाला नइं ए—येमन के मरे म ओह अपनआप ला असुध कर सकत हे।
LEV 21:4 जऊन मनखेमन बिहाव के कारन ओकर रिस्तेदार अंय, ओमन बर ओह अपनआप ला असुध झन करय अऊ ये किसम ले अपबितर झन होवय।
LEV 21:5 “ ‘पुरोहितमन अपन मुड़ झन मुड़ावंय या दाढ़ी के तीर ला झन कतरावंय या अपन देहें ला झन चिरंय-फारंय।
LEV 21:6 ओमन अपन परमेसर बर पबितर बने रहंय अऊ अपन परमेसर के नांव ला अपबितर झन करंय। काबरकि ओमन यहोवा बर जेवन-बलिदान याने कि अपन परमेसर बर जेवन चघाथें; एकरसेति ओमन पबितर बने रहंय।
LEV 21:7 “ ‘ओमन अइसने माईलोगन से बिहाव झन करंय, जऊन ह बेस्या के काम करके असुध हो गे हवय या ओमन अइसने कोनो माईलोगन ले बिहाव झन करंय, जऊन ला ओकर घरवाला ह तलाक दे देय हवय, काबरकि पुरोहितमन अपन परमेसर बर पबितर अंय।
LEV 21:8 ओमन ला पबितर जानव, काबरकि ओमन तुम्हर परमेसर ला जेवन चघाथें। ओमन ला पबितर समझव, काबरकि में यहोवा ह पबितर अंव—में जऊन ह तुमन ला पबितर करथंव।
LEV 21:9 “ ‘कहूं कोनो पुरोहित के बेटी ह बेस्या बनके अपनआप ला अपबितर करथे, त ओह अपन ददा ऊपर कलंक लगाथे; ओला आगी म जलाय जावय।
LEV 21:10 “ ‘अपन भाईमन म जऊन ह महा पुरोहित होवय, जेकर मुड़ म अभिसेक के तेल रितोय गे हवय अऊ जऊन ला पुरोहित के ओनहा पहिरे बर अभिसेक करे गे हवय, ओह अपन मुड़ के चुंदी ला झन छरियावय या ओह अपन ओनहा ला झन चीरय।
LEV 21:11 ओह ओ जगह म झन जावय, जिहां लास रखे हवय। इहां तक कि ओह अपन ददा या दाई बर घलो अपनआप ला असुध झन करय;
LEV 21:12 ओह अपन परमेसर के पबितर-स्थान ला झन छोंड़य या येला अपबितर झन करय, काबरकि ओह अपन परमेसर के अभिसेक के तेल दुवारा अलग करे गे हवय। मेंह यहोवा अंव।
LEV 21:13 “ ‘ओह कुंवारी ले ही बिहाव करय।
LEV 21:14 ओह कोनो बिधवा, कोनो तलाकसुदा माईलोगन, या बेस्या काम ले अपबितर होय माईलोगन ले बिहाव झन करय, पर अपन मनखेमन ले सिरिप कोनो कुंवारी ले बिहाव करय,
LEV 21:15 ताकि ओकर लइका ह ओकर मनखेमन के बीच म असुध झन होवय। में यहोवा अंव, जऊन ह ओला पबितर बनाथंव।’ ”
LEV 21:16 फेर यहोवा ह मूसा ला कहिस,
LEV 21:17 “हारून ला ये कह: ‘तोर बंस के पीढ़ी-पीढ़ी म कहूं कोनो मनखे म कोनो सारीरिक दोस होवय, त ओह अपन परमेसर ला बलिदान चघाय बर लकठा म झन आवय।
LEV 21:18 कोनो घलो मनखे, जेमा दोस हवय, ओह लकठा म झन आवय: चाहे ओह अंधरा या खोरवा, बिगड़े चेहरा, या खराप अंग वाला होवय,
LEV 21:19 या ओह गोड़ या हांथ ले लूलवा होवय,
LEV 21:20 या कुबड़ा या बवना, या जेकर आंखी म कोनो दोस होवय, या जेकर घाव ह पक गे हवय या घाव ले पीब निकलत हवय या जेकर अंडकोस ह पिचके होवय।
LEV 21:21 हारून पुरोहित के बंस म ले कोनो घलो, जेकर म कोनो सारीरिक दोस हवय, ओह यहोवा ला जेवन-बलिदान चघाय बर लकठा म झन आवय; काबरकि ओमा दोस हवय, ओह अपन परमेसर के जेवन चघाय बर लकठा म झन आवय।
LEV 21:22 ओह अपन परमेसर के महा पबितर जेवन अऊ संग म पबितर जेवन ला खा सकत हे।
LEV 21:23 पर ओमा सारीरिक दोस होय के कारन, ओह परदा के लकठा म या बेदी करा झन जावय, नइं तो मोर पबितर-स्थान ह अपबितर हो जाही। में यहोवा अंव, जऊन ह ओमन ला पबितर बनाथंव।’ ”
LEV 21:24 ये किसम ले मूसा ह ये बात हारून अऊ ओकर बेटामन ला अऊ जम्मो इसरायलीमन ला बताईस।
LEV 22:1 फेर यहोवा ह मूसा ला कहिस,
LEV 22:2 “हारून अऊ ओकर बेटामन ला कह कि ओमन ओ पबितर बलिदानमन के संग आदर के बरताव करंय, जऊन ला इसरायलीमन मोला अरपन करथें, ताकि ओमन मोर पबितर नांव ला अपबितर झन करंय। मेंह यहोवा अंव।
LEV 22:3 “ओमन ला कह: ‘तुम्हर अवइया पीढ़ीमन म, कहूं तुम्हर बंस के कोनो मनखे असुध हवय अऊ तभो ले ओह ओ पबितर बलिदान के लकठा म आथे, जऊन ला इसरायलीमन यहोवा बर अरपन करथें, त ओ मनखे ला मोर आघू ले अलग करे जावय। मेंह यहोवा अंव।
LEV 22:4 “ ‘यदि हारून के बंस म ले कोनो ला असुध चमड़ी के बेमारी या धात के रोग हवय, त ओह जब तक सुध नइं हो जावय, तब तक ओह पबितर बलिदान के चीजमन ला झन खावय। ओह तब घलो असुध होही यदि ओह कोनो अइसने चीज ला छूथे, जऊन ह लास के दुवारा या बीर्य निकले मनखे के दुवारा असुध हो गे हवय,
LEV 22:5 या कहूं ओह कोनो रेंगइया जीव ला छूथे, जऊन ह ओला असुध करथे, या कोनो मनखे जऊन ह ओला असुध करथे, चाहे ओह कोनो घलो किसम के असुधता होवय।
LEV 22:6 जऊन मनखे अइसने कोनो चीज ला छूथे, ओह संझा के होवत तक असुध रहिही। ओह तब तक पबितर बलिदान के कोनो चीज ला झन खावय, जब तक ओह पानी ले नइं नहा लेवय।
LEV 22:7 बेर बुड़े के बाद, ओह सुध हो जाही, अऊ एकर बाद ओह पबितर बलिदान म ले खा सकत हे, काबरकि येह ओकर जेवन अय।
LEV 22:8 ओह अपनआप मरे या जंगली पसु के दुवारा चिरे-फारे कोनो पसु ला झन खावय, नइं तो ओह असुध हो जाही। मेंह यहोवा अंव।
LEV 22:9 “ ‘पुरोहितमन मोर ये किसम ले सेवा करंय कि ओमन दोसी झन ठहिरंय, नइं तो अनादर करे के कारन मर जाहीं। मेंह यहोवा अंव, जऊन ह ओमन ला पबितर करथंव।
LEV 22:10 “ ‘पुरोहित के परिवार के छोंड़ कोनो आने मनखे पबितर बलिदान ला झन खावय, चाहे ओह पुरोहित के पहुना होवय या ओकर बनिहार, ओह कोनो पबितर चीज ला झन खावय।
LEV 22:11 पर कोनो पुरोहित ह कोनो गुलाम ला पईसा देके बिसा लेथे या कोनो गुलाम ह पुरोहित के घर म जनमे हवय, त ओ गुलाम ह ओमा ले खा सकत हे।
LEV 22:12 कहूं कोनो पुरोहित के बेटी ह अइसने मनखे ले बिहाव करथे, जऊन ह पुरोहित नो हय, त पुरोहित के ओ बेटी ह पबितर बलिदान के कोनो चीज ला झन खावय।
LEV 22:13 पर कहूं कोनो पुरोहित के बेटी ह बिधवा हो जाथे या ओला ओकर घरवाला छोंड़ देथे अऊ ओकर लोग-लइका नइं रहंय अऊ ओह अपन जवानी के दिन म अपन ददा के घर म फेर आके रहिथे, त ओह अपन ददा के जेवन ला खा सकत हे, पर कोनो आने मनखे ओमा ले झन खावय।
LEV 22:14 “ ‘कहूं कोनो मनखे अनजाने म पबितर बलिदान के चीज ला खा लेथे, त ओह ओ बलिदान के कीमत संग ओकर पांचवां भाग बढ़ाके पुरोहित ला भरपई कर देवय।
LEV 22:15 इसरायलीमन जऊन पबितर बलिदान यहोवा ला चघाथें, ओला पुरोहितमन इसरायलीमन ला खाय के अनुमति देके अपबितर झन करंय,
LEV 22:16 नइं तो ओमन दोसी ठहिरहीं अऊ ओमन ला दाम चुकाना पड़ही। मेंह यहोवा अंव, जऊन ह ओमन ला पबितर करथंव।’ ”
LEV 22:17 फेर यहोवा ह मूसा ला कहिस,
LEV 22:18 “हारून अऊ ओकर बेटामन ला अऊ जम्मो इसरायलीमन ले गोठिया अऊ ओमन ला कह: ‘तुमन म ले कोनो—चाहे इसरायली होवय या इसरायल म रहइया कोनो परदेसी—यदि ओह यहोवा ला होम-बलिदान के भेंट चघाथे, चाहे ओह बदना के होवय या स्वेच्छा-बलिदान के होवय,
LEV 22:19 त ओह पसु, भेड़ या बोकरा म ले निरदोस नर पसु होवय, ताकि येह तुम्हर कोति ले गरहन करे जावय।
LEV 22:20 जऊन पसु म कोनो दोस होवय, ओला झन लानव, काबरकि ओह तुम्हर कोति ले गरहन नइं करे जावय।
LEV 22:21 जब कोनो अपन बिसेस बदना या स्वेच्छा-बलिदान ला पूरा करे बर गाय-बईला या भेड़-बकरी म ले कोनो पसु ला यहोवा करा मेल-बलिदान चघाय बर लानथे, त गरहन करे बर जरूरी अय कि ओ पसु ह बिगर दोस के होवय।
LEV 22:22 जऊन पसु ह अंधरा या चोट खाय या अपंग होवय, या जेमा गांठ, या पके या बहत घाव होवय, अइसने पसु ला यहोवा बर बलि झन चघावव। अइसने कोनो पसु ला यहोवा बर जेवन-बलिदान के रूप म बेदी ऊपर झन रखव।
LEV 22:23 तुमन कोनो कुरूप बईला या भेड़ ला अपन स्वेच्छा-बलिदान के रूप म चघा सकत हव, पर येह बदना पूरा होय के बलिदान के रूप म गरहन नइं होवय।
LEV 22:24 जऊन पसु के अंडकोस ह चोट खाय, कुचराय, फटे या कटे हवय, ओला तुमन यहोवा बर झन चघावव। तुमन अपन देस म अइसन बलिदान के काम झन करव,
LEV 22:25 अऊ तुमन न तो अइसने पसु ला कोनो परदेसी के हांथ ले लेवव अऊ न ही ओला अपन परमेसर के जेवन के रूप म चघावव। ओह तुम्हर बर गरहन नइं होवय, काबरकि ओह कुरूप हे अऊ ओमा दोस हवय।’ ”
LEV 22:26 फेर यहोवा ह मूसा ला कहिस,
LEV 22:27 “जब कोनो बछवा, मेढ़ा-पीला या छेरी-पीला के जनम होवय, त ओह सात दिन तक अपन दाई के संग म रहय। आठवां दिन ले, ओह यहोवा बर जेवन-बलिदान के रूप म गरहन करे जावय।
LEV 22:28 चाहे गाय होवय या भेड़, ओला अऊ ओकर पीला ला एक ही दिन म झन मारव।
LEV 22:29 “जब तुमन यहोवा ला धनबाद-बलिदान चघाथव, त ये किसम ले चघावव कि ओह तुम्हर कोति ले गरहन करे जावय।
LEV 22:30 ओला ओहीच दिन खाय जावय; ओमा के कोनो चीज बिहान होवत तक झन बांचय। मेंह यहोवा अंव।
LEV 22:31 “मोर हुकूममन ला मानव अऊ ओमन के पालन करव। मेंह यहोवा अंव।
LEV 22:32 मोर पबितर नांव ला अपबितर झन करहू, काबरकि जरूरी अय कि मेंह इसरायलीमन के दुवारा पबितर माने जावंव। मेंह यहोवा अंव, जऊन ह तुमन ला पबितर करिस,
LEV 22:33 अऊ जऊन ह तुमन ला मिसर देस ले निकालके लानिस ताकि तुम्हर परमेसर होवय। मेंह यहोवा अंव।”
LEV 23:1 फेर यहोवा ह मूसा ला कहिस,
LEV 23:2 “इसरायलीमन ले गोठिया अऊ ओमन ला कह: ‘येमन मोर ठहिराय तिहार, यहोवा के ठहिराय तिहार अंय, जेकर तुमन पबितर सभा के रूप म घोसना करव।
LEV 23:3 “ ‘हर हप्ता छै दिन बुता करे जावय, पर सातवां दिन एक बिसराम के दिन, एक पबितर सभा के दिन अय। जिहां घलो रहव, तुमन ओ दिन कोनो घलो किसम के बुता-काम झन करव; येह यहोवा बर बिसराम के दिन अय।
LEV 23:4 “ ‘येमन यहोवा के ठहिराय तिहार, पबितर सभा अंय, जेकर तुमन ओमन के ठहिराय समय म घोसना करव:
LEV 23:5 हर साल पहिली महिना के चौदहवां दिन के बेर बुड़े के बाद यहोवा के फसह तिहार सुरू होथे।
LEV 23:6 ओहीच महिना के पंदरहवां दिन यहोवा के अखमीरी रोटी के तिहार सुरू होथे; सात दिन तक तुमन बिगर खमीर के बने रोटी खावव।
LEV 23:7 ये तिहार के पहिली दिन तुमन एक पबितर सभा करव, अऊ ओ दिन तुमन रोजमर्रा के काम झन करव।
LEV 23:8 पर सातों दिन तुमन यहोवा ला जेवन-बलिदान चघावव। अऊ सातवां दिन एक पबितर सभा करव अऊ ओ दिन रोजमर्रा के काम झन करव।’ ”
LEV 23:9 यहोवा ह मूसा ला कहिस,
LEV 23:10 “इसरायलीमन ले गोठिया अऊ ओमन ला कह: ‘जब तुमन ओ देस म जावव, जऊन ला मेंह तुमन ला देवइया हंव अऊ उहां जब फसल काटव, त लुए गय पहिली-फसल के एक करपा तुमन पुरोहित करा लानव।
LEV 23:11 पुरोहित ह ओ करपा ला यहोवा के आघू म हलावय कि ओह तुम्हर बर गरहन करे जावय; पुरोहित ह ओला बिसराम दिन के दूसर दिन हलावय।
LEV 23:12 जऊन दिन तुमन ओ करपा ला हलावव, ओ दिन एक बछर के निरदोस मेढ़ा-पीला ला तुमन यहोवा ला होम-बलिदान के रूप म चघावव,
LEV 23:13 अऊ ओकर संग म जैतून तेल म सनाय बहुंत बढ़िया पीसान के एक एपा के दू-दसवां भाग अन्न-बलिदान के रूप म यहोवा ला चघावव; येह यहोवा बर सुख-देवइया सुगंधवाला एक जेवन-बलिदान होही, अऊ एकर संग म एक हीन के चौथा भाग अंगूर के मंद पेय-बलिदान के रूप म चघावव।
LEV 23:14 जब तक तुमन अपन परमेसर करा ये बलिदान नइं ले जावव, ओ दिन तक तुमन कोनो रोटी, या भुने या नवां अन्न झन खावव। तुमन जिहां घलो रहव, येह तुम्हर पीढ़ी-पीढ़ी तक हमेसा के बिधि ठहिरय।
LEV 23:15 “ ‘बिसराम दिन के दूसर दिन, याने कि जऊन दिन तुमन हलाय-बलिदान के करपा ला लानेव, ओ दिन ले लेके पूरा सात हप्ता गन लेवव।
LEV 23:16 सातवां बिसराम दिन के दूसर दिन तक याने पचास दिन गनव, अऊ ओ पचासवां दिन यहोवा ला नवां अन्न के बलिदान चघावव।
LEV 23:17 तुमन जिहां घलो रहव, बहुंत बढ़िया पीसान के एपा के दू-दसवां भाग ले बने दू ठन रोटी लानव, जऊन म खमीर मिले रहय अऊ येला पहिली-फसल के हलाय-बलिदान के रूप म यहोवा ला चघावव।
LEV 23:18 अऊ ओ रोटी के संग एक-एक बछर के सात ठन निरदोस मेढ़ा-पीला, एक ठन जवान बछवा अऊ दू ठन मेढ़ा चघावव। येमन यहोवा बर ओमन के अन्न-बलिदान अऊ पेय-बलिदान के संग एक होम-बलिदान होहीं अऊ येह यहोवा बर महकत सुख-देवइया एक जेवन-बलिदान होही।
LEV 23:19 तब तुमन पाप-बलिदान बर एक ठन बोकरा अऊ मेल-बलिदान बर एक-एक बछर के दू ठन मेढ़ा-पीला चघावव।
LEV 23:20 पुरोहित ह पहिली-फसल के रोटी संग, ओ दूनों मेढ़ा-पीला ला हलाय-बलिदान के रूप म यहोवा के आघू म हलावय। ओमन यहोवा बर पबितर बलिदान अऊ पुरोहित के बांटा अंय।
LEV 23:21 ओहीच दिन तुमन एक पबितर सभा के हांका परवाव अऊ कोनो रोजमर्रा के काम झन करव। तुमन जिहां घलो रहव, येह तुम्हर पीढ़ी-पीढ़ी तक हमेसा के बिधि ठहिरय।
LEV 23:22 “ ‘जब तुमन अपन भुइयां के फसल लुवव, त अपन खेत के एकदम तीर के फसल ला झन लुवव अऊ गिरे बालमन ला झन संकेलव। ओमन ला गरीब अऊ तुम्हर बीच म रहइया परदेसीमन बर छोंड़ दव। मेंह यहोवा तुम्हर परमेसर अंव।’ ”
LEV 23:23 फेर यहोवा ह मूसा ला कहिस,
LEV 23:24 “इसरायलीमन ला कह: ‘हर साल सातवां महिना के पहिली दिन तुम्हर बर बिसराम दिन होवय, अऊ ओ दिन पबितर सभा जूरय अऊ तुरही बजाके आनंद मनावय।
LEV 23:25 ओ दिन रोजमर्रा के काम झन करव, पर यहोवा बर एक जेवन-बलिदान चघावव।’ ”
LEV 23:26 फेर यहोवा ह मूसा ला कहिस,
LEV 23:27 “ओ सातवां महिना के दसवां दिन ह प्रायस्चित के दिन अय। ओ दिन पबितर सभा करे जावय अऊ अपनआप के इनकार करव अऊ यहोवा ला जेवन-बलिदान चघावव।
LEV 23:28 ओ दिन तुमन कोनो काम-बुता झन करव, काबरकि ओह प्रायस्चित के दिन अय, अऊ यहोवा तुम्हर परमेसर के आघू म तुम्हर बर प्रायस्चित करे जाही।
LEV 23:29 ओ दिन जऊन मन अपनआप के इनकार नइं करंय, ओमन अपन मनखेमन के समाज ले अलग करे जावंय।
LEV 23:30 जऊन मनखे ह ओ दिन कोनो किसम के काम-बुता करथे, ओला मेंह ओकर मनखेमन के बीच ले नास कर दूहूं।
LEV 23:31 तुमन कोनो घलो किसम के काम झन करहू। तुमन जिहां घलो रहव, येह पीढ़ी-पीढ़ी तक तुम्हर बर हमेसा के बिधि होवय।
LEV 23:32 येह तुम्हर बर बिसराम दिन अय, अऊ तुमन अपनआप के इनकार करव। ओ महिना के नौवां दिन के संझा ले लेके दूसर दिन के संझा तक तुमन अपन बिसराम दिन माने करव।”
LEV 23:33 फेर यहोवा ह मूसा ला कहिस,
LEV 23:34 “इसरायलीमन ला कह: ‘सातवां महिना के पंदरहवां दिन यहोवा के पबितर-तम्बूमन के तिहार सुरू होथे अऊ येह सात दिन तक चलथे।
LEV 23:35 पहिली दिन पबितर सभा होवय; ओ दिन कोनो काम झन करव।
LEV 23:36 ये सातों दिन यहोवा ला जेवन-बलिदान चघावव, अऊ आठवां दिन तुमन पबितर सभा करव अऊ यहोवा ला जेवन-बलिदान चघावव। येह तिहार खतम करे के बिसेस सभा अय; ओ दिन रोजमर्रा के काम झन करव।
LEV 23:37 (“ ‘येमन यहोवा के ठहिराय तिहारमन अंय, जेमन ला तुमन पबितर सभा के रूप म घोसना करव ताकि यहोवा बर जेवन-बलिदान—याने कि होम-बलिदान अऊ अन्न-बलिदान, चढ़ावा अऊ पेय-बलिदान हर दिन के जरूरत के मुताबिक लाय जावय।
LEV 23:38 ये बलिदानमन ओ बलिदानमन के अलावा होहीं, जऊन ला तुमन यहोवा के बिसराम दिन अऊ तुम्हर भेंट अऊ तुम्हर बदना अऊ स्वेच्छा-बलिदान के रूप म यहोवा ला चघाहू।)
LEV 23:39 “ ‘जब तुमन भुइयां के ऊपज ला संकेल डारव, तब सातवां महिना के पंदरहवां दिन ले सुरू करके सात दिन तक यहोवा के तिहार मनावव; पहिला दिन ह बिसराम दिन अय, अऊ आठवां दिन घलो बिसराम दिन अय।
LEV 23:40 पहिला दिन तुमन घना रूख के डारामन ला याने कि खजूर, सरई अऊ आने पानवाला रूख के डारामन ला लेके यहोवा तुम्हर परमेसर के आघू म सात दिन तक आनंद मनावव।
LEV 23:41 तुमन येला हर साल सात दिन तक यहोवा बर तिहार के रूप म मनाय करव। येह तुम्हर पीढ़ी-पीढ़ी तक हमेसा के बिधि होवय; हर साल सातवां महिना म ये तिहार ला मनावव।
LEV 23:42 सात दिन तक तुमन कुंदरा म रहव: जम्मो देस म जनमे इसरायलीमन अइसने कुंदरा म रहंय,
LEV 23:43 ताकि तुम्हर बंस के मनखेमन जान सकंय कि जब मेंह इसरायलीमन ला मिसर देस ले निकालके लानत रहेंव, त ओमन ला मेंह कुंदरामन म रखे रहेंव। मेंह यहोवा तुम्हर परमेसर अंव।’ ”
LEV 23:44 ये किसम ले, मूसा ह इसरायलीमन ला यहोवा के ठहिराय तिहारमन ला बताईस।
LEV 24:1 यहोवा ह मूसा ला कहिस,
LEV 24:2 “इसरायलीमन ला हुकूम दे कि ओमन अंजोर करे बर जैतून के पेरके निकाले सुध तेल लानंय ताकि दीयामन हरदम बरत रहंय।
LEV 24:3 परदा के बाहिर जऊन ह मिलापवाला तम्बू म करार कानून के सन्दूक ला ओधा करथे, उहां हारून ह यहोवा के आघू म संझा ले बिहान होवत तक लगातार दीयामन के देखरेख करय। येह पीढ़ी-पीढ़ी तक हमेसा के बिधि होवय।
LEV 24:4 ओ दीया जऊन मन सुध सोन के दीवट म यहोवा के आघू म हवंय, ओमन के लगातार देखरेख करे जावय।
LEV 24:5 “बहुंत बढ़िया पीसान के बारह ठन रोटी सेंकके बनावव अऊ हर एक रोटी ह एपा के दू-दसवां भाग म बनाय जावय।
LEV 24:6 तुमन ओमन ला सुध सोन के मेज ऊपर दू जगह म, याने एक-एक जगह म छै-छै ठन करके यहोवा के आघू म रख देवव।
LEV 24:7 दूनों जगह म सुध धूप रखव, कि ओह रोटी के सेति सुरता-देवइया हिस्सा अऊ यहोवा बर जेवन-बलिदान होवय।
LEV 24:8 ये रोटी ला हमेसा के करार के रूप म इसरायलीमन कोति ले हर बिसराम के दिन लगातार यहोवा के आघू म रखे जावय।
LEV 24:9 ये रोटी ह हारून अऊ ओकर बेटामन के अय अऊ ओमन येला पबितर-स्थान के छेत्र म खावंय, काबरकि येह यहोवा ला चघाय जेवन-बलिदान के ओमन के हमेसा के महा पबितर भाग अय।”
LEV 24:10 एक इसरायली माईलोगन के बेटा, जेकर ददा ह मिसरी रिहिस, इसरायली मनखेमन के बीच म चल दीस, अऊ डेरा म इसरायली माईलोगन के ओ बेटा अऊ एक इसरायली के बीच झगरा हो गीस।
LEV 24:11 ओ इसरायली माईलोगन के बेटा ह सराप देके यहोवा के नांव के निन्दा करे लगिस। एकरसेति ओला मनखेमन मूसा करा ले गीन। (ओकर दाई के नांव सलोमीत रिहिस, जऊन ह दान के गोत्र के दिबरी के बेटी रिहिस।)
LEV 24:12 मनखेमन ओकर बारे म यहोवा के ईछा के पता चलत तक ओला हवालात म रखिन।
LEV 24:13 तब यहोवा ह मूसा ला कहिस,
LEV 24:14 “ओ निन्दा करइया ला डेरा के बाहिर ले जा। अऊ जतेक झन ओला सराप देवत सुने हवंय, ओमन अपन हांथ ओकर मुड़ म रखंय, अऊ जम्मो सभा के मनखेमन ओला पथरवाह करंय।
LEV 24:15 तेंह इसरायलीमन ला कह: ‘जऊन कोनो अपन परमेसर ला सराप देथे, ओह दोसी ठहिराय जाही;
LEV 24:16 जऊन कोनो यहोवा के नांव के निन्दा करथे, ओह मार डारे जावय। जम्मो सभा के मनखेमन ओला पथरा फेंक-फेंकके मारंय। चाहे कोनो परदेसी होवय या देसी मनखे होवय, जब कोनो घलो मनखे परमेसर के नांव के निन्दा करथे, त ओह मार डारे जावय।
LEV 24:17 “ ‘जऊन मनखे कोनो आने मनखे के परान ले लेथे, त ओह मार डारे जावय।
LEV 24:18 जऊन मनखे कोनो आने मनखे के पसु के परान ले लेथे, त ओह ओकर भरपई दूसर पसु देके करय।
LEV 24:19 जब कोनो मनखे ह अपन परोसी के देहें ला चोट पहुंचाथे, त ओला घलो ओही किसम ले चोट पहुंचाय जावय:
LEV 24:20 हाड़ा टोरई के बलदा हाड़ा टोरई, आंखी के बलदा आंखी, दांत के बलदा दांत। जऊन मनखे ह जइसने चोट कोनो आने मनखे ला देय हवय, ओला घलो वइसनेच चोट पहुंचाय जावय।
LEV 24:21 कोनो मनखे ह कोनो पसु ला मार डारथे, त ओ मनखे ह ओकर भरपई जरूर करय, पर जऊन मनखे ह कोनो आने मनखे ला मार डारथे, त ओला घलो मार डारे जावय।
LEV 24:22 चाहे परदेसी होवय या देसी मनखे, जम्मो बर तुम्हर ओहीच कानून होवय। मेंह यहोवा तुम्हर परमेसर अंव।’ ”
LEV 24:23 तब मूसा ह इसरायलीमन ले बात करिस, अऊ ओमन ओ निन्दा करइया ला डेरा के बाहिर ले गीन अऊ ओला पथरवाह करिन। इसरायलीमन वइसनेच करिन, जइसने यहोवा ह मूसा ला हुकूम दे रिहिस।
LEV 25:1 यहोवा ह सीनय परबत ऊपर मूसा ला कहिस,
LEV 25:2 “इसरायलीमन ले गोठिया अऊ ओमन ला कह: ‘जब तुमन ओ देस म जावव, जऊन ला मेंह तुमन ला देवइया हंव, त ओ देस ह खुद यहोवा बर एक बिसराम बछर ला मानय।
LEV 25:3 तुमन छै बछर ले अपन खेत ला बोवव, अऊ छै बछर ले अपन अंगूर के बारी के नारमन ला छांटव अऊ ओमन के फर ला संकेलव,
LEV 25:4 पर सातवां बछर ह भुइयां बर बिसराम के बछर होवय; येह यहोवा के नांव म बिसराम के बछर अय। ये साल न तो अपन खेत ला बोवव, अऊ न ही अपन अंगूर के बारी के नारमन ला छांटव।
LEV 25:5 खेत म जऊन कुछू अपनआप बाढ़थे, ओला झन लुवव या परिया छोंड़े गे अंगूर के नारमन के फर ला झन संकेलव। भुइयां ला एक बछर के बिसराम मिलय।
LEV 25:6 बिसराम बछर के समय भुइयां म जऊन घलो ऊपज अपनआप होथे, ओह तुम्हर बर जेवन होही—तुम्हर, तुम्हर सेवक या सेविका, बनिहार अऊ तुम्हर बीच म कुछू समय तक रहइया मनखेमन बर जेवन होही,
LEV 25:7 अऊ ओह तुम्हर पसु अऊ तुम्हर देस के जंगली पसुमन के घलो जेवन होही। भुइयां म जऊन घलो ऊपज अपनआप होथे, ओला खाय जा सकत हे।
LEV 25:8 “ ‘तुमन सात बिसराम बछर गनव—सात बछर के सात गुना—ताकि उनचास बछर म सात बिसराम बछर होवय।
LEV 25:9 तब तुमन पचासवां साल के सातवां महिना के दसवां दिन याने प्रायस्चित के दिन अपन पूरा देस म तुरही फुंकवाव।
LEV 25:10 ओ पचासवां बछर ला पबितर मानव अऊ देस म रहइया जम्मो झन के छुटकारा के घोसना करव। येह तुम्हर बर जुबली बछर होही; तुमन म ले हर एक झन अपन परिवारिक संपत्ति अऊ अपन खुद के कुल म लहुंटय।
LEV 25:11 तुम्हर बर ये पचासवां बछर ह जुबली बछर होवय; तुमन न तो बोवव, अऊ न ही अपनआप जामे फसल ला लुवव, अऊ न ही बिगर छांटे अंगूर के नार म फरे फर ला टोरव।
LEV 25:12 काबरकि येह जुबली बछर अय अऊ येह तुम्हर बर पबितर होवय। जऊन ऊपज तुम्हर करा सीधा खेत ले लाय जाथे, सिरिप ओला खावव।
LEV 25:13 “ ‘ये जुबली बछर म हर एक मनखे अपन खुद के भुइयां म लहुंटय।
LEV 25:14 “ ‘कहूं तुमन अपन कोनो मनखे ला भुइयां बेचथव या ओकर ले भुइयां बिसाथव, त एक-दूसर ले फायदा झन लेवव।
LEV 25:15 जुबली बछर के बाद, जतका बछर बीत गे होवय, ओकर गनती के आधार म तुमन अपन मनखेमन ले भुइयां बिसावव। अऊ ओमन फसल लुए बर बांचे बछर के गनती के आधार म अपन भुइयां ला तुम्हर करा बेचंय।
LEV 25:16 जतका जादा बछर बांचे रहय, ओतका जादा दाम बढ़ावव, अऊ जतका कम बछर बांचे रहय, ओतका ही दाम घटावव, काबरकि सही म जऊन चीज ह बेचे जावत हे, ओह बछर के हिसाब से ओकर फसल अय।
LEV 25:17 एक-दूसर ले फायदा झन लेवव, पर अपन परमेसर के भय मानव। मेंह यहोवा तुम्हर परमेसर अंव।
LEV 25:18 “ ‘मोर बिधिमन ला मानव अऊ धियान देके मोर कानूनमन के पालन करव, त तुमन निडर होके देस म बसे रहिहू।
LEV 25:19 तब भुइयां ह अपन फसल उपजाही, अऊ तुमन पेट भर खाहू अऊ उहां निडर बसे रहिहू।
LEV 25:20 तुमन पुछ सकत हव, “यदि सातवां बछर म, हमन नइं बोवन या अपन फसल ला नइं लुवन, त ओ बछर म, हमन का ला खाबो?”
LEV 25:21 मेंह छठवां बछर म अइसने आसीस दूहूं कि भुइयां ह ओ साल तीन बछर के बरोबर फसल दीही।
LEV 25:22 जब तुमन आठवां बछर म बोवई करव, त जुन्ना फसल म ले तब तक खावत रहव, जब तक कि नौवां बछर के फसल के लुवई नइं हो जावय।
LEV 25:23 “ ‘भुइयां ला सब दिन बर झन बेचव, काबरकि भुइयां ह मोर अय अऊ तुमन मोर भुइयां म परदेसी अऊ अजनबी के सहीं रहिथव।
LEV 25:24 ओ जम्मो भुइयां, जऊन ह तुम्हर अधिकार म हवय, ओकर छुटकारा के परबंध जरूर करव।
LEV 25:25 “ ‘कहूं तुम्हर कोनो संगी इसरायली गरीब हो जावय अऊ अपन कुछू संपत्ति ला बेचय, त ओकर सबले नजदीकी रिस्तेदार ह आवय अऊ ओ बेचे गय चीज ला छोंड़ावय।
LEV 25:26 कहूं ओकर बर छुड़ानेवाला कोनो नइं ए, पर बाद म, जब ओह खुद धनवान हो जाथे अऊ ओकर करा ओला छोंड़ाय बर धन हो जाथे,
LEV 25:27 त ओह ओ संपत्ति के बेचे जाय के पाछू के बछर के हिसाब से दाम तय करय अऊ ओ दाम बेचे गय मनखे ला वापिस कर देवय; ओह तब फेर अपन संपत्ति म काबिज हो सकथे।
LEV 25:28 पर कहूं ओकर करा अतका पूंजी नइं ए कि ओह फेर अपन संपत्ति ला बिसा सकय, त फेर ओ संपत्ति ह बिसइया के ही अधिकार म जुबली बछर तक रहिही। ओ संपत्ति ला जुबली बछर म वापिस करे जाही, अऊ तब ओह अपन संपत्ति म अधिकार कर सकत हे।
LEV 25:29 “ ‘कोनो मनखे दीवारवाले सहर म घर बेचथे, त बेचे जाय के पाछू एक बछर तक ओकर करा छोंड़ाय के अधिकार रहिथे। ओ एक साल म बेचइया ह अपन घर ला छोंड़ा सकत हे।
LEV 25:30 कहूं ओ एक बछर के पूरा होवत तक ओ घर ला छोंड़ाय नइं जावय, त दीवारवाले सहर के ओ घर ह सब दिन बर बिसइया अऊ ओकर संतानमन के हो जाही। येला जुबली बछर म झन वापिस करे जावय।
LEV 25:31 पर बिगर दीवार के गांवमन के घरमन ला देस के खेत सहीं समझे जावय। ओमन ला छोंड़ाय जा सकत हे, अऊ ओमन ला जुबली बछर म वापिस कर दिये जावय।
LEV 25:32 “ ‘लेवीमन ला अपन अधिकार के लेवी सहरमन म हमेसा अपन घर ला छोंड़ाय के अधिकार हवय।
LEV 25:33 एकरसेति लेवीमन के संपत्ति ह छोंड़ाय जा सकत हे—याने कि ओमन के अधिकार के सहर म बेचे गय कोनो घर—अऊ ये घर ह जुबली बछर म वापिस करे जावय, काबरकि इसरायलीमन के बीच, लेवीमन के सहर के घरमन लेवीमन के संपत्ति अंय।
LEV 25:34 पर ओमन के नगर के चरागन ह झन बेचे जावय; काबरकि येमा ओमन के हमेसा के अधिकार हवय।
LEV 25:35 “ ‘कहूं तुम्हर कोनो संगी इसरायली गरीब हो जाथे, अऊ तुम्हर बीच म ओकर दुरदसा होवय, त तुमन ओकर मदद करव, जइसने कि तुमन कोनो परदेसी अऊ अजनबी ला करथव, ताकि ओह तुम्हर बीच म रह सकय।
LEV 25:36 तुमन ओकर ले बियाज झन लेवव या ओकर ले कोनो फायदा झन लेवव, पर अपन परमेसर के भय मानव, ताकि ओह तुम्हर बीच म रह सकय।
LEV 25:37 तुमन ओला न तो बियाज म पईसा उधार देवव अऊ न ही फायदा लेके ओला जेवन के कोनो चीज बेचव।
LEV 25:38 मेंह यहोवा तुम्हर परमेसर अंव, जऊन ह तुमन ला मिसर देस ले निकालके लानेंव, ताकि तुमन ला कनान देस देवंव अऊ तुम्हर परमेसर होवंव।
LEV 25:39 “ ‘कहूं तुम्हर कोनो संगी इसरायली गरीब हो जाथे अऊ अपनआप ला तुम्हर हांथ म बेच देथे, त तुमन ओकर ले गुलाम सहीं काम झन करावव।
LEV 25:40 ओकर संग बनिहार या तुम्हर बीच म कुछू समय तक रहइया मनखे सहीं बरताव करव; ओह तुम्हर बर जुबली बछर तक काम करय।
LEV 25:41 तब ओह अऊ ओकर लइकामन छोंड़ दिये जावंय, ताकि ओमन अपन गोत्र अऊ अपन पुरखामन के संपत्ति करा वापिस जा सकंय।
LEV 25:42 काबरकि इसरायलीमन मोर सेवक अंय, जऊन मन ला मेंह मिसर देस ले निकालके लानेंव; ओमन ला गुलाम के रूप म झन बेचे जावय।
LEV 25:43 ओमन ऊपर कठोरता से सासन झन करव, पर अपन परमेसर के भय मानव।
LEV 25:44 “ ‘तुम्हर पुरूस अऊ महिला गुलाममन तुम्हर चारों कोति के आनजात के होवंय, जेमन ला तुमन गुलाम के रूप म बिसावव।
LEV 25:45 जऊन मन तुम्हर बीच म कुछू समय बर रहत हवंय अऊ ओमन के कुल के सदस्य, जऊन मन तुम्हर देस म जनमे हवंय, येमा के कुछू झन ला घलो तुमन बीसा सकत हव, अऊ ओमन तुम्हर संपत्ति हो जाहीं।
LEV 25:46 तुमन ओमन ला अपन लइकामन बर उत्तराधिकार म मिले संपत्ति के रूप म वसीयत कर सकत हव अऊ ओमन ला जिनगी भर गुलाम बना सकत हव, पर तुमन अपन संगी इसरायलीमन ऊपर कठोरता से सासन झन करव।
LEV 25:47 “ ‘कहूं तुम्हर बीच म रहइया कोनो परदेसी धनी हो जाथे अऊ तुम्हर कोनो संगी इसरायली गरीब हो जाथे अऊ अपनआप ला ओ परदेसी या परदेसी के गोत्र के कोनो सदस्य करा बेच देथे,
LEV 25:48 त अपनआप ला बेचे के बाद, ओकर करा छुटकारा के अधिकार रहिथे। ओकर कोनो रिस्तेदार ओला छोंड़ा सकत हे:
LEV 25:49 ओकर कोनो कका या चचेरा-भाई या ओकर गोत्र म ओकर कोनो खून के रिस्तेदार ओला छोंड़ा सकत हे। या कहूं ओह धनी हो जाथे, त ओह अपनआप ला छोंड़ा सकत हे।
LEV 25:50 ओह अपन बिसइया के संग अपन बेचे जाय के बछर ले जुबली बछर तक गनय। ओ गने गय बछर म एक बनिहार के कतेक बनी होथे, ओकर मुताबिक ओकर छोंड़ाय जाय के दाम होवय।
LEV 25:51 कहूं जादा बछर बांचे हवय, त ओकर बर दिये गय दाम के एक बड़े भाग ला अपन छुटकारा बर लहुंटा देवय।
LEV 25:52 कहूं जुबली बछर बर सिरिप थोरकून बछर बांचे हवय, त ओमन ओकर हिसाब लगावंय अऊ ओकर मुताबिक ओकर छुटकारा के दाम चुकावंय।
LEV 25:53 ओला साल दर साल बनिहार के सहीं समझे जावय; तुमन ये बात के धियान रखव कि ओकर मालिक ह ओकर ऊपर कठोरता से सासन झन करय।
LEV 25:54 “ ‘कहूं कोनो इसरायली येमा के कोनो घलो किसम ले छोंड़ाय नइं जावय, त ओला अऊ ओकर लइकामन ला जुबली बछर म छोंड़ दिये जावय,
LEV 25:55 काबरकि इसरायलीमन सेवक के रूप म मोर अंय। ओमन मोर सेवक अंय, जऊन मन ला मेंह मिसर देस ले निकालके लानेंव। मेंह यहोवा तुम्हर परमेसर अंव।
LEV 26:1 “ ‘तुमन अपन बर मूरती झन बनावव या अपन बर कोनो फोटू या कोनो पबितर पथरा झन ठाढ़ करव, अऊ अपन देस म दंडवत करे बर तुमन तरासके बनाय गय कोनो पथरा झन रखव। मेंह यहोवा तुम्हर परमेसर अंव।
LEV 26:2 “ ‘मोर बिसराम दिनमन ला मानव अऊ मोर पबितर-स्थान के आदर करव। मेंह यहोवा अंव।
LEV 26:3 “ ‘कहूं तुमन मोर बिधिमन म चलहू अऊ मोर हुकूममन के धियान से पालन करहू,
LEV 26:4 त मेंह तुम्हर बर सही रितु म बरसा भेजहूं, अऊ भुइयां ह अपन फसल उपजाही अऊ रूखमन अपन फर दीहीं।
LEV 26:5 तुम्हर मिंजई के काम ह चलते रहिही, जब तक कि अंगूर टोरे के समय नइं आ जावय अऊ अंगूर टोरई ह लगातार चलते रहिही, जब तक कि बोये के समय ह नइं आ जावय, अऊ तुमन भरपेट भोजन करहू अऊ अपन देस म सुरकछित बसे रहिहू।
LEV 26:6 “ ‘मेंह देस म सुख-सांति दूहूं, अऊ तुमन अराम से सुतहू अऊ तुमन ला कोनो डरवइया नइं होहीं। मेंह देस म ले हिंसक जंगली पसुमन ला निकाल दूहूं, अऊ तुम्हर देस म कोनो तलवार ले नइं मारे जाही।
LEV 26:7 तुमन अपन बईरीमन के पीछा करहू अऊ ओमन तुम्हर आघू म तलवार ले मारे जाहीं।
LEV 26:8 तुमन के पांच झन ह सौ झन ला अऊ तुमन के सौ झन ह दस हजार ला भगाहीं, अऊ तुम्हर बईरीमन तुम्हर आघू म तलवार ले मारे जाहीं।
LEV 26:9 “ ‘मेंह तुम्हर ऊपर दया करहूं अऊ तुमन ला फलवंत करहूं अऊ तुमन ला गनती म बढ़ाहूं, अऊ मेंह अपन करार ला तुम्हर संग पूरा करहूं।
LEV 26:10 नवां फसल ला रखे बर जब तुमन बीते बछर के फसल ला हटाहू, तब भी तुमन जुन्ना फसल ला खावत रहिहू।
LEV 26:11 मेंह तुम्हर बीच म अपन निवास के जगह बनाहूं, अऊ मेंह तुमन ले घिन नइं करहूं।
LEV 26:12 मेंह तुम्हर बीच म चले-फिरे करहूं अऊ तुम्हर परमेसर होहूं, अऊ तुमन मोर मनखे होहू।
LEV 26:13 मेंह यहोवा तुम्हर परमेसर अंव, जऊन ह तुमन ला मिसर देस ले निकालके लानेंव, ताकि तुमन मिसरी मनखेमन के गुलाम झन बने रहव; मेंह तुम्हर जुड़ा के डांड़ी ला टोर दे हंव अऊ तुमन ला अइसने कर दे हंव कि तुमन मुड़ उठाके चल सकव।
LEV 26:14 “ ‘पर कहूं तुमन मोर नइं सुनहू अऊ ये जम्मो हुकूममन के पालन नइं करहू,
LEV 26:15 अऊ कहूं तुमन मोर बिधिमन ला गरहन नइं करहू अऊ मोर कानून ले घिन करहू अऊ मोर जम्मो हुकूममन ला नइं मानहू अऊ ये किसम ले मोर करार ला टोर दूहू,
LEV 26:16 त फेर मेंह तुम्हर संग अइसन करहूं: मेंह तुम्हर ऊपर अचानक आतंक, नास करइया बेमारी अऊ जर लानहूं, जेकर ले तुम्हर आंखी ह नइं दिखही अऊ तुमन अब्बड़ दुख पाहू। तुम्हर बीज बोवई ह घलो बेकार होही, काबरकि ओला तुम्हर बईरीमन खा डारहीं।
LEV 26:17 मेंह तुम्हर बिरोध म हो जाहूं, जेकर ले तुमन अपन बईरीमन ले हार जाहू; जऊन मन तुम्हर ले घिन करथें, ओमन तुम्हर ऊपर सासन करहीं, अऊ जब तुम्हर कोनो पीछा नइं करत होही, तभो ले तुमन भागहू।
LEV 26:18 “ ‘ये जम्मो बात होय के बाद घलो, कहूं तुमन मोर नइं सुनहू, त मेंह तुम्हर पाप बर तुमन ला सात गुना दंड दूहूं।
LEV 26:19 मेंह तुम्हर जिद्द ले भरे घमंड ला टोर दूहूं अऊ तुम्हर ऊपर अकास ला लोहा सहीं अऊ तुम्हर खाल्हे के भुइयां ला कांसा सहीं कर दूहूं।
LEV 26:20 तुम्हर मेहनत ह बेकार जाही, काबरकि न तो तुम्हर भुइयां म फसल होही अऊ न ही तुम्हर देस के रूखमन म फर लगही।
LEV 26:21 “ ‘कहूं तुमन मोर बिरोध म चलतेच रहिहू अऊ मोर बात ला नइं सुनहू, त मेंह तुम्हर पापमन के मुताबिक तुम्हर दुख ला सात गुना बढ़ाहूं।
LEV 26:22 मेंह तुम्हर बीच म जंगली जानवर भेजहूं, अऊ ओमन तुम्हर लइकामन ला धरके ले जाहीं, तुम्हर पसुमन ला मार डारहीं अऊ तुम्हर गनती ला अतका कम कर दीहीं कि तुम्हर सड़कमन सुन्ना हो जाहीं।
LEV 26:23 “ ‘एकर बाद घलो, यदि तुमन मोर ताड़ना ले नइं सुधरहू अऊ मोर बिरोध म चलते रहिहू,
LEV 26:24 त मेंह घलो तुम्हर बिरोध म हो जाहूं अऊ तुम्हर पाप के सेति तुम्हर ऊपर सात गुना दुख-तकलीफ लानहूं।
LEV 26:25 अऊ करार ला टोरे के बदला म, मेंह तुम्हर ऊपर तलवार चलवाहूं। जब तुमन अपन-अपन सहर म वापिस जाहू, त मेंह तुम्हर बीच म महामारी लानहूं, अऊ तुमन ला बईरी के हांथ म कर दिये जाही।
LEV 26:26 जब में तुम्हर रोटी आय के जरिया ला बंद कर देवंव, तब दस माईलोगनमन एक ठन चूल्हा म रोटी बनाहीं, अऊ ओमन तुमन ला तऊलके थोर-थोर रोटी दीहीं। तुमन खाहू, पर तुम्हर पेट नइं भरही।
LEV 26:27 “ ‘ये जम्मो होय के बाद घलो, कहूं तुमन मोर नइं सुनहू अऊ मोर बिरोध म चलते रहिहू,
LEV 26:28 त गुस्सा होके मेंह तुम्हर बिरोध म होहूं, अऊ में खुद तुम्हर पाप बर तुमन ला सात गुना दंड दूहूं।
LEV 26:29 तुमन अपन बेटा-बेटीमन के मांस खाहू।
LEV 26:30 मेंह तुम्हर ऊंच जगहमन ला गिरा दूहूं, तुम्हर धूप के बेदीमन ला नास कर दूहूं अऊ तुम्हर लासमन ला तुम्हर निरजीव मूरतीमन ऊपर कुढ़ो दूहूं, अऊ मेंह तुम्हर ले घिन करहूं।
LEV 26:31 मेंह तुम्हर सहरमन ला खंडहर बना दूहूं अऊ तुम्हर पबितर-स्थानमन ला उजार दूहूं अऊ तुम्हर बलिदान के सुख-देवइया सुगंध ले मोला कोनो खुसी नइं होही।
LEV 26:32 मेंह खुद तुम्हर देस ला उजार दूहूं, ताकि उहां बसे तुम्हर बईरीमन डरा जाहीं।
LEV 26:33 मेंह तुमन ला जाति-जाति के मनखेमन के बीच तितिर-बितिर कर दूहूं अऊ अपन तलवार खींचके निकालहूं अऊ तुम्हर पीछा करहूं। तुम्हर देस ह सुन्ना हो जाही अऊ तुम्हर सहरमन नास हो जाहीं।
LEV 26:34 तब, जब ये देस ह उजरे रहिही अऊ तुमन अपन बईरीमन के देस म रहिहू, तब ये देस ह अपन बिसराम बछरमन के आनंद मनाही; देस ह अराम करही अऊ अपन बिसराम बछर के आनंद उठाही।
LEV 26:35 जतेक समय तक येह बीरान रहिही, ओह येकर सुसताय के समय होही, काबरकि जब तुमन येमा रहत रहेव, त बिसराम बछर म येला सुसताय बर नइं मिलिस।
LEV 26:36 “ ‘तुमन म के जऊन मन बांच गे हवंय, ओमन ला अपन बईरीमन के देस म अइसने डरपोक बना दूहूं कि हवा चले के कारन पान के खड़खड़ाय के अवाज सुनके ओमन भागहीं। ओमन अइसने भागहीं, मानो कोनो तलवार लेके ओमन के पीछा करत हे, अऊ ओमन गिर पड़हीं, हालाकि कोनो ओमन के पीछा नइं करत होही।
LEV 26:37 ओमन एक-दूसर के ऊपर गिरहीं, मानो कोनो तलवार ले बांचे बर भागत हवय, हालाकि कोनो घलो ओमन के पीछा नइं करत होही। एकरसेति तुमन अपन बईरीमन के सामना नइं कर सकहू।
LEV 26:38 तुमन आने जाति के मनखेमन के बीच म नास हो जाहू; तुम्हर बईरीमन के भुइयां ह तुमन ला खा जाही।
LEV 26:39 तुमन म जऊन मन बांचे हवंय, ओमन अपन पाप के कारन अपन बईरीमन के देस म नास हो जाहीं; ओमन अपन पुरखामन के पाप के कारन घलो नास हो जाहीं।
LEV 26:40 “ ‘पर कहूं ओमन अपन अऊ अपन पुरखामन के पाप ला मान लीहीं—याने कि मोर बर ओमन के बिसवासघात अऊ ओमन के बईरता ला,
LEV 26:41 जेकर कारन मेंह ओमन के बिरोध म हो गेंव अऊ मेंह ओमन ला ओमन के बईरीमन के देस म भेज देंव—तब जब ओमन के कठोर हिरदय ह नरम हो जावय अऊ ओमन अपन पाप के दाम चुकावंय,
LEV 26:42 त मेंह याकूब के संग मोर करार अऊ इसहाक के संग मोर करार अऊ अब्राहम के संग मोर करार ला सुरता करहूं, अऊ मेंह ये देस ला घलो सुरता करहूं।
LEV 26:43 काबरकि ओमन के दुवारा ओ देस ह छोंड़ दिये गे होही अऊ ओमन के छोंड़ दिये गय समय म देस ह अपन बिसराम के आनंद उठाही। ओमन अपन पाप के दाम चुकाहीं, काबरकि ओमन मोर कानूनमन ला नइं मानिन अऊ मोर बिधिमन ले घिन करिन।
LEV 26:44 तभो ले, ये जम्मो होय के बाद, जब ओमन अपन बईरीमन के देस म होवंय, त मेंह ओमन ला नइं छोंड़ देवंव अऊ न ही ओमन ले अइसने घिन करंव कि ओमन के संग मोर करार ला टोरके ओमन ला पूरा नास कर देवंव। मेंह यहोवा, ओमन के परमेसर अंव।
LEV 26:45 पर ओमन के भलई बर, मेंह ओमन के पुरखामन के संग मोर करार ला सुरता करहूं, जेमन ला मेंह जाति-जाति के मनखेमन के देखत म मिसर देस ले बाहिर निकाल लानेंव, ताकि मेंह ओमन के परमेसर होवंव। मेंह यहोवा अंव।’ ”
LEV 26:46 येमन बिधि, कानून अऊ नियम अंय, जऊन ला यहोवा ह सीनय पहाड़ म अपन अऊ इसरायलीमन के बीच म मूसा के दुवारा ठहिराईस।
LEV 27:1 फेर यहोवा ह मूसा ला कहिस,
LEV 27:2 “इसरायलीमन ले गोठिया अऊ ओमन ला कह: ‘यदि कोनो मनखे ह कोनो मनखे ला यहोवा ला अरपन करे के बिसेस मन्नत मानथे अऊ यदि ये मन्नत ह ओ मनखे के बरोबर कीमत देय के दुवारा होवय,
LEV 27:3 त बीस ले साठ बछर के आदमी के कीमत पबितर-स्थान के सेकेल के मुताबिक चांदी के पचास सेकेल ठहिरावव;
LEV 27:4 अऊ माईलोगन के कीमत तीस सेकेल ठहिरावव;
LEV 27:5 पांच ले बीस बछर के मनखे के कीमत—यदि ओह बाबू-पीला अय, त ओकर कीमत बीस सेकेल अऊ यदि ओह नोनी-पीला अय, त ओकर कीमत दस सेकेल ठहिरावव;
LEV 27:6 एक महिना ले लेके पांच बछर तक के मनखे के कीमत—यदि ओह बाबू-पीला अय, त ओकर कीमत चांदी के पांच सेकेल अऊ यदि नोनी-पीला अय, त ओकर कीमत चांदी के तीन सेकेल ठहिरावव;
LEV 27:7 साठ बछर या ओकर ले जादा उमर के मनखे के कीमत—यदि आदमी अय, त ओकर कीमत पंदरह सेकेल अऊ माईलोगन अय, त ओकर कीमत दस सेकेल ठहिरावव।
LEV 27:8 कहूं कोनो मनखे ह अतका गरीब अय कि ओह ठहिराय गय कीमत ला नइं पटा सकय, त अरपन करे गय मनखे ला पुरोहित करा लाने जावय अऊ पुरोहित ह ओकर कीमत मन्नत मनइया के हैसियत के मुताबिक ठहिराही।
LEV 27:9 “ ‘कहूं कोनो मनखे के मन्नत ह कोनो पसु अय, जऊन ला यहोवा बर बलिदान के रूप म दिये जा सकत हे, त यहोवा ला दिये गय अइसने पसु ह पबितर हो जाथे।
LEV 27:10 ओ मनखे ह ओला फेर कोनो किसम ले झन बदलय; खराप के बदले बढ़िया ला या बढ़िया के बदले खराप ला झन देवय; कहूं ओह एक पसु के बदला म आने पसु देवय, त पहिली अऊ बदला म दिये गय पसु, दूनों पबितर हो जाथें।
LEV 27:11 कहूं ओह बिधि के मुताबिक कोनो असुध पसु के मन्नत माने हवय, जऊन ला यहोवा बर बलिदान के रूप म नइं दिये जा सकय, त ओ पसु ला पुरोहित करा लाने जावय,
LEV 27:12 अऊ पुरोहित ह ओ पसु ला जांचके बढ़िया या खराप ठहिराही। ओकर बाद, जऊन घलो कीमत पुरोहित ह ठहिरावय, ओकर ओतकेच कीमत होही।
LEV 27:13 कहूं ओकर मालिक ह ओ पसु ला छोंड़ाय चाहथे, त ओह पुरोहित के दुवारा ठहिराय गे कीमत म पांचवां भाग अऊ देके ओला छोंड़ा सकत हे।
LEV 27:14 “ ‘कहूं कोनो मनखे अपन घर ला पबितर चीज के रूप म यहोवा ला अरपन करय, त पुरोहित ह ओ घर के जांच करके ओला बढ़िया या खराप बतावय। ओकर बाद, जऊन घलो कीमत पुरोहित ह ठहिरावय, ओकर ओतकेच कीमत होही।
LEV 27:15 कहूं अरपन करइया ह अपन घर ला छोंड़ाय चाहथे, त ओह ठहिराय गे कीमत म पांचवां भाग अऊ देवय, त ओ घर ह फेर ओकर हो जाही।
LEV 27:16 “ ‘कहूं कोनो मनखे ह अपन परिवारिक भुइयां के कुछू भाग ला यहोवा बर अरपन करथे, त ओमा बोये बर जतका बीजा के जरूरत होथे, ओकर मुताबिक ओ भाग के कीमत तय करे जावय—एक होमेर जौ बीजा के चांदी के पचास सेकेल।
LEV 27:17 कहूं ओह जुबली बछर म अपन कोनो खेत अरपन करय, त ओकर ठहिराय गे कीमत ह ओहीच रहय।
LEV 27:18 पर कहूं ओह जुबली बछर के पाछू अपन कोनो खेत ला अरपन करथे, त अवइया जुबली बछर बर जतका बछर बांचे हवय, ओकर मुताबिक पुरोहित ह ओ खेत के कीमत ठहिरावय, अऊ येकर ठहिराय गे कीमत ह कम हो जाही।
LEV 27:19 कहूं खेत ला अरपन करइया ह ओ खेत ला छोंड़ाय बर चाहथे, त ओह ठहिराय गे कीमत म पांचवां भाग अऊ देवय, त ओ खेत ह फेर ओकरेच हो जाही।
LEV 27:20 पर कहूं ओह ओ खेत ला नइं छोंड़ावय, या यदि ओह ओला कोनो आने मनखे ला बेच देवय, त ओ खेत ह फेर कभू छोंड़ाय नइं जा सकय।
LEV 27:21 जब ओ खेत ह जुबली बछर म छूट जावय, त ओह यहोवा ला अरपित खेत सहीं पबितर हो जाही; अऊ ओह पुरोहित के संपत्ति हो जाही।
LEV 27:22 “ ‘कहूं कोनो मनखे ह कोनो बिसाय खेत ला यहोवा ला अरपन करथे, जऊन ह कि ओकर पुरखा के खेत नो हय,
LEV 27:23 त अवइया जुबली बछर के मुताबिक पुरोहित ह ओकर कीमत ठहिरावय, अऊ मालिक ह ओहीच दिन यहोवा ला चघाय गे पबितर चीज के रूप म ओ कीमत ला दे देवय।
LEV 27:24 जुबली बछर म ओ खेत ला ओ मनखे ला लहुंटा दिये जावय, जेकर ले ओला बिसाय गे रिहिस, ओ मनखे ला जेकर ओ खेत रिहिस।
LEV 27:25 जब कोनो चीज के कीमत ठहिराय जाथे, ओ कीमत ह पबितर-स्थान के सेकेल मुताबिक ठहिराय जावय, सेकेल ह बीस गेराह के ठहिरय।
LEV 27:26 “ ‘कोनो मनखे कोनो पसु के पहिलांत पीला ला अरपन झन करय, काबरकि पहिली जनमे के कारन ओ पीला ह पहिले ही यहोवा के हो जाथे; चाहे ओह कोनो बईला होवय या कोनो भेड़, येह यहोवा के अय।
LEV 27:27 यदि ओह कोनो असुध पसु अय, त ओकर ठहिराय गे कीमत म पांचवां भाग अऊ देके ओला फेर वापिस बिसाय जा सकथे। कहूं ओ पसु ह छोंड़ाय नइं जावय, त ओकर ठहिराय गे कीमत के मुताबिक ओला बेच दिये जावय।
LEV 27:28 “ ‘पर जब कोनो मनखे अपन कोनो चीज ला यहोवा ला अरपित करथे—चाहे ओह मनखे होवय या पसु या पुरखा के खेत—ओह न तो बेचे जावय अऊ न ही छोंड़ाय जावय; अइसने अरपन करे गय हर एक चीज यहोवा बर महा पबितर अय।
LEV 27:29 “ ‘जऊन मनखे ला नास करे बर अरपित करे गे हवय, ओला छोंड़ाय झन जावय; ओह मार डारे जावय।
LEV 27:30 “ ‘भुइयां के हर एक चीज के दसमांस, चाहे माटी ले उपजाय बीजा होवय या रूख के फर, ओह यहोवा के अय; ओह यहोवा बर पबितर अय।
LEV 27:31 जऊन कोनो अपन दसमांस म ले कुछू भाग ला छोंड़ाय चाहथे, त ओकर कीमत म पांचवां भाग जादा देके ओला छोंड़ा सकथे।
LEV 27:32 गाय-बईला या भेड़-बकरी के झुंड के दसमांस—हर एक झुंड के दसवां पसु, जऊन ह चरवाहा के गने जाय के बेरा ओकर लउठी के तरी ले निकलथे, ओह यहोवा बर पबितर ठहिरही।
LEV 27:33 कोनो घलो मनखे बढ़िया या खराप होय के चिंता झन करय अऊ न ही ओमा कोनो अदला-बदली करय। कहूं कोनो मनखे अदला-बदली करथे, त ओ पसु अऊ ओकर बदले म दिये गय पसु, दूनों पबितर हो जाथें अऊ ओमन ला छोंड़ाय नइं जा सकय।’ ”
LEV 27:34 येमन ओ हुकूम अंय, जऊन ला यहोवा ह सीनय पहाड़ म मूसा ला इसरायलीमन बर दीस।
NUM 1:1 इसरायलीमन के मिसर देस ले निकल जाय के दूसर बछर के दूसर महिना के पहिली दिन, यहोवा ह सीनय के निरजन जगह म, मिलापवाला तम्बू म मूसा ला कहिस:
NUM 1:2 “इसरायलीमन के जम्मो समाज ओमन के गोत्र अऊ परिवार के मुताबिक, हर एक पुरूस के गनती नांव लिख-लिखके कर।
NUM 1:3 जतेक इसरायली बीस साल या ओकर ले जादा उमर के हवंय अऊ ओमन सेना म सेवा देय के लईक हवंय, ओ जम्मो के गनती तें अऊ हारून ओमन के दल के मुताबिक करव।
NUM 1:4 हर एक गोत्र के एक-एक पुरूस, जऊन मन अपन परिवार के मुखिया अंय, ओमन तुम्हर मदद करंय।
NUM 1:5 “ये ओ पुरूसमन के नांव अय, जऊन मन तुम्हर मदद करहीं: “रूबेन के गोत्र ले सदेऊर के बेटा एलीसूर;
NUM 1:6 सिमोन के गोत्र ले सूरीसद्दाय के बेटा सलूमीएल;
NUM 1:7 यहूदा के गोत्र ले अमीनादाब के बेटा नहसोन;
NUM 1:8 इस्साकार के गोत्र ले सूआर के बेटा नतनेल;
NUM 1:9 जबूलून के गोत्र ले हेलोन के बेटा एलीआब;
NUM 1:10 यूसुफ के बेटामन ले: एपरैम के गोत्र ले अमीहूद के बेटा एलीसामा; मनस्से के गोत्र ले पदासूर के बेटा गमलीएल;
NUM 1:11 बिनयामीन के गोत्र ले गिदोनी के बेटा अबीदान;
NUM 1:12 दान के गोत्र ले अम्मीसद्दाय के बेटा अहीएजेर;
NUM 1:13 आसेर के गोत्र ले ओकरान के बेटा पगीएल;
NUM 1:14 गाद के गोत्र ले दूएल के बेटा एलियासाप;
NUM 1:15 नपताली के गोत्र ले एनान के बेटा अहीरा।”
NUM 1:16 येमन समाज के ओ मनखे रिहिन, जेमन ला अपन पुरखा के गोत्रमन ले अगुवा ठहिराय गीस। येमन इसरायल के गोत्रमन के मुखिया रिहिन।
NUM 1:17 जऊन मनखेमन के नांव ऊपर लिखे गे हवय, ओमन ला मूसा अऊ हारून अपन संग लीन,
NUM 1:18 अऊ ओमन ओ साल के दूसरा महिना के पहिला दिन पूरा समाज ला इकट्ठा करिन। मनखेमन अपन गोत्र अऊ परिवार के मुताबिक अपन बंसावली लिखवाईन, अऊ जतेक झन बीस साल या बीस साल ले जादा उमर के रिहिन, ओमन के नांव एक-एक करके लिखे गीस,
NUM 1:19 जइसे कि यहोवा ह मूसा ला हुकूम दे रिहिस। ये किसम ले ओह सीनय के सुनसान जगह म ओमन के गनती करिस:
NUM 1:20 इसरायल के बेटा रूबेन के बंस ले: जतेक पुरूस बीस साल या बीस साल ले जादा उमर के रिहिन अऊ सेना म सेवा दे सकत रिहिन, ओमन के नांव ओमन के गोत्र अऊ परिवार के मुताबिक एक-एक करके लिखे गीस।
NUM 1:21 रूबेन के गोत्र के गनती 46,500 होईस।
NUM 1:22 सिमोन के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के गनती करे गीस अऊ ओमन के नांव ओमन के गोत्र अऊ परिवार के मुताबिक एक-एक करके लिखे गीस।
NUM 1:23 सिमोन के गोत्र के गनती 59,300 होईस।
NUM 1:24 गाद के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:25 गाद के गोत्र के गनती 45,650 होईस।
NUM 1:26 यहूदा के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:27 यहूदा के गोत्र के गनती 74,600 होईस।
NUM 1:28 इस्साकार के बंस ले: ओ जम्मो मनखे, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:29 इस्साकार के गोत्र के गनती 54,400 होईस।
NUM 1:30 जबूलून के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:31 जबूलून के गोत्र के गनती 57,400 होईस।
NUM 1:32 यूसुफ के बेटामन ले: एपरैम के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:33 एपरैम के गोत्र के गनती 40,500 होईस।
NUM 1:34 मनस्से के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:35 मनस्से के गोत्र के गनती 32,200 होईस।
NUM 1:36 बिनयामीन के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:37 बिनयामीन के गोत्र के गनती 35,400 होईस।
NUM 1:38 दान के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:39 दान के गोत्र के गनती 62,700 होईस।
NUM 1:40 आसेर के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:41 आसेर के गोत्र के गनती 41,500 होईस।
NUM 1:42 नपताली के बंस ले: ओ जम्मो पुरूस, जऊन मन बीस साल या बीस साल ले जादा उमर के रिहिन अऊ सेना म सेवा देय के लईक रिहिन, ओमन के नांव ओमन के गोत्र अऊ परिवार के मुताबिक लिखे गीस।
NUM 1:43 नपताली के गोत्र के गनती 53,400 होईस।
NUM 1:44 मूसा अऊ हारून अऊ इसरायल के बारह अगुवा, जेमन अपन-अपन परिवार के मुखिया घलो रिहिन, येमन के गनती करिन।
NUM 1:45 जम्मो इसरायली, जऊन मन बीस साल ले जादा उमर के रिहिन अऊ इसरायली सेना म सेवा देय के लईक रिहिन, ओमन के गनती परिवार के मुताबिक होईस।
NUM 1:46 कुल गनती 6,03,550 होईस।
NUM 1:47 पर लेवीमन के पुरखा के गोत्र ला आने मन के संग नइं गने गीस।
NUM 1:48 यहोवा ह मूसा ला कहे रिहिस:
NUM 1:49 “लेवी गोत्र ला झन गनबे या ओमन ला आने इसरायलीमन संग गनती म सामिल झन करबे।
NUM 1:50 पर लेवीमन ला करार के कानून के पबितर-तम्बू म अधिकारी ठहिराबे—ओकर जम्मो सजावट अऊ ओमा के जम्मो चीज ऊपर अधिकारी ठहिराबे। ओमन पबितर-तम्बू अऊ ओमा के जम्मो चीज ला उठावंय; ओमन ओकर देखभाल करंय अऊ ओकर चारों कोति डेरा डाले रहंय।
NUM 1:51 जब भी पबितर-तम्बू ला आने जगह ले जाय के समय होवय, त लेवीमन ओला उसालंय, अऊ जब भी पबितर-तम्बू ला गाड़े के समय होवय, त लेवीमन ही ओला गाड़ंय। यदि कोनो आने मनखे येकर लकठा म आवय, त ओह मार डारे जावय।
NUM 1:52 इसरायलीमन दल के मुताबिक अपन तम्बूमन ला गाड़ंय, हर एक जन अपन झंडा के अधीन अपन सिविर म तम्बू गाड़ंय।
NUM 1:53 पर लेवीमन करार के कानून के पबितर-तम्बू के चारों कोति अपन तम्बू गाड़ंय ताकि मोर कोप ह इसरायली समाज ऊपर झन भड़कय। लेवीमन करार के कानून के पबितर-तम्बू के देखभाल बर जिम्मेदार अंय।”
NUM 1:54 इसरायलीमन जम्मो चीज वइसने ही करिन, जइसने यहोवा ह मूसा ला हुकूम दे रिहिस।
NUM 2:1 यहोवा ह मूसा अऊ हारून ला कहिस:
NUM 2:2 “इसरायलीमन मिलापवाला तम्बू के थोरकन दूरिहा म ओकर चारों कोति डेरा डालंय, हर एक जन अपन दल के अधीन अऊ अपन परिवार के झंडा धरे डेरा डालंय।”
NUM 2:3 पूरब तरफ, सूरज निकले कोति: यहूदा के सिविर के दलमन अपन झंडा के अधीन डेरा डालंय। यहूदा के मनखेमन के अगुवा अमीनादाब के बेटा नहसोन होवय।
NUM 2:4 ओकर दल के गनती 74,600 रिहिस।
NUM 2:5 ओमन के बाद इस्साकार गोत्र के परधान सूआर के बेटा नतनेल ह डेरा डालही।
NUM 2:6 ओकर दल के गनती 54,400 रिहिस।
NUM 2:7 ओकर बाद जबूलून के गोत्र डेरा डालही। जबूलून के मनखेमन के अगुवा हेलोन के बेटा एलीआब होही।
NUM 2:8 ओकर दल के गनती 57,400 रिहिस।
NUM 2:9 यहूदा के सिविर बर जतेक आदमी सऊंपे गे रिहिन, ओमन के गनती ओमन के दल के मुताबिक 1,86,400 रिहिस। येमन पहिले निकलहीं।
NUM 2:10 दक्खिन कोति: रूबेन के सिविर के दलमन अपन झंडा के अधीन डेरा डालंय। रूबेन के मनखेमन के अगुवा सदेऊर के बेटा एलीसूर होही।
NUM 2:11 ओकर दल के गनती 46,500 रिहिस।
NUM 2:12 ओमन के बाद सिमोन के गोत्र ह डेरा डालही। सिमोन के मनखेमन के अगुवा सूरीसद्दाय के बेटा सलूमीएल होही।
NUM 2:13 ओकर दल के गनती 59,300 रिहिस।
NUM 2:14 ओकर बाद गाद के गोत्र डेरा डालही। गाद के मनखेमन के अगुवा दूएल के बेटा एलियासाप होही।
NUM 2:15 ओकर दल के गनती 45,650 रिहिस।
NUM 2:16 रूबेन के सिविर के जतेक आदमी रिहिन, ओमन के गनती दल के मुताबिक 1,51,450 रिहिस। दूसर बार म येमन बाहिर निकलहीं।
NUM 2:17 तब मिलापवाला तम्बू अऊ लेवीमन के सिविर ह ले जाय के बेरा सिविरमन के बीच म रहय। ओमन ला ओहीच किसम ले लेय जावंय, जऊन किसम ले ओमन गाड़े जावंय, हर एक अपन झंडा के अधीन अपन-अपन जगह म रहिके चलंय।
NUM 2:18 पछिम कोति: एपरैम के सिविर के दलमन अपन झंडा के अधीन डेरा डालंय। एपरैम के मनखेमन के अगुवा अमीहूद के बेटा एलीसामा होही।
NUM 2:19 ओकर दल के गनती 40,500 रिहिस।
NUM 2:20 ओकर बाद मनस्से के गोत्र डेरा डालही। मनस्से के मनखेमन के अगुवा पदासूर के बेटा गमलीएल होही।
NUM 2:21 ओकर दल के गनती 32,200 रिहिस।
NUM 2:22 ओकर बाद बिनयामीन के गोत्र डेरा डालही। बिनयामीन के मनखेमन के अगुवा गिदोनी के बेटा अबीदान होही।
NUM 2:23 ओकर दल के गनती 35,400 रिहिस।
NUM 2:24 एपरैम के सिविर म जतेक आदमी रिहिन, ओमन अपन दल के मुताबिक 1,08,100 रिहिन। येमन तीसरा नम्बर म निकलहीं।
NUM 2:25 उत्तर कोति: दान के सिविर के दलमन अपन झंडा के अधीन डेरा डालंय। दान के मनखेमन के अगुवा अम्मीसद्दाय के बेटा अहीएजेर होही।
NUM 2:26 ओकर दल के गनती 62,700 रिहिस।
NUM 2:27 ओमन के बाद आसेर के गोत्र डेरा डालही। आसेर के मनखेमन के अगुवा ओकरान के बेटा पगीएल होही।
NUM 2:28 ओकर दल के गनती 41,500 रिहिस।
NUM 2:29 ओकर बाद नपताली के गोत्र डेरा डालही। नपताली के मनखेमन के अगुवा एनान के बेटा अहीरा होही।
NUM 2:30 ओकर दल के गनती 53,400 रिहिस।
NUM 2:31 दान के सिविर के जतेक आदमी रिहिन, ओमन के गनती 1,57,600 रिहिस। आखिरी म येमन अपन झंडा के अधीन निकलहीं।
NUM 2:32 येमन ओ इसरायली रिहिन, जेमन ला ओमन के परिवार के मुताबिक गने गीस। सिविरमन म जम्मो पुरूस के गनती ओमन के दल के मुताबिक 6,03,550 रिहिस।
NUM 2:33 पर लेवीमन ला आने इसरायलीमन संग नइं गने गीस, जइसे कि यहोवा ह मूसा ला हुकूम दे रिहिस।
NUM 2:34 इसरायलीमन ओ हर काम करिन, जेकर हुकूम यहोवा ह मूसा ला दे रिहिस; ओ हुकूम के मुताबिक ओमन अपन-अपन झंडा के अधीन डेरा डालंय अऊ हुकूम के मुताबिक ही ओमा के हर एक जन अपन-अपन गोत्र अऊ परिवार के संग निकलंय।
NUM 3:1 जब यहोवा ह सीनय पहाड़ ऊपर मूसा ले गोठियाईस, ओ समय हारून अऊ मूसा के परिवार के लेखा-जोखा अइसने रिहिस।
NUM 3:2 हारून के बेटामन के नांव: पहिलऊठा नादाब ओकर बाद अबीहू, एलिआजर अऊ ईतामार।
NUM 3:3 हारून के बेटामन के ये नांव अय, जेमन अभिसिक्त पुरोहित रिहिन अऊ जेमन ला पुरोहिती सेवा बर अभिसेक करे गे रिहिस।
NUM 3:4 पर नादाब अऊ अबीहू यहोवा के आघू म मर गीन, जब ओमन ओकर आघू म सीनय के सुन्ना जगह म बरजे गय आगी के संग बलिदान चघाईन। ओमन के कोनो बेटा नइं रिहिस, एकरसेति एलिआजर अऊ ईतामार अपन ददा हारून के समय म पुरोहित के रूप म सेवा करिन।
NUM 3:5 यहोवा ह मूसा ला कहिस,
NUM 3:6 “लेवी गोत्र के मनखेमन ला बलाके हारून पुरोहित करा लान कि ओमन ओकर मदद करंय।
NUM 3:7 ओमन पबितर-तम्बू के काम करे के दुवारा मिलापवाला तम्बू म हारून बर अऊ पूरा समाज बर जिम्मेदारी पूरा करंय।
NUM 3:8 ओमन मिलापवाला तम्बू के जम्मो सामान के देखरेख करंय अऊ पबितर-तम्बू के काम करे के दुवारा इसरायलीमन के काम ला पूरा करंय।
NUM 3:9 लेवीमन ला लानके हारून अऊ ओकर बेटामन के हांथ म सऊंप दे; येमन ओ इसरायली अंय, जेमन ओला पूरा दे दिये जावंय।
NUM 3:10 हारून अऊ ओकर बेटामन ला पुरोहित के पद म सेवा करे बर ठहिरा; यदि आने मनखे पबितर-स्थान म जावय, त ओह मार डारे जावय।”
NUM 3:11 यहोवा ह मूसा ला ये घलो कहिस,
NUM 3:12 “हर एक इसरायली माईलोगन के पहिलांत बेटा के बदला म मेंह इसरायलीमन के बीच ले लेवीमन ला लेय ले हंव। लेवीमन मोर अंय,
NUM 3:13 काबरकि जम्मो पहिलांतमन मोर अंय। जब मेंह मिसर देस म जम्मो पहिलांतमन ला मार डारेंव, त मेंह इसरायल म हर एक पहिलांत ला अपन बर पबितर कर ले रहेंव, चाहे ओह मनखे होवय या पसु। ओमन मोर होहीं। मेंह यहोवा अंव।”
NUM 3:14 यहोवा ह सीनय के सुनसान जगह म मूसा ला कहिस,
NUM 3:15 “लेवीमन ला परिवार अऊ गोत्र के मुताबिक गनती कर। एक महिना अऊ जादा उमर के, पुरूसमन ला गन।”
NUM 3:16 एकरसेति मूसा ह ओमन ला वइसने गनिस, जइसने यहोवा ह ओला हुकूम देय रिहिस।
NUM 3:17 लेवी के बेटामन के नांव ये अंय: गेरसोन, कहात अऊ मरारी।
NUM 3:18 गेरसोन बंस के नांवमन ये रिहिन: लिबनी अऊ सिमी।
NUM 3:19 कहात बंस के येमन रिहिन: अमराम, ईसहार, हेबरोन अऊ उजीएल।
NUM 3:20 मरारी बंस के येमन रिहिन: महली अऊ मूसी।
NUM 3:21 गेरसोन के बंस म लिबनी अऊ सिमीमन रिहिन; येमन गेरसोनी बंस रिहिन।
NUM 3:22 एक महिना या जादा उमर के जम्मो पुरूसमन के गनती 7,500 रिहिस।
NUM 3:23 गेरसोनीमन के बंस ला पछिम कोति, पबितर-तम्बू के पाछू म डेरा डालना रिहिस।
NUM 3:24 गेरसोनीमन के परिवारमन के अगुवा लाएल के बेटा एलियासाप रिहिस।
NUM 3:25 मिलापवाला तम्बू म गेरसोन बंस के ऊपर पबितर-तम्बू अऊ तम्बू, ओकर ढपना, मिलापवाला तम्बू के प्रवेस दुवार के परदा,
NUM 3:26 अंगना के परदा, पबितर-तम्बू अऊ बेदी के चारों कोति अंगना के प्रवेस दुवार के परदा, अऊ रस्सी—अऊ ओमन के उपयोग ले संबंधित हर एक चीज के जिम्मेदारी रिहिस।
NUM 3:27 कहात ले अमरामी, ईसहारी, हेबरोनी अऊ उजीएलीमन के बंस चलिस; येमन कहातीमन के बंस रिहिन।
NUM 3:28 ओ जम्मो पुरूस, जऊन मन एक महिना या जादा उमर के रिहिन, ओमन के गनती 8,600 रिहिस। कहातीमन पबितर-स्थान के देखरेख करंय।
NUM 3:29 कहात के बंस ला पबितर-तम्बू के दक्खिन कोति डेरा डालना रिहिस।
NUM 3:30 कहाती बंस के परिवारमन के अगुवा उजीएल के बेटा एलीसापान रिहिस।
NUM 3:31 ओमन के ऊपर सन्दूक, मेज, दीवट, बेदी, सेवा म उपयोग अवइया पबितर-स्थान के बरतन, परदा, अऊ ओमन के उपयोग ले संबंधित हर एक चीज के जिम्मेदारी रिहिस।
NUM 3:32 लेवीमन के परधान अगुवा एलिआजर ह हारून पुरोहित के बेटा रिहिस। ओला ओमन के ऊपर ठहिराय गे रिहिस, जऊन मन के ऊपर पबितर-स्थान के देखरेख के जिम्मेदारी रिहिस।
NUM 3:33 मरारी ले महली अऊ मूसी गोत्र के बंस चलिस; येमन मरारी के बंस रिहिन।
NUM 3:34 एक महिना या जादा उमर के पुरूसमन गने गीन, ओमन 6,200 रिहिन।
NUM 3:35 मरारी बंस के परिवारमन के अगुवा अबीहैल के बेटा सूरीएल रिहिस। ओमन ला पबितर-तम्बू के उत्तर कोति डेरा डालना रिहिस।
NUM 3:36 मरारी बंस के ऊपर पबितर-तम्बू के ढांचा, येकर बल्ली, खंभा, आधार, येकर जम्मो सामान, ओमन के उपयोग ले संबंधित हर एक चीज के जिम्मेदारी रिहिस;
NUM 3:37 अंगना के संग ओमन के आधार के चारों कोति के खंभा, तम्बू के खूंटी अऊ डोरीमन के जिम्मेदारी घलो रिहिस।
NUM 3:38 मूसा अऊ हारून अऊ ओकर बेटामन ला पबितर-तम्बू के पूरब दिसा म, सूरज निकले कोति, मिलापवाला तम्बू के आघू म डेरा डालना रिहिस। ओमन के ऊपर इसरायलीमन कोति ले पबितर-स्थान के देखरेख के जिम्मेदारी रिहिस। यदि कोनो आने मनखे पबितर-स्थान करा जावय, त ओह मार डारे जावय।
NUM 3:39 मूसा अऊ हारून यहोवा के हुकूम ले लेवीमन के ओमन के बंस के मुताबिक गनती करिन, अऊ एक महिना या ओकर ले जादा उमर के पुरूसमन के संखिया 22,000 रिहिस।
NUM 3:40 ओकर बाद यहोवा ह मूसा ला कहिस, “इसरायलीमन के पहिलांत पुरूसमन ला गन, जऊन मन एक महिना या जादा उमर के हवंय ओमन के नांव के एक सूची बना।
NUM 3:41 मोर बर इसरायलीमन के जम्मो पहिलांत के बदले लेवीमन ला, अऊ इसरायलीमन के पसुमन के जम्मो पहिलांत के बदले लेवीमन के पसुमन ला लेय ले। मेंह यहोवा अंव।”
NUM 3:42 एकरसेति मूसा ह इसरायलीमन के जम्मो पहिलांतमन के गनती, यहोवा के हुकूम के मुताबिक करिस।
NUM 3:43 जऊन पहिलांत पुरूसमन, एक महिना या ओकर ले जादा उमर के रिहिन, ओमन के लिखे गय नांव के मुताबिक ओमन गनती म 22,273 रिहिन।
NUM 3:44 यहोवा ह मूसा ला ये घलो कहिस,
NUM 3:45 “इसरायल के जम्मो पहिलांत के बदले लेवीमन, अऊ ओमन के पसुमन के बदले लेवीमन के पसुमन ला लेय ले। लेवीमन मोर अंय। मेंह यहोवा अंव।
NUM 3:46 इसरायलीमन के ओ 273 पहिलांत, जेमन गनती म लेवीमन ले जादा हवंय, ओमन के छुड़ौती बर,
NUM 3:47 तें ओ हर एक पुरूस बर पांच सेकेल जमा कर, येह पबितर-स्थान के सेकेल के मुताबिक होवय, जेकर वजन बीस गेरा होथे।
NUM 3:48 ये रकम ला उपरहा इसरायलीमन के छुड़ौती बर हारून अऊ ओकर बेटामन ला दे देबे।”
NUM 3:49 एकरसेति मूसा ह ओ मनखेमन ले छोंड़ाय के दाम जमा करिस, जेमन लेवीमन के दुवारा छोंड़ाय गे मनखेमन ले जादा रिहिन।
NUM 3:50 इसरायलीमन के पहिलांतमन ले ओह पबितर-स्थान के सेकेल के मुताबिक दाम जमा करिस, जेकर वजन 1,365 सेकेल होईस।
NUM 3:51 मूसा ह हारून अऊ ओकर बेटामन ला छुड़ौती के दाम दीस, जइसे कि ओला यहोवा ह हुकूम दे रिहिस।
NUM 4:1 यहोवा ह मूसा अऊ हारून ला कहिस:
NUM 4:2 “लेवीमन के बीच म ले कहातीमन के ओमन के बंस अऊ परिवार के मुताबिक गनती कर।
NUM 4:3 तीस साल ले लेके पचास साल के उमर के ओ जम्मो आदमीमन के गनती कर, जेमन मिलापवाला तम्बू के काम म सेवा करे बर आथें।
NUM 4:4 “मिलापवाला तम्बू म कहातीमन के काम ये होही: महा पबितर चीजमन के देखरेख।
NUM 4:5 जब डेरा ह आघू बढ़थे तब हारून अऊ ओकर बेटामन भीतर जाके आड़ करइया परदा ला उतार लेवंय अऊ ओला करार कानून के सन्दूक ऊपर ढांप देवंय।
NUM 4:6 तब ओमन परदा ला एक टिकाऊ खाल ले ढांप देवंय, अऊ ओकर ऊपर पूरा नीला रंग के कपड़ा ओढ़ा देवंय अऊ डंडामन ला ओमन के जगह म लगावंय।
NUM 4:7 “उपस्थिति के मेज के ऊपर ओमन एक नीला कपड़ा ला फईला देवंय अऊ येकर ऊपर थाली, बरतन अऊ कटोरा, अऊ पेय-बलिदान के सुराहीमन ला रखंय; ओ रोटी, जऊन ह उहां हमेसा रहिथे, ओह उहां रखे रहय।
NUM 4:8 ओमन एक सिन्दूरी रंग के कपड़ा येमन के ऊपर फईलाके, टिकाऊ खाल ले ढांप देवंय अऊ डंडामन ला ओमन के जगह म लगावंय।
NUM 4:9 “फेर ओमन एक नीला कपड़ा लेके अंजोर करे बर रखे दीवट, ओकर दीया, ओकर बाती ला काटे के कतरनी अऊ बड़े थाली, अऊ जैतून तेल डारे म उपयोग अवइया ओकर जम्मो सुराहीमन ला ढांप देवंय।
NUM 4:10 तब ओमन येला अऊ ओकर जम्मो सामान ला एक टिकाऊ खाल के ढकना म लपेट देवंय अऊ येला ले जवइया ढांचा म डार देवंय।
NUM 4:11 “सोन के बेदी ऊपर ओमन एक नीला कपड़ा फईला देवंय अऊ ओला टिकाऊ खाल ले ढांप देवंय अऊ डंडामन ला ओकर जगह म लगा देवंय।
NUM 4:12 “ओमन पबितर-स्थान म सेवा बर उपयोग होवइया जम्मो सामान ला लेवंय अऊ ओमन ला एक नीला कपड़ा म लपेटंय, अऊ ओकर ऊपर टिकाऊ खाल ला ढांप देवंय अऊ ओमन ला ले जवइया ढांचा म रख देवंय।
NUM 4:13 “ओमन कांसा के बेदी ले राख ला हटाके ओकर ऊपर एक बैंगनी कपड़ा फईला देवंय।
NUM 4:14 तब ओमन ओमा बेदी करा सेवा म उपयोग होवइया जम्मो बरतन ला रख देवंय, जेमा करछूल, मांस म उपयोग होवइया कांटा, बेलचा अऊ छिंचे के कटोरामन घलो रहंय। येला ओमन एक टिकाऊ खाल ले ढांप देवंय अऊ डंडामन ला ओकर जगह म लगा देवंय।
NUM 4:15 “जब हारून अऊ ओकर बेटामन पबितर-स्थान अऊ ओकर जम्मो पबितर सामान अऊ पबितर बरतनमन ला ढांप लीहीं, अऊ जब सिविर ह चले बर तियार हो जाही, तब ही कहातीमन आवंय अऊ ओला उठाके ले जावंय। पर जरूरी अय कि ओमन पबितर चीजमन ला झन छुवंय, नइं तो ओमन मर जाहीं। मिलापवाला तम्बू म जऊन सामान रहिथे, कहातीमन ओमन ला उठाके ले जावंय।
NUM 4:16 “हारून पुरोहित के बेटा एलिआजर के देखरेख म ये चीजमन रहंय: दीया जलाय के तेल, खुसबूवाला धूप, नियमित अन्न-बलिदान अऊ अभिसेक के तेल। ओकर ऊपर पूरा पबितर-तम्बू अऊ ओमा के हर एक चीज के जिम्मेदारी रहय, ओमा के पबितर सामान अऊ बरतनमन के घलो जिम्मेदारी।”
NUM 4:17 फेर यहोवा ह मूसा अऊ हारून ला कहिस,
NUM 4:18 “धियान रहय कि कहाती बंस ह लेवीमन के बीच ले नास झन होवय,
NUM 4:19 ताकि जब ओमन सबले पबितर चीजमन के लकठा म आवंय, त ओमन जीयत रहंय अऊ झन मरंय, ओमन बर ये करव: हारून अऊ ओकर बेटामन पबितर-स्थान म जावंय अऊ हर एक झन ला ओकर काम के जिम्मेदारी सऊंपंय अऊ बतावंय कि कोन ह का उठाके ले जाही।
NUM 4:20 पर कहातीमन पबितर चीजमन ला देखे बर बिलकुल ही भीतर झन जावंय, थोरकन देर बर घलो नइं, नइं तो ओमन मर जाहीं।”
NUM 4:21 यहोवा ह मूसा ला कहिस,
NUM 4:22 “गेरसोनीमन के घलो ओमन के परिवार अऊ बंस के मुताबिक गनती कर।
NUM 4:23 तीस ले लेके पचास साल के ओ जम्मो पुरूसमन के गनती कर, जऊन मन मिलापवाला तम्बू म सेवा करे बर आथें।
NUM 4:24 “सामान ले जवई अऊ ओमन के आने काम म गेरसोनी बंस के मनखेमन के ये सेवा होही:
NUM 4:25 ओमन पबितर-तम्बू के परदा ला उठाके ले जावंय, येमा मिलापवाला तम्बू, कपड़ा के तोपनी अऊ टिकाऊ खाल के येकर बाहिरी तोपनी, मिलापवाला तम्बू के प्रवेस दुवार म लगे परदामन,
NUM 4:26 पबितर-तम्बू अऊ बेदी के चारों कोति के अंगना के परदामन, अंगना के प्रवेस दुवार म लगे परदा, तम्बू के सेवा म उपयोग होवइया रस्सी अऊ जम्मो सामानमन होहीं। गेरसोनीमन ये चीजमन ले संबंधित जम्मो काम ला करहीं।
NUM 4:27 गेरसोनीमन के जम्मो काम, चाहे ओह सामान उठाके ले जवई या आने काम; ये सब हारून अऊ ओकर बेटामन के निरदेसन म करे जावय। ओमन जऊन काम करहीं, येला एक जिम्मेदारी के रूप म तेंह ओमन ला सऊंपबे।
NUM 4:28 येह मिलापवाला तम्बू म गेरसोनी बंस के सेवा अय। ओमन अपन काम हारून पुरोहित के बेटा ईतामार के निरदेसन म करंय।
NUM 4:29 “मरारीमन ला ओमन के बंस अऊ परिवार के मुताबिक गन।
NUM 4:30 तीस ले लेके पचास साल के ओ जम्मो आदमीमन के गनती कर, जऊन मन मिलापवाला तम्बू म सेवा करे बर आथें।
NUM 4:31 तम्बू म अपन जम्मो सेवा के भाग के रूप म, ओमन पबितर-तम्बू के ढांचा, येकर डंडा, खंभा अऊ आधारमन ला उठाके ले जावंय,
NUM 4:32 संगे-संग ओमन अंगना के चारों कोति के खंभामन ला ओमन के आधार सहित, तम्बू के खूंटी, रस्सी, ओमन के जम्मो सामान अऊ ओमन के उपयोग के हर एक चीज ला ले जावंय। हर एक आदमी ला बता कि ओह का चीज ला ले जाही।
NUM 4:33 हारून पुरोहित के बेटा ईतामार के निरदेसन म मिलापवाला तम्बू म मरारी गोत्र के ये सेवा होही।”
NUM 4:34 तब मूसा, हारून अऊ समाज के अगुवामन कहातीमन ला ओमन के बंस अऊ परिवारमन के मुताबिक गनती करिन।
NUM 4:35 तीस ले लेके पचास साल के ओ जम्मो पुरूस, जऊन मन मिलापवाला तम्बू म सेवा करे बर आईन,
NUM 4:36 बंस के मुताबिक 2,750 रिहिन।
NUM 4:37 येह कहाती बंस म ओ जम्मो झन के संखिया रिहिस, जऊन मन मिलापवाला तम्बू म सेवा करिन। यहोवा के दुवारा मूसा ला दिये गय हुकूम के मुताबिक मूसा अऊ हारून ओमन के गनती करिन।
NUM 4:38 गेरसोनीमन ओमन के कुल अऊ परिवारमन के मुताबिक गने गीन।
NUM 4:39 तीस ले लेके पचास साल के ओ जम्मो पुरूस, जऊन मन मिलापवाला तम्बू म सेवा करे बर आईन,
NUM 4:40 ओमन के कुल अऊ परिवारमन के मुताबिक ओमन के संखिया 2,630 रिहिस।
NUM 4:41 येह गेरसोनी कुल म ओ जम्मो झन के संखिया रिहिस, जऊन मन मिलापवाला तम्बू म सेवा करिन। यहोवा के हुकूम के मुताबिक मूसा अऊ हारून ओमन के गनती करिन।
NUM 4:42 मरारीमन ला ओमन के कुल अऊ परिवार के मुताबिक गने गीस।
NUM 4:43 तीस ले लेके पचास साल के ओ जम्मो पुरूस, जऊन मन मिलापवाला तम्बू म सेवा करे बर आईन,
NUM 4:44 ओमन के कुल के मुताबिक ओमन के संखिया 3,200 रिहिस।
NUM 4:45 येह मरारी बंस के कुल संखिया रिहिस। यहोवा के दुवारा मूसा ला दिये गय हुकूम के मुताबिक मूसा अऊ हारून ओमन के गनती करिन।
NUM 4:46 मूसा, हारून अऊ इसरायल के अगुवामन जम्मो लेवीमन के ओमन के बंस अऊ परिवार के मुताबिक गनती करिन।
NUM 4:47 तीस ले लेके पचास साल के ओ जम्मो पुरूस, जऊन मन सेवा के काम करे बर अऊ मिलापवाला तम्बू ला उठाके ले जाय बर आईन,
NUM 4:48 ओमन के संखिया 8,580 रिहिस।
NUM 4:49 मूसा ला दिये गय यहोवा के हुकूम के मुताबिक हर एक जन ला ओकर काम सऊंपे गीस, अऊ बताय गीस कि कोन ह का चीज ला उठाके ले जाही। ये किसम ले यहोवा के दुवारा मूसा ला दिये गय हुकूम के मुताबिक ओमन के गनती होईस।
NUM 5:1 फेर यहोवा ह मूसा ला कहिस,
NUM 5:2 “इसरायलीमन ला हुकूम दे कि यदि कोनो ला असुध चाम के बेमारी या देहें ले कोनो चीज निकले, या लास ला छुए से असुध हो गे हवय, ओला सिविर ले बाहिर निकाल दिये जावय।
NUM 5:3 चाहे पुरूस हो या माईलोगन, ओला निकाल दव; ओमन ला सिविर के बाहिर निकाल दव ताकि ओमन सिविर ला असुध झन करंय, जिहां मेंह ओमन के बीच म रहिथंव।”
NUM 5:4 इसरायलीमन अइसने ही करिन; ओमन मनखेमन ला सिविर के बाहिर कर दीन। ओमन वइसने ही करिन, जइसने यहोवा ह मूसा ला निरदेस दे रिहिस।
NUM 5:5 फेर यहोवा ह मूसा ला कहिस,
NUM 5:6 “इसरायलीमन ला कह: ‘जब कोनो पुरूस या माईलोगन कोनो मनखे के संग गलत बरताव करथे अऊ ये किसम ले यहोवा के संग बिसवासघात करके दोसी ठहिरथे,
NUM 5:7 त ओह अपन करे गे पाप ला जरूर मान लेवय। ओह अपन करे गे दोस के पूरा भरपई करय; नुकसान करे गे चीज के दाम म ओकर पांचवां भाग जोड़के ओह ओ मनखे ला दे देवय, जेकर ओह नुकसान करे हवय।
NUM 5:8 पर कहूं ओ मनखे के कोनो नजदीकी रिस्तेदार नइं ए, जेला गलत काम के भरपई करे जा सकय, त फेर भरपई ह यहोवा के हो जाही अऊ येला पुरोहित ला ओ मेढ़ा के संग दे दिये जावय, जेकर संग बिसवासघात करइया मनखे ह पछताप करथे।
NUM 5:9 ओ जम्मो पबितर चीज के बांटा, जेला इसरायलीमन पुरोहित करा लानथें, ओ सब पुरोहित के होही।
NUM 5:10 पबितर चीजमन ओमन के मालिक के अंय, पर जऊन चीज ओमन पुरोहित ला देथें, ओह पुरोहित के हो जाही।’ ”
NUM 5:11 तब यहोवा ह मूसा ला कहिस,
NUM 5:12 “इसरायलीमन ले बात कर अऊ ओमन ला कह: ‘कहूं कोनो मनखे के घरवाली बदचलन होके ओकर संग बिसवासघात करथे
NUM 5:13 याने कि कोनो आने मनखे ह ओकर घरवाली संग सुतथे, अऊ ये बात ओकर घरवाला ला मालूम नइं ए अऊ ओकर असुध होय के पता नइं चले हे (काबरकि ओकर बिरूध कोनो सबूत नइं ए अऊ ओह ओ काम म पकड़े नइं गे हवय),
NUM 5:14 अऊ कहूं ओकर घरवाला के मन म जलन होथे अऊ ओह अपन घरवाली ऊपर संका करथे कि ओह असुध हवय—या फेर ओकर घरवाली के असुध नइं होवत घलो, कहूं ओ मनखे ह ओकर ऊपर जलन अऊ संका करथे—
NUM 5:15 तब ओह अपन घरवाली ला पुरोहित करा ले जावय। ओह अपन घरवाली कोति ले एक एपा के दसवां भाग जौ के पीसान घलो चढ़ावा के रूप म ले जावय। ओह ओकर ऊपर जैतून के तेल झन डालय या ओकर ऊपर धूप झन रखय, काबरकि येह जलन बर एक अन्न-बलिदान अय, पाप कोति धियान देय बर एक सुरता-बलिदान ए।
NUM 5:16 “ ‘पुरोहित ह ओ माईलोगन ला लानय अऊ यहोवा के आघू म ओला ठाढ़ करय।
NUM 5:17 तब पुरोहित ह माटी के सुराही म थोरकन पबितर पानी लेवय अऊ पबितर-तम्बू के फर्स ले कुछू धुर्रा लेके ओ पानी म डाल देवय।
NUM 5:18 पुरोहित ह ओ माईलोगन ला यहोवा के आघू म ठाढ़ करे के बाद, ओकर बाल ला खोल देवय अऊ ओकर हांथ म जलन के सुरता-बलिदान, अन्न-बलिदान ला रखय, जबकि पुरोहित ह खुद ओ करू पानी ला धरय, जऊन ह सराप लानथे।
NUM 5:19 तब पुरोहित ह ओ माईलोगन ला कसम खवाके कहय, “अपन घरवाला के संग बिहाव के जिनगी जीयत, यदि कोनो आने पुरूस ह तोला असुध नइं करे हवय अऊ तेंह निरदोस हस, त ये सराप लानेवाला करू पानी ले तोला कोनो हानि नइं होवय।
NUM 5:20 पर यदि अपन घरवाला के संग बिहाव के जिनगी जीयत, तेंह बदचलनी करे हस अऊ अपन घरवाला के छोंड़ आने पुरूस के संग सुतके अपनआप ला असुध करे हस”—
NUM 5:21 इहां पुरोहित ह ओ माईलोगन ला ये सराप के अधीन रखय—“त यहोवा ह मनखेमन के बीच म तोला सरापित करय, ओह तोर गरभपात करवा देवय अऊ तोर पेट ह फूल जावय।
NUM 5:22 ये सराप लानेवाला करू पानी ह तोर देहें भीतर जावय, ताकि तोर पेट ह फूल जावय या तोर गरभ गिर जावय।” “ ‘तब ओ माईलोगन ह कहय, “आमीन। अइसने ही होवय।”
NUM 5:23 “ ‘पुरोहित ह ये सराप ला एक ठन चामपट्टी म लिख लेवय अऊ तब ओला ओ करू पानी म धो लेवय।
NUM 5:24 ओकर बाद ओ सराप लानेवाला करू पानी ला ओह ओ माईलोगन ला पीये बर देवय, तब ये सराप लानेवाला पानी ओकर भीतर जाही, जेकर ले करू पीरा होथे।
NUM 5:25 तब पुरोहित ह जलन के अन्न-बलिदान ला ओ माईलोगन के हांथ ले लेय लेवय, अऊ येला यहोवा के आघू म हलावय अऊ येला बेदी करा लानय।
NUM 5:26 तब पुरोहित ह यादगार-बलिदान के रूप म ओ अन्न-बलिदान म ले एक मुठा ले लेवय अऊ येला बेदी ऊपर जला देवय; ओकर बाद, ओह ओ माईलोगन ला पानी पीयावय।
NUM 5:27 यदि ओह अपनआप ला असुध करे होही अऊ अपन घरवाला के संग बिसवासघात करे होही, त फेर ओकर ये हाल होही: जब ओला ओ सराप देवइया अऊ बहुंत पीरा देवइया पानी पीयाय जाही, त येह ओकर देहें भीतर जाके ओकर पेट ला फूला दीही अऊ ओकर गरभ गिर जाही, अऊ ओह अपन मनखेमन के बीच सरापित हो जाही।
NUM 5:28 पर यदि ओ माईलोगन ह अपनआप ला असुध नइं करे होही, पर साफ होही, त ओह निरदोस ठहिरही अऊ ओकर गरभ धरे म समस्या नइं होही।
NUM 5:29 “ ‘जलन के संबंध म इही ह सही नियम ए, जब कोनो माईलोगन ह अपन घरवाला के संग बिहाव के जिनगी जीयत बदचलनी करथे अऊ अपनआप ला असुध करथे,
NUM 5:30 या जब कोनो मनखे ऊपर अपन घरवाली बर संका के भावना आथे, त येह जलन के कानून अय। पुरोहित ह ओ माईलोगन ला यहोवा के आघू म ठाढ़ करय अऊ ओकर ऊपर ये जम्मो बिधि पूरा करय।
NUM 5:31 ओ घरवाला ह गलत काम बर निरदोस ठहिरही, पर ओ माईलोगन ला ओकर पाप के दंड मिलही।’ ”
NUM 6:1 फेर यहोवा ह मूसा ला कहिस,
NUM 6:2 “इसरायलीमन ले गोठिया अऊ ओमन ला कह: ‘यदि कोनो माईलोगन या पुरूस कोनो बिसेस मन्नत माने के दुवारा अपनआप ला एक नाजीर के रूप म यहोवा ला सऊंप देथे,
NUM 6:3 त जरूरी अय कि ओह अंगूर के मंद अऊ कोनो आने किसम के मंद अऊ अंगूर के मंद ले बने सिरका या आने किसम के मंद ले अलग रहय। जरूरी अय कि ओह अंगूर के रस झन पीयय या अंगूर या किसमिस झन खावय।
NUM 6:4 जब तक नाजीर ह मन्नत बर अलग रहिथे, तब तक जरूरी अय कि ओह अंगूर के नार के कोनो चीज ला झन खावय, इहां तक कि अंगूर के छिलका या बीजा ला घलो झन खावय।
NUM 6:5 “ ‘नाजीर के मन्नत माने के पूरा समय ओह अपन मुड़ म उस्तरा झन चलवाय। ओह तब तक अलग रहय। जब तक कि यहोवा ला दिये समय ह खतम नइं हो जावय, तब तक ओह पबितर बने रहय; ओह अपन चुंदी ला लम्बा बाढ़न देवय।
NUM 6:6 “ ‘यहोवा ला अपन दिये गय समय के बीच म नाजीर ह कोनो लास के लकठा म झन जावय।
NUM 6:7 अऊ त अऊ यदि ओकर खुद के दाई या ददा या भाई या बहिनी घलो मर जावय, तभो ले ओह अपनआप ला ओमन के कारन संस्कार म असुध झन करय, काबरकि अपनआप ला यहोवा ले मन्नत बर सऊंपे के चिनहां ह ओकर मुड़ म हवय।
NUM 6:8 अपन मन्नत बर ओ पूरा समय म, ओह यहोवा बर पबितर ठहिरथे।
NUM 6:9 “ ‘यदि नाजीर के उहां रहत कोनो मनखे ह अचानक मर जावय, त फेर ओकर बाल ह असुध हो जाथे, जऊन ह कि ओकर मन्नत बर चिनहां अय, ये स्थिति म सातवां दिन याने कि सुध होय के दिन, ओह अपन मुड़ मुड़ा ले।
NUM 6:10 तब आठवां दिन, ओह मिलापवाला तम्बू के मुंहटा म पुरोहित करा दू ठन पंड़की या दू ठन परेवा पीला लानय।
NUM 6:11 पुरोहित ह नाजीर बर पछताप करे के खातिर एक ठन ला पाप-बलिदान अऊ आने ला होम-बलिदान के रूप म चघावय, काबरकि ओह लास करा रहे के दुवारा पाप करे हवय। ओहीच दिन ओह अपन मुड़ ला फेर पबितर करय।
NUM 6:12 ओह फेर अपनआप ला मन्नत बर यहोवा ला सऊंपे अऊ ओह दोस-बलिदान के रूप म एक साल के मेढ़ा-पीला लानय। पहिले के दिनमन ला झन गने जावय, काबरकि ओह अपन मन्नत के दौरान असुध हो गे रिहिस।
NUM 6:13 “ ‘जब नाजीर के मन्नत बर ठहिराय समय ह पूरा हो जाथे, त येह ओकर कानून अय। ओला मिलापवाला तम्बू के मुंहटा करा लाने जावय।
NUM 6:14 उहां ओह यहोवा बर अपन बलिदान चघावय: होम-बलिदान बर एक साल के निरदोस मेढ़ा-पीला, पाप-बलिदान बर एक साल के निरदोस भेड़ी-पीला, अऊ मेल-बलिदान बर एक ठन निरदोस मेढ़ा,
NUM 6:15 संग म अपन अन्न-बलिदान अऊ पेय-बलिदान, अऊ एक टुकना अखमीरी रोटी, जऊन ह बढ़िया किसम के पीसान ले बने होवय—मोटहा रोटीमन म जैतून तेल मिले होवय, अऊ पातर रोटीमन के ऊपर जैतून तेल चुपरे होवय।
NUM 6:16 “ ‘पुरोहित ह ये जम्मो चीज ला यहोवा के आघू म लानय अऊ पाप-बलिदान अऊ होम-बलिदान चघावय।
NUM 6:17 पुरोहित ह अखमीरी रोटी के टोकरी ला लानय अऊ मेढ़ा ला मेल-बलिदान के रूप म यहोवा ला चढ़ावा चघावय, संग म अन्न-बलिदान अऊ पेय-बलिदान ला घलो चघावय।
NUM 6:18 “ ‘तब मिलापवाला तम्बू के मुंहटा म, नाजीर ह अपन ओ बाल ला मुड़ावय, जऊन ह कि ओकर मन्नत बर चिनहां अय। तब ओह ओ बाल ला ले जाके ओ आगी म डार देवय, जऊन ह मेल-बलिदान के चढ़ावा के खाल्हे म होथे।
NUM 6:19 “ ‘जब नाजीर ह बाल ला मुड़वा लेवय, जऊन ह ओकर मन्नत बर चिनहां अय, तब पुरोहित ह ओकर हांथ म मेढ़ा के एक ठन उबले कंधा, अऊ टुकना के एक ठन मोटहा अखमीरी रोटी अऊ एक ठन पातर अखमीरी रोटी रख देवय।
NUM 6:20 तब पुरोहित ह येमन ला हलाय-बलिदान के रूप म यहोवा के आघू म हलावय; येमन पबितर अंय अऊ पुरोहित के अंय, संग म ओ छाती, जेला हलाय गीस अऊ ओ जांघ जेला चघाय गीस, ओमन घलो पुरोहित के अंय। ओकर बाद, नाजीर ह अंगूर के मंद पी सकथे।
NUM 6:21 “ ‘येह नाजीर के कानून ए, जऊन ह अपन मन्नत के मुताबिक यहोवा ला मन्नत के चढ़ावा चघाथे, येकर अलावा अऊ जऊन कुछू ओह दे सकथे, ओह देवय। येह जरूरी अय कि ओह अपन माने गय मन्नत ला नाजीर के कानून के मुताबिक पूरा करय।’ ”
NUM 6:22 फेर यहोवा ह मूसा ला कहिस,
NUM 6:23 “हारून अऊ ओकर बेटामन ला कह, ‘ये किसम ले तुमन इसरायलीमन ला आसीस देवव। ओमन ला कहव:
NUM 6:24 “ ‘ “यहोवा तुमन ला आसीस देवय अऊ तुम्हर रकछा करय;
NUM 6:25 यहोवा ह अपन चेहरा के अंजोर तुम्हर ऊपर चमकाय अऊ अनुग्रह करय;
NUM 6:26 यहोवा ह अपन चेहरा तुम्हर कोति करय अऊ तुमन ला सांति देवय।” ’
NUM 6:27 “ये किसम ले ओमन मोर नांव ला इसरायलीमन म रखंय अऊ मेंह ओमन ला आसीस दूहूं।”
NUM 7:1 जब मूसा ह पबितर-तम्बू ला खड़े कर लीस, त ओह ओला ओकर जम्मो सामान सहित अभिसेक करिस अऊ ओला पबितर करिस। ओह बेदी अऊ ओकर जम्मो बरतनमन ला घलो अभिसेक करिस अऊ पबितर करिस,
NUM 7:2 तब इसरायल के अगुवामन, परिवारमन के ओ मुखियामन बलिदान चघाईन, जऊन मन ओमन के गोत्र के मुखिया रिहिन, जेमन ला गने गीस।
NUM 7:3 ओमन यहोवा के आघू म अपन चढ़ावा के रूप म छै ठन ढंपे बईला गाड़ी अऊ बारह ठन बईला लानिन—एक बईला एक अगुवा ले अऊ एक गाड़ी हर दू झन अगुवा ले। येमन ला ओमन पबितर-तम्बू के आघू म भेंट कर दीन।
NUM 7:4 तब यहोवा ह मूसा ला कहिस,
NUM 7:5 “ये चीजमन ला ओमन ले लेय ले, ताकि येमन के उपयोग मिलापवाला तम्बू के काम म करे जा सकय। लेवीमन ला ओमन के काम के मुताबिक येमन ला देय दे।”
NUM 7:6 तब मूसा ह गाड़ी अऊ बईलामन ला लेके लेवीमन ला दे दीस।
NUM 7:7 ओह गेरसोन के परिवार ला ओमन के काम के मुताबिक दू ठन गाड़ी अऊ चार ठन बईला दीस,
NUM 7:8 अऊ मरारीमन ला ओमन के काम के मुताबिक चार ठन गाड़ी अऊ आठ ठन बईला दीस। ओमन जम्मो हारून पुरोहित के बेटा ईतामार के अधीन काम करंय।
NUM 7:9 पर मूसा ह कहातीमन ला कुछू नइं दीस, काबरकि ओमन पबितर चीजमन ला अपन कंधा म उठाके ले जावंय, अऊ येह ओमन के जिम्मेदारी रिहिस।
NUM 7:10 जब बेदी के अभिसेक करे गीस, तब अगुवामन येकर समरपन बर अपन चढ़ावा ला लानके बेदी के आघू म रखिन।
NUM 7:11 काबरकि यहोवा ह मूसा ला कहे रिहिस, “बेदी के समरपन बर हर दिन एक अगुवा अपन चढ़ावा ला लानय।”
NUM 7:12 जऊन ह पहिले दिन चढ़ावा लानिस, ओह यहूदा के गोत्र के अमीनादाब के बेटा नहसोन रिहिस।
NUM 7:13 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल वजन के एक ठन चांदी के थाली अऊ सत्तर सेकेल वजन के छिंचनेवाला एक ठन चांदी के कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:14 धूप ले भरे दस सेकेल के एक ठन सोन के धूपदान;
NUM 7:15 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:16 पाप-बलिदान बर एक ठन बोकरा;
NUM 7:17 अऊ मेल-बलिदान के रूप म चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:18 दूसर दिन इस्साकार गोत्र के अगुवा सूआर के बेटा नतनेल अपन चढ़ावा लानिस।
NUM 7:19 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के एक ठन चांदी के थाली अऊ सत्तर सेकेल के एक ठन छिंचनेवाला चांदी के कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:20 धूप ले भरे दस सेकेल के एक ठन सोन के धूपदान;
NUM 7:21 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:22 पाप-बलिदान बर एक ठन बोकरा;
NUM 7:23 अऊ मेल-बलिदान के रूप म चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:24 तीसर दिन, जबूलून के मनखेमन के अगुवा हेलोन के बेटा एलीआब अपन चढ़ावा लानिस।
NUM 7:25 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के एक ठन चांदी के थाली अऊ सत्तर सेकेल के एक ठन छिंचनेवाला चांदी के कटोरा, अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन।
NUM 7:26 धूप ले भरे दस सेकेल के एक ठन सोन के धूपदान;
NUM 7:27 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:28 पाप-बलिदान बर एक ठन बोकरा;
NUM 7:29 अऊ मेल-बलिदान के रूप म चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:30 चौथा दिन, रूबेन के मनखेमन के अगुवा सदेऊर के बेटा एलीसूर अपन चढ़ावा लानिस।
NUM 7:31 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के एक ठन चांदी के थाली अऊ सत्तर सेकेल के छिंचनेवाला एक ठन चांदी के कटोरा, अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:32 धूप ले भरे दस सेकेल के एक ठन सोन के धूपदान;
NUM 7:33 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:34 पाप-बलिदान बर एक ठन बोकरा;
NUM 7:35 अऊ मेल-बलिदान चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:36 पांचवां दिन सिमोन के मनखेमन के अगुवा सूरीसद्दाय के बेटा सलूमीएल अपन चढ़ावा लानिस।
NUM 7:37 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के एक ठन चांदी के थाली अऊ सत्तर सेकेल के छिंचनेवाला एक ठन चांदी के कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:38 धूप ले भरे, दस सेकेल के एक ठन सोन के धूपदान;
NUM 7:39 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:40 पाप-बलिदान बर एक ठन बोकरा;
NUM 7:41 अऊ मेल-बलिदान चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:42 छठवां दिन गाद के मनखेमन के अगुवा दूएल के बेटा एलियासाप अपन चढ़ावा लानिस।
NUM 7:43 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के एक ठन चांदी के थाली अऊ सत्तर सेकेल के छिंचनेवाला एक ठन चांदी के कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:44 धूप ले भरे, दस सेकेल के एक ठन सोन के धूपदान;
NUM 7:45 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:46 पाप-बलिदान बर एक ठन बोकरा;
NUM 7:47 अऊ मेल-बलिदान चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:48 सातवां दिन एपरैम के मनखेमन के अगुवा अमीहूद के बेटा एलीसामा अपन चढ़ावा लानिस।
NUM 7:49 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के एक ठन चांदी के थाली अऊ सत्तर सेकेल के छिंचनेवाला एक ठन चांदी के कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:50 धूप ले भरे, दस सेकेल के एक ठन सोन के धूपदान;
NUM 7:51 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:52 पाप-बलिदान बर एक ठन बोकरा;
NUM 7:53 अऊ मेल-बलिदान चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:54 आठवां दिन मनस्से के मनखेमन के अगुवा पदासूर के बेटा गमलीएल ह अपन चढ़ावा लानिस।
NUM 7:55 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के एक ठन चांदी के थाली अऊ सत्तर सेकेल के छिंचनेवाला एक ठन चांदी के कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:56 धूप ले भरे दस सेकेल के एक ठन सोन के धूपदान;
NUM 7:57 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:58 पाप-बलिदान बर एक ठन बोकरा;
NUM 7:59 अऊ मेल-बलिदान चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:60 नौवां दिन बिनयामीन के मनखेमन के अगुवा गिदोनी के बेटा अबीदान ह अपन चढ़ावा लानिस।
NUM 7:61 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के एक ठन चांदी के थाली अऊ सत्तर सेकेल के एक ठन छिंचनेवाला चांदी के कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:62 धूप ले भरे दस सेकेल के एक ठन सोन के धूपदान;
NUM 7:63 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:64 पाप-बलिदान बर एक ठन बोकरा;
NUM 7:65 अऊ मेल-बलिदान चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:66 दसवां दिन दान के मनखेमन के अगुवा अम्मीसद्दाय के बेटा अहीएजेर ह अपन चढ़ावा लानिस।
NUM 7:67 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के एक ठन चांदी के थाली अऊ सत्तर सेकेल के छिंचनेवाला एक ठन चांदी के कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:68 धूप ले भरे, दस सेकेल के एक ठन सोन के धूपदान;
NUM 7:69 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:70 पाप-बलिदान बर एक ठन बोकरा;
NUM 7:71 अऊ मेल-बलिदान चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:72 गियारहवां दिन आसेर के मनखेमन के अगुवा ओकरान के बेटा पगीएल अपन चढ़ावा लानिस।
NUM 7:73 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के चांदी के एक ठन थाली अऊ सत्तर सेकेल के छिंचनेवाला एक ठन चांदी के कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:74 धूप ले भरे, दस सेकेल के एक ठन सोन के धूपदान;
NUM 7:75 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:76 पाप-बलिदान बर एक ठन बोकरा;
NUM 7:77 अऊ मेल-बलिदान चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:78 बारहवां दिन नपताली के मनखेमन के अगुवा एनान के बेटा अहीरा अपन चढ़ावा लानिस।
NUM 7:79 ओकर चढ़ावा ये रिहिस: पबितर-स्थान के सेकेल के मुताबिक एक सौ तीस सेकेल के चांदी के एक ठन थाली अऊ सत्तर सेकेल के छिंचनेवाला चांदी के एक ठन कटोरा; अन्न-बलिदान के रूप म ये दूनों चीज जैतून तेल ले सने उत्तम पीसान ले भरे रिहिन;
NUM 7:80 धूप ले भरे, दस सेकेल के एक ठन सोन के धूपदान;
NUM 7:81 होम-बलिदान बर एक ठन बछवा, एक ठन मेढ़ा अऊ एक साल के एक ठन मेढ़ा-पीला;
NUM 7:82 पाप-बलिदान बर एक ठन बोकरा;
NUM 7:83 अऊ मेल-बलिदान चघाय बर दू ठन बईला, पांच ठन मेढ़ा, पांच ठन बोकरा अऊ एक-एक साल के पांच ठन मेढ़ा-पीला।
NUM 7:84 जब बेदी के अभिसेक करे गीस, त ओकर समरपन बर इसरायली अगुवामन के ये चढ़ावा रिहिन: चांदी के बारह थाली, छिंचे बर चांदी के बारह कटोरा अऊ सोन के बारह धूपदान।
NUM 7:85 हर चांदी के थाली के वजन एक सौ तीस सेकेल, अऊ हर छिंचनेवाला कटोरा के वजन सत्तर सेकेल रिहिस। पबितर-स्थान के सेकेल के मुताबिक, जम्मो चांदी के बरतन के वजन दू हजार चार सौ सेकेल रिहिस।
NUM 7:86 पबितर-स्थान के सेकेल के मुताबिक, धूप ले भरे बारह सोन के धूपदान म ले हर एक के वजन दस सेकेल रिहिस। जम्मो धूपदान के वजन एक सौ बीस सेकेल रिहिस।
NUM 7:87 होम-बलिदान बर पसुमन के कुल संखिया ओमन के अन्न-बलिदान के संग बारह ठन बछवा, बारह ठन मेढ़ा अऊ एक-एक साल के बारह ठन मेढ़ा-पीला रिहिस। पाप-बलिदान बर बारह ठन बोकरा के उपयोग करे गीस।
NUM 7:88 मेल-बलिदान चघाय बर पसुमन के कुल संखिया चौबीस ठन बईला, साठ ठन मेढ़ा, साठ ठन बोकरा अऊ एक-एक साल के साठ ठन मेढ़ा-पीला रिहिस।
NUM 7:89 जब मूसा ह यहोवा ले गोठियाय बर मिलापवाला तम्बू के भीतर गीस, त करार कानून के सन्दूक ला ढंके पछताप ढकना के ऊपर दूनों करूबमन के बीच ले ओला गोठियाय के अवाज सुनाई दीस। ये किसम ले यहोवा ह मूसा ले गोठियाईस।
NUM 8:1 फेर यहोवा ह मूसा ला कहिस,
NUM 8:2 “हारून ले बात कर अऊ ओला कह, ‘जब भी तेंह दीयामन ला मढ़ाथस, त धियान रख कि जम्मो सातों दीया दीवट के सामने कोति अंजोर देवंय।’ ”
NUM 8:3 हारून ह वइसने करिस; ओह दीयामन ला मढ़ाईस कि ओमन दीवट के सामने अंजोर देवंय, जइसे कि यहोवा ह मूसा ला हुकूम दे रिहिस।
NUM 8:4 ये दीवट ला ये किसम ले बनाय गे रिहिस: येकर आधार ले लेके येकर फूल तक येह हथौड़ी ले पीटे गय सोन के बने रिहिस। दीवट ह बिलकुल ओहीच नमूना म बने रिहिस, जइसे कि यहोवा ह मूसा ला देखाय रिहिस।
NUM 8:5 फेर यहोवा ह मूसा ला कहिस:
NUM 8:6 “जम्मो इसरायलीमन के बीच ले लेवीमन ला अलग कर अऊ ओमन ला बिधि के मुताबिक सुध कर।
NUM 8:7 ओमन ला सुध करे बर तेंह अइसने कर: सुध करइया पानी के छिड़काव ओमन ऊपर कर; तब ओमन अपन पूरा देहें म उस्तरा चलवांय अऊ अपन कपड़ा ला धोवंय। अऊ अइसने ओमन अपनआप ला सुध करंय।
NUM 8:8 तब ओमन जैतून तेल ले सने उत्तम पीसान के अन्न-बलिदान के संग एक ठन बछवा लेवंय, अऊ पाप-बलिदान बर तें एक ठन दूसर बछवा ले।
NUM 8:9 ओकर बाद लेवीमन ला मिलापवाला तम्बू के आघू म लान अऊ जम्मो इसरायली समाज ला इकट्ठा कर।
NUM 8:10 तेंह लेवीमन ला यहोवा के आघू म लानबे, अऊ इसरायलीमन ओमन ऊपर अपन हांथ रखंय।
NUM 8:11 तब हारून ह इसरायलीमन कोति ले लेवीमन ला यहोवा के आघू म एक हलाय-बलिदान के रूप म लानय, ताकि ओमन यहोवा के काम करे बर तियार होवंय।
NUM 8:12 “तब लेवीमन अपन हांथ बछवामन के मुड़ ऊपर रखंय; येमा के एक ठन बछवा के उपयोग यहोवा ला पाप-बलिदान बर अऊ दूसर बछवा के उपयोग लेवीमन के पछताप करे बर होम-बलिदान के रूप म करे जावय।
NUM 8:13 ओकर बाद लेवीमन ला हारून अऊ ओकर बेटामन के आघू म ठाढ़ कर अऊ तब ओमन ला एक हलाय-बलिदान के रूप म यहोवा ला अरपन कर।
NUM 8:14 ये किसम ले तेंह लेवीमन ला आने इसरायलीमन ले अलग करबे, अऊ लेवीमन मोर होहीं।
NUM 8:15 “जब तेंह लेवीमन ला सुध करके ओमन ला एक हलाय-बलिदान के रूप म अरपन कर लेबे, तब ओमन मिलापवाला तम्बू म अपन काम करे बर आवंय।
NUM 8:16 येमन ओ इसरायली अंय, जेमन ला पूरा मोला दिये जावय। मेंह ओमन ला अपन जानके के पहिलांतमन के जगह म याने कि हर एक इसरायली माईलोगनमन के पहिला जनमे लड़का के रूप म लेय ले हंव।
NUM 8:17 इसरायल म हर पहिला जनमे नर, चाहे ओह मनखे होवय या पसु, ओह मोर अय। मेंह ओमन ला अपन बर पबितर करे हंव, जब मेंह मिसर देस म जम्मो पहिलांतमन ला मार डारेंव।
NUM 8:18 अऊ मेंह इसरायल म जम्मो पहिलांत बेटामन के जगह म लेवीमन ला लेय ले हंव।
NUM 8:19 जम्मो इसरायलीमन के बीच ले, मेंह लेवीमन ला एक भेंट के रूप म हारून अऊ ओकर बेटामन ला देय दे हंव कि ओमन इसरायलीमन कोति ले मिलापवाला तम्बू म काम करंय अऊ ओमन बर प्रायस्चित करंय, ताकि जब इसरायलीमन पबितर-स्थान के लकठा म जावंय त ओमन ऊपर कोनो महामारी झन आवय।”
NUM 8:20 मूसा, हारून अऊ पूरा इसरायली समाज ह लेवीमन के संग वइसे ही करिन, जइसे यहोवा ह मूसा ला हुकूम दे रिहिस।
NUM 8:21 लेवीमन अपनआप ला सुध करिन अऊ अपन ओनहा ला धोईन। तब हारून ह ओमन ला यहोवा के आघू म हलाय-बलिदान के रूप म अरपन करिस अऊ ओमन ला सुध करे बर ओमन बर प्रायस्चित करिस।
NUM 8:22 ओकर बाद, लेवीमन हारून अऊ ओकर बेटामन के देखरेख म मिलापवाला तम्बू म अपन काम करे बर आईन। ओमन लेवीमन के संग वइसने ही करिन, जइसे यहोवा ह मूसा ला हुकूम दे रिहिस।
NUM 8:23 फेर यहोवा ह मूसा ला कहिस,
NUM 8:24 “ये नियम लेवीमन ऊपर लागू होथे: पच्चीस साल या ओकर ले जादा उमर के मनखेमन मिलापवाला तम्बू म काम करे बर आवंय,
NUM 8:25 पर पचास साल के उमर म, ओमन अपन नियमित सेवा ले हट जावंय अऊ फेर काम झन करंय।
NUM 8:26 येकर बाद ओमन मिलापवाला तम्बू म अपन भाईमन के काम म मदद कर सकत हें, पर ओमन खुद होके कोनो काम झन करंय। ये किसम ले तेंह लेवीमन ला ओमन के जिम्मेदारी सऊंपबे।”
NUM 9:1 इसरायलीमन के मिसर देस ले निकल आय के दूसरा साल के पहिला महिना म यहोवा ह सीनय के सुन्ना जगह म मूसा ला कहिस,
NUM 9:2 “इसरायलीमन ठहिराय गे समय म फसह के तिहार मनावंय।
NUM 9:3 ठहिराय गे समय म, इही महिना के चौदहवां दिन सूरज बुड़े के पाछू, तुमन येला येकर जम्मो नियम अऊ बिधि के मुताबिक मनावव।”
NUM 9:4 तब मूसा ह इसरायलीमन ला फसह के तिहार मनाय बर कहिस,
NUM 9:5 अऊ ओमन सीनय के सुन्ना जगह म, पहिला महिना के चौदहवां दिन, सूरज बुड़े के पाछू फसह ला मनाईन। इसरायलीमन हर चीज वइसने ही करिन, जइसने कि यहोवा ह मूसा ला हुकूम दे रिहिस।
NUM 9:6 पर ओमा के कुछू झन ओ दिन फसह नइं मना सकिन, काबरकि एक लास के कारन ओमन बिधि के मुताबिक असुध रिहिन। एकरसेति ओहीच दिन ओमन मूसा अऊ हारून करा आईन
NUM 9:7 अऊ मूसा ला कहिन, “हमन एक लास के कारन असुध हो गे हन, पर ठहिराय गे समय म, यहोवा ला चढ़ावा चघाय बर, आने इसरायलीमन ले हमन ला काबर अलग करे जावथे?”
NUM 9:8 मूसा ह ओमन ला जबाब दीस, “मेंह पता लगात हंव कि तुम्हर बारे म यहोवा के का हुकूम अय, तब तक तुमन ठहिरे रहव।”
NUM 9:9 तब यहोवा ह मूसा ला कहिस,
NUM 9:10 “इसरायलीमन ला बता: ‘जब तुमन म ले कोनो या तुम्हर संतान म के कोनो मनखे कोनो लास के कारन असुध हवय या कोनो काम ले बाहिर गे हवय, तब भी ओह यहोवा के फसह ला मना सकत हे,
NUM 9:11 पर ओह दूसरा महिना के चौदहवां दिन बेर बुड़े के बाद येला मनावय। ओह मेढ़ा के मांस ला अखमीरी रोटी अऊ करू साग के संग खावय।
NUM 9:12 ओह बिहनियां होवत तक कुछू ला झन छोंड़य या येकर कोनो हाड़ा ला झन टोरय। जब ओह फसह तिहार ला मनावय, त ओह जम्मो बिधि के पालन करय।
NUM 9:13 पर यदि बिधि के मुताबिक सुध हवय अऊ यातरा म नइं ए, पर फसह के तिहार ला नइं मनाथे, त ओला अपन मनखेमन ले अलग करे जाय, काबरकि ओह ठहिराय गे समय म यहोवा ला चढ़ावा के अरपन नइं करिस। ओह अपन पाप के दुख भोगही।
NUM 9:14 “ ‘यदि कोनो परदेसी तुम्हर बीच म रहत हवय, त ओह घलो नियम अऊ बिधि के मुताबिक यहोवा के फसह ला मनावय। देस म जनमे मनखे अऊ परदेसी दूनों बर फसह माने के तुम्हर ओहीच बिधि होवय।’ ”
NUM 9:15 जऊन दिन पबितर-तम्बू, करार कानून के तम्बू ला खड़े करे गीस, ओ दिन बादर ह येला ढांप लीस। सांझ ले लेके बिहनियां तक बादर ह पबितर-तम्बू ऊपर आगी सहीं दिखिस।
NUM 9:16 अऊ हर दिन अइसने ही होईस; बादर ह येला ढांपय, अऊ रथिया के बेरा येह आगी सहीं दिखय।
NUM 9:17 जब भी बादर ह तम्बू के ऊपर ले उठय, त इसरायलीमन आघू बढ़ंय, अऊ जिहां भी बादर ह ठहर जावय, उहां इसरायलीमन डेरा डालंय।
NUM 9:18 यहोवा के हुकूम ले इसरायलीमन आघू बढ़िन, अऊ ओकर हुकूम ले ही ओमन डेरा डालिन। जब तक बादर ह पबितर-तम्बू के ऊपर रहय, ओमन डेरा डाले रहंय।
NUM 9:19 जब बादर ह पबितर-तम्बू के ऊपर बहुंत दिन तक बने रहय, त इसरायलीमन यहोवा के हुकूम ला मानंय अऊ आघू नइं बढ़ंय।
NUM 9:20 कभू-कभू बादर ह पबितर-तम्बू ऊपर सिरिप कुछू दिन बर रहय; यहोवा के हुकूम ले ओमन डेरा डालंय, अऊ तब ओकर हुकूम ले ही ओमन आघू बढ़ंय।
NUM 9:21 कभू-कभू बादर ह सिरिप सांझ ले बिहनियां तक रहय, अऊ जब येह बिहनियां उठय, त ओमन आघू बढ़ जावंय। चाहे दिन हो या रथिया, जब भी बादर ह उठ जावय, ओमन आघू बढ़ जावंय।
NUM 9:22 जब भी बादर ह पबितर-तम्बू ऊपर दू दिन या एक महिना या एक साल बर ठहिरय, त इसरायलीमन डेरा म रहंय अऊ आघू नइं बढ़ंय; पर जब येह उठ जावय, त ओमन आघू बढ़ंय।
NUM 9:23 यहोवा के हुकूम ले ओमन डेरा डालंय, अऊ यहोवा के हुकूम ले ही ओमन आघू बढ़ंय। ओमन यहोवा के हुकूम मानंय, जेला ओह मूसा के जरिये ओमन ला देवय।
NUM 10:1 फेर यहोवा ह मूसा ला कहिस:
NUM 10:2 “चांदी ला पीटके दू ठन तुरही बना, अऊ ओमन के उपयोग समाज ला एक संग जूरे बर अऊ सिविर के आघू बढ़े बर कर।
NUM 10:3 जब दूनों तुरही बजाय जावंय, त पूरा समाज मिलापवाला तम्बू के दुवार म तोर आघू म जूर जावय।
NUM 10:4 अऊ यदि सिरिप एक ठन ला बजाय जावय, त अगुवामन—इसरायल के गोत्र के मुखियामन तोर आघू म जूर जावंय।
NUM 10:5 जब तुरही ला एक बार जोर से फूंके जावय, त पूरब दिसा म डेरा डाले गोत्र के मन आघू बढ़ंय।
NUM 10:6 तुरही ला दूसर बार जोर से फूंके जावय, त दक्खिन कोति डेरा डाले मनखेमन आघू बढ़ंय। तुरही ला जोर से फूंकई ह आघू बढ़े के संकेत होही।
NUM 10:7 समाज ला इकट्ठा करे बर तुरहीमन ला फूंके जावय, पर येमा आघू बढ़े के संकेत झन होवय।
NUM 10:8 “हारून के बेटा, पुरोहितमन तुरही ला फूंकंय। येह हमेसा के बिधि होवय अऊ अवइया पीढ़ीमन म घलो येकर पालन करे जावय।
NUM 10:9 जब तुमन अपन ही देस म कोनो बईरी के बिरूध लड़े बर निकलव, जऊन ह तुम्हर ऊपर अतियाचार करत हे, त तुरहीमन ला एक बार जोर से बजावव। तब यहोवा तुम्हर परमेसर ह तुमन ला सुरता करही अऊ तुम्हर बईरीमन ले बचाही।
NUM 10:10 अपन आनंद मनाय के बेरा—तुम्हर ठहिराय गय तिहार अऊ नवां चंदा के जेवनार के बेरा, तुमन होम-बलिदान अऊ मेल-बलिदान चढ़ावा के समय तुरहीमन ला फूंकव, अऊ ओह तुम्हर बर परमेसर के आघू म एक सुरता करइया होही। मेंह यहोवा तुम्हर परमेसर अंव।”
NUM 10:11 इसरायलीमन के मिसर देस ले निकले के दूसरा साल के दूसरा महिना के बीसवां दिन बादर ह करार के कानून के पबितर-तम्बू के ऊपर ले उठ गीस।
NUM 10:12 तब इसरायलीमन सीनय के सुन्ना जगह ले आघू बढ़िन अऊ जगह-जगह होवत ओमन आघू बढ़त गीन जब तक कि बादर ह पारान के सुन्ना जगह म ठहर नइं गीस।
NUM 10:13 ओमन पहिली बार, मूसा के जरिये यहोवा के हुकूम के मुताबिक आघू बढ़िन।
NUM 10:14 पहिले यहूदा के सिविर के दलमन अपन झंडा के अधीन आघू बढ़िन। अमीनादाब के बेटा नहसोन ओमन के अगुवा रिहिस।
NUM 10:15 इस्साकार गोत्र के दल के अगुवा सूआर के बेटा नतनेल,
NUM 10:16 अऊ जबूलून के गोत्र के दल के अगुवा हेलोन के बेटा एलीआब रिहिस।
NUM 10:17 तब पबितर-तम्बू ला उसाले गीस, अऊ गेरसोनी अऊ मरारीमन येला उठाके आघू बढ़िन।
NUM 10:18 ओकर बाद, रूबेन के सिविर के दलमन अपन झंडा के अधीन आघू बढ़िन। सदेऊर के बेटा एलीसूर ओमन के अगुवा रिहिस।
NUM 10:19 सिमोन के गोत्र के दल के अगुवा सूरीसद्दाय के बेटा सलूमीएल,
NUM 10:20 अऊ गाद के गोत्र के दल के अगुवा दूएल के बेटा एलियासाप रिहिस।
NUM 10:21 तब कहातीमन पबितर चीजमन ला उठाके आघू बढ़िन। ओमन के हबरे के पहिले पबितर-तम्बू ला गाड़े जावय।
NUM 10:22 ओकर बाद एपरैम के सिविर के दलमन अपन झंडा के अधीन बढ़िन। अमीहूद के बेटा एलीसामा ह ओमन के अगुवा रिहिस।
NUM 10:23 मनस्से के गोत्र के दल के अगुवा पदासूर के बेटा गमलीएल,
NUM 10:24 अऊ बिनयामीन के गोत्र के दल के अगुवा गिदोनी के बेटा अबीदान रिहिस।
NUM 10:25 आखिरी म, जम्मो दल बर पाछू के पहरेदार के रूप म, दान के सिविर के दलमन अपन झंडा के अधीन आघू बढ़िन। अम्मीसद्दाय के बेटा अहीएजेर ओमन के अगुवा रिहिस।
NUM 10:26 आसेर के गोत्र के दल के अगुवा ओकरान के बेटा पगीएल,
NUM 10:27 अऊ नपताली के गोत्र के दल के अगुवा एनान के बेटा अहीरा रिहिस।
NUM 10:28 इसरायलीमन जब भी आघू बढ़ंय, त ओमन के दलमन के क्रम अइसने ही रहय।
NUM 10:29 मूसा ह अपन ससुर रूएल, जऊन ह मिदयानी रिहिस, ओकर बेटा होबाब ला कहिस, “हमन ओ जगह म जावत हन, जेकर बारे म यहोवा ह कहे हवय, ‘मेंह ओ जगह तुमन ला दूहूं।’ तें घलो हमर संग आ अऊ हमन तोर बने धियान रखबो, काबरकि यहोवा ह इसरायल बर बने चीजमन के वायदा करे हे।”
NUM 10:30 होबाब ह जबाब दीस, “नइं, में नइं जावंव; मेंह अपन देस अऊ अपन मनखेमन करा वापिस जावत हंव।”
NUM 10:31 पर मूसा ह कहिस, “हमन ला झन छोंड़। तेंह जानथस कि सुन्ना जगह म हमन ला कहां डेरा डालना चाही, अऊ तें हमर बर आंखी सहीं अस।
NUM 10:32 यदि तेंह हमर संग आबे, त जऊन भी बने चीज यहोवा ह हमन ला दीही, ओला हमन तोर संग बांटबो।”
NUM 10:33 तब इसरायलीमन यहोवा के पहाड़ ले आघू बढ़िन अऊ तीन दिन तक चलते रिहिन। ओ तीन दिन के दौरान, यहोवा के करार के सन्दूक ह ओमन बर एक ठन अराम के जगह के खोज म ओमन के आघू-आघू बढ़ते रिहिस।
NUM 10:34 जब ओमन डेरा ले आघू बढ़ंय, त दिन के बेरा यहोवा के बादर ह ओमन के ऊपर बने रहय।
NUM 10:35 जब भी सन्दूक ह आघू बढ़य, त मूसा ह कहय, “हे यहोवा, उठ! तोर बईरीमन तितिर-बितिर हो जावंय; तोर बईरीमन तोर आघू ले भाग जावंय।”
NUM 10:36 जब भी सन्दूक ह ठहर जावय, त मूसा ह कहय, “हे यहोवा, इसरायल के हजारों-हजार मनखेमन करा लहुंट आ।”
NUM 11:1 अब इसरायलीमन यहोवा के सुनत म अपन तकलीफ के सिकायत करे लगिन, अऊ जब ओह ओमन के बात ला सुनिस, त ओकर गुस्सा भड़क उठिस। तब ओमन के बीच यहोवा के आगी बरिस अऊ सिविर के कुछू बाहिरी भाग ला जलाके भसम कर दीस।
NUM 11:2 जब मनखेमन मूसा करा आके गोहार पारिन, त ओह यहोवा ले पराथना करिस अऊ आगी ह बुता गीस।
NUM 11:3 एकरसेति ओ जगह ला तबेरा कहे गीस, काबरकि यहोवा के आगी ह ओमन के बीच बरे रिहिस।
NUM 11:4 ओकर बाद ओमन के संग के हल्ला मचानेवालामन आने जेवन खाय के लालसा करे लगिन, अऊ फेर इसरायलीमन बिलाप करत कहिन, “कास हमर करा खाय बर मांस होतिस!
NUM 11:5 हमन ला मिसर के मछरी के सुरता आवत हे, जेला मुफत म खावत रहेंन—खीरा, कलिंदर, कांदा, गोंदली, अऊ लहसुन घलो।
NUM 11:6 पर अब हमर भूख ह खतम हो गे हवय; हमन ला ये मन्ना के छोंड़ अऊ कुछू नइं दिखय!”
NUM 11:7 मन्ना ह धनियां के बीजा सहीं रिहिस अऊ रंग ह मोती सहीं दिखय।
NUM 11:8 मनखेमन आसपास जाके ओला संकेलंय, अऊ तब ओला जांता म पीसंय या ओखली म कुटंय। ओमन ओला एक बरतन म रांधंय या ओकर रोटी बनांय। अऊ येकर सुवाद ह जैतून तेल ले बने कुछू चीज सहीं लगय।
NUM 11:9 जब रथिया सिविर म ओस पड़य, त संग म मन्ना घलो गिरय।
NUM 11:10 मूसा ह हर परिवार के मनखेमन ला अपन-अपन तम्बू के दुवार म रोवत सुनिस। यहोवा ह बहुंत गुस्सा करिस, अऊ मूसा ह परेसान हो गीस।
NUM 11:11 तब मूसा ह यहोवा ले पुछिस, “तेंह अपन सेवक ऊपर ये समस्या काबर लाने हस? मेंह अइसने का काम करके तोला दुखी करेंव कि ये जम्मो मनखेमन के बोझ मोर ऊपर डाल दे हस?
NUM 11:12 का ये जम्मो मनखेमन मोर गरभ म रिहिन? का येमन ला में जनमांय? तेंह मोला काबर कहिथस कि जइसने एक धाई ह छोटे लइका ला अपन कोरा म पाके चलथे, वइसने येमन ला ओ देस म लेके जा, जेला देय के वायदा तेंह येमन के पुरखामन ले कसम खाके करे रहय?
NUM 11:13 मेंह ये जम्मो झन बर मांस कहां ले लानंव? येमन लगातार रो-रोके मांगत रहिथें, ‘हमन ला खाय बर मांस दे!’
NUM 11:14 मेंह एके झन ये जम्मो मनखेमन के भार नइं उठा सकंव; येह मोर बर भारी हे।
NUM 11:15 यदि ये किसम ले तोला मोर संग बरताव करना हे, त आघू बढ़ अऊ मोला मार डार—यदि तोर दया के नजर मोर ऊपर हवय, त मोला अपन खुद के दुरदसा ला झन देखा।”
NUM 11:16 यहोवा ह मूसा ला कहिस: “मोर करा इसरायल के सत्तर अइसने अगुवामन ला लान, जेमन ला तेंह मनखेमन के अगुवा अऊ अधिकारी के रूप म जानथस। ओमन ला मिलापवाला तम्बू करा ले आ कि ओमन उहां तोर संग ठाढ़ होवंय।
NUM 11:17 तब मेंह खाल्हे उतरके उहां तोर ले गोठियाहूं, अऊ जऊन आतमा के सक्ति तोर म हवय, ओमा ले कुछू सक्ति लेके मेंह ओमन म डार दूहूं। ओमन तोर संग मिलके मनखेमन के ये बोझा ला उठाहीं, ताकि तोला एके झन येला उठाना झन पड़य।
NUM 11:18 “मनखेमन ला कह: ‘कल के तियारी म अपनआप ला पबितर करव, कल तुमन ला मांस खाय बर मिलही। काबरकि यहोवा ह तुम्हर ओ बात ला सुन ले हवय, जब तुमन बिलाप करके कहेव, “कास हमन ला मांस खाय बर मिलतिस! मिसर देस म ही हमर दसा बने रिहिस!” अब यहोवा ह तुमन ला मांस दीही, अऊ तुमन ओला खाहू।
NUM 11:19 तुमन ओला सिरिप एक दिन, या दू दिन, या पांच, दस या बीस दिन नइं,
NUM 11:20 पर पूरा एक महिना तक खाहू—जब तक कि येह तुम्हर नाक ले निकले नइं लगे अऊ येकर ले तुमन ला घिन नइं हो जावय—काबरकि तुमन यहोवा ला तुछ जाने हव, जऊन ह तुम्हर बीच म हवय, अऊ तुमन ओकर आघू म ये कहिके बिलाप करे हव, “हमन काबर मिसर देस ला छोंड़के आ गेंन?” ’ ”
NUM 11:21 पर मूसा ह कहिस, “इहां मेंह छै लाख पैदल चलइया मनखेमन के बीच हवंव, अऊ तेंह कहिथस, ‘मेंह पूरा एक महिना येमन ला खाय बर मांस दूहूं!’
NUM 11:22 यदि पसु अऊ चिरईमन के झुंड घलो काटे जाय, त का येमन ला पूरही? यदि समुंदर के जम्मो मछरी ला घलो येमन बर पकड़े जावय, त का येमन ला पूरही?”
NUM 11:23 यहोवा ह मूसा ला जबाब दीस, “का यहोवा के हांथ अतेक छोटे हवय? अब तेंह देखबे कि जऊन बात मेंह तोला कहे हंव, ओह सच होथे कि नइं।”
NUM 11:24 तब मूसा ह बाहिर निकलिस अऊ मनखेमन ला यहोवा के कहे बात ला बताईस। ओह ओमन के सत्तर अगुवामन ला इकट्ठा करिस अऊ ओमन ला तम्बू के लकठा म ठाढ़ करिस।
NUM 11:25 तब यहोवा ह बादर म होके खाल्हे उतरिस अऊ मूसा ले गोठियाईस, अऊ जऊन आतमा के सक्ति मूसा म रिहिस, ओमा ले कुछू सक्ति लेके, ओह ओ सत्तर अगुवामन म डार दीस। जब ओ आतमा ओमन म आईस, त ओमन अगमबानी करे लगिन—पर एकर बाद ओमन फेर दूबारा नइं करिन।
NUM 11:26 पर दू झन मनखे सिविर म रह गीन, जेमा के एक झन के नांव एलदाद अऊ दूसर के नांव मेदाद रिहिस। ओमन के नांव अगुवामन के सूची म रिहिस, पर ओमन बाहिर तम्बू करा नइं गीन। तभो ले आतमा ह ओमन म आईस, अऊ ओमन घलो सिविर म अगमबानी करे लगिन।
NUM 11:27 एक जवान ह दऊड़के गीस अऊ मूसा ला बताईस, “एलदाद अऊ मेदाद सिविर म अगमबानी करत हें।”
NUM 11:28 नून के बेटा यहोसू, जऊन ह अपन जवानी के समय ले मूसा के सहायक रिहिस; ओह मूसा ला कहिस, “हे मोर मालिक, मूसा, ओमन ला मना कर!”
NUM 11:29 पर मूसा ह जबाब दीस, “का मोर कारन तोला जलन होवत हे? बने होतिस कि यहोवा के जम्मो मनखेमन अगमजानी होतिन अऊ यहोवा ह अपन आतमा ओमन म डार देतिस!”
NUM 11:30 तब मूसा अऊ इसरायल के ओ अगुवामन डेरा म वापिस चल दीन।
NUM 11:31 यहोवा कोति ले एक गरेर चलिस अऊ ये गरेर ह समुंदर ले बटेर चिरईमन ला ले आईस। येह बटेरमन ला दू क्यूबीट ऊंचई तक डेरा के चारों कोति, हर दिसा म एक दिन के रसता तक बगरा दीस।
NUM 11:32 ओ पूरा दिन अऊ रथिया अऊ दूसर दिन घलो मनखेमन बाहिर जाके बटेरमन ला संकेलिन। कम से कम बटोरनेवाला घलो दस होमेर ले कम नइं बटोरिस। तब ओमन ओ बटेरमन ला सिविर के चारों कोति बगरा दीन।
NUM 11:33 पर खाय के बेरा जब मांस ह ओमन के मुहूं म ही रिहिस अऊ येकर पहिले कि ओमन ओला चबाके लीलतिन, यहोवा के कोरोध ह ओमन ऊपर भड़क उठिस अऊ ओह ओमन के बीच बड़े महामारी फईला दीस।
NUM 11:34 एकरसेति ओ जगह के नांव किबरोत-हतावा पड़िस, काबरकि उहां ओमन ओ मनखेमन ला माटी दे रिहिन, जेमन आने जेवन के लालसा करे रिहिन।
NUM 11:35 ओकर बाद किबरोत-हतावा ले मनखेमन हसेरोत गीन अऊ उहां रूक गीन।
NUM 12:1 मूसा ह एक कूसी माईलोगन ले बिहाव कर ले रिहिस, त मिरियम अऊ हारून ओकर कूसी घरवाली के कारन ओकर बिरूध गोठियाय लगिन।
NUM 12:2 ओमन कहिन, “का यहोवा ह सिरिप मूसा के दुवारा ही बात करे हवय? का ओह हमर दुवारा घलो बात नइं करे हवय?” अऊ यहोवा ह ये बात ला सुनिस।
NUM 12:3 (मूसा ह एक बहुंत नम्र सुभाव के मनखे रिहिस, धरती म ओकर ले जादा अऊ कोनो नम्र मनखे नइं रिहिन।)
NUM 12:4 तुरते यहोवा ह मूसा, हारून अऊ मिरियम ला कहिस, “तुमन तीनों झन बाहिर मिलापवाला तम्बू करा आवव।” त ओ तीनों झन बाहिर आ गीन।
NUM 12:5 तब यहोवा ह बादर के एक खंभा म खाल्हे आईस; ओह तम्बू के दुवार करा ठाढ़ हो गीस अऊ हारून अऊ मिरियम ला बलाईस। जब ओ दूनों झन आघू आईन,
NUM 12:6 त यहोवा ह कहिस, “मोर बात ला सुनव: “जब तुम्हर बीच म कोनो अगमजानी होथे, त में, यहोवा अपनआप ला ओकर करा दरसन म परगट करथंव, मेंह ओकर ले सपना म गोठियाथंव।
NUM 12:7 पर ये बात मोर सेवक मूसा बर लागू नइं होवय; ओह मोर जम्मो घर म बिसवासयोग्य ए।
NUM 12:8 ओकर संग मेंह आमने-सामने, अऊ साफ-साफ गोठियाथंव, पहेलीमन म नइं गोठियावंव; ओह यहोवा के स्वरूप ला देखथे। तब तुमन काबर मोर सेवक मूसा के बिरूध गोठियाय बर नइं डरेव?”
NUM 12:9 तब यहोवा के कोरोध ओमन ऊपर भड़किस, अऊ ओह ओमन ला छोंड़के चल दीस।
NUM 12:10 जब बादर ह तम्बू के ऊपर ले उठ गीस, त मिरियम ला कोढ़ के बेमारी हो गीस अऊ ओह बरफ सहीं सफेद हो गीस। हारून ह ओकर कोति मुड़िस अऊ देखिस कि ओला असुध करइया चाम-रोग हो गे हे,
NUM 12:11 अऊ ओह मूसा ला कहिस, “हे मोर मालिक, मेंह बिनती करत हंव कि हमर ओ पाप ला झन धर, जेला हमन बहुंत मुरूख होके करे हवन।
NUM 12:12 ओला दाई के गरभ ले निकलत आधा गले देहेंवाले लइका सहीं झन रहन दे।”
NUM 12:13 तब मूसा ह यहोवा ले गोहारिस, “हे परमेसर, किरपा करके ओला बने कर दे!”
NUM 12:14 यहोवा ह मूसा ला जबाब दीस, “यदि ओकर ददा ह ओकर चेहरा म थूक दे होतिस, त का ओह सात दिन तक कलंक म नइं रहितिस; ओला सात दिन तक सिविर के बाहिर रखव; ओकर बाद ओला वापिस लाने जावय।”
NUM 12:15 तब मिरियम ला सात दिन तक सिविर के बाहिर रखे गीस, अऊ मनखेमन आघू नइं बढ़िन जब तक कि ओला वापिस नइं लाने गीस।
NUM 12:16 ओकर बाद, मनखेमन हसेरोत ले आघू बढ़िन अऊ पारान के सुन्ना जगह म डेरा डालिन।
NUM 13:1 यहोवा ह मूसा ला कहिस,
NUM 13:2 “कुछू मनखेमन ला कनान देस के खोजबीन करे बर भेज, जेला मेंह इसरायलीमन ला देनेवाला हंव। हर पुरखा के गोत्र म ले एक-एक झन अगुवा ला भेज।”
NUM 13:3 तब यहोवा के हुकूम पाके मूसा ह ओमन ला पारान के सुन्ना जगह ले पठो दीस। ओ जम्मो झन इसरायलीमन के अगुवा रिहिन।
NUM 13:4 ओमन के नांव ये अंय: रूबेन के गोत्र ले जक्कूर के बेटा सम्मू;
NUM 13:5 सिमोन के गोत्र ले होरी के बेटा सापात;
NUM 13:6 यहूदा के गोत्र ले यपुन्ने के बेटा कालेब;
NUM 13:7 इस्साकार के गोत्र ले यूसुफ के बेटा इगाल;
NUM 13:8 एपरैम के गोत्र ले नून के बेटा होसे;
NUM 13:9 बिनयामीन के गोत्र ले राफू के बेटा पलती;
NUM 13:10 जबूलून के गोत्र ले सोदी के बेटा गदीएल;
NUM 13:11 मनस्से के गोत्र ले (यूसुफ के एक गोत्र) सूसी के बेटा गद्दी;
NUM 13:12 दान के गोत्र ले गमली के बेटा अमीएल;
NUM 13:13 आसेर के गोत्र ले मिकाएल के बेटा सतूर;
NUM 13:14 नपताली के गोत्र ले वोपसी के बेटा नहबी;
NUM 13:15 गाद के गोत्र ले माकी के बेटा गूएल।
NUM 13:16 ये ओ मनखेमन के नांव ए, जेमन ला मूसा ह देस के खोजबीन करे बर पठोईस। (मूसा ह नून के बेटा होसे के नांव यहोसू रखिस।)
NUM 13:17 जब मूसा ह ओमन ला कनान देस के खोजबीन करे बर पठोईस, त ओह कहिस, “तुमन नेगेव राज म होवत पहाड़ी देस म जावव।
NUM 13:18 देखव कि ओ देस ह कइसे हवय अऊ जऊन मनखेमन उहां रहिथें, ओमन बलवान हें कि कमजोर, संखिया म कम हवंय कि जादा।
NUM 13:19 कइसे हवय ओ देस, जेमा ओमन रहिथें? बने कि खराप? रहे के नगरमन कइसे हवंय? ओ नगरमन खुला हवंय कि चारों कोति दीवार बने हवय?
NUM 13:20 उहां के माटी कइसे हवय? उपजाऊ हे या बंजर? उहां रूखमन हवंय कि नइं? ओ देस म ले कुछू फर लाने के पूरा कोसिस करव।” (येह पाके अंगूर के पहिली-फसल के मौसम रिहिस।)
NUM 13:21 त ओमन गीन अऊ सीन के सुन्ना जगह ले लेके लेबो-हमात कोति रहोब नगर तक ओ देस के खोजबीन करिन।
NUM 13:22 ओमन नेगेव कोति ले होवत हेबरोन आ गीन, जिहां अनाक के बंसज अहीमन, सेसै अऊ तलमै रहत रिहिन। (हेबरोन सहर ह मिसर के सोअन ले सात साल पहिले बन गे रिहिस।)
NUM 13:23 जब ओमन एसकोल के घाटी म हबरिन, त ओमन अंगूर के एक नार ला काट लीन, जेमा अंगूर के सिरिप एके ठन गुच्छा रिहिस। ओमा के दू झन येला कुछू अनार अऊ अंजीर के संग एक ठन लउठी म लटकात बोहके ले चलिन।
NUM 13:24 ओ जगह ला एसकोल के घाटी कहे गीस काबरकि उहां इसरायलीमन अंगूर के एक गुच्छा ला काटे रिहिन।
NUM 13:25 चालीस दिन के बाद ओमन ओ देस के खोजबीन करके लहुंट आईन।
NUM 13:26 ओमन पारान के सुन्ना जगह के कादेस नगर म मूसा अऊ हारून अऊ जम्मो इसरायली समाज करा वापिस आईन। ओमन उहां ओमन ला अऊ जम्मो इसरायली सभा ला लेखा-जोखा दीन अऊ ओ देस के फर ओमन ला देखाईन।
NUM 13:27 ओमन मूसा ला बताईन: “हमन ओ देस म गेंन, जिहां तेंह हमन ला पठोय रहय, ओ देस म दूध अऊ मंधरस बहुंत हवय! हमन उहां ले ये कुछू फर लेके आय हन।
NUM 13:28 पर उहां के मनखेमन बलवान अंय, सहरमन के चारों कोति किला हे अऊ सहरमन बहुंत बड़े हवंय। अऊ त अऊ हमन उहां अनाक के संतानमन ला घलो देखेंन।
NUM 13:29 अमालेकीमन नेगेव म रहिथें; हित्ती, यबूसी अऊ अमोरी पहाड़ी इलाका म रहिथें; अऊ कनानीमन समुंदर के लकठा म, यरदन नदी के तीरे-तीर रहिथें।”
NUM 13:30 तब कालेब ह मूसा के आघू म मनखेमन ला चुप कराईस अऊ कहिस, “हमन ला जाके ओ देस ऊपर अधिकार कर लेना चाही, काबरकि हमन खचित अइसने कर सकत हन।”
NUM 13:31 पर जऊन मनखेमन ओकर संग गे रिहिन, ओमन कहिन, “हमन ओमन ऊपर हमला नइं कर सकन; काबरकि ओमन हमर ले जादा बलवान हें।”
NUM 13:32 अऊ ओमन इसरायलीमन के बीच म ओ देस के बारे म एक खराप बात फईला दीन, जिहां ओमन गे रिहिन। ओमन कहिन, “जऊन देस के हमन भेद लेके आय हन, ओ देस ह उहां के निवासीमन ला खा जाथे। उहां जम्मो मनखेमन बड़े डीलडौल के हवंय।
NUM 13:33 हमन उहां नेफिलीम देखेंन (अनाक के संतानमन नेफिलीम के बंस ले आथें)। हमन अपन नजर म ओमन के आघू म फांफा सहीं लगत रहेंन, अऊ अइसने ही हमन ओमन ला दिखत रहेंन।”
NUM 14:1 ओ रथिया समाज के जम्मो झन अपन अवाज ऊंचहा करिन अऊ जोर-जोर से रोईन।
NUM 14:2 जम्मो इसरायलीमन मूसा अऊ हारून के बिरूध बड़बड़ाय लगिन, अऊ पूरा सभा ह ओमन ला कहिस, “बने होतिस कि हमन मिसर म मर गे होतेंन! या ये सुन्ना जगह म मर जातेंन!
NUM 14:3 तलवार ले मारे जाय बर ही यहोवा ह हमन ला ये देस म काबर लानत हे? हमर घरवाली अऊ लइकामन ला लूट के सामान सहीं ले लिये जाही। का येह बने नइं होही कि हमन मिसर देस वापिस चले जावन?”
NUM 14:4 अऊ ओमन एक-दूसर ला कहिन, “आवव, हमन अपन बर एक अगुवा चुनके वापिस मिसर देस चल देवन।”
NUM 14:5 तब उहां जूरे सबो इसरायली समाज के आघू म मूसा अऊ हारून मुहूं के बल गिरिन।
NUM 14:6 नून के बेटा यहोसू अऊ यपुन्ने के बेटा कालेब दुखी होके अपन कपड़ा चीरिन; ये दूनों ओ दल म रिहिन, जेमन ओ देस के पता लगाय गे रिहिन।
NUM 14:7 ये दूनों इसरायलीमन के पूरा सभा ला कहिन, “जऊन देस म हमन गे रहेंन अऊ खोजबीन करके आय हन, ओह बहुंत ही बने देस अय।
NUM 14:8 यदि यहोवा ह हमन ले खुस हवय, त ओह हमन ला ओ देस म ले जाही, जिहां दूध अऊ मंधरस के भरमार हे, अऊ ओह ओ देस हमन ला दीही।
NUM 14:9 यहोवा के बिरूध बिदरोह झन करव। अऊ ओ देस के मनखेमन ले झन डरव, काबरकि हमन ओमन ला नास कर देबो। ओमन के सुरकछा ह हट गे हवय, पर यहोवा ह हमर संग हवय। ओमन ले झन डरावव।”
NUM 14:10 पर पूरा सभा के मनखेमन ओमन ला पथरवाह करे के बात करत रिहिन। तब मिलापवाला तम्बू करा जम्मो इसरायलीमन ऊपर यहोवा के महिमा परगट होईस।
NUM 14:11 यहोवा ह मूसा ला कहिस, “कब तक ये मनखेमन मोर संग अपमान के बरताव करत रहिहीं? मोर दुवारा येमन के बीच म ये जम्मो चिनहां देखाय के बाद भी, येमन कब तक मोर ऊपर बिसवास नइं करहीं?
NUM 14:12 मेंह महामारी लानके ओमन ला नास कर दूहूं, पर मेंह तोर दुवारा एक बड़े जाति बनाहूं, जऊन ह येमन ले घलो बड़े अऊ सक्तिसाली होही।”
NUM 14:13 मूसा ह यहोवा ला कहिस, “तब तो मिसर देस के मनखेमन येकर बारे म सुनहीं! तेंह अपन सामर्थ ले ये इसरायलीमन ला ओमन के बीच ले निकाल लाने हस।
NUM 14:14 अऊ ओमन ये देस के निवासीमन ला येकर बारे म बताहीं। ओमन ये बात ला सुने हवंय कि तें यहोवा ये मनखेमन के संग रहिथस अऊ ये कि तें यहोवा आमने-सामने दिखथस, कि तोर बादर ह येमन के ऊपर ठहिरे रहिथे, अऊ ये घलो कि तेंह दिन के बेरा बादर के एक खंभा के रूप म अऊ रथिया आगी के एक खंभा के रूप म येमन के आघू-आघू रेंगथस।
NUM 14:15 यदि तेंह ये जम्मो मनखेमन ला मार डारबे, कोनो ला नइं छोंड़बे, त ओ जाति के मनखेमन, जऊन मन येला सुने हवंय, ओमन कहिहीं,
NUM 14:16 ‘यहोवा ह ये इसरायलीमन ला ओ देस म नइं लाने सकिस, जेकर वायदा ओह येमन ले कसम खाके करे रिहिस, एकरसेति ओह येमन ला सुन्ना जगह म मार डारिस।’
NUM 14:17 “पर अब परभू के सक्ति ह परगट होवय, जइसे कि तेंह घोसना करे हस:
NUM 14:18 ‘यहोवा ह कोरोध करे म धीमा, मया ले भरपूर अऊ पाप अऊ बिदरोह ला छेमा करइया ए। फेर दोसी ला ओह निरदोस नइं छोंड़य; ओह दाई-ददा के पाप बर ओमन के लइकामन ला तीसरा अऊ चौथा पीढ़ी तक दंड देथे।’
NUM 14:19 तोर महान मया के मुताबिक, ये मनखेमन के पाप ला छेमा कर, जइसे कि तेंह येमन ला मिसर देस ले निकल आय के समय ले लेके अब तक छेमा करत आय हस।”
NUM 14:20 यहोवा ह जबाब दीस, “तोर बिनती के मुताबिक मेंह येमन ला छेमा कर दे हंव।
NUM 14:21 तभो ले, मोर जिनगी के कसम अऊ जब तक पूरा धरती ह यहोवा के महिमा ले भरे हवय,
NUM 14:22 ओ जम्मो झन, जऊन मन मोर महिमा अऊ चिनहांमन ला मिसर अऊ सुन्ना जगह म देखिन, ओमा के जऊन मन भी मोर बात ला नइं मानिन अऊ दस बार मोला जांचिन-परखिन—
NUM 14:23 ओमन कोनो भी ओ देस ला देखे नइं पाहीं, जेकर वायदा मेंह ओमन के पुरखामन ले कसम खाके करे रहेंव। मोर अपमान करइयामन कभू ओ देस ला देखे नइं पाहीं।
NUM 14:24 पर काबरकि मोर सेवक कालेब करा एक अलग आतमा हवय अऊ ओह पूरा मन से मोर पाछू चलथे, एकरसेति मेंह ओला उहां ले जाहूं, जिहां ओह गे रिहिस, अऊ ओकर संतानमन ओ देस ऊपर अधिकार करहीं।
NUM 14:25 काबरकि अमालेकीमन अऊ कनानीमन ओ घाटीमन म रहत हें, एकरसेति कल तुमन वापिस लहुंटव अऊ लाल-समुंदर के तीरे-तीर रसता ले सुन्ना जगह कोति आघू बढ़व।”
NUM 14:26 तब यहोवा ह मूसा अऊ हारून ला कहिस:
NUM 14:27 “ये दुस्ट समाज के मनखेमन कब तक मोर बिरूध बड़बड़ावत रहिहीं? मेंह ये बड़बड़ानेवाले इसरायलीमन के सिकायत ला सुने हंव।
NUM 14:28 एकरसेति ओमन ले कह, ‘यहोवा अपन जिनगी के कसम खाके घोसना करत हे, जऊन बात तुमन मोर सुनत म कहे हव, में तुम्हर संग वइसने ही करहूं।
NUM 14:29 ये सुन्ना जगह म ही तुम्हर लास पड़े रहिही—ओ जम्मो, जऊन मन बीस साल या जादा उमर के हवंय, जेमन के गनती हो चुके हवय अऊ जेमन मोर बिरूध बड़बड़ाय हवंय।
NUM 14:30 यपुन्ने के बेटा कालेब अऊ नून के बेटा यहोसू के छोंड़, तुमन म ले कोनो ओ देस म जाय नइं सकहू, जेला तुम्हर घर बनाय बर मेंह हांथ उठाके कसम खाय रहेंव।
NUM 14:31 जहां तक तुम्हर लइकामन के बात ए, जेमन के लूट म जाय के बारे म तुमन कहे रहेव, मेंह ओमन ला ओ देस म आनंद करे बर लानहूं, जेला तुमन ठुकरा दे हव।
NUM 14:32 पर जहां तक तुम्हर बात अय, तुमन ये सुन्ना जगह म मर जाहू।
NUM 14:33 तुम्हर बिसवासघात के कारन, तुम्हर लइकामन चालीस बछर तक दुख भोगत इहां चरवाहा होके रहिहीं, जब तक कि तुम्हर आखिरी जन ये सुन्ना जगह म मर नइं जाही।
NUM 14:34 तुमन चालीस दिन तक ओ देस के खोजबीन करे रहेव—एक दिन के पाछू एक साल याने कि चालीस साल तक तुमन अपन पाप के दुख भोगहू, तब तुमन जानहू कि मोर बिरूध होय के मतलब का होथे।’
NUM 14:35 में, यहोवा ये बात ला कहे हवंव, अऊ मेंह खचित ये पूरा दुस्ट समाज के संग अइसने ही करहूं, जेमन मोर बिरूध म एक जुट हो गे हवंय। ये सुन्ना जगह म येमन के आखिरी समय बीतही; इहां ओमन मर जाहीं।”
NUM 14:36 ओ मनखे जेमन ला मूसा ह ओ देस के खोजबीन करे बर पठोय रिहिस, ओमन लहुंटके ओ देस के बारे म गलत बात कहिके मूसा के बिरूध जम्मो समाज ला बड़बड़ाय बर उभारे रिहिन—
NUM 14:37 ये मनखे जेमन ओ देस के बारे म गलत बात फईलाय बर जिम्मेदार रिहिन, ओ जम्मो के जम्मो मार डारे गीन अऊ यहोवा के आघू म एक महामारी ले मर गीन।
NUM 14:38 जऊन मनखेमन ओ देस के खोजबीन करे बर गे रिहिन, ओमा ले सिरिप नून के बेटा यहोसू अऊ यपुन्ने के बेटा कालेब बांचिन।
NUM 14:39 जब मूसा ह जम्मो इसरायलीमन ला ये बात बताईस, त ओमन बहुंत सोक मनाईन।
NUM 14:40 दूसर दिन बड़े बिहनियां ये कहिके ओमन पहाड़ी देस के चोटी कोति आघू बढ़िन, “खचित हमन पाप करे हन! पर अब हमन ओ देस म जाय बर तियार हन, जेकर वायदा यहोवा ह करे हवय।”
NUM 14:41 पर मूसा ह कहिस, “तुमन काबर यहोवा के हुकूम ला नइं मानत हव? तुम्हर ये काम सफल नइं होवय!
NUM 14:42 तुमन ऊपर झन जावव, काबरकि यहोवा ह तुम्हर संग नइं ए। तुमन अपन बईरीमन ले हार जाहू,
NUM 14:43 अमालेकीमन अऊ कनानीमन उहां तुम्हर सामना करहीं। काबरकि तुमन यहोवा के रसता ले हट गे हव, एकरसेति ओह तुम्हर संग नइं रहय अऊ तुमन तलवार ले मार डारे जाहू।”
NUM 14:44 तभो ले, ओमन अपन ढिठई म पहाड़ी देस के चोटी कोति आघू बढ़िन, पर न तो मूसा अऊ न ही यहोवा के करार के सन्दूक ह सिविर ले आघू बढ़िस।
NUM 14:45 तब अमालेकीमन अऊ कनानीमन, जेमन ओ पहाड़ी देस म रहत रिहिन, ओमन खाल्हे उतरके इसरायलीमन ऊपर हमला कर दीन अऊ ओमन ला होरमा सहर तक मारत चले गीन।
NUM 15:1 यहोवा ह मूसा ला कहिस,
NUM 15:2 “इसरायलीमन ले बात कर अऊ ओमन ला कह: ‘जब तुमन ओ देस म हबरव, जेला मेंह तुम्हर घर के रूप म देवत हंव
NUM 15:3 अऊ तुमन यहोवा ला सुख-देवइया खुसबू के रूप म भेड़-बकरी या गाय-बईला के झुंड ले जेवन-बलिदान चघावव—चाहे होम-बलिदान या चढ़ावा होवय, बिसेस मन्नत या स्वेच्छा-बलिदान या तिहार-बलिदान होवय—
NUM 15:4 त जऊन मनखे ह चढ़ावा लानथे, ओह यहोवा ला जैतून तेल के एक हीन के चौथा भाग म सनाय उत्तम पीसान के एक एपा के दसवां भाग के एक अन्न-बलिदान चघावय।
NUM 15:5 होम-बलिदान या चढ़ावा बर हर एक मेढ़ा-पीला के संग पेय-बलिदान के रूप म अंगूर के मंद के एक हीन के चौथा भाग तियार करव।
NUM 15:6 “ ‘एक मेढ़ा-पीला के संग जैतून तेल के एक हीन के तीसरा भाग म सनाय उत्तम पीसान के एक एपा के दू-दसवां भाग के एक अन्न-बलिदान,
NUM 15:7 अऊ पेय-बलिदान बर अंगूर के मंद के एक हीन के तीसरा भाग ला, यहोवा ला सुख-देवइया सुगंध के रूप म चघावव।
NUM 15:8 “ ‘जब तुमन यहोवा बर एक होम-बलिदान या चढ़ावा, एक बिसेस मन्नत या मेल-बलिदान के चढ़ावा बर एक बछवा तियार करथव,
NUM 15:9 त बछवा के संग जैतून तेल के आधा हीन ले सनाय उत्तम पीसान के एक एपा के तीन-दसवां भाग के एक अन्न-बलिदान लानव,
NUM 15:10 अऊ पेय-बलिदान के रूप म आधा हीन अंगूर के मंद घलो लानव। येह यहोवा ला महकत सुख-देवइया एक जेवन-बलिदान होही।
NUM 15:11 हर बछवा या मेढ़ा, हर मेढ़ा-पीला या छेरी-पीला ला इही तरीका ले तियार करे जावय।
NUM 15:12 हर एक बलिदान के तियारी बर, तुमन इही तरीका अपनावव।
NUM 15:13 “ ‘हर एक मनखे, जऊन ह उहां देस म जनमे हवय, ओह ये चीजमन ला ये किसम ले करय, जब ओह यहोवा ला महकत सुख-देवइया एक जेवन-बलिदान चघाथे।
NUM 15:14 अवइया पीढ़ी-पीढ़ी तक, जब कोनो परदेसी या कोनो अऊ मनखे, जऊन ह तुम्हर बीच म रहत हे, यदि ओह यहोवा ला महकत सुख-देवइया जेवन-बलिदान चघाथे, त ओह वइसने ही करय जइसने तुमन करथव।
NUM 15:15 तुम्हर बर अऊ तुम्हर बीच रहइया परदेसी बर समाज के ओहीच नियम होवय; येह अवइया पीढ़ी-पीढ़ी तक हमेसा के बिधि ठहिरय। तुमन अऊ परदेसीमन यहोवा के आघू म एक समान होहू:
NUM 15:16 ओहीच कानून अऊ बिधि तुम्हर अऊ तुम्हर बीच रहइया परदेसी दूनों बर लागू होही।’ ”
NUM 15:17 फेर यहोवा ह मूसा ला कहिस,
NUM 15:18 “इसरायलीमन ले बात कर अऊ ओमन ला कह: ‘जऊन देस म मेंह तुमन ला ले जावत हंव, जब तुमन उहां हबरव
NUM 15:19 अऊ ओ देस के जेवन ला खावव, त ओकर एक भाग यहोवा ला बलिदान के रूप म चघावव।
NUM 15:20 अपन भुइयां के ऊपज के पहिली भाग के रूप म एक रोटी चघावव अऊ येला कोठार के बलिदान के रूप म चघावव।
NUM 15:21 अवइया पीढ़ी-पीढ़ी तक तुमन ला अपन भुइयां के पहिली ऊपज ले यहोवा ला ये बलिदान चघाना हे।
NUM 15:22 “ ‘यदि समाज के रूप म तुमन अनजाने म, यहोवा के मूसा ला दिये कोनो हुकूम के पालन करे म असफल होथव—
NUM 15:23 यहोवा दुवारा मूसा के जरिये तुमन ला दिये कोनो हुकूम, जेह पीढ़ी-पीढ़ी ले चले आवत हे—
NUM 15:24 अऊ यदि येह अनजाने म समाज के बिगर जानकारी म होथे, तब पूरा समाज ह यहोवा ला एक महकत सुख-देवइया होम-बलिदान बर एक बछवा चघावय, अऊ संग म येकर बताय गे अन्न-बलिदान अऊ पेय-बलिदान, अऊ एक ठन बोकरा पाप-बलिदान बर चघावय।
NUM 15:25 पुरोहित ह पूरा इसरायली समाज बर प्रायस्चित करय, अऊ ओमन के पाप छेमा हो जाही, काबरकि ये पाप ह जानबूझके नइं करे गे रिहिस अऊ ओमन यहोवा ला अपन गलती बर जेवन-बलिदान अऊ पाप-बलिदान चघाय हवंय।
NUM 15:26 पूरा इसरायली समाज अऊ ओमन के बीच रहइया परदेसीमन के पाप छेमा हो जाही, काबरकि ओ जम्मो झन अनजाने म करे गे गलती म सामिल रिहिन।
NUM 15:27 “ ‘पर यदि एक मनखे ह अनजाने म पाप करथे, त ओ मनखे ह पाप-बलिदान बर एक साल के बकरी लानय।
NUM 15:28 पुरोहित ह यहोवा के आघू म ओ मनखे बर प्रायस्चित करय, जऊन ह अनजाने म पाप करे हवय, अऊ जब प्रायस्चित कर लिये जाथे, त ओ मनखे के पाप छेमा हो जाही।
NUM 15:29 ओहीच कानून हर ओ मनखे ऊपर लागू होथे, जऊन ह अनजाने म पाप करथे, चाहे ओह देस म जनमे कोनो इसरायली हो या फेर तुम्हर बीच म रहइया कोनो परदेसी।
NUM 15:30 “ ‘पर ओ मनखे, जऊन ह जानबूझके पाप करथे, अऊ यहोवा के निन्दा करथे, चाहे जनमजात देसी हो या परदेसी, ओला इसरायलीमन ले जरूर अलग करे जावय।
NUM 15:31 काबरकि ओह यहोवा के बचन ला तुछ समझिस अऊ ओकर हुकूम ला टोरे हवय, ओला खचित अलग कर दिये जावय; ओकर दोस ओकर ऊपर बने रहिथे।’ ”
NUM 15:32 जब इसरायलीमन सुन्ना जगह म रिहिन, त एक मनखे मिलिस, जऊन ह बिसराम दिन म लकड़ी बीनत रहय।
NUM 15:33 जेमन ला ओह लकड़ी बीनत मिलिस, ओमन ओला मूसा अऊ हारून अऊ जम्मो सभा के आघू म लानिन,
NUM 15:34 अऊ ओमन ओला हिरासत म रखिन, काबरकि अइसे मनखे के संग का करे जावय, ये बात ह साफ नइं रिहिस।
NUM 15:35 तब यहोवा ह मूसा ला कहिस, “ओ मनखे के मरना जरूरी ए। सिविर के बाहिर पूरा सभा ह ओला पथरवाह करय।”
NUM 15:36 तब सभा ह ओला सिविर के बाहिर ले गीस अऊ पथरवाह करके मार डारिस, जइसे कि यहोवा ह मूसा ला हुकूम दे रिहिस।
NUM 15:37 फेर यहोवा ह मूसा ला कहिस,
NUM 15:38 “इसरायलीमन ले बात कर अऊ ओमन ला कह: ‘अवइया पीढ़ी-पीढ़ी तक तुमन अपन कपड़ा के छोर म झालर लगाय करव, अऊ हर झालर ह नीला रंग के डोरी ले बने रहय।
NUM 15:39 ये झालरमन ला जब भी तुमन देखहू, त येह तुमन ला यहोवा के ओ जम्मो हुकूम ला सुरता कराही, जेकर पालन तुमन ला करना हे अऊ तुमन अपन मन अऊ आंखी के लालसा म पड़के अपनआप से बेभिचार नइं करहू।
NUM 15:40 तब तुमन मोर जम्मो हुकूम ला पालन करे बर सुरता करहू अऊ अपनआप ला अपन परमेसर बर पबितर करहू।
NUM 15:41 मेंह यहोवा तुम्हर परमेसर अंव, जऊन ह तुम्हर परमेसर होय बर तुमन ला मिसर देस ले निकाल लानिस। मेंह यहोवा तुम्हर परमेसर अंव।’ ”
NUM 16:1 कोरह, जेह लेवी के परपोता, कहात के पोता अऊ ईसहार के बेटा रिहिस, अऊ कुछू रूबेनी—जेमा एलीआब के बेटा दातान अऊ अबीराम, अऊ पेलेत के बेटा ओन—उदंड हो गीन
NUM 16:2 अऊ येमन आके मूसा के बिरूध हो गीन। ओमन के संग 250 इसरायली मनखे घलो सामिल हो गीन, जेमन समाज के नामी अगुवा अऊ समिति के सदस्य घलो चुने गे रिहिन।
NUM 16:3 ओमन मूसा अऊ हारून के बिरोध करे बर एक दल के रूप म आईन अऊ ओमन ला कहिन, “तुमन अति कर दे हवव! पूरा समाज ह पबितर हे; येमा के हर एक जन पबितर हे, अऊ यहोवा ह ओमन के संग हवय। तब तुमन अपनआप ला यहोवा के सभा के ऊपर काबर ठहिराथव?”
NUM 16:4 मूसा ह येला सुनके, दुख म मुहूं-भरसा गिरिस।
NUM 16:5 तब ओह कोरह अऊ ओकर जम्मो दल ला कहिस: “कल बिहनियां यहोवा ह देखाही कि कोन ह ओकर अय अऊ कोन ह पबितर हवय, अऊ ओह ओ मनखे ला अपन लकठा म आवन दीही। जऊन मनखे ला ओह चुनही, ओला ओह अपन लकठा म लानही।
NUM 16:6 हे कोरह, तें अऊ तोर पाछू चलइया मनखेमन ये काम करव: धूपदानमन ला लेवव
NUM 16:7 अऊ कल यहोवा के आघू म ओमा कोइला के अंगरा अऊ धूप डालव। जऊन मनखे ला यहोवा ह चुनही, ओह पबितर अय। तुम लेवीमन अति कर दे हवव!”
NUM 16:8 मूसा ह कोरह ला ये घलो कहिस, “हे लेवीमन, तुमन सुनव!
NUM 16:9 का येह तुम्हर बर परयाप्त नो हय कि इसरायल के परमेसर ह तुमन ला बाकि इसरायली समाज ले अलग करे हवय अऊ तुमन ला अपन लकठा म लाने हवय कि तुमन यहोवा के पबितर-तम्बू म सेवा करव अऊ समाज के आघू म ठाढ़ होके ओमन के सेवा करव?
NUM 16:10 ओह तोला अऊ तोर जम्मो संगी लेवीमन ला अपन लकठा म लाने हवय, पर अब तेंह पुरोहित के पद ला घलो पाय के कोसिस करत हस।
NUM 16:11 ये काम ह यहोवा के बिरूध अय कि तें अऊ तोर जम्मो मंडली एक संग जूरे हव। हारून ह कोन ए कि तेंह ओकर बिरूध म बड़बड़ावत हस?”
NUM 16:12 तब मूसा ह एलीआब के बेटा दातान अऊ अबीराम ला बुलवाईस, पर ओमन कहिन, “हमन नइं आवन!
NUM 16:13 का येह परयाप्त नो हय कि तेंह दूध अऊ मंधरस के भरमार वाले देस ले हमन ला ये सुन्ना जगह म मारे बर ले आय हस? अऊ अब हमर ऊपर मालिक बने चाहत हस!
NUM 16:14 येकर छोंड़, तेंह हमन ला अइसन देस म नइं लाने, जिहां दूध अऊ मंधरस के भरमार हे अऊ न ही हमन ला खेत अऊ अंगूर के बारीमन के उत्तराधिकार दे हस। का ये मनखेमन संग गुलाम सहीं बरताव करे चाहथस? नइं, हमन नइं आवन!”
NUM 16:15 तब मूसा ह बहुंत गुस्सा होईस अऊ यहोवा ला कहिस, “ओमन के भेंट ला गरहन झन कर। मेंह ओमन ले एक गदहा तक नइं ले हंव, अऊ न ही ओमन के कुछू हानि करे हंव।”
NUM 16:16 मूसा ह कोरह ले कहिस, “तें अऊ तोर जम्मो मंडली ला कल यहोवा के आघू म आना हे—तें अऊ तोर संगीमन अऊ हारून।
NUM 16:17 हर मनखे अपन धूपदान ला लेवय अऊ ओमा धूप डालय—कुल मिलाके 250 धूपदान—येला यहोवा के आघू म अरपन करव। तें अऊ हारून घलो अपन धूपदान ला अरपन करव।”
NUM 16:18 तब ओमन के हर एक जन अपन-अपन धूपदान ला लीन, ओमा कोइला के अंगरा अऊ धूप डालिन, अऊ मिलापवाला तम्बू के मुंहटा म मूसा अऊ हारून के संग ठाढ़ हो गीन।
NUM 16:19 जब कोरह ह अपन जम्मो पाछू चलइयामन ला मिलापवाला तम्बू के मुंहटा म ओमन के बिरोध म इकट्ठा कर लीस, त यहोवा के महिमा ह जम्मो सभा ऊपर परगट होईस।
NUM 16:20 यहोवा ह मूसा अऊ हारून ला कहिस,
NUM 16:21 “अपनआप ला ये सभा ले अलग करव, ताकि मेंह तुरते येमन ला खतम कर दंव।”
NUM 16:22 पर मूसा अऊ हारून दुख म मुहूं-भरसा गिरिन अऊ गोहार पारके कहिन, “हे परमेसर, तेंह जम्मो जीयत परानीमन ला सांस देथस, त का सिरिप एक आदमी के पाप करे के कारन पूरा सभा ऊपर गुस्सा करबे?”
NUM 16:23 तब यहोवा ह मूसा ला कहिस,
NUM 16:24 “इसरायली सभा ला कह, ‘कोरह, दातान अऊ अबीराम के तम्बू ले हट जावव।’ ”
NUM 16:25 मूसा ह उठिस अऊ दातान अऊ अबीराम करा गीस, अऊ इसरायल के अगुवामन ओकर पाछू-पाछू गीन।
NUM 16:26 ओह इसरायली सभा ला चेताईस, “ये दुस्ट मनखेमन के तम्बू ले दूरिहा हट जावव! ओमन के कुछू भी चीज ला झन छुवव, नइं तो ओमन के जम्मो पाप के कारन तुमन खतम हो जाहू।”
NUM 16:27 तब ओमन कोरह, दातान अऊ अबीराम के तम्बू ले दूरिहा हट गीन। दातान अऊ अबीराम बाहिर निकलके अपन-अपन घरवाली, लइका अऊ छोटे लइकामन संग अपन-अपन तम्बू के दुवार म खड़े रिहिन।
NUM 16:28 तब मूसा ह कहिस, “ये किसम ले तुमन जान लूहू कि यहोवा ह ये जम्मो काम करे बर मोला पठोय हवय अऊ येह मोर उपाय नो हय।
NUM 16:29 यदि ये मनखेमन सुभाविक मऊत मरके जम्मो मानव-जाति सहीं दुख भोगथें, तब यहोवा ह मोला नइं पठोय हे।
NUM 16:30 पर यदि यहोवा ह कुछू एकदम नवां चीज करथे, अऊ धरती ह अपन मुहूं फारथे अऊ येमन ला येमन के जम्मो चीज के संग लील लेथे, अऊ येमन जीयत खाल्हे अधोलोक म चले जावंय, तब तुमन जान लूहू कि ये मनखेमन यहोवा के अपमान करे हवंय।”
NUM 16:31 मूसा के ये बात खतम होते ही, ओमन के खाल्हे भुइयां ह दू भाग म फट गीस
NUM 16:32 अऊ धरती ह अपन मुहूं ला फारिस अऊ ओमन ला अऊ ओमन के घर के सामान अऊ कोरह के संग के जम्मो मनखे अऊ ओमन के सामान ला लील लीस।
NUM 16:33 ओमन जीते जी खाल्हे अधोलोक म अपन सामान सहित हमा गीन; ओमन के हमाय के बाद, धरती फेर जस के तस हो गीस, अऊ ओमन नास होके समाज के बीच ले मिटा गीन।
NUM 16:34 ओमन के चिल्लई सुनके, ओमन के आसपास के जम्मो इसरायलीमन ये चिचियावत भागिन, “धरती ह हमन ला घलो लीलनेवाला हे!”
NUM 16:35 तब यहोवा ले आगी निकलिस अऊ ओ 250 आदमी ला भसम कर दीस, जऊन मन धूप चढ़ात रिहिन।
NUM 16:36 तब यहोवा ह मूसा ला कहिस,
NUM 16:37 “हारून पुरोहित के बेटा एलिआजर ला कह कि ओह आगी म ले धूपदानमन ला हटा ले अऊ बरत कोइला ला कुछू दूरिहा म बगरा दे, काबरकि ओ धूपदानमन पबितर अंय—
NUM 16:38 ओ मनखेमन के धूपदान, जऊन मन पाप के बदले अपन परान गंवाय हें। ओ धूपदानमन ला पीटके चद्दर बना दव, ताकि ओह बेदी म मढ़े जावय, काबरकि ओमन यहोवा ला चढ़ाय गे रिहिन अऊ पबितर हो गे हवंय। येमन इसरायलीमन बर एक चिनहां ठहिरंय।”
NUM 16:39 तब एलिआजर पुरोहित ह ओ कांसा के धूपदानमन ला संकेलिस, जेला ओमन लाने रिहिन, जेमन जलके मर गीन, अऊ ओह ओमन ला बेदी ऊपर मढ़े बर पीट-पीटके चद्दर बना दीस,
NUM 16:40 जइसे कि यहोवा ह ओला मूसा के दुवारा निरदेस देय रिहिस। अइसने इसरायली सभा ला सुरता कराय बर करे गीस, ताकि हारून के संतानमन ला छोंड़ अऊ कोनो आने मनखे आके यहोवा के आघू म धूप झन जलावय, नइं तो ओह कोरह अऊ ओकर संगवारीमन सहीं हो जाही।
NUM 16:41 ओकर दूसर दिन पूरा इसरायली समाज ह मूसा अऊ हारून के बिरूध ये कहिके बड़बड़ाय लगिस, “तुमन यहोवा के मनखेमन ला मार डारेव।”
NUM 16:42 पर जब ओ सभा ह मूसा अऊ हारून के बिरोध म जूरिस अऊ मिलापवाला तम्बू कोति मुड़िस, त अचानक बादर ह तम्बू ला ढांप लीस अऊ यहोवा के महिमा परगट होईस।
NUM 16:43 तब मूसा अऊ हारून मिलापवाला तम्बू के सामने गीन,
NUM 16:44 अऊ यहोवा ह मूसा ला कहिस,
NUM 16:45 “ये सभा ले दूरिहा चल दे ताकि मेंह अभीच येमन ला खतम कर दंव।” अऊ मूसा अऊ हारून दुख म मुहूं-भरसा गिरिन।
NUM 16:46 तब मूसा ह हारून ला कहिस, “अपन धूपदान ला ले अऊ ओमा बेदी के बरत कोइला लेके ओमा धूप डाल, अऊ बिगर देरी करे सभा के मनखेमन करा जा अऊ ओमन बर पछताप कर। यहोवा के कोप ह भड़के हवय; अऊ महामारी ह सुरू हो गे हवय।”
NUM 16:47 हारून ह वइसने ही करिस, जइसने मूसा ह कहिस, अऊ ओह सभा के बीच म दऊड़के गीस। महामारी ह मनखेमन के बीच सुरू हो गे रिहिस, पर हारून ह धूप चढ़ाईस अऊ ओमन बर पछताप करिस।
NUM 16:48 ओह मरे अऊ जीयत मनखेमन के बीच ठाढ़ होईस, अऊ महामारी ह रूक गीस।
NUM 16:49 पर 14,700 मनखे महामारी ले मर गीन; येह ओमन ला छोंड़के आय, जेमन कोरह के कारन मरे रिहिन।
NUM 16:50 तब हारून ह मिलापवाला तम्बू के दुवार म मूसा करा लहुंट आईस, काबरकि महामारी ह खतम हो गे रिहिस।
NUM 17:1 फेर यहोवा ह मूसा ला कहिस,
NUM 17:2 “इसरायलीमन ले गोठिया अऊ ओमन ले बारह ठन लउठी ले, ओमन के पुरखा के गोत्र के हर अगुवा ले एक ठन लउठी। हर एक अगुवा के नांव ओकर लउठी म लिख।
NUM 17:3 लेवी के लउठी म हारून के नांव लिख, काबरकि हर गोत्र के मुखिया के नांव म एक लउठी होना चाही।
NUM 17:4 ओ लउठीमन ला मिलापवाला तम्बू म करार कानून के सन्दूक के आघू म रख, जिहां मेंह तुम्हर ले मिलथंव।
NUM 17:5 तब ओ मनखे जेला मेंह चुनहूं, ओकर लउठी म पीका निकलही, अऊ इसरायलीमन तोर बिरूध म जऊन लगातार बड़बड़ावत हें, ओकर ले मेंह अपनआप ला अलग कर लूहूं।”
NUM 17:6 त मूसा ह इसरायलीमन ले बात करिस, अऊ ओमन के अगुवामन ओला बारह ठन लउठी दीन, ओमन के पुरखा के गोत्र के हर अगुवा बर एक ठन लउठी, अऊ हारून के लउठी घलो ओमा रिहिस।
NUM 17:7 मूसा ह लउठीमन ला करार कानून के तम्बू म यहोवा के आघू म रखिस।
NUM 17:8 ओकर दूसर दिन मूसा ह तम्बू के भीतर गीस, त ओह देखिस कि लेवी गोत्र के हारून के लउठी म सिरिप पीका ही नइं निकले रिहिस, पर ओमा कली निकलके, फूल फूटके ओमा बादाम फर भी लगे रिहिस।
NUM 17:9 तब मूसा ह जम्मो लउठी ला यहोवा के आघू ले निकालके इसरायलीमन करा ले आईस। ओमन लउठीमन ला देखिन, अऊ हर एक अगुवा ह अपन-अपन लउठी ला ले लीस।
NUM 17:10 तब यहोवा ह मूसा ला कहिस, “हारून के लउठी ला करार कानून के सन्दूक के आघू म वापिस रख दे, ताकि येह बिदरोहीमन बर एक चिनहां के रूप म रहय। येह मोर बिरूध ओमन के बड़बड़ई ला खतम कर दीही, अऊ ओमन नइं मरहीं।”
NUM 17:11 मूसा ह वइसे ही करिस, जइसे यहोवा ह ओला हुकूम दे रिहिस।
NUM 17:12 इसरायलीमन मूसा ले कहिन, “हमन मर जाबो! हमन भटक गे हन, हमन जम्मो झन भटक गे हन!
NUM 17:13 जऊन ह यहोवा के पबितर-तम्बू के लकठा म भी आही, ओह मर जाही। का हमन जम्मो के जम्मो मर जाबो?”
NUM 18:1 यहोवा ह हारून ला कहिस, “तें, तोर बेटामन अऊ तोर परिवार, पबितर-स्थान ले संबंधित अपराध के काम के जिम्मेदारी लेवंय, अऊ तें अऊ तोर बेटामन पुरोहित के पद ले संबंधित अपराध के जिम्मेदारी लेवंय।
NUM 18:2 तोर पुरखा के गोत्र के तोर लेवी संगीमन ला अपन संग लेय ले, ताकि जब तें अऊ तोर बेटामन करार कानून के तम्बू के आघू म सेवा करव, त ओमन तुम्हर मदद करंय।
NUM 18:3 ओमन तोर बर जिम्मेदार होवंय अऊ तम्बू के जम्मो काम करंय, पर ओमन पबितर-स्थान के चीजमन के लकठा म या बेदी करा झन जावंय। नइं तो ओमन अऊ तें दूनों मर जाहू।
NUM 18:4 ओमन तोर संग काम करहीं अऊ मिलापवाला तम्बू के देखरेख बर जिम्मेदार होहीं—तम्बू के जम्मो काम बर—पर कोनो आने मनखे तोर लकठा म झन आवय।
NUM 18:5 “पबितर-स्थान अऊ बेदी के देखरेख बर तें जिम्मेदार होबे, ताकि मोर कोप ह इसरायलीमन ऊपर फेर झन भड़के।
NUM 18:6 मेंह इसरायलीमन के बीच ले तोर संगी लेवीमन ला चुने हवंव; येमन मिलापवाला तम्बू म काम करे बर यहोवा ला समरपित तोर बर एक भेंट के सहीं अंय।
NUM 18:7 पर सिरिप तें अऊ तोर बेटामन ही पुरोहित के रूप म बेदी ले संबंधित हर काम अऊ परदा के भीतर के काम करहू। मेंह तोला पुरोहित के पद ला एक भेंट के रूप म देवत हंव। यदि कोनो आने मनखे पबितर-स्थान के लकठा म आथे, त ओह मार डारे जावय।”
NUM 18:8 तब यहोवा ह हारून ला कहिस, “मोला चघाय गे बलिदानमन के जिम्मेदारी मेंह खुद तोला देवत हंव; ओ जम्मो पबितर बलिदान, जेला इसरायलीमन मोला देथें, ओमन ला मेंह तोला अऊ तोर बेटामन ला तुम्हर भाग, तुम्हर हमेसा के भाग के रूप म देवत हंव।
NUM 18:9 सबले पबितर बलिदानमन, जेला आगी ले अलग रखे जाथे, ओमन तोर होहीं। ओ जम्मो भेंट म ले, जेला ओमन मोर करा सबले पबितर बलिदान के रूप म लानथें, चाहे ओह अन्न या पाप या दोस-बलिदान होवय, ओ भाग ह तोर अऊ तोर बेटामन के होही।
NUM 18:10 येला सबले पबितर चीज समझके खाय करव; हर एक पुरूस येला खावय। येला तेंह पबितर समझबे।
NUM 18:11 “येह घलो तोर अय: कोनो भी चीज, जेला इसरायलीमन के जम्मो हलाय-बलिदान के भेंट म ले अलग रखे जाथे। मेंह ये चीज तोला अऊ तोर बेटा अऊ बेटीमन ला तोर हमेसा के भाग के रूप म देवत हंव। तोर घर-परिवार के हर ओ मनखे जऊन ह रीति-बिधि से सुध हे, ओह येला खा सकथे।
NUM 18:12 “मेंह तोला ओ जम्मो बढ़िया जैतून तेल अऊ बढ़िया नवां अंगूर के मंद अऊ अनाज देवत हंव, जेला ओमन यहोवा ला अपन फसल के पहिली फर के रूप म देथें।
NUM 18:13 देस के ओ जम्मो पहिली-फसल, जेला ओमन यहोवा करा लानथें, ओह तोर होही। तोर घर-परिवार के हर ओ मनखे जऊन ह रीति-बिधि से सुध हे, ओह येला खा सकथे।
NUM 18:14 “इसरायल म कोनो भी चीज यहोवा ला अरपित करे जाथे, ओह तोर अय।
NUM 18:15 हर परानी के पहिलांत, चाहे ओह मनखे हो या पसु, जेला यहोवा ला अरपन करे जाथे, ओह तोर अय। पर जरूरी अय कि हर पहिलांत बेटा अऊ असुध पसु के हर पहिलांत नर ला दाम लेके छोंड़ देबे।
NUM 18:16 जब ओमन एक महिना के हो जाथें, त तेंह पबितर-स्थान के सेकेल के मुताबिक ठहिराय गे छुटकारा के दाम चांदी के पांच सेकेल लेके ओमन ला छोंड़ देबे, येह वजन म बीस गेरा होथे।
NUM 18:17 “पर तेंह कोनो गाय, भेड़ या बकरी के पहिलांत ला दाम लेके झन छोंड़बे; येमन पबितर पसु अंय। ओमन के खून ला बेदी ऊपर छिड़कबे अऊ ओमन के चरबी ला यहोवा ला महकत सुख-देवइया एक जेवन-बलिदान के रूप म जलाबे।
NUM 18:18 ओमन के मांस ह तोर होवय, जइसे कि हलाय-बलिदान के छाती अऊ जेवनी जांघ ह तोर होथे।
NUM 18:19 जऊन पबितर बलिदान इसरायलीमन यहोवा ला चघाथें, ओमा ले अलग रखे गे कोनो भी चीज मेंह तोला अऊ तोर बेटा अऊ बेटीमन ला तोर हमेसा के भाग के रूप म देवत हंव। येह तोर अऊ तोर संतानमन बर यहोवा के आघू म हमेसा बर नून के करार ए।”
NUM 18:20 फेर यहोवा ह हारून ला कहिस, “ओमन के देस म तोर कोनो उत्तराधिकार नइं होही, अऊ न ही ओमन के बीच तोर कोनो भाग होही; इसरायलीमन के बीच म, मेंह तोर भाग अऊ उत्तराधिकार अंव।
NUM 18:21 “मिलापवाला तम्बू म लेवीमन सेवा के जऊन काम करथें, ओकर बदले म, मेंह इसरायल म ओमन ला उत्तराधिकार के रूप म जम्मो दसमांस देवत हंव।
NUM 18:22 अब के बाद, इसरायलीमन मिलापवाला तम्बू के लकठा म झन जावंय, नइं तो ओमन अपन पाप के परतिफल भोगहीं अऊ मर जाहीं।
NUM 18:23 येमन लेवी अंय, जेमन मिलापवाला तम्बू म काम करहीं अऊ येकर बिरूध करे गे कोनो अपराध के जिम्मेदारी ओमन ऊपर होही। येह अवइया पीढ़ी-पीढ़ी तक एक बिधि ठहिरय। इसरायलीमन के बीच म, ओमन के कोनो उत्तराधिकार नइं होही।
NUM 18:24 बदले म, मेंह लेवीमन ला ओमन के उत्तराधिकार के रूप म ओ दसमांस ला देवत हंव, जेला इसरायलीमन यहोवा करा एक बलिदान के रूप म चघाथें। एकरे कारन मेंह ओमन के बारे म कहेंव: ‘इसरायलीमन के बीच म ओमन के कोनो उत्तराधिकार नइं होही।’ ”
NUM 18:25 यहोवा ह मूसा ला कहिस,
NUM 18:26 “लेवीमन ले बात कर अऊ ओमन ला कह: ‘जब तुमन ला इसरायलीमन ले दसमांस मिलथे, जेला मेंह तुमन ला तुम्हर उत्तराधिकार के रूप म देथंव, त तुमन ओ दसमांस के दसवां भाग यहोवा ला भेंट के रूप म चघावव।
NUM 18:27 तुम्हर भेंट के हिसाब तुम्हर बर कोठार के अनाज के रूप म या अंगूर के रसकुंड के रस के रूप म करे जाही।
NUM 18:28 ये किसम ले तुमन घलो ओ जम्मो दसमांस म ले यहोवा ला एक भेंट चघाहू, जेह तुमन ला इसरायलीमन ले मिलथे। अऊ येह जरूरी अय कि ये दसमांस म ले यहोवा के भाग ला तुमन हारून पुरोहित ला देवव।
NUM 18:29 तुमन ला जऊन चीज भी दिये जाथे, ओ हर चीज के सबले बने अऊ पबितर भाग ला यहोवा के भाग मानके भेंट चघावव।’
NUM 18:30 “लेवीमन ला कह: ‘जब तुमन सबले बने भाग ला चघाथव, त येला तुम्हर बर कोठार के अनाज या अंगूर के रसकुंड के रस सहीं हिसाब करे जाही।
NUM 18:31 तुमन अपन परिवार सहित बांचे चीज ला कहूं मेर खा सकत हव, काबरकि येह तुम्हर मिलापवाला तम्बू म काम करे के मजदूरी अय।
NUM 18:32 येकर सबले बने भाग ला चघाय के दुवारा तुमन ये बात म दोसी नइं ठहिरहू; तब तुमन इसरायलीमन के पबितर बलिदानमन ला असुध नइं करहू, अऊ तुमन नइं मरहू।’ ”
NUM 19:1 यहोवा ह मूसा अऊ हारून ला कहिस:
NUM 19:2 “येह कानून के एक जरूरत अय, जेकर हुकूम यहोवा ह दे हवय: इसरायलीमन ला कह कि ओमन एक लाल रंग के बछिया बिगर दोस के लानंय, जेकर ऊपर जुड़ा कभू नइं रखे गे हवय।
NUM 19:3 येला एलिआजर पुरोहित ला दे दव; येला सिविर के बाहिर लाने जावय अऊ ओकर आघू म मारे जावय।
NUM 19:4 तब एलिआजर पुरोहित ह एकर कुछू खून ला अपन अंगठी म लेवय अऊ येला मिलापवाला तम्बू के सामने कोति सात बार छिंचय।
NUM 19:5 ओकर बाद ओकर देखत म, ओ बछिया ला जला दिये जावय—ओकर चाम, मांस, लहू अऊ पोटा ला।
NUM 19:6 पुरोहित ह कुछू देवदार लकड़ी, जूफा अऊ सिन्दूरी रंग के ऊन लेवय अऊ ये चीजमन ला ओ बरत बछिया के ऊपर फटिक देवय।
NUM 19:7 ओकर बाद, जरूरी अय कि पुरोहित ह अपन ओनहा ला धोवय अऊ खुद नहावय। तब ओह सिविर म आवय, पर ओह बिधि के रूप म सांझ तक असुध रहिही।
NUM 19:8 जऊन मनखे ह येला जलाथे, ओह घलो अपन ओनहा ला जरूर धोवय अऊ नहावय, अऊ ओह घलो सांझ तक असुध रहिही।
NUM 19:9 “ओ मनखे जऊन ह सुध हे, ओह ओ बछिया के राख ला इकट्ठा करय अऊ ओला सिविर के बाहिर बिधि के रूप म सुध करे गे एक जगह म रख देवय। इसरायली समाज ह पानी ला सुध करे म येकर उपयोग करय; येह पाप ले सुध होय बर अय।
NUM 19:10 जऊन मनखे ह बछिया के राख ला इकट्ठा करथे, ओह घलो अपन ओनहा ला जरूर धोवय, अऊ ओह घलो सांझ तक असुध रहिही। येह इसरायली अऊ ओमन के बीच रहइया परदेसी दूनों बर हमेसा-हमेसा के एक बिधि ठहिरही।
NUM 19:11 “जऊन मनखे कोनो मनखे के लास ला छूही, त ओह सात दिन तक असुध रहिही।
NUM 19:12 जरूरी अय कि ओह तीसरा दिन अऊ सातवां दिन अपनआप ला पानी ले सुध करय; तब ओह सुध होही। पर यदि ओह तीसरा अऊ सातवां दिन अपनआप ला सुध नइं करय, त ओह सुध नइं होही।
NUM 19:13 यदि ओह कोनो मनखे के लास ला छूए के बाद अपनआप ला सुध नइं करय, त ओह यहोवा के पबितर-तम्बू ला असुध करथे। अइसे मनखे ला इसरायल ले अलग कर दिये जावय। ओह असुध हवय, काबरकि ओकर ऊपर सुध करइया पानी छिंचे नइं गे हवय; ओकर असुधता ओकर ऊपर बने रहिथे।
NUM 19:14 “ये कानून ह तब लागू होथे, जब कोनो मनखे कोनो तम्बू म मर जाथे: कोनो मनखे ओ तम्बू के भीतर जाथे या जऊन ह ओ तम्बू म हवय, ओह सात दिन तक असुध रहिही,
NUM 19:15 अऊ ओ तम्बू म हर एक खुला बरतन, जेला ढकना ले ढांपे नइं गे हवय, ओह असुध होही।
NUM 19:16 “जऊन मनखे ह बाहिर खुला मैदान म तलवार ले मारे गे मनखे या सुभाविक मिरतू ले मरे मनखे या मनखे के हाड़ा या कोनो कबर ला छू लेथे, त ओह सात दिन तक असुध रहिही।
NUM 19:17 “असुध मनखे बर, ओ जलाय गे सुध करइया पाप-बलिदान म ले कुछू राख लेके एक बरतन म रखव अऊ ओकर ऊपर ताजा पानी डारव।
NUM 19:18 तब बिधि के मुताबिक कोनो सुध मनखे ह कुछू जूफा लेवय अऊ येला पानी म बोरके तम्बू अऊ जम्मो सामान अऊ ओ मनखेमन ऊपर छिंचय, जेमन उहां हवंय। ओह ओ मनखे के ऊपर घलो छिंचय, जऊन ह कोनो मनखे के हाड़ा या कोनो कबर या कोनो मारे गे मनखे या कोनो सुभाविक मिरतू ले मरे मनखे ला छू ले हवय।
NUM 19:19 ओ मनखे जऊन ह सुध हे, ओह असुध मनखे ऊपर तीसरा अऊ सातवां दिन छिंचय, अऊ सातवां दिन ओह ओला सुध करय। जेमन ला सुध करे जाथे, ओमन अपन कपड़ा ला जरूर धोवंय अऊ नहावंय, अऊ ओ सांझ के बेरा ओमन सुध हो जाहीं।
NUM 19:20 पर जऊन मनखेमन असुध हवंय अऊ यदि अपनआप ला सुध नइं करंय, त ओमन ला समाज ले अलग कर दिये जावय, काबरकि ओमन यहोवा के पबितर-स्थान ला असुध करे हवंय। सुध करइया पानी ह ओमन ऊपर छिंचे नइं गे हवय, अऊ ओमन असुध हवंय।
NUM 19:21 येह ओमन बर हमेसा के बिधि ठहिरय। “जऊन मनखे ह सुध करइया पानी ला छिंचथे, ओह घलो अपन ओनहा ला जरूर धोवय, अऊ जऊन ह सुध करइया पानी ला छूथे, ओह सांझ तक असुध रहिही।
NUM 19:22 जऊन भी चीज ला ओ असुध मनखे छूथे, ओह असुध हो जाथे, अऊ जऊन मनखे ओ चीज ला छूथे, ओह सांझ तक असुध हो जाथे।”
NUM 20:1 पहिला महिना म, जम्मो इसरायली समाज के मनखेमन सीन के सुन्ना जगह म हबरिन, अऊ ओमन कादेस नगर म डेरा डालिन। उहां मिरियम ह मर गीस अऊ ओला उहां माटी दिये गीस।
NUM 20:2 उहां समाज के मनखेमन बर पानी नइं रिहिस, अऊ मनखेमन मूसा अऊ हारून के बिरोध म जूर गीन।
NUM 20:3 ओमन मूसा ले झगरा करे लगिन अऊ कहिन, “बने होतिस कि हमन घलो अपन संगी इसरायलीमन संग, यहोवा के आघू म मर गे रहितेंन!
NUM 20:4 तेंह काबर यहोवा के समाज ला ये सुन्ना जगह म लाने कि हमन अऊ हमर पसुमन इहां मर जावन?
NUM 20:5 तेंह काबर हमन ला मिसर देस ले बाहिर निकालके ये भयानक जगह म ले आय? इहां न तो अनाज या अंजीर, अऊ न ही अंगूर के नार या अनार हवय। अऊ इहां पीये बर पानी घलो नइं ए!”
NUM 20:6 मूसा अऊ हारून सभा ले निकलके मिलापवाला तम्बू के दुवार करा गीन अऊ निरासा म मुहूं-भरसा गिरिन, अऊ यहोवा के महिमा ओमन ऊपर परगट होईस।
NUM 20:7 यहोवा ह मूसा ला कहिस,
NUM 20:8 “ओ लउठी ला ले अऊ तें अऊ तोर भाई हारून इसरायली सभा ला एक जगह इकट्ठा करव। अऊ ओमन के देखत म ओ चट्टान ले बात कर अऊ येह अपन म ले पानी निकालही। तेंह समाज बर ये चट्टान म ले पानी निकालबे ताकि ओमन अऊ ओमन के पसु पानी पी सकंय।”
NUM 20:9 तब मूसा ह यहोवा के हुकूम के मुताबिक ओकर आघू म ओ लउठी ला ले लीस।
NUM 20:10 अऊ मूसा अऊ हारून चट्टान के आघू म समाज ला इकट्ठा करिन अऊ मूसा ह ओमन ला कहिस, “हे बिदरोह करइयामन, सुनव! का हमन ला ये चट्टान म ले तुम्हर बर पानी निकाले बर पड़ही?”
NUM 20:11 तब मूसा ह अपन हांथ उठाईस अऊ अपन लउठी ले ओ चट्टान ला दू बार मारिस। तब ओमा ले पानी बहे लगिस, अऊ पूरा समाज अऊ ओमन के पसुमन ओ पानी ला पीईन।
NUM 20:12 पर यहोवा ह मूसा अऊ हारून ला कहिस, “काबरकि तुमन इसरायलीमन के नजर म मोर ऊपर न तो परयाप्त भरोसा रखेव, न ही पबितर मानके आदर देव, एकरसेति तुमन ये समाज ला ओ देस म नइं ले जा सकहू, जेला मेंह ओमन ला दे हंव।”
NUM 20:13 येमन मरीबा पानी के सोतामन रिहिन, जिहां इसरायलीमन यहोवा ले झगरा करिन अऊ जिहां ओह ओमन के बीच म पबितर ठहिराय गीस।
NUM 20:14 मूसा ह एदोम के राजा करा कादेस ले संदेसियामन ला ये कहिके पठोईस: “तोर भाई इसरायल ह ये कहत हे: तेंह हमर ऊपर आय ओ जम्मो मुसीबत ला जानत हस।
NUM 20:15 हमर पुरखामन मिसर देस ला गीन, अऊ हमन उहां बहुंत साल रहेंन। मिसर के मनखेमन हमर अऊ हमर पुरखामन संग बुरा बरताव करिन,
NUM 20:16 पर जब हमन यहोवा ले गोहारेंन, त ओह हमर गोहार ला सुनिस अऊ एक स्वरगदूत पठोके हमन ला मिसर देस ले बाहिर निकालिस। “अब हमन इहां कादेस नगर म हन, जऊन ह तोर राज के तीर म हवय।
NUM 20:17 किरपा करके तोर देस म ले होके हमन ला जावन दे। हमन कोनो खेत या अंगूर के बारी म ले होके नइं जावन, अऊ न ही कोनो कुआं के पानी पीयन। हमन राजा के राजमार्ग म ही जाबो अऊ जब तक तोर राज ले निकल नइं जाबो तब तक न तो जेवनी मुड़बो अऊ न ही डेरी।”
NUM 20:18 पर एदोम ह जबाब दीस: “तुमन इहां ले होके नइं जा सकव; यदि कोसिस करहू, त हमन बाहिर निकलके तलवार से तुम्हर ऊपर हमला करबो।”
NUM 20:19 तब इसरायलीमन ये जबाब दीन: “हमन सिरिप मुख्य सड़क म जाबो, अऊ यदि हमन या हमर पसुमन तुम्हर कोनो पानी ला पीहीं, त हमन ओकर दाम चुकाबो। हमन सिरिप पैदल जाय चाहथन—अऊ कुछू नइं।”
NUM 20:20 फेर ओह ये जबाब दीस: “तुमन इहां ले होके नइं जा सकव।” तब एदोम ह ओमन के बिरूध एक बड़े अऊ सक्तिसाली सेना लेके निकलिस।
NUM 20:21 एदोम ह ओमन ला अपन राज म ले होके जाय बर मना करिस, त इसरायल ह उहां ले मुड़के चल दीस।
NUM 20:22 पूरा इसरायली समाज ह कादेस ले चलके होर पहाड़ करा आईस।
NUM 20:23 एदोम के सीमना के लकठा म, होर पहाड़ म, यहोवा ह मूसा अऊ हारून ला कहिस,
NUM 20:24 “हारून ह अपन पुरखा संग हमेसा बर सुत जाही। ओह ओ देस म नइं जा सकही, जेला मेंह इसरायलीमन ला दे हंव, काबरकि तुमन दूनों मरीबा के सोता करा मोर हुकूम के बिरूध बिदरोह करे रहेव।
NUM 20:25 हारून अऊ ओकर बेटा एलिआजर ला लेके होर पहाड़ के ऊपर जा।
NUM 20:26 हारून के पुरोहिती कपड़ा ला उतारके ओला ओकर बेटा एलिआजर ला पहिरा, काबरकि हारून ह अपन मनखेमन संग मिल जाही; ओह उहां मर जाही।”
NUM 20:27 मूसा ह यहोवा के हुकूम के मुताबिक करिस: ओमन जम्मो समाज के देखत म होर पहाड़ ऊपर गीन।
NUM 20:28 मूसा ह हारून के पुरोहिती कपड़ामन ला उतारिस अऊ ओ कपड़ा ला हारून के बेटा एलिआजर ला पहिरा दीस। अऊ हारून ह उहां पहाड़ के टीप म मर गीस। तब मूसा अऊ एलिआजर पहाड़ ले खाल्हे उतरिन,
NUM 20:29 अऊ जब पूरा समाज ला पता चलिस कि हारून ह मर गे हवय, त जम्मो इसरायलीमन ओकर बर तीस दिन तक बिलाप करिन।
NUM 21:1 जब नेगेव म रहइया अराद के कनानी राजा ये सुनिस कि इसरायल ह अतारीम के सड़क के रसता ले आवत हे, त ओह इसरायलीमन ऊपर हमला करिस अऊ ओमा के कुछू झन ला बंदी बना लीस।
NUM 21:2 तब इसरायल ह यहोवा ले ये मन्नत मानिस: “यदि तेंह ये मनखेमन ला हमर हांथ म कर देबे, त हमन ओमन के सहरमन ला पूरा नास कर देबो।”
NUM 21:3 यहोवा ह इसरायल के बिनती ला सुनिस अऊ कनानीमन ला ओमन के अधीन कर दीस। इसरायलीमन ओमन ला अऊ ओमन के नगरमन ला पूरा नास कर दीन, एकरसेति ओ जगह के नांव होरमा पड़िस।
NUM 21:4 ओमन होर पहाड़ ले आघू बढ़िन अऊ एदोम देस के बाहिर-बाहिर लाल-समुंदर के रसता ला धरिन। पर रसता म मनखेमन के धीरज खतम होय लगिस;
NUM 21:5 ओमन परमेसर अऊ मूसा के बिरूध गोठियाय लगिन, अऊ कहिन, “तेंह काबर हमन ला मिसर देस ले निकालके ये सुन्ना जगह म मरे बर ले आय? इहां न तो रोटी हवय न पानी! अऊ हमन ला ये बेकार के जेवन ले घिन हो गे हवय!”
NUM 21:6 तब यहोवा ह ओमन के बीच जहरिला सांप पठोईस; ओमन मनखेमन ला चाबिन अऊ कतको इसरायलीमन मर गीन।
NUM 21:7 तब मनखेमन मूसा करा आके कहिन, “हमन यहोवा अऊ तोर बिरूध बात करके पाप करे हन। पराथना कर कि यहोवा ह ये सांपमन ला हमर करा ले हटा ले।” तब मूसा ह मनखेमन बर पराथना करिस।
NUM 21:8 यहोवा ह मूसा ला कहिस, “सांप के एक मूरती बनाके खंभा के ऊपर टांग दे; सांप के चाबे मनखे ह ओला देखके जीयत रहिही।”
NUM 21:9 त मूसा ह कांसा के एक ठन सांप के मूरती बनाईस अऊ ओला एक खंभा के ऊपर रख दीस। तब सांप के चाबे जऊन भी मनखे ओ कांसा के सांप ला देखय, त ओह बच जावय।
NUM 21:10 इसरायलीमन आघू बढ़िन अऊ ओबोत नांव के जगह म डेरा डालिन।
NUM 21:11 तब ओमन ओबोत ले कूच करके इये-अबारीम के सुन्ना जगह म डेरा डालिन, जऊन ह मोआब के सामने पूरब कोति हवय।
NUM 21:12 उहां ले ओमन आघू बढ़िन अऊ जेरेद के घाटी म डेरा डालिन।
NUM 21:13 ओमन उहां ले बढ़त गीन अऊ अरनोन के तीर म डेरा डालिन, जऊन ह सुन्ना जगह म हवय अऊ अमोरी राज के सीमना तक फईले हवय। अरनोन ह मोआब के सीमना अय, मोआब अऊ अमोरीमन के बीच म।
NUM 21:14 एकरसेति यहोवा के लड़ई नांव के किताब म ये लिखे हवय: “सूपा म जाहब अऊ घाटीमन, अरनोन
NUM 21:15 अऊ घाटीमन के ढलान जऊन ह आर के इलाका तक जाथे अऊ मोआब के सीमना तक फईले हवय।”
NUM 21:16 उहां ले ओमन आघू बढ़िन अऊ बीर नांव कुआं करा हबरिन, जिहां यहोवा ह मूसा ला कहे रिहिस, “मनखेमन ला एक जगह म इकट्ठा कर अऊ मेंह ओमन ला पानी दूहूं।”
NUM 21:17 तब इसरायल ह ये गीत गाईस: “हे कुआं, पानी ले भर जा! ये गीत गावव,
NUM 21:18 ओ कुआं के बारे म जेला हाकिममन कोड़िन, जेला परभावसाली मनखेमन कोड़िन— परभावसाली मनखेमन राजदंड अऊ लउठी ले कोड़िन।” तब ओमन सुन्ना जगह ले मत्ताना करा गीन,
NUM 21:19 मत्ताना ले नहलीएल, नहलीएल ले बामोत,
NUM 21:20 अऊ बामोत ले मोआब के घाटी करा, जिहां पिसगा पहाड़ के टीप ह बीरान भुइयां ले ऊंच हवय।
NUM 21:21 इसरायल ह अमोरीमन के राजा सीहोन करा संदेसियामन ला ये कहे बर पठोईस:
NUM 21:22 “हमन ला तोर देस म ले होके जावन दे। हमन कोनो खेत या अंगूर के बारी कोति नइं जावन, न ही कोनो कुआं के पानी पीयन। जब तक तोर राज ले निकल नइं जाबो, तब तक हमन राजा के राजमार्ग म ही जाबो।”
NUM 21:23 पर सीहोन ह इसरायल ला अपन देस म ले होके जावन नइं दीस। ओह अपन पूरा सेना ला इकट्ठा करिस अऊ इसरायल के बिरूध सुन्ना जगह करा गीस। जब ओह यहस नगर करा हबरिस, त उहां ओह इसरायल के संग लड़िस।
NUM 21:24 पर इसरायल ह ओला तलवार ले मार डारिस अऊ अरनोन नदी ले लेके यब्बोक नदी तक ओकर देस म अधिकार कर लीस, पर सिरिप उहां तक, जिहां अमोनीमन रिहिन, काबरकि ओमन के सीमना ला किलाबंदी करे गे रिहिस।
NUM 21:25 इसरायल ह अमोरीमन के जम्मो सहर ऊपर कब्जा करके ओमन ऊपर अधिकार कर लीस, जेमा हेसबोन सहर अऊ ओकर आसपास के नगर अऊ बस्तीमन घलो रिहिन।
NUM 21:26 हेसबोन ह अमोरीमन के राजा सीहोन के सहर रिहिस, जऊन ह मोआब के पहिले के राजा के बिरूध लड़े रिहिस अऊ ओकर ले अरनोन तक ओकर जम्मो देस ला लेय ले रिहिस।
NUM 21:27 एकरे कारन कबिमन कहिथें: “हेसबोन म आवव अऊ येला फेर बनावव; सीहोन के सहर ह फेर पहिले सहीं हो जावय।
NUM 21:28 “हेसबोन ले आगी, अऊ सीहोन के सहर ले जुवाला निकलिस। येह मोआब के आर नगर ला, अरनोन के ऊंच जगह के मनखेमन ला भसम कर दीस।
NUM 21:29 हे मोआब, तोर ऊपर हाय! हे कमोस देवता के मनखेमन, तुमन नास हो गेव! ओह अपन बेटामन ला सरनार्थी के रूप म अऊ अपन बेटीमन ला कैदी के रूप म अमोरीमन के राजा सीहोन ला दे दीस।
NUM 21:30 “पर हमन ओमन ला गिरा दे हन; हेसबोन सहर के राज ह दीबोन नगर तक नास हो गे हवय। हमन ओमन ला नोपह नगर तक उजाड़ दे हन जऊन ह मेदबा नगर तक फईले हवय।”
NUM 21:31 ये किसम ले इसरायल ह अमोरीमन के देस म बस गीस।
NUM 21:32 मूसा के याजेर सहर म भेदियामन ला पठोय के बाद, इसरायलीमन ओकर आसपास के इलाका म कब्जा कर लीन अऊ जऊन अमोरीमन उहां रिहिन, ओमन ला भगा दीन।
NUM 21:33 तब ओमन मुड़के सड़क म होवत बासान कोति गीन, अऊ बासान के राजा ओग अऊ ओकर पूरा सेना ओमन के संग लड़ई करे बर निकलके एदरेई नगर करा आईन।
NUM 21:34 यहोवा ह मूसा ला कहिस, “ओकर ले झन डर, काबरकि मेंह ओला ओकर पूरा सेना अऊ ओकर देस सहित तोर हांथ म कर देवत हंव। ओकर संग वइसने ही कर, जइसने तेंह अमोरीमन के राजा सीहोन के संग करय, जऊन ह हेसबोन म राज करत रिहिस।”
NUM 21:35 तब इसरायलीमन राजा ओग अऊ ओकर बेटामन ला पूरा सेना सहित मार डारिन; ओमा के एको झन घलो नइं बचिन। अऊ इसरायलीमन ओकर देस ऊपर अधिकार कर लीन।
NUM 22:1 तब इसरायलीमन मोआब के मैदान म हबरिन अऊ यरीहो के सामने यरदन नदी के तीर म डेरा डालिन।
NUM 22:2 सिप्पोर के बेटा बालाक ह ओ जम्मो ला देखिस, जेला इसरायल ह अमोरीमन संग करे रिहिस,
NUM 22:3 अऊ मोआब ह डरा गीस, काबरकि इसरायलीमन बहुंत बड़े संखिया म रिहिन। वास्तव म, मोआब ह इसरायलीमन के कारन भयंकर डरा गीस।
NUM 22:4 मोआबीमन मिदयानीमन के अगुवामन ला कहिन, “ये उपदरवी दल ह हमर चारों कोति के जम्मो चीज ला चट कर डारही, जइसे बईला ह खेत के घांस ला चट कर जाथे।” ओ समय सिप्पोर के बेटा बालाक ह मोआब के राजा रिहिस;
NUM 22:5 ओह बेओर के बेटा बिलाम ला बलाय बर संदेसियामन ला भेजिस, जऊन ह फरात नदी के लकठा म अपन जनम भुइयां पतोर सहर म रिहिस। बालाक ह कहिस: “मिसर ले अब्बड़ मनखेमन आय हवंय; अऊ मोर बाजू म बस गे हवंय ओमन ले पूरा भुइयां ह ढंक गे हवय।
NUM 22:6 त तेंह आ अऊ ये मनखेमन ला सराप दे, काबरकि येमन मोर ले बहुंत सक्तिसाली हें। तब सायद में येमन ला हराय सकहूं अऊ देस ले बाहिर भगाय सकहूं। काबरकि मेंह जानत हंव कि जेला तें आसीस देथस, ओह आसीस पाथे, अऊ जेला तें सराप देथस, ओह सरापित हो जाथे।”
NUM 22:7 तब मोआब अऊ मिदयान के अगुवामन अगम बिचारे के दाम लेके चल दीन। जब ओमन बिलाम करा हबरिन, त ओला बालाक के कहे बात ला बताईन।
NUM 22:8 बिलाम ह ओमन ला कहिस, “आज रथिया इहां रूक जावव, अऊ जऊन बात यहोवा ह मोला कहिही, ओकर मुताबिक मेंह तुमन ला जबाब दूहूं।” त मोआब के अधिकारीमन ओकर संग रूक गीन।
NUM 22:9 परमेसर ह बिलाम करा आईस अऊ पुछिस, “तोर संग ये मनखेमन कोन अंय?”
NUM 22:10 बिलाम ह परमेसर ला कहिस, “सिप्पोर के बेटा, मोआब के राजा बालाक ह मोला ये संदेस भेजे हवय:
NUM 22:11 ‘मिसर देस ले निकलके आय मनखेमन के एक दल ले भुइयां ह ढंक गे हवय। अब तें आ अऊ मोर बर ओमन ला सराप दे। तब सायद में ओमन संग लड़ सकहूं अऊ ओमन ला भगाय सकहूं।’ ”
NUM 22:12 पर परमेसर ह बिलाम ला कहिस, “ओमन के संग झन जा। तें ओ मनखेमन ला सराप झन दे, काबरकि ओमन मोर आसीसित मनखे अंय।”
NUM 22:13 ओकर दूसर दिन बिहनियां बिलाम ह उठके बालाक के अधिकारीमन ला कहिस, “तुमन अपन देस वापिस जावव, काबरकि यहोवा ह मोला तुम्हर संग जाय बर मना करे हवय।”
NUM 22:14 तब मोआब के अधिकारीमन बालाक करा लहुंटके कहिन, “बिलाम ह हमर संग आय बर मना कर दीस।”
NUM 22:15 तब बालाक ह आने अधिकारीमन ला पठोईस, जऊन मन संखिया म पहिले से अधिक अऊ जादा आदर योग्य रिहिन।
NUM 22:16 ओमन बिलाम करा आईन अऊ कहिन: “सिप्पोर के बेटा बालाक ह ये कहिथे: तोला मोर करा आय ले कोनो चीज झन रोकय,
NUM 22:17 काबरकि में तोला बहुंत बढ़िया ईनाम दूहूं अऊ जऊन कुछू तें कहिबे, ओला करहूं। आ मोर बर ये मनखेमन ला सराप दे।”
NUM 22:18 पर बिलाम ह ओमन ला जबाब दीस, “अऊ त अऊ यदि बालाक ह अपन महल के जम्मो सोन अऊ चांदी मोला देय दे, तभो ले मेंह यहोवा मोर परमेसर के हुकूम के बाहिर जाके छोटे या बड़े कुछू काम नइं कर सकंव।
NUM 22:19 पर तुमन आज रथिया इहां रूकव, ताकि मेंह पता लगा सकंव कि यहोवा ह मोला का कहत हे।”
NUM 22:20 रथिया परमेसर ह बिलाम करा आके कहिस, “जब ये मनखेमन तोला ले जाय बर आय हवंय, त ओमन के संग जा, पर सिरिप वइसने ही करबे, जइसने मेंह तोला कहिहूं।”
NUM 22:21 बिलाम ह बिहनियां उठिस, अपन गदही म काठी बांधिस अऊ मोआब के अधिकारीमन संग चल दीस।
NUM 22:22 पर परमेसर ह बहुंत गुस्सा होईस, जब बिलाम ह ओमन के संग गीस, अऊ यहोवा के स्वरगदूत ह ओकर बिरोध करे बर सड़क म ठाढ़ हो गीस। बिलाम ह अपन गदही म चघके जावत रिहिस, अऊ दू झन सेवकमन ओकर संग रिहिन।
NUM 22:23 जब ओ गदही ह यहोवा के स्वरगदूत ला अपन हांथ म तलवार लिये देखिस, त ओह सड़क ला छोंड़के खेत कोति उतर गीस। तब बिलाम ह गदही ला फेर सड़क म लाने बर ओला मारिस।
NUM 22:24 तब यहोवा के स्वरगदूत ह अंगूर के बारीमन के संकरा रसता म ठाढ़ हो गीस, जेकर दूनों कोति दीवार रहय।
NUM 22:25 जब गदही ह यहोवा के स्वरगदूत ला देखिस, त ओह दीवार ले संट गीस, जेकर ले बिलाम के गोड़ ह दीवार ले रगड़ा गीस। त ओह फेर गदही ला मारिस।
NUM 22:26 तब यहोवा के स्वरगदूत ह आघू बढ़िस अऊ संकरा जगह म ठाढ़ हो गीस, जिहां न तो जेवनी अऊ न ही डेरी कोति हटे के जगह रिहिस।
NUM 22:27 जब गदही ह यहोवा के स्वरगदूत ला देखिस, त ओह बिलाम ला लेके बईठ गीस; तब बिलाम ह गुस्सा होईस अऊ गदही ला अपन लउठी ले मारे लगिस।
NUM 22:28 तब यहोवा ह गदही के मुहूं ला खोल दीस अऊ गदही ह बिलाम ला कहिस, “मेंह तोर का करे हंव कि तीन बार हो गीस, तेंह मोला मारत हस?”
NUM 22:29 त बिलाम ह गदही ला जबाब दीस, “तेंह मोला मुरूख बना दे हस! कहूं मोर हांथ म तलवार होतिस, त अभीच मेंह तोला मार डारतेंव।”
NUM 22:30 ओ गदही ह बिलाम ला कहिस, “का मेंह तोर खुद के गदही नो हंव, जेमा तेंह हमेसा आज तक सवारी करत आय हस? का मेंह तोर संग कभू अइसने करे रहंय?” ओह कहिस, “नइं।”
NUM 22:31 तब यहोवा ह बिलाम के आंखी ला खोल दीस, अऊ ओह यहोवा के स्वरगदूत ला तलवार लेके सड़क म खड़े देखिस। तब ओह झुकिस अऊ मुहूं के भार गिरके दंडवत करिस।
NUM 22:32 यहोवा के स्वरगदूत ह ओकर ले पुछिस, “तेंह अपन गदही ला ये तीन बार ले काबर मारय? मेंह इहां तोर बिरोध करे बर आय हंव, काबरकि जऊन काम तेंह करत हस, ओह मोर आघू म सही नो हय।
NUM 22:33 गदही ह मोला देखिस अऊ तीन बार मोर ले दूरिहा घुंचिस। यदि ओह नइं घुंचे रहितिस, त खचित मेंह अब तक तो तोला मार डारे रहितेंव, पर गदही ला छोंड़ देतेंव।”
NUM 22:34 बिलाम ह यहोवा के स्वरगदूत ला कहिस, “मेंह पाप करे हंव। मोला पता नइं रिहिस कि तेंह मोर सामना करे बर सड़क म खड़े हस। यदि तेंह ये बात ले नाखुस हस, त मेंह वापिस चल दूहूं।”
NUM 22:35 यहोवा के स्वरगदूत ह बिलाम ला कहिस, “ओ मनखेमन संग जा, पर जऊन बात में बताहूं, ओही बात ला कहिबे।” तब बिलाम ह बालाक के अधिकारीमन संग चल दीस।
NUM 22:36 जब बालाक ह सुनिस कि बिलाम ह आवत हे, त ओह बिलाम ले मिले बर अरनोन के सीमना म मोआबी नगर करा गीस, जऊन ह ओकर इलाका के तीर म हवय।
NUM 22:37 बालाक ह बिलाम ला कहिस, “का मेंह तोला जरूरी बात बर नइं बलाय रहेंव? तेंह मोर करा काबर नइं आवत रहय? का मेंह तोला आदर देय के लईक नो हंव?”
NUM 22:38 बिलाम ह बालाक ला जबाब दीस, “देख, अब तो में तोर करा आ गे हंव, पर मेंह अपन मन से कुछू नइं कहंव। जेला परमेसर मोर मुहूं म डारही, सिरिप ओहीच बात कहिहूं।”
NUM 22:39 तब बिलाम ह बालाक के संग किरयत-हुसोत नगर म गीस।
NUM 22:40 उहां बालाक ह पसु अऊ भेड़मन के बलि चघाईस, अऊ कुछू भाग बिलाम अऊ अधिकारीमन ला दीस, जेमन ओकर संग रिहिन।
NUM 22:41 ओकर दूसर दिन बिहनियां बालाक ह बिलाम ला ऊपर बामोत-बाल करा ले गीस, अऊ उहां ले ओह इसरायलीमन के डेरा के बाहिरी भाग ला देखिस।
NUM 23:1 बिलाम ह बालाक ला कहिस, “इहां मोर बर सात ठन बेदी बनवा, अऊ सात-सात ठन बछवा अऊ मेढ़ा बलिदान करे बर तियार कर।”
NUM 23:2 बालाक ह बिलाम के कहे मुताबिक करिस, अऊ दूनों झन हर एक बेदी म एक-एक ठन बछवा अऊ मेढ़ा चघाईन।
NUM 23:3 तब बिलाम ह बालाक ला कहिस, “तेंह इहां अपन बलि करा ठाढ़े रह; मेंह थोरकन दूरिहा जावत हंव। हो सकथे यहोवा ह मोर ले मिले बर आवय। जऊन कुछू ओह मोर ऊपर परगट करही, मेंह तोला बताहूं।” तब ओह एक उजाड़ पहाड़ी ऊपर गीस।
NUM 23:4 परमेसर ह ओकर ले मिलिस, त बिलाम ह कहिस, “में सात ठन बेदी तियार करे हंव, अऊ हर बेदी म एक ठन बछवा अऊ एक ठन मेढ़ा चघाय हंव।”
NUM 23:5 यहोवा ह बिलाम के मुहूं म एक ठन बात डालिस अऊ कहिस, “तें बालाक करा वापिस जा अऊ ओला ये बात कह।”
NUM 23:6 तब बिलाम ह बालाक करा वापिस गीस अऊ ओला जम्मो मोआब के अधिकारीमन के संग अपन चढ़ावा के बाजू म खड़े पाईस।
NUM 23:7 तब बिलाम ह अपन संदेस दीस: “बालाक ह मोला अराम देस ले लानिस, मोआब के राजा, पूरब के पहाड़ीमन ले। ओह कहिस, ‘आ अऊ मोर बर याकूब ला सराप दे; आ अऊ इसरायल के निन्दा कर।’
NUM 23:8 ओमन ला मेंह कइसे सराप दंव जेमन ला परमेसर ह सराप नइं दीस? ओमन के निन्दा कइसे करंव जेमन के निन्दा यहोवा ह नइं करिस?
NUM 23:9 चट्टानमन के ऊपर ले मेंह ओमन ला देखत हंव, ऊंचई ले ओमन मोला दिखत हें। मेंह अइसे मनखेमन ला देखत हंव, जेमन अलग रहिथें अऊ अपनआप ला आने जातमन सहीं नइं समझंय।
NUM 23:10 कोन ह याकूब के धुर्रा सहीं संतानमन ला या इसरायल के एक चौथाई ला घलो गन सकथे? बने होही कि मेंह एक धरमी के सहीं मरंव, अऊ मोर अन्त ह ओमन सहीं होवय!”
NUM 23:11 बालाक ह बिलाम ला कहिस, “तेंह मोर संग का करय? मेंह तोला मोर बईरीमन ला सराप दे बर लानेंव, पर तेंह ओमन ला सिरिप आसीस देय के अलावा कुछू नइं करे हस!”
NUM 23:12 ओह जबाब दीस, “जऊन बात यहोवा ह मोला कहे हवय, का ओही ला नइं बतावंव?”
NUM 23:13 तब बालाक ह ओला कहिस, “तेंह मोर संग आने जगह म आ, जिहां ले तें ओमन ला देख सकबे; तेंह जम्मो झन ला नइं, सिरिप ओमन के सिविर के बाहिर ला देख सकबे। अऊ उहां ले, तें मोर बर ओमन ला सराप दे।”
NUM 23:14 त ओह बिलाम ला पिसगा पहाड़ के ऊपर सोपीम के खेत म ले गीस, अऊ उहां ओह सात ठन बेदी बनवाईस अऊ हर बेदी म एक बछवा अऊ एक मेढ़ा चघाईस।
NUM 23:15 बिलाम ह बालाक ला कहिस, “तें इहां अपन चढ़ावा के बाजू म रूक अऊ मेंह जाके उहां यहोवा ले मिलत हंव।”
NUM 23:16 यहोवा ह बिलाम ले मिलिस अऊ ओकर मुहूं म अपन बात डालके कहिस, “बालाक करा वापिस जा अऊ ओला ये बात कह।”
NUM 23:17 तब बिलाम ह बालाक करा गीस अऊ ओला मोआब के अधिकारीमन के संग अपन चढ़ावा के बाजू म खड़े पाईस। बालाक ह ओकर ले पुछिस, “यहोवा ह का कहिस?”
NUM 23:18 तब बिलाम ह अपन संदेस दीस: “हे बालाक, सिप्पोर के बेटा उठ अऊ सुन; मोर बात ला सुन।
NUM 23:19 परमेसर ह मनखे नो हय, कि ओह लबारी मारय, ओह मनखे नो हय, कि ओह अपन मन ला बदलय। का ओह बोलथे अऊ वइसने नइं करय? का ओह वायदा करथे अऊ ओला पूरा नइं करय?
NUM 23:20 मोला आसीस देय के हुकूम मिले हवय; ओह आसीस दे हवय, अऊ येला मेंह नइं बदल सकंव।
NUM 23:21 “याकूब म कोनो अनर्थ, अऊ इसरायल म कोनो दुरगति नइं दिखत हे। यहोवा ओमन के परमेसर ह ओमन के संग हवय; ओमन के बीच म राजा के जय-जयकार होथे।
NUM 23:22 परमेसर ह ओमन ला मिसर ले लेय आईस; ओमन करा जंगली बईला के ताकत हवय।
NUM 23:23 याकूब के बिरूध म न कोनो अपसकुन हवय, न इसरायल के बिरूध म कोनो खराप सकुन-बिचार। अब याकूब अऊ इसरायल के बारे म कहे जाही, ‘देखव, परमेसर ह का अद्भूत काम करे हवय!’
NUM 23:24 ये मनखेमन सेरनी सहीं निकलथें; ओमन एक सिंह सहीं ठाढ़ होथें ओमन तब तक अराम नइं करंय, जब तक कि अपन सिकार ला खा नइं लेवंय अऊ ओकर खून ला पी नइं लेवंय।”
NUM 23:25 तब बालाक ह बिलाम ला कहिस, “तें ओमन ला न तो कोनो सराप दे अऊ न ही कोनो आसीस!”
NUM 23:26 बिलाम ह बालाक ला जबाब दीस, “का मेंह तोला नइं कहे रहेंव कि यहोवा जइसने कहिही, वइसने करहूं?”
NUM 23:27 तब बालाक ह बिलाम ला कहिस, “आ, तोला एक आने जगह म ले चलत हंव। सायद येह परमेसर ला बने लगय कि उहां ले ओह तोला मोर बर इसरायलीमन ला सराप देवन दे।”
NUM 23:28 अऊ बालाक ह बिलाम ला पेओर पहाड़ के चोटी ऊपर ले, उजाड़ जगह ला देखा दीस।
NUM 23:29 बिलाम ह बालाक ला कहिस, “इहां मोर बर सात ठन बेदी बनवा, अऊ सात ठन बछवा अऊ सात ठन मेढ़ा तियार कर।”
NUM 23:30 बिलाम के कहे मुताबिक बालाक ह करिस, अऊ हर बेदी म एक बछवा अऊ एक मेढ़ा चघाईस।
NUM 24:1 जब बिलाम ह देखिस कि इसरायल ला आसीस देवई ह यहोवा ला बने लगथे, त ओह पहिले के सहीं सकुन-बिचार करे म मन नइं लगाईस, पर अपन चेहरा ला सुन्ना जगह कोति करिस।
NUM 24:2 जब बिलाम ह देखिस कि इसरायल ह गोत्र-गोत्र के मुताबिक डेरा डाले हवय, त परमेसर के आतमा ओकर ऊपर आईस
NUM 24:3 अऊ बिलाम ह अपन संदेस दीस: “बेओर के बेटा बिलाम के अगमबानी, ओ मनखे के अगमबानी, जेकर आंखी ह साफ-साफ देखथे,
NUM 24:4 ओ मनखे के अगमबानी, जऊन ह परमेसर के बचन ला सुनथे, जऊन ह सर्वसक्तिमान परमेसर ले एक दरसन पाथे, जऊन ह सास्टांग दंडवत करथे, अऊ जेकर आंखीमन खुला हवंय:
NUM 24:5 “हे याकूब, का ही सुघर हवंय तोर तम्बूमन, हे इसरायल, तोर निवासमन!
NUM 24:6 “ओमन घाटीमन सहीं फईले हवंय, नदी के तीर म बगीचा सहीं, यहोवा दुवारा लगाय मुसब्बर, अऊ पानी तीर म लगे देवदार रूखमन सहीं हवंय।
NUM 24:7 ओमन के बाल्टीमन ले पानी ह बहते रहिही; ओमन के बीजा ला बहुंत पानी मिलही। “ओमन के राजा ह अमालेकी राजा अगाग ले घलो महान होही; ओमन के राज ह बढ़ते ही रहिही।
NUM 24:8 “परमेसर ह ओमन ला मिसर देस ले निकाल लानिस; ओमन करा जंगली बईला के ताकत हवय। जेमन बिरोधी देसमन ला नास करके ओमन के हाड़ा ला कुटा-कुटा कर देथें; अऊ अपन तीरमन ले बिरोधीमन ला छेद डारथें।
NUM 24:9 सिंह सहीं ओमन लेटके अराम करथें, सिंहनी सहीं—ओमन ला छेड़े के हिम्मत कोन करय? “जऊन मन तोला आसीस देथें, ओमन आसीस पावंय अऊ जऊन मन तोला सराप देथें, ओमन सरापित होवंय!”
NUM 24:10 तब बालाक के कोप बिलाम ऊपर भड़किस। ओह अपन दूनों हांथ ला ठोंकके बिलाम ला कहिस, “मेंह अपन बईरीमन ला सराप दे बर तोला बुलवाय हंव, पर तेंह तीन बार ओमन ला आसीस दे हस।
NUM 24:11 अब तें तुरते इहां ले भाग अऊ अपन घर जा! मेंह कहे रहेंव कि मेंह तोला बने ईनाम दूहू, पर यहोवा ह तोला ओ ईनाम ले दूरिहा रखे हवय।”
NUM 24:12 बिलाम ह बालाक ला कहिस, “का मेंह तोर संदेसियामन ला ये नइं कहे रहेंव,
NUM 24:13 ‘यदि बालाक ह मोला अपन महल के जम्मो सोन अऊ चांदी ला घलो दे दीही, तभो ले मेंह अपन ईछा ले यहोवा के हुकूम के बाहिर बने या खराप कुछू नइं कर सकंव—अऊ सिरिप ओहीच बात कहिहूं, जऊन बात यहोवा ह कहिही?’
NUM 24:14 अब सुन, मेंह अपन मनखेमन करा वापिस जावत हंव, पर मेंह तोला चेतात हंव कि अवइया समय म ये इसरायली मनखेमन तोर मनखेमन संग का करहीं।”
NUM 24:15 तब ओह अपन संदेस दीस: “बेओर के बेटा बिलाम के अगमबानी, ओ मनखे के अगमबानी, जेकर आंखी ह साफ-साफ देखथे,
NUM 24:16 ओ मनखे के अगमबानी, जऊन ह परमेसर के बचन ला सुनथे, जेला सर्वोच्च परमेसर ले गियान मिले हवय, जऊन ह सर्वसक्तिमान परमेसर के दरसन देखथे, जऊन ह सास्टांग दंडवत करथे, अऊ जेकर आंखीमन खुला हवंय:
NUM 24:17 “मेंह ओला देखथंव, पर अभी नइं; मेंह ओला देखथंव, पर लकठा ले नइं। याकूब ले एक तारा निकलके आही; इसरायल ले एक राजदंड के उदय होही। ओह मोआब के माथा ला कुचरही, सेत के जम्मो मनखेमन के खोपड़ी ला कुचरही।
NUM 24:18 एदोम के ऊपर जय मिलही; ओकर बईरी सेईर के ऊपर जीत मिलही, पर इसरायल ह ताकतवर होवत जाही।
NUM 24:19 याकूब ले एक सासन करइया निकलही अऊ सहर के बांचे मनखेमन ला नास कर दीही।”
NUM 24:20 तब बिलाम ह अमालेक ला देखिस अऊ अपन संदेस दीस: “अमालेक ह जातिमन म पहिले रिहिस, पर ओमन के अन्त ह बहुंत बिनासकारी होही।”
NUM 24:21 तब बिलाम ह केनीमन ला देखिस अऊ अपन संदेस दीस: “तुम्हर निवास स्थान ह सुरकछित हवय, तुम्हर बसेरा ह चट्टान म हवय;
NUM 24:22 तभो ले केनी मनखेमन, तुमन नास हो जाहू जब अस्सूर ह तुमन ला बंधुवई म ले जाही।”
NUM 24:23 तब बिलाम ह अपन ये संदेस दीस: “हाय! जब परमेसर ह अइसने करही, त कोन ह बचही?
NUM 24:24 कित्ती के समुंदर तीर ले पानी जहाजमन आहीं; ओमन अस्सूर अऊ एबेर ला अपन अधीन कर लीहीं, पर आखिर म ओमन घलो नास हो जाहीं।”
NUM 24:25 तब बिलाम ह उठिस अऊ अपन घर वापिस चल दीस, अऊ बालाक घलो अपन रसता म चल दीस।
NUM 25:1 जब इसरायल ह सित्तीम म रूके रिहिस, तब कुछू इसरायली मनखेमन मोआब के माईलोगनमन संग कुकरम करे लगिन।
NUM 25:2 अऊ ये माईलोगनमन अपन देवता ला बलिदान चघाय के बेरा म ओमन ला नेवता देय लगिन। ये मनखेमन ओ बलि चघाय जेवन खाके ये देवतामन ला दंडवत करे लगिन।
NUM 25:3 ये किसम ले इसरायलीमन बाल-पेओर देवता के संग जुड़ गीन। अऊ यहोवा के कोप ओमन के बिरूध भड़किस।
NUM 25:4 यहोवा ह मूसा ला कहिस, “ये मनखेमन के जम्मो अगुवामन ला ले, अऊ ओमन ला मारके दिन-दुपहरी म यहोवा के आघू म खुला रख दे, ताकि यहोवा के भयंकर कोरोध ह इसरायल ले हट जावय।”
NUM 25:5 तब मूसा ह इसरायल के नियायीमन ला कहिस, “तुमन ले हर एक जन अपन ओ मनखेमन ला मार डारव, जेमन अपनआप ला बाल-पेओर के अधीन कर दे हवंय।”
NUM 25:6 जब इसरायलीमन मिलापवाला तम्बू के प्रवेस दुवार म रोवत रिहिन, तब एक इसरायली मनखे ह मूसा अऊ जम्मो सभा के देखत म एक मिदयानी माईलोगन ला सिविर म ले आईस।
NUM 25:7 जब हारून पुरोहित के पोता, एलिआजर के बेटा पीनहास ह येला देखिस, त ओह सभा ले उठके गीस अऊ अपन हांथ म एक ठन बरछी लीस
NUM 25:8 अऊ ओ इसरायली मनखे के पाछू-पाछू तम्बू म गीस। ओह ओ इसरायली मनखे अऊ मिदयानी माईलोगन के पेट ला बरछी ले बेध दीस। तब इसरायलीमन के बिरूध फईले महामारी ह रूक गीस;
NUM 25:9 पर जेमन महामारी ले मरिन, ओमन 24,000 रिहिन।
NUM 25:10 यहोवा ह मूसा ला कहिस,
NUM 25:11 “हारून पुरोहित के पोता, एलिआजर के बेटा पीनहास ह इसरायलीमन के बिरूध मोर कोरोध ला सांत कर दे हवय। ओह ओमन के बीच मोर आदरमान बर अइसने जलन रखिस, जइसने मेंह रखथंव, एकर कारन मेंह अपन उत्साह म ओमन के अन्त नइं करेंव।
NUM 25:12 अब ओला बतावव कि मेंह ओकर संग अपन सांति के करार करत हंव।
NUM 25:13 ओह अऊ ओकर संतानमन बर हमेसा के पुरोहित के पद के एक करार होही, काबरकि ओला अपन परमेसर के आदरमान बर जलन होईस अऊ ओह इसरायलीमन बर पछताप करिस।”
NUM 25:14 जऊन इसरायली ह मिदयानी माईलोगन के संग मारे गीस, ओह सिमोनी गोत्र के एक अगुवा सालू के बेटा जिमरी रिहिस।
NUM 25:15 अऊ जऊन मिदयानी माईलोगन ह मारे गीस, ओकर नांव कोजबी रिहिस, जऊन ह एक मिदयानी परिवार के गोत्र के एक मुखिया सूर के बेटी रिहिस।
NUM 25:16 फेर यहोवा ह मूसा ला कहिस,
NUM 25:17 “मिदयानीमन के संग बईरी के सहीं बरताव करत ओमन ला मार डार।
NUM 25:18 काबरकि ओमन तुम्हर संग बईरी के सहीं बरताव करिन, जब ओमन अपन बहिनी, एक मिदयानी अगुवा के बेटी कोजबी ला सामिल करके पेओर के मामला म तुमन ला धोखा दीन, ओ माईलोगन ह मारे गीस, जब ओ घटना के कारन महामारी आईस।”
NUM 26:1 महामारी के बाद यहोवा ह मूसा अऊ हारून पुरोहित के बेटा एलिआजर ला कहिस,
NUM 26:2 “जम्मो इसरायली समाज के गनती परिवार के मुताबिक करव—जेमन बीस साल या जादा उमर के हवंय अऊ इसरायल के सेना म सेवा दे सकत हें।”
NUM 26:3 तब मूसा अऊ एलिआजर पुरोहित, यरीहो के ओ पार यरदन नदी के तीर, मोआब के मैदान म इसरायलीमन ले बात करिन अऊ कहिन,
NUM 26:4 “बीस साल या ओकर ले जादा उमर के मनखेमन के गनती करव, जइसने यहोवा ह मूसा ला हुकूम दे हवय।”
NUM 26:5 इसरायल के पहिलांत बेटा रूबेन के संतान: हनोक के जरिये हनोकी गोत्र; पल्लू के जरिये पल्लूयी गोत्र;
NUM 26:6 हेसरोन के जरिये हेसरोनी गोत्र; करमी के जरिये करमी गोत्र।
NUM 26:7 येमन रूबेनी गोत्र के रिहिन; जेमन के गनती, 43,730 रिहिस।
NUM 26:8 पल्लू के बेटा एलीआब रिहिस,
NUM 26:9 अऊ एलीआब के बेटामन नमूएल, दातान अऊ अबीराम रिहिन। इही दातान अऊ अबीराम समाज के करमचारी रिहिन अऊ येमन मूसा अऊ हारून के बिरूध बिदरोह करिन अऊ येमन कोरह के ओ अनुयायीमन के संग रिहिन, जब ओमन यहोवा के बिरूध बिदरोह करिन।
NUM 26:10 धरती ह अपन मुहूं फारिस अऊ ओमन ला कोरह के संग लील लीस; ओकर पाछू चलइयामन मर गीन, जब आगी ह 250 मनखे ला भसम कर दीस। अऊ ओमन चेतउनी के एक चिनहां होईन।
NUM 26:11 तभो ले कोरह के बंस ह खतम नइं होईस।
NUM 26:12 सिमोन के संतान ओमन के गोत्र के मुताबिक: नमूएल के जरिये नमूएली गोत्र; यामीन के जरिये यामीनी गोत्र; याकीन के जरिये याकीनी गोत्र;
NUM 26:13 जेरह के जरिये जेरही गोत्र; साऊल के जरिये साऊली गोत्र।
NUM 26:14 येमन सिमोन गोत्र के रिहिन; जेमन के गनती, 22,200 रिहिस।
NUM 26:15 गाद के संतान ओमन के गोत्र के मुताबिक: सपोन के जरिये सपोनी गोत्र; हाग्गी के जरिये हाग्गी गोत्र; सूनी के जरिये सूनी गोत्र;
NUM 26:16 ओजनी के जरिये ओजनी गोत्र; एरी के जरिये एरी गोत्र;
NUM 26:17 अरोद के जरिये अरोदी गोत्र; अरेली के जरिये अरेली गोत्र।
NUM 26:18 येमन गाद गोत्र के रिहिन; जेमन के गनती 40,500 रिहिस।
NUM 26:19 यहूदा के बेटा एर अऊ ओनान रिहिन, पर ओमन कनान देस म मर गीन।
NUM 26:20 यहूदा के संतान ओमन के गोत्र के मुताबिक: सेलह के जरिये सेलानी गोत्र; पेरेस के जरिये पेरेसी गोत्र; जेरह के जरिये जेरही गोत्र।
NUM 26:21 पेरेस के संतान येमन रिहिन: हेसरोन के जरिये हेसरोनी गोत्र; हामूल के जरिये हामूली गोत्र।
NUM 26:22 येमन यहूदा गोत्र के रिहिन; जेमन के गनती 76,500 रिहिस।
NUM 26:23 इस्साकार के संतान ओमन के गोत्र के मुताबिक: तोला के जरिये तोलायी गोत्र; पुआ के जरिये पुवी गोत्र;
NUM 26:24 यासूब के जरिये यासूबी गोत्र; सिमरोन के जरिये सिमरोनी गोत्र।
NUM 26:25 येमन इस्साकार गोत्र के रिहिन; जेमन के गनती 64,300 रिहिस।
NUM 26:26 जबूलून के संतान ओमन के गोत्र के मुताबिक: सेरेद के जरिये सेरेदी गोत्र; एलोन के जरिये एलोनी गोत्र; यहलेल के जरिये यहलेली गोत्र।
NUM 26:27 येमन जबूलूनी गोत्र के रिहिन; जेमन के गनती, 60,500 रिहिस।
NUM 26:28 यूसुफ के संतान, जेमन गोत्र के मुताबिक मनस्से अऊ एपरैम के जरिये होईन:
NUM 26:29 मनस्से के संतान: माकीर के जरिये माकीरी गोत्र (माकीर ह गिलाद के ददा रिहिस); गिलाद के जरिये गिलादी गोत्र।
NUM 26:30 गिलाद के संतान येमन रिहिन: ईएजेर के जरिये ईएजेरी गोत्र; हेलेक के जरिये हेलेकी गोत्र;
NUM 26:31 असरीएल के जरिये असरीएली गोत्र; सकेम के जरिये सकेमी गोत्र;
NUM 26:32 समीदा के जरिये समीदायी गोत्र; हेपेर के जरिये हेपेरी गोत्र।
NUM 26:33 (हेपेर के बेटा सलोफाद के कोनो बेटा नइं रिहिन; ओकर सिरिप बेटीमन रिहिन, जेमन के नांव महला, नोआ, होगला, मिलका अऊ तिरसा रिहिस।)
NUM 26:34 येमन मनस्से के गोत्र रिहिन; जेमन के गनती 52,700 रिहिस।
NUM 26:35 एपरैम के संतान ओमन के गोत्र के मुताबिक येमन रिहिन: सूतेलह के जरिये सूतेलही गोत्र; बेकेर के जरिये बेकेरी गोत्र; तहान के जरिये तहानी गोत्र।
NUM 26:36 सूतेलह के संतान येमन रिहिन: एरान के जरिये एरानी गोत्र।
NUM 26:37 येमन एपरैम के संतान रिहिन; जेमन के गनती, 32,500 रिहिस।
NUM 26:38 बिनयामीन के संतान ओमन के गोत्र के मुताबिक: बेला के जरिये बेलायी गोत्र; असबेल के जरिये असबेली गोत्र; अहीराम के जरिये अहीरामी गोत्र;
NUM 26:39 सूपाम के जरिये सूपामी गोत्र; हूपाम के जरिये हूपामी गोत्र।
NUM 26:40 बेला के संतान अर्द अऊ नामान के जरिये: अर्द के जरिये अर्दी गोत्र; नामान के जरिये नामानी गोत्र।
NUM 26:41 येमन बिनयामीन के गोत्र रिहिन; जेमन के संखिया 45,600 रिहिस।
NUM 26:42 दान के संतान ओमन के गोत्र के मुताबिक येमन रिहिन: सूहाम के जरिये सूहामी गोत्र।
NUM 26:43 येमा के जम्मो झन सूहामी गोत्र के रिहिन; जेमन के संखिया 64,400 रिहिस।
NUM 26:44 आसेर के संतान ओमन के गोत्र के मुताबिक: यिमना के जरिये यिमनी गोत्र; इसवी के जरिये इसवी गोत्र; बरीया के जरिये बरीयी गोत्र;
NUM 26:45 अऊ बरीया के संतान के जरिये: हेबेर के जरिये हेबेरी गोत्र; मलकीएल के जरिये मलकीएली गोत्र।
NUM 26:46 आसेर के सेरह नांव के एक बेटी रिहिस।
NUM 26:47 येमन आसेर के गोत्र रिहिन; जेमन के गनती 53,400 रिहिस।
NUM 26:48 नपताली के संतान ओमन के गोत्र के मुताबिक: यहसेल के जरिये यहसेली गोत्र; गूनी के जरिये गूनी गोत्र;
NUM 26:49 येसेर के जरिये येसेरी गोत्र; सिल्लेम के जरिये सिल्लेमी गोत्र।
NUM 26:50 येमन नपताली गोत्र के रिहिन; जेमन के गनती 45,400 रिहिस।
NUM 26:51 इसरायल के पुरूसमन के कुल संखिया 6,01,730 रिहिस।
NUM 26:52 यहोवा ह मूसा ला कहिस,
NUM 26:53 “नांव के गनती के आधार म ओमन के बीच म भुइयां ला ओमन के उत्तराधिकार के रूप म बांटना हे।
NUM 26:54 बड़े दल ला बड़े भाग दे, अऊ छोटे दल ला छोटे भाग; सूची म ओमन के गनती के मुताबिक हर एक ला ओकर उत्तराधिकार मिलय।
NUM 26:55 येकर धियान रखबे कि भुइयां ला चिट्ठी के जरिये बांटे जावय। हर एक दल ला जऊन भाग मिलथे, ओह ओकर पुरखा के गोत्र के नांव के मुताबिक होवय।
NUM 26:56 हर उत्तराधिकार ला चिट्ठी के दुवारा बड़े अऊ छोटे दलमन के बीच बांटे जावय।”
NUM 26:57 ये लेवीमन रिहिन, जेमन के गनती ओमन के गोत्र के मुताबिक होईस: गेरसोन के जरिये गेरसोनी गोत्र; कहात के जरिये कहाती गोत्र; मरारी के जरिये मरारी गोत्र।
NUM 26:58 लेवी गोत्र के येमन घलो रिहिन: लिबनी गोत्र, हेबरोनी गोत्र, महली गोत्र, मूसी गोत्र, कोरही गोत्र। (कहात ह अमराम के पुरखा रिहिस;
NUM 26:59 अमराम के घरवाली के नांव योकेबेद रिहिस, जऊन ह लेवी के एक संतान रिहिस, अऊ मिसर म लेवी बंस म जनमे रिहिस। अमराम कोति ले ओह हारून, मूसा अऊ ओमन के बहिनी मिरियम ला जनम दीस।
NUM 26:60 हारून ह नादाब, अबीहू, एलिआजर अऊ ईतामार के ददा रिहिस।
NUM 26:61 पर नादाब अऊ अबीहू मर गीन, जब ओमन यहोवा के आघू म बिगर अधिकार वाले आगी ले एक बलिदान चघाईन।)
NUM 26:62 जम्मो लेवी पुरूस, जेमन एक महिना अऊ जादा उमर के रिहिन, गनती म 23,000 रिहिन। येमन ला आने इसरायलीमन संग नइं गने गीस, काबरकि येमन ला ओमन के बीच उत्तराधिकार नइं मिले रिहिस।
NUM 26:63 मूसा अऊ एलिआजर पुरोहित के दुवारा येमन ला गने गीस, जब ओमन यरीहो के ओ पार यरदन नदी के तीर मोआब के मैदान म इसरायलीमन के गनती करिन।
NUM 26:64 जऊन इसरायलीमन ला मूसा अऊ हारून पुरोहित, सीनय के सुन्ना जगह म गने रिहिन, ओमा के एको झन घलो अभी गने गय मनखेमन के बीच नइं रिहिन।
NUM 26:65 काबरकि यहोवा ह ओ इसरायलीमन ला कहे रिहिस कि ओमन खचित सुन्ना जगह म मर जाहीं, अऊ सिरिप यपुन्ने के बेटा कालेब अऊ नून के बेटा यहोसू ला छोंड़ ओमा के एको झन घलो नइं बांचिन।
NUM 27:1 मनस्से के बेटा माकीर, माकीर के बेटा गिलाद, गिलाद के बेटा हेपेर, हेपेर के बेटा सलोफाद, सलोफाद ले ओकर बेटीमन रिहिन; येमन यूसुफ के बेटा मनस्से के गोत्र के रिहिन। सलोफाद के बेटीमन के नांव महला, नोआ, होगला, मिलका अऊ तिरसा रिहिस। एक दिन ओमन आईन
NUM 27:2 अऊ मिलापवाला तम्बू के प्रवेस दुवार करा मूसा, एलिआजर पुरोहित, अगुवामन अऊ जम्मो सभा के आघू म ठाढ़ होके कहिन,
NUM 27:3 “हमर ददा ह सुन्ना जगह म मर गीस। ओह कोरह के मनखेमन के संग नइं रिहिस, जेमन मिलके यहोवा के बिरोध करिन, पर हमर ददा ह अपन खुद के पाप के कारन मर गीस अऊ ओकर कोनो बेटा नइं ए।
NUM 27:4 ओकर कोनो बेटा नइं होय के कारन ओकर नांव ह गोत्र ले काबर खतम हो जावय? एकरसेति हमर ददा के रिस्तेदारमन के बीच म हमन ला घलो संपत्ति देवव।”
NUM 27:5 तब मूसा ह ओमन के ये बात ला यहोवा ला कहिस,
NUM 27:6 अऊ यहोवा ह मूसा ला कहिस,
NUM 27:7 “सलोफाद के बेटीमन जऊन बात कहत हें, ओह सही अय। जरूरी ए कि तें ओमन ला ओमन के ददा के रिस्तेदारमन के बीच उत्तराधिकार के रूप म संपत्ति दे अऊ ओमन के ददा के उत्तराधिकार ओमन ला दे।
NUM 27:8 “इसरायलीमन ला कह, ‘यदि कोनो मनखे बिगर बेटा के मर जाथे, त ओकर उत्तराधिकार ओकर बेटी ला दिये जावय।
NUM 27:9 यदि ओकर कोनो बेटी नइं ए, त ओकर भाईमन ला उत्तराधिकार दिये जावय।
NUM 27:10 यदि ओकर कोनो भाई नइं ए, त ओकर उत्तराधिकार ओकर ददा के भाईमन ला दिये जावय।
NUM 27:11 यदि ओकर ददा के भाई नइं ए, त उत्तराधिकार ओकर गोत्र के सबले नजदीकी रिस्तेदार ला मिलय, संपत्ति ला ओह ले लेवय। ये कानून ला इसरायलीमन के बीच म कड़ई से माने जावय, जइसने कि यहोवा ह मूसा ला हुकूम दे हवय।’ ”
NUM 27:12 तब यहोवा ह मूसा ला कहिस, “ये पहाड़ के अबारीम छेत्र म ऊपर जा अऊ ओ देस ला देख, जेला मेंह इसरायलीमन ला दे हंव।
NUM 27:13 येला देखे के बाद, तेंह घलो अपन भाई हारून सहीं अपन मनखेमन के संग हमेसा बर सुत जाबे,
NUM 27:14 काबरकि जब समाज ह सीन के सुन्ना जगह म पानी के सोता करा बिदरोह करिस, त तुमन दूनों मोर हुकूम ला नइं मानके ओमन के नजर म मोर पबितरता के अनादर करेव।” (येमन सीन के सुन्ना जगह म मरीबा-कादेस के पानी के सोतामन रिहिन।)
NUM 27:15 मूसा ह यहोवा ले बिनती करिस,
NUM 27:16 “यहोवा, परमेसर जऊन ह जम्मो जीयत चीजमन ला सांस देथे, ओह ये समाज के ऊपर कोनो ला ठहिरावय
NUM 27:17 जऊन ह ओमन के आघू म आवय-जावय, जऊन ह ओमन के अवई अऊ जवई म अगुवई करय, ताकि यहोवा के समाज बिगर चरवाहा के भेड़मन सहीं झन होवय।”
NUM 27:18 तब यहोवा ह मूसा ला कहिस, “नून के बेटा यहोसू ला ले अऊ ओकर ऊपर अपन हांथ रख; ओह एक अइसे मनखे अय, जेमा अगुवई करे के आतमा हवय।
NUM 27:19 ओला एलिआजर पुरोहित अऊ जम्मो सभा के आघू म ठाढ़ कर अऊ ओमन के आघू म ओला अधिकार दे।
NUM 27:20 ओला तोर कुछू अधिकार दे ताकि पूरा इसरायली समाज ओकर बात मानय।
NUM 27:21 ओह एलिआजर पुरोहित के आघू म ठाढ़ होवय, जऊन ह यहोवा के आघू म ऊरीम के पुछताछ के दुवारा ओकर बर परमेसर के ईछा मालूम करय। ओकर हुकूम ले ओह अऊ पूरा इसरायली समाज जावंय अऊ ओकर हुकूम ले ओमन आवंय।”
NUM 27:22 मूसा ह वइसने ही करिस, जइसने यहोवा ह ओला हुकूम दे रिहिस। ओह यहोसू ला लीस अऊ ओला एलिआजर पुरोहित अऊ जम्मो सभा के आघू म ठाढ़ करिस।
NUM 27:23 तब मूसा ह यहोसू के ऊपर अपन हांथ रखके ओला अधिकार दीस, जइसे यहोवा ह मूसा ला हुकूम दे रिहिस।
NUM 28:1 फेर यहोवा ह मूसा ला कहिस,
NUM 28:2 “इसरायलीमन ला ये हुकूम देके कह: ‘धियान रहय कि ठहिराय गे समय म मोला महकत सुख-देवइया जेवन-बलिदान चघावव।’
NUM 28:3 ओमन ला कह: ‘तुमन यहोवा ला ये जेवन-बलिदान चघावव: हर दिन होम-बलिदान के रूप म एक-एक बछर के दू ठन निरदोस मेढ़ा-पीला चघाय जावय।
NUM 28:4 एक ठन मेढ़ा-पीला ला बिहनियां अऊ एक ठन ला सांझ के चघावव,
NUM 28:5 संग म एक एपा उत्तम पीसान के दसवां भाग ला चढ़ावा चघावव, जेमा पेरके निकाले गय एक हीन जैतून तेल के चौथा भाग मिले रहय।
NUM 28:6 येह यहोवा ला चघाय जानेवाला महकत सुख-देवइया एक जेवन-बलिदान सीनय पहाड़ म ठहिराय गे नियमित होम-बलिदान ए।
NUM 28:7 संग म हर मेढ़ा-पीला के संग एक हीन के एक चौथाई मंद के पेय-बलिदान रहय। पेय-बलिदान ला पबितर-स्थान म यहोवा बर ढार दव।
NUM 28:8 दूसर मेढ़ा-पीला ला सांझ के बेरा चघावव; संग म ओहीच किसम के अन्न-बलिदान अऊ पेय-बलिदान के चढ़ावा घलो चघाय जावय, जइसे कि तुमन बिहनियां के बेरा चघाथव। येह यहोवा ला एक महकत सुख-देवइया जेवन-बलिदान अय।
NUM 28:9 “ ‘बिसराम दिन म, एक-एक साल के दू ठन निरदोस मेढ़ा-पीला के चढ़ावा चघावव; संग म येकर पेय-बलिदान अऊ एक एपा के दू-दसवां भाग जैतून तेल म सने उत्तम पीसान के एक अन्न-बलिदान चघावव।
NUM 28:10 नियमित रूप से चघाय जानेवाला होम-बलिदान अऊ येकर पेय-बलिदान के अलावा येह हर बिसराम दिन बर होम-बलिदान अय।
NUM 28:11 “ ‘हर महिना के सुरू म, दू ठन बछवा, एक ठन मेढ़ा अऊ एक-एक साल के सात ठन निरदोस मेढ़ा-पीला यहोवा ला एक होम-बलिदान के रूप म चघाय करव।
NUM 28:12 हर बछवा के संग तेल ले सने उत्तम पीसान के एक एपा के तीन-दसवां भाग अन्न-बलिदान के रूप म चघावव; मेढ़ा-पीला के संग तेल ले सने उत्तम पीसान के एक एपा के दू-दसवां भाग अन्न-बलिदान के रूप म चघावव;
NUM 28:13 अऊ हर एक मेढ़ा-पीला के संग तेल ले सने उत्तम पीसान के एक एपा के दसवां भाग अन्न-बलिदान के रूप म चघावव। येह यहोवा बर चघाय जानेवाला एक होम-बलिदान, एक महकत सुख-देवइया जेवन-बलिदान अय।
NUM 28:14 हर एक बछवा के संग आधा हीन अंगूर के मंद; मेढ़ा के संग एक हीन के तीसरा भाग; अऊ हर एक मेढ़ा-पीला संग एक हीन के चौथा भाग पेय-बलिदान के रूप म चघाय जावय। येह साल भर हर नवां चंदा के दिन चघाय जानेवाला मासिक होम-बलिदान अय।
NUM 28:15 नियमित होम-बलिदान के संग येकर पेय-बलिदान के अलावा एक ठन बोकरा पाप-बलिदान के रूप म यहोवा ला चघाय जावय।
NUM 28:16 “ ‘हर साल पहिला महिना के चौदहवां दिन यहोवा के फसह माने जावय।
NUM 28:17 ये महिना के पंदरहवां दिन एक तिहार होवय; काबरकि सात दिन बिगर खमीर के बने रोटी खावव।
NUM 28:18 पहिली दिन एक पबितर सभा करव अऊ ओ दिन तुमन रोजमर्रा के काम झन करव।
NUM 28:19 यहोवा ला एक जेवन-बलिदान चघावव, जेह दू ठन बछवा, एक ठन मेढ़ा-पीला अऊ एक-एक साल के सात ठन निरदोस मेढ़ा-पीला के होम-बलिदान ले बने होवय।
NUM 28:20 हर एक बछवा के चढ़ावा के संग तेल ले सने उत्तम पीसान के एक एपा के तीन-दसवां भाग; मेढ़ा के संग दू-दसवां भाग एक अन्न-बलिदान के रूप म चघावव;
NUM 28:21 अऊ सात मेढ़ा-पीला के हर एक के संग एक-दसवां भाग।
NUM 28:22 अपन पछताप करे बर एक ठन बोकरा पाप-बलिदान के रूप म मिलावव।
NUM 28:23 हर बिहनियां के होम-बलिदान के अलावा येमन ला चघावव।
NUM 28:24 ये किसम ले हर एक दिन सात दिन तक यहोवा ला एक महकत सुख-देवइया जेवन-बलिदान चघावव; नियमित होम-बलिदान अऊ येकर पेय-बलिदान के अलावा ये बलिदान चघाय जावव।
NUM 28:25 सातवां दिन एक पबितर सभा करव अऊ ओ दिन रोजमर्रा के काम झन करव।
NUM 28:26 “ ‘पहिली-फसल के दिन, जब तुमन हप्तामन के तिहार के समय नवां अनाज के बलिदान यहोवा ला चघावव, त एक पबितर सभा करव अऊ कोनो रोजमर्रा के काम झन करव।
NUM 28:27 दू ठन बछवा, एक ठन मेढ़ा अऊ एक-एक बछर के सात ठन निरदोस मेढ़ा-पीला के एक होम-बलिदान यहोवा बर महकत सुख-देवइया चढ़ावा के रूप म चघावव।
NUM 28:28 हर एक बछवा के चढ़ावा संग तेल ले सने उत्तम पीसान के एक एपा के तीन-दसवां भाग; मेढ़ा के संग दू-दसवां भाग;
NUM 28:29 अऊ हर सात मेढ़ा-पीला के संग एक-दसवां भाग।
NUM 28:30 अपन पछताप करे बर एक ठन बोकरा मिलावव।
NUM 28:31 नियमित होम-बलिदान अऊ येकर अन्न-बलिदान के अलावा येमन ला एक संग ओमन के पेय-बलिदान के संग चघावव। ये बात के धियान रहय कि पसुमन निरदोस होवंय।
NUM 29:1 “ ‘हर साल सातवां महिना के पहिला दिन एक पबितर सभा करव अऊ ओ दिन नियमित काम झन करव। येह तुम्हर बर तुरही बजाय के दिन अय।
NUM 29:2 यहोवा ला एक महकत सुख-देवइया चढ़ावा के रूप म एक ठन बछवा, एक ठन मेढ़ा अऊ एक-एक साल के सात ठन निरदोस मेढ़ा-पीला के होम-बलिदान चघावव।
NUM 29:3 बछवा के चढ़ावा के संग जैतून तेल ले सने उत्तम पीसान के एक एपा के तीन-दसवां भाग; मेढ़ा के संग दू-दसवां भाग;
NUM 29:4 अऊ हर सातों मेढ़ा-पीला संग एक-दसवां भाग चघावव।
NUM 29:5 अपन पछताप करे बर ओमा पाप-बलिदान बर एक ठन बोकरा घलो मिला लेवव।
NUM 29:6 बताय गे मासिक अऊ हर दिन के होम-बलिदान के संग ओमन के अन्न-बलिदान अऊ पेय-बलिदान के अलावा ये बलिदानमन ला चघाय जावय। येमन यहोवा ला एक महकत सुख-देवइया चघाय गे जेवन-बलिदान अंय।
NUM 29:7 “ ‘ये सातवां महिना के दसवां दिन एक पबितर सभा करव। तुमन अपनआप के इनकार करव अऊ काम झन करव।
NUM 29:8 यहोवा ला एक महकत सुख-देवइया चढ़ावा के रूप म एक ठन बछवा, एक ठन मेढ़ा अऊ एक-एक साल के सात ठन निरदोस मेढ़ा-पीला के होम-बलिदान चघावव।
NUM 29:9 बछवा के चढ़ावा संग तेल ले सने उत्तम पीसान के एक एपा के तीन-दसवां भाग; मेढ़ा के संग दू-दसवां भाग;
NUM 29:10 अऊ सातों मेढ़ा-पीलामन के हर एक के संग एक-दसवां भाग चघावव।
NUM 29:11 पछताप करे बर पाप-बलिदान अऊ नियमित होम-बलिदान के संग येकर अन्न-बलिदान, अऊ ओमन के पेय-बलिदान के अलावा, पाप-बलिदान के रूप म एक ठन बोकरा मिलावव।
NUM 29:12 “ ‘सातवां महिना के पंदरहवां दिन एक पबितर सभा करव अऊ ओ दिन नियमित काम झन करव। सात दिन तक यहोवा बर तिहार मनावव।
NUM 29:13 यहोवा ला एक महकत सुख-देवइया चढ़ावा के रूप म एक जेवन-बलिदान चघावव, जेमा तेरह ठन बछवा, दू ठन मेढ़ा अऊ एक-एक साल के चौदह ठन निरदोस मेढ़ा-पीला होम-बलिदान के होवंय।
NUM 29:14 तेरह बछवा म ले हर एक बछवा के चढ़ावा संग तेल ले सने उत्तम पीसान के एक एपा के तीन-दसवां भाग; दूनों मेढ़ा म ले हर एक के संग दू-दसवां भाग;
NUM 29:15 अऊ चौदह मेढ़ा-पीलामन के हर एक के संग म एक-दसवां भाग चघावव।
NUM 29:16 नियमित होम-बलिदान के संग येकर अन्न-बलिदान अऊ पेय-बलिदान के अलावा, एक ठन बोकरा पाप-बलिदान के रूप म मिलावव।
NUM 29:17 “ ‘दूसरा दिन बारह ठन बछवा, दू ठन मेढ़ा अऊ एक-एक साल के चौदह ठन निरदोस मेढ़ा-पीला चघावव।
NUM 29:18 बछवा, मेढ़ा अऊ मेढ़ा-पीला के संग बताय गे संखिया के मुताबिक ओमन के अन्न-बलिदान अऊ पेय-बलिदान चघावव।
NUM 29:19 नियमित होम-बलिदान के संग येकर अन्न-बलिदान, अऊ ओमन के पेय-बलिदान के अलावा, एक ठन बोकरा पाप-बलिदान के रूप म मिलावव।
NUM 29:20 “ ‘तीसरा दिन गियारह ठन बछवा, दू ठन मेढ़ा अऊ एक-एक साल के चौदह ठन निरदोस मेढ़ा-पीला चघावव।
NUM 29:21 बछवा, मेढ़ा अऊ मेढ़ा-पीला के संग बताय गे संखिया के मुताबिक ओमन के अन्न-बलिदान अऊ पेय-बलिदान चघावव।
NUM 29:22 नियमित होम-बलिदान के संग येकर अन्न-बलिदान अऊ पेय-बलिदान के अलावा, एक ठन बोकरा पाप-बलिदान के रूप म मिलावव।
NUM 29:23 “ ‘चौथा दिन दस ठन बछवा, दू ठन मेढ़ा अऊ एक-एक साल के चौदह ठन निरदोस मेढ़ा-पीला चघावव।
NUM 29:24 बछवा, मेढ़ा अऊ मेढ़ा-पीला के संग बताय गे संखिया के मुताबिक ओमन के अन्न-बलिदान अऊ पेय-बलिदान चघावव।
NUM 29:25 नियमित होम-बलिदान के संग येकर अन्न-बलिदान अऊ पेय-बलिदान के अलावा, एक ठन बोकरा पाप-बलिदान के रूप म मिलावव।
NUM 29:26 “ ‘पांचवां दिन नौ ठन बछवा, दू ठन मेढ़ा अऊ एक-एक साल के चौदह ठन निरदोस मेढ़ा-पीला चघावव।
NUM 29:27 बछवा, मेढ़ा अऊ मेढ़ा-पीला के संग बताय गे संखिया के मुताबिक ओमन के अन्न-बलिदान अऊ पेय-बलिदान चघावव।
NUM 29:28 नियमित होम-बलिदान के संग येकर अन्न-बलिदान अऊ पेय-बलिदान के अलावा, एक ठन बोकरा पाप-बलिदान के रूप म मिलावव।
NUM 29:29 “ ‘छठवां दिन आठ ठन बछवा, दू ठन मेढ़ा अऊ एक-एक साल के चौदह ठन निरदोस मेढ़ा-पीला चघावव।
NUM 29:30 बछवा, मेढ़ा अऊ मेढ़ा-पीला के संग बताय गे संखिया के मुताबिक ओमन के अन्न-बलिदान अऊ पेय-बलिदान चघावव।
NUM 29:31 नियमित होम-बलिदान के संग येकर अन्न-बलिदान अऊ पेय-बलिदान के अलावा, एक ठन बोकरा पाप-बलिदान के रूप म मिलावव।
NUM 29:32 “ ‘सातवां दिन सात ठन बछवा, दू ठन मेढ़ा अऊ एक-एक साल के चौदह ठन निरदोस मेढ़ा-पीला चघावव।
NUM 29:33 बछवा, मेढ़ा अऊ मेढ़ा-पीला के संग बताय गे संखिया के मुताबिक ओमन के अन्न-बलिदान अऊ पेय-बलिदान चघावव।
NUM 29:34 नियमित होम-बलिदान के संग येकर अन्न-बलिदान अऊ पेय-बलिदान के अलावा, एक ठन बोकरा पाप-बलिदान के रूप म मिलावव।
NUM 29:35 “ ‘आठवां दिन एक बिसेस समापन सभा करव अऊ ओ दिन नियमित काम झन करव।
NUM 29:36 यहोवा ला एक महकत सुख-देवइया चढ़ावा के रूप म एक जेवन-बलिदान चघावव, जेमा एक ठन बछवा, एक ठन मेढ़ा अऊ एक-एक साल के सात ठन निरदोस मेढ़ा-पीला के एक होम-बलिदान होवय।
NUM 29:37 बछवा, मेढ़ा अऊ मेढ़ा-पीला के संग बताय गे संखिया के मुताबिक ओमन के अन्न-बलिदान अऊ पेय-बलिदान चघावव।
NUM 29:38 नियमित होम-बलिदान के संग येकर अन्न-बलिदान अऊ पेय-बलिदान के अलावा, एक ठन बोकरा पाप-बलिदान के रूप म मिलावव।
NUM 29:39 “ ‘अपन मन्नत अऊ अपन स्वेच्छा-बलिदान के चढ़ावा के अलावा, तुम्हर ठहिराय गे तिहार म यहोवा ला ये घलो चघावव: तुम्हर होम-बलिदान, अन्न-बलिदान, पेय-बलिदान अऊ मेल-बलिदान।’ ”
NUM 29:40 यहोवा के जम्मो हुकूम ला मूसा ह इसरायलीमन ला बता दीस।
NUM 30:1 मूसा ह इसरायल के गोत्रमन के मुखियामन ला कहिस: “यहोवा के ये हुकूम अय:
NUM 30:2 जब कोनो मनखे यहोवा के मन्नत मानथे या अपनआप परन करके सपथ खावय, त ओह अपन बचन ले झन मुकरय, पर अपन कहे हर बात ला पूरा करय।
NUM 30:3 “जब कोनो जवान नोनी अपन ददा के घर म रहत यहोवा के मन्नत मानथे या अपनआप कोनो परन करथे
NUM 30:4 अऊ ओकर ददा ओकर मन्नत या परन ला सुनथे, पर ओला कुछू नइं कहय, त ओ जवान नोनी के जम्मो मन्नत अऊ ओकर करे गे हर परन ह लागू होथे।
NUM 30:5 पर यदि ओकर ददा ह ओकर मन्नत या ओकर बचन देवई ला सुनके ओला मना कर देथे, त ओकर दुवारा माने गय कोनो मन्नत या परन ह लागू नइं होवय; यहोवा ह ओला छोंड़ दीही, काबरकि ओकर ददा ह ओला मना कर दे हवय।
NUM 30:6 “यदि ओह कोनो परन करे के बाद या अपनआप बिगर सोचे-बिचारे कोनो मन्नत के बाद बिहाव कर लेथे
NUM 30:7 अऊ जब ओकर घरवाला ह येकर बारे म सुनथे, पर ओला कुछू नइं कहय, त फेर ओकर मन्नत या अपनआप करे गे परन करई ह लागू होथे।
NUM 30:8 पर यदि ओकर घरवाला ह मन्नत के बारे म सुनके ओला मना कर देथे, त ओह ओकर घरवाली के परन या बिगर सोचे-बिचारे अपनआप करे गे मन्नत ला खतम कर देथे, अऊ यहोवा ह ओला छेमा कर दीही।
NUM 30:9 “यदि बिधवा या तलाकसुदा माईलोगन कोनो मन्नत मानथे या बचन देथे, त ओह ओकर ले बंधे रहिथे।
NUM 30:10 “यदि कोनो माईलोगन अपन घरवाला के संग रहत कोनो मन्नत मानथे या सपथ खाके कोनो परन करथे
NUM 30:11 अऊ ओकर घरवाला येला सुनके ओला कुछू नइं कहय अऊ ओला मना नइं करय, त ओकर माने गे जम्मो मन्नत या ओकर दुवारा करे गे जम्मो परन लागू होथे।
NUM 30:12 पर यदि ओकर घरवाला ह ओ मन्नत या बचन ला सुनके खतम कर देथे, तब ओ माईलोगन के दुवारा माने गे मन्नत या बचन लागू नइं होवय। ओकर घरवाला ह ओमन ला रद्द कर दे हवय, एकरसेति यहोवा ह ओला छेमा कर दीही।
NUM 30:13 ओकर घरवाला ह ओकर दुवारा माने गे कोनो मन्नत या करे गय सपथ ला लागू कर सकथे या ओला खतम घलो कर सकथे।
NUM 30:14 पर यदि ओकर घरवाला दिन-प्रतिदिन ओकर बारे म ओला कुछू नइं कहय, त येकर मतलब ये अय कि ओह ओकर दुवारा करे गय जम्मो मन्नत या परन ला सहमती देथे। ओह सुनके ओला कुछू नइं कहे के दुवारा ओकर मन्नत या बचन बर सहमती देथे।
NUM 30:15 पर यदि ओह ओ मन्नत या बचन ला सुनके कुछू समय बाद ओमन ला खतम कर देथे, तब ओह अपन घरवाली के दोस के भार उठाही।”
NUM 30:16 एक मनखे अऊ ओकर घरवाली के बीच, अऊ एक ददा अऊ ओकर कुंवारी बेटी के बीच जऊन ह अभी भी घर म रहिथे, ओमन के संबंध के बारे म येमन बिधि अंय, जेला यहोवा ह मूसा ला दीस।
NUM 31:1 यहोवा ह मूसा ला कहिस,
NUM 31:2 “इसरायलीमन बर मिदयानीमन ले बदला ले। ओकर बाद, तेंह मरके अपन पुरखामन संग हमेसा बर मिल जाबे।”
NUM 31:3 तब मूसा ह मनखेमन ला कहिस, “मिदयानीमन के बिरूध लड़ई करे बर अपन कुछू मनखेमन ला तियार होय बर कहव, ताकि ओमन मिदयानीमन ले यहोवा के बदला लेवंय।
NUM 31:4 इसरायल के हर गोत्र म ले एक-एक हजार पुरूसमन ला लड़ई म भेजव।”
NUM 31:5 हर गोत्र म ले एक-एक हजार, कुल बारह हजार हथियारबंद पुरूस लड़ई बर इसरायल के बंस ले तियार होईन।
NUM 31:6 मूसा ह हर गोत्र म ले एक-एक हजार पुरूस लड़ई म भेजिस; संग म एलिआजर पुरोहित के बेटा पीनहास ला पठोईस, जऊन ह अपन संग पबितर-स्थान के चीज अऊ फूंकके इसारा करे बर तुरहीमन ला धरे रिहिस।
NUM 31:7 यहोवा के मूसा ला दिये हुकूम के मुताबिक ओमन मिदयानीमन के बिरूध लड़के जम्मो मिदयानी पुरूस ला मार डारिन।
NUM 31:8 मारे गे मनखेमन के बीच मिदयानीमन के पांच राजा—एवी, रेकेम, सूर, हूर अऊ रेबा रिहिन। ओमन बेओर के बेटा बिलाम ला घलो तलवार ले मार डारिन।
NUM 31:9 इसरायलीमन मिदयानी माईलोगन अऊ लइकामन ला बंदी बना लीन अऊ मिदयानीमन के जम्मो गरूवा-बईला, भेड़-बकरी के झुंड अऊ सामान ला लूट लीन।
NUM 31:10 ओमन मिदयानीमन के बसे जम्मो नगर अऊ ओमन के जम्मो सिविरमन ला नास कर दीन।
NUM 31:11 ओमन जम्मो लूट के सामान, मनखे अऊ पसुमन ला ले लीन,
NUM 31:12 अऊ बंदीमन ला अऊ लूट के सामान ला मूसा अऊ एलिआजर पुरोहित अऊ इसरायली सभा करा मोआब के मैदान म डारे ओमन के डेरा म ले आईन, जऊन ह यरीहो के ओ पार यरदन नदी के तीर म रिहिस।
NUM 31:13 मूसा, एलिआजर पुरोहित अऊ समाज के जम्मो अगुवामन ओमन ले मिले बर सिविर के बाहिर गीन।
NUM 31:14 मूसा ह लड़ई ले लहुंटे सेना के ओ अधिकारीमन ले नराज होईस, जेमन हजारों अऊ सैकड़ों सैनिक के ऊपर सेनापति ठहिराय गे रिहिन।
NUM 31:15 मूसा ह ओमन ले पुछिस, “का तुमन जम्मो माईलोगन ला जीयत छोंड़ दे हव?”
NUM 31:16 येमन ओ माईलोगन रिहिन, जेमन पेओर के घटना म बिलाम के सलाह मानिन अऊ यहोवा के संग बिसवासघात करे बर इसरायली समाज ला बहकाईन, जेकर ले यहोवा के मनखेमन ऊपर एक महामारी फईलिस।
NUM 31:17 अब जम्मो लड़कामन ला मार डारव। अऊ हर ओ माईलोगन ला मार डारव, जऊन ह पुरूस के संग सुते हवय,
NUM 31:18 पर हर ओ लड़की ला अपन बर बचाके रखव, जेह पुरूस के संग कभू नइं सुते हे।
NUM 31:19 “जऊन मनखे ह कोनो मनखे ला मार डारे हे या कोनो मारे गे मनखे ला छुए हे, त ओ मनखे ह सात दिन तक डेरा ले बाहिर रहय। तीसरा अऊ सातवां दिन तुमन अपनआप ला अऊ अपन बंदीमन ला सुध करव।
NUM 31:20 हर एक कपड़ा अऊ संग म चाम के बने हर चीज ला सुध करव, बोकरा के रूआं हो या लकड़ी।”
NUM 31:21 तब एलिआजर पुरोहित ह ओ सैनिकमन ला कहिस, जऊन मन लड़ई म गे रिहिन, “यहोवा के दुवारा मूसा ला दिये गे कानून के मुताबिक ये काम करे के जरूरत हे:
NUM 31:22 सोन, चांदी, कांसा, लोहा, टीन, सीसा
NUM 31:23 अऊ जऊन कुछू चीज आगी म नइं जलय, ओमन ला आगी म डालके निकालव, अऊ तब ये चीजमन सुध हो जाहीं। पर येमन ला सुध करइया पानी ले घलो सुध करना जरूरी ए। अऊ जऊन कुछू चीज आगी म ठहर नइं सकय, ओला ओ पानी म डालके निकालव।
NUM 31:24 सातवां दिन अपन कपड़ामन ला धोवव अऊ तुमन सुध हो जाहू। तब तुमन डेरा म आ सकत हव।”
NUM 31:25 फेर यहोवा ह मूसा ला कहिस,
NUM 31:26 “तें अऊ एलिआजर पुरोहित अऊ समाज के परिवार के मुखियामन बंदी बनाय गे जम्मो मनखे अऊ पसुमन के गनती करव।
NUM 31:27 लूट के सामान ला लड़ई म गय सैनिक अऊ समाज के बाकि मनखेमन के बीच बरोबर-बरोबर बांट दव।
NUM 31:28 जऊन सैनिकमन लड़ई म गे रिहिन, ओमा ले हर पांच सौ के पाछू एक झन ला यहोवा बर राजकर के रूप म अलग रखव; चाहे ओमन मनखे, पसु, गदहा या भेड़मन होवंय।
NUM 31:29 ओमन के आधा भाग म ले ये राजकर ला लेय ले अऊ येला यहोवा बर एलिआजर पुरोहित ला भेंट देय दे।
NUM 31:30 इसरायलीमन के आधा भाग म ले, हर पचास के पाछू एक झन ला अलग रख; चाहे ओमन मनखे, पसु, गदहा, भेड़ या आने पसुमन होवंय। ये भाग ला ओ लेवीमन ला देय दे, जेमन के ऊपर यहोवा के पबितर-तम्बू के देखरेख के जिम्मेदारी हवय।”
NUM 31:31 मूसा अऊ एलिआजर पुरोहित मूसा ला दिये गय यहोवा के हुकूम के मुताबिक करिन।
NUM 31:32 सैनिकमन के दुवारा लूटे गय सामान म ले ये बचे रिहिस 6,75,000 भेड़,
NUM 31:33 72,000 पसु
NUM 31:34 61,000 गदहा
NUM 31:35 32,000 माईलोगन जेमन कभू कोनो पुरूस संग नइं सुते रिहिन।
NUM 31:36 जेमन लड़ई म गे रिहिन, ओमन के आधा भाग ये रिहिस: 3,37,500 भेड़,
NUM 31:37 जेमा ले यहोवा के राजकर 675 ठन भेड़ रिहिन;
NUM 31:38 36,000 पसु, जेमा ले यहोवा के राजकर 72 ठन पसु रिहिन;
NUM 31:39 30,500 गदहा, जेमा ले यहोवा के राजकर 61 ठन गदहा रिहिन;
NUM 31:40 16,000 मनखे, जेमा यहोवा बर ठहिराय राजकर के रूप म 32 झन मनखे रिहिन।
NUM 31:41 मूसा ह एलिआजर पुरोहित ला यहोवा के बांटा के रूप म राजकर दीस, जइसे कि यहोवा ह मूसा ला हुकूम दे रिहिस।
NUM 31:42 मूसा ह सैनिकमन ले लूट के आधा सामान ला इसरायलीमन बर अलग रखिस;
NUM 31:43 समाज के आधा भाग 3,37,500 भेड़,
NUM 31:44 36,000 पसु,
NUM 31:45 30,500 गदहा,
NUM 31:46 अऊ 16,000 मनखे।
NUM 31:47 इसरायलीमन के आधा भाग म ले, मूसा ह हर पचास मनखे अऊ पचास पसु के पाछू एक-एक मनखे अऊ पसु ला अलग करिस, जइसे कि यहोवा ह ओला हुकूम दे रिहिस, अऊ ओला लेवीमन ला दे दीस, जेमन यहोवा के पबितर-तम्बू के देखरेख करत रिहिन।
NUM 31:48 तब सेना के हर दल के ऊपर ठहिराय गय अधिकारीमन—हजारों सैनिकमन अऊ सैकड़ों सैनिकमन ऊपर ठहिराय गय सेनापतिमन मूसा करा गीन
NUM 31:49 अऊ मूसा ला कहिन, “तोर सेवकमन हमर अधीन रहे सैनिकमन के गनती करे हवंय, अऊ ओमा ले एको झन भी नइं छूटे हवंय।
NUM 31:50 हमन म ले हर एक जन सोन के जऊन चीजमन ला अपन अधिकार म ले हन—बाजूबंद, कंगन, मुंदरी, कान के बाली अऊ माला—येला हमन यहोवा बर चढ़ावा के रूप म लाने हन, ताकि यहोवा के आघू म हमन पछताप कर सकन।”
NUM 31:51 तब मूसा अऊ एलिआजर पुरोहित ओमन ले तरासके बनाय गे सोन के जम्मो चीजमन ला ले लीन।
NUM 31:52 हजारों सैनिक अऊ सैकड़ों सैनिक के सेनापति दुवारा दिये गय जम्मो सोन ला, मूसा अऊ एलिआजर यहोवा ला भेंट म चघाईन, ओकर वजन 16,750 सेकेल रिहिस।
NUM 31:53 हर एक सैनिक अपन बर लूट के सामान लेय ले रिहिन।
NUM 31:54 मूसा अऊ एलिआजर पुरोहित हजारों अऊ सैकड़ों सैनिकमन के सेनापति ले ओ सोन ला स्वीकार कर लीन अऊ ओ सोन ला मिलापवाला तम्बू म ले आईन, ताकि ओह यहोवा के आघू म इसरायलीमन बर एक सुरता करइया चीज ठहिरे।
NUM 32:1 रूबेनी अऊ गादीमन करा गरूवा-बईला अऊ भेड़-बकरी के बड़े-बड़े झुंड रिहिन। जब ओमन देखिन कि याजेर अऊ गिलाद पसु-धन बर उचित छेत्र अंय,
NUM 32:2 त ओमन मूसा अऊ एलिआजर पुरोहित अऊ समाज के अगुवामन करा आईन अऊ कहिन,
NUM 32:3 “अतारोत, दीबोन, याजेर, निमराह, हेसबोन, एलाले, सबाम, नबो अऊ बोन नगरमन ला
NUM 32:4 यहोवा ह इसरायली समाज के मनखेमन के आघू म जीत लीस; ये नगरमन पसु-धन बर सही अंय, अऊ तुम्हर सेवकमन करा पसु-धन हवय।
NUM 32:5 यदि तुम्हर किरपा के नजर हमर ऊपर हवय, त ये देस ला तुम्हर सेवकमन के अधिकार म दिये जावय। हमन ला यरदन नदी के ओ पार झन जावन दव।”
NUM 32:6 तब मूसा ह गादी अऊ रूबेनीमन ला कहिस, “का तुम्हर संगी इसरायलीमन लड़ई करे बर जावंय, जब तुमन इहां बईठे रहव?
NUM 32:7 तुमन काबर इसरायलीमन ला यरदन के ओ पार के देस म जाय बर हतास करत हव, जेला कि यहोवा ह ओमन ला दे हवय?
NUM 32:8 तुम्हर पुरखामन घलो अइसने ही करिन, जब मेंह ओमन ला कादेस-बरने ले ओ देस ला देखे बर पठोंय।
NUM 32:9 जब ओमन एसकोल के घाटी म हबरिन अऊ उहां ले ओ देस ला देखिन, त ओमन इसरायलीमन ला ओ देस म जाय बर हतास करिन, जेला यहोवा ह ओमन ला दे रिहिस।
NUM 32:10 तब ओ दिन यहोवा के कोप ह भड़किस अऊ ओह ये सपथ खाईस:
NUM 32:11 ‘काबरकि ओमन पूरा मन से मोर पाछू नइं चलिन, एकरसेति मिसर ले निकले के बेरा जतेक झन बीस साल या ओकर ले जादा उमर के रिहिन, ओमा के कोनो भी ओ देस ला देखे नइं सकहीं, जेला देय के परतिगियां मेंह अब्राहम, इसहाक अऊ याकूब ले सपथ खाके करे रहेंव—
NUM 32:12 सिरिप कनजी यपुन्ने के बेटा कालेब अऊ नून के बेटा यहोसू ही ओ देस ला देखे सकहीं, काबरकि ओमन पूरा मन से यहोवा के पाछू चले हवंय।’
NUM 32:13 त यहोवा के कोप इसरायल ऊपर भड़किस अऊ ओह ओमन ला सुन्ना जगह म चालीस साल तक भटकाईस, जब तक कि ओ पूरा पीढ़ी खतम नइं हो गीस, जेमन ओकर नजर म दुस्ट काम करे रिहिन।
NUM 32:14 “अऊ तुमन इहां, पापीमन के संतान, अपन पुरखामन के जगह म खड़े हव अऊ इसरायल बर यहोवा ला अऊ गुस्सा देवात हव।
NUM 32:15 यदि तुमन ओकर पाछू चलई बंद कर दूहू, त ओह फेर ये जम्मो मनखेमन ला सुन्ना जगह म छोंड़ दीही, अऊ तुमन ओमन के बिनास के कारन होहू।”
NUM 32:16 तब गादी अऊ रूबेनीमन मूसा करा आके कहिन, “हमन इहां अपन पसुमन बर थान अऊ हमर माईलोगन अऊ लइकामन बर सहर बसाय चाहत हन।
NUM 32:17 पर हमन खुद लड़ई बर हथियार धरबो अऊ इसरायलीमन के आघू-आघू जाबो, जब तक कि हमन ओमन ला ओमन के जगह म अमरा नइं देबो। इही दौरान हमर माईलोगन अऊ लइकामन ये देस के निवासीमन ले बचे बर गढ़वाले सहर म रहिहीं।
NUM 32:18 हमन तब तक अपन घर नइं लहुंटन, जब तक कि हर एक इसरायली अपन उत्तराधिकार ला नइं पा लीही।
NUM 32:19 हमन यरदन के ओ पार ओमन के संग कोनो उत्तराधिकार नइं लेवन, काबरकि हमर उत्तराधिकार हमन ला यरदन के पूरब कोति मिल गे हवय।”
NUM 32:20 तब मूसा ह ओमन ला कहिस, “यदि तुमन ये करहू—यदि तुमन खुद यहोवा कोति ले लड़ई बर हथियार धरहू
NUM 32:21 अऊ यदि तुमन जम्मो, जऊन मन हथियार धरहू अऊ परभू के आघू यरदन के ओ पार जाहू अऊ यहोवा ह अपन आघू ले अपन बईरीमन ला निकाल दीही—
NUM 32:22 तब जब देस ह यहोवा के आघू म जीत लिये जाही, त तुमन लहुंट सकत हव अऊ यहोवा बर अऊ अपन संगी इसरायलीमन बर अपन जिम्मेदारी ले छूट सकत हव। अऊ ये देस ह यहोवा के आघू म तुम्हर अधिकार म हो जाही।
NUM 32:23 “पर यदि तुमन ये काम करे म असफल होहू, त तुमन यहोवा के बिरूध पाप करहू, अऊ तुमन ये बात ला खचित जान लव कि तुमन ला तुम्हर पाप लगही।
NUM 32:24 अपन माईलोगन अऊ लइकामन बर सहर अऊ अपन पसुमन बर थान बनावव, अऊ अपन करे गे परतिगियां ला पूरा करव।”
NUM 32:25 गादी अऊ रूबेनीमन मूसा ला कहिन, “हमन तोर सेवकमन, जइसे हमर मालिक ह हुकूम देवत हे, वइसे करबो।
NUM 32:26 हमर लइका अऊ घरवाली, हमर गरूवा-बईला अऊ भेड़-बकरी के झुंड इहां गिलाद के सहरमन म रहिहीं।
NUM 32:27 पर तोर सेवकमन, हर ओ मनखे जऊन ह लड़ई बर हथियार धरे हवय, यहोवा के आघू म लड़ई करे बर ओ पार जाही, जइसे कि हमर मालिक ह कहत हे।”
NUM 32:28 तब मूसा ह ओमन के बारे म एलिआजर पुरोहित अऊ नून के बेटा यहोसू अऊ इसरायली गोत्र के परिवार के मुखियामन ला हुकूम दीस।
NUM 32:29 मूसा ह ओमन ला कहिस, “यदि गादी अऊ रूबेनीमन के लड़ई बर हथियार धरे हर एक पुरूस यहोवा के आघू म तुम्हर संग यरदन के ओ पार जाथें, अऊ तब जब ओ देस ह तुम्हर अधिकार म आ जाथे, त तुमन गिलाद के देस ला ओमन के अधिकार म दे दूहू।
NUM 32:30 पर यदि ओमन हथियार धरके तुम्हर संग ओ पार नइं जाहीं, त ओमन ला कनान म ही अपन भाग स्वीकार करना पड़ही।”
NUM 32:31 गादी अऊ रूबेनीमन जबाब दीन, “तोर सेवकमन वइसने ही करहीं, जइसने यहोवा ह कहे हवय।
NUM 32:32 हमन हथियार धरके यहोवा के आघू म ओ पार कनान देस म जाबो, पर उत्तराधिकार के रूप म हमर संपत्ति यरदन के इही पार रहय।”
NUM 32:33 तब मूसा ह गाद, रूबेन अऊ यूसुफ के बेटा मनस्से के आधा गोत्र ला अमोरीमन के राजा सीहोन के राज अऊ बासान के राजा ओग के राज ला दे दीस—पूरा देस, येकर सहरमन अऊ ओमन के चारों कोति के इलाका ला दे दीस।
NUM 32:34 गादीमन दीबोन, अतारोत, अरोएर,
NUM 32:35 अतरोत-सोपान, याजेर, योगबहा,
NUM 32:36 बेत-निमरा अऊ बेत-हारान ला गढ़वाले नगर बना दीन, अऊ अपन पसुमन बर थान बनाईन।
NUM 32:37 अऊ रूबेनीमन हेसबोन, एलाले, अऊ किरयातैम,
NUM 32:38 अऊ संग म नबो अऊ बाल-मेओन (ये नांवमन ला बदल दिये गीस) अऊ सिबमा ला फेर बनाईन। ओमन फेर बनाय गे सहरमन के नांव रखिन।
NUM 32:39 मनस्से के बेटा माकीर के संतानमन गिलाद जाके ओला अपन कब्जा म कर लीन अऊ जऊन अमोरीमन उहां रहत रिहिन, ओमन ला भगा दीन।
NUM 32:40 तब मूसा ह मनस्से के संतान माकीर ला गिलाद के इलाका दे दीस, अऊ ओमन उहां बस गीन।
NUM 32:41 मनस्से के एक संतान याईर ह गिलाद के नगरमन ऊपर कब्जा कर लीस अऊ ओमन के नांव हव्वोत-याईर रखिस।
NUM 32:42 अऊ नोबह ह कनात अऊ ओकर आसपास के बस्तीमन ऊपर कब्जा कर लीस अऊ ओला अपन ही नांव नोबह दीस।
NUM 33:1 जब इसरायलीमन मूसा अऊ हारून के अगुवई म दल बना-बनाके मिसर देस ले बाहिर निकलिन, त येमन ओमन के यातरा के पड़ाव रिहिन।
NUM 33:2 यहोवा के हुकूम ले मूसा ह ओमन के यातरा के पड़ावमन के लेखा रखिस। पड़ावमन के मुताबिक येह ओमन के यातरा रिहिस:
NUM 33:3 पहिला महिना के पंदरहवां दिन, याने कि फसह तिहार के बाद दूसर दिन इसरायलीमन रामसेस सहर ले आघू बढ़िन। ओमन जम्मो मिसरीमन के देखत म बड़े निडरता से निकलिन;
NUM 33:4 ओ समय मिसरीमन अपन पहिलांतमन ला माटी देवत रिहिन, जेमन ला यहोवा ह मार डारे रिहिस; काबरकि यहोवा ह ओमन के देवतामन ला दंड देय रिहिस।
NUM 33:5 इसरायलीमन रामसेस ले चलके सुक्कोत नांव के जगह म डेरा डालिन।
NUM 33:6 फेर सुक्कोत ले आघू बढ़के एताम म डेरा डालिन, जऊन ह सुन्ना जगह के तीर म हवय।
NUM 33:7 ओमन एताम ले पाछू लहुंटके पी-हाहीरोत गीन, जऊन ह बाल-सपोन के पूरब म हवय, अऊ उहां मिगदोल के लकठा म डेरा डालिन।
NUM 33:8 तब ओमन पी-हाहीरोत ले चलके समुंदर ले होवत सुन्ना जगह म आईन, अऊ एताम के सुन्ना जगह म तीन दिन के रसता तय करिन, अऊ मारा नांव के जगह म डेरा डालिन।
NUM 33:9 ओमन मारा ले चलके एलीम म आईन, जिहां बारह ठन पानी के सोता अऊ सत्तर ठन खजूर के रूख रिहिन, अऊ ओमन उहां डेरा डालिन।
NUM 33:10 ओमन एलीम ले चलके लाल-समुंदर के तीर म डेरा डालिन।
NUM 33:11 ओमन लाल-समुंदर ले चलके सीन के सुन्ना जगह म डेरा डालिन।
NUM 33:12 फेर ओमन सीन के सुन्ना जगह ले दोपका म डेरा डालिन।
NUM 33:13 ओमन दोपका ले चलके आलूस म डेरा डालिन।
NUM 33:14 फेर ओमन आलूस ले चलके रपीदीम म डेरा डालिन, जिहां मनखेमन के पीये बर पानी नइं रिहिस।
NUM 33:15 तब ओमन रपीदीम ले चलके सीनय के सुन्ना जगह म डेरा डालिन।
NUM 33:16 फेर ओमन सीनय के सुन्ना जगह ले चलके किबरोत-हतावा म डेरा डालिन।
NUM 33:17 तब ओमन किबरोत-हतावा ले चलके हसेरोत म डेरा डालिन।
NUM 33:18 फेर ओमन हसेरोत ले चलके रितमा म डेरा डालिन।
NUM 33:19 ओमन रितमा ले चलके रिम्मोन-पेरेस म डेरा डालिन।
NUM 33:20 ओमन रिम्मोन-पेरेस ले चलके लिबना म डेरा डालिन।
NUM 33:21 ओमन लिबना ले चलके रिस्सा म डेरा डालिन।
NUM 33:22 ओमन रिस्सा ले चलके कहेलाता म डेरा डालिन।
NUM 33:23 तब ओमन कहेलाता ले चलके सेपेर पहाड़ करा डेरा डालिन।
NUM 33:24 फेर ओमन सेपेर पहाड़ ले चलके हरादा म डेरा डालिन।
NUM 33:25 तब ओमन हरादा ले चलके मखेलोत म डेरा डालिन।
NUM 33:26 फेर ओमन मखेलोत ले चलके तहत म डेरा डालिन।
NUM 33:27 तब ओमन तहत ले चलके तेरह म डेरा डालिन।
NUM 33:28 फेर ओमन तेरह ले चलके मितका म डेरा डालिन।
NUM 33:29 तब ओमन मितका ले चलके हसमोना म डेरा डालिन।
NUM 33:30 फेर ओमन हसमोना ले चलके मोसेरोत म डेरा डालिन।
NUM 33:31 तब ओमन मोसेरोत ले चलके बेने-जाकन म डेरा डालिन।
NUM 33:32 फेर ओमन बेने-जाकन ले चलके होर-हग्गीदगाद म डेरा डालिन।
NUM 33:33 तब ओमन होर-हग्गीदगाद ले चलके योतबाता म डेरा डालिन।
NUM 33:34 फेर ओमन योतबाता ले चलके अबरोना म डेरा डालिन।
NUM 33:35 ओमन अबरोना ले चलके एसियोन-गेबेर म डेरा डालिन।
NUM 33:36 फेर ओमन एसियोन-गेबेर ले चलके सीन के सुन्ना जगह कादेस म डेरा डालिन।
NUM 33:37 तब ओमन कादेस ले चलके एदोम के सीमना म होर पहाड़ करा डेरा डालिन।
NUM 33:38 यहोवा के हुकूम ले हारून पुरोहित ह होर पहाड़ ऊपर गीस, जिहां ओह मर गीस; ओकर मिरतू इसरायलीमन के मिसर देस ले निकले के चालीसवां साल के पांचवां महिना के पहिला दिन होईस।
NUM 33:39 जब हारून के मिरतू होर पहाड़ म होईस, त ओकर उमर एक सौ तेईस साल रिहिस।
NUM 33:40 इही समय कनान के नेगेव म रहइया अराद के कनानी राजा ला पता चलिस कि इसरायलीमन आवत हें।
NUM 33:41 इसरायलीमन होर पहाड़ ले चलके सलमोना म डेरा डालिन।
NUM 33:42 ओमन सलमोना ले चलके पुनोन म डेरा डालिन।
NUM 33:43 ओमन पुनोन ले चलके ओबोत म डेरा डालिन।
NUM 33:44 फेर ओमन ओबोत ले चलके मोआब के सीमना म इये-अबारीम करा डेरा डालिन।
NUM 33:45 फेर इये-अबारीम ले चलके दीबोन-गाद म डेरा डालिन।
NUM 33:46 फेर ओमन दीबोन-गाद ले चलके अलमोन-दिबलातैम म डेरा डालिन।
NUM 33:47 तब ओमन अलमोन-दिबलातैम ले चलके नबो के लकठा म अबारीम के पहाड़मन म डेरा डालिन।
NUM 33:48 फेर ओमन अबारीम के पहाड़मन ले चलके यरीहो के ओ पार यरदन नदी के तीर मोआब के मैदान म डेरा डालिन।
NUM 33:49 उहां ओमन यरदन नदी के तीर बेत-यसीमोत ले लेके आबेल-सित्तीम तक मोआब के मैदान म डेरा डालिन।
NUM 33:50 यरीहो के ओ पार यरदन नदी के तीर मोआब के मैदान म यहोवा ह मूसा ला कहिस,
NUM 33:51 “इसरायलीमन ले बात कर अऊ ओमन ला कह: ‘जब तुमन यरदन नदी ला पार करके कनान देस म जावव,
NUM 33:52 त अपन आघू ले ओ देस के जम्मो निवासी ला भगा दव। ओमन के गढ़े, अऊ ढालके बनाय गय जम्मो मूरती ला नास कर दव, अऊ ओमन के जम्मो ऊंचहा जगहमन ला गिरा दव।
NUM 33:53 ओ देस ला अपन अधिकार म ले लव अऊ उहां बस जावव, काबरकि मेंह ओ देस तुमन ला अधिकार करे बर दे हवंव।
NUM 33:54 अपन गोत्र के मुताबिक चिट्ठी निकालके ओ देस ला बांट लेवव। बड़े दल ला बड़े भाग अऊ छोटे दल ला छोटे भाग देवव। चिट्ठी के मुताबिक जऊन भाग ओमन ला मिलथे, ओह ओमन के होही। अपन पुरखा के गोत्रमन के मुताबिक येला बांटव।
NUM 33:55 “ ‘पर यदि तुमन ओ देस के निवासीमन ला निकाल नइं सकव, त ओमन म ले जेमन ला तुमन रहे बर दूहू, ओमन तुम्हर आंखीमन म कचरा अऊ तुम्हर पंजरामन म कांटा सहीं हो जाहीं। ओमन तुम्हर बर ओ देस म समस्या खड़े करहीं, जिहां तुमन रहिहू।
NUM 33:56 अऊ मेंह तुम्हर संग वइसने करहूं, जइसने ओमन बर करे के ठाने हंव।’ ”
NUM 34:1 यहोवा ह मूसा ला कहिस,
NUM 34:2 “इसरायलीमन ला हुकूम देके कह: ‘जब तुमन कनान देस म जावव, त जऊन भुइयां तुमन ला उत्तराधिकार के रूप म दिये जाही, ओकर ये सीमना होवय:
NUM 34:3 “ ‘तुम्हर दक्खिन कोति सीन के सुन्ना जगह के कुछू भाग घलो होही, जऊन ह एदोम के सीमना ए। तुम्हर दक्खिनी सीमना ह पूरब म मिरतू सागर के दक्खिनी छोर ले सुरू होही,
NUM 34:4 अऊ अकरबीम चढ़ई के दक्खिन के पार सीन कोति आही अऊ कादेस-बरने नगर के दक्खिन तक जाही। तब येह हाजार-अद्दार तक जाके असमोन तक जाही,
NUM 34:5 असमोन ले मुड़के मिसर के नरवा म जुड़ जाही अऊ भूमध्य सागर म खतम होही।
NUM 34:6 तुम्हर पछिमी सीमना ह भूमध्य सागर के किनारा होही। येह पछिम म तुम्हर सीमना होही।
NUM 34:7 अपन उत्तरी सीमना बर, भूमध्य सागर ले होर पहाड़ तक एक लकीर खींचव
NUM 34:8 अऊ होर पहाड़ ले लेबो-हमात सहर तक ये लकीर जाही। तब सीमना ह सेदाद नगर तक जाही,
NUM 34:9 अऊ जिपरोन तक बढ़के हसर-एनान करा खतम होही। येह उत्तर म तुम्हर सीमना होही।
NUM 34:10 अपन पूरब के सीमना बर, हसर-एनान ले सपाम तक एक लकीर खींचव।
NUM 34:11 सीमना ह सपाम ले खाल्हे ऐन के पूरब कोति रिबला तक जाही अऊ ढलान म बढ़त गलील समुंदर के पूरब तक जाही।
NUM 34:12 तब सीमना ह खाल्हे यरदन के तीरे-तीर जाही अऊ मिरतू सागर करा खतम होही।
NUM 34:13 मूसा ह इसरायलीमन ला हुकूम दीस: “चिट्ठी डारके ये देस ला बांटव, अऊ ओमन ला उत्तराधिकार के रूप म दे दव। यहोवा के हुकूम अय कि ये देस साढ़े नौ गोत्रमन ला दिये जावय,
NUM 34:14 काबरकि रूबेन के गोत्र, गाद के गोत्र अऊ मनस्से के आधा गोत्र के परिवारमन अपन उत्तराधिकार पा गे हवंय।
NUM 34:15 ये ढाई गोत्र के मनखेमन सूरज निकले के दिसा म, यरीहो के ओ पार, यरदन के पूरब म अपन उत्तराधिकार पा गे हवंय।”
NUM 34:16 फेर यहोवा ह मूसा ला कहिस,
NUM 34:17 “एलिआजर पुरोहित अऊ नून के बेटा यहोसू ओ मनखेमन के नांव अय, जेमन के ऊपर ये देस ला बांटके तुमन ला उत्तराधिकार म देय के जिम्मेदारी हवय।
NUM 34:18 अऊ हर एक गोत्र ले एक अगुवा ठहिरा, जेमन ये देस ला बांटे म मदद करहीं।
NUM 34:19 “ओमन के नांव ये अय: “यहूदा के गोत्र ले, यपुन्ने के बेटा कालेब;
NUM 34:20 सिमोन के गोत्र ले, अमीहूद के बेटा समूएल;
NUM 34:21 बिनयामीन के गोत्र ले, किसलोन के बेटा एलीदाद;
NUM 34:22 दान के गोत्र ले, योगली के बेटा बुक्की ह अगुवा रिहिस;
NUM 34:23 यूसुफ के बेटा मनस्से के गोत्र ले, एपोद के बेटा हन्नीएल ह अगुवा रिहिस;
NUM 34:24 यूसुफ के बेटा एपरैम के गोत्र ले, सिपतान के बेटा कमूएल ह अगुवा रिहिस;
NUM 34:25 जबूलून के गोत्र ले, परनाक के बेटा एलीसापान ह अगुवा रिहिस;
NUM 34:26 इस्साकार के गोत्र ले, अज्जान के बेटा पलतीएल ह अगुवा रिहिस;
NUM 34:27 आसेर के गोत्र ले, सलोमी के बेटा अहीहूद ह अगुवा रिहिस;
NUM 34:28 अऊ नपताली के गोत्र ले, अमीहूद के बेटा पदहेल ह अगुवा रिहिस।”
NUM 34:29 येमन ओ मनखे अंय, जेमन ला यहोवा ह कनान देस म इसरायलीमन ला उत्तराधिकार बांटे के हुकूम दीस।
NUM 35:1 यरीहो के ओ पार, यरदन नदी के तीर, मोआब के मैदान म यहोवा ह मूसा ला कहिस,
NUM 35:2 “इसरायलीमन ला हुकूम दे कि ओमन अपन उत्तराधिकार म पाय नगरमन ले कुछू नगर लेवीमन ला देवंय। अऊ ओमन ला नगर के चारों कोति के चरागन घलो देवंय।
NUM 35:3 तब ओमन करा रहे बर नगर अऊ गाय-बईला, भेड़-बकरी अऊ ओमन के आने जम्मो पसु बर चरागन होही।
NUM 35:4 “नगरमन के चारों कोति जऊन चरागन तेंह लेवीमन ला देबे, ओ चरागनमन के फईलाव नगर के दीवार ले एक हजार क्यूबीट तक होवय।
NUM 35:5 नगर के बाहिर, पूरब कोति दू हजार क्यूबीट, दक्खिन कोति दू हजार क्यूबीट, पछिम कोति दू हजार क्यूबीट अऊ उत्तर कोति दू हजार क्यूबीट नापव अऊ नगर ह मांझा म रहय। ओमन करा ये जगह नगर म चरागन के रूप म होही।
NUM 35:6 “लेवीमन ला तेंह जऊन सहरमन ला देबे, ओमा के छै ठन सहरमन सरन लेय के सहर होहीं, अऊ येमा ओ मनखे ह भागके जा सकथे, जऊन ह कोनो ला मार डारे हवय। येकर छोंड़, ओमन ला अऊ बियालीस सहर देबे।
NUM 35:7 तेंह लेवीमन ला कुल मिलाके अड़तालीस ठन नगर ओमन के चरागन सहित देबे।
NUM 35:8 इसरायलीमन के अधिकार के देस म ले जऊन नगर तेंह लेवीमन ला देबे, ओ नगरमन गोत्र के मुताबिक उत्तराधिकार के अनुपात म दिये जावंय: जऊन गोत्र के जादा नगर हवंय, ओकर ले जादा, पर जऊन गोत्र के कम नगर हवंय, ओकर ले कम नगर लेबे।”
NUM 35:9 तब यहोवा ह मूसा ला कहिस:
NUM 35:10 “इसरायलीमन ले बात कर अऊ ओमन ला कह: ‘जब तुमन यरदन पार करके कनान देस म जावव,
NUM 35:11 तब कुछू नगरमन ला अपन सरन लेय के नगर के रूप म चुनव, जिहां ओ मनखे ह भागके जा सकथे, जऊन ह कोनो ला अनजाने म मार डारे हवय।
NUM 35:12 ओ नगरमन बदला लेवइया मनखे ले सरन के जगह होहीं, ताकि सभा के आघू म जांच होय के पहिली ओला झन मार डारे जावय।
NUM 35:13 ये छै ठन नगर जेला तुमन दूहू, येमन तुम्हर सरन लेय के सहर होहीं।
NUM 35:14 तीन सहर यरदन के ये पार अऊ तीन सहर कनान देस म सरन लेय के सहर के रूप म दव।
NUM 35:15 ये छै नगर इसरायली अऊ ओमन के बीच रहइया परदेसीमन बर सरन लेय के जगह होहीं, ताकि कोनो मनखे अनजाने म कोनो आने मनखे ला मार डारथे, त ओह उहां भागके जा सकय।
NUM 35:16 “ ‘यदि कोनो मनखे आने मनखे ला लोहा के चीज ले अइसे मारथे कि ओह मर जाथे, त ओ मनखे ह हतियारा अय; अऊ ओ हतियारा ला मार डारे जावय।
NUM 35:17 या यदि कोनो मनखे पथरा लेके कोनो आने मनखे ला अइसे चोट पहुंचाथे कि ओह मर जाथे, त ओ मनखे ह हतियारा अय; ओला मार डारे जावय।
NUM 35:18 या कोनो मनखे ह लकड़ी के कोनो चीज धरे हवय अऊ ओकर ले कोनो आने मनखे ला अइसे मारथे कि ओह मर जाथे, त ओ मनखे ह हतियारा अय; ओला मार डारे जावय।
NUM 35:19 खून के बदला लेवइया ह ओ हतियारा ला मार डारय; जब भी बदला लेवइया ह हतियारा ला देखथे, त ओ बदला लेवइया ह हतियारा ला मार डारय।
NUM 35:20 यदि कोनो मनखे जलन के कारन कोनो आने मनखे ला ढकेल देथे या जानबूझके ओकर ऊपर कोनो चीज फेंकथे, जेकर से ओह मर जाथे
NUM 35:21 या यदि बईरता के कारन एक मनखे ह कोनो आने मनखे ला मुक्का मारथे, जेकर से ओह मर जाथे, त ओ मुक्का मारनेवाला मनखे ह मार डारे जावय; ओ मनखे ह एक हतियारा अय। जब भी खून के बदला लेवइया ह हतियारा ले मिलय, त ओ बदला लेवइया ह ओला मार डारय।
NUM 35:22 “ ‘पर यदि बिगर बईरता के कोनो मनखे कोनो ला धक्का देथे या अनजाने म ओकर ऊपर कुछू चीज ला फेंकथे
NUM 35:23 या ओला बिगर देखे ओकर ऊपर कोनो भारी पथरा गिरा देथे, जेकर से आने मनखे ह मर जाथे, त जब ओ आने मनखे ह कोनो बईरी नइं रिहिस अऊ चोट पहुंचाय के कोनो इरादा नइं रिहिस,
NUM 35:24 तब सभा ह ये मामला म मारइया अऊ खून के पलटा लेवइया के बीच ये नियम के मुताबिक नियाय करय।
NUM 35:25 सभा ह हतिया के दोसी मनखे ला खून के पलटा लेवइया मनखे ले बचावय अऊ दोसी मनखे ला सरन लेय के सहर म वापिस पठो दे, जिहां ओह भागके गे रिहिस। दोसी मनखे ह उहां तब तक रहय, जब तक कि पबितर तेल ले अभिसेक करे गय ओ समय के महा पुरोहित के मिरतू न हो जाय।
NUM 35:26 “ ‘पर यदि दोसी मनखे ह ओ सरन लेय के सहर के सीमना ले बाहिर जाथे, जिहां ओह भागके गे हवय
NUM 35:27 अऊ खून के बदला लेवइया ह ओला नगर के बाहिर पाथे, त खून के बदला लेवइया ह दोसी मनखे ला मार सकथे अऊ हतिया के दोसी नइं होवय।
NUM 35:28 जरूरी अय कि दोसी मनखे ह महा पुरोहित के मिरतू तक सरन लेय के सहर म रहय; सिरिप महा पुरोहित के मिरतू के बाद ही ओह अपन खुद के संपत्ति म लहुंट सकथे।
NUM 35:29 “ ‘जिहां कहूं भी तुमन रहव, येह तुम्हर पीढ़ी-पीढ़ी तक कानून बने रहय।
NUM 35:30 “ ‘जऊन मनखे ह कोनो आने मनखे ला मार डारथे, त ओह सिरिप गवाहमन के गवाही के आधार म ही हतियारा के रूप म मार डारे जावय। पर कोनो भी मनखे एक गवाह के गवाही के आधार म झन मार डारे जावय।
NUM 35:31 “ ‘कोनो हतियारा, जऊन ह मिरतू के दोसी हवय, ओकर जिनगी के बदले कोनो किसम के धन झन लेवव। ओह मार डारे जावय।
NUM 35:32 “ ‘जऊन ह सरन लेय के सहर म भाग गे हवय, ओकर बर कोनो किसम के छुड़ौती के धन स्वीकार झन करव कि ओह महा पुरोहित के मिरतू के पहिले वापिस जाके अपन देस म रह सकय।
NUM 35:33 “ ‘ओ देस ला असुध झन करव, जिहां तुमन रहत हव। खून करई ह देस ला असुध कर देथे, अऊ ओ देस बर पछताप नइं करे जा सकय, जिहां खून बहाय गे हवय; पछताप सिरिप ओ मनखे के खून के दुवारा होथे, जऊन ह खून बहाय हवय।
NUM 35:34 ओ देस ला असुध झन करव, जिहां तुमन रहिथव अऊ जिहां मेंह रहिथंव, काबरकि में यहोवा ह इसरायलीमन के बीच रहिथंव।’ ”
NUM 36:1 तब गिलाद, जऊन ह माकीर के बेटा अऊ मनस्से के पोता रिहिस, ओकर गोत्र के परिवार के मुखियामन यूसुफ के संतानमन के गोत्र म ले रिहिन; ये मुखियामन आईन अऊ मूसा अऊ अगुवामन के आघू म याने कि इसरायली परिवार के मुखियामन के आघू म कहे लगिन,
NUM 36:2 “जब यहोवा ह हमर मालिक ला चिट्ठी के दुवारा इसरायलीमन ला देस म उत्तराधिकार देय के हुकूम दीस, त ओह ये हुकूम देय रिहिस कि हमर भाई सलोफाद के उत्तराधिकार ओकर बेटीमन ला दिये जावय।
NUM 36:3 यदि ओमन कोनो आने इसरायली गोत्र के मनखे ले बिहाव करथें, त फेर ओमन के उत्तराधिकार ह हमर पुरखामन के भाग ले, ले लिये जाही अऊ ओ गोत्र म मिला दिये जाही, जेमा ओमन के बिहाव होही। अऊ ये किसम ले हमन ला मिले उत्तराधिकार के एक भाग ह ले लिये जाही।
NUM 36:4 जब इसरायलीमन के जुबली बछर ह आही, त ओमन के उत्तराधिकार ह ओ गोत्र म मिला दिये जाही, जेमा ओमन के बिहाव होथे, अऊ ओमन के संपत्ति ह हमर पुरखामन के गोत्र के उत्तराधिकार ले लेय लिये जाही।”
NUM 36:5 तब यहोवा ले हुकूम पाके मूसा ह इसरायलीमन ला ये हुकूम दीस: “यूसुफ के संतान के गोत्र के मनखेमन जऊन बात कहत हें, ओह सही ए।
NUM 36:6 सलोफाद के बेटीमन के बारे म यहोवा ह ये हुकूम दे हवय: ओमन अपन ईछा ले अपन ददा के गोत्र म ले ही कोनो पुरूस ले बिहाव कर सकथें।
NUM 36:7 इसरायल म कोनो भी उत्तराधिकार एक गोत्र ले आने गोत्र म झन जावय, काबरकि हर एक इसरायली ह अपन पुरखा के गोत्र के उत्तराधिकार ला बनाय रखही।
NUM 36:8 हर ओ बेटी, जऊन ह कोनो इसरायली जाति म उत्तराधिकार पाथे, त ओकर बर जरूरी अय कि ओह अपन ददा के जाति के गोत्र के कोनो पुरूस ले ही बिहाव करय, ताकि हर एक इसरायली ह अपन पुरखामन के उत्तराधिकार बनाय रखय।
NUM 36:9 कोनो भी उत्तराधिकार एक गोत्र ले आने गोत्र म झन जावय, काबरकि हर एक इसरायली ह उत्तराधिकार म मिले भाग ला बनाय रखय।”
NUM 36:10 सलोफाद के बेटीमन मूसा ला दिये गय यहोवा के हुकूम मुताबिक ही करिन।
NUM 36:11 सलोफाद के बेटीमन के नांव महला, तिरसा, होगला, मिलका अऊ नोआ रिहिस अऊ येमन अपन चचेरा-भाईमन ले बिहाव कर लीन।
NUM 36:12 ओमन यूसुफ के बेटा मनस्से के संतान के गोत्र म बिहाव करिन, अऊ ओमन के उत्तराधिकार ह ओमन के ददा के जाति अऊ गोत्र म बने रिहिस।
NUM 36:13 येमन ओ हुकूम अऊ नियम अंय, जेला यहोवा ह मूसा के जरिये इसरायलीमन ला यरीहो के ओ पार यरदन नदी के तीर मोआब के मैदान म दीस।
DEU 1:1 ये बात मूसा ह जम्मो इसरायल ला यरदन नदी के पूरब कोति सुन्ना जगह म कहिस—ये जगह ह पारान अऊ तोपेल, लाबान, हसेरोत अऊ दीजाहाब के बीच, सूप के सामने अराबा म हवय।
DEU 1:2 (सेईर पहाड़ के सड़क ले होवत होरेब पहाड़ ले कादेस-बरने जाय म गियारह दिन लगथे।)
DEU 1:3 मिसर देस छोंड़े के चालीसवां साल के गियारहवां महिना के पहिले दिन, मूसा ह इसरायलीमन ला ओ जम्मो बात कहिस, जेकर हुकूम यहोवा ह ओला इसरायलीमन के बारे म दे रिहिस।
DEU 1:4 ये बात ओ समय के अय, जब मूसा ह हेसबोन नगर म राज-करइया अमोरीमन के राजा सीहोन ला हराईस, अऊ असतारोत नगर म राज-करइया बासान के राजा ओग ला एदरेई नगर म हराईस।
DEU 1:5 यरदन के पूरब कोति मोआब के इलाका म, मूसा ह ये कानून ला बताय के सुरू करिस:
DEU 1:6 यहोवा हमर परमेसर ह होरेब पहाड़ म हमन ला कहिस, “ये पहाड़ करा रहत तुमन ला बहुंत दिन हो गे हवय।
DEU 1:7 एकरसेति अब डेरा ला उसालव अऊ अमोरीमन के पहाड़ी इलाका म जावव; अराबा के पास-पड़ोस के जम्मो मनखे करा, पहाड़मन म, पछिम के खाल्हे भाग म, नेगेव अऊ समुंदर के तीरे-तीर, कनानीमन के देस अऊ लबानोन म फरात महानदी तक जावव।
DEU 1:8 देखव, मेंह तुमन ला ये देस दे हवंव। जावव अऊ ये देस ऊपर अधिकार कर लव, जेकर बारे म यहोवा ह सपथ खाके कहे रिहिस कि ओह ये देस तुम्हर पुरखा—अब्राहम, इसहाक अऊ याकूब—अऊ ओमन के बाद ओमन के संतानमन ला दीही।”
DEU 1:9 ओ समय मेंह तुमन ला कहेंव, “मेंह एके झन तुम्हर भार नइं उठा सकंव।
DEU 1:10 यहोवा तुम्हर परमेसर ह तुम्हर संखिया ला बढ़ाय हवय कि आज तुमन अकास के तारामन सहीं अनगिनत हो गे हवव।
DEU 1:11 यहोवा, तुम्हर पुरखामन के परमेसर ह तुमन ला हजारों गुना अऊ बढ़ावय अऊ अपन वायदा के मुताबिक तुमन ला आसीस देवय!
DEU 1:12 पर मेंह एके झन तुम्हर समस्या अऊ तुम्हर भार अऊ तुम्हर झगरा के बोझ ला कइसे उठा सकत हंव?
DEU 1:13 एकरसेति तुमन अपन गोत्रमन ले कुछू बुद्धिमान, समझदार अऊ आदरनीय मनखेमन ला चुनव, अऊ मेंह ओमन ला तुम्हर ऊपर मुखिया ठहिराहूं।”
DEU 1:14 त तुमन के ये जबाब रिहिस, “तेंह जऊन काम करे के सलाह देवत हस, ओह बढ़िया ए।”
DEU 1:15 एकरसेति मेंह तुम्हर गोत्रमन के ओ अगुवा मनखेमन ला लेंय, जेमन बुद्धिमान अऊ आदरनीय रिहिन, अऊ ओमन ला तुम्हर ऊपर अधिकारी ठहिरांय—ओमन ला हजार-हजार, सौ-सौ, पचास-पचास अऊ दस-दस के ऊपर सेनापति अऊ गोत्रमन के अधिकारी ठहिरांय।
DEU 1:16 अऊ ओ समय मेंह तुम्हर नियायधीसमन ला ये अधिकार देंय, “अपन मनखेमन के बीच के झगरा ला सुनव अऊ सही-सही नियाय करव, चाहे मामला ह दू इसरायलीमन के बीच होवय या मामला ह एक इसरायली अऊ तुम्हर बीच रहइया कोनो परदेसी के बीच होवय।
DEU 1:17 नियाय करे म पखियपात झन करव; छोटे या बड़े दूनों मनखे के बात ला एक समान सुनव। कोनो मनखे ले झन डरव, काबरकि नियाय ह परमेसर के काम ए। यदि कोनो मामला ह तुम्हर बर बहुंत कठिन ए, त ओला मोर करा लानव, अऊ मेंह ओला सुनहूं।”
DEU 1:18 अऊ ओ समय मेंह तुमन ला तुम्हर जम्मो काम बता दे रहेंव।
DEU 1:19 तब, जइसे कि यहोवा हमर परमेसर ह हमन ला हुकूम दीस, हमन होरेब ले आघू बढ़ेंन अऊ ओ जम्मो बड़े अऊ भयानक सुन्ना जगह, जेला तुमन देखे हव, ओमा ले होवत अमोरीमन के पहाड़ी देस कोति गेंन, अऊ हमन कादेस-बरने पहुंचेंन।
DEU 1:20 तब मेंह तुमन ला कहेंव, “तुमन अमोरीमन के ओ पहाड़ी देस म हबर गे हव, जेला यहोवा हमर परमेसर ह हमन ला देवत हे।
DEU 1:21 देखव, यहोवा तुम्हर परमेसर ह ओ देस तुमन ला दे हवय। जावव अऊ ओ देस ऊपर अधिकार कर लव, जइसे कि यहोवा, तुम्हर पुरखामन के परमेसर ह तुमन ला कहे हवय। झन डरव; अऊ निरास झन होवव।”
DEU 1:22 तब तुमन जम्मो झन मोर करा आके कहेव, “आवव हमन हमर आघू कुछू मनखेमन ला पठोवन कि ओमन ओ देस म जाके गुपत रूप से पता लगावंय अऊ वापिस आके हमन ला बतावंय कि हमन ला कोन रसता म जाना हे अऊ हमन ला कोन-कोन नगर म होके जाना पड़ही।”
DEU 1:23 ये सलाह मोला बने लगिस; एकरसेति मेंह तुमन म ले बारह झन ला चुनेंव याने कि हर गोत्र म ले एक झन ला चुनेंव।
DEU 1:24 ओ बारह मनखे ऊपर पहाड़ी देस म गीन, अऊ एसकोल के घाटी म आके ओकर भेद लीन।
DEU 1:25 अपन संग ओ देस के कुछू फर लेके ओमन हमर करा आईन अऊ उहां के ये बात बताईन, “येह एक बने देस ए, जेला यहोवा हमर परमेसर ह हमन ला देवत हे।”
DEU 1:26 पर तुमन के जाय के ईछा नइं रिहिस; तुमन यहोवा अपन परमेसर के हुकूम के बिरूध बिदरोह करेव।
DEU 1:27 अपन तम्बूमन म तुमन बड़बड़ावत कहेव, “यहोवा ह हमन ले घिन करथे; एकरसेति ओह हमन ला मिसर देस ले निकाल लानिस कि हमन ला अमोरीमन के हांथ म सऊंपके नास कर दे।
DEU 1:28 हमन कहां जावन? हमर भाईमन ये कहिके हमन ला बहुंत डरा दे हवंय, ‘उहां के मनखेमन हमर ले बलवान अऊ हमर ले ऊंच हवंय; उहां के सहरमन बड़े-बड़े अऊ ओमन के दीवारमन अकास तक ऊंचहा हवंय। अऊ त अऊ हमन उहां अनाकीमन ला घलो देखेंन।’ ”
DEU 1:29 तब मेंह तुमन ला कहेंव, “भयभीत झन होवव; ओमन ले झन डरव।
DEU 1:30 यहोवा तुम्हर परमेसर, जऊन ह तुम्हर आघू जावत हे, ओह तुम्हर बर लड़ही, जइसे कि तुम्हर देखत म मिसर देस म तुम्हर बर करिस,
DEU 1:31 अऊ सुन्ना जगह म घलो करिस। उहां तुमन देखेव कि कइसे यहोवा तुम्हर परमेसर ह तुमन ला लेके चलिस, जइसे कोनो ददा ह अपन बेटा ला लेके चलथे, वइसे ओह तुमन ला पूरा रसता म लेके चलिस अऊ ये जगह म तुमन ला पहुंचाईस।”
DEU 1:32 येकर बावजूद, तुमन यहोवा अपन परमेसर ऊपर भरोसा नइं करेव,
DEU 1:33 जऊन ह तुम्हर यातरा म रथिया आगी म अऊ दिनमान बादर म होके तुम्हर आघू-आघू चलिस, ताकि ओह तुम्हर डेरा डाले बर जगह खोजय अऊ तुमन ला ओ रसता देखावय, जेमा तुमन ला जाना चाही।
DEU 1:34 जब यहोवा ह तुम्हर बात ला सुनिस, त ओह गुस्सा होईस अऊ सपथ खाके कहिस:
DEU 1:35 “ये दुस्ट पीढ़ी के कोनो भी मनखे ओ बने देस ला देख नइं सकहीं, जेला मेंह येमन के पुरखामन ला देय के सपथ खाय रहेंव;
DEU 1:36 यपुन्ने के बेटा कालेब ओ देस ला देखही, अऊ मेंह ओला अऊ ओकर संतानमन ला ओ देस दूहूं, जेमा ओकर पांव पड़े रिहिस, काबरकि ओह पूरा मन से यहोवा के पाछू चलिस।”
DEU 1:37 तुम्हर कारन यहोवा ह मोर ऊपर घलो गुस्सा होईस अऊ कहिस, “तेंह घलो ओ देस म नइं जा सकबे।
DEU 1:38 पर तोर सहायक नून के बेटा यहोसू ह ओ देस म जाही। तें ओला उत्साहित कर, काबरकि ओह ओ देस ऊपर अधिकार करे बर इसरायल के अगुवई करही।
DEU 1:39 अऊ छोटे लइकामन जेमन के बारे म तुमन कहे हव कि ओमन बंधुवई म चले जाहीं, तुम्हर लइकामन, जेमन ला अभी सही-गलत के गियान नइं ए—ओमन ओ देस म जाहीं। मेंह ओ देस ओमन ला दूहूं अऊ ओमन ओकर ऊपर अधिकार करहीं।
DEU 1:40 पर जहां तक तुम्हर सवाल ए, तुमन मुड़के लाल-समुंदर के रसता ले सुन्ना जगह कोति जावव।”
DEU 1:41 तब तुम्हर ये जबाब रिहिस, “हमन यहोवा के बिरूध म पाप करे हन। हमन जाबो अऊ लड़बो, जइसे कि यहोवा हमर परमेसर ह हमन ला हुकूम दे हवय।” तब तुमन म ले हर एक जन अपन-अपन हथियार ला धरेव, ये सोचके कि ओ पहाड़ी देस म जवई ह सरल ए।
DEU 1:42 पर यहोवा ह मोला कहिस, “ओमन ला कह, ‘तुमन ऊपर कोति जाके झन लड़व, काबरकि मेंह तुम्हर संग नइं रहंव। तुमन अपन बईरीमन ले हार जाहू।’ ”
DEU 1:43 मेंह ये बात तुमन ला कहेंव, पर तुमन नइं मानेव। तुमन यहोवा के हुकूम के बिरूध चलेव अऊ अपन घमंड म आके ओ पहाड़ी देस के ऊपर कोति आघू बढ़ेव।
DEU 1:44 ओ अमोरी, जेमन ओ पहाड़ी देस म रहत रिहिन, ओमन तुम्हर सामना करिन; अऊ तुमन ला मधुमक्खीमन के झुंड सहीं भगाईन अऊ तुमन ला सेईर ले लेके होरमा सहर तक मारत चले गीन।
DEU 1:45 तब तुमन वापिस आके यहोवा के आघू म रोये लगेव; पर ओह तुम्हर रोवई कोति धियान नइं दीस अऊ तुम्हर बात ला नइं सुनिस।
DEU 1:46 अऊ ये किसम ले तुमन कादेस म बहुंत दिन तक पड़े रहेव—उहां तुम्हर पूरा समय अइसने ही बीतिस।
DEU 2:1 तब यहोवा ह जइसे मोला कहे रिहिस, ओकरे मुताबिक हमन वापिस मुड़ेंन अऊ लाल-समुंदर के रसता ले होवत सुन्ना जगह कोति गेंन। हमन बहुंत समय तक सेईर के पहाड़ी देस के आसपास चलते रहेंन।
DEU 2:2 तब यहोवा ह मोला कहिस,
DEU 2:3 “तुमन ला ये पहाड़ी देस के आसपास चलत बहुंत समय हो गे हे; अब मुड़के उत्तर कोति चलव।
DEU 2:4 अऊ तें मनखेमन ला ये हुकूम दे: ‘तुमन सेईर म रहइया अपन रिस्तेदार, एसाव के संतानमन के इलाका म ले होके जानेवाला हव। ओमन तुमन ले डरहीं, पर तुमन बहुंत सावधान रहव।
DEU 2:5 ओमन ला लड़ई बर झन उकसावव, काबरकि मेंह तुमन ला ओमन के कोनो भुइयां नइं दंव, अऊ त अऊ तुमन ला अपन पांव धरे के जगह तक नइं दंव। मेंह एसाव ला सेईर के पहाड़ी देस ओकर खुद के संपत्ति के रूप म दे हवंव।
DEU 2:6 तुमन जऊन खाना खाहू अऊ पानी पीहू, ओकर बर तुमन ओमन ला चांदी देके ओ जेवन अऊ पानी के दाम चुकावव।’ ”
DEU 2:7 यहोवा तुम्हर परमेसर ह तुम्हर जम्मो काम म आसीस दे हवय। ओह ये बड़े सुन्ना जगह म तुम्हर यातरा के दौरान तुम्हर देखरेख करे हवय। ये चालीस साल तक यहोवा तुम्हर परमेसर ह तुम्हर संगे-संग रहे हवय, अऊ तुमन ला कोनो चीज के कमी नइं होईस।
DEU 2:8 अऊ हमन सेईर म रहइया हमर रिस्तेदार, एसाव के संतानमन के इलाका ले हटके गेंन। हमन अराबा के सड़क ले मुड़ेंन, जऊन ह एलात अऊ एसियोन-गेबेर म ले आथे, अऊ हमन मोआब के सुन्ना जगह के सड़क म ले होके गेंन।
DEU 2:9 तब यहोवा ह मोला कहिस, “मोआबीमन ला तंग झन करव या ओमन ला लड़ई बर झन उकसावव, काबरकि मेंह ओमन के देस म के कोनो भाग तुमन ला नइं दंव। मेंह लूत के संतानमन ला आर के इलाका ओमन के अधिकार म देय दे हंव।”
DEU 2:10 (एमीमन उहां रहे के आदि रिहिन—ये मनखेमन बलवान अऊ संखिया म बहुंत रिहिन, अऊ येमन अनाकीमन सहीं ऊंच घलो रिहिन।
DEU 2:11 अनाकीमन सहीं, ओमन ला घलो रपाई माने जावत रिहिस, पर मोआबीमन ओमन ला एमी कहंय।
DEU 2:12 सेईर म होरीमन रहे के आदि रिहिन, पर एसाव के संतानमन ओमन ला भगा दीन। ओमन होरीमन ला अपन आघू ले खतम कर दीन अऊ ओमन के जगह म बस गीन, जइसे कि इसरायलीमन ओ देस म बस गीन, जेला यहोवा ह ओमन के अधिकार म दे दीस।)
DEU 2:13 अऊ यहोवा ह कहिस, “अब तुमन उठव अऊ जेरेद घाटी के ओ पार जावव।” तब हमन घाटी के ओ पार गेंन।
DEU 2:14 कादेस-बरने ला छोंड़के आय के बेरा ले लेके जेरेद घाटी ला पार करत तक अड़तीस साल हो गे रिहिस। ये बीच म ओ पीढ़ी के जम्मो योद्धामन सिविर म नास हो गीन, जइसे कि यहोवा ह ओमन ले सपथ खाय रिहिस।
DEU 2:15 जब तक यहोवा ह ओमन ला सिविर ले पूरा खतम नइं कर दीस, तब तक ओकर हांथ ह ओमन के बिरूध रिहिस।
DEU 2:16 जब आखिरी म मनखेमन के बीच म ले जम्मो योद्धामन मर गीन,
DEU 2:17 तब यहोवा ह मोला कहिस,
DEU 2:18 “आज तेंह आर नगर म मोआब के इलाका ले होके जाबे।
DEU 2:19 जब तेंह अमोनीमन करा आबे, त ओमन ला तंग झन करबे या ओमन ला लड़ई करे बर झन उकसाबे, काबरकि मेंह ओमन के देस के कोनो भाग ला तोर अधिकार म नइं दंव। मेंह ओला लूत के संतानमन के अधिकार म कर दे हंव।”
DEU 2:20 (ओला घलो रपाईमन के एक देस समझे जावत रिहिस, जऊन मन उहां रहत रिहिन; पर अमोनीमन ओमन ला जमजुम्मी कहंय।
DEU 2:21 ओमन बलवान अऊ संखिया म बहुंत, अऊ अनाकीमन सहीं ऊंच रिहिन। यहोवा ह अमोनीमन के आघू ले ओमन ला नास कर दीस; अमोनीमन ओमन ला भगा दीन अऊ ओमन के जगह म बस गीन।
DEU 2:22 यहोवा ह वइसने ही एसाव के संतानमन बर करिस, जऊन मन सेईर म रहत रिहिन; ओह होरीमन ला ओमन के आघू ले नास कर दीस। एसाव के संतानमन ओमन ला भगा दीन अऊ ओमन आज तक होरीमन के जगह म रहत हवंय।
DEU 2:23 जहां तक अव्वीमन के बात ए, जऊन मन गाजा सहर तक के गांवमन म रहत रिहिन, ओमन ला कपतोरीमन कपतोर ले आके नास कर दीन अऊ ओमन के जगह म बस गीन।)
DEU 2:24 “अब आघू बढ़व अऊ अरनोन घाटी के ओ पार चलव। देख, मेंह हेसबोन के राजा, अमोरी सीहोन अऊ ओकर देस ला तोर हांथ म कर दे हंव। ओला अधिकार म लेय के सुरू कर दव अऊ ओला लड़ई म लगाय रखव।
DEU 2:25 आज के दिन ले ही मेंह धरती के जम्मो देस म तोर आतंक अऊ डर पईदा कर दूहूं। ओमन तोर बारे म सुनहीं अऊ तोर कारन ओमन कांपहीं अऊ ओमन ला तकलीफ होही।”
DEU 2:26 कदेमोत के सुन्ना जगह ले मेंह हेसबोन नगर के राजा सीहोन करा संदेसियामन के दुवारा ये कहिके सांति संदेस पठोंय,
DEU 2:27 “हमन ला तोर देस म ले होके जावन दे। हमन मुख्य सड़क म ही रहिबो; हमन न तो जेवनी अंग मुड़बो, न ही डेरी।
DEU 2:28 चांदी के रूप म हमन ले दाम लेके हमन ला खाय बर जेवन अऊ पीये बर पानी दे। हमन ला सिरिप इहां ले रेंगत जावन दे—
DEU 2:29 जइसे कि सेईर म रहइया एसाव के संतान, अऊ आर म रहइया मोआबीमन हमर बर करिन, जब तक कि हमन यरदन ला पार करके ओ देस म नइं हबर जावन, जेला यहोवा हमर परमेसर ह हमन ला देवत हे।”
DEU 2:30 पर हेसबोन के राजा सीहोन ह इसरायल ला अपन देस म ले होके जावन नइं दीस। काबरकि यहोवा तुम्हर परमेसर ह ओकर मन ला कठोर अऊ ओला जिद्दी बना दे रिहिस, ताकि ओह ओला तुम्हर हांथ म कर दे, जइसे कि अब ओह करे हवय।
DEU 2:31 यहोवा ह मोला कहिस, “देख, मेंह सीहोन अऊ ओकर देस ला तोर अधीन करे के सुरू कर दे हंव। अब तेंह ओकर देस ऊपर अधिकार अऊ ओला अपन अधीन करे के सुरू कर दे।”
DEU 2:32 जब सीहोन अऊ ओकर जम्मो सेना लड़ई म हमर सामना करे बर यहस नांव के नगर म आईन,
DEU 2:33 त यहोवा ह ओला हमर अधीन कर दीस अऊ हमन ओला ओकर बेटामन अऊ ओकर पूरा सेना सहित मार डारेंन।
DEU 2:34 ओ समय हमन ओकर जम्मो नगरमन ला ले लेंन अऊ ओमन ला पूरा नास कर देंन—जम्मो पुरूस, माईलोगन अऊ लइकामन ला। हमन एको झन ला घलो जीयत नइं छोड़ेंन।
DEU 2:35 पर पसु अऊ नगरमन ले लूटे सामान ला हमन अपन बर ले लेंन।
DEU 2:36 अरनोन घाटी के तीर म अरोएर ले, अऊ घाटी म नगर ले लेके गिलाद के इलाका तक कोनो भी नगर हमर आघू म टिक नइं सकिन। यहोवा हमर परमेसर ह ओ जम्मो ला हमन ला दे दीस।
DEU 2:37 पर यहोवा हमर परमेसर के दिये हुकूम के मुताबिक, तुमन न तो अमोनीमन के देस, अऊ न ही यब्बोक नदी के तीरे-तीर के देस अऊ पहाड़ी कोति के नगरमन के आसपास के इलाका म गेव।
DEU 3:1 ओकर बाद हमन मुड़के सड़क म होवत बासान कोति गेंन, अऊ बासान के राजा ओग अपन पूरा सेना के संग हमर ले लड़ई करे बर एदरेई नगर करा आईस।
DEU 3:2 यहोवा ह मोला कहिस, “ओकर ले झन डर, काबरकि मेंह ओला अऊ ओकर पूरा सेना के संग ओकर देस ला तोर हांथ म कर देवत हंव। ओकर संग वइसने ही करबे, जइसने तेंह अमोरीमन के राजा सीहोन के संग करे रहय, जऊन ह हेसबोन म राज करत रिहिस।”
DEU 3:3 ये किसम ले यहोवा हमर परमेसर ह बासान के राजा ओग अऊ ओकर जम्मो सेना ला हमर हांथ म कर दीस। हमन ओमन ला मार डारेंन अऊ एको झन ला घलो नइं छोड़ेंन।
DEU 3:4 ओ समय हमन ओकर जम्मो सहरमन ला ले लेंन। हमन ओमन के साठ ठन सहरमन ले जम्मो सहरमन ला ले लेंन—याने कि अरगोब के पूरा इलाका, जऊन ह बासान म ओग के राज म रिहिस।
DEU 3:5 ये जम्मो सहरमन ऊंच-ऊंच दीवार के संग गढ़वाले रिहिन, जेमा कपाट अऊ बाड़ामन लगे रिहिन, अऊ उहां बिगर दीवार के कतको बड़े-बड़े गांवमन घलो रिहिन।
DEU 3:6 हमन ओमन ला पूरा नास कर देंन, जइसे कि हमन हेसबोन के राजा सीहोन के संग करे रहेंन याने कि हर एक सहर के पुरूस, माईलोगन अऊ लइकामन ला नास कर देंन।
DEU 3:7 पर ओमन के सहर के जम्मो पसु अऊ लूट के सामान ला हमन अपन बर ले लेंन।
DEU 3:8 ये किसम ले ओ समय हमन अमोरीमन के ये दूनों राजामन ले यरदन के पूरब के इलाका अरनोन घाटी ले लेके हेरमोन पहाड़ तक ले लेंन।
DEU 3:9 (हेरमोन ला सीदोनीमन सिरयोन, अऊ अमोरीमन सनीर कहिथें।)
DEU 3:10 हमन पठार के जम्मो नगर, अऊ पूरा गिलाद के इलाका अऊ बासान म ओग राज के नगर सलका अऊ एदरेई तक पूरा बासान ला ले लेंन।
DEU 3:11 (रपाईमन म बासान के राजा ओग ह सबले आखिरी रिहिस। ओकर पलंग ह लोहा ले सजे रिहिस अऊ येह नौ क्यूबीट लम्बा अऊ चार क्यूबीट चौड़ा रिहिस। येह अमोनीमन के रब्बा नगर म अभी तक हवय।)
DEU 3:12 ओ देस, जेला हमन ओ समय अपन अधिकार म लेंन, ओमा के अरनोन घाटी के तीरे-तीर अरोएर के उत्तर के इलाका, गिलाद के आधा पहाड़ी इलाका अऊ येकर नगरमन ला मेंह रूबेनी अऊ गादीमन ला दे देंव।
DEU 3:13 गिलाद के बचे भाग अऊ पूरा बासान याने कि ओग के राज ला मेंह मनस्से के आधा गोत्र के मनखेमन ला दे देंव। (बासान म अरगोब के पूरा इलाका ह रपाईमन के देस के रूप म जाने जाथे।
DEU 3:14 मनस्से के एक संतान याईर ह गसूरी अऊ माकातीमन के सीमना तक पूरा अरगोब के इलाका ला लीस; येला ओकर नांव दिये गीस, एकरसेति आज तक बासान ला हव्वोत-याईर कहे जाथे।)
DEU 3:15 अऊ मेंह माकीर ला गिलाद दे देंव।
DEU 3:16 पर मेंह रूबेनी अऊ गादीमन ला ओ इलाका देंव, जऊन ह गिलाद ले लेके खाल्हे अरनोन घाटी (घाटी के मांझा भाग ह सीमना अय) अऊ यब्बोक नदी के बाहिर तक फईले हवय, जऊन ह कि अमोनीमन के सीमना अय।
DEU 3:17 येकर पछिमी सीमना ह अराबा म यरदन रिहिस, जऊन ह किन्नेरेत ले लेके पिसगा के ढलान के खाल्हे अराबा के समुंदर (याने कि मिरतू सागर) तक रिहिस।
DEU 3:18 ओ समय मेंह तुमन ला हुकूम देंव: “यहोवा तुम्हर परमेसर ह तुमन ला ये देस अपन अधिकार म करे बर दे हवय। पर तुम्हर जम्मो योग्य मनखेमन लड़ई बर हथियार धरके आने इसरायलीमन ले आघू ओ पार जावंय।
DEU 3:19 पर तुम्हर घरवाली, तुम्हर लइका अऊ तुम्हर पसुमन (मेंह जानत हंव कि तुम्हर करा बहुंत पसु हवंय) मोर दुवारा दिये गय नगरमन म तब तक रूके रहंय,
DEU 3:20 जब तक कि यहोवा ह तुम्हर संगी इसरायलीमन ला अराम नइं देय दे, जइसे कि ओह तुमन ला देय हवय, अऊ ओमन घलो ओ देस ऊपर अधिकार नइं कर लेवंय, जेला यहोवा तुम्हर परमेसर ह ओमन ला यरदन के ओ पार देवत हे। ओकर बाद, तुमन म ले हर एक जन अपन अधिकार म लिये गय ओ जगह म जावव, जेला मेंह तुमन ला दे हवंव।”
DEU 3:21 ओ समय मेंह यहोसू ला हुकूम देंव: “तेंह अपन आंखी ले ओ जम्मो चीज ला देखे हस कि यहोवा तोर परमेसर ह ये दूनों राजामन के संग का करिस। यहोवा ह उहां के जम्मो राजमन के संग वइसने ही करही, जिहां तेंह जावत हस।
DEU 3:22 ओमन ले झन डरबे; यहोवा तोर परमेसर ह खुद तोर बर लड़ही।”
DEU 3:23 ओ समय मेंह यहोवा ले बिनती करेंव:
DEU 3:24 “हे परमपरधान यहोवा, तेंह अपन सेवक ला अपन महानता अऊ अपन बलवान हांथ देखाय सुरू करे हस। स्वरग अऊ धरती म अइसे कोन देवता हे, जेह तोर सहीं काम अऊ सक्तिसाली काम कर सकथे?
DEU 3:25 मोला यरदन के ओ पार जाके ओ सुघर पहाड़ी देस अऊ लबानोन ला देखन दे।”
DEU 3:26 पर तुम्हर कारन यहोवा ह मोर ऊपर गुस्सा होईस अऊ मोर बात ला नइं सुनिस। यहोवा ह कहिस, “बहुंत हो गीस, येकर बारे म तेंह मोर ले अऊ झन गोठिया।
DEU 3:27 पिसगा पहाड़ के चोटी म जा अऊ पूरब, पछिम, उत्तर, दक्खिन चारों कोति देख। ओ देस ला अपन आंखी ले देख ले, काबरकि तेंह ये यरदन के ओ पार नइं जावत हस।
DEU 3:28 पर यहोसू ला अधिकार दे, अऊ ओला उत्साहित अऊ मजबूत कर, काबरकि ओ पार जाय म, ओह ये मनखेमन के अगुवई करही अऊ जऊन देस ला तेंह देखबे, ओकर ऊपर ओह ये मनखेमन ला अधिकार देवाही।”
DEU 3:29 तब हमन ओ घाटी म रूक गेंन, जऊन ह बेत-पोर के लकठा म रिहिस।
DEU 4:1 अब हे इसरायल, ओ बिधि अऊ कानूनमन ला सुनव, जेला मेंह तुमन ला सिखानेवाला हंव। ओमन के पालन करव ताकि तुमन जीयत रहव अऊ ओ देस म जाके ओकर ऊपर अधिकार कर सकव, जेला यहोवा, तुम्हर पुरखामन के परमेसर ह तुमन ला देवत हे।
DEU 4:2 जऊन हुकूम मेंह तुमन ला देवत हंव, ओमा न कुछू जोड़व अऊ न कुछू घटावव, पर यहोवा तुम्हर परमेसर के ओ हुकूम ला मानव, जेला मेंह तुमन ला देवत हंव।
DEU 4:3 तुमन अपन आंखी ले देखे हव कि यहोवा ह बाल-पेओर करा का करिस। यहोवा तुम्हर परमेसर ह तुम्हर बीच ले ओ जम्मो मनखेमन ला नास कर दीस, जऊन मन बाल-पेओर देवता के पाछू चलत रिहिन,
DEU 4:4 पर तुमन जम्मो, जऊन मन यहोवा अपन परमेसर के संग मजबूती से बने रहेव, ओ जम्मो आज भी जीयत हव।
DEU 4:5 देखव, यहोवा मोर परमेसर के दिये हुकूम के मुताबिक मेंह तुमन ला बिधि अऊ कानून सिखाय हंव, ताकि तुमन ओ देस म येमन के पालन करव, जिहां तुमन ओकर ऊपर अधिकार करे बर जावत हव।
DEU 4:6 धियान लगाके येमन के पालन करव, काबरकि येह ओ आने जाति के मनखेमन ला तुम्हर बुद्धि अऊ समझ देखाही, जऊन मन ये जम्मो बिधिमन के बारे म सुनहीं अऊ ओमन कहिहीं, “सही म ये महान जाति के मनखेमन एक बुद्धिमान अऊ समझवाले मनखे अंय।”
DEU 4:7 कोन अइसने बड़े जाति ए, जेकर देवता ओकर अइसे लकठा म रहिथे, जइसे यहोवा हमर परमेसर हमर लकठा म रहिथे, जब भी हमन ओकर ले पराथना करथन?
DEU 4:8 अऊ कोन अइसने बड़े जाति ए, जेकर करा अइसे धरमी बिधि अऊ कानून हवंय, जइसे कि ये कानूनमन, जेला मेंह आज तुम्हर आघू म रखत हंव?
DEU 4:9 सिरिप तुमन सावधान रहव, अऊ अपन म बहुंत सचेत रहव, ताकि तुम्हर आंखीमन जऊन चीजमन ला देखे हवंय, ओला तुमन झन भूलव या ओ चीजमन तुम्हर मन ले झन हटंय, जब तक कि तुमन जीयत हव। ये बातमन ला अपन लइका अऊ नाती-पोतामन ला सिखावव।
DEU 4:10 ओ दिन ला सुरता करव, जब तुमन होरेब म यहोवा अपन परमेसर के आघू म खड़े रहेव, अऊ ओह मोला कहिस, “मनखेमन ला मोर बात सुने बर मोर आघू म इकट्ठा कर, ताकि जब तक ओमन देस म जीयत रहंय, ओमन मोर आदर करई सीखंय अऊ ये बारे म अपन लइकामन ला घलो सिखावंय।”
DEU 4:11 तुमन लकठा म आके पहाड़ के खाल्हे म ठाढ़ हो गेव अऊ ओ पहाड़ ह आगी ले धधकत रहय; आगी के जुवाला ह करिया बादर अऊ घोर अंधियार के संग अकास तक हबरत रहय।
DEU 4:12 तब यहोवा ह आगी म ले तुम्हर ले गोठियाईस। तुमन सबद के अवाज तो सुनेव, पर तुमन ला कोनो दिखाई नइं दीस; उहां सिरिप एक अवाज रिहिस।
DEU 4:13 ओह तुमन ला अपन करार, दस ठन हुकूम ला बताईस अऊ ओह तुमन ला ये हुकूममन के पालन करे बर कहिस अऊ ओमन ला पथरा के दू ठन पटिया म लिख दीस।
DEU 4:14 अऊ यहोवा ह ओ समय मोला निरदेस दीस कि मेंह तुमन ला ओ बिधि अऊ कानूनमन ला सिखावंव, जेकर पालन तुमन ओ देस म करव, जेला अपन अधिकार म करे बर तुमन यरदन के ओ पार जावत हव।
DEU 4:15 तुमन ला ओ दिन कोनो किसम के सरूप दिखाई नइं दीस, जऊन दिन यहोवा ह तुमन ले होरेब पहाड़ करा आगी म ले गोठियाईस। एकरसेति तुमन बहुंत सचेत रहव,
DEU 4:16 ताकि तुमन भ्रस्ट होके अपन बर कोनो भी किसम के मूरती या कोनो चीज के नमूना झन बनावव, चाहे ओह कोनो पुरूस या माईलोगन के सहीं रूप होवय,
DEU 4:17 या धरती म कोनो पसु या अकास म उड़इया कोनो चिरई सहीं होवय,
DEU 4:18 या भुइयां म रेंगइया कोनो जीव सहीं या पानी के भीतर कोनो मछरी सहीं होवय।
DEU 4:19 अऊ जब तुमन अकास कोति नजर उठाके सूरज, चंदा अऊ तारा याने कि जम्मो अकास के चीजमन ला देखव, त बहकके तुमन ओमन के दंडवत अऊ अराधना झन करव; ये चीजमन ला यहोवा तुम्हर परमेसर ह धरती के जम्मो जाति के मनखेमन ला ओमन के भाग के रूप म दे हवय।
DEU 4:20 पर जहां तक तुम्हर सवाल ए, यहोवा ह तुमन ला लेके लोहा पिघलइया भट्ठी ले निकाले सहीं मिसर देस ले बाहिर निकालिस, ताकि तुमन ओकर उत्तराधिकार के मनखे हो जावव, जइसे कि अब तुमन अव घलो।
DEU 4:21 यहोवा ह तुम्हर कारन मोर ऊपर गुस्सा होईस अऊ सपथ खाके कहिस कि मेंह यरदन नदी के पार ओ बने देस म नइं जा सकंव, जेला यहोवा तुम्हर परमेसर ह तुमन ला तुम्हर उत्तराधिकार के रूप म देवत हे।
DEU 4:22 मेंह इही देस म मर जाहूं; मेंह यरदन के ओ पार नइं जा सकंव; पर तुमन ओ पार जाके ओ बने देस ऊपर अधिकार करहू।
DEU 4:23 एकरसेति धियान रहय कि तुमन यहोवा तुम्हर परमेसर के ओ करार ला झन भूलव, जेला ओह तुम्हर संग करे हवय; अपन बर कोनो भी चीज के कोनो मूरती झन बनावव, जेला यहोवा तुम्हर परमेसर ह मना करे हवय।
DEU 4:24 काबरकि यहोवा तुम्हर परमेसर ह एक भसम करइया आगी, एक जलन रखइया परमेसर अय।
DEU 4:25 जब तुम्हर लोग-लइका अऊ नाती-पोता हो जाहीं अऊ तुम्हर उहां लम्बा समय तक रहे के बाद—यदि तुमन भ्रस्ट होके कोनो किसम के मूरती बनाथव अऊ ये किसम ले यहोवा तुम्हर परमेसर के नजर म खराप काम करके ओकर गुस्सा ला भड़काथव,
DEU 4:26 त आज मेंह अकास अऊ धरती ला तुम्हर बिरूध गवाह रखके कहत हंव कि तुमन ओ देस ले जल्दी नास हो जाहू, जेला तुमन अपन अधिकार म लेय बर यरदन के ओ पार जावत हव। तुमन उहां लम्बा समय तक जिंदा नइं रहे पाहू, पर खचित तुमन नास हो जाहू।
DEU 4:27 यहोवा ह तुमन ला मनखेमन के बीच म तितिर-बितिर कर दीही, अऊ यहोवा ह तुमन ला जऊन जातिमन के बीच म भगा दीही, उहां तुमन थोरकन ही बचे रहिहू।
DEU 4:28 उहां तुमन मनखे के बनाय ओ लकड़ी अऊ पथरा के देवतामन के अराधना करहू, जेमन न तो देख सकंय, न सुन सकंय, न खा सकंय अऊ न ही सुंघ सकंय।
DEU 4:29 पर यदि उहां तुमन यहोवा अपन परमेसर के खोज करहू, त ओह तुमन ला मिलही, यदि तुमन ओला अपन पूरा मन अऊ अपन पूरा आतमा ले खोजहू।
DEU 4:30 जब तुमन बिपत्ति म पड़व अऊ ये जम्मो चीज तुम्हर जिनगी म होथे, तब बाद म, तुमन यहोवा अपन परमेसर करा लहुंटके आहू अऊ ओकर बात मानहू।
DEU 4:31 काबरकि यहोवा तुम्हर परमेसर ह दयालु परमेसर अय; ओह तुमन ला नइं छोंड़ही अऊ न ही नास करही अऊ न ही तुम्हर पुरखामन के संग करे गे ओ करार ला भूलही, जेला ओह सपथ खाके ओमन के संग मजबूत करे रिहिस।
DEU 4:32 अब पहिले के समय के बारे म पुछव, अपन बहुंत पहिले के समय, जब परमेसर ह धरती म मानव-जाति ला बनाईस; अकास के एक छोर ले लेके दूसर छोर तक पुछव। का अइसने बड़े बात कभू होईस, या कभू अइसने बात सुनई म आईस?
DEU 4:33 का कभू आने मनखेमन परमेसर के अवाज ला आगी ले गोठियावत सुनके घलो जीयत रिहिन, जइसे कि तुमन सुनके जीयत हव?
DEU 4:34 का कभू कोनो देवता एक जाति ला आने जाति के बीच ले अपन करे बर, परखे के दुवारा, चिनहां अऊ अद्भूत काम के दुवारा, लड़ई के दुवारा, सक्तिसाली हांथ अऊ बढ़ाय हुए भुजा के दुवारा, या बड़े अऊ अद्भूत काम के दुवारा निकाल लाने के कोसिस करिस, जइसे कि यहोवा तुम्हर परमेसर ह तुम्हर आंखी के आघू म तुम्हर बर मिसर देस म जम्मो काम करिस?
DEU 4:35 तुमन ला ये जम्मो चीज देखाय गीस ताकि तुमन जानव कि यहोवा ह परमेसर ए; ओला छोंड़ अऊ कोनो परमेसर नइं ए।
DEU 4:36 अकास ले ओह तुमन ला अपन अवाज सुनाईस, ताकि तुमन अनुसासन म रहव। धरती म ओह तुमन ला अपन बड़े आगी ला देखाईस, अऊ तुमन आगी ले ओकर बात सुनेव।
DEU 4:37 काबरकि ओह तुम्हर पुरखामन ले मया करिस अऊ ओमन के बाद ओह ओमन के संतान ला चुनिस, एकरसेति ओह तुमन ला खुद होके अपन बड़े सामर्थ से मिसर देस ले बाहिर निकाल लानिस,
DEU 4:38 ताकि तुम्हर आघू ले तुम्हर ले बड़े अऊ बलवान जाति के मनखेमन ला भगाके तुमन ला ओमन के देस म लानय अऊ ओ देस तुमन ला तुम्हर उत्तराधिकार के रूप म देवय, जइसे कि आज तुमन देखत हव।
DEU 4:39 एकरसेति आज तुमन मान लव अऊ अपन मन म जान लव कि यहोवा ही ऊपर अकास म अऊ खाल्हे धरती म परमेसर ए। आने अऊ कोनो परमेसर नइं ए।
DEU 4:40 ओकर बिधि अऊ कानूनमन ला मानव, जेला आज में तुमन ला देवत हंव, ताकि तुम्हर अऊ तुम्हर बाद तुम्हर लइकामन के संग भलई होवय अऊ तुमन ओ देस म बहुंत समय तक रहव, जेला यहोवा तुम्हर परमेसर ह तुमन ला हमेसा बर देवत हे।
DEU 4:41 तब मूसा ह यरदन के पूरब कोति तीन ठन सहर ला अलग करिस,
DEU 4:42 ताकि यदि कोनो मनखे के दुवारा अनजाने म बिगर कोनो बईरता के कोनो परोसी के हतिया हो जावय, त ओह येमा के कोनो सहर म भागके जा सकय अऊ अपन जिनगी ला बचावय।
DEU 4:43 ओ सहरमन ये रिहिन: रूबेनीमन बर सुन्ना जगह के पठार म बेसेर; गादीमन बर गिलाद म रामोत; अऊ मनस्सेयीमन बर बासान म गोलान।
DEU 4:44 येह ओ कानून ए, जेला मूसा ह इसरायलीमन के आघू म रखिस।
DEU 4:45 येमन ओ सर्त, बिधि अऊ कानून अंय, जेला मूसा ह ओमन ला दीस, जब ओमन मिसर देस ले निकलके आईन
DEU 4:46 अऊ यरदन के पूरब कोति बेत-पोर नगर के लकठा के घाटी म रिहिन; ये जगह ह अमोरीमन के राजा सीहोन के देस म रिहिस; ओह हेसबोन नगर म राज करत रिहिस अऊ ओला मूसा अऊ इसरायलीमन लड़ई म हराईन, जब ओमन मिसर देस ले निकलके आईन।
DEU 4:47 ओमन ओकर देस ऊपर अऊ बासान के राजा ओग के देस ऊपर अधिकार कर लीन याने कि यरदन के पूरब कोति ये दूनों अमोरी राजामन के देस ऊपर अधिकार कर लीन।
DEU 4:48 ये देस ह अरनोन घाटी के तीर म अरोएर ले लेके सीरिओन (याने कि हेरमोन) पहाड़ तक फईले रिहिस,
DEU 4:49 अऊ येमा यरदन के पूरब कोति जम्मो अराबा अऊ पिसगा पहाड़ के ढलान के खाल्हे मिरतू सागर तक के इलाका सामिल रिहिस।
DEU 5:1 मूसा ह जम्मो इसरायल ला बलाके कहिस: हे इसरायल, जऊन बिधि अऊ कानून मेंह आज तुम्हर आघू म बतात हंव, ओमन ला सुनव। ओमन ला सीखव अऊ धियान से ओमन के पालन करव।
DEU 5:2 यहोवा हमर परमेसर ह होरेब पहाड़ म हमर ले एक करार करिस।
DEU 5:3 येह ओ करार नो हय, जेला यहोवा ह हमर पुरखामन संग करिस, पर ये करार हमर संग, हमर ओ जम्मो झन संग करिस, जेमन आज इहां हवंय।
DEU 5:4 यहोवा ह पहाड़ ऊपर आगी म ले तुम्हर संग आमने-सामने गोठियाईस।
DEU 5:5 (ओ समय, मेंह यहोवा के बचन ला बताय बर यहोवा अऊ तुम्हर बीच ठाढ़ होंय, काबरकि तुमन ओ आगी ले डरके पहाड़ ऊपर नइं गेव।) अऊ यहोवा ह कहिस:
DEU 5:6 “में यहोवा तुम्हर परमेसर अंव, जऊन ह तुमन ला मिसर देस याने कि गुलामी के देस ले निकाल लानिस।
DEU 5:7 “तुमन मोर छोंड़ अऊ कोनो ला ईस्वर करके झन मानहू।
DEU 5:8 तुमन अपन बर कोनो भी चीज के कोनो किसम के मूरती झन बनाहू, न तो ऊपर अकास के, न खाल्हे धरती के अऊ न ही पानी म के कोनो चीज के।
DEU 5:9 तुमन ओमन ला न तो दंडवत करहू अऊ न ही ओमन के अराधना करहू; काबरकि में यहोवा तुम्हर परमेसर ह जलन रखइया परमेसर अंव अऊ जऊन मन मोर ले घिन करथें, ओमन के पाप के दंड मेंह ओमन के लइकामन के तीसरा अऊ चौथा पीढ़ी तक देथंव,
DEU 5:10 पर जऊन मन मोर ले मया करथें अऊ मोर हुकूममन ला मानथें, ओमन के हजार पीढ़ी तक मेंह अपन मया देखाथंव।
DEU 5:11 तुमन यहोवा अपन परमेसर के नांव बेमतलब के झन लूहू, काबरकि जऊन ह यहोवा के नांव के दुरपयोग करही, ओला ओह दोसी ठहिराही।
DEU 5:12 तुमन बिसराम दिन ला पबितर मानव, जइसे कि यहोवा तुम्हर परमेसर ह तुमन ला हुकूम दे हवय।
DEU 5:13 हप्ता के छै दिन तुमन मेहनत करव अऊ अपन जम्मो काम करव,
DEU 5:14 पर सातवां दिन यहोवा तुम्हर परमेसर बर बिसराम दिन ए। ओ दिन तुमन कोनो काम झन करहू, न तो तुमन, न तुम्हर बेटा या बेटीमन, न तुम्हर सेवक या सेविकामन, न तुम्हर बईला, तुम्हर गदहा या तुम्हर पसुमन, अऊ न ही तुम्हर नगर म रहइया कोनो परदेसी, ताकि तुम्हर सहीं तुम्हर सेवक अऊ सेविकामन घलो बिसराम करंय।
DEU 5:15 ये बात ला सुरता रखव कि तुमन मिसर देस म गुलाम रहेव अऊ यहोवा तुम्हर परमेसर ह तुमन ला उहां ले अपन सक्तिसाली हांथ अऊ बढ़ाय भुजा के दुवारा निकाल लानिस। एकरसेति यहोवा तुम्हर परमेसर ह तुमन ला बिसराम दिन ला माने के हुकूम दे हवय।
DEU 5:16 अपन दाई-ददा के आदरमान करव, जइसे कि यहोवा तुम्हर परमेसर ह तुमन ला हुकूम दे हवय, ताकि तुमन बहुंत साल तक जीयव अऊ ओ देस म तुम्हर भलई होवय, जेला यहोवा तुम्हर परमेसर ह तुमन ला देवत हे।
DEU 5:17 तुमन कोनो मनखे के हतिया झन करहू।
DEU 5:18 तुमन बेभिचार झन करहू।
DEU 5:19 तुमन चोरी झन करहू।
DEU 5:20 तुमन अपन परोसी के बिरूध लबारी गवाही झन दूहू।
DEU 5:21 तुमन अपन परोसी के घरवाली के लालच झन करहू। तुमन अपन परोसी के घर या भुइयां के लालच झन करहू, न ही ओकर सेवक या सेविका, ओकर बईला, या गदहा, या ओकर कोनो अऊ चीज के लालच करहू।”
DEU 5:22 येमन ओ हुकूम अंय, जेला यहोवा ह ऊंच अवाज म आगी, बादर अऊ घोर अंधियार म ले उहां पहाड़ ऊपर तुम्हर जम्मो सभा ला सुनाईस; अऊ ओह येमा अऊ कुछू नइं जोड़िस। तब ओह येमन ला दू ठन पथरा के पटिया म लिखके मोला दे दीस।
DEU 5:23 जब तुमन ओ अंधियार म ले अवाज ला सुनेव अऊ पहाड़ ह आगी ले बरत रिहिस, त तुम्हर गोत्रमन के जम्मो अगुवा अऊ तुम्हर मुखियामन मोर करा आईन।
DEU 5:24 अऊ तुमन कहेव, “यहोवा हमर परमेसर ह हमन ला अपन महिमा अऊ गौरव देखाय हवय, अऊ हमन आगी म ले ओकर अवाज सुने हन। आज हमन देखेंन कि यदि परमेसर ह मनखे ले गोठियाथे, तभो ले मनखे ह जीयत रह सकथे।
DEU 5:25 पर अब, हमन काबर मरन? ये भयंकर आगी ह हमन ला भसम कर दीही, अऊ यदि हमन यहोवा हमर परमेसर के अवाज फेर सुनबो, त हमन मर जाबो।
DEU 5:26 काबरकि कभू कोनो मरनहार मनखे ह परमेसर ला आगी म ले गोठियावत ओकर अवाज ला सुनके जीयत हवय, जइसे कि हमन जीयत हन?
DEU 5:27 एकरसेति तें लकठा म जा अऊ ओ जम्मो बात ला सुन, जेला यहोवा हमर परमेसर ह कहत हे। तब जऊन बात यहोवा हमर परमेसर ह तोला बताथे, ओ बात हमन ला बता। हमन सुनबो अऊ ओकर पालन करबो।”
DEU 5:28 यहोवा ह तुम्हर बात ला सुनिस, जब तुमन मोर ले गोठियावत रहेव, अऊ तब यहोवा ह मोला कहिस, “ये मनखेमन जऊन बात तोर ले कहिन, मेंह ओला सुनेंव। जऊन बात ओमन कहिन, ओह बने बात ए।
DEU 5:29 बने होही कि ओमन के मन ह अइसने ही रहय अऊ ओमन गंभीरता से मोर भय मानंय अऊ हमेसा मोर जम्मो हुकूम ला मानंय, ताकि ओमन अऊ ओमन के लइकामन संग हमेसा भलई होवय!
DEU 5:30 “जा, अऊ ओमन ला कह कि ओमन अपन तम्बू म लहुंट जावंय।
DEU 5:31 पर तें इहां मोर संग रूक, ताकि मेंह तोला ओ जम्मो हुकूम, बिधि अऊ कानून बता सकंव, जेला तेंह ओमन ला सिखाबे कि ओमन ओ देस म येकर पालन करंय, जेला मेंह ओमन के अधिकार म देवत हंव।”
DEU 5:32 एकरसेति सचेत होके ओ काममन ला करव, जेकर हुकूम यहोवा तुम्हर परमेसर ह तुमन ला दे हवय; येकर ले न तो जेवनी मुड़व अऊ न ही डेरी।
DEU 5:33 ओ जम्मो बात के पालन करत चलव, जेकर हुकूम यहोवा तुम्हर परमेसर ह तुमन ला दे हवय, ताकि तुमन जीयत रहव अऊ तुम्हर उन्नति होवय अऊ तुमन ओ देस म बहुंत समय तक बने रहव, जेला तुमन अपन अधिकार म करहू।
DEU 6:1 येमन ओ हुकूम, बिधि अऊ कानून अंय, जेमन ला सिखाय के निरदेस यहोवा तुम्हर परमेसर ह मोला देय हवय कि तुमन ओ देस म येमन के पालन करव, जिहां अधिकार करे बर तुमन यरदन के ओ पार जावत हव,
DEU 6:2 ताकि तुमन, तुम्हर लइकामन अऊ ओमन के बाद ओमन के लइकामन यहोवा अपन परमेसर के भय मानंय। जब तक तुमन मोर दिये जम्मो बिधि अऊ कानूनमन ला मानत रहिहू, तुमन लम्बा जिनगी के आनंद उठाहू।
DEU 6:3 हे इसरायलीमन, सुनव अऊ धियान से हुकूममन के पालन करव, ताकि तुम्हर भलई होवय अऊ तुम्हर संखिया ह ओ देस म बहुंत बढ़य, जिहां दूध अऊ मंधरस के भरमार हे, जइसे कि यहोवा, तुम्हर पुरखामन के परमेसर ह तुम्हर ले वायदा करे हवय।
DEU 6:4 हे इसरायलीमन, सुनव: यहोवा हमर परमेसर अय, यहोवा ह एके झन परभू अय।
DEU 6:5 यहोवा अपन परमेसर ले अपन पूरा हिरदय अऊ अपन पूरा परान अऊ अपन पूरा सक्ति ले मया करव।
DEU 6:6 ये हुकूम, जेमन ला आज मेंह तुमन ला देवत हंव, येमन तुम्हर हिरदय म रहंय।
DEU 6:7 येमन ला अपन लइकामन ला सिखावव। जब तुमन घर म बईठथव अऊ डहार म रेंगथव, जब तुमन लेटथव अऊ उठथव, त येमन ला सिखाय करव।
DEU 6:8 चिनहां के रूप म येमन ला अपन हांथ म बांध लव अऊ येमन ला अपन माथा म बांध लव।
DEU 6:9 येमन ला अपन घर के चौखटमन म अऊ अपन दुवारमन म लिखव।
DEU 6:10 जब यहोवा तुम्हर परमेसर ह तुमन ला ओ देस म लानथे, जेला ओह तुम्हर पुरखा, अब्राहम, इसहाक अऊ याकूब ला देय के सपथ खाय हवय—एक अइसने देस, जेमा बड़े-बड़े अऊ उन्नत सहरमन हवंय, जेला तुमन नइं बनाय हव,
DEU 6:11 अइसने घरमन, जेमा जम्मो किसम के बने चीजमन भरे हवंय, जेला तुमन नइं दे हव, कुआंमन जेला तुमन नइं कोड़े हव, अऊ अंगूर के बारी अऊ जैतून के छोटे जंगलमन, जेला तुमन नइं लगाय हव—तब जब तुमन येमन ला खाथव अऊ तुम्हर पेट ह भर जाथे,
DEU 6:12 त सचेत रहव कि तुमन यहोवा ला झन भूलव, जऊन ह तुमन ला मिसर देस याने कि गुलामी के देस ले निकाल लानिस।
DEU 6:13 यहोवा अपन परमेसर के भय मानव, सिरिप ओकरेच सेवा करव अऊ ओकर नांव म सपथ लेवव।
DEU 6:14 आने देवतामन के पाछू झन जावव याने कि ओ मनखेमन के देवता, जेमन तुम्हर चारों कोति हवंय;
DEU 6:15 काबरकि यहोवा तुम्हर परमेसर, जऊन ह तुम्हर बीच म हवय, ओह जलन रखनेवाला परमेसर ए अऊ ओकर कोप ह तुम्हर बिरूध भड़कही, अऊ ओह तुमन ला धरती ऊपर ले नास कर दीही।
DEU 6:16 तुमन यहोवा अपन परमेसर के परिछा झन करव, जइसे कि तुमन मस्सा म करे रहेव।
DEU 6:17 धियान देके ओ हुकूम, निरदेस अऊ बिधिमन ला मानव, जेला यहोवा तुम्हर परमेसर ह तुमन ला दे हवय।
DEU 6:18 यहोवा के नजर म ओ काम करव, जऊन ह सही अऊ बने अय, ताकि तुम्हर भलई होवय अऊ तुमन जाके ओ उत्तम देस के ऊपर अधिकार कर सकव, जेकर सपथ यहोवा ह तुम्हर पुरखामन ले खाय हवय,
DEU 6:19 तुम्हर जम्मो बईरीमन तुम्हर आघू ले भगा दिये जाहीं, जइसे कि यहोवा ह कहिसे।
DEU 6:20 भविस्य म, जब तुम्हर लइकामन तुम्हर ले पुछहीं, “ओ निरदेस, बिधि अऊ कानूनमन के का मतलब ए, जेला माने के हुकूम यहोवा हमर परमेसर ह तुमन ला दे हवय?”
DEU 6:21 त ओमन ला बतावव: “हमन मिसर देस म फिरौन के गुलाम रहेंन, पर यहोवा ह अपन सक्तिसाली हांथ ले हमन ला मिसर देस ले बाहिर निकाल लानिस।
DEU 6:22 हमर आंखी के आघू म यहोवा ह मिसर म फिरौन अऊ ओकर जम्मो परिवार ला बड़े-बड़े अऊ भयंकर चिनहां अऊ चमतकार देखाईस।
DEU 6:23 ओह हमन ला उहां ले निकालके ओ देस म लानिस, जेला हमन ला देय के सपथ ओह हमर पुरखामन ले खाय रिहिस।
DEU 6:24 यहोवा ह हमन ला ये जम्मो बिधिमन ला पालन करे के अऊ यहोवा हमर परमेसर के भय माने के हुकूम दीस, ताकि हमन हमेसा उन्नति करन अऊ जीयत रहन, जइसे कि आज के दिन म दिखत हे।
DEU 6:25 अऊ यदि हमन धियान देके ये जम्मो कानून ला यहोवा हमर परमेसर के आघू म मानथन, जइसे कि ओह हमन ला हुकूम दे हवय, त ओह हमर धरमीपन होही।”
DEU 7:1 जब यहोवा तुम्हर परमेसर ह तुमन ला ओ देस म ले आथे, जेला तुमन अधिकार करइया हव अऊ यहोवा ह तुम्हर आघू ले कतको जाति—याने कि हित्ती, गिरगासी, अमोरी, कनानी, परिज्जी, हिब्बी अऊ यबूसी जाति के मनखेमन ला भगा देथे; ये सात जाति के मनखे जेमन तुम्हर ले गनती म जादा अऊ बलवान हवंय—
DEU 7:2 अऊ जब यहोवा तुम्हर परमेसर ह ओमन ला तुम्हर हांथ म कर देथे अऊ तुमन ओमन ला हरा दव, तब ये जरूरी अय कि तुमन ओमन ला पूरा नास कर दव। ओमन के संग कोनो करार झन करव, अऊ ओमन ऊपर दया झन करव।
DEU 7:3 ओमन के संग सादी-बिहाव घलो झन करव। न अपन बेटीमन ला ओमन के बेटामन बर दव अऊ न ही ओमन के बेटीमन ला अपन बेटामन बर लानव,
DEU 7:4 काबरकि ओमन तुम्हर लइकामन ला मोर पाछू चले से भटका दीहीं अऊ आने देवता के सेवा करे बर कहिहीं, अऊ तब यहोवा के कोरोध ह तुम्हर ऊपर भड़कही अऊ तुमन ला तुरते नास कर दीही।
DEU 7:5 तुमन ला ओमन के संग ये करना हे: ओमन के बेदीमन ला टोरके गिरा दव, ओमन के पबितर पथरामन ला कुटा-कुटा कर दव, ओमन के असेरा के खंभामन ला काट डारव अऊ ओमन के मूरतीमन ला आगी म जला दव।
DEU 7:6 काबरकि तुमन यहोवा तुम्हर परमेसर बर एक पबितर जाति के मनखे अव। यहोवा तुम्हर परमेसर ह धरती के जम्मो जाति ले तुम्हर जाति ला चुने हवय ताकि तुमन ओकर मनखे, ओकर निज भाग ठहिरव।
DEU 7:7 यहोवा ह तुम्हर ऊपर अपन मया देखाके तुमन ला एकरसेति नइं चुनिस कि तुमन आने जातिमन के मनखेमन ले गनती म जादा रहेव; वास्तव म तुमन जम्मो जातिमन ले गनती म बहुंत कम रहेव।
DEU 7:8 पर येह एकरसेति होईस काबरकि यहोवा ह तुमन ले मया करिस अऊ ओ सपथ ला पूरा करिस, जेला ओह तुम्हर पुरखामन ले खाय रिहिस कि ओह तुमन ला अपन सक्तिसाली हांथ के दुवारा बंधुवई के देस ले याने कि मिसर देस के राजा फिरौन के सक्ति ले छोंड़ाईस।
DEU 7:9 एकरसेति तुमन जानव कि यहोवा तुम्हर परमेसर ह परमेसर ए; ओह बिसवासयोग्य परमेसर ए, जऊन ह अपन मया के करार ला ओमन के संग हजार पीढ़ी तक बनाय रखथे, जेमन ओकर ले मया करथें अऊ ओकर हुकूममन ला मानथें।
DEU 7:10 पर जऊन मन ओकर ले घिन करथें, ओह ओमन ला नास करके ओमन के आघू म ही ओमन ले बदला लीही; ओह ओमन ले बदला लेय म देरी नइं करही, जेमन ओकर ले घिन करथें।
DEU 7:11 एकरसेति, ओ हुकूम, बिधि अऊ कानूनमन ला माने बर धियान लगावव, जेला मेंह आज तुमन ला देवत हंव।
DEU 7:12 यदि तुमन ये कानूनमन ऊपर धियान देथव अऊ मन लगाके ओमन के पालन करथव, त यहोवा तुम्हर परमेसर ह अपन मया के करार ला तुम्हर संग बनाय रखही, जइसे कि ओह तुम्हर पुरखामन संग सपथ खाय रिहिस।
DEU 7:13 ओह तुमन ला मया करही अऊ तुमन ला आसीस दीही अऊ तुम्हर संखिया ला बढ़ाही। ओह तुम्हर गरभ के फर, तुम्हर भुइयां के ऊपज—तुम्हर अनाज, नवां अंगूर के मंद अऊ जैतून तेल अऊ तुम्हर बरदी के बछवा अऊ मेढ़ा-पीलामन ला ओ देस म आसीस दीही, जेला देय के परतिगियां ओह तुम्हर पुरखामन ले करे रिहिस।
DEU 7:14 तुमन कोनो आने जाति के मनखेमन ले जादा आसीसित होहू; तुम्हर कोनो भी आदमी या माईलोगन बांझ नइं होही, अऊ न ही तुम्हर पसु-धन म पीलामन के कमी होही।
DEU 7:15 यहोवा ह तुमन ला हर एक बेमारी ले दूरिहा रखही। ओह तुम्हर ऊपर ओ भयंकर बेमारीमन ला नइं लानही, जेला तुमन मिसर देस म देखे रहेव, पर ओह ये बेमारीमन ला ओ जम्मो झन ऊपर लानही, जेमन तुम्हर ले घिन करथें।
DEU 7:16 जरूरी ए कि तुमन ओ जम्मो जाति के मनखेमन ला नास कर दव, जेमन ला यहोवा तुम्हर परमेसर ह तुमन ला दे देथे। ओमन ऊपर दया झन करव अऊ ओमन के देवतामन के सेवा झन करव, काबरकि ओह तुम्हर बर एक फांदा होही।
DEU 7:17 तुमन अपनआप ले कह सकत हव, “ये जातिमन तो हमर ले बलवान हवंय। हमन येमन ला कइसे भगा सकत हन?”
DEU 7:18 पर ओमन ले झन डरव; बने करके सुरता करव कि यहोवा तुम्हर परमेसर ह फिरौन अऊ जम्मो मिसर देस के संग का करिस।
DEU 7:19 तुमन अपन आंखी ले ओ बड़े-बड़े बिपत्ति, चिनहां अऊ अद्भूत काम, सक्तिसाली हांथ अऊ बढ़ाय हुए बाहां ला देखे हव, जेकर दुवारा यहोवा तुम्हर परमेसर ह तुमन ला बाहिर निकालिस। यहोवा तुम्हर परमेसर ह ओ जम्मो मनखेमन के संग वइसने ही करही, जेमन ले तुमन अब डरत हव।
DEU 7:20 येकर अलावा, यहोवा तुम्हर परमेसर ह ओमन के बीच म तब तक दतैया पठोही, जब तक कि ओ बांचे मनखेमन नास नइं हो जाहीं, जेमन कि तुम्हर ले छिपे होहीं।
DEU 7:21 ओमन ले भयभीत झन होवव, काबरकि यहोवा तुम्हर परमेसर, जऊन ह तुम्हर बीच म हवय, ओह महान अऊ अद्भूत परमेसर अय।
DEU 7:22 यहोवा तुम्हर परमेसर ह ओ जाति-जाति के मनखेमन ला धीरे-धीरे करके तुम्हर आघू ले भगा दीही। ओमन ला तुरते भगाय के अनुमति तुमन ला नइं होही, नइं तो तुम्हर चारों कोति जंगली पसुमन बहुंत बढ़ जाहीं।
DEU 7:23 पर यहोवा तुम्हर परमेसर ह ओमन ला तुम्हर हांथ म सऊंप दीही अऊ ओमन के बीच म अइसने गड़बड़ी कर दीही कि ओमन नास हो जाहीं।
DEU 7:24 ओह ओमन के राजामन ला तुम्हर हांथ म कर दीही, अऊ तुमन धरती म ओमन के नांव मिटा दूहू। अइसने कोनो नइं होही, जऊन ह तुम्हर सामना कर सकय; तुमन ओमन ला नास कर दूहू।
DEU 7:25 तुमन ला ओमन के देवतामन के मूरती ला आगी म जला देना हे। ओमन के सोन अऊ चांदी के लालच झन करहू, अऊ ओला अपन बर झन लूहू, नइं तो तुमन ओकर दुवारा फंस जाहू, काबरकि येह यहोवा तुम्हर परमेसर बर घिनौना चीज अय।
DEU 7:26 अपन घर म कोनो घिनौना चीज ला झन लानव, नइं तो तुमन ला घलो ओकर सहीं बिनास बर अलग रखे जाही। येला नीच या खराप चीज समझव अऊ येकर ले बहुंत घिन करव, काबरकि येला बिनास बर अलग करे जाथे।
DEU 8:1 आज मेंह तुमन ला जऊन हुकूम देवत हंव, धियान देके तुमन ओमन के पालन करव, ताकि तुमन जीयत रहव अऊ संखिया म बढ़व अऊ ओ देस म जाके ओकर ऊपर अधिकार कर लेवव, जेकर परतिगियां यहोवा ह सपथ खाके तुम्हर पुरखामन ले करे रिहिस।
DEU 8:2 सुरता रखव कि कइसे यहोवा तुम्हर परमेसर ह पूरा रसता म ये चालीस साल तक सुन्ना जगह म तुम्हर अगुवई करिस अऊ ओह ये जाने बर तुमन ला नम्र करिस अऊ परखिस कि तुम्हर मन म का हवय, तुमन ओकर हुकूममन ला मानहू या नइं।
DEU 8:3 ओह तुमन ला भूखा रखके नम्र करिस अऊ फेर तुमन ला मन्ना खवाईस, जेकर बारे म न तो तुमन अऊ न ही तुम्हर पुरखामन जानत रिहिन; ओह तुमन ला ये सिखाय बर घलो नम्र करिस कि मनखे ह सिरिप रोटी ले ही जीयत नइं रहय, फेर हर ओ बचन जऊन ह यहोवा के मुहूं ले निकलथे जीयत रहिही।
DEU 8:4 ये चालीस साल के दौरान तुम्हर कपड़ामन न तो फटिन अऊ न ही तुम्हर गोड़मन थकके फूलिन।
DEU 8:5 तब अपन मन म जान लेवव कि जइसे एक मनखे ह अपन बेटा ला अनुसासित करथे, वइसे ही यहोवा तुम्हर परमेसर ह तुमन ला अनुसासित करथे।
DEU 8:6 यहोवा अपन परमेसर के हुकूम ला मानव, ओकर हुकूम के मुताबिक चलव अऊ ओकर आदर करव।
DEU 8:7 काबरकि यहोवा तुम्हर परमेसर ह तुमन ला एक उत्तम देस म ले जावत हे—एक अइसने देस जिहां घाटी अऊ पहाड़ीमन ले पानी के नाला, नरवा अऊ गहिरा सोतामन निकलत हें;
DEU 8:8 एक अइसने देस जिहां गहूं, जौ, अंगूर के नार, अंजीर के रूख, अनार, जैतून तेल अऊ मंधरस हवय;
DEU 8:9 एक अइसने देस जिहां जेवन के कमी नइं होही अऊ तुमन ला कोनो चीज के घटी नइं होही; एक अइसने देस जिहां चट्टान म लोहा हवय अऊ तुमन पहाड़ीमन ला खनके तांबा निकाल सकत हव।
DEU 8:10 जब तुमन जी भरके खा लेवव, त यहोवा अपन परमेसर के ओ उत्तम देस बर परसंसा करव, जेला ओह तुमन ला देय हवय।
DEU 8:11 ये बात के खियाल रखव कि मेंह तुमन ला आज ओकर जऊन हुकूम, कानून अऊ बिधिमन ला देवत हंव, ओमन ला नइं मानके यहोवा अपन परमेसर ला झन भूलव।
DEU 8:12 नइं तो, जब तुमन जी भरके खाथव, जब तुमन सुघर घर बनाथव अऊ रहे लगथव,
DEU 8:13 अऊ जब तुम्हर गाय-बईला अऊ भेड़-बकरी के झुंड ह बहुंत बढ़थे अऊ तुम्हर सोन अऊ चांदी ह बढ़थे अऊ तुम्हर जम्मो चीज म बढ़ोतरी होथे,
DEU 8:14 त तुम्हर मन ह घमंडी हो जाही अऊ तुमन यहोवा अपन परमेसर ला भुला जाहू, जऊन ह तुमन ला मिसर देस ले, याने कि बंधुवई के देस ले बाहिर निकाल लानिस।
DEU 8:15 ओह तुमन ला ओ बड़े अऊ भयानक निरजन प्रदेस म ले आईस, जिहां पानी के कमी अऊ सूखा भुइयां रिहिस, जिहां जहरिला सांप अऊ बिच्छूमन रिहिन। ओह तुम्हर बर कठोर चट्टान म ले पानी निकालिस।
DEU 8:16 ओह निरजन प्रदेस म तुमन ला खाय बर मन्ना दीस, जेकर बारे म तुम्हर पुरखामन नइं जानत रिहिन; ओह ये सब तुमन ला नम्र करे बर अऊ तुमन ला परखे बर करिस ताकि आखिरी म ये सब के दुवारा तुम्हर भलई होवय।
DEU 8:17 तुमन अपनआप ले कह सकत हव, “मोर सक्ति अऊ मोर हांथ के ताकत ले मेंह मोर बर ये संपत्ति बनाय हवंव।”
DEU 8:18 पर यहोवा अपन परमेसर ला सुरता रखव, काबरकि येह ओहीच अय, जऊन ह तुमन ला संपत्ति बनाय के योग्यता देथे, अऊ ये किसम ले ओह अपन करार ला मजबूत करथे, जेला ओह तुम्हर पुरखामन संग सपथ खाके करे रिहिस, जइसे कि येह आज दिखत हे।
DEU 8:19 कहूं तुमन कभू यहोवा अपन परमेसर ला भुला जावव अऊ आने देवतामन के पाछू चलव अऊ ओमन के अराधना अऊ दंडवत करव, त मेंह आज तुमन ला चेताके कहत हंव कि खचित तुमन नास हो जाहू।
DEU 8:20 जइसे कि यहोवा ह जाति-जाति के ओ मनखेमन ला तुम्हर आघू ले नास कर दे रिहिस, वइसे ही तुमन घलो यहोवा अपन परमेसर के हुकूम नइं माने के कारन नास हो जाहू।
DEU 9:1 हे इसरायलीमन, सुनव: तुमन अब यरदन नदी के ओ पार जाके ओ जाति-जाति के मनखेमन ला बेदखल करनेचवाला हव, जेमन तुम्हर ले बड़े अऊ बलवान हें, जेमन के बड़े-बड़े सहर हवंय अऊ ओ सहर म ऊंचहा-ऊंचहा दीवार हवंय।
DEU 9:2 उहां मनखेमन बलवान अऊ ऊंचहा-ऊंचहा हवंय—ओमन अनाकी अंय। तुमन ओमन के बारे म जानत हव अऊ ओमन के बारे म ये बात सुने हव: “कोन ह अनाकीमन के सामना कर सकथे?”
DEU 9:3 पर तुमन आज ये बात ला जान लेवव कि यहोवा तुम्हर परमेसर ही ओ अय, जऊन ह एक भसम करइया आगी सहीं तुम्हर आघू ओ पार जाही। ओह ओमन ला नास कर दीही; ओह ओमन ला तुम्हर आघू म दबा दीही। अऊ तुमन ओमन ला भगा दूहू अऊ तुरते ओमन के बिनास कर दूहू, जइसे कि यहोवा ह तुम्हर ले वायदा करे हवय।
DEU 9:4 जब यहोवा तुम्हर परमेसर ह ओमन ला तुम्हर आघू ले भगा दीही, त तुमन अपनआप ले ये झन कहव, “मोर धरमीपन के कारन यहोवा ह मोला इहां ये देस ऊपर अधिकार करे बर लाने हवय।” काबरकि सच तो ये अय कि ये जातिमन के दुस्टता के कारन यहोवा ह येमन ला तुम्हर आघू ले भगानेवाला हे।
DEU 9:5 तुमन अपन धरमीपन अऊ ईमानदारी के कारन ओमन के देस ऊपर अधिकार करे बर नइं जावत हव; पर ये जातिमन के दुस्टता के कारन यहोवा तुम्हर परमेसर ओमन ला तुम्हर आघू ले भगाही ताकि ओ बात पूरा होवय, जेकर सपथ ओह तुम्हर पुरखा अब्राहम, इसहाक अऊ याकूब ले खाय रिहिस।
DEU 9:6 एकरसेति ये बात ला समझ लव कि तुम्हर धरमीपन के कारन यहोवा तुम्हर परमेसर ह तुमन ला ये देस तुम्हर अधिकार म नइं देवत हे, काबरकि तुमन एक ढीठ जाति के मनखे अव।
DEU 9:7 ये बात ला सुरता रखव अऊ कभू झन भूलव कि सुन्ना जगह म तुमन कइसे यहोवा तुम्हर परमेसर के कोरोध ला भड़कावत रहेव। मिसर देस ला छोंड़े के दिन ले लेके इहां हबरे के दिन तक, तुमन यहोवा के बिरूध बिदरोह करत आय हवव।
DEU 9:8 होरेब करा घलो तुमन यहोवा के कोरोध ला भड़कायेव; ओह अतेक गुस्सा होईस कि तुमन ला नास कर देतिस।
DEU 9:9 जब मेंह पथरा के पटिया, ओ करार के पटियामन ला लेय बर पहाड़ ऊपर गेंव, जेला यहोवा ह तुम्हर संग करे रिहिस, त मेंह पहाड़ ऊपर चालीस दिन अऊ चालीस रात तक रहेंव; मेंह न तो जेवन करेंव अऊ न ही पानी पीयेंव।
DEU 9:10 यहोवा ह मोला दू ठन पथरा के पटिया दीस, जेमा परमेसर ह अपन अंगरी ले लिखे रिहिस। ओमा ओ जम्मो हुकूममन लिखाय रिहिन, जेला यहोवा ह पहाड़ ऊपर आगी म होके सभा के दिन तुमन ला बताय रिहिस।
DEU 9:11 चालीस दिन अऊ चालीस रात के आखिरी म यहोवा ह मोला ओ दू ठन पथरा के पटियामन ला दीस, जेमन करार के पटिया रिहिन।
DEU 9:12 तब यहोवा ह मोला कहिस, “तें इहां ले तुरते खाल्हे उतर, काबरकि तोर मनखेमन बिगड़ गे हवंय, जेमन ला तें मिसर देस ले निकालके लाने हस। ओमन ओ रसता ला बहुंत जल्दी छोंड़ दे हवंय, जेकर हुकूम मेंह ओमन ला दे रहेंव अऊ ओमन अपन बर एक मूरती बना ले हवंय।”
DEU 9:13 फेर यहोवा ह मोला ये घलो कहिस, “मेंह ये मनखेमन ला देखे हंव, अऊ येमन असल म एक हठीला जाति के मनखे अंय!
DEU 9:14 मोला अकेला छोंड़ दे, ताकि मेंह ओमन ला नास कर देवंव अऊ धरती ऊपर ले ओमन के नांव ला मिटा देवंव। अऊ मेंह तोर ले एक जाति बनाहूं, जऊन ह ओमन ले जादा सक्तिसाली अऊ संखिया म ओमन ले जादा होही।”
DEU 9:15 तब मेंह मुड़ें अऊ पहाड़ ले खाल्हे उतरेंव जबकि पहाड़ ह आगी ले धधकत रिहिस। अऊ करार के ओ दूनों पटिया मोर हांथ म रिहिस।
DEU 9:16 तब मेंह देखेंव कि तुमन यहोवा अपन परमेसर के बिरूध पाप करे रहेव; तुमन बछवा के आकार म एक ठन मूरती बना ले रहेव। तुमन ओ रसता ला बहुंत जल्दी छोंड़ दे रहेव, जेकर हुकूम यहोवा ह तुमन ला दे रिहिस।
DEU 9:17 एकरसेति मेंह ओ दूनों पटिया ला मोर हांथ ले फटिक देंव, अऊ ओमन ला तुम्हर आंखी के आघू म टोरके कुटा-कुटा कर देंव।
DEU 9:18 तब तुम्हर करे गय ओ जम्मो पाप के कारन, जऊन ह यहोवा के नजर म बुरई रिहिस अऊ जेकर ले ओकर गुस्सा ह भड़किस, मेंह फेर एक बार यहोवा के आघू म चालीस दिन अऊ चालीस रात सीधा पड़े रहेंव; मेंह न तो जेवन करेंव अऊ न ही पानी पीयेंव।
DEU 9:19 मेंह यहोवा के कोरोध अऊ कोप ले डरत रहेंव, काबरकि ओह अतेक गुस्सा म रिहिस कि तुमन ला नास करे चाहत रिहिस। पर एक बार फेर यहोवा ह मोर बात ला सुनिस।
DEU 9:20 अऊ यहोवा ह हारून ऊपर अतेक गुस्सा होईस कि ओला नास करे चाहत रिहिस, पर ओ समय मेंह हारून बर घलो पराथना करेंव।
DEU 9:21 मेंह तुम्हर ओ पापमय चीज—ओ बछवा ला लेंव, जेला तुमन बनाय रहेव, अऊ ओला आगी म जला देंव। तब मेंह ओला कुचर देंव अऊ ओला चूर-चूर करके धुर्रा सहीं कर देंव अऊ ओ धुर्रा ला एक ठन नरवा म फटिक देंव, जऊन ह पहाड़ ले खाल्हे बहत रिहिस।
DEU 9:22 तुमन यहोवा ला तबेरा, मस्सा अऊ किबरोत-हतावा म घलो गुस्सा दिलाय रहेव।
DEU 9:23 अऊ जब यहोवा ह तुमन ला कादेस-बरने ले भेजिस, त ओह कहिस, “जावव अऊ ओ देस ऊपर अधिकार कर लेवव, जेला में तुमन ला दे हवंव।” पर तुमन यहोवा तुम्हर परमेसर के बिरूध बिदरोह करेव। तुमन न तो ओकर ऊपर भरोसा करेव अऊ न ही ओकर बात मानेव।
DEU 9:24 जब ले में तुमन ला जानत हंव, तब ले तुमन यहोवा के बिरूध बिदरोह ही करत आय हवव।
DEU 9:25 मेंह ओ चालीस दिन अऊ चालीस रात यहोवा के आघू म मुहूं-भरसा पड़े रहेंव काबरकि यहोवा ह कहे रिहिस कि ओह तुमन ला नास कर दीही।
DEU 9:26 में यहोवा ले पराथना करके कहेंव, “हे परमपरधान यहोवा, अपन मनखेमन ला नास झन कर; येमन तोर निज भाग अंय, जेमन ला तेंह अपन बड़े सामर्थ से छोंड़ाय हस अऊ अपन सक्तिसाली हांथ से येमन ला मिसर देस ले निकाल लाने हस।
DEU 9:27 अपन सेवक अब्राहम, इसहाक अऊ याकूब ला सुरता कर। ये मनखेमन के हठीलापन, ओमन के दुस्टता अऊ ओमन के पाप ला अनदेखी कर।
DEU 9:28 नइं तो, जऊन देस ले तेंह हमन ला निकालके लाने हस, उहां के मनखेमन कहिहीं, ‘काबरकि यहोवा ह ओमन ला ओ देस म नइं ले जा सकिस, जेकर परतिगियां ओह ओमन ले करे रिहिस, अऊ काबरकि ओह ओमन ले घिन करिस, एकरसेति ओह ओमन ला बाहिर निकालिस ताकि निरजन प्रदेस म ओमन ला मार डारय।’
DEU 9:29 पर ओमन तोर मनखे अंय, तोर निज भाग, जेमन ला तें अपन बड़े सामर्थ अऊ अपन बढ़ाय भुजा के दुवारा निकालके ले आय।”
DEU 10:1 ओ बेरा यहोवा ह मोला कहिस, “पहिली के पटियामन सहीं दू ठन पथरा के पटिया काटके बना ले अऊ मोर करा पहाड़ ऊपर आ। अऊ लकड़ी के एक ठन सन्दूक घलो बना।
DEU 10:2 में ये पटियामन म ओ बचनमन ला फेर लिख दूहूं, जेमन पहिली के पटियामन म रिहिन, जेमन ला तें टोर देय। तब तें ओ पटियामन ला सन्दूक म रख देबे।”
DEU 10:3 तब में बंबरी लकड़ी के एक सन्दूक बनांय अऊ पहिली सहीं काटके पथरामन के दू ठन पटिया बनांय, अऊ दूनों पटियामन ला हांथ म धरके में पहाड़ ऊपर गेंव।
DEU 10:4 यहोवा ह ओ पटियामन म ओ बातमन ला लिख दीस, जेला ओह पहिली के पटियामन म लिखे रिहिस—ओ दस हुकूम, जेला ओह सभा के दिन पहाड़ ऊपर आगी म ले कहे रिहिस। अऊ यहोवा ह ओ पटियामन ला मोला दे दीस।
DEU 10:5 तब में पहाड़ ले खाल्हे उतरेंव अऊ ओ पटियामन ला मेंह ओ सन्दूक म रख देंव, जेला में बनाय रहेंव, जइसे कि यहोवा ह मोला हुकूम देय रिहिस, अऊ ओमन अब उहां हवंय।
DEU 10:6 (तब इसरायलीमन बेने-जाकन के कुआंमन ले आघू बढ़के मोसेरा करा आईन। उहां हारून मर गीस अऊ ओला उहां माटी दिये गीस, अऊ ओकर जगह म ओकर बेटा एलिआजर ह पुरोहित के रूप म सेवा करे लगिस।
DEU 10:7 उहां ले ओमन गुदगोदा अऊ गुदगोदा ले योतबाता आईन, जऊन ह पानी के सोतामन के एक देस रिहिस।
DEU 10:8 ओ समय यहोवा ह लेवी के गोत्र ला अलग करिस ताकि ओमन यहोवा के करार के सन्दूक ला उठाके ले जावंय; यहोवा के सेवा करे बर ओकर आघू म ठाढ़ रहंय अऊ ओकर नांव म आसीस देवंय, जइसे कि ओमन आज घलो करथें।
DEU 10:9 एकरे कारन लेवीमन ला ओमन के संगी इसरायलीमन के संग कोनो बांटा या भाग नइं मिलिस; यहोवा ह ओमन के निज भाग ए, जइसे कि यहोवा तुम्हर परमेसर ह ओमन ला कहिस।)
DEU 10:10 मेंह पहिले सहीं पहाड़ ऊपर चालीस दिन अऊ चालीस रात रूके रहेंव, अऊ यहोवा ह ये समय घलो मोर बात ला सुनिस। तुमन ला नास करे के अपन ईछा ला छोंड़ दे रिहिस।
DEU 10:11 तब यहोवा ह मोला कहिस, “जा अऊ मनखेमन ला ओमन के रसता म अगुवई कर, ताकि ओमन ओ देस म जाके ओकर ऊपर अधिकार करंय, जेला देय के सपथ मेंह ओमन के पुरखामन ले खाय रहेंव।”
DEU 10:12 अऊ अब, हे इसरायलीमन, यहोवा तुम्हर परमेसर ह तुमन ले का चाहथे, ये कि सिरिप तुमन यहोवा अपन परमेसर के भय मानव, ओकर हुकूम म चलव, ओकर ले मया करव, यहोवा अपन परमेसर के सेवा अपन पूरा मन अऊ अपन पूरा आतमा ले करव,
DEU 10:13 अऊ यहोवा के हुकूम अऊ बिधिमन के पालन करव, जेला मेंह आज तुमन ला तुम्हर खुद के भलई बर देवत हंव?
DEU 10:14 अकास, अऊ त अऊ सबले ऊंच स्वरग, धरती अऊ येमा के हर एक चीज यहोवा तुम्हर परमेसर के अय।
DEU 10:15 तभो ले यहोवा ह तुम्हर पुरखामन ऊपर अपन लगाव बनाय रखिस अऊ ओमन ले मया करिस, अऊ ओह ओमन के संतान—तुमन ला जम्मो जाति के मनखेमन के बीच म ले चुनिस, जइसे कि येह आज हवय।
DEU 10:16 एकरसेति, अपन हिरदय के खतना करव, अऊ अब हठीला झन बने रहव।
DEU 10:17 काबरकि यहोवा तुम्हर परमेसर ह देवतामन के परमेसर अऊ परभूमन के परभू, महान परमेसर, सक्तिसाली अऊ अद्भूत परमेसर अय, जऊन ह कोनो भेदभाव नइं करय अऊ न ही घूस लेवय।
DEU 10:18 ओह अनाथ अऊ बिधवामन के बचाव करथे, अऊ तुम्हर बीच रहइया परदेसीमन ले ओह मया करथे, अऊ ओमन ला जेवन अऊ कपड़ा देथे।
DEU 10:19 अऊ तुमन घलो ओमन ले मया करव, जेमन परदेसी अंय, काबरकि तुमन खुद मिसर देस म परदेसी रहेव।
DEU 10:20 यहोवा अपन परमेसर के भय मानव अऊ ओकर सेवा करव। ओला कसके पकड़े रहव अऊ ओकर ही नांव म सपथ खावव।
DEU 10:21 येह ओ अय, जेकर तुमन परसंसा करथव; ओह तुम्हर परमेसर ए, जऊन ह तुम्हर बर ओ बड़े अऊ अद्भूत काममन ला करिस, जेला तुमन खुद अपन आंखी ले देखे हव।
DEU 10:22 जब तुम्हर पुरखामन मिसर देस म गीन, त ओमन सिरिप सत्तर मनखे ही रिहिन, पर अब यहोवा तुम्हर परमेसर ह तुमन ला अकास के तारामन सहीं बहुंत अकन कर दे हवय।
DEU 11:1 यहोवा अपन परमेसर ले मया करव अऊ ओकर मांग, ओकर बिधि, ओकर कानून अऊ ओकर हुकूममन ला हमेसा मानव।
DEU 11:2 आज सुरता रखव कि तुम्हर लइकामन ओ चीजमन ला न तो देखे हवंय न ही ओकर अनुभव करे हवंय—याने कि यहोवा तुम्हर परमेसर के अनुसासन, ओकर वैभव, ओकर सक्तिसाली हांथ, ओकर बढ़ाय गय भुजा ला;
DEU 11:3 ओकर देखाय गय अद्भूत चिनहां अऊ मिसर देस के बीच म करे गय ओकर काम, जेला मिसर देस के राजा फिरौन अऊ ओकर जम्मो देस के संग करिस;
DEU 11:4 यहोवा ह मिसर देस के सेना, ओमन के घोड़ा अऊ रथमन के संग का करिस, जब ओमन तुम्हर पीछा करत रिहिन, त ओह लाल-समुंदर के पानी ले ओमन ला कइसे घबरा दीस अऊ कइसे यहोवा ह ओमन के सर्वनास कर दीस।
DEU 11:5 तुम्हर लइकामन नइं देखे हवंय कि ये जगह म हबरत तक ओह सुन्ना जगह म तुम्हर बर का करिस,
DEU 11:6 अऊ ओह रूबेनी एलीआब के बेटा दातान अऊ अबीराम के संग का करिस, जब धरती ह जम्मो इसरायलीमन के मांझा म अपन मुहूं खोलिस अऊ ओमन ला ओमन के परिवार के संग अऊ ओमन के तम्बू अऊ ओमा के हर जीयत चीजमन ला लील लीस।
DEU 11:7 पर तुमन खुद अपन आंखी ले ये जम्मो बड़े काममन ला देखे हव, जेला यहोवा ह करिस।
DEU 11:8 एकर कारन ओ जम्मो हुकूममन के पालन करव, जेला मेंह आज तुमन ला देवत हंव, ताकि तुमन ला आघू बढ़े बर ताकत मिलय अऊ तुमन ओ देस ला अपन अधीन कर लेवव, जेला अपन अधिकार म करे बर तुमन यरदन के ओ पार जावत हव,
DEU 11:9 अऊ तुमन ओ देस म लम्बा समय तक रहव, जेला यहोवा ह तुम्हर पुरखा अऊ ओमन के संतानमन ला देय के सपथ खाय रिहिस; ये देस म दूध अऊ मंधरस बहुंतायत म हवय।
DEU 11:10 जऊन देस म तुमन ओकर ऊपर अधिकार करे बर जावत हव, ओह ओ मिसर देस के सहीं नो हय, जिहां ले तुमन निकलके आय हव, जिहां तुमन बीजा ला बोए के बाद गोड़ ले नाली बनाके पानी पलोत रहेव, जइसे कि साग-सब्जी के बारी म करे जाथे।
DEU 11:11 पर जऊन देस ऊपर अधिकार करे बर तुमन यरदन ला पार करके जावत हव, ओह पहाड़ अऊ घाटीमन के देस अय, जिहां अकास के बारिस ले सिंचई होथे।
DEU 11:12 येह ओ देस अय, जेकर देखभाल यहोवा तुम्हर परमेसर करथे; अऊ साल के सुरू ले लेके आखिरी तक यहोवा तुम्हर परमेसर के नजर हमेसा येकर ऊपर बने रहिथे।
DEU 11:13 एकरसेति यदि तुमन ईमानदारी से ओ हुकूममन ला मानथव, जेला मेंह आज तुमन ला देवत हंव—यहोवा अपन परमेसर ले मया करव अऊ अपन पूरा मन अऊ अपन पूरा आतमा से ओकर सेवा करव,
DEU 11:14 तब मेंह सही मौसम म तुम्हर देस म बारिस भेजहूं, सुरूआती अऊ अंतिम बारिस, ताकि तुमन अपन अनाज, नवां अंगूर के मंद अऊ जैतून तेल के फसल ले सकव।
DEU 11:15 मेंह तुम्हर पसुमन बर मैदान म घांस उपजाहूं, अऊ तुमन भरपेट खाहू अऊ संतुस्ट होहू।
DEU 11:16 सचेत रहव, नइं तो तुमन ला बहकाय जाही कि तुमन अपन परमेसर ला छोंड़के आने देवतामन के अराधना करव अऊ ओमन के दंडवत करव।
DEU 11:17 तब यहोवा के कोरोध ह तुम्हर ऊपर भड़कही, अऊ ओह अकास के बारिस ला बंद कर दीही अऊ भुइयां म कोनो फसल नइं होही, अऊ तुमन ओ बने देस म ले जल्दी नास हो जाहू, जेला यहोवा ह तुमन ला देवत हे।
DEU 11:18 एकरसेति मोर ये बातमन ला अपन हिरदय अऊ मन म रख लव; येमन ला चिनहां के रूप म अपन हांथ म बांध लव अऊ येमन ला अपन माथा म बांध लव।
DEU 11:19 ये बातमन ला अपन लइकामन ला सिखावव, जब तुमन घर म बईठथव अऊ जब तुमन डहार म रेंगथव, जब तुमन लेटथव अऊ उठथव, त येमन के बारे म गोठियाय करव।
DEU 11:20 येमन ला अपन घर के चौखटमन म अऊ अपन दुवारमन म लिखव,
DEU 11:21 ताकि जऊन देस ला यहोवा ह तुम्हर पुरखामन ला देय के सपथ खाय रिहिस, ओ देस म तुमन अऊ तुम्हर लइकामन तब तक बने रहव, जब तक कि धरती ऊपर अकास ह बने रहिथे।
DEU 11:22 यदि तुमन धियान देके ये जम्मो हुकूम के पालन करव, जेला मेंह माने बर तुमन ला देवत हंव—यहोवा अपन परमेसर ले मया करव, ओकर हुकूम म चलव अऊ ओला कसके पकड़े रहव,
DEU 11:23 तब यहोवा ह ये जम्मो जाति के मनखेमन ला तुम्हर आघू ले भगा दीही, अऊ तुमन अपन ले बड़े अऊ सक्तिसाली जाति के मनखेमन ला निकाल दूहू।
DEU 11:24 हर ओ जगह जिहां तुमन अपन गोड़ रखहू, ओह तुम्हर हो जाही: तुम्हर राज ह निरजन प्रदेस ले लेके लबानोन, अऊ फरात नदी ले लेके भूमध्य सागर तक फईल जाही।
DEU 11:25 कोनो भी मनखे तुम्हर सामना नइं कर सकही। जइसे कि यहोवा तुम्हर परमेसर ह तुम्हर ले परतिगियां करे हवय, ओह तुम्हर आतंक अऊ भय ओ पूरा देस म फईला दीही, जिहां कहीं भी तुमन जावव।
DEU 11:26 देखव, आज में तुम्हर आघू म आसीस अऊ सराप दूनों ला रखत हंव—
DEU 11:27 यदि तुमन यहोवा तुम्हर परमेसर के ओ हुकूममन ला मानहू, जेला मेंह आज तुमन ला देवत हंव, त तुमन ला आसीस मिलही;
DEU 11:28 अऊ यदि यहोवा तुम्हर परमेसर के हुकूममन ला नइं मानहू, जेला मेंह आज तुमन ला देवत हंव अऊ यदि तुमन ओकर रसता ला छोंड़के आने देवतामन के पाछू चलहू, जेमन ला तुमन जानत घलो नइं रहेव, त तुमन ला सराप मिलही।
DEU 11:29 जब यहोवा तुम्हर परमेसर ह तुमन ला ओ देस म ले आय, जेकर ऊपर अधिकार करे बर तुमन जावत हव, तब तुमन ला गरीजीम पहाड़ ले आसीस, अऊ एबाल पहाड़ ले सराप के घोसना करना हे।
DEU 11:30 जइसे कि तुमन जानत हव, ये पहाड़मन यरदन के ओ पार, पछिम दिग म, सूरज के बुड़ती कोति, मोरे के बड़े रूखमन के लकठा, अराबा म रहइया ओ कनानीमन के छेत्र गिलगाल नगर के पड़ोस म हवंय।
DEU 11:31 तुमन यरदन के ओ पार जाके ओ देस ऊपर अधिकार करनेचवाला हव, जेला यहोवा तुम्हर परमेसर ह तुमन ला देवत हे। जब तुमन ओकर ऊपर अधिकार कर लेवव अऊ उहां रहे लगव,
DEU 11:32 तब धियान रहय कि तुमन ओ जम्मो बिधि अऊ कानूनमन के पालन करव, जेला मेंह आज तुम्हर आघू म रखत हंव।
DEU 12:1 येमन ओ बिधि अऊ कानून अंय, जेकर पालन तुमन ला धियान देके ओ देस म करना हे, जेला यहोवा, तुम्हर पुरखामन के परमेसर ह तुमन ला अपन अधिकार म करे बर दे हवय—जब तक तुमन ओ देस म जीयत हव, येमन के पालन करना हे।
DEU 12:2 तुमन ओ जम्मो जगह ला पूरा नास कर दव, जेमन ऊंच पहाड़, पहाड़ी ऊपर अऊ रूखमन के छइहां म हवंय, जिहां ओ आनजात के मनखेमन अपन देवतामन के अराधना करथें, जेमन ला तुमन बेदखल करत हव।
DEU 12:3 ओमन के बेदीमन ला टोर दव, ओमन के पबितर पथरामन ला कुटा-कुटा कर दव अऊ ओमन के असेरा के खंभामन ला आगी म जला दव; ओमन के देवतामन के मूरतीमन ला काट डारव अऊ ओ जगहमन ले ओमन के नांव ला मिटा दव।
DEU 12:4 तुमन यहोवा अपन परमेसर के अराधना ओमन सहीं झन करहू।
DEU 12:5 पर तुमन ओ जगह ला चुनव, जेला यहोवा तुम्हर परमेसर ह तुम्हर जम्मो गोत्रमन के बीच म ले देखाथे कि ओह अपन निवास बर अपन नांव ला उहां रखय। ओ जगह म तुमन जावव;
DEU 12:6 अऊ उहां अपन होम-बलिदान अऊ चढ़ावा, अपन दसमांस अऊ बिसेस दान, मन्नत म माने गय भेंट अऊ अपन स्वेच्छा-बलिदान, अऊ गाय-बईला अऊ पसु-चिरईमन के पहिलांतमन ला लानव।
DEU 12:7 उहां यहोवा अपन परमेसर के आघू म तुमन अऊ तुम्हर परिवार के मनखेमन खावंय अऊ ओ जम्मो चीज बर आनंद मनावंय, जेमा तुमन अपन हांथ रखे हव, काबरकि यहोवा तुम्हर परमेसर ह तुमन ला आसीस दे हवय।
DEU 12:8 तुमन ला वइसने नइं करना हे, जइसने कि हमन आज करत हन; हर एक जन वइसने ही करत हे, जइसने ओला बने लगथे,
DEU 12:9 काबरकि तुमन ओ अराम के जगह अऊ निज भाग म अभी तक नइं हबरे हव, जेला यहोवा तुम्हर परमेसर ह तुमन ला देवत हे।
DEU 12:10 पर तुमन यरदन नदी के ओ पार जाहू अऊ ओ देस म बस जाहू, जेला यहोवा तुम्हर परमेसर ह तुमन ला एक उत्तराधिकार के रूप म देवत हे, अऊ ओह तुमन ला तुम्हर चारों कोति के बईरीमन ले सुरकछा दीही, ताकि तुमन अराम से रहव।
DEU 12:11 तब ओ जगह म, जेला यहोवा तुम्हर परमेसर ह अपन नांव बर निवास के रूप म चुनही—उहां तुमन ओ जम्मो चीजमन ला ले आवव, जेकर हुकूम मेंह तुमन ला देवत हंव: तुम्हर होम-बलिदान अऊ चढ़ावा, तुम्हर दसमांस अऊ बिसेस दान, अऊ ओ जम्मो उत्तम चीज, जेला तुमन यहोवा बर मन्नत माने हव।
DEU 12:12 अऊ उहां यहोवा अपन परमेसर के आघू म आनंद मनावव—तुमन, तुम्हर बेटा-बेटीमन, तुम्हर सेवक-सेविकामन, अऊ ओ लेवीमन, जेमन तुम्हर नगर म रहिथें अऊ ओमन ला ओमन के नगर म कोनो जमीन या निज भाग नइं मिले हवय।
DEU 12:13 ये बात के धियान रहय कि तुमन अपन होम-बलिदान ला अइसने कोनो आने जगह म झन चघाहू, जेह तुमन ला बने लगय।
DEU 12:14 पर अपन बलिदान ला ओ जगह म चघावव, जेला यहोवा ह तुम्हर गोत्रमन ले चुनथे, अऊ उहां ओ जम्मो काम करव, जेकर हुकूम मेंह तुमन ला देवत हंव।
DEU 12:15 पर तुमन अपन कोनो भी नगर म अपन पसु ला मारके ओकर जतेक मांस चाहव, ओतेक खा सकत हव, चाहे ओह छोटे हिरन होवय या बड़े हिरन, जइसे भी यहोवा तुम्हर परमेसर तुमन ला आसीस देथे। संस्कारिक रूप से सुध या असुध दूनों किसम के मनखे येला खा सकत हें।
DEU 12:16 तुमन येकर लहू ला झन खावव; ओला भुइयां म पानी सहीं रितो दव।
DEU 12:17 तुमन अपन अनाज अऊ नवां अंगूर के मंद अऊ जैतून तेल के दसमांस, या गाय-बईला अऊ पसु-चिरईमन के पहिलांत, या अपन मन्नत माने गय कोनो चीज, या स्वेच्छा-बलिदान या बिसेस दान ला अपन खुद के नगर म झन खावव।
DEU 12:18 येकर बदले, तुमन येमन ला यहोवा तुम्हर परमेसर के आघू म ओ जगह म खावव, जेला यहोवा तुम्हर परमेसर ह चुनही—तुमन, तुम्हर बेटा-बेटीमन, तुम्हर सेवक-सेविकामन, अऊ तुम्हर नगर के लेवीमन खावंव—अऊ तुमन यहोवा अपन परमेसर के आघू म ओ जम्मो चीज बर आनंद मनावव, जेमा तुमन हांथ रखे हव।
DEU 12:19 ये बात के धियान रहय कि जब तक तुमन अपन देस म जीयत हवव, तब तक लेवीमन के अनदेखी झन करव।
DEU 12:20 जब यहोवा तुम्हर परमेसर ह तुम्हर इलाका ला बढ़ाथे जइसे कि ओह वायदा करे हवय, अऊ तुमन मांस खाय के ईछा करव अऊ कहव, “कुछू मांस खाय के मोर मन करत हे,” तब तुमन येला जतेक चाहव ओतेक खा सकत हव।
DEU 12:21 यदि ओ जगह ह तुमन ले बहुंत दूरिहा हवय, जेला परमेसर ह अपन नांव ला रखे बर चुनथे, त तुमन मोर हुकूम के मुताबिक यहोवा के दिये गाय-बईला अऊ पसु-चिरईमन के झुंड ले पसु ला मारव, अऊ अपन खुद के नगर म ओला जतेक चाहव ओतेक खा सकत हव।
DEU 12:22 ओला खावव, जइसे तुमन कोनो कोटरी या हिरन ला खाथव। संस्कारिक रूप ले सुध अऊ असुध दूनों किसम के मनखे ओला खा सकत हें।
DEU 12:23 पर धियान रहय कि तुमन लहू ला झन खावव, काबरकि लहू ह जिनगी अय, अऊ जरूरी अय कि तुमन मांस के संग जिनगी ला झन खावव।
DEU 12:24 तुमन लहू ला झन खावव; येला भुइयां म पानी सहीं रितो दव।
DEU 12:25 ओला झन खावव, ताकि तुम्हर अऊ तुम्हर बाद तुम्हर लइकामन के भलई होवय, काबरकि अइसने करके तुमन यहोवा के नजर म सही काम करहू।
DEU 12:26 पर अपन पबितर चीज अऊ अपन मन्नत म देय बर चीजमन ला लेवव अऊ ओ जगह म जावव, जेला यहोवा ह चुनही।
DEU 12:27 अपन होम-बलिदान ला यहोवा अपन परमेसर के बेदी म चघावव, मांस अऊ लहू दूनों ला चघावव। तुम्हर बलिदान के लहू ला यहोवा तुम्हर परमेसर के बेदी के बाजू म रितोय जावव, पर मांस ला तुमन खा सकत हव।
DEU 12:28 धियान रहय कि तुमन मोर दिये गय ये जम्मो नियम के पालन करव, ताकि तुम्हर अऊ तुम्हर बाद तुम्हर लइकामन के हमेसा भलई होवय, काबरकि अइसने करके तुमन यहोवा अपन परमेसर के नजर म बने अऊ सही काम करहू।
DEU 12:29 यहोवा तुम्हर परमेसर ह ओ जातिमन के मनखे ला तुम्हर आघू म नास कर दीही, जेमन ऊपर तुमन चढ़ई करके ओमन ला निकालनेचवाला हव। पर जब तुमन ओमन ला भगा देवव अऊ ओमन के देस म बस जावव,
DEU 12:30 अऊ ओमन तुम्हर आघू ले नास हो जावंय, त धियान रहय कि ओमन के देवतामन के बारे म पुछताछ करे के दुवारा ये कहिके झन फंसव, “ये जातिमन के मनखेमन अपन देवतामन के सेवा कइसे करत रिहिन? हमन घलो वइसने करबो।”
DEU 12:31 जरूरी अय कि तुमन यहोवा अपन परमेसर के अराधना ओमन सहीं झन करव, ओमन जम्मो किसम के घिनौना काम करथें, जेकर ले यहोवा ह घिन करथे। अऊ त अऊ ओमन अपन देवतामन बर बलिदान के रूप म अपन बेटा-बेटीमन ला आगी म जला देथें।
DEU 12:32 धियान रहय कि तुमन ओ जम्मो बात के पालन करव, जेकर हुकूम मेंह तुमन ला देवत हंव; येमा न तो कुछू जोड़व, अऊ न ही येमा ले कुछू निकालव।
DEU 13:1 यदि कोनो अगमजानी, या कोनो मनखे, जऊन ह सपना के दुवारा अगम के बात कहिथे, यदि अइसने मनखे तुम्हर बीच म आथे अऊ कोनो चिनहां या अद्भूत बात के घोसना करथे,
DEU 13:2 अऊ यदि ओ चिनहां या अद्भूत काम सही म हो जाथे, अऊ ओ अगमजानी ह कहिथे, “आवव, हमन आने देवतामन के पाछू चलन” (ओ देवता, जेमन ला तुमन नइं जानव) “अऊ ओमन के अराधना करन,”
DEU 13:3 त तुमन ओ अगमजानी या सपना देखइया के बात ला झन सुनहू; काबरकि यहोवा तुम्हर परमेसर ह ये पता लगाय बर परखत हे कि तुमन ओला अपन पूरा मन अऊ परान ले मया करथव कि नइं।
DEU 13:4 येह यहोवा तुम्हर परमेसर ए, जेकर पाछू तुमन ला चलना जरूरी ए, अऊ जरूरी ए कि तुमन ओकर आदर करव। ओकर हुकूम के पालन करव अऊ ओकर बात ला मानव; ओकर सेवा करव अऊ ओला कसके थामे रहव।
DEU 13:5 ओ अगमजानी या सपना देखइया मार डारे जावय, काबरकि ओह तुमन ला ओ यहोवा तुम्हर परमेसर के बिरूध म भड़काय हवय, जऊन ह तुमन ला मिसर देस ले बाहिर निकाल लानिस अऊ तुमन ला गुलामी के देस ले छोंड़ाईस। ओ अगमजानी या सपना देखइया ह तुमन ला ओ रसता ले हटाय के कोसिस करिस, जेमा चले के हुकूम यहोवा तुम्हर परमेसर ह तुमन ला देय हवय। येह जरूरी अय कि तुमन अपन बीच ले बुरई ला हटावव।
DEU 13:6 यदि तुम्हर खुद के भाई, या तुम्हर बेटा या बेटी, या तुम्हर मयारू घरवाली, या तुम्हर नजदीकी संगवारी गुपत रूप म ये कहिके तुमन ला बहकाथे, “चलव, हमन आने देवतामन के अराधना करन” (ओ देवता जेला न तो तुमन जानथव अऊ न ही तुम्हर पुरखामन कभू जानिन,
DEU 13:7 तुम्हर चारों कोति के मनखेमन के देवता, चाहे लकठा के होवंय या दूरिहा के, या ओमन देस के एक छोर ले लेके दूसर छोर म होवंय),
DEU 13:8 ओमन के बात झन मानव या ओमन के बात ला झन सुनव। ओमन ऊपर दया झन देखावव। ओमन ला झन छोंड़व या ओमन के बचाव झन करव।
DEU 13:9 जरूरी अय कि तुमन ओमन ला मार डारव। ओमन ला मारे म तुम्हर हांथ पहिले उठे, अऊ तब आने जम्मो मनखेमन के।
DEU 13:10 पथरवाह करके ओमन ला मार डारव, काबरकि ओमन तुमन ला ओ यहोवा तुम्हर परमेसर ले अलग करे के कोसिस करे हवंय, जऊन ह तुमन ला मिसर देस ले, ओ गुलामी के देस ले बाहिर निकाल लानिस।
DEU 13:11 तब जम्मो इसरायली ये बात ला सुनके डरहीं, अऊ तुम्हर बीच म फेर कोनो मनखे अइसने दुस्ट काम नइं करही।
DEU 13:12 जऊन नगरमन ला यहोवा तुम्हर परमेसर ह तुमन ला रहे बर दे हवय, यदि ओमा के कोनो नगर के बारे म ये सुनव
DEU 13:13 कि दुस्ट मनखेमन तुम्हर बीच म ले निकलके ओ नगर के मनखेमन ला ये कहिके भटका दे हवंय, “चलव, हमन आने देवतामन के अराधना करन” (ओ देवता, जेमन ला तुमन नइं जानव),
DEU 13:14 तब जरूरी अय कि तुमन पुछताछ करव, जांचव अऊ ओकर पूरा खोजबीन करव। अऊ यदि ये बात सच निकले अऊ येह साबित हो जावय कि ये घिनौना काम तुम्हर बीच म करे गे हवय,
DEU 13:15 त खचित तुमन ओ नगर म रहइया जम्मो झन ला तलवार ले मार डारव। तुमन ओला पूरा नास कर दव, उहां के मनखे अऊ पसु दूनों ला नास कर दव।
DEU 13:16 तुमन ओ नगर के जम्मो लूटे गय सामान ला सार्वजनिक चऊक म इकट्ठा करव अऊ ओ नगर अऊ ओकर लूटे गय जम्मो सामान ला यहोवा तुम्हर परमेसर बर एक पूरा होम-बलिदान के रूप म जला दव। ओ नगर ह हमेसा बर खंडहर बने रहय अऊ ओला फेर कभू झन बनाय जावय,
DEU 13:17 अऊ कोनो भी दंडित चीज तुम्हर हांथ म झन रहय। तब यहोवा ह अपन भयंकर कोरोध ला छोंड़के तुम्हर ऊपर दया देखाही, अऊ तुम्हर ऊपर किरपा करही। ओह तुम्हर संखिया ला बढ़ाही, जइसे कि ओह तुम्हर पुरखामन ले सपथ खाके वायदा करे रिहिस—
DEU 13:18 काबरकि तुमन यहोवा तुम्हर परमेसर के बात ला ओकर ओ जम्मो हुकूम ला माने के दुवारा पूरा करथव, जेला मेंह आज तुमन ला देवत हंव अऊ अइसे करके तुमन परमेसर के नजर म सही काम करत हव।
DEU 14:1 तुमन यहोवा तुम्हर परमेसर के लइकामन अव। मरे मनखे बर अपन देहें ला झन काटव या अपन मुड़ के आघू के बाल ला झन मुड़ावव,
DEU 14:2 काबरकि तुमन यहोवा तुम्हर परमेसर बर पबितर मनखे अव। धरती के जम्मो मनखेमन ले यहोवा ह तुमन ला अपन कीमती भाग होय बर चुन ले हवय।
DEU 14:3 तुमन कोनो घिनौना चीज ला झन खाहू।
DEU 14:4 ये पसुमन ला तुमन खा सकत हव: बईला, भेड़, बोकरा,
DEU 14:5 हिरन, चिकारा, हिरनी, जंगली बोकरा, बड़े सींगवाला पहाड़ी बोकरा, कुरंग अऊ पहाड़ी भेड़।
DEU 14:6 तुमन कोनो भी अइसने पसु ला खा सकत हव, जेकर फटे खुर हवय अऊ ओह पागुर करथे।
DEU 14:7 पर जऊन मन पागुर करथें या फेर सिरिप फटे खुर के होथें, ओमन ला झन खाहू—ऊंट, खरगोस या कबर-बिज्जू। हालाकि येमन पागुर करथें, पर येमन के खुर फटे नइं रहय; ओमन बिधि के मुताबिक तुम्हर बर असुध अंय।
DEU 14:8 सूरा ह घलो असुध अय; हालाकि येकर खुर ह फटे रहिथे, पर येह पागुर नइं करय। तुमन ओमन के मांस झन खावव अऊ न ही ओमन के लास ला छुवव।
DEU 14:9 पानी म जतेक जीव-जन्तु हवंय, ओमा के जेकर पंख अऊ बिस्सर छिलका होथे, ओमन ला तुमन खा सकत हव।
DEU 14:10 पर जेकर पंख अऊ बिस्सर छिलका नइं होवय, ओला झन खावव; काबरकि ओह असुध ए।
DEU 14:11 तुमन कोनो भी सुध चिरई ला खा सकत हव।
DEU 14:12 पर येमन ला तुमन झन खावव ओमन असुध अंय: चील, गिधवा, करिया गिधवा,
DEU 14:13 लाल चील, करिया चील, कोनो भी किसम के बाज,
DEU 14:14 कोनो भी किसम के कऊआ,
DEU 14:15 सींगवाला उल्लू, चिचियानेवाला उल्लू, समुंदरी चिरई, कोनो भी किसम के बाज,
DEU 14:16 छोटे घुघवा, बड़े घुघवा, सफेद घुघवा,
DEU 14:17 सुनसान जगह के घुघवा, समुंदरी बाज, हाड़गील,
DEU 14:18 सारस, कोनो भी किसम के कोकड़ा, टिटहरी अऊ चमगीदड़।
DEU 14:19 जम्मो उड़नेवाला कीरामन तुम्हर बर असुध अंय; ओमन ला झन खाहू।
DEU 14:20 पर कोनो पंखवाला सुध जीव ला खा सकत हव।
DEU 14:21 तुमन अइसे कोनो चीज ला झन खाहू, जऊन ह पहिले ही मर गे हवय। तुमन ओला अपन कोनो भी नगर म रहइया परदेसी ला दे सकत हव अऊ ओह ओला खा सकत हे, या तुमन ओला कोनो आने परदेसी ला बेच सकत हव। पर तुमन यहोवा अपन परमेसर बर एक पबितर मनखे अव। कोनो छेरी-पीला ला ओकर दाई के दूध म झन पकाहू।
DEU 14:22 जरूरी अय कि हर साल तुम्हर खेत म होवइया जम्मो फसल के दसवां अंस ला अलग रखव
DEU 14:23 जऊन जगह ला यहोवा तुम्हर परमेसर ह अपन नांव बर निवास के रूप म चुनही, ओ जगह म तुमन अपन अनाज के दसवां अंस, नवां अंगूर के मंद अऊ जैतून तेल, अऊ अपन गाय-बईला अऊ पसु-चिरई के पहिलांत ला यहोवा अपन परमेसर के आघू म खावव, ताकि तुमन हमेसा यहोवा अपन परमेसर ला आदर देय बर सीखव।
DEU 14:24 तुमन यहोवा अपन परमेसर के दुवारा आसीस पाय हवव अऊ यदि ओ जगह ह बहुंत दूरिहा म हवय, जेला यहोवा ह अपन नांव रखे बर चुनथे, अऊ तुमन उहां अपन दसवां अंस ला नइं ले जा सकव,
DEU 14:25 त फेर ओ दसवां अंस ला चांदी म बदला कर लव, अऊ ओ चांदी ला लेके तुमन ओ जगह म जावव, जेला यहोवा तुम्हर परमेसर ह चुनही।
DEU 14:26 ओ चांदी के उपयोग अपन मन मुताबिक चीज बिसाय म करव: गाय-बईला, भेड़-बकरी, अंगूर के मंद या कोनो आने मंद, या कोनो अऊ चीज जेला तुमन चाहव। तब तुमन अऊ तुम्हर परिवार के मनखेमन उहां यहोवा तुम्हर परमेसर के आघू म खावंय अऊ आनंद मनावंय।
DEU 14:27 अऊ तुमन तुम्हर नगर म रहइया लेवीमन के अनदेखी झन करव, काबरकि ओमन करा ओमन के खुद के कोनो हिस्सा या निज भाग नइं ए।
DEU 14:28 हर तीन साल के आखिरी म, ओ साल के ऊपज के जम्मो दसवां अंस ला लानव अऊ ओला अपन नगर म इकट्ठा करव,
DEU 14:29 ताकि लेवी (जेमन करा ओमन के खुद के कोनो हिस्सा या निज भाग नइं ए) अऊ परदेसी, अनाथ अऊ बिधवा जेमन तुम्हर नगर म रहिथें, ओमन आवंय अऊ खावंय अऊ संतुस्ट हो जावंय, अऊ यहोवा तुम्हर परमेसर ह तुम्हर जम्मो काम म तुमन ला आसीस देवय।
DEU 15:1 हर सात साल के आखिरी म तुमन करजा ला माफ कर दूहू।
DEU 15:2 ये करजा माफी के काम अइसने करे जावय: हर एक साहूकार ह अपन संगी इसरायली ला दिये करजा ला माफ कर देवय। ओह अपन खुद के मनखेमन ले करजा के पईसा वापिस झन लेवय, काबरकि करजा माफी बर यहोवा के समय के घोसना करे जा चुके हे।
DEU 15:3 तुमन कोनो परदेसी ले करजा म दिये पईसा ला वापिस ले सकत हव, पर तुम्हर संगी इसरायली तुम्हर ले कोनो करजा लेय हवय, त ओ करजा ला जरूर माफ कर दव।
DEU 15:4 पर तुम्हर बीच म कोनो भी गरीब मनखे झन रहय, काबरकि जऊन देस ला यहोवा तुम्हर परमेसर ह तुमन ला तुम्हर उत्तराधिकार के रूप म देवत हे, ओ देस म ओह तुमन ला बहुंत आसीस दीही,
DEU 15:5 यदि तुमन सिरिप यहोवा तुम्हर परमेसर के बात ला मानहू अऊ धियान देके ये जम्मो हुकूममन के पालन करहू, जेला मेंह आज तुमन ला देवत हंव।
DEU 15:6 काबरकि यहोवा तुम्हर परमेसर ह अपन वायदा के मुताबिक तुमन ला आसीस दीही, अऊ तुमन बहुंते जाति के मनखेमन ला उधार दूहू पर कोनो ले तुमन ला उधार लेना नइं पड़ही। तुमन बहुंते जाति के मनखेमन ऊपर सासन करहू पर तुम्हर ऊपर कोनो सासन नइं करही।
DEU 15:7 यदि तुम्हर संगी इसरायलीमन के बीच म ही कोनो गरीब हवय, जऊन ह ओ देस के कोनो नगर म रहिथे, जेला यहोवा तुम्हर परमेसर ह तुमन ला देवत हे, त ओकर बर अपन हिरदय ला कठोर झन करव या ओकर बर अपन हांथ ला झन बांध लव।
DEU 15:8 पर हांथ खोलके अऊ उदार मन से ओकर जरूरत के चीज ओला उधार दव या ओकर मदद करव।
DEU 15:9 धियान रहय कि ये दुस्ट बिचार तुम्हर मन म झन आवय: “सातवां साल, करजा माफी करे के साल ह लकठा म हवय,” ताकि तुम्हर संगी इसरायलीमन के बीच के ओ जरूरतमंद भाई बर तुम्हर मन म कोनो गलत बिचार झन आवय अऊ ओला तुमन कुछू नइं देय के बात झन सोचव। तब ओह यहोवा ले तुम्हर बिरूध बिनती कर सकत हे, अऊ तुमन पाप के दोसीदार होहू।
DEU 15:10 ओला उदार मन से देवव अऊ ये काम बिगर कुड़कुड़ाय करव; तब येकर कारन यहोवा तुम्हर परमेसर ह तुमन ला तुम्हर जम्मो काम म अऊ जेमा तुमन अपन हांथ लगाहू, ओ जम्मो म आसीस दीही।
DEU 15:11 देस म हमेसा गरीब मनखेमन होहीं। एकरसेति तुमन ला हुकूम देवत हंव कि तुमन अपन ओ संगी इसरायलीमन बर उदार भाव देखावव, जेमन तुम्हर देस म गरीब अऊ जरूरतमंद हवंय।
DEU 15:12 यदि तुम्हर मनखेमन ले कोनो—चाहे ओह इबरी आदमी हो या माईलोगन—अपनआप ला तुम्हर करा बेच देथे अऊ छै साल तक सेवा करथे, त जरूरी अय कि सातवां साल तुमन ओला छोंड़ दव।
DEU 15:13 अऊ जब तुमन ओला छोंड़ देथव, त ओला खाली हांथ झन जावन दव।
DEU 15:14 ओला अपन पसु के झुंड ले, अपन कोठार ले अऊ अपन अंगूर के रसकुंड ले उदार मन से देवव। जइसे यहोवा तुम्हर परमेसर ह तुमन ला आसीस दे हवय, ओकरे मुताबिक तुमन ओला देवव।
DEU 15:15 सुरता रखव कि तुमन मिसर देस म गुलाम रहेव अऊ यहोवा तुम्हर परमेसर ह तुमन ला छोंड़ाईस। एकर कारन मेंह आज तुमन ला ये हुकूम देवत हंव।
DEU 15:16 पर यदि तुम्हर सेवक तुमन ला कहिथे, “मेंह तोला छोंड़के जाय बर नइं चाहत हंव,” काबरकि ओह तुम्हर अऊ तुम्हर परिवार ले मया करथे अऊ तुम्हर संग खुस रहिथे,
DEU 15:17 तब एक ठन सूजा लेवव अऊ ओकर कान ला कपाट म लगाके छेद दव, अऊ ओह जिनगी भर तुम्हर सेवक बने रहिही। वइसने ही अपन सेविका के संग घलो करव।
DEU 15:18 अपन सेवक ला मुक्त करई तुम्हर बर कठिन काम झन होवय, काबरकि ये छै साल म बनिहार ले काम कराय के बदले तुम्हर सेवक के काम ले तुमन ला दू गुना फायदा होईस हे। अऊ यहोवा तुम्हर परमेसर ह तुमन ला तुम्हर हर काम म आसीस दीही।
DEU 15:19 अपन गाय-बईला अऊ भेड़-बकरी म ले जनमे हर पहिलांत नर पसु ला यहोवा अपन परमेसर बर अलग करव। अपन गाय के पहिलांत बछवा ले कोनो काम झन करवाव, अऊ अपन भेड़ के पहिलांत मेढ़ा-पीला के ऊन ला झन कतरव।
DEU 15:20 हर एक साल तुमन अऊ तुम्हर परिवार के मनखेमन ओला यहोवा तुम्हर परमेसर के आघू म ओ जगह म खावव, जेला परमेसर ह चुनही।
DEU 15:21 पर कहूं पसु म दोस हवय याने कि ओह खोरवा या कनवां हे, या ओमा कोनो गंभीर दोस हवय, त तुमन ओला यहोवा तुम्हर परमेसर बर बलिदान झन करव।
DEU 15:22 ओला तुमन अपन खुद के नगर म खावव। संस्कारिक रूप ले सुध अऊ असुध दूनों किसम के मनखे ओला खा सकत हें, जइसे कि कोनो चिकारा या हिरन ला खाथें।
DEU 15:23 पर धियान रहय कि तुमन ओकर खून ला झन खावव; ओला पानी सहीं बाहिर भुइयां म रितो दव।
DEU 16:1 अबीब के महिना ला मानव अऊ यहोवा अपन परमेसर बर फसह तिहार मनावव, काबरकि अबीब के महिना म ओह रथिया के बेरा तुमन ला मिसर देस ले निकालके लाने रिहिस।
DEU 16:2 यहोवा अपन परमेसर बर अपन गाय-बईला या भेड़-बकरी के झुंड म ले एक ठन पसु ला फसह के रूप म ओ जगह म बलिदान चघावव, जेला यहोवा ह अपन नांव बर निवास के रूप म चुनही।
DEU 16:3 ओला खमीर मिले हुए रोटी के संग झन खाहू, पर सात दिन तक बिगर खमीर मिले रोटी ला खावव याने कि दुख के रोटी खावव, काबरकि तुमन मिसर देस ले जल्दबाजी म निकले रहेव—ताकि तुमन ला मिसर ले निकल आय के बेरा ह जिनगी भर सुरता रहय।
DEU 16:4 तुम्हर पूरा देस म सात दिन तक तुम्हर करा कोनो खमीर झन दिखय। पहिला दिन के संझा के बेरा चघाय गय मांस के बलिदान म ले कुछू भी बिहनियां तक झन बचय।
DEU 16:5 तुमन यहोवा तुम्हर परमेसर के दुवारा तुमन ला दिये गय कोनो भी नगर म फसह के बलिदान ला झन चघाहू,
DEU 16:6 पर सिरिप ओहीच जगह म चघाहू, जेला यहोवा ह अपन नांव बर निवास के रूप म चुनही। उहां संझा के बेरा, जब सूरज ह ढरथे, तब तुमन मिसर ले निकले के सालाना उत्सव के रूप म फसह के बलिदान ला चघावव।
DEU 16:7 तुमन मांस ला ओ जगह म भूंजव अऊ खावव, जेला यहोवा तुम्हर परमेसर ह चुनही। तब बिहनियां अपन-अपन तम्बू म लहुंट जावव।
DEU 16:8 छै दिन तक बिगर खमीर मिले हुए रोटी ला खावव अऊ सातवां दिन यहोवा तुम्हर परमेसर बर एक सभा करव अऊ ओ दिन काम झन करव।
DEU 16:9 जब तुमन खड़े फसल ला लुए बर हंसिया चलाय के सुरू करथव, त ओ दिन ले लेके सात हप्ता गन लेवव।
DEU 16:10 तब यहोवा तुम्हर परमेसर ह जऊन आसीस तुमन ला देय हवय, ओकर अनुपात म एक स्वेच्छा-बलिदान देय के दुवारा तुमन यहोवा अपन परमेसर बर हप्तामन के तिहार मनावव।
DEU 16:11 अऊ यहोवा अपन परमेसर के आघू म ओ जगह म आनंद मनावव, जेला ओह अपन नांव बर निवास के रूप म चुनही—तुमन, तुम्हर बेटा-बेटी, तुम्हर सेवक-सेविका, तुम्हर नगर के लेवी, अऊ तुम्हर बीच रहइया परदेसी, अनाथ अऊ बिधवा, जम्मो के जम्मो आनंद मनावव।
DEU 16:12 सुरता रखव कि तुमन मिसर देस म गुलाम रहेव, अऊ धियान देके ये बिधिमन के पालन करव।
DEU 16:13 अपन कोठार अऊ अंगूर के रसकुंड ले ऊपज ला संकेले के सात दिन के बाद तुमन पबितर-तम्बूमन के तिहार मनावव।
DEU 16:14 अपन तिहार म आनंद मनावव—तुमन, तुम्हर बेटा-बेटी, तुम्हर सेवक-सेविका, अऊ लेवी, परदेसी, अनाथ अऊ तुम्हर नगर म रहइया बिधवा, जम्मो के जम्मो आनंद मनावव।
DEU 16:15 सात दिन तक यहोवा तुम्हर परमेसर बर ओ जगह म आनंद मनावव, जेला यहोवा ह चुनही। काबरकि यहोवा तुम्हर परमेसर ह तुमन ला तुम्हर जम्मो ऊपज अऊ तुम्हर हांथ के जम्मो काम म आसीस दीही, अऊ तुम्हर आनंद ह पूरा होही।
DEU 16:16 साल म तीन बार तुम्हर जम्मो आदमीमन यहोवा तुम्हर परमेसर के आघू म ओ जगह म उपस्थित होवंय, जेला ओह चुनही: याने कि बिगर खमीर के रोटी के तिहार, हप्तामन के तिहार अऊ पबितर-तम्बूमन के तिहार के बेरा उपस्थित होवंय। कोनो भी मनखे यहोवा के आघू म जुच्छा हांथ झन आवय:
DEU 16:17 हर एक झन यहोवा तुम्हर परमेसर के दिये आसीस के अनुपात म एक ठन भेंट जरूर लानय।
DEU 16:18 तुम्हर हर एक गोत्र बर हर ओ नगर म नियायधीस अऊ करमचारी नियुक्त करव, जेला यहोवा तुम्हर परमेसर ह तुमन ला देवत हे, अऊ ओमन ईमानदारी से मनखेमन के नियाय करंय।
DEU 16:19 नियाय ला झन बिगाड़व या भेदभाव झन करव। घूस झन लेवव, काबरकि घूस ह बुद्धिमान मनखे के आंखी ला अंधरा कर देथे अऊ निरदोस मनखे के गोठ ला बिगाड़ देथे।
DEU 16:20 नियाय अऊ सिरिप नियाय के पाछू चलव, ताकि तुमन जीयत रहव अऊ ओ देस ऊपर अधिकार करव, जेला यहोवा तुम्हर परमेसर ह तुमन ला देवत हे।
DEU 16:21 तुमन यहोवा अपन परमेसर बर बनाय गे बेदी के बाजू म लकड़ी के कोनो असेरा के खंभा झन खड़े करहू,
DEU 16:22 अऊ कोनो पबितर पथरा खड़े झन करहू, काबरकि यहोवा तुम्हर परमेसर ह अइसने चीज ले घिन करथे।
DEU 17:1 तुमन यहोवा, अपन परमेसर ला अइसने कोनो बईला या भेड़ ला झन चघाहू, जेमा कोनो किसम के दोस या खोट हवय, काबरकि येह ओकर नजर म घिनौना अय।
DEU 17:2 जऊन नगरमन ला यहोवा तुमन ला देय हवय, यदि ओमा के कोनो नगर म कोनो मनखे या माईलोगन तुम्हर बीच म रहत हे अऊ ओह यहोवा, तुम्हर परमेसर के करार ला टोरे के दुवारा ओकर नजर म दुस्ट काम करथे,
DEU 17:3 अऊ मोर हुकूम के उल्टा आने देवतामन ला दंडवत करके अराधना करथे या सूरज या चंदा या अकास के तारामन के अराधना करथे,
DEU 17:4 अऊ ये बात तुम्हर जानकारी म लाय जाथे, तब तुमन येकर पूरा जांच-पड़ताल करव। यदि येह सच पाय जाथे अऊ येह साबित हो जाथे कि इसरायल म ये घिनौना काम करे गे हवय,
DEU 17:5 त तुमन ओ मनखे या माईलोगन, जऊन ह ये दुस्ट काम करे हवय, ओला अपन सहर के दुवार म ले जावव, अऊ उहां ओला पथरवाह करके मार डारव।
DEU 17:6 दू या तीन गवाहमन के गवाही के दुवारा ही कोनो मनखे ला मऊत के सजा दिये जावय, पर सिरिप एक गवाह के गवाही के दुवारा कोनो ला मऊत के सजा झन दिये जावय।
DEU 17:7 ओला मार डारे जाय म पहिले गवाहमन के हांथ होवय, अऊ तब जम्मो मनखेमन के हांथ उठय। ये किसम ले तुमन अपन बीच ले बुरई ला दूर करव।
DEU 17:8 यदि तुम्हर अदालत म अइसने मामला आथे, जेकर नियाय करई बहुंत कठिन अय—चाहे ओह हतिया, बिबाद या मारपीट के मामला होवय—त ओ मामला ला ओ जगह म ले जावव, जेला यहोवा तुम्हर परमेसर ह चुनही।
DEU 17:9 उहां तुमन ओ लेवी पुरोहितमन अऊ नियायधीस करा जावव, जेमन ओ बेरा पद म होहीं। ओमन ले पुछताछ करव अऊ ओमन तुमन ला फैसला सुनाहीं।
DEU 17:10 यहोवा के दुवारा चुने गय जगह म ओमन तुमन ला जऊन फैसला देथें, तुमन ओकरे मुताबिक काम करव। ओमन जऊन निरदेस देथें, ओला पूरा करे म सावधानी बरतव।
DEU 17:11 ओमन तुमन ला जऊन बात सिखाथें अऊ तुमन ला जऊन निरदेस देथें, ओकर मुताबिक तुमन काम करव। ओमन के कहे बात ले एती-ओती झन जावव, न तो जेवनी अऊ न ही डेरी।
DEU 17:12 जऊन भी मनखे यहोवा तुम्हर परमेसर के सेवकई करइया नियायधीस या पुरोहित के बात ला नइं मानय, ओह मार डारे जावय। जरूरी अय कि तुमन इसरायल ले बुरई ला खतम करव।
DEU 17:13 जम्मो मनखेमन येला सुनहीं अऊ डरहीं, अऊ ओमन फेर नियायधीस या पुरोहित के बात के अनादर नइं करहीं।
DEU 17:14 जब तुमन ओ देस म हबर जावव, जेला यहोवा तुम्हर परमेसर ह तुमन ला देवत हे अऊ ओकर ऊपर अधिकार कर लव अऊ ओमा बस जाय के बाद तुमन कहव, “आवव, हमर चारों कोति के देसमन के सहीं हमन घलो अपन ऊपर एक राजा ठहिरावन,”
DEU 17:15 त धियान रहय कि जेला यहोवा तुम्हर परमेसर ह चुनथे, ओला तुमन अपन ऊपर राजा ठहिरावव। ओह तुम्हर संगी इसरायलीमन के बीच म ले होवय। अपन ऊपर कोनो परदेसी ला राजा झन ठहिरावव, ओ मनखे जऊन ह इसरायली नो हय।
DEU 17:16 येकर अलावा, जरूरी अय कि राजा अपन बर जादा संखिया म घोड़ा झन रखय या अऊ घोड़ा लाने के बदले म राजा ह मनखेमन ला मिसर देस म गुलाम के रूप म झन पठोवय, काबरकि यहोवा ह तुमन ला कहे हवय, “तुमन ला ओ रसता म फेर वापिस नइं जाना हे।”
DEU 17:17 राजा ह बहुंत घरवाली झन बनावय, नइं तो ओकर मन ह यहोवा कोति ले भटक जाही। जरूरी अय कि ओह जादा सोन अऊ चांदी जमा झन करय।
DEU 17:18 जब ओह अपन राज के सिंघासन म बईठे, त ओह लेवी पुरोहितमन ले लिये गय ये कानून के एक नकल करके अपन बर एक किताब बना ले।
DEU 17:19 येह ओकर संग रहय, अऊ ओह ओला अपन जिनगी भर पढ़य, ताकि ओह यहोवा ओकर परमेसर के आदर करना सीखय अऊ धियान देके ये कानून अऊ ये बिधि के बातमन के पालन करय
DEU 17:20 अऊ अपनआप ला अपन संगी इसरायलीमन ले उत्तम झन समझय अऊ ये कानून ले न तो जेवनी जावय, अऊ न ही डेरी। तब ओह अऊ ओकर संतानमन इसरायल म ओकर राज ऊपर लम्बा समय तक सासन करहीं।
DEU 18:1 लेवीय पुरोहितमन—वास्तव म लेवी के पूरा गोत्र ला इसरायल के संग कोनो भाग या उत्तराधिकार नइं मिलय। यहोवा ला चघाय गे जेवन-बलिदान ओमन ला मिलही, काबरकि ओह ओमन के भाग ए।
DEU 18:2 ओमन के संगी इसरायलीमन के बीच म ओमन के कोनो भाग नइं होही; यहोवा ह ओमन के भाग ए, जइसे कि ओह ओमन ले वायदा करे हवय।
DEU 18:3 मनखेमन जऊन बईला या भेड़ ला बलिदान चघाहीं, ओमा ले पुरोहितमन ला ये चीजमन बांटा के रूप म मिलही: कंधा, पेट के भीतर के चीजमन अऊ मुड़ के मांस।
DEU 18:4 तुमन पुरोहितमन ला अपन अनाज के पहिली फर देवव याने कि नवां अंगूर के मंद अऊ जैतून तेल, अऊ तुम्हर भेड़मन ले कतरे पहिला ऊन,
DEU 18:5 काबरकि यहोवा तुम्हर परमेसर ह ओमन ला अऊ ओमन के संतानमन ला तुम्हर जम्मो गोत्रमन ले चुने हवय कि ओमन हमेसा यहोवा के आघू म ठाढ़ होवंय अऊ ओकर सेवा करंय।
DEU 18:6 कोनो लेवी ह इसरायल के तुम्हर कोनो नगर जिहां ओह रहत हे, यदि ओह ओ जगह ले सही मन से इसरायल के कोनो आने जगह म आथे, जेला यहोवा ह चुनथे,
DEU 18:7 त ओह अपन ओ जम्मो संगी लेवीमन सहीं यहोवा अपन परमेसर के नांव म सेवा करय, जेमन उहां यहोवा के आघू म सेवा करथें।
DEU 18:8 ओला ओमन के जम्मो लाभ म बराबर भाग मिलय, हालाकि परिवारिक संपत्ति के बिक्री ले ओला पईसा मिल गे हवय।
DEU 18:9 जब तुमन ओ देस म जावव, जेला यहोवा तुम्हर परमेसर ह तुमन ला देवत हे, त उहां आनजातमन के घिनौना रीति-रिवाज के नकल करे बर झन सीखव।
DEU 18:10 तुम्हर बीच म अइसन कोनो मनखे झन पाय जावय, जऊन ह अपन बेटा या बेटी ला आगी म बलिदान करथे, जऊन ह सकुन-बिचार या जादू करथे या सकुन के अर्थ बताथे या जादू-टोना करथे,
DEU 18:11 या सम्मोहन करथे, या जऊन ह भूतसाधक या बईगा अय या जऊन ह मरे मनखे के आतमा ले सम्पर्क करथे।
DEU 18:12 जऊन ह अइसने काम करथे ओह यहोवा बर घिनौना अय, काबरकि इहीच घिनौना काम के कारन यहोवा तुम्हर परमेसर ह ओ आनजातमन ला तुम्हर आघू ले भगा दीही।
DEU 18:13 जरूरी अय कि तुमन यहोवा अपन परमेसर के आघू म निरदोस रहव।
DEU 18:14 जऊन जातिमन ला तुमन बेदखल करहू, ओमन अइसने मनखेमन के बात सुनथें, जऊन मन जादू-टोना या सकुन-बिचार करथें। पर जहां तक तुम्हर बात ए, यहोवा तुम्हर परमेसर ह तुमन ला अइसे करे के अनुमति नइं दे हवय।
DEU 18:15 यहोवा तुम्हर परमेसर ह तुम्हर बर तुम्हर बीच ले, तुम्हर संगी इसरायलीमन ले मोर सहीं एक अगमजानी ठाढ़ करही। तुमन ओकर बात जरूर सुनव।
DEU 18:16 काबरकि तुमन यहोवा तुम्हर परमेसर ले होरेब पहाड़ ऊपर सभा के दिन इही बात के मांग करे रहेव, जब तुमन कहेव, “आवव, हमन यहोवा हमर परमेसर के अवाज ला नइं सुनन अऊ ये भयंकर आगी ला झन देखन, नइं तो हमन मर जाबो।”
DEU 18:17 तब यहोवा ह मोला कहिस: “ओमन जऊन कुछू कहत हें ओह बने बात ए।
DEU 18:18 मेंह ओमन बर ओमन के संगी इसरायलीमन के बीच म ले तोर सहीं एक अगमजानी ला ठाढ़ करहूं, अऊ मेंह अपन बात ओकर मुहूं म डालहूं। ओह ओमन ला ओ जम्मो बात बताही, जेकर हुकूम मेंह ओला दूहूं।
DEU 18:19 मेंह खुद ओ मनखे ला जिम्मेदार ठहिराहूं, जऊन ह मोर ओ बात ला नइं सुनही, जेला ओ अगमजानी ह मोर नांव म बताही।
DEU 18:20 पर कोनो अगमजानी, जऊन ह मोर नांव म अपन मन के बात कहिथे, जेकर हुकूम मेंह नइं दे हंव, या कोनो अगमजानी, जऊन ह आने देवता के नांव म गोठियाथे, त ओह मार डारे जावय।”
DEU 18:21 तुमन अपनआप ले कह सकत हव, “हमन कइसे जानबो कि ओ संदेस ला यहोवा ह नइं दे हवय?”
DEU 18:22 जब कोनो अगमजानी ह यहोवा के नांव म कोनो बात के घोसना करथे अऊ ओ बात ह ओकर घोसना के मुताबिक नइं होवय या ओ बात ह सच साबित नइं होवय, त फेर ओ संदेस ला यहोवा ह नइं दे हवय। ओ अगमजानी ह अपन मन से ओ बात ला कहे हवय, एकरसेति तुमन झन डरहू।
DEU 19:1 जब यहोवा तुम्हर परमेसर ह ओ जाति-जाति के मनखेमन ला नास कर दीही, जेमन के देस तुमन ला देवत हे, अऊ जब तुमन ओमन ला भगा दूहू अऊ ओमन के नगर अऊ घरमन म बस जाहू,
DEU 19:2 तब ओ देस, जेला यहोवा तुम्हर परमेसर ह तुमन ला तुम्हर अधिकार म देवत हे, उहां अपन बर तीन सहर ला अलग करव।
DEU 19:3 तुमन उहां जाय बर डहार बनावव अऊ ओ देस ला तीन भाग म बांटव, जेला यहोवा तुम्हर परमेसर ह तुमन ला तुम्हर उत्तराधिकार के रूप म देवत हे, ताकि ओ मनखे जऊन ह कोनो मनखे के हतिया कर देथे, त ओह सरन लेय बर येमा के कोनो एक सहर म भागके जा सकय।
DEU 19:4 जऊन मनखे कोनो आने मनखे के हतिया करके अपन सुरकछा बर येमा के कोनो सहर म भागके जाथे, त ओकर बर ये नियम अय—कोनो मनखे अपन परोसी के हतिया बिगर इरादा, बिगर बईरता अऊ बिगर सोचे-बिचारे कर देथे।
DEU 19:5 उदाहरन के रूप म, जब कोनो मनखे अपन परोसी के संग लकड़ी काटे बर जंगल म जाथे, अऊ टांगा ला उठाके लकड़ी काटत बेरा, टांगा ह बेंट ले निकलके ओकर परोसी ला लगथे अऊ ओकर परोसी ह मर जाथे, त ओ मनखे ह येमा के कोनो एक सहर म भागके अपन परान बचा सकत हे।
DEU 19:6 नइं तो खून के बदला लेवइया ह कोरोध म ओकर पीछा कर सकथे अऊ यदि रसता ह बहुंत लम्बा हवय, त ओह ओला पकड़के मार सकथे, हालाकि ओह मिरतू-दंड के लईक काम नइं करे हवय, काबरकि ओकर मन म अपन परोसी बर कोनो बईरता के भाव नइं रिहिस।
DEU 19:7 एकरसेति मेंह तुमन ला हुकूम देवत हंव कि तुमन अपन बर तीन सहर ला अलग रखव।
DEU 19:8 यदि यहोवा तुम्हर परमेसर ह तुम्हर सीमना ला बढ़ाथे, जइसे कि ओह सपथ खाके तुम्हर पुरखामन ले वायदा करे रिहिस, अऊ ओह ओमन के संग करे वायदा के मुताबिक पूरा देस तुमन ला देथे,
DEU 19:9 काबरकि तुमन धियान देके ये जम्मो कानूनमन ला मानथव, जेकर हुकूम मेंह आज तुमन ला देवत हंव—यहोवा अपन परमेसर ले मया करव अऊ हमेसा हुकूम मानके ओकर रसता म चलव—त तुमन तीन अऊ सहर ला अलग करव।
DEU 19:10 अइसने करव ताकि ओ निरदोस के खून तुम्हर ये देस म झन बहाय जावय, जेला यहोवा तुम्हर परमेसर ह तुमन ला तुम्हर उत्तराधिकार के रूप म देवत हे, अऊ ये किसम ले खून करे के दोस तुम्हर ऊपर नइं लगही।
DEU 19:11 पर यदि कोनो मनखे अपन परोसी ले बईरता रखके ओकर घात म रहिथे अऊ हमला करके ओला मार डारथे, अऊ तब येमा के कोनो एक सहर म भाग जाथे,
DEU 19:12 त फेर सहर के अगुवामन कोनो ला पठोके ओला ओ सहर ले वापिस लानंय, अऊ ओला बदला लेवइया के हांथ म सऊंप देवंय ताकि ओह मार डारे जावय।
DEU 19:13 ओकर ऊपर दया झन देखावव। जरूरी अय कि तुमन इसरायल ले निरदोस के खून के दोस ला दूर करव, ताकि तुम्हर भलई होवय।
DEU 19:14 यहोवा तुम्हर परमेसर ह तुमन ला जऊन देस देवत हे कि तुमन ओकर ऊपर अधिकार करव याने कि जऊन देस ह तुमन ला उत्तराधिकार म मिलथे, उहां तुम्हर बाप-ददामन तुम्हर परोसी के जऊन सीमना के पथरा ठहिराथें, ओला झन हटाहू।
DEU 19:15 कोनो मनखे ला ओकर करे गय कोनो अपराध या पाप के दोसी ठहिराय बर एक गवाह के गवाही ह परयाप्त नो हय। कोनो भी बात के पुस्टि करे बर दू या तीन गवाह के गवाही जरूरी अय।
DEU 19:16 यदि कोनो बईरता रखनेवाला गवाह काकरो ऊपर कोनो अपराध के दोस लगाथे,
DEU 19:17 त ओ दूनों मनखे, जेमन झगड़ा म सामिल रहिथें, ओमन यहोवा के उपस्थिति म उहां बईठे पुरोहित अऊ नियायधीसमन के आघू म ठाढ़ होवंय।
DEU 19:18 नियायधीसमन पूरा जांच-पड़ताल करंय, अऊ यदि गवाह ह कोनो संगी इसरायली के बिरूध गवाही देवत लबरा साबित होवय,
DEU 19:19 तब तुमन ओ लबरा गवाह के संग वइसे करव, जइसे ओह दूसर झन के संग करे के इरादा करत रिहिस। तुमन अपन बीच ले बुरई ला जरूर साफ करव।
DEU 19:20 बाकि मनखेमन ये बात ला सुनके डर जाहीं, अऊ फेर कभू तुम्हर बीच म अइसे दुस्ट काम नइं करे जाही।
DEU 19:21 तुमन दया झन देखावव: परान के बलदा परान, आंखी के बलदा आंखी, दांत के बलदा दांत, हांथ के बलदा हांथ, गोड़ के बलदा गोड़।
DEU 20:1 जब तुमन अपन बईरीमन के बिरूध लड़ई करे बर जावव, अऊ घोड़ा अऊ रथ अऊ अपन ले जादा बड़े सेना ला देखव, त ओमन ले झन डरव, काबरकि यहोवा तुम्हर परमेसर, जऊन ह तुमन ला मिसर देस ले बाहिर लानिस, ओह तुम्हर संग होही।
DEU 20:2 जब तुमन लड़ई करे बर जावव, त पुरोहित ह आघू आवय अऊ सेना ले बात करय।
DEU 20:3 ओह ओमन ले कहय: “हे इसरायलीमन, सुनव: आज तुमन तुम्हर बईरीमन के बिरूध लड़ई करे बर जावत हव। डरपोक झन बनव या झन डरव; आतंकित झन होवव या ओमन के दुवारा भयभीत झन होवव।
DEU 20:4 काबरकि यहोवा तुम्हर परमेसर ह तुम्हर संग तुम्हर कोति ले लड़े बर जावत हे अऊ ओह तुम्हर बईरीमन के बिरूध तुमन ला जीत देवाही।”
DEU 20:5 तब अधिकारीमन सैनिकमन ला कहंय: “का कोनो अइसने हवय, जऊन ह नवां घर बनाय हवय अऊ ओमा अब तक रहे के सुरू नइं करे हवय? त ओह अपन घर जावय, नइं तो लड़ई म ओह मर सकत हे अऊ कोनो आने मनखे ओकर घर म रहे के सुरू कर सकत हे।
DEU 20:6 का कोनो अइसने हवय, जऊन ह एक अंगूर के बारी लगाय हवय अऊ ओकर फर खाय के आनंद नइं उठाय हवय? त ओह अपन घर जावय, नइं तो लड़ई म ओह मर सकत हे अऊ कोनो आने मनखे ओकर बारी के फर खाय के आनंद उठाही।
DEU 20:7 का कोनो अइसने हवय, जेकर बिहाव के बात कोनो माईलोगन के संग तय हो गे हवय, पर ओकर बिहाव ओ माईलोगन संग नइं होय हवय? त ओह अपन घर जावय, नइं तो लड़ई म ओह मर सकत हे अऊ कोनो आने मनखे ओ माईलोगन ले बिहाव कर लीही।”
DEU 20:8 तब अधिकारीमन ये घलो कहंय, “का कोनो अइसने हवय, जऊन ह डरथे या डरपोक हिरदय के अय? त ओह अपन घर जावय, ताकि ओकर संगी सैनिकमन घलो हतास झन होवंय।”
DEU 20:9 जब अधिकारीमन सैनिकमन ले बात कर लेवंय, तब ओमन सैनिकमन ऊपर सेनापतिमन ला ठहिरावंय।
DEU 20:10 जब तुमन कोनो सहर ऊपर हमला करे बर आघू बढ़व, त तुमन उहां के मनखेमन ले सांति के प्रस्ताव रखव।
DEU 20:11 यदि ओमन ये प्रस्ताव ला मानके सहर के दुवार ला खोल देवंय, त उहां के जम्मो मनखेमन तुम्हर बंधुवा मजदूर होहीं अऊ तुम्हर बर काम करहीं।
DEU 20:12 पर यदि ओमन सांति के प्रस्ताव ला स्वीकार नइं करंय अऊ तुमन ले लड़ई करे चाहंय, त तुमन ओ सहर के घेराबंदी कर लव।
DEU 20:13 जब यहोवा तुम्हर परमेसर ह ओ सहर ला तुम्हर अधीन कर देथे, त तुमन उहां के जम्मो आदमी ला तलवार ले मार डारव।
DEU 20:14 जहां तक माईलोगन, लइका, पसु अऊ सहर के आने चीजमन के बात ए, तुमन येमन ला लूट के सामान के रूप म अपन बर रख लव। अऊ तुमन ओ लूट के सामान के उपयोग कर सकत हव, जेला यहोवा तुम्हर परमेसर ह तुमन ला तुम्हर बईरीमन ले देथे।
DEU 20:15 तुमन ओ जम्मो सहरमन के संग अइसने ही बरताव करव, जेमन तुम्हर ले दूरिहा म हवंय अऊ लकठा के जातिमन के नो हंय।
DEU 20:16 पर ओ जाति के सहरमन, जेला यहोवा तुम्हर परमेसर ह तुमन ला तुम्हर उत्तराधिकार म देवत हे, उहां के कोनो परानी ला जीयत झन छोंड़व।
DEU 20:17 ओमन ला पूरा नास कर दव—हित्ती, अमोरी, कनानी, परिज्जी, हिब्बी अऊ यबूसी जम्मो ला—जइसे कि यहोवा तुम्हर परमेसर ह तुमन ला हुकूम दे हवय।
DEU 20:18 नइं तो, ओमन तुमन ला ओ जम्मो घिनौना चीज करे बर सिखा दीहीं, जेला ओमन अपन देवतामन के पूजा करे के बेरा म करथें, अऊ तुमन यहोवा अपन परमेसर के बिरूध पाप करहू।
DEU 20:19 जब तुमन कोनो सहर ऊपर कब्जा करे बर ओकर बिरूध लड़व अऊ ये दौरान ओ सहर के लम्बा समय तक घेराबंदी करव, त टांगा चलाके उहां के रूखमन ला झन काटव, काबरकि ओमन के फर तुम्हर खाय के काम आहीं। एकरसेति ओमन ला झन काटव। का रूखमन मनखे अंय कि तुमन ओमन के घेराबंदी करव?
DEU 20:20 पर तुमन ओ रूखमन ला काट सकत हव, जेमन ला तुमन जानत हव कि ओमन फरवाले रूख नो हंय; अऊ ओ रूखमन के उपयोग घेराबंदी म करव, जब तक कि ओ सहर ह तुम्हर कब्जा म नइं आ जावय।
DEU 21:1 ओ देस म, जेला यहोवा तुम्हर परमेसर तुम्हर अधिकार म देवत हे, यदि उहां कोनो मरे मनखे मैदान म पड़े हुए मिलथे, अऊ ये बात के पता नइं ए कि ओकर हतियारा कोन ए,
DEU 21:2 त तुम्हर अगुवा अऊ नियायधीसमन जावंय अऊ जिहां ओ लास ह पड़े हवय, उहां ले लकठा के नगरमन के दूरी ला नापंय।
DEU 21:3 तब ओ लास के सबले लकठा के नगर के अगुवामन एक अइसे बछिया ला लें, जऊन ह कभू काम नइं करे हवय अऊ जेकर ऊपर कभू जुड़ा नइं रखे गे हवय।
DEU 21:4 तब ओमन ओला खाल्हे कोति एक अइसे घाटी म ले जावंय, जिहां कभू नांगर नइं जोते गे हवय या जिहां कभू कुछू नइं बोय गे हवय अऊ जिहां पानी के बहत एक सोता होवय। उहां ओ घाटी म, ओमन ओ बछिया के घेंच ला टोर देवंय।
DEU 21:5 तब लेवीय पुरोहितमन आघू आवंय, काबरकि यहोवा तुम्हर परमेसर ह ओमन ला चुने हवय कि ओमन सेवा करंय अऊ यहोवा के नांव म आसीस देवंय अऊ झगड़ा अऊ मारपीट के जम्मो मामला के फैसला करंय।
DEU 21:6 तब ओ लास के लकठा के नगर के जम्मो अगुवामन अपन हांथ ओ बछिया के ऊपर धोवंय, जेकर घेंच ला घाटी म टोर दिये गे हवय,
DEU 21:7 अऊ ओमन ये घोसना करंय: “ये खून हमन नइं करे हन, अऊ न ही खून करत हमन कोनो ला देखे हन।
DEU 21:8 हे यहोवा, अपन इसरायली मनखेमन बर ये प्रायस्चित ला स्वीकार कर, जेमन ला तेंह छोंड़ाय हस, अऊ अपन मनखेमन ला एक निरदोस मनखे के खून के दोसी झन ठहिरा।” तब ओ हतिया के दोस ह छेमा हो जाही,
DEU 21:9 अऊ ये किसम ले तुमन अपनआप ला एक निरदोस मनखे के खून के दोस ले सुध करहू, काबरकि तुमन ओ काम करेव, जऊन ह यहोवा के नजर म सही अय।
DEU 21:10 जब तुमन अपन बईरीमन ले लड़ई करे बर जावव अऊ यहोवा तुम्हर परमेसर ह ओमन ला तुम्हर हांथ म कर देवय अऊ तुमन ओमन ला बंदी बना लेवव,
DEU 21:11 यदि ओ बंदी मनखेमन के बीच कोनो सुघर माईलोगन कोति तोर धियान ह जाथे अऊ तेंह ओकर कोति मोहित होथस, त तेंह ओला अपन घरवाली के रूप म ले सकत हस।
DEU 21:12 ओला अपन घर म ले आबे अऊ ओकर मुड़ के बाल के मुंडन करबे अऊ ओकर नाखूनमन ला कतर देबे
DEU 21:13 अऊ बंदी बनाय गे बेरा ओह जऊन कपड़ा पहिरे रिहिस, ओला अलग कर देबे। जब ओह तोर घर म रहिके एक महिना तक अपन दाई-ददा बर सोक मना लीही, तब तेंह ओकर करा जा सकत हस अऊ तेंह ओकर घरवाला अऊ ओह तोर घरवाली हो जाही।
DEU 21:14 यदि तें ओकर ले खुस नइं होवस, त ओह जिहां जाय बर चाहय, तें ओला उहां जावन देबे। तें ओला झन बेचबे या ओकर संग एक गुलाम के सहीं बरताव झन करबे, काबरकि तेंह ओकर अपमान करे हस।
DEU 21:15 यदि कोनो मनखे के दू घरवाली हवंय, अऊ ओह एक झन ले मया करथे अऊ दूसर ले नइं, अऊ दूनों घरवालीमन ओकर ले बेटा जनमंय, पर पहिलांत बेटा ओ घरवाली के अय, जेकर ले ओह मया नइं करय,
DEU 21:16 त जब ओह संपत्ति के बंटवारा करय, त ओ बेटा ला पहिलांत के अधिकार झन देवय, जेकर दाई ले ओह मया करथे, एकर बदले कि जऊन ह सही के पहिलांत अय अऊ जेकर दाई ले ओह मया नइं करय।
DEU 21:17 जऊन घरवाली ला ओह मया नइं करय, ओकर बेटा ला अपन जम्मो संपत्ति के दू गुना बांटा देके ओकर पहिलांत के अधिकार ला मानय। ओ बेटा ह अपन ददा के पौरूस के पहिला चिनहां अय। पहिलांत के अधिकार ओकर अय।
DEU 21:18 यदि कोनो मनखे के बेटा ह जिद्दी अऊ बिदरोही सुभाव के अय अऊ ओह अपन दाई-ददा के बात ला नइं मानय अऊ ओकर ताड़ना करे ले घलो ओमन के बात ला नइं सुनय,
DEU 21:19 त ओकर दाई-ददा ओला पकड़के अपन नगर के दुवार म अगुवामन करा ले जावंय।
DEU 21:20 ओमन अगुवामन ले कहंय, “हमर ये बेटा ह जिद्दी अऊ बिदरोही सुभाव के अय। ओह हमर बात नइं मानय। ओह पेटू अऊ मतवार ए।”
DEU 21:21 तब नगर के जम्मो मनखेमन पथरवाह करके ओला मार डारंय। तुमन अपन बीच ले अइसन बुरई ला दूर करव। जम्मो इसरायलीमन ये बात ला सुनके डरहीं।
DEU 21:22 यदि कोनो मनखे ह मिरतू-दंड के दोसी अय, अऊ ओला मार डारे गे हवय अऊ ओकर लास ला खंभा म टांग दिये गे हवय,
DEU 21:23 त तुमन ओ लास ला रात भर ओ खंभा म टंगे झन रहन दव। ये बात के धियान रखव कि ओला ओहीच दिन माटी दे दिये जावय, काबरकि जेला खंभा म टांग दिये जाथे, ओह परमेसर कोति ले सरापित ठहिरथे। तुमन ओ देस ला अपबितर झन करहू, जेला यहोवा तुम्हर परमेसर ह तुमन ला तुम्हर उत्तराधिकार म देवत हे।
DEU 22:1 यदि तें देखथस कि तोर संगी इसरायली के कोनो बईला या भेड़ ह भटक गे हवय, त तें ओकर अनदेखी झन करबे, पर धियान सहित ओला ओकर मालिक करा वापिस पहुंचा देबे।
DEU 22:2 यदि तोर ओ संगी इसरायली ह तोर लकठा म नइं रहय या यदि तेंह नइं जानस कि ओ बईला या भेड़ के मालिक कोन ए, त तें ओला अपन घर ले जाबे अऊ ओला तब तक अपन करा रखे रहिबे, जब तक कि ओकर मालिक ह ओला खोजत नइं आ जावय। तब तें ओला ओकर मालिक ला वापिस दे देबे।
DEU 22:3 यदि तोला ओमन के गंवाय कोनो गदहा या कपड़ा या कोनो आने चीज मिलथे, त ओमन के बारे म घलो अइसने ही करबे। ओकर अनदेखी झन करबे।
DEU 22:4 यदि तें तोर संगी इसरायली के कोनो गदहा या बईला ला रसता म गिरे-परे देखथस, त ओला अनदेखा झन करबे। ओला उठाके ठाढ़ करे म ओकर मालिक के मदद करबे।
DEU 22:5 कोनो माईलोगन ह आदमी के कपड़ा ला झन पहिरे, अऊ न ही कोनो आदमी ह माईलोगन के कपड़ा ला पहिरे, काबरकि जऊन ह अइसे करथे, ओकर ले यहोवा तुम्हर परमेसर ह घिन करथे।
DEU 22:6 यदि तोला रसता के तीर म कोनो चिरई के खोंधरा दिखय, चाहे ओह कोनो रूख म होवय या भुइयां म, अऊ माई चिरई ह लइकामन संग या अंडा ऊपर बईठे हवय, त माई ला लइकामन के संग झन ले जाबे।
DEU 22:7 तेंह लइकामन ला ले सकत हस, पर माई चिरई ला जरूर छोंड़ देबे, ताकि तोर भलई होवय अऊ तोर उमर ह घलो लम्बा होवय।
DEU 22:8 जब तेंह कोनो नवां घर बनाथस, त छत म चारों कोति मुन्डेर बनाबे, ताकि यदि कोनो छत ले गिर जावय, त तोर ऊपर खून के दोस झन लगय।
DEU 22:9 अपन अंगूर के बारी म दू किसम के बीजा झन लगाबे; यदि तेंह अइसने करबे, त न सिरिप तोर लगाय फसल, पर तोर अंगूर के बारी के फर घलो असुध हो जाही।
DEU 22:10 बईला अऊ गदहा ला एक संग फांदके नांगर झन जोतबे।
DEU 22:11 ऊन अऊ सन ला एक संग मिलाके बनाय गे कपड़ा ला झन पहिरबे।
DEU 22:12 अपन पहिरे के कपड़ा के चारों कोना म झालर लगवाबे।
DEU 22:13 यदि कोनो आदमी ह कोनो माईलोगन ले बिहाव करथे, अऊ ओकर संग सुते के बाद ओला पसंद नइं करय
DEU 22:14 अऊ ओकर निन्दा करथे अऊ ये कहिके ओकर ऊपर लांछन लगाथे, “में ये माईलोगन ले बिहाव करेंव, पर जब में ओकर संग सुतेंव, त मोला ओकर कुंवारी होय के सबूत नइं मिलिस,”
DEU 22:15 तब ओ माईलोगन के दाई-ददा नगर के दुवार म अगुवामन करा ओ माईलोगन के कुंवारी होय के सबूत लानंय।
DEU 22:16 ओकर ददा ह अगुवामन ला कहय, “में ये आदमी ले मोर बेटी के बिहाव करंय, पर येह मोर बेटी ला पसंद नइं करय।
DEU 22:17 अब ओह ओला बदनाम करत कहत हे, ‘मोला तुम्हर बेटी म कुंवारी होय के कोनो सबूत नइं मिलिस।’ पर ये हवय मोर बेटी के कुंवारीपन के सबूत।” तब ओकर दाई-ददा नगर के अगुवामन के आघू म ओ कपड़ा ला देखावंय,
DEU 22:18 अऊ अगुवामन ओ आदमी ला दंड देवंय।
DEU 22:19 ओमन ओ आदमी ऊपर चांदी के एक सौ सेकेल के जुरबाना लगावंय अऊ ओ जुरबाना ला ओ जवान माईलोगन के ददा ला देवंय, काबरकि ये आदमी ह एक इसरायली कुंवारी ला बदनाम करे हवय। ओ माईलोगन ह ओकर घरवाली बने रहय; जब तक ओ आदमी ह जीयत हवय, तब तक ओह ओ माईलोगन ला तलाक झन देवय।
DEU 22:20 पर यदि दोस ह सही पाय जाथे अऊ ओ जवान माईलोगन के कुंवारीपन के कोनो सबूत नइं मिलय,
DEU 22:21 त ओला ओकर ददा के घर के कपाट करा लाने जावय अऊ उहां ओकर नगर के मनखेमन ओला पथरवाह करके मार डारंय। ओह अपन ददा के घर म रहत बेभिचार करके इसरायल म बुरई करे हवय। जरूरी अय कि तुमन अपन बीच ले बुरई ला दूर करव।
DEU 22:22 यदि कोनो मनखे ह कोनो आने मनखे के घरवाली के संग सुतत पाय जाथे, त जऊन मनखे ह ओ माईलोगन के संग सुते हवय अऊ ओ माईलोगन, दूनों मार डारे जावंय। जरूरी अय कि तुमन इसरायल ले बुरई ला दूर करव।
DEU 22:23 यदि कोनो कुंवारी कन्या के बिहाव के बात तय हो गे हवय, अऊ कोनो आने मनखे कोनो नगर म ओकर ले मिलथे अऊ ओकर संग सुतथे,
DEU 22:24 त तुमन ओ दूनों ला ओ नगर के दुवार म ले जावव अऊ पथरवाह करके ओमन ला मार डारव—ओ जवान माईलोगन ला एकरसेति मार डारव काबरकि ओह एक नगर म रिहिस अऊ मदद बर नइं चिचियाईस, अऊ ओ मनखे ला एकरसेति मार डारव काबरकि ओह आने मनखे के घरवाली के सीलभंग करे हवय। जरूरी अय कि तुमन अपन बीच ले बुरई ला दूर करव।
DEU 22:25 पर यदि कोनो जवान माईलोगन के बिहाव के बात तय हो गे हवय, अऊ कोनो आने मनखे ओला खेत-खार म देखके ओकर संग कुकरम करथे, त सिरिप ओ मनखे ह मार डारे जावय।
DEU 22:26 ओ माईलोगन के संग कुछू झन करव; ओह मिरतू-दंड पाय के लईक कोनो पाप नइं करे हवय। ये मामला ह वइसने अय, मानो कोनो मनखे ह हमला करथे अऊ अपन परोसी ला मार डारथे,
DEU 22:27 काबरकि ओ मनखे ह ओ जवान माईलोगन ला खेत-खार म पाईस, अऊ हालाकि ओ माईलोगन ह चिचियाईस, जेकर मंगनी हो गे रिहिस, पर उहां ओला बचइया कोनो नइं रिहिस।
DEU 22:28 यदि कोनो मनखे कोनो अइसने कुंवारी कन्या ले मिलथे, जेकर बिहाव तय नइं होय हवय अऊ ओह ओकर संग कुकरम करथे अऊ दूनों पकड़े जाथें,
DEU 22:29 त ओ मनखे ह ओ माईलोगन के ददा ला चांदी के पचास सेकेल देवय, अऊ जरूरी अय कि ओ मनखे ह ओ माईलोगन ले बिहाव करय, काबरकि ओह ओ माईलोगन के सीलभंग करे हवय। ओह अपन जिनगी भर ओला तलाक नइं दे सकय।
DEU 22:30 कोनो मनखे अपन ददा के घरवाली ले बिहाव झन करय; ओह अपन ददा के बिस्तर के अनादर झन करय।
DEU 23:1 अइसने मनखे, जेकर अंडकोस कुचरे गे हवय या जेकर लिंग ला काट डारे गे हवय, ओह यहोवा के सभा के भीतर झन आवय।
DEU 23:2 अवैध रूप ले जनमे कोनो भी मनखे या ओकर संतान यहोवा के सभा के भीतर झन आवंय, अऊ त अऊ दसवां पीढ़ी तक ओकर संतान यहोवा के सभा के भीतर झन आवंय।
DEU 23:3 कोनो अमोनी या मोआबी या ओमन के कोनो संतान यहोवा के सभा के भीतर झन आवंय, इहां तक कि ओमन के दसवां पीढ़ी तक ओमन के कोनो संतान यहोवा के सभा म झन आवंय।
DEU 23:4 काबरकि जब तुमन मिसर देस ले निकलके आवत रहेव, त ओमन रोटी अऊ पानी लेके तुम्हर ले भेंट करे बर नइं आईन, अऊ अरम-नहरैम देस के पतोर नगर के बेओर के बेटा बिलाम ला पईसा देके ओकर सेवा लीन कि ओह तुमन ला सराप देवय।
DEU 23:5 पर यहोवा तुम्हर परमेसर ह बिलाम के बात ला नइं सुनिस पर ओकर सराप ला तुम्हर बर आसीस म बदल दीस, काबरकि यहोवा तुम्हर परमेसर ह तुम्हर ले मया करथे।
DEU 23:6 जब तक तेंह जीयत हस, तब तक अमोनी या मोआबीमन के संग संगवारी होय के कोनो समझौता झन करबे।
DEU 23:7 तुमन कोनो एदोमी ला तुछ झन समझहू, काबरकि एदोमीमन तुम्हर रिस्तेदार अंय। तुमन कोनो मिसरी ला तुछ झन जानहू, काबरकि तुमन ओमन के देस म परदेसी के रूप म रहत रहेव।
DEU 23:8 ओमन के तीसरा पीढ़ी म जनमे संतानमन यहोवा के सभा म आ सकत हें।
DEU 23:9 जब तुमन अपन बईरीमन के बिरूध डेरा डालव, त ओ जम्मो चीज ले दूरिहा रहव, जऊन ह असुध अय।
DEU 23:10 यदि तुम्हर कोनो मनखे ह अपनआप बीर्यपात होय के कारन असुध हो गे हवय, त ओह डेरा के बाहिर जाके उहां रहय।
DEU 23:11 पर जब सांझ होथे, त ओह अपनआप ला धोवय, अऊ बेर बुड़े के बेरा ओह डेरा म वापिस आवय।
DEU 23:12 दिसा मैदान बर डेरा के बाहिर अपन बर एक जगह तय करव।
DEU 23:13 औजार के रूप म तुम्हर करा खंचवा कोड़े बर कुछू होवय, अऊ जब तुमन बाहिर फिरे बर बईठव, त खंचवा कोड़के अपन मल ला ढांप दव।
DEU 23:14 काबरकि यहोवा तुम्हर परमेसर ह तुमन ला बचाय बर अऊ तुम्हर बईरीमन ला तुम्हर हांथ म करे बर तुम्हर डेरा म चलते-फिरथे। जरूरी अय कि तुम्हर डेरा पबितर रहय, ताकि अइसन झन होवय कि ओह तुम्हर बीच म कोनो अपबितर चीज देखके तुम्हर ले दूरिहा चले जावय।
DEU 23:15 यदि कोनो गुलाम ह अपन मालिक ले भागके तोर करा सरन ले हवय, त ओला ओकर मालिक के हांथ म झन कर देबे।
DEU 23:16 ओह तुम्हर बीच म जिहां चाहय, उहां रहय अऊ जऊन भी नगर ला ओह पसंद करय, उहां ओह रहय। ओकर ऊपर अतियाचार झन करहू।
DEU 23:17 कोनो भी इसरायली पुरूस या महिला मंदिर के बेस्या झन बनय।
DEU 23:18 तुमन कोनो महिला बेस्या या पुरूस बेस्या के कमई ला यहोवा तुम्हर परमेसर के घर म मन्नत के रूप म देय बर झन लानहू, काबरकि यहोवा तुम्हर परमेसर ह दूनों चीज ले घिन करथे।
DEU 23:19 तुमन कोनो इसरायली ले कोनो चीज के बियाज झन लूहू, चाहे ओह पईसा होवय या जेवन या कोनो आने चीज, जेकर ले बियाज कमाय जा सकत हे।
DEU 23:20 तुमन कोनो परदेसी ले बियाज ले सकत हव, पर अपन संगी इसरायली ले नइं, ताकि जऊन देस ऊपर अधिकार करे बर तुमन जावत हव, उहां जऊन काम म तुमन हांथ लगावव, ओ जम्मो काम म यहोवा तुम्हर परमेसर तुमन ला आसीस देवय।
DEU 23:21 यदि तुमन यहोवा अपन परमेसर बर कोनो मन्नत मानव, त ओला पूरा करे म देरी झन करव, काबरकि यहोवा तुम्हर परमेसर ह ओ मन्नत ला पूरा करे के मांग करही अऊ देरी करे के दुवारा तुमन पाप करे के दोसी ठहिरहू।
DEU 23:22 पर यदि तुमन मन्नत ही नइं मानहू, त तुमन दोसी नइं ठहिरहू।
DEU 23:23 जऊन भी बात तुम्हर मुहूं ले निकलथे, ओला जरूर पूरा करव, काबरकि तुमन खुद होके यहोवा अपन परमेसर बर अपन मुहूं ले मन्नत माने हव।
DEU 23:24 यदि तुमन अपन परोसी के अंगूर के बारी म जावव, त तुमन जतेक चाहव ओतेक अंगूर खा सकत हव, पर अपन टुकना म एको ठन भी झन रखव।
DEU 23:25 यदि तुमन अपन परोसी के खड़े फसलवाले खेत म जावव, त तुमन अपन हांथ ले बालीमन ला टोर सकत हव, पर तुमन ओकर खड़े फसल ला हंसिया ले झन लुवव।
DEU 24:1 यदि कोनो मनखे कोनो माईलोगन ले बिहाव करथे अऊ ओमा कुछू अनुचित बात पाके ओला पसंद नइं करय, अऊ ओ माईलोगन ला तियाग पतर लिखके देथे अऊ ओला अपन घर ले पठो देथे,
DEU 24:2 अऊ ओकर घर छोंड़े के बाद, यदि ओ माईलोगन ह आने मनखे के घरवाली बन जाथे,
DEU 24:3 अऊ ओकर दूसरा घरवाला ओला नापसंद करथे अऊ ओला तलाकनामा लिखके देथे अऊ ओला अपन घर ले निकाल देथे, या फेर ओ दूसरा घरवाला ह मर जाथे,
DEU 24:4 तब ओकर पहिले के घरवाला, जऊन ह ओला तलाक देय रिहिस, ओला ओ माईलोगन ले फेर बिहाव करे के अनुमति नइं ए, काबरकि ओ माईलोगन ह असुध हो गे हवय। येह यहोवा के नजर म घिनौना होही। तुमन ओ देस ऊपर पाप झन लानव, जेला यहोवा तुम्हर परमेसर ह तुमन ला एक उत्तराधिकार के रूप म देवत हे।
DEU 24:5 यदि कोनो मनखे ह नवां-नवां बिहाव करे हवय, त ओला लड़ई म झन भेजे जावय या ओला कोनो आने जिम्मेदारी झन दिये जावय। ओला एक साल तक अपन घर म रहे के छूट मिलय अऊ ओह अपन बिहाता घरवाली ला खुस रखय।
DEU 24:6 कोनो भी मनखे कोनो आने मनखे के जांता या जांता के सिरिप ऊपर के पथरा ला घलो गिरवी म अपन करा झन रखय, काबरकि ओह कोनो मनखे के रोजी-रोटी ला गिरवी रखे सहीं होही।
DEU 24:7 यदि कोनो मनखे कोनो संगी इसरायली ला गुलाम बनाय या गुलाम के रूप म बेचे के मनसा ले अपहरन करत पकड़े जाथे, त ओ अपहरन करइया ला जरूर मार डारे जावय। जरूरी अय कि तुमन अपन बीच ले बुरई ला दूर करव।
DEU 24:8 धियान रहय कि कोढ़ के रोग के मामला म तुमन एकदम वइसे ही करव, जइसे लेवी पुरोहितमन तुमन ला निरदेस देथें। तुमन धियान देके वइसने ही करव, जइसने मेंह ओमन ला हुकूम दे हवंव।
DEU 24:9 सुरता करव कि तुम्हर मिसर देस ले निकल आय के बाद, रसता म यहोवा तुम्हर परमेसर ह मिरियम के संग का करिस।
DEU 24:10 जब तुमन अपन परोसी ला कोनो किसम के करजा देथव, त ओकर बदले गिरवी के कोनो सामान लेय बर ओकर घर के भीतर झन जावव।
DEU 24:11 तुमन बाहिर खड़े रहव अऊ ओ परोसी, जेला तुमन करजा देवत हव, ओह गिरवी रखे के सामान ला तुम्हर करा बाहिर लानय।
DEU 24:12 यदि परोसी ह गरीब मनखे अय, त तुमन ओकर गिरवी के कपड़ा ला रथिया अपन करा रखके झन सुतहू।
DEU 24:13 सूरज के डूबत तक ओकर कपड़ा ला वापिस कर दव ताकि तुम्हर परोसी ह ओमा सो सकय। तब ओह तुमन ला धनबाद दीही, अऊ येह यहोवा तुम्हर परमेसर के नजर म एक धरमी काम समझे जाही।
DEU 24:14 तुमन कोनो गरीब अऊ जरूरतमंद बनिहार ले फायदा झन उठावव, चाहे ओ बनिहार ह संगी इसरायली होवय या फेर तुम्हर कोनो नगर म रहइया कोनो परदेसी।
DEU 24:15 बेर बुड़े के पहिले ओला ओकर बनी दे दव, काबरकि ओह गरीब अय अऊ ओह ओ बनी ऊपर निरभर रहिथे। नइं तो ओह तुम्हर बिरूध यहोवा करा गोहार लगा सकत हे, अऊ तुमन पाप करे के दोसी ठहिरहू।
DEU 24:16 दाई-ददा ला ओमन के लइकामन के कारन मिरतू-दंड झन मिलय, अऊ न ही लइकामन ओमन के दाई-ददा के कारन मार डारे जावंय; हर एक ह अपन खुद के पाप के कारन मरही।
DEU 24:17 कोनो परदेसी या अनाथ के नियाय ला झन बिगाड़व, या कोनो बिधवा के कपड़ा ला गिरवी झन रखव।
DEU 24:18 सुरता रखव कि तुमन मिसर देस म गुलाम रहेव अऊ यहोवा तुम्हर परमेसर ह तुमन ला उहां ले छोंड़ाईस। एकर कारन मेंह तुमन ला अइसे करे के हुकूम देवत हंव।
DEU 24:19 जब तुमन अपन खेत म फसल लुवत हव अऊ फसल के कोनो बीड़ा ह तुम्हर नजर ले छूट जाथे, त ओला लेय बर वापिस झन जावव। ओला परदेसी, अनाथ अऊ बिधवा बर छोंड़ दव, ताकि यहोवा तुम्हर परमेसर ह तुमन ला तुम्हर जम्मो काम म आसीस देवय।
DEU 24:20 जब तुमन अपन जैतून रूख ले फरमन ला गिरावव, त डारामन म दूसर बार फर टोरे बर झन जावव। जऊन ह बच जाथे, ओला परदेसी, अनाथ अऊ बिधवा बर छोंड़ दव।
DEU 24:21 जब तुमन अपन अंगूर के बारी म अंगूर टोरे बर जावव, त अंगूर के नारमन म फर टोरे बर दूबारा झन जावव। जऊन ह बच जाथे, ओला परदेसी, अनाथ अऊ बिधवा बर छोंड़ दव।
DEU 24:22 सुरता रखव कि तुमन मिसर देस म गुलाम रहेव। एकर कारन मेंह तुमन ला अइसे करे के हुकूम देवत हंव।
DEU 25:1 जब मनखेमन के बीच म झगरा होथे, त ओमन येला अदालत म ले जावंय अऊ नियायधीसमन निरदोस ला दोस मुक्त करत अऊ दोसी ला दंड देवत मामला के फैसला करंय।
DEU 25:2 यदि दोसी मनखे ह मार खाय के लईक दोस करे हवय, त नियायधीस ह ओला भुइयां म लेटाय अऊ अपन आघू म ओला ओतेक कोर्रा लगवाय, जतेक ओकर अपराध के मुताबिक ठहिराय गे हवय,
DEU 25:3 पर नियायधीस ह ओला चालीस कोर्रा ले जादा झन लगवाय। यदि दोसी मनखे ला चालीस ले जादा कोर्रा लगवाय जाथे, त तुम्हर नजर म तुम्हर संगी इसरायली के अपमान होही।
DEU 25:4 दंवरी म चलत बईला के मुहूं ला झन बांधव।
DEU 25:5 यदि भाईमन एक संग रहत हवंय अऊ ओमा के एक झन ह बिगर कोनो बेटा के मर जाथे, त ओकर बिधवा ह परिवार के बाहिर बिहाव झन करय। ओकर घरवाला के भाई ह ओला लेके ओकर ले बिहाव करय अऊ ओकर घरवाला के भाई के जिम्मेदारी ला ओकर बर पूरा करय।
DEU 25:6 ओ माईलोगन ह जऊन पहिलांत बेटा ला जनम देथे, ओकर नांव ओ मरे भाई के नांव म रखे जावय ताकि ओकर नांव इसरायल ले खतम झन हो जावय।
DEU 25:7 पर, यदि कोनो मनखे ह अपन भाई के घरवाली ले बिहाव करे नइं चाहय, त ओकर भाई के घरवाली ह नगर के दुवार म अगुवामन करा जाके कहय, “मोर घरवाला के भाई ह इसरायल म अपन भाई के नांव ला बनाय रखे नइं चाहथे। ओह मोर संग मोर घरवाला के भाई के जिम्मेदारी ला पूरा करे बर नइं चाहथे।”
DEU 25:8 तब नगर के अगुवामन ओला उहां बलावंय अऊ ओकर ले बात करंय। यदि ओह अपन बात म अड़े रहय अऊ कहय, “मेंह ओकर ले बिहाव करे नइं चाहत हंव।”
DEU 25:9 तब ओकर भाई के बिधवा ह अगुवामन के आघू म ओकर करा जावय, ओकर एक चप्पल ला उतारय, अऊ ओकर मुहूं म थूकके कहय, “ओ मनखे के संग अइसे करे जाथे, जऊन ह अपन भाई के बंस ला आघू बढ़ाय नइं चाहय।”
DEU 25:10 इसरायल म ओ मनखे के परिवार ह ये नांव ले जाने जाही—चप्पल उतारे गय मनखे के परिवार।
DEU 25:11 यदि दू झन मनखे के बीच मारपीट होवत हे अऊ ओमा के एक झन के घरवाली ह अपन घरवाला ला आने मनखे ले बचाय बर आथे, अऊ अपन हांथ ले ओ मनखे के गुपत अंग ला पकड़ लेथे,
DEU 25:12 त तुमन ओकर हांथ ला काट डारव। ओकर ऊपर दया झन करव।
DEU 25:13 अपन झोला म एक ही तौल के दू किसम के बाट झन रखव—एक ठन भारी अऊ एक ठन हल्का।
DEU 25:14 अपन घर म दू किसम के नाप झन रखव—एक ठन लम्बा अऊ एक ठन छोटे।
DEU 25:15 तुम्हर करा सही अऊ ईमानदार तौल अऊ नाप रहय, ताकि ओ देस म तुम्हर लम्बा उमर होवय, जेला यहोवा तुम्हर परमेसर ह तुमन ला देवत हे।
DEU 25:16 काबरकि यहोवा तुम्हर परमेसर ह ओ मनखे ले घिन करथे, जऊन ह अइसने काम करथे, जऊन ह बेईमानी करथे।
DEU 25:17 सुरता रखव कि जब तुमन मिसर देस ले निकलके आवत रहेव, त रसता म अमालेकीमन तुम्हर संग का करिन।
DEU 25:18 जब तुमन थकके चूर हो गे रहेव, त ओमन ओ मनखेमन ऊपर हमला कर दीन, जेमन झुंड के पाछू धीरे-धीरे चलत रिहिन; अमालेकीमन के मन म परमेसर के कोनो भय नइं रिहिस।
DEU 25:19 जब यहोवा तुम्हर परमेसर ह तुमन ला तुम्हर चारों कोति के ओ जम्मो बईरीमन ले अराम देथे, जेमन के देस ला ओह तुमन ला तुम्हर अधिकार म उत्तराधिकार के रूप म देवत हे, त तुमन अमालेकीमन ला मारके ओमन के नांव ला पूरा धरती ले मिटा दूहू। ये बात ला झन भुलाहू!
DEU 26:1 जब तुमन ओ देस म हबर जावव, जेला यहोवा तुम्हर परमेसर ह तुमन ला एक उत्तराधिकार के रूप म देवत हे अऊ जब तुमन ओकर ऊपर अधिकार करके ओमा बस जावव,
DEU 26:2 त जऊन देस यहोवा तुम्हर परमेसर ह तुमन ला देवत हे, उहां जऊन फसल तुमन लगाथव, ओ जम्मो के कुछू पहिली फर ला लेके एक ठन टुकना म रखव। तब ओ जगह म जावव, जेला यहोवा तुम्हर परमेसर ह अपन नांव के निवास के रूप म चुनही
DEU 26:3 अऊ ओ समय उहां पद म रहइया पुरोहित ले कहव, “आज मेंह यहोवा तोर परमेसर करा घोसना करत हंव कि मेंह ओ देस म आ गे हंव, जेला देय के वायदा यहोवा ह हमर पुरखामन ले करे रिहिस।”
DEU 26:4 तब पुरोहित ह ओ टुकना ला तुम्हर हांथ ले, लेय लीही अऊ यहोवा तुम्हर परमेसर के बेदी के आघू म मढ़ा दीही।
DEU 26:5 तब तुमन यहोवा अपन परमेसर के आघू म घोसना करहू: “मोर पुरखा ह एक घुमंतू अरामी मनखे रिहिस, अऊ ओह अपन कुछू मनखेमन के संग जाके मिसर देस म रहे लगिस अऊ ओह एक बड़े, सक्तिसाली जाति हो गीस अऊ ओमन संखिया म बहुंत हो गीन।
DEU 26:6 पर मिसरीमन हमर संग खराप बरताव करिन अऊ हमर ऊपर अतियाचार करिन, अऊ हमर ले कठोर मेहनत करवाईन।
DEU 26:7 तब हमन यहोवा, हमर पुरखामन के परमेसर ले गोहारेंन अऊ यहोवा ह हमर गोहार ला सुनिस अऊ हमर दुरगति, मेहनत अऊ हमर ऊपर होवत अतियाचार ला देखिस,
DEU 26:8 अऊ यहोवा ह अपन सक्तिसाली हांथ, लमाय हुए बाहां, बड़े आतंक अऊ चिनहां अऊ चमतकार देखाके हमन ला मिसर देस ले बाहिर लानिस।
DEU 26:9 ओह हमन ला ये जगह म लानिस अऊ ये देस हमन ला दीस, जिहां दूध अऊ मंधरस बहुंतायत म हवय;
DEU 26:10 अऊ अब मेंह भुइयां के पहिली ऊपज ला लाने हंव, जेला हे यहोवा, तेंह मोला दे हस।” तब तुमन ओ टुकना ला यहोवा अपन परमेसर के आघू म रख दव अऊ यहोवा ला दंडवत करव।
DEU 26:11 तब तुमन अऊ लेवी अऊ तुम्हर बीच रहइया परदेसीमन ओ जम्मो चीज बर आनंद मनावव, जेला यहोवा तुम्हर परमेसर ह तुमन ला अऊ तुम्हर परिवार ला देय हवय।
DEU 26:12 जब तुमन तीसरा साल म याने कि दसमांस देय के साल म अपन जम्मो ऊपज के दसवां भाग ला अलग कर लेवव, त येला लेवी, परदेसी, अनाथ अऊ बिधवा ला दे दव, ताकि ओमन येला खाके तुम्हर नगर म संतोस हो जावंय।
DEU 26:13 तब यहोवा अपन परमेसर ले कहव: “मेंह तोर हुकूम के मुताबिक अपन घर ले पबितर भाग ला अलग करे हंव अऊ ओ भाग ला लेवी, परदेसी, अनाथ अऊ बिधवा ला दे देय हंव। मेंह न तो तोर हुकूममन ला टारे हंव अऊ न ही ओमा के कोनो ला भुलाय हंव।
DEU 26:14 जब मेंह सोक मनात रहेंव, तब मेंह ओ पबितर भाग के कोनो चीज ला नइं खाय हंव, न ही ओमा के कोनो चीज ला हटाय हंव, जब में असुध रहेंव अऊ न ही ओमा के कोनो चीज ला मेंह मरे मनखे ला अरपन करे हंव। मेंह यहोवा अपन परमेसर के हुकूम ला माने हंव; मेंह ओ हर काम करे हंव, जेकर हुकूम तेंह मोला दे हस।
DEU 26:15 तें अपन पबितर निवास, स्वरग ले खाल्हे देख, अऊ अपन इसरायली मनखे अऊ ओ देस ला आसीस दे, जेला हमर पुरखामन ले करे गय वायदा के मुताबिक तेंह हमन ला दे हस, जिहां दूध अऊ मंधरस बहुंतायत म हवय।”
DEU 26:16 यहोवा तुम्हर परमेसर ह तुमन ला आज हुकूम देवत हे कि तुमन ये बिधि अऊ कानूनमन के पालन करव; धियान देके अपन पूरा मन अऊ पूरा परान ले येमन के पालन करव।
DEU 26:17 तुमन आज घोसना करे हव कि यहोवा तुम्हर परमेसर अय अऊ ये कि तुमन ओकर हुकूम के मुताबिक चलहू अऊ ये कि तुमन ओकर बिधि, हुकूम अऊ कानूनमन ला मानहू अऊ ओकर बात ला सुनहू।
DEU 26:18 अऊ यहोवा ह अपन वायदा के मुताबिक आज घोसना करे हवय कि तुमन ओकर मनखे, ओकर कीमती धन अव, अऊ ये कि तुमन ओकर जम्मो हुकूम के पालन करव।
DEU 26:19 ओह घोसना करे हवय कि ओह जतेक भी जाति के मनखे बनाय हवय, ओ जम्मो जातिमन ले तुमन ला परसंसा, खियाती अऊ आदर म ऊपर रखही अऊ ये कि तुमन यहोवा तुम्हर परमेसर बर एक पबितर मनखे ठहिरहू, जइसे कि ओह वायदा करे हवय।
DEU 27:1 मूसा अऊ इसरायल के अगुवामन मनखेमन ला हुकूम दीन: “ये जम्मो हुकूम के पालन करव, जेला आज मेंह तुमन ला देवत हंव।
DEU 27:2 जब तुमन यरदन नदी ला पार करके ओ देस म हबरव, जेला यहोवा तुम्हर परमेसर ह तुमन ला देवत हे, त कुछू बड़े-बड़े पथरामन ला तियार करव अऊ ओमन ला चूना ले पलस्तर कर दव।
DEU 27:3 अऊ ओमन म ये कानून के जम्मो बातमन ला लिखव, जब तुमन यरदन नदी पार करके ओ देस म हबरव, जेला यहोवा तुम्हर परमेसर ह तुमन ला देवत हे, जेमा दूध अऊ मंधरस बहुंतायत म हवय, जइसे कि यहोवा, तुम्हर पुरखामन के परमेसर ह तुमन ले वायदा करे रिहिस।
DEU 27:4 अऊ जब तुमन यरदन नदी ला पार कर लेवव, त ये पथरामन ला एबाल पहाड़ ऊपर खड़े करव, जइसे कि मेंह आज तुमन ला हुकूम दे हंव, अऊ ये पथरामन ला चूना ले पलस्तर कर दव।
DEU 27:5 उहां तुमन यहोवा अपन परमेसर बर पथरामन ले एक बेदी बनावव। ओ पथरामन ऊपर लोहा के कोनो औजार के उपयोग झन करहू।
DEU 27:6 यहोवा अपन परमेसर बर खेत के पथरामन ले बेदी ला बनावव अऊ ओमा यहोवा अपन परमेसर बर होम-बलिदान चघावव।
DEU 27:7 उहां मेल-बलिदान घलो चघावव अऊ ओला खावव अऊ यहोवा अपन परमेसर के आघू म आनंद मनावव।
DEU 27:8 अऊ जऊन पथरामन ला तुमन खड़े करे हव, ओमा ये कानून के हर एक बचन ला साफ-साफ लिख दव।”
DEU 27:9 तब मूसा अऊ लेवी पुरोहितमन जम्मो इसरायलीमन ले कहिन, “हे इसरायलीमन सांत रहव अऊ सुनव! तुमन अब यहोवा अपन परमेसर के मनखे बन गे हव।
DEU 27:10 यहोवा अपन परमेसर के बात ला मानव अऊ जऊन हुकूम अऊ बिधि मेंह आज तुमन ला देवत हंव, ओमन के पालन करव।”
DEU 27:11 ओहीच दिन मूसा ह मनखेमन ला ये हुकूम दीस:
DEU 27:12 जब तुमन यरदन नदी ला पार कर लव, तब ये गोत्रमन के मनखे गरीजीम पहाड़ ऊपर ठाढ़ होके मनखेमन ला आसीस दीहीं: सिमोन, लेवी, यहूदा, इस्साकार, यूसुफ अऊ बिनयामीन।
DEU 27:13 अऊ ये गोत्रमन के मनखे एबाल पहाड़ ऊपर ठाढ़ होके सराप दीहीं: रूबेन, गाद, आसेर, जबूलून, दान अऊ नपताली।
DEU 27:14 तब लेवीमन इसरायल के जम्मो मनखेमन ला ऊंचहा अवाज म कहिहीं:
DEU 27:15 “सरापित होवय ओ मनखे, जऊन ह ढालके या गढ़के कोनो मूरती बनाथे या बनवाथे अऊ ओला गुपत जगह म स्थापित करथे, काबरकि यहोवा ह ये काम ले घिन करथे।” तब जम्मो मनखेमन कहंय, “आमीन!”
DEU 27:16 “सरापित होवय ओ मनखे, जऊन ह अपन दाई या ददा के अपमान करथे।” तब जम्मो मनखेमन कहंय, “आमीन!”
DEU 27:17 “सरापित होवय ओ मनखे, जऊन ह अपन परोसी के सीमना के पथरा ला हटाथे।” तब जम्मो मनखेमन कहंय, “आमीन!”
DEU 27:18 “सरापित होवय ओ मनखे, जऊन ह अंधरा ला डहार ले भटका देथे।” तब जम्मो मनखेमन कहंय, “आमीन!”
DEU 27:19 “सरापित होवय ओ मनखे, जऊन ह परदेसी, अनाथ या बिधवा के नियाय ला बिगाड़थे।” तब जम्मो मनखेमन कहंय, “आमीन!”
DEU 27:20 “सरापित होवय ओ मनखे, जऊन ह अपन ददा के घरवाली के संग कुकरम करथे; ओह अपन ददा के दसना ला कलंकित करथे।” तब जम्मो मनखेमन कहंय, “आमीन!”
DEU 27:21 “सरापित होवय ओ मनखे, जऊन ह कोनो पसु के संग कुकरम करथे।” तब जम्मो मनखेमन कहंय, “आमीन!”
DEU 27:22 “सरापित होवय ओ मनखे, जऊन ह अपन बहिनी या सौतेली बहिनी के संग कुकरम करथे।” तब जम्मो मनखेमन कहंय, “आमीन!”
DEU 27:23 “सरापित होवय ओ मनखे, जऊन ह अपन सास के संग कुकरम करथे।” तब जम्मो मनखेमन कहंय, “आमीन!”
DEU 27:24 “सरापित होवय ओ मनखे, जऊन ह छुपके अपन परोसी ला मार डारथे।” तब जम्मो मनखेमन कहंय, “आमीन!”
DEU 27:25 “सरापित होवय ओ मनखे, जऊन ह कोनो निरदोस मनखे के हतिया करे बर सुपारी लेथे।” तब जम्मो मनखेमन कहंय, “आमीन!”
DEU 27:26 “सरापित होवय ओ मनखे, जऊन ह ये कानून ला सुनके येमन के पालन नइं करय।” तब जम्मो मनखेमन कहंय, “आमीन!”
DEU 28:1 यदि तुमन यहोवा अपन परमेसर के जम्मो हुकूम ला मानहू अऊ धियान देके ओकर जम्मो हुकूम के पालन करहू, जेला में आज तुमन ला देवत हंव, त यहोवा तुम्हर परमेसर ह तुमन ला धरती के जम्मो जाति के मनखेमन ले बहुंत ऊपर ठहिराही।
DEU 28:2 यदि तुमन यहोवा अपन परमेसर के बात ला मानव, त ये जम्मो आसीस तुमन ला मिलही अऊ ये आसीसमन तुम्हर संग बने रहिहीं:
DEU 28:3 तुमन ला सहर म अऊ खेत-खार म आसीस मिलही।
DEU 28:4 तुम्हर संतान ला आसीस मिलही, अऊ तुम्हर देस के फसल अऊ तुम्हर पसुमन के पीला—तुम्हर झुंड के बछरू अऊ मेढ़ा-पीलामन ला आसीस मिलही।
DEU 28:5 तुम्हर टुकना अऊ तुम्हर पीसान साने के बरतन ला आसीस मिलही।
DEU 28:6 तुमन ला आसीस मिलही, जब तुमन भीतर आहू अऊ तुमन ला आसीस मिलही, जब तुमन बाहिर जाहू।
DEU 28:7 यहोवा ह अइसे करही कि तुम्हर बिरूध ठाढ़ होवइया बईरीमन तुम्हर ले हार जाहीं। ओमन एक दिग ले तो हमला करहीं, पर सात दिग ले होके भाग जाहीं।
DEU 28:8 यहोवा ह तुम्हर कोठार ऊपर अऊ तुमन जऊन कुछू करथव, ओ जम्मो म आसीस दीही। यहोवा तुम्हर परमेसर ह तुमन ला ओ देस म आसीस दीही, जेला ओह तुमन ला देवत हे।
DEU 28:9 यदि तुमन यहोवा तुम्हर परमेसर के हुकूममन के पालन करहू अऊ ओकर रसता म चलहू, त यहोवा ह तुमन ला अपन पबितर मनखे के रूप म स्थापित करही, जइसे कि ओह तुम्हर ले कसम खाके वायदा करे हवय।
DEU 28:10 तब धरती के जम्मो मनखेमन देखहीं कि तुमन यहोवा के नांव के दुवारा बलाय जाथव, त ओमन तुम्हर ले डरहीं।
DEU 28:11 अऊ जऊन देस तुमन ला देय बर यहोवा ह तुम्हर पुरखामन ले कसम खाय रिहिस, ओ देस म ओह तुम्हर संतान, तुम्हर पसु-धन के बढ़ती अऊ तुम्हर भुइयां के फसल म बहुंत उन्नति करही।
DEU 28:12 यहोवा ह उदार मन से अकास के भंडार ला खोल दीही अऊ समय म तुम्हर भुइयां म बारिस पठोही अऊ तुम्हर जम्मो काम म आसीस दीही। तुमन बहुंत जाति के मनखेमन ला उधार दूहू, पर कोनो मेर ले तुमन ला उधार लेना नइं पड़ही।
DEU 28:13 यहोवा ह तुमन ला पुंछी नइं, पर मुड़ ठहिराही। यदि तुमन यहोवा अपन परमेसर के हुकूम ऊपर धियान दूहू, जेला आज मेंह तुमन ला देवत हंव अऊ धियान देके ओमन के पालन करहू, त तुमन हमेसा सबले ऊपर रहिहू, खाल्हे म कभू नइं रहिहू।
DEU 28:14 जऊन बातमन के आज मेंह तुमन ला हुकूम देवत हंव, ओमा ले एती-ओती झन जावव; जेवनी या डेरी मुड़के आने देवतामन के पाछू झन चलव अऊ न ही ओमन के सेवा करव।
DEU 28:15 पर, यदि तुमन यहोवा तुम्हर परमेसर के बात ला नइं मानव अऊ धियान देके ओकर ओ जम्मो हुकूम अऊ बिधिमन के पालन नइं करव, जेला आज मेंह तुमन ला देवत हंव, त ये जम्मो सराप तुम्हर ऊपर पड़ही अऊ तुम्हर ऊपर लगे रहिही:
DEU 28:16 तुमन अपन सहर म अऊ अपन खेत-खार म सरापित होहू।
DEU 28:17 तुम्हर टुकना अऊ तुम्हर पीसान गुंथे के बरतन सरापित होही।
DEU 28:18 तुम्हर संतान ह सरापित होही, अऊ तुम्हर भुइयां के फसल, अऊ तुम्हर गरूवा-बईला के पीला अऊ भेड़-बकरी के पीलामन सरापित होहीं।
DEU 28:19 तुमन सरापित होहू, जब तुमन भीतर आहू अऊ सरापित होहू, जब तुमन बाहिर जाहू।
DEU 28:20 यहोवा ला तियागके तुमन जऊन दुस्ट काम करहू, ओकर कारन तुमन जऊन कुछू करहू, यहोवा ह तुमन ला हर चीज म सराप दीही, डरवाही अऊ दबकारही, जब तक कि तुमन नास नइं हो जाहू अऊ खतम नइं हो जाहू।
DEU 28:21 यहोवा ह तुमन म तब तक महामारी लानही, जब तक कि तुमन ओ देस ले खतम नइं हो जावव, जेकर ऊपर तुमन अधिकार करे बर जावत हव।
DEU 28:22 यहोवा ह तुम्हर ऊपर कोढ़ के संग जर अऊ जलन, झुलसइया गरमी अऊ अकाल, रोग अऊ गेरूई के बेमारी लानही, अऊ येमन तुम्हर ऊपर तब तक रहिहीं, जब तक कि तुमन नास नइं हो जाहू।
DEU 28:23 तुम्हर मुड़ के ऊपर अकास ह कांसा अऊ तुम्हर गोड़ खाल्हे के भुइयां ह लोहा हो जाही।
DEU 28:24 यहोवा ह तुम्हर देस म पानी के बदले बालू अऊ धुर्रा के बारिस करही; येह अकास ले तब तक गिरही, जब तक कि तुमन नास नइं हो जाहू।
DEU 28:25 यहोवा ह तुमन ला तुम्हर बईरीमन ले हरवा दीही। तुमन ओमन ऊपर एक दिग ले आहू, पर सात दिग ले भागहू, अऊ तुमन धरती ऊपर जम्मो राज के मनखेमन बर घिन करे के चीज बन जाहू।
DEU 28:26 तुम्हर लासमन जम्मो चिरई अऊ जंगली पसुमन के जेवन बन जाहीं, अऊ उहां ओमन ला कोनो भगानेवाला नइं होही।
DEU 28:27 यहोवा ह तुमन ला मिसर देस के सहीं फोड़ा, अऊ गिलठी, पके घाव अऊ खुजली के पीरा दीही, जेमन ले तुमन ला चंगई नइं मिलही।
DEU 28:28 यहोवा ह तुमन ला पागल अऊ अंधरा कर दीही अऊ तुम्हर जी ला घबरा दीही।
DEU 28:29 अऊ जइसे कोनो अंधरा मनखे अंधियार म टमड़थे, वइसे तुमन दिन-दुपहरी के टमड़त फिरहू। तुमन ला तुम्हर कोनो भी काम-बुता म सफलता नइं मिलही; हमेसा तुम्हर ऊपर अतियाचार होही अऊ तुमन लूटे जाहू, अऊ तुमन ला बचइया कोनो नइं होही।
DEU 28:30 तुम्हर सगाई कोनो माईलोगन ले तो होही, पर कोनो आने मनखे ओला लेके ओकर ले कुकरम करही। तुमन घर तो बनाहू, पर ओमा रह नइं सकहू। तुमन अंगूर के बारी तो लगाहू, पर ओकर फर खाय के आनंद नइं उठा सकहू।
DEU 28:31 तुम्हर बईला ला तुम्हर आंखी के आघू म काटे जाही, पर तुमन ला ओमा के कुछू भी खाय बर नइं मिलही। तुम्हर गदहा ला तुम्हर ले छीन लिये जाही, अऊ तुमन ला ओह फेर नइं मिलही। तुम्हर भेड़मन तुम्हर बईरीमन ला दे दिये जाहीं, अऊ ओमन ला बचइया कोनो नइं होही।
DEU 28:32 तुम्हर बेटा अऊ बेटीमन आने देस के मनखेमन ला बंधुवा के रूप म दे दिये जाहीं, अऊ ओमन के डहार देखत-देखत तुमन के आंखी पथरा जाहीं, अऊ तुमन कुछू नइं कर सकहू।
DEU 28:33 तुम्हर देस के ऊपज अऊ तुम्हर कमई ला ओ मनखेमन खा जाहीं, जेमन ला तुमन नइं जानव, अऊ जिनगी भर तुम्हर ऊपर कठोर अतियाचार के अलावा तुम्हर संग अऊ कुछू बने नइं होवय।
DEU 28:34 तुम्हर आघू म अइसन चीजमन होहीं, जेला देखके तुमन पगला जाहू।
DEU 28:35 यहोवा ह तुम्हर माड़ी अऊ गोड़मन ला पीरावाले घाव ले भर दीही, जऊन ह ठीक नइं होवय अऊ ये घावमन तुम्हर मुड़ ले लेके गोड़ तक भरे होहीं।
DEU 28:36 यहोवा ह तुमन ला अऊ तुम्हर ठहिराय राजा ला एक अइसने जाति के मनखेमन करा भगा दीही, जेला न तो तुमन जानथव, अऊ न ही तुम्हर पुरखामन कभू जानिन। उहां तुमन लकड़ी अऊ पथरा के देवतामन के पूजा-उपासना करहू।
DEU 28:37 जिहां यहोवा ह तुमन ला भगा दीही, उहां तुमन ओ जम्मो मनखेमन के बीच भय, कहावत अऊ हंसी के बिसय बन जाहू।
DEU 28:38 तुमन खेत म बहुंत अकन बीजा तो बोहू, पर थोरकन फसल ही लुए पाहू, काबरकि फांफामन ओला खा जाहीं।
DEU 28:39 तुमन अंगूर के बारी लगाके ओमा काम तो करहू, पर तुमन ओमा के न तो मंद पीये सकहू अऊ न ही ओमा के अंगूर इकट्ठा कर सकहू, काबरकि कीरामन ओमन ला खा जाहीं।
DEU 28:40 तुम्हर पूरा देस म जैतून के रूखमन तो होहीं, पर तुमन ओमन के तेल ला बउरे नइं सकहू, काबरकि जैतून के फरमन झरके गिर जाहीं।
DEU 28:41 तुम्हर बेटा अऊ बेटीमन तो होहीं, पर तुमन ओमन ला रख नइं सकहू, काबरकि ओमन बंधुवई म चल दीहीं।
DEU 28:42 तुम्हर जम्मो रूख अऊ तुम्हर देस के फसल ला फांफामन के झुंड ह खा जाही।
DEU 28:43 जऊन परदेसीमन तुम्हर बीच रहिथें, ओमन तुम्हर ले बढ़त जाहीं, पर तुमन घटत अऊ घटत जाहू।
DEU 28:44 ओमन तुमन ला उधार दीहीं, पर तुमन ओमन ला उधार नइं दे सकहू। ओमन मुड़ी होहीं अऊ तुमन पुंछी।
DEU 28:45 ये जम्मो सराप तुम्हर ऊपर लगही। ओमन तुम्हर पाछू पड़े रहिहीं अऊ तुमन ला पकड़ लीहीं, जब तक कि तुमन नास नइं हो जाहू, काबरकि तुमन यहोवा अपन परमेसर के बात नइं मानेव अऊ ओ हुकूम अऊ बिधिमन के पालन नइं करेव, जेला ओह तुमन ला दे रिहिस।
DEU 28:46 ओमन तुम्हर अऊ तुम्हर संतानमन बर हमेसा बर एक चिनहां अऊ अद्भूत काम होहीं।
DEU 28:47 काबरकि तुमन अपन उन्नति के बेरा यहोवा अपन परमेसर के सेवा खुसी अऊ आनंद से नइं करेव,
DEU 28:48 एकरसेति भूख अऊ पीयास म, नंगई अऊ भयंकर गरीबी म, तुमन ओ बईरीमन के सेवा करहू, जेमन ला यहोवा ह तुम्हर बिरूध पठोही। ओह तुम्हर घेंच म लोहा के जुड़ा तब तक डाले रखही, जब तक कि ओह तुमन ला नास नइं कर दीही।
DEU 28:49 यहोवा ह तुम्हर बिरूध बहुंत दूरिहा ले, धरती के छोर ले, चील के सहीं झपटनेवाला एक अइसन जाति ला लानही, जेकर भासा तुमन नइं समझहू;
DEU 28:50 येमन एक भयानक जाति के मनखे होहीं, जेमन के मन म सियानमन बर न तो कोनो आदर होही, न ही लइकामन बर कोनो किसम के दया।
DEU 28:51 ओमन तुम्हर पसुमन के पीला अऊ तुम्हर देस के फसल ला तब तक खाते रहिहीं, जब तक कि तुमन नास नइं हो जावव। ओमन तुम्हर बर न तो कोनो अनाज अऊ नवां अंगूर के मंद अऊ न जैतून के तेल ला छोंड़हीं, अऊ न ही तुम्हर गाय-बईला या भेड़-बकरी के कोनो बछरू या मेढ़ा-पीला ला छोंड़हीं, जेकर ले तुमन नास हो जाहू।
DEU 28:52 ओमन तुम्हर पूरा देस म जम्मो सहरमन ला तब तक घेरे रहिहीं, जब तक कि ओ गढ़वाले ऊंच दीवारमन गिर नइं जाहीं, जेमन के ऊपर तुमन भरोसा करथव। ओमन पूरा देस म ओ जम्मो सहर ला घेर लीहीं, जेमन ला यहोवा तुम्हर परमेसर ह तुमन ला देवत हे।
DEU 28:53 ओ घेराबंदी के बेरा, जऊन दुख-तकलीफ तुम्हर बईरीमन तुमन ला दीहीं, ओकर कारन तुमन अपन जनमाय ओ बेटा-बेटीमन के मांस ला खाहू, जेमन ला यहोवा तुम्हर परमेसर ह तुमन ला दे हवय।
DEU 28:54 अऊ त अऊ, तुम्हर बीच के सबले जादा दयालु अऊ नम्र मनखे घलो अपन खुद के भाई या अपन मयारू घरवाली या अपन बांचे लइकामन ऊपर कोनो दया नइं करही,
DEU 28:55 अऊ ओह अपन लइकामन के ओ मांस कोनो ला नइं दीही, जेला ओह खावत होही। तुम्हर जम्मो सहरमन के घेराबंदी के बेरा, तुम्हर बईरीमन तुमन ला जऊन दुख-तकलीफ दीहीं, ओकर कारन सिरिप येहीच मांस ह ओकर करा बांचे रहिही।
DEU 28:56 तुम्हर बीच के सबले जादा दयालु अऊ नम्र माईलोगन—अतेक दयालु अऊ नम्र कि ओह अपन पांव ले भुइयां ला छुए के हिम्मत घलो नइं करय, पर ओह घलो अपन मयारू घरवाला अऊ अपन गरभ ले जनमाय खुद के बेटा-बेटी
DEU 28:57 अऊ अपन गरभ म धरे लइकामन ऊपर दया नइं देखाही। तुम्हर सहरमन के घेराबंदी के बेरा, तुम्हर बईरीमन तुमन ला जऊन दुख-तकलीफ दीहीं, ओकर कारन ओह अपन लइकामन के मांस ला छुप-छुपके खाय के लालसा करही।
DEU 28:58 यदि तुमन ये कानून के जम्मो बात ला धियान देके नइं मानहू, जऊन ह ये किताब म लिखे हवय, अऊ ये महान अऊ अद्भूत नांव—यहोवा तुम्हर परमेसर—के आदर नइं करहू,
DEU 28:59 त यहोवा ह तुम्हर अऊ तुम्हर संतानमन ऊपर भयंकर महामारी, कठोर अऊ लम्बा समय तक रहनेवाला बिपत्ति अऊ बहुंत समय तक रहनेवाला बेमारी लानही।
DEU 28:60 ओह तुमन ऊपर मिसर देस के ओ जम्मो बेमारी ले आही, जेमन ले तुमन डरत रहेव, अऊ ओ बेमारीमन तुमन ला नइं छोंड़हीं।
DEU 28:61 यहोवा ह तुम्हर ऊपर ओ जम्मो किसम के रोग अऊ बिपत्ति ला घलो लानही, जेमन के बरनन कानून के ये किताब म नइं करे गे हवय, ताकि तुमन नास हो जावव।
DEU 28:62 तुमन के संखिया बहुंत कम हो जाही, जबकि एक समय तुम्हर संखिया अकास के तारामन सहीं अनगिनत रिहिस; ये सब येकर कारन होही, काबरकि तुमन यहोवा अपन परमेसर के बात नइं मानेव।
DEU 28:63 जइसे कि यहोवा ला तुम्हर उन्नति करके अऊ तुम्हर संखिया ला बढ़ाके खुसी मिले रिहिस, वइसे ही तुमन ला नास करके अऊ मिटाके ओला खुसी मिलही। तुमन ला ओ देस ले निकाल दिये जाही, जेकर ऊपर तुमन अधिकार करे बर जावत हव।
DEU 28:64 तब यहोवा ह तुमन ला धरती के एक छोर ले लेके आने छोर तक जम्मो जाति के मनखेमन के बीच तितिर-बितिर कर दीही। उहां तुमन आने देवतामन के अराधना करहू—लकड़ी अऊ पथरा के देवतामन, जेमन ला न तो तुमन अऊ न ही तुम्हर पुरखामन कभू जानिन।
DEU 28:65 ओ जातिमन के बीच म तुमन ला लेटे बर या अपन पांव धरे बर जगह नइं मिलही। उहां यहोवा ह तुमन ला एक चिंतित मन, लालसा करत थके आंखी अऊ एक निरास हिरदय दीही।
DEU 28:66 तुमन लगातार असमंजस के स्थिति म, दिन अऊ रात डर म भरे रहिहू, अऊ तुमन ला अपन जिनगी के कभू भरोसा नइं होही।
DEU 28:67 जऊन आतंक तुम्हर मन म भरे होही अऊ जऊन चीजमन ला तुम्हर आंखी ह देखही, ओकर कारन तुमन बिहनियां के बेरा कहिहू, “कास येह सांझ होतिस!” अऊ सांझ के बेरा कहिहू, “कास येह बिहनियां होतिस!”
DEU 28:68 यहोवा ह तुमन ला पानी जहाज म बईठाके वापिस मिसर देस पठो दीही, जेकर बारे म मेंह कहे रहेंव तुमन येला फेर कभू नइं देखहू। उहां तुमन अपनआप ला दे दूहू कि तुम्हर बईरीमन तुमन ला नर अऊ नारी गुलाम के रूप म बिसावंय, पर तुमन ला कोनो नइं बिसाहीं।
DEU 29:1 यहोवा ह होरेब पहाड़ ऊपर जऊन करार इसरायलीमन ले करे रिहिस, ओकर अलावा यहोवा ह मूसा ला जऊन करार इसरायलीमन के संग करे के हुकूम मोआब देस म दीस, ओकर बचन ये अंय।
DEU 29:2 मूसा ह जम्मो इसरायलीमन ला बलाके कहिस: यहोवा ह मिसर देस म फिरौन, ओकर जम्मो करमचारी अऊ ओकर पूरा देस के संग जऊन कुछू करिस, ओ जम्मो ला तुमन अपन आंखी ले देखे हव।
DEU 29:3 अपन खुद के आंखी ले तुमन ओ बड़े बिपत्ति, ओ चिनहां अऊ बड़े अद्भूत काममन ला देखे हव।
DEU 29:4 पर आज तक यहोवा ह तुमन ला अइसे मन नइं दे हवय, जऊन ह समझथे या अइसे आंखी नइं दे हवय, जऊन ह देखथे या अइसे कान नइं दे हवय, जऊन ह सुनथे।
DEU 29:5 तभो ले यहोवा ह कहिथे, “चालीस साल तक मेंह निरजन प्रदेस म तुम्हर अगुवई करेंव, पर न तो तुम्हर कपड़ा फटिस, अऊ न ही तुम्हर पांव के जूता।
DEU 29:6 तुमन ला खाय बर रोटी नइं मिलिस अऊ पीये बर अंगूर के मंद या आने मंद नइं मिलिस। मेंह ये सब करेंव, ताकि तुमन जानव कि मेंह यहोवा तुम्हर परमेसर अंव।”
DEU 29:7 जब तुमन ये जगह म हबरेव, त हेसबोन के राजा सीहोन अऊ बासान के राजा ओग हमर बिरूध लड़े बर निकलके आईन, पर हमन ओमन ला हरा देंन।
DEU 29:8 हमन ओमन के देस ऊपर कब्जा कर लेंन अऊ ओ देस ला रूबेनी, गादी अऊ मनस्सेयीमन के आधा गोत्र ला ओमन के उत्तराधिकार के रूप म दे देंन।
DEU 29:9 धियान देके ये करार के बचन के पालन करव, ताकि जऊन कुछू तुमन करव, ओमा तुम्हर उन्नति होवय।
DEU 29:10 तुमन जम्मो झन आज यहोवा अपन परमेसर के आघू म खड़े हवव—तुम्हर अगुवा अऊ मुखिया मनखेमन, तुम्हर सियान अऊ करमचारीमन, अऊ इसरायल के आने जम्मो मनखेमन,
DEU 29:11 संग म तुम्हर लइकामन अऊ तुम्हर घरवालीमन, अऊ तुम्हर सिविर म रहइया ओ परदेसीमन घलो हवंय, जेमन तुम्हर बर लकरी काटथें अऊ तुम्हर बर पानी भरथें।
DEU 29:12 तुमन इहां एकरसेति खड़े हव, ताकि यहोवा तुम्हर परमेसर के संग तुम्हर करार होवय, ओ करार जेला यहोवा ह आज तुम्हर संग करत हे अऊ सपथ खाके मुहर लगात हे,
DEU 29:13 आज ओह तुमन ला अपन मनखे के रूप म पुस्टि करत हे, अऊ ये घलो कि ओह तुम्हर परमेसर होवय, जइसे कि ओह तुम्हर ले वायदा करिस अऊ तुम्हर पुरखा, अब्राहम, इसहाक अऊ याकूब ले कसम खाय रिहिस।
DEU 29:14 मेंह ये करार सपथ खाके सिरिप तुम्हर संग ही नइं करत हंव,
DEU 29:15 जेमन आज इहां हमर संग यहोवा हमर परमेसर के आघू म खड़े हव पर ओमन संग घलो करत हंव, जेमन आज इहां नइं अंय।
DEU 29:16 तुमन खुद जानत हव कि हमन मिसर देस म कइसे रहत रहेंन अऊ कइसे हमन देसमन ले होवत इहां तक हबरेंन।
DEU 29:17 तुमन ओमन के बीच लकरी अऊ पथरा, सोन अऊ चांदी के बने घिनौना चीज अऊ मूरतीमन ला देखे हव।
DEU 29:18 ये बात के निस्चय करव कि तुम्हर बीच आज अइसने कोनो आदमी या माईलोगन, कुल या गोत्र झन होवय, जेकर मन ह यहोवा हमर परमेसर ले हट जावय अऊ जाके ओ जातिमन के देवता के अराधना करय; ये बात के निस्चय करव कि तुम्हर बीच म कोनो जरी झन रहय, जऊन ह अइसने करू जहर पईदा करय।
DEU 29:19 जब अइसने कोनो मनखे ये सपथ के बचन ला सुनथे अऊ अपनआप ला ये सोचके आसीस देथे, “मेंह तो अपन खुद के रसता म चलहूं, तभो ले मेंह सुरकछित रहिहूं,” त ओ मनखे ह सिंचईवाले भुइयां के संगे-संग सूखा भुइयां म घलो बिपत्ति लानही।
DEU 29:20 यहोवा कभू ओकर पाप छेमा नइं करही; ओकर कोप अऊ जलन ओ मनखे के ऊपर भड़कही। ये किताब म लिखे जम्मो सराप ओकर ऊपर पड़ही, अऊ यहोवा ह धरती ले ओकर नांव मिटा दीही।
DEU 29:21 कानून के ये किताब म लिखे करार के ओ जम्मो सरापमन के मुताबिक, यहोवा ह इसरायल के जम्मो गोत्र म ले ओला अलग करके ओकर ऊपर बिपत्ति लानही।
DEU 29:22 अवइया पीढ़ी म, तुम्हर जऊन लइकामन होहीं, ओमन अऊ दूरिहा देस ले आय परदेसीमन ओ देस ऊपर पड़नेवाला ओ बिपत्ति अऊ बेमारीमन ला देखहीं, जेला यहोवा ह ओमन ऊपर लानही।
DEU 29:23 पूरा देस ह जलके नून अऊ गंधक के कचरा हो जाही—उहां न तो कुछू बोए जाही, न ही उहां कुछू जामही अऊ न ही उहां कुछू घांस-पूस या रूख-रई होही। येह सदोम अऊ अमोरा, अदमा अऊ सबोईम सहरमन के बिनास सहीं होही, जेला यहोवा ह अपन भयंकर कोरोध म नास कर दे रिहिस।
DEU 29:24 जम्मो जाति के मनखेमन पुछहीं: “यहोवा ह ये देस के संग अइसे काबर करिस? काबर ओकर भयंकर कोरोध ह भड़किस?”
DEU 29:25 त ओकर जबाब ये होही: “काबरकि ये मनखेमन यहोवा अपन पुरखामन के परमेसर के ओ करार ला टोर दे हवंय, जेला ओह ओमन के संग तब करे रिहिस, जब ओह ओमन ला मिसर देस ले बाहिर निकालके लाने रिहिस।
DEU 29:26 ओमन भटकके आने देवतामन के अराधना करिन अऊ ओमन ला दंडवत करिन, अइसन देवता जेला ओमन नइं जानत रिहिन अऊ जेला परमेसर ह ओमन ला नइं दे रिहिस।
DEU 29:27 एकरसेति यहोवा के कोरोध ये देस के बिरूध भड़किस, अऊ ओह ये किताब म लिखे जम्मो सराप येमन ऊपर लानिस।
DEU 29:28 यहोवा ह बड़े कोरोध अऊ भयंकर कोप म आके ओमन ला ओमन के देस ले उखानके आने देस म फटिक दीस, जइसे कि अब दिखत हे।”
DEU 29:29 गुपत के चीजमन यहोवा हमर परमेसर के अंय, पर जऊन चीजमन परगट हो गे हवंय, ओमन सदाकाल बर हमर अऊ हमर लइकामन के अंय, ताकि हमन ये कानून के जम्मो बचन के पालन करन।
DEU 30:1 जब ये जम्मो आसीस अऊ सराप तुम्हर ऊपर आवंय, जेमन के चरचा मेंह तुम्हर आघू म करे हवंव, अऊ तुमन येमन ला ओ जातिमन के बीच म रहिके सुरता करव, जिहां यहोवा तुम्हर परमेसर ह तुमन ला बगरा दीही,
DEU 30:2 अऊ जब तुमन अऊ तुम्हर लइकामन यहोवा तुम्हर परमेसर करा लहुंटव अऊ अपन पूरा मन अऊ अपन पूरा परान से ओ जम्मो बात के पालन करव, जेकर हुकूम मेंह आज तुमन ला देवत हंव,
DEU 30:3 तब यहोवा तुम्हर परमेसर ह तुमन ला पहिले सहीं कर दीही अऊ तुम्हर ऊपर दया करही अऊ तुमन ला ओ जम्मो जाति के मनखेमन के बीच ले इकट्ठा करही, जिहां ओह तुमन ला तितिर-बितिर कर दे रिहिस।
DEU 30:4 अऊ त अऊ यदि तुमन धरती के बहुंत दूरिहा देस म घलो पड़े होहू, त उहां ले घलो यहोवा तुम्हर परमेसर ह तुमन ला इकट्ठा करही अऊ वापिस ले आही।
DEU 30:5 ओह तुमन ला ओ देस म ले आही, जऊन ह तुम्हर पुरखामन के रिहिस, अऊ तुमन ओकर ऊपर अधिकार कर लूहू। ओह तुमन ला तुम्हर पुरखामन ले घलो जादा सम्पन्न करही अऊ तुम्हर संखिया ला ओमन ले जादा बढ़ाही।
DEU 30:6 यहोवा तुम्हर परमेसर ह तुम्हर अऊ तुम्हर संतानमन के हिरदय के खतना करही, ताकि तुमन ओकर ले अपन पूरा हिरदय अऊ अपन पूरा परान ले मया करव अऊ जीयत रहव।
DEU 30:7 यहोवा तुम्हर परमेसर ह ये जम्मो सराप ला तुम्हर बईरीमन ऊपर डाल दीही, जेमन तुम्हर ले घिन करथें अऊ तुम्हर ऊपर अतियाचार करथें।
DEU 30:8 तुमन फेर यहोवा के बात मानहू अऊ ओकर जम्मो हुकूम के पालन करहू, जेला मेंह आज तुमन ला देवत हंव।
DEU 30:9 तब यहोवा तुम्हर परमेसर ह तुम्हर जम्मो काम म तुम्हर उन्नति करही अऊ तुम्हर संतान, तुम्हर पसुमन के पीला अऊ तुम्हर भुइयां के फसल ला बहुंत कर दीही। यहोवा ह फेर तुम्हर ले खुस होही अऊ तुमन ला धनवान बना दीही, जइसे ओह तुम्हर पुरखामन ले खुस रिहिस,
DEU 30:10 यदि तुमन यहोवा तुम्हर परमेसर के बात मानहू अऊ कानून के ये किताब म लिखे ओकर हुकूम अऊ बिधिमन के पालन करहू अऊ अपन पूरा मन अऊ अपन पूरा परान से यहोवा तुम्हर परमेसर करा लहुंटहू।
DEU 30:11 देखव, मेंह आज तुमन ला जऊन हुकूम देवत हंव, ओह तुम्हर बर जादा कठिन नो हय अऊ न ही तुम्हर पहुंच के बाहिर अय।
DEU 30:12 येह ऊपर अकास म नइं ए कि तुमन ला ये कहना पड़य, “कोन ह अकास ऊपर जाके येला लानही अऊ हमन ला पढ़के सुनाही कि हमन येकर पालन करन?”
DEU 30:13 न ही येह समुंदर के ओ पार हवय कि तुमन ला ये कहना पड़य, “कोन ह समुंदर के ओ पार जाके येला लानही अऊ हमन ला पढ़के सुनाही कि हमन येकर पालन करन?”
DEU 30:14 नइं, ये बचन ह तुम्हर बहुंत लकठा म हवय; येह तुम्हर मुहूं म अऊ तुम्हर मन म हवय कि तुमन येकर पालन करव।
DEU 30:15 देखव, मेंह आज तुम्हर आघू म जिनगी अऊ सम्पन्नता, मिरतू अऊ बिनास के बात ला रखे हंव।
DEU 30:16 काबरकि मेंह आज तुमन ला हुकूम देवत हंव कि तुमन यहोवा अपन परमेसर ले मया करव, ओकर बात म चलव, अऊ ओकर हुकूम, बिधि अऊ कानूनमन के पालन करव; तब तुमन जीयत रहिहू अऊ गनती म बढ़हू, अऊ यहोवा तुम्हर परमेसर ह तुमन ला ओ देस म आसीस दीही, जेकर ऊपर अधिकार करे बर तुमन जावत हव।
DEU 30:17 पर यदि तुम्हर मन ह परमेसर ले हट जाय अऊ तुमन ओकर हुकूममन ला नइं मानव, अऊ यदि तुमन दूरिहा हटके आने देवतामन के दंडवत करव अऊ ओमन के अराधना करव,
DEU 30:18 त मेंह आज तुम्हर आघू म घोसना करत हंव कि खचित तुमन नास हो जाहू। अऊ तुमन जऊन देस ऊपर अधिकार करे बर यरदन नदी के ओ पार जावत हव, ओ देस म जादा समय तक रह नइं सकहू।
DEU 30:19 आज मेंह अकास अऊ धरती ला तुम्हर बिरूध गवाह बनात हंव कि मेंह जिनगी अऊ मिरतू, परमेसर के आसीस अऊ सरापमन ला तुम्हर आघू म रखे हंव। एकरसेति तुमन जिनगी ला चुनव, ताकि तुमन अऊ तुम्हर लइकामन जीयत रहव
DEU 30:20 अऊ तुमन यहोवा अपन परमेसर ले मया करव, ओकर अवाज ला सुनव, अऊ मजबूती से ओला धरे रहव। काबरकि यहोवा ह तुम्हर जिनगी अय, अऊ ओह तुमन ला ओ देस म बहुंत साल तक रहे बर दीही, जेला देय बर ओह तुम्हर पुरखा, अब्राहम, इसहाक अऊ याकूब ले सपथ खाय रिहिस।
DEU 31:1 तब मूसा ह बाहिर निकलिस अऊ जम्मो इसरायल ले ये कहिस:
DEU 31:2 “अब मेंह एक सौ बीस साल के हो गे हंव अऊ अब मोर म तुम्हर अगुवई करे के सक्ति नइं ए। यहोवा ह मोला कहे हवय, ‘तें यरदन नदी के ओ पार नइं जा सकस।’
DEU 31:3 यहोवा तुम्हर परमेसर ह खुद तुम्हर आघू ओ पार जाही। ओह उहां के मनखेमन ला तुम्हर आघू ले नास कर दीही, अऊ तुमन ओमन के देस ऊपर अधिकार कर लूहू। यहोसू घलो तुम्हर ले आघू ओ पार जाही, जइसे कि यहोवा ह कहे हवय।
DEU 31:4 अऊ यहोवा ह उहां के मनखेमन के संग वइसे ही करही, जइसे ओह अमोरीमन के राजा सीहोन अऊ ओग के संग करे रिहिस, जेमन ला ओह ओमन के देस के संग नास कर दे रिहिस।
DEU 31:5 यहोवा ह ओमन ला तुम्हर अधीन कर दीही, अऊ तुमन ओमन के संग वइसे ही करहू, जइसे कि मेंह तुमन ला हुकूम दे हवंव।
DEU 31:6 मजबूत अऊ साहसी बनव। ओमन ले झन डरव या भयभीत झन होवव, काबरकि यहोवा तुम्हर परमेसर ह तुम्हर संग जाथे; ओह तुमन ला न तो कभू छोंड़ही अऊ न ही तियागही।”
DEU 31:7 तब मूसा ह यहोसू ला बुलवाईस अऊ जम्मो इसरायल के आघू म ओला कहिस, “मजबूत अऊ साहसी बन, काबरकि तें ये मनखेमन के संग ओ देस म जाबे, जेला येमन के पुरखामन ला देय बर यहोवा ह सपथ खाय रिहिस, अऊ तेंह ओ देस ला येमन के बीच येमन के उत्तराधिकार के रूप म बांटबे।
DEU 31:8 यहोवा ह खुद तोर आघू-आघू जावत हे अऊ ओह तोर संग रहिही; ओह न तो तोला कभू छोंड़ही अऊ न ही तियागही। एकरसेति झन डर अऊ झन घबरा।”
DEU 31:9 मूसा ह ये कानून ला लिखिस अऊ येला यहोवा के करार के सन्दूक उठानेवाला लेवीय पुरोहितमन ला अऊ इसरायल के जम्मो अगुवामन ला दे दीस।
DEU 31:10 तब मूसा ह ओमन ला हुकूम दीस: “हर सात साल के आखिरी म, करजा माफी करे के साल, पबितर-तम्बूमन के तिहार के बेरा,
DEU 31:11 जब जम्मो इसरायलीमन यहोवा तुम्हर परमेसर के आघू म ओ जगह म इकट्ठा होथें, जेला ओह चुनही, तब तुमन ये कानून ओमन के आघू म पढ़के सुनाहू।
DEU 31:12 मनखेमन ला इकट्ठा करव—आदमी, माईलोगन अऊ लइकामन, अऊ तुम्हर नगरमन म रहइया परदेसी, ओ जम्मो झन ला—ताकि ओमन ये कानून ला सुनंय अऊ यहोवा तुम्हर परमेसर के भय मानना सीखंय अऊ धियान देके ये कानून के हर बात के पालन करंय।
DEU 31:13 ओमन के लइकामन, जेमन ये कानून ला नइं जानंय, ओमन घलो येला सुनंय अऊ यहोवा तुम्हर परमेसर के भय मानना सीखंय, जब तक कि तुमन ओ देस म जीयत हव, जेकर ऊपर अधिकार करे बर तुमन यरदन नदी के ओ पार जावत हव।”
DEU 31:14 यहोवा ह मूसा ला कहिस, “तोर मिरतू के दिन ह लकठा म हवय। यहोसू ला बला अऊ तुमन दूनों मिलापवाला तम्बू करा हाजिर होवव, जिहां मेंह ओला अधिकार दूहूं।” तब मूसा अऊ यहोसू मिलापवाला तम्बू करा जाके हाजिर होईन।
DEU 31:15 तब यहोवा ह बादर के एक खंभा म परगट होईस, अऊ बादर के खंभा ह तम्बू के प्रवेस दुवार के ऊपर ठहर गीस।
DEU 31:16 अऊ यहोवा ह मूसा ला कहिस: “तेंह मरके अपन पुरखामन के संग मिल जानेवाला हस, अऊ ये मनखेमन ओ देस जिहां ओमन जावत हें, उहां जल्दी ही पराय देवतामन के पाछू जाके बेभिचारी हो जाहीं। ओमन मोला तियाग दीहीं अऊ जऊन करार मेंह ओमन के संग करे हवंव, ओला टोर दीहीं।
DEU 31:17 तब ओ दिन मेंह ओमन ऊपर गुस्सा करहूं अऊ ओमन ला तियाग दूहूं; मेंह ओमन ले अपन मुहूं मोड़ लूहूं, अऊ ओमन नास हो जाहीं। ओमन ऊपर बहुंत बिपत्ति अऊ संकट आही, अऊ ओ दिन ओमन कहिहीं, ‘का ये बिपत्तिमन हमर ऊपर येकर कारन तो नइं आय हवंय, काबरकि हमर परमेसर ह हमर संग नइं ए?’
DEU 31:18 ओ समय ओमन आने देवतामन कोति जाके जऊन जम्मो बुरई के काम करहीं, ओकर कारन खचित मेंह अपन मुहूं मोड़ लूहूं।
DEU 31:19 “एकरसेति अब ये गीत ला लिख ले अऊ येला इसरायलीमन ला सिखा दे, ताकि येह ओमन के बिरूध मोर गवाह ठहिरय।
DEU 31:20 जब मेंह ओमन ला ओ देस म ले आहूं, जिहां दूध अऊ मंधरस बहुंतायत म मिलथे, ओ देस जेला देय के मेंह ओमन के पुरखामन ले सपथ खाय रहेंव, अऊ जब ओमन ला भरपेट खाय बर मिलही अऊ ओमन उन्नति करहीं, तब ओमन मोर करार ला टोरके मोला अस्वीकार करहीं अऊ आने देवतामन कोति जाके ओमन के अराधना करहीं।
DEU 31:21 अऊ जब बहुंत बिपत्ति अऊ संकट ओमन ऊपर आही, तब ये गीत ह ओमन के बिरूध गवाही दीही, काबरकि ये गीत ला ओमन के संतानमन नइं भुलाय होहीं। मेंह जानत हंव कि ओमन का करे के ठाने हवंय, हालाकि मेंह ओमन ला अभी ओ देस म नइं लाने हंव, जेकर वायदा मेंह ओमन ले करे हवंव।”
DEU 31:22 तब मूसा ह ओ दिन ये गीत ला लिख लीस अऊ येला इसरायलीमन ला सिखाईस।
DEU 31:23 तब यहोवा ह नून के बेटा यहोसू ला ये हुकूम दीस: “मजबूत अऊ साहसी बन, काबरकि तेंह इसरायलीमन ला ओ देस म लेके जाबे, जेकर वायदा मेंह ओमन ले करे हवंव, अऊ मेंह खुद तोर संग रहिहूं।”
DEU 31:24 जब मूसा ह कानून के ये बचन ला सुरू ले लेके आखिरी तक एक किताब म लिख लीस,
DEU 31:25 त ओह ओ लेवीमन ला ये हुकूम दीस, जेमन यहोवा के करार के सन्दूक ला उठाके चलंय:
DEU 31:26 “कानून के ये किताब ला लव अऊ यहोवा अपन परमेसर के करार के सन्दूक के बाजू म रख दव। उहां येह तुम्हर बिरूध एक गवाह के रूप म रहय।
DEU 31:27 काबरकि मेंह जानत हंव कि तुमन कतेक बिदरोही अऊ ढीठ सुभाव के अव। जब मेंह अभी जीयत हंव अऊ तुम्हर संग हवंव, तब तुमन यहोवा के बिरूध बिदरोह करे हव, त फेर मोर मरे के बाद तुमन कतेक जादा बिदरोह करहू!
DEU 31:28 अपन-अपन गोत्र के जम्मो अगुवा अऊ जम्मो करमचारीमन ला मोर करा इकट्ठा करव, ताकि मेंह ये बचन ओमन ला सुनावंव अऊ अकास अऊ धरती ला ओमन के बिरूध गवाह बनावंव।
DEU 31:29 काबरकि मेंह जानत हंव कि मोर मरे के बाद तुमन एकदम बिगड़ जाहू अऊ ओ रसता ले हट जाहू, जेकर हुकूम मेंह तुमन ला दे हवंव। अवइया दिन म, तुम्हर ऊपर बिपत्ति आही, काबरकि तुमन यहोवा के नजर म दुस्ट काम करहू अऊ अपन हांथ ले करे गय काम के दुवारा तुमन ओकर कोरोध ला भड़काहू।”
DEU 31:30 तब मूसा ह इसरायल के जम्मो सभा ला सुरू ले लेके आखिरी तक ये गीत के बचन ला पढ़के सुना दीस:
DEU 32:1 हे अकास, तेंह सुन अऊ मेंह गोठियाहूं; हे धरती, तेंह मोर मुहूं के बातमन ला सुन।
DEU 32:2 मोर सिकछा ह बारिस के सहीं गिरय अऊ मोर बचन ह ओस के सहीं पड़य, नवां कांदी ऊपर पानी के बौछार सहीं, अऊ कोमल पऊधामन ऊपर बारिस के झड़ी सहीं गिरय।
DEU 32:3 मेंह यहोवा के नांव के घोसना करहूं। जम्मो मनखेमन हमर परमेसर के महानता के परसंसा करव!
DEU 32:4 ओह चट्टान अय, ओकर काममन एकदम सही अंय, अऊ ओकर जम्मो रसता नियाय के अंय। ओह एक बिसवासयोग्य परमेसर अय, जऊन ह गलत काम नइं करय, ओह ईमानदार अऊ नियायी अय।
DEU 32:5 इसरायलीमन बिगड़ गे हवंय अऊ ओमन ओकर लइका नो हंय; अपन बेसरमी म, ओमन बेईमान अऊ दुस्ट पीढ़ी के मनखे अंय।
DEU 32:6 हे मुरूख अऊ निरबुद्धि मनखेमन, का तुमन ये किसम ले यहोवा ला बदला देवत हव? का ओह तुम्हर ददा, तुम्हर सिरजनहार नो हय, जऊन ह तुमन ला बनाईस अऊ तुमन ला आकार दीस?
DEU 32:7 पुराना जमाना ला सुरता करव; बहुंत पहिले के पीढ़ीमन ऊपर बिचार करव। अपन ददा ले पुछव अऊ ओह तुमन ला बताही, अपन अगुवामन ले पुछव, अऊ ओमन तुमन ला समझाहीं।
DEU 32:8 जब सर्वोच्च परमेसर ह जाति-जाति के मनखेमन ला ओमन के उत्तराधिकार दीस, जब ओह मनखे-जात ला अलग-अलग करिस, ओह इसरायल के बेटामन के गनती के मुताबिक मनखेमन बर सीमना बांधिस।
DEU 32:9 काबरकि यहोवा के बांटा ओकर मनखेमन अंय, याकूब ह उत्तराधिकार म मिले ओकर भाग ए।
DEU 32:10 एक मरू-भुइयां, एक बंजर अऊ सांय-सांय करत भुइयां म ओला याकूब ह मिलिस। ओह ओला सुरकछा दीस अऊ ओकर खियाल रखिस; अपन आंखी के पुतली के सहीं ओकर देखरेख करिस,
DEU 32:11 जइसे एक गिधवा ह अपन खोंधरा ला हलाथे अऊ अपन पीलामन ऊपर मंडराथे, ताकि अपन डेना ला फईलाके ओमन ला पकड़य अऊ उठाके ऊपर ले जावय।
DEU 32:12 यहोवा ह एके झन ओकर अगुवई करिस; कोनो पराय देवता ओकर संग नइं रिहिस।
DEU 32:13 ओह ओला धरती के ऊंच-ऊंच जगह म ले गीस अऊ खेतमन के फसल ओला खवाईस। ओह ओकर पालन-पोसन चट्टान के मंधरस, अऊ कठोर खड़े चट्टान के तेल म ले करिस
DEU 32:14 ओह ओला पसुमन के झुंड के दूध-दही अऊ बासान के छंटे मेढ़ामन के संग मोटा-ताजा भेड़ अऊ बोकरा के मांस अऊ उत्तम किसम के गहूं के जेवन कराईस। तेंह अंगूर के झागवाला लाल रस पीयय।
DEU 32:15 पर यसूरून ह मोटा होके लात मारिस; बहुंत खाके, ओमन भारी अऊ चिकना हो गीन। ओमन ओ परमेसर ला तियाग दीन, जऊन ह ओमन ला बनाईस अऊ ओ चट्टान अपन उद्धारकर्ता ला अस्वीकार करिन।
DEU 32:16 ओमन पराय देवतामन ला मानके ओला जलन रखनेवाला बना दीन अऊ अपन घिनौना मूरतीमन के दुवारा ओला रिस देवाईन।
DEU 32:17 ओमन झूठ-मूठ के देवतामन ला बलिदान चघाईन, जेमन परमेसर नो हंय; ओ देवतामन, जेमन ला ओमन नइं जानत रिहिन, ओ देवतामन, जेमन कुछू समय पहिले परगट होय रिहिन, ओ देवतामन, जेमन के भय तुम्हर पुरखामन म नइं रिहिस।
DEU 32:18 तुमन ओ चट्टान ला छोंड़ देव, जऊन ह तुमन ला पालिस-पोसिस; तुमन ओ परमेसर ला भुला गेव, जऊन ह तुमन ला पईदा करिस।
DEU 32:19 यहोवा ह येला देखिस अऊ ओमन ला अस्वीकार कर दीस काबरकि ओमन के बेटा-बेटीमन ओला गुस्सा देवाईन।
DEU 32:20 तब यहोवा ह कहिस, “मेंह ओमन ले अपन मुहूं छुपा लूहूं, अऊ देखहूं कि ओमन के अन्त कइसे होही; काबरकि ओमन एक बिगड़े पीढ़ी के मनखे अंय, अइसे संतान अंय, जेमन बिसवासयोग्य नो हंय।
DEU 32:21 ओमन मोर म ओकर दुवारा जलन पईदा करिन, जऊन ह ईस्वर नो हय अऊ अपन बेकार के मूरतीमन के दुवारा मोला गुस्सा देवाईन। मेंह ओमन म ओमन के दुवारा जलन पईदा करहूं, जेमन एक जाति नो हंय; मेंह ओमन ला एक अइसे जाति के दुवारा कोरोध दिलवाहूं, जेमन म समझ नइं ए।
DEU 32:22 काबरकि मोर कोप के आगी ह बरही, अइसन आगी, जऊन ह खाल्हे तक मिरतू-लोक ला जला देथे। येह धरती अऊ येकर ऊपज ला भसम कर दीही अऊ पहाड़मन के नीव म आगी लगा दीही।
DEU 32:23 “मेंह ओमन ऊपर बहुंत बिपत्ति लानहूं अऊ ओमन ऊपर अपन तीर चलाहूं।
DEU 32:24 मेंह ओमन ऊपर नास करइया अकाल, बिनास करइया अऊ मिरतू देवइया महामारी लानहूं; मेंह ओमन ऊपर जंगली पसु पठोहूं, जेमन ओमन ला काट खाहीं, अऊ मेंह ओमन ऊपर धुर्रा म रेंगइया करैत सांप के जहर पठोहूं।
DEU 32:25 घर के बाहिर गली म ओमन तलवार ले मारे जाहीं; ओमन के घर म आतंक छा जाही। जवान छोकरा अऊ छोकरी दूध पीयत लइका अऊ डोकरामन नास हो जाहीं।
DEU 32:26 मेंह कहेंव कि मेंह ओमन ला तितिर-बितिर कर दूहूं अऊ मनखेमन के सुरता ले ओमन के नांव तक मिटा दूहूं,
DEU 32:27 पर मोला बईरीमन के ताना मारे के भय रिहिस, अइसे झन होवय कि बिरोधीमन गलत समझंय अऊ ये कहंय, ‘हमन अपन बाहुबल ले जय पाय हन; यहोवा ह ये जम्मो काम नइं करे हवय।’ ”
DEU 32:28 ओमन एक अइसन जाति के मनखे अंय, जेमन करा गियान नइं ए, ओमन म कुछू समझ नइं ए।
DEU 32:29 कास ओमन म बुद्धि होतिस अऊ ओमन ये बात ला समझतिन अऊ जानतिन कि ओमन के का अन्त होही!
DEU 32:30 एक मनखे ह हजार मनखे ला कइसे भगा सकही, या दू झन दस हजार के संग कइसे लड़ सकत हें, जब तक कि ओमन के चट्टान ह ओमन ला बेच नइं देवय, अऊ यहोवा ह ओमन ला आने मन के हांथ म नइं कर देवय?
DEU 32:31 काबरकि ओमन के चट्टान ह हमर चट्टान सहीं नो हय, इहां तक कि हमर बईरीमन घलो ये बात ला स्वीकार करथें।
DEU 32:32 ओमन के अंगूर के नार ह सदोम के अंगूर के नार अऊ अमोरा के खेतमन ले आथे। ओमन के अंगूरमन जहर ले, अऊ ओमन के गुच्छामन करूवाहट ले भरे हवंय।
DEU 32:33 ओमन के अंगूर के मंद ह सांप के जहर, नाग सांप के घातक जहर अय।
DEU 32:34 “का मेंह येला जमा करके अऊ मोर गुफा म मुहर लगाके नइं रखे हंव?
DEU 32:35 बदला लेवई मोर काम ए; मेंह बदला लूहूं। सही समय म ओमन के पांव ह फिसलही; ओमन के बिपत्ति के दिन ह लकठा म हवय अऊ बिनास ह ओमन ऊपर जल्दी अवइया हे।”
DEU 32:36 जब यहोवा ह देखही कि ओकर मनखेमन के सक्ति खतम हो गे हवय अऊ कोनो नइं बचे हवंय, न गुलाम न सुतंतर मनखे, त ओह अपन मनखेमन के बचाव करही अऊ अपन सेवकमन के ऊपर दया देखाही।
DEU 32:37 अऊ यहोवा ह कहिही, “ओमन के देवतामन कहां हवंय, ओ चट्टान, जिहां ओमन सरन ले रिहिन,
DEU 32:38 ओ देवता, जेमन ओमन के चघाय बलिदान के चरबी ला खाईन अऊ ओमन के पेय-बलिदान के अंगूर के मंद ला पीईन? ओमन तुम्हर मदद करे बर उठंय! ओमन तुमन ला सरन देवंय!
DEU 32:39 “तुमन अब देख लव कि मेंह खुद ओ अंव! मोर छोंड़ अऊ कोनो देवता नइं एं। मेंह मिरतू देथंव अऊ मेंह जिनगी देथंव, मेंह चोट लगाय हंव अऊ मेंह चंगा करहूं, अऊ कोनो मोर हांथ ले बचा नइं सकंय।
DEU 32:40 मेंह स्वरग कोति हांथ उठाके कसम खावत हंव: मोर जिनगी के सपथ,
DEU 32:41 जब मेंह अपन चमकत तलवार म धार लगाहूं अऊ मोर हांथ ह नियाय बर येला धरही, त मेंह अपन बईरीमन ले बदला लूहूं अऊ ओमन ला बदला चुकाहूं, जेमन मोर ले घिन करथें।
DEU 32:42 मोर तीरमन खून ले भर जाहीं, अऊ मोर तलवार ह मांस ला चीर-फार दीही: मारे गय मनखे अऊ बंधुवामन के खून ले लाल हो जाही, अऊ बईरीमन के अगुवामन के मुड़मन ला चीर-फार दीही।”
DEU 32:43 हे जाति-जाति के मनखेमन ओकर मनखेमन के संग आनंद मनावव, काबरकि ओह अपन सेवकमन के खून के बदला लीही; ओह अपन बईरीमन ले बदला लीही अऊ अपन देस अऊ अपन मनखेमन बर प्रायस्चित ला पूरा करही।
DEU 32:44 मूसा ह नून के बेटा यहोसू के संग आईस अऊ ये गीत के जम्मो बचन ला मनखेमन ला सुनाईस।
DEU 32:45 जब मूसा ह जम्मो इसरायलीमन ला ये जम्मो बचन पढ़के सुना दीस,
DEU 32:46 त ओह ओमन ला कहिस, “जऊन बचन मेंह आज तुमन ला गंभीरता से सुनाय हंव, ओ जम्मो ला अपन मन म रख लव, ताकि तुमन अपन लइकामन ला हुकूम दे सकव कि ओमन धियान देके ये कानून के जम्मो बचन के पालन करंय।
DEU 32:47 येमन तुम्हर बर बेमतलब के बचन नो हंय—येमन तुम्हर जिनगी अंय। येमन के दुवारा ओ देस म लम्बा समय तक जीयत रहिहू, जेकर ऊपर अधिकार करे बर तुमन यरदन नदी के ओ पार जावत हव।”
DEU 32:48 ओहीच दिन यहोवा ह मूसा ला कहिस,
DEU 32:49 “तेंह नबो पहाड़ के अबारीम छेत्र के ऊपर जा, जऊन ह मोआब देस म यरीहो सहर के ओ पार हवय, अऊ कनान देस ला देख, जेला मेंह इसरायलीमन ला ओमन के अधिकार म देवत हंव।
DEU 32:50 ओ पहाड़ जिहां तेंह चढ़बे, उहां तेंह मर जाबे अऊ अपन मरे मनखेमन संग मिल जाबे, जइसे कि तोर भाई हारून ह होर पहाड़ ऊपर मरिस अऊ अपन मरे पुरखामन संग मिल गीस।
DEU 32:51 येकर कारन ये अय कि सीन के निरजन जगह म, मरीबा-कादेस के पानी के सोता करा, तुमन दूनों मोर बिसवास ला टोर देव अऊ इसरायलीमन के बीच म मोर पबितरता ला बनाय नइं रखेव।
DEU 32:52 एकरसेति, तेंह ओ देस ला दूरिहा ले सिरिप देख सकबे; तेंह ओ देस म नइं जा सकबे, जेला मेंह इसरायल के मनखेमन ला देवत हंव।”
DEU 33:1 परमेसर के जन मूसा ह अपन मिरतू के पहिले इसरायलीमन ला जऊन आसीस दीस, ओह ये अय।
DEU 33:2 ओह कहिस: “यहोवा ह सीनय पहाड़ ले आईस अऊ सेईर पहाड़ ले ओमन ऊपर सूरज के सहीं परगट होईस; ओह पारान पहाड़ ले अपन अंजोर के चमक देखाईस। ओह हजारों पबितर जन के संग दक्खिन ले, अपन पहाड़ के ढाल म ले आईस।
DEU 33:3 खचित येह तें अस, जऊन ह अपन मनखेमन ले मया करथस; जम्मो पबितर जन तोर हांथ म हवंय। तोर गोड़ म ओ जम्मो झन मुड़ नवाथें, अऊ तोर ले ओमन ला हुकूम मिलथे,
DEU 33:4 ओ कानून जेला मूसा हमन ला दीस, अऊ याकूब के सभा के अधिकार घलो मिलथे।
DEU 33:5 जब मनखेमन के अगुवामन इसरायल के गोत्रमन के संग जूरे रिहिन, तब ओह यसूरून के राजा रिहिस।
DEU 33:6 “रूबेन ह जीयत रहय अऊ ओह झन मरय, अऊ ओकर मनखेमन कम झन होवंय।”
DEU 33:7 अऊ मूसा ह यहूदा के बारे म ये कहिस: “हे यहोवा, यहूदा के बिनती ला सुन; ओला ओकर मनखेमन करा लान। अपन खुद के हांथ ले ओह अपन मामला के बचाव करथे। ओकर बईरीमन के बिरूध ओकर मदद कर!”
DEU 33:8 लेवी के बारे म ओह कहिस: “तोर तुम्मीम अऊ ऊरीम तोर बिसवासयोग्य सेवक के अंय। तेंह ओला मस्सा करा परखय; तेंह मरीबा के सोता करा ओकर संग बाद-बिबाद करय।
DEU 33:9 ओह अपन दाई अऊ ददा के बारे म कहिस, ‘ओमन बर मोर मन म कोनो आदर नइं ए।’ ओह अपन भाईमन ला नइं पहिचानिस अऊ न ही अपन लइकामन ला स्वीकार करिस, पर ओह तोर बचन के पालन करिस अऊ तोर करार के रखवारी करिस।
DEU 33:10 ओह याकूब ला तोर नियम अऊ इसरायल ला तोर कानून के सिकछा देथे। ओह तोर आघू म धूप जलाथे अऊ तोर बेदी म पूरा होम-बलिदान चघाथे।
DEU 33:11 हे यहोवा, ओकर जम्मो कुसलता ऊपर आसीस दे, अऊ ओकर हांथ के सेवा ला गरहन कर। जेमन ओकर बिरूध ठाढ़ होथें, ओमन ला अऊ ओकर बईरीमन ला अइसे मार कि ओमन फेर ठाढ़ झन हो सकंय।”
DEU 33:12 बिनयामीन के बारे म ओह कहिस: “यहोवा के मयारू ह ओकर सुरकछा म रहय, काबरकि यहोवा ह दिन भर ओकर सुरकछा करथे, अऊ जेला यहोवा ह मया करथे, ओह ओकर दूनों कंधा के बीच म रहिथे।”
DEU 33:13 यूसुफ के बारे म ओह कहिस: “यहोवा ह ओकर देस ला ऊपर अकास के कीमती ओस ले अऊ खाल्हे के गहिरा पानी ले आसीस देवय;
DEU 33:14 सूरज के परभाव ले उपजे सबले बने चीज अऊ चंदा के दुवारा दिये उत्तम चीज;
DEU 33:15 पुराना पहाड़मन के मनपसंद ईनाम अऊ सदाकाल तक बने रहइया पहाड़ीमन के फर;
DEU 33:16 धरती अऊ येकर भरपूरी म ले सबले उत्तम चीजमन के आसीस यहोवा देवय अऊ ओकर किरपा बने रहय, जऊन ह बरत झाड़ी म रिहिस। ये जम्मो चीज यूसुफ के मुड़ म याने कि ओकर भौंह म उतरय, जऊन ह अपन भाईमन के बीच राजकुमार रिहिस।
DEU 33:17 वैभव म ओह एक पहिलांत सांड़ के सहीं अय; ओकर सींगमन जंगली बईला के सींग के सहीं अंय। ओमन के दुवारा ओह जाति-जाति के मनखे, इहां तक कि धरती के छोर के मनखेमन ला घायल करही। अइसने अंय एपरैम के दस हजार; अइसने अंय मनस्से के हजारों-हजार।”
DEU 33:18 जबूलून के बारे म ओह कहिस: “हे जबूलून, अपन बाहिर जवई म, अऊ हे इस्साकार, तेंह अपन तम्बू म आनंद मना।
DEU 33:19 ओमन मनखेमन ला पहाड़ ऊपर बलाहीं अऊ उहां धरमीपन के बलिदान चघाहीं; ओमन समुंदर के बहुंत चीज, अऊ बालू म छुपे खजाना म ले लाभ उठाहीं।”
DEU 33:20 गाद के बारे म ओह कहिस: “धइन अय ओ, जऊन ह गाद के इलाका ला बढ़ाथे! गाद ह उहां एक सिंह के सहीं रहिथे, अऊ बाहां या मुड़ ला चीर देथे।
DEU 33:21 ओह अपन बर सबले बढ़िया भुइयां ला चुनिस; अगुवा के भाग ह ओकर बर रखे गे रिहिस। जब मनखेमन के मुखियामन जूरिन, त ओह यहोवा के धरमी ईछा अऊ इसरायल के बारे म ओकर नियाय ला पूरा करिस।”
DEU 33:22 दान के बारे म ओह कहिस: “दान ह बासान के उछलत-कूदत सिंह के एक पीला ए।”
DEU 33:23 नपताली के बारे म ओह कहिस: “नपताली के ऊपर यहोवा के बहुंत किरपा हवय अऊ ओह यहोवा के आसीस ले भरे हवय; ओला समुंदर कोति दक्खिन के भाग उत्तराधिकार म मिलही।”
DEU 33:24 आसेर के बारे म ओह कहिस: “बेटामन म आसेर ह सबले जादा आसीसित अय; ओकर ऊपर ओकर भाईमन के किरपा होवय, अऊ ओकर पांव ह तेल म नहावय।
DEU 33:25 तोर दुवार के छड़मन लोहा अऊ कांसा के होहीं, अऊ तोर बल ह तोर उमर के बराबर होही।
DEU 33:26 “यसूरून के परमेसर के सहीं कोनो नइं अंय, जऊन ह अकास के ओ पार ले अपन वैभव म बादर ऊपर सवार होके तोर मदद करे बर आथे।
DEU 33:27 अनादि परमेसर ह तोर सरन-स्थान ए, अऊ तोर खाल्हे म सदा बने रहइया बाहांमन हवंय। ओह तोर आघू ले तोर बईरीमन ला ये कहिके भगा दीही, ‘ओमन ला नास कर दव!’
DEU 33:28 एकरसेति इसरायल ह निडर होके रहिही; याकूब ह अनाज अऊ नवां अंगूर के मंद के देस म सुरकछित निवास करही, जिहां अकास ले ओस गिरथे।
DEU 33:29 हे इसरायल, धइन अस तें! यहोवा ले उद्धार पाय मनखे, तोर सहीं कोन हवय? ओह तोर ढाल अऊ मददगार अऊ महिमामय तलवार ए। तुम्हर बईरीमन तुम्हर आघू म झुकहीं, अऊ तुमन ओमन के ऊंच जगहमन ला रऊंद डालहू।”
DEU 34:1 तब मूसा ह मोआब के मैदान ले नबो पहाड़ ऊपर पिसगा के चोटी म चढ़ गीस, जऊन ह यरीहो के ओ पार हवय। उहां यहोवा ह ओला पूरा देस ला देखाईस—गिलाद के इलाका ले लेके दान नगर तक,
DEU 34:2 पूरा नपताली, एपरैम अऊ मनस्से के इलाका, यहूदा के जम्मो देस भूमध्य सागर तक,
DEU 34:3 नेगेव अऊ पूरा इलाका—यरीहो के घाटी, खजूर के सहर ले लेके सोअर तक।
DEU 34:4 तब यहोवा ह मूसा ला कहिस, “येह ओ देस ए, जेला मेंह सपथ खाके अब्राहम, इसहाक अऊ याकूब ला देय के वायदा ये कहिके करे रहेंव, ‘येला मेंह तुम्हर संतानमन ला दूहूं।’ मेंह तोला ये देस देखावत हंव, पर तें पार होके उहां नइं जा सकबे।”
DEU 34:5 अऊ उहां मोआब देस म यहोवा के सेवक मूसा के मिरतू हो गीस, जइसे कि यहोवा ह कहे रिहिस।
DEU 34:6 यहोवा ह ओला मोआब म बेत-पोर नगर के सामने घाटी म माटी दीस, पर आज तक कोनो ला पता नइं चलिस कि ओकर कबर कहां हवय।
DEU 34:7 जब मूसा के मिरतू होईस, तब ओह एक सौ बीस बछर के रिहिस, तभो ले ओकर आंखी ह न तो कमजोर होय रिहिस अऊ न ही ओकर बल ह घटे रिहिस।
DEU 34:8 इसरायलीमन मोआब के मैदान म मूसा बर तीस दिन तक बिलाप करते रिहिन, जब तक कि रोये अऊ सोक मनाय के समय ह खतम नइं हो गीस।
DEU 34:9 नून के बेटा यहोसू ह बुद्धि के आतमा ले भर गे रिहिस, काबरकि मूसा ह अपन हांथ ओकर ऊपर रखे रिहिस। एकरसेति इसरायलीमन ओकर बात ला सुनिन अऊ ओ काम करिन जेकर हुकूम यहोवा ह मूसा ला दे रिहिस।
DEU 34:10 ओकर बाद, इसरायल म कोनो भी अगमजानी मूसा के सहीं नइं होईस, जेकर ले यहोवा ह आमने-सामने बात करिस,
DEU 34:11 जऊन ह ओ जम्मो चिनहां अऊ चमतकार देखाईस, जेमन ला देखाय बर यहोवा ह ओला मिसर देस म पठोय रिहिस कि ओह फिरौन, अऊ ओकर जम्मो करमचारी अऊ ओकर पूरा देस के सामने ओ चिनहां अऊ चमतकारमन ला देखावय।
DEU 34:12 काबरकि कभू कोनो अइसे अपार सक्ति या अद्भूत काम करके नइं देखाय रिहिन, जइसे मूसा ह इसरायल के जम्मो मनखेमन के आघू म करके देखाईस।
JOS 1:1 यहोवा के सेवक मूसा के मरे के बाद यहोवा ह मूसा के सहायक नून के बेटा यहोसू ला कहिस,
JOS 1:2 “मोर दास मूसा ह मर गे हवय; त अब तेंह उठ, अऊ इसरायली मनखेमन संग यरदन नदी ला पार करके ओ देस म जाय बर तियार हो जा, जेला मेंह ओमन ला, याने कि इसरायली मनखेमन ला देनेचवाला हंव।
JOS 1:3 जइसे कि मेंह मूसा ले वायदा करे हवंव, जऊन-जऊन जगह म तुमन अपन गोड़ ला रखहू, ओ जम्मो देस ला मेंह तुमन ला दे दूहूं।
JOS 1:4 निरजन प्रदेस ले लबानोन, अऊ बड़े नदी, फरात—हित्तीमन के जम्मो देस ले—पछिम म भूमध्य सागर तक तुम्हर इलाका होही।
JOS 1:5 तोर जिनगी भर कोनो मनखे तोर आघू म ठहिर नइं सकय; जइसन मेंह मूसा संग रहंय, वइसन तोर संग घलो रहिहूं; मेंह तोला कभू नइं छोंड़हूं अऊ न ही तोला तियागहूं।
JOS 1:6 एकरसेति मजबूत अऊ साहसी बन; काबरकि जऊन देस ला देय के सपथ, मेंह इसरायली मनखेमन के पुरखामन ले खाय हवंव, ओ देस ला अपन कब्जा म करे बर ये मनखेमन के अगुवई तेंह करबे।
JOS 1:7 “एकरसेति तेंह मजबूत अऊ अब्बड़ साहसी बन। जऊन कानून ला मोर दास मूसा ह तोला दे हवय, ओ जम्मो कानून ला धियान देके मान; ये कानून ले तेंह डेरी या जेवनी झन मुड़बे, तब तेंह जिहां कहूं जाबे, ओ हर जगह म तें सफल होबे।
JOS 1:8 परमेसर के कानून के ये किताब ला अपन चित ले कभू झन उतरन देबे; ये किताब म दिन अऊ रथिया धियान करत रहिबे, ताकि तेंह ये किताब म लिखाय हर बात ला माने म सचेत रह। तब तेंह सम्पन्न अऊ सफल होबे।
JOS 1:9 का मेंह तोला हुकूम नइं दे हवंव? मजबूत अऊ साहसी बन। झन डराबे: निरास झन होबे, काबरकि जिहां घलो तेंह जाबे, यहोवा तोर परमेसर ह तोर संग रहिही।”
JOS 1:10 तब यहोसू ह इसरायलीमन के अधिकारीमन ला हुकूम दीस:
JOS 1:11 “जम्मो डेरा म होके जावव, अऊ मनखेमन ला हुकूम देवव, ‘अपन-अपन बर खाना तियार करके रखव; काबरकि तीन दिन के भीतर म तुमन ला यरदन नदी के ओ पार जाके ओ देस ला अपन कब्जा म करना हवय, जेला यहोवा तुम्हर परमेसर ह तुमन ला तुम्हर कब्जा म देनेवाला हवय।’ ”
JOS 1:12 लेकिन यहोसू ह रूबेन अऊ गाद के गोत्र अऊ मनस्से के आधा गोत्र के मनखेमन ला कहिस,
JOS 1:13 “जऊन हुकूम ला यहोवा परमेसर के दास मूसा ह तुमन ला बताय रिहिस, ओला सुरता रखव; हुकूम ला बताय के बाद ओह कहे रिहिस, ‘यहोवा तुम्हर परमेसर ह तुमन ला ये देस देय के दुवारा तुमन ला अराम दीही।’
JOS 1:14 तुम्हर घरवालीमन, तुम्हर लइकामन अऊ पसु-धन ओ जगह म रूक सकत हंय, जऊन ला मूसा ह तुमन ला यरदन नदी के पूरब दिग म दे हवय, पर तुम्हर जम्मो सैनिकमन लड़ई बर तियार होके तुम्हर संगी इसरायलीमन के आघू-आघू यरदन नदी के ओ पार जावंय। तुमन ला ओमन के मदद करना हे,
JOS 1:15 जब तक कि यहोवा ह तुम्हर संगी इसरायलीमन ला बिसराम नइं देवय, जइसन कि ओह तुमन ला बिसराम दे हवय, अऊ जब तक ओमन घलो ओ देस ला अपन अधिकार म नइं ले लेवंय, जेला यहोवा तुम्हर परमेसर ह ओमन ला देवत हवय। ओकर पाछू, तुमन अपन खुद के भुइयां ला अपन कब्जा म करे बर वापिस जा सकत हवव, जेला यहोवा के दास मूसा ह, सूरज निकले के दिग म यरदन नदी के पूरब म तुमन ला दे हवय।”
JOS 1:16 तब ओमन यहोसू ला जबाब दीन, “जऊन कुछू तेंह हमन ला करे के हुकूम दे हस, ओ काम ला हमन करबो, अऊ जिहां घलो तेंह हमन ला पठोबे, उहां हमन जाबो।
JOS 1:17 जइसन हमन मूसा के सब बात मानत रहेंन, वइसनेच तोर बात ला घलो मानबो। सिरिप अइसन होवय कि यहोवा तोर परमेसर ह जइसन मूसा के संग रिहिस, वइसने तोर संग घलो रहय।
JOS 1:18 जऊन ह तोर बात के बिरोध म बिदरोह करही अऊ जऊन हुकूम तेंह देबे, ओला नइं मानही, त ओह मार डारे जाही। तेंह सिरिप मजबूत अऊ साहसी बने रह!”
JOS 2:1 एकर बाद नून के बेटा यहोसू ह दू झन मनखेमन ला भेद लेय खातिर सित्तीम नगर ले चुपेचाप भेजिस, अऊ ओ मनखेमन ला कहिस, “जाके ओ देस ला देखव, बिसेस करके यरीहो सहर ला।” त ओमन उहां ले चल दीन, अऊ राहाब नांव के एक बेस्या के घर म जाके ठहिरिन।
JOS 2:2 तब कोनो मनखे ह जाके यरीहो के राजा ला बता दीस कि आज रथिया कुछू इसरायलीमन हमर देस के भेद ले बर इहां आय हवंय।
JOS 2:3 त यरीहो के राजा ह राहाब करा ये खबर भेजिस: “जऊन आदमीमन तोर इहां आय हवंय, ओमन ला बाहिर लान, काबरकि ओमन हमर जम्मो देस के भेद लेय खातिर आय हवंय।”
JOS 2:4 ओ माईलोगन ह दूनों मनखेमन ला छिपा दे रिहिस, अऊ ओह राजा के सेवकमन ला कहिस, “मोर घर म मनखेमन आय तो रिहिन, पर मेंह नइं जानंव कि ओमन कहां ले आय रिहिन।
JOS 2:5 जब अंधियार हो गीस, अऊ नगर के दुवार बंद होय लगिस, त ओमन चल दीन; मेंह नइं जानंव कि ओमन कते डहार गीन। तुमन जल्दी करके ओमन के पीछा करव, त ओमन ला धर लूहू।”
JOS 2:6 (पर ओ माईलोगन ह ओ दूनों मनखे ला अपन घर के छानी म चघाके सनई के ओ लकड़ी के खाल्हे म छिपा दे रिहिस, जऊन ला ओह छानी म इकट्ठा करके रखे रिहिस।)
JOS 2:7 तब राजा के ओ सिपाहीमन यरदन नदी के डहार ले ओ भेदिया मनखेमन के खोज म घाट तक चल दीन, अऊ जइसे ही ओमन के खोजनेवालामन दुवारी ले निकलिन, त नगर के दुवार ला बंद कर दिये गीस।
JOS 2:8 भेदियामन के सुते के पहिले ओ माईलोगन ह ओमन करा छानी म जाके
JOS 2:9 ओ मनखेमन ला कहिस, “अब मेंह जान गे हंव कि यहोवा ह तुमन ला ये देस ला दे हवय, अऊ तुमन के डर हमन के मन म हमा गे हवय, अऊ ये देस के जम्मो रहनेवालामन तुम्हर खातिर घबरावत हवंय
JOS 2:10 काबरकि हमन सुने हवन कि जब तुमन मिसर देस ले निकलके आएव, त यहोवा ह तुम्हर बर लाल-समुंदर के पानी ला सूखा दीस, अऊ ये घलो कि तुमन सीहोन अऊ ओग के अमोरीमन के दूनों राजामन ला, जऊन मन यरदन नदी के ओ पार रिहिन, पूरा सतियानास कर डालेव।
JOS 2:11 जइसे ही ये गोठ ला हमन सुनेंन, हमन डर के मारे घबरा गेंन अऊ तुम्हर कारन काकरो जी म जी नइं रिहिस; काबरकि तुम्हर यहोवा परमेसर ह ऊपर अकास के अऊ खाल्हे धरती के परमेसर अय।
JOS 2:12 “अब मेंह जो तुम्हर ऊपर किरपा करे हंव, एकर खातिर मोर ले यहोवा परमेसर के किरिया खावव कि तुमन घलो मोर ददा के घराना ऊपर किरपा करहू, अऊ एकर एक सच्चा चिनहां मोला देवव
JOS 2:13 कि तुमन मोर दाई अऊ ददा, भाई अऊ बहिनीमन ला, अऊ जऊन कुछू ओमन के हवय ओ सबो ला जीयत छोंड़ दूहू अऊ हमन ला मिरतू ले बचाहू।”
JOS 2:14 तब ओ मनखेमन ओ माईलोगन ले कहिन, “तुम्हर परान के बदला म हमर परान जावय! जऊन काम हमन करत हन, अगर तेंह येला नइं बताबे, त जब यहोवा परमेसर ह हमन ला ये देस ला दे दीही, तब हमन तोर संग किरपा अऊ सच्चई से बरताव करबो।”
JOS 2:15 राहाब ह जऊन घर म रहत रिहिस, ओह सहर के दीवार म बने रिहिस, त ओह ओमन ला खिड़की ले रस्सी के दुवारा उतारके नगर के बाहिर कर दीस।
JOS 2:16 अऊ ओह ओमन ला कहिस, “तुमन पहाड़ी कोति चले जावव, ताकि राजा के मनखेमन तुमन ला झन खोज सकंय। जब तक तुम्हर खोजनेवालामन वापिस नइं आ जावंय, तब तक तुमन उहां तीन दिन तक छिपे रहव, ओकर बाद अपन डहार म चले जावव।”
JOS 2:17 ओ मनखेमन ओला कहिन, “जऊन किरिया तेंह हमन ला खवाय हस, ओकर बिसय म हमन तो निरदोस रहिबो।
JOS 2:18 सुन, जब हमन ये देस म आबो, तब जऊन खिड़की ले तेंह हमन ला उतारे हस, ओमा ये लाल रंग के फीता ला बांध देबे; अऊ तोर दाई-ददा, तोर भाईमन ला अऊ अपन ददा के घराना के जम्मो झन ला अपन घर म जमा करके रखबे।
JOS 2:19 यदि कोनो तोर दुवारी ले बाहिर निकलही, त ओकर लहू के दोस ओकरेच मुड़ म पड़ही, अऊ हमन निरदोस ठहिरबो; पर कहूं तोर संग तोर घर म, काकरो ऊपर काकरो हांथ पड़ही, त ओकर लहू के दोस हमर ऊपर लगही।
JOS 2:20 फेर यदि तेंह हमर ये बात ला काकरो करा बताबे, त जऊन किरिया तेंह हमन ला खवाय हस, ओकर ले हमन छूट जाबो।”
JOS 2:21 ओह कहिस, “ठीक हे, तुम्हर बचन के मुताबिक होवय।” तब ओह ओमन ला बिदा करिस, अऊ ओमन चल दीन; अऊ ओह ओ लाल रंग के फीता ला खिड़की म बांध दीस।
JOS 2:22 तब ओमन उहां ले पहाड़ी म चल दीन, अऊ तीन दिन तक उहां रूके रिहिन, जब तक कि ओमन ला खोजनेवालामन वापिस नइं चल दीन; खोजनेवालामन ओमन ला पूरा रसता भर खोजिन, पर ओमन ला नइं पाईन।
JOS 2:23 तब दूनों मनखेमन पहाड़ी ले उतरिन, अऊ नदी के ओ पार नून के बेटा यहोसू करा आईन अऊ जऊन कुछू ओमन के ऊपर बीते रिहिस, ओ जम्मो बात ओला बताईन।
JOS 2:24 ओमन यहोसू ला कहिन, “सच म यहोवा ह ओ जम्मो देस ला हमर हांथ म दे देय हवय; उहां के जम्मो मनखेमन डर के मारे घबरावत हें।”
JOS 3:1 दूसर दिन बड़े बिहनियां यहोसू अऊ जम्मो इसरायलीमन सित्तीम ले आघू बढ़िन अऊ यरदन नदी करा आईन, अऊ नदी ला नाहके के पहिले उहां डेरा डालिन।
JOS 3:2 तीन दिन के पाछू मनखेमन के अधिकारीमन पूरा डेरा म जाके
JOS 3:3 मनखेमन ला ये हुकूम दीन: “जब तुमन यहोवा अपन परमेसर के करार के सन्दूक, अऊ ओला उठाके लेवीय पुरोहितमन ला ले जावत देखव, तब तुमन अपन जगह ले उठके ओमन के पाछू-पाछू चलव।
JOS 3:4 पर तुम्हर अऊ सन्दूक के बीच म लगभग दू हजार क्यूबीट के दूरी रहय; तुमन सन्दूक के लकठा म झन जावव। ये किसम ले तुमन ला पता रहिही कि कोन रसता से तुमन ला चलना हे, काबरकि तुमन ये रसता में पहिले कभू नइं गे हवव।”
JOS 3:5 फेर यहोसू ह मनखेमन ला कहिस, “तुमन अपनआप ला पबितर करव, काबरकि कल यहोवा ह तुम्हर बीच म अद्भूत काम करही।”
JOS 3:6 तब यहोसू ह पुरोहितमन ला कहिस, “करार के सन्दूक ला उठाके मनखेमन के आघू-आघू चलव।” तब ओमन करार के सन्दूक ला उठाके ओमन के आघू-आघू चलिन।
JOS 3:7 अऊ यहोवा ह यहोसू ला कहिस, “आज मेंह तोला जम्मो इसरायलीमन के नजर म ऊपर करे के सुरू करहूं, ताकि ओमन जानंय कि जइसे मेंह मूसा के संग रहेंव, वइसे ही मेंह तोर संग घलो हवंव।
JOS 3:8 जऊन पुरोहितमन करार के सन्दूक ला उठाके ले जाथें, ओमन ला तें ये बता, ‘जब तुमन यरदन नदी के पानी के तीर म हबरव, त जावव अऊ यरदन के पानी म ठाढ़ हो जावव।’ ”
JOS 3:9 तब यहोसू ह इसरायलीमन ले कहिस, “इहां आवव अऊ यहोवा अपन परमेसर के बचन ला सुनव।
JOS 3:10 ये किसम ले तुमन जानहू कि जीयत परमेसर ह तुम्हर बीच म हवय अऊ ओह सच म कनानी, हित्ती, हिब्बी, परिज्जी, गिरगासी, अमोरी अऊ यबूसीमन ला तुम्हर आघू ले भगा दीही।
JOS 3:11 देखव, जम्मो धरती के परभू के करार के सन्दूक ह तुम्हर आघू यरदन नदी म जाही।
JOS 3:12 एकरसेति, अब इसरायल के गोत्रमन ले बारह मनखे ला चुन लव, हर एक गोत्र ले एक झन।
JOS 3:13 अऊ जइसे ही जम्मो धरती के यहोवा के करार के सन्दूक उठानेवाला पुरोहितमन के पांव ह यरदन नदी के पानी म पड़ही, वइसे ही नदी के खाल्हे कोति बहत पानी ह रूक जाही अऊ एक जगह जमा होके ठहर जाही।”
JOS 3:14 जब इसरायली मनखेमन यरदन ला पार करे बर डेरा ला उसालिन, त पुरोहितमन करार के सन्दूक ला उठाके ओमन के आघू-आघू चलिन।
JOS 3:15 फसल के कटनी के पूरा समय म नदी के पानी ह पूरा भरके बहत रहय। पर जइसे ही पुरोहितमन करार के सन्दूक ला उठाके यरदन नदी करा हबरिन अऊ ओमन के गोड़ ह पानी के तीर ला छुईस,
JOS 3:16 त ऊपर कोति ले बहत आवत पानी ह रूक गीस। अऊ येह बहुंत दूरिहा म, सारतान सहर के लकठा म आदम नगर करा रूकके एक ठन ढेर म जमा हो गीस, जबकि खाल्हे कोति अराबा के समुंदर (मिरतू सागर) तरफ बहत पानी ह पूरा अलग हो गीस। तब मनखेमन पार होके यरीहो के सामने आ गीन।
JOS 3:17 यहोवा के करार के सन्दूक ला उठाके ले जवइया पुरोहितमन यरदन नदी के मांझा म रूक गीन अऊ उहां सूखा भुइयां म तब तक ठाढ़े रिहिन, जब तक कि जम्मो इसरायलीमन ओ पार जाय लगिन अऊ जम्मो मनखेमन सूखा भुइयां म होके पूरा यरदन नदी के ओ पार नइं चल दीन।
JOS 4:1 जब जम्मो इसरायलीमन पूरा यरदन नदी के ओ पार चल दीन, त यहोवा ह यहोसू ला कहिस,
JOS 4:2 “मनखेमन के बीच ले बारह झन ला चुन, हर एक गोत्र ले एक मनखे,
JOS 4:3 अऊ ओमन ला कह कि ओमन यरदन नदी के मांझा ले, याने कि जिहां पुरोहितमन खड़े हवंय, उहां ले बारह ठन पथरा उठाके तोर संग चलंय अऊ ओ पथरामन ला उहां रख देवंय, जिहां तें आज रथिया पड़ाव डालबे।”
JOS 4:4 तब यहोसू ह ओ बारह मनखे ला एक संग बलाईस, जेमन ला ओह इसरायलीमन के हर एक गोत्र से छांटके ठहिराय रिहिस,
JOS 4:5 अऊ ओमन ला कहिस, “तुमन यहोवा अपन परमेसर के सन्दूक के आघू यरदन नदी के मांझा म जावव अऊ इसरायलीमन के गोत्र के गनती के मुताबिक एक-एक ठन पथरा अपन कंधा म उठावव;
JOS 4:6 ये पथरामन तुम्हर बीच म एक चिनहां ठहिरहीं। भविस्य म जब तुम्हर लइकामन तुमन ले ये पुछंय, ‘ये पथरामन के का मतलब ए?’
JOS 4:7 त तुमन ओमन ला बतावव कि यरदन नदी के पानी ह यहोवा के करार के सन्दूक के आघू म दू भाग हो गे रिहिस। जब ओमन यरदन नदी ला पार करत रिहिन, तब नदी के पानी ह दू भाग हो गे रिहिस। ये पथरामन इसरायलीमन बर हमेसा बर एक स्मारक ठहिरहीं।”
JOS 4:8 इसरायलीमन यहोसू के ये हुकूम के मुताबिक करिन। जइसन यहोवा ह यहोसू ला कहे रिहिस, वइसन ओमन इसरायली गोत्रमन के गनती के मुताबिक बारह ठन पथरा यरदन के मांझा ले उठाईन, अऊ ओमन ला लानके अपन डेरा म रख दीन।
JOS 4:9 अऊ यरदन नदी के मांझा म, जिहां पुरोहितमन करार के सन्दूक ला उठाके खड़े रिहिन, ओ जगह के बारह ठन अऊ पथरा ला यहोसू ह स्थापित कर दीस। अऊ ओ पथरामन आज तक उहां हवंय।
JOS 4:10 अऊ पुरोहितमन सन्दूक ला उठाके यरदन नदी के मांझा म तब तक ठाढ़े रिहिन, जब तक कि ओ जम्मो काम पूरा नइं हो गीस, जऊन ला यहोवा ह यहोसू ला मनखेमन ला करे के हुकूम दे रिहिस, जइसे कि मूसा ह यहोसू ला निरदेस दे रिहिस। तब मनखेमन जल्दी से ओ पार चल दीन,
JOS 4:11 अऊ जतेक जल्दी जम्मो मनखेमन ओ पार चल दीन, ओकर तुरते यहोवा के सन्दूक अऊ पुरोहितमन घलो एक संग ओमन के देखत म ओ पार आ गीन।
JOS 4:12 रूबेनी, गादी अऊ मनस्से के आधा गोत्र के मनखेमन मूसा के कहे अनुसार लड़ई बर तियार होके आने इसरायलीमन के आघू-आघू पार हो गीन।
JOS 4:13 लगभग चालीस हजार सैनिकमन हथियार धरके लड़ई करे बर यहोवा के आघू-आघू यरीहो के मैदान म पहुंच गीन।
JOS 4:14 ओहीच दिन यहोवा ह जम्मो इसरायलीमन के नजर म यहोसू के आदर बढ़ाईस; अऊ जइसे ओमन मूसा के भय मानत रिहिन, वइसे ही ओमन यहोसू के भी भय ओकर जिनगी भर मानिन।
JOS 4:15 तब यहोवा ह यहोसू ला कहिस,
JOS 4:16 “करार कानून के सन्दूक ला जऊन पुरोहितमन उठाके ले जावत हें, ओमन ला हुकूम दे कि ओमन यरदन नदी ले निकल आवंय।”
JOS 4:17 तब यहोसू ह पुरोहितमन ला हुकूम दीस, “यरदन म ले निकलके ऊपर आवव।”
JOS 4:18 अऊ जइसने ही यहोवा के करार के सन्दूक उठानेवाला पुरोहितमन यरदन के मांझा म ले निकलके आईन, अऊ ओमन के गोड़ सूखा भुइयां म परिस, वइसने ही यरदन नदी के पानी अपन जगह में वापिस आ गीस; अऊ पहिले के सहीं भरके बहे लगिस।
JOS 4:19 ओ साल के पहिले महिना के दसवां दिन, मनखेमन यरदन नदी ले निकलके गीन अऊ यरीहो के पूरबी सीमना म गिलगाल नगर करा डेरा डालिन।
JOS 4:20 अऊ जऊन बारह ठन पथरा ओमन यरदन नदी ले लाने रिहिन, ओमन ला यहोसू ह गिलगाल म स्थापित कर दीस।
JOS 4:21 तब ओह इसरायलीमन ला कहिस, “भविस्य म, जब तुम्हर संतानमन अपन दाई-ददा ले पुछहीं, ‘ये पथरामन के का मतलब ए?’
JOS 4:22 त ओमन ला बतावव, ‘इसरायलीमन यरदन नदी ला सूखा भुइयां म होके पार करे रिहिन।’
JOS 4:23 काबरकि यहोवा तुम्हर परमेसर ह यरदन नदी ला तुम्हर आघू म सूखा दीस, जब तक कि तुमन नदी के ओ पार नइं चल देव। यहोवा तुम्हर परमेसर ह यरदन के पानी ला वइसने ही करिस, जइसने ओह लाल-समुंदर के पानी ला करे रिहिस, ओह ओला हमर आघू म तब तक सूखा दे रिहिस, जब तक कि हमन पार नइं हो गेंन।
JOS 4:24 ओह अइसने एकरसेति करिस ताकि धरती के जम्मो मनखेमन जानंय कि यहोवा के हांथ ह सक्तिसाली ए अऊ ये घलो कि तुमन हमेसा यहोवा अपन परमेसर के भय मानव।”
JOS 5:1 जब यरदन के पछिम के अमोरीमन के जम्मो राजामन अऊ समुंदर तीर के जम्मो कनानी राजामन सुनिन कि यहोवा ह कइसे इसरायलीमन के आघू म ओमन के पार होवत तक यरदन नदी के पानी ला सूखाय रखिस, त डर के मारे ओमन के मन ह घबरा गीस अऊ इसरायलीमन के सामना करे के ओमन के फेर हिम्मत नइं होईस।
JOS 5:2 ओ समय म यहोवा ह यहोसू ला कहिस, “चकमक पथरा के चाकू बनवा अऊ ओ इसरायलीमन के खतना कर, जेमन के खतना नइं होय हवय।”
JOS 5:3 तब यहोसू ह चकमक पथरा के चाकू बनवाईस अऊ गिबियात-हारालोत करा इसरायलीमन के खतना करिस।
JOS 5:4 यहोसू ह ये कारन से ओमन के खतना करिस: ओ जम्मो जेमन मिसर देस ले निकलके आईन—ओ जम्मो जेमन के उमर सैनिक बने के रिहिस—मिसर देस ले निकले के बाद डहार म निरजन प्रदेस म मर गीन।
JOS 5:5 ओ जम्मो मनखे, जेमन मिसर से निकलके आय रिहिन, ओमन के तो खतना हो गे रिहिस, पर जऊन मन मिसर ले निकले के पाछू यातरा के दौरान निरजन प्रदेस म पईदा होईन, ओमन के खतना नइं होय रिहिस।
JOS 5:6 इसरायलीमन चालीस साल तक निरजन प्रदेस म भटकत रिहिन, जब तक कि ओ जम्मो मनखेमन, जेमन के उमर सैनिक बने के लईक रिहिस, जेमन मिसर ले निकले रिहिन, मर नइं गीन, काबरकि ओमन यहोवा के हुकूम ला नइं मानिन। एकर कारन यहोवा ह सपथ खाके ओमन ले कहे रिहिस कि ओमन ओ देस ला नइं देख सकहीं, जेला हमन ला देय बर ओह हमर पुरखामन ले सपथ खाके वायदा करे रिहिस, ओ देस, जिहां दूध अऊ मंधरस बहुंतायत म मिलथे।
JOS 5:7 त ओह ओ मनखेमन के जगह म ओमन के बेटामन ला बढ़ाईस, अऊ येमन ओ मनखे रिहिन, जेमन के खतना यहोसू करिस, काबरकि डहार म ओमन के खतना नइं होय रिहिस।
JOS 5:8 अऊ जम्मो झन के खतना होय के बाद, ओ जम्मो इसरायलीमन तब तक डेरा म रिहिन, जब तक कि ओमन चंगा नइं हो गीन।
JOS 5:9 तब यहोवा ह यहोसू ला कहिस, “आज मेंह तोर ऊपर ले मिसर देस के कलंक ला दूरिहा कर देवत हंव।” एकरसेति ओ जगह ह आज तक गिलगाल के नांव ले जाने जाथे।
JOS 5:10 जब इसरायलीमन यरीहो के मैदान करा गिलगाल म डेरा डाले रिहिन, त महिना के चौदहवां दिन के सांझ के बेरा ओमन उहां फसह के तिहार मनाईन।
JOS 5:11 अऊ फसह के दूसरा दिन ओमन ओ देस के कुछू ऊपज म ले अखमीरी रोटी अऊ भूंजे दाना भी खाईन।
JOS 5:12 जऊन दिन ओमन ओ देस के ये जेवन ला खाईन, ओकर दूसर दिन ले मन्ना गिरे के बंद हो गीस; इसरायलीमन ला फेर कभू मन्ना नइं मिलिस, पर ओ बरस ओमन कनान देस के ऊपज म ले खाईन।
JOS 5:13 जब यहोसू ह यरीहो के लकठा म रिहिस, तब ओह नजर उठाके देखिस कि एक जन अपन हांथ म तलवार लेके ओकर आघू म ठाढ़े हवय। यहोसू ह ओकर करा जाके पुछिस, “का तेंह हमर कोति हस या हमर बईरीमन कोति?”
JOS 5:14 ओह जबाब दीस, “काकरो कोति नइं, मेंह यहोवा के सेना के सेनापति के रूप म आय हवंव।” तब यहोसू ह मुहूं-भरसा गिरके ओला दंडवत करिस, अऊ ओकर ले पुछिस, “अपन सेवक बर मोर परभू के का संदेस हवय?”
JOS 5:15 यहोवा के सेना के सेनापति ह यहोसू ला जबाब दीस, “गोड़ ले अपन पनही ला उतार ले, काबरकि जऊन जगह म तेंह ठाढ़े हस, ओह पबितर जगह अय।” अऊ यहोसू ह वइसनेच करिस।
JOS 6:1 यरीहो सहर के दुवारमन ला इसरायलीमन के डर के कारन मजबूती से बंद कर दिये गे रिहिस, एकरसेति न तो कोनो बाहिर निकल सकत रिहिन अऊ न ही कोनो भीतर जा सकत रिहिन।
JOS 6:2 तब यहोवा ह यहोसू ला कहिस, “मेंह यरीहो ला ओकर राजा अऊ ओकर सूरबीरमन सहित तोर हांथ म कर दे हवंव।
JOS 6:3 तुमन हथियार धरे जम्मो सैनिकमन के संग सहर के चारों कोति एक चक्कर लगावव। अऊ छै दिन तक अइसनेच करव।
JOS 6:4 सन्दूक के आघू म सात झन पुरोहितमन मेढ़ा के सींग के बने तुरहीमन ला लेवंय। सातवां दिन, सहर के सात चक्कर लगावव, अऊ संग म पुरोहितमन तुरही ला फूंकत रहंय।
JOS 6:5 जब तुमन ला ओमन के तुरही के एक लम्बा अवाज सुनई दीही, त जम्मो सेना ह ऊंचहा अवाज म जय-जयकार करय; तब सहर के दीवार ह गिर जाही, अऊ जम्मो सेना ह सीधा भीतर चल दीही।”
JOS 6:6 एकरसेति नून के बेटा यहोसू ह पुरोहितमन ला बलाके कहिस, “यहोवा के करार के सन्दूक ला उठावव, अऊ सात झन पुरोहित तुरही लेके येकर आघू-आघू चलंय।”
JOS 6:7 अऊ ओह सेना ला हुकूम दीस, “आघू बढ़व! अऊ सहर के चारों खूंट चक्कर लगावव; अऊ हथियारबंद एक पहरेदार ह यहोवा के सन्दूक के आघू-आघू चलय।”
JOS 6:8 जब यहोसू ह मनखेमन ले गोठिया लीस, त ओ सात झन पुरोहित, जेमन यहोवा के आघू म सात ठन तुरही धरे रिहिन, आघू बढ़िन। ओमन तुरही ला फूंकत चलत रिहिन, अऊ यहोवा के करार के सन्दूक ह ओमन के पाछू-पाछू चलिस।
JOS 6:9 हथियारबंद पहरेदार ह तुरही फूंकइया पुरोहितमन के आघू-आघू चलत रहय, अऊ पाछू के पहरेदार ह सन्दूक के पाछू-पाछू रहय। ये पूरा समय पुरोहितमन तुरही ला फूंकत चलत रहंय।
JOS 6:10 पर यहोसू ह सेना ला हुकूम दे रिहिस, “जब तक मेंह तुमन ला जय-जयकार करे के हुकूम नइं देवंव, तब तक जय-जयकार झन करहू, अऊ न तुम्हर कोनो अवाज सुनई देवय, न ही कोनो बात तुम्हर मुहूं ले निकलय; मोर हुकूम पाय के बाद ही जय-जयकार करहू।”
JOS 6:11 ओह यहोवा के सन्दूक ला एक बार नगर के चारों मुड़ा घुमवाईस; तब ओमन डेरा म लहुंट आईन, अऊ उहां रात काटिन।
JOS 6:12 यहोसू ह दूसर दिन बड़े बिहनियां उठिस अऊ पुरोहितमन यहोवा के सन्दूक ला उठाके चलिन।
JOS 6:13 अऊ ओ सात पुरोहितमन सात ठन तुरही धरके यहोवा के सन्दूक के आघू-आघू ओ तुरही ला फूंकत चलिन। ओमन के आघू म हथियारबंद मनखेमन चलिन, अऊ पाछू के पहरेदार ह यहोवा के सन्दूक के पाछू-पाछू चलिस, ये दौरान पुरोहितमन तुरही ला लगातार फूंकत रहंय।
JOS 6:14 अइसने ही ओमन दूसर दिन घलो एक बार सहर के चारों खूंट चक्कर लगाईन अऊ डेरा म लहुंट आईन। ओमन अइसने छै दिन तक करिन।
JOS 6:15 सातवां दिन ओमन बड़े बिहनियां उठके ओही किसम ले नगर के चारों खूंट सात चक्कर लगाईन; सिरिप सातवां दिन ही ओमन सात चक्कर लगाईन।
JOS 6:16 सातवां बार जब पुरोहितमन तुरही ला फूंकिन, त यहोसू ह सेना ला हुकूम दीस, “जय-जयकार करव! काबरकि यहोवा ह ये सहर तुमन ला दे हवय!
JOS 6:17 सहर अऊ ओमा के जम्मो चीज यहोवा बर अरपन के चीज ठहिरय। सिरिप राहाब बेस्या अऊ जतेक झन ओकर संग ओकर घर म हवंय, ओमन ला जीयत छोंड़ दिये जावय, काबरकि ओह हमर पठोय भेदियामन ला छुपाके रखे रिहिस।
JOS 6:18 पर तुमन अरपन करे गय चीजमन ले दूरिहा रहव, ताकि ओमा ले कुछू लेय के दुवारा तुमन अपन खुद के बिनास झन करव। नइं तो तुमन इसरायल के डेरा ला जिम्मेदार ठहिराहू अऊ येकर ऊपर बिपत्ति लानहू।
JOS 6:19 जम्मो सोन, चांदी, अऊ कांसा अऊ लोहा के चीजमन यहोवा बर पबितर अंय, अऊ जरूरी अय कि येमन ला ओकर भंडार म रखे जावय।”
JOS 6:20 जब तुरहीमन ला फूंके गीस, त सेना के मनखेमन जय-जयकार करिन, अऊ तुरही के अवाज सुनके जब मनखेमन ऊंचहा अवाज म जय-जयकार करिन, त दीवार ह गिर गीस; अऊ जम्मो झन भीतर घुस गीन, अऊ ओमन सहर ला अपन अधिकार म कर लीन।
JOS 6:21 ओमन सहर ला यहोवा बर अरपन कर दीन अऊ ओमा के जम्मो जीयत चीजमन ला तलवार ले नास कर दीन—आदमी अऊ माईलोगन, जवान अऊ सियान, गरूवा-बईला, भेड़, गदहा, जम्मो ला मार डारिन।
JOS 6:22 तब यहोसू ह ओ दूनों मनखे ला कहिस, जेमन ओ देस के भेद लेय बर गे रिहिन, “ओ बेस्या के घर म जावव अऊ ओकर संग करे गय अपन वायदा के मुताबिक ओला अऊ ओकर संग के जम्मो झन ला बाहिर ले आवव।”
JOS 6:23 तब ओ दूनों जवान, जेमन भेदिया के काम करे रिहिन, भीतर गीन अऊ राहाब, ओकर दाई अऊ ददा, ओकर भाई अऊ बहिनीमन ला, अऊ ओ जम्मो जेमन ओकर अधीन रिहिन, ओमन ला बाहिर ले आईन। ओमन ओकर पूरा परिवार ला ले आईन अऊ ओमन ला इसरायल के डेरा के बाहिर एक जगह म रखिन।
JOS 6:24 तब ओमन पूरा सहर ला अऊ ओमा के हर चीज ला जला दीन, पर ओमन सोन अऊ चांदी, अऊ कांसा अऊ लोहा के चीजमन ला यहोवा के घर के भंडार म धर दीन।
JOS 6:25 पर यहोसू ह राहाब बेस्या, ओकर परिवार अऊ ओकर अधीन रहइया जम्मो झन ला जीयत छोंड़ दीस, काबरकि ओह ओ मनखेमन ला छुपाके रखे रिहिस, जेमन ला यहोसू ह यरीहो के भेद लेय बर पठोय रिहिस—अऊ ओह आज तक इसरायलीमन के बीच म रहिथे।
JOS 6:26 ओही बेरा यहोसू ह ये सपथ खाईस: अऊ कहिस: “ओ मनखे ह यहोवा के आघू म सरापित होवय, जऊन ह ये सहर यरीहो ला फेर बनाय के जिम्मेदारी लेथे: “जब ओह येकर नीव ला डारही तब ओकर बड़े बेटा ह मर जाही; अऊ जब ओह ओकर दुवारमन ला लगवाही तब ओकर छोटे बेटा ह मर जाही।”
JOS 6:27 अऊ यहोवा ह यहोसू के संग म रिहिस, अऊ यहोसू के कीरति पूरा देस म बगर गीस।
JOS 7:1 पर इसरायलीमन यहोवा ला अरपन करे गय चीज के बिसय म बिसवासघात करिन; याने कि यहूदा गोत्र के आकान, जऊन ह जेरहबंसी जिमरी के पोता अऊ करमी के बेटा रिहिस, ओह अरपन करे गय चीजमन म ले कुछू ला ले लीस; ये खातिर यहोवा के कोरोध इसरायलीमन के ऊपर भड़क उठिस।
JOS 7:2 यहोसू ह कुछू मनखेमन ला यरीहो ले अई नांव के नगर म पठोईस, जऊन ह बेत-आवेन के लकठा म बेतेल के पूरब कोति हवय, अऊ ओह ओमन ला ये कहिस, “जाके ओ इलाका के भेद लेके आवव।” त ओ मनखेमन जाके अई नगर के चुपचाप जानकारी लीन।
JOS 7:3 जब ओमन यहोसू करा लहुंटके आईन त ओला कहिन, “जम्मो सेना ला अई नगर भेजे के जरूरत नइं ए। दू या तीन हजार मनखे जाके येला जीत सकत हंय; जम्मो मनखे ला थकाय के जरूरत नइं ए, काबरकि उहां सिरिप कुछू मनखेमन रहत हवंय।”
JOS 7:4 एकरसेति लगभग तीन हजार इसरायली उहां गीन; पर ओमन ला अई के रहइया मनखेमन के आघू ले भागना पड़िस।
JOS 7:5 अई के मनखेमन ओमा के लगभग छत्तीस मनखे ला मार डारिन। ओमन अपन सहर के दुवार ले पथरा के खदान तक इसरायलीमन के पीछा करिन अऊ खाल्हे ढलान म ओमन ला मार डारिन। येला देखके इसरायलीमन डर के मारे घबरा गीन अऊ ओमन के हिम्मत जबाब देय लगिस।
JOS 7:6 तब यहोसू ह अपन ओनहा ला चीरिस, अऊ ओह यहोवा के सन्दूक के आघू भुइयां म मुहूं-भरसा गिरिस अऊ सांझ तक उहां दुख म पड़े रिहिस। इसरायल के अगुवामन घलो वइसने करिन, अऊ अपन-अपन मुड़ म धुर्रा ला डालिन।
JOS 7:7 अऊ यहोसू ह बिनती करके कहिस, “हाय, हे परमपरधान यहोवा, तें अपन ये मनखेमन ला यरदन नदी के ये पार काबर ले आय? का हमन ला अमोरीमन के बस म करके नास करे बर ले आय हस? बने होतिस कि हमन संतोस करके यरदन के ओ पार रह जातेंन!
JOS 7:8 हे परभू, अपन सेवक ला छेमा कर। मेंह का कहंव, जब इसरायलीमन अपन बईरीमन ला पीठ देखाके भागे हवंय?
JOS 7:9 कनानी अऊ ये देस के आने मनखेमन ये बात ला सुनके हमन ला घेर लीहीं, अऊ हमर नांव ला भुइयां ले मिटा दीहीं। तब तें अपन बड़े नांव बर का करबे?”
JOS 7:10 यहोवा ह यहोसू ला कहिस, “उठ! तेंह काबर मुहूं-भरसा भुइयां म परे हस?
JOS 7:11 इसरायलीमन पाप करे हवंय; ओमन मोर ओ करार ला टोरे हवंय, जेला माने के हुकूम मेंह ओमन ला देय रहंय, ओमन अरपन के कुछू चीजमन ला ले लेय हवंय; ओमन चोरी करे हवंय, ओमन लबारी मारे हवंय, ओमन ओ चीजमन ला अपन अधिकार म रखे हवंय।
JOS 7:12 ये खातिर इसरायलीमन अपन बईरीमन के आघू ठहर नइं सकिन; ओमन बईरीमन ला अपन पीठ देखाके भागिन, काबरकि बिनास के जिम्मेदार ओमन अंय। मेंह तब तक तुम्हर संग नइं रहंव, जब तक कि तुमन अपन बीच म ले अरपन के चीजमन ला नास नइं कर डारहू।
JOS 7:13 “जा, अऊ मनखेमन ला पबितर कर। ओमन ला कह, ‘कल के तियारी म अपनआप ला पबितर करव; काबरकि यहोवा, इसरायल के परमेसर ह ये कहत हे: हे इसरायल, तोर बीच म अरपन के चीजमन हवंय। जब तक तुमन अरपन के चीजमन ला अपन बीच म ले दूरिहा नइं कर दूहू, तब तक तुमन अपन बईरीमन के आघू म ठहर नइं सकव।
JOS 7:14 “ ‘कल बिहनियां तुमन अपन-अपन गोत्र के मुताबिक आवव। जऊन गोत्र ला यहोवा ह चुनथे, ओमन अपन-अपन कुल के मुताबिक आघू आवंय; अऊ जऊन कुल ला यहोवा ह चुनथे, ओमन अपन-अपन परिवार के मुताबिक आघू आवंय; अऊ जऊन परिवार ला यहोवा ह चुनथे, ओ परिवार के आदमीमन एक-एक करके आघू आवंय।
JOS 7:15 जऊन मनखे ह अरपन के चीजमन के संग पकड़े जाही, ओला ओकर जम्मो चीजमन के संग आगी म जलाके नास कर दिये जाही, काबरकि ओह यहोवा के करार ला टोरे हवय अऊ इसरायल म बेभिचार के सहीं काम करे हवय!’ ”
JOS 7:16 यहोसू ह दूसर दिन बड़े बिहनियां उठके इसरायलीमन ला गोत्र-गोत्र करके आघू लानिस, अऊ यहूदा के गोत्र ह चुने गीस।
JOS 7:17 तब ओह यहूदा के कुल के मनखेमन ला आघू लानिस, अऊ जेरहीमन चुने गीन; फेर ओह जेरहीमन ला परिवार के मुताबिक आघू लानिस, अऊ जिमरी के परिवार ह चुने गीस।
JOS 7:18 तब यहोसू ह जिमरी के परिवार के एक-एक मनखे ला आघू म लानिस, अऊ यहूदा गोत्र के आकान ह पकड़े गीस, जऊन ह जेरहबंसी जिमरी के पोता अऊ करमी के बेटा रिहिस।
JOS 7:19 तब यहोसू ह आकान ला कहिस, “हे मोर बेटा, यहोवा, इसरायल के परमेसर के महिमा कर, अऊ ओला आदर दे। जऊन कुछू तेंह करे हस, मोला बता; मोर ले कुछू बात झन छुपा।”
JOS 7:20 आकान ह यहोसू ला जबाब दीस, “सही म मेंह यहोवा, इसरायल के परमेसर के बिरूध पाप करे हंव। मेंह ये करे हंव:
JOS 7:21 जब मेंह लूट म बेबिलोनिया के एक सुघर ओनहा, अऊ दू सौ सेकेल चांदी अऊ पचास सेकेल सोन के एक ठन ईंटा ला देखेंव, त लालच म आके मेंह ओमन ला धर लेंव। ओमन ला मेंह अपन तम्बू के भीतर म भुइयां म गाड़ दे हवंव, अऊ सब के खाल्हे म चांदी हवय।”
JOS 7:22 तब यहोसू ह दूतमन ला पठोईस, अऊ ओमन ओ तम्बू म दऊड़के गीन, अऊ ओमन ला ओ चीजमन ओकर तम्बू म गड़े मिलिन, अऊ सब के खाल्हे म चांदी रहय।
JOS 7:23 ओमन ओ चीजमन ला तम्बू ले निकालके यहोसू अऊ जम्मो इसरायलीमन करा लानिन अऊ ओमन ला यहोवा के आघू म मढ़ा दीन।
JOS 7:24 तब यहोसू अऊ जम्मो इसरायलीमन मिलके जेरह के बेटा आकान, ओ चांदी अऊ ओनहा, सोन के ईंटा, ओकर बेटा-बेटी, ओकर गरूवा-बईला, गदहा अऊ भेड़-बकरी, ओकर तम्बू, अऊ जऊन कुछू ओकर रिहिस, ओ जम्मो ला आकोर के घाटी म ले गीन।
JOS 7:25 तब यहोसू ह ओकर ले कहिस, “तेंह हमर ऊपर काबर ये संकट लानय? आज यहोवा ह तोर ऊपर संकट लानही।” तब जम्मो इसरायलीमन ओकर ऊपर पथरवाह करिन, अऊ बाकि चीजमन ऊपर घलो पथरवाह करके ओमन ला आगी म जला दीन।
JOS 7:26 अऊ आकान के ऊपर पथरामन के बड़े ढेर लगा दीन, जऊन ह आज तक हवय। तब यहोवा के भड़के हुए भयंकर कोरोध ह सांत हो गीस। ये खातिर ओ जगह ला आज तक आकोर के घाटी कहे जाथे।
JOS 8:1 तब यहोवा ह यहोसू ला कहिस, “झन डर्रा; हिम्मत झन हार। अपन संग पूरा सेना ला ले अऊ जाके अई ऊपर हमला कर। काबरकि मेंह अई के राजा, ओकर मनखे, ओकर सहर अऊ ओकर देस ला तोर हांथ म कर दे हंव।
JOS 8:2 जइसने तेंह यरीहो अऊ ओकर राजा के संग करे रहय, वइसनेच तें अई अऊ ओकर राजा के संग घलो करबे; तुमन ओमन के लूट अऊ पसुमन ला अपन बर ले सकत हव। एकरसेति ओ सहर के पाछू कोति अपन मनखेमन ला घात लगाके बईठा दे।”
JOS 8:3 तब यहोसू अऊ जम्मो सेना अई म हमला करे बर आघू बढ़िन। यहोसू ह तीस हजार अपन सबले बने योद्धामन ला चुनिस अऊ रथिया ओमन ला ये हुकूम देके भेज दीस:
JOS 8:4 “धियान देके सुनव। तुमन ला ओ सहर के पाछू कोति घात लगाके बईठना हे। नगर ले जादा दूरिहा झन जावव। तुमन जम्मो झन सचेत रहव।
JOS 8:5 में अऊ मोर संग के जम्मो झन आघू बढ़के सहर म जाबो, अऊ ओमन जब पहिले के सहीं हमर सामना करे बर निकलहीं, त हमन ओमन के आघू ले भागबो।
JOS 8:6 तब ओमन हमर पीछा करहीं अऊ हमन ओमन ला सहर ले दूरिहा निकालके ले आबो, काबरकि ओमन सोचहीं, ‘ओमन हमन ले भागत हें जइसे कि ओमन पहिले घलो भागंय।’ त जब हमन ओमन ले भागबो,
JOS 8:7 तब तुमन घात म ले उठके सहर ला अपन अधीन कर लूहू। यहोवा तुम्हर परमेसर ह ओला तुम्हर हांथ म कर दीही।
JOS 8:8 अऊ जब तुमन सहर ला ले लूहू, त ओमा आगी लगाके जला दूहू। जइसे यहोवा ह हुकूम दे हवय, तुमन वइसे ही करव। सुरता रखव, तुम्हर बर येह मोर हुकूम अय।”
JOS 8:9 तब यहोसू ह ओमन ला पठो दीस; अऊ ओमन घात म बईठे बर चल दीन, अऊ बेतेल अऊ अई के बीच म अई के पछिम कोति घात लगाके बईठिन—पर यहोसू ह बाकि सेना के बीच ओ रथिया बिताईस।
JOS 8:10 दूसर दिन बड़े बिहनियां यहोसू ह अपन सेना ला इकट्ठा करिस अऊ ओ अऊ इसरायल के अगुवामन ओमन के आघू-आघू अई सहर कोति बढ़िन।
JOS 8:11 ओकर संग के जम्मो सेना ह आघू बढ़के सहर के सामने म आ गीस। ओमन अई सहर के उत्तर कोति डेरा डालिन; ओमन के अऊ सहर के बीच म एक घाटी रिहिस।
JOS 8:12 यहोसू ह लगभग पांच हजार मनखे ला लेके बेतेल अऊ अई के बीच सहर के पछिम कोति ओमन ला घात म बईठा दे रिहिस।
JOS 8:13 सैनिकमन अपन-अपन जगह ले लीन—मुख्य छावनी ह सहर के उत्तर कोति अऊ घात लगाय बईठे सैनिकमन सहर के पछिम कोति रहंय। ओ रथिया यहोसू ह घाटी म चल दीस।
JOS 8:14 जब अई के राजा ह येला देखिस, त ओह अऊ सहर के जम्मो मनखेमन जल्दी करके बड़े बिहनियां उठिन अऊ ओमन इसरायलीमन ले लड़े बर एक जगह म गीन अऊ ओमन अराबा कोति धियान नइं दीन। राजा ह नइं जानत रिहिस कि सहर के पाछू कोति ओकर बिरूध इसरायली सैनिकमन घात लगाके बईठे हवंय।
JOS 8:15 यहोसू अऊ जम्मो इसरायलीमन अई के सेना के आघू ले वापिस भागे के दिखावा करिन, अऊ ओमन निरजन प्रदेस कोति भागिन।
JOS 8:16 तब अई सहर के जम्मो मनखेमन ला इसरायलीमन के पीछा करे बर बलाय गीस, अऊ ओमन यहोसू के पीछा करत सहर ले दूरिहा निकल गीन।
JOS 8:17 अई अऊ बेतेल म एको झन आदमी नइं रिहिन, जम्मो के जम्मो इसरायलीमन के पीछा करे म लगे रिहिन। ओमन सहर ला खुला छोंड़के इसरायलीमन के पीछा करे म लगे रिहिन।
JOS 8:18 तब यहोवा ह यहोसू ले कहिस, “अपन हांथ के धरे बरछी ला अई सहर कोति उठा, काबरकि सहर ला मेंह तोर हांथ म दे दूहूं।” तब यहोसू ह अपन हांथ म धरे बरछी ला सहर कोति बढ़ाईस।
JOS 8:19 जइसे ही ओह अइसने करिस, त जऊन इसरायली सैनिकमन घात लगाके बईठे रिहिन, ओमन तुरते अपन जगह ले उठिन, अऊ दऊड़के सहर के भीतर जाके ओकर ऊपर कब्जा कर लीन अऊ तुरते ओमा आगी लगा दीन।
JOS 8:20 जब अई के मनखेमन पाछू कोति मुड़के देखिन, त सहर के धुआं अकास कोति ऊपर उठत रहय, पर ओमन करा कोनो भी दिग म भागे के कोनो मऊका नइं रिहिस; जऊन इसरायलीमन निरजन प्रदेस कोति भागत रिहिन, ओमन मुड़के अपन पीछा करइयामन ऊपर टूट पड़िन।
JOS 8:21 जब यहोसू अऊ जम्मो इसरायलीमन देखिन कि घात लगाय मनखेमन सहर ला ले लेय हवंय अऊ उहां ले धुआं उठत हवय, त ओमन मुड़के अई के मनखेमन ऊपर हमला कर दीन।
JOS 8:22 घात म रहे मनखेमन घलो अई के मनखेमन के सामना करे बर सहर ले निकल आईन, अऊ ये किसम ले दूनों कोति इसरायलीमन आ गीन अऊ मांझा म अई के मनखेमन फंस गीन। इसरायलीमन ओ जम्मो ला मार डारिन; न तो ओमा के कोनो बचिन अऊ न ही कोनो भागन पाईन।
JOS 8:23 पर ओमन अई के राजा ला जीयत पकड़के यहोसू करा ले आईन।
JOS 8:24 जब इसरायलीमन अई के जम्मो मनखेमन ला मैदान म अऊ ओ निरजन प्रदेस म मार डारिन, जिहां ओमन इसरायलीमन के पीछा करे रिहिन, अऊ जब ओमन के जम्मो आदमीमन तलवार ले मार डारे गीन, त जम्मो इसरायलीमन अई सहर ला लहुंटके आईन अऊ ओमन ला मार डारिन, जेमन उहां रिहिन।
JOS 8:25 ओ दिन बारह हजार आदमी अऊ माईलोगन मारे गीन—अई सहर के जम्मो मनखे।
JOS 8:26 यहोसू ह अपन हांथ के बरछी ला तब तक खाल्हे नइं करिस, जब तक कि ओह अई म रहइया जम्मो झन ला नास नइं कर दीस।
JOS 8:27 पर जइसे यहोवा ह यहोसू ला निरदेस दे रिहिस, ओकर मुताबिक इसरायलीमन सहर के पसु अऊ लूट के सामान ला अपन बर ले लीन।
JOS 8:28 यहोसू ह अई सहर ला जला दीस, अऊ ओला हमेसा बर कचरा के एक कुढ़ा कर दीस; जऊन ह आज तक उजाड़ पड़े हवय।
JOS 8:29 ओह अई के राजा के लास ला संझा तक एक ठन खंभा म लटकाके रखिस। बेर बुड़े के बेरा, यहोसू ह मनखेमन ला हुकूम दीस कि ओमन लास ला खंभा ले उतारके सहर के प्रवेस दुवार के खाल्हे म फटिक दें। अऊ ओमन ओकर ऊपर पथरामन के एक बड़े कुढ़ा लगा दीन, जऊन ह आज तक बने हवय।
JOS 8:30 तब यहोसू ह यहोवा, इसरायल के परमेसर बर एबाल पहाड़ म एक बेदी बनाईस,
JOS 8:31 जइसे कि यहोवा के सेवक मूसा ह इसरायलीमन ला हुकूम देय रिहिस। ओह बेदी वइसे ही बनाईस, जइसे मूसा के कानून के किताब म लिखाय रिहिस—बिगर काटे पथरामन ले बने बेदी, जेमा लोहा के कोनो औजार नइं चलाय गे रिहिस। अऊ ओमा ओमन यहोवा बर होम-बलिदान अऊ मेल-बलिदान चघाईन।
JOS 8:32 उहां, इसरायलीमन के आघू म यहोसू ह पथरामन म मूसा के कानून के एक नकल लिखवाईस।
JOS 8:33 जम्मो इसरायली, ओमन के अगुवा, करमचारी, अऊ नियायधीसमन यहोवा के करार के सन्दूक के दूनों कोति, ओ लेवीय पुरोहितमन कोति मुहूं करके ठाढ़े रहंय, जेमन सन्दूक ला उठाके ले जावंय। ओमन के बीच रहइया परदेसी अऊ देसी दूनों मनखेमन उहां रिहिन। आधा मनखेमन गरीजीम पहाड़ के आघू म अऊ आधा मनखेमन एबाल पहाड़ के आघू म ठाढ़े रहंय, जइसे कि यहोवा के सेवक मूसा ह पहिले ले हुकूम दे रिहिस जब ओह इसरायल के मनखेमन ला आसीस देय बर निरदेस देय रिहिस।
JOS 8:34 ओकर बाद, यहोसू ह कानून के जम्मो बचन ला पढ़के सुनाईस—आसीस अऊ सराप—जइसे कि येह कानून के किताब म लिखाय हवय।
JOS 8:35 जतेक बातमन के मूसा ह हुकूम देय रिहिस, ओमा के एको ठन सबद ला यहोसू नइं छोंड़िस; ओ जम्मो बात इसरायल के जम्मो सभा के संग माईलोगन अऊ लइका अऊ ओमन के बीच रहइया परदेसीमन ला घलो सुनाईस।
JOS 9:1 ये जम्मो बात ला सुनके हित्ती, अमोरी, कनानी, परिज्जी, हिब्बी, अऊ यबूसी, जतेक राजा यरदन के ये पार पहाड़ी देस अऊ खाल्हे पछिम म, अऊ लबानोन ले लेके भूमध्य सागर के तीर म रहत रिहिन,
JOS 9:2 ओमन यहोसू अऊ इसरायलीमन ले लड़े बर एक संग जूरिन।
JOS 9:3 पर जब गिबोन के निवासीमन सुनिन कि यहोसू ह यरीहो अऊ अई सहर के का दसा करिस,
JOS 9:4 त ओमन एक छल करिन: ओमन एक परतिनिधि-मंडल के भेस बनाके अपन गदहामन म पुराना बोरा अऊ मंद धरे के चमड़ा के पुराना थैलीमन ला जोरिन, जेमन फटा-पुराना रिहिन अऊ जेमन ला मरम्मत करे गे रिहिस।
JOS 9:5 ओमन अपन गोड़ म फटा-पुराना पनही अऊ देहें म फटा-पुराना ओनहा पहिरिन। ओमन के जेवन के जम्मो रोटी ह सूखा अऊ ओमा फफूंद लगे रहय।
JOS 9:6 तब ओमन गिलगाल के डेरा म यहोसू करा जाके ओला अऊ इसरायलीमन ले कहिन, “हमन दूरिहा देस ले आय हवन; एकरसेति तुमन हमर संग एक करार करव।”
JOS 9:7 इसरायलीमन ओ हिब्बीमन ले कहिन, “का पता, तुमन हमर लकठा म रहत हवव; त हमन तुम्हर संग कइसे करार कर सकत हन?”
JOS 9:8 तब ओमन यहोसू ले कहिन, “हमन तोर सेवक अन।” पर यहोसू ह ओमन ले पुछिस, “तुमन कोन अव अऊ कहां ले आय हवव?”
JOS 9:9 ओमन जबाब दीन, “तोर सेवकमन बहुंत दूरिहा के देस ले यहोवा तुम्हर परमेसर के कीरति ला सुनके आय हवंय। काबरकि हमन ओकर बारे म सुने हवन: ओ जम्मो काम, जेला ओह मिसर देस म करिस,
JOS 9:10 अऊ ओ जम्मो, जेला ओह यरदन के पूरब कोति अमोरीमन के दूनों राजामन के संग करिस—याने कि हेसबोन के राजा सीहोन, अऊ बासान के राजा ओग के संग, जेमन असतारोत म राज करत रिहिन।
JOS 9:11 एकरसेति हमर अगुवा अऊ हमर देस के रहइया जम्मो झन हमन ला कहिन, ‘अपन रसता बर खाय-पीये के सामान ले जावव अऊ जाके ओमन ले मिलव अऊ ओमन ला कहव, “हमन तुम्हर सेवक अन; तुमन हमर संग एक करार करव।” ’
JOS 9:12 जऊन दिन हमन तुम्हर करा आय बर निकले रहेंन, ओ दिन हमन गरम रोटी लेके निकले रहेंन। पर अब देखव, येह सूखा गे हवय अऊ येमा फफूंद लग गे हवय।
JOS 9:13 अऊ जब हमन ये चमड़ा के थैलीमन म मंद ला भरे रहेंन, तब येमन नवां रिहिन, पर अब देखव, येमन कइसे फट गे हवंय। अऊ हमर ये ओनहा अऊ पनहीमन बहुंत दूरिहा ले यातरा करे के कारन फट गे हवंय।”
JOS 9:14 तब इसरायलीमन ओमन के खाय-पीये के सामान ला देखिन पर यहोवा ले पुछताछ नइं करिन।
JOS 9:15 तब यहोसू ह ओमन ले सांति के एक करार करिस अऊ ओमन ला जीयत छोंड़ दीस, अऊ इसरायली सभा के अगुवामन सपथ खाके येमा सहमती दीन।
JOS 9:16 गिबोनीमन संग करार करे के तीन दिन के बाद, इसरायलीमन ला पता चलिस कि ओमन परोसी रिहिन अऊ लकठा म रहिथें।
JOS 9:17 तब इसरायलीमन निकलिन अऊ तीसर दिन ओमन के सहर गिबोन, कपीरा, बेरोत अऊ किरयत-यारीम म आईन।
JOS 9:18 पर इसरायलीमन ओमन के ऊपर हमला नइं करिन, काबरकि सभा के अगुवामन ओमन के संग यहोवा, इसरायल के परमेसर के सपथ खाय रिहिन। सभा के जम्मो मनखेमन अगुवामन के बिरूध कुड़कुड़ाय लगिन।
JOS 9:19 पर जम्मो अगुवामन जबाब दीन, “हमन ओमन ले यहोवा, इसरायल के परमेसर के सपथ खाय हवन, एकरसेति अब हमन ओमन ला छू घलो नइं सकन।
JOS 9:20 हमन ओमन के संग अइसने कर सकत हन: हमन ओमन ला जीयत छोंड़ देवन, ताकि ओमन के संग हमर खाय सपथ के कारन हमर ऊपर परमेसर के कोप झन भड़कय।”
JOS 9:21 ओमन आगे कहिन, “ओमन ला जीयत छोंड़ दव, पर ओमन जम्मो सभा के सेवा म लकरी फोरइया अऊ पानी भरइया बनंय।” ये किसम ले ओमन के संग अगुवामन के करे सपथ ह बने रिहिस।
JOS 9:22 तब यहोसू ह गिबोनीमन ला बलाके पुछिस, “तुमन काबर ये कहिके हमर ले छल करेव, ‘हमन तुम्हर ले बहुंत दूरिहा देस म रहिथन,’ जबकि सही म तुमन हमर लकठा म रहिथव?
JOS 9:23 एकरसेति अब तुमन सरापित अव: तुमन मोर परमेसर के घर बर लकरी फोरइया अऊ पानी भरइया के सेवा ले कभू भी छूट नइं सकव।”
JOS 9:24 ओमन यहोसू ला जबाब दीन, “तोर सेवकमन ला साफ-साफ जरूर बताय गे रिहिस कि यहोवा तुम्हर परमेसर ह अपन सेवक मूसा ला हुकूम देय रिहिस कि तुमन ला ओह जम्मो देस दे दीही अऊ ओकर जम्मो निवासीमन ला तुम्हर आघू ले नास कर दीही। एकरसेति हमन ला तुम्हर कारन हमर परान गंवाय के भय हो गीस, अऊ ओकरे कारन हमन अइसने करेंन।
JOS 9:25 हमन अब तोर हांथ म हवन। तोला जऊन बात भी बने अऊ सही लगय, तेंह हमर संग वइसने कर।”
JOS 9:26 तब यहोसू ह ओमन ला इसरायलीमन ले बचाईस, अऊ ओमन गिबोनीमन के हतिया नइं करिन।
JOS 9:27 पर यहोसू ह ओही दिन ले ओमन ला सभा बर, अऊ जऊन ठऊर ला यहोवा ह चुनय, उहां ओकर बेदी बर लकरी फोरइया अऊ पानी भरइया बना दीस। अऊ ओमन आज तक वइसने ही हवंय।
JOS 10:1 जब यरूसलेम के राजा अदोनी-सेदेक ह सुनिस कि यहोसू ह अई नगर ला ले लीस, अऊ ओकर पूरा सतियानास कर डारिस, अऊ जइसन ओह यरीहो अऊ ओकर राजा ले करे रिहिस, वइसनेच अई सहर अऊ ओकर राजा ले घलो करे हवय, अऊ ये घलो सुनिस कि गिबोन के निवासीमन इसरायलीमन ले सांति के करार करे हवंय, अऊ ओमन के बीच रहत हवंय,
JOS 10:2 त ओ अऊ ओकर मनखेमन अब्बड़ डरा गीन, काबरकि गिबोन ह एक मुख्य सहर बरन राजनगर के सहीं रिहिस; ओह अई ले घलो बड़े नगर रिहिस, अऊ ओकर जम्मो आदमीमन बने योद्धा रिहिन।
JOS 10:3 एकरसेति यरूसलेम के राजा अदोनी-सेदेक ह हेबरोन के राजा होहाम, यरमूत के राजा पिराम, लाकीस के राजा यापी, अऊ एगलोन के राजा दबीर करा ये खबर भेजिस:
JOS 10:4 “आवव अऊ गिबोन ऊपर हमला करे म मोर मदद करव, काबरकि येह यहोसू अऊ इसरायलीमन के संग मिल गे हवय।”
JOS 10:5 तब यरूसलेम, हेबरोन, यरमूत, लाकीस अऊ एगलोन के पांचों अमोरी राजामन अपन-अपन सेना ला इकट्ठा करके एक हो गीन। ओमन अपन जम्मो सेना के संग आघू बढ़िन अऊ गिबोन के बिरूध हमला कर दीन।
JOS 10:6 तब गिबोन के निवासीमन गिलगाल के डेरा म यहोसू करा ये खबर पठोईन, “अपन सेवकमन ला झन तियाग दे। जल्दी करके आ अऊ हमन ला बचा! हमर मदद कर, काबरकि पहाड़ी देस के जम्मो अमोरी राजामन हमर बिरूध एक संग सेना इकट्ठा करे हवंय।”
JOS 10:7 तब यहोसू ह अपन पूरा सेना अऊ जम्मो बने योद्धामन ला लेके गिलगाल ले आघू बढ़िस।
JOS 10:8 अऊ यहोवा ह यहोसू ला कहिस, “ओमन ले झन डर, काबरकि मेंह ओमन ला तोर हांथ म कर दे हंव। ओमा के कोनो भी तोर आघू म ठहर नइं सकंय।”
JOS 10:9 पूरा रथिया गिलगाल ले आघू बढ़े के बाद, यहोसू ह अचानक ओमन ऊपर टूट परिस।
JOS 10:10 यहोवा ह अइसे करिस कि इसरायल के सामने ओमन घबरा गीन, अऊ यहोसू अऊ इसरायलीमन गिबोन म ओमन ला हरा दीन। इसरायलीमन बेत-होरोन जाय के रसता म ओमन के पीछा करिन अऊ अजेका अऊ मकेदा सहर तक ओमन ला मारत चले गीन।
JOS 10:11 जब ओमन इसरायलीमन के आघू ले बेत-होरोन के खाल्हे रसता ले अजेका कोति भागत रिहिन, तब यहोवा ह ओमन ऊपर अकास ले बड़े-बड़े ओला गिराईस, अऊ इसरायलीमन के तलवार ले मारे गय मनखे ले जादा मनखे ओला गिरे ले मर गीन।
JOS 10:12 जऊन दिन यहोवा ह अमोरीमन ला इसरायलीमन के बस म कर दीस, ओ दिन यहोसू ह इसरायलीमन के आघू म यहोवा ले कहिस: “हे सूरज, तेंह गिबोन के ऊपर, अऊ हे चंदा, तेंह अय्यालोन के घाटी ऊपर ठहर जा।”
JOS 10:13 तब सूरज ह ठहर गीस, अऊ चंदा ह रूक गीस, जब तक कि इसरायली मनखेमन अपन बईरीमन ले बदला नइं ले लीन, जइसे कि ये बात ह यासार नांव के किताब म लिखाय हवय। सूरज ह अकास के मांझा म ठहर गीस अऊ बेर के बुड़े म लगभग एक दिन के देरी होईस।
JOS 10:14 न तो ओकर पहिले कोनो अइसन दिन होय रिहिस अऊ न ही ओकर बाद होईस, एक अइसने दिन जब यहोवा ह कोनो मनखे के बात ला सुनिस। सही म यहोवा ह इसरायल कोति ले लड़त रिहिस!
JOS 10:15 तब यहोसू ह जम्मो इसरायलीमन के संग गिलगाल के डेरा म लहुंट गीस।
JOS 10:16 ओ पांचों राजा भागके मकेदा करा गुफा म जाके छुपे रिहिन।
JOS 10:17 जब यहोसू ला बताय गीस कि पांचों राजा मकेदा करा गुफा म छुपे हवंय,
JOS 10:18 त ओह कहिस, “गुफा के मुंहटा म बड़े-बड़े पथरा ला ढुलंगा दव, अऊ पहरा देय बर उहां कुछू मनखेमन ला ठहिरा दव।
JOS 10:19 पर तुमन उहां झन रूकव; अपन बईरीमन के पीछा करव! पाछू कोति ले ओमन ऊपर हमला करव अऊ ओमन ला ओमन के सहर म हबरन झन दव, काबरकि यहोवा तुम्हर परमेसर ह ओमन ला तुम्हर हांथ म कर दे हवय।”
JOS 10:20 जब यहोसू अऊ इसरायलीमन ओमन ला पूरा हरा दीन, पर कुछू मनखेमन बचके अपन गढ़वाले सहर म हबर गीन।
JOS 10:21 तब जम्मो सेना ह मकेदा के डेरा म यहोसू करा सुरकछित लहुंट गीस, अऊ इसरायलीमन के बिरूध काकरो मुहूं ले एको ठन भी सबद नइं निकलिस।
JOS 10:22 तब यहोसू ह कहिस, “गुफा के मुहूं ला खोलके ओ पांचों राजामन ला मोर करा लानव।”
JOS 10:23 अऊ ओमन ओ पांचों राजा ला गुफा ले निकालके लानिन—याने कि यरूसलेम, हेबरोन, यरमूत, लाकीस, अऊ एगलोन के राजा।
JOS 10:24 जब ओमन ओ राजामन ला यहोसू करा ले आईन, त ओह इसरायल के जम्मो मनखेमन ला बलाईस अऊ अपन संग आय सेना के सेनापतिमन ले कहिस, “इहां आवव अऊ अपन-अपन गोड़ ला ये राजामन के घेंच म मढ़ावव।” अऊ ओमन आघू आके अपन-अपन गोड़ ला ओमन के घेंच म मढ़ाईन।
JOS 10:25 तब यहोसू ह ओमन ले कहिस, “झन डरव; निरास झन होवव। मजबूत अऊ साहसी बनव। काबरकि यहोवा ह तुम्हर जम्मो ओ बईरीमन के संग अइसनेच करही, जेमन ले तुमन लड़नेवाला हव।”
JOS 10:26 एकर बाद, यहोसू ह ओ पांचों राजा ला मरवा दीस अऊ ओमन के लास ला पांच ठन खंभा म लटका दीस, अऊ ओमन के लासमन सांझ तक ओ खंभामन म लटके रिहिन।
JOS 10:27 बेर बुड़त बेरा, यहोसू ह हुकूम दीस अऊ मनखेमन लासमन ला खंभामन ले उतार लीन अऊ ओमन ला ओ गुफा म फटिक दीन, जिहां ओमन छुपे रिहिन। अऊ ओ गुफा के मुंहटा म बड़े-बड़े पथरा ला मढ़ा दीन, जेमन आज तक उहां हवंय।
JOS 10:28 ओहीच दिन यहोसू ह मकेदा ला ले लीस। ओह सहर के मनखे अऊ ओकर राजा ला तलवार ले मार डारिस अऊ ओमा के हर चीज ला पूरा नास कर दीस; कोनो ला भी जीयत नइं छोंड़िस। अऊ जइसन ओह यरीहो के राजा के संग करे रिहिस, वइसने ही ओह मकेदा के राजा के संग करिस।
JOS 10:29 तब यहोसू अऊ जम्मो इसरायलीमन मकेदा ले आघू बढ़के लिबना नगर म आईन अऊ लिबना ऊपर हमला करिन।
JOS 10:30 यहोवा ह ओ सहर अऊ ओकर राजा ला घलो इसरायलीमन के हांथ म कर दीस। ओ सहर अऊ ओमा के जम्मो मनखे ला यहोसू ह तलवार ले मार डारिस। ओह कोनो ला भी उहां जीयत नइं छोंड़िस अऊ ओह ओ सहर के राजा के संग वइसनेच करिस, जइसने ओह यरीहो के राजा के संग करे रिहिस।
JOS 10:31 फेर यहोसू अऊ जम्मो इसरायलीमन लिबना ले आघू बढ़के लाकीस नगर म आईन; ओह ओकर बिरूध तियारी करके ओकर ऊपर हमला करिस।
JOS 10:32 अऊ यहोवा ह लाकीस ला इसरायल के हांथ म कर दीस, अऊ दूसर दिन यहोसू ओला ले लीस। ओ सहर अऊ ओमा के जम्मो मनखे ला ओह तलवार ले मार डारिस, जइसने कि ओह लिबना के मनखेमन संग करे रिहिस।
JOS 10:33 ये बीच म गेजेर सहर के राजा हीराम ह लाकीस के मदद करे बर आ गे रिहिस, पर यहोसू ह ओला अऊ ओकर सेना ला हरा दीस—ओकर कोनो भी जीयत नइं बचिन।
JOS 10:34 तब यहोसू अऊ जम्मो इसरायलीमन लाकीस ले आघू बढ़के एगलोन नगर म आईन; ओमन ओकर बिरूध तियारी करके ओकर ऊपर हमला कर दीन।
JOS 10:35 अऊ ओहीच दिन ओमन ओकर ऊपर कब्जा कर लीन, अऊ जम्मो झन ला तलवार ले मार डारिन अऊ ओमा के हर एक जन ला पूरा नास कर दीन, जइसे कि ओमन लाकीस के संग करे रिहिन।
JOS 10:36 फेर यहोसू अऊ जम्मो इसरायलीमन एगलोन ले आघू बढ़के हेबरोन सहर म आईन अऊ ओकर ऊपर हमला करिन।
JOS 10:37 अऊ ओमन सहर ला ले लीन अऊ ओकर राजा, ओकर गांव अऊ ओमा के हर मनखे ला तलवार ले मार डारिन। ओमन कोनो ला भी जीयत नइं छोंड़िन। एगलोन के सहीं, ओमन ओला अऊ ओमा के हर एक जन ला पूरा नास कर दीन।
JOS 10:38 तब यहोसू अऊ जम्मो इसरायलीमन मुड़के दबीर सहर ऊपर हमला करिन।
JOS 10:39 अऊ ओमन सहर ला ओकर राजा अऊ ओकर गांवमन सहित ले लीन अऊ ओमन ला तलवार ले मार डारिन। ओमा के हर एक जन ला ओमन पूरा नास कर दीन। ओमन कोनो ला भी जीयत नइं छोंड़िन। ओमन दबीर अऊ ओकर राजा के संग वइसने ही करिन, जइसने ओमन लिबना अऊ ओकर राजा अऊ हेबरोन के संग करे रिहिन।
JOS 10:40 ये किसम ले यहोसू ह ओ जम्मो छेत्र ला अपन अधीन म कर लीस—याने कि पहाड़ी देस, नेगेव, पछिम के खाल्हे के पहाड़ीमन अऊ पहाड़ी ढलान अऊ ओमन के जम्मो राजामन। ओह कोनो ला भी जीयत नइं छोंड़िस। ओह जम्मो जीयत परानी ला पूरा नास कर दीस, जइसे कि यहोवा, इसरायल के परमेसर ह हुकूम दे रिहिस।
JOS 10:41 यहोसू ह कादेस-बरने सहर ले लेके गाजा अऊ गोसेन के पूरा इलाका ले लेके गिबोन तक अपन अधीन म कर लीस।
JOS 10:42 ये जम्मो राजा अऊ ओमन के देसमन ला यहोसू ह एकेच सैनिक अभियान म जीत लीस, काबरकि यहोवा, इसरायल के परमेसर ह इसरायलीमन बर लड़िस।
JOS 10:43 तब यहोसू ह जम्मो इसरायलीमन के संग गिलगाल के डेरा म लहुंट आईस।
JOS 11:1 जब हासोर के राजा याबीन ह इसरायल के जीत के बात ला सुनिस, त ओह मादोन के राजा योबाब, अऊ सिमरोन अऊ अछाप के राजामन ला,
JOS 11:2 अऊ जऊन राजामन उत्तर कोति पहाड़ी देस म, अऊ किन्नेरेत के दक्खिन के अराबा म, अऊ खाल्हे पछिमी पहाड़ी देस म, अऊ पछिम कोति नपोत-दोर म रहत रिहिन ओमन ला;
JOS 11:3 पूरब अऊ पछिम म कनानीमन ला, अमोरी, हित्ती, परिज्जी, अऊ पहाड़ी देस म यबूसीमन ला, अऊ मिसपा के इलाका म हेरमोन के खाल्हे हिब्बीमन ला खबर पठोईस।
JOS 11:4 ये जम्मो राजामन अपन पूरा सेना अऊ बड़े संखिया म घोड़ा अऊ रथमन ला लेके निकल आईन—एक बहुंत बड़े सेना, समुंदर तीर के बालू सहीं अब्बड़ रिहिन।
JOS 11:5 ये जम्मो राजामन के सेनामन एक संग हो गीन अऊ इसरायलीमन ले लड़े बर मेरोम नांव के पानी के जगह म आके एक संग डेरा डालिन।
JOS 11:6 तब यहोवा ह यहोसू ला कहिस, “ओमन ले झन डर, काबरकि कल एहीच बेरा मेंह ओ जम्मो ला इसरायलीमन के बस म करके मरवा डारहूं; तुमन ला ओमन के घोड़ामन के माड़ी के नस ला काटके ओमन के रथमन ला जला देना हे।”
JOS 11:7 अऊ यहोसू अऊ ओकर जम्मो सेना मेरोम नांव के पानी के जगह म आके अचानक ओमन ऊपर हमला कर दीन,
JOS 11:8 अऊ यहोवा ह ओमन ला इसरायलीमन के हांथ म कर दीस। इसरायलीमन ओमन ला हरा दीन अऊ बड़े नगर सीदोन अऊ मिसरपोत-मैम तक, अऊ पूरब म मिसपा के घाटी तक ओमन के पीछा करिन; अऊ ओमन ला मारत गीन, अऊ कोनो ला भी जीयत नइं छोंड़िन।
JOS 11:9 यहोसू ह यहोवा के हुकूम के मुताबिक ओमन के संग करिस: ओह ओमन के घोड़ामन के माड़ी के नस ला कटवाईस, अऊ ओमन के रथमन ला आगी म जला दीस।
JOS 11:10 ओ बेरा, यहोसू ह मुड़िस अऊ हासोर ऊपर कब्जा करके ओकर राजा ला तलवार ले मार डारिस। (हासोर ह ये जम्मो राजमन के मुखिया रिहिस।)
JOS 11:11 अऊ उहां के जम्मो झन ला ओमन तलवार ले मार डारिन। इसरायलीमन ओमन ला पूरा नास कर दीन, कोनो ला भी जीयत नइं छोंड़िन, अऊ हासोर ला जला दीन।
JOS 11:12 यहोसू ह ये जम्मो साही नगर अऊ ओमन के राजामन ला लीस अऊ ओमन ला तलवार ले मार डारिस। यहोवा के सेवक मूसा के हुकूम के मुताबिक ओह ओमन ला पूरा नास कर दीस।
JOS 11:13 पर हासोर ला छोंड़, जेला यहोसू ह जला दीस, इसरायलीमन टीलामन म बसे अऊ कोनो नगर ला नइं जलाईन।
JOS 11:14 ये नगरमन के पसु अऊ येमा के जम्मो लूट के सामान ला इसरायलीमन अपन बर ले लीन, पर जम्मो मनखेमन ला ओमन तब तक तलवार ले मारिन, जब तक कि ओमन पूरा नास नइं हो गीन, ओमन के एको झन ला घलो जीयत नइं छोंड़िन।
JOS 11:15 जइसे यहोवा ह अपन सेवक मूसा ला हुकूम देय रिहिस, वइसे ही मूसा ह यहोसू ला हुकूम दीस, अऊ यहोसू ह वइसने ही करिस; जऊन-जऊन हुकूम यहोवा ह मूसा ला देय रिहिस, यहोसू ह ओमा के एको ठन ला घलो अधूरा नइं छोंड़िस।
JOS 11:16 ये किसम ले यहोसू ह ओ पूरा देस ला ले लीस: पहाड़ी देस, जम्मो नेगेव, गोसेन के जम्मो इलाका, खाल्हे के पछिमी पहाड़ी देस, अराबा अऊ इसरायल के पहाड़मन के संग ओमन के खाल्हे के पहाड़ीमन,
JOS 11:17 हालाक नांव के पहाड़ ले लेके, जऊन ह सेईर कोति उठे हवय, बाल-गाद तक, जऊन ह लबानोन के घाटी म हेरमोन पहाड़ के खाल्हे म हवय। यहोसू ह ओमन के जम्मो राजामन ला पकड़के मार डारिस।
JOS 11:18 ये जम्मो राजामन के बिरूध यहोसू ह बहुंत लम्बा समय तक लड़ई करिस।
JOS 11:19 गिबोन म रहइया हिब्बीमन ला छोंड़ अऊ कोनो सहर के मनखेमन इसरायलीमन ले सांति के करार नइं करिन; आने जम्मो नगरमन ला ओमन लड़ई म जीत लीन।
JOS 11:20 काबरकि यहोवा ह खुद ओमन के मन ला कठोर कर दे रिहिस, ताकि ओमन इसरायलीमन के बिरूध लड़ई करंय, अऊ ओह ओमन ला बिगर कोनो दया के पूरा नास कर देवय, जइसे कि यहोवा ह मूसा ला हुकूम दे रिहिस।
JOS 11:21 ओ बेरा यहोसू ह जाके पहाड़ी देस ले अनाकीमन ला नास कर दीस: हेबरोन, दबीर अऊ अनाब, यहूदा के जम्मो पहाड़ी देस, अऊ इसरायल के जम्मो पहाड़ी देस म रहइया अनाकीमन ला नास कर दीस। यहोसू ह ओमन ला अऊ ओमन के नगरमन ला पूरा नास कर दीस।
JOS 11:22 इसरायलीमन के इलाका म कोनो अनाकीमन नइं बचिन; सिरिप गाजा, गत अऊ असदोद म कोनो-कोनो बच गीन।
JOS 11:23 ये किसम ले यहोवा के मूसा ला दिये निरदेस के मुताबिक यहोसू ह ओ जम्मो देस ऊपर अधिकार कर लीस, अऊ ओह येला इसरायलीमन ला ओमन के गोत्रमन के मुताबिक एक उत्तराधिकार के रूप म दे दीस। तब देस ला लड़ई ले सांति मिलिस।
JOS 12:1 यरदन नदी के पार पूरब कोति, याने कि अरनोन घाटी ले लेके हेरमोन पहाड़ तक के देस अऊ अराबा के जम्मो पूरबी इलाका के जऊन राजामन ला इसरायलीमन मारके ओमन के देस ला अपन अधिकार म कर लेय रिहिन, ओ राजामन ये अंय:
JOS 12:2 अमोरीमन के राजा सीहोन, जऊन ह हेसबोन म राज करत रिहिस। ओह अरनोन घाटी के तीर के अरोएर नगर ले लेके—घाटी के मांझा ले लेके—यब्बोक नदी तक, जऊन ह अमोनीमन के सीमना अय। येमा गिलाद के आधा भाग सामिल रिहिस।
JOS 12:3 ओह पूरबी अराबा ऊपर गलील समुंदर ले लेके अराबा के समुंदर (जेला मिरतू सागर कहे जाथे), बेत-यसीमोत, अऊ तब दक्खिन कोति पिसगा पहाड़ के ढलान के खाल्हे तक राज करत रिहिस।
JOS 12:4 बासान के राजा ओग के इलाका, जऊन ह रपाईमन के बचे आखिरी राजामन ले एक झन रिहिस; ओह असतारोत अऊ एदरेई म सासन करत रिहिस।
JOS 12:5 ओह हेरमोन पहाड़, सलका नगर, गसूर अऊ माका के मनखेमन के सीमना तक पूरा बासान, अऊ हेसबोन के राजा सीहोन के सीमना तक आधा गिलाद म राज करत रिहिस।
JOS 12:6 यहोवा के सेवक मूसा अऊ इसरायलीमन ओमन ला हरा दीन; अऊ यहोवा के सेवक मूसा ह ओमन के देस ला रूबेनी, गादी अऊ मनस्से के आधा गोत्र के मनखेमन के अधिकार म दे दीस।
JOS 12:7 यरदन के पछिम कोति, लबानोन के घाटी म बाल-गाद सहर ले लेके सेईर कोति उठे हालाक पहाड़ तक के देस के जऊन राजामन ला यहोसू अऊ इसरायलीमन हराय रिहिन अऊ जेमन के देस ला यहोसू ह इसरायलीमन ला ओमन के गोत्र अऊ कुल के मुताबिक ओमन के उत्तराधिकार म दे दीस, ओमन ये अंय:
JOS 12:8 येमा पहाड़ी देस, पछिम म खाल्हे के पहाड़ीमन, अराबा, पहाड़ के ढलानमन, निरजन प्रदेस अऊ नेगेव सामिल रिहिन। येमन हित्ती, अमोरी, कनानी, परिज्जी, हिब्बी, अऊ यबूसीमन के देस रिहिन।
JOS 12:9 एक, यरीहो के राजा; एक, बेतेल के लकठा के अई के राजा;
JOS 12:10 एक, यरूसलेम के राजा; एक, हेबरोन के राजा;
JOS 12:11 एक, यरमूत के राजा; एक, लाकीस के राजा;
JOS 12:12 एक, एगलोन के राजा; एक, गेजेर के राजा;
JOS 12:13 एक, दबीर के राजा; एक, गेदेर के राजा;
JOS 12:14 एक, होरमा के राजा; एक, अराद के राजा;
JOS 12:15 एक, लिबना के राजा; एक, अदुल्लाम के राजा;
JOS 12:16 एक, मकेदा के राजा; एक, बेतेल के राजा;
JOS 12:17 एक, तप्पूह के राजा; एक, हेपेर के राजा;
JOS 12:18 एक, अपेक के राजा; एक, लसारोन के राजा;
JOS 12:19 एक, मादोन के राजा; एक, हासोर के राजा;
JOS 12:20 एक, सिमरोन-मरोन के राजा; एक, अछाप के राजा;
JOS 12:21 एक, तानाक के राजा; एक, मगिद्दो के राजा;
JOS 12:22 एक, केदेस के राजा; एक, करमेल म योकनाम के राजा;
JOS 12:23 एक, नपोत-दोर म दोर के राजा; एक, गिलगाल म गोयीम के राजा;
JOS 12:24 एक, तिरसा के राजा;
JOS 13:1 जब यहोसू ह बहुंत डोकरा हो गीस, त यहोवा ह ओला कहिस, “तेंह अब बहुंत डोकरा हो गे हस, अऊ अभी घलो देस के एक बड़े भाग ऊपर इसरायल ला अधिकार करना बाकि हवय।
JOS 13:2 “ये देसमन ला लेना बाकि हे: “पलिस्ती अऊ गसूरीमन के जम्मो देस,
JOS 13:3 मिसर के पूरब कोति सीहोर नदी ले लेके उत्तर कोति एकरोन के इलाका, ये जम्मो ला कनानीमन के भाग गने जावय, हालाकि ये इलाका पांच पलिस्ती हाकिममन के अधीन रिहिस, जेमन गाजा, असदोद, अस्कलोन, गत अऊ एकरोन नगर म रिहिन; दक्खिन कोति अव्वीमन के इलाका;
JOS 13:4 कनानीमन के पूरा देस, सीदोनीमन के आरा ले लेके अपेक अऊ अमोरीमन के सीमना तक;
JOS 13:5 गबालीमन के इलाका; अऊ पूरब कोति जम्मो लबानोन, हेरमोन पहाड़ के खाल्हे बाल-गाद ले लेके लेबो-हमात तक।
JOS 13:6 “फेर लबानोन ले लेके मिसरपोत-मैम तक पहाड़ी इलाका के जम्मो निवासीमन, येमन जम्मो सीदोनीमन रिहिन, येमन ला मेंह खुद इसरायलीमन के आघू ले भगा दूहूं। धियान रहय कि तें मोर हुकूम के मुताबिक चिट्ठी निकालके ये देस इसरायल ला बांट देबे।
JOS 13:7 ये देस ला नौ गोत्र अऊ मनस्से के आधा गोत्र के मनखेमन के बीच ओमन के उत्तराधिकार के रूप म बांट दे।”
JOS 13:8 मनस्से के आधा गोत्र, रूबेनी अऊ गादीमन ला ओमन के भाग मिल गे रिहिस, मूसा ह ओमन ला यरदन के पूरब कोति ओमन के उत्तराधिकार देय रिहिस, जइसे कि ओ यहोवा के दास ह ओमन ला ओ भाग देय रिहिस।
JOS 13:9 येह अरनोन नांव के घाटी के तीर के अरोएर ले लेके, अऊ ओही घाटी के बीच के नगर ले लेके दीबोन तक मेदबा के पूरा पठार,
JOS 13:10 अऊ अमोरीमन के राजा सीहोन के जम्मो नगर, जऊन ह अमोनीमन के सीमना के बाहिर, हेसबोन सहर म राज करत रिहिस।
JOS 13:11 अऊ गिलाद देस, अऊ गसूर अऊ माकावासीमन के सीमना, अऊ जम्मो हेरमोन पहाड़, अऊ सलका तक जम्मो बासान,
JOS 13:12 फेर असतारोत अऊ एदरेई म सासन करइया ओ बासान म ओग के जम्मो राज, जऊन ह रपाईमन म अकेला बांच गे रिहिस; काबरकि येमन ला मूसा ह मारके येमन के देस ला लेय ले रिहिस।
JOS 13:13 पर इसरायलीमन गसूर अऊ माका के मनखेमन ला ओमन के देस ले नइं निकालिन; एकरसेति ओमन इसरायलीमन के बीच म आज तक रहत हवंय।
JOS 13:14 पर लेवी के गोत्र ला ओह कोनो भाग नइं दीस; काबरकि यहोवा, इसरायल के परमेसर ला चघाय गय जेवन-बलिदान ह ओमन के भाग अय, जइसे कि ओह ओमन ले वायदा करे रिहिस।
JOS 13:15 मूसा ह रूबेन के गोत्र ला ओमन के कुलमन के मुताबिक ये भाग देय रिहिस:
JOS 13:16 अरनोन नांव के घाटी के तीर म अरोएर ले लेके, अऊ ओही घाटी के बीच के नगर, अऊ मेदबा के लकठा के जम्मो पठार ले लेके
JOS 13:17 हेसबोन अऊ पठार म येकर जम्मो नगरमन रिहिन; येमा दीबोन, बामोत-बाल, बेत-बाल-मेओन,
JOS 13:18 यहस, कदेमोत, मेपात,
JOS 13:19 किरयातैम, सिबमा, अऊ घाटी के पहाड़ी म बसे हुए सेरेत-सहर,
JOS 13:20 बेत-पोर, पिसगा के ढलानमन अऊ बेत-यसीमोत—
JOS 13:21 पठार के जम्मो नगरमन अऊ अमोरीमन के राजा सीहोन के जम्मो राज, जऊन ह हेसबोन म राज करत रिहिस। मूसा ह ओला, अऊ मिदयानी मुखियामन ला, एवी, रेकेम, सूर, हूर अऊ रेबा ला हराय रिहिस—येमन सीहोन के संगी हाकिममन रिहिन अऊ ओही देस म रहत रिहिन।
JOS 13:22 लड़ई म मारे गय येमन के अलावा, इसरायलीमन बेओर के बेटा बिलाम ला घलो तलवार ले मार डारिन, जऊन ह सकुन-बिचार करय।
JOS 13:23 रूबेनीमन के सीमना ह यरदन के किनारा रिहिस। रूबेनीमन ला ओमन के कुलमन के मुताबिक ये नगर अऊ ओमन के गांवमन उत्तराधिकार म मिले रिहिन।
JOS 13:24 मूसा ह गाद के गोत्र ला ओमन के कुलमन के मुताबिक ये भाग देय रिहिस:
JOS 13:25 याजेर के इलाका, गिलाद के जम्मो नगर अऊ रब्बा के लकठा म अरोएर तक अमोनीमन के आधा देस,
JOS 13:26 अऊ हेसबोन ले लेके रामत-मिसपा अऊ बतोनीम तक, अऊ महनैम ले लेके दबीर के इलाका तक;
JOS 13:27 अऊ घाटी म, बेत-हारम, बेत-निमरा, सुक्कोत अऊ सापोन, अऊ हेसबोन के राजा सीहोन के राज के बांचे भाग (यरदन नदी के पूरब कोति, गलील समुंदर के आखिरी छोर तक के इलाका)।
JOS 13:28 गादीमन ला ओमन के कुलमन के मुताबिक ये नगर अऊ ओमन के गांवमन बांटा म मिले रिहिन।
JOS 13:29 मनस्से के आधा गोत्र ला मूसा ह ये भाग देय रिहिस; येह मनस्से के संतानमन के आधा परिवार ला ओमन के कुलमन के मुताबिक दिये गे रिहिस:
JOS 13:30 महनैम के इलाका ले लेके जम्मो बासान तक, बासान के राजा ओग के जम्मो राज—बासान म याईर के बसे जम्मो साठ नगर,
JOS 13:31 गिलाद के आधा भाग, अऊ असतारोत अऊ एदरेई (बासान म ओग के साही सहरमन)।
JOS 13:32 ये ओ भागमन अंय, जेला मूसा तब देय रिहिस, जब ओह यरीहो के पूरब कोति, यरदन नदी के ओ पार, मोआब के मैदान म रिहिस।
JOS 13:33 पर लेवी के गोत्र ला, मूसा ह कोनो भाग नइं दीस; यहोवा, इसरायल के परमेसर ह ओमन के भाग अय, जइसे कि ओह ओमन ले वायदा करे रिहिस।
JOS 14:1 एलिआजर पुरोहित, नून के बेटा यहोसू अऊ इसरायली गोत्रमन के अगुवामन कनान देस म इसरायलीमन ला ओमन के उत्तराधिकार के रूप म जऊन इलाकामन ला दीन, ओमन ये अंय।
JOS 14:2 जइसे कि यहोवा ह मूसा के जरिये हुकूम देय रिहिस, ओकर मुताबिक साढ़े नौ गोत्रमन ला ओमन के उत्तराधिकार चिट्ठी डार-डारके देय गीस।
JOS 14:3 मूसा ह अऊ बांचे अढ़ई गोत्र के मनखेमन ला ओमन के उत्तराधिकार यरदन के पूरब कोति देय रिहिस पर लेवीमन ला ओह बाकि मनखेमन के बीच कोनो उत्तराधिकार नइं देय रिहिस,
JOS 14:4 काबरकि यूसुफ के संतानमन दू ठन गोत्र बन गे रिहिन—मनस्से अऊ एपरैम। ओ देस म लेवीमन ला कुछू भाग नइं देय गे रिहिस; पर ओमन ला सिरिप रहे बर नगरमन, अऊ संग म ओमन के गरूवा-बईला अऊ भेड़-बकरी बर चरागनमन मिले रिहिस।
JOS 14:5 ये किसम ले मूसा ला यहोवा के दिये हुकूम के मुताबिक इसरायलीमन देस ला बांट लीन।
JOS 14:6 तब गिलगाल म यहूदा के मनखेमन यहोसू करा आईन, अऊ कनजी यपुन्ने के बेटा कालेब ह ओला कहिस, “तेंह जानत हस कि यहोवा ह कादेस-बरने नगर म परमेसर के जन मूसा ला तोर अऊ मोर बारे म का कहे रिहिस।
JOS 14:7 जब यहोवा के दास मूसा ह मोला कादेस-बरने ले ये देस के खोजबीन करे बर पठोय रिहिस, तब मेंह चालीस बछर के रहेंव। अऊ मेंह अपन सही बिसवास से ओकर करा सूचना लेके वापिस आयेंव,
JOS 14:8 पर मोर संगी इसरायली, जेमन मोर संग म गेय रिहिन, ओमन अपन बात ले मनखेमन ला डरवा दीन। तभो ले मेंह यहोवा अपन परमेसर के पाछू पूरा मन से चलेंव।
JOS 14:9 तब ओ दिन मूसा ह सपथ खाके मोर ले कहिस: ‘जऊन भुइयां म तेंह अपन गोड़ ला मढ़ाके आय हस, ओह सदाकाल बर तोर अऊ तोर संतानमन के भाग होही, काबरकि तेंह पूरा मन से यहोवा मोर परमेसर के पाछू चले हस।’
JOS 14:10 “अऊ तब ले, जइसे यहोवा ह वायदा करे रिहिस, मूसा ला ये कहे के बाद, ओह मोला पैंतालीस साल तक जीयत रखे हवय, जबकि इसरायलीमन सुन्ना जगह म फिरत रिहिन। आज मेंह इहां हंव अऊ मेंह पचयासी साल के हो गे हंव!
JOS 14:11 में आज घलो ओतेक मजबूत हंव, जतेक मजबूत में ओ समय रहेंव, जब मूसा ह मोला पठोय रिहिस; मेंह आज घलो लड़ई म जाय बर वइसे ताकतवर हंव, जइसे मेंह ओ समय रहेंव।
JOS 14:12 ये खातिर ये पहाड़ी देस मोला दे, जेकर वायदा यहोवा ह ओ दिन मोर ले करे रिहिस। तेंह खुद ओ समय सुने रहय कि उहां अनाकीमन रिहिन अऊ ओमन के सहरमन बड़े अऊ दीवारवाले रिहिन, पर यहोवा के मदद ले, ओकर कहे मुताबिक मेंह अनाकीमन ला भगा दूहूं।”
JOS 14:13 तब यहोसू ह यपुन्ने के बेटा कालेब ला आसीरबाद दीस अऊ हेबरोन सहर ला ओकर उत्तराधिकार के रूप म दीस।
JOS 14:14 एकरसेति हेबरोन ह तब ले, कनजी यपुन्ने के बेटा कालेब के हो गीस, काबरकि ओह यहोवा, इसरायल के परमेसर के पाछू पूरा मन से चलिस।
JOS 14:15 (पहिले हेबरोन के नांव अरबा के कारन किरयत-अरबा रिहिस; काबरकि अरबा ह अनाकीमन के बीच सबले बड़े मनखे रिहिस।) तब ओ देस ला लड़ई ले सांति मिलिस।
JOS 15:1 यहूदा के गोत्र के भाग ओकर कुलमन के मुताबिक खाल्हे एदोम के इलाका, अऊ दक्खिन के आखिरी छोर म सीन के सुन्ना जंगल तक रिहिस।
JOS 15:2 ओमन के दक्खिनी सीमना मिरतू सागर के दक्खिनी छोर के खाड़ी ले सुरू होके
JOS 15:3 अकरबीम नांव के चढ़ई के दक्खिन कोति ले निकलके सीन होवत कादेस-बरने के दक्खिन तक गे हवय। तब येह हेसरोन के बाजू ले होवत अद्दार तक जाथे अऊ करका के चारों कोति मुड़ गे हवय।
JOS 15:4 येह तब असमोन सहर ले होवत मिसर के नरवा म जुड़ गीस, अऊ भूमध्य सागर म खतम होईस। येह ओमन के दक्खिन के सीमना ए।
JOS 15:5 पूरबी सीमना ह यरदन के मुंहाटी तक मिरतू सागर ए। उत्तरी दिग के सीमना ह यरदन नदी के मुंहाटी म समुंदर के खाड़ी ले सुरू होके,
JOS 15:6 बेत-होगला तक गीस अऊ फेर आघू बेत-अराबा के उत्तर कोति ले होवत रूबेन के बेटा बोहन नांव के पथरा तक चघ गीस।
JOS 15:7 ओही सीमना ह तब आकोर के घाटी ले ऊपर दबीर तक गीस अऊ उत्तर कोति मुड़के गिलगाल तक गीस, जऊन ह संकरी घाटी के दक्खिन कोति अदुमीम के चघई के आघू म हवय। येह आघू बढ़त एन-सेमेस के सोता ले होवत एन-रोगेल करा निकलिस।
JOS 15:8 तब येह यबूसी सहर याने कि यरूसलेम के दक्खिनी ढलान ले होवत बेन-हिन्नोम के घाटी तक गीस। उहां ले येह रपाईम घाटी के उत्तरी छोर म हिन्नोम के घाटी के पछिमी पहाड़ी के टीप तक गीस।
JOS 15:9 पहाड़ी के टीप ले ओही सीमना ह नेपतोह के पानी के सोता कोति गीस, अऊ एपरोन पहाड़ के नगरमन म निकलिस; फेर उहां ले खाल्हे बालाह सहर (जेला किरयत-यारीम कहे जाथे) कोति गीस।
JOS 15:10 फेर येह बालाह ले मुड़के पछिम कोति सेईर पहाड़ तक हबरिस, अऊ यारीम पहाड़ (जेला कसालोन घलो कहे जाथे) के उत्तरी ढलान ले होवत खाल्हे बेत-सेमेस करा आईस अऊ फेर तिमना नगर करा निकलिस।
JOS 15:11 उहां ले ये सीमना ह एकरोन सहर के उत्तरी ढलान करा गीस, अऊ मुड़के सिक्करोन सहर कोति गीस, अऊ बालाह पहाड़ म ले होवत यबनेल करा हबरिस अऊ ओ सीमना ह समुंदर करा खतम हो गीस।
JOS 15:12 पछिम के सीमना ह भूमध्य सागर के किनारा ठहिरिस।
JOS 15:13 यहोसू ह यपुन्ने के बेटा कालेब ला यहोवा के हुकूम के मुताबिक यहूदा म एक भाग दीस, याने कि किरयत-अरबा, जेला हेबरोन घलो कहे जाथे। (अरबा ह अनाक के पुरखा रिहिस।)
JOS 15:14 हेबरोन ले कालेब ह तीन अनाकीमन ला निकाल दीस—येमन अनाक के बेटा सेसै, अहीमन, अऊ तलमै रिहिन।
JOS 15:15 फेर उहां ले ओह दबीर नगर म रहइया मनखेमन के बिरूध आघू बढ़िस (पहिले दबीर ला किरयत-सेपेर कहे जावय)।
JOS 15:16 अऊ कालेब ह कहिस, “जऊन मनखे ह किरयत-सेपेर ऊपर हमला करके ओला अपन अधीन म कर लीही, ओकर संग मेंह अपन बेटी अकसा के बिहाव कर दूहूं।”
JOS 15:17 तब कालेब के भाई कनज के बेटा ओतनीएल ह ये काम ला करिस; एकरसेति कालेब ह ओकर संग अपन बेटी अकसा के बिहाव कर दीस।
JOS 15:18 एक दिन जब अकसा ह ओतनीएल करा आईस, त ओह ओतनीएल ले बिनती करिस कि ओह अकसा के ददा कालेब ले एक ठन खेत मांगय। जब अकसा ह अपन गदहा ले उतरिस, त कालेब ह ओकर ले पुछिस, “तेंह का चाहत हस कि मेंह तोर बर करंव?”
JOS 15:19 ओह जबाब दीस, “मोर ऊपर एक बिसेस किरपा कर। जब तेंह मोला नेगेव म कुछू भुइयां दे हस, त मोला पानी के सोतामन ला घलो दे।” तब कालेब ह ओला ऊपर अऊ खाल्हे के पानी के सोतामन ला दे दीस।
JOS 15:20 येह यहूदा गोत्र के येकर कुलमन के मुताबिक उत्तराधिकार ए:
JOS 15:21 नेगेव म एदोम के सीमना कोति यहूदा गोत्र के दक्खिनी छोर के नगरमन ये रिहिन: कबसेल, एदेर यागूर,
JOS 15:22 कीना, दीमोना, अदादा,
JOS 15:23 केदेस, हासोर, यितनान,
JOS 15:24 जीप, तेलेम, बालोत,
JOS 15:25 हासोर-हदत्ता, करियोत-हेसरोन (जेला हासोर घलो कहे जाथे),
JOS 15:26 अमाम, सेमा, मोलादा,
JOS 15:27 हसर-गद्दा, हेसमोन, बेत-पेलेत,
JOS 15:28 हसर-सूआल, बेरसेबा, बिजयोतिया,
JOS 15:29 बालाह, इय्यीम, एसेम
JOS 15:30 एलतोलद, कसील, होरमा,
JOS 15:31 सिकलग, मदमन्ना, सनसन्ना,
JOS 15:32 लबाओत, सिल्हीम, ऐन, अऊ रिम्मोन—कुल मिलाके उनतीस नगर अऊ येमन के गांवमन।
JOS 15:33 पछिमी पहाड़ीमन के खाल्हे म: एसताओल, सोरा, असना,
JOS 15:34 जानोह, एन-गन्नीम, तप्पूह, एनाम,
JOS 15:35 यरमूत, अदुल्लाम, सोको, अजेका,
JOS 15:36 सारैम, अदीतैम अऊ गदेरा (या गदेरोतैम)—कुल चौदह नगर अऊ येमन के गांवमन घलो हवंय।
JOS 15:37 फेर सनान, हदासा, मिगदल-गाद,
JOS 15:38 दिलान, मिसपा, योकतेल,
JOS 15:39 लाकीस, बोसकत, एगलोन,
JOS 15:40 कब्बोन, लहमास, कितलीस,
JOS 15:41 गदेरोत, बेत-दागोन, नामा, अऊ मकेदा—कुल सोलह नगर अऊ येमन के गांवमन घलो हवंय।
JOS 15:42 फेर लिबना, एतेर, आसान,
JOS 15:43 यिप्तह, असना, नसीब,
JOS 15:44 कीला, अकजीब, अऊ मारेसा—कुल नौ नगर अऊ येमन के गांवमन घलो हवंय।
JOS 15:45 फेर एकरोन, येकर बसाहट अऊ गांवमन समेत;
JOS 15:46 एकरोन के पछिम म, ओ जम्मो जऊन मन असदोद के आसपास रिहिन अऊ संग म ओमन के गांवमन घलो;
JOS 15:47 असदोद, येकर आसपास के बसाहट अऊ गांवमन; अऊ गाजा, येकर बसाहट अऊ गांवमन, मिसर के नरवा अऊ भूमध्य सागर के तीर तक।
JOS 15:48 पहाड़ी देस म: सामीर, यत्तीर, सोको,
JOS 15:49 दन्ना, किरयत-सन्ना (जऊन ला दबीर घलो कहे जाथे),
JOS 15:50 अनाब, एसतमो आनीम,
JOS 15:51 गोसेन, होलोन, अऊ गीलो—कुल गियारह नगर अऊ येमन के गांवमन घलो हवंय।
JOS 15:52 फेर अरब, दूमा, एसान,
JOS 15:53 यानीम, बेत-तप्पूह, अपेका,
JOS 15:54 हुमता, किरयत-अरबा, (जऊन ला हेबरोन घलो कहे जाथे) अऊ सीओर—कुल नौ नगर अऊ येमन के गांवमन घलो हवंय।
JOS 15:55 फेर माओन, करमेल, जीप, यूता,
JOS 15:56 यिजरेल, योकदाम, जानोह,
JOS 15:57 कैन, गिबा, अऊ तिमना—कुल दस नगर अऊ येमन के गांवमन घलो हवंय।
JOS 15:58 फेर हलहूल, बेत-सूर, गदोर,
JOS 15:59 मरात, बेत-अनोत, अऊ एलतकोन—कुल छै नगर अऊ येमन के गांवमन घलो हवंय।
JOS 15:60 फेर किरयत-बाल, (जऊन ला किरयत-यारीम घलो कहे जाथे) अऊ रब्बा—कुल दू ठन नगर अऊ येमन के गांवमन घलो हवंय।
JOS 15:61 निरजन जगह म: बेत-अराबा, मिद्दीन, सकाका,
JOS 15:62 निबसान, नून के सहर अऊ एन-गदी—कुल छै नगर अऊ येमन के गांवमन घलो हवंय।
JOS 15:63 यहूदा के मनखेमन ओ यबूसीमन ला निकाल नइं सकिन, जेमन यरूसलेम म रहत रिहिन; एकरसेति आज तक यबूसीमन यहूदा के मनखेमन के संग उहां रहत हें।
JOS 16:1 फेर यूसुफ के संतानमन के भाग यरीहो के सोतामन के पूरब कोति, यरदन नदी ले सुरू होईस, अऊ उहां ले सुन्ना जगह ले होवत बेतेल के पहाड़ी देस म आईस।
JOS 16:2 येह बेतेल (जेला लूज कहे जाथे) ले निकलके अतारोत सहर म अरकीमन के इलाका म आईस,
JOS 16:3 अऊ पछिम कोति उतरके यपलेतीमन के इलाका म खाल्हे के बेत-होरोन के इलाका अऊ गेजेर सहर तक आईस, अऊ भूमध्य सागर म खतम हो गीस।
JOS 16:4 ये किसम ले यूसुफ के संतान, मनस्से अऊ एपरैम ला ओमन के उत्तराधिकार मिलिस।
JOS 16:5 येह एपरैम के कुलमन के मुताबिक ओकर इलाका रिहिस: ओमन के उत्तराधिकार के सीमना ह पूरब म अतारोत-अद्दार ले होवत ऊपरी बेत-होरोन तक गीस
JOS 16:6 अऊ येह भूमध्य सागर तक हबरिस। उत्तर म मिकमतात सहर ले येह मुड़के पूरब कोति तानत-सीलो सहर करा आईस, अऊ फेर येला पार करके पूरब म यानोह सहर तक हबरिस।
JOS 16:7 तब येह यानोह ले खाल्हे अतारोत अऊ नारा सहरमन म गीस, अऊ यरीहो ला छूवत यरदन करा निकलिस।
JOS 16:8 फेर तप्पूह ले सीमना ह पछिम कोति काना घाटी करा आईस अऊ भूमध्य सागर म खतम हो गीस। येह एपरैमीमन के गोत्र के ओमन के कुलमन के मुताबिक उत्तराधिकार रिहिस।
JOS 16:9 येमा जम्मो नगर अऊ ओमन के गांवमन घलो सामिल रिहिन, जेला मनस्सेयीमन के उत्तराधिकार के भीतर एपरैमीमन बर अलग करे गे रिहिस।
JOS 16:10 पर ओमन गेजेर सहर म रहइया कनानीमन ला नइं निकालिन; एकरसेति आज तक कनानीमन एपरैम के मनखेमन के बीच म रहत हें, पर ओमन ला बंधुवा मजदूर के रूप म काम करना जरूरी ए।
JOS 17:1 फेर यूसुफ के बड़े बेटा मनस्से के गोत्र के बांटा ये रिहिस। मनस्से के बड़े बेटा माकीर ह गिलादीमन के पुरखा रिहिस अऊ ओला बांटा म गिलाद अऊ बासान मिलिस, काबरकि माकीरीमन बड़े योद्धा रिहिन।
JOS 17:2 ये बांटा ह मनस्से के बाकि बांचे मनखेमन बर रिहिस—अबिएजेर, हेलेक, असरीएल, सकेम हेपेर, अऊ समीदा के बंस के मनखेमन ला। येमन अपन बंस के मुताबिक यूसुफ के बेटा मनस्से के आने पुरूस संतान अंय।
JOS 17:3 पर हेपेर जऊन ह गिलाद के बेटा, माकीर के पोता, अऊ मनस्से के परपोता रिहिस, ओकर बेटा सलोफाद के बेटा नइं रिहिन; ओकर सिरिप बेटीमन रिहिन, जेमन के नांव महला, नोआ, होगला, मिलका अऊ तिरसा रिहिस।
JOS 17:4 तब ओमन एलिआजर पुरोहित, नून के बेटा यहोसू, अऊ अगुवामन करा जाके कहिन, “यहोवा ह मूसा ला हुकूम देय रिहिस कि हमन ला हमर रिस्तेदारमन के बीच उत्तराधिकार दिये जावय।” एकरसेति यहोसू ह यहोवा के हुकूम के मुताबिक ओमन ला ओमन के ककामन के संग एक बांटा दीस।
JOS 17:5 मनस्से के बांटा म यरदन नदी के पूरब कोति गिलाद अऊ बासान के अलावा दस इलाका अऊ रिहिस,
JOS 17:6 काबरकि मनस्से के गोत्र के बेटीमन ला घलो बेटामन के बीच एक भाग दिये गीस। गिलाद देस ह मनस्से के बाकि बांचे संतानमन के हो गीस।
JOS 17:7 मनस्से के सीमना ह आसेर ले लेके सकेम के पूरब कोति मिकमतात सहर तक फईले रिहिस। सीमना ह उहां ले बढ़के दक्खिन कोति एन-तप्पूह के निवासीमन तक हबरिस।
JOS 17:8 तप्पूह के भुइयां त मनस्से के रिहिस, पर तप्पूह नगर ह मनस्से के सीमना म एपरैमीमन के ठहिरिस।
JOS 17:9 तब उहां ले सीमना ह दक्खिन कोति काना के नरवा तक गीस। उहां एपरैम के नगरमन रिहिन अऊ ये नगरमन मनस्से के नगरमन के बीच म रिहिन, पर मनस्से के सीमना काना के नरवा के उत्तर कोति रिहिस अऊ भूमध्य सागर करा खतम होवत रिहिस।
JOS 17:10 दक्खिन कोति के भुइयां ह एपरैम के अऊ उत्तर कोति के भुइयां ह मनस्से के रिहिस। मनस्से के इलाका ह भूमध्य सागर तक रिहिस अऊ ओकर सीमना ह उत्तर कोति आसेर ले अऊ पूरब कोति इस्साकार ले जाके मिलत रिहिस।
JOS 17:11 इस्साकार अऊ आसेर के भीतर मनस्से ला बेत-सान, यिबलाम अऊ दोर के मनखे, एनदोर के मनखे, तानाक के मनखे अऊ मगिद्दो के मनखे अऊ येमन के आसपास बसे इलाकामन घलो मिले रिहिस (सूची म तीसरा नांव नपोत अय)।
JOS 17:12 पर मनस्सेयीमन ये नगरमन ला अपन अधीन नइं कर सकिन, काबरकि कनानीमन ओ इलाका म ही रहे के ठान ले रिहिन।
JOS 17:13 तभो ले जब इसरायलीमन ताकतवर हो गीन, त ओमन कनानीमन ला बंधुवा मजदूर बना लीन, पर ओमन ला पूरा रीति ले बाहिर नइं निकालिन।
JOS 17:14 यूसुफ के मनखेमन यहोसू ला कहिन, “तेंह काबर हमन ला सिरिप एक बांटा अऊ उत्तराधिकार बर एक भाग दे हस? हमन तो गनती म अब्बड़ हवन, अऊ यहोवा ह हमन ला अब्बड़ आसीस दे हवय।”
JOS 17:15 यहोसू ह ओमन ला जबाब दीस, “यदि तुमन गनती म अब्बड़ मनखे हवव, अऊ यदि एपरैम के पहाड़ी देस तुम्हर बर बहुंत छोटे हवय, त परिज्जी अऊ रपाईमन के देस म ऊपर जंगल म जावव अऊ उहां रूखमन ला काटके अपन बर भुइयां साफ करव।”
JOS 17:16 तब यूसुफ के मनखेमन जबाब दीन, “ओ पहाड़ी देस ह हमर बर परयाप्त नो हय, अऊ मैदानी इलाका म रहइया जम्मो कनानीमन करा याने कि बेत-सान सहर अऊ उहां बसे मनखे अऊ यिजरेल के घाटी म बसे जम्मो मनखेमन करा लोहा के रथ हवंय।”
JOS 17:17 पर यहोसू ह, यूसुफ के गोत्र के मनखे—एपरैमी अऊ मनस्से ला कहिस, “तुमन गनती म अब्बड़ हवव अऊ बहुंत ताकतवर भी हव। तुमन ला सिरिप एकेच बांटा ही नइं मिलही,
JOS 17:18 पर संग म जंगल के पहाड़ी देस घलो तुम्हर हो जाही। तुमन ओला साफ करव, अऊ ओकर दूरिहा के इलाकामन तुम्हर हो जाहीं; हालाकि कनानीमन करा लोहा के रथमन हवंय, अऊ ओ मनखेमन ताकतवर हवंय, पर तुमन ओमन ला भगा सकत हव।”
JOS 18:1 फेर इसरायलीमन के सभा के जम्मो मनखेमन सीलो सहर म इकट्ठा होके उहां मिलापवाला तम्बू ला ठाढ़ करिन। काबरकि ओ देस ह ओमन के बस म आ गे रिहिस,
JOS 18:2 पर अभी भी इसरायलीमन के सात गोत्र अइसे रिहिन, जेमन ला ओमन के उत्तराधिकार नइं मिले रिहिस।
JOS 18:3 एकरसेति यहोसू ह इसरायलीमन ले कहिस, “तुम्हर पुरखामन के परमेसर यहोवा ह तुमन ला जऊन देस दे हवय, ओला अपन अधिकार म कर लेय म तुमन कब तक ढिलई करत रहिहू?
JOS 18:4 अब हर एक गोत्र म ले तीन मनखे ला ठहिरा लेवव। मेंह ओमन ला पठोहूं कि ओमन जाके देस के खोजबीन करंय अऊ हर एक गोत्र के उत्तराधिकार के अनुसार ओकर एक बिबरन लिखंय। अऊ तब ओमन मोर करा लहुंट आवंय।
JOS 18:5 तुमन ला बाकि देस ला सात भाग म बांटना हे। यहूदा ह ओकर दक्खिन के इलाका म रहय अऊ यूसुफ के गोत्रमन उत्तर के ओमन के इलाका म रहंय।
JOS 18:6 जब तुमन देस के सात भागमन के बिबरन ला लिख लव, त ओला लेके मोर करा आवव अऊ मेंह यहोवा हमर परमेसर के आघू म तुम्हर बर चिट्ठी डालहूं।
JOS 18:7 पर लेवीमन ला तुम्हर बीच म कोनो भाग नइं मिलय, काबरकि यहोवा के पुरोहिती सेवा ह ओमन के उत्तराधिकार अय। अऊ गाद, रूबेन अऊ मनस्से के आधा गोत्र ला यरदन नदी के पूरब कोति पहिले ही ओमन के उत्तराधिकार मिल गे हवय। यहोवा के सेवक मूसा ह ओमन ला ये भाग दे हवय।”
JOS 18:8 जब ओ मनखेमन देस के हालचाल लिखे बर निकलिन, त यहोसू ह ओमन ला निरदेस दीस, “जाके देस के खोजबीन करव अऊ ओकर एक बिबरन लिखव। अऊ तब मोर करा लहुंट आवव, अऊ मेंह इहां सीलो म यहोवा के आघू म तुम्हर बर चिट्ठी डालहूं।”
JOS 18:9 तब ओ मनखेमन गीन अऊ ओ देस म घुमिन, अऊ नगरमन ला सात भाग करके एक ठन किताब म ओकर बिबरन ला लिखिन, अऊ सीलो के डेरा म यहोसू करा लहुंट आईन।
JOS 18:10 तब यहोसू ह सीलो म यहोवा के आघू म ओमन बर चिट्ठी डालिस, अऊ उहां ओह इसरायलीमन ला ओमन के गोत्र के दल के मुताबिक देस ला बांट दीस।
JOS 18:11 पहिली चिट्ठी बिनयामीन के गोत्र बर ओमन के कुलमन के मुताबिक निकलिस। ओमन के इलाका ह यहूदा अऊ यूसुफ के गोत्रमन के बीच म परिस:
JOS 18:12 उत्तर कोति ओमन के सीमना यरदन नदी ले सुरू होईस, अऊ यरीहो के उत्तरी ढलान ले होवत पछिम कोति पहाड़ी देस म गीस, अऊ उहां ले बेत-आवेन के सुन्ना जगह म निकलिस।
JOS 18:13 उहां ले पार होके येह लूज के दक्खिन ढलान करा हबरिस (लूज ला बेतेल घलो कहिथें), अऊ उहां ले खाल्हे के बेत-होरोन सहर के दक्खिन कोति पहाड़ी म अतारोत-अद्दार सहर करा आईस।
JOS 18:14 पहाड़ी ले बेत-होरोन के सामने दक्खिन म सीमना ह दक्खिन म मुड़के पछिम कोति होवत किरयत-बाल सहर (येला किरयत-यारीम घलो कहिथें) करा निकलिस; येह यहूदा के मनखेमन के एक नगर रिहिस। येह पछिम कोति के सीमना रिहिस।
JOS 18:15 दक्खिन कोति के सीमना ह पछिम म किरयत-यारीम के बाहिरी भाग ले सुरू होईस अऊ येह नेपतोह के पानी के सोता करा निकलिस।
JOS 18:16 ये सीमना ह खाल्हे कोति ओ पहाड़ी के नीचे म गीस, जऊन ह रपाईम के घाटी के उत्तर म बेन-हिन्नोम के घाटी के सामने म हवय। उहां ले येह यबूसी सहर के दक्खिनी ढलान ले होवत हिन्नोम के घाटी के खाल्हे म गीस अऊ ये किसम ले एन-रोगेल करा आईस।
JOS 18:17 येह तब उत्तर कोति मुड़के एन-सेमेस करा आईस अऊ उहां ले निकलके गलीलोत करा आईस, जऊन ह अदुमीम घाटी के चघई के सामने म हवय, फेर उहां ले येह रूबेन के बेटा बोहन नांव के पथरा तक उतर गीस।
JOS 18:18 उहां ले आघू बढ़त येह बेत-अराबा के उत्तरी ढलान करा गीस अऊ खाल्हे अराबा म आईस।
JOS 18:19 येह तब बेत-होगला के उत्तरी ढलान तक गीस अऊ उहां ले जाके दक्खिन म यरदन नदी के मुंहाटी करा मिरतू सागर के उत्तरी खाड़ी म निकलिस। येह दक्खिन के सीमना रिहिस।
JOS 18:20 यरदन ह पूरब कोति के सीमना ठहिरिस।
JOS 18:21 बिनयामीन के गोत्र ला येकर कुलमन के मुताबिक ये नगरमन मिले रिहिन: यरीहो, बेत-होगला, एमेक-कसीस,
JOS 18:22 बेत-अराबा, समारैम, बेतेल,
JOS 18:23 अब्बीम, पारा, ओपरा,
JOS 18:24 कपर-अम्मोनी, ओपनी अऊ गेबा—बारह नगर अऊ येमन के गांवमन।
JOS 18:25 फेर गिबोन, रामा, बेरोत,
JOS 18:26 मिसपा, कपीरा, मोसा,
JOS 18:27 रेकेम, यिरपेल, तरला,
JOS 18:28 सेला, हेलेप, यबूसी सहर (जेला यरूसलेम कहिथें), गिबा अऊ किरयत—चौदह नगर अऊ येमन के गांवमन।
JOS 19:1 दूसर चिट्ठी सिमोन के गोत्र बर ओकर कुलमन के मुताबिक निकलिस। ओमन के भाग यहूदा के इलाका के भीतर रिहिस।
JOS 19:2 येमा ये नगरमन सामिल रिहिन: बेरसेबा, सेबा, मोलादा,
JOS 19:3 हसर-सूआल, बाला, एसेम,
JOS 19:4 एलतोलद, बतूल, होरमा,
JOS 19:5 सिकलग, बेत-मरकाबोत, हसर-सूसा,
JOS 19:6 बेत-लबाओत अऊ सारूहेन—तेरह नगर अऊ येमन के गांवमन;
JOS 19:7 ऐन, रिम्मोन, एतेर, अऊ आसान—चार नगर अऊ येमन के गांवमन—
JOS 19:8 अऊ ये नगरमन के आसपास के जम्मो गांवमन बालत-बेर तक (नेगेव म रामा)।
JOS 19:9 सिमोनीमन के उत्तराधिकार यहूदा के भाग ले लिये गे रिहिस, काबरकि यहूदा ला ओमन के जरूरत ले जादा भाग मिले रिहिस। एकरसेति यहूदा के इलाका के भीतर सिमोनीमन ला ओमन के उत्तराधिकार मिलिस।
JOS 19:10 तीसर चिट्ठी जबूलून बर ओकर कुलमन के मुताबिक निकलिस: ओमन के भाग के सीमना सारीद सहर तक हबरिस।
JOS 19:11 अऊ ओमन के सीमना पछिम कोति मरला सहर ला जाके दब्बेसेत सहर ला छुईस, अऊ योकनाम सहर के लकठा के नरवा तक बढ़िस।
JOS 19:12 फेर सारीद ले येह पूरब कोति ले मुड़के बेर के उगती कोति किसलोत-ताबोर के इलाका तक हबरिस अऊ उहां ले आघू बढ़त दाबरत अऊ तब यापी तक आईस
JOS 19:13 तब येह पूरब कोति आघू बढ़त गत-हेपेर अऊ इत-कासीन ला गीस; येह रिम्मोन करा निकलिस अऊ नेआ कोति मुड़ गीस।
JOS 19:14 उहां ले ओ सीमना ह मुड़के उत्तर कोति हन्नातोन करा चल दीस अऊ यिप्तह-एल के घाटी म खतम हो गीस।
JOS 19:15 येमा कत्तात, नहलाल, सिमरोन, यिदला अऊ बैतलहम सामिल रिहिन। उहां बारह नगर अऊ ओमन के गांवमन रिहिन।
JOS 19:16 ये नगर अऊ ओमन के गांवमन जबूलून के कुलमन के मुताबिक ओला उत्तराधिकार म मिले रिहिन।
JOS 19:17 चौथा चिट्ठी इस्साकार बर ओकर कुलमन के मुताबिक निकलिस।
JOS 19:18 ओमन के इलाका म ये जगहमन सामिल रिहिन: यिजरेल, कसुल्लोत, सुनेम,
JOS 19:19 हपारैम, सीओन, अनाहरत,
JOS 19:20 रब्बीत, किसयोन, एबेस,
JOS 19:21 रेमेत, एन-गन्नीम, एन-हद्दा अऊ बेत-पस्सेस।
JOS 19:22 ओ सीमना ह ताबोर पहाड़, सहसूमा, अऊ बेत-सेमेस ला छुईस, अऊ यरदन नदी करा खतम हो गीस। उहां सोलह नगर अऊ ओमन के गांवमन रिहिन।
JOS 19:23 ये नगर अऊ ओकर गांवमन इस्साकार के कुलमन के मुताबिक ओकर गोत्र के उत्तराधिकार रिहिन।
JOS 19:24 पांचवां चिट्ठी आसेर के गोत्र बर ओकर कुलमन के मुताबिक निकलिस।
JOS 19:25 ओमन के इलाका म ये नगरमन सामिल रिहिन: हेलकत, हली, बेतेन, अछाप,
JOS 19:26 अलाम्मेलेक, अमाद अऊ मिसाल। पछिम कोति सीमना ह करमेल पहाड़ अऊ सीहोर-लिब्नात ला छुईस।
JOS 19:27 तब येह पूरब कोति मुड़के बेत-दागोन सहर करा गीस, अऊ जबूलून गोत्र अऊ यिप्तह-एल के घाटी ला छुईस, अऊ डेरी कोति काबूल ला पार करत उत्तर दिग म बेत-एमेक अऊ नीएल तक हबरिस।
JOS 19:28 येह एबरोन, रहोब, हम्मोन अऊ काना ले होके बड़े सीदोन तक हबरिस।
JOS 19:29 तब सीमना ह वापिस रामा कोति लहुंटिस अऊ सूर नांव के गढ़वाले नगर तक गीस; फेर उहां ले होसा कोति मुड़के अकजीब,
JOS 19:30 उम्मा, अपेक अऊ रहोब के छेत्र म भूमध्य सागर करा निकलिस। उहां बाईस नगर अऊ ओमन के गांवमन रिहिन।
JOS 19:31 ये नगर अऊ ओमन के गांवमन आसेर के कुलमन के मुताबिक ओकर गोत्र के उत्तराधिकार रिहिन।
JOS 19:32 छठवां चिट्ठी नपताली बर ओकर कुलमन के मुताबिक निकलिस:
JOS 19:33 ओमन के सीमना ह हेलेप नगर अऊ साननीम नगर म बड़े रूख ले गीस अऊ अदामी-नेकेब अऊ यबनेल ला पार करत लक्कूम करा आईस अऊ यरदन नदी करा खतम हो गीस।
JOS 19:34 सीमना ह पछिम कोति अजनोत-ताबोर ले होवत हूकोक करा निकलिस। येह दक्खिन म जबूलून गोत्र, पछिम म आसेर गोत्र अऊ पूरब म यरदन ला छुईस।
JOS 19:35 ओमन के गढ़वाले नगर येमन रिहिन—सिद्दीम, सेर, हम्मत, रक्कत, किन्नेरेत,
JOS 19:36 अदामा, रामा, हासोर,
JOS 19:37 केदेस, एदरेई, एन-हासोर,
JOS 19:38 यिरोन, मिगदल-एल, होरेम, बेत-अनात अऊ बेत-सेमेस। उहां उन्नीस नगर अऊ ओमन के गांवमन रिहिन।
JOS 19:39 ये नगर अऊ ओमन के गांवमन नपताली के कुलमन के मुताबिक ओकर गोत्र के उत्तराधिकार रिहिन।
JOS 19:40 सातवां चिट्ठी दान के गोत्र बर ओकर कुलमन के मुताबिक निकलिस।
JOS 19:41 ओमन के उत्तराधिकार के इलाका म ये नगरमन सामिल रिहिन: सोरा, एसताओल, ईर-सेमेस,
JOS 19:42 सालब्बीन, अय्यालोन, यितला,
JOS 19:43 एलोन, तिमना, एकरोन,
JOS 19:44 एलतके, गिब्बतोन, बालात,
JOS 19:45 यहूद, बने-बराक, गत-रिम्मोन,
JOS 19:46 मे-यरकोन अऊ रक्कोन अऊ ओ छेत्र, जऊन ह यापा के सामने म हवय।
JOS 19:47 (जब दानीमन के इलाका ह ओमन करा ले चले गीस, त ओमन जाके लेसेम सहर ऊपर हमला करिन, अऊ ओला लेके उहां तलवार के उपयोग करिन अऊ ओला अपन अधिकार म कर लीन। ओमन लेसेम म बस गीन अऊ ओकर नांव अपन पुरखा के नांव म दान रखिन।)
JOS 19:48 ये नगर अऊ ओमन के गांवमन दान के कुलमन के मुताबिक ओकर गोत्र के उत्तराधिकार रिहिन।
JOS 19:49 जब इसरायलीमन देस के अपन-अपन हिस्सा के मुताबिक बंटवारा कर लीन, तब इसरायलीमन नून के बेटा यहोसू ला घलो अपन बीच म एक बांटा दीन,
JOS 19:50 जइसे कि यहोवा ह हुकूम देय रिहिस। ओमन ओला ओ नगर दीन, जेकर मांग ओह करे रिहिस। येह एपरैम के पहाड़ी देस के तिमनत-सेरह रिहिस। अऊ ओह ओ नगर ला बनाईस अऊ बस गीस।
JOS 19:51 येमन ओ इलाका अंय, जेला एलिआजर पुरोहित, नून के बेटा यहोसू अऊ इसरायल के गोत्र ले संबंधित कुलमन के मुखियामन सीलो म, मिलापवाला तम्बू के प्रवेस दुवार करा, यहोवा के आघू म चिट्ठी डाल-डालके बांट दीन। अऊ ये किसम ले ओमन देस के बंटवारा के काम ला पूरा करिन।
JOS 20:1 तब एक दिन यहोवा ह यहोसू ले कहिस,
JOS 20:2 “इसरायलीमन ले कह कि ओमन सरन लेय के सहरमन ला चुन लेवंय, जइसे कि मेंह तोला मूसा के जरिये निरदेस दे हंव,
JOS 20:3 ताकि यदि कोनो मनखे के दुवारा गलती से अऊ अनजाने म कोनो आने मनखे के हतिया हो जाथे, त ओह ओ सहर म भागके जा सकय अऊ खून के बदला लेवइया ले बचे रहय।
JOS 20:4 जब ओह येमा के कोनो नगर म भाग जावय, त ओह ओ सहर के प्रवेस दुवार म खड़े रहय अऊ ओ सहर के अगुवामन के आघू म अपन मामला ला बतावय। तब अगुवामन ओ भगोड़ा मनखे ला अपन सहर म ले लेवंय अऊ ओला अपन बीच म रहे बर कोनो ठऊर देवंय।
JOS 20:5 यदि खून के बदला लेवइया ह ओकर पीछा करत आथे, त अगुवामन ओ भगोड़ा ला ओकर हांथ म झन सऊंपंय, काबरकि ओ भगोड़ा ह अपन परोसी ला अनजाने म अऊ बिगर बईरता के मार डारे हे।
JOS 20:6 ओह ओ सहर म तब तक रूके रहय, जब तक कि सभा के आघू म ओकर नियायिक जांच नइं हो जावय अऊ जब तक कि ओ समय म सेवा करइया महा पुरोहित के मिरतू नइं हो जावय। ओकर बाद, ओह ओ नगर के अपन घर म वापिस जा सकत हे, जिहां ले ओह भागके आय रिहिस।”
JOS 20:7 एकरसेति ओमन नपताली के पहाड़ी देस म गलील के केदेस ला, एपरैम के पहाड़ी देस म सकेम ला, अऊ यहूदा के पहाड़ी देस म किरयत-अरबा (जेला हेबरोन घलो कहिथें) नगरमन ला अलग करिन।
JOS 20:8 यरदन नदी के पूरब कोति (यरीहो ले ओ पार) ओमन रूबेन के गोत्र म पठार ऊपर सुन्ना जगह म बेसेर ला, गाद के गोत्र म गिलाद के रामोत ला, अऊ मनस्से के गोत्र म बासान के गोलान नगरमन ला ठहिराईन।
JOS 20:9 कोनो इसरायली या ओमन के बीच म रहइया कोनो परदेसी के दुवारा गलती से कोनो मनखे के हतिया हो जाथे, त ओह ये ठहिराय गय सहरमन म भागके जा सकत हे अऊ खून के बदला लेवइया के दुवारा मारे जाय ले बच सकत हे, जब तक कि सभा के आघू म ओकर नियायिक जांच नइं हो जावय।
JOS 21:1 तब लेवीमन के परिवार के मुखियामन एलिआजर पुरोहित, नून के बेटा यहोसू, अऊ इसरायल के आने गोत्रमन के परिवार के मुखियामन करा
JOS 21:2 कनान देस के सीलो नगर म आके कहे लगिन, “यहोवा ह मूसा के दुवारा हुकूम दे हवय कि तुमन हमन ला हमर रहे बर नगर अऊ संग म हमर पसुमन ला चराय बर चरागन दव।”
JOS 21:3 तब इसरायलीमन यहोवा के हुकूम के मुताबिक अपन-अपन बांटा म ले लेवीमन ला ये नगर अऊ चरागनमन ला दीन:
JOS 21:4 तब पहिली चिट्ठी कहातीमन बर, ओमन के कुलमन के मुताबिक निकलिस। ओ लेवी, जेमन हारून पुरोहित के संतान रिहिन, ओमन ला यहूदा, सिमोन अऊ बिनयामीन के गोत्रमन ले तेरह नगर मिलिस।
JOS 21:5 बाकि बांचे कहात के संतानमन ला एपरैम के गोत्र, दान के गोत्र अऊ मनस्से के आधा गोत्र के कुलमन ले चिट्ठी डालके दस नगर दिये गीस।
JOS 21:6 गेरसोन के संतानमन ला इस्साकार के गोत्र, आसेर के गोत्र, नपताली के गोत्र अऊ बासान म मनस्से के आधा गोत्र के कुलमन ले चिट्ठी के मुताबिक तेरह नगर दिये गीस।
JOS 21:7 मरारी के संतानमन ला ओमन के कुलमन के मुताबिक रूबेन, गाद अऊ जबूलून के गोत्रमन ले बारह नगर दिये गीस।
JOS 21:8 ये किसम ले इसरायलीमन लेवीमन ला चिट्ठी डाले के दुवारा ये नगर अऊ अपन चरागनमन ला दीन, जइसे कि यहोवा ह मूसा के जरिये हुकूम देय रिहिस।
JOS 21:9 ओमन यहूदा अऊ सिमोन के गोत्रमन ले नगरमन ला नांव ले-लेके दीन।
JOS 21:10 ये नगरमन हारून के ओ संतानमन ला दिये गीस, जेमन लेवी के कहाती कुलमन ले रिहिन, काबरकि पहिली चिट्ठी ओही मन के नांव म निकले रिहिस:
JOS 21:11 ओमन कहातीमन ला यहूदा के पहाड़ी देस म किरयत-अरबा (जेला हेबरोन घलो कहिथें) के संग ओकर चारों कोति के चरागन ला दीन। (अरबा ह अनाक के पुरखा रिहिस।)
JOS 21:12 पर ओ सहर के आसपास के खेत अऊ गांवमन ला ओमन यपुन्ने के बेटा कालेब ला ओकर अधिकार म देय रिहिन।
JOS 21:13 ये किसम ले, हारून पुरोहित के संतानमन ला ओमन हेबरोन (कोनो हतियारा के सरन लेय के एक सहर), लिबना,
JOS 21:14 यत्तीर, एसतमोआ,
JOS 21:15 होलोन, दबीर,
JOS 21:16 ऐन, यूता, अऊ बेत-सेमेस सहरमन ला ओमन के चरागनमन के संग दीन—ये दूनों गोत्रमन ले नौ ठन नगर।
JOS 21:17 अऊ बिनयामीन के गोत्र ले ओमन ये नगरमन ला दीन: गिबोन, गेबा,
JOS 21:18 अनातोत अऊ अलमोन—ये चार नगर के संग ओमन के चरागनमन ला घलो दीन।
JOS 21:19 ये किसम ले हारून के संतान, पुरोहितमन ला तेरह नगर अऊ ओमन के चरागनमन मिलिन।
JOS 21:20 बाकि बांचे लेवी के कहाती कुलमन ला एपरैम के गोत्र ले नगरमन मिलिस:
JOS 21:21 एपरैम के पहाड़ी देस म ओमन ला ये नगरमन दिये गीन: सकेम (कोनो हतियारा बर सरन लेय के एक सहर) अऊ गेजेर,
JOS 21:22 किबसैम, अऊ बेत-होरोन—ये चार नगर के संग ओमन के चरागनमन घलो मिलिस।
JOS 21:23 दान के गोत्र ले घलो ओमन ला ये नगरमन मिलिन: एलतके, गिब्बतोन,
JOS 21:24 अय्यालोन अऊ गत-रिम्मोन—ये चार नगर के संग ओमन के चरागनमन घलो मिलिस।
JOS 21:25 मनस्से के आधा गोत्र ले ओमन ला ये नगरमन मिलिन: तानाक अऊ गत-रिम्मोन—ये दू ठन नगर के संग ओमन के चरागनमन घलो मिलिस।
JOS 21:26 ये किसम ले, ये जम्मो दस नगर अऊ ओमन के चरागनमन ला बाकि बांचे कहाती कुलमन ला दिये गीस।
JOS 21:27 गेरसोनीमन के लेवीय कुलमन ला ये नगरमन दिये गीन: मनस्से के आधा गोत्र म ले: बासान म गोलान (कोनो हतियारा बर सरन लेय के एक सहर) अऊ बे-एसतरा—ये दू ठन नगर के संग ओमन के चरागनमन घलो दिये गीन;
JOS 21:28 इस्साकार के गोत्र ले ये नगरमन दिये गीन: किसयोन, दाबरत,
JOS 21:29 यरमूत अऊ एन-गन्नीम—ये चार नगरमन के संग ओमन के चरागनमन घलो दिये गीन;
JOS 21:30 आसेर के गोत्र ले ये नगरमन दिये गीन: मिसाल, अबदोन,
JOS 21:31 हेलकत, अऊ रहोब—ये चार नगर के संग ओमन के चरागनमन घलो दिये गीन;
JOS 21:32 नपताली के गोत्र ले ये नगरमन दिये गीन: गलील म केदेस (कोनो हतियारा बर सरन लेय के एक सहर), हम्मोत-दोर अऊ करतान—ये तीन नगर अऊ ओमन के चरागनमन घलो दिये गीन।
JOS 21:33 गेरसोनी कुलमन ला कुल तेरह नगर मिले रिहिन अऊ संग म ओमन के चरागनमन घलो मिलिन।
JOS 21:34 मरारी कुलमन (बाकि बांचे लेवीमन) ला ये नगरमन दिये गीन: जबूलून के गोत्र ले: योकनाम, करता,
JOS 21:35 दिमना, अऊ नहलाल—ये चार नगर अऊ संग म ओमन के चरागनमन घलो दिये गीन;
JOS 21:36 रूबेन के गोत्र ले: बेसेर, यहस,
JOS 21:37 कदेमोत अऊ मेपात—ये चार नगर अऊ संग म ओमन के चरागनमन घलो दिये गीन;
JOS 21:38 गाद के गोत्र ले: गिलाद म रामोत (कोनो हतियारा बर सरन लेय के एक सहर), महनैम,
JOS 21:39 हेसबोन अऊ याजेर—कुल ये चार नगर अऊ संग म ओमन के चरागनमन घलो दिये गीन।
JOS 21:40 मरारी कुल, जेमन बाकि बांचे लेवी रिहिन; ओमन ला कुल बारह नगर दिये गीस।
JOS 21:41 इसरायलीमन के इलाका म लेवीमन ला कुल मिलाके अड़तालीस नगर मिले रिहिन अऊ संग म ओमन के चरागनमन घलो रिहिन।
JOS 21:42 ये जम्मो नगर म हर एक के चारों कोति चरागनमन रिहिन; ये बात ये जम्मो नगरमन बर सच रिहिस।
JOS 21:43 ये किसम ले, यहोवा ह इसरायलीमन ला ओ जम्मो देस दे दीस, जेला ओह ओमन के पुरखामन ला देय बर सपथ खाय रिहिस, अऊ ओमन ओला अपन अधिकार म कर लीन अऊ उहां बस गीन।
JOS 21:44 अऊ यहोवा ह ओमन ला चारों कोति ले बिसराम दीस, जइसे कि ओह ओमन के पुरखामन ले सपथ खाय रिहिस। ओमन के कोनो भी बईरी ओमन के आघू म टिक नइं सकिन; यहोवा ह ओमन के जम्मो बईरी ला ओमन के अधीन कर दीस।
JOS 21:45 यहोवा के दुवारा इसरायल बर करे गय जम्मो बने वायदामन ले एको ठन भी अधूरा नइं रिहिस; हर एक वायदा ह पूरा होईस।
JOS 22:1 तब यहोसू ह रूबेनी, गादी, अऊ मनस्से के आधा गोत्रमन ला बलाईस
JOS 22:2 अऊ ओमन ला कहिस, “जऊन-जऊन हुकूम यहोवा के सेवक मूसा ह तुमन ला देय रिहिस ओ सब के पालन तुमन करे हवव, अऊ तुमन मोर हर हुकूम ला घलो माने हवव।
JOS 22:3 बहुंत समय हो गे हे अऊ तब ले लेके आज तक तुमन अपन संगी इसरायलीमन ला नइं छोंड़े हव, पर यहोवा अपन परमेसर के दिये काम ला तुमन करे हवव।
JOS 22:4 अऊ अब यहोवा तुम्हर परमेसर अपन वायदा के मुताबिक तुम्हर भाईमन ला बिसराम देय हवय; एकरसेति अब तुमन ओ देस म अपन घर ला लहुंट जावव, जेला यहोवा के सेवक मूसा ह यरदन नदी के ओ पार तुमन ला देय हवय।
JOS 22:5 पर यहोवा के सेवक मूसा के दिये हुकूम अऊ कानून ला धियान देके मानव: यहोवा अपन परमेसर ले मया करव, ओकर रसता म चलव, ओकर हुकूममन के पालन करव, ओकर भक्ति म मगन रहव अऊ अपन जम्मो मन अऊ जम्मो परान ले ओकर सेवा करव।”
JOS 22:6 तब यहोसू ह ओमन ला आसीरबाद देके बिदा करिस अऊ ओमन अपन-अपन घर चल दीन।
JOS 22:7 (मनस्से के आधा गोत्र ला मूसा ह बासान म भुइयां देय रिहिस, अऊ दूसर आधा गोत्र ला यहोसू ह ओमन के संगी इसरायलीमन के संग यरदन नदी के पछिम कोति भुइयां दीस।) ओमन ला जब यहोसू ह बिदा करिस, त ओह ओमन ला ये कहिके आसीरबाद दीस,
JOS 22:8 “अपन अपार संपत्ति ला लेके अपन-अपन घर लहुंट जावव—पसुमन के बड़े झुंड, सोन, चांदी, कांसा अऊ लोहा, अऊ बहुंते ओनहा सब ला लेके जावव अऊ अपन बईरीमन ले लूटे गय सामान ला अपन संगी इसरायलीमन संग बांट लेवव।”
JOS 22:9 तब रूबेनी, गादी अऊ मनस्से के आधा गोत्र के मनखेमन कनान देस के सीलो नगर मेर इसरायलीमन ला छोंड़के अपन देस, गिलाद ला चल दीन, जेला यहोवा के हुकूम के मुताबिक, मूसा के जरिये ओमन पाय रिहिन।
JOS 22:10 जब रूबेनी, गादी, अऊ मनस्से के आधा गोत्र के मनखेमन कनान देस म यरदन नदी के लकठा म गलीलोत के इलाका म हबरिन, त ओमन उहां यरदन नदी के तीर म एक बड़े बेदी बनाईन।
JOS 22:11 अऊ जब इसरायलीमन सुनिन कि रूबेनी, गादी, अऊ मनस्से के आधा गोत्र के मनखेमन कनान देस के सीमना म, इसरायलीमन के भाग म, यरदन नदी के लकठा म गलीलोत करा एक बेदी बनाय हवंय,
JOS 22:12 त पूरा इसरायल के सभा ह ओमन के बिरूध लड़ई म जाय बर सीलो करा जूर गीस।
JOS 22:13 तब इसरायलीमन रूबेनी, गादी अऊ मनस्से के आधा गोत्र के मनखेमन करा गिलाद देस म एलिआजर पुरोहित के बेटा पीनहास ला पठोईन।
JOS 22:14 ओकर संग ओमन दस झन मुखियामन ला घलो पठोईन, जेमन इसरायल के हर एक गोत्र म ले एक-एक झन रिहिन अऊ ओमन इसरायली कुलमन के बीच हर एक परिवारिक दल के मुखिया घलो रिहिन।
JOS 22:15 जब ओमन गिलाद देस म रूबेनी, गादी अऊ मनस्से के आधा गोत्र के मनखेमन करा गीन, त येमन ओमन ला कहिन:
JOS 22:16 “यहोवा के जम्मो सभा ह कहत हे: ‘तुमन इसरायल के परमेसर के संग अइसने बिसवासघात कइसे कर सकत हव? तुमन यहोवा ले मुहूं मोड़के अब ओकर बिरूध बिदरोह म अपन बर एक बेदी कइसे बना ले हव?
JOS 22:17 का पेओर के पाप ह हमर बर कुछू कम रिहिस? आज तक हमन अपनआप ला ओ पाप ले सुध नइं करे हन, हालाकि ओकर कारन यहोवा के समाज ऊपर एक महामारी घलो फईलिस!
JOS 22:18 अऊ अब का तुमन यहोवा ला तियागके ओकर पाछू चलना छोंड़ देवत हव? “ ‘यदि आज तुमन यहोवा के बिरूध बिदरोह करथव, त कल ओह इसरायल के जम्मो समाज ऊपर गुस्सा होही।
JOS 22:19 जऊन देस ऊपर तुम्हर अधिकार हवय, यदि ओ देस ह असुध हो गे हवय, त यहोवा के देस म आवव, जिहां यहोवा के पबितर-तम्बू हवय, अऊ हमर संग देस म बांटा लेके रहव। पर यहोवा हमर परमेसर के बेदी ला छोंड़ अपन बर अऊ कोनो बेदी बनाके यहोवा के बिरूध या हमर बिरूध बिदरोह झन करव।
JOS 22:20 जब जेरह के बेटा आकान ह अरपन करे गे चीज के बिसय म बिसवासघात करिस, त का यहोवा के कोप ह इसरायल के जम्मो समाज ऊपर नइं भड़किस? अऊ ओ मनखे के पाप के कारन सिरिप ओह एके झन ही नइं मरिस, पर आने मन घलो मरिन।’ ”
JOS 22:21 तब रूबेनी, गादी अऊ मनस्से के आधा गोत्र के मनखेमन इसरायल के कुलमन के मुखियामन ला जबाब दीन:
JOS 22:22 “सक्तिमान, परमेसर, यहोवा! सक्तिमान, परमेसर, यहोवा! ओह जानत हे! अऊ इसरायल घलो जानय! यदि ये काम ह यहोवा के बिदरोह म या ओकर हुकूम के बिरूध करे गे हवय, त फेर हमन ला आज जीयत झन छोंड़व।
JOS 22:23 यदि हमन यहोवा ले अलग होय बर अपन खुद के बेदी बनाय हन या एकरसेति बनाय हन कि ओमा होम-बलिदान अऊ अन्न-बलिदान, या मेल-बलिदान चघावन, त यहोवा ह खुद हमर ले हिसाब लेवय।
JOS 22:24 “पर हमन ये डर म अइसन करे हवन कि कोनो दिन तुम्हर संतानमन हमर संतानमन ला ये कह सकत हें, ‘यहोवा, इसरायल के परमेसर ले तुम्हर का काम?
JOS 22:25 यहोवा ह तुम्हर अऊ हमर बीच म यरदन नदी ला एक सीमना ठहिराय हवय—हे रूबेनी अऊ गादीमन! यहोवा म तुम्हर कोनो भाग नइं ए।’ अइसन कहिके तुम्हर संतानमन हमर संतानमन ला यहोवा के भय माने ले रोक सकत हें।
JOS 22:26 “एकरसेति हमन कहेंन, ‘आवव, हमन तियार होके एक बेदी बनावन—पर होम-बलिदान या चढ़ावा बर नइं।’
JOS 22:27 येकर उल्टा, येह तुम्हर अऊ हमर बीच अऊ अवइया पीढ़ी के मनखेमन बर एक गवाह के रूप म अय, कि हमन होम-बलिदान, चढ़ावा अऊ मेल-बलिदान के संग यहोवा के पबितर-स्थान म ओकर अराधना करबो। तब भविस्य म, तुम्हर संतानमन हमर संतानमन ला ये नइं कह सकहीं, ‘यहोवा म तुम्हर कोनो भाग नइं ए।’
JOS 22:28 “अऊ हमन कहेंन, ‘यदि ओमन कभू हमन ले, या हमर संतानमन ले अइसे कहिथें, त हमन ये जबाब देबो: यहोवा के बेदी के नमूना म बने ये बेदी ला देखव, जेला हमर पुरखामन बनाय हवंय; येह होम-बलिदान अऊ चढ़ावा बर नो हय, पर येह तुम्हर अऊ हमर बीच म एक गवाह के रूप म अय।’
JOS 22:29 “ये बात ह हमर ले दूरिहा रहय कि हमन यहोवा के बिरूध बिदरोह करन, अऊ यहोवा हमर परमेसर के ओ बेदी ला छोंड़के जऊन ह ओकर पबितर-तम्बू के आघू म हवय, कोनो आने होम-बलिदान के बेदी, अन्न-बलिदान अऊ चढ़ावा चघाय के बेदी बनावन।”
JOS 22:30 रूबेनी, गादी, अऊ मनस्से के आधा गोत्र के मनखेमन के ये बात ला जब पीनहास पुरोहित अऊ समाज के अगुवामन—इसरायली कुलमन के मुखियामन सुनिन, त ओमन खुस होईन।
JOS 22:31 अऊ एलिआजर पुरोहित के बेटा पीनहास ह रूबेनी, गादी, अऊ मनस्सेयीमन ले कहिस, “आज हमन जान गेंन कि यहोवा हमर संग हवय, काबरकि ये बात म तुमन यहोवा के संग बिसवासघात नइं करे हव। तुमन इसरायलीमन ला यहोवा के हांथ ले बचा ले हव।”
JOS 22:32 तब एलिआजर पुरोहित के बेटा पीनहास, अऊ अगुवामन गिलाद म रूबेनी अऊ गादीमन के संग बात करे के बाद कनान देस लहुंट गीन अऊ इसरायलीमन ला जम्मो बात बताईन।
JOS 22:33 इसरायलीमन ये बात ला सुनके खुस होईन अऊ परमेसर के महिमा करिन। अऊ ओमन ओ देस, जिहां रूबेनी अऊ गादीमन रहत रिहिन, ओकर बिरूध लड़ई म जाके ओला नास करे के चरचा फेर नइं करिन।
JOS 22:34 अऊ रूबेनी अऊ गादीमन ओ बेदी के ये नांव रखिन: हमर बीच म एक गवाह—कि यहोवा ह परमेसर अय।
JOS 23:1 बहुंत समय बीत गे रिहिस अऊ यहोवा ह इसरायलीमन ला ओमन के चारों कोति के बईरीमन ले बिसराम दे रिहिस, अऊ यहोसू ह बहुंत डोकरा हो गे रिहिस,
JOS 23:2 तब एक दिन ओह जम्मो इसरायली—ओमन के सियान, अगुवा, नियायधीस अऊ करमचारीमन ला बलाईस अऊ ओमन ला कहिस: “मेंह बहुंत डोकरा हो गे हंव।
JOS 23:3 तुमन खुद हर एक चीज ला देखे हवव, जेला यहोवा तुम्हर परमेसर ह तुम्हर खातिर ये जम्मो जाति के मनखेमन संग करे हवय; येह यहोवा तुम्हर परमेसर रिहिस, जऊन ह तुम्हर कोति ले लड़िस।
JOS 23:4 सुरता रखव कि मेंह कइसे ओ जाति-जाति के बांचे जम्मो देस ला तुम्हर गोत्रमन बर एक उत्तराधिकार के रूप म बांट देंव—ओ जाति-जाति के देस जेमन ला मेंह जीत लेंव—पछिम म यरदन नदी अऊ भूमध्य सागर के बीच।
JOS 23:5 यहोवा तुम्हर परमेसर ह खुद तुम्हर खातिर ओमन ला तुम्हर आघू ले भगा दीही, अऊ तुमन ओमन के देस ऊपर अधिकार कर लूहू, जइसे कि यहोवा तुम्हर परमेसर ह तुमन ले वायदा करे हवय।
JOS 23:6 “एकरसेति बहुंत मजबूत बनव; अऊ बिगर जेवनी या डेरी कोति मुड़े, मूसा के कानून के किताब म लिखाय जम्मो बात के पालन धियान देके करव।
JOS 23:7 तुम्हर बीच म जऊन आने जातिमन के मनखेमन बांच गे हवंय, ओमन के संग सहभागी झन होवव; ओमन के देवतामन के नांव झन लेवव अऊ न ही ओमन के सपथ खावव। ये जरूरी अय कि तुमन न तो ओमन के सेवा करव अऊ न ही ओमन ला दंडवत करव।
JOS 23:8 पर तुमन ला यहोवा अपन परमेसर के रसता म अडिग बने रहना हे, जइसे कि तुमन अब तक करत आय हवव।
JOS 23:9 “यहोवा ह तुम्हर आघू ले बड़े-बड़े अऊ ताकतवर जातिमन ला निकाल दे हवय; तुम्हर आघू म आज के दिन तक कोनो ठहर नइं सकिन।
JOS 23:10 तुमन म ले एक मनखे ह एक हजार मनखेमन ला भगा देथे, काबरकि यहोवा तुम्हर परमेसर ह तुम्हर बर लड़थे, जइसे कि ओह वायदा करे हवय।
JOS 23:11 एकरसेति यहोवा अपन परमेसर ले मया रखे के पूरा चौकसी करव।
JOS 23:12 “पर यदि तुमन यहोवा ले फिरके ये आने जातिमन के बांचे मनखेमन के संग संबंध जोड़थव, जेमन तुम्हर बीच म रहत हवंय अऊ यदि ओमन के संग सादी-बिहाव करथव अऊ ओमन के संग सहभागी होथव,
JOS 23:13 त फेर ये बात ला जरूर जान लव कि यहोवा तुम्हर परमेसर ह ये जातिमन ला तुम्हर आघू ले नइं निकालही। पर ओमन तुम्हर बर तब तक जाल अऊ फांदा, तुम्हर पीठ बर कोर्रा अऊ तुम्हर आंखी म कांटा सहीं बने रहिहीं, जब तक कि तुमन ये बने देस म ले नास नइं हो जाहू, जेला यहोवा तुम्हर परमेसर ह तुमन ला देय हवय।
JOS 23:14 “अब ये धरती ले मोर जाय के समय आ गे हवय। तुमन अपन पूरा हिरदय अऊ मन ले जानत हव कि ओ जम्मो भलई के बात, जेला यहोवा तुम्हर परमेसर ह तुमन ले करे रिहिस, ओमा ले एको ठन बात घलो बिगर पूरा होय नइं रिहिस। ओकर हर वायदा ह पूरा होय हवय; ओमा के एको ठन घलो बिगर पूरा होय नइं रिहिस।
JOS 23:15 पर जइसने यहोवा तुम्हर परमेसर के दुवारा करे गय वायदा के जम्मो भलई के बातमन तुम्हर ऊपर पूरा होईस, वइसने ही ओह ओ जम्मो बिपत्ति के बात घलो तुम्हर ऊपर लानही, जेकर चेतउनी ओह देय हवय, अऊ येह तब तक होही, जब तक कि यहोवा तुम्हर परमेसर ह ओकर दुवारा तुमन ला दिये गय ये बने देस म ले तुमन ला नास नइं कर दीही।
JOS 23:16 यदि तुमन यहोवा तुम्हर परमेसर के करार ला टोरथव, जेकर हुकूम ओह तुमन ला देय हवय, अऊ तुमन जाके आने देवतामन के सेवा करथव अऊ ओमन के दंडवत करथव, त यहोवा के कोरोध तुमन ऊपर भड़कही, अऊ तुमन ये बने देस म ले जल्दी नास हो जाहू, जेला ओह तुमन ला देय हवय।”
JOS 24:1 तब यहोसू ह इसरायल के जम्मो गोत्रमन ला सकेम म इकट्ठा करिस। ओह इसरायल के सियान, अगुवा, नियायधीस अऊ करमचारीमन ला बलाईस, अऊ ओमन परमेसर के आघू म हाजिर होईन।
JOS 24:2 यहोसू ह ओ जम्मो मनखेमन ला कहिस, “यहोवा, इसरायल के परमेसर ह ये कहत हे: ‘पुराना जमाना म तुम्हर पुरखामन, जेमा अब्राहम अऊ नाहोर के ददा तेरह घलो रिहिस, फरात नदी के ओ पार रहत रिहिन अऊ आने देवतामन के अराधना करत रिहिन।
JOS 24:3 पर मेंह तुम्हर पुरखा अब्राहम ला फरात नदी के ओ पार ले लेंव अऊ कनान देस के जम्मो जगह म ओकर अगुवई करेंव अऊ ओला बहुंत संतान देंव। मेंह ओला इसहाक ला देंव,
JOS 24:4 अऊ इसहाक ला मेंह याकूब अऊ एसाव ला देंव। एसाव ला मेंह सेईर के पहाड़ी देस देंव, पर याकूब अऊ ओकर परिवार खाल्हे कोति मिसर देस चले गीन।
JOS 24:5 “ ‘तब मेंह मूसा अऊ हारून ला पठोंय, अऊ अपन काममन के दुवारा मिसर के मनखेमन ला दुख-तकलीफ देंव, अऊ तुमन ला उहां ले बाहिर निकाल लानेंव।
JOS 24:6 जब मेंह तुम्हर पुरखामन ला मिसर देस ले निकाल लानेंव, त तुमन समुंदर करा हबरेव, अऊ मिसरीमन रथ अऊ घुड़सवारमन के संग लाल-समुंदर तक तुम्हर पुरखामन के पीछा करिन।
JOS 24:7 पर ओमन मदद बर यहोवा ले गोहारिन, अऊ ओह तुम्हर अऊ मिसरीमन के बीच म अंधियार कर दीस; ओह मिसरीमन ऊपर समुंदर के पानी ला लानके ओमन ला पानी म बुड़ो दीस। तुमन खुद जानत हव कि मेंह मिसरीमन के संग का करेंव। तब तुमन बहुंत समय तक निरजन जगह म रहेव।
JOS 24:8 “ ‘फेर मेंह तुमन ला अमोरीमन के देस म ले आंय, जऊन मन यरदन नदी के पूरब कोति रहत रिहिन। ओमन तुमन ले लड़िन, पर मेंह ओमन ला तुम्हर बस म कर देंव। मेंह ओमन ला तुम्हर आघू म नास कर देंव, अऊ तुमन ओमन के देस ला अपन अधीन कर लेव।
JOS 24:9 जब मोआब के राजा, सिप्पोर के बेटा बालाक ह उठके इसरायल ले लड़े के तियारी करिस, त ओह तुमन ला सराप देय बर बेओर के बेटा बिलाम ला बलाय बर पठोईस।
JOS 24:10 पर मेंह बिलाम के बात नइं सुनेंव; एकरसेति ओह तुमन ला बार-बार आसीरबाद दीस, अऊ मेंह तुमन ला ओकर हांथ ले बचांय।
JOS 24:11 “ ‘तब तुमन यरदन नदी ला पार करके यरीहो सहर हबरेव। यरीहो के मनखेमन तुम्हर बिरूध लड़िन, अऊ वइसने ही अमोरी, परिज्जी, कनानी, हित्ती, गिरगासी, हिब्बी, अऊ यबूसीमन घलो तुमन ले लड़िन, पर मेंह ओमन ला तुम्हर अधीन कर देंव।
JOS 24:12 मेंह तुम्हर आघू दतैयामन ला पठोंय, जेमन अमोरीमन के ओ दूनों राजामन ला तुम्हर आघू ले भगा दीन। तुमन ये काम अपन खुद के तलवार अऊ धनुस के बल म नइं करेव।
JOS 24:13 मेंह तुमन ला एक अइसन देस ला देंव, जेकर बर तुमन मेहनत नइं करे रहेव अऊ अइसन नगरमन घलो देंव, जेमन ला तुमन नइं बसाय रहेव; अऊ तुमन ओमा रहिथव अऊ ओ अंगूर अऊ जैतून के बारीमन के फर ला खाथव, जेला तुमन नइं लगाय हव।’
JOS 24:14 “एकरसेति अब तुमन यहोवा के भय मानव अऊ पूरा सच्चई से ओकर सेवा करव। ओ देवतामन ला दूरिहा म फटिक दव, जेमन के अराधना तुम्हर पुरखामन फरात नदी के ओ पार अऊ मिसर देस म करत रिहिन, अऊ अब यहोवा के सेवा करव।
JOS 24:15 पर यदि यहोवा के सेवा करई तुमन ला बने नइं लगय, त आज तुमन अपन बर चुन लव कि तुमन काकर सेवा करहू, ओ देवतामन के, जेमन के सेवा तुम्हर पुरखामन फरात नदी के ओ पार म करत रिहिन, या फेर अमोरीमन के देवतामन के, जेमन के देस म तुमन रहत हव। पर जहां तक मोर अऊ मोर परिवार के बात ए, हमन यहोवा के ही सेवा करबो।”
JOS 24:16 तब मनखेमन जबाब दीन, “यहोवा ला तियागके आने देवतामन के सेवा करई हमन ले दूरिहा के बात होवय!
JOS 24:17 येह यहोवा हमर परमेसर ही अय, जऊन ह हमन अऊ हमर पुरखामन ला मिसर देस ले, ओ गुलामी के देस ले निकाल लानिस, अऊ हमर देखत म बड़े-बड़े अचरज के काम करिस, अऊ जऊन डहार म अऊ जतेक जाति के मनखेमन के बीच म ले होवत हमन आयेंन, ओ जम्मो बात म ओह हमर रकछा करिस।
JOS 24:18 अऊ यहोवा ह हमर आघू ले जम्मो जाति के मनखेमन ला भगा दीस, जेमा ये देस म रहइया अमोरीमन घलो रिहिन। एकरसेति हमन घलो यहोवा के सेवा करबो, काबरकि हमर परमेसर ओहीच अय।”
JOS 24:19 यहोसू ह मनखेमन ला कहिस, “तुमन ले यहोवा के सेवा नइं हो सकय, काबरकि ओह पबितर परमेसर अय; ओह जलन रखइया परमेसर अय। ओह तुम्हर अपराध अऊ पापमन ला छेमा नइं करही।
JOS 24:20 यदि तुमन यहोवा ला तियागके पराय देवतामन के सेवा करथव, त हालाकि ओह अब तक तुम्हर भलई करत आय हवय, तभो ले ओह मुड़के तुम्हर ऊपर बिपत्ति लानही अऊ तुमन ला खतम कर दीही।”
JOS 24:21 पर मनखेमन यहोसू ले कहिन, “नइं! हमन यहोवा के ही सेवा करबो।”
JOS 24:22 यहोसू ह ओमन ला कहिस, “तुमन खुदेच अपन गवाह अव कि तुमन यहोवा के सेवा करई के बात ला चुन ले हव।” ओमन जबाब दीन, “हव, हमन गवाह अन।”
JOS 24:23 यहोसू ह कहिस, “त फेर तुमन अपन बीच म ले पराय देवतामन ला दूरिहा फटिक दव अऊ अपन मन ला यहोवा, इसरायल के परमेसर कोति लगावव।”
JOS 24:24 अऊ मनखेमन यहोसू ला कहिन, “हमन यहोवा हमर परमेसर के सेवा करबो, अऊ ओकरेच बात ला मानबो।”
JOS 24:25 तब यहोसू ह ओहीच दिन ओ मनखेमन ले एक करार करवाईस, अऊ उहां सकेम म ओमन ला बिधि अऊ कानूनमन के बारे म फेर बताईस।
JOS 24:26 अऊ ये जम्मो बात ला यहोसू ह परमेसर के कानून के किताब म लिख दीस। तब ओह एक बड़े पथरा ला लीस अऊ ओला उहां ओ बांज रूख के खाल्हे म ठाढ़ कर दीस, जऊन ह यहोवा के पबितर स्थान के लकठा म रिहिस।
JOS 24:27 तब यहोसू ह जम्मो मनखेमन ला कहिस, “देखव! ये पथरा ह हमर बर एक गवाह होही। येह ओ जम्मो बात ला सुने हवय, जेला यहोवा ह हमन ले कहे हवय। यदि तुमन अपन परमेसर ले मुकर जावव, त येह तुम्हर बिरूध एक गवाह होही।”
JOS 24:28 तब यहोसू ह मनखेमन ला अपन-अपन निज भाग म जाय बर बिदा करिस।
JOS 24:29 येकर बाद, यहोवा के सेवक, नून के बेटा यहोसू के मिरतू हो गीस; ओ समय ओकर उमर एक सौ दस बछर रिहिस।
JOS 24:30 अऊ ओमन ओला ओकर उत्तराधिकार के भुइयां तिमनत-सेरह म माटी दीन, जऊन ह गास पहाड़ के उत्तर कोति, एपरैम के पहाड़ी देस म हवय।
JOS 24:31 यहोसू के जिनगी भर, अऊ जऊन अगुवामन यहोसू के मरे के बाद जीयत रिहिन अऊ इसरायल बर यहोवा के करे गय हर काम के अनुभव करे रिहिन, ओमन के जिनगी भर इसरायलीमन यहोवा ही के सेवा करते रिहिन।
JOS 24:32 अऊ यूसुफ के हाड़ामन जेला इसरायलीमन मिसर ले, ले आय रिहिन, ओला ओमन सकेम म भुइयां के ओ भाग म गाड़ दीन, जेला याकूब ह सकेम के ददा हमोर के बेटामन ले एक सौ चांदी के टुकड़ा म बिसाय रिहिस। ये भुइयां ह यूसुफ के संतानमन के निज भाग हो गीस।
JOS 24:33 हारून के बेटा एलिआजर घलो मर गीस अऊ ओला गिबा नगर म माटी दिये गीस; ये जगह एलिआजर के बेटा पीनहास ला बांटा म मिले रिहिस अऊ येह एपरैम के पहाड़ी देस म रिहिस।
JDG 1:1 यहोसू के मरे के बाद, इसरायलीमन यहोवा ले पुछिन, “कनानीमन के बिरूध म लड़े बर हमन ले कोन पहिले जाही?”
JDG 1:2 यहोवा ह जबाब दीस, “यहूदा गोत्र ह जाही; मेंह ये देस ला ओमन के हांथ म देय दे हवंव।”
JDG 1:3 तब यहूदा के मनखेमन अपन संगी इसरायली सिमोनीमन ले कहिन, “हमर संग हमन ला दिये गे इलाका म आवव कि हमन कनानीमन के बिरूध लड़ई करन। बदले म, हमन तुम्हर संग तुम्हर करा जाबो।” त सिमोनीमन ओमन के संग गीन।
JDG 1:4 जब यहूदा के मनखेमन हमला करिन, अऊ यहोवा ह कनानी अऊ परिज्जीमन ला ओमन के हांथ म कर दीस, अऊ ओमन बेजेक नांव के जगह म दस हजार मनखेमन ला मार डारिन।
JDG 1:5 बेजेक म ओमन ला अदोनी-बेजेक मिलिस अऊ ओमन ओकर बिरूध लड़िन अऊ कनानीमन अऊ परिज्जीमन ला हराके भगा दीन।
JDG 1:6 अदोनी-बेजेक ह भागे लगिस, पर ओमन ओकर पीछा करके ओला पकड़ लीन, अऊ ओकर हांथ-गोड़ के अंगठामन ला काट डारिन।
JDG 1:7 तब अदोनी-बेजेक ह कहिस, “हांथ-गोड़मन के अंगठा कटे सत्तर राजामन मोर मेज के खाल्हे म जेवन के कुटामन ला बीनत रिहिन। जइसने मेंह ओमन के संग करे रहेंव, अब परमेसर ह मोला ओकर बदला दे हवय।” तब यहूदा के मनखेमन ओला यरूसलेम ले आईन अऊ उहां ओह मर गीस।
JDG 1:8 यहूदा के आदमीमन यरूसलेम ऊपर घलो हमला करिन अऊ ओला ले लीन। ओमन तलवार ले सहर के निवासीमन ला मार डारिन अऊ सहर म आगी लगा दीन।
JDG 1:9 ओकर बाद, यहूदीमन पहाड़ी देस, नेगेव अऊ पछिम के पहाड़ीमन म रहइया कनानीमन ले लड़े बर खाल्हे गीन।
JDG 1:10 ओमन हेबरोन (पहिले किरयत-अरबा कहे जावय) म रहइया कनानीमन के बिरूध हमला करिन अऊ सेसै, अहीमन अऊ तलमै ला हराईन।
JDG 1:11 उहां ले ओमन दबीर नगर म रहइया मनखेमन के बिरूध आघू बढ़िन (पहिले दबीर ला किरयत-सेपेर कहे जावय)।
JDG 1:12 तब कालेब ह कहिस, “जऊन मनखे ह किरयत-सेपेर ऊपर हमला करके ओला अपन अधीन म कर लीही, ओकर संग मेंह अपन बेटी अकसा के बिहाव कर दूहूं।”
JDG 1:13 कालेब के छोटे भाई कनज के बेटा ओतनीएल ह ये काम ला करिस; त कालेब ह ओकर संग अपन बेटी अकसा के बिहाव कर दीस।
JDG 1:14 एक दिन जब अकसा ह ओतनीएल करा आईस, त ओह ओतनीएल ले बिनती करिस कि ओह अकसा के ददा कालेब ले एक ठन खेत मांगय। जब अकसा ह अपन गदहा ले उतरिस, त कालेब ह ओकर ले पुछिस, “तेंह का चाहत हस कि मेंह तोर बर करंव?”
JDG 1:15 अकसा ह जबाब दीस, “मोर ऊपर एक बिसेस किरपा कर। जब तेंह मोला नेगेव म कुछू भुइयां दे हस, त मोला पानी के सोतामन घलो दे।” तब कालेब ह ओला ऊपर अऊ खाल्हे के सोतामन ला दे दीस।
JDG 1:16 मूसा के ससुर, जऊन ह केनी के रहइया रिहिस, ओकर संतानमन यहूदा के मनखेमन संग खजूर के सहर ले यहूदा के सुन्ना जगह के निवासीमन के बीच रहे बर ऊपर गीन, जऊन ह कि अराद के लकठा म नेगेव म हवय।
JDG 1:17 तब यहूदा के मनखेमन अपन संगी इसरायली सिमोनीमन संग गीन अऊ ओमन सपत सहर म रहइया कनानीमन ऊपर हमला करके सहर ला पूरा नास कर दीन। एकरसेति ओ सहर ला होरमा कहे गीस।
JDG 1:18 यहूदा के मनखेमन गाजा, अस्कलोन अऊ एकरोन सहरमन ऊपर घलो येमन के इलाका सहित कब्जा कर लीन।
JDG 1:19 यहोवा ह यहूदा के मनखेमन संग रिहिस। ओमन पहाड़ी देस ला अपन अधिकार म ले लीन, पर ओमन मैदानी भाग म रहइया मनखेमन ला भगा नइं सकिन, काबरकि ओमन करा लोहा के बने रथ रिहिन।
JDG 1:20 जइसे कि मूसा ह वायदा करे रिहिस, कालेब ला हेबरोन सहर दिये गीस, जऊन ह उहां ले अनाक के तीनों बेटा ला भगा दीस।
JDG 1:21 पर बिनयामीनीमन ओ यबूसीमन ला भगा नइं सकिन, जऊन मन यरूसलेम म रहत रिहिन; अऊ आज घलो यबूसीमन यरूसलेम म बिनयामीनीमन के संग रहिथें।
JDG 1:22 यूसुफ के बंस के मनखेमन बेतेल ऊपर हमला करिन, अऊ यहोवा ह ओमन के संग रिहिस।
JDG 1:23 जब ओमन बेतेल (पहिले लूज कहे जावय) के भेद लेय बर मनखेमन ला पठोईन,
JDG 1:24 त भेदियामन देखिन कि एक मनखे ह सहर ले निकलत हवय, त ओमन ओला कहिन, “हमन ला सहर भीतर जाय के रद्दा देखा, त हमन तोर संग बने बरताव करबो।”
JDG 1:25 ओह ओमन ला सहर भीतर जाय के रद्दा देखाईस, अऊ ओमन सहर के मनखेमन ला तलवार ले मार डारिन, पर ओ मनखे अऊ ओकर पूरा परिवार ला छोंड़ दीन।
JDG 1:26 तब ओ मनखे ह हित्तीमन के देस म गीस अऊ उहां एक ठन सहर बसाईस, अऊ ओ सहर के नांव लूज रखिस; अऊ आज के दिन तक ओ सहर के ये नांव हवय।
JDG 1:27 पर मनस्से के मनखेमन बेत-सान या तानाक या दोर या यिबलाम या मगिद्दो अऊ ये नगरमन के चारों कोति के निवासीमन ला नइं भगा सकिन, काबरकि कनानीमन ओ देस म बसे रहे के ठान ले रिहिन।
JDG 1:28 जब इसरायलीमन सक्तिसाली हो गीन, त ओमन कनानीमन ला बंधुवा मजदूर बना लीन, पर ओमन ला कभू पूरा रीति ले नइं भगाईन।
JDG 1:29 अऊ न ही एपरैम के गोत्र ह गेजेर म रहइया कनानीमन ला भगाईस, पर कनानीमन उहां ओमन के बीच म बसेच रिहिन।
JDG 1:30 जबूलून ह घलो कितरोन अऊ नहलोल के निवासीमन ला नइं भगाईस; एकरसेति ये कनानी ओमन के बीच म बसे रिहिन, पर जबूलून ह ओमन ला बंधुवा मजदूर बना लीस।
JDG 1:31 आसेर के मनखेमन घलो अक्को, सीदोन, अहलाब, अकजीब, हेलबा, अपेक, अऊ रहोब सहरमन के निवासीमन ला नइं भगाईन;
JDG 1:32 आसेरी मनखेमन देस के निवासी कनानीमन के बीच म रहत रिहिन, काबरकि ओमन कनानीमन ला नइं भगाईन।
JDG 1:33 नपताली के मनखेमन घलो बेत-सेमेस अऊ बेत-अनात सहरमन के निवासीमन ला नइं भगाईन; पर नपतालीमन घलो ओ देस के निवासी कनानीमन के बीच म बस गीन, अऊ जऊन मन बेत-सेमेस अऊ बेत-अनात म रहत रिहिन, ओमन नपतालीमन के बंधुवा मजदूर बन गीन।
JDG 1:34 अमोरीमन दानीमन ला पहाड़ी देस म घेरके रखे रिहिन, अऊ ओमन ला खाल्हे चौरस भाग म नइं आवन देत रिहिन।
JDG 1:35 अऊ अमोरीमन हेरेस पहाड़, अय्यालोन अऊ सालबीम म घलो अपन पकड़ बनाय रखे के ठान ले रिहिन, पर जब यूसुफ के बंस के मनखेमन के सक्ति ह बढ़िस, त अमोरीमन घलो बंधुवा मजदूर हो गीन।
JDG 1:36 अमोरीमन के इलाका ह अकरबीम ले लेके सेला अऊ ओकर आघू तक रिहिस।
JDG 2:1 एक दिन यहोवा के स्वरगदूत ह गिलगाल ले बोकीम म जाके कहिस, “मेंह तुमन ला मिसर देस ले निकालके ये देस म लानेंव, जेला मेंह तुम्हर पुरखामन ला देय के कसम खाय रहेंव। मेंह कहे रहेंव, ‘जऊन करार मेंह तुम्हर संग करे हवंव, ओला मेंह कभू नइं टोरंव,
JDG 2:2 अऊ तुमन ये देस के मनखेमन के संग कोनो करार झन करहू; तुमन ओमन के बेदीमन ला गिरा दूहू।’ पर तुमन मोर बात ला नइं मानेव। तुमन अइसने काबर करे हवव?
JDG 2:3 अऊ मेंह ये घलो कहे रहेंव, ‘मेंह ओमन ला तुम्हर आघू ले नइं भगाहूं; ओमन तुम्हर जी के जंजाल अऊ ओमन के देवतामन तुम्हर बर फांदा हो जाहीं।’ ”
JDG 2:4 जब यहोवा के स्वरगदूत ह जम्मो इसरायलीमन ला ये बात कहिस, त मनखेमन चिचिया-चिचियाके रोईन,
JDG 2:5 अऊ ओमन ओ जगह के नांव बोकीम धरिन। अऊ उहां ओमन यहोवा बर बलिदान चघाईन।
JDG 2:6 जब यहोसू ह इसरायलीमन ला बिदा कर लीस, त इसरायलीमन ओ देस म अपन-अपन भाग लेय बर, ओ देस ऊपर अधिकार करे बर गीन।
JDG 2:7 यहोसू के जिनगी भर अऊ जऊन अगुवामन यहोसू के मरे के बाद जीयत रिहिन अऊ इसरायल बर यहोवा के करे जम्मो बड़े-बड़े काममन ला देखे रिहिन, ओमन के जिनगी भर, मनखेमन यहोवा के सेवा करिन।
JDG 2:8 तब यहोवा के सेवक, नून के बेटा यहोसू ह एक सौ दस साल के होके मर गीस।
JDG 2:9 अऊ ओला मनखेमन तिमनत-हेरेस म ओकर उत्तराधिकार म मिले भुइयां म माटी दे दीन, जऊन ह कि एपरैम के पहाड़ी देस म गास नांव के पहाड़ के उत्तर दिग म हवय।
JDG 2:10 ओकर बाद ओ पूरा पीढ़ी के मनखेमन अपन-अपन पुरखामन म मिल गीन; तब जऊन आने पीढ़ी आईस, ओकर मनखेमन न तो यहोवा ला जानत रिहिन अऊ न ही ओ काममन ला, जेला ओह इसरायल बर करे रिहिस।
JDG 2:11 तब इसरायलीमन यहोवा के नजर म दुस्ट काम करिन अऊ बाल नांव के देवता के सेवा करन लगिन।
JDG 2:12 ओमन ओ यहोवा, अपन पुरखामन के परमेसर ला तियाग दीन, जऊन ह ओमन ला मिसर देस ले निकालके लाने रिहिस। ओमन अपन चारों कोति के मनखेमन के कतको किसम के देवतामन के पाछू चलिन अऊ ओमन के अराधना करिन। अऊ ओमन यहोवा के कोरोध ला भड़काईन
JDG 2:13 काबरकि ओमन यहोवा ला तियागके बाल देवता अऊ असतोरेत देवी के सेवा करन लगिन।
JDG 2:14 एकरसेति यहोवा ह इसरायलीमन ऊपर गुस्सा होके, ओह ओमन ला लुटेरामन के हांथ म कर दीस, जेमन ओमन ला लूटिन। ओह ओमन ला ओमन के चारों कोति के ओ बईरीमन के हांथ म कर दीस, जेमन के बिरोध ओमन अऊ नइं कर सकिन।
JDG 2:15 जब भी इसरायली मनखेमन लड़े बर बाहिर निकलिन, यहोवा के हांथ ह ओमन ला हराय बर उठिस, जइसने कि ओह ओमन ला कसम खाके कहे रिहिस। ओमन बहुंत तकलीफ म रिहिन।
JDG 2:16 तब यहोवा ह नियायीमन ला ठाढ़ करिस, जऊन मन ओमन ला लुटेरामन के हांथ ले बचाईन।
JDG 2:17 तभो ले ओमन अपन नियायीमन के बात ला नइं सुनंय, पर बेभिचारिन के सहीं आने देवतामन के पाछू चलंय अऊ ओमन के अराधना करंय। ओमन बहुंत जल्दी अपन ओ पुरखामन के रसता ला छोंड़ दीन, जऊन मन यहोवा के हुकूममन ला मानत आय रिहिन।
JDG 2:18 जब भी यहोवा ह ओमन बर एक नियायी ला ठाढ़ करय, त ओह ओ नियायी के संग म रहय अऊ ओ नियायी के जिनगी भर ओह ओमन ला ओमन के बईरीमन के हांथ ले बचावय; काबरकि जऊन मन ओमन ला सतावंय अऊ दुख देवंय, ओकर कारन ओमन करलई होवंय, अऊ ओ करलई ला देखके यहोवा ह ओमन ऊपर दया करय।
JDG 2:19 पर जब नियायी ह मर जावय, त ओमन फेर आने देवतामन के पाछू चलंय अऊ ओमन के सेवा अऊ अराधना करंय, अऊ अपन पुरखामन ले घलो जादा बिगड़ जावंय। ओमन अपन दुस्ट काम अऊ हठीला चालचलन ला छोंड़े नइं चाहंय।
JDG 2:20 ये खातिर यहोवा ह इसरायल ऊपर बहुंत गुस्सा होईस अऊ कहिस, “ये जाति के मनखेमन ओ करार ला टोर दे हवंय, जेला मेंह ओमन के पुरखामन के संग करे रहेंव, येमन मोर बात ला नइं माने हवंय,
JDG 2:21 एकरसेति यहोसू ह अपन मरे के बेरा, जऊन आने जाति के मनखेमन ला छोंड़ गे रिहिस, ओमन ला मेंह इसरायलीमन के आघू ले अब नइं निकालंव।
JDG 2:22 मेंह ओमन के उपयोग इसरायलीमन ला परखे बर करहूं अऊ देखहूं कि ओमन यहोवा के हुकूम ला मानहीं कि नइं अऊ अपन पुरखामन के सहीं ओ हुकूम म चलहीं कि नइं।”
JDG 2:23 एकरसेति यहोवा ह ओ जातिमन के मनखेमन ला उहां रहे बर दीस; ओह ओमन ला तुरते नइं निकालिस अऊ ओह ओमन ला यहोसू के हांथ म नइं करिस।
JDG 3:1 ओ जम्मो इसरायली, जऊन मन कनान म कोनो लड़ई के अनुभव नइं करे रिहिन, ओमन ला परखे बर यहोवा ह ये जातिमन के मनखेमन ला छोंड़ दे रिहिस
JDG 3:2 (ओ इसरायलीमन के संतान, जऊन मन ला पहिले लड़ई के अनुभव नइं रिहिस, ओमन ला लड़ई के बारे म सिखाय बर ही यहोवा ह अइसने करिस):
JDG 3:3 याने कि पलिस्तीमन के पांच सासन करइया, जम्मो कनानीमन, सीदोनीमन, अऊ बाल-हेरमोन पहाड़ ले लेके लेबो-हमात तक लबानोन पहाड़मन म रहइया हिब्बीमन ला।
JDG 3:4 इसरायलीमन ला परखे बर येमन ला छोंड़ दिये गे रिहिस, ताकि ये पता चले कि इसरायलीमन यहोवा के ओ हुकूममन ला मानथें कि नइं, जेला ओह मूसा के जरिये ओमन के पुरखामन ला देय रिहिस।
JDG 3:5 इसरायली मनखेमन कनानी, हित्ती, अमोरी, परिज्जी, हिब्बी अऊ यबूसीमन के बीच म रहत रिहिन।
JDG 3:6 इसरायलीमन ओमन के बेटीमन ला अपन बेटा बर बिहाव करके लानंय अऊ अपन बेटीमन ला ओमन के बेटा बर बिहाव म देवंय, अऊ ओमन के देवतामन के सेवा करंय।
JDG 3:7 ये किसम ले इसरायलीमन यहोवा के नजर म दुस्ट काम करिन; ओमन यहोवा अपन परमेसर ला भुला गीन अऊ बाल देवता अऊ असेरा देवी के सेवा करन लगिन।
JDG 3:8 तब यहोवा के गुस्सा ह इसरायलीमन ऊपर भड़किस, अऊ ओह ओमन ला अरम-नहरैम के राजा कूसन-रिसातैम के हांथ म कर दीस, जेकर अधीन म इसरायलीमन आठ साल तक रिहिन।
JDG 3:9 पर जब इसरायलीमन यहोवा करा गोहारिन, त ओह ओमन बर एक छुटकारा देवइया ओतनीएल ला ठाढ़ करिस, जऊन ह कालेब के छोटे भाई कनज के बेटा रिहिस, अऊ ओतनीएल ह ओमन ला बचाईस।
JDG 3:10 यहोवा के आतमा ह ओमा आईस, अऊ ओह इसरायलीमन के नियायी बन गीस अऊ लड़े बर निकलिस। यहोवा ह अराम के राजा कूसन-रिसातैम ला ओतनीएल के हांथ म कर दीस, अऊ ओह कूसन-रिसातैम ऊपर जय पाईस।
JDG 3:11 तब चालीस साल तक, कनज के बेटा ओतनीएल के मरत तक इसरायल देस म सांति रिहिस।
JDG 3:12 इसरायलीमन फेर यहोवा के नजर म दुस्ट काम करिन, त यहोवा ह इसरायलीमन ला मोआब के राजा एगलोन के अधीन कर दीस, काबरकि ओमन यहोवा के नजर म दुस्ट काम करे रिहिन।
JDG 3:13 एगलोन ह अमोनी अऊ अमालेकीमन ला इकट्ठा करिस अऊ ओमन के मदद ले इसरायल ऊपर हमला करिस, अऊ ओमन खजूरवाले सहर ला अपन अधिकार म कर लीन।
JDG 3:14 तब इसरायलीमन अठारह साल तक मोआब के राजा एगलोन के अधीन म रिहिन।
JDG 3:15 इसरायलीमन फेर यहोवा करा गोहारिन, अऊ ओह गेरा बिनयामीनी के बेटा एहूद ला ओमन के छुटकारा देवइया ठहिराईस; ओह डेरी हत्था रिहिस। इसरायलीमन ओला मोआब के राजा एगलोन करा भेंट के संग पठोईन।
JDG 3:16 एहूद ह हांथ भर लम्बा एक दूधारी तलवार बनवाय रिहिस, जेला ओह अपन ओनहा के खाल्हे जेवनी जांघ म बांधके रखे रिहिस।
JDG 3:17 ओह ओ भेंट ला मोआब के राजा एगलोन ला दीस; एगलोन ह एक बहुंत मोटा मनखे रिहिस।
JDG 3:18 जब एहूद ह भेंट ला दे चुकिस, त ओह भेंट ला उठाके लानेवालामन ला वापिस भेज दीस।
JDG 3:19 पर गिलगाल के लकठा म पथरा के मूरतीमन करा हबरके, ओह खुद एगलोन करा वापिस गीस अऊ कहिस, “हे महाराजा, मोला तोर ले एक भेद के बात कहना हे।” तब राजा ह अपन सेवकमन ला कहिस, “हमन दूनों ला थोरकन देर बर अकेला छोंड़ दव!” अऊ ओ जम्मो बाहिर चल दीन।
JDG 3:20 तब एहूद ह ओकर करा गीस, जब ओह अपन महल के ऊपर के कमरा म अकेला बईठे रिहिस, अऊ एहूद ह ओला कहिस, “परमेसर के कोति ले मोर करा तोर बर एक संदेस हवय।” जब राजा ह अपन गद्दी ले उठिस,
JDG 3:21 त अतका म, एहूद ह अपन डेरी हांथ ला बढ़ाके अपन जेवनी जांघ म ले तलवार ला निकालिस अऊ राजा के पेट म भोंग दीस।
JDG 3:22 अऊ त अऊ तलवार के संगे-संग ओकर मुठ घलो ओकर पेट म हमा गीस, अऊ ओकर अंतड़ीमन बाहिर निकल आईन। एहूद ह तलवार ला ओकर पेट म ले नइं निकालिस, अऊ चरबी ह ओला ढांप दीस।
JDG 3:23 तब एहूद ह निकलके बरामदा म आईस; अऊ ऊपर के कमरा के कपाटमन ला बंद कर दीस अऊ ओमन म ताला लगा दीस।
JDG 3:24 जब ओह चले गीस, त सेवकमन आईन अऊ देखिन कि ऊपर के कमरा के कपाटमन म ताला लगे हवय। ओमन कहिन, “जरूर ओह महल के भीतर के कमरा म अपनआप ला हल्का करत होही।”
JDG 3:25 ओमन बाट जोहत-जोहत परेसान हो गीन, पर जब ओह कमरा के कपाटमन ला नइं खोलिस, त ओमन एक चाबी लेके कपाटमन ला खोलिन, त का देखिन कि ओमन के सुवामी ह भुइयां म मरे पड़े रहय।
JDG 3:26 जब ओमन सोच-बिचार करत रिहिन, तब एहूद ह भाग निकलिस। ओह पथरा के मूरतीमन ले होवत बचके सेइरे नगर चल दीस।
JDG 3:27 जब ओह उहां हबरिस, त ओह एपरैम के पहाड़ी देस म तुरही फूंकिस, अऊ इसरायलीमन ओकर संग पहाड़ीमन ले उतरके खाल्हे गीन, अऊ ओह ओमन के अगुवई करत रिहिस।
JDG 3:28 ओह ओमन ला हुकूम दीस, “मोर पाछू-पाछू आवव, काबरकि यहोवा ह तुम्हर बईरी मोआब ला तुम्हर हांथ म देय दे हवय।” तब ओमन ओकर पाछू-पाछू खाल्हे गीन अऊ यरदन के ओ घाटीमन ला अपन अधिकार म कर लीन, जऊन मन ले मनखेमन मोआब देस कोति जावंय; ओमन कोनो ला ओ पार नाहकन नइं दीन।
JDG 3:29 ओ बेरा ओमन करीब दस हजार मोआबीमन ला मार डारिन, ओ जम्मो मोआबीमन ताकतवर अऊ सूरबीर रिहिन; ओमा के एको झन घलो बचके नइं जा सकिन।
JDG 3:30 ओ दिन मोआब ह इसरायल के अधीन म हो गीस, अऊ अस्सी साल तक इसरायल देस म सांति रिहिस।
JDG 3:31 एहूद के बाद, अनात के बेटा समगर आईस, जऊन ह एक बईला खेदे के लउठी ले छै सौ पलिस्तीमन ला मार डारिस। ये किसम ले ओह घलो इसरायल ला बचाईस।
JDG 4:1 जब एहूद ह मर गीस, त इसरायलीमन फेर यहोवा के नजर म दुस्ट काम करिन।
JDG 4:2 एकरसेति यहोवा ह ओमन ला हासोर सहर म राज-करइया कनान के राजा याबीन के अधीन कर दीस। ओकर सेना के सेनापति सीसरा ह हरोसेत-हगोईम के निवासी रिहिस।
JDG 4:3 याबीन करा लोहा के बने नौ सौ रथ रिहिस अऊ ओह इसरायलीमन ला बीस साल तक बहुंत तकलीफ दीस। तब ओमन यहोवा करा मदद बर गोहार पारिन।
JDG 4:4 ओ बेरा म लपीदोत के घरवाली दबोरा ह इसरायलीमन के अगुवई करत रिहिस अऊ ओह अगमजानीन रिहिस।
JDG 4:5 ओह एपरैम के पहाड़ी देस म रामा अऊ बेतेल नगरमन के बीच म दबोरा के खजूर के खाल्हे म अदालत लगावय, अऊ इसरायलीमन ओकर करा अपन झगरा के निपटारा करवाय बर जावंय।
JDG 4:6 ओह अबीनोम के बेटा बाराक ला नपताली के केदेस नगर म ले बलाईस अऊ ओला कहिस, “यहोवा, इसरायल के परमेसर ह तोला हुकूम देवत हे, ‘तें जा, अऊ नपताली अऊ जबूलून के दस हजार मनखेमन ला अपन संग लेके ताबोर पहाड़ ऊपर जा।
JDG 4:7 तब मेंह याबीन के सेना के सेनापति सीसरा ला ओकर रथमन अऊ ओकर सेना के संग कीसोन नदी करा लानहूं अऊ ओला तोर हांथ म कर दूहूं।’ ”
JDG 4:8 बाराक ह ओला कहिस, “यदि तेंह मोर संग जाबे, त मेंह जाहूं; पर यदि तेंह मोर संग नइं जाबे, त मेंह नइं जावंव।”
JDG 4:9 दबोरा ह कहिस, “जरूर मेंह तोर संग जाहूं। जऊन बरताव तेंह करत हस, ओकर कारन तोर बड़ई नइं होही, काबरकि यहोवा ह सीसरा ला एक माईलोगन के हांथ म कर दीही।” तब दबोरा ह बाराक के संग केदेस गीस।
JDG 4:10 उहां बाराक ह जबूलून अऊ नपताली के मनखेमन ला बलाईस, अऊ ओकर हुकूम पाके दस हजार मनखेमन ओकर संग ऊपर गीन। दबोरा ह घलो ओकर संग ऊपर गीस।
JDG 4:11 ओ बेरा हेबेर नांव के केनी ह ओ आने केनीमन ला छोंड़ दे रिहिस, जऊन मन मूसा के साला होबाब के संतान रिहिन, अऊ हेबेर ह केदेस के लकठा म जाके साननीम म बड़े रूख करा अपन तम्बू गाड़े रिहिस।
JDG 4:12 जब मनखेमन सीसरा ला बताईन कि अबीनोम के बेटा बाराक ह ताबोर पहाड़ ऊपर गे हवय,
JDG 4:13 त सीसरा ह हरोसेत-हगोईम ले लेके कीसोन नदी तक के अपन जम्मो मनखे अऊ लोहा ले बने अपन नौ सौ रथमन ला बलाईस।
JDG 4:14 तब दबोरा ह बाराक ला कहिस, “जा! काबरकि आज ओ दिन ए, जब यहोवा ह सीसरा ला तोर हांथ म कर दे हवय। का यहोवा ह तोर ले आघू नइं गे हवय?” एकरसेति बाराक ह ताबोर पहाड़ ले उतरिस अऊ ओकर पाछू-पाछू दस हजार मनखे गीन।
JDG 4:15 जब बाराक ह आघू बढ़िस, त यहोवा ह सीसरा अऊ ओकर जम्मो रथ अऊ सेना ला तलवार ले हराके भगा दीस, अऊ सीसरा ह अपन रथ ले उतरके दऊड़त भाग गीस।
JDG 4:16 बाराक ह हरोसेत-हगोईम तक रथमन के अऊ सेना के पीछा करिस, अऊ तलवार ले सीसरा के जम्मो सेना ह मारे गीस; अऊ एको झन घलो नइं बांचिस।
JDG 4:17 पर सीसरा ह दऊड़त हेबेर केनी के घरवाली, याएल के तम्बू करा भाग गीस, काबरकि हासोर के राजा याबीन अऊ हेबेर केनी के परिवार के बीच म मेल रिहिस।
JDG 4:18 तब याएल ह सीसरा ले भेंट करे बर निकलिस अऊ ओला कहिस, “हे मोर मालिक, आ, मोर करा आ। झन डर्रा।” तब ओह ओकर तम्बू के भीतर गीस, अऊ याएल ह ओला एक कम्बल म ढांप दीस।
JDG 4:19 तब सीसरा ह ओकर ले कहिस, “मोला पीयास लगत हे, मोला थोरकन पानी दे।” तब याएल ह दूध के कुप्पी ला खोलके ओला दूध पीये बर दीस, अऊ ओकर ऊपर फेर कम्बल ओढ़ा दीस।
JDG 4:20 तब सीसरा ह ओला कहिस, “तम्बू के दुवारी म ठाढ़े रह; यदि कोनो आके तोर ले पुछथे, ‘इहां कोनो हवय?’ त कहिबे, ‘कोनो नइं ए।’ ”
JDG 4:21 पर जब सीसरा ह थकके गहिरा नींद म सोवत रिहिस, त हेबेर के घरवाली, याएल ह तम्बू के एक खूंटी अऊ हथौड़ा ला लीस, अऊ चुपेचाप सीसरा करा गीस अऊ खूंटी ला ओकर कनपटी म अइसने ठोंक दीस कि खूंटी ह पार होके भुइयां म धंस गीस, अऊ सीसरा ह मर गीस।
JDG 4:22 जब बाराक ह सीसरा के पीछा करत उहां आईस, त याएल ह ओकर ले भेंट करे बर निकलिस अऊ कहिस, “एती आ, मेंह तोला ओ मनखे ला देखाहूं, जेला तेंह खोजत हस।” तब ओह याएल के संग भीतर गीस अऊ देखिस कि सीसरा के कनपटी म तम्बू के खूंटी ठोंकाय रहय अऊ ओह मरे पड़े रहय।
JDG 4:23 ये किसम ले, ओ दिन, परमेसर ह कनान के राजा याबीन ला इसरायलीमन के अधीन कर दीस।
JDG 4:24 अऊ इसरायलीमन कनान के राजा याबीन ऊपर परबल होवत गीन, जब तक कि ओमन ओला नास नइं कर दीन।
JDG 5:1 ओहीच दिन दबोरा अऊ अबीनोम के बेटा बाराक ये गीत गाईन:
JDG 5:2 “जब इसरायल के राजकुमारमन अगुवई करथें, जब मनखेमन अपन ही ईछा से अपनआप ला दे देथें— यहोवा के परसंसा होवय!
JDG 5:3 “हे राजामन, ये बात ला सुनव! हे सासन करइयामन सुनव! मेंह खुद यहोवा बर गीत गाहूं; मेंह यहोवा, इसरायल के परमेसर के गीत गाके परसंसा करहूं।
JDG 5:4 “हे यहोवा, जब तेंह सेईर ले निकलय, जब तेंह एदोम के देस ले आघू बढ़य, त धरती ह कांपिस, अकासमन टूट पड़िन, बादरमन पानी बरसाईन।
JDG 5:5 सीनय के यहोवा के आघू म, यहोवा, इसरायल के परमेसर के आघू म पहाड़मन कांप उठिन।
JDG 5:6 “अनात के बेटा समगर के दिनमन म, अऊ याएल के दिनमन म, राजमार्गमन सूना पड़े रिहिन; डहार रेंगइयामन पै-डगरीमन ले जावत रिहिन।
JDG 5:7 जब तक में, दबोरा ह छुड़ानेवाला बनके नइं उठेंव, जब तक मेंह इसरायल म एक दाई होके नइं उठेंव, इसरायल म गांववालामन नइं लड़त रिहिन; ओमन पाछू घुंचत रिहिन।
JDG 5:8 परमेसर ह नवां अगुवामन ला चुनिस, जब लड़ई ह सहर के दुवारमन म आ गीस, पर चालीस हजार इसरायलीमन के बीच म एको ठन ढाल या बरछी नइं दिखिस।
JDG 5:9 मोर मन ह इसरायल के राजकुमारमन कोति, अऊ मनखेमन के बीच म अपन ईछा से सैनिक बने मनखेमन कोति हवय। यहोवा के परसंसा होवय!
JDG 5:10 “हे पंर्रा गदहामन म सवारी करइया, अपन काठी म कम्बल डालके बईठइया मनखेमन, अऊ हे रसता म रेंगइया मनखेमन,
JDG 5:11 पानी सिंचइया जगहमन म गीत गवइयामन के अवाज ऊपर धियान दव। ओमन यहोवा के बिजय के, अऊ इसरायल म ओकर गांववालामन के बिजय के गीत गाथें। “तब यहोवा के मनखेमन खाल्हे सहर के दुवारमन करा गीन।
JDG 5:12 ‘जाग, जाग, हे दबोरा! जाग, जाग, गाना सुना! हे बाराक, उठ! हे अबीनोम के बेटा, अपन बंदीमन ला बंधुवई म ले जा।’
JDG 5:13 “परभावसाली मनखेमन के बांचे मनखेमन खाल्हे उतरिन; यहोवा के मनखेमन बलसालीमन के बिरूध म लड़े बर मोर करा उतर आईन।
JDG 5:14 कुछू मनखेमन एपरैम ले आईन, जेमन के संबंध अमालेक म रिहिस; बिनयामीन ह ओ मनखेमन के संग रिहिस, जऊन मन तोर पाछू चलिन। माकीर म ले कप्तानमन उतर आईन जबूलून ले सेनापति के सामान-धरइयामन आईन।
JDG 5:15 इस्साकार के राजकुमारमन दबोरा के संग रिहिन; हव, इस्साकार ह बाराक के संग रिहिस; ओकर हुकूम पाके ओमन घाटी म गीन। रूबेन के इलाकामन म बहुंत बातमन ला मन म सोचे गीस।
JDG 5:16 भेड़-बकरी के झुंड बर चरवाहा के सीटी के अवाज सुने बर, तेंह काबर भेड़साला म रूक गे रहय? रूबेन के इलाकामन म बहुंत बातमन ला मन म सोचे गीस।
JDG 5:17 गिलाद ह यरदन के ओ पार रह गीस। अऊ दान ह काबर पानी जहाजमन म रूक गीस? आसेर ह समुंदर के तीर म रह गीस अऊ ओकर छोटे खाड़ीमन म ठहर गीस।
JDG 5:18 जबूलून के मनखेमन अपन परान ला खतरा म डालिन; वइसने ही नपताली घलो खेतमन के चौरस जगह म ठहर गीस।
JDG 5:19 “राजामन आईन, अऊ ओमन लड़िन, कनान के राजामन मगिद्दो के सोतामन करा तानाक म लड़िन; ओमन चांदी के कोनो सामान ला नइं लूटिन।
JDG 5:20 अकासमन ले तारामन लड़िन; ओमन अपन क्रम म सीसरा ले लड़ई करिन।
JDG 5:21 कीसोन नदी ह ओमन ला बोहाके ले गीस, याने कि ओ पुराना नदी, ओ कीसोन नदी। हे मोर मन, आघू बढ़; मजबूत हो!
JDG 5:22 तब घोड़ामन के खुर के गरजन होवन लगिस— ओकर ताकतवर घोड़ामन सरपट दऊड़न लगिन।
JDG 5:23 यहोवा के स्वरगदूत ह कहिस, ‘मेरोज सहर ला सराप देवव; येकर मनखेमन ला भारी सराप देवव, काबरकि ओमन यहोवा के सहायता करे बर, बलसाली मनखेमन के बिरूध म यहोवा के सहायता करे बर नइं आईन।’
JDG 5:24 “केनी हेबेर के घरवाली याएल ह माईलोगनमन म सबले जादा धइन होवय, तम्बू म रहइया माईलोगनमन म सबले जादा धइन होवय।
JDG 5:25 सीसरा ह पानी मांगिस, पर ओह ओला दूध दीस; परभावसाली मनखेमन बर उचित, ओह सीसरा बर कटोरा म दही ले आईस।
JDG 5:26 याएल ह अपन एक हांथ म तम्बू के खूंटी, अऊ अपन जेवनी हांथ म बढ़ई के हथौड़ा धरिस। अऊ ओह हथौड़ा ले सीसरा ला मारिस; ओह ओकर मुड़ ला कुचर दीस; ओह ओकर कनपटी ला चकनाचूर करके आर-पार छेद दीस।
JDG 5:27 ओ माईलोगन के गोड़मन म ओह झुकिस, ओह गिरिस; उहां ओह चित हो गीस। ओकर गोड़मन म ओह झुकिस, ओह गिरिस; जिहां ओह झुकिस, उहां ओह गिरिस—मर गीस।
JDG 5:28 “खिड़की म ले सीसरा के दाई ह झांकके देखिस; अऊ जाली के पाछू म ले पुकारके कहिस, ‘ओकर रथ के आय म अतेक देर काबर होवत हे? ओकर रथमन के खड़खड़ के अवाज काबर सुनई नइं देवत हे?’
JDG 5:29 ओकर सबले बुद्धिमान माईलोगनमन ओला जबाब देथें; वास्तव म, ओह अपनआप ला कहिते रहिथे,
JDG 5:30 ‘का ओमन लूट ला पाके बांटा नइं करत हें: हर आदमी बर एक या दू माईलोगन, सीसरा बर लूट के रूप म रंग-बिरंगी कपड़ामन, काढ़े गय रंग-बिरंगी कपड़ामन, मोर गला बर बढ़िया ढंग से काढ़े गय कपड़ामन— ये जम्मो लूट के रूप म?’
JDG 5:31 “हे यहोवा, तोर जम्मो बईरीमन नास हो जावंय! पर ओ जम्मो, जऊन मन तोर ले मया करथें, ओमन अपन पूरा ताकत ले उगत सूरज के सहीं होवंय।” तब इसरायल देस म चालीस साल तक सांति रिहिस।
JDG 6:1 तब इसरायलीमन यहोवा के नजर म फेर दुस्ट काम करिन, एकरसेति यहोवा ह ओमन ला मिदयानीमन के हांथ म सात साल तक सऊंप दीस।
JDG 6:2 मिदयानीमन के अतियाचार इसरायलीमन ऊपर अतेक जादा होय लगिस कि इसरायलीमन पहाड़ के दरार, गुफा अऊ गढ़मन म अपन डेरा बना लीन।
JDG 6:3 जब भी इसरायलीमन फसल लगावंय, त मिदयानी, अमालेकी अऊ पूरब दिग के आने मनखेमन ओमन ऊपर हमला कर देवंय।
JDG 6:4 ओमन भुइयां म डेरा डालंय अऊ गाजा सहर तक फसल ला नास कर डारंय अऊ इसरायलीमन बर कोनो जीयत चीज ला नइं छोंड़ंय, न तो भेड़-बकरी, न ही गाय-बईला, अऊ न ही गदहामन ला छोंड़ंय।
JDG 6:5 ओमन अपन पसुमन सहित डेरा डालंय अऊ ओमन के तम्बूमन फांफामन के दल के सहीं अब्बड़ रहय। ओमन के या ओमन के ऊंटमन के गनती करई असंभव रिहिस; ओमन ओ देस ला नास करे बर ओकर ऊपर हमला करंय।
JDG 6:6 मिदयानीमन इसरायलीमन के अतेक दुरदसा करिन कि इसरायलीमन यहोवा करा मदद बर गोहार पारिन।
JDG 6:7 जब इसरायलीमन मिदयानीमन के कारन यहोवा करा गोहारिन,
JDG 6:8 त यहोवा ह इसरायलीमन करा एक अगमजानी ला पठोईस, जऊन ह ओमन ले कहिस, “यहोवा, इसरायल के परमेसर ह ये कहत हे: मेंह तुमन ला मिसर देस ले, गुलामी के देस ले निकाल लानेंव।
JDG 6:9 मेंह तुमन ला मिसरीमन के हांथ ले बचायेंव। अऊ मेंह तुमन ला ओ जम्मो झन के हांथ ले छुटकारा देंय, जऊन मन तुमन ला दुख देवत रिहिन; मेंह ओमन ला तुम्हर आघू ले भगा देंय अऊ ओमन के देस ला तुमन ला दे देंय।
JDG 6:10 अऊ मेंह तुमन ला कहेंव, ‘मेंह यहोवा तुम्हर परमेसर अंव; अमोरीमन के देवतामन के अराधना झन करव, जेमन के देस म तुमन रहिथव।’ पर तुमन मोर बात ला नइं मानेव।”
JDG 6:11 यहोवा के स्वरगदूत ह आके ओपरा नगर म ओ बलूत रूख के खाल्हे म बईठ गीस, जऊन ह अबिएजेरी योआस के रिहिस, अऊ उहां ओकर बेटा गिदोन ह एक अंगूर के मंद निकाले के कुन्ड म गहूं मिंजत रहय ताकि ओह गहूं ला मिदयानीमन के नजर ले बचाके रख सकय।
JDG 6:12 जब यहोवा के स्वरगदूत ह गिदोन ला दरसन दीस, त ओह कहिस, “हे बलसाली सूरबीर, यहोवा ह तोर संग हवय।”
JDG 6:13 गिदोन ह ओला कहिस, “हे मोर परभू, मोर बिनती ला सुन; यदि यहोवा ह हमर संग हवय, त हमर ऊपर ये जम्मो बिपत्ति काबर पड़िस? ओकर जम्मो अचरज के काममन कहां हवंय, जेकर बारे म हमर पुरखामन हमन ला बताईन, जब ओमन कहिन, ‘का यहोवा ह हमन ला मिसर देस ले निकालके नइं लानिस?’ पर अब यहोवा ह हमन ला तियाग दे हवय अऊ हमन ला मिदयानीमन के हांथ म कर दे हवय।”
JDG 6:14 तब यहोवा ह ओकर कोति मुड़िस अऊ कहिस, “तोर करा जऊन बल हवय, ओ बल म होके जा अऊ इसरायलीमन ला मिदयानीमन के हांथ ले बचा। मेंह तोला पठोवत हंव?”
JDG 6:15 गिदोन ह कहिस, “हे मोर परभू, मोर बिनती ला सुन, मेंह इसरायल ला कइसे बचा सकत हंव? मनस्से म मोर कुल ह सबले कमजोर हवय, अऊ मेंह अपन परिवार म सबले छोटे अंव।”
JDG 6:16 यहोवा ह जबाब दीस, “मेंह तोर संग रहिहूं, अऊ तेंह जम्मो मिदयानीमन ला मार गिराबे, अऊ एको झन ला जीयत नइं छोंड़बे।”
JDG 6:17 गिदोन ह कहिस, “यदि तोर दया-दिरिस्टी मोर ऊपर हवय, त मोला एकर कोनो चिनहां देखा, जेकर ले पता चले कि सही म, तेंह मोर ले गोठियावत हस।
JDG 6:18 किरपा करके तेंह इहां ले झन जाबे, जब तक कि मेंह जाके तोर बर भेंट लानके तोर आघू म नइं धर दंव।” अऊ यहोवा ह कहिस, “मेंह तोर लहुंटके आवत तक ठहिरे रहिहूं।”
JDG 6:19 तब गिदोन ह भीतर जाके एक बोकरा-पीला ला अऊ एक एपा पीसान ले बिगर खमीर के रोटी तियार करिस। तब मांस ला एक टुकनी म, अऊ झोर ला एक बरतन म रखके, ओह ओ चीजमन ला बाहिर लानिस अऊ बलूत रूख के खाल्हे म ओ चीजमन ला लानके ओला दीस।
JDG 6:20 परमेसर के स्वरगदूत ह ओला कहिस, “मांस अऊ अखमीरी रोटी ला ले अऊ ओमन ला ये चट्टान ऊपर रख दे, अऊ झोर ला ढार दे।” अऊ गिदोन ह अइसने ही करिस।
JDG 6:21 तब यहोवा के स्वरगदूत ह अपन हांथ म धरे लउठी के टीप ले मांस अऊ अखमीरी रोटी ला छुईस। त चट्टान ले आगी निकलिस अऊ मांस अऊ अखमीरी रोटी ला भसम कर दीस। तब यहोवा के स्वरगदूत ह गायब हो गीस।
JDG 6:22 जब गिदोन ह ये जानिस कि येह यहोवा के स्वरगदूत रिहिस, त ओह चिचियाके कहिस, “हाय, हे परमपरधान यहोवा! मेंह तो यहोवा के स्वरगदूत ला आमने-सामने देखे हंव!”
JDG 6:23 पर यहोवा ह ओला कहिस, “तोला सांति मिलय! झन डर। तेंह नइं मरबे।”
JDG 6:24 तब गिदोन ह उहां यहोवा बर एक बेदी बनाईस अऊ ओकर नांव यहोवा ह सांति ए रखिस। ओह आज के दिन तक अबिएजेरीमन के ओपरा म हवय।
JDG 6:25 ओहीच रथिया, यहोवा ह गिदोन ला कहिस, “अपन ददा के पसु के झुंड म ले दूसरा एक सात साल के बईला ला ले, अऊ तोर ददा के बाल देवता के बेदी ला गिरा दे अऊ ओकर बाजू म ठाढ़े असेरा देवी के खंभा ला काट डार।
JDG 6:26 अऊ तब ये ऊंचई के टीप म, यहोवा अपन परमेसर बर ठहिराय गय रीति के मुताबिक एक बेदी बना, अऊ असेरा देवी के ओ खंभा, जेला तेंह काट डारे हस, ओकर लकरी के उपयोग करत, तें ओ दूसरा बईला ला एक होम-बलिदान के रूप म चघा।”
JDG 6:27 तब गिदोन ह अपन सेवकमन के दस झन ला लीस अऊ यहोवा के बताय मुताबिक करिस। पर ओह अपन परिवार अऊ नगर के मनखेमन के डर के कारन ये काम ला दिनमान नइं करके रथिया के बेरा करिस।
JDG 6:28 दूसर दिन बिहनियां जब नगर के मनखेमन सोके उठिन, त का देखिन कि बाल के बेदी ह गिरा देय गे हवय, अऊ ओकर बाजू के असेरा के खंभा ला काट देय गे हवय अऊ दूसरा बईला ला नवां बनाय बेदी म बलिदान चघाय गे हवय।
JDG 6:29 तब ओमन एक-दूसर ले पुछिन, “ये काम कोन ह करिस?” जब ओमन बहुंत खोजबीन करिन, त ओमन ला बताय गीस, “ये काम योआस के बेटा गिदोन ह करे हवय।”
JDG 6:30 तब नगर के मनखेमन योआस ले कहिन, “अपन बेटा ला बाहिर लान। ओकर मरना जरूरी अय, काबरकि ओह बाल के बेदी ला गिरा दे हवय अऊ ओकर बाजू के असेरा के खंभा ला काट दे हवय।”
JDG 6:31 पर योआस ह अपन चारों कोति के गुस्साय भीड़ के मनखेमन ला कहिस, “का तुमन बाल के तरफ ले गोठियावत हव? का तुमन ओला बचाय चाहत हव? जऊन ह ओकर बर लड़ही, ओह बिहनियां तक मार डारे जाही। यदि बाल ह सही म एक देवता ए, त ओह खुद अपन बचाव कर सकत हे, जब कोनो ओकर बेदी ला गिराथे।”
JDG 6:32 काबरकि गिदोन ह बाल के बेदी ला गिरा दे रिहिस, एकरसेति मनखेमन ओकर नांव ये कहिके यरूब्बाल रखिन, “बाल ह खुद ओकर संग लड़ई करय।”
JDG 6:33 एकर बाद जम्मो मिदयानी, अमालेकी अऊ पूरब दिग के आने मनखेमन सेना म भरती हो गीन अऊ यरदन नदी के ओ पार जाके यिजरेल के घाटी म डेरा डालिन।
JDG 6:34 तब यहोवा के आतमा ह गिदोन म हमाईस, अऊ अबिएजेरीमन ला अपन पाछू म आय बर कहिके, ओह एक तुरही फूंकिस।
JDG 6:35 ओह मनस्से के जम्मो जगह म दूतमन ला पठोके मनखेमन ला हथियार धरके आय बर कहिस, अऊ ओह आसेर, जबूलून, अऊ नपताली के जगह म घलो दूतमन ला पठोईस, अऊ ओमन घलो ओकर ले मिले बर चले आईन।
JDG 6:36 तब गिदोन ह परमेसर ले कहिस, “यदि तेंह अपन वायदा के मुताबिक इसरायल ला मोर दुवारा बचाबे—
JDG 6:37 त सुन, मेंह भेड़ के रूआं ला कोठार म रखहूं। यदि उहां ओस ह सिरिप ओ भेड़ के रूआं म पड़ही अऊ जम्मो भुइयां ह सूखा रहिही, तब मेंह जानहूं कि तेंह अपन कहे मुताबिक इसरायल ला मोर दुवारा बचाबे।”
JDG 6:38 अऊ अइसने ही होईस। ओकर दूसर दिन, बड़े बिहनियां गिदोन ह सोके उठिस; ओह भेड़ के रूआं ला दबाईस अऊ निचोड़के ओस ला निकालिस, त ओस के अतेक पानी निकलिस कि एक कटोरा भर गीस।
JDG 6:39 तब गिदोन ह परमेसर ले कहिस, “मोर ऊपर गुस्सा झन करबे। मोला एक बिनती अऊ करन दे। ये भेड़ के रूआं म ले मोला एक अऊ परिछा करन दे, पर ये बेरा भेड़ के रूआं ह सूखा रहय अऊ जम्मो भुइयां ऊपर ओस पड़य।”
JDG 6:40 अऊ ओ रथिया परमेसर ह अइसने ही करिस। सिरिप भेड़ के रूआं ह सूखा रहय, अऊ जम्मो भुइयां म ओस पड़े रहय।
JDG 7:1 एक दिन बड़े बिहनियां, यरूब्बाल (गिदोन) अऊ ओकर जम्मो मनखेमन हरोद के सोता करा डेरा डालिन। अऊ मिदयानीमन के डेरा ह ओमन के उत्तर कोति मोरे के पहाड़ी के लकठा म खाड़ी म रिहिस।
JDG 7:2 तब यहोवा ह गिदोन ला कहिस, “तोर करा बहुंत जादा मनखे हवंय। मेंह मिदयानीमन ला तोर हांथ म नइं कर सकंव, नइं तो इसरायलीमन ये कहिके मोर बिरूध म अपन बड़ई करहीं, ‘हमन अपन ही ताकत के दुवारा बांचे हवन।’
JDG 7:3 एकरसेति अब तेंह जाके सेना म ये घोसना कर, ‘जऊन ह डर के मारे कांपत हे, ओह गिलाद पहाड़ ला छोंड़के वापिस जा सकत हे।’ ” तब बाईस हजार आदमी लहुंट गीन, अऊ सिरिप दस हजार आदमी रह गीन।
JDG 7:4 पर यहोवा ह गिदोन ला कहिस, “अभी घलो बहुंत जादा मनखे हवंय। ओमन ला खाल्हे पानी करा ले जा, अऊ उहां मेंह ओमन ला तोर बर छांटहूं। यदि मेंह कहंव, ‘येह तोर संग जावय,’ त ओह जावय; पर यदि मेंह कहंव, ‘ये तोर संग झन जावय,’ त ओह झन जावय।”
JDG 7:5 तब गिदोन ह मनखेमन ला खाल्हे पानी करा ले गीस। उहां यहोवा ह गिदोन ला कहिस, “जऊन मन कुकुर सहीं जीभ ले पानी ला चपड़-चपड़ करके पीयथें, ओमन ला अलग कर; अऊ जऊन मन माड़ी टेकके पानी पीयथें, ओमन ला अलग कर।”
JDG 7:6 ओमा ले तीन सौ मनखे हांथ लगाके कुकुर के सहीं चपड़-चपड़ करके पानी पीईन; अऊ बाकि बचे जम्मो झन माड़ी टेकके पानी पीईन।
JDG 7:7 तब यहोवा ह गिदोन ला कहिस, “ये तीन सौ चपड़-चपड़ करके पीयइयामन के दुवारा मेंह तुमन ला बचाहूं अऊ मिदयानीमन ला तोर हांथ म कर दूहूं। आने जम्मो झन ला ओमन के घर म पठो दे।”
JDG 7:8 तब गिदोन ह बाकि इसरायलीमन ला ओमन के घर पठो दीस, पर ओ तीन सौ मनखेमन ला रखिस, जऊन मन आने मन के जेवन के सामान अऊ तुरहीमन ला अपन अधिकार म ले लीन। मिदयानीमन के डेरा ह गिदोन के खाल्हे घाटी म रहय।
JDG 7:9 ओ रथिया यहोवा ह गिदोन ला हुकूम दीस, “उठ अऊ खाल्हे जाके ओ डेरा के ऊपर हमला कर, काबरकि ओ डेरा ला मेंह तोर हांथ म कर दूहूं।
JDG 7:10 यदि तेंह हमला करे बर डरावत हस, त अपन सेवक फूरा के संग खाल्हे डेरा म जा,
JDG 7:11 अऊ सुन कि ओमन का कहत हें। ओकर बाद, ओ डेरा ऊपर हमला करे म तोला हिम्मत मिलही।” तब ओह अऊ ओकर सेवक फूरा, खाल्हे डेरा के सैनिक चौकीमन करा उतर गीन।
JDG 7:12 मिदयानी, अमालेकी अऊ आने जम्मो पूरबी मनखेमन घाटी म आराम से पड़े रहंय अऊ ओमन फांफामन सहीं बहुंते रहंय। ओमन के ऊंटमन समुंदर तीर के बालू सहीं गनती ले बाहिर रिहिन।
JDG 7:13 जब गिदोन ह उहां हबरिस, त उहां एक मनखे ह अपन सपना के बारे म अपन एक संगवारी ला अइसने बतात रहय, “मेंह एक सपना देखेंव; जौ के बने एक गोल रोटी ह उंडलत-उंडलत मिदयानीमन के डेरा म आईस अऊ डेरा ले अइसने जोर से टकराईस कि डेरा ह उलटके गिर गीस।”
JDG 7:14 ओकर संगवारी ह जबाब दीस, “येह योआस के बेटा गिदोन नांव के एक इसरायली मनखे के तलवार के छोंड़ अऊ कुछू नो हय। परमेसर ह मिदयानीमन ला अऊ जम्मो डेरा ला ओकर हांथ म कर दे हवय।”
JDG 7:15 जब गिदोन ह ओ सपना अऊ ओ सपना के मतलब के बारे म सुनिस, त ओह मुड़ नवाके यहोवा ला दंडवत करिस। ओह इसरायलीमन के डेरा म लहुंटिस अऊ कहिस, “उठव! यहोवा ह मिदयानीमन के डेरा ला तुम्हर हांथ म कर दे हवय।”
JDG 7:16 तब ओह ओ तीन सौ मनखे ला तीन ठन दल म बांटिस, अऊ ओमा के हर एक मनखे के हांथ म एक तुरही अऊ खाली घघरी दीस, अऊ घघरीमन के भीतर म एक मसाल रहय।
JDG 7:17 तब ओह ओमन ले कहिस, “मोला देखव; अऊ मोर पाछू-पाछू आवव। जब मेंह ओमन के डेरा के तीर म जावंव, अऊ जइसने मेंह करंव, त तुमन घलो वइसने करव।
JDG 7:18 जब मेंह अऊ मोर संग के जम्मो झन अपन तुरही ला फूंकंय, तब तुमन घलो डेरा के चारों कोति अपन तुरही ला फूंकव अऊ चिचियाके कहव, ‘यहोवा बर अऊ गिदोन बर।’ ”
JDG 7:19 अध-रथिया के सुरूआत म, पहरेदारमन के बदले जाय के तुरते बाद, गिदोन अऊ ओकर संग म सौ झन मनखे मिदयानीमन के डेरा के तीर म हबरिन; अऊ अपन-अपन तुरही ला फूंकिन अऊ अपन हांथ म धरे घघरीमन ला टोर दीन।
JDG 7:20 तब तीनों दल के मनखेमन घलो तुरहीमन ला फूंकिन अऊ घघरीमन ला टोर दीन, अऊ अपन-अपन डेरी हांथ म मसाल अऊ जेवनी हांथ म फूंके बर तुरही धरके, ओमन चिचियाके कहिन, “यहोवा बर अऊ गिदोन बर एक तलवार!”
JDG 7:21 हर एक मनखे डेरा के चारों कोति अपन-अपन जगह ले लीन, त जम्मो मिदयानीमन रोवत भागे लगिन।
JDG 7:22 जब ओमन तीन सौ तुरही ला फूंकिन, त यहोवा ह अइसने करिस कि पूरा डेरा म आदमीमन एक-दूसर के ऊपर तलवार चलाय लगिन, अऊ सेना के मनखेमन सरेरा नगर कोति तब्बात के लकठा म आबेल-महोला नगर के सीमना तक बेत-सित्ता करा भाग गीन।
JDG 7:23 नपताली, आसेर अऊ जम्मो मनस्से के इसरायलीमन ला बलाय गे रिहिस, अऊ ओमन मिदयानीमन के पीछा करिन।
JDG 7:24 गिदोन ह एपरैम के जम्मो पहाड़ी देस म ये कहे बर दूतमन ला पठोईस, “मिदयानीमन के बिरोध म आवव अऊ यरदन नदी के पानी ला ओमन के पहिले बेत-बारा तक रोक देवव।” एकरसेति एपरैम के जम्मो आदमीमन आईन अऊ यरदन नदी के पानी ला बेत-बारा तक रोक दीन।
JDG 7:25 अऊ ओमन ओरेब अऊ जेब नांव के मिदयानीमन के दू झन अगुवामन ला पकड़ लीन; अऊ ओमन ओरेब ला ओरेब नांव के चट्टान करा अऊ जेब ला जेब नांव के अंगूर के रस निकाले के कुन्ड करा मार डारिन; अऊ ओमन मिदयानीमन के पीछा करिन अऊ ओरेब अऊ जेब के मुड़ ला यरदन के पार गिदोन करा लानिन।
JDG 8:1 तब एपरैमी मनखेमन गिदोन ले पुछिन, “तेंह हमर संग अइसने बरताव काबर करे हस? जब तें मिदयानीमन ले लड़े बर गेय, त हमन ला काबर नइं बलाय?” अऊ ओमन ओकर ले बहुंत बिबाद करिन।
JDG 8:2 पर ओह ओमन ला जबाब दीस, “तुम्हर से तुलना करे जावय, त मेंह का काम करे हवंव? का एपरैम के छोंड़े गय मिंझरती अंगूर ह घलो अबिएजेर के जम्मो अंगूर के फसल ले बने नो हय?
JDG 8:3 परमेसर ह ओरेब अऊ जेब नांव के मिदयानी अगुवामन ला तुम्हर हांथ म कर दीस। तुम्हर काम के तुलना म, मेंह करे ही का हंव?” अतका म, ओकर ऊपर एपरैमी मनखेमन के गुस्सा ह सांत हो गीस।
JDG 8:4 गिदोन अऊ ओकर तीन सौ मनखेमन थक गे रिहिन, तभो ले ओमन पीछा करत यरदन नदी करा आईन अऊ ओला पार करिन।
JDG 8:5 तब गिदोन ह सुक्कोत नगर के मनखेमन ला कहिस, “मोर सेना के मनखेमन ला कुछू रोटी देवव; ओमन बहुंत थक गे हवंय, अऊ मेंह अभी घलो मिदयानीमन के राजा जेबह अऊ सलमुन्ना के पीछा करत हंव।”
JDG 8:6 पर सुक्कोत के करमचारीमन जबाब दीन, “का जेबह अऊ सलमुन्ना तोर अधीन हो चुके हवंय? हमन तोर सेना ला काबर रोटी देबो?”
JDG 8:7 तब गिदोन ह कहिस, “जब यहोवा ह जेबह अऊ सलमुन्ना ला मोर हांथ म कर दीही, त ये बात के खातिर मेंह सुन्ना जगह के कांटा अऊ कंटिली झाड़ीमन ले तुम्हर मांस ला चीथवाहूं।”
JDG 8:8 उहां ले ओह पनिएल नगर ला गीस अऊ उहां के मनखेमन ले अइसनेच बिनती करिस, पर ओमन घलो सुक्कोत के मनखेमन सहीं जबाब दीन।
JDG 8:9 एकरसेति ओह पनिएल के मनखेमन ले कहिस, “जब मेंह बिजयी होके लहुंटहूं, त मेंह ये मीनार ला गिरा दूहूं।”
JDG 8:10 जेबह अऊ सलमुन्ना, करकोर सहर म रिहिन, अऊ ओमन के संग पूरबी मनखेमन के सेना के बांचे करीब पंदरह हजार मनखेमन रिहिन; एक लाख बीस हजार तलवारबाज मनखेमन मारे गे रिहिन।
JDG 8:11 तब गिदोन ह नोबह अऊ योगबहा नगरमन के पूरब कोति डेरा म रहइयामन के रद्दा ले ऊपर गीस अऊ बेफिकर पड़े सेना ऊपर हमला करिस।
JDG 8:12 मिदयानीमन के दूनों राजा, जेबह अऊ सलमुन्ना भागिन, पर गिदोन ह ओमन के पीछा करके ओमन ला पकड़ लीस, अऊ ओमन के जम्मो सेना ला भगा दीस।
JDG 8:13 तब योआस के बेटा गिदोन ह लड़ई के बाद हेरेस के चढ़ाव कोति ले लहुंटिस।
JDG 8:14 ओह सुक्कोत के एक जवान ला पकड़के ओकर ले पुछताछ करिस, अऊ ओ जवान ह गिदोन ला सुक्कोत के सतहत्तर करमचारीमन के नांव लिखके दीस, जऊन मन कि नगर के अगुवा रिहिन।
JDG 8:15 तब गिदोन ह सुक्कोत के मनखेमन करा आईस अऊ ओमन ला कहिस, “जेबह अऊ सलमुन्ना इहां हवंय, जेमन के बारे म, तुमन मोला ये कहिके ताना मारे रहेव, ‘का जेबह अऊ सलमुन्ना तोर अधीन हो गे हवंय? हमन काबर तोर थके-मांदे मनखेमन ला रोटी देबो?’ ”
JDG 8:16 तब ओह ओ नगर के अगुवामन ला लीस, अऊ सुक्कोत के मनखेमन ला सुन्ना जगह के कांटा अऊ कंटिली झाड़ीमन ले चीथवाके एक पाठ पढ़ाईस।
JDG 8:17 ओह पनिएल के मीनार ला घलो गिरा दीस अऊ ओ नगर के आदमीमन ला मार डारिस।
JDG 8:18 तब ओह जेबह अऊ सलमुन्ना ले पुछिस, “जऊन आदमीमन ला तुमन ताबोर पहाड़ म मार डारेव, ओमन कइसने आदमी रिहिन?” ओमन जबाब दीन, “ओमन तोर सहीं आदमी रिहिन, याने कि हर एक झन राजकुमार के सहीं रिहिस।”
JDG 8:19 गिदोन ह कहिस, “ओमन मोर भाई, मोर अपन दाई के बेटामन रिहिन; यहोवा के जिनगी के कसम, यदि तुमन ओमन ला जीयत छोंड़ देय रहितेव, त मेंह तुम्हर परान नइं लेतेंव।”
JDG 8:20 तब ओह अपन बड़े बेटा येतेर कोति मुड़िस अऊ कहिस, “येमन ला मार डार।” पर येतेर ह अपन तलवार ला नइं निकालिस, काबरकि ओह ओ समय एक लड़का ही रिहिस अऊ डर गीस।
JDG 8:21 तब जेबह अऊ सलमुन्ना कहिन, “आ अऊ तें खुद हमन ला मार डार। ‘काबरकि आदमी ह जइसने होथे, वइसनेच ओकर ताकत घलो होथे।’ ” तब गिदोन ह आघू बढ़िस, अऊ जेबह अऊ सलमुन्ना ला मार डारिस, अऊ ओमन के ऊंटमन के घेंच ले गहनामन ला उतार लीस।
JDG 8:22 तब इसरायली मनखेमन गिदोन ले कहिन, “तें हमर ऊपर राज कर—तें, तोर बेटा अऊ तोर पोता घलो हमर ऊपर राज करंय—काबरकि तेंह हमन ला मिदयानीमन के हांथ ले बचाय हस।”
JDG 8:23 पर गिदोन ह ओमन ले कहिस, “मेंह तुम्हर ऊपर राज नइं करंव अऊ न ही मोर बेटा ह तुम्हर ऊपर राज करही। यहोवा ह तुम्हर ऊपर राज करही।”
JDG 8:24 अऊ ओह कहिस, “मेंह तुमन ले एक बिनती करत हंव, कि तुमन ले हर एक झन मोला अपन-अपन लूट के सामान म ले एक-एक कान के बाली देवव।” (इसमायलीमन के रिवाज रिहिस कि ओमन अपन कान म सोन के बाली पहिरंय।)
JDG 8:25 ओमन कहिन, “कान के बाली देके हमन ला खुसी होही।” तब ओमन एक ठन ओनहा ला फईला दीन, अऊ ओमन ले हर एक झन अपन-अपन लूट म ले एक-एक बाली ओ ओनहा म डार दीन।
JDG 8:26 जऊन सोन के बालीमन ला ओह मांगिस, ओमन के वजन एक हजार सात सौ सेकेल होईस; येमा आने जेवर, झुमका अऊ मिदयानी राजामन के पहिरे बैंगनी कपड़ा या ओमन के ऊंटमन के गला के जंजीरमन के गनती नइं करे गीस।
JDG 8:27 गिदोन ह ओ सोन म ले एक एपोद बनाईस, अऊ ओला अपन नगर ओपरा म रखिस। अऊ जम्मो इसरायलीमन उहां ओ एपोद के अराधना करे के दुवारा अपनआप ले बेभिचार करिन, अऊ येह गिदोन अऊ ओकर परिवार बर एक फांदा हो गीस।
JDG 8:28 ये किसम ले मिदयानीमन इसरायलीमन के अधीन हो गीन अऊ फेर कभू मुड़ नइं उठाईन। अऊ गिदोन के जिनगी भर याने कि चालीस साल तक इसरायल देस म सांति रिहिस।
JDG 8:29 योआस के बेटा यरूब्बाल ह वापिस जाके अपन घर म रहे लगिस।
JDG 8:30 ओकर खुद के सत्तर बेटा रिहिन, काबरकि ओकर बहुंत घरवाली रिहिन।
JDG 8:31 ओकर रखैल, जऊन ह सकेम सहर म रहत रिहिस, ओकर घलो एक बेटा होईस, जेकर नांव ओह अबीमेलेक रखिस।
JDG 8:32 योआस के बेटा गिदोन ह बहुंत डोकरा होय के बाद मर गीस अऊ अबिएजेरीमन के ओपरा म, ओकर ददा योआस के कबर म ओला माटी देय गीस।
JDG 8:33 गिदोन के मरते ही इसरायलीमन फेर बाल देवता के अराधना करे के दुवारा अपनआप ले बेभिचार करिन याने कि परमेसर ले बिसवासघात करिन। ओमन बाल-बरीत ला अपन देवता मान लीन
JDG 8:34 अऊ ओमन ओ यहोवा अपन परमेसर ला सुरता नइं करिन, जऊन ह ओमन ला चारों खूंट के ओमन के जम्मो बईरीमन के हांथ ले बचाय रिहिस।
JDG 8:35 ओमन यरूब्बाल (गिदोन) के परिवार बर घलो कुछू मया नइं देखाईन, जऊन ह ओमन बर बहुंते भलई के काम करे रिहिस।
JDG 9:1 एक दिन यरूब्बाल के बेटा अबीमेलेक ह सकेम म अपन ममामन करा गीस अऊ ओमन ला अऊ अपन नाना के बंस के जम्मो मनखेमन ला कहिस,
JDG 9:2 “सकेम के जम्मो मनखेमन ले पुछव, ‘तुम्हर बर का ह बने अय: तुम्हर ऊपर यरूब्बाल के जम्मो सत्तर बेटा राज करंय, या फेर तुम्हर ऊपर सिरिप एक मनखे ह राज करय?’ सुरता रखव कि मेंह तुम्हर हाड़ा अऊ मांस अंव।”
JDG 9:3 जब ओकर ममामन ये जम्मो बात सकेम के मनखेमन ला कहिन, त मनखेमन अबीमेलेक के पाछू चले के निरनय करिन, काबरकि ओमन कहिन, “अबीमेलेक तो हमर रिस्तेदार अय।”
JDG 9:4 तब ओमन बाल-बरीत के मंदिर म ले चांदी के सत्तर सेकेल ओला दीन, अऊ अबीमेलेक ह ओ चांदी के सेकेल ला ढीठ अऊ दुस्ट मनखेमन ला देके ओमन ला अपन तरफ कर लीस, अऊ ओमन ओकर पाछू हो लीन।
JDG 9:5 तब ओह ओपरा म अपन ददा के घर गीस अऊ एकेच पथरा ऊपर अपन सत्तर भाईमन ला याने कि यरूब्बाल के बेटामन ला मार डारिस। पर यरूब्बाल के सबले छोटे बेटा योताम ह छुप गीस अऊ बांच गीस।
JDG 9:6 तब सकेम अऊ बेत-मिलो के जम्मो मनखेमन अबीमेलेक ला राजा बनाय बर सकेम म खंभा करा बड़े रूख के तीर म जूरिन।
JDG 9:7 जब योताम ला येकर बारे म बताय गीस, त ओह गरीजीम पहाड़ के टीप म चघ गीस अऊ ओमन ला चिचियाके कहिस, “हे सकेम के मनखेमन, मोर बात ला सुनव, ताकि परमेसर ह तुम्हर बात ला सुनय।
JDG 9:8 एक दिन रूखमन अपन बर एक राजा के अभिसेक करे बर निकलिन। ओमन जैतून के रूख ले कहिन, ‘तेंह हमर राजा बन जा।’
JDG 9:9 “पर जैतून के रूख ह जबाब दीस, ‘का मेंह अपन ओ तेल ला छोंड़ दंव, जेकर दुवारा देवता अऊ मनखेमन के आदर होथे, अऊ रूखमन ऊपर सासन करंव?’
JDG 9:10 “तब रूखमन अंजीर के रूख ले कहिन, ‘आ अऊ हमर राजा बन जा।’
JDG 9:11 “पर अंजीर के रूख ह जबाब दीस, ‘का मेंह अपन बहुंत बढ़िया अऊ मीठा फरमन ला छोंड़ दंव, अऊ रूखमन ऊपर सासन करंव?’
JDG 9:12 “तब रूखमन अंगूर के नार ले कहिन, ‘आ अऊ हमर राजा बन जा।’
JDG 9:13 “पर अंगूर के नार ह जबाब दीस, ‘का मेंह अपन ओ अंगूर के मंद ला छोंड़ दंव, जेकर ले देवता अऊ मनखे दूनों खुस होथें, अऊ रूखमन ऊपर सासन करंव?’
JDG 9:14 “आखिरी म, जम्मो रूखमन कंटिला-झाड़ी ले कहिन, ‘आ अऊ हमर राजा बन जा।’
JDG 9:15 “कंटिला-झाड़ी ह ओ रूखमन ले कहिस, ‘यदि तुमन सही म, मोला अपन ऊपर राजा होय बर मोर अभिसेक करे चाहत हव, त आवव अऊ मोर छइहां म सरन लेवव; अऊ यदि नइं, त फेर कंटिला-झाड़ी ले आगी निकलय अऊ लबानोन के देवदार रूखमन ला भसम कर देवय!’
JDG 9:16 “अबीमेलेक ला राजा बनाके, का तुमन आदर अऊ सही बिसवास के काम करे हवव? का तुमन यरूब्बाल अऊ ओकर परिवार बर सही काम करे हवव? का तुमन ओकर योग्यता के मुताबिक ओकर संग बरताव करे हवव?
JDG 9:17 सुरता करव कि मोर ददा ह तुम्हर बर लड़िस अऊ मिदयानीमन के हांथ ले तुमन ला बचाय बर अपन परान ला जोखिम म डालिस।
JDG 9:18 पर आज तुमन मोर ददा के परिवार के बिरूध म बिदरोह करे हवव। तुमन सिरिप एके ठन पथरा ऊपर ओकर सत्तर झन बेटा ला मार डारे हव अऊ ओकर गुलाम माईलोगन के बेटा अबीमेलेक ला सकेम के मनखेमन ऊपर राजा बनाय हवव, काबरकि ओह तुम्हर रिस्तेदार अय।
JDG 9:19 त का तुमन आज यरूब्बाल अऊ ओकर परिवार बर आदर अऊ सही बिसवास के संग काम करे हवव? यदि तुमन करे हवव, त फेर अबीमेलेक ह तुम्हर आनंद के कारन बनय, अऊ तुमन घलो ओकर आनंद के कारन बनव!
JDG 9:20 पर यदि तुमन सही काम नइं करे हवव, त फेर अबीमेलेक ले आगी निकलय अऊ तुमन ला याने कि सकेम अऊ बेत-मिलो के मनखेमन ला भसम कर देवय, अऊ तुमन याने कि सकेम अऊ बेत-मिलो के मनखेमन ले आगी निकलय, अऊ अबीमेलेक ला भसम कर देवय!”
JDG 9:21 तब योताम ह भाग गीस, अऊ बचके बेर नगर चल दीस, अऊ अपन भाई अबीमेलेक के डर के मारे उहां रहे लगिस।
JDG 9:22 अबीमेलेक के इसरायल के ऊपर तीन साल तक राज करे के बाद,
JDG 9:23 परमेसर ह अबीमेलेक अऊ सकेम के मनखेमन के बीच म बईरता के भावना लानिस, जेकर कारन सकेम के मनखेमन अबीमेलेक ले बिसवासघात करे लगिन।
JDG 9:24 परमेसर ह ये काम एकरसेति करिस ताकि यरूब्बाल के सत्तर बेटामन के खून बहाय के जऊन अपराध करे गे रिहिस, ओकर बदला ओह ओमन के भाई अबीमेलेक अऊ सकेम के ओ मनखेमन ले लेवय, जेमन ओकर भाईमन ला मार डारे म ओकर मदद करे रिहिन।
JDG 9:25 अबीमेलेक के बिरोध म, सकेम के ये मनखेमन पहाड़ के टीपमन म मनखेमन ला छुपाके रखे रहंय, जऊन मन उहां ले जवइया हर एक झन ला लूटंय, अऊ ये बात अबीमेलेक ला बताय गीस।
JDG 9:26 तब एबेद के बेटा गाल ह अपन बंस के मनखेमन संग सकेम म आईस, अऊ सकेम के मनखेमन ओकर ऊपर भरोसा करिन।
JDG 9:27 ओमन मैदान म गीन अऊ अंगूर ला संकेले अऊ कुचरे के बाद, ओमन अपन देवता के मंदिर म एक तिहार मनाईन। जब ओमन खावत-पीयत रिहिन, त ओमन अबीमेलेक ला कोसन लगिन।
JDG 9:28 तब एबेद के बेटा गाल ह कहिस, “अबीमेलेक ह कोन ए, अऊ हमन सकेमीमन ओकर अधीन काबर रहन? का ओह यरूब्बाल के बेटा नो हय, अऊ का जबूल ओकर परतिनिधि नो हय? सकेम के ददा, हमोर के परिवार के सेवा करव! हमन काबर अबीमेलेक के सेवा करन?
JDG 9:29 यदि ये मनखेमन मोर अधीन म होतिन, त मेंह ओकर ले पीछा छोंड़ा लेतेंव। मेंह अबीमेलेक ले कहितेंव, ‘अपन जम्मो सेना ला बला।’ ”
JDG 9:30 एबेद के बेटा गाल के ये बात ला, जब सहर के राजपाल जबूल ह सुनिस, त ओह बहुंत गुस्सा होईस।
JDG 9:31 ओह चुपेचाप अबीमेलेक करा दूतमन ला ये कहे बर पठोईस, “एबेद के बेटा गाल अऊ ओकर बंस के मनखेमन सकेम म आके सहर के मनखेमन ला तोर बिरोध म भड़कावत हें।
JDG 9:32 एकरसेति तें अऊ तोर मनखेमन रथिया आवव अऊ मैदान म छुपके इंतजार करव।
JDG 9:33 कल बिहनियां सूरज के निकलत बेरा, सहर के मनखेमन के बिरूध म आघू बढ़व। जब गाल अऊ ओकर मनखेमन तोर सामना करे बर निकलंय, त मऊका के फायदा उठाके ओमन ऊपर हमला करव।”
JDG 9:34 तब अबीमेलेक अऊ ओकर जम्मो सेना रथिया के बेरा निकलिन अऊ सकेम के लकठा म चार दल बनाईन अऊ छुपके अपन-अपन जगह ले लीन।
JDG 9:35 एबेद के बेटा गाल ह बाहिर निकलके सहर के भीतर जाय के दुवार म ठाढ़े रिहिस, ओतकेच बेरा अबीमेलेक अऊ ओकर सेना अपन छुपे के जगह ले बाहिर निकलिन।
JDG 9:36 जब गाल ह ओमन ला देखिस, त ओह जबूल ला कहिस, “देख, पहाड़मन के टीपमन ले मनखेमन उतरके आवत हें!” जबूल ह ओकर ले कहिस, “तेंह पहाड़मन के छइहांमन ला मनखे समझत हस।”
JDG 9:37 पर गाल ह फेर कहिस, “देख, मनखेमन मांझा के पहाड़ी ले उतरके आवत हें, अऊ मनखेमन के एक दल ह बांज रूख के तरफ ले आवत हे।”
JDG 9:38 तब जबूल ह ओला कहिस, “तोर बड़े-बड़े बात के का होईस, तेंह कहत रहय, ‘अबीमेलेक ह कोन ए कि हमन ओकर अधीन रहन?’ का येमन ओ मनखे नो हंय, जेमन के तेंह हंसी उड़ात रहय? बाहिर निकल अऊ ओमन ले लड़!”
JDG 9:39 तब गाल ह निकलके सकेम के मनखेमन के अगुवई करिस अऊ अबीमेलेक ले लड़िस।
JDG 9:40 अबीमेलेक ह कपाट ले भीतर जाय के दुवार तक ओकर पीछा करिस, अऊ जब ओमन भागत रिहिन, त बहुंते झन मारे गीन।
JDG 9:41 तब अबीमेलेक ह अरूमा नगर म रूक गीस, अऊ जबूल ह गाल अऊ ओकर बंस के मनखेमन ला सकेम ले बाहिर भगा दीस।
JDG 9:42 ओकर दूसर दिन सकेम के मनखेमन निकलके मैदान म गीन, अऊ ये बात अबीमेलेक ला बताय गीस।
JDG 9:43 त ओह अपन मनखेमन ला लीस, अऊ ओमन के तीन ठन दल बनाईस अऊ हमला करे बर मैदान म छुपके बईठ गीस। जब ओह मनखेमन ला सहर ले निकलके आवत देखिस, त ओह ओमन ऊपर हमला करे बर उठिस।
JDG 9:44 अबीमेलेक अऊ ओकर संग के दल ह दऊड़के गीन अऊ सहर के भीतर जाय के कपाट करा ठाढ़ हो गीन। तब आने दू दल के मनखेमन ओमन ऊपर हमला करिन, जऊन मन मैदान म रिहिन अऊ ओमन ला मार डारिन।
JDG 9:45 ओ पूरा दिन अबीमेलेक ह सहर म तब तक हमला करिस, जब तक कि ओह सहर ऊपर कब्जा करके उहां के मनखेमन ला नइं मार डारिस। तब ओह सहर ला नास कर दीस अऊ ओकर ऊपर नून छिंचवा दीस।
JDG 9:46 ये सुनके सकेम के मीनार के रहइयामन एल-बरीत के मंदिर के गढ़ म चल दीन।
JDG 9:47 जब अबीमेलेक ह ये सुनिस कि ओमन उहां जूरे हवंय,
JDG 9:48 त ओह अऊ ओकर जम्मो आदमीमन सलमोन पहाड़ ऊपर चल दीन; अऊ ओह एक टंगिया लीस अऊ रूखमन ले कुछू डारामन ला काटिस, अऊ ओला उठाके अपन कंधा म रखिस, अऊ ओह अपन संग के आदमीमन ला हुकूम दीस, “जइसने तुमन मोला करत देखे हवव, वइसनेच तुमन घलो करव; जल्दी करव!”
JDG 9:49 तब ओ जम्मो आदमीमन घलो डारामन ला काटिन अऊ अबीमेलेक के सहीं करिन। ओमन डारामन ला गढ़ म कुढ़ोके ओमा आगी लगा दीन, जबकि मनखेमन गढ़ के भीतर रिहिन, अऊ सकेम के मीनार के ओ जम्मो मनखे घलो मर गीन, जऊन मन करीब एक हजार आदमी अऊ माईलोगन रिहिन।
JDG 9:50 ओकर बाद अबीमेलेक ह तेबेस नगर ला जाके उहां घेरा डालिस अऊ ओकर ऊपर कब्जा कर लीस।
JDG 9:51 पर ओ सहर के भीतर म, एक मजबूत मीनार रिहिस, जिहां जम्मो आदमी अऊ माईलोगन—सहर के जम्मो मनखेमन भागके चल दे रिहिन। ओमन अपनआप ला भीतर ले बंद करके मीनार के छत म चघ गे रिहिन।
JDG 9:52 तब अबीमेलेक ह मीनार करा गीस अऊ ओकर ऊपर हमला करिस। पर जब ओह मीनार म आगी लगाय बर ओकर दुवार करा गीस,
JDG 9:53 तब एक माईलोगन ह जांता के ऊपर के पाटा ला अबीमेलेक के मुड़ ऊपर गिरा दीस अऊ ओकर खोपड़ी ह फट गीस।
JDG 9:54 तब तुरते अबीमेलेक ह अपन हथियार ढोवइया ला बलाके कहिस, “अपन तलवार निकाल अऊ मोला मार डार, ताकि ओमन ये झन कह सकंय, ‘ओला एक माईलोगन ह मार डारिस।’ ” तब ओकर सेवक ह ओला तलवार ले भोंग दीस, अऊ ओह मर गीस।
JDG 9:55 जब इसरायलीमन देखिन कि अबीमेलेक ह मर गे हवय, त ओमन अपन-अपन घर चल दीन।
JDG 9:56 ये किसम ले, परमेसर ह अबीमेलेक के ओ दुस्ट काम के बदला चुकाईस, जेला ओह अपन सत्तर भाईमन ला मारके अपन ददा के बिरूध करे रिहिस।
JDG 9:57 परमेसर ह सकेम के मनखेमन के जम्मो दुस्ट काम के बदला घलो ओमन ले लीस। यरूब्बाल के बेटा योताम के सराप ओमन ऊपर लगिस।
JDG 10:1 अबीमेलेक के मिरतू के बाद, इसरायल ला बचाय बर तोला नांव के एक इस्साकारी मनखे उठिस; ओह दोदो के पोता अऊ पुआ के बेटा रिहिस। ओह एपरैम के पहाड़ी देस के सामीर नगर म रहत रिहिस।
JDG 10:2 ओह तेईस साल तक इसरायल के अगुवई करिस; तब ओह मर गीस, अऊ ओला सामीर म माटी देय गीस।
JDG 10:3 तोला के मरे के बाद, गिलाद के याईर आईस, अऊ ओह बाईस साल तक इसरायल के अगुवई करिस।
JDG 10:4 ओकर तीस झन बेटा रिहिन, जऊन मन तीस ठन गदहामन म सवारी करंय। ओमन के गिलाद म तीस ठन नगर के ऊपर अधिकार रिहिस, जेमन ला आज तक हव्वोत-याईर कहे जाथे।
JDG 10:5 जब याईर ह मर गीस, त ओला कामोन नगर म माटी देय गीस।
JDG 10:6 तब इसरायलीमन फेर यहोवा के नजर म दुस्ट काम करिन। ओमन बाल देवता अऊ असतोरेत देवी, अऊ अराम, सीदोन, मोआब, अमोनी अऊ पलिस्तीमन के देवतामन के सेवा करिन। यहोवा ह इसरायलीमन ऊपर गुस्सा होईस, काबरकि ओमन ओला तियाग दीन
JDG 10:7 अऊ ओकर सेवा करे बर छोंड़ दीन। ओह ओमन ला पलिस्ती अऊ अमोनीमन के हांथ म कर दीस,
JDG 10:8 जऊन मन ओ साल इसरायलीमन ला सताईन अऊ कुचर दीन। अठारह साल तक, ओमन अमोरीमन के देस, गिलाद म यरदन के पूरब कोति जम्मो इसरायलीमन ला सताईन।
JDG 10:9 अमोनीमन घलो यहूदा, बिनयामीन अऊ एपरैम के बिरूध म लड़े बर यरदन के ओ पार गीन; इसरायलीमन बहुंत तकलीफ म रिहिन।
JDG 10:10 तब इसरायलीमन यहोवा करा रो-रोके बिनती करिन, “हमन तोर बिरूध म पाप करे हवन; हमन अपन परमेसर ला तियागके बाल देवता के सेवा करे हवन।”
JDG 10:11 यहोवा ह इसरायलीमन ला जबाब दीस, “जब मिसरी, अमोरी, अमोनी, पलिस्ती,
JDG 10:12 सीदोनी, अमालेकी अऊ माओनी मनखेमन तुम्हर ऊपर अतियाचार करत रिहिन अऊ तुमन मदद बर मोर ले रोवत बिनती करेव, त का मेंह तुमन ला ओमन के हांथ ले नइं बचायेंव?
JDG 10:13 पर तुमन मोला तियागके आने देवतामन के सेवा करे हवव, एकरसेति मेंह तुमन ला अब नइं बचावंव।
JDG 10:14 जावव अऊ अपन चुने देवतामन करा बिनती करव। तुम्हर संकट के बेरा म, ओमन तुमन ला बचावंय!”
JDG 10:15 पर इसरायलीमन यहोवा ले कहिन, “हमन पाप करे हवन। तोला जइसने बने लगथे, वइसने तेंह हमर संग कर, पर अब तेंह हमन ला बचा।”
JDG 10:16 तब ओमन आने देवतामन ला अपन बीच ले निकाल दीन अऊ यहोवा के सेवा करिन। अऊ ओह इसरायलीमन के दुरगति ला देख नइं सकिस।
JDG 10:17 जब अमोनीमन ला लड़ई बर बलाय गीस अऊ ओमन गिलाद के इलाका म अपन डेरा डालिन, त इसरायलीमन जूरिन अऊ मिसपा नगर म अपन डेरा डालिन।
JDG 10:18 तब गिलाद के मनखेमन के अगुवामन एक-दूसर ले कहिन, “जऊन मनखे ह अमोनीमन ले लड़ई करे म अगुवई करही, ओह गिलाद म रहइया जम्मो मनखेमन ऊपर मुखिया होही।”
JDG 11:1 यिप्तह नांव के गिलादी मनखे ह एक बड़े सूरबीर रिहिस। ओकर ददा के नांव गिलाद रिहिस, अऊ ओकर दाई ह एक बेस्या रिहिस।
JDG 11:2 गिलाद के घरवाली ला घलो बेटामन होईन, अऊ जब ओमन बड़े हो गीन, त ओमन यिप्तह ला ये कहिके निकाल दीन, “तोला हमर परिवार म कोनो बांटा नइं मिलय, काबरकि तेंह आने माईलोगन के बेटा अस।”
JDG 11:3 तब यिप्तह ह अपन भाईमन करा ले भाग गीस अऊ तोब देस म रहे लगिस, जिहां दुस्ट मनखेमन के एक दल ह ओकर संग जूर गीस अऊ ओकर पाछू चले लगिस।
JDG 11:4 कुछू समय के बाद, जब अमोनीमन इसरायल ले लड़त रिहिन,
JDG 11:5 तब गिलाद के अगुवामन यिप्तह ला तोब देस ले लाने बर गीन।
JDG 11:6 ओमन यिप्तह ले कहिन, “चल अऊ हमर सेनापति बन जा, ताकि हमन अमोनीमन ले लड़ सकन।”
JDG 11:7 यिप्तह ह ओमन ले कहिस, “का तुमन मोर तिरस्कार करके मोला मोर ददा के घर ले निकाल नइं देय रहेव? पर अब जब तुमन संकट म हवव, त मोर करा काबर आय हवव?”
JDG 11:8 गिलाद के अगुवामन यिप्तह ले कहिन, “तभो ले, हमन अब तोर करा लहुंटत हन; एकरसेति अमोनीमन ले लड़े बर हमर संग आ, अऊ गिलाद म रहइया हमन जम्मो ऊपर तेंह मुखिया होबे।”
JDG 11:9 यिप्तह ह जबाब दीस, “मान लव, तुमन मोला अमोनीमन ले लड़े बर वापिस ले जाथव अऊ यहोवा ह ओमन ला मोर हांथ म कर देथे—त का सही म मेंह तुम्हर मुखिया होहूं?”
JDG 11:10 गिलाद के अगुवामन यिप्तह ले कहिन, “हमन जरूर वइसने करबो, जइसने तेंह कहत हस; यहोवा ह हमर ये बात के गवाह हवय।”
JDG 11:11 तब यिप्तह ह गिलाद के अगुवामन संग गीस, अऊ मनखेमन ओला अपन ऊपर मुखिया अऊ सेनापति ठहिराईन। अऊ ओह मिसपा म अपन जम्मो बात यहोवा के आघू म फेर कहिस।
JDG 11:12 तब यिप्तह ह अमोनीमन के राजा ले ये पुछे बर अपन दूतमन ला पठोईस, “तोला मोर ले का दुसमनी हवय कि तेंह मोर देस ऊपर हमला करे हवस?”
JDG 11:13 अमोनीमन के राजा ह यिप्तह के दूतमन ला जबाब दीस, “जब इसरायलीमन मिसर देस ले आईन, त ओमन अरनोन नदी ले लेके यब्बोक नदी अऊ यरदन नदी तक मोर देस ला ले लीन। अब तेंह सांति से ओला वापिस कर दे।”
JDG 11:14 तब यिप्तह ह अमोनी राजा करा अपन दूतमन ला वापिस पठोईस
JDG 11:15 ताकि ओमन राजा ला कहंय: “यिप्तह ह ये कहत हे: इसरायलीमन मोआब देस या अमोनीमन के देस ला नइं लीन।
JDG 11:16 पर जब ओमन मिसर ले निकलके आईन, त इसरायलीमन सुन्ना जगह म ले होवत लाल-समुंदर अऊ कादेस करा आईन,
JDG 11:17 तब इसरायलीमन एदोम के राजा ले ये कहे बर दूतमन ला पठोईन, ‘हमन ला तोर देस म ले होवत जाय के अनुमति दे,’ पर एदोम के राजा ह ओ बात ला नइं मानिस। इसरायलीमन मोआब के राजा करा घलो येहीच बात कहे बर दूतमन ला पठोईन, पर ओह घलो नइं मानिस। एकरसेति इसरायलीमन कादेस म रूक गीन।
JDG 11:18 “तब ओमन सुन्ना जगह म ले होवत, एदोम अऊ मोआब देस के तीरे-तीर, मोआब देस के पूरब कोति ले आघू बढ़िन, अऊ अरनोन के ओ पार डेरा डालिन। ओमन मोआब के इलाका के भीतर नइं गीन, काबरकि अरनोन ह येकर सीमना रिहिस।
JDG 11:19 “तब इसरायलीमन अमोरीमन के राजा सीहोन करा दूतमन ला पठोईन, जऊन ह हेसबोन म राज करत रिहिस, अऊ ओला ये कहिन, ‘हमन ला तोर देस म ले होके हमर जगह म जावन दे।’
JDG 11:20 पर सीहोन ह इसरायलीमन ऊपर बिसवास नइं करिस अऊ ओमन ला अपन देस म ले होके जावन नइं दीस। ओह अपन सेना ला इकट्ठा करिस अऊ यहस म डेरा डालके इसरायलीमन ले लड़िस।
JDG 11:21 “तब यहोवा, इसरायल के परमेसर ह सीहोन अऊ ओकर जम्मो सेना ला इसरायलीमन के हांथ म कर दीस, अऊ ओमन सीहोन अऊ ओकर सेना ला हरा दीन। इसरायलीमन ओ देस म रहइया अमोरीमन के जम्मो देस ला अपन अधिकार म ले लीन,
JDG 11:22 याने कि ओमन अरनोन ले लेके यब्बोक तक अऊ सुन्ना जगह ले लेके यरदन तक जम्मो चीज ऊपर कब्जा कर लीन।
JDG 11:23 “अब जबकि यहोवा, इसरायल के परमेसर ह अमोरीमन ला अपन मनखे इसरायलीमन के आघू ले निकाल दे हवय, त येकर ऊपर अधिकार करे के तोर का अधिकार हे?
JDG 11:24 का तें ओला नइं लेबे, जेला तोर देवता कमोस तोला दीही? इही किसम ले जऊन कुछू यहोवा हमर परमेसर ह हमन ला देय हवय, ओला हमन अपन अधिकार म रखबो।
JDG 11:25 का तेंह मोआब के राजा, सिप्पोर के बेटा बालाक ले कुछू बने अस? का ओह कभू इसरायलीमन ले झगरा करिस या ओमन ले कभू लड़िस?
JDG 11:26 तीन सौ साल तक, इसरायलीमन हेसबोन, अरोएर, आसपास के इलाका अऊ अरनोन के तीर के जम्मो नगरमन ऊपर कब्जा करे रिहिन, त ओ समय तेंह ओमन ला फेर से अपन कब्जा म काबर नइं लेय ले?
JDG 11:27 मेंह तोर बिरूध म कुछू गलत नइं करे हंव, पर तेंह मोर बिरूध म लड़ई करके, मोर संग गलत करत हस। एकरसेति यहोवा, जऊन ह नियायी ए, ओह आज इसरायली अऊ अमोनीमन के बीच के झगरा के निपटारा करय।”
JDG 11:28 तभो ले, अमोनीमन के राजा ह यिप्तह के भेजे संदेस ऊपर कोनो धियान नइं दीस।
JDG 11:29 तब यहोवा के आतमा ह यिप्तह ऊपर आईस, अऊ ओह गिलाद अऊ मनस्से ला पार करिस, अऊ गिलाद के मिसपा होवत गीस, अऊ उहां ले ओह अमोनीमन के बिरूध म आघू बढ़िस।
JDG 11:30 अऊ यिप्तह ह कसम खाके यहोवा ले ये कहिस: “यदि तेंह अमोनीमन ला मोर हांथ म कर देबे,
JDG 11:31 त जब मेंह अमोनीमन ले बिजय पाके लहुंट आहूं, तब जऊन कोनो मोर ले भेंट करे बर मोर घर के कपाट ले निकलही, ओह यहोवा के हो जाही, अऊ मेंह ओला होम-बलिदान के रूप म चघाहूं।”
JDG 11:32 तब यिप्तह ह अमोनीमन ले लड़े बर गीस, अऊ यहोवा ह ओमन ला यिप्तह के हांथ म कर दीस।
JDG 11:33 अऊ ओह अरोएर ले लेके मिन्नीत के लकठा, अऊ आबेल-करामीम तक बीस ठन नगर ला बरबाद कर दीस। ये किसम ले इसरायलीमन अमोनीमन ला अधीन म कर लीन।
JDG 11:34 जब यिप्तह ह मिसपा म अपन घर ला लहुंटिस, त ओकर बेटी ह खंजरी के अवाज म नाचत ओकर ले भेंट करे बर निकलिस। ओह यिप्तह के एकलऊती बेटी रिहिस। ओला छोंड़ ओकर न तो अऊ कोनो बेटा रिहिस अऊ न ही अऊ कोनो बेटी।
JDG 11:35 जब यिप्तह ह ओला देखिस, त ओह दुख म अपन ओनहामन ला चीरिस अऊ जोर से कहिस, “ओ नइं, हे मोर बेटी! तेंह मोर कनिहां ला टोर देय अऊ मेंह बरबाद हो गेंव। काबरकि मेंह यहोवा करा एक कसम खाय हंव, अऊ ओला टोर नइं सकंव।”
JDG 11:36 ओह अपन ददा ला कहिस, “हे मोर ददा, तेंह यहोवा ला अपन बचन दे हवस। अपन दिये बचन के मुताबिक तेंह मोर ले बरताव कर, काबरकि यहोवा ह तोर बईरी, अमोनीमन ले तोर बदला लेय हवय।”
JDG 11:37 फेर ओह अपन ददा ले कहिस, “पर मोर ये बिनती ला मान ले; दू महिना के समय दे कि मेंह अपन सहेलीमन संग पहाड़ीमन म एती-ओती घुमंव अऊ रोवंव, काबरकि मोर कभू बिहाव नइं होही।”
JDG 11:38 ओकर ददा ह कहिस, “तेंह जा सकत हस।” अऊ ओह ओला दू महिना बर जावन दीस। तब ओकर बेटी ह अपन सहेलीमन संग पहाड़ीमन म गीस अऊ ओमन रोईन, काबरकि ओकर कभू बिहाव नइं होही।
JDG 11:39 दू महिना के बाद, ओह अपन ददा करा लहुंटके आईस, अऊ ओकर ददा ह परमेसर के संग खाय अपन कसम के मुताबिक ओकर संग बरताव करिस। अऊ ओह एक कुंवारी रिहिस। ये बात ले इसरायलीमन म ये रिवाज चलिस
JDG 11:40 कि हर साल इसरायल के जवान माईलोगनमन यिप्तह गिलादी के बेटी के सुरता म उत्सव मनाय खातिर चार दिन बर बाहिर जाथें।
JDG 12:1 कुछू समय के बाद एपरैमी सेना के मनखेमन जूरिन, अऊ ओमन पार होके सापोन नगर म गीन अऊ यिप्तह ला कहिन, “जब तेंह अमोनीमन ले लड़े बर गेय, त हमन ला अपन संग चले बर काबर नइं बलाय? हमन तोर घर ला तोर सहित जला देबो।”
JDG 12:2 यिप्तह ह ओमन ले कहिस, “में अऊ मोर मनखेमन अमोनीमन ले एक बड़े झगरा म लगे रहेंन, अऊ हालाकि मेंह तुमन ला बलाएंव, पर तुमन मोला ओमन के हांथ ले नइं बचाएव।
JDG 12:3 जब मेंह देखेंव कि तुमन मोर मदद नइं करत हव, त मेंह अपन परान ला अपन हथेली म लेके अमोनीमन ले लड़े बर ओ पार गेंव, अऊ यहोवा ह मोला ओमन ऊपर बिजय देवाईस। अब तुमन काबर आज मोर ले लड़े बर आय हवव?”
JDG 12:4 तब यिप्तह ह गिलाद के जम्मो मनखेमन ला इकट्ठा करके एपरैम ले लड़िस। गिलादीमन ओमन ला मार डारिन काबरकि एपरैमीमन कहत रिहिन, “हे गिलादीमन, तुमन एपरैम अऊ मनस्से के भगोड़ा अव।”
JDG 12:5 गिलादीमन एपरैम कोति जाय के यरदन के घाट ऊपर कब्जा कर लीन, अऊ जब भी एपरैम के कोनो बचके निकलइया मनखे ह कहय, “मोला ओ पार जावन दव,” त गिलाद के मनखेमन ओकर ले पुछंय, “का तेंह एक एपरैमी अस?” अऊ यदि ओह कहय, “नइं,”
JDG 12:6 त ओमन कहंय, “ठीक हे, शिब्बोलेत कह,” अऊ यदि ओह कहय, “सिब्बोलेत,” काबरकि ओह ओ सबद के सही उच्चारन नइं कर सकय, तब ओमन ओला पकड़ लेंय अऊ यरदन के घाट म मार डारंय। ओ बेरा, बियालीस हजार एपरैमीमन मार डारे गीन।
JDG 12:7 यिप्तह ह छै साल तक इसरायलीमन के अगुवई करिस। तब यिप्तह गिलादी ह मर गीस, अऊ ओला गिलाद के एक नगर म माटी दिये गीस।
JDG 12:8 यिप्तह के मरे के बाद, बैतलहम के इबसान ह इसरायलीमन के अगुवई करिस।
JDG 12:9 ओकर तीस बेटा अऊ तीस झन बेटी रिहिन। ओह अपन बेटीमन के बिहाव अपन बंस के बाहिर करिस, अऊ अपन बेटामन बर घलो, ओह अपन बंस के बाहिर तीस जवान माईलोगनमन ला ओमन के घरवाली के रूप म ले आईस। इबसान ह सात साल तक इसरायलीमन के अगुवई करिस।
JDG 12:10 तब इबसान ह मर गीस अऊ ओला बैतलहम म माटी देय गीस।
JDG 12:11 ओकर बाद जबूलूनी एलोन इसरायल के नियाय करन लगिस; अऊ ओह इसरायल के नियाय दस साल तक करिस।
JDG 12:12 तब एलोन जबूलूनी ह मर गीस, अऊ ओला जबूलून के देस के अय्यालोन सहर म माटी देय गीस।
JDG 12:13 एलोन के मरे के बाद, पिरातोनी हिल्लेल के बेटा अबदोन ह इसरायल के नियाय करन लगिस।
JDG 12:14 अऊ ओकर चालीस बेटा अऊ तीस पोता होईन, जऊन मन सत्तर गदहामन म सवारी करत रिहिन। ओह आठ साल तक इसरायल के नियाय करिस।
JDG 12:15 तब पिरातोनी हिल्लेल के बेटा अबदोन ह मर गीस, अऊ ओला एपरैम के पिरातोन नगर म माटी दिये गीस, जऊन ह अमालेकीमन के पहाड़ी देस म हवय।
JDG 13:1 इसरायलीमन फेर यहोवा के नजर म दुस्ट काम करिन; एकरसेति यहोवा ह ओमन ला चालीस साल तक पलिस्तीमन के अधीन कर दीस।
JDG 13:2 ओ समय दानीमन के कुल म सोरा नगर के एक मनखे रिहिस, जेकर नांव मानोह रिहिस; ओकर घरवाली के बांझ होय के कारन कोनो बेटा नइं रिहिस।
JDG 13:3 ये माईलोगन ला यहोवा के दूत ह दरसन देके कहिस, “बांझ होय के कारन तोर कोनो लइका नइं ए, पर अब तें गरभवती होबे अऊ तोला एक बेटा होही।
JDG 13:4 एकरसेति अब ये बात के धियान रख कि तेंह न तो अंगूर के मंद या अऊ कोनो परकार के मंद पीबे, अऊ न ही कोनो असुध चीज ला खाबे,
JDG 13:5 काबरकि तेंह गरभवती होबे अऊ तोर एक बेटा पईदा होही। ओकर मुड़ म कभू भी उस्तरा झन फिरय, काबरकि गरभ ले ही परमेसर ला समरपित ओह एक नाजीर होही। ओह इसरायलीमन ला पलिस्तीमन के हांथ ले छुड़ाय म अगुवई करही।”
JDG 13:6 ओ माईलोगन ह अपन घरवाला करा जाके ओ बात ला बताईस, “परमेसर के एक जन ह मोर करा आय रिहिस। ओकर रूप ह परमेसर के स्वरगदूत कस बहुंत अद्भूत रिहिस। मेंह ओकर ले नइं पुछेंव कि ओह कहां ले आय रिहिस, अऊ न ही ओह मोला अपन नांव बताईस।
JDG 13:7 पर ओह मोर ले कहिस, ‘सुन, तेंह गरभवती होबे अऊ तोला एक बेटा होही। एकरसेति, अब तें न तो अंगूर के मंद या अऊ कोनो परकार के मंद पीबे, अऊ न ही कोनो असुध चीज खाबे, काबरकि ओ लइका ह गरभ ले लेके ओकर मरन के दिन तक परमेसर के एक नाजीर होही।’ ”
JDG 13:8 तब मानोह ह यहोवा परमेसर ले ये बिनती करिस, “हे परभू, मोर बिनती ला सुन। परमेसर के ओ जन जेला तेंह पठोय रहय, ओला फेर हमर करा पठो कि ओह हमन ला सिखोय कि जऊन लइका ह पईदा होवइया हवय, ओकर पालन-पोसन कइसे करे जावय।”
JDG 13:9 मानोह के ये बात ला परमेसर ह सुनिस, एकरसेति जब ओ माईलोगन ह मैदान म रिहिस, अऊ ओकर घरवाला मानोह ओकर संग म नइं रिहिस, त परमेसर के स्वरगदूत ह ओकर करा फेर आईस।
JDG 13:10 तब ओ माईलोगन ह दऊड़के अपन घरवाला ला ये समाचार देय बर गीस, “जऊन मनखे ओ दिन मोला दिखाई देय रिहिस, ओही ह फेर आय हवय।”
JDG 13:11 ये सुनत ही मानोह ह उठके अपन घरवाली के पाछू-पाछू गीस, अऊ ओ मनखे करा आके ओकर ले पुछिस, “का तेंह ओही मनखे अस, जऊन ह मोर घरवाली ले गोठियाय रहय?” ओह जबाब दीस, “मेंह ओही अंव।”
JDG 13:12 तब मानोह ह ओकर ले पुछिस, “जब तोर बचन ह पूरा हो जाही, त ओ लइका के जिनगी के का ढंग अऊ ओकर का काम होही?”
JDG 13:13 यहोवा के स्वरगदूत ह जबाब दीस, “जतेक चीजमन के चरचा मेंह तोर घरवाली ले करे रहेंव, ओह ओ जम्मो ला जरूर पूरा करय।
JDG 13:14 येह अइसने कोनो चीज ला झन खावय, जऊन ह अंगूर के नार ले पईदा होथे, अऊ न ही अंगूर के मंद या अऊ कोनो परकार के मंद पीयय, अऊ न ही कोनो असुध चीज ला खावय। जरूरी अय कि येह हर ओ चीज ला करय, जेकर हुकूम मेंह येला देय हवंव।”
JDG 13:15 मानोह ह यहोवा के स्वरगदूत ला कहिस, “हमन चाहथन कि तेंह इहां रूक, ताकि हमन तोर बर एक ठन बोकरा पीला ला रांधके तियार करन।”
JDG 13:16 यहोवा के स्वरगदूत ह कहिस, “तेंह मोला रोक भी लेबे, तभो ले मेंह तोर जेवन म ले कुछू नइं खाहूं। पर यदि तेंह होम-बलिदान चघाय चाहथस, त येला यहोवा ला चघा।” (मानोह ह नइं जानत रिहिस कि ओह यहोवा के स्वरगदूत अय।)
JDG 13:17 तब मानोह ह यहोवा के ओ स्वरगदूत ले पुछिस, “तोर का नांव अय, ताकि जब तोर बात ह पूरा होवय, त हमन तोर आदरमान कर सकन।”
JDG 13:18 यहोवा के स्वरगदूत ह ओकर ले कहिस, “तेंह काबर मोर नांव पुछत हस? येह समझ के बाहिर अय?”
JDG 13:19 तब मानोह ह अन्न-बलिदान के संग बोकरा के एक पीला ला धरिस अऊ ओला एक चट्टान ऊपर यहोवा बर चघाईस। तब यहोवा ह मानोह अऊ ओकर घरवाली के देखत म एक अद्भूत काम करिस।
JDG 13:20 याने कि जब आगी के लपट ओ बेदी म ले अकास कोति उठत रिहिस, तब यहोवा के स्वरगदूत ह ओ बेदी के आगी के लपट म ले होके ऊपर चल दीस, येला देखके मानोह अऊ ओकर घरवाली भुइयां म मुहूं के बल गिरके दंडवत करिन।
JDG 13:21 पर जब यहोवा के स्वरगदूत ह मानोह अऊ ओकर घरवाली ला फेर नइं दिखिस, तब मानोह ह जान डारिस कि ओह यहोवा के स्वरगदूत रिहिस।
JDG 13:22 तब मानोह ह अपन घरवाली ले कहिस, “हमन जरूर मर जाबो काबरकि हमन परमेसर के दरसन करे हवन!”
JDG 13:23 पर ओकर घरवाली ह जबाब दीस, “यदि यहोवा ह हमन ला मार डारे चाहतिस, त ओह हमर हांथ ले होम-बलिदान अऊ अन्न-बलिदान गरहन नइं करतिस, अऊ न ही ओह ये जम्मो चीज हमन ला देखातिस, अऊ न ही अभी हमन ला ये बातमन ला बतातिस।”
JDG 13:24 बाद म, ओ माईलोगन ह एक बेटा ला जनम दीस, अऊ ओकर नांव सिमसोन धरिस। ओ लइका ह बाढ़त गीस अऊ यहोवा ह ओला आसीस दीस,
JDG 13:25 अऊ जब ओह सोरा अऊ एसताओल नगरमन के बीच महने-दान म रिहिस, त यहोवा के आतमा ह ओला उभारन लगिस।
JDG 14:1 एक दिन सिमसोन ह खाल्हे तिमना नगर म गीस, अऊ तिमना म एक पलिस्तीनी माईलोगन ला देखिस।
JDG 14:2 तब ओह जाके अपन दाई-ददा ले कहिस, “तिमना म मेंह एक पलिस्तीनी माईलोगन ला देखे हवंव, एकरसेति अब तुमन ओकर ले मोर बिहाव कर देवव।”
JDG 14:3 ओकर दाई-ददा ओकर ले कहिन, “का तोर सगा-संबंधी म या हमर जम्मो मनखेमन म कोनो माईलोगन नइं अंय कि तेंह खतनारहित पलिस्तीमन के माईलोगन ले बिहाव करे चाहथस?” पर सिमसोन ह अपन ददा ले कहिस, “ओकर ले ही मोर बिहाव करा देवव, काबरकि मोर बर ओही ह सही अय।”
JDG 14:4 (ओकर दाई-ददा नइं जानत रिहिन कि ये बात यहोवा कोति ले अय, जऊन ह पलिस्तीमन के बदला लेय के मऊका खोजत रिहिस; काबरकि ओ बेरा पलिस्तीमन इसरायल ऊपर राज करत रिहिन।)
JDG 14:5 तब सिमसोन ह अपन दाई-ददा के संग खाल्हे तिमना नगर ला गीस। जब ओमन तिमना के अंगूर के बारी करा हबरिन, त अचानक एक जवान सिंह गरजत ओकर कोति लपकिस।
JDG 14:6 तब यहोवा के आतमा सिमसोन के ऊपर बड़े सक्ति से उतरिस, अऊ ओह ओ सिंह ला अपन खाली हांथ ले अइसे चीर दीस, जइसे ओह कोनो बोकरा के पीला ला चीरे हवय। पर ये बात ओह न तो अपन ददा ला बताईस अऊ न ही अपन दाई ला।
JDG 14:7 तब ओह जाके ओ माईलोगन ले गोठियाईस, अऊ सिमसोन ह ओला पसंद करिस।
JDG 14:8 कुछू समय के बाद, जब ओह ओ माईलोगन ले बिहाव करे बर वापिस तिमना गीस, त ओह रसता म ओ सिंह के लास ला देखे बर रसता ले मुड़िस, अऊ ओह सिंह के लास म मधुमक्खीमन के एक झुंड अऊ कुछू मंधरस घलो देखिस।
JDG 14:9 तब ओह ओमा ले मंधरस ला अपन हांथ ले निकालिस अऊ खावत-खावत आघू बढ़ गीस। जब ओह अपन दाई-ददा करा गीस, त ओह ओमन ला घलो कुछू मंधरस दीस, अऊ ओमन घलो खाईन। पर ओह ओमन ला ये बात नइं बताईस कि ओह ओ मंधरस ला सिंह के लास म ले निकाले रिहिस।
JDG 14:10 तब ओकर ददा ह ओ माईलोगन ला देखे बर गीस। अऊ उहां सिमसोन ह जवानमन के रीति के मुताबिक एक भोज के आयोजन करिस।
JDG 14:11 जब मनखेमन ओला देखिन, त ओमन ओकर संग-संग रहे बर तीस संगवारीमन ला चुनिन।
JDG 14:12 सिमसोन ह ओमन ला कहिस, “मेंह तुमन ला एक पहेली कहत हवंव; यदि तुमन ये भोज के सात दिन के भीतर ये पहेली के उत्तर दे दूहू, त मेंह तुमन ला तीस मलमल के पहिरावा अऊ तीस जोड़ी कपड़ा दूहूं।
JDG 14:13 पर यदि तुमन येकर उत्तर नइं दे सकहू, त तुमन ला मोला तीस मलमल के पहिरावा अऊ तीस जोड़ी कपड़ा देय बर पड़ही।” ओमन कहिन, “हमन ला अपन पहेली बता; हमन ओला सुनन।”
JDG 14:14 सिमसोन ह कहिस, “खवइया म ले कुछू खाय के चीज; अऊ बलवान म ले कुछू मीठा चीज।” तीन दिन तक ओमन कुछू जबाब नइं दे सकिन।
JDG 14:15 चौथा दिन, ओमन सिमसोन के घरवाली ला कहिन, “अपन घरवाला ला फुसला कि ओह हमन ला पहेली के मतलब बतावय, नइं त हमन तोला अऊ तोर ददा के परिवार ला आगी लगाके मार डालबो। का तुमन हमर संपत्ति चोराय बर हमन ला इहां नेवता देके बलाय हवव?”
JDG 14:16 तब सिमसोन के घरवाली ह ये कहिके सिमसोन के आघू म रोवन लगिस, “तेंह मोर ले नफरत करथस! असल म, तेंह मोर ले मया नइं करस। तेंह मोर मनखेमन ला एक पहेली तो कहे हवस, पर तेंह मोला ओकर मतलब नइं बताय हस।” ओह कहिस, “में तो येकर मतलब अपन दाई-ददा ला घलो नइं बताय हंव, त फेर मेंह तोला काबर बतावंव?”
JDG 14:17 ओह भोज के पूरा सात दिन तक रोवत रिहिस, त सातवां दिन आखिर म, सिमसोन ह ओला पहेली के मतलब बता दीस, काबरकि ओह सिमसोन ला लगातार तंग करते रिहिस। तब ओह जाके अपन मनखेमन ला पहेली के मतलब बता दीस।
JDG 14:18 सातवां दिन सूरज डुबे के पहिले, ओ नगर के मनखेमन सिमसोन ले कहिन, “मंधरस ले जादा मीठा का ए? सिंह ले जादा बलवान का ए?” सिमसोन ह ओमन ला कहिस, “यदि तुमन मोर बछिया ला नांगर म नइं जोततेव, त मोर पहेली के मतलब नइं बुझतेव।”
JDG 14:19 तब यहोवा के आतमा ह ओकर ऊपर ताकत से उतरिस। ओह अस्कलोन नगर गीस अऊ उहां ओमन के तीस मनखेमन ला मार डारिस, अऊ ओमन के जम्मो चीज ला लूट लीस अऊ ओमा के तीस जोड़ी कपड़ा ओमन ला दे दीस, जेमन पहेली के मतलब बताय रिहिन। तब ओह बहुंत गुस्सा होके अपन ददा के घर लहुंट गीस।
JDG 14:20 अऊ सिमसोन के घरवाली ला ओकर ही एक संगवारी ला दे दिये गीस, जऊन ह ओकर संग भोज के बेरा म रिहिस।
JDG 15:1 बाद म, गहूं के लुवई के बेरा, सिमसोन ह बोकरा के एक पीला ला लेके अपन घरवाली ले मिले बर गीस। उहां जाके ओह कहिस, “मेंह अपन घरवाली के कमरा म जावत हंव।” पर ओकर ससुर ह ओला भीतर जाय बर नइं दीस।
JDG 15:2 ओकर ससुर ह सिमसोन ला कहिस, “मेंह पक्का जानत रहेंव कि तेंह ओकर ले नफरत करथस, एकरसेति मेंह ओला तोर संगवारी ला देय दे हंव। का ओकर छोटे बहिनी ह ओकर ले जादा सुघर नइं अय? अपन घरवाली के बदला म ओला लेय ले।”
JDG 15:3 सिमसोन ह ओ मनखेमन ला कहिस, “अब के बेरा, मोला अधिकार हे कि मेंह पलिस्तीमन ले भिड़ंव; मेंह सही म ओमन के नुकसान करहूं।”
JDG 15:4 तब सिमसोन ह जाके तीन सौ कोलिहामन ला पकड़िस, अऊ दू-दू ठन कोलिहामन के पुंछी ला एक संग बांध दीस। तब ओह ओमन के पुंछी के मांझा म एक-एक ठन मसाल ला बांधिस,
JDG 15:5 अऊ मसालमन म आगी लगाके कोलिहामन ला पलिस्तीमन के खड़े फसल म खुला छोंड़ दीस। ओह अनाज के ढेर अऊ खड़े फसल के संग अंगूर अऊ जैतून के बारीमन ला जला दीस।
JDG 15:6 तब पलिस्तीमन पुछिन, “येला कोन करे हवय?” त ओमन ला बताय गीस, “तिमनी के दामाद, सिमसोन ह येला करे हवय, काबरकि ओकर घरवाली ओकर संगवारी ला दे दिये गे हवय।” एकरसेति पलिस्तीमन जाके ओकर घरवाली अऊ ओकर ससुर दूनों ला जलाके मार डारिन।
JDG 15:7 सिमसोन ह ओमन ला कहिस, “तुमन जऊन काम करे हवव, एकरसेति मेंह कसम खावत हंव कि जब तक मेंह तुमन ले अपन बदला नइं ले लूहूं, तब तक चुप नइं बईठंव।”
JDG 15:8 ओह ओमन ऊपर बड़े निरदयता से हमला करिस अऊ ओमा के बहुंते झन ला मार डारिस। तब ओह जाके एताम नांव के चट्टान के एक ठन गुफा म रहन लगिस।
JDG 15:9 पलिस्तीमन ऊपर जाके यहूदा देस म डेरा डालिन, अऊ लेही नांव के नगर के आसपास बगर गीन।
JDG 15:10 यहूदी मनखेमन ओमन ले पुछिन, “तुमन काबर हमर संग लड़ई करे बर आय हवव?” ओमन जबाब दीन, “हमन सिमसोन ला बंदी बनाके ले जाय बर आय हवन, ताकि हमन ओकर संग वइसे करन, जइसे ओह हमर संग करे हवय।”
JDG 15:11 तब तीन हजार यहूदी मनखेमन एताम नांव के चट्टान के गुफा म जाके सिमसोन ला कहिन, “का तेंह नइं जानत हस कि पलिस्तीमन हमर ऊपर सासन करत हवंय? फेर तेंह हमर संग ये का करे हस?” सिमसोन ह ओमन ला जबाब दीस, “मेंह ओमन के संग सिरिप वइसे ही करे हंव, जइसे ओमन मोर संग करिन।”
JDG 15:12 ओमन ओला कहिन, “हमन इहां एकरसेति आय हवन कि तोला बंदी बनावन अऊ पलिस्तीमन के हांथ म सऊंप दन।” सिमसोन ह कहिस, “मोर ले ये कसम खावव कि तुमन खुद मोर हतिया नइं करहू।”
JDG 15:13 ओमन कहिन, “ठीक हे; हमन तोला सिरिप बांधके ओमन के हांथ म कर देबो। हमन तोर हतिया नइं करन।” तब ओमन सिमसोन ला दू ठन नवां रस्सी म बांधके ओ चट्टान म ले बाहिर ले आईन।
JDG 15:14 जब ओह लेही नांव के जगह म हबरिस, त पलिस्तीमन चिचियावत ओकर कोति आईन। तब यहोवा के आतमा सिमसोन ऊपर ताकत से उतरिस, अऊ ओकर हांथ म बंधे रस्सीमन आगी म जरे सन कस हो गीन, अऊ ओकर हांथ के बंधनामन टूटके गिर गीन।
JDG 15:15 ओला गदहा के जबड़ा के एक नवां हाड़ा मिलिस, ओला ओह उठाईस अऊ ओकर दुवारा एक हजार पलिस्ती आदमीमन ला मार डारिस।
JDG 15:16 तब सिमसोन ह कहिस, “गदहा के जबड़ा के हाड़ा ले मेंह ओमन ला गदहा बना दे हंव। गदहा के जबड़ा के हाड़ा ले मेंह एक हजार मनखे ला मार डारेंव।”
JDG 15:17 अइसने कहे के बाद, ओह जबड़ा के ओ हाड़ा ला फटिक दीस; अऊ ओ जगह के नांव रामत-लेही रखे गीस।
JDG 15:18 तब सिमसोन ला अब्बड़ पीयास लगिस, त ओह यहोवा ला पुकारके कहिस, “तेंह अपन सेवक ला ये बड़े जीत दे हस। का अब मेंह पीयास म मरके ओ खतनारहित मनखेमन के हांथ म पड़ंव?”
JDG 15:19 तब परमेसर ह लेही म खंचवा के मुहूं ला खोल दीस, अऊ ओमा ले पानी निकले लगिस। जब सिमसोन ह पानी पीईस, त ओला फेर ताकत मिलिस, अऊ ओह फेर तरो-ताजा हो गीस। ये खातिर ओ सोता के नांव एन-हक्कोरे रखे गीस, अऊ येह अभी घलो उहां लेही म हवय।
JDG 15:20 सिमसोन ह पलिस्तीमन के दिन म बीस साल तक इसरायल के अगुवई करिस।
JDG 16:1 एक दिन सिमसोन ह गाजा सहर ला गीस, अऊ उहां एक बेस्या ला देखके ओकर संग रथिया बिताय बर गीस।
JDG 16:2 गाजा के मनखेमन ला बताय गीस, “सिमसोन ह इहां आय हवय,” त ओमन ओ जगह ला घेर लीन, अऊ ओला पकड़े बर रात भर सहर के दुवार म इंतजार करिन। ओमन ये कहिके रात भर डटे रिहिन, “बड़े बिहनियां हमन ओला मार डालबो।”
JDG 16:3 पर सिमसोन ह उहां सिरिप आधा रथिया तक पड़े रिहिस। तब ओह उठिस अऊ सहर के दुवार के कपाट ला दूनों खंभा के संग धरिस, अऊ ओला टोरके छड़ अऊ जम्मो चीज ला ढीला कर दीस, अऊ ओमन ला अपन कंधा म उठाके ओ पहाड़ी के टीप म ले गीस, जऊन ह हेबरोन सहर के सामने म हवय।
JDG 16:4 कुछू समय बाद, ओला सोरेक के घाटी के एक माईलोगन ले मया हो गीस, जेकर नांव दलीला रिहिस।
JDG 16:5 पलिस्तीमन के सासन करइयामन ओ माईलोगन करा जाके कहिन, “तें ओला फुसलाके पुछ कि ओकर अब्बड़ ताकत के भेद का अय, अऊ हमन ओला कइसे हरा सकत हन, ताकि ओला बांधके अपन अधीन करन। हमन ले हर एक झन तोला चांदी के गियारह-गियारह सौ सेकेल दीही।”
JDG 16:6 तब दलीला ह सिमसोन ले कहिस, “मोला बता कि तोर अब्बड़ ताकत के राज का अय, अऊ कइसे तोला बांधके अधीन करे जा सकत हवय।”
JDG 16:7 सिमसोन ह ओला जबाब दीस, “यदि कोनो मोला धनुस के सात ठन अइसन नवां-नवां तांतमन ले बांधथे, जेमन ला सूखाय नइं गे हवय, त मेंह कोनो आने मनखे के सहीं कमजोर हो जाहूं।”
JDG 16:8 तब पलिस्तीमन के सासन करइयामन दलीला करा धनुस के सात ठन अइसन नवां-नवां तांतमन ला ले आईन, जेमन ला सूखाय नइं गे रिहिस, अऊ ओ तांतमन ले ओह सिमसोन ला बांध दीस।
JDG 16:9 ओ कमरा म कुछू मनखेमन छिपे रहंय, त ओह ओकर ले जोर से कहिस, “हे सिमसोन, पलिस्तीमन तोर घात म हवंय!” पर ओह ओ तांतमन ला अइसन टोर दीस, जइसन जब तांत ह आगी के लकठा म आथे, त टूट जाथे। अऊ ओकर अब्बड़ ताकत के राज ह नइं खुलिस।
JDG 16:10 तब दलीला ह सिमसोन ला कहिस, “देख, तेंह मोर संग छल करे हवस; अऊ लबारी मारे हवस। अब मोला बता कि तोला कइसे बांधे जा सकत हे।”
JDG 16:11 ओह कहिस, “यदि कोनो मोला अइसने नवां रस्सीमन ले बने करके बांधय, जेकर उपयोग कभू नइं करे गे हवय, त मेंह कोनो आने मनखे के सहीं कमजोर हो जाहूं।”
JDG 16:12 तब दलीला ह नवां रस्सीमन ला लीस अऊ ओला बांध दीस। तब जऊन मनखेमन ओ कमरा म छिपे रहंय, ओमन के सुनत म जोर से कहिस, “हे सिमसोन, पलिस्तीमन तोर घात म हवंय!” पर सिमसोन ह अपन बाहां म बंधे ओ रस्सीमन ला अइसन टोर दीस, मानो ओमन सूंत के सहीं कमजोर रिहिन।
JDG 16:13 तब दलीला ह सिमसोन ला कहिस, “अब तक तेंह मोर ले छल करत अऊ लबारी मारत आय हवस। मोला बता दे कि तोला कइसे बांधे जा सकत हे?” सिमसोन ह कहिस, “यदि तेंह मोर मुड़ के सात ठन लटमन ला ताना म बुनबे अऊ ओला खूंटी म बांध देबे, त मेंह कोनो आने मनखे सहीं कमजोर हो जाहूं।” जब सिमसोन ह सुतत रिहिस, त दलीला ह ओकर मुड़ के सात ठन लटमन ला लेके ताना म बुन दीस
JDG 16:14 अऊ ओला खूंटी म बांध दीस। फेर दलीला ह ओला जोर से कहिस, “हे सिमसोन, पलिस्तीमन तोर घात म हवंय!” तब ओह नींद ले जागिस, अऊ खूंटी अऊ ताना ला लट समेत उखान दीस।
JDG 16:15 तब दलीला ह ओकर ले कहिस, “तेंह कइसे कह सकत हस कि तेंह मोर ले मया करथस, जबकि तेंह मोर ऊपर बिसवास नइं करस? येह तीसरा बार अय, जब तेंह मोर ले छल करे हस अऊ मोला अपन अब्बड़ ताकत के राज नइं बताय हस।”
JDG 16:16 दिन ब दिन दलीला ह ओला अइसे तंग करके मजबूर करिस कि ओकर नाक म दम आ गीस।
JDG 16:17 तब सिमसोन ह अपन जम्मो भेद ला ओकर आघू म खोलत कहिस, “मोर मुड़ म उस्तरा कभू नइं चलाय गे हवय, काबरकि मेंह अपन दाई के पेट ले ही परमेसर ला समरपित एक नाजीर अंव। यदि मोर मुड़ के बाल के मुंडन कर दिये जाही, त मोर ताकत ह चले जाही, अऊ मेंह कोनो आने मनखे सहीं कमजोर हो जाहूं।”
JDG 16:18 जब दलीला ह देखिस कि सिमसोन ह ओला जम्मो भेद के बात बता दे हवय, त ओह पलिस्तीमन के सासन करइयामन करा ये खबर पठोईस, “एक बार फेर आवव, काबरकि ओह जम्मो भेद के बात मोला बता देय हवय।” तब पलिस्तीमन के सासन करइयामन अपन हांथ म चांदी धरके ओकर करा वापिस आईन।
JDG 16:19 दलीला ह ओला अपन कोरा म सुताके एक झन मनखे ला बलाईस कि ओह सिमसोन के मुड़ के सातों लटमन ला मुड़वा दे, अऊ ये किसम ले ओह अधीन म कर लेवय। लटमन ला काटे के बाद, सिमसोन के ताकत ह खतम हो गीस।
JDG 16:20 तब दलीला ह जोर से कहिस, “हे सिमसोन, पलिस्तीमन तोर घात म हवंय!” ओह नींद ले जागिस अऊ सोचन लगिस, “मेंह पहिले के असन बाहिर जाहूं अऊ अपनआप ला झटकके आजाद हो जाहूं।” पर ओह ये नइं जानत रिहिस कि यहोवा ह ओला छोंड़ दे हवय।
JDG 16:21 तब पलिस्तीमन ओला पकड़ लीन अऊ ओकर आंखी ला फोरके ओला गाजा ले गीन। ओमन ओला कांसा के बेड़ी म जकड़के जेल म डाल दीन कि ओह उहां चक्की पीसय।
JDG 16:22 पर मुंडन होय के बाद, ओकर मुड़ के चुंदी ह फेर बाढ़न लगिस।
JDG 16:23 कुछू समय के बाद, पलिस्तीमन के सासन करइयामन अपन देवता दागोन ला बड़े बलिदान चघाय अऊ आनंद मनाय बर ये कहिके जूरिन, “हमर देवता ह हमर बईरी सिमसोन ला हमर हांथ म कर दे हवय।”
JDG 16:24 जब पलिस्तीमन सिमसोन ला देखिन, त ओमन ये कहिके अपन देवता के बड़ई करिन, “हमर देवता ह हमर बईरी सिमसोन ला हमर हांथ म कर दे हवय, जऊन ह हमर देस ला नास करत रिहिस अऊ हमर बहुंते झन ला मार डारिस।”
JDG 16:25 जब ओमन के मन मगन हो गीस, त ओमन चिचियाके कहिन, “सिमसोन ला लानव कि ओह हमर मनोरंजन करय।” एकरसेति सिमसोन ला जेल ले बाहिर लाने गीस, अऊ ओह ओमन के मनोरंजन करिस। जब ओमन ओला खंभामन के मांझा म ठाढ़ कर देय रिहिन,
JDG 16:26 त सिमसोन ह ओ सेवक ला कहिस, जऊन ह ओकर हांथ ला पकड़े रिहिस, “मोला ओ खंभामन करा ले जा, जेमन मंदिर ला संभाले हवंय, ताकि मेंह ओमन ला छू सकंव अऊ ओमन म टिकके ठाढ़ हो सकंव।”
JDG 16:27 मंदिर ह आदमी अऊ माईलोगनमन ले भर गे रिहिस; पलिस्तीमन के जम्मो सासन करइयामन उहां रिहिन, अऊ छानी म लगभग तीन हजार आदमी अऊ माईलोगन रिहिन, जेमन सिमसोन ला तमासा करत देखत रिहिन।
JDG 16:28 तब सिमसोन ह ये कहिके यहोवा ले पराथना करिस, “हे परमपरधान यहोवा, मोर सुधि ले। हे परमेसर, मोला सिरिप एक बार अऊ ताकत दे कि मेंह पलिस्तीमन ले अपन दूनों आंखी के बदला एकेच बार म ले लंव।”
JDG 16:29 तब सिमसोन ह मांझा के दू ठन खंभामन ला पकड़िस, जेमा मंदिर ह टिके रिहिस, अऊ ओमन ऊपर अपन ताकत लगाईस; जेवनी हांथ ले एक खंभा अऊ डेरी हांथ ले दूसर खंभा ऊपर बल लगात
JDG 16:30 सिमसोन ह कहिस, “पलिस्तीमन के संग मोर परान घलो जावय!” तब ओह अपन जम्मो ताकत ला लगाके धकेलिस, अऊ मंदिर ह सासन करइया अऊ उहां जूरे जम्मो मनखेमन ऊपर आ गिरिस। ये किसम ले ओह अपन जीयत समय जतेक मनखेमन ला मारे रिहिस, ओकर ले जादा मनखे ओह अपन मरत बेरा म मार डारिस।
JDG 16:31 तब ओकर भाई अऊ ओकर ददा के पूरा परिवार ओकर लास ला ले जाय बर आईन। ओमन ओला उठाके वापिस ले गीन अऊ सोरा अऊ एसताओल के बीच ओला ओकर ददा मानोह के कबर म माटी दीन। ओह इसरायल के अगुवई बीस साल तक करे रिहिस।
JDG 17:1 एपरैम के पहाड़ी इलाका म मीका नांव के एक मनखे रिहिस।
JDG 17:2 एक दिन ओह अपन दाई ले कहिस, “जऊन गियारह सौ सेकेल चांदी तोर से ले लिये गे रिहिस, जेकर बारे तेंह मोर सुनत म सराप देय रहय—ओ चांदी ह मोर करा हवय; मेंह ओला लेय रहेंव।” तब ओकर दाई ह कहिस, “हे मोर बेटा, यहोवा ह तोला आसीस देवय!”
JDG 17:3 जब ओह ओ गियारह सौ सेकेल चांदी अपन दाई ला लहुंटा दीस, त ओकर दाई ह कहिस, “मेंह गंभीरता से अपन चांदी ला मोर बेटा बर यहोवा ला अरपन करत हंव ताकि एक मूरती बनाय जावय अऊ ओकर ऊपर चांदी के परत लगाय जावय। एकरसेति मेंह ये चांदी तोला वापिस देवत हंव।”
JDG 17:4 जब ओह अपन दाई ला ओ चांदी लहुंटा दीस, त ओकर दाई ह दू सौ सेकेल चांदी लीस अऊ ओला एक सुनार ला दे दीस, जऊन ह ओकर उपयोग एक मूरती बनाय म करिस। अऊ ओ मूरती ला मीका के घर म रखे गीस।
JDG 17:5 ये मनखे मीका करा एक ठन देव-स्थल रिहिस, अऊ ओह एक एपोद अऊ कुछू घर-देवता बनाईस अऊ अपन एक बेटा ला संस्कार करके अपन पुरोहित ठहिरा लीस।
JDG 17:6 ओ समय म इसरायलीमन के कोनो राजा नइं रिहिस; जेला जइसने ठीक लगय, ओह वइसने करय।
JDG 17:7 यहूदा के बैतलहम नगर म एक जवान लेवी यहूदा गोत्र के मनखेमन के बीच रहत रिहिस;
JDG 17:8 ओह बैतलहम नगर ला छोंड़के कहीं अऊ रहे बर आने जगह के खोज म निकलिस। रेंगत-रेंगत ओह एपरैम के पहाड़ी देस म मीका के घर म हबरिस।
JDG 17:9 मीका ह ओकर ले पुछिस, “तेंह कहां ले आवत हस?” ओह जबाब दीस, “मेंह यहूदा के बैतलहम ले आय हंव अऊ एक लेवी अंव, अऊ मेंह एक जगह के खोज म हवंव, जिहां में रह सकंव।”
JDG 17:10 तब मीका ह ओ लेवी ला कहिस, “मोर संग म रह अऊ मोर ददा अऊ मोर पुरोहित बन जा। मेंह तोला हर साल चांदी के दस सेकेल, तोर कपड़ा अऊ तोर जेवन दूहूं।”
JDG 17:11 लेवी ह ओकर संग रहे बर तियार हो गीस, अऊ ओ जवान ह ओकर एक बेटा के सहीं हो गीस।
JDG 17:12 तब मीका ह ओ लेवी के संस्कार करिस, अऊ ओ जवान ह ओकर पुरोहित बन गीस अऊ ओकर घर म रहन लगिस।
JDG 17:13 अऊ मीका ह अपनआप ला कहिस, “अब मेंह जानत हंव कि यहोवा ह मोर भलई करही, काबरकि ये लेवी ह मोर पुरोहित बन गे हवय।”
JDG 18:1 ओ समय म इसरायलीमन के कोनो राजा नइं रिहिस। अऊ ओ समय म दानीमन के गोत्र के मनखेमन रहे बर अपन खुद के जगह के खोज म रिहिन, काबरकि इसरायली गोत्रमन के बीच ओमन ला अभी तक कोनो निज भाग नइं मिले रिहिस।
JDG 18:2 तब दानीमन ओ देस के भेद लेय बर अऊ खोजबीन करे बर अपन पांच झन अगुवा मनखेमन ला सोरा अऊ एसताओल सहर ले पठोईन। ये मनखेमन जम्मो दानीमन के परतिनिधि रिहिन। ओमन ला ये कहे गीस, “जाके ओ देस के खोजबीन करव।” एकरसेति ओमन एपरैम के पहाड़ी इलाका म गीन अऊ मीका के घर म जाके उहां रात बिताईन।
JDG 18:3 जब ओमन मीका के घर के लकठा म आईन, त ओमन ओ जवान लेवी के अवाज ला पहिचान लीन; तब ओमन मुड़के उहां गीन अऊ ओकर ले पुछिन, “तोला इहां कोन लेके आईस? तेंह इहां का करत हस? इहां तें काबर हस?”
JDG 18:4 ओह ओमन ला बताईस कि मीका ह ओकर बर का-का करे रिहिस, अऊ ओह कहिस, “ओह मोला सेवा करे बर रखे हवय अऊ मेंह ओकर पुरोहित अंव।”
JDG 18:5 तब ओमन ओकर ले कहिन, “किरपा करके परमेसर ले ये पता लगाके बता कि हमन ला हमर यातरा म सफलता मिलही कि नइं।”
JDG 18:6 पुरोहित ह ओमन ला जबाब दीस, “सांति से जावव। तुम्हर यातरा म यहोवा के किरपा-दिरिस्टी हवय।”
JDG 18:7 तब ओ पांचों जन उहां ले चल दीन अऊ लैस नांव के नगर म आईन, जिहां ओमन देखिन कि मनखेमन उहां सीदोनीमन के सहीं सांति अऊ सुरकछा म रहत हवंय। अऊ ओमन के देस म कोनो चीज के कमी नइं रिहिस, एकरसेति ओमन सम्पन्न रिहिन। अऊ ये घलो कि ओमन सीदोनीमन ले बहुंत दूरिहा म रहत रिहिन, अऊ कोनो आने मनखे के संग ओमन के कोनो संबंध नइं रिहिस।
JDG 18:8 तब ओमन सोरा अऊ एसताओल वापिस आईन, त ओमन के संगी दानीमन ओमन ले पुछिन, “तुमन का समाचार लेके आय हवव?”
JDG 18:9 ओमन जबाब दीन, “आवव, हमन ओमन ऊपर हमला करन! हमन ओ देस ला देखे हन, अऊ ओ देस ह बहुंत बढ़िया हवय। तुमन काबर चुपेचाप बईठे हवव? उहां चलके ओ देस ला अपन अधीन कर लेय म झन हिचकव।
JDG 18:10 जब तुमन उहां जाहू, त उहां तुमन ला सीधवा मनखेमन अऊ चौरस देस मिलही, जेला परमेसर ह तुम्हर हांथ म कर दे हवय, एक अइसन देस जिहां कुछू चीज के कमी नइं ए।”
JDG 18:11 तब सोरा अऊ एसताओल ले दानीमन के छै सौ मनखे हथियार बांधके लड़ई बर निकलिन।
JDG 18:12 अपन रसता म ओमन यहूदा के किरयत-यारीम म डेरा डालिन। एकर खातिर किरयत-यारीम के पछिम के जगह ला आज तक महने-दान कहे जाथे।
JDG 18:13 उहां ले ओमन आघू बढ़िन अऊ एपरैम के पहाड़ी देस म मीका के घर म आईन।
JDG 18:14 तब ओ पांचों मनखे, जेमन लैस के देस के भेद लेय रिहिन, अपन संगी दानीमन ले कहिन, “का तुमन जानत हव कि येमा के एक घर म एक एपोद, कुछू घर-देवता अऊ चांदी के परत चघाय एक मूरती हवय? एकरसेति अब तुमन जानव कि का करना हे।”
JDG 18:15 तब ओमन ओती मुड़के मीका के घर म ओ जवान लेवी करा गीन अऊ ओकर हालचाल पुछिन।
JDG 18:16 छै सौ दानीमन लड़ई बर हथियार बांधे प्रवेस दुवार म खड़े रिहिन।
JDG 18:17 तब ओ पांचों मनखे, जेमन देस के भेद लेय बर गे रिहिन, घर के भीतर गीन अऊ मूरती, एपोद अऊ घर-देवतामन ला ले लीन; ये समय पुरोहित अऊ ओ हथियार बांधे छै सौ मनखे प्रवेस दुवार म खड़े रिहिन।
JDG 18:18 जब ओ पांचों मनखे मीका के घर म घुसरके मूरती, एपोद अऊ घर-देवतामन ला ले लीन, त पुरोहित ह ओमन ले पुछिस, “ये तुमन का करत हव?”
JDG 18:19 ओमन ओला जबाब दीन, “चुपे रह, अऊ कुछू झन कह। हमर संग आ, अऊ हमर ददा अऊ पुरोहित बनके रह। का येह तोर बर ठीक अय कि एक पुरोहित के रूप म तेंह इसरायल के एक गोत्र अऊ कुल के सेवा करे के बदले सिरिप एक मनखे के खानदान के पुरोहित के रूप म सेवा कर?”
JDG 18:20 तब पुरोहित ह बहुंत खुस होईस। ओह एपोद, घर-देवता अऊ मूरती ला लेके ओ मनखेमन के संग चल दीस।
JDG 18:21 तब ओमन अपन छोटे लइका, पसु अऊ अपन साजो-सामान ला अपन आघू करके मुड़िन अऊ उहां ले चल दीन।
JDG 18:22 जब ओमन मीका के घर ले कुछू दूरिहा निकल गे रिहिन, तब मीका के घर के लकठा म रहइया मनखेमन जूरिन अऊ दानीमन करा हबर गीन।
JDG 18:23 जब ओमन दानीमन ऊपर चिचियाईन, त दानीमन मुड़के मीका ले कहिन, “का बात ए कि तेंह अपन मनखेमन ला लेके लड़े बर आय हस?”
JDG 18:24 ओह जबाब दीस, “तुमन मोर बनाय देवतामन ला अऊ मोर पुरोहित ला लेके जावत हव। मोर करा अऊ का हवय? तुमन कइसे कह सकत हव कि का बात ए?”
JDG 18:25 दानीमन ओला जबाब दीन, “हमर संग बहस झन कर, अइसे झन होवय कि हमर कुछू मनखेमन गुस्सा होके तुम्हर ऊपर हमला करंय, अऊ तें अऊ तोर परिवार के मनखेमन मारे जावंय।”
JDG 18:26 तब दानीमन अपन रसता म चल दीन, अऊ मीका ह ये देखके कि ओमन जादा ताकतवर हवंय, मुड़िस अऊ अपन घर वापिस चल दीस।
JDG 18:27 तब ओमन मीका के बनाय चीज अऊ ओकर पुरोहित ला लेके लैस नांव के जगह म आईन, जिहां के मनखेमन सांति से अऊ बिगर कोनो डर के रहत रिहिन। दानीमन तलवार लेके ओमन ऊपर हमला करिन, अऊ ओमन के सहर लैस म आगी लगाके जला दीन।
JDG 18:28 ओमन ला बचानेवाला कोनो नइं रिहिन, काबरकि ओमन सीदोन ले बहुंत दूरिहा म रहत रिहिन अऊ ओमन के कोनो आने मनखेमन के संग कोनो संबंध नइं रिहिस। ओ सहर ह बेत-रहोब नगर के लकठा म एक घाटी म रिहिस। तब दानीमन ओ सहर ला फेर बनाईन अऊ उहां बस गीन।
JDG 18:29 ओमन ओ सहर के नांव अपन पुरखा दान के नांव म रखिन, जऊन ह इसरायल के एक बेटा रिहिस। ओ सहर के नांव पहिले लैस रिहिस।
JDG 18:30 उहां दानीमन ओ मूरती ला ठाढ़ कर लीन, अऊ देस के बंधुवई म जावत तक मूसा के पोता, गेरसोम के बेटा योनातन अऊ ओकर बेटामन दान के गोत्र के पुरोहित के काम करते रिहिन।
JDG 18:31 जब तक परमेसर के घर ह सीलो नगर म रिहिस, तब तक ओमन मीका के बनाय मूरती के उपयोग करिन।
JDG 19:1 ओ समय म इसरायलीमन के कोनो राजा नइं रिहिस, तब एक लेवी मनखे एपरैम के पहाड़ी देस के एक दूरिहा जगह म रहत रिहिस; ओह यहूदा के बैतलहम ले एक रखैल ला अपन घर ले आईस।
JDG 19:2 पर ओ रखैल ह बेभिचार करिस अऊ ओह अपन दाई-ददा के घर वापिस यहूदा के बैतलहम चल दीस। जब ओला उहां रहत चार महिना हो गीस,
JDG 19:3 त ओकर घरवाला ह ओकर करा गीस कि ओला मनाके वापिस अपन घर ले आवय। ओह अपन संग अपन सेवक अऊ दू ठन गदहा घलो लेके गे रिहिस। ओह अपन घरवाला ला अपन ददा के घर म ले गीस, अऊ जब ओकर ससुर ह ओला देखिस, त ओह खुसी से ओकर सुवागत करिस।
JDG 19:4 तब ओकर ससुर याने कि ओ माईलोगन के ददा ह बिनती करके ओला रोक लीस; अऊ ओह उहां खावत-पीयत अऊ सुतत तीन दिन तक ओकर करा रूके रिहिस।
JDG 19:5 चौथा दिन ओमन बड़े बिहनियां उठिन, अऊ ओह जाय के तियारी करिस; पर ओ माईलोगन के ददा ह अपन दामाद ले कहिस, “कुछू खाके अपनआप ला तरो-ताजा कर ले, तब चल देबे।”
JDG 19:6 तब ओ दूनों झन बईठके एक संग खाईन-पीईन। ओकर बाद ओ माईलोगन के ददा ह कहिस, “एक रात अऊ रूक जा अऊ आनंद मना।”
JDG 19:7 अऊ जब ओ मनखे ह जाय बर उठिस, त ओकर ससुर ह ओला मना लीस, एकरसेति ओह ओ रथिया उहां रूक गीस।
JDG 19:8 पांचवां दिन बिहनियां जब ओह जाय बर उठिस, त ओ माईलोगन के ददा ह कहिस, “अपनआप ला तरो-ताजा कर ले अऊ मंझन तक रूक!” तब ओ दूनों झन एक संग रोटी खाईन।
JDG 19:9 जब ओ मनखे अपन रखैल अऊ अपन सेवक के संग जाय बर उठिस, त ओकर ससुर याने कि ओ माईलोगन के ददा ह ओकर ले कहिस, “देख, सांझ होनेचवाला हे, एकरसेति रात भर रूक जा। सूरज ह डुबनेचवाला हे। एकरसेति रूक जा अऊ आनंद मना। कल बड़े बिहनियां उठके अपन घर चल देबे।”
JDG 19:10 पर ओ मनखे ह एक अऊ रथिया रूके नइं चाहिस, अऊ बिदा होके काठी कसे अपन दूनों गदहा अऊ अपन रखैल के संग यबूस (यरूसलेम) कोति गीस।
JDG 19:11 जब ओमन यबूस के लकठा म हबरिन अऊ दिन ह लगभग खतम हो गे रिहिस, त सेवक ह अपन मालिक ले कहिस, “आ, हमन यबूसीमन के ये सहर म रूकके रात बितावन।”
JDG 19:12 ओकर मालिक ह जबाब दीस, “नइं, हमन अइसन कोनो सहर म नइं जावन, जिहां के मनखे इसरायली नो हंय। हमन आघू बढ़बो अऊ गिबा नगर तक जाबो।”
JDG 19:13 फेर ओह अपन सेवक ला कहिस, “आ, हमन गिबा या रामा नगर तक हबरे के कोसिस करन अऊ ओमा के कोनो जगह म रात बितावन।”
JDG 19:14 अऊ ओमन आघू बढ़िन, अऊ सूरज ह डूब गीस, जब ओमन बिनयामीन के गिबा के लकठा म आईन।
JDG 19:15 त उहां ओमन रात बिताय बर रूक गीन। ओमन जाके नगर के चऊक म बईठ गीन, पर रथिया बिताय बर कोनो ओमन ला अपन घर म नइं ले गीस।
JDG 19:16 तब ओ दिन सांझ के बेरा, एपरैम के पहाड़ी इलाका के एक सियान मनखे अपन खेत-खार के काम ला निपटाके आईस; ओह गिबा म रहत रिहिस; गिबा ह बिनयामीनी मनखेमन के नगर रिहिस।
JDG 19:17 जब ओ सियान ह देखिस कि यातरा करइयामन नगर के चऊक म बईठे हवंय, त ओह पुछिस, “तुमन कहां जावत हव, अऊ कहां ले आय हवव?”
JDG 19:18 ओह सियान ला जबाब दीस, “हमन यहूदा के बैतलहम ले आय हवन अऊ एपरैम के पहाड़ी देस के एक दूरिहा के जगह म जावत हन, जिहां मेंह रहिथंव। मेंह यहूदा के बैतलहम नगर गे रहेंव अऊ अब मेंह यहोवा के घर ला जावत हंव। रथिया बिताय बर कोनो हमन ला अपन घर नइं ले गीन।
JDG 19:19 हमर करा हमर गदहामन बर पैंरा अऊ चारा दूनों हवय अऊ तोर सेवकमन करा याने कि मोर अऊ तोर ये दासी अऊ हमर संग ये जवान करा रोटी अऊ अंगूर के मंद घलो हवय। हमन ला कोनो चीज के जरूरत नइं ए।”
JDG 19:20 तब सियान मनखे ह कहिस, “तुमन मोर घर म आ सकत हव। तुमन ला जऊन चीज के जरूरत होही, ओला में दूहूं, पर चऊक म तुमन रात झन बितावव।”
JDG 19:21 तब ओह ओमन ला अपन घर म ले गीस अऊ ओकर गदहामन ला चारा दीस। तब ओमन अपन गोड़ धोके खाय-पीये लगिन।
JDG 19:22 जब ओमन आनंद मनात रिहिन, त सहर के कुछू दुस्ट मनखेमन ओ घर ला घेर लीन। कपाट ला खटखटा-खटखटाके ओ घर के मालिक, ओ सियान मनखे ले चिचियाके कहिन, “जऊन आदमी ह तोर घर म आय हवय, ओला बाहिर लेके आ ताकि हमन ओकर संग सारीरिक संबंध बनावन।”
JDG 19:23 घर के मालिक ह बाहिर निकलके ओमन ला कहिस, “नइं, हे मोर संगीमन, अइसन कुकरम झन करव। ये आदमी ह मोर पहुना ए, अइसन कुकरम झन करव।
JDG 19:24 देखव, इहां मोर कुंवारी बेटी हवय, अऊ ओ मनखे के रखैल घलो हवय। मेंह ओमन ला बाहिर तुम्हर करा लावत हंव, अऊ तुमन ओमन के उपयोग कर सकत हव, अऊ ओमन के संग तुमन जइसन चाहव, वइसन करव। पर ये आदमी के संग अइसन कुकरम झन करव।”
JDG 19:25 पर ओ मनखेमन ओकर बात ला नइं सुनिन। तब ओ लेवी ह अपन रखैल ला लीस अऊ बाहिर ओमन करा पठो दीस, अऊ ओमन रात भर ओकर संग कुकरम अऊ गलत बरताव करिन, अऊ बिहनियां ओमन ओला छोंड़ दीन।
JDG 19:26 सूरज निकलत बेरा, ओ माईलोगन ह ओ घर म वापिस गीस, जिहां ओकर मालिक ह रूके रिहिस; ओह कपाट करा गिर गीस अऊ अंजोर होवत तक उहां पड़े रिहिस।
JDG 19:27 जब ओकर मालिक ह बिहनियां उठिस, अऊ घर के कपाट खोलके बाहिर निकलिस, त देखिस कि ओकर रखैल ह चौखट ला हांथ म थामे घर के कपाट करा पड़े हवय।
JDG 19:28 ओह ओला कहिस, “उठ, अब हमन चलबो।” पर ओला कोनो जबाब नइं मिलिस। तब ओह ओकर देहें ला गदहा म लादके अपन घर जाय बर निकलिस।
JDG 19:29 जब ओह अपन घर म हबरिस, त एक चाकू लीस अऊ अपन रखैल के देहें के अंगमन ला काटके बारह कुटा करिस, अऊ ओ कुटामन ला इसरायल के जम्मो इलाका म पठो दीस।
JDG 19:30 जतेक झन भी ओला देखिन, ओ जम्मो आपस म कहन लगिन, “जब ले इसरायलीमन मिसर देस ले निकलके आय हवंय, तब ले लेके आज तक अइसने चीज न तो कभू देखे गे हवय अऊ न ही करे गे हवय। येकर ऊपर सोच-बिचार करव! हमन ला कुछू करना जरूरी ए! बतावव!”
JDG 20:1 तब दान ले लेके बेरसेबा नगर तक जम्मो इसरायली अऊ गिलाद के इलाका के मनखेमन एक संग आईन अऊ ओमन मिसपा नगर म यहोवा के आघू म इकट्ठा होईन।
JDG 20:2 इसरायल के गोत्रमन के जम्मो मनखे के अगुवामन परमेसर के मनखेमन के सभा म अपन-अपन जगह लीन; ओमन चार लाख तलवारधारी मनखे रिहिन।
JDG 20:3 (बिनयामीनीमन ला पता चलिस कि इसरायलीमन मिसपा म जूरे हवंय।) तब इसरायलीमन पुछन लगिन, “हमन ला बतावव कि ये कुकरम कइसे होईस?”
JDG 20:4 ओ लेवी याने कि मार डारे गय माईलोगन के घरवाला ह जबाब दीस, “में अऊ मोर रखैल, बिनयामीन के गिबा नगर म रात बिताय बर आयेंन।
JDG 20:5 रथिया के बेरा गिबा के मनखेमन मोर पाछू आईन अऊ मोला मार डारे के इरादा से ओ घर ला घेर लीन। ओमन मोर रखैल के संग कुकरम करिन अऊ ओह मर गीस।
JDG 20:6 तब मेंह अपन रखैल के लास ला लेके ओकर कुटा-कुटा करेंव अऊ एक-एक कुटा इसरायल के उत्तराधिकार के हर इलाका म पठो देंव, काबरकि ओमन इसरायल म ये बेभिचार अऊ कुकरम करे हवंय।
JDG 20:7 अब हे जम्मो इसरायलीमन, तुमन बिचार करव अऊ मोला बतावव कि तुमन का करे के फैसला करे हवव।”
JDG 20:8 तब जम्मो मनखेमन एक मन होके ये कहत ठाढ़ हो गीन, “हमन ले कोनो भी घर नइं जावन। नइं, हमन ले कोनो भी अपन घर वापिस नइं जावय।
JDG 20:9 पर अब हमन गिबा के संग अइसे करबो: हमन परची डालबो अऊ ओकर मुताबिक क्रम म ओमन के बिरूध आघू बढ़बो।
JDG 20:10 हमन इसरायल के जम्मो गोत्रमन म ले हर सौ मनखेमन ले दस मनखे, अऊ एक हजार मनखेमन ले एक सौ, अऊ दस हजार मनखेमन ले एक हजार मनखे लेबो कि ओमन सेना के मनखेमन बर जेवन के परबंध करंय। तब, जब सेना के मनखेमन बिनयामीन के गिबा म हबरहीं, त ओमन इसरायल म करे गय ये कुकरम के काम के उचित सजा उहां के मनखेमन ला दीहीं।”
JDG 20:11 तब जम्मो इसरायलीमन एक संग जूरिन अऊ गिबा सहर के बिरूध एक जुट हो गीन।
JDG 20:12 तब इसरायल के गोत्रमन बिनयामीन के गोत्र के जम्मो जगह म ये कहिके संदेसिया पठोईन, “तुम्हर बीच म ये कइसे भयंकर अपराध करे गे हवय?
JDG 20:13 अब तुमन गिबा के ओ दुस्ट मनखेमन ला हमर हांथ म कर देवव, ताकि हमन ओमन ला मार डारन अऊ इसरायल ले बुरई ला साफ करन।” पर बिनयामीनीमन अपन संगी इसरायलीमन के बात ला नइं सुनिन।
JDG 20:14 इसरायलीमन के बिरूध लड़े बर बिनयामीनीमन अपन-अपन नगर ले निकलके गिबा म इकट्ठा होईन।
JDG 20:15 ओहीच दिन अपन-अपन नगर ले छब्बीस हजार तलवारधारी बिनयामीनी जूर गीन; येकर अलावा गिबा म ही रहइया सात सौ योग्य जवान घलो ओमन के संग सामिल हो गीन।
JDG 20:16 ये जम्मो सैनिकमन के बीच सात सौ झन के चुने गय एक सैनिक दल रिहिस, जेमन डेरी हांथ के उपयोग करंय अऊ ओमा के हर एक जन गोफन के पथरा ले एक पातर बाल ला घलो बिगर चूके निसाना लगा सकत रिहिन।
JDG 20:17 बिनयामीनीमन ले अलग, इसरायलीमन के चार लाख तलवारधारी सैनिक रिहिन अऊ ये जम्मो के जम्मो योग्य योद्धा रिहिन।
JDG 20:18 इसरायलीमन परमेसर के ईछा जाने बर बेतेल ला गीन। ओमन परमेसर ले पुछिन, “हमन म ले कोन ह बिनयामीनीमन ले लड़े बर पहिले जावय।” यहोवा ह जबाब दीस, “यहूदा ह पहिले जावय।”
JDG 20:19 तब बिहनियां इसरायलीमन उठके गिबा के लकठा म डेरा डालिन।
JDG 20:20 इसरायलीमन बिनयामीनीमन ले लड़े बर बाहिर निकलिन अऊ इसरायलीमन ओमन के बिरूध गिबा करा लड़ई के पांति बांध लीन।
JDG 20:21 तब बिनयामीनीमन गिबा ले निकलके आईन अऊ ओ दिन बाईस हजार इसरायलीमन ला मारके माटी म मिला दीन।
JDG 20:22 पर इसरायलीमन एक-दूसर ला उत्साहित करिन अऊ फेर ओहीच जगह म पांति बांधिन, जिहां पहिले दिन बांधे रिहिन।
JDG 20:23 इसरायलीमन जाके सांझ तक यहोवा के आघू म रोईन, अऊ यहोवा ले पता लगाईन। ओमन कहिन, “का हमन बिनयामीनी, अपन संगी इसरायलीमन ले लड़े बर जावन?” यहोवा ह जबाब दीस, “ओमन के बिरूध लड़े बर जावव।”
JDG 20:24 तब दूसर दिन इसरायलीमन बिनयामीनीमन के लकठा म गीन।
JDG 20:25 ये बेरा, जब बिनयामीनीमन ओमन के सामना करे बर गिबा ले निकलके आईन, त ओमन अऊ अठारह हजार इसरायलीमन ला मार डारिन, ये जम्मो के जम्मो तलवारधारी सैनिक रिहिन।
JDG 20:26 तब जम्मो इसरायली, जम्मो सेना बेतेल म गीन, अऊ उहां ओमन रोवत-रोवत यहोवा के आघू म बईठ गीन। ओ दिन ओमन सांझ तक उपास करिन अऊ यहोवा ला होम-बलिदान अऊ मेल-बलिदान चघाईन।
JDG 20:27 अऊ इसरायलीमन यहोवा ले पता लगाईन। (ओ समय म परमेसर के करार के सन्दूक बेतेल म रिहिस,
JDG 20:28 अऊ हारून के पोता, एलिआजर के बेटा पीनहास ह करार के सन्दूक के आघू म सेवा करत रिहिस।) ओमन पुछिन, “का हमन फेर बिनयामीनी, हमर संगी इसरायलीमन के बिरूध लड़े बर जावन कि नइं?” यहोवा ह जबाब दीस, “जावव, काबरकि कल मेंह ओमन ला तुम्हर हांथ म कर दूहूं।”
JDG 20:29 तब इसरायलीमन गिबा के चारों खूंट सैनिकमन ला घात लगाके बईठा दीन।
JDG 20:30 तीसर दिन ओमन बिनयामीनीमन के बिरूध लड़े बर गीन, अऊ पहिले के सहीं गिबा म पांति बांधिन।
JDG 20:31 बिनयामीनीमन ओमन के सामना करे बर निकलिन, अऊ इसरायली सेना ह पाछू हटत ओमन ला सहर ले दूरिहा ले गीस। बिनयामीनीमन पहिले के सहीं इसरायलीमन ला मारे लगिन अऊ खुला मैदान अऊ बेतेल कोति जानेवाला सड़क अऊ गिबा कोति जानेवाला सड़क म लगभग तीस इसरायली मारे गीन।
JDG 20:32 जब बिनयामीनीमन ये कहे लगिन, “हमन ओमन ला पहिले के सहीं हरावत हन,” तब इसरायलीमन कहिन, “आवव, हमन पाछू हटके ओमन ला सहर ले दूरिहा सड़कमन म ले आवन।”
JDG 20:33 तब इसरायल के जम्मो आदमीमन अपन जगह ले पाछू हटके बाल-तामार नगर म पांति बांधिन, अऊ घात म बईठे हुए इसरायलीमन अपन जगह, याने कि गिबा के पछिम ले अचानक निकलिन।
JDG 20:34 तब इसरायल के छांटे गय दस हजार जवान गिबा म आघू आके हमला करिन। उहां अतेक घोर लड़ई होवन लगिस कि बिनयामीनीमन ला पता नइं चलिस कि बिपत्ति ह ओमन के कतेक लकठा म हवय।
JDG 20:35 यहोवा ह बिनयामीनीमन ला इसरायलीमन ले हरवा दीस, अऊ ओ दिन इसरायलीमन 25,100 बिनयामीनी मनखे ला मार डारिन; मारे गय जम्मो मनखे तलवारधारी रिहिन।
JDG 20:36 बिनयामीनीमन देखिन कि ओमन हार गे हवंय। अब इसरायल के आदमीमन बिनयामीनीमन ला आघू म रसता दे दीन, काबरकि ओमन ला गिबा के लकठा म घात लगाके बईठे अपन मनखेमन ऊपर भरोसा रिहिस।
JDG 20:37 तब जऊन मन घात लगाके बईठे रिहिन, ओमन गिबा सहर म झपट पड़िन, अऊ पूरा सहर म फईलके जम्मो झन ला तलवार ले मार डारिन।
JDG 20:38 इसरायली मनखेमन अपन घात लगइया मनखेमन संग पहिले ही ये तय कर ले रिहिन कि जब ओमन सहर के भीतर जावंय, त ओमन सहर ले धुआं के बड़े बादर सहीं छोंड़ंय,
JDG 20:39 अऊ येला देखके इसरायलीमन एती ले घलो हमला करहीं। बिनयामीनीमन इसरायलीमन ला मारे के सुरू कर दे रिहिन (करीब तीस झन ला मार डारिन), अऊ ओमन कहिन, “हमन पहिली के लड़ई सहीं ओमन ला हरावत हन।”
JDG 20:40 पर जब सहर ले धुआं के खंभा उठे लगिस, त बिनयामीनीमन मुड़के देखिन कि पूरा सहर ले धुआं उठत हवय।
JDG 20:41 तब इसरायलीमन फेर हमला करिन, अऊ ये देखके बिनयामीनीमन घबरा गीन, काबरकि ओमन समझ गे रिहिन कि ओमन ऊपर बिपत्ति आ गे हवय।
JDG 20:42 एकरसेति ओमन इसरायलीमन ला पीठ देखाके निरजन जगह कोति भागे लगिन, पर ओमन लड़ई ले बच नइं सकिन। अऊ जऊन इसरायलीमन नगर ले निकलके आईन, ओमन ये बिनयामीनीमन ला उहां मार डारिन।
JDG 20:43 ओमन बिनयामीनीमन ला घेर लीन, अऊ ओमन के पीछा करत पूरब कोति गिबा के लकठा म ओमन ला अपन अधीन कर लीन।
JDG 20:44 ये लड़ई म अठारह हजार बिनयामीनी सैनिक मारे गीन; ओ जम्मो के जम्मो सूरबीर रिहिन।
JDG 20:45 जब आने बिनयामीनी मनखेमन मुड़के निरजन जगह म रिम्मोन नांव के चट्टान कोति भागिन, त इसरायलीमन पांच हजार मनखे ला सड़कमन म मार डारिन। ओमन गिदोम नगर तक बिनयामीनीमन के पीछा करते रिहिन अऊ ओमन के दू हजार अऊ मनखे ला मार डारिन।
JDG 20:46 ओ दिन पच्चीस हजार तलवारधारी बिनयामीनीमन मार डारे गीन; ओ जम्मो के जम्मो सूरबीर रिहिन।
JDG 20:47 पर ओमा के छै सौ मनखे मुड़के निरजन प्रदेस म रिम्मोन नांव के चट्टान करा भाग गीन, अऊ उहां चार महिना तक ठहिरे रिहिन।
JDG 20:48 तब इसरायल के मनखेमन वापिस बिनयामीनीमन करा गीन, अऊ ओमन के नगर म ओमन ला जऊन कुछू मिलिस, ओ जम्मो ला तलवार ले नास कर दीन; येमा उहां के मनखे अऊ पसुमन घलो रिहिन। जम्मो ला तलवार ले नास कर डारिन। ओमन जतेक भी नगर म गीन, ओ जम्मो नगर म आगी लगा दीन।
JDG 21:1 इसरायली मनखेमन मिसपा म ये सपथ खाय रिहिन, “हमन म ले कोनो भी अपन बेटी के बिहाव कोनो बिनयामीनी मनखे ले नइं करही।”
JDG 21:2 मनखेमन बेतेल जाके सांझ तक उहां परमेसर के आघू म बईठे रिहिन अऊ फूट-फूटके बहुंत रोईन,
JDG 21:3 अऊ रोवत-रोवत ओमन ये कहिन, “हे यहोवा, इसरायल के परमेसर, इसरायल म अइसने काबर होईस? काबर आज इसरायल म ले एक गोत्र के कमी हो गीस?”
JDG 21:4 ओकर दूसर दिन, बड़े बिहनियां मनखेमन उठके एक बेदी बनाईन अऊ होम-बलिदान अऊ मेल-बलिदान चघाईन।
JDG 21:5 तब इसरायलीमन पुछन लगिन, “इसरायल के जम्मो गोत्रमन म ले कोन ह यहोवा के आघू म नइं आय हवय?” काबरकि ओमन बहुंत गंभीरता से सपथ खाय रिहिन कि जऊन कोनो मिसपा म यहोवा के आघू म इकट्ठा नइं होही, ओह मार डारे जाही।
JDG 21:6 इसरायलीमन बिनयामीन के गोत्र, अपन संगी इसरायलीमन बर सोक मनाईन अऊ ओमन ये कहिन, “आज इसरायल ले एक गोत्र ह अलग हो गे हवय।
JDG 21:7 हमन ओ बांचे बिनयामीनीमन ला घरवाली कइसे दे सकत हन, जब हमन यहोवा के ये सपथ खाय हवन कि हमन अपन कोनो बेटी ओमन ला बिहाव म नइं देवन?”
JDG 21:8 तब ओमन पुछिन, “इसरायल के गोत्रमन ले कते गोत्र ह मिसपा म यहोवा के आघू म इकट्ठा नइं होय हवय?” तब ओमन ला पता चलिस कि याबेस-गिलाद म ले कोनो भी सभा म नइं आय हवंय।
JDG 21:9 जब ओमन मनखेमन के गनती करिन, त ओमन ला पता चलिस कि याबेस-गिलाद म ले कोनो भी मनखे उहां नइं रिहिन।
JDG 21:10 एकरसेति सभा ह बारह हजार लड़नेवाला मनखेमन ला ये निरदेस देके याबेस-गिलाद पठोईस कि उहां जतेक झन रहत हवंय, माईलोगन अऊ लइकामन सहित जम्मो झन ला तलवार ले मार डारव।
JDG 21:11 ओमन कहिन, “तुमन ला ये करना हे; हर पुरूस अऊ हर ओ माईलोगन ला मार डारव, जऊन ह कुंवारी नो हय।”
JDG 21:12 ओमन ला याबेस-गिलाद म चार सौ अइसे जवान माईलोगनमन मिलिन, जेमन कभू कोनो पुरूस के संग नइं सुते रिहिन, अऊ ओमन ओ जवान माईलोगनमन ला कनान देस के सीलो म ले आईन।
JDG 21:13 तब जम्मो सभा ह रिम्मोन के चट्टान म बिनयामीनीमन करा सांति के एक प्रस्ताव भेजिस।
JDG 21:14 तब ओ बेरा बिनयामीनीमन लहुंट गीन अऊ ओमन ला ओ माईलोगनमन दिये गीन, जेमन ला याबेस-गिलाद म छोंड़ दिये गे रिहिस। पर ये माईलोगनमन के संखिया ओमन बर कम रिहिस।
JDG 21:15 तब मनखेमन बिनयामीन के गोत्र बर सोक मनाईन, काबरकि यहोवा ह इसरायल के गोत्रमन म एक दरार बना दे रिहिस।
JDG 21:16 तब सभा के अगुवामन कहिन, “बिनयामीनी माईलोगनमन मार डारे गीन, त हमन बांचे मनखेमन बर घरवाली के परबंध कइसे करन?”
JDG 21:17 ओमन ये बिचार करिन, “बांचे बिनयामीनीमन के वारिस होना जरूरी अय, ताकि इसरायल के एक गोत्र के अन्त झन होवय।
JDG 21:18 हमन अपन बेटीमन ला ओमन के घरवाली के रूप म नइं दे सकन, काबरकि हमन इसरायलीमन ये सपथ ले हवन: ‘सरापित होवय ओ मनखे, जऊन ह कोनो बिनयामीनी ला अपन बेटी बिहाव करके देथे।’
JDG 21:19 पर देखव, सीलो सहर—जऊन ह बेतेल के उत्तर म अऊ बेतेल ले सकेम सहर जवइया सड़क के पूरब, अऊ लबोना नगर के दक्खिन कोति हवय, उहां यहोवा के सालाना तिहार मनाय जानेवाला हे।”
JDG 21:20 एकरसेति ओमन बिनयामीनीमन ला ये हुकूम दीन, “जाके अंगूर के बारीमन म छिप जावव
JDG 21:21 अऊ देखत रहव। जब सीलो के जवान माईलोगनमन नाचे बर बाहिर निकलके आवंय, त तुमन अंगूर के बारीमन ले झपटके निकलव अऊ तुमन के हर एक जन ओमन के एक-एक माईलोगन ला अपन घरवाली बनाय बर धर लव। तब बिनयामीन के देस म वापिस चले जावव।
JDG 21:22 जब ओमन के ददा या भाई हमर ले सिकायत करहीं, त हमन ओमन ला कहिबो, ‘ओमन के मदद करे के दुवारा हमर ऊपर किरपा करव, काबरकि लड़ई के बेरा हमन ओमन बर घरवाली के परबंध नइं कर सकेंन। तुमन अपन सपथ ला टोरे के दोसी नइं ठहिरहू, काबरकि तुमन अपन बेटी ओमन ला नइं दे हव।’ ”
JDG 21:23 तब बिनयामीनीमन वइसनेच करिन। जब जवान माईलोगनमन नाचत रिहिन, त हर एक मनखे एक-एक माईलोगन ला अपन घरवाली बनाय बर धरके ले गीन। तब ओमन अपन निज भाग म लहुंट गीन अऊ नगरमन ला फेर बनाके ओमा बस गीन।
JDG 21:24 ओ समय बाकि इसरायलीमन ओ जगह ला छोंड़के अपन घर, अपन गोत्र अऊ अपन कुलमन म चल दीन, हर एक अपन निज भाग म चल दीस।
JDG 21:25 ओ समय म इसरायलीमन के कोनो राजा नइं रिहिस; जेला जइसने ठीक लगय, ओह वइसने करय।
RUT 1:1 ओ समय म, जब नियायीमन राज करत रिहिन, त जम्मो देस म अकाल पड़िस। एकरसेति यहूदा प्रदेस के बैतलहम गांव के एक मनखे ह अपन माईलोगन अऊ दूनों बेटामन ला संग म लेके कुछू समय बर मोआब देस म रहे बर चल दीस।
RUT 1:2 ओ मनखे के नांव एलीमेलेक, अऊ ओकर घरवाली के नांव नाओमी, अऊ ओकर दू झन बेटामन के नांव महलोन अऊ किलयोन रिहिस। ओमन यहूदा प्रदेस के बैतलहम गांव के एपराती रिहिन। अऊ ओमन मोआब देस गीन अऊ उहां रहे लगिन।
RUT 1:3 कुछू समय के बाद, नाओमी के घरवाला एलीमेलेक ह मर गीस, अऊ नाओमी अऊ ओकर दूनों बेटा रह गीन।
RUT 1:4 बाद म ओमन एक-एक मोआबीन माईलोगन ले बिहाव कर लीन; एक के नांव ओरपा अऊ दूसर के नांव रूत रिहिस। ओमन के उहां करीब दस साल रहे के बाद,
RUT 1:5 महलोन अऊ किलयोन घलो मर गीन, अऊ नाओमी ह अपन दूनों बेटा अऊ घरवाला के बिगर रह गीस।
RUT 1:6 जब नाओमी ह मोआब देस म ये बात ला सुनिस कि यहोवा ह अपन मनखेमन के सुधि ले हवय, अऊ ओमन ला जेवन-बस्तु दे हवय, त नाओमी अऊ ओकर दूनों बहुरियामन मोआब देस ले बैतलहम लहुंटे के तियारी करिन।
RUT 1:7 नाओमी ह अपन दूनों बहुरियामन संग मोआब देस ला छोंड़के, यहूदा प्रदेस ला वापिस जाय बर उहां के डहार ला धरिस।
RUT 1:8 तब नाओमी ह अपन दूनों बहुरियामन ले कहिस, “तुमन दूनों अपन-अपन मायके लहुंट जावव। जइसने तुमन अपन मर गेय घरवालामन ऊपर अऊ मोर ऊपर किरपा करे हवव, वइसने यहोवा ह तुम्हर ऊपर किरपा करय।
RUT 1:9 यहोवा ह तुम्हर संग अइसने करय कि तुमन फेर बिहाव करके अपन-अपन घरवालामन के घर म अराम पावव।” तब नाओमी ह अपन दूनों बहुरिया ला बिदा करे बर चूमिस, अऊ ओ दूनों चिचिया-चिचियाके रोवन लगिन
RUT 1:10 अऊ ओमन नाओमी ला कहिन, “हमन तोर संग तोर मनखेमन करा वापिस जाबो।”
RUT 1:11 पर नाओमी ह कहिस, “हे मोर बेटीमन, अपन घर लहुंट जावव। तुमन काबर मोर संग म आहू? का मेंह अऊ बेटामन ला जनम देवइया हंव, जऊन मन तुम्हर घरवाला होहीं?
RUT 1:12 हे मोर बेटीमन, अपन घर लहुंट जावव; काबरकि मेंह तो अपन खातिर अऊ कोनो घरवाला बनाय बर बहुंत डोकरी हो गे हवंव। चाहे यदि मेंह सोचंव भी कि अभी घलो मोर बर आसा हवय—अऊ यदि आज रथिया मोर कोनो घरवाला हो जावय अऊ मोर बेटामन घलो जनमंय—
RUT 1:13 त का तुमन ओमन के जवान होवत तक इंतजार करहू? का ओमन बर बिगर बिहाव करे ठहिरे रहिहू? हे मोर बेटीमन, अइसने झन होवय। मोर दुख ह तुम्हर दुख ले जादा बढ़के अय, काबरकि यहोवा के हांथ ह मोर बिरूध म उठे हवय!”
RUT 1:14 ये सुनके ओमन फेर चिचिया-चिचियाके रोईन। तब ओरपा ह तो अपन सास ला चूमा देके बिदा होईस, पर रूत ह अपन सास ला नइं छोंड़िस।
RUT 1:15 तब नाओमी ह रूत ला कहिस, “देख, तोर जेठानी ह तो अपन मनखे अऊ अपन देवतामन करा वापिस जावत हे। तेंह घलो ओकर संग लहुंट जा।”
RUT 1:16 पर रूत ह जबाब दीस, “तोला छोंड़े बर या तोला छोंड़के वापिस जाय बर, तेंह मोर ले बिनती झन कर। जिहां तेंह जाबे, उहां मेंह घलो जाहूं, अऊ जिहां तेंह रहिबे, उहां मेंह घलो रहिहूं। तोर मनखेमन मोर मनखेमन होहीं, अऊ तोर परमेसर ह मोर परमेसर होही।
RUT 1:17 जिहां तेंह मरबे, उहां मेंह घलो मरहूं, अऊ उहेंच मोला माटी दिये जाही। यदि मिरतू के छोंड़ अऊ कोनो कारन ले मेंह तोर ले अलग होथंव, त यहोवा ह मोर संग बहुंत कठोर बरताव करय।”
RUT 1:18 जब नाओमी ह देखिस कि रूत ह ओकर संग चले बर ठान ले हवय, त नाओमी ह ओकर ले बिनती करे बर छोंड़ दीस।
RUT 1:19 तब ओमन दूनों माईलोगन चलिन अऊ बैतलहम हबरिन। जब ओमन बैतलहम म हबरिन, त जम्मो नगर म ओमन के कारन हलचल मच गीस, अऊ माईलोगनमन अचम्भो करके कहे लगिन, “का येह नाओमी अय?”
RUT 1:20 नाओमी ह ओमन ले कहिस, “मोला नाओमी झन कहव; मोला मारा कहव, काबरकि सर्वसक्तिमान परमेसर ह मोला बहुंत दुख दे हवय।
RUT 1:21 मेंह भरा-पूरा गे रहेंव, पर यहोवा ह मोला जुच्छा हांथ लहुंटाय हवय। एकरसेति जब यहोवा ह मोला दुख दे हवय; सर्वसक्तिमान परमेसर ह मोर ऊपर बिपत्ति लाने हवय, त फेर तुमन मोला काबर नाओमी कहत हव?”
RUT 1:22 ये किसम ले नाओमी ह मोआब देस ले अपन मोआबीन बहुरिया रूत के संग लहुंटिस। जब जौ कटई के सुरूआत होवत रिहिस, तब ओमन बैतलहम हबरिन।
RUT 2:1 नाओमी के ओकर घरवाला कोति ले एक रिस्तेदार रिहिस, जऊन ह एलीमेलेक के बंस के एक नामी मनखे रिहिस; ओकर नांव बोअज रिहिस।
RUT 2:2 एक दिन मोआबीन रूत ह नाओमी ले कहिस, “मोला कोनो खेत म जावन दे कि कोनो फसल लुवइया ह मोर ऊपर दया-दिरिस्टी करय, त ओकर पाछू-पाछू मेंह सीला बीनत जावंव।” नाओमी ह ओला कहिस, “ठीक ए बेटी, तें जा।”
RUT 2:3 एकरसेति रूत ह जाके एक ठन खेत म फसल लुवइयामन के पाछू-पाछू सीला बीनन लगिस। अऊ अइसने होईस कि जऊन खेत म ओह काम करत रिहिस, ओह संजोग से बोअज के रिहिस, जऊन ह एलीमेलेक के बंस के रिहिस।
RUT 2:4 ओतकीच बेरा बोअज ह बैतलहम ले उहां आके फसल लुवइयामन ले कहिस, “यहोवा ह तुम्हर संग रहय।” अऊ ओमन ओला कहिन, “यहोवा ह तोला आसीस देवय।”
RUT 2:5 तब बोअज ह अपन फसल लुवइयामन के मुखिया ले पुछिस, “ओ जवान माईलोगन ह काकर घर के अय?”
RUT 2:6 फसल लुवइयामन के मुखिया ह जबाब दीस, “ओह एक मोआबीन अय, जऊन ह नाओमी के संग मोआब देस ले लहुंटके आय हवय।
RUT 2:7 ओ माईलोगन ह कहे रिहिस, ‘मोला फसल लुवइयामन के पाछू-पाछू अऊ करपामन के बीच म बीनन अऊ बटोरन देवव।’ ओह खेत म आईस अऊ बिहनियां ले लेके अब तक इहेंच हवय; सिरिप थोरकन देर बर छइहां म अराम करे हवय।”
RUT 2:8 तब बोअज ह रूत ला कहिस, “हे बेटी, मोर बात ला सुन। कोनो दूसर के खेत म सीला बीने बर झन जाबे अऊ इहां ले झन जाबे। जऊन माईलोगनमन मोर काम करत हें, ओमन के संग इहेंच रह।
RUT 2:9 जिहां मनखेमन फसल लुवत हें, उहां खेत म तोर धियान लगे रहय, अऊ माईलोगनमन के संग पाछू-पाछू चल। मेंह मनखेमन ला कहि दे हंव कि ओमन तोला तंग झन करंय। अऊ जब भी तोला पीयास लगही, त जाके ओ बरतन के पानी ला पी लेबे, जेला सेवकमन भर दे हवंय।”
RUT 2:10 अतका म, रूत ह भुइयां तक मुहूं नवाके बोअज ला दंडवत करिस, अऊ बोअज ले पुछिस, “का कारन ए कि तें मोर ऊपर, एक परदेसीन के ऊपर दया-दिरिस्टी करके मोर सुधि ले हवस?”
RUT 2:11 बोअज ह जबाब दीस, “तोर घरवाला के मिरतू के बाद, तेंह जऊन काम अपन सास बर करे हवस, ओ जम्मो बात मोला बताय गे हवय—कि कइसे तेंह अपन दाई-ददा अऊ जनम भुइयां ला छोंड़के अइसने मनखेमन संग रहे बर आय हवस, जेमन ला तेंह पहिली नइं जानत रहय।
RUT 2:12 यहोवा ह तोला तोर करम के फर देवय। ओ यहोवा, इसरायल के परमेसर ह तोला बहुंतायत से आसीस देवय, जेकर खाल्हे म तेंह सरन लेय बर आय हस।”
RUT 2:13 रूत ह कहिस, “हे मोर मालिक, तोर दया-दिरिस्टी मोर ऊपर बने रहय; हालाकि मेंह तोर दासीमन ले कोनो के बराबर नो हंव, तभो ले तेंह अपन दासी ले दया के बात कहिके मोला सांति दे हवस।”
RUT 2:14 फेर खाय के बेरा म बोअज ह रूत ला कहिस, “इहां आके कुछू रोटी ले अऊ ओला सिरका म बोरके खा।” जब रूत ह फसल लुवइयामन संग म बईठ गीस, त बोअज ह ओला भूंजे अनाज के कुछू बाली घलो दीस। अऊ रूत ह पेट भरके खाईस अऊ कुछू बंचा घलो लीस।
RUT 2:15 जब ओह सीला बीने बर उठिस, त बोअज ह अपन मनखेमन ला हुकूम दीस, “ओला करपामन के बीच म बीनन देवव अऊ ओला झन डांटिहव।
RUT 2:16 बरन बंधाय बीड़ा म ले कुछू बालीमन ला खींचके गिरा देवव, ताकि ओह ओमन ला बीनय, अऊ ओला झन दबकारव।”
RUT 2:17 एकरसेति रूत ह संझा होवत तक सीला बीनिस। तब ओह ओ जौ ला मिंजिस, जेला ओह बीने रिहिस अऊ ओह करीब एक एपा भर जौ निकलिस।
RUT 2:18 तब रूत ह ओ जौ ला उठाके नगर म लानिस, अऊ ओकर सास ह देखिस कि ओह कतेक जौ संकेले रिहिस। रूत ह ओ खाय के चीज ला घलो निकालके अपन सास ला दीस, जऊन ह ओकर भरपेट खाय के बाद बच गे रिहिस।
RUT 2:19 ओकर सास ह ओकर ले पुछिस, “आज तेंह कहां सीला बीनय? तेंह कहां बुता करय? धइन होवय ओ मनखे, जऊन ह तोर ऊपर धियान दीस!” तब रूत ह अपन सास ला ओकर बारे म बताईस, जेकर खेत म ओह काम करे रिहिस। ओह कहिस, “जऊन मनखे के खेत म, मेंह आज बुता करेंव, ओकर नांव बोअज अय।”
RUT 2:20 नाओमी ह अपन बहू ले कहिस, “यहोवा ओला आसीस देवय! ओह जीयत अऊ मरे मनखे ऊपर अपन दया देखई ला बंद नइं करे हवय।” नाओमी ह ये घलो कहिस, “ओ मनखे ह हमर करीबी रिस्तेदार ए; ओह हमर कुटुम्ब के मनखेमन ले एक झन अय, जेला हमर भुइयां छुड़ाय के अधिकार घलो हवय।”
RUT 2:21 तब मोआबीन रूत ह अपन सास ला कहिस, “ओह मोर ले ये घलो कहिस, ‘जब तक मोर काम करइयामन मोर जम्मो फसल ला काट नइं लेवंय, तब तक ओमन के संग म रहिबे।’ ”
RUT 2:22 नाओमी ह अपन बहू रूत ले कहिस, “हे मोर बेटी, ये बात ह तोर बर ठीक होही कि तेंह ओकरेच काम करइया माईलोगनमन के संग जा, काबरकि कोनो आने के खेत म तोर संग गलत हो सकत हे।”
RUT 2:23 एकरसेति रूत ह सीला बीने बर बोअज के माईलोगन के लकठा म रहे लगिस, जब तक कि जौ अऊ गहूं के फसल कटई ह खतम नइं हो गीस। अऊ ओह अपन सास के संग रहत रिहिस।
RUT 3:1 एक दिन रूत के सास नाओमी ह ओला कहिस, “हे मोर बेटी, मोला तोर घर बसाय के परबंध करना जरूरी ए, जिहां तोर बने देखरेख हो सकय।
RUT 3:2 बोअज, जेकर माईलोगनमन के संग तेंह काम करे हस, ओह हमर रिस्तेदार ए। आज रथिया ओह कोठार म जौ पछरही।
RUT 3:3 तेंह नहा-खोरके अंतर तेल चुपर ले, अऊ अपन सबले सुघर ओनहामन ला पहिर, अऊ तब कोठार म जा, पर जब तक बोअज ह खा-पी नइं लीही, तब तक ओला ये पता नइं चलना चाही कि तेंह उहां हवस।
RUT 3:4 जब ओह सुतही, तब तें ओकर सुते के जगह ला देख लेबे। तब उहां जाके ओकर गोड़ ढांपे के ओढ़ना ला उघार देबे अऊ उहां पसर जाबे। तब ओह तोला बताही कि तोला का करना हे।”
RUT 3:5 रूत ह कहिस, “जऊन कुछू तेंह कहत हस, ओला मेंह करहूं।”
RUT 3:6 तब ओह कोठार म गीस, अऊ वइसने करिस, जइसने ओकर सास ह करे बर कहे रिहिस।
RUT 3:7 जब बोअज ह खाय-पीये के बाद मन म आनंदित रिहिस, त ओह अनाज के ढेर के आखिरी छोर म जाके पसर गीस। तब रूत ह चुपेचाप उहां गीस, अऊ बोअज के गोड़ ढांपे के ओढ़ना ला उघारके उहां पसर गीस।
RUT 3:8 आधा रथिया, कुछू चीज के कारन बोअज ह चौंक गीस; ओह करवट बदलिस, त देखिस कि ओकर गोड़ करा कोनो माईलोगन ह पसरे हवय!
RUT 3:9 ओह पुछिस, “तेंह कोन अस?” तब ओह जबाब दीस, “मेंह तोर सेविका रूत अंव; तेंह अपन ओढ़ना के छोर ला मोर ऊपर ओढ़ा दे, काबरकि तेंह हमर परिवार के भुइयां छुड़इया अस।”
RUT 3:10 बोअज ह कहिस, “हे मोर बेटी, यहोवा तोला आसीस देवय; ये दया ह तोर पहिली के देखाय दया ले अऊ जादा बने अय: तेंह कोनो जवान के पाछू नइं गे, चाहे धनी होवय या गरीब।
RUT 3:11 एकरसेति अब, हे मोर बेटी, तेंह झन डर। जऊन कुछू तेंह कहिबे, मेंह तोर बर करहूं। मोर नगर के जम्मो मनखेमन ये बात ला जानत हें कि तेंह बने चालचलन के माईलोगन अस।
RUT 3:12 हालाकि ये बात ह सच अय कि मेंह हमर कुटुम्ब के एक छुड़इया अंव, तभो ले एक झन अऊ मनखे हवय, जऊन ह मोर ले अऊ नजदीकी रिस्तेदार अय।
RUT 3:13 तेंह रथिया भर इहां ठहर, अऊ बिहनियां यदि ओह तोला छुड़ाय के जिम्मेदारी ला पूरा करे चाहथे, त ठीक अय; ओह तोला छुड़ाय। पर यदि ओह तोर छुड़ाय के जिम्मेदारी ला पूरा नइं करे चाहय, त यहोवा के जिनगी के कसम, मेंह ये काम ला करहूं। बिहान के होवत तक तें इहां लेटे रह।”
RUT 3:14 तब रूत ह बोअज के गोड़ करा बिहान होवत तक लेटे रिहिस, अऊ येकर पहिली कि मनखेमन एक-दूसर ला पहिचान सकंय, रूत ह उठ गीस; तब बोअज ह कहिस, “कोनो ये बात ला झन जानय कि कोठार म कोनो माईलोगन आय रिहिस।”
RUT 3:15 ओह ये घलो कहिस, “जऊन ओढ़ना ला तेंह ओढ़े हवस, ओला फईलाके धर।” जब रूत ह ओढ़ना ला फईलाके धरिस, त बोअज ह छै नपुआ जौ ओमा डाल दीस अऊ ओ गठरी ला रूत ला बोहा दीस। तब बोअज ह नगर म चल दीस।
RUT 3:16 जब रूत ह अपन सास करा आईस, त नाओमी ह पुछिस, “हे मोर बेटी, का होईस?” तब जऊन कुछू बोअज ह रूत बर करे रिहिस, ओ जम्मो बात रूत ह नाओमी ला बताईस।
RUT 3:17 ओह ये घलो कहिस, “ये छै नपुआ जौ ओह ये कहिके मोला दीस कि अपन सास करा खाली हांथ झन जा।”
RUT 3:18 तब नाओमी ह कहिस, “हे मोर बेटी, जब तक कि तोला ये बात के पता नइं चल जावय कि का होवइया हे, तब तक तेंह धीरज धरे रह। काबरकि ये बात ला आज निपटाय बिगर ओ मनखे ह सांति से नइं बईठय।”
RUT 4:1 ओकर बाद, बोअज ह नगर के कपाट करा जाके बईठ गीस; अऊ जऊन छुड़इया सगा के चरचा बोअज ह करे रिहिस, ओह घलो आ गीस तब बोअज ह कहिस, “हे संगवारी, इहां आ अऊ बईठ।” त ओह उहां जाके बईठ गीस।
RUT 4:2 तब बोअज ह नगर के दस झन अगुवामन ला बलाईस अऊ कहिस, “इहां बईठव,” अऊ ओमन बईठ गीन।
RUT 4:3 तब ओह ओ छुड़इया सगा ला कहिस, “नाओमी जऊन ह कि मोआब देस ले लहुंटके आ गे हवय, ओह भुइयां के एक टुकड़ा ला बेचत हे, जऊन ह हमर रिस्तेदार एलीमेलेक के अय।
RUT 4:4 एकरसेति मेंह सोचेंव कि ये बात ला तोर आघू म लानंव अऊ मेंह सलाह देवत हंव कि तें ओ जमीन ला ये बईठे मनखेमन के आघू म अऊ मोर मनखेमन के अगुवामन के आघू म बिसा ले। यदि तेंह ओला छुड़ाय चाहबे, त छुड़ा ले। पर यदि तें छुड़ाय नइं चाहस, त मोला बता दे ताकि मेंह जान लंव। काबरकि तोला छोंड़ अऊ कोनो ला अइसने करे के अधिकार नइं ए, अऊ मोर अधिकार तोर बाद हवय।” ओह कहिस, “मेंह ओला छोंड़ाहूं।”
RUT 4:5 तब बोअज ह कहिस, “जऊन दिन तेंह ओ जमीन ला नाओमी के हांथ ले बीसा लेबे, ओ दिन तेंह मोआबीन रूत ला घलो पा जाबे, जऊन ह मरे मनखे के बिधवा अय, ताकि मरे मनखे के नांव ह ओकर संपत्ति के संग आघू बढ़य।”
RUT 4:6 अतका म, ओ छुड़इया सगा ह कहिस, “तब मेंह ओला छुड़ा नइं सकंव, काबरकि अइसने म मोर खुद के संपत्ति खतरा म पड़ सकत हे। एकरसेति तेंह खुद ओला छुड़ा ले। मेंह ये नइं कर सकंव।”
RUT 4:7 (पुराना जमाना म, इसरायल म संपत्ति ला छुड़ाय अऊ नांव चढ़ाय के काम ला पक्का करे बर ये रिवाज रिहिस कि मनखे ह अपन पनही ला उतारके दूसर ला देवय। इसरायल म कोनो लेन-देन ला पक्का करे के ये कानूनी तरीका रिहिस।)
RUT 4:8 एकरसेति ओ छुड़इया सगा ह बोअज ले कहिस, “तेंह ओला बीसा ले,” अऊ ओह अपन पनही ला उतार दीस।
RUT 4:9 तब बोअज ह अगुवा मनखे अऊ जम्मो मनखेमन ला कहिस, “तुमन आज ये बात के गवाह अव कि मेंह एलीमेलेक, किलयोन अऊ महलोन के जम्मो संपत्ति ला नाओमी के हांथ ले बीसा ले हंव।
RUT 4:10 मेंह महलोन के बिधवा मोआबीन रूत ला घलो अपन घरवाली के रूप म पा गे हंव कि मरे मनखे के नांव ला ओकर संपत्ति के संग आघू बढ़ावंव, ताकि ओ मरे मनखे के नांव ह ओकर परिवार ले या ओकर जनम स्थान ले झन मिट जावय। तुमन आज ये बात के गवाह हव!”
RUT 4:11 तब दुवार करा जतेक मनखे अऊ अगुवामन रिहिन, ओमन कहिन, “हमन गवाह हन। ये जऊन माईलोगन तोर घर म आवत हे, ओला यहोवा ह राहेल अऊ लिआ के सहीं बनावय, जऊन मन इसरायल के परिवार ला मिलके बनाईन। एपराता म तोर मान-सम्मान होवय अऊ बैतलहम म तोर अब्बड़ नांव होवय।
RUT 4:12 ये जवान माईलोगन के दुवारा यहोवा ह तोला जऊन संतान देवय, त तोर परिवार ह पेरेस के परिवार सहीं हो जावय, जेला तामार ह यहूदा कोति ले जनमिस।”
RUT 4:13 तब बोअज ह रूत ला ले लीस अऊ ओह ओकर घरवाली हो गीस। अऊ जब ओह ओकर संग संबंध बनाईस, त यहोवा के दया ले ओला गरभ ठहिरिस, अऊ ओह एक बेटा ला जनम दीस।
RUT 4:14 तब माईलोगनमन नाओमी ले कहिन, “यहोवा के महिमा होवय, जऊन ह तोला आज छुड़इया सगा के बिगर नइं छोंड़िस। जम्मो इसरायल म येकर अब्बड़ नांव होवय!
RUT 4:15 येह तोर जिनगी ला तरो-ताजा करही अऊ तोर बुढ़त काल म तोला संभालही। काबरकि तोर बहू जऊन ह तोर ले मया करथे, सात झन बेटामन ले घलो तोर बर बने अय, ओही ह येला जनम दे हवय।”
RUT 4:16 तब नाओमी ह ओ लइका ला अपन कोरा म लीस अऊ ओकर जतन करे लगिस।
RUT 4:17 जऊन माईलोगनमन उहां रहत रिहिन, ओमन कहिन, “नाओमी के एक बेटा हवय!” अऊ ओमन ओकर नांव ओबेद रखिन। ओह यिसै के ददा अऊ यिसै ह दाऊद के ददा रिहिस।
RUT 4:18 तब येह पेरेस के बंसावली अय: पेरेस के बेटा हेसरोन रिहिस;
RUT 4:19 हेसरोन के बेटा राम, अऊ राम के बेटा अमीनादाब रिहिस;
RUT 4:20 अमीनादाब के बेटा नहसोन, अऊ नहसोन के बेटा सलमोन रिहिस;
RUT 4:21 सलमोन के बेटा बोअज, अऊ बोअज के बेटा ओबेद रिहिस;
RUT 4:22 ओबेद के बेटा यिसै, अऊ यिसै के बेटा दाऊद रिहिस।
1SA 1:1 एपरैम के पहाड़ी देस के रामातैम-सोपीम नगर म, एलकाना नांव के एक मनखे रिहिस, ओह एक एपरैमी रिहिस। ओह यरोहाम के बेटा रिहिस अऊ यरोहाम ह एलीहू के, एलीहू ह तोहू के अऊ तोहू ह सूप के बेटा रिहिस।
1SA 1:2 एलकाना के दू झन घरवाली रिहिन; एक के नांव हन्ना अऊ दूसर के नांव पनिन्ना रिहिस। पनिन्ना के तो लइका रिहिन, पर हन्ना के लइका नइं रिहिन।
1SA 1:3 ओ मनखे ह हर साल अपन नगर ले यहोवा सर्वसक्तिमान ला दंडवत करे बर अऊ बलिदान चघाय बर सीलो नगर म जावत रिहिस, जिहां होपनी अऊ पीनहास नांव के एली के दू झन बेटा, यहोवा के पुरोहित रिहिन।
1SA 1:4 जब भी एलकाना ह बलिदान चघावय, त ओह अपन घरवाली पनिन्ना अऊ ओकर जम्मो बेटा-बेटीमन ला मांस के बांटा देवय।
1SA 1:5 पर हन्ना ला ओह दू गुना देवय काबरकि ओह हन्ना ले मया करय, तभो ले यहोवा ह ओकर कोख ला बंद कर दे रिहिस।
1SA 1:6 काबरकि यहोवा ह ओकर कोख ला बंद कर दे रिहिस, एकर खातिर ओकर सऊत ह ओला चिढ़ाके दुख देवय।
1SA 1:7 अइसने बहुंते साल तक चलते रिहिस। जब भी हन्ना ह यहोवा के भवन म जावय, त पनिन्ना ह ओला चिढ़ावय; जेकर कारन हन्ना ह रोवय अऊ खाना-पीना छोंड़ देवय।
1SA 1:8 एकरसेति ओकर घरवाला एलकाना ह ओला कहय, “हे हन्ना, तेंह काबर रोवत हस? तेंह काबर नइं खावत हस? तोर मन ह काबर उदास हवय? का तोर बर मेंह दस झन बेटा ले घलो बढ़के नो हंव?”
1SA 1:9 एक बार अइसने होईस कि जब ओमन सीलो म खा-पी लीन, त हन्ना ह उठिस। ओ बेरा एली पुरोहित ह यहोवा के भवन के चौखट के बाजू म कुरसी म बईठे रिहिस।
1SA 1:10 हन्ना ह अपन मन म बहुंत दुखी होके यहोवा ले पराथना करन लगिस, अऊ बिलख-बिलखके रोवन लगिस।
1SA 1:11 अऊ ओह ये कहत मन्नत मानिस, “हे यहोवा सर्वसक्तिमान, यदि तें अपन दासी के दुख ला सही म देखबे अऊ मोर सुधि लेबे, अऊ अपन दासी ला नइं भूलबे पर ओला एक बेटा देबे, त मेंह ओला ओकर जिनगी भर बर यहोवा ला अरपन कर दूहूं, अऊ ओकर मुड़ म कभू उस्तरा फिरन नइं पाही।”
1SA 1:12 जब ओह यहोवा के आघू म अइसने पराथना करत रिहिस, त एली ह ओकर मुहूं कोति देखत रिहिस।
1SA 1:13 हन्ना ह अपन मन म पराथना करत रिहिस, ओकर ओंठ तो हालत रिहिस फेर ओकर अवाज नइं सुनई पड़त रिहिस। एली ह समझिस कि ओह नसा म हवय
1SA 1:14 अऊ ओला कहिस, “तें कब तक नसा म रहिबे? अपन नसा ला उतार।”
1SA 1:15 हन्ना ह कहिस, “हे मोर मालिक, अइसने नो हय, मेंह तो एक दुखियारी माईलोगन अंव। मेंह न तो अंगूर के मंद पीये हंव अऊ न ही कोनो अऊ मंद; मेंह अपन मन के बात खोलके यहोवा ला कहत रहेंव।
1SA 1:16 अपन दासी ला दुस्ट माईलोगन झन समझ; मेंह अब्बड़ पीरा म अऊ दुखी होके इहां पराथना करत रहेंव।”
1SA 1:17 एली ह कहिस, “सांति से जा, इसरायल के परमेसर ह तोला मनचाहा बरदान देवय।”
1SA 1:18 ओह कहिस, “तोर दासी ह तोर नजर म अनुग्रह पावय।” तब ओ माईलोगन ह चले गीस अऊ जेवन करिस, अऊ ओकर मुहूं ह फेर उदास नइं दिखिस।
1SA 1:19 दूसर दिन बड़े बिहनियां ओमन उठके यहोवा के आघू म अराधना करिन अऊ तब अपन घर रामा ला लहुंट गीन। एलकाना ह अपन घरवाली हन्ना करा गीस, अऊ यहोवा ह हन्ना के सुधि लीस।
1SA 1:20 तब कुछू दिन के बाद हन्ना देहें म होईस अऊ एक बेटा ला जनम दीस। ओह ये कहत ओकर नांव समूएल रखिस, “काबरकि मेंह येला यहोवा ले मांगेंव।”
1SA 1:21 जब एलकाना ह हर साल के सहीं अपन जम्मो परिवार सहित यहोवा ला बलिदान चघाय बर अऊ अपन मन्नत पूरा करे बर गीस,
1SA 1:22 त हन्ना ह नइं गीस। ओह अपन घरवाला ला कहिस, “जब लइका के दूध छूट जाही, तब मेंह ओला ले जाहूं अऊ यहोवा के आघू म ओला अरपन करहूं, अऊ ओह उहां हमेसा रहिही।”
1SA 1:23 ओकर घरवाला एलकाना ह ओला कहिस, “जऊन बात तोला बने लगय, ओहीच कर। जब तक तें ओकर दूध ला नइं छोंड़ाथस, तब तक इहां ठहिरे रह; सिरिप अइसने होवय कि यहोवा ह अपन बचन ला पूरा करय।” एकरसेति हन्ना ह घर म रूक गीस अऊ अपन बेटा के दूध छूटत तक ओला दूध पीयात रिहिस।
1SA 1:24 जब लइका के दूध ह छूट गीस, तब ओह ओला अपन संग म ले गीस, अऊ संग म तीन साल के एक बछवा, एपा भर पीसान अऊ अंगूर के मंद ले भरे चमड़ा के एक थैली घलो लीस, अऊ ये जम्मो चीज सहित लइका ला सीलो म यहोवा के भवन म लानिस।
1SA 1:25 बछवा ला बलि करे के बाद, ओमन लइका ला एली करा लानिन,
1SA 1:26 तब हन्ना ह कहिस, “हे मोर मालिक, मोला छेमा कर, तोर जिनगी के कसम, मेंह ओहीच माईलोगन अंव, जऊन ह इहां तोर बाजू म ठाढ़ होके यहोवा ले पराथना करत रहेंव।
1SA 1:27 येह ओ लइका ए, जेकर बर मेंह पराथना करे रहेंव, अऊ यहोवा ह मोला मोर मुहूं मांगा बर दे हवय।
1SA 1:28 एकरसेति अब मेंह ओला यहोवा ला अरपन कर देवत हंव। येह अपन जिनगी भर यहोवा ही के बने रहय।” अऊ तब ओह उहां यहोवा के अराधना करिस।
1SA 2:1 तब हन्ना ह पराथना करत कहिस: “मोर मन ह यहोवा म आनंदित हवय; यहोवा म मोर सींग ला ऊपर करे गे हवय। मोर मुहूं ह मोर बईरीमन के बिरूध खुल गीस, काबरकि में तोर दिये गय छुटकारा म आनंदित हंव।
1SA 2:2 “यहोवा के सहीं कोनो पबितर नइं अंय; तोर छोंड़ अऊ कोनो नइं अंय; हमर परमेसर के सहीं कोनो चट्टान नइं अय।
1SA 2:3 “घमंड से भरे बात झन करत रहव, या घमंड के बात तुम्हर मुहूं ले झन निकले, काबरकि यहोवा ह अइसने परमेसर अय, जऊन ह जम्मो बात ला जानथे, अऊ ओह हमर काम के नियाय करथे।
1SA 2:4 “सूरबीरमन के धनुसमन टूट गीन, पर ठोकर खानेवालामन ला ताकत दिये जाथे।
1SA 2:5 जऊन मन के पेट भरे रिहिस, ओमन जेवन बर बनी करे बर जाथें, पर जऊन मन भूखा रिहिन, ओमन अब भूखा नइं अंय। ओ माईलोगन, जऊन ह बांझ रिहिस, ओह सात झन लइका जनमे हवय, पर ओह, जेकर कतको बेटा रिहिन, ओह सोक मनाथे।
1SA 2:6 “यहोवा ह मिरतू लानथे अऊ जियाथे घलो; ओह खाल्हे कबर म उतारथे अऊ फेर जियाथे।
1SA 2:7 यहोवा ह गरीब बनाथे अऊ धन घलो देथे; ओह मनखे ला नीचा दिखाथे अऊ ओला ऊंचा घलो उठाथे।
1SA 2:8 ओह गरीब ला धुर्रा ले उठाथे अऊ जरूरतमंद ला राख के कुढ़ा ले ऊपर करथे; ओह ओमन ला हाकिममन के संग बईठाथे अऊ ओमन ला आदर के सिंघासन के अधिकारी बनाथे। “काबरकि धरती के नीव यहोवा के अय; अऊ ओकरे ऊपर ओह संसार ला धरे हवय।
1SA 2:9 ओह अपन बिसवासयोग्य सेवकमन के पांव ला संभाले रहिही, पर दुस्टमन ला अंधियार म चुप रहे बर कहे जाही। “कोनो मनखे अपन ताकत के दुवारा जीत नइं सकय;
1SA 2:10 जऊन मन यहोवा के बिरोध करथें ओमन टूट जाहीं। सर्वोच्च परमेसर ह अकास ले गरजही; यहोवा ह धरती के छोर तक नियाय करही। “ओह अपन राजा ला ताकत दीही अऊ अपन अभिसिक्त मनखे के सींग ला ऊंचा करही।”
1SA 2:11 तब एलकाना ह अपन घर रामा ला चले गीस, पर ओ लइका ह एली पुरोहित के अधीन म रहिके यहोवा के सेवा करन लगिस।
1SA 2:12 एली के बेटामन दुस्ट मनखे रिहिन; ओमन के मन म यहोवा बर कोनो आदर नइं रिहिस।
1SA 2:13 उहां पुरोहितमन के ये रिवाज रिहिस कि जब भी कोनो मनखे बलिदान चघावय, त पुरोहित के सेवक ह मांस चुरे के बेरा म एक तीन दांतवाला कांटा अपन हांथ म धरके आवय
1SA 2:14 अऊ ओला कढ़ाही, या करसी, या करसा, या धमेला के भीतर डुबोवय। अऊ जतेक मांस कांटा म फंसके ऊपर आवय, ओला पुरोहित ह अपन बर ले लेवय। ये किसम ले ओमन ओ जम्मो इसरायलीमन संग बरताव करंय, जऊन मन सीलो म आवंय।
1SA 2:15 अऊ इहां तक कि चरबी ला जलाय के पहिली, पुरोहित के सेवक ह आके बलिदान करइया मनखे ला कहय, “भूंजे बर पुरोहित ला कुछू मांस दे; ओह तोर ले चुरे हुए मांस ला नइं लेवय, पर सिरिप कच्चा मांस ला लीही।”
1SA 2:16 अऊ कहूं ओ मनखे ह सेवक ला कहय, “पहिली चरबी ला जरन दे, तब तें जो चाहथस, ओला ले जा सकथस,” तब सेवक ह जबाब देवय, “नइं, अभी दे; यदि नइं देवस, त मेंह येला छीनके ले जाहूं।”
1SA 2:17 ओ जवानमन के ये पाप ह यहोवा के नजर म बहुंत बड़े रिहिस, काबरकि ओमन यहोवा के भेंट के अपमान करत रिहिन।
1SA 2:18 पर समूएल जऊन ह लइका रिहिस, सन के कपड़ा के एपोद पहिरे यहोवा के आघू म सेवा करत रिहिस।
1SA 2:19 ओकर दाई ह हर साल ओकर बर एक ठन छोटे अंगरखा बनाके ओकर बर ले जावय, जब भी ओह अपन घरवाला संग हर साल बलिदान चघाय बर उहां जावय।
1SA 2:20 एली ह एलकाना अऊ ओकर घरवाली ला ये कहिके आसीस देवय, “जऊन लइका बर तोर घरवाली ह पराथना करे रिहिस अऊ ओला यहोवा ला अरपन कर दीस, ओकर बदला म यहोवा ह तोला तोर ये घरवाली ले अऊ लइका देवय।” तब ओमन अपन घर चले जावंय।
1SA 2:21 अऊ यहोवा ह हन्ना के सुधि लीस; ओह अऊ तीन बेटा अऊ दू बेटी ला जनम दीस। ये बीच म लइका समूएल ह यहोवा के संग म रहत बाढ़त गीस।
1SA 2:22 एली ह अब्बड़ डोकरा हो गे रिहिस, अऊ ओह ओ जम्मो बात के बारे म सुनिस, जेला ओकर बेटामन जम्मो इसरायलीमन के संग करत रिहिन अऊ कइसे मिलापवाला तम्बू के मुंहटा म सेवा करइया माईलोगनमन संग कुकरम घलो करत रिहिन।
1SA 2:23 एकरसेति ओह अपन बेटामन ला बलाके कहिस, “तुमन अइसने काम काबर करथव? मेंह जम्मो मनखेमन ले तुम्हर ये कुकरम के बारे म सुनत हंव।
1SA 2:24 हे मोर बेटामन, अइसने झन करव; काबरकि जऊन खबर यहोवा के मनखेमन के बीच म फईलत हे, अऊ जेला मेंह सुनत हंव, ओह ठीक नो हय।
1SA 2:25 यदि एक मनखे ह दूसर मनखे के बिरूध पाप करथे, त परमेसर ह ओकर बिचवई करही; पर यदि कोनो मनखे ह यहोवा के बिरूध पाप करथे, त ओकर बिचवई कोन करही?” तभो ले एली के बेटामन अपन ददा के गोठ ला नइं सुनिन, काबरकि यहोवा के ईछा ओमन ला मार डारे के रिहिस।
1SA 2:26 अऊ लइका समूएल ह डीलडौल अऊ यहोवा अऊ मनखेमन के अनुग्रह म बढ़त गीस।
1SA 2:27 तब परमेसर के एक जन ह एली करा आईस अऊ ओला कहिस, “यहोवा अइसने कहत हे: ‘जब तोर पुरखामन के घराना ह मिसर म फिरौन राजा के अधीन रिहिन, त का मेंह ओमन करा अपनआप ला साफ-साफ परगट नइं करे रहेंव?
1SA 2:28 मेंह इसरायल के जम्मो गोत्रमन ले तोर पुरखा ला मोर पुरोहित होय बर चुनेंव कि ओमन मोर बेदी करा जावंय, उहां धूप जलावंय, अऊ मोर आघू म एपोद पहिरंय। मेंह तोर पुरखामन के घराना ला इसरायलीमन के चघाय जम्मो जेवन-बलिदान ला घलो देंव।
1SA 2:29 तुमन काबर मोर ओ चढ़ावा अऊ बलिदान के अपमान करत हव, जेला मेंह अपन निवास बर ठहिराय हंव? तेंह काबर मोर मनखे इसरायलीमन के दुवारा चघाय जम्मो बलिदान के बने भाग ला खाके अपनआप ला मोटा-ताजा करत हवस अऊ मोर ले जादा अपन बेटामन के आदर करत हवस?’
1SA 2:30 “एकरसेति यहोवा, इसरायल के परमेसर ह घोसना करत हे: ‘मेंह वायदा करे रहेंव कि तोर परिवार के मनखेमन हमेसा मोर आघू म सेवा करहीं।’ पर अब यहोवा ह घोसना करत हे: ‘अब अइसने नइं होवय! जऊन मन मोर आदर करथें, ओमन के में आदर करहूं, पर जऊन मन मोला तुछ समझथें, ओमन तुछ समझे जाहीं।
1SA 2:31 ओ समय ह आवत हवय जब मेंह तोर ताकत अऊ तोर पुरोहिती घराना के ताकत ला कम कर दूहूं, ताकि तोर खानदान म कोनो डोकरा होवत तक नइं जी सकहीं,
1SA 2:32 अऊ तेंह मोर निवास म दुख ला देखबे। हालाकि इसरायल के भलई करे जाही, पर तोर खानदान म कोनो कभू डोकरा होवत तक नइं जीयन पाही।
1SA 2:33 तुमन म के हर एक झन ला मोर बेदी के सेवा ले अलग नइं करंव; मेंह सिरिप तोर आंखी ला नास करे बर अऊ तोर ताकत घटाय बर ओमन ला बचाय रखहूं, अऊ तोर जम्मो संतानमन अपन भरे जवानी म मरहीं।
1SA 2:34 “ ‘तोर दूनों बेटामन के का होही, होपनी अऊ पीनहास तोर बर एक चिनहां होहीं, दूनों के दूनों एक ही दिन म मर जाहीं।
1SA 2:35 मेंह अपन बर एक बिसवासयोग्य पुरोहित ला ठहिराहूं, जऊन ह मोर हिरदय अऊ मन के मुताबिक काम करही। मेंह ओकर पुरोहिती घराना ला बने करके बसाहूं अऊ ओमन मोर अभिसिक्त जन के आघू म हमेसा सेवा करहीं।
1SA 2:36 तब तोर परिवार म बचे जम्मो झन आहीं अऊ चांदी के एक छोटे टुकड़ा अऊ रोटी के एक टुकड़ा बर ओकर आघू म झुकहीं अऊ बिनती करहीं, “पुरोहित के कोनो काम बर मोर अभिसेक कर, ताकि खाय बर मोला जेवन मिलय।” ’ ”
1SA 3:1 ओ लइका समूएल ह एली के अधीन म यहोवा के सेवा करत रिहिस। ओ समय म यहोवा के बचन के परकासन दुरलभ रिहिस; अऊ बहुंत कम दरसन मिलत रिहिस।
1SA 3:2 एक रथिया अइसने होईस कि एली, जेकर आंखी बहुंत कमजोर हो गे रिहिस अऊ ओला बहुंत कम दिखत रिहिस, ओह अपन जगह म लेटे रिहिस।
1SA 3:3 परमेसर के दीया ह अब तक ले बुताय नइं रिहिस, अऊ समूएल ह यहोवा के मंदिर म उहां लेटे रिहिस, जिहां परमेसर के सन्दूक रहय।
1SA 3:4 तब यहोवा ह समूएल ला बलाईस। समूएल ह कहिस, “में इहां हंव।”
1SA 3:5 अऊ ओह एली करा दऊड़के गीस अऊ कहिस, “में इहां हंव; तेंह मोला बलाय।” पर एली ह कहिस, “मेंह नइं बलाय हंव; जाके लेट जा।” त ओह जाके लेट गीस।
1SA 3:6 यहोवा ह ओला फेर बलाईस, “हे समूएल!” समूएल ह उठिस अऊ एली करा जाके कहिस, “में इहां हंव; तेंह मोला बलाय।” पर एली ह कहिस, “हे मोर बेटा, मेंह नइं बलाय हंव; जाके लेट जा।”
1SA 3:7 अभी तक ले समूएल ह यहोवा ला नइं पहिचानत रिहिस: यहोवा के बचन ह अभी तक ले ओकर ऊपर परगट नइं होय रिहिस।
1SA 3:8 फेर तीसर बार यहोवा ह बलाईस, “हे समूएल!” समूएल ह उठिस अऊ एली करा जाके कहिस, “में इहां हंव; तेंह मोला बलाय।” तब एली ह समझ गीस कि ये लड़का ला यहोवा ह बलाय हवय।
1SA 3:9 एकरसेति एली ह समूएल ला कहिस, “जाके लेट जा, अऊ यदि ओह तोला बलाथे, त कहिबे, ‘हे यहोवा, कह, काबरकि तोर सेवक ह सुनत हवय।’ ” तब समूएल ह अपन जगह म जाके लेट गीस।
1SA 3:10 तब यहोवा ह उहां आके ठाढ़ हो गीस, अऊ पहिले सहीं बलाईस, “हे समूएल! हे समूएल!” तब समूएल ह कहिस, “कह, काबरकि तोर सेवक ह सुनत हवय।”
1SA 3:11 अऊ यहोवा ह समूएल ला कहिस: “सुन, मेंह इसरायल म कुछू अइसने करइया हंव, जेकर ले जम्मो सुनइयामन म सनसनी फईल जाही।
1SA 3:12 ओ समय म मेंह एली के बिरूध ओ जम्मो काम करहूं, जऊन ला मेंह ओकर घराना के बिसय म कहे रहेंव, ओला सुरू ले आखिरी तक पूरा करहूं।
1SA 3:13 मेंह ओला कहे रहेंव कि ओ पाप के खातिर, जेला ओह जानत रिहिस, ओकर परिवार के नियाय सदाकाल बर करहूं; ओकर बेटामन परमेसर के निन्दा करिन, अऊ ओह ओमन ला रोके म असफल होईस।
1SA 3:14 एकरसेति मेंह एली के घराना के बिसय म ये किरिया खायेंव, ‘एली के घराना के अपराध के प्रायस्चित कोनो बलिदान या चढ़ावा के दुवारा कभू नइं होवय।’ ”
1SA 3:15 समूएल ह बिहान तक लेटे रिहिस अऊ तब ओह यहोवा के भवन के कपाटमन ला खोलिस। ओह एली ला ओ दरसन के बारे म बताय बर डरात रिहिस।
1SA 3:16 पर एली ह ओला बलाईस अऊ कहिस, “हे मोर बेटा, समूएल।” समूएल ह कहिस, “मेंह इहां हंव।”
1SA 3:17 तब ओह पुछिस, “ओह का गोठ अय, जऊन ला परमेसर ह तोर ले कहिस? ओ बात मोर ले झन छुपा। जऊन कुछू ओह तोर ले कहिस, यदि तेंह मोर ले छुपाबे, त परमेसर ह तोर ले वइसने ही बरताव, बरन ओकर ले घलो जादा कड़ई से बरताव करय।”
1SA 3:18 तब समूएल ह ओला जम्मो बात ला बता दीस, ओकर ले कुछू नइं छुपाईस। तब एली ह कहिस, “ओह यहोवा अय; जऊन कुछू ओकर नजर म बने लगथे, ओला ओह करय।”
1SA 3:19 समूएल बड़े होवत गीस अऊ यहोवा ह ओकर संग रिहिस, अऊ ओह समूएल के कोनो घलो बात ला बेकार नइं होवन दीस।
1SA 3:20 अऊ दान ले लेके बेरसेबा तक जम्मो इसरायलीमन जान डारिन कि समूएल ह यहोवा के अगमजानी के रूप म ठहिराय गे हवय।
1SA 3:21 यहोवा ह सीलो म परगट होते रिहिस, अऊ ओह उहां अपन बचन के जरिये अपनआप ला समूएल करा परगट करिस।
1SA 4:1 अऊ समूएल के बचन जम्मो इसरायल देस म हबर गीस। इसरायलीमन पलिस्तीमन ले लड़ई करे बर निकलिन। ओमन एबनेजेर सहर करा डेरा डालिन, अऊ पलिस्तीमन अपेक सहर म डेरा डालिन।
1SA 4:2 पलिस्तीमन इसरायलीमन के बिरूध म लड़ई करे बर अपन सेना के मोरचा बनाईन, अऊ जब घमासान लड़ई होवन लगिस, त इसरायलीमन पलिस्तीमन ले हार गीन, अऊ लगभग चार हजार इसरायली सेना के मनखे लड़ई के मैदान म मारे गीन।
1SA 4:3 जब इसरायली सैनिकमन डेरा म लहुंटके आईन, तब इसरायल के अगुवामन पुछिन, “आज यहोवा ह हमन ला पलिस्तीमन ले काबर हरवा दीस? आवव, हमन यहोवा के करार के सन्दूक ला सीलो ले लेय आवन, ताकि ओह हमर संग जावय अऊ हमन ला बईरीमन के हांथ ले बचावय।”
1SA 4:4 एकरसेति ओमन आदमीमन ला सीलो म पठोईन, अऊ ओमन ओ सर्वसक्तिमान यहोवा के करार के सन्दूक ला वापिस ले आईन, जऊन ह करूबमन के ऊपर बिराजमान हवय। अऊ एली के दू झन बेटा, होपनी अऊ पीनहास, परमेसर के करार के सन्दूक संग उहां रिहिन।
1SA 4:5 जब यहोवा के करार के सन्दूक ह डेरा म आईस, त जम्मो इसरायलीमन अतेक जोर से नरियाईन कि भुइयां ह कांप गीस।
1SA 4:6 ये अवाज ला सुनके पलिस्तीमन पुछिन, “इबरीमन के डेरा म नरियाय के ये का अवाज होवथे?” जब पलिस्तीमन ये जानिन कि यहोवा के सन्दूक ह डेरा म आय हवय,
1SA 4:7 त पलिस्तीमन डर्रा गीन अऊ कहन लगिन, “एक देवता ह डेरा म आय हवय, ओहो नइं! एकर पहिली अइसने कभू नइं होय रिहिस।
1SA 4:8 हमर ऊपर बिपत्ति आय हवय! हमन ला ये सक्तिसाली देवतामन के हांथ ले कोन बचाही? येमन ओ देवता अंय, जेमन सुनसान जगह म मिसरीमन ऊपर जम्मो किसम के महामारी लाने रिहिन।
1SA 4:9 हे पलिस्तीमन, हिम्मत रखव! मरद बनव, नइं तो तुमन इबरीमन के अधीन हो जाहू, जइसने कि ओमन तुम्हर अधीन म रिहिन। मरद बनव, अऊ लड़व!”
1SA 4:10 तब पलिस्तीमन लड़िन, अऊ इसरायलीमन हार गीन अऊ हर एक झन अपन-अपन तम्बू म भाग गीन। बहुंते झन मार डारे गीन; इसरायलीमन के तीस हजार पैदल चलइया सैनिकमन मार डारे गीन।
1SA 4:11 परमेसर के सन्दूक ला कब्जा कर लिये गीस, अऊ एली के दूनों बेटा, होपनी अऊ पीनहास मर गीन।
1SA 4:12 तब ओहीच दिन एक बिनयामीन बंस के मनखे लड़ई के जगह ले फटहा-चीरहा कपड़ा पहिरे अऊ मुड़ म धुर्रा लगाके दऊड़त सीलो म आईस।
1SA 4:13 जब ओह हबरिस, त एली ह सड़क-तीर म अपन कुरसी म बईठके देखत रहय, काबरकि ओकर मन म परमेसर के सन्दूक बर डर रहय। जब ओ मनखे ह नगर म आके जम्मो बात ला बताईस, त जम्मो नगर के मनखेमन रोये लगिन।
1SA 4:14 रोये के अवाज ला सुनके एली ह पुछिस, “ये हो-हल्ला के का मतलब ए?” ओ मनखे ह तुरते एली करा गीस,
1SA 4:15 एली ह अन्ठानबे साल के रिहिस, अऊ ओकर आंखीमन नइं दिखत रिहिन।
1SA 4:16 ओ मनखे ह एली ला कहिस, “मेंह अभीच लड़ई के जगह ले आय हवंव; में आजेच उहां ले भागके आय हवंव।” एली ह पुछिस, “हे मोर बेटा, उहां का होईस?”
1SA 4:17 ओ मनखे, जऊन ह संदेस लेके आय रिहिस ओह जबाब दीस, “इसरायलीमन पलिस्तीमन के आघू ले भाग गीन, अऊ सेना के बहुंत नुकसान होय हवय। तोर दूनों बेटा होपनी अऊ पीनहास घलो मर गीन, अऊ परमेसर के सन्दूक ला कब्जा कर लिये गे हवय।”
1SA 4:18 जइसे ही एली ह परमेसर के सन्दूक के बारे म सुनिस, ओह दुवार के बाजू म कुरसी म ले पाछू कोति लुड़कके गिर पड़िस। ओकर गरदन ह टूट गीस अऊ ओह मर गीस, काबरकि ओह डोकरा हो गे रिहिस अऊ भारी सरीर के रिहिस। ओह इसरायलीमन के अगुवई चालीस साल तक करिस।
1SA 4:19 ओकर बहू, पीनहास के घरवाली ह देहें म रिहिस अऊ ओकर छेवारी होय के समय ह लकठा आ गे रिहिस। जब ओह सुनिस कि परमेसर के सन्दूक ला छीन लिये गे हवय अऊ ओकर ससुर अऊ ओकर घरवाला मर गे हवंय, त ओला छेवारी होय के पीरा उठिस अऊ ओह एक लइका ला जनम दीस, पर ओह अपन छेवारी होय के पीरा ला सहे नइं सकिस।
1SA 4:20 जब ओह मरत रिहिस, त ओला छेवारी करइया माईलोगनमन ओला कहिन, “निरास झन हो; तेंह एक बेटा ला जनमे हस।” पर ओह कुछू जबाब नइं दीस या कुछू धियान नइं दीस।
1SA 4:21 ओह ये कहत ओ लइका के नांव ईकाबोद रखिस, “इसरायल म ले महिमा ह चल दीस”—काबरकि परमेसर के सन्दूक ह छीन लिये गे रिहिस अऊ ओकर ससुर अऊ ओकर घरवाला मर गे रिहिन।
1SA 4:22 ओह कहिस, “इसरायल म ले परमेसर के महिमा ह चल दीस, काबरकि परमेसर के सन्दूक ला छीन लिये गे हवय।”
1SA 5:1 परमेसर के सन्दूक ला कब्जा करे के बाद, पलिस्तीमन ओला एबनेजेर ले असदोद सहर ले गीन।
1SA 5:2 तब ओमन परमेसर के सन्दूक ला उठाके दागोन के मंदिर म ले गीन अऊ दागोन मूरती के बाजू म मढ़ा दीन।
1SA 5:3 ओकर दूसर दिन असदोदीमन बड़े बिहनियां उठके देखिन, त दागोन ह भुइयां म अपन मुहूं के भार यहोवा के सन्दूक के आघू म गिरे पड़े रहय! तब ओमन दागोन ला उठाके फेर ओकर जगह म रख दीन।
1SA 5:4 पर दूसर दिन जब ओमन बिहनियां उठिन, तब का देखिन कि दागोन ह भुइयां म अपन मुहूं के भार यहोवा के सन्दूक के आघू म फेर गिरे पड़े रहय! ओकर मुड़ अऊ हांथमन टूट गे रहंय अऊ कपाट करा पड़े रहंय; सिरिप ओकर देहें ह बांचे रिहिस।
1SA 5:5 एकर खातिर आज के दिन तक दागोन के पुरोहितमन या असदोद म दागोन के मंदिर म जवइया कोनो मनखे उहां के कपाट म गोड़ नइं रखंय।
1SA 5:6 यहोवा के कोप ह असदोद अऊ ओकर आसपास के इलाका म भड़किस; अऊ ओह ओमन ला बरबाद करे लगिस अऊ ओमन के सरीर म गिलठी पईदा करिस।
1SA 5:7 अपन ये हाल ला देखके असदोद के मनखेमन कहिन, “इसरायल के परमेसर के सन्दूक ह हमर बीच म झन रहय, काबरकि ओकर कोप ह हमर ऊपर अऊ हमर देवता दागोन ऊपर भड़के हवय।”
1SA 5:8 एकरसेति ओमन पलिस्तीमन के जम्मो सासन करइयामन ला बलाईन अऊ ओमन ले पुछिन, “हमन इसरायल के परमेसर के सन्दूक के संग का करन?” ओमन जबाब दीन, “इसरायल के परमेसर के सन्दूक ला गत नगर अमरा दिये जावय।” एकरसेति ओमन इसरायल के परमेसर के सन्दूक ला गत नगर अमरा दीन।
1SA 5:9 पर ओला उहां अमराय के बाद, यहोवा के कोप ह ओ सहर ऊपर भड़किस, अऊ उहां भयंकर हलचल मच गीस। परमेसर ह ओ सहर म छोटे ले लेके बड़े तक, जम्मो मनखे के देहें ला गिलठी होय के पीरा ले भर दीस।
1SA 5:10 एकरसेति ओमन परमेसर के सन्दूक ला एकरोन पठो दीन। जब परमेसर के सन्दूक ह एकरोन सहर के भीतर आवत रिहिस, त एकरोन के मनखेमन चिचियाके कहिन, “ओमन इसरायल के परमेसर के सन्दूक ला हमर करा हमन ला अऊ हमर मनखेमन ला मरवाय बर लाने हवंय।”
1SA 5:11 एकरसेति ओमन पलिस्तीमन के जम्मो सासन करइयामन ला एक जगह बलाईन अऊ कहिन, “इसरायल के परमेसर के सन्दूक ला निकाल दव; ओला अपन जगह म लहुंटा दव, नइं तो येह हमन ला अऊ हमर मनखेमन ला मार डारही।” काबरकि जम्मो सहर म मिरतू के डर के हलचल मचे हवय; परमेसर के भारी हांथ येकर ऊपर पड़े हवय।
1SA 5:12 जऊन मनखेमन नइं मरिन, ओमन के देहें म गिलठी हो गीस, अऊ सहर के मनखेमन के चिचियाहट ह ऊपर अकास तक गीस।
1SA 6:1 जब यहोवा के सन्दूक पलिस्तीमन के इलाका म सात महिना तक रिहिस,
1SA 6:2 त पलिस्तीमन, पुरोहितमन अऊ सकुन-बिचार करइयामन ला बलाके पुछिन, “यहोवा के सन्दूक के हमन का करन? हमन ला बतावव कि हमन येला कइसन येकर जगह म वापिस पठोवन।”
1SA 6:3 ओमन जबाब दीन, “यदि तुमन इसरायल के परमेसर के सन्दूक ला वापिस पठोथव, त येला बिगर कोनो भेंट के वापिस झन पठोवव; जरूरी अय कि तुमन ओला दोस-बलिदान देके पठोवव। तब तुमन चंगा हो जाहू, अऊ तुमन जानहू कि ओकर कोप ह तुम्हर ऊपर ले काबर नइं उठे हवय।”
1SA 6:4 पलिस्तीमन पुछिन, “हमन ओला का दोस-बलिदान पठोवन?” ओमन कहिन, “पलिस्ती सासन करइयामन के गनती के मुताबिक सोन के पांच गिलठी अऊ सोन के पांच ठन मुसवा, काबरकि तुमन अऊ तुम्हर सासन करइयामन ला एकेच महामारी धरे हवय।
1SA 6:5 तुमन गिलठी अऊ मुसवामन के मूरती बनावव, जऊन मन देस ला नास करत हवंय, अऊ इसरायल के परमेसर के महिमा करव। हो सकत हे, ओकर कोप ह तुम्हर अऊ तुम्हर देवतामन अऊ देस ऊपर ले उठ जावय।
1SA 6:6 तुमन काबर अपन मन ला मिसरीमन अऊ फिरौन राजा सहीं कठोर कर ले हवव? जब इसरायल के परमेसर ह ओमन के संग कड़ई से पेस आईस, त का ओमन इसरायलीमन ला पठो नइं दीन कि ओमन अपन रसता म जावंय?
1SA 6:7 “एकरसेति, अब तुमन एक नवां गाड़ी तियार करव, अऊ संग म दू ठन दूधारू गाय लेवव, जऊन मन म कभू जुड़ा नइं रखे गे हवंय। गायमन ला ओ गाड़ी म फांदव, पर ओमन के बछरूमन ला ले जाके बाड़ा म बांध देवव।
1SA 6:8 तब यहोवा के सन्दूक ला लेके ओ गाड़ी ऊपर रखव, अऊ येकर बाजू म एक-दूसर सन्दूक म सोन के ओ चीजमन ला रखव जऊन ला तुमन ओकर करा दोस-बलिदान के रूप म पठोवत हवव। फेर गाड़ी ला ओकर रसता म पठो दव,
1SA 6:9 पर ओला देखत रहव। यदि ओह अपन खुद के इलाका, बेत-सेमेस कोति जाथे, तब जानव कि यहोवा ह ये बड़े बिपत्ति ला हमर ऊपर लाने हवय। पर यदि गाड़ी ह ओ कोति नइं जावय, त हमन जान लेबो कि हमर ऊपर ये बिपत्ति ह ओकर कोति ले नइं, पर संजोग से होईस।”
1SA 6:10 ओ मनखेमन वइसनेच करिन। ओमन वइसने दू ठन गाय लेके गाड़ी म फांद दीन अऊ ओमन के बछरूमन ला बाड़ा म बांध दीन।
1SA 6:11 ओमन यहोवा के सन्दूक, अऊ संग म ओ दूसर सन्दूक ला घलो गाड़ी म रख दीन, जेमा सोन के मुसवा अऊ गिलठी के नमूना रहंय।
1SA 6:12 तब गायमन सीधा बेत-सेमेस कोति सड़क म चिचियावत चले गीन; ओमन न तो जेवनी अऊ न ही डेरी कोति मुड़िन। पलिस्तीमन के सासन करइयामन ओमन के पाछू-पाछू बेत-सेमेस के सीमना तक गीन।
1SA 6:13 बेत-सेमेस के मनखेमन घाटी म अपन गहूं लुवत रहंय, अऊ जब ओमन आंखी उठाके सन्दूक ला देखिन, त ओला देखके आनंदित होईन।
1SA 6:14 गाड़ी ह बेत-सेमेस के यहोसू नांव के एक मनखे के खेत म आईस अऊ उहां एक ठन पथरा के बाजू म रूक गीस। मनखेमन गाड़ी के कठवा ला काटिन अऊ गायमन ला यहोवा बर होम-बलिदान के रूप म चघाईन।
1SA 6:15 लेवीमन यहोवा के सन्दूक ला, सोन के चीज रखे ओ सन्दूक सहित उतारिन, अऊ ओमन ला ओ बड़े पथरा म मढ़ा दीन। ओ दिन बेत-सेमेस के मनखेमन यहोवा ला होम-बलिदान अऊ चढ़ावा चघाईन।
1SA 6:16 पलिस्तीमन के पांच सासन करइयामन ये जम्मो ला देखिन अऊ तब ओहीच दिन एकरोन लहुंट गीन।
1SA 6:17 सोन के जऊन गिलठीमन ला पलिस्तीमन यहोवा बर दोस-बलिदान के रूप म पठोय रिहिन, ओमा ले एक असदोद, एक गाजा, एक अस्कलोन, एक गत अऊ एक एकरोन कोति ले देय गे रिहिस।
1SA 6:18 अऊ ओ सोन के मुसवामन पलिस्तीमन के ओ सहरमन के गनती के मुताबिक रिहिन, जेमन पांच सासन करइयामन के अधीन रिहिन; ओमा दीवारवाले सहरमन अऊ ओमन के बिगर दीवार के गांवमन घलो रिहिन। जऊन बड़े पथरा म लेवीमन यहोवा के सन्दूक ला रखे रिहिन, ओह आज तक बेत-सेमेस म यहोसू के खेत म एक गवाही अय।
1SA 6:19 पर परमेसर ह बेत-सेमेस के रहइया कुछू मनखेमन ला मारिस, काबरकि ओमन यहोवा के सन्दूक के भीतर झांके रिहिन। परमेसर ह ओमन के सत्तर मनखे ला मार डारिस। ओ मनखेमन सोक मनाईन काबरकि यहोवा के भारी कोप ओमन के ऊपर भड़के रिहिस।
1SA 6:20 अऊ बेत-सेमेस के मनखेमन पुछिन, “यहोवा, ये पबितर परमेसर के आघू म कोन ह ठाढ़ हो सकत हे? इहां ले सन्दूक ह काकर करा जाही?”
1SA 6:21 तब ओमन ये कहिके किरयत-यारीम के मनखेमन करा दूतमन ला पठोईन, “पलिस्तीमन यहोवा के सन्दूक ला लहुंटा दे हवंय। एकरसेति तुमन खाल्हे आवव अऊ येला अपन सहर म ले जावव।”
1SA 7:1 तब किरयत-यारीम के मनखेमन आईन अऊ यहोवा के सन्दूक ला ले गीन। ओमन येला पठार ऊपर अबीनादाब के घर म लानिन अऊ यहोवा के सन्दूक के पहरेदारी करे बर अबीनादाब के बेटा एलिआजर के अभिसेक करिन।
1SA 7:2 किरयत-यारीम म सन्दूक ह बहुंत समय तक रिहिस—कुल बीस बछर तक। तब इसरायल के जम्मो मनखेमन यहोवा के पाछू चले लगिन।
1SA 7:3 एकरसेति समूएल ह जम्मो इसरायलीमन ला कहिस, “यदि तुमन अपन पूरा मन से यहोवा कोति फिरत हवव, त अपनआप ला आने देवतामन अऊ असतोरेत के मूरतीमन ले दूरिहा रखव अऊ अपनआप ला यहोवा ला सऊंप दव अऊ सिरिप ओकरेच सेवा करव, त ओह तुमन ला पलिस्तीमन के हांथ ले छुड़ाही।”
1SA 7:4 एकरसेति इसरायलीमन ओमन के बाल देवतामन ला अऊ असतोरेत देवीमन ला छोंड़ दीन, अऊ सिरिप यहोवा के सेवा करिन।
1SA 7:5 तब समूएल ह कहिस, “जम्मो इसरायलीमन ला मिसपा सहर म जूरे बर कहव, अऊ मेंह तुम्हर बर यहोवा ले बिनती करहूं।”
1SA 7:6 जब ओमन मिसपा म जूर गीन, त ओमन पानी लानके यहोवा के आघू म ढारिन। ओ दिन ओमन उपास करिन अऊ ये कहिके अपन पाप ला मानिन, “हमन यहोवा के बिरूध म पाप करे हन।” अऊ समूएल ह मिसपा म इसरायलीमन के अगुवा के रूप म सेवा करत रिहिस।
1SA 7:7 जब पलिस्तीमन सुनिन कि इसरायलीमन मिसपा म जूरे हवंय, त ओमन के सासन करइयामन इसरायलीमन ऊपर हमला करे बर आईन। ये सुनके इसरायलीमन पलिस्तीमन ले डरा गीन।
1SA 7:8 अऊ इसरायलीमन समूएल ला कहिन, “यहोवा हमर परमेसर करा हमर बर रोना बंद झन कर, ताकि ओह हमन ला पलिस्तीमन के हांथ ले बचावय।”
1SA 7:9 तब समूएल ह एक दूध-पियइया मेढ़ा-पीला ला लेके ओला पूरा होम-बलिदान के रूप म यहोवा ला चघाईस। ओह इसरायलीमन बर यहोवा करा बिलाप करिस, अऊ यहोवा ह ओकर पराथना के उत्तर दीस।
1SA 7:10 जब समूएल ह होम-बलिदान चघात रिहिस, तब पलिस्तीमन इसरायलीमन संग लड़ई करे बर लकठा म आ गीन। पर ओ दिन यहोवा ह बड़े अवाज म पलिस्तीमन के बिरूध बादर सहीं गरजिस अऊ ओमन ला अइसने डरवाईस कि ओमन इसरायलीमन के आघू ले भाग गीन।
1SA 7:11 तब इसरायली मनखेमन मिसपा ले निकलके पलिस्तीमन के पीछा करिन, अऊ ओमन ला डहार म बेत-कर के खाल्हे तक मारत चले गीन।
1SA 7:12 तब समूएल ह एक ठन पथरा ला लेके मिसपा अऊ सेन के बीच म ठाढ़ करिस, अऊ ओह ये कहिके ओकर नांव एबनेजेर रखिस, “इहां तक यहोवा ह हमर मदद करे हवय।”
1SA 7:13 ये किसम ले पलिस्तीमन दब गीन अऊ ओमन इसरायलीमन के देस म चढ़ई करे बर बंद कर दीन। समूएल के जिनगी भर यहोवा के हांथ ह पलिस्तीमन के बिरूध बने रिहिस।
1SA 7:14 एकरोन ले लेके गत तक जतेक नगरमन ला पलिस्तीमन, इसरायलीमन ले छीन ले रिहिन, ओमन फेर इसरायलीमन ला वापिस मिल गीन, अऊ इसरायलीमन परोसी इलाका ला घलो पलिस्तीमन के हांथ ले छोंड़ाईन। अऊ इसरायली अऊ अमोरीमन के बीच सांति हो गीस।
1SA 7:15 समूएल ह अपन जिनगी भर इसरायलीमन के अगुवा बने रिहिस।
1SA 7:16 ओह हर साल बेतेल नगर ले गिलगाल नगर अऊ गिलगाल ले मिसपा नगर म जा-जाके ओ जम्मो जगह म इसरायलीमन के नियाय करत रिहिस।
1SA 7:17 पर ओह हमेसा वापिस रामा सहर चल देवय, जिहां ओकर घर रिहिस, अऊ उहां घलो ओह इसरायलीमन के नियाय करय। अऊ उहां ओह यहोवा बर एक बेदी बनाईस।
1SA 8:1 जब समूएल ह डोकरा हो गीस, त ओह अपन बेटामन ला इसरायलीमन के अगुवा ठहिराईस।
1SA 8:2 ओकर बड़े बेटा के नांव योएल अऊ दूसर बेटा के नांव अबियाह रिहिस, अऊ ओमन बेरसेबा नगर म सेवा करत रिहिन।
1SA 8:3 पर ओकर बेटामन ओकर रद्दा म नइं चलिन। ओमन बेईमानी करके फायदा उठाईन अऊ घूस लेवत रिहिन अऊ नियाय ला बिगाड़त रिहिन।
1SA 8:4 एकरसेति इसरायलीमन के जम्मो अगुवामन एक संग जूरिन अऊ रामा नगर म समूएल करा आईन,
1SA 8:5 अऊ ओमन ओला कहिन, “सुन, तेंह तो अब डोकरा हो गे हस, अऊ तोर बेटामन तोर रद्दा म नइं चलत हें; अब हमर अगुवई करे बर एक राजा ठहिरा, जइसने कि जम्मो दूसर जातिमन के राजा हवंय।”
1SA 8:6 पर जब ओमन ये कहिन, “हमर अगुवई करे बर हमन ला एक राजा दे,” त ये बात ह समूएल ला खराप लगिस; एकरसेति ओह यहोवा ले पराथना करिस।
1SA 8:7 अऊ यहोवा ह ओला कहिस, “मनखेमन जऊन कुछू तोला कहत हवंय, ओ जम्मो बात ला सुन; येह तें नो हस, जऊन ला ओमन अस्वीकार करे हवंय, पर ओमन मोला अपन राजा के रूप म अस्वीकार करे हवंय।
1SA 8:8 जइसने काम ओमन ओ दिन ले करत आय हवंय, जब मेंह ओमन ला मिसर देस ले निकाल लानेंव, ओमन आज घलो वइसने काम करत हें; मोला तियागके आने देवतामन के सेवा करत हवंय; वइसने ओमन तोर संग घलो करत हवंय।
1SA 8:9 एकरसेति अब ओमन के बात ला सुन; पर ओमन ला बने करके चेता दे अऊ ओमन ला बता दे कि जऊन राजा ह ओमन ऊपर राज करही, ओकर बेवहार कइसने होही।”
1SA 8:10 समूएल ह यहोवा के जम्मो बात ओ मनखेमन ला बता दीस, जऊन मन ओकर ले एक राजा के मांग करत रिहिन।
1SA 8:11 ओह कहिस, “जऊन राजा ह तुम्हर ऊपर राज करही, ओकर बेवहार अइसने होही: ओह तुम्हर बेटामन ला लीही अऊ ओमन ला अपन रथ अऊ घोड़ामन के काम म लगाही, अऊ ओमन ओकर रथमन के आघू-आघू दऊड़हीं।
1SA 8:12 कुछू झन ला ओह हजार-हजार अऊ कुछू झन ला पचास-पचास के ऊपर सेनापति ठहिराही, अऊ कतको ले ओह अपन नांगर जोतवाही, अऊ अपन फसल कटवाही, अऊ कतको ले ओह लड़ई के हथियार अऊ रथमन के साजो-सामान बनवाही।
1SA 8:13 ओह तुम्हर बेटीमन ला लेके ओमन ले खुसबूवाला इतर अऊ जेवन अऊ रोटी बनवाही।
1SA 8:14 ओह तुम्हर सबले बने खेत अऊ अंगूर अऊ जैतून के बारीमन ला लेके अपन सेवकमन ला दे दीही।
1SA 8:15 ओह तुम्हर अनाज अऊ अंगूर के फर के दसवां भाग ला लेके अपन अधिकारी अऊ सेवकमन ला दे दीही।
1SA 8:16 तुम्हर सेवक-सेविकामन ला, अऊ तुम्हर सबले बने पसु अऊ गदहामन ला लेके अपन उपयोग म लानही।
1SA 8:17 ओह तुम्हर भेड़-बकरीमन के दसवां भाग ला ले लीही, अऊ तुमन खुद ओकर गुलाम बन जाहू।
1SA 8:18 जब ओ दिन आही, त तुमन अपन ओ चुने हुए राजा ले छुटकारा पाय बर गोहारहू, पर यहोवा ह ओ दिन तुम्हर बात नइं सुनही।”
1SA 8:19 पर ओ मनखेमन समूएल के बात ला नइं सुनिन। ओमन कहिन, “नइं! हमन अपन बर एक राजा चाहत हन।
1SA 8:20 तब जम्मो दूसर देसमन सहीं हमर करा घलो हमर अगुवई करे बर एक राजा होही, जऊन ह आघू-आघू जाही अऊ हमर लड़ई लड़ही।”
1SA 8:21 जब समूएल ह ओ मनखेमन के कहे जम्मो बात ला सुनिस, त ओह ओ बात ला यहोवा के आघू म बताईस।
1SA 8:22 यहोवा ह समूएल ला कहिस, “ओमन के बात ला मानके ओमन बर एक राजा ठहिरा दे।” तब समूएल ह इसरायलीमन ला कहिस, “तुमन जम्मो झन अपन-अपन नगर म वापिस जावव।”
1SA 9:1 बिनयामीन के गोत्र म कीस नांव के एक मनखे रिहिस, जऊन ह अबीएल के बेटा रिहिस, अबीएल ह सरोर के बेटा, सरोर ह बकोरत के बेटा अऊ बकोरत ह अपीह के बेटा रिहिस। कीस ह एक बिनयामीनी अऊ इज्जतदार मनखे रिहिस।
1SA 9:2 ओकर साऊल नांव के एक जवान बेटा रिहिस, जऊन ह सुन्दर रिहिस, अऊ इसरायलीमन म कोनो ओकर ले बढ़के सुन्दर नइं रिहिन; ओह अतेक ऊंच रिहिस कि आने मनखेमन ओकर कंधा तक ही आवत रिहिन।
1SA 9:3 एक दिन साऊल के ददा कीस के गदहामन गंवा गीन, त कीस ह अपन बेटा साऊल ले कहिस, “एक सेवक ला अपन संग म ले जा अऊ गदहामन ला खोजके लान।”
1SA 9:4 तब ओह एपरैम के पहाड़ी देस अऊ सलीसा के इलाका म होवत गीस, पर ओमन ला गदहामन नइं मिलिन। तब ओमन सालीम जिला म गीन, पर गदहामन उहां घलो नइं रिहिन। तब ओमन बिनयामीन के इलाका म होवत गीन, पर गदहामन नइं मिलिन।
1SA 9:5 जब ओमन सूप जिला म हबरिन, त साऊल ह अपन संग के सेवक ला कहिस, “आ, हमन वापिस चलन, नइं तो मोर ददा ह गदहामन के चिंता ला छोंड़के हमर चिंता करे लगही।”
1SA 9:6 पर सेवक ह कहिस, “देख, ये नगर म परमेसर के एक जन हवय, जेह बहुंत आदर योग्य अय, अऊ जऊन भी बात ओह कहिथे, ओह सच हो जाथे। आ, हमन उहां चलबो, हो सकत हे कि ओह हमन ला रद्दा बतावय कि हमन ला कते डहार जाना हे।”
1SA 9:7 साऊल ह अपन सेवक ले कहिस, “यदि हमन ओ मनखे करा जाबो, त ओकर बर का लेके जाबो? हमर झोलामन के जेवन ह खतम हो गे हवय। परमेसर के ओ जन ला देय बर हमर करा भेंट के लईक कोनो चीज नइं ए। हमर करा का हवय?”
1SA 9:8 सेवक ह साऊल ला फेर जबाब दीस, “देख, मोर करा चांदी के एक चौथाई सेकेल हवय। मेंह येला परमेसर के ओ जन ला दे दूहूं ताकि ओह हमन ला बतावय कि कोन डहार म जाना हे।”
1SA 9:9 (पुराना जमाना म इसरायल म, जब कोनो मनखे परमेसर ले कुछू पुछे बर जावय, त ओह कहय, “आ, हमन अगम-दरसी करा चलबो,” काबरकि आज के अगमजानी ला पहिली अगम-दरसी कहे जावत रिहिस।)
1SA 9:10 तब साऊल ह अपन सेवक ला कहिस, “तेंह सही कहत हस, आ, हमन चलन।” अऊ ओमन ओ नगर ला चलिन, जिहां परमेसर के जन रिहिस।
1SA 9:11 जब ओमन ओ नगर म जाय बर पठार ला चघत रिहिन, त ओमन ला कुछू जवान माईलोगनमन मिलिन, जऊन मन पानी भरे बर निकले रिहिन, अऊ ओमन ओ माईलोगनमन ले पुछिन, “का अगम-दरसी इहां हवय?”
1SA 9:12 ओमन जबाब दीन, “हवय, ओह तुम्हर आघू कोति हवय। अब जल्दी करव; ओह आज ही हमर नगर म आय हवय, काबरकि मनखेमन ऊंचहा जगह म बलिदान करत हवंय।
1SA 9:13 जइसने ही तुमन नगर म हबरहू, वइसने ही ओह तुमन ला ऊंचहा जगह म जेवन करे बर जाय के पहिले मिलही। मनखेमन खाय के सुरू नइं करंय, जब तक ओह नइं आ जाही, काबरकि बलिदान ला ओकर आसीस देना जरूरी अय; ओकर पाछू नेवताहारी मनखेमन खाथें। एकरसेति तुमन अभी ऊपर जावव; इही बेरा म ओह तुमन ला मिलही।”
1SA 9:14 ओमन ऊपर नगर म गीन अऊ जब ओमन नगर के भीतर हबरिन, त समूएल ह ऊंचहा जगह ला जाय बर ओमन कोति आवत रहय।
1SA 9:15 साऊल के आय के एक दिन पहिली, यहोवा ह समूएल ला ये बता दे रिहिस:
1SA 9:16 “कल लगभग अतकेच बेरा, मेंह तोर करा बिनयामीन के देस ले एक मनखे ला पठोहूं। ओला तेंह मोर इसरायली मनखेमन के ऊपर सासन करइया के रूप म अभिसेक करबे; ओह मोर मनखेमन ला पलिस्तीमन के हांथ ले बचाही। मेंह अपन मनखेमन ऊपर किरपा-दिरिस्टी करे हवंव, काबरकि मदद बर ओमन के रोवई ह मोर करा हबरे हवय।”
1SA 9:17 जब समूएल के नजर साऊल ऊपर पड़िस, त यहोवा ह ओला कहिस, “येहीच ह ओ मनखे अय, जेकर बारे म मेंह तोला बताय रहेंव; ओह मोर मनखेमन ऊपर राज करही।”
1SA 9:18 साऊल ह दुवार के लकठा म समूएल करा जाके पुछिस, “किरपा करके मोला बता कि अगम-दरसी के घर कहां हवय?”
1SA 9:19 समूएल ह कहिस, “मेंह अगम-दरसी अंव; तें मोर ले आघू ऊपर ऊंचहा जगह म जा, काबरकि आज तें मोर संग जेवन करबे, अऊ जऊन कुछू तोर मन म हवय, बिहनियां ओ जम्मो बात तोला बताके बिदा करहूं।
1SA 9:20 अऊ तोर जऊन गदहामन तीन दिन पहिली गंवा गे रिहिन, ओमन के चिंता झन कर; ओमन मिल गे हवंय। अऊ कोन ए, जेला इसरायल के जम्मो मनखेमन चाहथें, का येह तें अऊ तोर जम्मो घराना नो हय?”
1SA 9:21 साऊल ह जबाब दीस, “का मेंह इसरायल के सबले छोटे गोत्र के एक बिनयामीनी नो हंव, अऊ का मोर कुल ह बिनयामीन के गोत्र के जम्मो कुलमन म ले छोटे नो हय? तेंह मोला अइसन बात काबर कहत हस?”
1SA 9:22 तब समूएल ह साऊल अऊ ओकर सेवक ला ओ बड़े कोठरी म ले आईस अऊ नेवताहारीमन के खास जगह म बईठा दीस—करीब तीस जन नेवताहारी उहां रिहिन।
1SA 9:23 फेर समूएल ह रसोइया ला कहिस, “ओ मांस के टुकड़ा ला लान, जऊन ला मेंह तोला देके अलग रखे बर कहे रहेंव।”
1SA 9:24 त रसोइया ह मांस समेत जांघ ला उठाके साऊल के आघू म मढ़ा दीस। तब समूएल ह कहिस, “येह ओ चीज अय, जऊन ला तोर बर रखे गे रिहिस। खा, काबरकि येह ओ समय ले तोर बर इही ठहिराय बेरा सेति अलग रखे गे रिहिस, जब मेंह कहे रहेंव, ‘मेंह पहुनामन ला नेवता दे हवंव।’ ” अऊ साऊल ह ओ दिन समूएल के संग जेवन करिस।
1SA 9:25 जब ओमन ऊंचहा जगह ले उतरके नगर म आ गीन, त समूएल ह अपन घर के छानी म साऊल के संग गोठियाईस।
1SA 9:26 ओमन दूसर दिन बड़े बिहनियां सुतके उठिन, अऊ समूएल ह साऊल ला छानी म बलाके कहिस, “तियार हो जा, मेंह तोला बिदा करहूं।” जब साऊल ह तियार हो गीस, त ओह अऊ समूएल एक संग बाहिर निकलिन।
1SA 9:27 जब ओमन खाल्हे नगर के तीर मेर जावत रिहिन, त समूएल ह साऊल ला कहिस, “अपन सेवक ला कह कि ओह हमर ले आघू जावय”—अऊ सेवक ह आघू चल दीस—“पर तें कुछू समय तक इहां रूक, ताकि मेंह तोला परमेसर के एक संदेस सुनावंव।”
1SA 10:1 तब समूएल ह एक कुप्पी म तेल लेके साऊल के मुड़ म रितोईस अऊ ओला चूमके कहिस, “का यहोवा ह अपन मनखे इसरायलीमन ऊपर परधान होय बर तोर अभिसेक नइं करे हवय?
1SA 10:2 आज जब तेंह मोर करा ले जाबे, त राहेल के कबर के लकठा म, बिनयामीन के देस के सीमना ऊपर सेलसह सहर म तोला दू झन मिलहीं अऊ ओमन तोला कहिहीं, ‘जऊन गदहामन ला तेंह खोजे बर गे रहय, ओमन मिल गे हवंय। अऊ अब तोर ददा ह गदहामन के चिंता छोंड़के तोर चिंता करत हवय। ओह पुछत हे, “मेंह अपन बेटा बर का करंव?” ’
1SA 10:3 “फेर उहां ले, तें आघू बढ़बे अऊ ताबोर के बड़े रूख करा हबरबे, तब तीन झन परमेसर के अराधना करे बर बेतेल सहर जावत उहां तोला मिलहीं। ओमा के एक झन ह तीन ठन छेरी-पीला, दूसर ह तीन ठन रोटी, अऊ तीसर ह चाम के बोतल म अंगूर के मंद धरे होही।
1SA 10:4 ओमन तोर कुसल-मंगल पुछे के बाद तोला दू ठन रोटी दीहीं, अऊ तेंह ओला ओमन करा ले स्वीकार करबे।
1SA 10:5 “ओकर बाद, तेंह परमेसर के गिबा म जाबे, जिहां पलिस्तीमन के एक चउकी हवय। अऊ जब तेंह उहां नगर म हबरबे, त तोला अगमजानीमन के एक दल ऊंचहा जगह ले उतरत मिलही, अऊ ओमन के आघू म सितार, डफली, बांसुरी अऊ बीना बजत होही; अऊ ओमन अगमबानी करत होहीं।
1SA 10:6 तब यहोवा के आतमा तोर ऊपर बल से उतरही, अऊ तेंह ओमन के संग अगमबानी करबे, अऊ तेंह बदलके एक अलग मनखे बन जाबे।
1SA 10:7 जब ये चिनहांमन पूरा हो जाहीं, तब तोला जऊन काम करे बर मिलथे, ओला कर, काबरकि परमेसर ह तोर संग हवय।
1SA 10:8 “तें मोर ले आघू गिलगाल नगर ला जा। मेंह होम-बलिदान अऊ मेल-बलिदान चघाय बर तोर करा खाल्हे जरूर आहूं, पर तें सात दिन तक मोर रसता देखत रहिबे, जब तक कि मेंह आके तोला नइं बतावंव कि तोला का करना हे।”
1SA 10:9 जब साऊल ह समूएल करा ले जाय बर मुड़िस, त परमेसर ह साऊल के मन ला बदल दीस, अऊ ओ जम्मो चिनहांमन ओहीच दिन पूरा होईन।
1SA 10:10 जब ओ अऊ ओकर सेवक गिबा करा हबरिन, त अगमजानीमन के एक दल ओला मिलिस; अऊ परमेसर के आतमा ओकर ऊपर बल से उतरिस, अऊ ओह ओमन के संग अगमबानी करे लगिस।
1SA 10:11 जब ओ जम्मो, जऊन मन ओला पहिली ले जानत रिहिन, ये देखिन कि ओह अगमजानीमन के संग अगमबानी करत हवय, त ओमन आपस म कहन लगिन, “कीस के बेटा ला ये का हो गे हे? का साऊल घलो अगमजानीमन म ले एक झन अय?”
1SA 10:12 उहां के रहइया एक मनखे ह जबाब दीस, “अऊ कोन ह ओमन के ददा अय?” एकरसेति येह एक अनमोल बानी बन गीस, “का साऊल घलो अगमजानीमन म ले एक झन अय?”
1SA 10:13 साऊल ह अगमबानी करे के बाद, ऊंचहा जगह म चल दीस।
1SA 10:14 तब साऊल के कका ह ओकर अऊ ओकर सेवक ले पुछिस, “तुमन कहां चले गे रहेव?” साऊल ह कहिस, “हमन तो गदहामन ला खोजे बर गे रहेंन, पर जब हमन ला गदहामन नइं मिलिन, त हमन समूएल करा गेंन।”
1SA 10:15 साऊल के कका ह कहिस, “मोला बता कि समूएल ह तोला का कहिस।”
1SA 10:16 साऊल ह अपन कका ले कहिस, “ओह हमन ला बिसवास देवाके कहिस कि गदहामन मिल गे हवंय।” पर समूएल ह ओकर राजा बने के बारे म जऊन बात कहे रिहिस, ओह ओ बात अपन कका ला नइं बताईस।
1SA 10:17 तब समूएल ह इसरायल के मनखेमन ला मिसपा म यहोवा करा बलाईस
1SA 10:18 अऊ ओमन ला कहिस, “यहोवा, इसरायल के परमेसर ह अइसने कहत हे: ‘मेंह इसरायल ला मिसर देस ले निकाल लानेंव, अऊ मेंह तुमन ला मिसर के हांथ ले, अऊ ओ जम्मो राजमन के हांथ ले छोंड़ांय, जऊन मन तुम्हर ऊपर अतियाचार करत रिहिन।’
1SA 10:19 पर तुमन अब अपन परमेसर ला तियाग दे हवव, जऊन ह तुमन ला तुम्हर जम्मो बिपत्ति अऊ संकट म बचाथे। अऊ तुमन कहे हवव, ‘हमर ऊपर एक राजा ठहिरा दे।’ एकरसेति, अब तुमन अपन-अपन गोत्र अऊ कुल के मुताबिक यहोवा के आघू म ठाढ़ हो जावव।”
1SA 10:20 जब समूएल ह जम्मो इसरायल ला गोत्रमन के मुताबिक आघू म ले आईस, त बिनयामीन के गोत्र म चिट्ठी निकलिस।
1SA 10:21 तब ओह बिनयामीन के गोत्र ला कुल-कुल करके आघू म लानिस, अऊ चिट्ठी ह मतरी के कुल म निकलिस। आखिर म चिट्ठी ह कीस के बेटा साऊल के नांव म निकलिस। पर जब ओमन ओला खोजिन, त ओह नइं मिलिस।
1SA 10:22 एकरसेति ओमन फेर यहोवा ले पुछिन, “का ओ मनखे ह इहां आ गे हवय?” अऊ यहोवा ह कहिस, “हव, ओह अपनआप ला सामान के बीच म लुकाय हवय।”
1SA 10:23 तब ओमन दऊड़के गीन अऊ ओला बाहिर निकालिन, अऊ जब ओह मनखेमन के बीच म ठाढ़ होईस, त ओह अतेक ऊंचहा रिहिस कि आने जम्मो मनखेमन ओकर कंधा तक आवत रिहिन।
1SA 10:24 समूएल ह जम्मो मनखेमन ला कहिस, “का तुमन यहोवा के चुने मनखे ला देखत हव? जम्मो मनखे म ओकर सहीं अऊ कोनो नइं एं?” तब मनखेमन चिचियाके कहिन, “राजा चिरंजीव रहय!”
1SA 10:25 तब समूएल ह मनखेमन ला राजपद के अधिकार अऊ काममन के बारे म बताईस। ओह ओमन ला एक ठन चामपट्टी म लिखके यहोवा के आघू म रख दीस। तब समूएल ह जम्मो मनखेमन ला अपन-अपन घर जाय बर बिदा करिस।
1SA 10:26 साऊल घलो अपन घर गिबा ला चल दीस, अऊ ओकर संग साहसी मनखेमन के एक दल घलो गीस, जेमन के मन ला परमेसर ह उभारे रिहिस।
1SA 10:27 पर कुछू दुस्ट मनखेमन कहिन, “ये मनखे ह हमन ला कइसे बचाही?” ओमन ओला तुछ जानिन अऊ ओकर करा भेंट नइं लानिन। पर साऊल ह चुपेचाप रिहिस।
1SA 11:1 तब अमोनी राज के नाहास ह चढ़ई करके गिलाद के याबेस सहर के बिरूध म डेरा डालिस। अऊ याबेस के जम्मो मनखेमन नाहास ला कहिन, “हमर संग एक करार कर, अऊ हमन तोर अधीन म रहिबो।”
1SA 11:2 पर अमोनी नाहास ह ओमन ले कहिस, “मेंह तुमन ले एक सर्त म करार करहूं कि मेंह तुमन जम्मो झन के जेउनी आंखी ला फोरे के दुवारा जम्मो इसरायल ला कलंकित करहूं।”
1SA 11:3 याबेस के अगुवामन ओला कहिन, “हमन ला सात दिन के मोहलत दे ताकि हमन जम्मो इसरायल म दूतमन ला पठो सकन; यदि हमन ला कोनो बचानेवाला नइं मिलही, त हमन तोर अधीन हो जाबो।”
1SA 11:4 जब दूतमन साऊल के गिबा म आके मनखेमन ला ये सर्त के बारे म बताईन, त ओ जम्मो झन चिचिया-चिचियाके रोईन।
1SA 11:5 ओतेक बेरा साऊल ह बईलामन के पाछू-पाछू खेत ले आवत रहय; अऊ साऊल ह पुछिस, “मनखेमन ला का होईस कि ओमन रोवत हवंय?” तब ओमन याबेस के मनखेमन के कहे बात ओला सुनाईन।
1SA 11:6 ये खबर सुनत ही साऊल ऊपर परमेसर के आतमा बल से उतरिस, अऊ ओकर गुस्सा ह भड़क गीस।
1SA 11:7 ओह एक जोड़ी बईला ला लेके ओमन ला काटके कुटा-कुटा करिस, अऊ ये कहिके दूतमन के हांथ म इसरायल के जम्मो देस म दूतमन ला पठोईस, “जऊन कोनो साऊल अऊ समूएल के पाछू नइं चलही, ओकर बईलामन के संग घलो अइसने ही करे जाही।” तब यहोवा के आतंक मनखेमन ऊपर फईल गीस अऊ ओमन एक मन होके निकल आईन।
1SA 11:8 तब साऊल ह ओमन ला बेजेक म गनिस, अऊ इसरायल के मनखेमन तीन लाख अऊ यहूदा के मनखेमन तीस हजार होईन।
1SA 11:9 ओमन, जऊन दूतमन उहां आय रिहिन, ओमन ला कहिन, “तुमन गिलाद म याबेस के मनखेमन ला कहव, ‘कल घाम बाढ़े के बेरा, तुमन के छुटकारा होही।’ ” जब दूतमन जाके याबेस के मनखेमन ला ये बात बताईन, त ओमन खुस होईन।
1SA 11:10 याबेस के मनखेमन अमोनी मनखेमन ला कहिन, “कल हमन अपनआप ला तुम्हर अधीन कर देबो, अऊ तब तुमन हमर संग जो चाहव, ओ कर सकत हव।”
1SA 11:11 ओकर दूसर दिन साऊल ह अपन मनखेमन के तीन ठन दल बनाईस; अऊ रथिया के आखिरी पहर म, ओमन अमोनीमन के डेरा म हमाईन अऊ घाम के बाढ़त तक ओमन के कतल करत गीन। जऊन मन बांचके निकल गीन, ओमन अइसने तितिर-बितिर होईन कि ओमन के दू झन एक संग कोनो मेर नइं बांचिन।
1SA 11:12 तब मनखेमन समूएल ला कहिन, “जऊन मनखेमन कहे रिहिन, ‘का साऊल हमर ऊपर राज करही?’ ओमन ला हमर हांथ म सऊंप दे कि हमन ओमन ला मार डारन।”
1SA 11:13 पर साऊल ह कहिस, “आज के दिन कोनो घलो मारे नइं जावय, काबरकि आज यहोवा ह इसरायलीमन ला छुटकारा दे हवय।”
1SA 11:14 तब समूएल ह मनखेमन ला कहिस, “आवव, हमन गिलगाल ला जावन अऊ उहां राजपद ला नवां तरीका ले स्थापित करन।”
1SA 11:15 एकरसेति जम्मो मनखेमन गिलगाल ला गीन अऊ उहां यहोवा के आघू म साऊल ला राजा बनाईन। उहां ओमन यहोवा ला मेल-बलिदान चघाईन, अऊ साऊल अऊ जम्मो इसरायलीमन एक बड़े उत्सव करिन।
1SA 12:1 समूएल ह जम्मो इसरायलीमन ला कहिस, “जऊन कुछू तुमन मोर ले कहेव, ओ जम्मो बात ला मेंह सुनेंव अऊ तुम्हर ऊपर एक राजा ठहिरांय।
1SA 12:2 अब तुम्हर करा तुम्हर अगुवा के रूप म एक राजा हवय। अब मेंह, डोकरा हो गे हवंव अऊ मोर चुंदीमन पाक गे हवंय, अऊ मोर बेटामन इहां तुम्हर संग हवंय। मेंह अपन लड़कपन ले लेके आज तक तुम्हर अगुवा रहे हंव।
1SA 12:3 इहां में ठाढ़े हंव। तुमन यहोवा अऊ ओकर अभिसिक्त राजा के आघू म मोर बिरूध गवाही देवव। मेंह काकर बईला ला ले लेय हंव? या काकर गदहा ला ले लेय हंव? या काकर ऊपर अंधेर करे हंव? या कोन ला सताय हंव? या काकर हांथ ले अपन आंखी ला बंद करे बर घूस ले हंव? कहूं मेंह येमा के कोनो चीज करे हवंव, त बतावव; मेंह ओकर भरती दूहूं?”
1SA 12:4 ओमन कहिन, “तेंह न तो हमर ऊपर अंधेर करे हस अऊ न ही हमन ला सताय हस। अऊ न ही काकरो हांथ ले कुछू घूस ले हस।”
1SA 12:5 समूएल ह ओमन ला कहिस, “आज के दिन यहोवा गवाह हवय, अऊ ओकर अभिसिक्त राजा घलो ये बात के गवाह हवय कि तुमन ला मोर बिरूध म कुछू नइं मिलिस।” ओमन कहिन, “हव, ओह गवाह हवय।”
1SA 12:6 तब समूएल ह मनखेमन ला कहिस, “येह यहोवा ए, जऊन ह मूसा अऊ हारून ला ठहिराईस अऊ तुम्हर पुरखामन ला मिसर देस ले निकालके लानिस।
1SA 12:7 अब तुमन इहां ठाढ़े रहव, काबरकि मेंह यहोवा के आघू म ओकर ओ जम्मो धरमी काममन के बारे म तुमन ला बताहूं, जेला ओह तुम्हर अऊ तुम्हर पुरखामन के संग करे हवय।
1SA 12:8 “याकूब के मिसर म जाय के बाद, तुम्हर पुरखामन यहोवा ले मदद बर गोहार लगाईन, अऊ यहोवा ह मूसा अऊ हारून ला पठोईस, जऊन मन तुम्हर पुरखामन ला मिसर ले निकालके लानिन अऊ ये जगह म बसाईन।
1SA 12:9 “पर ओमन यहोवा अपन परमेसर ला भुला गीन; एकरसेति ओह ओमन ला हासोर सहर के सेनापति सीसरा, अऊ पलिस्तीमन अऊ मोआब के राजा के अधीन कर दीस; अऊ येमन ओमन के संग लड़िन।
1SA 12:10 तब तुम्हर पुरखामन यहोवा ला गोहार पारके कहिन, ‘हमन पाप करे हवन; हमन यहोवा ला तियागके बाल देवता अऊ असतोरेत देवीमन के सेवा करे हवन; पर अब तेंह हमन ला हमर बईरीमन के हांथ ले छोंड़ा, अऊ हमन तोर सेवा करबो।’
1SA 12:11 तब यहोवा ह यरूब्बाल, बाराक, यिप्तह अऊ समूएल ला पठोईस अऊ तुमन ला तुम्हर चारों कोति के बईरीमन के हांथ ले छोंड़ाईस, जेकर ले तुमन निडर रहे लगेव।
1SA 12:12 “पर जब तुमन देखेव के अमोनीमन के राजा नाहास ह तुम्हर ऊपर चढ़ई करत हवय, त तुमन मोला कहेव, ‘नइं, हमर ऊपर राज करे बर हमन एक राजा चाहत हन’ हालाकि यहोवा तुम्हर परमेसर ह तुम्हर राजा रिहिस।
1SA 12:13 अब तुम्हर चुने ओ राजा ह इहां हवय, जेकर बर तुमन मोर ले पराथना करे रहेव; देखव, यहोवा ह तुम्हर ऊपर एक राजा ठहिराय हवय।
1SA 12:14 यदि तुमन यहोवा के भय मानथव अऊ ओकर सेवा करथव अऊ ओकर बात मानथव अऊ ओकर बिरोध म बिदरोह नइं करव, अऊ यदि तुमन अऊ ओ राजा, जऊन ह तुम्हर ऊपर राज करथे, दूनों यहोवा तुम्हर परमेसर के पाछू चलथव, त बने बात ए!
1SA 12:15 पर यदि तुमन यहोवा के बात नइं मानहू, अऊ ओकर बिरोध म बिदरोह करहू, त फेर जइसने ओकर हांथ तुम्हर पुरखामन के बिरूध म उठे रिहिस, वइसने तुम्हर बिरूध म घलो उठही।
1SA 12:16 “एकरसेति, अब तुमन ठाढ़े रहव अऊ ये बड़े काम ला देखव, जेला यहोवा ह तुम्हर आंखी के आघू म करइया हवय!
1SA 12:17 का अभी गहूं लुवई नइं होवत हे? मेंह यहोवा ले बिनती करहूं कि ओह बादर गरजाय अऊ पानी बरसाय। अऊ तब तुमन जानहू कि एक राजा ला मांगके तुमन यहोवा के नजर म कतेक बड़े खराप काम करे हवव।”
1SA 12:18 तब समूएल ह यहोवा ले बिनती करिस, अऊ ओहीच दिन यहोवा ह बादर गरजाईस अऊ पानी गिराईस। एकरसेति जम्मो मनखेमन ऊपर यहोवा अऊ समूएल के भय छा गीस।
1SA 12:19 तब जम्मो मनखेमन समूएल ला कहिन, “यहोवा तोर परमेसर ले अपन सेवकमन बर पराथना कर, ताकि हमन झन मरन, काबरकि हमन एक राजा मांगके अपन जम्मो पाप म एक अऊ बुरई जोड़ ले हवन।”
1SA 12:20 समूएल ह कहिस, “झन डरव, तुमन ये जम्मो बुरई तो करे हवव; पर अब यहोवा के पाछू चले बर झन छोंड़व, पर अपन पूरा मन से यहोवा के सेवा करव।
1SA 12:21 बेकार के मूरतीमन के पाछू झन चलव। ओमन तुम्हर कुछू भलई नइं कर सकंय, अऊ न ही ओमन तुमन ला बचा सकंय, काबरकि ओमन बेकार के चीज अंय।
1SA 12:22 यहोवा ह अपन बड़े नांव के खातिर अपन मनखेमन ला नइं छोंड़य, काबरकि यहोवा ह तुमन ला अपन बनाके खुस होईस हे।
1SA 12:23 मोर ले ये बात ह दूरिहा रहय कि मेंह तुम्हर बर पराथना नइं करके यहोवा के बिरूध म पाप करंव। अऊ मेंह तुमन ला सिखाहूं कि कोन ह बने अऊ सही रद्दा अय।
1SA 12:24 पर जरूरी अय कि तुमन यहोवा के आदर करव अऊ ईमानदारी से अपन पूरा मन सहित ओकर सेवा करव; ये तो सोचव कि ओह तुम्हर बर कतेक बड़े-बड़े काम करे हवय।
1SA 12:25 पर तभो ले यदि तुमन बुरई करते रहिहू, त तुमन अऊ तुम्हर राजा दूनों के दूनों नास हो जाहू।”
1SA 13:1 साऊल ह तीस साल के रिहिस जब ओह राजा बनिस, अऊ ओह इसरायल ऊपर बियालीस साल तक राज करिस।
1SA 13:2 साऊल ह इसरायलीमन ले तीन हजार मनखे ला चुनिस; ओमा के दू हजार साऊल के संग मिकमास सहर म अऊ बेतेल के पहाड़ म रिहिन, अऊ एक हजार योनातन के संग बिनयामीन के गिबा सहर म रिहिन। बाकि मनखेमन ला ओह ओमन के घर वापिस पठो दीस।
1SA 13:3 तब योनातन ह गिबा म पलिस्तीमन के चउकी ऊपर हमला करिस, अऊ पलिस्तीमन येकर बारे म सुनिन। तब साऊल ह जम्मो देस म तुरही बजवाके ये कहिस, “इबरी मनखेमन सुनंय!”
1SA 13:4 अऊ जम्मो इसरायलीमन ये खबर ला सुनिन कि साऊल ह पलिस्तीमन के चउकी ऊपर हमला करे हवय, अऊ पलिस्तीमन इसरायलीमन ले नफरत करत हवंय। अऊ मनखेमन ला गिलगाल म साऊल के संग चले बर बलाय गीस।
1SA 13:5 पलिस्तीमन इसरायलीमन के संग लड़े बर जूरिन, अऊ ओमन करा तीन हजार रथ, छै हजार सारथी, अऊ समुंदर तीर के बालू सहीं अनगिनत सैनिक रहंय। ओमन ऊपर जाके बेत-आवेन के पूरब कोति मिकमास म डेरा डालिन।
1SA 13:6 जब इसरायलीमन देखिन कि ओमन संकट म हवंय अऊ ओमन के सेना ह घिर गे हवय, त ओमन खोड़रा अऊ झाड़ीमन म, पथरामन के बीच म, अऊ गड्ढा अऊ पानी के जगहमन म छुपे लगिन।
1SA 13:7 अऊ कुछू इबरीमन यरदन नदी पार करके गाद अऊ गिलाद के इलाका म चल दीन। पर साऊल ह गिलगाल म ही रह गीस, अऊ ओकर संग के जम्मो सैनिक दलमन डर के मारे कांपत रहंय।
1SA 13:8 समूएल के ठहिराय समय, याने कि सात दिन तक साऊल ह इंतजार करिस; पर समूएल ह गिलगाल म नइं आईस, अऊ साऊल के आदमीमन एती-ओती होय लगिन।
1SA 13:9 एकरसेति ओह कहिस, “मोर करा होम-बलिदान अऊ मेल-बलिदानमन ला लानव।” अऊ साऊल ह होम-बलिदान चघाईस।
1SA 13:10 जइसने ही ओह बलिदान चघाय ला खतम करिस, वइसने ही समूएल ह उहां हबरिस, अऊ साऊल ह ओकर ले भेंट करे बर बाहिर निकलिस।
1SA 13:11 समूएल ह पुछिस, “तेंह ये का करे हस?” साऊल ह कहिस, “जब मेंह देखेंव कि आदमीमन एती-ओती होवत हवंय, अऊ तेंह अपन ठहिराय समय म नइं आय, अऊ पलिस्तीमन मिकमास म जूरत रिहिन,
1SA 13:12 त मेंह सोचेंव, ‘पलिस्तीमन गिलगाल म मोर ऊपर आ पड़हीं, अऊ मेंह यहोवा ले मदद बर बिनती घलो नइं करे हवंव।’ एकरसेति दबाव म आके मेंह होम-बलिदान चघांय।”
1SA 13:13 समूएल ह कहिस, “तेंह मुरूखता के काम करे हस; यहोवा तोर परमेसर ह तोला जऊन हुकूम दे रिहिस, ओला तेंह नइं माने हस; यदि तेंह माने होते, त ओह तोर राज ला इसरायलीमन ऊपर सदा बनाय रखतिस।
1SA 13:14 पर अब तोर राज ह इस्थिर नइं रहय; यहोवा ह अपन बर एक अइसने मनखे ला खोज ले हवय, जऊन ह ओकर मन के मुताबिक हवय अऊ ओह ओला अपन मनखेमन ऊपर परधान होय बर ठहिराय हवय, काबरकि तेंह यहोवा के हुकूम ला नइं मानय।”
1SA 13:15 तब समूएल ह गिलगाल ले चल दीस अऊ बिनयामीन के गिबा म गीस, अऊ साऊल ह अपन संग के मनखेमन के गनती करिस। ओमन करीब छै सौ मनखे रिहिन।
1SA 13:16 साऊल अऊ ओकर बेटा योनातन अऊ ओमन के संग के मनखेमन बिनयामीन के गिबा म ठहिरे रिहिन, जबकि पलिस्तीमन मिकमास म डेरा डाले रिहिन।
1SA 13:17 पलिस्तीमन के डेरा ले हमला करइयामन तीन दल बनाके निकलिन। एक दल ह सूआल देस के तीर म ओपरा सहर कोति गीस,
1SA 13:18 दूसर दल ह बेत-होरोन सहर कोति गीस, अऊ तीसर दल ह सुन्ना जगह के सामने सबोईम के घाटी ला धियान नइं देवत सीमना म लगे देस कोति गीस।
1SA 13:19 इसरायल के जम्मो देस म लोहार कहीं नइं मिलत रिहिन, काबरकि पलिस्तीमन कहे रिहिन, “इबरीमन तलवार या भाला बनावन झन पावंय!”
1SA 13:20 एकरसेति जम्मो इसरायलीमन अपन नांगर के फाल, गैंती, टंगिया, अऊ हंसियामन ला धार करवाय बर पलिस्तीमन करा जावंय।
1SA 13:21 ओमन नांगर के फाल अऊ गैंती ला धार करवाय के एक सेकेल के दू-तिहाई भाग, अऊ तिरसूल अऊ टंगिया अऊ तुतारी ला धार करवाय बर एक सेकेल के एक तिहाई भाग देवत रिहिन।
1SA 13:22 एकरसेति लड़ई के दिन, साऊल अऊ योनातन के संग के कोनो सैनिक के हांथ म तलवार या भाला नइं रिहिस; सिरिप साऊल अऊ ओकर बेटा योनातन करा तलवार अऊ भाला रिहिस।
1SA 13:23 पलिस्तीमन के सैनिक के एक दल ह निकलके मिकमास के घाटी म गे रिहिस।
1SA 14:1 एक दिन साऊल के बेटा योनातन ह हथियार ढोवइया जवान ले कहिस, “आ, हमन ओती पलिस्तीमन के सेना के चउकी करा जाबो।” पर योनातन ह ये बात अपन ददा ला नइं बताईस।
1SA 14:2 साऊल ह गिबा के सीमना म मिगरोन म अनार के एक रूख के खाल्हे म ठहिरे रिहिस। अऊ ओकर संग म करीब छै सौ आदमी रिहिन,
1SA 14:3 ओमन म अहियाह घलो रिहिस, जऊन ह एपोद पहिरे रिहिस। ओह ईकाबोद के भाई अहीतूब के एक बेटा रिहिस; अहीतूब ह पीनहास के बेटा अऊ पीनहास ह ओ एली के बेटा रिहिस, जऊन ह सीलो म यहोवा के पुरोहित रिहिस। पर कोनो नइं जानत रिहिन कि योनातन ह चले गे हवय।
1SA 14:4 जऊन घाटी ला पार करके योनातन ह पलिस्तीमन के चउकी करा जाय चाहत रिहिस, ओ घाटी के दूनों कोति एक-एक खड़े चट्टान रिहिस; एक चट्टान के नांव बोसेस अऊ दूसर के नांव सेने रिहिस।
1SA 14:5 एक चट्टान ह उत्तर कोति मिकमास के आघू, अऊ दूसर चट्टान ह दक्खिन कोति गेबा के आघू म निकले रिहिस।
1SA 14:6 तब योनातन ह अपन हथियार ढोवइया जवान ला कहिस, “आ, हमन ओ खतनारहित मनखेमन के सेना के चउकी करा जाबो। हो सकथे, यहोवा ह हमर मदद करय। यदि यहोवा ह बचाही, त कोनो रूकावट नइं डाल सकंय, चाहे ओह अब्बड़ मनखेमन के दुवारा बचावय या थोरकन मनखेमन के दुवारा।”
1SA 14:7 ओकर हथियार ढोवइया ह कहिस, “जइसने तेंह सोचत हस, वइसने कर; चल, मेंह तोर संग अपन मन अऊ आतमा सहित हंव।”
1SA 14:8 योनातन ह कहिस, “त फेर आ, हमन नाहकके ओमन कोति जाबो कि ओमन हमन ला देखंय।
1SA 14:9 यदि पलिस्तीमन हमन ला कहिथें, ‘उहां ठहिरव, जब तक कि हमन तुम्हर करा नइं आ जावन,’ तब हमन रूक जाबो अऊ ओमन करा नइं जाबो।
1SA 14:10 पर यदि ओमन कहिथें, ‘हमर करा आवव,’ त हमन ओमन करा ऊपर जाबो, काबरकि ओह हमर बर चिनहां होही कि यहोवा ह ओमन ला हमर हांथ म कर दे हवय।”
1SA 14:11 तब ओ दूनों अपनआप ला पलिस्तीमन के चउकी के नजर म लानिन। तब पलिस्तीमन कहिन, “देखव! इबरी मनखेमन ओ बिलमन ले निकलके आवत हें, जिहां ओमन लुकाय रिहिन।”
1SA 14:12 चउकी के मनखेमन योनातन अऊ ओकर हथियार ढोवइया ला चिचियाके कहिन, “हमर करा आवव अऊ हमन तुमन ला एक पाठ पढ़ाबो।” तब योनातन ह अपन हथियार ढोवइया ला कहिस, “मोर पाछू ऊपर आ जा; यहोवा ह ओमन ला इसरायलीमन के हांथ म कर दे हवय।”
1SA 14:13 योनातन ह अपन हांथ अऊ गोड़ के सहारा लेके ऊपर चघिस, अऊ ओकर हथियार ढोवइया घलो ओकर पाछू-पाछू चघ गीस। पलिस्तीमन योनातन के आघू म गिरत गीन, अऊ ओकर हथियार ढोवइया ओकर पाछू-पाछू ओमन ला मारत गीस।
1SA 14:14 ओ पहिली हमला म, योनातन अऊ ओकर हथियार ढोवइया करीब आधा एकड़ जमीन म लगभग बीस मनखे ला मार डारिन।
1SA 14:15 तब जम्मो सेना म आतंक फईल गीस—जऊन मन डेरा अऊ भांठा म रहंय, अऊ जऊन मन सेना के चउकी अऊ हमला करइया दल म रहंय—अऊ भुइयां ह कांप गीस। ये आतंक ह परमेसर के दुवारा भेजे गे रिहिस।
1SA 14:16 साऊल के पहरेदारमन बिनयामीन के गिबा म देखिन कि सेना के मनखेमन चारों कोति तितिर-बितिर होवत हवंय।
1SA 14:17 त साऊल ह अपन संग के आदमीमन ला कहिस, “सेना के मनखेमन के गनती करके देखव कि कोन ह इहां नइं ए।” जब ओमन गनती करिन, त पाईन कि योनातन अऊ ओकर हथियार ढोवइया उहां नइं रिहिन।
1SA 14:18 तब साऊल ह अहियाह ला कहिस, “परमेसर के सन्दूक ला लान।” (ओ बेरा परमेसर के सन्दूक ह इसरायलीमन करा रिहिस।)
1SA 14:19 जब साऊल ह पुरोहित ले गोठियावत रिहिस, तब पलिस्तीमन के डेरा म हुल्लड़ अऊ बढ़त गीस। एकरसेति साऊल ह पुरोहित ले कहिस, “अपन हांथ ला वापिस खींच ले।”
1SA 14:20 तब साऊल अऊ ओकर जम्मो मनखेमन जूरिन अऊ लड़ई म गीन। उहां ओमन देखिन कि पलिस्तीमन के बीच म गड़बड़ हो गे रहय, अऊ ओमन एक-दूसर ला तलवार ले घात करत रहंय।
1SA 14:21 ओ इबरी जऊन मन पहिली पलिस्तीमन के संग रिहिन, अऊ ओमन के संग ओमन के डेरा म चल दे रिहिन, ओमन आके ओ इसरायलीमन संग मिल गीन, जऊन मन साऊल अऊ योनातन के संग रिहिन।
1SA 14:22 जब ओ जम्मो इसरायली, जऊन मन एपरैम के पहाड़ी देस म लुकाय रिहिन, ये सुनिन कि पलिस्तीमन भागत हवंय, त ओमन घलो लड़ई म सामिल होके पलिस्तीमन के पीछा करे म लग गीन।
1SA 14:23 ओ दिन, यहोवा ह इसरायलीमन ला बचाईस, अऊ लड़ई ह बेत-आवेन के बाहिर तक चल दीस।
1SA 14:24 पर इसरायली मनखेमन ओ दिन दुखी रिहिन, काबरकि साऊल ह मनखेमन ला किरिया खवाके कहे रिहिस, “सरापित होवय ओ मनखे, जऊन ह सांझ होय के पहिली कुछू खावय, या मोर बईरीमन ले बदला लेय के पहिली कुछू खावय!” एकरसेति कोनो घलो मनखे जेवन नइं करिन।
1SA 14:25 जम्मो सेना ह जंगल भीतर गीस, अऊ उहां भुइयां म मंधरस परे रहय।
1SA 14:26 जब ओमन जंगल भीतर गीन, त ओमन देखिन कि मंधरस ह चूहत रहय; तभो ले कोनो ओला नइं खाईस, काबरकि ओमन ला किरिया के डर रहय।
1SA 14:27 पर योनातन ह ये बात ला नइं जानत रिहिस कि ओकर ददा ह मनखेमन ला किरिया खवाय हवय, एकरसेति ओह अपन हांथ के लउठी के एक छोर ला मंधरस के छत्ता म बोरिस, अऊ अपन हांथ म मंधरस लेके खाय लगिस, अऊ ओकर आंखी म चमक आ गीस।
1SA 14:28 तब सैनिकमन ले एक झन ह ओला कहिस, “तोर ददा ह सेना के मनखेमन ला एक कठोर किरिया खवाके कहे हवय, ‘सरापित होवय ओ मनखे, जऊन ह आज कुछू खावय!’ ओकरे कारन मनखेमन थक गे हवंय।”
1SA 14:29 योनातन ह कहिस, “मोर ददा ह मनखेमन ला समस्या म डाल दे हवय। देख, मोर आंखी म कइसे चमक आ गीस, जब में ये मंधरस ला थोरकन चिखेंव त।
1SA 14:30 कतेक बढ़िया होय रहितिस, यदि मनखेमन अपन बईरीमन ले लूटे चीज म ले कुछू आज खाय रहितिन। का पलिस्तीमन के कतल करई ह अऊ बड़े बात नइं होतिस?”
1SA 14:31 ओ दिन, इसरायली सेना के मनखेमन पलिस्तीमन ला मिकमास ले लेके अय्यालोन तक मारे के बाद बहुंत थक गीन।
1SA 14:32 एकरसेति ओमन लूट के सामान ऊपर टूट पड़िन अऊ भेड़, गाय-बईला अऊ बछरूमन ला लेके भुइयां म मारिन अऊ ओमन ला खून समेत खाईन।
1SA 14:33 तब एक मनखे ह साऊल ला बताईस, “देख, मनखेमन खून समेत मांस ला खाके यहोवा के बिरूध म पाप करत हवंय।” तब साऊल ह ओमन ले कहिस, “तुमन बिसवासघात करे हवव; तुरते एक बड़े पथरा लुड़का के इहां लानव।”
1SA 14:34 फेर साऊल ह कहिस, “मनखेमन के बीच म जाके ओमन ला कहव, ‘हर एक जन अपन-अपन पसु अऊ भेड़मन ला साऊल राजा करा लानय, अऊ इहां ओमन ला मारके खावय। खून समेत मांस ला खाके यहोवा के बिरूध म पाप झन करव।’ ” एकरसेति जम्मो मनखेमन ओ रथिया अपन-अपन बईला ला ले जाके उहां मारिन।
1SA 14:35 तब साऊल ह यहोवा बर एक बेदी बनाईस; ओह पहिली बार बेदी बनाईस।
1SA 14:36 तब साऊल ह कहिस, “आवव, हमन खाल्हे जाके रथिया पलिस्तीमन के पीछा करन अऊ बिहान होवत तक ओमन ला लूटन; अऊ ओमन ले एको झन ला घलो जिंदा नइं छोड़न।” ओमन कहिन, “जऊन कुछू तोला बने लगय, ओही कर।” पर पुरोहित ह कहिस, “आवव, हमन इहां परमेसर ले पुछन।”
1SA 14:37 एकरसेति साऊल ह परमेसर ले पुछिस, “का में खाल्हे जाके पलिस्तीमन के पीछा करंव? का तेंह ओमन ला इसरायलीमन के हांथ म कर देबे?” पर ओ दिन परमेसर ह ओला जबाब नइं दीस।
1SA 14:38 एकरसेति साऊल ह कहिस, “सेना के जम्मो अगुवामन इहां आवव, अऊ हमन पता लगाबो कि हमर ले आज का पाप होईस हवय।
1SA 14:39 यहोवा जऊन ह इसरायल ला बचाथे, ओकर जिनगी के कसम, अऊ त अऊ यदि मोर बेटा योनातन घलो दोसी पाय जाथे, त निस्चय ओह घलो मार डारे जाही।” पर ओमा के कोनो कुछू नइं कहिस।
1SA 14:40 तब साऊल ह जम्मो इसरायलीमन ला कहिस, “तुमन एक तरफ ठाढ़ हो जावव; में अऊ मोर बेटा योनातन दूसर तरफ ठाढ़ होबो।” ओमन कहिन, “जऊन कुछू तोला बने लगत हे, ओही कर।”
1SA 14:41 तब साऊल ह यहोवा, इसरायल के परमेसर ले पराथना करिस, “तेंह काबर आज अपन सेवक ला जबाब नइं दे। यदि गलती मोर या मोर बेटा योनातन के अय, त ऊरीम म जबाब दे, पर यदि इसरायल के मनखेमन के गलती अय, त तुम्मीम म जबाब दे।” चिट्ठी ह योनातन अऊ साऊल के नांव म निकलिस, अऊ मनखेमन बांच गीन।
1SA 14:42 तब साऊल ह कहिस, “मोर अऊ मोर बेटा योनातन के नांव म चिट्ठी निकालव।” अऊ चिट्ठी योनातन के नांव म निकलिस।
1SA 14:43 तब साऊल ह योनातन ला कहिस, “मोला बता कि तेंह का करे हस।” योनातन ह ओला बताईस, “मेंह अपन लउठी के एक छोर म थोरकन मंधरस लेके चखे हंव। अऊ अब में जरूर मरहूं!”
1SA 14:44 साऊल ह कहिस, “हे योनातन यदि तेंह नइं मरबे, त परमेसर ह मोर संग अइसने ही करय, बरन एकर ले घलो जादा करय।”
1SA 14:45 पर मनखेमन साऊल ले कहिन, “का योनातन ला मार डारे जावय, जऊन ह इसरायल बर अइसने बड़े छुटकारा लाने हवय? अइसने कभू झन होवय! यहोवा के जिनगी के कसम, ओकर मुड़ के एक ठन चुंदी घलो भुइयां म गिरन नइं पाही; काबरकि ओह आज परमेसर के मदद ले ये करे हवय।” ये किसम ले मनखेमन योनातन ला बचा लीन, अऊ ओह नइं मारे गीस।
1SA 14:46 तब साऊल ह पलिस्तीमन के पीछा करई छोंड़ दीस, अऊ ओमन अपन इलाका म चल दीन।
1SA 14:47 जब साऊल के राज ह इसरायलीमन ऊपर इस्थिर हो गीस, तब ओह अपन चारों कोति के बईरी मोआबी, अमोनी, एदोमी, सोबा के राजामन, अऊ पलिस्तीमन ले लड़िस। जिहां कहूं घलो ओह गीस, हर जगह ओह जय पाईस।
1SA 14:48 ओह बीरता से लड़िस अऊ अमालेकीमन ला हराईस, अऊ इसरायलीमन ला ओमन के हांथ ले छोंड़ाईस, जऊन मन ओमन ला लूटे रिहिन।
1SA 14:49 साऊल के बेटामन योनातन, इसवी अऊ मलकी-सुआ रिहिन। ओकर बड़े बेटी के नांव मेरब, अऊ छोटे बेटी के नांव मीकल रिहिस।
1SA 14:50 साऊल के घरवाली के नांव अहीनोअम रिहिस, जऊन ह अहीमास के बेटी रिहिस। साऊल के सेना के सेनापति के नांव अबनेर रिहिस, जऊन ह नेर के बेटा रिहिस, अऊ नेर ह साऊल के कका रिहिस।
1SA 14:51 साऊल के ददा कीस अऊ अबनेर के ददा नेर, दूनों अबीएल के बेटा रिहिन।
1SA 14:52 साऊल ह अपन जिनगी भर पलिस्तीमन ले भारी लड़ई लड़ते रिहिस, अऊ जब भी साऊल कोनो बलवान अऊ हिम्मती मनखे ला देखय, त ओह ओला अपन सेवा म ले लेवय।
1SA 15:1 एक दिन समूएल ह साऊल ला कहिस, “यहोवा ह मोला पठोय रिहिस कि मेंह ओकर मनखे इसरायलीमन ऊपर तोला राजा के रूप म अभिसेक करंव; एकरसेति अब यहोवा के बचन ला सुन ले।
1SA 15:2 यहोवा सर्वसक्तिमान ह ये कहत हे: ‘मेंह अमालेकीमन ला ओ काम के सजा दूहूं, जेला ओमन इसरायलीमन के संग करिन कि जब इसरायलीमन मिसर देस ले आवत रिहिन, तब अमालेकीमन घात लगाके ओमन ऊपर हमला करिन।
1SA 15:3 एकरसेति अब तें जा अऊ अमालेकीमन ऊपर हमला कर अऊ ओमन के जम्मो चीज ला पूरा नास कर दे। ओमन ला झन छोंड़बे; मनखे, माईलोगन, लइका अऊ दूध पीयत लइका, गाय-बईला, भेड़, ऊंट अऊ गदहा, जम्मो ला मार डार।’ ”
1SA 15:4 एकरसेति साऊल ह मनखेमन ला बलाके ओमन ला तलाईम सहर म जूरे बर कहिस—उहां ओमन दू लाख पैदल चलइया सैनिक अऊ दस हजार यहूदा के मनखे रिहिन।
1SA 15:5 साऊल ह अमालेक सहर म गीस अऊ घाटी म घात लगाके बईठिस।
1SA 15:6 तब ओह केनीमन ले कहिस, “इहां ले चले जावव, अमालेकीमन ला छोंड़के चले जावव, ताकि मेंह तुमन ला ओमन के संग नास झन करंव; काबरकि तुमन जम्मो इसरायलीमन ऊपर दया करे रहेव, जब ओमन मिसर देस ले निकलके आवत रिहिन।” एकरसेति केनीमन अमालेकीमन के बीच म ले अलग हट गीन।
1SA 15:7 तब साऊल ह हवीला के इलाका ले लेके मिसर के पूरब के सीमना के लकठा म सूर तक, अमालेकीमन ऊपर हमला करिस।
1SA 15:8 ओह अमालेकीमन के राजा अगाग ला जीयत पकड़िस, अऊ ओकर जम्मो मनखेमन ला तलवार ले नास कर दीस।
1SA 15:9 पर साऊल अऊ ओकर सेना ह अगाग अऊ जम्मो बने चीजमन ला नइं मारिन, जइसे कि बने भेड़ अऊ गाय-बईला, मोटहा बछेड़ा अऊ मेढ़ा-पीलामन ला। येमन ला ओमन नास करे बर नइं चाहत रिहिन, पर जऊन चीजमन तुछ अऊ कमजोर रिहिन, ओमन ला साऊल अऊ ओकर सेना ह पूरा नास कर दीस।
1SA 15:10 तब यहोवा के ये बचन समूएल करा आईस:
1SA 15:11 “मेंह साऊल ला राजा बनाके पछतावत हंव, काबरकि ओह मोर पाछू चलना छोंड़ दे हवय अऊ मोर हुकूममन ला नइं मानत हवय।” समूएल ह गुस्सा होईस, अऊ ओ रात भर ओह यहोवा ले गोहार पारिस।
1SA 15:12 दूसर दिन बड़े बिहनियां समूएल ह उठिस अऊ साऊल ले भेंट करे बर गीस, पर ओला ये बताय गीस, “साऊल ह करमेल नगर ला चल दे हवय। उहां ओह अपन आदर म एक स्मारक बनवाय हवय अऊ लहुंटके खाल्हे गिलगाल चल दे हवय।”
1SA 15:13 जब समूएल ह साऊल करा हबरिस, त साऊल ह कहिस, “यहोवा ह तोला आसीस देवय! मेंह यहोवा के बचन ला पालन करे हवंव।”
1SA 15:14 पर समूएल ह कहिस, “तब भेड़मन के ये मिमियाना, जऊन ह मोर कान म पड़त हे, येह का ए? अऊ गाय-बईलामन के रम्भाना, जेला मेंह सुनत हंव, ये का ए?”
1SA 15:15 साऊल ह जबाब दीस, “सैनिकमन येमन ला अमालेकीमन ले इहां लाने हवंय; ओमन सबले बने भेड़ अऊ गाय-बईलामन ला बचाके रखे हवंय कि ओमन ला यहोवा तोर परमेसर ला बलिदान चघावंय, पर बाकि जम्मो ला हमन पूरा नास कर दे हवन।”
1SA 15:16 समूएल ह साऊल ला कहिस, “भइगे! बीते रथिया यहोवा ह मोला का कहिस, मेंह तोला बतावत हंव।” साऊल ह कहिस, “बता।”
1SA 15:17 समूएल ह कहिस, “हालाकि एक समय तेंह खुद अपन नजर म छोटे रहय, पर का तें इसरायल के गोत्रमन के मुखिया नइं बन गे? यहोवा ह इसरायल ऊपर राजा के रूप म तोर अभिसेक करिस।
1SA 15:18 अऊ यहोवा तोला एक खास काम करे बर ये कहिके पठोईस, ‘जा अऊ ओ दुस्ट अमालेकी मनखेमन ला पूरा नास कर दे; अऊ जब तक ओमन खतम नइं हो जावंय, तब तक ओमन के बिरूध लड़ई करते रह।’
1SA 15:19 त फेर तेंह यहोवा के बात काबर नइं मानय? तेंह काबर लूट के चीजमन ऊपर टूट पड़य अऊ यहोवा के नजर म खराप काम करय?”
1SA 15:20 तब साऊल ह कहिस, “पर मेंह तो यहोवा के बात ला माने हंव। जऊन खास काम यहोवा ह मोला दे रिहिस, ओला करे बर मेंह गेंव। मेंह अमालेकीमन ला पूरा नास कर देंव अऊ ओमन के राजा अगाग ला वापिस ले आनेंव।
1SA 15:21 पर सैनिकमन लूट म ले भेड़ अऊ गाय-बईलामन ला ले लीन, याने कि परमेसर के भक्ति म सबले बने चीजमन, ताकि ओ चीजमन ला गिलगाल म यहोवा तोर परमेसर बर बलिदान चघावंय।”
1SA 15:22 पर समूएल ह जबाब दीस: “का यहोवा ह होम-बलिदान अऊ बलिदानमन ले ओतेक खुस होथे जतेक कि ओकर बात ला माने ले होथे? हुकूम मनई ह बलिदान चघई ले, अऊ बात ला धियान देवई ह मेढ़ामन के चरबी ले घलो बने अय।
1SA 15:23 काबरकि बिदरोह करई ह सकुन-बिचार के पाप, अऊ घमंड करई ह मूरती-पूजा के पाप सहीं अय। काबरकि तेंह यहोवा के बचन ला नइं मानय, एकरसेति ओह तोला राजा के रूप म अस्वीकार करे हवय।”
1SA 15:24 तब साऊल ह समूएल ला कहिस, “मेंह पाप करे हवंव। मेंह यहोवा के हुकूम अऊ तोर बात ला नइं मानेंव। मेंह मनखेमन ले डरके ओमन के बात मानेंव।
1SA 15:25 पर अब मेंह तोर ले बिनती करत हंव कि मोर पाप ला छेमा कर अऊ मोर संग वापिस चल, ताकि मेंह यहोवा के अराधना करंव।”
1SA 15:26 पर समूएल ह ओला कहिस, “मेंह तोर संग वापिस नइं जावंव। तेंह यहोवा के बचन ला अस्वीकार करय, त यहोवा ह तोला इसरायल के राजा के रूप म अस्वीकार करे हवय।”
1SA 15:27 जब समूएल ह जाय बर मुड़िस, त साऊल ह ओकर कपड़ा के छोर ला धरिस, अऊ ओह चीरा गीस।
1SA 15:28 तब समूएल ह ओला कहिस, “यहोवा ह आज तोर ले इसरायल के राज ला टोर दीस अऊ येला तोर एक परोसी इसरायली ला दे दीस, जऊन ह तोर ले बने हवय।
1SA 15:29 जऊन ह इसरायल के महिमामय परमेसर अय, ओह लबारी नइं मारय या अपन मन ला नइं बदलय; काबरकि ओह कोनो मनखे नो हय कि अपन मन ला बदलय।”
1SA 15:30 साऊल ह बिनती करिस, “मेंह पाप करे हवंव; पर किरपा करके मोर मनखेमन के अगुवामन के आघू म अऊ इसरायल के आघू म मोर आदर कर; मोर संग वापिस चल, ताकि मेंह यहोवा तोर परमेसर के अराधना करंव।”
1SA 15:31 एकरसेति समूएल ह साऊल के संग वापिस गीस, अऊ साऊल ह यहोवा के अराधना करिस।
1SA 15:32 तब समूएल ह कहिस, “अमालेकीमन के राजा अगाग ला मोर करा लान।” अगाग ह संकली म बंधाय ओकर करा आईस। अऊ ओह सोचत रिहिस, “निस्चय ही खराप समय ह खतम हो गीस अऊ मेंह मिरतू ले बच गेंव।”
1SA 15:33 पर समूएल ह कहिस, “जइसे कि तोर तलवार ह माईलोगनमन ला बिगर लइका के कर दीस, वइसे ही तोर दाई घलो माईलोगनमन के बीच म बिगर लइका के होही।” अऊ समूएल ह अगाग ला गिलगाल म यहोवा के आघू म मार डारिस।
1SA 15:34 तब समूएल ह अपन घर रामा ला चल दीस, पर साऊल ह अपन नगर गिबा म अपन घर गीस।
1SA 15:35 एकर बाद, समूएल ह अपन जिनगी भर फेर कभू साऊल ले भेंट करे बर नइं गीस, हालाकि समूएल ह साऊल बर दुखी होवत रिहिस। अऊ यहोवा ह साऊल ला इसरायल के राजा बनाके पछताईस।
1SA 16:1 एक दिन यहोवा ह समूएल ला कहिस, “जब मेंह साऊल ला इसरायल के राजा के रूप म अस्वीकार करे हंव, त तें कब तक साऊल बर दुखी होते रहिबे? अपन सींग म तेल भर अऊ चल; मेंह तोला बैतलहम नगर के यिसै करा पठोवत हंव। मेंह ओकर बेटामन ले एक झन ला राजा होय बर चुने हंव।”
1SA 16:2 पर समूएल ह कहिस, “मेंह कइसे जा सकत हंव? यदि साऊल ह ये बात ला सुनही, त ओह मोला मार डारही।” यहोवा ह कहिस, “अपन संग एक बछिया ला ले अऊ कह, ‘मेंह यहोवा करा बलिदान चघाय बर आय हवंव।’
1SA 16:3 बलिदान करे बर यिसै ला घलो नेवता दे, अऊ मेंह तोला बताहूं कि का करना हे। जेला मेंह बताहूं, तेला तें मोर कोति ले अभिसेक करबे।”
1SA 16:4 समूएल ह वइसने करिस, जइसने यहोवा ह कहिस। जब समूएल ह बैतलहम हबरिस, त ओ नगर के अगुवामन ओकर ले मिलके कांपे लगिन। ओमन पुछिन, “का तें सांत मन से आय हवस?”
1SA 16:5 समूएल ह कहिस, “हव, सांति मन से; मेंह यहोवा ला बलिदान चघाय बर आय हवंव। तुमन अपनआप ला पबितर करके मोर संग बलिदान चघाय बर आवव।” तब ओह यिसै अऊ ओकर बेटामन ला पबितर करिस अऊ बलिदान चघाय बर ओमन ला नेवता दीस।
1SA 16:6 जब ओमन आईन, त ओह एलीआब ला देखिस अऊ सोचिस, “निस्चय, ये जो यहोवा के आघू म हवय, ओही ह ओकर अभिसिक्त जन अय।”
1SA 16:7 पर यहोवा ह समूएल ला कहिस, “ओकर रूप अऊ ओकर कद के ऊंचई के बारे म झन सोच, काबरकि मेंह ओला अस्वीकार करे हंव। यहोवा ह मनखेमन सहीं नइं देखय। मनखेमन तो बाहिरी रूप ला देखथें, पर यहोवा ह मनखे के मन ला देखथे।”
1SA 16:8 तब यिसै ह अबीनादाब ला बलाईस अऊ ओला समूएल के आघू म पठोईस। पर समूएल ह कहिस, “यहोवा ह येला घलो नइं चुने हवय।”
1SA 16:9 यिसै ह तब सम्मा ला पठोईस, पर समूएल ह कहिस, “यहोवा ह येला घलो नइं चुने हवय।”
1SA 16:10 ये किसम ले, यिसै ह अपन सात बेटामन ला समूएल के आघू म पठोईस, पर समूएल ह यिसै ला कहिस, “यहोवा ह येमन ला नइं चुने हवय।”
1SA 16:11 एकरसेति ओह यिसै ले पुछिस, “का तोर अतकेच बेटामन हवंय?” ओह जबाब दीस, “नइं, सबले छोटे ह अभी नइं आय हवय; ओह भेड़मन ला चरावत हे।” समूएल ह कहिस, “ओला बलाय बर कोनो ला भेज; जब तक ओह नइं आ जाही, तब तक हमन नइं बईठन।”
1SA 16:12 तब यिसै ह ओला बलाय बर एक झन ला पठोईस अऊ ओला लाय गीस। ओकर देहें ह दमकत रहय अऊ रूप ह सुघर अऊ सुडौल रहय। तब यहोवा ह कहिस, “उठ अऊ ओकर अभिसेक कर; ओह येहीच अय।”
1SA 16:13 एकरसेति समूएल ह तेल ले भरे सींग ला लीस अऊ ओकर भाईमन के आघू म ओकर अभिसेक करिस, अऊ ओ दिन ले लेके आघू घलो यहोवा के आतमा दाऊद ऊपर बल से उतरे लगिस। समूएल ह तब उठके रामा ला वापिस चल दीस।
1SA 16:14 यहोवा के आतमा ह साऊल ला छोंड़के चल दीस, अऊ यहोवा कोति ले एक दुस्ट आतमा ओला सताय लगिस।
1SA 16:15 साऊल के अधिकारीमन ओला कहिन, “देख, परमेसर कोति ले एक दुस्ट आतमा तोला सतावत हवय।
1SA 16:16 हमर मालिक ह इहां अपन सेवकमन ला हुकूम देवय कि ओमन कोनो बने बीना बजइया ला खोजके लानंय। जब-जब परमेसर कोति ले दुस्ट आतमा तोर ऊपर आवय, तब-तब ओह बीना बजावय, ताकि तोला बने लगय।”
1SA 16:17 एकरसेति साऊल ह अपन सहायकमन ला कहिस, “एक बने बीना बजइया ला खोजव अऊ ओला मोर करा लानव।”
1SA 16:18 तब सेवकमन ले एक झन ह जबाब देवत कहिस, “मेंह बैतलहम के रहइया यिसै के एक बेटा ला देखे हंव, जऊन ह बीना बजाय बर जानथे। ओह एक बहादुर मनखे अऊ योद्धा घलो अय। ओह समझ से गोठियाथे अऊ दिखे म सुघर हवय। अऊ यहोवा ह ओकर संग हवय।”
1SA 16:19 तब साऊल ह दूतमन के हांथ म यिसै करा ये खबर पठोईस, “अपन बेटा दाऊद ला मोर करा पठो, जऊन ह भेड़मन के संग म हवय।”
1SA 16:20 तब यिसै ह रोटी ले लदे एक गदहा, चाम के थैली म अंगूर के मंद अऊ बकरी के पीला लीस अऊ येमन ला अपन बेटा दाऊद के हांथ म साऊल करा पठो दीस।
1SA 16:21 दाऊद ह साऊल करा आईस अऊ ओकर सेवा म लग गीस। साऊल ह ओला बहुंत पसंद करिस, अऊ दाऊद ह साऊल के एक हथियार ढोवइया बन गीस।
1SA 16:22 तब साऊल ह यिसै करा ये खबर पठोईस, “दाऊद ला मोर सेवा म रहन दे, काबरकि मेंह ओकर ले खुस हवंव।”
1SA 16:23 जब भी परमेसर कोति ले साऊल ऊपर आतमा आवय, तब दाऊद ह अपन बीना ला लेके बजावय। तब साऊल ला अराम मिलय, ओला बने लगय, अऊ ओ दुस्ट आतमा ह ओला छोंड़ देवय।
1SA 17:1 एक दिन पलिस्तीमन लड़ई बर अपन सेना ला इकट्ठा करिन अऊ ओमन यहूदा देस के सोको नगर म जूरिन। ओमन सोको अऊ अजेका के बीच एपेस दम्मीम म डेरा डालिन।
1SA 17:2 साऊल अऊ इसरायलीमन घलो इकट्ठा होके एला नांव के घाटी म डेरा डालिन अऊ लड़ई बर पलिस्तीमन के बिरूध म पांति बांधिन।
1SA 17:3 पलिस्तीमन एक तरफ के पहाड़ी म अऊ इसरायलीमन दूसर तरफ के पहाड़ी म रहंय, अऊ ओमन के बीच म घाटी रहय।
1SA 17:4 तब पलिस्तीमन के छावनी ले गोलियत नांव के एक बीर ह निकलिस, जऊन ह गत नगर के रिहिस। ओकर ऊंचई छै क्यूबीट अऊ एक स्पान रिहिस।
1SA 17:5 ओकर मुड़ म पीतल के टोप रहय अऊ ओह एक पीतल के परत चढ़े झिलम पहिरे रिहिस, जेकर वजन पांच हजार सेकेल रिहिस;
1SA 17:6 ओकर गोड़मन म पीतल के कवच रहय, अऊ ओकर पीठ म बरछी लटकत रहय।
1SA 17:7 ओकर भाला ह बुनकर के डोंगी सहीं रहय अऊ ओ भाला के लोहा के फाल के वजन छै सौ सेकेल रहय, अऊ ओकर ढाल ला लेके एक झन ओकर आघू-आघू चलत रहय।
1SA 17:8 गोलियत ठाढ़ होईस अऊ इसरायली पांति के सैनिकमन ला चिचियाके कहिस, “तुमन इहां आके लड़ई बर काबर दल बांधे हव? का मेंह एक पलिस्ती नो हंव, अऊ तुमन साऊल के सेवक नो हव? तुमन अपन म ले एक झन ला चुनव अऊ ओला मोर करा आवन दव।
1SA 17:9 यदि ओह मोर ले लड़के मोला मार डारही, त हमन तुम्हर अधीन हो जाबो; पर यदि मेंह ओकर ऊपर जय पाके ओला मार डारंव, त फेर तुमन ला हमर अधीन होके हमर सेवा करना पड़ही।”
1SA 17:10 फेर ओ पलिस्ती ह कहिस, “मेंह आज इसरायली सेना ला ललकारत हंव! एक मनखे ला मोर करा पठोवव कि में ओकर संग लड़ंव।”
1SA 17:11 ओ पलिस्ती के बात ला सुनके साऊल अऊ जम्मो इसरायलीमन चिंतित होके बहुंत डरा गीन।
1SA 17:12 दाऊद ह यहूदा के बैतलहम नगर के ओ एपराती मनखे के बेटा रिहिस, जेकर नांव यिसै रिहिस। यिसै के आठ झन बेटा रिहिन अऊ ओह साऊल के समय म बहुंत डोकरा हो गे रिहिस।
1SA 17:13 यिसै के तीन बड़े बेटामन साऊल के पाछू होके लड़ई म गे रिहिन। ओकर पहिलांत बेटा एलीआब, दूसरा अबीनादाब, अऊ तीसरा सम्मा रिहिस।
1SA 17:14 दाऊद ह सबले छोटे रिहिस; तीनों बड़े बेटामन साऊल के सेना म सामिल हो गे रिहिन,
1SA 17:15 पर दाऊद ह साऊल मेर ले आ-जाके बैतलहम म अपन ददा के भेड़मन ला चरात रिहिस।
1SA 17:16 ओ पलिस्ती ह चालीस दिन तक बिहनियां अऊ सांझ के बेरा इसरायली सेना के आघू म जाके ठाढ़ होय करत रिहिस।
1SA 17:17 एक दिन यिसै ह अपन बेटा दाऊद ला कहिस, “ये एपा भर भूंजे अनाज अऊ दस ठन रोटी अपन भाईमन बर छावनी म जल्दी लेके जा।
1SA 17:18 अपन संग म पनीर के ये दस टिकिया ओमन के दल के सेनापति बर ले जा, अऊ तोर भाईमन कइसे हवंय, देखबे अऊ ओमन ले कुछू चिनहां लेके आबे।
1SA 17:19 साऊल अऊ तोर भाई अऊ जम्मो इसरायली मनखेमन एला नांव के घाटी म पलिस्तीमन ले लड़त हवंय।”
1SA 17:20 बड़े बिहनियां दाऊद ह उठिस अऊ भेड़-बकरीमन ला एक चरवाहा के हांथ म कर दीस अऊ अपन ददा यिसै के हुकूम के मुताबिक सामानमन ला लादके चल दीस। जब सेना ह निकलके लड़ई करे बर चिचियावत लड़ई के जगह म जावत रिहिस, तभे दाऊद ह छावनी म हबरिस।
1SA 17:21 तब इसरायली अऊ पलिस्तीमन एक-दूसर के आमने-सामने लड़ई बर पांति बांधत रिहिन।
1SA 17:22 दाऊद ह अपन सामान ला सामान के रखवार के हांथ म छोंड़के लड़ई के पांति करा दऊड़के गीस अऊ अपन भाईमन ले ओमन के हालचाल पुछे लगिस।
1SA 17:23 जब ओह ओमन के संग गोठियावत रिहिस, तभे गत के रहइया ओ पलिस्ती बीर, गोलियत अपन पांति म ले आघू आईस अऊ पहिले के सहीं लड़ई बर चिचियाय लगिस, अऊ दाऊद ह ओला सुनिस।
1SA 17:24 जब भी इसरायलीमन ओ मनखे ला देखंय, त ओ जम्मो झन डर के मारे ओकर करा ले भाग जावंय।
1SA 17:25 इसरायलीमन एक-दूसर ला कहत रिहिन, “का तुमन देखत हव कि ओ मनखे ह कइसे बार-बार निकलके आथे? ओह इसरायलीमन ला ललकारे बर आथे। जऊन कोनो ये मनखे ला मार डारही, ओला राजा ह बहुंत धन दीही। ओह अपन बेटी के बिहाव घलो ओकर संग कर दीही अऊ ओकर परिवार ला इसरायल के कर पटाना घलो नइं पड़ही।”
1SA 17:26 तब दाऊद ह अपन लकठा म खड़े सैनिकमन ले पुछिस, “ओ मनखे बर का करे जाही, जऊन ह ये पलिस्ती ला मारके इसरायल ले ये बेजत्ती ला दूर करही? ये खतनारहित पलिस्ती कोन ए कि जीयत परमेसर के सेना ला ललकारे?”
1SA 17:27 ओमन ओला ओहीच बात फेर बता दीन अऊ ओला जबाब दीन, “जऊन कोनो गोलियत ला मारही, ओकर बर अइसने करे जाही।”
1SA 17:28 जब दाऊद के सबले बड़े भाई, एलीआब ह ओला सैनिकमन ले गोठियावत सुनिस, त ओह दाऊद ऊपर अब्बड़ गुस्सा होईस अऊ ओकर ले पुछिस, “तें इहां काबर आय हवस? अऊ सुन्ना जगह म ओ थोरकन भेड़मन ला तेंह काकर करा छोंड़े हवस? मेंह जानत हंव कि तेंह कतेक घमंडी अस अऊ तोर मन म कतेक बुरई हवय; तेंह इहां सिरिप लड़ई देखे बर आय हवस।”
1SA 17:29 दाऊद ह कहिस, “अब मेंह का करे हंव? का मेंह बात भी नइं कर सकंव।”
1SA 17:30 तब दाऊद ह ओकर ले मुड़के आने सैनिक करा गीस अऊ ओहीच बात पुछे लगिस, अऊ मनखेमन ओला पहिले के सहीं जबाब दीन।
1SA 17:31 जब दाऊद के बात ला आने मन सुनिन, त ये बात साऊल ला घलो बताय गीस, अऊ साऊल ह दाऊद ला बलाय बर मनखे पठोईस।
1SA 17:32 तब दाऊद ह साऊल ला कहिस, “ये पलिस्ती के कारन कोनो मनखे निरास झन होवय; तोर सेवक ह जाके ओ पलिस्ती ले लड़ही।”
1SA 17:33 साऊल ह कहिस, “तेंह जाके ओ पलिस्ती के बिरूध लड़ नइं सकस; तेंह अभी सिरिप एक जवान अस, अऊ ओह लड़कपन ही ले एक लड़नेवाला बीर अय।”
1SA 17:34 पर दाऊद ह साऊल ला कहिस, “तोर सेवक ह अपन ददा के भेड़मन ला बहुंत समय ले चरावत आवत हे; अऊ जब भी कोनो सेर या भालू आके बरदी म ले भेड़ ला उठाके ले जावय,
1SA 17:35 त मेंह ओकर पीछा करके ओकर ऊपर वार करंव, अऊ भेड़ ला ओकर मुहूं ले छोड़ांव; जब ओह मोर ऊपर हमला करय, त मेंह ओकर चुंदी ला धरके ओकर ऊपर वार करंव अऊ ओला मार डारंव।
1SA 17:36 तोर सेवक ह सेर अऊ भालू दूनों ला मारे हवय; ये खतनारहित पलिस्ती ह ओमन ले एक ठन सहीं होही, काबरकि ओह जीयत परमेसर के सेना ला ललकारे हवय।
1SA 17:37 यहोवा, जऊन ह मोला सेर के पंजा अऊ भालू के पंजा ले बचाईस, ओह मोला ये पलिस्ती के हांथ ले घलो बचाही।” साऊल ह दाऊद ला कहिस, “जा, यहोवा तोर संग रहय।”
1SA 17:38 तब साऊल ह अपन कपड़ा दाऊद ला पहिराईस। ओह ओला झिलम अऊ ओकर मुड़ म पीतल के टोप पहिराईस।
1SA 17:39 तब दाऊद ह ओकर तलवार ला कपड़ा के ऊपर म कसिस अऊ एती-ओती चले के कोसिस करिस; काबरकि ओला वइसने चीज पहिरे के आदत नइं रिहिस। दाऊद ह साऊल ला कहिस, “येमन ला पहिरके मेंह नइं जा सकंव, काबरकि मोला येमन के आदत नइं ए।” एकरसेति दाऊद ह ओमन ला उतार दीस।
1SA 17:40 तब ओह अपन लउठी ला अपन हांथ म लीस, अऊ नरवा ले पांच ठन चिकना पथरा छांटके अपन चरवाहा झोला म धरिस, अऊ अपन गोफन हांथ म लेके ओ पलिस्ती कोति गीस।
1SA 17:41 इही दौरान, ओ पलिस्ती ह दाऊद के लकठा म आवन लगिस, अऊ ओकर ढाल धरइया ह ओकर आघू-आघू चलत रहय।
1SA 17:42 पलिस्ती ह दाऊद ला देखके ओला तुछ समझिस, काबरकि ओह एक लड़का ले थोरकन बड़े रिहिस अऊ ओकर बदन ह चमकत रहय अऊ ओह सुघर रहय।
1SA 17:43 पलिस्ती ह दाऊद ला कहिस, “का मेंह कुकुर अंव कि तेंह लउठी लेके मोर करा आय हवस?” अऊ पलिस्ती ह अपन देवतामन के नांव लेके दाऊद ला कोसन लगिस।
1SA 17:44 फेर पलिस्ती ह दाऊद ला ये घलो कहिस, “इहां आ, अऊ मेंह तोर मांस ला चिरई अऊ जंगली पसुमन ला दूहूं!”
1SA 17:45 दाऊद ह पलिस्ती ला कहिस, “तेंह तो मोर ले लड़े बर तलवार अऊ बरछी अऊ भाला लेके आय हवस, पर मेंह ओ यहोवा सर्वसक्तिमान, इसरायल के सेनामन के परमेसर के नांव म तोर बिरूध आय हवंव, जेला तेंह ललकारे हस।
1SA 17:46 आज यहोवा ह तोला मोर हांथ म कर दीही, अऊ मेंह तोला मारहूं, अऊ तोर मुड़ ला तोर देहें ले अलग कर दूहूं। आज के ही दिन मेंह पलिस्ती सेना के लासमन ला चिरई अऊ जंगली पसुमन ला दे दूहूं, तब जम्मो संसार के मनखेमन जानहीं कि इसरायल म एक परमेसर हवय।
1SA 17:47 ओ जम्मो, जऊन मन इहां जूरे हवंय, ओमन जान जाहीं कि येह तलवार या बरछी नो हय, जेकर दुवारा यहोवा ह बचाथे; काबरकि लड़ई तो यहोवा के अय, अऊ ओह तुमन जम्मो झन ला हमर हांथ म कर दीही।”
1SA 17:48 जब ओ पलिस्ती ह हमला करे बर दाऊद कोति आय लगिस, त दाऊद ह ओकर सामना करे बर तुरते दऊड़के लड़ई के पांति कोति गीस।
1SA 17:49 दाऊद ह अपन झोला ले एक ठन पथरा निकालिस, अऊ ओला गोफन म रखके पलिस्ती के माथा म अइसने मारिस कि पथरा ह ओकर माथा भीतर घुस गीस, अऊ ओ पलिस्ती ह भुइयां म मुहूं के बल गिरिस।
1SA 17:50 ये किसम ले, दाऊद ह अपन हांथ म बिगर कोनो तलवार के, एक गोफन अऊ एक पथरा के दुवारा ओ पलिस्ती ऊपर घात करिस अऊ ओला मार डारिस।
1SA 17:51 तब दाऊद ह दऊड़के गीस अऊ पलिस्ती ऊपर ठाढ़ हो गीस, अऊ ओह पलिस्ती के तलवार ला खींचके मियान ले निकालिस, अऊ ओला मारे के बाद, ओकर मुड़ ला ओही तलवार से काटके अलग कर दीस। जब पलिस्तीमन देखिन कि ओमन के सूरबीर ह मारे गे हे, त ओमन लहुंटके भागे लगिन।
1SA 17:52 तब इसरायल अऊ यहूदा के मनखेमन ललकारत एक संग आघू बढ़िन अऊ गत अऊ एकरोन सहर के कपाटमन तक पलिस्तीमन के पीछा करिन। अऊ पलिस्तीमन के लास ह सारैम के रद्दा ले लेके गत अऊ एकरोन तक परे रहय।
1SA 17:53 जब इसरायलीमन पलिस्तीमन के पीछा करके लहुंटिन, त ओमन पलिस्तीमन के डेरामन ला लूट लीन।
1SA 17:54 दाऊद ह पलिस्ती के मुड़ ला यरूसलेम ले आईस; अऊ ओह पलिस्ती के हथियारमन ला अपन तम्बू म रखिस।
1SA 17:55 जब साऊल ह दाऊद ला ओ पलिस्ती के सामना करे बर जावत देखिस, त ओह अपन सेना के सेनापति, अबनेर ले पुछिस, “हे अबनेर, ओ जवान ह काकर बेटा अय?” अबनेर ह कहिस, “हे महाराजा, तोर जिनगी के कसम, मोला मालूम नइं ए।”
1SA 17:56 राजा ह कहिस, “पता लगा कि ये जवान ह काकर बेटा अय?”
1SA 17:57 जतेक जल्दी दाऊद ह ओ पलिस्ती गोलियत ला मारके लहुंटिस, अबनेर ह ओला लेके साऊल करा आईस, अऊ ओतेक बेरा दाऊद ह पलिस्ती के मुड़ ला धरे रहय।
1SA 17:58 साऊल ह ओकर ले पुछिस, “हे जवान, तेंह काकर बेटा अस?” दाऊद ह कहिस, “मेंह तोर सेवक बैतलहम नगर के रहइया, यिसै के बेटा अंव।”
1SA 18:1 दाऊद के साऊल के संग गोठियाय के बाद, योनातन के मन ह दाऊद ऊपर अइसे लगिस कि ओह दाऊद ला अपन परान के सहीं मया करे लगिस।
1SA 18:2 ओ दिन ले साऊल ह दाऊद ला अपन करा रखिस, अऊ ओला ओकर ददा के घर जावन नइं दीस।
1SA 18:3 अऊ योनातन ह दाऊद के संग एक करार करिस, काबरकि ओह ओला अपन परान सहीं मया करत रिहिस।
1SA 18:4 योनातन ह अपन पहिरे लम्बा ओनहा ला उतारके अपन कुरता सहित दाऊद ला दे दीस, अऊ ओह अपन तलवार, तीर-धनुस अऊ कमरबंध ला घलो ओला दे दीस।
1SA 18:5 साऊल ह जऊन भी काम करे बर दाऊद ला पठोवय, ओ जम्मो काम म दाऊद ह सफल होवय, एकरसेति साऊल ह ओला सेना म एक ऊंचा पद दीस। ये बात ले सेना के जम्मो दल अऊ साऊल के अधिकारीमन घलो खुस होईन।
1SA 18:6 जब दाऊद ह ओ पलिस्ती गोलियत ला मारके लहुंटत रिहिस, अऊ मनखेमन घलो आवत रिहिन, तब जम्मो इसरायली नगरमन के माईलोगनमन डफली अऊ बीना बजावत, आनंद के संग गावत अऊ नाचत, साऊल राजा ले भेंट करे बर निकलिन।
1SA 18:7 अऊ माईलोगनमन नाचत-नाचत अइसने गावत रिहिन: “साऊल ह हजारों बईरी ला, अऊ दाऊद ह लाखों बईरी ला मारिस।”
1SA 18:8 तब साऊल ह बहुंत गुस्सा होईस; अऊ ये बात ह ओला बहुंत खराप लगिस। ओह सोचिस, “ओमन दाऊद बर तो लाखों अऊ मोर बर सिरिप हजारों कहत हवंय। अब तो मोर राज के छोंड़ ओला अऊ का मिलना बाकि हे?”
1SA 18:9 अऊ ओ समय ले साऊल ह दाऊद ऊपर नजर रखे लगिस।
1SA 18:10 ओकर दूसर दिन परमेसर कोति ले एक दुस्ट आतमा साऊल ऊपर बल से उतरिस। ओह अपन घर के भीतर अगमबानी करत रिहिस, जबकि दाऊद ह हर दिन के सहीं बीना बजावत रहय। साऊल ह अपन हांथ म एक बरछी धरे रहय
1SA 18:11 अऊ ओह अपनआप ले ये कहत बरछी ला जोर से फेंकिस, “मेंह दाऊद ला छेदके दीवार म धंसा दूहूं।” पर दाऊद ह होसियारी से दू बार बच गीस।
1SA 18:12 साऊल ह दाऊद ले डरत रिहिस, काबरकि यहोवा ह दाऊद के संग रिहिस अऊ साऊल ला छोंड़ दे रिहिस।
1SA 18:13 एकरसेति साऊल ह ओला अपन करा ले अलग करके ओला एक हजार सैनिकमन ऊपर मुखिया के जिम्मेदारी दे रिहिस, अऊ दाऊद ह ओ सैनिक दल के लड़ई म अगुवई करय।
1SA 18:14 ओह जऊन कुछू भी करिस, ओमा ओह बहुंत सफल होईस, काबरकि यहोवा ह ओकर संग रिहिस।
1SA 18:15 जब साऊल ह देखिस कि दाऊद ह बहुंत सफल होवत हे, त ओह दाऊद ले डरे लगिस।
1SA 18:16 पर इसरायल अऊ यहूदा के जम्मो मनखेमन दाऊद ले मया करत रिहिन, काबरकि दाऊद ह ओमन के सैनिक अभियान म अगुवई करत रिहिस।
1SA 18:17 साऊल ह दाऊद ला कहिस, “येह मोर बड़की बेटी मेरब अय। मेंह येकर बिहाव तोर ले कर दूहूं; तेंह सिरिप बीरता से मोर सेवा कर अऊ यहोवा के लड़ई ला लड़।” काबरकि साऊल ह सोचत रिहिस, “मेंह अपन हांथ ओकर बिरूध नइं उठावंव। ये काम ला पलिस्तीमन करंय।”
1SA 18:18 पर दाऊद ह साऊल ला कहिस, “मेंह कोन अंव, अऊ मोर परिवार या इसरायल म मोर कुल ह का ए कि मेंह राजा के दामाद बनंव?”
1SA 18:19 तभो ले जब समय आईस कि साऊल के बेटी मेरब के बिहाव दाऊद के संग करे जावय, त ओकर बिहाव दाऊद के संग नइं करके महोला नगर के अदरीएल के संग कर दिये गीस।
1SA 18:20 साऊल के बेटी मीकल ह दाऊद ले मया करत रिहिस अऊ जब साऊल ला ये बात के पता चलिस, त ओह खुस होईस।
1SA 18:21 साऊल ह सोचिस, “मेंह मीकल के बिहाव दाऊद के संग करहूं ताकि मीकल ह ओकर बर एक फांदा बन जावय अऊ पलिस्तीमन के हांथ ओकर बिरूध उठय।” एकरसेति साऊल ह दाऊद ला कहिस, “मोर दामाद बने बर अब तोर करा दूसरा मऊका हवय।”
1SA 18:22 तब साऊल ह अपन अधिकारीमन ला हुकूम दीस: “दाऊद ला अलग ले जाके कहव, ‘देख, राजा ह तोला पसंद करथे, अऊ ओकर जम्मो सेवकमन तोर ले मया करथें; एकरसेति अब तेंह राजा के दामाद बन जा।’ ”
1SA 18:23 साऊल के अधिकारीमन दाऊद करा जाके ये बात कहिन। पर दाऊद ह कहिस, “का तुमन सोचथव कि राजा के दामाद बनई एक छोटे बात ए? मेंह तो एक गरीब मनखे अंव अऊ मोला बहुंत कम मनखेमन जानथें।”
1SA 18:24 जब साऊल के सेवकमन साऊल करा आके दाऊद के कहे बात ला बताईन,
1SA 18:25 त साऊल ह कहिस, “तुमन दाऊद ला कहव, ‘राजा ह दुलहिन के दाम के रूप म पलिस्तीमन के सिरिप एक सौ लिंग के चमड़ी के छोंड़ अऊ कुछू नइं चाहत हे, अऊ ये किसम ले ओह बईरीमन ले बदला लेय चाहथे।’ ” साऊल के योजना ये रिहिस कि दाऊद ह पलिस्तीमन के दुवारा मार डारे जावय।
1SA 18:26 जब सेवकमन ये बात दाऊद ला बताईन, त ओह राजा के दामाद बने बर खुसी से राजी हो गीस। एकरसेति ठहिराय गे समय के पहिली,
1SA 18:27 दाऊद ह अपन सैनिकमन ला लेके निकलिस, अऊ दू सौ पलिस्तीमन ला मारिस अऊ ओमन के लिंग के चमड़ी ला ले आईस। ओ लिंग के चमड़ीमन ला पूरा गनती करके राजा ला दिये गीस, ताकि दाऊद ह राजा के दामाद बन सकय। तब साऊल ह अपन बेटी मीकल के बिहाव ओकर संग कर दीस।
1SA 18:28 जब साऊल ह ये बात ला जानिस कि यहोवा ह दाऊद के संग म हवय अऊ ओकर बेटी मीकल ह दाऊद ला मया करथे,
1SA 18:29 त साऊल ह दाऊद ले अऊ डरे लगिस, अऊ साऊल ह अपन बाकि जिनगी भर दाऊद के बईरी बने रिहिस।
1SA 18:30 पलिस्तीमन के सेनापतिमन लगातार लड़ई करे बर जावत रिहिन, अऊ जब भी ओमन लड़ई बर निकलंय, त दाऊद ह ओमन ले लड़े अऊ ओह साऊल के बाकि दूसर सैनिक अधिकारीमन ले जादा सफल होवय, अऊ दाऊद के नांव जम्मो मनखेमन म फईल गीस।
1SA 19:1 साऊल ह अपन बेटा योनातन अऊ अपन जम्मो अधिकारीमन ला कहिस कि दाऊद ला मार डारव। पर योनातन ह दाऊद ला बहुंत पसंद करत रिहिस
1SA 19:2 अऊ ओह दाऊद ला चेताके कहिस, “मोर ददा ह तोला मार डारे बर मऊका खोजत हे। एकरसेति कल बिहनियां तेंह सचेत रहिबे, कोनो जगह म जाके छुप जाबे अऊ उहां रहिबे;
1SA 19:3 अऊ तेंह जिहां रहिबे, उहां मैदान म मेंह अपन ददा के संग जाहूं अऊ ओकर ले तोर बारे म गोठियाहूं, अऊ जऊन कुछू भी होही, मेंह तोला बताहूं।”
1SA 19:4 योनातन ह अपन ददा साऊल ले दाऊद के परसंसा करके ओकर ले कहिस, “हे राजा, अपन सेवक दाऊद के बिरूध कोनो गलत काम झन कर; काबरकि ओह तोर बिरूध म कोनो गलती नइं करे हवय, अऊ जऊन कुछू भी ओह करे हवय, ओकर ले तोर बहुंत भलई होय हवय।
1SA 19:5 ओह अपन परान के चिंता नइं करिस जब ओह ओ पलिस्ती ला मारिस। यहोवा ह जम्मो इसरायलीमन ला एक बड़े जीत देवाईस हे, अऊ तेंह येला देखके खुस होय रहय। तब तें काबर बिगर कारन के दाऊद सहीं निरदोस मनखे ला मारके गलती करे चाहत हस?”
1SA 19:6 साऊल ह योनातन के बात ला सुनिस अऊ ये कसम खाईस: “यहोवा के जिनगी के कसम, दाऊद ला मारे नइं जावय।”
1SA 19:7 ओकर पाछू योनातन ह दाऊद ला बलाईस अऊ ये जम्मो बात ओला बताईस। योनातन ह दाऊद ला साऊल करा लेके आईस, अऊ दाऊद ह पहिली के सहीं साऊल के संग रहे लगिस।
1SA 19:8 तब लड़ई ह फेर सुरू हो गीस, अऊ दाऊद ह जाके पलिस्तीमन ले लड़िस। ओह पलिस्तीमन ला अइसने मारे लगिस कि ओमन ओकर आघू ले भाग गीन।
1SA 19:9 पर जब साऊल ह अपन घर म बईठे रहय अऊ ओकर हांथ म एक बरछी रहय, तभे यहोवा करा ले एक दुस्ट आतमा साऊल ऊपर आईस, अऊ ओ बेरा दाऊद ह बीना ला बजावत रहय,
1SA 19:10 तब साऊल ह बरछी फेंकके ओला दीवार म धंसा देय के कोसिस करिस, पर दाऊद ह होसियारी से बच गीस, अऊ बरछी ह दीवार म धंस गीस। दाऊद ह भागिस, अऊ ओ रथिया ओह बच गीस।
1SA 19:11 तब साऊल ह दाऊद के घर के निगरानी करे बर अऊ बिहनियां ओला मार डारे बर आदमीमन ला पठोईस। पर दाऊद के घरवाली मीकल ह ओला ये कहिके चेताईस, “यदि तेंह आज रथिया अपन परान बचाके नइं भागबे, त कल तेंह मार डारे जाबे।”
1SA 19:12 मीकल ह दाऊद ला खिड़की ले खाल्हे उतार दीस अऊ ओह भागके बच निकलिस।
1SA 19:13 तब मीकल ह एक मूरती ला लेके पलंग म सुता दीस, अऊ मुड़ म छेरीमन के कुछू रूआं ला रखके ओकर ऊपर चादर ओढ़ा दीस।
1SA 19:14 जब साऊल ह दाऊद ला पकड़े बर आदमीमन ला पठोईस, त मीकल ह कहिस, “ओह बेमार हवय।”
1SA 19:15 तब साऊल ह आदमीमन ला दाऊद ला देखे बर वापिस पठोईस अऊ ओमन ला कहिस, “ओला पलंग समेत उठाके मोर करा लानव ताकि मेंह ओला मार डारंव।”
1SA 19:16 पर जब ओ आदमीमन घर के भीतर गीन, त देखिन कि पलंग म मूरती हवय अऊ मुड़ म छेरीमन के कुछू रूआं रखे हवय।
1SA 19:17 ये बात ला जानके साऊल ह मीकल ला कहिस, “तेंह मोला अइसने धोखा काबर देय अऊ मोर बईरी ला भगा दे कि ओह बचके निकल गीस?” मीकल ह साऊल ला कहिस, “ओह मोर ले कहिस, ‘मोला जावन दे। मेंह तोला काबर मार डारंव?’ ”
1SA 19:18 जब दाऊद ह भागके बच निकलिस, त ओह रामा म समूएल करा गीस अऊ जऊन कुछू साऊल ह ओकर संग करे रिहिस, ओ जम्मो बात ओला बताईस। तब ओ अऊ समूएल जाके नबायोत म रहे लगिन।
1SA 19:19 जब ये बात साऊल ला बताय गीस कि दाऊद ह रामा के नबायोत म हवय,
1SA 19:20 त ओह दाऊद ला पकड़े बर आदमीमन ला पठोईस। पर जब साऊल के सेवकमन देखिन कि अगमजानीमन के एक दल ह अगमबानी करत हवय, अऊ समूएल ह ओमन के अगुवा के रूप म उहां ठाढ़े हवय, त परमेसर के आतमा साऊल के आदमीमन ऊपर उतरिस, अऊ ओमन घलो अगमबानी करे लगिन।
1SA 19:21 ये बात जब साऊल ला बताय गीस, त ओह अऊ आदमीमन ला पठोईस, अऊ ओमन घलो जाके अगमबानी करे लगिन। साऊल ह तीसर बार आदमीमन ला पठोईस, पर ओमन घलो जाके अगमबानी करे लगिन।
1SA 19:22 आखिर म साऊल ह खुद रामा जाय बर निकलिस, अऊ सेकू नगर के बड़े तरिया करा हबरके पुछे लगिस, “समूएल अऊ दाऊद कहां हवंय?” उहां मनखेमन जबाब दीन, “ओमन तो रामा के नबायोत म हवंय।”
1SA 19:23 तब साऊल ह रामा के नबायोत म गीस। पर परमेसर के आतमा ओकर ऊपर घलो उतरिस अऊ ओह रामा के नबायोत ला हबरते तक अगमबानी करत गीस।
1SA 19:24 ओह अपन कपड़ामन ला उतार दीस, अऊ ओह घलो समूएल के आघू म अगमबानी करे लगिस। ओह ओ पूरा दिन अऊ पूरा रथिया नंगरा परे रिहिस। एकरे कारन मनखेमन कहिथें, “का साऊल ह घलो अगमजानीमन म ले एक जन अय?”
1SA 20:1 तब दाऊद ह रामा के नबायोत ले भागिस अऊ योनातन करा जाके ओकर ले पुछिस, “मेंह का करे हंव? मोर का अपराध ए? मेंह तोर ददा के का गलत करे हंव कि ओह मोला मार डारे के कोसिस करत हवय?”
1SA 20:2 योनातन ह ओला जबाब दीस, “तेंह नइं मारे जावस! देख, मोर ददा ह मोला बिगर बताय, कोनो बड़े या छोटे काम नइं करय। त फेर ओह ये बात ला मोर ले काबर छुपाही? अइसने कोनो बात नइं ए!”
1SA 20:3 पर दाऊद ह किरिया खाके कहिस, “तोर ददा ह बने करके जानत हे कि तोर किरपा-दिरिस्टी मोर ऊपर हवय, अऊ ओह अपन मन म सोचे होही, ‘योनातन ला ये बात के पता झन चलय, नइं तो ओह दुखी हो जाही।’ तभो ले यहोवा के जिनगी के कसम अऊ तोर जिनगी के कसम, मोर अऊ मिरतू के बीच म सिरिप एक कदम के फासला हवय।”
1SA 20:4 योनातन ह दाऊद ला कहिस, “तेंह जऊन कुछू मोर ले चाहत हस, मेंह तोर बर करहूं।”
1SA 20:5 एकरसेति दाऊद ह कहिस, “देख, कल नवां चंदा के भोज अय, अऊ येकरे कारन राजा के संग बईठके जेवन करे पड़ही; पर तें मोला जावन दे कि में परसों सांझ होवत तक मैदान म छुपे रहंव।
1SA 20:6 यदि तोर ददा ह मोर बारे म पुछही, त ओला कहिबे, ‘दाऊद ह अपन नगर बैतलहम ला जल्दी जाय बर मोर ले बिनती करके छुट्टी मांगे हवय, काबरकि उहां ओकर जम्मो कुल के मनखेमन बर एक सालाना बलिदान चघाय जावत हे।’
1SA 20:7 यदि ओह अइसने कहय, ‘बने बात ए!’ तब तो तोर सेवक बर कोनो डर के बात नो हय। पर यदि ओह अब्बड़ गुस्सा करय, त तेंह जान लेबे कि ओह मोर हानि करे बर ठान ले हवय।
1SA 20:8 अब तेंह अपन सेवक के ऊपर दया कर, काबरकि तेंह यहोवा के आघू म ओकर संग एक करार करे हस। यदि मेंह दोसी अंव, त तेंह खुद मोला मार डार! तेंह मोला अपन ददा के हांथ म काबर सऊंपबे?”
1SA 20:9 योनातन ह कहिस, “अइसने कभू नइं होवय! यदि मोला थोरकन भी जानकारी होतिस कि मोर ददा ह तोर हानि करे के ठाने हवय, त का मेंह तोला नइं बतातेंव?”
1SA 20:10 दाऊद ह पुछिस, “यदि तोर ददा ह तोला कठोर जबाब देथे, त ये बात मोला कोन बताही?”
1SA 20:11 योनातन ह कहिस, “आ, हमन मैदान म जाबो।” अऊ ओमन दूनों सहर ले बाहिर मैदान म चल दीन।
1SA 20:12 तब योनातन ह दाऊद ला कहिस, “मेंह यहोवा, इसरायल के परमेसर के कसम खावत हंव कि मेंह परसों ये बेरा तक अपन ददा के मन के भेद ला जरूर पा लूहूं! यदि ओह तोर हित म गोठियाथे, त मेंह खबर भेजके तोला बता दूहूं।
1SA 20:13 पर यदि मोर ददा ह तोर हानि करे के इरादा करे हवय, अऊ ये बात यदि मेंह तोला नइं बताके तोला सांति से बिदा करहूं, त यहोवा ह मोर संग बहुंत कठोरता करय। यहोवा ह तोर संग वइसने ही रहय, जइसने ओह मोर ददा के संग रिहिस।
1SA 20:14 पर मोर जीयत तक, यहोवा के दया सहीं तेंह मोर ऊपर अपन दया रखे रह, ताकि मेंह मारे झन जावंव,
1SA 20:15 अऊ मोर परिवार ले घलो अपन करूना ला कभू झन हटाबे, अऊ त अऊ जब यहोवा ह दाऊद के जम्मो बईरीमन ला ये धरती ले नास कर देवय, तभो ले घलो अपन किरपा-दिरिस्टी झन हटाबे।”
1SA 20:16 एकरसेति योनातन ह दाऊद के घराना ले ये कहिके एक करार करिस, “यहोवा ह दाऊद के बईरीमन ले बदला लेवय।”
1SA 20:17 अऊ योनातन ह दाऊद बर अपन मया के कारन, ओह दाऊद के संग किरिया ला फेर मजबूत करिस, काबरकि ओह ओला अपन परान के सहीं मया करय।
1SA 20:18 तब योनातन ह दाऊद ला कहिस, “कल नवां चंदा के भोज अय, अऊ तोर बारे म पुछे जाही, काबरकि तोर कुरसी ह खाली रहिही।
1SA 20:19 परसों, सांझ के बेरा, तेंह ओ जगह म जाबे, जिहां तेंह ये समस्या के सुरूआत म छुपे रहय, अऊ उहां एजेल नांव के पथरा के लकठा म बाट जोहबे।
1SA 20:20 मेंह ओकर बाजू म तीन ठन तीर चलाहूं, मानो कि मेंह निसाना लगाय हंव।
1SA 20:21 तब मेंह एक छोकरा ला ये कहिके पठोहूं, ‘जा अऊ तीरमन ला खोजके लान।’ यदि मेंह ओ छोकरा ला ये कहंव, ‘देख, तीरमन तोर ये कोति हवंय; ओमन ला इहां ले आ,’ तब तेंह आ जाबे, काबरकि यहोवा के जिनगी के कसम, तेंह सुरकछित हस; कोनो खतरा नइं ए।
1SA 20:22 पर यदि मेंह ओ छोकरा ला कहंव, ‘देख, तीरमन तोर ओ कोति हवंय,’ तब तेंह चले जाबे, काबरकि यहोवा ह तोला बिदा करे हवय।
1SA 20:23 अऊ जऊन बात के चरचा तें अऊ में करे हवन ओला सुरता रखबे, यहोवा तोर अऊ मोर बीच म हमेसा बर गवाह हवय।”
1SA 20:24 एकरसेति दाऊद ह मैदान म जाके छुप गीस, अऊ जब नवां चंदा के भोज होईस, त राजा साऊल ह जेवन खाय बर बईठिस।
1SA 20:25 राजा ह पहिले सहीं अपन ओ आसन म बईठिस, जऊन ह दीवार करा रिहिस; योनातन ह साऊल के सामने, अऊ अबनेर ह साऊल के बाजू म बईठिस, पर दाऊद के जगह ह खाली रिहिस।
1SA 20:26 ओ दिन तो साऊल ह ये सोचके कुछू नइं कहिस, “दाऊद ला कुछू होय होही, जेकर से ओह रिवाज के मुताबिक सुध नइं होही, जरूर ओह असुध होही।”
1SA 20:27 पर ओकर आने दिन, याने कि महिना के दूसर दिन, दाऊद के जगह ह फेर खाली रिहिस। तब साऊल ह अपन बेटा योनातन ले पुछिस, “का कारन ए कि यिसै के बेटा ह न तो कल खाय बर आईस, अऊ न ही आज खाय बर आय हवय?”
1SA 20:28 योनातन ह जबाब दीस, “दाऊद ह बैतलहम जाय बर मोर ले बिनती करके छुट्टी मांगिस
1SA 20:29 अऊ कहिस, ‘मोला जावन दे, काबरकि उहां नगर म हमर परिवार के मन एक बलिदान चघावत हंय अऊ मोर भाई ह मोला उहां हाजिर होय के हुकूम देय हवय। यदि मोर ऊपर तोर किरपा-दिरिस्टी होवय, त मेंह अपन भाईमन ले मिले बर जावंव।’ एकरे कारन ओह राजा के संग भोज खाय बर नइं आ सकिस।”
1SA 20:30 तब साऊल के कोप योनातन ऊपर भड़किस अऊ ओह योनातन ला कहिस, “हे कुटिल अऊ बिदरोही माईलोगन के बेटा! का मेंह नइं जानत हंव कि अपन लाज-सरम अऊ अपन जनमाय दाई के लाज-सरम के परवाह करे बिगर, तेंह यिसै के ओ बेटा के तरफ हो गे हवस?
1SA 20:31 काबरकि जब तक यिसै के बेटा ये धरती म जीयत रहिही, तब तक न तो तें अऊ न ही तोर राज ह स्थापित होही। एकरसेति अब कोनो ला पठोके ओला मोर करा लान, काबरकि ओकर मरना जरूरी अय!”
1SA 20:32 योनातन ह अपन ददा ले पुछिस, “ओह काबर मार डारे जाही? ओह का करे हवय?”
1SA 20:33 पर साऊल ह ओला मारे बर ओकर ऊपर अपन बरछी फेंकिस। तब योनातन जान डारिस कि ओकर ददा ह दाऊद ला मार डारे के इरादा करे हवय।
1SA 20:34 योनातन ह अब्बड़ गुस्सा करत खाय के ओ मेज ले उठिस; भोज के ओ दूसर दिन ओह खाना नइं खाईस, काबरकि दाऊद बर ओकर ददा के खराप बरताव के कारन, ओह बहुंत दुखी रिहिस।
1SA 20:35 दूसर दिन बिहनियां, योनातन ह मैदान म दाऊद ले मिले बर ठहिराय जगह म गीस। ओह अपन संग एक छोटे लड़का ला ले गे रिहिस,
1SA 20:36 अऊ ओह ओ लड़का ला कहिस, “दऊड़के जाबे अऊ जऊन तीर मेंह चलाहूं, ओमन ला खोजके लानबे।” जब लड़का ह दऊड़िस, त योनातन ह एक तीर ओकर आघू कोति चलाईस।
1SA 20:37 जब लड़का ह ओ जगह म आईस, जिहां योनातन के चलाय तीर ह गिरे रिहिस, तब योनातन ह ओकर पाछू ले आरो लगाके कहिस, “तीर ह तोर आघू कोति हवय।”
1SA 20:38 तब योनातन ह चिचियाके कहिस, “जल्दी कर! तुरते चले जा! झन ठहर!” अऊ लड़का ह तीर ला उठाके अपन मालिक करा आ गीस।
1SA 20:39 (भेद के ओ बात के बारे म ओ लड़का ह कुछू नइं जानत रिहिस; सिरिप योनातन अऊ दाऊद ओ बात ला जानत रिहिन।)
1SA 20:40 तब योनातन ह अपन हथियार ओ लड़का ला देके कहिस, “जा, येमन ला वापिस नगर म ले जा।”
1SA 20:41 जब लड़का ह चले गीस, तब दाऊद ह पथरा के दक्खिन कोति ले निकलिस, अऊ भुइयां म मुहूं के भार तीन बार गिरके योनातन ला दंडवत करिस। तब ओमन एक-दूसर ला चूमिन अऊ रोईन, पर दाऊद बहुंत जादा रोईस।
1SA 20:42 योनातन ह दाऊद ला कहिस, “सांति से जा, काबरकि हमन दूनों एक-दूसर ले ये कहिके यहोवा के नांव म किरिया खाय हवन, ‘यहोवा ह तोर अऊ मोर बीच, अऊ तोर बंस अऊ मोर बंस के मनखेमन के बीच सदा गवाह हवय।’ ” तब दाऊद ह उठके चले गीस, अऊ योनातन ह नगर ला वापिस चल दीस।
1SA 21:1 दाऊद ह नोब म, अहीमेलेक पुरोहित करा गीस। अहीमेलेक ह डर के मारे कांपत रिहिस, जब ओह दाऊद ले भेंट करिस, अऊ ओह दाऊद ले पुछिस, “का कारन ए कि तेंह अकेला हस? तोर संग म अऊ कोनो काबर नइं ए?”
1SA 21:2 दाऊद ह अहीमेलेक पुरोहित ला जबाब दीस, “राजा ह मोला एक काम म पठोके मोला कहे हवय, ‘जऊन काम बर मेंह तोला पठोत हवंव, ओकर बारे म कोनो झन जान पावय।’ मेंह अपन मनखेमन ला एक जगह म मोर ले मिले बर कहे हवंव।
1SA 21:3 त अब, तोर हांथ म का हवय? तेंह पांच ठन रोटी, या जऊन कुछू तोर करा हवय, ओला मोला दे।”
1SA 21:4 पर पुरोहित ह दाऊद ला जबाब दीस, “मोर करा सधारन रोटी तो नइं ए; पर इहां कुछू पबितर रोटी हवय, येह ओमन बर अय, जऊन मन अपनआप ला जवान माईलोगनमन ले अलग रखे हवंय।”
1SA 21:5 दाऊद ह कहिस, “वास्तव म, माईलोगनमन हमर ले अलग हवंय, अऊ जब भी मेंह काम म निकलथंव, ओमन अलग रहिथें। आदमीमन के देहें ह पबितर रहिथे, जब ओमन सधारन काम म घलो जाथें। आज तो अऊ पबितर होहीं!”
1SA 21:6 तब पुरोहित ह ओला पबितर रोटी दीस; काबरकि उहां अऊ दूसर रोटी नइं रिहिस, सिरिप भेंट के रोटी रिहिस, जऊन ला यहोवा के आघू ले उठाय गे रिहिस, अऊ ओकर जगह म ओहीच दिन गरम रोटी रखे गे रिहिस।
1SA 21:7 ओ दिन, उहां साऊल के एक सेवक ह यहोवा के आघू रूके रिहिस; ओह एक एदोमी मनखे रिहिस अऊ ओकर नांव दोएग रिहिस अऊ ओह साऊल के चरवाहामन के मुखिया रिहिस।
1SA 21:8 दाऊद ह अहीमेलेक ले पुछिस, “का इहां तोर करा कोनो बरछी या तलवार हवय? राजा के काम ह जरूरी रिहिस अऊ मेंह जल्दी म अपन तलवार या कोनो अऊ हथियार नइं लाने हंव।”
1SA 21:9 पुरोहित ह कहिस, “पलिस्ती गोलियत के तलवार इहां हवय, जेला तेंह एला के घाटी म मारे रहय; ओकर तलवार कपड़ा म लपेटे एपोद के पाछू माढ़े हवय। यदि तेंह चाहथस, त ओला लेय ले; ओकर छोंड़ इहां अऊ कोनो तलवार नइं ए।” दाऊद ह कहिस, “ओकर सहीं अऊ कोनो तलवार नइं ए; ओहीच ला मोला दे।”
1SA 21:10 ओ दिन दाऊद ह साऊल के डर के मारे भागिस अऊ गत के राजा आकीस करा गीस।
1SA 21:11 पर आकीस के सेवकमन आकीस ले कहिन, “का येह ओ देस के राजा दाऊद नो हय? का येह ओ नो हय, जेकर बारे म मनखेमन नाचत ये गीत गावत रिहिन: “ ‘साऊल ह हजारों मनखे ला, अऊ दाऊद ह लाखों मनखे ला मारिस’?”
1SA 21:12 दाऊद ह ये गोठ के बारे म सोचके गत के राजा आकीस ले अब्बड़ डर गीस।
1SA 21:13 एकरसेति ओह ओमन के आघू म एक चाल चलिस; अऊ जब ओह ओमन के हांथ म रिहिस, त ओह एक पागल मनखे सहीं बरताव करिस अऊ दुवार के कपाटमन ला खुरचत अपन लार ला दाढ़ी म बोहाय लगिस।
1SA 21:14 तब आकीस ह अपन सेवकमन ला कहिस, “ओ मनखे ला देखव! ओह पागल ए! तुमन ओला मोर करा काबर लाने हव?
1SA 21:15 का मोर करा पागल मनखेमन के कोनो कमी हवय कि तुमन ये मनखे ला इहां मोर आघू म पागलपन करे बर लाने हवव? का अइसने मनखे ला मोर भवन म लाना जरूरी ए?”
1SA 22:1 दाऊद ह गत सहर ला छोंड़ दीस अऊ बचके अदुल्लाम नगर के गुफा म हबरिस। जब ओकर भाई अऊ ओकर ददा के परिवार के मन येकर बारे म सुनिन, त ओमन उहां ओकर करा गीन।
1SA 22:2 ओ जम्मो जऊन मन संकट म पड़े रिहिन या करजदार रिहिन या जेमन असंतुस्ट रिहिन, ओमन दाऊद करा जूरिन, अऊ ओह ओमन के परधान होईस। लगभग चार सौ मनखे ओकर संग हो गीन।
1SA 22:3 उहां ले दाऊद ह मोआब के मिसपा नगर ला गीस अऊ मोआब के राजा ला कहिस, “का मोर ददा अऊ दाई आके तोर संग रह सकत हंय, जब तक कि मेंह ये नइं जान लेवंव कि परमेसर ह मोर बर का करे चाहथे?”
1SA 22:4 अऊ ओह ओमन ला मोआब के राजा के संग छोंड़ दीस, अऊ ओमन तब तक राजा के संग रिहिन, जब तक दाऊद ह ओ गढ़ म छुपे रिहिस।
1SA 22:5 पर गाद नांव के एक अगमजानी ह दाऊद ला कहिस, “ये गढ़ म झन रह। यहूदा देस म जा।” एकरसेति दाऊद ह ओ जगह ला छोंड़के हेरेत के जंगल म चल दीस।
1SA 22:6 साऊल ह सुनिस कि दाऊद अऊ ओकर मनखेमन के पता चल गे हवय। ओ बेरा साऊल ह अपन हांथ म बरछी धरके गिबा के पहाड़ी म एक झाऊ के रूख के खाल्हे म बईठे रहय, अऊ ओकर जम्मो करमचारीमन ओकर आसपास ठाढ़े रहंय।
1SA 22:7 तब साऊल ह अपन करमचारीमन ला कहिस, “हे बिनयामीनी मनखेमन, सुनव! का यिसै के बेटा ह तुमन जम्मो झन ला खेत अऊ अंगूर के बारी दीही? का ओह तुमन जम्मो ला हजार-हजार मनखेमन ऊपर अऊ सौ-सौ मनखेमन ऊपर सेनापति बनाही?
1SA 22:8 का येकर खातिर तुमन जम्मो झन मोर बिरूध म सडयंत्र करे हवव? जब मोर बेटा ह यिसै के बेटा के संग करार करिस, त ये बात मोला कोनो नइं बताईस। तुमन म ले कोनो मोर चिंता नइं करय या नइं बतावय कि मोर बेटा ह मोर सेवक ला मोर घात करे बर उभारे हवय, जइसने कि ओह आज करत हे।”
1SA 22:9 तब एदोमी दोएग, जऊन ह साऊल के करमचारीमन के संग ठाढ़े रिहिस, जबाब देवत कहिस, “मेंह तो यिसै के बेटा ला नोब म अहीतूब के बेटा अहीमेलेक करा आवत देखेंव।
1SA 22:10 अहीमेलेक ह ओकर बर यहोवा ले पुछिस; ओह यिसै के बेटा ला जेवन के सामान अऊ पलिस्ती गोलियत के तलवार घलो दीस।”
1SA 22:11 तब राजा ह अहीतूब के बेटा अहीमेलेक पुरोहित ला अऊ ओकर ददा के परिवार के जम्मो मनखे, जऊन मन नोब म पुरोहित रिहिन, ओ जम्मो ला बलाय बर पठोईस, अऊ ओ जम्मो झन राजा करा आईन।
1SA 22:12 साऊल ह कहिस, “हे अहीतूब के बेटा, सुन!” अहीमेलेक ह कहिस, “हे मोर मालिक, का हुकूम हे?”
1SA 22:13 साऊल ह ओकर ले पुछिस, “का कारन ए कि तें अऊ यिसै के बेटा मोर बिरूध म सडयंत्र करे हवव? तेंह ओला रोटी अऊ तलवार दे हवस अऊ ओकर बर परमेसर ले पुछे हवस, जेकर ले ओह मोर बिरूध म बिदरोह करे हवय अऊ मोला घात करे म लगे हवय, जइसने कि ओह आज करत हे?”
1SA 22:14 अहीमेलेक ह राजा ला जबाब दीस, “तोर जम्मो सेवकमन म दाऊद सहीं बिसवासयोग्य कोन हवय? ओह तो तोर दामाद अऊ तोर रकछा करइयामन के मुखिया ए अऊ तोर परिवार म ओकर बहुंत आदर करे जाथे।
1SA 22:15 का ओ दिन पहिली बार मेंह ओकर बर परमेसर ले पुछेंव? नइं! राजा ह अपन सेवक ऊपर या ओकर ददा के परिवार के काकरो ऊपर दोस झन लगावय, काबरकि तोर सेवक ये जम्मो चीज के बारे म कुछू भी नइं जानत हे।”
1SA 22:16 पर राजा ह कहिस, “हे अहीमेलेक, तेंह जरूर मार डारे जाबे, तें अऊ तोर पूरा परिवार घलो।”
1SA 22:17 तब राजा ह अपन लकठा म खड़े पहरेदारमन ला हुकूम दीस, “मुड़व अऊ यहोवा के पुरोहितमन ला मार डारव, काबरकि ओमन घलो दाऊद कोति हो गे हवंय। ओमन जानत रिहिन कि दाऊद ह भागत रिहिस, तभो ले ओमन मोला नइं बताईन।” पर राजा के पहरेदारमन यहोवा के पुरोहितमन ला मारे बर हांथ उठाना नइं चाहत रिहिन।
1SA 22:18 तब राजा ह दोएग ला हुकूम दीस, “तेंह मुड़के पुरोहितमन ला मार डार।” तब एदोमी दोएग ह मुड़के पुरोहितमन ला मार डारिस। ओ दिन, ओह ओ पचयासी झन ला मार डारिस, जऊन मन सन के बने एपोद पहिरे रिहिन।
1SA 22:19 ओह पुरोहितमन के नगर नोब के मनखे, माईलोगन, लइका अऊ दूध पीयत लइका, अऊ नगर के गाय-बईला, गदहा अऊ भेड़-बकरीमन ला घलो तलवार ले मार डारिस।
1SA 22:20 पर अहीतूब के बेटा अहीमेलेक के अबियातार नांव के एक बेटा बच निकलिस, अऊ भागके दाऊद करा चल दीस।
1SA 22:21 अबियातार ह दाऊद ला बताईस कि साऊल ह यहोवा के पुरोहितमन ला मार डारे हवय।
1SA 22:22 तब दाऊद ह अबियातार ला कहिस, “ओ दिन, एदोमी दोएग ह उहां रिहिस, तभे मेंह जान गे रहेंव कि ओह जरूर साऊल ला बताही। मेंह तोर जम्मो परिवार के मिरतू के जिम्मेदार अंव।
1SA 22:23 मोर संग रह अऊ झन डर। जऊन मनखे ह तोला मार डारे चाहत हे, ओह मोला घलो मार डारे के कोसिस करत हे। तेंह मोर संग सुरकछित रहिबे।”
1SA 23:1 जब दाऊद ला ये बताय गीस कि पलिस्तीमन कीला नगर ले लड़त हवंय अऊ कोठारमन ला लूटत हवंय,
1SA 23:2 त ओह ये कहिके यहोवा ले पता लगाईस, “का मेंह जाके ये पलिस्तीमन ऊपर हमला करंव?” यहोवा ह ओला जबाब दीस, “जा, अऊ पलिस्तीमन ऊपर हमला कर अऊ कीला नगर ला बचा।”
1SA 23:3 पर दाऊद के मनखेमन ओला कहिन, “इहां यहूदा देस म, हमन डरत रहिथन; अऊ यदि हमन पलिस्तीमन के सामना करे बर कीला नगर ला जाबो, त हमर का हाल होही?”
1SA 23:4 तब दाऊद ह एक बार फेर यहोवा ले पता लगाईस, अऊ यहोवा ह ओला जबाब दीस, “खाल्हे कीला नगर ला जा, काबरकि मेंह पलिस्तीमन ला तोर हांथ म कर दूहूं।”
1SA 23:5 एकरसेति दाऊद अऊ ओकर मनखेमन कीला नगर म जाके पलिस्तीमन ले लड़िन अऊ ओमन के पसुमन ला ले आईन। दाऊद ह पलिस्तीमन के बहुंत नुकसान करिस अऊ कीला के मनखेमन ला बचाईस।
1SA 23:6 (जब अहीमेलेक के बेटा अबियातार ह दाऊद करा कीला नगर म भागके आईस, त ओह अपन संग एपोद धरके आय रिहिस।)
1SA 23:7 साऊल ला बताय गीस कि दाऊद ह कीला नगर ला चल दे हवय, त ओह कहिस, “परमेसर ह ओला मोर हांथ म कर दे हवय, काबरकि ओह कपाट अऊ बेड़ा लगे नगर म घुसके अपनआप ला बंदी बना ले हवय।”
1SA 23:8 अऊ साऊल ह अपन जम्मो सेना ला लड़ई बर बलाईस कि कीला नगर म जाके दाऊद अऊ ओकर मनखेमन ला घेर लेवंय।
1SA 23:9 जब दाऊद ला ये पता चलिस कि साऊल ह ओकर बिरूध म सडयंत्र करत हे, त ओह अबियातार पुरोहित ला कहिस, “एपोद ला लान।”
1SA 23:10 तब दाऊद ह पराथना करिस, “हे यहोवा, इसरायल के परमेसर, तोर सेवक ह निस्चय सुने हवय कि साऊल ह मोर कारन कीला म आके नगर ला नास करे के योजना बनात हवय।
1SA 23:11 का कीला के मनखेमन मोला ओकर हांथ म कर दीहीं? का साऊल ह आही, जइसने कि तोर सेवक ह सुने हवय? हे यहोवा, इसरायल के परमेसर, अपन सेवक ला बता।” अऊ यहोवा ह कहिस, “हव, ओह आही।”
1SA 23:12 दाऊद ह फेर पुछिस, “का कीला के मनखेमन मोला अऊ मोर मनखेमन ला साऊल के हांथ म कर दीहीं?” अऊ यहोवा ह कहिस, “हव, ओमन अइसने करहीं।”
1SA 23:13 तब दाऊद अऊ ओकर मनखे, जऊन मन लगभग छै सौ जन रिहिन, कीला नगर ले निकलके एती-ओती जगह-जगह फिरे लगिन। जब साऊल ला ये बताय गीस कि दाऊद ह कीला ले निकलके भाग गे हवय, त ओह उहां नइं गीस।
1SA 23:14 दाऊद ह सुनसान गढ़मन म अऊ जीप के सुनसान पहाड़ीमन म रहे लगिस। साऊल ह ओला हर दिन खोजिस, पर परमेसर ह दाऊद ला ओकर हांथ म नइं पड़न दीस।
1SA 23:15 जब दाऊद ह जीप के सुनसान जगह म होरेस सहर म रिहिस, त ओला पता चलिस कि साऊल ह ओकर परान के खोज म निकले हवय।
1SA 23:16 अऊ साऊल के बेटा योनातन ह होरेस म दाऊद करा गीस अऊ परमेसर ऊपर बिसवास म मजबूती से बने रहे बर ओकर मदद करिस।
1SA 23:17 ओह दाऊद ला कहिस, “झन डर! मोर ददा साऊल ह तोला नइं पकड़ सकय। तेंह इसरायल के राजा बनबे, अऊ मोर पद ह तोर बाद दूसरा नम्बर म होही। अऊ त अऊ ये बात ला मोर ददा साऊल घलो जानत हे।”
1SA 23:18 तब ओ दूनों झन यहोवा के आघू म एक करार करिन। तब योनातन अपन घर चल दीस, पर दाऊद ह होरेस म रह गीस।
1SA 23:19 तब जीपीमन गिबा म साऊल करा जाके कहिन, “का दाऊद ह हमर बीच म, हकीला पहाड़ी म, होरेस के गढ़मन म नइं छुपे हवय, जऊन ह यसीमोन के दक्खिन कोति हवय?
1SA 23:20 एकरसेति, हे राजा, तोला जब भी सही लगय, तेंह आ, अऊ ओला तोर हांथ म कर देना हमर जिम्मेदारी होही।”
1SA 23:21 साऊल ह जबाब दीस, “मोर चिंता करे के कारन, यहोवा ह तुमन ला आसीस देवय।
1SA 23:22 तुमन जाके अऊ पता लगावव। पता लगावव कि दाऊद ह अकसर कहां जाथे अऊ कोन ह ओला उहां देखे हवय। मोला बताय गे हवय कि ओह बहुंत चालबाज अय।
1SA 23:23 ओह कहां-कहां छुपथे, ओ जम्मो जगह के पता लगावव अऊ वापिस आके मोला सही-सही बतावव। तब मेंह तुम्हर संग चलहूं; यदि ओह ओ इलाका म होही, त मेंह ओला यहूदा के जम्मो गोत्र म ले खोज निकालहूं।”
1SA 23:24 तब ओमन चलिन अऊ साऊल ले पहिले जीप ला गीन। दाऊद अऊ ओकर मनखेमन माओन के सुनसान जगह म रिहिन, जऊन ह अराबा म यसीमोन के दक्खिन कोति हवय।
1SA 23:25 तब साऊल अऊ ओकर मनखेमन दाऊद के खोज म लग गीन, अऊ जब दाऊद ला येकर बारे म बताय गीस, त ओह खाल्हे चट्टान करा उतर गीस अऊ माओन के सुनसान जगह म रहे लगिस। जब साऊल ह ये बात ला सुनिस, त ओह माओन के सुनसान जगह म दाऊद के पीछा करे बर गीस।
1SA 23:26 साऊल ह पहाड़ के एक तरफ जावत रिहिस, अऊ दाऊद अऊ ओकर मनखेमन पहाड़ के दूसर कोति साऊल ले बचे बर जल्दी-जल्दी जावत रिहिन। जब साऊल अऊ ओकर सेना ह दाऊद अऊ ओकर मनखेमन ला पकड़े बर लकठा म आवत रिहिन,
1SA 23:27 तभे एक दूत ह साऊल करा आईस अऊ कहिस, “जल्दी करके आ! काबरकि पलिस्तीमन देस ऊपर हमला करत हवंय।”
1SA 23:28 ये सुनके साऊल ह दाऊद के पीछा करे बर छोंड़के पलिस्तीमन के सामना करे बर गीस। येकरे कारन मनखेमन ओ जगह ला सेला-हम्मालकोत कहिथें।
1SA 23:29 अऊ दाऊद ह उहां ले चल दीस अऊ एन-गदी के गढ़मन म रहे लगिस।
1SA 24:1 जब साऊल ह पलिस्तीमन के पीछा करके लहुंटिस, त ओला ये बताय गीस, “दाऊद ह एन-गदी के सुनसान जगह म हवय।”
1SA 24:2 तब साऊल ह जम्मो इसरायलीमन म ले तीन हजार उत्तम जवानमन ला लीस अऊ दाऊद अऊ ओकर मनखेमन ला जंगली छेरीमन के खड़े चट्टानमन के लकठा म खोजे बर निकलिस।
1SA 24:3 जब ओह रद्दा म भेड़थान करा आईस, त उहां एक गुफा रिहिस, अऊ साऊल ह बहिर फिरे बर ओकर भीतर गीस। दाऊद अऊ ओकर मनखेमन ओही गुफा के पाछू म बईठे रहंय।
1SA 24:4 तब दाऊद के मनखेमन ओकर ले कहिन, “आज ओ दिन अय, जेकर बारे म यहोवा ह तोला कहे रिहिस, ‘मेंह तोर बईरी ला तोर हांथ म कर दूहूं ताकि तें ओकर संग अपन ईछा मुताबिक बरताव कर।’ ” तब दाऊद ह रेंगत गीस अऊ चुपेचाप साऊल के अंगरखा के छोर ला काट लीस।
1SA 24:5 येकर बाद, दाऊद ह साऊल के कपड़ा के छोर ला काटके पछताईस।
1SA 24:6 ओह अपन मनखेमन ला कहिस, “यहोवा ह मना करथे कि मेंह अपन मालिक, यहोवा के अभिसिक्त जन के संग अइसने काम करंव, या ओकर ऊपर अपन हांथ उठावंव; काबरकि ओह यहोवा के अभिसिक्त जन अय।”
1SA 24:7 अइसने बात कहिके दाऊद ह अपन मनखेमन ला बहुंत चेताईस अऊ ओमन ला साऊल ऊपर हमला करे के अनुमति नइं दीस। ओकर पाछू साऊल ह गुफा ले निकलके अपन डहार म चल दीस।
1SA 24:8 तब दाऊद ह खोड़रा ले बाहिर निकलिस अऊ साऊल ला नरियाके कहिस, “हे राजा मोर मालिक।” जब साऊल ह अपन पाछू कोति मुड़के देखिस, त दाऊद ह झुकके भुइयां कोति मुड़ ला नवाके दंडवत करिस।
1SA 24:9 ओह साऊल ला कहिस, “तेंह ओ मनखेमन के बात ला काबर सुनथस, जऊन मन ये कहिथें कि दाऊद ह तोर हानि करे चाहत हे?
1SA 24:10 आज तेंह अपन आंखी ले देख डारे हस कि यहोवा ह गुफा म कइसे तोला मोर हांथ म कर दे रिहिस। मोर कुछू मनखेमन तो तोला मार डारे बर घलो कहिन, पर मेंह तोला छोंड़ देंव; मेंह कहेंव, ‘मेंह अपन मालिक ऊपर हांथ नइं उठावंव, काबरकि ओह यहोवा के अभिसिक्त जन अय।’
1SA 24:11 देख, हे मोर ददा, मोर हांथ म तोर अंगरखा के ये कुटा ला देख! मेंह तोर कपड़ा के छोर ला काट तो लेंव पर तोला घात नइं करेंव। देख कि मोर हांथ म अइसने कुछू नइं ए, जेकर से ये पता चले कि मेंह गलत काम करे के या बिदरोह करे के दोसी अंव। मेंह तोर बिरूध म कोनो गलती नइं करे हंव, पर तेंह मोर परान लेय बर मोला खोजत हस।
1SA 24:12 यहोवा ह तोर अऊ मोर नियाय करय। अऊ जऊन गलत काम तेंह मोर बिरूध म करे हवस, यहोवा ओकर बदला लेवय, पर मोर हांथ ह तोर हानि करे बर नइं उठय।
1SA 24:13 जइसे कि पुराना कहावत हे, ‘दुस्ट मनखेमन ले दुस्टता के काम होथे,’ एकरसेति मोर हांथ ह तोर ऊपर नइं उठही।
1SA 24:14 “इसरायल के राजा ह काकर बिरूध म निकलके आय हवय? तेंह काकर पाछू पड़े हस? एक मरे कुकुर के पाछू? एक कीरा के पाछू?
1SA 24:15 यहोवा ह हमर नियाय करइया होवय अऊ फैसला करय। ओह मोर मामला ऊपर बिचार करय अऊ मोला संभालय; ओह मोला तोर हांथ ले बचाके मोर नियाय करय।”
1SA 24:16 जब दाऊद ह साऊल ले ये बात कह चुकिस, त साऊल ह पुछिस, “हे मोर बेटा, दाऊद, का येह तोर अवाज ए?” अऊ साऊल ह चिचियाके रोवन लगिस।
1SA 24:17 फेर ओह दाऊद ले कहिस, “तेंह मोर ले जादा धरमी अस। तेंह तो मोर संग भलई करे हस, पर मेंह तोर संग बुरई करे हंव।
1SA 24:18 तेंह जऊन भलई मोर संग करे हस, ओकर बारे म तेंह मोला अभी बताय; यहोवा ह मोला तोर हांथ म कर दे रिहिस, पर तेंह मोर घात नइं करय।
1SA 24:19 जब कोनो मनखे अपन बईरी ला पाथे, त का ओह ओकर बिगर कोनो हानि करे ओला जावन देथे? आज तेंह जइसने बरताव मोर संग करे हस, यहोवा ह तोला ओकर बने ईनाम देवय।
1SA 24:20 मेंह जानत हंव कि तेंह जरूर राजा बनबे अऊ इसरायल के राज ह तोर हांथ म इस्थिर होही।
1SA 24:21 अब तेंह मोर ले यहोवा के कसम खा कि तेंह मोर संतानमन ला नास नइं करबे या मोर ददा के घराना ले मोर नांव ला नइं मेटाबे।”
1SA 24:22 एकरसेति दाऊद ह साऊल ले अइसने ही कसम खाईस। तब साऊल ह अपन घर लहुंट गीस, पर दाऊद अऊ ओकर मनखेमन ऊपर गढ़ म चल दीन।
1SA 25:1 समूएल के मिरतू हो गीस, अऊ जम्मो इसरायलीमन जूरिन अऊ ओकर बर सोक मनाईन; अऊ ओमन ओला रामा सहर के ओकर घर म माटी दीन। तब दाऊद ह खाल्हे पारान के सुन्ना जगह म चल दीस।
1SA 25:2 माओन नगर म एक मनखे रिहिस, जेकर उहां करमेल नगर म संपत्ति रिहिस, अऊ ओह बहुंत धनी मनखे रिहिस। ओकर करा एक हजार बकरी अऊ तीन हजार भेड़ रिहिन, अऊ ओह करमेल म अपन भेड़मन के ऊन कतरत रिहिस।
1SA 25:3 ओ मनखे के नांव नाबाल अऊ ओकर घरवाली के नांव अबीगैल रिहिस। ओह एक बुद्धिमान अऊ सुन्दर माईलोगन रिहिस, पर ओकर घरवाला ह कठोर अऊ खराप काम करनेवाला रिहिस—ओह एक कालेबबंसी रिहिस।
1SA 25:4 जब दाऊद ह सुन्ना जगह म रिहिस, त ओह सुनिस कि नाबाल ह अपन भेड़मन के ऊन कतरत हवय।
1SA 25:5 त दाऊद ह अपन दस जवानमन ला कहिस, “करमेल म नाबाल करा जावव अऊ मोर कोति ले ओला जोहार-भेंट करव।
1SA 25:6 अऊ ओला अइसने कहव, ‘तेंह जीयत रह! तोर अऊ तोर घराना के कल्यान होवय! अऊ तोर जम्मो चीज के कल्यान होवय!
1SA 25:7 “ ‘मेंह सुने हंव कि येह भेड़मन के ऊन कतरे के समय अय। जब तोर चरवाहामन हमर संग रिहिन, त हमन ओमन के संग कोनो गलत बरताव नइं करेंन अऊ जतेक समय ओमन हमर संग करमेल म रिहिन, ओमन के कुछू नइं गंवाईस।
1SA 25:8 तेंह अपन सेवकमन ला पुछ अऊ ओमन तोला बताहीं। एकरसेति, जब हमन खुसी के बेरा म आय हवन, त मोर जवान मनखेमन ऊपर किरपा कर। जऊन कुछू तोर ले हो सकत हे, अपन सेवकमन ला अऊ अपन बेटा सहीं दाऊद ला दे।’ ”
1SA 25:9 जब दाऊद के जवानमन उहां हबरिन, त ओमन दाऊद के नांव म नाबाल ला ये संदेस देके इंतजार करिन।
1SA 25:10 नाबाल ह दाऊद के सेवकमन ला ये जबाब दीस, “दाऊद ह कोन ए? ये यिसै के बेटा कोन ए? आजकल बहुंत सेवकमन अपन मालिकमन ला छोंड़के भागत हवंय।
1SA 25:11 मेंह काबर अपन रोटी अऊ पानी, अऊ मांस, जऊन ला मेंह अपन ऊन कतरइयामन बर काटे हवंव, ओला लेके अइसने मनखेमन ला दे दंव, जेमन ला मेंह नइं जानंव कि ओमन कहां ले आय हवंय?”
1SA 25:12 दाऊद के जवानमन लहुंटके वापिस चल दीन। जब ओमन दाऊद करा हबरिन, त ओमन ओला जम्मो बात जस के तस सुना दीन।
1SA 25:13 तब दाऊद ह अपन मनखेमन ला कहिस, “जम्मो झन अपन-अपन तलवार बांध लेवव!” अऊ ओमन अपन-अपन तलवार बांध लीन, अऊ दाऊद घलो अपन तलवार ला बांध लीस। लगभग चार सौ मनखे दाऊद के संग गीन, अऊ दू सौ मनखे सामान के संग रूक गीन।
1SA 25:14 पर एक सेवक ह नाबाल के घरवाली अबीगैल ला बताईस, “दाऊद ह सुनसान जगह ले हमर मालिक ला अपन जोहार-भेंट करे बर दूत पठोय रिहिस, पर हमर मालिक ह ओमन के बेजत्ती करिस।
1SA 25:15 जबकि ओ आदमीमन हमर संग भलई करिन। ओमन हमर ले गलत बरताव नइं करिन, अऊ ओ पूरा समय जब हमन मैदान म ओमन के लकठा म रहेंन, तब हमर कोनो चीज नइं गंवाईस।
1SA 25:16 ओ पूरा समय जब हमन ओमन के लकठा म भेड़-बकरीमन ला चरात रहेंन, त ओमन रात-दिन हमर चारों कोति आड़ बनके रिहिन।
1SA 25:17 अब तें येकर बारे म सोच-बिचार कर अऊ देख कि तेंह का कर सकथस, काबरकि बिपत्ति ह हमर मालिक अऊ ओकर जम्मो घराना ऊपर अवइया हे। हमर मालिक तो अइसने दुस्ट मनखे अय कि ओकर ले कोनो गोठिया नइं सकय।”
1SA 25:18 तब अबीगैल ह जल्दी करके दू सौ रोटी, दू ठन चाम के थैली म अंगूर के मंद, पांच ठन भेड़मन के मांस, पांच सेआ भूंजे अनाज, एक सौ किसमिस के केक अऊ दबाय अंजीर के दू सौ केक लेके गदहामन म लदवाईस,
1SA 25:19 अऊ अबीगैल ह अपन सेवकमन ला कहिस, “तुमन आघू चलव; मेंह तुम्हर पाछू-पाछू आवत हंव।” पर ओह अपन घरवाला नाबाल ला ये बात नइं बताईस।
1SA 25:20 जब ओह अपन गदहा म चघके पहाड़ के एक घाटी म आईस, त उहां दाऊद अऊ ओकर मनखेमन ओकर कोति खाल्हे उतरत आवत रिहिन, अऊ ओह ओमन ले मिलिस।
1SA 25:21 दाऊद ह थोरकन देर पहिली अपनआप ले कहे रिहिस, “ये सब बेकार हो गे—सुनसान जगह म, ये मनखे के संपत्ति के, मेंह पूरा पहरेदारी करेंव, जेकर से ओकर कुछू घलो चीज नइं गंवाईस। ओह भलई के बदले मोर संग बुरई करे हवय।
1SA 25:22 परमेसर ह दाऊद के संग बहुंत कठोरता से बरताव करय, यदि बिहनियां होवत तक, में ओ मनखे के अधीन म रहइया एको आदमी ला घलो जीयत छोड़ंव त!”
1SA 25:23 जब अबीगैल ह दाऊद ला देखिस, त ओह जल्दी से अपन गदहा ले उतरिस अऊ दाऊद के आघू मुहूं के बल भुइयां म गिरके ओला दंडवत करिस।
1SA 25:24 ओह दाऊद के गोड़ खाल्हे गिरके कहिस: “हे मोर मालिक, अपन सेविका ला छेमा कर, अऊ मोला तोर से गोठियावन दे; सुन कि तोर सेविका का कहे चाहत हे।
1SA 25:25 हे मोर मालिक, ओ दुस्ट मनखे नाबाल ऊपर धियान झन दे। जइसने ओकर नांव हे, वइसने ही ओह अय—ओकर नांव के मतलब मुरूख होथे, अऊ सही म ओमा मुरूखता पाय जाथे। पर में, तोर सेविका ह ओ जवानमन ला नइं देख सकेंव, जेमन ला मोर मालिक ह पठोय रिहिस।
1SA 25:26 अऊ अब, हे मोर मालिक, यहोवा तोर परमेसर के जिनगी अऊ तोर जिनगी के कसम, जबकि यहोवा ह तोला खून करे ले अऊ अपन हांथ से खुद बदला लेय से रोके हवय, एकरसेति तोर बईरीमन अऊ ओ जम्मो, जेमन मोर मालिक ला नुकसान पहुंचाय के इरादा रखथें, ओमन के हालत नाबाल के सहीं होवय।
1SA 25:27 अऊ ये भेंट, जऊन ला तोर सेविका ह अपन मालिक करा लाने हवय, येला तोर पाछू चलइया मनखेमन ला दिये जावय।
1SA 25:28 “किरपा करके अपन सेविका के अपराध ला छेमा कर। यहोवा तोर परमेसर ह निस्चय ही मोर परभू के राजबंस ला स्थापित करही, काबरकि तेंह यहोवा के लड़ई लड़त हस, अऊ तोर जिनगी भर तोर म कोनो बुरई नइं पाय जाही।
1SA 25:29 हालाकि एक मनखे तोर परान लेय बर तोर पीछा करत हे, पर मोर मालिक के परान यहोवा तोर परमेसर के दुवारा जिनगी के गठरी म बंधाय रहिही, अऊ तोर बईरीमन के परान ला अइसने निकाल लीही, जइसने गोफन म ले गोटी निकलथे।
1SA 25:30 जब यहोवा ह मोर मालिक ले करे गय वायदा के जम्मो बने चीज ला पूरा कर लीही अऊ ओला इसरायल ऊपर परधान ठहिरा दीही,
1SA 25:31 तब मोर मालिक ला ये खातिर पछताना नइं पड़ही कि ओह अकारन खून बहाय हवय या ओह खुद बदला लेय हवय। अऊ जब यहोवा तोर परमेसर ह मोर मालिक ला सफलता दे दीही, तब अपन सेविका ला सुरता करबे।”
1SA 25:32 दाऊद ह अबीगैल ला कहिस, “यहोवा, इसरायल के परमेसर के महिमा होवय, जऊन ह आज मोर ले भेंट करे बर तोला पठोय हवय।
1SA 25:33 परमेसर ह तोला आसीस देवय, काबरकि तेंह सही निरनय ले हस अऊ मोला आज तें खून बहाय अऊ अपन खुद के हांथ ले अपन बदला लेय से रोक ले हस।
1SA 25:34 नइं तो, यहोवा, इसरायल के परमेसर के जिनगी के कसम, जऊन ह मोला तोर नुकसान करे ले रोके हवय, कहूं तेंह जल्दी करके मोर ले भेंट करे बर नइं आय रहितय, त बिहनियां के होवत तक नाबाल के कोनो आदमी जीयत नइं बचे रहितिन।”
1SA 25:35 तब दाऊद ह अबीगैल के दुवारा लाय गे चीजमन ला गरहन करिस अऊ ओला कहिस, “सांति से अपन घर जा। मेंह तोर बात ला सुनेंव अऊ तोर बिनती ला मान ले हंव।”
1SA 25:36 तब अबीगैल ह नाबाल करा गीस, त देखिस कि ओह घर म राजा के सहीं एक भोज के आयोजन करत हवय। ओकर मन ह मगन रहय अऊ ओह नसा म चूर हो गे रहय। एकरसेति अबीगैल ह बिहनियां के होवत तक, ओला कुछू नइं कहिस।
1SA 25:37 दूसर दिन बिहनियां, जब नाबाल के नसा ह उतर गे रिहिस, तब ओकर घरवाली ह ओला ये जम्मो बात बताईस, तब ओह अपन मन म बहुंत हतास होईस अऊ ओह एक पथरा सहीं सुन्न हो गीस।
1SA 25:38 लगभग दस दिन के बाद, यहोवा ह नाबाल ला अइसने मारिस कि ओह मर गीस।
1SA 25:39 जब दाऊद ह सुनिस कि नाबाल ह मर गे हवय, त ओह कहिस, “यहोवा के महिमा होवय, जऊन ह नाबाल के दुवारा करे गय मोर अपमान के बदला लीस। ओह अपन सेवक ला गलती करे ले रोकिस अऊ नाबाल के बुरई ला ओकरेच मुड़ म डार दीस।” तब दाऊद ह अबीगैल करा खबर भिजवाके पुछिस कि ओह दाऊद के घरवाली बनय।
1SA 25:40 दाऊद के सेवकमन करमेल गीन अऊ अबीगैल ला कहिन, “दाऊद ह हमन ला तोला ले जाय बर पठोय हवय, ताकि तेंह ओकर घरवाली बनके रह।”
1SA 25:41 अबीगैल ह मुहूं के बल भुइयां म गिरके दंडवत करिस अऊ कहिस, “मेंह तोर सेविका अंव अऊ तोर सेवा करे बर अऊ अपन मालिक के सेवकमन के चरन धोय बर तियार हंव।”
1SA 25:42 तब अबीगैल ह जल्दी से एक गदहा ऊपर चघिस, अऊ अपन पांच सेविकामन ला लेके दाऊद के दूतमन के संग गीस, अऊ ओकर घरवाली हो गीस।
1SA 25:43 दाऊद ह यिजरेल नगर के अहीनोअम ले घलो बिहाव कर लीस, अऊ ओ दूनों ओकर घरवाली होईन।
1SA 25:44 पर साऊल ह अपन बेटी, दाऊद के घरवाली, मीकल ला लैस के बेटा पलतीएल ला देय दे रिहिस, जऊन ह गल्लीम के रहइया रिहिस।
1SA 26:1 जीपीमन गिबा म साऊल करा जाके कहिन, “का दाऊद ह ओ हकीला नांव के पहाड़ी म नइं छुपे हवय, जऊन ह यसीमोन के सामने म हवय?”
1SA 26:2 एकरसेति साऊल ह अपन तीन हजार चुने इसरायलीमन के संग दाऊद ला खोजे बर जीप के सुनसान जगह म गीस।
1SA 26:3 साऊल ह अपन डेरा हकीला नांव के पहाड़ी के रद्दा के तीर म डालिस, जऊन ह यसीमोन के सामने म रिहिस। पर दाऊद ह सुनसान जगह म रूके रिहिस। जब ओह ये जानिस कि साऊल ह ओकर पीछा करत उहां आ गे हवय,
1SA 26:4 त ओह भेदियामन ला पठोके ये जान लीस कि साऊल ह सही म आ गे हवय।
1SA 26:5 तब दाऊद ह निकलिस अऊ ओ जगह म गीस, जिहां साऊल ह डेरा डाले रिहिस। ओह ओ जगह ला देखिस, जिहां साऊल अऊ सेना के सेनापति, नेर के बेटा अबनेर पड़े रहंय। साऊल ह डेरा के भीतर लेटे रहय, अऊ सेना ह ओकर चारों कोति डेरा डाले रहय।
1SA 26:6 तब दाऊद ह हित्ती अहीमेलेक अऊ सरूयाह के बेटा, योआब के भाई, अबीसै ले पुछिस, “मोर संग कोन ह खाल्हे डेरा म साऊल करा जाही?” अबीसै ह कहिस, “मेंह तोर संग चलहूं।”
1SA 26:7 त दाऊद अऊ अबीसै रथिया सेना करा गीन, अऊ का देखिन कि साऊल डेरा के भीतर सोवत हवय, ओकर बरछी ह ओकर मुड़ के लकठा म भुइयां म गड़े हवय। अबनेर अऊ सैनिकमन ओकर चारों कोति पड़े रहंय।
1SA 26:8 तब अबीसै ह दाऊद ला कहिस, “परमेसर ह आज तोर बईरी ला तोर हांथ म कर दे हवय। मोला कह, मेंह बरछी के एके वार म ओला भुइयां म बेध दूहूं; मोला ओकर ऊपर दूबारा वार करना नइं पड़ही।”
1SA 26:9 पर दाऊद ह अबीसै ला कहिस, “ओला नास झन कर! यहोवा के अभिसिक्त जन ऊपर हांथ उठाके कोन ह निरदोस हो सकथे?”
1SA 26:10 फेर दाऊद ह कहिस, “यहोवा के जिनगी के कसम, यहोवा ह ओला मारही, या ओकर समय आही अऊ ओह मर जाही, या ओह लड़ई म जाके नास हो जाही।
1SA 26:11 पर यहोवा ये झन करय कि मेंह यहोवा के अभिसिक्त जन ऊपर हांथ उठावंव। अब तें ओकर मुड़ के लकठा म रखे बरछी अऊ पानी के सुराही ला धर, अऊ आ हमन इहां ले चले जावन।”
1SA 26:12 तब दाऊद ह बरछी अऊ पानी के सुराही ला साऊल के मुड़ के लकठा ले लेय लीस, अऊ ओमन चल दीन। कोनो येला नइं देखिस या येकर बारे नइं जानिस, अऊ न ही कोनो जागिस। ओमन जम्मो झन सुतत रिहिन, काबरकि यहोवा ह ओमन ला भारी नींद म डार दे रिहिस।
1SA 26:13 तब दाऊद ह पार होके दूसर कोति गीस अऊ कुछू दूरिहा म पहाड़ी ऊपर जाके ठाढ़ हो गीस; अऊ ओमन के बीच म एक बड़े जगह रहय।
1SA 26:14 दाऊद ह ओ सेना ला अऊ नेर के बेटा अबनेर ला नरियाके कहिस, “हे अबनेर, का तेंह मोला जबाब देबे?” अबनेर ह जबाब दीस, “तेंह कोन अस, जो राजा ला नरियावत हस?”
1SA 26:15 दाऊद ह अबनेर ला कहिस, “तेंह एक आदमी अस, अस कि नइं? अऊ इसरायल म तोर सहीं कोन हवय? तेंह अपन मालिक, राजा के पहरेदारी काबर नइं करय? एक झन तोर मालिक, राजा ला नास करे बर आय रिहिस।
1SA 26:16 जऊन काम तें करे हस, ओह ठीक नो हय। यहोवा के जिनगी के कसम, तें अऊ तोर मनखेमन मारे जाय के लईक हव, काबरकि तुमन अपन मालिक, यहोवा के अभिसिक्त जन के पहरेदारी नइं करेव। अपन चारों कोति देख। राजा के ओ बरछी अऊ पानी के सुराही कहां हवय, जऊन ह ओकर मुड़ के लकठा म रिहिस?”
1SA 26:17 साऊल ह दाऊद के अवाज ला चिन डारिस अऊ कहिस, “हे मोर बेटा, दाऊद, का येह तोर अवाज अय?” दाऊद ह जबाब दीस, “हव, हे मोर मालिक मोर राजा, येह मोर अवाज अय।”
1SA 26:18 फेर ओह कहिस, “मोर परभू ह अपन सेवक के पीछा काबर करत हवय? मेंह का करे हवंव, अऊ मेंह कोन गलत काम के दोसी अंव?
1SA 26:19 अब, मोर मालिक, राजा ह अपन सेवक के बात ला सुन लेवय। यदि यहोवा ह तोला मोर बिरूध उकसाईस हवय, त फेर ओह एक भेंट गरहन करय। पर यदि मनखेमन अइसने करे हवंय, त ओमन ला यहोवा के आघू म सराप लगय! ओमन आज मोला यहोवा के उत्तराधिकार के बांटा ले अलग कर दे हवंय अऊ कहे हवंय, ‘जा, आने देवतामन के सेवा कर।’
1SA 26:20 एकरसेति अब मोर खून ह यहोवा ले दूरिहा भुइयां म झन गिरन पावय। इसरायल के राजा ह एक कीरा ला खोजे बर निकले हवय—जइसने कि कोनो पहाड़मन म तीतर के सिकार करथे।”
1SA 26:21 तब साऊल ह कहिस, “मेंह पाप करे हवंव। हे मोर बेटा दाऊद, वापिस आ जा। मेंह फेर तोर कुछू हानि करे के कोसिस नइं करंव, काबरकि तेंह आज मोर परान ला बहुंत अनमोल समझय। निस्चय ही, मेंह मुरूख सहीं काम करे हंव अऊ बहुंत गलत करे हंव।”
1SA 26:22 दाऊद ह जबाब देवत कहिस, “राजा के बरछी इहां हवय; तोर कोनो जवान इहां आवय अऊ येला ले जावय।
1SA 26:23 यहोवा ह हर एक ला ओकर धरमीपन अऊ बिसवासयोग्यता के ईनाम देथे। यहोवा ह आज तोला मोर हांथ म कर दे रिहिस, पर मेंह यहोवा के अभिसिक्त जन के ऊपर हांथ उठाना उचित नइं समझेंव।
1SA 26:24 जइसने कि मेंह आज तोर जिनगी ला मयारू जानेंव, वइसने ही यहोवा घलो मोर जिनगी ला मयारू जानय अऊ मोला जम्मो बिपत्ति ले बचावय।”
1SA 26:25 तब साऊल ह दाऊद ला कहिस, “हे मोर बेटा दाऊद, परमेसर ह तोला आसीस देवय; तेंह बड़े-बड़े काम करबे अऊ जरूर जय पाबे।” तब दाऊद ह अपन रसता म चल दीस, अऊ साऊल ह अपन घर लहुंट गीस।
1SA 27:1 ओकर पाछू दाऊद ह अपन मन म सोचिस, “अब में कोनो न कोनो दिन साऊल के हांथ ले मारे जाहूं। सबले बने बात ये होही कि मेंह बचके पलिस्तीमन के देस म भाग जावंव। तब साऊल ह इसरायल के कोनो भी जगह म मोला खोजना छोंड़ दीही, अऊ मेंह ओकर हांथ ले बच निकलहूं।”
1SA 27:2 एकरसेति दाऊद अऊ ओकर संग छै सौ मनखे ओ जगह ला छोंड़ दीन अऊ ओमन गत सहर के राजा माओक के बेटा आकीस करा गीन।
1SA 27:3 दाऊद अऊ ओकर मनखेमन गत म आकीस के संग रहे लगिन। हर एक मनखे के संग ओकर परिवार घलो रहय, अऊ दाऊद के दू झन घरवाली रिहिन: यिजरेल के अहीनोअम अऊ करमेल के अबीगैल, जऊन ह नाबाल के बिधवा रिहिस।
1SA 27:4 जब साऊल ला ये बताय गीस कि दाऊद ह गत ला भाग गे हवय, त ओह ओला फेर नइं खोजिस।
1SA 27:5 तब दाऊद ह आकीस ला कहिस, “यदि मोर ऊपर तोर किरपा-दिरिस्टी हवय, त देहात इलाका म कोनो नगर मोला दे ताकि मेंह उहां रहंव। तोर सेवक ह तोर संग राजकीय सहर म काबर रहय?”
1SA 27:6 एकरसेति ओ दिन आकीस ह दाऊद ला सिकलग नगर दे दीस, अऊ तब ले सिकलग ह यहूदा के राजामन के बने हवय।
1SA 27:7 दाऊद ह पलिस्तीमन के इलाका म एक साल अऊ चार महिना रिहिस।
1SA 27:8 दाऊद अऊ ओकर मनखेमन ऊपर जाके गसूरी, गिरजी अऊ अमालेकीमन ऊपर हमला करिन। (पुराना जमाना ले, ये मनखेमन ओ देस म रहत रिहिन, जऊन ह सूर अऊ मिसर देस तक फईले रिहिस।)
1SA 27:9 दाऊद ह जब भी कोनो इलाका म हमला करय, त ओह उहां के एको मनखे या माईलोगन ला जीयत नइं छोंड़य, पर भेड़-बकरी, गाय-बईला, गदहा, ऊंट अऊ कपड़ामन ला ले लेवय अऊ तब ओह लहुंटके आकीस करा जावय।
1SA 27:10 जब आकीस ह पुछय, “आज तुमन कहां हमला करे बर गे रहेव?” त दाऊद ह कहय, “यहूदा के नेगेव म” या “यरहमेल के नेगेव म” या “केनीमन के नेगेव म।”
1SA 27:11 दाऊद ह ये सोचके एको मनखे या माईलोगन ला जीयत नइं छोंड़य, “ओमन गत म आके हमर बारे म ये कह सकत हें, ‘दाऊद ह अइसने करे हवय।’ ” अऊ जब तक ओह पलिस्तीमन के इलाका म रिहिस, तब तक ओह अइसने ही करिस।
1SA 27:12 आकीस ह दाऊद ऊपर बिसवास करय अऊ अपन मन म कहय, “ओह अपन इसरायली मनखेमन के नजर म अइसे गिर गे हवय कि ओह जिनगी भर मोर सेवक बने रहिही।”
1SA 28:1 कुछू दिन के पाछू पलिस्तीमन इसरायल के बिरूध लड़े बर अपन सेना ला संकेलिन। आकीस ह दाऊद ला कहिस, “तेंह ये बात ला जान ले कि तोला अऊ तोर मनखेमन ला मोर संग सेना म जाना पड़ही।”
1SA 28:2 दाऊद ह कहिस, “तब तेंह खुद देखबे कि तोर सेवक ह का कर सकत हे।” आकीस ह जबाब दीस, “बहुंत बढ़िया, मेंह तोला अपन जिनगी भर अपन अंगरछक बनाके रखहूं।”
1SA 28:3 समूएल ह मर गीस, अऊ जम्मो इसरायलीमन ओकर बर सोक मनाईन अऊ ओला ओकर नगर रामा म माटी दीन। साऊल ह भूतसाधक अऊ बईगामन ला देस ले निकाल देय रिहिस।
1SA 28:4 पलिस्तीमन जूरिन अऊ आके सुनेम नगर म डेरा डालिन, जबकि साऊल ह जम्मो इसरायलीमन ला संकेलके गिलबो पहाड़ म डेरा डालिस।
1SA 28:5 जब साऊल ह पलिस्ती सेना ला देखिस, त ओह डरा गीस; ओकर मन ह आतंक ले भर गीस।
1SA 28:6 ओह यहोवा ले पुछताछ करिस, पर यहोवा ह ओला न तो सपना, न ही ऊरीम अऊ न ही अगमजानीमन के दुवारा कोनो जबाब दीस।
1SA 28:7 साऊल ह तब अपन सेवकमन ले कहिस, “मोर बर कोनो भूतसाधक माईलोगन ला खोजव ताकि मेंह ओकर करा जाके पुछताछ करंव।” ओमन कहिन, “एनदोर नगर म एक भूत सिद्धि-करइया माईलोगन हवय।”
1SA 28:8 तब साऊल ह अपन भेस ला बदलिस अऊ आने कपड़ा पहिरके दू झन मनखे ला संग म लीस, अऊ रथिया ओ माईलोगन करा गीस, अऊ कहिस, “मोर बर कोनो आतमा ले सम्पर्क कर, अऊ जेकर नांव में लेवंव, ओ आतमा ला बला।”
1SA 28:9 पर ओ माईलोगन ह ओला कहिस, “तेंह तो जानत हस कि साऊल ह का करे हवय। ओह भूत सिद्धि-करइया अऊ बईगामन ला देस ले निकाल दे हवय। फेर तेंह मोला मरवाय बर मोर परान म फांदा काबर लगावत हस?”
1SA 28:10 साऊल ह यहोवा के कसम खाके ओला कहिस, “यहोवा के जिनगी के कसम, तोला येकर बर सजा नइं मिलय।”
1SA 28:11 तब माईलोगन ह पुछिस, “मेंह तोर बर कोन ला बलावंव?” ओह जबाब दीस, “समूएल ला बला।”
1SA 28:12 जब ओ माईलोगन ह समूएल ला देखिस, त ओह जोर से चिचियाके साऊल ले कहिस, “तेंह मोला काबर धोखा देय हस? तेंह तो साऊल अस!”
1SA 28:13 राजा ह ओला कहिस, “झन डर। तोला का दिखत हे?” माईलोगन ह कहिस, “मेंह भूत सहीं एक रूप ला भुइयां ले बाहिर निकलत देखत हंव।”
1SA 28:14 ओह पुछिस, “ओह कइसे दिखत हवय?” ओ माईलोगन ह जबाब दीस, “एक सियान मनखे बागा पहिरे ऊपर आवत हवय।” तब साऊल ह जान डारिस कि ओह समूएल अय, अऊ ओह झुकिस अऊ मुहूं के भार भुइयां म पट पड़के दंडवत करिस।
1SA 28:15 समूएल ह साऊल ला कहिस, “तेंह मोला ऊपर बलाके काबर बाधा डाले हवस?” साऊल ह कहिस, “मेंह भारी संकट म हवंव। पलिस्तीमन मोर संग लड़त हवंय अऊ परमेसर ह मोला छोंड़ दे हवय। ओह अब मोला कोनो जबाब नइं देवय, न तो अगमजानीमन के दुवारा अऊ न ही सपना के दुवारा। एकरसेति मेंह तोला बलाय हवंव कि तेंह मोला बता कि मेंह का करंव।”
1SA 28:16 समूएल ह कहिस, “जब यहोवा ह तोला छोंड़के तोर बईरी बन गे हवय, त फेर तेंह मोर ले काबर पुछत हस?
1SA 28:17 यहोवा ह जइसने मोर जरिये कहवाय रिहिस, वइसने ही ओह करे हवय। यहोवा ह तोर हांथ ले राज ला छीनके तोर परोसी दाऊद ला दे दीस हवय।
1SA 28:18 काबरकि तेंह यहोवा के बात ला नइं माने अऊ अमालेकीमन के बिरूध ओकर भड़के कोप के मुताबिक ओमन ला दंड नइं देय, एकरसेति यहोवा ह तोर संग आज अइसने करे हवय।
1SA 28:19 यहोवा ह तोला अऊ इसरायलीमन ला पलिस्तीमन के हांथ म कर दीही, अऊ कल तें अऊ तोर बेटामन मोर संग होहू। यहोवा ह इसरायली सेना ला घलो पलिस्तीमन के हांथ म कर दीही।”
1SA 28:20 समूएल के बात ला सुनके साऊल ह डर के मारे भुइयां म चित गिर पड़िस। ओकर ताकत ह खतम हो गे रहय, काबरकि ओह ओ पूरा दिन अऊ ओ पूरा रथिया कुछू नइं खाय रिहिस।
1SA 28:21 जब ओ माईलोगन ह साऊल करा आईस अऊ देखिस कि साऊल ह बहुंत डरे हवय, त ओह कहिस, “देख, तोर सेविका ह तोर बात ला मानिस। मेंह अपन परान ला जोखिम म डालके, तें जो कहय, ओला करेंव।
1SA 28:22 अब तें घलो अपन सेविका के बात ला मान; मेंह तोला कुछू खाय बर देवत हंव; ओला खा, ताकि अपन रसता म जाय बर तोला ताकत मिलय।”
1SA 28:23 ओह मना करके कहिस, “मेंह नइं खावंव।” पर साऊल के मनखेमन घलो ओ माईलोगन के संग ओकर ले बिनती करिन, अऊ ओह ओमन के बात मान लीस। ओह भुइयां ले उठके खटिया म बईठिस।
1SA 28:24 ओ माईलोगन करा कोठा म एक मोटा बछवा रहय, जेला ओह तुरते काटके बनाईस। फेर ओह कुछू पीसान लेके गुंथिस अऊ बिगर खमीर डाले ओकर रोटी बनाईस।
1SA 28:25 तब ओह साऊल अऊ ओकर मनखेमन के आघू म ओ जेवन ला परोस दीस, अऊ ओमन खाईन। तब ओमन उठके ओहीच रथिया उहां ले चल दीन।
1SA 29:1 पलिस्तीमन अपन जम्मो सेना ला अपेक सहर म संकेलिन, अऊ इसरायलीमन यिजरेल म झरना के बाजू म डेरा डाले रहंय।
1SA 29:2 जब पलिस्ती सासन करइयामन अपन सेना के सौ-सौ अऊ हजार-हजार के दल बनाके आघू बढ़िन, त ओमन के पाछू-पाछू दाऊद अऊ ओकर मनखेमन आकीस के संग बढ़िन।
1SA 29:3 तब पलिस्तीमन के दूसर सेनापतिमन पुछिन, “ये इबरीमन का करहीं?” आकीस ह जबाब दीस, “का येह दाऊद नो हय, जऊन ह इसरायल के राजा साऊल के एक अधिकारी रिहिस? एक साल ले जादा हो गे, ओह मोर संग हवय, अऊ जब ले ओह साऊल ला छोंड़के आय हवय, तब ले लेके आज तक, मेंह ओमा कोनो दोस नइं पाय हवंव।”
1SA 29:4 पर दूसर पलिस्ती सेनापतिमन आकीस ऊपर गुस्सा होईन अऊ कहिन, “ओ मनखे ला वापिस भेज, ताकि ओह ओ जगह ला जावय, जेला तेंह ओकर बर ठहिराय हस। ओला हमर संग लड़ई म बिलकुल ही नइं जाना हे, नइं तो ओह लड़ई चलत समय हमर बिरूध हो जाही। बने बात ये होही कि ओह अपन मालिक के मन फेर जीतय, एकर बदले कि ओह हमर मनखेमन के मुड़ काटय।
1SA 29:5 का येह ओ दाऊद नो हय, जेकर बारे म इसरायल के माईलोगनमन नाचत-नाचत अइसने गावत रिहिन: “ ‘साऊल ह हजारों मनखे ला, अऊ दाऊद ह लाखों मनखे ला मारिस’?”
1SA 29:6 एकरसेति आकीस ह दाऊद ला बलाईस अऊ ओला कहिस, “यहोवा के जिनगी के कसम, तेंह भरोसा करे के लईक मनखे अस, अऊ सेना म मोर संग तोर सेवा ला पाके, मेंह खुस होहूं। जऊन दिन ले तेंह मोर करा आय, ओ दिन ले लेके आज तक, मेंह तोर म कोनो गलती नइं पाय हंव, पर दूसर सेनापतिमन तोला नइं चाहत हंय।
1SA 29:7 एकरसेति तेंह अब सांति से लहुंटके चले जा; अऊ अइसने कुछू झन कर, जेकर से दूसर पलिस्ती सासन करइयामन तोर ले नराज होवंय।”
1SA 29:8 दाऊद ह आकीस ले पुछिस, “पर मेंह का करे हंव? जब ले मेंह तोर करा आय हंव, तब ले लेके आज तक, तेंह अपन सेवक म का गलती पाय हस? मेंह जाके मोर मालिक राजा के बईरीमन के बिरूध म काबर लड़ नइं सकंव?”
1SA 29:9 आकीस ह जबाब दीस, “मेंह जानत हंव कि तेंह मोर नजर म तो परमेसर के स्वरगदूत सहीं बने लगत हस; पर पलिस्ती सेनापतिमन कहे हवंय, ‘ओला हमर संग लड़ई म बिलकुल ही नइं जाना हे।’
1SA 29:10 एकरसेति तेंह तोर मालिक के ओ सेवक, जऊन मन तोर संग आय हवंय, ओमन के संग बड़े बिहनियां उठबे, अऊ ओमन के संग बिहनियां अंजोर होते ही चले जाबे।”
1SA 29:11 एकरसेति दाऊद अऊ ओकर मनखेमन बड़े बिहनियां उठिन अऊ पलिस्तीमन के देस ला लहुंट गीन, अऊ पलिस्तीमन ऊपर यिजरेल कोति बढ़ गीन।
1SA 30:1 दाऊद अऊ ओकर मनखेमन तीसर दिन सिकलग सहर म हबरिन। इही बीच अमालेकीमन नेगेव अऊ सिकलग ऊपर हमला करे रहंय। ओमन हमला करके सिकलग ला जला दे रहंय,
1SA 30:2 अऊ ओमन उहां के माईलोगन, जवान, डोकरा अऊ आने जम्मो झन ला बंदी बनाके ले गे रहंय। ओमन कोनो के हतिया नइं करिन, पर ओमन ला अपन संग लेके चल दे रिहिन।
1SA 30:3 जब दाऊद अऊ ओकर मनखेमन सिकलग हबरिन, त देखिन कि नगर ला आगी ले जलाके नास कर दे गे हवय, अऊ ओमन के घरवाली अऊ बेटा-बेटीमन ला बंदी बनाके ले गे रहंय।
1SA 30:4 तब दाऊद अऊ ओकर मनखेमन चिचिया-चिचियाके अतका रोईन कि ओमन म अऊ रोये के ताकत नइं बचिस।
1SA 30:5 दाऊद के दू घरवालीमन घलो बंदी बनाय गे रिहिन—यिजरेल के अहीनोअम, अऊ अबीगैल, जऊन ह करमेल नगर के नाबाल के बिधवा रिहिस।
1SA 30:6 दाऊद ह बहुंत संकट म रिहिस, काबरकि मनखेमन ओला पथरवाह करके मार डारे के बात एक-दूसर ले करत रिहिन; हर एक मनखे ह अपन बेटा-बेटीमन के कारन मन म बहुंत दुखी रिहिस। पर दाऊद ला यहोवा ओकर परमेसर म ताकत मिलिस।
1SA 30:7 तब दाऊद ह अहीमेलेक के बेटा, अबियातार पुरोहित ला कहिस, “एपोद ला मोर करा लान।” तब अबियातार ह एपोद ला दाऊद करा ले आईस,
1SA 30:8 अऊ दाऊद ह यहोवा ले पुछताछ करिस, “का मेंह ये हमला करइया दल के पीछा करंव? का मेंह पीछा करके ओमन ला पकड़ लूहूं?” ओह जबाब दीस, “ओमन के पीछा कर। तेंह ओमन ला जरूर पकड़ लेबे अऊ जम्मो ला छोंड़ाके ले आबे।”
1SA 30:9 तब दाऊद ह अपन छै सौ मनखेमन के संग बसोर घाटी करा आईस; उहां कुछू मनखेमन रूक गीन।
1SA 30:10 दू सौ मनखे बहुंत थक गे रिहिन, जेकर कारन ओमन घाटी के ओ पार नइं जा सकिन, पर दाऊद ह चार सौ मनखेमन संग पीछा करत आघू बढ़िस।
1SA 30:11 मनखेमन ला मैदान म एक मिसरी मनखे मिलिस अऊ ओमन ओला दाऊद करा ले आईन। ओमन ओला पीये बर पानी अऊ खाय बर जेवन घलो दीन—
1SA 30:12 जेमा अंजीर के केक के एक टुकड़ा अऊ किसमिस के दू ठन केक रहय। जब ओह खाईस, त ओकर जी म जी आईस, काबरकि ओह तीन दिन अऊ तीन रथिया ले न तो खाना खाय रिहिस अऊ न ही पानी पीये रिहिस।
1SA 30:13 दाऊद ह ओकर ले पुछिस, “तेंह काकर मनखे अस? अऊ तेंह कहां ले आवत हस?” ओह जबाब दीस, “मेंह एक मिसरी मनखे अंव अऊ एक अमालेकी के गुलाम अंव। तीन दिन पहिले जब में बेमार पड़ेंव, त मोर मालिक ह मोला छोंड़ दीस।
1SA 30:14 हमन करेतीमन के नेगेव, यहूदा के देस के कुछू इलाका अऊ कालेब के नेगेव म हमला करे रहेंन। अऊ हमन सिकलग ला जला देंन।”
1SA 30:15 दाऊद ह ओकर ले पुछिस, “का तेंह मोला ओ हमला करइया दल करा ले जा सकत हस?” ओह जबाब दीस, “परमेसर के आघू म मोर ले कसम खा कि तेंह मोर परान नइं लेबे या मोला मोर मालिक के हांथ म नइं कर देबे, तब मेंह तोला खाल्हे ओमन करा ले जाहूं।”
1SA 30:16 ओह दाऊद ला खाल्हे ले गीस, अऊ ओमन उहां रहंय। ओमन ओ इलाका म बगर गे रहंय अऊ खावत-पीयत अऊ खुसी मनात रहंय, काबरकि ओमन पलिस्तीमन के देस अऊ यहूदा के देस ले बहुंत सामान लूटे रहंय।
1SA 30:17 दाऊद ह ओ दिन के सांझ ले लेके दूसर दिन के सांझ होवत तक ओमन के संग लड़ते रिहिस, अऊ ओमन के एको झन नइं बांचिन, सिरिप चार सौ जवान मनखेमन ला छोंड़के, जऊन मन ऊंटमन म चघके भाग गीन।
1SA 30:18 जऊन कुछू अमालेकीमन ले गे रिहिन, ओ जम्मो ला दाऊद ह छुड़ा लीस, अपन दूनों घरवालीमन ला घलो छुड़ा लीस।
1SA 30:19 कुछू घलो नइं गंवाईस: जवान या सियान, नोनी या बाबू, लूट के माल या अऊ कोनो चीज, जेला अमालेकीमन ले गे रिहिन। दाऊद ह जम्मो चीज ला वापिस ले आईस।
1SA 30:20 ओह जम्मो भेड़-बकरी अऊ गाय-बईलामन ला लीस, अऊ ओकर मनखेमन ये कहत ओमन ला आने जानवरमन के आघू हांकत ले गीन, “येह दाऊद के लूट के माल अय।”
1SA 30:21 तब दाऊद ह ओ दू सौ मनखेमन करा आईस, जऊन मन बहुंत थकावट के कारन ओकर संग नइं जा सके रिहिन, अऊ ओमन ला बसोर घाटी म छोंड़ दिये गे रिहिस। ओमन दाऊद अऊ ओकर संग के मनखेमन संग मिले बर बाहिर निकलिन। जब दाऊद अऊ ओकर मनखेमन ओमन करा हबरिन, त दाऊद ह ओमन के हालचाल पुछिस।
1SA 30:22 पर जऊन मन दाऊद के संग गे रिहिन, ओमा के दुस्ट अऊ खराप मनखेमन कहे लगिन, “ये मनखेमन हमर संग नइं गे रिहिन, एकरसेति हमन ओमन ला अपन छुड़ाय गे लूट के माल म ले कुछू नइं देवन। पर येमन अपन-अपन घरवाली अऊ अपन लइकामन ला लेके जा सकत हें।”
1SA 30:23 पर दाऊद ह कहिस, “हे मोर भाईमन, नइं! तुमन ओ सामान के संग अइसने झन करव, जेला यहोवा ह हमन ला दे हवय। ओह हमन ला बचाय हवय अऊ ओ हमला करइया दल ला हमर हांथ म कर दीस, जऊन ह हमर बिरूध म आय रिहिस।
1SA 30:24 ये बिसय म तुम्हर बात ला कोन सुनही? लड़ई म जवइयामन ला जइसने बांटा मिलही, वइसने ही बांटा ओमन ला घलो मिलही, जऊन मन इहां सामान के संग रूक गे रिहिन। जम्मो झन ला बरोबर-बरोबर बांटा मिलही।”
1SA 30:25 दाऊद ह येला इसरायलीमन बर एक कानून अऊ नियम बना दीस, अऊ ओ दिन ले लेके आज तक येह चले आवत हे।
1SA 30:26 जब दाऊद ह सिकलग म हबरिस, त ओह यहूदा के ओ अगुवामन करा लूट के कुछू माल पठोईस, जऊन मन ओकर संगवारी रिहिन, अऊ ओमन ला ये संदेस घलो पठोईस, “यहोवा के बईरीमन ले हमर लूटे गय माल म ले येह तुम्हर बर एक भेंट अय।”
1SA 30:27 दाऊद ह ये भेंट ओमन ला पठोईस, जऊन मन बेतेल, रामोत नेगेव, यत्तीर,
1SA 30:28 अरोएर, सिपमोत, एसतमोआ
1SA 30:29 राकाल म; अऊ जऊन मन यरहमेली अऊ केनीमन के नगरमन म;
1SA 30:30 होरमा, बोर-आसान, अताक
1SA 30:31 अऊ हेबरोन म; अऊ ओ जम्मो जगह म रहत रिहिन, जिहां दाऊद अऊ ओकर मनखेमन घुमे-फिरे रिहिन।
1SA 31:1 इही दौरान पलिस्तीमन इसरायलीमन ले लड़िन; इसरायलीमन ओमन ले हारके भाग गीन, अऊ बहुंते झन गिलबो नांव के पहाड़ म मारे गीन।
1SA 31:2 पलिस्तीमन साऊल अऊ ओकर बेटामन के तेजी से पीछा करत रिहिन, अऊ ओमन ओकर बेटा योनातन, अबीनादाब अऊ मलकी-सुआ ला मार डारिन।
1SA 31:3 साऊल के चारों कोति भयंकर लड़ई होय लगिस, अऊ जब धनुसधारीमन पीछा करके ओला घेर लीन, त ओमन ओला घायल कर दीन।
1SA 31:4 तब साऊल ह अपन हथियार ढोवइया ला कहिस, “अपन तलवार ला खींचके मोला भोंग दे, नइं तो ये खतनारहित मनखेमन आके मोर ठट्ठा करहीं।” पर ओकर हथियार ढोवइया ह डरके वइसने नइं करिस। तब साऊल ह अपन तलवार ला ठाढ़ करके ओकर ऊपर गिर गीस।
1SA 31:5 जब हथियार ढोवइया ह देखिस कि साऊल ह मर गीस, त ओह घलो अपन तलवार ऊपर गिरके ओकर संग मर गीस।
1SA 31:6 ये किसम ले साऊल अऊ ओकर तीनों बेटा अऊ ओकर हथियार ढोवइया अऊ ओकर जम्मो मनखेमन ओहीच दिन एके संग मर गीन।
1SA 31:7 जब घाटी के तीर के अऊ यरदन नदी के ओ पार के इसरायलीमन देखिन कि इसरायली सेना ह भाग गे हवय अऊ साऊल अऊ ओकर बेटामन मर गे हवंय, त ओमन अपन-अपन नगर ला छोंड़के भाग गीन। अऊ पलिस्तीमन आके ओ नगरमन ला अपन अधिकार म ले लीन।
1SA 31:8 दूसर दिन, जब पलिस्तीमन मरे मनखेमन के माल ला लूटे बर आईन, त ओमन ला साऊल अऊ ओकर तीनों बेटामन के लास गिलबो पहाड़ म मिलिस।
1SA 31:9 ओमन साऊल के मुड़ ला काटिन, अऊ ओकर हथियार ला निकाल लीन, अऊ ओमन पलिस्तीमन के पूरा देस म संदेसियामन ला एकरसेति पठोईन कि ओमन के मूरतीमन के मंदिर अऊ ओमन के मनखेमन के बीच म जाके ये खबर सुनावंय।
1SA 31:10 ओमन साऊल के हथियार ला असतोरेत नांव के देवी के मंदिर म रखिन अऊ ओकर लास ला बेत-सान सहर के दीवार म ठोंक दीन।
1SA 31:11 जब याबेस-गिलाद सहर के मनखेमन सुनिन कि पलिस्तीमन साऊल के संग का करे हवंय,
1SA 31:12 त ओमन के जम्मो साहसी मनखेमन रातों-रात बेत-सान गीन। ओमन साऊल अऊ ओकर बेटामन के लास ला बेत-सान के दीवार ले खाल्हे उतारके याबेस म ले आईन, अऊ उहां जला दीन।
1SA 31:13 तब ओमन साऊल अऊ ओकर बेटामन के हाड़ामन ला लीन अऊ ओमन ला याबेस म एक ठन झाऊ के रूख के खाल्हे म गाड़ दीन, अऊ ओमन सात दिन तक उपास रखिन।
2SA 1:1 साऊल के मरे के बाद, जब दाऊद ह अमालेकीमन ला मारके लहुंटिस, अऊ दाऊद ला सिकलग सहर म रहत दू दिन हो गीस,
2SA 1:2 तब तीसर दिन अइसने होईस कि साऊल के छावनी म ले एक मनखे आईस, जेकर ओनहा ह फटे रहय अऊ ओकर मुड़ म धुर्रा रहय। जब ओह दाऊद के लकठा म आईस, त ओह भुइयां म गिरके दाऊद ला दंडवत करिस।
2SA 1:3 दाऊद ह ओकर ले पुछिस, “तेंह कहां ले आवत हस?” ओह जबाब दीस, “मेंह इसरायली छावनी ले बांचके आय हवंव।”
2SA 1:4 दाऊद ह पुछिस, “उहां का बात होईस? मोला बता।” ओह जबाब दीस, “इसरायली मनखेमन लड़ई के मैदान ला छोंड़के भाग गीन। बहुंते झन गिरके मर गीन। अऊ साऊल अऊ ओकर बेटा योनातन घलो मारे गीन।”
2SA 1:5 तब दाऊद ह ओ समाचार देवइया जवान ले पुछिस, “तोला कइसे पता चलिस कि साऊल अऊ ओकर बेटा योनातन मर गे हवंय?”
2SA 1:6 ओ जवान ह कहिस, “संजोग के बात ए कि मेंह गिलबो पहाड़ म रहेंव, त मेंह देखेंव कि साऊल ह अपन भाला ऊपर टेक लगाय हवय, अऊ ओकर पीछा करत रथ अऊ सवारमन बड़ तेजी से आवत रहंय।
2SA 1:7 जब साऊल ह पाछू मुड़िस अऊ मोला देखिस, त ओह मोला बलाईस, अऊ मेंह कहेंव, ‘मोर बर का हुकूम हे?’
2SA 1:8 “ओह मोर ले पुछिस, ‘तें कोन अस?’ “मेंह कहेंव, ‘मेंह एक अमालेकी अंव।’
2SA 1:9 “तब ओह मोला कहिस, ‘मोर बाजू म ठाढ़ होके मोला मार डार! मेंह मिरतू के पीरा म कलपत हंव, पर मोर परान ह नइं निकलत हे।’
2SA 1:10 “तब मेंह ओकर बाजू म ठाढ़ होके ओला मार डारेंव, काबरकि मेंह जान गे रहेंव कि ओह गिर जाय के बाद नइं बांच सकय। अऊ मेंह ओकर मुड़ के मुकुट अऊ ओकर बाहां के कंगन ला इहां अपन मालिक करा ले आय हंव।”
2SA 1:11 तब दाऊद अऊ उहां ओकर संग के जम्मो मनखेमन सोक म अपन ओनहा ला पकड़के चीरिन।
2SA 1:12 ओमन साऊल अऊ ओकर बेटा योनातन बर, अऊ यहोवा के सेना बर अऊ इसरायल के घराना बर बिलाप करिन अऊ रोईन अऊ संझा तक उपास करिन, काबरकि ओमन तलवार ले मारे गे रिहिन।
2SA 1:13 दाऊद ह ओ समाचार देवइया जवान ले पुछिस, “तें कहां के अस?” ओह जबाब दीस, “में एक परदेसी के बेटा, एक अमालेकी अंव।”
2SA 1:14 दाऊद ह ओकर ले पुछिस, “तेंह यहोवा के अभिसिक्त जन ला नास करे बर अपन हांथ उठाय ले काबर नइं डरय?”
2SA 1:15 तब दाऊद ह अपन एक जवान ला बलाके कहिस, “जा अऊ ओला मार डार।” तब ओह ओ समाचार देवइया ला अइसे मारिस कि ओह मर गीस।
2SA 1:16 काबरकि दाऊद ह ओ समाचार देवइया ला कहे रिहिस, “तोर खून के दोस तोला ही लगय। तेंह खुद अपन मुहूं ले अपन बिरूध ये कहिके गवाही दे हस, ‘मेंह यहोवा के अभिसिक्त जन ला मार डारेंव।’ ”
2SA 1:17 तब दाऊद ह साऊल अऊ ओकर बेटा योनातन के बारे म ये बिलाप करिस,
2SA 1:18 अऊ ओह हुकूम दीस कि यहूदा के मनखेमन ला धनुस नांव के ये बिलापगीत सिखाय जावय (ये बिलापगीत ह यासार नांव के किताब म लिखाय हवय):
2SA 1:19 “हे इसरायल, एक सुघर हिरन तोर ऊंचहा जगह म मरे पड़े हे। सूरबीर ह कइसे गिरे पड़े हवय!
2SA 1:20 “गत म येला झन बतावव, अस्कलोन के गलीमन म येकर घोसना झन करव, अइसन झन होवय कि पलिस्तीमन के माईलोगनमन खुस होवंय, अइसन झन होवय कि खतनारहित मनखेमन के माईलोगनमन आनंद मनावंय।
2SA 1:21 “हे गिलबो के पहाड़मन, तुम्हर ऊपर न तो ओस पड़य अऊ न ही बारिस होवय, तुम्हर चौरस खेतमन म झड़ी के फुहार झन लगय। काबरकि उहां सूरबीर के ढाल ला तुछ समझे गीस, साऊल के ढाल—बिगर तेल लगाय रह गीस।
2SA 1:22 “मारे गय मनखे के खून बोहाय बिगर, सूरबीरमन के मांस खाय बिगर, योनातन के धनुस ह नइं लहुंटत रिहिस, अऊ न ही साऊल के तलवार ह असंतुस्ट होके लहुंटत रिहिस।
2SA 1:23 साऊल अऊ योनातन ला ओमन के जिनगी म ओमन ला मया मिलिस अऊ ओमन के परसंसा करे गीस, अऊ अपन मिरतू के बेरा म घलो ओमन अलग नइं होईन। ओमन गिधवा ले घलो तेज चलइया, अऊ सिंह ले घलो जादा बलवान रिहिन।
2SA 1:24 “हे इसरायल के बेटीमन, साऊल बर रोवव, जऊन ह तुमन ला सिन्दूरी अऊ सुघर ओनहा पहिराईस, जऊन ह तुम्हर पहिरावा ला सोन के जेवर ले सजाईस।
2SA 1:25 “ओ सूरबीरमन लड़ई म कइसे गिरे पड़े हवंय! तुम्हर ऊंचहा जगह म योनातन ह मरे पड़े हवय।
2SA 1:26 हे मोर भाई योनातन, मेंह तोर खातिर दुखी हवंव; तेंह मोर बहुंत मयारू रहय। मोर बर तोर मया ह अद्भूत रिहिस, माईलोगनमन के मया ले घलो जादा अद्भूत रिहिस।
2SA 1:27 “सूरबीर सैनिकमन कइसे गिरे पड़े हवंय! लड़ई के हथियारमन नास हो गे हवंय!”
2SA 2:1 एकर बाद दाऊद ह यहोवा ले पुछताछ करिस, “का मेंह यहूदा प्रदेस के कोनो नगर म जावंव?” यहोवा ह ओला जबाब दीस, “हव, जा।” त दाऊद ह पुछिस, “कोन नगर म जावंव?” यहोवा ह जबाब दीस, “हेबरोन म।”
2SA 2:2 तब दाऊद ह यिजरेली अहीनोअम, अऊ करमेली नाबाल के बिधवा अबीगैल नांव के अपन दूनों घरवाली के संग उहां गीस।
2SA 2:3 दाऊद ह अपन संग के मनखेमन ला घलो ओमन के परिवार के संग लेके गीस; अऊ ओमन हेबरोन अऊ येकर नगरमन म रहे लगिन।
2SA 2:4 तब यहूदा के मनखेमन हेबरोन आईन, अऊ उहां ओमन यहूदा के गोत्र ऊपर राजा के रूप म दाऊद के अभिसेक करिन। जब दाऊद ला ये बताय गीस कि जेमन साऊल ला माटी दीन, ओमन याबेस-गिलाद के मनखे रिहिन,
2SA 2:5 त ओह संदेसियामन ला ओमन करा ये कहे बर पठोईस, “अपन मालिक साऊल ला माटी देय के दुवारा तुमन जऊन दया देखाय हव, ओकर बर यहोवा ह तुमन ला आसीस देवय।
2SA 2:6 यहोवा ह तुमन ले किरपा अऊ सच्चई के बरताव करय, अऊ मेंह घलो तुम्हर ऊपर अइसे किरपा करहूं, काबरकि तुमन ये काम करे हवव।
2SA 2:7 अब तुमन मजबूत अऊ साहसी बनव, काबरकि तुम्हर मालिक साऊल ह मर गीस, अऊ यहूदा के मनखेमन अपन ऊपर राजा होय बर मोर अभिसेक करे हवंय।”
2SA 2:8 ये दौरान, नेर के बेटा अबनेर, जऊन ह साऊल के सेनापति रिहिस, ओह साऊल के बेटा ईस-बोसेत ला लेके महनैम म आईस,
2SA 2:9 अऊ ईस-बोसेत ला गिलाद, अस्सूरी अऊ यिजरेल, अऊ एपरैम, बिनयामीन अऊ जम्मो इसरायल ऊपर राजा बना दीस।
2SA 2:10 साऊल के बेटा ईस-बोसेत ह चालीस बछर के रिहिस, जब ओह इसरायल ऊपर राजा बनिस, अऊ ओह दू बछर तक राज करिस। पर यहूदा के गोत्र ह दाऊद बर वफादार बने रिहिस।
2SA 2:11 हेबरोन म यहूदा के गोत्र ऊपर दाऊद ह साढ़े सात बछर तक राजा रिहिस।
2SA 2:12 नेर के बेटा अबनेर ह साऊल के बेटा ईस-बोसेत के आदमीमन के संग महनैम ले गिबोन गीस।
2SA 2:13 तब सरूयाह के बेटा योआब, अऊ दाऊद के आदमीमन निकलके गीन अऊ ओमन ले गिबोन के तरिया करा मिलिन। एक दल ह तरिया के एक तरफ बईठिस अऊ एक दल ह तरिया के दूसर तरफ बईठिस।
2SA 2:14 तब अबनेर ह योआब ले कहिस, “कुछू जवानमन उठके हमर आघू म एक-दूसर के संग लड़ंय।” योआब ह कहिस, “ठीक हे, ओमन लड़ंय।”
2SA 2:15 तब ओमन उठिन अऊ ओमन के गनती करे गीस—बिनयामीन अऊ साऊल के बेटा ईस-बोसेत के तरफ ले बारह झन, अऊ दाऊद के तरफ ले बारह झन।
2SA 2:16 हर एक आदमी अपन बिरोधी के मुड़ ला धरिस अऊ अपन छुरा ला अपन बिरोधी के पंजरा म भोंग दीस, अऊ ओमन एक संग गिरके मर गीन। एकरसेति गिबोन म ओ जगह के नांव हेलकत-हस्सूरीम पड़िस।
2SA 2:17 ओ दिन बहुंत भयंकर लड़ई होईस, अऊ अबनेर अऊ इसरायलीमन दाऊद के जवानमन ले हार गीन।
2SA 2:18 उहां सरूयाह के तीन बेटा रिहिन: योआब, अबीसै अऊ असाहेल। असाहेल ह जंगली हिरन के सहीं तेज भागनेवाला मनखे रिहिस।
2SA 2:19 ओह अबनेर के पीछा करन लगिस, अऊ बिगर जेवनी या डेरी कोति मुड़े, ओह अबनेर के पीछा करिस।
2SA 2:20 अबनेर ह पाछू कोति मुड़के पुछिस, “का तेंह असाहेल अस?” ओह जबाब दीस, “हव, में अंव।”
2SA 2:21 त अबनेर ह ओकर ले कहिस, “अपन जेवनी या डेरी कोति मुड़ अऊ कोनो जवान ला पकड़के ओकर हथियारमन ला छीन ले।” पर असाहेल ह ओकर पीछा करई नइं छोंड़िस।
2SA 2:22 अबनेर ह फेर असाहेल ला चेतउनी दीस, “मोर पीछा करई छोंड़ दे! मेंह तोला काबर मार डारंव? अइसन करके मेंह तोर भाई योआब ला अपन मुहूं कइसे देखाहूं?”
2SA 2:23 पर असाहेल ह ओकर पीछा करई नइं छोंड़िस; तब अबनेर ह अपन बरछी के कुन्दा ला ओकर पेट म अइसे भोंग दीस कि बरछी ह ओकर आर-पार होके ओकर पीठ कोति निकल आईस। अऊ ओह गिरके उहेंच मर गीस। हर ओ मनखे जऊन ह ओ जगह म आईस, जिहां असाहेल ह गिरके मर गे रिहिस, उहां आके ओमन रूक गीन।
2SA 2:24 पर योआब अऊ अबीसै अबनेर के पीछा करिन, अऊ जब बेर ह बुड़त रिहिस, त ओमन अम्मा नांव के ओ पहाड़ी करा हबरिन, जऊन ह गिबोन के उजाड़ जगह के रसता म गीह के लकठा म हवय।
2SA 2:25 तब बिनयामीन के आदमीमन एक जुट होके अबनेर के पाछू हो लीन। ओमन अपन एक दल बनाके पहाड़ी के टीप म ठाढ़ हो गीन।
2SA 2:26 तब अबनेर ह योआब ला पुकारके कहिस, “का जरूरी अय कि तलवार ह सदा मारत रहय? का तें नइं जानस कि एकर अन्त दुखदाई होही? तेंह कब अपन आदमीमन ला हुकूम देबे कि ओमन अपन संगी इसरायलीमन के पीछा करई छोंड़ दें?”
2SA 2:27 योआब ह जबाब दीस, “परमेसर के जिनगी के सपथ, यदि तेंह नइं बोले होते, त मोर आदमीमन बिहान होवत तक ओमन के पीछा करे रहितिन।”
2SA 2:28 तब योआब ह तुरही फूंकिस, अऊ पूरा सैनिक दल ह रूक गीस; ओमन फेर इसरायलीमन के पीछा नइं करिन, अऊ न ही ओमन फेर लड़ई करिन।
2SA 2:29 ओ पूरा रथिया अबनेर अऊ ओकर आदमीमन अराबा म ले होके गीन। ओमन यरदन नदी ला पार करिन, अऊ बिहनियां के बेरा आघू बढ़त ओमन महनैम करा हबरिन।
2SA 2:30 तब योआब ह अबनेर के पीछा करई छोंड़ दीस अऊ पूरा सेना ला इकट्ठा करिस। ओह देखिस कि असाहेल के अलावा, दाऊद के अऊ उन्नीस आदमी उहां नइं रिहिन।
2SA 2:31 पर दाऊद के आदमीमन तीन सौ साठ ओ बिनयामीनीमन ला मार डारे रिहिन, जेमन अबनेर के संग रिहिन।
2SA 2:32 योआब अऊ ओकर दल के मन असाहेल के लास ला लीन अऊ ओला बैतलहम म ओकर ददा के कबर म माटी दीन। तब ओमन अऊ ओकर आदमीमन रात भर आघू बढ़ते रिहिन अऊ बड़े बिहनियां हेबरोन म हबरिन।
2SA 3:1 साऊल के घराना अऊ दाऊद के घराना के बीच बहुंत समय तक लड़ई चलते रिहिस। पर दाऊद ह अऊ मजबूत होवत गीस अऊ साऊल के घराना ह कमजोर होवत गीस।
2SA 3:2 हेबरोन नगर म दाऊद के जऊन बेटामन जनमिन, ओमन ये रिहिन: ओकर बड़े बेटा अमनोन रिहिस, जऊन ह यिजरेल के अहीनोअम ले जनमे रिहिस;
2SA 3:3 अऊ ओकर दूसर बेटा किलाब रिहिस, जऊन ह करमेल के नाबाल के बिधवा अबीगैल ले जनमे रिहिस; तीसर, अबसालोम रिहिस, जऊन ह गसूर के राजा तलमै के बेटी माका ले जनमे रिहिस;
2SA 3:4 चौथा, अदोनियाह रिहिस, जऊन ह हगीत ले जनमे रिहिस; पांचवां सपतयाह रिहिस, जेकर दाई अबीतल रिहिस;
2SA 3:5 अऊ छठवां यितराम, जऊन ह एगला नांव दाऊद के घरवाली ले जनमे रिहिस।
2SA 3:6 जब साऊल अऊ दाऊद दूनों के घराना के बीच लड़ई होवत रिहिस, तब अबनेर ह साऊल के घराना म अपन खुद के स्थिति ला मजबूत करत गीस।
2SA 3:7 साऊल के एक झन रखैल रिहिस, जेकर नांव रिस्पा रिहिस; ओह अय्या के बेटी रिहिस। ईस-बोसेत ह अबनेर ऊपर दोस लगाईस, “तेंह मोर ददा के रखैल संग काबर सुतय?”
2SA 3:8 ईस-बोसेत ह जऊन बात कहिस, ओकर कारन अबनेर ह बहुंत गुस्सा होईस अऊ कहिस, “का मेंह यहूदा के कुकुर के मुड़ अंव? आज तक मेंह तोर ददा साऊल के घराना अऊ ओकर परिवार अऊ संगवारीमन के पूरा मन से काम करे हंव। मेंह तोला दाऊद के हांथ म पड़न नइं दे हंव। तभो ले तेंह अब मोर ऊपर ये माईलोगन के बिसय म दोस लगावत हस!
2SA 3:9 यहोवा ह सपथ खाके दाऊद ले जऊन वायदा करे हवय, यदि मेंह ओकर मुताबिक दाऊद के मदद नइं करंव, त परमेसर ह अबनेर ले लेखा लेवय अऊ बहुंत कड़ई से लेखा लेवय
2SA 3:10 याने कि मेंह राज ला साऊल के घराना ले छीन लूहूं अऊ दाऊद के सिंघासन ला दान ले लेके बेरसेबा तक इसरायल अऊ यहूदा के ऊपर इस्थिर करहूं।”
2SA 3:11 ईस-बोसेत ह अबनेर ला अऊ कुछू कहे के हिम्मत नइं करिस, काबरकि ओह अबनेर ले डरत रिहिस।
2SA 3:12 तब अबनेर ह अपन कोति ले ये कहे बर संदेसियामन ला दाऊद करा पठोईस, “ये देस काकर अय? मोर संग एक समझौता कर, अऊ मेंह जम्मो इसरायल ला तोर अधीन करे म तोर मदद करहूं।”
2SA 3:13 दाऊद ह कहिस, “ठीक हे, मेंह तोर संग एक समझौता करहूं। पर एक बात मेंह तोर ले चाहथंव: तेंह मोर सामने नइं आबे, जब तक कि तेंह साऊल के बेटी मीकल ला लेके नइं आबे, जब तेंह मोर ले भेंट करे बर आबे।”
2SA 3:14 तब दाऊद ह ये मांग के संग संदेसियामन ला साऊल के बेटा ईस-बोसेत करा पठोईस, “मोला मोर घरवाली मीकल ला दे, जेकर संग मोर रिस्ता तय करे बर एक सौ पलिस्तीमन के खलड़ी ला दाम के रूप म चुकाय रहेंव।”
2SA 3:15 तब ईस-बोसेत ह मनखेमन ला हुकूम देके मीकल ला ओकर घरवाला पलतीएल ले अलग कर दीस, जऊन ह लैस के बेटा रिहिस।
2SA 3:16 तभो ले, ओकर घरवाला ह रोवत ओकर पाछू-पाछू बहूरीम तक गीस। तब अबनेर ह ओला कहिस, “अपन घर लहुंट जा।” त ओह लहुंट गीस।
2SA 3:17 फेर अबनेर ह इसरायल के अगुवामन संग सलाह-मसविरा करिस अऊ कहिस, “कुछू समय ले तुमन चाहत रहेव कि दाऊद ह तुम्हर राजा होवय।
2SA 3:18 अब वइसनेच करव! काबरकि यहोवा ह दाऊद ले वायदा करे हवय, ‘अपन सेवक दाऊद के दुवारा मेंह अपन मनखे इसरायल ला पलिस्तीमन के हांथ ले अऊ ओमन के जम्मो बईरीमन के हांथ ले छोंड़ाहूं।’ ”
2SA 3:19 अबनेर ह बिनयामीनी मनखेमन ले घलो गोठियाईस। तब ओह हेबरोन म दाऊद ला ओ जम्मो बात बताय बर चल दीस, जेला इसरायल अऊ बिनयामीन के पूरा गोत्र के मनखेमन करे चाहत रिहिन।
2SA 3:20 तब अबनेर ह अपन बीस जवानमन के संग हेबरोन म दाऊद करा आईस, त दाऊद ह ओकर अऊ ओकर मनखेमन बर एक जेवनार करिस।
2SA 3:21 तब अबनेर ह दाऊद ला कहिस, “मोला तुरते जाके मोर मालिक, राजा बर जम्मो इसरायलीमन ला इकट्ठा करन दे, ताकि ओमन तोर संग एक करार करंय, अऊ ये कि तें अपन मन मुताबिक जम्मो के ऊपर राज कर सकस।” तब दाऊद ह अबनेर ला बिदा करिस, अऊ ओह सांत मन से चले गीस।
2SA 3:22 तब ओही बेरा, दाऊद के जवानमन अऊ योआब बईरीमन के कोनो जगह म हमला करके लहुंटिन अऊ अपन संग बहुंत अकन लूट के सामान लेके आईन। पर ओ समय अबनेर ह दाऊद के संग हेबरोन म नइं रिहिस, काबरकि दाऊद ह ओला बिदा कर देय रिहिस, अऊ ओह सांत मन से चल दे रिहिस।
2SA 3:23 जब योआब अऊ ओकर संग के जम्मो सैनिकमन आईन, त योआब ला बताय गीस कि नेर के बेटा अबनेर ह राजा करा आय रिहिस अऊ राजा ह ओला बिदा कर दीस अऊ ओह सांत मन से चल दीस।
2SA 3:24 तब योआब ह राजा करा जाके कहिस, “तेंह ये का करे हस? देख, अबनेर ह तोर करा आय रिहिस, त तेंह ओला काबर जावन देय? अब ओह चले गे हवय!
2SA 3:25 तेंह नेर के बेटा अबनेर ला जानत हस; ओह तोला धोखा देय बर, अऊ तोर अवई-जवई अऊ तोर जम्मो काम के भेद लेय बर आय रिहिस।”
2SA 3:26 तब योआब ह दाऊद करा ले चल दीस अऊ अबनेर के पाछू संदेसियामन ला पठोईस, अऊ ओमन ओला सीरा नांव के कुन्ड ले लहुंटाके ले आईन। पर दाऊद ला ये बात के पता नइं रिहिस।
2SA 3:27 जब अबनेर ह हेबरोन म लहुंट आईस, त योआब ह ओला अलग एक भीतर के कमरा म ले गीस; ओह अइसे देखाईस मानो ओह ओकर ले गुपत म कुछू बात करे चाहत हे। अऊ उहां अपन भाई असाहेल के खून के बदला लेय बर, योआब ह ओकर पेट म छुरा ला अइसन भोंगिस कि ओह मर गीस।
2SA 3:28 बाद म, जब दाऊद ये बात ला सुनिस, त ओह घोसना करिस, “नेर के बेटा अबनेर के खून के बारे म, में अऊ मोर राज ह यहोवा के नजर म हमेसा निरदोस रहिबो।
2SA 3:29 ओकर खून के दोस ह योआब अऊ ओकर पूरा परिवार ऊपर लगय! योआब के परिवार म हमेसा कोनो न कोनो मनखे ला बहत घाव या कोढ़ के बेमारी होवय या ओह लउठी के मदद ले चलय या तलवार ले मारे जावय या भूखन मरइया होवय।”
2SA 3:30 (योआब अऊ ओकर भाई अबीसै मिलके अबनेर के हतिया कर दीन, काबरकि ओह ओमन के भाई असाहेल ला गिबोन म लड़ई के बेरा मार डारे रिहिस।)
2SA 3:31 तब दाऊद ह योआब अऊ अपन संग के जम्मो मनखेमन ला कहिस, “अपन-अपन ओनहा ला सोक म चीरव अऊ बोरा के ओनहा पहिरव अऊ अबनेर के आघू-आघू सोक मनात चलव।” दाऊद राजा खुद अरथी के पाछू-पाछू चलिस।
2SA 3:32 ओमन अबनेर ला हेबरोन म माटी दीन, अऊ राजा ह अबनेर के कबर म जोर-जोर से रोईस, अऊ जम्मो मनखेमन घलो रोईन।
2SA 3:33 तब राजा ह अबनेर बर ये बिलापगीत गाईस: “का उचित रिहिस कि अबनेर ह अइसने मरय, जइसने कोनो मुरूख ह मरथे?
2SA 3:34 न तो तोर हांथमन ला बांधे गीस, न ही तोर गोड़मन म बेड़ी डारे गीस। तेंह अइसे मरय, जइसे कोनो, दुस्ट मनखे के आघू म मरथे।” अऊ जम्मो मनखेमन ओकर बर फेर रोईन।
2SA 3:35 तब जम्मो मनखेमन आईन अऊ दाऊद ले बिनती करिन कि ओह दिन के रहत कुछू खा ले; पर दाऊद ह ये कहिके सपथ लीस, “यदि बेर बुड़े के पहिले मेंह रोटी या कुछू आने चीज ला खावंव, त परमेसर ह मोर ले अइसनेच, बरन एकर ले घलो जादा कठोर बरताव करय!”
2SA 3:36 जम्मो मनखेमन ये बात ऊपर धियान दीन अऊ खुस होईन; वास्तव म, ओ जम्मो चीज ले ओमन खुस रिहिन, जेला राजा ह करिस।
2SA 3:37 तब ओ दिन, उहां ओ जम्मो मनखे अऊ जम्मो इसरायलीमन जान डारिन कि नेर के बेटा अबनेर के हतिया करे म राजा के कोनो हांथ नइं रिहिस।
2SA 3:38 तब राजा ह अपन अधिकारीमन ले कहिस, “का तुमन ये बात ला नइं समझत हव कि इसरायल म, आज एक सेनापति अऊ एक बड़े मनखे ह खतम हो गीस?
2SA 3:39 अऊ आज, हालाकि मेंह अभिसिक्त राजा अंव, तभो ले मेंह कमजोर हंव, अऊ सरूयाह के ये बेटामन मोर ले जादा ताकतवर हो गे हवंय। यहोवा ह दुस्ट काम करइया ला ओकर दुस्ट काम के मुताबिक बदला देवय।”
2SA 4:1 जब साऊल के बेटा, ईस-बोसेत ह सुनिस कि अबनेर ह हेबरोन म मारे गीस, तब ओह हिम्मत हार गीस, अऊ जम्मो इसरायलीमन घबरा गीन।
2SA 4:2 साऊल के बेटा के दू झन आदमी रिहिन, जेमन छापामार दलमन के अगुवा रिहिन। एक के नांव बाना अऊ दूसर के नांव रेकाब रिहिस; येमन बिनयामीन के गोत्र के बेरोतवासी रिम्मोन के बेटा रिहिन—बेरोत ला बिनयामीन के भाग समझे जाथे,
2SA 4:3 काबरकि बेरोत के मनखेमन गित्तैम नगर ला भाग गे रिहिन अऊ ओमन उहां आज तक परदेसी के रूप म रहिथें।
2SA 4:4 (साऊल के बेटा योनातन के एक झन बेटा रिहिस, जऊन ह दूनों गोड़ ले खोरवा रिहिस। जब यिजरेल ले साऊल अऊ योनातन के बारे म समाचार आईस, तब ओह पांच बछर के रिहिस। ओ बेरा म, ओकर धाई ह ओला उठाके भागिस, अऊ जब ओह भागे बर जल्दी करत रिहिस, त लइका ह गिरके खोरवा हो गीस। ओकर नांव मपीबोसेत रिहिस।)
2SA 4:5 बेरोती रिम्मोन के बेटा रेकाब अऊ बाना, ईस-बोसेत के घर जाय बर निकलिन, अऊ ओमन उहां दिन म घाम के बेरा हबरिन, जब ईस-बोसेत ह मंझनियां अराम करत रिहिस।
2SA 4:6 ओमन घर के भीतरी भाग म अइसे गीन, मानो ओमन कुछू गहूं ले जाय बर आय हवंय, अऊ उहां ओमन ईस-बोसेत के पेट म छुरा भोंग दीन। तब रेकाब अऊ ओकर भाई बाना चुपेचाप भाग निकलिन।
2SA 4:7 ओमन घर म तब घुसे रिहिन, जब ईस-बोसेत ह अपन सोये के कमरा म बिस्तर म लेटे रिहिस। ओमन ओला छुरा घोंपके मार डारिन अऊ ओकर मुड़ ला काट लीन, अऊ ओकर मुड़ ला लेके, ओमन रात भर अराबा के रसता म चलिन।
2SA 4:8 ओमन ईस-बोसेत के मुड़ ला हेबरोन म दाऊद करा लानिन अऊ राजा ला कहिन, “तोर ओ बईरी साऊल, जऊन ह तोला मार डारे के कोसिस करत रिहिस, ये देख, हमन ओकर बेटा ईस-बोसेत के मुड़ ला ले आय हन। आज यहोवा ह साऊल अऊ ओकर बंस ले हमर मालिक, राजा के पलटा लेय ले हवय।”
2SA 4:9 दाऊद ह बेरोती रिम्मोन के बेटा रेकाब अऊ ओकर भाई बाना ला ये जबाब दीस, “यहोवा के जिनगी के सपथ, जऊन ह मोला हर समस्या ले निकाले हवय,
2SA 4:10 जब कोनो मनखे ह मोला बताईस, ‘साऊल ह मर गे हे,’ अऊ ओह सोचिस कि ओह सुघर संदेस लेके आय हवय, पर मेंह ओला पकड़के सिकलग म मरवा देंव। ओह ओकर ईनाम रिहिस, जेला मेंह ओकर ओ संदेस बर देंव!
2SA 4:11 त फेर येकर ले जादा ईनाम काबर नइं मिलही—जब दुस्ट मनखेमन एक निरदोस मनखे ला ओकरेच घर म अऊ ओकर बिस्तर म मार डारे हवंय—त येह जरूरी अय कि मेंह ओकर खून के बदला तुमन ले लंव अऊ तुमन ला ये धरती ले मिटा दंव!”
2SA 4:12 तब दाऊद ह अपन आदमीमन ला हुकूम दीस, अऊ ओमन ओ दूनों झन ला मार डारिन अऊ ओमन के हांथ अऊ गोड़मन ला काटके ओमन के लास ला हेबरोन के तरिया के तीर म टांग दीन। पर ओमन ईस-बोसेत के मुड़ ला लेके हेबरोन म अबनेर के कबर म गाड़ दीन।
2SA 5:1 इसरायल के जम्मो गोत्र के मनखेमन हेबरोन म दाऊद मेर आके कहिन, “सुन, हमन तोर खुद के मांस अऊ लहू अन।
2SA 5:2 पहिले जब साऊल ह हमर राजा रिहिस, तब तेंहीच ह सैनिक अभियान म इसरायल के अगुवई करत रहय। अऊ यहोवा ह तोला कहे रिहिस, ‘तेंह मोर मनखे इसरायल के चरवाहा होबे, अऊ तेंह ओमन ऊपर सासन करबे।’ ”
2SA 5:3 जब इसरायल के जम्मो अगुवामन हेबरोन म राजा दाऊद मेर आय रिहिन, त दाऊद राजा ह ओमन के संग म हेबरोन म यहोवा के आघू म एक करार करिस, अऊ ओमन इसरायल के राजा होय बर दाऊद के अभिसेक करिन।
2SA 5:4 दाऊद ह तीस बछर के रिहिस, जब ओह राजा बनिस, अऊ चालीस बछर तक राज करिस।
2SA 5:5 हेबरोन म यहूदा ऊपर, ओह साढ़े सात बछर तक राज करिस, अऊ यरूसलेम म जम्मो इसरायल अऊ यहूदा ऊपर, ओह तैंतीस बछर तक राज करिस।
2SA 5:6 राजा अऊ ओकर आदमीमन यरूसलेम जाके यबूसीमन ऊपर हमला करिन, जऊन मन उहां रहत रिहिन। यबूसीमन दाऊद ला कहिन, “तेंह इहां घुस नइं सकस; अऊ त अऊ अंधरा अऊ खोरवामन तोला रोक लीहीं।” ओमन सोचत रिहिन, “दाऊद ह इहां घुस नइं सकय।”
2SA 5:7 तभो ले दाऊद ह सियोन के गढ़ ऊपर कब्जा कर लीस—जऊन ह दाऊद के नगर अय।
2SA 5:8 ओ दिन दाऊद ह कहे रिहिस, “जऊन कोनो यबूसीमन ऊपर जय पाय चाहथे, ओला ओ अंधरा अऊ खोरवामन करा हबरे बर पानी के लम्बा सुरंग के उपयोग करना पड़ही, जेमन दाऊद के बईरी अंय।” एकर कारन ओमन कहिथें, “अंधरा अऊ खोरवामन महल भीतर नइं आ सकंय।”
2SA 5:9 तब दाऊद ह ओ किला म रहे लगिस, अऊ ओकर नांव दाऊद के नगर रखिस। ओह चारों कोति मिल्लो ले लेके भीतर कोति नगर ला बनवाईस।
2SA 5:10 अऊ ओह अऊ जादा सक्तिसाली होवत गीस, काबरकि सर्वसक्तिमान यहोवा परमेसर ह ओकर संग रिहिस।
2SA 5:11 तब सूर के राजा हीराम ह दाऊद करा दूतमन ला पठोईस, अऊ संग म देवदार के लकड़ी, बढ़ई अऊ राज-मिसतिरीमन ला पठोईस, अऊ ओमन दाऊद बर एक महल बनाईन।
2SA 5:12 तब दाऊद ला निस्चय हो गीस कि यहोवा ह ओला इसरायल ऊपर राजा के रूप म इस्थिर करे हवय अऊ अपन मनखे इसरायलीमन के हित म ओकर राज ला उठाय हवय।
2SA 5:13 हेबरोन नगर ला छोंड़े के बाद, दाऊद ह यरूसलेम म अऊ रखैल अऊ घरवाली बना लीस, अऊ ओकर ले अऊ बेटा अऊ बेटीमन पईदा होईन।
2SA 5:14 येमन ओ लइकामन के नांव अंय, जेमन उहां ओकर ले जनमिन: सम्मू, सोबाब, नातान, सुलेमान,
2SA 5:15 यिभार, एलीसू, नेपेग, यापी,
2SA 5:16 एलीसामा, एलयादा अऊ एलीपेलेत।
2SA 5:17 जब पलिस्तीमन ये सुनिन कि इसरायल के ऊपर राजा के रूप म दाऊद के अभिसेक करे गे हवय, त ओमन पूरा सेना लेके दाऊद के खोज म निकलिन, पर दाऊद ह येकर बारे म सुनिस अऊ खाल्हे कोति गढ़ म चल दीस।
2SA 5:18 तब पलिस्तीमन आके रपाईम के घाटी म बगर गीन।
2SA 5:19 तब दाऊद ह परमेसर ले पुछताछ करिस, “का मेंह जाके पलिस्तीमन ऊपर हमला करंव? का तेंह ओमन ला मोर हांथ म कर देबे?” यहोवा ह दाऊद ला जबाब दीस, “जा, खचित मेंह पलिस्तीमन ला तोर हांथ म कर दूहूं।”
2SA 5:20 तब दाऊद ह बाल-परासीम ला गीस, अऊ उहां ओह ओमन ला हरा दीस। ओह कहिस, “यहोवा ह मोर आघू म मोर बईरीमन ला अइसे फोर दे हवय, जइसे पानी के धारा ह फूट निकलथे।” ये खातिर ओ जगह ला बाल-परासीम कहे गीस।
2SA 5:21 पलिस्तीमन उहां अपन मूरतीमन ला छोंड़ दीन, अऊ दाऊद अऊ ओकर आदमीमन ओमन ला उठाके ले गीन।
2SA 5:22 एक बार फेर पलिस्तीमन आईन अऊ रपाईम घाटी म बगर गीन;
2SA 5:23 तब दाऊद ह यहोवा ले पुछताछ करिस, अऊ परमेसर ह जबाब दीस, “ओमन कोति सीधा झन जा, पर ओमन के पाछू कोति घेरा बनाके चिनार रूखमन के आघू म ओमन ऊपर हमला कर।
2SA 5:24 जतेक जल्दी तेंह चिनार रूखमन के पान ऊपर म सेना के चले के खरखराहट ला सुनबे, त जल्दी करबे, काबरकि ओकर ये मतलब होही कि यहोवा ह पलिस्ती सेना ला मारे बर तोर आघू गे हवय।”
2SA 5:25 दाऊद ह वइसे ही करिस, जइसे यहोवा ह ओला हुकूम देय रिहिस, अऊ ओह गिबोन सहर ले लेके गेजेर नगर तक पलिस्तीमन ला मार गिराईस।
2SA 6:1 दाऊद ह फेर इसरायल के जम्मो योग्य जवानमन ला इकट्ठा करिस, जेमन के संखिया तीस हजार रिहिस।
2SA 6:2 ओ अऊ ओकर आदमीमन यहूदा के बालाह नांव के जगह म गीन ताकि उहां ले ओमन परमेसर के ओ सन्दूक ला ले आवंय, जेला नांव ले पुकारे जाथे, याने कि सर्वसक्तिमान यहोवा के नांव ले पुकारे जाथे, जऊन ह सन्दूक ऊपर करूबमन के बीच म बिराजे हवय।
2SA 6:3 तब ओमन पहाड़ी म रहइया अबीनादाब के घर ले परमेसर के सन्दूक ला निकालके एक नवां गाड़ी म रखिन। अऊ अबीनादाब के उज्जा अऊ अहियो नांव के दू झन बेटामन ओ गाड़ी ला हांकत रिहिन,
2SA 6:4 जेमा परमेसर के सन्दूक रखाय रिहिस, अऊ अहियो ह सन्दूक के आघू-आघू चलत रिहिस।
2SA 6:5 दाऊद अऊ जम्मो इसरायलीमन यहोवा के आघू म जम्मो किसम के बाजा, बीना, सारंगी, डफ, डमरू अऊ झांझ बजाके उत्सव मनात रिहिन।
2SA 6:6 जब ओमन नाकोन के कोठार मेर आईन, तब उज्जा ह अपन हांथ ला बढ़ाके परमेसर के सन्दूक ला थाम लीस, काबरकि बईलामन लड़खड़ा गे रिहिन।
2SA 6:7 तब यहोवा के कोरोध उज्जा के ऊपर भड़किस, काबरकि ओह अनादर के काम करे रिहिस; एकरसेति परमेसर ह ओला अइसन मारिस कि ओह उहां परमेसर के सन्दूक के बाजू म मर गीस।
2SA 6:8 तब दाऊद ह गुस्सा होईस, काबरकि यहोवा के कोप ह उज्जा ऊपर भड़के रिहिस, अऊ आज तक ओ जगह ला पेरेस-उज्जा कहे जाथे।
2SA 6:9 ओ दिन दाऊद ह यहोवा ले डर गीस अऊ कहिस, “यहोवा के सन्दूक ह मोर इहां कभू कइसे आ सकत हे?”
2SA 6:10 दाऊद ह यहोवा के सन्दूक ला अपन संग दाऊद के नगर म ले जाय बर नइं चाहत रिहिस। पर ओह येला गत के रहइया ओबेद-एदोम के घर ले गीस।
2SA 6:11 यहोवा के सन्दूक ह गत के रहइया ओबेद-एदोम के घर म तीन महिना तक रिहिस, अऊ यहोवा ह ओबेद-एदोम अऊ ओकर जम्मो घराना ला आसीस दीस।
2SA 6:12 तब दाऊद राजा ला ये बताय गीस, “परमेसर के सन्दूक के कारन यहोवा ह ओबेद-एदोम के घराना अऊ ओकर हर चीज ला आसीस देय हवय।” तब दाऊद ह परमेसर के सन्दूक ला ओबेद-एदोम के घर ले दाऊद के नगर म लाने बर आनंद मनात गीस।
2SA 6:13 जब यहोवा के सन्दूक ला उठानेवालामन छै कदम बढ़ाय रिहिन, तब दाऊद ह एक ठन बईला अऊ एक ठन मोटा-ताजा बछरू ला बलि चघाईस।
2SA 6:14 मलमल के एक ठन एपोद पहिरे, दाऊद ह पूरा मन से यहोवा के आघू म नाचत रिहिस,
2SA 6:15 जब ओ अऊ जम्मो इसरायलीमन जोर-सोर से अऊ तुरही फूंकत यहोवा के सन्दूक ला लावत रिहिन।
2SA 6:16 जब यहोवा के सन्दूक दाऊद के नगर म प्रवेस करत रिहिस, त साऊल के बेटी मीकल ह खिड़की ले झांकके देखिस। जब ओह दाऊद राजा ला यहोवा के आघू म नाचत-कूदत देखिस, त ओह अपन मन म ओला तुछ समझिस।
2SA 6:17 मनखेमन यहोवा के सन्दूक ला लानके ओ तम्बू के भीतर ओकर जगह म रख दीन, जेला दाऊद ह ओकर बर बनाय रिहिस, अऊ दाऊद ह यहोवा के आघू म होम-बलिदान अऊ मेल-बलिदान चघाईस।
2SA 6:18 होम-बलिदान अऊ मेल-बलिदान चघाय के बाद, ओह मनखेमन ला सर्वसक्तिमान यहोवा के नांव म आसीस दीस।
2SA 6:19 तब ओह इसरायलीमन के जम्मो भीड़ के हर एक मनखे, आदमी अऊ माईलोगन दूनों ला एक-एक ठन रोटी, एक-एक ठन खजूर के टिकिया अऊ एक-एक ठन किसमिस के टिकिया दीस। ओकर बाद जम्मो मनखेमन अपन-अपन घर चल दीन।
2SA 6:20 जब दाऊद ह अपन घराना ला आसीस देय बर घर लहुंटिस, त साऊल के बेटी मीकल ह ओकर ले मिले बर बाहिर निकलिस अऊ ओला कहिस, “आज इसरायल के राजा ह कइसे अपनआप ला अलग देखाईस! ओह अपन सेवकमन के दासीमन के देखत म आधा नंगरा हो गे रिहिस, जइसने कोनो गंवार मनखे ह करथे!”
2SA 6:21 दाऊद ह मीकल ला कहिस, “येह यहोवा के आघू म होईस, जऊन ह तोर ददा या ओकर घर के कोनो मनखे के बदले मोला चुनिस, जब ओह मोला यहोवा के मनखे इसरायलीमन ऊपर सासन करइया ठहिराईस—मेंह यहोवा के आघू म उत्सव मनाहूं।
2SA 6:22 अऊ मेंह एकर ले घलो जादा तुछ बनहूं, अऊ मेंह अपन ही नजर म अपमानित होहूं। पर जऊन दासीमन के तेंह चरचा करय, ओमन के दुवारा मोला आदर मिलही।”
2SA 6:23 अऊ साऊल के बेटी मीकल के मरे के दिन तक ओकर कोनो लइका नइं होईस।
2SA 7:1 जब राजा दाऊद ह अपन महल म रहे लगिस, अऊ यहोवा ओला ओकर चारों कोति के जम्मो बईरीमन ले बिसराम देय रिहिस,
2SA 7:2 त एक दिन राजा ह नातान अगमजानी ला कहिस, “देख, मेंह देवदार लकरी ले बने घर म रहत हंव, जबकि परमेसर के सन्दूक ह एक तम्बू म हवय।”
2SA 7:3 नातान ह राजा ले कहिस, “जऊन कुछू तोर मन म हवय, जा अऊ ओला कर, काबरकि यहोवा ह तोर संग हवय।”
2SA 7:4 पर ओहीच रथिया, यहोवा के ये बचन नातान मेर आईस:
2SA 7:5 “जाके मोर सेवक दाऊद ला कह, ‘यहोवा ह ये कहत हे: का तेंह ओ अस, जऊन ह मोर निवास बर एक घर बनवाबे?
2SA 7:6 जब ले मेंह इसरायलीमन ला मिसर देस ले निकालके लाने हंव, ओ दिन ले लेके आज तक मेंह कोनो घर म नइं रहे हंव। निवास के रूप म एक तम्बू के संग मेंह एक जगह ले दूसर जगह जावत हंव।
2SA 7:7 जिहां-जिहां मेंह जम्मो इसरायलीमन के संग गेंव, का मेंह कभू ओमन के ऊपर सासन करइयामन ले, जेमन ला मेंह अपन इसरायली मनखेमन ऊपर सासक ठहिराय रहेंव, ओमन ले कोनो ला अइसन बात कहेंव, “तेंह मोर बर देवदार लकड़ी के घर काबर नइं बनवाय?” ’
2SA 7:8 “एकरसेति, अब मोर सेवक दाऊद ले कह, ‘सर्वसक्तिमान यहोवा ह ये कहत हे: मेंह तोला चरागन ले, भेड़-बकरीमन ला चराय के काम ले लेंव, अऊ मेंह तोला मोर इसरायली मनखेमन ऊपर सासन करइया ठहिरांय।
2SA 7:9 जिहां घलो तें गे, उहां में तोर संग रहेंव, अऊ मेंह तोर जम्मो बईरीमन ला तोर आघू ले नास कर देंव। अब मेंह तोर नांव ला धरती के सबले बड़े मनखेमन के नांव सहीं बड़े करहूं।
2SA 7:10 अऊ मेंह अपन इसरायली मनखेमन बर एक जगह ठहिराहूं, अऊ ओमन ला बसाहूं, ताकि ओमन के अपन खुद के घर होवय अऊ ओमन फेर कभू एती-ओती झन होवंय। दुस्ट मनखेमन फेर ओमन ऊपर अतियाचार नइं करहीं, जइसने कि ओमन सुरू म करत रिहिन
2SA 7:11 अऊ ओ बेरा ले करत आवत हें, जब मेंह अपन इसरायली मनखेमन ऊपर अगुवामन ला ठहिरांय। मेंह तोला तोर जम्मो बईरीमन ले बिसराम दूहूं। “ ‘यहोवा तोर करा घोसना करत हे कि यहोवा ह खुद तोर बर एक घर स्थापित करही:
2SA 7:12 जब तोर उमर पूरा हो जाही, अऊ तेंह अपन पुरखामन संग मिल जाबे, त मेंह तोर संतान ला तोर जगह लेय बर ठाढ़ करहूं; ओह तोर खुद के देहें अऊ खून म ले होही, अऊ मेंह ओकर राज ला इस्थिर करहूं।
2SA 7:13 ओही ह मोर नांव बर एक घर बनाही, अऊ मेंह ओकर राज के सिंघासन ला हमेसा बर इस्थिर करहूं।
2SA 7:14 मेंह ओकर ददा होहूं, अऊ ओह मोर बेटा होही। जब ओह गलत काम करही, त मेंह ओला मनखेमन के दुवारा छड़ी ले अऊ कोर्रा ले पीटवाके दंड दूहूं।
2SA 7:15 पर मोर मया ह ओकर ऊपर ले कभू नइं हटही, जइसे कि मेंह साऊल के ऊपर ले हटा ले रहेंव अऊ जेला मेंह तोर आघू ले दूरिहा कर देंव।
2SA 7:16 तोर घराना अऊ तोर राज ह मोर आघू म सदा बने रहिही; तोर सिंघासन ह सदा बने रहिही।’ ”
2SA 7:17 नातान ह दरसन के हर एक बात दाऊद ला बता दीस।
2SA 7:18 तब दाऊद राजा ह भीतर जाके यहोवा के आघू म बईठ गीस, अऊ कहिस: “हे परमपरधान यहोवा, मेंह कोन अंव, अऊ मोर घराना का ए, कि तेंह मोला इहां तक लाने हस?
2SA 7:19 अऊ हे परमपरधान यहोवा, मानो येह तोर नजर म परयाप्त नइं रिहिस कि तेंह अपन सेवक के घराना के भविस्य के बारे म गोठियाय—अऊ हे परमपरधान यहोवा, ये बिधि-बिधान ह सिरिप एक मनखे बर अय!
2SA 7:20 “दाऊद ह तोर ले अऊ का कह सकत हे? काबरकि हे परमपरधान यहोवा, तें तो अपन सेवक ला जानत हस।
2SA 7:21 अपन बचन के हित म अऊ अपन ईछा के मुताबिक, तेंह ये बड़े काम करे हस अऊ अपन सेवक ला ये बात बताय हस।
2SA 7:22 “हे परमपरधान यहोवा, तेंह कतेक महान अस! तोर सहीं अऊ कोनो नइं ए, अऊ तोला छोंड़ अऊ कोनो परमेसर नइं ए, जइसे कि हमन अपन कान ले सुने हवन।
2SA 7:23 अऊ तोर मनखे इसरायल के सहीं कोन हे—धरती ऊपर के एक जाति, जेला अपन नांव के खातिर तेंह जाके छोंड़ाय, अऊ अपन मनखेमन के आघू ले जाति-जाति के मनखेमन ला निकालके बड़े अऊ अद्भूत काम करे, अऊ ओमन ला मिसर देस ले छोंड़ाय।
2SA 7:24 तेंह अपन मनखे इसरायलीमन ला हमेसा बर अपन खुद के मनखे के रूप म स्थापित करे, अऊ हे यहोवा, तेंह ओमन के परमेसर बने हस।
2SA 7:25 “अऊ अब हे यहोवा परमेसर, तेंह जऊन वायदा अपन सेवक अऊ ओकर घराना के बारे म करे हस, ओला सदाकाल तक बनाय रख। अपन वायदा के मुताबिक ही कर,
2SA 7:26 ताकि तोर नांव ह सदाकाल बर महान रहय। तब मनखेमन कहिहीं, ‘सर्वसक्तिमान यहोवा ह इसरायल ऊपर परमेसर अय!’ अऊ तोर सेवक दाऊद के घराना ह तोर नजर म बने रहिही।
2SA 7:27 “हे सर्वसक्तिमान यहोवा, इसरायल के परमेसर, तेंह येला अपन सेवक ऊपर परगट करे हस, ‘मेंह तोर बर एक घर ला बनाहूं।’ एकरसेति तोर सेवक ला तोर ले पराथना करे के हिम्मत मिले हवय।
2SA 7:28 हे परमपरधान यहोवा, तेंहीच ह परमेसर अस! तोर करार ह बिसवासयोग्य अय, अऊ तेंह ये बने चीजमन के वायदा अपन सेवक ले करे हस।
2SA 7:29 त अब खुस होके अपन सेवक के घराना ला आसीस दे, कि येह तोर नजर म हमेसा बने रहय; काबरकि हे परमपरधान यहोवा, तेंह ये बात ला कहे हस, अऊ तोर आसीस ले ही तोर सेवक के घराना ह हमेसा आसीसित होही।”
2SA 8:1 कुछू समय के बाद, दाऊद ह पलिस्तीमन ला हराके ओमन ला अपन अधीन कर लीस, अऊ ओह मेतेग-अम्मा सहर ला पलिस्तीमन के हांथ ले छीन लीस।
2SA 8:2 दाऊद ह मोआबीमन ला घलो हराईस। ओह ओमन ला भुइयां म लेटा दीस अऊ ओमन ला एक ठन डोरी ले नापिस। तब ओमा के हर दू पांति के मनखेमन मार डारे गीन, अऊ तीसरा पांति के मनखेमन ला जीयत छोंड़ दिये गीस। ये किसम ले मोआबीमन दाऊद के अधीन होके ओला कर पटाय लगिन।
2SA 8:3 येकर छोंड़ दाऊद ह रहोब के बेटा सोबा के राजा हददेजेर ला हराईस, जब हददेजेर ह फरात नदी करा अपन स्मारक के मरम्मत करे बर जावत रिहिस।
2SA 8:4 दाऊद ह ओकर एक हजार रथ, सात हजार सारथी, अऊ बीस हजार पैदल सैनिकमन ला छीन लीस। ओह एक सौ रथवाले घोड़ामन ला छोंड़के बाकि जम्मो घोड़ामन के माड़ी के पाछू के नस ला कटवा दीस।
2SA 8:5 जब दमिस्क के अरामीमन सोबा के राजा हददेजेर के मदद करे बर आईन, त दाऊद ह ओमन के बाईस हजार मनखेमन ला मार डारिस।
2SA 8:6 दाऊद ह दमिस्क के अरामी राज म सैनिक दलमन ला ठहिरा दीस, अऊ अरामीमन ओकर अधीन हो गीन अऊ ओला कर पटाय लगिन। दाऊद ह जिहां घलो गीस, यहोवा ह ओला जीतवाईस।
2SA 8:7 दाऊद ह हददेजेर के अधिकारीमन के सोन के ढालमन ला ले लीस अऊ ओ ढालमन ला यरूसलेम ले आईस।
2SA 8:8 हददेजेर के तेबह अऊ बरोतै नांव के नगरमन ले दाऊद राजा ह बहुंत अकन कांसा ले आईस।
2SA 8:9 जब हमात के राजा तोऊ ह सुनिस कि दाऊद ह हददेजेर के पूरा सेना ला हरा दे हवय,
2SA 8:10 त ओह योराम नांव के अपन बेटा ला दाऊद राजा करा पठोईस, ताकि ओह ओकर ले भेंट करके हददेजेर के ऊपर लड़ई म मिले जीत बर बधाई देवय, काबरकि हददेजेर ह तोऊ ले लड़ई करत रिहिस। योराम ह अपन संग सोन, चांदी, अऊ कांसा के चीजमन ला लेके आय रिहिस।
2SA 8:11 दाऊद राजा ह ये चीजमन ला यहोवा बर अरपन कर दीस, जइसे कि ओह ओ चांदी अऊ सोन के संग करे रिहिस, जेला ओह ये जम्मो जाति—
2SA 8:12 याने कि एदोम अऊ मोआब, अमोनी अऊ पलिस्ती, अऊ अमालेकीमन ले लेय रिहिस। ओह रहोब के बेटा, सोबा के राजा हददेजेर ले लूटे चीजमन ला घलो अरपन कर दीस।
2SA 8:13 अऊ जब दाऊद ह नून के घाटी म अठारह हजार एदोमीमन ला मारके लहुंटिस, त ओकर बड़े नांव हो गीस।
2SA 8:14 ओह पूरा एदोम म सैनिक दलमन के पहरा बईठा दीस, अऊ जम्मो एदोमीमन दाऊद के अधीन हो गीन। दाऊद ह जिहां घलो गीस, यहोवा ह ओला जीतवाईस।
2SA 8:15 दाऊद ह जम्मो इसरायल ऊपर राज करिस, अऊ ओ काम करिस, जऊन ह ओकर जम्मो मनखेमन बर ठीक अऊ सही रिहिस।
2SA 8:16 सरूयाह के बेटा योआब ह सेना के सेनापति रिहिस; अहीलूद के बेटा यहोसापात ह इतिहास के लेखक रिहिस;
2SA 8:17 अहीतूब के बेटा सादोक अऊ अबियातार के बेटा अहीमेलेक पुरोहित रिहिन; सरायाह ह सचिव रिहिस;
2SA 8:18 यहोयादा के बेटा बनायाह ह करेती अऊ पलेतीमन के अधिकारी रिहिस; अऊ दाऊद के बेटामन मुखिया अधिकारी रिहिन।
2SA 9:1 एक दिन दाऊद ह सोचिस, “का साऊल के घराना म ले कोनो अभी घलो बांचे हवय, जेला मेंह योनातन के खातिर मया देखावंव?”
2SA 9:2 साऊल के घराना के सीबा नांव के एक झन सेवक रिहिस। ओला दाऊद करा बलाय गीस, अऊ जब राजा ह ओकर ले पुछिस, “का तेंह सीबा अस?” तब ओह जबाब दीस, “हव, तोर सेवा म हाजिर हे।”
2SA 9:3 राजा ह पुछिस, “का साऊल के घराना म ले कोनो अब तक बांचे हवय, जेला मेंह परमेसर के दया देखा सकंव?” सीबा ह राजा ला जबाब दीस, “अभी घलो योनातन के एक झन बेटा हवय, जऊन ह दूनों गोड़ ले खोरवा अय।”
2SA 9:4 राजा ह पुछिस, “ओह कहां हवय?” सीबा ह जबाब दीस, “ओह लो-देबार नगर म अमीएल के बेटा माकीर के घर म हवय।”
2SA 9:5 तब राजा दाऊद ह दूत ला पठोके ओला लो-देबार ले, अमीएल के बेटा माकीर के घर ले बुलवा लीस।
2SA 9:6 जब मपीबोसेत, जऊन ह योनातन के बेटा अऊ साऊल के पोता रिहिस, दाऊद मेर आईस, तब ओह आदर देय बर मुहूं के बल गिरके दाऊद ला दंडवत करिस। दाऊद ह कहिस, “हे मपीबोसेत!” ओह कहिस, “तोर सेवा म हाजिर हे।”
2SA 9:7 दाऊद ह ओला कहिस, “झन डर, काबरकि तोर ददा योनातन के खातिर मेंह तोर ऊपर जरूर दया करहूं। अऊ तोर दादा साऊल के सबो भुइयां तोला फेर वापिस कर दूहूं, अऊ तेंह हमेसा मोर संग राजा के मेज म जेवन करबे।”
2SA 9:8 मपीबोसेत ह दंडवत करके कहिस, “तोर सेवक ह का अय कि तेंह मोर सहीं मरे कुकुर के कोति धियान देवत हस?”
2SA 9:9 तब राजा ह साऊल के करमचारी सीबा ला बलाके ओला कहिस, “जऊन कुछू साऊल अऊ ओकर परिवार के रिहिस, ओ जम्मो चीज मेंह तोर मालिक के पोता ला देय दे हंव।
2SA 9:10 अब ले तें अपन बेटा अऊ सेवकमन संग ओकर बर भुइयां म खेती-बारी करके ओकर ऊपज ला ले आय करबे, ताकि तोर मालिक के पोता ला जेवन मिलय। अऊ तोर मालिक के पोता मपीबोसेत ह हमेसा मोर मेज म जेवन करही।” (सीबा के पंदरह बेटा अऊ बीस सेवक रिहिन।)
2SA 9:11 तब सीबा ह राजा ले कहिस, “मोर मालिक राजा ह अपन सेवक ला जऊन कुछू भी करे के हुकूम दीही, तोर सेवक ह ओहीच काम करही।” एकरसेति मपीबोसेत ह राजा के एक बेटा सहीं दाऊद के मेज म जेवन करे लगिस।
2SA 9:12 मपीबोसेत के मीका नांव के एक छोटे बेटा रिहिस, अऊ सीबा के घर के जम्मो मनखेमन मपीबोसेत के सेवक रिहिन।
2SA 9:13 अऊ मपीबोसेत ह यरूसलेम म रहे लगिस; काबरकि ओह हमेसा राजा के मेज म जेवन करय; ओह दूनों गोड़ ले खोरवा रिहिस।
2SA 10:1 कुछू समय के बाद, अमोनीमन के राजा नाहास ह मर गीस, अऊ ओकर बेटा हानून ह ओकर जगह म राजा बनिस।
2SA 10:2 तब दाऊद ह ये सोचिस, “मेंह नाहास के बेटा हानून ऊपर दया करहूं, जइसे ओकर ददा ह मोर ऊपर दया करे रिहिस।” एकरसेति दाऊद ह अपन एक परतिनिधि-मंडल ला हानून करा ओकर ददा के बारे म सहानुभूति परगट करे बर पठोईस। जब दाऊद के आदमीमन अमोनीमन के देस म आईन,
2SA 10:3 त अमोनी सेनापतिमन अपन मालिक हानून ला कहिन, “का तेंह ये सोचत हस कि दाऊद ह तोर संग सहानुभूति देखाय बर दूतमन ला पठोय के दुवारा तोर ददा के आदर करत हे? का दाऊद ह ओमन ला तोर मेर सिरिप एकर खातिर नइं पठोय हवय कि ओमन ये सहर के खोजबीन करंय अऊ भेद लेवंय अऊ येला उखान फेकंय?”
2SA 10:4 एकरसेति हानून ह दाऊद के दूतमन ला पकड़ लीस, अऊ ओमन के हर एक के आधा-आधा दाढ़ी ला फंकवा दीस, अऊ ओमन के ओनहा ला कुलामन तक कटवा दीस अऊ ओमन ला वापिस भेज दीस।
2SA 10:5 जब दाऊद ला एकर बारे म बताय गीस, त ओह संदेसियामन ला ओमन ले मिले बर पठोईस, काबरकि ओमन के बहुंत बेजत्ती करे गे रिहिस। राजा ह ओमन करा ये खबर पठोईस, “जब तक तुम्हर दाढ़ी बाढ़ नइं जावय, तब तक तुमन यरीहो सहर म ठहिरे रहव, अऊ तब वापिस आ जावव।”
2SA 10:6 जब अमोनीमन ला महसूस होईस कि ओमन दाऊद ला नराज कर दे हवंय, तब ओमन बेत-रहोब अऊ सोबा ले बीस हजार अरामी पैदल सैनिक, माका के राजा के संग एक हजार मनखे, अऊ बारह हजार मनखे तोब ले भाड़ा म लीन।
2SA 10:7 ये सुनके, दाऊद ह योआब ला योद्धामन के जम्मो सेना के संग पठोईस।
2SA 10:8 तब अमोनीमन बाहिर निकलिन अऊ अपन सहर के प्रवेस दुवार करा लड़ई बर कतार बांधिन, जबकि सोबा अऊ रहोब के अरामीमन अऊ तोब अऊ माका के मनखेमन खुला मैदान म रिहिन।
2SA 10:9 जब योआब ह देखिस कि ओकर आघू अऊ पाछू दूनों कोति ओकर बिरूध लड़ई बर कतार बांधे गे हवय, त ओह इसरायल के सबले बढ़िया कुछू सैनिक दलमन ला चुनिस अऊ ओमन ला अरामीमन के बिरूध ठहिरा दीस।
2SA 10:10 ओह बाकि बांचे आदमीमन ला अपन भाई अबीसै के अधीन करके ओमन ला अमोनीमन के बिरूध तैनात कर दीस।
2SA 10:11 फेर योआब ह कहिस, “यदि अरामीमन मोर ऊपर भारी होवन लगंय, त तुमन मोर मदद करे बर आहू; अऊ यदि अमोनीमन तुम्हर ऊपर भारी होवन लगहीं, त मेंह आके तुम्हर मदद करहूं।
2SA 10:12 मजबूत बनव, अऊ आवव, हमन अपन मनखे अऊ अपन परमेसर के सहरमन बर हिम्मत से लड़ई करन। यहोवा ह ओही करही, जऊन ह ओकर नजर म सही अय।”
2SA 10:13 तब योआब अऊ ओकर संग के सैनिक दल अरामीमन ले लड़े बर आघू बढ़िन, अऊ अरामीमन ओकर आघू ले भाग गीन।
2SA 10:14 जब अमोनीमन देखिन कि अरामीमन भागत हवंय, त अमोनीमन घलो अबीसै के आघू ले भागिन अऊ सहर के भीतर चल दीन। योआब ह अमोनीमन ले लड़े के बाद लहुंटके यरूसलेम आ गीस।
2SA 10:15 जब अरामीमन देखिन कि ओमन इसरायलीमन ले हार गे हवंय, त ओमन फेर दल बनाके एक संग जूरिन।
2SA 10:16 हददेजेर ह फरात नदी के ओ पार ले अरामीमन ला बुलवा ले रिहिस; ओमन हेलाम नगर करा आ गीन अऊ हददेजेर के सेना के सेनापति सोबक ह ओमन के अगुवई करत रहय।
2SA 10:17 जब दाऊद ला ये बात बताय गीस, त ओह जम्मो इसरायलीमन ला इकट्ठा करिस, अऊ यरदन नदी ला पार करके हेलाम म आ गीस। तब अरामीमन दाऊद ले लड़े बर अपन कतार बांधिन अऊ ओकर ले लड़िन।
2SA 10:18 पर ओमन इसरायलीमन के आघू ले भाग गीन, अऊ दाऊद ह अरामीमन के सात सौ सारथी अऊ चालीस हजार पैदल सैनिकमन ला मार डारिस। ओह ओमन के सेना के सेनापति सोबक ला घलो अइसन मारिस कि ओह उहां मर गीस।
2SA 10:19 जब हददेजेर के अधीन के जम्मो राजामन देखिन कि ओमन इसरायलीमन ले हार गे हवंय, त ओमन इसरायलीमन संग समझौता कर लीन अऊ ओमन के अधीन हो गीन। ओकर बाद, अरामीमन अमोनीमन के मदद करे बर डरे लगिन।
2SA 11:1 बसन्त के मौसम म, जब राजामन लड़ई करे बर निकलथें, ओ बेरा, दाऊद ह योआब ला राजा के आदमी अऊ जम्मो इसरायली सेना के संग पठोईस। ओमन अमोनीमन ला नास कर दीन अऊ रब्बा नगर ला घेर लीन। पर दाऊद ह यरूसलेम म ही रिहिस।
2SA 11:2 एक दिन सांझ के बेरा, दाऊद ह अपन बिस्तर ले उठके महल के छत म टहलत रिहिस, अऊ छत ले ओह एक माईलोगन ला नहावत देखिस। ओ माईलोगन ह अब्बड़ सुघर रिहिस।
2SA 11:3 दाऊद ह एक झन ला पठोके ओ माईलोगन के बारे म पता लगवाईस। ओ मनखे ह ओला ये बताईस, “ओह एलीआम के बेटी, अऊ हित्ती उरियाह के घरवाली बतसेबा ए”
2SA 11:4 तब दाऊद ह दूतमन ला पठोके ओला बुलवा लीस। बतसेबा ह ओकर मेर आईस अऊ दाऊद ह ओकर संग सुतिस। (ओ समय ओह अपन माहवारी ले सुध हो गे रिहिस।) तब ओह अपन घर वापिस चल दीस।
2SA 11:5 ओ माईलोगन ह आसरा म हो गीस अऊ तब दाऊद करा ये कहिके खबर पठोईस, “मेंह आसरा म हवंव।”
2SA 11:6 तब दाऊद ह योआब करा ये खबर पठोईस, “हित्ती उरियाह ला मोर करा पठो दे।” अऊ योआब ह उरियाह ला दाऊद मेर पठो दीस।
2SA 11:7 जब उरियाह ह ओकर करा आईस, त दाऊद ह ओकर ले योआब अऊ सेना के हालचाल अऊ लड़ई के बारे म पुछिस।
2SA 11:8 तब दाऊद ह उरियाह ले कहिस, “तेंह अपन घर म जाके अपन गोड़ ला धो।” अऊ उरियाह ह महल ले चल दीस, अऊ ओकर पाछू, ओकर बर राजा कोति ले कुछू ईनाम पठोय गीस।
2SA 11:9 पर उरियाह ह अपन मालिक के जम्मो सेवकमन संग महल के प्रवेस दुवार म सुत गीस अऊ अपन घर नइं गीस।
2SA 11:10 दाऊद ला बताय गीस, “उरियाह ह अपन घर नइं गीस,” त दाऊद ह उरियाह ले पुछिस, “का तेंह अभी सैनिक अभियान ले नइं आय हस? त तें अपन घर म काबर नइं गेय?”
2SA 11:11 उरियाह ह दाऊद ले कहिस, “जब सन्दूक अऊ इसरायल अऊ यहूदा के मनखेमन तम्बूमन म रहत हवंय, अऊ मोर सेनापति योआब अऊ मोर मालिक के मनखेमन खुला मैदान म डेरा डाले हवंय, त फेर मेंह खाय-पीये बर अऊ अपन घरवाली ला मया करे बर अपन घर कइसे जा सकत हंव? तोर जिनगी के सपथ, मेंह अइसन काम नइं करंव।”
2SA 11:12 तब दाऊद ह उरियाह ला कहिस, “इहां एक दिन अऊ रूक जा, अऊ कल मेंह तोला बिदा कर दूहूं।” एकरसेति उरियाह ओ दिन अऊ दूसर दिन घलो यरूसलेम म रूक गीस।
2SA 11:13 दाऊद ह ओला नेवता दीस, अऊ ओह ओकर संग खाईस-पीईस, अऊ दाऊद ह ओला मतवाला कर दीस। पर सांझ के बेरा, उरियाह ह गीस अऊ अपन मालिक के सेवकमन के बीच अपन चटई म सुत गीस; पर ओह अपन घर नइं गीस।
2SA 11:14 बिहनियां दाऊद ह योआब के नांव म एक चिट्ठी लिखके उरियाह के हांथ म पठो दीस।
2SA 11:15 ओ चिट्ठी म ओह ये लिखे रिहिस, “उरियाह ला सामने ओ जगह म रख, जिहां भयंकर लड़ई होवत हे। तब ओकर ले पाछू हट जा, ताकि बईरीमन के दुवारा ओह मार डारे जावय।”
2SA 11:16 जब योआब ह नगर ला घेर लेय रिहिस, त ओह उरियाह ला लड़ई बर ओ जगह म भेजिस, जिहां ओह जानत रिहिस कि बईरीमन के बलवान सैनिकमन हवंय।
2SA 11:17 जब सहर के मनखेमन बाहिर निकलके योआब ले लड़ई करिन, त दाऊद के सेना के कुछू मनखेमन मारे गीन; अऊ ओमा हित्ती उरियाह घलो मर गीस।
2SA 11:18 तब योआब ह लड़ई के पूरा हालचाल लिखके दाऊद करा भेज दीस।
2SA 11:19 ओह संदेसिया ला ये निरदेस दीस, “जब तें लड़ई के पूरा हाल राजा ला बता लेबे,
2SA 11:20 तब राजा ह गुस्सा होके तोला पुछ सकत हे, ‘तुमन लड़े बर सहर के अतेक लकठा म काबर गेव? का तुमन नइं जानत रहेव कि ओमन दीवार म ले तीर चलाहीं?
2SA 11:21 यरूब-बेसेत के बेटा अबीमेलेक ला कोन ह मार डारिस? का एक माईलोगन ह दीवार ले चक्की के ऊपर के पाट ला ओकर ऊपर नइं गिरा देय रिहिस, जेकर ले ओह तेबेस म मर गीस? फेर तुमन दीवार के अतेक लकठा म काबर गेव?’ यदि ओह तोर ले अइसने पुछथे, त ओला कहिबे, ‘येकर अलावा, तोर सेवक हित्ती उरियाह घलो मर गीस।’ ”
2SA 11:22 तब संदेसिया ह चल दीस, अऊ जब ओह दाऊद करा हबरिस, त ओह ओला ओ जम्मो बात बताईस, जेला कहे बर योआब ह ओला पठोय रिहिस।
2SA 11:23 संदेसिया ह दाऊद ले कहिस, “ओ मनखेमन हमर ऊपर हावी हो गीन अऊ खुला मैदान म हमर ऊपर हमला करिन, पर हमन ओमन ला सहर के प्रवेस दुवार तक भगा देंन।
2SA 11:24 तब धनुसधारीमन दीवार ले तोर सेवकमन ऊपर तीर चलाईन, अऊ राजा के कुछू मनखेमन मर गीन। ओमा तोर सेवक हित्ती उरियाह घलो मर गीस।”
2SA 11:25 दाऊद ह संदेसिया ला कहिस, “योआब ले अइसने कहिबे: ‘ये बात के खातिर उदास झन हो; तलवार ह जइसने एक ला मारथे, वइसने दूसर ला घलो मारथे। सहर के बिरूध अऊ जादा मजबूती से हमला कर अऊ ओला नास कर दे।’ योआब के हौसला बढ़ाय बर अइसने कह।”
2SA 11:26 जब उरियाह के घरवाली ह सुनिस कि ओकर घरवाला ह मर गीस, त ओह अपन घरवाला बर बिलाप करे लगिस।
2SA 11:27 ओकर बिलाप के दिन खतम होय के बाद, दाऊद ह ओला अपन घर म ले आईस, अऊ ओह ओकर घरवाली हो गीस अऊ ओह एक बेटा ला जनम दीस। पर जऊन काम दाऊद ह करे रिहिस, ओकर ले यहोवा ह नराज होईस।
2SA 12:1 तब यहोवा ह नातान ला दाऊद मेर पठोईस। नातान ह ओकर मेर जाके कहिस, “एक नगर म दू झन मनखे रिहिन, जेमा एक झन ह धनी अऊ दूसर ह गरीब रिहिस।
2SA 12:2 धनी मनखे करा अब्बड़ भेड़-बकरी अऊ गाय-बईला रिहिन,
2SA 12:3 पर गरीब मेर एक ठन छोटे भेड़ी-पीला के छोंड़ अऊ कुछू नइं रिहिस, जेला कि ओह बिसाय रिहिस। ओह ओला पालिस-पोसिस, अऊ ओ भेड़ी-पीला ह ओकर अऊ ओकर लइकामन संग बढ़े रिहिस; ओह ओ गरीब मनखे के संग खावय, अऊ ओकर कटोरा म ले पीयय, अऊ ओकर कोरा म सुतय घलो। ओ भेड़ी-पीला ह ओकर बर ओकर एक बेटी के असन रिहिस।
2SA 12:4 “एक दिन अइसने होईस कि एक यातरा करइया मनखे ह धनी मनखे करा आईस, पर ओ यातरी, जऊन ह धनी मनखे करा आय रिहिस, ओकर खातिर जेवन बनाय बर, ओह अपन भेड़-बकरी या गाय-बईलामन ले कुछू नइं लीस, पर ओ गरीब मनखे के भेड़ी-पीला ला लेके, ओह ओ यातरी बर जेवन तियार करिस, जऊन ह ओकर मेर आय रिहिस।”
2SA 12:5 ये सुनके दाऊद के कोप ओ मनखे ऊपर बहुंत भड़किस अऊ ओह नातान ला कहिस, “यहोवा के जिनगी के सपथ, जऊन मनखे ह ये काम करे हवय, ओकर मरना जरूरी ए!
2SA 12:6 अऊ ओला ओ भेड़ी-पीला के चौगुना भरपई करे बर पड़ही, काबरकि ओह अइसन काम करिस, अऊ कुछू दया नइं करिस।”
2SA 12:7 तब नातान ह दाऊद ले कहिस, “तेंह ओ मनखे अस! यहोवा, इसरायल के परमेसर ह, ये कहत हे: ‘मेंह इसरायल ऊपर राजा के रूप म तोर अभिसेक करेंव, अऊ मेंह तोला साऊल के हांथ ले बचायेंव।
2SA 12:8 मेंह तोर मालिक के घर ला तोला दे देंव, अऊ तोर मालिक के घरवालीमन ला तोर हांथ म कर देंव। मेंह पूरा इसरायल अऊ यहूदा तोला दे देंव। अऊ यदि ये जम्मो ह थोरकन रिहिस, त मेंह तोला अऊ घलो बहुंत चीज देय रहितेंव।
2SA 12:9 तेंह यहोवा के बचन ला तुछ जानके काबर ओकर नजर म दुस्ट काम करय? तेंह हित्ती उरियाह ला तलवार ले मार डारय, अऊ ओकर घरवाली ला अपन घरवाली बना लेय। तेंह उरियाह ला अमोनीमन के तलवार ले मरवा डारय।
2SA 12:10 एकरसेति, अब तलवार ह तोर घर के पीछा कभू नइं छोंड़य, काबरकि तेंह मोला तुछ जानके हित्ती उरियाह के घरवाली ला अपन बना ले हस।’
2SA 12:11 “यहोवा ह ये कहत हे: ‘तोर खुद के घराना ले मेंह तोर ऊपर बिपत्ति लानहूं। तोर आंखी के आघू म मेंह तोर घरवालीमन ला लेके तोर नजदीकी मनखे ला दे दूहूं, अऊ ओह दिन के अंजोर म तोर घरवालीमन ले कुकरम करही।
2SA 12:12 तेंह तो ये काम गुपत म करय, पर मेंह ये काम जम्मो इसरायलीमन के देखते-देखत दिन-दुपहरी म करहूं।’ ”
2SA 12:13 तब दाऊद ह नातान ले कहिस, “मेंह यहोवा के बिरूध पाप करे हंव।” नातान ह दाऊद ला कहिस, “यहोवा ह तोर पाप ला दूरिहा कर दे हवय। तेंह नइं मरबे।
2SA 12:14 पर तोर जऊन बेटा ह जनम लीही, ओह मर जाही, काबरकि ये काम करे के दुवारा तेंह यहोवा के बहुंत अपमान करे हस।”
2SA 12:15 नातान के अपन घर जाय के बाद, यहोवा ह ओ लइका ला बहुंत बिमरहा कर दीस, जेला उरियाह के घरवाली ह दाऊद कोति ले जनमाय रिहिस।
2SA 12:16 दाऊद ह ओ लइका बर परमेसर ले बिनती करिस। ओह उपास करिस अऊ बोरा के ओनहा पहिरे रात भर भुइयां म पड़े रिहिस।
2SA 12:17 ओकर घराना के सियानमन ओला भुइयां ले उठाय बर ओकर बाजू खड़े रिहिन, पर ओह नइं मानिस, अऊ ओमन के संग कोनो जेवन नइं करिस।
2SA 12:18 सात दिन बेमार रहे के बाद ओ लइका ह मर गीस। दाऊद के सेवकमन ओला लइका के मरे के समाचार देय बर डरत रिहिन, काबरकि ओमन सोचत रिहिन, “जब लइका ह जीयत रिहिस, अऊ हमन ओकर ले गोठियायेंन, त ओह हमर बात ला नइं सुनिस। पर अब हमन ओला कइसे बतावन कि लइका ह मर गे हवय? ओह निरासा म कुछू गलत झन कर बईठे।”
2SA 12:19 दाऊद ह देखिस कि ओकर सेवकमन आपस म फुसफुसावत हवंय, त ओह जान डारिस कि लइका ह मर गे हवय। दाऊद ह ओमन ले पुछिस, “का लइका ह मर गीस?” त ओमन जबाब दीन, “हव, ओह मर गीस।”
2SA 12:20 तब दाऊद ह भुइयां ले उठिस, अऊ नहा-खोरके तेल लगाईस, अऊ अपन ओनहा ला बदलिस; तब ओह यहोवा के घर म जाके अराधना करिस। ओकर बाद, ओह अपन घर गीस, अऊ ओकर हुकूम ले ओला रोटी परोसे गीस, अऊ ओह जेवन करिस।
2SA 12:21 तब ओकर सेवकमन ओकर ले पुछिन, “तेंह काबर अइसन करत हस? जब तक लइका ह जीयत रिहिस, त तेंह उपास करय अऊ रोये, पर अब, जब लइका ह मर गीस, त तेंह उठके जेवन करत हस।”
2SA 12:22 ओह जबाब दीस, “जब लइका ह जीयत रिहिस, त मेंह उपास करेंव अऊ रोयें। काबरकि मेंह सोचत रहेंव, ‘कोन जानय? यहोवा के अनुग्रह मोर ऊपर होवय अऊ लइका ह जीयत रहय।’
2SA 12:23 पर अब ओह मर गीस, फेर मेंह काबर उपास करत रहंव? का मेंह ओला लहुंटाके ला सकत हंव? मेंह ओकर मेर जाहूं, पर ओह मोर करा लहुंटके नइं आवय।”
2SA 12:24 तब दाऊद ह अपन घरवाली बतसेबा ला सांतवना दीस, अऊ ओह ओकर मेर जाके ओला मया करिस। बतसेबा ह एक बेटा ला जनम दीस, अऊ ओमन ओकर नांव सुलेमान रखिन। यहोवा ह ओकर ले मया करिस;
2SA 12:25 अऊ काबरकि यहोवा ह ओकर ले मया करिस, एकरसेति ओह नातान अगमजानी के दुवारा संदेस पठोके ओ लइका के नांव यदिदियाह रखिस।
2SA 12:26 इही बीच म योआब ह अमोनीमन के रब्बा नगर के बिरूध लड़िस अऊ साही किला ऊपर कब्जा कर लीस।
2SA 12:27 तब योआब ह ये कहिके संदेसियामन ला दाऊद मेर पठोईस, “मेंह रब्बा के बिरूध लड़ेंव अऊ एकर पानी पूरोय के काम ला अपन अधीन कर ले हंव।
2SA 12:28 एकरसेति अब बांचे सेना के मनखेमन ला इकट्ठा करके सहर के घेराबंदी कर अऊ ओला अपन अधीन कर ले। नइं तो मेंह सहर ला ले लूहूं, अऊ ओ सहर के नांव मोर नांव म रखे जाही।”
2SA 12:29 तब दाऊद ह जम्मो सेना ला इकट्ठा करके रब्बा नगर म गीस, अऊ ओकर ऊपर हमला करके ओला अपन अधीन कर लीस।
2SA 12:30 तब दाऊद ह ओमन के राजा के मुड़ ले मुकुट ला ले लीस, अऊ ओ मुकुट ला दाऊद के मुड़ म रखे गीस। ओ मुकुट के वजन सोन के एक टेलेन्ट रिहिस, अऊ येमा कीमती पथरामन जड़े रिहिन। दाऊद ह ओ सहर ले बहुंत अकन सामान लूटके ले गीस
2SA 12:31 अऊ उहां के मनखेमन ला बाहिर निकाल लीस अऊ ओमन ला आरी, रांपा अऊ टंगिया देके ओमन ले मजदूरी करवाईस, अऊ ओह ओमन ले ईंटा घलो बनवाईस। दाऊद ह अमोनी नगरमन के जम्मो मनखेमन के संग अइसने ही करिस। तब ओह अऊ ओकर पूरा सेना यरूसलेम लहुंट गीस।
2SA 13:1 तामार नांव के एक सुघर कन्या, जऊन ह दाऊद के बेटा अबसालोम के बहिनी रिहिस, ओकर ऊपर दाऊद के दूसर बेटा अमनोन ह मोहा गीस।
2SA 13:2 अमनोन के मन म ओकर बहिनी तामार ह अइसन छा गे रिहिस कि अमनोन ह बेमार पड़ गीस। तामार ह कुंवारी रिहिस, अऊ अमनोन ला ओकर संग कुछू करना असंभव लगत रिहिस।
2SA 13:3 अमनोन के योनादाब नांव के एक सलाहकार रिहिस, जऊन ह दाऊद के भाई सिमा के बेटा रिहिस। योनादाब ह बहुंत चतुर मनखे रिहिस।
2SA 13:4 ओह अमनोन ले पुछिस, “तें राजा के बेटा अस, अऊ का कारन ए कि दिन ब दिन तेंह पातर होवत जावत हस? का तेंह मोला नइं बताबे?” अमनोन ह ओकर ले कहिस, “मेंह तो अपन भाई अबसालोम के बहिनी तामार ऊपर मोहा गे हंव।”
2SA 13:5 योनादाब ह कहिस, “अपन बिस्तर म जा अऊ अइसे बहाना कर कि तेंह बेमार हस, अऊ जब तोर ददा ह तोला देखे बर आही, तब ओकर ले कहिबे, ‘मेंह चाहत हंव कि मोर बहिनी तामार ह आके मोला खाय बर कुछू देवय। ओह जेवन ला मोर आघू म रांधय ताकि मेंह ओला देखंव अऊ तब ओकर हांथ ले खावंव।’ ”
2SA 13:6 तब अमनोन ह लेट गीस अऊ अइसे बहाना करे लगिस, मानो ओह बेमार हवय। अऊ जब राजा ह ओला देखे बर आईस, त अमनोन ह राजा ले कहिस, “मेंह चाहत हंव कि मोर बहिनी तामार ह आके मोर देखत म कुछू बिसेस रोटी बनाय कि मेंह ओकर हांथ ले खावंव।”
2SA 13:7 तब दाऊद ह महल म तामार मेर ये खबर पठोईस, “अपन भाई अमनोन के घर म जाके ओकर बर कुछू जेवन तियार कर।”
2SA 13:8 तब तामार ह अपन भाई अमनोन के घर म गीस, जऊन ह अपन बिस्तर म लेटे रिहिस। तामार ह कुछू पीसान ला लेके गुंथिस, अऊ ओकर देखत म रोटी बनाईस।
2SA 13:9 तब ओह थाली लेके ओला रोटी परोस दीस, पर अमनोन ह खाय ले मना करिस। ओह कहिस, “इहां ले जम्मो झन ला बाहिर भेज दे।” तब जम्मो झन उहां ले चल दीन।
2SA 13:10 तब अमनोन ह तामार ले कहिस, “अब जेवन ला इहां मोर सुते के कमरा म ले आ कि में तोर हांथ ले खावंव।” त तामार ह अपन बनाय रोटी ला लीस अऊ ओला अपन भाई अमनोन मेर ओकर सुते के कमरा म ले आईस।
2SA 13:11 पर जब ओह ओ रोटी ला ओकर करा खाय बर ले गीस, त अमनोन ह ओला पकड़ लीस अऊ कहिस, “हे मोर बहिनी, आ, मोर संग बिस्तर म सुत।”
2SA 13:12 तामार ह ओला कहिस, “हे मोर भाई, नइं, मोर संग जबरदस्ती झन कर; अइसन काम इसरायल म नइं होना चाही! अइसन दुस्ट काम झन कर।
2SA 13:13 मोर का होही? मेंह अपन कलंक ले अलग कइसे होहूं? अऊ तोर का होही? तेंह इसरायल म एक दुस्ट मुरूख के रूप म गने जाबे। किरपा करके तेंह राजा ले गोठिया; ओह मोर बिहाव तोर संग करे बर मना नइं करही।”
2SA 13:14 पर अमनोन ह ओकर बात नइं सुनिस; अऊ ओह तामार ले जादा ताकतवर होय के कारन ओह ओकर संग जबरदस्ती कुकरम करिस।
2SA 13:15 ओकर बाद, अमनोन ह ओकर ले बहुंत घिन करे लगिस। पहिले जतेक मया ओह तामार ले करत रिहिस, ओकर ले बढ़के ओह घिन करे लगिस। तब अमनोन ह ओला कहिस, “उठ अऊ इहां ले निकल जा!”
2SA 13:16 पर तामार ह ओला कहिस, “नइं! जऊन गलत काम तेंह मोर संग करे हस, ओकर ले जादा गलती तो तेंह मोला इहां ले बाहिर भगाके करत हस।” पर अमनोन ह ओकर एको ठन बात नइं सुनिस।
2SA 13:17 तब ओह अपन निजी सेवक ला बलाके कहिस, “ये माईलोगन ला मोर नजर ले हटा अऊ ओला निकालके कपाट ला बंद कर दे।”
2SA 13:18 तब ओकर सेवक ह ओला निकाल दीस अऊ कपाट ला बंद कर दीस। ओह पूरा बांही के एक रंग-बिरंगी कुरता पहिरे रिहिस, काबरकि राजा के कुंवारी बेटीमन ये किसम के पहिरावा पहिरंय।
2SA 13:19 तामार ह अपन मुड़ म राख ला डारिस, अऊ अपन पहिरे कुरता ला चीरिस, अऊ अपन मुड़ म अपन हांथ धरिस अऊ जोर-जोर से रोवत उहां ले चल दीस।
2SA 13:20 ओकर भाई अबसालोम ह ओकर ले पुछिस, “का तोर भाई, ओ अमनोन ह तोर संग म रिहिस? हे मोर बहिनी, अभी तें चुप हो जा; ओह तोर भाई अय। ये बात ला अपन मन म झन रख।” अऊ तामार ह अपन भाई अबसालोम के घर म अलग परे माईलोगन सहीं रहे लगिस।
2SA 13:21 जब दाऊद राजा ये जम्मो बात ला सुनिस, त ओह बहुंत नराज होईस।
2SA 13:22 पर अबसालोम ह अमनोन ला कभू बने या खराप कुछू नइं कहिस; ओह ओकर ले घिन करय काबरकि अमनोन ह ओकर बहिनी तामार ला कलंकित करे रिहिस।
2SA 13:23 दू बछर के बाद, जब अबसालोम के ऊन कतरइयामन एपरैम के सीमना के लकठा म बाल-हासोर मेर रिहिन, त ओह राजा के जम्मो बेटामन ला उहां आय बर नेवता दीस।
2SA 13:24 अबसालोम ह राजा करा जाके कहिस, “तोर सेवक ह भेड़ के ऊन कतरइयामन ला बलाय हवय, एकरसेति राजा अऊ ओकर सेवकमन किरपा करके मोर संग उहां चलंय।”
2SA 13:25 पर राजा ह जबाब दीस, “हे मोर बेटा, नइं, हमन जम्मो झन नइं जावन; नइं तो हमन तोर ऊपर एक बोझा सहीं हो जाबो।” हालाकि अबसालोम ओकर ले बिनती करिस, पर तभो ले राजा ह जाय बर मना कर दीस, पर ओला अपन आसीस दीस।
2SA 13:26 तब अबसालोम ह कहिस, “यदि तें नइं आ सकस, त किरपा करके मोर भाई अमनोन ला हमर संग म आवन दे।” राजा ह ओकर ले पुछिस, “ओह तोर संग काबर जाही?”
2SA 13:27 पर अबसालोम ह ओकर ले बिनती करते रिहिस, त ओह अमनोन अऊ बाकि जम्मो राजकुमारमन ला ओकर संग पठो दीस।
2SA 13:28 अबसालोम ह अपन मनखेमन ला हुकूम दीस, “सुनव! जब अमनोन ह मंद पीके बहुंत नसा म आ जाही अऊ मेंह तुमन ले कहंव, ‘अमनोन ला मारव,’ तब ओला मार डारव। झन डरहू। का तुमन ला ये हुकूम देवइया में नो हंव। बलवान अऊ साहसी बनव।”
2SA 13:29 एकरसेति अबसालोम के सेवकमन अमनोन के संग वइसे ही करिन, जइसे अबसालोम ह हुकूम देय रिहिस। तब जम्मो राजकुमारमन उठिन, अऊ अपन-अपन खच्चर म चघके भाग गीन।
2SA 13:30 जब ओमन रसता म ही रिहिन कि दाऊद ला ये खबर मिलिस, “अबसालोम ह राजा के जम्मो बेटामन ला मार डारे हे; ओमन के एको झन घलो नइं बांचे हवंय।”
2SA 13:31 ये सुनके राजा ह उठके दुख म अपन ओनहा ला चीरिस अऊ भुइयां म लेट गीस; अऊ ओकर जम्मो सेवकमन घलो अपन ओनहा ला चीरके ओकर बाजू म ठाढ़ हो गीन।
2SA 13:32 पर दाऊद के भाई सिमा के बेटा योनादाब ह कहिस, “मोर मालिक ह ये झन सोचय कि जम्मो राजकुमार मार डारे गे हवंय; सिरिप अमनोन ही मारे गे हवय। जऊन दिन ले अमनोन ह अबसालोम के बहिनी तामार ले जबरदस्ती कुकरम करे रिहिस, ओही दिन ले ही अबसालोम ह एकर इरादा कर ले रिहिस।
2SA 13:33 मोर मालिक राजा ह ये खबर सुनके उदास झन होवय कि राजा के जम्मो बेटामन मर गे हवंय। सिरिप अमनोन ही मारे गे हवय।”
2SA 13:34 इही दौरान, अबसालोम ह भाग गे रिहिस। जऊन मनखे ह पहरा देवत रिहिस, ओह आंखी ला उठाके देखिस कि ओकर पछिम के रसता ले, पहाड़ी के बाजू ले बहुंते मनखेमन आवत हवंय। पहरेदार ह जाके राजा ला कहिस, “मेंह होरोनैम कोति, पहाड़ी के बाजू म मनखेमन ला देखत हंव।”
2SA 13:35 योनादाब ह राजा ला कहिस, “देख, राजा के बेटामन आ गे हवंय; जइसने तोर सेवक ह कहे रिहिस, वइसनेच होईस।”
2SA 13:36 ओह अपन बात खतम ही करे रिहिस कि राजा के बेटामन जोर-जोर से रोवत आ गीन। राजा ह घलो अपन जम्मो अधिकारीमन संग कलप-कलपके के रोवन लगिस।
2SA 13:37 अबसालोम ह भागके गसूर के राजा, अमीहूद के बेटा तलमै करा चल दीस। पर दाऊद ह अपन बेटा बर बहुंत दिन तक बिलाप करिस।
2SA 13:38 जब अबसालोम ह भागके गसूर ला गीस, त ओह उहां तीन बछर तक रिहिस।
2SA 13:39 अऊ राजा दाऊद के मन म अबसालोम मेर जाय के बड़े लालसा रिहिस, काबरकि ओह अमनोन के मिरतू के बात ले उबर चुके रिहिस।
2SA 14:1 सरूयाह के बेटा योआब ह जान डारिस कि राजा के मन ह अबसालोम कोति लगे हवय।
2SA 14:2 एकरसेति योआब ह तकोआ नगर म दूत ला पठोके उहां ले एक बुद्धिमान माईलोगन ला बलाईस। ओह ओ माईलोगन ले कहिस, “अइसे दिखावा कर कि तेंह सोक मनात हस। सोक के पहिरावा ला पहिर ले, अऊ कोनो भी किसम के सजे-संवरे के चीज के उपयोग झन कर। अइसे माईलोगन सहीं दिखावा कर, जऊन ह मरे मनखे बर बहुंत दिन ले बिलाप करत हे।
2SA 14:3 तब राजा करा जाके ओला ये बात कह।” अऊ योआब ह ओला सिखो दीस कि का कहना हे।
2SA 14:4 जब तकोआ नगर के ओ माईलोगन ह राजा मेर गीस, त ओह मुहूं के भार भुइयां म गिरके राजा के दंडवत करिस, अऊ ओह कहिस, “हे महाराज, मोर मदद कर!”
2SA 14:5 राजा ह ओकर ले पुछिस, “तोर का समस्या ए?” ओह जबाब दीस, “में एक बिधवा अंव; मोर घरवाला ह मर गीस।
2SA 14:6 अऊ में, तोर सेविका के दू झन बेटा रिहिन, जब ओमन खेत म रिहिन, त ओ दूनों के बीच मारपीट होईस, अऊ उहां ओमन ला छोंड़ाके अलग करनेवाला कोनो नइं रिहिस। एक झन ह दूसर ला अइसन मारिस कि ओह मर गीस।
2SA 14:7 अब जम्मो कुल के मनखेमन तोर सेविका के बिरूध हो गे हवंय; ओमन कहत हें, ‘जऊन ह अपन भाई ला घात करे हवय, ओला हमर हांथ म सऊंप दे, ताकि ओला ओकर भाई के हतिया करे के बदला म मार डारन;’ यदि ओमन अइसे करहीं, त फेर हमर वारिस ह घलो खतम हो जाही। जऊन एके ठन मोर बरत कोइला बांचे हवय, ओमन ओला घलो बुता दीहीं, अऊ ये धरती म मोर घरवाला के न तो नांव रहिही अऊ न ही ओकर कोनो संतान बांचही।”
2SA 14:8 राजा ह ओ माईलोगन ला कहिस, “तें अपन घर जा, अऊ मेंह तोर बिसय म एक हुकूम दूहूं।”
2SA 14:9 पर तकोआ के ओ माईलोगन ह राजा ले कहिस, “मोर मालिक, राजा ह मोला अऊ मोर परिवार ला छेमा करय, अऊ राजा अऊ ओकर सिंघासन ह निरदोस ठहिरय।”
2SA 14:10 राजा ह कहिस, “यदि कोनो मनखे तोर ले कुछू बोलथे, त ओला मोर करा ले आबे, अऊ ओ मनखेमन तोला फेर नइं सताहीं।”
2SA 14:11 ओह कहिस, “राजा ह यहोवा अपन परमेसर ला सुरता करय कि खून के पलटा लेवइया ह अऊ नास करन झन पावय, अऊ मोर बेटा ला नास झन करे जावय।” राजा ह कहिस, “यहोवा के जिनगी के सपथ, तोर बेटा के एको ठन बाल भी बांका नइं होवय।”
2SA 14:12 तब माईलोगन ह कहिस, “तोर सेविका ह मोर मालिक राजा ले एक ठन अऊ बात कहे चाहत हे।” ओह कहिस, “गोठिया।”
2SA 14:13 ओ माईलोगन ह कहिस, “फेर तेंह परमेसर के मनखेमन के बिरूध अइसनेच उपाय काबर करे हस? जब राजा ह ये बात कहिथे, त का ओह खुद दोसी नइं ठहिरत हे, काबरकि राजा अपन निकाले गय बेटा ला लहुंटाके नइं लाय हवय?
2SA 14:14 हमन ला तो मरनेच हे, अऊ हमन भुइयां म गिरे हुए पानी के असन ठहिरबो, जेला फेर उठाय नइं जा सकय। पर परमेसर ह ओ बात ला नइं चाहय; एकर बदले, ओह अइसन उपाय करथे कि निकाले गय मनखे हमेसा बर ओकर ले निकाले गय सहीं झन रहय।
2SA 14:15 “अऊ अब मेंह अपन मालिक राजा ले ये बात कहे बर आय हवंव, काबरकि मनखेमन मोला डरा देय रिहिन। तोर सेविका ह सोचिस, ‘में राजा ले बात करहूं; सायद ओह अपन सेविका के बिनती ला सुन ले।
2SA 14:16 सायद राजा ह अपन सेविका ला ओ मनखे के हांथ ले छोंड़ाय के अनुमति देवय, जऊन ह मोला अऊ मोर बेटा दूनों ला परमेसर के भाग ले अलग करे के कोसिस करत हे।’
2SA 14:17 “अब तोर सेविका ह कहत हे, ‘मोर मालिक राजा के बचन ह मोर भाग ला सुनिस्चित करय, काबरकि मोर मालिक राजा ह परमेसर के कोनो स्वरगदूत के असन बने अऊ खराप बात म भेद कर सकथे। यहोवा तोर परमेसर ह तोर संग रहय।’ ”
2SA 14:18 तब राजा ह ओ माईलोगन ला कहिस, “जऊन बात मेंह तोर ले पुछनेवाला हंव, ओला मोर ले झन छुपाबे।” ओ माईलोगन ह कहिस, “मोर मालिक राजा ह पुछय।”
2SA 14:19 राजा ह पुछिस, “का ये जम्मो बात म तोर पाछू योआब के हांथ हवय?” माईलोगन ह जबाब देके कहिस, “हे मोर मालिक राजा, तोर जिनगी के सपथ, जऊन कुछू मोर मालिक राजा ह कहत हे, ओकर ले कोनो न तो जेवनी कोति मुड़ सकथे अऊ न ही डेरी कोति। हव, येह तोर सेवक योआब ए, जऊन ह मोला ये सब करे के हुकूम दे रिहिस, अऊ ओही ह ये जम्मो बात तोर सेविका ला सिखोय रिहिस।
2SA 14:20 तोर सेवक योआब ह अभी के स्थिति ला बदले बर ये सब करिस। मोर मालिक करा परमेसर के एक स्वरगदूत सहीं बुद्धि हवय—ओह ओ हर चीज ला जानथे, जऊन ह धरती म होथे।”
2SA 14:21 तब राजा ह योआब ला कहिस, “बहुंत बढ़िया, मेंह ये काम करहूं। तेंह जा अऊ ओ जवान अबसालोम ला वापिस लेके आ।”
2SA 14:22 योआब ह राजा के आदर म भुइयां म मुहूं के बल गिरके ओला दंडवत करिस, अऊ ओह राजा ला आसीरबाद दीस। योआब ह कहिस, “हे मोर मालिक राजा, आज तोर सेवक ह जान गीस कि मोर ऊपर तोर दया-दिरिस्टी हवय, काबरकि राजा ह अपन सेवक के बिनती ला मान ले हवय।”
2SA 14:23 तब योआब ह उठके गसूर राज ला गीस अऊ अबसालोम ला वापिस यरूसलेम ले आईस।
2SA 14:24 पर राजा ह कहिस, “ओह अपन खुद के घर म जावय; ओह मोर चेहरा झन देखय।” तब अबसालोम अपन घर म चल दीस, अऊ राजा के चेहरा नइं देखिस।
2SA 14:25 जम्मो इसरायल म अबसालोम के सुघर देहें के जतेक परसंसा होवय, ओकर तुलना म अऊ कोनो के नइं होवत रिहिस। ओकर मुड़ ले लेके गोड़ तक, ओमा कुछू भी दोस नइं रिहिस।
2SA 14:26 जब भी ओह अपन मुड़ के बाल ला कटवाय—ओह बछर म एक बार अपन बाल कटवात रिहिस, काबरकि येह ओकर बर बहुंत भारी हो जावय—ओह अपन बाल के तऊल करवाय, अऊ ओकर वजन साही तऊल के मुताबिक दू सौ सेकेल होवय।
2SA 14:27 अबसालोम के तीन बेटा अऊ एक बेटी होईन। ओकर बेटी के नांव तामार रिहिस, अऊ ओह एक सुघर माईलोगन होईस।
2SA 14:28 अबसालोम ह दू बछर तक राजा के चेहरा देखे बिगर यरूसलेम म रिहिस।
2SA 14:29 तब अबसालोम ह योआब ला बुलवाईस ताकि ओला राजा दाऊद करा पठोवय, पर योआब ह ओकर मेर आय ले मना कर दीस। तब ओह ओला दूसर बार बलाय बर पठोईस, पर तब भी योआब ह आय ले मना कर दीस।
2SA 14:30 तब अबसालोम ह अपन सेवकमन ला कहिस, “देखव, योआब के खेत ह मोर खेत ले लगे हवय, अऊ ओमा जौ के फसल लगे हवय। तुमन जाके ओमा आगी लगा दव।” तब अबसालोम के सेवकमन जाके ओ खेत म आगी लगा दीन।
2SA 14:31 तब योआब ह अबसालोम के घर गीस, अऊ ओह ओकर ले पुछिस, “तोर सेवकमन मोर खेत म काबर आगी लगाय हवंय?”
2SA 14:32 अबसालोम ह योआब ले कहिस, “देख, मेंह तोर मेर ये कहे बर मनखे पठोय रहेंव, ‘इहां आ कि मेंह तोला राजा करा ये पुछे बर पठोवंव, “मेंह गसूर ले काबर आयेंव? बने होतिस कि मेंह अब तक उहेंच रहितेंव!” ’ एकरसेति अब मेंह राजा के दरसन करे चाहत हंव, अऊ यदि मेंह कोनो बात के दोसी अंव, त ओह मोला मार डारय।”
2SA 14:33 तब योआब ह राजा करा गीस अऊ ओला ये बात बताईस। अऊ राजा ह अबसालोम ला बलाईस, अऊ ओह राजा करा गीस अऊ ओकर आघू म भुइयां म मुहूं के बल गिरके ओला दंडवत करिस। अऊ राजा ह अबसालोम ला चूमिस।
2SA 15:1 कुछू दिन के बाद, अबसालोम ह अपन बर रथ अऊ घोड़ामन अऊ अपन आघू-आघू दऊड़इया पचास झन मनखेमन ला रख लीस।
2SA 15:2 अबसालोम ह बड़े बिहनियां उठके ओ सड़क के किनारे म ठाढ़ हो जावय, जऊन ह सहर के दुवार करा जावय। जब भी कोनो मनखे अपन सिकायत लेके राजा मेर आवत दिखय, त अबसालोम ह ओला आरो लगाके पुछय, “तेंह कोन नगर ले आवत हस?” जब ओ मनखे ह कहय, “तोर सेवक ह इसरायल के एक गोत्र म के अय।”
2SA 15:3 तब अबसालोम ह ओला कहय, “देख, तोर सिकायत ह सही अऊ उचित अय, पर तोर बात ला सुने बर राजा कोति ले कोनो मनखे नइं ए।”
2SA 15:4 अऊ अबसालोम ह ये घलो कहय, “बने होतिस कि सिरिप मेंह ये देस म नियायी ठहिराय जातेंव! तब हर एक मनखे मोर करा अपन सिकायत या मामला ला लेके आतिन, अऊ मेंह देखतेंव कि ओमन ला नियाय मिलतिस।”
2SA 15:5 अबसालोम ह ये घलो करय कि जब भी कोनो मनखे झुकके ओला दंडवत करे बर ओकर करा आवय, त ओह अपन हांथ बढ़ाय अऊ ओला पकड़के चूम लेवय।
2SA 15:6 जतेक इसरायलीमन राजा करा नियाय मांगे बर आवंय, ओ जम्मो के संग अबसालोम के अइसनेच बेवहार रहय, अऊ ये किसम ले अबसालोम ह इसरायली मनखेमन के मन ला जीत लीस।
2SA 15:7 चार बछर के आखिरी म, अबसालोम ह राजा ले कहिस, “मोला हेबरोन जावन दे कि यहोवा ले माने गय मन्नत ला पूरा कर सकंव।
2SA 15:8 जब तोर सेवक ह अराम के गसूर म रहत रिहिस, तब ये मन्नत माने रिहिस: ‘यदि यहोवा ह मोला वापिस यरूसलेम ले जाथे, त मेंह यहोवा के उपासना हेबरोन म करहूं।’ ”
2SA 15:9 राजा ह ओला कहिस, “सांति से जा।” अऊ ओह हेबरोन चल दीस।
2SA 15:10 तब अबसालोम ह इसरायल के जम्मो गोत्रमन म ये कहे बर गुपत संदेसियामन ला पठोईस, “जइसे ही तुमन तुरहीमन के अवाज सुनव, त कहव, ‘अबसालोम ह हेबरोन के राजा बन गीस।’ ”
2SA 15:11 यरूसलेम ले दू सौ मनखे अबसालोम के संग गे रिहिन। ओमन ला पहुना के रूप म नेवता देय गे रिहिस अऊ ओमन सीधवा मन ले बिगर कोनो बात ला जाने उहां गे रिहिन।
2SA 15:12 जब अबसालोम ह बलिदान चघात रिहिस, त ओह दाऊद के सलाहकार, गीलोनी अहीतोपेल ला घलो बुलवाईस कि ओह अपन नगर गीलो ले आवय। अऊ ये किसम ले साजिस ह अऊ मजबूत होईस, अऊ अबसालोम के तरफ के मनखेमन के गनती बराबर बाढ़त गीस।
2SA 15:13 एक संदेसिया ह आके दाऊद ला बताईस, “इसरायली मनखेमन के मन ह अबसालोम कोति हो गे हवय।”
2SA 15:14 तब दाऊद ह अपन ओ जम्मो करमचारीमन ले कहिस, जेमन ओकर संग यरूसलेम म रिहिन, “आवव! हमन भाग चलन; नइं तो हमन म ले कोनो भी अबसालोम के हांथ ले नइं बांचही। हमन ला तुरते भागना पड़ही, नइं तो ओह बहुंत जल्दी आके हमन ला घेर लीही, अऊ हमर नुकसान करही अऊ ये नगर के मनखेमन ला तलवार ले मार डारही।”
2SA 15:15 राजा के करमचारीमन ओला जबाब दीन, “जइसने हमर मालिक राजा ह कहिही, वइसने हमन तोर सेवकमन करे बर तियार हवन।”
2SA 15:16 तब राजा ह निकल गीस, अऊ ओकर संग ओकर पूरा घराना घलो चल दीस; पर ओह दस रखैलमन ला महल के देखरेख करे बर छोंड़ दीस।
2SA 15:17 राजा ह निकल गीस, अऊ ओकर पाछू-पाछू जम्मो मनखेमन घलो चल दीन, अऊ ओमन सहर के तीर म जाके रूक गीन।
2SA 15:18 ओकर जम्मो आदमीमन ओकर सामने ले होके आघू बढ़ गीन; ओमन के संग म जम्मो करेती अऊ पलेतीमन अऊ ओ जम्मो छै सौ गतीमन घलो रिहिन, जेमन गत ले ओकर संग आय रिहिन; ओमन जम्मो राजा के आघू म चलिन।
2SA 15:19 तब राजा दाऊद ह गत के निवासी इत्तै ले पुछिस, “हमर संग तेंह काबर चलत हस? वापिस जा अऊ राजा अबसालोम के संग रह। तेंह एक परदेसी बंधुवा अस अऊ अपन देस ले बाहिर रहत हस।
2SA 15:20 तेंह तो कल ही आय हस। अऊ का आज ही मेंह तोला हमर संग एती-ओती भटकावंव, जबकि मेंह खुद नइं जानत हंव कि मेंह कहां जावत हंव? तें लहुंट जा, अऊ अपन संग अपन मनखेमन ला घलो ले जा। यहोवा ह तोर ऊपर दया अऊ मया देखावय।”
2SA 15:21 पर इत्तै ह राजा ला जबाब दीस, “यहोवा के जिनगी के सपथ, अऊ मोर मालिक राजा के जिनगी के सपथ, जिहां कहूं मोर मालिक राजा ह रहिही, चाहे मरे या जीये के बात घलो होवय, उहां तोर सेवक तोर संग रहिही।”
2SA 15:22 तब दाऊद ह इत्तै ला कहिस, “ठीक हे, आघू बढ़।” तब गती इत्तै ह अपन जम्मो आदमी अऊ ओमन के परिवार के मनखेमन संग आघू बढ़िस।
2SA 15:23 गांव-गंवई के जम्मो मनखेमन चिचिया-चिचियाके रोईन, जब जम्मो मनखेमन उहां ले होके गीन। राजा घलो किदरोन घाटी ला पार करिस, अऊ जम्मो मनखेमन निरजन जगह कोति बढ़ गीन।
2SA 15:24 सादोक ह घलो उहां रिहिस, अऊ ओकर संग के जम्मो लेवीमन परमेसर के करार के सन्दूक ला उठाके ले जावत रिहिन। ओमन परमेसर के सन्दूक ला खाल्हे धर दीन; तब अबियातार ह बलिदान चघाईस, जब तक कि जम्मो मनखेमन सहर ले नइं निकल गीन।
2SA 15:25 तब राजा ह सादोक ला कहिस, “परमेसर के सन्दूक ला वापिस सहर म ले जा। यदि यहोवा के अनुग्रह के नजर मोर ऊपर होही, त ओह मोला लहुंटाके लानही अऊ येला अऊ ओकर निवास स्थान ला फेर देखाही।
2SA 15:26 पर यदि ओह कहिथे, ‘मेंह तोर ले खुस नइं अंव,’ तब मेंह तियार हंव, जइसने ओला उचित लगय, वइसने ओह मोर संग करय।”
2SA 15:27 राजा ह सादोक पुरोहित ला ये घलो कहिस, “का तेंह समझत हस? मोर आसीस के संग वापिस सहर चले जा। अपन संग अपन बेटा अहीमास, अऊ अबियातार के बेटा योनातन ला घलो ले जा। तें अऊ अबियातार अपन-अपन बेटा संग लहुंट जावव।
2SA 15:28 मेंह निरजन जगह के पानी के घाट म तब तक इंतजार करहूं, जब तक कि तोर खबर मोला नइं मिल जाही।”
2SA 15:29 तब सादोक अऊ अबियातार, परमेसर के सन्दूक ला वापिस यरूसलेम ले गीन अऊ उहां रूक गीन।
2SA 15:30 पर दाऊद ह जैतून पहाड़ ऊपर चढ़त गीस, अऊ चलत-चलत ओह रोवत रिहिस; ओकर मुड़ ह ढंके रिहिस अऊ ओह खाली गोड़ रिहिस। ओकर संग के जम्मो मनखेमन घलो अपन-अपन मुड़ ला ढांके रहंय अऊ चलत-चलत रोवत रहंय।
2SA 15:31 दाऊद ला ये बताय गे रिहिस, “अबसालोम के संग साजिस करइयामन म अहीतोपेल घलो हवय।” एकरसेति दाऊद ह पराथना करिस, “हे यहोवा, अहीतोपेल के सलाह ला मुरूखता म बदल दे।”
2SA 15:32 जब दाऊद ह पहाड़ के चोटी म हबर गीस, जिहां मनखेमन परमेसर के अराधना करंय, त उहां ओकर ले मिले बर अरकी हूसै आय रिहिस अऊ ओकर ओनहा ह फटे रहय अऊ सोकित मनखे सहीं मुड़ म धुर्रा रहय।
2SA 15:33 दाऊद ह ओला कहिस, “यदि तेंह मोर संग जाबे, त तेंह मोर बर एक बोझा सहीं होबे।
2SA 15:34 पर यदि तेंह सहर ला वापिस जाके अबसालोम ला कहिबे, ‘हे महाराज, मेंह तोर एक सेवक होहूं; जइसे मेंह पहिले तोर ददा के सेवक रहेंव, पर अब में तोर सेवक होहूं,’ तब तेंह अहीतोपेल के सलाह ला असफल करके मोर मदद कर सकत हस।
2SA 15:35 उहां तोर संग सादोक अऊ अबियातार पुरोहित घलो होहीं? राजा के महल म जऊन कुछू भी तेंह सुनथस, ओ बात तें ओमन ला बता देबे।
2SA 15:36 ओमन के दू झन बेटा, याने कि सादोक के बेटा अहीमास, अऊ अबियातार के बेटा योनातन घलो उहां ओमन के संग हवंय। जऊन भी बात तें उहां सुनथस, ओकर खबर मोला ओमन के दुवारा पठो देबे।”
2SA 15:37 तब दाऊद के भरोसावाला मनखे, हूसै ह यरूसलेम सहर हबरिस, जब अबसालोम ह सहर के भीतर जावत रिहिस।
2SA 16:1 जब दाऊद ह पहाड़ के चोटी ले थोरकन आघू बढ़े रिहिस कि ओला मपीबोसेत के करमचारी सीबा ह मिलिस, जऊन ह राजा ले मिले बर आय रिहिस। ओकर करा सामान से लदे गदहामन रहंय अऊ ओमा दू सौ रोटी, किसमिस के एक सौ टिकिया, अंजीर के एक सौ टिकिया अऊ अंगूर के मंद ले भरे चमड़ा के एक थैली रहय।
2SA 16:2 राजा ह सीबा ले पुछिस, “तेंह काबर येमन ला लाने हस?” सीबा ह जबाब दीस, “गदहामन त राजा के घराना के सवारी बर, रोटी अऊ फर ह आदमीमन के खाय बर, अऊ अंगूर के मंद ह ओमन ला तरो-ताजा करे बर अय, जेमन निरजन प्रदेस म थक जाहीं।”
2SA 16:3 तब राजा ह पुछिस, “तोर मालिक के पोता कहां हवय?” सीबा ह राजा ला जबाब दीस, “ओह यरूसलेम म हवय, काबरकि ओह सोचथे, ‘आज इसरायलीमन मोला मोर डोकरा ददा के राज फेर वापिस कर दीहीं।’ ”
2SA 16:4 तब राजा ह सीबा ला कहिस, “जऊन कुछू मपीबोसेत के रिहिस, ओ जम्मो चीज अब तोर अय।” सीबा ह कहिस, “हे मोर मालिक राजा, में तोर दंडवत करत हंव, मोर ऊपर तोर अनुग्रह के नजर बने रहय।”
2SA 16:5 जब दाऊद राजा बहूरीम नगर म हबरिस, त साऊल के परिवार के कुल म ले एक मनखे उहां ले निकलिस, ओकर नांव सिमी रिहिस अऊ ओह गेरा के बेटा रिहिस, अऊ ओह दाऊद ला सराप देवत बाहिर निकलिस।
2SA 16:6 ओह दाऊद अऊ दाऊद राजा के जम्मो करमचारीमन ऊपर पथरा फेंकत रिहिस, हालाकि जम्मो सेना अऊ बिसेस पहरेदारमन दाऊद के जेवनी अऊ डेरी दूनों कोति रिहिन।
2SA 16:7 सिमी ह सराप देवत कहिस, “दूरिहा हट, हे हतियारा, दूरिहा हट, हे दुस्ट!
2SA 16:8 यहोवा ह तोर ले साऊल के घराना के जम्मो खून के बदला लेय हवय, जेकर जगह म तेंह राज करत हस। यहोवा ह राज ला तोर बेटा अबसालोम के हांथ म कर देय हवय। तेंह बरबाद होवत हस काबरकि तेंह हतियारा अस!”
2SA 16:9 तब सरूयाह के बेटा अबीसै ह राजा ले कहिस, “ये मरे कुकुर ह मोर मालिक राजा ला काबर सराप देवय? मोला उहां जावन दे कि मेंह ओकर मुड़ ला काटके अलग कर दंव।”
2SA 16:10 पर राजा ह कहिस, “हे सरूयाह के बेटामन, तुमन ला एकर से कुछू लेना-देना नइं ए? ओह सराप देवत हे, काबरकि यहोवा ह ओकर ले कहे हवय, ‘दाऊद ला सराप दे,’ त ओकर ले कोन पुछ सकथे, ‘तेंह अइसन काबर करत हस?’ ”
2SA 16:11 तब दाऊद ह अबीसै अऊ अपन जम्मो करमचारीमन ले कहिस, “जब मोर बेटा, मोर खुद के मांस अऊ खून ह मोला मार डारे के कोसिस करत हे, त फेर ये बिनयामीनी ह अइसन काबर नइं करही? ओला रहन दव, अऊ सराप देवन दव, काबरकि यहोवा ह ओला अइसन करे बर कहे हवय।
2SA 16:12 हो सकत हे कि यहोवा ह मोर दुरगति ला देखय अऊ आज ओकर सराप के बदले मोला ओकर करार के आसीस फेर मिलय।”
2SA 16:13 तब दाऊद अऊ ओकर आदमीमन रसता म आघू बढ़त गीन जबकि सिमी ह ओकर उल्टा पहाड़ के तीरे-तीर जावत रिहिस अऊ जावत-जावत ओह दाऊद ला सराप देवत रिहिस अऊ ओकर ऊपर पथरा अऊ धुर्रा घलो फेंकत रिहिस।
2SA 16:14 जब राजा अऊ ओकर जम्मो मनखेमन अपन ठिकाना म हबरिन, त ओमन थक गे रिहिन। अऊ उहां राजा ह बिसराम करिस।
2SA 16:15 इही बीच म, अबसालोम ह इसरायल के जम्मो आदमीमन संग यरूसलेम आ गीस, अऊ ओकर संग अहीतोपेल घलो रिहिस।
2SA 16:16 तब दाऊद के बिसवासयोग्य मनखे, अरकी हूसै ह अबसालोम मेर जाके नरियाईस, “राजा चिरंजीव रहय! राजा चिरंजीव रहय!”
2SA 16:17 अबसालोम ह हूसै ला कहिस, “का येह तोर मया अय, जेला तेंह अपन संगी बर देखात हस? यदि ओह तोर संगी अय, त फेर तें ओकर संग काबर नइं गेय?”
2SA 16:18 हूसै ह अबसालोम ला जबाब दीस, “अइसन नो हय, जऊन ला यहोवा, ये मनखेमन, अऊ इसरायल के जम्मो आदमीमन चुने हवंय, ओकर मेंह संगी अंव, अऊ ओकरे संग मेंह रहिहूं।
2SA 16:19 अऊ फेर मेंह काकर सेवा करंव? का में ओकर बेटा के सेवा नइं करंव? जइसने मेंह तोर ददा के सेवा करत रहेंव, वइसने ही तोर सेवा करहूं।”
2SA 16:20 तब अबसालोम ह अहीतोपेल ला कहिस, “तेंह अपन सलाह दे। हमन ला का करना चाही?”
2SA 16:21 अहीतोपेल ह जबाब देवत कहिस, “तें अपन ददा के ओ रखैलमन संग सुत, जेमन ला तोर ददा ह महल के देखरेख करे बर छोंड़ दे हवय। तब जम्मो इसरायलीमन सुनहीं कि तेंह अपनआप ला अपन ददा के नजर म घिनौना बना ले हस, अऊ जेमन तोर संग रहिहीं ओमन अऊ हिम्मती हो जाहीं।”
2SA 16:22 तब ओमन अबसालोम बर महल के छत म एक तम्बू गाड़िन, अऊ अबसालोम ह जम्मो इसरायलीमन के देखत अपन ददा के रखैलमन संग सुतिस।
2SA 16:23 ओ समय म, जऊन सलाह अहीतोपेल ह देवत रिहिस, ओह अइसन होवत रिहिस कि मानो कोनो मनखे ह परमेसर ले पुछके सलाह देवत हे। दाऊद अऊ अबसालोम दूनों अहीतोपेल के जम्मो सलाह ला अइसने ही समझंय।
2SA 17:1 ओकर बाद अहीतोपेल ह अबसालोम ला कहिस, “मोला बारह हजार मनखे ला छांटन देय, अऊ मेंह उठके आजेच रथिया दाऊद के पीछा करहूं।
2SA 17:2 जब दाऊद ह थके-मांदे अऊ निरबल होही, तभे मेंह ओकर ऊपर हमला करहूं। मेंह ओला आतंकित कर दूहूं, अऊ तब ओकर संग के जम्मो मनखेमन भाग जाहीं। मेंह सिरिप राजा ही ला मारहूं
2SA 17:3 अऊ जम्मो मनखेमन ला वापिस तोर करा ले आहूं। जऊन मनखे ला तेंह खोजत हस, ओकर मिरतू के मतलब होही—जम्मो मनखेमन के वापिस लहुंटई; जम्मो मनखेमन सही-सलामत होहीं।”
2SA 17:4 ये बात ह अबसालोम अऊ इसरायल के जम्मो अगुवामन ला सही लगिस।
2SA 17:5 फेर अबसालोम ह कहिस, “अरकी हूसै ला घलो बलाके लानव, ताकि ओकर बात ला घलो हमन सुनन कि ओह का कहिथे।”
2SA 17:6 जब हूसै ह अबसालोम मेर आईस, त अबसालोम ह ओकर ले कहिस, “अहीतोपेल ह ये सलाह दे हवय। जऊन बात ओह कहत हे, का हमन ला करना चाही? यदि नइं, त फेर तोर का बिचार ए, हमन ला बता।”
2SA 17:7 हूसै ह अबसालोम ला जबाब दीस, “जऊन सलाह अहीतोपेल ह ये बखत दे हवय, ओह सही नो हय।
2SA 17:8 तेंह तो अपन ददा अऊ ओकर आदमीमन ला जानत हस; ओमन योद्धा अंय, अऊ अपन पीला छीने गय जंगली भालू सहीं भयंकर कोरोधित होहीं। एकर अलावा, तोर ददा ह एक अनुभवी योद्धा अय; ओह सेना के दलमन के संग रात नइं बितावय।
2SA 17:9 अऊ त अऊ अभी घलो ओह कोनो गुफा या कोनो आने जगह म लुकाय होही। यदि ओह पहिले हमला करथे, त जऊन ह भी ये बात ला सुनही, ओह कहिही, ‘अबसालोम के सेना के बहुंते जन मारे गे हवंय।’
2SA 17:10 तब सबले हिम्मती सैनिक घलो, जेकर हिरदय सिंह के असन होथे, डर के मारे टघल जाही, काबरकि पूरा इसरायल जानत हे कि तोर ददा ह एक योद्धा अय, अऊ जऊन मन ओकर संग हवंय, ओमन हिम्मती अंय।
2SA 17:11 “एकरसेति मोर सलाह ये अय: दान सहर ले लेके बेरसेबा सहर तक जम्मो इसरायलीमन, जेमन समुंदर तीर के बालू सहीं अनगिनत हवंय, येमन तोर करा इकट्ठा होवंय, अऊ तें खुद लड़ई म ओमन के अगुवई कर।
2SA 17:12 तब जिहां कहूं भी ओह मिलही, हमन ओकर ऊपर हमला करबो, अऊ हमन ओकर ऊपर अइसे टूट पड़बो, जइसे भुइयां म ओस गिरथे। तब न तो ओ अऊ न ही ओकर आदमीमन ले कोनो बांचहीं।
2SA 17:13 यदि ओह कोनो सहर म चले जाथे, त जम्मो इसरायलीमन ओ सहर म रस्सी ले आहीं, अऊ हमन सहर ला घाटी म घसीटके ले आबो, इहां तक कि उहां एक ठन कंकड़ घलो नइं बांचही।”
2SA 17:14 तब अबसालोम अऊ इसरायल के जम्मो आदमीमन कहिन, “अरकी हूसै के सलाह अहीतोपेल के सलाह ले उत्तम अय।” काबरकि यहोवा ह अहीतोपेल के सही सलाह ला असफल करे के ठान लेय रिहिस, ताकि ओह अबसालोम के ऊपर बिपत्ति लानय।
2SA 17:15 तब हूसै ह सादोक अऊ अबियातार पुरोहितमन ले कहिस, “अहीतोपेल ह अबसालोम अऊ इसरायल के अगुवामन ला ये किसम के सलाह देय हवय, पर मेंह ओमन ला अइसे-अइसे करे बर कहे हवंव।
2SA 17:16 अब तुमन दाऊद करा खबर पठोके ओला बतावव, ‘आज रथिया निरजन जगह के पानी के तीर म झन ठहिरव; बिगर रूके ओ पार चल दव, नइं तो राजा अऊ ओकर संग के जम्मो मनखेमन नास हो जाहीं।’ ”
2SA 17:17 योनातन अऊ अहीमास ह एन-रोगेल के नरवा करा ठहिरे रिहिन। एक सेविका ला जाके ओमन ला बताना रिहिस, अऊ ओमन ला जाके राजा दाऊद ला बताना रिहिस, काबरकि ओमन काकरो देखत म सहर के भीतर जाय के जोखिम नइं उठा सकत रिहिन।
2SA 17:18 पर एक दिन एक जवान मनखे ह ओमन ला देख डारिस अऊ जाके अबसालोम ला बताईस। एकरसेति ओ दूनों तुरते उहां ले चल दीन अऊ बहूरीम म एक मनखे के घर म गीन। ओ मनखे के अंगना म एक ठन कुआं रिहिस अऊ ओमन ओ कुआं म उतरके छिप गीन।
2SA 17:19 ओ मनखे के घरवाली ह एक ठन कपड़ा लेके कुआं के ऊपर बिछा दीस अऊ ओमा अनाज ला फईला दीस। एकर बारे म कोनो कुछू नइं जानत रिहिन।
2SA 17:20 जब अबसालोम के जवानमन ओ घर म ओ माईलोगन करा आईन, त ओमन पुछिन, “अहीमास अऊ योनातन कहां हवंय?” तब माईलोगन ह ओमन ला जबाब दीस, “ओमन तो नरवा के ओ पार चल दीन।” तब ओ आदमीमन ओ दूनों ला खोजिन, पर ओ दूनों ओमन ला नइं मिलिन, तब अबसालोम के आदमीमन यरूसलेम लहुंट गीन।
2SA 17:21 जब ओमन चल दीन, तब अहीमास अऊ योनातन दूनों कुआं ले निकलिन अऊ जाके दाऊद राजा ला खबर दीन। ओमन दाऊद ला कहिन, “तुमन आघू बढ़व अऊ तुरते नदी के ओ पार चले जावव; काबरकि अहीतोपेल ह राजा के बिरूध अइसन-अइसन सलाह देय हवय।”
2SA 17:22 तब दाऊद अऊ ओकर संग के जम्मो मनखेमन आघू बढ़िन अऊ यरदन नदी के ओ पार चल दीन। बिहनियां होवत तक ओमन के जम्मो झन यरदन नदी के ओ पार हो गीन।
2SA 17:23 जब अहीतोपेल ह देखिस कि ओकर सलाह के मुताबिक काम नइं करे गे हवय, त ओह अपन गदहा म काठी ला कसिस, अऊ अपन नगर म अपन घर कोति निकल गीस। ओह अपन घर ला ब्यवस्थित करिस अऊ तब फांसी लगा लीस। ये किसम ले ओह मर गीस अऊ ओकर ददा के कबर म ओला माटी देय गीस।
2SA 17:24 तब दाऊद ह महनैम नगर म हबरिस, अऊ अबसालोम ह इसरायल के जम्मो आदमीमन के संग यरदन नदी ला पार करिस।
2SA 17:25 अबसालोम ह अमासा ला योआब के जगह म सेना के सेनापति ठहिराय रिहिस। अमासा ह एक इसमायली मनखे के बेटा रिहिस, जेकर नांव येतेर रिहिस, अऊ ओह अबीगैल ले बिहाव करे रिहिस; अबीगैल ह नाहास के बेटी अऊ सरूयाह के बहिनी अऊ योआब के दाई रिहिस।
2SA 17:26 इसरायलीमन अऊ अबसालोम गिलाद देस म डेरा डाले रिहिन।
2SA 17:27 जब दाऊद ह महनैम म आईस, तब अमोनीमन के रब्बा सहर के निवासी नाहास के बेटा सोबी, अऊ लो-देबार के निवासी अमीएल के बेटा माकीर, अऊ रोगलीम नगरवासी गिलादी बरजिलै,
2SA 17:28 बिस्तर, कटोरा, माटी के बरतन लेके आईन। ओमन गहूं अऊ जौ, पीसान अऊ भुने अनाज, सेमी अऊ दाल,
2SA 17:29 मंधरस, दही, भेड़, अऊ गाय के दूध के पनीर घलो दाऊद अऊ ओकर मनखेमन के खाय बर ले आईन। काबरकि ओमन सोचत रिहिन, “निरजन जगह म ओ मनखेमन थक गे होहीं अऊ भूखन-पियासन घलो होहीं।”
2SA 18:1 राजा दाऊद ह अपन संग के आदमीमन ला इकट्ठा करिस अऊ ओमन ला हजार-हजार अऊ सौ-सौ मनखेमन के ऊपर सेनापति ठहिरा दीस।
2SA 18:2 तब दाऊद ह अपन सेना के एक तिहाई ला योआब के, अऊ एक तिहाई ला सरूयाह के बेटा, योआब के भाई अबीसै के, अऊ एक तिहाई ला गती इत्तै के अधीन म करके पठो दीस। राजा ह सेना के मनखेमन ला कहिस, “मेंह घलो जरूर तुम्हर संग चलहूं।”
2SA 18:3 पर आदमीमन कहिन, “नइं, तोला बिलकुल ही नइं जाना हे; यदि हमन ला उहां भागे बर पड़य, त ओमन हमर चिंता नइं करहीं। अऊ त अऊ यदि हमन आधा मनखे घलो मारे जाथन, तभो ले ओमन चिंता नइं करंय; पर तेंह हमर सहीं दस हजार मनखे के बरोबर अस। एकरसेति येह सही होही कि तेंह सहर ले हमन ला मदद कर।”
2SA 18:4 राजा ह जबाब दीस, “जऊन कुछू तुमन ला बने लगय, मेंह ओही काम करहूं।” तब राजा ह दुवार के एक कोति ठाढ़ हो गीस, अऊ ओकर जम्मो आदमीमन सौ-सौ अऊ हजार-हजार के दल म निकलत गीन।
2SA 18:5 राजा ह योआब, अबीसै अऊ इत्तै ला हुकूम दीस, “मोर खियाल रखके ओ जवान अबसालोम के संग नमरता से बरताव करहू।” अऊ राजा ह अबसालोम के बारे म सेनापतिमन ला जऊन हुकूम देवत रिहिस, ओला सेना के जम्मो मनखेमन सुनिन।
2SA 18:6 दाऊद के सेना इसरायल के बिरूध लड़े बर बाहिर निकलिस, अऊ एपरैम के जंगल म ओमन के बीच लड़ई होईस।
2SA 18:7 उहां इसरायल के सेना ह दाऊद के आदमीमन ले हार गीस, अऊ ओ दिन बहुंत आदमी मारे गीन—बीस हजार आदमी।
2SA 18:8 लड़ई ह ओ जम्मो देहात छेत्र म फईल गीस, अऊ ओ दिन जतेक आदमी तलवार ले मारे गीन, ओकर ले जादा आदमी जंगल के कारन मर गीन।
2SA 18:9 अइसने होईस कि अबसालोम के मुलाकात राजा दाऊद के आदमीमन संग हो गीस। अबसालोम ह एक खच्चर म चघके जावत रिहिस, अऊ जब खच्चर ह एक बड़े बलूत रूख के घना डारामन के खाल्हे ले होके गीस, त अबसालोम के मुड़ के बाल ह रूख म फंस गीस। ओह अधर म लटक गीस, जबकि ओकर खच्चर ह आघू निकल गीस।
2SA 18:10 जब एक आदमी ह येला देखिस, त ओह योआब ला बताईस, “मेंह अभी-अभी अबसालोम ला एक ठन बलूत रूख म टंगे देखे हंव।”
2SA 18:11 तब योआब ह ओ खबर देवइया मनखे ला कहिस, “का! तें ओला देखे हस? फेर काबर तें ओला उहां मारके भुइयां म नइं गिरा देय? तब मेंह तोला चांदी के दस सेकेल अऊ एक ठन योद्धा के पट्टा देय रहितेंव।”
2SA 18:12 पर ओ मनखे ह योआब ला जबाब दीस, “अऊ त अऊ यदि तें मोला एक हजार सेकेल तऊलके देय रहितेय, तभो ले मेंह राजा के बेटा ऊपर हांथ नइं उठाय रहितेंव। काबरकि हमर सुनत म, राजा ह तोला अऊ अबीसै अऊ इत्तै ला ये हुकूम देय रिहिस, ‘मोर खियाल रखके ओ जवान अबसालोम ला कुछू झन करहू।’
2SA 18:13 अऊ यदि मेंह परान ला संकट म डाले रहितेंव—त तेंह खुद मोर बिरोधी हो जाते, काबरकि राजा ले कोनो बात छिपे नइं ए।”
2SA 18:14 योआब ह कहिस, “मेंह तोर संग अइसनेच ठहिरे नइं रह सकंव।” तब ओह अपन हांथ म तीन ठन भाला लीस अऊ ओमन ला अबसालोम के हिरदय म भोंग दीस, जब अबसालोम ह बलूत रूख म लटके रिहिस अऊ जीयत रिहिस।
2SA 18:15 अऊ योआब के दस हथियार ढोवइयामन अबसालोम ला घेरके ओकर ऊपर हमला करिन अऊ ओला मार डारिन।
2SA 18:16 फेर योआब ह तुरही ला फूंकिस, अऊ सेना के मनखेमन इसरायल के पीछा करई छोंड़ दीन, काबरकि योआब ह ओमन ला रोक ले रिहिस।
2SA 18:17 तब ओमन अबसालोम ला लीन अऊ जंगल के एक बड़े खंचवा म डाल दीन अऊ ओकर ऊपर पथरामन के एक बड़े ढेर लगाके पाट दीन। इही बीच म, जम्मो इसरायली अपन-अपन घर ला भाग गीन।
2SA 18:18 अपन जीते जी अबसालोम ह एक खंभा ला लेके राजा के घाटी म अपन खुद के स्मारक के रूप म ठाढ़ करे रिहिस, काबरकि ओह सोचिस, “मोर नांव ला आघू बढ़ानेवाला मोर कोनो बेटा नइं एं।” ओह ओ खंभा ला अपन नांव देय रिहिस, अऊ ओला आज के दिन तक अबसालोम के स्मारक कहे जाथे।
2SA 18:19 तब सादोक के बेटा अहीमास ह कहिस, “मेंह दऊड़के जाहूं अऊ राजा ला ये खबर दूहूं कि यहोवा ह राजा ला ओकर बईरीमन के हांथ ले छोंड़ाके ओला बचाय हवय।”
2SA 18:20 पर योआब ह ओला कहिस, “तें आज के दिन ये खबर ला झन ले जा, तें कोनो आने दिन ये खबर ले जा सकत हस, पर आज नइं, काबरकि राजा के बेटा मरे हवय।”
2SA 18:21 तब योआब ह एक कूसी मनखे ला कहिस, “जा अऊ ओ जम्मो बात राजा ला बता, जेला तेंह देखे हस।” ओ कूसी मनखे ह योआब ला दंडवत करिस अऊ दऊड़के चल दीस।
2SA 18:22 सादोक के बेटा अहीमास ह योआब ला फेर कहिस, “कुछू भी होवय, मोला घलो ओ कूसी मनखे के पाछू दऊड़के जावन दे।” पर योआब ह कहिस, “हे मोर बेटा, तें काबर जाय चाहत हस? तोर करा अइसने कोनो संदेस नइं ए, जेकर तोला ईनाम मिलय?”
2SA 18:23 ओह कहिस, “कुछू भी होवय, में दऊड़के जाय चाहत हंव।” तब योआब ह कहिस, “दऊड़!” तब अहीमास ह मैदान के रसता म होके दऊड़िस अऊ ओह कूसी मनखे ले आघू निकल गीस।
2SA 18:24 जब दाऊद ह भीतरी अऊ बाहिरी दुवारमन के बीच बईठे रिहिस, त पहरेदार ह दीवार म चढ़के दुवार के ऊपर बने छत म गीस, ओह आंखी उठाके देखिस कि एक मनखे ह अकेला दऊड़त आवत हे।
2SA 18:25 तब पहरेदार ह आरो लगाके राजा ला ये बात बताईस। तब राजा ह कहिस, “यदि ओह एके झन हवय, त ओह जरूर बने खबर लावत होही।” अऊ ओ दऊड़नेवाला लकठा म आवत गीस।
2SA 18:26 तब पहरेदार ह एक अऊ मनखे ला दऊड़के आवत देखिस, अऊ ओह दुवारपाल ला आरो लगाके कहिस, “देख, एक अऊ मनखे दऊड़त आवत हे!” राजा ह कहिस, “ओह घलो जरूर बने खबर लावत होही।”
2SA 18:27 पहरेदार ह कहिस, “मोला अइसे लगत हे कि पहिले मनखे ह सादोक के बेटा अहीमास सहीं दऊड़त हे।” राजा ह कहिस, “ओह एक बने मनखे अय, अऊ ओह बने खबर लेके आथे।”
2SA 18:28 तब अहीमास ह आरो लगाके राजा ला कहिस, “सब ठीक हे!” फेर ओह भुइयां म मुहूं के बल गिरके राजा ला दंडवत करिस अऊ कहिस, “यहोवा तोर परमेसर के परसंसा होवय! जऊन मन मोर मालिक राजा के बिरूध हांथ उठाय रिहिन, ओमन ला परमेसर ह तोर अधीन कर दे हवय।”
2SA 18:29 राजा ह पुछिस, “का जवान अबसालोम ह सुरकछित हवय?” अहीमास ह जबाब दीस, “जब योआब ह राजा के सेवक अऊ तोर दास मोला भेजनेचवाला रिहिस, त मेंह उहां बहुंत गड़बड़ी देखेंव, पर में नइं जानंव कि का होय रिहिस।”
2SA 18:30 तब राजा ह कहिस, “बाजू म ठाढ़े रह अऊ इहां इंतजार कर।” त ओह बाजू म जाके उहां ठाढ़ हो गीस।
2SA 18:31 तब कूसी मनखे ह हबरिस अऊ कहिस, “हे मोर मालिक राजा, तोर बर बने खबर हवय। यहोवा ह तोला ओ जम्मो झन ले छोंड़ाके बचाय हवय, जेमन के हांथ तोर बिरूध उठे रिहिस।”
2SA 18:32 राजा ह ओ कूसी ले पुछिस, “का जवान अबसालोम ह सुरकछित हवय?” कूसी ह जबाब देवत कहिस, “मोर मालिक राजा के बईरी अऊ ओ जम्मो जऊन मन तोर हानि करे बर ठाढ़ होथें, ओमन के दसा ओ जवान के असन होवय।”
2SA 18:33 तब राजा ह कांपे लगिस। ओह सहर के दुवार के ऊपर बने कमरा म गीस अऊ रोवन लगिस। ओह जावत-जावत कहिस: “हाय मोर बेटा अबसालोम! मोर बेटा, मोर बेटा अबसालोम! बने होतिस कि तोर बदला म, में मर गे रहितेंव—हाय अबसालोम, मोर बेटा, मोर बेटा!”
2SA 19:1 तब योआब ला ये समाचार मिलिस, “राजा ह अबसालोम बर रोवत हवय अऊ बिलाप करत हवय।”
2SA 19:2 एकरसेति ओ दिन के बिजय ह सबो सेना बर बिलाप म बदल गीस, काबरकि ओ दिन सेना के मनखेमन ये सुनिन, “राजा ह अपन बेटा बर सोक मनात हे।”
2SA 19:3 एकरसेति ओ दिन आदमीमन अइसन मुहूं ला लुकाके महनैम नगर म घुसिन, जइसन मनखेमन लड़ई ले भागके आय ले लज्जित होके अपन मुहूं छुपाथें।
2SA 19:4 राजा ह अपन मुहूं ला ढांपके चिचिया-चिचियाके रोईस, “हाय मोर बेटा अबसालोम! हाय अबसालोम, मोर बेटा, मोर बेटा!”
2SA 19:5 तब योआब ह राजा के घर म जाके ओला कहिस, “आज तेंह ओ जम्मो आदमीमन ला लज्जित करे हस, जेमन अभी-अभी तोर परान अऊ तोर बेटा अऊ बेटीमन के परान अऊ तोर घरवाली अऊ रखैलमन के परान ला बचाय हवंय।
2SA 19:6 तेंह ओमन ले मया करथस, जेमन तोर ले घिन करथें अऊ ओमन ले घिन करथस, जेमन तोर ले मया करथें। तेंह आज ये बात ला साफ कर देय कि तोर नजर म सेनापति अऊ ओमन के आदमीमन के कोनो महत्व नइं ए। मेंह देखत हंव कि तेंह खुस होते, यदि आज अबसालोम ह जीयत रहितिस अऊ हमन जम्मो झन मारे जातेंन।
2SA 19:7 अब उठके बाहिर जा अऊ अपन आदमीमन ला उत्साहित कर। में यहोवा के सपथ खाके कहत हंव कि यदि तेंह बाहिर नइं जाबे, त आज रथिया तक एको झन भी तोर संग नइं रहंय। अऊ तोर लइकापन ले लेके अब तक जतेक बिपत्ति तोर ऊपर पड़े हवय, ओ सबो ले ये बिपत्ति ह बड़े होही।”
2SA 19:8 तब राजा ह उठिस अऊ दुवार म जाके बईठिस। जब आदमीमन ला ये बताय गीस, “राजा ह दुवार म बईठे हवय,” त ओ जम्मो झन ओकर करा आईन। इही बीच, इसरायलीमन अपन-अपन घर भाग गे रिहिन।
2SA 19:9 इसरायल के सबो गोत्र म, जम्मो मनखेमन आपस म ये कहिके बहस करत रिहिन, “राजा ह हमन ला हमर बईरीमन के हांथ ले बचाईस; ओह ओ मनखे अय, जऊन ह हमन ला पलिस्तीमन के हांथ ले छोंड़ाईस। पर अब ओह अबसालोम ले बचे बर देस छोंड़के भाग गीस;
2SA 19:10 अऊ अबसालोम, जऊन ला हमन हमर ऊपर राज करे बर अभिसेक करेंन, ओह लड़ई म मर गीस। त अब तुमन राजा ला वापिस लाय के बारे म काबर कुछू नइं कहत हव?”
2SA 19:11 राजा दाऊद ह सादोक अऊ अबियातार पुरोहितमन करा ये खबर भेजिस, “यहूदा के अगुवामन ले पुछव, ‘तुमन राजा ला ओकर महल म लाय बर सबले पाछू काबर होवत हव, जबकि जम्मो इसरायल म जऊन बात के चरचा होवत हे, ओकर खबर राजा ला ओकर भवन म मिल चुके हे?
2SA 19:12 तुमन त मोर रिस्तेदार, मोर खुद के मांस अऊ लहू अव। त तुमन राजा ला वापिस लाय म सबले पाछू काबर होवत हव?’
2SA 19:13 अऊ अमासा ला ये कहव, ‘का तेंह मोर खुद के मांस अऊ लहू नो हस? यदि तेंह योआब के जगह म हमेसा बर मोर सेना के सेनापति नइं ठहिरबे, त परमेसर मोर ले बहुंत कड़ई से बरताव करय।’ ”
2SA 19:14 ये किसम ले, ओह यहूदा के आदमीमन के मन ला अइसन अपन कोति कर लीस कि ओ जम्मो झन एके मन के हो गीन। ओमन राजा मेर ये खबर पठोईन, “तें अऊ तोर जम्मो आदमीमन वापिस आ जावव।”
2SA 19:15 तब राजा ह लहुंटके यरदन नदी तक आ गीस। यहूदा के आदमीमन गिलगाल सहर तक गे रिहिन ताकि ओमन जाके राजा ले मिलंय अऊ ओला यरदन के ये पार ले आवंय।
2SA 19:16 यहूदा के आदमीमन के संग बहूरीम नगर के निवासी बिनयामीनी, गेरा के बेटा सिमी ह घलो जल्दी करके राजा दाऊद ले भेंट करे बर गीस।
2SA 19:17 ओकर संग एक हजार बिनयामीनी मनखे अऊ साऊल के घराना के परबंधक सीबा अऊ ओकर पंदरह बेटा अऊ बीस सेवकमन घलो रिहिन। ओमन जल्दी करके यरदन नदी करा गीन, जिहां राजा ह रिहिस।
2SA 19:18 ओमन राजा के घराना ला लाने बर अऊ राजा के हर ईछा ला पूरा करे बर नदी के ओ पार गीन। जब गेरा के बेटा सिमी ह यरदन के ओ पार गीस, त ओह राजा ला सास्टांग दंडवत करिस
2SA 19:19 अऊ राजा ला कहिस, “मोर मालिक ह मोला दोसी झन ठहिरावय। जऊन दिन मोर मालिक राजा ह यरूसलेम ला छोंड़ आईस, ओ दिन तोर सेवक ह जऊन गलती करिस, ओला तें सुरता झन कर। राजा ह ओ बात ला अपन मन ले निकाल देय।
2SA 19:20 काबरकि में, तोर सेवक ह जानत हंव कि मेंह पाप करे हंव, पर आज अपन मालिक राजा ले भेंट करे बर, यूसुफ के गोत्र ले में ही पहिले आय हंव।”
2SA 19:21 तब सरूयाह के बेटा अबीसै ह कहिस, “का सिमी ला ओकर काम के कारन मिरतू-दंड नइं मिलना चाही? ओह यहोवा के अभिसिक्त जन ला सराप देय रिहिस।”
2SA 19:22 दाऊद ह जबाब दीस, “हे सरूयाह के बेटामन, एकर से तुम्हर का लेना-देना हे? येमा दखल देय के तुम्हर का अधिकार हे? का आज इसरायल म कोनो ला मिरतू-दंड मिलना चाही? का मेंह नइं जानत हंव कि आज मेंह इसरायल के ऊपर राजा अंव?”
2SA 19:23 तब राजा ह सिमी ले कहिस, “तोला मिरतू-दंड नइं दिये जावय।” अऊ राजा ह ओकर ले सपथ खाके वायदा करिस।
2SA 19:24 साऊल के पोता मपीबोसेत ह घलो राजा ले भेंट करे बर गे रिहिस। राजा के चले जाय के दिन ले लेके ओकर सुरकछित वापिस लहुंटके आवत तक, ओह न तो अपन गोड़मन के खियाल रखिस अऊ न ही अपन दाढ़ी-मूछ ला काटे रिहिस अऊ न ही अपन ओनहामन ला धोय रिहिस।
2SA 19:25 जब ओह यरूसलेम ले राजा ले मिले बर आईस, त राजा ह ओकर ले पुछिस, “हे मपीबोसेत, तेंह मोर संग म काबर नइं गेय रहय?”
2SA 19:26 ओह कहिस, “हे मोर मालिक राजा, में तोर सेवक ह लंगड़ा अंव, त मेंह कहेंव, ‘में अपन गदहा म काठी कसवाहूं अऊ ओमा सवार होके राजा के संग चले जाहूं।’ पर सीबा, मोर सेवक ह मोला धोखा दीस।
2SA 19:27 अऊ ओह मोर मालिक राजा करा मोर चुगली करे हवय। मोर मालिक राजा ह परमेसर के स्वरगदूत के असन अय; अब तोला जऊन कुछू बने लगय, ओला तें कर।
2SA 19:28 मोर डोकरा-बबा के जम्मो संतानमन मोर मालिक राजा ले मिरतू-दंड पाय के लईक रिहिन, पर तेंह अपन सेवक ला ओमन के बीच जगह देय, जेमन तोर मेज म खाथें। मोला अऊ कोनो हक नइं ए कि मेंह राजा ले अऊ बिनती करंव?”
2SA 19:29 राजा ह ओकर ले कहिस, “अऊ बातमन के चरचा करे के का मतलब? मेंह तोला अऊ सीबा ला हुकूम देवत हंव कि ओ भुइयां ला तुमन दूनों आपस म बांट लेवव।”
2SA 19:30 तब मपीबोसेत ह राजा ले कहिस, “सीबा ह जम्मो कुछू ला लेय ले, मोर बर ये काफी ए कि मोर मालिक राजा ह सुरकछित घर लहुंट आय हे।”
2SA 19:31 गिलादी बरजिलै ह घलो रोगलीम ले आय रिहिस कि ओह राजा के संग यरदन नदी पार जावय अऊ उहां ले राजा ला ओकर रसता बर बिदा करय।
2SA 19:32 बरजिलै बहुंत डोकरा हो गे रिहिस; ओकर उमर ह अस्सी बछर रिहिस। जब राजा ह महनैम म रिहिस, तब ओ दौरान बरजिलै ही ओकर देखरेख करत रिहिस, काबरकि ओह एक बहुंत धनी मनखे रिहिस।
2SA 19:33 राजा ह बरजिलै ले कहिस, “मोर संग ओ पार चल अऊ यरूसलेम म मोर संग रूक, अऊ मेंह तोर देखरेख करहूं।”
2SA 19:34 पर बरजिलै ह राजा ला जबाब दीस, “मोला अऊ कतेक साल जीयत रहना हे कि मेंह राजा के संग यरूसलेम जावंव?
2SA 19:35 मेंह अब अस्सी बछर के हो गे हंव। का मेंह ये बात म अंतर बता सकत हंव कि का चीज के आनंद उठाय जावय अऊ का चीज के नइं? जऊन कुछू तोर सेवक ह खाथे-पीथे, का ओह ओकर सुवाद ला पहिचान सकत हे? का में अब पुरूस अऊ महिला गायकमन के अवाज ला सुन सकत हंव? तोर सेवक ह अपन मालिक राजा ऊपर काबर एक अतकिहा बोझ बनय?
2SA 19:36 तोर सेवक ह राजा के संग म यरदन के पार थोरकन दूरिहा तक जाही, पर राजा ह काबर मोला ये किसम के ईनाम देवय?
2SA 19:37 अपन सेवक ला वापिस लहुंटन दे कि मेंह अपन ही नगर म अपन दाई-ददा के कबर के लकठा म मरंव। पर इहां तोर दास किमहाम हवय। ओला मोर मालिक राजा के संग ओ पार जावन दे। अऊ जइसने तोला भावय, वइसने ओकर बर करबे।”
2SA 19:38 राजा ह कहिस, “हव, किमहाम ह मोर संग ओ पार चलही, अऊ जइसने तोला बने लगय, वइसने मेंह ओकर बर करहूं। अऊ कोनो चीज तेंह मोर ले चाहत हस, त मेंह ओला तोर बर करहूं।”
2SA 19:39 तब जम्मो मनखेमन यरदन के ओ पार गीन, अऊ राजा ह घलो ओ पार गीस। तब राजा ह बरजिलै ला चूमिस अऊ ओला बिदा करिस, अऊ बरजिलै ह अपन घर लहुंट गीस।
2SA 19:40 जब राजा ह पार होके गिलगाल करा आईस, त ओकर संग किमहाम घलो पार होईस। यहूदा के जम्मो सेना अऊ इसरायल के आधा सेना के मनखेमन राजा ला ओ पार ले गीन।
2SA 19:41 तब जल्दी ही इसरायल के जम्मो आदमीमन राजा करा आके ओला ये कहे लगिन, “का कारन ए कि हमर भाई, यहूदा के आदमीमन राजा ला चोर सहीं चुपेचाप ले जावत हें अऊ ओला अऊ ओकर घराना ला ओकर जम्मो आदमीमन के संग यरदन के ये पार लावत हें?”
2SA 19:42 यहूदा के जम्मो आदमीमन इसरायल के आदमीमन ला जबाब दीन, “हमन अइसने करेंन काबरकि राजा के हमर ले नजदीकी रिस्ता हवय। तुमन एकर बारे म, काबर गुस्सा करत हव? का हमन राजा के कुछू जेवन-पानी ला खाय हवन? या का ओमा के कुछू चीज ला हमन लेय हवन?”
2SA 19:43 तब इसरायली आदमीमन यहूदी आदमीमन ला जबाब दीन, “राजा म दस भाग हमर हवय; एकरसेति दाऊद ऊपर तुम्हर ले जादा हमर अधिकार हवय। त फेर तुमन काबर हमन ला अपमानित करत हव? का हमन अपन राजा ला वापिस लाय के चरचा सबले पहिले नइं करे रहेंन?” पर यहूदी आदमीमन इसरायली आदमीमन ले अऊ जादा मजबूती से दावा करे लगिन।
2SA 20:1 उहां संजोग ले सेबा नांव के एक दुस्ट मनखे रिहिस, जऊन ह बिनयामीनी गोत्र के बिकरी के बेटा रिहिस। ओह तुरही ला फूंकिस अऊ चिचियाके कहिस, “दाऊद म हमर कुछू भाग नइं ए, यिसै के बेटा म हमर कोनो बांटा नइं ए! हे इसरायलीमन, हर एक जन अपन-अपन तम्बू म चले जावव!”
2SA 20:2 तब इसरायल के जम्मो मनखेमन दाऊद ला छोंड़के बिकरी के बेटा सेबा के पाछू हो लीन। पर यहूदा के जम्मो मनखेमन यरदन ले लेके यरूसलेम तक पूरा रसता म अपन राजा के संग रिहिन।
2SA 20:3 जब दाऊद ह यरूसलेम म अपन महल म आईस, त ओह ओ दस रखैलमन ला लीस, जेमन ला ओह महल के देखरेख करे बर छोंड़के गे रिहिस, अऊ ओमन ला पहरेदार के अधीन एक घर म रखिस। ओह ओमन के पालन-पोसन करिस पर ओमन के संग सारीरिक संबंध नइं बनाईस। ओमन अपन मिरतू के दिन तक बिधवा के सहीं ओ घर के सीमना के भीतर रिहिन।
2SA 20:4 तब राजा ह अमासा ला कहिस, “यहूदा के आदमीमन करा खबर भिजवा कि ओमन तीन दिन के भीतर मोर करा आवंय, अऊ तेंह घलो इहां हाजिर रहिबे।”
2SA 20:5 पर जब अमासा ह यहूदा के आदमीमन ला बलाय बर गीस, त ओह राजा के दुवारा ठहिराय गय समय ले जादा समय लीस।
2SA 20:6 तब दाऊद ह अबीसै ला कहिस, “अब बिकरी के बेटा सेबा ह अबसालोम ले घलो हमर जादा नुकसान करही। एकरसेति तें अपन मालिक के आदमीमन ला लेके ओकर पीछा कर, नइं तो ओह गढ़वाले नगर ला जाके हमर ले बच जाही।”
2SA 20:7 तब योआब के आदमीमन अऊ करेती अऊ पलेतीमन, अऊ जम्मो सूरबीरमन अबीसै के अधीन होके निकलिन। ओमन बिकरी के बेटा सेबा के पीछा करे बर यरूसलेम ले आघू बढ़िन।
2SA 20:8 जब ओमन गिबोन म बड़े पथरा करा रिहिन, त अमासा ह ओमन ले मिले बर आईस। योआब ह अपन सेना के पहिरावा ला पहिरे रिहिस, अऊ ओकर कनिहां म बंधे पट्टा के मियान म एक कटार रिहिस। जब ओह आघू बढ़िस, त कटार ह मियान ले निकलके गिर गीस।
2SA 20:9 योआब ह अमासा ला कहिस, “हे मोर भाई, का हालचाल हे?” तब योआब ह अमासा ला चूमे बर अपन जेवनी हांथ ले ओकर दाढ़ी ला पकड़िस।
2SA 20:10 अमासा के धियान ये तरफ नइं गीस कि योआब के हांथ म कटार रिहिस, अऊ योआब ह कटार ला अमासा के पेट म भोंग दीस, जेकर से ओकर पोटामन निकलके भुइयां म गिरिन। अमासा ला दूसर बार कटार भोंगे बर नइं पड़िस, अऊ ओह मर गीस। तब योआब अऊ ओकर भाई अबीसै बिकरी के बेटा सेबा के पीछा करिन।
2SA 20:11 योआब के एक आदमी अमासा के बाजू म ठाढ़ होके कहिस, “जऊन कोनो योआब के तरफ अऊ दाऊद कोति हवय, ओह योआब के पाछू हो लेवय।”
2SA 20:12 अमासा ह सड़क के बीच म अपन खून म लोटत रहय, अऊ ओ मनखे ह देखिस कि पूरा सेना ह उहां आके रूक गीस। जब ओह देखिस कि हर एक जन अमासा करा आके रूक गे हवंय, त ओह अमासा ला सड़क ले घसीटके खेत म ले गीस अऊ ओकर ऊपर एक ओनहा ला डार दीस।
2SA 20:13 अमासा ला सड़क ले हटाय के बाद, जम्मो आदमी बिकरी के बेटा सेबा के पीछा करे बर योआब के संग चल दीन।
2SA 20:14 सेबा ह सबो इसरायली गोत्रमन म ले होवत आबेल-बेत-माका हबरिस अऊ बिकरीमन के पूरा इलाका म ले होवत गीस, जेमन इकट्ठा होके ओकर पाछू म हो लीन।
2SA 20:15 योआब ह पूरा सेना के संग आके आबेल-बेत-माका म सेबा ला घेर लीस। ओमन सहर ला घेरे बर एक टीला ठाढ़ कर दीन, अऊ एकर से सहर के बाहिरी किलाबंदी हो गीस। अऊ ओमन सहर के दीवार ला गिराय बर ओला धक्का देवन लगिन।
2SA 20:16 तब एक बुद्धिमान माईलोगन ह सहर ले पुकारके कहिस, “सुनव! सुनव! योआब ले कहव कि ओह इहां मोर करा आवय, ताकि मेंह ओकर ले बात कर सकंव।”
2SA 20:17 जब योआब ह ओकर लकठा म गीस, त ओ माईलोगन ह पुछिस, “का तेंह योआब अस?” योआब ह कहिस, “हव, मेंह ओहीच अंव।” माईलोगन ह कहिस, “अपन सेविका के बात ला सुन।” त ओह कहिस, “मेंह सुनत हंव।”
2SA 20:18 माईलोगन ह आघू कहिस, “पुराना जमाना म मनखेमन ये कहंय, ‘आबेल करा समस्या ला रखव,’ अऊ ये किसम ले समस्या के हल हो जावय।
2SA 20:19 हमन इसरायल म सांति से अऊ ईमानदारी से रहिथन। तेंह एक अइसन सहर ला नास करे चाहत हस, जऊन ह इसरायल म एक दाई सहीं अय। तेंह यहोवा के भाग ला काबर लील जाय चाहत हस?”
2SA 20:20 योआब ह जबाब दीस, “अइसन काम मोर ले दूरिहा रहय! लीले या नास करे के काम मोर ले दूरिहा रहय!
2SA 20:21 मामला अइसने नो हय। सेबा नांव के बिकरी के बेटा, जऊन ह एपरैम के पहाड़ी देस के अय, ओह दाऊद राजा के बिरूध हांथ उठाय हवय। ये एक आदमी ला मोर हांथ म कर दव, अऊ मेंह सहर ले चले जाहूं।” माईलोगन ह योआब ले कहिस, “ओकर मुड़ ला दीवार ले तोर करा फटिक दिये जाही।”
2SA 20:22 तब ओ माईलोगन ह अपन बुद्धिमानी के बात के संग जम्मो मनखे करा गीस, अऊ ओमन बिकरी के बेटा सेबा के मुड़ ला काटिन अऊ योआब करा फटिक दीन। तब योआब ह तुरही ला फूंकिस, अऊ ओकर आदमीमन सहर ले हट गीन, अऊ अपन-अपन घर वापिस चल दीन। अऊ योआब ह राजा करा यरूसलेम लहुंट गीस।
2SA 20:23 योआब त जम्मो इसरायली सेना के सेनापति रिहिस; यहोयादा के बेटा बनायाह ह करेतीमन अऊ पलेतीमन के ऊपर रिहिस;
2SA 20:24 अदोनीराम ह बंधुवा मजदूरमन ऊपर मुखिया रिहिस; अहीलूद के बेटा यहोसापात ह इतिहास के लिखइया रिहिस;
2SA 20:25 सेवा ह सचिव रिहिस; सादोक अऊ अबियातार पुरोहित रिहिन;
2SA 20:26 अऊ याईरी ईरा ह दाऊद के पुरोहित रिहिस।
2SA 21:1 दाऊद के सासनकाल के समय म लगातार तीन बछर तक अकाल पड़िस; त एकर कारन जाने बर दाऊद ह यहोवा ले पुछिस। यहोवा ह जबाब दीस, “येह साऊल अऊ ओकर खूनी घराना के खातिर होईस, काबरकि ओह गिबोनीमन ला मरवा डारे रिहिस।”
2SA 21:2 तब राजा ह गिबोनीमन ला बलाके ओमन ले बात करिस। (गिबोनीमन इसरायलीमन के भाग नइं रिहिन, पर ओमन अमोरीमन के बांचे मनखेमन रिहिन; इसरायलीमन ओमन ला बचाय के सपथ खाय रिहिन, पर साऊल ह इसरायल अऊ यहूदा बर अपन उत्साह म ओमन ला पूरा नास कर डारे के कोसिस करिस।)
2SA 21:3 दाऊद ह गिबोनीमन ले पुछिस, “मेंह तुम्हर बर का करंव? मेंह कइसे प्रायस्चित करंव कि तुमन यहोवा के निज भाग ला आसीरबाद देवव?”
2SA 21:4 गिबोनीमन ओला जबाब दीन, “हमर करा साऊल या ओकर घराना ले सोन या चांदी मांगे के कोनो अधिकार नइं ए, अऊ न ही हमर करा अधिकार हवय कि इसरायल म कोनो ला मार डारन।” दाऊद ह पुछिस, “तुमन मोर ले का चाहत हव कि में तुम्हर बर करंव।”
2SA 21:5 ओमन राजा ला जबाब दीन, “जहां तक ओ आदमी के बात ए, जऊन ह हमन ला नास कर दीस अऊ हमर बिरूध साजिस करिस, जेकर कारन लगभग हमन मेटा गे हन अऊ इसरायल म कोनो मेर हमर बर जगह नइं ए,
2SA 21:6 ओकर संतानमन ले सात झन आदमी हमन ला दिये जावय कि हमन ओमन ला मार डारन अऊ ओमन के लासमन ला यहोवा के चुने जन साऊल के गिबा नांव के बस्ती म यहोवा के आघू म खुला म रखे जावय।” त राजा ह कहिस, “मेंह ओमन ला तुम्हर हांथ म दे दूहूं।”
2SA 21:7 पर दाऊद अऊ साऊल के बेटा योनातन आपस म यहोवा के आघू म सपथ खाय रिहिन, एकरसेति राजा ह साऊल के पोता, योनातन के बेटा मपीबोसेत ला बचाय रखिस।
2SA 21:8 पर राजा ह अय्या के बेटी रिस्पा ले साऊल कोति ले जनमे दू झन बेटा अरमोनी अऊ मपीबोसेत के संग साऊल के बेटी मेरब के पांच झन बेटा ला लीस, जेमन महोलावासी बरजिलै के बेटा अदरीएल कोति ले जनमे रिहिन।
2SA 21:9 राजा ह येमन ला गिबोनीमन के हांथ म सऊंप दीस, अऊ गिबोनीमन ओमन ला मार डारिन अऊ ओमन के लास ला एक पहाड़ी ऊपर यहोवा के आघू म खुला छोंड़ दीन। ओ जम्मो सातों जन एक संग नास हो गीन; ओमन ला कटनी के सुरूआती दिन म ही मार डारे गीस याने कि जब जौ के कटनी के सुरूआत होवत रिहिस।
2SA 21:10 तब अय्या के बेटी रिस्पा ह बोरा के कपड़ा लीस अऊ ओला एक चट्टान ऊपर अपन बर बिछा लीस। कटनी के सुरूआत ले लेके अकास ले ओ लासमन ऊपर बहुंत बारिस होवत तक, ओ लासमन ला ओह दिन के बेरा न तो चिरईमन ला अऊ रात के बेरा न ही जंगली पसुमन ला छुवन दीस।
2SA 21:11 जब दाऊद ला अय्या के बेटी, साऊल के रखैल रिस्पा के ये काम के खबर देय गीस,
2SA 21:12 त दाऊद ह जाके साऊल अऊ ओकर बेटा योनातन के हाड़ामन ला याबेस-गिलाद के मनखेमन ले लेय लीस। (जेमन ओमन के लास ला बेत-सान के सार्वजनिक चऊक ले चोरा ले रिहिन; पलिस्तीमन साऊल अऊ ओकर बेटा योनातन ला गिलबो म मार डारे के बाद ओमन के लास ला ओ चऊक म टांग दे रिहिन।)
2SA 21:13 दाऊद ह साऊल अऊ ओकर बेटा योनातन के हाड़ामन ला याबेस ले लेय आईस, अऊ ओमन के हाड़ा ला घलो इकट्ठा करे गीस, जेमन ला मारके खुला म छोंड़ दिये गे रिहिस।
2SA 21:14 साऊल अऊ ओकर बेटा योनातन के हाड़ामन ला बिनयामीन के सेला म साऊल के ददा कीस के कबर म माटी दिये गीस; अऊ राजा दाऊद के हुकूम के मुताबिक हर काम करे गीस। ओकर बाद, परमेसर ह देस के मनखेमन के पराथना के जबाब दीस।
2SA 21:15 कुछू दिन के बाद एक बार फेर, पलिस्ती अऊ इसरायलीमन के बीच लड़ई होय लगिस। दाऊद ह अपन आदमीमन संग खाल्हे पलिस्तीमन के बिरूध लड़े बर गीस, अऊ ओह थक गीस।
2SA 21:16 अऊ रापा के एक संतान, यिसबी-बनोब, जेकर कांसा के भाला के मुठ के वजन तीन सौ सेकेल रिहिस, अऊ जऊन ह एक नवां तलवार धरे रिहिस, ओह कहिस कि ओह दाऊद ला मार डारही।
2SA 21:17 पर सरूयाह के बेटा अबीसै ह दाऊद के बचाव करे बर आईस; ओह ओ पलिस्ती ऊपर वार करिस अऊ ओला मार डारिस। तब दाऊद के आदमीमन सपथ खाके दाऊद ला कहिन, “तेंह हमर संग लड़ई म फेर कभू झन जाबे, ताकि इसरायल के दीया ह झन बुतावय।”
2SA 21:18 समय के बीतत, पलिस्तीमन ले गोब म फेर एक लड़ई होईस। ओ बेरा हूसाती सिब्बकै ह रापा के एक संतान, साप ला मार डारिस।
2SA 21:19 गोब म, पलिस्तीमन के संग फेर एक लड़ई म, बैतलहमवासी याईर के बेटा एल्हानान ह गत सहर के रहइया गोलियत के भाई ला मार डारिस, जेकर बरछी के मुठिया ह बुनकर के डोंगी सहीं रिहिस।
2SA 21:20 गत म एक अऊ लड़ई होईस, जिहां एक बहुंत बड़े डीलडौलवाला आदमी रिहिस, जेकर हर हांथ अऊ गोड़ म छै-छै ठन अंगरी रिहिस—कुल चौबीस ठन अंगरी। ओह घलो रापा के संतान रिहिस।
2SA 21:21 जब ओह इसरायल ला ताना मारिस, त दाऊद के भाई, सिमा के बेटा योनातन ह ओला मार डारिस।
2SA 21:22 ये चारों जवान गत के रहइया रापा के संतान रिहिन, अऊ ओमन दाऊद अऊ ओकर आदमीमन के हांथ म मारे गीन।
2SA 22:1 दाऊद ह यहोवा बर ये गीत के बचनमन ला तब गाईस, जब यहोवा ह ओला ओकर जम्मो बईरीमन के हांथ ले अऊ साऊल के हांथ ले बचाईस।
2SA 22:2 ओह कहिस: “यहोवा ह मोर चट्टान, मोर गढ़ अऊ मोर छुड़ानेवाला अय;
2SA 22:3 मोर परमेसर ह मोर चट्टान अय, जेमा मेंह सरन लेथंव, ओह मोर ढाल अऊ मोर उद्धार के सींग अय। ओह मोर मजबूत गढ़, मोर सरन-स्थान अऊ मोर उद्धारकर्ता अय— तेंह उपदरवी मनखे ले मोला बचाथस।
2SA 22:4 “मेंह यहोवा ला पुकारेंव, जऊन ह इस्तुति के योग्य अय, अऊ मेंह अपन बईरीमन ले बचाय गे हवंव।
2SA 22:5 मिरतू के लहरमन मोला घेर डारिन; भयंकर बिनास के तेज धारा ह मोला घबरा दीस।
2SA 22:6 कबर के डोरीमन मोर चारों कोति रिहिन; मिरतू के फांदा ह मोर आघू म रिहिस।
2SA 22:7 “मेंह अपन बिपत्ति म यहोवा ला पुकारेंव; मेंह अपन परमेसर ला पुकारेंव। अपन मंदिर ले ओह मोर अवाज ला सुनिस; मोर गोहार ह ओकर कान म पड़िस।
2SA 22:8 तब धरती ह कांपिस अऊ डोलिस, अऊ अकास के नीवमन डोल गीन; ओमन कांपे लगिन, काबरकि ओह गुस्सा हो गे रिहिस।
2SA 22:9 ओकर नाक ले धुआं निकलिस; ओकर मुहूं ले भसम करइया आगी निकलिस, जेमा ले बरत कोइला के जुवाला निकलिस।
2SA 22:10 ओह अकास ला अलग करिस अऊ खाल्हे उतरिस; करिया बादरमन ओकर गोड़ के खाल्हे रिहिन।
2SA 22:11 ओह करूब ऊपर सवार होके उड़ गीस; ओह हवा के डेनामन म सवार होके बहुंत ऊपर उड़िस।
2SA 22:12 ओह अंधियार ला अपन चारों कोति ओढ़ना बना लीस— याने कि अकास के पानीवाले करिया बादरमन ला।
2SA 22:13 ओकर उपस्थिति के तेज ले बिजली के जुवाला चमकिस।
2SA 22:14 यहोवा ह स्वरग ले गरजिस; सर्वोच्च परमेसर के अवाज ह गुंजिस।
2SA 22:15 ओह अपन तीरमन ला चलाईस अऊ बईरीमन ला तितिर-बितिर कर दीस, बिजली के बड़े कड़क ले ओह ओमन ला हराके भगा दीस।
2SA 22:16 यहोवा के डांटे ले, ओकर नाक के सांस फूंके ले, समुंदर के घाटीमन दिखे लगिन अऊ धरती के नीवमन खाली पड़ गीन।
2SA 22:17 “ओह ऊपर ले हांथ बढ़ाके मोला थाम लीस; ओह मोला गहिरा पानी म ले बाहिर निकालिस।
2SA 22:18 ओह मोला मोर ओ ताकतवर बईरीमन ले, मोर बिरोधीमन ले छोंड़ाईस, जेमन बहुंत बलवान रिहिन।
2SA 22:19 ओमन मोर बिपत्ति के दिन म मोर बिरोध करिन, पर यहोवा ह मोर सहारा रिहिस।
2SA 22:20 ओह मोला एक ठन चाकर जगह म ले आईस; ओह मोला बचाईस काबरकि ओह मोर ले खुस रिहिस।
2SA 22:21 “यहोवा ह मोर धरमीपन के मुताबिक मोर ले बरताव करे हवय; मोर हांथ के सुधता के मुताबिक ओह मोला ईनाम दे हवय।
2SA 22:22 काबरकि मेंह यहोवा के रद्दा म चले हवंव; मेंह अपन परमेसर के रद्दा ले हट जाय के पाप नइं करे हंव।
2SA 22:23 ओकर जम्मो कानूनमन मोर आघू म हवंय; मेंह ओकर बिधिमन ला माने ले नइं हटे हंव।
2SA 22:24 मेंह ओकर आघू म निरदोस रहे हंव अऊ मेंह अपनआप ला पाप ले दूरिहा रखे हंव।
2SA 22:25 यहोवा ह मोर धरमीपन के मुताबिक मोला ईनाम दे हवय, ओकर नजर म मोर सुधता के मुताबिक ओह मोला ईनाम दे हवय।
2SA 22:26 “बिसवासयोग्य मनखे बर तेंह बिसवासयोग्य रहिथस, निरदोस मनखे बर तेंह निरदोस रहिथस,
2SA 22:27 सुध मनखे बर तेंह सुध रहिथस, पर भटके हुए मनखे बर तेंह चतुर बनथस।
2SA 22:28 तेंह नम्र सुभाव के मनखे ला बचाथस, पर अभिमानीमन ला नीचा दिखाय बर तोर आंखी ह ओमन ऊपर लगे रहिथे।
2SA 22:29 हे यहोवा, तेंह मोर दीया अस; यहोवा ह मोर अंधियार ला अंजोर कर देथे।
2SA 22:30 तोर मदद ले मेंह एक सेना के बिरूध जा सकत हंव; मोर परमेसर के मदद ले मेंह एक दीवार ऊपर चढ़ सकत हंव।
2SA 22:31 “जहां तक परमेसर के बात ए, ओकर रसता ह बिलकुल सही ए: यहोवा के बचन म कोनो कमी नइं ए; ओह ओ जम्मो झन ला बचाथे, जऊन मन ओकर सरन म आथें।
2SA 22:32 काबरकि यहोवा ला छोंड़ कोन ह परमेसर ए? अऊ हमर परमेसर ला छोंड़ कोन ह चट्टान ए?
2SA 22:33 येह परमेसर ए, जऊन ह सामर्थ से मोला संभालथे अऊ मोर रसता ला सुरकछित रखथे।
2SA 22:34 ओह मोर गोड़ ला हिरन के गोड़ सहीं कर देथे; ओह मोला ऊंच जगह म ठाढ़ करथे।
2SA 22:35 ओह मोर हांथमन ला लड़ई करे बर सिखाथे; मोर बाहां ह कांसा के धनुस ला मोड़ सकथे।
2SA 22:36 तेंह अपन बचाव के मदद ला मोर ढाल बनाथस; तोर मदद ह मोला महान कर दे हवय।
2SA 22:37 तेंह मोर पांव बर चाकर रसता देथस, जेकर ले मोर एड़ीमन नइं थकंय।
2SA 22:38 “मेंह अपन बईरीमन के पीछा करके ओमन ला कुचर देंव; मेंह तब तक नइं लहुंटंय, जब तक कि ओमन नास नइं हो गीन।
2SA 22:39 मेंह ओमन ला पूरा कुचर देंव, अऊ ओमन उठ नइं सकिन; ओमन मोर गोड़ खाल्हे गिर गीन।
2SA 22:40 तेंह मोला लड़ई करे बर ताकत दे हस; तेंह मोर बईरीमन ला मोर आघू म झुका दे हस।
2SA 22:41 तेंह मोर बईरीमन ला पीठ देखाके भागे बर बिबस कर दे हस, अऊ मेंह मोर बईरीमन ला नास कर देंव।
2SA 22:42 ओमन मदद बर गोहारिन, पर ओमन ला बचानेवाला कोनो नइं रिहिस— ओमन यहोवा ला पुकारिन, पर ओह जबाब नइं दीस।
2SA 22:43 मेंह ओमन ला मार-मारके भुइयां के धुर्रा सहीं कर देंव; मेंह ओमन ला गली के चीखला सहीं कुटेंव अऊ रऊंदेंव।
2SA 22:44 “तेंह मोला मनखेमन के हमला ले बचाय हस; तेंह मोला जाति-जाति के मनखेमन के मुखिया के रूप म बचाके रखे हस। ओ मनखे, जेमन ला मेंह नइं जानत रहेंव, ओमन अब मोर सेवा करथें,
2SA 22:45 परदेसीमन मोर आघू म डरथें; मोर अवाज ला सुनतेच ही ओमन मोर हुकूम के पालन करथें।
2SA 22:46 ओ जम्मो झन घबरा जाथें; ओमन कांपत अपन गढ़ ले बाहिर निकलथें।
2SA 22:47 “यहोवा ह जीयत हवय! मोर चट्टान के परसंसा होवय! मोर परमेसर, चट्टान, मोर उद्धारकर्ता के बहुंत परसंसा होवय!
2SA 22:48 ओह परमेसर ए, जऊन ह मोर बदला लेथे, जऊन ह जाति-जाति के मनखेमन ला मोर अधीन कर देथे,
2SA 22:49 जऊन ह मोला मोर बईरीमन ले छुड़ाथे; तेंह मोला मोर बिरोधीमन ले ऊंच करे हस; एक हिंसक आदमी ले तेंह मोला बचाय हस।
2SA 22:50 एकरसेति हे यहोवा, मेंह जाति-जाति के मनखेमन के बीच तोर परसंसा करहूं; मेंह तोर नांव के परसंसा के गीत गाहूं।
2SA 22:51 “ओह अपन राजा ला बड़े बिजय देथे; ओह अपन अभिसिक्त जन, दाऊद अऊ ओकर संतानमन ऊपर हमेसा बहुंत दया देखाथे।”
2SA 23:1 दाऊद के आखिरी बचन ये अय: “यिसै के बेटा दाऊद के उत्साह देवइया बचन, ओ मनखे के बचन, जेला सर्वोच्च परमेसर ह ऊपर उठाईस, ओ मनखे, जेला याकूब के परमेसर ह अभिसेक करिस, इसरायल के गीतमन के नायक:
2SA 23:2 “यहोवा के आतमा ह मोर जरिये गोठियाईस; ओकर बचन ह मोर मुहूं म रिहिस।
2SA 23:3 इसरायल के परमेसर ह गोठियाईस, इसरायल के चट्टान ह मोर ले कहिस: ‘जब एक झन धरमीपन म मनखेमन ऊपर सासन करथे, जब ओह परमेसर के भय मानत सासन करथे,
2SA 23:4 ओह बिहनियां सूरज निकले के बेरा के अंजोर सहीं अय अइसन बिहनियां, जेमा बादर नइं होवय, जइसन बरसात होय के बाद चमकीलापन होथे जेह भुइयां ले हरियर-हरियर कांदी उगाथे।’
2SA 23:5 “यदि मोर घराना के सही संबंध परमेसर के संग नइं होतिस, त खचित ओह मोर संग सदा के एक करार नइं करतिस, जऊन ह हर किसम ले ठीक अऊ सुरकछित हवय; खचित ओह मोर उद्धार के फर ला नइं लानतिस अऊ मोर हर ईछा ला पूरा नइं करतिस।
2SA 23:6 पर जम्मो दुस्ट मनखेमन कांटा के सहीं बाजू म फटिक दिये जाय बर होथें, जेला हांथ ले नइं संकेले जावय।
2SA 23:7 जऊन ह कांटा ला छूथे ओह लोहा के कोनो चीज या कोनो भाला के डंडा के उपयोग करथे; जहां ओमन पड़े रहिथें, ओ जगह ला जला दिये जाथे।”
2SA 23:8 दाऊद के तीन बड़े सूरबीरमन के नांव: योसेब-यसेबेत, येह एक तहकमोनी रिहिस अऊ तीनों झन के मुखिया रिहिस; ओह आठ सौ आदमीमन ऊपर अपन बरछी उठाईस अऊ ओमन ला एकेच मुकाबला म मार डारिस।
2SA 23:9 ओकर बाद अहोही दोदै के बेटा एलिआजर रिहिस। तीन बड़े योद्धा म ले एक झन के रूप म, ओह ओ समय म दाऊद के संग रिहिस, जब ओमन पलिस्तीमन ला ताना मारिन, जब पलिस्तीमन लड़ई बर पस-दमीम म जूरे रिहिन। तब इसरायलीमन पाछू हट गीन,
2SA 23:10 पर एलिआजर ह सामना करिस अऊ ओह पलिस्तीमन ला तब तक मारत गीस, जब तक कि ओकर हांथ ह थकके तलवार ले चिपट नइं गीस। ओ दिन यहोवा ह एक बड़े जीत दिलाईस। सेना ह एलिआजर करा लहुंटके आईस, पर सिरिप मरे मनखेमन के सामान लूटे बर।
2SA 23:11 ओकर बाद, हरारी अगी के बेटा सम्मा रिहिस। जब पलिस्तीमन एक अइसन जगह म एक संग जूरिन, जिहां मसूर दाल ले भरे एक खेत रिहिस, त इसरायल के सेना ह ओमन ले डरके भाग गीस।
2SA 23:12 पर सम्मा ह खेत के मांझा म ठाढ़ होके ओमन के सामना करिस। ओह बचाव करिस अऊ पलिस्तीमन ला मार गिराईस, अऊ यहोवा ह एक बड़े जीत दिलाईस।
2SA 23:13 फसल लुए के समय, तीस मुख्य सूरबीरमन ले तीन झन दाऊद करा अदुल्लाम के गुफा म आईन, अऊ ओ समय, पलिस्तीमन के एक दल ह रपाईम के घाटी म डेरा डाले रहय।
2SA 23:14 ओ बेरा दाऊद ह गढ़ म रिहिस, अऊ पलिस्तीमन के गढ़ के सेना ह बैतलहम म रिहिस।
2SA 23:15 दाऊद ला बहुंत पीयास लगिस, त ओह कहिस, “हाय, कोनो मोला बैतलहम के दुवार के लकठा के कुआं ले पानी लानके पीयावव!”
2SA 23:16 त ओ तीनों सूरबीरमन पलिस्तीमन के कतार ला टोरके बैतलहम के दुवार के लकठा के कुआं ले पानी निकालिन अऊ ओ पानी ला लेके दाऊद करा वापिस आ गीन। पर ओह ओ पानी ला पीये ले मना करिस, अऊ ओह ओ पानी ला यहोवा के आघू म ढार दीस,
2SA 23:17 अऊ कहिस, “हे यहोवा, अइसन काम करई ह मोर ले दूरिहा रहय! का येह ओ आदमीमन के लहू नो हय, जेमन अपन परान ला जोखिम म डालके गेय रिहिन?” अऊ दाऊद ह ओ पानी ला नइं पीईस। अइसने बीरता के काम रिहिस ओ तीनों बड़े सूरबीरमन के।
2SA 23:18 सरूयाह के बेटा, योआब के भाई अबीसै ह ओ तीनों झन के मुखिया रिहिस। ओह तीन सौ आदमीमन के बिरूध अपन बरछी उठाके ओमन ला मार डारिस, अऊ ये किसम ले ओह ओ तीनों के सहीं नामी हो गीस।
2SA 23:19 का ओ तीनों ले ओकर जादा आदर नइं होईस? ओह ओमन के सेनापति बनिस, हालाकि ओला ओ तीनों के बीच सामिल नइं करे गीस।
2SA 23:20 यहोयादा के बेटा बनायाह ह कबसेल सहर के एक बड़े बीर रिहिस, अऊ ओह बहुंत बीरता देखाईस। ओह मोआब के दू झन सबले बड़े योद्धामन ला मार गिराईस। बरफ गिरे के दिन म ओह खाल्हे एक खंचवा म उतरके एक सिंह ला घलो मार डारिस।
2SA 23:21 दूसर बार ओह एक बहुंत बड़े मिसरी मनखे ला मार डारिस। हालाकि ओ मिसरी मनखे ह अपन हांथ म बरछी धरे रिहिस, पर बनायाह एक ठन बड़े लउठी लेके ओकर बिरूध गीस। ओह ओ मिसरी मनखे के हांथ ले बरछी ला छीन लीस अऊ ओकरेच बरछी ले ही ओला मार डारिस।
2SA 23:22 अइसने-अइसने बीरता के काम यहोयादा के बेटा बनायाह ह करिस; ओह घलो ओ तीनों बड़े सूरबीरमन सहीं नामी रिहिस।
2SA 23:23 ओला ओ तीस सूरबीरमन ले जादा आदर मिलिस, पर ओला ओ तीनों म सामिल नइं करे गीस। अऊ दाऊद ह ओला अपन अंग रकछकमन के मुखिया ठहिराईस।
2SA 23:24 येमन ओ तीस योद्धा रिहिन: योआब के भाई असाहेल, बैतलहम के दोदो के बेटा एल्हानान,
2SA 23:25 हेरोदी सम्मा, हेरोदी एलीका,
2SA 23:26 पलती हेलेस, तकोआ ले इक्केस के बेटा ईरा,
2SA 23:27 अनातोत ले अबिएजेर, हूसाती सिब्बकै,
2SA 23:28 अहोही सलमोन, नतोपाती महरै,
2SA 23:29 नतोपाती बाना के बेटा हेलेद, बिनयामीन म गिबा नगर ले रीबै के बेटा इतै,
2SA 23:30 पिरातोनी बनायाह, गास के घाटीमन के इलाका ले हिद्दै,
2SA 23:31 अरबात के अबी-अल्बोन, बरहूमी अजमावेत,
2SA 23:32 सालबोनी एल्यहबा, यासेन के बेटामन, योनातन
2SA 23:33 हरारी सम्मा के बेटा, हरारी सारार के बेटा अहीआम,
2SA 23:34 माकाती अहसबै के बेटा एलीपेलेत, गीलोनी अहीतोपेल के बेटा एलीआम,
2SA 23:35 करमेली हेसरो, अराबी पारै,
2SA 23:36 सोबा ले नातान के बेटा इगाल, हगरी के बेटा,
2SA 23:37 अमोनी सेलेक, बेरोती नहरै, जऊन ह सरूयाह के बेटा योआब के हथियार ढोवइया रिहिस,
2SA 23:38 येतेरी ईरा, येतेरी गारेब,
2SA 23:39 अऊ हित्ती उरियाह।
2SA 24:1 यहोवा के कोप ह फेर इसरायलीमन ऊपर भड़किस, अऊ ओह दाऊद ला ओमन के बिरूध ये कहिके उभारिस, “जा अऊ इसरायल अऊ यहूदा के गनती कर।”
2SA 24:2 एकरसेति राजा ह योआब अऊ ओकर संग के सेनापतिमन ला हुकूम दीस, “दान सहर ले लेके बेरसेबा तक इसरायल के जम्मो गोत्र म जावव, अऊ सैनिकमन के गनती करव, ताकि मेंह जानंव कि ओमन कतेक हवंय।”
2SA 24:3 पर योआब ह राजा ला जबाब दीस, “यहोवा तोर परमेसर ह इसरायल के मनखेमन ला सौ गुना बढ़ावय, अऊ मोर मालिक राजा के आंखी ह येला देखय। पर मोर मालिक राजा ह अइसने काम काबर करे चाहत हे?”
2SA 24:4 पर राजा ह योआब अऊ सेना के सेनापतिमन के बात ला नइं मानिस; तब ओमन राजा करा ले चल दीन अऊ इसरायल के सैनिकमन के गनती करिन।
2SA 24:5 यरदन नदी के ओ पार जाके, ओमन घाटी म नगर के दक्खिन कोति अरोएर नगर के लकठा म डेरा डालिन, अऊ तब गाद म ले होवत याजेर कोति गीन।
2SA 24:6 तब ओमन गिलाद म अऊ तहतीम-होदसी के इलाका म गीन, फेर दान-यान गीन अऊ घुमके सीदोन सहर कोति चलिन।
2SA 24:7 तब ओमन सूर के गढ़, अऊ हिब्बी अऊ कनानीमन के जम्मो नगरमन कोति गीन। आखिर म, ओमन यहूदा देस के नेगेव म बेरसेबा करा गीन।
2SA 24:8 पूरा देस भर म जाय के बाद, नौ महिना अऊ बीस दिन के आखिरी म ओमन यरूसलेम वापिस आईन।
2SA 24:9 योआब ह राजा ला सैनिकमन के गनती बताईस; इसरायल म आठ लाख योग्य आदमीमन रिहिन, जेमन तलवार चला सकत रिहिन, अऊ यहूदा म पांच लाख रिहिन।
2SA 24:10 सैनिकमन के गनती करे के बाद, दाऊद के मन ह बियाकुल होय लगिस, अऊ ओह यहोवा ले पराथना करिस, “जऊन काम मेंह करे हंव, ओह एक बड़े पाप ए। त अब, हे यहोवा, मेंह तोर ले बिनती करत हंव, अपन सेवक के दोस ला दूर कर दे। मेंह एक बहुंत मुरूखता के काम करे हंव।”
2SA 24:11 एकर पहिले कि दूसर दिन बिहनियां दाऊद ह सोके उठतिस, यहोवा के ये बचन गाद अगमजानी, दाऊद के अगम-दरसी करा आईस:
2SA 24:12 “जा अऊ दाऊद ला बता, ‘यहोवा ह ये कहत हे: मेंह तोर आघू म तीन बात रखत हंव। ओमा ले कोनो एक ठन ला चुन ले, जेला में तोर बिरूध करहूं।’ ”
2SA 24:13 तब गाद ह दाऊद मेर जाके ओला कहिस, “का तोर देस म तीन बछर के अकाल पड़य? या तीन महिना तक तोर बईरीमन तोर पीछा करत रहंय अऊ तेंह ओमन ले भागत रहिबे? या फेर तोर देस म तीन दिन तक महामारी होवय? अब तें येकर ऊपर सोच-बिचार कर अऊ मोला बता ताकि में ओला जबाब दे सकंव, जऊन ह मोला पठोय हवय।”
2SA 24:14 दाऊद ह गाद ला कहिस, “मेंह बड़े संकट म पड़े हंव। हमन यहोवा के हांथ म पड़न, काबरकि ओकर दया बहुंत बड़े अय; पर मोला मनखेमन के हांथ म झन पड़न दे।”
2SA 24:15 तब यहोवा ह ओ बिहनियां ले लेके ठहिराय गय समय तक इसरायल ऊपर एक महामारी लानिस, अऊ दान ले लेके बेरसेबा तक सत्तर हजार मनखे मर गीन।
2SA 24:16 जब स्वरगदूत ह यरूसलेम ला नास करे बर अपन हांथ ला बढ़ाईस, तब यहोवा के मन ह ओ बिपत्ति के बारे म पिघल गीस अऊ ओह ओ स्वरगदूत ला कहिस, जऊन ह मनखेमन ला पीरा देवत रिहिस, “बहुंत हो गे! अपन हांथ ला खींच ले।” ओ समय यहोवा के स्वरगदूत ह ओरनान नांव के एक यबूसी के कोठार म रिहिस।
2SA 24:17 जब दाऊद ह ओ स्वरगदूत ला देखिस, जऊन ह मनखेमन ला पीरा देवत रिहिस, त ओह यहोवा ले कहिस, “पाप तो में करे हंव; में, चरवाहा ह गलत काम करे हंव। येमन तो भेड़ अंय। येमन का करे हवंय? तोर हांथ ह मोर अऊ मोर परिवार ऊपर उठे।”
2SA 24:18 ओहीच दिन, गाद ह दाऊद मेर गीस अऊ ओकर ले कहिस, “जा अऊ यबूसी ओरनान के कोठार म यहोवा बर एक बेदी बना।”
2SA 24:19 तब दाऊद ह उहां गीस जइसे कि यहोवा ह गाद के जरिये हुकूम देय रिहिस।
2SA 24:20 जब ओरनान ह राजा अऊ ओकर करमचारीमन ला अपन कोति आवत देखिस, त ओह निकलके राजा के आघू म भुइयां तक मुड़ नवाके ओला दंडवत करिस।
2SA 24:21 ओरनान ह कहिस, “मोर मालिक राजा ह अपन दास मेर काबर आय हवय?” दाऊद ह जबाब दीस, “तोर कोठार ला बिसाय बर आय हवंव, ताकि में इहां यहोवा बर एक बेदी बना सकंव, जेकर ले मनखेमन के महामारी ह खतम हो जावय।”
2SA 24:22 ओरनान ह दाऊद ले कहिस, “मोर मालिक राजा ला जऊन कुछू बने लगय, ओला ओह लेय ले अऊ भेंट चघावय। होम-बलिदान बर इहां बईलामन हवंय, अऊ इहां लकरी बर दंवरी के चीज अऊ बईलामन के जुड़ा हवय।
2SA 24:23 हे महाराज, ओरनान ह ये जम्मो चीज राजा ला देवत हे।” ओरनान ह राजा ला ये घलो कहिस, “यहोवा तोर परमेसर ह तोला स्वीकार करय।”
2SA 24:24 पर राजा ह ओरनान ला जबाब दीस, “नइं, मेंह दाम देके तोर ले येला लूहूं। मेंह यहोवा अपन परमेसर ला अइसन होम-बलिदान नइं चघावंव, जेकर बर में कुछू दाम नइं चुकाय हंव।” एकरसेति दाऊद ह कोठार अऊ बईलामन ला चांदी के पचास सेकेल म बिसा लीस।
2SA 24:25 उहां दाऊद ह यहोवा बर एक बेदी बनाईस अऊ होम-बलिदान अऊ मेल-बलिदान चघाईस। तब यहोवा ह देस बर दाऊद के दुवारा करे पराथना के जबाब दीस, अऊ इसरायल ऊपर आय महामारी ह खतम हो गीस।
1KI 1:1 जब दाऊद राजा ह बहुंत डोकरा हो गीस, त ओला ओनहा ओढ़ाय ले घलो ओकर देहें ह गरम नइं होवत रिहिस।
1KI 1:2 एकरसेति ओकर सेवकमन ओला कहिन, “हमन एक जवान कुंवारी लड़की खोजथन, जऊन ह राजा के सेवा करय अऊ ओकर देखभाल करय। ओह ओकर बाजू म लेटय, ताकि हमर परभू राजा ला गरमी लगय।”
1KI 1:3 तब ओमन जम्मो इसरायल देस म एक सुघर जवान माईलोगन के खोज करिन अऊ ओमन ला अबीसग नांव के एक सुनेमवासी लड़की मिलिस, अऊ ओमन ओला राजा करा ले आईन।
1KI 1:4 ओ माईलोगन ह अब्बड़ सुघर रहय; ओह राजा के देखभाल करय अऊ ओकर बाजू म ठाढ़े रहय, पर राजा के सारीरिक संबंध ओकर संग नइं रिहिस।
1KI 1:5 तब अदोनियाह, जेकर दाई के नांव हगीत रिहिस, अपनआप ला आघू करके कहिस, “मेंह राजा बनहूं।” अऊ ओह रथ अऊ घोड़ामन ला तियार करिस अऊ अपन आघू-आघू दऊड़े बर पचास मनखे रखिस।
1KI 1:6 (ओकर ददा ह ओला ये कहिके कभू नइं डांटे रिहिस, “तेंह अइसने काम काबर करथस।” ओह बहुंत सुन्दर घलो रिहिस अऊ अबसालोम के बाद ओकर जनम होय रिहिस।)
1KI 1:7 अदोनियाह ह सरूयाह के बेटा योआब अऊ अबियातार पुरोहित ले बातचीत करिस, अऊ ओमन ओकर समरथन करिन।
1KI 1:8 पर सादोक पुरोहित, यहोयादा के बेटा बनायाह, नातान अगमजानी, सिमी अऊ रेई अऊ दाऊद के बिसेस पहरेदार, अदोनियाह के समरथन नइं करिन।
1KI 1:9 अदोनियाह ह तब एन-रोगेल के लकठा म जोहेलेत नांव के पथरा करा भेड़, पसु अऊ मोटहा बछरूमन के बलिदान करिस। ओह अपन जम्मो भाई राजा के बेटामन ला, अऊ यहूदा के जम्मो राज-करमचारीमन ला बलाईस।
1KI 1:10 पर ओह नातान अगमजानी, बनायाह, बिसेस पहरेदार अऊ अपन भाई सुलेमान ला नइं बलाईस।
1KI 1:11 तब नातान ह सुलेमान के दाई बतसेबा ले पुछिस, “का तेंह सुने हस कि हगीत के बेटा अदोनियाह ह राजा बन गे हवय अऊ हमर परभू दाऊद येकर बारे म कुछू नइं जानत हे?
1KI 1:12 एकरसेति, अब मेंह तोला सलाह देवत हंव कि तेंह कइसे अपन अऊ अपन बेटा सुलेमान के परान बचा सकत हस।
1KI 1:13 तेंह दाऊद राजा करा जा अऊ ओला अइसने कह, ‘हे मोर मालिक! हे राजा! का तेंह अपन दासी मोर ले कसम खाके ये नइं कहे रहय: “तोर बेटा सुलेमान ह मोर बाद राजा होही, अऊ ओह मोर सिंघासन म बईठही”? त फेर अदोनियाह ह काबर राजा बन गे हवय?’
1KI 1:14 जब तेंह उहां राजा ले अइसने गोठियावत रहिबे, तभे मेंह आहूं अऊ तोर बात के समरथन करहूं।”
1KI 1:15 तब बतसेबा ह डोकरा राजा ला देखे बर ओकर कमरा म गीस, जिहां सुनेम के अबीसग ह ओकर सेवा-टहल करत रिहिस।
1KI 1:16 बतसेबा ह खाल्हे झुकके राजा ला दंडवत करिस। राजा ह पुछिस, “तेंह का चाहत हस?”
1KI 1:17 ओह कहिस, “हे मोर परभू, तेंह खुद यहोवा तोर परमेसर के कसम खाके अपन दासी ले कहे रहय: ‘तोर बेटा सुलेमान ह मोर बाद राजा होही, अऊ ओह मोर सिंघासन म बईठही।’
1KI 1:18 पर अब अदोनियाह ह राजा बन गे हवय, अऊ तें, हे मोर मालिक राजा, येकर बारे म नइं जानत हस।
1KI 1:19 ओह अब्बड़ पसु, मोटहा बछरू अऊ भेड़मन के बलिदान करे हवय, अऊ राजा के जम्मो बेटा, अबियातार पुरोहित अऊ सेना के सेनापति योआब ला बलाय हवय, पर ओह तोर सेवक सुलेमान ला नइं बलाईस।
1KI 1:20 हे मोर परभू! हे राजा! जम्मो इसरायल के आंखी तोर कोति ये जाने बर लगे हवय कि मोर परभू राजा के बाद ओकर सिंघासन म कोन ह बईठही।
1KI 1:21 नइं तो जब मोर मालिक राजा ह अपन पुरखामन के संग हमेसा बर सो जाही, त मोर अऊ मोर बेटा सुलेमान के संग अपराधी के सहीं बरताव करे जाही।”
1KI 1:22 जब बतसेबा ह राजा ले गोठियावत रिहिस, तभे नातान अगमजानी घलो आ गीस।
1KI 1:23 अऊ राजा ला बताय गीस, “नातान अगमजानी ह आय हवय।” तब ओह राजा करा गीस, अऊ मुहूं के बल भुइयां म गिरके राजा ला दंडवत करिस।
1KI 1:24 नातान ह कहिस, “हे मोर मालिक राजा! का तेंह घोसना करे हवस कि अदोनियाह ह तोर बाद राजा होही, अऊ ओह तोर सिंघासन म बईठही?
1KI 1:25 आज ओह खाल्हे म जाके अब्बड़ अकन पसु, मोटहा बछरू अऊ भेड़मन के बलिदान करे हवय। ओह राजा के जम्मो बेटा, सेना के सेनापति अऊ अबियातार पुरोहित ला बलाय हवय। अभी ओमन ओकर संग खावत अऊ पीयत हवंय अऊ ये कहत हवंय, ‘राजा अदोनियाह चिरंजीव रहय।’
1KI 1:26 पर तोर दास मोला, अऊ सादोक पुरोहित, अऊ यहोयादा के बेटा बनायाह, अऊ तोर दास सुलेमान ला ओह नइं बलाय हवय।
1KI 1:27 का ये काम मोर मालिक राजा कोति ले अपन दासमन ला बिगर बताय होय हवय कि मोर मालिक राजा के बाद ओकर सिंघासन म कोन बईठही।”
1KI 1:28 तब दाऊद राजा ह कहिस, “बतसेबा ला मोर करा बलावव।” तब ओह राजा करा आईस अऊ ओकर आघू म ठाढ़ हो गीस।
1KI 1:29 राजा ह तब ये कसम खाईस, “यहोवा के जिनगी के कसम, जऊन ह मोला हर बिपत्ति ले बचाय हवय,
1KI 1:30 मेंह जऊन बात तोर ले यहोवा, इसरायल के परमेसर के कसम खाके कहे हवंव, ओला आज ही पूरा करहूं: तोर बेटा सुलेमान ह मोर बाद राजा होही, अऊ ओह मोर बाद सिंघासन म मोर जगह म बईठही।”
1KI 1:31 तब बतसेबा ह राजा के आघू म मुहूं-भरसा होके ओला सास्टांग दंडवत करिस, अऊ कहिस, “मोर परभू राजा दाऊद ह सदा जीयत रहय!”
1KI 1:32 तब दाऊद राजा ह कहिस, “सादोक पुरोहित, नातान अगमजानी अऊ यहोयादा के बेटा बनायाह ला मोर करा बलाके लान।” अऊ जब ओमन राजा करा आईन,
1KI 1:33 त ओह ओमन ले कहिस: “अपन परभू के सेवकमन ला अपन संग लेवव अऊ मोर बेटा सुलेमान ला मोर अपन खुद के खच्चर म चघावव अऊ ओला खाल्हे गीहोन म ले जावव।
1KI 1:34 अऊ उहां सादोक पुरोहित अऊ नातान अगमजानी, इसरायल के राजा के रूप म ओकर अभिसेक करंय। तब तुरही फूंकके चिचियाके कहव, ‘राजा सुलेमान चिरंजीव रहय!’
1KI 1:35 तब तुमन ओकर संग ऊपर जावव, अऊ ओह आके मोर सिंघासन म बईठे अऊ मोर जगह म राज करय। मेंह ओला इसरायल अऊ यहूदा ऊपर सासन करइया ठहिराय हंव।”
1KI 1:36 तब यहोयादा के बेटा बनायाह ह कहिस, “आमीन! यहोवा, मोर मालिक, राजा के परमेसर घलो अइसने ही घोसना करय।
1KI 1:37 जइसने यहोवा ह मोर मालिक, राजा के संग रिहिस, वइसने ही ओह सुलेमान के संग घलो रहय अऊ ओकर राज ला मोर मालिक, राजा दाऊद के राज ले घलो अधिक बढ़ावय!”
1KI 1:38 तब सादोक पुरोहित, नातान अगमजानी, यहोयादा के बेटा बनायाह, करेती अऊ पलेतीमन खाल्हे गीन अऊ सुलेमान ला राजा दाऊद के खच्चर म चघाईन, अऊ ओला गीहोन म ले गीन।
1KI 1:39 तब सादोक पुरोहित ह पबितर तम्बू ले तेल ले भरे सींग ला लीस अऊ सुलेमान के अभिसेक करिस। तब ओमन तुरही फूंकिन अऊ जम्मो मनखे चिचियाके कहिन, “राजा सुलेमान चिरंजीव रहय!”
1KI 1:40 अऊ जम्मो मनखेमन बांसुरी बजावत अऊ अइसने आनंद मनावत ओकर पाछू-पाछू ऊपर गीन कि अवाज के मारे धरती घलो कांपे लगिस।
1KI 1:41 जब अदोनियाह अऊ ओकर जम्मो पहुनामन अपन खाना खवई खतम करनेवाला ही रिहिन कि ओमन ये अवाज सुनिन। तुरही के अवाज ला सुनके, योआब ह पुछिस, “सहर म ये जम्मो कोलाहल के का मतलब ए?”
1KI 1:42 जब ओह अइसने गोठियावत रिहिस, तभे अबियातार पुरोहित के बेटा योनातन आईस। अदोनियाह ह ओकर ले कहिस, “भीतर आ। तेंह एक बने मनखे अस, अऊ तेंह जरूर कोनो बने संदेस लाने होबे।”
1KI 1:43 योनातन ह जबाब दीस, “बिलकुल ही नइं! हमर परभू राजा दाऊद ह सुलेमान ला राजा बना दे हवय।
1KI 1:44 अऊ राजा ह सादोक पुरोहित, नातान अगमजानी, यहोयादा के बेटा बनायाह, करेती अऊ पलेतीमन ला ओकर संग पठोय हवय, अऊ ओमन ओला राजा के खच्चर म चघाय हवंय,
1KI 1:45 अऊ सादोक पुरोहित अऊ नातान अगमजानी गीहोन म राजा के रूप म ओकर अभिसेक करे हवंय। उहां ले ओमन खुसी मनावत ऊपर गे हवंय, सहर म येकर कोलाहल मचे हे, जेकर अवाज तुमन सुनत हवव।
1KI 1:46 अऊ सुलेमान ह राज सिंघासन म अपन जगह ले लेय हवय।
1KI 1:47 राज-करमचारीमन घलो हमर परभू राजा दाऊद करा आके ये कहिके बधाई देवत हंय, ‘तोर परमेसर ह सुलेमान के नांव ला तोर नांव ले घलो महान करय अऊ ओकर राज ला तोर राज ले घलो अधिक बढ़ावय!’ अऊ राजा ह अपन पलंग म भक्ति म दंडवत करिस
1KI 1:48 अऊ कहिस, ‘ओ यहोवा, इसरायल के परमेसर के महिमा होवय, जऊन ह आज मोर देखत म एक उत्तराधिकारी ला मोर सिंघासन म बईठाय हवय।’ ”
1KI 1:49 ये सुनके, अदोनियाह के जम्मो पहुनामन घबराके उहां ले उठिन अऊ अपन-अपन रद्दा म चल दीन।
1KI 1:50 पर अदोनियाह ह सुलेमान के डर के मारे उठिस, अऊ जाके बेदी के सींगमन ला पकड़ लीस।
1KI 1:51 तब सुलेमान ला ये बताय गीस, “अदोनियाह ह राजा सुलेमान ले डरत हवय अऊ बेदी के सींगमन ला ये कहिके पकड़ ले हवय, ‘राजा सुलेमान ह आज मोर ले कसम खावय कि ओह अपन दास ला तलवार ले नइं मार डारही।’ ”
1KI 1:52 सुलेमान ह जबाब दीस, “यदि ओह अपनआप ला सही साबित करथे, त ओकर बाल भी बांका नइं होही; पर यदि ओमा बुरई पाय जाथे, तो ओह मारे जाही।”
1KI 1:53 तब राजा सुलेमान ह कुछू आदमीमन ला पठोईस, अऊ ओमन ओला बेदी ले खाल्हे ले आईन। अऊ अदोनियाह ह आईस अऊ झुकके राजा सुलेमान ला दंडवत करिस, अऊ सुलेमान ह ओला कहिस, “अपन घर चले जा।”
1KI 2:1 जब दाऊद के मरे के बेरा ह लकठा म आईस, त ओह अपन बेटा सुलेमान ला ये कहिके अधिकार दीस:
1KI 2:2 “मेंह जम्मो संसार के रीति के मुताबिक जवइया हंव, एकरसेति तेंह मजबूत होके एक मनखे के सहीं काम कर,
1KI 2:3 अऊ जऊन कुछू यहोवा तोर परमेसर चाहथे, ओला मान: ओकर ईछा के मुताबिक चल, अऊ जइसने मूसा के कानून म लिखे हवय वइसने ही ओकर रीति-बिधि अऊ हुकूम, ओकर कानून अऊ नियममन ला मान। तेंह ये जम्मो ला माने कर, ताकि तोर हर काम अऊ तोला हर जगह म सफलता मिलय
1KI 2:4 अऊ यहोवा ह मोर ले करे ये वायदा ला पूरा करय: ‘यदि तोर संतानमन अपन चालचलन ला सही रखहीं, अऊ यदि ओमन अपन पूरा मन अऊ परान के संग म मोर आघू म सच्चई म चलहीं, त इसरायल के सिंघासन म बईठे बर तोर खानदान म उत्तराधिकारी के कभू कमी नइं होही।’
1KI 2:5 “तेंह खुद जानत हस कि सरूयाह के बेटा योआब ह मोर संग का करिस—याने कि नेर के बेटा अबनेर अऊ येतेर के बेटा अमासा, इसरायल के ये दूनों सेनापतिमन के संग ओह का करिस। ओह ओमन ला मार डारिस, अऊ सांति के समय म लड़ई के बेरा सहीं खून बहाईस अऊ ओ खून ले अपन कनिहां के कमरबंध अऊ अपन गोड़ के पनहीमन म दाग लगाईस।
1KI 2:6 अपन बुद्धि के मुताबिक ओकर संग बरताव कर, पर ओ पक्का चुंदीवाला ला सांति से मरन झन देबे।
1KI 2:7 “पर गिलाद के बरजिलै के बेटामन ऊपर दया करबे अऊ ओमन तोर मेज म खाना खवइया होवंय, काबरकि जब मेंह तोर भाई अबसालोम ले भागत रहेंव, त ओमन मोर साथ दे रिहिन।
1KI 2:8 “अऊ सुन, तोर संग बहूरीम के बिनयामीनी गेरा के बेटा सिमी हवय, जऊन ह मोला ओ दिन कठोर सराप देय रिहिस जब मेंह महनैम ला जावत रहेंव। पर जब ओह मोर ले भेंट करे बर यरदन मेर आईस, त मेंह ओकर ले यहोवा के किरिया खाके कहे रहेंव: ‘मेंह तोला तलवार ले नइं मारंव।’
1KI 2:9 पर अब तेंह ओला निरदोस झन ठहिराबे। तेंह एक बुद्धिमान मनखे अस; तोला पता होही कि ओकर संग का करना हे। ओ पक्का चुंदीवाला के खून बहाके ओला मार डारबे।”
1KI 2:10 तब दाऊद ह अपन पुरखामन के संग सुत गीस अऊ ओला दाऊद के सहर म माटी दिये गीस।
1KI 2:11 ओह इसरायल ऊपर चालीस साल तक राज करिस—सात साल हेबरोन सहर म अऊ तैंतीस साल यरूसलेम सहर म।
1KI 2:12 तब सुलेमान ह अपन ददा दाऊद के सिंघासन म बईठिस, अऊ ओकर राज ह मजबूत होवत गीस।
1KI 2:13 तब हगीत के बेटा अदोनियाह ह सुलेमान के दाई बतसेबा करा गीस। बतसेबा ह ओकर ले पुछिस, “का तेंह मितानभाव ले आय हस?” ओह जबाब दीस, “हव, मितानभाव ले!”
1KI 2:14 फेर ओह कहिस, “मोला तोर से कुछू कहना हे।” बतसेबा ह कहिस, “तेंह कह सकत हस!”
1KI 2:15 त ओह कहिस, “जइसे कि तेंह जानत हस कि राज ह मोर हो गे रिहिस। जम्मो इसरायल ह मोला अपन राजा के रूप म देखत रिहिस। पर चीजमन बदल गीन, अऊ अब राज ह मोर भाई के हो गे हवय, काबरकि येह यहोवा कोति ले ओला मिले हवय।
1KI 2:16 एकरसेति अब मेंह तोर ले एक बिनती करत हंव। मोला इनकार झन करबे।” बतसेबा ह कहिस, “अपन बिनती ला बता।”
1KI 2:17 ओह कहिस, “राजा सुलेमान ह तोर बात ला नइं काटही—एकरसेति ओकर ले पुछ कि ओह मोला सुनेमिन अबीसग ला मोर घरवाली के रूप म देवय।”
1KI 2:18 बतसेबा ह कहिस, “बने बात ए, मेंह तोर बर राजा ले बात करहूं।”
1KI 2:19 जब बतसेबा ह अदोनियाह के बारे म राजा सुलेमान करा गोठियाय बर गीस, त राजा ह ओकर ले भेंट करे बर उठिस, अऊ झुकके ओला दंडवत करिस अऊ तब ओह अपन सिंघासन म बईठ गीस। राजा ह अपन दाई बर घलो एक सिंघासन रखवा दीस, अऊ ओकर दाई ह ओकर जेवनी हांथ कोति बईठ गीस।
1KI 2:20 तब राजा के दाई ह कहिस, “मेंह तोर ले एक छोटे बिनती करे चाहत हंव, मोला इनकार झन करबे।” राजा ह कहिस, “हे मोर दाई, का बिनती करे चाहत हस? मेंह तोला इनकार नइं करंव।”
1KI 2:21 ओह कहिस, “सुनेमिन अबीसग ह तोर भाई अदोनियाह ला बिहाव म दिये जावय।”
1KI 2:22 राजा सुलेमान ह अपन दाई ला जबाब दीस, “तेंह अदोनियाह बर सुनेमिन अबीसग ला ही काबर मांगत हस? तेंह ओकर बर राज ला घलो मांग सकत हस, काबरकि ओह तो मोर बड़े भाई अय—हव, सिरिप ओकर बर ही काबर! अबियातार पुरोहित अऊ सरूयाह के बेटा योआब बर घलो मांग!”
1KI 2:23 तब राजा सुलेमान ह यहोवा के कसम खाके कहिस: “यदि अदोनियाह ह ये बिनती बर मार डारे नइं जावय, त परमेसर ह मोर ले बहुंत कठोरता से बरताव करय!
1KI 2:24 अऊ अब यहोवा के जिनगी के कसम—जऊन ह मोला मोर ददा दाऊद के सिंघासन म बने करके स्थापित करे हवय अऊ अपन वायदा के मुताबिक मोर बर एक राजबंस कायम करे हवय—आज ही अदोनियाह ह मार डारे जाही।”
1KI 2:25 एकरसेति राजा सुलेमान ह यहोयादा के बेटा बनायाह ला हुकूम दीस अऊ ओह गीस अऊ अदोनियाह ऊपर घात करके ओला मार डारिस।
1KI 2:26 अबियातार पुरोहित ला राजा ह कहिस, “अनातोत नगर म अपन भुइयां म जा। तेंह मार डारे जाय के लईक अस, पर मेंह तोला अभी नइं मारंव, काबरकि तें मोर ददा दाऊद के आघू म परमपरधान यहोवा के सन्दूक ला उठाय करत रहय अऊ मोर ददा के जम्मो दुख म तेंह ओकर संग रहय।”
1KI 2:27 सुलेमान ह अबियातार ला पुरोहित पद ले उतार दीस, ये किसम ले जऊन बचन यहोवा ह एली के बंस के बारे म सीलो म कहे रिहिस, ओह पूरा होईस।
1KI 2:28 जब ये खबर योआब करा हबरिस, जऊन ह अबसालोम के संग तो नइं, पर अदोनियाह के संग साजिस रचे रिहिस, तब ओह यहोवा के तम्बू म भाग के गीस अऊ बेदी के सींगमन ला धर लीस।
1KI 2:29 राजा सुलेमान ला बताय गीस कि योआब ह यहोवा के तम्बू म भाग गे हवय अऊ बेदी के बाजू म हवय। तब सुलेमान ह यहोयादा के बेटा बनायाह ला हुकूम दीस, “जा अऊ ओला मार डार!”
1KI 2:30 तब बनायाह ह यहोवा के तम्बू भीतर गीस अऊ योआब ला कहिस, “राजा के हुकूम अय कि बाहिर निकल आ!” पर ओह जबाब दीस, “नइं, मेंह इहां मरहूं।” बनायाह ह ये बात के सूचना राजा ला दीस, “योआब ह मोला अइसने जबाब दे हवय।”
1KI 2:31 तब राजा ह बनायाह ला हुकूम दीस, “ओकर कहे के मुताबिक ओला मार डार। ओला मारके माटी देय दे, अऊ अइसने करके योआब के दुवारा बहाय निरदोसमन के खून के दोस ले मोला अऊ मोर जम्मो परिवार ला बरी कर।
1KI 2:32 जऊन खून, ओह बहाय रिहिस, यहोवा ह ओकर बदला लीही, काबरकि मोर ददा दाऊद के बिगर जाने, ओह दू झन मनखे ऊपर हमला करिस अऊ ओमन ला तलवार ले मार डारिस। ओ दूनों मनखे—नेर के बेटा अबनेर, इसरायल के सेना के सेनापति, अऊ येतेर के बेटा अमासा यहूदा के सेना के सेनापति रिहिन। ये दूनों झन योआब ले जादा बने अऊ धरमी मनखे रिहिन।
1KI 2:33 येमन के खून के दोस ह योआब अऊ ओकर संतान के मुड़ म सदाकाल तक बने रहय। पर दाऊद अऊ ओकर संतान, ओकर घर अऊ ओकर सिंघासन ऊपर यहोवा के सांति सदाकाल तक बने रहय।”
1KI 2:34 एकरसेति यहोयादा के बेटा बनायाह ह जाके योआब ला मार डारिस, अऊ ओला देहात इलाका म ओकर घर म माटी दिये गीस।
1KI 2:35 तब राजा सुलेमान ह योआब के जगह म यहोयादा के बेटा बनायाह ला सेना के सेनापति ठहिराईस अऊ अबियातार के जगह म सादोक पुरोहित ला ठहिराईस।
1KI 2:36 तब राजा ह सिमी ला बुलवाईस अऊ ओला कहिस, “तें यरूसलेम म अपन बर एक घर बना अऊ उहां रह, पर उहां ले बाहिर कोनो अऊ जगह ला झन जाबे।
1KI 2:37 तें ये बात ला पक्का जान ले कि जऊन दिन तेंह निकलके किदरोन घाटी के ओ पार जाबे, त ओहीच दिन, तेंह जरूर मार डारे जाबे; तोर खून के दोस तोरेच मुड़ ऊपर होही।”
1KI 2:38 सिमी ह राजा ला जबाब दीस, “तेंह बने बात कहे हस। जइसने मोर मालिक, राजा ह कहे हवय, तोर सेवक ह वइसने ही करही।” अऊ सिमी ह बहुंत समय तक यरूसलेम म रिहिस।
1KI 2:39 पर तीन साल के बाद, सिमी के दू झन गुलाम माका के बेटा आकीस करा भाग गीन, जऊन ह गत नगर के राजा रिहिस, अऊ सिमी ला ये बात बताय गीस, “तोर गुलाममन गत म हवंय।”
1KI 2:40 ये सुनके सिमी ह अपन गदहा ऊपर काठी कसिस अऊ अपन गुलाममन ला खोजे बर गत म आकीस करा गीस। ये किसम ले सिमी ह निकलके गीस अऊ अपन गुलाममन ला गत ले वापिस ले आईस।
1KI 2:41 जब सुलेमान ला बताय गीस कि सिमी ह यरूसलेम ले गत गे रिहिस अऊ फेर वापिस आ गे हवय,
1KI 2:42 त ओह सिमी ला बुलवाईस अऊ ओला कहिस, “का मेंह तोला यहोवा के कसम खवाके ये चेतउनी नइं दे रहेंव, ‘तें ये बात पक्का जान ले कि जऊन दिन तेंह निकलके कोनो अऊ जगह ला जाबे, त तेंह जरूर मार डारे जाबे’? अऊ ओ समय तेंह मोला कहे रहय, ‘तेंह बने बात कहे हस। मेंह येला मानहूं।’
1KI 2:43 त फेर तेंह यहोवा के खाय कसम ला काबर टोरय अऊ मोर दिये हुकूम ला नइं मानय?”
1KI 2:44 राजा ह सिमी ला ये घलो कहिस, “तेंह खुद अपन मन म ओ जम्मो गलत काम ला जानत हस, जऊन ला तेंह मोर ददा दाऊद के बिरूध करे हवस। अब यहोवा ह तोर गलत काम के बदला तोर ले लीही।
1KI 2:45 पर राजा सुलेमान ह आसीस पाही, अऊ दाऊद के सिंघासन ह यहोवा के आघू म सदा मजबूत बने रहिही।”
1KI 2:46 तब राजा ह यहोयादा के बेटा बनायाह ला हुकूम दीस, अऊ ओह बाहिर म जाके सिमी ला अइसने मारिस कि ओह मर गीस। ये किसम ले सुलेमान के हांथ म राज ह स्थापित होईस।
1KI 3:1 सुलेमान ह मिसर के राजा फिरौन के संग एक संधि करके ओकर बेटी ले बिहाव कर लीस। ओह ओला लानके दाऊद के सहर म तब तक रखिस, जब तक कि ओह अपन महल अऊ यहोवा के मंदिर अऊ यरूसलेम के चारों कोति दीवार नइं बनवा लीस।
1KI 3:2 मनखेमन अभी तक ले ऊंचहा जगहमन म बलिदान करत रिहिन, काबरकि ओ समय तक यहोवा के नांव म कोनो मंदिर नइं बने रिहिस।
1KI 3:3 सुलेमान ह अपन ददा दाऊद के बताय बिधिमन म चले के दुवारा यहोवा बर अपन मया देखाईस, पर ओह ऊंचहा जगहमन म बलि चघाय अऊ धूप जलाय करत रिहिस।
1KI 3:4 राजा ह गिबोन सहर ला बलि चघाय बर गीस, काबरकि ओह सबले जादा महत्व के ऊंच जगह रिहिस, अऊ सुलेमान ह उहां बेदी म एक हजार होम-बलिदान करिस।
1KI 3:5 गिबोन म यहोवा ह रथिया सपना म सुलेमान करा परगट होईस, अऊ परमेसर ह कहिस, “जऊन भी चीज तेंह चाहत हस, मांग अऊ मेंह तोला दूहूं।”
1KI 3:6 सुलेमान ह जबाब दीस, “तेंह अपन सेवक, मोर ददा दाऊद ऊपर बहुंत दया करे हवस, काबरकि ओह तोर बर बिसवासयोग्य रिहिस अऊ मन म धरमी अऊ ईमानदार रिहिस। तेंह अभी घलो ओकर ऊपर बहुंत दया करे हवस अऊ ओला ओकर सिंघासन म बईठे बर एक बेटा देय हवस, जऊन ह आज ओमा बिराजे हवय।
1KI 3:7 “अब हे यहोवा, मोर परमेसर, तेंह अपन सेवक ला मोर ददा दाऊद के जगह म राजा बनाय हवस। पर मेंह तो एक छोटे लइका सहीं अंव अऊ नइं जानंव कि मेंह अपन काम ला कइसे करंव।
1KI 3:8 तोर सेवक ह इहां तोर चुने हुए मनखेमन के बीच म हवय, अऊ येमन अतेक जादा हवंय कि येमन के गनती करे नइं जा सकय।
1KI 3:9 एकरसेति तोर मनखेमन ऊपर राज करे बर, अऊ सही अऊ गलत ला परखे बर, तेंह अपन सेवक ला समझे के सक्ति दे। काबरकि कोन एकर लईक हवय कि तोर ये अब्बड़ मनखेमन ऊपर राज कर सकय?”
1KI 3:10 ये बात ले परभू ह खुस होईस कि सुलेमान ह अइसने बरदान मांगे हवय।
1KI 3:11 एकरसेति परमेसर ह ओला कहिस, “जब तेंह ये बरदान मांगे हस अऊ न तो लम्बा उमर, न धन-संपत्ति अऊ न ही अपन बईरीमन के मिरतू मांगे हस, पर नियाय करे बर समझे के सक्ति मांगे हस,
1KI 3:12 त जऊन कुछू तेंह मांगे हस, मेंह ओला पूरा करहूं। मेंह तोला एक बुद्धिमान अऊ समझवाला मन दूहूं, ताकि तोर सहीं न तो तोर ले पहिले कोनो कभू होईस, अऊ न ही तोर बाद कोनो कभू होही।
1KI 3:13 येकर अलावा मेंह तोला ओ चीज घलो दूहूं, जेला तेंह नइं मांगे हस—धन अऊ आदरमान दूनों—ताकि तोर जिनगी भर तोर सहीं अऊ कोनो राजा नइं होही।
1KI 3:14 अऊ यदि तेंह मोर हुकूममन ला मानत चलत रहिबे अऊ अपन ददा दाऊद के सहीं मोर बिधि अऊ हुकूममन के पालन करबे, त मेंह तोर उमर ला घलो बढ़ाहूं।”
1KI 3:15 तब सुलेमान ह जाग गीस—अऊ ओह समझ गीस कि येह एक सपना रिहिस। तब ओह यरूसलेम लहुंट गीस, अऊ परभू के करार के सन्दूक के आघू म ठाढ़ होईस अऊ होम-बलिदान अऊ मेल-बलिदान करिस। तब ओह अपन जम्मो करमचारीमन बर एक भोज करिस।
1KI 3:16 एक बार दू झन बेस्या राजा करा आके ओकर आघू म ठाढ़ होईन।
1KI 3:17 ओमा के एक झन कहिस, “हे मोर मालिक! में अऊ ये माईलोगन, हमन दूनों एकेच घर म रहिथन, अऊ येकर संग म रहत मोला एक लइका होईस।
1KI 3:18 मोर लइका होय के तीन दिन के बाद, ये माईलोगन ला घलो एक लइका होईस। हमन अकेला रहेंन; हमर दूनों के छोंड़ घर म अऊ कोनो नइं रिहिस।
1KI 3:19 “रथिया ये माईलोगन के बेटा ह येकर खाल्हे म दबके मर गीस।
1KI 3:20 जब में, तोर सेविका ह सोवत रहेंव, तब येह आधा रथिया उठिस, अऊ मोर बाजू ले मोर बेटा ला लेके अपन छाती म रखिस अऊ अपन मरे बेटा ला मोर छाती म रख दीस।
1KI 3:21 बिहनियां, जब में अपन बेटा ला दूध पीयाय बर उठेंव, त देखेंव कि ओह मर गे रहय! पर जब मेंह बिहनियां के अंजोर म धियान से देखेंव, त जानेंव कि येह मोर जनमाय बेटा नो हय।”
1KI 3:22 तब दूसर माईलोगन ह कहिस, “नइं! जीयत लइका ह मोर बेटा अय; मरे लइका ह तोर बेटा अय।” पर पहिली माईलोगन ह जोर देके कहिस, “नइं! मरे लइका ह तोर अय; अऊ जीयत लइका ह मोर अय।” ये किसम ले ओमन राजा के आघू म बहस करे लगिन।
1KI 3:23 राजा ह कहिस, “एक झन ह कहत हे, ‘मोर बेटा ह जीयत हवय अऊ तोर बेटा ह मर गे हवय,’ जबकि दूसर झन ह कहत हे, ‘नइं! तोर बेटा ह मर गे हवय अऊ मोर ह जीयत हवय।’ ”
1KI 3:24 तब राजा ह कहिस, “मोर करा एक ठन तलवार लानव।” एकरसेति एक तलवार राजा करा लाने गीस।
1KI 3:25 तब राजा ह हुकूम दीस, “जीयत लइका ला काटके दू कुटा कर दव अऊ आधा एक झन ला अऊ आधा दूसर झन ला दे दव।”
1KI 3:26 तब ओ माईलोगन जेकर बेटा जीयत रिहिस, ओकर मन ह अपन बेटा के मया ले भर आईस अऊ ओह राजा ले कहिस, “हे मोर मालिक! जीयत लइका ला ओला देय दे! लइका ला झन मार!” पर दूसर माईलोगन ह कहिस, “ओ लइका ह न तो तोर होवय अऊ न ही मोर। काटके ओकर दू कुटा कर दव!”
1KI 3:27 तब राजा ह अपन ये फैसला सुनाईस, “पहिली माईलोगन ला जीयत लइका दे दव। लइका ला झन मारव; काबरकि ओह लइका के दाई अय।”
1KI 3:28 जब जम्मो इसरायलीमन राजा के दिये फैसला ला सुनिन, त ओमन राजा के भय मानके ओकर आदर करिन, काबरकि ओमन देखिन कि ओकर करा नियाय करे बर परमेसर के दिये बुद्धि हवय।
1KI 4:1 राजा सुलेमान ह जम्मो इसरायल ऊपर राज करिस।
1KI 4:2 अऊ येमन ओकर परधान करमचारी रिहिन: सादोक के बेटा अजरयाह—पुरोहित;
1KI 4:3 सीसा के बेटा एलीहोरेप अऊ अहियाह—सचिव; अहीलूद के बेटा यहोसापात—इतिहास के लिखइया;
1KI 4:4 यहोयादा के बेटा बनायाह—परधान सेनापति; सादोक अऊ अबियातार—पुरोहित;
1KI 4:5 नातान के बेटा अजरयाह—जिला राजपालमन के ऊपर मुखिया; अऊ नातान के बेटा जाबूद—एक पुरोहित अऊ राजा के सलाहकार;
1KI 4:6 अहीसार—महल के अधिकारी; अब्दा के बेटा अदोनीराम—बंधुवा बनिहारमन के ऊपर मुखिया।
1KI 4:7 जम्मो इसरायल म सुलेमान के बारह जिला राजपाल रिहिन, जऊन मन राजा अऊ राज-घराना बर जेवन के परबंध करत रिहिन। हर एक राजपाल ह साल म ठहिराय एक महिना के जेवन के परबंध करय।
1KI 4:8 राजपालमन के नांव ये रिहिस: बेन-हूर—एपरैम के पहाड़ी इलाका म;
1KI 4:9 बेन-देकर—माकस, सालबीम, बेत-सेमेस अऊ एलोन-बेतानन म;
1KI 4:10 बेन-हेसेद—अरूब्बोत म (सोको अऊ हेपेर के जम्मो देस ओकर रिहिन);
1KI 4:11 बेन-अबीनादाब—नपोत-दोर म (येह सुलेमान के बेटी तापत ले बिहाव करे रिहिस);
1KI 4:12 अहीलूद के बेटा बाना—तानाक, मगिद्दो अऊ बेत-सान के ओ जम्मो देस म रिहिस, जऊन ह सारतान के बाद अऊ यिजरेल के खाल्हे, बेत-सान अऊ आबेल-महोला ले लेके योकमाम के ओ पार तक रिहिस;
1KI 4:13 बेन-गेबेर—रामोत-गिलाद म (गिलाद म मनस्से के बेटा याईर के गांवमन ओकर रिहिन, अऊ संग म बासान के अरगोब के इलाका अऊ कांसा दुवार के डंडामन के संग बड़े दीवारवाले साठ ठन सहर घलो ओकर रिहिन);
1KI 4:14 इद्दो के बेटा अहीनादाब—महनैम सहर म;
1KI 4:15 अहीमास—नपताली म (येह सुलेमान के बेटी बासमत ले बिहाव करे रिहिस);
1KI 4:16 हूसै के बेटा बाना—आसेर अऊ आलोत म;
1KI 4:17 पारूह के बेटा यहोसापात—इस्साकार के इलाका म;
1KI 4:18 एला के बेटा सिमी—बिनयामीन म;
1KI 4:19 ऊरी के बेटा गेबेर—गिलाद म (अमोरीमन के राजा सीहोन के देस अऊ बासान के राजा ओग के देस)। ये जिला के सिरिप ओहीच ह राजपाल रिहिस।
1KI 4:20 यहूदा अऊ इसरायल के मनखेमन समुंदर तीर के बालू के सहीं अनगिनत रिहिन; ओमन खावत-पीयत रिहिन अऊ खुस रिहिन।
1KI 4:21 अऊ सुलेमान ह फरात नदी अऊ पलिस्तीमन के देस ले लेके मिसर के सीमना तक जम्मो राज म सासन करत रिहिस। ये देसमन सुलेमान ला ओकर जिनगी भर राजकीय लगान दीन अऊ ओकर अधीन रिहिन।
1KI 4:22 सुलेमान अऊ ओकर परिवार के एक दिन के रसोई तीस कोर बढ़िया पीसान, साठ कोर मैदा,
1KI 4:23 कोठार म रखके खवाय गे दस ठन बईला, मैदान म चराय गे बीस ठन पसु अऊ एक सौ भेड़-बकरी अऊ संग म हिरन, चिकारा, सांबर अऊ मनपसंद चिरई।
1KI 4:24 काबरकि ओह फरात नदी के पछिम के जम्मो राज, तिपसह सहर ले लेके गाजा सहर तक राज करत रिहिस, अऊ ओकर चारों कोति सांति रिहिस।
1KI 4:25 सुलेमान के जिनगी भर, दान सहर ले लेके बेरसेबा सहर तक, यहूदा अऊ इसरायल के मनखेमन अपन-अपन अंगूर अऊ अंजीर खाके निडर रहत रिहिन।
1KI 4:26 सुलेमान करा रथ के घोड़ामन बर चार हजार घुड़साल के कोठरी, अऊ बारह हजार घोड़ा रिहिन।
1KI 4:27 जिला के राजपालमन अपन-अपन ठहिराय महिना म, राजा सुलेमान अऊ ओकर मेज म खवइया जम्मो मनखे बर जेवन के परबंध करंय। ओमन ये बात के धियान रखंय कि कोनो चीज के कमी झन होवय।
1KI 4:28 ओमन रथ के घोड़ा अऊ आने घोड़ामन बर घलो अपन बर ठहिराय जौ अऊ पैंरा के भाग सही जगह म लानंय।
1KI 4:29 परमेसर ह सुलेमान ला बहुंत बुद्धि अऊ अंतर-गियान दीस, अऊ ओकर समझ ला अइसने बढ़ाईस, जइसने समुंदर तीर के बालू, जऊन ला कि नापे नइं जा सकय।
1KI 4:30 सुलेमान के बुद्धि ह पूरब देस के जम्मो मनखे अऊ मिसर देस के जम्मो मनखेमन के बुद्धि ले घलो बढ़के रिहिस।
1KI 4:31 ओह जम्मो मनखेमन ले बढ़के बुद्धिमान रिहिस; एतान एजराही अऊ माहोल के बेटा हेमान, कलकोल अऊ दरदा ले घलो जादा बुद्धिमान रिहिस। अऊ ओकर कीरति ह आसपास के जम्मो देस म फईल गीस।
1KI 4:32 ओह तीन हजार नीतिबचन कहिस, अऊ ओकर एक हजार पांच गीत घलो हवंय।
1KI 4:33 ओह रूख-रईमन के बारे म गोठियाईस—लबानोन के देवदार रूख ले लेके दीवारमन म उगइया जूफा तक के चरचा करिस। ओह पसु अऊ चिरई, पेट के भार रेंगइया जन्तु अऊ मछरीमन के बारे म घलो कहिस।
1KI 4:34 जम्मो देस के मनखेमन सुलेमान के बुद्धि के बात सुने बर आवत रिहिन—संसार के जम्मो राजा, जऊन मन ओकर बुद्धि के बारे म सुने रिहिन, अपन मनखेमन ला सुलेमान के बुद्धि के बात सुने बर पठोत रिहिन।
1KI 5:1 जब सूर सहर के राजा हीराम ह ये सुनिस कि सुलेमान ला ओकर ददा दाऊद के जगह म राजा बनाय गे हवय, त ओह अपन दूत ला सुलेमान करा पठोईस, काबरकि दाऊद के संग ओकर हमेसा संगवारी के नाता रिहिस।
1KI 5:2 सुलेमान ह वापिस हीराम करा ये संदेस पठोईस:
1KI 5:3 “तेंह तो जानत हस कि मोर ददा दाऊद ह यहोवा ओकर परमेसर के नांव के एक मंदिर नइं बनवा सकिस काबरकि ओह चारों कोति लड़ई म तब तक उलझे रिहिस, जब तक कि यहोवा ह ओकर बईरीमन ला ओकर गोड़ खाल्हे नइं कर दीस।
1KI 5:4 पर अब यहोवा मोर परमेसर ह मोला चारों कोति ले बिसराम दे हवय, अऊ अब न तो कोनो बिरोधी हवय, अऊ न ही कोनो बिपत्ति दिखत हे।
1KI 5:5 एकरसेति मेंह यहोवा अपन परमेसर के नांव के एक मंदिर बनाय चाहत हंव, जइसे कि यहोवा ह मोर ददा दाऊद ले कहे रिहिस, ‘तोर ओ बेटा ह मोर नांव के मंदिर बनाही, जेला मेंह तोर जगह म सिंघासन म बईठाहूं।’
1KI 5:6 “एकरसेति अब तेंह हुकूम दे कि मोर बर लबानोन के देवदार रूख काटे जावंय। मोर आदमीमन तोर आदमीमन के संग काम करहीं, अऊ जऊन कुछू भी बनी, तेंह अपन मनखेमन बर ठहिराबे, ओला मेंह दूहूं। तेंह तो जानत हस कि सीदोनीमन के सहीं कठवा काटे के जानकार मनखे हमर करा एको झन नइं एं।”
1KI 5:7 जब हीराम ह सुलेमान के संदेस ला सुनिस, त ओह अब्बड़ खुस होईस अऊ कहिस, “आज यहोवा के महिमा होवय, काबरकि ओह दाऊद ला ओ बड़े जाति ऊपर राज करे बर एक बुद्धिमान बेटा दे हवय।”
1KI 5:8 तब हीराम ह सुलेमान करा ये खबर पठोईस: “मोला तोर संदेस ह मिल गे हवय अऊ तोर ईछा के मुताबिक मेंह तोला देवदार अऊ सनोवर के कठवा दूहूं।
1KI 5:9 मोर आदमीमन कठवा ला लबानोन ले भूमध्य सागर तक लानहीं, अऊ मेंह ओमन के बेड़ा बनवाके, समुंदर के रसता ले ओ जगह म भिजवा दूहूं, जिहां तें कहिबे। उहां मेंह ओमन ला खोलके अलग-अलग कर दूहूं, तब तें ओमन ला ले जा सकत हस। अऊ तेंह मोर राज-परिवार बर जेवन देय के दुवारा मोर ईछा ला पूरा करबे।”
1KI 5:10 ये किसम ले हीराम ह सुलेमान के ईछा के मुताबिक ओला देवदार अऊ सनोवर के कठवा देवन लगिस,
1KI 5:11 अऊ सुलेमान ह हीराम के परिवार के खाय बर ओला बीस हजार कोर गहूं अऊ बीस हजार बत पेरे गय जैतून तेल दीस। सुलेमान ह हीराम करा हर साल अइसने जेवन पठोईस।
1KI 5:12 यहोवा ह अपन वायदा के मुताबिक सुलेमान ला बुद्धि दीस। हीराम अऊ सुलेमान के बीच म सांति के नाता बने रिहिस अऊ ओ दूनों झन आपस म एक करार घलो करिन।
1KI 5:13 राजा सुलेमान ह जम्मो इसरायल ले तीस हजार मनखेमन ला जरूरी बनिहार के रूप म लगाईस।
1KI 5:14 ओह ओमन के दस-दस हजार के दल बनाईस अऊ हर दल ला पारी-पारी करके महिना म लबानोन पठोय करत रिहिस अऊ ओमन एक महिना लबानोन म अऊ दू महिना घर म रहे करत रिहिन। अदोनीराम ह ये जरूरी बनिहारमन के अधिकारी रिहिस।
1KI 5:15 सुलेमान करा पहाड़ी म सत्तर हजार बोझा ढोवइया बनिहार अऊ अस्सी हजार पथरा कटइया मनखेमन रिहिन,
1KI 5:16 येमन ला छोंड़के सुलेमान करा तीन हजार तीन सौ बनिहारमन के अधिकारी रिहिन, जऊन मन ओ काम के देखरेख करंय अऊ बनिहारमन ला काम बतावंय।
1KI 5:17 राजा के हुकूम ले ओमन बड़े-बड़े कीमती पथरा ला खदान ले निकालत रिहिन, ताकि गढ़े गय पथरामन ला मंदिर के नीव म डाले जा सकय।
1KI 5:18 ये किसम ले, सुलेमान अऊ हीराम के कारीगरमन अऊ गबाल के बनिहारमन मंदिर बनाय बर लकड़ी अऊ पथरामन ला काटिन अऊ तियार करिन।
1KI 6:1 इसरायलीमन के मिसर देस ले निकले के चार सौ अस्सीवां साल के बाद, जऊन ह कि सुलेमान के इसरायल ऊपर राज करे के चौथा साल रिहिस, जीव के महिना म, जऊन ला दूसरा महिना घलो कहे जावय, सुलेमान ह यहोवा के मंदिर ला बनाय के काम सुरू करिस।
1KI 6:2 जऊन मंदिर, राजा सुलेमान ह यहोवा बर बनाईस, ओह साठ क्यूबीट लम्बा, बीस क्यूबीट चौड़ा अऊ तीस क्यूबीट ऊंचा रिहिस।
1KI 6:3 मंदिर के सबले बड़े कमरा के आघू म जऊन मंडप रिहिस, ओकर लम्बई मंदिर के चौड़ई के बरोबर, याने कि बीस क्यूबीट रिहिस, अऊ मंदिर के आघू म मंडप ह दस क्यूबीट निकले रिहिस।
1KI 6:4 ओह मंदिर के दीवारमन म ऊंचई म संकरा खिड़कीमन ला बनाईस।
1KI 6:5 सबले बड़े कमरा अऊ भीतरी पबितर-स्थान के दीवारमन के सामने, ओह भवन के चारों कोति एक परिसर बनाईस, जेकर किनारे म कमरामन रहंय।
1KI 6:6 सबले खाल्हे वाले मंजिल के चौड़ई पांच क्यूबीट, बीच वाले मंजिल के छै क्यूबीट अऊ तीसर मंजिल के चौड़ई सात क्यूबीट रिहिस। ओह मंदिर के बाहिर चारों कोति निकले हुए चीज बनाईस, ताकि मंदिर के दीवार म कोनो घलो चीज जोड़े झन जा सकय।
1KI 6:7 मंदिर के बनाय म, सिरिप खदान म गढ़े गय पथरामन के उपयोग करे गीस, अऊ मंदिर बने के बेरा, कोनो हथौड़ा, छैनी या अऊ कोनो किसम के लोहा के औजार के अवाज मंदिर इलाका म सुनई नइं दीस।
1KI 6:8 खाल्हे के मंजिल म जाय बर मंदिर के दक्खिन कोति कपाट रिहिस; बीच के मंजिल म जाय बर एक सीढ़ी रिहिस अऊ उहां ले तीसरा मंजिल म जाय बर घलो सीढ़ी रिहिस।
1KI 6:9 ओह छानी म बड़े अऊ लम्बा लकड़ीमन के संग देवदार के तखतामन ला लगाईस, अऊ मंदिर के काम ला पूरा करिस।
1KI 6:10 अऊ ओह पूरा मंदिर के किनारे कमरामन ला बनवाईस। हर कमरा के ऊंचई पांच क्यूबीट रिहिस, अऊ ये कमरामन मंदिर ले देवदार के लकड़ी ले जुड़े रिहिन।
1KI 6:11 तब यहोवा के ये बचन सुलेमान करा आईस:
1KI 6:12 “जइसने कि तेंह ये मंदिर ला बनावत हस, यदि तेंह मोर बिधि, कानून अऊ हुकूममन के मुताबिक चलके ओमन के पालन करबे, त जऊन वायदा मेंह तोर ददा दाऊद ले करे रहेंव, ओला मेंह तोर जरिये पूरा करहूं।
1KI 6:13 अऊ मेंह इसरायलीमन के बीच म निवास करहूं अऊ अपन इसरायली मनखेमन ला नइं छोंड़हूं।”
1KI 6:14 सुलेमान ह मंदिर बनाय के काम ला पूरा करिस।
1KI 6:15 ओह मंदिर के भीतरी दीवारमन ला देवदार के तखतामन ले मंदिर के फर्स अऊ छानी ला जोड़िस, अऊ मंदिर के फर्स ला सनोवर के तखता ले बनाईस।
1KI 6:16 ओह मंदिर के भीतर पाछू कोति फर्स ले लेके छानी तक देवदार के तखता लगाके बीस क्यूबीट के एक भीतरी पबितर-स्थान बनाईस; येला महा पबितर स्थान कहे जावय।
1KI 6:17 ये कोठरी के आघू म जऊन मुख्य बड़े कमरा रिहिस, ओह चालीस क्यूबीट लम्बा रिहिस।
1KI 6:18 मंदिर के भीतर ह देवदार लकरी के बने रिहिस अऊ लकरी म लौकी अऊ खिले फूलमन के चित्र बनाय गे रिहिस, उहां जम्मो चीज देवदार लकरी के रिहिस; कोनो चीज पथरा के नइं रिहिस।
1KI 6:19 ओह मंदिर म भीतरी पबितर-स्थान ला तियार करिस ताकि उहां यहोवा के करार के सन्दूक ला रखे जा सकय।
1KI 6:20 ओ भीतरी पबितर-स्थान ह बीस क्यूबीट लम्बा, बीस क्यूबीट चौड़ा अऊ बीस क्यूबीट ऊंचा रिहिस। ओह भीतर ला सुध सोन ले मढ़वाईस अऊ ओह देवदार के बेदी ला घलो मढ़वाईस।
1KI 6:21 सुलेमान ह मंदिर के भीतर ला सुध सोन ले मढ़वाईस, अऊ ओह सोन के जंजीर ला भीतरी पबितर-स्थान के सामने एक तरफ ले दूसर तरफ तक बढ़ाईस; जऊन ह सोन ले मढ़े गे रिहिस।
1KI 6:22 ओह पूरा भीतर के भाग ला सोन ले मढ़वाईस। ओह भीतरी पबितर-स्थान के बेदी ला घलो सोन ले मढ़वाईस।
1KI 6:23 भीतरी पबितर-स्थान बर, ओह जैतून लकड़ी के एक जोड़ा करूब बनाईस, अऊ ओमा के हर एक के ऊंचई दस-दस क्यूबीट रिहिस।
1KI 6:24 पहिली करूब के एक डेना ह पांच क्यूबीट लम्बा, अऊ दूसर डेना ह पांच क्यूबीट लम्बा रिहिस—एक डेना के सिरा ले लेके दूसर डेना के सिरा तक लम्बई दस क्यूबीट रिहिस।
1KI 6:25 दूसर करूब के नाप घलो दस क्यूबीट के रिहिस; दूनों करूब एकेच आकार अऊ बनावट के रिहिन।
1KI 6:26 हर एक करूब के ऊंचई दस क्यूबीट के रिहिस।
1KI 6:27 ओह करूबमन ला मंदिर के सबले भीतर के कमरा म रखिस, अऊ करूबमन के डेनामन फईले रहंय। एक करूब के एक डेना ह एक दीवार ला, जबकि दूसर करूब के डेना ह दूसर दीवार ला छूवत रहय, अऊ दूनों करूब के डेनामन भवन के मांझा म एक-दूसर ले छूवत रिहिन।
1KI 6:28 ओह करूबमन ला सोन ले मढ़वाईस।
1KI 6:29 मंदिर के चारों कोति दीवारमन म, दूनों भीतरी अऊ बाहिरी कमरामन म, ओह करूब, खजूर के रूख अऊ खिले फूल खनवाके बनवाईस।
1KI 6:30 ओह मंदिर के दूनों भीतरी अऊ बाहिरी कमरामन के फर्समन ला सोन ले मढ़वाईस।
1KI 6:31 भीतरी पबितर-स्थान के प्रवेस दुवार बर, ओह जैतून लकड़ी के बने कपाटमन ला बनवाईस, जेमन आकार म पबितर-स्थान के चौड़ई के पांचवां भाग रिहिन।
1KI 6:32 अऊ दू ठन जैतून लकड़ी के कपाट म, ओह करूब, खजूर के रूख अऊ खिले फूल खनवाके बनवाईस, अऊ करूब अऊ खजूर के रूखमन के ऊपर म हथौड़ी ले पीटे सोन मढ़वाईस।
1KI 6:33 ओही किसम ले, ओह मुख्य बड़े कमरा के प्रवेस दुवार बर जैतून लकड़ी के चौखट बनवाईस, जेमन के आकार बड़े कमरा के चौड़ई के चौथा भाग रिहिन।
1KI 6:34 ओह सनोवर के कठवा के घलो दू ठन कपाट बनवाईस, अऊ ये दूनों कपाट म दू-दू ठन पान मुड़े हुए बनाय गे रिहिन।
1KI 6:35 ओह ओमन म घलो करूब, खजूर के रूख अऊ खिले फूल खनवाके बनवाईस अऊ ओमन के ऊपर खनवाय भाग म सही ढंग म हथौड़ी ले पीटे सोन मढ़वाईस।
1KI 6:36 अऊ ओह भीतर के अंगना ला गढ़े गय पथरामन के तीन परत, अऊ एक परत सुघर देवदार रूख के बल्लीमन ले बनाईस।
1KI 6:37 चौथा बछर के जीव नांव के महिना म, यहोवा के मंदिर के नीव रखे गीस।
1KI 6:38 अऊ गियारहवां बछर के बूल नांव के आठवां महिना म, पूरा मंदिर के काम ह दिये गय निरदेस के मुताबिक पूरा हो गीस। सुलेमान ला ये मंदिर बनाय म सात बछर लगिस।
1KI 7:1 सुलेमान ह अपन महल घलो बनाईस, अऊ ओला बनाय म तेरह बछर लगिस।
1KI 7:2 ओह लबानोन के जंगल नांव के महल बनाईस, जेकर लम्बई सौ क्यूबीट, चौड़ई पचास क्यूबीट अऊ ऊंचई तीस क्यूबीट के रिहिस; ओह देवदार के खंभामन के चार कतार म बनिस अऊ खंभामन ला सुघर देवदार के कड़ीमन संभाले रिहिन।
1KI 7:3 येकर छानी ला देवदार लकरी के संग कड़ीमन के ऊपर खंभामन के सहारा म बनाय गीस; उहां पैंतालीस ठन कड़ी रिहिन अऊ येमन एक कतार म पंदरह ठन रिहिन।
1KI 7:4 येकर खिड़कीमन, ऊपर म तीन समूह म रिहिन अऊ येमन एक-दूसर के आमने-सामने रिहिन।
1KI 7:5 जम्मो कपाटमन के चौखटमन चौकोर रिहिन; येमन सामने कोति तीन समूह म रिहिन अऊ येमन एक-दूसर के आमने-सामने रिहिन।
1KI 7:6 ओह एक ठन ओसारा घलो बनाईस, जेकर लम्बई पचास क्यूबीट अऊ चौड़ई तीस क्यूबीट के रिहिस। येकर आघू म एक मंडप रिहिस, अऊ ओकर आघू म खंभामन रहंय अऊ ऊपर म छानी बने रहय।
1KI 7:7 फेर ओह सिंघासन के बड़े कमरा याने कि नियाय के बड़े कमरा ला नियाय करे बर बनाईस, अऊ येमा फर्स ले लेके छत तक देवदार के कठवा के तखताबंदी करवाईस।
1KI 7:8 अऊ जऊन महल म ओह रहइया रिहिस, दूरिहा पाछू म ओहीच ढंग के बनावट रिहिस। सुलेमान ह ये बड़े कमरा सहीं एक महल फिरौन के बेटी बर घलो बनाईस, जेकर ले ओह बिहाव करे रिहिस।
1KI 7:9 ये जम्मो घर, बाहिर ले लेके बड़े अंगना तक अऊ नीव ले लेके छानी के कोना तक, उच्च कोटी के गढ़े गय पथरामन ले बने रिहिस, जेमन के भीतरी अऊ बाहिरी सतह ह चिकना रहय।
1KI 7:10 येमन के नीव म उच्च कोटी के बड़े-बड़े पथरामन ला डाले गे रिहिस, जेमा कुछू पथरा दस क्यूबीट अऊ कुछू पथरा आठ क्यूबीट के रिहिन।
1KI 7:11 ऊपर म उच्च कोटी के गढ़े गय पथरा, अऊ देवदार के कठवा के कड़ीमन रिहिन।
1KI 7:12 बड़े अंगना ह गढ़े गय पथरा के तीन परत अऊ सुघर देवदार के कड़ीमन के एक परत के दीवार ले चारों कोति ले घिरे रिहिस, जइसने कि यहोवा के मंदिर के भीतरी अंगना ह येकर मंडप सहित घिरे रिहिस।
1KI 7:13 राजा सुलेमान ह सूर सहर के हूराम ला बुलवाईस।
1KI 7:14 हूराम के दाई ह नपताली के गोत्र के एक बिधवा रिहिस अऊ ओकर ददा ह सूर देस के निवासी रिहिस अऊ कांसा के बढ़िया कारीगर रिहिस। हूराम ह कांसा के जम्मो किसम के काम करे म बुद्धिमान, समझदार अऊ गियानी रिहिस। ओह राजा सुलेमान करा आईस अऊ ओला दिये गय जम्मो काम ला करिस।
1KI 7:15 ओह कांसा ला ढारके अठारह-अठारह क्यूबीट ऊंच अऊ बारह-बारह क्यूबीट गोलई के दू ठन खंभा बनाईस।
1KI 7:16 ओह खंभा के मुड़ म लगाय बर कांसा ढारके दू ठन कंगनी घलो बनाईस; एक-एक कंगनी के ऊंचई पांच-पांच क्यूबीट रिहिस।
1KI 7:17 खंभामन के मुड़ ऊपर कंगनीमन सात-सात ठन गुंथे गय संकली ले सजे रहंय।
1KI 7:18 खंभामन के ऊपर कंगनीमन ला सजाय बर, ओह गुंथे गय संकलीमन के चारों कोति अनारमन के दू-दू ठन कतार बनाईस। ओह हर कंगनी म अइसने करिस।
1KI 7:19 मंडप के खंभामन के मुड़ ऊपर कंगनीमन कुमुदिनी फूल के आकार के रहंय, अऊ येमन के ऊंचई चार-चार क्यूबीट के रहय।
1KI 7:20 दूनों खंभा के कंगनीमन म, कटोरा आकार वाले भाग के ऊपर, संकली के बाद दू सौ अनार चारों कोति कतार म बने रहंय।
1KI 7:21 ओह खंभामन ला मंदिर के मंडप म सीधा ठाढ़ करिस। दक्खिन कोति के खंभा के नांव ओह याकीन रखिस अऊ उत्तर कोति के खंभा के नांव बोअज रखिस।
1KI 7:22 कंगनीमन के मुड़ ह कुमुदिनी फूल के आकार म रिहिस। अऊ ये किसम ले खंभामन म काम ह पूरा होईस।
1KI 7:23 ओह ढाले गय धातु ले एक बड़े हौज बनाईस, जऊन ह आकार म गोल रिहिस, ओकर बियास ह दस क्यूबीट अऊ ऊंचई पांच क्यूबीट रिहिस। येकर कुल घेरा के नाप तीस क्यूबीट रिहिस।
1KI 7:24 गोल घेरा के खाल्हे म एक-एक क्यूबीट म दस-दस ठन लौकी बने रहंय। लौकीमन ला हौज के संग दू कतार म एके ठन कुटा म ढालके बनाय गे रिहिस।
1KI 7:25 हौज ला बारह ठन बनाय गे बईलामन ऊपर रखे गे रिहिस, जेमा के तीन ठन के मुहूं उत्तर कोति, तीन के मुहूं पछिम कोति, तीन के मुहूं दक्खिन कोति, अऊ तीन के मुहूं पूरब कोति रिहिस। हौज ला ओमन के ऊपर मढ़ाय गे रिहिस, अऊ ओमन के पाछू के भागमन हौज के मांझा कोति रहंय।
1KI 7:26 येकर मोटई लगभग तीन ईंच रिहिस, अऊ ओकर किनारा ह कटोरा के किनारा असन, खिले कुमुदिनी फूल सहीं रिहिस। ओमा दू हजार बत पानी हमात रिहिस।
1KI 7:27 ओह कांसा के दस ठन ठेला घलो बनाईस, हर एक ठेला के लम्बई चार क्यूबीट, चौड़ई घलो चार क्यूबीट अऊ ऊंचई तीन क्यूबीट के रहय।
1KI 7:28 ओ ठेलामन ला ये किसम ले बनाय गीस: ओमन के तखतामन रिहिन, अऊ तखतामन ढांचामन म फंसाय गे रिहिन।
1KI 7:29 ये तखतामन म सेर, बईला अऊ करूब बने रिहिन—अऊ ढांचामन म घलो ये चित्र बने रिहिन। सेर अऊ बईलामन के ऊपर अऊ खाल्हे हथौड़ा ले बनाय गे झालरमन रिहिन।
1KI 7:30 हर एक ठेला म कांसा के चार-चार पहिया अऊ कांसा के धुरीमन रिहिन, अऊ हर एक ठेला म एक-एक ठन हौदी रहय, जऊन ह चार ठन आधार म टिके रहय अऊ येकर हर किनारे म झालरमन लगे रहंय।
1KI 7:31 ठेला के भीतर भाग म एक खुला जगह रहय, जेकर गोलाकार ढांचा ह एक क्यूबीट गहिरा रहय। ये खुला भाग ह गोलाकार रहय अऊ येकर मुहूं के नाप ह डेड़ क्यूबीट के रहय। ये खुला भाग के चारों कोति नक्कासी करे गे रहय। ठेलामन के तखतामन गोलाकार न होके चौकोर रिहिन।
1KI 7:32 चारों पहियामन तखतामन के खाल्हे म रिहिन, अऊ पहियामन के धुरीमन ठेला ले जुड़े रिहिन। हर एक पहिया के ऊंचई डेड़-डेड़ क्यूबीट के रिहिस।
1KI 7:33 पहियामन के बनावट ह रथ के पहियामन सहीं रिहिस; धुरी, चकरी, आरा, अऊ नाभमन जम्मो के जम्मो ढाले गय धातु के बने रिहिन।
1KI 7:34 हर एक ठेला के चारों कोना म एक-एक ठन मुठिया रिहिस, अऊ ये मुठियामन ठेला ले निकले हुए रिहिन।
1KI 7:35 ठेला के टीप म आधा क्यूबीट गहरई के एक गोलाकार तस्मा रिहिस। आधार अऊ तखतामन ठेला के टीप ले जुड़े हुए रिहिन।
1KI 7:36 ओह आधार अऊ तखतामन के ऊपर जम्मो जगह करूब, सेर अऊ खजूर के रूख खनके बनाईस, अऊ चारों कोति झालर घलो बनाईस।
1KI 7:37 ये किसम ले ओह दस ठन ठेलामन ला बनाईस। ओ जम्मो ठेलामन एकेच सांचा एकेच आकार के रिहिन अऊ दिखे म घलो एक सहीं रिहिन।
1KI 7:38 ओह तब कांसा के दस ठन हौदी बनाईस। हर एक हौदी म चालीस-चालीस बत पानी हमात रिहिस अऊ ओमन एक कोति ले दूसर कोति चार-चार क्यूबीट के रिहिन, अऊ ये हौदीमन दसों ठेला म एक-एक ठन रिहिन।
1KI 7:39 ओह पांच ठन ठेला ला मंदिर के दक्खिन कोति अऊ पांच ठन ला उत्तर कोति रखिस। ओह हौज ला दक्खिन कोति, मंदिर के दक्खिन-पूरबी कोना म रखिस।
1KI 7:40 ओह बरतन अऊ बेलचा अऊ छिंचे बर कटोरामन ला घलो बनाईस। ये किसम ले हूराम ह राजा सुलेमान के दुवारा दिये गय काम ला यहोवा के मंदिर म पूरा करिस।
1KI 7:41 दू ठन खंभामन; खंभामन के टीप म कटोरा के आकार के दू ठन कंगनी; खंभामन के टीप म कटोरा के आकार के दूनों कंगनीमन ला सजाय बर दू ठन जाली;
1KI 7:42 दूनों जाली बर चार सौ अनार (खंभामन के टीप म कटोरा के आकार के कंगनीमन ला सजाय बर हर एक जाली म ये अनारमन दू ठन कतार म रहंय);
1KI 7:43 दस ठन खुरामन अऊ ओमन के दस ठन तसला;
1KI 7:44 हौज अऊ ओकर खाल्हे म बारह ठन बईला;
1KI 7:45 बरतन, बेलचा अऊ छिंचनेवाला कटोरामन। ये जम्मो चीज, जेमन ला हूराम ह यहोवा के मंदिर बर राजा सुलेमान के हुकूम ले बनाईस, येमन चमकदार कांसा के बने रिहिन।
1KI 7:46 राजा ह ओमन ला यरदन के मैदान म सुक्कोत अऊ सारतान के बीच चिक्कन माटी के सांचा ले ढलवाय रिहिस।
1KI 7:47 अब्बड़ सामान होय के कारन सुलेमान ह ये चीजमन ला नइं तऊलिस; कांसा के वजन कतेक रिहिस, पता नइं चलिस।
1KI 7:48 सुलेमान ह ओ जम्मो सजावट के चीजमन ला घलो बनवाईस, जेमन यहोवा के मंदिर म रिहिन: सोन के बेदी; सोन के ओ मेज, जेमा भेंट के रोटी रखे जावय;
1KI 7:49 अऊ सुध सोन के दीवटमन (भीतरी पबितर-स्थान के आघू म, पांच ठन जेवनी कोति अऊ पांच ठन डेरी कोति); सोन के फूलवाला काम अऊ दीया अऊ चिमटामन;
1KI 7:50 सुध सोन के तसला, बाती ला काटे बर कतरनी, छिंचे के कटोरामन, बरतन अऊ धूपदानीमन; अऊ मंदिर के सबले भीतर के कमरा, महा पबितर स्थान के कपाटमन बर सोन के कब्जा, अऊ मंदिर के मुख्य सभा मंडप के कपाटमन बर घलो सोन के कब्जा।
1KI 7:51 जब राजा सुलेमान ह यहोवा के मंदिर के जम्मो बुता ला पूरा कर डारिस, तब ओह ओ चीजमन ला लानिस, जेमन ला ओकर ददा दाऊद ह अरपन करे रिहिस—ओमा सोन अऊ चांदी अऊ सजावट के चीजमन रिहिन—अऊ ओह ओमन ला यहोवा के मंदिर के खजाना म रखिस।
1KI 8:1 तब राजा सुलेमान ह इसरायल के अगुवामन ला, गोत्रमन के जम्मो मुखियामन ला अऊ इसरायली परिवारमन के मुखियामन ला यरूसलेम म अपन करा बलाईस कि ओमन यहोवा के करार के सन्दूक ला सियोन ले याने कि दाऊद के सहर ले लेय आवंय।
1KI 8:2 एकरसेति जम्मो इसरायलीमन एतानीम नांव के सातवां महिना म तिहार के बेरा म राजा सुलेमान करा जूरिन।
1KI 8:3 जब इसरायल के जम्मो अगुवामन आ गीन, त पुरोहितमन सन्दूक ला उठाईन,
1KI 8:4 अऊ ओमन यहोवा के करार के सन्दूक अऊ मिलापवाला तम्बू अऊ ओमा के जम्मो पबितर चीजमन ला ऊपर ले आईन। पुरोहित अऊ लेवीमन ओमन ला उठाके लानिन,
1KI 8:5 अऊ राजा सुलेमान अऊ जम्मो इसरायली सभा, जऊन मन ओकर करा जूरे रिहिन, ओमन सन्दूक के आघू म होके अतेक भेड़ अऊ पसुमन ला बलि करत रिहिन कि ओमन के हिसाब या गनती नइं करे जा सकिस।
1KI 8:6 तब पुरोहितमन यहोवा के करार के सन्दूक ला ओकर जगह म याने कि मंदिर के भीतरी पबितर-स्थान, महा पबितर स्थान म लानिन, अऊ ओला करूबमन के डेना के खाल्हे म मढ़ा दीन।
1KI 8:7 करूबमन अपन डेनामन ला सन्दूक के ऊपर फईलाय रिहिन अऊ सन्दूक अऊ ओकर बोहे के डंडामन ला छाया करत रिहिन।
1KI 8:8 ये डंडामन अतेक लम्बा रिहिन कि ओमन के छोरमन ला भीतरी पबितर-स्थान के सामने पबितर स्थान ले देखे जा सकत रिहिस, पर ओमन ला पबितर स्थान के बाहिर ले नइं देखे जा सकत रिहिस; अऊ ओमन आज भी उहेंच हवंय।
1KI 8:9 सन्दूक म सिरिप ओ दू ठन पथरा के पटिया के छोंड़ अऊ कुछू नइं रिहिस, जेला मूसा ह होरेब पहाड़ ऊपर येमा रखे रिहिस, जिहां इसरायलीमन के मिसर देस ले बाहिर निकले के बाद, यहोवा ह ओमन के संग एक करार करे रिहिस।
1KI 8:10 जब पुरोहितमन पबितर स्थान ले बाहिर निकल गीन, तब यहोवा के मंदिर ह बादर ले भर गीस।
1KI 8:11 अऊ पुरोहितमन बादर के कारन अपन सेवा नइं देय सकिन, काबरकि यहोवा के महिमा ले ओकर मंदिर ह भर गे रिहिस।
1KI 8:12 तब सुलेमान ह कहिस, “यहोवा ह कहे हवय कि ओह करिया बादर म निवास करही;
1KI 8:13 मेंह सही म तोर बर एक सानदार मंदिर बनाय हंव; तोर हमेसा रहे बर निवास के एक ठन जगह।”
1KI 8:14 जब इसरायल के जम्मो सभा ह उहां ठाढ़े रिहिस, त राजा ह ओमन कोति मुहूं करके ओमन ला आसीरबाद दीस।
1KI 8:15 तब ओह कहिस: “यहोवा, इसरायल के परमेसर के महिमा होवय, जऊन ह मोर ददा दाऊद के संग अपन मुहूं ले करे गय वायदा ला अपन हांथ ले पूरा करे हवय। काबरकि ओह कहिस,
1KI 8:16 ‘जऊन दिन ले मेंह अपन इसरायली मनखेमन ला मिसर ले निकालके लानंय, तब ले मेंह इसरायल के कोनो गोत्र के एको ठन सहर ला एक मंदिर बनाय बर नइं चुने हवंव कि उहां मोर नांव होवय, पर मेंह दाऊद ला अपन इसरायली मनखेमन ऊपर राज करे बर चुने हवंव।’
1KI 8:17 “मोर ददा दाऊद के मन म ये बात रिहिस कि ओह इसरायल के परमेसर, यहोवा के नांव खातिर एक मंदिर बनावय।
1KI 8:18 पर यहोवा ह मोर ददा दाऊद ला कहिस, ‘मोर नांव खातिर अपन मन म, एक मंदिर बनवाय के ईछा करके, तेंह बने करे हवस।
1KI 8:19 तभो ले, तेंह ओ मनखे नो हस, जऊन ह ओ मंदिर ला बनाही, पर तोर बेटा, तोर खुद के मांस अऊ लहू—ओही ह मोर नांव बर मंदिर बनवाही।’
1KI 8:20 “यहोवा ह अपन करे गय वायदा ला पूरा करे हवय: मेंह अपन ददा दाऊद के जगह म राजा बने हंव अऊ अब यहोवा के वायदा के मुताबिक मेंह इसरायल के सिंघासन म बईठे हवंव, अऊ मेंह यहोवा, इसरायल के परमेसर के नांव खातिर मंदिर ला बनाय हवंव।
1KI 8:21 मेंह उहां सन्दूक बर एक जगह ठहिराय हवंव, जेमा यहोवा के ओ करार हवय, जेला ओह हमर पुरखामन ले तब करे रिहिस, जब ओह ओमन ला मिसर देस ले निकालके लानिस।”
1KI 8:22 तब सुलेमान ह इसरायल के जम्मो सभा के आघू म यहोवा के बेदी के आघू म ठाढ़ होईस, अऊ अपन हांथ ला स्वरग कोति उठाईस
1KI 8:23 अऊ कहिस: “हे यहोवा, इसरायल के परमेसर! ऊपर स्वरग म, अऊ खाल्हे धरती म तोर असन कोनो परमेसर नइं एं—तेंह अपन ओ सेवकमन संग करे मया के करार ला पूरा करथस, जेमन पूरा मन से तोर रसता म बने रहिथें।
1KI 8:24 तेंह अपन सेवक मोर ददा दाऊद ले करे ओ वायदा ला बनाय रखे हस, जेला तेंह अपन मुहूं ले बोलके करे रहय अऊ अपन हांथ ले ओला पूरा करे हस—जइसने कि येह आज हवय।
1KI 8:25 “अब हे यहोवा, इसरायल के परमेसर! अपन सेवक मोर ददा दाऊद ले करे गय ओ वायदा ला बनाय रख, जब तेंह कहय, ‘मोर आघू म इसरायल के सिंघासन म बईठे बर तोला उत्तराधिकारी के कमी कभू नइं होवय, यदि सिरिप तोर संतानमन अपन जम्मो काम ला धियान देके बिसवासयोग्यता के संग करंय, जइसे कि तेंह करे हस।’
1KI 8:26 अऊ अब, हे इसरायल के परमेसर! तोर ओ बचन, जेकर वायदा तेंह अपन सेवक मोर ददा दाऊद ले करे रहय, ओला सच होवन दे।
1KI 8:27 “पर का सही म परमेसर ह धरती म निवास करही? स्वरगमन, अऊ त अऊ सबले ऊंच स्वरग घलो तोला धारन नइं कर सकंय। फेर मोर बनाय ये मंदिर तो बहुंत छोटे हे!
1KI 8:28 तभो ले, हे यहोवा, मोर परमेसर! अपन सेवक के पराथना अऊ दया के ओकर बिनती ऊपर धियान दे। मोर रोवई अऊ ओ पराथना ला सुन, जेला आज तोर सेवक ह तोर आघू म करत हवय।
1KI 8:29 तोर आंखीमन रात अऊ दिन ये मंदिर कोति लगे रहंय, ये जगह जेकर बारे म तेंह कहे हस, ‘मोर नांव ह उहां रहिही,’ ताकि तेंह ओ पराथना ला सुनबे, जेला तोर सेवक ये जगह कोति मुहूं करके करथे।
1KI 8:30 अपन सेवक अऊ अपन मनखे इसरायलीमन के बिनती ला सुन, जब ओमन ये जगह कोति मुहूं करके पराथना करथें। स्वरग ले, अपन निवास के जगह ले सुन, अऊ जब तें सुनथस, त ओमन ला छेमा कर।
1KI 8:31 “जब कोनो अपन परोसी के बिरूध कोनो अपराध करय अऊ ओला किरिया खाय के जरूरत पड़य अऊ ओह आके ये मंदिर म तोर बेदी के आघू म किरिया खावय,
1KI 8:32 त तेंह स्वरग ले सुनके, अपन सेवकमन के बीच म नियाय करबे। अपराधी के काम ला ओकर मुड़ म लानके ओला सजा देबे, अऊ निरदोस के ओकर निरदोसता के मुताबिक नियाय करबे।
1KI 8:33 “जब तोर इसरायली मनखेमन तोर बिरूध पाप करे के कारन, अपन कोनो बईरी ले हार जावंय, अऊ जब ओमन तोर कोति फेर लहुंटंय अऊ ये मंदिर म तोर ले पराथना अऊ बिनती करत, तोर नांव के परसंसा करंय,
1KI 8:34 तब स्वरग ले सुनबे अऊ अपन इसरायली मनखेमन के पाप ला छेमा करबे अऊ ओमन ला ओ देस म लहुंटाके ले आबे, जेला तेंह ओमन के पुरखामन ला देय हस।
1KI 8:35 “तोर मनखेमन के तोर बिरूध पाप करे के कारन, जब अकास ह बंद हो जावय अऊ बरसा नइं होवय, अइसने बेरा म जब ओमन ये जगह कोति होके पराथना करंय अऊ तोर नांव के परसंसा करंय अऊ अपन पाप ले मन फिरावंय, काबरकि तेंह ओमन ला दुख म डाले हस,
1KI 8:36 तब स्वरग ले सुनके अपन सेवक, अपन इसरायली मनखेमन के पाप ला छेमा करबे। ओमन ला जीये के सही रसता सिखाबे, अऊ ओ देस म बारिस भेजबे, जेला तेंह अपन मनखेमन ला उत्तराधिकार म देय हस।
1KI 8:37 “जब देस म अकाल या महामारी आवय, या फसल म रोग या फफूंदी, टिड्डी या फांफामन लगंय, या जब कोनो बईरी ओमन ला ओमन के कोनो सहर म घेर लेवय, याने कोनो भी बिपत्ति या बेमारी आवय,
1KI 8:38 अऊ जब तोर इसरायली मनखेमन के बीच म ले कोनो ओमन के मन के पीरा ला जानके, ये मंदिर कोति अपन हांथ ला फईलाके पराथना या बिनती करय—
1KI 8:39 त तेंह अपन निवास स्वरग ले सुनके छेमा करबे; हर एक के संग ओमन के काम के मुताबिक बरताव करबे, तेंह ओमन के मन के बात ला जानथस (काबरकि सिरिप तेंहीच ह हर एक मनखे के मन ला जानथस),
1KI 8:40 ताकि जऊन देस ला तेंह हमर पुरखामन ला देय हवस, ओ देस म रहत ओमन हर समय तोर भय मानंय।
1KI 8:41 “जहां तक परदेसी के बात ए, जऊन ह तोर इसरायली मनखेमन के बीच म के नो हय, पर ओह तोर नांव ला सुनके दूरिहा देस ले आय हवय—
1KI 8:42 काबरकि परदेसीमन तोर बड़े नांव अऊ बलवंत हांथ अऊ तोर बड़े काम के बारे म सुनहीं—जब ओमन आवंय अऊ ये मंदिर कोति मुहूं करके पराथना करंय,
1KI 8:43 त तेंह स्वरग, अपन निवास स्थान ले सुनबे। जऊन कुछू ओ परदेसी तोर ले मांगय, ओला पूरा करबे, ताकि धरती के जम्मो मनखे तोर नांव ला जानंय अऊ तोर भय मानंय, जइसे कि तोर खुद के इसरायली मनखेमन करथें, अऊ ओमन जानंय कि ये घर ला मेंह तोर नांव बर बनाय हवंव।
1KI 8:44 “जब तेंह अपन मनखेमन ला ओमन के बईरीमन के बिरूध म लड़े बर जिहां कहीं भी पठोथस, अऊ जब ओमन यहोवा करा तोर चुने ये सहर अऊ तोर नांव बर मोर बनाय ये मंदिर कोति होके पराथना करंय,
1KI 8:45 तब तेंह स्वरग ले ओमन के पराथना अऊ बिनती ला सुनबे, अऊ ओमन ला संभालबे।
1KI 8:46 “जब ओमन तोर बिरूध पाप करंय—काबरकि कोनो भी अइसन नइं ए जऊन ह पाप नइं करय—अऊ तेंह ओमन ऊपर गुस्सा होके ओमन ला ओमन के बईरीमन के हांथ म कर देवस, जऊन मन ओमन ला बंदी बनाके बहुंत दूरिहा या लकठा म अपन देस म ले जावंय;
1KI 8:47 अऊ यदि तोर मनखेमन ओ बंदी बनाय गे देस म अपन मन ला बदलंय, अऊ पछताप करंय अऊ बंदी बनाय गय देस म तोर ले बिनती करके कहंय, ‘हमन पाप करे हवन, हमन गलती करे हवन, हमन दुस्टता के काम करे हवन’;
1KI 8:48 अऊ यदि ओमन अपन ओ बईरीमन के देस म, जऊन मन ओमन ला बंदी बनाके ले गे हवंय, अपन पूरा मन अऊ आतमा ले तोर कोति फिरंय, अऊ ओमन के पुरखामन ला तोर दिये देस कोति, तोर चुने सहर कोति अऊ तोर नांव खातिर मोर बनाय ये मंदिर कोति होके तोर ले पराथना करंय;
1KI 8:49 त तेंह स्वरग अपन निवास स्थान ले ओमन के पराथना अऊ ओमन के बिनती ला सुनबे, अऊ ओमन ला संभालबे।
1KI 8:50 अऊ अपन ओ मनखेमन ला छेमा करबे, जऊन मन तोर बिरूध म पाप करे हवंय; ओ जम्मो अपराध ला छेमा करबे, जेला ओमन तोर बिरूध म करे हवंय, अऊ ओमन ला बंधुवई म ले जवइयामन के मन म ओमन बर दया पईदा करबे।
1KI 8:51 काबरकि ओमन तोर मनखे अऊ तोर निज भाग अंय, जेमन ला तेंह मिसर देस ले, ओ लोहा पिघलइया भट्ठी ले बाहिर निकालके लानय।
1KI 8:52 “तोर आंखी तोर सेवक के बिनती अऊ तोर इसरायली मनखेमन कोति लगे रहय, अऊ जब भी ओमन तोर ले गोहारंय, तें ओमन के सुनबे।
1KI 8:53 काबरकि तेंह ओमन ला संसार के जम्मो जाति ले, अपन निज भाग होय बर अलग करे हवस, जइसने कि हे परमपरधान यहोवा, तेंह अपन सेवक मूसा के जरिये कहे रहय, जब तेंह हमर पुरखामन ला मिसर देस ले निकालके लानय।”
1KI 8:54 जब सुलेमान ह यहोवा ले ये जम्मो पराथना अऊ बिनती कर चुकिस, तब ओह यहोवा के बेदी के आघू ले उठिस, जिहां ओह माड़ी टेकके अकास कोति अपन हांथमन ला फईलाय रिहिस।
1KI 8:55 ओह ठाढ़ होईस अऊ इसरायल के जम्मो सभा ला ऊंचहा अवाज म ये कहिके आसीस दीस:
1KI 8:56 “यहोवा के महिमा होवय, जऊन ह अपन वायदा के मुताबिक अपन इसरायली मनखेमन ला बिसराम देय हवय। ओह अपन सेवक मूसा के जरिये जऊन बने वायदामन ला करे रिहिस, ओमा के एको ठन घलो नइं छूटिस।
1KI 8:57 यहोवा हमर परमेसर ह हमर संग रहे, जइसने कि ओह हमर पुरखामन के संग रिहिस; ओह हमन ला कभू झन छोंड़े अऊ कभू झन तियागे।
1KI 8:58 ओह हमर मन ला अपन कोति करय, ताकि हमन ओकर हुकूम के मुताबिक चलन अऊ जऊन हुकूम, बिधि अऊ कानून ओह हमर पुरखामन ला देय रिहिस, ओकर हमन पालन करन।
1KI 8:59 अऊ मोर ये बातमन, जेला मेंह यहोवा के आघू म पराथना के रूप म रखे हवंव, रात अऊ दिन यहोवा हमर परमेसर के लकठा म रहंय, ताकि हर एक दिन के जरूरत के मुताबिक, ओह अपन सेवक अऊ अपन इसरायली मनखेमन के मांग ला पूरा करय,
1KI 8:60 अऊ धरती के जम्मो मनखेमन जानंय कि यहोवा ही परमेसर अय अऊ कोनो दूसर परमेसर नइं ए।
1KI 8:61 अऊ ओकर बिधिमन म चले अऊ ओकर हुकूममन ला माने बर तुम्हर मन ह यहोवा हमर परमेसर कोति पूरा लगे रहय, जइसे कि अभी तुमन करत हव।”
1KI 8:62 तब राजा अऊ ओकर संग जम्मो इसरायली मनखेमन यहोवा के आघू म बलिदान चघाईन।
1KI 8:63 सुलेमान ह यहोवा ला मेल-बलिदान चघाईस: बाईस हजार पसु अऊ एक लाख बीस हजार भेड़ अऊ बकरी। ये किसम ले राजा अऊ जम्मो इसरायलीमन यहोवा के मंदिर के समरपन करिन।
1KI 8:64 ओहीच दिन राजा ह यहोवा के मंदिर के आघू के अंगना के मांझा वाले भाग के अभिसेक करिस, अऊ उहां ओह होम-बलिदान, अन्न-बलिदान अऊ मेल-बलिदान के चरबी ला चघाईस, काबरकि जऊन कांसा के बेदी यहोवा के आघू म रिहिस, ओह होम-बलिदान, अन्न-बलिदान अऊ मेल-बलिदान के चरबी ला रखे बर बहुंत छोटे रिहिस।
1KI 8:65 तब ओ बेरा, सुलेमान ह तिहार मनाईस, अऊ ओकर संग जम्मो इसरायलीमन घलो मनाईन—उहां एक बड़े सभा जूरे रिहिस अऊ सभा म लेबो-हमात सहर ले लेके मिसर के नरवा तक के मनखेमन रिहिन। ओमन सात दिन अऊ सात दिन अऊ, याने कि कुल चौदह दिन यहोवा हमर परमेसर के आघू म ये तिहार मनाईन।
1KI 8:66 ओकर दूसर दिन, ओह मनखेमन ला बिदा करिस। मनखेमन राजा ला आसीस दीन अऊ ओ जम्मो बने काम, जऊन ला यहोवा ह अपन सेवक दाऊद अऊ अपन इसरायली मनखेमन बर करे रिहिस, ओकर बर ओमन आनंदित अऊ मगन होके अपन-अपन घर चल दीन।
1KI 9:1 जब सुलेमान ह यहोवा के मंदिर अऊ राजमहल ला बना चुकिस, अऊ ओकर जऊन कुछू करे के ईछा रिहिस, ओला पूरा कर डारिस,
1KI 9:2 त यहोवा ह जइसे गिबोन सहर म ओकर करा परगट होय रिहिस, वइसे ओह दूसर बार सुलेमान करा परगट होईस।
1KI 9:3 यहोवा ह ओला कहिस: “जऊन पराथना अऊ बिनती तेंह मोर आघू म करे हवस, ओला मेंह सुने हवंव; ये मंदिर जऊन ला तेंह बनाय हवस, मेंह अपन नांव उहां सदाकाल बर रखे के दुवारा ओकर अभिसेक करे हंव। मोर आंखी अऊ मोर मन ह हमेसा उहां लगे रहिही।
1KI 9:4 “जहां तक तोर बात ए, यदि तेंह अपन ददा दाऊद के सहीं, मन के सीधई अऊ सच्चई के संग मोर आघू म बिसवासयोग्यता से चलबे, अऊ मोर दिये जम्मो हुकूम ला मानबे अऊ मोर बिधि अऊ कानूनमन के पालन करबे,
1KI 9:5 त मेंह तोर राज सिंघासन ला इसरायल के ऊपर सदाकाल बर स्थिर करहूं, जइसने कि मेंह तोर ददा दाऊद ले वायदा करके ये कहे रहेंव, ‘इसरायल के सिंघासन म बईठे बर, तोर बंस म उत्तराधिकारी के कमी कभू नइं होही’
1KI 9:6 “पर यदि तें या तोर संतानमन मोर पाछू चलई छोंड़ देथें अऊ जऊन हुकूम अऊ बिधिमन ला मेंह तोला देय हवंव, ओला नइं मानंय अऊ जाके आने देवतामन के सेवा अऊ ओमन के अराधना करंय,
1KI 9:7 त फेर मेंह इसरायल ला ये देस ले निकाल दूहूं, जेला मेंह ओमन ला देय हवंव, अऊ मेंह ये मंदिर ला अस्वीकार करहूं, जेला मेंह अपन नांव खातिर पबितर करे हवंव। इसरायल ह तब जम्मो झन के बीच म एक कहावत अऊ ठट्ठा के चीज बन जाही।
1KI 9:8 ये मंदिर ह पथरामन के कुढ़हा हो जाही। अऊ ओ जम्मो, जेमन इहां ले होके जाहीं, ओमन अचरज करहीं अऊ हंसी उड़ाके कहिहीं, ‘यहोवा ह ये देस अऊ ये मंदिर ला अइसने काबर करे हवय?’
1KI 9:9 तब मनखेमन जबाब दीहीं, ‘काबरकि ओमन यहोवा अपन परमेसर ला तियाग दे हवंय, जऊन ह ओमन के पुरखामन ला मिसर देस ले निकालके लानिस। ओमन आने देवतामन ला अपनाके ओमन के अराधना अऊ सेवा करत हवंय—एकरसेति यहोवा ह ये जम्मो बिपत्ति ओमन ऊपर लाने हवय।’ ”
1KI 9:10 बीसवां बछर के आखिर म, ये दौरान सुलेमान ह ये दू ठन भवन बनाईस—यहोवा के मंदिर अऊ राजमहल—
1KI 9:11 राजा सुलेमान ह सूर के राजा हीराम ला गलील म बीस ठन नगर दीस, काबरकि हीराम ह सुलेमान ला ओकर मन के मुताबिक देवदार अऊ सनोवर के लकरी अऊ सोन देय रिहिस।
1KI 9:12 पर जब हीराम ह सूर ले जाके ओ नगरमन ला देखिस, जेमन ला सुलेमान ह ओला देय रिहिस, त ओमन ला देखके हीराम ह खुस नइं होईस।
1KI 9:13 ओह सुलेमान ले पुछिस, “हे मोर भाई, ये का किसम के नगर तेंह मोला देय हवस?” अऊ ओह ओमन के नांव काबूल देस रखिस, अऊ येहीच नांव आज के दिन तक पड़े हवय।
1KI 9:14 फेर हीराम ह राजा करा 120 टेलेन्ट सोन पठोय रिहिस।
1KI 9:15 राजा सुलेमान ह यहोवा के मंदिर, अपन महल, घरमन के पंक्ति, अऊ यरूसलेम, अऊ हासोर, मगिद्दो अऊ गेजेर नगरमन के दीवार ला बनाय बर जऊन बंधुवा बनिहारमन ला अनिवार्य रूप म रखे रिहिस, ओमन के लेखा ये अय।
1KI 9:16 (मिसर के राजा फिरौन ह गेजेर ऊपर हमला करके ओला कब्जा कर ले रिहिस अऊ ओह ओमा आगी लगा दे रिहिस। ओह ओ नगर म रहइया कनानीमन ला मार डारिस अऊ तब ओह ओला अपन बेटी, सुलेमान के घरवाली ला एक बिहाव भेंट के रूप म दे दीस।
1KI 9:17 अऊ सुलेमान ह गेजेर ला फेर बनाईस।) ओह अपन देस के भीतर खाल्हे के बेत-होरोन,
1KI 9:18 बालात अऊ सुन्ना जगह म तदमोर ला बनाईस,
1KI 9:19 अऊ संग म सुलेमान ह अपन जम्मो भंडारवाले सहर अऊ अपन रथ अऊ अपन घोड़ामन बर नगरमन ला बनाईस—ओह यरूसलेम म, लबानोन म अऊ अपन जम्मो राज म, जऊन कुछू बनाय चाहत रिहिस, ओ जम्मो ला ओह बनाईस।
1KI 9:20 तभो ले अमोरी, हित्ती, परिज्जी, हिब्बी अऊ यबूसीमन के कुछू मनखेमन बांच गे रिहिन (ये मनखेमन इसरायली नइं रिहिन)।
1KI 9:21 देस म बचे ये जम्मो मनखेमन के संतान, जेमन ला इसरायलीमन पूरा नास नइं कर सकिन—ओमन ला सुलेमान ह अनिवार्य रूप से सेवा करे बर बंधुवा बनिहार बना दीस, अऊ आज तक ओमन वइसनेच हवंय।
1KI 9:22 पर सुलेमान ह इसरायलीमन ले कोनो ला गुलाम नइं बनाईस; ओमन ओकर सैनिक, ओकर सरकारी करमचारी, ओकर अधिकारी, ओकर कप्तान, अऊ ओकर रथ अऊ सारथीमन के सेनापति रिहिन।
1KI 9:23 ओमन सुलेमान के काम-योजनामन के मुखिया अधिकारीमन घलो रिहिन; 550 अधिकारी, जऊन मन काम करइयामन के काम ला देखंय।
1KI 9:24 जब फिरौन के बेटी ह दाऊद के सहर ले ओ महल म आ गीस, जेला सुलेमान ह ओकर बर बनाय रिहिस, तब सुलेमान ह घरमन के पंक्ति ला बनाईस।
1KI 9:25 सुलेमान ह जऊन बेदी ला यहोवा बर बनाय रिहिस, ओ बेदी म ओह हर साल तीन बार होम-बलिदान अऊ मेल-बलिदान चघात रिहिस, अऊ बलिदान के संग, ओह यहोवा के आघू म धूप घलो जलाय करत रिहिस, अऊ ये किसम ले, ओह मंदिर बर अपन जबाबदेही ला पूरा करत रिहिस।
1KI 9:26 राजा सुलेमान ह एसियोन-गेबेर नगर म पानी जहाजमन ला घलो बनाईस; एसियोन-गेबेर ह एदोम देस म, लाल-समुंदर के तट म एलात के लकठा म हवय।
1KI 9:27 अऊ हीराम ह अपन ओ मनखेमन ला पठोईस, जऊन मन नाविक रिहिन अऊ समुंदर के जानकार रिहिन—ताकि ओमन सुलेमान के मनखेमन संग जहाजी-बेड़ा म काम करंय।
1KI 9:28 ओमन जहाज म ओपीर गीन अऊ उहां ले वापिस 420 टेलेन्ट सोन लानके राजा सुलेमान ला दे दीन।
1KI 10:1 जब सेबा के रानी ह सुलेमान के जस अऊ यहोवा के संग ओकर संबंध के बारे म सुनिस, त ओह सुलेमान ला परखे बर कठिन-कठिन सवाल लेके आईस।
1KI 10:2 ओह एक बड़े दल के संग ऊंटमन म मसाला, बहुंत अकन सोन, अऊ कीमती रत्नमन ला लादके यरूसलेम म हबरिस—ओह सुलेमान मेर आईस अऊ अपन मन म जऊन बात रिहिस, ओ जम्मो के बारे ओकर ले गोठियाईस।
1KI 10:3 सुलेमान ह ओकर जम्मो सवाल के जबाब दीस; कोनो भी बात राजा बर अइसे कठिन नइं रिहिस कि ओह ओला नइं समझा सकय।
1KI 10:4 जब सेबा के रानी ह सुलेमान के जम्मो बुद्धि अऊ ओकर बनाय महल,
1KI 10:5 ओकर मेज के जेवन, ओकर करमचारीमन के बईठना, पोसाक पहिरे सेवकमन के सेवा करई, ओकर पीयानेवालामन, अऊ यहोवा के मंदिर म ओकर दुवारा चघाय गे होम-बलिदान ला देखिस, त ओह चकित हो गीस।
1KI 10:6 ओह राजा ले कहिस, “जऊन बात, मेंह अपन देस म तोर काम अऊ तोर बुद्धि के बारे म सुने रहेंव, ओह सही अय।
1KI 10:7 पर ये बातमन ऊपर मोला बिसवास नइं होईस, जब तक कि मेंह खुद आके अपन आंखी ले नइं देख लेंव। वास्तव म, मोला तो आधा घलो बात नइं बताय गे रिहिस; जऊन बात मेंह सुने रहेंव, ओकर ले कहीं बढ़के तोर करा बुद्धि अऊ संपत्ति हवय।
1KI 10:8 तोर मनखेमन कतेक खुस होहीं! तोर करमचारीमन कतेक खुस होहीं, जऊन मन लगातार तोर आघू म ठाढ़े रहिके तोर बुद्धि के गोठ ला सुनथें!
1KI 10:9 यहोवा तोर परमेसर के परसंसा होवय, जऊन ह तोर ले खुस होके तोला इसरायल के सिंघासन म बईठाय हवय। इसरायल बर यहोवा के अनंत मया के कारन, ओह तोला राजा बनाय हवय, ताकि तेंह नियाय अऊ धरमीपन ला बनाय रख।”
1KI 10:10 अऊ ओह राजा ला 120 टेलेन्ट सोन, अब्बड़ अकन मसाला, अऊ कीमती रत्न दीस। अतेक मसाला फेर कभू नइं आईस, जतेक कि सेबा के रानी ह राजा सुलेमान ला दीस।
1KI 10:11 (हीराम के जहाजमन घलो ओपीर ले सोन लानिन; अऊ उहां ले ओमन जहाज म अब्बड़ अकन चंदन के लकरी अऊ कीमती पथरा घलो लानिन।
1KI 10:12 राजा ह चंदन के लकरी ले यहोवा के मंदिर अऊ राजमहल बर खंभा अऊ संगीतकारमन बर बीना अऊ सारंगी बनवाईस। ओ दिन के बाद, अतेक जादा चंदन के लकरी न तो फेर कभू मंगाय गीस, अऊ न ही देखे गीस।)
1KI 10:13 राजा सुलेमान ह सेबा के रानी ला अपन साही उदारता से देय के अलावा ओह रानी ला ओ सब दीस, जेकर ईछा रानी ह करिस अऊ मांगिस। तब रानी ह अपन सेवकमन के संग अपन देस लहुंट गीस।
1KI 10:14 सुलेमान ला हर साल 666 टेलेन्ट सोन मिलत रिहिस,
1KI 10:15 येकर अलावा ओला सौदागर अऊ बेपारीमन ले अऊ अरब देस के जम्मो राजा ले, अऊ अपन राज के राजपालमन ले मालगुजारी घलो मिलत रिहिस।
1KI 10:16 राजा सुलेमान ह गढ़े गय सोन ले दू सौ बड़े ढाल बनवाईस; हर एक ढाल म छै-छै सौ सेकेल सोन लगिस।
1KI 10:17 ओह गढ़े गय सोन के तीन सौ छोटे ढाल घलो बनाईस; जेमा के हर एक ढाल म तीन-तीन मीना सोन लगिस। राजा ह ओमन ला लबानोन के जंगल के महल म रख दीस।
1KI 10:18 तब राजा ह हाथी-दांत ले ढंके एक बड़े सिंघासन बनवाईस, अऊ ओला सुध सोन ले मढ़वाईस।
1KI 10:19 ओ सिंघासन के छै ठन पायदान रिहिस; अऊ सिंघासन के पाछू के भाग के टीप ह गोलाकार रिहिस। आसन के दूनों कोति हांथ रखे के हत्था लगे रहय, अऊ दूनों हत्था के बाजू म एक-एक ठन सेर ठाढ़े स्थिति म बनाय गे रहंय।
1KI 10:20 बारह ठन सेर छै ठन पायदानमन म खड़े रिहिन, हर एक पायदान के दूनों छोर म एक-एक ठन। कोनो आने राज म अइसने सिंघासन कभू नइं बनाय गे रिहिस।
1KI 10:21 राजा सुलेमान के पीये के जम्मो पियालामन सोन के रिहिन, अऊ लबानोन के जंगल के महल म जम्मो बरतन सुध सोन के रिहिन। कुछू भी चीज चांदी के नइं बने रिहिस, काबरकि सुलेमान के समय म, चांदी के जादा कीमत नइं रिहिस।
1KI 10:22 समुंदर म हीराम के जहाजमन के संग, राजा के घलो एक ब्यवसायिक जहाजी-बेड़ा रिहिस। हर तीन बछर म ये जहाजी-बेड़ा ह एक बार सोन, चांदी अऊ हाथी-दांत ले बने सामान, अऊ बिगर पुंछीवाला बेंदरा अऊ आने किसम के बेंदरामन ला लेके लहुंटय।
1KI 10:23 राजा सुलेमान ह धन अऊ बुद्धि म धरती के आने जम्मो राजामन ले बढ़के रिहिस।
1KI 10:24 जम्मो संसार के मनखेमन सुलेमान के ओ बुद्धि के बात ला सुने के ताक म रहंय, जेला परमेसर ह ओकर मन म डाले रिहिस।
1KI 10:25 हर एक बछर, ओकर करा अवइयामन भेंट लेके आवंय—सोन अऊ चांदी के सामान, ओनहा, हथियार अऊ मसाला, अऊ घोड़ा अऊ खच्चरमन।
1KI 10:26 सुलेमान ह रथ अऊ घोड़ामन ला संकेले रिहिस; ओकर मेर चौदह सौ रथ अऊ बारह हजार घोड़ामन रिहिन, जऊन ला ओह रथ के नगरमन म, अऊ अपन संग यरूसलेम म घलो रखय।
1KI 10:27 राजा ह यरूसलेम म चांदी ला पथरा के असन सधारन, अऊ देवदार लकड़ी ला खाल्हे पहाड़ी के डूमर रूख असन बहुंत अकन कर दीस।
1KI 10:28 सुलेमान के घोड़ामन ला मिसर देस ले अऊ कू ले मंगाय जावत रिहिस—राजा के बेपारीमन ओमन ला ओ समय ठहिराय दाम म कू ले बिसावंय।
1KI 10:29 ओमन मिसर देस ले एक ठन रथ ला चांदी के छै सौ सेकेल, अऊ एक ठन घोड़ा ला चांदी के डेड़ सौ सेकेल म मंगावत रिहिन। राजा के बेपारीमन ओमन ला हित्ती अऊ अरामीमन के जम्मो राजामन ला घलो पठोवत रिहिन।
1KI 11:1 फेर राजा सुलेमान ह फिरौन के बेटी के अलावा अऊ कतको परदेसी माईलोगनमन ले मया करिस—जेमा मोआबी, अमोनी, एदोमी, सीदोनी, अऊ हित्ती माईलोगनमन रिहिन।
1KI 11:2 ओमन ओ जाति के रिहिन, जेकर बारे म यहोवा ह इसरायलीमन ला कहे रिहिस, “तुमन ओमन के संग सादी-बिहाव झन करहू, काबरकि ओमन खचित तुम्हर मन ला अपन देवतामन के कोति कर लीहीं।” तभो ले सुलेमान ह ओमन के मया म मगन हो गीस।
1KI 11:3 राज-परिवार म जनमे, ओकर सात सौ घरवाली अऊ तीन सौ रखैल रिहिन, अऊ ओकर घरवालीमन ओकर मन ला परमेसर ले दूरिहा कर दीन।
1KI 11:4 जब सुलेमान के उमर बढ़त गीस, तब ओकर घरवालीमन ओकर मन ला आने देवतामन कोति कर लीन, अऊ जइसने ओकर ददा दाऊद के मन ह पूरा यहोवा ऊपर लगे रिहिस, वइसने ओकर मन ह यहोवा ओकर परमेसर ऊपर पूरा नइं लगे रिहिस।
1KI 11:5 ओह सीदोनीमन के असतोरेत नांव के देवी, अऊ अमोनीमन के मोलेक नांव के घिनित देवता के पाछू चलिस।
1KI 11:6 ये किसम ले सुलेमान ह यहोवा के नजर म खराप काम करिस; ओह अपन ददा दाऊद के सहीं पूरा यहोवा के पाछू नइं चलिस।
1KI 11:7 तब सुलेमान ह यरूसलेम के पूरब दिग के एक पठार म मोआब के घिनित देवता कमोस बर, अऊ अमोनीमन के घिनित देवता मोलेक बर एक ऊंचहा जगह बनाईस।
1KI 11:8 ओह अपन ओ जम्मो परदेसी घरवालीमन बर घलो अइसने करिस, जेमन अपन-अपन देवता बर धूप जलावंय अऊ बलिदान चघावंय।
1KI 11:9 यहोवा ह सुलेमान ऊपर गुस्सा होईस, काबरकि ओकर मन ह ओ यहोवा, इसरायल के परमेसर ले दूरिहा हट गे रिहिस, जऊन ह ओला दू बार दरसन देय रिहिस।
1KI 11:10 हालाकि ओह सुलेमान ला आने देवतामन के पाछू चले बर मना करे रिहिस, तभो ले सुलेमान ह यहोवा के हुकूम ला नइं मानिस।
1KI 11:11 एकरसेति यहोवा ह सुलेमान ला कहिस, “जब तोर अइसने मन हवय, अऊ तेंह मोर ओ करार अऊ बिधिमन ला नइं माने हवस, जेला माने के हुकूम मेंह दे रहेंव, त ये खातिर, मेंह खचित तोर ले राज ला छीनके तोर एक अधिकारी ला दे दूहूं।
1KI 11:12 तभो ले तोर ददा दाऊद के कारन, तोर जिनगी रहत तक, मेंह अइसने नइं करंव; पर तोर बेटा के हांथ ले राज ला छीन लूहूं।
1KI 11:13 मेंह पूरा राज ला तो ओकर हांथ ले नइं छीनंव, पर मोर सेवक दाऊद के कारन, अऊ मोर चुने यरूसलेम के कारन, मेंह तोर बेटा के हांथ म एक गोत्र ला छोंड़ दूहूं।”
1KI 11:14 तब यहोवा ह एदोमी हदद ला सुलेमान के एक बईरी बना दीस; हदद ह एदोम के राजबंस के रिहिस।
1KI 11:15 पहिले जब दाऊद ह एदोम के संग लड़ई करत रिहिस, तब सेना के सेनापति योआब ह मरे मनखेमन ला माटी देय बर गे रिहिस, अऊ ओह एदोम म जम्मो मनखेमन ला मार डारिस
1KI 11:16 योआब अऊ जम्मो इसरायलीमन उहां छै महिना रूकिन, जब तक कि ओमन एदोम म जम्मो मनखेमन के नास नइं कर दीन।
1KI 11:17 पर हदद ह ओ समय सिरिप एक छोटे लड़का रिहिस, अऊ ओह कुछू ओ एदोमी करमचारीमन संग मिसर देस भाग गीस, जऊन मन ओकर ददा के सेवा करे रिहिन।
1KI 11:18 ओमन मिदयान ले निकलिन अऊ पारान म आईन। तब पारान ले मनखेमन ला अपन संग लेके, ओमन मिसर म फिरौन राजा करा गीन, जऊन ह हदद ला एक घर अऊ भुइयां दीस अऊ ओला खाना घलो दीस।
1KI 11:19 फिरौन ह हदद ले अतेक खुस होईस कि ओह ओला अपन घरवाली, रानी तहपनेस के एक बहिनी ला बिहाव म दे दीस।
1KI 11:20 तहपनेस के बहिनी ला ओकर कोति ले एक बेटा होईस, जेकर नांव गनूबत रिहिस, जेला तहपनेस ह राजमहल म पालिस-पोसिस। उहां महल म, गनूबत ह फिरौन के लइकामन संग रहत रिहिस।
1KI 11:21 जब हदद ह मिसर म रहत रिहिस, त ओह ये सुनिस कि दाऊद ह अपन पुरखामन के संग सुत गीस अऊ सेना के सेनापति योआब घलो मर गे हवय। तब हदद ह फिरौन ले कहिस, “मोला हुकूम दे कि मेंह अपन देस ला जावंव।”
1KI 11:22 फिरौन ह पुछिस, “तोला इहां का चीज के कमी हवय कि तेंह अपन देस ला जाय चाहथस?” हदद ह जबाब दीस, “कुछू भी नइं, पर मोला जावन दे!”
1KI 11:23 अऊ परमेसर ह सुलेमान के एक अऊ बईरी कर दीस, याने कि एलयादा के बेटा रजोन ला, जऊन ह अपन मालिक सोबा के राजा हददेजेर करा ले भाग गे रिहिस।
1KI 11:24 जब दाऊद ह सोबा के सेना ला नास कर दीस, त रजोन ह अपन करा मनखेमन के एक दल जमा करिस अऊ ओमन के अगुवा बन गीस; ओमन दमिस्क चल दीन अऊ उहां रहिके अधिकार जमा लीन।
1KI 11:25 हदद ह जऊन समस्या खड़े करे रिहिस, ओकर अलावा रजोन ह सुलेमान के जिनगी भर इसरायल के बईरी बने रिहिस। ये किसम ले रजोन ह अराम म राज करिस अऊ इसरायल के बईरी बने रिहिस।
1KI 11:26 नबात के बेटा, यरोबाम घलो राजा के बिरूध बिदरोह करिस। ओह सरेदा के रहइया एक एपरैमी रिहिस अऊ ओह सुलेमान के एक करमचारी रिहिस, अऊ ओह सरूआह नांव के एक बिधवा के बेटा रिहिस।
1KI 11:27 ओकर राजा के बिरूध बिदरोह करे के, ये कारन रिहिस: सुलेमान ह घरमन के मिल्लो ला बनाय रिहिस अऊ अपन ददा दाऊद के सहर के दीवार के दरार ला बंद कर दे रिहिस।
1KI 11:28 यरोबाम ह एक बहुंत योग्य मनखे रिहिस, अऊ जब सुलेमान ह ओ जवान ला देखिस कि ओह कतेक बने तरीका से काम ला करथे, त ओह ओला यूसुफ के गोत्र के जम्मो काम ऊपर मुखिया ठहिरा दीस।
1KI 11:29 ओही बेरा यरोबाम यरूसलेम ले निकलके जावत रिहिस कि तभे सीलो के अगमजानी, अहियाह एक नवां कपड़ा पहिरे, ओला रसता म मिलिस। ओ दूनों ओ गांव के इलाका म अकेला रिहिन,
1KI 11:30 अऊ अहियाह ह अपन पहिरे नवां कपड़ा ला लीस अऊ ओला चीरके बारह टुकड़ा कर दीस।
1KI 11:31 तब ओह यरोबाम ला कहिस, “दस ठन टुकड़ा ला अपन बर लेय ले, काबरकि यहोवा, इसरायल के परमेसर ह ये कहत हवय, ‘देख, मेंह सुलेमान के हांथ ले राज ला छीनके, दस ठन गोत्र ला तोर हांथ म कर देवत हंव।
1KI 11:32 पर मोर सेवक दाऊद के कारन अऊ यरूसलेम सहर के कारन, जऊन ला मेंह इसरायल के जम्मो गोत्र म ले चुने हवंव, ओकर करा एक गोत्र बने रहिही।
1KI 11:33 मेंह अइसने करहूं काबरकि ओमन मोला तियागके सीदोनीमन के देवी असतोरेत अऊ मोआबीमन के देवता कमोस, अऊ अमोनीमन के देवता मोलेक ला अराधना करत हवंय, अऊ मोर रसता म नइं चलिन, अऊ जऊन ह मोर नजर म सही अय, ओला नइं करिन, अऊ न ही मोर बिधि अऊ कानूनमन ला मानिन, जइसने कि सुलेमान के ददा, दाऊद ह मानिस।
1KI 11:34 “ ‘पर मेंह सुलेमान के हांथ ले जम्मो राज ला नइं लेवंव; मोर चुने सेवक दाऊद, जऊन ह मोर हुकूम अऊ बिधिमन ला मानिस, ओकर कारन, मेंह सुलेमान ला ओकर जिनगी भर सासन करइया ठहिराय हंव।
1KI 11:35 मेंह ओकर बेटा के हांथ ले राज ला ले लूहूं अऊ तोला दस गोत्रमन ला दूहूं।
1KI 11:36 ओकर बेटा ला मेंह एक गोत्र दूहूं, ताकि यरूसलेम सहर, जेला मेंह अपन नांव रखे बर चुने हवंव, उहां मोर सेवक दाऊद के एक दीया हमेसा मोर आघू म रहय।
1KI 11:37 पर जहां तक तोर बात ए, तोला मेंह लूहूं, अऊ तेंह अपन पूरा मन के मुताबिक राज करबे; तेंह इसरायल के ऊपर राजा होबे।
1KI 11:38 यदि तेंह मोर सेवक दाऊद के सहीं मोर जम्मो हुकूममन ला मानबे अऊ मोर रसता म चलबे, अऊ मोर बिधि अऊ हुकूममन ला माने के दुवारा, मोर नजर म सही काम करबे, त मेंह तोर संग रहिहूं। जइसने मेंह दाऊद बर ठहरनेवाला एक राज-घराना बनाय हवंव, वइसने तोर बर एक राज-घराना बनाहूं अऊ तोर हांथ म इसरायल ला दे दूहूं।
1KI 11:39 ये पाप के खातिर, मेंह दाऊद के संतानमन ला दुख दूहूं, पर सदाकाल बर नइं।’ ”
1KI 11:40 सुलेमान ह यरोबाम ला मार डारे के कोसिस करिस, पर यरोबाम ह मिसर के राजा सीसक करा भाग गीस, अऊ सुलेमान के मिरतू तक उहां रिहिस।
1KI 11:41 सुलेमान के राज के आने घटनामन—जऊन कुछू ओह करिस अऊ ओकर बुद्धि के काम—ओ जम्मो बात सुलेमान के इतिहास के किताब म लिखे गे हवय।
1KI 11:42 सुलेमान ह यरूसलेम म जम्मो इसरायल ऊपर चालीस साल तक राज करिस।
1KI 11:43 तब ओह अपन पुरखामन संग हमेसा बर सुत गीस अऊ ओला ओकर ददा दाऊद के सहर म माटी दिये गीस। अऊ ओकर बेटा, रहूबियाम ह ओकर जगह म राजा बनिस।
1KI 12:1 रहूबियाम ह सकेम सहर गीस, काबरकि जम्मो इसरायलीमन ओला राजा बनाय बर उहां गे रिहिन।
1KI 12:2 जब नबात के बेटा यरोबाम ह येला सुनिस (ओह अभी भी मिसर देस म रिहिस, जिहां ओह राजा सुलेमान के डर म भागके गे रिहिस), त ओह मिसर ले लहुंट आईस।
1KI 12:3 अऊ ओमन यरोबाम ला बलाय बर पठोईन, अऊ ओह अऊ इसरायल के जम्मो सभा रहूबियाम मेर गीन अऊ ओकर ले कहिन:
1KI 12:4 “तोर ददा ह हमर ऊपर एक भारी बोझा डाले रिहिस, पर अब तें हमर ऊपर डाले ओकर कठोर काम अऊ भारी बोझा ला हल्का कर, अऊ हमन तोर सेवा करबो।”
1KI 12:5 रहूबियाम ह जबाब दीस, “अभी तो तुमन जावव, अऊ तब तीन दिन के बाद मोर करा लहुंटके आवव।” तब मनखेमन चल दीन।
1KI 12:6 तब राजा रहूबियाम ह ओ अगुवामन ले सलाह लीस, जेमन ओकर ददा सुलेमान के जिनगी भर सेवा करे रिहिन। ओह ओमन ले पुछिस, “तुम्हर का सलाह ए? ये मनखेमन ला का जबाब देना चाही?”
1KI 12:7 ओमन जबाब दीन, “यदि तें आज ये मनखेमन के सेवक बनके येमन के सेवा करबे अऊ अपन जबाब म बने बात कहिबे, त ओमन हमेसा तोर सेवक बने रहिहीं।”
1KI 12:8 पर रहूबियाम ह अगुवामन के सलाह ला नइं मानिस अऊ ओ जवानमन ले सलाह लीस, जेमन ओकर संग बड़े होय रिहिन, अऊ ओकर सेवा करत रिहिन।
1KI 12:9 ओह ओमन ले पुछिस, “तुम्हर का सलाह ए? हमन ला ये मनखेमन ला कइसे जबाब देना चाही, जेमन मोर ले ये कहत हें, ‘जऊन बोझा तोर ददा ह हमर ऊपर डाले हवय, ओला हल्का कर’?”
1KI 12:10 ओकर संग बाढ़े जवान मनखेमन ओला जबाब दीन, “ये मनखेमन तोला कहे हवंय, ‘तोर ददा ह हमर ऊपर भारी बोझा डाले हवय, पर तें हमर बोझा ला हल्का कर।’ अब तें ओमन ला अइसने कह, ‘मोर छोटे अंगरी ह मोर ददा के कनिहां ले मोट हवय।
1KI 12:11 मोर ददा ह तुम्हर ऊपर जऊन भारी बोझा डाले हवय, ओला मेंह अऊ भारी करहूं। मोर ददा ह तो तुमन ला कोर्रा म पीटवाईस, पर मेंह तुमन ला बिच्छूमन ले कटवाहूं।’ ”
1KI 12:12 तीन दिन के बाद, यरोबाम अऊ जम्मो मनखेमन रहूबियाम करा वापिस आईन, जइसे कि राजा ह कहे रिहिस, “तीन दिन म मोर मेर वापिस आवव।”
1KI 12:13 राजा ह मनखेमन ला कठोर मन से जबाब दीस। अगुवामन के सलाह ला नइं मानके,
1KI 12:14 ओह जवानमन के सलाह ला मानिस अऊ कहिस, “मोर ददा ह तुम्हर बोझा ला भारी कर दीस; मेंह येला अऊ भारी करहूं। मोर ददा ह तो तुमन ला कोर्रा म पीटवाईस, पर मेंह तुमन ला बिच्छूमन ले कटवाहूं।”
1KI 12:15 ये किसम ले राजा ह मनखेमन के बात ला नइं सुनिस; काबरकि ये घटना ह यहोवा कोति ले ओ बचन ला पूरा करे बर होईस, जेला यहोवा ह सीलोवासी, अहियाह अगमजानी के दुवारा नबात के बेटा यरोबाम ले कहे रिहिस।
1KI 12:16 जब जम्मो इसरायलीमन देखिन कि राजा ह ओमन के बात ला सुने ले इनकार कर दीस, तब ओमन राजा ला जबाब दीन: “दाऊद म हमर का बांटा हवय, यिसै के बेटा म हमर का भाग हवय? हे इसरायलीमन! अपन-अपन तम्बू म चले जावव, हे दाऊद! अपन खुद के घर ला संभाल।” तब इसरायलीमन अपन-अपन घर चल दीन।
1KI 12:17 पर ओ इसरायली, जेमन यहूदा के नगरमन म रहत रिहिन, ओमन ऊपर रहूबियाम ह राज करते रिहिस।
1KI 12:18 राजा रहूबियाम ह अदोनीराम ला भेजिस, जऊन ह बंधुवा मजदूरमन ऊपर मुखिया रिहिस, पर जम्मो इसरायलीमन ओकर ऊपर पथरवाह करके ओला मार डारिन। पर राजा रहूबियाम ह कोनो किसम ले अपन रथ म चघिस अऊ बचके यरूसलेम भाग गीस।
1KI 12:19 ये किसम ले, इसरायलीमन आज तक ले दाऊद के घराना के बिरूध बिदरोह करत हें।
1KI 12:20 जब जम्मो इसरायलीमन ये सुनिन कि यरोबाम ह लहुंटके आ गे हवय, त ओमन ओला सभा म बलाईन अऊ ओला जम्मो इसरायल ऊपर राजा बनाईन। अऊ सिरिप यहूदा के गोत्र ही दाऊद के घराना के संग बने रिहिस।
1KI 12:21 जब रहूबियाम ह यरूसलेम हबरिस, त ओह जम्मो यहूदा अऊ बिनयामीन के गोत्र ले एक लाख अस्सी हजार काबिल जवानमन ला संकेलिस कि ओमन इसरायल के बिरूध लड़े बर जावंय अऊ ओ राज ला सुलेमान के बेटा रहूबियाम के अधीन फेर कर देवंय।
1KI 12:22 पर परमेसर के जन समायाह करा परमेसर के ये बचन आईस:
1KI 12:23 “यहूदा के राजा सुलेमान के बेटा रहूबियाम ले, जम्मो यहूदा अऊ बिनयामीन ले, अऊ बाकि मनखेमन ले कह,
1KI 12:24 ‘यहोवा ह ये कहत हे: अपन भाई इसरायलीमन के बिरूध म लड़े बर झन जावव। तुमन जम्मो झन अपन-अपन घर जावव, काबरकि येला मेंह करत हंव।’ ” ओमन यहोवा के बचन के पालन करिन अऊ अपन-अपन घर चल दीन, जइसने कि यहोवा ह ओमन ला हुकूम दे रिहिस।
1KI 12:25 तब यरोबाम ह एपरैम के पहाड़ी देस म सकेम नगर ला किलाबंदी करिस अऊ उहां रहे लगिस। फेर उहां ले ओह निकलके गीस अऊ पनिएल नगर ला बनाईस।
1KI 12:26 यरोबाम ह अपन मन म सोचिस, “अब सायद राज ह दाऊद के घराना के फेर हो जाही।
1KI 12:27 यदि ये मनखेमन यरूसलेम म यहोवा के मंदिर म बलिदान चघाय बर जाथें, त ओमन के देसभक्ति ह ओमन के मालिक, यहूदा के राजा रहूबियाम कोति फेर हो जाही, अऊ ओमन मोला मारके राजा रहूबियाम करा फेर लहुंट जाहीं।”
1KI 12:28 एकरसेति, राजा ह सलाह लेके सोन के दू ठन बछवा के मूरती बनाईस अऊ मनखेमन ला कहिस, “यरूसलेम जवई तुम्हर बर बहुंत कठिन अय। एकरसेति, हे इसरायलीमन, येमन तुम्हर देवता अंय, जऊन मन तुमन ला मिसर देस ले निकालके लानिन।”
1KI 12:29 ओह एक ठन बछरू ला बेतेल नगर, अऊ दूसर ला दान नगर म स्थापित करिस।
1KI 12:30 अऊ ये बात ह एक पाप होईस; मनखेमन एक बछरू के अराधना करे बर बेतेल अऊ दूसर बछरू के अराधना करे बर, दान तक घलो जावन लगिन।
1KI 12:31 यरोबाम ह ऊंचहा जगहमन म देव-स्थल बनाईस अऊ जम्मो किसम के मनखेमन ले पुरोहित ठहिराईस, हालाकि ओमन लेवी के बंस के नइं रिहिन।
1KI 12:32 जइसने यहूदा म तिहार मनाय जावय, वइसने ओह आठवां महिना के पंदहरवां दिन म एक तिहार मनाय बर ठहिराईस, अऊ बेदी म बलिदान चघाईस। ये काम, ओह बेतेल म, अपन बनाय बछवा के मूरतीमन ला बलिदान चघाके करिस। अऊ बेतेल म, ओह अपन बनाय ऊंचहा जगहमन म पुरोहित घलो ठहिराईस।
1KI 12:33 अपन खुद के चुने आठवां महिना के पंदहरवां दिन म, ओह बेतेल म अपन बनाय बेदी म बलिदान चघाईस। ये किसम ले, ओह इसरायलीमन बर एक तिहार ठहिराईस अऊ बलिदान चघाय बर ऊपर बेदी मेर गीस।
1KI 13:1 एक दिन जब यरोबाम ह बेदी मेर एक बलिदान चघाय बर ठाढ़े रिहिस, तब यहोवा के बचन पाके, परमेसर के एक आदमी यहूदा ले बेतेल आईस।
1KI 13:2 ओ मनखे ह यहोवा के बचन पाके, बेदी के बिरूध चिचियाके कहिस: “हे बेदी, हे बेदी! यहोवा ह ये कहिथे: ‘दाऊद के घराना म योसियाह नांव के एक बेटा जनम लीही। तोर ऊपर, ओह ऊंचहा जगहमन के ओ पुरोहितमन ला बलिदान करही, जऊन मन इहां बलिदान करथें, अऊ मनखेमन के हाड़ामन ला तोर ऊपर जलाय जाही।’ ”
1KI 13:3 अऊ ओहीच दिन, परमेसर के ओ मनखे ह ये कहिके एक चिनहां दीस: “येह ओ चिनहां ए, जेला यहोवा ह दे हवय: बेदी ह फटके दू भाग हो जाही अऊ येकर ऊपर के राख ला गिराय जाही।”
1KI 13:4 जब राजा यरोबाम ह सुनिस कि परमेसर के मनखे ह बेतेल म बेदी के बिरूध चिचियाके का कहे हवय, त ओह बेदी ले अपन हांथ बढ़ाके कहिस, “ओला धर लेवव!” पर जऊन हांथ ला ओह ओ मनखे कोति बढ़ाय रिहिस, ओ हांथ ह सूख गीस अऊ ओह ओला वापिस खींच नइं सकिस।
1KI 13:5 अऊ बेदी ह फट गीस, अऊ ओकर राख ह गिर गीस; ये किसम ले ओ चिनहां ह पूरा होईस, जऊन ला परमेसर के मनखे ह यहोवा के बचन ला पाके कहे रिहिस।
1KI 13:6 तब राजा ह परमेसर के मनखे ले कहिस, “यहोवा अपन परमेसर ला मना अऊ मोर बर पराथना कर कि मोर हांथ ह पहिले के सहीं हो जावय!” तब परमेसर के मनखे ह यहोवा ला मनाईस अऊ राजा के हांथ ह ठीक पहिले के सहीं हो गीस।
1KI 13:7 राजा ह परमेसर के मनखे ला कहिस, “में चाहत हंव कि मोर संग घर चलके जेवन कर, अऊ मेंह तोला ईनाम घलो दूहूं।”
1KI 13:8 पर परमेसर के मनखे ह राजा ला जबाब दीस, “चाहे तें मोला अपन आधा संपत्ति घलो दे, तभो ले मेंह तोर संग नइं जावंव, अऊ न ही इहां रोटी खावंव अऊ पानी पीयंव।
1KI 13:9 काबरकि यहोवा के बचन के दुवारा मोला ये हुकूम मिले हवय: ‘तेंह न तो रोटी खाबे अऊ न ही पानी पीबे अऊ न ही ओ डहार ले लहुंटबे, जेमा ले आय हवस।’ ”
1KI 13:10 एकरसेति ओह आने डहार म गीस अऊ ओ डहार ले नइं लहुंटिस, जेमा ले ओह बेतेल आय रिहिस।
1KI 13:11 बेतेल म एक डोकरा अगमजानी रहत रिहिस, जेकर बेटामन आके ओला ओ जम्मो बात बताईन, जेला परमेसर के ओ मनखे ह ओ दिन बेतेल म करे रिहिस; अऊ जऊन बात परमेसर के मनखे ह राजा ले कहे रिहिस, ओला घलो ओमन अपन ददा ला बताईन।
1KI 13:12 ओमन के ददा ह ओमन ले पुछिस, “ओह कते रसता म गीस?” अऊ ओकर बेटामन ओला देखाईन कि यहूदा ले आय परमेसर के ओ मनखे ह कते रसता म गीस।
1KI 13:13 तब ओह अपन बेटामन ले कहिस, “मोर बर गदहा म काठी बांधव।” अऊ जब ओमन गदहा म काठी बांध लीन, त ओह ओमा चघिस
1KI 13:14 अऊ परमेसर के मनखे के पाछू गीस। ओह परमेसर के मनखे ला एक बलूत रूख के खाल्हे बईठे पाईस अऊ ओकर ले पुछिस, “का तेंह परमेसर के ओ मनखे अस, जऊन ह यहूदा ले आय रिहिस?” ओह कहिस, “हव, मेंह अंव।”
1KI 13:15 तब ओ अगमजानी ह ओकर ले कहिस, “मोर संग चलके मोर घर म जेवन कर।”
1KI 13:16 परमेसर के मनखे ह कहिस, “मेंह लहुंटके तोर संग नइं जा सकंव, अऊ न ही मेंह ये जगह म तोर संग रोटी खा सकंव या पानी पी सकंव।
1KI 13:17 यहोवा के बचन के दुवारा मोला ये बताय गे हवय: ‘उहां तेंह न तो रोटी खाबे, न ही पानी पीबे अऊ न ही ओ रसता ले लहुंटबे, जऊन रसता ले तेंह आबे।’ ”
1KI 13:18 ओ डोकरा अगमजानी ह जबाब दीस, “तोर सहीं मेंह घलो एक अगमजानी अंव। अऊ एक स्वरगदूत ह यहोवा के बचन के दुवारा मोला कहिस, ‘ओला अपन संग अपन घर वापिस ले आ ताकि ओह रोटी खावय अऊ पानी पीयय।’ ” (पर ओह ओकर ले लबारी मारत रिहिस।)
1KI 13:19 एकरसेति परमेसर के मनखे ह ओ डोकरा के संग लहुंट गीस अऊ ओकर घर म खाईस अऊ पीईस।
1KI 13:20 जब ओमन खाना खाय के मेज म बईठे ही रिहिन, त यहोवा के बचन ओ डोकरा अगमजानी मेर आईस, जऊन ह ओला लहुंटाके लाने रिहिस।
1KI 13:21 ओह यहूदा ले आय परमेसर के ओ मनखे ला चिचियाके ये कहिस, “यहोवा ह ये कहत हे: ‘तेंह यहोवा के बचन ला धियान नइं दे हस अऊ जऊन हुकूम यहोवा तोर परमेसर ह तोला देय रिहिस, ओला नइं माने हस।
1KI 13:22 तेंह ओ जगह म वापिस आके रोटी खाय अऊ पानी पीये हस, जिहां परमेसर ह तोला खाय अऊ पीये बर मना करे रिहिस। एकरसेति तोला तोर पुरखामन के मरघटी म माटी नइं दिये जाही।’ ”
1KI 13:23 जब परमेसर के मनखे ह खा-पी चुकिस, त जऊन अगमजानी ह ओला वापिस लाने रिहिस, ओह ओकर बर ओकर गदहा म काठी बांधिस।
1KI 13:24 जब परमेसर के मनखे ह जावत रिहिस, त रसता म ओला एक सेर मिलिस अऊ सेर ह ओला मार डारिस, अऊ ओकर लास ह रसता म पड़े रहय, अऊ गदहा अऊ सेर ओ लास के बाजू म ठाढ़े रहंय।
1KI 13:25 कुछू मनखेमन ओती ले होवत जावत रिहिन, त ओमन देखिन कि लास ह उहां पड़े हवय, अऊ सेर ह लास के बाजू म ठाढ़े हवय, तब ओमन ओ सहर म जाके बताईन, जिहां ओ डोकरा अगमजानी रहत रिहिस।
1KI 13:26 जब ओ अगमजानी, जऊन ह ओला रसता ले लहुंटाके लाने रिहिस, ये बात ला सुनिस, त ओह कहिस, “येह परमेसर के ओ मनखे अय, जऊन ह यहोवा के बचन ला धियान नइं दीस। एकरसेति यहोवा ह ओला सेर के हवाले कर दीस; अऊ सेर ह ओला चीरके मार डारिस, जइसने कि यहोवा के बचन ह ओला चेतउनी दे रिहिस।”
1KI 13:27 तब ओ अगमजानी ह अपन बेटामन ले कहिस, “मोर बर गदहा म काठी बांधव,” अऊ ओमन काठी बांधिन।
1KI 13:28 तब ओह बाहिर गीस अऊ देखिस कि लास ह रसता म पड़े रहय, अऊ गदहा अऊ सेर ओ लास के बाजू म ठाढ़े रहंय। सेर ह न तो लास ला खाय रिहिस अऊ न ही गदहा ला फाड़े रिहिस।
1KI 13:29 तब ओ सियान अगमजानी ह परमेसर के मनखे के लास ला उठाके गदहा के ऊपर रखिस, अऊ ओकर बर सोक मनाय बर अऊ ओला माटी देय बर अपन सहर म ले आईस।
1KI 13:30 तब ओह ओ लास ला अपन खुद के कबर म रखिस, अऊ ओमन ओकर बर सोक मनाईन अऊ कहिन, “हाय, मोर भाई!”
1KI 13:31 ओला माटी देय के बाद, ओ अगमजानी ह अपन बेटामन ले कहिस, “जब में मर जाहूं, त मोला ओ कबर म माटी देवव, जेमा परमेसर के ओ मनखे ला माटी देय गे हवय; मोर हाड़ामन ला ओकर हाड़ामन के बाजू म रखव।
1KI 13:32 काबरकि जऊन संदेस, ओह यहोवा के बचन के दुवारा बेतेल के बेदी के बिरूध अऊ सामरिया के नगरमन के ऊंचहा जगहमन के जम्मो देवालय के बिरूध दे रिहिस, ओह जरूर पूरा होही।”
1KI 13:33 येकर बाद घलो, यरोबाम ह अपन दुस्ट काममन ला नइं छोंड़िस, पर एक बार फेर, ओह जम्मो किसम के मनखेमन ला ऊंचहा जगहमन के पुरोहित ठहिराईस। जऊन कोनो भी पुरोहित बने बर चाहिस, यरोबाम ह ओकर संस्कार ऊंचहा जगहमन बर कर देवत रिहिस।
1KI 13:34 येह यरोबाम के घर के पाप ठहिरिस, अऊ येकरे कारन ओकर पतन होईस अऊ ओह धरती ऊपर ले नास हो गीस।
1KI 14:1 ओ बेरा म यरोबाम के बेटा अबियाह ह बेमार हो गीस,
1KI 14:2 तब यरोबाम ह अपन घरवाली ला कहिस, “जा अऊ अपन भेस ला अइसने बदल ले कि तोला कोनो यरोबाम के घरवाली के रूप म झन चिन सकंय। तब सीलो सहर ला चले जाबे। उहां अहियाह अगमजानी हवय, जऊन ह मोर ले कहे रिहिस कि मेंह ये मनखेमन के राजा बनहूं।
1KI 14:3 अपन संग दस ठन रोटी, कुछू केक अऊ एक कुप्पी सहद ले, अऊ ओकर मेर जा। ओह तोला बताही कि लड़का के का होही।”
1KI 14:4 जइसने यरोबाम ह कहिस, ओकर घरवाली ह वइसनेच करिस अऊ सीलो म अहियाह के घर गीस। अहियाह ह देखे नइं सकत रिहिस; ओकर उमर होय के कारन, ओकर नजर ह कमजोर हो गे रिहिस।
1KI 14:5 पर यहोवा ह अहियाह ला ये बता दे रिहिस, “यरोबाम के घरवाली अपन बेटा के बारे म पुछे बर तोर करा आवत हे, काबरकि ओह बेमार हवय, अऊ तेंह ओकर ले ये-ये बात कहिबे। जब इहां आही, त ओह अइसने देखाही, जइसने ओह कोनो अऊ अय।”
1KI 14:6 एकरसेति जब अहियाह ह कपाट करा आवत ओकर गोड़ के अवाज ला सुनिस, त ओह कहिस, “हे यरोबाम के घरवाली, भीतर आ। तेंह काबर ये भेस बदले हस? तोला बताय बर, मोला खराप संदेस मिले हवय।
1KI 14:7 जा अऊ यरोबाम ला बता कि यहोवा, इसरायल के परमेसर ह ये कहिथे: ‘मेंह तोला मनखेमन के बीच ले उठांय अऊ अपन मनखे इसरायलीमन ऊपर सासन करइया ठहिरांय।
1KI 14:8 मेंह दाऊद के घराना ले राज ला छीनके तोला दे देंव, पर तेंह मोर सेवक दाऊद के सहीं नइं ठहिरय, जऊन ह मोर हुकूममन ला मानिस अऊ अपन पूरा मन से मोर पाछू चलिस, अऊ सिरिप ओही काम करिस, जऊन ह मोर नजर म सही अय।
1KI 14:9 तेंह ओ जम्मो ले जादा दुस्ट काम करे हवस, जऊन मन तोर ले पहिले रिहिन। तेंह अपन बर धातु के आने देवता अऊ मूरतीमन ला बना ले हस; तेंह मोर गुस्सा ला भड़काय हस अऊ मोर कोति ले अपन मुहूं फेर ले हस।
1KI 14:10 “ ‘येकरे कारन, मेंह यरोबाम के घराना ऊपर बिपत्ति लानहूं। मेंह इसरायल म यरोबाम के हर एक आदमी ला नास कर दूहूं—चाहे गुलाम होवय या सुतंतर। मेंह यरोबाम के घराना ला अइसने जला दूहूं, जइसने कोनो गोबर ला पूरा खतम होवत तक जलाथे।
1KI 14:11 यरोबाम के घराना के जऊन मन सहर म मरहीं, ओमन ला कुकुरमन खाहीं, अऊ जऊन मन मैदान म मरहीं, ओमन ला चिरईमन खा जाहीं। काबरकि यहोवा ह ये कहे हवय!’
1KI 14:12 “जहां तक तोर बात ए, तेंह घर वापिस जा। जब तें अपन सहर के भीतर गोड़ रखबे, त ओ छोकरा ह मर जाही।
1KI 14:13 जम्मो इसरायलीमन ओकर बर सोक मनाहीं अऊ ओला माटी दीहीं। ओह यरोबाम के घराना के सिरिप एके झन होही, जऊन ला माटी दिये जाही, काबरकि यरोबाम के घराना म सिरिप ओहीच ह एके झन हवय, जऊन म यहोवा, इसरायल के परमेसर ह कुछू बने चीज पाय हवय।
1KI 14:14 “यहोवा ह इसरायल ऊपर अपन बर एक अइसने राजा ठाढ़ करही, जऊन ह यरोबाम के परिवार ला नास कर दीही। अऊ अब येकर सुरूआत घलो हो चुके हवय।
1KI 14:15 अऊ यहोवा इसरायल ला अइसने मारही, जइसने पानी म नरकट के पऊधा हलाय जाथे। ओह इसरायल ला ये बने भुइयां ले उखान दीही, जेला ओह ओमन के पुरखामन ला देय रिहिस अऊ ओमन ला फरात नदी के ओ पार तितिर-बितिर कर दीही, काबरकि ओमन असेरा देवी के खंभा बनाके यहोवा के गुस्सा ला भड़काय हवंय।
1KI 14:16 अऊ ओ पाप, जऊन ला यरोबाम ह करिस अऊ इसरायल ले करवाईस, ओकर कारन यहोवा इसरायल ला तियाग दीही।”
1KI 14:17 तब यरोबाम के घरवाली ह उठिस अऊ उहां ले तिरसा सहर चल दीस। जइसने ही ओह घर के कपाट म गोड़ रखिस, ओ छोकरा ह मर गीस।
1KI 14:18 ओमन ओला माटी दीन, अऊ जम्मो इसरायल ओकर बर सोक मनाईस, जइसने कि यहोवा ह अपन सेवक अहियाह अगमजानी के जरिये कहे रिहिस।
1KI 14:19 यरोबाम के सासन के आने घटना, ओकर लड़ई अऊ ओह कइसने सासन करिस—ये जम्मो बात इसरायल के राजामन के इतिहास के किताब म लिखाय हवय।
1KI 14:20 यरोबाम ह बाईस साल तक राज करिस अऊ तब अपन पुरखामन संग हमेसा बर सुत गीस अऊ नादाब नांव के ओकर बेटा ह ओकर जगह म राजा होईस।
1KI 14:21 सुलेमान के बेटा, रहूबियाम ह यहूदा के राजा रिहिस। ओह इकतालीस बछर के रिहिस, जब ओह राजा बनिस, अऊ ओह यरूसलेम सहर म सतरह साल ले राज करिस, ओ सहर जेला यहोवा ह इसरायल के जम्मो गोत्र म ले अपन नांव रखे बर चुने रिहिस। ओकर दाई के नांव नामा रिहिस; ओह एक अमोनी माईलोगन रिहिस।
1KI 14:22 यहूदीमन यहोवा के नजर म दुस्ट काम करिन। अपन पुरखामन ले घलो जादा पाप करके ओमन परमेसर के जलन रखइया कोरोध ला अऊ भड़काईन।
1KI 14:23 ओमन जम्मो ऊंचहा पठार अऊ छइहां देवइया रूखमन के खाल्हे म, अपन बर ऊंचहा जगह, पबितर पथरा अऊ असेरा के खंभा बना लीन।
1KI 14:24 अऊ त अऊ उहां देस म पुरूस बेस्यामन घलो देवालय म रिहिन; मनखेमन ओ जातिमन के जम्मो घिनौना काम करत रिहिन, जेमन ला यहोवा ह इसरायलीमन के आघू ले निकाल देय रिहिस।
1KI 14:25 राजा रहूबियाम के राज के पांचवां साल म, मिसर के राजा सीसक ह यरूसलेम ऊपर हमला करिस,
1KI 14:26 अऊ ओह यहोवा के मंदिर के खजाना अऊ राजमहल के खजाना ला उठाके ले गीस। ओह सबो चीज ला ले गीस, जेमा सुलेमान के बनाय सोन के जम्मो ढालमन घलो रिहिन।
1KI 14:27 एकरसेति राजा रहूबियाम ह ओमन के बदला म कांसा के ढालमन ला बनवाईस अऊ ये ढालमन ला पहरेदारमन के ओ सेनापतिमन ला सऊंप दीस, जेमन राजमहल के प्रवेस दुवार म पहरेदारी करत रिहिन।
1KI 14:28 जब भी राजा ह यहोवा के मंदिर म जावय, तब पहरेदारमन ढालमन ला धरके चलंय, अऊ ओकर बाद ओमन ओ ढालमन ला पहरेदारमन के कमरा म लहुंटा देवंय।
1KI 14:29 रहूबियाम के सासन के आने घटना, अऊ जऊन कुछू ओह करिस, ओ जम्मो बात यहूदा के राजामन के इतिहास के किताब म लिखाय हवय?
1KI 14:30 रहूबियाम अऊ यरोबाम के बीच म हमेसा लड़ई होवत रिहिस।
1KI 14:31 अऊ रहूबियाम ह अपन पुरखामन संग हमेसा बर सुत गीस अऊ ओला ओमन के संग दाऊद के सहर म माटी देय गीस। ओकर दाई के नांव नामा रिहिस, जऊन ह एक अमोनी माईलोगन रिहिस। अऊ ओकर बेटा अबियाह ओकर जगह म राजा बनिस।
1KI 15:1 नबात के बेटा, यरोबाम के राज के अठारहवां साल म अबियाह ह यहूदा के राजा बनिस,
1KI 15:2 अऊ ओह तीन साल तक यरूसलेम म राज करिस। ओकर दाई के नांव माका रिहिस, जऊन ह अबसालोम के बेटी रिहिस।
1KI 15:3 ओह ओ जम्मो पाप करिस, जऊन ला ओकर ददा ह ओकर पहिले करे रिहिस; ओकर मन ह यहोवा अपन परमेसर कोति अपन पुरखा दाऊद के सहीं पूरा नइं लगे रिहिस।
1KI 15:4 तभो ले दाऊद के खातिर, यहोवा ओकर परमेसर ह यरूसलेम म ओला एक दीया दीस, याने कि ओकर बेटा ला ओकर बाद राजा ठहिराईस अऊ यरूसलेम ला मजबूत करिस।
1KI 15:5 काबरकि दाऊद ह ओ जम्मो काम करिस, जऊन ह यहोवा के नजर म सही रिहिस अऊ सिरिप हित्ती उरियाह के मामला ला छोंड़के, ओह अपन जिनगी भर यहोवा के कोनो हुकूम ला नइं टोरिस।
1KI 15:6 अबियाह के जिनगी भर, ओकर अऊ यरोबाम के बीच लड़ई चलते रिहिस।
1KI 15:7 अबियाह के सासन के आने घटनामन अऊ जऊन कुछू ओह करिस, ओ जम्मो काम यहूदा के राजामन के इतिहास के किताब म लिखाय हवय। अऊ अबियाह अऊ यरोबाम के बीच लड़ई होते रिहिस।
1KI 15:8 अऊ अबियाह ह अपन पुरखामन संग हमेसा बर सुत गीस अऊ ओला दाऊद के सहर म माटी देय गीस। अऊ ओकर बेटा आसा ह ओकर जगह म राजा बनिस।
1KI 15:9 इसरायल के राजा यरोबाम के राज के बीसवां साल म, आसा ह यहूदा के राजा बनिस,
1KI 15:10 अऊ ओह यरूसलेम म इकतालीस साल तक राज करिस। ओकर दादी के नांव माका रिहिस, जऊन ह अबसालोम के बेटी रिहिस।
1KI 15:11 आसा ह अपन पुरखा दाऊद के सहीं ओ काम करिस, जऊन ह यहोवा के नजर म सही रिहिस।
1KI 15:12 ओह देवालय के पुरूस बेस्यामन ला देस ले निकाल दीस अऊ जतेक मूरती ओकर पुरखामन बनाय रिहिन, ओ जम्मो ला ओह हटा दीस।
1KI 15:13 अऊ त अऊ ओह अपन दादी माका ला राज-माता के पद ले हटा दीस, काबरकि माका ह असेरा के अराधना करे बर एक घिनौना मूरती बनाय रिहिस। आसा ह ओला काट डारिस अऊ ओला किदरोन घाटी म जला दीस।
1KI 15:14 हालाकि आसा ह ऊंचहा जगहमन ला नइं हटाईस, तभो ले ओकर मन ह पूरा जिनगी भर यहोवा बर समरपित रिहिस।
1KI 15:15 जऊन सोन, चांदी अऊ सामानमन ला, ओ अऊ ओकर ददा अरपन करे रिहिन, ओ जम्मो ला ओह यहोवा के मंदिर म ले आईस।
1KI 15:16 आसा अऊ इसरायल के राजा बासा के बीच ओमन के सासन करत तक लड़ई होते रिहिस।
1KI 15:17 इसरायल के राजा बासा ह यहूदा के बिरूध गीस अऊ रामा नगर के किलाबंदी करिस, ताकि यहूदा के राजा आसा के इलाका ले न तो कोनो निकल सकंय अऊ न ही कोनो ओकर राज म जा सकंय।
1KI 15:18 तब आसा ह जम्मो सोन अऊ चांदी ला लीस, जऊन ह यहोवा के मंदिर अऊ ओकर महल के खजानामन म बांचे रिहिस, अऊ ओला अपन करमचारीमन के हांथ म सऊंप दीस अऊ ओमन ला अराम के राजा बेन-हदद करा पठोईस, जऊन ह हेज्योन के पोता अऊ तबरिम्मोन के बेटा रिहिस अऊ दमिस्क सहर म सासन करत रिहिस।
1KI 15:19 ओह कहिस, “जइसने मोर ददा अऊ तोर ददा के बीच म करार होय रिहिस, वइसनेच मोर अऊ तोर बीच म घलो करार होवय। देख, मेंह तोर मेर सोन अऊ चांदी के भेंट पठोवत हंव। एकरसेति तें इसरायल के राजा बासा के संग अपन करार ला टोर दे, ताकि ओह मोर करा ले पाछू हट जाय।”
1KI 15:20 बेन-हदद ह राजा आसा के बात ला मान लीस अऊ अपन सेना के सेनापतिमन ला इसरायल के नगरमन के बिरूध भेजिस। ओह इयोन, दान, आबेल-बेत-माका अऊ नपताली ला मिलाके जम्मो किन्नेरेत ला जीत लीस।
1KI 15:21 जब बासा ह ये बात ला सुनिस, त ओह रामा सहर ला बनाय के काम ला रोक दीस अऊ तिरसा सहर चले गीस।
1KI 15:22 तब राजा आसा ह जम्मो यहूदा म ये हुकूम दीस—अऊ कोनो ला ये हुकूम ले छूट नइं रिहिस—अऊ ओमन रामा ले ओ पथरा अऊ इमारती लकड़ीमन ला ले गीन, जेमन के उपयोग बासा ह उहां करत रिहिस। येमन ले राजा आसा ह बिनयामीन के गेबा अऊ संग म मिसपा सहरमन ला घलो बनाईस।
1KI 15:23 आसा के सासन के आने जम्मो घटना, ओकर जम्मो काम, जऊन कुछू ओह करिस अऊ जऊन सहरमन ला ओह बनाईस, ये जम्मो बात यहूदा के राजामन के इतिहास के किताब म लिखाय हवय। पर ओकर डोकरा होय के बाद ओकर गोड़मन म बेमारी हो गीस।
1KI 15:24 तब आसा अपन पुरखामन संग हमेसा बर सुत गीस अऊ ओला ओमन के संग ओकर पुरखा दाऊद के सहर म माटी दिये गीस। अऊ ओकर बेटा यहोसापात ओकर जगह म राजा होईस।
1KI 15:25 यहूदा के राजा आसा के राज के दूसर साल म यरोबाम के बेटा नादाब ह इसरायल के राजा बनिस, अऊ ओह इसरायल ऊपर दू बछर तक राज करिस।
1KI 15:26 ओह यहोवा के नजर म दुस्ट काम करिस अऊ अपन ददा के रसता म चलत ओहीच पाप करिस, जऊन ला ओकर ददा ह इसरायल ले करवाय रिहिस।
1KI 15:27 जब नादाब अऊ जम्मो इसरायलीमन पलिस्तीमन के एक नगर, गिब्बतोन ला घेरे रिहिन, तब इस्साकार के गोत्र के अहियाह के बेटा, बासा ह नादाब के बिरूध गोस्टी करिस, अऊ ओला गिब्बतोन म मार डारिस।
1KI 15:28 यहूदा के राजा आसा के तीसरा साल म, बासा ह नादाब ला मार डारिस अऊ ओकर जगह म राजा बन गीस।
1KI 15:29 राजा बनते ही, बासा ह यरोबाम के पूरा परिवार ला मार डारिस। ओह यरोबाम के घराना के एको झन ला घलो जीयत नइं छोंड़िस, पर ओ जम्मो झन ला नास कर दीस, अऊ येह यहोवा के ओ बचन के मुताबिक होईस, जऊन ला परमेसर ह अपन सेवक सीलो के अहियाह के जरिये कहे रिहिस।
1KI 15:30 येह एकर खातिर होईस, काबरकि यरोबाम ह पाप करिस अऊ इसरायल ले घलो पाप करवाईस, अऊ अइसने करके, ओह यहोवा, इसरायल के परमेसर के गुस्सा ला भड़काईस।
1KI 15:31 नादाब के सासन के आने घटनामन, अऊ जऊन कुछू ओह करिस, ओ जम्मो बात इसरायल के राजामन के इतिहास के किताब म लिखाय हवय।
1KI 15:32 आसा अऊ इसरायल के राजा बासा के बीच ओमन के सासन करत तक लड़ई होते रिहिस।
1KI 15:33 यहूदा के राजा आसा के राज के तीसरा साल म अहियाह के बेटा बासा ह तिरसा म जम्मो इसरायल ऊपर राजा बनिस, अऊ ओह चौबीस साल तक राज करिस।
1KI 15:34 यरोबाम के रसता म चलत, ओह यहोवा के नजर म दुस्ट काम करिस, अऊ ओहीच पाप करिस, जेला यरोबाम ह इसरायल ले करवाय रिहिस।
1KI 16:1 तब बासा के बिसय म यहोवा के ये बचन हनानी के बेटा येहू मेर आईस:
1KI 16:2 “मेंह तोला माटी ले उठाके अपन इसरायली मनखेमन ऊपर सासन करइया ठहिरांय, पर तेंह यरोबाम के रसता म चलके मोर इसरायली मनखेमन ले पाप करवाय अऊ ओमन के पाप के दुवारा मोर गुस्सा ला भड़काय।
1KI 16:3 एकरसेति, मेंह बासा अऊ ओकर घराना ला नास कर दूहूं, अऊ मेंह तोर घराना ला नबात के बेटा यरोबाम के सहीं कर दूहूं।
1KI 16:4 बासा के घर के जऊन मन सहर म मरहीं, ओमन ला कुकुरमन खा जाहीं, अऊ ओकर जऊन मनखेमन खुले जगह म मरहीं, ओमन ला चिरईमन खा जाहीं।”
1KI 16:5 बासा के सासन के आने घटनामन, जऊन कुछू ओह करिस अऊ ओकर काम, ये जम्मो बात इसरायल के राजामन के इतिहास के किताब म लिखाय हवय।
1KI 16:6 आखिरी म बासा ह अपन पुरखामन संग हमेसा बर सुत गीस अऊ तिरसा म ओला माटी दिये गीस। अऊ ओकर बेटा एला ओकर जगह म राजा होईस।
1KI 16:7 हनानी के बेटा अगमजानी येहू के जरिये यहोवा के अऊ भी बचन, बासा अऊ ओकर घराना के बिरूध म आईस, काबरकि ओह यहोवा के नजर म बहुंत दुस्ट काम करे रिहिस, अऊ अपन काम के दुवारा ओकर गुस्सा ला भड़काय रिहिस, अऊ ओह यरोबाम के घराना सहीं हो गे रिहिस—अऊ येकर खातिर घलो कि बासा ह यरोबाम के घराना ला नास कर दे रिहिस।
1KI 16:8 यहूदा के राजा आसा के राज के छब्बीसवां साल म, बासा के बेटा एला इसरायल के राजा बनिस, अऊ ओह तिरसा म दू साल तक राज करिस।
1KI 16:9 जिमरी नांव के राजा एला के एक करमचारी, जऊन ह राजा के आधा रथमन के मुखिया रिहिस; ओह राजा के बिरूध गोस्टी करिस। ओतेक बेरा, एला ह तिरसा म महल के परधान अरसा के घर म मंद पीके मतवाला हो गे रहय।
1KI 16:10 तब जिमरी ह भीतर आईस अऊ एला ऊपर वार करके ओला मार डारिस, अऊ ओकर जगह म राजा बन गीस। येह यहूदा के राजा आसा के राज के सत्ताईसवां साल म होईस।
1KI 16:11 ओह राज करे के सुरू करते अऊ सिंघासन म बईठते ही बासा के जम्मो परिवार ला मार डारिस। ओह ओकर परिवार के एको झन पुरूस ला नइं छोंड़िस, अऊ त अऊ ओह ओकर रिस्तेदार अऊ संगीमन के एको पुरूस ला घलो जीयत नइं छोंड़िस।
1KI 16:12 ये किसम ले यहोवा के ओ बचन के मुताबिक, जऊन ला ओह येहू अगमजानी के जरिये बासा के बिरूध कहे रिहिस, जिमरी ह बासा के जम्मो परिवार ला नास कर दीस—
1KI 16:13 काबरकि बासा अऊ ओकर बेटा एला बहुंत पाप करे रिहिन अऊ इसरायल ले घलो करवाय रिहिन अऊ ओमन अपन बेकार के मूरतीमन के दुवारा यहोवा, इसरायल के परमेसर के गुस्सा ला भड़काय रिहिन।
1KI 16:14 एला के सासन के आने घटनामन, अऊ जऊन कुछू ओह करिस, ओ जम्मो बात इसरायल के राजामन के इतिहास के किताब म लिखाय हवय।
1KI 16:15 यहूदा के राजा आसा के राज के सत्ताईसवां साल म जिमरी ह तिरसा म सात दिन तक राज करिस। सेना के मनखेमन एक पलिस्ती नगर, गिब्बतोन के लकठा म डेरा डाले रहंय।
1KI 16:16 जब सिविर म इसरायली मनखेमन सुनिन कि जिमरी ह राजा के बिरूध गोस्टी करके ओला मार डारे हवय, त ओहीच दिन ओमन उहां सिविर म सेना के सेनापति ओमरी ला इसरायल के राजा घोसित कर दीन।
1KI 16:17 तब ओमरी अऊ ओकर संग के जम्मो इसरायलीमन गिब्बतोन ले हट गीन अऊ तिरसा ला घेर लीन।
1KI 16:18 जब जिमरी ह देखिस कि सहर ला ले लिये गे हवय, त ओह राजमहल के किला भीतर गीस अऊ महल म अपन चारों कोति आगी लगा लीस, अऊ जरके मर गीस,
1KI 16:19 येह एकरसेति होईस, काबरकि ओह बहुंत पाप करे रिहिस, अऊ यहोवा के नजर म दुस्ट काम करके यरोबाम के रसता म चले रिहिस अऊ यरोबाम के सहीं पाप करके इसरायल ले घलो पाप करवाईस।
1KI 16:20 जिमरी के सासन के आने घटनामन, अऊ जऊन बिदरोह, ओह करिस, ओ जम्मो बातमन इसरायल के राजामन के इतिहास के किताब म लिखाय हवय।
1KI 16:21 तब इसरायली मनखेमन दू भाग म बंट गीन; आधा मनखेमन गीनत के बेटा तिबनी ला राजा बनाय बर समरथन करिन, त आधा मनखे ओमरी के समरथन करिन।
1KI 16:22 पर ओमरी के समरथकमन गीनत के बेटा तिबनी के समरथकमन ले जादा ताकतवर रिहिन। एकरसेति तिबनी ह मारे गीस अऊ ओमरी ह राजा बनिस।
1KI 16:23 यहूदा के राजा आसा के राज के इकतीसवां साल म, ओमरी ह इसरायल के राजा बनिस, अऊ ओह बारह साल तक राज करिस, जेमा के छै साल ओकर राज ह तिरसा ऊपर रिहिस।
1KI 16:24 ओह सेमेर ले सामरिया के पहाड़ी ला दू टेलेन्ट चांदी म बिसाईस अऊ ओ पहाड़ी ऊपर एक सहर बसाईस; अऊ अपन बसाय ओ सहर के नांव पहाड़ी के पहिले के मालिक सेमेर के नांव म सामरिया रखिस।
1KI 16:25 पर ओमरी ह यहोवा के नजर म दुस्ट काम करिस अऊ ओ जम्मो राजामन ले घलो जादा पाप करिस, जऊन मन ओकर पहिले रिहिन।
1KI 16:26 ओह पूरा नबात के बेटा यरोबाम के रसता म चलिस, अऊ ओहीच पाप करिस, जेला यरोबाम ह इसरायली मनखेमन ले करवाय रिहिस, अऊ ये किसम ले, ओमन अपन बेकार के मूरतीमन के दुवारा यहोवा, इसरायल के परमेसर के गुस्सा ला भड़काईन।
1KI 16:27 ओमरी के सासन के आने घटनामन, जऊन कुछू ओह करिस अऊ ओकर काम, ये जम्मो बात इसरायल के राजामन के इतिहास के किताब म लिखाय हवय।
1KI 16:28 ओमरी ह अपन पुरखामन के संग हमेसा बर सुत गीस अऊ ओला सामरिया म माटी दिये गीस। अऊ ओकर बेटा अहाब ह ओकर जगह म राजा होईस।
1KI 16:29 यहूदा के राजा आसा के राज के अड़तीसवां साल म ओमरी के बेटा, अहाब ह इसरायल के राजा बनिस, अऊ इसरायल ऊपर सामरिया म बाईस बरस तक राज करिस।
1KI 16:30 ओमरी के बेटा, अहाब ह यहोवा के नजर म ओकर पहिले के जम्मो राजामन ले जादा दुस्ट काम करिस।
1KI 16:31 न सिरिप ओह नबात के बेटा यरोबाम के सहीं पाप करई ला मामूली बात समझिस, पर ओह सीदोनीमन के राजा एतबाल के बेटी, ईजेबेल ले बिहाव घलो कर लीस, अऊ बाल देवता के सेवा सुरू करके ओकर अराधना करिस।
1KI 16:32 ओह बाल के एक मंदिर सामरिया म बनाके, ओमा बाल बर एक बेदी बनाईस।
1KI 16:33 अहाब ह एक असेरा के खंभा घलो बनाईस अऊ अपन पहिले के जम्मो इसरायली राजामन ले अऊ जादा पाप करके यहोवा, इसरायल के परमेसर के गुस्सा ला भड़काईस।
1KI 16:34 अहाब के समय म, बेतेल के रहइया हीएल ह यरीहो ला फेर बनाईस; जब ओह ओकर नीव डारिस, त ओकर पहिलांत बेटा अबीराम ह मर गीस, अऊ जब ओह ओकर दुवारमन ला ठाढ़ करिस, त ओकर सबले छोटे बेटा सगूब ह मर गीस, अऊ येह यहोवा के ओ बचन के मुताबिक होईस, जऊन ला ओह नून के बेटा यहोसू के दुवारा कहे रिहिस।
1KI 17:1 गिलाद म तिसबे नगर के रहइया, एलियाह तिसबी ह राजा अहाब ला कहिस, “ओ यहोवा, इसरायल के परमेसर के कसम, जेकर सेवा मेंह करथंव, अवइया कुछू साल म मोर कहे बिगर, न तो ओस गिरही अऊ न ही पानी बरसही।”
1KI 17:2 तब यहोवा के ये बचन एलियाह करा आईस:
1KI 17:3 “ये जगह ला छोंड़ अऊ पूरब दिग म जा अऊ करीत नांव के घाटी म छुप जा, जऊन ह यरदन के पूरब म हवय।
1KI 17:4 तें नरवा के पानी ला पीबे, अऊ मेंह कऊआमन ला हुकूम दे हवंव कि ओमन तोर बर उहां जेवन लानहीं।”
1KI 17:5 यहोवा के कहे बचन के मुताबिक ओह करिस। ओह यरदन के पूरब कोति, करीत नांव के घाटी म गीस अऊ उहां रहे लगिस।
1KI 17:6 कऊआमन बिहनियां अऊ सांझ के बेरा ओकर बर रोटी अऊ मांस लानंय, अऊ ओह नरवा के पानी ला पीयय।
1KI 17:7 पानी नइं गिरे के कारन, कुछू समय के बाद, नरवा ह सूख गीस।
1KI 17:8 तब यहोवा के ये बचन एलियाह करा आईस:
1KI 17:9 “सीदोन इलाका के सारपत नगर म तुरते जा अऊ उहां रह। मेंह उहां के एक बिधवा ला तोला खवाय बर हुकूम दे हवंव।”
1KI 17:10 एकरसेति ओह सारपत गीस। जब ओह नगर के दुवार मेर आईस, त ओह देखिस कि उहां एक बिधवा ह लकड़ी बीनत रहय। ओह ओला बलाके कहिस, “का तेंह कोनो बरतन म मोर पीये बर थोरकन पानी लानबे?”
1KI 17:11 जब ओह पानी लेय बर जावत रिहिस, त एलियाह ह ओला पुकारके कहिस, “अऊ मोर बर रोटी के एक ठन टुकड़ा घलो लेवत आबे।”
1KI 17:12 ओ बिधवा ह कहिस, “यहोवा तोर परमेसर के जिनगी के कसम, मोर करा कोनो रोटी नइं ए—एक घड़ा म सिरिप मुट्ठी भर पीसान अऊ एक कुप्पी म थोरकन तेल हवय। मेंह कुछू लकड़ी बीनत हंव, ताकि येला घर ले जाके मोर अऊ मोर बेटा बर खाना पकावंव, अऊ हमन ओला खावन अऊ मर जावन।”
1KI 17:13 एलियाह ह ओला कहिस, “झन डर। घर जा अऊ जइसने तेंह अभी कहय, वइसने कर। पर पहिले मोर बर ओ पीसान ले एक ठन छोटे रोटी बनाके मोर करा लान, अऊ ओकर बाद, अपन अऊ अपन बेटा बर कुछू बना।
1KI 17:14 काबरकि यहोवा, इसरायल के परमेसर ये कहत हे: ‘जब तक यहोवा ह भुइयां म पानी नइं बरसाही, तब तक न तो ओ घड़ा के पीसान सिराही, अऊ न ही ओ कुप्पी के तेल घटही।’ ”
1KI 17:15 तब ओह चले गीस, अऊ एलियाह के कहे बचन के मुताबिक करिस। अऊ एलियाह अऊ ओ माईलोगन अऊ ओकर परिवार बर हर दिन जेवन के परबंध होवय।
1KI 17:16 काबरकि न तो घड़ा के पीसान ह सिराईस, अऊ न ही कुप्पी के तेल ह घटिस, जइसने कि यहोवा ह एलियाह के दुवारा कहे रिहिस।
1KI 17:17 कुछू समय के बाद, घर के मालकिन ओ बिधवा के बेटा ह बेमार हो गीस। ओकर बेमारी बढ़ते अऊ बढ़ते गीस, अऊ आखिरी म ओकर सांस लेवई बंद हो गीस।
1KI 17:18 तब ओ माईलोगन ह एलियाह ले कहिस, “हे परमेसर के जन! तोर मन म मोर बिरोध म का हवय? का तेंह मोला मोर पाप के सुरता कराय बर अऊ मोर बेटा ला मारे बर आय हवस?”
1KI 17:19 एलियाह ह ओला जबाब दीस, “अपन बेटा ला मोला दे।” तब ओह माईलोगन के कोरा ले ओकर बेटा ला ले लीस अऊ ओला लेके ऊपर के कमरा म गीस, जिहां ओह खुद रहत रिहिस, अऊ ओला अपन खटिया म लेटा दीस।
1KI 17:20 तब ओह गोहार पारके यहोवा ला कहिस, “हे यहोवा मोर परमेसर! ये बिधवा, जेकर इहां मेंह ठहिरे हंव, ओकर बेटा ला मारके, का तेंह ये बिधवा ऊपर घलो बिपत्ति लाने हस?”
1KI 17:21 तब ओह ओ छोकरा ऊपर तीन बार पसर गीस अऊ यहोवा ला गोहार पारके कहिस, “हे यहोवा मोर परमेसर! ये छोकरा के परान येमा फेर डाल दे।”
1KI 17:22 एलियाह के ये गोहार ला यहोवा ह सुनिस, अऊ ओ छोकरा के परान ओमा फेर आ गीस अऊ ओह जी उठिस।
1KI 17:23 तब एलियाह ओ लइका ला कमरा ले खाल्हे घर म ले गीस, अऊ ओह लइका ला ओकर दाई के हांथ म सऊंपके कहिस, “देख, तोर बेटा ह जीयत हवय!”
1KI 17:24 तब ओ माईलोगन ह एलियाह ले कहिस, “अब मेंह जान गे हंव कि तेंह परमेसर के जन अस अऊ तोर मुहूं ले निकले यहोवा के बचन म सच्चई हवय।”
1KI 18:1 बहुंत समय के बाद, तीसरा साल म, यहोवा के ये बचन एलियाह करा आईस: “जा अऊ अपनआप ला अहाब ला देखा, अऊ मेंह भुइयां म पानी बरसाहूं।”
1KI 18:2 तब एलियाह अपनआप ला देखाय बर अहाब करा गीस। ओ बेरा म, सामरिया म भारी अकाल पड़े रहय,
1KI 18:3 अऊ अहाब ह अपन महल के अधिकारी ओबदयाह ला बलाय रहय। (ओबदयाह ह यहोवा के बड़े भक्त रिहिस।
1KI 18:4 जब ईजेबेल ह यहोवा के अगमजानीमन ला नास करत रिहिस, तब ओबदयाह ह एक सौ अगमजानीमन ला लेके ओमन के पचास-पचास दू ठन दल बनाईस अऊ ओमन ला दू ठन खोड़रा म छुपा दे रिहिस, अऊ ओमन बर जेवन अऊ पानी के परबंध घलो करे रिहिस।)
1KI 18:5 अहाब ह ओबदयाह ला कहे रिहिस, “देस के जम्मो सोता अऊ घाटीमन ला जाके देख। सायद हमन ला घोड़ा अऊ खच्चरमन ला बंचाय बर कुछू कांदी मिल जाय अऊ हमन ला हमर कोनो पसु ला मारना झन पड़य।”
1KI 18:6 एकरसेति ओमन देस म जाय बर देस के इलाका ला बांट लीन; अहाब ह एक दिग म गीस, त ओबदयाह ह दूसर दिग म।
1KI 18:7 जब ओबदयाह ह जावत रिहिस, त रसता म ओला एलियाह मिलिस। ओबदयाह ह ओला चिन डारिस अऊ भुइयां म झुकके ओला दंडवत करिस, अऊ कहिस, “हे मोर मालिक, एलियाह, का सही म, ये तें अस?”
1KI 18:8 ओह जबाब दीस, “हव मेंह अंव। जा अऊ अपन मालिक ला बता, ‘एलियाह ह इहां हवय।’ ”
1KI 18:9 ओबदयाह ह कहिस, “मेंह का पाप करे हंव कि तेंह अपन सेवक ला मार डारे बर, अहाब के हांथ म कर देय चाहथस?
1KI 18:10 यहोवा तोर परमेसर के जिनगी के कसम, कोनो अइसन देस या राज नइं ए, जिहां मोर मालिक ह तोला खोजे बर मनखेमन ला नइं पठोय होही। अऊ जब भी कोनो देस या राज के मनखेमन कहंय कि तेंह उहां नइं अस, त मोर मालिक ओमन ले किरिया खवाके कहवाय कि ओमन ला तें नइं मिलय।
1KI 18:11 अऊ तेंह मोला कहत हस कि जाके मेंह अपन मालिक ले कहंव, ‘एलियाह ह इहां हवय।’
1KI 18:12 अऊ जइसने ही मेंह तोर करा ले चले जाहूं, वइसने ही यहोवा के आतमा तोला न जाने कहां उठाके ले जाही। यदि मेंह जाके अहाब ला बतावंव अऊ ओला तेंह नइं मिलबे, त ओह मोला मार डारही। तभो ले, में तोर सेवक अपन लइकापन ले यहोवा के भय मानत आय हवंव।
1KI 18:13 हे मोर मालिक, का तेंह ये बात नइं सुने हस कि जब ईजेबेल ह यहोवा के अगमजानीमन ला नास करत रिहिस, त मेंह का करेंव? मेंह यहोवा के एक सौ अगमजानीमन ला लेंव अऊ ओमन के पचास-पचास के दू ठन दल करके, ओमन ला दू ठन खोड़रा म छुपा दे रहेंव, अऊ ओमन के जेवन अऊ पानी के परबंध घलो करेंव।
1KI 18:14 अऊ तेंह मोला कहत हस कि जाके मेंह अपन मालिक ले कहंव, ‘एलियाह ह इहां हवय।’ ओह मोला मार डारही!”
1KI 18:15 एलियाह ह कहिस, “सर्वसक्तिमान यहोवा, जेकर सेवा मेंह करथंव, ओकर जिनगी के कसम, आज ही मेंह अपनआप ला अहाब ला देखाहूं।”
1KI 18:16 तब ओबदयाह ह अहाब करा गीस अऊ ओला बताईस, अऊ अहाब ह एलियाह ले मिले बर गीस।
1KI 18:17 जब ओह एलियाह ला देखिस, त ओह ओला कहिस, “का तेंह ओ मनखे अस, हे इसरायल बर समस्या खड़े करनेवाला?”
1KI 18:18 एलियाह ह जबाब दीस, “मेंह इसरायल बर समस्या नइं खड़े करे हवंव, पर तें अऊ तोर ददा के परिवार ह समस्या खड़े करे हवय। तेंह यहोवा के हुकूम मानना छोंड़ दे हस अऊ बाल देवतामन के पाछू चलत हस।
1KI 18:19 अब तें जम्मो इसरायल के मनखेमन करा खबर भेज कि ओमन आके मोर ले करमेल पहाड़ ऊपर मिलंय। अऊ बाल के साढ़े चार सौ अगमजानी अऊ असेरा के चार सौ अगमजानीमन ला लेके आ, जऊन मन ईजेबेल के मेज म खाथें।”
1KI 18:20 तब अहाब ह जम्मो इसरायल म खबर पठोईस, अऊ अगमजानीमन ला करमेल पहाड़ म इकट्ठा करिस।
1KI 18:21 एलियाह ह मनखेमन के आघू म आके कहिस, “तुमन कब तक दू ठन बिचार के बीच म डोलत रहिहू? यदि यहोवा ह परमेसर अय, त ओकर पाछू चलव; पर यदि बाल ह परमेसर अय, त ओकर पाछू हो लेवव।” पर मनखेमन कुछू नइं कहिन।
1KI 18:22 तब एलियाह ह ओमन ला कहिस, “यहोवा के अगमजानीमन ले सिरिप मेंह एके झन बांचे हंव, पर बाल करा साढ़े चार सौ अगमजानी हवंय।
1KI 18:23 हमर बर दू ठन सांड़ लानव। बाल के अगमजानीमन ओमा के एक ठन ला चुनंय, अऊ ओला कुटा-कुटा काटके कठवा ऊपर रखंय पर ओमा आगी झन लगावंय। मेंह आने सांड़ ला तियार करके ओला कठवा ऊपर रखहूं पर ओमा आगी नइं लगाहूं।
1KI 18:24 तब तुमन अपन देवता ले पराथना करहू, अऊ मेंह यहोवा ले पराथना करहूं। अऊ जऊन देवता ह आगी गिराके जबाब दीही—ओही ह परमेसर अय।” तब जम्मो मनखेमन कहिन, “तेंह बने बात कहे हस।”
1KI 18:25 एलियाह ह बाल के अगमजानीमन ला कहिस, “पहिले तुमन एक सांड़ ला चुनव अऊ ओला तियार करव, काबरकि तुमन बहुंत झन हवव। अपन देवता ले पराथना करव, पर आगी झन लगावव।”
1KI 18:26 तब ओमन ओ सांड़ ला लीन, जऊन ह ओमन ला दिये गे रिहिस अऊ ओला तियार करिन। तब ओमन बिहनियां ले लेके मंझनियां तक ये कहिके बाल ले चिचियाके पराथना करिन, “हे बाल, हमन ला जबाब दे!” पर ओमन ला कोनो जबाब नइं मिलिस; कोनो जबाब नइं दीन। अऊ ओमन अपन बनाय बेदी के चारों कोति नाचे लगिन।
1KI 18:27 मंझन के बेरा, एलियाह ह ये कहिके ओमन ला ताना मारे लगिस, “अऊ जोर से चिचियावव! खचित, ओह एक देवता अय; सायद ओह बहुंत सोच-बिचार करत होही, या ब्यस्त होही, या यातरा करत होही। हो सकत हे, ओह सोवत होही अऊ ओला जगाय के जरूरत हे।”
1KI 18:28 अऊ ओमन अऊ चिचियाय लगिन अऊ अपन रीति-रिवाज के मुताबिक अपनआप ला तलवार अऊ बरछीमन ले तब तक घायल करे लगिन, जब तक कि ओमन के लहू नइं निकले लगिस।
1KI 18:29 आधा दिन बीत गीस, फेर ओमन संझा बलिदान के बेरा होवत तक पागल सहीं अगमबानी करते रिहिन। पर ओमन ला कोनो जबाब नइं मिलिस, कोनो जबाब नइं दीन, कोनो धियान नइं दीन।
1KI 18:30 तब एलियाह ह जम्मो मनखेमन ला कहिस, “इहां, मोर करा आवव।” अऊ ओमन ओकर करा आईन, अऊ ओह यहोवा के बेदी ला मरम्मत करिस, जऊन ला कि टोरके गिरा दिये गे रिहिस।
1KI 18:31 तब एलियाह बारह ठन पथरा लीस, याने कि याकूब म ले आय बारह गोत्र म ले हर एक बर एक-एक ठन पथरा लीस; याकूब ला यहोवा ह कहे रिहिस, “तोर नांव इसरायल होही।”
1KI 18:32 ओ पथरामन ले एलियाह ह यहोवा के नांव म एक बेदी बनाईस, अऊ ओकर चारों कोति अतेक बड़े एक खंचवा कोड़िस कि ओमा दू सेआ बीजा आ सके।
1KI 18:33 तब ओह बेदी म कठवा ला सजाईस, सांड़ ला कुटा-कुटा करके काटिस अऊ ओ कुटामन ला कठवा ऊपर मढ़ा दीस। तब ओह मनखेमन ला कहिस, “चार ठन बड़े घड़ा म पानी भर देवव अऊ ओ पानी ला बलिदान अऊ कठवा ऊपर ढार देवव।”
1KI 18:34 तब ओह कहिस, “वइसनेच फेर करव,” अऊ मनखेमन फेर वइसनेच करिन। ओह कहिस, “तीसरा बार अइसनेच फेर करव,” अऊ मनखेमन तीसरा बार घलो वइसनेच करिन।
1KI 18:35 पानी ह बेदी के चारों कोति बोहा गीस अऊ खंचवा ह पानी ले भर गीस।
1KI 18:36 सांझ के बलिदान चघाय के बेरा, एलियाह अगमजानी ह आघू बढ़िस अऊ पराथना करिस, “हे यहोवा, अब्राहम, इसहाक अऊ इसरायल के परमेसर! आज तें येला परगट कर दे कि इसरायल म तें ही परमेसर अस, अऊ मेंह तोर सेवक अंव अऊ ये जम्मो काम तोर हुकूम ले करे हंव।
1KI 18:37 मोला जबाब दे, हे यहोवा, मोला जबाब दे, ताकि ये मनखेमन जानंय कि हे यहोवा, तें ही परमेसर अस, अऊ तें ही ओमन के मन ला फेर बदलत हस।”
1KI 18:38 तब यहोवा के आगी ह अकास ले गिरिस अऊ बलिदान, कठवा, पथरा अऊ माटी ला जलाके भसम कर दीस, अऊ खंचवा के पानी ला घलो सूखा दीस।
1KI 18:39 येला देखके, जम्मो मनखेमन मुहूं के भार गिरिन अऊ चिचियाके कहिन, “यहोवा ही परमेसर अय! यहोवा ही परमेसर अय।”
1KI 18:40 तब एलियाह ह ओमन ला हुकूम दीस, “बाल के अगमजानीमन ला धर लेवव। ओमन ले एको झन घलो भागन झन पावय!” तब मनखेमन ओमन ला धर लीन, अऊ एलियाह ह ओमन ला खाल्हे कीसोन घाटी म ले आईस अऊ उहां ओमन ला मार डारिस।
1KI 18:41 फेर एलियाह ह अहाब ला कहिस, “जा, खा अऊ पी, काबरकि भारी बारिस के अवाज सुनई देवत हे।”
1KI 18:42 तब अहाब ह खाय-पीये बर चल दीस, पर एलियाह ह करमेल पहाड़ के टीप म चघिस, अऊ भुइयां म झुकके अपन मुहूं ला दूनों माड़ी के बीच म करिस।
1KI 18:43 फेर ओह अपन सेवक ला कहिस, “जा अऊ समुंदर कोति देख।” तब ओह ऊपर जाके देखिस। सेवक ह आके कहिस, “उहां तो कुछू नइं ए।” एलियाह ह सात बार ले कहिस, “वापिस जा।”
1KI 18:44 सातवां बार, सेवक ह आके कहिस, “समुंदर म ले मनखे के हांथ सहीं एक छोटे बादर उठत हवय।” तब एलियाह ह कहिस, “जा अऊ अहाब ले कह, ‘येकर पहिले कि बारिस ह तोला रोकय, जल्दी से अपन रथ म चघ अऊ खाल्हे चले जा।’ ”
1KI 18:45 थोरकन देर म, अकास ह बादर के कारन करिया होय लगिस, आंधी चले लगिस अऊ भारी बारिस सुरू हो गीस अऊ अहाब ह सवार होके यिजरेल सहर ला चल दीस।
1KI 18:46 यहोवा के सक्ति एलियाह ऊपर उतरिस, अऊ ओह अपन कपड़ा ला अपन कमरपट्टा म खोंचके अहाब के पहिले यिजरेल तक दऊड़त चले गीस।
1KI 19:1 राजा अहाब ह ईजेबेल ला ओ जम्मो बात बताईस, जऊन ला एलियाह ह करे रिहिस अऊ कइसने ओह जम्मो अगमजानीमन ला तलवार ले मार डारे रिहिस।
1KI 19:2 तब ईजेबेल ह एलियाह करा ये कहे बर दूत पठोईस, “यदि मेंह कल अतेक बेरा तक तोर परान ओ अगमजानीमन सहीं नइं कर दूहूं, त देवतामन मोर संग वइसने करंय, फेर ओकर ले घलो जादा करंय।”
1KI 19:3 ये सुनके एलियाह ह डर गीस अऊ अपन परान बंचाय बर भागिस। जब ओह यहूदा के बेरसेबा सहर म हबरिस, त उहां ओह अपन सेवक ला छोंड़ दीस।
1KI 19:4 पर ओह खुद आघू सुनसान जगह म एक दिन के रसता चलिस। ओह एक झाऊ के झाड़ी करा आके ओकर खाल्हे म बईठ गीस अऊ ये कहिके पराथना म अपन मिरतू मांगे लगिस, “हे यहोवा, बहुंत हो गे; अब मोर परान लेय ले, काबरकि मेंह अपन पुरखामन ले बने नो हंव।”
1KI 19:5 तब ओह ओ झाड़ी खाल्हे लेट गीस अऊ सुत भुलाईस। तुरते एक स्वरगदूत ह ओला छुईस अऊ कहिस, “उठ अऊ खा।”
1KI 19:6 ओह चारों कोति अपन नजर घुमाके देखिस, त ओला अपन मुड़ करा कोइला के अंगरा म चुरे कुछू रोटी, अऊ पानी ले भरे एक सुराही दिखिस। तब ओह खाईस अऊ पीईस अऊ फेर लेट गीस।
1KI 19:7 यहोवा के स्वरगदूत ह दूसर बार आईस अऊ ओला छूके कहिस, “उठ अऊ खा, काबरकि तोला बहुंत लम्बा यातरा करना हे।”
1KI 19:8 तब ओह उठके खाईस अऊ पीईस। खाना खाय ले ओला ताकत मिलिस अऊ ओह चालीस दिन अऊ चालीस रात रेंगत-रेंगत परमेसर के पहाड़ होरेब करा हबरिस।
1KI 19:9 उहां ओह एक खोड़रा म गीस अऊ उहां रथिया काटिस। अऊ यहोवा के बचन ह एलियाह करा आईस: “हे एलियाह, तेंह इहां का करत हस?”
1KI 19:10 ओह जबाब दीस, “मेंह यहोवा सर्वसक्तिमान परमेसर बर बहुंत उत्साही हंव। इसरायलीमन तोर करार ला नइं माने हवंय, तोर बेदीमन ला गिरा दे हवंय, अऊ तोर अगमजानीमन ला तलवार ले घात करे हवंय। सिरिप मेंह एके झन बांचे हवंव, अऊ अब ओमन मोला घलो मार डारे के कोसिस करत हवंय।”
1KI 19:11 यहोवा ह कहिस, “बाहिर निकलके, यहोवा के आघू म पहाड़ ऊपर ठाढ़ हो जा, काबरकि यहोवा ह उहां ले होके जवइया हे।” तब यहोवा के आघू म एक बड़े भयंकर आंधी ह पहाड़मन ला फोर दीस अऊ चट्टानमन ला टोर दीस, पर यहोवा ह ओ आंधी म नइं रिहिस। आंधी के बाद, एक भुइंडोल होईस, पर यहोवा ह ओ भुइंडोल म घलो नइं रिहिस।
1KI 19:12 भुइंडोल के बाद, आगी ह आईस, पर यहोवा ओ आगी म नइं रिहिस। अऊ आगी के बाद, एक धीमा कानाफूसी के अवाज सुनई दीस।
1KI 19:13 जब एलियाह ह येला सुनिस, त ओह अपन कपड़ा ला अपन मुहूं ऊपर ढांप लीस अऊ बाहिर निकलके खोड़रा के मुंहाटी म ठाढ़ हो गीस। तब ओला ये बात सुनई दीस, “हे एलियाह, तेंह इहां का करत हस?”
1KI 19:14 ओह जबाब दीस, “मेंह यहोवा सर्वसक्तिमान परमेसर बर बहुंत उत्साही हंव। इसरायलीमन तोर करार ला नइं माने हवंय, तोर बेदीमन ला गिरा दे हवंय, अऊ तोर अगमजानीमन ला तलवार ले घात करे हवंय। सिरिप मेंह एके झन बांचे हवंव, अऊ अब ओमन मोला घलो मार डारे के कोसिस करत हवंय।”
1KI 19:15 यहोवा ह ओला कहिस, “जऊन रसता म आय रहय, ओहीच रसता म लहुंट जा, अऊ दमिस्क सहर के सुनसान जगह म जा। जब तें उहां हबरबे, त हजाएल ला अराम के राजा होय बर अभिसेक करबे।
1KI 19:16 अऊ निमसी के बेटा येहू ला इसरायल के राजा होय बर, अऊ तोर जगह म अगमजानी होय बर आबेल-महोला नगर के सापात के बेटा एलीसा के अभिसेक करबे।
1KI 19:17 हजाएल के तलवार ले जऊन कोनो भी बच जाही, ओला येहू ह मार डारही, अऊ जऊन कोनो येहू के तलवार ले बच जाही, ओला एलीसा ह मार डारही।
1KI 19:18 तभो ले मेंह इसरायल म सात हजार मनखे ला बंचाके रखे हंव—ये जम्मो ओमन अंय, जेमन न तो बाल के आघू म माड़ी टेके हवंय, अऊ न ही अपन मुहूं ले ओला चूमे हवंय।”
1KI 19:19 तब एलियाह ह उहां ले चल दीस, अऊ ओला सापात के बेटा एलीसा मिलिस, जऊन ह बारह जोड़ी बईलामन ले नांगर जोतत रहय, अऊ ओह खुद बारहवां जोड़ी ला हांकत रहय। एलियाह ह ओकर मेर जाके ओकर ऊपर अपन कपड़ा ला डाल दीस।
1KI 19:20 तब एलीसा ह अपन बईलामन ला छोंड़के एलियाह के पाछू दऊड़िस अऊ कहे लगिस, “मोला जाके मोर दाई अऊ ददा ला चूमन दे अऊ बिदा लेवन दे, अऊ तब मेंह तोर संग चलहूं।” एलियाह ह कहिस, “लहुंट जा, मेंह तोर का करे हवंव?”
1KI 19:21 तब एलीसा ह ओला छोंड़के वापिस चल दीस। अऊ अपन बईलामन के जोड़ी ला लेके पूज दीस। ओह नांगर जोते के सामान ला जलाके मांस ला पकाईस अऊ ओला मनखेमन ला खाय बर दीस, अऊ ओमन खाईन। तब ओह एलियाह के पाछू चले बर गीस अऊ ओकर सेवक बन गीस।
1KI 20:1 अराम के राजा बेन-हदद ह अपन जम्मो सेना ला संकेलिस। ओकर संग म अऊ बत्तीस राजामन अपन घोड़ा अऊ रथ सहित गीन; ओमन के संग जाके ओह सामरिया ला घेर लीस अऊ ओकर ऊपर हमला करिस।
1KI 20:2 ओह सहर म इसरायल के राजा अहाब करा दूतमन ला ये कहे बर पठोईस, “बेन-हदद ह ये कहत हे:
1KI 20:3 ‘तोर सोन अऊ चांदी ह मोर अय, अऊ तोर सबले बने घरवालीमन अऊ लइकामन घलो मोर अंय।’ ”
1KI 20:4 इसरायल के राजा ह ओकर करा ये कहे बर पठोईस, “हे मोर मालिक राजा! तोर कहे मुताबिक में तोर अंव अऊ मोर जम्मो चीज घलो तोर अंय।”
1KI 20:5 दूतमन वापिस आके इसरायल के राजा ले कहिन, “बेन-हदद ह ये कहत हे: ‘मेंह खबर पठोय रहेंव कि तें अपन सोन अऊ चांदी, अपन घरवाली अऊ लइकामन ला मोला दे।
1KI 20:6 पर कल अतेक बेरा, मेंह अपन करमचारीमन ला पठोहूं अऊ ओमन तोर महल अऊ तोर करमचारीमन के घर के जांच-पड़ताल करहीं, अऊ ओमन तोर जम्मो कीमती सामान ला जपती करके अपन संग ले आहीं।’ ”
1KI 20:7 तब इसरायल के राजा ह अपन देस के जम्मो अगुवामन ला बलाके कहिस, “देखव, ये मनखे ह कइसे समस्या खड़े करे के ताक म हवय! जब ओह मोर घरवालीमन अऊ मोर लइकामन, मोर सोन अऊ चांदी के मांग करिस, त मेंह इनकार नइं करेंव।”
1KI 20:8 तब जम्मो अगुवा अऊ मनखेमन जबाब दीन, “बेन-हदद के बात ला झन सुन या ओकर मांग ला झन मान।”
1KI 20:9 तब राजा ह बेन-हदद के दूतमन ला जबाब दीस, “मोर मालिक राजा ला जाके कहव, ‘जऊन कुछू तेंह पहिले अपन सेवक ले मांग करे रहे, ओ जम्मो ला मेंह पूरा करहूं, पर तोर ये मांग ला मेंह पूरा नइं कर सकंव।’ ” दूतमन वापिस जाके बेन-हदद ला ये संदेस सुनाईन।
1KI 20:10 तब बेन-हदद ह अहाब करा एक आने संदेस पठोईस, “यदि सामरिया म अतेक धुर्रा बांचे हवय कि मोर जम्मो मनखेमन ला एक-एक मुट्ठी मिल जावय, त देवतामन मोर संग कठोरता से बेवहार करंय।”
1KI 20:11 इसरायल के राजा ह जबाब देवत खबर पठोईस, “ओकर ले कहव, ‘जऊन ह अपन हथियार बांधथे, ओला ओकर सहीं घमंड नइं करना चाही, जऊन ह ओ हथियार ला उतारथे।’ ”
1KI 20:12 जब ये संदेस बेन-हदद ला दिये गीस, त ओ समय, ओह अऊ राजामन अपन डेरामन म पीयत रिहिन, अऊ ओह अपन मनखेमन ला हुकूम दीस: “हमला करे बर तियारी करव।” तब ओमन सहर ऊपर हमला करे बर तियारी करिन।
1KI 20:13 ये बीच म, एक अगमजानी ह इसरायल के राजा अहाब करा आके कहिस, “यहोवा ह ये कहत हे: ‘का तेंह ये बहुंत बड़े सेना ला देखत हस? येला आज ही मेंह तोर हांथ म कर दूहूं, अऊ तब तें जान लेबे कि मेंह यहोवा अंव।’ ”
1KI 20:14 अहाब ह पुछिस, “पर येला कोन ह करही?” अगमजानी ह जबाब दीस, “यहोवा ह ये कहत हे: ‘इलाका के सेनापतिमन के अधीन छोटे अधिकारीमन येला करहीं।’ ” फेर ओह पुछिस, “अऊ लड़ई के सुरूआत कोन ह करही?” ओ अगमजानी ह जबाब दीस, “तेंह करबे।”
1KI 20:15 एकरसेति अहाब ह इलाका के सेनापतिमन के अधीन दू सौ बत्तीस छोटे अधिकारीमन ला बलाईस। तब ओह बाकि बचे सात हजार इसरायली मनखेमन ला इकट्ठा करिस।
1KI 20:16 ओमन मंझन के बेरा म निकलिन, अऊ ओ समय, बेन-हदद अऊ ओकर संग के बत्तीस राजामन अपन डेरामन म मंद पीके मतवाला होवत रहंय।
1KI 20:17 इलाका के सेनापतिमन के अधीन छोटे अधिकारीमन पहिले निकलिन। बेन-हदद ह संदेस लाने बर सैनिकमन ला पठोय रिहिस, अऊ ओमन आके कहिन, “सामरिया ले मनखेमन आघू बढ़त हवंय।”
1KI 20:18 ओह हुकूम दीस, “यदि ओमन मेल-मिलाप करे बर निकले हवंय, त ओमन ला जिंदा पकड़के ले आवव; यदि ओमन लड़ई करे बर निकले हवंय, तब भी ओमन ला जिंदा पकड़के ले आवव।”
1KI 20:19 छोटे अधिकारीमन इलाका के सेनापतिमन के अधीन सहर ले निकलिन अऊ ओमन के पाछू सेना के सिपाहीमन रहंय
1KI 20:20 अऊ ओमा के हर एक जन अपन बिरोधी ला मार डारिस। येला देखके, अरामीमन भागे लगिन, अऊ इसरायलीमन ओमन के पीछा करिन। पर अराम के राजा बेन-हदद ह घोड़ा म चघके अपन कुछू घुड़सवारमन संग बचके भाग गीस।
1KI 20:21 तब इसरायल के राजा ह आघू बढ़के घोड़ा अऊ रथमन ला अधिकार म कर लीस अऊ अरामीमन के भारी नुकसान करिस।
1KI 20:22 ओकर बाद, ओ अगमजानी ह इसरायल के राजा करा आके कहिस, “अपन स्थिति ला मजबूत कर अऊ देख कि का करना जरूरी ए, काबरकि नवां साल के लगत ही अराम के राजा ह फेर तोर ऊपर हमला करही।”
1KI 20:23 ये बीच म, अराम के राजा के करमचारीमन ओला ये सलाह दीन, “ओ मनखेमन के देवतामन पहाड़ी देवता अंय, एकर खातिर ओमन हमर ऊपर भारी पड़िन। पर यदि हमन ओमन ले मैदान म लड़बो, त निस्चय ही, हमन ओमन ऊपर भारी पड़बो।
1KI 20:24 अइसने कर: जम्मो राजामन के अधिकार ला छीन ले अऊ ओमन के जगह म आने अधिकारीमन ला ठहिरा दे।
1KI 20:25 अऊ जऊन सेना ला तेंह गंवा दे हस, वइसने फेर एक ठन सेना तियार कर—घोड़ा के बदला म घोड़ा अऊ रथ के बदला म रथ—ताकि हमन मैदान म इसरायल ले लड़ सकन। तब निस्चय ही, हमन ओमन ऊपर भारी पड़बो।” ओह ओमन के बात ला मानिस अऊ वइसनेच करिस।
1KI 20:26 नवां साल के लगत ही बेन-हदद ह अरामी सेना ला इकट्ठा करिस अऊ इसरायल ले लड़े बर अपेक सहर ला गीस।
1KI 20:27 जब इसरायलीमन ला घलो इकट्ठा करे गीस अऊ ओमन ला भोजन-पानी दिये गीस, त ओमन अरामीमन के सामना करे बर निकलिन। इसरायलीमन छेरीमन के दू ठन छोटे झुंड सहीं ओमन के आघू म डेरा डाले रिहिन, जबकि अरामीमन मैदान म भर गे रिहिन।
1KI 20:28 तब परमेसर के जन ह इसरायल के राजा करा आईस अऊ कहिस, “यहोवा ह ये कहत हे: ‘अरामीमन सोचथें कि यहोवा ह पहाड़ी देवता अय अऊ घाटीमन के देवता नो हय, एकरे कारन, मेंह ओ बड़े सेना ला तोर हांथ म कर दूहूं, अऊ तब तुमन जानहू कि मेंह यहोवा अंव।’ ”
1KI 20:29 सात दिन तक, ओमन एक-दूसर के आघू म डेरा डाले रिहिन, अऊ सातवां दिन लड़ई सुरू होईस। अऊ इसरायलीमन एक दिन म, अरामीमन के एक लाख पैदल सेना ला मार डारिन।
1KI 20:30 बाकि बचे अरामी सेना ह बचके अपेक सहर ला भाग गीस, जिहां सहर के दीवार गिरे ले ओमा के सत्ताईस हजार मनखे दबके मर गीन। अऊ बेन-हदद ह सहर ला भाग गीस अऊ जाके एक ठन भीतरी कमरा म लुका गीस।
1KI 20:31 तब ओकर करमचारीमन ओला कहिन, “देख, हमन सुने हवन कि इसरायल के राजामन दयालु होथें, एकरसेति, हमन कनिहां म टाट के कपड़ा अऊ मुड़ म रस्सी लपेटके इसरायल के राजा करा चलन। हो सकथे कि ओह तोर परान झन लेवय।”
1KI 20:32 तब अपन कनिहां म टाट के कपड़ा पहिरके अऊ मुड़ म रस्सी बांधके, ओमन इसरायल के राजा करा गीन अऊ कहिन, “तोर सेवक बेन-हदद ह कहत हे, ‘किरपा करके मोला जीयत रहन दे।’ ” राजा ह जबाब दीस, “का ओह अभी तक ले जीयत हवय? ओह तो मोर भाई अय।”
1KI 20:33 ओ मनखेमन येला बने बात समझके तुरते ओकर बात के ये जबाब दीन, “हव, तोर भाई बेन-हदद।” राजा ह कहिस, “जाके ओला ले आवव।” जब बेन-हदद ह निकलके आईस, त अहाब ह ओला अपन रथ म चघा लीस।
1KI 20:34 तब बेन-हदद ह ओला कहिस, “जऊन सहरमन ला मोर ददा ह तोर ददा ले छीन ले रिहिस, ओमन ला मेंह तोला वापिस कर दूहूं, अऊ जइसने मोर ददा ह सामरिया म हाट-बजार बनाय रिहिस, वइसने तेंह अपन खुद के हाट-बजार दमिस्क म बना सकत हस।” अहाब ह कहिस, “एक करार के अधार म, मेंह तोला छोंड़ दूहूं।” तब ओह बेन-हदद संग एक करार करिस, अऊ ओला जावन दीस।
1KI 20:35 यहोवा ले बचन पाके, अगमजानीमन के दल के एक जन ह अपन संगी ला कहिस, “अपन हथियार ले मोला मार।” पर ओकर संगी ह इनकार करिस।
1KI 20:36 तब पहिले अगमजानी ह कहिस, “काबरकि तेंह यहोवा के बात ला नइं माने, एकरसेति जइसने ही तेंह मोर करा ले जाबे, एक सिंह ह तोला मार डारही।” अऊ जब ओ मनखे ह चले गीस, त डहार म ओला एक सिंह मिलिस अऊ ओला मार डारिस।
1KI 20:37 ओ अगमजानी ला एक आने मनखे मिलिस, ओला घलो कहिस, “मोला मार।” अऊ ओ मनखे ह अगमजानी ला मारिस अऊ ओला घायल कर दीस।
1KI 20:38 तब ओ अगमजानी चले गीस अऊ सड़क के तीर म ठाढ़ होके राजा के बाट जोहे लगिस। ओह अपन पगड़ी ले अपन आंखीमन ला ढांपके अपन भेस ला छुपा ले रहय।
1KI 20:39 जब राजा ह उहां ले होके जावत रिहिस, त ओ अगमजानी ह ओला पुकारके कहिस, “जब तोर सेवक ह लड़ई के इलाका म गे रिहिस, त एक मनखे ह एक कैदी ला लेके मोर करा आईस अऊ कहिस, ‘ये मनखे के रखवारी कर। यदि ये मनखे कहीं चले जाही, त ओकर परान के बदले म तोर परान ले लिये जाही, या फेर तोला एक टेलेन्ट चांदी देय ला पड़ही।’
1KI 20:40 ओकर बाद, जब तोर सेवक ह एती-ओती बुता म फंस गीस, त ओ मनखे ह गायब हो गीस।” इसरायल के राजा ह कहिस, “तोर अइसने ही नियाय होही; तेंह खुद येकर निरनय करे हवस।”
1KI 20:41 तब अगमजानी ह तुरते अपन आंखीमन ले पगड़ी ला हटाईस, अऊ इसरायल के राजा ह ओला एक अगमजानी के रूप म चिन डारिस।
1KI 20:42 तब ओ अगमजानी ह राजा ला कहिस, “यहोवा ह ये कहत हे: ‘तेंह एक अइसने मनखे ला छोंड़ दे हस, जेकर बारे म मेंह ठान ले रहेंव कि ओह मरय। एकरसेति अब ओकर परान के बदले तोर परान जाही अऊ ओकर मनखेमन के बदले तोर मनखेमन।’ ”
1KI 20:43 तब उदास अऊ गुस्सा होके, इसरायल के राजा ह सामरिया के अपन महल म चले गीस।
1KI 21:1 कुछू समय के बाद, नाबोत नांव के एक यिजरेली के एक अंगूर के बारी के संबंध म एक घटना होईस। ओ अंगूर के बारी ह यिजरेल म सामरिया के राजा अहाब के महल के लकठा म रहय।
1KI 21:2 अहाब ह नाबोत ला कहिस, “तोर अंगूर के बारी ह मोर महल के लकठा म हवय, त तें ओला मोला देय दे कि मेंह ओकर उपयोग साग-भाजी के बारी के रूप म करंव। ओकर बदले म, मेंह तोला ओकर ले जादा बने एक अंगूर के बारी दूहूं या यदि तें चाहबे, त जो भी ओकर कीमत होही, मेंह तोला ओकर दाम चुका दूहूं।”
1KI 21:3 पर नाबोत ह जबाब दीस, “यहोवा ह झन करय कि मेंह अपन पुरखामन के संपत्ति ला देवंव।”
1KI 21:4 यिजरेली नाबोत के ये बात के कारन कि मेंह अपन पुरखामन के संपत्ति तोला नइं देवंव, अहाब ह उदास अऊ नराज होके अपन घर चल दीस, अऊ उदास मन से अपन बिस्तर म लेट गीस अऊ जेवन करे बर मना कर दीस।
1KI 21:5 तब ओकर घरवाली ईजेबेल ह ओकर करा आके पुछिस, “तेंह काबर अतेक उदास हवस? तेंह काबर नइं खावत हस?”
1KI 21:6 राजा ह ओला कहिस, “कारन ये अय कि मेंह यिजरेली नाबोत ला कहेंव, ‘तोर अंगूर के बारी ला मोर करा बेच दे; या यदि तें चाहबे, त मेंह तोला ओकर बदले म एक आने अंगूर के बारी दूहूं।’ पर ओह कहिस, ‘मेंह अपन अंगूर के बारी तोला नइं दंव।’ ”
1KI 21:7 राजा के घरवाली ईजेबेल ह कहिस, “का तेंह इसरायल ऊपर राज करथस कि नइं? उठ अऊ खाना खा! खुसी मना। यिजरेली नाबोत के अंगूर के बारी मेंह तोला देवाहूं।”
1KI 21:8 तब ईजेबेल ह अहाब के नांव ले चिट्ठी लिखके ओमा ओकर मुहर लगाईस, अऊ चिट्ठीमन ला ओ अगुवा अऊ परभावसाली मनखेमन करा पठोईस, जऊन मन ओही सहर म नाबोत के संग रहत रिहिन।
1KI 21:9 ओ चिट्ठीमन म, ओह ये लिखे रहय: “एक दिन के उपास रखे के घोसना करव अऊ नाबोत ला मनखेमन के बीच एक खास जगह म बईठावव।
1KI 21:10 पर दू झन दुस्ट मनखे ला ओकर आघू म बईठावव, जऊन मन नाबोत ऊपर ये दोस लगावंय कि ओह परमेसर अऊ राजा दूनों के निन्दा करे हवय। तब ओला बाहिर ले जावव अऊ पथरवाह करके ओला मार डारव।”
1KI 21:11 ईजेबेल ह नाबोत के सहर म रहइया अगुवा अऊ परभावसाली मनखेमन ला चिट्ठी म लिखके जइसने हुकूम दे रिहिस, ओमन वइसने ही करिन।
1KI 21:12 ओमन उपास रखे के घोसना करिन अऊ नाबोत ला मनखेमन के बीच एक खास जगह म बईठाईन।
1KI 21:13 तब दू झन दुस्ट मनखे आके ओकर आघू म बईठ गीन अऊ ओमन ये कहिके मनखेमन के आघू म नाबोत ऊपर दोस लगाईन, “नाबोत ह परमेसर अऊ राजा दूनों के निन्दा करे हवय।” एकरे कारन, ओमन ओला सहर के बाहिर ले गीन अऊ पथरवाह करके ओला मार डारिन।
1KI 21:14 तब ओमन ईजेबेल करा ये खबर पठोईन: “नाबोत ला पथरवाह करके मार डारे गे हवय।”
1KI 21:15 जइसने ही ईजेबेल ह ये सुनिस कि नाबोत ला पथरवाह करके मार डारे गे हवय, त ओह अहाब ले कहिस, “उठ अऊ यिजरेली नाबोत के ओ अंगूर के बारी ला अपन कब्जा म लेय ले, जेला ओह तोला बेचे बर इनकार करे रिहिस। नाबोत ह अब जीयत नइं ए, पर ओह मर गे हवय।”
1KI 21:16 जब अहाब ह सुनिस कि नाबोत ह मर गे हवय, त ओह उठिस अऊ नाबोत के अंगूर के बारी ला अपन कब्जा म लेय बर खाल्हे गीस।
1KI 21:17 तब यहोवा के ये बचन तिसबी एलियाह करा आईस:
1KI 21:18 “इसरायल के राजा अहाब करा मिले बर खाल्हे जा, जऊन ह सामरिया म राज करथे। ओह अभी नाबोत के अंगूर के बारी म हवय, अऊ ओह ओला अपन कब्जा म लेय बर उहां गे हवय।
1KI 21:19 ओला ये कह, ‘यहोवा ह ये कहत हे: का तेंह एक मनखे के हतिया करके ओकर संपत्ति ला कब्जा नइं कर ले हस?’ फेर ओला ये घलो कह, ‘यहोवा ह ये कहत हे: जऊन जगह म कुकुरमन नाबोत के लहू ला चाटिन, ओही जगह म कुकुरमन तोर लहू ला घलो चाटहीं—हव, तोर लहू!’ ”
1KI 21:20 एलियाह ला देखके अहाब ह कहिस, “हे मोर बईरी! तेंह मोला खोज लेय!” एलियाह ह जबाब दीस, “हव, मेंह तोला खोज लेंव, काबरकि यहोवा के नजर म दुस्ट काम करे बर तेंह अपनआप ला बेच दे हवस।
1KI 21:21 परमेसर ह कहत हे, ‘मेंह तोर ऊपर बिपत्ति लानेवाला हंव। मेंह तोर संतानमन के नामोनिसान मिटा दूहूं अऊ इसरायल म अहाब के घर के एक-एक छोकरा अऊ पुरूस ला नास कर दूहूं—चाहे ओह गुलाम हो या सुतंतर मनखे।
1KI 21:22 मेंह तोर घराना ला नबात के बेटा यरोबाम, अऊ अहियाह के बेटा बासा के सहीं कर दूहूं, काबरकि तेंह मोर गुस्सा ला भड़काय हस अऊ इसरायल ले पाप करवाय हस।’
1KI 21:23 “अऊ ईजेबेल के बारे म घलो यहोवा ह कहत हे: ‘यिजरेल के दीवार के भीतर, कुकुरमन ईजेबेल ला खा डारहीं।’
1KI 21:24 “अहाब के जऊन मनखेमन सहर म मरहीं, ओमन ला कुकुरमन खा डारहीं, अऊ जऊन मन मैदान म मरहीं, ओमन ला अकास के चिरईमन खा जाहीं।”
1KI 21:25 (अहाब के सहीं अऊ कोनो नइं रिहिस, जऊन ह अपन घरवाली ईजेबेल के उकसाय म आके, यहोवा के नजर म दुस्ट काम करे बर अपनआप ला बेच दीस।
1KI 21:26 ओह मूरतीमन के पाछू जाके सबले जादा नीच काम करिस, जइसने कि ओ अमोरीमन करे रिहिन, जेमन ला यहोवा ह इसरायलीमन के आघू ले निकाल दे रिहिस।)
1KI 21:27 जब अहाब ह ये बात ला सुनिस, त ओह अपन ओनहा ला चीरिस, अऊ टाट के कपड़ा पहिरके उपास करिस। ओह टाट के कपड़ा म सोये लगिस अऊ नम्र मन से एती-ओती जाय लगिस।
1KI 21:28 तब यहोवा के ये बचन तिसबी एलियाह करा आईस:
1KI 21:29 “का तेंह धियान दे हवस कि अहाब ह कइसे मोर आघू म नम्र बन गे हवय? काबरकि ओह अपनआप ला नम्र कर ले हवय, एकरसेति मेंह ये बिपत्ति ला ओकर जीयत भर नइं लानंव, पर मेंह येला ओकर बेटा के दिन म ओकर घराना ऊपर लानहूं।”
1KI 22:1 तीन बछर तक अरामी अऊ इसरायलीमन के बीच म लड़ई नइं होईस।
1KI 22:2 पर तीसरा बछर यहूदा के राजा यहोसापात इसरायल के राजा ला देखे बर गीस।
1KI 22:3 इसरायल के राजा ह अपन करमचारीमन ला कहे रिहिस, “का तुमन नइं जानत हव कि रामोत-गिलाद ह हमर अय अऊ तभो ले ओला हमन अराम के राजा के हांथ ले वापिस लेय बर कुछू नइं करत हन?”
1KI 22:4 एकरसेति ओह यहोसापात ले पुछिस, “का तेंह मोर संग रामोत-गिलाद के बिरूध लड़े बर जाबे?” यहोसापात ह इसरायल के राजा ला जबाब दीस, “मेंह घलो तोर असन अंव, मोर मनखेमन तोर मनखेमन असन अंय, मोर घोड़ामन तोर घोड़ामन असन अंय।”
1KI 22:5 पर यहोसापात ह इसरायल के राजा ला ये घलो कहिस, “पहिले यहोवा के ईछा ला मालूम कर ले।”
1KI 22:6 तब इसरायल के राजा ह अगमजानीमन ला इकट्ठा करिस—ओमन करीब चार सौ आदमी रिहिन—अऊ राजा ह ओमन ले पुछिस, “का मेंह रामोत-गिलाद के बिरूध लड़ई करे बर जावंव, या फेर रूक जावंव?” ओमन जबाब दीन, “जा, काबरकि परभू ह ओला राजा के हांथ म कर दीही।”
1KI 22:7 पर यहोसापात ह पुछिस, “का इहां यहोवा के कोनो अगमजानी नइं अंय, जेकर ले हमन पुछताछ कर सकन?”
1KI 22:8 इसरायल के राजा ह यहोसापात ला जबाब दीस, “इहां अभी भी एक अगमजानी हवय, जेकर जरिये हमन यहोवा ले पुछताछ कर सकत हन? पर मेंह ओकर ले घिन करथंव, काबरकि ओह कभू भी मोर बारे म कोनो बने बात के अगमबानी नइं करय, पर हमेसा खराप बात ही कहिथे। ओह यिमला के बेटा मीकायाह ए।” यहोसापात ह कहिस, “राजा ला अइसन बात नइं कहना चाही।”
1KI 22:9 तब इसरायल के राजा ह अपन एक करमचारी ला बलाके कहिस, “यिमला के बेटा मीकायाह ला अभीचे लेके आवव।”
1KI 22:10 इसरायल के राजा अऊ यहूदा के राजा यहोसापात अपन राजसी कपड़ा पहिरे सामरिया के प्रवेस दुवार के बगल म एक कोठार म अपन सिंघासन म बईठे रहंय अऊ जम्मो अगमजानीमन ओमन के आघू म अगमबानी करत रहंय।
1KI 22:11 कनाना के बेटा सिदकियाह ह लोहा के सींग बनाय रिहिस अऊ ओह घोसना करिस, “यहोवा ह ये कहत हे: ‘ये सींगमन ले तुमन अरामीमन ला अइसन मारहू, कि जब तक ओमन नास नइं हो जाहीं।’ ”
1KI 22:12 आने जम्मो अगमजानीमन घलो येहीच अगमबानी करत रिहिन। ओमन कहिन, “रामोत-गिलाद ऊपर हमला करव अऊ जीत जावव, काबरकि यहोवा ह ओला राजा के हांथ म कर दीही।”
1KI 22:13 जऊन संदेसिया ह मीकायाह ला बलाय बर गे रिहिस, ओह ओकर ले कहिस, “देख, आने अगमजानीमन बिगर कोनो आपत्ति के राजा बर सफलता के अगमबानी करत हवंय। तोर बात ह घलो ओमन के बात ले मेल खावय, अऊ तें राजा के हित म गोठियाबे।”
1KI 22:14 पर मीकायाह ह कहिस, “यहोवा के जिनगी के सपथ, मेंह ओला सिरिप ओही बात बताहूं, जेला यहोवा ह मोला कहिही।”
1KI 22:15 जब मीकायाह ह उहां हबरिस, त राजा ह ओकर ले पुछिस, “हे मीकायाह! का हमन रामोत-गिलाद के बिरूध लड़ई करे बर जावन, या नइं?” ओह जबाब दीस, “हमला करव अऊ जीत जावव, काबरकि यहोवा ह ओला राजा के हांथ म कर दीही।”
1KI 22:16 राजा ह ओला कहिस, “मेंह तोला कतेक बार कसम खवावंव कि तें यहोवा के नांव म मोला सिरिप सच्चई के छोंड़ अऊ कुछू बात झन बता?”
1KI 22:17 तब मीकायाह ह जबाब दीस, “मेंह जम्मो इसरायल ला पहाड़ीमन म बिगर चरवाहा के बगरे भेड़मन सहीं देखेंव, अऊ यहोवा ह कहिस, ‘ये मनखेमन के कोनो मालिक नइं एं। हर एक जन सांति से अपन घर जावय।’ ”
1KI 22:18 तब इसरायल के राजा ह यहोसापात ला कहिस, “का मेंह तोला नइं कहे रहेंव कि ओह मोर बारे म कभू बने अगमबानी नइं करय, पर सिरिप खराप बात कहिथे?”
1KI 22:19 तब मीकायाह ह आगे कहिस, “एकरसेति यहोवा के बचन ला सुनव: मेंह यहोवा ला अपन सिंघासन म बईठे अऊ ओकर संग स्वरग के जम्मो भीड़ ला ओकर जेवनी अऊ डेरी कोति खड़े देखेंव।
1KI 22:20 अऊ यहोवा ह कहिस, ‘कोन ह अहाब ला रामोत-गिलाद ऊपर हमला करे बर अऊ उहां जाके मरे बर बहकाही?’ “कोनो ह कुछू सलाह दीस, त कोनो ह कुछू अऊ।
1KI 22:21 आखिर म, एक आतमा आघू म आके यहोवा के आघू म ठाढ़ होईस अऊ कहिस, ‘मेंह ओला बहकाहूं।’
1KI 22:22 “यहोवा ह पुछिस, ‘कोन किसम ले?’ “ओ आतमा ह कहिस, ‘मेंह बाहिर जाहूं अऊ ओकर जम्मो अगमजानीमन के मुहूं म एक धोखा देवइया आतमा बनहूं।’ “यहोवा ह कहिस, ‘तेंह ओला बहकाय म सफल होबे, जा अऊ येला कर।’
1KI 22:23 “एकरसेति, अब यहोवा ह तोर ये जम्मो अगमजानीमन के मुहूं म एक धोखा देवइया आतमा डाल दे हवय। यहोवा ह तोर बिनास के हुकूम दे हवय।”
1KI 22:24 तब कनाना के बेटा सिदकियाह ह ऊपर मीकायाह करा गीस अऊ ओकर गाल म थपरा मारके पुछिस, “कते रसता ले आतमा ह यहोवा करा ले गीस, जब ओह तोर ले गोठियाय बर मोर ले निकलके गीस?”
1KI 22:25 मीकायाह ह जबाब दीस, “तोला ओ दिन ये बात के पता चलही, जब तेंह लुकाय बर एक भीतरी कमरा म जाबे।”
1KI 22:26 तब इसरायल के राजा ह हुकूम दीस, “मीकायाह ला ले जावव अऊ ओला सहर के हाकिम आमोन अऊ राजा के बेटा योआस करा वापिस भेज दव
1KI 22:27 अऊ ओमन ले कहव, ‘राजा ह ये कहत हे: ये मनखे ला जेल म डाल दव अऊ जब तक मेंह सही-सलामत वापिस नइं लहुंटंव, तब तक येला रोटी अऊ पानी के छोंड़ अऊ कुछू झन दव।’ ”
1KI 22:28 पर मीकायाह ह घोसना करिस, “यदि तेंह सही-सलामत लहुंटके आ जाबे, त फेर यहोवा ह मोर जरिये बात नइं करे हवय।” तब ओह ये घलो कहिस, “तुमन, जम्मो मनखेमन! मोर बात ला धियान म रखव!”
1KI 22:29 तब इसरायल के राजा अऊ यहूदा के राजा यहोसापात, ऊपर रामोत-गिलाद गीन।
1KI 22:30 इसरायल के राजा ह यहोसापात ला कहिस, “मेंह भेस बदलके लड़ई म जाहूं, पर तें अपन राजसी पहिरावा पहिरबे।” तब इसरायल के राजा ह अपन भेस ला बदल लीस अऊ लड़ई म गीस।
1KI 22:31 अराम के राजा ह अपन रथ के बत्तीस सेनापतिमन ला हुकूम देय रिहिस, “इसरायल के राजा के छोंड़, अऊ कोनो छोटे या बड़े मनखे ले लड़ई झन करहू।”
1KI 22:32 जब रथ के सेनापतिमन यहोसापात ला देखिन, त ओमन सोचिन, “खचित, येह इसरायल के राजा अय।” एकरसेति ओमन ओकर ऊपर हमला करे बर मुड़िन, पर जब यहोसापात ह चिचियाईस,
1KI 22:33 त रथ के सेनापतिमन देखिन कि ओह इसरायल के राजा नो हय, अऊ तब ओमन ओकर पीछा करई छोंड़ दीन।
1KI 22:34 पर कोनो मनखे ह बिगर सोचे-बिचारे अपन तीर ला चला दीस अऊ ओ तीर ह इसरायल के राजा के हथियार के बीच भाग म लगिस। तब राजा ह अपन रथ के सारथी ला कहिस, “मेंह घायल हो गे हवंव। रथ ला एती-ओती ले घुमाके मोला लड़ई ले बाहिर निकाल।”
1KI 22:35 ओ पूरा दिन भयंकर लड़ई होते रिहिस अऊ राजा अहाब ह अपन रथ के सहारा म अरामीमन कोति मुहूं करके ठाढ़े रिहिस। ओकर घाव के खून ह रथ के फर्स म बहत रहय अऊ ओहीच दिन सांझ के बेरा, ओह मर गीस।
1KI 22:36 जब सूरज बुड़त रिहिस, त जम्मो सेना म ये पुकार होईस, “हर एक मनखे अपन-अपन सहर अऊ अपन-अपन देस ला लहुंट जावय!”
1KI 22:37 राजा ह मर गीस, त ओकर लास ला सामरिया म लाय गीस, अऊ उहां ओला माटी दिये गीस।
1KI 22:38 मनखेमन सामरिया म ओ रथ ला धोईन (जिहां बेस्यामन नहावंय), अऊ कुकुरमन ओकर लहू ला चाटिन, जइसने कि यहोवा के बचन के दुवारा कहे गे रिहिस।
1KI 22:39 अहाब के सासन के आने घटनामन, ओकर जम्मो काम, जऊन महल ओह बनाईस अऊ हाथी-दांत ले सजाईस, अऊ सहरमन के किलाबंदी करई—ये जम्मो बात इसरायल के राजामन के इतिहास के किताब म लिखाय हवय।
1KI 22:40 अहाब अपन पुरखामन के संग हमेसा बर सुत गीस अऊ ओकर बेटा अहजयाह ओकर जगह म राजा होईस।
1KI 22:41 इसरायल के राजा अहाब के राज के चौथा साल म आसा के बेटा यहोसापात ह यहूदा के राजा बनिस।
1KI 22:42 जब यहोसापात ह राजा बनिस, त ओह पैंतीस साल के रिहिस, अऊ ओह पच्चीस साल तक यरूसलेम म राज करिस। ओकर दाई के नांव अजूबा रिहिस, जऊन ह सिलही के बेटी रिहिस।
1KI 22:43 ओह हर काम म अपन ददा आसा के रसता म चलिस अऊ ओमन ले नइं हटिस; ओह ओही काम करिस, जऊन ह यहोवा के नजर म सही रिहिस। तभो ले, ऊंचहा जगहमन हटाय नइं गीन, अऊ मनखेमन उहां बलिदान चघाय अऊ धूप जलाय के काम करते रिहिन।
1KI 22:44 यहोसापात ह इसरायल के राजा संग सांति घलो बनाय रखिस।
1KI 22:45 यहोसापात के सासन के आने घटनामन, जऊन काम ओह करिस अऊ ओकर सैनिक छमता—ये जम्मो बात यहूदा के राजामन के इतिहास के किताब म लिखाय हवय?
1KI 22:46 ओह मंदिर के ओ पुरूस बेस्यामन ला नास कर दीस, जऊन मन ओकर ददा आसा के सासन के बाद घलो उहां बांच गे रिहिन।
1KI 22:47 तब एदोम म कोनो राजा नइं रिहिस; एक प्रदेस के राजपाल ह राज-काज चलात रिहिस।
1KI 22:48 यहोसापात ह ओपीर जाके सोन लाने बर एक बेपारी जहाजी-बेड़ा बनवाईस, पर ओ जहाजमन कभू नइं जा सकिन—ओमन एसियोन-गेबेर म टूट गीन।
1KI 22:49 ओ बेरा अहाब के बेटा अहजयाह ह यहोसापात ले कहिस, “मोर नाविकमन ला तोर नाविकमन के संग जहाज म जावन दे,” पर यहोसापात ह इनकार करिस।
1KI 22:50 तब यहोसापात ह अपन पुरखामन संग हमेसा बर सुत गीस अऊ ओला ओमन के संग, ओकर पुरखा दाऊद के सहर म माटी दिये गीस। अऊ ओकर बेटा यहोराम ओकर जगह म राजा बनिस।
1KI 22:51 यहूदा के राजा यहोसापात के राज के सतरहवां बछर म, अहाब के बेटा अहजयाह, सामरिया म इसरायल के राजा बनिस, अऊ ओह दू बछर तक इसरायल ऊपर राज करिस।
1KI 22:52 ओह यहोवा के नजर म दुस्ट काम करिस, काबरकि ओह अपन दाई अऊ ददा के रसता म चलिस अऊ नबात के बेटा यरोबाम के रसता म घलो चलिस, जऊन ह इसरायल ले पाप करवाय रिहिस।
1KI 22:53 जइसने ओकर ददा ह करे रिहिस, वइसने अहजयाह ह घलो बाल के सेवा अऊ अराधना करिस अऊ यहोवा, इसरायल के परमेसर के गुस्सा ला भड़काईस।
2KI 1:1 अहाब के मरे के बाद मोआब ह इसरायल के बिरूध बिदरोह कर दीस।
2KI 1:2 अहजयाह ह सामरिया नगर म अपन ऊपर के कमरा के एक जालीदार खिड़की ले खाल्हे गिर गीस अऊ घायल हो गीस। तब ओह अपन दूतमन ला ये कहिके पठोईस, “तुमन जाके एकरोन के देवता बाल-जबूब ले ये पता लगावव कि मोर ये चोट ह ठीक होही कि नइं?”
2KI 1:3 पर यहोवा के स्वरगदूत ह तिसबी एलियाह ले कहिस, “जा अऊ सामरिया के राजा के संदेसियामन ले भेंट कर अऊ ओमन ले पुछ, ‘का इसरायल म कोनो परमेसर नइं ए, जेकर कारन तुमन एकरोन के देवता बाल-जबूब ले पुछे बर जावत हव?’
2KI 1:4 एकरसेति अब यहोवा ह ये कहत हे: ‘जऊन पलंग म तेंह पड़े हस, उहां ले तेंह कभू नइं उठ सकस, पर खचित तेंह मर जाबे।’ ” तब एलियाह ह चल दीस।
2KI 1:5 जब अहजयाह के संदेसियामन लहुंटके राजा करा आईन, त ओह ओमन ले पुछिस, “तुमन काबर लहुंटके आ गेव?”
2KI 1:6 ओमन जबाब दीन, “एक मनखे ह हमर ले मिले बर आईस अऊ हमन ले कहिस, ‘जऊन राजा ह तुमन ला पठोय हवय, ओकर करा लहुंट जावव अऊ ओला कहव, “यहोवा ह ये कहत हे: का इसरायल म कोनो परमेसर नइं ए, जेकर कारन तेंह एकरोन के देवता बाल-जबूब ले पुछे बर संदेसिया पठोय हस? ये खातिर जऊन पलंग म तेंह पड़े हस, उहां ले कभू नइं उठ सकस। पर खचित तेंह मर जाबे!” ’ ”
2KI 1:7 राजा ह ओमन ले पुछिस, “जऊन मनखे ह तुम्हर ले मिले बर आय रिहिस, अऊ तुम्हर ले ये बात कहिस, ओकर रंग-रूप कइसने रिहिस?”
2KI 1:8 ओमन जबाब दीन, “ओह तो रूआं के कपड़ा पहिरे रिहिस अऊ अपन कनिहां म चमड़ा के पट्टा बांधे रिहिस।” त राजा ह कहिस, “ओह तिसबी एलियाह अय।”
2KI 1:9 तब ओह एलियाह करा पचास सैनिकमन के संग ओमन के कप्तान ला पठोईस। कप्तान ह एलियाह करा गीस, जऊन ह एक पहाड़ी के चोटी म बईठे रिहिस, अऊ ओह एलियाह ला कहिस, “हे परमेसर के जन, राजा ह कहे हवय, ‘तें खाल्हे उतर आ!’ ”
2KI 1:10 एलियाह ह ओ कप्तान ला कहिस, “यदि मेंह परमेसर के जन अंव, त अकास ले आगी गिरय अऊ तोला अऊ तोर पचास मनखेमन ला भसम कर देवय!” तब अकास ले आगी गिरिस अऊ कप्तान अऊ ओकर मनखेमन ला भसम कर दीस।
2KI 1:11 फेर राजा ह एलियाह करा एक आने कप्तान ला ओकर पचास सैनिकमन के संग पठोईस। कप्तान ह एलियाह ले कहिस, “हे परमेसर के जन, राजा ह ये कहे हवय, ‘तुरते खाल्हे उतर आ!’ ”
2KI 1:12 एलियाह ह जबाब दीस, “यदि मेंह परमेसर के जन अंव, त अकास ले आगी गिरय अऊ तोला अऊ तोर पचास मनखेमन ला भसम कर देवय!” तब परमेसर के आगी अकास ले गिरिस अऊ ओला अऊ ओकर पचास मनखेमन ला भसम कर दीस।
2KI 1:13 फेर राजा ह एक तीसरा कप्तान अऊ संग म ओकर पचास सैनिकमन ला पठोईस। ये तीसरा कप्तान गीस अऊ एलियाह के आघू म माड़ी टेकके बिनती करिस, “हे परमेसर के जन, मोर परान अऊ तोर ये पचास सेवकमन के परान तोर नजर म अनमोल ठहिरय!
2KI 1:14 देख, पहिले के दू झन कप्तान अऊ ओमन के मनखेमन ऊपर अकास ले आगी गिरिस अऊ ओमन ला भसम कर दीस। पर अब मोर परान ह तोर नजर म अनमोल ठहिरय!”
2KI 1:15 यहोवा के स्वरगदूत ह एलियाह ला कहिस, “ओकर संग खाल्हे जा, ओकर ले झन डर।” तब एलियाह ह उठिस अऊ ओकर संग राजा करा गीस।
2KI 1:16 ओह राजा ला कहिस, “यहोवा ह ये कहत हे: का पुछताछ करे बर इसरायल म तोर बर कोनो परमेसर नइं अय कि तेंह पुछताछ करे बर एकरोन के देवता बाल-जबूब करा संदेसिया पठोय हस? काबरकि तेंह अइसने करे हस, एकरसेति जऊन पलंग म तेंह पड़े हस, उहां ले तें कभू नइं उठ सकस। खचित तेंह मर जाबे!”
2KI 1:17 तब एलियाह के दुवारा कहे यहोवा के बचन के मुताबिक राजा अहजयाह ह मर गीस। अहजयाह के कोनो बेटा नइं रिहिस, एकर कारन योराम ह ओकर जगह म राजा बनिस। ओह यहूदा के राजा यहोसापात के बेटा यहोराम के राज के दूसर बरस म राजा बनिस।
2KI 1:18 अहजयाह के राज के आने घटनामन, अऊ ओकर जम्मो काम इसरायल के राजामन के इतिहास के किताब म लिखे हवय?
2KI 2:1 जब यहोवा ह एलियाह ला बवंडर के दुवारा स्वरग म उठाके ले जानेवाला रिहिस, त एलियाह अऊ एलीसा दूनों गिलगाल नगर ले निकलके जावत रिहिन।
2KI 2:2 एलियाह ह एलीसा ले कहिस, “इहां रूक; यहोवा ह मोला बेतेल जाय बर कहे हवय।” पर एलीसा ह कहिस, “यहोवा के जिनगी अऊ तोर जिनगी के सपथ, मेंह तोर संग ला नइं छोड़ंव।” तब ओमन बेतेल चल दीन।
2KI 2:3 बेतेल म अगमजानीमन के दल ह एलीसा करा आईस अऊ ओमन एलीसा ले पुछिन, “का तेंह जानत हस कि आज यहोवा ह तोर मालिक ला तोर करा ले उठाके ले जानेवाला हे?” एलीसा ह जबाब दीस, “हव, मेंह जानत हंव, तुमन चुप रहव।”
2KI 2:4 तब एलियाह ह ओला कहिस, “हे एलीसा, इहां रूक, काबरकि यहोवा ह मोला यरीहो सहर ला पठोत हवय।” पर एलीसा ह कहिस, “यहोवा के जिनगी अऊ तोर जिनगी के सपथ, मेंह तोर संग ला नइं छोड़ंव।” तब ओमन यरीहो चल दीन।
2KI 2:5 यरीहो म अगमजानीमन के दल ह एलीसा करा गीस अऊ ओकर ले पुछिस, “का तेंह जानत हस कि आज यहोवा ह तोर मालिक ला तोर करा ले उठाके ले जानेवाला हे?” ओह जबाब दीस, “हव, मेंह जानत हंव, तुमन चुप रहव।”
2KI 2:6 तब एलियाह ह ओला कहिस, “इहां रूक, यहोवा ह मोला यरदन नदी मेर पठोत हवय।” एलीसा ह कहिस, “यहोवा के जिनगी अऊ तोर जिनगी के सपथ, मेंह तोर संग ला नइं छोड़ंव।” तब ओ दूनों चल दीन।
2KI 2:7 अगमजानीमन के दल के पचास झन जाके ओमन ले थोरकन दूरिहा म ठाढ़ हो गीन, अऊ ओमन के चेहरा ह ओ जगह कोति रहय, जिहां एलियाह अऊ एलीसा यरदन के तीर म रूके रिहिन।
2KI 2:8 एलियाह ह अपन चादर ला लीस अऊ ओला अइंठके पानी म पटकिस। तब पानी ह जेवनी अऊ डेरी कोति दू भाग हो गीस, अऊ ओ दूनों झन सूखा भुइयां म ओ पार चल दीन।
2KI 2:9 जब ओमन ओ पार चल दीन, तब एलियाह ह एलीसा ला कहिस, “येकर पहिली कि मेंह तोर करा ले उठा लिये जावंव, मोला बता कि मेंह तोर बर का करंव?” एलीसा ह जबाब दीस, “तोर म जऊन आतमा हवय, ओकर दू गुना भाग मोला मिलय।”
2KI 2:10 एलियाह ह कहिस, “तेंह एक कठिन बात मांगे हस, तभो ले यदि तेंह मोला तोर करा ले उठाय जावत बेरा मोला देख लेबे, त तोर ईछा ह पूरा हो जाही, यदि देख नइं पाबे, त तोर ईछा पूरा नइं होवय।”
2KI 2:11 जब ओमन एक संग गोठियावत जावत रिहिन, तब अचानक एक आगी के रथ अऊ आगी के घोड़ामन परगट होईन अऊ ओ दूनों ला अलग-अलग कर दीन, अऊ एलियाह ह बवंडर म होके स्वरग ऊपर चल दीस।
2KI 2:12 एलीसा ह येला देखके जोर से पुकारके कहिस, “हे मोर ददा! हे मोर ददा! हे इसरायल के रथ अऊ घुड़सवारमन!” अऊ एलीसा ह ओला फेर कभू नइं देखिस। तब ओह दुख म अपन कपड़ा ला धरिस अऊ चीरके दू कुटा कर दीस।
2KI 2:13 एलीसा ह तब ओ चादर ला उठा लीस, जऊन ह एलियाह के देहें ले गिरे रिहिस, अऊ ओह वापिस जाके यरदन के तीर म ठाढ़ हो गीस।
2KI 2:14 ओह एलियाह के देहें ले गिरे चादर ला लीस अऊ ओकर से पानी ला मारके पुछिस, “अब यहोवा, एलियाह के परमेसर कहां हवय?” जब ओह पानी ला मारिस, त पानी ह जेवनी अऊ डेरी कोति दू भाग हो गीस अऊ एलीसा ह नदी के ओ पार चल दीस।
2KI 2:15 यरीहो के अगमजानीमन के दल ह येला देखत रिहिस अऊ ओमन कहिन, “एलियाह म जऊन आतमा रिहिस, ओहीच ह अब एलीसा म आ गे हवय।” अऊ ओमन ओकर ले मिले बर गीन अऊ ओकर आघू म भुइयां म झुकके ओला दंडवत करिन।
2KI 2:16 तब ओमन ओला कहिन, “देख, हमर याने कि तोर सेवकमन करा पचास बलवान मनखे हवंय, ओमन ला अनुमति दे कि ओमन जावंय अऊ तोर मालिक ला खोजंय। हो सकथे यहोवा के आतमा ह ओला उठाके कोनो पहाड़ म या कोनो घाटी म छोंड़ देय होही।” एलीसा ह जबाब दीस, “नइं, ओमन ला झन भेजव।”
2KI 2:17 पर जब ओमन ओला बार-बार कहितेच रिहिन, त ओह परेसान होके ओमन के बात ला मान लीस अऊ कहिस, “ओमन ला पठो दव।” अऊ ओमन पचास मनखे ला पठो दीन, जेमन ओला तीन दिन तक खोजिन, पर ओला नइं पाईन।
2KI 2:18 जब ओमन वापिस एलीसा करा आईन, जऊन ह यरीहो म ठहिरे रिहिस, त ओह ओमन ला कहिस, “का मेंह तुमन ले नइं कहे रहंय कि झन जावव?”
2KI 2:19 एक दिन नगर के मनखेमन एलीसा ला कहिन, “हे मालिक, देख, ये नगर ह बढ़िया बसे हवय, जइसे कि तेंह देखत हस, पर इहां के पानी ह खराप हवय अऊ भुइयां म फसल नइं होवय।”
2KI 2:20 एलीसा ह कहिस, “एक ठन नवां कटोरा म नून डालके मोर करा लानव।” त ओमन कटोरा म नून डालके ओकर करा ले आईन।
2KI 2:21 तब ओह बाहिर पानी के झरना मेर गीस अऊ ओमा नून ला डालके कहिस, “यहोवा ह ये कहत हे: ‘मेंह ये पानी ला ठीक कर दे हवंव। अब ले फेर कभू येकर कारन मिरतू नइं होही अऊ भुइयां म फसल होही।’ ”
2KI 2:22 अऊ एलीसा के कहे ये बचन के मुताबिक पानी ह आज तक सुध हवय।
2KI 2:23 उहां ले एलीसा ह बेतेल म गीस। जब ओह डहार म रेंगत रिहिस, त नगर के कुछू लड़कामन आईन अऊ ये कहिके ओकर हंसी उड़ाय लगिन, “ए चंदवा मनखे, इहां ले निकल जा, ए चंदवा मनखे, इहां ले निकल जा!”
2KI 2:24 ओह पाछू कोति मुड़के ओमन ला देखिस अऊ यहोवा के नांव ले ओमन ला सराप दीस। तब जंगल म ले दू ठन भालू निकलके आईन अऊ बियालीस झन लड़का ला फार डारिन।
2KI 2:25 अऊ उहां ले एलीसा ह करमेल पहाड़ करा गीस अऊ फेर सामरिया लहुंट आईस।
2KI 3:1 सामरिया म अहाब के बेटा योराम ह इसरायल के राजा बनिस; ओह यहूदा के राजा यहोसापात के राज के अठारहवां साल म राजा बनिस, अऊ बारह साल तक राज करिस।
2KI 3:2 ओह यहोवा के नजर म दुस्ट काम करिस, पर ओह ओतेक दुस्ट काम नइं करिस, जतेक ओकर दाई अऊ ददा करे रिहिन। ओह अपन ददा के बनाय बाल देवता के पथरा ला हटा दीस।
2KI 3:3 तभो ले ओह नबात के बेटा यरोबाम के ओ पापमन म लगे रिहिस, जेला यरोबाम ह इसरायल ले करवाय रिहिस; ओह ओ पापमन ला नइं छोंड़िस।
2KI 3:4 मोआब देस के राजा मेसा ह बहुंत अकन भेड़ पाले रिहिस, अऊ ओला इसरायल के राजा ला एक लाख मेढ़ा-पीला अऊ एक लाख मेढ़ामन के ऊन राजकर के रूप म देय पड़त रिहिस।
2KI 3:5 पर अहाब के मरे के बाद, मोआब के राजा ह इसरायल के राजा ले बिदरोह करिस।
2KI 3:6 एकरसेति ओ बेरा राजा योराम ह सामरिया ले निकलके जम्मो इसरायल ला लड़ई बर इकट्ठा करिस।
2KI 3:7 ओह यहूदा के राजा यहोसापात करा ये संदेस घलो पठोईस: “मोआब के राजा ह मोर बिरोध म बिदरोह करे हवय। का तेंह मोर संग मोआब के बिरोध म लड़े बर जाबे?” यहोसापात ह जबाब दीस, “हव, मेंह तोर संग जाहूं, जइसने तेंह, वइसने महूं घलो अंव; मोर मनखेमन तोर मनखेमन सहीं अंय, अऊ मोर घोड़ामन तोर घोड़ा अंय।”
2KI 3:8 तब ओह पुछिस, “हमन कते डहार ले हमला करबो?” योराम ह जबाब दीस, “एदोम के बंजर भुइयां कोति ले।”
2KI 3:9 तब इसरायल के राजा, यहूदा के राजा अऊ एदोम के राजा मिलके चलिन। अऊ जब ओमन सात दिन तक घुमके चल चुकिन, तब सेना अऊ ओमन के संग रेंगत पसुमन बर पानी नइं मिलिस।
2KI 3:10 तब इसरायल के राजा ह कहिस, “हाय! का यहोवा ह हमन तीनों राजा ला मोआब के हांथ म सऊंप देय बर एक संग बलाय हवय।”
2KI 3:11 पर यहोसापात ह पुछिस, “का इहां यहोवा के कोनो अगमजानी नइं ए, जेकर दुवारा हमन यहोवा के ईछा ला जान सकन?” इसरायल के राजा के एक अधिकारी ह जबाब दीस, “सापात के बेटा एलीसा ह इहां हवय, जऊन ह एलियाह के हांथ धोवाय के काम करत रिहिस।”
2KI 3:12 यहोसापात ह कहिस, “ओकर करा यहोवा के बचन ह पहुंचथे।” तब इसरायल के राजा अऊ यहोसापात अऊ एदोम के राजा ओकर करा गीन।
2KI 3:13 एलीसा ह इसरायल के राजा ला कहिस, “मोला तोर ले कोनो लेना-देना नइं ए। अपन ददा के अगमजानी अऊ अपन दाई के अगमजानीमन करा जा।” इसरायल के राजा ह ओला जबाब दीस, “नइं, काबरकि यहोवा ह हमन तीनों राजामन ला मोआब के हांथ म कर देय बर एक संग बलाय हवय।”
2KI 3:14 एलीसा ह कहिस, “ओ सर्वसक्तिमान यहोवा के जिनगी के सपथ, जेकर मेंह सेवा करथंव, यदि यहूदा के राजा यहोसापात बर मोर मन म आदर नइं होतिस, त मेंह तुम्हर कोति कोनो धियान नइं देय रहितेंव।
2KI 3:15 पर अब कोनो बीना बजइया ला मोर करा लानव।” जब बीना बजइया ह बीना ला बजात रिहिस, त यहोवा के सामर्थ एलीसा के ऊपर उतरिस
2KI 3:16 अऊ ओह कहिस, “यहोवा ह ये कहत हे: मेंह ये घाटी ला पानी के सोता ले भर दूहूं।
2KI 3:17 काबरकि यहोवा ह ये कहत हे: तुमन न तो हवा ला देखहू अऊ न ही बारिस, तभो ले ये घाटी ह पानी ले भर जाही, अऊ तुमन अऊ तुम्हर गाय-बईला अऊ तुम्हर आने पसुमन ला पीये बर पानी मिलही।
2KI 3:18 येह यहोवा के नजर म एक छोटकन बात अय; ओह मोआब ला घलो तुम्हर हांथ म कर दीही।
2KI 3:19 तुमन हर गढ़वाले सहर अऊ हर एक बड़े नगर ला नास कर दूहू। तुमन हर एक बने रूख ला काट डारहू, पानी के जम्मो सोतामन ला बंद कर दूहू, अऊ जम्मो बने खेतमन ला पथरा पाटके नास कर दूहू।”
2KI 3:20 ओकर दूसर दिन बिहनियां, बलिदान चघाय के बेरा म, अइसने होईस—एदोम के दिग ले पानी बहे लगिस! अऊ देस ह पानी ले भर गीस।
2KI 3:21 जम्मो मोआबीमन सुने रिहिन कि राजामन हमर ले लड़े बर आय हवंय, एकरसेति हर एक मनखे, जवान अऊ डोकरा, जेमन हथियार उठा सकत रिहिन, ओ जम्मो ला बलाके सीमना म तैनात कर दिये गीस।
2KI 3:22 जब ओमन बड़े बिहनियां सुतके उठिन, त देखिन कि सूरज ह पानी के ऊपर चमकत रहय। मोआबीमन ला रसता के एक तरफ ले लेके दूसर तरफ तक पानी ह लहू के सहीं लाल दिखिस।
2KI 3:23 त ओमन आपस म कहे लगिन, “ओह तो लहू अय! जरूर ओ राजामन आपस म लड़के एक-दूसर ला मार डारे हवंय। एकरसेति हे मोआबीमन, सामान ला लूटे बर आवव।”
2KI 3:24 पर जब ओमन इसरायल के छावनी करा आईन, त इसरायलीमन उठिन अऊ मोआबीमन ले लड़के ओमन ला भगा दीन। अऊ इसरायलीमन ओ देस ऊपर हमला करके मोआबीमन ला मारते चले गीन।
2KI 3:25 ओमन नगरमन ला नास कर दीन, अऊ जम्मो बने-बने खेत म हर एक मनखे पथरा फेंकत गीन अऊ ओ खेतमन ला पथरा ले पाट दीन। ओमन पानी के जम्मो सोतामन ला बंद कर दीन अऊ हर एक बने रूख ला काट डारिन। सिरिप कीर-हरेसेत सहर के जगह ह पथरामन के संग बांचिस, पर जऊन मनखेमन गोफन चलात रिहिन, ओमन ओला चारों कोति ले घेर लीन अऊ ओकर ऊपर हमला कर दीन।
2KI 3:26 जब मोआब के राजा ह देखिस कि ओह लड़ई हारत हवय, त ओह सात सौ तलवारधारी मनखेमन ला लेके एदोम के राजा कोति हमला करिस, पर ओमन सफल नइं होईन।
2KI 3:27 तब ओह अपन पहिलांत बेटा ला लीस, जऊन ह कि ओकर जगह म राजा होनेवाला रिहिस, अऊ ओला सहर के दीवार म एक बलिदान के रूप म चघाईस। ये खातिर इसरायल के बिरूध बहुंत कोरोध भड़किस; अऊ ओमन पाछू हटके अपन देस वापिस चल दीन।
2KI 4:1 अगमजानीमन के दल के एक मनखे के घरवाली ह एलीसा करा गोहारिस, “तोर दास मोर घरवाला ह मर गे हवय, अऊ तेंह जानथस कि ओह यहोवा के आदर करय। पर अब ओकर साहूकार ह मोर दू झन बेटा ला अपन गुलाम बनाके ले जाय बर आवत हे।”
2KI 4:2 एलीसा ह ओकर ले पुछिस, “मेंह तोर बर का करंव? मोला बता, तोर घर म का हवय?” ओह कहिस, “तोर दासी के घर म जैतून तेल के एक छोटे बरतन के अलावा अऊ कुछू नइं ए।”
2KI 4:3 एलीसा ह कहिस, “तें आसपास म जा अऊ अपन जम्मो पड़ोसीमन ले खाली बरतन मांगके ले आ, अऊ धियान रहे कि थोरकन बरतन झन लानबे।
2KI 4:4 तब अपन बेटामन ला लेके घर के भीतर जा अऊ कपाट ला बंद करके जम्मो बरतन म तेल ला ढार, अऊ जब हर बरतन ह भर जाही, त ओला एक तरफ रखत जाबे।”
2KI 4:5 तब ओ माईलोगन ह ओकर करा ले चले गीस, अऊ अपन बेटामन ला संग म लेके अपन घर के भीतर गीस अऊ कपाट ला बंद कर लीस। ओकर बेटामन ओकर करा बरतनमन ला लावत गीन अऊ ओह बरतनमन म तेल ढारत गीस।
2KI 4:6 जब जम्मो बरतनमन भर गीन, त ओह अपन बेटा ला कहिस, “मोर करा एक अऊ बरतन ले आ।” पर ओकर बेटा ह कहिस, “अऊ कोनो बरतन नइं ए।” तब तेल के धार ह बंद हो गीस।
2KI 4:7 तब ओ माईलोगन ह जाके परमेसर के जन ला ये बात बताईस, त परमेसर के जन ह कहिस, “जा अऊ तेल ला बेचके अपन करजा के चुकता कर। अऊ जऊन ह बच जाही, ओमा तें अऊ तोर बेटामन गुजारा कर सकत हव।”
2KI 4:8 एक दिन एलीसा ह सुनेम नांव के सहर म गीस। उहां एक धनी माईलोगन रिहिस, जऊन ह बिनती करके एलीसा ला जेवन करे बर बलाईस। एकर बाद जब भी ओह ओती आवय, त ओह उहां जेवन करे बर रूकय।
2KI 4:9 ओ माईलोगन ह अपन घरवाला ले कहिस, “सुन, मेंह जानत हंव कि ये मनखे, जऊन ह अकसर हमर एती आथे, ओह परमेसर के एक पबितर जन अय।
2KI 4:10 आ हमन ओकर बर छत म एक छोटे कमरा बना दन, अऊ उहां ओकर बर एक ठन पलंग अऊ एक ठन मेज, एक ठन कुरसी अऊ एक ठन दीया रख देवन। तब जब भी ओह हमर इहां आही, त ओह उहां रूक सकथे।”
2KI 4:11 एक दिन जब एलीसा ह आईस, त ओह ऊपर अपन कमरा म गीस अऊ उहां लेट गीस।
2KI 4:12 ओह अपन सेवक गेहजी ला कहिस, “ओ सुनेमिन ला बला।” त गेहजी ह ओला बलाईस, अऊ सुनेमिन ह आके ओकर आघू म ठाढ़ हो गीस।
2KI 4:13 तब एलीसा ह गेहजी ले कहिस, “ओला कह, ‘तेंह हमर बर ये जम्मो तकलीफ उठाय हस। त तोर बर का करे जावय? का हमन तोर कोनो बात के चरचा राजा या सेनापति ले करन?’ ” ओ माईलोगन ह जबाब दीस, “मोर अपन मनखेमन के बीच एक घर हवय।”
2KI 4:14 एलीसा ह गेहजी ले पुछिस, “त येकर बर का करे जा सकत हे?” गेहजी ह जबाब दीस, “ओकर कोनो बेटा नइं ए, अऊ ओकर घरवाला ह डोकरा हो गे हवय।”
2KI 4:15 तब एलीसा ह कहिस, “ओला बला।” त गेहजी ह ओला बलाईस, अऊ सुनेमिन ह आके दुवार म ठाढ़ हो गीस।
2KI 4:16 तब एलीसा ह कहिस, “अगले साल लगभग इही समय म तोर कोरा म एक बेटा होही।” ओ माईलोगन ह कहिस, “नइं, हे मोर मालिक! हे परमेसर के जन, अपन दासी ले लबारी बात झन कह!”
2KI 4:17 पर ओ माईलोगन ह गरभवती होईस, अऊ अगले साल लगभग ओहीच समय म ओह एक बेटा ला जनम दीस, जइसे कि एलीसा ह ओला कहे रिहिस।
2KI 4:18 लइका ह बड़े होवत गीस, अऊ एक दिन ओह बाहिर अपन ददा करा गीस, जऊन ह फसल लुवइयामन के संग रिहिस।
2KI 4:19 अचानक ओह अपन ददा ला कहिस, “आह! मोर मुड़! मोर मुड़!” ओकर ददा ह अपन एक सेवक ला कहिस, “येला येकर दाई करा ले जा।”
2KI 4:20 ओ सेवक ह ओला उठाके ओकर दाई करा ले गीस; ओ लइका ह मंझन तक अपन दाई के कोरा म बईठे रिहिस, अऊ तब ओह मर गीस।
2KI 4:21 ओ माईलोगन ह लइका ला ऊपर ले जाके परमेसर के जन के दसना म लेटा दीस, अऊ कपाट ला बंद करके उहां ले चल दीस।
2KI 4:22 तब ओह अपन घरवाला करा ये संदेस भिजवाईस, “मोर करा एक सेवक अऊ एक गदही पठो दे ताकि मेंह तुरते परमेसर के जन करा जाके वापिस आ सकंव।”
2KI 4:23 ओकर घरवाला ह पुछिस, “आज तेंह ओकर इहां काबर जाबे? आज न तो नवां चंदा, अऊ न ही बिसराम दिन अय।” ओह कहिस, “कोनो बात नइं ए।”
2KI 4:24 गदही म काठी बंधवाके ओह अपन सेवक ला कहिस, “गदही ला हांकत चल; अऊ जब तक मेंह तोला नइं कहंव, तब तक धीरे झन चलबे।”
2KI 4:25 ओ माईलोगन ह आघू बढ़त करमेल पहाड़ म परमेसर के जन करा आईस। जब परमेसर के जन ह ओला दूरिहा ले देखिस, त ओह अपन सेवक गेहजी ला कहिस, “देख! ओती ओ सुनेमिन माईलोगन!
2KI 4:26 ओकर ले मिले बर दऊड़के जा अऊ ओकर ले पुछ, ‘सब बने तो हवय? तोर घरवाला घलो बने तो हवय? अऊ का तोर लइका ह बने तो हवय?’ ” ओ माईलोगन ह कहिस, “हव, सब बने हवय।”
2KI 4:27 जब ओह पहाड़ म परमेसर के जन करा गीस, त ओह ओकर गोड़ ला धर लीस। तब गेहजी ह आके ओला अलग हटाय लगिस, पर परमेसर के जन ह कहिस, “ओला छोंड़ दे! ओकर मन बहुंत बियाकुल हवय, पर यहोवा ह ये बात मोर ले छुपाके रखे हवय, अऊ मोला नइं बताय हवय, कोन जाने काबर?”
2KI 4:28 तब ओ माईलोगन ह कहन लगिस, “हे मोर मालिक, का मेंह तोर ले एक बेटा मांगे रहंय? का मेंह नइं कहे रहंय कि मोर ले लबारी बात झन कह?”
2KI 4:29 एलीसा ह गेहजी ले कहिस, “अपन कनिहां ला कस ले, अऊ मोर लउठी ला अपन हांथ म लेके दऊड़के जा। डहार म कोनो तोला मिलय, त ओकर हालचाल झन पुछबे, अऊ यदि कोनो तोर हालचाल पुछय, त ओकर जबाब झन देबे। अऊ जाके मोर ये लउठी ला ओ लइका के चेहरा म रख देबे।”
2KI 4:30 पर लइका के दाई ह कहिस, “यहोवा के अऊ तोर जिनगी के सपथ, मेंह तोला नइं छोड़ंव।” एकरसेति एलीसा ह उठिस अऊ ओकर पाछू-पाछू गीस।
2KI 4:31 गेहजी ह पहिले हबरके लउठी ला ओ लइका के चेहरा म रखिस, पर कोनो अवाज नइं आईस, अऊ न ही ओमा कोनो हरकत होईस। तब गेहजी ह वापिस आके एलीसा ला कहिस, “लइका ह नइं जागिस।”
2KI 4:32 जब एलीसा ह घर म आईस, त देखिस कि लइका ह ओकर दसना म मरे पड़े हवय।
2KI 4:33 तब ओह भीतर गीस अऊ कपाट ला बंद कर दीस, अऊ भीतर म ओ अऊ मरे पड़े लइका रिहिन। एलीसा ह यहोवा ले पराथना करिस।
2KI 4:34 तब ओह दसना म चढ़के लइका के ऊपर लेट गीस; अपन मुहूं ला लइका के मुहूं ऊपर, अपन आंखी ला लइका के आंखी ऊपर अऊ अपन हांथमन ला लइका के हांथमन ऊपर रखिस। जब ओह ओ लइका ऊपर पसर गीस, त लइका के देहें ह गरम होय लगिस।
2KI 4:35 तब ओह उठके कमरा म एती ले ओती टहले लगिस अऊ तब दसना म जाके एक बार फेर लइका के ऊपर पसर गीस। तब लइका ह सात बार छिंकिस अऊ अपन आंखी ला खोलिस।
2KI 4:36 एलीसा ह गेहजी ला बलाके कहिस, “सुनेमिन ला बला।” अऊ ओह बलाके लानिस। जब सुनेमिन ह आईस, त ओह कहिस, “अपन बेटा ला ले जा।”
2KI 4:37 ओह भीतर आके एलीसा के गोड़ खाल्हे गिरिस अऊ झुकके दंडवत करिस। तब ओह अपन बेटा ला लेके बाहिर चल दीस।
2KI 4:38 तब एलीसा ह गिलगाल ला लहुंट गीस। ओ बेरा ओ इलाका म अकाल पड़े रिहिस। जब अगमजानीमन के दल ह ओकर संग बईठे रिहिस, त ओह अपन सेवक ले कहिस, “एक ठन बड़े बरतन म ये अगमजानीमन बर कुछू रांध।”
2KI 4:39 ओमा ले एक झन ह साग-भाजी टोरे बर बाहिर मैदान म गीस अऊ ओह उहां एक ठन जंगली नार म ले ओकर लौकी ला टोरिस अऊ अपन पूरा कपड़ा भरके गंठियाईस अऊ ओला ले आईस। वापिस आके ओह ओ फरमन ला काटके रांधे बर बरतन म डाल दीस अऊ कोनो नइं जानत रिहिन कि ओमन का फर अंय।
2KI 4:40 जेवन पके के बाद, ओला मनखेमन ला परोसे गीस। पर जब ओमन खाय लगिन, ओमन चिचियाके कहे लगिन, “हे परमेसर के जन, बरतन म मिरतू हवय!” अऊ ओमन ओला खाय नइं सकिन।
2KI 4:41 एलीसा ह कहिस, “थोरकन पीसान ले आवव।” तब ओह पीसान ला बरतन म डालके कहिस, “अब येला खाय बर मनखेमन ला परोस दव।” तब ओ बरतन म नुकसान करे के कोनो चीज नइं रिहिस।
2KI 4:42 बाल-सालीसा सहर ले, एक मनखे ह आके परमेसर के जन ला पके अनाज के पहिली-फसल ले बने जौ के बीस ठन रोटी, अऊ नवां अनाज के कुछू बालमन ला दीस। त एलीसा ह कहिस, “खाय बर येला मनखेमन ला दे दव।”
2KI 4:43 ओकर सेवक ह पुछिस, “येला मेंह सौ मनखेमन ला कइसे परोसंव?” पर एलीसा ह जबाब दीस, “येला खाय बर मनखेमन ला देय दे। काबरकि यहोवा ह ये कहत हे: ‘ओमन के खाय के बाद कुछू बांच घलो जाही।’ ”
2KI 4:44 तब ओह ओमन के आघू म परोस दीस, अऊ ओमन खाईन अऊ यहोवा के बचन के मुताबिक ओमन के खाय के बाद कुछू बांच घलो गीस।
2KI 5:1 अराम के राजा के सेना के नामान नांव के सेनापति रिहिस। ओह अपन मालिक के नजर म एक बड़े अऊ आदर के योग्य मनखे रिहिस, काबरकि ओकर जरिये यहोवा ह अराम ला लड़ई म जीताय रिहिस। ओह एक बीर सैनिक रिहिस, पर ओह कोढ़ के रोगी रिहिस।
2KI 5:2 एक बार, अराम के हमला करइया मनखेमन के दल ह जाके इसरायल देस के एक छोटे लड़की ला बंदी बनाके ले आय रिहिस, अऊ ओह नामान के घरवाली के सेवा करत रिहिस।
2KI 5:3 ओ लड़की ह अपन मालकिन ले कहिस, “यदि मोर मालिक ह सामरिया के अगमजानी करा जातिस, त बने होतिस! काबरकि ओह ओला कोढ़ ले चंगा कर दीही।”
2KI 5:4 त नामान ह अपन मालिक, राजा करा जाके ओ बात ला बताईस, जेला ओ इसरायली लड़की ह कहे रिहिस,
2KI 5:5 अराम के राजा ह कहिस, “तेंह जरूर जा; मेंह इसरायल के राजा करा एक ठन चिट्ठी लिख दूहूं।” तब नामान ह अपन संग दस टेलेन्ट चांदी, छै हजार सेकेल सोन अऊ दस जोड़ी कपड़ा लेके निकलिस।
2KI 5:6 ओह इसरायल के राजा बर जऊन चिट्ठी लेके गीस, ओमा ये लिखाय रिहिस: “ये चिट्ठी के संग मेंह अपन सेवक नामान ला तोर करा भेजत हंव, ताकि तेंह ओला कोढ़ के बेमारी ले बने कर दे।”
2KI 5:7 जब इसरायल के राजा ह चिट्ठी ला पढ़िस, त ओह अपन कपड़ा ला चीरके कहिस, “का मेंह परमेसर अंव? का मेंह मार सकत हंव या कोनो ला जीया सकत हंव? ये मनखे ह मोर करा एक मनखे ला ओकर कोढ़ ले बने करे बर काबर पठोय हवय? देखव, कइसे ओह मोर ले झगड़ा करे के बहाना खोजत हे!”
2KI 5:8 जब परमेसर के जन एलीसा ह ये बात ला सुनिस कि इसरायल के राजा ह अपन कपड़ा ला चीरे हवय, त ओह ओकर करा ये संदेस पठोईस, “तेंह काबर अपन कपड़ा ला फारे हस? ओ मनखे ह मोर करा आवय, तब ओला पता चलही कि इसरायल म एक अगमजानी हवय।”
2KI 5:9 तब नामान ह घोड़ा अऊ रथमन संग जाके एलीसा के दुवार म ठाढ़ हो गीस।
2KI 5:10 एलीसा ह एक संदेसिया ला ओकर करा ये कहे बर पठोईस, “तेंह जा अऊ यरदन नदी म सात बार डुबकी मार, तब तोर देहें ह पहिले के सहीं हो जाही अऊ तेंह सुध हो जाबे।”
2KI 5:11 पर नामान ह गुस्सा होके उहां ले चल दीस अऊ कहिस, “मेंह तो सोचत रहेंव कि ओह जरूर बाहिर मोर करा निकलके आही अऊ ठाढ़ होही अऊ यहोवा अपन परमेसर के नांव लेके कोढ़ के जगह म अपन हांथ फेरही अऊ मोर कोढ़ ला दूर कर दीही!
2KI 5:12 का दमिस्क सहर के अबाना अऊ परपर नदी के पानी ह इसरायल के जम्मो जगह के पानी ले जादा बने नो हय? का मेंह ओमा डुबकी लगाके सुध नइं हो सकंव?” ओह गुस्सा होके मुड़िस अऊ उहां ले चल दीस।
2KI 5:13 तब नामान के सेवकमन ओकर करा गीन अऊ कहिन, “हे हमर ददा, यदि अगमजानी ह तोला कोनो भारी काम करे बर कहे होतिस, त का तेंह ओला नइं करते? येला तो जरूर करना चाही, जब ओह तोला कहत हवय, ‘जाके डुबकी लगा अऊ सुध हो जा!’ ”
2KI 5:14 तब नामान ह गीस अऊ यरदन नदी म सात बार डुबकी लगाईस, जइसे कि परमेसर के जन ह ओला कहे रिहिस, ओकर देहें ह पहिले के सहीं हो गीस अऊ ओह छोटे लइका के सहीं सुध हो गीस।
2KI 5:15 तब नामान अऊ ओकर जम्मो सेवकमन परमेसर के जन करा वापिस गीन, अऊ नामान ह ओकर आघू म ठाढ़ होके कहिस, “अब मेंह जान गे हवंव कि जम्मो संसार म इसरायल के परमेसर के छोंड़ अऊ कोनो परमेसर नइं ए। एकरसेति अब तोर दास के भेंट ला गरहन कर।”
2KI 5:16 एलीसा ह कहिस, “यहोवा के जिनगी के सपथ, जेकर सेवा मेंह करथंव, मेंह कोनो चीज नइं लेवंव।” अऊ नामान के बहुंत बिनती करे के बाद घलो ओह भेंट ला गरहन नइं करिस।
2KI 5:17 तब नामान ह कहिस, “यदि तेंह भेंट ला गरहन नइं करस, त फेर तोर सेवक ला इहां के अतेक माटी लेके जावन दे, जतेक कि दू ठन खच्चर उठाके ले जा सकंय, काबरकि येकर बाद तोर सेवक ह यहोवा ला छोंड़ फेर कभू कोनो आने देवता ला होम-बलिदान अऊ आने बलिदान नइं चघाही।
2KI 5:18 पर यहोवा ह तोर सेवक ला ये एक बात बर माफ करय: जब मोर मालिक ह रिम्मोन के मंदिर म दंडवत करे बर जाथे अऊ ओह मोर हांथ के सहारा लेथे अऊ मोला घलो उहां दंडवत करे बर पड़थे—जब मेंह रिम्मोन के मंदिर म दंडवत करथंव, त यहोवा ह तोर सेवक ला येकर बर माफ करय।”
2KI 5:19 एलीसा ह कहिस, “सांति से जा।” नामान ह थोरकन दूरिहा गे रिहिस,
2KI 5:20 कि परमेसर के जन एलीसा के सेवक गेहजी ह अपन मन म बिचार करिस, “मोर मालिक ह ओ अरामी नामान ला अइसनेच छोंड़ दीस अऊ ओकर लाय गे भेंट ला स्वीकार नइं करिस। यहोवा के जिनगी के सपथ, मेंह पाछू दऊड़के ओकर करा जाहूं अऊ ओकर ले कुछू न कुछू ले लूहूं।”
2KI 5:21 तब गेहजी ह नामान के पाछू दऊड़िस। जब नामान ह कोनो ला दऊड़त अपन कोति आवत देखिस, त ओह ओकर ले मिले बर रथ ले खाल्हे उतरिस अऊ पुछिस, “सब ठीक-ठाक तो हवय?”
2KI 5:22 गेहजी ह जबाब दीस, “हव, सब ठीक-ठाक हवय, पर मोर मालिक ह मोला ये कहे बर पठोय हवय, ‘एपरैम के पहाड़ी इलाका ले अगमजानीमन के दल के दू जवान अभीच मोर करा आय हवंय। किरपा करके ओमन बर एक टेलेन्ट चांदी अऊ दू जोड़ी कपड़ा देय दे।’ ”
2KI 5:23 नामान ह कहिस, “खुसी से दू टेलेन्ट लेय ले।” ओह ओला लेय बर गेहजी ले जिद्द करिस, अऊ तब दू ठन झोला म दू टेलेन्ट चांदी के संग दू जोड़ी कपड़ा बांध दीस। ओह ये दूनों झोला अपन दू झन सेवकमन ला दीस, अऊ ओमन येला उठाके गेहजी के आघू-आघू ले चलिन।
2KI 5:24 जब गेहजी ह पहाड़ी करा हबरिस, त ओह ओ सामान ला सेवकमन ले लेके घर म रख दीस। तब ओह ओ मनखेमन ला बिदा करिस, अऊ ओमन चल दीन।
2KI 5:25 जब गेहजी ह भीतर जाके अपन मालिक के आघू म ठाढ़ होईस, त एलीसा ह ओकर ले पुछिस, “हे गेहजी, तेंह कहां गे रहय?” ओह जबाब दीस, “तोर सेवक ह कहीं नइं गे रिहिस।”
2KI 5:26 पर एलीसा ह ओला कहिस, “जब ओ मनखे ह तोर से मिले बर अपन रथ ले खाल्हे उतरिस, त का मोर आतमा ह तोर संग नइं रिहिस? का येह पईसा या कपड़ा या जैतून अऊ अंगूर के बारी, या गाय-बईला अऊ भेड़-बकरी, या नर गुलाम अऊ नारी गुलाम लेय के समय ए?
2KI 5:27 येकर कारन नामान के कोढ़ ह तोर अऊ तोर संतानमन म सदाकाल बर लगे रहिही।” तब गेहजी ह एलीसा करा ले चल दीस अऊ ओकर चमड़ी म कोढ़ हो गीस—येह बरफ के सहीं सफेद हो गे रिहिस।
2KI 6:1 एक दिन अगमजानीमन के दल ह एलीसा ला कहिस, “देख, जऊन जगह म हमन तोर संग मिलथन, ओह हमर बर बहुंत छोटे पड़त हे।
2KI 6:2 एकरसेति आवव, हमन यरदन तक जावन, अऊ उहां हमर म ले हर एक जन बल्ली लेवय अऊ उहां हमन अपन बर एक जगह तियार करन।” एलीसा ह कहिस, “ठीक हे, जावव।”
2KI 6:3 तब ओमा के एक झन ह कहिस, “किरपा करके तेंह घलो अपन सेवकमन के संग चल।” एलीसा ह जबाब दीस, “ठीक हे, मेंह घलो तुम्हर संग चलहूं।”
2KI 6:4 अऊ ओह ओमन के संग गीस। अऊ ओमन यरदन के तीर म गीन अऊ रूखमन ला काटे के सुरू करिन।
2KI 6:5 जब ओमन लकड़ी काटत रिहिन, त ओमा के एक झन के टंगिया ह बेंट ले निकलके पानी म गिर गीस। त ओह चिचियाके कहिस, “ओहो! नइं, हे मोर परभू, टंगिया ला मेंह मांगके लाने रहंय!”
2KI 6:6 परमेसर के जन ह पुछिस, “ओह कहां गिरिस?” जब ओह ओ जगह ला देखाईस, त एलीसा ह एक ठन छड़ी ला काटिस अऊ उहां फेंक दीस, अऊ ओ टंगिया ह पानी म तउंरे लगिस।
2KI 6:7 एलीसा ह कहिस, “ओला उठा ले।” तब ओ मनखे ह हांथ बढ़ाके ओला ले लीस।
2KI 6:8 ओ बेरा, अराम के राजा ह इसरायल ले लड़ई करत रिहिस। अपन अधिकारीमन ले सलाह करे के बाद ओह कहिस, “मेंह फलाना-फलाना जगह म अपन डेरा डालहूं।”
2KI 6:9 तब परमेसर के जन एलीसा ह इसरायल के राजा करा ये खबर पठोईस, “सावधानी बरतव अऊ ओ फलाना जगह ले होके झन जावव, काबरकि अरामी सेना ह उहां जावत हवय।”
2KI 6:10 तब इसरायल के राजा ह ओ जगह के बारे म पता लगवाईस, जेकर बारे म परमेसर के जन ह बताय रिहिस। एलीसा ह राजा ला फेर कतको बार चेताईस, एकरसेति ओ जगहमन म राजा ह अपन बचाव म सावधानी बरतिस।
2KI 6:11 ये खातिर अराम के राजा ह गुस्सा होईस। ओह अपन अधिकारीमन ला बलाके ओमन ले पुछिस, “मोला बतावव! हमन म ले कोन ह इसरायल के राजा कोति हवय?”
2KI 6:12 ओकर एक अधिकारी ह कहिस, “हे मोर मालिक राजा! हमन म ले कोनो नइं ए, पर इसरायल म जऊन अगमजानी हवय—एलीसा, ओह इसरायल के राजा ला ओ जम्मो गोठ बता देथे, जेला तेंह अपन सुते के कमरा म कहिथस।”
2KI 6:13 राजा ह हुकूम दीस, “जावव अऊ पता लगावव कि ओह कहां हवय, ताकि मेंह मनखेमन ला पठोके ओला पकड़ सकंव।” ओला ये समाचार मिलिस: “ओह दोतान नगर म हवय।”
2KI 6:14 तब ओह उहां घोड़ा अऊ रथमन के संग एक भारी सैनिक दल भेजिस। ओमन रथिया उहां गीन अऊ सहर ला घेर लीन।
2KI 6:15 बिहनियां जब परमेसर के जन के सेवक ह उठिस अऊ बाहिर निकलके देखिस, त सहर ह घोड़ा अऊ रथमन के संग एक सेना ले घिर गे रहय। तब सेवक ह पुछिस, “ओहो! नइं, हे मोर मालिक! अब हमन का करन?”
2KI 6:16 अगमजानी ह जबाब दीस, “झन डर, काबरकि जऊन मन हमर तरफ हवंय, ओमन संखिया म ओ बिरोधीमन ले जादा हवंय।”
2KI 6:17 अऊ एलीसा ह ये पराथना करिस, “हे यहोवा, येकर आंखी ला खोल दे कि येह देख सकय।” तब यहोवा ह सेवक के आंखी ला खोल दीस, अऊ जब ओह नजर उठाके देखिस, त एलीसा के चारों कोति पहाड़ी ह आगी के घोड़ा अऊ रथमन ले भर गे रहय।
2KI 6:18 जब अरामीमन ओकर कोति आईन, तब एलीसा ह यहोवा ले पराथना करिस, “ये सेना ला अंधरा कर दे।” अऊ एलीसा के बिनती के मुताबिक यहोवा ह ओमन ला अंधरा कर दीस।
2KI 6:19 एलीसा ह ओमन ले कहिस, “येह ओ डहार नो हय, अऊ न ही येह ओ सहर अय। मोर पाछू आवव, अऊ मेंह तुमन ला ओ मनखे करा ले जाहूं, जेला तुमन खोजत हवव।” अऊ ओह ओमन ला सामरिया ले गीस।
2KI 6:20 जब ओमन सामरिया सहर के भीतर गीन, त एलीसा ह पराथना करिस, “हे यहोवा, ये मनखेमन के आंखी ला खोल दे कि येमन देख सकंय।” तब यहोवा ह ओमन के आंखी ला खोल दीस, अऊ ओमन देखिन कि ओमन सामरिया सहर के भीतर हवंय।
2KI 6:21 जब ओमन ला इसरायल के राजा ह देखिस, त ओह एलीसा ले पुछिस, “हे मोर ददा, का मेंह येमन ला मार डारंव? का मेंह येमन ला मार डारंव?”
2KI 6:22 ओह जबाब दीस, “नइं, ओमन ला झन मार। का तेंह ओमन ला मार डारबे, जेमन ला तेंह अपन तलवार या धनुस के दुवारा बंदी बना लेथस? ओमन ला जेवन अऊ पानी दे, ताकि ओमन खावंय-पीयंय अऊ अपन मालिक करा वापिस जावंय।”
2KI 6:23 तब ओह ओमन बर बड़े जेवनार करिस, अऊ जब ओमन खा-पी लीन, तब ओह ओमन ला विदा करिस, अऊ ओमन अपन मालिक करा वापिस चले गीन। येकर बाद, अराम के दलमन इसरायल के इलाका म हमला करे बर बंद कर दीन।
2KI 6:24 कुछू समय बाद, अराम के राजा बेन-हदद ह अपन जम्मो सेना ला संगठित करिस अऊ सेना ला लेके सामरिया सहर ला घेर लीस।
2KI 6:25 सामरिया म भयंकर अकाल पड़िस; अऊ सहर के घेराबंदी ह अतेक लम्बा चलिस कि गदहा के एक ठन मुड़ी ह चांदी के अस्सी सेकेल, अऊ पंड़की के टट्टी के एक चौथाई केब ह पांच सेकेल म बिके लगिस।
2KI 6:26 एक दिन जब इसरायल के राजा ह सहर के दीवार म ले होके जावत रिहिस, त एक झन माईलोगन ह पुकारके ओला कहिस, “हे मोर मालिक, हे राजा, मोर मदद कर!”
2KI 6:27 राजा ह जबाब दीस, “यदि यहोवा ह तोर मदद नइं करत हे, त फेर मेंह कहां ले तोर मदद करंव? का कोठार म ले या अंगूर के रसकुंड म ले?”
2KI 6:28 तब राजा ह ओकर ले पुछिस, “का बात ए?” ओह जबाब दीस, “ये माईलोगन ह मोर ले कहिस, ‘अपन बेटा ला दे कि आज हमन ओला खावन, अऊ कल हमन मोर बेटा ला खाबो।’
2KI 6:29 तब हमन मोर बेटा ला रांधके खायेंन। ओकर दूसर दिन जब मेंह येला कहेंव, ‘अपन बेटा ला दे कि हमन ओला खावन,’ पर येह अपन बेटा ला छिपा दे हवय।”
2KI 6:30 जब राजा ह ओ माईलोगन के ये बात ला सुनिस, त दुख म अपन ऊपर के कपड़ा ला चीरिस। जब राजा ह दीवार म होके जावत रिहिस, त मनखेमन देखिन कि ओह कपड़ा के भीतर अपन देहें म बोरा ले बने कपड़ा पहिरे हवय।
2KI 6:31 ओह कहिस, “यदि सापात के बेटा एलीसा के मुड़ी आज ओकर धड़ म बने रहिथे, त परमेसर ह मोला दंड देवय, अऊ मोला बहुंत कठोर दंड देवय।”
2KI 6:32 एलीसा ह अपन घर म बईठे रिहिस, अऊ अगुवामन घलो ओकर संग बईठे रिहिन। राजा ह एक संदेसिया ला पठोय रिहिस, पर ओ संदेसिया के हबरे के पहिली, एलीसा ह अगुवामन ले कहिस, “का तुमन देखत हव कि ये हतियारा ह मोर मुड़ी ला काटे बर एक झन ला पठोय हवय? देखव, जब ओ संदेसिया ह आवय, त कपाट ला बंद करके ओला रोके रहव। का ओकर मालिक के पांव के अवाज ओकर पाछू सुनई नइं देवत हे?”
2KI 6:33 जब ओह ओमन से गोठियात रिहिस, त संदेसिया ह ओकर करा आ गीस। राजा ह कहिस, “ये बिपत्ति ह यहोवा कोति ले अय। अब मेंह काबर यहोवा के अऊ बाट जोहत रहंव?”
2KI 7:1 तब एलीसा ह जबाब दीस, “यहोवा के बचन ला सुनव। यहोवा ह ये कहत हे: कल इही बेरा सामरिया के दुवार म एक सेआ मैदा एक सेकेल म अऊ दू सेआ जौ घलो एक सेकेल म बिकही।”
2KI 7:2 तब ओ अधिकारी, जेकर बाहां के सहारा राजा लेय रिहिस, परमेसर के जन ला कहिस, “देख, यदि यहोवा ह अकास के दुवार ला घलो खोल दीही, त का अइसन बात हो सकत हे?” एलीसा ह जबाब दीस, “तेंह खुद अपन आंखी ले येला देखबे, पर तेंह ओमा ले कुछू भी खाय नइं पाबे।”
2KI 7:3 ओ बेरा, सहर के प्रवेस दुवार करा चार झन मनखे रिहिन, जेमन ला कोढ़ के बेमारी रिहिस। ओमन आपस म कहन लगिन, “हमन काबर इहां बईठे-बईठे मर जावन?
2KI 7:4 यदि हमन कहिथन, ‘हमन सहर म जाबो’—त मर जाबो, काबरकि उहां अकाल परे हवय। अऊ यदि हमन इहां बईठे रहिथन, तब भी हमन मर जाबो। एकरसेति आवव, हमन अरामीमन के डेरा म जाके अपनआप ला ओमन के हांथ म दे देवन। यदि ओमन हमन ला छोंड़ दीहीं, त हमन जिंदा रहिबो, अऊ यदि ओमन हमन ला मार डारहीं, त वइसे घलो हमन ला तो मरनेच हवय।”
2KI 7:5 तब सांझ के बेरा ओमन उठिन अऊ अरामीमन के डेरा म चल दीन। जब ओमन अरामी डेरा के छोर म हबरिन, त देखिन कि उहां कोनो नइं रिहिस,
2KI 7:6 काबरकि परभू ह अइसे करिस कि अरामी सेना ला रथमन के अऊ घोड़ामन के अऊ एक भारी सेना के अवाज सुनई दीस, जेकर कारन ओमन एक-दूसर ला कहन लगिन, “देखव, इसरायल के राजा ह हमर ऊपर हमला करे बर हित्ती अऊ मिसरी राजामन ला भाड़ा म लेय हवय।”
2KI 7:7 एकरसेति ओमन उठिन अऊ सांझ के बेरा अपन तम्बू, घोड़ा अऊ गदहामन ला छोंड़के भागिन। ओमन डेरा ला जस के तस छोंड़के अपन परान बंचाय बर भाग गीन।
2KI 7:8 जब ओ कोढ़ीमन डेरा के छोर म हबरिन, त ओमन एक ठन तम्बू के भीतर गीन अऊ खाईन-पीईन। तब ओमन सोन, चांदी अऊ कपड़ामन ला ले जाके छिपा दीन। फेर ओमन लहुंटके आईन अऊ एक ठन आने तम्बू म जाके उहां ले कुछू चीजमन ला लीन अऊ ओमन ला घलो ले जाके छिपा दीन।
2KI 7:9 तब ओमन एक-दूसर ले कहिन, “जऊन कुछू हमन करत हवन, ओह सही नो हय। आज के दिन ह सुघर संदेस के दिन अय अऊ येला हमन सिरिप अपन तक रखे हवन। यदि हमन बिहनियां तक ठहिरे रहिबो, त हमन ला दंड मिलही। एकरसेति आवव, हमन तुरते राजमहल म जाके ये बात के खबर देवन।”
2KI 7:10 तब ओमन गीन अऊ सहर के दुवारपालमन ला बलाके बताईन, “हमन अरामीमन के डेरा म गेय रहेंन अऊ देखेंन कि उहां कोनो नइं ए—कोनो मनखे के अवाज घलो नइं आवत हे—सिरिप खूंटा म बंधे घोड़ा अऊ गदहामन हवंय अऊ तम्बूमन ला जस के तस छोंड़ देय गे हवय।”
2KI 7:11 तब दुवारपालमन चिचिया-चिचियाके ये खबर ला बताईन अऊ राजमहल म घलो ये समाचार हबर गीस।
2KI 7:12 तब रथियाच ही राजा ह उठिस अऊ अपन अधिकारीमन ले कहिस, “मेंह तुमन ला बतात हंव कि अरामीमन हमर संग का करे हवंय। ओमन जानत हवंय कि हमन भूखन मरत हन; एकरसेति ओमन डेरा ला छोंड़ दे हवंय अऊ ये सोचके मैदान म छिपे हवंय कि खचित हमन सहर ले निकलके आबो, तब ओमन हमन ला जिंदा पकड़के सहर म ले जाहीं।”
2KI 7:13 पर राजा के एक अधिकारी ह जबाब देवत कहिस, “जऊन घोड़ामन सहर म बांचे हवंय, ओमा ले पांच ठन घोड़ा कुछू मनखेमन लेवंय अऊ उहां जाके पता लगावंय कि का होय हवय। ओमन के दसा घलो इहां बचे जम्मो इसरायलीमन सहीं होही—हव, ओमन घलो ये जम्मो नास होवत इसरायलीमन के सहीं होहीं।”
2KI 7:14 तब ओमन दू ठन रथ ला ओमन के घोड़ामन के संग लीन, अऊ राजा ह ओमन ला अरामी सेना के पाछू पठो दीस। ओह सारथीमन ला हुकूम दीस, “जावव अऊ पता लगावव कि का होय हवय।”
2KI 7:15 तब ओमन यरदन नदी तक ओमन के पाछू-पाछू जाके देखिन कि पूरा रसता म कपड़ा अऊ हथियार बिखरे पड़े रहय, जेला अरामीमन भागत-भागत फेंक देय रिहिन। तब संदेसियामन लहुंटके आईन अऊ राजा ला ये खबर बताईन।
2KI 7:16 तब सामरिया के मनखेमन बाहिर निकलके अरामीमन के डेरा ला लूट लीन। अऊ एक सेआ मैदा ह एक सेकेल म, अऊ दू सेआ जौ घलो एक सेकेल म बिकिस, जइसे कि यहोवा ह कहे रिहिस।
2KI 7:17 राजा ह जऊन अधिकारी के बाहां ऊपर झुकके सहारा लेवय, ओ अधिकारी ला दुवार के जिम्मा देय रिहिस, पर ओह दुवार म मनखेमन के भागम-भाग म गोड़ खाल्हे कुचरे गीस अऊ मर गीस, जइसे कि परमेसर के जन पहिले ही बता देय रिहिस, जब राजा ह ओकर घर म आय रिहिस।
2KI 7:18 येह ठीक वइसनेच ही होईस, जइसे कि परमेसर के जन ह राजा ले कहे रिहिस, “कल लगभग इहीच बेरा सामरिया के दुवार म एक सेआ मैदा एक सेकेल म अऊ दू सेआ जौ घलो एक सेकेल म बिकही।”
2KI 7:19 ओ अधिकारी ह परमेसर के जन ला कहे रिहिस, “देख, यदि यहोवा ह अकास के दुवार ला घलो खोल दीही, त का अइसन बात हो सकत हे?” अऊ परमेसर के जन ह जबाब देवत कहे रिहिस, “तेंह खुद अपन आंखी ले येला देखबे, पर ओमा ले तेंह कुछू भी खाय नइं पाबे!”
2KI 7:20 अऊ ठीक वइसनेच ओकर संग होईस, काबरकि ओह दुवार म मनखेमन के भागम-भाग म गोड़ खाल्हे कुचरे गीस अऊ ओह मर गीस।
2KI 8:1 जऊन माईलोगन के बेटा ला एलीसा ह जिलाय रिहिस, ओकर ले ओह कहे रिहिस, “अपन परिवार के संग इहां ले जाके कुछू समय तक जिहां कहीं तेंह रह सकत हस, उहां रह, काबरकि यहोवा के ईछा हवय कि ये देस म अकाल पड़ही, अऊ ओ अकाल ह सात बरस तक बने रहिही।”
2KI 8:2 परमेसर के जन के कहे बचन के मुताबिक ओ माईलोगन ह करिस। ओह अपन परिवार के संग उहां ले चल दीस अऊ ओमन पलिस्तीमन के देस म जाके सात बरस तक रिहिन।
2KI 8:3 सात साल के आखिरी म, ओह पलिस्तीमन के देस ले लहुंट आईस अऊ अपन घर अऊ जमीन ला वापिस पाय बर राजा करा बिनती करे बर गीस।
2KI 8:4 ओ बेरा राजा ह परमेसर के जन के सेवक गेहजी ले गोठियावत रिहिस, अऊ ओह कहत रिहिस, “जऊन बड़े-बड़े काम एलीसा ह करे हवय, ओ जम्मो के बारे म मोला बता।”
2KI 8:5 जब गेहजी ह राजा ला बतात रिहिस कि एलीसा ह कइसे एक मुरदा ला जिलाईस, त ओहीच बेरा म, ओ माईलोगन ह जेकर बेटा ला एलीसा ह जिलाय रिहिस, राजा करा अपन घर अऊ जमीन ला वापिस करे के बिनती लेके आईस। ओला देखके गेहजी ह कहिस, “हे मोर मालिक, हे राजा, येह ओही माईलोगन अऊ येह ओकर बेटा ए, जेला एलीसा ह जिलाय रिहिस।”
2KI 8:6 राजा ह ओ माईलोगन ले येकर बारे म पुछिस, त ओह जम्मो बात ला बताईस। तब राजा ह ओ माईलोगन के मामला बर एक अधिकारी ला ठहिराके ओला कहिस, “जऊन कुछू ये माईलोगन के रिहिस, ओ जम्मो चीज येला लहुंटा दिये जावय अऊ जऊन दिन ले येह देस छोंड़के गे रिहिस, तब ले लेके आज तक येकर जमीन के जतकी आमदनी होय हवय, ओ जम्मो ला घलो येला दे दिये जावय।”
2KI 8:7 एलीसा ह दमिस्क ला गीस, अऊ अराम के राजा बेन-हदद ह बेमार रिहिस। जब राजा ला ये बताय गीस, “परमेसर के जन ह इहां आय हवय।”
2KI 8:8 त ओह हजाएल ला कहिस, “अपन संग एक भेंट लेके परमेसर के जन करा जा, अऊ ओकर जरिये यहोवा के ईछा के पता लगा; ओकर ले पुछ, ‘का मेंह ये बेमारी ले ठीक होहूं?’ ”
2KI 8:9 तब हजाएल ह अपन संग दमिस्क ले भेंट के रूप म सबले उत्तम चीजमन ला चालीस ठन ऊंट म लदवाके एलीसा ले मिले बर गीस। ओह एलीसा के आघू म ठाढ़ होके कहिस, “तोर बेटा अराम के राजा बेन-हदद ह मोला तोर ले ये पुछे बर पठोय हवय, ‘का मेंह ये बेमारी ले ठीक होहूं?’ ”
2KI 8:10 एलीसा ह जबाब दीस, “जाके ओला बता, ‘तेंह जरूर ठीक हो जाबे।’ तभो ले यहोवा ह मोर ऊपर ये परगट करे हवय कि ओह निसंदेह मर जाही।”
2KI 8:11 अऊ ओह ओकर कोति टकटकी लगाके देखते रिहिस, जब तक कि हजाएल ह परेसान नइं हो गीस। तब परमेसर के जन ह रोवन लगिस।
2KI 8:12 तब हजाएल ह पुछिस, “मोर परभू ह काबर रोवत हे?” ओह जबाब दीस, “काबरकि जऊन हानि तेंह इसरायलीमन के करबे, ओला मेंह जानत हंव। तेंह ओमन के गढ़वाले जगहमन म आगी लगा देबे; ओमन के जवानमन ला तलवार ले मार डारबे; ओमन के छोटे लइकामन ला भुइयां म पटक देबे, अऊ ओमन के गरभवती माईलोगनमन के पेट ला फार देबे।”
2KI 8:13 हजाएल ह कहिस, “तोर सेवक जऊन ह एक कुकुर सहीं अय, ओह का ए कि अइसन बड़े काम करय?” एलीसा ह जबाब दीस, “यहोवा ह मोर ऊपर ये परगट करे हवय कि तेंह अराम के राजा बन जाबे।”
2KI 8:14 तब हजाएल ह एलीसा ले बिदा होके अपन मालिक करा लहुंट आईस। जब बेन-हदद ह ओकर ले पुछिस, “एलीसा ह तोर ले का कहिस?” त हजाएल ह जबाब दीस, “ओह मोला बताईस कि तेंह जरूर ठीक हो जाबे।”
2KI 8:15 पर ओकर दूसर दिन हजाएल ह एक मोटा कपड़ा लेके पानी म भिजोईस, अऊ ओला राजा के मुहूं म अइसने ओढ़हा दीस कि राजा ह मर गीस। तब हजाएल ह ओकर जगह म राजा बनिस।
2KI 8:16 इसरायल के राजा अहाब के बेटा योराम के राज के पांचवां बछर म, जब यहूदा के राजा यहोसापात ह जिंदा रिहिस, तब यहोसापात के बेटा यहोराम ह यहूदा म राजा के रूप म राज करन लगिस।
2KI 8:17 जब ओह राजा बनिस, तब ओह बत्तीस साल के रिहिस, अऊ ओह आठ साल तक यरूसलेम म राज करिस।
2KI 8:18 ओह इसरायल के राजामन के रसता म चलिस, जइसने कि अहाब के घराना ह करे रिहिस, काबरकि ओह अहाब के एक बेटी ले बिहाव करे रिहिस। ओह यहोवा के नजर म दुस्ट काम करिस।
2KI 8:19 पर यहोवा ह अपन सेवक दाऊद के कारन यहूदा ला नास करे नइं चाहत रिहिस। ओह वायदा करे रिहिस कि ओह दाऊद अऊ ओकर संतानमन बर एक दीया हमेसा बनाय रखही।
2KI 8:20 यहोराम के समय म, एदोम ह यहूदा के बिरूध बिदरोह करिस अऊ अपन खुद के एक राजा बना लीस।
2KI 8:21 एकरसेति यहोराम ह अपन जम्मो रथमन ला लेके साईर ला चले गीस। एदोमीमन ओला अऊ ओकर रथ के सेनापतिमन ला घेर लीन, पर रथिया उठके ओह निकल गीस; पर ओकर सेना ह वापिस घर भाग गीस।
2KI 8:22 आज तक ले एदोम ह यहूदा के बिरूध बिदरोह करत रहिथे। ओही बेरा लिबना ह घलो बिदरोह कर दीस।
2KI 8:23 यहोराम के राज के आने घटनामन, अऊ ओकर जम्मो काम के बारे म यहूदा के राजामन के इतिहास के किताब म लिखे गे हवय।
2KI 8:24 यहोराम ह अपन पुरखामन के संग हमेसा बर सुत गीस अऊ ओमन के बीच दाऊद के सहर म ओला माटी देय गीस। अऊ ओकर जगह म ओकर बेटा अहजयाह ह राजा बनिस।
2KI 8:25 अहाब के बेटा इसरायल के राजा योराम के राज के बारहवां साल म, यहूदा के राजा यहोराम के बेटा अहजयाह ह राज करन लगिस।
2KI 8:26 जब अहजयाह ह राजा बनिस, तब ओह बाईस साल के रिहिस, अऊ ओह यरूसलेम म एक साल तक राज करिस। ओकर दाई के नांव अतलयाह रिहिस, जऊन ह इसरायल के राजा ओमरी के पोती रिहिस।
2KI 8:27 अहजयाह ह अहाब के घराना के रसता म चलिस अऊ यहोवा के नजर म दुस्ट काम करिस, जइसे कि अहाब के घराना ह करे रिहिस, काबरकि ओह अहाब के परिवार के दामाद रिहिस।
2KI 8:28 अहजयाह ह अहाब के बेटा योराम के संग रामोत-गिलाद सहर म अराम के राजा हजाएल के बिरूध लड़ई करे बर गीस। अरामीमन योराम ला घायल कर दीन;
2KI 8:29 एकरसेति राजा योराम ह ओ घावमन ले ठीक होय बर यिजरेल लहुंट गीस, जेमन ओला अरामीमन के दुवारा रामोत म अराम के राजा हजाएल के संग लड़ई करत बेरा लगे रिहिन। तब यहूदा के राजा यहोराम के बेटा अहजयाह ह अहाब के बेटा योराम ला देखे बर यिजरेल गीस, काबरकि योराम ह घायल हो गे रिहिस।
2KI 9:1 एक दिन एलीसा अगमजानी ह अगमजानीमन के दल के एक मनखे ला बलाईस अऊ ओला कहिस, “अपन कनिहां ला बांध ले, अऊ हांथ म जैतून तेल के ये कुप्पी लेके रामोत-गिलाद जा।
2KI 9:2 जब तेंह उहां हबरबे, त निमसी के पोता, यहोसापात के बेटा येहू के पता लगाबे अऊ ओकर करा जाबे। ओला ओकर संगवारीमन ले अलग एक ठन भीतर के कमरा म ले जाबे।
2KI 9:3 तब ये कुप्पी ला लेके येकर तेल ला ओकर मुड़ म ढार देबे अऊ ये घोसना करबे, ‘यहोवा ह ये कहत हे: मेंह, तोला इसरायल के राजा के रूप म अभिसेक करत हंव।’ तब कपाट खोलके भाग जाबे; देरी झन करबे!”
2KI 9:4 तब ओ जवान अगमजानी ह रामोत-गिलाद गीस।
2KI 9:5 जब ओह उहां हबरिस, त देखिस कि सेना के अधिकारीमन एक संग बईठे रहंय, तब ओह कहिस, “हे सेनापति, मोर करा तोर बर एक संदेस हवय।” येहू ह पुछिस, “हमन म ले काकर बर?” त ओह जबाब दीस, “हे सेनापति, तोर बर!”
2KI 9:6 तब येहू ह उठके घर के भीतर गीस। अऊ अगमजानी ह येहू के मुड़ म तेल ला ढारके ये घोसना करिस, “यहोवा, इसरायल के परमेसर ह ये कहत हे: ‘मेंह यहोवा के मनखे इसरायलीमन ऊपर राजा होय बर तोर अभिसेक करत हंव।
2KI 9:7 तोला अपन मालिक अहाब के घराना के नास करना हे, जेकर ले ईजेबेल के दुवारा बहाय गे मोर सेवक अगमजानीमन के खून अऊ यहोवा के जम्मो सेवकमन के खून के बदला ह पूरा होवय।
2KI 9:8 अहाब के पूरा घराना ह नास हो जाही। मेंह इसरायल म अहाब के घराना के छोटे-बड़े हर एक पुरूस ला मार डारहूं—चाहे ओह गुलाम होवय या सुतंतर मनखे।
2KI 9:9 मेंह अहाब के घराना ला नबात के बेटा यरोबाम के घराना सहीं अऊ अहियाह के बेटा बासा के घराना सहीं कर दूहूं।
2KI 9:10 जहां तक ईजेबेल के बात ए, यिजरेल के भुइयां म कुकुरमन ओला खा जाहीं, अऊ ओला माटी देवइया कोनो नइं होहीं।’ ” तब ओ अगमजानी ह कपाट ला खोलके भाग गीस।
2KI 9:11 जब येहू ह कमरा ले निकलके अपन संगी अधिकारीमन करा गीस, त ओमा के एक झन ह ओकर ले पुछिस, “सब ठीक-ठाक तो हवय? ओ पगला ह काबर तोर करा आय रिहिस?” येहू ह जबाब दीस, “तुमन तो ओ मनखे ला जानत हव अऊ जऊन बात ओह कहिथे, ओला भी जानथव।”
2KI 9:12 ओमन कहिन, “येह सच नो हय; हमन ला सच बता।” येहू ह कहिस, “ओह मोला ये बात बताईस: ‘यहोवा ह ये कहत हवय हे: मेंह इसरायल के राजा होय बर तोर अभिसेक करत हंव।’ ”
2KI 9:13 तब ओमन तुरते अपन ऊपर पहिरे कपड़ा ला उतारिन अऊ ओकर खाल्हे सीढ़ी म बिछा दीन। तब ओमन तुरही फूंकके चिचियाके कहिन, “येहू ह राजा ए!”
2KI 9:14 निमसी के पोता, यहोसापात के बेटा येहू ह योराम के बिरूध सडयंत्र करिस। (योराम अऊ जम्मो इसरायलीमन अराम के राजा हजाएल ले रामोत-गिलाद के रकछा करत रिहिन;
2KI 9:15 पर राजा योराम ह अपन घाव के ईलाज करवाय बर यिजरेल लहुंट गे रिहिस; अराम के राजा हजाएल ले लड़ई करत बेरा ओला अरामीमन घायल कर दे रिहिन।) तब येहू ह कहिस, “यदि तुमन मोला राजा बनाय के ईछा करत हव, त फेर कोनो ला सहर ले बाहिर झन जावन दव ताकि ये खबर यिजरेल तक झन पहुंच सकय।”
2KI 9:16 तब येहू ह अपन रथ म चढ़के यिजरेल गीस, काबरकि योराम ह उहां अराम करत रिहिस अऊ यहूदा के राजा अहजयाह ह योराम ला देखे बर उहां गे रिहिस।
2KI 9:17 जब यिजरेल के गुम्मट ऊपर खड़े पहरेदार ह येहू के सैनिक दल ला आवत देखिस, त ओह चिचियाके कहिस, “मोला एक सैनिक दल आवत दिखत हे।” योराम ह हुकूम दीस, “एक घुड़सवार ला बलाके ओमन ले भेंट करे बर भेजव ताकि ओह ओमन ले पुछय, ‘का तुमन सांति के ईछा से आवत हव?’ ”
2KI 9:18 तब एक घुड़सवार ह येहू ले भेंट करे बर गीस, अऊ ओकर ले कहिस, “राजा ह पुछत हवय, ‘का तुमन सांति के ईछा से आवत हव?’ ” येहू ह जबाब दीस, “सांति से तोर का लेना-देना हवय? मुड़के मोर पाछू हो ले।” तब पहरेदार ह कहिस, “संदेसिया ह ओमन करा हबर गे हवय, पर ओह लहुंटके नइं आवत हे।”
2KI 9:19 तब राजा ह एक-दूसर घुड़सवार ला पठोईस। जब ओह ओमन करा गीस, त ओह कहिस, “राजा ह पुछत हवय: ‘का तुमन सांति के ईछा से आवत हव?’ ” येहू ह कहिस, “सांति से तोर का लेना-देना हवय? मुड़के मोर पाछू हो ले।”
2KI 9:20 तब पहरेदार ह कहिस, “ओह ओमन करा हबर गे हवय, पर ओह घलो लहुंटके नइं आवत हे। रथ ला चलानेवाला ह निमसी के बेटा येहू के सहीं लगत हे—ओह एक पागल के सहीं रथ ला दऊड़ाथे।”
2KI 9:21 योराम ह हुकूम दीस, “जल्दी से मोर रथ ला तियार करव।” अऊ जब रथ ह तियार हो गीस, तब इसरायल के राजा योराम अऊ यहूदा के राजा अहजयाह, दूनों अपन-अपन रथ म चघके येहू ले भेंट करे बर गीन। ओमन जाके यिजरेली नाबोत के भुइयां म ओकर ले भेंट करिन।
2KI 9:22 येहू ला देखके योराम ह पुछिस, “हे येहू, का तेंह सांति के ईछा से आय हस?” येहू ह जबाब दीस, “जब तक तोर दाई ईजेबेल ह मूरती-पूजा अऊ जादू-टोना करत रहिही, तब तक सांति कहां हो सकत हे?”
2KI 9:23 तब योराम ह मुड़िस अऊ भागत-भागत अहजयाह ला चिचियाके कहिस, “हे अहजयाह, धोखा होय हवय!”
2KI 9:24 तब येहू ह अपन धनुस ला तानिस अऊ योराम के कंधा के बीच निसाना लेके तीर चलाईस। तीर ह योराम के हिरदय ला छेद दीस अऊ ओह अपन रथ म गिर गीस।
2KI 9:25 तब येहू ह अपन रथ के अधिकारी बिदकर ले कहिस, “ओला उठा अऊ यिजरेली नाबोत के खेत म ओला फटिक दे। सुरता कर कि जब तें अऊ में एक संग ओकर ददा अहाब के पाछू-पाछू रथ चलावत रहेंन, तब यहोवा ह ओकर बिरूध ये अगमबानी करे रिहिस:
2KI 9:26 ‘कल नाबोत अऊ ओकर बेटामन के जऊन खून होईस, ओला मेंह देखे हंव, अऊ यहोवा ह घोसना करत हे कि खचित मेंह भुइयां के ये जगह म तोर ले बदला लूहूं, यहोवा ह घोसना करत हे।’ त अब यहोवा के ओ बचन के मुताबिक ओला उठा अऊ ओ भुइयां के ओ जगह म फटिक दे।”
2KI 9:27 जब यहूदा के राजा अहजयाह ह ये सब ला देखिस, त ओह बेत-हग्गान नगर के रसता ले भागिस। येहू ह ये चिचियावत ओकर पीछा करिस, “ओला घलो मार डारव!” त ओमन ओला ओकर रथ म यिबलाम के लकठा म गूर के चढ़ईवाले रसता म घायल कर दीन, पर ओह बचके मगिद्दो तक निकल गीस अऊ उहां मर गीस।
2KI 9:28 तब अहजयाह के सेवकमन रथ म ही ओला यरूसलेम ले गीन अऊ दाऊद के नगर म ओकर पुरखामन के संग ओला ओकर कबर म माटी दीन।
2KI 9:29 (अहाब के बेटा योराम के राज के गियारहवां साल म अहजयाह ह यहूदा के राजा बने रिहिस।)
2KI 9:30 तब येहू ह यिजरेल म आईस। जब ईजेबेल येकर बारे म सुनिस, त अपन आंखी म काजर आंजिस, अपन बाल बनाईस अऊ खिड़की म ले देखन लगिस।
2KI 9:31 जब येहू ह दुवार के भीतर आईस, त ईजेबेल ह पुछिस, “हे अपन मालिक के घात करइया जिमरी, का तें सांति के ईछा से आय हस?”
2KI 9:32 तब ओह ऊपर खिड़की कोति देखिस अऊ पुछिस, “मोर कोति कोन हवय? कोन?” दू या तीन खोजामन खाल्हे ओकर कोति देखिन।
2KI 9:33 तब येहू ह कहिस, “ओला उहां ले फेंक दव!” तब ओमन ओला उहां ले खाल्हे फेंक दीन, अऊ ओकर लहू के कुछू छींटा ह दीवार अऊ घोड़ामन ऊपर पड़िस जब ओमन ओला गोड़ खाल्हे कुचर डारिन।
2KI 9:34 तब येहू ह महल भीतर जाके खाईस अऊ पीईस अऊ कहिस, “जावव, ओ सरापित माईलोगन ला देखव, अऊ ओला माटी दे दव, काबरकि ओह एक राजा के बेटी रिहिस।”
2KI 9:35 पर जब मनखेमन ओला माटी दे बर बाहिर निकलिन, त ओमन ला ओकर खोपड़ी, ओकर पांव अऊ ओकर हांथमन के छोंड़ अऊ कुछू नइं मिलिस।
2KI 9:36 ओमन वापिस जाके येहू ला ये बात बताईन, त येहू ह कहिस, “येह यहोवा के ओ बचन अय, जेला ओह अपन सेवक तिसबी एलियाह के जरिये कहे रिहिस: ईजेबेल के मांस ला यिजरेल के भुइयां म कुकुरमन खाहीं।
2KI 9:37 ईजेबेल के लास ह यिजरेल के भुइयां म गोबर के सहीं होही, ताकि कोनो नइं कह सकहीं, ‘येह ईजेबेल अय।’ ”
2KI 10:1 अहाब के सत्तर बेटा सामरिया सहर म रिहिन। एकरसेति येहू ह सामरिया म यिजरेल के करमचारीमन ला, अगुवामन ला अऊ अहाब के लइकामन के संरछकमन ला चिट्ठी लिखके पठोईस। ओह चिट्ठी म ये लिखिस,
2KI 10:2 “तुम्हर मालिक के बेटामन तुम्हर करा हवंय अऊ तुम्हर करा रथ अऊ घोड़ा, एक गढ़वाला सहर अऊ हथियारमन घलो हवंय। त जतेक जल्दी तुमन ला ये चिट्ठी मिलथे,
2KI 10:3 ओतेक जल्दी अपन मालिक के बेटामन ले सबले बने अऊ योग्य बेटा ला चुनव अऊ ओला अपन ददा के सिंघासन म बईठावव। अऊ तब अपन मालिक के खानदान बर लड़व।”
2KI 10:4 पर ओमन बहुंत डर गीन अऊ कहन लगिन, “जब दू झन राजामन ओकर आघू म टिक नइं सकिन, त हमन कइसे टिक सकबो?”
2KI 10:5 एकरसेति महल के अधिकारी, सहर के राजपाल, अगुवा अऊ संरछकमन येहू करा ये संदेस पठोईन: “हमन तोर सेवक अन अऊ तेंह जऊन कुछू घलो कहिबे, हमन ओला करबो। हमन कोनो ला राजा नइं बनावन; तोला जऊन बात सबले बने लगथे, वइसने कर।”
2KI 10:6 तब येहू ह ये लिखके दूसरा चिट्ठी ओमन करा पठोईस, “यदि तुमन मोर तरफ हव अऊ मोर बात ला मानथव, त अपन मालिक के बेटामन के मुड़ ला काटके कल इही बेरा तक मोर करा यिजरेल ले आवव।” राजा के सत्तर राजकुमार रिहिन, जऊन मन सहर के जाने-माने मनखेमन के अधीन पलत-बढ़त रिहिन।
2KI 10:7 जब ओमन ला चिट्ठी मिलिस, त ओमन ओ जम्मो सत्तर राजकुमारमन ला लेके ओमन ला मार डारिन, अऊ ओमन के मुड़ ला टोकरीमन म रखके यिजरेल म येहू करा पठो दीन।
2KI 10:8 जब संदेसिया ह हबरिस, त ओह येहू ला कहिस, “ओमन राजकुमारमन के मुड़ ला लाने हवंय।” तब येहू ह हुकूम दीस, “ये मुड़मन ला दू ठन ढेरी म सहर के दुवार करा बिहान होवत तक रखव।”
2KI 10:9 बिहनियां येहू बाहिर गीस। ओह जम्मो मनखेमन के आघू म ठाढ़ होके कहिस, “तुमन निरदोस अव। मेंह अपन मालिक के बिरूध सडयंत्र रचेंव अऊ ओला मार डारेंव, पर ये जम्मो झन ला कोन मार डारिस?
2KI 10:10 तब ये बात ला जान लव कि यहोवा के दुवारा अहाब के खानदान के बिरूध कहे गय कोनो भी बात बेकार नइं होवय। यहोवा ह ओ बात ला पूरा करे हवय, जेला ओह अपन सेवक एलियाह के दुवारा कहे रिहिस।”
2KI 10:11 तब येहू ह यिजरेल म अहाब के खानदान के बांचे जम्मो झन ला मार डारिस, संग म ओह अहाब के जम्मो मुखिया मनखे, ओकर करीबी संगी अऊ ओकर पुरोहितमन ला घलो मार डारिस; अहाब के कोनो मनखे नइं बचिन।
2KI 10:12 तब येहू ह निकलके सामरिया कोति गीस। रसता म चरवाहामन के बेत-एकेद नांव के जगह म,
2KI 10:13 ओकर मुलाकात यहूदा के राजा अहजयाह के कुछू रिस्तेदारमन ले होईस, त ओह ओमन ले पुछिस, “तुमन कोन अव?” ओमन कहिन, “हमन अहजयाह के रिस्तेदार अन, अऊ हमन राजा अऊ राज-माता के परिवार के हालचाल पुछे बर आय हवन।”
2KI 10:14 येहू ह हुकूम दीस, “येमन ला जीयत पकड़ लव!” त मनखेमन ओमन ला जीयत पकड़ लीन अऊ बेत-एकेद के कुआं करा ओमन ला मार डारिन—ओमन बियालीस झन रिहिन। ओह कोनो ला जीयत नइं छोंड़िस।
2KI 10:15 तब ओह उहां ले चल दीस, अऊ रसता म ओकर मुलाकात रेकाब के बेटा यहोनादाब ले होईस, जऊन ह ओकर ले भेंट करे बर आवत रिहिस। येहू ह ओला जोहार करिस अऊ कहिस, “का तेंह मोर संग हस, जइसे कि मेंह तोर संग हवंव?” यहोनादाब ह जबाब दीस, “हव, तोर संग हवंव।” तब येहू ह कहिस, “अगर अइसने बात ए, त अपन हांथ मोला दे।” ओह अपन हांथ बढ़ाईस, अऊ येहू ह ओकर मदद करके अपन रथ म चघा लीस।
2KI 10:16 येहू ह कहिस, “मोर संग आ अऊ यहोवा बर मोर उत्साह ला देख।” तब ओह यहोनादाब ला अपन संग रथ म ले गीस।
2KI 10:17 जब येहू ह सामरिया म आईस, त ओह अहाब के परिवार के उहां बचे जम्मो मनखे ला मार डारिस; ओह ओमन के नास कर दीस, अऊ येह यहोवा के कहे ओ बचन के मुताबिक होईस, जेला ओह एलियाह ला कहे रिहिस।
2KI 10:18 तब येहू ह जम्मो मनखेमन ला इकट्ठा करिस अऊ ओमन ला कहिस, “अहाब ह तो बाल देवता के थोरकन सेवा करिस; पर येहू ह ओकर ले बढ़के सेवा करही।
2KI 10:19 अब बाल के जम्मो अगमजानी, ओकर जम्मो सेवक अऊ ओकर जम्मो पुरोहितमन ला बलावव। ये बात के धियान रखव कि कोनो झन छूटय, काबरकि मेंह बाल बर एक बड़े बलिदान चघानेवाला हंव। जऊन ह नइं आही, ओह जीयत नइं बचही।” असल म येहू ह छल करके एक चाल चलत रिहिस, ताकि ओह बाल के सेवकमन ला नास कर देवय।
2KI 10:20 येहू ह कहिस, “बाल के आदर म एक सभा के आयोजन करव।” अऊ मनखेमन येकर घोसना करिन।
2KI 10:21 तब ओह पूरा इसरायल म खबर पठोईस, अऊ बाल के जम्मो सेवकमन आईन; एको झन भी अपन घर म नइं रूकिन। ओमन बाल के मंदिर भीतर गीन अऊ उहां अतेक भीड़ होईस कि एक किनारा ले लेके दूसर किनारा तक पूरा जगह भर गीस।
2KI 10:22 अऊ येहू ह कपड़ा रखे के कमरा के अधिकारी ला हुकूम दीस, “बाल के जम्मो सेवकमन बर कपड़ा लेके आ।” तब ओह ओमन बर कपड़ा ले आईस।
2KI 10:23 तब येहू अऊ रेकाब के बेटा यहोनादाब बाल के मंदिर के भीतर गीन। येहू ह बाल के सेवकमन ला कहिस, “चारों कोति खोजबीन करके देखव कि तुम्हर संग इहां यहोवा के कोनो सेवक नइं, पर सिरिप बाल के सेवकमन हवंय।”
2KI 10:24 तब ओमन बलिदान अऊ होम-बलिदान चघाय बर भीतर गीन। येहू ह बाहिर अस्सी मनखे ला ये चेतउनी देके ठाढ़ करे रिहिस, “यदि तुमन म ले कोनो ये मनखेमन ले कोनो ला बचके जावन दूहू, जेमन ला मेंह तुम्हर हांथ म सऊंपत हंव, त फेर ओकर परान के बदले तुम्हर परान ले लिये जाही।”
2KI 10:25 जइसे ही येहू ह होम-बलिदान चघाय के काम ला पूरा करिस, त ओह पहरेदार अऊ अधिकारीमन ला हुकूम दीस: “भीतर जावव अऊ ओमन ला मार डारव; एको झन भी बचके झन निकलय।” तब पहरेदार अऊ अधिकारीमन ओमन ला तलवार ले मार डारिन अऊ ओमन के लास ला बाहिर फटिक दीन अऊ तब ओमन बाल के मंदिर के भीतर के कमरा म गीन।
2KI 10:26 ओमन बाल के मंदिर ले पबितर पथरा ला बाहिर निकालिन अऊ ओला जला दीन।
2KI 10:27 ओमन बाल के पबितर पथरा ला नास कर दीन अऊ बाल के मंदिर ला गिरा दीन, अऊ मनखेमन ओला बाहिर फिरे के जगह के रूप म आज तक उपयोग करत हवंय।
2KI 10:28 ये किसम ले येहू ह इसरायल म बाल उपासना ला खतम कर दीस।
2KI 10:29 तभो ले, ओह नबात के बेटा यरोबाम के ओ पापमन ले नइं हटिस, जेला ओह इसरायल ले करवाय रिहिस—याने कि बेतेल अऊ दान म सोन के बछवामन के अराधना करई।
2KI 10:30 यहोवा ह येहू ला कहिस, “काबरकि तेंह ओ काम ला बने करके पूरा करे हस, जऊन ह मोर नजर म सही अय अऊ जऊन कुछू मेंह अपन मन म अहाब के घराना के संग करे के सोचे रहंय, ओला घलो तेंह करे हस, एकरसेति तोर संतानमन इसरायल के सिंघासन म चौथा पीढ़ी तक बईठत रहिहीं।”
2KI 10:31 तभो ले, येहू ह अपन पूरा मन ले यहोवा, इसरायल के परमेसर के कानून ऊपर चले म सावधानी नइं बरतिस। ओह यरोबाम के पापमन ले नइं हटिस, जेला ओह इसरायल ले करवाय रिहिस।
2KI 10:32 ओ दिनमन म, यहोवा ह इसरायल के इलाका ला घटाय लगिस। हजाएल ह इसरायलीमन ऊपर ओमन के पूरा इलाका म अधिकार कर लीस:
2KI 10:33 यरदन नदी के पूरब कोति गिलाद के पूरा देस (गाद, रूबेन अऊ मनस्से के इलाका), अरनोन के घाटी के लकठा म अरोएर नगर ले लेके गिलाद अऊ बासान के इलाका तक।
2KI 10:34 येहू के राज के आने घटनामन, ओकर करे गे जम्मो काम, अऊ ओकर जम्मो उपलब्धी इसरायल के राजामन के इतिहास के किताब म लिखे गे हवय।
2KI 10:35 येहू ह अपन पुरखामन के संग हमेसा बर सुत गीस अऊ ओला सामरिया म माटी दिये गीस। अऊ ओकर बेटा यहोआहाज ओकर जगह म राजा बनिस।
2KI 10:36 येहू ह सामरिया म इसरायल ऊपर अठाईस साल तक राज करिस।
2KI 11:1 जब अहजयाह के दाई अतलयाह ह देखिस कि ओकर बेटा ह मर गे हवय, त ओह जम्मो राज-घराना ला नास करे बर सुरू कर दीस।
2KI 11:2 पर राजा यहोराम के बेटी अऊ अहजयाह के बहिनी यहोसेबा ह अहजयाह के बेटा योआस ला धरिस अऊ ओला ओ साही राजकुमारमन के बीच ले निकालके ले गीस, जेमन मार डारे जवइया रिहिन अऊ ओह ओला अऊ ओकर धाई ला अतलयाह के नजर ले दूर एक ठन सोये के कमरा म रख दीस, ताकि ओह झन मार डारे जावय।
2KI 11:3 योआस ह अपन धाई के संग यहोवा के मंदिर म छै साल तक लुकाय रिहिस, जब तक कि अतलयाह ह ओ देस म राज करते रिहिस।
2KI 11:4 सातवां साल म यहोयादा ह कारी जाति के सौ-सौ सैनिकमन ऊपर ठहिराय गे सेनापति अऊ पहरेदारमन ला बुलवाईस अऊ ओमन ला अपन संग यहोवा के मंदिर म ले आईस। ओह ओमन के संग एक करार करिस अऊ यहोवा के मंदिर म ओमन ला सपथ खवाईस। तब ओह ओमन ला राजा के बेटा ला देखाईस।
2KI 11:5 ओह ये कहिके ओमन ला हुकूम दीस, “तुमन ला ये काम करना हे: तुमन तीन दल म हवव अऊ तुमन, जऊन मन बिसराम दिन म काम म जावत हव—तुमन के एक तिहाई राजमहल के पहरेदारी करहीं,
2KI 11:6 एक तिहाई सूर नांव के दुवार करा, अऊ एक तिहाई ओ पहरेदार के पाछू दुवार करा रहंय, जऊन मन आरी-पारी ले मंदिर के पहरेदारी करथें—
2KI 11:7 अऊ तुमन के आने दू ठन दल म जऊन मन हवंय, ओमन सधारन रूप म बिसराम दिन कोनो काम नइं करंय, पर ओ जम्मो झन ला राजा बर मंदिर के पहरेदारी करना हे।
2KI 11:8 तुमन म ले हर एक जन अपन हांथ म हथियार धरके राजा के चारों कोति रहव। जऊन कोनो तुम्हर सीमना म आवय, ओह मार डारे जावय। राजा ह जिहां भी जाथे, ओकर संगे-संग रहव।”
2KI 11:9 एक सौ समूह के सेनापतिमन वइसे ही करिन, जइसे यहोयादा पुरोहित ह हुकूम दीस। हर एक जन अपन-अपन आदमीमन ला लीन—ओमन जऊन मन बिसराम दिन काम करे बर जानेवाला रिहिन अऊ ओमन जऊन मन काम करके आवत रिहिन—ओमन यहोयादा पुरोहित करा आईन।
2KI 11:10 तब पुरोहित ह सेनापतिमन ला बरछी अऊ ढालमन ला दीस, जेमन राजा दाऊद के रिहिन अऊ यहोवा के मंदिर म रखे गे रिहिन।
2KI 11:11 पहरेदारमन अपन हांथ म हथियार लेके मंदिर के दक्खिन दिग ले उत्तर दिग तक, बेदी अऊ मंदिर के लकठा म, राजा के चारों कोति ठाढ़ हो गीन।
2KI 11:12 यहोयादा ह राजा के बेटा ला बाहिर लानिस अऊ ओला मुकुट पहिरा दीस; ओह ओला करार के एक नकल भेंट करके ओला राजा घोसित करिस। ओमन ओकर अभिसेक करिन, अऊ मनखेमन ताली बजाईन अऊ चिचियाके कहिन, “राजा ह चिरंजीव रहय!”
2KI 11:13 जब अतलयाह ह पहरेदार अऊ मनखेमन के हल्ला ला सुनिस, त ओह यहोवा के मंदिर म मनखेमन करा गीस।
2KI 11:14 ओह देखिस कि राजा ह उहां रीति के मुताबिक खंभा करा खड़े रिहिस। अधिकारी अऊ तुरही बजइयामन राजा के बाजू म खड़े रहंय, अऊ देस के जम्मो मनखेमन आनंद मनात तुरही फूंकत रहंय। तब अतलयाह ह अपन कपड़ा ला चीरिस अऊ चिचियाके कहिस, “देस-द्रोह! देस-द्रोह!”
2KI 11:15 तब यहोयादा पुरोहित ह ओ सौ-सौ सैनिक के दल के सेनापतिमन ला हुकूम दीस, जऊन मन सेना के अधिकारी रिहिन, “ओला कतार के बीच म ले बाहिर लानव अऊ जऊन कोनो भी ओकर पाछू चलथे, ओला तलवार ले मार डारव।” काबरकि पुरोहित ह कहे रिहिस, “यहोवा के मंदिर म ओकर हतिया झन करे जावय।”
2KI 11:16 एकरसेति ओमन ओला ओ जगह म पकड़ लीन, जिहां ले घोड़ामन महल के मैदान के भीतर जाथें, अऊ उहां ओला मार डारिन।
2KI 11:17 तब यहोयादा ह यहोवा अऊ राजा अऊ मनखेमन के बीच करार करवाईस कि ओमन यहोवा के मनखे होहीं। ओह राजा अऊ मनखेमन के बीच म घलो करार करवाईस।
2KI 11:18 देस के जम्मो मनखेमन बाल के मंदिर म गीन अऊ ओला टोर-फोरके गिरा दीन। ओमन बेदी अऊ मूरतीमन ला कुटा-कुटा कर दीन अऊ बाल के पुरोहित मतान ला बेदी के आघू म मार डारिन। तब यहोयादा पुरोहित ह यहोवा के मंदिर म पहरेदारमन ला नियुक्त करिस।
2KI 11:19 ओकर बाद ओह सौ-सौ सैनिक के ऊपर ठहिराय सेनापति, कारी, पहरेदार अऊ देस के जम्मो मनखेमन ला अपन संग लीस, अऊ ओमन एक संग राजा ला यहोवा के मंदिर ले खाल्हे लानिन अऊ पहरेदारमन के दुवार के रसता ले होवत महल के भीतर गीन। तब राजा योआस ह राज सिंघासन म बिराजिस।
2KI 11:20 देस के जम्मो मनखेमन आनंद मनाईन, अऊ सहर म सांति रिहिस, काबरकि अतलयाह ह महल मेर तलवार ले मार डारे गे रिहिस।
2KI 11:21 योआस ह सात साल के रिहिस, जब ओह राज करे के सुरू करिस।
2KI 12:1 येहू के राज के सातवां साल म, योआस ह राजा बनिस, अऊ ओह यरूसलेम म चालीस साल तक राज करिस। ओकर दाई के नांव सिबयाह रिहिस अऊ ओह बेरसेबा के रिहिस।
2KI 12:2 पूरा समय म यहोयादा पुरोहित ह योआस ला निरदेस दीस अऊ योआस ह ओहीच काम करिस, जऊन ह यहोवा के नजर म सही अय।
2KI 12:3 तभो ले, पूजा के ऊंचहा जगहमन हटाय नइं गीन; मनखेमन तब भी उहां बलिदान चघात अऊ धूप जलात रिहिन।
2KI 12:4 योआस ह पुरोहितमन ला कहिस, “यहोवा के मंदिर म जऊन पईसा पबितर दान के रूप म चघाय जाथे, ओ जम्मो ला जमा कर लव—येमा जन संखिया के गनती के समय जमा करे गे पईसा, मनखेमन के खुद के सपथ ले मिले पईसा अऊ मनखेमन के दुवारा खुद के ईछा से मंदिर म लाय पईसा रिहिस।
2KI 12:5 हर पुरोहित ला कोनो एक ही खजांची ले पईसा मिलय, तब येकर उपयोग मंदिर म होय टूट-फूट के मरम्मत के काम म करे जावय।”
2KI 12:6 पर राजा योआस के राज के तेईसवां साल तक पुरोहितमन मंदिर के मरम्मत के काम ला नइं करे रिहिन।
2KI 12:7 एकरसेति राजा योआस ह यहोयादा पुरोहित अऊ आने पुरोहितमन ला बलाईस अऊ ओमन ले पुछिस, “तुमन मंदिर के टूट-फूट के मरम्मत काबर नइं करत हव? अब अपन खजांचीमन ले पईसा झन लेवव, पर येला मंदिर के मरम्मत के काम बर दे दव।”
2KI 12:8 पुरोहितमन ये बात ऊपर सहमत हो गीन कि ओमन मनखेमन ले अऊ पईसा जमा नइं करहीं अऊ ओमन मंदिर के मरम्मत खुद नइं करहीं।
2KI 12:9 यहोयादा पुरोहित ह एक सन्दूक लीस अऊ ओकर ढकना म एक ठन छेद करिस अऊ ओह ओ सन्दूक ला यहोवा के मंदिर म अवइया मनखेमन के जेवनी कोति, बेदी के बाजू म रख दीस। जऊन पुरोहितमन दुवार के पहरेदारी करंय, ओमन यहोवा के मंदिर म लाने गय जम्मो पईसा ला ओ सन्दूक म रख देंय।
2KI 12:10 जब भी ओमन देखंय कि सन्दूक म बहुंत पईसा हो गे हवय, त साही सचिव अऊ महा पुरोहित आके ओ पईसा ला गनंय, जेला यहोवा के मंदिर म लाय के बाद थैलीमन म रखे गे रहय।
2KI 12:11 पईसा ला गने के बाद, ओमन ओ पईसा ला ओ मनखेमन ला दे देवंय, जऊन मन मंदिर के मरम्मत के काम के देखरेख करे बर ठहिराय गे रिहिन। ये पईसा ले ओमन ओ मनखेमन ला बनी देवंय, जऊन मन यहोवा के मंदिर म काम करंय—याने कि बढ़ई अऊ भवन-निरमान करइया,
2KI 12:12 राज-मिसतिरी अऊ पथरा काटनेवालामन ला। ये पईसा ले ओमन यहोवा के मंदिर के मरम्मत बर इमारती लकड़ी अऊ गढ़े पथरामन ला बिसावंय, अऊ मंदिर के मरम्मत म होवइया आने जम्मो खरचा म ओ पईसा ला लगावंय।
2KI 12:13 जऊन पईसा मंदिर म आवत रिहिस, ओकर उपयोग चांदी के तसला, दीया के बत्ती संवारे, छिड़काव के कटोरा, तुरही या यहोवा के मंदिर बर सोन या चांदी कोनो आने चीज बनाय म नइं होवत रिहिस;
2KI 12:14 पर येला काम करइयामन ला दिये जावत रिहिस, जऊन मन येकर उपयोग मंदिर के मरम्मत म करंय।
2KI 12:15 जेमन ला ये पईसा काम करइयामन ला देय बर दिये जावत रिहिस, ओमन ले कोनो हिसाब-किताब नइं मांगे जावय, काबरकि ओमन पूरा ईमानदारी से काम करत रिहिन।
2KI 12:16 दोस-बलिदान अऊ पाप-बलिदान बर दिये गय पईसा ला यहोवा के मंदिर म नइं लाय जावत रिहिस; येह पुरोहितमन बर रिहिस।
2KI 12:17 इही बेरा अराम के राजा हजाएल ह गीस अऊ गत नगर ऊपर हमला करके ओला अपन अधिकार म कर लीस। तब ओह यरूसलेम ऊपर हमला करे बर मुड़िस।
2KI 12:18 पर यहूदा के राजा योआस ह ओ जम्मो पबितर चीजमन ला लीस, जेला ओकर पहिले के यहूदा के राजा—यहोसापात, यहोराम अऊ अहजयाह समरपित करे रिहिन अऊ ओकर खुद के दुवारा समरपित करे गे भेंट अऊ ओ पूरा सोन, जऊन ह यहोवा के खजाना अऊ राजमहल म रिहिस, ओमन ला घलो लीस अऊ ओ जम्मो चीज ला अराम के राजा हजाएल करा पठो दीस। तब हजाएल ह अपन सेना के संग यरूसलेम ले वापिस चल दीस।
2KI 12:19 योआस के सासन के आने घटनामन अऊ ओकर जम्मो काम यहूदा के राजामन के इतिहास के किताब म लिखे गे हवय।
2KI 12:20 ओकर करमचारीमन ओकर बिरूध सडयंत्र करिन अऊ सिल्ला के खाल्हे के रसता म, बेत-मिलो करा ओकर हतिया कर दीन।
2KI 12:21 जऊन करमचारीमन ओकर हतिया करिन, ओमन सिमात के बेटा योजाबाद अऊ सोमेर के बेटा यहोजाबाद रिहिन। योआस के मिरतू हो गीस अऊ ओला ओकर पुरखामन के संग दाऊद के सहर म माटी दिये गीस। अऊ ओकर बेटा अमसयाह ह ओकर जगह म राजा बनिस।
2KI 13:1 अहजयाह के बेटा यहूदा के राजा योआस के सासन के तेईसवां साल म येहू के बेटा यहोआहाज ह सामरिया म इसरायल के राजा बनिस, अऊ सतरह साल तक राज करिस।
2KI 13:2 ओह यहोवा के नजर म दुस्ट काम करिस, याने कि ओह ओ पाप के पाछू चलिस, जेला नबात के बेटा यरोबाम ह इसरायल ले करवाय रिहिस, अऊ ओह ओ पापमन ला नइं छोंड़िस।
2KI 13:3 एकरसेति यहोवा के कोरोध इसरायल ऊपर भड़किस, अऊ बहुंत समय तक ओह इसरायलीमन ला अराम के राजा हजाएल अऊ ओकर बेटा बेन-हदद के अधीन म रखिस।
2KI 13:4 तब यहोआहाज ह यहोवा ले बिनती करिस, अऊ यहोवा ह ओकर बात ला सुनिस, काबरकि अराम के राजा के दुवारा जऊन भयंकर अतियाचार इसरायलीमन के ऊपर होवत रिहिस, ओला यहोवा ह देखिस।
2KI 13:5 यहोवा ह इसरायल बर एक छुटकारा देवइया दीस, अऊ ओमन अराम के अधीन ले मुक्त हो गीन, अऊ इसरायलीमन पहिले के सहीं अपन खुद के घर म रहे लगिन।
2KI 13:6 पर ओमन यरोबाम के घराना के ओ पापमन ले नइं हटिन, जेला ओह इसरायल ले करवाय रिहिस; ओमन ओ पापमन ला करते रिहिन, अऊ सामरिया म असेरा देवी के खंभा घलो खड़े रिहिस, गिराय नइं गीस।
2KI 13:7 यहोआहाज के सेना म सिरिप पचास घुड़सवार, दस ठन रथ अऊ दस हजार पैदल सैनिकमन ला छोंड़के अऊ कुछू नइं बचिस, काबरकि अराम के राजा ह बाकि मन ला नास कर दीस अऊ ओमन ला अनाज रऊंदत बेरा के धुर्रा सहीं कर दीस।
2KI 13:8 यहोआहाज के सासन के आने घटना, ओकर जम्मो काम अऊ ओकर उपलब्धी इसरायल के राजामन के इतिहास के किताब म लिखे गे हवय।
2KI 13:9 आखिर म यहोआहाज ह हमेसा बर अपन पुरखामन के संग सुत गीस अऊ ओला सामरिया म माटी दिये गीस। अऊ ओकर जगह म ओकर बेटा यहोआस राजा बनिस।
2KI 13:10 यहूदा के राजा योआस के राज के सैंतीसवां साल म यहोआहाज के बेटा यहोआस ह सामरिया म इसरायल के राजा बनिस, अऊ ओह सोलह साल तक राज करिस।
2KI 13:11 ओह यहोवा के नजर म दुस्ट काम करिस अऊ ओह नबात के बेटा यरोबाम के कोनो पाप ले नइं हटिस, जेला ओह इसरायल ले करवाय रिहिस; यहोआस ह ओ पापमन ला करते रिहिस।
2KI 13:12 यहोआस के सासन के आने घटना, ओकर जम्मो काम, ओकर उपलब्धी अऊ यहूदा के राजा अमसयाह के संग ओकर लड़ई—ये जम्मो बात इसरायल के राजामन के इतिहास के किताब म लिखे गे हवय।
2KI 13:13 यहोआस अपन पुरखामन के संग हमेसा बर सुत गीस, अऊ यरोबाम ह ओकर जगह सिंघासन म बईठिस। यहोआस ला सामरिया म इसरायल के राजामन के संग माटी दिये गीस।
2KI 13:14 एलीसा ह बेमार पड़े रिहिस अऊ ओ बेमारी ले मरनेवाला रिहिस। इसरायल के राजा यहोआस ह ओला देखे बर गीस अऊ ओकर बर रोवत-रोवत कहिस, “हे मोर ददा! हे मोर ददा! हे इसरायल के रथ अऊ घुड़सवारमन!”
2KI 13:15 एलीसा ह कहिस, “एक ठन धनुस अऊ कुछू तीर ले,” अऊ ओह वइसने करिस।
2KI 13:16 तब एलीसा ह इसरायल के राजा ला कहिस, “धनुस ला अपन हांथ म ले।” जब राजा ह धनुस ला अपन हांथ म ले लीस, त एलीसा ह अपन हांथ ला राजा के हांथ म रख दीस।
2KI 13:17 तब ओह कहिस, “पूरब कोति के खिड़की ला खोल दे,” अऊ ओह खिड़की ला खोल दीस। एलीसा ह कहिस, “तीर चला!” अऊ ओह तीर चलाईस। एलीसा ह घोसना करिस, “यहोवा के बिजय के तीर, अराम के ऊपर बिजय के तीर! तेंह अपेक सहर म अरामीमन ला पूरा नास कर देबे।”
2KI 13:18 फेर ओह कहिस, “तीरमन ला ले,” अऊ राजा ह तीरमन ला ले लीस। एलीसा ह राजा ला कहिस, “भुइयां म तीर चला।” अऊ ओह भुइयां म तीन बार तीर चलाईस अऊ फेर रूक गीस।
2KI 13:19 परमेसर के जन ह ओकर ऊपर गुस्सा होके कहिस, “तोला भुइयां म पांच या छै बार तीर चलाना रिहिस; तब तेंह अराम ला हराय रहितय अऊ ओला पूरा नास कर दे रहितय। पर अब तेंह ओला सिरिप तीन बार हराबे।”
2KI 13:20 तब एलीसा मर गीस अऊ ओला माटी दिये गीस। मोआबी हमला करइयामन हर साल बसन्त के समय देस म आवंय।
2KI 13:21 एक बार कुछू इसरायलीमन एक मनखे ला माटी देवत रिहिन, अचानक ओमन हमला करइयामन के एक दल ला देखिन; त ओमन ओ मनखे के लास ला एलीसा के कबर म फटिक दीन। जब लास ह एलीसा के हाड़ामन ले छुईस, त ओ लास ह जी उठिस अऊ ओ मनखे ह अपन गोड़ म ठाढ़ हो गीस।
2KI 13:22 यहोआहाज के पूरा सासनकाल म अराम के राजा हजाएल ह इसरायल ला सताते ही रिहिस।
2KI 13:23 पर यहोवा ह ओमन ऊपर अनुग्रह करिस अऊ करूना करके ओमन ऊपर दया देखाईस, काबरकि ओह अब्राहम, इसहाक अऊ याकूब के संग करार करे रिहिस, अऊ आज तक ओह ओमन ला नास करे के या ओमन ला अपन आघू ले दूरिहा हटाय के ईछा नइं करय।
2KI 13:24 अराम के राजा हजाएल मर गीस, अऊ ओकर बेटा बेन-हदद ओकर जगह म राजा बनिस।
2KI 13:25 तब यहोआहाज के बेटा यहोआस ह हजाएल के बेटा बेन-हदद ले ओ नगरमन ला अपन अधिकार म फेर ले लीस, जेमन ला बेन-हदद ह लड़ई म यहोआस के ददा यहोआहाज ले छीन ले रिहिस। तीन बार ले यहोआस ह ओला हराईस, अऊ ये किसम ले ओह इसरायलीमन के नगर ला वापिस ले लीस।
2KI 14:1 इसरायल के राजा यहोआहाज के बेटा यहोआस के सासन के दूसरा साल म, यहूदा के राजा योआस के बेटा अमसयाह ह राज करे के सुरू करिस।
2KI 14:2 जब ओह राजा बनिस, त ओह पच्चीस साल के रिहिस, अऊ ओह यरूसलेम म उनतीस साल तक राज करिस। ओकर दाई के नांव यहोअद्दीन रिहिस; जऊन ह यरूसलेम के रिहिस।
2KI 14:3 ओह ओही काम करिस, जऊन ह यहोवा के नजर म सही रिहिस, पर जइसे ओकर पुरखा दाऊद करे रिहिस, वइसे नइं करिस। ओह हर काम अपन ददा योआस के सहीं करिस।
2KI 14:4 पर पूजा के ऊंचहा जगहमन हटाय नइं गीन; मनखेमन तब भी उहां बलिदान चघात अऊ धूप जलात रिहिन।
2KI 14:5 ओकर हांथ म राज ह मजबूत होय के बाद, ओह ओ करमचारीमन ला मार डारिस, जऊन मन ओकर ददा राजा ला मार डारे रिहिन।
2KI 14:6 पर ओह ओ हतियारामन के लइकामन ला नइं मरवाईस; येह मूसा के कानून के किताब म लिखे बात के मुताबिक रिहिस, जिहां यहोवा ह हुकूम दे हवय: “दाई-ददा ला ओमन के लइकामन के कारन मिरतू-दंड झन मिलय, अऊ न ही लइकामन ओमन के दाई-ददा के कारन मार डारे जावंय; हर एक ह अपन खुद के पाप के कारन मरही।”
2KI 14:7 अमसयाह ह नून के घाटी म दस हजार एदोमीमन ला हराईस अऊ लड़ई करके सेला नगर ऊपर अपन अधिकार कर लीस अऊ ओकर नांव योकतेल रखिस, जऊन ह आज तक चलत हे।
2KI 14:8 तब अमसयाह ह इसरायल के राजा यहोआस करा संदेसियामन ला पठोईस, जऊन ह यहोआहाज के बेटा अऊ येहू के पोता रिहिस, अऊ ओला ये चुनौती दीस, “आ, हमन लड़ई म एक-दूसर के सामना करन।”
2KI 14:9 पर इसरायल के राजा यहोआस ह यहूदा के राजा अमसयाह ला जबाब भेजिस, “लबानोन के एक कंटिली झाड़ी ह लबानोन के एक देवदार रूख मेर ये संदेस भेजिस, ‘अपन बेटी के बिहाव मोर बेटा के संग कर दे।’ तब लबानोन म एक जंगली पसु आईस अऊ ओ कंटिली झाड़ी ला गोड़ खाल्हे कुचर दीस।
2KI 14:10 तेंह वास्तव म एदोम ला हराय हस अऊ अब तेंह घमंडी हो गे हस। अपन जीत के डींग मार, पर अपन घर म रह! मुसीबत ला काबर नेवता देवत हस अऊ अपन खुद के अऊ यहूदा के घलो बिनास के कारन बनत हस?”
2KI 14:11 पर अमसयाह ह ओकर बात ला नइं सुनिस, एकरसेति इसरायल के राजा यहोआस ह हमला कर दीस। ओकर अऊ यहूदा के राजा अमसयाह के आमना-सामना यहूदा के बेत-सेमेस नगर म होईस।
2KI 14:12 यहूदा ह इसरायल ले हार गीस अऊ जम्मो मनखेमन अपन-अपन घर भाग गीन।
2KI 14:13 इसरायल के राजा यहोआस ह यहूदा के राजा अमसयाह ला बेत-सेमेस करा बंदी बना लीस, जऊन ह योआस के बेटा अऊ अहजयाह के पोता रिहिस। तब यहोआस ह यरूसलेम गीस अऊ यरूसलेम के दीवार ला एपरैम के दुवार ले लेके कोना के दुवार तक टोरके गिरा दीस—याने कि लगभग चार सौ क्यूबीट लम्बा भाग ला गिरा दीस।
2KI 14:14 ओह यहोवा के मंदिर अऊ राजमहल के खजाना म रखे जम्मो सोन, चांदी अऊ जम्मो चीजमन ला ले लीस। ओह बंदी बनाय गे मनखेमन ला घलो लेके वापिस सामरिया लहुंट गीस।
2KI 14:15 यहोआस के राज के आने घटना, ओकर जम्मो काम अऊ ओकर उपलब्धी, संग म यहूदा के राजा अमसयाह के संग ओकर लड़ई—ये जम्मो बात इसरायल के राजामन के इतिहास के किताब म लिखे हवय।
2KI 14:16 यहोआस अपन पुरखामन संग हमेसा बर सुत गीस अऊ ओला सामरिया म इसरायल के राजामन के संग माटी दिये गीस। अऊ ओकर बेटा यरोबाम ओकर जगह म राजा बनिस।
2KI 14:17 यहोआहाज के बेटा इसरायल के राजा यहोआस के मिरतू के बाद योआस के बेटा यहूदा के राजा अमसयाह ह पंदरह साल जिंदा रिहिस।
2KI 14:18 अमसयाह के सासन के आने घटनामन यहूदा के राजामन के इतिहास के किताब म लिखे गे हवंय।
2KI 14:19 मनखेमन यरूसलेम म ओकर बिरूध साजिस करिन, अऊ ओह लाकीस सहर ला भाग गीस, पर ओमन ओकर पाछू आदमीमन ला लाकीस पठोईन अऊ ओला उहां मार डारिन।
2KI 14:20 ओकर लास ला घोड़ा म लादके वापिस लाय गीस अऊ ओला यरूसलेम म ओकर पुरखामन संग दाऊद के सहर म माटी देय गीस।
2KI 14:21 तब यहूदा के जम्मो मनखेमन अजरयाह ला लीन अऊ ओला ओकर ददा अमसयाह के जगह म राजा बनाईन; ओ समय अजरयाह के उमर सोलह साल रिहिस।
2KI 14:22 जब अमसयाह ह अपन पुरखामन संग हमेसा बर सुत गीस, तब अजरयाह ही ओ राजा रिहिस, जऊन ह एलात नगर ला फेर बनाईस अऊ यहूदा म सामिल कर लीस।
2KI 14:23 योआस के बेटा यहूदा के राजा अमसयाह के राज के पंदरहवां साल म इसरायल के राजा यहोआस के बेटा यरोबाम ह सामरिया म राजा बनिस, अऊ ओह एकतालीस साल तक राज करिस।
2KI 14:24 ओह यहोवा के नजर म दुस्ट काम करिस अऊ ओह नबात के बेटा यरोबाम के कोनो पाप ले नइं हटिस, जेला ओह इसरायल ले करवाय रिहिस।
2KI 14:25 ओह लेबो-हमात सहर ले लेके मिरतू सागर तक इसरायल के सीमना ला फेर बनाईस, अऊ येह इसरायल के परमेसर, यहोवा के कहे ओ बचन के मुताबिक होईस, जेला ओह अमित्तै के बेटा अपन सेवक योना अगमजानी के जरिये कहे रिहिस; योना ह गत-हेपेर नगर के निवासी रिहिस।
2KI 14:26 यहोवा ह देखिस कि इसरायल म हर मनखे के ऊपर अतियाचार होवत हे; चाहे ओह गुलाम हो या सुतंतर मनखे; ओमन के मदद करे बर कोनो नइं रिहिन।
2KI 14:27 अऊ काबरकि यहोवा ह ये नइं कहे रिहिस कि ओह इसरायल के नांव ला धरती ले मिटा दीही, त ओह यहोआस के बेटा यरोबाम के दुवारा ओमन ला छुटकारा दीस।
2KI 14:28 यरोबाम के राज के आने घटना, ओकर जम्मो काम, अऊ ओकर सेना के उपलब्धी, संग म ओह कइसे दमिस्क अऊ हमात ला फेर इसरायल म मिलाईस, जेमन यहूदा के अधिकार म रिहिन—ये जम्मो बात इसरायल के राजामन के इतिहास के किताब म लिखे हवय।
2KI 14:29 यरोबाम ह हमेसा बर अपन पुरखा इसरायल के राजामन संग सुत गीस। अऊ ओकर बेटा जकरयाह ओकर जगह म राजा बनिस।
2KI 15:1 इसरायल के राजा यरोबाम के राज के सत्ताईसवां साल म अमसयाह के बेटा यहूदा के राजा अजरयाह ह राज करे के सुरू करिस।
2KI 15:2 जब ओह राजा बनिस, तब ओह सोलह साल के रिहिस, अऊ ओह यरूसलेम म बावन साल तक राज करिस। ओकर दाई के नांव यकोलियाह रिहिस, जऊन ह यरूसलेम के रिहिस।
2KI 15:3 अजरयाह ह अपन ददा अमसयाह के सहीं ओहीच काम करिस, जऊन ह यहोवा के नजर म सही अय।
2KI 15:4 तभो ले, ऊंचहा जगहमन नइं हटाय गीन; मनखेमन उहां बलिदान चघाय अऊ धूप जलाय के काम करते रिहिन।
2KI 15:5 यहोवा ह राजा ला कोढ़ के बेमारी ले पीड़ित कर दीस, जऊन ह ओकर मिरतू तक ओकर देहें म बने रिहिस, अऊ ओह एक अलग घर म रहत रिहिस। राजा के बेटा योताम ह महल के अधिकारी होके देस के मनखेमन ऊपर सासन करिस।
2KI 15:6 अजरयाह के राज के आने घटनामन, ओकर जम्मो काम के बिबरन यहूदा के राजामन के इतिहास के किताब म लिखे गे हवय।
2KI 15:7 अजरयाह ह हमेसा बर अपन पुरखामन संग सुत गीस अऊ ओला ओमन के लकठा म दाऊद के सहर म माटी दिये गीस। अऊ ओकर बेटा योताम ह ओकर जगह म राजा बनिस।
2KI 15:8 यहूदा के राजा अजरयाह के राज के अड़तीसवां साल म, यरोबाम के बेटा जकरयाह ह सामरिया म इसरायल के राजा बनिस, अऊ ओह छै महिना राज करिस।
2KI 15:9 ओह अपन पहिले के राजामन सहीं यहोवा के नजर म दुस्ट काम करिस। ओह नबात के बेटा यरोबाम के ओ पापमन ले नइं हटिस, जेला ओह इसरायल ले करवाय रिहिस।
2KI 15:10 याबेस के बेटा सल्लूम ह जकरयाह के बिरूध सडयंत्र करिस। ओह मनखेमन के आघू म ओकर ऊपर हमला करिस अऊ ओकर हतिया करके ओकर जगह म राजा बन गीस।
2KI 15:11 जकरयाह के राज के आने घटनामन इसरायल के राजामन के इतिहास के किताब म लिखे गे हवय।
2KI 15:12 ये किसम ले यहोवा के दुवारा येहू ला कहे गे ये बचन ह पूरा होईस: “तोर संतानमन चौथा पीढ़ी तक इसरायल के सिंघासन म बईठहीं।”
2KI 15:13 यहूदा के राजा उजियाह के राज के उन्चालीसवां साल म, याबेस के बेटा सल्लूम ह राजा बनिस, अऊ ओह सामरिया म एक महिना तक राज करिस।
2KI 15:14 तब गादी के बेटा मनहेम ह तिरसा नगर ले सामरिया गीस। उहां सामरिया म, ओह याबेस के बेटा सल्लूम के ऊपर हमला करिस अऊ ओकर हतिया करके ओकर जगह म राजा बन गीस।
2KI 15:15 सल्लूम के राज के आने घटना, अऊ ओकर दुवारा रचे गय सडयंत्र—ये जम्मो बात इसरायल के राजामन के इतिहास के किताब म लिखे गे हवय।
2KI 15:16 ओ समय, मनहेम ह तिरसा ले निकलत रिहिस अऊ ओह तिपसह नगर अऊ नगर के हर मनखे ऊपर अऊ अड़ोस-पड़ोस म हमला करिस, काबरकि ओमन सहर के दुवार खोले बर मना करिन। ओह तिपसह ला लूट लीस अऊ उहां जतेक माईलोगनमन गरभवती रिहिन, ओ जम्मो के पेट ला चीर दीस।
2KI 15:17 यहूदा के राजा अजरयाह के राज के उन्चालीसवां साल म, गादी के बेटा मनहेम ह इसरायल के राजा बनिस, अऊ ओह सामरिया म दस साल तक राज करिस।
2KI 15:18 ओह यहोवा के नजर म दुस्ट काम करिस। ओह अपन पूरा सासनकाल म, नबात के बेटा यरोबाम के पाप ले नइं हटिस, जेला ओह इसरायल ले करवाय रिहिस।
2KI 15:19 तब अस्सूर के राजा पूल ह इसरायल देस के ऊपर हमला करिस, अऊ मनहेम ह ओकर समरथन पाय बर अऊ राज म अपन पकड़ मजबूत करे बर ओला लगभग पैंतीस टन चांदी दीस।
2KI 15:20 मनहेम ह इसरायल ले ये पईसा वसूल करिस। हर एक धनी मनखे ले पचास सेकेल चांदी वसूले गीस, ताकि ये पईसा ला अस्सूर के राजा ला देय जा सकय। तब अस्सूर के राजा ह देस ला छोंड़के चल दीस अऊ उहां नइं रूकिस।
2KI 15:21 मनहेम के राज के आने घटना, अऊ ओकर जम्मो काम इसरायल के राजामन के इतिहास के किताब म लिखे गे हवय।
2KI 15:22 मनहेम ह अपन पुरखामन संग हमेसा बर सुत गीस। अऊ ओकर बेटा पकहियाह ह ओकर जगह म राजा बनिस।
2KI 15:23 यहूदा के राजा अजरयाह के राज के पचासवां साल म, मनहेम के बेटा पकहियाह ह सामरिया म इसरायल के राजा बनिस, अऊ ओह दू साल तक राज करिस।
2KI 15:24 पकहियाह ह यहोवा के नजर म दुस्ट काम करिस। ओह नबात के बेटा यरोबाम के ओ पाप ले नइं हटिस, जेला ओह इसरायल ले करवाय रिहिस।
2KI 15:25 ओकर मुखिया अधिकारीमन ले एक झन रमलियाह के बेटा पेकह ह ओकर बिरूध सडयंत्र करिस। ओह अपन संग गिलाद के पचास मनखे लीस, अऊ सामरिया के राजमहल के किला म ओह पकहियाह के संग अरगोब अऊ अरये के घलो हतिया कर दीस। ये किसम ले पेकह ह पकहियाह ला मार डारिस अऊ ओकर जगह म राजा बन गीस।
2KI 15:26 पकहियाह के राज के आने घटना, अऊ ओकर जम्मो काम इसरायल के राजामन के इतिहास के किताब म लिखे गे हवय।
2KI 15:27 यहूदा के राजा अजरयाह के राज के बावनवां साल म, रमलियाह के बेटा पेकह सामरिया म इसरायल के राजा बनिस, अऊ ओह बीस साल तक राज करिस।
2KI 15:28 ओह यहोवा के नजर म दुस्ट काम करिस। ओह नबात के बेटा यरोबाम के ओ पापमन ले नइं हटिस, जेला ओह इसरायल ले करवाय रिहिस।
2KI 15:29 इसरायल के राजा पेकह के समय म, अस्सूर के राजा तिगलत-पिलेसेर आईस अऊ इयोन, आबेल-बेत-माका, यानोह, केदेस अऊ हासोर नगरमन ला ले लीस। ओह गिलाद अऊ गलील अऊ संग म नपताली के जम्मो इलाका ला घलो ले लीस, अऊ मनखेमन ला बंदी बनाके अस्सूर ले गीस।
2KI 15:30 तब एला के बेटा होसे ह रमलियाह के बेटा पेकह के बिरूध सडयंत्र करिस। ओह हमला करिस अऊ पेकह ला मार डारिस, अऊ ओकर जगह म राजा बन गीस; ये घटना ह उजियाह के बेटा योताम के राज के बीसवां साल म होईस।
2KI 15:31 पेकह के राज के आने घटना, अऊ ओकर जम्मो काम इसरायल के राजामन के इतिहास के किताब म लिखे गे हवय।
2KI 15:32 रमलियाह के बेटा इसरायल के राजा पेकह के राज के दूसरा साल म, उजियाह के बेटा यहूदा के राजा योताम राज करे के सुरू करिस।
2KI 15:33 जब ओह राजा बनिस, त ओह पच्चीस साल के रिहिस, अऊ ओह यरूसलेम म सोलह साल तक राज करिस। ओकर दाई के नांव यरूसा रिहिस, जऊन ह सादोक के बेटी रिहिस।
2KI 15:34 ओह अपन ददा उजियाह के सहीं ओही काम करिस, जऊन ह यहोवा के नजर म सही रिहिस।
2KI 15:35 तभो ले, पूजा के ऊंचहा जगहमन नइं हटाय गीन; मनखेमन उहां बलिदान चघाय अऊ धूप जलाय के काम करते रिहिन। योताम ह यहोवा के मंदिर के दुवार ला फेर बनाईस।
2KI 15:36 योताम के राज के आने घटनामन, अऊ ओकर करे गय जम्मो काम यहूदा के राजामन के इतिहास के किताब म लिखे गे हवय।
2KI 15:37 (ओ समय म, यहोवा ह अराम के राजा रसीन अऊ रमलियाह के बेटा पेकह ला यहूदा के बिरूध पठोय के सुरू करिस।)
2KI 15:38 योताम ह अपन पुरखामन संग हमेसा बर सुत गीस अऊ ओला ओकर ददा के सहर, दाऊद के सहर म माटी देय गीस। अऊ ओकर बेटा आहाज ह ओकर जगह म राजा बनिस।
2KI 16:1 रमलियाह के बेटा पेकह के राज के सतरहवां साल म, योताम के बेटा यहूदा के राजा आहाज ह राज करे के सुरू करिस।
2KI 16:2 आहाज ह बीस साल के रिहिस, जब ओह राजा बनिस, अऊ ओह यरूसलेम म सोलह साल तक सासन करिस। अपन पुरखा दाऊद के सहीं, ओह ओ काम नइं करिस, जऊन ह यहोवा अपन परमेसर के नजर म सही रिहिस।
2KI 16:3 ओह इसरायल के राजामन के रसता म चलिस; ओह ओ जाति-जाति के मनखेमन के घिनौना रीति-रिवाज म चलिस, जेमन ला यहोवा ह इसरायलीमन के आघू ले भगा दे रिहिस; इहां तक कि ओह अपन बेटा ला आगी म बलिदान करिस।
2KI 16:4 ओह ऊंच जगह म, पहाड़ीमन के टीप म अऊ हर फईले हुए रूख के खाल्हे म बलिदान चघाईस अऊ धूप जलाईस।
2KI 16:5 तब अराम के राजा रसीन अऊ रमलियाह के बेटा इसरायल के राजा पेकह यरूसलेम के बिरूध लड़ई करे बर आघू बढ़िन अऊ आहाज ला घेर लीन, पर ओमन ओला अपन बस म नइं कर सकिन।
2KI 16:6 ओ समय, अराम के राजा रसीन ह यहूदा के मनखेमन ला निकालके एलात ला अराम के अधीन कर दीस। तब एदोमी मनखेमन एलात म आ गीन अऊ आज तक ओमन उहां रहत हंय।
2KI 16:7 आहाज ह अस्सूर के राजा तिगलत-पिलेसेर करा संदेसियामन के दुवारा ये संदेस पठोईस, “मेंह तोर सेवक अऊ तोर गुलाम अंव। आ अऊ मोला अराम के राजा अऊ इसरायल के राजा के हांथ ले बचा, जेमन मोर ऊपर हमला करत हवंय।”
2KI 16:8 अऊ आहाज ह यहोवा के मंदिर अऊ राजमहल के खजाना म रखे सोन अऊ चांदी ला लीस अऊ येला अस्सूर के राजा करा भेंट के रूप म पठो दीस।
2KI 16:9 अस्सूर के राजा ह ओकर बात ला मान लीस अऊ दमिस्क सहर ऊपर हमला करके ओला अपन अधीन कर लीस। ओह उहां के मनखेमन ला बंदी बनाके कीर नांव के नगर म ले गीस अऊ रसीन ला मार डारिस।
2KI 16:10 तब राजा आहाज ह अस्सूर के राजा तिगलत-पिलेसेर ले मिले बर दमिस्क गीस। ओह दमिस्क म एक बेदी देखिस अऊ ओह ओ बेदी के एक नक्सा अऊ ओकर पूरा बनावट के बारे म लिखके उरियाह पुरोहित करा पठो दीस।
2KI 16:11 अऊ उरियाह पुरोहित ह दमिस्क ले पठोय राजा आहाज के पूरा बिबरन के मुताबिक एक बेदी बनाईस अऊ ओह ये बेदी ला राजा आहाज के दमिस्क ले वापिस लहुंटे के पहिले ही बना लीस।
2KI 16:12 जब राजा ह दमिस्क ले वापिस लहुंटिस अऊ ओ बेदी ला देखिस, त ओह ओकर लकठा म गीस अऊ ओकर ऊपर बलि चघाईस।
2KI 16:13 ओह उहां होम-बलिदान अऊ अन्न-बलिदान चघाईस; पेय-बलिदान ला ढारिस, अऊ अपन मेल-बलिदान के खून ला ओ बेदी ऊपर छिंच दीस।
2KI 16:14 जऊन कांसा के बेदी यहोवा के आघू म रिहिस, ओला ओह मंदिर के सामने म ले लेय आईस—याने कि नवां बेदी अऊ यहोवा के मंदिर के बीच म ले लानिस अऊ ओला नवां बेदी के जेवनी कोति रख दीस।
2KI 16:15 तब राजा आहाज ह उरियाह पुरोहित ला ये हुकूम दीस: “नवां बड़े बेदी ऊपर तेंह बिहनियां के होम-बलिदान अऊ संझा के अन्न-बलिदान, राजा के होम-बलिदान अऊ ओकर अन्न-बलिदान, अऊ देस के जम्मो मनखे के होम-बलिदान, अऊ ओमन के अन्न-बलिदान अऊ ओमन के पेय-बलिदान चघाय कर। अऊ जम्मो होम-बलिदान अऊ आने बलिदानमन के खून ला ये बेदी ऊपर छिंचे कर। पर मेंह कांसा के बेदी के उपयोग अगुवई पाय बर करहूं।”
2KI 16:16 अऊ उरियाह पुरोहित ह वइसने ही करिस, जइसने राजा आहाज ह हुकूम दे रिहिस।
2KI 16:17 राजा आहाज ह बाजू के तखतामन ला काट दीस अऊ हटनेवाला सहारा ले तसलामन ला हटा दीस। ओह कांसा के बईलामन ऊपर रखे बड़े तसला ला हटा दीस अऊ ओला पथरा के चबूतरा म रख दीस।
2KI 16:18 ओह बिसराम दिन म उपयोग होवइया ओ ओसारा ला हटा दीस, जऊन ह मंदिर परिसर म बने रिहिस अऊ अस्सूर के राजा के कारन, ओह यहोवा के मंदिर के बाहिर बने साही प्रवेस दुवार ला हटा दीस।
2KI 16:19 आहाज के राज के आने घटनामन, अऊ ओकर जम्मो काम यहूदा के राजामन के इतिहास के किताब म लिखे गे हवंय।
2KI 16:20 आहाज ह अपन पुरखामन संग हमेसा बर सुत गीस अऊ ओला ओमन के संग दाऊद के सहर म माटी दिये गीस। अऊ ओकर बेटा हिजकियाह ह ओकर जगह म राजा बनिस।
2KI 17:1 यहूदा के राजा आहाज के राज के बारहवां साल म, एला के बेटा होसे सामरिया म इसरायल के राजा बनिस, अऊ ओह नौ साल तक राज करिस।
2KI 17:2 ओह यहोवा के नजर म दुस्ट काम करिस, पर इसरायल के ओ राजामन सहीं दुस्ट काम नइं करिस, जेमन ओकर पहिले रिहिन।
2KI 17:3 अस्सूर के राजा सल्मनेसेर ह होसे ऊपर हमला करे बर आईस, जऊन ह सल्मनेसेर के अधीन रिहिस अऊ सल्मनेसेर ला राजकर देवत रिहिस।
2KI 17:4 पर अस्सूर के राजा ला पता चलिस कि होसे ह बिसवासघाती रिहिस, काबरकि होसे ह सो नांव के मिसर के राजा करा मदद बर दूतमन ला भेजे रिहिस, अऊ अब ओह अस्सूर के राजा ला राजकर देना बंद कर दीस, जेला ओह हर साल देवत रिहिस। एकरसेति सल्मनेसेर ह ओला बंदी बना लीस अऊ ओला जेल म डाल दीस
2KI 17:5 तब अस्सूर के राजा ह पूरा देस ऊपर हमला कर दीस अऊ सामरिया के बिरूध सेना लेके आघू बढ़िस अऊ तीन साल तक ओला सेना के घेरा म रखिस।
2KI 17:6 होसे के राज के नौवां साल म, अस्सूर के राजा ह सामरिया ऊपर कब्जा कर लीस अऊ इसरायलीमन ला अस्सूर देस ले गीस। ओह ओमन ला हलह सहर म, हाबोर नदी करा गोजान म अऊ मादीमन के नगरमन म बसा दीस।
2KI 17:7 ये जम्मो बात एकरसेति होईस काबरकि इसरायलीमन यहोवा अपन परमेसर के बिरूध पाप करिन, जऊन ह कि ओमन ला मिसर देस के राजा फिरौन के सक्ति ले छोंड़ाय रिहिस अऊ ओमन ला मिसर देस ले बाहिर निकालके लाने रिहिस। ओमन आने देवतामन के अराधना करिन
2KI 17:8 अऊ ओ आनजातमन के रीति-रिवाज म चलिन, जेमन ला यहोवा ह ओमन के आघू ले भगा दे रिहिस, येकर अलावा ओमन इसरायल के राजामन के बनाय रीति-रिवाज म घलो चलिन।
2KI 17:9 इसरायलीमन यहोवा अपन परमेसर के बिरूध गुपत रूप म ओ काम करिन, जऊन ह सही नो हय। पहरेदारमन के गुम्मट ले लेके गढ़वाले सहर तक ओमन अपन बर अपन जम्मो नगर म पूजा के ऊंचहा जगहमन ला बनाईन।
2KI 17:10 ओमन हर ऊंचहा पहाड़ी ऊपर अऊ हर फईले रूख के खाल्हे म देव ला अरपित पथरा अऊ असेरा के खंभा खड़े करिन।
2KI 17:11 हर ऊंचहा जगह म, ओमन धूप जलात रिहिन, जइसने कि ओ आनजातमन करे रिहिन, जेमन ला यहोवा ह ओमन के आघू ले भगा दे रिहिस। ओमन दुस्ट काम करिन, जेकर ले यहोवा के गुस्सा भड़किस।
2KI 17:12 ओमन मूरतीमन के उपासना करिन, हालाकि यहोवा ह ओमन ला कहे रिहिस, “तुमन ये काम झन करहू।”
2KI 17:13 यहोवा ह इसरायल अऊ यहूदा ला अपन जम्मो अगमजानी अऊ अगम-दरसीमन के जरिये ये चेतउनी दे रिहिस: “अपन दुस्ट काममन ला छोंड़व। पूरा कानून के मुताबिक मोर ओ हुकूम अऊ नियममन ला मानव, जेला मेंह तुम्हर पुरखामन ला माने के हुकूम दे रहेंव अऊ जेला मेंह अपन सेवक अगमजानीमन के जरिये तुमन ला दे हंव।”
2KI 17:14 पर इसरायलीमन नइं सुनिन अऊ अपन ओ पुरखामन सहीं हठी हो गीन, जेमन यहोवा अपन परमेसर के बिसवास नइं करिन।
2KI 17:15 ओमन ओकर नियम अऊ ओ करार ला अस्वीकार करिन, जेला ओह ओमन के पुरखामन संग करे रिहिस अऊ ओमन ओ बिधिमन ला घलो नइं मानिन, जेला माने के चेतउनी यहोवा ह ओमन ला दे रिहिस। ओमन बेकार के मूरतीमन के पाछू चलिन अऊ खुद बेकार हो गीन। ओमन अपन चारों कोति के जातिमन के सहीं काम करिन, हालाकि यहोवा ह ओमन ला हुकूम दे रिहिस, “वइसने काम झन करव, जइसने ओमन करथें।”
2KI 17:16 ओमन यहोवा अपन परमेसर के जम्मो हुकूम ला तियाग दीन अऊ अपन बर दू ठन बछवामन के मूरती ढालके बनाईन, अऊ एक ठन असेरा के खंभा घलो बनाईन। ओमन जम्मो तारामन के समूह ला दंडवत करिन, अऊ बाल देवता के उपासना करिन।
2KI 17:17 ओमन अपन बेटा अऊ बेटीमन ला आगी म बलि चघाईन। ओमन सकुन-बिचार के काम अऊ जादू-टोना करे लगिन अऊ यहोवा के नजर म दुस्ट काम करे बर अपनआप ला बेच दीन, अऊ अइसे करके यहोवा के कोरोध ला भड़काईन।
2KI 17:18 येकर कारन यहोवा ह इसरायल ऊपर बहुंत गुस्सा होईस अऊ ओमन ला अपन आघू ले हटा दीस। सिरिप यहूदा के गोत्र बचिस,
2KI 17:19 अऊ हालाकि यहूदा घलो यहोवा अपन परमेसर के हुकूम नइं मानिस। ओमन इसरायल के बनाय रीति-रिवाज म चलिन।
2KI 17:20 एकरसेति यहोवा ह इसरायल के जम्मो मनखेमन ला अस्वीकार करिस; ओह ओमन ला दुख दीस अऊ ओमन ला लुटेरामन के हांथ म कर दीस, अऊ ओमन ला अपन आघू ले निकाल दीस।
2KI 17:21 जब ओह इसरायल ला दाऊद के घराना ले अलग कर दीस, त ओमन नबात के बेटा यरोबाम ला अपन राजा बनाईन। यरोबाम ह इसरायल ला बहकाईस कि ओमन यहोवा के पाछू झन चलंय अऊ ओह ओमन ले एक बड़े पाप करवाईस।
2KI 17:22 इसरायलीमन ओ जम्मो पाप करिन, जेला यरोबाम ह करे रिहिस अऊ ओमन ओ पापमन ले तब तक नइं हटिन
2KI 17:23 जब तक कि यहोवा ह ओमन ला अपन आघू ले नइं हटा दीस, जइसे कि ओह अपन जम्मो सेवक अऊ अगमजानीमन के जरिये चेतउनी दे रिहिस। ये किसम ले इसरायल के मनखेमन ला ओमन के देस ले हटा दिये गीस अऊ ओमन ला बंधुवा बनाके अस्सूर देस ले जाय गीस, अऊ ओमन आज तक उहां हवंय।
2KI 17:24 अस्सूर के राजा ह बेबिलोन, कूता, अव्वा, हमात अऊ सपरवैम नगर ले मनखेमन ला लानिस अऊ इसरायलीमन के जगह म ओमन ला सामरिया के नगरमन म बसा दीस। ओमन सामरिया ला अपन अधिकार म ले लीन अऊ येकर नगरमन म रहे लगिन।
2KI 17:25 जब ओमन उहां पहिली-पहल रहे लगिन, त ओमन यहोवा के उपासना नइं करिन; एकरसेति यहोवा ह ओमन के बीच म सिंह पठोईस अऊ ओ सिंहमन ओमन के कुछू मनखे ला मार डारिन।
2KI 17:26 अस्सूर के राजा ला ये बात बताय गीस: “जऊन मनखेमन ला तेंह ले जाके सामरिया के नगरमन म बसाय हस, ओमन नइं जानंय कि ओ देस के देवता के का रीति-बिधि ए। ओ देवता ह ओमन के बीच म सिंहमन ला पठोय हवय, जऊन मन ओमन ला मार डारत हें, काबरकि ओमन ओ देस के देवता के रीति-बिधि नइं जानत हें।”
2KI 17:27 तब अस्सूर के राजा ह ये हुकूम दीस: “जऊन पुरोहितमन ला तुमन सामरिया ले बंधुवई म ले गे हवव, ओमा ले एक झन उहां रहे बर वापिस जावय अऊ मनखेमन ला सिखोवय कि ओ देस के देवता के का रीति-बिधि ए।”
2KI 17:28 एकरसेति सामरिया ले बंधुवई म आय पुरोहितमन ले एक झन बेतेल म रहे बर आईस अऊ ओमन ला सिखोईस कि यहोवा के उपासना का रीति-बिधि ले करे जावय।
2KI 17:29 तभो ले, हर जाति के मनखेमन अपन खुद के देवता ओ नगरमन म बना लीन, जिहां ओमन बस गे रिहिन, अऊ ओ देवतामन ला ओ जगहमन म स्थापित करिन, जेला सामरिया के मनखेमन ऊंच जगह म बनाय रिहिन।
2KI 17:30 बेबिलोन के मनखेमन सुक्कोत-बनोत ला बनाईन, कूता के मनखेमन नेरगल ला बनाईन, अऊ हमात के मनखेमन असीमा ला बनाईन;
2KI 17:31 अव्वीमन निभज अऊ तर्ताक के मूरतीमन ला बनाईन, अऊ सपरवीमन अपन लइकामन ला आगी म जलाके सपरवैम के देवता अद्रमेलेक अऊ अनमेलेक ला बलिदान के रूप म चघाय लगिन।
2KI 17:32 ओमन यहोवा के उपासना करिन, पर ओमन अपन म ले जम्मो किसम के मनखेमन ला घलो पुरोहित के रूप म नियुक्त कर लीन, जऊन मन ओमन बर ऊंचहा जगह के देव-स्थल म बलि चघावंय।
2KI 17:33 ओमन यहोवा के उपासना करिन, पर ओमन अपन देवतामन के ओ जातिमन के रीति-बिधि के मुताबिक सेवा घलो करत रिहिन, जेमन के बीच ले ओमन ला लाने गे रिहिस।
2KI 17:34 आज तक ओमन अपन पहिले के रीति-रिवाज म चलत हें। ओमन न तो यहोवा के उपासना करथें, अऊ न ही ओ बिधि-बिधान अऊ नियम, कानून अऊ हुकूम ऊपर चलथें, जेला यहोवा ह ओ याकूब के संतानमन ला दे रिहिस, जेकर नांव ओह इसरायल रखिस।
2KI 17:35 जब यहोवा ह इसरायलीमन ले करार करिस, त ओह ओमन ला ये हुकूम दीस: “कोनो आने देवता के उपासना झन करव या ओमन ला दंडवत झन करव, ओमन के सेवा झन करव, अऊ न ही ओमन ला बलिदान चघावव।
2KI 17:36 पर ओ यहोवा के उपासना करव, जऊन ह बड़े सक्ति अऊ बढ़े हुए भुजा ले तुमन ला मिसर देस ले निकाल लानिस। ओला तुमन दंडवत करव अऊ ओला तुमन बलिदान चघावव।
2KI 17:37 जऊन बिधि अऊ नियम, कानून अऊ हुकूम ओह तुमन बर लिखवा दे हवय, ओमन ला हमेसा धियान देके मानव। आने देवतामन के अराधना झन करव।
2KI 17:38 जऊन करार मेंह तुम्हर संग करे हवंव, ओला झन भूलव, अऊ आने देवतामन के उपासना झन करव।
2KI 17:39 पर सिरिप यहोवा, अपन परमेसर के उपासना करव; सिरिप ओहीच ह तुमन ला तुम्हर जम्मो बईरीमन के हांथ ले बचाही।”
2KI 17:40 पर ओमन नइं सुनिन, अऊ अपन पहिले के रीति-रिवाज म ही चलते रिहिन।
2KI 17:41 अऊ त अऊ, जब ओमन यहोवा के सेवा करत रिहिन, तब भी ओमन मूरतीमन के सेवा घलो करत रिहिन। आज घलो ओमन के लइका अऊ नाती-पोतामन अपन पुरखामन सहीं करत हवंय।
2KI 18:1 एला के बेटा, इसरायल के राजा होसे के राज के तीसरा साल म, आहाज के बेटा, यहूदा के राजा हिजकियाह ह राज करे के सुरू करिस।
2KI 18:2 ओह पच्चीस साल के रिहिस, जब ओह राजा बनिस, अऊ ओह यरूसलेम म उनतीस साल तक राज करिस। ओकर दाई के नांव अबियाह रिहिस, जऊन ह जकरयाह के बेटी रिहिस।
2KI 18:3 ओह ओही काम करिस, जऊन ह यहोवा के नजर म सही रिहिस, जइसे कि ओकर पुरखा दाऊद ह करे रिहिस।
2KI 18:4 ओह पूजा के ऊंचहा जगहमन ला हटा दीस, पबितर पथरामन ला कुटा-कुटा कर दीस अऊ असेरा के खंभामन ला काटके गिरा दीस। ओह मूसा के दुवारा बनाय कांसा के ओ सांप के मूरती ला टोरके कुटा-कुटा कर दीस, काबरकि इसरायलीमन ओ समय तक ओकर आघू म धूप जलात रिहिन। (ये मूरती ला नहुस्तान कहे जावय।)
2KI 18:5 हिजकियाह ह यहोवा, इसरायल के परमेसर ऊपर भरोसा रखिस। ओकर पहिले या ओकर बाद, यहूदा के जम्मो राजामन के बीच ओकर सहीं अऊ कोनो राजा नइं होईन।
2KI 18:6 ओह यहोवा के संग मजबूती से लगे रिहिस अऊ ओकर पाछू चले बर नइं छोंड़िस; ओह मूसा के जरिये दिये यहोवा के हुकूम म चलते रिहिस।
2KI 18:7 अऊ यहोवा ह ओकर संग रिहिस; ओह जऊन कुछू भी करिस, ओमा ओह सफल होईस। ओह अस्सूर के राजा के बिरूध बिदरोह करिस अऊ ओकर सेवा नइं करिस।
2KI 18:8 पहरेदारमन के मचान ले लेके गढ़वाले सहर तक, गाजा सहर अऊ येकर सीमना तक ओह पलिस्तीमन ला हराईस।
2KI 18:9 हिजकियाह राजा के राज के चौथा साल म, जऊन ह एला के बेटा, इसरायल के राजा होसे के राज के सातवां साल रिहिस, अस्सूर के राजा सल्मनेसेर ह सामरिया के बिरूध सेना लेके आघू बढ़िस अऊ ओला घेर लीस।
2KI 18:10 तीन साल के आखिरी म, ओमन ओला अपन अधिकार म ले लीन। ये किसम ले हिजकियाह के राज के छठवां साल म, जऊन ह इसरायल के राजा होसे के राज के नौवां साल रिहिस, सामरिया ह अस्सूर के राजा के अधिकार म चले गीस।
2KI 18:11 अस्सूर के राजा ह इसरायलीमन ला बंदी बनाके अस्सूर देस ले गीस अऊ ओमन ला हलह म, हाबोर नदी के तीर गोजान म अऊ मादीमन के नगर म बसा दीस।
2KI 18:12 येह येकर कारन होईस काबरकि ओमन यहोवा, अपन परमेसर के बात नइं मानिन, पर ओकर करार ला टोर दीन—याने कि ओ जम्मो हुकूम जेला यहोवा के सेवक मूसा ह दे रिहिस। ओमन न तो ओ हुकूममन ला सुनिन, अऊ न ही ओमन ला मानिन।
2KI 18:13 हिजकियाह राजा के राज के चौदहवां साल म, अस्सूर के राजा सनहेरीब ह यहूदा के जम्मो गढ़वाले सहर ऊपर हमला करिस अऊ ओमन ला अपन अधिकार म कर लीस।
2KI 18:14 एकरसेति यहूदा के राजा हिजकियाह ह अस्सूर के राजा करा लाकीस नगर म ये खबर पठोईस: “मेंह गलत करे हंव। अपन सेना ला इहां ले हटा ले, अऊ जऊन भी मांग तेंह रखबे, ओला मेंह पूरा करहूं।” अस्सूर के राजा ह यहूदा के राजा हिजकियाह ले तीन सौ टेलेन्ट चांदी अऊ तीस टेलेन्ट सोन वसूल करिस।
2KI 18:15 तब हिजकियाह ह यहोवा के मंदिर म रखे जम्मो चांदी अऊ राजमहल के खजाना के जम्मो चांदी अस्सूर के राजा ला दे दीस।
2KI 18:16 ओ बेरा यहूदा के राजा हिजकियाह ह यहोवा के मंदिर के कपाट अऊ कपाट के चौखटमन म मढ़े सोन ला निकालिस अऊ अस्सूर के राजा ला दे दीस।
2KI 18:17 तब अस्सूर के राजा ह अपन परधान सेनापति, अपन मुखिया अधिकारी अऊ अपन लड़ई के मैदान के सेनापति ला एक बड़े सेना के संग लाकीस नगर ले यरूसलेम म हिजकियाह राजा करा पठोईस। ओमन यरूसलेम आईन अऊ ऊपरी तरिया के नहर करा, धोबीमन के खेत के सड़क म रूक गीन।
2KI 18:18 ओमन राजा ला बलाईन; त हिलकियाह के बेटा एलयाकीम, जऊन ह महल के अधिकारी रिहिस; सेबना, जऊन ह सचिव रिहिस; अऊ आसाप के बेटा योआह, जऊन ह अभिलेखक रिहिस; ये तीनों झन निकलके ओमन करा गीन।
2KI 18:19 मैदान के सेनापति ह ओमन ला कहिस, “हिजकियाह ला बतावव: “ ‘महाराजा, अस्सूर के राजा ह ये कहत हे: तोर ये भरोसा के आधार का ए?
2KI 18:20 तेंह कहिथस कि तोर करा लड़ई बर नीति अऊ ताकत हवय—पर तेंह सिरिप खोखला बात करथस। काकर ऊपर भरोसा करके, तेंह मोर बिरूध बिदरोह करत हस?
2KI 18:21 देख, मेंह जानत हंव कि तेंह मिसर देस ऊपर भरोसा करत हस, ओ एक लउठी के चीरे नरकट ऊपर, जऊन ह ओ मनखे के हांथ म चूभथे, जऊन ह येकर सहारा लेथे! फिरौन, मिसर के राजा ह ओ जम्मो झन बर अइसने ही अय, जेमन ओकर ऊपर भरोसा करथें।
2KI 18:22 पर कहूं तें मोला ये कहिथस, “हमर भरोसा यहोवा, हमर परमेसर ऊपर हवय”—का येह ओ नो हय, जेकर ऊंचहा जगह अऊ बेदीमन ला हिजकियाह ह हटाके यहूदा अऊ यरूसलेम के मनखेमन ला कहिस, “ये जरूरी अय कि तुमन यरूसलेम म ये बेदी के आघू म उपासना करव”?
2KI 18:23 “ ‘अब आ अऊ मोर मालिक, अस्सूर के राजा के संग मोलभाव कर: मेंह तोला दू हजार घोड़ा दूहूं—यदि तें ओमन बर घुड़सवारमन के परबंध कर सकबे त!
2KI 18:24 हालाकि तेंह रथ अऊ घुड़सवारमन बर मिसर देस ऊपर भरोसा करत हस, पर मोर मालिक के छोटे ले छोटे अधिकारी ला घलो कइसे भगा सकत हस?
2KI 18:25 अऊ ये घलो कि का मेंह यहोवा के बिगर कहे ये जगह ऊपर हमला करे अऊ येला नास करे बर आय हवंव? यहोवा ह खुद मोला कहे हवय कि ये देस ऊपर हमला कर अऊ येला नास कर दे।’ ”
2KI 18:26 तब हिलकियाह के बेटा एलयाकीम, सेबना अऊ योआह मैदान के सेनापति ला कहिन, “अपन सेवकमन ले अरामिक भासा म गोठिया, काबरकि हमन ये भासा ला समझथन। भीथी ऊपर बईठे मनखेमन के सुनत म हमर ले इबरानी म झन गोठिया।”
2KI 18:27 पर सेनापति ह जबाब दीस, “का मोर मालिक ह मोला सिरिप तुम्हर मालिक अऊ तुमन ला ये बात कहे बर पठोय हवय, अऊ दीवार ऊपर बईठे ओ मनखेमन ला नइं, जेमन ला तुम्हर सहीं, अपन खुद के मल ला खाना अऊ अपन खुद के पेसाब ला पीना पड़ही?”
2KI 18:28 तब सेनापति ह ठाढ़ होईस अऊ इबरानी म जोर से कहिस, “महाराजा, अस्सूर के राजा के बात ला सुनव!
2KI 18:29 राजा ह ये कहत हे: हिजकियाह ह तुमन ला धोखा झन देवय। ओह तुमन ला मोर हांथ ले छुड़ा नइं सकय।
2KI 18:30 हिजकियाह के मनाय म झन आवव, जब ओह यहोवा ऊपर भरोसा रखे बर ये कहिथे, ‘खचित यहोवा ह हमन ला छुड़ाही; ये सहर ला अस्सूर के राजा के हांथ म नइं दिये जावय।’
2KI 18:31 “हिजकियाह के बात ला झन सुनव। अस्सूर के राजा ह ये कहिथे: मोर संग मेल-मिलाप करव अऊ बाहिर निकलके मोर करा आवव। तब तुमन म ले हर एक ह अपन खुद के अंगूर के नार के अऊ अंजीर के रूख के फर खाही अऊ अपन खुद के कुंड के पानी पीही,
2KI 18:32 जब तक कि मेंह आके तुमन ला एक अइसन देस म नइं ले जाहूं, जऊन ह तुम्हर खुद के सहीं होही—अनाज अऊ नवां अंगूर के मंद के देस, रोटी अऊ अंगूर के बारीमन के देस, जैतून रूख अऊ मंधरस के देस। जिनगी ला चुनव, मिरतू ला नइं! “हिजकियाह के बात ला झन सुनव, काबरकि ओह तुमन ला बहकावथे, जब ओह ये कहिथे, ‘यहोवा ह हमन ला छुड़ाही।’
2KI 18:33 का कोनो जाति के देवता कभू अपन देस ला अस्सूर के राजा के हांथ ले छुड़ाय हवय?
2KI 18:34 हमात अऊ अरपाद के देवतामन कहां हवंय? सपरवैम, हेना अऊ इव्वा के देवतामन कहां हवंय? का ओमन सामरिया ला मोर हांथ ले बचाय हवंय?
2KI 18:35 ये देसमन के जम्मो देवतामन ले कोन ह अपन देस ला मोर हांथ ले बचाय हवय? तब यहोवा ह कइसे यरूसलेम ला मोर हांथ ले छुड़ा सकथे?”
2KI 18:36 पर मनखेमन चुपेचाप रिहिन अऊ जबाब म कुछू नइं कहिन, काबरकि राजा ह ये हुकूम दे रिहिस, “ओला जबाब झन दव।”
2KI 18:37 तब हिलकियाह के बेटा एलयाकीम, जऊन ह महल के अधिकारी रिहिस; सेबना, जऊन ह सचिव रिहिस; अऊ आसाप के बेटा योआह, जऊन ह इतिहास के अभिलेखक रिहिस; ये तीनों अपन फटे कपड़ा के संग हिजकियाह मेर गीन, अऊ ओला मैदान के सेनापति के कहे बात ला बताईन।
2KI 19:1 जब हिजकियाह राजा ह ये बात ला सुनिस, त ओह दुख म अपन ओनहा ला चीरिस अऊ बोरा के ओनहा पहिरिस अऊ यहोवा के मंदिर म गीस।
2KI 19:2 ओह महल के अधिकारी एलयाकीम, सचिव सेबना अऊ अगुवा पुरोहितमन ला, जेमन बोरा के कपड़ा पहिरे रहंय, येमन ला आमोस के बेटा यसायाह अगमजानी करा पठोईस।
2KI 19:3 ओमन ओला कहिन, “हिजकियाह ह ये कहत हे: ये दिन ह दुख अऊ फटकार अऊ निन्दा के दिन अय, येह अइसने अय, मानो लइकामन के जनमे के समय आ गे, पर दाई म ओमन ला जनम देय के ताकत नइं ए।
2KI 19:4 ये हो सकत हे कि यहोवा तोर परमेसर ह ओ मैदान के सेनापति के जम्मो बात ला सुनय, जेला ओकर मालिक, अस्सूर के राजा ह जीयत परमेसर के हंसी उड़ाय बर पठोय हवय, अऊ ये कि यहोवा तोर परमेसर ह ओकर बात ला सुनके ओला डांटय। एकरसेति ओ बांचे भाग बर पराथना कर, जेमन अभी जीयत हें।”
2KI 19:5 जब हिजकियाह राजा के अधिकारीमन यसायाह करा आईन,
2KI 19:6 तब यसायाह ह ओमन ला कहिस, “अपन मालिक ला बतावव, ‘यहोवा ह ये कहत हे: ओ बात ले झन डर, जेला तेंह सुने हस—ओ बात जेला अस्सूर के राजा के सेवकमन मोर निन्दा करत कहे हवंय।
2KI 19:7 सुन! जब ओह कोनो बिसेस खबर सुनही, त मेंह अइसे करहूं कि ओह अपन खुद के देस ला लहुंट जाही, अऊ उहां मेंह ओला तलवार ले मरवा दूहूं।’ ”
2KI 19:8 जब मैदान के सेनापति ह ये सुनिस कि अस्सूर के राजा ह लाकीस नगर ला छोंड़के चले गे हवय, त ओह लहुंट गीस अऊ देखिस कि राजा ह लिबना के बिरूध लड़त हवय।
2KI 19:9 अस्सूर के राजा सनहेरीब ला ये खबर मिलिस कि कूस के राजा तिरहाका ह ओकर बिरूध लड़ई करे बर सेना लेके आवत हे, त ओह फेर हिजकियाह मेर संदेसियामन के हांथ म ये खबर पठोईस:
2KI 19:10 “यहूदा के राजा हिजकियाह ला कहव: तोर परमेसर, जेकर ऊपर तेंह भरोसा करथस, ओह तोला ये कहिके धोखा झन देवय, ‘यरूसलेम ला अस्सूर के राजा के हांथ म नइं दिये जावय।’
2KI 19:11 तेंह ये जरूर सुने होबे कि अस्सूर के राजामन जम्मो देसमन ला पूरा नास कर दे हवंय। त का तेंह बच सकबे?
2KI 19:12 जब मोर ले पहिले के राजामन गोजान, हारान, रेसेप सहरमन के देवता अऊ तेल-अस्सार म रहइया एदेन के मनखेमन ला नास करिन, त का ओ जाति के देवतामन ओमन ला बचा सकिन?
2KI 19:13 हमात के राजा या अरपाद के राजा कहां हवय? लायर, सपरवैम, हेना अऊ इव्वा के राजामन कहां हवंय?”
2KI 19:14 हिजकियाह ला संदेसियामन ले चिट्ठी मिलिस अऊ ओह ओला पढ़िस। तब ओह यहोवा के मंदिर म गीस अऊ ओ चिट्ठी ला यहोवा के आघू म बगरा दीस।
2KI 19:15 अऊ हिजकियाह ह यहोवा ले पराथना करिस: “हे यहोवा, इसरायल के परमेसर, तेंह करूबमन के बीच म बिराजे हस, सिरिप तें ही धरती के जम्मो राजमन के ऊपर परमेसर अस। तें ही स्वरग अऊ धरती ला बनाय हस।
2KI 19:16 हे यहोवा, कान लगाके सुन; हे यहोवा, अपन आंखी ला खोलके देख; सनहेरीब के ओ बात ला सुन, जेला ओह जीयत परमेसर के हंसी उड़ाय बर लिखके भेजे हवय।
2KI 19:17 “हे यहोवा, ये बात सच ए कि अस्सूर के राजामन ये जातिमन ला अऊ ओमन के देसमन ला उजाड़ दे हवंय।
2KI 19:18 ये राजामन ओमन के देवतामन ला आगी म फटिकके नास कर दे हवंय, काबरकि ओमन देवता नइं रिहिन, पर मनखेमन के हांथ के बनाय सिरिप लकरी अऊ पथरा ही रिहिन।
2KI 19:19 एकरसेति, अब हे यहोवा, हमर परमेसर, हमन ला ओकर हांथ ले बचा, ताकि धरती के जम्मो राजमन जानंय कि सिरिप तें यहोवा ही परमेसर अस।”
2KI 19:20 तब आमोस के बेटा यसायाह ह हिजकियाह करा ये खबर पठोईस: “यहोवा, इसरायल के परमेसर ह ये कहत हे: मेंह अस्सूर के राजा सनहेरीब के बारे म तोर पराथना ला सुने हंव।
2KI 19:21 यहोवा ह ओकर बिरूध म ये बात कहे हवय: “ ‘कुंवारी बेटी सियोन ह तोला तुछ समझथे अऊ तोर हंसी उड़ाथे। बेटी यरूसलेम ह अपन मुड़ हलाथे, जब तेंह भागथस।
2KI 19:22 तेंह काकर हंसी उड़ाय हस अऊ निन्दा करे हस? काकर बिरूध म, तेंह अपन अवाज उठाय हस अऊ घमंड ले अपन आंखी उठाय हस? इसरायल के पबितर परमेसर के बिरूध!
2KI 19:23 अपन संदेसियामन के दुवारा तेंह परभू के हंसी उड़ाय हस। अऊ तेंह कहे हस, “अपन बहुंते रथमन के संग मेंह पहाड़मन के ऊंचई म चघे हंव, लबानोन के टीप तक। मेंह ओकर सबले ऊंच देवदार रूखमन ला अऊ सबले बने सनोवर रूखमन ला काट डारे हंव। मेंह ओकर सबले दुरगम भाग, ओकर जंगल के सबले सुघर भाग म हबर गे हवंव।
2KI 19:24 मेंह परदेस म कुआं खने हंव अऊ उहां पानी पीये हंव। अपन गोड़ के तलवा ले मेंह मिसर के जम्मो झरना ला सूखा दे हंव।”
2KI 19:25 “ ‘का तेंह नइं सुने? बहुंत पहिले मेंह ओला ठहिराय रहेंव; बहुंत पहिले ओकर योजना बनाय रहेंव; अब मेंह ओला पूरा करत हंव, कि तेंह गढ़वाले सहरमन ला पथरा के कुढ़ा बना दे हस।
2KI 19:26 ओमन के ताकत ह चले गे हवय, ओमन डर गे हवंय अऊ ओमन के बेजत्ती होय हवय। ओमन खेत के पऊधा सहीं अंय, हरियर कोअंर पऊधा के पीका सहीं, छानी म उगत कांदी सहीं, जऊन ह बाढ़े के पहिली सूख जाथे।
2KI 19:27 “ ‘पर मेंह जानत हंव कि तेंह कहां हस अऊ तें कब आथस अऊ जाथस अऊ कइसे तेंह मोर ऊपर गुस्सा करथस।
2KI 19:28 काबरकि तें मोर ऊपर गुस्सा करथस अऊ तोर घमंड के बात मेंह सुने हवंव, एकरसेति मेंह तोर नाक म नकेल डालहूं अऊ तोर मुहूं म अपन लगाम लगाहूं, अऊ जऊन रसता ले तेंह आय रहे ओही रसता ले तोला लहुंटा दूहूं।’
2KI 19:29 “हे हिजकियाह, तोर बर ये चिनहां होही: “ये बछर तेंह ओला खाबे, जऊन ह अपनआप जामही, अऊ दूसरा बछर ओला खाबे, जऊन ह ओकर ले पईदा होही। पर तीसरा बछर तेंह बोबे अऊ फसल लूबे, अंगूर के बारी लगाबे अऊ ओकर फर खाबे।
2KI 19:30 एक बार फेर यहूदा के राज के बांचे भाग ह खाल्हे जरी धरही अऊ ऊपर फर लगही।
2KI 19:31 काबरकि यरूसलेम ले एक बांचे भाग निकलही, अऊ सियोन पहाड़ ले बांचे मनखेमन के एक दल आही। सर्वसक्तिमान यहोवा के उत्साह ह येला पूरा करही।
2KI 19:32 “एकरसेति अस्सूर के राजा के बारे म यहोवा ह ये कहिथे: “ ‘ओह ये सहर म न तो घुसही अऊ न ही इहां एको ठन तीर चलाही। ओह येकर आघू म न तो ढाल लेके आही अऊ न ही येकर बिरूध घेराबंदी के कोनो ढलान बनाही।
2KI 19:33 जऊन रसता ले ओह आय हवय, ओही रसता ले ओह लहुंट जाही; ओह ये सहर म नइं घुसही, यहोवा ह घोसना करत हे।
2KI 19:34 मेंह अपन हित अऊ अपन सेवक दाऊद के हित म ये सहर के रकछा करहूं अऊ येला बचाहूं।’ ”
2KI 19:35 ओहीच रथिया यहोवा के स्वरगदूत ह निकलके गीस अऊ अस्सूरीमन के सिविर म एक लाख पचयासी हजार मनखेमन ला मार डारिस। जब मनखेमन बिहनियां उठिन, त देखिन कि उहां मनखेमन के लास ही लास पड़े हवय!
2KI 19:36 एकरसेति अस्सूर के राजा सनहेरीब ह सिविर ला उखानके वापिस चल दीस। ओह नीनवे सहर लहुंटिस अऊ उहां रहे लगिस।
2KI 19:37 एक दिन, जब ओह अपन देवता निसरोक के मंदिर म उपासना करत रिहिस, त ओकर बेटा अद्रमेलेक अऊ सरेसेर ह ओला तलवार ले मार डारिन, अऊ ओमन अरारात देस भाग गीन। अऊ ओकर बेटा एसरहदोन ह ओकर जगह म राजा बनिस।
2KI 20:1 ओ समय म हिजकियाह ह बेमार हो गीस अऊ मरइयाच रिहिस। तब आमोस के बेटा यसायाह अगमजानी ह ओकर मेर गीस अऊ कहिस, “यहोवा ह ये कहत हे: अपन घर-परिवार ला ठीक कर, काबरकि तेंह मरइयाच हस; तोर बेमारी ह ठीक नइं होवय।”
2KI 20:2 तब हिजकियाह ह भीथी कोति अपन मुहूं करके यहोवा ले पराथना करिस,
2KI 20:3 “हे यहोवा, सुरता कर कि मेंह कइसे सच्चई अऊ पूरा मन लगाके तोर आघू म चलत आय हंव अऊ ओ काम करे हंव जऊन ह तोर नजर म सही अय।” अऊ हिजकियाह ह फूट-फूटके रोए लगिस।
2KI 20:4 येकर पहिले कि यसायाह ह मांझा के अंगना ला पार करके जातिस, यहोवा के ये बचन ओकर करा आईस:
2KI 20:5 “लहुंट जा अऊ मोर मनखेमन ऊपर सासन करइया हिजकियाह ला कह, ‘यहोवा, तोर पुरखा दाऊद के परमेसर ये कहत हे: मेंह तोर पराथना ला सुने हंव अऊ तोर आंसू ला देखे हंव; मेंह तोर बेमारी ला ठीक करहूं। परसों तेंह यहोवा के मंदिर ला जाबे।
2KI 20:6 मेंह तोर उमर पंदरह बछर अऊ बढ़ा दूहूं। अऊ मेंह तोला अऊ ये यरूसलेम सहर ला अस्सूर के राजा के हांथ ले छोंड़ाहूं। मेंह अपन हित अऊ अपन सेवक दाऊद के हित म ये सहर के रकछा करहूं।’ ”
2KI 20:7 तब यसायाह ह राजा के सेवकमन ला कहिस, “अंजीर के एक लेप बनावव।” ओमन ओला बनाईन अऊ राजा के फोड़ा म लगाईन, अऊ राजा ह ठीक हो गीस।
2KI 20:8 हिजकियाह ह यसायाह ले पुछे रिहिस, “यहोवा ह मोला चंगा कर दीही अऊ तीसरा दिन मेंह यहोवा के मंदिर म जाहूं, येकर का चिनहां होही?”
2KI 20:9 यसायाह ह जबाब दीस, “यहोवा ह अपन बचन ला पूरा करही, ये बात के यहोवा के तोर बर ये चिनहां होही: तें बता कि छइहां ह दस कदम आघू बढ़ जावय या फेर छइहां ह दस कदम पाछू हो जावय?”
2KI 20:10 हिजकियाह ह कहिस, “छइहां के दस कदम आघू बढ़ई सधारन बात ए। बल्कि अइसन होवय कि छइहां ह दस कदम पाछू हो जावय।”
2KI 20:11 तब यसायाह अगमजानी ह यहोवा ला पुकारिस, अऊ यहोवा ह छइहां ला दस कदम पाछू कर दीस, जऊन ह कि खाल्हे आहाज के सीढ़ी ऊपर चल दे रिहिस।
2KI 20:12 ओ समय बलदान के बेटा बेबिलोन के राजा मरोदक-बलदान ह हिजकियाह करा चिट्ठी अऊ उपहार पठोईस, काबरकि ओह हिजकियाह के बेमारी के बारे म सुने रिहिस।
2KI 20:13 हिजकियाह ह दूतमन के सुवागत करिस अऊ ओमन ला अपन भंडारघर के जम्मो चीजमन ला देखाईस—सोन, चांदी, मसाला अऊ उत्तम किसम के जैतून तेल—अपन हथियार-घर अऊ अपन खजाना म रखे जम्मो चीज ला देखाईस। उहां ओकर महल या ओकर जम्मो राज म अइसन कोनो चीज नइं बांचिस, जेला हिजकियाह ह ओमन ला नइं देखाय होही।
2KI 20:14 तब यसायाह अगमजानी ह हिजकियाह राजा मेर जाके पुछिस, “ओ आदमीमन का कहिन, अऊ ओमन कहां ले आय रिहिन?” हिजकियाह ह जबाब दीस, “ओमन एक दूरिहा के देस बेबिलोन ले आय रिहिन।”
2KI 20:15 अगमजानी ह पुछिस, “ओमन तोर महल म का देखिन?” हिजकियाह ह कहिस, “ओमन मोर महल के हर चीज ला देखिन। मोर खजाना म अइसन कोनो चीज नइं ए, जेला मेंह ओमन ला नइं देखाय होहूं।”
2KI 20:16 तब यसायाह ह हिजकियाह ला कहिस, “यहोवा के बचन ला सुन:
2KI 20:17 अइसन समय जरूर आही, जब तोर महल के हर एक चीज, अऊ ओ जम्मो चीज, जेला तोर पुरखामन के दुवारा आज तक इकट्ठा करे गे हवय, ओ जम्मो ला बेबिलोन ले जाय जाही। कुछू भी चीज नइं बांचही, यहोवा ह कहत हे।
2KI 20:18 अऊ तोर कुछू संतानमन ला, तोर खुद के मांस अऊ लहू, जऊन मन तोर ले पईदा होहीं, ओमन ला घलो ले जाय जाही, अऊ ओमन बेबिलोन के राजा के महल म खोजा बन जाहीं।”
2KI 20:19 हिजकियाह ह जबाब दीस, “यहोवा के जऊन बात तेंह कहे हस, ओह बने बात ए।” काबरकि ओह सोचिस, “का मोर जिनगी भर सांति अऊ सुरकछा नइं होही?”
2KI 20:20 हिजकियाह के राज के आने घटना, अऊ ओकर जम्मो काम अऊ कइसे ओह तरिया अऊ नाली बनाके पानी सहर म लानिस, ये जम्मो बात यहूदा के राजामन के इतिहास के किताब म लिखे गे हवय।
2KI 20:21 आखिर म हिजकियाह ह अपन पुरखामन के संग हमेसा बर सुत गीस। अऊ ओकर बेटा मनस्से ह ओकर जगह म राजा बनिस।
2KI 21:1 मनस्से ह बारह साल के रिहिस, जब ओह राजा बनिस, अऊ ओह यरूसलेम म पचपन साल तक राज करिस। ओकर दाई के नांव हेपसीबा रिहिस।
2KI 21:2 ओह यहोवा के नजर म दुस्ट काम करिस; ओह ओ जातिमन के घिनित काममन के पाछू चलिस, जेमन ला यहोवा ह इसरायलीमन के आघू ले भगा दे रिहिस।
2KI 21:3 ओकर ददा हिजकियाह ह जऊन ऊंचहा जगहमन ला गिरा दे रिहिस, ओमन ला ओह फेर बनाईस; ओह बाल देवता के बेदीमन ला घलो बनाईस अऊ असेरा देवी के एक खंभा बनाईस, जइसे कि इसरायल के राजा अहाब ह करे रिहिस। ओह जम्मो तारामन के समूह ला दंडवत करके ओमन के अराधना करिस।
2KI 21:4 ओह यहोवा के ओ मंदिर म बेदीमन ला बनाईस, जेकर बारे म यहोवा ह कहे रिहिस, “यरूसलेम म मेंह अपन नांव ला रखहूं।”
2KI 21:5 यहोवा के मंदिर के दू ठन अंगना म, ओह जम्मो तारामन के समूह बर बेदीमन ला बनाईस।
2KI 21:6 ओह अपन बेटा ला आगी म बलिदान कर दीस, ओह सुभ-असुभ समय ला मानिस, सकुन-बिचार करवाईस, अऊ ओह बईगा अऊ भूत-परेत साधकमन ले सलाह लीस। ओह यहोवा के नजर म बहुंत दुस्ट काम करिस अऊ ओकर कोरोध ला भड़काईस।
2KI 21:7 ओह अपन दुवारा गढ़े असेरा के खंभा ला लीस अऊ ओला ओ मंदिर म रखिस, जेकर बारे म यहोवा ह दाऊद अऊ ओकर बेटा सुलेमान ला कहे रिहिस, “ये मंदिर अऊ यरूसलेम ला मेंह इसरायल के जम्मो गोत्र म ले चुने हंव, अऊ इहां मेंह अपन नांव ला सदाकाल बर रखहूं।
2KI 21:8 यदि इसरायलीमन सिरिप मोर दिये गे जम्मो हुकूम ला धियान देके पालन करहीं अऊ ओ जम्मो कानून ला मानहीं, जेला मोर सेवक मूसा ह दे हवय, त मेंह ओमन ला ये देस ले फेर बाहिर भटकन नइं दूहूं, जेला कि मेंह ओमन के पुरखामन ला दे हंव।”
2KI 21:9 पर मनखेमन नइं सुनिन। मनस्से ह ओमन ला इहां तक भटका दीस कि ओमन ओ जाति के मनखेमन ले घलो जादा दुस्ट काम करिन, जेमन ला यहोवा ह इसरायलीमन के आघू ले नास कर दे रिहिस।
2KI 21:10 यहोवा ह अपन सेवक अगमजानीमन के जरिये कहिस:
2KI 21:11 “यहूदा के राजा मनस्से ह ये घिनौना पाप करे हवय। ओह ओकर ले पहिले आय अमोरीमन ले घलो जादा दुस्ट काम करे हवय अऊ यहूदा के मनखेमन ले अपन मूरतीमन के पूजा करवाके ओमन ले पाप करवाय हे।
2KI 21:12 एकरसेति यहोवा, इसरायल के परमेसर ह ये कहत हे: मेंह यरूसलेम सहर अऊ यहूदा म अइसन बिपत्ति लानहूं कि ओला सुनके हर एक जन सनसनी के अनुभव करहीं।
2KI 21:13 जऊन नापे के डोरी सामरिया के ऊपर डाले गे हवय अऊ जऊन भार अहाब के घराना के ऊपर लटकाय गे हवय, ओला मेंह यरूसलेम के ऊपर घलो डालहूं। मेंह यरूसलेम ला अइसन पोंछहूं, जइसने कोनो बरतन ला पोंछथे, अऊ ओला पोंछके उल्टा रख देथे।
2KI 21:14 मेंह अपन उत्तराधिकार के बचे भाग ला तियाग दूहूं अऊ ओमन ला बईरीमन के हांथ म कर दूहूं। ओमन अपन बईरीमन के दुवारा लूटे अऊ छीने जाहीं;
2KI 21:15 ओमन मोर नजर म दुस्ट काम करे हवंय अऊ जब ले ओमन के पुरखामन मिसर देस ले निकलके आईन, तब ले आज तक मोर गुस्सा ला भड़कावत हें।”
2KI 21:16 मनस्से ह यहूदा ले पाप करवाईस, जेकर ले ओमन यहोवा के नजर म दुस्ट काम करिन; येकर अलावा, ओह अतेक निरदोसमन के खून बहाईस कि यरूसलेम के एक छोर ले लेके दूसर छोर तक खून ले भर गीस।
2KI 21:17 मनस्से के राज के आने घटनामन, अऊ ओकर जम्मो काम अऊ ओकर करे गय पाप—ये जम्मो बात यहूदा के राजामन के इतिहास के किताब म लिखे हवय।
2KI 21:18 मनस्से ह अपन पुरखामन के संग हमेसा बर सुत गीस अऊ ओला ओकर महल के बारी याने कि उज्जा के बारी म माटी दिये गीस। अऊ ओकर जगह म ओकर बेटा आमोन ह राजा बनिस।
2KI 21:19 आमोन ह बाईस साल के रिहिस, जब ओह राजा बनिस, अऊ ओह यरूसलेम म दू साल तक राज करिस। ओकर दाई के नांव मसुल्लेमेत रिहिस, जऊन ह हारूस के बेटी रिहिस अऊ योतबा के रहइया रिहिस।
2KI 21:20 राजा ह यहोवा के नजर म दुस्ट काम करिस, जइसे कि ओकर ददा मनस्से ह करे रिहिस।
2KI 21:21 जइसे ओकर ददा ह मूरतीमन के उपासना करे रिहिस, वइसे ही ओह घलो मूरतीमन के उपासना करत अऊ ओमन ला दंडवत करत पूरा अपन ददा के रसता म चलिस।
2KI 21:22 ओह यहोवा, अपन पुरखामन के परमेसर ला छोंड़ दीस, अऊ ओकर हुकूम नइं मानिस।
2KI 21:23 आमोन के करमचारीमन ओकर बिरूध साजिस करिन अऊ राजा ला ओकर महल म मार डारिन।
2KI 21:24 तब देस के मनखेमन ओ जम्मो झन ला मार डारिन, जेमन राजा आमोन के बिरूध साजिस करे रिहिन, अऊ ओमन ओकर बेटा योसियाह ला ओकर जगह म राजा बनाईन।
2KI 21:25 आमोन के राज के आने घटनामन, अऊ ओकर जम्मो काम यहूदा के राजामन के इतिहास के किताब म लिखे हवय।
2KI 21:26 ओला उज्जा के बारी के कबर म माटी दिये गीस। अऊ ओकर बेटा योसियाह ह ओकर जगह म राजा बनिस।
2KI 22:1 योसियाह ह आठ साल के रिहिस, जब ओह राजा बनिस, अऊ ओह यरूसलेम म इकतीस साल तक राज करिस। ओकर दाई के नांव यदीदा रिहिस, जऊन ह अदायाह के बेटी रिहिस अऊ ओह बोसकत के रहइया रिहिस।
2KI 22:2 राजा ह ओ काम करिस, जऊन ह यहोवा के नजर म सही रिहिस अऊ अपन पुरखा दाऊद के रसता म पूरा मन से चलिस, ओकर ले ओह न तो जेवनी कोति मुड़िस अऊ न ही डेरी कोति।
2KI 22:3 अपन राज के अठारहवां साल म राजा योसियाह ह मसुल्लाम के पोता, असलियाह के बेटा अपन सचिव सापान ला यहोवा के मंदिर म ये कहिके पठोईस:
2KI 22:4 “हिलकियाह महा पुरोहित करा जा अऊ कह कि ओह यहोवा के मंदिर म लाने गय ओ पईसा ला तियार रखे, जेला दुवारपालमन मनखेमन ले जमा करे हवंय।
2KI 22:5 ये पईसा ला ओ मनखेमन ला सऊंप दिये जावय, जऊन मन मंदिर के काम के देखरेख बर ठहिराय गे हवंय। अऊ ये मनखेमन ओ पईसा ला बनी के रूप म ओ काम करइयामन ला देवंय, जऊन मन यहोवा के मंदिर के मरम्मत के काम करत हें—
2KI 22:6 याने कि बढ़ई, भवन बनानेवाला अऊ राज-मिसतिरीमन ला देवंय अऊ मंदिर के मरम्मत बर ओमन इमारती लकरी अऊ गढ़े पथरा घलो बिसावंय।
2KI 22:7 पर जऊन पईसा ओमन ला सऊंपे गे हवय, ओ पईसा के ओमन ला लेखा-जोखा देय के जरूरत नइं ए, काबरकि ओमन अपन लेन-देन म ईमानदार अंय।”
2KI 22:8 हिलकियाह महा पुरोहित ह सचिव सापान ला कहिस, “मोला कानून के किताब यहोवा के मंदिर म मिले हवय।” हिलकियाह ह ओ किताब सापान ला दे दीस, अऊ सापान ह ओला पढ़िस।
2KI 22:9 तब सचिव सापान ह राजा करा जाके ओला बताईस: “जऊन पईसा यहोवा के मंदिर म रिहिस, ओला तोर करमचारीमन भुगतान कर दे हवंय अऊ ओला मंदिर म काम करइया अऊ देखरेख करइयामन ला सऊंप दे हवंय।”
2KI 22:10 तब सचिव सापान ह राजा ला ये घलो बताईस, “हिलकियाह पुरोहित ह मोला एक किताब दे हवय।” अऊ सापान ह राजा के आघू म ओ किताब ला पढ़के सुनाईस।
2KI 22:11 जब राजा ह कानून के किताब के बात ला सुनिस, त ओह अपन ओनहा ला चीरिस।
2KI 22:12 ओह हिलकियाह पुरोहित, सापान के बेटा अहीकाम, मीकायाह के बेटा अकबोर, सचिव सापान अऊ राजा के सेवक असायाह ला ये हुकूम दीस:
2KI 22:13 “जावव अऊ जऊन किताब मिले हवय, ओमा लिखे बात के बारे म मोर बर अऊ मनखेमन बर अऊ जम्मो यहूदा बर यहोवा ले पुछताछ करव। भयंकर ए यहोवा के कोरोध, जऊन ह हमर ऊपर भड़कत हे काबरकि हमर पुरखामन ये किताब के बात ला नइं मानिन; ओमन ओ किताब म हमर संबंध म लिखे जम्मो बात के मुताबिक नइं चलिन।”
2KI 22:14 हिलकियाह पुरोहित, अहीकाम, अकबोर, सापान अऊ असायाह बात करे बर हुलदा अगमजानीन करा गीन, जऊन ह हरहस के पोता अऊ तिकवा के बेटा सल्लूम के घरवाली रिहिस; ओह ओनहा रखे के कमरा के रखवारीन रिहिस अऊ ओह यरूसलेम के नवां बने मकान म रहत रिहिस।
2KI 22:15 हुलदा ह ओमन ला कहिस, “यहोवा, इसरायल के परमेसर ह ये कहत हे: जऊन मनखे ह तुमन ला मोर करा पठोय हवय, ओला ये कहव,
2KI 22:16 ‘यहोवा ह ये कहत हे: यहूदा के राजा ह जऊन किताब ला पढ़े हवय, ओमा लिखे हर बात के मुताबिक मेंह ये जगह अऊ इहां के मनखेमन ऊपर बिपत्ति लानेवाला हंव।
2KI 22:17 काबरकि ओमन मोला तियाग दे हवंय अऊ आने देवतामन बर धूप जलाय हवंय अऊ अपन हांथ के बनाय जम्मो मूरतीमन के दुवारा मोर कोरोध ला भड़काय हवंय, एकरसेति ये जगह ऊपर मोर कोरोध ह भड़कही अऊ येह सांत नइं होही।’
2KI 22:18 यहूदा के राजा ले कहव, जऊन ह तुमन ला यहोवा ले पुछताछ करे बर पठोय हवय, ‘जऊन बातमन ला तेंह सुने हस, ओकर बारे म यहोवा, इसरायल के परमेसर ह ये कहत हे:
2KI 22:19 काबरकि तोर मन ह उत्तरदायी होईस अऊ तेंह यहोवा के आघू म अपनआप ला नम्र करय, जब तेंह ये जगह अऊ इहां के मनखेमन के बिरूध कहे गय मोर बात ला सुनय—कि ओमन एक सराप बन जाहीं अऊ ओमन उजड़ जाहीं—अऊ काबरकि तेंह अपन ओनहा ला चीरय अऊ मोर आघू म रोवय, त मेंह घलो तोर बात ला सुनेंव, यहोवा ह घोसना करत हे।
2KI 22:20 एकरसेति मेंह तोला तोर पुरखामन संग मिला दूहूं, अऊ तोला सांति म माटी दिये जाही। तोर आंखीमन ओ जम्मो बिपत्ति ला नइं देखहीं, जेला मेंह ये जगह ऊपर लानेवाला हंव।’ ” तब ओमन वापिस जाके ओ माईलोगन के कहे बात राजा ला बताईन।
2KI 23:1 तब राजा ह यहूदा अऊ यरूसलेम के जम्मो अगुवामन ला बलाके इकट्ठा करिस।
2KI 23:2 ओह यहूदा के मनखे, यरूसलेम के निवासी, पुरोहित अऊ अगमजानीमन के संग यहोवा के मंदिर म गीस—ओमा छोटे ले लेके बड़े जम्मो मनखे रिहिन। ओह ओमन ला करार के ओ किताब के जम्मो बचन ला पढ़के सुनाईस, जऊन ह यहोवा के मंदिर म मिले रिहिस।
2KI 23:3 राजा ह खंभा करा ठाढ़ होईस अऊ यहोवा के आघू म ये कहिके ओ करार ला नवां करिस कि ओह यहोवा के पाछू चलही अऊ अपन पूरा मन अऊ अपन पूरा परान से ओकर हुकूम, नियम अऊ बिधिमन ला मानही अऊ ओ किताब म लिखे करार के बातमन ला मजबूत करही। तब जम्मो मनखेमन करार ला पूरा करे के सपथ खाईन।
2KI 23:4 राजा ह हिलकियाह महा पुरोहित ला, ओकर बाद के पद के पुरोहितमन ला, अऊ दुवारपालमन ला हुकूम दीस कि ओमन यहोवा के मंदिर ले बाल अऊ असेरा अऊ अकास के जम्मो तारामन बर बने जम्मो चीजमन ला हटवा दें। ओह ओ चीजमन ला यरूसलेम के बाहिर किदरोन घाटी म जला दीस अऊ ओमन के राख ला बेतेल ले गीस।
2KI 23:5 ओह ओ मूरती-पूजा करइया पुरोहितमन ला निकाल दीस, जेमन ला यहूदा के राजामन यहूदा के नगर के ऊंचहा जगहमन म अऊ यरूसलेम के आसपास धूप जलाय बर ठहिराय रिहिन—येमन बाल, सूरज अऊ चंदा, तारा मंडल अऊ जम्मो तारागन बर धूप जलावंय।
2KI 23:6 ओह यहोवा के मंदिर ले असेरा के खंभा ला यरूसलेम के बाहिर किदरोन घाटी म ले गीस अऊ उहां ओला जला दीस। ओह ओला कुचरके चूरा बना दीस अऊ ओकर धुर्रा ला सधारन मनखेमन के कबर म बिखेर दीस।
2KI 23:7 ओह मंदिर के ओ पुरूस बेस्यामन के घरमन ला घलो गिरा दीस, जेमन यहोवा के मंदिर म रिहिन अऊ जिहां माईलोगनमन असेरा देवी बर कपड़ा बुने के काम करत रिहिन।
2KI 23:8 योसियाह ह यहूदा के नगरमन ले जम्मो पुरोहितमन ला बलाईस अऊ गेबा ले लेके बेरसेबा तक ओ ऊंचहा जगहमन ला असुध कर दीस, जिहां पुरोहितमन धूप जलात रिहिन। ओह सहर के हाकिम यहोसू के दुवार के पास के ओ कपाट ला टोरके गिरा दीस, जऊन ह सहर के दुवार के डेरी कोति रिहिस।
2KI 23:9 हालाकि ऊंचहा जगह के पुरोहितमन यरूसलेम म यहोवा के बेदी करा सेवा नइं करत रिहिन, पर ओमन अपन संगी पुरोहितमन के संग बिगर खमीर के रोटी ला खावत रिहिन।
2KI 23:10 ओह तोपेत ला असुध कर दीस, जऊन ह बेन-हिन्नोम के घाटी म रिहिस, ताकि कोनो मोलेक देवता बर अपन बेटा या बेटी ला आगी म बलिदान करे म ओकर उपयोग झन कर सकंय।
2KI 23:11 ओह दुवार ले लेके यहोवा के मंदिर तक ओ घोड़ामन ला हटा दीस, जेमन ला यहूदा के राजामन सूरज ला अरपन करे रिहिन। ओ घोड़ामन नातान-मेलेक नांव के एक करमचारी के कमरा के लकठा के अंगना म रिहिन। योसियाह ह तब सूरज ला अरपन करे गे रथमन ला जला दीस।
2KI 23:12 ओह आहाज के ऊपर के कमरा के लकठा म, छत म यहूदा के राजामन के बनाय बेदीमन ला गिरा दीस, अऊ ओह यहोवा के मंदिर के दूनों अंगना म मनस्से के बनाय बेदीमन ला घलो गिरा दीस। ओह ओमन ला उहां ले हटाके ओमन के कुटा-कुटा कर दीस अऊ कुड़ा-कचरा ला किदरोन के घाटी म फेंकवा दीस।
2KI 23:13 राजा ह ओ ऊंचहा जगहमन ला घलो असुध कर दीस, जेमन बेईमानी के पहाड़ी के दक्खिन कोति यरूसलेम के पूरब म रिहिन—येमन ला इसरायल के राजा सुलेमान ह सीदोनीमन के दुस्ट देवी असतोरेत, मोआब के दुस्ट देवता कमोस, अऊ अमोन के मनखेमन के घिनित देवता मोलेक बर बनाय रिहिस।
2KI 23:14 योसियाह ह देवतामन ला अरपित पथरामन ला चूर-चूर कर दीस अऊ असेरा के खंभामन ला काट डारिस अऊ ओ जगहमन ला मनखे के हाड़ामन ले भर दीस।
2KI 23:15 अऊ त अऊ बेतेल के बेदी, नबात के बेटा यरोबाम के बनाय ऊंचहा जगह, जऊन ह इसरायल ले पाप करवाय रिहिस—येमन ला घलो ओह गिरा दीस। ओह ऊंचहा जगह ला जला दीस अऊ येला कुचरके चूरा बना दीस, अऊ असेरा के खंभा ला घलो जला दीस।
2KI 23:16 तब योसियाह ह अपन आसपास देखिस, अऊ ओला पहाड़ी कोति कबरमन दिखिन, त ओह कबरमन ले हाड़ामन ला हटवाईस अऊ ओ हाड़ामन ला बेदी के ऊपर जलाके ओला असुध कर दीस। ये बात ह यहोवा के ओ बचन के मुताबिक होईस, जेला परमेसर के जन ह अगमबानी करके घोसना करे रिहिस।
2KI 23:17 राजा ह पुछिस, “ओ कबर के पथरा का ए, जेला मेंह देखत हंव?” सहर के मनखेमन कहिन, “येह बताथे कि येह परमेसर के ओ मनखे के कबर अय, जऊन ह यहूदा ले आईस अऊ बेतेल के बेदी के बिरूध ओ बात के घोसना करिस, जेला तेंह बेदी के संग करे हस।”
2KI 23:18 राजा ह कहिस, “ओला छोंड़ दव। कोनो ओकर हाड़ामन ला झन हटाय।” एकरसेति ओमन ओकर हाड़ामन ला अऊ सामरिया ले आय अगमजानी के हाड़ामन ला छोंड़ दीन।
2KI 23:19 जइसने योसियाह बेतेल म करे रिहिस, वइसने ही ओह ऊंचहा जगहमन के ओ जम्मो देव-स्थलमन ला गिरा दीस, जेमन ला इसरायल के राजामन सामरिया के नगरमन म बनाय रिहिन अऊ जेकर कारन यहोवा के गुस्सा भड़के रिहिस।
2KI 23:20 योसियाह ह ओ ऊंचहा जगहमन के जम्मो पुरोहितमन ला बेदीमन के ऊपर मार डारिस अऊ मनखेमन के हाड़ा ला ओमन के ऊपर जला दीस। तब ओह यरूसलेम वापिस चल दीस।
2KI 23:21 राजा ह जम्मो मनखेमन ला ये हुकूम दीस: “करार के ये किताब म लिखे मुताबिक यहोवा, अपन परमेसर बर फसह के तिहार मनावव।”
2KI 23:22 न तो नियायीमन के दिन म, जऊन मन इसरायल के अगुवई करिन, अऊ न ही इसरायल के राजा अऊ यहूदा के राजामन के दिन म अइसने फसह के तिहार मनाय गे रिहिस।
2KI 23:23 पर योसियाह राजा के सासन के अठारहवां साल म यहोवा बर यरूसलेम म ये फसह तिहार मनाय गीस।
2KI 23:24 येकर अलावा, योसियाह ह जादू-टोना करइया, भूत-परेत साधक, घर म रखे देवता, मूरती, अऊ यहूदा अऊ यरूसलेम के जम्मो घिनित चीजमन ला हटा दीस। ये काम ओह ओ किताब म लिखे कानून के बात ला पूरा करे बर करिस, जऊन ह हिलकियाह पुरोहित ला यहोवा के मंदिर म मिले रिहिस।
2KI 23:25 न तो योसियाह के पहिले अऊ न ही ओकर बाद कोनो अइसने राजा होईस, जऊन ह ओकर सहीं अपन जम्मो हिरदय अऊ अपन जम्मो परान अऊ अपन जम्मो ताकत ले मूसा के जम्मो कानून के मुताबिक यहोवा के रसता म चले हो।
2KI 23:26 तभो ले, यहोवा के ओ भयंकर कोरोध ह सांत नइं होईस, जऊन ह यहूदा के बिरूध भड़के रिहिस, काबरकि मनस्से ह ओकर कोरोध ला भड़काय बर बहुंते दुस्ट काम करे रिहिस।
2KI 23:27 एकरसेति यहोवा ह कहिस, “मेंह यहूदा ला घलो अपन आघू ले हटा दूहूं, जइसे कि मेंह इसरायल ला हटा दे हंव, अऊ मेंह यरूसलेम ला अस्वीकार करहूं, ओ सहर जेला मेंह चुनेंव, अऊ ये मंदिर ला घलो अस्वीकार करहूं, जेकर बारे म मेंह कहे रहेंव, ‘मोर नांव उहां होही।’”
2KI 23:28 योसियाह के राज के आने घटना, अऊ ओकर जम्मो काम यहूदा के राजामन के इतिहास के किताब म लिखे हवंय।
2KI 23:29 जब योसियाह ह राजा रिहिस, त मिसर के राजा फिरौन नको ह अस्सूर के राजा के मदद करे बर फरात नदी करा गीस। योसियाह राजा ओकर ले लड़ई करे बर आघू बढ़िस, पर नको ह ओकर सामना करके ओला मगिद्दो सहर म मार डारिस।
2KI 23:30 योसियाह के सेवकमन ओकर लास ला मगिद्दो ले यरूसलेम एक रथ म लानिन अऊ ओकर खुद के कबर म माटी दीन। अऊ देस के मनखेमन योसियाह के बेटा यहोआहाज ला लीन अऊ ओकर अभिसेक करके ओला ओकर ददा के जगह म राजा बनाईन।
2KI 23:31 यहोआहाज ह तेईस साल के रिहिस, जब ओह राजा बनिस, अऊ ओह यरूसलेम म तीन महिना राज करिस। ओकर दाई के नांव हमूतल रिहिस, जऊन ह यरमियाह के बेटी रिहिस, अऊ ओह लिबना के रहइया रिहिस।
2KI 23:32 यहोआहाज ह यहोवा के नजर म दुस्ट काम करिस, जइसे कि ओकर पहिले के राजामन करे रिहिन।
2KI 23:33 फिरौन नको ह ओला हमात देस के रिबला नगर म संकली म बांधके रखिस, ताकि ओह यरूसलेम म राज झन कर सकय, अऊ ओह यहूदा देस ऊपर एक सौ टेलेन्ट चांदी अऊ एक टेलेन्ट सोन के कर लगा दीस।
2KI 23:34 फिरौन नको ह योसियाह के बेटा एलयाकीम ला ओकर ददा योसियाह के जगह म राजा बनाईस अऊ ओकर नांव एलयाकीम ला बदलके यहोयाकीम रख दीस। पर ओह यहोआहाज ला मिसर ले गीस, जिहां यहोआहाज के मिरतू हो गीस।
2KI 23:35 यहोयाकीम ह फिरौन नको के मांग के मुताबिक ओला सोन अऊ चांदी दीस। पर अइसने करे बर, ओह देस के ऊपर कर लगाईस अऊ देस के मनखेमन ले ओमन के संपत्ति के हिसाब से जबरदस्ती सोन अऊ चांदी के वसूली करिस।
2KI 23:36 यहोयाकीम ह पच्चीस साल के रिहिस, जब ओह राजा बनिस, अऊ ओह यरूसलेम म गियारह साल तक राज करिस। ओकर दाई के नांव जबीदा रिहिस, जऊन ह पदायाह के बेटी रिहिस; जबीदा ह रूमा नगर के रहइया रिहिस।
2KI 23:37 यहोयाकीम ह यहोवा के नजर म दुस्ट काम करिस, जइसे कि ओकर पहिले के राजामन करे रिहिन।
2KI 24:1 यहोयाकीम के राज के समय, बेबिलोन के राजा नबूकदनेसर ह ओकर देस ऊपर हमला करिस, अऊ यहोयाकीम ह तीन साल तक ओकर अधीन म रिहिस। ओकर बाद ओह नबूकदनेसर के बिरूध बिदरोह करिस।
2KI 24:2 तब यहोवा ह यहूदा ला नास करे बर ओकर बिरूध बेबिलोनी, अरामी, मोआबी अऊ अमोनी हमला करइयामन ला पठोईस अऊ येह यहोवा के ओ बचन के मुताबिक होईस, जेकर घोसना ओकर सेवक अऊ अगमजानीमन करे रिहिन।
2KI 24:3 सही म, ये बात यहूदा के ऊपर यहोवा के हुकूम के मुताबिक होईस, ताकि राजा मनस्से के दुवारा करे गे पाप अऊ निरदोसमन के खून बहाय के संगे-संग ओकर दुवारा करे गे जम्मो दुस्ट काम के कारन,
2KI 24:4 यहोवा ह यहूदा ला अपन आघू ले हटावय। काबरकि मनस्से ह यरूसलेम ला निरदोस मनखेमन के खून ले भर दे रिहिस, अऊ यहोवा ह ओला छेमा नइं करे चाहत रिहिस।
2KI 24:5 यहोयाकीम के राज के आने घटना, अऊ ओकर जम्मो काम यहूदा के राजामन के इतिहास के किताब म लिखे हवंय।
2KI 24:6 यहोयाकीम ह हमेसा बर अपन पुरखामन संग सुत गीस। अऊ ओकर जगह म ओकर बेटा यहोयाकीन राजा बनिस।
2KI 24:7 मिसर देस के राजा फेर कभू अपन देस ले बाहिर नइं गीस, काबरकि बेबिलोन के राजा ह मिसर के नरवा ले लेके फरात नदी तक ओकर जम्मो राज ला ले लेय रिहिस।
2KI 24:8 यहोयाकीन ह अठारह साल के रिहिस, जब ओह राजा बनिस, अऊ ओह यरूसलेम म तीन महिना तक राज करिस। ओकर दाई के नांव नहुस्ता रिहिस, जऊन ह एलनातान के बेटी रिहिस; नहुस्ता ह यरूसलेम के रहइया रिहिस।
2KI 24:9 यहोयाकीन ह यहोवा के नजर म दुस्ट काम करिस, जइसे कि ओकर ददा ह करे रिहिस।
2KI 24:10 ओ समय बेबिलोन के राजा नबूकदनेसर के सेना के अधिकारीमन आके यरूसलेम ला घेर लीन,
2KI 24:11 अऊ नबूकदनेसर खुद सहर म आईस, जब ओकर अधिकारीमन सहर ला घेरे रिहिन।
2KI 24:12 यहूदा के राजा यहोयाकीन, ओकर दाई, ओकर सेवकमन, ओकर परभावसाली मनखेमन, अऊ ओकर करमचारीमन—जम्मो के जम्मो बेबिलोन के राजा के आघू म समरपन कर दीन। बेबिलोन के राजा ह अपन राज के आठवां साल म यहोयाकीन ला बंदी बना लीस।
2KI 24:13 नबूकदनेसर ह यहोवा के मंदिर अऊ राजमहल ले खजाना ला निकाल लीस, अऊ इसरायल के राजा सुलेमान ह यहोवा के मंदिर बर जऊन सोन के चीजमन ला बनाय रिहिस, ओमन ला ओह काट डारिस।
2KI 24:14 ओह पूरा यरूसलेम ला बंधुवई म ले गीस: येमा जम्मो अधिकारी अऊ योद्धामन, अऊ जम्मो कुसल मजदूर अऊ सिल्पकारमन रिहिन; येमन के संखिया दस हजार रिहिस। देस के सबले गरीब मनखेमन ला ही छोंड़ दिये गीस।
2KI 24:15 नबूकदनेसर ह यहोयाकीन ला बंदी बनाके बेबिलोन ले गीस। ओह राजा के दाई, ओकर घरवाली, ओकर करमचारी अऊ देस के परभावसाली मनखेमन ला घलो यरूसलेम ले बेबिलोन ले गीस।
2KI 24:16 बेबिलोन के राजा ह सात हजार लड़ई करइया मनखेमन के पूरा सेना ला घलो बेबिलोन ले गीस, अऊ संग म एक हजार कुसल मजदूर अऊ कारीगरमन ला ले गीस।
2KI 24:17 बेबिलोन के राजा ह यहोयाकीन के कका मतनयाह ला ओकर जगह म राजा बनाईस अऊ ओकर नांव ला बदलके सिदकियाह रखिस।
2KI 24:18 सिदकियाह ह इक्कीस साल के रिहिस, जब ओह राजा बनिस, अऊ ओह यरूसलेम म गियारह साल तक राज करिस। ओकर दाई के नांव हमूतल रिहिस, जऊन ह यरमियाह के बेटी रिहिस; हमूतल ह लिबना सहर के रिहिस।
2KI 24:19 सिदकियाह ह यहोवा के नजर म दुस्ट काम करिस, जइसने यहोयाकीम ह करे रिहिस।
2KI 24:20 यहोवा के गुस्सा के कारन ये जम्मो बात यरूसलेम अऊ यहूदा ऊपर होईस, अऊ आखिर म, यहोवा ह ओमन ला अपन आघू ले भगा दीस। सिदकियाह ह बेबिलोन के राजा के बिरूध बिदरोह करिस।
2KI 25:1 सिदकियाह के राज के नौवां साल के दसवां महिना के दसवां दिन, बेबिलोन के राजा नबूकदनेसर ह अपन जम्मो सेना के संग यरूसलेम के बिरूध लड़ई करे बर निकलिस। ओह सहर के बाहिर डेरा डालिस अऊ सहर ला चारों कोति ले घेर लीस।
2KI 25:2 सहर म ये घेराबंदी सिदकियाह राजा के गियारहवां साल तक रिहिस।
2KI 25:3 चौथा महिना के नौवां दिन ले सहर म अकाल के असर अतेक भयंकर हो गीस कि मनखेमन बर खाय बर कुछू नइं रिहिस।
2KI 25:4 तब सहर के दीवार ला टोर दिये गीस, अऊ पूरा सेना ह रथिया राजा के बारी के लकठा म दू ठन दीवार के बीच बने दुवार ले भाग गीस, हालाकि बेबिलोनीमन सहर ला घेरे रिहिन। ओमन अराबा कोति भागिन,
2KI 25:5 पर बेबिलोनी सेना ह राजा के पीछा करिस अऊ यरीहो के मैदान म ओकर करा हबर गीस। राजा के जम्मो सैनिकमन ओकर ले अलग होके तितिर-बितिर हो गीन,
2KI 25:6 अऊ राजा ला पकड़ लिये गीस। ओला रिबला सहर म बेबिलोन के राजा करा लाने गीस, जिहां ओला सजा सुनाय गीस।
2KI 25:7 ओमन सिदकियाह के बेटामन ला ओकर आंखी के आघू म मार डारिन। तब ओमन ओकर आंखीमन ला निकाल लीन अऊ ओला कांसा के बेड़ीमन म जकड़के बेबिलोन ले गीन।
2KI 25:8 बेबिलोन के राजा नबूकदनेसर के राज के उन्नीसवां साल के पांचवां महिना के सातवां दिन, बेबिलोन के राजा के एक अधिकारी, साही पहरेदारमन के सेनापति नबूजरदान ह यरूसलेम आईस।
2KI 25:9 ओह यहोवा के मंदिर, राजमहल अऊ यरूसलेम के जम्मो घरमन म आगी लगा दीस। हर एक बड़े भवन ला ओह जला दीस।
2KI 25:10 साही पहरेदारमन के सेनापति के अगुवई म, बेबिलोनीमन के जम्मो सेना ह यरूसलेम के चारों कोति के दीवारमन ला गिरा दीस।
2KI 25:11 पहरेदारमन के सेनापति नबूजरदान ह सहर म बचे मनखेमन ला, बाकि बचे सधारन मनखे अऊ ओ मनखे जऊन मन बेबिलोन के राजा कोति भागे रिहिन—ओ जम्मो ला बंधुवा करके ले गीस।
2KI 25:12 पर सेनापति ह देस के कुछू बहुंत गरीब मनखेमन ला अंगूर के बारी अऊ खेतमन म काम करे बर छोंड़ दीस।
2KI 25:13 बेबिलोनीमन यहोवा के मंदिर के कांसा के खंभामन ला, सरकनेवाला सहारामन ला अऊ कांसा के हौज ला टोर दीन अऊ ओमन कांसा ला बेबिलोन ले गीन।
2KI 25:14 ओमन हंड़िया, बेलचा, दीया के बाती ला कतरे के कतरनी, बरतन अऊ मंदिर के सेवा म उपयोग होवइया जम्मो कांसा के चीजमन ला ले गीन।
2KI 25:15 धूपदान अऊ छिंचे के कटोरामन—ओ चीज, जेमन सुध सोन या चांदी के बने रिहिन, ओ जम्मो ला साही पहरेदारमन के सेनापति ह ले गीस।
2KI 25:16 यहोवा के मंदिर बर सुलेमान के दुवारा बनाय गे दूनों खंभा, हौज अऊ सरकनेवाला सहारामन के कांसा ह अतेक जादा रिहिस कि ओला तऊले नइं जा सकिस।
2KI 25:17 हर एक खंभा के ऊंचई अठारह क्यूबीट रिहिस। एक खंभा के ऊपर कांसा के बने सिरा ह तीन क्यूबीट ऊंचा रिहिस, जेमा चारों कोति कांसा के जाली अऊ अनार बनाके सजाय गे रिहिस। आने खंभा घलो जालीदार सजावट के संग वइसने ही रिहिस।
2KI 25:18 पहरेदारमन के सेनापति ह मुखिया पुरोहित सरायाह, पद म ओकर बाद वाला पुरोहित सपनयाह अऊ तीन झन दुवारपाल ला कैदी के रूप म ले गीस।
2KI 25:19 सहर म जऊन मन बांचे रिहिन, ओमा के सैनिकमन के मुखिया अधिकारी, अऊ पांच साही सलाहकार ला ओह ले गीस। ओह ओ सचिव ला घलो ले गीस, जऊन ह देस के मनखेमन के जरूरी सैनिक सेवा भरती के मुखिया अधिकारी रिहिस। जरूरी सैनिक सेवा के साठ झन सहर म मिलिन।
2KI 25:20 सेनापति नबूजरदान ओ जम्मो झन ला लीस अऊ ओमन ला रिबला म बेबिलोन के राजा करा लानिस।
2KI 25:21 हमात देस के रिबला म, राजा ह ओमन ला मरवा दीस। ये किसम ले यहूदा ह अपन देस ले दूर बंधुवई म चल दीस।
2KI 25:22 जऊन मनखेमन यहूदा म छूट गीन, ओमन के ऊपर बेबिलोन के राजा नबूकदनेसर ह गदलयाह ला अधिकारी ठहिरा दीस, जऊन ह अहीकाम के बेटा अऊ सापान के पोता रिहिस।
2KI 25:23 जब सेना के जम्मो अधिकारी अऊ ओमन के मनखेमन ये सुनिन कि बेबिलोन के राजा ह गदलयाह ला राजपाल के रूप म ठहिराय हवय, त ओमन मिसपा म गदलयाह करा आईन—येमा नतनयाह के बेटा इसमायल, कारेह के बेटा योहानान, नतोपाती के रहइया तनहूमेत के बेटा सरायाह, माकाती के बेटा याजनयाह, अऊ ओमन के मनखेमन रिहिन।
2KI 25:24 गदलयाह ह ओमन ला अऊ ओमन के मनखेमन ला बिसवास दिलाय बर कसम खाके ये कहिस, “बेबिलोन के करमचारीमन ले झन डरव, देस म बस जावव अऊ बेबिलोन के राजा के सेवा करव, तब तुम्हर भलई होही।”
2KI 25:25 पर सातवां महिना म इसमायल, जऊन ह नतनयाह के बेटा अऊ एलीसामा के पोता रिहिस अऊ राज-परिवार के रिहिस; ओह दस झन मनखे ला लेके आईस अऊ गदलयाह ला मार डारिस अऊ मिसपा म ओकर संग रहइया यहूदा के मनखे अऊ बेबिलोनी मनखेमन ला घलो मार डारिस।
2KI 25:26 येकर कारन, छोटे ले लेके बड़े जम्मो मनखे अऊ सेना के अधिकारीमन बेबिलोनी मनखेमन के डर के मारे मिसर देस भाग गीन।
2KI 25:27 यहूदा के राजा यहोयाकीन के बंधुवई के सैंतीसवां साल म, जब एवील-मरोदक ह बेबिलोन के राजा बनिस, त ओ साल ओह यहूदा के राजा यहोयाकीन ला जेल ले छोंड़ दीस। ओह ये काम बारहवां महिना के सत्ताईसवां दिन करिस।
2KI 25:28 ओह ओकर संग मया ले बात करिस अऊ ओला ओ राजामन ले एक ऊंच आदर के पद दीस, जेमन ओकर संग बेबिलोन म रिहिन।
2KI 25:29 तब यहोयाकीन ह अपन जेल के कपड़ा ला उतार लीस अऊ जिनगी भर हर दिन राजा के मेज म जेवन करिस।
2KI 25:30 राजा ह यहोयाकीन के हर दिन के खरचा बर एक भत्ता ठहिराय रिहिस, जऊन ह ओला ओकर जिनगी भर मिलिस।
1CH 1:1 आदम, सेत, एनोस,
1CH 1:2 केनान, महललेल, येरेद,
1CH 1:3 हनोक, मतूसेलह, लेमेक, नूह।
1CH 1:4 नूह के बेटामन: सेम, हाम अऊ येपेत।
1CH 1:5 येपेत के बेटामन: गोमेर, मागोग, मादै, यावान, तूबल, मेसेक अऊ तीरास।
1CH 1:6 गोमेर के बेटामन: असकनज, रीपत अऊ तोगरमा।
1CH 1:7 यावान के बेटामन: एलीसाह, तरसीस, कित्ती अऊ रोदानीमन।
1CH 1:8 हाम के बेटामन: कूस, मिसर, पूत अऊ कनान।
1CH 1:9 कूस के बेटामन: सबा, हवीला, सबता, रामा अऊ सबतका। रामा के बेटामन: सेबा अऊ ददान।
1CH 1:10 कूस ह निमरोद के ददा रिहिस; निमरोद ह धरती म पहिला बड़े बीर होईस।
1CH 1:11 मिसर ह लूदी, अनामी, लहाबी, नपतूही,
1CH 1:12 पतरूसी, कसलूही (जेकर ले पलिस्तीमन आईन) अऊ कपतोरी मनखेमन के ददा रिहिस।
1CH 1:13 कनान के बड़े बेटा सीदोन रिहिस, तेकर पाछू हित्ती,
1CH 1:14 यबूसी, अमोरी, गिरगासी,
1CH 1:15 हिब्बी, अरकी, सीनी,
1CH 1:16 अरवदी, समारी, अऊ हमातीमन घलो होईन।
1CH 1:17 सेम के बेटामन: एलाम, अस्सूर, अर्पछद, लूद अऊ अराम। अराम के बेटामन: ऊस, हूल, गेतेर अऊ मेसेक।
1CH 1:18 अर्पछद ह सेलह के ददा रिहिस, अऊ सेलह ह एबेर के ददा रिहिस।
1CH 1:19 एबेर के दू झन बेटा होईन: एक के नांव पेलेग रखे गीस, काबरकि ओकर समय म धरती ह बंट गीस; ओकर भाई के नांव योकतान रिहिस।
1CH 1:20 योकतान ह अलमोदाद, सेलेप, हसरमावेत, येरह
1CH 1:21 हदोराम, ऊजाल, दिकला,
1CH 1:22 ओबाल, अबीमाएल, सेबा,
1CH 1:23 ओपीर हवीला अऊ योबाब के ददा रिहिस। ये जम्मो योकतान के बेटा रिहिन।
1CH 1:24 सेम, अर्पछद, सेलह,
1CH 1:25 एबेर, पेलेग, रू,
1CH 1:26 सरूग, नाहोर, तेरह
1CH 1:27 अऊ अब्राम (जेह अब्राहम घलो कहाथे)।
1CH 1:28 अब्राहम के बेटामन: इसहाक अऊ इसमायल।
1CH 1:29 ओमन के बंस येमन रिहिन: इसमायल के बड़े बेटा नबायोत, तब केदार, अदबेल, मिबसाम,
1CH 1:30 मिस्मा, दूमा, मस्सा, हदद, तेमा,
1CH 1:31 यतूर, नापीस अऊ केदमा।
1CH 1:32 अब्राहम के रखैल कतूरा के बेटामन: जिमरान, योकसान, मदान, मिदयान, यिसबाक अऊ सूह। योकसान के बेटामन: सेबा अऊ ददान।
1CH 1:33 मिदयान के बेटामन: एपा, एपेर, हनोक, अबीदा अऊ एलदा।
1CH 1:34 अब्राहम ह इसहाक के ददा रिहिस। इसहाक के बेटामन: एसाव अऊ इसरायल।
1CH 1:35 एसाव के बेटामन: एलीपज, रूएल, यूस, यालाम अऊ कोरह।
1CH 1:36 एलीपज के बेटामन: तेमान, ओमार, सपो, गाताम अऊ कनज; अऊ तिमना कोति ले अमालेक।
1CH 1:37 रूएल के बेटामन: नहत, जेरह, सम्मा अऊ मिज्जा।
1CH 1:38 सेईर के बेटामन: लोतान, सोबाल, सिबोन, अना, दीसोन, एसेर अऊ दीसान।
1CH 1:39 लोतान के बेटामन: होरी अऊ होमाम। तिमना ह लोतान के बहिनी रिहिस।
1CH 1:40 सोबाल के बेटामन: आलवान, मानहत, एबाल, सपो अऊ ओनाम। सिबोन के बेटामन: अय्या अऊ अना।
1CH 1:41 अना के बेटा: दीसोन। दीसोन के बेटामन: हेमदान, एसबान, यितरान अऊ करान।
1CH 1:42 एसेर के बेटामन: बिलहान, जाबान अऊ अकान। दीसान के बेटामन: ऊस अऊ अरान।
1CH 1:43 कोनो इसरायली राजा के एदोम म राज करे के पहिली येमन ओ राजा रिहिन, जेमन एदोम म राज करिन: बेओर के बेटा बेला, जेकर सहर के नांव दिनहाबा रखे गीस।
1CH 1:44 बेला के मरे के बाद, ओकर जगह म बोसरा के रहइया जेरह के बेटा योबाब राजा बनिस।
1CH 1:45 योबाब के मरे के बाद, तेमानीमन के देस के हूसाम ओकर जगह म राजा होईस।
1CH 1:46 जब हूसाम ह मर गीस, त बदद के बेटा हदद ओकर जगह म राजा होईस: येह ओही अय, जऊन ह मोआब के देस म मिदयानीमन ला हराईस। ओकर सहर के नांव अबीत रखे गीस।
1CH 1:47 हदद के मरे के बाद, मसरेका नगर के रहइया समला ह ओकर जगह म राजा होईस।
1CH 1:48 जब समला ह मर गीस, त साऊल ह ओकर जगह म राजा होईस, जेह नदी के तीर म बसे रहोबोत नगर के रिहिस।
1CH 1:49 साऊल के मरे के बाद, अकबोर के बेटा बाल-हानान ओकर जगह म राजा होईस।
1CH 1:50 बाल-हानान के मरे के बाद, ओकर जगह म हदद राजा होईस। ओकर सहर के नांव पाऊ रखे गीस, अऊ ओकर घरवाली के नांव महेतबेल रिहिस, जऊन ह मतरेद के बेटी अऊ मे-जाहब के नतनीन रिहिस।
1CH 1:51 हदद घलो मर गीस। एदोम के मुखियामन येमन रिहिन: तिमना, अलबा, यतेत,
1CH 1:52 ओहोलीबामा, एला, पीनोन,
1CH 1:53 कनज, तेमान, मिबसार,
1CH 1:54 मगदीएल अऊ ईराम।
1CH 2:1 येमन इसरायल के बेटा रिहिन: रूबेन, सिमोन, लेवी, यहूदा, इस्साकार, जबूलून,
1CH 2:2 दान, यूसुफ, बिनयामीन, नपताली, गाद अऊ आसेर।
1CH 2:3 यहूदा के बेटामन: एर, ओनान, अऊ सेलह। ओकर ये तीनों बेटामन एक कनानी माईलोगन, जऊन ह सूआ के बेटी रिहिस, ओकर ले जनमे रिहिन। (यहूदा के पहिलांत बेटा एर ह यहोवा के नजर म दुस्ट मनखे रिहिस, ये खातिर यहोवा ह ओला मार दीस।)
1CH 2:4 यहूदा के बहू तामार ह यहूदा कोति ले पेरेस अऊ जेरह ला जनम दीस।
1CH 2:5 पेरेस के बेटामन: हेसरोन अऊ हामूल।
1CH 2:6 जेरह के बेटामन: जिमरी, एतान, हेमान, कलकोल अऊ दारा। जम्मो मिलाके पांच झन बेटा रिहिन।
1CH 2:7 करमी के बेटा: आकार, येह अरपन करे गे चीज के बारे म बिसवासघात करके इसरायलीमन ला दुख देवइया होईस।
1CH 2:8 एतान के बेटा: अजरयाह।
1CH 2:9 हेसरोन के बेटामन: यरहमेल, राम अऊ कालेब।
1CH 2:10 राम ह अमीनादाब के ददा रिहिस, अऊ अम्मीनादाब ह नहसोन के ददा रिहिस, जऊन ह यहूदा के मनखेमन के मुखिया होईस।
1CH 2:11 नहसोन ह सलमोन के ददा रिहिस अऊ सलमोन ह बोअज के ददा रिहिस,
1CH 2:12 बोअज ह ओबेद के ददा रिहिस अऊ ओबेद ह यिसै के ददा रिहिस।
1CH 2:13 यिसै के पहिलांत बेटा एलीआब रिहिस; दूसर बेटा अबीनादाब रिहिस, तीसरा बेटा सिमा,
1CH 2:14 चौथा बेटा नतनेल, पांचवां रदै,
1CH 2:15 छठवां ओसेम अऊ सातवां दाऊद रिहिस।
1CH 2:16 ओमन के बहिनीमन सरूयाह अऊ अबीगैल रिहिन। सरूयाह के तीन झन बेटा होईन: अबीसै, योआब अऊ असाहेल।
1CH 2:17 अबीगैल ह अमासा के दाई रिहिस, जेकर ददा इसमायली येतेर रिहिस।
1CH 2:18 हेसरोन के बेटा कालेब के घरवाली अजूबा (अऊ यरीओत) ले ओकर बेटामन जनमे रिहिन, जेमन के नांव रिहिस: येसेर, सोबाब अऊ अरदोन।
1CH 2:19 जब अजूबा मर गीस तब कालेब ह एपरात ले बिहाव करिस, जेकर ले हूर जनमिस।
1CH 2:20 हूर ह ऊरी के ददा रिहिस अऊ ऊरी ह बसलेल के।
1CH 2:21 बाद म, हेसरोन, अपन साठ बरस के उमर म गिलाद के ददा माकीर के बेटी ले बिहाव करिस, जेकर ले सगूब जनमिस।
1CH 2:22 सगूब ह याईर के ददा रिहिस जेकर गिलाद देस म तेईस ठन सहर रिहिस।
1CH 2:23 (पर गसूर अऊ अराम, हव्वोत-याईर के बस्ती अऊ गांवमन के संगे-संग कनात ऊपर घलो कब्जा कर लीन, ये जम्मो साठ ठन सहर रिहिन।)
1CH 2:24 कालेब-एपराता म हेसरोन के मरे के बाद, हेसरोन के घरवाली, अबियाह ह तकोआ के ददा असहूर ला जनम दीस।
1CH 2:25 हेसरोन के बड़े बेटा यरहमेल के बेटामन: ओकर बड़े बेटा राम, बूना, ओरेन, ओसेम अऊ अहियाह।
1CH 2:26 यरहमेल के एक झन अऊ घरवाली रिहिस, जेकर नांव अतारा रिहिस; ओह ओनाम के दाई रिहिस।
1CH 2:27 यरहमेल के बड़े बेटा राम के बेटामन: मास, यामीन अऊ एकेर।
1CH 2:28 ओनाम के बेटामन: सम्मै अऊ यादा। सम्मै के बेटामन: नादाब अऊ अबीसूर।
1CH 2:29 अबीसूर के घरवाली के नांव अबीहैल रिहिस, जेकर ले अहबान अऊ मोलीद जनमिन।
1CH 2:30 नादाब के बेटामन: सेलेद अऊ अप्पैम। सेलेद ह बिना कोनो लइका के मर गीस।
1CH 2:31 अप्पैम के बेटा: यिसी जऊन ह सेसान के ददा रिहिस। सेसान ह अहलै के ददा रिहिस।
1CH 2:32 सम्मै के भाई यादा के बेटामन: येतेर अऊ योनातन। येतेर बिगर संतान के मर गीस।
1CH 2:33 योनातन के बेटामन: पेलेत अऊ जाजा।
1CH 2:34 सेसान के कोनो बेटा नइं रिहिन, सिरिप बेटी रिहिन। ओकर यरहा नांव के एक झन मिसरी सेवक रिहिस।
1CH 2:35 सेसान ह अपन बेटी के बिहाव अपन सेवक यरहा के संग कर दीस, जेकर ले अत्तै जनमिस।
1CH 2:36 अत्तै ह नातान के ददा रिहिस, नातान ह जाबाद के ददा रिहिस,
1CH 2:37 जाबाद ह एपलाल के ददा रिहिस, एपलाल ह ओबेद के,
1CH 2:38 ओबेद ह येहू के, येहू ह अजरयाह के,
1CH 2:39 अजरयाह ह हेलेस के, हेलेस ह एलासा के
1CH 2:40 एलासा ह सिसमै के, सिसमै ह सल्लूम के,
1CH 2:41 सल्लूम ह यकमयाह के, यकमयाह ह एलीसामा के।
1CH 2:42 यरहमेल के भाई कालेब के बेटामन: ओकर बड़े बेटा मेसा, जऊन ह जीप के ददा रिहिस, अऊ ओकर बेटा मारेसा जऊन ह हेबरोन के ददा रिहिस।
1CH 2:43 हेबरोन के बेटामन: कोरह, तप्पूह, रेकेम अऊ सेमा।
1CH 2:44 सेमा ह रहम के ददा रिहिस, अऊ रहम ह योरकाम के। रेकेम ह सम्मै के ददा रिहिस।
1CH 2:45 सम्मै के बेटा माओन होईस अऊ माओन ह बेत-सूर के ददा रिहिस।
1CH 2:46 कालेब के रखैल एपा ले हारान, मोसा अऊ गाजेज जनमिन। हारान ह गाजेज के ददा रिहिस।
1CH 2:47 याहदै के बेटामन: रेगेम, योताम, गेसान, पेलेत, एपा अऊ साप।
1CH 2:48 कालेब के रखैल माका ह सेबेर अऊ तिरहाना के दाई रिहिस।
1CH 2:49 ओह मदमन्ना के ददा, साप ला अऊ मकबेना अऊ गिबा के ददा, सेवा ला घलो जनम दीस। कालेब के बेटी अकसा रिहिस।
1CH 2:50 येमन कालेब के बंसज रिहिन। एपराता के बड़े बेटा हूर के बेटामन: किरयत-यारीम के ददा सोबाल,
1CH 2:51 बैतलहम के ददा सलमा अऊ बेत-गादेर के ददा हारेप।
1CH 2:52 किरयत-यारीम के ददा सोबाल के बंस म येमन रिहिन: हारोएह, आधा मनुहोतीमन,
1CH 2:53 अऊ किरयत-यारीम के कुल: येतेरी, पूती, सूमाती अऊ मिसराई। येमन ले सोराती अऊ एसताओली निकलिन।
1CH 2:54 सलमा के बंसज: बैतलहम, नतोपाती, अतरोत-बेत-योआब, आधा मानहतीमन, सोरी,
1CH 2:55 अऊ याबेस नगर म रहइया लेखकमन के कुल: तिराती, सिमाती, अऊ सूकाती। येमन केनी अंय, जेमन रेकाब के परिवार के मूल पुरूस हम्मत के बंस म ले आईन।
1CH 3:1 दाऊद के बेटा, जेमन ओकर ले हेबरोन नगर म जनमिन: ओकर पहिलांत बेटा अमनोन रिहिस, जऊन ह यिजरेल सहर के अहीनोअम ले जनमे रिहिस; दूसर बेटा दानिएल जऊन ह करमेल नगर के अबीगैल ले जनमे रिहिस;
1CH 3:2 तीसर, अबसालोम, गसूर के राजा तलमै के बेटी माका के बेटा; चौथा अदोनियाह, हगीत के बेटा;
1CH 3:3 पांचवां सपतयाह, अबीतल के बेटा; अऊ छठवां यितराम, जऊन ह ओकर एगला नांव के घरवाली ले जनमे रिहिस।
1CH 3:4 दाऊद के ये छै बेटा हेबरोन म जनमे रिहिन, जिहां ओह सात बरस अऊ छै महिना राज करिस।
1CH 3:5 अऊ येमन ओ लइकामन के नांव अंय, जेमन उहां ओकर ले जनमिन: सम्मू, सोबाब, नातान अऊ सुलेमान। ये चारों अमीएल के बेटी बतसेबा ले जनमिन।
1CH 3:6 अऊ यिभार, एलीसू, एलीपेलेत,
1CH 3:7 नोगह, नेपेग, यापी,
1CH 3:8 एलीसामा, एलयादा अऊ एलीपेलेत—ये जम्मो नौ झन बेटा।
1CH 3:9 ये जम्मो दाऊद के बेटा रिहिन, येमन ला छोंड़के ओकर रखैलमन ले घलो बेटा होईन। येमन के बहिनी तामार रिहिस।
1CH 3:10 सुलेमान के बेटा रहूबियाम रिहिस, ओकर बेटा अबियाह, ओकर ले आसा, ओकर ले यहोसापात,
1CH 3:11 ओकर ले यहोराम, ओकर ले अहजयाह, ओकर ले योआस,
1CH 3:12 ओकर ले अमसयाह, ओकर ले अजरयाह, ओकर ले योताम,
1CH 3:13 ओकर ले आहाज, ओकर ले हिजकियाह, ओकर ले मनस्से,
1CH 3:14 ओकर ले आमोन अऊ ओकर ले योसियाह जनमिस।
1CH 3:15 योसियाह के बेटामन: ओकर पहिलांत बेटा योहानान, दूसर बेटा यहोयाकीम, तीसर बेटा सिदकियाह, चौथा सल्लूम।
1CH 3:16 यहोयाकीम के बेटा यहोयाकीन, ओकर बेटा सिदकियाह।
1CH 3:17 यहोयाकीन जऊन ह बंदी रिहिस, ओकर संतान: सालतीएल,
1CH 3:18 मलकीराम, पदायाह, सेनसर, यकमयाह, होसामा अऊ नदबयाह।
1CH 3:19 पदायाह के बेटामन: जरूब्बाबेल अऊ सिमी। जरूब्बाबेल के बेटामन: मसुल्लाम अऊ हननयाह। सलोमीत ह ओमन के बहिनी रिहिस।
1CH 3:20 अऊ आने पांच झन घलो रिहिन: हसूबा, ओहेल, बेरेकियाह, हसदियाह अऊ यूसब-हेसेद।
1CH 3:21 हननयाह के संतान: पलतयाह अऊ येसायाह, अऊ रपायाह के बेटामन, अरनान के बेटामन, ओबदयाह के बेटामन अऊ सेकनयाह के बेटामन।
1CH 3:22 सेकनयाह के संतान: समायाह अऊ ओकर बेटामन: हतूस, इगाल, बारीह, नारयाह अऊ सापात—ये जम्मो छै झन।
1CH 3:23 नारयाह के बेटामन: एलयोएनै, हिजकियाह अऊ अजरीकाम—जम्मो तीन झन।
1CH 3:24 एलयोएनै के बेटामन: होदवियाह, एलियासीब, पलायाह, अक्कूब, योहानान, दलायाह अऊ अनानी—जम्मो सात झन।
1CH 4:1 यहूदा के संतान: पेरेस, हेसरोन, करमी, हूर अऊ सोबाल।
1CH 4:2 सोबाल के बेटा रायाह ले यहत, अऊ यहत ले अहूमै अऊ लहद जनमिन। येमन सोराती बंस के अंय।
1CH 4:3 येमन एताम के बेटा रिहिन: यिजरेल, यिस्मा, अऊ यिद्बास। येमन के बहिनी के नांव हस्सलेलपोनी रिहिस।
1CH 4:4 गदोर के ददा पनूएल, अऊ हूसा के ददा एजेर रिहिस। येमन एपराता के बेटा हूर के संतान अंय जऊन ह बैतलहम के ददा रिहिस।
1CH 4:5 तकोआ के ददा असहूर के हेला अऊ नारा नांव के दू झन घरवाली रिहिन।
1CH 4:6 नारा ले अहुज्जाम, हेपेर, तेमनी अऊ हाहसतारी जनमिन। येमन नारा के बेटा रिहिन।
1CH 4:7 हेला के बेटामन: सेरेत, सोहर, एतनान।
1CH 4:8 अऊ कोस ले आनूब अऊ हस्सोबेबा जनमिन अऊ ओकर बंस म हारूम के बेटा अहरहेल के कुल भी जनमिन।
1CH 4:9 याबेस ह अपन भाईमन ले जादा नामी होईस। ओकर दाई ह ये कारन ले ओकर नांव याबेस राखिस, “मेंह येला दुख-पीरा ले जनमाय हंव।”
1CH 4:10 याबेस ह इसरायल के परमेसर ला गोहार लगाईस, “बने होतिस कि तें मोला सही म आसीस देते अऊ मोर इलाका ला बढ़ाते अऊ तोर हांथ मोर संग रहितिस अऊ तें मोला हानि ले अइसन बचाते कि मेंह पीरा ले बांचे रहितंय।” अऊ परमेसर ह ओकर बिनती ला सुनिस।
1CH 4:11 फेर सूहा के भाई कलूब ले एसतोन के ददा महीर जनमिस।
1CH 4:12 एसतोन ह बेत-रापा, पासेह अऊ तहिन्ना के ददा रिहिस अऊ तहिन्ना ह ईर-नाहास के ददा रिहिस। येमन रेका नगर के मनखेमन रिहिन।
1CH 4:13 कनज के बेटामन: ओतनीएल अऊ सरायाह। ओतनीएल के बेटामन: हतत अऊ मोनोतै।
1CH 4:14 मोनोतै ह ओपरा के ददा रिहिस। सरायाह ले योआब जनमिस, जऊन ह गे-हरासीम के ददा रिहिस; येमन कारीगर रिहिन।
1CH 4:15 यपुन्ने के बेटा कालेब के बेटामन: इरू, एला अऊ नाम। एला के बेटा: कनज।
1CH 4:16 यहल्लेलेल के बेटामन: जीप, जीपा, तीरया अऊ असरेल।
1CH 4:17 एजरा के बेटामन: येतेर, मेरेद, एपेर अऊ यालोन। ओकर घरवाली ले मिरियम, सम्मै अऊ एसतमोआ के ददा यिसबह जनमिन।
1CH 4:18 येमन फिरौन के बेटी बित्या के संतान रिहिन, जेला मेरेद ह बिहाव करे रिहिस। ओकर यहूदीन घरवाली ले गदोर के ददा येरेद, सोको के ददा हेबेर अऊ जानोह के ददा यकुतिएल जनमिन।
1CH 4:19 होदियाह के घरवाली जऊन ह नहम के बहिनी रिहिस, ओकर बेटामन: गेरेमी कीला के ददा, अऊ माकाती एसतमोआ
1CH 4:20 सीमोन के बेटामन: अमनोन, रिन्ना, बेन-हानान अऊ तोलोन। यिसी के संतान: जोहेत अऊ बेन-जोहेत।
1CH 4:21 यहूदा के बेटा सेलह के संतान: लेका के ददा एर, मारेसा के ददा लादा, अऊ बेत-असबे ले ओकर परिवार के बंसज जेमन मलमल के कपड़ा बनाय के बुता करंय।
1CH 4:22 योकीम अऊ कोजबा के मनखे अऊ योआस अऊ साराप जऊन मन मोआब म सासन करंय, अऊ यासुबी-लेहेम। (ये लेखा-जोखा पुराना जमाना के अय।)
1CH 4:23 येमन कुम्हार रिहिन अऊ येमन नताईम अऊ गदेरा नगर म रहत रिहिन; येमन उहां रूकंय अऊ राजा बर काम करंय।
1CH 4:24 सिमोन के संतान: नमूएल, यामीन, यारीब, जेरह अऊ साऊल;
1CH 4:25 साऊल के बेटा सल्लूम, सल्लूम के बेटा मिबसाम अऊ मिबसाम ले मिस्मा होईस।
1CH 4:26 मिस्मा के संतान: हम्मूएल ओकर बेटा, जक्कूर ओकर बेटा, अऊ सिमी ओकर बेटा।
1CH 4:27 सिमी के सोलह झन बेटा अऊ छै बेटी रिहिन, लेकिन ओकर भाईमन के बहुंत लइका नइं रिहिन; एकरसेति ओकर कुल ह यहूदा के कुल असन नइं बाढ़िस।
1CH 4:28 ओमन बेरसेबा, मोलादा, हसर-सूआल,
1CH 4:29 बिलहा, एसेम, तोलाद,
1CH 4:30 बतूएल, होरमा, सिकलग,
1CH 4:31 बेत-मरकाबोत, हसर-सूसीम, बेत-बिरी अऊ सारैम म बस गीन। दाऊद के राज के समय तक येमन ओमन के नगर रिहिन।
1CH 4:32 ओमन के गांव एताम, ऐन, रिम्मोन, तोकेन अऊ आसान नांव के पांच ठन नगर
1CH 4:33 अऊ बालात तक ये नगरमन के आसपास के जम्मो गांव। ओमन के बसे के जगह येमन रिहिन।
1CH 4:34 मेसोबाब, यमलेक, अमसयाह के बेटा योसा,
1CH 4:35 योएल, योसिब्याह के बेटा येहू, जऊन ह सरायाह के पोता अऊ असीएल के परपोता रिहिस,
1CH 4:36 अऊ एलयोएनै, अऊ याकोबा, यसोहायाह, अऊ असायाह, अऊ अदीएल, अऊ यसीमीएल, अऊ बनायाह,
1CH 4:37 अऊ सिपी के बेटा जीजा, जऊन ह अल्लोन के बेटा, ओह यदायाह के बेटा, ओह सिमरी के बेटा, ओह समायाह के बेटा रिहिस।
1CH 4:38 जऊन आदमीमन के नांव ऊपर लिखे गे हवय, ओमन अपन-अपन कुल के मुखिया रिहिन। अऊ ओमन के परिवारमन बहुंत बाढ़िस,
1CH 4:39 अऊ येमन अपन भेड़-बकरीमन बर चरागन खोजे बर गदोर सहर के सीमना म घाटी के पूरब कोति तक गीन।
1CH 4:40 अऊ ओमन बने-बने चरागन पाईन अऊ ओ देस ह लम्बा-चौड़ा, सांतिमय अऊ सांत रिहिस। पहिले उहां हाम के बंस के कुछू मनखेमन रहत रिहिन।
1CH 4:41 जऊन आदमीमन के नांव ह सूची म लिखे गे रिहिस, ओमन यहूदा के राजा हिजकियाह के समय म आईन। ओमन हामीमन के निवास ऊपर अऊ उहां रहइया मूनीमन ऊपर घलो हमला कर दीन अऊ ओमन ला पूरा नास कर दीन, जेकर सबूत आज तक देखे जा सकत हे। तब ओमन ओमन के जगह म बस गीन काबरकि उहां ओमन के पसुमन बर चरागन रिहिस।
1CH 4:42 अऊ ये सिमोनीमन के पांच सौ मनखे पलतयाह, नारयाह, रपायाह अऊ उजीएल नांव के यिसी के बेटामन के अगुवई म सेईर के पहाड़ी देस ऊपर हमला कर दीन।
1CH 4:43 ओमन ओ अमालेकीमन ला मार डारिन, जेमन बांचके भाग गे रिहिन, अऊ ओमन आज तक उहां रहत हवंय।
1CH 5:1 इसरायल के पहिलांत रूबेन के बेटामन (ओह पहिलांत रिहिस, पर जब ओह अपन ददा के बिछौना ला असुध करिस, त ओकर पहिलांत के अधिकार ला इसरायल के बेटा यूसुफ के बेटामन ला देय गीस; एकरसेति रूबेन के नांव ला ओकर जनम के अधिकार के मुताबिक बंसावली के लेखा-जोखा म नइं लिखे गीस,
1CH 5:2 अऊ अपन भाईमन ले यहूदा के नांव ह सबले जादा मजबूती से चलिस अऊ ओकर ले एक सासन करइया निकलके आईस, पर पहिलांत के अधिकार यूसुफ ह पाईस)।
1CH 5:3 इसरायल के पहिलांत रूबेन के बेटामन: हनोक, पल्लू, हेसरोन अऊ करमी।
1CH 5:4 योएल के संतान: योएल के बेटा समायाह, समायाह के बेटा गोग, गोग के बेटा सिमी,
1CH 5:5 सिमी के बेटा मीका, मीका के बेटा रायाह, रायाह के बेटा बाल,
1CH 5:6 अऊ बाल के बेटा बेरा, जऊन ला अस्सूर के राजा तिगलत-पिलेसेर बंदी बनाके ले गीस। बेरा ह रूबेनीमन के एक अगुवा रिहिस।
1CH 5:7 ओमन के रिस्तेदारमन के नांव ओमन के कुल के मुताबिक बंसावली के सूची म लिखे गीस: ओमन के मुखिया येइल, फेर जकरयाह,
1CH 5:8 अऊ अजाज के बेटा बेला, जऊन ह सेमा के पोता अऊ योएल के परपोता रिहिस। ओमन अरोएर नगर ले लेके नबो पहाड़ अऊ बाल-मेओन सहर के छेत्र म बस गीन।
1CH 5:9 पूरब कोति ओमन ओ निरजन जगह के किनारे तक के भुइयां ऊपर कब्जा कर लीन, जऊन ह फरात नदी तक फईले हवय, काबरकि ओमन के पसुमन के संखिया गिलाद देस म बाढ़ गे रिहिस।
1CH 5:10 साऊल के राज के समय म ओमन हगरीमन ले लड़ई करिन अऊ हगरीमन ओमन ले हार गीन; तब ओमन गिलाद के जम्मो पूरबी भाग के इलाका म हगरीमन के निवासमन ऊपर अधिकार कर लीन।
1CH 5:11 गादीमन ओमन के बाद सलका नगर तक बासान के इलाका म रहत रिहिन।
1CH 5:12 योएल तो मुखिया रिहिस, अऊ दूसरा सापाम, तब यानै अऊ सापात, येमन बासान म रहंय।
1CH 5:13 परिवारमन के मुताबिक ओमन के रिस्तेदारमन: मिकाएल, मसुल्लाम, सेबा, योरै, याकान, जिया अऊ एबेर—कुल सात झन।
1CH 5:14 येमन अबीहैल के बेटा रिहिन जऊन ह हूरी के बेटा रिहिस, हूरी ह योराह के बेटा, योराह ह गिलाद के बेटा, गिलाद ह मिकाएल के बेटा, मिकाएल ह यसीसै के बेटा, यसीसै ह यहदो के बेटा, यहदो ह बूज के बेटा रिहिस।
1CH 5:15 येमन के परिवार के मुखिया अही रिहिस, जऊन ह अब्दीएल के बेटा अऊ गूनी के पोता रिहिस।
1CH 5:16 गादीमन बासान के गिलाद अऊ ओकर बाहिर म फईले गांवमन म, अऊ सारोन के जम्मो चरागनमन म रहत रिहिन, जऊन ह दूरिहा तक फईले रिहिस।
1CH 5:17 ये जम्मो के नांव बंसावली म यहूदा के राजा योताम अऊ इसरायल के राजा यरोबाम के सासनकाल म लिखे गीस।
1CH 5:18 रूबेनी, गादी, अऊ मनस्से के आधा गोत्र के 44,760 आदमीमन सेना म सेवा देय बर तियार रिहिन—येमन ढाल अऊ तलवार अऊ तीर चलाय म माहिर रिहिन, अऊ येमन लड़ई के सिकछा लेय रिहिन।
1CH 5:19 ओमन हगरी, यतूर, नापीस अऊ नोदाब के बिरूध लड़ई करिन।
1CH 5:20 ओमन के बिरूध लड़ई म येमन ला मदद मिले रिहिस अऊ परमेसर ह हगरीमन अऊ ओमन के जम्मो संगी सेना ला येमन के हांथ म कर दीस, काबरकि लड़ई के बेरा येमन परमेसर ला गोहारिन। अऊ ओह ओमन के पराथना ला सुनिस, काबरकि येमन ओकर ऊपर भरोसा रखिन।
1CH 5:21 येमन हगरीमन के पसुमन ला छीन लीन—जेमा पचास हजार ऊंट, दू लाख पचास हजार भेड़, अऊ दू हजार गदहामन रिहिन। येमन एक लाख मनखेमन ला घलो बंदी बनाके ले गीन,
1CH 5:22 अऊ आने बहुंते झन मारे गीन, काबरकि येह परमेसर के लड़ई रिहिस। येमन ओ जगह म बंधुवई के समय तक कब्जा बनाय रखिन।
1CH 5:23 मनस्से के आधा गोत्र के मनखेमन के संखिया बहुंत रिहिस; ओमन ओ देस म बासान ले लेके बाल-हेरमोन तक बस गीन; बाल-हेरमोन ला सनीर (हेरमोन पहाड़) कहे जाथे।
1CH 5:24 ओमन के परिवारमन के मुखिया येमन रिहिन: एपेर, यिसी, एलीएल, अजरीएल, यरमियाह, होदवियाह अऊ यहदीएल। येमन बड़े बीर अऊ नामी मनखे अऊ अपन परिवारमन के मुखिया रिहिन।
1CH 5:25 पर ओमन अपन पुरखामन के परमेसर ले बिसवासघात करिन अऊ ओ देस के ओ मनखेमन के देवतामन के पूजा करे के दुवारा अपनआप ले बेभिचार करिन, जेमन ला परमेसर ह ओमन के आघू ले नास कर देय रिहिस।
1CH 5:26 एकरसेति इसरायल के परमेसर ह अस्सूर के राजा पूल (जेला अस्सूर के राजा तिगलत-पिलेसेर कहे जाथे) के मन ला उभारिस, जऊन ह रूबेनी, गादी, अऊ मनस्से के आधा गोत्र के मनखेमन ला बंधुवई म ले गीस। ओह ओमन ला हलह, हाबोर, हारा अऊ गोजान नदी करा ले गीस, जिहां ओमन आज तक हवंय।
1CH 6:1 लेवी के बेटामन: गेरसोन, कहात अऊ मरारी।
1CH 6:2 कहात के बेटामन: अमराम, ईसहार, हेबरोन अऊ उजीएल।
1CH 6:3 अमराम के संतान: हारून, मूसा अऊ मिरियम। हारून के बेटामन: नादाब, अबीहू, एलिआजर अऊ ईतामार।
1CH 6:4 एलिआजर ह पीनहास के ददा रिहिस, पीनहास ह अबीसू के ददा,
1CH 6:5 अबीसू ह बुक्की के ददा, बुक्की ह उज्जी के ददा,
1CH 6:6 उज्जी ह जरहयाह के ददा, जरहयाह ह मरायोत के ददा,
1CH 6:7 मरायोत ह अमरयाह के ददा, अमरयाह ह अहीतूब के ददा,
1CH 6:8 अहीतूब ह सादोक के ददा, सादोक ह अहीमास के ददा,
1CH 6:9 अहीमास ह अजरयाह के ददा, अजरयाह ह योहानान के ददा,
1CH 6:10 योहानान ह अजरयाह के ददा जऊन ह सुलेमान के यरूसलेम म बनाय गे भवन म पुरोहित के काम करय,
1CH 6:11 अजरयाह ह अमरयाह के ददा, अमरयाह ह अहीतूब के ददा,
1CH 6:12 अहीतूब ह सादोक के ददा, सादोक ह सल्लूम के ददा,
1CH 6:13 सल्लूम ह हिलकियाह के ददा, हिलकियाह ह अजरयाह के ददा,
1CH 6:14 अजरयाह ह सरायाह के ददा, अऊ सरायाह ह योसादाक के ददा रिहिस।
1CH 6:15 जब यहोवा ह यहूदा अऊ यरूसलेम ला नबूकदनेसर के दुवारा बंधुवई म भेज दीस, तब योसादाक घलो बंधुवई म चल दीस।
1CH 6:16 लेवी के बेटामन: गेरसोन, कहात अऊ मरारी।
1CH 6:17 गेरसोन के बेटामन के नांव ये रिहिस: लिबनी अऊ सिमी।
1CH 6:18 कहात के बेटामन: अमराम, ईसहार, हेबरोन अऊ उजीएल।
1CH 6:19 मरारी के बेटामन: महली अऊ मूसी।
1CH 6:20 गेरसोन के संतान: लिबनी, लिबनी ले यहत, ओकर ले जिम्मा,
1CH 6:21 ओकर ले योआह, योआह ले इद्दो, इद्दो ले जेरह, जेरह ले यातरै।
1CH 6:22 कहात के संतान: कहात के बेटा अमीनादाब, ओकर बेटा कोरह, ओकर बेटा अस्सीर,
1CH 6:23 ओकर बेटा एलकाना, ओकर बेटा एबियासाप, ओकर बेटा अस्सीर,
1CH 6:24 ओकर बेटा तहत, ओकर बेटा उरीएल, ओकर बेटा उजियाह अऊ ओकर बेटा साऊल।
1CH 6:25 एलकाना के संतान: अमासै अऊ अहीमोत,
1CH 6:26 ओकर बेटा एलकाना, ओकर बेटा सोपै, ओकर बेटा नहत,
1CH 6:27 ओकर बेटा एलीआब, ओकर बेटा यरोहाम, ओकर बेटा एलकाना, अऊ ओकर बेटा समूएल।
1CH 6:28 समूएल के बेटामन: ओकर जेठा योएल अऊ दूसरा अबियाह।
1CH 6:29 मरारी के संतान: महली, ओकर बेटा लिबनी, ओकर बेटा सिमी, ओकर बेटा उज्जा,
1CH 6:30 ओकर बेटा सिमा, ओकर बेटा हग्गियाह अऊ ओकर बेटा असायाह।
1CH 6:31 यहोवा के भवन म सन्दूक ला रखे जाय के बाद, दाऊद ह यहोवा के भवन म संगीत के जिम्मेदारी जेमन ला दीस, ओमन ये अंय।
1CH 6:32 जब तक सुलेमान ह यरूसलेम म यहोवा के मंदिर ला नइं बनवा लीस, तब तक येमन पबितर-तम्बू, मिलापवाला तम्बू के आघू म संगीत के दुवारा सेवा करिन। येमन ओमन के ऊपर लागू बिधि के मुताबिक अपन काम करिन।
1CH 6:33 येमन ओ आदमी रिहिन, जेमन अपन बेटामन के संग सेवा करिन: कहातीमन ले: हेमान संगीतकार, जऊन ह योएल के बेटा रिहिस, अऊ योएल ह समूएल के,
1CH 6:34 समूएल ह एलकाना के, एलकाना ह यरोहाम के यरोहाम ह एलीएल के, एलीएल ह तोह के,
1CH 6:35 तोह ह सूप के, सूप ह एलकाना के, एलकाना ह महत के, महत ह अमासै के,
1CH 6:36 अमासै ह एलकाना के, एलकाना ह योएल के, योएल ह अजरयाह के, अजरयाह ह सपनयाह के,
1CH 6:37 सपनयाह ह तहत के, तहत ह अस्सीर के, अस्सीर ह एबियासाप के, एबियासाप ह कोरह के,
1CH 6:38 कोरह ह ईसहार के, ईसहार ह कहात के, कहात ह लेवी के, अऊ लेवी ह इसरायल के बेटा रिहिस;
1CH 6:39 अऊ हेमान के सहयोगी आसाप, जऊन ह ओकर जेवनी कोति रहिके सेवा करय: आसाप ह बेरेकियाह के बेटा रिहिस, अऊ बेरेकियाह ह सिमा के,
1CH 6:40 सिमा ह मिकाएल के, मिकाएल ह बासेयाह के, बासेयाह ह मलकियाह के,
1CH 6:41 मलकियाह ह एत्नी के, एत्नी ह जेरह के, जेरह ह अदायाह के,
1CH 6:42 अदायाह ह एतान के, एतान ह जिम्मा के, जिम्मा ह सिमी के,
1CH 6:43 सिमी ह यहत के, यहत ह गेरसोन के, अऊ गेरसोन ह लेवी के बेटा रिहिस;
1CH 6:44 अऊ ओमन के सहयोगी, मरारीमन ओकर डेरी कोति रहंय: एतान ह कीसी के बेटा रिहिस, कीसी ह अब्दी के, अब्दी ह मल्लूक के,
1CH 6:45 मल्लूक ह हसबियाह के, हसबियाह ह अमसयाह के, अमसयाह ह हिलकियाह के,
1CH 6:46 हिलकियाह ह अमसी के, अमसी ह बानी के, बानी ह सेमेर के,
1CH 6:47 सेमेर ह महली के, महली ह मूसी के, मूसी ह मरारी के, अऊ मरारी ह लेवी के बेटा रिहिस।
1CH 6:48 ओमन के संगी लेवीमन ला पबितर-तम्बू, परमेसर के भवन म आने जम्मो किसम के काम दिये गे रिहिस।
1CH 6:49 पर सिरिप हारून अऊ ओकर बेटा अऊ ओकर संतानमन महा पबितर स्थान म करे गे जम्मो काम के संबंध म होम-बलिदान के बेदी अऊ धूप के बेदी म भेंट चघावंय अऊ इसरायलीमन बर प्रायस्चित करंय जइसन कि परमेसर के दास मूसा ह हुकूम दे रिहिस।
1CH 6:50 हारून के संतान येमन रिहिन: ओकर बेटा एलिआजर, ओकर बेटा पीनहास, ओकर बेटा अबीसू,
1CH 6:51 ओकर बेटा बुक्की, ओकर बेटा उज्जी, ओकर बेटा जरहयाह,
1CH 6:52 ओकर बेटा मरायोत, ओकर बेटा अमरयाह, ओकर बेटा अहीतूब,
1CH 6:53 ओकर बेटा सादोक, ओकर बेटा अहीमास।
1CH 6:54 ओमन के इलाका म ओमन के बसाहट के मुताबिक जऊन भाग ओमन ला दिये गीस, ओमन ये रिहिन (हारून के संतान, जेमन कहाती कुल के रिहिन, ओमन ला ये भाग दिये गीस, काबरकि पहिली चिट्ठी ओमन के नांव म निकलिस):
1CH 6:55 ओमन ला चारों कोति के चरागन समेत यहूदा प्रदेस म हेबरोन मिलिस।
1CH 6:56 (पर सहर के चारों कोति के खेत अऊ गांवमन ला यपुन्ने के बेटा कालेब ला दिये गीस।)
1CH 6:57 हारून के संतानमन ला हेबरोन (एक सरन लेय के सहर), अऊ लिबना, यत्तीर, एसतमोआ
1CH 6:58 हीलेन अऊ दबीर,
1CH 6:59 आसान, यूता अऊ बेत-सेमेस अऊ ये सहरमन के संग ओमन के चरागनमन घलो दिये गीस।
1CH 6:60 अऊ बिनयामीन के गोत्र म ले ओमन ला गिबोन, गेबा, आलेमेत अऊ अनातोत सहर ओमन के चरागनमन के संग दिये गीस।
1CH 6:61 बाकि बांचे कहात के संतानमन ला मनस्से के आधा गोत्र के कुलमन ले दस नगर चिट्ठी डालके बांट दिये गीस।
1CH 6:62 गेरसोन के संतानमन ला ओमन के कुलमन के मुताबिक इस्साकार, आसेर अऊ नपताली के गोत्र अऊ बासान म रहइया मनस्से के गोत्र के भाग म ले तेरह नगर मिलिस।
1CH 6:63 मरारीमन के कुलमन के मुताबिक ओमन ला रूबेन, गाद अऊ जबूलून के गोत्र म ले बारह नगर चिट्ठी डालके बांट दिये गीस।
1CH 6:64 इसरायलीमन लेवीमन ला ओ नगरमन ला चरागन समेत दीन।
1CH 6:65 ओमन ला यहूदा, सिमोन अऊ बिनयामीन के गोत्र म ले ओ नगरमन चिट्ठी डालके दिये गीन, जेमन के नांव ऊपर दिये गे हवय।
1CH 6:66 कहाती के कुछू कुलमन ला ओमन के इलाका के नगरमन के रूप म एपरैम के गोत्र ले दिये गीस।
1CH 6:67 ये किसम ले ओमन ला एपरैम के पहाड़ी देस म सकेम सहर (सरन लेय के एक सहर), गेजेर,
1CH 6:68 योकमाम, बेत-होरोन,
1CH 6:69 अय्यालोन अऊ गत-रिम्मोन, ओमन के चरागन समेत मिलिस।
1CH 6:70 मनस्से के आधा गोत्र म ले इसरायलीमन आनेर अऊ बिलाम, ओमन के चरागन समेत दीन; ये नगरमन बाकि बांचे कहाती के कुलमन ला मिलिस।
1CH 6:71 गेरसोनीमन ला ये नगरमन मिलिन: मनस्से के आधा गोत्र के कुल म ले ओमन बासान के गोलान अऊ असतारोत घलो पाईन, ये नगरमन के संग ओमन के चरागनमन घलो रिहिन;
1CH 6:72 इस्साकार के गोत्र म ले ओमन केदेस, दाबरत,
1CH 6:73 रामोत अऊ आनेम नगर पाईन, संग म ओमन के चरागनमन घलो रिहिन;
1CH 6:74 आसेर के गोत्र म ले ओमन मासाल, अबदोन,
1CH 6:75 हूकोक अऊ रहोब नगर पाईन, संग म ओमन के चरागनमन घलो रिहिन;
1CH 6:76 अऊ नपताली के गोत्र म ले ओमन ला गलील के केदेस, हम्मोन अऊ किरयातैम नगर मिलिस, संग म ओमन के चरागनमन घलो रिहिन।
1CH 6:77 मरारीमन (बाकि बांचे लेवीमन) ला ये नगरमन मिलिन: जबूलून के गोत्र म ले ओमन योकनाम, करताह, रिम्मोन अऊ ताबोर नगर पाईन, संग म ओमन के चरागनमन घलो रिहिन;
1CH 6:78 यरीहो के पूरब कोति यरदन नदी के ओ पार, रूबेन के गोत्र म ले ओमन ला निरजन जगह म बेसेर मिलिस, अऊ यहस,
1CH 6:79 कदेमोत अऊ मेपात नगरमन के संग ओमन के चरागनमन घलो मिलिन;
1CH 6:80 अऊ गाद के गोत्र म ले ओमन गिलाद के रामोत, महनैम,
1CH 6:81 हेसबोन अऊ याजेर नगर पाईन, संग म ओमन के चरागनमन घलो रिहिन।
1CH 7:1 इस्साकार के बेटामन: तोला, पुआ, यासूब अऊ सिमरोन—जम्मो चार झन रिहिन।
1CH 7:2 तोला के बेटामन: उज्जी, रपायाह, यरीएल, यहमै, यिबसाम अऊ समूएल—येमन अपन-अपन परिवार के मुखिया रिहिन। दाऊद के राज के समय, तोला के संतानमन के गनती ओमन के बंसावली म बीर योद्धा के रूप म करे गीस अऊ दाऊद के समय म ओमन के संखिया 22,600 रिहिस।
1CH 7:3 उज्जी के बेटा: यिजराहियाह। यिजराहियाह के बेटामन: मिकाएल, ओबदयाह, योएल अऊ यिसियाह। ये जम्मो पांच झन मुखिया रिहिन।
1CH 7:4 ओमन के परिवार के बंसावली के मुताबिक, ओमन 36,000 आदमी रिहिन, जेमन लड़ई बर तियार रिहिन, काबरकि ओमन के बहुंत घरवाली अऊ लइकामन रिहिन।
1CH 7:5 इस्साकार के जम्मो कुलमन ले ओमन के रिस्तेदार, जेमन योद्धा रिहिन, ओमन के बंसावली म लिखे नांव के मुताबिक ओमन के कुल संखिया 87,000 रिहिस।
1CH 7:6 बिनयामीन के तीन बेटामन: बेला, बेकेर अऊ यदीएल।
1CH 7:7 बेला के बेटामन: एसबोन, उज्जी, उजीएल, यरीमोत अऊ ईरी; येमन कुल पांच झन रिहिन अऊ येमन अपन-अपन परिवार के मुखिया रिहिन। ओमन के बंसावली म 22,034 योद्धामन के नांव लिखे गे रिहिस।
1CH 7:8 बेकेर के बेटामन: जमीरा, योआस, एलिएजेर, एलयोएनै, ओमरी, यरेमोत, अबियाह, अनातोत अऊ आलेमेत। ये जम्मो झन बेकेर के बेटा रिहिन।
1CH 7:9 ओमन के बंसावली म ओमन के परिवारमन के मुखियामन के नांव अऊ 20,200 योद्धामन के नांव लिखे गे रिहिस।
1CH 7:10 यदीएल के बेटा: बिलहान। बिलहान के बेटामन: यूस, बिनयामीन, एहूद, कनाना, जेतान, तरसीस अऊ अहीसहर।
1CH 7:11 यदीएल के ये जम्मो बेटामन अपन-अपन परिवारमन के मुखिया रिहिन। 17,200 योद्धामन लड़ई म जाय बर तियार रिहिन।
1CH 7:12 ईर के संतान सुप्पीम अऊ हुप्पीम अऊ अहेर के संतान हूसीमन रिहिन।
1CH 7:13 नपताली के बेटामन: यहसीएल, गूनी, येसेर अऊ सल्लूम—येमन बिलहा के संतान रिहिन।
1CH 7:14 मनस्से के संतान: असरीएल ह ओकर अरामी रखैल कोति ले ओकर संतान रिहिस। ओ अरामी माईलोगन ह गिलाद के ददा माकीर ला घलो जनम दीस।
1CH 7:15 माकीर ह हुप्पीमन अऊ सुप्पीममन के बीच ले अपन बर एक घरवाली बनाईस। माकीर के बहिनी के नांव माका रिहिस। ओकर आने संतान के नांव सलोफाद रिहिस, जेकर सिरिप बेटीमन रिहिन।
1CH 7:16 माकीर के घरवाली माका ह एक बेटा ला जनम दीस, जेकर नांव पेरेस रखे गीस। ओकर भाई के नांव सेरेस रखे गीस, अऊ ऊलाम अऊ राकेम ओकर बेटामन रिहिन।
1CH 7:17 ऊलाम के बेटा: बदान। येमन गिलाद के बेटामन रिहिन अऊ गिलाद ह माकीर के बेटा अऊ मनस्से के पोता रिहिस।
1CH 7:18 ओकर बहिनी हम्मोलेकेत ह ईसहोद, अबिएजेर अऊ महला ला जनम दीस।
1CH 7:19 समीदा के बेटा येमन रिहिन: अहियान, सकेम, लिखी, अऊ अनीआम।
1CH 7:20 एपरैम के संतानमन: सूतेलह, ओकर बेटा बेरेद, ओकर बेटा तहत, ओकर बेटा एलादा, ओकर बेटा तहत,
1CH 7:21 ओकर बेटा जाबाद, अऊ ओकर बेटा सूतेलह। (एजेर अऊ एलाद ला देस म ही जनमे गत के आदमीमन मार डारिन, जब ओमन ये मनखेमन के पसुमन ला पकड़के ले जाय बर आय रिहिन।
1CH 7:22 ओमन के ददा एपरैम ह बहुंत दिन तक ओमन बर सोक मनाईस, अऊ ओकर रिस्तेदारमन ओला सांति देय बर आईन।
1CH 7:23 तब ओह अपन घरवाली संग फेर संबंध बनाईस, अऊ ओकर घरवाली ह गरभवती होके एक झन बेटा ला जनम दीस। एपरैम ह ओकर नांव एकर खातिर बरीया रखिस, काबरकि ओकर परिवार म बिपत्ति पड़े रिहिस।
1CH 7:24 ओकर बेटी सेरा रिहिस, जऊन ह खाल्हे अऊ ऊपर कोति के बेत-होरोन के संग म उज्जेन-सेरा ला घलो बनवाईस।)
1CH 7:25 ओकर बेटा रेपा रिहिस अऊ ओकर बेटा रेसेप, ओकर बेटा तेलह, ओकर बेटा तहान,
1CH 7:26 ओकर बेटा लादान, ओकर बेटा अमीहूद, ओकर बेटा एलीसामा,
1CH 7:27 ओकर बेटा नून, अऊ ओकर बेटा यहोसू रिहिस।
1CH 7:28 ओमन के भुइयां अऊ बसे जगह म बेतेल अऊ ओकर आसपास के गांवमन, पूरब कोति नारान, गेजेर अऊ येकर गांवमन पछिम कोति, अऊ सकेम अऊ येकर गांवमन अय्या तक अऊ संग म अय्या के गांवमन घलो रिहिन।
1CH 7:29 अऊ मनस्से के सीमना के तीरे-तीर बेत-सान, तानाक, मगिद्दो अऊ दोर सहरमन अऊ संग म ओमन के गांवमन घलो रिहिन। इसरायल के बेटा, यूसुफ के संतानमन ये नगरमन म रहत रिहिन।
1CH 7:30 आसेर के बेटामन: यिमना, इसवा, इसवी अऊ बरीया। अऊ ओमन के बहिनी के नांव सेरह रिहिस।
1CH 7:31 बरीया के बेटामन: हेबेर अऊ मलकीएल, जऊन ह बिरजोत के ददा होईस।
1CH 7:32 हेबेर ह यपलेत, सोमेर, होताम, अऊ ओमन के बहिनी सूआ के ददा होईस।
1CH 7:33 यपलेत के बेटामन: पासक, बिम्हाल अऊ अस्वात।
1CH 7:34 सोमेर के बेटामन: अही, रोहगा, यहुब्बा अऊ अराम।
1CH 7:35 ओकर भाई हेलेम के बेटामन: सोपह, यिमना, सेलेस अऊ आमाल।
1CH 7:36 सोपह के बेटामन: सूह, हरनेपर, सूआल, बेरी, इमरा,
1CH 7:37 बेसेर, होद, सम्मा, सिलसा, यितरान अऊ बेरा।
1CH 7:38 येतेर के बेटामन: यपुन्ने, पिस्पा अऊ अरा।
1CH 7:39 उल्ला के बेटामन: आरह, हन्नीएल अऊ रिस्या।
1CH 7:40 ये जम्मो झन आसेर के संतान रिहिन अऊ येमन अपन-अपन परिवार के मुखिया, चुने आदमी, बीर योद्धा अऊ बहुंत बढ़िया अगुवा रिहिन। ओमन के बंसावली म लिखे गय, लड़ई बर तियार आदमीमन के संखिया 26,000 रिहिस।
1CH 8:1 बिनयामीन के बेटामन: ओकर पहिलांत बेटा बेला, दूसर बेटा असबेल, तीसर अहराह,
1CH 8:2 चौथा नोहा अऊ पांचवां रापा।
1CH 8:3 बेला के बेटामन: अद्दार, गेरा, अबीहूद,
1CH 8:4 अबीसू, नामान, अहोह,
1CH 8:5 गेरा, सपूपान अऊ हूराम।
1CH 8:6 येमन एहूद के संतान रिहिन, जेमन गेबा नगर म रहइयामन के परिवारमन के मुखिया रिहिन, अऊ येमन ला बंदी बनाके मानहत ले जाय गीस:
1CH 8:7 नामान, अहियाह, अऊ गेरा, जऊन ह ओमन ला बंदी बनाके ले गीस अऊ ओह उज्जा अऊ अहीहूद ला जनम दीस।
1CH 8:8 सहरैम के अपन घरवाली हूसीम अऊ बारा ला तलाक देय के बाद, मोआब देस म ओकर बेटामन जनमिन।
1CH 8:9 ओकर घरवाली होदेस ले योबाब, सिब्या, मेसा, मल्काम,
1CH 8:10 यूस, साकिया अऊ मिरमा जनमिन। येमन ओकर बेटामन रिहिन अऊ येमन अपन-अपन परिवार के मुखिया रिहिन।
1CH 8:11 हूसीम ले अबीतूब अऊ एलपाल जनमिन।
1CH 8:12 एलपाल के बेटामन: एबेर, मिसाम अऊ सेमेद (जऊन ह ओनो अऊ लोद सहर अऊ येमन के आसपास के गांवमन ला बसाईस),
1CH 8:13 अऊ बरीया अऊ सेमा, जेमन अय्यालोन सहर म रहइयामन के परिवारमन के मुखिया रिहिन अऊ जेमन गत सहर के निवासीमन ला भगा दीन।
1CH 8:14 अहियो, सासक, यरेमोत,
1CH 8:15 जबदयाह, अराद, एदेर,
1CH 8:16 मिकाएल, यिस्पा, योहा; येमन बरीया के बेटा रिहिन।
1CH 8:17 जबदयाह, मसुल्लाम, हिजकी, हेबेर,
1CH 8:18 यिसमरै, यिजलीया, योबाब; येमन एलपाल के बेटा रिहिन।
1CH 8:19 याकीम, जिकरी, जबदी,
1CH 8:20 एलीएनै, सिल्लतै, एलीएल
1CH 8:21 अदायाह, बरायाह अऊ सिमरात; येमन सिमी के बेटा रिहिन।
1CH 8:22 यिसपान, एबेर, एलीएल,
1CH 8:23 अबदोन, जिकरी, हानान,
1CH 8:24 हननयाह, एलाम, अन्तोतयाह,
1CH 8:25 यिपदयाह अऊ पनूएल; येमन सासक के बेटा रिहिन।
1CH 8:26 समसरै, सहरयाह, अतलयाह,
1CH 8:27 यारेसियाह, एलियाह अऊ जिकरी; येमन यरोहाम के बेटा रिहिन।
1CH 8:28 ये जम्मो झन अपन-अपन परिवार के मुखिया रिहिन अऊ ओमन के बंसावली म ओमन के नांव मुखिया के रूप म लिखे गे रिहिस, अऊ ओमन यरूसलेम म रहत रिहिन।
1CH 8:29 गिबोन के ददा येइल, गिबोन सहर म रहय। ओकर घरवाली के नांव माका रिहिस।
1CH 8:30 अऊ ओकर पहिलांत बेटा अबदोन रिहिस, फेर जूर, कीस, बाल, नेर, नादाब,
1CH 8:31 गदोर, अहियो, जेकेर
1CH 8:32 अऊ मिकलोत, जऊन ह सिमा के ददा रिहिस। येमन घलो अपन रिस्तेदारमन के लकठा म यरूसलेम म रहत रिहिन।
1CH 8:33 नेर ह कीस के ददा रिहिस, कीस ह साऊल के अऊ साऊल ह योनातन, मलकी-सुआ, अबीनादाब अऊ एस-बाल के ददा रिहिस।
1CH 8:34 योनातन के बेटा: मरीब-बाल, जऊन ह मीका के ददा रिहिस।
1CH 8:35 मीका के बेटामन: पीतोन, मेलेक, तारे अऊ आहाज।
1CH 8:36 आहाज ह यहोआदा के ददा रिहिस, यहोआदा ह आलेमेत, अजमावेत अऊ जिमरी के ददा रिहिस, अऊ जिमरी ह मोसा के ददा रिहिस।
1CH 8:37 मोसा ह बीना के ददा रिहिस; ओकर बेटा रापा, रापा के बेटा एलासा अऊ एलासा के बेटा आसेल रिहिस।
1CH 8:38 आसेल के छै बेटा रिहिन अऊ ये ओमन के नांव अंय: अजरीकाम, बोकेरू, इसमायल, सारयाह, ओबदयाह अऊ हानान। ये जम्मो झन आसेल के बेटा रिहिन।
1CH 8:39 ओकर भाई एसेक के बेटामन: ओकर पहिलांत बेटा ऊलाम, दूसर यूस अऊ तीसर एलीपेलेत।
1CH 8:40 ऊलाम के बेटामन बीर योद्धा रिहिन अऊ धनुसधारी रिहिन। ओमन के बहुंत बेटा अऊ पोतामन रिहिन—कुल 150 जन। येमन जम्मो बिनयामीन के संतान रिहिन।
1CH 9:1 जम्मो इसरायलीमन के नांव बंसावली म इसरायल अऊ यहूदा के राजामन के किताब म लिखे गे हवय। ओमन के बिसवासघात करे के कारन ओमन ला बंधुवई म बेबिलोन देस ले जाय गीस।
1CH 9:2 बंधुवई ले लहुंटे के बाद, सबले पहिले अपन-अपन नगर के अपन-अपन संपत्ति म फेर बसनेवालामन कुछू इसरायली, पुरोहित, लेवी अऊ मंदिर के सेवकमन रिहिन।
1CH 9:3 यहूदा के गोत्र ले, बिनयामीन के गोत्र ले, अऊ एपरैम अऊ मनस्से के गोत्र ले जेमन यरूसलेम म रहत रिहिन, ओमन ये रिहिन:
1CH 9:4 यहूदा के बेटा पेरेस के एक संतान ऊतै रिहिस, जऊन ह अमीहूद के बेटा, अमीहूद ह ओमरी के बेटा, ओमरी ह इमरी के बेटा अऊ इमरी ह बानी के बेटा रिहिस।
1CH 9:5 सेलानीमन के बंस: बड़े बेटा असायाह अऊ ओकर बेटामन।
1CH 9:6 जेरहीमन के बंस: यूएल।
1CH 9:7 बिनयामीनीमन के बंस: सल्लू, जऊन ह मसुल्लाम के बेटा, होदवियाह के पोता अऊ हस्सनूआ के परपोता रिहिस;
1CH 9:8 यिबनियाह, जऊन ह यरोहाम के बेटा रिहिस; एला, जऊन ह उज्जी के बेटा अऊ मिकरी के पोता रिहिस; अऊ मसुल्लाम, जऊन ह सपतयाह के बेटा, रूएल के पोता अऊ यिबनियाह के परपोता रिहिस।
1CH 9:9 बिनयामीन के गोत्र के मनखेमन के ओमन के बंसावली म लिखे नांव के मुताबिक ओमन के संखिया 956 रिहिस। ये जम्मो आदमीमन अपन-अपन परिवार के मुखिया रिहिन।
1CH 9:10 पुरोहितमन ले: यदायाह; यहोयारीब; याकीन;
1CH 9:11 अजरयाह जऊन ह परमेसर के भवन के अधिकारी अऊ हिलकियाह के बेटा रिहिस, हिलकियाह ह मसुल्लाम के बेटा, मसुल्लाम ह सादोक के बेटा, सादोक ह मरायोत के बेटा अऊ मरायोत ह अहीतूब के बेटा रिहिस;
1CH 9:12 अऊ अदायाह, जऊन ह यरोहाम के बेटा रिहिस, यरोहाम ह पसहूर के बेटा, पसहूर ह मलकियाह के बेटा रिहिस; अऊ मासै, जऊन ह अदीएल के बेटा, अदीएल ह यहसेरा के बेटा, यहसेरा ह मसुल्लाम के बेटा, मसुल्लाम ह मसिल्लेमीत के बेटा, मसिल्लेमीत ह इम्मेर के बेटा रिहिस।
1CH 9:13 ओ पुरोहित, जेमन अपन-अपन परिवार के मुखिया रिहिन, ओमन के संखिया 1,760 रिहिस। ओमन योग्य मनखे रिहिन, अऊ परमेसर के भवन म सेवा करे बर जिम्मेदार रिहिन।
1CH 9:14 लेवीमन ले: समायाह, जऊन ह हस्सूब के बेटा रिहिस, हस्सूब ह अजरीकाम के बेटा, अजरीकाम ह हसबियाह के बेटा रिहिस अऊ येह एक मरारी रिहिस;
1CH 9:15 बकबक्कर, हेरेस अऊ गालाल अऊ मतनयाह, जऊन ह मीका के बेटा रिहिस, मीका ह जिकरी के बेटा, जिकरी ह आसाप के बेटा रिहिस;
1CH 9:16 ओबदयाह, जऊन ह समायाह के बेटा रिहिस, समायाह ह गालाल के बेटा, गालाल ह यदूतून के बेटा रिहिस; अऊ बेरेकियाह, जऊन ह आसा के बेटा रिहिस, आसा ह एलकाना के बेटा रिहिस, जऊन ह नतोपातीमन के गांवमन म रहत रिहिस।
1CH 9:17 दुवारपालमन: सल्लूम, अक्कूब, तलमोन, अहीमन अऊ ओमन के संगी लेवीमन; सल्लूम ह येमन के मुखिया रिहिस
1CH 9:18 अऊ ओह अब तक पूरब कोति राजा के दुवार करा तैनात रिहिस। लेवीमन के डेरा ले येमन दुवारपाल रिहिन।
1CH 9:19 सल्लूम, जऊन ह कोरे के बेटा, एबियासाप के पोता, अऊ कोरह के परपोता रिहिस, ओकर अऊ ओकर कोरही परिवार के ओकर संगी दुवारपालमन ऊपर तम्बू के दुवारमन के पहरेदारी करे के जिम्मेदारी रिहिस, जइसे कि ओमन के पुरखामन ऊपर यहोवा के निवास के प्रवेस दुवार के पहरेदारी करे के जिम्मेदारी रिहिस।
1CH 9:20 पहिले के समय म, एलिआजर के बेटा पीनहास ह दुवारपालमन के अधिकारी रिहिस, अऊ यहोवा ह ओकर संग रिहिस।
1CH 9:21 मसेलेमियाह के बेटा जकरयाह ह मिलापवाला तम्बू के प्रवेस दुवार करा दुवारपाल रिहिस।
1CH 9:22 जऊन मन दुवारमन करा दुवारपाल के रूप म चुने गे रिहिन, ओमन के कुल संखिया 212 रिहिस। ओमन के नांव बंसावली के मुताबिक ओमन के गांवमन म लिखे गे रिहिस। दाऊद अऊ समूएल अगम-दरसी के दुवारा दुवारपालमन ला ओमन के भरोसा के पद म ठहिराय गे रिहिस
1CH 9:23 ओमन अऊ ओमन के संतानमन यहोवा के भवन के दुवारमन म दुवारपालमन के अधिकारी रिहिन—भवन ला मिलापवाला तम्बू कहे जावय।
1CH 9:24 दुवारपालमन चारों दिग म रिहिन: पूरब, पछिम, उत्तर अऊ दक्खिन।
1CH 9:25 ओमन के संगी लेवीमन समय-समय म अपन-अपन गांवमन ले आवंय अऊ सात-सात दिन तक ओमन के काम म हांथ बटावंय।
1CH 9:26 पर चार परधान दुवारपाल, जऊन मन लेवी रिहिन, ओमन ला परमेसर के भवन के कमरामन के अऊ खजानामन के जिम्मेदारी सऊंपे गे रिहिस।
1CH 9:27 ओमन परमेसर के भवन के आसपास ही रथिया बितावंय, काबरकि ओमन ला ओकर पहरेदारी करना पड़य; अऊ रोज बिहनियां ओला खोले बर ओमन करा चाबी के जिम्मेदारी रहय।
1CH 9:28 ओमन म ले कुछू झन के ऊपर मंदिर के सेवा म उपयोग होवइया चीजमन के जिम्मेदारी रिहिस; ओमन ओ चीजमन ला गनंय, जब ओ चीजमन ला भीतर लाने जावय अऊ जब ओ चीजमन ला बाहिर लाने जावय।
1CH 9:29 आने मन ला पबितर-स्थान के साजो-सामान अऊ आने जम्मो चीजमन के देखरेख करे बर ठहिराय गे रिहिस, येकर अलावा येमन ऊपर बिसेस पीसान अऊ अंगूर के मंद, अऊ जैतून तेल, धूप अऊ मसालामन के जिम्मेदारी रिहिस।
1CH 9:30 पर कुछू पुरोहितमन मसाला तियार करे के काम करंय।
1CH 9:31 मत्तितियाह नांव के एक लेवी, जऊन ह कोरही सल्लूम के पहिलांत बेटा रिहिस, ओकर ऊपर भेंट चघाय के रोटी ला सेंके के जिम्मेदारी रिहिस।
1CH 9:32 ओमन के संगी लेवी, कुछू कहातीमन ऊपर हर बिसराम दिन म मेज ऊपर रखइया रोटी ला तियार करे के जिम्मेदारी रिहिस।
1CH 9:33 जेमन संगीतकार, लेवी परिवारमन के मुखिया रिहिन, ओमन मंदिर के कमरामन म रहंय अऊ ओमन आने काम नइं करंय, काबरकि ओमन रात अऊ दिन अपन काम बर जिम्मेदार रिहिन।
1CH 9:34 ये जम्मो झन अपन-अपन लेवी परिवार के मुखिया रिहिन; ओमन के बंसावली म ओमन के नांव मुखिया के रूप म लिखे गे रिहिस अऊ ओमन यरूसलेम म रहत रिहिन।
1CH 9:35 गिबोन के ददा येइल गिबोन सहर म रहय। ओकर घरवाली के नांव माका रिहिस।
1CH 9:36 ओकर पहिलांत बेटा अबदोन रिहिस, फेर जूर, कीस, बाल, नेर, नादाब,
1CH 9:37 गदोर, अहियो, जकरयाह अऊ मिकलोत।
1CH 9:38 मिकलोत ह सिमाम के ददा रिहिस। ओमन घलो अपन रिस्तेदारमन के लकठा म यरूसलेम म रहत रिहिन।
1CH 9:39 नेर ह कीस के ददा रिहिस, कीस ह साऊल के ददा रिहिस, अऊ साऊल ह योनातन, मलकी-सुआ, अबीनादाब, अऊ एस-बाल के ददा रिहिस।
1CH 9:40 योनातन के बेटा: मरीब-बाल, जऊन ह मीका के ददा रिहिस।
1CH 9:41 मीका के बेटामन: पीतोन, मेलेक, तारे अऊ आहाज।
1CH 9:42 आहाज ह यादा के ददा रिहिस, यादा ह आलेमेत, अजमावेत अऊ जिमरी के ददा रिहिस, अऊ जिमरी ह मोसा के ददा रिहिस।
1CH 9:43 अऊ मोसा ह बीना के ददा रिहिस; अऊ बीना के बेटा रपायाह रिहिस, रपायाह के बेटा एलासा अऊ एलासा के बेटा आसेल रिहिस।
1CH 9:44 आसेल के छै बेटा रिहिन, अऊ ये ओमन के नांव अंय: अजरीकाम, बोकेरू, इसमायल, सारयाह, ओबदयाह अऊ हानान। येमन आसेल के बेटा रिहिन।
1CH 10:1 इही दौरान पलिस्तीमन इसरायलीमन ले लड़िन; इसरायलीमन ओमन ले हारके भाग गीन, अऊ बहुंते झन गिलबो नांव के पहाड़ म मारे गीन।
1CH 10:2 पलिस्तीमन साऊल अऊ ओकर बेटामन के तेजी से पीछा करत रिहिन; अऊ ओमन ओकर बेटा योनातन, अबीनादाब अऊ मलकी-सुआ ला मार डारिन।
1CH 10:3 साऊल के चारों कोति भयंकर लड़ई होय लगिस, अऊ जब धनुसधारीमन पीछा करके ओला घेर लीन, त ओमन ओला घायल कर दीन।
1CH 10:4 तब साऊल ह अपन हथियार ढोवइया ला कहिस, “अपन तलवार खींचके मोला भोंग दे, नइं तो ये खतनारहित मनखेमन आके मोर ठट्ठा करहीं।” पर ओकर हथियार ढोवइया ह डरके वइसने नइं करिस; तब साऊल ह अपन तलवार ला ठाढ़ करके ओकर ऊपर गिर गीस।
1CH 10:5 जब हथियार ढोवइया ह देखिस कि साऊल ह मर गीस, त ओह घलो अपन तलवार ऊपर गिरके मर गीस।
1CH 10:6 ये किसम ले साऊल अऊ ओकर तीनों बेटा मर गीन, अऊ ओकर घर के जम्मो झन एक संग मर गीन।
1CH 10:7 जब घाटी के जम्मो इसरायलीमन देखिन कि पूरा सेना के मनखेमन भाग गीन अऊ साऊल अऊ ओकर बेटामन मर गे हवंय, त ओमन अपन-अपन नगरमन ला छोंड़के भाग गीन। अऊ पलिस्तीमन आके ओ नगरमन ला अपन अधिकार म ले लीन।
1CH 10:8 दूसर दिन जब पलिस्तीमन मरे मनखेमन के माल ला लूटे बर आईन, त ओमन ला साऊल अऊ ओकर बेटामन के लास गिलबो पहाड़ म मिलिस।
1CH 10:9 ओमन साऊल के ओनहा ला उतारके ओकर मुड़ ला काटिन अऊ ओकर मुड़ ला ओकर हथियार संग ले गीन, अऊ पलिस्तीमन के पूरा देस म संदेसियामन ला पठोके अपन मूरती अऊ अपन मनखेमन के बीच ये संदेस के घोसना करवा दीन।
1CH 10:10 ओमन साऊल के हथियार ला अपन देवतामन के मंदिर म रखिन अऊ ओकर मुड़ ला दागोन देवता के मंदिर म टांग दीन।
1CH 10:11 जब याबेस-गिलाद के जम्मो रहइयामन सुनिन कि पलिस्तीमन साऊल के संग का करे हवंय,
1CH 10:12 त ओमन के जम्मो बहादुर आदमीमन गीन अऊ साऊल अऊ ओकर बेटामन के लास ला याबेस म ले आईन। तब ओमन साऊल अऊ ओकर बेटामन के हाड़ा ला याबेस म बड़े रूख के खाल्हे म गाड़ दीन, अऊ ओमन दुखी होके सात दिन तक उपास रखिन।
1CH 10:13 साऊल ह मर गीस, काबरकि ओह यहोवा के संग बिसवासघात करिस; ओह यहोवा के बचन के पालन नइं करिस; अऊ त अऊ ओह सलाह लेय बर एक भूतसिद्धी करइया ले मदद लीस,
1CH 10:14 अऊ ओह यहोवा ले पुछताछ नइं करिस। एकरसेति यहोवा ह ओला मारके राज ला यिसै के बेटा दाऊद ला दे दीस।
1CH 11:1 ओकर बाद जम्मो इसरायलीमन हेबरोन म दाऊद मेर आके कहिन, “सुन, हमन तोर खुद के मांस अऊ लहू अन।
1CH 11:2 पहिले, जब साऊल ह राजा रिहिस, तब तेंहीच ह सैनिक अभियान म इसरायल के अगुवई करत रहय। अऊ यहोवा तोर परमेसर ह तोला कहे रिहिस, ‘तेंह मोर मनखे इसरायल के चरवाहा होबे, अऊ तेंह ओमन ऊपर सासन करबे।’ ”
1CH 11:3 जब इसरायल के जम्मो अगुवामन हेबरोन म राजा दाऊद करा आ गीन, त ओह हेबरोन म ओमन के संग यहोवा के आघू म एक करार करिस, अऊ समूएल के जरिये यहोवा के करे गय वायदा के मुताबिक, ओमन इसरायल ऊपर दाऊद ला राजा के रूप म अभिसेक करिन।
1CH 11:4 तब दाऊद ह जम्मो इसरायलीमन के संग यरूसलेम सहर गीस, (यरूसलेम ला यबूस घलो कहे जाथे)। जऊन यबूसीमन उहां रहत रिहिन,
1CH 11:5 ओमन दाऊद ले कहिन, “तेंह इहां नइं आय पाबे।” तभो ले, दाऊद ह सियोन के गढ़ ऊपर कब्जा कर लीस—जऊन ह दाऊद के नगर अय।
1CH 11:6 दाऊद ह कहे रिहिस, “जऊन ह यबूसीमन ऊपर हमला करे म अगुवई करही, ओह मुखिया सेनापति होही।” तब सरूयाह के बेटा योआब ह सबले पहिले उहां गीस, अऊ ये किसम ले ओला सेनापति के पद दिये गीस।
1CH 11:7 तब दाऊद ह ओ गढ़ म रहे लगिस, अऊ ओकर खातिर ओला दाऊद के सहर कहे गीस।
1CH 11:8 ओह एकर चारों कोति सहर ला बनाईस, छत ले लेके चारों कोति दीवार ला बनवाईस, जबकि योआब ह सहर के बाकि काम ला पूरा करिस।
1CH 11:9 अऊ दाऊद ह अऊ जादा सक्तिसाली होवत गीस, काबरकि सर्वसक्तिमान यहोवा ह ओकर संग रिहिस।
1CH 11:10 येमन दाऊद के बड़े सूरबीरमन के मुखिया रिहिन—यहोवा के वायदा के मुताबिक येमन जम्मो इसरायल के संग दाऊद के राज ला पूरा देस म फईलाय बर बहुंत सहयोग करिन—
1CH 11:11 येह दाऊद के बड़े सूरबीरमन के सूची अय: एक हकमोनी के बेटा यासोबाम ह अधिकारीमन के मुखिया रिहिस; ओह तीन सौ आदमीमन ऊपर अपन बरछी उठाईस, अऊ ओमन ला एकेच मुकाबला म मार डारिस।
1CH 11:12 ओकर बाद अहोही दोदै के बेटा एलिआजर रिहिस, जऊन ह तीन बड़े योद्धा म ले एक झन रिहिस।
1CH 11:13 ओह पस-दमीम म दाऊद के संग रिहिस, जब पलिस्तीमन उहां लड़ई बर जूरे रिहिन। ओ जगह जिहां जौ के फसल ले भरे एक खेत रिहिस, अऊ सेना ह पलिस्तीमन ले डरके भाग गीस।
1CH 11:14 पर ओमन ओ खेत के बीच म ठाढ़ होके ओमन के सामना करिन। ओमन लड़िन अऊ पलिस्तीमन ला मार डारिन, अऊ यहोवा ह एक बड़े जीत देवाईस।
1CH 11:15 तीस मुखियामन ले तीन झन दाऊद करा चट्टान म आईन, जऊन ह अदुल्लाम के गुफा म रिहिस, जबकि पलिस्तीमन के एक दल ह रपाईम के घाटी म डेरा डाले रहय।
1CH 11:16 ओ बेरा दाऊद ह गढ़ म रिहिस, अऊ पलिस्तीमन के गढ़ के सेना ह बैतलहम म रिहिस।
1CH 11:17 दाऊद ला बहुंत पीयास लगिस, त ओह कहिस, “हाय, कोनो मोला बैतलहम के दुवार के लकठा के कुआं ले पानी लानके पीयावव!”
1CH 11:18 तब ओ तीनों झन पलिस्तीमन के कतार ला टोरके बैतलहम के दुवार के लकठा के कुआं ले पानी निकालिन अऊ ओ पानी ला लेके दाऊद करा वापिस आ गीन। पर ओह ओ पानी ला पीये ले मना करिस; अऊ ओह ओ पानी ला यहोवा के आघू म ढार दीस।
1CH 11:19 ओह कहिस, “परमेसर ह मोला अइसन काम करई ले दूरिहा रखय। का में ये आदमीमन के लहू पीयंव, जऊन मन अपन परान ला जोखिम म डालके उहां गे रिहिन?” काबरकि ओमन अपन परान ला जोखिम म डालके ओ पानी ला लाने रिहिन, एकरसेति ओह ओला नइं पीईस। ये तीनों बड़े सूरबीरमन के बीरता के काम अइसने रिहिस।
1CH 11:20 योआब के भाई अबीसै ह ओ तीनों झन के मुखिया रिहिस। ओह तीन सौ आदमीमन के बिरूध अपन बरछी उठाके ओमन ला मार डारिस, अऊ ये किसम ले ओह ओ तीनों के सहीं नामी हो गीस।
1CH 11:21 ओला ओ तीनों ले दू गुना आदर मिलिस, अऊ ओह ओमन के सेनापति बनिस, हालाकि ओला ओ तीनों के बीच सामिल नइं करे गीस।
1CH 11:22 यहोयादा के बेटा बनायाह ह कबसेल सहर के एक बड़े बीर रिहिस, अऊ ओह बहुंत बीरता देखाईस। ओह मोआब के दू झन सबले बड़े योद्धामन ला मार गिराईस। बरफ गिरे के दिन म, ओह खाल्हे एक खंचवा म उतरके एक सिंह ला घलो मार डारिस।
1CH 11:23 अऊ ओह एक मिसरी मनखे ला मार डारिस, जऊन ह पांच क्यूबीट ऊंच रिहिस। हालाकि ओ मिसरी ह अपन हांथ म बुनकर के डोंगी असन एक ठन बरछी धरे रिहिस, पर बनायाह एक ठन बड़े लउठी लेके ओकर बिरूध गीस। ओह ओ मिसरी के हांथ ले बरछी ला छीन लीस अऊ ओकरेच बरछी ले ही ओला मार डारिस।
1CH 11:24 यहोयादा के बेटा बनायाह के बीरता के काम अइसने रिहिस; ओह घलो ओ तीनों बड़े सूरबीरमन सहीं नामी रिहिस।
1CH 11:25 ओला ओ तीस सूरबीरमन ले जादा आदर मिलिस, पर ओला ओ तीनों म सामिल नइं करे गीस। अऊ दाऊद ह ओला अपन अंग रकछकमन के मुखिया ठहिराईस।
1CH 11:26 बड़े सूरबीरमन ये रिहिन: योआब के भाई असाहेल, बैतलहम के दोदो के बेटा एल्हानान,
1CH 11:27 हरोरी सम्मोत, पलोनी हेलेस,
1CH 11:28 तकोआ ले इक्केस के बेटा ईरा, अनातोत ले अबिएजेर,
1CH 11:29 हूसाती सिब्बकै, अहोही ईलै,
1CH 11:30 नतोपाती महरै, नतोपाती बाना के बेटा हेलेद,
1CH 11:31 बिनयामीन म गिबा ले रीबै के बेटा इतै, पिरातोनी बनायाह,
1CH 11:32 गास के घाटीमन ले हूरै, अरबात के अबीएल,
1CH 11:33 बहरूमी अजमावेत, सालबोनी एल्यहबा,
1CH 11:34 गीजोनी हसेम के बेटामन, हरारी सागे के बेटा योनातन,
1CH 11:35 हरारी साकार के बेटा अहीआम, ऊर के बेटा एलीपाल,
1CH 11:36 मकेराती हेपेर, पलोनी अहियाह,
1CH 11:37 करमेली हेसरो, एजबै के बेटा नारै,
1CH 11:38 नातान के भाई योएल, हगरी के बेटा मिभार,
1CH 11:39 अमोनी सेलेक, बेरोती नहरै, जऊन ह सरूयाह के बेटा योआब के हथियार ढोवइया रिहिस,
1CH 11:40 येतेरी ईरा येतेरी गारेब,
1CH 11:41 हित्ती उरियाह, अहलै के बेटा जाबाद,
1CH 11:42 रूबेनी सीजा के बेटा अदीना, जऊन ह रूबेनीमन के मुखिया रिहिस, अऊ ये तीस झन ओकर संग रिहिन,
1CH 11:43 माका के बेटा हानान, मितनी योसापात,
1CH 11:44 असतरोती उजियाह, अरोएरी होताम के बेटा सामा अऊ येइल,
1CH 11:45 सिमरी के बेटा यदीएल अऊ ओकर भाई तीसी योहा,
1CH 11:46 महवी के एलीएल, एलनाम के बेटा यरीबै अऊ योसब्याह, मोआबी यितमा,
1CH 11:47 एलीएल, ओबेद अऊ मसोबाई यासीएल।
1CH 12:1 जब दाऊद ह सिकलग नगर म कीस के बेटा राजा साऊल के डर के मारे छिपे रिहिस, तब येमन ओ आदमी रिहिन, जेमन दाऊद करा आईन (येमन ओ योद्धामन के बीच म ले रिहिन, जेमन लड़ई म ओकर मदद करिन।
1CH 12:2 येमन धनुस धरे रिहिन, अऊ जेवनी या डेरी हांथ ले तीर चलाय या गोफन के पथरा चलाय सकत रिहिन; येमन बिनयामीन के गोत्र ले साऊल के रिस्तेदार रिहिन):
1CH 12:3 गिबाती समाआ के बेटामन अहीएजेर अऊ योआस; अहीएजेर ह ओमन के मुखिया रिहिस; अजमावेत के बेटामन यजीएल अऊ पेलेत; बराका अऊ अनातोती येहू,
1CH 12:4 अऊ गिबोनी यिसमायाह, जऊन ह तीस म ले एक बड़े योद्धा रिहिस अऊ ओ तीस झन के एक अगुवा रिहिस; फेर यरमियाह, यहजीएल, योहानान, गदेराती योजाबाद,
1CH 12:5 एलूजै, यरीमोत, बाल्याह, समरयाह, हारूपी सपतयाह;
1CH 12:6 एलकाना, यिसियाह, अजरेल, योएजेर, यासोबाम, येमन जम्मो कोरहबंसी रिहिन;
1CH 12:7 अऊ गदोर नगर ले यरोहाम के बेटा योएला अऊ जबदयाह।
1CH 12:8 जब दाऊद ह निरजन प्रदेस म अपन गढ़ म रिहिस, त कुछू गादीमन अलग होके ओकर करा आ गीन। ओमन साहसी योद्धा रिहिन, लड़ई बर तियार अऊ ढाल अऊ बरछी चलाय म माहिर रिहिन। ओमन के मुहूं ह सिंह के मुहूं असन रिहिस, अऊ ओमन पहाड़ी हिरन असन तेज दऊड़नेवाला रिहिन।
1CH 12:9 एजेर ह मुखिया रिहिस, दूसरा ओबदयाह, तीसर एलीआब,
1CH 12:10 चौथा मिसमन्ना, पांचवां यरमियाह,
1CH 12:11 छठवां अत्तै, सातवां एलीएल,
1CH 12:12 आठवां योहानान, नौवां एलजाबाद,
1CH 12:13 दसवां यरमियाह अऊ गियारहवां मकबनै रिहिस।
1CH 12:14 ये गादीमन सेना के सेनापति रिहिन; ओमन म जऊन ह सबले छोटे रिहिस, ओह एक सौ के बराबर, अऊ जऊन ह सबले बड़े रिहिस ओह एक हजार के बराबर रिहिस।
1CH 12:15 येमन ही ओ रिहिन, जेमन साल के पहिला महिना म यरदन नदी के ओ पार गीन, जब नदी म जम्मो किनारामन के ऊपर तक पानी बहत रिहिस, अऊ ओमन घाटीमन म रहइया जम्मो झन ला पूरब अऊ पछिम कोति भगा दीन।
1CH 12:16 यहूदा ले आने बिनयामीनी अऊ कुछू आदमीमन घलो दाऊद करा गढ़ म आईन।
1CH 12:17 ओमन ले भेंट करे बर दाऊद निकलके गीस अऊ ओमन ला कहिस, “यदि तुमन मोर करा सांति के भाव म मोर मदद करे बर आय हव, त मेंह तियार हंव कि तुमन मोर संग जुड़ जावव। पर यदि तुमन धोखा देके मोला मोर बईरीमन के हांथ म पकड़वाय बर आय हवव, त हमर पुरखामन के परमेसर येला देखय अऊ तुम्हर नियाय करय, काबरकि मोर हांथमन कोनो गलत काम नइं करे हवंय।”
1CH 12:18 तब आतमा ह अमासै ऊपर आईस, जऊन ह तीस सूरबीरमन के मुखिया रिहिस, अऊ ओह कहिस, “हे दाऊद, हमन तोर अन! हे यिसै के बेटा! हमन तोर संग हवन! तोला सफलता अऊ सफलता मिलय, अऊ जऊन मन तोर मदद करथें, ओमन ला सफलता मिलय, काबरकि तोर परमेसर तोर मदद करही।” एकर खातिर दाऊद ह ओमन ला स्वीकार करिस अऊ ओमन ला अपन हमला करइया दलमन के मुखिया बना दीस।
1CH 12:19 जब दाऊद ह पलिस्तीमन के संग साऊल के बिरूध लड़े बर गीस, मनस्से गोत्र के कुछू मनखे घलो आके दाऊद के संग मिल गीन। (ओह अऊ ओकर आदमीमन पलिस्तीमन के मदद नइं करिन, काबरकि, सलाह करे के बाद, पलिस्तीमन के सासकमन ओला वापिस भेज दीन। ओमन कहिन, “यदि ओह अपन मालिक संग मिल जाही, त ओह हमन के मुड़ ला कटवा दीही।”)
1CH 12:20 जब दाऊद ह सिकलग गीस, त येमन मनस्से के ओ आदमीमन रिहिन, जेमन आके ओकर संग मिल गे रिहिन: अदना, योजाबाद, यदीएल, मिकाएल, योजाबाद, एलीहू अऊ सिल्लतै; येमन मनस्से के एक-एक हजार दल के मुखिया रिहिन।
1CH 12:21 येमन हमला करइया दलमन के बिरूध दाऊद के मदद करिन, काबरकि ये जम्मो झन बीर योद्धा रिहिन, अऊ ओमन ओकर सेना म सेनापति रिहिन।
1CH 12:22 दिनों-दिन आदमीमन दाऊद करा ओकर मदद करे बर आते रिहिन, जब तक कि ओकर करा एक बड़े सेना नइं हो गीस, परमेसर के सेना सहीं।
1CH 12:23 येह ओ आदमीमन के संखिया ए, जेमन लड़ई बर हथियार बांधे हेबरोन म दाऊद करा आईन, ताकि यहोवा के कहे मुताबिक ओमन साऊल के राज ला दाऊद के हांथ म कर देवंय:
1CH 12:24 यहूदा ले लड़ई बर ढाल अऊ बरछी लेके 6,800 हथियारवाले आदमी;
1CH 12:25 सिमोन ले लड़ई बर तियार योद्धामन 7,100;
1CH 12:26 लेवीमन ले 4,600 आदमी;
1CH 12:27 हारून के परिवार के अगुवा यहोयादा ला मिलाके ओकर संग 3,700 आदमी,
1CH 12:28 अऊ सादोक, एक बीर जवान योद्धा, अऊ ओकर संग ओकर परिवार के 22 अधिकारीमन;
1CH 12:29 साऊल के गोत्र, बिनयामीन ले 3,000; येमा के जादातर आदमीमन ओ समय तक साऊल के घराना के वफादार रिहिन;
1CH 12:30 एपरैम ले, बीर योद्धामन, अपन-अपन कुल म नामी रिहिन 20,800;
1CH 12:31 मनस्से के आधा गोत्र म ले, जेमन ला नामांकित करे गे रिहिस कि ओमन आके दाऊद ला राजा बनावंय 18,000;
1CH 12:32 इस्साकार ले, ओ आदमी, जेमन समय ला समझत रिहिन अऊ ये जानत रिहिन कि इसरायल ला का करना चाही 200 मुखियामन, संग म ओमन के अधीन ओमन के जम्मो रिस्तेदार।
1CH 12:33 जबूलून म ले, हर किसम के हथियार के संग लड़ई बर तियार अनुभवी सैनिक, जेमन पूरा वफादारी से दाऊद के मदद करे बर तियार रिहिन 50,000;
1CH 12:34 फेर नपताली म ले 1,000 अधिकारीमन ला मिलाके 37,000 आदमी, जेमन ढाल अऊ बरछी धरे रहंय;
1CH 12:35 दान म ले, लड़ई बर तियार आदमी 28,600;
1CH 12:36 अऊ आसेर म ले, लड़ई बर तियार अनुभवी सैनिक 40,000;
1CH 12:37 अऊ यरदन नदी के पूरब कोति रूबेन, गाद अऊ मनस्से के आधा गोत्र म ले, हर किसम के हथियार धरे आदमी 1,20,000 रिहिन।
1CH 12:38 ये जम्मो के जम्मो योद्धा रिहिन अऊ अपन मरजी से सेना म मिले पद के मुताबिक सेवा करे बर तियार रिहिन। ओमन पूरा मनसा से दाऊद ला जम्मो इसरायल ऊपर राजा बनाय बर हेबरोन म आईन। बाकि बांचे जम्मो इसरायलीमन घलो दाऊद ला राजा बनाय बर एक हो गे रिहिन।
1CH 12:39 आदमीमन उहां तीन दिन दाऊद के संग खावत-पीयत बिताईन, काबरकि ओमन के परिवार के मनखेमन ओमन बर खाय-पीये के परबंध करिन।
1CH 12:40 ओमन के दूरिहा-दूरिहा के पड़ोसी, जइसे कि इस्साकार, जबूलून अऊ नपताली गोत्र के मनखेमन घलो गदहा, ऊंट, खच्चर अऊ बईलामन के ऊपर खाय-पीये के सामान जोरके ओमन करा आईन। ओमा बहुंत अकन पीसान, अंजीर के टिकिया, किसमिस के टिकिया, अंगूर के मंद, जैतून तेल, गरूवा-बईला अऊ भेड़मन रिहिन, काबरकि इसरायल म आनंद मनाय जावत रिहिस।
1CH 13:1 कुछू समय बाद, दाऊद अपन हर एक अधिकारीमन ले, हजार-हजार के ऊपर ठहिराय सेनापति अऊ सौ-सौ के ऊपर ठहिराय सेनापतिमन ले सलाह-मसविरा करिस।
1CH 13:2 ओह तब जम्मो इसरायली सभा ले कहिस, “यदि येह तुमन ला बने लगय अऊ यदि येह यहोवा हमर परमेसर के ईछा अय, त आवव, हमन दूरिहा-दूरिहा म बाकि बांचे हमर मनखेमन करा इसरायल के जम्मो इलाका म खबर पठोवन, अऊ ओमन के नगर अऊ चरागनमन म ओमन के संग रहइया पुरोहित अऊ लेवीमन करा घलो खबर पठोवन कि ओमन आवंय अऊ हमर संग सामिल हो जावंय।
1CH 13:3 आवव, हमन अपन परमेसर के सन्दूक ला अपन इहां वापिस ले आवन, काबरकि साऊल के राज करे के दौरान हमन येकर बारे म पुछताछ नइं करेंन।”
1CH 13:4 पूरा सभा ये बात म राजी रिहिस, काबरकि जम्मो मनखे ला ये बात बने लगिस।
1CH 13:5 तब किरयत-यारीम सहर ले परमेसर के सन्दूक ला लाने बर, दाऊद ह मिसर के सीहोर नदी ले लेके लेबो-हमात सहर तक जम्मो इसरायलीमन ला इकट्ठा करिस।
1CH 13:6 दाऊद अऊ जम्मो इसरायलीमन यहूदा के बालाह (किरयत-यारीम) सहर करा गीन, ताकि ओ यहोवा परमेसर के सन्दूक ला ले आवंय, जऊन ह करूबमन के बीच म बिराजे हवय—ओ सन्दूक जेला यहोवा के नांव ले पुकारे जाथे।
1CH 13:7 ओमन परमेसर के सन्दूक ला एक ठन नवां गाड़ी म चढ़ाके अबीनादाब के घर ले निकालिन, अऊ उज्जा अऊ अहियो ओ गाड़ी ला हांकत रिहिन।
1CH 13:8 दाऊद अऊ जम्मो इसरायलीमन परमेसर के आघू म तन-मन ले गीत गावत अऊ बीना, सारंगी, डफ, झांझ अऊ तुरही बजाके उत्सव मनात रिहिन।
1CH 13:9 जब ओमन कीदोन के कोठार मेर आईन, तब उज्जा ह सन्दूक ला संभाले बर अपन हांथ बढ़ाईस, काबरकि बईलामन लड़खड़ा गे रिहिन।
1CH 13:10 तब यहोवा के कोरोध उज्जा के ऊपर भड़किस, अऊ ओह ओला मारिस, काबरकि ओह सन्दूक म अपन हांथ लगाय रिहिस। ओह ओहीच मेर परमेसर के आघू म मर गीस।
1CH 13:11 तब दाऊद ह गुस्सा होईस, काबरकि यहोवा के कोप ह उज्जा ऊपर भड़के रिहिस, अऊ आज तक ओ जगह ला पेरेस-उज्जा कहे जाथे।
1CH 13:12 ओ दिन दाऊद ह परमेसर ले डर गीस अऊ पुछिस, “मेंह परमेसर के सन्दूक ला कभू अपन इहां कइसे ला सकत हंव?”
1CH 13:13 तब ओह सन्दूक ला अपन संग दाऊद के नगर म नइं ले गीस। पर ओह येला गत नगर के रहइया ओबेद-एदोम के घर ले गीस।
1CH 13:14 अऊ परमेसर के सन्दूक ह ओबेद-एदोम के परिवार करा ओकर घर म तीन महिना तक रिहिस, अऊ यहोवा ह ओकर घराना अऊ ओकर जम्मो चीज ऊपर आसीस दीस।
1CH 14:1 सूर के राजा हीराम ह दाऊद करा दूतमन ला पठोईस, अऊ संग म ओकर बर एक महल बनाय बर देवदार के लकड़ी अऊ राज-मिसतिरी अऊ बढ़ईमन ला घलो पठोईस।
1CH 14:2 तब दाऊद ला निस्चय हो गे रिहिस कि यहोवा ह ओला इसरायल ऊपर राजा के रूप म इस्थिर करे हवय अऊ अपन मनखे इसरायलीमन के हित म ओकर राज ला बहुंत उठाय हवय।
1CH 14:3 यरूसलेम म दाऊद ह अऊ कतको माईलोगनमन ला अपन घरवाली बना लीस अऊ ओकर कतको बेटा अऊ बेटीमन पईदा होईन।
1CH 14:4 येमन ओ लइकामन के नांव अंय, जेमन उहां ओकर ले जनमिन: सम्मू, सोबाब, नातान, सुलेमान,
1CH 14:5 यिभार, एलीसू, एलपेलेत,
1CH 14:6 नोगह, नेपेग, यापी,
1CH 14:7 एलीसामा, बेल्यादा अऊ एलीपेलेत।
1CH 14:8 जब पलिस्तीमन सुनिन कि जम्मो इसरायल के ऊपर राजा के रूप म दाऊद के अभिसेक करे गे हवय, त ओमन पूरा सेना लेके दाऊद के खोज म निकलिन, पर दाऊद ह येकर बारे म सुनिस अऊ ओमन के सामना करे बर निकलिस।
1CH 14:9 पलिस्तीमन आके रपाईम के घाटी म धावा बोल दे रहंय।
1CH 14:10 तब दाऊद ह परमेसर ले पुछताछ करिस, “का मेंह जाके पलिस्तीमन ऊपर हमला करंव? का तेंह ओमन ला मोर हांथ म कर देबे?” यहोवा ह ओला जबाब दीस, “जा, मेंह ओमन ला तोर हांथ म कर दूहूं।”
1CH 14:11 तब दाऊद अऊ ओकर आदमीमन बाल-परासीम नगर गीन, अऊ उहां दाऊद ह ओमन ला हरा दीस। ओह कहिस, “जइसे पानी के धारा ह फूट निकलथे, वइसे ही परमेसर ह मोर हांथ के दुवारा मोर बईरीमन ला फोर दे हवय।” एकरसेति ओ जगह ला बाल-परासीम कहे गीस।
1CH 14:12 पलिस्तीमन उहां अपन देवतामन ला छोंड़ दे रिहिन, अऊ दाऊद ह हुकूम दीस कि ओमन ला आगी म जला देय जावय।
1CH 14:13 एक बार फेर पलिस्तीमन घाटी ऊपर हमला करिन;
1CH 14:14 तब दाऊद ह परमेसर ले फेर पुछताछ करिस, अऊ परमेसर ह जबाब दीस, “ओमन कोति सीधा झन जा, पर ओमन के चारों कोति घेरा डाल अऊ चिनार रूखमन के आघू म ओमन ऊपर हमला कर।
1CH 14:15 जतेक जल्दी तेंह चिनार रूखमन के पान ऊपर म सेना के चले के खरखराहट ला सुनबे, त लड़ई करे बर निकलबे, काबरकि ओकर ये मतलब होही कि परमेसर ह पलिस्ती सेना ला मारे बर तोर आघू गे हवय।”
1CH 14:16 तब दाऊद ह वइसे ही करिस, जइसे परमेसर ह ओला हुकूम देय रिहिस, अऊ ओमन पलिस्ती सेना ला पूरा गिबोन सहर ले लेके गेजेर नगर तक मार डारिन।
1CH 14:17 तब दाऊद के नांव हर देस म फईल गीस, अऊ यहोवा ह जम्मो जाति के मनखेमन के मन म दाऊद के डर पईदा कर दीस।
1CH 15:1 दाऊद के नगर म अपन बर भवन बनवाय के बाद, दाऊद ह परमेसर के सन्दूक बर एक ठन जगह तियार करिस अऊ येकर बर एक ठन तम्बू खड़े करिस।
1CH 15:2 तब दाऊद ह कहिस, “लेवीमन के छोंड़ अऊ कोनो परमेसर के सन्दूक ला उठाके झन ले जावंय, काबरकि यहोवा ह ओमन ला यहोवा के सन्दूक ला उठाके ले जाय बर अऊ ओकर आघू म हमेसा सेवा-टहल करे बर चुने हवय।”
1CH 15:3 तब दाऊद ह जम्मो इसरायलीमन ला यरूसलेम म ये खातिर इकट्ठा करिस कि यहोवा के सन्दूक ला ओ जगह म लानंय, जेला ओह येकर खातिर तियार करे रिहिस।
1CH 15:4 दाऊद ह हारून के संतान अऊ लेवीमन ला इकट्ठा करिस:
1CH 15:5 कहात के संतानमन ले, उरीएल नांव के अगुवा अऊ ओकर 120 झन रिस्तेदार;
1CH 15:6 मरारी के संतानमन ले, असायाह नांव के अगुवा अऊ ओकर 220 झन रिस्तेदार;
1CH 15:7 गेरसोन के संतानमन ले, योएल नांव के अगुवा अऊ ओकर 130 झन रिस्तेदार;
1CH 15:8 एलीसापान के संतानमन ले, समायाह नांव के अगुवा अऊ ओकर 200 रिस्तेदारमन;
1CH 15:9 हेबरोन के संतानमन ले, एलीएल नांव के अगुवा अऊ ओकर 80 रिस्तेदारमन;
1CH 15:10 अऊ उजीएल के संतानमन ले, अमीनादाब नांव के अगुवा अऊ ओकर 112 रिस्तेदारमन।
1CH 15:11 तब दाऊद ह सादोक अऊ अबियातार पुरोहितमन ला, अऊ उरीएल, असायाह, योएल, समायाह, एलीएल अऊ अमीनादाब नांव के लेवीमन ला बुलवाईस
1CH 15:12 अऊ ओह ओमन ले कहिस, “तुमन तो लेवी परिवारमन के मुखिया अव; तुमन अऊ तुम्हर संगी लेवीमन अपनआप ला पबितर करव अऊ इसरायल के परमेसर यहोवा के सन्दूक ला ओ जगह म ले आवव, जेला मेंह येकर बर तियार करे हंव।
1CH 15:13 काबरकि पहिली बार तुम, लेवीमन ओला उठाके नइं लानेव, एकर कारन यहोवा हमर परमेसर के गुस्सा हमर ऊपर भड़किस। हमन ओकर ले पुछताछ नइं करेंन कि बताय गय तरीका म येला कइसे करे जावय।”
1CH 15:14 तब पुरोहित अऊ लेवीमन इसरायल के परमेसर, यहोवा के सन्दूक ला लाने बर अपनआप ला पबितर करिन।
1CH 15:15 अऊ लेवीमन परमेसर के सन्दूक ला ओमा लगे डंडामन ला धरके उठाईन अऊ अपन कंधा म रखके ले चलिन, जइसे कि मूसा ह यहोवा के बचन मुताबिक हुकूम दे रिहिस।
1CH 15:16 दाऊद ह लेवीमन के अगुवामन ला कहिस कि ओमन अपन संगी लेवीमन ला संगीतकार ठहिरावंय ताकि ओमन आनंद के संग बाजा याने कि सारंगी, बीना अऊ झांझ बजावंय अऊ गावंय।
1CH 15:17 तब लेवीमन योएल के बेटा हेमान ला; ओकर रिस्तेदारमन ले बेरेकियाह के बेटा आसाप ला; अऊ ओमन के रिस्तेदार मरारीमन ले कुसायाह के बेटा एतान ला ठहिराईन।
1CH 15:18 ओमन के संग ओमन के रिस्तेदार, जेमन ओकर बाद के पद म रिहिन: जकरयाह, बेन, याजीएल, समीरामोत, यहीएल, उन्नी, एलीआब, बनायाह, मासेयाह, मत्तितियाह, एलीपलेह, मिकनेयाह, अऊ ओबेद-एदोम अऊ येइल, जऊन मन दुवारपाल रिहिन।
1CH 15:19 हेमान, आसाप अऊ एतान नांव के संगीतकारमन कांसा के झांझमन ला बजावंय;
1CH 15:20 जकरयाह, अजीएल, समीरामोत, यहीएल, उन्नी, एलीआब, मासेयाह, अऊ बनायाह, अलामोत नांव के राग म सारंगी ला बजावंय,
1CH 15:21 अऊ मत्तितियाह, एलीपलेह, मिकनेयाह, ओबेद-एदोम, येइल अऊ अजजियाह, सेमिनित नांव के राग म अगुवई करत बीनामन ला बजावंय।
1CH 15:22 कननियाह नांव के लेवी ह गवइयामन के मुखिया रिहिस; ओह ओकर जिम्मेदारी रिहिस, काबरकि ओह ओ काम म माहिर रिहिस।
1CH 15:23 बेरेकियाह अऊ एलकाना सन्दूक के दुवारपाल रिहिन।
1CH 15:24 सबनियाह, योसापात, नतनेल, अमासै, जकरयाह, बनायाह अऊ एलिएजेर नांव के पुरोहितमन परमेसर के सन्दूक के आघू-आघू तुरही बजावंय। ओबेद-एदोम अऊ यहियाह घलो सन्दूक के दुवारपाल रिहिन।
1CH 15:25 ये किसम ले, दाऊद अऊ इसरायलीमन के अगुवा अऊ एक-एक हजार दल के सेनापतिमन चलिन कि ओमन यहोवा के करार के सन्दूक ला ओबेद-एदोम के घर ले आनंद के संग ले आवंय।
1CH 15:26 काबरकि परमेसर ह ओ लेवीमन के मदद करिस, जेमन यहोवा के करार के सन्दूक ला उठाके ले जावत रिहिन, त सात ठन बईला अऊ सात ठन मेढ़ा ला बलि करे गीस।
1CH 15:27 दाऊद ह सुघर मलमल के ओनहा पहिरे रिहिस, संग म सन्दूक उठाके ले जवइया जम्मो लेवीमन, अऊ संगीतकारमन, अऊ गीत गवइयामन के मुखिया कननियाह घलो सुघर मलमल के ओनहा पहिरे रिहिन। दाऊद ह मलमल के एक एपोद घलो पहिरे रिहिस।
1CH 15:28 ये किसम ले, जम्मो इसरायलीमन यहोवा के करार के सन्दूक ला जय-जयकार करत, अऊ नरसिंगा, अऊ तुरही, अऊ झांझ अऊ सारंगी अऊ बीना बजात ले आईन।
1CH 15:29 जब यहोवा के करार के सन्दूक ह दाऊद के नगर म प्रवेस करत रिहिस, त साऊल के बेटी मीकल ह खिड़की ले झांकके देखिस। जब ओह दाऊद राजा ला नाचत अऊ खुसी मनात देखिस, त ओह अपन मन म ओला तुछ समझिस।
1CH 16:1 ओमन परमेसर के सन्दूक ला लानके ओ तम्बू के भीतर म रख दीन, जऊन ला दाऊद ह ओकर बर बनाय रिहिस, अऊ ओमन परमेसर के आघू म होम-बलिदान अऊ मेल-बलिदान चघाईन।
1CH 16:2 जब दाऊद ह होम-बलिदान अऊ मेल-बलिदान चघा लीस, त ओह यहोवा के नांव म मनखेमन ला आसीस दीस।
1CH 16:3 तब ओह हर एक इसरायली आदमी अऊ माईलोगन ला एक-एक ठन रोटी अऊ एक-एक ठन खजूर के टिकिया अऊ एक-एक ठन किसमिस के टिकिया बंटवाईस।
1CH 16:4 तब दाऊद ह कुछू लेवीमन ला ठहिराईस कि ओमन यहोवा के सन्दूक के आघू म यहोवा, इसरायल के परमेसर के इस्तुति, धनबाद अऊ परसंसा करे के दुवारा सेवा करंय:
1CH 16:5 आसाप ह मुखिया रिहिस, अऊ ओकर बाद जकरयाह के पद रिहिस, फेर याजीएल, समीरामोत, यहीएल, मत्तितियाह, एलीआब, बनायाह, ओबेद-एदोम अऊ येइल रिहिन। येमन ला सारंगी अऊ बीना बजाना रिहिस, अऊ आसाप ला झांझ बजाना रिहिस,
1CH 16:6 बनायाह अऊ यहजीएल नांव के पुरोहितमन ला परमेसर के करार के सन्दूक के आघू म लगातार तुरही बजाना रिहिस।
1CH 16:7 ओ दिन दाऊद ह आसाप अऊ ओकर सहायकमन ला ठहिराईस कि ओमन ये तरीका ले यहोवा के परसंसा करंय:
1CH 16:8 यहोवा के परसंसा करव, ओकर नांव के घोसना करव; जाति-जाति के मनखेमन के बीच म ओकर करे गे काम ला बतावव।
1CH 16:9 ओकर गीत गावव, ओकर परसंसा के गीत गावव; ओकर जम्मो अद्भूत काम के बखान करव।
1CH 16:10 ओकर पबितर नांव के महिमा होवय; जऊन मन यहोवा के खोज करथें, ओमन के मन आनंदित होवय।
1CH 16:11 यहोवा अऊ ओकर बल के खोज म रहव; हमेसा ओकर दरसन के खोज म रहव।
1CH 16:12 ओकर करे गे अद्भूत काम, ओकर चमतकार, अऊ ओकर दिये गय नियाय ला सुरता करव,
1CH 16:13 हे ओकर सेवक, इसरायल के संतानमन, हे ओकर चुने गय मनखे, याकूब के लइकामन।
1CH 16:14 ओह यहोवा हमर परमेसर ए; जम्मो धरती म ओकर नियाय हवय।
1CH 16:15 ओह अपन करे गे करार, हजार पीढ़ी के मनखेमन बर करे गे वायदा,
1CH 16:16 अब्राहम के संग करे गे करार, इसहाक के संग खाय गे सपथ ला सदाकाल बर सुरता रखथे।
1CH 16:17 ओह येला याकूब के संग एक बिधि के रूप म, इसरायल के संग हमेसा के एक करार के रूप म ये कहिके मजबूत करिस:
1CH 16:18 “तोला मेंह कनान देस दूहूं, एक निज भाग के रूप म तोला ओह मिलही।”
1CH 16:19 जब ओमन गनती म थोरकन ही रिहिन, वास्तव म थोरकन रिहिन, अऊ ओ देस म अजनबी रिहिन,
1CH 16:20 त ओमन एक जाति ले आने जाति, अऊ एक राज ले दूसर राज म भटकत रिहिन।
1CH 16:21 पर परमेसर ह कोनो ला ओमन ला सताय नइं दीस; ओमन के हित म, ओह राजामन ला दबकारिस:
1CH 16:22 “मोर अभिसिक्त मनखेमन ला झन छुवव; मोर अगमजानीमन के कुछू हानि झन करव।”
1CH 16:23 हे धरती के जम्मो मनखेमन, यहोवा बर गीत गावव, ओकर उद्धार के सुसमाचार हर दिन सुनात रहव।
1CH 16:24 जाति-जाति के मनखेमन के बीच म ओकर महिमा के, अऊ जम्मो मनखेमन के बीच ओकर अद्भूत काम के बखान करव।
1CH 16:25 काबरकि यहोवा ह महान अऊ अति परसंसा के योग्य अय; ओह जम्मो देवतामन ले जादा भय के योग्य अय।
1CH 16:26 काबरकि जाति-जाति के जम्मो देवतामन सिरिप मूरती अंय, पर यहोवा ह स्वरग ला बनाईस।
1CH 16:27 सोभा अऊ वैभव ओकर आघू म हवय; ताकत अऊ आनंद ओकर निवास स्थान म हवय।
1CH 16:28 हे जाति-जाति के जम्मो परिवारमन, यहोवा के बखान करव, यहोवा के महिमा अऊ बल के बखान करव।
1CH 16:29 यहोवा के नांव के मुताबिक ओकर बखान करव; भेंट लेके ओकर आघू म आवव। पबितरता ले सोभायमान होके यहोवा के अराधना करव।
1CH 16:30 हे धरती के जम्मो मनखेमन, ओकर आघू म कांपव! संसार ला मजबूती से स्थापित करे गे हवय; येला हटाय नइं जा सकय।
1CH 16:31 अकास ह आनंद मनावय, धरती ह खुस होवय; ओमन जाति-जाति के मनखेमन के बीच म कहंय, “यहोवा राज करथे!”
1CH 16:32 समुंदर अऊ ओमा के जम्मो चीजमन गरजंय; भुइयां अऊ ओमा के हर एक चीज बहुंत आनंदित होवंय!
1CH 16:33 जंगल के रूखमन गीत गावंय, ओमन यहोवा के आघू म आनंद के गीत गावंय, काबरकि ओह धरती के नियाय करे बर आवत हे।
1CH 16:34 यहोवा ला धनबाद देवव, काबरकि ओह बने अय; ओकर मया हमेसा बने रहिथे।
1CH 16:35 ओला पुकारव, “हमर उद्धार करइया परमेसर, हमन ला बचा; हमन ला इकट्ठा कर अऊ हमन ला जाति-जाति के मनखेमन ले छुड़ा, ताकि हमन तोर पबितर नांव ला धनबाद देवन, अऊ तोर परसंसा म बड़ई करन।”
1CH 16:36 आदिकाल ले अनंतकाल तक, यहोवा, इसरायल के परमेसर के परसंसा होवय। तब जम्मो मनखेमन कहिन, “आमीन” अऊ “यहोवा के परसंसा होवय।”
1CH 16:37 तब दाऊद ह आसाप अऊ ओकर सहायकमन ला यहोवा के करार के सन्दूक के आघू म छोंड़ दीस, ताकि ओमन उहां हर दिन के जरूरत के मुताबिक लगातार सेवा करंय।
1CH 16:38 ओह ओबेद-एदोम अऊ ओकर अड़सठ सहायकमन ला घलो ओमन के संग सेवा करे बर छोंड़ दीस। यदूतून के बेटा ओबेद-एदोम अऊ होसा घलो दुवारपाल रिहिन।
1CH 16:39 दाऊद ह सादोक पुरोहित अऊ ओकर संगी पुरोहितमन ला यहोवा के पबितर-तम्बू के आघू म, जऊन ह गिबोन के ऊंचहा जगह म हवय, ठहिरा दीस,
1CH 16:40 ताकि ओमन लगातार बिहनियां अऊ संझा के बेरा, होम-बलिदान के बेदी म यहोवा ला होम-बलिदान चघावंय अऊ ये जम्मो काम यहोवा के कानून म लिखे मुताबिक करंय, जऊन ला यहोवा ह इसरायल ला देय रिहिस।
1CH 16:41 ओमन के संग हेमान अऊ यदूतून अऊ बाकि बांचे ओ आने मन घलो रिहिन, जऊन मन ला नांव लेके चुने गे रिहिस, ताकि ओमन यहोवा के नांव के धनबाद ये किसम ले करंय, “ओकर मया सदाकाल तक बने रहिथे।”
1CH 16:42 हेमान अऊ यदूतून के ऊपर तुरही अऊ झांझमन ला बजाय के अऊ पबितर गीत गाय के बेरा आने बाजामन ला बजाय के जिम्मेदारी रिहिस। यदूतून के बेटामन ला दुवार के रखवारी करे बर ठहिराय गे रिहिस।
1CH 16:43 तब जम्मो मनखेमन अपन-अपन घर चले गीन, अऊ दाऊद ह अपन परिवार ला आसीस देय बर अपन घर लहुंट गीस।
1CH 17:1 जब दाऊद ह अपन महल म रहे लगिस, त ओह नातान अगमजानी ला कहिस, “देख, मेंह देवदार रूख ले बने घर म रहत हंव, जबकि यहोवा के करार के सन्दूक ह एक तम्बू म हवय।”
1CH 17:2 नातान ह दाऊद ला कहिस, “जऊन कुछू तोर मन म हवय, ओला कर, काबरकि परमेसर ह तोर संग हवय।”
1CH 17:3 पर ओहीच रथिया परमेसर के ये बचन नातान मेर आईस:
1CH 17:4 “जाके मोर सेवक दाऊद ला कह, ‘यहोवा ह ये कहत हे: तेंह ओ मनखे नो हस, जऊन ह मोर रहे बर घर बनाबे।
1CH 17:5 जब ले मेंह इसरायल ला मिसर देस ले निकालके लाने हंव, ओ दिन ले लेके आज तक मेंह कोनो घर म नइं रहे हंव। मेंह एक तम्बू ले दूसर तम्बू, एक निवास ले दूसर निवास म रहत आय हंव।
1CH 17:6 जिहां-जिहां मेंह जम्मो इसरायलीमन के संग गेंव, का मेंह कभू ओमन के ऊपर सासन करइयामन ले, जेमन ला मेंह अपन इसरायली मनखेमन ऊपर अगुवा ठहिराय रहेंव, ओमन ले कोनो ला अइसन बात कहेंव, “तेंह मोर बर देवदार लकड़ी के घर काबर नइं बनवाय?” ’
1CH 17:7 “एकरसेति अब, मोर सेवक दाऊद ले कह, ‘सर्वसक्तिमान यहोवा ह ये कहत हे: मेंह तोला चरागन ले, भेड़-बकरीमन ला चराय के काम ले लेंव, अऊ मोर इसरायली मनखेमन ऊपर सासन करइया ठहिरांय।
1CH 17:8 जिहां घलो तें गे, उहां में तोर संग रहेंव, अऊ मेंह तोर जम्मो बईरीमन ला तोर आघू ले नास कर देंव। अब मेंह तोर नांव ला धरती के सबले बड़े मनखेमन के नांव सहीं बड़े करहूं।
1CH 17:9 अऊ मेंह अपन इसरायली मनखेमन बर एक जगह ठहिराहूं अऊ मेंह ओमन ला बसाहूं ताकि ओमन के अपन खुद के घर होवय अऊ ओमन फेर कभू एती-ओती झन होवंय। दुस्ट मनखेमन फेर ओमन ऊपर अतियाचार नइं करहीं, जइसने कि ओमन सुरू म करत रिहिन
1CH 17:10 अऊ ओ बेरा ले करत आवत हें, जब मेंह अपन इसरायली मनखेमन ऊपर अगुवामन ला ठहिरांय। मेंह तोर जम्मो बईरीमन ला दबा दूहूं। “ ‘मेंह तोला बतात हंव कि यहोवा ह तोर बर एक घर बनाही:
1CH 17:11 जब तोर उमर ह पूरा हो जाही अऊ तेंह अपन पुरखामन संग मिल जाबे, त मेंह तोर संतान ला तोर जगह लेय बर ठाढ़ करहूं अऊ ओह तोर बेटामन ले एक झन होही, अऊ मेंह ओकर राज ला इस्थिर करहूं।
1CH 17:12 ओही ह मोर बर एक घर बनाही, अऊ मेंह ओकर सिंघासन ला हमेसा बर इस्थिर करहूं।
1CH 17:13 मेंह ओकर ददा होहूं, अऊ ओह मोर बेटा होही। मेंह ओकर ऊपर ले मोर मया ला कभू नइं हटाहूं, जइसे कि मेंह तोर ले पहिले के राजामन ले हटाय रहेंव।
1CH 17:14 मेंह ओला मोर घर अऊ मोर राज ऊपर हमेसा बर इस्थिर करहूं; ओकर सिंघासन ह सदा बने रहिही।’ ”
1CH 17:15 नातान ह दरसन के हर एक बात दाऊद ला बता दीस।
1CH 17:16 तब दाऊद राजा ह भीतर जाके यहोवा के आघू म बईठ गीस, अऊ कहिस: “हे यहोवा, परमेसर, मेंह कोन अंव, अऊ मोर घराना का ए, कि तेंह मोला इहां तक लाने हस?
1CH 17:17 अऊ हे मोर परमेसर, मानो येह तोर नजर म परयाप्त नइं रिहिस कि तेंह अपन सेवक के घराना के भविस्य के बारे म गोठियाय। हे यहोवा, परमेसर, तेंह मोला अइसे देखे हस, मानो मेंह मनखेमन म सबले ऊंच पदवाला अंव।
1CH 17:18 “तेंह अपन सेवक ला जऊन आदर दे हस, ओकर बारे म दाऊद ह का कह सकत हे? काबरकि हे यहोवा, तेंह अपन सेवक ला जानत हस।
1CH 17:19 अपन सेवक के हित म अऊ अपन ईछा के मुताबिक, तेंह ये बड़े काम करे हस अऊ ये जम्मो बड़े बातमन ला बताय हस।
1CH 17:20 “हे यहोवा, जइसे कि हमन अपन कान ले सुने हवन, तोर सहीं अऊ कोनो नइं ए, अऊ तोला छोंड़ अऊ कोनो परमेसर नइं ए।
1CH 17:21 अऊ तोर मनखे इसरायल के सहीं कोन हे—धरती ऊपर के एक जाति, जेला अपन नांव के खातिर तें परमेसर ह जाके छोंड़ाय, अऊ अपन मनखेमन के आघू ले जाति-जाति के मनखेमन ला निकालके बड़े अऊ अद्भूत काम करे, अऊ ओमन ला मिसर देस ले छोंड़ाय।
1CH 17:22 तेंह अपन मनखे इसरायलीमन ला हमेसा बर अपन खुद के मनखे बनाय हस, अऊ हे यहोवा, तेंह ओमन के परमेसर बने हस।
1CH 17:23 “अब, हे यहोवा, तेंह अपन सेवक अऊ ओकर घराना के बारे म जऊन वायदा करे हस, ओला सदाकाल तक बनाय रख। अपन वायदा के मुताबिक ही कर,
1CH 17:24 ताकि येह स्थापित होवय अऊ तोर नांव ह सदाकाल बर महान रहय। तब मनखेमन कहिहीं, ‘सर्वसक्तिमान यहोवा, इसरायल ऊपर परमेसर ही इसरायल के परमेसर अय!’ अऊ तोर सेवक दाऊद के घराना ह तोर आघू म इस्थिर होही।
1CH 17:25 “हे मोर परमेसर, तेंह येला अपन सेवक ऊपर परगट करे हस कि तेंह ओकर बर एक घर बनाबे। एकरसेति तोर सेवक ला तोर ले पराथना करे के हिम्मत मिले हवय।
1CH 17:26 हे यहोवा, तेंह परमेसर अस! तेंह ये बने चीजमन के वायदा अपन सेवक ले करे हस।
1CH 17:27 अब तेंह खुस होके अपन सेवक के घराना ला आसीस दे हस, कि येह तोर नजर म हमेसा बने रहय; काबरकि हे यहोवा, तेंह येला आसीस दे हस, अऊ येह हमेसा आसीसित होही।”
1CH 18:1 कुछू समय के बाद, दाऊद ह पलिस्तीमन ला हराके ओमन ला अपन अधीन कर लीस, अऊ गत नगर अऊ ओकर आसपास के गांवमन ला पलिस्तीमन के हांथ ले छीन लीस।
1CH 18:2 दाऊद ह मोआबीमन ला घलो लड़ई म हराईस अऊ ओमन ओकर अधीन होके ओला कर पटाय लगिन।
1CH 18:3 येकर छोंड़, दाऊद ह सोबा के राजा हददेजेर ला हमात के इलाका म हराईस, जब हददेजेर ह फरात नदी करा अपन स्मारक बनाय बर जावत रिहिस।
1CH 18:4 दाऊद ह ओकर एक हजार रथ, सात हजार सारथी अऊ बीस हजार पैदल सैनिकमन ला छीन लीस। ओह एक सौ रथवाले घोड़ामन ला छोंड़के बाकि जम्मो घोड़ामन के माड़ी के पाछू के नस ला कटवा दीस।
1CH 18:5 जब दमिस्क के अरामीमन सोबा के राजा हददेजेर के मदद करे बर आईन, त दाऊद ह ओमन के बाईस हजार मनखेमन ला मार डारिस।
1CH 18:6 दाऊद ह दमिस्क के अरामी राज म सैनिक दलमन ला ठहिरा दीस, अऊ अरामीमन ओकर अधीन हो गीन अऊ ओला कर पटाय लगिन। दाऊद ह जिहां घलो गीस, यहोवा ह ओला जीतवाईस।
1CH 18:7 दाऊद ह हददेजेर के अधिकारीमन के सोन के ढालमन ला ले लीस अऊ ओ ढालमन ला यरूसलेम ले आईस।
1CH 18:8 येकर अलावा, दाऊद ह हददेजेर के तेबह अऊ कून नांव के नगरमन ले बहुंत अकन कांसा ले आईस, जेकर उपयोग सुलेमान ह कांसा के हौद, खंभा अऊ कांसा के आने चीजमन ला बनाय म करिस।
1CH 18:9 जब हमात के राजा तोऊ ह सुनिस कि दाऊद ह सोबा के राजा हददेजेर के पूरा सेना ला हरा दे हवय,
1CH 18:10 त ओह अपन बेटा हदोराम ला दाऊद राजा करा पठोईस, ताकि ओह ओकर ले भेंट करके हददेजेर के ऊपर लड़ई म मिले जीत बर बधाई देवय, काबरकि हददेजेर ह तोऊ ले लड़ई करत रिहिस। हदोराम ह सोन, चांदी अऊ कांसा के जम्मो किसम के चीजमन ला लेके आईस।
1CH 18:11 दाऊद राजा ह ये चीजमन ला यहोवा बर अरपन कर दीस, जइसे कि ओह ओ चांदी अऊ सोन के संग करे रिहिस, जेला ओह ये जम्मो जाति—एदोम अऊ मोआब, अमोनी अऊ पलिस्ती, अऊ अमालेकीमन ले लेय रिहिस।
1CH 18:12 सरूयाह के बेटा अबीसै ह नून के घाटी म अठारह हजार एदोमीमन ला मार डारिस।
1CH 18:13 ओह एदोम म सैनिक दलमन के पहरा बईठा दीस, अऊ जम्मो एदोमीमन दाऊद के अधीन हो गीन। दाऊद ह जिहां घलो गीस, यहोवा ह ओला जीतवाईस।
1CH 18:14 दाऊद ह जम्मो इसरायल ऊपर राज करिस अऊ ओ काम करिस, जऊन ह ओकर जम्मो मनखेमन बर ठीक अऊ सही रिहिस।
1CH 18:15 सरूयाह के बेटा योआब ह सेना के सेनापति रिहिस; अहीलूद के बेटा यहोसापात ह इतिहास के लेखक रिहिस;
1CH 18:16 अहीतूब के बेटा सादोक अऊ अबियातार के बेटा अहीमेलेक पुरोहित रिहिन; सावसा ह सचिव रिहिस;
1CH 18:17 यहोयादा के बेटा बनायाह ह करेती अऊ पलेतीमन के अधिकारी रिहिस; अऊ दाऊद के बेटामन राजा करा मुखिया अधिकारी रिहिन।
1CH 19:1 कुछू समय के बाद, अमोनीमन के राजा नाहास ह मर गीस, अऊ ओकर बेटा ओकर जगह म राजा बनिस।
1CH 19:2 दाऊद ह सोचिस, “मेंह नाहास के बेटा हानून ऊपर दया करहूं, काबरकि ओकर ददा मोर ऊपर दया करे रिहिस।” एकरसेति दाऊद ह अपन एक परतिनिधि-मंडल ला हानून करा ओकर ददा के बारे म सहानुभूति परगट करे बर पठोईस। जब दाऊद के दूतमन अमोनीमन के देस म हानून करा सहानुभूति परगट करे बर आईन,
1CH 19:3 त अमोनी सेनापतिमन हानून ला कहिन, “का तेंह ये सोचत हस कि दाऊद ह तोर संग सहानुभूति देखाय बर दूतमन ला पठोय के दुवारा तोर ददा के आदर करत हे? का ओकर दूतमन तोर करा सिरिप देस के खोजबीन अऊ भेद लेय बर अऊ येला उखान फेंके बर नइं आय हवंय?”
1CH 19:4 एकरसेति हानून ह दाऊद के दूतमन ला पकड़ लीस, अऊ ओमन के बाल मुड़वाके ओमन के ओनहा ला कुलामन तक कटवा दीस अऊ ओमन ला वापिस भेज दीस।
1CH 19:5 जब एक मनखे ह आके दाऊद ला ओकर मनखेमन के बारे म बताईस, त ओह संदेसियामन ला ओमन ले मिले बर पठोईस, काबरकि ओमन के बहुंत बेजत्ती करे गे रिहिस। राजा ह ओमन करा ये खबर पठोईस, “जब तक तुम्हर दाढ़ी बाढ़ नइं जावय, तब तक तुमन यरीहो सहर म ठहिरे रहव, अऊ तब वापिस आ जावव।”
1CH 19:6 जब अमोनीमन ला महसूस होईस कि ओमन दाऊद ला नराज कर दे हवंय, त हानून अऊ अमोनीमन लगभग एक हजार टेलेन्ट चांदी अरम-नहरैम, अरम-माका अऊ सोबा ला देके रथ अऊ सारथीमन ला किराया म लीन।
1CH 19:7 ओमन बत्तीस हजार रथ अऊ सारथीमन ला किराया म लीन, संग म माका के राजा ह अपन सेना लेके मेदबा नगर के लकठा म डेरा डालिस, जबकि अमोनीमन अपन-अपन नगर ले निकलके जूरिन अऊ लड़ई बर आघू बढ़िन।
1CH 19:8 ये सुनके, दाऊद ह योआब ला योद्धामन के जम्मो सेना के संग पठोईस।
1CH 19:9 अमोनीमन बाहिर निकलिन अऊ अपन सहर के प्रवेस दुवार करा लड़ई बर कतार बांधिन, जबकि राजामन, जऊन मन लड़ई बर आय रिहिन, खुला मैदान म रिहिन।
1CH 19:10 योआब ह देखिस कि ओकर आघू अऊ पाछू दूनों कोति ओकर बिरूध लड़ई बर कतार बांधे गे हवय; त ओह इसरायल के सबले बढ़िया कुछू सैनिक दलमन ला चुनिस अऊ ओमन ला अरामीमन के बिरूध ठहिरा दीस।
1CH 19:11 ओह बाकि बांचे आदमीमन ला अपन भाई अबीसै के अधीन कर दीस, अऊ ओमन ला अमोनीमन के बिरूध तैनात कर दीस।
1CH 19:12 योआब ह कहिस, “यदि अरामीमन मोर ऊपर भारी होवन लगंय, त तुमन मोर मदद करे बर आहू; अऊ यदि अमोनीमन तुम्हर ऊपर भारी होवन लगहीं, त मेंह आके तुम्हर मदद करहूं।
1CH 19:13 मजबूत बनव, अऊ आवव, हमन अपन मनखे अऊ अपन परमेसर के सहरमन बर हिम्मत से लड़ई करन। यहोवा ह ओही करही, जऊन ह ओकर नजर म सही अय।”
1CH 19:14 तब योआब अऊ ओकर संग के सैनिक दल अरामीमन ले लड़े बर आघू बढ़िन, अऊ अरामीमन ओकर आघू ले भाग गीन।
1CH 19:15 जब अमोनीमन देखिन कि अरामीमन भागत हवंय, त ओमन घलो ओकर भाई अबीसै के आघू ले भागिन अऊ सहर के भीतर चल दीन। तब योआब ह यरूसलेम लहुंट गीस।
1CH 19:16 जब अरामीमन देखिन कि ओमन इसरायलीमन ले हार गे हवंय, त ओमन दूतमन ला पठोईन अऊ फरात नदी के ओ पार ले अरामीमन ला बुलवाईन, अऊ हददेजेर के सेना के सेनापति सोपक ओमन के अगुवई करत रहय।
1CH 19:17 जब दाऊद ला ये बात बताय गीस, त ओह जम्मो इसरायलीमन ला इकट्ठा करिस अऊ यरदन नदी के ओ पार गीस; ओह ओमन के बिरूध आघू बढ़िस अऊ ओमन के बिरूध लड़ई के दल बांधिस। दाऊद ह लड़ई म अरामीमन के सामना करे बर अपन दल बांधिस, अऊ ओमन ओकर ले लड़िन।
1CH 19:18 पर ओमन इसरायलीमन के आघू ले भाग गीन, दाऊद ह ओमन के सात हजार सारथी अऊ चालीस हजार पैदल सैनिकमन ला मार डारिस। ओह ओमन के सेना के सेनापति सोपक ला घलो मार डारिस।
1CH 19:19 जब हददेजेर के सेवकमन देखिन कि ओमन इसरायलीमन ले हार गे हवंय, त ओमन दाऊद संग समझौता कर लीन अऊ ओकर अधीन हो गीन। ओकर बाद, अरामीमन अमोनीमन के फेर मदद करे नइं चाहिन।
1CH 20:1 बसन्त के मौसम म, जब राजामन लड़ई करे बर निकलथें, त योआब ह सेना के अगुवई करत रिहिस। ओह अमोनीमन के देस ला उजाड़ दीस अऊ ओह रब्बा म जाके ओला अपन अधिकार म कर लीस, पर दाऊद ह यरूसलेम म ही रिहिस। योआब ह रब्बा ऊपर हमला करके ओला नास कर दीस।
1CH 20:2 दाऊद ह ओमन के राजा के मुड़ ले मुकुट ला ले लीस—येह सोन के बने रिहिस अऊ येकर वजन एक टेलेन्ट रिहिस, अऊ येमा कीमती पथरामन जड़े रिहिन—अऊ ये मुकुट ला दाऊद के मुड़ म रखे गीस। दाऊद ह ओ सहर ले बहुंत अकन सामान लूटके ले गीस
1CH 20:3 अऊ उहां के मनखेमन ला बाहिर निकाल लीस अऊ ओमन ला आरी, रांपा अऊ टंगिया देके ओमन ले मजदूरी करवाईस। दाऊद ह अमोनी नगरमन के जम्मो मनखेमन के संग अइसने ही करिस। तब दाऊद अऊ ओकर पूरा सेना यरूसलेम लहुंट गीस।
1CH 20:4 समय के बीतत, गेजेर नगर म पलिस्तीमन ले लड़ई होय लगिस। ओ बेरा हूसाती सिब्बकै ह सिप्पै ला मार डारिस, जऊन ह रपाईमन के एक संतान रिहिस, अऊ पलिस्तीमन अधीन म हो गीन।
1CH 20:5 पलिस्तीमन ले फेर एक लड़ई म, याईर के बेटा एल्हानान ह गत सहर के रहइया गोलियत के भाई लहमी ला मार डारिस, जेकर बरछी के मुठिया ह बुनकर के डोंगी सहीं रिहिस।
1CH 20:6 एक अऊ लड़ई गत म होईस, जिहां एक बहुंत बड़े डीलडौलवाला आदमी रिहिस, जेकर हर हांथ अऊ गोड़ म छै-छै ठन अंगरी रिहिस—कुल चौबीस ठन अंगरी। ओह घलो रापा के संतान रिहिस।
1CH 20:7 जब ओह इसरायल ला ताना मारिस, त दाऊद के भाई सिमा के बेटा योनातन ह ओला मार डारिस।
1CH 20:8 येमन गत के रहइया रापा के संतान रिहिन, अऊ ओमन दाऊद अऊ ओकर आदमीमन के हांथ म मारे गीन।
1CH 21:1 सैतान ह इसरायल के बिरूध काम करे लगिस अऊ ओह दाऊद ला इसरायल के गनती करे बर उकसाईस।
1CH 21:2 एकरसेति दाऊद ह योआब अऊ सेना के सेनापतिमन ला हुकूम दीस, “जावव अऊ बेरसेबा ले लेके दान तक इसरायलीमन के गनती करव अऊ आके मोला बतावव ताकि मेंह जानंव कि ओमन कतेक हवंय।”
1CH 21:3 पर योआब ह जबाब दीस, “यहोवा ह इसरायल के मनखेमन ला सौ गुना बढ़ावय। हे मोर मालिक, हे राजा, का ओ जम्मो मोर मालिक के अधीन नइं एं? मोर मालिक अइसे काबर करे चाहथे? ओह इसरायल ऊपर दोस लाने के कारन काबर बनय?”
1CH 21:4 राजा ह योआब के बात ला नइं मानिस; एकरसेति योआब ह उहां ले चल दीस अऊ जम्मो इसरायल देस म गीस अऊ तब यरूसलेम वापिस आ गीस।
1CH 21:5 योआब ह दाऊद ला सैनिकमन के गनती बताईस: जम्मो इसरायल म गियारह लाख आदमी रिहिन, जऊन मन तलवार चला सकत रिहिन, येमा यहूदा के चार लाख सत्तर हजार मनखे घलो रिहिन।
1CH 21:6 पर योआब ह लेवी अऊ बिनयामीन के बंस के गनती नइं करिस, राजा के हुकूम ह ओला बने नइं लगत रिहिस।
1CH 21:7 ये हुकूम ह परमेसर के नजर म घलो गलत रिहिस; एकरसेति ओह इसरायल ला सजा दीस।
1CH 21:8 तब दाऊद ह परमेसर ला कहिस, “मेंह अइसे करके बहुंत पाप करे हंव। अब, मेंह तोर ले बिनती करत हंव कि अपन सेवक के दोस ला दूर कर दे। मेंह एक बहुंत मुरूखता के काम करे हंव।”
1CH 21:9 यहोवा ह दाऊद के अगम-दरसी गाद ला कहिस,
1CH 21:10 “जा अऊ दाऊद ला बता, ‘यहोवा ह ये कहत हे: मेंह तोर आघू म तीन बात रखत हंव। ओमा ले कोनो एक ठन ला चुन ले जेला में तोर बिरूध करहूं।’ ”
1CH 21:11 तब गाद ह दाऊद करा गीस अऊ ओला कहिस, “यहोवा ह ये कहत हे: ‘तेंह एक ठन ला चुन ले:
1CH 21:12 तीन साल तक अकाल, तीन महिना तक तोर बईरीमन तोला तलवार ले नास करंय, या फेर तीन दिन तक यहोवा के तलवार चले—याने कि देस म महामारी फईलय अऊ यहोवा के दूत ह इसरायल के हर भाग ला नास करय।’ अब तें निरनय कर कि मेंह ओला का जबाब दंव, जऊन ह मोला पठोय हवय।”
1CH 21:13 दाऊद ह गाद ला कहिस, “मेंह बड़े संकट म पड़े हंव। मोला यहोवा के हांथ म पड़न दे, काबरकि ओकर दया बहुंत बड़े अय; पर मोला मनखेमन के हांथ म झन पड़न दे।”
1CH 21:14 तब यहोवा ह इसरायल ऊपर एक महामारी लानिस, अऊ इसरायल के सत्तर हजार मनखे मर गीन।
1CH 21:15 अऊ परमेसर ह यरूसलेम ला नास करे बर एक स्वरगदूत ला पठोईस। पर जब स्वरगदूत ह नास करत रिहिस, त यहोवा ह येला देखिस अऊ बिपत्ति के बारे म ओकर मन ह पिघल गीस अऊ ओह मनखेमन ला नास करइया ओ स्वरगदूत ला कहिस, “बहुंत हो गे! अपन हांथ ला खींच ले।” ओ समय यहोवा के स्वरगदूत ह ओरनान नांव के एक यबूसी के कोठार म ठाढ़े रिहिस।
1CH 21:16 दाऊद ह आंखी उठाके देखिस कि यहोवा के दूत ह अकास अऊ धरती के बीच म एक तलवार खींचके खड़े रहय अऊ ओ तलवार ह यरूसलेम कोति बढ़े हवय। तब दाऊद अऊ अगुवामन बोरा के कपड़ा पहिरे मुहूं के बल गिरके दंडवत करिन।
1CH 21:17 दाऊद ह परमेसर ले कहिस, “का ओह में नो हंव, जऊन ह लड़ई म जवइया मनखेमन के गनती करे के हुकूम देय रहेंव? में, चरवाहा ह पाप करे हंव अऊ गलत काम करे हंव। येमन तो भेड़ अंय। येमन का करे हवंय? हे यहोवा मोर परमेसर, तोर हांथ ह मोर अऊ मोर परिवार ऊपर उठे, पर तोर मनखेमन ऊपर ये महामारी झन रहय।”
1CH 21:18 तब यहोवा के स्वरगदूत ह गाद ला हुकूम दीस कि ओह दाऊद ले कहय कि दाऊद ह जाके यबूसी ओरनान के कोठार म यहोवा बर एक बेदी बनावय।
1CH 21:19 तब यहोवा के नांव म गाद के दुवारा कहे गे बात ला मानके दाऊद ह उहां गीस।
1CH 21:20 जब ओरनान ह गहूं ला मिंजत रिहिस, त ओह मुड़िस अऊ दूत ला देखिस; ओरनान के चार झन बेटा ओकर संग म रिहिन, अऊ ओमन दूत ला देखके लुका गीन।
1CH 21:21 तब दाऊद ह ओरनान करा आईस अऊ जब ओरनान ह दाऊद ला देखिस, त ओह कोठार ला छोंड़के आईस अऊ भुइयां तक मुड़ नवाके दाऊद ला दंडवत करिस।
1CH 21:22 दाऊद ह ओला कहिस, “मोला तोर ये कोठार के जगह ला देय दे ताकि में इहां यहोवा बर एक बेदी बना सकंव, जेकर ले मनखेमन के महामारी ह खतम हो जावय। पूरा दाम लेके मोला ये जगह ला बेच दे।”
1CH 21:23 ओरनान ह दाऊद ले कहिस, “येला लेय ले! मोर मालिक राजा ला जइसे बने लगथे, वइसे करे। देख, मेंह होम-बलिदान बर बईला, लकरी बर दंवरी के चीज, अऊ अन्न-बलिदान बर गहूं दूहूं। मेंह ये जम्मो चीज दूहूं।”
1CH 21:24 पर दाऊद राजा ह ओरनान ला जबाब दीस, “नइं, मेंह पूरा दाम देके ही मानहूं। जऊन ह तोर ए, ओला मेंह यहोवा बर अइसने ही नइं ले लूहूं, अऊ न ही मुफत म कोनो होम-बलिदान चघाहूं।”
1CH 21:25 एकरसेति दाऊद ह ओरनान ला ओ जगह के दाम के रूप म छै सौ सेकेल सोन दीस।
1CH 21:26 दाऊद ह उहां यहोवा बर एक बेदी बनाईस अऊ होम-बलिदान अऊ मेल-बलिदान चघाईस। दाऊद ह यहोवा ले पराथना करिस अऊ यहोवा ह ओकर जबाब होम-बलिदान के बेदी ऊपर स्वरग ले आगी गिराके दीस।
1CH 21:27 तब यहोवा ह दूत ले बात करिस, अऊ दूत ह अपन तलवार ला मियान म रख लीस।
1CH 21:28 ओ बेरा, जब दाऊद ह देखिस कि यहोवा ह यबूसी ओरनान के कोठार म ओला जबाब दे हवय, त ओह उहां बलिदान चघाईस।
1CH 21:29 यहोवा के पबितर-तम्बू, जेला मूसा ह निरजन जगह म बनाय रिहिस, अऊ होम-बलिदान के बेदी ओ बेरा गिबोन के ऊंचहा जगह म रिहिन।
1CH 21:30 पर दाऊद ह परमेसर ले पुछे बर ओ बेदी के आघू म नइं जा सकिस, काबरकि ओह यहोवा के दूत के तलवार ले डरत रिहिस।
1CH 22:1 तब दाऊद ह कहिस, “यहोवा परमेसर के घर ला इहां होना हे अऊ इसरायल बर होम-बलिदान के बेदी ला घलो।”
1CH 22:2 दाऊद ह इसरायल म रहइया परदेसीमन ला इकट्ठा होय के हुकूम दीस, अऊ ओमन के बीच ले ओह परमेसर के घर बनाय बर पथरा कटइयामन ला ठहिराईस कि ओमन गढ़े गय पथरा तियार करंय।
1CH 22:3 ओह दुवारमन के कपाट बर खीला बनाय बर अऊ जोड़ या पुरजा बर बहुंत अकन लोहा दीस, अऊ अतेक कांसा दीस कि ओला तऊले नइं जा सकय।
1CH 22:4 ओह गनती के बाहिर देवदार के लकड़ी घलो दीस, काबरकि सीदोन अऊ सूर के मनखेमन दाऊद करा बहुंत अकन देवदार के लकड़ी ले आय रिहिन।
1CH 22:5 दाऊद ह अपनआप ले कहिस, “मोर बेटा सुलेमान ह अभी लइका अऊ अनुभवहीन हे, अऊ यहोवा बर जऊन घर बनाय जाना हे, ओह जम्मो जाति के मनखेमन के नजर म बहुंत सोभायमान, प्रसिद्ध अऊ भब्य होना चाही। एकरसेति मेंह येकर बर तियारी करहूं।” तब दाऊद ह अपन मरे के पहिली बहुंत तियारी करिस।
1CH 22:6 तब ओह अपन बेटा सुलेमान ला बलाईस अऊ ओला यहोवा, इसरायल के परमेसर बर एक घर बनाय के जिम्मेदारी दीस।
1CH 22:7 दाऊद ह सुलेमान ला कहिस: “हे मोर बेटा, येह मोर मन म रिहिस कि मेंह यहोवा, मोर परमेसर के नांव बर एक घर बनावंव।
1CH 22:8 पर यहोवा के ये बचन मोर करा आईस: ‘तेंह बहुंत खून बहाय हस अऊ बहुंत लड़ई लड़े हस। तेंह मोर नांव बर एक घर नइं बनाय सकबे, काबरकि मोर नजर म धरती ऊपर, तेंह बहुंत खून बहाय हस।
1CH 22:9 पर तोर एक बेटा होही, जऊन ह सांति अऊ अराम के एक मनखे होही, अऊ मेंह ओला जम्मो कोति ले ओकर जम्मो बईरीमन ले अराम दूहूं। ओकर नांव सुलेमान होही, अऊ मेंह ओकर राज के दौरान इसरायल ला सांति अऊ अराम दूहूं।
1CH 22:10 ओह ओ मनखे होही, जऊन ह मोर नांव बर एक घर बनाही। ओह मोर बेटा होही, अऊ मेंह ओकर ददा होहूं। अऊ मेंह ओकर सिंघासन ला इसरायल के ऊपर हमेसा बर स्थापित करहूं।’
1CH 22:11 “अब, हे मोर बेटा, यहोवा ह तोर संग रहय, अऊ तोला सफलता मिलय अऊ तेंह यहोवा, तोर परमेसर के घर ला बना, जइसे कि ओह कहे हवय कि तेंह ओकर घर ला बनाबे।
1CH 22:12 यहोवा ह तोला बुद्धि अऊ समझ देवय, जब ओह तोला इसरायल के ऊपर अधिकार देथे, ताकि तेंह यहोवा, तोर परमेसर के कानून के पालन कर सकस।
1CH 22:13 तेंह तब सफल होबे, जब तेंह ओ नियम अऊ कानूनमन ला धियान देके मानबे, जेला यहोवा ह मूसा ला इसरायलीमन बर देय रिहिस। मजबूत अऊ साहसी बन। झन डर अऊ हिम्मत झन हार।
1CH 22:14 “मेंह बड़े तकलीफ उठाके यहोवा के मंदिर बर एक लाख टेलेन्ट सोन, दस लाख टेलेन्ट चांदी, कांसा अऊ लोहा अतेक जादा कि तऊल के बाहिर, अऊ लकड़ी अऊ पथरा के परबंध करे हंव। अऊ तेंह अऊ सामान लानके येला बढ़ा सकत हस।
1CH 22:15 तोर करा बहुंत काम करइया हें: पथरा कटइया, राज-मिसतिरी अऊ बढ़ईमन संग म सोन अऊ चांदी, कांसा अऊ लोहा के हर काम करे के कुसल मनखेमन हवंय—
1CH 22:16 गनती के बाहिर कारीगरमन हवंय। अब तेंह काम सुरू कर, अऊ यहोवा ह तोर संग रहय।”
1CH 22:17 तब दाऊद ह इसरायल के जम्मो अगुवामन ला अपन बेटा सुलेमान के मदद करे बर हुकूम दीस।
1CH 22:18 ओह ओमन ला कहिस, “का यहोवा, तुम्हर परमेसर ह तुम्हर संग नइं ए? अऊ का ओह तुमन ला जम्मो कोति ले अराम नइं दे हवय? काबरकि ओह ये देस के निवासीमन ला मोर हांथ म कर दे हवय, अऊ ये देस ह यहोवा अऊ ओकर मनखेमन के अधिकार म हवय।
1CH 22:19 अब अपन मन अऊ आतमा ला यहोवा, अपन परमेसर के खोज म लगाय रखव। यहोवा परमेसर के पबितर-स्थान ला बनाय के काम सुरू करव, ताकि तुमन यहोवा के करार के सन्दूक अऊ परमेसर के पबितर चीजमन ला ओ मंदिर म ला सकव, जऊन ह कि यहोवा के नांव म बनाय जाही।”
1CH 23:1 जब दाऊद ह बहुंत उमर के हो गीस अऊ डोकरा हो गीस, त ओह अपन बेटा सुलेमान ला इसरायल के ऊपर राजा बनाईस।
1CH 23:2 ओह इसरायल के जम्मो अगुवा अऊ संग म पुरोहित अऊ लेवीमन ला घलो इकट्ठा करिस।
1CH 23:3 जतेक लेवी तीस साल या तीस साल के ऊपर के रिहिन, ओमन के गनती करे गीस, अऊ आदमीमन के कुल संखिया अड़तीस हजार होईस।
1CH 23:4 दाऊद ह कहिस, “येमा के चौबीस हजार मनखेमन के ऊपर यहोवा के मंदिर के काम के जिम्मेदारी होही अऊ छै हजार मनखे अधिकारी अऊ नियाय करइया होहीं।
1CH 23:5 चार हजार मनखेमन दुवारपाल अऊ चार हजार मनखेमन ओ बाजामन के संग यहोवा के महिमा करहीं, जेला मेंह ओ काम बर देय हवंव।”
1CH 23:6 दाऊद ह लेवीमन ला लेवी के बेटा गेरसोन, कहात अऊ मरारी के नांव के मुताबिक अलग-अलग दल म बांट दीस।
1CH 23:7 गेरसोनीमन के बंसज: लादान अऊ सिमी।
1CH 23:8 लादान के बेटामन: पहिलऊठा यहीएल, तब जेताम अऊ फेर योएल—कुल तीन झन।
1CH 23:9 सिमी के बेटामन: सलोमोत, हजीएल अऊ हारान—कुल तीन झन। (येमन लादान के परिवारमन के मुखिया रिहिन।)
1CH 23:10 अऊ सिमी के बेटामन: यहत, जीजा, यूस अऊ बरीया। येमन सिमी के बेटा रिहिन—कुल चार झन।
1CH 23:11 (यहत पहिलऊठा रिहिस, अऊ जीजा ह दूसरा, पर यूस अऊ बरीया के जादा बेटा नइं रिहिन: एकरसेति येमन ला एक भाग के संग एक परिवार के रूप म गने गीस।)
1CH 23:12 कहात के बेटामन: अमराम, ईसहार, हेबरोन अऊ उजीएल—कुल चार झन।
1CH 23:13 अमराम के बेटामन: हारून अऊ मूसा। हारून ला अलग करे गीस, ओला अऊ ओकर संतानमन ला हमेसा बर, ताकि ओमन परम पबितर चीजमन ला पबितर ठहिरांय, यहोवा के आघू म बलिदान चघावंय, ओकर आघू म सेवा करंय अऊ ओकर नांव म हमेसा आसीस देवंय।
1CH 23:14 परमेसर के जन मूसा के बेटामन ला लेवी बंस के एक भाग के रूप म गने गीस।
1CH 23:15 मूसा के बेटामन: गेरसोम अऊ एलिएजेर।
1CH 23:16 गेरसोम के संतान: सूबाएल ह पहिलऊठा रिहिस।
1CH 23:17 एलिएजेर के संतान: रहबियाह ह पहिलऊठा रिहिस। (एलिएजेर के अऊ कोनो बेटा नइं रिहिन, पर रहबियाह के बहुंत बेटा रिहिन।)
1CH 23:18 ईसहार के बेटामन: सलोमीत ह पहिलऊठा रिहिस।
1CH 23:19 हेबरोन के बेटामन: यरियाह ह पहिलऊठा, अमरयाह ह दूसरा, यहजीएल ह तीसरा अऊ यकमाम ह चौथा।
1CH 23:20 उजीएल के बेटामन: मीका ह पहिलऊठा अऊ यिसियाह ह दूसरा।
1CH 23:21 मरारी के बेटामन: महली अऊ मूसी। महली के बेटामन: एलिआजर अऊ कीस।
1CH 23:22 (एलिआजर के मिरतू बिगर कोनो बेटा के हो गीस: ओकर सिरिप बेटीमन रिहिन। कीस के बेटामन याने कि ओमन के चचेरा-भाईमन ओमन ले बिहाव कर लीन।)
1CH 23:23 मूसी के बेटामन: महली, एदेर अऊ यरीमोत—कुल तीन झन रिहिन।
1CH 23:24 येमन ओमन के परिवार के मुताबिक लेवी के संतान रिहिन—परिवार के मुखियामन के नांव लिखे गीस अऊ ओमन ला एक-एक करके गने गीस, याने कि ओ काम करइयामन, जेमन बीस साल या बीस साल ले जादा उमर के रिहिन अऊ यहोवा के मंदिर म सेवा करत रिहिन।
1CH 23:25 काबरकि दाऊद ह कहे रिहिस, “जब यहोवा, इसरायल के परमेसर ह अपन मनखेमन ला अराम दे हवय अऊ यरूसलेम म हमेसा रहे बर आय हवय,
1CH 23:26 त लेवीमन ला पबितर-तम्बू या येकर सेवा म उपयोग होवइया कोनो चीज ला अऊ ले जाय के जरूरत नइं ए।”
1CH 23:27 दाऊद के पिछला निरदेस के मुताबिक बीस साल या बीस साल के ऊपर के लेवीमन के गनती करे गीस।
1CH 23:28 लेवीमन के काम ह यहोवा के मंदिर के सेवा म हारून के संतानमन के मदद करई रिहिस: याने कि अंगनामन के देखरेख करई, बाजू के कमरामन के देखरेख करई, जम्मो पबितर चीजमन के सुध करई अऊ परमेसर के घर म आने किसम के काम करई।
1CH 23:29 ओमन मेज म सजे रोटी, अन्न-बलिदान बर बिसेस पीसान, बिगर खमीर के बनाय पातर रोटी, रोटी के सेंकई अऊ पीसान के मिलई, अऊ जम्मो चीजमन के मात्रा अऊ आकार के नाप-तौल के देखरेख करंय।
1CH 23:30 ओमन ला यहोवा के धनबाद अऊ इस्तुति करे बर हर बिहनियां ठाढ़ होना घलो पड़य। ओमन सांझ के बेरा घलो वइसने करंय
1CH 23:31 अऊ जब भी बिसराम दिन, नवां चंदा के तिहार अऊ ठहिराय तिहारमन म यहोवा ला होम-बलिदान चघाय जावय, ओमन वइसने ही करंय। ओमन सही संखिया म होके लगातार यहोवा के आघू म सेवा करंय अऊ ओमन येला ओमन बर ठहिराय गे नियम के मुताबिक करंय।
1CH 23:32 अऊ ये किसम ले लेवीमन मिलापवाला तम्बू बर, पबितर स्थान बर यहोवा के मंदिर के सेवा म अपन रिस्तेदार हारून के संतानमन के अधीन अपन जिम्मेदारी ला पूरा करंय।
1CH 24:1 हारून के संतानमन के दल येमन रिहिन: हारून के बेटामन नादाब, अबीहू, एलिआजर अऊ ईतामार रिहिन।
1CH 24:2 पर नादाब अऊ अबीहू अपन ददा के मरे के पहिली मर गीन, अऊ ओमन के कोनो बेटा नइं रिहिन; एकरसेति एलिआजर अऊ ईतामार पुरोहित के रूप म सेवा करिन।
1CH 24:3 एलिआजर के एक संतान सादोक अऊ ईतामार के एक संतान अहीमेलेक के मदद ले, दाऊद ह ओमन ला ओमन के सेवा के पद के मुताबिक दल-दल करके बांट दीस।
1CH 24:4 एलिआजर के संतान म ईतामार के संतान ले जादा अगुवामन पाय गीन, अऊ ओमन ला ये किसम ले बांटे गीस: एलिआजर के संतान ले परिवारमन के सोलह जन मुखिया अऊ ईतामार के संतान ले परिवारमन के आठ जन मुखिया रिहिन।
1CH 24:5 चिट्ठी निकाले के दुवारा बिगर भेदभाव के ओमन ला दल म बांट दिये गीस, काबरकि एलिआजर अऊ ईतामार दूनों के संतानमन ले पबितर-स्थान के अधिकारी अऊ परमेसर के अधिकारी ठहिराय गे रिहिन।
1CH 24:6 नतनेल के बेटा लेखक समायाह ह एक लेवी रिहिस, अऊ ओह ओमन के नांव राजा अऊ ये अधिकारीमन के आघू म लिख लीस: सादोक पुरोहित, अबियातार के बेटा अहीमेलेक, अऊ पुरोहित अऊ लेवीमन के परिवारमन के मुखियामन—एक परिवार एलिआजर के बंस ले अऊ एक परिवार ईतामार के बंस ले लिये गीस।
1CH 24:7 पहिला चिट्ठी यहोयारीब के नांव, दूसरा यदायाह,
1CH 24:8 तीसरा हारीम, चौथा सोरीम,
1CH 24:9 पांचवां मलकियाह, छठवां मियामीन,
1CH 24:10 सातवां हक्कोस, आठवां अबियाह,
1CH 24:11 नौवां येहोसू, दसवां सेकनयाह,
1CH 24:12 गियारहवां एलियासीब, बारहवां याकीम,
1CH 24:13 तेरहवां हुपा, चौदहवां येसेबाब,
1CH 24:14 पंदरहवां बिलगा, सोलहवां इम्मेर,
1CH 24:15 सतरहवां हेजीर, अठारहवां हपिसेस,
1CH 24:16 उन्नीसवां पतहियाह, बीसवां यहेजकेल,
1CH 24:17 इक्कीसवां याकीन, बाईसवां गामूल,
1CH 24:18 तेईसवां दलायाह, चौबीसवां माजियाह के नांव निकलिस।
1CH 24:19 जब ओमन यहोवा के मंदिर म जावंय त येह ओमन के सेवा के ठहिराय गे पारी रिहिस अऊ येह ओमन के पुरखा हारून के दुवारा ओमन ला दिये ओ नियम के मुताबिक रिहिस, जेकर हुकूम यहोवा, इसरायल के परमेसर ह हारून ला देय रिहिस।
1CH 24:20 लेवी के बाकि बचे संतानमन: अमराम के बेटामन ले सूबाएल; सूबाएल के बेटामन ले येहदियाह।
1CH 24:21 रहबियाह के बेटामन ले, यिसियाह ह पहिलऊठा रिहिस।
1CH 24:22 ईसहारीमन ले: सलोमोत; सलोमोत के बेटामन ले: यहत।
1CH 24:23 हेबरोन के बेटामन: यरियाह ह पहिलऊठा, अमरयाह ह दूसरा, यहजीएल ह तीसरा अऊ यकमाम ह चौथा रिहिस।
1CH 24:24 उजीएल के बेटा: मीका; मीका के बेटामन ले: सामीर।
1CH 24:25 मीका के भाई: यिसियाह; यिसियाह के बेटामन ले: जकरयाह।
1CH 24:26 मरारी के बेटामन: महली अऊ मूसी। याजियाह के बेटा: बेनो।
1CH 24:27 मरारी के बेटामन: याजियाह ले: बेनो, सोहम, जक्कूर अऊ इबरी।
1CH 24:28 महली ले: एलिआजर, जेकर कोनो बेटा नइं रिहिन।
1CH 24:29 कीस ले: कीस के बेटा: यरहमेल।
1CH 24:30 अऊ मूसी के बेटामन: महली, एदेर अऊ यरीमोत।
1CH 24:31 ओमन घलो अपन रिस्तेदार हारून के संतानमन सहीं दाऊद राजा अऊ सादोक, अहीमेलेक, अऊ पुरोहित अऊ लेवीमन के परिवारमन के मुखियामन के आघू म चिट्ठी निकालिन। सबले बड़े भाई के परिवारमन के संग अऊ सबले छोटे भाई के परिवारमन के संग एक समान बरताव करे गीस।
1CH 25:1 राजा दाऊद ह सेना के सेनापतिमन के संग मिलके आसाप, हेमान अऊ यदूतून के कुछू बेटामन ला अलग करिस कि ओमन बीना, सारंगी अऊ झांझ बजाके अगमबानी के सेवकई करंय। जऊन मनखेमन ये सेवा करत रिहिन, ओमन के सूची ये अय:
1CH 25:2 आसाप के बेटामन ले: जक्कूर, यूसुफ, नतनयाह अऊ असरेला। आसाप के बेटामन आसाप के देखरेख म सेवा करंय अऊ आसाप ह राजा के देखरेख म अगमबानी करय।
1CH 25:3 यदूतून के बेटामन ले: गदलयाह, जरी, येसायाह, सिमेई, हसबियाह अऊ मत्तितियाह, कुल छै जन अपन ददा के देखरेख म रिहिन, जऊन ह यहोवा के धनबाद अऊ इस्तुति करे म बीना के उपयोग करय अऊ अगमबानी करय।
1CH 25:4 हेमान के बेटामन ले: बुकियाह, मतनयाह, उजीएल, सूबाएल अऊ यरीमोत; हननयाह, हनानी, एलीआता, गिदलती अऊ रोमामती-एजेर; योसबकासा, मलोती, होतीर अऊ महजीओत।
1CH 25:5 (ये जम्मो झन हेमान के बेटा रिहिन, जऊन ह राजा के अगम-दरसी रिहिस। येमन हेमान ला परमेसर के वायदा के जरिये मिले रिहिन ताकि ओमन परमेसर के नांव ला ऊंचहा करंय। परमेसर ह हेमान ला चौदह बेटा अऊ तीन बेटी दे रिहिस।)
1CH 25:6 ये जम्मो अपन ददा के देखरेख म यहोवा के मंदिर के संगीत दल के आदमीमन रिहिन, अऊ येमन परमेसर के घर म सेवकई बर झांझ, सारंगी अऊ बीना बजाके अराधना करंय। आसाप, यदूतून अऊ हेमान, राजा के देखरेख म काम करंय।
1CH 25:7 अपन रिस्तेदारमन के संग—ये जम्मो झन यहोवा बर संगीत के गियानी अऊ कुसल संगीतकार रिहिन—ओमन के संखिया 288 रिहिस।
1CH 25:8 जवान अऊ सियान एक समान, गुरू के संगे-संग चेला, ओ जम्मो झन ला जिम्मेदारी देय बर चिट्ठी निकाले गीस।
1CH 25:9 पहिला चिट्ठी आसाप बर यूसुफ के नांव निकलिस, ओकर बेटा अऊ रिस्तेदारमन सहित ओमन 12 झन रिहिन; दूसरा चिट्ठी गदलयाह के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:10 तीसरा जक्कूर के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:11 चौथा यिसरी के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:12 पांचवां नतनयाह के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:13 छठवां बुकियाह के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:14 सातवां यसरेला के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:15 आठवां येसायाह के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:16 नवां मतनयाह के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:17 दसवां सिमी के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:18 गियारहवां अजरेल के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:19 बारहवां हसबियाह के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:20 तेरहवां सूबाएल के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:21 चौदहवां मत्तितियाह के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:22 पंदरहवां यरीमोत के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:23 सोलहवां हननयाह के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:24 सतरहवां योसबकासा के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:25 अठारहवां हनानी के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:26 उन्नीसवां मलोती के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:27 बीसवां इलियाता के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:28 इक्कीसवां होतीर के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:29 बाईसवां गिदलती के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:30 तेईसवां महजीओत के नांव निकलिस, ओकर बेटा अऊ रिस्तेदारमन सहित ओमन 12 झन रिहिन;
1CH 25:31 चौबीसवां चिट्ठी रोमामती-एजेर के नांव निकलिस, ओकर बेटा अऊ रिस्तेदारमन सहित ओमन 12 झन रिहिन।
1CH 26:1 दुवारपालमन के दल येमन रिहिन: कोरहीमन ले: कोरे के बेटा मसेलेमियाह, जऊन ह आसाप के संतानमन ले एक झन रिहिस।
1CH 26:2 मसेलेमियाह के बेटामन: पहिलऊठा बेटा जकरयाह, दूसरा यदीएल, तीसरा जबदयाह, चौथा यतनिएल,
1CH 26:3 पांचवां एलाम, छठवां यहोहानान अऊ सातवां एलिहोएनै।
1CH 26:4 ओबेद-एदोम के घलो बेटामन रिहिन: पहिलऊठा बेटा समायाह, दूसरा यहोजाबाद, तीसरा योआह, चौथा साकार पांचवां नतनेल,
1CH 26:5 छठवां अमीएल, सातवां इस्साकार अऊ आठवां पुलेताई। (काबरकि परमेसर ह ओबेद-एदोम ला आसीस दे रिहिस।)
1CH 26:6 ओबेद-एदोम के बेटा समायाह के घलो बेटामन रिहिन, जऊन मन अपन ददा के परिवार म अगुवा रिहिन, काबरकि ओमन बहुंत योग्य आदमी रिहिन।
1CH 26:7 समायाह के बेटामन: ओतनी, रपाएल, ओबेद अऊ एलजाबाद; ओकर रिस्तेदार एलीहू अऊ समाकियाह घलो योग्य आदमी रिहिन।
1CH 26:8 ये जम्मो झन ओबेद-एदोम के संतान रिहिन; ओमन अऊ ओकर बेटामन अऊ ओमन के रिस्तेदारमन योग्य मनखे रिहिन अऊ ओमन म कोनो भी काम करे के ताकत रिहिस—ओबेद-एदोम के संतानमन के कुल संखिया 62 रिहिस।
1CH 26:9 मसेलेमियाह के बेटा अऊ रिस्तेदारमन रिहिन, जऊन मन योग्य आदमी रिहिन—येमन कुल 18 झन रिहिन।
1CH 26:10 मरारी के बंस के होसा के बेटामन: पहिलऊठा बेटा सिमरी (हालाकि ओह पहिलऊठा नइं रिहिस, पर ओकर ददा ह ओला पहिलऊठा ठहिराय रिहिस),
1CH 26:11 दूसरा हिलकियाह, तीसरा तबलियाह अऊ चौथा जकरयाह।
1CH 26:12 ये दुवारपालमन के ये दलमन ला ओमन के रिस्तेदारमन के सहीं ओमन के अगुवामन के जरिये यहोवा के मंदिर म सेवा के जबाबदारी दिये जावत रिहिस।
1CH 26:13 ओमन के परिवार के मुताबिक हर एक दुवार बर चिट्ठी निकाले गीस, जवान अऊ सियान जम्मो बर एक समान।
1CH 26:14 पूरब के दुवार के चिट्ठी सेलेमियाह के नांव निकलिस। तब ओकर बेटा जकरयाह बर चिट्ठी निकाले गीस, जऊन ह एक बुद्धिमान सलाहकार रिहिस, अऊ ओकर नांव म उत्तर के दुवार के चिट्ठी निकलिस।
1CH 26:15 दक्खिन के दुवार के चिट्ठी ओबेद-एदोम के नांव निकलिस, अऊ भंडारघर के चिट्ठी ओकर बेटामन के नांव म आईस।
1CH 26:16 पछिम के दुवार अऊ ऊपर के सड़क म सलेकेत दुवार के चिट्ठी सुप्पीम अऊ होसा के नांव निकलिस।
1CH 26:17 पूरब म हर दिन छै लेवी रहंय, उत्तर म हर दिन चार झन, दक्खिन म हर दिन चार झन अऊ भंडारघर म एक समय म दू झन।
1CH 26:18 पछिम कोति के अंगना बर चार झन सड़क म अऊ अंगना म ही दू झन रहंय।
1CH 26:19 ये दुवारपालमन के दल रिहिन, जऊन मन कोरह अऊ मरारी के संतान रिहिन।
1CH 26:20 ओमन के संगी लेवीमन के ऊपर परमेसर के घर के खजाना अऊ चघाय गे चीजमन के खजाना के जिम्मेदारी रिहिस।
1CH 26:21 लादान के संतान, जऊन मन लादान के जरिये गेरसोनी रिहिन अऊ जऊन मन गेरसोनी लादान के परिवारमन के मुखिया रिहिन, ओमन ये रिहिन—यहीएली,
1CH 26:22 यहीएली के बेटा जेताम अऊ ओकर भाई योएल। येमन यहोवा के मंदिर के खजाना के अधिकारी रिहिन।
1CH 26:23 अमरामी, ईसहारी, हेबरोनी अऊ उजीएलीमन ले:
1CH 26:24 मूसा के बेटा गेरसोम के एक संतान सूबाएल ह खजाना के मुखिया अधिकारी रिहिस।
1CH 26:25 ओकर रिस्तेदार एलिएजेर के जरिये: ओकर बेटा रहबियाह, रहबियाह के बेटा येसायाह, येसायाह के बेटा योराम, योराम के बेटा जिकरी अऊ जिकरी के बेटा सलोमीत रिहिस।
1CH 26:26 (राजा दाऊद अऊ परिवारमन के मुखिया, जऊन मन हजार-हजार मनखे ऊपर सेनापति अऊ सौ-सौ मनखे ऊपर सेनापति रिहिन, अऊ सेना के आने सेनापति जऊन चीजमन ला चघाय रिहिन, ओ जम्मो चीज के खजाना के जिम्मेदारी सलोमीत अऊ ओकर रिस्तेदारमन के ऊपर रिहिस।
1CH 26:27 लड़ई म लूटे गे कुछू चीजमन ला घलो ओमन यहोवा के मंदिर के सुधार के काम बर चघाय रिहिन।
1CH 26:28 अऊ समूएल अगम-दरसी के दुवारा अऊ कीस के बेटा साऊल के दुवारा, नेर के बेटा अबनेर अऊ सरूयाह के बेटा योआब के दुवारा चघाय गे चीजमन, अऊ मंदिर के उपयोग बर चघाय गे आने जम्मो चीजमन के देखरेख के जिम्मेदारी सलोमीत अऊ ओकर रिस्तेदारमन के ऊपर रिहिस।)
1CH 26:29 ईसहारीमन ले: कननियाह अऊ ओकर बेटामन ला मंदिर के बाहिर इसरायल देस के ऊपर अधिकारी अऊ नियायधीस के काम करे बर ठहिराय गे रिहिस।
1CH 26:30 हेबरोनीमन ले: हसबियाह अऊ ओकर रिस्तेदार, जऊन मन सतरह सौ योग्य आदमी रिहिन, ओमन इसरायल म यरदन नदी के पछिम कोति यहोवा के जम्मो काम अऊ राजा के सेवा बर जिम्मेदार रिहिन।
1CH 26:31 हेबरोनीमन बर, ओमन के परिवारमन के बंसावली के मुताबिक यरियाह ह ओमन के मुखिया रिहिस। (दाऊद के राज के चालीसवां साल म अभिलेखमन म खोजे गीस, अऊ गिलाद के याजेर नगर म हेबरोनीमन के बीच योग्य आदमीमन पाय गीन।
1CH 26:32 यरियाह के सत्ताईस सौ रिस्तेदार रिहिन, जऊन मन योग्य आदमी रिहिन अऊ परिवारमन के मुखिया रिहिन, दाऊद राजा ह ओमन ला रूबेनी, गादी अऊ मनस्से के आधा बंस के ऊपर परमेसर ले संबंधित जम्मो काम बर अऊ राजा ले संबंधित काम बर अधिकारी ठहिराईस।)
1CH 27:1 येह इसरायलीमन के सूची अय—परिवारमन के मुखियामन, हजार-हजार मनखे ऊपर सेनापति, सौ-सौ मनखे ऊपर सेनापति, अऊ ओमन के अधिकारी, जऊन मन साल भर एक-एक महिना करके सैनिक दलमन ले संबंधित जम्मो काम म राजा के सेवा करंय। हर दल म 24,000 सैनिक रिहिन।
1CH 27:2 पहिला महिना बर, पहिला दल के अधिकारी जबदीएल के बेटा यासोबाम रिहिस। ओकर दल म 24,000 सैनिक रिहिन
1CH 27:3 ओह पेरेस के एक संतान रिहिस अऊ पहिला महिना बर जम्मो सैनिक अधिकारीमन के मुखिया रिहिस।
1CH 27:4 दूसरा महिना बर दल के अधिकारी दोदै नांव के अहोही रिहिस; मिकलोत ह ओकर दल के अगुवा रिहिस। ओकर दल म 24,000 सैनिक रिहिन।
1CH 27:5 तीसरा महिना बर, तीसरा सेनापति यहोयादा पुरोहित के बेटा बनायाह रिहिस। ओह मुखिया रिहिस अऊ ओकर दल म 24,000 सैनिक रिहिन।
1CH 27:6 येह ओ बनायाह रिहिस, जऊन ह तीस बीरमन के बीच म एक बीर योद्धा रिहिस अऊ ओ तीस बीरमन के ऊपर रिहिस। ओकर बेटा अमीजाबाद ह ओकर दल के अगुवा रिहिस।
1CH 27:7 चौथा महिना बर, चौथा सेनापति योआब के भाई असाहेल रिहिस; ओकर बाद ओकर बेटा जबदयाह ह ओकर उत्तराधिकारी रिहिस। ओकर दल म 24,000 सैनिक रिहिन।
1CH 27:8 पांचवां महिना बर, पांचवां सेनापति समहूत नांव के ईसराही रिहिस। ओकर दल म 24,000 सैनिक रिहिन।
1CH 27:9 छठवां महिना बर, छठवां सेनापति तकोआ ले इक्केस के बेटा ईरा रिहिस। ओकर दल म 24,000 सैनिक रिहिन।
1CH 27:10 सातवां महिना बर, सातवां सेनापति हेलेस नांव के पलोनी रिहिस, जऊन ह एपरैम के बंस के रिहिस। ओकर दल म 24,000 सैनिक रिहिन।
1CH 27:11 आठवां महिना बर, आठवां सेनापति सिब्बकै नांव के हूसाती रिहिस, जऊन ह जेरही बंस के रिहिस। ओकर दल म 24,000 सैनिक रिहिन।
1CH 27:12 नौवां महिना बर, नौवां सेनापति अबिएजेर नांव के अनातोती रिहिस, जऊन ह बिनयामीन के बंस के रिहिस। ओकर दल म 24,000 सैनिक रिहिन।
1CH 27:13 दसवां महिना बर, दसवां सेनापति महरै नांव के नतोपाती रिहिस, जऊन ह जेरही बंस के रिहिस। ओकर दल म 24,000 सैनिक रिहिन।
1CH 27:14 गियारहवां महिना बर, गियारहवां सेनापति बनायाह नांव के पिरातोनी रिहिस, जऊन ह एपरैम के बंस के रिहिस। ओकर दल म 24,000 सैनिक रिहिन।
1CH 27:15 बारहवां महिना बर, बारहवां सेनापति हेल्दै नांव के नतोपाती रिहिस, जऊन ह ओतनीएल के परिवार के रिहिस। ओकर दल म 24,000 सैनिक रिहिन।
1CH 27:16 इसरायल के गोत्रमन के अगुवामन: रूबेनीमन ले: जिकरी के बेटा एलिएजेर; सिमोनीमन ले: माका के बेटा सपतयाह;
1CH 27:17 लेवी ले: कमूएल के बेटा हसबियाह; हारून ले: सादोक;
1CH 27:18 यहूदा ले: एलीहू नांव के दाऊद के एक भाई; इस्साकार ले: मिकाएल के बेटा ओमरी;
1CH 27:19 जबूलून ले: ओबदयाह के बेटा यिसमायाह; नपताली ले: अजरीएल के बेटा यरीमोत;
1CH 27:20 एपरैम ले: अजजियाह के बेटा होसे; मनस्से के आधा गोत्र ले: पदायाह के बेटा योएल;
1CH 27:21 गिलाद म मनस्से के आधा गोत्र ले: जकरयाह के बेटा इद्दो; बिनयामीन ले: अबनेर के बेटा यासीएल;
1CH 27:22 दान ले: यरोहाम के बेटा अजरेल।
1CH 27:23 दाऊद ह ओ मनखेमन ला गनती म नइं लीस, जेमन बीस साल या बीस साल ले छोटे रिहिन, काबरकि यहोवा ह वायदा करे रिहिस कि ओह इसरायल ला अकास के तारामन सहीं अनगिनत कर दीही।
1CH 27:24 सरूयाह के बेटा योआब ह मनखेमन ला गने के सुरू करिस पर येला पूरा नइं करिस। ये गनती करे के कारन परमेसर के कोरोध इसरायल ऊपर भड़किस, अऊ दाऊद राजा के इतिहास के किताब म ये गनती ला नइं लिखे गीस।
1CH 27:25 अदीएल के बेटा अजमावेत ह साही भंडारघरमन के अधिकारी रिहिस। उजियाह के बेटा योनातन ह दूरिहा-दूरिहा जिला, नगर, गांव अऊ पहरेदारी के मीनारमन के अधिकारी रिहिस।
1CH 27:26 कलूब के बेटा एजरी ह भुइयां म खेती करइया मनखेमन के अधिकारी रिहिस।
1CH 27:27 रामाह के सिमी ह अंगूर के बारीमन के अधिकारी रिहिस। सेपाम के जबदी ह अंगूर के बारी के ऊपज रखे के अंगूर के कुंडमन के अधिकारी रिहिस।
1CH 27:28 गेदेर के बाल-हानान ह पछिम के पहाड़ी इलाका म जैतून अऊ डूमर रूखमन के अधिकारी रिहिस। योआस ह जैतून तेल के पूरती करे के अधिकारी रिहिस।
1CH 27:29 सारोन के सितरै ह सारोन के इलाका म घांस चरइया पसु के झुंडमन के अधिकारी रिहिस। अदलै के बेटा सापात ह घाटीमन म पसु के झुंडमन के अधिकारी रिहिस।
1CH 27:30 इसमायली ओबील ह ऊंटमन के अधिकारी रिहिस। मेरोनोत के येहदियाह ह गदहामन के अधिकारी रिहिस।
1CH 27:31 हगरी के याजीज ह भेड़-बकरी के झुंडमन के अधिकारी रिहिस।
1CH 27:32 दाऊद के कका योनातन ह एक सलाहकार रिहिस, जऊन ह एक समझदार मनखे अऊ लेखक रिहिस। हकमोनी के बेटा यहीएल ह राजा के बेटामन के देखरेख करय।
1CH 27:33 अहीतोपेल ह राजा के सलाहकार रिहिस। अरकी हूसै ह राजा के बिसवासयोग्य मनखे रिहिस।
1CH 27:34 (अहीतोपेल के मरे के बाद यहोयादा अऊ अबियातार सलाहकार बनाय गीन; यहोयादा ह बनायाह के बेटा रिहिस।) योआब ह साही सेना के सेनापति रिहिस।
1CH 28:1 दाऊद ह इसरायल के जम्मो करमचारीमन ला यरूसलेम म जूरे के हुकूम दीस: येमा गोत्र के अधिकारीमन, राजा के सेवा दल के सेनापतिमन, हजार-हजार मनखेमन के ऊपर सेनापतिमन, सौ-सौ मनखेमन के ऊपर सेनापतिमन, जम्मो संपत्ति अऊ राजा अऊ ओकर बेटामन के पसु-धन बर ठहिराय गे अधिकारीमन, अऊ संग म महल के करमचारीमन, योद्धामन अऊ जम्मो बहादुर सैनिकमन रिहिन।
1CH 28:2 दाऊद राजा ह अपन गोड़ म ठाढ़ हो गीस अऊ कहिस: “हे मोर संगी इसरायली, मोर मनखेमन, मोर बात ला सुनव। ये बात मोर मन म रिहिस कि मेंह यहोवा के करार के सन्दूक बर अराम के एक जगह के रूप म, हमर परमेसर के गोड़ के चौकी बर एक घर बनावंव, अऊ मेंह येला बनाय बर योजना घलो बनाएंव।
1CH 28:3 पर परमेसर ह मोला कहिस, ‘तेंह ओ मनखे नो हस, जऊन ह मोर नांव बर एक घर बनाही, काबरकि तेंह एक योद्धा अस अऊ तेंह बहुंत खून बहाय हस।’
1CH 28:4 “तभो ले इसरायल के परमेसर, यहोवा ह मोर पूरा परिवार ले मोला चुनिस कि मेंह इसरायल ऊपर हमेसा बर राजा बनंव। ओह यहूदा ला अगुवा के रूप म चुनिस, अऊ यहूदा के गोत्र ले ओह मोर परिवार ला चुनिस, अऊ मोर ददा के बेटामन ले ओह मोला जम्मो इसरायल ऊपर राजा बनाके खुस होईस।
1CH 28:5 यहोवा ह मोला बहुंत बेटा दे हवय, अऊ मोर जम्मो बेटामन ले ओह मोर बेटा सुलेमान ला चुने हवय कि ओह इसरायल ऊपर यहोवा के राज के सिंघासन म बईठे।
1CH 28:6 यहोवा ह मोला कहिस: ‘तोर बेटा सुलेमान ह ओ मनखे अय, जऊन ह मोर घर अऊ मोर अंगनामन ला बनाही, काबरकि मेंह ओला मोर बेटा होय बर चुन ले हंव, अऊ मेंह ओकर ददा होहूं।
1CH 28:7 मेंह ओकर राज ला हमेसा बर स्थापित करहूं, यदि ओह मोर हुकूम अऊ कानूनमन के पालन करे ले पाछू नइं हटही, जइसे कि अभी करे जावथे।’
1CH 28:8 “एकरसेति अब मेंह जम्मो इसरायल अऊ यहोवा के सभा के आघू म, अऊ परमेसर के सुनत म तोला ये जिम्मेदारी देवत हंव: धियान देके यहोवा तोर परमेसर के जम्मो हुकूममन ला मान, ताकि ये बने देस म तोर अधिकार रहय अऊ तोर बाद तोर संतानमन ला तें ये देस ला हमेसा बर दे सकस।
1CH 28:9 “अऊ हे मोर बेटा सुलेमान, तें अपन ददा के परमेसर ला जान ले, अऊ पूरा हिरदय के भक्ति अऊ मन के ईछा ले ओकर सेवा कर, काबरकि यहोवा ह हर एक के मन ला जांचथे अऊ हर एक के ईछा अऊ हर एक के बिचार ला समझथे। यदि तें ओला खोजबे, त ओह तोला मिलही; पर यदि तें ओला तियाग देबे, त ओह तोला हमेसा बर छोंड़ दीही।
1CH 28:10 अब बिचार कर, काबरकि यहोवा ह तोला चुने हवय कि तें पबितर-स्थान के रूप म एक घर बना। मजबूत बन अऊ ये काम ला कर।”
1CH 28:11 तब दाऊद ह अपन बेटा सुलेमान ला मंदिर के मंडप, येकर भवन, येकर भंडारघर, येकर ऊपरी भाग, येकर भीतर के कमरामन के अऊ प्रायस्चित करे के जगह के योजना ला सऊंप दीस।
1CH 28:12 ओह ओला ओ जम्मो योजना ला सऊंप दीस, जेला परमेसर के आतमा ह यहोवा के मंदिर के अंगना अऊ आसपास के जम्मो कमरा बर, परमेसर के मंदिर के खजाना बर अऊ चघाय गे चीजमन के खजाना बर ओकर मन म डाले रिहिस।
1CH 28:13 ओह ओला पुरोहित अऊ लेवीमन के दल बर, यहोवा के मंदिर म सेवा के जम्मो काम बर, संग म येकर सेवा म उपयोग होवइया जम्मो चीजमन के संबंध म निरदेस दीस।
1CH 28:14 दाऊद ह आने-आने किसम के सेवा म उपयोग होवइया सोन के जम्मो चीजमन बर सोन के मात्रा तय करिस, अऊ ओह आने-आने किसम के सेवा म उपयोग होवइया चांदी के जम्मो चीजमन बर चांदी के मात्रा तय करिस:
1CH 28:15 सोन के दीवट अऊ ओमन के दीयामन बर सोन के मात्रा, संग म हर एक दीवट अऊ ओकर दीयामन बर सोन के मात्रा; अऊ हर एक चांदी के दीवट अऊ ओकर दीयामन बर चांदी के मात्रा हर एक दीवट के उपयोग के मुताबिक तय करिस;
1CH 28:16 भेंट चघाय रोटी के हर एक मेज बर सोन के मात्रा; चांदी के मेजमन बर चांदी के मात्रा;
1CH 28:17 कांटा, छिड़काव के कटोरा अऊ मटकामन बर सुध सोन के मात्रा; हर एक सोन के बरतन बर सोन के मात्रा; हर एक चांदी के बरतन बर चांदी के मात्रा;
1CH 28:18 अऊ धूप के बेदी बर चोखा सोन। ओह ओला रथ बनाय के योजना घलो दीस, याने कि सोन के करूब, जेकर डेनामन फईले रहंय अऊ यहोवा के करार के सन्दूक ला ढांपे रहंय।
1CH 28:19 दाऊद ह सुलेमान ला कहिस, “यहोवा के हांथ मोर ऊपर होय के कारन, मेंह ये जम्मो बात ला लिखके रखे हंव, अऊ ओह मोला येकर काबिल बनाईस कि मेंह योजना के जम्मो बात ला समझ सकेंव।”
1CH 28:20 दाऊद ह अपन बेटा सुलेमान ला ये घलो कहिस, “मजबूत अऊ साहसी बन, अऊ ये काम ला कर। झन डरा या निरास झन हो, काबरकि यहोवा परमेसर, मोर परमेसर ह तोर संग हवय। ओह तोला असफल नइं करय या ओह तोला नइं तियागय, जब तक कि यहोवा के मंदिर के सेवा बर जम्मो काम पूरा नइं हो जाही।
1CH 28:21 पुरोहित अऊ लेवीमन के दलमन परमेसर के मंदिर के जम्मो काम बर तियार हवंय, अऊ कुसल मनखेमन अपन ईछा ले जम्मो काम म तोर मदद करहीं। करमचारी अऊ जम्मो मनखेमन तोर हर हुकूम ला मानहीं।”
1CH 29:1 तब राजा दाऊद ह पूरा सभा के मनखेमन ला कहिस: “मोर बेटा सुलेमान, जेला परमेसर ह चुने हवय, ओह छोटे हवय अऊ ओला अनुभव घलो नइं ए। पर काम ह बड़े हे, काबरकि ये महल सहीं भवन ह मनखे बर नइं, पर यहोवा परमेसर बर बनही।
1CH 29:2 मोर जम्मो साधनमन ले मेंह मोर परमेसर के मंदिर बर चीजमन ला दे हवंव—सोन के काम बर सोन, चांदी के काम बर चांदी, कांसा के काम बर कांसा, लोहा के काम बर लोहा अऊ लकड़ी के काम बर लकड़ी, संग म लगाय या जड़े बर गोमेदक, फिरोजा, कई रंग के कीमती पथरा, अऊ किसम-किसम के जम्मो सुघर पथरा अऊ संगमरमर के पथरा—ये जम्मो चीज भारी मात्रा म दे हवंव
1CH 29:3 ओ हर एक चीज, जेला मेंह ये पबितर मंदिर बर मोर परमेसर के मंदिर के भक्ति म दे हवंव, येकर अलावा, मेंह अब मोर परमेसर के मंदिर बर अपन खुद के खजाना के सोन अऊ चांदी देवत हंव:
1CH 29:4 याने कि तीन हजार सोन (ओपीर के सोन) के टेलेन्ट अऊ सात हजार टेलेन्ट सुध करे गे चांदी, भवन के दीवारमन म मढ़े बर,
1CH 29:5 सोन के काम अऊ चांदी के काम बर, अऊ कारीगरमन के दुवारा करइया जम्मो काम बर दे हवंव। अब, आज कोन ह अपन ईछा ले अपनआप ला यहोवा बर समरपित करे चाहथे?”
1CH 29:6 तब परिवार के मुखियामन, इसरायल के गोत्र के अधिकारीमन, हजार-हजार दल के सेनापति अऊ सौ-सौ दल के सेनापतिमन, अऊ राजा के काम बर ठहिराय गे अधिकारीमन अपन-अपन ईछा ले दीन।
1CH 29:7 ओमन परमेसर के मंदिर के काम बर पांच हजार टेलेन्ट अऊ दस हजार दरकमोन सोन, दस हजार टेलेन्ट चांदी, अठारह हजार टेलेन्ट कांसा अऊ एक लाख टेलेन्ट लोहा दीन।
1CH 29:8 जेकर करा कीमती पथरामन रिहिन, ओमन ओ पथरामन ला यहोवा के मंदिर के खजाना म दे दीन, जऊन ह गेरसोनीमन के यहीएल के देखरेख म रिहिस।
1CH 29:9 अपन अगुवामन के ईछा से देवई ला देखके, मनखेमन आनंद मनाईन, काबरकि ओमन खुले मन ले अऊ अपन ईछा ले यहोवा ला देय रिहिन। दाऊद राजा घलो बहुंत आनंद मनाईस।
1CH 29:10 दाऊद ह जम्मो सभा के आघू म यहोवा के ये कहिके महिमा करिस, “हे यहोवा, हमर ददा इसरायल के परमेसर, अनादिकाल ले अनंतकाल तक, तोर महिमा होवय।
1CH 29:11 हे यहोवा, महानता अऊ सामर्थ अऊ महिमा अऊ गौरव अऊ सोभा तोर ए, काबरकि स्वरग अऊ धरती म हर चीज ह तोर ए। हे यहोवा, राज ह तोर ए; तेंह जम्मो के ऊपर मुखिया के रूप म उठाय गे हस।
1CH 29:12 धन-संपत्ति अऊ आदर तोर करा ले आथे; तेंह जम्मो चीज के ऊपर परभूता करथस। जम्मो ला उठाय अऊ बल देय बर तोर हांथ म बल अऊ सामर्थ हवय।
1CH 29:13 अब, हे हमर परमेसर, हमन तोला धनबाद, अऊ तोर महिमामय नांव के इस्तुति करथन।
1CH 29:14 “पर मेंह कोन अंव, अऊ मोर मनखेमन कोन अंय, कि हमन अइसने उदार मन ले दे सकन? हर एक चीज तोर करा ले आथे, अऊ हमन तोला सिरिप ओही चीज दे हन, जऊन ह तोर ले हमर करा आथे।
1CH 29:15 हमन तोर नजर म परदेसी अऊ अजनबी अन, जइसे कि हमर जम्मो पुरखामन रिहिन। धरती म हमर दिन ह बिगर आसा के एक छइहां सहीं अय।
1CH 29:16 हे यहोवा हमर परमेसर, ये जम्मो बहुंत अकन चीज, जेला हमन तोर पबितर नांव बर एक भवन बनाय खातिर दे हवन, ये जम्मो चीज तोर करा ले आथे, अऊ ये जम्मो चीज तोर अय।
1CH 29:17 हे मोर परमेसर, मेंह जानत हंव कि तेंह मन ला जांचथस अऊ ईमानदारी ले खुस होथस। ये जम्मो चीज मेंह अपन ईछा ले अऊ सही मनसा ले दे हवंव। अऊ अब मेंह आनंद के संग देखे हंव कि तोर मनखे, जऊन मन इहां हवंय, कइसे अपन ईछा ले तोला देय हवंय।
1CH 29:18 हे यहोवा, हमर पुरखा अब्राहम, इसहाक अऊ इसरायल के परमेसर, ये ईछा अऊ बिचारमन ला अपन मनखेमन के मन म हमेसा बनाय रख, अऊ ओमन के मन ला अपन कोति लगाय रख।
1CH 29:19 अऊ मोर बेटा सुलेमान ला भक्ति ले भरे अइसे मन दे कि ओह तोर हुकूम, कानून अऊ बिधिमन ला मानय अऊ ओ महल सहीं भवन ला बनाय बर हर काम करे, जेकर इंतजाम मेंह करे हवंव।”
1CH 29:20 तब दाऊद ह जम्मो सभा के मनखेमन ला कहिस, “यहोवा तुम्हर परमेसर के महिमा होवय।” तब ओमन जम्मो यहोवा, अपन पुरखामन के परमेसर के महिमा करिन; ओमन मुड़ नवाके, यहोवा अऊ राजा ला सास्टांग दंडवत करिन।
1CH 29:21 ओकर दूसर दिन, ओमन यहोवा ला बलिदान चघाईन अऊ ओकर करा होम-बलिदान लानिन: एक हजार बईला, एक हजार मेढ़ा अऊ एक हजार नर मेढ़ा-पीला, अऊ संग म ओमन के पेय-बलिदान, अऊ जम्मो इसरायल बर बहुंत अकन आने बलिदान।
1CH 29:22 ओ दिन ओमन यहोवा के आघू म बहुंत आनंद सहित खाईन अऊ पीईन। तब ओमन दाऊद के बेटा सुलेमान ला दूसर बार राजा के रूप म स्वीकार करिन, अऊ यहोवा के आघू म ओला सासन करे बर अऊ सादोक ला पुरोहित के काम बर अभिसेक करिन।
1CH 29:23 तब सुलेमान ह यहोवा के सिंघासन म अपन ददा दाऊद के जगह म राजा के रूप म बईठिस। ओह उन्नति करत गीस अऊ जम्मो इसरायल ह ओकर बात मानिस।
1CH 29:24 जम्मो अधिकारी अऊ योद्धा, संग म राजा दाऊद के जम्मो बेटामन सुलेमान राजा के अधीन रहे के सपथ खाईन।
1CH 29:25 यहोवा ह सुलेमान ला जम्मो इसरायल के नजर म बहुंत बढ़ाईस अऊ ओला अइसे राजकीय सोभा दीस, जइसे ओकर पहिले इसरायल म कोनो राजा ला नइं देय रिहिस।
1CH 29:26 यिसै के बेटा दाऊद ह जम्मो इसरायल के ऊपर राजा रिहिस।
1CH 29:27 ओह इसरायल ऊपर चालीस साल तक राज करिस—सात साल हेबरोन सहर म अऊ तैंतीस साल यरूसलेम सहर म।
1CH 29:28 ओह लम्बा जिनगी, धन अऊ आदरमान के आनंद उठाके बने बुढ़त काल म मरिस। ओकर बेटा सुलेमान ओकर जगह म राजा बनिस।
1CH 29:29 सुरू ले लेके आखिरी तक, दाऊद राजा के राज के घटनामन समूएल अगम-दरसी के अभिलेख, नातान अगमजानी के अभिलेख अऊ गाद अगम-दरसी के अभिलेख म लिखे गे हवंय,
1CH 29:30 संग म ओकर राज अऊ सक्ति, अऊ ओकर आसपास के अऊ इसरायल के अऊ आने जम्मो देसमन के परिस्थिति के बारे म घलो लिखे गे हवय।
2CH 1:1 दाऊद के बेटा राजा सुलेमान ह अपन राज म अपनआप ला मजबूती के साथ स्थापित कर लीस, काबरकि यहोवा ओकर परमेसर ह ओकर संग रिहिस अऊ ओला अति महान करिस।
2CH 1:2 तब सुलेमान ह जम्मो इसरायल ले—हजार-हजार के ऊपर सेनापति अऊ सौ-सौ के ऊपर सेनापति, नियायी अऊ इसरायल के जम्मो अगुवा अऊ परिवारमन के मुखियामन ले गोठियाईस—
2CH 1:3 अऊ सुलेमान अऊ ओकर सभा के जम्मो झन उठके गिबोन सहर के ऊंच जगह म गीन, काबरकि परमेसर के मिलापवाला तम्बू उहां रिहिस, जेला यहोवा के सेवक मूसा ह सुन्ना जगह म बनाय रिहिस।
2CH 1:4 पर दाऊद ह परमेसर के सन्दूक ला किरयत-यारीम नगर ले ओ जगह म ले आय रिहिस, जऊन ला ओह येकर बर तियार करे रिहिस, काबरकि येकर बर दाऊद ह यरूसलेम म एक तम्बू खड़े करे रिहिस।
2CH 1:5 पर ओ कांसा के बेदी, जऊन ला ऊरी के बेटा, हूर के पोता, बसलेल ह बनाय रिहिस, ओह गिबोन म यहोवा के पबितर-तम्बू के आघूच म माढ़े रिहिस; एकरसेति सुलेमान अऊ सभा के मनखेमन उहां परमेसर ले पुछताछ करिन।
2CH 1:6 सुलेमान ह मिलापवाला तम्बू म कांसा के बेदी करा यहोवा के आघू म गीस अऊ ओकर ऊपर एक हजार होम-बलिदान चघाईस।
2CH 1:7 ओहीच रथिया परमेसर ह सुलेमान ला दरसन देके कहिस, “जऊन भी चीज तेंह चाहत हस, मांग अऊ मेंह तोला दूहूं।”
2CH 1:8 सुलेमान ह परमेसर ला जबाब दीस, “तेंह मोर ददा दाऊद ऊपर बहुंत दया करे हवस अऊ मोला ओकर जगह म राजा बनाय हस।
2CH 1:9 अब, हे यहोवा परमेसर, मोर ददा दाऊद ले करे गे वायदा ह पूरा होवय, काबरकि तेंह मोला अइसन मनखेमन ऊपर राजा बनाय हस, जऊन मन गनती म धरती के धुर्रा सहीं अनगिनत हवंय।
2CH 1:10 मोला बुद्धि अऊ गियान दे कि मेंह ये मनखेमन के अगुवई कर सकंव, काबरकि कोन ह एकर लईक हवय कि तोर ये अब्बड़ मनखेमन ऊपर राज कर सकय?”
2CH 1:11 परमेसर ह सुलेमान ला कहिस, “जब येह तोर हिरदय के ईछा ए अऊ तेंह मोर ले न तो धन-संपत्ति, न वैभव, न आदरमान, न ही अपन बईरीमन के मऊत अऊ न ही अपन बर लम्बा जिनगी के मांग करय, पर तेंह अपन बर बुद्धि अऊ गियान के मांग करय ताकि तें मोर मनखेमन ऊपर सासन कर सकस, जेमन के ऊपर मेंह तोला राजा बनाय हवंव,
2CH 1:12 एकरसेति बुद्धि अऊ गियान त तोला देय जाही, संग म मेंह तोला अतेक धन, वैभव अऊ आदरमान दूहूं, जतेक कि तोर ले पहिली कोनो राजा ला न तो मिलिस अऊ न ही तोर बाद कोनो राजा ला मिलही।”
2CH 1:13 तब सुलेमान ह गिबोन के ऊंचहा जगह, मिलापवाला तम्बू करा ले यरूसलेम लहुंट गीस। अऊ ओह इसरायल ऊपर राज करे लगिस।
2CH 1:14 सुलेमान ह रथ अऊ घोड़ामन ला संकेले रिहिस; ओकर मेर चौदह सौ रथ अऊ बारह हजार घोड़ामन रिहिन; जऊन ला ओह रथ के नगरमन म अऊ अपन संग यरूसलेम म घलो रखय।
2CH 1:15 राजा ह यरूसलेम म चांदी अऊ सोन ला पथरा के असन सधारन, अऊ देवदार लकड़ी ला खाल्हे पहाड़ी के डूमर रूख असन बहुंत अकन कर दीस।
2CH 1:16 सुलेमान के घोड़ामन ला मिसर अऊ कू ले मंगाय जावत रिहिस—राजा के बेपारीमन ओमन ला ओ समय ठहिराय दाम म कू ले बिसावंय।
2CH 1:17 ओमन मिसर देस ले एक रथ ला चांदी के छै सौ सेकेल म, अऊ एक ठन घोड़ा ला चांदी के डेड़ सौ सेकेल म मंगावत रिहिन। राजा के बेपारीमन ओमन ला हित्ती अऊ अरामीमन के जम्मो राजामन ला घलो पठोवत रिहिन।
2CH 2:1 सुलेमान ह यहोवा के नांव बर एक मंदिर अऊ अपन बर एक राजमहल बनाय के हुकूम दीस।
2CH 2:2 ओह 70,000 मनखेमन ला बोझा ढोये बर अऊ 80,000 मनखे ला पहाड़ी ले पथरा काटे बर अऊ 3,600 मनखे ला येमन ऊपर देखरेख करे बर ठहिराईस।
2CH 2:3 सुलेमान ह सूर के राजा हीराम ला ये संदेस भेजिस: “तेंह मोर ददा दाऊद ला ओकर रहे के महल बनाय बर देवदार के लकड़ी पठोय रहय, त मोर बर घलो अइसने ही देवदार के लकड़ी पठो।
2CH 2:4 अब मेंह यहोवा मोर परमेसर के नांव बर एक मंदिर बनानेवाला हंव अऊ ओला समरपित करहूं, ताकि ओकर आघू म खुसबू देवइया धूप जलाय जावय, हमेसा पबितर रोटी रखे जावय, अऊ हर बिहनियां अऊ संझा के अऊ बिसराम दिन म, नवां चंदा अऊ यहोवा हमर परमेसर दुवारा ठहिराय गे तिहार म होम-बलिदान चघाय जावय। येह इसरायल बर हमेसा के एक बिधि अय।
2CH 2:5 “जऊन मंदिर मेंह बनानेवाला हंव, ओह अब्बड़ महान होही, काबरकि हमर परमेसर ह आने जम्मो देवता ले महान अय।
2CH 2:6 पर अइसन कोन हे, जऊन ह ओकर बर एक मंदिर बनवा सकथे, काबरकि स्वरगमन, अऊ त अऊ सबले ऊंच स्वरगमन घलो ओला धारन नइं कर सकंय? त मेंह कोन अंव, कि ओकर आघू म बलिदान के एक जगह ला छोंड़ ओकर बर एक मंदिर बनवावंव?
2CH 2:7 “एकरसेति मोर करा एक आदमी भेज, जऊन ह सोन अऊ चांदी, कांसा अऊ लोहा, अऊ बैंगनी, लाल अऊ नीला सूंत म काम करे के कुसल कारीगर होवय, अऊ नक्कासी के कला म अनुभवी होवय, अऊ जऊन ह मोर ओ कुसल कारीगरमन संग यहूदा अऊ यरूसलेम म काम कर सकय, जेमन ला मोर ददा दाऊद ह ठहिराय हवय।
2CH 2:8 “मोर करा लबानोन ले देवदार, सनोवर अऊ चंदन के लकड़ी घलो भेज, काबरकि मोला मालूम हवय कि तोर सेवकमन उहां लकड़ी काटे म माहिर अंय। मोर सेवकमन तोर सेवकमन संग बुता करहीं
2CH 2:9 जेकर ले मोला अब्बड़ अकन लकड़ी मिल जाही, काबरकि जऊन मंदिर मेंह बनवावत हंव, ओह बहुंत बड़े अऊ सानदार होना चाही।
2CH 2:10 तोर जऊन सेवकमन लकड़ी काटहीं, मेंह ओमन ला बीस हजार कोर्स गहूं, बीस हजार कोर्स जौ, बीस हजार बत अंगूर के मंद अऊ बीस हजार बत जैतून तेल दूहूं।”
2CH 2:11 तब सूर के राजा हीराम ह सुलेमान ला चिट्ठी लिखके जबाब दीस: “काबरकि यहोवा ह अपन मनखेमन ले मया करथे, एकरसेति ओह तोला ओमन के राजा बनाय हवय।”
2CH 2:12 अऊ हीराम ह ओमा ये घलो जोड़िस: “यहोवा, इसरायल के परमेसर के परसंसा होवय, जेह अकास अऊ धरती ला बनाईस! ओह राजा दाऊद ला एक बुद्धिमान बेटा देय हवय, जऊन ह बुद्धि अऊ सूझ-बूझ ले भरे हवय, जऊन ह यहोवा बर एक मंदिर अऊ अपन बर एक राजमहल बनवाही।
2CH 2:13 “मेंह तोर मेर हूराम-अबी ला भेजत हवंव, जऊन ह एक बढ़िया कारीगर अय,
2CH 2:14 जेकर दाई ह दान के गोत्र अऊ ददा ह सूर देस के रिहिस। ओह सोन अऊ चांदी, कांसा अऊ लोहा, पथरा अऊ लकड़ी, अऊ बैंगनी अऊ नीला अऊ लाल रंग के सूंत अऊ सुघर मलमल म काम करे बर सिखोय गे मनखे अय। ओह जम्मो किसम के नक्कासी के काम म अनुभवी अय अऊ ओला दिये गय कोनो भी बनावट ला ओह तियार कर सकथे। ओह तोर अऊ तोर ददा, मोर मालिक दाऊद के कुसल कारीगरमन संग बुता करही।
2CH 2:15 “अब मोर मालिक ह अपन वायदा के मुताबिक अपन सेवकमन ला गहूं अऊ जौ अऊ जैतून तेल अऊ अंगूर के मंद भेज देवय,
2CH 2:16 अऊ हमन लबानोन ले ओ जम्मो लकरी ला काट लेबो, जेकर तोला जरूरत हवय अऊ ओला बेड़ा म समुंदरी रसता ले यापा भेज देबो। तब तेंह ओमन ला यरूसलेम ले जा सकत हस।”
2CH 2:17 सुलेमान ह इसरायल म रहइया जम्मो परदेसीमन के गनती करवाईस, ये गनती ओकर ददा दाऊद के गनती के पाछू करे गीस; अऊ ओमन 1,53,600 रिहिन।
2CH 2:18 ओह ओमा ले 70,000 मनखे ला बोझा ढोवइया अऊ 80,000 मनखे ला पहाड़ीमन म पथरा काटे बर, अऊ संग म 3,600 मनखे ला बुता करइयामन ऊपर देखरेख करे बर ठहिराईस।
2CH 3:1 येकर बाद सुलेमान ह यरूसलेम म मोरियाह पहाड़ ऊपर यहोवा के मंदिर ला बनाय के सुरू करिस, जिहां यहोवा ह ओकर ददा दाऊद ला दरसन देय रिहिस। येह यबूसी ओरनान के कोठार रिहिस, जेला दाऊद ह देय रिहिस।
2CH 3:2 सुलेमान ह अपन राज के चौथा बछर के दूसर महिना के दूसर दिन मंदिर ला बनाय के काम सुरू करिस।
2CH 3:3 परमेसर के मंदिर बनाय बर सुलेमान दुवारा रखे गय नीव ह साठ क्यूबीट लम्बा अऊ बीस क्यूबीट चौड़ा रिहिस (पुराना समय के क्यूबीट के उपयोग करे गीस)।
2CH 3:4 मंदिर के सामने के मंडप ह बीस क्यूबीट लम्बा अऊ येह मंदिर के पूरा चौड़ई म रिहिस अऊ येकर ऊंचई बीस क्यूबीट रिहिस। ओह ओकर भीतरी भाग ला सुध सोन ले मढ़वाईस।
2CH 3:5 ओह मुख्य सभा के मंडप के भीतरी भाग म सनोवर के लकड़ी लगवाईस अऊ खांटी सोन के परत ले मढ़वा दीस अऊ येला खजूर रूख अऊ जंजीर के बनावट ले सजवाईस।
2CH 3:6 ओह मंदिर ला कीमती पथरामन ले सजवाईस। अऊ जऊन सोन के उपयोग ओह करिस, ओह परवैम के सोन रिहिस।
2CH 3:7 ओह मंदिर के छत के कड़ीमन ला, कपाट के चौखटमन, दीवार अऊ कपाटमन ला सोन ले मढ़वाईस, अऊ दीवारमन म करूब के नक्कासी करवाईस।
2CH 3:8 ओह महा पबितर स्थान ला बनाईस, येकर लम्बई ह मंदिर के चौड़ई के बरोबर रिहिस—बीस क्यूबीट लम्बा अऊ बीस क्यूबीट चौड़ा। ओह येकर भीतरी भाग ला छै सौ टेलेन्ट खांटी सोन ले मढ़वाईस।
2CH 3:9 सोन के खीलामन के वजन पचास सेकेल रिहिस। ओह ऊपरी भागमन ला घलो सोन ले मढ़वा दीस।
2CH 3:10 महा पबितर स्थान बर खुदवाके करूबमन के एक जोड़ा बनाईस अऊ ओमन ला सोन ले मढ़वाईस।
2CH 3:11 करूबमन के पूरा डेना ह बीस क्यूबीट रिहिस। पहिली करूब के एक ठन डेना ह पांच क्यूबीट लम्बा रिहिस अऊ मंदिर के दीवार ला छूवत रिहिस, जबकि येकर दूसर डेना ह घलो पांच क्यूबीट लम्बा रिहिस, अऊ आने करूब के डेना ला छूवत रिहिस।
2CH 3:12 वइसने ही आने करूब के डेना ह घलो पांच क्यूबीट लम्बा रिहिस अऊ मंदिर के दूसर दीवार ला छूवत रिहिस, अऊ येकर आने डेना ह घलो पांच क्यूबीट लम्बा रिहिस, जऊन ह पहिली करूब के डेना ला छूवत रिहिस।
2CH 3:13 ये करूबमन के डेनामन बीस क्यूबीट तक फईले रिहिन। येमन अपन गोड़ म खड़े रहंय अऊ येमन के मुहूं ह मुख्य मंडप कोति रहय।
2CH 3:14 ओह नीला, बैंगनी अऊ लाली रंग के सूंत अऊ सुघर मलमल के परदा बनाईस, जेमा करूबमन के कढ़ई करिस।
2CH 3:15 मंदिर के आघू बर ओह दू ठन खंभा बनाईस, जेमन पैंतीस क्यूबीट लम्बा रिहिन, हर एक के ऊपर के कंगनी ह पांच क्यूबीट रिहिस।
2CH 3:16 ओह गुंथाय सांकल बनवाके खंभामन के ऊपर म लगवा दीस। ओह सौ ठन अनार घलो बनाईस अऊ ओला सांकल म लटका दीस।
2CH 3:17 ओह मंदिर के आघू म खंभामन ला बनाईस, एक ठन दक्खिन अऊ एक ठन ला उत्तर कोति। दक्खिन कोति के खंभा के नांव ओह याकीन रखिस अऊ उत्तर कोति के खंभा के नांव बोअज रखिस।
2CH 4:1 राजा सुलेमान ह कांसा के एक बेदी बनाईस, जेह बीस क्यूबीट लम्बा, बीस क्यूबीट चौड़ा अऊ दस क्यूबीट ऊंचहा रिहिस।
2CH 4:2 ओह ढाले गय धातु ले एक बड़े हौज बनाईस, जऊन ह आकार म गोल रिहिस, ओकर बियास ह दस क्यूबीट अऊ ऊंचई पांच क्यूबीट रिहिस। येकर कुल घेरा के नाप तीस क्यूबीट रिहिस।
2CH 4:3 गोल घेरा के खाल्हे म बईलामन के मूरती दस क्यूबीट के घेरा म रिहिस। बईलामन ला हौज के संग दू कतार म एके ठन कुटा म ढालके बनाय गे रिहिस।
2CH 4:4 हौज ला बारह ठन बनाय गे बईलामन ऊपर रखे गे रिहिस, जेमा के तीन ठन के मुहूं उत्तर कोति, तीन ठन के मुहूं पछिम कोति, तीन ठन के मुहूं दक्खिन कोति अऊ तीन ठन के मुहूं पूरब कोति रिहिस। हौज ला ओमन के ऊपर मढ़ाय गे रिहिस, अऊ ओमन के पाछू के भागमन हौज के मांझा कोति रहंय।
2CH 4:5 येकर मोटई लगभग तीन ईंच रिहिस, अऊ ओकर किनारा ह कटोरा के किनारा असन, खिले कुमुदिनी फूल सहीं रिहिस। ओमा तीन हजार बत पानी हमात रिहिस।
2CH 4:6 ओकर बाद ओह धोय बर दस ठन तसला बनाईस अऊ पांच ठन ला दक्खिन कोति अऊ पांच ठन ला उत्तर कोति मढ़ाईस। ओमा होम-बलिदान चघाय म उपयोग के चीजमन ला धोय जावय, पर हौज के उपयोग पुरोहितमन के दुवारा धोय बर करे जावय।
2CH 4:7 बिसेस निरदेस के मुताबिक ओह दस ठन सोन के दीवट ला बनाईस अऊ ओमन ला मंदिर म रख दीस, पांच ठन ला दक्खिन कोति अऊ पांच ठन ला उत्तर म रखिस।
2CH 4:8 ओह दस ठन मेज बनाईस अऊ ओमन ला मंदिर म रख दीस, पांच ठन ला दक्खिन कोति अऊ पांच ठन ला उत्तर म रखिस। ओह सौ ठन सोन के छिंचनेवाला कटोरा घलो बनाईस।
2CH 4:9 ओह पुरोहितमन के अंगना, अऊ बड़े अंगना अऊ अंगना के कपाटमन ला बनाईस, अऊ कपाटमन ला कांसा ले मढ़वाईस।
2CH 4:10 ओह हौज ला दक्खिन कोति, दक्खिन-पूरब के कोनटा म रखिस।
2CH 4:11 अऊ हूराम ह बरतन अऊ बेलचा अऊ छिंचे बर कटोरामन ला घलो बनाईस। ये किसम ले हूराम ह राजा सुलेमान के दुवारा दिये गय काम ला परमेसर के मंदिर म पूरा करिस:
2CH 4:12 दू ठन खंभामन; खंभामन के टीप म कटोरा के आकार के दू ठन कंगनी; खंभामन के टीप म कटोरा के आकार के दूनों कंगनीमन ला सजाय बर दू ठन जाली तियार करिस;
2CH 4:13 दूनों जाली बर चार सौ अनार (खंभामन के टीप म कटोरा के आकार के कंगनीमन ला सजाय बर हर एक जाली म ये अनारमन दू ठन कतार म रहंय);
2CH 4:14 तसलामन के संग ओमन के खुरामन;
2CH 4:15 हौज अऊ ओकर खाल्हे म बारह ठन बईला;
2CH 4:16 बरतन, बेलचा, मांस निकाले बर कांटा अऊ येकर से जुड़े सामान। ये जम्मो चीज, जेमन ला हूराम-अबी ह यहोवा के मंदिर बर राजा सुलेमान के हुकूम ले बनाईस, येमन चमकदार कांसा के बने रिहिन।
2CH 4:17 राजा ह ओमन ला यरदन के मैदान म सुक्कोत अऊ सारतान के बीच म चिक्कन माटी के सांचा ले ढलवाय रिहिस।
2CH 4:18 सुलेमान ह जतेक चीजमन ला बनवाय रिहिस, ओ जम्मो ह अतेक जादा रिहिस कि कांसा के वजन के गनती नइं करे जा सकत रिहिस।
2CH 4:19 सुलेमान ह ओ जम्मो सजावट के चीजमन ला घलो बनवाईस, जेमन परमेसर के मंदिर म रिहिन: सोन के बेदी; ओ मेज जेमा भेंट के रोटी रखे जावय;
2CH 4:20 सुध सोन के दीवटमन के संग ओमन के दीयामन ला भीतरी पबितर-स्थान के आघू म जलाय बर जइसे कि बताय गे रिहिस;
2CH 4:21 सोन के फूलवाला काम अऊ दीया अऊ चिमटामन (येमन ठोस सोन के रिहिन);
2CH 4:22 बाती ला काटे बर सुध सोन के कतरनी, छिंचे के कटोरामन, बरतन अऊ धूपदानीमन; अऊ मंदिर के सोन के कपाटमन: महा पबितर स्थान के भीतरी कपाटमन अऊ मुख्य सभा मंडप के कपाटमन।
2CH 5:1 जब सुलेमान ह यहोवा के मंदिर के जम्मो बुता ला पूरा कर डारिस, तब ओह ओ चीजमन ला लानिस, जेमन ला ओकर ददा दाऊद ह अरपन करे रिहिस—ओमा सोन अऊ चांदी अऊ जम्मो सजावट के चीजमन रिहिन—अऊ ओह ओमन ला परमेसर के मंदिर के खजाना म रख दीस।
2CH 5:2 तब सुलेमान ह यरूसलेम म इसरायल के अगुवामन ला, गोत्रमन के जम्मो मुखियामन ला अऊ इसरायली परिवारमन के मुखियामन ला बलाईस कि ओमन सियोन ले याने कि दाऊद के सहर ले यहोवा के करार के सन्दूक ला लानंय।
2CH 5:3 अऊ जम्मो इसरायलीमन सातवां महिना म तिहार के बेरा राजा करा जूरिन।
2CH 5:4 जब इसरायल के जम्मो अगुवामन आ गीन, त लेवीमन सन्दूक ला उठाईन,
2CH 5:5 अऊ ओमन करार के सन्दूक अऊ मिलापवाला तम्बू अऊ ओमा के जम्मो पबितर चीजमन ला ऊपर ले आईन। लेवीय पुरोहितमन ओमन ला उठाके लानिन;
2CH 5:6 अऊ राजा सुलेमान अऊ जम्मो इसरायली सभा, जऊन मन ओकर करा जूरे रिहिन, ओमन सन्दूक के आघू म होके अतेक भेड़ अऊ पसुमन ला बलि करत रिहिन कि ओमन के हिसाब या गनती नइं करे जा सकिस।
2CH 5:7 तब पुरोहितमन यहोवा के करार के सन्दूक ला ओकर जगह म याने कि मंदिर के भीतरी पबितर-स्थान, महा पबितर स्थान म लानिन, अऊ ओला करूबमन के डेना के खाल्हे म मढ़ा दीन।
2CH 5:8 करूबमन अपन डेनामन ला सन्दूक के ऊपर फईलाय रिहिन अऊ सन्दूक अऊ ओकर बोहे के डंडामन ला ढांपे रिहिन।
2CH 5:9 ये डंडामन अतेक लम्बा रिहिन कि ओमन के छोरमन सन्दूक ले निकले रिहिन अऊ येमन ला भीतरी पबितर-स्थान के सामने ले देखे जा सकत रिहिस, पर ओमन ला पबितर स्थान के बाहिर ले नइं देखे जा सकत रिहिस; अऊ ओमन आज भी उहेंच हवंय।
2CH 5:10 सन्दूक म सिरिप ओ दू ठन पथरा के पटिया के छोंड़ अऊ कुछू नइं रिहिस, जेला मूसा ह येमा होरेब पहाड़ ऊपर रखे रिहिस, जिहां इसरायलीमन के मिसर देस ले बाहिर निकले के बाद, यहोवा ह ओमन के संग एक करार करे रिहिस।
2CH 5:11 तब पुरोहितमन पबितर स्थान ले हट गीन। जतेक भी पुरोहित उहां रिहिन, ओ जम्मो झन अपन दल म भेद करे बिगर अपनआप ला सुध करे रिहिन।
2CH 5:12 जम्मो लेवी, जेमन संगीतकार रिहिन—आसाप, हेमान, यदूतून अऊ ओमन के लइका अऊ रिस्तेदारमन—बेदी के पूरब कोति खड़े रिहिन, अऊ ओमन बढ़िया मलमल के ओनहा पहिरे मंजीरा, बीना अऊ सारंगी बजात रिहिन। ओमन के संग तुरही बजात 120 पुरोहितमन रिहिन।
2CH 5:13 तुरही बजइया अऊ संगीतकारमन एक संग जूरके यहोवा के धनबाद अऊ परसंसा करत रिहिन। तुरही, मंजीरा अऊ आने बाजामन के संग, गवइयामन यहोवा के परसंसा म अपन अवाज उठाईन अऊ गाईन: “ओह बने अय; ओकर मया हमेसा बने रहिथे।” तब यहोवा के मंदिर ह बादर ले भर गीस,
2CH 5:14 अऊ पुरोहितमन बादर के कारन अपन सेवा नइं देय सकिन, काबरकि यहोवा के महिमा ले परमेसर के मंदिर ह भर गे रिहिस।
2CH 6:1 तब सुलेमान ह कहिस, “यहोवा ह कहे हवय कि ओह करिया बादर म निवास करही;
2CH 6:2 मेंह तोर बर एक सानदार मंदिर बनाय हंव, तोर हमेसा रहे बर निवास के एक ठन जगह।”
2CH 6:3 जब इसरायल के जम्मो सभा ह उहां ठाढ़े रिहिस, त राजा ह ओमन कोति मुहूं करके ओमन ला आसीरबाद दीस।
2CH 6:4 तब ओह कहिस: “यहोवा, इसरायल के परमेसर के महिमा होवय; जऊन ह अपन हांथ ले मोर ददा दाऊद के संग अपन मुहूं ले करे गय वायदा ला पूरा करे हवय। काबरकि ओह कहे रिहिस,
2CH 6:5 ‘जऊन दिन ले मेंह अपन मनखेमन ला मिसर ले निकालके लानंय, तब ले मेंह इसरायल के कोनो गोत्र के एको ठन सहर ला एक मंदिर बनाय बर नइं चुने हवंव कि उहां मोर नांव होवय, अऊ न ही मेंह कोनो ला अपन मनखे इसरायलीमन ऊपर राजा चुने हवंव।
2CH 6:6 पर अब मेंह यरूसलेम ला अपन नांव बर चुने हंव, अऊ मेंह दाऊद ला अपन इसरायली मनखेमन ऊपर राज करे बर चुने हवंव।’
2CH 6:7 “मोर ददा दाऊद के मन म ये बात रिहिस कि ओह इसरायल के परमेसर, यहोवा के नांव खातिर एक मंदिर बनावय।
2CH 6:8 पर यहोवा ह मोर ददा दाऊद ला कहिस, ‘मोर नांव खातिर अपन मन म, मंदिर बनवाय के ईछा करके, तेंह बने करे हवस।
2CH 6:9 तभो ले, तेंह ओ मनखे नो हस, जऊन ह ओ मंदिर ला बनाही, पर तोर बेटा, तोर खुद के मांस अऊ लहू—ओही ह मोर नांव बर मंदिर बनवाही।’
2CH 6:10 “यहोवा ह अपन करे गय वायदा ला पूरा करे हवय। मेंह अपन ददा दाऊद के जगह म राजा बने हंव अऊ अब यहोवा के वायदा के मुताबिक मेंह इसरायल के सिंघासन म बईठे हवंव, अऊ मेंह यहोवा, इसरायल के परमेसर के नांव खातिर मंदिर ला बनाय हवंव।
2CH 6:11 उहां मेंह सन्दूक ला रखे हंव, जेमा यहोवा के ओ करार हवय, जेला ओह इसरायल के मनखेमन संग करे रिहिस।”
2CH 6:12 तब सुलेमान ह इसरायल के जम्मो सभा के आघू म यहोवा के बेदी के आघू म ठाढ़ होईस अऊ अपन हांथ ला फैलाईस।
2CH 6:13 ओह पांच क्यूबीट लम्बा, पांच क्यूबीट चौड़ा अऊ तीन क्यूबीट ऊंच कांसा के एक चबूतरा बनाय रिहिस, अऊ येला बाहिर के अंगना के बीचों-बीच रखिस। ओह चबूतरा म ठाढ़ होईस अऊ इसरायल के जम्मो सभा के आघू म माड़ी टेकिस अऊ अपन हांथ ला स्वरग कोति उठाईस।
2CH 6:14 ओह पराथना करत कहिस: “हे यहोवा, इसरायल के परमेसर, स्वरग अऊ धरती म तोर असन कोनो परमेसर नइं एं—तेंह अपन ओ सेवकमन संग करे मया के करार ला पूरा करथस, जेमन पूरा मन से तोर रसता म बने रहिथें।
2CH 6:15 तेंह अपन सेवक मोर ददा दाऊद ले करे ओ वायदा ला बनाय रखे हस; जेला तेंह अपन मुहूं ले बोलके करे रहय अऊ अपन हांथ ले ओला पूरा करे हस—जइसने कि येह आज हवय।
2CH 6:16 “अब, हे यहोवा, इसरायल के परमेसर, अपन सेवक मोर ददा दाऊद ले करे गय वायदा ला बनाय रख, जब तेंह कहय, ‘मोर आघू म इसरायल के सिंघासन म बईठे बर तोला उत्तराधिकारी के कमी कभू नइं होवय, यदि सिरिप तोर संतानमन अपन जम्मो काम ला धियान देके मोर कानून के मुताबिक करंय, जइसे कि तेंह करे हस।’
2CH 6:17 अऊ अब, हे यहोवा, इसरायल के परमेसर, तोर ओ बचन, जेकर वायदा तेंह अपन सेवक दाऊद ले करे रहय, ओला सच होवन दे।
2CH 6:18 “पर का सही म परमेसर ह मनखेमन संग धरती म निवास करही? स्वरगमन, अऊ त अऊ सबले ऊंच स्वरगमन घलो तोला धारन नइं कर सकंय। फेर मोर बनाय ये मंदिर तो बहुंत छोटे हे!
2CH 6:19 तभो ले, हे यहोवा, मोर परमेसर, अपन सेवक के पराथना अऊ दया के ओकर बिनती ऊपर धियान दे। मोर रोवई अऊ ओ पराथना ला सुन, जेला तोर सेवक ह तोर आघू म करत हवय।
2CH 6:20 तोर आंखीमन रात अऊ दिन ये मंदिर कोति लगे रहंय, ये जगह जेकर बारे म तेंह कहे हस कि तेंह अपन नांव ला उहां रखबे। तेंह ओ पराथना ला सुन, जेला तोर सेवक ये जगह कोति मुहूं करके करथे।
2CH 6:21 अपन सेवक अऊ अपन मनखे इसरायलीमन के बिनती ला सुन, जब ओमन ये जगह कोति मुहूं करके पराथना करथें। स्वरग ले, अपन निवास के जगह ले सुन; अऊ जब तें सुनथस, त ओमन ला छेमा कर।
2CH 6:22 “जब कोनो अपन परोसी के बिरूध कोनो अपराध करय अऊ ओला किरिया खाय के जरूरत पड़य अऊ ओह आके ये मंदिर म तोर बेदी के आघू म किरिया खावय,
2CH 6:23 तब स्वरग ले सुनके, अपन सेवकमन के बीच म नियाय कर, अपराधी के काम ला ओकर मुड़ म लानके ओला सजा दे, अऊ निरदोस के ओकर निरदोसता के मुताबिक नियाय कर।
2CH 6:24 “जब तोर इसरायली मनखेमन तोर बिरूध पाप करे के कारन अपन कोनो बईरी ले हार जावंय, अऊ जब ओमन तोर कोति फेर लहुंटंय अऊ ये मंदिर म तोर आघू म पराथना अऊ बिनती करत तोर नांव के परसंसा करंय,
2CH 6:25 तब स्वरग ले सुनबे अऊ अपन इसरायली मनखेमन के पाप ला छेमा करबे अऊ ओमन ला ओ देस म लहुंटाके ले आबे, जेला तेंह ओमन ला अऊ ओमन के पुरखामन ला देय हस।
2CH 6:26 “तोर मनखेमन के तोर बिरूध पाप करे के कारन, जब अकास ह बंद हो जावय अऊ बरसा नइं होवय, अइसने बेरा म जब ओमन ये जगह कोति होके पराथना करंय अऊ तोर नांव के परसंसा करंय अऊ अपन पाप ले मन फिरावंय, काबरकि तेंह ओमन ला दुख म डाले हस,
2CH 6:27 तब स्वरग ले सुनके अपन सेवक, अपन इसरायली मनखेमन के पाप ला छेमा करबे। ओमन ला जीये के सही रसता सिखाबे, अऊ ओ देस म बारिस भेजबे, जेला तेंह अपन मनखेमन ला उत्तराधिकार म देय हस।
2CH 6:28 “जब अकाल या महामारी देस म आवय, या फसल म रोग या फफूंदी, टिड्डी या फांफामन लगंय, या जब बईरीमन ओमन ला ओमन के कोनो सहर म घेर लेवंय, याने कोनो भी बिपत्ति या बेमारी आवय,
2CH 6:29 अऊ जब तोर इसरायली मनखेमन के बीच म ले कोनो ओमन के दुख अऊ पीरा ला जानके, ये मंदिर कोति अपन हांथ ला फईलाके पराथना या बिनती करय—
2CH 6:30 तब अपन निवास स्वरग ले सुनके छेमा करबे; हर एक के संग ओमन के काम के मुताबिक बरताव करबे, तेंह ओमन के मन के बात ला जानथस (काबरकि सिरिप तेंहीच ह मनखे के मन ला जानथस),
2CH 6:31 ताकि जऊन देस ला तेंह हमर पुरखामन ला देय हवस, ओ देस म रहत ओमन तोर भय मानंय अऊ हर समय तोर हुकूम म चलंय।
2CH 6:32 “जहां तक परदेसी के बात ए, जऊन ह तोर इसरायली मनखेमन के बीच म के नो हय, पर तोर बड़े नांव अऊ बलवंत हांथ अऊ तोर बड़े काम के कारन दूरिहा देस ले आय हवय—जब ओमन आवंय अऊ ये मंदिर कोति मुहूं करके पराथना करंय,
2CH 6:33 तब स्वरग, अपन निवास स्थान ले सुनबे। जऊन कुछू ओ परदेसी तोर ले मांगय, ओला पूरा करबे, ताकि धरती के जम्मो मनखे तोर नांव ला जानंय अऊ तोर भय मानंय, जइसे कि तोर खुद के इसरायली मनखेमन करथें, अऊ ओमन जानंय कि ये घर ला मेंह तोर नांव बर बनाय हवंव।
2CH 6:34 “जब तेंह अपन मनखेमन ला ओमन के बईरीमन के बिरूध लड़े बर जिहां कहीं भी पठोथस, अऊ जब ओमन तोर ले तोर चुने ये सहर अऊ तोर नांव बर मोर बनाय ये मंदिर कोति होके पराथना करंय,
2CH 6:35 तब स्वरग ले ओमन के पराथना अऊ बिनती ला सुनबे, अऊ ओमन ला संभालबे।
2CH 6:36 “जब ओमन तोर बिरूध पाप करंय—काबरकि कोनो भी अइसन नइं ए जऊन ह पाप नइं करय—अऊ तेंह ओमन ऊपर गुस्सा होके ओमन ला ओमन के बईरी के हांथ म कर देवस, जऊन ह ओमन ला बहुंत दूरिहा या लकठा के देस म बंदी बनाके ले जावय;
2CH 6:37 अऊ यदि तोर मनखेमन ओ बंदी बनाय गे देस म अपन मन ला बदलंय, अऊ पछताप करंय अऊ बंदी बनाय गय देस म तोर ले बिनती करके कहंय, ‘हमन पाप करे हवन, हमन गलती करे हवन, अऊ दुस्टता के काम करे हवन’;
2CH 6:38 अऊ यदि ओमन अपन ओ बंदी बनाय गय देस म जिहां ओमन ला ले जाय गे हवय, अपन पूरा मन अऊ आतमा ले तोर कोति फिरंय, अऊ ओमन के पुरखामन ला तोर दिये देस कोति, तोर चुने सहर कोति अऊ तोर नांव खातिर मोर बनाय ये मंदिर कोति होके तोर ले पराथना करंय;
2CH 6:39 त स्वरग, अपन निवास स्थान ले ओमन के पराथना अऊ बिनती ला सुनबे, अऊ ओमन ला संभालबे। अऊ अपन मनखेमन ला छेमा करबे, जेमन कि तोर बिरूध पाप करे हवंय।
2CH 6:40 “अब हे मोर परमेसर, तोर आंखीमन खुले रहंय अऊ तोर कान ह ये जगह म करे गे पराथना ऊपर धियान देवय।
2CH 6:41 “हे यहोवा परमेसर, अब उठ, अऊ अपन बिसराम के जगह म
2CH 6:42 हे यहोवा परमेसर, अपन अभिसिक्त जन ला झन तियाग।
2CH 7:1 जब सुलेमान के पराथना ह खतम होईस, त आगी ह स्वरग ले खाल्हे गिरिस अऊ होम-बलिदान अऊ बलिदानमन ला जलाके भसम कर दीस, अऊ यहोवा के महिमा ले मंदिर ह भर गीस।
2CH 7:2 पुरोहितमन यहोवा के मंदिर म प्रवेस नइं कर सकिन, काबरकि यहोवा के महिमा ले ओह भर गीस।
2CH 7:3 जब जम्मो इसरायलीमन मंदिर के ऊपर आगी गिरत अऊ यहोवा के महिमा ला देखिन, त ओमन माड़ी टेकके मुहूं-भरसा भुइयां म हो गीन, अऊ ओमन ये कहिके यहोवा के अराधना करिन अऊ धनबाद दीन, “ओह बने अय; ओकर मया सदा बने रहिथे।”
2CH 7:4 तब राजा अऊ जम्मो मनखेमन यहोवा के आघू म बलिदान चघाईन।
2CH 7:5 अऊ राजा सुलेमान ह बाईस हजार पसुमन के मुड़ी अऊ एक लाख बीस हजार भेड़ अऊ बकरामन के बलिदान चघाईस। ये किसम ले राजा अऊ जम्मो मनखेमन परमेसर के मंदिर के समरपन करिन।
2CH 7:6 पुरोहितमन अपन-अपन जगह ला ले लीन, वइसे ही लेवीमन यहोवा के बाजामन संग अपन जगह लीन, जेला राजा दाऊद ह यहोवा के परसंसा बर बनाय रिहिस अऊ जेमन के उपयोग तब होवय, जब ओह ये कहिके धनबाद देवय, “ओकर मया हमेसा बने रहिथे।” लेवीमन के आघू म, पुरोहितमन अपन तुरही फूंकंय, अऊ जम्मो इसरायलीमन खड़े रहंय।
2CH 7:7 सुलेमान ह यहोवा के मंदिर के आघू के अंगना के मांझा वाले भाग के अभिसेक करिस, अऊ उहां ओह होम-बलिदान अऊ मेल-बलिदान के चरबी ला चघाईस, काबरकि जऊन कांसा के बेदी ओह बनाय रिहिस, ओमा होम-बलिदान, अन्न-बलिदान अऊ चरबी के हिस्सामन नइं समात रिहिन।
2CH 7:8 ओ बेरा, सुलेमान ह सात दिन तक तिहार मनाईस, अऊ ओकर संग जम्मो इसरायलीमन घलो मनाईन—येह एक बड़े सभा रिहिस, जेमा लेबो-हमात ले लेके मिसर के नरवा तक के मनखेमन रिहिन।
2CH 7:9 आठवां दिन ओमन एक सभा के आयोजन करिन, काबरकि ओमन बेदी के समरपन बर सात दिन के उत्सव मनाय रिहिन अऊ सात दिन तिहार मनाय म बिताय रिहिन।
2CH 7:10 सातवां महिना के तेईसवां दिन म, सुलेमान ह ओ मनखेमन ला ओमन के घर भेजिस; यहोवा ह जऊन भलई के काम दाऊद अऊ सुलेमान अऊ अपन इसरायली मनखेमन बर करे रिहिस, ओकर बर ओमन आनंदित अऊ मगन होके लहुंट गीन।
2CH 7:11 जब सुलेमान ह यहोवा के मंदिर अऊ राजमहल ला बना चुकिस, अऊ ओ सबो काम ला पूरा कर डारिस, जेमन ला ओह अपन मन म यहोवा के मंदिर अऊ अपन खुद के महल म करे के ठाने रिहिस,
2CH 7:12 त यहोवा ह रथिया ओला दरसन दीस अऊ कहिस: “मेंह तोर पराथना ला सुने हवंव अऊ ये जगह ला बलिदान बर मंदिर के रूप म अपन बर चुने हवंव।
2CH 7:13 “जब मेंह अकास ला अइसन बंद कर देवंव कि बरसा झन होवय, या फांफामन ला देस ला उजारे के हुकूम देवंव, या अपन मनखेमन के बीच म महामारी भेजंव,
2CH 7:14 तब कहूं मोर मनखेमन, जेमन मोर कहाथें, अपनआप ला दीन करके पराथना करहीं अऊ मोर दरसन के खोजी होहीं अऊ बुरई के रद्दा ले फिरहीं, तब मेंह स्वरग ले सुनके, ओमन के पाप ला छेमा करहूं अऊ ओमन के देस ला चंगा करहूं।
2CH 7:15 अब मोर आंखी ह खुले रहिही, अऊ मोर कान ह ये जगह म करे गय पराथना ऊपर धियान दीही।
2CH 7:16 मेंह ये मंदिर ला एकरसेति चुने अऊ अभिसेक करे हंव ताकि मोर नांव ह हमेसा बर उहां रहय। मोर आंखी अऊ मोर मन ह हमेसा उहां लगे रहिही।
2CH 7:17 “जहां तक तोर बात ए, यदि तेंह मोर आघू म अपन ददा दाऊद के सहीं बिसवासयोग्यता से चलबे, अऊ मोर दिये जम्मो हुकूम ला मानबे, अऊ मोर बिधि अऊ कानूनमन के पालन करबे,
2CH 7:18 त मेंह तोर राज सिंघासन ला स्थिर करहूं, जइसन कि मेंह तोर ददा दाऊद ले करार करके कहे रहेंव, ‘इसरायल ऊपर सासन करे बर, तोर बंस म उत्तराधिकारी के कमी कभू नइं होही।’
2CH 7:19 “पर यदि तेंह मोर ले दूरिहा होके ओ बिधि अऊ हुकूममन ला तियाग देबे, जेला मेंह तोला देय हवंव अऊ जाके आने देवतामन के सेवा अऊ ओमन के अराधना करबे,
2CH 7:20 तब मेंह अपन देस ले इसरायल ला उखान दूहूं, जेला मेंह ओमन ला देय हवंव, अऊ ये मंदिर ला तियाग दूहूं, जेला मेंह अपन नांव बर संस्कार करे हवंव। मेंह येला जम्मो झन के बीच म एक कहावत अऊ ठट्ठा के चीज बना दूहूं।
2CH 7:21 ये मंदिर ह पथरामन के कुढ़हा हो जाही। अऊ ओ जम्मो, जेमन इहां ले होके जाहीं, ओमन अचरज करहीं अऊ कहिहीं, ‘यहोवा ह ये देस अऊ ये मंदिर ला अइसने काबर करे हवय?’
2CH 7:22 त मनखेमन जबाब दीहीं, ‘काबरकि ओमन यहोवा, अपन पुरखामन के ओ परमेसर ला तियाग दे हवंय, जऊन ह ओमन ला मिसर देस ले निकालके लानिस, ओमन आने देवतामन ला अपनाके ओमन के अराधना अऊ सेवा करत हवंय—एकरसेति ओह ये जम्मो बिपत्ति ओमन ऊपर लाने हवय।’ ”
2CH 8:1 बीसवां बछर के आखिर म, ये दौरान सुलेमान ह यहोवा के मंदिर अऊ अपन खुद के महल ला बनाईस,
2CH 8:2 तब सुलेमान ह ओ गांवमन ला फेर बनाईस, जेला हीराम ह ओला देय रिहिस, अऊ ओमा इसरायलीमन ला बसाईस।
2CH 8:3 तब सुलेमान ह हमात-सोबा नगर जाके ओला कब्जा कर लीस।
2CH 8:4 ओह सुनसान जगह म तदमोर नगर ला घलो बनाईस अऊ ओ जम्मो भंडार सहर, जेमन ला ओह हमात म बनाय रिहिस, ओमन ला घलो फेर बनाईस।
2CH 8:5 ओह ऊपर के बेत-होरोन अऊ खाल्हे के बेत-होरोन ला गढ़वाला सहर के रूप म, दीवारमन के संग अऊ कपाट अऊ सरिया के संग फेर बनाईस,
2CH 8:6 संगे-संग ओह बालात अऊ जम्मो भंडारवाले सहर, अऊ अपन रथ अऊ घोड़ामन बर जम्मो सहर—ओह यरूसलेम म, लबानोन म अऊ अपन जम्मो राज म, जऊन कुछू बनाय चाहत रिहिस, ओ जम्मो ला बनाईस।
2CH 8:7 उहां अभी तक ले हित्ती, अमोरी, परिज्जी, हिब्बी, अऊ यबूसीमन के कुछू मनखेमन बांच गे रिहिन (ये मनखेमन इसरायली नइं रिहिन)।
2CH 8:8 सुलेमान ह देस म ये जम्मो मनखे के ओ बांचे संतानमन ला बंधुवा मजदूर के रूप म सेवा करे बर रखिस, जेमन ला इसरायलीमन नास नइं करे रिहिन, ओमन आज तक वइसने ही हवंय।
2CH 8:9 पर सुलेमान ह अपन बुता बर इसरायलीमन ला गुलाम नइं बनाईस; ओमन ओकर सैनिक, ओकर कप्तानमन के सेनापति, अऊ ओकर रथ अऊ सारथीमन के सेनापति रिहिन।
2CH 8:10 ओमन राजा सुलेमान के मुखिया अधिकारीमन घलो रिहिन—दू सौ पचास अधिकारी, आदमीमन के काम ला देखंय।
2CH 8:11 सुलेमान ह फिरौन के बेटी ला दाऊद के सहर ले ओ महल म ले आईस, जेला सुलेमान ह ओकर बर बनाय रिहिस, काबरकि ओह सोचिस, “मोर घरवाली ला इसरायल के राजा दाऊद के महल म नइं रहना चाही, काबरकि यहोवा के सन्दूक ह जऊन-जऊन जगह म गे हवय ओ जगहमन पबितर अंय।”
2CH 8:12 यहोवा के बेदी म, जेला ओह मंडप के आघू म बनाय रिहिस, सुलेमान ह यहोवा ला होम-बलिदान चघाईस,
2CH 8:13 ये बलिदान ला मूसा के दुवारा दिये हुकूम म हर दिन के जरूरत के मुताबिक बिसराम दिन, नवां चंदा अऊ तीन ठन सालाना तिहारमन बर चघाय जावय—याने कि अखमीरी रोटी के तिहार, हप्तामन के तिहार अऊ पबितर-तम्बूमन के तिहार।
2CH 8:14 अपन ददा दाऊद के बिधि ला धियान म रखत, ओह पुरोहितमन ला ओमन के काम करे बर दल-दल म बांट दीस, अऊ लेवीमन ला अराधना करे म अगुवई करे बर अऊ हर एक दिन के जरूरत के मुताबिक पुरोहितमन के मदद करे बर ठहिराईस। ओह अलग-अलग दुवार बर दुवारपालमन के अलग-अलग दलमन ला घलो ठहिराईस, काबरकि अइसने ही परमेसर के जन दाऊद ह हुकूम देय रिहिस।
2CH 8:15 ओमन राजा दुवारा पुरोहित या लेवीमन बर दिये गय कोनो भी हुकूम ले कोनो भी मामला म नइं हटिन, येमा खजानामन के मामला घलो रिहिस।
2CH 8:16 सुलेमान के जम्मो बुता ला करे गे रिहिस, यहोवा के मंदिर के नीव रखे के दिन ले लेके मंदिर के पूरा होवत तक। ये किसम ले यहोवा के मंदिर पूरा हो गीस।
2CH 8:17 तब सुलेमान ह एदोम देस के तट म एसियोन-गेबेर अऊ एलात नगर म गीस।
2CH 8:18 अऊ हीराम ह ओकर मेर पानी जहाज पठोईस, जेला ओकर खुद के मनखेमन चलावंय, ओमन नाविक रिहिन अऊ समुंदर के जानकार रिहिन। येमन, सुलेमान के मनखेमन संग, ओपीर गीन अऊ उहां ले वापिस चार सौ पचास टेलेन्ट सोन लानके राजा सुलेमान ला दे दीन।
2CH 9:1 जब सेबा के रानी ह सुलेमान के जस ला सुनिस, तब ओह ओला परखे बर कठिन-कठिन सवाल लेके यरूसलेम आईस। ओह एक बड़े दल के संग ऊंटमन म मसाला, बहुंत अकन सोन, अऊ कीमती रत्नमन ला लेके आईस; ओह सुलेमान मेर आईस अऊ अपन मन म जऊन बात रिहिस, ओ जम्मो के बारे ओकर ले गोठियाईस।
2CH 9:2 सुलेमान ह ओकर जम्मो सवाल के जबाब दीस; कोनो भी बात ओकर बर अइसे कठिन नइं रिहिस कि ओह ओला नइं समझा सकय।
2CH 9:3 जब सेबा के रानी ह सुलेमान के बुद्धि ला देखिस, संग म ओकर बनाय महल,
2CH 9:4 ओकर मेज के जेवन, ओकर करमचारीमन के बईठना, पोसाक पहिरे सेवकमन के सेवा करई, पोसाक पहिरे पीयानेवालामन अऊ यहोवा के मंदिर म ओकर दुवारा चघाय गे होम-बलिदानमन ला देखिस, त ओह चकित हो गीस।
2CH 9:5 ओह राजा ले कहिस, “जऊन बात, मेंह अपन देस म तोर काम अऊ तोर बुद्धि के बारे म सुने रहेंव, ओह सही अय।
2CH 9:6 पर ओमन के कहे बात ऊपर मोला बिसवास नइं होईस, जब तक कि मेंह आके अपन आंखी ले नइं देख लेंव। वास्तव म, तोर बुद्धि के आधा महानता ला घलो मोला नइं बताय गे रिहिस; जऊन बात मेंह सुने रहेंव, तेंह ओकर ले बढ़के हस।
2CH 9:7 तोर मनखेमन कतेक खुस होहीं! तोर करमचारीमन कतेक खुस होहीं, जऊन मन लगातार तोर आघू म ठाढ़े रहिके तोर बुद्धि के गोठ ला सुनथें!
2CH 9:8 यहोवा तोर परमेसर के परसंसा होवय, जऊन ह तोर ले खुस हवय अऊ तोला राजा के रूप म अपन सिंघासन म बईठाय हवय, ताकि तें यहोवा अपन परमेसर कोति ले सासन कर सकस। इसरायल बर तोर परमेसर के मया अऊ हमेसा बर ओमन ला ऊपर बनाय रखे के ओकर मनसा के कारन, ओह तोला ओमन ऊपर राजा बनाय हवय, ताकि तेंह नियाय अऊ धरमीपन ला बनाय रख।”
2CH 9:9 तब ओह राजा ला 120 टेलेन्ट सोन, अब्बड़ अकन मसाला, अऊ कीमती रत्न दीस। अइसन मसाला कभू नइं देखे गे रिहिस, जइसन सेबा के रानी ह राजा सुलेमान ला दीस।
2CH 9:10 (हीराम के सेवक अऊ सुलेमान के सेवकमन ओपीर ले सोन लानिन; ओमन चंदन के लकरी अऊ कीमती पथरा घलो लानिन।
2CH 9:11 राजा ह चंदन के लकरी ले यहोवा के मंदिर अऊ राजमहल बर सीढ़ी अऊ संगीतकारमन बर बीना अऊ सारंगी बनवाईस। ओकर असन कुछू भी कभू यहूदा म नइं देखे गे रिहिस।)
2CH 9:12 राजा सुलेमान ह सेबा के रानी ला ओ सब दीस, जेकर ईछा ओह करिस अऊ मांगिस; जतेक चीज सेबा के रानी ह सुलेमान ला देय रिहिस, सुलेमान ह ओकर ले जादा ओला दीस। तब रानी ह अपन सेवकमन के संग अपन देस लहुंट गीस।
2CH 9:13 सुलेमान ला हर साल 666 टेलेन्ट सोन मिलत रिहिस,
2CH 9:14 जेमा सौदागर अऊ बेपारीमन के दुवारा लाय गय लगान ह सामिल नइं रिहिस। संग म अरब देस के जम्मो राजा अऊ राजमन के राजपालमन घलो सोन अऊ चांदी सुलेमान मेर लानंय।
2CH 9:15 राजा सुलेमान ह गढ़े गय सोन ले दू सौ बड़े ढाल बनवाईस; हर एक ढाल म छै-छै सौ सेकेल गढ़े गय सोन लगिस।
2CH 9:16 ओह गढ़े गय सोन के तीन सौ छोटे ढाल घलो बनाईस, जेमा के हर एक ढाल म तीन-तीन सौ सेकेल सोन लगिस। राजा ह ओमन ला लबानोन के जंगल के महल म रख दीस।
2CH 9:17 तब राजा ह हाथी-दांत ले ढंके एक बड़े सिंघासन बनवाईस अऊ ओला सुध सोन ले मढ़वाईस।
2CH 9:18 सिंघासन के छै ठन पायदान रिहिस, अऊ सोन के एक ठन पांवदानी ओमा जुड़े रिहिस। आसन के दूनों कोति हांथ रखे के हत्था लगे रहय, अऊ दूनों हत्था के बाजू म एक-एक ठन सेर ठाढ़े स्थिति म बनाय गे रहंय।
2CH 9:19 बारह ठन सेर छै ठन पायदानमन म खड़े रिहिन, हर एक पायदान के दूनों छोर म एक-एक ठन। कोनो आने राज म अइसने सिंघासन कभू नइं बनाय गे रिहिस।
2CH 9:20 राजा सुलेमान के पीये के जम्मो पियालामन सोन के रिहिन, अऊ लबानोन के जंगल के महल म जम्मो बरतन सुध सोन के रिहिन। कुछू भी चीज चांदी के नइं बने रिहिस, काबरकि सुलेमान के समय म चांदी के जादा कीमत नइं रिहिस।
2CH 9:21 राजा सुलेमान मेर हीराम के सेवकमन के दुवारा चलाय जानेवाला एक ब्यवसायिक जहाजी-बेड़ा रिहिस। हर तीन बछर म ये जहाजी-बेड़ा ह एक बार सोन, चांदी अऊ हाथी-दांत ले बने सामान, अऊ बिगर पुंछीवाला बेंदरा अऊ आने किसम के बेंदरामन ला लेके लहुंटय।
2CH 9:22 राजा सुलेमान ह धन अऊ बुद्धि म धरती के आने जम्मो राजामन ले बढ़के रिहिस।
2CH 9:23 धरती के जम्मो राजामन सुलेमान के बुद्धि के ओ बात ला सुने के ताक म रहंय, जेला परमेसर ह ओकर मन म डाले रिहिस।
2CH 9:24 हर एक बछर, ओकर करा अवइयामन भेंट लेके आवंय—सोन अऊ चांदी के सामान, अऊ ओनहा, हथियार अऊ मसाला, अऊ घोड़ा अऊ खच्चरमन।
2CH 9:25 सुलेमान मेर घोड़ा अऊ रथमन बर चार हजार घुड़साल रिहिस, अऊ बारह हजार घोड़ामन रिहिन, जेमन ला ओह रथमन के सहर अऊ अपन संग यरूसलेम म भी रखे रिहिस।
2CH 9:26 ओह फरात नदी ले पलिस्तीमन के देस, याने कि मिसर देस के सीमना तक जम्मो राजामन ऊपर सासन करिस।
2CH 9:27 राजा ह यरूसलेम म चांदी ला पथरा के असन सधारन कर दीस, अऊ देवदार ला खाल्हे पहाड़ी के डूमर रूख असन बहुंत अकन कर दीस।
2CH 9:28 सुलेमान के घोड़ामन मिसर अऊ आने जम्मो देस ले मंगाय जावत रिहिन।
2CH 9:29 सुलेमान के राज के आने घटनामन सुरू ले आखिरी तक, नातान अगमजानी के किताब म, सीलोवासी अहियाह के अगमबानी म, अऊ नबात के बेटा यरोबाम के बारे म इद्दो अगम-दरसी के दरसन म लिखे गे हवय।
2CH 9:30 सुलेमान ह यरूसलेम म जम्मो इसरायल ऊपर चालीस साल तक राज करिस।
2CH 9:31 तब ओह अपन पुरखामन संग हमेसा बर सुत गीस अऊ ओला ओकर ददा दाऊद के सहर म माटी दिये गीस। अऊ ओकर बेटा रहूबियाम ह ओकर जगह म राजा बनिस।
2CH 10:1 रहूबियाम ह सकेम सहर गीस, काबरकि जम्मो इसरायलीमन ओला राजा बनाय बर उहां गे रिहिन।
2CH 10:2 जब नबात के बेटा यरोबाम ह येला सुनिस (ओह मिसर देस म रिहिस, जिहां ओह राजा सुलेमान के डर म भागके गे रिहिस), त ओह मिसर ले लहुंट आईस।
2CH 10:3 तब ओमन यरोबाम ला बलाय बर पठोईन, अऊ ओह अऊ जम्मो इसरायलीमन रहूबियाम मेर गीन अऊ ओकर ले कहिन:
2CH 10:4 “तोर ददा ह हमर ऊपर एक भारी बोझा डाले रिहिस, पर अब तें हमर ऊपर डाले ओकर कठोर काम अऊ भारी बोझा ला हल्का कर, अऊ हमन तोर सेवा करबो।”
2CH 10:5 रहूबियाम ह जबाब दीस, “तीन दिन के बाद मोर करा लहुंटके आवव।” तब मनखेमन चल दीन।
2CH 10:6 तब राजा रहूबियाम ह ओ अगुवामन ले सलाह लीस, जेमन ओकर ददा सुलेमान के जिनगी भर सेवा करे रिहिन। ओह ओमन ले पुछिस, “तुम्हर का सलाह ए? ये मनखेमन ला का जबाब देना चाही।”
2CH 10:7 ओमन जबाब दीन, “यदि तें ये मनखेमन ऊपर दया करबे अऊ ओमन ला खुस रखबे अऊ अपन जबाब म बने बात कहिबे, त ओमन हमेसा तोर सेवक बने रहिहीं।”
2CH 10:8 पर रहूबियाम ह अगुवामन के सलाह ला नइं मानिस, अऊ ओ जवानमन ले सलाह लीस, जेमन ओकर संग बड़े होय रिहिन अऊ ओकर सेवा करत रिहिन।
2CH 10:9 ओह ओमन ले पुछिस, “तुम्हर का सलाह ए? हमन ला ये मनखेमन ला कइसे जबाब देना चाही, जेमन मोर ले ये कहत हें, ‘जऊन बोझा तोर ददा ह हमर ऊपर डाले हवय, ओला हल्का कर’?”
2CH 10:10 ओकर संग बाढ़े जवान मनखेमन ओला जबाब दीन, “जऊन मनखेमन तोला कहे हवंय, ‘तोर ददा ह हमर ऊपर भारी बोझा डाले हवय, पर तें हमर बोझा ला हल्का कर।’ अब तें ओमन ला अइसने कह, ‘मोर छोटे अंगरी ह मोर ददा के कनिहां ले मोट हवय।
2CH 10:11 मोर ददा ह तुम्हर ऊपर जऊन भारी बोझा डाले हवय; ओला मेंह अऊ भारी करहूं। मोर ददा ह तो तुमन ला कोर्रा म पीटवाईस; पर मेंह तुमन ला बिच्छूमन ले कटवाहूं।’ ”
2CH 10:12 तीन दिन के बाद यरोबाम अऊ जम्मो मनखेमन रहूबियाम करा वापिस आईन, जइसे कि राजा ह कहे रिहिस, “तीन दिन म मोर मेर वापिस आवव।”
2CH 10:13 राजा ह ओमन ला कठोर जबाब दीस। अगुवामन के सलाह ला ठुकराके,
2CH 10:14 ओह जवानमन के सलाह ला मानिस अऊ कहिस, “मोर ददा ह तुम्हर बोझा ला भारी कर दीस; मेंह येला अऊ भारी करहूं। मोर ददा ह तो तुमन ला कोर्रा म पीटवाईस; पर मेंह तुमन ला बिच्छूमन ले कटवाहूं।”
2CH 10:15 ये किसम ले राजा ह मनखेमन के बात ला नइं सुनिस, काबरकि ये घटना ह परमेसर कोति ले ओ बचन ला पूरा करे बर होईस, जेला यहोवा ह सीलोवासी अहियाह अगमजानी के दुवारा नबात के बेटा यरोबाम ले कहे रिहिस।
2CH 10:16 जब जम्मो इसरायलीमन देखिन कि राजा ह ओमन के बात ला सुने ले इनकार कर दीस, तब ओमन राजा ला जबाब दीन: “दाऊद म हमर का बांटा हवय, यिसै के बेटा म का भाग हवय? हे इसरायलीमन, अपन-अपन तम्बू म चले जावव! हे दाऊद, अपन खुद के घर ला संभाल!” तब जम्मो इसरायलीमन अपन-अपन घर चल दीन।
2CH 10:17 पर ओ इसरायली, जेमन यहूदा के नगरमन म रहत रिहिन, रहूबियाम ह ओमन ऊपर राज करते रिहिस।
2CH 10:18 राजा रहूबियाम ह अदोनीराम ला भेजिस, जऊन ह बंधुवा मजदूरमन ऊपर मुखिया रिहिस, पर इसरायलीमन ओकर ऊपर पथरवाह करके ओला मार डारिन। पर राजा रहूबियाम ह कोनो किसम ले अपन रथ म चघिस अऊ बचके यरूसलेम भाग गीस।
2CH 10:19 ये किसम ले इसरायलीमन आज तक ले दाऊद के घराना के बिरूध बिदरोह करत हें।
2CH 11:1 जब रहूबियाम ह यरूसलेम हबरिस, त ओह यहूदा अऊ बिनयामीन के गोत्र ले एक लाख अस्सी हजार काबिल जवानमन ला संकेलिस कि ओमन इसरायल के बिरूध लड़े बर जावंय अऊ ओ राज ला रहूबियाम के अधीन फेर कर देवंय।
2CH 11:2 पर परमेसर के जन समायाह करा यहोवा के ये बचन आईस:
2CH 11:3 “यहूदा के राजा सुलेमान के बेटा रहूबियाम अऊ यहूदा अऊ बिनयामीन के जम्मो इसरायलीमन ले कह,
2CH 11:4 ‘यहोवा ह ये कहत हे: अपन संगी इसरायलीमन के बिरूध लड़ई करे बर झन जावव। तुमन जम्मो झन अपन-अपन घर जावव, काबरकि येला मेंह करत हंव।’ ” ओमन यहोवा के बचन के पालन करिन अऊ यरोबाम के बिरूध हमला करे बिगर वापिस लहुंट गीन।
2CH 11:5 रहूबियाम ह यरूसलेम म रहत रिहिस, अऊ यहूदा म सुरकछा बर सहर बनवाईस:
2CH 11:6 बैतलहम, एताम, तकोआ,
2CH 11:7 बेत-सूर, सोको, अदुल्लाम,
2CH 11:8 गत, मारेसा, जीप,
2CH 11:9 अदोरैम, लाकीस, अजेका,
2CH 11:10 सोरा, अय्यालोन अऊ हेबरोन। येमन यहूदा अऊ बिनयामीन के गढ़वाला सहर रिहिन।
2CH 11:11 ओह अपन सुरकछा ला मजबूत करिस अऊ ओमन म सेनापतिमन ला ठहिराईस, ओमन बर उहां जेवन, जैतून तेल अऊ अंगूर के मंद के परबंध घलो कर दीस।
2CH 11:12 ओह जम्मो सहरमन म ढाल अऊ बरछीमन ला रखवा दीस, अऊ ओमन ला बहुंत मजबूत बना दीस। ये किसम ले यहूदा अऊ बिनयामीन ओकर अधिकार म रिहिस।
2CH 11:13 इसरायल के जम्मो जिला के पुरोहित अऊ लेवीमन ओकर कोति हो गीन।
2CH 11:14 अऊ त अऊ लेवीमन अपन चरागन अऊ धन-दौलत ला तियाग दीन अऊ यहूदा अऊ यरूसलेम म आईन, काबरकि यरोबाम अऊ ओकर बेटामन ओमन ला यहोवा के पुरोहित के रूप म ठुकरा दे रिहिन
2CH 11:15 जब ओह ऊंच जगह बर अऊ अपन बनाय बोकरा अऊ बछवा के मूरतीमन बर अपन खुद के पुरोहितमन ला ठहिराईस।
2CH 11:16 इसरायल के जम्मो गोत्र के मनखेमन, जेमन अपन हिरदय ला यहोवा, इसरायल के परमेसर के खोज म लगाईन, ओमन यहोवा, अपन पुरखामन के परमेसर ला बलिदान चघाय बर यरूसलेम म लेवीमन करा आईन।
2CH 11:17 ओमन यहूदा के राज ला मजबूत करिन अऊ सुलेमान के बेटा रहूबियाम ला तीन साल ले समरथन करिन, अऊ ये समय के दौरान दाऊद अऊ सुलेमान के बताय रद्दा म चलिन।
2CH 11:18 रहूबियाम ह महलत ले बिहाव करिस, जऊन ह दाऊद के बेटा यरीमोत अऊ यिसै के बेटा एलीआब के बेटी अबीहैल के बेटी रिहिस।
2CH 11:19 महलत के बेटामन यूस, समरयाह अऊ जाहम रिहिन।
2CH 11:20 तब ओह अबसालोम के बेटी माका ले बिहाव करिस, जेकर ले अबियाह, अत्तै, जीजा, अऊ सलोमीत पईदा होईन।
2CH 11:21 रहूबियाम ह अपन आने जम्मो घरवालीमन अऊ रखैलमन ले जादा अबसालोम के बेटी माका ले मया करत रिहिस। सबो मिलाके ओकर अठारह घरवाली अऊ साठ रखैलमन रिहिन, अऊ अठाईस बेटा अऊ साठ बेटीमन रिहिन।
2CH 11:22 रहूबियाम ह माका के बेटा अबियाह ला राजा बनाय बर, ओकर भाईमन के बीच म ओला राजकुमार के रूप म ठहिराईस।
2CH 11:23 रहूबियाम ह समझदारी ले काम लीस, अपन कुछू बेटामन ला यहूदा अऊ बिनयामीन के जिलामन म अऊ गढ़वाला सहरमन म जिम्मेदारी दे दीस। ओह ओमन ला बहुंत अकन खाय-पीये के चीज दीस अऊ ओमन बर कतको घरवालीमन के परबंध करिस।
2CH 12:1 एकर बाद, जब राजा के रूप म रहूबियाम के पद ह स्थिर हो गीस अऊ ओह मजबूत हो गीस, त ओह अऊ ओकर संग जम्मो इसरायल ह यहोवा के कानून ला छोंड़ दीस।
2CH 12:2 काबरकि ओमन यहोवा ले बिसवासघात करे रिहिन, मिसर के राजा सीसक ह राजा रहूबियाम के राज के पांचवां साल म यरूसलेम ऊपर हमला करिस।
2CH 12:3 बारह सौ रथ अऊ साठ हजार घुड़सवार अऊ मिसर ले ओकर संग आय लिबियन, सुक्की अऊ कूसीमन के अनगिनत सेनामन के संग,
2CH 12:4 ओह यहूदा के गढ़वाला सहरमन म कब्जा कर लीस अऊ यरूसलेम तक पहुंच गीस।
2CH 12:5 तब अगमजानी समायाह ह रहूबियाम अऊ यहूदा के अगुवामन मेर आईस, जेमन सीसक ले डराके यरूसलेम म जूरे रिहिन, अऊ ओह ओमन ले कहिस, “यहोवा ह ये कहत हे, ‘तुमन मोला छोंड़ दे हवव; एकरसेति मेंह अब तुमन ला सीसक के हांथ म छोंड़ देवत हंव।’ ”
2CH 12:6 इसरायल के अगुवामन अऊ राजा ह अपनआप ला दीन करिन अऊ कहिन, “यहोवा धरमी अय।”
2CH 12:7 जब यहोवा ह देखिस कि ओमन अपनआप ला नम्र कर ले हवंय, त यहोवा के ये बचन ह समायाह मेर आईस: “ओमन अब अपनआप ला नम्र कर ले हवंय, त मेंह ओमन ला नास नइं करंव, अऊ जल्दी ही ओमन ला छुटकारा दूहूं। सीसक के जरिये मोर कोप यरूसलेम म नइं भड़कय।
2CH 12:8 तभो ले, ओमन ओकर अधीन रहिहीं, ताकि ओमन मोर सेवा करई अऊ आने देसमन के राजा के सेवा करई म फरक ला समझ सकंय।”
2CH 12:9 जब मिसर के राजा सीसक ह यरूसलेम म हमला करिस, तब ओह यहोवा के मंदिर के खजाना अऊ राजमहल के खजाना ला उठाके ले गीस। ओह सबो चीज ला ले गीस, जेमा सुलेमान के बनाय सोन के ढालमन घलो रिहिन।
2CH 12:10 एकरसेति राजा रहूबियाम ह ओमन के बदला म कांसा के ढालमन ला बनवाईस अऊ ये ढालमन ला पहरेदारमन के ओ सेनापतिमन ला सऊंप दीस, जेमन राजमहल के प्रवेस दुवार म पहरेदारी करत रिहिन।
2CH 12:11 जब भी राजा ह यहोवा के मंदिर म जावय, तब पहरेदारमन ढालमन ला धरके चलंय, अऊ ओकर बाद ओमन ओ ढालमन ला पहरेदारमन के कमरा म लहुंटा देवंय।
2CH 12:12 काबरकि रहूबियाम ह अपनआप ला नम्र बना लीस, एकरसेति यहोवा के कोरोध ओकर ले हट गीस, अऊ ओह पूरा नास नइं होईस। वास्तव म, यहूदा म कुछू अछई रिहिस।
2CH 12:13 राजा रहूबियाम ह अपनआप ला यरूसलेम सहर म मजबूती ले इस्थिर कर लीस अऊ राजा के रूप म ओह सासन करते रिहिस। ओह इकतालीस बछर के रिहिस, जब ओह राजा बनिस, अऊ ओह यरूसलेम म सतरह साल ले राज करिस, ओ सहर जेला यहोवा ह इसरायल के जम्मो गोत्र म ले अपन नांव रखे बर चुने रिहिस। ओकर दाई के नांव नामा रिहिस; ओह एक अमोनी माईलोगन रिहिस।
2CH 12:14 रहूबियाम ह बुरई के काम करिस, काबरकि ओह अपन हिरदय ला यहोवा के खोज म नइं लगाईस।
2CH 12:15 रहूबियाम के राज के घटनामन सुरू ले आखिरी तक, समायाह अगमजानी के किताब अऊ इद्दो अगम-दरसी के ओ किताबमन म लिखाय हवंय, जऊन ह बंसावली ले संबंध रखथे? रहूबियाम अऊ यरोबाम के बीच म लड़ई हमेसा होते रिहिस।
2CH 12:16 रहूबियाम ह अपन पुरखामन संग हमेसा बर सुत गीस अऊ ओला दाऊद के सहर म माटी देय गीस। अऊ ओकर बेटा अबियाह ओकर जगह म राजा बनिस।
2CH 13:1 यरोबाम के राज के अठारहवां साल म, अबियाह ह यहूदा के राजा बनिस,
2CH 13:2 अऊ ओह तीन साल तक यरूसलेम म राज करिस। ओकर दाई के नांव माका रिहिस, जऊन ह गिबा सहर के उरीएल के एक बेटी रिहिस। अबियाह अऊ यरोबाम के बीच म लड़ई होईस।
2CH 13:3 अबियाह ह चार लाख योग्य लड़नेवाला मनखेमन संग लड़ई म गीस, अऊ यरोबाम ह आठ लाख योग्य सैनिकमन संग ओकर बिरूध लड़ई करे बर पांति बांधिस।
2CH 13:4 अबियाह ह एपरैम के पहाड़ी देस म, समारैम पहाड़ म ठाढ़ होईस, अऊ कहिस, “यरोबाम अऊ जम्मो इसरायलीमन, मोर बात ला सुनव!
2CH 13:5 का तुमन नइं जानव कि यहोवा, इसरायल के परमेसर ह इसरायल के राज ला दाऊद अऊ ओकर संतानमन ला हमेसा बर नून के करार के दुवारा दे देय हवय?
2CH 13:6 तभो ले नबात के बेटा यरोबाम, जऊन ह दाऊद के बेटा सुलेमान के करमचारी रिहिस, अपन मालिक के बिरूध बिदरोह करिस।
2CH 13:7 कुछू निकम्मा दुस्ट मनखेमन ओकर संग जूर गीन अऊ सुलेमान के बेटा रहूबियाम के बिरोध करिन, जब ओह लड़का अऊ अलहड़ मन के रिहिस अऊ अतेक मजबूत नइं रिहिस कि ओमन के सामना कर सकय।
2CH 13:8 “अऊ अब तुमन यहोवा के राज के बिरोध करे के योजना बनात हव, जऊन ह कि दाऊद के संतानमन के हांथ म हवय। तुमन वास्तव म एक बड़े सेना अव अऊ तुम्हर संग सोन के बछवामन हवंय, जेमन ला यरोबाम ह तुम्हर देवता होय बर बनाय हवय।
2CH 13:9 पर का तुमन यहोवा के पुरोहित, हारून के बेटामन ला अऊ लेवीमन ला भगाके, अपन खुद के मनखेमन ला पुरोहित नइं बनाय हव, जइसे कि आने देस के मनखेमन करथें? जऊन ह भी अपन संग एक जवान बछवा अऊ सात ठन मेढ़ा लाके अपनआप ला पबितर करथे, ओह ओ चीजमन के पुरोहित बन जाथे, जेमन देवता नो हंय।
2CH 13:10 “जहां तक हमर बात ए, यहोवा ह हमर परमेसर ए, अऊ हमन ओला नइं तियागे हन। जऊन पुरोहितमन यहोवा के सेवा करथें, ओमन हारून के संतान अंय, अऊ लेवीमन ओमन के मदद करथें।
2CH 13:11 रोज बिहनियां अऊ संझा के बेरा ओमन यहोवा ला होम-बलिदान अऊ खुसबूदार धूप चघाथें। ओमन संस्कारिक रूप ले साफ मेज म रोटी ला रखथें अऊ रोज सांझकुन सोन के दीवट म दीयामन ला बारथें। हमन यहोवा अपन परमेसर के आदेस के पालन करत हन। पर तुमन ओला तियाग दे हवव।
2CH 13:12 परमेसर ह हमर संग हवय; ओह हमर अगुवा अय। ओकर पुरोहितमन अपन तुरही के संग तुम्हर बिरूध लड़ई के अवाज करहीं। हे इसरायल के मनखेमन, यहोवा, अपन पुरखामन के परमेसर के बिरूध लड़ई झन करव, काबरकि तुमन सफल नइं होहू।”
2CH 13:13 यरोबाम ह पाछू कोति सेनामन ला भेजे रिहिस, ताकि जब ओह यहूदा के आघू म रहय, त घात लगाके सेना ह ओमन के पाछू कोति ले हमला करय।
2CH 13:14 यहूदा ह मुड़के देखिस कि ओमन ऊपर आघू अऊ पाछू दूनों कोति ले हमला होवत हे। तब ओमन यहोवा ला पुकारिन। पुरोहितमन अपन तुरही ला फूंकिन
2CH 13:15 अऊ यहूदा के आदमीमन लड़ई बर ललकारिन, तब ओमन के लड़ई के ललकार ला सुनके, परमेसर ह यरोबाम अऊ जम्मो इसरायली ला अबियाह अऊ यहूदा के दुवारा हरवा दीस।
2CH 13:16 इसरायलीमन यहूदा के आघू ले भाग गीन, अऊ परमेसर ह ओमन ला यहूदा के हांथ म कर दीस।
2CH 13:17 अबियाह अऊ ओकर सेना ह ओमन के अब्बड़ नुकसान करिन, जेकर कारन इसरायल के योग्य आदमीमन ले पांच लाख बीर सैनिक मारे गीन।
2CH 13:18 इसरायलीमन ओ समय बस म कर लिये गीन, अऊ यहूदा के मनखेमन बिजयी हो गीन, काबरकि ओमन यहोवा अपन पुरखामन के परमेसर के ऊपर भरोसा करिन।
2CH 13:19 अबियाह ह यरोबाम के पीछा करिस अऊ बेतेल, यसाना, अऊ एपरोन सहर ला ओमन के आसपास के गांव के संग ले लीस।
2CH 13:20 अबियाह के राजकाल म यरोबाम के ताकत फेर नइं बढ़ पाईस। अऊ यहोवा ह ओला अइसे मारिस कि ओह मर गीस।
2CH 13:21 पर अबियाह ह ताकत म बढ़िस। ओह चौदह माईलोगन ले बिहाव करिस अऊ ओकर बीस झन बेटा अऊ सोलह बेटीमन रिहिन।
2CH 13:22 अबियाह के राज के आने घटनामन, जऊन कुछू ओह करिस अऊ कहिस, ओ जम्मो बात अगमजानी इद्दो के कथा म लिखे हवय।
2CH 14:1 अऊ अबियाह ह अपन पुरखामन संग हमेसा बर सुत गीस अऊ ओला दाऊद के सहर म माटी देय गीस। ओकर बेटा आसा ह ओकर जगह म राजा बनिस, अऊ ओकर राजकाल म देस ह दस साल तक सांति म रिहिस।
2CH 14:2 आसा ह ओही काम करिस, जऊन ह यहोवा अपन परमेसर के नजर म बढ़िया अऊ सही रिहिस।
2CH 14:3 ओह परदेसी बेदीमन ला अऊ ऊंच जगहमन ला हटा दीस, पूजा के पथरामन ला कुटा-कुटा कर दीस अऊ असेरा के खंभामन ला काटके गिरा दीस।
2CH 14:4 ओह यहूदा ला हुकूम दीस कि अपन पुरखा के यहोवा, परमेसर ला खोजव अऊ ओकर कानून अऊ हुकूम के पालन करव।
2CH 14:5 ओह यहूदा के जम्मो सहर म ऊंच जगहमन ला अऊ धूप के बेदीमन ला हटा दीस, अऊ ओकर अधीन राज म सांति रिहिस।
2CH 14:6 ओह यहूदा म गढ़वाला सहरमन ला बनाईस, काबरकि ओ देस म सांति रिहिस। ओ समय म कोनो भी ओकर संग लड़ई नइं करिन, काबरकि यहोवा ह ओला अराम दीस।
2CH 14:7 आसा ह यहूदा ले कहिस, “आवव, हमन ये सहरमन ला बनावन, अऊ ओमन के चारों कोति मीनार, दुवार अऊ बल्लीमन के संग दीवार घलो लगा देवन। देस ह अभी भी हमर अय, काबरकि हमन यहोवा अपन परमेसर ला खोजे हवन; हमन ओला खोजेंन अऊ ओह हमन ला सबो कोति ले अराम दे हवय।” एकरसेति ओमन सहरमन ला बनाईन अऊ उन्नति करिन।
2CH 14:8 आसा मेर यहूदा के तीन लाख आदमीमन के सेना रिहिस, जऊन मन बड़े-बड़े ढाल अऊ संग म बरछी घलो धरे रिहिन, अऊ बिनयामीन म ले दू लाख अस्सी हजार आदमी रिहिन, जेमन छोटे ढाल अऊ तीर-कमान धरे रिहिन। ये जम्मो झन बहादुर योद्धा रिहिन।
2CH 14:9 ओमन के बिरूध जेरह कूसी ह हजारों-हजार सेना अऊ तीन सौ रथमन ला लेके आईस, अऊ ओह मारेसा नगर तक आ गीस।
2CH 14:10 आसा ह ओकर ले मिले बर निकलिस, अऊ ओमन मारेसा करा सापता के घाटी म लड़ई बर तियार होईन।
2CH 14:11 तब आसा ह यहोवा परमेसर ला दुहाई दीस अऊ कहिस, “हे यहोवा, बलसाली के बिरूध बलहीन के मदद करे बर तोर असन कोनो नइं ए। हमर मदद कर, हे यहोवा हमर परमेसर, काबरकि हमन तोर ऊपर भरोसा करथन, अऊ तोर नांव म हमन ये अब्बड़ अकन सेना के बिरूध आय हवन। हे यहोवा, तेंह हमर परमेसर अस; नासमान मनखेमन ला तोर बिरूध झन आवन देय।”
2CH 14:12 यहोवा ह आसा अऊ यहूदा के आघू म कूसीमन ला मारिस। कूसीमन भागिन,
2CH 14:13 अऊ आसा अऊ ओकर सेना गरार नगर तक ओमन के पीछा करिन। कूसी सेना के अतेक संखिया म मनखेमन मारे गीन कि ओमन फेर उबर नइं सकिन; ओमन यहोवा अऊ ओकर सेना के आघू म कुचर दिये गीन। यहूदा के आदमीमन अब्बड़ अकन सामान लूटके ले लीन।
2CH 14:14 ओमन गरार के आसपास के जम्मो गांवमन ला नास कर दीन, काबरकि यहोवा के डर ओमन ऊपर छा गे रिहिस। ओमन ये जम्मो गांव ला लूट लीन, काबरकि उहां अब्बड़ लूट के सामान रिहिस।
2CH 14:15 ओमन चरवाहामन के डेरामन म घलो हमला करिन अऊ भेड़-बकरी अऊ ऊंट के झुंडमन ला ले गीन। तब ओमन यरूसलेम लहुंट गीन।
2CH 15:1 परमेसर के आतमा ह ओदेद के बेटा अजरयाह म आईस।
2CH 15:2 अजरयाह ह राजा आसा ले मिले बर गीस अऊ ओला कहिस, “हे आसा अऊ जम्मो यहूदा अऊ बिनयामीन के मनखेमन, मोर बात ला सुनव। यहोवा ह तुम्हर संग हवय, जब तुमन ओकर संग हवव। यदि तुमन ओला खोजथव, त ओह तुमन ला मिलही, पर यदि तुमन ओला तियाग देथव, त ओह घलो तुमन ला तियाग दीही।
2CH 15:3 एक लम्बा समय तक, इसरायल ह बिगर सच्चा परमेसर के, बिगर सिखानेवाला पुरोहित के, अऊ बिगर कानून के रिहिस।
2CH 15:4 पर जब ओमन अपन बिपत्ति म यहोवा, इसरायल के परमेसर करा लहुंटिन, अऊ ओला खोजिन, त ओह ओमन ला मिलिस।
2CH 15:5 ओ दिन म, यातरा करई ह सुरकछित नइं रिहिस, काबरकि देस के जम्मो निवासीमन के बीच बहुंत उपदरव होवत रिहिस।
2CH 15:6 एक जाति के मनखे आने जाति के मनखेमन ला अऊ एक सहर ह आने सहर दुवारा कुचरे जावत रिहिन, काबरकि परमेसर ह ओमन ऊपर हर किसम के बिपत्ति लानके ओमन ला दुख देवत रिहिस।
2CH 15:7 पर जहां तक तुम्हर बात ए, तुमन मजबूत बनव अऊ हार झन मानव, काबरकि तुमन के काम के ईनाम तुमन ला मिलही।”
2CH 15:8 जब आसा ह ये बातमन ला अऊ ओदेद के बेटा अगमजानी अजरयाह के अगमबानी ला सुनिस, त ओह हिम्मत करिस। ओह यहूदा अऊ बिनयामीन के सबो जगह ले घिनौना मूरतीमन ला हटा दीस अऊ ओ नगरमन ले घलो हटा दीस, जेमन ला ओह एपरैम के पहाड़ी इलाका म कब्जा करे रिहिस। ओह यहोवा के बेदी के मरम्मत करिस, जऊन ह यहोवा के मंदिर के मंडप के आघू म रिहिस।
2CH 15:9 तब ओह जम्मो यहूदा अऊ बिनयामीन ला अऊ एपरैम, मनस्से अऊ सिमोन के मनखेमन ला संकेलिस, जऊन मन ओमन के बीच बस गे रिहिन, काबरकि इसरायल ले ओमन के एक बड़े संखिया म मनखेमन ओकर करा आ गे रिहिन, जब ओमन देखिन कि यहोवा ओकर परमेसर ह ओकर संग रहिथे।
2CH 15:10 ओमन आसा के राज के पंदरहवां साल के तीसरा महिना म यरूसलेम म जूरिन।
2CH 15:11 ओही बेरा म ओमन यहोवा ला सात सौ पसु अऊ सात हजार भेड़ अऊ बकरी, जेला ओमन लूटके लाय रिहिन, बलिदान चघाईन।
2CH 15:12 ओमन अपन पूरा हिरदय अऊ आतमा ले यहोवा, अपन पुरखामन के परमेसर के खोज म लगे रहे के एक करार करिन।
2CH 15:13 ओ जम्मो मनखे, जेमन यहोवा, इसरायल के परमेसर के खोज नइं करहीं, ओमन मार डारे जाहीं, चाहे ओह कोनो भी छोटे या बड़े, आदमी या माईलोगन होवय।
2CH 15:14 ओमन ऊंचहा अवाज म चिचियावत तुरही अऊ नरसिंगामन के अवाज के संग यहोवा ले एक सपथ खाईन।
2CH 15:15 जम्मो यहूदा ह ये सपथ ला लेके आनंदित होईस, काबरकि ओमन पूरा हिरदय ले सपथ लेय रिहिन। ओमन उत्सुक होके परमेसर ला खोजिन, अऊ ओह ओमन ला मिलिस। तब यहोवा ह ओमन ला सबो तरफ ले अराम दीस।
2CH 15:16 राजा आसा ह अपन दादी माका ला घलो राज-माता के पद ले हटा दीस, काबरकि माका ह असेरा के अराधना करे बर एक घिनौना मूरती बनाय रिहिस। आसा ह ओला काटके कुटा-कुटा कर दीस अऊ ओला किदरोन घाटी म जला दीस।
2CH 15:17 हालाकि ओह इसरायल ले ऊंचहा जगहमन ला नइं हटाईस, तभो ले आसा के मन ह पूरा जिनगी भर यहोवा ला समरपित रिहिस।
2CH 15:18 जऊन सोन, चांदी अऊ सामानमन ला, ओ अऊ ओकर ददा अरपन करे रिहिन, ओ जम्मो ला ओह परमेसर के मंदिर म ले आईस।
2CH 15:19 आसा के राजकाल के पैंतीसवां साल तक कोनो लड़ई नइं होईस।
2CH 16:1 आसा के राज के छत्तीसवां साल म, इसरायल के राजा बासा ह यहूदा के बिरूध गीस अऊ रामा नगर के किलाबंदी करिस ताकि यहूदा के राजा आसा के इलाका ले न तो कोनो निकल सकंय अऊ न ही कोनो ओकर राज म जा सकंय।
2CH 16:2 तब आसा ह सोन अऊ चांदी ला यहोवा के मंदिर अऊ अपन महल के खजानामन ले लीस अऊ अराम के राजा बेन-हदद करा पठो दीस, जऊन ह दमिस्क सहर म सासन करत रिहिस।
2CH 16:3 अऊ ओह कहिस, “जइसने मोर ददा अऊ तोर ददा के बीच म करार होय रिहिस, वइसनेच मोर अऊ तोर बीच म घलो करार होवय। देख, मेंह तोर मेर सोन अऊ चांदी पठोवत हंव। एकरसेति तें इसरायल के राजा बासा के संग अपन करार ला टोर दे, ताकि ओह मोर करा ले पाछू हट जाय।”
2CH 16:4 बेन-हदद ह राजा आसा के बात ला मान लीस अऊ अपन सेना के सेनापतिमन ला इसरायल के नगरमन के बिरूध भेजिस। ओमन इयोन, दान, आबेल-मैम अऊ नपताली के जम्मो भंडारवाले सहरमन ला जीत लीन।
2CH 16:5 जब बासा ह ये बात ला सुनिस, त ओह रामा सहर ला बनाय के काम ला रोक दीस अऊ ओह अपन ओ काम ला ही छोंड़ दीस।
2CH 16:6 तब राजा आसा ह यहूदा के जम्मो मनखेमन ला संग म लीस अऊ ओमन रामा ले ओ पथरा अऊ इमारती लकड़ीमन ला ले गीन, जेमन के उपयोग बासा ह करत रिहिस। येमन ले ओह गेबा अऊ मिसपा सहरमन ला बनाईस।
2CH 16:7 ओही बेरा अगम-दरसी हनानी ह यहूदा के राजा आसा करा आके ओला कहिस: “काबरकि तेंह अराम के राजा ऊपर भरोसा करय अऊ यहोवा अपन परमेसर के ऊपर नइं, एकरसेति अराम के राजा के सेना ह तोर हांथ ले बचके निकल गीस।
2CH 16:8 का कूसी अऊ लिबियनमन के सेना एक बड़े सेना नइं रिहिस? अऊ का ओमन करा बहुंत अकन रथ अऊ घुड़सवारमन नइं रिहिन? तभो ले जब तेंह यहोवा ऊपर भरोसा करय, त ओह ओमन ला तोर हांथ म कर दीस।
2CH 16:9 काबरकि यहोवा के आंखी ह पूरा धरती म रहिथे अऊ ओमन ला मजबूत करथे, जेमन के हिरदय ओकर बर पूरा समरपित रहिथे। तेंह एक मुरूखता के काम करे हस, एकरसेति अब ले तें लड़ई म फंसे रहिबे।”
2CH 16:10 आसा ह एकर कारन अगम-दरसी ऊपर गुस्सा होईस; ओह अतेक गुस्सा होईस कि ओह ओला जेल म डलवा दीस। ओही बेरा म आसा ह कुछू मनखेमन ऊपर निरदयी होके अतियाचार करे लगिस।
2CH 16:11 आसा के सासन के घटनामन सुरू ले आखिरी तक, यहूदा अऊ इसरायल के राजामन के किताब म लिखाय हवय।
2CH 16:12 अपन राज के उन्चालीसवां साल म, आसा ह अपन गोड़ के एक बेमारी ले रोगी हो गीस। ओकर बेमारी ह गंभीर रिहिस, तभो ले ओह अपन बेमारी म घलो यहोवा ले मदद के मांग नइं करिस, पर ओह सिरिप बईदमन के मदद लीस।
2CH 16:13 तब अपन राज के इकतालीसवां साल म, आसा ह मर गीस अऊ अपन पुरखामन संग हमेसा बर सुत गीस।
2CH 16:14 ओमन ओला ओ कबर म माटी दीन, जेला ओह दाऊद के सहर म अपन बर काटके बनाय रिहिस। ओमन ओला मसाला अऊ नाना किसम के इतर मिलाय पेटी म रखिन, अऊ ओमन ओकर आदर म एक बहुंत बड़े कुढ़ा बनाके ओमा आगी लगाईन।
2CH 17:1 आसा के जगह म ओकर बेटा यहोसापात ह राजा बनिस अऊ इसरायल के बिरूध अपनआप ला मजबूत करिस।
2CH 17:2 ओह यहूदा के जम्मो गढ़वाला सहर म सेना के दलमन ला तैनात करिस अऊ यहूदा अऊ एपरैम के ओ सहरमन म सेना के छावनी डार दीस, जेमन ला ओकर ददा आसा ह कब्जा करे रिहिस।
2CH 17:3 यहोवा ह यहोसापात के संग रिहिस काबरकि ओह अपन पहिले याने कि अपन पुरखा दाऊद के रसता म चलिस। ओह बाल देवता ले कोनो सलाह नइं लीस
2CH 17:4 पर अपन ददा के परमेसर के खोज करिस अऊ इसरायल के रीति-रिवाज म चले के बजाय परमेसर के हुकूममन के पालन करिस।
2CH 17:5 यहोवा ह ओकर अधीन म राज ला स्थापित करिस; अऊ यहूदा के जम्मो झन यहोसापात करा भेंट लानिन, जेकर ले ओकर करा अब्बड़ धन-दौलत हो गीस अऊ ओकर आदरमान होईस।
2CH 17:6 ओकर हिरदय ह यहोवा के रसता बर समरपित रिहिस; एकर अलावा, ओह यहूदा के ऊंच स्थानमन ला अऊ असेरा के खंभामन ला हटा दीस।
2CH 17:7 अपन राज के तीसर साल म, ओह अपन करमचारी बेन-हैल, ओबदयाह, जकरयाह, नतनेल अऊ मीकायाह ला यहूदा के सहरमन म पढ़ाय बर भेजिस।
2CH 17:8 ओमन के संग कुछू लेवीमन—समायाह, नतनयाह, जबदयाह, असाहेल, समीरामोत, यहोनातान, अदोनियाह, तोबियाह अऊ तोब-अदोनियाह अऊ पुरोहितमन ले एलीसामा अऊ यहोराम रिहिन।
2CH 17:9 अपन संग म यहोवा के कानून के किताब लेके ओमन पूरा यहूदा म सिकछा दीन; ओमन यहूदा के जम्मो सहरमन म गीन अऊ मनखेमन ला सिखाईन।
2CH 17:10 यहोवा के डर ह यहूदा के आसपास के देस के जम्मो राज म फईल गीस, जेकर कारन ओमन यहोसापात के बिरूध लड़ई म नइं गीन।
2CH 17:11 कुछू पलिस्तीमन यहोसापात करा भेंट अऊ चांदी के रूप म राजकर लानिन, अऊ अरब के मनखेमन सात हजार सात सौ मेढ़ा अऊ सात हजार सात सौ बोकरामन के झुंड लानिन।
2CH 17:12 यहोसापात ह अऊ जादा ताकतवर होवत गीस; ओह गढ़मन ला अऊ यहूदा म भंडार सहरमन ला बनाईस
2CH 17:13 अऊ यहूदा के सहरमन म जरूरी चीजमन के अब्बड़ भंडारन करके रखिस। ओह यरूसलेम म अनुभवी लड़ई करइया आदमीमन ला रखिस।
2CH 17:14 परिवार के हिसाब से ओमन के गनती अइसन रिहिस: यहूदा के गोत्र ले, 1,000 के दल के सेनापतिमन: सेनापति अदना संग 3,00,000 लड़ई करइया आदमीमन;
2CH 17:15 ओकर बाद, सेनापति यहोहानान संग 2,80,000;
2CH 17:16 ओकर बाद, जिकरी के बेटा अमसयाह, जऊन ह स्वेच्छा से अपनआप ला यहोवा के सेवा बर देय दे रिहिस; ओकर संग 2,00,000 आदमी रिहिन।
2CH 17:17 बिनयामीन के गोत्र ले: एलयादा, जऊन ह एक बीर सैनिक रिहिस, ओकर संग 2,00,000 हथियारबंद आदमी तीर-कमान अऊ ढालमन ला धरके रिहिन;
2CH 17:18 ओकर बाद, यहोजाबाद के संग 1,80,000 हथियारबंद आदमी लड़ई बर रिहिन।
2CH 17:19 येमन ओ आदमीमन रिहिन, जेमन राजा के सेवा करत रिहिन, येमन ओमन के अलावा रिहिन, जेमन ला राजा ह पूरा यहूदा के गढ़वाला सहरमन म तैनात करे रिहिस।
2CH 18:1 यहोसापात करा अब्बड़ धन-दौलत अऊ मान-सम्मान हो गीस, अऊ ओह बिहाव करके अपन रिस्ता अहाब संग बना लीस।
2CH 18:2 कुछू बछर के बाद, ओह सामरिया सहर म अहाब ला देखे बर गीस। अहाब ह ओकर अऊ ओकर संग के मनखेमन बर अब्बड़ अकन भेड़ अऊ पसु मारिस अऊ ओकर ले रामोत-गिलाद म हमला करे बर बिनती करिस।
2CH 18:3 इसरायल के राजा अहाब ह यहूदा के राजा यहोसापात ले पुछिस, “का तेंह मोर संग रामोत-गिलाद के बिरूध जाबे?” यहोसापात ह जबाब दीस, “मेंह घलो तोर असन अंव, अऊ मोर मनखेमन तोर मनखेमन असन अंय; हमन लड़ई म तोर संग देबो।”
2CH 18:4 पर यहोसापात ह इसरायल के राजा ला ये घलो कहिस, “पहिले यहोवा के ईछा ला मालूम कर ले।”
2CH 18:5 तब इसरायल के राजा ह अगमजानीमन ला इकट्ठा करिस—ओमन चार सौ आदमी रिहिन—अऊ राजा ह ओमन ले पुछिस, “का हमन रामोत-गिलाद के बिरूध लड़ई करे बर जावन या नइं?” ओमन जबाब दीन, “जावव, काबरकि परमेसर ह ओला राजा के हांथ म कर दीही।”
2CH 18:6 पर यहोसापात ह पुछिस, “का इहां यहोवा के कोनो अगमजानी नइं अंय, जेकर ले हमन पुछताछ कर सकन?”
2CH 18:7 इसरायल के राजा ह यहोसापात ला जबाब दीस, “इहां अभी भी एक अगमजानी हवय, जेकर जरिये हमन यहोवा ले पुछताछ कर सकत हन, पर मेंह ओकर ले घिन करथंव, काबरकि ओह कभू भी मोर बारे म कोनो बने बात के अगमबानी नइं करय, पर हमेसा खराप बात ही कहिथे। ओह यिमला के बेटा मीकायाह ए।” यहोसापात ह कहिस, “राजा ला अइसन बात नइं कहना चाही।”
2CH 18:8 तब इसरायल के राजा ह अपन एक करमचारी ला बलाके कहिस, “यिमला के बेटा मीकायाह ला अभीचे लेके आवव।”
2CH 18:9 इसरायल के राजा अऊ यहूदा के राजा यहोसापात अपन राजसी कपड़ा पहिरे, सामरिया के प्रवेस दुवार के बगल म एक कोठार म अपन सिंघासन म बईठे रहंय, अऊ जम्मो अगमजानीमन ओमन के आघू म अगमबानी करत रहंय।
2CH 18:10 कनाना के बेटा सिदकियाह ह लोहा के सींग बनाय रिहिस अऊ ओह घोसना करिस, “यहोवा ह ये कहत हे: ‘ये सींगमन ले तुमन अरामीमन ला अइसन मारहू कि ओमन नास हो जाहीं।’ ”
2CH 18:11 आने जम्मो अगमजानीमन घलो येहीच अगमबानी करत रिहिन। ओमन कहिन, “रामोत-गिलाद ऊपर हमला करव अऊ जीत जावव, काबरकि यहोवा ह ओला राजा के हांथ म कर दीही।”
2CH 18:12 जऊन संदेसिया ह मीकायाह ला बलाय बर गे रिहिस, ओह ओकर ले कहिस, “देख, आने अगमजानीमन बिगर कोनो आपत्ति के राजा बर सफलता के अगमबानी करत हवंय। तोर बात ह घलो ओमन के बात ले मेल खावय, अऊ तें राजा के हित म गोठियाबे।”
2CH 18:13 पर मीकायाह ह कहिस, “यहोवा के जिनगी के सपथ, मेंह ओला सिरिप ओही बात बताहूं, जेला मोर परमेसर ह कहिही।”
2CH 18:14 जब मीकायाह ह उहां हबरिस, त राजा ह ओकर ले पुछिस, “हे मीकायाह, का हमन रामोत-गिलाद के बिरूध लड़ई करे बर जावन या नइं?” ओह जबाब दीस, “हमला करव अऊ जीत जावव, काबरकि ओमन तोर हांथ म दे दिये जाहीं।”
2CH 18:15 राजा ह ओला कहिस, “मेंह तोला कतेक बार कसम खवावंव कि यहोवा के नांव म मोला सिरिप सच्चई के छोंड़ अऊ कुछू बात झन बता?”
2CH 18:16 तब मीकायाह ह जबाब दीस, “मेंह जम्मो इसरायल ला पहाड़ीमन म बिगर चरवाहा के बगरे भेड़मन सहीं देखेंव, अऊ यहोवा ह कहिस, ‘ये मनखेमन के कोनो मालिक नइं एं। हर एक जन सांति से अपन घर जावय।’ ”
2CH 18:17 इसरायल के राजा ह यहोसापात ला कहिस, “का मेंह तोला नइं कहे रहेंव कि ओह मोर बारे म कभू बने अगमबानी नइं करय, पर सिरिप खराप बात कहिथे?”
2CH 18:18 मीकायाह ह आगे कहिस, “एकरसेति यहोवा के बचन ला सुनव: मेंह यहोवा ला अपन सिंघासन म बईठे अऊ ओकर संग स्वरग के जम्मो भीड़ ला ओकर जेवनी अऊ डेरी कोति खड़े देखेंव।
2CH 18:19 अऊ यहोवा ह कहिस, ‘कोन ह इसरायल के राजा अहाब ला रामोत-गिलाद ऊपर हमला करे बर अऊ उहां जाके मरे बर बहकाही?’ “कोनो ह कुछू सलाह दीस, त कोनो ह कुछू अऊ।
2CH 18:20 आखिर म, एक आतमा आघू म आके यहोवा के आघू म ठाढ़ होईस अऊ कहिस, ‘मेंह ओला बहकाहूं।’ “यहोवा ह पुछिस, ‘कोन तरीका ले?’
2CH 18:21 “ओ आतमा ह कहिस, ‘मेंह जाहूं अऊ ओकर जम्मो अगमजानीमन के मुहूं म एक धोखा देवइया आतमा बनहूं।’ “यहोवा ह कहिस, ‘तेंह ओला बहकाय म सफल होबे। जा अऊ येला कर।’
2CH 18:22 “एकरसेति अब यहोवा ह तोर ये अगमजानीमन के मुहूं म एक धोखा देवइया आतमा डाल दे हवय। यहोवा ह तोर बिनास के हुकूम दे हवय।”
2CH 18:23 तब कनाना के बेटा सिदकियाह ह ऊपर मीकायाह करा गीस अऊ ओकर गाल म थपरा मारके पुछिस, “कते रसता ले आतमा ह यहोवा करा ले गीस, जब ओह तोर ले गोठियाय बर मोर करा ले निकलके गीस?”
2CH 18:24 मीकायाह ह जबाब दीस, “तोला ओ दिन ये बात के पता चलही, जब तेंह लुकाय बर एक भीतरी कमरा म जाबे।”
2CH 18:25 तब इसरायल के राजा ह हुकूम दीस, “मीकायाह ला ले जावव अऊ ओला सहर के हाकिम आमोन अऊ राजा के बेटा योआस करा वापिस भेज दव,
2CH 18:26 अऊ कहव, ‘राजा ह ये कहत हे: ये मनखे ला जेल म डाल दव अऊ जब तक मेंह सही-सलामत वापिस नइं लहुंटंव, तब तक येला रोटी अऊ पानी के छोंड़ अऊ कुछू झन दव।’ ”
2CH 18:27 मीकायाह ह घोसना करिस, “यदि तेंह सही-सलामत लहुंटके आ जाबे, त फेर यहोवा ह मोर जरिये बात नइं करे हवय।” तब ओह ये घलो कहिस, “तुमन जम्मो मनखेमन, मोर बात ला धियान म रखव!”
2CH 18:28 इसरायल के राजा अऊ यहूदा के राजा यहोसापात, ऊपर रामोत-गिलाद गीन।
2CH 18:29 इसरायल के राजा ह यहोसापात ला कहिस, “मेंह भेस बदलके लड़ई म जाहूं, पर तें अपन राजसी पहिरावा पहिरबे।” तब इसरायल के राजा ह अपन भेस ला बदल लीस अऊ लड़ई म गीस।
2CH 18:30 अराम के राजा ह अपन रथ के सेनापतिमन ला हुकूम देय रिहिस, “इसरायल के राजा के छोंड़, अऊ कोनो छोटे या बड़े मनखे ले लड़ई झन करहू।”
2CH 18:31 जब रथ के सेनापतिमन यहोसापात ला देखिन, त ओमन सोचिन, “येह इसरायल के राजा अय।” एकरसेति ओमन ओकर ऊपर हमला करे बर मुड़िन, पर यहोसापात ह चिचियाईस, अऊ यहोवा ह ओकर मदद करिस। परमेसर ह ओमन ला ओकर से दूरिहा कर दीस,
2CH 18:32 काबरकि जब रथ के सेनापतिमन देखिन कि ओह इसरायल के राजा नो हय, तब ओमन ओकर पीछा करई छोंड़ दीन।
2CH 18:33 पर कोनो मनखे ह बिगर सोचे-बिचारे अपन तीर ला चला दीस अऊ ओ तीर ह इसरायल के राजा के छाती के कवच अऊ कमरबंध के बीच म लगिस। तब राजा ह रथ के सारथी ला कहिस, “मेंह घायल हो गे हवंव। रथ ला एती-ओती घुमाके मोला लड़ई ले बाहिर निकाल।”
2CH 18:34 पूरा दिन भयंकर लड़ई होते रिहिस, अऊ इसरायल के राजा ह अपन रथ के सहारा म संझा तक अरामीमन कोति मुहूं करके ठाढ़े रिहिस। तब बेर बुड़े के बेरा ओह मर गीस।
2CH 19:1 जब यहूदा के राजा यहोसापात ह यरूसलेम म अपन महल म सुरकछित लहुंट आईस,
2CH 19:2 हनानी के बेटा, येहू अगम-दरसी ह ओकर ले मिले बर बाहिर गीस अऊ राजा ले कहिस, “का तोला ओ दुस्टमन के मदद अऊ ओमन ले मया करना चाही, जेमन यहोवा ले घिन करथें? एकर कारन यहोवा के कोप ह तोर ऊपर हवय।
2CH 19:3 हालाकि, तोर म कुछू बने बात भी हवय, काबरकि तेंह असेरा के खंभामन ला देस ले हटा दे हस अऊ अपन हिरदय ला परमेसर के खोज म लगाय हस।”
2CH 19:4 यहोसापात ह यरूसलेम म रहत रिहिस, अऊ ओह फेर बेरसेबा सहर ले लेके एपरैम के पहाड़ी देस के मनखेमन के बीच म गीस अऊ ओह ओमन ला फेर से वापिस यहोवा, ओमन के पुरखा के परमेसर कोति ले आईस।
2CH 19:5 ओह देस म, यहूदा के हर एक गढ़वाला सहर म नियायधीसमन ला ठहिराईस।
2CH 19:6 यहोसापात ह ओमन ला कहिस, “धियान देवव कि तुमन का करथव, काबरकि तुमन मरनहार मनखेमन बर नियाय नइं करत हव, पर यहोवा बर नियाय करत हव, जऊन ह तुम्हर संग हवय, जब भी तुमन कोनो फैसला करथव।
2CH 19:7 अब यहोवा के भय तुमन ऊपर रहय। धियान से नियाय करव, काबरकि यहोवा हमर परमेसर के संग कोनो अनियाय अऊ पखियपात या घूसखोरी के लेना-देना नइं ए।”
2CH 19:8 यरूसलेम म घलो, यहोसापात ह कुछू लेवी, पुरोहितमन अऊ इसरायली परिवारमन के मुखियामन ला यहोवा के कानून के पालन करे बर अऊ बाद-बिबाद के निपटारा करे बर ठहिराईस। अऊ ओमन यरूसलेम म रहत रिहिन।
2CH 19:9 ओह ओमन ला ये हुकूम दीस: “तुमन यहोवा के भय म रहिके पूरा बिसवासयोग्यता अऊ दिल से सेवा करव।
2CH 19:10 हर ओ मामला ला, जेला तुम्हर सहर के रहइया मनखेमन तुम्हर आघू म लाथें—चाहे ओह हतिया के हो या ब्यवस्था, हुकूम, बिधि या नियममन के कोनो आने मामला हो—तुमन ओमन ला चेता देवव कि ओमन यहोवा के बिरूध पाप झन करंय; नइं तो ओकर कोरोध तुम्हर अऊ तुम्हर मनखेमन ऊपर आही। अइसने करव, अऊ तुमन पाप नइं करहू।
2CH 19:11 “यहोवा ले संबंधित कोनो भी बिसय म मुखिया पुरोहित अमरयाह ह तुम्हर ऊपर होही, अऊ राजा ले संबंधित कोनो बिसय म यहूदा के गोत्र के अगुवा, इसमायल के बेटा जबदयाह ह तुम्हर ऊपर होही, अऊ लेवीमन तुम्हर आघू म करमचारीमन के रूप म सेवा करहीं। हिम्मत के संग काम करव, अऊ यहोवा ह ओमन के संग रहय, जेमन बने बुता करथें।”
2CH 20:1 एकर बाद, मोआबी अऊ अमोनीमन कुछू मूनीमन संग राजा यहोसापात के बिरूध लड़ई करे बर आईन।
2CH 20:2 कुछू मनखेमन यहोसापात करा आके बताईन, “एदोम ले, मिरतू सागर के ओ पार ले तोर बिरूध एक बड़े सेना आवत हे। येमन पहिली ले हससोन-तामार म हवंय” (मतलब कि एन-गदी म हवंय)।
2CH 20:3 यहोसापात ह सचेत होके एकर बारे म यहोवा के ईछा जाने बर ठान लीस, अऊ जम्मो यहूदा म उपास रखे के घोसना करिस।
2CH 20:4 यहूदा के मनखेमन यहोवा ले मदद के आसा करत एक संग जूरिन; वास्तव म, ओमन यहूदा के हर एक सहर ले ओकर ईछा जाने बर आईन।
2CH 20:5 तब यहोसापात ह यहूदा अऊ यरूसलेम के सभा म यहोवा के मंदिर मेर नवां अंगना के आघू म ठाढ़ होईस।
2CH 20:6 अऊ पराथना करिस: “हे यहोवा, हमर पुरखामन के परमेसर, का तें स्वरग म रहइया परमेसर नो हस? तेंह देस-देस के जम्मो राज ऊपर सासन करथस। सामर्थ अऊ ताकत तोर हांथ म हवय, अऊ कोनो भी तोर सामना नइं कर सकंय।
2CH 20:7 हे हमर परमेसर, का तेंह अपन मनखे इसरायल के आघू ले ये देस के रहइयामन ला बाहिर निकालके अपन संगवारी अब्राहम के संतानमन ला नइं देय दे हस?
2CH 20:8 ओमन येमा निवास करिन अऊ येमा तोर नांव बर ये कहत एक पबितर-स्थान बनाईन,
2CH 20:9 ‘यदि हमर ऊपर बिपत्ति आथे, चाहे नियाय के तलवार होवय, या महामारी या अकाल, हमन ये मंदिर के आघू म ठाढ़ होबो, जऊन ह तोर नांव म बने हवय, अऊ अपन दुख म तोर आघू म रोबो, अऊ तेंह हमर रोवई ला सुनके हमन ला बचाबे।’
2CH 20:10 “पर अब इहां अमोन, मोआबी अऊ सेईर पहाड़ के मनखेमन, जेमन के राज म तेंह इसरायल ला जब ओमन मिसर ले आवत रिहिन, तेंह हमला करे के अनुमति नइं देय; एकरसेति ओमन उहां ले मुड़के चल दीन अऊ ओमन ला नास नइं करिन।
2CH 20:11 देख कि ओमन कइसन हमन ला ओ जगह ले बाहिर निकाले बर आके बदला लेवत हवंय, जेला तेंह हमन ला उत्तराधिकार म दे हस।
2CH 20:12 हे हमर परमेसर, का तेंह ओमन के काम के नियाय नइं करस? काबरकि हमर करा ये बड़े सेना के सामना करे के कोनो सक्ति नइं ए, जऊन ह हमर ऊपर हमला करत हवय। हमन नइं जानन कि हमन ला का करना हे, पर हमर आंखी तोर ऊपर लगे हवय।”
2CH 20:13 यहूदा के जम्मो मनखेमन, अपन घरवाली अऊ लइका अऊ कोरा के लइकामन संग, उहां यहोवा के आघू म खड़े रिहिन।
2CH 20:14 ओही बेरा यहोवा के आतमा ह यहजीएल के ऊपर आईस, ओह सभा म ठाढ़ होईस। ओह जकरयाह के बेटा, ओह बनायाह के बेटा, ओह येइल के बेटा, ओह मतनयाह के बेटा, जऊन ह एक लेवी अऊ आसाप के संतान रिहिस।
2CH 20:15 यहजीएल ह कहिस: “सुनव, राजा यहोसापात अऊ ओ जम्मो, जेमन यहूदा अऊ यरूसलेम म रहिथें! यहोवा ह तुमन ले ये कहत हे: ‘ये बड़े सेना के कारन तुमन झन डरव या हतास झन होवव। काबरकि लड़ई तुम्हर नइं, पर परमेसर के अय।
2CH 20:16 कल ओमन के बिरूध हमला करव। ओमन सीस के चढ़ई म चढ़हीं, अऊ तुमन ओमन ला यरूएल के मरू-भुइयां के संकरी घाटी के आखिरी म पाहू।
2CH 20:17 तुमन ला ये लड़ई लड़े बर नइं पड़य। अपन-अपन जगह ले लव; मजबूती से खड़े रहव अऊ यहोवा ह तुमन ला, यहूदा ला अऊ यरूसलेम ला जऊन छुटकारा दीही, ओला देखव। झन डरव; हतास झन होवव। कल ओमन के सामना करे बर बाहिर निकलव, अऊ यहोवा ह तुम्हर संग रहिही।’ ”
2CH 20:18 यहोसापात ह अपन मुड़-भरसा हो गीस, अऊ यहूदा अऊ यरूसलेम के जम्मो मनखेमन यहोवा के आघू म दंडवत करे बर मुड़-भरसा हो गीन।
2CH 20:19 तब कहाती अऊ कोरहीमन के कुछू लेवीमन ठाढ़ हो गीन अऊ ऊंचहा अवाज म यहोवा, इसरायल के परमेसर के परसंसा करिन।
2CH 20:20 बड़े बिहनियां ओमन तकोआ के बंजर भुइयां करा जाय बर निकलिन। जब ओमन निकलिन, त यहोसापात ह ठाढ़ होईस अऊ कहिस, “हे यहूदा अऊ यरूसलेम के मनखेमन, मोर बात ला सुनव! यहोवा अपन परमेसर ऊपर भरोसा रखव अऊ तुमन बने रहिहू; ओकर अगमजानीमन ऊपर बिसवास रखव अऊ तुमन सफल होहू।”
2CH 20:21 यहोसापात ह मनखेमन ले सलाह लेय के बाद, पुरूसमन ला यहोवा के गीत गाय बर चुनिस, ताकि ओमन ओकर पबितरता के सोभा बर सेना के आघू-आघू रेंगत ये कहिके परसंसा करंय: “यहोवा के धनबाद करव, काबरकि ओकर मया हमेसा बने रहिथे।”
2CH 20:22 जब ओमन गीत गाय के अऊ परसंसा करे के सुरू करिन, त यहोवा ह यहूदा ऊपर हमला करइया अमोनी अऊ मोआबी अऊ सेईर पहाड़ के मनखेमन के बिरूध घात लगा दीस, अऊ ओमन हार गीन।
2CH 20:23 अमोनी अऊ मोआबीमन सेईर पहाड़ के मनखेमन ला नास करे बर ओमन के बिरूध खड़े हो गीन। सेईर के आदमीमन ला मार डारे के बाद, ओमन एक-दूसर ला मारे बर मदद करिन।
2CH 20:24 जब यहूदा के मनखेमन ओ जगह म आईन, जिहां ले सुन्ना जगह ह दिखथे अऊ ओ बड़े सेना कोति देखिन, त ओमन ला भुइयां म परे मनखेमन के सिरिप लास ही लास दिखिस; कोनो भी नइं बचे रिहिन।
2CH 20:25 तब यहोसापात अऊ ओकर मनखेमन ओमन के लूट के सामान लेय बर गीन, अऊ ओमन उहां अब्बड़ अकन साज-सामान अऊ कपड़ा अऊ कीमती चीजमन ला पाईन—अतेक जादा सामान कि ओमन ले जा नइं सकत रिहिन। उहां अतेक जादा लूट के सामान रिहिस कि ओला संकेलत तीन दिन लग गीस।
2CH 20:26 चौथा दिन ओमन बराका के घाटी म जूरिन, अऊ उहां ओमन यहोवा के परसंसा करिन। एकरसेति येला आज तक बराका के घाटी कहे जाथे।
2CH 20:27 तब, यहोसापात के अगुवई म, यहूदा अऊ यरूसलेम के जम्मो आदमीमन अब्बड़ खुसी से यरूसलेम ला लहुंट गीन, काबरकि यहोवा ह ओमन ला ओमन के बईरीमन ऊपर आनंदित होय के कारन देय रिहिस।
2CH 20:28 ओमन यरूसलेम म आईन अऊ बीना अऊ सारंगी अऊ तुरहीमन के संग यहोवा के मंदिर म गीन।
2CH 20:29 आसपास के जम्मो राजमन म परमेसर के भय छा गीस, जब ओमन सुनिन कि कइसे यहोवा ह इसरायल के बईरीमन के बिरूध लड़ई लड़े हवय।
2CH 20:30 अऊ यहोसापात के राज म सांति रिहिस, काबरकि ओकर परमेसर ह ओला सबो डहार ले बिसराम देय रिहिस।
2CH 20:31 यहोसापात ह यहूदा म सासन करिस। जब ओह यहूदा के राजा बनिस, त ओह पैंतीस साल के रिहिस अऊ ओह पच्चीस साल तक यरूसलेम म राज करिस। ओकर दाई के नांव अजूबा रिहिस, जऊन ह सिलही के बेटी रिहिस।
2CH 20:32 ओह अपन ददा आसा के रसता म चलिस अऊ ओमन ले नइं हटिस; ओह ओही काम करिस, जऊन ह यहोवा के नजर म सही रिहिस।
2CH 20:33 तभो ले, ऊंचहा जगहमन हटाय नइं गीन, अऊ मनखेमन अभी घलो अपन पुरखामन के परमेसर म अपन मन ला नइं लगाय रिहिन।
2CH 20:34 यहोसापात के सासन के आने घटनामन, सुरू ले आखिरी तक, हनानी के बेटा, येहू के इतिहास के किताब म लिखे गे हवय, जेमन ला इसरायल के राजामन के किताब म अंकित करे गे हवय।
2CH 20:35 बाद म, यहूदा के राजा यहोसापात ह इसरायल के राजा अहजयाह के संग संधि कर लीस, जेकर काममन दुस्टता के रिहिन।
2CH 20:36 ओह ओकर संग एक बेपारी जहाजी-बेड़ा बनाय बर राजी हो गीस। एसियोन-गेबेर नगर म येमन ला बनाय के बाद,
2CH 20:37 मारेसा के दोदावाह के बेटा एलिएजेर ह यहोसापात के बिरूध ये कहिके अगमबानी करिस, “काबरकि तेंह अहजयाह के संग संधि करे हस, यहोवा ह ओला नास कर दीही, जेला तेंह बनाय हस।” एकरसेति जहाजमन टूट गीन अऊ बेपार बर पानी म चले के लईक नइं रिहिन।
2CH 21:1 तब यहोसापात ह अपन पुरखामन संग हमेसा बर सुत गीस अऊ ओला ओमन के संग, दाऊद के सहर म माटी दिये गीस। अऊ ओकर बेटा यहोराम ओकर जगह म राजा बनिस।
2CH 21:2 यहोसापात के बेटा, यहोराम के भाईमन ये रिहिन, अजरयाह, यहीएल, जकरयाह, अजरयाहू, मिकाएल अऊ सपतयाह। ये सबो झन इसरायल के राजा यहोसापात के बेटा रिहिन।
2CH 21:3 ओमन के ददा ह ओमन ला सोन अऊ चांदी अऊ कीमती सामान के बहुंत अकन भेंट अऊ येकर अलावा यहूदा म गढ़वाला सहरमन ला देय रिहिस, पर ओह यहोराम ला राज ला देय रिहिस काबरकि ओह ओकर पहिलांत बेटा रिहिस।
2CH 21:4 जब यहोराम ह अपन ददा के राज म अपनआप ला मजबूती ले स्थापित कर लीस, तब ओह अपन जम्मो भाईमन ला अऊ संग म इसरायल के कुछू करमचारीमन ला तलवार ले मरवा दीस।
2CH 21:5 यहोराम ह बत्तीस साल के रिहिस, जब ओह राजा बनिस अऊ ओह आठ साल तक यरूसलेम म राज करिस।
2CH 21:6 ओह इसरायल के राजामन के रसता म चलिस, जइसने कि अहाब के घराना ह करे रिहिस, काबरकि ओह अहाब के एक बेटी ले बिहाव करे रिहिस। ओह यहोवा के नजर म दुस्ट काम करिस।
2CH 21:7 तभो ले, यहोवा ह दाऊद के घर ला नास करे बर नइं चाहिस। काबरकि यहोवा ह दाऊद के संग करार करे रिहिस। ओह वायदा करे रिहिस कि ओह ओकर अऊ ओकर संतानमन बर एक दीया हमेसा बनाय रखही।
2CH 21:8 यहोराम के समय म, एदोम ह यहूदा के बिरूध बिदरोह करिस अऊ अपन खुद के एक राजा बना लीस।
2CH 21:9 एकरसेति यहोराम ह अपन अधिकारी अऊ अपन जम्मो रथमन ला लेके उहां गीस। एदोमीमन ओला अऊ ओकर रथ के सेनापतिमन ला घेर लीन। पर रथिया उठके ओह निकल गीस।
2CH 21:10 आज तक ले एदोम ह यहूदा के बिरूध बिदरोह करत रहिथे। ओही बेरा लिबना ह घलो बिदरोह कर दीस, काबरकि यहोराम ह यहोवा, अपन पुरखामन के परमेसर ला तियाग देय रिहिस।
2CH 21:11 ओह यहूदा के पहाड़ीमन म ऊंच जगहमन ला बनाय रिहिस अऊ यरूसलेम के मनखेमन ला ओ जगहमन म अराधना करे बर उकसाके अपनआप ले बेभिचार करवाय रिहिस अऊ यहूदा ला भटका देय रिहिस।
2CH 21:12 यहोराम ला अगमजानी एलियाह ले एक चिट्ठी मिलिस, जेमा कहे गे रिहिस: “यहोवा, तोर ददा दाऊद के परमेसर ह ये कहत हे: ‘तेंह अपन ददा यहोसापात अऊ यहूदा के राजा आसा के रसता म नइं चले हस।
2CH 21:13 पर तेंह इसरायल के राजामन के रसता म चले हस, अऊ तेंह यहूदा अऊ यरूसलेम के मनखेमन ले बेभिचार करवाय हस, जइसने कि अहाब के घराना ह करे रिहिस। तेंह अपन ही भाईमन के, अपन खुद के परिवार के सदस्यमन के, ओ मनखेमन के हतिया करे हस, जऊन मन तोर ले बने रिहिन।
2CH 21:14 एकरसेति अब यहोवा ह तोर मनखे, तोर बेटा, तोर घरवाली अऊ तोर हर एक चीज ऊपर भारी बिपत्ति लानही।
2CH 21:15 तेंह खुद लम्बा समय तक आंत के बेमारी ले बेमार हो जाबे, इहां तक कि बेमारी के कारन तोर आंत ह बाहिर निकल आही।’ ”
2CH 21:16 यहोवा ह यहोराम के बिरूध पलिस्ती अऊ अरबीमन ला बईरी कर दीस, जऊन मन कूसीमन के लकठा म रहत रिहिन।
2CH 21:17 ओमन यहूदा ऊपर हमला करिन, अऊ चढ़ई करके राजा के महल म मिले जम्मो सामान ला ले गीन, अऊ संग म ओकर बेटा अऊ घरवालीमन ला घलो ले गीन। सबले छोटे बेटा अहजयाह के छोंड़ कोनो बेटा नइं बचे रिहिस।
2CH 21:18 ये सब होय के बाद, यहोवा ह यहोराम ला अंतड़ी के असाध्य बेमारी ले पीड़ित कर दीस।
2CH 21:19 समय के बीतत, दूसर साल के आखिरी म, बेमारी के कारन ओकर अंतड़ीमन बाहिर आ गीन, अऊ अब्बड़ पीरा म ओह मर गीस। ओकर मनखेमन ओकर आदर म माटी देय के बेरा कोनो किसम के आगी नइं बारिन, जइसने कि ओमन पहिली ओकर पुरखामन के आदर म आगी बारत रिहिन।
2CH 21:20 यहोराम ह बत्तीस साल के रिहिस, जब ओह राजा बनिस अऊ आठ साल तक यरूसलेम म सासन करिस। ओह मर गीस, अऊ ओकर बर कोनो दुखी नइं होईन, अऊ दाऊद के सहर म ओला माटी देय गीस, पर राजामन के कबर म नइं।
2CH 22:1 यरूसलेम के मनखेमन यहोराम के सबले छोटे बेटा अहजयाह ला ओकर जगह म राजा बनाईन, काबरकि ओ हमलावरमन, जेमन अरबीमन संग आय रिहिन, ओमन यहोराम के जम्मो बड़े बेटामन ला मार डारे रिहिन। एकरसेति यहूदा के राजा यहोराम के बेटा अहजयाह ह राज करे लगिस।
2CH 22:2 जब अहजयाह ह राजा बनिस, तब ओह बाईस साल के रिहिस, अऊ ओह एक साल तक यरूसलेम म राज करिस। ओकर दाई के नांव अतलयाह रिहिस, जऊन ह राजा ओमरी के पोती रिहिस।
2CH 22:3 ओह घलो अहाब के घराना के रसता म चलिस, काबरकि ओकर दाई ह ओला दुस्टता ले भरे काम करे बर उकसाईस।
2CH 22:4 ओह यहोवा के नजर म दुस्ट काम करिस, जइसे कि अहाब के घराना ह करे रिहिस, काबरकि ओकर ददा के मऊत के बाद, ओमन ओकर सलाहकार बन गीन, जेकर से ओकर नास हो गीस।
2CH 22:5 ओह घलो ओमन के सलाह म चलिस, जब ओह इसरायल के राजा अहाब के बेटा योराम के संग रामोत-गिलाद सहर म अराम के राजा हजाएल के बिरूध लड़ई करे बर गीस। अरामीमन योराम ला घायल कर दीन;
2CH 22:6 एकरसेति ओह ओ घावमन ले ठीक होय बर यिजरेल लहुंट गीस, जेमन ओला रामोत म अराम के राजा हजाएल के संग लड़ई करत बेरा लगे रिहिन। तब यहूदा के राजा यहोराम के बेटा अहजयाह ह अहाब के बेटा योराम ला देखे बर यिजरेल गीस, काबरकि योराम ह घायल हो गे रिहिस।
2CH 22:7 अहजयाह के योराम ले मिले के कारन, परमेसर ह अहजयाह ला खाल्हे गिराईस। जब अहजयाह ह पहुंचिस, त ओह योराम संग निमसी के बेटा येहू ले मिले बर निकलिस, जेला यहोवा ह अहाब के घर ला नास करे बर अभिसेक करे रिहिस।
2CH 22:8 जब येहू ह अहाब के घराना ला मिले दंड ऊपर अमल करत रिहिस, तब ओला यहूदा के करमचारी अऊ अहजयाह के रिस्तेदार के बेटामन मिलिन, जेमन अहजयाह के सेवा करत रिहिन, अऊ ओह ओमन ला मार डारिस।
2CH 22:9 तब ओह अहजयाह ला खोजे बर गीस, अऊ ओकर मनखेमन ओला पकड़ लीन, जब ओह सामरिया म लुकाय रिहिस। ओला येहू करा लाय गीस अऊ मार डारे गीस। ओमन ओला माटी दे दीन, काबरकि ओमन कहिन, “ओह यहोसापात के एक बेटा रिहिस, जऊन ह पूरा हिरदय ले यहोवा ला खोजिस।” उहां अहजयाह के घराना म कोनो अतेक ताकतवर नइं रिहिन कि ओ राज ला बनाय रखतिन।
2CH 22:10 जब अहजयाह के दाई अतलयाह ह देखिस कि ओकर बेटा ह मर गे हवय, त ओह यहूदा के घर के जम्मो राज-घराना ला नास करे बर सुरू कर दीस।
2CH 22:11 पर राजा यहोराम के बेटी यहोसेबा ह अहजयाह के बेटा योआस ला धरिस अऊ ओला ओ साही राजकुमारमन के बीच ले निकालके ले गीस, जेमन मार डारे जवइया रिहिन अऊ ओह ओला अऊ ओकर धाई ला सोये के एक ठन कमरा म रख दीस। काबरकि राजा यहोराम के बेटी यहोसेबा अऊ पुरोहित यहोयादा के घरवाली ह अहजयाह के बहिनी रिहिस, ओह अतलयाह ले लइका ला लुका दीस, जेकर कारन ओह ओ लइका ला मार नइं सकिस।
2CH 22:12 योआस ह छै साल तक ओमन के संग परमेसर के मंदिर म लुकाय रिहिस, जब तक कि अतलयाह ह ओ देस म राज करते रिहिस।
2CH 23:1 सातवां साल म यहोयादा पुरोहित ह अपन ताकत देखाईस। ओह सौ-सौ सैनिकमन ऊपर ठहिराय गे सेनापतिमन संग एक करार करिस: यरोहाम के बेटा अजरयाह, यहोहानान के बेटा इसमायल, ओबेद के बेटा अजरयाह, अदायाह के बेटा मासेयाह अऊ जिकरी के बेटा एलीसापात।
2CH 23:2 येमन पूरा यहूदा म जाके जम्मो सहर के लेवीमन ला अऊ इसरायली परिवारमन के मुखियामन ला संकेलिन। तब ओमन यरूसलेम आईन,
2CH 23:3 त पूरा सभा ह परमेसर के मंदिर म राजा संग एक करार करिस। यहोयादा ह ओमन ले कहिस, “राजा के बेटा ह सासन करही, जइसे कि यहोवा ह दाऊद के संतानमन के बिसय म वायदा करे हवय।
2CH 23:4 अब तुमन ला ये काम करना हे: एक तिहाई पुरोहित अऊ लेवीमन, जऊन मन बिसराम दिन म काम म जावत हवंय, ओमन कपाटमन करा पहरेदारी करंय,
2CH 23:5 तुमन के एक तिहाई राजमहल म अऊ एक तिहाई नीव के दुवार म, अऊ जम्मो आने मन यहोवा के मंदिर के अंगना म रहिहीं।
2CH 23:6 सेवा करइया पुरोहित अऊ लेवीमन के छोंड़ अऊ कोनो यहोवा के मंदिर के भीतर झन जावन पावय; पुरोहित अऊ लेवीमन जा सकत हें, काबरकि ओमन पबितर करे गे हवंय, पर जम्मो आने मन यहोवा के हुकूम के पालन करंय अऊ भीतर झन जावंय।
2CH 23:7 लेवीमन राजा के चारों कोति रहंय, हर एक जन अपन हांथ म हथियार धरे रहय। जऊन कोनो मंदिर के भीतर जावय, ओह मार डारे जावय। जिहां भी राजा ह जाथे, ओकर संगे-संग रहव।”
2CH 23:8 लेवीमन अऊ यहूदा के जम्मो आदमीमन वइसे ही करिन, जइसे यहोयादा पुरोहित ह हुकूम दीस। हर एक जन अपन-अपन आदमीमन ला लीन—जऊन मन बिसराम दिन काम करे बर जानेवाला रिहिन अऊ जऊन मन काम करके आवत रिहिन—काबरकि यहोयादा पुरोहित ह कोनो भी दल ला छुट्टी नइं देय रिहिस।
2CH 23:9 तब ओह सौ-सौ के ऊपर ठहिराय गे दल के सेनापतिमन ला बरछी अऊ बड़े अऊ छोटे ढालमन ला दीस, जेमन राजा दाऊद के रिहिन अऊ परमेसर के मंदिर म रखे गे रिहिन।
2CH 23:10 ओह जम्मो आदमीमन ला, ओमन के हांथ म हथियार के संग, राजा के चारों कोति ठहिरा दीस—बेदी अऊ मंदिर के लकठा म, मंदिर के दक्खिन दिग ले उत्तर दिग तक ठहिरा दीस।
2CH 23:11 यहोयादा अऊ ओकर बेटामन राजा के बेटा ला बाहिर लेके आईन अऊ ओला मुकुट पहिरा दीन; ओमन ओला करार के एक नकल भेंट करिन अऊ ओला राजा घोसित करिन। ओमन ओकर अभिसेक करिन अऊ चिचियाके कहिन, “राजा ह चिरंजीव रहय!”
2CH 23:12 जब अतलयाह ह मनखेमन के हल्ला अऊ राजा के जय-जयकार के अवाज ला सुनिस, त ओह यहोवा के मंदिर म ओमन करा गीस।
2CH 23:13 अऊ ओह देखिस कि राजा ह प्रवेस दुवार के खंभा करा खड़े हवय। अधिकारी अऊ तुरही बजइयामन राजा के बाजू म खड़े रहंय, अऊ देस के जम्मो मनखेमन आनंद मनात तुरही फूंकत रहंय, अऊ संगीतकारमन अपन बाजामन संग परसंसा करत अगुवई करत रिहिन। तब अतलयाह ह अपन कपड़ा ला चीरिस अऊ चिचियाके कहिस, “देस-द्रोह! देस-द्रोह!”
2CH 23:14 यहोयादा पुरोहित ह सौ-सौ सैनिक के दल के सेनापतिमन ला बाहिर भेज दीस, जऊन मन सेना के अधिकारी रिहिन, अऊ ओमन ला कहिस: “अतलयाह ला कतार के बीच ले बाहिर लानव अऊ जऊन कोनो भी ओकर पाछू चलथे, ओला तलवार ले मार डारव।” काबरकि पुरोहित ह कहे रिहिस, “यहोवा के मंदिर म ओकर हतिया झन करे जावय।”
2CH 23:15 एकरसेति ओमन ओला पकड़ लीन, जब ओह महल के मैदान म घोड़ा फाटक के प्रवेस दुवार म हबरिस, अऊ उहां ओमन ओला मार डारिन।
2CH 23:16 तब यहोयादा ह एक करार करिस कि ओह, मनखेमन अऊ राजा ह यहोवा के मनखे होहीं।
2CH 23:17 जम्मो मनखेमन बाल के मंदिर म गीन अऊ ओला गिरा दीन। ओमन बेदी अऊ मूरतीमन ला कुचर दीन अऊ बेदी के आघू म बाल के पुरोहित मतान ला मार डारिन।
2CH 23:18 तब यहोयादा ह यहोवा के मंदिर के सेवा लेवीय पुरोहितमन के हांथ म दे दीस, जेमन ला दाऊद ह मंदिर म काम सऊंपे रिहिस, ताकि ओमन आनंद मनात अऊ गीत गावत मूसा के कानून म लिखे मुताबिक यहोवा के होम-बलिदान चघावंय, जइसे कि दाऊद ह हुकूम देय रिहिस।
2CH 23:19 ओह यहोवा के मंदिर के दुवारमन म घलो दुवारपालमन ला ठहिरा दीस ताकि कोनो भी असुध मनखे मंदिर के भीतर झन जा सकंय।
2CH 23:20 ओह अपन संग सौ-सौ सैनिक के ऊपर ठहिराय सेनापति, परभावसाली मनखे, मनखेमन ऊपर सासन करइया अऊ ओ देस के जम्मो मनखेमन ला लीस अऊ राजा ला यहोवा के मंदिर ले खाल्हे लानिस। ओमन ऊपरी दुवार ले होके महल म गीन अऊ राजा ला राज सिंघासन म बईठाईन।
2CH 23:21 देस के जम्मो मनखेमन आनंद मनाईन, अऊ सहर म सांति रिहिस, काबरकि अतलयाह ह तलवार ले मार डारे गे रिहिस।
2CH 24:1 योआस ह सात साल के रिहिस, जब ओह राजा बनिस, अऊ ओह यरूसलेम म चालीस साल तक राज करिस। ओकर दाई के नांव सिबयाह रिहिस, जऊन ह बेरसेबा के रिहिस।
2CH 24:2 योआस ह यहोयादा पुरोहित के जिनगी भर यहोवा के नजर म सही काम करिस।
2CH 24:3 यहोयादा ह ओकर बर दू झन घरवाली चुनिस, अऊ ओकर बेटा अऊ बेटीमन होईन।
2CH 24:4 कुछू समय के बाद, योआस ह यहोवा के मंदिर ला फेर स्थापित करे के फैसला करिस।
2CH 24:5 ओह पुरोहित अऊ लेवीमन ला एक संग बलाईस अऊ ओमन ले कहिस, “यहूदा के नगरमन म जावव अऊ अपन परमेसर के मंदिर के मरम्मत बर जम्मो इसरायल ले हर साल धन इकट्ठा करव। येला तुरते करव।” पर लेवीमन तुरते ये बुता ला नइं करिन।
2CH 24:6 एकरसेति राजा ह यहोयादा मुखिया पुरोहित ला बलाईस अऊ कहिस, “तेंह काबर लेवीमन ले यहूदा अऊ यरूसलेम म यहोवा के सेवक मूसा अऊ इसरायल के सभा के दुवारा तम्बू बर करार के कानून के दुवारा लगाय गे लगान ला लाय बर नइं कहे हस?”
2CH 24:7 ओ दुस्ट माईलोगन अतलयाह के बेटामन परमेसर के मंदिर ला टोरके घुस गीन अऊ बाल देवता बर यहोवा के पबितर चीजमन के उपयोग करे रिहिन।
2CH 24:8 तब राजा के हुकूम ले, एक बड़े सन्दूक बनाय गीस अऊ बाहिर म, यहोवा के मंदिर के दुवार म रखवा दिये गीस।
2CH 24:9 तब यहूदा अऊ यरूसलेम म घोसना करे गीस कि मनखेमन यहोवा करा ओ लगान ला लानंय, जेला परमेसर के सेवक मूसा ह सुन्ना जगह म इसरायल ऊपर लगाय रिहिस।
2CH 24:10 जम्मो करमचारी अऊ जम्मो मनखेमन खुसी से अपन भाग के लगान ला तब तक सन्दूक म डालत गीन, जब तक कि ओह भर नइं गीस।
2CH 24:11 जब भी लेवीमन के दुवारा राजा के करमचारीमन करा सन्दूक ला लाय जावय अऊ ओमन देखंय कि अब्बड़ अकन पईसा हो गे हवय, त साही सचिव अऊ मुखिया पुरोहित के अधिकारी आवंय अऊ सन्दूक ला खाली करके ओला फेर वापिस ओकर जगह म मढ़ा देवंय। ओमन हमेसा अइसने करंय अऊ ये किसम ले ओमन अब्बड़ अकन पईसा जमा कर लीन।
2CH 24:12 राजा अऊ यहोयादा ह येला ओमन ला दे दीन, जऊन मन यहोवा के मंदिर के मरम्मत के काम ला करत रिहिन। ओमन यहोवा के मंदिर के मरम्मत बर राज-मिसतिरी अऊ बढ़ईमन ला, अऊ मंदिर के मरम्मत बर लोहा अऊ कांसा के काम करइयामन ला घलो ठहिराईन।
2CH 24:13 जऊन मन के ऊपर ओ काम के जिम्मेदारी रिहिस, ओमन मेहनती रिहिन, अऊ मरम्मत के काम ह ओमन के अधीन बढ़त गीस। ओमन पहिली जइसे असली बनावट म परमेसर के मंदिर ला फेर बनाईन अऊ ओला मजबूत करिन।
2CH 24:14 जब ओमन काम ला पूरा कर डारिन, त ओमन बाकि बचे पईसा ला राजा अऊ यहोयादा करा लेय आईन, अऊ ये बाकि बचे पईसा ले यहोवा के मंदिर बर सामान बनाय गीस: सेवा बर सामान अऊ होम-बलिदान बर सामान, अऊ बरतन घलो अऊ आने सोन-चांदी के सामान। जब तक यहोयादा ह जीयत रिहिस, तब तक यहोवा के मंदिर म हमेसा होम-बलिदान चघाय जावत रिहिस।
2CH 24:15 अब यहोयादा ह डोकरा हो गे रिहिस अऊ ओह पूरा उमर के हो गे रिहिस, त ओह एक सौ तीस साल के उमर म मर गीस।
2CH 24:16 ओला दाऊद के सहर म राजामन संग माटी देय गीस, काबरकि ओह इसरायल म परमेसर अऊ ओकर मंदिर बर बढ़िया काम करे रिहिस।
2CH 24:17 यहोयादा के मऊत के बाद, यहूदा के करमचारीमन आईन अऊ राजा ला अपन राजभक्ति देखाईन, अऊ ओह ओमन के बात ला सुनिस।
2CH 24:18 ओमन यहोवा, अपन पुरखामन के परमेसर के मंदिर ला तियाग दीन, अऊ असेरा के खंभा अऊ मूरतीमन के अराधना करिन। ओमन के अपराध के कारन, परमेसर के कोरोध ह यहूदा अऊ यरूसलेम म आईस।
2CH 24:19 हालाकि यहोवा ह ओ मनखेमन ला अपन करा लहुंटाके लाने बर अगमजानीमन ला भेजिस, अऊ हालाकि ओमन ओ मनखेमन के बिरूध गवाही दीन, तभो ले ओमन नइं सुनिन।
2CH 24:20 तब परमेसर के आतमा ह यहोयादा पुरोहित के बेटा जकरयाह ऊपर उतरिस। ओह मनखेमन के आघू म ठाढ़ होईस अऊ कहिस, “परमेसर ह ये कहत हे: ‘तुमन काबर यहोवा के हुकूम ला नइं मानत हव? तुम्हर उन्नति नइं होवय। काबरकि तुमन यहोवा ला छोंड़ दे हवव, अऊ ओह तुमन ला छोंड़ दे हवय।’ ”
2CH 24:21 पर मनखेमन ओकर बिरूध साजिस करिन, अऊ राजा के हुकूम ले ओमन ओला यहोवा के मंदिर के अंगना म पथरवाह करके मार डारिन।
2CH 24:22 राजा योआस ह ओ दया के बात ला सुरता नइं करिस, जेला जकरयाह के ददा यहोयादा ह ओला देखाय रिहिस, पर ओह ओकर बेटा ला मार डारिस, जऊन ह मरत बेरा ये कहिस, “यहोवा ह येला देखय अऊ तोर ले लेखा लेवय।”
2CH 24:23 साल के सुरूआत म, अराम के सेना ह योआस के बिरूध आघू बढ़िस; ये सेना ह यहूदा अऊ यरूसलेम ऊपर हमला करिस अऊ मनखेमन के जम्मो अगुवामन ला मार डारिस। ओमन दमिस्क म अपन राजा करा जम्मो लूट के माल ला भेज दीन।
2CH 24:24 हालाकि अरामी सेना ह सिरिप थोरकन आदमीमन संग आय रिहिस, तभो ले यहोवा ह एक जादा बड़े यहूदा के सेना ला ओमन के हांथ म कर दीस। काबरकि यहूदा ह यहोवा, अपन पुरखामन के परमेसर ला तियाग देय रिहिस, एकरसेति योआस ला दंड देय गीस।
2CH 24:25 जब अरामीमन के सेना ह लहुंट गीस, त ओमन योआस ला बहुंत घायल करके छोंड़ दीन। ओकर करमचारीमन ओकर बिरूध यहोयादा पुरोहित के बेटा के हतिया करे के कारन साजिस करिन, अऊ ओमन ओला ओकर बिस्तर म मार डारिन। एकरसेति ओह मर गीस अऊ ओला दाऊद के सहर म माटी देय गीस, पर राजामन के कबर म नइं।
2CH 24:26 ओकर बिरूध सडयंत्र करइया म एक अमोनी माईलोगन सिमात के बेटा जाबाद, अऊ एक मोआबी माईलोगन सिमरित के बेटा यहोजाबाद रिहिन।
2CH 24:27 योआस के बेटामन के लेखा-जोखा, ओकर बारे म बहुंत अकन अगमबानी के बातमन, अऊ परमेसर के मंदिर के मरम्मत के लेखा-जोखा राजामन के इतिहास के किताब म लिखे गे हवय। अऊ ओकर बेटा अमसयाह ह ओकर जगह म राजा होईस।
2CH 25:1 जब अमसयाह ह राजा बनिस, त ओह पच्चीस साल के रिहिस, अऊ ओह यरूसलेम म उनतीस साल तक राज करिस। ओकर दाई के नांव यहोअद्दीन रिहिस; जऊन ह यरूसलेम के रिहिस।
2CH 25:2 अमसयाह ह ओही काम करिस, जऊन ह यहोवा के नजर म सही रिहिस, पर पूरा हिरदय ले नइं करिस।
2CH 25:3 राज-सासन ह पूरा ओकर कब्जा म होय के बाद, ओह ओ करमचारीमन ला मार डारिस, जऊन मन ओकर ददा राजा ला मार डारे रिहिन।
2CH 25:4 तभो ले ओमन के लइकामन ला नइं मारिस, पर ओह मूसा के किताब म लिखे कानून के मुताबिक काम करिस, जिहां यहोवा ह हुकूम दे हवय: “दाई-ददा ला ओमन के लइकामन के कारन झन मार डारे जावय, अऊ न ही लइकामन ला ओमन के दाई-ददा के कारन मार डारे जावय; हर एक ह अपन खुद के पाप के कारन मरही।”
2CH 25:5 अमसयाह ह यहूदा के जम्मो मनखेमन ला एक संग बलाईस अऊ ओमन ला ओमन के परिवार के मुताबिक जम्मो यहूदा अऊ बिनयामीन म हजार-हजार के ऊपर सेनापति अऊ सौ-सौ के ऊपर सेनापति ठहिराईस। तब ओह ओमन ला इकट्ठा करिस, जेमन बीस साल या बीस साल ले जादा उमर के रिहिन अऊ ओला पता चलिस कि उहां तीन लाख आदमी सेना के सेवा बर योग्य रिहिन, अऊ ओमन बरछी अऊ ढालमन ला चलाय म कुसल रिहिन।
2CH 25:6 ओह इसरायल ले एक लाख सैनिकमन ला घलो चांदी के एक सौ टेलेन्ट देके किराया म रखिस।
2CH 25:7 पर परमेसर के एक जन ह ओकर करा आईस अऊ कहिस, “हे महाराज, इसरायल के ये सेनामन तोर संग आघू झन बढ़ंय, काबरकि यहोवा ह इसरायल के संग नइं ए—अऊ न ही एपरैम के कोनो मनखे के संग हवय।
2CH 25:8 अऊ त अऊ अगर तेंह लड़ई म जाबे अऊ हिम्मत करके लड़बे, तभो ले परमेसर ह तोला बईरी के आघू ले उखान फेंकही, काबरकि परमेसर करा मदद करे के या उखान फेंके के ताकत हवय।”
2CH 25:9 अमसयाह ह परमेसर के जन ले पुछिस, “पर ओ सौ टेलेन्ट के का होही, जेला मेंह इसरायल के सेनामन बर चुकाय हवंव?” परमेसर के जन ह जबाब दीस, “यहोवा ह तोला एकर ले जादा देय सकत हे।”
2CH 25:10 एकरसेति अमसयाह ह ओ सैनिकमन ला वापिस ओमन के घर भेज दीस, जेमन एपरैम ले ओकर करा आय रिहिन। ओमन यहूदा ऊपर बहुंत नराज होईन अऊ बहुंत गुस्सा होके अपन घर चल दीन।
2CH 25:11 तब अमसयाह ह हिम्मत करिस अऊ अपन सेना ला नून के घाटी म ले गीस, जिहां ओह सेईर के दस हजार मनखेमन ला मार डारिस।
2CH 25:12 यहूदा के सेनामन दस हजार मनखेमन ला घलो जीयत पकड़ लीन, अऊ ओमन ला एक टीला के ऊपर ले गीन अऊ खाल्हे फेंक दीन, जेकर ले ओ जम्मो टकराके कुटा-कुटा हो गीन।
2CH 25:13 इही बीच, अमसयाह ह जऊन सेना ला वापिस भेज देय रिहिस अऊ ओमन ला लड़ई म सामिल करे ले मना कर दे रिहिस, ओ सेना ह सामरिया ले लेके बेत-होरोन तक यहूदा के नगरमन ऊपर हमला कर दीस। ओमन तीन हजार मनखेमन ला मार डारिन अऊ अब्बड़ अकन लूट के सामान ले गीन।
2CH 25:14 जब राजा अमसयाह ह एदोमीमन ला घात करके लहुंटिस, त ओह सेईर के मनखेमन के देवतामन ला वापिस ले आईस। ओह ओमन ला अपन खुद के देवतामन के रूप म स्थापित करिस, ओमन ला दंडवत करिस अऊ ओमन बर धूप जलाईस।
2CH 25:15 अमसयाह के बिरूध यहोवा के कोरोध ह भड़किस, अऊ ओह ओकर करा एक अगमजानी ला पठोईस, जऊन ह ओला कहिस, “तेंह ओ मनखेमन के देवतामन ले सलाह काबर लेवत हस, जऊन मन अपन ही मनखेमन ला तोर हांथ ले नइं बचा सकिन?”
2CH 25:16 जब ओह गोठियात रिहिस, तब राजा ह ओकर ले कहिस, “का हमन तोला राजा के सलाहकार ठहिराय हन? बंद कर! काबर मरे बर चाहत हस?” एकरसेति अगमजानी ह रूक गीस पर ओह कहिस, “मेंह जानत हंव कि परमेसर ह तोला नास करे बर ठान ले हवय, काबरकि तेंह अइसे करे हस अऊ मोर सलाह ला नइं माने हस।”
2CH 25:17 जब यहूदा के राजा अमसयाह ह अपन सलाहकारमन ले सलाह कर लीस, त ओह इसरायल के राजा यहोआस ला ये चुनौती दीस, जऊन ह येहू के पोता अऊ यहोआहाज के बेटा रिहिस: “आ, हमन लड़ई म एक-दूसर के सामना करन।”
2CH 25:18 पर इसरायल के राजा यहोआस ह यहूदा के राजा अमसयाह ला जबाब भेजिस: “लबानोन के एक कंटिली झाड़ी ह लबानोन के एक देवदार रूख मेर ये संदेस भेजिस, ‘अपन बेटी के बिहाव मोर बेटा के संग कर दे।’ तब लबानोन म एक जंगली पसु आईस अऊ ओ कंटिली झाड़ी ला गोड़ खाल्हे कुचर दीस।
2CH 25:19 तेंह अपनआप ले कहिथस कि तेंह एदोम ला हराय हस, अऊ अब तेंह जिद्दी अऊ घमंडी हो गे हस। पर अपन घर म रह! मुसीबत ला काबर नेवता देवत हस अऊ अपन खुद के अऊ यहूदा के घलो बिनास के कारन बनत हस?”
2CH 25:20 पर अमसयाह ह ओकर बात ला नइं सुनिस, काबरकि परमेसर ह अइसन करे रिहिस कि ओला यहोआस के हांथ म कर देवय, काबरकि ओमन एदोम के देवतामन के खोज म लगे रिहिन।
2CH 25:21 एकरसेति इसरायल के राजा यहोआस ह हमला कर दीस। ओकर अऊ यहूदा के राजा अमसयाह के आमना-सामना यहूदा के बेत-सेमेस नगर म होईस।
2CH 25:22 यहूदा ह इसरायल ले हार गीस अऊ जम्मो मनखेमन अपन-अपन घर भाग गीन।
2CH 25:23 इसरायल के राजा यहोआस ह यहूदा के राजा अमसयाह ला, बेत-सेमेस करा बंदी बना लीस, जऊन ह योआस के बेटा अऊ अहजयाह के पोता रिहिस। तब यहोआस ह ओला यरूसलेम ले आईस अऊ यरूसलेम के दीवार ला एपरैम के दुवार ले लेके कोना के दुवार तक टोरके गिरा दीस—याने कि लगभग चार सौ क्यूबीट लम्बा भाग ला गिरा दीस।
2CH 25:24 ओह जम्मो सोन अऊ चांदी अऊ परमेसर के मंदिर म रखे ओ जम्मो सामान ला ले लीस, जऊन ह ओबेद-एदोम के देखरेख म रिहिस, संग म ओह महल के खजाना अऊ बंदी बनाय गे मनखेमन ला घलो लेके वापिस सामरिया लहुंट गीस।
2CH 25:25 यहूदा के राजा, योआस के बेटा अमसयाह ह यहोआहाज के बेटा इसरायल के राजा यहोआस के मिरतू के बाद पंदरह साल जिंदा रिहिस।
2CH 25:26 अमसयाह के सासन के आने घटनामन, सुरू ले लेके आखिरी तक यहूदा अऊ इसरायल के राजामन के किताब म लिखे गे हवंय।
2CH 25:27 जब अमसयाह ह यहोवा के पाछू चले बर बंद कर दीस, त ओ बेरा ले मनखेमन यरूसलेम म ओकर बिरूध साजिस करिन अऊ ओह लाकीस सहर ला भाग गीस, पर ओमन ओकर पाछू आदमीमन ला लाकीस पठोईन अऊ ओला उहां मार डारिन।
2CH 25:28 ओकर लास ला घोड़ा म लादके वापिस लाय गीस अऊ ओला यहूदा के सहर म ओकर पुरखामन संग माटी देय गीस।
2CH 26:1 तब यहूदा के जम्मो मनखेमन उजियाह ला लेके ओकर ददा अमसयाह के जगह म राजा बनाईन। उजियाह ह ओ समय सोलह साल के रिहिस।
2CH 26:2 येह ओही मनखे अय, जऊन ह अमसयाह के ओकर पुरखामन संग हमेसा बर सुत जाय के बाद एलात नगर ला फेर बनाईस अऊ यहूदा म सामिल कर लीस।
2CH 26:3 जब उजियाह ह राजा बनिस, तब ओह सोलह साल के रिहिस, अऊ ओह यरूसलेम म बावन साल तक राज करिस। ओकर दाई के नांव यकोलियाह रिहिस, जऊन ह यरूसलेम के रिहिस।
2CH 26:4 उजियाह ह अपन ददा अमसयाह के सहीं ओहीच काम करिस, जऊन ह यहोवा के नजर म सही अय।
2CH 26:5 ओह जकरयाह के दिन म परमेसर ला खोजिस, जऊन ह ओला परमेसर के डर म बढ़े के निरदेस दीस। जब तक ओह यहोवा ला खोजिस, परमेसर ह ओला सफलता दीस।
2CH 26:6 उजियाह ह पलिस्तीमन के बिरूध लड़ई करे बर गीस अऊ गत, यबने अऊ असदोद के दीवारमन ला गिरा दीस। ओकर बाद ओह असदोद के लकठा के अऊ पलिस्तीमन के बीच म सहरमन ला फेर बनाईस।
2CH 26:7 परमेसर ह पलिस्तीमन के बिरूध अऊ गुर-बाल नगर म रहइया अरबीमन के बिरूध अऊ मूनीमन के बिरूध ओकर मदद करिस।
2CH 26:8 अमोनीमन उजियाह करा राजकर लानिन, अऊ ओकर बड़ई मिसर के सीमना तक फईल गीस, काबरकि ओह अब्बड़ ताकतवर हो गे रिहिस।
2CH 26:9 उजियाह ह यरूसलेम म कोना के दुवार, घाटी के दुवार अऊ सहर के दीवार के कोर म मीनारमन ला बनाईस अऊ ओला गढ़वाला करिस।
2CH 26:10 ओह सुन्ना जगह म घलो मीनारमन ला बनाईस अऊ कई ठन तरिया कोड़वाईस, काबरकि ओकर करा पहाड़ी के खाल्हे म अऊ मैदान म अब्बड़ अकन मवेसी रिहिन। ओकर करा ओकर खेतमन म अऊ पहाड़ी के अंगूर के बारी म अऊ उपजाऊ जमीन म बुता करइया मनखेमन रिहिन, काबरकि ओह खेती-बारी ले मया करय।
2CH 26:11 उजियाह करा बढ़िया कुसल सेना रिहिस, जऊन मन अपन संखिया के मुताबिक दल के दल एक राज करमचारी हननयाह के अगुवई म येइल सचिव अऊ मासेयाह अधिकारी के दुवारा बाहिर जाय बर तियार रिहिन।
2CH 26:12 लड़ई करइया आदमीमन के अलावा परिवार के अगुवामन के कुल संखिया 2,600 रिहिस।
2CH 26:13 ओमन के हुकूम के अधीन लड़ई बर 3,07,500 कुसल आदमीमन के सेना रिहिस, येह राजा ला ओकर बईरीमन के बिरूध सहयोग करे बर एक ताकतवर सेना रिहिस।
2CH 26:14 उजियाह ह पूरा सेना बर ढाल, बरछी, लोहा के टोपी, छाती के कवच, तीर अऊ गोफन के परबंध करिस।
2CH 26:15 यरूसलेम म ओह मीनारमन म अऊ कोना म बचाव बर नवां-नवां किसम के औजारमन ला बनाईस, ताकि सिपाहीमन तीर चला सकंय अऊ दीवार ले बड़े पथरामन ला तेजी से फेंक सकंय। ओकर बड़ई ह दूरिहा-दूरिहा तक ले फईल गीस, काबरकि ओला अब्बड़ मदद मिलिस, जब तक कि ओह ताकतवर नइं हो गीस।
2CH 26:16 पर बाद म, जब उजियाह ह ताकतवर हो गीस, त ओकर घमंड के सेति ओकर पतन हो गीस। ओह यहोवा अपन परमेसर बर बिसवासघाती हो गीस, अऊ धूप के बेदी म धूप जलाय बर यहोवा के मंदिर भीतर गीस।
2CH 26:17 अजरयाह पुरोहित ह यहोवा के अस्सी आने हिम्मती पुरोहितमन संग ओकर पाछू गीस।
2CH 26:18 ओमन राजा उजियाह के सामना करिन अऊ कहिन, “हे उजियाह, यहोवा बर धूप जलाना तोर बर सही नो हय। ये काम ह हारून के संतान, पुरोहितमन के अय, जेमन ला धूप जलाय बर पबितर करे गे हवय। पबितर-स्थान ला छोंड़ दे, काबरकि तेंह बिसवासघाती हो गे हस; अऊ यहोवा परमेसर के दुवारा तोर आदर नइं करे जावय।”
2CH 26:19 उजियाह, जऊन ह अपन हांथ म धूपदान लेके धूप जलाय बर तियार रिहिस, गुस्सा हो गीस। जब ओह यहोवा के मंदिर म धूप के बेदी के आघू म पुरोहितमन ऊपर गुस्सा करत रिहिस, त ओकर माथा म कोढ़ के बेमारी हो गीस।
2CH 26:20 जब मुखिया पुरोहित अजरयाह अऊ आने जम्मो पुरोहितमन ओला देखिन, त पाईन कि ओकर माथा म कोढ़ हो गे हवय, एकरसेति ओमन ओला जल्दी से बाहिर निकालिन। असल म, ओह खुद बाहिर निकले के जल्दी म रिहिस, काबरकि यहोवा ह ओला कोढ़ ले पीड़ित कर दे रिहिस।
2CH 26:21 राजा उजियाह ह ओ दिन तक कोढ़ के रोगी रिहिस, जब तक कि ओकर मिरतू नइं हो गीस। ओह अलग घर म रहत रिहिस—कोढ़ के सेति ओला यहोवा के मंदिर म जाय के मनाही रिहिस। ओकर बेटा योताम ह महल के अधिकारी होके देस के मनखेमन ऊपर सासन करिस।
2CH 26:22 उजियाह के सासन के आने घटनामन, सुरू ले आखिरी तक, आमोस के बेटा अगमजानी यसायाह के दुवारा लिखे गे हवंय।
2CH 26:23 उजियाह ह हमेसा बर अपन पुरखामन संग सुत गीस अऊ ओला ओमन के लकठा म एक कबर म माटी दिये गीस, जऊन ह राजामन के रिहिस, काबरकि मनखेमन कहिन, “ओला कोढ़ के बेमारी रिहिस।” अऊ ओकर बेटा योताम ह ओकर जगह म राजा बनिस।
2CH 27:1 जब योताम ह राजा बनिस, त ओह पच्चीस साल के रिहिस, अऊ ओह सोलह साल तक यरूसलेम म राज करिस। ओकर दाई के नांव यरूसा रिहिस, जऊन ह सादोक के बेटी रिहिस।
2CH 27:2 ओह अपन ददा उजियाह के सहीं ओही काम करिस, जऊन ह यहोवा के नजर म सही रिहिस, पर ओकर सहीं ओह यहोवा के मंदिर म प्रवेस नइं करिस। तभो ले, मनखेमन भ्रस्टाचार करते ही रिहिन।
2CH 27:3 योताम ह यहोवा के मंदिर के ऊपर के दुवार ला फेर बनाईस अऊ ओपेल के पहाड़ी के दीवार ला अऊ बढ़ाईस।
2CH 27:4 ओह यहूदा के पहाड़ी देस म सहरमन ला अऊ जंगली जगहमन म किला अऊ मीनारमन ला बनाईस।
2CH 27:5 योताम ह अमोनीमन के राजा के बिरूध लड़ई करिस अऊ ओमन ला जीत लीस। ओ बछर अमोनीमन ओला चांदी के एक सौ टेलेन्ट, दस हजार कोर्स गहूं अऊ दस हजार कोर्स जौ दीन। अमोनीमन ओला दूसर अऊ तीसर बछर म घलो ओतकेच मात्रा म सामान दीन।
2CH 27:6 योताम ह ताकतवर होवत गीस, काबरकि ओह यहोवा अपन परमेसर के आघू म सही चलत रिहिस।
2CH 27:7 योताम के राज के आने घटनामन, ओकर जम्मो लड़ईमन अऊ ओकर करे गय आने काममन इसरायल अऊ यहूदा के राजामन के किताब म लिखे गे हवय।
2CH 27:8 जब ओह राजा बनिस, त ओह पच्चीस साल के रिहिस, अऊ ओह सोलह साल तक यरूसलेम म राज करिस।
2CH 27:9 योताम ह अपन पुरखामन संग हमेसा बर सुत गीस अऊ ओला दाऊद के सहर म माटी देय गीस। अऊ ओकर बेटा आहाज ह ओकर जगह म राजा बनिस।
2CH 28:1 आहाज ह बीस साल के रिहिस, जब ओह राजा बनिस अऊ ओह यरूसलेम म सोलह साल तक सासन करिस। अपन पुरखा दाऊद के सहीं, ओह ओ काम नइं करिस, जऊन ह यहोवा के नजर म सही रिहिस।
2CH 28:2 ओह इसरायल के राजामन के रसता म चलिस अऊ अराधना करे बर बाल के मूरतीमन ला घलो बनाईस।
2CH 28:3 ओह बेन-हिन्नोम के घाटी म धूप के बलिदान चघाईस अऊ अपन लइकामन ला आगी म बलिदान करिस, अऊ ओ जाति-जाति के मनखेमन के घिनौना रीति-रिवाज म चलिस, जेमन ला यहोवा ह इसरायलीमन के आघू ले भगा दे रिहिस।
2CH 28:4 ओह ऊंच जगह म, पहाड़ीमन के टीप म अऊ हर फईले हुए रूख के खाल्हे म बलिदान चघाईस अऊ धूप जलाईस।
2CH 28:5 एकरसेति यहोवा ओकर परमेसर ह ओला अराम के राजा के हांथ म कर दीस। अरामीमन ओमन ला हरा दीन अऊ ओकर कतको मनखेमन ला बंदी बनाके दमिस्क ले आईन। ओला इसरायल के राजा के हांथ म घलो दे दिये गीस, जऊन ह ओकर भारी नुकसान करिस।
2CH 28:6 एकेच दिन म रमलियाह के बेटा पेकह ह यहूदा म एक लाख बीस हजार सैनिकमन ला मार डारिस, काबरकि यहूदा ह यहोवा, अपन पुरखामन के परमेसर ला तियाग दे रिहिस।
2CH 28:7 एक एपरैमी योद्धा, जिकरी ह राजा के बेटा मासेयाह, महल के प्रभारी अधिकारी अजरीकाम, अऊ राजा के बाद दूसरा अधिकारी एलकाना ला मार डारिस।
2CH 28:8 इसरायल के मनखेमन यहूदा के अपन संगी इसरायलीमन ला बंदी बना लीन, जेमा दू लाख घरवाली, बेटा अऊ बेटीमन रिहिन। ओमन अब्बड़ अकन लूट के सामान घलो ले लीन, जेला ओमन वापिस सामरिया ले गीन।
2CH 28:9 पर उहां ओदेद नांव के यहोवा के एक अगमजानी रिहिस, अऊ ओह सेना के मनखेमन ले मिले बर गीस, जब ओमन सामरिया लहुंटिन। ओह ओमन ला कहिस, “काबरकि यहोवा, तुम्हर पुरखामन के परमेसर ह यहूदा ले गुस्सा करिस, त ओह ओमन ला तुम्हर हांथ म दे दीस। पर तुमन ओमन ला गुस्सा म मार दे हवव, जऊन ह स्वरग तक पहुंच गे हवय।
2CH 28:10 अऊ अब तुमन यहूदा अऊ यरूसलेम के आदमी अऊ माईलोगनमन ला अपन गुलाम बनाय चाहत हवव। पर का तुमन घलो यहोवा अपन परमेसर के बिरूध पाप के दोसी नइं हवव?
2CH 28:11 अब मोर बात ला सुनव! अपन संगी इसरायलीमन ला वापिस भेज दव, जेला तुमन कैदी के रूप म ले आय हवव, काबरकि यहोवा के भयंकर कोरोध तुम्हर ऊपर हवय।”
2CH 28:12 तब एपरैम के कुछू अगुवा—यहोहानान के बेटा अजरयाह, मसिल्लेमोत के बेटा बेरेकियाह, सल्लूम के बेटा यहिजकियाह, अऊ हदले के बेटा अमासा—येमन ओमन के सामना करिन, जेमन लड़ई ले आवत रिहिन।
2CH 28:13 ओमन कहिन, “तुमन ओ कैदीमन ला इहां झन लानव, नइं तो हमन यहोवा के आघू म दोसी ठहिरबो। का तुम्हर इरादा हमर पाप अऊ दोस ला अऊ बढ़ाय के हवय? काबरकि हमर दोस पहिले ले ही अब्बड़ हवय, अऊ ओकर भयंकर कोरोध इसरायल ऊपर हवय।”
2CH 28:14 एकरसेति सैनिकमन, करमचारी अऊ जम्मो सभा के आघू म कैदीमन ला अऊ लूट के सामान ला दे दीन।
2CH 28:15 जेमन के नांव लिखके निरदेस दिये गीस, ओमन कैदीमन ला ले लीन, अऊ जेमन नंगरा रिहिन ओ जम्मो ला ओमन लूट म के कपड़ा ला पहिराईन। ओमन ला कपड़ा अऊ चप्पल, खाना-पीना अऊ चंगा करे के मलहम दिये गीस। ओ जम्मो, जेमन कमजोर रिहिन, ओमन ला गदहा म बईठाईन। ये किसम ले ओमन अपन संगी इसरायलीमन ला वापिस यरीहो, खजूर के सहर म ले गीन, अऊ सामरिया लहुंट आईन।
2CH 28:16 ओही बेरा, राजा आहाज ह अस्सूर के राजामन ले मदद मांगिस।
2CH 28:17 एदोमीमन फेर आईन अऊ यहूदा ऊपर हमला करिन अऊ मनखेमन ला कैदी बनाके ले गीन,
2CH 28:18 जबकि पलिस्तीमन खाल्हे कोति के सहरमन म अऊ यहूदा के नेगेव म हमला करिन। ओमन बेत-सेमेस, अय्यालोन अऊ गदेरोत, संग म सोको, तिमना अऊ गिमजो ऊपर ओमन के चारों कोति के गांवमन सहित कब्जा कर लीन।
2CH 28:19 यहोवा ह इसरायल के राजा आहाज के कारन यहूदा ला दीन-हीन कर दीस, काबरकि ओह यहूदा म दुस्टता ला बढ़ावा देय रिहिस अऊ यहोवा के बिरूध सबले जादा बिसवासघात करे रिहिस।
2CH 28:20 अस्सूर के राजा तिगलत-पिलेसेर ह ओकर करा आईस, पर ओह ओला मदद देय के बदले ओकर बर परेसानी खड़े करिस।
2CH 28:21 आहाज ह यहोवा के मंदिर अऊ राजमहल अऊ करमचारीमन ले कुछू चीजमन ला लीस अऊ ओ चीजमन ला अस्सूर के राजा ला भेंट म दीस, पर येकर ले ओला कोनो फायदा नइं होईस।
2CH 28:22 अपन मुसीबत के ये बेरा म, राजा आहाज ह यहोवा बर अऊ बिसवासघाती हो गीस।
2CH 28:23 ओह दमिस्क के देवतामन ला बलिदान चघाईस, जऊन मन ओला हराय रिहिन; काबरकि ओह सोचिस, “जब अराम के राजामन के देवतामन ओमन के मदद करे हवंय, एकरसेति मेंह ओमन ला बलिदान चघाहूं, त ओमन मोर घलो मदद करहीं।” पर ओमन ओकर अऊ जम्मो इसरायल के पतन के कारन बनिन।
2CH 28:24 आहाज ह परमेसर के मंदिर के सामान ला संकेलिस अऊ ओमन ला कुटा-कुटा करके काट दीस। ओह यहोवा के मंदिर के कपाटमन ला बंद करवा दीस अऊ यरूसलेम के हर एक गली के कोना म बेदी बनवाईस।
2CH 28:25 यहूदा के हर एक नगर म, ओह आने देवतामन ला बलिदान चघाय बर ऊंच जगहमन ला बनाईस अऊ यहोवा, अपन पुरखामन के परमेसर के कोरोध ला भड़काईस।
2CH 28:26 ओकर राज के आने घटनामन अऊ ओकर जम्मो चालचलन, सुरू ले आखिरी तक, यहूदा अऊ इसरायल के राजामन के किताब म लिखे गे हवंय।
2CH 28:27 आहाज ह अपन पुरखामन संग हमेसा बर सुत गीस अऊ ओला यरूसलेम सहर म माटी दिये गीस, पर ओला इसरायल के राजामन के कबर म नइं रखे गीस। अऊ ओकर बेटा हिजकियाह ह ओकर जगह म राजा बनिस।
2CH 29:1 हिजकियाह ह पच्चीस साल के रिहिस, जब ओह राजा बनिस अऊ ओह यरूसलेम म उनतीस साल तक राज करिस। ओकर दाई के नांव अबियाह रिहिस, जऊन ह जकरयाह के बेटी रिहिस।
2CH 29:2 हिजकियाह ह ओही काम करिस, जऊन ह यहोवा के नजर म सही रिहिस, जइसे कि ओकर पुरखा दाऊद ह करे रिहिस।
2CH 29:3 अपन सासनकाल के पहिला बछर के पहिला महिना म, ओह यहोवा के मंदिर के कपाटमन ला खोल दीस अऊ ओमन के मरम्मत करवाईस।
2CH 29:4 ओह पुरोहित अऊ लेवीमन ला लेके, ओमन ला पूरब कोति चऊक म संकेलिस
2CH 29:5 अऊ कहिस: “हे लेवीमन! मोर बात ला सुनव! अब अपनआप ला पबितर करव अऊ यहोवा, अपन पुरखामन के परमेसर के मंदिर ला पबितर करव। जम्मो असुधता ला पबितर-स्थान ले हटावव।
2CH 29:6 हमर दाई-ददामन बिसवासघाती रिहिन; ओमन यहोवा हमर परमेसर के नजर म बुरई करिन अऊ ओला तियाग दीन। ओमन यहोवा के निवास ले अपन मुहूं फेर लीन अऊ ओला अपन पीठ देखा दीन।
2CH 29:7 ओमन मंडप के कपाटमन ला घलो बंद कर दीन अऊ दीयामन ला बुता दीन। ओमन इसरायल के परमेसर बर पबितर-स्थान म न तो धूप जलाईन अऊ न ही कोनो किसम के होम-बलिदान चघाईन।
2CH 29:8 एकरसेति यहोवा के कोरोध ह यहूदा अऊ यरूसलेम म भड़के हवय; ओह ओमन ला डर अऊ आतंक अऊ अपमान के चीज बना दे हवय, जइसन कि तुमन खुद अपन आंखी ले देख सकत हव।
2CH 29:9 एकर कारन हमर ददामन तलवार ले मारे गे हवंय अऊ हमर बेटा अऊ बेटी अऊ हमर घरवालीमन बंधुवई म चल दीन।
2CH 29:10 अब मेंह यहोवा, इसरायल के परमेसर संग एक करार करे के इरादा करत हंव, ताकि ओकर भयंकर कोरोध ह हमर ऊपर ले दूर हो जावय।
2CH 29:11 हे मोर बेटामन, अब लापरवाही झन करव, काबरकि यहोवा ह तुमन ला अपन आघू म खड़े होय बर अऊ ओकर सेवा करे बर, अऊ ओकर आघू म सेवा करे अऊ धूप जलाय बर चुने हवय।”
2CH 29:12 तब ये लेवीमन बुता करे लगिन: कहातीमन ले: अमासै के बेटा महत अऊ अजरयाह के बेटा योएल; मरारीमन ले: अब्दी के बेटा कीस अऊ यहल्लेलेल के बेटा अजरयाह; गेरसोनीमन ले: जिम्मा के बेटा योआह अऊ योआह के बेटा एदेन;
2CH 29:13 एलीसापान के संतानमन ले: सिमरी अऊ येइल; आसाप के संतानमन ले: जकरयाह अऊ मतनयाह;
2CH 29:14 हेमान के संतानमन ले: यहीएल अऊ सिमी; यदूतून के संतानमन ले: समायाह अऊ उजीएल।
2CH 29:15 जब ओमन अपन संगी लेवीमन ला संकेल लीन अऊ अपनआप ला पबितर कर लीन, तब ओमन यहोवा के बचन ला मानके मंदिर ला सुध करे बर गीन, जइसन कि राजा ह हुकूम दे रिहिस।
2CH 29:16 पुरोहितमन यहोवा के पबितर-स्थान ला सुध करे बर गीन। ओमन यहोवा के मंदिर म जऊन भी असुध चीज पाईन, ओ जम्मो ला यहोवा के मंदिर के अंगना म बाहिर निकालिन। लेवीमन येला लेके किदरोन घाटी करा गीन।
2CH 29:17 ओमन पहिला महिना के पहिला दिन संस्कार करे के सुरू करिन, अऊ ओही महिना के आठवां दिन ओमन यहोवा के मंडप म पहुंच गीन। ओमन अऊ आठ दिन यहोवा के मंदिर के संस्कार करिन अऊ ये काम ला ओमन पहिला महिना के सोलहवां दिन पूरा करिन।
2CH 29:18 तब ओमन राजा हिजकियाह करा गीन अऊ ये खबर दीन: “हमन यहोवा के पूरा मंदिर ला सुध कर ले हन—होम-बलिदान के बेदी के संग ओकर जम्मो बरतन, अऊ पबितर रोटी ला रखे बर मेज के संग ओकर जम्मो बरतन ला।
2CH 29:19 हमन ओ जम्मो सामान ला तियार करके संस्कार करे हवन, जेमन ला आहाज ह जब ओह राजा रिहिस, त बिसवासघाती होके निकाल दे रिहिस। ओ चीजमन अब यहोवा के बेदी के आघू म हवंय।”
2CH 29:20 दूसर दिन बड़े बिहनियां राजा हिजकियाह ह सहर के करमचारीमन ला एक जगह म संकेलिस अऊ यहोवा के मंदिर म गीस।
2CH 29:21 ओमन राज बर, पबितर-स्थान बर अऊ यहूदा बर पाप-बलिदान के रूप म सात ठन बईला, सात ठन मेढ़ा, सात ठन मेढ़ा-पीला अऊ सात ठन बोकरा लानिन। राजा ह हारून के संतान, पुरोहितमन ला हुकूम दीस कि ओमन येमन ला यहोवा के बेदी म चघावंय।
2CH 29:22 तब ओमन बईलामन ला बलि करिन, अऊ पुरोहितमन खून ला लेके बेदी म छिंच दीन; तब ओमन मेढ़ामन ला बलि करिन अऊ खून ला बेदी म छिंच दीन। तब ओमन मेढ़ा-पीलामन ला बलि करिन अऊ खून ला बेदी म छिंच दीन।
2CH 29:23 पाप-बलिदान बर बोकरामन ला राजा अऊ सभा के आघू म लाने गीस, अऊ ओमन अपन हांथ ओ बोकरामन ऊपर रखिन।
2CH 29:24 तब पुरोहितमन बोकरामन ला बलि करिन अऊ बेदी म खून ला जम्मो इसरायल के पछताप बर पाप-बलिदान के रूप म चघा दीन, काबरकि राजा हिजकियाह ह जम्मो इसरायल बर होम-बलिदान अऊ पाप-बलिदान के हुकूम देय रिहिस।
2CH 29:25 ओह यहोवा के मंदिर म लेवीमन ला मंजीरा, बीना अऊ सितार के संग दाऊद अऊ राजा के अगम-दरसी गाद अऊ अगमजानी नातान दुवारा बताय बिधि के मुताबिक तैनात करिस; येकर हुकूम यहोवा के दुवारा अगमजानीमन के जरिये देय गे रिहिस।
2CH 29:26 तब लेवीमन दाऊद के बताय बाजामन ला अऊ पुरोहितमन अपन तुरहीमन ला लेके तियार खड़े हो गीन।
2CH 29:27 हिजकियाह ह बेदी म होम-बलिदान चघाय के हुकूम दीस। जब बलिदान चघाय के काम सुरू होईस, त तुरही अऊ इसरायल के राजा दाऊद के बाजामन संग, यहोवा बर गाना गवई घलो सुरू होईस।
2CH 29:28 जम्मो सभा के मन अराधना म झुक गीन, जबकि संगीतकारमन बजाते रिहिन अऊ तुरहीमन बजते रिहिन। ये जम्मो ह तब तक चलते रिहिस, जब तक कि होम-बलिदान चघाय के काम ह पूरा नइं हो गीस।
2CH 29:29 जब बलिदान चघई के काम खतम हो गीस, तब राजा अऊ उहां ओकर संग म जूरे जम्मो मनखेमन माड़ी टेकके अराधना करिन।
2CH 29:30 राजा हिजकियाह अऊ ओकर करमचारीमन लेवीमन ला हुकूम दीन कि ओमन दाऊद अऊ आसाप अगम-दरसी के सबदमन के संग यहोवा के परसंसा करंय। एकरसेति ओमन खुसी के संग भजन गाईन अऊ मुड़ नवाके अराधना करिन।
2CH 29:31 तब हिजकियाह ह कहिस, “तुमन अब अपनआप ला यहोवा ला समरपित कर देय हवव। आवव अऊ बलिदान अऊ धनबाद-बलिदान यहोवा के मंदिर म लानव।” एकरसेति सभा के मनखेमन बलिदान अऊ धनबाद-बलिदान लाईन, अऊ जेमन के मन होईस, ओ जम्मो झन होम-बलिदान लाईन।
2CH 29:32 सभा के दुवारा लाय गे होम-बलिदान म सत्तर ठन बईला, एक सौ मेढ़ा अऊ दू सौ मेढ़ा-पीला रिहिन—ये जम्मो यहोवा के होम-बलिदान बर रिहिन।
2CH 29:33 सुध करे गय पसु, जेमन ला बलिदान के रूप म चघाना रिहिस, ओमन के गनती छै सौ बईला अऊ तीन हजार भेड़ अऊ बोकरामन रिहिन।
2CH 29:34 पर होम-बलिदान के पसुमन के चमड़ी ला निकाले बर उहां बहुंत कम पुरोहितमन रिहिन; एकरसेति ओमन के सगा-संबंधी लेवीमन तब तक ओमन के मदद करिन, जब तक कि काम ह पूरा नइं हो गीस अऊ जब तक कि आने पुरोहितमन के संस्कार नइं करे गीस, काबरकि लेवीमन अपनआप ला पुरोहितमन के तुलना म जादा मन लगाके संस्कार करत रिहिन।
2CH 29:35 उहां अब्बड़ अकन होम-बलिदान रिहिस, संग म मेल-बलिदान के चरबी अऊ होम-बलिदान के संग पेय-बलिदान घलो रिहिस। ये किसम ले यहोवा के मंदिर के सेवा ला फेर से स्थापित करे गीस।
2CH 29:36 परमेसर ह अपन मनखेमन बर जऊन कुछू करे रिहिस, ओकर बर राजा हिजकियाह अऊ जम्मो मनखेमन आनंद मनाईन, काबरकि येला बहुंत जल्दी कर लेय गे रिहिस।
2CH 30:1 हिजकियाह ह जम्मो इसरायल अऊ यहूदा म खबर भेजिस अऊ एपरैम अऊ मनस्से ला घलो नेवता देवत चिट्ठी लिखिस कि तुमन यरूसलेम म यहोवा के मंदिर म आवव अऊ यहोवा, इसरायल के परमेसर के फसह के तिहार मनावव।
2CH 30:2 राजा अऊ ओकर करमचारी अऊ सभा के जम्मो मनखेमन यरूसलेम म दूसर महिना म फसह के तिहार मनाय के फैसला करिन।
2CH 30:3 ओमन ये तिहार ला नियमित रूप म नइं मनाय पाय रिहिन, काबरकि परयाप्त पुरोहितमन अपन संस्कार नइं करे रिहिन अऊ मनखेमन यरूसलेम म संकलाय नइं रिहिन।
2CH 30:4 ये योजना ह राजा अऊ जम्मो सभा ला सही लगिस।
2CH 30:5 ओमन पूरा इसरायल म बेरसेबा ले लेके दान तक एक घोसना करे के फैसला करिन कि मनखेमन यरूसलेम आवंय अऊ यहोवा, इसरायल के परमेसर के फसह के तिहार मनावंय। काबरकि ओमन अतेक बड़े संखिया म येला नइं मनाय रिहिन, जइसे कि किताब म लिखे गे रिहिस।
2CH 30:6 राजा के हुकूम ले, दूतमन राजा अऊ ओकर अधिकारीमन के चिट्ठी लेके इसरायल अऊ यहूदा के पूरा देस म गीन, अऊ चिट्ठी म ये लिखाय रहय: “हे इसरायल के मनखेमन, यहोवा करा लहुंट आवव, जऊन ह अब्राहम, इसहाक अऊ इसरायल के परमेसर अय, ताकि ओह तुम्हर करा लहुंट आवय, जेमन बचे हवव, जेमन अस्सूर के राजामन के हांथ ले बांच गे हवव।
2CH 30:7 अपन दाई-ददा अऊ अपन संगी इसरायलीमन असन झन बनव, जेमन यहोवा, अपन पुरखामन के परमेसर बर बिसवासघाती हो गीन, जेकर कारन ओह ओमन ला आतंक के चीज बना दीस, जइसे कि तुमन देखत हवव।
2CH 30:8 अपन पुरखामन असन हठी झन बनव; यहोवा के अधीन होवव। ओकर पबितर-स्थान म आवव, जेला ओह हमेसा बर संस्कार करे हवय। यहोवा अपन परमेसर के सेवा करव, ताकि ओकर भयंकर कोरोध ह तुम्हर ले दूरिहा हो जावय।
2CH 30:9 यदि तुमन यहोवा करा लहुंट आहू, त तुम्हर संगी इसरायली अऊ तुम्हर लइकामन ऊपर ओमन के कैद करइया दुवारा दया देखाय जाही अऊ ओमन ये देस म लहुंट आहीं, काबरकि यहोवा तुम्हर परमेसर ह अनुग्रह करइया अऊ दयालु अय। यदि तुमन ओकर करा लहुंट आहू, त ओह तुम्हर ले अपन मुहूं नइं मोड़य।”
2CH 30:10 दूतमन एपरैम अऊ मनस्से म नगर-नगर ले होवत जबूलून के इलाका तक गीन, पर मनखेमन ओमन के अपमान अऊ ठट्ठा करिन।
2CH 30:11 तभो ले, आसेर, मनस्से अऊ जबूलून के कुछू मनखेमन अपनआप ला नम्र करके यरूसलेम चले गीन।
2CH 30:12 यहूदा म घलो परमेसर के हांथ मनखेमन ऊपर रिहिस कि ओमन यहोवा के बचन म चलत राजा अऊ ओकर अधिकारीमन के हुकूम ला पूरा करे बर एक मन हो गीन।
2CH 30:13 दूसर महिना म अखमीरी रोटी के तिहार मनाय बर यरूसलेम म मनखेमन के एक बड़े भीड़ जूर गीस।
2CH 30:14 ओमन यरूसलेम म बेदीमन ला हटा दीन अऊ धूप के बेदीमन ला हटाके ओमन ला किदरोन घाटी म फेंक दीन।
2CH 30:15 ओमन दूसर महिना के चौदहवां दिन फसह के मेढ़ा-पीला बलिदान करिन। पुरोहित अऊ लेवीमन सरमिंदा होईन अऊ ओमन अपनआप ला पबितर करिन अऊ यहोवा के मंदिर म होम-बलिदान लाईन।
2CH 30:16 तब ओमन परमेसर के जन मूसा के कानून के मुताबिक अपन नियमित जगह ला लीन। पुरोहितमन लेवीमन के दुवारा देय गे खून ला बेदी म छिंच दीन।
2CH 30:17 काबरकि भीड़ म बहुंते अइसे मनखे रिहिन, जेमन अपनआप ला पबितर नइं करे रिहिन, तेकर खातिर लेवीमन ला ओ जम्मो मनखेमन बर फसह के मेढ़ा-पीलामन ला मारे ला पड़िस, जेमन बिधि के मुताबिक सुध नइं होय रिहिन अऊ अपन मेढ़ा-पीलामन ला यहोवा बर संस्कार नइं कर सके रिहिन।
2CH 30:18 हालाकि एपरैम, मनस्से, इस्साकार अऊ जबूलून ले आय बहुंत अकन मनखेमन अपनआप ला सुध नइं करे रिहिन, तभो ले कानून म लिखे बात के उल्टा ओमन फसह ला खा लीन। पर हिजकियाह ह ये कहिके ओमन बर पराथना करिस, “यहोवा, जऊन ह बने अय, जम्मो ला छेमा करय
2CH 30:19 जऊन ह ओमन के मन ला अपन परमेसर के खोज म लगाथे—यहोवा, ओमन के पुरखामन के परमेसर—भले ही ओमन पबितर-स्थान के नियम के मुताबिक सुध नइं अंय।”
2CH 30:20 अऊ यहोवा ह हिजकियाह के पराथना ला सुनिस अऊ मनखेमन ला चंगा करिस।
2CH 30:21 जऊन इसरायलीमन ओ समय यरूसलेम म रिहिन, ओमन सात दिन ले अखमीरी रोटी के तिहार अब्बड़ आनंद के संग मनाईन, जबकि लेवी अऊ पुरोहितमन हर दिन बाजामन के अवाज के संग यहोवा के परसंसा करत रिहिन।
2CH 30:22 हिजकियाह ह ओ जम्मो लेवीमन ला उत्साह के बात कहिस, जेमन यहोवा के सेवा म बने समझदारी देखाईन। काबरकि सात दिन तक ओमन अपन ठहिराय भाग ला खाईन अऊ मेल-बलिदान चघाईन अऊ यहोवा, अपन पुरखामन के परमेसर के परसंसा करिन।
2CH 30:23 तब सभा के जम्मो मनखेमन तिहार ला अऊ सात दिन तक मनाय बर सहमत हो गीन; एकरसेति अऊ सात दिन तक ओमन आनंद सहित तिहार मनाईन।
2CH 30:24 यहूदा के राजा हिजकियाह ह सभा बर एक हजार बईला अऊ सात हजार भेड़ अऊ बकरी दीस, अऊ अधिकारीमन ओमन ला एक हजार बईला अऊ दस हजार भेड़ अऊ बकरी दीन। अब्बड़ संखिया म पुरोहितमन अपनआप ला पबितर करिन।
2CH 30:25 यहूदा के जम्मो सभा ह पुरोहित अऊ लेवीमन संग आनंद मनाईस अऊ ओमन घलो जेमन इसरायल ले जमा होय रिहिन, ओमा ओ परदेसीमन घलो रिहिन, जेमन इसरायल ले आय रिहिन अऊ ओमन घलो जेमन यहूदा म रहत रिहिन।
2CH 30:26 यरूसलेम म बहुंत आनंद मनाय गीस, काबरकि इसरायल के राजा दाऊद के बेटा सुलेमान के दिन ले यरूसलेम म अइसन उत्सव नइं मनाय गे रिहिस।
2CH 30:27 पुरोहित अऊ लेवीमन मनखेमन ला आसीरबाद देय बर ठाढ़ हो गीन, अऊ परमेसर ह ओमन के सुनिस, काबरकि ओमन के पराथना ह स्वरग म, ओकर पबितर निवास म हबर गीस।
2CH 31:1 जब ये सबो काम खतम हो गीस, तब जऊन इसरायलीमन उहां रिहिन, ओमन यहूदा के सहरमन म गीन अऊ पबितर पथरामन ला कुटा-कुटा कर दीन अऊ असेरा देवी के खंभामन ला काटके गिरा दीन। ओमन पूरा यहूदा अऊ बिनयामीन अऊ एपरैम अऊ मनस्से के ऊंच जगह अऊ बेदीमन ला नास कर दीन। ओ सब ला नास करे के बाद, इसरायलीमन अपन-अपन सहर अऊ अपन जमीन-जायजाद म लहुंट गीन।
2CH 31:2 राजा हिजकियाह ह पुरोहित अऊ लेवीमन ला दल म बांट दीस—ओमा के हर एक ला ओमन के बुता के मुताबिक पुरोहित या लेवी के रूप म—ताकि ओमन होम-बलिदान अऊ मेल-बलिदान चघावंय, सेवा करंय, धनबाद देवंय अऊ यहोवा के निवास के दुवारमन म परसंसा के गीत गावंय।
2CH 31:3 राजा ह बिहनियां अऊ संझा के होम-बलिदान अऊ बिसराम दिन के होम-बलिदान, नवां चंदा म अऊ यहोवा के कानून म लिखके ठहिराय तिहारमन बर अपन खुद के धन ले दान करिस।
2CH 31:4 ओह यरूसलेम म रहइया मनखेमन ला हुकूम दीस कि ओमन पुरोहित अऊ लेवीमन ला ओमन के भाग देवंय, ताकि ओमन अपनआप ला यहोवा के कानून बर अरपित कर सकंय।
2CH 31:5 जइसे ही ये हुकूम दिये गीस, इसरायलीमन उदारता ले अपन अनाज के पहिला फर, नवां अंगूर के मंद, जैतून तेल अऊ मंधरस अऊ खेत के जम्मो किसम के ऊपज ला दीन। ओमन अब्बड़ मात्रा म, सबो चीज के दसमांस ला लेके आईन।
2CH 31:6 यहूदा के नगरमन म रहइया इसरायल अऊ यहूदा के मनखेमन घलो अपन गाय-बईला अऊ भेड़-बकरीमन के झुंड ले दसमांस अऊ यहोवा ओमन के परमेसर ला समरपित पबितर चीजमन के दसमांस लेके आईन, अऊ ओला कुढ़ोके ढेर कर दीन।
2CH 31:7 ओमन तीसर महिना म अइसने करे के सुरू करिन अऊ सातवां महिना म खतम करिन।
2CH 31:8 जब हिजकियाह अऊ ओकर करमचारीमन आके कुढ़ा के ये ढेर ला देखिन, तब ओमन यहोवा के परसंसा करिन अऊ इसरायल के मनखेमन ला आसीस दीन।
2CH 31:9 हिजकियाह ह पुरोहित अऊ लेवीमन ले कुढ़ा के बारे म पुछिस;
2CH 31:10 सादोक के परिवार ले, अजरयाह मुखिया पुरोहित ह जबाब दीस, “जब ले मनखेमन यहोवा के मंदिर म अपन भेंट ला देय के सुरू करे हवंय, तब ले हमर करा खाय बर परयाप्त जेवन हवय अऊ बहुंत बांच घलो जावत हे, काबरकि यहोवा ह अपन मनखेमन ला आसीस देय हवय, अऊ अब्बड़ अकन बचे घलो हवय।”
2CH 31:11 हिजकियाह ह यहोवा के मंदिर म भंडारघरमन ला तियार करे के हुकूम दीस, अऊ ये काम ला करे गीस।
2CH 31:12 तब ओमन बिसवास सहित भेंट, दसमांस अऊ समरपित भेंट लाईन। एक लेवी कोनन्याह ह ये चीजमन के अधिकारी रिहिस अऊ ओकर बाद ओकर भाई सिमी ह अधिकारी रिहिस।
2CH 31:13 यहीएल, अजजियाह, नहत, असाहेल, यरीमोत, योजाबाद, एलीएल, यिसमाकियाह, महत अऊ बनायाह—येमन कोनन्याह अऊ ओकर भाई सिमी के सहायक रिहिन। ये जम्मो झन राजा हिजकियाह अऊ परमेसर के मंदिर के अधिकारी अजरयाह के हुकूम ले सेवा करत रिहिन।
2CH 31:14 पूरब दुवार के रखवार यिमना लेवी के बेटा कोरे ऊपर परमेसर ला देय गे स्वेच्छा-बलिदान के जबाबदारी रिहिस, जऊन ह यहोवा ला देय गे दान अऊ पबितर भेंट ला बांटय।
2CH 31:15 एदेन, मिनयामीन, येहोसू, समायाह, अमरयाह अऊ सेकनयाह, पुरोहितमन के नगरमन म बिसवास के संग ओकर मदद करिन, अऊ ओमन के संगी पुरोहितमन ला ओमन के दल के मुताबिक दान अऊ भेंट ला बांट दीन, डोकरा अऊ जवान जम्मो ला एक समान बांटिन।
2CH 31:16 येकर अलावा, ओमन तीन साल या ओकर ले जादा उमर के ओ पुरूसमन ला बांटिन जेमन के नांव बंसावली म लिखे गे रिहिस—ओ जम्मो, जेमन अपन जबाबदारी अऊ अपन दल के मुताबिक, अपन अलग-अलग किसम के रोज के बुता बर यहोवा के मंदिर म प्रवेस करहीं।
2CH 31:17 अऊ ओमन पुरोहितमन ला ओमन के परिवार के बंसावली के लेखा-जोखा के मुताबिक अऊ अइसने ही बीस साल या ओकर ले जादा उमर के लेवीमन ला, ओमन के जिम्मेदारी अऊ दल के मुताबिक बांट दीन।
2CH 31:18 ओमन जम्मो छोटे लइका, घरवाली, अऊ ओ पूरा समाज के बेटा-बेटीमन ला सामिल करिन, जऊन मन के नांव ये बंसावली के लेखा-जोखा म लिखाय रिहिस। काबरकि ओमन अपनआप ला पबितर करे म बिसवासयोग्य रिहिन।
2CH 31:19 जहां तक हारून के संतान, पुरोहितमन के बात ए, जेमन अपन नगरमन के चारों कोति चराईवाले मैदान म या कोनो आने नगर म रहत रिहिन, ओमन के पुरूसमन ला ओमन के नांव के मुताबिक ठहिराय गीस, ताकि ओमन अपन बीच म ले हर एक पुरूस ला अऊ ओ जम्मो ला, जेमन के नांव लेवीमन के बंसावली म लिखे गे रिहिस, ओमन के भाग ला बांट देवंय।
2CH 31:20 हिजकियाह ह ये काम ला पूरा यहूदा प्रदेस म करिस, ओह ओ काम करिस, जऊन ह यहोवा ओकर परमेसर के नजर म बने अऊ सही अऊ बिसवास के लईक रिहिस।
2CH 31:21 हर ओ काम, जेला ओह परमेसर के मंदिर के सेवा म अऊ कानून अऊ हुकूम के पालन म करिस, ओह हमेसा परमेसर के खोज म सबो काम ला पूरा मन से करिस। अऊ ये किसम ले ओह उन्नति करत गीस।
2CH 32:1 हिजकियाह के दुवारा ये जम्मो काम ला बिसवासयोग्यता से पूरा करे के बाद, अस्सूर के राजा सनहेरीब ह आके यहूदा ऊपर हमला कर दीस। ओह गढ़वाला सहरमन ला घेर लीस, ये सोचके कि ये सहरमन ला ओह अपन बर जीत लीही।
2CH 32:2 जब हिजकियाह ह देखिस कि सनहेरीब ह आय हवय अऊ ओह यरूसलेम के बिरूध लड़ई करे के इरादा रखथे,
2CH 32:3 त हिजकियाह ह अपन करमचारी अऊ सेना के करमचारीमन ले सलाह लीस कि सहर के बाहिर पानी के सोता ला रोके जावय, अऊ ओमन ओकर मदद करिन।
2CH 32:4 ओमन मनखेमन के एक बड़े दल ला संकेलिन, जऊन मन देस म होके बहत जम्मो सोता अऊ झरनामन ला रोक दीन। ओमन कहिन, “अस्सूर के राजा ह काबर आवय अऊ ओला अब्बड़ अकन पानी मिलय?”
2CH 32:5 तब हिजकियाह ह दीवार के जम्मो टूटे भाग के मरम्मत अऊ येकर ऊपर मीनारमन ला बनाय के कठिन बुता ला करिस। ओह ओकर बाहिर म एक अऊ दीवार बनाईस अऊ दाऊद के सहर के छतमन ला मजबूत करिस। ओह अब्बड़ संखिया म हथियार अऊ ढालमन ला घलो बनाईस।
2CH 32:6 ओह मनखेमन ऊपर सेना के अधिकारीमन ला ठहिरा दीस अऊ ओमन ला अपन सामने चऊक म सहर के दुवार करा संकेलिस अऊ ये बात कहिके ओमन ला उत्साहित करिस:
2CH 32:7 “मजबूत अऊ साहसी बनव। अस्सूर के राजा अऊ ओकर बड़े सेना के कारन झन डरव अऊ हतास झन होवव, काबरकि ओकर ले बड़े ताकत हमर संग हवय।
2CH 32:8 ओकर संग सिरिप हाड़-मांस के हांथ हवय, पर हमर संग यहोवा हमर परमेसर हमर मदद करे बर अऊ हमर लड़ई लड़े बर हवय।” अऊ यहूदा के राजा हिजकियाह के बात ले मनखेमन के भरोसा ह बढ़िस।
2CH 32:9 बाद म, जब अस्सूर के राजा सनहेरीब अऊ ओकर जम्मो सेनामन लाकीस नगर ला घेरे रिहिन, तब ओह अपन अधिकारीमन ला यहूदा के राजा हिजकियाह अऊ उहां रहइया जम्मो यहूदा के मनखेमन करा ये संदेस के संग यरूसलेम भेजिस:
2CH 32:10 “अस्सूर के राजा सनहेरीब ह ये कहत हे: तुमन का बात के ऊपर भरोसा करके यरूसलेम के भीतर म घेराय बईठे हवव?
2CH 32:11 जब हिजकियाह ह कहिथे, ‘यहोवा हमर परमेसर ह हमन ला अस्सूर के राजा के हांथ ले बचाही,’ त ओह तुमन ला बहकावत हे, ताकि तुमन भूख अऊ पीयास म मर जावव।
2CH 32:12 का हिजकियाह ह खुद देवतामन के ये ऊंच जगह अऊ बेदीमन ला यहूदा अऊ यरूसलेम ले ये कहिके नइं हटा दीस, ‘तुमन एकेच बेदी के आघू म अराधना करव अऊ ओमा बलिदान चघावव’?
2CH 32:13 “का तुमन नइं जानव कि में अऊ मोर ले पहिले के राजामन आने देसमन के जम्मो मनखेमन संग का करे हवंय? का ओ जातिमन के देवतामन कभू अपन देस ला मोर हांथ ले छुड़ाय पाईन?
2CH 32:14 ओ जातिमन के जम्मो देवता, जेमन ला मोर ले पहिले के राजामन नास कर दीन, ओमा के कोन ह अपन मनखेमन ला मोर ले बचा सकिस? तब तुम्हर देवता ह तुमन ला मोर हांथ ले कइसे छुड़ा सकथे?
2CH 32:15 अब हिजकियाह ह तुमन ला धोखा झन देवय, अऊ तुमन ला अइसन झन बहकावय। ओकर ऊपर बिसवास झन करव, काबरकि कोनो भी देस या राज के देवता ह अपन मनखेमन ला मोर हांथ ले या मोर पुरखामन के हांथ ले नइं छुड़ा सके हवय। त फेर तुम्हर देवता ह तुमन ला मोर हांथ ले कइसे छुड़ाही!”
2CH 32:16 सनहेरीब के अधिकारीमन यहोवा परमेसर के बिरूध अऊ ओकर सेवक हिजकियाह के बिरूध अऊ बात कहिन।
2CH 32:17 राजा ह घलो यहोवा, इसरायल के परमेसर के ठट्ठा करत अऊ ओकर बिरूध ये कहत चिट्ठी लिखिस: “जइसे कि आने देसमन के मनखेमन के देवतामन अपन मनखेमन ला मोर हांथ ले नइं बचाईन, वइसे ही हिजकियाह के देवता ह घलो ओकर मनखेमन ला मोर हांथ ले नइं बचा सकही।”
2CH 32:18 तब ओमन यरूसलेम के मनखेमन ला जेमन दीवार ऊपर रिहिन, इबरानी म ऊंचहा अवाज म कहिन, ताकि ओमन आतंकित हो जावंय अऊ डर जावंय, अऊ सहर म सनहेरीब के अधिकारीमन कब्जा कर लेवंय।
2CH 32:19 ओमन यरूसलेम के परमेसर के बारे म वइसे कहिन, जइसे ओमन संसार के आने मनखेमन के देवतामन के बारे म कहे रिहिन—जेमन मनखे के हांथ के काम अंय।
2CH 32:20 राजा हिजकियाह अऊ आमोस के बेटा अगमजानी यसायाह ह ये बारे म स्वरग के परमेसर ले चिल्लाके पराथना करिन।
2CH 32:21 अऊ यहोवा ह एक स्वरगदूत ला भेजिस, जऊन ह अस्सूर के राजा के डेरा म जम्मो सैनिक अऊ सेनापति अऊ अधिकारीमन के पूरा सतियानास कर दीस। तब सनहेरीब ह कलंकित होके अपन देस चल दीस। अऊ जब ओह अपन देवता के मंदिर म गीस, तब ओकर कुछू बेटामन, जेमन ओकर खुद के मांस अऊ लहू रिहिन, ओला तलवार ले मार डालिन।
2CH 32:22 ये किसम ले यहोवा ह हिजकियाह अऊ यरूसलेम के मनखेमन ला अस्सूर के राजा सनहेरीब के हांथ ले अऊ जम्मो आने मन के हांथ ले बचाईस। यहोवा ह हर कोति ले ओमन के खियाल रखिस।
2CH 32:23 बहुंत मनखेमन यरूसलेम म यहोवा बर भेंट अऊ यहूदा के राजा हिजकियाह बर कीमती उपहार लाईन। तब ले जम्मो जाति के मनखेमन हिजकियाह के बहुंत आदर करे लगिन।
2CH 32:24 ओ समय म, हिजकियाह ह बेमार हो गीस अऊ मरइयाच रिहिस। ओह यहोवा ले पराथना करिस, अऊ यहोवा ह ओला जबाब दीस अऊ ओला एक अद्भूत चिनहां दीस।
2CH 32:25 पर हिजकियाह के हिरदय ह घमंड ले भर गीस, अऊ ओह ओकर ऊपर करे गे दया के मुताबिक काम नइं करिस; एकरसेति यहोवा के कोरोध ह ओकर ऊपर अऊ यहूदा अऊ यरूसलेम ऊपर भड़किस।
2CH 32:26 तब हिजकियाह ह अपन हिरदय के घमंड ले पछताप करिस, अऊ वइसने ही यरूसलेम के मनखेमन घलो पछताप करिन; एकरसेति यहोवा के कोप ह ओमन के ऊपर हिजकियाह के दिन म नइं आईस।
2CH 32:27 हिजकियाह करा अब्बड़ अकन धन रिहिस अऊ ओकर मान-सम्मान रिहिस, अऊ ओह अपन सोन अऊ चांदी बर अऊ अपन कीमती पथरा, मसाला, ढाल अऊ जम्मो किसम के कीमती सामान बर भंडार बनवाईस।
2CH 32:28 ओह अनाज के फसल, नवां अंगूर के मंद अऊ जैतून तेल ला रखे बर भवन घलो बनवाईस; अऊ ओह आने-आने किसम के पसुमन बर कोठा, अऊ भेड़-बकरीमन बर बाड़ा बनवाईस।
2CH 32:29 ओह गांवमन ला बनाईस, अऊ अब्बड़ अकन भेड़-बकरी अऊ गाय-बईलामन ला संकेलिस, काबरकि परमेसर ह ओला अब्बड़ अकन संपत्ति देय रिहिस।
2CH 32:30 येह हिजकियाह ही रिहिस, जऊन ह गीहोन सोता के ऊपर के नाली ला बंद कर दीस अऊ दाऊद के सहर के पछिम कोति ओ पानी के बहाव ला कर दीस। ओह जऊन कुछू भी करिस, ओमा ओला सफलता मिलिस।
2CH 32:31 पर जब बेबिलोन के सासन करइयामन ओकर ले ओ देस म होय अद्भूत चिनहां के बारे म पुछे बर दूतमन ला भेजिन, तब परमेसर ह ओला परखे बर अऊ जऊन कुछू ओकर हिरदय म रिहिस, ओ सबो ला जाने बर ओला छोंड़ दीस।
2CH 32:32 हिजकियाह के राज के आने घटनामन अऊ ओकर भक्ति के काम आमोस के बेटा अगमजानी यसायाह के दरसन म यहूदा अऊ इसरायल के राजामन के किताब म लिखे गे हवय।
2CH 32:33 हिजकियाह ह अपन पुरखामन के संग हमेसा बर सुत गीस अऊ ओला ओ पहाड़ी म माटी देय गीस, जिहां दाऊद के संतानमन के कबरमन हवंय। जब ओह मरिस, त जम्मो यहूदा अऊ यरूसलेम के मनखेमन ओकर आदर करिन। अऊ ओकर बेटा मनस्से ह ओकर जगह म राजा बनिस।
2CH 33:1 मनस्से ह बारह साल के रिहिस, जब ओह राजा बनिस, अऊ ओह यरूसलेम म पचपन साल तक राज करिस।
2CH 33:2 ओह यहोवा के नजर म दुस्ट काम करिस, ओह ओ जातिमन के घिनित काममन के पाछू चलिस, जेमन ला यहोवा ह इसरायलीमन के आघू ले भगा दे रिहिस।
2CH 33:3 ओह ओ ऊंचहा जगहमन ला फेर बनाईस, जेमन ला ओकर ददा हिजकियाह ह गिरा दे रिहिस; ओह बाल देवतामन बर बेदीमन ला अऊ असेरा देवी के खंभामन ला बनाईस। ओह जम्मो तारामन के समूह ला दंडवत करके ओमन के अराधना करिस।
2CH 33:4 ओह यहोवा के मंदिर म बेदीमन ला बनाईस, जेकर बारे म यहोवा ह कहे रिहिस, “मोर नांव यरूसलेम म हमेसा बने रहिही।”
2CH 33:5 यहोवा के मंदिर के दूनों अंगना म, ओह जम्मो तारामन के समूह बर बेदीमन ला बनाईस।
2CH 33:6 ओह बेन-हिन्नोम के घाटी म अपन लइकामन ला आगी म बलिदान कर दीस, ओह सकुन-बिचार अऊ जादू-टोना करवाईस, सुभ-असुभ समय ला मानिस, अऊ बईगा अऊ भूत-परेत साधकमन ले सलाह लीस। ओह यहोवा के नजर म बहुंत दुस्ट काम करिस अऊ ओकर कोरोध ला भड़काईस।
2CH 33:7 ओह अपन बनाय मूरती ला लीस अऊ ओला परमेसर के मंदिर म रखिस, जेकर बारे म परमेसर ह दाऊद अऊ ओकर बेटा सुलेमान ला कहे रिहिस, “इसरायल के जम्मो गोत्र म ले, मेंह ये मंदिर अऊ यरूसलेम ला चुने हंव अऊ इहां मेंह अपन नांव ला सदाकाल बर रखहूं।
2CH 33:8 मेंह इसरायलीमन ला ओ देस ले फेर नइं निकालहूं, जेला मेंह तोर पुरखामन ला देय हंव, पर ओमन ला सिरिप ये करना हे कि मूसा के जरिये दिये गय मोर जम्मो कानून, बिधि अऊ नियम के ओमन धियान देके पालन करंय।”
2CH 33:9 पर मनस्से ह यहूदा अऊ यरूसलेम के मनखेमन ला इहां तक भटका दीस, कि ओमन ओ जाति ले घलो जादा दुस्ट काम करिन, जेमन ला यहोवा ह इसरायलीमन के आघू ले नास कर दे रिहिस।
2CH 33:10 यहोवा ह मनस्से अऊ ओकर मनखेमन ले गोठियाईस, पर ओमन धियान नइं दीन।
2CH 33:11 एकरसेति यहोवा ह ओमन के बिरूध अस्सूर के राजा के सेना के सेनापतिमन के दुवारा हमला करवाईस, जेमन मनस्से ला बंदी बना लीन अऊ ओकर नाक म एक नकेल डाल दीन अऊ ओला कांसा के बेड़ी म जकड़के बेबिलोन सहर ले गीन।
2CH 33:12 ये दुख के बेरा, मनस्से ह यहोवा अपन परमेसर ले दया के भीख मांगिस अऊ अपन पुरखामन के परमेसर के आघू म अपनआप ला बहुंत दीन-हीन करिस।
2CH 33:13 अऊ जब ओह यहोवा ले पराथना करिस, त यहोवा ह ओकर बिनती ले पिघल गीस अऊ ओकर पराथना ला सुनिस, अऊ ओह ओला वापिस यरूसलेम अऊ ओकर राज म लहुंटा ले आईस। तब मनस्से ह जानिस कि यहोवा ह परमेसर ए।
2CH 33:14 ओकर बाद ओह दाऊद के सहर के बाहिरी दीवार ला फेर बनाईस, जऊन ह घाटी म गीहोन नाला के पछिम कोति मछरी दुवार तक हवय अऊ ओह ओपेल के पहाड़ी तक घेरा लगा दीस; ओह येला अऊ जादा ऊंच बनाईस। ओह यहूदा के जम्मो गढ़वाले सहर म सेना के सेनापतिमन ला ठहिराईस।
2CH 33:15 ओह पराया देवतामन ला अऊ यहोवा के मंदिर ले मूरती ला निकाल दीस, अऊ संग म ओ जम्मो बेदी, जेमन ला ओह मंदिर के पहाड़ी अऊ यरूसलेम म बनाय रिहिस, ओ जम्मो ला घलो सहर के बाहिर फेंक दीस।
2CH 33:16 तब ओह यहोवा के बेदी ला फेर स्थापित करिस अऊ येमा मेल-बलिदान अऊ धनबाद-बलिदान चघाईस अऊ यहूदीमन ला यहोवा इसरायल के परमेसर के सेवा करे बर कहिस।
2CH 33:17 तभो ले मनखेमन ऊंच जगहमन म बलिदान चघाना जारी रखिन, पर सिरिप यहोवा अपन परमेसर ला।
2CH 33:18 मनस्से के राज के आने घटनामन, परमेसर ले करे गय ओकर पराथना अऊ यहोवा, इसरायल के परमेसर के नांव म अगम-दरसीमन के दुवारा ओला कहे गय बचन, ये जम्मो बातमन इसरायल के राजामन के इतिहास के किताब म लिखे हवंय।
2CH 33:19 ओकर पराथना अऊ परमेसर ह कइसे ओकर बिनती ले पिघल गीस, येकर अलावा अपनआप ला नम्र करे के पहिले ओकर जम्मो पाप अऊ बिसवासघात, अऊ ओ जगहमन जिहां ओह ऊंचहा जगहमन ला बनाईस अऊ असेरा देवी के खंभा अऊ मूरतीमन ला स्थापित करिस—ये जम्मो बात अगमजानीमन के अभिलेख म लिखे हवय।
2CH 33:20 मनस्से ह हमेसा बर अपन पुरखामन के संग सुत गीस अऊ ओला ओकर महल म माटी दिये गीस। अऊ ओकर बेटा आमोन ह ओकर जगह म राजा बनिस।
2CH 33:21 आमोन ह बाईस साल के रिहिस, जब ओह राजा बनिस, अऊ ओह यरूसलेम म दू साल तक राज करिस।
2CH 33:22 ओह यहोवा के नजर म दुस्ट काम करिस, जइसे कि ओकर ददा मनस्से ह करे रिहिस। आमोन ह अपन ददा मनस्से के बनाय जम्मो मूरतीमन के अराधना करिस अऊ ओमन ला बलिदान चघाईस।
2CH 33:23 पर अपन ददा मनस्से के सहीं, ओह अपनआप ला यहोवा के आघू म नम्र नइं करिस; आमोन ह अऊ जादा अपराध करत गीस।
2CH 33:24 आमोन के करमचारीमन ओकर बिरूध साजिस करिन अऊ ओकर महल म ओला मार डारिन।
2CH 33:25 तब देस के मनखेमन ओ जम्मो झन ला मार डारिन, जेमन राजा आमोन के बिरूध साजिस करे रिहिन, अऊ ओमन ओकर बेटा योसियाह ला ओकर जगह म राजा बनाईन।
2CH 34:1 योसियाह ह आठ साल के रिहिस, जब ओह राजा बनिस, अऊ ओह यरूसलेम म इकतीस साल तक राज करिस।
2CH 34:2 ओह ओ काम करिस, जऊन ह यहोवा के नजर म सही रिहिस अऊ अपन पुरखा दाऊद के रसता म चलिस; ओकर ले ओह न तो जेवनी कोति मुड़िस अऊ न ही डेरी कोति।
2CH 34:3 अपन राज के आठवां साल म, जब ओह जवान ही रिहिस, तभे ओह अपन पुरखा दाऊद के परमेसर के खोज म लग गे रिहिस। अपन राज के बारहवां साल म, ओह पूजा के ऊंचहा जगह, असेरा के खंभा अऊ मूरतीमन ला हटाके यहूदा अऊ यरूसलेम ला सुध करे लगिस।
2CH 34:4 ओकर हुकूम ले बाल देवता के बेदीमन ला टोरके गिरा दिये गीस; ओह ओमन के ऊपर के धूप के बेदीमन ला कुटा-कुटा कर दीस, अऊ असेरा के खंभा अऊ मूरतीमन ला चूर-चूर कर दीस। येमन ला ओह कुटा-कुटा करके, ओ कुटामन ला ओ मनखेमन के कबर ऊपर फेंकवा दीस, जेमन येकर ऊपर बलिदान चघांय।
2CH 34:5 ओह ओ बेदीमन म सेवा करइया पुरोहितमन के हाड़ा ला जला दीस, अऊ ये किसम ले ओह यहूदा अऊ यरूसलेम ला सुध करिस।
2CH 34:6 मनस्से, एपरैम अऊ सिमोन, इहां तक कि नपताली तक के नगरमन म, अऊ ओमन के आसपास खंडहरमन म,
2CH 34:7 ओह बेदी अऊ असेरा के खंभामन ला टोरके गिरा दीस अऊ मूरतीमन ला कुचरके चूरा बना दीस अऊ पूरा इसरायल म जम्मो धूप के बेदीमन ला काटके कुटा-कुटा कर दीस। तब ओह वापिस यरूसलेम चल दीस।
2CH 34:8 अपन राज के अठारहवां साल म, योसियाह ह देस अऊ मंदिर ला सुध कर लीस। तब ओह असलियाह के बेटा सापान अऊ सहर के हाकिम मासेयाह के संग योआहाज के बेटा इतिहास के लेखक योआह ला यहोवा अपन परमेसर के मंदिर ला मरम्मत करे बर पठोईस।
2CH 34:9 तब ओमन हिलकियाह महा पुरोहित करा गीन अऊ परमेसर के मंदिर म लाने गय ओ पईसा ओला दीन, जेला दुवारपाल के काम करइया लेवीमन मनस्से, एपरैम अऊ इसरायल के बांचे जम्मो मनखे अऊ यहूदा अऊ बिनयामीन के जम्मो मनखे अऊ यरूसलेम म रहइया मनखेमन ले जमा करे रिहिन।
2CH 34:10 तब ओमन ओ पईसा ला ओ मनखेमन के हांथ म सऊंप दीन, जेमन ला यहोवा के मंदिर के काम के देखरेख बर ठहिराय गे रिहिस। ये मनखेमन ओ पईसा मंदिर के मरम्मत अऊ सुधार करइयामन ला दीन।
2CH 34:11 ओमन बढ़ई अऊ भवन बनानेवालामन ला पईसा दीन, ताकि ओमन ओ भवन बर गढ़े पथरा, जोड़े बर लकड़ी अऊ बल्ला बिसावंय, काबरकि भवन के गिरके नास होय म यहूदा के राजामन के सहमती रिहिस।
2CH 34:12 काम करइयामन बिसवासयोग्यता से काम करिन। येमन के काम के देखरेख करइयामन मरारी के संतान लेवी—यहत अऊ ओबदयाह, कहात के संतान—जकरयाह अऊ मसुल्लाम रिहिन। ओ जम्मो लेवी, जेमन अलग-अलग किसम के बाजा बजाय म कुसल रिहिन,
2CH 34:13 ओमन घलो बनिहारमन के अधिकारी रिहिन अऊ अलग-अलग काम के देखरेख करिन। कुछू लेवीमन सचिव, लेखक अऊ दुवारपाल रिहिन।
2CH 34:14 जब ओमन ओ पईसा ला निकालत रिहिन, जेला यहोवा के मंदिर म लाने गे रिहिस, त हिलकियाह पुरोहित ला यहोवा के कानून के किताब मिलिस, जेह मूसा के दुवारा दिये गे रिहिस।
2CH 34:15 हिलकियाह ह सचिव सापान ला कहिस, “यहोवा के मंदिर म, मोला कानून के किताब मिले हवय।” अऊ ओह ओ किताब सापान ला दे दीस।
2CH 34:16 तब सापान ह ओ किताब ला राजा करा ले गीस अऊ ओला बताईस, “तोर करमचारीमन ओ सब करत हें, जेकर जिम्मेदारी ओमन ला देय गे हवय।
2CH 34:17 ओमन यहोवा के मंदिर म ले पईसा के भुगतान कर दे हवंय अऊ येला देखरेख करइया अऊ काम करइयामन के हांथ म सऊंप दे हवंय।”
2CH 34:18 तब सचिव सापान ह राजा ला ये बताईस, “हिलकियाह पुरोहित ह मोला एक किताब दे हवय।” अऊ सापान ह राजा के आघू म ओ किताब ला पढ़िस।
2CH 34:19 जब राजा ह कानून के बचन ला सुनिस, त ओह दुख म अपन ओनहा ला चीरिस।
2CH 34:20 अऊ ओह हिलकियाह, सापान के बेटा अहीकाम, मीका के बेटा अबदोन, सचिव सापान अऊ राजा के सेवक असायाह ला ये हुकूम दीस:
2CH 34:21 “जावव अऊ यहोवा ले पता लगावव कि मोर अऊ इसरायल अऊ यहूदा के बांचे मनखेमन के बारे म ओ किताब म का लिखे हवय, जऊन ह मिले हे। काबरकि भयंकर ए यहोवा के कोरोध, जऊन ह हमर ऊपर भड़के हे, काबरकि हमर पुरखामन यहोवा के बचन ला नइं मानिन; ओमन ये किताब म लिखे जम्मो बात के मुताबिक नइं चलिन।”
2CH 34:22 हिलकियाह अऊ ओकर संग राजा के दुवारा पठोय गय मनखेमन हुलदा अगमजानीन करा बात करे बर गीन, जऊन ह हसरा के नाती अऊ तोखत के बेटा सल्लूम के घरवाली रिहिस। ओह ओनहा रखे के कमरा के रखवारीन रिहिस अऊ ओह यरूसलेम के नवां बने मकान म रहत रिहिस।
2CH 34:23 हुलदा ह ओमन ला कहिस, “यहोवा, इसरायल के परमेसर ह ये कहत हे: जऊन मनखे ह तुमन ला मोर करा पठोय हवय, ओला ये कहव,
2CH 34:24 ‘यहोवा ह ये कहत हे: मेंह ये जगह अऊ इहां के मनखेमन ऊपर बिपत्ति लानेवाला हंव—ओ जम्मो सराप जेकर बारे ओ किताब म लिखे गे हवय, जेला यहूदा के राजा के आघू म पढ़े गीस।
2CH 34:25 काबरकि ओमन मोला तियाग दे हवंय अऊ आने देवतामन बर धूप जलाय हवंय अऊ अपन हांथ के जम्मो काम के दुवारा मोर कोरोध ला भड़काय हवंय, एकरसेति ये जगह ऊपर मोर कोरोध ह भड़कही अऊ येह सांत नइं होही।’
2CH 34:26 यहूदा के राजा ले कहव, जऊन ह यहोवा ले पुछताछ करे बर तुमन ला पठोय हवय, ‘जऊन बातमन ला तेंह सुने हस, ओकर बारे म यहोवा, इसरायल के परमेसर ह ये कहत हे:
2CH 34:27 काबरकि तोर मन ह उत्तरदायी होईस अऊ तेंह परमेसर के आघू म अपनआप ला नम्र करय, जब तेंह ये जगह अऊ इहां के मनखेमन के बिरूध म ओकर बात ला सुनय, अऊ काबरकि तेंह मोर आघू म अपनआप ला नम्र करय अऊ अपन ओनहा ला चीरके मोर आघू म रोवय, एकरसेति मेंह तोर बात ला सुने हंव, यहोवा ह घोसना करत हे।
2CH 34:28 मेंह तोला तोर पुरखामन संग मिला दूहूं, अऊ तोला सांति म माटी दिये जाही। तोर आंखीमन ओ जम्मो बिपत्ति ला नइं देखहीं, जेला मेंह ये जगह अऊ इहां रहइयामन ऊपर लानेवाला हंव।’ ” तब ओमन वापिस जाके ओ माईलोगन के कहे बात राजा ला बताईन।
2CH 34:29 तब राजा ह यहूदा अऊ यरूसलेम के जम्मो अगुवामन ला बलाके इकट्ठा करिस।
2CH 34:30 ओह यहूदा के मनखे, यरूसलेम के निवासी, पुरोहित अऊ लेवीमन के संग यहोवा के मंदिर म गीस—ओमा छोटे ले लेके बड़े जम्मो मनखे रिहिन। ओह ओमन ला करार के ओ किताब के जम्मो बचन ला पढ़के सुनाईस, जऊन ह यहोवा के मंदिर म मिले रिहिस।
2CH 34:31 राजा ह अपन खंभा करा ठाढ़ होईस अऊ यहोवा के आघू म ये कहिके ओ करार ला नवां करिस कि ओह यहोवा के पाछू चलही अऊ अपन पूरा मन अऊ पूरा परान से ओकर हुकूम, नियम अऊ बिधिमन ला मानही, अऊ ओ किताब म लिखे करार के बचन के पालन करही।
2CH 34:32 तब ओह यरूसलेम अऊ बिनयामीन म के हर एक जन ले भी अइसने करे बर सपथ खवाईस; यरूसलेम के मनखेमन परमेसर, अपन पुरखामन के परमेसर के करार के मुताबिक अइसने ही करिन।
2CH 34:33 योसियाह ह इसरायलीमन के अधीन जम्मो इलाका ले जम्मो घिनौना मूरतीमन ला हटा दीस, अऊ ओह इसरायल म रहइया जम्मो झन ले यहोवा अपन परमेसर के सेवा करवाईस। जब तक ओह जीयत रिहिस, ओमन यहोवा, अपन पुरखामन के परमेसर के पाछू चले बर नइं छोंड़िन।
2CH 35:1 राजा योसियाह ह यहोवा बर यरूसलेम म फसह तिहार मनाईस, अऊ साल के पहिला महिना के चौदहवां दिन फसह के मेढ़ा-पीला ला बध करे गीस।
2CH 35:2 ओह पुरोहितमन ला ओमन के काम बर ठहिराईस अऊ ओमन ला यहोवा के मंदिर के सेवा बर उत्साहित करिस।
2CH 35:3 ओह लेवीमन ला कहिस, जेमन जम्मो इसरायलीमन ला निरदेस देवंय अऊ जेमन यहोवा बर पबितर करे गे रिहिन: “ओ पबितर सन्दूक ला मंदिर म रखव, जेला इसरायल के राजा दाऊद के बेटा सुलेमान ह बनाईस। येला तुम्हर कंधा म उठाके नइं ले जाना हे। अब यहोवा अपन परमेसर अऊ ओकर मनखे इसरायलीमन के सेवा करव।
2CH 35:4 अऊ इसरायल के राजा दाऊद अऊ ओकर बेटा सुलेमान के दुवारा दिये गय लिखित निरदेस के मुताबिक अपनआप ला अपन-अपन दल म अपन-अपन परिवार के मुताबिक तियार करव।
2CH 35:5 “अपन संगी इसरायली, सधारन मनखे के परिवारमन के हर एक उप-दल बर लेवीमन के एक दल के संग पबितर स्थान म ठाढ़ होवव।
2CH 35:6 अऊ फसह के मेढ़ा-पीलामन ला बध करव, अपनआप ला पबितर करव अऊ मूसा के जरिये यहोवा के दिये हुकूम ला पूरा करत, अपन संगी इसरायलीमन बर मेढ़ा-पीलामन ला तियार करव।”
2CH 35:7 योसियाह ह उहां के जम्मो सधारन मनखे बर कुल तीस हजार मेढ़ा-पीला अऊ बोकरा फसह-बलिदान बर, अऊ अलग से तीन हजार पसु अऊ दीस—ये जम्मो पसु राजा के खुद के संपत्ति म ले दिये गीन।
2CH 35:8 ओकर करमचारीमन घलो अपन मन से मनखेमन ला अऊ पुरोहित अऊ लेवीमन ला दीन। हिलकियाह, जकरयाह अऊ यहीएल नांव के परमेसर के मंदिर के अधिकारीमन दू हजार छै सौ फसह-बलिदान अऊ तीन सौ पसु दीन।
2CH 35:9 कोनन्याह के संग ओकर भाई समायाह अऊ नतनेल, अऊ लेवीमन के अगुवा हसबियाह, येइल अऊ योजाबाद घलो लेवीमन बर पांच हजार फसह-बलिदान अऊ पांच सौ पसुमन के मुड़ी दीन।
2CH 35:10 अराधना के तियारी करे गीस अऊ पुरोहितमन अपन जगह म लेवीमन के दलमन के संग ठाढ़ होईन, जइसे कि राजा ह हुकूम दे रिहिस।
2CH 35:11 फसह के मेढ़ा-पीलामन के बध करे गीस, अऊ जऊन लहू पुरोहितमन ला दिये गीस, ओला ओमन बेदी के आघू म छिंचिन, अऊ लेवीमन बध करे गे पसुमन के खाल उतारिन।
2CH 35:12 ओमन मनखेमन के परिवार के उप-दलमन ला देय बर होम-बलिदान ला अलग रखिन, ताकि ओ मनखेमन यहोवा ला बलिदान चघा सकंय, जइसे कि मूसा के किताब म लिखे हवय। ओमन पसुमन ला घलो वइसे करिन।
2CH 35:13 बिधि म लिखे मुताबिक लेवीमन फसह के पसुमन ला आगी ऊपर भुंजिन, अऊ पबितर बलिदान ला बरतन, हांड़ी अऊ कढ़ाहीमन म उसनिन अऊ तुरते जम्मो मनखेमन ला परोस दीन।
2CH 35:14 येकर बाद, ओमन अपन बर अऊ पुरोहितमन बर तियारी करिन, काबरकि हारून के संतान, पुरोहितमन होम-बलिदान अऊ चरबीवाला भाग ला रथिया होवत तक चघावत रिहिन। एकरसेति लेवीमन अपन बर अऊ हारून के बंस के पुरोहितमन बर तियारी करिन।
2CH 35:15 दाऊद, आसाप, हेमान अऊ राजा के अगम-दरसी यदूतून के दिये गय निरदेस के मुताबिक आसाप के बंसज संगीतकारमन अपन जगह लीन। हर एक दुवार म दुवारपालमन ला अपन-अपन जगह म रहे के हुकूम रिहिस, काबरकि ओमन के संगी लेवीमन तियारी करत रिहिन।
2CH 35:16 तब ओ बेरा, फसह के उत्सव बर अऊ यहोवा के बेदी ऊपर होम-बलिदान चघाय बर यहोवा के पूरा अराधना करे गीस, जइसे कि राजा योसियाह ह हुकूम देय रिहिस।
2CH 35:17 जऊन इसरायलीमन उहां रिहिन, ओमन ओ बेरा फसह तिहार मनाईन अऊ सात दिन तक अखमीरी रोटी के तिहार मनाईन।
2CH 35:18 ये फसह तिहार सहीं समूएल अगमजानी के समय ले लेके अब तक कोनो फसह तिहार नइं मनाय गे रिहिस; अऊ इसरायल के कोनो राजा अइसने फसह के तिहार नइं मनाय रिहिन, जइसने योसियाह ह पुरोहित, लेवी अऊ यहूदा अऊ इसरायल के ओ जम्मो मनखेमन संग मनाईस, जेमन उहां यरूसलेम के मनखेमन संग रिहिन।
2CH 35:19 ये फसह तिहार योसियाह राजा के राज के अठारहवां साल म मनाय गीस।
2CH 35:20 ये जम्मो के बाद, जब योसियाह ह मंदिर ला ब्यवस्थित कर लीस, तब मिसर के राजा नको ह फरात नदी के तीर म कर्कमीस नांव के सहर मेर लड़े बर चल दीस, अऊ योसियाह घलो ओकर ले लड़े बर आघू बढ़िस।
2CH 35:21 पर नको ह ये कहिके ओकर करा संदेसिया पठोईस, “हे यहूदा के राजा, तोर अऊ मोर बीच म कोनो झगरा के बात नइं ए। ये समय मेंह तोर ऊपर हमला करे बर नइं आय हंव, पर मेंह ओ घराना के बिरूध लड़े बर आय हंव, जेकर से मोर झगरा हवय। परमेसर ह मोला जल्दी करे बर कहे हवय; एकरसेति परमेसर के बिरोध करई बंद कर, जऊन ह मोर संग हवय, नइं तो ओह तोला नास कर दीही।”
2CH 35:22 पर योसियाह ह ओकर ले पाछू नइं हटिस, बल्कि ओकर ले लड़े बर अपन भेस बदल लीस। ओह ओ बात ला नइं सुनिस, जेला नको ह परमेसर के हुकूम ले कहे रिहिस, पर ओह नको ले लड़े बर मगिद्दो के मैदान म गीस।
2CH 35:23 धनुसधारीमन राजा योसियाह ऊपर तीर चलाईन, त ओह अपन अधिकारीमन ला कहिस, “मोला दूरिहा ले जावव; मोला बहुंत चोट लगे हवय।”
2CH 35:24 तब ओमन ओला ओकर रथ म ले उतारके एक आने रथ म डालिन अऊ ओला यरूसलेम ले गीन, जिहां ओह मर गीस। ओला ओकर पुरखामन के कबर म माटी दिये गीस, अऊ पूरा यहूदा अऊ यरूसलेम के मनखेमन ओकर बर सोक मनाईन।
2CH 35:25 यरमियाह ह योसियाह बर एक बिलापगीत लिखिस, अऊ आज तक पुरूस अऊ महिला गवइयामन योसियाह के सुरता म ओ बिलापगीत गाथें। येह इसरायल म एक परंपरा बन गीस अऊ येला बिलापगीत म लिखे गे हवय।
2CH 35:26 योसियाह के राज के आने घटनामन अऊ यहोवा के कानून म लिखे मुताबिक ओकर भक्ति के काम—
2CH 35:27 सुरू ले लेके आखिरी तक, जम्मो घटनामन इसरायल अऊ यहूदा के राजामन के किताब म लिखे गे हवंय।
2CH 36:1 अऊ देस के मनखेमन योसियाह के बेटा यहोआहाज ला लीन अऊ ओला ओकर ददा के जगह म यरूसलेम म राजा बनाईन।
2CH 36:2 यहोआहाज ह तेईस साल के रिहिस, जब ओह राजा बनिस, अऊ ओह यरूसलेम म तीन महिना राज करिस।
2CH 36:3 मिसर के राजा ह ओला यरूसलेम के गद्दी ले हटा दीस अऊ यहूदा देस ऊपर एक सौ टेलेन्ट चांदी अऊ एक टेलेन्ट सोन के कर लगा दीस।
2CH 36:4 मिसर के राजा ह यहोआहाज के एक भाई एलयाकीम ला यहूदा अऊ यरूसलेम ऊपर राजा बना दीस अऊ एलयाकीम के नांव ला बदलके यहोयाकीम रख दीस। पर नको ह एलयाकीम के भाई यहोआहाज ला मिसर ले गीस।
2CH 36:5 यहोयाकीम ह पच्चीस साल के रिहिस, जब ओह राजा बनिस, अऊ ओह यरूसलेम म गियारह साल तक राज करिस। ओह यहोवा अपन परमेसर के नजर म दुस्ट काम करिस।
2CH 36:6 बेबिलोन के राजा नबूकदनेसर ह ओकर ऊपर हमला करिस अऊ ओला कांसा के संकली म बांधके बेबिलोन ले गीस।
2CH 36:7 नबूकदनेसर ह यहोवा के मंदिर ले कुछू चीजमन ला घलो बेबिलोन ले गीस अऊ ओ चीजमन ला उहां अपन मंदिर म रखिस।
2CH 36:8 यहोयाकीम के राज के आने घटनामन, जऊन घिनौना काम ओह करिस अऊ ओमा जऊन बुरई के बातमन पाय गीस, ओ सब इसरायल अऊ यहूदा के राजामन के किताब म लिखे हवय। अऊ ओकर बेटा यहोयाकीन ओकर जगह म राजा बनिस।
2CH 36:9 यहोयाकीन ह अठारह साल के रिहिस, जब ओह राजा बनिस, अऊ ओह यरूसलेम म तीन महिना अऊ दस दिन राज करिस। ओह यहोवा के नजर म दुस्ट काम करिस।
2CH 36:10 बसन्त के मौसम म, नबूकदनेसर राजा ह ओला बेबिलोन बुलवा लीस अऊ संग म यहोवा के मंदिर ले कीमती चीजमन ला घलो बेबिलोन मंगवा लीस, अऊ ओह यहोयाकीन के कका सिदकियाह ला यहूदा अऊ यरूसलेम ऊपर राजा बना दीस।
2CH 36:11 सिदकियाह ह इक्कीस साल के रिहिस, जब ओह राजा बनिस, अऊ ओह यरूसलेम म गियारह साल तक राज करिस।
2CH 36:12 ओह यहोवा अपन परमेसर के नजर म दुस्ट काम करिस अऊ अपनआप ला यरमियाह अगमजानी के आघू म नम्र नइं करिस, जऊन ह ओला यहोवा के बचन सुनाईस।
2CH 36:13 ओह राजा नबूकदनेसर के बिरूध म घलो बिदरोह करिस, जऊन ह ओला परमेसर के नांव म सपथ देवाय रिहिस। ओह हठी हो गीस अऊ अपन मन ला कठोर करके यहोवा, इसरायल के परमेसर कोति नइं फिरिस।
2CH 36:14 येकर अलावा, पुरोहित अऊ मनखेमन के जम्मो अगुवामन अऊ जादा बिसवासघाती होवत गीन, अऊ आनजातमन के घिनौना रीति-रिवाज के पाछू चलिन अऊ यहोवा के मंदिर ला असुध करिन, जेला ओह यरूसलेम म पबितर करे रिहिस।
2CH 36:15 यहोवा, ओमन के पुरखामन के परमेसर ह अपन संदेसियामन के जरिये बार-बार ओमन करा अपन संदेस भेजिस, काबरकि ओह अपन मनखे अऊ अपन निवास स्थान ऊपर दया देखात रिहिस।
2CH 36:16 पर ओमन परमेसर के संदेसियामन के हंसी उड़ाईन, ओकर बचन ला तुछ समझिन अऊ ओकर अगमजानीमन के खिल्ली उड़ाईन, जब तक कि यहोवा के कोप ह ओमन ऊपर नइं भड़किस अऊ ओकर ले बचे के कोनो उपाय नइं रिहिस।
2CH 36:17 परमेसर ह ओमन के बिरूध बेबिलोनीमन के राजा ला ले आईस, जऊन ह ओमन के जवानमन ला पबितर-स्थान म तलवार ले मार डारिस, अऊ जवान या जवान छोकरी, डोकरा या दुरबल मनखेमन ला घलो नइं छोंड़िस। परमेसर ह ओ जम्मो ला नबूकदनेसर के हांथ म कर दीस।
2CH 36:18 ओह परमेसर के मंदिर के छोटे-बड़े जम्मो चीजमन ला, अऊ यहोवा के मंदिर के खजाना अऊ राजा अऊ ओकर करमचारीमन के खजाना ला बेबिलोन ले गीस।
2CH 36:19 ओमन परमेसर के मंदिर म आगी लगा दीन अऊ यरूसलेम के दीवार ला टोर दीन; ओमन जम्मो महलमन ला जला दीन अऊ उहां के जम्मो कीमती चीज ला नास कर दीन।
2CH 36:20 जऊन मन तलवार ले बच गे रिहिन, ओमन ला ओह बेबिलोन ले गीस, अऊ ओमन तब तक ओकर अऊ ओकर संतानमन के सेवक बने रिहिन, जब तक कि फारस के राज ह परबल नइं हो गीस।
2CH 36:21 देस ह अपन बिसराम काल म आनंद उठाईस; अपन अलगाव के समय, ओ पूरा समय येह तब तक अराम करिस, जब तक कि ओ सत्तर साल पूरा नइं हो गीस, जेकर बारे म यरमियाह ह यहोवा के बचन के पूरा होय के बारे म कहे रिहिस।
2CH 36:22 फारस के राजा कुसरू के राज के पहिला बछर म यहोवा ह फारस के राजा कुसरू के मन ला उभारिस कि यहोवा के जऊन बचन यरमियाह अगमजानी के दुवारा कहे गे रिहिस, ओह पूरा हो जाय, एकरसेति राजा कुसरू ह अपन जम्मो राज म ये परचार करवाईस अऊ लिखवा भी दीस:
2CH 36:23 “फारस के राजा कुसरू ह ये कहत हे: “ ‘यहोवा, स्वरग के परमेसर ह, धरती भर के जम्मो राज ला मोला दे हवय, अऊ यहूदा प्रदेस के यरूसलेम म ओकर बर एक मंदिर बनाय बर, ओह मोला ठहिराय हवय। तुम्हर बीच म ले, ओकर जऊन भी मनखे उहां जाय चाहत हवंय, ओमन जा सकत हें, अऊ यहोवा ओमन के परमेसर ह ओमन के संग रहय।’ ”
EZR 1:1 फारस के राजा कुसरू के राज के पहिला बछर म यहोवा ह फारस के राजा कुसरू के मन ला उभारिस कि यहोवा के जऊन बचन यरमियाह अगमजानी के दुवारा कहे गे रिहिस, ओह पूरा हो जाय, एकरसेति राजा कुसरू ह अपन जम्मो राज म ये परचार करवाईस अऊ लिखवा भी दीस:
EZR 1:2 “फारस के राजा कुसरू ह ये कहत हे: “ ‘यहोवा, स्वरग के परमेसर ह धरती भर के जम्मो राज ला मोला दे हवय, अऊ ओह मोला यहूदा प्रदेस के यरूसलेम म ओकर बर एक मंदिर बनाय बर ठहिराय हवय।
EZR 1:3 तुम्हर बीच म ले, ओकर जऊन भी मनखे यहूदा के यरूसलेम जाय चाहत हवंय, ओमन जा सकत हें अऊ ओ यहोवा, इसरायल के परमेसर के मंदिर ला बनावंय, जऊन ह यरूसलेम म हवय, अऊ ओमन के परमेसर ह ओमन के संग रहय।
EZR 1:4 अऊ कोनो भी जगह म जिहां बांचे मनखेमन रहत हवंय, ओ जगह के मनखेमन सोन अऊ चांदी, धन अऊ पसु देके, ओमन के मदद करंय अऊ यरूसलेम म परमेसर के मंदिर बर स्वेच्छा-बलिदान देवंय।’ ”
EZR 1:5 तब यहूदा अऊ बिनयामीन के परिवार के मुखियामन, अऊ पुरोहितमन अऊ लेवीमन—जेमन के मन ला परमेसर ह उभारे रिहिस, ओमन जाके यरूसलेम म यहोवा के भवन ला बनाय बर तियार हो गीन।
EZR 1:6 ओमन के जम्मो परोसीमन सोन अऊ चांदी, चीज-वस्तु अऊ पसु, अऊ अनमोल भेंट देके, ओमन के मदद करिन; येकर अलावा ओमन स्वेच्छा-बलिदान घलो दीन।
EZR 1:7 फेर राजा कुसरू ह यहोवा के मंदिर के ओ चीजमन ला बाहिर ले आईस, जेला राजा नबूकदनेसर ह यरूसलेम ले लानके अपन देवता के मंदिर म रखे रिहिस,
EZR 1:8 ओमन ला फारस के राजा कुसरू ह मिथरदात खजांची के दुवारा निकलवाईस, जऊन ह ओमन ला गनके यहूदीमन के परधान सेसबसर ला सऊंप दीस।
EZR 1:9 ओ चीजमन के गनती ये रिहिस: सोन के बरतन 30; चांदी के बरतन 1,000; चांदी के परात 29;
EZR 1:10 सोन के कटोरा 30; ओमन सहीं चांदी के कटोरा 410; आने किसम के बरतन 1,000;
EZR 1:11 सोन अऊ चांदी के कुल 5,400 चीजमन रिहिन। ये जम्मो ला सेसबसर ह बंधुवा मनखेमन के संग म लानिस, जब ओमन बेबिलोन ले यरूसलेम आईन।
EZR 2:1 जेमन ला बेबिलोन के राजा नबूकदनेसर ह बंदी बनाके बेबिलोन ले गेय रिहिस, येमन प्रदेस के ओ मनखे अंय, जेमन बंधुवई ले छूटके आईन (ओमन यरूसलेम अऊ यहूदा के अपन-अपन नगर म लहुंटिन,
EZR 2:2 येमन जरूब्बाबेल, यहोसू, नहेमियाह, सरायाह, रेलायाह, मोरदकै, बिलसान, मिसपार, बिगवै, रहूम, अऊ बाना के संग आईन):
EZR 2:3 परोस के संतान 2,172;
EZR 2:4 सपतयाह के संतान 372;
EZR 2:5 आरह के संतान 775;
EZR 2:6 पहत-मोआब के संतान (येहोसू अऊ योआब के बंस म ले) 2,812;
EZR 2:7 एलाम के संतान 1,254;
EZR 2:8 जत्तू के संतान 945;
EZR 2:9 जक्कई के संतान 760;
EZR 2:10 बानी के संतान 642;
EZR 2:11 बेबै के संतान 623;
EZR 2:12 अजगाद के संतान 1,222;
EZR 2:13 अदोनीकाम के संतान 666;
EZR 2:14 बिगवै के संतान 2,056;
EZR 2:15 आदीन के संतान 454;
EZR 2:16 आतेर के संतान (हिजकियाह के बंस म ले) 98;
EZR 2:17 बेसै के संतान 323;
EZR 2:18 योराह के संतान 112;
EZR 2:19 हासूम के संतान 223;
EZR 2:20 गिब्बार के संतान 95;
EZR 2:21 बैतलहम के आदमीमन 123;
EZR 2:22 नतोपा के आदमीमन 56;
EZR 2:23 अनातोत के आदमीमन 128;
EZR 2:24 अजमावेत के आदमीमन 42;
EZR 2:25 किरयत-यारीम, कपीरा अऊ बेरोत के आदमीमन 743;
EZR 2:26 रामा अऊ गेबा के आदमीमन 621;
EZR 2:27 मिकमास के आदमीमन 122;
EZR 2:28 बेतेल अऊ अई के आदमीमन 223;
EZR 2:29 नबो के आदमीमन 52;
EZR 2:30 मगबीस के आदमीमन 156;
EZR 2:31 दूसर एलाम के आदमीमन 1,254;
EZR 2:32 हारीम के आदमीमन 320;
EZR 2:33 लोद, हादीद अऊ ओनो के आदमीमन 725;
EZR 2:34 यरीहो के आदमीमन 345;
EZR 2:35 सना के आदमीमन 3,630।
EZR 2:36 पुरोहितमन: यदायाह के संतान (येहोसू के परिवार के जरिये) 973;
EZR 2:37 इम्मेर के संतान 1,052;
EZR 2:38 पसहूर के संतान 1,247;
EZR 2:39 हारीम के संतान 1,017।
EZR 2:40 लेवीमन: येहोसू अऊ कदमीएल के संतान (होदवियाह के बंस के जरिये) 74।
EZR 2:41 संगीतकारमन: आसाप के संतान 128।
EZR 2:42 मंदिर के दुवारपालमन: सल्लूम, आतेर, तलमोन, अक्कूब, हतीता अऊ सोबै के संतान 139।
EZR 2:43 मंदिर के सेवकमन: खाल्हे लिखे मनखेमन के संतानमन— सीहा, हसूपा, तब्बाओत,
EZR 2:44 केरोस, सीअहा, पादोन,
EZR 2:45 लबाना, हगाबा, अक्कूब,
EZR 2:46 हागाब, सल्मै, हानान,
EZR 2:47 गिद्दल, गहर, रायाह,
EZR 2:48 रसीन, नकोदा, गज्जाम,
EZR 2:49 उज्जा, पासेह, बेसै,
EZR 2:50 असना, मूनीम, नेफूसीम,
EZR 2:51 बकबूक, हकूपा, हरहूर,
EZR 2:52 बसलूत, महीदा, हरसा,
EZR 2:53 बरकोस, सीसरा, तेमह,
EZR 2:54 नसीह, अऊ हतीपा।
EZR 2:55 राजा सुलेमान के सेवकमन के संतान: सोतै, हस्सोपेरेत, परूदा,
EZR 2:56 याला, दरकोन, गिद्देल,
EZR 2:57 सपतयाह, हत्तील, पोकेरेत-हसेबायीम अऊ आमी के संतान।
EZR 2:58 मंदिर के सेवक अऊ सुलेमान के सेवकमन के संतान 392 रिहिन।
EZR 2:59 ये मनखेमन तेल-मेलह, तेल-हरसा, करूब, अदोन, अऊ इम्मेर ले आईन, पर येमन बता नइं सकिन कि येमन के परिवार के मनखेमन इसरायलीमन के संतान रिहिन:
EZR 2:60 संतानमन— दलायाह, तोबियाह अऊ नकोदा के संतान 652।
EZR 2:61 अऊ पुरोहितमन के बीच म ले: संतानमन— होबायाह, हक्कोस अऊ बरजिलै (एक आदमी, जऊन ह गिलादी बरजिलै के एक बेटी ले बिहाव करे रिहिस अऊ ओकर नांव रख ले रिहिस) के संतान।
EZR 2:62 येमन अपन परिवार के लेखा-जोखा ला खोजिन, पर ओमन ला नइं मिलिस। एकरसेति येमन ला असुध ठहिराके पुरोहित के पद ले अलग रखे गीस।
EZR 2:63 राजपाल ह ओमन ला हुकूम दीस कि जब तक ऊरीम अऊ तुम्मीम धारन करइया कोनो पुरोहित सेवा नइं करत रहय, तब तक ओमन कोनो परम पबितर जेवन म ले कुछू चीज झन खावंय।
EZR 2:64 पूरा सभा के संखिया 42,360 रिहिस।
EZR 2:65 येमन के अलावा येमन के 7,337 पुरूस अऊ महिला गुलाम रिहिन; अऊ येमन के 200 पुरूस अऊ महिला गवइयामन घलो रिहिन।
EZR 2:66 ओमन करा 736 घोड़ा, 245 खच्चर,
EZR 2:67 435 ऊंट अऊ 6,720 गदहामन रिहिन।
EZR 2:68 जब ओमन यरूसलेम म यहोवा के घर मेर पहुंचिन, त परिवारमन के कुछू मुखियामन परमेसर के घर ला ओही जगह म फेर बनाय बर अपन ईछा ले दान दीन।
EZR 2:69 ओमन अपन योग्यता के मुताबिक 61,000 दरकमोन सोन अऊ 5,000 मीना चांदी अऊ पुरोहितमन के 100 अंगरखा ये काम बर खजाना म दीन।
EZR 2:70 तब पुरोहितमन, लेवीमन, संगीतकारमन, दुवारपालमन, अऊ मंदिर के सेवकमन अपन-अपन नगर म आने कुछू अऊ मनखेमन संग बस गीन, अऊ बाकि इसरायलीमन अपन-अपन नगर म बस गीन।
EZR 3:1 बेबिलोन ले लहुंटे के बाद, जब सातवां महिना आईस, अऊ इसरायलीमन अपन-अपन नगर म बस गीन, त मनखेमन यरूसलेम म एक मन होके जमा होईन।
EZR 3:2 तब योसादाक के बेटा यहोसू अऊ ओकर संगी पुरोहितमन अऊ सालतीएल के बेटा जरूब्बाबेल अऊ ओकर सहायकमन इसरायल के परमेसर के बेदी ला बनाय के सुरू करिन ताकि ओमा परमेसर के जन मूसा के कानून म लिखे मुताबिक होम-बलिदान चघाय जावय।
EZR 3:3 अपन आसपास के मनखेमन के डर के बावजूद, ओमन बेदी ला ओकरेच नीव म बनाईन अऊ येमा यहोवा बर हर रोज बिहनियां अऊ सांझकुन होम-बलिदान चघाय लगिन।
EZR 3:4 तब कानून म लिखे मुताबिक, ओमन पबितर-तम्बूमन के तिहार ला मानिन, अऊ संग म हर दिन जरूरी होम-बलिदानमन ला चघाईन।
EZR 3:5 ओकर बाद ओमन नियमित होम-बलिदान, नवां चंदा के बलिदान अऊ ठहिराय गय यहोवा के जम्मो पबितर तिहारमन के बलिदान अऊ संग म लाय गय यहोवा बर स्वेच्छा-बलिदान घलो चघाईन।
EZR 3:6 सातवां महिना के पहिले दिन ले ओमन यहोवा ला होम-बलिदान चघाय लगिन, हालाकि यहोवा के मंदिर के नीव तब तक नइं डारे गे रिहिस।
EZR 3:7 तब मनखेमन राज-मिसतिरीमन ला अऊ बढ़ईमन ला रूपिया, अऊ सीदोन अऊ सूर के मनखेमन ला खाय-पीये के चीज अऊ तेल दीन, ताकि ओमन फारस के राजा कुसरू के अनुमति के मुताबिक देवदार के लकरी लबानोन ले यापा तक समुंदर के जरिये अमरांय।
EZR 3:8 दूसर बरस के दूसर महिना म परमेसर के भवन यरूसलेम म ओमन के हबरे के पाछू, सालतीएल के बेटा जरूब्बाबेल अऊ योसादाक के बेटा यहोसू अऊ बाकि मनखेमन (पुरोहित अऊ लेवी, अऊ जतेक बंधुवई ले यरूसलेम लहुंटे रिहिन) काम ला सुरू करिन। ओमन बीस बरस अऊ ओकर ले जादा उमर के लेवीमन ला यहोवा के भवन म काम के देखरेख करे बर नियुक्त करिन।
EZR 3:9 यहोसू अऊ ओकर बेटा अऊ भाईमन, अऊ कदमीएल अऊ ओकर बेटामन (होदवियाह के संतानमन) अऊ हेनादाद के बेटामन अऊ ओमन के बेटा अऊ भाईमन—सबो लेवीमन—परमेसर के भवन म कारीगरमन के काम के देखरेख करे बर एक संग जूरिन।
EZR 3:10 जब भवन के बनइयामन यहोवा के मंदिर के नीव डारिन, तब अपन ओनहा पहिरे, अऊ तुरहीमन ला धरे पुरोहितमन, अऊ लेवीमन (आसाप के बेटामन) झांझमन ला धरके यहोवा के परसंसा करे बर अपन-अपन जगह ले लीन, जइसे कि इसरायल के राजा दाऊद के दुवारा बताय गे रिहिस।
EZR 3:11 परसंसा अऊ धनबाद के संग यहोवा बर अइसने गीत गाईन: “ओह बने अय; ओकर मया ह इसरायल बर हमेसा बने रहिथे।” तब जम्मो मनखेमन ये जानके कि यहोवा के भवन के नीव अब रखे जावत हे, अब्बड़ चिचियाके यहोवा के परसंसा करे लगिन।
EZR 3:12 पर कतको सियान पुरोहित अऊ लेवी अऊ परिवार के मुखियामन, जेमन पहिले के मंदिर ला देखे रिहिन, जब ये मंदिर के नीव ला रखत देखिन, त ओमन फूट-फूटके रोवन लगिन, अऊ कतको आने मनखेमन आनंद के मारे जय-जयकार करे लगिन।
EZR 3:13 एकरसेति मनखेमन, आनंद के जय-जयकार के सबद ले मनखेमन के रोये के सबद ला अलग पहिचान नइं सकिन, काबरकि मनखेमन बहुंत कोलाहल करत रिहिन। अऊ ओ अवाज ह दूरिहा तक सुनई देवत रिहिस।
EZR 4:1 जब यहूदा अऊ बिनयामीन के बईरीमन ये सुनिन कि बंधुवई ले लहुंटे मनखेमन यहोवा, इसरायल के परमेसर बर एक मंदिर बनावत हवंय,
EZR 4:2 त ओमन जरूब्बाबेल अऊ परिवार के मुखिया मनखेमन करा आके ओमन ले कहन लगिन, “हमन ला घलो तुम्हर संग बनाय म मदद करे बर देवव, काबरकि तुम्हर सहीं, हमन घलो तुम्हर परमेसर के खोज म लगे हवन, अऊ अस्सूर के राजा एसरहदोन, जऊन ह हमन ला इहां अमराईस, ओकर दिन ले हमन ओ परमेसर ला बलिदान घलो चघावत हवन।”
EZR 4:3 पर जरूब्बाबेल, यहोसू अऊ इसरायल के परिवारमन के मुखिया मनखेमन ओमन ला जबाब दीन, “हमर परमेसर बर भवन बनाय म, तुम्हर हमर संग कोनो संबंध नइं ए। हमीचमन एक संग मिलके फारस के राजा कुसरू के हुकूम के मुताबिक यहोवा, इसरायल के परमेसर बर येला बनाबो।”
EZR 4:4 तब ओ देस के मनखेमन यहूदीमन ला निरास करे लगिन अऊ ओमन ला डरवाके मंदिर बनाय म बाधा डारन लगिन।
EZR 4:5 ओमन फारस के अधिकारीमन ला घूस दीन, ताकि ओमन ये काम म बाधा डालंय, फारस के राजा कुसरू के पूरा सासनकाल ले लेके फारस के राजा दारा के सासनकाल तक ओमन अइसने करते रिहिन।
EZR 4:6 छयर्स के राज के सुरू के दिन म, ओ मनखेमन यहूदा अऊ यरूसलेम के निवासीमन के बिरूध एक दोस-पतर लिखिन।
EZR 4:7 अऊ फारस के राजा अर्तछयर्स के दिन म, बिसलाम, मिथरदात, ताबेल अऊ ओकर सहयोगीमन अर्तछयर्स ला एक ठन चिट्ठी लिखिन। चिट्ठी अरामिक अकछर अऊ अरामिक भासा म लिखे गीस।
EZR 4:8 हुकूम देवइया अधिकारी रहूम अऊ सचिव सिमसै ह यरूसलेम के बिरूध राजा अर्तछयर्स ला ये किसम के चिट्ठी लिखिन:
EZR 4:9 हुकूम देवइया अधिकारी रहूम अऊ सचिव सिमसै अऊ ओमन के आने जम्मो सहयोगीमन—फारस, ऊरूक अऊ बेबिलोन के मनखेमन ऊपर नियायधीस, अधिकारी अऊ सासन करइयामन, सूसन के एलामीमन,
EZR 4:10 अऊ आने मनखेमन, जेमन ला महान अऊ आदरनीय असूरबानीपाल ह बाहिर निकालके सामरिया सहर म अऊ फरात नदी के पार के देस म बसाय रिहिस।
EZR 4:11 (जऊन चिट्ठी ओमन राजा ला भेजिन, ओकर येह नकल अय।) राजा अर्तछयर्स के सेवा म, तोर ओ सेवकमन ले, जेमन फरात नदी के ओ पार रहिथें:
EZR 4:12 राजा ला ये मालूम होवय कि जऊन यहूदीमन तोर करा ले हमर इहां आईन, ओमन यरूसलेम गे हवंय अऊ ओमन ओ बिदरोही अऊ दुस्ट सहर ला फेर बनावत हवंय। ओमन दीवारमन ला फेर ठाढ़ करत हवंय अऊ ओकर नीवमन ला मरम्मत करत हवंय।
EZR 4:13 राजा ला मालूम होवय कि कहूं ओ सहर ह बन गीस अऊ ओकर दीवारमन फेर बन गीन, तब ओमन कर, लगान, अऊ चुंगी फेर नइं दीहीं, अऊ आखिर म राजकर के हानि होही।
EZR 4:14 काबरकि राजमहल बर हमर जिम्मेदारी हवय अऊ हमर बर येह उचित नो हय कि हमर देखत म राजा के अनादर होवय, एकर खातिर हमन ये चिट्ठी पठोके राजा ला खबर देवत हन,
EZR 4:15 ताकि तोर पुरखामन के इतिहास के किताब म खोजे जावय। ये इतिहास के किताबमन म तोला मिलही कि ओ सहर ह एक बिदरोही सहर, राजा अऊ राजमन बर दुख देवइया सहर ए, अऊ ये जगह के बिदरोह करे के एक लम्बा इतिहास हवय। एकर खातिर ओ सहर ला नास कर देय गे रिहिस।
EZR 4:16 हमन राजा ला सूचना देवत हन कि यदि ओ सहर ला बनाय जाथे अऊ ओकर दीवारमन फेर ठाढ़ करे जाथें, त फेर तोर बर फरात नदी के पार कुछू नइं बचही।
EZR 4:17 तब राजा ह ये जबाब भेजिस: हुकूम देवइया अधिकारी रहूम अऊ सचिव सिमसै अऊ सामरिया अऊ फरात नदी के पार आने जगह म रहइया ओमन के बाकि सहयोगीमन: तुम्हर कल्यान होवय।
EZR 4:18 जऊन चिट्ठी तुमन हमर करा पठोय हवव, ओला मोर आघू म पढ़के ओकर अनुवाद करे गीस।
EZR 4:19 मोर हुकूम ले जब खोजे गीस, त पता चलिस कि राजामन के बिरूध ओ सहर के बिदरोह करे के एक पुराना इतिहास हवय अऊ ये जगह म बिदरोह अऊ दंगा होवत आवत हे।
EZR 4:20 यरूसलेम म सामर्थी राजामन रिहिन, जेमन पूरा फरात नदी के पार तक राज करत रिहिन, अऊ कर, लगान, अऊ चुंगी ओमन ला दिये जावत रिहिस।
EZR 4:21 एकरसेति अब एक हुकूम दिये जावय कि ओ आदमीमन काम ला बंद करंय अऊ जब तक मोर कोति ले हुकूम नइं मिले, तब तक ओ सहर ला फेर झन बनाय जावय।
EZR 4:22 सचेत रहव, ये बात म ढिलई झन होवय। राज हित के हानि करे बर ये खतरा काबर बढ़न पाय?
EZR 4:23 जइसे ही राजा अर्तछयर्स के चिट्ठी रहूम अऊ सचिव सिमसै अऊ ओमन के सहयोगीमन ला पढ़के सुनाय गीस, त ओमन तुरते यरूसलेम म यहूदीमन करा गीन अऊ ओमन ऊपर दबाव डालके काम ला रूकवा दीन।
EZR 4:24 ये किसम ले, यरूसलेम म परमेसर के भवन के काम ह रूक गीस, अऊ ये काम ह फारस के राजा दारा के राज के दूसर बरस तक रूके रिहिस।
EZR 5:1 तब हाग्गै अगमजानी अऊ इद्दो के एक संतान, जकरयाह अगमजानी ह यहूदा अऊ यरूसलेम के यहूदीमन बर इसरायल के परमेसर के नांव म अगमबानी करिन, जऊन ह ओमन के ऊपर रिहिस।
EZR 5:2 तब सालतीएल के बेटा जरूब्बाबेल अऊ योसादाक के बेटा यहोसू, यरूसलेम म परमेसर के भवन ला फेर बनाय के सुरू करिन। अऊ परमेसर के ओ अगमजानीमन ओमन ला सहारा देवत, ओमन के संग रिहिन।
EZR 5:3 ओही बेरा, फरात नदी के पार के राजपाल ततनै, अऊ सतर-बोजनै अऊ ओमन के सहयोगीमन ओमन करा जाके ये पुछन लगिन, “ये मंदिर ला फेर बनाय अऊ ये काम ला पूरा करे के अधिकार तुमन ला कोन दीस?”
EZR 5:4 ओमन ये घलो पुछिन, “जऊन मन ये भवन ला बनावत हें, ओमन के नांव का अंय?”
EZR 5:5 पर यहूदीमन के अगुवामन ऊपर परमेसर के नजर रिहिस, एकरसेति जब तक ये बात के चरचा दारा ले नइं करे गीस अऊ ये बिसय म ओकर लिखित जबाब नइं मिलिस, तब तक ओमन ये काम ला नइं रोकिन।
EZR 5:6 जऊन चिट्ठी फरात नदी के पार के राजपाल ततनै अऊ सतर-बोजनै अऊ ओमन के सहयोगी, फरात नदी के पार के अधिकारीमन राजा दारा करा पठोईन, ओकर नकल ये अय।
EZR 5:7 जऊन खबर ओमन भेजिन, ओमा ये लिखाय रिहिस: सेवा म राजा दारा: जय जोहार।
EZR 5:8 राजा ला मालूम होवय कि हमन यहूदा प्रदेस म महान परमेसर के मंदिर म गे रहेंन। मनखेमन ओला बड़े-बड़े पथरा ले बनात हवंय, अऊ ओकर दीवारमन म इमारती लकरी मढ़ात हवंय। ये काम ला बड़े मेहनत से करे जावत हे, अऊ ओमन के निरदेसन म ये काम तेजी से होवत हे।
EZR 5:9 हमन ओ अगुवामन ले सवाल करके पुछेंन, “ये मंदिर ला फेर बनाय के अऊ ये काम ला पूरा करे के अधिकार तुमन ला कोन दीस?”
EZR 5:10 हमन ओमन के नांव घलो पुछेंन ताकि हमन ओमन के अगुवामन के नांव लिखके तोला बता सकन।
EZR 5:11 ओमन हमन ला ये जबाब दीन: हमन तो अकास अऊ धरती के परमेसर के सेवक अन, अऊ ओ भवन ला बनात हन, जेह बहुंत साल पहिले बने रिहिस, जेला इसरायल के एक बड़े राजा ह बनाके तियार करे रिहिस।
EZR 5:12 पर जब हमर पुरखामन स्वरग के परमेसर ला कोरोध दिलाईन, तब ओह ओमन ला बेबिलोन के कसदी राजा नबूकदनेसर के हांथ म कर दीस, जऊन ह ये भवन ला नास कर दीस अऊ मनखेमन ला बंदी बनाके बेबिलोन ले गीस।
EZR 5:13 तभो ले, बेबिलोन के राजा कुसरू के पहिले बरस म, ओही कुसरू राजा ह परमेसर के इही भवन ला बनाय के हुकूम दीस।
EZR 5:14 परमेसर के भवन के जऊन सोन अऊ चांदी के बरतन नबूकदनेसर यरूसलेम के मंदिर म ले निकलवाके बेबिलोन के मंदिर म ले गेय रिहिस, ओमन ला राजा कुसरू ह बेबिलोन के मंदिर म ले निकलवाके सेसबसर नांव के एक मनखे ला सऊंप दीस, जेला ओह राजपाल ठहिराय रिहिस।
EZR 5:15 राजा ह ओकर ले कहिस, ये बरतनमन ला ले अऊ जाके येमन ला यरूसलेम के मंदिर म जमा कर दे। अऊ परमेसर के ओ भवन ला अपन जगह म फेर बना।
EZR 5:16 “तब सेसबसर ह आईस अऊ यरूसलेम म परमेसर के भवन के नीव डारिस। तब ले लेके अब तक येह बनत हवय, पर अब तक येह पूरा नइं बने हवय।”
EZR 5:17 अब यदि राजा ला बने लगे, त बेबिलोन के राज-भंडार म ये बात के खोज करे जावय कि राजा कुसरू ह सही म यरूसलेम म, परमेसर के भवन ला फेर बनाय के हुकूम देय रिहिस या नइं। तब राजा ह ये बिसय म अपन निरनय हमन ला बतावय।
EZR 6:1 तब राजा दारा ह हुकूम दीस, अऊ ओमन बेबिलोन के खजाना म रखे राज-भंडार म खोज करिन।
EZR 6:2 मादै प्रदेस म एकबतना नगर के राजगढ़ म एक चामपट्टी मिलिस, जेमा ये लिखाय रिहिस: सुरता करइया चिट्ठी:
EZR 6:3 राजा कुसरू ह अपन राज के पहिली बरस म, यरूसलेम म परमेसर के मंदिर के बारे म ये हुकूम दीस: बलिदान चघाय के जगह के रूप म मंदिर ला फेर बनाय जावय, अऊ ओकर नीव डाले जावय, ओकर ऊंचई साठ क्यूबीट अऊ चौड़ई साठ क्यूबीट के होवय,
EZR 6:4 ओमा बड़े-बड़े पथरा के तीन परत अऊ लकड़ीमन के एक परत होवय। अऊ एकर खरचा साही खजाना ले दिये जावय।
EZR 6:5 अऊ परमेसर के भवन के जऊन सोन अऊ चांदी के चीजमन ला नबूकदनेसर ह यरूसलेम के मंदिर म ले निकलवाके बेबिलोन ले गेय रिहिस, ओमन ला लहुंटाके यरूसलेम के मंदिर म ओमन के जगह म रख दिये जावय; ओमन ला परमेसर के भवन म जमा करे जावय।
EZR 6:6 त अब हे फरात नदी के पार के राजपाल, ततनै, अऊ हे सतर-बोजनै अऊ ओ प्रदेस के आने अधिकारीमन, तुमन उहां ले दूरिहा रहव।
EZR 6:7 परमेसर के ये मंदिर के काम म बाधा झन डालव। यहूदीमन के राजपाल अऊ यहूदीमन के अगुवामन ला परमेसर के ओ भवन ला ओही जगह म बनावन दव।
EZR 6:8 येकर अलावा, मेंह हुकूम देवत हंव कि तुमन ला यहूदीमन के ओ अगुवामन बर परमेसर के मंदिर बनाय म का करना हे: ओमन के पूरा खरचा ह साही खजाना, फरात नदी के पार के मालगुजारी ले देय जावय, ताकि काम ह झन रूकय।
EZR 6:9 जऊन भी चीज के जरूरत हवय—स्वरग के परमेसर ला होम-बलिदान चघाय बर बछवा, मेढ़ा, मेढ़ा-पीला, अऊ यरूसलेम म पुरोहितमन के दुवारा मांगे गय गहूं, नून, अंगूर के मंद अऊ जैतून तेल—ये जम्मो चीज ओमन ला बिगर भूले रोज दिये जावय,
EZR 6:10 ताकि ओमन स्वरग के परमेसर ला सुख-देवइया बलिदान चघा सकंय अऊ राजा अऊ ओकर बेटामन के भलई बर पराथना कर सकंय।
EZR 6:11 मेंह ये हुकूम भी देवत हंव कि यदि कोनो ये हुकूम ला नइं मानही, त ओकर घर म ले एक बल्ला खींचके निकाले जावय अऊ ओमा ओला टांग दिये जावय। अऊ ओकर ये अपराध के कारन ओकर घर ला कचरा के घूरवा बना दिये जावय।
EZR 6:12 परमेसर, जेह उहां अपन नांव के निवास ठहिराय हवय, ओह ओ राजा या मनखे ला नास करय, जऊन ह ये हुकूम ला बदले के कोसिस करथे या यरूसलेम म ये मंदिर ला नास करे बर हांथ बढ़ाथे। में, दारा ह ये हुकूम देवत हंव। धियान से येकर पालन करे जावय।
EZR 6:13 तब, राजा दारा के हुकूम देय के कारन, ततनै, फरात नदी के पार के राजपाल, अऊ सतर-बोजनै अऊ ओमन के सहयोगीमन धियान देके ओ हुकूम के पालन करिन।
EZR 6:14 तब यहूदीमन के अगुवामन मंदिर ला फेर बनाय के काम ला जारी रखिन अऊ हाग्गै अगमजानी अऊ इद्दो के एक संतान जकरयाह के अधीन काम करत ओमन उन्नति करत गीन। ओमन इसरायल के परमेसर के हुकूम मुताबिक अऊ फारस के राजा कुसरू, दारा, अऊ अर्तछयर्स के हुकूम के मुताबिक मंदिर बनाय के काम ला पूरा करिन।
EZR 6:15 मंदिर के काम ह राजा दारा के राज के छठवां बछर के अदार महिना के तीसरा दिन म पूरा होईस।
EZR 6:16 तब इसरायल के मनखेमन—पुरोहित, लेवी अऊ आने जतेक बंधुवई ले आय रिहिन, ओ जम्मो आनंद के साथ परमेसर के ओ भवन के समरपन के उत्सव मनाईन।
EZR 6:17 परमेसर के ये भवन के समरपन म, ओमन एक सौ बईला, दू सौ मेढ़ा, चार सौ मेढ़ा-पीला चघाईन अऊ जम्मो इसरायल के हित बर पाप-बलिदान के रूप म बारह ठन बोकरा याने कि इसरायल के हर एक गोत्र बर एक-एक ठन बोकरा चघाईन।
EZR 6:18 तब जइसने मूसा के किताब म लिखाय हवय, वइसनेच ओमन यरूसलेम म परमेसर के सेवा बर अपन-अपन बिभाग म पुरोहितमन ला अऊ अपन-अपन दल म लेवीमन ला नियुक्त करिन।
EZR 6:19 बंधुवई ले लहुंटे के बाद पहिला महिना के चौदहवां दिन, ओमन फसह तिहार मानिन।
EZR 6:20 पुरोहित अऊ लेवीमन अपन ला सुध करे रिहिन अऊ संस्कारिक रूप ले ओ जम्मो झन सुध रिहिन। लेवीमन बंधुवई ले लहुंटे जम्मो झन बर, ओमन के रिस्तेदार पुरोहितमन बर अऊ अपनआप बर फसह के मेढ़ा-पीला के बलि करिन।
EZR 6:21 तब बंधुवई ले लहुंटे इसरायलीमन ओ जम्मो झन के संग येला खाईन, जेमन अपनआप ला अपन आनजात परोसी के असुध काम ले अलग कर ले रिहिन, ताकि ओमन यहोवा, इसरायल के परमेसर के खोज करंय।
EZR 6:22 ओमन अखमीरी रोटी के तिहार ला सात दिन तक आनंद के साथ मनाईन, काबरकि यहोवा ह अस्सूर के राजा के मन ला ओमन कोति करके ओमन ला आनंदित करे रिहिस, जेकर कारन राजा ह परमेसर, इसरायल के परमेसर के भवन के काम म ओमन के मदद करिस।
EZR 7:1 ये घटनामन के बाद, फारस के राजा अर्तछयर्स के राज के समय, एजरा ह आईस। एजरा ह सरायाह के बेटा, सरायाह ह अजरयाह के बेटा, अजरयाह ह हिलकियाह के बेटा,
EZR 7:2 हिलकियाह ह सल्लूम के, सल्लूम ह सादोक के, सादोक ह अहीतूब के,
EZR 7:3 अहीतूब ह अमरयाह के, अमरयाह ह अजरयाह के, अजरयाह ह मरायोत के,
EZR 7:4 मरायोत ह जरहयाह के, जरहयाह ह उज्जी के, उज्जी ह बुक्की के,
EZR 7:5 बुक्की ह अबीसू के, अबीसू ह पीनहास के, पीनहास ह एलिआजर के अऊ एलिआजर ह हारून मुखिया पुरोहित के बेटा रिहिस।
EZR 7:6 येहीच एजरा ह बेबिलोन ले आईस। ओह एक गुरूजी रिहिस अऊ मूसा के ओ कानून के बने जानकार रिहिस, जेला यहोवा, इसरायल के परमेसर ह देय रिहिस। यहोवा ओकर परमेसर के हांथ ओकर ऊपर रिहिस, जेकर कारन राजा ह ओला ओ जम्मो चीज देय रिहिस, जेकर मांग ओह करिस।
EZR 7:7 कुछू इसरायली अऊ संग म कुछू पुरोहित, लेवी, संगीतकार, दुवारपाल अऊ मंदिर के सेवकमन घलो राजा अर्तछयर्स के राज के सातवां बरस म यरूसलेम आईन।
EZR 7:8 एजरा ह राजा के सासनकाल के सातवां बरस के पांचवां महिना म यरूसलेम हबरिस।
EZR 7:9 ओह बेबिलोन ले ओ सातवां बछर के पहिला महिना के पहिला दिन अपन यातरा सुरू करे रिहिस, अऊ ओह पांचवां महिना के पहिला दिन यरूसलेम हबर गीस, काबरकि ओकर परमेसर के अनुग्रहकारी हांथ ओकर ऊपर रिहिस।
EZR 7:10 एजरा ह यहोवा के कानून के अध्ययन करे बर अऊ ओकर अनुसार चले बर, अऊ इसरायल म ओकर बिधि अऊ कानून ला सिखाय बर अपन मन ला लगाय रिहिस।
EZR 7:11 येह ओ चिट्ठी के नकल अय, जेला राजा अर्तछयर्स ह एजरा पुरोहित ला देय रिहिस, जऊन ह कानून के एक गुरू, अऊ इसरायलीमन बर यहोवा के हुकूम अऊ बिधिमन के एक बने जानकार रिहिस:
EZR 7:12 महाराजाधिराज, अर्तछयर्स कोति ले एजरा पुरोहित के नांव, जऊन ह स्वरग के परमेसर के कानून के गुरू अय: तोर कल्यान होवय।
EZR 7:13 मेंह ये हुकूम देवत हंव कि मोर राज ले जतेक इसरायली अऊ ओमन के संग जतेक पुरोहित अऊ लेवीमन अपन ईछा ले यरूसलेम जाय चाहत हें, ओमन तोर संग जा सकत हें।
EZR 7:14 तोला राजा अऊ ओकर सातों सलाहकारमन कोति ले एकरसेति पठोय जावत हे कि अपन परमेसर के कानून के बात जऊन ह तोर करा हवय, यहूदा प्रदेस अऊ यरूसलेम सहर के बारे म मालूम कर,
EZR 7:15 अऊ तेंह ओ सोन अऊ चांदी ला ले जा, जेला राजा अऊ ओकर सलाहकारमन अपन ईछा से इसरायल के परमेसर ला देय हवंय, जेकर निवास यरूसलेम म हवय,
EZR 7:16 अऊ जतेक सोन अऊ चांदी पूरा बेबिलोन प्रदेस म तोला मिलही, अऊ संग म ओ स्वेच्छा-बलिदानमन ला घलो ले जा, जऊन ला मनखे अऊ पुरोहितमन यरूसलेम के ओमन के परमेसर के मंदिर बर देथें।
EZR 7:17 ये धन ले सावधानी के संग बईला, मेढ़ा अऊ मेढ़ा-पीलामन के संग ओमन के अन्न-बलिदान अऊ पेय-बलिदान के चीजमन ला बिसा लेबे, अऊ ओमन ला यरूसलेम म तोर परमेसर के मंदिर के बेदी ऊपर चघाबे।
EZR 7:18 तब जऊन सोन अऊ चांदी बांच जाही, ओकर उपयोग तें अऊ तोर संगी इसरायलीमन जइसे उचित जान पड़ही, अपन परमेसर के ईछा के मुताबिक कर सकत हव।
EZR 7:19 ओ जम्मो चीज यरूसलेम के परमेसर ला दे देवव, जेमन ला तोर परमेसर के मंदिर म अराधना करे बर तोला सऊंपे जावत हवंय।
EZR 7:20 यदि तोर परमेसर के मंदिर बर अऊ कोनो चीज के जरूरत होही, जेकर पूरती करे के जिम्मेदारी तोर अय, त ओला तेंह साही खजाना म ले देय सकत हस।
EZR 7:21 में, राजा अर्तछयर्स, ये हुकूम देवत हंव कि फरात नदी के पार के जम्मो खजांचीमन धियान देके ओ जम्मो चीज ला देवंय, जेकर मांग एजरा पुरोहित, स्वरग के परमेसर के कानून के गुरू ह करथे—
EZR 7:22 याने सौ टेलेन्ट तक चांदी, सौ कोर तक गहूं, सौ बत तक अंगूर के मंद, सौ बत तक जैतून तेल, अऊ नून जतेक चाही ओतेक देय जावय।
EZR 7:23 जऊन भी हुकूम स्वरग के परमेसर कोति ले मिले हवय, ओला धियान देके स्वरग के परमेसर के मंदिर बर पूरा करे जावय। राजा अऊ ओकर राजकुमारमन के राज ऊपर परमेसर के कोरोध काबर भड़कय?
EZR 7:24 तुमन ला ये घलो मालूम होवय कि तुमन ला परमेसर के ओ भवन के कोनो पुरोहित, लेवी, संगीतकार, दुवारपाल, मंदिर के सेवक या आने काम करइयामन ले कर, लगान, या चुंगी लेय के कोनो अधिकार नइं ए।
EZR 7:25 अऊ हे एजरा! तोर परमेसर के बुद्धि के मुताबिक, जऊन ह कि तोर म हवय, तें जिलाधीस अऊ नियायधीसमन ला नियुक्त कर, जेमन फरात नदी के पार के जम्मो मनखेमन ऊपर नियाय के संग सासन करंय—ओ जम्मो जेमन तोर परमेसर के कानून ला जानथें। अऊ यदि कोनो ये कानूनमन ला नइं जानत हे, त तें ओला ये कानून सिखा।
EZR 7:26 जऊन कोनो तोर परमेसर के कानून अऊ राजा के कानून ला नइं मानही, त ओला खचित परानदंड, देस निकाला, ओकर माल जपत करई, या कैद के सजा देय जावय।
EZR 7:27 यहोवा, हमर पुरखामन के परमेसर के परसंसा होवय, जऊन ह राजा के मन म ये बात डालिस कि ये किसम ले यरूसलेम म यहोवा के भवन बर आदर के काम होवय
EZR 7:28 अऊ जऊन ह राजा अऊ ओकर सलाहकार अऊ राजा के जम्मो बड़े अधिकारीमन के आघू म मोर बर बड़े दया देखाय हवय। काबरकि यहोवा मोर परमेसर के हांथ मोर ऊपर रिहिस, एकरसेति मेंह हिम्मत करंय, अऊ इसरायल के अगुवामन ला मोर संग जाय बर इकट्ठा करंय।
EZR 8:1 येह परिवारमन के मुखिया अऊ ओमन के संग लिखे गय मनखेमन के नांव के सूची अय, जेमन राजा अर्तछयर्स के राज म बेबिलोन ले मोर संग यरूसलेम गीन:
EZR 8:2 पीनहास के बंस म ले: गेरसोम; ईतामार के बंस म ले: दानिएल; दाऊद के बंस म ले: हतूस
EZR 8:3 सेकनयाह के बंस के; परोस के बंस म ले: जकरयाह, अऊ ओकर संग 150 आदमीमन के नांव लिखे गे रिहिस;
EZR 8:4 पहत-मोआब के बंस म ले: जरहयाह के बेटा एलिहोएनै, अऊ ओकर संग 200 आदमी;
EZR 8:5 जत्तू के बंस म ले: यहजीएल के बेटा सेकनयाह, अऊ ओकर संग 300 आदमी;
EZR 8:6 आदीन के बंस म ले: योनातन के बेटा एबेद, अऊ ओकर संग 50 आदमी;
EZR 8:7 एलाम के बंस म ले: अतलयाह के बेटा येसायाह, अऊ ओकर संग 70 आदमी;
EZR 8:8 सपतयाह के बंस म ले: मिकाएल के बेटा जबदयाह, अऊ ओकर संग 80 आदमी;
EZR 8:9 योआब के बंस म ले: यहीएल के बेटा ओबदयाह, अऊ ओकर संग 218 आदमी;
EZR 8:10 बानी के बंस म ले: योसिवियाह के बेटा सलोमीत, अऊ ओकर संग 160 आदमी;
EZR 8:11 बेबै के बंस म ले: बेबै के बेटा जकरयाह, अऊ ओकर संग 28 आदमी;
EZR 8:12 अजगाद के बंस म ले: हक्कातान के बेटा योहानान, अऊ ओकर संग 110 आदमी;
EZR 8:13 अदोनीकाम के बंस म ले: आखिरी के मनखेमन, जेमन के नांव एलीपेलेत, यूएल, अऊ समायाह, अऊ ओमन के संग 60 आदमी;
EZR 8:14 बिगवै के बंस म ले: ऊतै अऊ जक्कूर, अऊ ओमन के संग 70 आदमी।
EZR 8:15 मेंह येमन ला नहर मेर इकट्ठा कर लेंव, जऊन ह अहवा सहर कोति बहथे, अऊ उहां हमन तीन दिन तक डेरा डाले रहेंन। अऊ मेंह मनखे अऊ पुरोहितमन के बीच जांच करेंव, त मोला उहां कोनो लेवी नइं मिलिन।
EZR 8:16 एकरसेति मेंह एलिएजेर, अरीएल, समायाह, एलनातान, यारीब, एलनातान, नातान, जकरयाह अऊ मसुल्लाम ला जऊन मन अगुवा रिहिन, अऊ योयारीब अऊ एलनातान ला, जेमन गियानी रिहिन, बुलवा लेंव,
EZR 8:17 अऊ मेंह ओमन ला कासिपिया म अगुवा, इद्दो मेर जाय के हुकूम देंव। मेंह ओमन ला समझा देंव कि कासिपिया म इद्दो अऊ ओकर संगी लेवी, मंदिर के सेवकमन ले का कहना हे, ताकि ओमन हमर करा हमर परमेसर के भवन बर सेवकमन ला लेके आवंय।
EZR 8:18 काबरकि हमर परमेसर के अनुग्रहकारी हांथ हमर ऊपर रिहिस, ओमन सेरेबियाह, एक योग्य मनखे, महली के संतान ला हमर करा लानिन; महली ह लेवी के बेटा अऊ लेवी ह इसरायल के बेटा रिहिस; सेरेबियाह के बेटा अऊ भाईमन, सब मिलाके 18 झन;
EZR 8:19 अऊ हसबियाह, अऊ ओकर संग मरारी के संतान म ले येसायाह, अऊ ओकर भाई अऊ भतीजामन, सब मिलाके 20 झन।
EZR 8:20 ओमन 220 मंदिर के सेवकमन ला घलो लानिन—एक समूह जेकर स्थापना दाऊद अऊ अधिकारीमन करे रिहिन, ताकि ये समूह ह लेवीमन के मदद करय। ये जम्मो के नांव सूची म लिखाय रिहिस।
EZR 8:21 उहां, अहवा नहर के तीर म, मेंह उपास रखे के घोसना करेंव, ताकि हमन अपनआप ला हमर परमेसर के आघू म दीन करन; अऊ ओकर ले यातरा के दौरान अपन अऊ अपन लइका अऊ अपन जम्मो संपत्ति बर सुरकछा के पराथना करन।
EZR 8:22 रसता के बईरीमन ले सुरकछा पाय बर राजा ले सैनिक अऊ घुड़सवारमन के मांग करे म मोला संकोच होवत रिहिस, काबरकि हमन राजा ले ये कहे रहेंन, “हमर परमेसर के अनुग्रहकारी हांथ ओ हर एक मनखे ऊपर हवय, जऊन ह ओला खोजथे, पर ओकर भयंकर कोरोध ओ जम्मो ऊपर भड़कथे, जेमन ओला तियाग देथें।”
EZR 8:23 एकरसेति हमन उपास करेंन अऊ येकर बारे म हमन अपन परमेसर ले पराथना करेंन, अऊ ओह हमर पराथना के जबाब दीस।
EZR 8:24 तब मेंह अगुवा पुरोहितमन म ले बारह झन ला अलग करेंव, अऊ येमन सेरेबियाह, हसबियाह अऊ येमन के दस भाईमन रिहिन,
EZR 8:25 अऊ मेंह ओमन ला ओ सोन अऊ चांदी अऊ ओ जम्मो चीजमन ला तऊलके दे देंव, जेला राजा, ओकर सलाहकार, ओकर अधिकारी अऊ उहां उपस्थित जम्मो इसरायलीमन हमर परमेसर के भवन बर भेंट म देय रिहिन।
EZR 8:26 मेंह ओमन ला तऊलके 650 टेलेन्ट चांदी, 100 टेलेन्ट चांदी के सामान, 100 टेलेन्ट सोन,
EZR 8:27 सोन के 20 कटोरा, जेमन के कीमत 1,000 दरकमोन रिहिस, अऊ सोन के सहीं कीमती चमकत कांसा के दू ठन सुघर सामान देंव।
EZR 8:28 मेंह ओमन ले कहेंव, “तुमन अऊ संग म ये सामान घलो यहोवा बर पबितर करे गे हवंव। ये सोन अऊ चांदी यहोवा, तुम्हर पुरखामन के परमेसर बर एक स्वेच्छा-बलिदान अंय।
EZR 8:29 एकरसेति धियान देके येमन के पहरेदारी करव, जब तक कि तुमन ये चीजमन ला यरूसलेम म अगुवा पुरोहित अऊ लेवी अऊ इसरायल के परिवार के मुखियामन के आघू म यहोवा के भवन के कोठरीमन म तऊलके नइं दे दव।”
EZR 8:30 तब पुरोहित अऊ लेवीमन सोन अऊ चांदी अऊ ओ पबितर सामान ला तऊलके ले लीन ताकि ओमन ला यरूसलेम म हमर परमेसर के भवन म अमरा देवंय।
EZR 8:31 पहिला महिना के बारहवां दिन, हमन अहवा नहर ले यरूसलेम जाय बर निकलेंन। हमर परमेसर के हांथ हमर ऊपर रिहिस, अऊ ओह रसता म हमन ला बईरी अऊ डाकूमन ले बचाईस।
EZR 8:32 आखिर म हमन यरूसलेम हबरेंन अऊ उहां तीन दिन अराम करेंन।
EZR 8:33 उहां हबरे के चऊथा दिन, हमर परमेसर के भवन म, हमन ओ सोन अऊ चांदी अऊ पबितर चीजमन ला तऊलके उरियाह के बेटा मरेमोत पुरोहित के हांथ म देंन। ओकर संग पीनहास के बेटा एलिआजर रिहिस, अऊ वइसने ही ओमन के संग लेवीमन याने येहोसू के बेटा योजाबाद अऊ बिन्नूई के बेटा नोअदियाह घलो रिहिन।
EZR 8:34 ओ जम्मो चीजमन गने अऊ तऊले गीन, अऊ ओमन के पूरा वजन ओ बेरा लिख लिये गीस।
EZR 8:35 तब जेमन बंधुवई ले लहुंटके आय रिहिन, ओमन इसरायल के परमेसर बर होम-बलिदान चघाईन: जम्मो इसरायल बर बारह ठन बछवा, छियानबे मेढ़ा अऊ सतहत्तर मेढ़ा-पीला, अऊ पाप-बलिदान बर बारह ठन बोकरा। ये जम्मो यहोवा बर एक होम-बलिदान रिहिस।
EZR 8:36 ओमन राजा के हुकूम घलो फरात नदी के पार के साही हाकिम अऊ राजपालमन ला दीन, जेमन तब इसरायली मनखेमन ला अऊ संग म परमेसर के भवन बर मदद करिन।
EZR 9:1 ये बातमन के पूरा होय के बाद, अगुवामन मोर करा आके कहिन, “इसरायल के मनखेमन, संग म पुरोहित अऊ लेवीमन अपनआप ला परोसी मनखे कनानी, हित्ती, परिज्जी, यबूसी, अमोनी, मोआबी, मिसरी अऊ अमोरीमन के घिनित काममन ले अलग नइं रखे हवंय।
EZR 9:2 येमन ओमन के कुछू बेटीमन ला अपन अऊ अपन बेटामन के घरवाली बना ले हवंय, अऊ पबितर जाति ला अपन आसपास के मनखेमन संग मिला ले हवंय। अऊ अगुवा अऊ करमचारीमन ये बिसवासघात के काम म अगुवई करे हवंय।”
EZR 9:3 जब मेंह ये बात ला सुनेंव, त मेंह निरासा म अपन कपड़ा अऊ बागा ला चीरेंव, अपन मुड़ के बाल अऊ दाढ़ी ला चीथेंव अऊ निरास होके उहां खाल्हे बईठ गेंव।
EZR 9:4 तब बंधुवई म ले आय मनखेमन के ये बिसवासघात के कारन ओ मनखे जेमन इसरायल के परमेसर के बचन ला सुनके कांप गे रिहिन, ओमन मोर चारों कोति जमा हो गीन। अऊ मेंह निरास होके सांझ के बलिदान के समय तक उहां बईठे रहेंव।
EZR 9:5 तब, सांझ के बलिदान के बेरा, मेंह अपन खुद के बेजत्ती के दसा ले उठेंव, मोर कपड़ा अऊ बागा फटे रहंय, अऊ मेंह माड़ी टेकके अपन हांथमन ला यहोवा अपन परमेसर कोति उठांय
EZR 9:6 अऊ ये पराथना करेंव: “हे मोर परमेसर, मेंह अतेक अपमानित अऊ कलंकित महसूस करत हंव कि मेंह तोर कोति अपन चेहरा नइं कर सकंव, काबरकि हमर पापमन हमर मुड़ के घलो ऊपर चले गे हवंय अऊ हमर अपराध ह अकास तक हबर गे हवय।
EZR 9:7 हमर पुरखामन के समय ले लेके अब तक, हमन घोर अपराध करे हन। हमर पाप के कारन, हमन अऊ हमर राजा अऊ हमर पुरोहितमन ला आने राजामन के तलवार, बंधुवई, लूट अऊ अपमान के सामना करे पड़िस, जइसे कि आज घलो दिखत हे।
EZR 9:8 “पर अब, कुछू समय बर, यहोवा हमर परमेसर ह हमन ला मनखेमन के एक बांचे भाग अऊ पबितर-स्थान म एक इस्थिर जगह देय के दुवारा हमर ऊपर अनुग्रह करे हवय, अऊ ये किसम ले हमर परमेसर ह हमर आंखी ला अंजोर अऊ हमर बंधुवई म हमन ला थोरकन मदद देय हवय।
EZR 9:9 हालाकि हमन गुलाम अन, पर हमर परमेसर ह हमन ला हमर बंधुवई म नइं तियागे हवय। ओह फारस के राजामन के नजर म हमर ऊपर दया देखाय हवय: ओह हमन ला नवां जिनगी देय हवय कि हमन अपन परमेसर के घर ला फेर बनावन अऊ येकर खंडहरमन ला सुधारन, अऊ ओह हमन ला यहूदा अऊ यरूसलेम म सुरकछा के एक दीवार देय हवय।
EZR 9:10 “पर हे हमर परमेसर, अब हमन येकर बाद का कह सकथन? काबरकि हमन तोर ओ हुकूममन ला नइं माने हन,
EZR 9:11 जेला तेंह अपन सेवक अगमजानीमन के जरिये देय रहय जब तेंह कहय: ‘जऊन देस ला तुमन अपन अधिकार म लेय बर जावत हव, ओ देस ह उहां के मनखेमन के भ्रस्टाचार के काम के कारन दूसित हो गे हवय। ओमन घिनौना काम करके देस के एक छोर ले लेके दूसर छोर तक अपन असुधता ले भर देय हवंय।
EZR 9:12 एकरसेति, अपन बेटीमन के बिहाव ओमन के बेटामन संग झन करव अऊ ओमन के बेटीमन ला अपन बेटामन बर झन लानव। ओमन के संग कभू भी संगी-यारी के समझौता झन करव, ताकि तुमन बलवान बनव अऊ ओ देस के बने-बने चीज तुमन ला खाय बर मिलय अऊ येला तुमन अपन लइकामन बर हमेसा के उत्तराधिकार के रूप म छोंड़ सकव।’
EZR 9:13 “हमर ऊपर जऊन कुछू होय हवय, ओह हमर दुस्ट काम अऊ बड़े अपराध के परिनाम ए; पर तभो ले, हे हमर परमेसर, तेंह हमन ला हमर पाप के मुताबिक कम सजा दे हस अऊ हमन ला ये किसम के एक बांचे भाग दे हस।
EZR 9:14 त का हमन तोर हुकूममन ला फेर टोरन अऊ ओ मनखेमन संग अंतर-जात बिहाव करन, जऊन मन अइसने घिनौना काम करथें? का तेंह बहुंत गुस्सा होके हमर बर बिगर बांचे भाग छोंड़े या बिगर जीयत मनखे छोंड़े, हमन ला नास नइं कर देबे?
EZR 9:15 हे यहोवा, इसरायल के परमेसर, तेंह धरमी अस! हमन आज एक बांचे भाग के रूप म छोंड़ दिये गे हन। इहां हमन अपन अपराध के संग तोर आघू म हन, हालाकि ये अपराध के कारन हमन ले कोनो तोर आघू म ठाढ़ नइं हो सकन।”
EZR 10:1 जब एजरा ह परमेसर के भवन के आघू म रोवत, मुहूं-भरसा गिरके पराथना करत अऊ पाप ला मानत रिहिस, तब इसरायली आदमी, माईलोगन अऊ लइकामन के एक बड़े भीड़ ओकर चारों कोति जमा हो गीस, अऊ मनखेमन घलो बिलख-बिलखके रोवन लगिन।
EZR 10:2 तब यहीएल के बेटा सेकनयाह, जऊन ह एलाम के संतान म ले रिहिस, एजरा ले कहिस, “हमन हमर आसपास के मनखेमन ले परदेसी माईलोगनमन ले बिहाव करके अपन परमेसर के संग बिसवासघात करे हन। पर अतेक होय के बाद घलो, अभी भी इसरायल बर आसा हवय।
EZR 10:3 अब हमन हमर परमेसर के आघू म ये करार बांधन कि हमन हमर मालिक अऊ जेमन हमर परमेसर के हुकूम के भय मानथें, ओमन के सलाह मुताबिक ये जम्मो माईलोगन अऊ ओमन के लइकामन ला दूरिहा कर देवन। ये काम कानून के मुताबिक करे जावय।
EZR 10:4 उठ; ये बात ह तोर हांथ म हवय। हमन तोर संग हवन, एकरसेति हिम्मत बांधके ये काम ला कर।”
EZR 10:5 तब एजरा ह उठिस, अऊ अगुवा पुरोहित अऊ लेवी अऊ जम्मो इसरायलीमन ला दिये गय सलाह के मुताबिक काम करे बर सपथ खवाईस। अऊ ओमन सपथ खाईन।
EZR 10:6 तब एजरा ह परमेसर के भवन के आघू ले उठिस अऊ एलियासीब के बेटा यहोहानान के कमरा म गीस। जब तक ओह उहां रिहिस, ओह न तो रोटी खाईस, अऊ न पानी पीईस, काबरकि ओह बंधुवई म ले आय मनखेमन के बिसवासघात के कारन सोक मनात रिहिस।
EZR 10:7 तब ओमन यहूदा अऊ यरूसलेम म रहइया बंधुवई म ले आय जम्मो मनखेमन बर एक घोसना करवाईन कि ओमन यरूसलेम म जूरंय।
EZR 10:8 जऊन कोनो तीन दिन के भीतर नइं आही, ओकर पूरा संपत्ति ला अधिकारी अऊ अगुवामन के फैसला के मुताबिक जपत कर लिये जाही अऊ ओला बंधुवई ले आय सभा ले निकाल दिये जाही।
EZR 10:9 तब तीन दिन के भीतर, यहूदा अऊ बिनयामीन के जम्मो आदमीमन यरूसलेम म जूर गीन। अऊ नौवां महिना के बीसवां दिन, जम्मो मनखेमन परमेसर के भवन के आघू, चऊक म ओ बिसय के कारन अऊ बारिस के कारन बहुंत दुखी बईठे रिहिन।
EZR 10:10 तब एजरा पुरोहित ह ठाढ़ होके ओमन ले कहन लगिस, “तुमन बिसवासघात करे हवव; तुमन परदेसी माईलोगनमन ले बिहाव करे हव, अऊ इसरायल के दोस ला बढ़ाय हव।
EZR 10:11 एकरसेति अब यहोवा, अपन पुरखामन के परमेसर के आदर करव, अऊ ओकर ईछा ला पूरा करव। अपन आसपास के आनजात मनखेमन ले अऊ अपन परदेसी घरवालीमन ले अपनआप ला अलग करव।”
EZR 10:12 तब पूरा सभा के मनखेमन चिचियाके जबाब दीन: “तेंह सही कहत हस! तेंह जइसने कहत हस, हमन ला वइसने करना जरूरी ए।
EZR 10:13 पर इहां बहुंत मनखेमन हवंय अऊ येह बारिस के बेरा अय; एकरसेति हमन बाहिर ठाढ़ नइं रह सकन। एकर अलावा, ये काम ला एक या दू दिन म नइं करे जा सकय, काबरकि हमन ये बात म बड़े पाप करे हवन।
EZR 10:14 जम्मो सभा के सेति हमर अधिकारीमन काम करंय। तब हमर नगरमन के हर ओ आदमी, जऊन ह कोनो परदेसी माईलोगन ले बिहाव करे हवय, हर नगर के अगुवा अऊ नियायीमन के संग ठहिराय गय समय म आवय, जब तक हमर परमेसर के भड़के कोरोध ह ये बिसय म हमर ले दूरिहा नइं हो जावय।”
EZR 10:15 सिरिप असाहेल के बेटा योनातन अऊ तिकवा के बेटा यहजयाह अऊ संग म मसुल्लाम अऊ सब्बतै लेवी ये बात के बिरोध करिन।
EZR 10:16 तब बंधुवई ले आय मनखेमन वइसे करिन, जइसे एजरा ह सलाह देय रिहिस। तब एजरा पुरोहित ह ओ आदमीमन ला चुनिस, जेमन परिवार के मुखिया रिहिन, हर एक परिवार के दल ले एक झन, अऊ ओ जम्मो झन ला नांव के दुवारा ठहिराय गीस। दसवां महिना के पहिला दिन, ओमन ये मामला के जांच-पड़ताल करे बर बईठिन,
EZR 10:17 अऊ पहिला महिना के पहिला दिन तक, ओमन ओ जम्मो मनखेमन के जांच पूरा कर लीन, जेमन ह परदेसी माईलोगनमन ले बिहाव करे रिहिन।
EZR 10:18 पुरोहितमन के संतानमन ले, येमन परदेसी माईलोगनमन ले बिहाव करे रिहिन: योसादाक के बेटा यहोसू के संतानमन ले, अऊ ओकर भाईमन ले: मासेयाह, एलिएजेर, यारीब अऊ गदलयाह।
EZR 10:19 (ओमन अपन हांथ देके अपन घरवालीमन ला छोंड़ देय के सपथ खाईन, अऊ अपन दोस बर ओमन बरदी म ले एक-एक ठन मेढ़ा दोस-बलिदान के रूप म चघाईन।)
EZR 10:20 इम्मेर के संतान म ले: हनानी अऊ जबदयाह।
EZR 10:21 हारीम के संतान म ले: मासेयाह, एलियाह, समायाह, यहीएल अऊ उजियाह।
EZR 10:22 पसहूर के संतान म ले: एलयोएनै, मासेयाह, इसमायल, नतनेल, योजाबाद अऊ एलासा।
EZR 10:23 लेवीमन म ले: योजाबाद, सिमी, केलायाह (जऊन ह कलीता कहाथे), पतहियाह, यहूदा अऊ एलिएजेर।
EZR 10:24 संगीतकारमन ले: एलियासीब। दुवारपालमन ले: सल्लूम, तेलेम अऊ ऊरी।
EZR 10:25 अऊ आने इसरायलीमन ले: परोस के संतान म ले: रमयाह, यिजियाह, मलकियाह, मियामीन, एलिआजर, मलकियाह अऊ बनायाह।
EZR 10:26 एलाम के संतान म ले: मतनयाह, जकरयाह, यहीएल, अब्दी, यरेमोत अऊ एलियाह।
EZR 10:27 जत्तू के संतान म ले: एलयोएनै, एलियासीब, मतनयाह, यरेमोत, जाबाद अऊ अजीजा।
EZR 10:28 बेबै के संतान म ले: यहोहानान, हननयाह, जब्बै अऊ अतलै।
EZR 10:29 बानी के संतान म ले: मसुल्लाम, मल्लूक, अदायाह, यासूब, साल अऊ यरेमोत।
EZR 10:30 पहत-मोआब के संतान म ले: अदना, कलाल, बनायाह, मासेयाह, मतनयाह, बसलेल, बिन्नूई अऊ मनस्से।
EZR 10:31 हारीम के संतान म ले: एलिएजेर, यिसियाह, मलकियाह, समायाह, सिमोन,
EZR 10:32 बिनयामीन, मल्लूक अऊ समरयाह।
EZR 10:33 हासूम के संतान म ले: मत्तनै, मतता, जाबाद, एलीपेलेत, यरेमै, मनस्से अऊ सिमी।
EZR 10:34 बानी के संतान म ले: मादै, अमराम, ऊएल,
EZR 10:35 बनायाह, बेदयाह, कलूही,
EZR 10:36 वनियाह, मरेमोत, एलियासीब,
EZR 10:37 मतनयाह, मत्तनै, यासू;
EZR 10:38 बानी बिन्नूई के संतान म ले: सिमी,
EZR 10:39 सेलेमियाह, नातान, अदायाह,
EZR 10:40 मकनदबै, सासै, सारै,
EZR 10:41 अजरेल, सेलेमियाह, समरयाह,
EZR 10:42 सल्लूम, अमरयाह अऊ यूसुफ।
EZR 10:43 नबो के संतान म ले: येइल, मत्तितियाह, जाबाद, जबीना, यद्दई, योएल अऊ बनायाह।
EZR 10:44 ये जम्मो झन परदेसी माईलोगनमन ले बिहाव करे रिहिन, अऊ ओमा के कुछू झन के ये घरवालीमन ले लइकामन घलो पईदा होय रिहिन।
NEH 1:1 हकलयाह के बेटा नहेमियाह के बचन: राजा अर्तछयर्स के राज के बीसवां बछर के किसलेव नांव महिना म, जब मेंह सूसन नांव राजगढ़ म रहत रहेंव,
NEH 1:2 तब हनानी नांव के मोर एक भाई ह यहूदा ले कुछू आने आदमीमन के संग आईस, अऊ मेंह ओमन ले ओ बांचे यहूदीमन के बारे म पुछेंव, जेमन बंधुवई ले बच गे रिहिन, अऊ मेंह यरूसलेम के बारे म घलो पुछेंव।
NEH 1:3 ओमन मोर ले कहिन, “बांचे मनखेमन जेमन बंधुवई ले छूटके प्रदेस म वापिस आ गे हवंय, ओमन बहुंत दुरदसा अऊ अपमान म परे हवंय। यरूसलेम के चारों मुड़ा के दीवार ह टूट गे हवय, अऊ ओकर दुवारमन जर गे हवंय।”
NEH 1:4 ये बात ला सुनके मेंह बईठके रोवन लगंय अऊ कुछू दिन तक सोक मनांय, अऊ स्वरग के परमेसर के आघू म उपास अऊ पराथना करंय।
NEH 1:5 तब मेंह कहेंव: “हे यहोवा, स्वरग के परमेसर, महान अऊ अद्भूत परमेसर, तें जऊन ह अपन मया रखइयामन अऊ हुकूम मनइयामन के संग अपन मया के करार ला बनाय रखथस,
NEH 1:6 तोर कान ह धियान देवय अऊ आंखी ह खुले रहय कि जऊन पराथना में, तोर सेवक ह रात अऊ दिन तोर सेवक, इसरायल के मनखेमन बर तोर आघू म करत हंव, ओला तें सुन ले। मेंह तोर बिरूध करे गय इसरायलीमन के पाप अऊ मोर अऊ मोर ददा के घराना के पाप करई ला मानत हंव।
NEH 1:7 हमन तोर आघू म बहुंत बुरई करे हवन। जऊन हुकूम, बिधि अऊ कानूनमन ला तेंह अपन दास मूसा ला देय रहय, ओला हमन नइं माने हन।
NEH 1:8 “ओ निरदेस ला सुरता कर, जेला तेंह अपन दास मूसा ला ये कहिके दे रहय, ‘यदि तुमन बिसवासघात करहू, त मेंह तुमन ला जाति-जाति के मनखेमन के बीच म तितिर-बितिर कर दूहूं।
NEH 1:9 पर यदि तुमन मोर करा लहुंटके आहू अऊ मोर हुकूम ला मानहू, त चाहे तुम्हर बंधुवई म गय मनखेमन धरती के छोर म घलो होहीं, तब भी मेंह ओमन ला उहां ले संकेलके ओ जगह म ले आहूं, जेला मेंह अपन नांव के निवास बर चुन लेय हंव।’
NEH 1:10 “ओमन तोर सेवक अऊ तोर मनखे अंय, जेमन ला तेंह अपन बहुंत ताकत अऊ बलवान हांथ के दुवारा छोंड़ाय हस।
NEH 1:11 हे परभू, तोर ये सेवक के पराथना अऊ तोर ओ सेवकमन के पराथना ला कान लगाके सुन, जेमन तोर नांव के भय माने म खुस होथें। ये आदमी के आघू म अनुग्रह देके आज तोर ये सेवक के काम ला सफल कर।” मेंह तो राजा के पीयानेवाला रहेंव।
NEH 2:1 अर्तछयर्स राजा के राज के बीसवां बछर के नीसान महिना म, जब ओकर बर अंगूर के मंद लाने गीस, त मेंह मंद ला लेके राजा ला देंय। एकर पहिले मेंह ओकर आघू म कभू उदास नइं होय रहंय,
NEH 2:2 एकरसेति राजा ह मोर ले पुछिस, “जब तेंह बेमार नइं अस, त फेर तोर मुहूं ह काबर उतरे हवय? येह मन के उदासी के अलावा अऊ कुछू नइं हो सकय।” तब मेंह अब्बड़ डर गेंव,
NEH 2:3 पर मेंह राजा ले कहेंव, “राजा सदा जीयत रहय! जब ओ सहर जेमा मोर पुरखामन के कबरमन हवंय, उजाड़ परे हवय अऊ ओ सहर के दुवारमन जरके नास हो गे हवंय, त फेर मोर मुहूं ह काबर नइं उतरही?”
NEH 2:4 राजा ह मोर ले पुछिस, “त तेंह का चाहत हस?” तब मेंह स्वरग के परमेसर ले पराथना करंय,
NEH 2:5 अऊ मेंह राजा ला जबाब देंय, “यदि राजा ला ये बात बने लगे, अऊ ओह अपन सेवक ले खुस हे, त ओह मोला यहूदा प्रदेस के ओ सहर म पठोवय, जिहां मोर पुरखामन ला माटी देय गे हवय, ताकि मेंह ओला फेर बनवा सकंव।”
NEH 2:6 तब राजा ह, जेकर बगल म रानी घलो बईठे रिहिस, मोर ले पुछिस, “तेंह कतेक दिन तक यातरा म रहिबे अऊ कब लहुंटके आबे?” ये बात ह राजा ला बने लगिस कि ओह मोला पठोवय; तब मेंह ओकर बर एक समय ठहिरांय।
NEH 2:7 मेंह राजा ले ये भी कहंय, “यदि राजा ला बने लगे, त फरात नदी के पार के राजपालमन बर इही बिसय के चिट्ठी मोला दिये जावय कि जब तक मेंह यहूदा प्रदेस म नइं हबरंव, तब तक ओमन मोला सुरकछित अपन देस म ले होके जावन देंय?
NEH 2:8 अऊ साही जंगल के चौकीदार आसाप बर घलो एक चिट्ठी मोला दिये जावय, ताकि ओह मोला मंदिर ले लगे गढ़ के दुवारमन के कड़ीमन ला बनाय बर, अऊ सहर के दीवार बर अऊ मोर रहे के घर बर इमारती लकरी देवय।” मोर परमेसर के किरपा मोर ऊपर रिहिस, एकरसेति राजा ह मोर बिनती ला मान लीस।
NEH 2:9 तब मेंह फरात नदी के पार के राजपालमन करा जाके ओमन ला राजा के चिट्ठीमन ला देंय। राजा ह मोर संग सेना के अधिकारीमन ला अऊ सेना ला घलो पठोय रिहिस।
NEH 2:10 ये सुनके कि एक मनखे ह इसरायलीमन के मदद करे बर आय हवय, दू झन मनखे सम्बल्लत नांव के होरोनी अऊ तोबियाह नांव के अमोनी बहुंत घबरा गीन। ये दूनों उहां करमचारी रिहिन।
NEH 2:11 मेंह यरूसलेम गेंव, अऊ उहां तीन दिन तक ठहिरे के बाद
NEH 2:12 मेंह कुछू मनखेमन के संग रथिया निकलेंव। मेंह कोनो ला नइं बताय रहेंव कि मोर परमेसर ह यरूसलेम के हित बर मोर मन म का योजना डारे हवय। उहां मोर सवारी के पसु ला छोंड़ कोनो आने पसु मोर संग नइं रिहिस।
NEH 2:13 मेंह रथिया घाटी के दुवार म ले होके सियार कुआं अऊ गोबर दुवार कोति निकलेंव; मेंह यरूसलेम के टूटे दीवारमन के जांच करत गेंव, अऊ ओमन के दुवारमन के घलो जांच करंय, जेमन आगी म जरके नास हो गे रिहिन।
NEH 2:14 तब मेंह झरना दुवार अऊ राजा के कुंड कोति गेंव, पर मोर सवारी के पसु बर उहां ले होके जाय बर जगह नइं रिहिस;
NEH 2:15 एकरसेति मेंह रथियाच दीवार के जांच करत ऊपर घाटी कोति गेंव। आखिर म, मेंह वापिस मुड़ेंव अऊ फेर घाटी दुवार म ले होके गेंव।
NEH 2:16 अधिकारीमन नइं जानत रिहिन कि मेंह कहां गे रहंय या मेंह का करत रहंय, काबरकि मेंह तब तक यहूदीमन ला या पुरोहितमन ला या परभावसाली मनखेमन ला या अधिकारीमन ला या आने कोनो ला कुछू नइं बताय रहेंव, जेमन कि काम ला करनेवाला रिहिन।
NEH 2:17 तब मेंह ओमन ले कहंय, “तुमन खुद देखत हव कि हमन कइसन दुरदसा म हवन: यरूसलेम ह उजाड़ परे हवय अऊ ओकर दुवारमन आगी ले जर गे हवंय। आवव, हमन यरूसलेम के दीवार ला फेर बनावन, ताकि हमन फेर कलंकित झन होवन।”
NEH 2:18 मेंह ओमन ला ये घलो बतांय कि मोर परमेसर के किरपा-दिरिस्टी मोर ऊपर हवय अऊ राजा ह मोर ले का कहे रिहिस, ओ बात ला घलो बतांय। तब ओमन कहिन, “आवव, हमन फेर बनाय के काम ला सुरू करन।” अऊ ओमन ये बने काम ला सुरू करिन।
NEH 2:19 पर जब सम्बल्लत नांव के होरोनी अऊ तोबियाह नांव के एक अमोनी करमचारी अऊ गेसेम नांव के एक अरबी मनखे ये बात ला सुनिन, त ओमन हमर हंसी उड़ाईन अऊ ठट्ठा करके पुछिन, “तुमन ये का करत हव? का तुमन राजा के बिरूध म बिदरोह करत हव?”
NEH 2:20 तब मेंह ये कहिके ओमन ला जबाब देंव, “स्वरग के परमेसर ह हमर काम ला सफल करही। हमन ओकर सेवकमन फेर बनाय बर सुरू करबो, पर जहां तक तुम्हर बात ए, यरूसलेम म तुम्हर न तो कोनो भाग, न ही कोनो हक अऊ न ही कोनो इतिहासिक अधिकार हवय।”
NEH 3:1 तब एलियासीब महा पुरोहित ह अपन संगी पुरोहितमन संग गीस अऊ भेड़ दुवार ला फेर बनाईस। ओमन ओकर परतिस्ठा करिन, अऊ ओकर कपाट ला ओकर जगह म लगाईन, अऊ ओमन सौ के मीनार तक अऊ संग म हनानेल के मीनार तक बनाईन अऊ ओकर परतिस्ठा करिन।
NEH 3:2 ओकर ले जुड़े भाग ला यरीहो के मनखेमन बनाईन, अऊ ओकर बाद वाले भाग ला इमरी के बेटा जक्कूर ह बनाईस।
NEH 3:3 मछरी दुवार ला हस्सना के बेटामन बनाईन। ओमन ओकर बल्लीमन ला लगाईन, अऊ ओकर कपाट अऊ चिटकनी अऊ बेड़ीमन ला ओमन के जगह म लगाईन।
NEH 3:4 मरेमोत, जऊन ह हक्कोस के पोता अऊ उरियाह के बेटा रिहिस, ओकर बाद के भाग के मरम्मत करिस। ओकर बाद के भाग ला मसुल्लाम ह मरम्मत करिस, जऊन ह मेसेजाबेल के पोता, अऊ बेरेकियाह के बेटा रिहिस। ओकर बाद के भाग ला बाना के बेटा सादोक ह मरम्मत करिस।
NEH 3:5 ओकर बाद के भाग ला तकोआ गांव के आदमीमन मरम्मत करिन, पर ओमन के परभावसाली मनखेमन ओमन के देखरेख करइयामन के अधीन काम म कोनो मदद नइं करिन।
NEH 3:6 फेर यसाना दुवार ला पासेह के बेटा योयादा अऊ बसोदयाह के बेटा मसुल्लाम के दुवारा मरम्मत करे गीस। ओमन ओकर कड़ीमन ला लगाईन अऊ ओकर कपाट, चिटकनी अऊ बेड़ीमन ला ओमन के जगह म लगाईन।
NEH 3:7 ओमन ले बाद के भाग के मरम्मत, गिबोन अऊ मिसपा के आदमीमन के दुवारा करे गीस—गिबोन के मलतियाह अऊ मेरोनोत के यादोन—येमन फरात नदी के पार के राजपाल के अधीन मरम्मत के काम ला करिन।
NEH 3:8 ओमन के बाद के मरम्मत हरहयाह के बेटा उजीएल ह करिस, जऊन ह सुनारमन ले एक झन रिहिस; अऊ ओकर बाद के भाग ला हननयाह ह मरम्मत करिस, जऊन ह एक अंतर तेल बनइया रिहिस। ओमन यरूसलेम ला चाकर दीवार तक मरम्मत करके पहिले के सहीं कर दीन।
NEH 3:9 ओकर बाद के भाग ला हूर के बेटा रपायाह ह मरम्मत करिस, जऊन ह यरूसलेम के आधा जिला के सासक रिहिस।
NEH 3:10 येला जोड़त, हरूमप के बेटा यदायाह ह अपन घर के सामने मंदिर ला मरम्मत करिस, अऊ ओकर बाद के भाग ला हसबनयाह के बेटा हतूस ह मरम्मत करिस।
NEH 3:11 हारीम के बेटा मलकियाह अऊ पहत-मोआब के बेटा हस्सूब आने भाग ला अऊ भट्ठीमन के मीनार ला मरम्मत करिन।
NEH 3:12 ओकर बाद के भाग ला यरूसलेम के आधा जिला के सासक हल्लोहेस के बेटा सल्लूम ह अपन बेटीमन के संग मिलके मरम्मत करिस।
NEH 3:13 घाटी दुवार ला हानून अऊ जानोह के रहइयामन मरम्मत करिन। ओमन ओला फेर बनाईन, अऊ ओकर कपाटमन ला ओमन के चिटकनीमन अऊ बेड़ीमन के संग ओमन के जगह म लगाईन। ओमन घलो दीवार ला एक हजार क्यूबीट लम्बा गोबर दुवार तक बनाईन।
NEH 3:14 गोबर दुवार ला रेकाब के बेटा मलकियाह ह ठीक करिस, जऊन ह बेत-हकेरेम के जिला के सासक रिहिस। ओह ओला फेर बनाईस, अऊ ओकर कपाटमन ला ओमन के चिटकनीमन अऊ बेड़ीमन के संग ओमन के जगह म लगाईस।
NEH 3:15 झरना दुवार ला कोल-होजे के बेटा सल्लूम ह मरम्मत करिस, जऊन ह मिसपा जिला के सासक रिहिस। ओह ओला फेर बनाईस; ओकर ऊपर छत लगाईस अऊ ओकर कपाटमन ला ओमन के चिटकनीमन अऊ बेड़ीमन के संग ओमन के जगह म लगाईस। ओह राजा के बारी के लकठा के सीलोम नांव कुंड के दीवार ला घलो दाऊद के सहर ले खाल्हे उतरइया सीढ़ी तक बनाईस।
NEH 3:16 ओकर बाद अजबूक के बेटा नहेमियाह, जऊन ह बेत-सूर के आधा जिला के सासक रिहिस, दाऊद के मरघटी के सामने के एक जगह तक, बनावटी कुंड अऊ सूरबीरमन के घर तक मरम्मत करिस।
NEH 3:17 ओकर बाद के भाग ला बानी के बेटा रहूम के देखरेख म लेवीमन मरम्मत करिन। ओकर बाजू के भाग ला कीला के आधा जिला के सासक हसबियाह ह अपन जिला कोति ले मरम्मत करिस।
NEH 3:18 ओकर बाद के भाग ला ओमन के संगी लेवीमन कीला के आधा जिला के सासक हेनादाद के बेटा बिन्नूई के देखरेख म मरम्मत करिन।
NEH 3:19 ओकर बाद आने भाग ला, हथियार के भंडार के चढ़ाव के सामने के एक भाग ले दीवार के मोड़ तक येहोसू के बेटा एजेर ह मरम्मत करिस, जऊन ह मिसपा के सासक रिहिस।
NEH 3:20 ओकर बाद आने भाग ला याने कि ओ मोड़ ले लेके एलियासीब महा पुरोहित के घर के प्रवेस दुवार तक जब्बै के बेटा बारूक ह बहुंत उत्साहित होके मरम्मत करिस।
NEH 3:21 एकर बाद एलियासीब के घर के प्रवेस दुवार ले आखिरी छोर तक मरेमोत ह ठीक करिस, जऊन ह हक्कोस के पोता अऊ उरियाह के बेटा रिहिस।
NEH 3:22 ओकर बाद के भाग के मरम्मत आसपास के इलाका के पुरोहितमन करिन।
NEH 3:23 ओमन के बाद के भाग ला बिनयामीन अऊ हस्सूब मरम्मत करिन, जऊन ह ओमन के सामने रिहिस; ओकर बाद के भाग के मरम्मत मासेयाह के बेटा अऊ अननियाह के पोता अजरयाह के दुवारा करे गीस, ये भाग ह ओकर घर के बाजू म रिहिस।
NEH 3:24 ओकर बाद, अजरयाह के घर ले लेके मोड़ अऊ कोना तक हेनादाद के बेटा बिन्नूई ह मरम्मत करिस,
NEH 3:25 फेर ओही मोड़ के सामनेवाले भाग अऊ पहरेदारमन के अंगना के लकठा म ऊपरी महल ले बाहिर निकले मीनार वाले भाग म ऊजै के बेटा पालाल ह काम करिस। ओकर बाद, परोस के बेटा पदायाह ह मरम्मत करिस
NEH 3:26 अऊ ओपेल के पहाड़ी म रहइया मंदिर के सेवकमन पूरब कोति जल-दुवार के सामने के जगह तक अऊ बाहिर निकले हुये मीनार तक मरम्मत करिन।
NEH 3:27 ओमन के बाद, तकोआ के आदमीमन आने भाग ला याने कि बाहिर निकले बड़े मीनार ले ओपेल के दीवार तक मरम्मत करिन।
NEH 3:28 फेर घोड़ा दुवार के ऊपर, पुरोहितमन अपन-अपन घर के सामने वाला भाग ला मरम्मत करिन।
NEH 3:29 ओमन के बाद, इम्मेर के बेटा सादोक ह अपन घर के सामने वाला भाग ला मरम्मत करिस। ओकर बाद, पूरबी दुवार के पहरेदार, सेकनयाह के बेटा समायाह ह मरम्मत करिस।
NEH 3:30 ओकर बाद, सेलेमियाह के बेटा हननयाह अऊ सालाप के छठवां बेटा हानून आने भाग ला मरम्मत करिन। ओमन के बाद, बेरेकियाह के बेटा मसुल्लाम ह अपन रहे के घर के सामने के भाग ला मरम्मत करिस।
NEH 3:31 ओकर बाद, मलकियाह, जऊन ह एक सुनार रिहिस, मंदिर के सेवक अऊ बेपारीमन के घर तक याने कि मुआयना दुवार के सामने तक, अऊ कोना के ऊपर के कमरा तक मरम्मत करिस;
NEH 3:32 अऊ कोना के ऊपर वाले कमरा अऊ भेड़ दुवार के बीच के दीवार ला सुनारमन अऊ बेपारीमन मरम्मत करिन।
NEH 4:1 जब सम्बल्लत ह सुनिस कि हमन दीवार ला फेर बनावत हन, तब ओह गुस्सा करिस अऊ बहुंत उत्तेजित हो गीस। ओह यहूदीमन के मजाक उड़ान लगिस,
NEH 4:2 अऊ अपन सहायकमन के अऊ सामरिया के सेना के आघू म, ओह कहिस, “ओ कमजोर यहूदीमन का करत हवंय? का ओमन ओ दीवार ला फेर बना लीहीं? का ओमन बलिदान चघाहीं? का ओमन ये काम एकेच दिन म पूरा कर लीहीं? का ओमन कंकड़ के ढेर म ले पथरामन ला फेर ठीक कर लीहीं—जबकि येमन जल चुके हवंय?”
NEH 4:3 अमोनी तोबियाह, जऊन ह ओकर बगल म रिहिस, ओह कहिस, “ओमन जऊन कुछू बनावत हवंय, यदि कोनो कोलिहा घलो ओकर ऊपर चढ़ही, त ओकर भार ले, ओमन के बनाय पथरा के दीवार ह टूटके गिर जाही।”
NEH 4:4 हे हमर परमेसर, हमर बात ला सुन, काबरकि हमर अपमान होवत हे। ओमन के दुवारा करे गे बेजत्ती ला ओमन के ही मुड़ म लहुंटा दे। ओमन ला बंधुवई के देस म लूट के सामान के रूप म देय दे।
NEH 4:5 ओमन के अपराध ला छेमा झन कर या अपन नजर ले ओमन के पाप ला झन मिटा, काबरकि ओमन दीवार बनइयामन के अपमान करे हवंय।
NEH 4:6 ये किसम ले, हमन दीवार ला फेर बनायेंन, अऊ जम्मो दीवार ह आधा ऊंचई तक ठाढ़ हो गीस, काबरकि मनखेमन अपन पूरा मन से ओ काम म लगे रिहिन।
NEH 4:7 पर जब सम्बल्लत, तोबियाह, अरबीमन, अमोनीमन अऊ असदोद सहर के मनखेमन सुनिन कि यरूसलेम के दीवार के मरम्मत होवत जावत हे, अऊ ओमा के फटानमन बंद होवत जावत हें, तब ओमन बहुंत गुस्सा होईन।
NEH 4:8 ओमन जम्मो झन मिलके ये साजिस रचिन कि ओमन आके यरूसलेम के बिरूध लड़हीं अऊ ओकर बिरूध समस्या खड़े करहीं।
NEH 4:9 पर हमन अपन परमेसर ले पराथना करेंन अऊ ओमन के ये साजिस के कारन दिन अऊ रात बर एक पहरेदार ठहिरा देंन।
NEH 4:10 इही बीच म, यहूदा के मनखेमन कहन लगिन, “बनिहारमन के बल ह घटत हवय, अऊ अतेक जादा मलबा हवय कि हमन दीवार ला फेर नइं बना सकन।”
NEH 4:11 हमर बईरीमन घलो कहन लगिन, “एकर पहिले कि ओमन येला जानंय या हमन ला देखंय, हमन ओमन के बीच म हबर जाबो अऊ ओमन ला मार डारबो अऊ ओ काम ला बंद कर देबो।”
NEH 4:12 तब जऊन यहूदीमन ओमन के आसपास रहत रिहिन, ओमन दस बार आ आके हमन ले कहिन, “तुमन जिहां भी जाहू, ओमन हमर ऊपर हमला करहीं।”
NEH 4:13 ये खातिर मेंह कुछू मनखेमन ला ओमन के परिवार सहित तलवार, बरछी अऊ धनुस के संग दीवार के सबले खाल्हे जगह म पाछू कोति खुले जगहमन म ठहिरा देंव।
NEH 4:14 जब मेंह ये चीजमन ला देख लेंव, तब मेंह उठेंव अऊ परभावसाली मनखे, अधिकारीमन अऊ बाकि मनखेमन ले कहंय, “ओमन ले झन डरव। परभू, जऊन ह महान अऊ अद्भूत अय, ओला सुरता करव, अऊ अपन परिवारमन, अपन बेटा अऊ बेटीमन, अपन घरवालीमन अऊ अपन घरमन बर लड़व।”
NEH 4:15 जब हमर बईरीमन सुनिन कि ओमन के साजिस के बात हमन ला मालूम हो गे हवय अऊ परमेसर ह ओमन के योजना ला बिफल कर दे हवय, तब हमन जम्मो के जम्मो दीवार मेर अपन-अपन काम करे बर लहुंटेंन।
NEH 4:16 ओ दिन ले, मोर आधा आदमीमन ओ काम म लगे रहंय अऊ आधा आदमीमन बरछी, ढाल, धनुस अऊ हथियारमन ला धरके ठाढ़े रहंय। अऊ अधिकारीमन अपनआप ला यहूदा के ओ जम्मो मनखेमन के पाछू तैनात कर लीन,
NEH 4:17 जेमन दीवार ला बनात रिहिन। जेमन सामानमन ला उठाके ले जावंय, ओमन एक हांथ ले अपन काम करंय अऊ दूसर हांथ म एक ठन हथियार धरे रहंय,
NEH 4:18 अऊ हर राज-मिसतिरी ह काम करत बेरा अपन बाजू म अपन तलवार ला लटकाय रहय। पर तुरही फूंकइयामन मोर संग रहंय।
NEH 4:19 तब मेंह परभावसाली मनखे, अधिकारी अऊ बाकि मनखेमन ले कहेंव, “काम ह बड़े अऊ बगरे हवय, अऊ हमन दीवार म एक-दूसर ले अलग दूरिहा-दूरिहा म हवन।
NEH 4:20 एकरसेति जऊन तरफ ले तुरही के अवाज तुमन सुनव, ओही तरफ आके तुमन हमर संग जूर जावव। हमर परमेसर ह हमर बर लड़ही!”
NEH 4:21 एकरसेति हमन काम म लगे रहेंन, अऊ ओमा आधा मनखेमन, बड़े बिहनियां ले तारामन के निकले तक बरछीमन ला धरे रहंय।
NEH 4:22 फेर ओ बेरा मेंह मनखेमन ले ये घलो कहंय, “हर एक मनखे अपन सहायक संग यरूसलेम के भीतर म रात बितावय, ताकि ओमन रथिया तो हमर रखवारी करंय, अऊ दिन म काम म लगे रहंय।”
NEH 4:23 न तो मेंह अपन कपड़ा उतारत रहंय, अऊ न ही मोर भाईमन, न मोर मनखेमन, न ओ पहरेदारमन, जेमन मोर संग रिहिन, अपन कपड़ा उतारत रिहिन; हर एक झन अपन हथियार ला धरे रहंय, अऊ त अऊ जब ओमन पानी लेय बर जावंय, तब भी हथियार धरे रहंय।
NEH 5:1 तब आदमीमन अऊ ओमन के घरवालीमन अपन संगी यहूदीमन के बिरूध म अब्बड़ चिचियाय लगिन।
NEH 5:2 कुछू मन कहत रिहिन, “हमन अऊ हमर बेटा अऊ बेटीमन बहुंत झन हवन; हमर खाय अऊ जीयत रहे बर, हमन ला अनाज के बहुंत जरूरत हवय।”
NEH 5:3 आने मन कहत रिहिन, “हमन अपन खेतमन, अंगूर के बारीमन अऊ घरमन ला गिरवी रखत हन कि अकाल के दौरान हमन ला अनाज मिलय।”
NEH 5:4 अऊ कुछू मन ये कहत रिहिन, “हमन अपन खेतमन अऊ अंगूर के बारीमन के ऊपर राजा के लगान पटाय बर उधार म पईसा ले हवन।
NEH 5:5 हालाकि हमन अऊ संगी यहूदीमन ओहीच मांस अऊ लहू के अन अऊ हालाकि हमर लइकामन ओमन के लइकामन सहीं ही बने हवंय, तभो ले हमन ला अपन बेटा अऊ बेटीमन ला गुलामी म देना पड़थे। हमर कुछू बेटीमन पहिले से ही गुलामी म हवंय, पर हमन असहाय हन, काबरकि हमर खेत अऊ अंगूर के बारीमन आने मन के हांथ म चले गे हवंय।”
NEH 5:6 जब मेंह ये कोलाहल अऊ ये सिकायत के बात ला सुनेंव, त मेंह अब्बड़ गुस्सा होंय।
NEH 5:7 मेंह अपन मन म सोच-बिचार करेंव अऊ तब परभावसाली मनखे अऊ अधिकारीमन ला घुड़कके कहंय, “तुमन अपन खुद के मनखेमन ले बियाज लेवत हव!” तब मेंह ओमन के संग बात करे बर एक बड़े सभा करंय
NEH 5:8 अऊ मेंह कहेंव: “जतेक हो सकिस, हमन ओ अपन संगी यहूदीमन ला दाम देके वापिस बिसा ले हन, जेमन ला आनजातमन के हांथ बेच दिये गे रिहिस। अब तुमन अपन खुद के मनखेमन ला बेचत हव, ताकि ओमन ला हमर हांथ म फेर वापिस बेचे जावय!” ओमन चुपेचाप रिहिन, काबरकि अपन बचाव म कहे बर ओमन करा कुछू नइं रिहिस।
NEH 5:9 मेंह ये घलो कहेंव, “जऊन काम तुमन करत हव, ओह सही नो हय। का तुमन ला हमर परमेसर के भय म नइं चलना चाही, ताकि हमर आनजात बईरीमन के बीच हमर निन्दा झन होवय?
NEH 5:10 में अऊ मोर भाईमन अऊ मोर आदमीमन घलो मनखेमन ला पईसा अऊ अनाज उधार देवत हन। पर आवव, हमन एकर बियाज लेना छोंड़ देवन!
NEH 5:11 ओमन ला तुरते ओमन के खेत, अंगूर के बारी, जैतून के बारी अऊ घरमन ला लहुंटा देवव, अऊ जऊन बियाज तुमन ओमन ले लेवत हव, ओला घलो लहुंटा दव—पईसा, अनाज, नवां अंगूर के मंद अऊ जैतून तेल के एक प्रतिसत।”
NEH 5:12 ओमन कहिन, “हमन ओला वापिस लहुंटा देबो, अऊ ओमन ले जादा कुछू चीज के मांग नइं करन। जइसने तेंह कहत हस, वइसनेच हमन करबो।” तब मेंह पुरोहितमन ला बलांय अऊ परभावसाली मनखे अऊ अधिकारीमन ले ये सपथ खवांय कि ओमन अपन दिये बचन के अनुसार करहीं।
NEH 5:13 फेर मेंह अपन कपड़ा के छोर ला झर्राके कहंय, “जऊन कोनो ये वायदा ला पूरा नइं करही, इही रीति ले, परमेसर ह ओला ओकर घर अऊ संपत्ति ले छुड़ा देवय। अऊ इही रीति ले ओ मनखे ह झर्राय जावय, अऊ जुच्छा हो जावय!” तब जम्मो सभा ह कहिस, “आमीन” अऊ यहोवा के इस्तुति करिन। अऊ मनखेमन अपन दिये बचन के अनुसार करिन।
NEH 5:14 फेर राजा अर्तछयर्स के राज के बीसवां साल म जब मेंह यहूदा देस म ओमन के राजपाल बनाय गेंव, तब ले लेके राजा के राज के बत्तीसवां साल तक—याने कि बारह साल तक न तो में अऊ न ही मोर भाईमन राजपाल बर तय करे गय जेवन ला खायेंन।
NEH 5:15 पर पहिले के राजपालमन—जेमन मोर ले पहिले रिहिन—ओमन मनखेमन ऊपर बोझा डाल दे रिहिन अऊ जेवन, अऊ अंगूर के मंद के अलावा ओमन ले चालीस सेकेल चांदी लेवत रिहिन। ओमन के सहायकमन घलो मनखेमन ऊपर अधिकार जतात रिहिन। पर मेंह वइसने नइं करंय, काबरकि मेंह परमेसर के भय मानत रहंय।
NEH 5:16 मेंह अपनआप ला दीवार बनाय के काम म लगा देंव। मोर जम्मो आदमीमन ला उहां काम करे बर इकट्ठा करे गीस; हमन कोनो भुइयां नइं बिसायेंन।
NEH 5:17 येकर अलावा, एक सौ पचास यहूदीमन अऊ अधिकारीमन अऊ संग म ओ आनजात मनखेमन घलो मोर मेज म जेवन करंय, जेमन आसपास ले आवंय।
NEH 5:18 हर दिन एक बईला, छै ठन बने भेड़ अऊ कुछू चिरईमन ला मोर जेवन बर तियार करे जावत रिहिस, अऊ हर दस दिन के बाद बहुंत अकन किसम-किसम के अंगूर के मंद दिये जावय। ये सब के बावजूद, मेंह राजपाल बर तय जेवन के मांग कभू नइं करंय, काबरकि मनखेमन ऊपर भारी बोझा रिहिस।
NEH 5:19 हे मोर परमेसर, जऊन कुछू मेंह ये मनखेमन बर करे हवंव, तेकर बर मोला किरपा करके सुरता रखबे।
NEH 6:1 जब सम्बल्लत, तोबियाह अऊ अरबी गेसेम अऊ हमर बाकि बईरीमन ला ये खबर मिलिस कि मेंह दीवार ला बनवा डारे हंव अऊ ओमा अऊ कोनो फटान नइं ए—हालाकि ओ बेरा तक, मेंह दुवारमन म कपाटमन ला नइं लगाय रहंय—
NEH 6:2 तब सम्बल्लत अऊ गेसेम मोर करा ये खबर पठोईन, “आ, हमन ओनो के मैदान के कोनो गांव म एक-दूसर ले भेंट करन।” पर ओमन मोर हानि करे के योजना बनात रिहिन;
NEH 6:3 एकरसेति मेंह ओमन करा संदेसियामन ले ये खबर पठोंय: “मेंह तो भारी काम म लगे हवंव, उहां खाल्हे नइं जा सकंव। काम ह बंद हो जाही, जब मेंह येला छोंड़के तुम्हर संग भेंट करे बर आहूं?”
NEH 6:4 चार बार ओमन मोर करा वइसनेच खबर पठोईन, अऊ हर एक बार मेंह ओमन ला वइसनेच जबाब देंय।
NEH 6:5 तब, पांचवां बार, सम्बल्लत ह अपन सहायक के हांथ म ओहीच खबर पठोईस, अऊ ओकर हांथ म एक खुला चिट्ठी रिहिस,
NEH 6:6 जेमा ये लिखाय रिहिस: “जाति-जाति के मनखेमन के बीच ये कहे जावत हे, अऊ गेसेम घलो येहीच बात कहत हे—कि तें अऊ यहूदीमन बिदरोह करे के साजिस रचत हव, अऊ इही कारन ले तुमन ओ दीवार ला बनवात हव। अऊ ये घलो कि ये सूचना के मुताबिक तें ओमन के राजा बननेवाला हस
NEH 6:7 अऊ तेंह अगमजानीमन ला नियुक्त कर चुके हस कि ओमन यरूसलेम म तोर बारे म ये घोसना करंय: ‘यहूदीमन म एक राजा हवय!’ अब ये खबर राजा ला दिये जाही; एकरसेति अब तें आ, अऊ हमन मिलके बात करबो।”
NEH 6:8 मेंह ओला ये जबाब पठोंय: “जइसने तेंह कहत हवस, वइसने कुछू भी नइं होवत हे; येह सिरिप तोर मन के गढ़े बात ए।”
NEH 6:9 ओ जम्मो झन हमन ला डराय के कोसिस करत रिहिन, ओमन सोचत रिहिन, “ओमन के हांथमन अल्लर पड़ जावंय अऊ काम ह पूरा झन होवय।” पर मेंह पराथना करेंव, “मोर हांथमन म ताकत दे।”
NEH 6:10 एक दिन, मेंह महेतबेल के पोता, दलायाह के बेटा समायाह के घर गेंव, ओह अपन घर म बंद रिहिस। ओह कहिस, “आ, हमन परमेसर के भवन, मंदिर के भीतर म भेंट करन, अऊ हमन मंदिर के कपाटमन ला बंद कर देवन, काबरकि आदमीमन तोर हतिया करे बर आवत हें—रथिया ओमन तोला मार डारे बर आवत हें।”
NEH 6:11 पर मेंह कहंय, “का मोर सहीं आदमी ला भाग जाना चाही? या का मोर सहीं मनखे ला अपन परान ला बचाय बर मंदिर के भीतर जाना चाही? मेंह नइं जावंव!”
NEH 6:12 मेंह समझ गेंव कि परमेसर ह ओला नइं पठोय रिहिस, पर ओह मोर बिरूध अगमबानी करिस, काबरकि तोबियाह अऊ सम्बल्लत ओला पईसा देय रिहिन।
NEH 6:13 मोला डराय बर ओला पईसा देय गे रिहिस ताकि मेंह अइसने काम करके पाप करंव, अऊ तब ओमन मोला बदनाम करके मोर निन्दा करंय।
NEH 6:14 हे मोर परमेसर! तोबियाह अऊ सम्बल्लत जऊन कुछू करे हवंय ओला सुरता रख; ये बात ला घलो सुरता रख कि कइसे नोअदियाह अगमजानीन अऊ बाकि अगमजानीमन मोला डराय के कोसिस करत रिहिन।
NEH 6:15 एलूल महिना के पचीसवां दिन, बावन दिन म दीवार के काम ह पूरा होईस।
NEH 6:16 जब हमर जम्मो बईरीमन एकर बारे म सुनिन, त हमर चारों कोति के जम्मो जाति के मनखेमन डर गीन अऊ बहुंत सरमिंदा होईन, काबरकि ओमन जान डारिन कि ये काम परमेसर के मदद ले होय हवय।
NEH 6:17 ओ दिन म यहूदा के परभावसाली मनखेमन अऊ तोबियाह एक-दूसर ला बहुंत चिट्ठी घलो लिखत रिहिन।
NEH 6:18 यहूदा के बहुंते झन तोबियाह के सपथ के अधीन रिहिन, काबरकि ओह आरह के बेटा सेकनयाह के दामाद रिहिस, अऊ ओकर बेटा यहोहानान ह बेरेकियाह के बेटा मसुल्लाम के बेटी ले बिहाव करे रिहिस।
NEH 6:19 एकर अलावा, मनखेमन ओकर बने काममन के बारे मोला बताते रहंय अऊ तब ओमन जाके मोर कहे बात ओला बतावंय। अऊ तोबियाह ह मोला डराय बर चिट्ठी भेजय।
NEH 7:1 जब दीवार ला फेर बनाय के काम ह पूरा हो गीस अऊ मेंह कपाटमन ला ओमन के जगह म लगा देंव, तब दुवारपाल, संगीतकार अऊ लेवीमन ठहिराय गीन।
NEH 7:2 मेंह अपन भाई हनानी अऊ गढ़ के सेनापति हननयाह ला यरूसलेम के अधिकारी ठहिरांय, काबरकि ओह एक ईमानदार मनखे रिहिस अऊ आने बहुंते झन ले ओह जादा परमेसर के भय मानय।
NEH 7:3 मेंह ओमन ले कहेंव, “जब तक घाम तेज नइं होवय, तब तक यरूसलेम के दुवारमन ला झन खोले जावय। जब दुवारपालमन पहरा देवत रहंय, तभो ले कपाटमन ला बंद रखे जावय अऊ ओमन म चिटकनी लगे रहंय। यरूसलेम के रहइयामन ला घलो पहरेदार ठहिरावव, कुछू झन ला ओमन बर ठहिराय जगह म अऊ कुछू झन ला ओमन के खुद के घर के आघू म ठहिरा दव।”
NEH 7:4 यरूसलेम सहर ह बड़े अऊ ओमा बहुंत जगह रिहिस, पर ओमा थोरकन मनखेमन रहत रिहिन, अऊ घरमन ला अभी तक ले फेर नइं बनाय गे रिहिस।
NEH 7:5 तब मोर परमेसर ह मोर मन म ये बिचार डालिस कि परभावसाली मनखे, अधिकारी अऊ सधारन मनखेमन ला इकट्ठा करके परिवार के मुताबिक ओमन के नांव लिखे जावय। मोला ओमन के बंसावली के लेखा-जोखा मिलिस, जेमन सबले पहिले लहुंटके आय रिहिन। ओमा ये लिखाय रिहिस:
NEH 7:6 येमन प्रदेस के ओ मनखे अंय, जेमन बंधुवई ले छूटके आईन; जेमन ला बेबिलोन के राजा, नबूकदनेसर ह बंदी बनाके ले गेय रिहिस (ओमन यरूसलेम अऊ यहूदा के अपन-अपन नगर म
NEH 7:7 जरूब्बाबेल, यहोसू, नहेमियाह, अजरयाह, रामियाह, नहमानी, मोरदकै, बिलसान, मिसपेरेत, बिगवै, नहूम अऊ बाना के संग लहुंटिन):
NEH 7:8 संतानमन— परोस के संतान 2,172;
NEH 7:9 सपतयाह के संतान 372;
NEH 7:10 आरह के संतान 652;
NEH 7:11 पहत-मोआब (येहोसू अऊ योआब के बंस म ले) 2,818;
NEH 7:12 एलाम के संतान 1,254;
NEH 7:13 जत्तू के संतान 845;
NEH 7:14 जक्कई के संतान 760;
NEH 7:15 बिन्नूई के संतान 648;
NEH 7:16 बेबै के संतान 628;
NEH 7:17 अजगाद के संतान 2,322;
NEH 7:18 अदोनीकाम के संतान 667;
NEH 7:19 बिगवै के संतान 2,067;
NEH 7:20 आदीन के संतान 655;
NEH 7:21 आतेर के संतान (हिजकियाह के बंस म ले) 98;
NEH 7:22 हासूम के संतान 328;
NEH 7:23 बेसै के संतान 324;
NEH 7:24 हारीफ के संतान 112;
NEH 7:25 गिबोन के संतान 95।
NEH 7:26 आदमीमन— बैतलहम अऊ नतोपा के आदमीमन 188;
NEH 7:27 अनातोत के आदमीमन 128;
NEH 7:28 बेत-अजमावेत के आदमीमन 42;
NEH 7:29 किरयत-यारीम, कपीरा अऊ बेरोत के आदमीमन 743;
NEH 7:30 रामा अऊ गेबा के आदमीमन 621;
NEH 7:31 मिकमास के आदमीमन 122;
NEH 7:32 बेतेल अऊ अई के आदमीमन 123;
NEH 7:33 दूसर नबो के आदमीमन 52;
NEH 7:34 दूसर एलाम के आदमीमन 1,254;
NEH 7:35 हारीम के आदमीमन 320;
NEH 7:36 यरीहो के आदमीमन 345;
NEH 7:37 लोद हादीद अऊ ओनो के आदमीमन 721;
NEH 7:38 सना के आदमीमन 3,930।
NEH 7:39 पुरोहितमन: संतानमन— यदायाह के संतान (येहोसू के परिवार के जरिये) 973;
NEH 7:40 इम्मेर के संतान 1,052;
NEH 7:41 पसहूर के संतान 1,247;
NEH 7:42 हारीम के संतान 1,017।
NEH 7:43 लेवीमन: संतानमन— येहोसू के संतान (होदवियाह के बंस म ले कदमीएल के जरिये) 74।
NEH 7:44 संगीतकारमन: संतानमन— आसाप के संतान 148।
NEH 7:45 मंदिर के दुवारपालमन: संतानमन— सल्लूम, आतेर, तलमोन, अक्कूब, हतीता, अऊ सोबै के संतान 138।
NEH 7:46 मंदिर के सेवकमन: खाल्हे लिखे मनखेमन के संतानमन— सीहा, हसूपा, तब्बाओत,
NEH 7:47 केरोस, सीआ, पादोन,
NEH 7:48 लबाना, हगाबा, सल्मै,
NEH 7:49 हानान, गिद्दल, गहर,
NEH 7:50 रायाह, रसीन, नकोदा,
NEH 7:51 गज्जाम, उज्जा, पासेह,
NEH 7:52 बेसै, मूनीम, नेफूसीम,
NEH 7:53 बकबूक, हकूपा, हरहूर,
NEH 7:54 बसलूत, महीदा, हरसा,
NEH 7:55 बरकोस, सीसरा, तेमह,
NEH 7:56 नसीह अऊ हतीपा।
NEH 7:57 सुलेमान के सेवकमन के संतान: खाल्हे लिखे मनखेमन के संतानमन— सोतै, सोपेरेत, परीदा,
NEH 7:58 याला, दरकोन, गिद्देल,
NEH 7:59 सपतयाह, हत्तील, पोकेरेत-हसेबायीम, अऊ आमोन।
NEH 7:60 मंदिर के सेवक अऊ सुलेमान के सेवकमन के संतान 392,
NEH 7:61 ये मनखेमन तेल-मेलह, तेल-हरसा, करूब, अदोन, अऊ इम्मेर ले आईन, पर येमन बता नइं सकिन कि येमन के परिवार के मनखेमन इसरायलीमन के संतान रिहिन:
NEH 7:62 संतानमन— दलायाह, तोबियाह, अऊ नकोदा के संतान 642।
NEH 7:63 अऊ पुरोहितमन के बीच म ले: संतानमन— होबायाह, हक्कोस अऊ बरजिलै (एक आदमी, जऊन ह गिलादी बरजिलै के एक बेटी ले बिहाव करे रिहिस अऊ ओकर नांव रख ले रिहिस)।
NEH 7:64 येमन अपन परिवार के लेखा-जोखा ला खोजिन, पर ओमन ला नइं मिलिस, एकरसेति येमन ला असुध ठहिराके पुरोहित के पद ले अलग रखे गीस;
NEH 7:65 एकर कारन राजपाल ह ओमन ला हुकूम दीस कि जब तक ऊरीम अऊ तुम्मीम धारन करइया कोनो पुरोहित सेवा नइं करत रहय, तब तक ओमन कोनो परम पबितर जेवन म ले कुछू चीज झन खावंय।
NEH 7:66 पूरा सभा के संखिया 42,360 रिहिस,
NEH 7:67 येमन के अलावा येमन के 7,337 पुरूस अऊ महिला गुलाम रिहिन, अऊ येमन के 245 पुरूस अऊ महिला गवइयामन घलो रिहिन।
NEH 7:68 ओमन के 736 घोड़ा, 245 खच्चर,
NEH 7:69 435 ऊंट अऊ 6,720 गदहा रिहिन।
NEH 7:70 परिवारमन के कुछू मुखियामन काम बर दान दीन। राजपाल ह तिजोरी म 1,000 सोन के दरकमोन, 50 ठन कटोरा, अऊ पुरोहितमन बर 530 अंगरखा दीस।
NEH 7:71 परिवारमन के कुछू मुखियामन ओ काम बर तिजोरी म 20,000 सोन के दरकमोन अऊ 2,200 चांदी के मीना दीन।
NEH 7:72 बाकि मनखेमन 20,000 दरकमोन सोन, 2,000 मीना चांदी अऊ पुरोहितमन बर 67 अंगरखा दीन।
NEH 7:73 तब पुरोहितमन, लेवीमन, दुवारपालमन, संगीतकारमन अऊ मंदिर के सेवकमन कुछू मनखेमन के संग अऊ बाकि इसरायलीमन अपन-अपन नगर म बस गीन। जब सातवां महिना आईस अऊ इसरायलीमन अपन-अपन नगर म बस गे रिहिन,
NEH 8:1 तब ओ जम्मो इसरायली मनखेमन एक मन होके, जल-दुवार के आघू के चऊक म जमा होईन। ओमन कानून के गुरू, एजरा ला मूसा के कानून के किताब ला बाहिर लाने बर कहिन, जेमा यहोवा ह इसरायल ला हुकूम देय रिहिस।
NEH 8:2 तब एजरा पुरोहित सातवां महिना के पहिला दिन कानून के किताब ला सभा के आघू म लानिस; ओ सभा म आदमी अऊ माईलोगन अऊ ओ जम्मो मनखेमन रिहिन, जेमन सुनके समझ सकत रिहिन।
NEH 8:3 ओह कानून के किताब ला बिहनियां ले लेके मंझनियां तक चऊक कोति मुहूं करके जल-दुवार के आघू म आदमी, माईलोगन अऊ ओ जम्मो झन ला पढ़के सुनाईस, जेमन समझ सकत रिहिन। अऊ जम्मो मनखेमन धियान लगाके कानून के किताब ला सुनिन।
NEH 8:4 कानून के गुरू, एजरा ह लकरी के एक ऊंच मंच म ठाढ़ होईस, जेला ओहीच मऊका बर बनाय गे रिहिस। ओकर जेवनी कोति मत्तितियाह, सेमा, अनायाह, उरियाह, हिलकियाह अऊ मासेयाह; अऊ ओकर डेरी कोति पदायाह, मिसाएल, मलकियाह, हासूम, हसबद्दानाह, जकरयाह अऊ मसुल्लाम ठाढ़े रिहिन।
NEH 8:5 एजरा ह किताब ला खोलिस। जम्मो झन ओला देख सकत रिहिन, काबरकि ओह ओमन ले ऊंचहा जगह म ठाढ़े रिहिस; अऊ जब ओह किताब ला खोलिस, तब जम्मो मनखेमन उठके ठाढ़ हो गीन।
NEH 8:6 एजरा ह यहोवा, महान परमेसर के इस्तुति करिस; अऊ जम्मो मनखेमन हांथ उठाके कहिन, “आमीन! आमीन!” तब ओमन मुड़ नवाके अपन माथा भुइयां म टेकाईन अऊ यहोवा के अराधना करिन।
NEH 8:7 जब मनखेमन उहां खड़े रिहिन, त लेवीमन—येहोसू, बानी, सेरेबियाह, यामीन, अक्कूब, सब्बतै, होदियाह, मासेयाह, कलीता, अजरयाह, योजाबाद, हानान अऊ पलायाह—मनखेमन ला कानून के बातमन ला समझाईन।
NEH 8:8 ओमन परमेसर के कानून के किताब ले पढ़िन अऊ ओकर अनुवाद करत मतलब घलो बतात गीन, जेकर ले मनखेमन पढ़े गय भाग ला समझंय घलो।
NEH 8:9 तब राजपाल नहेमियाह, एजरा पुरोहित अऊ कानून के गुरू, अऊ ओ लेवी, जेमन मनखेमन ला समझावत रिहिन, ओमन जम्मो मनखेमन ले कहिन, “आज के दिन ह यहोवा तुम्हर परमेसर बर पबितर दिन अय। एकरसेति सोक झन मनावव या झन रोवव।” काबरकि जम्मो मनखेमन कानून के बचन ला सुनके रोवत रहंय।
NEH 8:10 नहेमियाह ह ओमन ले कहिस, “जावव अऊ अपन पसंद के खाना खावव अऊ मीठा रस पीके आनंद मनावव, अऊ जेमन रांधे नइं हवंय, ओमन बर कुछू जेवन पठोवव। आज के दिन ह हमर परभू बर पबितर दिन अय। दुखी झन होवव, काबरकि यहोवा के आनंद ह तुम्हर बल अय।”
NEH 8:11 लेवीमन जम्मो मनखेमन ला ये कहिके चुप कराईन, “सांत रहव, काबरकि आज एक पबितर दिन अय। दुखी झन होवव।”
NEH 8:12 तब जम्मो मनखेमन खाय-पीये बर, आने मन ला कुछू जेवन पठोय बर अऊ आनंद मनाय बर चले गीन, काबरकि जऊन बचन ओमन ला बताय गे रिहिस, ओला ओमन समझ गे रिहिन।
NEH 8:13 सातवां महिना के दूसर दिन, परिवारमन के मुखियामन, पुरोहित अऊ लेवीमन के संग कानून के बचन ऊपर धियान करे बर एजरा गुरू के चारों कोति फेर जूर गीन।
NEH 8:14 ओमन ला ओ कानून म लिखाय ये बात मिलिस, जेला यहोवा ह मूसा के जरिये हुकूम देय रिहिस कि इसरायलीमन सातवां महिना के तिहार के बेरा कुंदरामन म रहंय
NEH 8:15 अऊ ओमन अपन जम्मो नगरमन म अऊ यरूसलेम म ये बचन के घोसना करंय: “पहाड़ी इलाका म जावव अऊ जैतून अऊ जंगली जैतून रूखमन ले, अऊ मेंहदी, खजूर अऊ घना रूखमन के डारामन ला लानके ओमन ले कुंदरा बनावव” जइसने कि लिखाय हवय।
NEH 8:16 एकरसेति मनखेमन बाहिर जाके डारामन ला ले आईन अऊ अपन घर के छानी म, अऊ अपन अंगनामन म, अऊ परमेसर के भवन के अंगना म, अऊ जल-दुवार के लकठा के चऊक म कुंदरामन ला बनाईन अऊ एक ठन कुंदरा एपरैम के दुवार के लकठा म घलो बनाईन।
NEH 8:17 ओ पूरा दल के मनखे, जेमन बंधुवई ले वापिस लहुंटके आय रिहिन, ओमन कुंदरामन ला बनाके ओमा निवास करिन। नून के बेटा यहोसू के दिन ले लेके ओ दिन तक इसरायलीमन अइसने उत्सव नइं मनाय रिहिन। अऊ ओमन बहुंत आनंदित होईन।
NEH 8:18 पहिले दिन ले लेके आखिरी दिन तक, एजरा ह हर दिन परमेसर के कानून के किताब ले पढ़-पढ़के सुनाईस। ओमन सात दिन तक तिहार मानिन, अऊ आठवां दिन, नियम के मुताबिक एक महासभा होईस।
NEH 9:1 फेर ओहीच महिना के चौबीसवां दिन म, इसरायलीमन उपास करत अऊ बोरा के कपड़ा पहिरके अऊ अपन मुड़ म धुर्रा डालके, जमा हो गीन।
NEH 9:2 तब इसरायल के बंस के ओ मनखे, जेमन जम्मो परदेसी मनखेमन ले अलग हो गे रिहिन, ओमन ठाढ़ होके, अपन पाप अऊ अपन पुरखामन के पाप ला मान लीन।
NEH 9:3 ओमन अपन जगह म ठाढ़ हो गीन अऊ दिन के एक पहर तक यहोवा अपन परमेसर के कानून के किताब पढ़ते रिहिन, अऊ दूसर पहर अपन पाप ला माने अऊ यहोवा अपन परमेसर के अराधना करे म बिताईन।
NEH 9:4 सीढ़ी म जऊन लेवीमन खड़े रिहिन, ओमन के नांव येहोसू, बानी, कदमीएल, सबनियाह, बुन्नी, सेरेबियाह, बानी अऊ केनानी रिहिस। ओमन ऊंचहा अवाज म यहोवा अपन परमेसर ला गोहारिन।
NEH 9:5 अऊ येहोसू, कदमीएल, बानी, हसबनयाह, सेरेबियाह, होदियाह, सबनियाह, अऊ पतहियाह नांव के लेवीमन मनखेमन ला कहिन, “ठाढ़ होवव अऊ यहोवा अपन परमेसर के परसंसा करव, जऊन ह अनादिकाल ले अनंतकाल तक बने रहिथे।” “तोर महिमामय नांव ला धइन कहे जावय, अऊ येला जम्मो आसीस अऊ परसंसा ले ऊंचहा करे जावय।
NEH 9:6 तें एके झन ही यहोवा अस। अकास, अऊ सबले ऊंच अकास अऊ ओमन के जम्मो तारा मंडल, धरती अऊ ओमा के जम्मो चीज, समुंदर अऊ ओमा के जम्मो चीज, सब ला तेंहीच ह बनाय हस। तेंह हर एक चीज ला जिनगी देथस, अऊ स्वरग के जम्मो झन तोर अराधना करथें।
NEH 9:7 “तें यहोवा परमेसर अस, जऊन ह अब्राम ला चुनके कसदीमन के ऊर नगर म ले निकाल लानय, अऊ ओकर नांव अब्राहम रखय।
NEH 9:8 ओकर मन ला अपन बर बिसवासयोग्य पाके, ओकर ले करार करय कि ओकर संतानमन ला कनानी, हित्ती, अमोरी, परिज्जी, यबूसी अऊ गिरगासीमन के देस ला देबे। तेंह अपन वायदा ला पूरा करे हस, काबरकि तेंह धरमी अस।
NEH 9:9 “तेंह मिसर म हमर पुरखामन के दुख ला देखे; लाल-समुंदर के तीर म तेंह ओमन के गोहार ला सुने।
NEH 9:10 फिरौन अऊ ओकर जम्मो करमचारी बरन ओकर देस के जम्मो मनखेमन के बिरूध तेंह चिनहां अऊ अद्भूत काम करके देखाय, काबरकि तेंह जानत रहय कि मिसरीमन ओमन ले कड़ई से बरताव करत रिहिन। तेंह अपन अइसने बड़े नांव करय, जऊन ह आज तक बने हवय।
NEH 9:11 तेंह ओमन के आघू म समुंदर ला दू भाग कर देय, जेकर ले ओमन समुंदर म ले होके सूखा भुइयां म पार हो गीन। पर ओमन के पीछा करइयामन ला तेंह गहिरा पानी म अइसने डार देय, जइसने पथरा ला अब्बड़ पानी के बीच म डारे जाथे।
NEH 9:12 तेंह दिन म बादर के खंभा अऊ रथिया ओमन के रसता म अंजोर देय बर आगी के खंभा के दुवारा ओमन के अगुवई करय।
NEH 9:13 “तेंह सीनय पहाड़ म उतरय; तेंह स्वरग ले ओमन ले बात करय। तेंह ओमन ला नियम अऊ कानूनमन ला देय, जेमन ठीक अऊ सही अंय, अऊ तेंह बिधि अऊ हुकूममन ला देय, जेमन उचित अंय।
NEH 9:14 तेंह ओमन ला अपन पबितर बिसराम दिन के बारे म बताय अऊ अपन दास मूसा के जरिये ओमन ला हुकूम, बिधि अऊ कानूनमन ला देय।
NEH 9:15 ओमन के भूख मिटाय बर अकास ले ओमन ला खाना देय अऊ ओमन के पीयास बुझाय बर चट्टान म ले ओमन बर पानी निकालय; तेंह ओमन ला कहय कि जाके ओ देस ऊपर अधिकार कर लेवव, जेला ओमन ला देय बर तेंह हांथ उठाके सपथ खाय रहय।
NEH 9:16 “पर ओ, हमर पुरखामन हठी अऊ जिद्दी हो गीन, अऊ ओमन तोर हुकूममन ला नइं मानिन।
NEH 9:17 ओमन तोर बात ला सुने नइं चाहिन अऊ ओ चमतकारमन ला सुरता नइं रखिन, जेला तेंह ओमन के बीच म करे रहय। ओमन जिद्दी हो गीन अऊ बिदरोह करके अपन बर एक अगुवा ठहिराईन ताकि अपन गुलामी के दसा म लहुंट जावंय। पर तेंह छेमा करइया, अनुग्रहकारी अऊ दयालु, कोरोध करे म धीमा अऊ मया ले भरे परमेसर अस। एकरसेति तेंह ओमन ला अकेला नइं छोंड़य,
NEH 9:18 अऊ त अऊ जब ओमन अपन बर बछवा के एक मूरती बनाईन अऊ कहिन, ‘येह तुम्हर देवता अय, जऊन ह तुमन ला मिसर देस ले बाहिर निकाल लानिस,’ या जब ओमन तोर बहुंत तिरस्कार करिन, तब भी तें ओमन ला अकेला नइं छोंड़य।
NEH 9:19 “अपन बड़े दया के कारन, तें ओमन ला सुन्ना जगह म नइं छोंड़य। दिन म रसता देखाय बर, न तो बादर के खंभा अऊ न रथिया रसता म अंजोर देय बर आगी के खंभा ह हटिस।
NEH 9:20 तेंह ओमन ला समझाय बर अपन बने आतमा ला देय। तेंह अपन मन्ना ओमन ला खवाय बर नइं छोंड़य, अऊ ओमन के पीयास बुझाय बर पानी देवत रहय।
NEH 9:21 चालीस बरस तक तेंह ओमन ला सुन्ना जगह म संभाले रहय; ओमन ला कुछू कमी नइं होईस, ओमन के कपड़ा नइं फटिस अऊ रेंगत-रेंगत न ही ओमन के गोड़ फूलिस।
NEH 9:22 “तेंह राज अऊ देस के मनखेमन ला ओमन के बस म कर देय, अऊ त अऊ सीमना के आखिरी म दूरिहा के राज घलो ओमन ला देय। ओमन हेसबोन के राजा के सीहोन देस अऊ बासान के राजा के ओग देस के ऊपर अधिकार कर लीन।
NEH 9:23 तेंह ओमन के संतानमन ला अकास के तारामन सहीं अनगिनत कर देय, अऊ तेंह ओमन ला ओ देस म अमरा देय, जेकर बारे म तेंह ओमन के पुरखामन ले कहे रहय कि ओमन ओमा जाके ओकर ऊपर अधिकार कर लेवंय।
NEH 9:24 ओमन के संतानमन जाके ओ देस ऊपर अधिकार कर लीन। तेंह ओमन के आघू म ओ देस म रहइया कनानीमन ला ओमन के अधीन कर देय; तेंह कनानीमन ला ओमन के राजामन अऊ देस के मनखेमन सहित ओमन के हांथ म कर देय, ताकि तोर मनखेमन ओ मनखेमन ले अपन मन मुताबिक बरताव करंय।
NEH 9:25 तोर मनखेमन गढ़वाले नगर अऊ उपजाऊ भुइयां ऊपर कब्जा कर लीन; ओमन जम्मो किसम के बने चीजमन ले भरे घर, खोदे गय कुआं, अऊ अंगूर अऊ जैतून के बारी अऊ फरवाले बहुंते रूखमन ला अपन अधिकार म ले लीन। ओमन भरपेट खाईन अऊ मोटहा तगड़ा हो गीन; ओमन तोर बड़े भलई के कारन आनंदित होईन।
NEH 9:26 “पर ओमन तोर हुकूम नइं मानिन अऊ तोर बिरूध बिदरोह करिन; ओमन तोर कानून ला तियाग दीन। ओमन तोर ओ अगमजानीमन ला मार डारिन, जेमन ओमन ला तोर कोति फिरे बर चेतात रिहिन; ओमन तोर बहुंत निन्दा करिन।
NEH 9:27 एकरसेति तेंह ओमन ला ओमन के बईरीमन के हांथ म कर देय, जेमन ओमन ला सताईन। पर जब ओमन ला सताय गीस, त ओमन तोर ले गोहारिन। तब तेंह स्वरग ले ओमन के गोहार ला सुनय, अऊ तेंह अपन बड़े दया के कारन ओमन ला छुड़ानेवाला देय, जेमन ओमन ला ओमन के बईरीमन के हांथ ले बचाईन।
NEH 9:28 “पर जतेक जल्दी ओमन ला चैन मिलय, ओमन फेर तोर नजर म बुरई के काम करंय। तब तेंह ओमन ला ओमन के बईरीमन के हांथ म कर देत रहय, जेकर से ओ बईरीमन ओमन ऊपर सासन करंय। अऊ जब ओमन तोर ले फेर गोहारंय, त तेंह स्वरग ले ओमन के सुनय, अऊ अपन दया के कारन, तेंह ओमन ला बार-बार छुड़ाय।
NEH 9:29 “तेंह ओमन ला चेतउनी देय ताकि ओमन तोर कानून कोति फिरंय, पर ओमन ढिठई करत रहंय अऊ तोर हुकूममन ला नइं मानंय। ओमन तोर नियम के बिरूध पाप करंय, जेकर बारे म तेंह कहय, ‘जऊन मनखे ह ओमन ला मानथे, ओह ओमन के दुवारा ही जीयत रहिही।’ जिद्दी होके ओमन तोर ले अपन मुहूं फेर लेवंय अऊ हठी होके तोर बात ला नइं सुनंय।
NEH 9:30 बहुंत साल तक तेंह ओमन बर धीरज धरे रहय। अपन आतमा के दुवारा तेंह अगमजानीमन के जरिये ओमन ला चेतावत रहय। तभो ले ओमन धियान नइं दीन, एकरसेति तेंह ओमन ला परोसी मनखेमन के हांथ म कर देय।
NEH 9:31 पर अपन बड़े दया के कारन तेंह ओमन के नास नइं करय या ओमन ला नइं तियागय, काबरकि तेंह अनुग्रहकारी अऊ दयालु परमेसर अस।
NEH 9:32 “एकरसेति अब, हे हमर परमेसर, महान परमेसर, सक्तिसाली अऊ अद्भूत परमेसर, जऊन ह अपन मया के करार ला बनाय रखथस, तोर नजर म हमर ये दुख ह बेकार के बात झन जान पड़य—ओ दुख जऊन ह हमर ऊपर, हमर राजा अऊ अगुवामन ऊपर, हमर पुरोहित अऊ अगमजानीमन ऊपर, हमर पुरखा अऊ तोर जम्मो मनखेमन ऊपर अस्सूर के राजामन के समय ले आज तक पड़े हवय।
NEH 9:33 ओ जम्मो बात, जऊन ह हमर ऊपर बीते हवय, ओ सब म तेंह धरमी ठहिरे हस; तेंह बिसवासयोग्य काम करे हस, जबकि हमन दुस्टता के काम करे हवन।
NEH 9:34 हमर राजामन, हमर अगुवामन, हमर पुरोहितमन अऊ हमर पुरखामन तोर कानून म नइं चलिन; ओमन तोर हुकूम या ओ बिधिमन ऊपर धियान नइं दीन, जेमन ला माने के चेतउनी तेंह देय रहय।
NEH 9:35 इहां तक कि जब ओमन अपन राज म रिहिन अऊ तोर बड़े भलई के कारन तोर दिये बड़े अऊ उपजाऊ भुइयां के आनंद उठात रिहिन, तब भी ओमन तोर सेवा नइं करिन या अपन दुस्ट काममन ला नइं छोंड़िन।
NEH 9:36 “पर देख, हमन आज गुलाम हन; ओ देस म गुलाम हन, जऊन देस तेंह हमर पुरखामन ला देय रहय ताकि ओमन ओकर फर अऊ आने उत्तम ऊपज ला खा सकंय।
NEH 9:37 हमर पाप के कारन, ये भुइयां के बहुंतायत के फसल ओ राजामन करा चले जाथे, जेमन ला तेंह हमर ऊपर ठहिराय हस। ओमन हमर देहें अऊ हमर पसुमन ऊपर अपन ईछा के मुताबिक राज करथें। हमन बड़े संकट म पड़े हवन।
NEH 9:38 “ये सब के कारन, हमन सच्चई के संग लिखके एक करार करत हन, अऊ हमर अगुवामन, हमर लेवीमन अऊ हमर पुरोहितमन ओमा अपन मुहर लगावत हें।”
NEH 10:1 जेमन करार म मुहर लगाईन, ओमन ये अंय: राजपाल: हकलयाह के बेटा नहेमियाह। सिदकियाह,
NEH 10:2 सरायाह, अजरयाह, यरमियाह,
NEH 10:3 पसहूर, अमरयाह, मलकियाह,
NEH 10:4 हतूस, सबनियाह, मल्लूक,
NEH 10:5 हारीम, मरेमोत, ओबदयाह,
NEH 10:6 दानिएल, गिन्नतोन, बारूक,
NEH 10:7 मसुल्लाम, अबियाह, मियामीन,
NEH 10:8 माजियाह, बिलगै, अऊ समायाह। येमन पुरोहित रिहिन।
NEH 10:9 लेवीमन: अजानियाह के बेटा येहोसू, हेनादाद के संतान म ले बिन्नूई अऊ कदमीएल
NEH 10:10 अऊ ओमन के सहायकमन: सबनियाह, होदियाह, कलीता, पलायाह, हानान,
NEH 10:11 मीका, रहोब, हसबियाह
NEH 10:12 जक्कूर, सेरेबियाह, सबनियाह;
NEH 10:13 होदियाह, बानी, अऊ बनीनू।
NEH 10:14 मनखेमन के अगुवामन: परोस, पहत-मोआब, एलाम, जत्तू, बानी,
NEH 10:15 बुन्नी, अजगाद, बेबै,
NEH 10:16 अदोनियाह, बिगवै, आदीन,
NEH 10:17 आतेर, हिजकियाह, अज्जूर,
NEH 10:18 होदियाह, हासूम, बेसै,
NEH 10:19 हारीफ, अनातोत, नेबै,
NEH 10:20 मगपीआस, मसुल्लाम, हेजीर,
NEH 10:21 मेसेजाबेल, सादोक, यद्दुआ,
NEH 10:22 पलतयाह, हानान, अनायाह,
NEH 10:23 होसे, हननयाह, हस्सूब,
NEH 10:24 हल्लोहेस, पिलहा, सोबेक,
NEH 10:25 रहूम, हसबनाह, मासेयाह,
NEH 10:26 अहियाह, हानान, अनान,
NEH 10:27 मल्लूक, हारीम अऊ बाना।
NEH 10:28 “बांचे इसरायल के मनखेमन—पुरोहित, लेवी, दुवारपाल, संगीतकार, मंदिर के सेवक अऊ जतेक परमेसर के कानून के हित म आसपास के मनखेमन ले अलग होय रिहिन, ओ जम्मो झन अपन माईलोगन अऊ अपन जम्मो बेटा अऊ बेटीमन, जेमन समझदार रिहिन—
NEH 10:29 ये जम्मो झन अपन परभावसाली संगी इसरायलीमन संग मिलके अपनआप ला एक सराप अऊ सपथ के संग जोड़िन कि ओमन परमेसर के ओ कानून म चलहीं, जेला परमेसर के सेवक मूसा के जरिये देय गे रिहिस, अऊ यहोवा अपन परभू के जम्मो हुकूम, नियम अऊ बिधिमन ला धियान देके मानहीं।
NEH 10:30 “हमन वायदा करत हन कि न तो अपन बेटीमन ला हमर आसपास म रहइया परदेसीमन ला बिहाव म देबो, अऊ न अपन बेटामन बर ओमन के बेटीमन ला बिहाव बर लेबो।
NEH 10:31 “जब आसपास के देस के मनखेमन बिसराम दिन म कोनो बेचे के चीज या अनाज बेचे बर लानहीं, तब हमन ओमन ले न तो बिसराम दिन म, न कोनो पबितर दिन म कुछू बिसाबो; अऊ सातवां बछर म भुइयां ला पड़ती रहन देबो, अऊ अपन करजा के वसूली छोंड़ देबो।
NEH 10:32 “हमन अइसने नियम बांध लेवत हन कि हमन अपन परमेसर के भवन के सेवा बर हर एक बछर एक तिहाई सेकेल देबो:
NEH 10:33 येकर उपयोग मेज म के पबितर रोटी बर; नियमित अन्न-बलिदान अऊ होम-बलिदान बर; बिसराम दिन, नवां चंदा के भोज अऊ ठहिराय गय तिहारमन बर; पबितर बलिदान बर; इसरायली मनखेमन के पछताप खातिर पाप-बलिदान बर; अपन परमेसर के भवन के जम्मो काम बर होही।
NEH 10:34 “हमन—पुरोहित, लेवी अऊ मनखेमन ये बात ला निस्चित करे बर चिट्ठी डाले हन कि कब हमन म के हर एक परिवार परमेसर के भवन म यहोवा हमर परमेसर के बेदी म जलाय बर अपन बांटा के लकरी लानही, जइसे कि येह कानून म लिखे हवय।
NEH 10:35 “हमन ये घलो अपन जिम्मेदारी मानत हन कि अपन ऊपज के पहिली-फसल अऊ हर एक फरवाले रूख के पहिली फर हर साल यहोवा के भवन म ले आबो।
NEH 10:36 “जइसे कि कानून म ये घलो लिखे हवय, हमन अपन पहिलऊठा बेटा अऊ अपन पहिलऊठा पसु, अपन बरदी अऊ झुंड के पहिलऊठा पसुमन ला हमर परमेसर के भवन म, उहां सेवा करत पुरोहितमन करा ले आबो।
NEH 10:37 “येकर अलावा, हमन अपन गुंथे हुए पीसान के पहिली जेवन, हमर अन्न के दान, हमर जम्मो रूखमन के फर अऊ हमर नवां अंगूर के मंद अऊ जैतून तेल, अपन परमेसर के भवन के भंडारघर म पुरोहितमन करा ले आबो। अऊ हमन अपन भुइयां के फसल के दसवां अंस लेवीमन करा लानबो, काबरकि ये लेवीमन ही जम्मो नगरमन म हमर कमई के दसवां अंस जमा करथें।
NEH 10:38 जब लेवीमन दसवां अंस ला लेवंय, तब ओमन के संग हारून के बंस के कोनो पुरोहित रहय; अऊ लेवीमन ओ दसवां अंस के दसवां भाग हमर परमेसर के भवन म, याने कि खजाना के भंडारघर म लानंय।
NEH 10:39 इसरायल के मनखेमन के संग लेवीमन घलो अनाज, नवां अंगूर के मंद अऊ जैतून तेल के अपन बांटा ला भंडारघर म लानंय, जिहां पबितर-स्थान बर अऊ सेवा-टहल करइया पुरोहित, दुवारपाल अऊ संगीतकारमन बर सामान घलो रखे जाथे। “हमन अपन परमेसर के भवन के अनदेखी नइं करन।”
NEH 11:1 मनखेमन के अगुवामन यरूसलेम म बस गीन। बाकि बचे मनखेमन चिट्ठी निकालके दस म ले एक मनखे ला पबितर सहर यरूसलेम म रहे बर लानिन, जबकि बांचे नौ मनखे ओमन के खुद के नगर म रह गीन।
NEH 11:2 मनखेमन ओ जम्मो के परसंसा करिन, जऊन मन अपन ईछा ले यरूसलेम म रहे बर तियार होईन।
NEH 11:3 येमन राज के ओ अगुवामन अंय, जऊन मन यरूसलेम म बस गीन (कुछू इसरायली, पुरोहित, लेवी, मंदिर के सेवक अऊ सुलेमान के सेवकमन के कुछू संतान, जेमन यहूदा के नगरमन म रहत रिहिन, हर एक झन अलग-अलग नगर म अपन खुद के संपत्ति म रहत रिहिन,
NEH 11:4 जबकि यहूदा अऊ बिनयामीन के गोत्र के आने मनखेमन यरूसलेम म रहत रिहिन): यहूदा के संतान म ले: अतायाह, जेह उजियाह के बेटा रिहिस, जेह जकरयाह के बेटा, जेह अमरयाह के बेटा, जेह सपतयाह के बेटा, जेह महललेल के बेटा, जेह पेरेस के एक संतान रिहिस;
NEH 11:5 अऊ मासेयाह, जेह बारूक के बेटा रिहिस, जेह कोल-होजे के बेटा, जेह हजायाह के बेटा, जेह अदायाह के बेटा, जेह योयारीब के बेटा, जेह जकरयाह के बेटा, जेह सेलह के एक संतान रिहिस।
NEH 11:6 पेरेस के संतान, जेमन यरूसलेम म रहत रिहिन, ओमन जम्मो मिलाके 468 मरयादावाले आदमी रिहिन।
NEH 11:7 बिनयामीन के संतान म ले: सल्लू, जेह मसुल्लाम के बेटा रिहिस, जेह योएद के बेटा, जेह पदायाह के बेटा, जेह कोलायाह के बेटा, जेह मासेयाह के बेटा, जेह ईतीएल के बेटा अऊ जेह येसायाह के बेटा,
NEH 11:8 अऊ ओकर पाछू चलइया गब्बै अऊ सल्लै—कुल 928 आदमी।
NEH 11:9 येमन के मुखिया अधिकारी जिकरी के बेटा योएल रिहिस, अऊ हस्सनूआ के बेटा यहूदा ह सहर के नवां चौथाई भाग के अधिकारी रिहिस।
NEH 11:10 पुरोहितमन ले: योयारीब के बेटा यदायाह अऊ याकीन;
NEH 11:11 सरायाह, जऊन ह हिलकियाह के बेटा रिहिस, जेह मसुल्लाम के बेटा, जेह सादोक के बेटा, जेह मरायोत के बेटा, जेह अहीतूब के बेटा अऊ अहीतूब ह परमेसर के घर के मुखिया अधिकारी रिहिस,
NEH 11:12 अऊ ओमन के सहयोगी, जेमन मंदिर के काम करंय—कुल 822 आदमी; अदायाह, जेह यरोहाम के बेटा रिहिस, जेह पलेलियाह के बेटा, जेह आमजी के बेटा, जेह जकरयाह के बेटा, जेह पसहूर के बेटा, जेह मलकियाह के बेटा रिहिस,
NEH 11:13 अऊ ओकर सहयोगी, जेमन परिवारमन के मुखियामन रिहिन—कुल 242 आदमी; अमसै, जेह अजरेल के बेटा रिहिस, जेह अहजै के बेटा, जेह मसिल्लेमोत के बेटा, जेह इम्मेर के बेटा रिहिस,
NEH 11:14 अऊ ओकर सहयोगी, जेमन मरयादावाले आदमी रिहिन—कुल 128 मनखे। ओमन के मुखिया अधिकारी जबदीएल रिहिस, जऊन ह हगेदोलीम के बेटा रिहिस।
NEH 11:15 लेवीमन ले: समायाह, जेह हस्सूब के बेटा रिहिस, जेह अजरीकाम के बेटा, जेह हसबियाह के बेटा, जेह बुन्नी के बेटा रिहिस;
NEH 11:16 लेवीमन के मुखियामन ले दू झन सब्बतै अऊ योजाबाद रिहिन, जेमन परमेसर के घर के बाहिर के काम बर जबाबदार रिहिन;
NEH 11:17 मतनयाह, जेह मीका के बेटा, जबदी के पोता अऊ आसाप के परपोता रिहिस। आसाप ह निरदेसक रिहिस अऊ धनबाद अऊ पराथना म अगुवई करय; बकबुकियाह, जेह अपन सहयोगीमन के बीच पद म दूसरा रिहिस; अऊ अब्दा, जेह सम्मू के बेटा, गालाल के पोता अऊ यदूतून के परपोता रिहिस।
NEH 11:18 लेवीमन पबितर सहर म कुल 284 झन रिहिन।
NEH 11:19 दुवारपालमन: अक्कूब, अऊ तलमोन अऊ ओमन के सहयोगी, जेमन दुवार म पहरेदारी करंय—कुल 172 आदमी।
NEH 11:20 बाकि इसरायलीमन, पुरोहित अऊ लेवीमन के संग यहूदा के जम्मो नगर म रिहिन अऊ येमन अपन-अपन पुरखा के संपत्ति म रहत रिहिन।
NEH 11:21 मंदिर के सेवकमन ओपेल के पहाड़ी म रहत रिहिन, अऊ सीहा अऊ गिसपा ओमन के अधिकारी रिहिन।
NEH 11:22 यरूसलेम म लेवीमन के मुखिया अधिकारी उज्जी रिहिस, जेह बानी के बेटा रिहिस, जेह हसबियाह के बेटा, जेह मतनयाह के बेटा अऊ जेह मीका के बेटा रिहिस। उज्जी ह आसाप के संतानमन ले एक झन रिहिस, जऊन मन संगीतकार रिहिन अऊ परमेसर के घर के सेवा के जिम्मेदारी ओमन के ऊपर रिहिस।
NEH 11:23 संगीतकारमन बर राजा के आदेस रिहिस, जेकर मुताबिक ओमन के हर दिन के काम रहय।
NEH 11:24 मेसेजाबेल के बेटा पतहियाह ह यहूदा के बेटा जेरह के संतान म ले एक झन रिहिस। पतहियाह ह मनखेमन ले संबंधित जम्मो काम म राजा के परतिनिधि रिहिस।
NEH 11:25 गांवमन के बारे म ये कहे जा सकथे, जेमा खेत घलो रिहिन, यहूदा गोत्र के कुछू मनखेमन किरयत-अरबा अऊ ओकर आसपास के गांव म, दीबोन अऊ येकर गांवमन म, जेकबसील अऊ येकर गांवमन म,
NEH 11:26 येहोसू म, मोलादा म, बेत-पेलेत म,
NEH 11:27 हसर-सूआल म, बेरसेबा अऊ येकर गांवमन म,
NEH 11:28 सिकलग म, मकोना अऊ येकर गांवमन म,
NEH 11:29 एन-रिम्मोन म, सोरा म, यरमूत म,
NEH 11:30 जानोह, अदुल्लाम अऊ ओमन के गांवमन म, लाकीस अऊ येकर खेतमन म, अऊ अजेका अऊ येकर गांवमन म रहत रिहिन। ये किसम ले ओमन बेरसेबा ले लेके हिन्नोम के घाटी तक अपन निवास बनाके रहत रिहिन।
NEH 11:31 गेबा के बिनयामीन के संतानमन मिकमास, अईजा, बेतेल अऊ येकर गांवमन म,
NEH 11:32 अनातोत, नोब अऊ अननियाह म,
NEH 11:33 हासोर, रामा अऊ गित्तैम म,
NEH 11:34 हादीद, सबोईम अऊ नबल्लत म,
NEH 11:35 लोद अऊ ओनो म, अऊ गे-हरासीम म रहत रिहिन।
NEH 11:36 यहूदा के लेवीमन के कुछू दलमन बिनयामीन म बस गे रिहिन।
NEH 12:1 जऊन पुरोहित अऊ लेवीमन सालतीएल के बेटा जरूब्बाबेल अऊ यहोसू के संग लहुंटिन, ओमन ये रिहिन: सरायाह, यरमियाह, एजरा,
NEH 12:2 अमरयाह, मल्लूक, हतूस,
NEH 12:3 सेकनयाह, रहूम, मरेमोत,
NEH 12:4 इद्दो, गिन्नतोन, अबियाह,
NEH 12:5 मियामीन, मादियाह, बिलगा,
NEH 12:6 समायाह, योयारीब, यदायाह,
NEH 12:7 सल्लू, आमोक, हिलकियाह अऊ यदायाह।
NEH 12:8 लेवीमन येहोसू, बिन्नूई, कदमीएल, सेरेबियाह, यहूदा रिहिन, अऊ मतनयाह घलो अपन सहयोगीमन संग रिहिस; ये मतनयाह ह धनबाद के गीत गवइयामन के अधिकारी रिहिस।
NEH 12:9 ओमन के सहयोगी बकबुकियाह अऊ उन्नी सेवा म ओमन के दूसर तरफ ठाढ़ होवंय।
NEH 12:10 यहोसू ह योयाकीम के ददा रिहिस, योयाकीम ह एलियासीब के ददा, एलियासीब ह योयादा के ददा,
NEH 12:11 योयादा ह योनातन के ददा, अऊ योनातन ह यद्दुआ के ददा रिहिस।
NEH 12:12 योयाकीम के समय म, येमन पुरोहिती परिवारमन के मुखिया रिहिन: सरायाह के परिवार के मुखिया मरायाह; यरमियाह के परिवार के मुखिया हननयाह;
NEH 12:13 एजरा के परिवार के मुखिया मसुल्लाम; अमरयाह के परिवार के मुखिया यहोहानान;
NEH 12:14 मल्लूक के परिवार के मुखिया योनातन; सेकनयाह के परिवार के मुखिया यूसुफ;
NEH 12:15 हारीम के परिवार के मुखिया अदना; मरेमोत के परिवार के मुखिया हेलकै;
NEH 12:16 इद्दो के परिवार के मुखिया जकरयाह; गिन्नतोन के परिवार के मुखिया मसुल्लाम;
NEH 12:17 अबियाह के परिवार के मुखिया जिकरी; मिनयामीन के अऊ मोअदियाह के परिवार के मुखिया पिलतै;
NEH 12:18 बिलगा के परिवार के मुखिया सम्मू; समायाह के परिवार के मुखिया यहोनातान;
NEH 12:19 योयारीब के परिवार के मुखिया मत्तनै; यदायाह के परिवार के मुखिया उज्जी;
NEH 12:20 सल्लू के परिवार के मुखिया कल्लै; आमोक के परिवार के मुखिया एबेर;
NEH 12:21 हिलकियाह के परिवार के मुखिया हसबियाह; अऊ यदायाह के परिवार के मुखिया नतनेल रिहिस।
NEH 12:22 एलियासीब, योयादा, योहानान अऊ यद्दुआ के समय म लेवीमन के परिवारमन के मुखियामन के नांव लिखे गे रिहिन, वइसने ही फारस के राजा दारा के राज म पुरोहितमन के नांव लिखे गे रिहिन।
NEH 12:23 लेवी के संतान म जऊन मन परिवार के मुखिया रिहिन, ओमन के नांव एलियासीब के बेटा योहानान के समय तक इतिहास के किताब म लिखे गीस।
NEH 12:24 अऊ लेवीमन के अगुवा येमन रिहिन: हसबियाह, सेरेबियाह अऊ कदमीएल के बेटा येहोसू, अऊ ओमन के सहयोगी, जऊन मन ओमन के आघू म खड़े रहंय अऊ परमेसर के जन दाऊद के दिये निरदेस के मुताबिक एक दल के उत्तर के रूप म दूसरा दल परसंसा अऊ धनबाद के गीत गावय।
NEH 12:25 मतनयाह, बकबुकियाह, ओबदयाह, मसुल्लाम, तलमोन अऊ अक्कूब दुवारपाल रिहिन, जेमन दुवारमन के पास के भंडारघरमन के पहरेदारी करंय।
NEH 12:26 येमन यहोसू के बेटा अऊ योसादाक के पोता योयाकीम के समय म, अऊ नहेमियाह राजपाल अऊ एजरा पुरोहित, कानून के गुरू के समय म सेवा करिन।
NEH 12:27 यरूसलेम के दीवार के समरपन बर लेवीमन ला ओमन के जगह म ले खोजे गीस अऊ ओमन ला यरूसलेम लाय गीस, ताकि आनंद सहित धनबाद के गीत गावत अऊ मंजीरा, बीना अऊ सारंगी बजावत समरपन के उत्सव ला मनाय जा सकय।
NEH 12:28 संगीतकारमन ला घलो यरूसलेम के आसपास के इलाका ले लाय गीस—नतोपातीमन के गांवमन ले,
NEH 12:29 बेत-गिलगाल ले, अऊ गेबा अऊ अजमावेत के इलाका ले, काबरकि संगीतकारमन यरूसलेम के आसपास अपन बर गांव बना ले रिहिन।
NEH 12:30 जब पुरोहित अऊ लेवीमन नियम के मुताबिक अपनआप ला सुध कर लीन, तब ओमन मनखेमन ला, दुवारमन ला अऊ दीवार ला सुध करिन।
NEH 12:31 मेंह यहूदा के अगुवामन ला दीवार के ऊपर चढ़े बर कहेंव। मेंह धनबाद देय बर गवइयामन के दू ठन बड़े दल घलो ठहिरांय। एक दल के काम रिहिस कि ओमन दीवार म चघके जेवनी कोति कुड़ा दुवार तरफ जावंय।
NEH 12:32 ओमन के पाछू-पाछू येमन गीन—होसायाह अऊ यहूदा के आधा अगुवामन,
NEH 12:33 संग म अजरयाह, एजरा, मसुल्लाम,
NEH 12:34 यहूदा, बिनयामीन, समायाह, यरमियाह,
NEH 12:35 संगे-संग कुछू पुरोहितमन तुरही फूंकत रिहिन, अऊ संग म जकरयाह घलो रिहिस, जऊन ह योनातन के बेटा रिहिस, जेह समायाह के बेटा, जेह मतनयाह के बेटा, जेह मीकायाह के बेटा, जेह जक्कूर के बेटा, जेह आसाप के बेटा रिहिस,
NEH 12:36 अऊ ओकर सहयोगी—समायाह, अजरेल, मिललै, गिललै, माई, नतनेल, यहूदा अऊ हनानी रिहिन अऊ येमन परमेसर के जन दाऊद के दिये निरदेस के मुताबिक बाजा धरे रिहिन। कानून के गुरू एजरा ह जुलूस के आघू-आघू चलिस।
NEH 12:37 सोता दुवार करा येमन सीधा दाऊद के सहर के सीढ़ी ले ऊपर दीवार म चघ गीन अऊ दाऊद के महल के ऊपर ले होवत पूरब कोति जल-दुवार तक हबर गीन।
NEH 12:38 गवइयामन के दूसरा दल ह उल्टा दिग म गीस। मेंह ओमन के पाछू-पाछू आधा मनखेमन के संग दीवार के ऊपर चलत रहेंव—भट्ठीमन के पास ले चाकर दीवार तक,
NEH 12:39 फेर एपरैम दुवार, यसाना दुवार, मछरी दुवार, हनानेल के मीनार अऊ सौ के मीनार ले होवत भेड़ दुवार तक गेंन। पहरेदार के दुवार करा ओमन रूक गीन।
NEH 12:40 गवइयामन के दूनों दल धनबाद दीन अऊ परमेसर के घर म अपन जगह म खड़े हो गीन, वइसने ही मेंह घलो आधा करमचारीमन के संग खड़े हो गेंव,
NEH 12:41 संग म पुरोहितमन—एलयाकीम, मासेयाह, मिनयामीन, मीकायाह, एलयोएनै, जकरयाह अऊ हननयाह अपन-अपन तुरही लेके रिहिन—
NEH 12:42 येमन के संग मासेयाह, समायाह, एलिआजर, उज्जी, यहोहानान, मलकियाह, एलाम अऊ एजेर घलो रिहिन। गवइयामन जेज्रहियाह के निरदेसन म गीत गाईन।
NEH 12:43 अऊ ओ दिन, मनखेमन आनंद मनात बहुंत बलिदान चघाईन, काबरकि परमेसर ह ओमन ला बहुंत आनंदित करे रिहिस। माईलोगन अऊ लइकामन घलो आनंद मनाईन। आनंद मनाय के अवाज ला यरूसलेम म बहुंत दूरिहा तक सुने जा सकत रिहिस।
NEH 12:44 ओ समय, आदमीमन ला भंडारघरमन के अधिकारी ठहिराय गीस; ओमन के ऊपर भेंट, खेत के पहिला फर अऊ दसमांस के जिम्मा रिहिस। नगरमन के आसपास के खेतमन ले ओमन कानून के मुताबिक ठहिराय गे भाग ला भंडारघर म लानंय। ये भाग ह पुरोहित अऊ लेवीमन के बांटा रहय, काबरकि यहूदीमन पुरोहित अऊ लेवीमन के सेवा ले खुस रिहिन।
NEH 12:45 ओमन अपन परमेसर के सेवा अऊ सुध करे के सेवा के काम ला करिन, वइसने ही संगीतकार अऊ दुवारपालमन घलो दाऊद अऊ ओकर बेटा सुलेमान के हुकूम के मुताबिक सेवा करिन।
NEH 12:46 बहुंत पहिले, दाऊद अऊ आसाप के समय म, संगीतकारमन के निरदेसकमन रिहिन, जऊन मन परमेसर के परसंसा अऊ धनबाद के गीत गाय म अगुवई करंय।
NEH 12:47 ये किसम ले जरूब्बाबेल के समय अऊ नहेमियाह के समय म, जम्मो इसरायलीमन संगीतकार अऊ दुवारपालमन बर हर दिन के भाग देवत रिहिन। ओमन आने लेवीमन बर घलो एक भाग अलग रखंय, अऊ लेवीमन हारून के संतानमन बर एक भाग अलग रखंय।
NEH 13:1 ओ दिन मूसा के किताब मनखेमन ला ऊंचहा अवाज म पढ़के सुनाय गीस अऊ उहां ये लिखे मिलिस कि कोनो अमोनी या मोआबी परमेसर के सभा म कभू झन आवन पावय,
NEH 13:2 काबरकि ओमन जेवन अऊ पानी लेके इसरायलीमन ले भेंट नइं करिन पर ओमन ला सराप देय बर बिलाम ला पईसा देके बलाय रिहिन। (पर हमर परमेसर ह सराप ला आसीस म बदल दीस।)
NEH 13:3 जब मनखेमन ये कानून ला सुनिन, त ओमन ओ जम्मो ला इसरायल ले बाहिर कर दीन, जऊन मन बिदेसी मूल के रिहिन।
NEH 13:4 एकर पहिले, एलियासीब पुरोहित ला हमर परमेसर के घर के भंडारघरमन के अधिकारी बनाय गे रिहिस। ओह तोबियाह के नजदीकी सहयोगी रिहिस,
NEH 13:5 ओह तोबियाह ला एक बड़े कमरा देय रिहिस, जिहां पहिले अन्न-बलिदान, धूप, मंदिर के चीज, अऊ लेवीमन, संगीतकारमन अऊ दुवारपालमन बर ठहिराय अन्न के दसमांस, अंगूर के नवां मंद अऊ जैतून के तेल रखे जावय, संग म पुरोहितमन के बांटा ला घलो उहां रखे जावय।
NEH 13:6 जब ये सब होवत रिहिस, त मेंह यरूसलेम म नइं रहेंव, काबरकि बेबिलोन के राजा अर्तछयर्स के राज के बत्तीसवां साल म, मेंह राजा करा गेंव। कुछू समय के बाद, मेंह ओकर ले अनुमति मांगेंव
NEH 13:7 अऊ यरूसलेम वापिस आयेंव। इहां मेंह ओ बुरई के बारे म सुनेंव, जेला एलियासीब ह तोबियाह ला परमेसर के घर के अंगना म एक कमरा देके करे रिहिस।
NEH 13:8 मेंह बहुंत नराज होयेंव अऊ तोबियाह के घर के जम्मो सामान ला कमरा के बाहिर फटिक देंव।
NEH 13:9 मेंह कमरामन ला सुध करे के हुकूम देंव, अऊ तब मेंह ओमा वापिस परमेसर के घर के साज-सामान ला अन्न-बलिदान अऊ धूप के संग रखवा देंव।
NEH 13:10 मोला ये घलो पता चलिस कि लेवीमन बर ठहिराय भाग ओमन ला नइं दिये जावत रिहिस, अऊ ये घलो कि ओ जम्मो लेवी अऊ संगीतकार, जेमन के ऊपर सेवा के जिम्मेदारी रिहिस, ओमन अपन-अपन खेत म काम करे बर वापिस चल दे रिहिन।
NEH 13:11 एकरसेति मेंह करमचारीमन ला डांटेंव अऊ ओमन ले पुछेंव, “परमेसर के घर के धियान काबर नइं दिये जावथे?” तब मेंह ओमन ला बलांय अऊ ओमन ला ओमन के पद म नियुक्त करेंव।
NEH 13:12 तब यहूदा के जम्मो मनखेमन अन्न, अंगूर के नवां मंद अऊ जैतून तेल के दसमांस भंडारघर म लाने लगिन।
NEH 13:13 मेंह सेलेमियाह पुरोहित, सादोक मुंसी, अऊ पदायाह नांव के एक लेवी ला भंडारघरमन के अधिकारी ठहिरा देंव अऊ हानान ला ओमन के सहायक बना देंव, जऊन ह जक्कूर के बेटा अऊ मतनयाह के पोता रिहिस, काबरकि येमन बिसवासयोग्य समझे जावंय। येमन के ऊपर अपन संगी लेवीमन ला सामान बांटे के जिम्मेदारी रिहिस।
NEH 13:14 हे मोर परमेसर, ये काम बर तेंह मोला सुरता रखबे, अऊ जऊन काम मेंह ईमानदारी से अपन परमेसर के घर अऊ येकर सेवा म करे हवंव, ओला झन मिटा देबे।
NEH 13:15 ओ समय म, मेंह देखेंव कि यहूदा म मनखेमन बिसराम के दिन हौदमन म अंगूर ला रऊंदंय अऊ गदहामन ऊपर अनाज ला जोरके लानंय, वइसने ही ओमन अंगूर के मंद, अंगूर, अंजीर अऊ आने जम्मो किसम के सामान जोरके लानंय। अऊ ओमन ये जम्मो चीज बिसराम के दिन यरूसलेम म लानंय। एकरसेति मेंह ओमन ला बिसराम दिन म खाय के सामान बेचे बर मना करेंव।
NEH 13:16 सूर के मनखे, जेमन यरूसलेम म रहत रिहिन, ओमन मछरी अऊ जम्मो किसम के बेपार के चीज लानंय अऊ ओला यरूसलेम म यहूदा के मनखेमन ला बिसराम के दिन बेचंय।
NEH 13:17 तब मेंह यहूदा के परभावसाली मनखेमन ला डांटेंव अऊ ओमन ला कहेंव, “तुमन ये गलत काम कइसे करत हव—बिसराम दिन ला अपबितर करत हव?
NEH 13:18 का तुम्हर पुरखामन अइसनेच नइं करत रिहिन, जेकर कारन हमर परमेसर ह ये जम्मो बिपत्ति हमर ऊपर अऊ ये सहर ऊपर लानिस? अब तुमन बिसराम दिन ला अपबितर करके इसरायल ऊपर परमेसर के कोप ला अऊ भड़कावत हव।”
NEH 13:19 बिसराम दिन के पहिले, जब सांझ के छइहां ह यरूसलेम के दुवारमन ऊपर पड़िस, तब मेंह हुकूम देंव कि कपाटमन ला बंद कर दिये जावय अऊ बिसराम दिन के खतम होवत तक येमन ला झन खोले जावय। मेंह अपन कुछू आदमीमन ला दुवारमन म तैनात कर देंव, ताकि बिसराम दिन म, कोनो भी सामान भीतर झन लाने जा सकय।
NEH 13:20 एक या दू बार बेपारी अऊ जम्मो किसम के सामान बेचइयामन यरूसलेम के बाहिर रात बिताईन।
NEH 13:21 पर मेंह ओमन ला चेतउनी देके कहेंव, “तुमन काबर दीवार करा रात बिताथव? यदि तुमन फेर अइसने करहू, त मेंह तुमन ला गिरफतार कर लूहूं।” ओ समय के बाद, ओमन फेर कभू बिसराम दिन म नइं आईन।
NEH 13:22 तब मेंह लेवीमन ला हुकूम देंव कि ओमन अपनआप ला सुध करंय अऊ बिसराम दिन ला पबितर रखे बर, जाके दुवारमन म पहरेदारी करंय। हे मोर परमेसर, ये काम बर घलो मोला सुरता रखबे, अऊ अपन बड़े करूना के मुताबिक मोर ऊपर दया करबे।
NEH 13:23 ओ समय म, मेंह यहूदा के अइसे आदमीमन ला घलो देखेंव, जेमन असदोदी, अमोनी अऊ मोआबी माईलोगनमन ले बिहाव कर ले रिहिन।
NEH 13:24 ओमन के आधा लइकामन असदोद के भासा या ओ आने मनखेमन के एक भासा बोलंय, अऊ ओमन यहूदीमन के भासा नइं बोल सकत रिहिन।
NEH 13:25 मेंह ओमन ला डांटेंव अऊ ओमन ला सराप देंव। मेंह कुछू आदमीमन ला मारेंव-पीटेंव अऊ ओमन के बाल खीचेंव। मेंह ओमन ला परमेसर के सपथ दिलाके कहेंव, “तुमन अपन बेटी बिहाव म ओमन के बेटामन ला झन दव, न ही तुमन ओमन के बेटी बिहाव म अपन बेटामन बर या अपन बर लानव।
NEH 13:26 का ये किसम के बिहाव के कारन ही इसरायल के राजा सुलेमान ह पाप नइं करिस? बहुंते देस म ओकर सहीं कोनो राजा नइं रिहिन। ओकर परमेसर ह ओकर ले मया करय, अऊ परमेसर ह ओला जम्मो इसरायल के ऊपर राजा बनाईस, पर ओह घलो परदेसी माईलोगनमन के दुवारा पाप म पड़िस।
NEH 13:27 त का अब हमन तुम्हर बात ला सुनन, अऊ ये जम्मो भयंकर दुस्टता के काम करन अऊ बिदेसी माईलोगनमन ले बिहाव करके हमर परमेसर के संग बिसवासघात करन?”
NEH 13:28 एलियासीब महा पुरोहित के बेटा योयादा के बेटामन ले एक झन ह होरोनी सम्बल्लत के दामाद रिहिस। अऊ मेंह ओला अपन करा ले भगा देंव।
NEH 13:29 हे मोर परमेसर, ओमन ला सुरता रख, काबरकि ओमन पुरोहित के पद अऊ पुरोहित अऊ लेवीमन के करार ला असुध करे हवंय।
NEH 13:30 ये किसम ले मेंह पुरोहित अऊ लेवीमन ला ओमन के हर परदेसी काम ले सुध करेंव, अऊ हर एक ला ओमन के काम बांट देंव।
NEH 13:31 मेंह ठहिराय गे समय म लकरी के भेंट लाने अऊ ऊपज के पहिली-फसल देय के घलो परबंध करेंव। हे मोर परमेसर, मोर ऊपर दया करत मोला सुरता रखबे।
EST 1:1 छयर्स राजा के समय म ये बात होईस, येह ओही छयर्स अय, जऊन ह 127 राजमन म, याने भारत ले लेके कूस देस तक राज करत रिहिस:
EST 1:2 ओ समय छयर्स राजा ह सूसनगढ़ के किला म अपन राज सिंघासन म बईठके राज करत रिहिस,
EST 1:3 अऊ अपन राज के तीसरा साल म, ओह अपन जम्मो परभावसाली मनखे अऊ करमचारीमन बर एक जेवनार करिस। फारस अऊ मादै के सेनापतिमन, राजकुमारमन अऊ राज-राज के परभावसाली मनखेमन उहां रिहिन।
EST 1:4 पूरा 180 दिन तक, ओह ओमन ला अपन राज के बहुंत धन-संपत्ति अऊ अपन राजपद के सोभा अऊ महिमा ला देखाईस।
EST 1:5 जब ये दिनमन बीत गीन, त राजा ह का छोटे का बड़े अपन जम्मो मनखेमन बर, जऊन मन सूसनगढ़ के किला म जूरे रिहिन, राजमहल के बाड़ा ले घिरे बारी म 7 दिन तक जेवनार करिस।
EST 1:6 बारी म मलमल के बने सफेद अऊ नीला रंग के परदामन टंगाय रहंय, जेमन ला मलमल के बने सफेद डोरी अऊ बैंगनी चीज ले संगमरमर के खंभामन म चांदी के छल्ला म बांधे गे रहय। उहां सोन अऊ चांदी के सोफामन रिहिन, जेमन ला कारीगरी करे गे बड़े सफेद पथरा, संगमरमर, मोती अऊ कीमती पथरामन ले बने फर्स ऊपर मढ़ाय गे रिहिस।
EST 1:7 राजा के उदारता के कारन बहुंत अकन साही-मदिरा रिहिस, अऊ मंद ला सोन के पियाला म परोसे जावत रिहिस, अऊ हर एक जन ला आने किसम के पियाला म मंद दिये जावत रिहिस।
EST 1:8 राजा के हुकूम ले हर एक पहुना ह बिगर कोनो बाधा के मंद पी सकत रिहिस, काबरकि राजा ह जम्मो मदिरा देवइयामन ला आदेस दे रिहिस कि जऊन मनखे जइसने चाहय, ओला वइसने देवव।
EST 1:9 रानी वसती ह घलो राजा छयर्स के राजमहल म माईलोगनमन बर जेवनार करिस।
EST 1:10 जेवनार के सातवां दिन, जब राजा छयर्स के मन ह मंद पीके मगन हो गे रिहिस, त ओह अपन सेवा करइया सात झन खोजा—महूमान, बिजता, हरबोना, बिगता, अबगता, जेतेर अऊ करकस—ला हुकूम दीस
EST 1:11 कि रानी वसती ला राज-मुकुट पहिरे हुये राजा के आघू म लाने जावव, ताकि मनखे अऊ परभावसाली मनखेमन ओकर सुन्दरता ला देख सकंय, काबरकि ओह देखे म सुन्दर रिहिस।
EST 1:12 पर जब सेवकमन जाके राजा के ये हुकूम दीन, त रानी वसती ह आय बर मना कर दीस। तब राजा ह बहुंत नराज होईस अऊ गुस्सा के मारे जरे लगिस।
EST 1:13 काबरकि येह राजा के रिवाज रिहिस कि कानून अऊ नियाय के बात म, ओह जानकार मनखेमन ले सलाह लेवय, एकरसेति ओह ओ बुद्धिमान मनखेमन ले बात करिस, जऊन मन समय ला समझत रिहिन
EST 1:14 अऊ राजा के बहुंत करीबी रिहिन—ओमन करसना, सेतार, अदमाता, तरसीस, मेरेस, मरसना अऊ ममूकान नांव के फारस अऊ मादै के सात झन परभावसाली मनखे रिहिन; येमन के राजा करा बिसेस पहुंच रिहिस अऊ येमन राज के बड़े-बड़े पद म रिहिन।
EST 1:15 राजा ह पुछिस, “कानून के मुताबिक रानी वसती के संग का करना चाही? ओह राजा छयर्स के खोजामन के दुवारा देय गे हुकूम ला नइं माने हे।”
EST 1:16 तब ममूकान ह राजा अऊ परभावसाली मनखेमन के आघू म जबाब दीस, “रानी वसती सिरिप राजा के बिरूध ही गलत काम नइं करे हवय, पर ओह जम्मो परभावसाली मनखे अऊ राजा छयर्स के जम्मो राज के मनखेमन के बिरूध घलो गलत काम करे हवय।
EST 1:17 काबरकि जब जम्मो माईलोगनमन रानी के बरताव के बारे म जानहीं, त ओमन अपन घरवालामन ला तुछ समझहीं अऊ कहिहीं, ‘राजा छयर्स ह हुकूम दीस कि रानी वसती ला ओकर आघू म लाने जावय, पर ओह नइं आईस।’
EST 1:18 आज के दिन जऊन परभावसाली फारसी अऊ मादी माईलोगनमन रानी के बरताव के बारे म सुने हवंय, ओमन घलो राजा के परभावसाली मनखेमन संग अइसने ही बरताव करहीं। अऊ अनादर अऊ बिरोध के कोनो अन्त नइं होही।
EST 1:19 “एकरसेति, यदि राजा ला बने लगय, त ओह एक राजकीय आदेस निकालय अऊ ओ आदेस ह फारस अऊ मादै के कानून म लिखे जावय, जेला रद्द नइं करे जा सकय कि वसती ह राजा छयर्स के आघू म फेर कभू झन जावय। अऊ ये घलो कि राजा ह ओकर पटरानी के पद कोनो आने ला दे देवय, जऊन ह ओकर ले घलो बने होवय।
EST 1:20 तब जब राजा के ये आदेस ला ओकर जम्मो राज म सुनाय जाही, त जम्मो माईलोगनमन, का छोटे का बड़े, अपन-अपन घरवालामन के आदरमान करहीं।”
EST 1:21 ये सलाह ह राजा अऊ ओकर परभावसाली मनखेमन ला बने लगिस, एकरसेति राजा ह ममूकान के सलाह ला मान लीस।
EST 1:22 ओह राज के जम्मो भाग म संदेस पठोईस; हर एक छेत्र म, उहां के लिपि अऊ उहां के मनखेमन के भासा म संदेस पठोईस अऊ घोसना करवाईस कि हर एक आदमी ह अपन खुद के भासा के उपयोग करत, अपन घर म हुकूम चलावय।
EST 2:1 ये घटना के बाद, जब राजा छयर्स के गुस्सा ह सांत हो गीस, त ओह वसती अऊ ओकर बरताव अऊ जऊन आदेस राजा ह वसती के बारे म देय रिहिस, ओ जम्मो बात ला सुरता करिस।
EST 2:2 तब राजा के निजी सेवकमन सलाह दीन, “राजा बर सुन्दर अऊ कइनारी कुंवारीमन के खोज करे जावय।
EST 2:3 राजा ह अपन राज के हर छेत्र म आयुक्तमन ला ठहिरावय, जऊन मन ये जम्मो कइनारी कुंवारीमन ला सूसन के किला के रनवास म लानंय। अऊ ओमन ला राजा के खोजा हेगे के अधीन कर दिये जावय, जऊन ह कि माईलोगनमन के देखरेख करइयामन के मुखिया ए; अऊ ओमन ला सुघर बने चीजमन दिये जावंय।
EST 2:4 तब जऊन कइनारी माईलोगन ले राजा ह खुस होही, ओला वसती के जगह म रानी बनाय जावय।” ये सलाह ह राजा ला बने लगिस, अऊ ओह वइसनेच करिस।
EST 2:5 सूसनगढ़ के किला म मोरदकै नांव के बिनयामीन के गोत्र के एक झन यहूदी रिहिस, जऊन ह कीस के परनाती, सिमी के नाती अऊ याईर के बेटा रिहिस
EST 2:6 ओह ओ बंदीमन के संग यरूसलेम ले बंधुवई म आय रिहिस, जेमन ला बेबिलोन के राजा नबूकदनेसर ह यहूदा के राजा यहोयाकीन के संग बंदी बनाके ले गे रिहिस।
EST 2:7 मोरदकै के हदस्सा नांव के एक चचेरी बहिनी रिहिस, जेला ओह पाले-पोसे रिहिस, काबरकि हदस्सा के दाई-ददा कोनो नइं रिहिन। ये कइनारी माईलोगन ला एस्तर घलो कहे जावय; ओकर देहें ह सुघर अऊ ओह सुन्दर रिहिस। जब ओकर दाई-ददा मर गीन, त मोरदकै ह ओला लेके अपन खुद के बेटी सहीं पाले रिहिस।
EST 2:8 जब राजा के आदेस अऊ नियम के घोसना करे गीस, त बहुंत अकन कइनारी कुंवारीमन ला सूसनगढ़ के किला म लाने गीस अऊ ओमन ला हेगे के देखरेख म रखे गीस। एस्तर ला घलो राजा के महल म लाने गीस अऊ ओला हेगे के अधीन सऊंप दिये गीस, जऊन ह कि रनवास के देखरेख करइयामन के मुखिया रिहिस।
EST 2:9 एस्तर ला देखके हेगे ह खुस होईस अऊ ओ कइनारी माईलोगन ह ओला बने लगिस। तुरते ओह सुघर बनाय के चीजमन ओला दीस अऊ ओकर बर खास जेवन के परबंध करिस। ओह ओला राजा के महल ले चुने सात झन सेविका घलो दीस अऊ ओला अऊ ओकर सेविकामन ला रनवास म सबले बढ़िया जगह म रहे बर दीस।
EST 2:10 एस्तर ह न तो अपन जाति के बारे म अऊ न ही अपन परिवार के बारे म बताय रिहिस, काबरकि मोरदकै ह ओला ये बातमन ला बताय बर मना करे रिहिस।
EST 2:11 मोरदकै ह हर एक दिन रनवास के अंगना के आघू म ये जाने बर घुमय-फिरय कि एस्तर ह कइसे हवय अऊ ओकर संग का होवत हे।
EST 2:12 जब भी कोनो कइनारी माईलोगन के राजा छयर्स करा जाय के पारी आवय, त जाय के पहिली, ओ माईलोगन ला सुघर बनाय के बारह महिना ला पूरा करना पड़य; याने कि ओला छै महिना तक गंधरस के तेल लगाय जावय अऊ छै महिना तक खुसबूवाला तेल अऊ सुघर बनाय के चीजमन ला लगाय जावय।
EST 2:13 अऊ ये किसम ले ओ कइनारी माईलोगन ह राजा करा जावय: जऊन कुछू चीज ओह अपन संग रनवास म ले राजा के महल म ले जाय बर चाहय, ओ चीज ओला दिये जावय।
EST 2:14 संझा के बेरा, ओह राजा के महल म जावय अऊ बिहनियां, ओह लहुंटके रनवास के आने भाग म सासगज के देखरेख म रहे बर चले जावय; सासगज ह राजा के खोजा अऊ रखैलमन के देखरेख करइयामन के मुखिया रिहिस। ओ माईलोगन ह फेर राजा करा नइं जावय; कहूं राजा ह ओकर ले खुस हो जावय, त ओकर नांव लेके ओला फेर बलाय जावय।
EST 2:15 जब मोरदकै के कका अबीहैल के बेटी एस्तर, जेला मोरदकै ह बेटी बनाके रखे रिहिस, ओकर पारी आईस, कि ओह राजा करा जावय, त जऊन कुछू चीज रनवास के मुखिया, राजा के खोजा हेगे ह ओला ले जाय के सलाह दीस, ओला छोंड़ एस्तर ह अपन संग ले जाय बर अऊ कुछू चीज के मांग नइं करिस। अऊ जऊन मन एस्तर ला देखिन, ओ जम्मो झन ओकर ले खुस होईन।
EST 2:16 एस्तर ला राजमहल म राजा छयर्स करा ओकर राज के सातवां साल के तेबेत नांव के दसवां महिना म अमराय गीस।
EST 2:17 राजा ह एस्तर ला अऊ जम्मो माईलोगनमन ले जादा मया करिस, अऊ राजा के ओकर ऊपर अऊ जम्मो कइनारी कुंवारीमन ले जादा अनुग्रह अऊ किरपा होईस। एकरसेति ओह ओकर मुड़ म राज-मुकुट रखिस अऊ ओला वसती के जगह म रानी बनाईस।
EST 2:18 अऊ राजा ह अपन जम्मो परभावसाली मनखे अऊ करमचारीमन बर एक बड़े जेवनार करिस, जऊन ह एस्तर के जेवनार रिहिस। ओह जम्मो राज म एक दिन के छुट्टी के घोसना करवाईस अऊ साही उदारता से ईनाम घलो बांटिस।
EST 2:19 जब कुंवारीमन ला दूसर बार संकेले गीस, त मोरदकै ह राजमहल के कपाट करा बईठे रिहिस।
EST 2:20 पर एस्तर ह अपन परिवार अऊ जाति के बात ला गुपत रखे रिहिस जइसने कि मोरदकै ह ओला करे बर कहे रिहिस, काबरकि एस्तर ह अभी घलो मोरदकै के बात ला वइसने ही मानय, जइसने ओह अपन पालन-पोसन के समय ओकर बात ला मानय।
EST 2:21 ओ दिनमन म, जब मोरदकै ह राजमहल के दुवार करा बईठे रहय, तब राजा के दू झन अधिकारी—बिगताना अऊ तेरेस, जऊन मन दुवारपाल रिहिन, राजा छयर्स के कोनो बात ले गुस्सा होके राजा के हतिया करे के साजिस रचिन।
EST 2:22 पर मोरदकै ला ये साजिस के पता चल गीस अऊ ओह ये बात एस्तर रानी ला बताईस, अऊ एस्तर ह मोरदकै के नांव लेके ये बात राजा ला बताईस।
EST 2:23 अऊ जब जांच-पड़ताल होईस, त ये बात ह सही पाय गीस अऊ ओ दूनों अधिकारीमन ला खंभामन म टांग दिये गीस। ये जम्मो बात ला राजा के आघू म इतिहास के किताब म लिख दिये गीस।
EST 3:1 ये घटनामन के बाद, राजा छयर्स ह हम्मदाता अगागी के बेटा हामान ला ऊंचा उठाके अऊ ओला आने जम्मो परभावसाली मनखेमन ले जादा ऊंच पद देके ओकर महत्व ला बढ़ाईस।
EST 3:2 राजा के दुवार के जम्मो साही करमचारीमन हामान के आघू म माड़ी टेकंय अऊ ओकर आदर करंय, काबरकि राजा ह ओकर बारे म ये हुकूम देय रिहिस। पर मोरदकै ह न तो माड़ी टेकय अऊ न ही ओकर आदर करय।
EST 3:3 तब राजा के दुवार के साही करमचारीमन मोरदकै ले पुछिन, “तेंह राजा के हुकूम ला काबर नइं मानत हस?”
EST 3:4 हर दिन ओमन ओकर ले ये बारे म गोठियाईन पर ओह हुकूम माने नइं चाहिस। एकरसेति ओमन येकर बारे म हामान ला बताईन; ओमन ये देखे चाहत रिहिन कि मोरदकै के ये बरताव ला सहन करे जाही कि नइं, काबरकि ओह ओमन ला बता देय रिहिस कि ओह एक यहूदी अय।
EST 3:5 जब हामान ह देखिस कि मोरदकै ह न तो माड़ी टेकय अऊ न ही ओला आदर देवय, त हामान ह बहुंत गुस्सा होईस।
EST 3:6 मोरदकै के जाति के मनखेमन के बारे म जानके, हामान ह सिरिप मोरदकै ला मार डारे के योजना ला छोंड़ दीस। येकर बदले ओह छयर्स के जम्मो राज म रहइया मोरदकै के जम्मो मनखे—यहूदीमन ला नास करे के उपाय खोजे लगिस।
EST 3:7 राजा छयर्स के सासनकाल के बारहवां साल के नीसान नांव के पहिला महिना म, हामान के आघू म एक दिन अऊ महिना ला चुने बर पुर (चिट्ठी) निकाले गीस। अऊ चिट्ठी ह अदार नांव के बारहवां महिना बर निकलिस।
EST 3:8 तब हामान ह राजा छयर्स ला कहिस, “तोर राज के जम्मो छेत्र म मनखेमन के बीच म एक जाति के मनखेमन तितिर-बितिर होके रहत हें, जऊन मन अपनआप ला अलग रखथें। ओमन के रीति-रिवाज ह आने जम्मो मनखेमन ले अलग हवय, अऊ ओमन राजा के कानून ला नइं मानंय; एकरसेति ओमन ला अइसने रहन देवई ह राजा के हित म नो हय।
EST 3:9 यदि राजा ला ये बात बने लगय, त ओमन ला नास करे के एक आदेस निकाले जावय, अऊ मेंह राजा के हाकिममन ला साही खजाना बर चांदी के दस हजार टेलेन्ट दूहूं।”
EST 3:10 त राजा ह अपन अंगरी ले मुहरवाला मुंदरी ला उतारिस अऊ हम्मदाता अगागी के बेटा हामान ला दे दीस, जऊन ह कि यहूदीमन के बईरी रिहिस।
EST 3:11 अऊ राजा ह हामान ला कहिस, “पईसा ला रख, अऊ जइसने तोला बने लगय, वइसने तें ओ मनखेमन संग कर।”
EST 3:12 तब पहिली महिना के तेरहवां दिन म राजा के सचिवमन ला बलाय गीस। अऊ ओमन हर इलाका के लिपि अऊ हर मनखे के भासा म, हामान के आदेस ला राजा के जम्मो अधिपति, अलग-अलग इलाका के राजपाल अऊ परभावसाली मनखेमन ला लिखिन। ये आदेस ला खुद राजा छयर्स के नांव म लिखे गीस अऊ ओमा राजा के मुंदरी के मुहर लगाय गीस।
EST 3:13 ये लिखित आदेस ला दूतमन के हांथ म राजा के जम्मो इलाका म ये आदेस के संग पठोय गीस कि का जवान का डोकरा, का माईलोगन का लइका—जम्मो के जम्मो यहूदीमन ला मारके ओमन के पूरा बिनास कर दिये जावय अऊ ओमन के संपत्ति ला लूट लिये जावय—अऊ ये काम ला एक ही दिन म, याने कि अदार नांव के बारहवां महिना के तेरहवां दिन म करे जावय।
EST 3:14 राजा के ये हुकूम के एक प्रति ला कानून के रूप म हर इलाका म पठोय जावय अऊ हर जाति के मनखेमन ला येकर बारे म बताय जावय ताकि ओमन ओ दिन बर तियार रहंय।
EST 3:15 राजा के हुकूम ले दूतमन निकलिन अऊ आघू बढ़ गीन, अऊ सूसनगढ़ म राजा के हुकूम निकाले गीस। राजा अऊ हामान मंद पीये बर बईठ गीन, पर सूसनगढ़ सहर म घबराहट फईल गीस।
EST 4:1 जब मोरदकै ला ओ जम्मो बात के पता चलिस कि का-का करे गे हवय, त ओह अपन ओनहा ला चीरिस, बोरा के कपड़ा पहिरके अपन ऊपर राख डालिस, अऊ चिचियाके अऊ कलप-कलपके बिलाप करत सहर के भीतर गीस।
EST 4:2 पर ओह सिरिप राजा के दुवार तक गीस, काबरकि कोनो ला बोरा के ओनहा पहिरके ओकर भीतर जाय के अनुमति नइं रिहिस।
EST 4:3 ओ हर इलाका जिहां राजा के हुकूम अऊ राजा के आदेस पहुंचिस, उहां यहूदीमन उपास करत अऊ बहुंत रोवत बिलाप करे लगिन। बहुंत झन बोरा के कपड़ा पहिरके राख ऊपर पड़े रहंय।
EST 4:4 जब एस्तर रानी के खोजा अऊ सेविकामन आके ओला मोरदकै के बारे म बताईन, त ओह बहुंत दुखी होईस। ओह मोरदकै बर कपड़ा भिजवाईस कि ओह बोरा के कपड़ा ला उतारके ओ कपड़ा ला पहिरय, पर मोरदकै ह ओ कपड़ामन ला नइं लीस।
EST 4:5 तब एस्तर ह हताक ला बुलवाईस, जऊन ह राजा के खोजामन ले एक झन रिहिस अऊ एस्तर के सेवा बर ठहिराय गे रिहिस। ओह हताक ला हुकूम दीस कि ओह जाके पता लगावय कि मोरदकै ला का चीज के तकलीफ हवय अऊ ओकर कारन का ए।
EST 4:6 तब हताक ह राजा के दुवार के सामने, सहर के खुला चऊक म मोरदकै करा गीस।
EST 4:7 मोरदकै ह ओला ओ जम्मो बात बता दीस, जऊन ह ओकर ऊपर होय रिहिस; ओह ये घलो बताईस कि हामान ह यहूदीमन ला नास करे बर कतेक पईसा साही खजाना म देय के वायदा करे हवय।
EST 4:8 सूसनगढ़ म यहूदीमन के पूरा बिनास के जऊन साही हुकूम लिखे गे रिहिस, ओकर एक प्रति घलो मोरदकै ह हताक ला दीस, ताकि ओह ओ प्रति ला एस्तर ला देखावय अऊ ओकर बारे म समझा देवय, अऊ ओह हताक ला ये घलो कहिस कि ओह जाके एस्तर ला कहय कि एस्तर ह राजा के आघू म जाके अपन मनखेमन बर बिनती करय अऊ दया के भीख मांगय।
EST 4:9 तब हताक ह वापिस गीस अऊ जऊन कुछू मोरदकै ह कहे रिहिस, ओ जम्मो बात एस्तर ला बताईस।
EST 4:10 तब एस्तर ह हताक ला हुकूम दीस कि ओह जाके मोरदकै ला ये कहय,
EST 4:11 “साही इलाका के राजा के जम्मो करमचारी अऊ मनखेमन जानत हें कि यदि कोनो आदमी या माईलोगन बिगर बलाय राजमहल के भीतर राजा करा जाथे, त ओकर बर राजा के सिरिप एक कानून हवय: कि ओ आदमी या माईलोगन ला मार डारे जावय, पर यदि राजा ह सोन के राजदंड ला ओकर कोति बढ़ाथे, त ओकर परान ह बच जाथे। पर अब तीस दिन हो गे हवय, मोला राजा करा जाय के बुलावा नइं आय हवय।”
EST 4:12 जब एस्तर के ये बात मोरदकै ला बताय गीस।
EST 4:13 त ओह एस्तर करा ये जबाब भेजिस, “अइसने झन सोच कि तेंह राजा के घर म हवस, त तें एके झन जम्मो यहूदीमन म बच जाबे।
EST 4:14 काबरकि यदि तें ये बेरा म चुपेचाप रहिबे, त यहूदीमन के मदद अऊ छुटकारा कहीं अऊ जगह ले हो जाही, पर तें अऊ तोर ददा के परिवार ह नास हो जाही। अऊ कोन जाने, सायद अइसने कठिन बेरा बर ही तोला ये राजपद मिले हवय।”
EST 4:15 तब एस्तर ह मोरदकै करा ये जबाब भेजिस:
EST 4:16 “तें जा अऊ सूसनगढ़ के जम्मो यहूदीमन ला इकट्ठा कर, अऊ तुमन जम्मो मोर बर उपास करव। तीन दिन तक, रात हो या दिन, कुछू झन खावव-पीयव। में अऊ मोर सेविकामन घलो तुम्हर सहीं उपास करबो। अऊ ओकर बाद, मेंह राजा करा जाहूं, हालाकि येह कानून के बिरूध अय। अऊ कहूं मेंह नास हो जावंव, त हो जावंव।”
EST 4:17 त मोरदकै ह गीस अऊ जइसने एस्तर ह करे बर कहे रिहिस, वइसने करिस।
EST 5:1 अपन उपास के तीसर दिन, एस्तर ह अपन राजकीय कपड़ा ला पहिरिस अऊ राजा के दरबार के आघू म जाके, महल के भीतरी अंगना म ठाढ़ हो गीस। राजा ह दरबार म राज सिंघासन म बईठे रहय अऊ ओकर मुहूं ह दुवारी कोति रहय।
EST 5:2 जब ओह एस्तर रानी ला अंगना म ठाढ़े देखिस, त ओह खुस होईस अऊ अपन हांथ म धरे सोन के राजदंड ला रानी कोति बढ़ाईस। तब एस्तर ह आघू बढ़िस अऊ राजदंड के छोर ला छुईस।
EST 5:3 तब राजा ह पुछिस, “हे एस्तर रानी, का बात ए? तोर का मांग हे? मांग अऊ इहां तक कि आधा राज ला घलो तोला दिये जाही।”
EST 5:4 एस्तर ह जबाब दीस, “यदि राजा ला ये बात बने लगय, त आज राजा ह हामान के संग ओ जेवनार म आवय, जेला मेंह राजा बर तियार करे हंव।”
EST 5:5 तब राजा ह हुकूम दीस, “हामान ला तुरते ले आवव, ताकि हमन एस्तर के दिये नेवता म जावन।” त राजा अऊ हामान ओ जेवनार खाय बर चल दीन, जेला एस्तर ह बनाय रिहिस।
EST 5:6 जब ओमन मंद पीयत रिहिन, त राजा ह एस्तर ले पुछिस, “अब तोर का बिनती हे? ओ चीज तोला दिये जाही। अऊ तोर का मांग हे? मांग अऊ इहां तक कि आधा राज ला घलो तोला दिये जाही।”
EST 5:7 एस्तर ह जबाब दीस, “मोर बिनती अऊ मोर मांग ये अय:
EST 5:8 यदि राजा के दया-दिरिस्टी मोर ऊपर हवय अऊ मोर बिनती ला सुने अऊ मोर मांग ला पूरा करे म, राजा ला बने लगथे, त राजा अऊ हामान कल फेर ओ जेवनार म आवंय, जेला मेंह ओमन बर तियार करहूं। तब मेंह राजा के सवाल के जबाब दूहूं।”
EST 5:9 हामान ह ओ दिन खुस होके अऊ बड़े आनंद मन से बाहिर गीस। पर जब ओह राजा के दुवार करा गीस जिहां मोरदकै ह रहय, त ओह देखिस कि मोरदकै ह न तो उठिस अऊ न ही ओमा हामान के उहां होय के कोनो भय दिखिस, त ओह मोरदकै बर गुस्सा ले भर गीस।
EST 5:10 तभो ले, हामान अपनआप ला रोकिस अऊ घर चल दीस। अपन संगीमन ला अऊ अपन घरवाली जेरेस ला बलाके,
EST 5:11 ओमन के आघू म हामान ह अपन बहुंत धन अऊ अपन बहुंते बेटामन ऊपर डींग मारिस, अऊ कहिस कि राजा ह कइसे ओकर आदर करे हवय अऊ ओह कइसे ओला आने परभावसाली मनखे अऊ करमचारीमन ले ऊंच पद दे हवय।
EST 5:12 हामान ह ये घलो कहिस, “अतका ही नइं, एस्तर रानी ह मोला छोंड़ अऊ कोनो ला राजा के संग म अपन तियार करे जेवनार म आय के नेवता नइं दीस। अऊ रानी ह कल बर घलो राजा के संग मोला नेवते हवय।
EST 5:13 पर ये जम्मो बात ले मोर मन ह संतोस नइं होवय, जब तक कि मेंह यहूदी मोरदकै ला राजा के दुवार करा बईठे देखत रहिहूं।”
EST 5:14 ओकर घरवाली जेरेस अऊ ओकर जम्मो संगीमन ओला कहिन, “करीब 50 क्यूबीट ऊंच एक ठन खंभा गड़वा ले, अऊ बिहनियां राजा ले कहिबे कि ओमा मोरदकै ला टांग दिये जावय। तब राजा के संग जाके जेवनार के आनंद उठा।” ये सलाह ह हामान ला बने लगिस, अऊ ओह एक खंभा गड़वाईस।
EST 6:1 ओ रथिया राजा ला नींद नइं आईस; एकरसेति ओह हुकूम दीस कि इतिहास के ओ किताब ला लाय जावय, जेमा ओकर सासन के बारे म लिखे गे हवय, अऊ ओह ये घलो हुकूम दीस कि ओला पढ़के सुनाय जावय।
EST 6:2 ओ किताब म, ये लिखे हुए मिलिस कि राजा के दू झन अधिकारी—बिगताना अऊ तेरेस, जेमन दुवारपाल रिहिन, राजा छयर्स के हतिया करे के साजिस रचे रिहिन, जेकर परदाफास मोरदकै ह करे रिहिस।
EST 6:3 तब राजा ह पुछिस, “येकर बदले म, मोरदकै ला का आदरमान अऊ ईनाम दिये गीस?” ओकर सेवकमन जबाब दीन, “ओकर बर कुछू नइं करे गे हवय।”
EST 6:4 त राजा ह पुछिस, “अंगना म कोन हवय?” ओतकीच बेरा, हामान ह महल के बाहिरी अंगना म राजा ले ये कहे बर हबरे रिहिस कि ओह जऊन खंभा गड़वाय हवय, ओमा राजा ह मोरदकै ला टंगवा दे।
EST 6:5 राजा के सेवकमन जबाब दीन, “अंगना म तो हामान ह खड़े हवय।” राजा ह हुकूम दीस, “ओला भीतर बलाके लानव।”
EST 6:6 जब हामान ह भीतर आईस, त राजा ह ओकर ले पुछिस, “जऊन मनखे के आदरमान राजा ह खुसी से करना चाहय, त ओ मनखे बर का करना उचित होही?” हामान ह खुद अपन बारे म ये सोचिस, “मोला छोंड़ राजा ह अऊ काकर आदरमान करही?”
EST 6:7 एकरसेति ओह राजा ला जबाब दीस, “जऊन मनखे के राजा खुसी से आदरमान करना चाहय,
EST 6:8 ओकर बर राजकीय कपड़ा लाने जावय, जेला राजा पहिर चुके हवय अऊ एक घोड़ा लाने जावय, जेमा राजा सवारी कर चुके हवय अऊ ओकर मुड़ म राजकीय मुकुट धरे रहय।
EST 6:9 तब ओ कपड़ा अऊ घोड़ा ला राजा के सबले बने परभावसाली अधिकारीमन ले एक झन ला दे दिये जावय। अऊ राजा ह खुसी से जेकर आदरमान करे चाहत हे, ओला ओ कपड़ा ला पहिरा दिये जावय अऊ ओला घोड़ा म बईठाके सहर के गलीमन घुमाय जावय, अऊ ओकर आघू म ये घोसना करत जावय, ‘राजा ह खुसी से जेकर आदरमान करे चाहथे, ओकर संग अइसने करे जाथे।’ ”
EST 6:10 तब राजा ह हामान ला हुकूम दीस, “तुरते जा अऊ ओ कपड़ा अऊ घोड़ा ला ले आ अऊ अपन दिये सलाह के मुताबिक ओ यहूदी मोरदकै के संग वइसने ही कर, जऊन ह राजा के दुवार मेर बईठे रहिथे। अऊ जऊन सलाह तेंह दे हवस, ओमा कुछू भी कमी-घटी झन होवय।”
EST 6:11 तब हामान ह राजकीय कपड़ा अऊ घोड़ा ला लीस। ओह मोरदकै ला ओ कपड़ा पहिराईस, अऊ ओला घोड़ा म बईठाके सहर के गलीमन म घुमाईस, अऊ ओकर आघू म ये घोसना करत गीस, “राजा ह खुसी से जेकर आदरमान करे चाहथे, ओकर संग अइसने करे जाथे।”
EST 6:12 ओकर बाद, मोरदकै ह राजा के दुवार मेर लहुंट आईस। पर हामान ह दुख म अपन मुड़ ला ढांपके जल्दी से अपन घर चल दीस,
EST 6:13 अऊ ओह अपन घरवाली जेरेस अऊ अपन जम्मो संगीमन ला ओ जम्मो बात बताईस, जऊन ह ओकर ऊपर बीते रिहिस। त ओकर सलाहकारमन अऊ ओकर घरवाली जेरेस ओला कहिन, “मोरदकै के आघू म तोर गिरे के सुरूआत हो चुके हवय, काबरकि ओह यहूदी जाति के अय, तेंह ओकर आघू म टिक नइं सकस—खचित, तेंह नास हो जाबे!”
EST 6:14 जब ओमन ओकर ले गोठियावत रिहिन, तभे राजा के खोजामन आ गीन अऊ ओमन हामान ला जल्दी करके एस्तर के बनाय जेवनार म ले गीन।
EST 7:1 त राजा अऊ हामान, रानी एस्तर के जेवनार म गीन,
EST 7:2 अऊ जब ओमन दूसर दिन घलो मंद पीयत रिहिन, त राजा ह रानी ले फेर पुछिस, “हे एस्तर रानी, तोर का बिनती हे? ओला पूरा करे जाही। तोर का मांग हे? मांग, इहां तक कि आधा राज घलो तोला दे दिये जाही।”
EST 7:3 तब एस्तर रानी ह जबाब दीस, “हे महाराज, यदि तोर दया-दिरिस्टी मोर ऊपर हवय, अऊ ये बात तोला बने लगय, त मोला मोर जिनगी मिले—येह मोर बिनती ए। अऊ मोर मनखेमन के परान ला बचा ले—येह मोर मांग ए।
EST 7:4 काबरकि में अऊ मोर मनखेमन नास होय बर, मारे जाय बर अऊ पूरा बिनास होय बर बेचे गे हवन। यदि हमन नर अऊ नारी गुलाम के रूप म बेचे गे रहितेंन, त मेंह चुप रहितंय, काबरकि वइसने बात बर राजा ला तकलीफ देवई सही बात नइं होतिस।”
EST 7:5 तब छयर्स राजा ह एस्तर रानी ले पुछिस, “ओह कोन ए? अऊ ओह कहां हवय—ओ मनखे, जऊन ह अइसने काम करे के हिम्मत करे हवय?”
EST 7:6 एस्तर रानी ह जबाब दीस, “एक बिरोधी अऊ बईरी ए! अऊ ओह ये दुस्ट हामान ए!” तब हामान ह राजा अऊ रानी के आघू म डर गीस।
EST 7:7 राजा ह बहुंत गुस्सा होके उठिस अऊ अपन मंद ला छोंड़के बाहिर महल के बारी म चल दीस। पर हामान ह ये जानके कि राजा ह ओकर भाग्य के फैसला कर चुके हवय, ओह एस्तर रानी ले अपन परान के भीख मांगे बर उहां रूक गीस।
EST 7:8 जब राजा ह महल के बारी ले जेवनार के जगह म आईस, त देखिस कि जऊन सोफा म एस्तर ह बईठे हवय, ओहीच म हामान ह झुके हवय। त राजा ह चिचियाके कहिस, “अऊ त अऊ का येह रानी के संग छेड़खानी घलो करही, जबकि ओह मोर संग घर म हवय?” राजा के मुहूं ले ये बचन निकलतेच ही, राजा के सेवकमन हामान के मुहूं ला ढांप दीन।
EST 7:9 तब राजा के सेवा करइया खोजामन ले एक झन, जेकर नांव हरबोना रिहिस, ओह कहिस, “हामान के घर म पचास क्यूबीट ऊंच एक ठन खंभा गड़वाय गे हवय। हामान ह ओला मोरदकै बर गड़वाय रिहिस, जऊन ह कि राजा के भलई के बात कहे रिहिस।” तब राजा ह हुकूम दीस, “हामान ला ओमा टांग दव!”
EST 7:10 त ओमन हामान ला ओहीच खंभा म टांग दीन, जेला ओह मोरदकै बर गड़वाय रिहिस। तब राजा के गुस्सा ह ठंडा होईस।
EST 8:1 ओहीच दिन राजा छयर्स ह यहूदीमन के बईरी, हामान के घर-बार अऊ जमीन-बारी एस्तर रानी ला दे दीस। अऊ मोरदकै ह राजा के आघू म आईस, काबरकि एस्तर ह मोरदकै के संग अपन रिस्तेदारी के बारे म राजा ला बता दे रिहिस।
EST 8:2 तब राजा ह अपन ओ राज मुहरवाला मुंदरी ला निकालिस, जऊन ला ओह हामान ले लेय ले रिहिस, अऊ ओ मुंदरी ला मोरदकै ला दे दीस। अऊ एस्तर ह मोरदकै ला हामान के घर-बार अऊ जमीन-बारी के अधिकारी ठहिराईस।
EST 8:3 एस्तर ह राजा के गोड़ खाल्हे गिरके अऊ रोवत ओकर ले फेर बिनती करिस। ओह बिनती करके कहिस कि अगागी हामान ह यहूदीमन के बिरूध म जऊन हानि करे के योजना बनाय रिहिस, ओला खतम कर दिये जावय।
EST 8:4 तब राजा ह एस्तर कोति सोन के राजदंड ला बढ़ाईस अऊ एस्तर ह उठिस अऊ राजा के आघू म ठाढ़ हो गीस।
EST 8:5 ओह फेर बिनती करके कहिस, “यदि ये बात राजा ला बने लगथे, अऊ यदि ओकर दया-दिरिस्टी मोर ऊपर हवय अऊ ओह सोचथे कि अइसने करई ह सही अय, अऊ यदि ओह मोर ले खुस हवय, त जऊन आदेस हम्मदाता अगागी के बेटा हामान ह राजा के राज के जम्मो इलाका म यहूदीमन ला नास करे के खातिर लिखके पठोय रिहिस, ओ आदेस ला खारिज कर दिये जावय।
EST 8:6 काबरकि मोर मनखेमन ऊपर बिपत्ति आवय, येला मेंह देख नइं सकंव। मेंह अपन परिवार के बिनास ला कइसे देख सकत हंव?”
EST 8:7 तब राजा छयर्स ह एस्तर रानी ला अऊ यहूदी मोरदकै ला कहिस, “काबरकि हामान ह यहूदीमन ऊपर हमला करिस, एकरसेति मेंह ओकर घर-बार अऊ जमीन-बारी एस्तर ला देय दे हंव, अऊ ओला ओकर गड़वाय खंभा म टांग दिये गे हवय।
EST 8:8 अब जइसने तुमन ला बने लगे, वइसने तुमन राजा के नांव म यहूदीमन बर लिखव, अऊ ओमा राजा के मुंदरी के मुहर घलो लगावव—काबरकि जऊन कागजात ह राजा के नांव म लिखे जावय अऊ ओमा राजा के मुंदरी के मुहर लगय, ओला कोनो खारिज नइं कर सकय।”
EST 8:9 त ओहीच बेरा याने कि सीवान नांव के तीसरा महिना के तेईसवां दिन, राजा के सचिवमन ला बलाय गीस अऊ ओमन मोरदकै के दिये जम्मो हुकूम ला यहूदीमन ला, अऊ भारत ले लेके कूस तक के 127 राज के बड़े हाकिममन, राजपालमन अऊ परभावसाली मनखेमन ला लिखिन। ये हुकूममन ला हर राज के लिपि अऊ हर जाति के मनखेमन के भासा म लिखे गीस। ये जम्मो हुकूम ला यहूदीमन ला ओमन के लिपि अऊ भासा म घलो लिखे गीस।
EST 8:10 मोरदकै ह राजा छयर्स के नांव म लिखिस अऊ ओ कागजात म राजा के मुंदरी के मुहर लगाईस, अऊ ओ कागजातमन ला ओ घुड़सवारी करइया दूतमन के हांथ म पठो दीस, जऊन मन बिसेस करके राजा बर तेज घुड़सवारी करंय।
EST 8:11 राजा के साही हुकूम ले हर सहर म यहूदीमन ला अधिकार मिलिस कि ओमन जूरंय अऊ अपनआप के बचाव करंय; कोनो भी जाति या राज के हथियारबंद मनखेमन ओमन अऊ ओमन के माईलोगनमन अऊ लइकामन ऊपर हमला करंय, त ओमन ओ हथियारबंद मनखेमन ला नास कर देवंय, मार डारंय अऊ ओमन के नामोनिसान मिटा देवंय, अऊ अपन बईरीमन के संपत्ति ला लूट लेवंय।
EST 8:12 राजा छयर्स के जम्मो राज म, ये काम ला करे बर यहूदीमन खातिर एक दिन ठहिराय गीस, अऊ ओ दिन ह अदार नांव के बारहवां महिना के तेरहवां दिन रिहिस।
EST 8:13 ये साही हुकूम के एक-एक नकल कानून के रूप म जम्मो राज म पठोय गीस अऊ हर एक जाति के मनखेमन ला बताय गीस, ताकि यहूदीमन ओ दिन अपन बईरीमन ले बदला लेय बर तियार रहंय।
EST 8:14 राजा के हुकूम ले दूतमन साही घोड़ामन म सवार होके निकलिन अऊ आघू बढ़िन, अऊ साही हुकूम ह सूसनगढ़ के किला म ले दिये गीस।
EST 8:15 जब मोरदकै ह राजा करा ले निकलके गीस, त ओह नीला अऊ सफेद रंग के राजकीय कपड़ा पहिरे रिहिस अऊ ओकर मुड़ म सोन के मुकुट रहय अऊ ओह सुघर मलमल के बने बैंगनी रंग के बागा पहिरे रिहिस। अऊ सूसनगढ़ सहर के मनखेमन आनंद के मारे जय-जयकार करिन।
EST 8:16 यहूदीमन बर, येह खुसी, आनंद अऊ आदरमान के बेरा रिहिस।
EST 8:17 ओ हर राज अऊ सहर, जिहां भी राजा के साही हुकूम आईस, उहां यहूदीमन आनंद अऊ खुसी ले भर गीन, अऊ ओमन जेवनार करके उत्सव मनाईन। अऊ आने जाति के बहुंते मनखेमन यहूदी बन गीन, काबरकि ओमन के मन म यहूदीमन के डर हमा गे रिहिस।
EST 9:1 अदार नांव के बारहवां महिना के तेरहवां दिन, राजा के दुवारा दिये गे हुकूम ला पूरा करना रिहिस। ये दिन यहूदीमन के बईरीमन ओमन के ऊपर जय पाय के आसा म रिहिन, पर अब येकर उल्टा हो गीस अऊ यहूदीमन ओ बईरीमन ऊपर भारी पड़िन, जेमन ओमन ले घिन करत रिहिन।
EST 9:2 यहूदी मनखेमन राजा छयर्स के जम्मो राजमन के अपन-अपन सहर म जूरिन, ताकि ओमन ओ मनखेमन ऊपर हमला करंय, जेमन यहूदीमन ला नास करे के ठाने रिहिन। कोनो मनखे यहूदीमन के सामना नइं कर सकिन, काबरकि आने जम्मो जाति के मनखेमन म यहूदीमन के डर हमा गे रिहिस।
EST 9:3 अऊ राजमन के जम्मो परभावसाली मनखेमन, हाकिममन, राजपालमन अऊ राजा के अधिकारीमन यहूदीमन के मदद करिन, काबरकि ओमन म मोरदकै के डर हमा गे रिहिस।
EST 9:4 मोरदकै ह महल म एक बड़े मनखे हो गीस; ओकर नांव ह जम्मो राजमन म फईल गीस, अऊ ओह अऊ सक्तिसाली होवत गीस।
EST 9:5 यहूदीमन अपन जम्मो बईरीमन ऊपर तलवार चलाके मार डारिन अऊ ओमन ला नास कर दीन, अऊ ओमन अपन घिन करइयामन ऊपर अपन मन मुताबिक बरताव करिन।
EST 9:6 सूसनगढ़ के किला म, यहूदीमन पांच सौ मनखे ला मारके नास कर दीन।
EST 9:7 ओमन परसनदाता, दलपोन, असपाता,
EST 9:8 पोराता, अदलया, अरीदाता,
EST 9:9 परमसता, अरीसै, अरीदै अऊ वैजाता ला घलो मार डारिन;
EST 9:10 ये दस झन हम्मदाता के बेटा हामान के बेटा रिहिन, जऊन ह यहूदीमन के बईरी रिहिस। पर यहूदीमन ओमन के संपत्ति ला नइं लूटिन।
EST 9:11 ओ दिन सूसनगढ़ के किला म जतेक झन मारे गीन, ओमन के संखिया ला ओहीच दिन राजा ला बता दिये गीस।
EST 9:12 तब राजा ह एस्तर रानी ला कहिस, “यहूदीमन सूसनगढ़ के किला म पांच सौ मनखे अऊ हामान के दसों बेटामन ला मारके नास कर दे हवंय। राजा के बाकि राजमन म, ओमन न जाने का-का करे हवंय? अब तोर अऊ का निबेदन हे? ओला घलो पूरा करे जाही। तेंह अऊ का मांगत हस? ओ घलो तोला दिये जाही।”
EST 9:13 एस्तर ह जबाब दीस, “यदि राजा ला ये बात बने लगय, त सूसनगढ़ म यहूदीमन ला अनुमति दिये जावय कि ओमन आज के राजा के हुकूम ला कल घलो करंय, अऊ हामान के दसों बेटामन ला खंभामन म टांग दिये जावय।”
EST 9:14 राजा ह हुकूम दीस कि अइसने करे जावय। सूसनगढ़ म राजा के ये हुकूम दिये गीस, अऊ ओमन हामान के दसों बेटा ला खंभामन म टांग दीन।
EST 9:15 सूसनगढ़ म यहूदीमन अदार महिना के चौदहवां दिन जूरिन, अऊ ओमन सूसनगढ़ म तीन सौ मनखे ला मार डारिन, पर यहूदीमन ओमन के संपत्ति ला नइं लूटिन।
EST 9:16 इही बीच म, राजा के राजमन के बाकि यहूदीमन घलो जूरिन, ताकि ओमन अपनआप ला बचा सकंय अऊ अपन बईरीमन के सतावा ले छुटकारा पा सकंय। ओमन अपन बईरीमन म ले पचहत्तर हजार मनखेमन ला मार डारिन, पर ओमन ओमन के संपत्ति ला नइं लूटिन।
EST 9:17 ये काम ला अदार महिना के तेरहवां दिन म करे गीस, अऊ चौदहवां दिन, ओमन अराम करिन अऊ ओ दिन ओमन जेवनार करिन अऊ आनंद मनाईन।
EST 9:18 पर सूसनगढ़ के यहूदीमन अदार महिना के तेरहवां अऊ चौदहवां दिन जूरिन, अऊ तब पंदरहवां दिन, ओमन अराम करिन अऊ ओ दिन ओमन जेवनार करिन अऊ आनंद मनाईन।
EST 9:19 येकरे कारन देहात के यहूदी—जऊन मन गांव म रहिथें, ओमन अदार के महिना के चौदहवां दिन ला आनंद अऊ जेवनार के दिन के रूप म अऊ एक-दूसर ला उपहार देय के दिन के रूप म मनाथें।
EST 9:20 ये घटनामन ला मोरदकै ह लिखिस, अऊ ओह राजा छयर्स के जम्मो राजमन म, लकठा अऊ दूरिहा म रहइया जम्मो यहूदीमन करा चिट्ठी भेजिस,
EST 9:21 ताकि ओमन हर साल अदार महिना के चौदहवां अऊ पंदरहवां दिन उत्सव मनावंय,
EST 9:22 काबरकि येह ओ समय रिहिस, जब यहूदीमन अपन बईरीमन ले छुटकारा पाईन, अऊ ये ओ महिना रिहिस, जब ओमन के दुख ह आनंद म अऊ ओमन के सोक ह उत्सव म बदल गे रिहिस। ओह ओमन ला लिखिस कि ओमन ओ दिनमन ला जेवनार अऊ आनंद अऊ एक-दूसर करा जेवन के उपहार भेजई अऊ गरीबमन ला ईनाम देवई के दिन के रूप म मानंय।
EST 9:23 तब यहूदीमन मोरदकै के लिखे चिट्ठी के मुताबिक हर साल ओ उत्सव ला मनाय बर सहमत हो गीन, जेला कि ओमन ओ साल सुरू करे रिहिन।
EST 9:24 काबरकि हम्मदाता अगागी के बेटा हामान, जऊन ह जम्मो यहूदीमन के बईरी रिहिस, ओह यहूदीमन ला नास करे के उपाय रचे रिहिस अऊ ओमन के बरबादी अऊ बिनास बर पुर (चिट्ठी) डाले रिहिस।
EST 9:25 पर जब ये साजिस के बारे म राजा ला बताय गीस, त ओह लिखित म ये हुकूम दीस कि जऊन दुस्ट योजना हामान ह यहूदीमन के बिरोध म बनाय हवय, ओ योजना ला ओकर ही ऊपर पूरा करे जावय, अऊ ओला अऊ ओकर बेटामन ला खंभा म टांग दिये जावय।
EST 9:26 (एकरसेति ये दिनमन ला पुर सबद के कारन पुरीम कहे गीस।) ये चिट्ठी म लिखे जम्मो बात के कारन अऊ जऊन कुछू यहूदीमन देखे रिहिन अऊ जऊन कुछू ओमन ऊपर होय रिहिस, ये जम्मो के कारन,
EST 9:27 यहूदीमन अपन बर एक रिवाज बनाईन कि ओमन अऊ ओमन के संतानमन अऊ ओ जम्मो, जेमन ओमन के संग मिल गे हवंय, ये जम्मो के जम्मो हर साल ये दू दिन बिगर भूले उत्सव मनावंय अऊ ये उत्सव चिट्ठी म लिखे बात के मुताबिक ठहिराय गे समय म ही मनाय जावय।
EST 9:28 ये दिनमन ला हर पीढ़ी म हर एक परिवार के दुवारा मनाय जावय, अऊ येला हर राज अऊ हर सहर म मनाय जावय। अऊ पुरीम के ये दिनमन ला यहूदीमन के दुवारा बिगर कभू भूले मनाय जावय—अऊ न ही ओमन के संतानमन ये दिनमन ला कभू भूलंय।
EST 9:29 त फेर अबीहैल के बेटी एस्तर रानी, मोरदकै यहूदी के संग पूरा अधिकार से मजबूत करे बर पुरीम के बारे म ये दूसर चिट्ठी लिखिस।
EST 9:30 अऊ मोरदकै ह छयर्स राजा के 127 राज के जम्मो यहूदीमन ला सद्भावना अऊ भरोसा के चिट्ठी लिख भेजिस,
EST 9:31 ताकि ओमन मोरदकै यहूदी अऊ एस्तर रानी के दिये हुकूम के मुताबिक पुरीम के ये दिनमन ला अपन ठहिराय गे समय म मानंय, अऊ जइसने कि ओमन अपन अऊ अपन संतानमन बर उपास अऊ सोक के समय ठहिराय रिहिन।
EST 9:32 एस्तर के हुकूम ह पुरीम के बारे म ये नियममन ला मजबूत करिस, अऊ येला किताब म लिखके रखे गीस।
EST 10:1 राजा छयर्स ह पूरा देस म अऊ येकर दूरिहा के समुंदर तीर तक राजकर लगाईस।
EST 10:2 अऊ ओकर सक्ति अऊ पराकरम के जम्मो काम अऊ मोरदकै के महानता के पूरा लेखा-जोखा, जेला राजा ह ऊपर उठाय रिहिस, ओ जम्मो बात मादै अऊ फारस के राजामन के इतिहास के किताब म लिखे गे हवय।
EST 10:3 मोरदकै यहूदी के पद ह छयर्स राजा के बाद दूसरा रिहिस; यहूदीमन के बीच म ओह सबले उत्तम रिहिस, अऊ ओकर बहुंते यहूदी संगीमन ओकर बहुंत आदर करंय, काबरकि ओह अपन मनखेमन के भलई बर काम करय अऊ जम्मो यहूदीमन के सुख-सांति बर गोठियावय।
JOB 1:1 ऊज नांव के देस म अयूब नांव के एक झन मनखे रिहिस। ओह निरदोस अऊ ईमानदार रिहिस; ओह परमेसर के भय मानय अऊ बुरई ले दूरिहा रहय।
JOB 1:2 ओकर सात झन बेटा अऊ तीन झन बेटी रिहिन,
JOB 1:3 अऊ ओकर करा सात हजार भेड़, तीन हजार ऊंट, पांच सौ जोड़ी बईला, पांच सौ गदही, अऊ बहुंत अकन नौकर-चाकर रिहिन। पूरब देस के मनखेमन के बीच म, ओह सबले धनवान मनखे रिहिस।
JOB 1:4 ओकर बेटामन अपन जनम दिन म अपन घर म एक-दूसर ला बलाके भोज के आयोजन करंय, अऊ ओमन अपन तीनों बहिनीमन ला घलो अपन संग खाय-पीये बर नेवता देवंय।
JOB 1:5 जब भी भोज खाय के दिन ह बीत जावय, त अयूब ह ओमन ला सुध करे के परबंध करय। बड़े बिहनियां, ओह ओमन के हर एक झन बर ये सोचके होम-बलिदान करय, “सायद मोर लइकामन पाप करे होहीं अऊ अपन मन म परमेसर के बिरोध म काम करे होहीं।” अयूब ह हमेसा अइसने करय।
JOB 1:6 एक दिन स्वरगदूतमन यहोवा करा आईन, अऊ सैतान ह घलो ओमन के संग म आईस।
JOB 1:7 यहोवा ह सैतान ले पुछिस, “तें कहां ले आवत हस?” सैतान ह यहोवा ला जबाब दीस, “जम्मो धरती म एती-ओती घुमत-फिरत आय हवंव।”
JOB 1:8 तब यहोवा ह सैतान ला कहिस, “का तेंह मोर सेवक, अयूब कोति धियान देय हवस? धरती म ओकर सहीं कोनो नइं ए; ओह बिगर दोस के अऊ ईमानदार मनखे अय; ओह परमेसर के भय मानथे अऊ बुरई ले दूरिहा रहिथे।”
JOB 1:9 सैतान ह यहोवा ला जबाब दीस, “का अयूब ह बिगर कोनो कारन के परमेसर के भय मानथे?
JOB 1:10 का तेंह ओकर अऊ ओकर घर-परिवार अऊ ओकर जम्मो जिनिस के चारों कोति अपन सुरकछा के बाड़ा बांधके नइं रखे हस? तेंह ओकर काम म आसीस देय हवस, जेकर ले ओकर पसुमन के संखिया जम्मो देस म बढ़ गे हवय।
JOB 1:11 पर अब अपन हांथ ला बढ़ाके ओकर जम्मो जिनिस ला मार, अऊ ओह तोर मुहूं म तोर निन्दा करही।”
JOB 1:12 यहोवा ह सैतान ला कहिस, “ठीक हे! जऊन कुछू ओकर करा हवय, ओ जम्मो के अधिकार ला मेंह तोर हांथ म देवत हंव, पर अयूब के ऊपर तें अपन हांथ झन लगाबे।” तब सैतान ह यहोवा के आघू ले चल दीस।
JOB 1:13 एक दिन जब अयूब के बेटा-बेटीमन अपन बड़े भईया के घर म खावत रिहिन अऊ अंगूर के मंद पीयत रिहिन,
JOB 1:14 तब एक संदेसिया ह अयूब करा आके कहिस, “हमर बईलामन खेत जोतत रिहिन अऊ गदहीमन लकठा म चरत रिहिन
JOB 1:15 कि सबा के मनखेमन हमर ऊपर चढ़ई कर दीन अऊ पसुमन ला ले गीन। ओमन सेवकमन ला तलवार ले मार डारिन अऊ मेंह एके झन बांचके तोला बताय बर आय हवंव!”
JOB 1:16 अभी ओह अइसने कहितेच रिहिस कि दूसरा संदेसिया ह आके कहिस, “परमेसर के आगी अकास ले गिरिस अऊ ओकर ले भेड़मन अऊ चरवाहामन जरके भसम हो गीन अऊ मेंह एके झन बांचके तोला बताय बर आय हवंव!”
JOB 1:17 ओह अभी अइसने कहितेच रिहिस कि एक झन अऊ संदेसिया आके कहे लगिस, “कसदी के मनखेमन तीन दल बनाके आईन अऊ ऊंटमन ऊपर चढ़ई करके ओमन ला ले गीन अऊ ओमन सेवकमन ला तलवार ले मार डारिन। मेंह एके झन बांचके तोला बताय बर आय हवंव!”
JOB 1:18 ओह अभी अइसने कहितेच रिहिस कि एक आने संदेसिया आके कहिस, “तोर बेटा-बेटीमन अपन बड़े भईया के घर म खावत रिहिन अऊ अंगूर के मंद पीयत रिहिन
JOB 1:19 कि अचानक सुनसान जगह ले एक भयंकर आंधी आईस अऊ घर के चारों कोनटा ला अइसन मारिस कि घर ह ओमन ऊपर गिर पड़िस अऊ ओमन मर गीन। मेंहीच ह एके झन बांचके तोला बताय बर आय हवंव!”
JOB 1:20 ये सुनके अयूब ह ठाढ़ होईस अऊ दुख म अपन ओनहा ला चीरिस अऊ मुड़ ला मुड़ाईस। तब ओह परमेसर के भक्ति म भुइयां म गिरके दंडवत करिस
JOB 1:21 अऊ कहिस: “नंगरा मेंह अपन दाई के कोख ले आय रहेंव, अऊ नंगरा मेंह वापिस चले जाहूं। यहोवा ह दीस अऊ यहोवा ह ले लीस; यहोवा के नांव के परसंसा होवय।”
JOB 1:22 ये जम्मो बात म, अयूब ह न तो पाप करिस अऊ न ही परमेसर ऊपर अनियाय करे के दोस लगाईस।
JOB 2:1 फेर एक आने दिन स्वरगदूतमन यहोवा करा आईन, अऊ सैतान घलो ओमन के संग म यहोवा करा आईस।
JOB 2:2 तब यहोवा ह सैतान ला पुछिस, “तें कहां ले आवत हस?” सैतान ह यहोवा ला जबाब दीस, “जम्मो धरती म एती-ओती घुमत-फिरत आय हवंव।”
JOB 2:3 तब यहोवा ह सैतान ला कहिस, “का तेंह मोर दास अयूब के ऊपर धियान देय हवस? धरती म ओकर सहीं कोनो नइं ए; ओह बिगर दोस के अऊ ईमानदार मनखे अय अऊ ओह परमेसर के भय आदर के साथ मानथे अऊ बुरई ले दूरिहा रहिथे। हालाकि तेंह ओला बिगर कोनो कारन के नास करे बर मोला ओकर बिरोध म उकसाय हस, तभो ले ओह अब तक ईमानदार बने हवय।”
JOB 2:4 सैतान ह जबाब दीस, “खाल के बलदा म खाल! परान के बलदा म मनखे ह अपन जम्मो कुछू ला दे देथे।
JOB 2:5 पर अब तेंह अपन हांथ बढ़ाके ओकर मांस अऊ हाड़ामन ला मार, अऊ ओह खचित तोर मुहूं म तोर निन्दा करही।”
JOB 2:6 यहोवा ह सैतान ला कहिस, “ठीक हे, अब ओह तोर अधिकार म हवय, पर तें ओकर परान ला सुरकछित रहन देबे।”
JOB 2:7 तब सैतान ह यहोवा करा ले चल दीस अऊ ओह अयूब के पांव के तरी ले लेके मुड़ के टीप तक पीरा देवइया फोड़ा निकालके दुख दीस।
JOB 2:8 तब अयूब ह माटी के घघरी के एक ठन टुकड़ा लीस अऊ राख म बईठके ओ टुकड़ा ले अपनआप ला खुजीयाय लगिस।
JOB 2:9 तब ओकर घरवाली ह ओला कहिस, “का तेंह अभी घलो अपन ईमानदारी ला धरे हस? परमेसर के निन्दा कर अऊ मर जा!”
JOB 2:10 अयूब ह ओला जबाब दीस, “तेंह मुरूख माईलोगन सहीं गोठियावत हस। का हमन परमेसर ले सिरिप बने चीजमन ला लेवन, अऊ समस्या ला नइं लेवन?” ये जम्मो बात म, अयूब ह अपन गोठ के दुवारा कोनो पाप नइं करिस।
JOB 2:11 जब अयूब के तीन झन संगी तेमानी के रहइया एलीपज, सूही के रहइया बिलदद अऊ नामाती के रहइया सोपर, अयूब के ऊपर आय ओ जम्मो समस्या के बारे म सुनिन, त ओमन अपन-अपन घर ले निकलिन अऊ एक संग मिलके ये निरनय करिन कि हमन ओकर करा जाके ओला सहानुभूति अऊ सांतवना देबो।
JOB 2:12 जब ओमन थोरकन दूरिहा ले ओला देखिन, त ओला नइं चिन सकिन; ओमन चिचिया-चिचियाके रोय लगिन, अऊ अपन दुख परगट करके ओनहा ला चीरिन अऊ ऊपर कोति धुर्रा उड़ियाके अपन-अपन मुड़ म डारे लगिन।
JOB 2:13 तब ओमन सात दिन अऊ सात रात ले ओकर संग भुइयां म बईठिन। कोनो अयूब ला एक सबद घलो नइं कहिन, काबरकि ओमन देखिन कि ओह अब्बड़ पीरा म रहय।
JOB 3:1 एकर बाद, अयूब ह अपन मुहूं खोलके अपन जनम दिन ला धिक्कारे लगिस।
JOB 3:2 ओह कहिस:
JOB 3:3 “नास हो जावय ओ दिन, जऊन दिन मोर जनम होईस, अऊ ओ रात घलो जेह कहिस, ‘पेट म बाबू हवय!’
JOB 3:4 ओ दिन ह अंधियार हो जावय; परमेसर ह ऊपर ले ओकर सुधि झन लेवय; ओकर ऊपर अंजोर झन होवय।
JOB 3:5 दुख अऊ मिरतू के छइहां ह ओ दिन के ऊपर अधिकार करय; बादर ह ओकर ऊपर छाय रहय; दिन के अंधियार ह ओला डरावय।
JOB 3:6 ओ रथिया ला घोर अंधियार ह जकड़ डारय, बछर के दिनमन म ओ दिन ला सामिल झन करे जावय अऊ कोनो महिना म ओ दिन के गनती झन होवय।
JOB 3:7 ओ रथिया ह ठड़गी हो जावय; ओमा कोनो आनंद के धुन झन सुनई देवय।
JOB 3:8 जऊन मन दिनमन ला धिक्कारथें, ओमन ओ दिन ला धिक्कारंय, जऊन मन लिबयातान ला उत्तेजित करे बर तियार हवंय।
JOB 3:9 ओकर बिहनियां के तारामन अंधियार हो जावंय; ओह दिन के अंजोर बर तरसय अऊ ओ अंजोर ह झन आवय अऊ ओह बिहनियां के पहिली किरन ला झन देखे पावय,
JOB 3:10 काबरकि ओ दिन ह मोर दाई के कोख ला मोर बर बंद नइं करिस कि मोर आंखीमन समस्या ला झन देखंय।
JOB 3:11 “जनम के बेरा ही मेंह काबर नास नइं हो गेंव, अऊ गरभ ले निकलते ही मेंह काबर नइं मर गेंव?
JOB 3:12 मोला थामे बर उहां माड़ीमन काबर रिहिन अऊ मोला दूध पीयाय बर ओ थनमन काबर रिहिन?
JOB 3:13 कहूं अइसने नइं होतिस, त मेंह सांति म चुपेचाप पड़े रहितेंव; अऊ गहरी नींद म सुते अराम करतेंव,
JOB 3:14 मेंह धरती के ओ राजामन अऊ सासन करइयामन संग होतेंव जऊन मन अपन बर ओ जगहमन ला बनाईन, जऊन मन अब खंडहर हो गे हवंय,
JOB 3:15 या ओ राजकुमारमन संग होतेंव, जेमन करा सोन रिहिस, अऊ जऊन मन अपन घरमन ला चांदी ले भर ले रिहिन।
JOB 3:16 या बिगर समय के गिरे गरभ के लइका सहीं मोला भुइयां म काबर तोपे नइं गीस, याने ओ लइका जऊन ह कभू दिन के अंजोर ला नइं देखिस?
JOB 3:17 उहां दुस्ट मनखे के दुख देवई ह खतम हो जाथे, अऊ उहां थके-मांदे मनखेमन बिसराम पाथें।
JOB 3:18 उहां बंधक बनाय गे मनखेमन घलो अपन सुख के आनंद उठाथें; ओमन ला बेगारी करवइयामन के ललकार ह सुनई नइं देवय।
JOB 3:19 उहां छोटे-बड़े जम्मो झन रहिथें, अऊ गुलाममन अपन मालिक ले सुतंतर रहिथें।
JOB 3:20 “ओमन ला अंजोर काबर दिये जाथे, जऊन मन दुख म हवंय, अऊ ओमन ला जिनगी काबर दिये जाथे, जऊन मन उदास हवंय?
JOB 3:21 जऊन मन मऊत के कामना करथें, पर मऊत ओमन ला आवय नइं, जऊन मन गड़े खजाना ले घलो जादा मऊत के खोज करथें,
JOB 3:22 जऊन मन कि खुसी अऊ आनंद ले भरे रहिथें, जब ओमन कबर म हबरथें?
JOB 3:23 ओ मनखे ला जिनगी काबर दिये जाथे जेकर अगम के रद्दा ह लुकाय हवय, जेकर चारों कोति परमेसर ह घेरा बांधे हवय?
JOB 3:24 काबरकि आह भरई ह हर दिन के मोर जेवन हो गे हवय; मोर रोवई ह पानी के धारा कस बोहावत रहिथे।
JOB 3:25 जऊन बात ले मेंह डरावत रहेंव, ओही ह मोर ऊपर आ गे हवय; जऊन बात के मोला भय रिहिस, ओही ह मोर संग घटे हवय।
JOB 3:26 मोला न तो सुख, न ही सांति हवय; न ही मोला अराम मिलत हवय, पर सिरिप दुख ही दुख मोर ऊपर आ गे हवय।”
JOB 4:1 तब तेमान के रहइया एलीपज ह कहिस:
JOB 4:2 “कहूं कोनो तोर ले दू सबद कहय, त का तेंह तमक जाबे? पर कहे बिना कोन रह सकत हे?
JOB 4:3 सोच, तेंह कतेक झन ला सिकछा दे हवस, अऊ तेंह कइसने दुरबलमन ला बलवान करे हवस।
JOB 4:4 तोर बचन ह ओमन ला सहारा देय हवय, जऊन मन लड़खड़ावत रिहिन; तेंह लड़खड़ावत माड़ीमन ला बलवान करे हस।
JOB 4:5 फेर अब दुख ह तोर ऊपर आवत हे, अऊ तेंह निरास होवत हस; ओह तोर ऊपर आईस अऊ तेंह डरा गे।
JOB 4:6 का परमेसर के भक्ति ही तोर भरोसा अऊ तोर निरदोस जिनगी ह तोर आसा नइं होना चाही?
JOB 4:7 “बिचार कर: कोन ह निरदोस होके कभू नास होय हवय? कोनो मेर कोनो धरमी मनखे ह नास होय हवय?
JOB 4:8 जइसने कि मेंह देखे हंव, जऊन मन बुरई ला जोतथें अऊ दुख ला बोथें, ओमन उही ला लूहीं।
JOB 4:9 परमेसर के सांस ले ही ओमन नास हो जाथें; अऊ ओकर रिस के झोंका ले ओमन खतम हो जाथें।
JOB 4:10 सेरमन गरजथें अऊ गुर्राथें, तभो ले जवान सेरमन के दांत टोरे जाथे।
JOB 4:11 सिकार के कमी के कारन सेर ह मर जाथे, अऊ सेरनी के पीलामन एती-ओती बगर जाथें।
JOB 4:12 “एक ठन गोठ मोला गुपत म बताय गीस, मेंह येकर कानाफूसी ला सुनेंव।
JOB 4:13 रथिया बियाकुल करइया सपनामन के बीच म, जब मनखेमन गहिरा नींद म रहिथें,
JOB 4:14 तभे डर अऊ कंपकपी ह मोर म हमा गीस अऊ मोर जम्मो हाड़ामन कांपे लगिन।
JOB 4:15 एक आतमा ह मोर चेहरा के सामने ले होके गीस, अऊ मोर देहें के रूआंमन ठाढ़ हो गीन।
JOB 4:16 ओह रूक गीस, पर मेंह नइं बता सकेंव कि ओह का रिहिस। मोर आंखी के आघू म एक ठन रूप ठाढ़े रिहिस, अऊ मेंह एक सांत अवाज सुनेंव:
JOB 4:17 ‘का नासमान मनखे ह परमेसर ले जादा धरमी हो सकथे? का एक बलवान मनखे अपन सिरजनहार ले जादा सुध हो सकथे?
JOB 4:18 कहूं परमेसर ह अपन सेवकमन ऊपर भरोसा नइं करय, अऊ ओह अपन स्वरगदूतमन ला दोसी ठहिराथे,
JOB 4:19 त फेर ओमन के का होही, जऊन मन माटी के घरमन म रहिथें, जेमन के नीवमन धुर्रा म हवंय, जऊन मन पतंगा के सहीं पीस जाथें!
JOB 4:20 बिहान अऊ संझा के बीच म ओमन ला कुटा-कुटा करे जाथे; बिगर काकरो जाने, ओमन सदाकाल बर नास हो जाथें।
JOB 4:21 का ओमन के जिनगी के डेरा के डोरीमन ला नइं खींच दिये जावय, जेकर ले ओमन बिगर बुद्धि के मर जाथें?’
JOB 5:1 “यदि तोर ईछा हवय, त पुकार, पर तोला कोन जबाब दीही? पबितर जन म ले तेंह काकर कोति सहायता बर लहुंटबे?
JOB 5:2 तमकई ह तो मुरूख मनखे ला मार डारथे, अऊ जलन ह सीधवा मनखे ला मार डारथे।
JOB 5:3 मेंह खुद मुरूख मनखे ला बढ़त देखे हंव, पर अचानक ओकर घर ह सरापित हो गीस।
JOB 5:4 ओकर लइकामन सुरकछित नइं एं, ओमन अदालत म कुचरे जाथें, अऊ ओमन के बचाव करइया कोनो नइं ए।
JOB 5:5 भूखहा मनखेमन ओकर फसल ला खा जाथें, इहां तक कि ओमन कांटा-खूंटी के बीच ले घलो फसल ला ले लेथें, अऊ पीयासा मनखेमन ओकर धन ला हड़प लेथें।
JOB 5:6 काबरकि बिपत्ति ह माटी ले नइं उपजय, अऊ न ही समस्या ह भुइयां म ले उगय।
JOB 5:7 जइसे चिंगारीमन ऊपर कोति ही उड़थें, वइसे ही मनखे ह दुख भोगे बर जनमे हवय।
JOB 5:8 “पर यदि मेंह तोर स्थिति म होतेंव, त में परमेसर ले पराथना करतेंव; में अपन बात ओकर आघू म रखतेंव।
JOB 5:9 ओह अद्भूत काम करथे, जेला समझे नइं जा सकय अऊ ओह चमतकार करथे, जेला गने नइं जा सकय।
JOB 5:10 ओह धरती म बारिस करथे; ओह खेतमन म पानी पठोथे।
JOB 5:11 छोटे मनखेमन ला ओह ऊंचहा जगह म बईठारथे, अऊ सोक करइया मनखेमन ला ओह सुरकछा देथे।
JOB 5:12 ओह चतुरामन के योजना ला बिफल कर देथे, जेकर ले ओमन ला सफलता नइं मिलय।
JOB 5:13 ओह बुद्धिमानमन ला ओहीचमन के चतुरई म फंसो देथे, अऊ चलाकमन के योजना ह बिफल हो जाथे।
JOB 5:14 दिन म ही ओमन के ऊपर अंधियार छा जाथे; मंझन के बेरा ओमन रथिया कस टमड़े लगथें।
JOB 5:15 ओह जरूरतमंद मनखेमन ला ओमन के बोली के चोखा तलवार ले बचाथे; ओह ओमन ला बलवानमन के हांथ ले बचाथे।
JOB 5:16 एकरसेति गरीबमन ला आसा होथे, अऊ अनियायीमन अपन मुहूं बंद रखथें।
JOB 5:17 “धइन अय ओ मनखे, जऊन ला परमेसर ह सुधारथे; एकरसेति सर्वसक्तिमान के ताड़ना ला तुछ झन जान।
JOB 5:18 काबरकि ओह चोट पहुंचाथे, पर ओहीच ह पट्टी घलो बांधथे; ओह घायल करथे, पर ओकर हांथमन घायल ला बने घलो करथें।
JOB 5:19 छै बिपत्तिमन ले ओह तोला छोंड़ाही; सातवां म घलो तोर कुछू हानि नइं होही।
JOB 5:20 दुकाल म ओह तोला मिरतू ले, अऊ लड़ई म तलवार के वार ले बचाही।
JOB 5:21 तेंह जीभ ले निकले बचन के मार ले बचाय जाबे, अऊ जब बिनास ह तोर ऊपर आवय, त तोला डरे के जरूरत नइं ए।
JOB 5:22 तेंह बिनास अऊ दुकाल के बेरा म हंसबे, अऊ जंगली पसुमन ले तोला डर नइं होही।
JOB 5:23 काबरकि मैदान के पथरामन संग तोर एक करार होही, अऊ जंगली पसुमन तोर मितान सहीं होहीं।
JOB 5:24 तेंह जानबे कि तोर डेरा ह कुसल हवय; तेंह अपन संपत्ति के जांच करबे अऊ तोर कुछू चीज गंवाय नइं रहिही।
JOB 5:25 तेंह ये घलो जानबे कि तोर लइकामन अब्बड़ होहीं, अऊ तोर संतानमन भुइयां के कांदी सहीं बहुंत होहीं।
JOB 5:26 जइसे कि समय म बीड़ा ला खरही गांजे जाथे, वइसे ही तेंह तोर पूरा उमर होय के बाद ही मरबे।
JOB 5:27 “हमन येला परखके देख डारे हन, अऊ येह सच अय। एकरसेति येला सुन, अऊ येला अपन जिनगी म लागू कर।”
JOB 6:1 तब अयूब ह कहिस:
JOB 6:2 “यदि मोर पीरा ला तऊले जातिस अऊ मोर दुरगति ला तराजू म मढ़ाय जातिस!
JOB 6:3 त खचित येह समुंदर के बालू ले जादा भारी होतिस— कोनो अचम्भो के बात नो हय कि मेंह अपन गोठ म उतावला हो गे हंव।
JOB 6:4 सर्वसक्तिमान परमेसर के बानमन मोला बेधे हवंय, मोर आतमा ह ओमन के जहर ला पीयथे; परमेसर के आतंक ह मोर बिरोध म ठाढ़े हवय।
JOB 6:5 का जंगली गदहा ह रेंकथे, जब ओकर करा खाय बर कांदी रहिथे, या का बईला ह नरियाथे, जब ओकर करा चारा रहिथे?
JOB 6:6 का बिगर सुवादवाले जेवन ला बिगर नून के खाय जाथे, या दवाई के पऊधा के रस म कोनो सुवाद होथे?
JOB 6:7 मेंह येला छुये बर घलो नइं चाहंव; अइसने जेवन ह मोला बिमरहा कस घिन लगथे।
JOB 6:8 “बने होतिस, कि मोर बिनती ह सुने जातिस, अऊ जऊन बात के मेंह आसा करथंव, परमेसर ह ओला पूरा करतिस,
JOB 6:9 कि परमेसर ह मोला कुचर डारे के ईछा करतिस, अऊ ओह अपन हांथ ला बढ़ाके मोर परान ला ले लेतिस!
JOB 6:10 तब मोला ये बात म ढाढ़स होतिस— अब्बड़ पीरा म मोला आनंद होतिस— कि मेंह ओ पबितर परमेसर के बचन ला इनकार नइं करेंव।
JOB 6:11 “मोर म बल ही कहां हवय कि में अब भी आसा करंव? मोर सोच-बिचार ही का अय कि में धीरज धरंव?
JOB 6:12 का मोर बल पथरा कस हवय? का मोर देहें ह कांसा कस हवय?
JOB 6:13 का मोर करा अपनआप के मदद करे बर कोनो सक्ति हवय? का सफलता ह मोर ले दूरिहा नइं हो गे हवय?
JOB 6:14 “जऊन ह अपन संगी ऊपर दया नइं करय, ओह सर्वसक्तिमान के भय मानना छोंड़ देथे।
JOB 6:15 पर मोर भाईमन समय-समय म बोहावत ओ नरवामन कस दगाबाज अंय, जऊन मन छलकत बहथें
JOB 6:16 जब पिघलत बरफ के दुवारा मतलहा हो जाथें अऊ टघले बरफ ह ओमा मिल जाथे।
JOB 6:17 पर सूखा समय म ओमन के बहना बंद हो जाथे, अऊ गरमी म ओमन अपन जगह ले गायब हो जाथें।
JOB 6:18 यातरा करइया दलमन अपन रसता ले भटक जाथें; ओमन भटकके सुनसान जगह म चल देथें अऊ नास हो जाथें।
JOB 6:19 तेमा के यातरा करइया दलमन पानी खोजथें, सेबा नांव के जगह के यातरा करइया बेपारीमन ओकर आसा करत रहिथें।
JOB 6:20 ओमन ला निरासा होथे, काबरकि ओमन भरोसा रखे रिहिन; ओमन उहां हबरिन, त ओमन ला निरासा होईस।
JOB 6:21 वइसने तुमन घलो साबित कर दे हव कि तुमन मोर कोनो मदद नइं कर सकव; तुमन मोर बिपत्ति ला देखके डरा गे हवव।
JOB 6:22 का मेंह कभू कहेंव, ‘मोर कोति ले कुछू देवव, अपन संपत्ति म ले मोर बर एक छुड़ौती दव,
JOB 6:23 बईरी के हांथ ले मोला बचा लेवव, निरदयी के पकड़ ले मोला छोंड़ावव?’
JOB 6:24 “मोला सिखावव अऊ मेंह चुपेचाप रहिहूं; मोला बतावव कि मेंह का गलती करे हंव।
JOB 6:25 खर्रा बोली ह कतेक पीरा देवइया होथे! पर तुमन के बहस ह का साबित करथे?
JOB 6:26 का तुमन मोर कहे गोठ ला सुधारे चाहत हव, अऊ मोर निरासा के गोठमन ला हवा के सहीं समझत हव?
JOB 6:27 तुमन तो अनाथमन ला गुलाम बनाय बर परची निकालहू, अऊ अपन संगी ला घलो दाम लेके बदल डारहू।
JOB 6:28 “पर अब किरपा करके मोर कोति देखव। का मेंह तुम्हर आघू म लबारी मारहूं?
JOB 6:29 नरम बनव, अनियायी झन होवव; फेर बिचार करव, काबरकि मोर ईमानदारी ह संकट म हवय।
JOB 6:30 का मोर गोठ म कोनो बुरई के बात हवय? का मेंह खराप भावना ला नइं चिन सकंव?
JOB 7:1 “का मनखेमन ला धरती म कठिन मेहनत नइं करे बर परय? का ओमन के दिन ह बनी करइया बनिहार कस नइं होवय?
JOB 7:2 जइसने एक गुलाम ह संझा के छइहां के ईछा करथे, या एक बनिहार ह अपन बनी के आसा म रहिथे,
JOB 7:3 वइसने ही मोला बेकार के महिनामन ला देय गे हवय, अऊ मोर बर दुख भरे रथियामन ला ठहिराय गे हवय।
JOB 7:4 जब मेंह ढलंगथंव, त मेंह सोचथंव, ‘मेंह कब उठहूं?’ रथिया ह लाम होथे, अऊ मेंह बिहनियां होवत ले छटपटावत रहिथंव।
JOB 7:5 मोर देहें म कीरा अऊ घाव ह माटी के परत ले ढंकाय हवय, मोर चमड़ी ह फट गे हवय अऊ घाव ह पाक गे हवय।
JOB 7:6 “मोर दिनमन कोसटा के ढरकी ले घलो जादा तेज चलत हवंय, अऊ येमन बिगर कोनो आसा के बीत जाथें।
JOB 7:7 सुरता कर, हे परमेसर, मोर जिनगी ह सिरिप एक सांस अय; मोर आंखीमन फेर कभू खुसी नइं देखहीं।
JOB 7:8 जऊन ह अभी मोला देखत हवय, ओकर आंखी ह मोला फेर नइं देखही; तेंह मोला खोजबे, पर मेंह नइं मिलहूं।
JOB 7:9 जइसने बादर ह छरियाके गायब हो जाथे, वइसने ही जऊन ला कबर म माटी दे दिये जाथे, ओह लहुंटके नइं आवय।
JOB 7:10 ओह अपन घर म फेर कभू नइं आही; ओकर जगह ह ओला फेर कभू नइं चिनही।
JOB 7:11 “एकरसेति मेंह चुप नइं रहंव; मेंह अपन आतमा के दुख म होके गोठियाहूं, मेंह अपन जिनगी के करूवाहट म होके सिकायत करहूं।
JOB 7:12 का मेंह समुंदर अंव, या गहिरा पानी के बिकराल जन्तु, कि तें मोला पहरेदारी म रखबे?
JOB 7:13 जब मेंह सोचथंव, मोर खटिया म मोला सांति मिलही अऊ बिछौना म मोला मोर पीरा ले हरू लगही,
JOB 7:14 तब घलो तें मोला सपना म डरवाथस अऊ दरसन देखाके मोला भयभीत करथस,
JOB 7:15 एकरसेति मोर गला घोंटे जावय अऊ मोला मिरतू मिलय, एकर बदले कि मेंह ये देहें म बने रहंव।
JOB 7:16 मोला अपन जिनगी ले घिन आवथे; मेंह हमेसा जीयत नइं रहंव। मोला अकेला छोंड़ दे; मोर जिनगी के दिनमन के कोनो मतलब नइं ए।
JOB 7:17 “मनखे ह का ए कि तेंह ओला बहुंत महत्व देथस, अऊ तेंह ओकर ऊपर बहुंत धियान देथस,
JOB 7:18 अऊ तेंह रोज बिहनियां ओकर जांच करथस अऊ छिन-छिन म ओला परखत रहिथस?
JOB 7:19 का तेंह कभू मोर देखभाल करई नइं छोंड़स, या छिन भर के लागि घलो मोला अकेला नइं छोंड़स?
JOB 7:20 तेंह ओ अस, जऊन ह हमर हर एक काम ला देखत रहिथे, अगर मेंह पाप करे हंव, त मेंह तोर का बिगाड़े हंव? तेंह काबर मोला अपन निसाना बनाय हस? का मेंह तोर बर बोझ बन गे हवंव?
JOB 7:21 तेंह काबर मोर अपराध अऊ मोर पाप ला छेमा नइं करस? काबरकि अब तो मेंह माटी म मिल जाहूं; तेंह मोला खोजबे, फेर मोला नइं पाबे।”
JOB 8:1 तब सूही के रहइया बिलदद ह जबाब दीस:
JOB 8:2 “तेंह कब तक अइसने बातमन ला कहत रहिबे? तोर गोठमन गरजत गरेर सहीं अंय?
JOB 8:3 का परमेसर ह नियाय ला बिगाड़थे? का सर्वसक्तिमान ह सही बात ला गलत कर देथे?
JOB 8:4 जब तोर लइकामन परमेसर के बिरूध पाप करिन, त ओह ओमन ला ओमन के पाप के सजा दीस।
JOB 8:5 पर यदि तेंह ईमानदारी ले परमेसर ला सहायता बर खोजबे, अऊ सर्वसक्तिमान ले बिनती करबे,
JOB 8:6 कहूं तेंह सुध अऊ धरमी अस, त अभी घलो ओह तोर कोति ले ठाढ़ होही अऊ तोला तोर पहिले के सम्पन्न दसा म ला दीही।
JOB 8:7 तोर सुरूआत ह छोटे जान पड़ही, पर तोर भविस्य म बहुंत बढ़ती होही।
JOB 8:8 “पिछला पीढ़ी के मनखेमन ले पुछ अऊ पता लगा कि ओमन के पुरखामन का सीखे रिहिन,
JOB 8:9 काबरकि हमन तो कल जनमे हन अऊ कुछू नइं जानन, अऊ धरती म हमर दिन ह छइहां कस अय।
JOB 8:10 जऊन मन हमर ले पहिले आईन, का ओमन तोला नइं सिखाहीं अऊ नइं बताहीं? का ओमन अपन समझ ले बात नइं करहीं?
JOB 8:11 जिहां दलदली भुइयां नइं ए, का उहां पपीरस पऊधा ह लम्बा बढ़ सकथे? का पानी बिगर कछार के कांदी ह बढ़ सकथे?
JOB 8:12 ओमन बढ़ सकथें अऊ काटे घलो नइं गे रहंय, पर ओमन कांदी ले घलो जल्दी सूख जाथें।
JOB 8:13 जऊन मन परमेसर ला बिसरा देथें, ओ जम्मो के हाल अइसने होथे; अऊ अइसने भक्तिहीन मनखेमन के आसा ह टूट जाथे।
JOB 8:14 जेकर ऊपर ओमन भरोसा करथें, ओह कमजोर होथे; अऊ जेला ओमन पतियाथें, ओह मेकरा के जाला सहीं अय।
JOB 8:15 ओमन जाला के ऊपर आसरा करथें, पर ओह टूट जाथे; ओमन ओला थामथें, पर ओह थामे नइं रहय।
JOB 8:16 ओमन घाम म पानी पलोय गे पऊधा सहीं अंय, जेकर डारामन बारी म चारों कोति बगरथें;
JOB 8:17 येह अपन जरीमन ला पथरा के कुढ़ा के चारों कोति लपेटथे अऊ पथरामन के बीच म जगह खोजथे।
JOB 8:18 कहूं येला अपन जगह ले उखान दिये जाथे, त ओ जगह ह ओकर इनकार करथे अऊ कहिथे, ‘मेंह तोला कभू देखे घलो नइं अंव।’
JOB 8:19 खचित, इही ह येकर जिनगी के अन्त अय, अऊ ओ माटी म ले आने पऊधामन जामथें।
JOB 8:20 “खचित, परमेसर ह निरदोस मनखे ला अस्वीकार नइं करय या दुस्ट काम करइया मनखेमन के हांथ ला मजबूत नइं करय।
JOB 8:21 ओह अब भी तोर मुहूं ला हंसी ले अऊ तोर ओंठमन ला आनंद के जयकार ले भर दीही।
JOB 8:22 तोर बईरीमन ला लज्जित करे जाही, अऊ दुस्टमन के डेरा कहूं मेर नइं रहिही।”
JOB 9:1 तब अयूब ह जबाब दीस:
JOB 9:2 “सही म मेंह जानथंव कि येह सच अय। पर परमेसर के आघू म मनखेमन कइसे अपन निरदोस होय के बात ला साबित कर सकथें?
JOB 9:3 हालाकि ओमन ओकर ले बाद-बिबाद करे बर चाहिन, पर हजार म ले ओकर एको ठन गोठ के घलो जबाब नइं दे सकिन।
JOB 9:4 परमेसर ह अति बुद्धिमान ए अऊ अति बलवान ए। कोन ह ओकर बिरोध करके बिगर हानि के बांचे हवय?
JOB 9:5 ओह पहाड़मन ला बिगर ओमन के जानकारी के टार देथे अऊ ओह अपन रिस म ओमन ला उलट-पलट देथे।
JOB 9:6 ओह धरती ला अपन जगह ले हला देथे अऊ ओकर खंभामन ला कंपा देथे।
JOB 9:7 ओकर कहे ले सूरज ह घलो अंजोर नइं देवय; ओह तारामन के अंजोर ला बंद कर देथे।
JOB 9:8 ओह एके झन अकास-मंडल ला तानथे अऊ समुंदर के लहरामन ऊपर चलथे।
JOB 9:9 ओह सपतरसी अऊ सिकारी तारापुंज किरतिका अऊ दक्खिन के नछत्रमन के रचइता अय।
JOB 9:10 परमेसर ह अइसने अद्भूत काम करथे, जेला समझे नइं जा सकय, अऊ ओह अतेक चमतकार करथे, जेला गने नइं जा सकय।
JOB 9:11 जब ओह मोर लकठा ले होके निकलथे, त मेंह ओला देख नइं सकंव; जब ओह चलथे, त मेंह समझ नइं सकंव।
JOB 9:12 कहूं ओह कुछू झटकके ले जाथे, त कोन ह ओला रोक सकथे? कोन ह ओला पुछ सकत हे, ‘तें का करत हस?’
JOB 9:13 परमेसर ह अपन रिस ला नइं रोकय; इहां तक कि राहाब के मदद करइयामन ओकर पांव खाल्हे झुकिन।
JOB 9:14 “त मेंह ओकर संग कइसे झगरा कर सकत हंव? ओकर संग बहस करे बर मेंह बचन कइसे पा सकथंव?
JOB 9:15 हालाकि मेंह निरदोस रहेंव, तभो ले ओला जबाब नइं दे सकेंव; मेंह अपन नियाय करइया करा दया करे बर सिरिप बिनती कर सकहूं।
JOB 9:16 अऊ त अऊ कहूं मेंह ओकर ले गोहार पारतेंव अऊ ओह जबाब घलो देतिस, पर मेंह बिसवास नइं करंव कि ओह मोर बात ला सुनही।
JOB 9:17 ओह आंधी चलाके मोला कुचर डारही अऊ बिगर कोनो कारन के ओह मोला घाव के ऊपर घाव दीही।
JOB 9:18 ओह मोला सांस लेवन घलो नइं दीही पर मोला दुख ले बियाकुल कर दीही।
JOB 9:19 कहूं येह बल के बात अय, त ओह बलसाली अय! अऊ कहूं येह नियाय के बात अय, त कोन ह ओला ललकार सकथे?
JOB 9:20 चाहे मेंह बिना दोस के होवंव, पर मोर बात ह मोला गलत ठहिराही; कहूं मेंह निरदोस होवंव, पर ओह मोला दोसी ठहिराही।
JOB 9:21 “हालाकि में निरदोस अंव, मोला अपन बर चिंता नइं ए; में अपन खुद के जिनगी ला तुछ समझथंव।
JOB 9:22 जम्मो बात ह एकेच अय; एकरसेति मेंह कहिथंव, ‘ओह निरदोस अऊ दुस्ट दूनों ला नास करथे।’
JOB 9:23 जब कोनो बिपत्ति ह अचानक मिरतू लानथे, त ओह निरदोस मनखे के निरासा के हंसी उड़ाथे।
JOB 9:24 जब कोनो भुइयां ला दुस्ट मनखे के हांथ म दिये जाथे, त परमेसर ह येकर नियाय करइयामन के आंखी ला मुंद देथे। अइसने करइया ओह नो हय, त कोन अय?
JOB 9:25 “मोर जिनगी के दिनमन दऊड़नेवाला ले घलो जादा तेजी ले बीतत हवंय; येमन बिगर कोनो आनंद के बीतत जावत हंय।
JOB 9:26 येमन पपीरस पऊधा के डोंगीमन कस निकल जावत हंय, येमन अइसने बीतत हवंय, जइसने गिधवामन अपन सिकार ऊपर झपटथें।
JOB 9:27 कहूं मेंह कहंव, ‘मेंह अपन सिकायत ला भुला जाहूं मेंह अपन पीरा ला छोंड़के मुस्कराहूं,’
JOB 9:28 तभो ले मेंह अपन जम्मो पीरा ले डरथंव, काबरकि मेंह जानत हंव कि तेंह मोला निरदोस नइं ठहिराबे।
JOB 9:29 जब मेंह पहिले ले ही दोसी पाय गे हंव, त फेर मेंह बेकार म काबर मेहनत करंव?
JOB 9:30 चाहे मेंह अपनआप ला साबुन ले अऊ अपन हांथमन ला सफई करइया पावडर ले धोवंव,
JOB 9:31 तभो ले तेंह मोला चीखला के खंचवा म डार देबे, अऊ मोर ओनहामन घलो मोर ले घिन करे लगहीं।
JOB 9:32 “परमेसर ह मोर सहीं कोनो मरनहार मनखे नो हय कि मेंह ओला जबाब दे सकंव, अऊ हमन अदालत म एक-दूसर के सामना करन।
JOB 9:33 यदि हमर बीच म कोनो समझौता करोइया होतिस, जऊन ह हमन ला एक संग लानतिस,
JOB 9:34 जऊन ह मोर ऊपर ले परमेसर के छड़ी ला टारतिस, ताकि मेंह ओकर आतंक ले कभू नइं डरतंय।
JOB 9:35 तब मेंह ओकर बिगर भय के गोठियातेंव, पर मेंह अपनआप म वइसने नो हंव।
JOB 10:1 “मेंह अपन जिनगी ले घिन करथंव; एकरसेति मेंह खुलके सिकायत करहूं अऊ अपन मन के करूवाहट ले गोठियाहूं।
JOB 10:2 मेंह परमेसर ला कहिथंव: मोला दोसी झन ठहिरा, पर मोला बता कि मेंह तोर बिरोध म का अपराध करे हंव।
JOB 10:3 का मोला सताना, अपन हांथ के काम ला तुछ जानना तोला बने लगथे, जबकि दुस्टमन के बनाय योजना ऊपर तेंह हांसथस?
JOB 10:4 का तोर आंखीमन मनखे के आंखी कस हवंय? का तेंह वइसने देखथस, जइसने मनखेमन देखथें?
JOB 10:5 का तोर उमर के दिन ह मनखे के दिन कस छोटे अय या का तोर बछर ह मनखे के बछर सहीं अय,
JOB 10:6 कि तेंह मोर गलतीमन ला खोजबे अऊ मोर पाप के जांच-पड़ताल करबे—
JOB 10:7 हालाकि तेंह जानत हस कि मेंह दोसी नो हंव अऊ ये घलो कि तोर हांथ ले मोला कोनो बचाय नइं सकय?
JOB 10:8 “तोर हांथमन मोला रूप देय हवंय अऊ मोला बनाय हवंय। तभो ले का तेंह मोला नास कर देबे?
JOB 10:9 सुरता कर कि तेंह मोला माटी ले बनाय हवस। का तेंह मोला फेर धुर्रा म मिला देबे?
JOB 10:10 का तेंह मोला दूध के सहीं नइं रितोय अऊ दही के सहीं नइं जमाय?
JOB 10:11 का तेंह मोर ऊपर मांस अऊ चमड़ी नइं चघाय अऊ हाड़ा अऊ नसमन ला एक संग बुनके मोला नइं बनाय?
JOB 10:12 तेंह मोला जिनगी देय अऊ मोर ऊपर दया करय, अऊ तोर किरपा के कारन मोर आतमा के देखरेख होय हवय।
JOB 10:13 “पर तेंह अपन हिरदय म ये बातमन ला लुकाके राखे हवस, अऊ मेंह जानथंव कि येह तोर मन म रिहिस:
JOB 10:14 कहूं मेंह कोनो पाप करेंव, त तेंह ओला देखत होबे अऊ मोला बिगर सजा दिये नइं छोंड़बे।
JOB 10:15 कहूं मेंह दोसी अंव, त दुख-तकलीफ मोर ऊपर आवय, अऊ कहूं मेंह निरदोस घलो होवंव, तभो ले मेंह अपन मुड़ उठा नइं सकंव, काबरकि मेंह बहुंत लज्जित हंव अऊ अपन पीरा म मरत हंव।
JOB 10:16 यदि मेंह अपन मुड़ ला उठावंव, त तेंह सेर के सिकार करे सहीं लुकाके मोर पीछा करथस अऊ फेर तेंह मोर बिरोध म अपन अद्भूत बल देखाथस।
JOB 10:17 तेंह मोर बिरोध म नवां गवाहमन ले आथस अऊ मोर ऊपर अपन रिस ला बढ़ाथस अऊ बाधा के ऊपर बाधा मोर बिरोध म ले आथस।
JOB 10:18 “फेर तेंह मोला गरभ ले निकाले काबर? बने होतिस, काकरो देखे के पहिली, मेंह मर गे रहितेंव,
JOB 10:19 मोर रचना नइं होय रहितिस, या सीधा गरभ ले कबर म अमराय गे रहितेंव!
JOB 10:20 का मोर बांचे जिनगी के दिनमन थोरकून नइं ए? मोला छोंड़ दे कि मेंह आनंद के कुछू समय बीता सकंव
JOB 10:21 येकर पहिली कि मेंह ओ जगह म जावंव, जिहां ले कोनो नइं लहुंटंय, ओ जगह, जिहां अंधियार अऊ भारी अंधियार हवय,
JOB 10:22 याने ओ जगह, जिहां घोर रथिया, भारी अंधियार अऊ गड़बड़ हवय, अऊ त अऊ जिहां अंजोर ह घलो अंधियार सहीं अय।”
JOB 11:1 तब नामात के रहइया सोपर ह जबाब दीस:
JOB 11:2 “का ये जम्मो गोठ के जबाब नइं देना चाही? का ये गोठ कहइया के समरथन करे जावय?
JOB 11:3 का तोर बड़े बोल ले आने मन चुप रहंय? का तोला कोनो झन डांटय, जब तेंह हंसी उड़ाथस?
JOB 11:4 तेंह परमेसर ले कहिथस, ‘मोर बिसवास म कोनो कमी नइं ए अऊ मेंह तोर नजर म सुध हवंव।’
JOB 11:5 बने होतिस, परमेसर ह खुद गोठियातिस, अऊ तोर बिरोध म अपन मुहूं ला खोलतिस
JOB 11:6 अऊ तोर ऊपर बुद्धि के गुपत गोठमन ला परगट करतिस, काबरकि सत-बुद्धि के दू ठन पहलू हवय। येला जान ले: परमेसर ह तोर कुछू पापमन ला भुला गे हवय।
JOB 11:7 “का तेंह परमेसर के भेद के बातमन ला समझ सकथस? का तेंह सर्वसक्तिमान के सीमना के पता पा सकत हस?
JOB 11:8 ओमन स्वरगमन ले घलो ऊंच हवंय—तेंह का कर सकत हस? ओह तो पाताल-लोक ले जादा गहिरा हवय—तेंह का जान सकत हस?
JOB 11:9 ओमन के नाप ह धरती ले लम्बा अऊ समुंदर ले घलो जादा चाकर हवय।
JOB 11:10 “कहूं ओह आवय अऊ तोला जेल म डाल देवय अऊ अदालत लगावय, त कोन ह ओला रोक सकथे?
JOB 11:11 खचित ओह धोखा देवइयामन ला चिन लेथे; अऊ जब ओह बुरई देखथे, त का ओह ओला धियान नइं देवय?
JOB 11:12 पर मुरूख मनखे ह बुद्धिमान नइं बन सकय, जइसे कि जंगली गदहा के पीला ह मनखे के रूप म नइं जनम सकय।
JOB 11:13 “तभो ले कहूं तेंह अपन मन ला ओकर कोति लगाथस अऊ अपन हांथमन ला ओकर कोति पसारथस,
JOB 11:14 यदि तेंह अपन पापमन ला छोंड़ देथस अऊ अपन डेरा म बुरई ला रहे बर नइं देवस,
JOB 11:15 तब, तेंह निरदोस होके अपन चेहरा ऊपर उठा सकबे; अऊ तेंह बिगर भय के मजबूत ठाढ़े रहिबे।
JOB 11:16 तेंह खचित अपन दुख ला भुला जाबे, ओह तोला सिरिप बहा दिये गय पानी कस सुरता रहिही।
JOB 11:17 तोर जिनगी ह मंझनियां ले घलो जादा चमकदार होही, अऊ अंधियार ह बिहनियां कस हो जाही।
JOB 11:18 तेंह सुरकछित रहिबे, काबरकि तोला आसा होही; तेंह अपनआप ला देखबे अऊ निरभय होके अराम करबे।
JOB 11:19 जब तेंह लेटबे, त तोला कोनो नइं डराहीं, अऊ बहुंते झन तोर बर मया देखाहीं।
JOB 11:20 पर दुस्ट मनखेमन के आंखीमन अंधरा हो जाहीं, अऊ ओमन ला बचके निकले के कोनो रसता नइं दिखही; ओमन ये आसा करहीं कि ओमन मर जावंय।”
JOB 12:1 तब अयूब ह जबाब दीस:
JOB 12:2 “तुमन सोचथव कि सिरिप तुमन ही महत्व के मनखे अव अऊ तुम्हर मरे ले तुम्हर संग बुद्धि ह घलो खतम हो जाही!
JOB 12:3 पर मोर म घलो तुम्हर सहीं समझ हवय; मेंह तुमन ले कम नो हंव, कोन ह ये जम्मो बातमन ला नइं जानय?
JOB 12:4 “मेंह अपन संगीमन बर ठिठोली के बिसय बन गे हवंव, हालाकि मेंह परमेसर ले गोहारेंव अऊ ओह जबाब दीस— हालाकि में धरमी अऊ निरदोस अंव, तभो ले एक ठिठोली के बिसय बन गे हवंव!
JOB 12:5 जऊन मन अराम के जिनगी जीयथें, ओमन दुखी मनखे ले घिन करथें अऊ जेमन के गोड़ ह फिसलथे ओमन ला ढकेल देथें।
JOB 12:6 लुटेरामन के डेरा म कोनो समस्या नइं आवय, अऊ जऊन मन परमेसर ला रिस देवाथें, ओमन सुरकछित हवंय— ओमन के ईस्वर ह ओमन के मुठा म हवय।
JOB 12:7 “पर पसुमन ले पुछ, अऊ ओमन तोला सिखोहीं, या अकास के चिरईमन ले पुछ, अऊ ओमन तोला बताहीं;
JOB 12:8 या धरती ले गोठिया, अऊ येह तोला सिखोही, या समुंदर के मछरीमन तोला बतावंय।
JOB 12:9 ये जम्मो म ले कोन ह नइं जानय कि यहोवा ह अपन हांथ ले येला करे हवय?
JOB 12:10 ओकर हांथ म जम्मो जीवमन के जिनगी अऊ जम्मो मनखेमन के सांस हवय।
JOB 12:11 का कान ह सबदमन ला नइं परखय, जइसे जीभ ह जेवन के सुवाद ला चखथे?
JOB 12:12 का सियान मनखेमन के बीच म बुद्धि नइं पाय जावय? का जादा उमरवालामन म समझदारी नइं रहय?
JOB 12:13 “बुद्धि अऊ बल परमेसर के अय; सलाह अऊ समझ ओकर करा हवय।
JOB 12:14 जऊन ला ओह टोर-फोर देथे, ओला फेर नइं बनाय जा सकय; जऊन ला ओह बंदी बनाथे, ओला छोंड़ाय नइं जा सकय।
JOB 12:15 यदि ओह पानी ला रोक देथे, त उहां सूखा पड़थे; यदि ओह पानी ला छोंड़ देथे, त भुइयां ह बरबाद हो जाथे।
JOB 12:16 बल अऊ बुद्धि परमेसर के अंय; धोखा-खवइया अऊ धोखा देवइया दूनों ह ओकरेच अंय।
JOB 12:17 ओह सासन करइयामन ला ओमन के अधिकार ले अलग कर देथे अऊ नियाय करइयामन ला मुरूख बना देथे।
JOB 12:18 ओह राजामन के दुवारा डारे गे बेड़ी ला निकाल देथे अऊ ओमन के कनिहां ला कमरपट्टा ले जकड़ देथे।
JOB 12:19 ओह पुरोहितमन ला ओमन के अधिकार ले अलग कर देथे अऊ जमे-जमाय अधिकारीमन ला उखान फेंकथे।
JOB 12:20 ओह भरोसावाले सलाहकारमन के बोलती बंद कर देथे अऊ सियानमन के समझ ला छीन लेथे।
JOB 12:21 ओह उच्च घराना के मनखेमन के अपमान करथे अऊ बलवानमन ला बलहीन कर देथे।
JOB 12:22 ओह अंधियार के गहिरा बातमन ला परगट कर देथे अऊ घिटके अंधियार ला अंजोर म ले आथे।
JOB 12:23 ओह देसमन ला महान करथे, अऊ ओमन ला नास घलो करथे; ओह देसमन के बिस्तार करथे, अऊ ओमन ला छितिर-बितिर घलो कर देथे।
JOB 12:24 ओह धरती के अगुवामन के बिबेक ला छीन लेथे; अऊ ओमन ला बिगर रसतावाले बीरान जगह म भटकाथे।
JOB 12:25 ओमन अंजोर के बिगर अंधियार म टमड़त रहिथें; ओह ओमन ला अइसे बना देथे कि ओमन मतवार सहीं लड़खड़ावत रेंगथें।
JOB 13:1 “मेंह ये जम्मो ला अपन आंखी ले देखे हवंव, मेंह येला अपन कान ले सुने अऊ समझ गे हवंव।
JOB 13:2 जऊन कुछू तुमन जानत हव, ओला मेंह घलो जानत हंव; मेंह तुमन ले कम नो हंव।
JOB 13:3 पर मेंह तो सर्वसक्तिमान परमेसर ले बात करे चाहत हंव अऊ मोर हालत के बारे म परमेसर ले बहस करे चाहत हंव।
JOB 13:4 तुमन तो मोर ऊपर लबारी गोठ के धब्बा लगावत हव; तुमन जम्मो झन बेकार के बईद अव।
JOB 13:5 कास! तुमन एकदम चुप रहितेव! तुम्हर बर ओह बुद्धिमानी होतिस।
JOB 13:6 अब मोर बहस ला सुनव; मोर तर्क के बात ला धियान देके सुनव।
JOB 13:7 का तुमन परमेसर बर खराप बात कहिहू? का तुमन ओकर बर कपट ले भरे गोठ गोठियाहू?
JOB 13:8 का तुमन ओकर संग पखियपात करहू? का तुमन परमेसर बर बहस करहू?
JOB 13:9 कहूं ओह तुमन ला जांचय, त का येह बने होही? का तुमन ओला कोनो मनखे ला धोखा देय सहीं धोखा दे सकत हव?
JOB 13:10 कहूं तुमन गुपत म पखियपात करहू, त ओह खचित तुम्हर ले लेखा लीही।
JOB 13:11 का ओकर सोभा तुमन ला भयभीत नइं करही? का ओकर डर तुमन म नइं समाही?
JOB 13:12 तुम्हर कहावतमन राख के नीतिबचन अंय; तुम्हर सुरकछा के गढ़मन माटी के गढ़ अंय।
JOB 13:13 “चुप रहव अऊ मोला गोठियावन दव; फेर चाहे जऊन कुछू मोर ऊपर आवय, त आवय।
JOB 13:14 काबर मेंह अपनआप ला जोखिम म डारंव अऊ अपन परान ला अपन हथेली म ले लंव?
JOB 13:15 चाहे परमेसर ह मोला मार घलो डारय, तभो ले मेंह ओकर ऊपर आसा रखहूं; मेंह खचित ओकर आघू म अपन बात के बचाव करहूं।
JOB 13:16 वास्तव म, इही ह मोर छुटकारा के कारन होही, काबरकि भक्तिहीन मनखे ह ओकर आघू म आय के हिम्मत नइं कर सकय!
JOB 13:17 मोर बात ला धियान देके सुनव; मोर बचन ह तुम्हर कान म एकदम पड़य।
JOB 13:18 अब मेंह अपन मामला तियार कर लेय हंव, मेंह जानत हंव कि मोला नियाय मिलही।
JOB 13:19 का कोनो मोर ऊपर दोस लगा सकथे? कहूं कोनो मोला दोसी ठहिरा देवय, त मेंह चुप हो जाहूं अऊ मर जाहूं।
JOB 13:20 “हे परमेसर! सिरिप मोर दू ठन मांग ला पूरा कर दे, अऊ तब मेंह तोर ले नइं लुकावंव:
JOB 13:21 तोर ताड़ना के हांथ ला मोर ऊपर ले हटा ले, अऊ अपन आतंक ले मोला डराना बंद कर दे।
JOB 13:22 तब मोला बला अऊ मेंह जबाब दूहूं, या फेर मोला गोठियावन दे, अऊ तें मोला ओकर जबाब दे।
JOB 13:23 मेंह कतेक गलती अऊ पाप करे हवंव? मोला मोर अपराध अऊ मोर पाप ला बता।
JOB 13:24 तेंह अपन चेहरा ला काबर लुकावत हस अऊ मोला अपन बईरी समझत हस?
JOB 13:25 का तेंह हवा म उड़ियावत रूख के पान ला दुख देबे? या का तेंह सूखाय भूंसा के पाछू पड़बे?
JOB 13:26 तेंह मोर बिरोध म करू गोठमन ला लिखत हवस, अऊ मोर जवानी के पाप के फल मोला भुगतात हवस।
JOB 13:27 तेंह मोर गोड़ म बेड़ी पहिरा दे हवस; तेंह मोर गोड़ के तरवा म चिनहां देके मोर जम्मो चालचलन ला धियान ले देखत रहिथस।
JOB 13:28 “अइसने मनखे ह तो सरे-गले चीज सहीं बेकार हो जाथे, जइसने कि कोनो ओनहा ला कीरामन खा डारे हवंय।
JOB 14:1 “मनखेमन माईलोगन ले जनमथें, ओमन थोरकन दिन के अंय अऊ ओमन के जिनगी ह दुख ले भरे रहिथे।
JOB 14:2 ओमन फूल कस फूलथें, अऊ फेर मुरझा जाथें; ओमन तेजी ले ढरत छइहां कस अंय, अऊ टिके नइं रहंय।
JOB 14:3 का तेंह ओमन ऊपर अपन नजर डारबे? का तेंह ओमन ला नियाय बर अपन आघू म लानबे?
JOB 14:4 कोन ह असुध चीज म ले सुध चीज ला निकाल सकत हे? कोनो नइं!
JOB 14:5 मनखे के उमर के दिनमन ला निस्चित करे गे हवय; तेंह ओकर महिनामन के संखिया के फैसला कर डारे हस अऊ ओकर सिवाना ठहिराय हस जेकर आगे ओह नइं जा सकय।
JOB 14:6 एकरसेति जब तक ओह बनिहार कस अपन समय ला पूरा नइं कर लेवय, ओकर ऊपर ले अपन नजर ला हटा ले अऊ ओला अकेला रहन दे।
JOB 14:7 “एक रूख बर कम से कम ये आसा रहिथे: यदि येह काटे जावय, त येह फेर उलहोही, अऊ येकर नवां पीका निकलई बंद नइं होही।
JOB 14:8 चाहे येकर जरीमन भुइयां म जुन्ना हो जावंय अऊ येकर ठुड़गा ह माटी म सूखा जावय,
JOB 14:9 तभो ले पानी के गंध पाके येह उलहोही अऊ एक पऊधा कस पीका निकालही।
JOB 14:10 पर मनखे ह मर जाथे अऊ खाल्हे म परे रहिथे; ओकर परान निकल जाय के बाद ओह इहां नइं रहय।
JOB 14:11 जइसने झील के पानी ह घट जाथे या नदी ह गरमी म सूखा जाथे,
JOB 14:12 वइसने ही मनखे ह लेटथे अऊ फेर नइं उठय; जब तक अकासमन खतम नइं हो जाहीं, मनखे ह नइं जागही या ओला नींद ले जगाय नइं जाही।
JOB 14:13 “कास! तेंह मोला कबर म लुकाके रखते अऊ तब तक लुकाय रखते, जब तक कि तोर गुस्सा ह सांत नइं हो जातिस! कास! तेंह मोर बर एक समय ठहिरा देते अऊ तब मोला सुरता करते!
JOB 14:14 कहूं कोनो मनखे ह मर जावय, त का ओह फेर जीही? अपन कठिन सेवा के जम्मो दिन म जब तक मोर छुटकारा नइं हो जावय, मेंह अगोरत रहिहूं।
JOB 14:15 तेंह मोला बलाबे अऊ मेंह तोला जबाब दूहूं; तेंह अपन हांथ ले रचे परानीमन के लालसा करबे।
JOB 14:16 खचित तब तेंह मोर कदम ला गनबे पर मोर पाप के हिसाब नइं रखबे।
JOB 14:17 मोर अपराधमन थैली म मुहरबंद करे जाहीं; तेंह मोर पाप ला ढांप देबे।
JOB 14:18 “पर जइसे पहाड़ ह गिरथे अऊ चूर-चूर हो जाथे अऊ जइसे चट्टान ह अपन जगह ले हट जाथे,
JOB 14:19 जइसे पानी ह पथरामन ला घीस डारथे अऊ पानी के धारा ह माटी ला बोहाके ले जाथे, वइसे तेंह मनखे के आसा ला नास कर देथस।
JOB 14:20 तेंह ओमन ला हमेसा बर हरा देथस, अऊ ओमन चल देथें; तेंह ओमन के चेहरा ला बदल देथस अऊ ओमन ला निकाल देथस।
JOB 14:21 यदि ओमन के लइकामन के सम्मान करे जाथे, त ओमन येला नइं जानंय; यदि ओमन के संतानमन के बेजत्ती होथे, त ओमन येला नइं देख पावंय।
JOB 14:22 ओमन पीरा के अनुभव तो करथें पर सिरिप अपन देहें के पीरा, अऊ ओमन सिरिप अपन बर सोक मनाथें।”
JOB 15:1 तब तेमान के रहइया एलीपज ह जबाब दीस:
JOB 15:2 “का बुद्धिमान मनखे बिगर सोचे-बिचारे जबाब दीही या गरम पूरबी पवन ले अपन पेट भरही?
JOB 15:3 का ओमन बेकार के गोठ ले बहस करहीं या बेमतलब के बात संग बहस करहीं?
JOB 15:4 पर तेंह परमेसर के आदर ला कम करथस अऊ परमेसर के भक्ति म बाधा डालथस।
JOB 15:5 तोर पाप ह तोर मुहूं ला गोठियाय बर उकसावत हे; तेंह चतुरामन के भासा म बातचीत करथस।
JOB 15:6 मेंह नइं, पर तोर खुद के मुहूं के गोठ ह तोला दोसी ठहिरात हे; तोर खुद के जीभ ह तोर बिरोध म गवाही देवत हे।
JOB 15:7 “का जम्मो मनखे म सबले पहिली तेंह जनमे? का परबतमन ले पहिली तोला बनाय गीस?
JOB 15:8 का तें परमेसर के सभा म बईठके सुनथस? का सिरिप तोरेच करा बुद्धि हवय?
JOB 15:9 तेंह अइसे का जानथस, जऊन ला हमन नइं जानन? तोर म अइसे कोन समझ के बात हवय, जऊन ह हमन म नइं ए?
JOB 15:10 पाके चुंदीवाला अऊ सियानमन हमर तरफ हवंय, अऊ त अऊ तोर ददा ले घलो जादा उमर के मनखेमन।
JOB 15:11 का परमेसर के ढाढ़स देवई, अऊ कहे गे कोमल बचन तोर बर परयाप्त नो हंय?
JOB 15:12 तोर मन ह तोला काबर आने कोति लेगत हे, अऊ रिस म तोर आंखीमन काबर चमकत हवंय,
JOB 15:13 कि तेंह अपन गुस्सा ला परमेसर के बिरोध म परगट कर अऊ अपन मुहूं ले अइसने बचन निकलन देय?
JOB 15:14 “मरनहार मनखे ह का अय कि ओह सुध हो सकय या माईलोगन ले जनमे मनखेमन कोन अंय कि ओमन धरमी हो सकंय?
JOB 15:15 यदि परमेसर ह अपन पबितर मनखेमन ऊपर भरोसा नइं करय, अऊ यदि स्वरगमन घलो ओकर नजर म सुध नइं अंय,
JOB 15:16 त फेर मरनहार मनखेमन के का हिसाब, जऊन मन दुस्ट अऊ भ्रस्ट अंय, अऊ अधरम के काम करे बर पीयासन रहिथें!
JOB 15:17 “मोर बात ला सुन अऊ मेंह तोला समझाहूं; मेंह तोला बतात हंव कि मेंह का देखे हंव,
JOB 15:18 ओ बात जऊन ला बुद्धिमान मनखेमन अपन पुरखामन ले पाय रिहिन, ओला बिगर छुपाय बताय हवंय,
JOB 15:19 (सिरिप पुरखामन ला देस दिये गे रिहिस जब कोनो परदेसी के ओमन के बीच म आना-जाना नइं रिहिस):
JOB 15:20 दुस्ट मनखे ह अपन जिनगी भर पीरा सहथे, अऊ निरदयी मनखे बर येह ओकर जिनगी भर बने रहिथे।
JOB 15:21 भयभीत करइया अवाज ओकर कान म गूंजत रहिथे; जब सब सही जान पड़थे, तभे बिनास करइयामन ओकर ऊपर आ जाथें।
JOB 15:22 ओला अंधियार म ले बच निकले के बिसवास नइं रहय; अऊ तलवार ले ओकर मारे जवई ह खचित ए।
JOB 15:23 ओह गिधवा के सहीं जेवन बर एती-ओती किंदरत रहिथे; ओह जानथे कि अंधियार के दिन ह तीरेच म हवय।
JOB 15:24 पीरा अऊ बिपत्ति के भय ले ओह भरे रहिथे; दुख-समस्या ले ओह बियाकुल रहिथे, जइसे कोनो राजा चढ़ई करे बर तियार हवय,
JOB 15:25 काबरकि ओह परमेसर के ऊपर मुक्का तानथे अऊ सर्वसक्तिमान परमेसर के बिरोध म अपन डींग मारथे,
JOB 15:26 अऊ ओकर बिरोध म उतावला होके एक मोटा अऊ मजबूत ढाल लेके ओकर ऊपर धावा बोलथे।
JOB 15:27 “हालाकि ओकर चेहरा म चरबी बड़ गे हवय अऊ ओकर कनिहां ह मांस भरे ले मोटा हो गे हवय,
JOB 15:28 पर ओह उजरे नगरमन म अऊ ओ घरमन म रहिही जिहां कोनो नइं रहंय, अऊ जिहां घर के दीवारमन कुटा-कुटा होके गिरथें।
JOB 15:29 ओह अऊ धनवान नइं रहिही अऊ ओकर धन बने नइं रहय, ओकर धन ह देस म नइं फईलही।
JOB 15:30 ओह अंधियार ले नइं बांच पाही; आगी के जुवाला ले ओकर पीकामन झुलस जाहीं, अऊ परमेसर के मुहूं के सांस ले ओह दूरिहा छिटक जाही।
JOB 15:31 ओह बेकार के बातमन म भरोसा करके अपनआप ला धोखा झन देवय, काबरकि ओकर बलदा म ओला कुछू नइं मिलय।
JOB 15:32 अपन समय के पहिली ओह मुरझा जाही, अऊ ओकर डारामन नइं बड़हीं।
JOB 15:33 ओह ओ अंगूर के नार सहीं होही जेकर कइंचा अंगूरमन झरके गिर जाथें, या ओह ओ जैतून रूख सहीं होही जेकर फूलमन झरके गिरत हवंय।
JOB 15:34 काबरकि भक्तिहीन के संगति म रहइया बिगर फर के होही, अऊ घूसखोरमन के डेरामन ला आगी ह भसम कर दीही।
JOB 15:35 ओमन समस्या खड़े करे के योजना बनाथें अऊ दुस्ट काम करथें; ओमन के मन म धोखाधड़ी के बिचार रहिथे।”
JOB 16:1 तब अयूब ह जबाब दीस:
JOB 16:2 “मेंह ये किसम के बहुंत गोठ सुन चुके हंव; तुमन जम्मो के जम्मो दयनीय तसल्ली देवइया अव।
JOB 16:3 का तुम्हर बेकार के लम्बा भासन कभू खतम नइं होवय? तुमन ला का तकलीफ हे कि तुमन बहस करतेच हव?
JOB 16:4 मेंह घलो तुम्हर सहीं गोठियातेंव, कहूं तुमन मोर जगह म होतेव त; मेंह तुम्हर बिरोध म सुघर भासन देतेंव अऊ मुड़ डोलातेंव।
JOB 16:5 पर मोर बचन ह तुमन ला उत्साहित करतिस; अऊ तसल्ली देवइया मोर गोठ ह तुम्हर दुख ला कम करतिस।
JOB 16:6 “कहूं मेंह गोठियावंव, तभो ले मोर पीरा ह कम नइं होवय; अऊ चाहे मेंह चुप रहंव, तभो ले ये पीरा ह मोर ले दूरिहा नइं होवय।
JOB 16:7 सही म, हे परमेसर, तेंह मोला थको दे हस; तेंह मोर जम्मो परिवार ला उजाड़ दे हस।
JOB 16:8 तेंह मोला सूखा डारे हस—अऊ येह एक गवाह बन गे हवय; मोर दुबलापन ह बाढ़त हे अऊ मोर बिरोध म उठके गवाही देवत हे।
JOB 16:9 परमेसर ह मोर ऊपर वार करथे अऊ अपन रिस म मोला चीर डारथे अऊ मोर बर अपन दांत किटकिटाथे; मोर बईरी ह मोला हीनता के आंखी देखावत हे।
JOB 16:10 मनखेमन मोला ताना मारथें; ओमन तिरस्कार म मोर गाल म थपरा मारथें अऊ मोर बिरोध म एक जुट होवथें।
JOB 16:11 परमेसर ह मोला भक्तिहीन मनखेमन के बस म कर दे हवय अऊ मोला दुस्टमन के हांथ म सऊंप दे हवय।
JOB 16:12 मोर संग सब ठीक रिहिस, पर ओह मोला चकनाचूर कर दीस; ओह मोर घेंच ला धरके मोला कुचर डारे हवय। ओह मोला अपन निसाना बनाय हवय;
JOB 16:13 ओकर धनुसधारीमन मोला चारों कोति ले घेरे हवंय। ओह निरदयी होके मोर गुरदामन ला बेधथे अऊ मोर पित्त ला भुइयां म बोहा देथे।
JOB 16:14 बार-बार ओकर गुस्सा ह मोर ऊपर फूटथे; ओह सूरबीर सहीं मोर ऊपर झपटत हवय।
JOB 16:15 “मेंह दुख के सेति अपन खाल ऊपर बोरा ला सील ले हवंव अऊ अपन बल ला धुर्रा म गड़िया दे हवंव।
JOB 16:16 रो-रोके मोर चेहरा ह लाल हो गे हवय, अऊ मोर आंखी के पलकमन के तरी ह करिया गे हवय;
JOB 16:17 तभो ले मेंह कोनो हिंसा के काम नइं करे हवंव अऊ मोर पराथना ह पबितर अय।
JOB 16:18 “हे धरती! मोर लहू ला झन ढांप; मोर दुहाई ह कभू झन रूकय।
JOB 16:19 अभी घलो स्वरग म मोर गवाह हवय; मोर वकील ह ऊपर म हवय।
JOB 16:20 मोर संगीमन मोर निन्दा करइया अंय; अऊ मोर आंखी ह परमेसर के आघू म आंसू बोहावत हवय;
JOB 16:21 एक मनखे कोति ले ओह परमेसर ले बिनती करथे जइसे कोनो अपन संगी बर बिनती करथे।
JOB 16:22 “सिरिप थोरकून बछर बीते के बाद मेंह ओ रद्दा म चले जाहूं, जिहां ले कोनो लहुंटके नइं आवंय।
JOB 17:1 मोर मन ह टूट गे हवय, मोर जीये के दिनमन ला कम कर दिये गे हवय, कबर ह मोला अगोरत हे।
JOB 17:2 खचित ठट्ठा करइयामन मोर चारों कोति हवंय; मोर आंखीमन ओमन के बईरता ला देखत हवंय।
JOB 17:3 “हे परमेसर, मोला छोंड़ाय बर जमानत दे। अऊ कोन हवय, जऊन ह मोर बर ठाढ़ होही?
JOB 17:4 तेंह ओमन के समझ के सक्ति ला बंद कर दे हवस; एकरसेति तेंह ओमन ला जीते बर नइं देवस।
JOB 17:5 कहूं कोनो अपन लाभ बर अपन संगीमन के चारी-चुगली करथे, त ओकर लइकामन के आंखीमन फूट जाहीं।
JOB 17:6 “परमेसर ह मोला जम्मो झन बर एक कहावत बना दे हवय, अऊ मेंह अइसे मनखे हो गे हवंव, जेकर चेहरा म मनखेमन थूकथें।
JOB 17:7 मोर आंखीमन दुख के कारन धुंधला गे हवंय; मोर जम्मो देहें ह छइहां कस कमजोर हो गे हवय।
JOB 17:8 सीधवा मनखेमन येला देखके अचम्भो करथें; अऊ निरदोस मनखेमन भक्तिहीन मनखेमन के बिरोध म भड़कथें।
JOB 17:9 तभो ले, धरमीमन अपन रद्दा ला धरे रहिहीं, अऊ सुध काम करइया मनखेमन मजबूत होवत जाहीं।
JOB 17:10 “पर आवव, तुमन जम्मो झन, फेर कोसिस करव! पर तुम्हर बीच म, मेंह एको झन ला बुद्धिमान नइं पाहूं।
JOB 17:11 मोर जीये के दिनमन तो बीत गीन, मोर योजनामन छितिर-बितिर हो गे हवंय। मोर हिरदय के ईछामन चले गे हवंय
JOB 17:12 ओमन रथिया ला दिन म बदल देथें; अंजोर ह अंधियार के लकठा म हवय।
JOB 17:13 कहूं मेंह कोनो घर के आसा करंव, त ओह सिरिप कबर अय, कहूं मेंह अंधियार के जगह म अपन बिस्तर ला बिछावंव,
JOB 17:14 कहूं मेंह भ्रस्ट काम ला कहंव, ‘तें मोर ददा अस,’ अऊ कीरा ला कहंव, ‘तें मोर दाई अस’ या ‘मोर बहिनी अस,’
JOB 17:15 त फेर मोर आसा कहां हवय— कोन ह मोर आसा ला देख सकथे?
JOB 17:16 का मोर आसा ह मिरतू के कपाट करा खाल्हे चल दीही? का हमन खाल्हे जाके एके संग धुर्रा म मिल जाबो?”
JOB 18:1 तब सूही के रहइया बिलदद ह जबाब दीस:
JOB 18:2 “तेंह कब ये भासन ला खतम करबे? समझदार बन, अऊ तभे हमन गोठियाय सकथन।
JOB 18:3 हमन काबर पसु सहीं समझे जावत हन अऊ तोर नजर म मुरूख ठहिरे हन?
JOB 18:4 तें जऊन ह अपन रिस म अपनआप ला कुटा-कुटा करत हस, का तोर कारन धरती ला तियाग दिये जावय? या फेर चट्टानमन अपन जगह ले हट जावंय?
JOB 18:5 “दुस्ट मनखे के दीया ह बुता जाथे; ओकर आगी के जुवाला निकलई ह बंद हो जाथे।
JOB 18:6 दुस्ट मनखे के डेरा म अंजोर ह अंधियार हो जाथे, ओकर ऊपर म टांगे दीया ह बुता जाथे।
JOB 18:7 ओकर गोड़ के बल ह कमजोर हो जाथे; ओकर खुद के युक्ति ह ओला ले बुड़थे।
JOB 18:8 ओकर पांव ह ओला जाल म फंसोथे; ओह जाल म फंसके एती-ओती होथे।
JOB 18:9 फांदा ह ओकर एड़ी ला जकड़ लेथे; जाल ह ओला कसके पकड़ लेथे।
JOB 18:10 भुइयां म ओकर बर एक फांदा छिपे हवय; एक जाल ह ओकर रसता म हवय।
JOB 18:11 आतंक ह ओला जम्मो कोति ले चउंकाथे अऊ ओला पकड़े बर ओकर हर कदम के पीछा करथे।
JOB 18:12 बिपत्ति ह ओकर बर भूखन हवय; जब ओह गिरथे, त बिपत्ति ह ओकर बर तियार रहिथे।
JOB 18:13 येह ओकर चाम के भागमन ला खा जाथे; मिरतू के रोग ह ओकर देहें के अंगमन ला खा लेथे।
JOB 18:14 ओह अपन डेरा के सुरकछा ले चीर डाले जाथे अऊ आतंक के राजा करा लाने जाथे।
JOB 18:15 आगी ह ओकर डेरा म रहिथे; बरत गंधक ला ओकर निवास म छितराय जाथे।
JOB 18:16 ओकर जरी ह खाल्हे ले सूखा जाथे अऊ ऊपर म ओकर डारामन मुरझा जाथें।
JOB 18:17 धरती ले ओकर सुरता ह मिट जाथे; देस म ओकर नांव नइं रहय।
JOB 18:18 ओला अंजोर ले अंधियार के जगह म भगाय जाथे अऊ ओला संसार ले हटा दिये जाथे।
JOB 18:19 अपन मनखेमन के बीच म, ओकर कोनो संतान नइं रहंय, जिहां ओह रहत रिहिस, उहां ओकर कोनो नइं बचंय।
JOB 18:20 पछिम के मनखेमन ओकर दुरदसा ला देखके डराथें; पूरब के मनखेमन ऊपर भयंकर भय छा जाथे।
JOB 18:21 खचित, दुस्ट मनखे के निवास ह अइसने ही होथे; जऊन ह परमेसर ला नइं जानय, ओकर जगह ह अइसने होथे।”
JOB 19:1 तब अयूब ह जबाब दीस:
JOB 19:2 “तुमन मोला कब तक दुख देवत रहिहू अऊ ये गोठमन ले मोला कुचरत रहिहू?
JOB 19:3 दस बार अब तुमन मोर निन्दा कर चुके हव; अऊ बिगर लाज-सरम के मोर बुरई करथव।
JOB 19:4 कहूं येह सच अय कि मेंह सही रसता ले भटक गे हवंव, त फेर येह सिरिप मोर चिंता के बात ए।
JOB 19:5 कहूं तुमन सिरतों अपनआप ला मोर ले ऊपर करहू अऊ मोर दुख ला मोर बिरोध म उपयोग करहू,
JOB 19:6 त येला जान लेवव कि परमेसर ह मोला गलत ठहिराय हवय अऊ अपन जाल मोर चारों कोति बिछाय हवय।
JOB 19:7 “हालाकि मेंह चिचियाके कहिथंव, ‘उपदरव!’ पर मोला कोनो जबाब नइं मिलय; हालाकि मेंह सहायता बर गोहार लगाथंव, पर कोनो नियाय नइं होवय।
JOB 19:8 परमेसर ह मोला रोके बर रद्दा ला रूंध देय हवय कि मेंह नाहकके झन जा सकंव; ओह अंधियार म मोर रद्दा ला छुपा दे हवय।
JOB 19:9 ओह मोर आदरमान ला लेय ले हवय अऊ मुकुट ला मोर मुड़ म ले हटा ले हवय।
JOB 19:10 ओह मोला चारों कोति ले चीर डारथे, जब तक कि मेंह खतम नइं हो जावंव; ओह मोर आसा ला रूख के सहीं उखान देथे।
JOB 19:11 ओकर रिस ह मोर बिरोध म भड़कथे; ओह मोला अपन एक बईरी समझथे।
JOB 19:12 ओकर सेनामन ताकत के संग आघू बढ़थें; ओमन मोर बिरोध म घेरा बनाथें अऊ मोर डेरा के चारों कोति डेरा डालथें।
JOB 19:13 “ओह मोर भाईमन ला मोर ले दूरिहा कर दे हवय; मोर चिनहार मनखेमन मोर ले पूरा-पूरा अपन नाता टोर ले हवंय।
JOB 19:14 मोर रिस्तेदारमन मोला छोंड़ दे हवंय; अऊ मोर सबले बने संगीमन मोला भुला गे हवंय।
JOB 19:15 मोर पहुना अऊ मोर दासीमन मोला परदेसी समझथें; ओमन मोला एक अजनबी के सहीं देखथें।
JOB 19:16 मेंह अपन सेवक ला बलाथंव, पर ओह जबाब नइं देवय, हालाकि मेंह ओकर ले बिनती करथंव।
JOB 19:17 मोर सांस ह मोर घरवाली ला बने नइं लगय; मेंह अपन खुद के भाईमन बर घिनौना हो गे हवंव।
JOB 19:18 अऊ त अऊ नानकून लइकामन घलो मोर हंसी उड़ाथें; जब मेंह उठके बाहिर निकलथंव, त ओमन मोर ठिठोली करथें।
JOB 19:19 मोर जम्मो नजदीकी संगी-साथीमन मोर ले घिन करथें; जऊन मन ले मेंह मया करथंव, ओमन मोर बिरोध म हो गे हवंय।
JOB 19:20 मेंह सिरिप चमड़ी अऊ हाड़ा के छोंड़ अऊ कुछू नो हंव; मेंह मरे ले लटपट बांचे हवंव।
JOB 19:21 “मोर ऊपर दया करव, हे मोर संगीमन, दया करव, काबरकि परमेसर के कोप ह मोर ऊपर भड़के हवय।
JOB 19:22 तुमन परमेसर के सहीं काबर मोर पाछू पड़े हवव? का मोला तड़फाय म तुमन ला कभू संतोस नइं होवय?
JOB 19:23 “कास, मोर गोठमन ला लिखे जातिस, कास, ओमन ला एक किताब म लिखे जातिस,
JOB 19:24 कास, ओमन सीसा म लोहा के कलम ले लिखे जातिन, या हमेसा बर चट्टान के ऊपर खने जातिन!
JOB 19:25 मेंह जानत हंव कि मोला कैद ले छुड़इया ह जीयत हवय, अऊ आखिर म ओह धरती ऊपर ठाढ़ होही।
JOB 19:26 अऊ मोर चमड़ी के नास हो जाय के पाछू घलो, मेंह अपन मांस म होके परमेसर ला देखहूं;
JOB 19:27 मेंह खुद ओला देखहूं अपन खुद के आंखी ले—मेंह देखहूं, आने अऊ कोनो नइं। मोर हिरदय ह भीतरे-भीतर ओकर बहुंत कामना करत हवय।
JOB 19:28 “कहूं तुमन कहत हव, ‘हमन ओला कइसे सताबो, जब समस्या के जरी ओकर ऊपर हवय,’
JOB 19:29 त तुमन ला खुद तलवार ले डरना चाही; काबरकि कोरोध ह तलवार के दुवारा दंड लानही, अऊ तब तुमन जानहू कि नियाय हवय।”
JOB 20:1 तब नामात के रहइया सोपर ह जबाब दीस:
JOB 20:2 “मोर बियाकुल बिचार ह मोला उकसावत हे कि मेंह जबाब दंव काबरकि मेंह बहुंत असांत हंव।
JOB 20:3 मेंह एक डांट सुनेंव, जेकर ले मोर अपमान होथे, अऊ मोर समझ ह जबाब देय बर मोला उकसावत हे।
JOB 20:4 “खचित तेंह जानत हस कि पुराना जमाना ले येह कइसे हवय, याने जब ले धरती के ऊपर मनखे के सिरिस्टी करे गीस,
JOB 20:5 दुस्टमन के खुसी ह थोरकून समय के अय, अऊ भक्तिहीन मनखेमन के आनंद छिन भर के होथे।
JOB 20:6 हालाकि भक्तिहीन मनखे के घमंड ह अकास तक हबरथे अऊ ओकर मुड़ ह बादरमन ला छूथे,
JOB 20:7 पर ओह अपन खुद के संडास सहीं सदाकाल बर नास हो जाही; जऊन मन ओला देखे रिहिन, ओमन पुछहीं, ‘ओह कहां हवय?’
JOB 20:8 सपना कस ओह उड़ जाथे, अऊ फेर कभू नइं मिलय, रात के एक दरसन कस ओह दूरिहा हो जाही।
JOB 20:9 जऊन आंखी ह ओला देखे रिहिस, ओह ओला फेर नइं देखही; ओह अपन जगह म फेर नइं देखे जाही।
JOB 20:10 ओकर लइकामन गरीबमन ले दया के आसा करहीं; ओकर खुद के हांथमन ओकर धन वापिस दीहीं।
JOB 20:11 जऊन जवानी के बल ह ओकर हाड़ामन म भरे रहिथे, ओह ओकर संग धुर्रा म मिल जाही।
JOB 20:12 “हालाकि बुरई ह ओकर मुहूं म मीठ लगथे अऊ ओह ओला अपन जीभ के तरी म लुकाके रखथे,
JOB 20:13 हालाकि ओह ओला छोंड़े बर नइं चाहय अऊ ओला अपन मुहूं म रखे रहिथे,
JOB 20:14 तभो ले ओकर जेवन ह पेट म करू हो जाही; येह ओकर भीतर म सांप के जहर हो जाही।
JOB 20:15 जऊन धन ला ओह लील ले रिहिस, ओह ओला निकाल दीही; परमेसर ह ओला ओकर पेट म ले उल्टी करवा दीही।
JOB 20:16 ओह सांपमन के जहर ला चुहकही; जहरिला सांप के दांतमन ओला मार डारहीं।
JOB 20:17 ओह ओ झरना अऊ नदियामन के आनंद नइं उठा सकही, जेमा मंधरस अऊ दही के धार बोहावत हवय।
JOB 20:18 जेकर बर ओह कठोर मेहनत करिस, ओला बिगर खाय ओह वापिस करही; ओह अपन धंधा ले मिले लाभ के आनंद नइं उठा सकही।
JOB 20:19 काबरकि ओह कंगालमन ऊपर अतियाचार करे हवय अऊ ओमन ला बेसहारा छोंड़ दे हवय; ओह ओ घरमन ला हड़प ले हवय, जऊन ला ओह नइं बनाय रिहिस।
JOB 20:20 “खचित, ओकर लालसा के कभू अन्त नइं होवय; ओह अपन धन के दुवारा अपनआप ला नइं बंचा सकय।
JOB 20:21 खाय बर ओकर लिये कुछू नइं बांचे हवय; ओकर अमीरी ह बने नइं रहय।
JOB 20:22 ओकर धन अऊ सफलता के समय म ओला दुख ह घेर लीही; दुरगति के जम्मो चीज ओकर ऊपर आ पड़ही।
JOB 20:23 जब ओह अपन पेट ला भर चुके होही, तभे परमेसर ह अपन भारी रिस ला ओकर ऊपर देखाही अऊ ओकर ऊपर दुख ही दुख लानही।
JOB 20:24 हालाकि ओह लोहा के हथियार ले बच निकलथे, फेर कांस के बान ह ओला छेद डारथे।
JOB 20:25 ओह ये बान ला तीरके ओकर पीठ ले निकालथे, चिकचिकावत छोर ह ओकर करेजा ले बाहिर निकलथे। ओकर ऊपर आतंक छा जाही;
JOB 20:26 ओकर धन-संपत्ति बर घिटके अंधियार ह बाट जोहथे। बिगर हवा के बरत आगी ह ओला भसम कर दीही अऊ ओकर डेरा म बांचे चीजमन ला नास कर दीही।
JOB 20:27 अकास ह ओकर अपराध ला परगट करही; धरती ह ओकर बिरोध म ठाढ़ होही।
JOB 20:28 पानी के बाढ़ ह ओकर घर ला बोहाके ले जाही, परमेसर के रिस के दिन ओकर पूंजी ह बोहा जाही।
JOB 20:29 परमेसर ह दुस्ट मनखे के हालत अइसने करथे, परमेसर कोति ले ओमन बर ये किसम के उत्तराधिकार ठहिराय गे हवय।”
JOB 21:1 तब अयूब ह जबाब दीस:
JOB 21:2 “मोर गोठ ला धियान देके सुनव; ये किसम ले तुमन मोला सांतवना दे सकत हव।
JOB 21:3 मोर गोठ के पूरा होवत ले धीरज धरव, अऊ जब मेंह गोठिया लेवंव, त फेर मोर हंसी उड़ावव।
JOB 21:4 “का मोर सिकायत कोनो मनखे ले हवय? फेर मेंह अधीर काबर नइं होवंव?
JOB 21:5 मोला देखव अऊ अचम्भो करव; अपन मुहूं ला अपन हांथ ले छबकव।
JOB 21:6 जब में येकर बारे म सोचथंव, त मोर म भय छा जाथे; मोर देहें ह थर-थर कांपे लगथे।
JOB 21:7 दुस्ट मनखेमन काबर जीयत रहिथें, जबकि डोकरा होवत ओमन के ताकत ह बढ़त जाथे?
JOB 21:8 ओमन अपन लइकामन ला अपन चारों कोति बसत देखथें, अऊ ओमन अपन नाती-पोतामन ला अपन आंखी ले बढ़त देखथें।
JOB 21:9 ओमन के घर सुरकछित रहिथे अऊ उहां डर नइं रहय; परमेसर के सजा के छड़ी ओमन ऊपर नइं परय।
JOB 21:10 ओमन के सांड़मन गाभिन करे म कभू नइं चुकंय; ओमन के गायमन बछरू जनमथें अऊ गरभ ला नइं गिरावंय।
JOB 21:11 ओमन अपन लइकामन ला बरदी के रूप म भेजथें; ओमन के छोटे लइकामन नाचथें।
JOB 21:12 ओमन खंजरी अऊ बीना के धुन म गाथें; ओमन बंसी के धुन म खुसी मनाथें।
JOB 21:13 ओमन अपन जिनगी के दिन सम्पन्नता म बिताथें अऊ सांति म मरथें।
JOB 21:14 तभो ले ओमन परमेसर ला कहिथें, ‘हमन ला अकेला छोंड़ दे! हमन तोर रद्दा ला जाने के ईछा नइं रखन।
JOB 21:15 सर्वसक्तिमान कोन ए कि हमन ओकर सेवा करन? ओकर ले पराथना करके हमन ला का मिलही?’
JOB 21:16 पर ओमन के सम्पन्नता ओमन के हांथ म नइं ए, एकरसेति मेंह दुस्टमन के योजना ले दूरिहा रहिथंव।
JOB 21:17 “तभो ले दुस्टमन के दीया ह कतेक बार बुताथे? ओमन ऊपर कतेक बार बिपत्ति पड़थे, परमेसर ह अपन रिस म ओमन ला दुख देथे?
JOB 21:18 ओमन कतेक बार हवा के आघू म भूंसा कस होथें, गरेर के दुवारा उड़ियाय भूंसा कस होथें?
JOB 21:19 ये कहे जाथे, ‘परमेसर ह दुस्टमन के सजा ला ओमन के लइकामन बर कुढ़ोके रखथे।’ ओला दुस्टमन ले बदला लेवन दव, ताकि ओमन खुद अनुभव करंय!
JOB 21:20 ओमन अपनेच आंखी ले अपन बिनास ला देखंय; ओमन सर्वसक्तिमान के कोरोध ला झेलंय।
JOB 21:21 काबरकि ओमन अपन बाद अपन परिवार के का फिकर करथें जब ओमन ला दिये गय समय ह खतम हो जाथे?
JOB 21:22 “का कोनो मनखे परमेसर ला गियान दे सकथे, ये जानत कि ओह सबले बड़े पदवाला के घलो नियाय करथे?
JOB 21:23 एक मनखे अपन पूरा बल सहित मरथे, पूरा सुरकछित अऊ अराम से,
JOB 21:24 अपन देहें ला पुस्ट करके, अऊ हाड़ामन ला मजबूत करके।
JOB 21:25 आने मनखे ह अपन जीव के करूवाहट म मरथे, ओह कभू कोनो बने चीज के आनंद नइं उठावय।
JOB 21:26 एक के बाजू म एक, ओमन धुर्रा म लेटे रहिथें, अऊ कीरामन ओ दूनों ला ढांक लेथें।
JOB 21:27 “मेंह बने करके जानत हंव कि तुमन का सोचत हव, ओ चलाकी, जेकर दुवारा तुमन मोला गलत ठहिराहू।
JOB 21:28 तुमन पुछथव, ‘अब ओ बड़े मनखे के घर कहां हवय, ओ डेरामन जिहां दुस्ट मनखेमन निवास करिन?’
JOB 21:29 का कभू तुमन ओमन ले सवाल करेव, जऊन मन डहार रेंगथें? का तुमन ओमन के लेखा-जोखा ला धियान नइं दे हवव—
JOB 21:30 कि दुस्टमन बिपत्ति के दिन ले बचाय जावत हें, कि ओमन परलय के दिन ले छुटकारा पावत हें?
JOB 21:31 कोन ह ओमन के मुहूं के आघू म ओमन के चालचलन के बुरई करही? ओमन जऊन काम करे हवंय, ओकर बदला कोन लीही?
JOB 21:32 ओमन ला कबर म अमराय जाथे, अऊ ओमन के कबर के रखवारी करे जाथे।
JOB 21:33 घाटी के माटी ह ओमन ला गुरतूर लगथे; हर एक जन ओमन के पाछू-पाछू जाथें, अऊ अनगिनत मनखेमन ओमन के आघू-आघू जाथें।
JOB 21:34 “एकरसेति तुमन अपन बेकार के बात ले मोला कइसे सांतवना दे सकत हव? तुमन के जबाब म लबारी ही लबारी हवय!”
JOB 22:1 तब तेमान के रहइया एलीपज ह जबाब दीस:
JOB 22:2 “का कोनो मनखे ले परमेसर ला फायदा हो सकथे? अऊ त अऊ का कोनो बुद्धिमान मनखे ले ओला फायदा हो सकथे?
JOB 22:3 यदि तेंह धरमी होते, त एकर ले सर्वसक्तिमान ला का खुसी मिलतिस? यदि तोर चालचलन ह निरदोस होतिस, त ओला का फायदा होतिस?
JOB 22:4 “का ओह तोर भक्ति के कारन तोला दबकारथे अऊ तोर बिरोध म दोस लगाथे?
JOB 22:5 का तोर दुस्टता बहुंत नइं हो गे हवय? का तोर पापमन के कोनो अन्त हवय?
JOB 22:6 तेंह बिगर कोनो कारन के अपन रिस्तेदारमन ले सुरकछा मांगय; तेंह मनखेमन के ओनहा ला उतारके ओमन ला नंगरा छोंड़ दे हस।
JOB 22:7 तेंह थके-मांदे मनखे ला पानी नइं पीयाय अऊ भूखा मनखे ला जेवन देय बर इनकार करय,
JOB 22:8 हालाकि तेंह एक सामर्थी मनखे रहय अऊ तोर करा जमीन-बारी रिहिस— एक सम्मानित मनखे के रूप म येमा रहत रहय।
JOB 22:9 अऊ तेंह बिधवामन ला खाली हांथ लहुंटा देय अऊ अनाथमन के बल ला टोर देय।
JOB 22:10 एकरसेति तोर चारों कोति फांदामन हवंय, अऊ बिपत्ति ह अचानक तोला भयभीत करथे,
JOB 22:11 अऊ अइसे अंधियार हवय कि तेंह देख नइं सकस, अऊ पानी के बाढ़ ह तोला बुड़ो देथे।
JOB 22:12 “का परमेसर ह स्वरग के ऊंचई म नइं ए? अऊ ओह देखथे कि तारामन कतेक ऊंच म हवंय!
JOB 22:13 तभो ले तेंह कहिथस, ‘परमेसर ह का जानथे? का ओह अइसने अंधियार म ले नियाय करथे?
JOB 22:14 बादरमन ओकर आघू म परदा डार देथें, जेकर ले ओह हमन ला नइं देखय जब ओह अकास-मंडल म रेंगथे-बुलथे।’
JOB 22:15 का तेंह ओ जुन्ना डहार ला धरे रहिबे जऊन म दुस्ट मनखेमन चलिन?
JOB 22:16 ओमन ला ओमन के समय ले पहिली उठा लिये गीस, ओमन के नीवमन बाढ़ म बोहा गीन।
JOB 22:17 ओमन परमेसर ला कहिन, ‘हमन ला अकेला छोंड़ दे! सर्वसक्तिमान हमर का कर सकथे?’
JOB 22:18 तभो ले ओही ह ओमन के घर ला बढ़िया चीजमन ले भर दीस, एकरसेति मेंह ओ दुस्टमन के योजना ले दूरिहा रहिथंव।
JOB 22:19 धरमीमन ओमन के बिनास ला देखथें अऊ आनंद मनाथें; निरदोस मनखेमन ओमन के ये कहिके हंसी उड़ाथें,
JOB 22:20 ‘खचित, हमर बिरोधीमन नास होवथें अऊ आगी ह ओमन के धन-संपत्ति ला भसम कर देथे।’
JOB 22:21 “अपनआप ला परमेसर ला दे अऊ ओकर संग सांति बनाय रख; ये किसम ले सम्पन्नता तोर करा आही।
JOB 22:22 ओकर निरदेस ला मान अऊ ओकर बात ला अपन हिरदय म रख।
JOB 22:23 कहूं तेंह सर्वसक्तिमान करा लहुंटके आबे, त तेंह पहिली के सहीं हो जाबे: कहूं तेंह अपन डेरा ले दुस्टता के काम ला हटा देबे
JOB 22:24 अऊ अपन सोन, धुर्रा ला, अऊ ओपीर के सोन ला घाटी के पथरामन ला दे देबे,
JOB 22:25 त सर्वसक्तिमान ह तोर बर सोन, अऊ उत्तम चांदी होही।
JOB 22:26 खचित, तब तें सर्वसक्तिमान म खुसी पाबे अऊ अपन चेहरा परमेसर कोति उठाबे।
JOB 22:27 तेंह ओकर ले पराथना करबे, अऊ ओह तोर सुनही, अऊ तेंह अपन मन्नत ला पूरा करबे।
JOB 22:28 जऊन कुछू करे बर तेंह ठान लेबे, ओह तोर बर पूरा हो जाही, अऊ तोर डहार म अंजोर रहिही।
JOB 22:29 जब मनखेमन के बेजत्ती करे जाथे अऊ तेंह कहिथस, ‘ओमन के आदर करव!’ तब ओह दीन-हीन मनखेमन ला बचाही।
JOB 22:30 अऊ त अऊ जऊन ह निरदोस नो हय, ओह ओला घलो छोंड़ाही, ओला ओह तोर हांथ के सुध काम के जरिये छोंड़ाही।”
JOB 23:1 तब अयूब ह जबाब दीस:
JOB 23:2 “आज घलो मोर सिकायत ह करू अय; मोर कलहरई के बावजूद ओकर हांथ ह मोर ऊपर भारी हवय।
JOB 23:3 कहूं मेंह सिरिप ये जानतेंव कि ओह कहां मिलही; कहूं मेंह सिरिप ओकर निवास करा जा सकतेंव!
JOB 23:4 मेंह अपन मामला ओकर आघू म रखतेंव अऊ बहुंत बहस करतेंव।
JOB 23:5 मेंह पता लगातेंव कि ओह मोला का जबाब देतिस, अऊ जऊन कुछू ओह मोर ले कहितिस, ओकर ऊपर बिचार करतेंव।
JOB 23:6 का ओह अपन पूरा बल ले मोर संग बहस करही? नइं, ओह मोर बिरोध म दोस नइं लगाही।
JOB 23:7 उहां ईमानदार मनखे ह ओकर आघू म अपन निरदोस होय के बात ला साबित कर सकथे, अऊ उहां मेंह अपन नियाय करइया ले हमेसा बर छुटकारा पा लेतेंव।
JOB 23:8 “पर कहूं मेंह पूरब दिग म जावंव, त ओह उहां नइं ए; कहूं मेंह पछिम दिग म जावंव, त ओह मोला नइं मिलय।
JOB 23:9 जब ओह उत्तर दिग म काम करत रहिथे, त मेंह ओला नइं देखंव; जब ओह दक्खिन कोति मुड़थे, त मेंह ओकर झलक घलो नइं देख पावंव।
JOB 23:10 पर ओह जानथे कि मेंह कते रद्दा म जावत हंव; जब ओह मोला परखही, त मेंह सोन कस निकलहूं।
JOB 23:11 मेंह बहुंत नजदीकी ले ओकर पाछू म चले हंव; मेंह बिगर एती-ओती जाय ओकर रद्दा ला धरे हंव।
JOB 23:12 मेंह ओकर दिये मुहूं के हुकूम ले नइं हटे हंव; मेंह ओकर मुहूं के गोठमन ला अपन रोज के जेवन ले घलो जादा अनमोल जानत हंव।
JOB 23:13 “पर ओह अपन बात म अडिग रहिथे, अऊ कोन ह ओकर बिरोध कर सकथे? जऊन बात ओला बने लगथे, ओही ला ओह करथे।
JOB 23:14 ओह मोर बिरोध म अपन फैसला लेथे, अऊ अइसने कतको योजना ओकर करा माढ़े हवय।
JOB 23:15 येकरे कारन मेंह ओकर आघू म भयभीत हंव; जब में ये जम्मो के बारे म सोचथंव, त मेंह ओकर ले डरथंव।
JOB 23:16 परमेसर ह मोर मन ला हतास कर दे हवय; सर्वसक्तिमान ह मोला भयभीत कर दे हवय।
JOB 23:17 तभो ले मेंह अंधियार के कारन चुप नइं अंव, ओ गहिरा अंधियार जऊन ह मोर चेहरा ऊपर छाय हवय।
JOB 24:1 “सर्वसक्तिमान परमेसर ह नियाय के समय ला काबर नइं ठहिरात हे? जऊन मन ओला जानथें, ओमन काबर बेकार म अइसने दिन बर अगोरंय?
JOB 24:2 कुछू मनखेमन भुइयां के सिवाना ला बढ़ा देथें; ओमन चोराय भेड़मन के झुंड ला चराथें।
JOB 24:3 ओमन अनाथमन के गदहा ला खेदके ले जाथें अऊ बिधवा के बईला ला गिरवी म रखथें।
JOB 24:4 ओमन जरूरतमंद मनखे ला रद्दा ले ढकेल देथें अऊ देस के जम्मो गरीबमन ला छुपे बर बिबस कर देथें।
JOB 24:5 सुन्ना जगह म जंगली गदहामन कस, गरीबमन जेवन के खोज म भटकत रहिथें; सुन्ना जगह ले ओमन के लइकामन ला जेवन मिलथे।
JOB 24:6 ओमन खेत म फसल संकेलथें अऊ दुस्टमन के अंगूर के बारी म सीला बिनथें।
JOB 24:7 ओमन बिगर ओनहा के नंगरा रथिया बिताथें; जाड़ म ओढ़े बर ओमन करा कुछू नइं रहय।
JOB 24:8 ओमन परबत के बरसा ले भीग जाथें अऊ सरन लेय के जगह नइं मिले के कारन ओमन चट्टान म सरन लेथें।
JOB 24:9 अनाथ लइका ला दूध पीयावत दाई के छाती ले छीन लेथें; गरीब के नानकून लइका ला लागा बर धर लिये जाथे।
JOB 24:10 ओनहा के कमी के कारन, ओमन नंगरा रहिथें; ओमन अनाज के करपा ला तो ले जाथें, तभो ले भूखन रहिथें।
JOB 24:11 ओमन चबूतरामन म जैतून तेल पेरथें; ओमन अंगूर के रसकुंडमन म अंगूर ला खुंदथें, तभो ले पीयासन रहिथें।
JOB 24:12 सहर ले मरइयामन के कलहरई ह सुनई देथे, अऊ घायलमन के आतमा ह मदद बर पुकारथे। पर परमेसर ह कोनो ला गलती के दोस नइं देवय।
JOB 24:13 “अइसने मनखे हवंय, जऊन मन अंजोर के बिरोध म बिदरोह करथें, ओमन येकर रद्दा ला नइं जानंय, या येकर रद्दा म नइं रूकंय।
JOB 24:14 जब दिन के अंजोर ह चले जाथे, त हतियारा ह ठाढ़ होथे, अऊ गरीब अऊ जरूरतमंद ला मार डारथे, अऊ रथिया ओह चोर कस चोरी करथे।
JOB 24:15 बेभिचार करइया के आंखी ह संझाती के डहार देखथे; ओह सोचथे, ‘मोला कोनो नइं देखहीं,’ अऊ ओह अपन चेहरा ला छुपाके रखथे।
JOB 24:16 अंधियार म चोरमन घर म सेंध लगाथें, पर दिन म अपनआप ला लुकाय रखथें; अंजोर म ओमन कुछू करे बर नइं चाहंय।
JOB 24:17 ओ जम्मो बर, आधा रथिया ह ओमन के बिहनियां ए; ओमन अंधियार के आतंक ला संगी बनाथें।
JOB 24:18 “तभो ले ओमन पानी के ऊपर झाग सहीं अंय; ओमन के बांटा के भुइयां ह सरापित ए, जेकर ले अंगूर के बारीमन म कोनो नइं जावंय।
JOB 24:19 जइसे कि गरमी अऊ सूखा ह पिघलत बरफ के पानी ला ले जाथे, वइसनेच ही कबर ह ओमन ला ले जाथे जऊन मन पाप करे हवंय।
JOB 24:20 दाई ह ओमन ला भुला जाथे, कीरामन ओमन ला मजा लेके खाथें; दुस्टमन ला कोनो सुरता नइं करंय पर ओमन ला रूख कस काट डारे जाथे।
JOB 24:21 ओमन ठड़गी अऊ बिगर लइका के माईलोगनमन ला लूटथें, अऊ बिधवामन ऊपर कुछू दया नइं देखावंय।
JOB 24:22 पर परमेसर ह अपन सामर्थ ले सूरबीरमन ला घिल्लावत ले जाथे; हालाकि ओमन स्थापित रहिथें, पर ओमन ला जिनगी के भरोसा नइं रहय।
JOB 24:23 परमेसर ह ओमन ला सुरकछा के अनुभव म अराम करा सकथे, पर ओकर आंखी ह ओमन के रद्दा ऊपर लगे रहिथे।
JOB 24:24 ओमन थोरकून समय बर ऊपर उठाय जाथें, अऊ ओकर बाद ओमन के कुछू महत्व नइं रहय; ओमन ला गिराय जाथे अऊ जम्मो आने मन कस संकेले जाथे; ओमन ला अनाज के बालीमन कस काट डारे जाथे।
JOB 24:25 “कहूं येह अइसे नो हय, त कोन ह मोला गलत साबित कर सकथे अऊ मोर गोठ ला बिना मतलब के ठहिरा सकथे?”
JOB 25:1 तब सूही के रहइया बिलदद ह जबाब दीस:
JOB 25:2 “परभूता अऊ भय के अधिकारी परमेसर ही अय; ओह ऊंच स्वरग म सांति स्थापित करथे।
JOB 25:3 का ओकर सेनामन के गनती करे जा सकथे? अइसे कोन हवय, जेकर ऊपर ओकर अंजोर नइं परय?
JOB 25:4 तब एक मरनहार मनखे ह परमेसर के आघू म कइसे धरमी हो सकथे? माईलोगन ले जनमे मनखे ह कइसे सुध हो सकथे?
JOB 25:5 कहूं ओकर नजर म चंदा ह घलो उजला अऊ तारामन घलो ओकर नजर म सुध नइं अंय,
JOB 25:6 त फेर मरनहार मनखे के का गनती, जऊन ह सिरिप एक गेंगरूआ अय— एक मनखे, जऊन ह सिरिप एक कीरा अय!”
JOB 26:1 तब अयूब ह जबाब दीस:
JOB 26:2 “तेंह कइसे निरबलमन के मदद करे हवस! तेंह कइसे ओ मनखे ला संभाले हस, जऊन ह कमजोर हवय!
JOB 26:3 तेंह ओ मनखे ला का सलाह दे हवस, जेकर करा बुद्धि नइं ए! अऊ तेंह का अंतर-गियान देखाय हवस!
JOB 26:4 कोन ह तोला ये गोठ कहे बर मदद करे हवय? अऊ काकर आतमा ह तोर मुहूं ले गोठियाईस?
JOB 26:5 “मरे मनखेमन बहुंत पीरा म हवंय, ओमन, जऊन मन पानी के खाल्हे अऊ ओ जम्मो, जऊन मन ओमा रहिथंय।
JOB 26:6 अधोलोक ह परमेसर के आघू म खुला हवय; बिनास ह नइं तोपाय हवय।
JOB 26:7 ओह उत्तर दिग के अकासमन ला खाली जगह म बगराथे; ओह धरती ला अधर म लटकाय हवय।
JOB 26:8 ओह बारिस के पानी ला अपन बादर म लपेटे हवय, तभो ले बादरमन ओमन के बोझ म होके बरसंय नइं।
JOB 26:9 ओह पून्नी के चंदा ला ढांप देथे, ओकर ऊपर अपन बादरमन ला बगराय के दुवारा।
JOB 26:10 अंजोर अऊ अंधियार के बीच म सिवाना बांधे बर ओह समुंदर के सतह म छितिज ला ठहिराय हवय।
JOB 26:11 ओकर दबकारे ले अकास के खंभामन डरके थर-थर कांपथें।
JOB 26:12 अपन सामर्थ ले ओह समुंदर ला सांत कर देथे; अपन बुद्धि ले ओह राहाब ला कुटा-कुटा कर देथे।
JOB 26:13 ओकर सांस ले अकास-मंडल साफ हो जाथे; ओकर हांथ ह भागत सांप ला मार देथे।
JOB 26:14 अऊ येमन तो ओकर काम के सिरिप एक झलक अंय; ओकर फुसफुसाहट हमन ला कतेक कम सुनई देथे! त फेर ओकर सामर्थ के गरजन ला कोन ह समझ सकथे?”
JOB 27:1 अऊ अयूब ह अपन बात ला आगे कहिस:
JOB 27:2 “जीयत परमेसर के किरिया, जऊन ह मोला नियाय नइं दे हवय, ओ सर्वसक्तिमान, जऊन ह मोर जिनगी ला करू कर दे हवय,
JOB 27:3 जब तक मोर म परान हवय, परमेसर के सांस ह मोर नाक म चलत हवय,
JOB 27:4 तब तक मेंह मोर मुहूं ले कोनो खराप बात नइं गोठियावंव, अऊ मोर जीभ ले लबारी बात नइं निकलय।
JOB 27:5 मेंह कभू नइं मानंव कि तुमन सही अव; मेंह अपन मरत ले अपन ईमानदारी नइं छोड़ंव।
JOB 27:6 मेंह अपन धरमीपन ला बनाय रखहूं अऊ एकर ले बाहिर नइं जावंव; जब तक मेंह जीयत हंव मोर बिबेक ह मोला नइं धिक्कारय।
JOB 27:7 “मोर बईरी ह दुस्ट मनखे कस, अऊ मोर बिरोधी ह अनियायी कस ठहिरय!
JOB 27:8 जब भक्तिहीन मनखेमन मर जाथें, त ओमन करा का आसा रहिथे, याने कि जब परमेसर ह ओमन के परान ला ले लेथे?
JOB 27:9 जब ओमन ऊपर संकट आथे, त का परमेसर ह ओमन के गोहार ला सुनथे?
JOB 27:10 का ओमन ला सर्वसक्तिमान म खुसी मिलही? का ओमन परमेसर ला हर समय गोहारहीं?
JOB 27:11 “मेंह तुमन ला परमेसर के सामर्थ के बारे म सिखाहूं; सर्वसक्तिमान के रद्दा ला मेंह नइं छुपावंव।
JOB 27:12 तुमन जम्मो ये बात ला देख डारे हव। त फेर ये बेकार के बात काबर करत हव?
JOB 27:13 “दुस्ट मनखे के बांटा म परमेसर ह ये चीज देथे, निरदयी मनखे ला सर्वसक्तिमान ले पुरखा के ये पूंजी मिलथे:
JOB 27:14 चाहे ओकर कतको लइका रहंय, ओमन तलवार ले घात करे जाहीं; ओकर संतानमन ला कभू पेट भर जेवन नइं मिलय।
JOB 27:15 ओकर जऊन मनखेमन बांच जाहीं, ओमन महामारी ले मर जाहीं, अऊ ओमन के बिधवामन ओमन बर नइं रोहीं।
JOB 27:16 हालाकि ओह चांदी ला धुर्रा कस कुढ़ोथे अऊ ओनहा ला माटी कस ढेर लगाथे,
JOB 27:17 पर जऊन ओनहा के ढेर ओह लगाथे, ओला धरमी मनखे ह पहिरही, अऊ निरदोस मनखेमन ओकर चांदी ला बांट लीहीं।
JOB 27:18 जऊन घर ओह बनाथे, ओह कीरा के घरौंदा कस अय, या ओह रखवार के बनाय एक झोपड़ी कस अय।
JOB 27:19 ओह धनी होके सुतथे, पर अब अइसने नइं कर सकही; जब ओह सुतके उठथे, त जम्मो ह खतम हो गे रहिथे।
JOB 27:20 आतंक ह ओला बाढ़ कस घेर लेथे; गरेर ह ओला रथिया उड़िया ले जाथे।
JOB 27:21 पुरवई हवा ह ओला उड़िया ले जाथे, अऊ ओह नइं रहय; येह ओला ओकर घर ले झपटके ले जाथे।
JOB 27:22 ओ हवा ह बिगर दया के ओला ओकर बिरूध उठाके फटिकथे; ओह ओ हवा के सक्ति ले तेजी से भागथे।
JOB 27:23 येह हंसी उड़ाय सहीं ताली बजाथे अऊ फुफकारके ओला ओकर जगह ले हटा देथे।”
JOB 28:1 चांदी ह खदान म मिलथे अऊ सोन ला सुध करे बर एक जगह होथे।
JOB 28:2 माटी म ले लोहा निकाले जाथे, अऊ तांबा ह धातु ला गलाय ले मिलथे।
JOB 28:3 मरनहार मनखेमन अंधियार के अन्त कर देथें; ओमन बहुंत दूर तक कोना-कोना म घोर अंधियार म धातु के खोज करथें।
JOB 28:4 मनखेमन के बसेरा ले बहुंत दूरिहा ओमन खदान खनथें, जिहां मनखेमन के गोड़ घलो नइं परे रहय; आने मनखेमन ले बहुंत दूर ओमन ओरमे अऊ झूलत रहिथें।
JOB 28:5 धरती, जिहां ले फसल आथे, ओकर खाल्हे के रूप ह आगी के दुवारा बदलत हवय।
JOB 28:6 येकर चट्टानमन म ले नीलमनि, अऊ येकर धुर्रा म सोन के कन पाय जाथे।
JOB 28:7 ओ छुपे रद्दा ला कोनो सिकार करइया चिरई नइं जानय, येकर ऊपर कोनो बाज चिरई के आंखी नइं परे हवय।
JOB 28:8 येमा जंगली पसुमन अपन गोड़ नइं रखंय, अऊ कोनो सेर उहां छुपके घलो नइं जावय।
JOB 28:9 मनखेमन कठोर चट्टान ऊपर अपन हांथ ले ठोकर मारथें अऊ पहाड़मन के नीव ला उखानके हटा देथें।
JOB 28:10 ओमन चट्टान म ले सुरंग निकाल लेथें; ओमन के आंखी ह येकर खजाना ला देखथे।
JOB 28:11 ओमन नदीमन के सोतमन ला खोजथें अऊ छुपे चीजमन ला सब के आघू म लानथें।
JOB 28:12 पर बुद्धि ह कहां मिल सकथे? ओ जगह कहां हवय, जिहां समझ ह रहिथे।
JOB 28:13 कोनो मरनहार मनखे येकर कीमत नइं जान सकय; येह जीयत परानीमन के लोक म नइं मिलय।
JOB 28:14 समुंदर के गहरई ह कहिथे, “बुद्धि ह मोर म नइं ए”; समुंदर ह कहिथे, “बुद्धि ह मोर करा नइं ए।”
JOB 28:15 चोखा सोन ले येला बिसाय नइं जा सकय, अऊ न ही येकर कीमत बर चांदी ला तऊले जा सकथे।
JOB 28:16 येला ओपीर के सोन ले बिसाय नइं जा सकय, येला कीमती गोमेदक या नीलमनि ले घलो बिसाय नइं जा सकय।
JOB 28:17 न सोन, न कांच के तुलना येकर संग करे जा सकथे, न ही सोन के जेवर के बलदा म येह मिल सकथे।
JOB 28:18 मूंगा अऊ मनि के येकर आघू म चरचा करई ह बेकार अय; बुद्धि के कीमत ह मानिक ले घलो बढ़के अय।
JOB 28:19 कूस के पुखराज के तुलना येकर संग करे नइं जा सकय; येला चोखा सोन ले बिसाय नइं जा सकय।
JOB 28:20 त फेर बुद्धि ह कहां ले आथे? समझ ह कहां रहिथे?
JOB 28:21 येह हर एक जीयत चीज के आंखी ले छुपे हवय, अऊ त अऊ अकास के चिरईमन के आंखी घलो येला नइं देख सकंय।
JOB 28:22 बिनास अऊ मिरतू कहिथें, “सिरिप येकर अफवाह ला हमन सुने हवन।”
JOB 28:23 परमेसर ह येकर रद्दा ला समझथे अऊ सिरिप ओही ह येकर रहे के जगह ला जानथे,
JOB 28:24 काबरकि ओह धरती के छोर तक नजर रखथे अऊ अकास के खाल्हे के हर एक चीज ला देखथे।
JOB 28:25 जब ओह हवा के ताकत ला स्थापित करिस अऊ पानी ला नापिस,
JOB 28:26 जब ओह बरसा होय के नियम अऊ बादर के गरजन के रद्दा ठहिराईस,
JOB 28:27 तब ओह बुद्धि ला देखिस अऊ येकर दाम आंकिस; ओह येकर पुस्टि करिस अऊ येला जांचिस।
JOB 28:28 अऊ परमेसर ह मनखे-जात ला कहिस, “परभू के भय मनई ह बुद्धि अय, अऊ बुरई ले दूरिहा रहई ह समझ अय।”
JOB 29:1 अयूब ह अपन बात ला आगे कहिस:
JOB 29:2 “कास मोर स्थिति ह पहिली के महिनामन सहीं हो जातिस, ओ दिनमन म, जब परमेसर ह मोर देखभाल करत रिहिस,
JOB 29:3 जब ओकर दीया के अंजोर ह मोर मुड़ म परत रिहिस अऊ ओकर अंजोर के जरिये मेंह अंधियार म रेंगत रहेंव!
JOB 29:4 ओ दिनमन मोर बढ़िया दिन रिहिन, जब परमेसर के संग घनिस्ट संगी के रिस्ता ह मोर घर ला आसीस देवत रिहिस,
JOB 29:5 जब सर्वसक्तिमान ह मोर संग म रिहिस अऊ मोर लइकामन मोर चारों कोति रिहिन,
JOB 29:6 जब मोर रसता ह मलाई ले गीला होवत रिहिस अऊ चट्टानमन मोर बर जैतून के तेल के धारा बहात रिहिन।
JOB 29:7 “जब मेंह सहर के कपाट करा जावंव अऊ खुला चऊक म अपन आसन म बईठंव,
JOB 29:8 त जवानमन मोला देखके डहार छोंड़ देवंय अऊ डोकरामन आदर म उठके ठाढ़ हो जावंय;
JOB 29:9 मुखिया मनखेमन अपन गोठियाई बंद कर देवंय अऊ अपन हांथ ले अपन मुहूं ला ढंक लेवंय;
JOB 29:10 आदरनीय मनखेमन चुप हो जावंय, अऊ ओमन के जीभ ह ओमन के तालू म चपक जावय।
JOB 29:11 जऊन कोनो मोर बात ला सुनय, ओह मोला बने कहय, अऊ जऊन मन मोला देखंय, ओमन मोर बड़ई करंय,
JOB 29:12 काबरकि मेंह मदद मंगइया गरीब अऊ ओ अनाथ लइकामन, जेमन के मदद करइया कोनो नइं रहंय, ओमन ला छोंड़ावंव।
JOB 29:13 मिरतू के खटिया म परे मनखे ह मोला आसीरबाद देवय; मोर कारन बिधवामन अपन हिरदय ले आनंद के गीत गावंय।
JOB 29:14 मेंह धरमीपन ला कपड़ा सहीं पहिर ले रहेंव; नियाय ह मोर ओनहा अऊ मोर पागा रिहिस।
JOB 29:15 मेंह अंधरामन बर आंखी अऊ खोरवामन बर गोड़ रहेंव।
JOB 29:16 में जरूरतमंद बर ददा सहीं रहेंव; मेंह अनचिनहार मनखे के मामला ला निपटावंव।
JOB 29:17 मेंह दुस्टमन के दांत ला टोरंव अऊ पीड़ित मनखे ला ओमन के पकड़ ले छोंड़ावंव।
JOB 29:18 “मेंह सोचेंव, ‘में अपन घर म ही मरहूं, मोर जिनगी के दिनमन बालू कस अनगिनत होहीं।
JOB 29:19 मोर जरी ह पानी तक हबरही, अऊ ओस ह रात भर मोर डारामन म रहिही।
JOB 29:20 मोर महिमा ह नइं मुरझाही; धनुस ह मोर हांथ म हमेसा नवां बने रहिही।’
JOB 29:21 “मनखेमन मोर बात ला मन लगाके सुनंय, अऊ चुपेचाप मोर सलाह के इंतजार करंय।
JOB 29:22 मोर गोठियाय के बाद ओमन अऊ नइं गोठियांय; मोर गोठ ह ओमन के कान म सरलता से उतर जावय।
JOB 29:23 ओमन बारिस के सहीं मोर बाट जोहंय अऊ बसंतकाल के बरसा सहीं मोर गोठ ला गरहन करंय।
JOB 29:24 जब मेंह ओमन ऊपर मुस्करावंव, त ओमन मुसकुल से येला बिसवास करंय; मोर चेहरा के अंजोर ह ओमन बर कीमती रिहिस।
JOB 29:25 मेंह ओमन बर रसता चुनेंव अऊ ओमन के मुखिया के रूप म बईठेंव; मेंह ओकर सेना के बीच म राजा सहीं रहत रहेंव; मेंह सोक करइयामन ला सांति देवइया सहीं रहेंव।
JOB 30:1 “पर अब ओमन ही मोर हंसी उड़ाथें, ओ मनखे जऊन मन उमर म मोर ले छोटे हवंय, जऊन मन के ददामन ला मेंह अपन भेड़मन के रखवार कुकुरमन संग रखे के लईक घलो नइं समझत रहेंव।
JOB 30:2 ओमन के भुजा के बल ह मोर का काम के रिहिस, जब ओमन के ताकत ह खतम हो गे रिहिस?
JOB 30:3 गरीबी अऊ भूख ले दुबर-पातर, ओमन बीरान अऊ बेकार पड़े भुइयां म रथिया के बेरा भटकत रिहिन।
JOB 30:4 ओमन झाड़ी के बीच म लोनिया साग टोरिन, अऊ ओमन के जेवन, बहरी बनाय के झाड़ी के जरी रिहिस।
JOB 30:5 ओमन ला समाज ले निकाल देय गे रिहिस, मनखेमन ओमन ऊपर अइसे चिचियावंय, जइसे चोर ऊपर चिचियाथें।
JOB 30:6 ओमन ला डरावनी घाटीमन म, चट्टानमन के बीच म अऊ भुइयां के बिलमन म रहे ला परय।
JOB 30:7 ओमन झाड़ीमन के बीच म पसु सहीं चिचियावंय अऊ रूख के खाल्हे उगे झाड़ीमन म भीड़ लगावंय।
JOB 30:8 ओमन नीच अऊ अनामी संतान रिहिन, जेमन ला देस ले निकाल देय जावय।
JOB 30:9 “अब ओ जवानमन गीत गाके मोर हंसी उड़ाथें; मेंह ओमन के बीच म एक नारा बन गे हवंव।
JOB 30:10 ओमन मोर ले घिन करथें अऊ मोर ले दूरिहा रहिथें; ओमन मोर मुहूं ऊपर थूके म संकोच नइं करंय।
JOB 30:11 काबरकि परमेसर ह मोला सक्तिहीन कर दे हवय अऊ मोला पीरा दे हवय, ओमन मोर आघू म बिगर लगाम के हो जाथंय।
JOB 30:12 मोर जेवनी कोति बरदी के बरदी चढ़ई करथें; ओमन मोर गोड़ बर फांदा लगाथें, ओमन मोर बिरोध म अपन घेराबंदी के ढलान बनाथें।
JOB 30:13 ओमन मोर डहार ला काटके बंद कर देथें; ओमन मोला नास करे म सफल होथें। ओमन कहिथें, ‘ओकर मदद कोनो झन करंय।’
JOB 30:14 दरार म ले बुलकके आय सहीं ओमन आघू बढ़थें; बिनास के बीच म ओमन उंडलत आथें।
JOB 30:15 आतंक ह मोर ऊपर छा गे हवय; मोर मान-सम्मान ह हवा कस उड़िया गे हवय, मोर सुरकछा ह बादर कस गायब हो गे हवय।
JOB 30:16 “अब मोर जिनगी ह घटत हवय; दुख के दिनमन मोला जकड़ ले हवंय।
JOB 30:17 रथिया ह मोर हाड़ामन ला भेद देथे; मोर अब्बड़ पीरा ह कभू बंद नइं होवय।
JOB 30:18 परमेसर ह अपन बड़े सामर्थ म मोर ओनहा ला पकड़थे; ओह मोर कुरता के कालर कस मोला लपेटथे।
JOB 30:19 ओह मोला चीखला म फटिकथे, अऊ मेंह धुर्रा अऊ राख कस हो गे हंव।
JOB 30:20 “हे परमेसर, में तोला पुकारथंव, पर तेंह जबाब नइं देवस; मेंह ठाढ़ होथंव, पर तेंह सिरिप मोला देखथस।
JOB 30:21 तें मोर बर कठोर हो गे हस; अपन भुजा के बल ले मोला सताथस।
JOB 30:22 तेंह मोला उठाके हवा म उड़िया देथस; तेंह मोला आंधी म उछाल देथस।
JOB 30:23 मेंह जानत हंव तेंह मोला मिरतू करा ले आबे, ओ जगह जऊन ह जम्मो जीयत परानीमन बर ठहिराय गे हवय।
JOB 30:24 “खचित कोनो टूटे मनखे कोति हांथ नइं बढ़ावय जब ओह अपन बिपत्ति के समय मदद बर गोहारथे।
JOB 30:25 का मेंह ओमन बर नइं रोयेंव, जऊन मन समस्या म रिहिन? का गरीबमन बर मोर आतमा ह दुखी नइं होईस?
JOB 30:26 तभो ले जब मेंह भलई के आसा करेंव, त बुरई ह आईस; जब मेंह अंजोर के बाट जोहत रहेंव, त अंधियार आईस।
JOB 30:27 मोर भीतर म उथल-पुथल कभू बंद नइं होवय; दुख के दिनमन मोर ऊपर आ गे हवंय।
JOB 30:28 मेंह करिया होवत हंव, पर सूरज के दुवारा नइं; मेंह सभा म ठाढ़ होके मदद बर गोहारथंव।
JOB 30:29 मेंह गीदड़मन के भाई, अऊ उल्लू चिरईमन के संगी बन गे हवंव।
JOB 30:30 मोर चमड़ी ह करिया होके गिरत हवय; मोर देहें ह जर-बुखार म जरत हवय।
JOB 30:31 मोर बीना ले बिलाप के सुर, अऊ मोर बंसी ले रोये के अवाज निकलत हवय।
JOB 31:1 “मेंह अपन आंखीमन के संग करार करे हंव कि मेंह कोनो जवान माईलोगन ला लालसा ले नइं देखंव।
JOB 31:2 स्वरग ले परमेसर के दुवारा हमन ला का बांटा मिले हे, या ऊंच म बिराजे सर्वसक्तिमान ले हमन ला मिले संपत्ति का ए?
JOB 31:3 का येह दुस्टमन बर बिनास, अऊ गलत करइयामन बर बिपत्ति नो हय?
JOB 31:4 का परमेसर ह मोर चालचलन ला नइं देखय अऊ मोर कदम-कदम ला नइं गनय?
JOB 31:5 “कहूं मेंह लबारी आचरन करे हंव या मोर गोड़ ह धोखा देय बर दऊड़े हे—
JOB 31:6 त परमेसर ह मोला सच के तराजू म तऊल लेवय अऊ ओह जान लेवय कि मेंह निरदोस अंव—
JOB 31:7 कहूं मोर कदम ह ओकर डहार ले भटक गे हवय, कहूं मोर मन ह मोर आंखी के मुताबिक चले हवय, या कहूं मोर हांथमन असुध हो गे हवंय,
JOB 31:8 त जऊन कुछू मेंह बोये हंव, ओला आने मन खावंय, अऊ मोर फसल ला उखान दिये जावय।
JOB 31:9 “कहूं मोर मन ह कोनो माईलोगन के दुवारा बहकाय गे हे, या कहूं मेंह अपन परोसी के मुंहटा म घात लगाके बईठे हंव,
JOB 31:10 त मोर घरवाली ह आने आदमी के अनाज पीसय, अऊ आने आदमीमन ओकर संग सुतंय।
JOB 31:11 काबरकि ओह दुस्ट काम होतिस, अऊ नियायधीस के दुवारा पाप के दंड मिलतिस।
JOB 31:12 येह एक आगी ए, जऊन ह जलाके भसम कर देथे; येह मोर कटनी के फसल ला जरी ले उखान देतिस।
JOB 31:13 “कहूं मेंह अपन कोनो सेवक के संग अनियाय करे हंव, चाहे दास हो या दासी, जब ओमन मोर बिरोध म मोर करा सिकायत करिन,
JOB 31:14 तब में का करहूं, जब परमेसर ह मोर ले जबाब मांगही? मेंह का जबाब दूहूं, जब ओह मोर ले लेखा लीही?
JOB 31:15 जऊन ह मोला दाई के गरभ म बनाईस, का ओहीच ह ओमन ला नइं बनाईस? का ओही ह हमन दूनों ला हमर दाईमन के गरभ म नइं रचिस?
JOB 31:16 “कहूं मेंह गरीबमन के ईछा ला पूरा नइं करे हंव या मोर कारन बिधवामन म निरासा छा गीस,
JOB 31:17 कहूं मेंह खाना खाय म सुवारथी हो गे हंव, अऊ खाना ला अनाथमन संग नइं बांटे हंव—
JOB 31:18 पर में तो ओमन ला अपन जवानी ले अइसे पालें-पोसें, जइसे एक ददा ह करथे, अऊ मेंह अपन लइकापन ले ही बिधवा ला रसता देखावत हंव—
JOB 31:19 कहूं मेंह कोनो ला ओनहा के कमी के कारन नास होवत देखेंव, या कोनो जरूरतमंद ला बिगर ओनहा के देखेंव,
JOB 31:20 त ओमन ला मेंह अपन भेड़ के ऊन ले गरम रखे के कारन ओमन मोला हिरदय ले आसीरबाद नइं दे हवंय,
JOB 31:21 कहूं मेंह अनाथमन ऊपर अपन हांथ उठाय हंव, ये जानके कि अदालत म मोर पहुंच हवय,
JOB 31:22 त मोर बाहां ह कंधा ले उखनके गिर जावय, येह कोहनी ले टूटके अलग हो जावय।
JOB 31:23 काबरकि मेंह परमेसर कोति ले अवइया बिनास ले डरेंव, अऊ ओकर सोभा के डर के कारन मेंह अइसे नइं कर सकेंव।
JOB 31:24 “कहूं मेंह अपन भरोसा सोन ऊपर रखे हंव या चोखा सोन ले कहे हंव, ‘तेंह मोर आसरा अस,’
JOB 31:25 कहूं मेंह अपन बहुंत धन, या अपन हांथ के बहुंत कमई ऊपर आनंद मनाय हंव,
JOB 31:26 कहूं मेंह सूरज के चमकई, या चंदा ला सोभा म चलत देखेंव,
JOB 31:27 ताकि मोर मन ह मोहा गीस अऊ ओमन के भक्ति म मोर हांथ के चूमा लेय हंव,
JOB 31:28 त ये पापमन के घलो दंड मिलतिस, काबरकि तब मेंह ऊपर म बिराजे परमेसर के इनकार करे रहितेंव।
JOB 31:29 “कहूं मेंह अपन बईरी के दुरभाग्य म आनंद मनाय हंव या ओकर ऊपर आय बिपत्ति ला देखके खुस होय हंव—
JOB 31:30 मेंह ओमन ला मरे के सराप देय के दुवारा अपन मुहूं ले पाप नइं करे हंव—
JOB 31:31 कहूं मोर घर म रहइया मनखेमन ये कभू नइं कहे हवंय, ‘कोन ह अयूब के इहां खाके संतोस नइं होईस?’—
JOB 31:32 पर कोनो अजनबी ला गली म रथिया बिताना नइं परिस, काबरकि मोर घर के मुंहटा ह बटोहीमन बर हमेसा खुला रिहिस—
JOB 31:33 अपन मन म अपन अपराध ला छुपाय के दुवारा कहूं मेंह आने मनखेमन सहीं अपन पाप ला छुपाय हंव,
JOB 31:34 काबरकि मोला मनखेमन के भीड़ ले डर लगिस अऊ अपन कुल के अपमान ले अइसे डर गेंव कि मेंह चुप रहेंव अऊ घर ले बाहिर नइं निकलेंव—
JOB 31:35 (“आह, कि कोनो तो मोर बात के सुनइया रिहिस! मेंह अब अपन बचाव के दसखत करत हंव—सर्वसक्तिमान ह मोला जबाब देवय; मोर ऊपर दोस लगइया ह मोर दोस ला लिखित म देवय।
JOB 31:36 खचित मेंह येला अपन खांध म उठाहूं, मेंह येला मुकुट कस पहिरहूं।
JOB 31:37 मेंह ओला अपन हर कदम के हिसाब दूहूं; जइसे सासन करइया के आघू म मामला रखथें, वइसे मेंह येला ओकर आघू म रखहूं।)—
JOB 31:38 “कहूं मोर भुइयां ह मोर बिरोध म पुकारथे अऊ नांगर ले बने येकर जम्मो घारीमन रोथें,
JOB 31:39 कहूं मेंह बिगर दाम चुकाय येकर ऊपज ला खा गे हंव या येकर मालिक के मरे के कारन बने हंव,
JOB 31:40 त गहूं के बलदा म कंटिली झाड़ी अऊ जवांर के बलदा म खरपतवार उगय।” अयूब के गोठ ह खतम होईस।
JOB 32:1 तब अयूब के ये तीनों संगी अयूब ला जबाब देना बंद कर दीन, काबरकि अयूब ह खुद के नजर म धरमी रिहिस।
JOB 32:2 पर राम के परिवार के बूजवासी बारकेल के बेटा एलीहू ह अयूब के ऊपर बहुंत गुस्सा होईस काबरकि अयूब ह परमेसर के बदले अपनआप ला धरमी ठहिरात रिहिस।
JOB 32:3 एलीहू ह ये तीनो संगीमन ऊपर घलो गुस्सा होईस, काबरकि ओमन अयूब ला जबाब नइं दे सकिन, अऊ तभो ले ओमन ओला दोसी ठहिराईन।
JOB 32:4 एलीहू ह अयूब के आघू म गोठियाय बर इंतजार करत रिहिस, काबरकि ओह ओमन ले उमर म छोटे रिहिस।
JOB 32:5 पर जब ओह देखिस कि ओ तीनों झन करा कहे बर अऊ कुछू नइं ए, त ओकर रिस ह भड़किस।
JOB 32:6 तब बूजवासी बारकेल के बेटा एलीहू ह जबाब दीस: “मेंह तो उमर म छोटे अंव, अऊ तुमन सियान अव; एकरसेति मेंह डरत रहेंव, अऊ जऊन कुछू जानथंव, ओला कहे के हिम्मत नइं करत रहेंव।
JOB 32:7 मेंह सोचत रहेंव, ‘उमर म बड़ेमन ला गोठियाना चाही; उमर म बड़ेमन ला बुद्धि के बात सिखाना चाही।’
JOB 32:8 पर मनखे म येह आतमा ए, याने सर्वसक्तिमान के सांस ए, जऊन ह ओमन ला समझ देथे।
JOB 32:9 सिरिप सियान मनखेमन ही बुद्धिमान नइं होवंय, अऊ सिरिप उमरवालामन ही सही बात के समझ नइं रखंय।
JOB 32:10 “एकरसेति मेंह कहत हंव: मोर बात ला सुनव; मेंह घलो तुमन ला बताहूं, जऊन कुछू मेंह जानथंव।
JOB 32:11 जब तुमन गोठियावत रहेव, त मेंह रूके रहेंव, मेंह तुम्हर बिचार ला सुनेंव; जब तुमन बोले बर सबद खोजत रहेव,
JOB 32:12 मेंह पूरा धियान देके तुम्हर बात सुनेंव। पर तुमन म ले कोनो अयूब ला गलत साबित नइं करेव; तुमन म ले एको झन घलो ओकर बात के जबाब नइं दे सकेव।
JOB 32:13 ये झन कहव, ‘हमन बुद्धि पा गे हन; कोनो मनखे नइं, पर परमेसर ह ओला लबरा साबित करय।’
JOB 32:14 पर अयूब ह मोर बिरोध म कुछू नइं कहिस, अऊ मेंह ओला तुम्हर तर्क के संग जबाब नइं देवंव।
JOB 32:15 “ओमन अबक हो गे हवंय अऊ ओमन करा कहे बर कुछू नइं ए; ओमन ला सबद ही नइं मिलिस।
JOB 32:16 ओमन चुप हवंय अऊ बिगर कोनो जबाब के ठाढ़े हवंय, त का मेंह रूके रहंव?
JOB 32:17 मेंह घलो अपन बात कहिहूं; जऊन कुछू मेंह जानथंव, मेंह घलो बताहूं।
JOB 32:18 काबरकि मेंह गोठमन ले भरे हवंव, अऊ मोर भीतर के आतमा ह मोला बाध्य करत हवय;
JOB 32:19 भीतर म मेंह अंगूर के मंद के बोतल सहीं अंव, नवां चाम के बोतल सहीं, जऊन ह फूटे बर तियार हवय।
JOB 32:20 मेंह जरूर बोलहूं अऊ येकर ले मोला अराम मिलही; मेंह मुहूं खोलके जरूर जबाब दूहूं।
JOB 32:21 मेंह काकरो पखियपात नइं करंव, अऊ न ही काकरो चापलूसी करहूं;
JOB 32:22 काबरकि कहूं मेंह चापलूसी करे म कुसल होतेंव, त मोर सिरजनहार ह मोला जल्दी नास कर देतिस।
JOB 33:1 “पर अब, हे अयूब, मोर गोठ ला सुन; अऊ मोर ओ जम्मो बात ऊपर धियान दे, जेला मेंह कहत हंव।
JOB 33:2 मेंह अपन मुहूं खोलनेचवाला हंव; मोर जीभ ह गोठियाय बर चुलबुलावत हवय।
JOB 33:3 मोर गोठ ह सही मन ले आवत हे; जऊन बात मेंह जानथंव, ओला मेंह ईमानदारी ले गोठियाथंव।
JOB 33:4 परमेसर के आतमा ह मोला बनाय हवय; सर्वसक्तिमान के सांस ह मोला जिनगी देथे।
JOB 33:5 कहूं जबाब दे सकत हस, त दे; ठाढ़ हो अऊ मोर आघू म अपन स्थिति बर जबाब दे।
JOB 33:6 परमेसर के नजर म तोरेच कस महूं घलो अंव; महूं ह घलो माटी ले बनाय गे हंव।
JOB 33:7 मोर ले तोला कोनो किसम के डर झन होवय, अऊ न ही मोर कोति ले तोर ऊपर कोनो किसम के दबाव होवय।
JOB 33:8 “पर तेंह मोर सुनत म कहे हस— मेंह ओ बातमन ला सुने हंव—
JOB 33:9 ‘मेंह सुध हंव, मेंह कोनो अपराध नइं करे हंव; मेंह सुध अऊ पाप ले मुक्त हंव।
JOB 33:10 तभो ले परमेसर ह मोर म गलती पाय हे; ओह मोला अपन बईरी समझथे।
JOB 33:11 ओह मोर गोड़ ला बेड़ी म बांधथे; ओह मोर जम्मो चालचलन ला धियान से देखथे।’
JOB 33:12 “पर मेंह तोला कहत हंव कि ये बात म तेंह सही नो हस, काबरकि परमेसर ह कोनो भी मनखे ले बड़े अय।
JOB 33:13 तेंह ओकर करा काबर सिकायत करथस कि ओह काकरो बात के जबाब नइं देवय?
JOB 33:14 काबरकि परमेसर ह गोठियाथे जरूर—कभू एक रीति ले, त कभू आने रीति ले— हालाकि येला कोनो मनखे नइं समझंय।
JOB 33:15 कभू सपना म, कभू रथिया दरसन म, जब मनखेमन बहुंत नींद म परे रहिथें अपन बिस्तर म आलस के मारे झपकी लेवत रहिथें,
JOB 33:16 त परमेसर ह ओमन के कान म गोठियाथे अऊ ओमन ला चेतउनी देके डराथे,
JOB 33:17 ताकि ओमन गलत काम झन करंय अऊ घमंड ले दूरिहा रहंय,
JOB 33:18 ताकि ओमन खंचवा म गिरे ले बचंय, अऊ ओमन के जिनगी ह तलवार ले नास झन होवय।
JOB 33:19 “या कोनो मनखे अपन बिस्तर म पीरा ले पीड़ित हे, ओकर हाड़ामन म लगातार पीरा ले ओला सजा मिलत हे,
JOB 33:20 जेकर ले जेवन ह ओकर मन ला नइं रूचय अऊ ओकर मन ह सुवादवाले जेवन ले घिन करे लगथे।
JOB 33:21 ओकर देहें के मांस ह बेकार म नास होथे, अऊ ओकर नइं दिखइया हाड़ामन दिखे लगथें।
JOB 33:22 ओकर जीव खंचवा के लकठा म जाथे, अऊ ओकर जिनगी ह मिरतू के दूतमन करा जाथे।
JOB 33:23 कहूं एक स्वरगदूत ह ओकर कोति रहय एक संदेसिया, जऊन ह हजार म ले एक अय ओकर करा ये कहे बर भेजे जावय कि ईमानदार कइसे बनय,
JOB 33:24 अऊ ओह ओ मनखे ऊपर दयालु बनके परमेसर ले कहय, ‘ओला कबर म जाय ले बचा; मोला ओकर छुड़ौती के कीमत मिल गे हवय—
JOB 33:25 ओकर मांस ह लइका के मांस सहीं कोमल हो जावय ओला ओकर जवानी के दिन सहीं कर दिये जावय’—
JOB 33:26 तब ओ मनखे ह परमेसर ले पराथना करय अऊ परमेसर के अनुग्रह ला पावय, ओह परमेसर के मुहूं ला देखही अऊ आनंद के मारे चिचियाही; परमेसर ह ओला फेर पहिले सहीं बने स्थिति म ले आही।
JOB 33:27 अऊ ओह आने मनखेमन करा जाके कहिही, ‘मेंह पाप करे हंव, मेंह सही काम ला बिगाड़े हंव, पर मोर गलती के सजा मोला नइं मिलिस।
JOB 33:28 परमेसर ह मोला कबर म जाय ले बचाय हवय, अऊ मेंह अपन जिनगी के अंजोर के आनंद उठाय बर जीहूं।’
JOB 33:29 “परमेसर ह ये जम्मो चीज मनखे के संग करथे— दू बार, तीन बार घलो करथे—
JOB 33:30 ताकि ओमन कबर ले लहुंटंय, अऊ जिनगी के अंजोर ह ओमन ऊपर चमकय।
JOB 33:31 “हे अयूब, धियान दे, अऊ मोर बात ला सुन; चुपे रह, अऊ मेंह गोठियाहूं।
JOB 33:32 कहूं तोला कुछू कहना हे, त मोला जबाब दे; गोठिया, काबरकि मेंह तोला सही ठहिराय चाहत हंव।
JOB 33:33 पर कहूं नइं, त फेर मोर बात ला सुन; चुपे रह, अऊ मेंह तोला बुद्धि के बात सिखोहूं।”
JOB 34:1 तब एलीहू ह आगे कहिस:
JOB 34:2 “हे बुद्धिमान मनखेमन, मोर बात ला सुनव; हे गियानी मनखेमन, मोर बात म कान लगावव।
JOB 34:3 काबरकि जइसे जीभ ले जेवन चखे जाथे, वइसनेच ही कान ह गोठमन ला परखथे।
JOB 34:4 सही का ए, आवव, हमन ओला समझन; भलई का ए, आवव हमन ओला एक संग सीखन।
JOB 34:5 “काबरकि अयूब ह ये कहिथे, ‘मेंह निरदोस अंव, पर परमेसर ह मोर संग नियाय नइं करत हे।
JOB 34:6 हालाकि मेंह सही अंव, पर मेंह लबरा समझे जावत हंव; हालाकि मेंह अपराधी नो हंव, पर ओकर तीर ह मोला असाध्य घाव देवत हे।’
JOB 34:7 का कोनो अयूब कस हवय, जऊन ह अपमान ला पानी कस पी जाथे?
JOB 34:8 ओह कुकरमीमन के संग म रहिथे; ओह दुस्ट मनखेमन के संगति करथे।
JOB 34:9 काबरकि ओह कहिथे, ‘परमेसर ला खुस करे के कोसिस करे म कोनो फायदा नइं ए।’
JOB 34:10 “एकरसेति, हे समझदार मनखेमन, मोर बात सुनव। येह संभव नो हय कि परमेसर ह बुरई करय, सर्वसक्तिमान ह गलत करय।
JOB 34:11 ओह हर कोनो ला ओमन के काम के मुताबिक फर देथे; ओह ओमन के चालचलन के मुताबिक ओमन ले बरताव करथे।
JOB 34:12 ये सोचे घलो नइं जा सकय कि परमेसर ह गलत करही, ये कि सर्वसक्तिमान ह नियाय ला बिगाड़ही।
JOB 34:13 कोन ह ओला धरती ऊपर नियुक्त करे हवय? कोन ह ओला जम्मो संसार के जबाबदारी दे हवय।
JOB 34:14 कहूं येह ओकर इरादा होतिस अऊ ओह अपन आतमा अऊ अपन सांस ला वापिस ले लेतिस,
JOB 34:15 त जम्मो मानव-जाति एक संग नास हो जातिस अऊ मनखे ह फेर धुर्रा म मिल जातिस।
JOB 34:16 “कहूं तोर म समझ हवय, त सुन; मेंह का कहत हंव, ओला सुन।
JOB 34:17 जऊन ह नियाय के बईरी ए, का ओह सासन कर सकथे? का तेंह धरमी अऊ बलसाली ला दोसी ठहिराबे?
JOB 34:18 का येह ओ नो हय, जऊन ह राजामन ला कहिथे, ‘तुमन निकम्मा अव,’ अऊ परधानमन ला कहिथे, ‘तुमन दुस्ट अव,’
JOB 34:19 परमेसर ह राजकुमारमन के तरफदारी नइं करय अऊ न ही धनवान ला गरीब ले जादा महत्व देथे, काबरकि ओ जम्मो झन परमेसर के हांथ के कारीगरी अंय।
JOB 34:20 ओमन छिन भर म, आधा रथिया के मर जाथें; मनखेमन कांपथें अऊ मर जाथें; परतापी मनखेमन बिगर हांथ लगाय नास हो जाथें।
JOB 34:21 “परमेसर के आंखी ह मनखे के चालचलन के ऊपर लगे रहिथे; ओह ओमन के पग-पग ला देखत रहिथे।
JOB 34:22 अइसे कोनो घोर अंधियार या घिटके अंधियार नइं ए, जिहां दुराचारीमन लुका सकंय।
JOB 34:23 परमेसर बर मनखेमन ला अऊ परखना जरूरी नो हय, कि ओमन नियाय बर ओकर आघू म ठाढ़ होवंय।
JOB 34:24 बिगर छानबीन करे ओह बलवानमन ला चूर-चूर करथे अऊ ओमन के जगह म आने मनखे ला ठाढ़ कर देथे।
JOB 34:25 काबरकि ओह ओमन के करनी ला जानथे, ओह ओमन ला रथिया फटिक देथे अऊ ओमन चकनाचूर हो जाथें।
JOB 34:26 ओह ओमन ला ओमन के दुस्टता के सजा उहां देथे जिहां जम्मो झन ओमन ला देख सकंय,
JOB 34:27 काबरकि ओमन ओकर पाछू रेंगई ला छोंड़ दे हवंय अऊ ओकर कोनो कानून के आदर नइं करंय।
JOB 34:28 ओमन के कारन गरीबमन के गोहार ह परमेसर करा हबरिस, अऊ ओह जरूरतमंद मनखे के गोहार ला सुनिस।
JOB 34:29 पर कहूं ओह चुप रहय, त कोन ह ओला दोसी ठहिरा सकत हे? कहूं ओह अपन चेहरा ला छुपाय, त कोन ह ओला देख सकत हे? चाहे एक झन मनखे होवय या मनखेमन के जाति, ओह जम्मो के संग एक समान बरताव करथे,
JOB 34:30 ताकि भक्तिहीन मनखे ह राज झन करय अऊ मनखेमन फांदा म झन फंसय।
JOB 34:31 “मान लव, कोनो मनखे परमेसर ला कहिथे, ‘मेंह दोसी अंव पर अब कभू अपराध नइं करंव।
JOB 34:32 जऊन ला मेंह नइं देख सकंव, तेंह मोला ओ बात सिखा; कहूं मेंह गलती करे हंव, त मेंह अइसे फेर नइं करंव।’
JOB 34:33 त का परमेसर ह तोर सर्त के मुताबिक तोला परतिफल दीही, जबकि तेंह प्रायस्चित करे बर इनकार करथस? तें फैसला कर, में नइं; मोला बता कि तेंह का जानथस।
JOB 34:34 “समझदार मनखेमन बताथें, बुद्धिमान मनखे जऊन मन मोर सुनथें, मोला कहिथें,
JOB 34:35 ‘अयूब ह बिगर गियान के गोठियाथे; ओकर बात म समझ नइं दिखय।’
JOB 34:36 बने होतिस, कि अयूब ह आखिरी तक परखे जातिस काबरकि ओह दुस्ट मनखे कस जबाब देथे!
JOB 34:37 ओह अपन पाप के संगे-संग बिदरोह घलो करथे; तिरस्कार करके, ओह हमर बीच म ताली बजाथे अऊ परमेसर के बिरोध म बहुंत बात कहिथे।”
JOB 35:1 तब एलीहू ह ये घलो कहिस:
JOB 35:2 “का तेंह येला नियाय-संगत मानथस? तेंह कहिथस, ‘मेंह सही अंव, परमेसर नइं।’
JOB 35:3 तभो ले तेंह ओकर ले पुछथस, ‘मोला येकर ले का फायदा, पाप नइं करे ले मोला का मिलत हे?’
JOB 35:4 “मेंह तोला अऊ तोर संगीमन ला जबाब देय चाहत हंव।
JOB 35:5 अकासमन कोति निहार अऊ देख; बादरमन कोति निहार, जऊन मन तोर बहुंत ऊपर हवंय।
JOB 35:6 कहूं तेंह पाप करथस, त परमेसर के का बिगड़थे? कहूं तोर पापमन बहुंते हवंय, त येकर ले ओला का फरक पड़थे?
JOB 35:7 कहूं तेंह धरमी अस, त तेंह ओला का देथस? या ओला तोर हांथ ले का मिल जाथे?
JOB 35:8 तोर दुस्टता ह सिरिप तोर सहीं मनखेमन ऊपर, अऊ तोर धरमीपन ह आने मनखेमन ऊपर असर डालथे।
JOB 35:9 “अब्बड़ अतियाचार के कारन मनखेमन कलहरथें; ओमन बलवान के बाहुबल ले छुटकारा पाय बर बिनती करथें।
JOB 35:10 पर कोनो नइं कहय, ‘मोर सिरजनहार परमेसर कहां हवय, जऊन ह रथिया गीत गाय बर देथे,
JOB 35:11 जऊन ह हमन ला धरती के जानवरमन ले जादा सिकछा देथे अऊ हमन ला अकास के चिरईमन ले जादा बुद्धिमान बनाथे।’
JOB 35:12 दुस्ट मनखेमन के घमंड के कारन परमेसर जबाब नइं देवय, जब मनखेमन गोहारथें।
JOB 35:13 वास्तव म, परमेसर ह ओमन के खाली निबेदन ला नइं सुनय; सर्वसक्तिमान ह ओकर कोति धियान नइं देवय।
JOB 35:14 त ओह तोर का सुनही जब तेंह कहिथस कि मेंह ओला नइं देखत हंव, जबकि तोर मामला ओकर आघू म हवय, अऊ तोला ओकर बाट जोहना जरूरी अय।
JOB 35:15 अऊ देख, ओह गुस्सा होके कभू दंड नइं देवय अऊ ओह दुस्टता कोति कम धियान नइं देवय।
JOB 35:16 एकरसेति अयूब ह बेकार के बात कहे बर अपन मुहूं खोलथे; बिगर गियान के, ओह बहुंत गोठियाथे।”
JOB 36:1 फेर एलीहू ह ये घलो कहिस:
JOB 36:2 “थोरकून अऊ धीरज धर, त मेंह तोला देखाहूं कि परमेसर कोति ले अऊ घलो बहुंत अकन कहे जा सकत हे।
JOB 36:3 मेंह अपन गियान बहुंत दूरिहा ले पाथंव; मेंह अपन सिरजनहार करा नियाय के बात करहूं।
JOB 36:4 खचित मोर गोठ ह लबारी नो हय; तोर संग म जऊन ह हवय, ओकर करा सिद्ध गियान हवय।
JOB 36:5 “परमेसर ह सक्तिमान ए, पर ओह कोनो मनखे ला तुछ नइं जानय; ओह सक्तिमान ए, अऊ अपन उदेस्य ले नइं डिगय।
JOB 36:6 ओह दुस्ट ला जीयत नइं रहन देवय पर दुखी मनखेमन ला ओमन के अधिकार देथे।
JOB 36:7 ओह धरमीमन ले अपन नजर नइं हटावय; ओह ओमन ला राजामन संग सिंघासन म बईठाथे अऊ ओमन ला सदाकाल बर ऊंचा उठाथे।
JOB 36:8 पर कहूं मनखेमन बेड़ी म बंधाय हवंय, दुख के डोरी म जोर से जकड़े हवंय,
JOB 36:9 त ओह ओमन ला बताथे कि ओमन का करे हवंय— कि ओमन घमंडी होके पाप करे हवंय।
JOB 36:10 ओह ओमन ला सुधारे खातिर सुनाथे अऊ अपन बुरई ले प्रायस्चित करे बर ओमन ला हुकूम देथे।
JOB 36:11 कहूं ओमन हुकूम मानंय अऊ ओकर सेवा करंय, त ओमन के जिनगी के बाकि दिनमन उन्नति करे म अऊ ओमन के जिनगी के बछरमन सुख म बीतहीं।
JOB 36:12 पर कहूं ओमन नइं सुनंय, त ओमन तलवार ले नास हो जाहीं अऊ बिगर गियान के मर जाहीं।
JOB 36:13 “भक्तिहीनमन अपन दिल म कोरोध पालथें; अऊ त अऊ जब परमेसर ह ओमन ला बेड़ी म बांधथे, तभो ले ओमन मदद बर नइं गोहारंय।
JOB 36:14 ओमन देवालय के पुरूस बेस्यामन के बीच अपन जवानी के दिन म ही मर जाथें।
JOB 36:15 पर परमेसर ह दुखी मनखेमन ला ओमन के दुख ले छुड़ाथे; ओह ओमन के दुख के बेरा म ओमन ले गोठियाथे।
JOB 36:16 “ओह तोला बिपत्ति के मुहूं ले निकालके अइसे चाकर जगह म अमरा देवत हे जिहां कोनो बाधा नइं ए, जिहां सुवादवाला जेवन तोर सुबिधा के मेज म परोसे जाथे।
JOB 36:17 पर अब तोला ओ दंड दिये जावत हे, जऊन ह दुस्टमन बर अय; निरनय अऊ नियाय तोला पकड़ ले हवय।
JOB 36:18 सचेत रह कि कोनो तोला धन-संपत्ति के दुवारा झन बहकावय; अऊ बहुंत घूस ह तोला डहार ले झन भटकावय।
JOB 36:19 का तोर जम्मो धन-संपत्ति अऊ तोर जम्मो बल तोला तोर दुख ले छुटकारा दीही?
JOB 36:20 ओ रथिया के आसा झन कर, जेमा मनखेमन ला ओमन के घर ले घसीटके निकाले जाथे।
JOB 36:21 सचेत रह अऊ बुरई कोति झन लहुंट, जेला तेंह सायद दुख ले जादा पसंद करथस।
JOB 36:22 “परमेसर ह अपन सामर्थ म अति महान अय। ओकर सहीं गुरू कोन हवय?
JOB 36:23 कोन ह ओकर बर डहार ठहिराय हवय, या कोन ह ओला कह सकत हे, ‘तेंह गलती करे हस’?
JOB 36:24 ओकर काम के परसंसा करे बर झन भुला; जेकर परसंसा मनखेमन गीत म करे हवंय।
JOB 36:25 जम्मो मानव-जाति ह येला देखे हवय; मरनहार मनखेमन येला दूरिहा ले टकटकी लगाके देखथें।
JOB 36:26 परमेसर ह कतेक महान ए—हमर समझ के बाहिर ए! ओकर उमर के गनई ह असंभव ए।
JOB 36:27 “ओह पानी के बूंदमन ला ऊपर खींच लेथे, जऊन ह बारिस के बूंद के रूप म नदी म बहथे;
JOB 36:28 बादरमन अपन नमी ला खाल्हे उंडेलथें अऊ मानव-जाति ऊपर बहुंत बारिस होथे।
JOB 36:29 कोन ह समझ सकथे कि ओह बादरमन ला कइसे बगराथे, अऊ कइसे ओह अपन जगह ले बादरमन ला गरजाथे?
JOB 36:30 देखव, ओह कइसे चारों कोति अपन बिजली ला चमकाथे, अऊ समुंदर के गहरई ला ढांप देथे।
JOB 36:31 ये किसम ले ओह देस-देस के मनखेमन ऊपर सासन करथे अऊ ओमन ला बहुंतायत ले जेवन देथे।
JOB 36:32 ओह बिजली ला अपन हांथ म ले लेथे अऊ ओला हुकूम देथे कि सही जगह म गिरय।
JOB 36:33 ओकर गरजई ह अवइया आंधी के घोसना करथे; अऊ त अऊ पसुमन घलो येकर आय के चिनहां बताथें।
JOB 37:1 “इही बात म मोर हिरदय ह कांपथे अऊ अपन जगह ले उदकथे।
JOB 37:2 सुन! परमेसर के अवाज के गरजन, ओकर मुहूं ले निकलत गड़गड़ाहट ला सुन।
JOB 37:3 ओह अपन बिजली ला जम्मो अकास के खाल्हे जावन देथे अऊ ओला धरती के छोर तक पठोथे।
JOB 37:4 ओकर बाद ओकर गरजन के अवाज आथे; ओह अपन परतापी अवाज ले गरजथे। जब ओकर अवाज फेर सुनई देथे, तब ओह अपन करा कुछू नइं रख छोंड़य।
JOB 37:5 परमेसर के अवाज ह अद्भूत रीति ले गरजथे; ओह हमर समझ ले बाहिर बड़े-बड़े काम करथे।
JOB 37:6 ओह बरफ ला हुकूम देथे, ‘धरती म गिर,’ अऊ बारिस के पानी ला हुकूम देथे, ‘जमके बरस,’
JOB 37:7 ताकि हर एक मनखे, जऊन ला ओह बनाय हे, ओकर काम ला जानय, ओह जम्मो मनखे ला ओमन के मेहनत करे ले रोक देथे।
JOB 37:8 तब बन के पसुमन अपन गुफा म खुसर जाथें; ओमन अपन मांद म रहिथें।
JOB 37:9 अपन छेत्र ले आंधी, अऊ तेज बहत हवा ले जाड़ा आथे।
JOB 37:10 परमेसर के सांस फूंके ले बरफ बनथे, अऊ बगरे पानी ह जम जाथे।
JOB 37:11 ओह बादरमन ला नमी ले लादथे; अऊ अपन बिजली ला ओमन के जरिये बगराथे।
JOB 37:12 ओकर आदेस म येमन धरती के चारों कोति ऊपर एती-ओती किंदरथें अऊ ओकर हुकूम के मुताबिक काम करथें।
JOB 37:13 ओह मनखेमन ला दंड देय बर बादर लानथे, या धरती ऊपर पानी लानके ओह अपन मया देखाथे।
JOB 37:14 “हे अयूब, येला सुन; रूक अऊ परमेसर के अद्भूत काम ऊपर बिचार कर।
JOB 37:15 का तें जानथस कि परमेसर ह कइसे बादरमन ला अपन हुकूम ले चलाथे अऊ अपन बिजली चमकाथे?
JOB 37:16 का तेंह जानथस कि बादरमन अधर म कइसे रहिथें, ओकर ये अचरज के काम के बारे म कोन ला सिद्ध गियान हवय?
JOB 37:17 जब दक्खिन के हवा के कारन भुइयां ह सांत रहिथे, अऊ तेंह अपन कपड़ा के गरमी म बियाकुल रहिथस,
JOB 37:18 त का तेंह ओकर संग म अकास-मंडल ला तान सकत हस, जऊन ह ढरूवा कांसा के दरपन सहीं कठोर होथे?
JOB 37:19 “हमन ला बता कि हमन ओला का कहिबो; हमर अंधियार के कारन, हमन अपन मामला नइं रख सकन।
JOB 37:20 का ओला बताय जावय कि मेंह गोठियाय चाहत हंव? का कोनो मनखे चाहथे कि ओला लील डारे जावय?
JOB 37:21 अभी तो सूरज कोति कोनो नइं देख सकंय, काबरकि हवा ह अकास ला साफ कर दे हे, अऊ सूरज ह तेज चमकत हे।
JOB 37:22 उत्तर कोति ले ओह सोन कस चमकत आथे; परमेसर ह अद्भूत महिमा म आथे।
JOB 37:23 सर्वसक्तिमान ह हमर पहुंच के बाहिर ए अऊ बहुंत सामर्थी ए; अपन नियाय अऊ बड़े धरमीपन म, ओह अतियाचार नइं करय।
JOB 37:24 एकरसेति, मनखेमन ओकर आदर करंय, काबरकि ओह जम्मो बुद्धिमान मनखेमन के आदर करथे।”
JOB 38:1 तब यहोवा ह अयूब ला गरेर म ले गोठियाईस। ओह कहिस:
JOB 38:2 “येह कोन ए जऊन ह अगियानता के बात करके मोर युक्ति ला बिगाड़े चाहत हे?
JOB 38:3 एक आदमी सहीं अपन कनिहां कस ले; मेंह तोर ले सवाल पुछहूं, अऊ तेंह मोला जबाब देबे।
JOB 38:4 “जब मेंह धरती के नीव डारेंव, त तेंह कहां रहय? कहूं तेंह समझत हस, त मोला बता।
JOB 38:5 कोन ह येकर बिस्तार करिस? खचित तेंह जानत हस! कोन ह येकर ऊपर नापे के लाईन धरिस?
JOB 38:6 येकर नीव काकर ऊपर रखे गीस, या कोन ह येकर कोना के पथरा ला मढ़ाईस—
JOB 38:7 जब बिहनियां के तारामन एक संग गाईन अऊ जम्मो स्वरगदूतमन आनंद के मारे चिचियाईन?
JOB 38:8 “कोन ह कपाटमन के पाछू समुंदर ला रोकिस जब येह अइसे फूटके निकलिस, मानो ओह गरभ ले फूट निकले हे,
JOB 38:9 जब मेंह बादर ला ओकर ओनहा बनांय अऊ येला घिटके अंधियार म लपेटें,
JOB 38:10 जब मेंह येकर सीमना ठहिरांय अऊ येकर कपाट अऊ बाड़ा ठहिरांय,
JOB 38:11 जब मेंह समुंदर ला कहेंव, ‘तेंह इहां तक आ सकत हस अऊ आगे नइं; येह ओ जगह ए, जिहां तोर उमड़इया लहरामन रूक जावंय’?
JOB 38:12 “का तेंह कभू बिहनियां ला हुकूम देय हवस, या बिहान होय ला अपन जगह देखाय हवस,
JOB 38:13 कि येह धरती के छोर ला अपन बस म करय अऊ दुस्ट मनखेमन ला येमा ले झर्रा देवय?
JOB 38:14 धरती ह अइसे आकार लेथे जइसे मुहर के खाल्हे के चिक्कन माटी के आकार बदलथे; येकर रूप ह पोसाक के सहीं दिखे लगथे।
JOB 38:15 दुस्टमन ला ओमन के अंजोर ले रोक लिये जाथे, अऊ ओमन के उठे बाहां ला टोर दिये जाथे।
JOB 38:16 “का तेंह कभू समुंदर के सोतमन करा हबरे हवस या गहिरा समुंदर के पेंदी म कभू रेंगे-बुले हवस?
JOB 38:17 का मिरतू के कपाट ला तोला देखाय गे हवय? का तेंह घिटके अंधियार के कपाटमन ला देखे हस?
JOB 38:18 का तेंह धरती के बिस्तार ला समझे हस? कहूं तेंह ये जम्मो ला जानथस, त मोला बता।
JOB 38:19 “अंजोर के निवास के रसता का ए? अऊ अंधियार ह कहां रहिथे?
JOB 38:20 का तेंह ओमन ला ओमन के जगह म ले जा सकबे? का तेंह ओमन के निवास के रसता ला जानथस?
JOB 38:21 तेंह तो जरूर जानथस, काबरकि पहिली ही तोर जनम हो गे रिहिस! तेंह बहुंत साल तक जीये हस!
JOB 38:22 “का तेंह बरफ के भंडारघरमन म खुसरे हवस या ओला के भंडारघरमन ला देखे हवस,
JOB 38:23 जऊन मन ला मेंह संकट के समय बर, याने युद्ध अऊ लड़ई बर रखे हवंव?
JOB 38:24 ओ जगह के रसता का ए, जिहां ले अंजोर ला बगराय जाथे, या ओ जगह कहां हवय, जिहां ले धरती ऊपर पुरवई हवा ह बहथे?
JOB 38:25 कोन ह भारी बारिस बर नरवा खनथे, अऊ कोन ह बादर के गरजन बर रद्दा बनाथे;
JOB 38:26 ताकि निरजन भुइयां म, मरू-भुइयां म, जिहां कोनो नइं रहंय, उहां पानी जा सकय,
JOB 38:27 जेकर ले उजरे अऊ बंजर भुइयां के पीयास बुझय अऊ कांदी ह जामय?
JOB 38:28 का बरसा के कोनो ददा हवय? ओस के बूंदी ला कोन ह पईदा करथे?
JOB 38:29 काकर गरभ ले बरफ ह निकलथे? कोन ह अकास ले गिरे ओस ला जमाथे
JOB 38:30 जब पानी ह पथरा कस कठोर हो जाथे, जब गहिरा पानी के सतह ह जम जाथे?
JOB 38:31 “का तेंह नछत्र के समूह ला जंजीर म बांध सकथस? का तेंह मिरगासिरा के बंधना ला खोल सकथस?
JOB 38:32 का तेंह तारा मंडल ला ओमन के ठहिराय समय म परगट कर सकथस? या का तेंह सपतरसी ला ओकर लइकामन संग ले जा सकथस?
JOB 38:33 का तेंह अकासमन के कानून ला जानथस? का तेंह धरती म परमेसर के सासन लागू कर सकथस?
JOB 38:34 “का तेंह बादरमन ला हुकूम दे सकथस कि बहुंत बारिस होवय अऊ तोला छुपा लेवय
JOB 38:35 का तेंह बिजली ला गिरे के हुकूम दे सकथस? का ओमन तोर करा आके कहिथें, ‘हमन इहां हवन’?
JOB 38:36 कोन ह सारस चिरई ला बुद्धि देथे या कोन ह कुकरा ला समझे के सक्ति देथे?
JOB 38:37 बादरमन ला गने के बुद्धि काकर करा हवय? कोन ह अकास के पानी के घघरी ला उलद सकत हे,
JOB 38:38 जब धुर्रा ह कठोर हो जाथे अऊ धरती के ढेलामन एक संग संट जाथें?
JOB 38:39 “का तेंह सिंहनी बर सिकार करके लानथस अऊ सिंहमन के भूख ला मिटाथस
JOB 38:40 जब ओमन अपन मांद म बईठे रहिथें या झाड़ीमन के बीच म लेटके घात लगाय रहिथें?
JOB 38:41 कोन ह कऊआ ला भोजन देथे जब ओकर पीलामन परमेसर ले गोहारथें अऊ भोजन के खोज म भटकत रहिथें?
JOB 39:1 “का तेंह जानथस कि पहाड़ के जंगली छेरीमन कब पीला देथें? का तेंह देखथस कि हिरनी ह कब पीला देथे?
JOB 39:2 का तेंह ओमन के गरभ धारन करे के महिनामन ला गनथस? का तेंह ओमन के जनम देय के समय ला जानथस?
JOB 39:3 ओमन निहरके अपन पीला ला जनमथें; अऊ ओमन के लइका जनमे के पीरा ह खतम हो जाथे।
JOB 39:4 ओमन के पीलामन जंगल म बाढ़थें अऊ मजबूत होवत जाथें; ओमन चल देथें अऊ फेर लहुंटके नइं आवंय।
JOB 39:5 “कोन ह जंगली गदहामन ला खुला छोंड़ देथे? कोन ह ओमन के बंधना ला खोल दीस?
JOB 39:6 ओमन ला मेंह ओमन के घर बर सुन्ना जगह, अऊ ओमन के निवास बर नूनचूर ऊसर भुइयां देय हवंव।
JOB 39:7 ओमन तो सहर के कोलाहल ऊपर हांसथें; ओमन गदहा खेदइया के हांका ला नइं सुनंय।
JOB 39:8 ओमन अपन चारा बर पहाड़मन म किंदरथें अऊ हरियर-हरियर चारा खोजत रहिथें।
JOB 39:9 “का जंगली बईला ह तोर सेवा करे बर सहमती दीही? का ओह तोर कोटना के तीर म रात बिताही?
JOB 39:10 का तेंह जंगली बईला ला डोरी ले बांधके नांगर जोत सकथस? का ओह तोर पाछू घाटी म पाटा ला खींचही?
JOB 39:11 का तेंह ओकर बड़े बल के सेति ओकर ऊपर भरोसा करबे? का तेंह अपन मेहनत के काम ला ओकर ऊपर छोंड़ देबे?
JOB 39:12 का तेंह ओकर ऊपर भरोसा करबे कि ओह तोर अनाज ला लानय अऊ लानके तोर कोठार म रखय?
JOB 39:13 “सुतुरमुर्ग ह अपन डेनामन ला आनंद म फड़फड़ाथे, हालाकि ओमन के तुलना सारस के डेना अऊ पांखीमन ले नइं करे जा सकय।
JOB 39:14 सुतुरमुर्ग ह तो अपन अंडा भुइयां म देथे अऊ ओमन ला धुर्रा के गरमी ह सेथे,
JOB 39:15 ओला धियान नइं रहय कि ओमन काकरो गोड़ ले कुचरे जा सकथें, या कोनो जंगली पसु ओमन ला कुचर सकथे।
JOB 39:16 ओह अपन पीलामन ले कठोर बरताव करथे, मानो कि ओमन ओकर पीला नो हंय; ओह फिकर नइं करय कि ओकर मेहनत ह बेकार रिहिस,
JOB 39:17 काबरकि परमेसर ह ओला बुद्धि नइं देय हवय या ओला बने समझ नइं देय हवय।
JOB 39:18 तभो ले जब ओह दऊड़े बर अपन डेना ला बगराथे, त ओह घोड़ा अऊ ओकर सवारी करइया ऊपर हांसथे।
JOB 39:19 “का तेंह घोड़ा ला ओकर बल देथस या का तेंह ओकर घेंच म उड़त लम्बा बाल पहिराय हस?
JOB 39:20 का तेंह ओला फांफा कस उचके के बल देथस, जेकर फुंफकारे के अवाज ह आतंक फईला देथे?
JOB 39:21 ओह अपन बल ऊपर आनंद मनात, अपन खुर ले भुइयां ला खुरचथे, अऊ लड़ई के सामना करथे।
JOB 39:22 ओह बिगर कोनो भय के, डर के ऊपर हंसथे; ओह तलवार ला देखके पाछू नइं घुंचय।
JOB 39:23 तरकस ह अपन किनारा के बिरूध चमकत बरछी अऊ भाला के संग खड़खड़ाथे।
JOB 39:24 उत्तेजित होके रिस के मारे, ओह भुइयां ला छेदथे; अऊ तुरही के अवाज सुनके ओह सीधा ठाढ़ नइं होवय।
JOB 39:25 तुरही के अवाज म ओह हिनहिनाथे, ‘अहा!’ ओह दूरिहाच ले लड़ई के गंध ला सुंघ लेथे, अऊ सेनापतिमन के ललकार अऊ लड़ई के गरजन ला सुन लेथे।
JOB 39:26 “का बाज चिरई ह तोर बुद्धि के दुवारा उड़थे अऊ दक्खिन कोति उड़े बर अपन डेनामन ला बगराथे?
JOB 39:27 का गिधवा ह तोर हुकूम ले बहुंत ऊपर म उड़थे अऊ अपन खोंधरा ला ऊंच जगह म बनाथे?
JOB 39:28 ओह निकले चट्टान के चोटी म रहिथे अऊ उहां रात बिताथे; खड़े चट्टान ह ओकर घर अय।
JOB 39:29 उहां ले ओह अपन जेवन के ताक म रहिथे; ओकर आंखी ह दूरिहा ले ही ओला देख लेथे।
JOB 39:30 ओकर पीलामन खून ला मजा लेके पीथें, अऊ जिहां लास रहिथे, उहां ओह घलो होथे।”
JOB 40:1 यहोवा ह अयूब ला कहिस:
JOB 40:2 “जऊन ह सर्वसक्तिमान ऊपर दोस लगाथे, का ओह ओकर संग बहस करही? जऊन ह परमेसर ऊपर दोस लगाथे, ओह ओला जबाब देवय!”
JOB 40:3 तब अयूब ह यहोवा ला जबाब दीस:
JOB 40:4 “मेंह तो तुछ मनखे अंव—मेंह तोला कइसे जबाब दे सकत हंव? मेंह अपन मुहूं ऊपर अपन हांथ रख लेथंव।
JOB 40:5 एक बार मेंह गोठिया डारेंव, पर मोर करा जबाब नइं ए— हव, दू बार घलो, पर अब मेंह नइं कहंव।”
JOB 40:6 तब यहोवा ह अयूब ला गरेर म ले गोठियाईस:
JOB 40:7 “एक आदमी कस अपन कनिहां कस ले; मेंह तोर ले सवाल पुछहूं, अऊ तेंह मोला जबाब देबे।
JOB 40:8 “का तेंह मोर नियाय ला बेकार ठहिराबे? का तेंह अपनआप ला सही ठहिराय बर मोला दोस देबे?
JOB 40:9 का तोर करा परमेसर के सहीं भुजबल हवय, अऊ का तेंह ओकर कस अवाज म गरज सकथस?
JOB 40:10 तब तेंह अपनआप ला महिमा अऊ परताप ले संवार ले, अऊ अपनआप ला आदर अऊ गौरव के ओनहा पहिरा ले।
JOB 40:11 अपन उफनत रिस ला छोंड़ दे, अऊ जऊन मन घमंडी अंय, ओमन ला देख अऊ ओमन ला झुकवा दे,
JOB 40:12 जऊन मन घमंडी अंय, ओमन ला देख अऊ ओमन ला नम्र बना, दुस्टमन जिहां ठाढ़ होथें, उहां ओमन ला कुचर दे।
JOB 40:13 ओ जम्मो झन ला एके संग माटी म गाड़ दे; अऊ कबर म ओमन के मुहूं ऊपर कफन ओढ़ा दे।
JOB 40:14 तब मेंह खुद मान लूहूं कि तोरेच जेवनी हांथ ह तोला बचा सकत हे।
JOB 40:15 “जलहाथी ला देख, जेला मेंह तोर संग बनाय हवंव अऊ जऊन ह बईला के सहीं कांदी खाथे।
JOB 40:16 ओकर कनिहां म कतेक बल होथे, अऊ ओकर पेट के मांस-पेसी म कतेक सक्ति होथे!
JOB 40:17 ओकर पुंछी ह देवदार रूख कस झुमथे; ओकर जांघ के नसमन एक-दूसर ले गुंथाय रहिथें।
JOB 40:18 ओकर हाड़ामन कांस के नलीमन कस अंय, अऊ ओकर अंगमन लोहा के छड़ कस अंय।
JOB 40:19 परमेसर के रचना म ओह पहिला जगह पाथे, तभो ले ओकर सिरजनहार ह ओकर करा तलवार लेके आ सकत हे।
JOB 40:20 पठारमन ले ओकर बर चारा मिलथे, अऊ बन के जम्मो पसु ओकर लकठा म खेलथें।
JOB 40:21 ओह कमल फूल के नार के तरी म लेटथे, चीखला म कांदी के बीच ओह छुपे रहिथे।
JOB 40:22 कमल फूल के नारमन ओला अपन छइहां म छुपाथें, अऊ चिनार रूखमन नरवा के तीर म ओला घेरे रहिथें।
JOB 40:23 नदी म घुमड़त बाढ़ आय ले घलो ओह नइं घबरावय; चाहे यरदन नदी के पानी ह ओकर मुहूं तक चघ जावय, तभो ले ओह सुरकछित रहिथे।
JOB 40:24 का कोनो ओला पकड़ सकथे जब ओह जागत रहिथे, या फांदा म फंसाके ओकर नाक ला छेद सकथे?
JOB 41:1 “का तेंह लिबयातान ला मछरी धरे के गरी ले तीरके निकाल सकथस या डोरी ले ओकर जीभ ला बांध सकत हस।
JOB 41:2 का तेंह ओकर नाक म नत्थी लगा सकथस या ओकर जबड़ा ला लोहा के कांटा ले छेद सकथस?
JOB 41:3 का ओह तोर ले दया के भीख मांगही? का ओह तोर ले गुरतूर बोली बोलही?
JOB 41:4 का ओह तोर ले करार करही कि तेंह ओला जिनगी भर अपन गुलाम बना ले?
JOB 41:5 का तेंह ओला कोनो चिरई के सहीं पालतू बना सकथस या अपन घर म जवान माईलोगनमन के खेले बर ओमा पट्टा बांधके रख सकबे?
JOB 41:6 का बेपारीमन ओकर बर मोलभाव करहीं? का ओमन ओला बेपारीमन के बीच म बांट दीहीं?
JOB 41:7 का तेंह ओकर खाल ला भाला ले, या ओकर मुड़ ला मछरी मारे के बरछी ले भर सकथस?
JOB 41:8 यदि तेंह ओकर ऊपर अपन हांथ रखथस, त तोला ओकर संग लड़े के सुरता आही अऊ तेंह अइसने फेर कभू नइं करबे!
JOB 41:9 ये बेकार के आसा ए कि तेंह ओला अपन अधिकार म रखबे; तेंह ओकर आघू म आवत ही हार जाबे।
JOB 41:10 काकरो हिम्मत नइं ए कि ओला भड़कावंय। त फेर कोन ह मोर सामना कर सकथे?
JOB 41:11 कोन ह मोला देय हवय कि मेंह ओला लहुंटावंव? स्वरग के खाल्हे के जम्मो चीज मोर अय।
JOB 41:12 “मेंह लिबयातान के अंग, ओकर बल अऊ ओकर सोभायमान रूप के बारे म बताय बर चुप नइं रहंव।
JOB 41:13 कोन ह ओकर बाहिर के आवरन ला उतार सकत हे? कोन ह ओकर दोहरा कवच ला भेद सकथे?
JOB 41:14 कोन ह ओकर मुहूं ला खोले के हिम्मत कर सकथे? जेकर भयानक दांतमन एक-दूसर ले जुड़े रहिथें।
JOB 41:15 ओकर पीठ म तह के तह ढालमन हवंय, जऊन म मजबूती से एक संग मुहर लगे हवय;
JOB 41:16 ओमन एक-दूसर ले अइसे संटे हवंय कि ओमन के बीच म ले हवा घलो नइं निकल सकय।
JOB 41:17 ओमन एक-दूसर ले मजबूती ले जुड़े हवंय; ओमन एक-दूसर ले लिपटे हवंय अऊ ओमन ला अलग नइं करे जा सकय।
JOB 41:18 ओकर छींक ले अंजोर चमकथे; ओकर आंखीमन बिहनियां के किरन कस अंय।
JOB 41:19 ओकर मुहूं ले बरत जुवाला निकलथे; अऊ आगी के चिनगारी निकलथे।
JOB 41:20 ओकर नाक के छेदा ले धुआं निकलथे जइसे बरत सरकंडामन ऊपर रखे उबलत बरतन ले निकलथे।
JOB 41:21 ओकर सांस ले कोइला ह बरथे, अऊ ओकर मुहूं ले आगी के जुवाला निकलथे।
JOB 41:22 ओकर घेंच म ताकत रहिथे; अऊ डर ह ओकर आघू-आघू जाथे।
JOB 41:23 ओकर मांस-पेसी के परतमन कसके जूरे हवंय; ओमन मजबूत हवंय अऊ डोलंय नइं।
JOB 41:24 ओकर छाती ह पथरा कस कठोर हवय, जांता के तरी के कुटा कस कठोर हवय।
JOB 41:25 जब ओह ठाढ़ होथे, त बलवालामन घलो डरा जाथें; येकर मारे-कुटे के पहिले, ओमन पाछू हट जाथें।
JOB 41:26 ओकर ऊपर तलवार चलाय ले घलो ओला कुछू नइं होवय, अऊ न ही भाला या बान या बरछी के परभाव पड़य।
JOB 41:27 ओह लोहा ला पैंरा सहीं अऊ कांसा ला सरे लकरी सहीं जानथे।
JOB 41:28 बान ह ओला भगाय नइं सकय; गुलेल के पथरा ह ओकर बर भूंसा सहीं अय।
JOB 41:29 लउठी घलो ओला पैंरा सहीं लगथे; ओह बरछी के अवाज ऊपर हांसथे।
JOB 41:30 ओकर खाल्हे के भाग ह माटी के फटे बरतन के धार सहीं अय, जऊन ह चीखला म अनाज कुटे के पट्टा सहीं चिनहां छोंड़थे।
JOB 41:31 ओह समुंदर के पानी ला खउलत हांड़ी के सहीं मथथे अऊ समुंदर ला मलहम के बरतन सहीं हलाथे।
JOB 41:32 ओह अपन पाछू म एक चमकीला धारी छोंड़त जाथे; मानो गहिरा पानी के सफेद बाल हवय।
JOB 41:33 धरती म ओकर बरोबर कोनो चीज नइं ए— एक जीव जेला काकरो डर नइं ए।
JOB 41:34 ओह हर एक अभिमानी ला नीचा देखथे; जम्मो घमंड करइयामन ऊपर ओह राजा अय।”
JOB 42:1 तब अयूब ह यहोवा ला जबाब दीस:
JOB 42:2 “में जानत हंव कि तेंह जम्मो कुछू कर सकथस; तोर कोनो योजना म बाधा नइं डाले जा सकय।
JOB 42:3 तेंह पुछय, ‘ये कोन ए, जऊन ह बिगर गियान के मोर योजना म परदा डालत हवय?’ सही म मेंह ओ चीजमन के बारे म गोठियांय, जेला मेंह नइं समझत रहेंव, मोर जाने बर ओमन बहुंत अद्भूत चीजमन रिहिन।
JOB 42:4 “तेंह कहय, ‘अब सुन, मेंह गोठियाहूं; मेंह तोर ले सवाल करहूं, अऊ तेंह मोला जबाब देबे।’
JOB 42:5 मोर कानमन तोर बात ला सुने हवंय पर अब मोर आंखीमन तोला देख डारिन।
JOB 42:6 एकरसेति मेंह अपनआप ला तुछ समझत हंव अऊ धुर्रा अऊ राख म प्रायस्चित करत हंव।”
JOB 42:7 यहोवा ह अयूब ला अपन बात कहे के बाद, ओह तेमान के एलीपज ला कहिस, “मेंह तोर अऊ तोर दूनों संगीमन ऊपर गुस्सा हवंव, काबरकि तुमन मोर बिसय म सच बात नइं कहे हवव, जइसे कि मोर सेवक अयूब ह कहिस।
JOB 42:8 एकरसेति, अब तुमन सात ठन बईला अऊ सात ठन मेढ़ा ला लेके मोर सेवक अयूब करा जावव अऊ अपन बर होम-बलिदान करव। मोर सेवक अयूब ह तुम्हर बर पराथना करही, अऊ मेंह ओकर पराथना ला गरहन करहूं अऊ मेंह तुम्हर संग तुम्हर मुरूखता के मुताबिक बेवहार नइं करहूं। तुमन मोर बारे म सच बात नइं कहे हवव, जइसे कि मोर सेवक अयूब ह कहिस।”
JOB 42:9 एकरसेति तेमान के एलीपज, सूही के बिलदद अऊ नामात के सोपर वइसनेच करिन जइसने यहोवा ह ओमन ला कहे रिहिस; अऊ यहोवा ह अयूब के पराथना ला गरहन करिस।
JOB 42:10 जब अयूब ह अपन संगीमन बर पराथना कर डारिस, तब यहोवा ह ओकर जम्मो दुख ला दूर करिस अऊ जतेक संपत्ति अयूब करा पहिली रिहिस, ओकर दू गुना यहोवा ह ओला दीस।
JOB 42:11 तब ओकर जम्मो भाई-बहिनी अऊ जतेक झन पहिली ओला जानत रिहिन, ओ जम्मो झन आईन अऊ अयूब के संग ओकर घर म जेवन करिन। अऊ जतेक बिपत्ति यहोवा ह अयूब ऊपर डाले रिहिस, ओ जम्मो के बारे म ओमन ओला सहानुभूति देखाके सांतवना दीन, अऊ हर एक झन ओला एक-एक ठन चांदी के टुकड़ा अऊ सोन के बाली दीन।
JOB 42:12 यहोवा ह अयूब के एकर बाद के जिनगी ला एकर पहिली के जिनगी ले जादा आसीस दीस। ओकर करा चौदह हजार भेड़, छै हजार ऊंट, एक हजार जोड़ी बईला अऊ एक हजार गदहीमन रिहिन।
JOB 42:13 ओकर सात बेटा अऊ तीन बेटी रिहिन।
JOB 42:14 ओह बड़े बेटी के नांव यमीमा, मंझली के नांव कसीआ, अऊ छोटे बेटी के नांव केरेन-हपूक धरिस।
JOB 42:15 ओ जम्मो देस भर म अयूब के बेटीमन कस सुघर अऊ कोनो माईलोगन नइं रिहिन, अऊ ओमन के ददा अयूब ह ओमन ला ओमन के भाईमन के संग म संपत्ति के एक बांटा दीस।
JOB 42:16 एकर बाद, अयूब ह एक सौ चालीस बछर तक जीयत रिहिस; ओह अपन लइका अऊ ओमन के लइकामन के चार पीढ़ी तक देखे बर पाईस।
JOB 42:17 अऊ अयूब ह अपन पूरा उमर म डोकरा होके मर गीस।
PSA 1:1 धइन अय ओ मनखे, जऊन ह दुस्टमन के चाल म नइं चलय या पापीमन के रद्दा म ठाढ़ नइं होवय, या ठट्ठा करइयामन के संग म नइं बईठय,
PSA 1:2 पर ओह यहोवा के कानून म खुस रहिथे, अऊ ओह ओकर कानून म रात अऊ दिन मनन-चिंतन करत रहिथे।
PSA 1:3 ओ मनखे ह ओ रूख सहीं अय, जऊन ला बहत नरवा के तीर म लगाय गे हवय, अऊ सही समय म फरथे, अऊ जेकर पान ह कभू नइं अयलाय— जऊन कुछू ओह करथे, ओह सफल होथे।
PSA 1:4 दुस्ट मनखेमन अइसे नइं होवंय, ओमन बदरा जइसे होथें, जऊन ला हवा ह उड़िया ले जाथे।
PSA 1:5 एकरसेति दुस्ट मनखेमन अदालत म ठहर नइं सकंय, अऊ न ही पापीमन धरमीमन के सभा म ठहिरहीं।
PSA 1:6 काबरकि यहोवा के नजर ह धरमीमन के चालचलन ऊपर रहिथे, पर दुस्टमन के चालचलन ह ओमन ला बिनास कोति ले जाथे।
PSA 2:1 जाति-जाति के मनखेमन काबर हो-हल्ला मचाथें अऊ मनखेमन काबर बेकार म सडयंत्र रचथें?
PSA 2:2 यहोवा अऊ ओकर अभिसिक्त जन के बिरूध धरती के राजामन ठाढ़ होथें अऊ सासन करइयामन ये कहिके एक संग जूरथें,
PSA 2:3 “आवव, हमन ओमन के बेड़ीमन ला टोर दन अऊ ओमन के बंधना ला उतार फेंकन।”
PSA 2:4 जऊन ह स्वरग के सिंघासन म बिराजे हवय, ओह हंसथे; परमेसर ह ओमन के ठट्ठा करथे।
PSA 2:5 ओह गुस्सा होके ओमन ला डांटथे अऊ अपन कोप म ओमन ला ये कहिके डरवाथे,
PSA 2:6 “मेंह अपन राजा ला अपन पबितर पहाड़ सियोन ऊपर बईठा दे हंव।”
PSA 2:7 मेंह यहोवा के बिधि-बिधान के घोसना करहूं: ओह मोला कहिस, “तेंह मोर बेटा अस; आज मेंह तोर ददा बन गे हवंव।
PSA 2:8 मोर ले मांग, अऊ मेंह जम्मो देसमन ला तोर संपत्ति होय बर, अऊ धरती के छोर तक के जगह ला तोर अधिकार म दे दूहूं।
PSA 2:9 तेंह ओमन ला लोहा के छड़ ले टोर-फोर देबे; तेंह ओमन ला माटी के बरतन सहीं फोरके कुटा-कुटा कर देबे।”
PSA 2:10 एकरसेति, हे राजामन, तुमन बुद्धिमान बनव; हे धरती के सासन करइयामन, सचेत रहव।
PSA 2:11 भय के संग यहोवा के सेवा करव अऊ कांपत-कांपत ओकर सासन के खुसी मनावव।
PSA 2:12 ओकर बेटा ला चूमव, नइं तो ओह गुस्सा हो जाही अऊ तुम्हर जिनगी ह तुमन ला बिनास कोति ले जाही, काबरकि छिन भर म ओकर कोप ह भड़क सकथे। धइन अंय ओमन, जेमन ओकर करा सरन लेथें।
PSA 3:1 दाऊद के एक भजन। जब ओह अपन बेटा अबसालोम करा ले भागत रिहिस। हे यहोवा, कतेक जादा हवंय मोर बईरीमन! कतेक मनखेमन मोर बिरोध म ठाढ़ होवत हें!
PSA 3:2 बहुंते झन मोर बारे म कहत हें, “परमेसर ह ओला नइं बचाय।”
PSA 3:3 पर हे यहोवा, तेंह मोर चारों कोति एक ढाल अस, तेंह मोर महिमा अस, अऊ तेंह मोर मुड़ ला ऊंचहा करथस।
PSA 3:4 मेंह यहोवा ला जोर से पुकारथंव, अऊ ओह अपन पबितर पहाड़ ले मोला जबाब देथे।
PSA 3:5 मेंह लेटथंव अऊ सुत जाथंव; मेंह फेर जागथंव, काबरकि यहोवा ह मोला संभालथे।
PSA 3:6 मेंह ओ हजारों-हजार मनखेमन ले नइं डरंव, जेमन चारों कोति ले मोर ऊपर हमला करथें।
PSA 3:7 हे यहोवा, उठ! हे मोर परमेसर, मोला बचा! मोर जम्मो बईरीमन के जबड़ा म मार; अऊ दुस्टमन के दांत ला टोर दे।
PSA 3:8 छुटकारा यहोवा ही देथे। हे यहोवा, तोर आसीस तोर मनखेमन ऊपर होवय।
PSA 4:1 संगीत के निरदेसक बर। तारवाले बाजामन के संग। दाऊद के एक भजन। हे मोर धरमी परमेसर, जब मेंह तोला बलावंव, त तेंह मोला जबाब दे। मोला मोर बिपत्ति म सहारा दे; मोर ऊपर दया कर अऊ मोर पराथना ला सुन।
PSA 4:2 हे मनखेमन! तुमन कब तक मोर महिमा के बेजत्ती करत रहिहू? तुमन कब तक भरम ले मया करत रहिहू अऊ लबरा देवतामन के खोज म रहिहू?
PSA 4:3 तुमन जान लव कि यहोवा ह अपन बिसवासयोग्य सेवक ला अपन बर अलग रखे हवय; जब मेंह यहोवा ला पुकारथंव, त ओह मोर बात ला सुनथे।
PSA 4:4 कांपत रहव अऊ पाप झन करव; जब तुमन अपन दसना म रहिथव, त अपन मन ला जांचव अऊ चुप रहव।
PSA 4:5 धरमीपन के बलिदान चघावव अऊ यहोवा ऊपर भरोसा रखव।
PSA 4:6 बहुंते जन पुछत हवंय, “कोन ह हमर उन्नति करही?” हे यहोवा, तोर मुख के अंजोर हमर ऊपर चमका।
PSA 4:7 जब ओमन के अनाज अऊ नवां अंगूर के मंद बहुंत होथे, त तेंह मोर मन ला आनंद ले भर दे।
PSA 4:8 सांति से मेंह लेटहूं अऊ सुतहूं, काबरकि हे यहोवा, तेंहीच ह मोला सुरकछा म रखथस।
PSA 5:1 संगीत के निरदेसक बर। बांसुरी या नलीवाले बाजा बर। दाऊद के एक भजन। हे यहोवा, मोर बात ला सुन, मोर बिलाप करई ऊपर धियान दे।
PSA 5:2 हे मोर राजा अऊ मोर परमेसर, मदद बर मोर गोहार ला सुन, काबरकि तोरेच ले मेंह पराथना करत हंव।
PSA 5:3 हे यहोवा, बिहनियां के बेरा तेंह मोर गोठ ला सुनथस; बिहनियां के बेरा मेंह तोर ले बिनती करथंव अऊ तोर जबाब के बाट जोहथंव।
PSA 5:4 काबरकि तेंह अइसन परमेसर नो हस, जऊन ह दुस्टता ले खुस होथे; दुस्ट मनखेमन तोर संग नइं रह सकंय।
PSA 5:5 घमंडी मनखे ह तोर आघू म ठाढ़ नइं हो सकय। तेंह जम्मो दुस्ट काम करइयामन ले घिन करथस;
PSA 5:6 तेंह ओमन ला नास कर देथस, जेमन लबारी मारथंय। यहोवा ओमन ले घिन करथे, जेमन खून करथें अऊ धोखा देथें।
PSA 5:7 पर मेंह तोर बड़े मया के कारन तोर घर म आ सकत हंव; आदर म तोर पबितर मंदिर कोति मेंह मुड़ नवाथंव।
PSA 5:8 हे यहोवा, अपन धरमीपन म मोर अगुवई कर, मोर बईरीमन के कारन— मोर आघू म तोर रद्दा ला सीधा देखा।
PSA 5:9 ओमन के मुहूं के एको ठन बात ऊपर भरोसा नइं करे जा सकय; ओमन के मन ह डाह-बैर ले भरे हवय। ओमन के टोंटा ह एक खुला कबर ए; अपन जीभ ले ओमन लबारी मारथें।
PSA 5:10 हे परमेसर, ओमन ला दोसी ठहिरा! ओमन के चालबाजी ह ओमन के गिरे के कारन होवय। ओमन के बहुंते पाप के कारन ओमन ला बाहिर निकाल दे, काबरकि ओमन तोर बिरूध बिदरोह करे हवंय।
PSA 5:11 पर जेमन तोर करा सरन लेथें, ओमन खुस होवंय; ओमन हमेसा आनंद के गीत गावंय। ओमन ला अपन सुरकछा म रख, ताकि जऊन मन तोर नांव ले मया करथें, ओमन तोर म आनंद मनावंय।
PSA 5:12 हे यहोवा, सही म तेंह धरमी जन ला आसीस देथस; तेंह एक ढाल के सहीं ओमन ला अपन अनुग्रह के घेरा म रखथस।
PSA 6:1 संगीत के निरदेसक बर। तारवाले बाजामन के संग। सेमिनित के मुताबिक। दाऊद के एक भजन। हे यहोवा, अपन गुस्सा म मोला झन फटकार या अपन कोप म मोर ताड़ना झन कर।
PSA 6:2 हे यहोवा मोर ऊपर दया कर, काबरकि मेंह दुरबल हो गे हंव; हे यहोवा, मोर बेमारी ला बने कर दे, काबरकि मोर हाड़ामन म पीरा हवय।
PSA 6:3 मोर परान ह अब्बड़ पीरा म हवय। हे यहोवा, कब तक, कब तक ठहिरे रहिबे?
PSA 6:4 हे यहोवा, किंदरके मोला छुड़ा; अपन बहुंते मया के कारन मोला बचा।
PSA 6:5 मरे मनखेमन के बीच कोनो तोर नांव के परचार नइं करंय। कबर ले कोन ह तोर इस्तुति करथे?
PSA 6:6 मेंह कराहत-कराहत थक गे हंव। पूरा रथिया रोवत-रोवत मोर दसना ह भीग जाथे अऊ मोर आंसू ले मोर पलंग ह भीग जाथे।
PSA 6:7 मोर आंखीमन दुख के मारे कमजोर होवत हें; मोर जम्मो बईरीमन के कारन ओमन धुंधला गे हवंय।
PSA 6:8 हे जम्मो दुस्ट काम करइयामन, मोर ले दूरिहा हटव, काबरकि यहोवा ह मोर रोये के अवाज ला सुने हवय।
PSA 6:9 यहोवा ह दया बर मोर रोवई ला सुने हवय; यहोवा ह मोर पराथना ला गरहन करथे।
PSA 6:10 मोर जम्मो बईरीमन लाज अऊ पीरा के मारे घबराहीं; ओमन पाछू मुड़हीं अऊ अचानक लज्जित होहीं।
PSA 7:1 दाऊद के सिग्गायोन नांव के एक भजन, जेला ओह बिनयामीनी कूस के संबंध म यहोवा के आघू म गाईस। हे यहोवा मोर परमेसर, मेंह तोर सरन लेथंव; मोला ओ जम्मो झन ले बचा अऊ छुड़ा, जेमन मोर पीछा करत हें,
PSA 7:2 नइं तो ओमन सिंह के सहीं मोला चीरके कुटा-कुटा कर दीहीं अऊ मोला बचानेवाला कोनो नइं होहीं।
PSA 7:3 हे यहोवा मोर परमेसर, कहूं मेंह ये काम करे हंव अऊ मोर हांथमन दोसी अंय—
PSA 7:4 यदि मेंह मोर संग मेल रखइयामन के संग भलई के बदले बुरई करे हंव या बिगर कारन के मेंह अपन बईरी ला लूटे हंव—
PSA 7:5 त फेर मोर बईरी ह मोर पीछा करके मोला धर लेवय; ओह मोला भुइयां म कुचरके मार डारय अऊ मोला माटी म मिला देवय।
PSA 7:6 हे यहोवा, अपन कोरोध म उठ; मोर बईरीमन के कोरोध के बिरूध म उठ। हे मोर परमेसर, जाग अऊ नियाय कर।
PSA 7:7 मनखेमन के भीड़ तोर चारों कोति जूरय, अऊ तें ओमन ऊपर ऊंच जगह म बिराजमान हो जा।
PSA 7:8 यहोवा ह मनखेमन के नियाय करय। हे यहोवा, हे सर्वोच्च परमेसर, मोर धरमीपन के मुताबिक, मोर ईमानदारी के मुताबिक मोर नियाय कर।
PSA 7:9 हे धरमी परमेसर, तें जऊन ह मन अऊ हिरदय ला जांचथस; दुस्टमन के बुरई ला खतम कर दे अऊ धरमीमन ला सुरकछित रख।
PSA 7:10 सर्वोच्च परमेसर ह मोर ढाल ए, जऊन ह सीधवा मनखेमन ला बचाथे।
PSA 7:11 परमेसर ह धरमी नियायधीस अय, अइसन परमेसर, जऊन ह हर दिन कोप करथे।
PSA 7:12 यदि मनखे ह पछताप नइं करही, त परमेसर ह अपन तलवार ला धार करही; ओह धनुस ला साधके ओमा तीर चघाही।
PSA 7:13 ओह मिरतू के हथियार तियार करे हवय; ओह अपन आगी बरत तीरमन ला तियार रखथे।
PSA 7:14 जऊन ह दुस्टता के बात सोचथे, ओह समस्या खड़े करथे अऊ बईरता ला पईदा करथे।
PSA 7:15 जऊन ह माटी निकालके खंचवा कोड़थे, ओह अपन कोड़े खंचवा म खुद गिरथे।
PSA 7:16 जऊन समस्या ओह खड़े करथे, ओह लहुंटके ओकरे ऊपर आ जाथे; ओकर हिंसा के काम ओकरेच मुड़ ऊपर आ जाथे।
PSA 7:17 मेंह यहोवा ला ओकर धरमीपन बर धनबाद दूहूं; मेंह यहोवा सर्वोच्च परमेसर के नांव म परसंसा के गीत गाहूं।
PSA 8:1 संगीत के निरदेसक बर। गित्तीथ के मुताबिक दाऊद के एक भजन। हे यहोवा, हमर परभू, तोर नांव ह जम्मो धरती म का ही परतापी ए! तेंह अपन महिमा स्वरग म ठहिराय हस।
PSA 8:2 लइका अऊ छोटे लइकामन के दुवारा परसंसा करवाके तेंह बईरी अऊ पलटा लेवइयामन ला चुप कराय बर ओमन के बिरूध एक गढ़ बनाय हस।
PSA 8:3 जब मेंह अकास ऊपर बिचार करथंव, जऊन ह तोर हांथ के काम ए चंदा अऊ तारामन, जेमन ला तेंह अपन-अपन जगह म रखे हस,
PSA 8:4 त मनखे ह का ए कि तेंह ओकर ऊपर धियान देथस, मानव-जाति ह का ए कि तेंह ओकर खियाल रखथस?
PSA 8:5 तेंह ओला स्वरगदूतमन ले थोरकन कम करके बनाय हस अऊ ओला महिमा अऊ आदर के मुकुट पहिराय हस।
PSA 8:6 तेंह ओला अपन हांथ के काममन के ऊपर राज-करइया बनाय हस; तेंह हर एक चीज ला ओकर गोड़ खाल्हे कर दे हस:
PSA 8:7 जम्मो भेड़-बकरी अऊ गाय-बईला, अऊ जंगल के पसु,
PSA 8:8 अकास के चिरई, अऊ समुंदर के मछरी, अऊ ओ जम्मो जीव-जन्तु, जेमन समुंदर के पानी म रहिथें।
PSA 8:9 हे यहोवा हमर परभू, तोर नांव ह जम्मो धरती म का ही वैभवसाली अय।
PSA 9:1 संगीत के निरदेसक बर। “बेटा के मिरतू” के धुन म दाऊद के एक भजन। हे यहोवा, मेंह अपन पूरा मन से तोर धनबाद करहूं; मेंह तोर जम्मो अचरज के काम के बखान करहूं।
PSA 9:2 मेंह तोर कारन खुस होहूं अऊ आनंद मनाहूं; हे सर्वोच्च परमेसर, मेंह तोर नांव के महिमा के गीत गाहूं।
PSA 9:3 मोर बईरीमन पीठ देखाके भागथें; ओमन ठोकर खाके तोर आघू म नास हो जाथें।
PSA 9:4 काबरकि तेंह मोर सही नियाय अऊ फैसला करे हस, तेंह एक धरमी नियायधीस के रूप म सिंघासन म बिराजमान होके नियाय करे हस।
PSA 9:5 तेंह जाति-जाति के मनखेमन ला फटकारे हस अऊ दुस्टमन के नास करे हस; तेंह ओमन के नांव ला हमेसा-हमेसा बर मिटा दे हस।
PSA 9:6 कभू खतम नइं होवइया बिनास मोर बईरीमन ऊपर आ गे हवय, तेंह ओमन के सहरमन ला गिरा दे हस; अऊ त अऊ ओमन के सुरता घलो नइं ए।
PSA 9:7 यहोवा ह सदाकाल बर राज करथे; ओह अपन सिंघासन ला नियाय बर स्थापित करे हवय।
PSA 9:8 ओह धरमीपन से संसार के नियाय करथे अऊ बिगर पखियपात के मनखेमन के मामला निपटाथे।
PSA 9:9 यहोवा ह दबे-कुचरे मनखेमन बर सरन के जगह अऊ संकट के बेरा म एक मजबूत गढ़ ए।
PSA 9:10 जेमन तोर नांव ला जानथें, ओमन तोर ऊपर भरोसा करथें, काबरकि हे यहोवा, तेंह ओमन ला कभू नइं छोंड़स, जऊन मन तोला खोजथें।
PSA 9:11 सियोन म बिराजे, यहोवा के महिमा के गीत गावव; जाति-जाति के मनखेमन के बीच ओकर काम के बखान करव।
PSA 9:12 काबरकि जऊन ह खून के बदला लेथे, ओह सुरता रखथे; ओह दुखी मनखे के पुकार ला अनसुना नइं करय।
PSA 9:13 हे यहोवा, देख, मोर बईरीमन मोला कइसन सतात हवंय! मोर ऊपर दया कर अऊ मोला मिरतू के दुवार ले हटा,
PSA 9:14 ताकि मेंह बेटी सियोन के दुवारमन म तोर परसंसा के बखान करंव, अऊ उहां तोर करे गय उद्धार ले आनंदित होवंव।
PSA 9:15 जाति-जाति के मनखेमन ओ खंचवा म गिरे हवंय, जेला ओमन कोड़े रिहिन; ओमन के गोड़मन ओ फांदा म फंस गे हवंय, जेला ओमन लगाय रिहिन।
PSA 9:16 यहोवा ह अपन नियाय के काम बर जाने जाथे; दुस्ट मनखेमन अपन करे गे काम के दुवारा ही फंस जाथें।
PSA 9:17 दुस्ट मनखेमन खाल्हे अधोलोक म चले जाथें, अऊ ओ जम्मो जाति के मनखेमन घलो, जेमन परमेसर ला भुला जाथें।
PSA 9:18 पर परमेसर ह दीन-दुखी ला कभू नइं भूलय; दुखीमन के आसा कभू नइं टूटय।
PSA 9:19 हे यहोवा, उठ, मरनहार मनखे ला जय झन पावन दे; जाति-जाति के मनखेमन के नियाय तोर आघू म होवय।
PSA 9:20 हे यहोवा, तें ओमन ला डरवा; जाति-जाति के मनखेमन जानंय कि ओमन सिरिप मरनहार मनखे अंय।
PSA 10:1 हे यहोवा, तेंह दूरिहा म काबर ठाढ़े रहिथस? संकट के बेरा म तेंह काबर अपनआप ला छिपा लेथस?
PSA 10:2 दुस्ट मनखे ह अपन घमंड म दुरबल मनखे के सिकार कर लेथे; ओह दुस्ट के बिछाय जाल म फंस जाथे।
PSA 10:3 दुस्ट ह अपन मन के लालसा ऊपर घमंड करथे; ओह लालची मनखे ला आसीस देथे अऊ यहोवा के तिरस्कार करथे।
PSA 10:4 अपन घमंड के कारन दुस्ट मनखे ह परमेसर के खोज नइं करय; ओकर जम्मो सोच-बिचार म परमेसर बर कोनो जगह नइं रहय।
PSA 10:5 ओकर रसता ह हमेसा उन्नति के रहिथे; तोर कानून ला ओह नइं मानय; ओह अपन जम्मो बईरीमन के ऊपर हंसके ओमन के ठट्ठा करथे।
PSA 10:6 ओह अपनआप ले कहिथे, “मोला कभू कोनो हला नइं सकंय।” ओह कसम खाके कहिथे, “मेंह हमेसा दुख ले बचे रहिहूं।”
PSA 10:7 ओकर मुहूं ह लबारी अऊ धमकी के बात ले भरे हवय, समस्या अऊ दुस्टता के बात ओकर जीभ म रहिथे।
PSA 10:8 ओह गांवमन के लकठा म घात लगाय बईठे रहिथे; ओह छिपके निरदोस मनखे के हतिया करथे। ओकर आंखी ह छुपके अपन सिकार ला देखत रहिथे।
PSA 10:9 छुपके बईठे सिंह के सहीं ओह घात म रहिथे। ओह असहाय ला धरे बर घात म रहिथे; ओह असहाय ला धरथे अऊ अपन जाल म घसीटके ले जाथे।
PSA 10:10 ओकर सिकारमन कुचरे जाथें, ओमन गिर जाथें; ओमन ओकर ताकत के आघू म हार जाथें।
PSA 10:11 ओह अपनआप ले कहिथे, “परमेसर ह कभू धियान नइं दीही; ओह अपन चेहरा ला ढांप लेथे अऊ कभू नइं देखय।”
PSA 10:12 हे यहोवा, उठ! हे परमेसर अपन हांथ ला उठा। असहाय मनखेमन ला झन भुला।
PSA 10:13 दुस्ट मनखे ह काबर परमेसर ला तुछ समझथे? ओह अपनआप ले काबर कहिथे, “परमेसर ह मोर ले लेखा नइं लेवय?”
PSA 10:14 पर हे परमेसर, तेंह दुखी मनखे के समस्या ला देखथस; तेंह ओमन के दुख ऊपर बिचार करके ओला अपन हांथ म ले लेथस। पीड़ित मनखे ह अपनआप ला तोर हांथ म सऊंप देथे; तेंह अनाथमन के सहारा अस।
PSA 10:15 दुस्ट मनखे के बाहां ला टोर दे; दुस्ट काम करइया मनखे ले ओकर दुस्टता के हिसाब ले ताकि ओकर दुस्टता ह खतम हो जावय।
PSA 10:16 यहोवा ह सदाकाल बर राजा अय; आने जाति के मनखेमन ओकर देस ले नास हो जाहीं।
PSA 10:17 हे यहोवा, तेंह दुखी मनखे के मन के बात ला सुनथस; तेंह ओमन ला उत्साहित करथस अऊ ओमन के गोहार ला सुनथस,
PSA 10:18 अऊ तेंह अनाथ अऊ दुखी-पीड़ित मनखेमन के बचाव करथस, ताकि धरती म रहइया मरनहार मनखे ह फेर कभू आतंक झन मचावय।
PSA 11:1 संगीत के निरदेसक बर दाऊद के एक भजन। मेंह यहोवा करा सरन लेथंव। तब तेंह मोला कइसे कह सकत हस: “चिरई के सहीं अपन पहाड़ करा उड़ जा।
PSA 11:2 काबरकि देख, दुस्ट मनखेमन अपन धनुस ला साधत हें; ओमन तीर ला धनुस के डोरी म रखत हें ताकि अंधियार म ले सीधवा मनखे ऊपर तीर चलावंय।
PSA 11:3 जब नीव ला गिराय जावत हे, त फेर धरमी ह का कर सकथे?”
PSA 11:4 यहोवा ह अपन पबितर मंदिर म हवय; यहोवा ह अपन स्वरग के सिंघासन म बिराजे हवय। ओह धरती ऊपर हर एक जन ला देखत रहिथे; ओकर आंखी ह ओमन ला परखथे।
PSA 11:5 यहोवा ह धरमी ला परखथे, पर ओह ओ दुस्टमन ले बहुंत घिन करथे, जेमन हिंसा ले मया करथें।
PSA 11:6 दुस्ट मनखेमन ऊपर परमेसर ह बरत कोइला अऊ बरत गंधक बरसाही; लेसा देवइया हवा ह ओमन के भाग होही।
PSA 11:7 काबरकि यहोवा ह धरमी अय, ओह नियाय ले मया करथे; धरमी मनखे ह ओकर दरसन करही।
PSA 12:1 संगीत के निरदेसक बर। सेमिनित के मुताबिक दाऊद के एक भजन। हे यहोवा, मदद कर, काबरकि अऊ कोनो वफादार नइं अंय; जऊन मन बिसवासयोग्य अंय, ओमन मनखेमन के बीच ले गायब हो गे हवंय।
PSA 12:2 हर एक मनखे अपन परोसी ले लबारी मारथे; ओमन अपन मुहूं ले चापलूसी करथें पर अपन मन म धोखा के बात रखथें।
PSA 12:3 यहोवा ह जम्मो चापलूसी करइया मुहूं अऊ हर ओ घमंड करइया जीभ ला बंद कर देवय—
PSA 12:4 जेमन कहिथें, “हमन अपन जीभ के दुवारा जीत जाबो; हमर खुद के ओंठ ह हमर बचाव करही—हमर मालिक कोन अय?”
PSA 12:5 यहोवा ह कहिथे, “मेंह अब उठहूं, काबरकि गरीब मनखे ला लूटे जाथे अऊ जरूरतमंद ह कलहरथे। मेंह ओमन ला ओ मनखेमन ले बचाहूं, जेमन ओमन ला कलंकित करत हें।”
PSA 12:6 यहोवा के बचन म कोनो कमी नइं ए, येह भट्ठी म सुध करे गे चांदी के सहीं अय, ये सात बार सुध करे गे सोन के सहीं अय।
PSA 12:7 हे यहोवा, तेंह जरूरतमंद ला सही-सलामत रखबे अऊ हमन ला हमेसा बर ओ दुस्टमन ले बचाय रखबे,
PSA 12:8 जेमन अकड़के चलथें जब दुस्टता ला मनखेमन के दुवारा आदर करे जाथे।
PSA 13:1 संगीत के निरदेसक बर दाऊद के एक भजन। हे यहोवा, कब तक? का तेंह मोला हमेसा बर भुला जाबे? कब तक तेंह अपन चेहरा ला मोर ले छुपाय रहिबे?
PSA 13:2 कब तक मेंह अपन बिचार म फंसे रहिहूं अऊ हर दिन अपन मन म दुखी होवत रहिहूं? कब तक मोर बईरी ह मोर ऊपर जय पावत रहिही?
PSA 13:3 हे यहोवा मोर परमेसर, मोर कोति देख अऊ जबाब दे, मोर आंखी ला देखे के सक्ति दे, नइं तो मेंह मिरतू के नींद म सो जाहूं,
PSA 13:4 नइं तो मोर बईरी ह कहिही, “मेंह ओला जीत डारे हंव,” अऊ मोर बईरीमन आनंद मनाहीं, जब में गिर जाहूं।
PSA 13:5 पर मेंह तोर अब्बड़ मया ऊपर भरोसा रखथंव; मोर हिरदय ह तोर उद्धार म आनंद मनाथे।
PSA 13:6 मेंह यहोवा के गीत गाहूं, काबरकि ओह मोर भलई करे हवय।
PSA 14:1 संगीत के निरदेसक बर दाऊद के एक भजन। मुरूख ह अपन मन म कहिथे, “परमेसर नइं ए।” ओमन बिगड़ गे हवंय, ओमन दुस्टता के काम करथें; अइसे कोनो नइं ए, जऊन ह भलई करथे।
PSA 14:2 यहोवा ह स्वरग ले जम्मो मानव-जाति ला ये आसा म देखथे कि कोनो समझदार हवय कि नइं, कोनो परमेसर के खोज करथे कि नइं।
PSA 14:3 जम्मो झन भटक गे हवंय, जम्मो झन बिगड़ गे हवंय; अइसे कोनो नइं ए, जऊन ह भलई करथे, एको झन घलो नइं।
PSA 14:4 का ये जम्मो दुस्ट काम करइयामन कुछू नइं जानंय? ओमन मोर मनखेमन ला अइसे खा जाथें, मानो कि रोटी खावत हें; ओमन कभू यहोवा के नांव तक नइं लेवंय।
PSA 14:5 पर उहां, ओमन डर के मारे घबरा गे हवंय, काबरकि परमेसर ह धरमीमन के संग हवय।
PSA 14:6 दुस्ट काम करइयामन, तुमन गरीबमन के योजना ला बेकार कर देथव, पर यहोवा ह ओमन के सरन-स्थान अय।
PSA 14:7 बने होतिस कि इसरायल बर उद्धार ह सियोन ले बाहिर आतिस! जब यहोवा ह अपन मनखेमन ला पहिले के सहीं कर देथे, याकूब ह आनंद मनावय अऊ इसरायल ह खुस होवय!
PSA 15:1 दाऊद के एक भजन। हे यहोवा, तोर पबितर तम्बू म कोन निवास कर सकथे? तोर पबितर पहाड़ म कोन रह सकथे?
PSA 15:2 ओ, जेकर चालचलन ह निरदोस हे, जऊन ह धरमी काम करथे, जऊन ह अपन हिरदय ले सच बोलथे;
PSA 15:3 जेकर मुहूं ले निन्दा के बात नइं निकलय, जऊन ह अपन परोसी के बिरूध कोनो गलत काम नइं करय, अऊ आने मन के निन्दा नइं करय;
PSA 15:4 जऊन ह दुस्ट मनखे ला तुछ समझथे पर ओमन के आदर करथे, जेमन यहोवा ले डरथें; जऊन ह हानि उठाके घलो अपन सपथ ला पूरा करथे, अऊ अपन मन ला नइं बदलय;
PSA 15:5 जऊन ह बिगर बियाज के गरीब ला अपन पईसा उधार देथे; जऊन ह निरदोस मनखे ले घूस नइं लेवय। जऊन ह ये काममन ला करथे, ओह कभू नइं डोलय।
PSA 16:1 दाऊद के एक मिकताम। हे मोर परमेसर, मोला सुरकछित रख, काबरकि तोर करा मेंह सरन लेवत हंव।
PSA 16:2 मेंह यहोवा ले कहिथंव, “तेंह मोर परभू अस; तोर छोंड़ मोर करा अऊ कोनो बने चीज नइं ए।”
PSA 16:3 ओ पबितर मनखे, जऊन मन देस म हवंय, ओमन के बारे मेंह कहिथंव, “ओमन उत्तम मनखे अंय, जेमन म मोर जम्मो खुसी हवय।”
PSA 16:4 ओ मनखे, जऊन मन आने देवतामन के पाछू भागथें, ओमन के दुख बढ़ते ही जाही। मेंह अइसन देवतामन ला लहू के अरपन नइं करंव अऊ न ही मोर मुहूं ले ओमन के नांव लेवंव।
PSA 16:5 हे यहोवा, सिरिप तेंहीच ह मोर हिस्सा अऊ मोर कटोरा अस; तेंह मोर हिस्सा ला सुरकछित रखथस।
PSA 16:6 सीमना रेखा ह मोर बर खुसी के जगह म पड़े हवय; सही म मोर करा मनभावन बिरासत हवय।
PSA 16:7 मेंह यहोवा के परसंसा करहूं, जऊन ह मोला सलाह देथे; अऊ त अऊ रथिया के बेरा घलो मोर मन ह मोला सिखोथे।
PSA 16:8 मोर आंखी ह हमेसा यहोवा ऊपर लगे रहिथे। ओह मोर जेवनी हांथ कोति हवय, मेंह नइं डोलंव।
PSA 16:9 एकरसेति मोर मन ह खुस हवय अऊ मोर मुहूं ह आनंद मनाथे; मोर देहें घलो चैन से अराम करही।
PSA 16:10 काबरकि तेंह मोला मरे मनखेमन के लोक म नइं छोंड़बे, अऊ न ही अपन बिसवासयोग्य जन ला तेंह सड़न देबे।
PSA 16:11 तेंह मोला जिनगी के रसता देखाथस; तेंह अपन आघू म मोला आनंद ले भर देबे, तोर जेवनी हांथ म अनंतकाल के खुसी रहिही।
PSA 17:1 दाऊद के एक पराथना। हे यहोवा, मोर सच्चई के बिनती ला सुन; मोर गोहार ला सुन। मोर पराथना ला सुन— येह कपटरहित बात बोलइया मुहूं ले निकले हवय।
PSA 17:2 मोर नियाय तोरेच करा ले आथे; तोर आंखी ह सही बात ला देखय।
PSA 17:3 हालाकि तेंह मोर मन ला जांचथस, हालाकि रथिया तेंह मोला परखथस अऊ मोला जांचथस, तभो ले तेंह पाबे कि मेंह कोनो दुस्टता के योजना नइं बनाय हंव; मोर मुहूं ह कोनो पाप नइं करे हवय।
PSA 17:4 हालाकि मनखेमन मोला घूस देय के कोसिस करिन, पर तोर दिये गय हुकूम के जरिये मेंह अपनआप ला गलत काम ले दूरिहा रखे हंव।
PSA 17:5 मोर पांव ह तोर रसता ला धरे हवय; मोर गोड़ ह नइं लड़खड़ाय हवय।
PSA 17:6 हे परमेसर, मेंह तोला पुकारत हंव, काबरकि तेंह मोला जबाब देबे; अपन कान ला मोर कोति लगा अऊ मोर पराथना ला सुन।
PSA 17:7 अपन बड़े मया के अद्भूत काममन ला मोला देखा, तें जऊन ह अपन जेवनी हांथ के दुवारा ओमन ला बचाथस, जऊन मन अपन बईरीमन ले तोर करा सरन लेथें।
PSA 17:8 मोला अपन आंखी के पुतली सहीं रख; मोला अपन डेना के छइहां म छुपा ले
PSA 17:9 ओ दुस्ट मनखेमन ले, जेमन मोला नास करे बर निकले हवंय, ओ मोर मरनहार बईरीमन ले, जेमन मोला घेर ले हवंय।
PSA 17:10 ओमन अपन कठोर हिरदय ला बंद कर लेथें, अऊ ओमन के मुहूं ले घमंड के बात निकलथे।
PSA 17:11 ओमन मोर पता लगा ले हवंय, अऊ अब ओमन मोला घेरत हवंय, मोला भुइयां म पटके बर ओमन के आंखीमन सचेत हवंय।
PSA 17:12 ओमन सिकार के भूखा एक सिंह सहीं अंय, ओ भयंकर सिंह, जऊन ह ओधा लेके घात म बईठे रहिथे।
PSA 17:13 हे यहोवा, उठ, ओमन के सामना कर, ओमन ला पटक दे; अपन तलवार के दुवारा मोला दुस्ट ले बचा।
PSA 17:14 हे यहोवा, अपन हांथ के दुवारा मोला अइसन मनखेमन ले बचा, ये संसार के ओ मनखेमन ले, जेमन के ईनाम इही जिनगी म हवय। ओमन के पेट ओमा ले भरय, जेला तेंह दुस्टमन बर रखे हस; ओमन के लइकामन ओमा ले पेट भरके खावंय, अऊ ओमा ले ओमन के छोटे लइकामन बर घलो बच जावय।
PSA 17:15 जहां तक मोर बात ए, मेंह बचाय जाहूं अऊ तोर चेहरा ला देखहूं; जब मेंह जागहूं, त तोर सरूप ला देखके संतोस करहूं।
PSA 18:1 संगीत के निरदेसक बर यहोवा के सेवक दाऊद के एक भजन। ओह यहोवा बर ये गीत ला तब गाईस, जब यहोवा ह ओला ओकर जम्मो बईरीमन के हांथ ले अऊ साऊल के हांथ ले बचाईस। ओह कहिस: हे यहोवा, मोर बल, मेंह तोर ले मया करथंव।
PSA 18:2 यहोवा ह मोर चट्टान, मोर गढ़ अऊ मोर छुड़ानेवाला अय; मोर परमेसर ह मोर चट्टान अय, जेमा मेंह सरन लेथंव, ओह मोर ढाल अऊ मोर उद्धार के सींग, मोर मजबूत गढ़ अय।
PSA 18:3 मेंह यहोवा ला पुकारेंव, जऊन ह इस्तुति के योग्य अय, अऊ मेंह अपन बईरीमन ले बचाय गे हवंव।
PSA 18:4 मिरतू के डोरीमन मोला फंसा लीन; भयंकर बिनास के तेज धारा ह मोला घबरा दीस।
PSA 18:5 कबर के डोरीमन मोर चारों कोति रिहिन; मिरतू के फांदा ह मोर आघू म रिहिस।
PSA 18:6 मेंह अपन बिपत्ति म यहोवा ला पुकारेंव; मेंह अपन परमेसर ले मदद करे बर गोहार लगांय। अपन मंदिर ले ओह मोर अवाज ला सुनिस; मोर गोहार ह ओकर आघू म, ओकर कान म पड़िस।
PSA 18:7 धरती ह कांपिस अऊ डोलिस, अऊ पहाड़मन के नीवमन डोल गीन; ओमन कांपे लगिन, काबरकि ओह गुस्सा हो गे रिहिस।
PSA 18:8 ओकर नाक ले धुआं निकलिस; ओकर मुहूं ले भसम करइया आगी निकलिस, जेमा ले बरत कोइला के जुवाला निकलिस।
PSA 18:9 ओह अकास ला अलग करिस अऊ खाल्हे उतरिस; करिया बादरमन ओकर गोड़ के खाल्हे रिहिन।
PSA 18:10 ओह करूब ऊपर सवार होके उड़ गीस; ओह हवा के डेनामन म सवार होके बहुंत ऊपर उड़िस।
PSA 18:11 ओह अंधियार ला अपन ओढ़ना बना लीस, ओह ओकर चारों कोति सुघर ओढ़ना रिहिस— याने कि अकास के पानीवाले करिया बादरमन।
PSA 18:12 ओकर उपस्थिति के तेज ले बादरमन बढ़िन, अऊ करा गिरिस अऊ बिजली कड़किस।
PSA 18:13 यहोवा ह स्वरग ले गरजिस; सर्वोच्च परमेसर के अवाज ह गुंजिस।
PSA 18:14 ओह अपन तीरमन ला चलाईस अऊ बईरीमन ला तितिर-बितिर कर दीस, बिजली के बड़े कड़क ले ओह ओमन ला हराके भगा दीस।
PSA 18:15 हे यहोवा, तोर घुड़की ले, तोर नाक के सांस फूंके ले, समुंदर के घाटीमन दिखे लगिन अऊ धरती के नीवमन खाली पड़ गीन।
PSA 18:16 ओह ऊपर ले हांथ बढ़ाके मोला थाम लीस; ओह मोला गहिरा पानी म ले बाहिर निकालिस।
PSA 18:17 ओह मोला मोर ओ ताकतवर बईरीमन ले, मोर बिरोधीमन ले छोंड़ाईस, जेमन बहुंत बलवान रिहिन।
PSA 18:18 ओमन मोर बिपत्ति के दिन म मोर बिरोध करिन, पर यहोवा ह मोर सहारा रिहिस।
PSA 18:19 ओह मोला एक ठन चाकर जगह म ले आईस; ओह मोला बचाईस, काबरकि ओह मोर ले खुस रिहिस।
PSA 18:20 यहोवा ह मोर धरमीपन के मुताबिक मोर ले बरताव करे हवय; मोर हांथ के सुधता के मुताबिक ओह मोला ईनाम दे हवय।
PSA 18:21 काबरकि मेंह यहोवा के रद्दा म चले हवंव; मेंह अपन परमेसर के रद्दा ले हट जाय के पाप नइं करे हंव।
PSA 18:22 ओकर जम्मो कानूनमन मोर आघू म हवंय; मेंह ओकर बिधिमन ला माने ले नइं हटे हंव।
PSA 18:23 मेंह ओकर आघू म निरदोस रहे हंव अऊ मेंह अपनआप ला पाप ले दूरिहा रखे हंव।
PSA 18:24 यहोवा ह मोर धरमीपन के मुताबिक मोला ईनाम दे हवय, ओकर नजर म मोर हांथ के सुधता के मुताबिक, ओह मोला ईनाम दे हवय।
PSA 18:25 बिसवासयोग्य मनखे बर तेंह बिसवासयोग्य रहिथस, निरदोस मनखे बर तेंह निरदोस रहिथस,
PSA 18:26 सुध मनखे बर तेंह सुध रहिथस, पर भटके हुए मनखे बर तेंह चतुर बनथस।
PSA 18:27 तेंह नम्र सुभाव के मनखे ला बचाथस, पर घमंड ले चढ़े आंखीवाले ला नीचा देखाथस।
PSA 18:28 हे यहोवा, तेंह मोर दीया ला बारे रखथस; मोर परमेसर ह मोर अंधियार ला अंजोर कर देथे।
PSA 18:29 तोर मदद ले मेंह एक सेना के बिरूध जा सकत हंव; मोर परमेसर के मदद ले मेंह एक दीवार ऊपर चढ़ सकत हंव।
PSA 18:30 जहां तक परमेसर के बात ए, ओकर रसता ह बिलकुल सही ए: यहोवा के बचन म कोनो कमी नइं ए; ओह ओ जम्मो झन ला बचाथे, जऊन मन ओकर सरन म आथें।
PSA 18:31 काबरकि यहोवा ला छोंड़ कोन ह परमेसर ए? अऊ हमर परमेसर ला छोंड़ कोन ह चट्टान ए?
PSA 18:32 येह परमेसर ए, जऊन ह सामर्थ से मोला संभालथे अऊ मोर रसता ला सुरकछित रखथे।
PSA 18:33 ओह मोर गोड़ ला हिरन के गोड़ सहीं कर देथे; ओह मोला ऊंच जगह म ठाढ़ करथे।
PSA 18:34 ओह मोर हांथमन ला लड़ई करे बर सिखाथे; मोर बाहां ह कांसा के धनुस ला मोड़ सकथे।
PSA 18:35 तेंह अपन बचाव के मदद ला मोर ढाल बनाथस, अऊ तोर जेवनी हांथ ह मोला संभालथे; तोर मदद ह मोला महान कर दे हवय।
PSA 18:36 तेंह मोर पांव बर चाकर रसता देथस, जेकर ले मोर एड़ीमन नइं थकंय।
PSA 18:37 मेंह अपन बईरीमन के पीछा करके ओमन ला पकड़ लेंव; मेंह तब तक नइं लहुंटंय, जब तक कि ओमन नास नइं हो गीन।
PSA 18:38 मेंह ओमन ला कुचर देंव, जेकर ले ओमन उठ नइं सकिन; ओमन मोर गोड़ खाल्हे गिर गीन।
PSA 18:39 तेंह मोला लड़ई करे बर ताकत दे हस; तेंह मोर बईरीमन ला मोर आघू म झुका दे हस।
PSA 18:40 तेंह मोर बईरीमन ला पीठ देखाके भागे बर बिबस कर दे हस, अऊ मेंह मोर बईरीमन ला नास कर देंव।
PSA 18:41 ओमन मदद बर गोहारिन, पर ओमन ला बचानेवाला कोनो नइं रिहिस— ओमन यहोवा ला पुकारिन, पर ओह ओमन ला जबाब नइं दीस।
PSA 18:42 मेंह ओमन ला मार-मारके हवा म उड़ियावत धुर्रा के सहीं कर देंव; मेंह ओमन ला गली के चीखला सहीं रऊंदेंव।
PSA 18:43 तेंह मोला मनखेमन के हमला ले बचाय हस; तेंह मोला जाति-जाति के मनखेमन के मुखिया बनाय हस। ओ मनखे, जेमन ला मेंह नइं जानत रहेंव, ओमन अब मोर सेवा करथें,
PSA 18:44 परदेसीमन मोर आघू म डरथें; मोर अवाज ला सुनतेच ही ओमन मोर हुकूम के पालन करथें।
PSA 18:45 ओ जम्मो झन घबरा जाथें; ओमन कांपत अपन गढ़ ले बाहिर निकलथें।
PSA 18:46 यहोवा ह जीयत हवय! मोर चट्टान के परसंसा होवय! परमेसर मोर उद्धारकर्ता के बहुंत परसंसा होवय!
PSA 18:47 ओह परमेसर ए, जऊन ह मोर बदला लेथे, जऊन ह जाति-जाति के मनखेमन ला मोर अधीन कर देथे,
PSA 18:48 जऊन ह मोला मोर बईरीमन ले बचाथे। तेंह मोला मोर बिरोधीमन ले ऊंच करे हस; एक हिंसक आदमी ले तेंह मोला बचाय हस।
PSA 18:49 एकरसेति हे यहोवा, मेंह जाति-जाति के मनखेमन के बीच तोर परसंसा करहूं; मेंह तोर नांव के परसंसा के गीत गाहूं।
PSA 18:50 ओह अपन राजा ला बड़े बिजय देथे; ओह अपन अभिसिक्त जन, दाऊद अऊ ओकर संतानमन ऊपर हमेसा अटूट मया देखाथे।
PSA 19:1 संगीत के निरदेसक बर दाऊद के एक भजन। स्वरग ह परमेसर के महिमा के बखान करत हे; अकास ह ओकर हांथ के काम ला परगट करत हे।
PSA 19:2 हर दिन ओमन बखान करथें; हर रथिया ओमन गियान परगट करथें।
PSA 19:3 ओमन के कोनो बोली नइं ए, ओमन कोनो सबद के उपयोग नइं करंय; ओमन ले कोनो अवाज सुनई नइं देय।
PSA 19:4 तभो ले ओमन के अवाज जम्मो धरती म जाथे, ओमन के सबद संसार के छोर तक हबरथे। अकास म परमेसर ह सूरज बर एक तम्बू ताने हवय।
PSA 19:5 येह एक दूल्हा के अपन कमरा ले बाहिर निकलके आय सहीं ए, येह एक बिजेता के सहीं अय, जऊन ह अपन दऊड़ ला दऊड़े बर आनंदित हे।
PSA 19:6 येह अकास के एक छोर ले निकलथे अऊ दूसर छोर तक चक्कर लगाथे; जम्मो चीज ला येकर गरमी मिलथे।
PSA 19:7 यहोवा के कानून ह बिलकुल सही ए, अऊ येह आतमा ला ताजा कर देथे। यहोवा के बिधिमन भरोसा के लईक अंय, अऊ येमन सधारन मनखे ला बुद्धिमान बना देथें।
PSA 19:8 यहोवा के उपदेसमन सही अंय, अऊ येमन हिरदय ला आनंदित करथें। यहोवा के हुकूममन चमकीला एं, अऊ येमन आंखी ला अंजोर देथें।
PSA 19:9 यहोवा के भय ह सुध ए, अऊ येह सदाकाल तक बने रहिथे। यहोवा के नियममन पक्का अंय, अऊ ये जम्मो के जम्मो नियाय के अंय।
PSA 19:10 ओमन सोन ले घलो, सुध सोन ले घलो कीमती अंय; ओमन मंधरस ले घलो, मधुमक्खी के छत्ता के मंधरस ले घलो जादा मीठ अंय।
PSA 19:11 ओमन के दुवारा तोर सेवक ला चेतउनी मिलथे; ओमन के पालन करे ले बड़े ईनाम मिलथे।
PSA 19:12 पर अपन खुद के गलती ला कोन समझ सकथे? मोर छिपे गलतीमन ला छेमा कर।
PSA 19:13 अपन सेवक ला जानबूझके करइया पाप ले दूरिहा रख; ओमन के अधिकार मोर ऊपर झन होवय। तब मेंह निरदोस होहूं, अऊ बड़े अपराध के दोसी नइं होहूं।
PSA 19:14 हे यहोवा, मोर चट्टान अऊ मोर छुड़इया, मोर मुहूं के ये बचन अऊ मोर मन के ये बिचार तोला भावय।
PSA 20:1 संगीत के निरदेसक बर दाऊद के एक भजन। बिपत्ति के बेरा म यहोवा ह तोर बिनती के जबाब देवय; याकूब के परमेसर के नांव ह तोला बचावय।
PSA 20:2 पबितर-स्थान ले ओह तोर बर मदद पठोवय अऊ सियोन ले तोला मदद देवय।
PSA 20:3 ओह तोर जम्मो बलिदान ला सुरता करय; अऊ तोर होम-बलिदान ला स्वीकार करय।
PSA 20:4 ओह तोर मन के ईछा ला पूरा करय अऊ तोर जम्मो योजना ला सफल करय।
PSA 20:5 हमन तोर जय के कारन आनंद के मारे चिचियावन अऊ अपन परमेसर के नांव के झंडा ला ऊंचा करन। यहोवा ह तोर जम्मो बिनती ला पूरा करय।
PSA 20:6 अब ये बात मेंह जानत हंव: यहोवा ह अपन अभिसिक्त जन ला बिजयी बनाथे। ओह ओला अपन स्वरगीय पबितर-स्थान ले अपन जेवनी हांथ के बिजयी सक्ति के संग जबाब देथे।
PSA 20:7 कुछू मनखेमन रथ ऊपर अऊ कुछू मनखेमन घोड़ामन ऊपर भरोसा करथें, पर हमन तो यहोवा हमर परमेसर के नांव ऊपर भरोसा करथन।
PSA 20:8 ओमन ला ओमन के माड़ी म लाय जाथे अऊ ओमन गिरथें, पर हमन उठके मजबूती से खड़े रहिथन।
PSA 20:9 हे यहोवा, राजा ला बिजयी बना! जब हमन पुकारथन, त हमन ला जबाब दे!
PSA 21:1 संगीत के निरदेसक बर दाऊद के एक भजन। हे यहोवा, राजा ह तोर सामर्थ म आनंदित होथे। तोर दिये गे बिजय म ओला बहुंत आनंद मिलथे!
PSA 21:2 तेंह ओकर हिरदय के ईछा ला पूरा करे हस अऊ ओकर मुहूं के बिनती ला अस्वीकार नइं करे हस।
PSA 21:3 तेंह उत्तम आसीस के संग ओकर ले मिले बर आय अऊ ओकर मुड़ म सुध सोन के मुकुट पहिराय हस।
PSA 21:4 ओह तोर ले जिनगी मांगिस, अऊ तेंह ओला जिनगी देय— तेंह ओकर जिनगी ला सदाकाल बर बढ़ाय।
PSA 21:5 जऊन जय तेंह ओला दे हस, ओकर महिमा ह बड़े ए; तेंह ओला सोभा अऊ महिमा दे हस।
PSA 21:6 सही म तेंह ओला खतम नइं होवइया आसीस दे हस अऊ अपन उपस्थिति के आनंद ले ओला खुस कर दे हस।
PSA 21:7 काबरकि राजा ह यहोवा ऊपर भरोसा करथे; सर्वोच्च परमेसर के बड़े मया के कारन ओह अटल बने रहिही।
PSA 21:8 तोर हांथ ह तोर जम्मो बईरीमन के ऊपर पड़ही; तोर जेवनी हांथ ह तोर बईरीमन ला धर लीही।
PSA 21:9 जब तेंह लड़ई करे बर परगट होबे, त तेंह ओमन ला बरत भट्ठी म बारे सहीं बार देबे। यहोवा ह अपन कोप म ओमन ला लील जाही, अऊ ओकर आगी ह ओमन ला भसम कर दीही।
PSA 21:10 तेंह ओमन के संतानमन ला धरती ले नास कर देबे, मानव-जाति ले ओमन के बंस ला मिटा देबे।
PSA 21:11 हालाकि ओमन तोर बिरूध सडयंत्र रचथें अऊ दुस्ट योजना बनाथें, पर ओमन सफल नइं होवंय।
PSA 21:12 जब तेंह अपन धनुस ले ओमन ला अपन निसाना बनाबे। त ओमन अपन पीठ देखाके भागहीं।
PSA 21:13 हे यहोवा, तोर सामर्थ ह अऊ बढ़य; हमन तोर सक्ति के गीत गाबो अऊ परसंसा करबो।
PSA 22:1 संगीत के निरदेसक बर। “बिहनियां के मादा हिरन” के धुन म दाऊद के एक भजन। हे मोर परमेसर, हे मोर परमेसर, तेंह मोला काबर तियाग दे हस? तेंह मोर बचाव काबर नइं करत हस? मोर पीरा के गोहार ला काबर नइं सुनत हस?
PSA 22:2 हे मोर परमेसर, मेंह दिन म गोहारथंव, पर तेंह जबाब नइं देवस, रथिया घलो, मोला अराम नइं मिलय।
PSA 22:3 पर तेंह पबितर परमेसर के रूप म बिराजमान हस; तेंह ओ अस, जेकर परसंसा इसरायल करथे।
PSA 22:4 तोर ऊपर ही हमर पुरखामन भरोसा करिन; ओमन भरोसा करिन अऊ तेंह ओमन ला छोंड़ाय।
PSA 22:5 तोर ले ओमन गोहारिन अऊ ओमन बचाय गीन; तोर ऊपर ओमन भरोसा करिन अऊ ओमन लज्जा म नइं पड़िन।
PSA 22:6 पर में तो एक कीरा अंव, मनखे नइं, हर एक जन मोला अपमानित करथें, मनखेमन मोला तुछ समझथें।
PSA 22:7 ओ जम्मो झन, जेमन मोला देखथें, ओमन मोर हंसी उड़ाथें; ओमन अपन मुड़ हला-हलाके मोर बेजत्ती करथें।
PSA 22:8 ओमन कहिथें, “ओह यहोवा ऊपर भरोसा करथे, यहोवा ह ओला बचावय। जब ओह यहोवा म खुस रहिथे, त ओही ह ओला छोंड़ावय।”
PSA 22:9 तभो ले तेंह मोला गरभ ले बाहिर लानय, जब मेंह दूध पीयत लइका रहेंव, तब ले तेंह मोला तोर ऊपर भरोसा करे बर सिखोय हस।
PSA 22:10 जनम ले ही मोला तोर देखरेख म छोंड़ दिये गीस; जब मेंह मोर दाई के गरभ म रहेंव, तब ले ही तेंह मोर परमेसर अस।
PSA 22:11 मोर ले दूरिहा झन रह, काबरकि समस्या ह लकठा म हवय अऊ कोनो मदद करइया नइं ए,
PSA 22:12 बहुंत अकन सांड़मन मोला घेरत हवंय; बासान देस के बलवान सांड़मन मोला चारों कोति ले घेरत हवंय।
PSA 22:13 गरजत सिंह, जेमन अपन सिकार ला फाड़ डालथें, ओमन मोर बिरोध म अपन मुहूं खोलत हवंय।
PSA 22:14 मेंह पानी कस ढारे जावत हंव, अऊ मोर जम्मो हाड़ामन अपन जोड़ ले खिसक गे हवंय। मोर हिरदय ह मोम कस हो गे हवय; येह मोर भीतर म ही टघल गे हवय।
PSA 22:15 मोर मुहूं ह माटी के टूटे बरतन सहीं सूखा गे हवय, अऊ मोर जीभ ह मोर तालू म चिपकत हे, तेंह मोला मिरतू के माटी म लेटाथस।
PSA 22:16 कुकुरमन मोला घेरत हें, दुस्ट मनखेमन के एक दल ह मोला चारों कोति ले घेरत हे; ओमन मोर हांथ अऊ गोड़मन ला छेदत हवंय।
PSA 22:17 मोर जम्मो हाड़ामन दिखत हवंय; मनखेमन मोला घूरथें अऊ गंदा नजर ले देखथें।
PSA 22:18 ओमन मोर ओनहा ला आपस म बांट लेथंय अऊ मोर कुरता बर चिट्ठी निकालथें।
PSA 22:19 पर हे यहोवा, तेंह मोर ले दूरिहा झन रह। तेंह मोर ताकत अस; मोर मदद करे बर जल्दी आ।
PSA 22:20 मोर जिनगी ला तलवार ले बचा, मोर बहुमोल जिनगी ला कुकुरमन के सक्ति ले बचा।
PSA 22:21 सिंहमन के मुहूं ले मोला बचा; जंगली बईलामन के सींग ले मोला बचा।
PSA 22:22 मेंह अपन भाईमन के आघू म तोर नांव के परचार करहूं; सभा के बीच म, मेंह तोर परसंसा करहूं।
PSA 22:23 हे यहोवा के भय मनइयामन, ओकर परसंसा करव! हे याकूब के जम्मो संतानमन, ओकर आदर करव! हे इसरायल के जम्मो संतानमन, ओकर सम्मान करव!
PSA 22:24 काबरकि ओह दुख म परे मनखे ला तुछ नइं समझे हे या ओला छोंड़ नइं दे हे; ओह ओकर ले अपन मुहूं नइं छुपाय हवय पर मदद बर ओकर गोहार ला सुने हवय।
PSA 22:25 बड़े सभा म तोर परसंसा के बिसय तोरेच करा ले आथे; जऊन मन तोर भय मानथें, ओमन के आघू म मेंह अपन मन्नत ला पूरा करहूं।
PSA 22:26 गरीबमन खाहीं अऊ संतुस्ट हो जाहीं; जऊन मन यहोवा ला खोजथें, ओमन ओकर परसंसा करहीं— तुम्हर परान हमेसा जीयत रहय!
PSA 22:27 धरती के जम्मो छोर तक मनखेमन यहोवा ला सुरता करहीं अऊ ओकर कोति फिरहीं, अऊ जाति-जाति के जम्मो परिवारमन ओकर आघू म दंडवत करहीं।
PSA 22:28 काबरकि राज ह यहोवा के ही अय अऊ जाति-जाति के मनखेमन ऊपर ओहीच ह राज करथे।
PSA 22:29 धरती के जम्मो धनवानमन भोज खाहीं अऊ ओकर अराधना करहीं; ओ जम्मो जऊन मन धुर्रा म मिल जाथें, ओमन ओकर आघू म माड़ी टेकहीं— ओ मनखे, जऊन मन अपनआप ला जीयत नइं रख सकंय।
PSA 22:30 अवइया पीढ़ी के मनखेमन ओकर सेवा करहीं; अवइया पीढ़ी के मनखेमन ला परभू के बारे बताय जाही।
PSA 22:31 ओमन ओकर धरमीपन के बखान करहीं, ओ मनखेमन के आघू म बखान करहीं, जेमन अभी जनमे नइं अंय: ओह येला करे हवय!
PSA 23:1 दाऊद के एक भजन। यहोवा ह मोर चरवाहा अय, मोला कुछू घटी नइं होवय।
PSA 23:2 ओह मोला हरियर-हरियर चरागन म अराम कराथे, ओह मोला सांत पानी के तीर म ले जाथे,
PSA 23:3 ओह मोर जीव ला तरो-ताजा कर देथे। अपन नांव के खातिर ओह मोला धरमीपन के रसता म ले चलथे।
PSA 23:4 चाहे मेंह घिटके अंधियार के घाटी म ले होके जावंव, तभो ले कोनो अहित होय ले नइं डरंव, काबरकि तेंह मोर संग रहिथस; तोर सुंटी अऊ तोर लउठी ले मोला अराम मिलथे।
PSA 23:5 तेंह मोर बईरीमन के आघू म मोर बर जेवन के मेज सजाथस। तेंह मोर मुड़ ला तेल ले अभिसेक करथस; मोर कटोरा ह छलकत हे।
PSA 23:6 खचित तोर भलई अऊ मया मोर जिनगी भर मोर संग रहिही, अऊ मेंह सदा-सर्वदा यहोवा के घर म निवास करहूं।
PSA 24:1 दाऊद के एक भजन। धरती अऊ येमा के हर एक चीज यहोवा के अय, संसार, अऊ ओ जम्मो जेमन येमा रहिथें;
PSA 24:2 काबरकि ओह एकर नीव समुंदरमन के ऊपर रखिस अऊ पानी के ऊपर येला इस्थिर करिस।
PSA 24:3 यहोवा के पहाड़ ऊपर कोन चढ़ सकत हे? ओकर पबितर स्थान म कोन ठाढ़ हो सकत हे?
PSA 24:4 ओह, जेकर काम सही अऊ हिरदय सुध हवय, जऊन ह मूरती ऊपर भरोसा नइं करय या लबरा ईस्वर के सपथ नइं खावय।
PSA 24:5 ओह यहोवा ले आसीस पाही अऊ ओला अपन उद्धार करइया परमेसर ले सुरकछा मिलही।
PSA 24:6 अइसने ही होथे ओमन के पीढ़ी, जऊन मन परमेसर के खोज करथें, हे याकूब के परमेसर, जऊन मन तोर दरसन के खोज म रहिथें।
PSA 24:7 हे दुवारमन, अपन मुड़ ला ऊंचा करव; हे पुराना जमाना के कपाटमन, ऊपर उठव, ताकि महिमा के राजा ह भीतर आवय।
PSA 24:8 ये महिमा के राजा कोन ए? यहोवा, जऊन ह बलवान अऊ सक्तिसाली ए, यहोवा, जऊन ह लड़ई म सक्तिसाली ए।
PSA 24:9 हे दुवारमन, अपन मुड़ ला ऊंचा करव; हे पुराना जमाना के कपाटमन, ऊपर उठव, ताकि महिमा के राजा ह भीतर आवय।
PSA 24:10 ये महिमा के राजा कोन ए? सर्वसक्तिमान यहोवा— ओह महिमा के राजा अय।
PSA 25:1 दाऊद के भजन। हे यहोवा, मोर परमेसर, तोर ऊपर मेंह अपन भरोसा रखथंव।
PSA 25:2 मेंह तोर ऊपर भरोसा करथंव; मोला सरमिंदा झन होवन दे, न ही मोर बईरीमन ला मोर ऊपर जय पावन दे।
PSA 25:3 जऊन ह तोर ऊपर आसा रखथे ओह कभू सरमिंदा नइं होही, पर सरमिंदा ओमन होहीं जऊन मन बिगर कारन के बिसवासघात करथें।
PSA 25:4 हे यहोवा, मोला अपन डहार देखा, मोला अपन रसता के बात सिखा।
PSA 25:5 अपन सच्चई म मोर अगुवई कर अऊ मोला सिखा, काबरकि तेंह परमेसर मोर उद्धारकर्ता अस, अऊ दिन भर मोर आसा ह तोर ऊपर रहिथे।
PSA 25:6 हे यहोवा, अपन बड़े दया अऊ मया ला सुरता कर, काबरकि ओमन पुराना जमाना ले हवंय।
PSA 25:7 मोर जवानी के पाप अऊ मोर बिदरोही काममन ला सुरता झन कर; अपन मया के मुताबिक मोला सुरता कर, काबरकि हे यहोवा, तेंह बने अस।
PSA 25:8 यहोवा ह बने अऊ ईमानदार अय; एकरसेति ओह पापीमन ला अपन तरीका ले सिखाथे।
PSA 25:9 जऊन बात ह सही अय, ओमा ओह नम्र मनखे के अगुवई करथे अऊ ओमन ला अपन रसता के सिकछा देथे।
PSA 25:10 जऊन मन यहोवा के करार के बात ला मानथें ओमन बर ओकर जम्मो रसतामन मया ले भरे अऊ बिसवासयोग्य अंय।
PSA 25:11 हे यहोवा, अपन नांव के खातिर, मोर अपराध ला छेमा कर, हालाकि येह बहुंत बड़े हवय।
PSA 25:12 तब ओमन कोन अंय, जेमन यहोवा के भय मानथें? ओह ओमन ला ओ रसता म ले जाही, जेला ओह ओमन बर चुनथे।
PSA 25:13 ओमन अमीरी म अपन दिन काटहीं, अऊ ओमन के संतानमन देस के ऊपर अधिकार करहीं।
PSA 25:14 यहोवा ह ओमन ऊपर भरोसा रखथे, जेमन ओकर भय मानथें; ओह ओमन ला अपन करार के बारे म बताथे।
PSA 25:15 मोर आंखी ह हमेसा यहोवा ऊपर लगे रहिथे, काबरकि सिरिप ओहीच ह मोर गोड़ ला फांदा ले छुड़ाही।
PSA 25:16 हे यहोवा, मोर कोति लहुंट अऊ मोर ऊपर अनुग्रह कर, काबरकि मेंह अकेला अऊ दुखित हंव।
PSA 25:17 मोर हिरदय के दुख ला दूरिहा कर दे अऊ मोला तकलीफ ले छुड़ा ले।
PSA 25:18 मोर दुख अऊ तकलीफ ला देख अऊ मोर जम्मो पाप ला दूरिहा कर दे।
PSA 25:19 देख मोर बईरीमन कतेक जादा हवंय अऊ कतेक जादा ओमन मोर ले घिन करथें!
PSA 25:20 मोर जिनगी के रकछा कर अऊ मोला बचा ले; मोला सरमिंदा झन होवन दे, काबरकि मेंह तोर सरन ले हवंव।
PSA 25:21 मोर ईमानदारी अऊ सच्चई ह मोला बचावय, काबरकि मोर आसा तोर ऊपर हवय।
PSA 25:22 हे परमेसर, इसरायल ला ओकर जम्मो संकट ले छोंड़ा ले।
PSA 26:1 दाऊद के भजन। हे यहोवा, मोला नियाय दे, काबरकि मेंह एक निरदोस जिनगी जीये हवंव; मेंह यहोवा ऊपर भरोसा करे हंव अऊ नइं डगमगाय हंव।
PSA 26:2 हे यहोवा, मोला परख अऊ मोला जांच, मोर हिरदय अऊ मोर मन ला जांच ले;
PSA 26:3 काबरकि तोर अटूट मया के खियाल मोर मन म हमेसा रहिथे अऊ मेंह तोर बिसवासयोग्यता के भरोसा म जीयत हंव।
PSA 26:4 मेंह धोखेबाजमन के संग म नइं बईठंव, अऊ न ही पाखंडीमन के संगति करंव।
PSA 26:5 मेंह गलत काम करइयामन के संगति ले घिन करथंव अऊ दुस्टमन के संग नइं बईठंव।
PSA 26:6 हे यहोवा, मेंह अपन हांथ ला निरदोस रखथंव, अऊ तोर बेदी करा जाथंव,
PSA 26:7 अऊ ऊंचहा अवाज म तोर परसंसा करथंव अऊ तोर जम्मो अद्भूत काममन ला बताथंव।
PSA 26:8 हे यहोवा, मेंह ओ घर ले मया करथंव, जिहां तेंह रहिथस, ओ जगह जिहां तोर महिमा रहिथे।
PSA 26:9 मोर परान ला पापीमन के संग अऊ मोर जिनगी ला खून के पीयासामन के संग झन ले,
PSA 26:10 जेमन के हांथमन दुस्टता के उपाय करथें, अऊ जेमन के जेवनी हांथ ह घूसखोरी ले भरे हवय।
PSA 26:11 मेंह तो निरदोस जिनगी जीथंव; मोला छोंड़ा ले अऊ मोर ऊपर दया कर।
PSA 26:12 मेंह समतल भुइयां म ठाढ़े हवंव; सभामन म मेंह यहोवा के इस्तुति करहूं।
PSA 27:1 दाऊद के भजन। यहोवा ह मोर अंजोर अऊ मोर उद्धार अय— त मेंह काकर ले डरहूं? यहोवा ह मोर जिनगी के मजबूत किला अय— त काकर ले मेंह भय खाहूं?
PSA 27:2 जब दुस्ट मनखेमन मोला नास करे बर मोर बिरूध आघू बढ़थें, त ये मोर बईरी अऊ बिरोधीमन ही ठोकर खाहीं अऊ गिरहीं।
PSA 27:3 यदि एक सेना घलो मोला घेर ले, तभो ले मेंह नइं डरंव; यदि मोर बिरोध म लड़ई घलो सुरू हो जावय, तभो ले मोला भरोसा रहिही।
PSA 27:4 एक ठन चीज मेंह यहोवा ले मांगथंव, सिरिप ये बात मेंह चाहथंव: कि अपन जिनगी भर मेंह यहोवा के घर म रहंव, ताकि यहोवा के सुघरता ला देखंव अऊ ओकर मंदिर म ओकर धियान करंव।
PSA 27:5 काबरकि बिपत्ति के दिन म ओह मोला अपन निवास म सुरकछित रखही; ओह अपन पबितर तम्बू के खाल्हे म मोला छिपा लीही अऊ एक चट्टान के ऊपर ऊंचहा जगह म रखही।
PSA 27:6 तब मोर मुड़ ह ओ बईरीमन के आघू म ऊपर हो जाही जऊन मन मोला चारों कोति ले घेरथें; ओकर पबितर तम्बू म मेंह आनंद के मारे चिचियावत बलिदान चघाहूं; मेंह यहोवा बर गीत गाहूं अऊ बाजा बजाहूं।
PSA 27:7 हे यहोवा, जब मेंह गोहारंव, त मोर अवाज ला सुन; मोर ऊपर दया करके मोला जबाब दे।
PSA 27:8 मोर हिरदय ह तोर बारे कहिथे, “ओकर चेहरा के खोज म रह!” हे यहोवा, मेंह तोरेच दरसन के खोज म रहिहूं।
PSA 27:9 तेंह मोर ले अपन चेहरा झन छिपा, गुस्सा होके अपन सेवक ला दूरिहा झन कर दे; तेंह मोर मदद करइया रहे हस। हे परमेसर मोर उद्धारकर्ता, मोला अस्वीकार झन कर या मोला झन तियाग।
PSA 27:10 भले ही मोर दाई-ददा मोला तियाग देवंय, पर यहोवा ह मोला गरहन करही।
PSA 27:11 हे यहोवा, मोला अपन रसता के बात सिखा; मोर ऊपर अतियाचार करइयामन के कारन मोला सीधा रसता म ले चल।
PSA 27:12 मोर बईरीमन के ईछा ऊपर मोला झन छोंड़ दे, काबरकि लबरा गवाहमन मोर बिरूध ठाढ़ होथें, अऊ जलन से भरके मोर ऊपर दोस लगाथें।
PSA 27:13 मोला ये बात के भरोसा हवय: कि जीयत परानीमन के देस म मेंह यहोवा के भलई ला देखहूं।
PSA 27:14 यहोवा के बाट जोहत रहव; मजबूत बनव अऊ हिम्मत रखव अऊ यहोवा के बाट जोहत रहव।
PSA 28:1 दाऊद के भजन। हे यहोवा, मेंह तोहीच ला पुकारथंव; तेंह मोर चट्टान अस, मोर गोठ ला अनसुना झन कर। काबरकि यदि तेंह चुपचाप रहिबे, त मेंह ओ मरे मनखेमन सहीं हो जाहूं, जऊन मन कबर म चले जाथें।
PSA 28:2 जब मेंह मदद बर तोला पुकारंव, जब मेंह तोर महा पबितर स्थान कोति अपन हांथ उठावंव, त दया के मोर गोहार ला सुन ले।
PSA 28:3 ओ दुस्ट मनखेमन संग मोला घसीटके अलग झन कर, ओमन के संग, जऊन मन दुस्ट काम करथें, जऊन मन अपन परोसी संग मया के गोठ करथें, पर ओमन के मन म बुरई के बात रहिथे।
PSA 28:4 ओमन के काम अऊ बुरई के काम बर ओमन ले बदला ले; ओमन ले ओमन के काम के बदला ले ओमन के दुस्ट काम के मुताबिक ओमन ला दंड दे।
PSA 28:5 काबरकि ओमन यहोवा के काम ऊपर अऊ ओह जऊन कुछू करथे, ओकर ऊपर धियान नइं देवंय, एकरसेति ओह ओमन ला नास कर दीही अऊ ओमन ला फेर कभू नइं उठाही।
PSA 28:6 यहोवा के परसंसा होवय, काबरकि ओह दया के मोर गोहार ला सुने हवय।
PSA 28:7 यहोवा ह मोर बल अऊ मोर ढाल अय; मोर मन ह ओकर ऊपर भरोसा करथे, अऊ ओह मोर मदद करथे। मोर मन ह आनंद ले भर गे हवय, अऊ अपन गीत के दुवारा मेंह ओकर परसंसा करथंव।
PSA 28:8 यहोवा ह अपन मनखेमन के बल अय, अऊ अपन अभिसिक्त जन बर उद्धार के एक गढ़ अय।
PSA 28:9 हे यहोवा, अपन मनखेमन ला बचा अऊ अपन निज भाग ला आसीस दे; ओमन के चरवाहा बन अऊ ओमन ला हमेसा संभाले रह।
PSA 29:1 दाऊद के एक भजन। हे स्वरगीय जीवमन, यहोवा के बखान करव, यहोवा के महिमा अऊ बल के बखान करव।
PSA 29:2 यहोवा के नांव के मुताबिक ओकर बखान करव; यहोवा के पबितरता के सोभा म ओकर अराधना करव।
PSA 29:3 यहोवा के अवाज समुंदर के ऊपर म हवय; महिमा के परमेसर ह गरजथे, यहोवा ह समुंदर के भयंकर लहरामन ऊपर गरजथे।
PSA 29:4 यहोवा के अवाज ह सक्तिसाली अय; यहोवा के अवाज ह सानदार हवय।
PSA 29:5 यहोवा के अवाज ह देवदार के रूख ला टोर देथे; यहोवा ह लबानोन के देवदार रूखमन ला कुटा-कुटा कर देथे।
PSA 29:6 ओह लबानोन ला एक बछरू के सहीं अऊ सिरयोन ला जंगली बईला के सहीं उछालथे।
PSA 29:7 यहोवा के अवाज ह बिजली के चमक के संग चोट करथे।
PSA 29:8 यहोवा के अवाज ह बीरान भुइयां ला हला देथे; यहोवा ह कादेस के बीरान भुइयां ला घलो हला देथे।
PSA 29:9 यहोवा के अवाज ह बांज के रूख ला मुरकेट देथे अऊ जंगल म पतझड़ हो जाथे। अऊ ओकर मंदिर म जम्मो झन चिचियाके कहिथें, “परमेसर के महिमा होवय!”
PSA 29:10 यहोवा ह बाढ़ के पानी ऊपर बिराजमान होथे; यहोवा ह सदाकाल बर राजा के रूप म बिराजमान होथे।
PSA 29:11 यहोवा ह अपन मनखेमन ला ताकत देथे; यहोवा ह अपन मनखेमन ला सांति के आसीस देथे।
PSA 30:1 मंदिर के समरपन बर दाऊद के एक भजन। एक गीत। हे यहोवा, मेंह तोर बहुंत परसंसा करहूं, काबरकि तेंह मोला खंचवा ले ऊपर निकाले हस अऊ मोर बईरीमन ला मोर ऊपर आनंद करे बर नइं दे हस।
PSA 30:2 हे यहोवा मोर परमेसर, मेंह तोला मदद बर पुकारेंव, अऊ तेंह मोला चंगा करय।
PSA 30:3 हे यहोवा, तेंह मोला मिरतू-लोक ले निकाले हस; तेंह मोला खाल्हे खंचवा म जाय ले बचाय हस।
PSA 30:4 हे यहोवा के बिसवासयोग्य मनखेमन, तुमन ओकर महिमा के गीत गावव; ओकर पबितर नांव के परसंसा करव।
PSA 30:5 काबरकि ओकर गुस्सा छीन भर के होथे, पर ओकर किरपा ह जिनगी भर रहिथे; रोवई ह रथिया भर रह सकथे, पर आनंद के समय ह बिहनियां आथे।
PSA 30:6 जब मेंह सुरकछित महसूस करेंव, त मेंह अपनआप ला कहेंव, “मेंह कभूच नइं डोलंव।”
PSA 30:7 हे यहोवा, जब तेंह मोर ऊपर किरपा करय, त तेंह मोर साही पहाड़ ला मजबूती से खड़े करय; पर जब तेंह अपन चेहरा ला छिपा लेय, त मेंह डर गेंव।
PSA 30:8 हे यहोवा, तोला मेंह पुकारेंव; परभू ला मेंह दया बर गोहारेंव:
PSA 30:9 “का फायदा होही यदि मेंह मर जावंव त, यदि मेंह खाल्हे कबर म चले जावंव त? का माटी ह तोर महिमा करही? का येह तोर बिसवासयोग्यता के बखान करही?
PSA 30:10 हे यहोवा, मोर बात ला सुन, अऊ मोर ऊपर दया कर; हे यहोवा, मोर मदद कर।”
PSA 30:11 तेंह मोर बिलाप करई ला नचई म बदल दे हस; तेंह मोर दुख के कपड़ा ला हटाके मोला आनंद के कपड़ा पहिराय हस,
PSA 30:12 ताकि मोर मन ह तोर महिमा के गीत गावय अऊ चुप झन रहय। हे यहोवा मोर परमेसर, मेंह हमेसा तोर परसंसा करहूं।
PSA 31:1 संगीत के निरदेसक बर दाऊद के एक भजन। हे यहोवा, मेंह तोर सरन म हंव; मोला कभू लज्जित झन होवन दे; अपन धरमीपन के कारन मोला छुड़ा ले।
PSA 31:2 मोर कोति अपन कान लगा, अऊ मोला बचाय बर जल्दी आ; मोर सरन के चट्टान बन, अऊ मोला बचाय बर एक मजबूत गढ़ बन जा।
PSA 31:3 जब तेंह मोर चट्टान अऊ मोर गढ़ अस, त अपन नांव के खातिर मोर अगुवई कर अऊ मोला डहार देखा।
PSA 31:4 मोर बर लगाय गे फांदा ले मोला बचा ले, काबरकि तेंह मोर सरन लेय के जगह अस।
PSA 31:5 तोर हांथ म मेंह अपन आतमा ला सऊंपत हवंव; हे यहोवा, मोर बिसवासयोग्य परमेसर, मोला छोंड़ा ले।
PSA 31:6 मेंह ओमन ले घिन करथंव, जऊन मन बेकार के मूरतीमन म मन लगाय रहिथें; जहां तक मोर बात ए, मेंह यहोवा के ऊपर भरोसा करथंव।
PSA 31:7 मेंह खुस होहूं अऊ तोर मया म आनंद मनाहूं, काबरकि तेंह मोर दुख ला देखे हस अऊ मोर आतमा के पीरा ला जाने हस।
PSA 31:8 तेंह मोला बईरीमन के हांथ म नइं दे हस पर मोर गोड़ ला चाकर जगह म मढ़ाय हस।
PSA 31:9 हे यहोवा, मोर ऊपर दया कर, काबरकि मेंह दुख-तकलीफ म हवंव; दुख के मारे मोर आंखी, मोर जीव अऊ मोर देहें ह कमजोर होवत हे।
PSA 31:10 मोर जिनगी ह दुख-पीरा अऊ जम्मो बछरमन कलहरत-कलहरत खतम होवथें; मोर दुख के कारन मोर ताकत ह कम होवथे, अऊ मोर हाड़ामन कमजोर होवत हें।
PSA 31:11 मोर जम्मो बईरीमन के कारन, मेंह मोर परोसीमन के बहुंत अपमान के बिसय अऊ मोर नजदीकी संगवारीमन बर एक डर के बिसय हो गे हवंव— जऊन मन मोला सड़क म देखथें, ओमन मोर ले दूरिहा भागथें।
PSA 31:12 मरे मनखे के सहीं मोला भुला दिये गे हवय; मेंह माटी के टूटहा-फूटहा बरतन सहीं हो गे हवंव।
PSA 31:13 मेंह सुनत हंव कि बहुंते जन ये कानाफूसी करत हंय, “आतंक ह जम्मो कोति हवय!” ओमन मोर बिरूध गोस्टी करथें अऊ मोर परान लेय के योजना बनाथें।
PSA 31:14 पर हे यहोवा, मेंह तोर ऊपर भरोसा करथंव; मेंह कहिथंव, “तेंह मोर परमेसर अस।”
PSA 31:15 मोर जिनगी ह तोर हांथ म हवय; मोला मोर बईरीमन के हांथ ले, मोर पीछा करइयामन के हांथ ले छुड़ा।
PSA 31:16 तोर सेवक के ऊपर तोर मुहूं के अंजोर चमकय; अपन बहुंत मया के कारन मोर उद्धार कर।
PSA 31:17 हे यहोवा, मोला लज्जित झन होवन दे, काबरकि मेंह तोर करा गोहारे हंव; पर दुस्ट मनखे ह लज्जित होवय अऊ मिरतू-लोक म चुप रहय।
PSA 31:18 ओमन के लबारी बात कहइया मुहूं ह बंद हो जावय, काबरकि घमंड अऊ अपमान के संग ओमन धरमीमन के बिरूध बड़े अभिमान से गोठियाथें।
PSA 31:19 कतेक जादा हवंय बने-बने चीजमन, जेला तेंह ओमन बर कुढ़ोके रखे हस, जेमन तोर भय मानथें, ताकि तेंह येला जम्मो के देखत म ओमन ला दे, जेमन तोर सरन म आथें।
PSA 31:20 अपन उपस्थिति के आसरय म तेंह ओमन ला मनखेमन के जम्मो सडयंत्र ले छुपा लेथस; तेंह ओमन ला अपन निवास म दोस लगइयामन ले बचाके रखथस।
PSA 31:21 यहोवा के परसंसा होवय, काबरकि जब मेंह बईरीमन ले घेराय एक सहर म रहेंव, त ओह मोला अपन अद्भूत मया देखाईस।
PSA 31:22 घबराहट म मेंह कहेंव, “मेंह तोर नजर ले दूरिहा हो गे हवंव!” तभो ले जब मेंह तोला मदद बर पुकारेंव, त तेंह मोर दया के गोहार ला सुनय।
PSA 31:23 हे ओकर जम्मो बिसवासयोग्य मनखेमन, यहोवा ले मया करव! यहोवा ह ओमन ला सुरकछित रखथे, जऊन मन ओकर बर ईमानदार रहिथें, पर घमंडी मनखे ले ओह पूरा बदला लेथे।
PSA 31:24 हे यहोवा ऊपर आसा रखइया जम्मो मनखेमन, मजबूत बनव अऊ धीरज धरे रहव।
PSA 32:1 दाऊद के एक मसकील। धइन अय ओ मनखे, जेकर अपराध छेमा करे जाथे, जेकर पाप तोपे जाथे।
PSA 32:2 धइन अय ओ मनखे, जेकर पाप ला यहोवा ह ओकर बिरूध नइं गनय अऊ जेकर आतमा म कोनो कपट के बात नइं ए।
PSA 32:3 जब मेंह कलेचुप रहंय, त दिन भर कलहरत-कलहरत मोर हाड़ामन बेकार होय लगिन।
PSA 32:4 काबरकि रात अऊ दिन तोर हांथ ह मोर ऊपर भारी पड़िस; अऊ जइसे घाम महिना के घाम म चीजमन सूखा जाथें वइसे मोर बल ह कम हो गीस।
PSA 32:5 तब मेंह अपन पाप ला तोर आघू म मान लेंव अऊ मोर अपराध ला नइं छुपांय। मेंह कहेंव, “मेंह यहोवा के आघू म अपन पाप ला मान लूहूं।” अऊ तेंह मोर पाप के दोस ला छेमा करय।
PSA 32:6 एकरसेति जम्मो बिसवासयोग्य मनखेमन तोर ले पराथना करंय जब तेंह मिल सकत हस; खचित संकट रूपी पानी के भयंकर लहरामन ओमन करा नइं हबरहीं।
PSA 32:7 तेंह मोर छुपे के जगह अस; तेंह मोला संकट ले बचाबे अऊ छुटकारा के गीत म मोला घेर लेबे।
PSA 32:8 मेंह तोला निरदेस दूहूं अऊ ओ रसता के बात सिखाहूं, जेमा तोला जाना चाही; मेंह तोर ऊपर अपन मया के नजर रखके तोला सलाह दूहूं।
PSA 32:9 तेंह घोड़ा अऊ खच्चर के सहीं झन बन, जेमन करा कोनो समझ नइं रहय पर ओमन ला काठी अऊ लगाम ले काबू म करे जाथे नइं तो ओमन तुम्हर लकठा म नइं आवंय।
PSA 32:10 दुस्टमन के दुख-तकलीफ बहुंत हवय, पर यहोवा के अब्बड़ मया ह ओमन ला घेरे रहिथे, जऊन मन ओकर ऊपर भरोसा करथें।
PSA 32:11 हे धरमी मनखेमन, यहोवा म आनंद मनावव अऊ खुस रहव; अऊ हे मन के जम्मो सीधवा मनखेमन, तुमन गीत गावव।
PSA 33:1 हे धरमी मनखेमन, आनंद ले भर के यहोवा के गीत गावव; ईमानदार मनखे बर ओकर परसंसा करई ह जंचथे।
PSA 33:2 बीना बजाके यहोवा के परसंसा करव; दस तारवाले बीना बजाके ओकर परसंसा करव।
PSA 33:3 ओकर बर एक नवां गीत गावव; कुसलता से बजावव, अऊ आनंद के मारे जय-जयकार करव।
PSA 33:4 काबरकि यहोवा के बचन ह सही अऊ सच अय; ओह अपन हर काम म बिसवासयोग्य अय।
PSA 33:5 यहोवा ह धरमीपन अऊ नियाय ले मया करथे; धरती ह ओकर अब्बड़ मया ले भरे हवय।
PSA 33:6 अकास-मंडल यहोवा के बचन के दुवारा अऊ ओमन के तारागन ओकर मुहूं के सांस के दुवारा बनाय गीन।
PSA 33:7 ओह समुंदर के पानी ला एके ठऊर म रखथे; अऊ गहिरा पानी ला भंडार म रखथे।
PSA 33:8 धरती के जम्मो मनखेमन यहोवा के भय मानंय; संसार के जम्मो मनखेमन ओकर आदर करंय।
PSA 33:9 काबरकि ओकर कहे ले संसार ह बनिस; ओह हुकूम दीस अऊ येह इस्थिर हो गीस।
PSA 33:10 यहोवा ह आनजात के मनखेमन के योजना ला बिगाड़ देथे; ओह मनखेमन के उदेस्य म बाधा डाल देथे।
PSA 33:11 पर यहोवा के योजना ह हमेसा मजबूत बने रहिथे, ओकर मन के उदेस्य ह पीढ़ी-पीढ़ी तक बने रहिथे।
PSA 33:12 धइन अंय ओ जाति के मनखेमन, जेमन के परमेसर यहोवा अय, ओ मनखे, जेमन ला ओह अपन वारिस होय बर चुनिस।
PSA 33:13 स्वरग ले यहोवा ह खाल्हे निहारथे अऊ जम्मो मानव-जाति ला देखथे;
PSA 33:14 अपन निवास स्थान ले ओह ओ जम्मो झन ला देखत रहिथे, जऊन मन धरती म रहिथें—
PSA 33:15 ओ, जऊन ह जम्मो झन के हिरदय ला गढ़थे, जऊन ह ओमन के करे गे जम्मो काम ऊपर बिचार करथे।
PSA 33:16 कोनो भी राजा अपन बड़े सेना होय के कारन नइं बचय; कोनो भी योद्धा अपन बड़े बल के कारन बचके नइं जा सकय।
PSA 33:17 बचके निकले बर घोड़ा ऊपर आसा करई ह बेकार ए; अपन अब्बड़ बल के बावजूद येह बचा नइं सकय।
PSA 33:18 पर यहोवा के नजर ह ओमन ऊपर लगे रहिथे, जऊन मन ओकर भय मानथें, जऊन मन ओकर बड़े मया के कारन ये आसा लगाय रहिथें,
PSA 33:19 कि ओह ओमन ला मिरतू ले बचाही अऊ अकाल के बेरा म घलो ओमन ला जीयत रखही।
PSA 33:20 हमन यहोवा के आस म बाट जोहत रहिथन; ओहीच ह हमर मदद अऊ हमर ढाल ए।
PSA 33:21 ओहीच म ही हमर हिरदय ह आनंदित होथे, काबरकि हमन ओकर पबितर नांव ऊपर भरोसा करथन।
PSA 33:22 हे यहोवा, जइसे हमन तोर ऊपर अपन आसा रखथन, वइसे तोर बड़े मया ह हमर ऊपर बने रहय।
PSA 34:1 दाऊद के एक भजन। जब ओह अबीमेलेक के आघू म पागल होय के नाटक करिस, जेकर से अबीमेलेक ह ओला भगा दीस, अऊ ओह उहां ले भाग गीस। मेंह हर समय यहोवा के परसंसा करहूं; ओकर परसंसा हमेसा मोर मुहूं ले होवत रहिही।
PSA 34:2 मेंह यहोवा ऊपर घमंड करहूं; दुखित-पीड़ित मनखेमन सुनंय अऊ आनंद मनांय।
PSA 34:3 मोर संग यहोवा के महिमा करव; आवव, हमन मिलके ओकर नांव के परसंसा करन।
PSA 34:4 मेंह यहोवा ले पराथना करेंव; अऊ ओह मोला जबाब दीस; ओह मोला मोर जम्मो डर ले मुक्त करिस।
PSA 34:5 जऊन मन ओकर कोति देखथें, ओमन दीप्तिमान होथें; ओमन कभू लज्जित नइं होवंय।
PSA 34:6 ये दीन-हीन मनखे ह पुकारिस, अऊ यहोवा ह ओकर बात ला सुनिस; ओह ओला ओकर जम्मो दुख-तकलीफ ले बचाईस।
PSA 34:7 यहोवा के स्वरगदूत ह ओमन के चारों कोति डेरा डालथे, जऊन मन ओकर भय मानथें, अऊ ओह ओमन ला छुड़ाथे।
PSA 34:8 परखके देखव कि यहोवा ह बने अय; धइन अय ओ मनखे, जऊन ह ओकर करा सरन लेथे।
PSA 34:9 हे ओकर पबितर मनखेमन, तुमन यहोवा के भय मानव, काबरकि जऊन मन ओकर भय मानथें, ओमन ला कुछू चीज के घटी नइं होवय।
PSA 34:10 भले ही सिंह ह कमजोर हो सकथे अऊ भूखा रह सकथे, पर जऊन मन यहोवा के खोज म रहिथें, ओमन ला कोनो बने चीज के घटी नइं होवय।
PSA 34:11 हे मोर लइकामन, आवव, मोर बात ला सुनव; मेंह तुमन ला यहोवा के भय मानना सिखोहूं।
PSA 34:12 तुमन म ले जऊन ह भी जिनगी ले मया करथे अऊ बहुंते बने दिनमन ला देखे के ईछा करथे,
PSA 34:13 त ओह अपन जीभ ला खराप बात ले अऊ अपन मुहूं ला लबारी बात ले दूरिहा रखय।
PSA 34:14 बुरई ला छोंड़के भलई करव; सांति के खोज म रहव अऊ ओकर पाछू लगे रहव।
PSA 34:15 यहोवा के नजर ह धरमीमन ऊपर लगे रहिथे, अऊ ओकर कान ह ओमन के गोहार के तरफ लगे रहिथे;
PSA 34:16 पर यहोवा ह बुरई करइयामन के बिरोध करथे, ताकि ओह ओमन के नांव ला धरती ले मिटा देवय।
PSA 34:17 धरमीमन गोहारथें, अऊ यहोवा ह ओमन के सुनथे; ओह ओमन ला ओमन के जम्मो समस्या ले बाहिर निकालथे।
PSA 34:18 यहोवा ह टूटे मनवाला के लकठा म रहिथे अऊ ओमन के उद्धार करथे, जऊन मन आतमा म बहुंत दुखी होथें।
PSA 34:19 धरमी मनखे करा बहुंत समस्या हो सकथे, पर यहोवा ह ओला ओकर जम्मो समस्या ले निकालथे;
PSA 34:20 ओह ओकर जम्मो हाड़ामन के रकछा करथे, ओमा के एको ठन घलो नइं टूटय।
PSA 34:21 बुरई ही दुस्ट मनखे ला मार डालही; धरमी जन के बईरीमन दोसी ठहिरहीं।
PSA 34:22 यहोवा ह अपन सेवकमन ला बचाही; अऊ जऊन ह ओकर करा सरन लेथे, ओह दोसी नइं ठहिरही।
PSA 35:1 दाऊद के भजन। हे यहोवा, ओमन के बिरोध कर, जेमन मोर बिरोध करथें; ओमन के बिरूध लड़, जेमन मोर बिरूध लड़थें।
PSA 35:2 ढाल अऊ कवच ला ले; अऊ उठके मोर मदद करे बर आ।
PSA 35:3 जऊन मन मोर पीछा करथें, ओमन के बिरूध बरछी अऊ भाला उठा। अऊ मोर आतमा ला कह, “मेंह तोर उद्धार अंव।”
PSA 35:4 जऊन मन मोर परान के पाछू पड़े हवंय, ओमन कलंकित अऊ लज्जित होवंय; जऊन मन मोर बिनास के गोस्टी करथें, ओमन भयभीत होके वापिस लहुंटंय।
PSA 35:5 ओमन हवा म उड़ जानेवाला भूंसा के सहीं हो जावंय, अऊ यहोवा के स्वरगदूत ह ओमन ला भगा देवय;
PSA 35:6 ओमन के डहार ह अंधियार हो जावय अऊ ओमा फिसलन होवय, अऊ यहोवा के स्वरगदूत ह ओमन के पीछा करत रहय।
PSA 35:7 काबरकि ओमन बिगर कारन के मोर बर जाल बिछाईन अऊ बिगर कारन के मोर बर खंचवा कोड़िन।
PSA 35:8 अचानक ओमन के बिनास हो जावय— अपन बिछाय जाल म ओमन खुद फंस जावंय, अपन खने खंचवा म ओमन खुद गिरंय, अऊ ओमन के बिनास हो जावय।
PSA 35:9 तब मोर आतमा ह यहोवा म आनंदित होही अऊ ओकर करे गे उद्धार ले खुस होही।
PSA 35:10 मोर पूरा हिरदय ह कहिही, “हे यहोवा, तोर सहीं कोन हवय? तेंह गरीबमन ला ओमन ले बचाथस, जेमन बहुंत बलवान हवंय, अऊ गरीब अऊ जरूरतमंद ला ओमन ले बचाथस, जेमन ओमन ला लूटथें।”
PSA 35:11 निरदयी गवाहमन ठाढ़ होथें; अऊ ओमन मोर ले ओ बिसय म सवाल करथें, जेकर बारे म मेंह कुछू नइं जानंव।
PSA 35:12 ओमन मोर भलई के बदले मोर ले बुरई करथें अऊ मोला एक सोकित मनखे के सहीं छोंड़ देथें।
PSA 35:13 तभो ले जब ओमन बेमार रिहिन, त मेंह ओमन ला दुख के ओनहा ओढ़ांय अऊ मेंह अपनआप ला नम्र करके उपास करेंव। जब मोर पराथनामन बिगर जबाब के मोर करा लहुंट आईन,
PSA 35:14 त मेंह सोक मनांय मानो कि मेंह अपन संगी या भाई बर सोक मनात हंव। मेंह दुख म अपन मुड़ ला तरी कर लेंव मानो कि मेंह अपन दाई बर रोवत हंव।
PSA 35:15 पर जब मेंह ठोकर खांय, त ओमन खुसी से जूर गीन; हमला करइयामन मोर बिगर जाने मोर बिरूध जूर गीन। ओमन बिगर रूके मोर निन्दा करिन।
PSA 35:16 अधरमी मनखे सहीं ओमन जलन म मोर हंसी उड़ाईन; ओमन मोर ऊपर दांत किटकिटाईन।
PSA 35:17 हे परभू, तेंह कब तक देखत रहिबे? ओमन के बिनास के काम ले मोला बचा, मोर अनमोल जिनगी ला सिंहमन के सहीं ये बईरीमन ले बचा।
PSA 35:18 मेंह बड़े सभा म तोला धनबाद दूहूं; मनखेमन के भीड़ म मेंह तोर परसंसा करहूं।
PSA 35:19 जऊन मन बिगर कारन के मोर बईरी अंय, ओमन बुरा नजर से मोला झन देखन पांय; जऊन मन बिगर कारन के मोर ले घिन करथें ओमन जलन से मोर ऊपर आंखी झन मारन पांय।
PSA 35:20 ओमन सांति के बात नइं करंय, पर ओमन ओ मनखेमन के बिरूध लबारी बात कहिथें, जेमन देस म सांति से रहिथें।
PSA 35:21 ओमन मोर हंसी उड़ाके कहिथें, “अहा! अहा! हमन अपन आंखी ले देखे हवन।”
PSA 35:22 हे यहोवा, तेंह तो येला देखे हस; चुप झन रह। हे परभू मोर ले दूरिहा झन रह।
PSA 35:23 जाग, अऊ मोर बचाव करे बर उठ! हे मोर परमेसर अऊ हे मोर परभू, मोर बर लड़।
PSA 35:24 हे यहोवा मोर परमेसर, अपन धरमीपन म मोर रकछा कर; ओमन ला मोर बिरूध आनंदित झन होवन दे।
PSA 35:25 ओमन ला ये सोचन झन दे, “अहा, इही बात तो हमन चाहत रहेंन!” या ओमन ला ये झन कहन दे, “हमन ओला लील ले हन।”
PSA 35:26 ओ जम्मो, जऊन मन मोर दुख म खुस होथें, ओमन लज्जित होवंय अऊ घबरावंय; ओ जम्मो, जऊन मन मोला नीचा दिखाथें, ओमन लज्जा अऊ निन्दा ले ढंक जावंय।
PSA 35:27 जऊन मन मोर सही साबित होय म खुस होथें, ओमन आनंद अऊ खुसी के जय-जयकार करंय; अऊ ओमन हमेसा कहंय, “यहोवा के बड़ई होवय, जऊन ह अपन सेवक के कुसलता म खुस होथे।”
PSA 35:28 मोर मुहूं ह तोर धरमीपन के बखान करही, अऊ दिन भर तोरेच परसंसा करही।
PSA 36:1 संगीत के निरदेसक बर यहोवा के सेवक दाऊद के एक भजन। दुस्ट मनखेमन के दुस्टता के बारे मोर हिरदय म एक ठन संदेस हवय: ओमन के आंखी के आघू म परमेसर के कोनो डर नइं ए।
PSA 36:2 ओमन खुद ही अपनआप के अतेक बड़ई करथें कि ओमन अपन पाप ला जानंय नइं या ओकर ले घिन नइं करंय।
PSA 36:3 ओमन के मुहूं ले बुरई अऊ धोखा के बात निकलथे; ओमन बुद्धिमानी के काम या भलई के काम नइं करंय।
PSA 36:4 अऊ त अऊ ओमन अपन दसना म घलो सडयंत्र रचथें; ओमन अपनआप ला पाप के काम करे बर सऊंप देथें अऊ खराप काम करे बर मना नइं करंय।
PSA 36:5 हे यहोवा, तोर मया ह स्वरग तक, अऊ तोर बिसवासयोग्यता ह अकास तक पहुंचथे।
PSA 36:6 तोर धरमीपन ह सबले ऊंच पहाड़ सहीं अय, अऊ तोर नियाय ह समुंदर के गहरई सहीं अय। हे यहोवा, तेंह मनखे अऊ पसु दूनों के देखरेख करथस।
PSA 36:7 हे परमेसर, तोर अब्बड़ मया ह अनमोल ए! मनखेमन तोर डेना के छइहां म सरन लेथें।
PSA 36:8 ओमन तोर घर के भरे भंडार म ले जेवनार करथें; तेंह अपन खुसी के नदी म ले ओमन ला पीये बर देथस।
PSA 36:9 काबरकि तोरेच करा जिनगी के पानी के सोत हवय; तोरेच अंजोर म हमन अंजोर देखथन।
PSA 36:10 जऊन मन तोला जानथें, ओमन ऊपर अपन मया, अऊ मन के सीधवा मनखे ऊपर अपन धरमीपन ला बनाय रख।
PSA 36:11 घमंडी ह मोर ऊपर लात झन उठाय, अऊ न ही दुस्ट मनखे मोला अपन हांथ ले भगाय।
PSA 36:12 देखव, दुस्ट काम करइयामन कइसने गिरे-परे हवंय— अइसने फटिक दिये गे हवंय कि ओमन अब उठ नइं सकत हवंय!
PSA 37:1 दाऊद के भजन। दुस्ट मनखेमन के कारन झन चिढ़व या गलत काम करइयामन ले जलन झन करव;
PSA 37:2 काबरकि कांदी के सहीं ओमन अइला जाहीं, हरियर पऊधा के सहीं ओमन जल्दी खतम हो जाहीं।
PSA 37:3 यहोवा ऊपर भरोसा रखव अऊ भलई करव; देस म रहिके सुरकछित निवास के आनंद उठावव।
PSA 37:4 यहोवा के सेवा करे म खुस रहव, अऊ ओह तुम्हर मन के ईछा ला पूरा करही।
PSA 37:5 यहोवा ला अपन जिनगी सऊंप दे; ओकर ऊपर भरोसा रख अऊ ओह येला करही:
PSA 37:6 ओह तोर धरमीपन के ईनाम ला बिहान के अंजोर सहीं, अऊ तोर काम के नियाय ला मंझनियां के सूरज सहीं चमकाही।
PSA 37:7 यहोवा के आघू म चुपेचाप रह अऊ धीरज धरके ओकर इंतजार कर; जब मनखेमन अपन योजना म सफल होथें या अपन दुस्टता के काम ला करंय, त झन कुढ़बे।
PSA 37:8 गुस्सा झन करव अऊ कोप करई ले दूरिहा रहव; झन चिढ़व—एकर ले सिरिप बुरई होथे।
PSA 37:9 काबरकि जऊन मन दुस्ट मनखे अंय, ओमन नास करे जाहीं, पर जऊन मन यहोवा ऊपर भरोसा करथें, ओमन देस के वारिस होहीं।
PSA 37:10 थोरकन समय अऊ हे, तब दुस्ट मनखेमन खतम हो जाहीं; हालाकि तेंह ओमन ला खोजबे, पर ओमन नइं मिलहीं।
PSA 37:11 पर नम्र मनखेमन देस के वारिस होहीं अऊ सांति अऊ धन-संपत्ति के आनंद उठाहीं।
PSA 37:12 दुस्टमन धरमी मनखेमन के बिरूध साजिस रचथें अऊ ओमन ऊपर अपन दांत पीसथें;
PSA 37:13 पर परभू ह दुस्टमन के ऊपर हंसथे, काबरकि ओह जानथे कि ओमन के आखिरी दिन ह आवत हे।
PSA 37:14 दुस्टमन अपन तलवार खींचथें, अऊ धनुस ला तानथें ताकि ओमन गरीब अऊ जरूरतमंद ला नीचा दिखावंय, अऊ सीधवा मनखेमन ला मार डारंय।
PSA 37:15 फेर ओमन के तलवार ह ओमन के खुद के हिरदय ला बेधही, अऊ ओमन के धनुस ह टूट जाही।
PSA 37:16 धरमी के थोरकन चीज ह दुस्टमन के अब्बड़ धन ले जादा बने अय;
PSA 37:17 काबरकि दुस्टमन के सक्ति ला खतम कर दिये जाही, पर यहोवा ह धरमी जन ला संभालथे।
PSA 37:18 निरदोस मनखेमन यहोवा के देखरेख म दिन बिताथें, अऊ ओमन के निज भाग ह हमेसा बने रहिही।
PSA 37:19 बिपत्ति के बेरा ओमन नइं मुरझांय; अऊ अकाल के दिन म ओमन भरपूर चीज के आनंद उठाहीं।
PSA 37:20 पर दुस्टमन नास हो जाहीं: हालाकि यहोवा के बईरीमन खेत के फूल सहीं अंय, पर ओमन जलके खतम हो जाहीं, ओमन धुआं म समा जाहीं।
PSA 37:21 दुस्टमन उधार लेथें अऊ नइं पटांय, पर धरमीमन हांथ खोलके देथें;
PSA 37:22 जेमन ला यहोवा ह आसीस देथे, ओमन देस के वारिस होहीं, पर जेमन ला ओह सराप देथे, ओमन नास हो जाहीं।
PSA 37:23 यहोवा ह ओकर पांव ला मजबूत करथे, जऊन ह यहोवा म खुस रहिथे;
PSA 37:24 हालाकि ओह लड़खड़ा सकथे, पर ओह गिरय नइं, काबरकि यहोवा ह ओला अपन हांथ ले संभालथे।
PSA 37:25 मेंह जवान रहेंव अऊ अब डोकरा हो गे हंव, पर मेंह ये बात कभू नइं देखेंव कि धरमीमन ला तियाग दिये गीस या ओमन के लइकामन खाय बर भीख मांगिन।
PSA 37:26 ओमन हमेसा उदार दिल के होथें अऊ दिल खोलके उधार देथें; ओमन के लइकामन एक आसीस के कारन बनहीं।
PSA 37:27 बुरई ला छोंड़व अऊ भलई करव; तब तुमन देस म हमेसा बने रहिहू।
PSA 37:28 काबरकि यहोवा ह सच्चई ले मया करथे अऊ अपन बिसवासयोग्य मनखेमन ला नइं तियागे, ओमन के हमेसा रकछा करे जाही; पर दुस्टमन के संतानमन नास हो जाहीं।
PSA 37:29 धरमी मनखेमन देस के उत्तराधिकारी होहीं अऊ ओमा हमेसा निवास करहीं।
PSA 37:30 धरमीमन के मुहूं ले बुद्धि के बात निकलथे, अऊ ओमन के जीभ ओ बात कहिथे, जऊन ह सही अय।
PSA 37:31 ओमन के परमेसर के कानून ह ओमन के हिरदय म हवय; ओमन के गोड़ ह नइं फिसलय।
PSA 37:32 दुस्ट मनखे ह ये इरादा से धरमीमन के घात म रहिथे कि ओह ओमन ला मार डारय।
PSA 37:33 पर यहोवा ह धरमीमन ला दुस्ट मनखेमन के हांथ म नइं छोंड़य या ओमन ला दोसी नइं ठहिराय, जब ओमन अदालत म लाय जाथें।
PSA 37:34 यहोवा ऊपर आसा रखव अऊ ओकर रसता म चलव। ओह तुमन ला बढ़ाही अऊ देस के उत्तराधिकारी बनाही; जब दुस्ट मनखेमन के नास करे जाही, त तुमन येला देखहू।
PSA 37:35 मेंह एक दुस्ट अऊ निरदयी मनखे ला बड़े देसी रूख के सहीं बाढ़त देखे हंव,
PSA 37:36 पर ओह जल्दी खतम हो गीस अऊ ओह फेर नइं दिखिस; हालाकि मेंह ओला खोजेंव, पर ओह नइं मिलिस।
PSA 37:37 निरदोस मनखे ऊपर बिचार कर, अऊ ईमानदार मनखे ला देख; ओमन के भविस्य उज्जवल होथे, जेमन सांति के खोज म रहिथें।
PSA 37:38 पर जम्मो पापीमन ला नास करे जाही; दुस्टमन के कुछू भविस्य नइं होही।
PSA 37:39 धरमीमन के उद्धार ह यहोवा कोति ले होथे; संकट के बेरा म ओहीच ह ओमन के मजबूत गढ़ ए।
PSA 37:40 यहोवा ह ओमन के मदद करथे अऊ ओमन ला छुड़ाथे; ओह ओमन ला दुस्ट मनखे ले छुड़ाथे अऊ ओमन ला बचाथे। काबरकि ओमन यहोवा करा सरन लेथें।
PSA 38:1 दाऊद के एक भजन। एक बिनती। हे यहोवा, गुस्सा होके मोला झन फटकार या अपन कोप म मोर ताड़ना झन कर।
PSA 38:2 तोर तीरमन मोला छेद डारे हवंय, अऊ तोर हांथ ह मोर ऊपर पड़े हवय।
PSA 38:3 तोर कोप के कारन मोर देहें ह स्वस्थ नइं ए; मोर पाप के कारन मोर हाड़ामन म कुछू बल नइं ए।
PSA 38:4 मोर अपराध ह मोला बियाकुल कर दे हवय, येह भारी बोझा के सहीं सहन सक्ति ले बाहिर हो गे हवय।
PSA 38:5 मोर पाप के मुरूखता के कारन मोर घावमन पाकके सड़ गे हवंय।
PSA 38:6 मोला लज्जित करे जाथे अऊ मोला झुकाय गे हवय; दिन भर मेंह सोक मनात रहिथंव।
PSA 38:7 मोर पीठ ह चूभत पीरा ले भरे हवय; अऊ मोर देहें ह स्वस्थ नइं ए।
PSA 38:8 मेंह कमजोर होके चूर-चूर हो गे हंव; मेंह अपन हिरदय के पीरा म कलहरत हंव।
PSA 38:9 हे परभू, मोर जम्मो ईछा ला तेंह जानत हस; मोर आह भरई ह तोर ले नइं छुपे हे।
PSA 38:10 मोर हिरदय ह कुटा-कुटा होवत हे, मोर म ताकत नइं ए; अऊ त अऊ मोर आंखी के अंजोर ह खतम हो गे हवय।
PSA 38:11 मोर घावमन के कारन मोर संगी-साथीमन मोर ले अलग होवथें; मोर पड़ोसीमन मोर ले बहुंत दूरिहा रहिथें।
PSA 38:12 जऊन मन मोला मार डारे चाहथें, ओमन अपन जाल बिछात हवंय, जऊन मन मोर हानि करहीं, ओमन मोर बिनास के बात करत हवंय; दिन भर ओमन साजिस करत पड़े रहिथें।
PSA 38:13 मेंह तो भैंरा मनखे सहीं अंव, जऊन ह सुन नइं सकय, अऊ कोंदा सहीं अंव, जऊन ह गोठियाय नइं सकय;
PSA 38:14 हव, मेंह ओ मनखे सहीं हो गे हंव, जऊन ह नइं सुनय, जेकर मुहूं ले कोनो जबाब नइं निकलय।
PSA 38:15 हे यहोवा, मेंह तोर इंतजार करत हंव; हे परभू मोर परमेसर, तेंह मोला जबाब देबे।
PSA 38:16 काबरकि मेंह कहेंव, “जब मोर गोड़ ह फिसलथे, त ओमन ला मोर ऊपर खुस होवन झन दे या ओमन अपनआप ला मोर ले ऊपर झन करंय।”
PSA 38:17 काबरकि मेंह गिरनेचवाला हंव, अऊ मोर म हमेसा पीरा हवय।
PSA 38:18 मेंह अपन पाप ला मान लेवत हंव; मेंह अपन पाप के कारन बियाकुल हंव।
PSA 38:19 बहुंते जन बिगर कारन के मोर बईरी हो गे हवंय; जऊन मन बिगर कारन के मोर ले घिन करथें, ओमन के संखिया अनगिनत हवय।
PSA 38:20 जऊन मन मोर भलई करे के कारन मोर बुरई करथें अऊ मोर बिरूध दोस लगाथें, जबकि मेंह सिरिप भलई के काम करे चाहथंव।
PSA 38:21 हे यहोवा, मोला झन तियाग; हे मोर परमेसर, मोर ले दूरिहा झन रह।
PSA 38:22 हे मोर परभू अऊ मोर उद्धारकर्ता, मोर मदद करे बर जल्दी आ।
PSA 39:1 संगीत निरदेसक बर। यदूतून बर। दाऊद के एक भजन। मेंह अपन मन म कहेंव, “मेंह अपन चालचलन ऊपर धियान दूहूं अऊ मोर जीभ ला पाप के बात ले दूरिहा रखहूं; जब दुस्ट मनखेमन मोर आघू म होहीं, त मेंह अपन मुहूं म लगाम लगाय रखहूं।”
PSA 39:2 एकरसेति मेंह एकदम चुप रहेंव, इहां तक कि मेंह कोनो बने बात घलो नइं कहेंव। पर मोर पीरा ह बढ़ गीस;
PSA 39:3 मोर हिरदय ह भीतरे-भीतर बरत रिहिस। जब मेंह सोचत रहेंव, आगी ह भड़क उठिस; तब मेंह अपन जीभ ले बोले लगेंव:
PSA 39:4 “हे यहोवा, मोला मोर जिनगी के अन्त ला देखा अऊ मोर जिनगी के कतेक दिन बांचे हवय, मोला बता; मोला बता कि मोर जिनगी कइसे तेजी से खतम होवथे।
PSA 39:5 तेंह मोर जिनगी के दिन ला सिरिप बीता भर कर दे हस; मोर जिनगी के थोरकन बछरमन तोर आघू म कुछू नो हंय। हर एक जन एक सांस के सहीं अय, अऊ त अऊ ओमन घलो, जऊन मन सुरकछित जान पड़थें।
PSA 39:6 “खचित हर एक जन छइहां के सहीं एती-ओती फिरत रहिथें; बेकार म ओमन भाग-दऊड़ करके धन जमा करत रहिथें, ये जाने बिगर कि मरे के बाद ये धन ह काकर होही।
PSA 39:7 “पर अब, हे परभू, मेंह का चीज के डहार देखत हंव? मोर आसा ह तोरेच ऊपर हवय।
PSA 39:8 मोला मोर जम्मो अपराध ले बचा ले; मोला मुरूखमन के तिरस्कार के पात्र झन बना।
PSA 39:9 मेंह चुप रहेंव; अऊ अपन मुहूं नइं खोलेंव, काबरकि तें अस ओ जन, जऊन ह येला करे हवय।
PSA 39:10 तेंह मोर ऊपर जऊन बिपत्ति डाले हस, ओला हटा ले; तोर हांथ के मार ले मेंह कुछू करे के लईक नइं अंव।
PSA 39:11 जब तेंह कोनो मनखे ला ओकर पाप के कारन डांटथस अऊ दंड देथस, त तेंह ओमन के धन-संपत्ति ला घूना खाय सहीं खतम कर देथस— खचित हर एक जन जिनगी के एक सांस के सहीं अय।
PSA 39:12 “हे यहोवा, मोर पराथना ला सुन, मदद बर मोर गोहार ला सुन; मोर रोवई ला सुनके चुप झन रह। मेंह एक परदेसी, एक अजनबी के सहीं तोर संग रहिथंव, जइसे कि मोर जम्मो पुरखामन रिहिन।
PSA 39:13 एकर पहिले कि मेंह ये संसार ले चले जावंव अऊ खतम हो जावंव, तेंह अपन कोप ला मोर ऊपर ले हटा ले, ताकि मेंह जिनगी के फेर आनंद उठा सकंव।”
PSA 40:1 संगीत के निरदेसक बर दाऊद के एक भजन। मेंह धीरज धरके यहोवा के डहार देखेंव; ओह मोर तरफ धियान दीस अऊ मोर गोहार ला सुनिस।
PSA 40:2 ओह मोला चीखला ले भरे खंचवा ले, चीखला अऊ दलदल ले बाहिर निकालिस; अऊ मोला चट्टान ऊपर ठाढ़ करिस अऊ ठाढ़ होय बर मोला एक मजबूत जगह दीस।
PSA 40:3 ओह मोला एक नवां गीत दीस, हमर परमेसर के इस्तुति करे बर एक ठन भजन दीस। बहुंते जन देखहीं अऊ यहोवा के भय मानहीं अऊ ओकर ऊपर भरोसा करहीं।
PSA 40:4 धइन अय ओ मनखे, जऊन ह यहोवा ऊपर भरोसा रखथे, जऊन ह घमंडी मनखेमन कोति नइं देखय, या ओमन कोति नइं देखय, जेमन लबरा देवतामन ऊपर अपन मन लगाथें।
PSA 40:5 हे यहोवा मोर परमेसर, तेंह बहुंते अद्भूत काम करे हस, अऊ हमर बर बहुंते चीजमन के योजना बनाय हस। काकरो तुलना तोर से नइं करे जा सकय; यदि मेंह तोर काममन के चरचा करंव अऊ ओमन के बारे बतावंव, त ओमन अतेक जादा हवंय कि ओमन के गनती नइं करे जा सकय।
PSA 40:6 बलिदान अऊ भेंट तेंह नइं चाहय— पर मोर कान ला तेंह खोल दे हस— होम-बलिदान अऊ पाप-बलिदान तेंह नइं चाहय।
PSA 40:7 तब मेंह कहेंव, “मेंह इहां हंव, मेंह आय हंव— मोर बारे म ये बात ह किताब म लिखे हवय।
PSA 40:8 हे मोर परमेसर, मेंह तोर ईछा ला पूरा करे चाहथंव; तोर कानून ह मोर हिरदय म बसे हवय।”
PSA 40:9 मेंह तोर धरमीपन के काम के बखान बड़े सभा म करथंव; हे यहोवा, जइसे कि तेंह जानत हस, मेंह अपन मुहूं ला बंद नइं रखंव।
PSA 40:10 मेंह तोर धरमीपन ला अपन हिरदय म नइं छुपावंव; मेंह तोर बिसवासयोग्यता अऊ तोर उद्धार के काम के बारे म गोठियाथंव। मेंह बड़े सभा ले तोर मया अऊ तोर बिसवासयोग्यता के बात ला नइं छुपावंव।
PSA 40:11 हे यहोवा, मोर ऊपर ले अपन दया ला झन हटा; तोर मया अऊ बिसवासयोग्यता हमेसा मोर बचाव करय।
PSA 40:12 काबरकि अनगिनत समस्यामन मोला घेरे हवंय; मोर पापमन मोला दबा ले हवंय, अऊ मेंह देख नइं सकत हंव। ओमन के संखिया मोर मुड़ के चुंदी ले घलो जादा हवय, एकरसेति मोर मन ह टूट गे हवय।
PSA 40:13 हे यहोवा, किरपा करके मोला बचा ले; हे यहोवा, मोर मदद करे बर जल्दी आ।
PSA 40:14 जऊन मन मोर परान लेय चाहथें, ओ जम्मो झन लज्जित होवंय अऊ घबरावंय; ओ जम्मो, जऊन मन मोर बिनास के ईछा रखथें, ओमन कलंकित होके पाछू हटंय।
PSA 40:15 जऊन मन मोला ये कहिथें, “अहा! अहा!” ओमन अपन ही लज्जा म चकित होवंय।
PSA 40:16 पर ओ जम्मो, जऊन मन तोर खोज म रहिथें, ओमन तोर कारन आनंद मनावंय अऊ खुस होवंय; जऊन मन तोर उद्धार के मदद चाहथें, ओमन हमेसा कहंय, “यहोवा महान ए!”
PSA 40:17 पर जहां तक मोर बात ए, मेंह गरीब अऊ जरूरतमंद अंव; परभू ह मोर बारे म सोचय। तेंह मोर मददगार अऊ मोर छुड़ानेवाला अस; तेंह मोर परमेसर अस, मोर मदद करे म देरी झन कर।
PSA 41:1 संगीत के निरदेसक बर दाऊद के एक भजन। धइन अंय ओमन, जऊन मन कमजोर मनखे के सुधि लेथें; यहोवा ह संकट के बेरा म ओमन ला बचाथे।
PSA 41:2 यहोवा ह ओमन ला बचाथे अऊ ओमन ला संभाले रखथे— देस म ओमन के गनती आसीसित मनखेमन के बीच होथे— ओह ओमन ला ओमन के बईरीमन के ईछा म नइं छोंड़य।
PSA 41:3 जब ओमन बेमार होके बिस्तर म पड़े रहिथें, त यहोवा ह ओमन ला संभालथे अऊ ओमन ला ठीक करके बेमारी के बिस्तर ले ठाढ़ करथे।
PSA 41:4 मेंह कहेंव, “हे यहोवा, मोर ऊपर दया कर; मोला चंगा कर, काबरकि मेंह तोर बिरूध पाप करे हंव।”
PSA 41:5 मोर बईरीमन मोर बुरई करके कहिथें, “ओह कब मरही अऊ ओकर नांव ह मिटाही?”
PSA 41:6 जब ओमन ले कोनो मोला देखे बर आथे, त ओह लबारी बात कहिथे, अऊ अपन मन म बदनामी के बात ला रखथे; तब ओह बाहिर जाथे अऊ ओ बात ला फईलाथे।
PSA 41:7 मोर जम्मो बईरीमन एक संग मोर बिरूध म कानाफूसी करथें; ओमन ये कहिके मोर बिरूध खराप कल्पना करथें,
PSA 41:8 “ओला एक खराप बेमारी हो गे हवय; ओह ओ जगह ले कभू उठ नइं सकय, जिहां ओह पड़े हवय।”
PSA 41:9 अऊ त अऊ मोर खास संगी, जेकर ऊपर मेंह भरोसा करत रहंय, जऊन ह मोर संग खाना खावत रिहिस, ओह मोर बिरूध हो गे हवय।
PSA 41:10 पर हे यहोवा, तेंह मोर ऊपर दया कर; मोला उठा कि मेंह ओमन ले बदला ले सकंव।
PSA 41:11 मेंह जानत हंव कि तेंह मोर ले खुस हवस, काबरकि मोर बईरीमन मोर ऊपर जय नइं पावथें।
PSA 41:12 मोर ईमानदारी के कारन तेंह मोला संभाले रखथस अऊ हमेसा बर मोला अपन आघू म रखथस।
PSA 41:13 यहोवा, इसरायल के परमेसर के परसंसा आदि ले अनंतकाल तक होवत रहय।
PSA 42:1 संगीत के निरदेसक बर कोरह के बेटामन के एक मसकील। जइसे हिरन ह पानी के सोता बर हांफथे, हे मोर परमेसर, वइसे ही मोर जीव ह तोर बर हांफथे।
PSA 42:2 मोर जीव ह परमेसर बर, जीयत परमेसर बर पीयासा हवय। कब मेंह जाके परमेसर संग मिल सकत हंव?
PSA 42:3 रात अऊ दिन मेंह अपन आंखी के आंसू ला पीयत हंव, जबकि दिन भर मनखेमन मोला कहिथें, “कहां हवय तोर परमेसर?”
PSA 42:4 जब मेंह अपन मन के बात ला रखथंव, त मोला ये बातमन सुरता आथें: मेंह कइसे उत्सव मनावत भीड़ के संग परमेसर के सुरकछा म आनंद अऊ परसंसा के जय-जयकार करत परमेसर के घर म जाय के आदि रहेंव।
PSA 42:5 हे मोर मन, तेंह काबर उदास होवत हस? तेंह भीतरे-भीतर काबर बियाकुल हस? परमेसर ऊपर अपन आसा रख, काबरकि मेंह अब भी मोर उद्धारकर्ता अऊ मोर परमेसर के परसंसा करहूं।
PSA 42:6 मोर मन ह भीतरे-भीतर उदास हवय; एकरसेति यरदन के देस ले, हेरमोन के ऊंचई—मिसार पहाड़ ले मेंह तोला सुरता करहूं।
PSA 42:7 तोर जल-परपात के गरजन म गहरई ह गहरई ला पुकारथे; तोर जम्मो पानी के उफान अऊ लहरामन मोर ऊपर ले निकले हवंय।
PSA 42:8 दिन के बेरा यहोवा ह अपन मया देखाथे, अऊ रथिया मेंह ओकर गीत गाथंव— मोर जिनगी के परमेसर बर पराथना के गीत।
PSA 42:9 मेंह परमेसर अपन चट्टान ला कहिथंव, “तेंह काबर मोला भुला गे हस? बईरीमन के दुवारा सताय जाके मेंह काबर सोक मनावंव?”
PSA 42:10 जब मोर बईरीमन ये कहिके दिन भर मोला ताना मारथें, “कहां हे तोर परमेसर?” त मोर हाड़ामन पीरा म चूर-चूर हो जाथें।
PSA 42:11 हे मोर मन, तेंह काबर उदास होवत हस? मोर भीतरे-भीतर काबर अतेक बियाकुल हस? परमेसर ऊपर अपन आसा रख, काबरकि मेंह अब भी मोर उद्धारकर्ता अऊ मोर परमेसर के परसंसा करहूं।
PSA 43:1 हे मोर परमेसर, मोला निरदोस साबित कर, बिसवासघाती जाति के मनखेमन के बिरूध मोर मामला ला देख। ओमन ले मोला बचा, जऊन मन धोखेबाज अऊ दुस्ट अंय।
PSA 43:2 तेंह परमेसर अस अऊ मोर मजबूत गढ़ अस। तेंह काबर मोला तिरस्कार करे हस? बईरी के दुवारा दुख मिले के कारन मेंह काबर सोक मनावंव?
PSA 43:3 अपन अंजोर अऊ सच्चई ला मोर करा पठो, ओमन मोर अगुवई करंय; ओमन मोला तोर पबितर पहाड़ करा लानंय, ओ जगह म जिहां तेंह रहिथस।
PSA 43:4 तब मेंह परमेसर के बेदी करा जाहूं, ओ परमेसर, जऊन ह मोर आनंद अऊ मोर खुसी अय। हे परमेसर, मोर परमेसर, मेंह बीना बजा-बजाके तोर इस्तुति करहूं।
PSA 43:5 हे मोर मन, तेंह काबर उदास होवत हस? मोर भीतरे-भीतर काबर अतेक बियाकुल हस? परमेसर ऊपर अपन आसा रख, काबरकि मेंह अब भी मोर उद्धारकर्ता अऊ मोर परमेसर के परसंसा करहूं।
PSA 44:1 संगीत के निरदेसक बर कोरह के बेटामन के एक मसकील। हे परमेसर, हमन अपन कान ले सुने हवन; हमर पुरखामन हमन ला बताय हवंय कि बहुंत समय पहिले तेंह ओमन के समय म का-का काम करे हस।
PSA 44:2 अपन हांथ ले तेंह जाति-जाति के मनखेमन ला निकालके भगा देय अऊ हमर पुरखामन ला बसाय; तेंह मनखेमन ला कुचर डारय अऊ हमर पुरखामन ला बढ़ाय।
PSA 44:3 ओमन अपन तलवार के ताकत ले देस ला नइं जीतिन, न ही ओमन अपन बाहां के ताकत ले जय पाईन; पर येह तोर जेवनी हांथ, तोर बाहां, अऊ तोर चेहरा के अंजोर रिहिस जेकर दुवारा जीत मिलिस, काबरकि तेंह ओमन ले मया करय।
PSA 44:4 तेंह मोर राजा अऊ मोर परमेसर अस, जऊन ह याकूब बर जीत के हुकूम देथे।
PSA 44:5 तोर जरिये ही हमन अपन बईरीमन ला पाछू ढकेल देथन; तोर नांव ले ही हमन अपन बिरोधीमन ला कुचर देथन।
PSA 44:6 मेंह अपन धनुस ऊपर भरोसा नइं करंव, मोर तलवार के दुवारा मोला जीत नइं मिलय;
PSA 44:7 पर तेंह हमन ला हमर बईरीमन ऊपर जीत देवाथस, तेंह हमर बईरीमन ला लज्जित करथस।
PSA 44:8 परमेसर ऊपर हमन दिन भर घमंड करत रहिथन, अऊ हमन हमेसा तोर नांव के परसंसा करत रहिबो।
PSA 44:9 पर अब तेंह हमन ला तियाग दे हस अऊ हमर अनादर करे हस; तेंह हमर सेना के संग अब नइं जावस।
PSA 44:10 तेंह हमन ला हमर बईरी के आघू ले भगा दे हस, अऊ हमर बईरीमन हमन ला लूट ले हवंय।
PSA 44:11 तेंह हमन ला भेड़मन के सहीं मारे जाय बर देय दे हस अऊ हमन ला जाति-जाति के मनखेमन के बीच तितिर-बितिर कर दे हस।
PSA 44:12 तेंह अपन मनखेमन ला थोरकन दाम म बेच दे हस, अऊ ओमन ला बेचे ले कुछू लाभ नइं होईस।
PSA 44:13 तेंह हमन ला हमर पड़ोसीमन बर निन्दा के कारन बना दे हस, हमर चारों कोति के मनखे बर हंसी अऊ ठट्ठा के चीज बना दे हस।
PSA 44:14 तेंह हमन ला जाति-जाति के मनखेमन के बीच म एक कहावत बना दे हस; ओमन हमर बर मुड़ झटक लेथें।
PSA 44:15 मेंह दिन भर कलंक म जीयत हंव, अऊ मोर मुहूं ह लाज म ढंपा गे हवय,
PSA 44:16 ओमन के ताना मारे के कारन, जऊन मन मोर निन्दा करथें अऊ मोला गाली देथें, ओ बईरी के कारन, जऊन ह मोर ले बदला लेय बर तियार हवय।
PSA 44:17 ये जम्मो कुछू हमर ऊपर होईस, हालाकि हमन तोला नइं भुलाय रहेंन; अऊ हमन तोर करार ला नइं टोरे रहेंन।
PSA 44:18 हमर मन ह तोर ले नइं हटे रिहिस; हमर गोड़मन तोर रसता ले नइं भटके रिहिन।
PSA 44:19 पर तेंह हमन ला कुचर डारय अऊ हमन ला गीदड़मन के डेरा बना डारय; तेंह हमन ला घोर अंधियार ले ढांप ले हस।
PSA 44:20 यदि हमन अपन परमेसर के नांव ला भुला गे रहेंन या अपन हांथ ला आने देवता कोति बढ़ाय रहेंन,
PSA 44:21 त का परमेसर ला ये बात के पता नइं चल गे होतिस? काबरकि ओह तो मन के गुपत बात ला घलो जानथे।
PSA 44:22 तभो ले तोर बर, हमन दिन भर मिरतू के जोखिम म रहिथन; हमन ओ भेड़ सहीं समझे जाथन, जऊन मन के बध होवइया हवय।
PSA 44:23 हे परभू, जाग! तेंह काबर सुतत हस? अपनआप ला जगा! हमन ला सदाकाल बर झन तियाग।
PSA 44:24 तेंह काबर अपन मुहूं ला छिपात हस अऊ हमर अतियाचार अऊ दुरगति ला भुला देत हस?
PSA 44:25 हमन ला खाल्हे धुर्रा म पटक दिये गे हवय; हमर देहें ह भुइयां म पड़े हवय।
PSA 44:26 उठ अऊ हमर मदद कर; अपन अटूट मया के कारन हमन ला छोंड़ा ले।
PSA 45:1 संगीत के निरदेसक बर कुमुदिनी के स्वर म कोरह के बेटामन के एक मसकील। एक बिहाव गीत। मोर हिरदय म एक ठन उत्तम बिसय आवत हे जइसे कि मेंह राजा बर अपन पदमन के पाठ करथंव; त मोर जीभ ह एक कुसल लेखक के कलम बन जाथे।
PSA 45:2 तेंह मनखेमन म सबले उत्तम अस अऊ तोर ओंठ ला अनुग्रह ले अभिसेक करे गे हवय, काबरकि परमेसर ह तोला सदाकाल बर आसीस दे हवय।
PSA 45:3 हे बलसाली मनखे, तेंह अपन बाजू म तलवार ला धर ले; सोभा अऊ महिमा देवइया कपड़ा पहिर ले।
PSA 45:4 सच्चई, नमरता अऊ नियाय के हित म अपन महिमा के संग बिजयी होके निकल; तोर जेवनी हांथ ले अद्भूत काम होवय।
PSA 45:5 तोर नुकीला तीरमन राजा के बईरीमन के हिरदय ला छेद डारंय; जाति-जाति के मनखेमन तोर गोड़ खाल्हे गिरंय।
PSA 45:6 हे परमेसर, तोर सिंघासन ह सदाकाल तक बने रहिही; अऊ धरमीपन के राजदंड ह तोर राज के राजदंड होही।
PSA 45:7 तेंह धरमीपन ले मया अऊ दुस्टता ले घिन करथस; एकरसेति परमेसर, तोर परमेसर ह आनंद के तेल ले तोर अभिसेक करे के दुवारा तोला तोर संगीमन ले ऊपर करे हवय।
PSA 45:8 तोर जम्मो ओनहामन लोहबान, मुसब्बर अऊ दालचीनी के सुगंध ले महकत हंय; हाथी-दांत ले सजे महल ले तारवाले बाजा के संगीत ह तोला खुसी देवत हे।
PSA 45:9 राजामन के बेटीमन तोर सम्मानित माईलोगनमन के बीच हवंय; तोर जेवनी हांथ कोति ओपीर के सोन ले सजे राजसी दुलहिन हवय।
PSA 45:10 हे बेटी, सुन, अऊ बने करके ये बात ऊपर धियान दे: तोर मनखेमन अऊ तोर ददा के घर ला भुला दे।
PSA 45:11 राजा ह तोर सुघरता ला देखके मोहित होवय; ओकर आदर कर, काबरकि ओह तोर परभू अय।
PSA 45:12 सूर देस के सहर ह एक ठन भेंट लेके आही, धनी मनखेमन तोर दया के कामना करहीं।
PSA 45:13 राजकुमारी ह अपन कमरा म पूरा सोभायमान हे; ओकर ओढ़ना म सोन के कसीदा कढ़ाय हवय।
PSA 45:14 कसीदा करे कपड़ा पहिराके ओला राजा करा लाने जाथे; ओकर कुंवारी सखीमन ओकर पाछू-पाछू चलथें— ओ सखीमन, जेमन ला ओकर संग रहे बर लाने जाथे।
PSA 45:15 आनंद अऊ खुसी के संग ओमन ला लाने जाथे, अऊ ओमन राजा के महल के भीतर जाथें।
PSA 45:16 तोर ददामन के जगह ला तोर बेटामन लीहीं; तेंह ओमन ला पूरा देस म राज करे बर ठहिराबे।
PSA 45:17 मेंह अइसे करहूं कि पीढ़ी-पीढ़ी तक तोर नांव के चरचा होवत रहय; एकरसेति जाति-जाति के मनखेमन हमेसा-हमेसा बर तोर परसंसा करहीं।
PSA 46:1 संगीत के निरदेसक बर। कोरह के बेटामन के अलामोत के मुताबिक एक गीत। परमेसर ह हमर सरन-स्थान अऊ बल अय, बिपत के बेरा म ओह मदद करे बर हमेसा तियार रहिथे।
PSA 46:2 एकरसेति हमन नइं डरन, चाहे धरती ह पलट जावय अऊ पहाड़ ह समुंदर के गरभ म जा गिरय।
PSA 46:3 चाहे समुंदर के पानी ह गरजय अऊ ओमा ले फेन निकलय अऊ ओकर बड़े लहरामन ले पहाड़मन कांप उठंय।
PSA 46:4 एक नदी हवय, जेकर जल-धारामन परमेसर के सहर ला खुस कर देथें, ये ओ पबितर स्थान अय, जिहां सर्वोच्च परमेसर ह रहिथे।
PSA 46:5 परमेसर ह ओ नगर म हवय, ओ नगर ह नइं गिरय; बड़े बिहनियां परमेसर ह ओकर मदद करही।
PSA 46:6 जाति-जाति के मनखेमन के बीच खलबली मचे हवय, कतको राजमन गिर जावत हें; ओह अपन अवाज ऊंचा करथे, त धरती ह टघल जाथे।
PSA 46:7 यहोवा सर्वसक्तिमान ह हमर संग हवय; याकूब के परमेसर ह हमर गढ़ अय।
PSA 46:8 आवव अऊ यहोवा के काम ला देखव कि ओह धरती ला कइसे उजाड़ दे हवय।
PSA 46:9 ओह धरती के छोर तक लड़ई ला रोक देथे। ओह धनुस ला टोर देथे अऊ बरछी ला कुटा-कुटा कर देथे; ओह ढालमन ला आगी म जला देथे।
PSA 46:10 ओह कहिथे, “सांत रहव, अऊ ये बात ला जान लव कि मेंह परमेसर अंव; जाति-जाति के मनखेमन के बीच मोर नांव ला ऊंचा करे जाही, धरती म मोर नांव ला ऊंचा करे जाही।”
PSA 46:11 यहोवा सर्वसक्तिमान ह हमर संग हवय; याकूब के परमेसर ह हमर गढ़ अय।
PSA 47:1 संगीत के निरदेसक बर कोरह के बेटामन के एक भजन। हे देस-देस के जम्मो मनखेमन, ताली बजावव; आनंद के जय-जयकार के संग परमेसर ला पुकारव।
PSA 47:2 काबरकि यहोवा, सर्वोच्च परमेसर ह अद्भूत ए, ओह जम्मो धरती ऊपर महाराजा अय।
PSA 47:3 ओह देस-देस के मनखेमन ला हमर अधीन, हमर गोड़ खाल्हे कर दे हवय।
PSA 47:4 ओह हमर निज भाग ला हमर बर चुनिस, जऊन ह ओकर मयारू याकूब के घमंड के कारन अय।
PSA 47:5 परमेसर ह आनंद के जय-जयकार के बीच ऊपर गे हवय, यहोवा ह तुरही के अवाज के संग ऊपर गे हवय।
PSA 47:6 परमेसर के परसंसा के गीत गावव, परसंसा के गीत गावव; हमर राजा के परसंसा के गीत गावव, परसंसा के गीत गावव।
PSA 47:7 काबरकि परमेसर ह जम्मो धरती के राजा अय; ओकर परसंसा के भजन गावव।
PSA 47:8 परमेसर ह जाति-जाति के मनखेमन ऊपर राज करथे; परमेसर ह अपन पबितर सिंघासन म बिराजे हवय।
PSA 47:9 राज-राज के परभावसाली मनखेमन अब्राहम के परमेसर के मनखेमन के रूप म जूरथें, काबरकि धरती के राजामन परमेसर के अंय; ओला बहुंत ऊपर करे जाथे।
PSA 48:1 एक गीत। कोरह के बेटामन के एक भजन। महान ए यहोवा, अऊ हमर परमेसर के सहर म, ओकर पबितर पहाड़ म, ओह सबले जादा परसंसा के योग्य अय।
PSA 48:2 सुघर हे अपन ऊंचई म अऊ येह जम्मो धरती के आनंद ए, सपोन के ऊंचई के सहीं हवय सियोन परबत, जऊन ह महाराजा के सहर अय।
PSA 48:3 परमेसर ह उहां के किलामन म हवय; ओह अपनआप ला ओकर गढ़ के रूप म देखाय हवय।
PSA 48:4 जब राजामन अपन सेना ला मिलाईन, जब ओमन एक संग आघू बढ़िन,
PSA 48:5 त ओमन ओला देखिन अऊ चकित हो गीन; अऊ ओमन डर के मारे भाग गीन।
PSA 48:6 ओमन उहां कांपे लगिन, ओमन ला छेवारी होवत माईलोगन के सहीं पीरा होईस।
PSA 48:7 तेंह ओमन ला तरसीस के पानी जहाजमन सहीं नास कर देय याने कि पुरवई हवा ले ओमन ला चकनाचूर कर देय।
PSA 48:8 सर्वसक्तिमान यहोवा के सहर म, हमर परमेसर के सहर म जइसे हमन सुने हन जइसे हमन देखे हन: परमेसर ह ओला सदाकाल बर सुरकछित बनाथे।
PSA 48:9 हे परमेसर, तोर मंदिर के भीतर हमन तोर अब्बड़ मया ऊपर चिंतन-मनन करथन।
PSA 48:10 हे परमेसर, तोर नांव के सहीं, तोर परसंसा ह धरती के छोर तक हबरत हे; तोर जेवनी हांथ ह धरमीपन ले भरे हवय।
PSA 48:11 तोर नियाय के काम के कारन सियोन परबत आनंद मनावत हे, अऊ यहूदा के बस्तीमन म खुसी हवय।
PSA 48:12 सियोन करा जावव, ओकर चारों कोति चक्कर लगावव, ओकर गुम्मटमन के गनती करव।
PSA 48:13 ओकर मजबूत दीवारमन ऊपर बने करके बिचार करव, ओकर महलमन ला धियान से देखव, ताकि अवइया पीढ़ी के मनखेमन ला तुमन ओमन के बारे म बता सकव।
PSA 48:14 काबरकि ये परमेसर ह हमर सदाकाल के परमेसर अय; ओहीच ह आखिरी तक हमर अगुवई करही।
PSA 49:1 संगीत के निरदेसक बर। कोरह के बेटामन के एक भजन। हे जम्मो मनखेमन, तुमन ये बात ला सुनव; ये संसार म रहइया जम्मो झन सुनव,
PSA 49:2 का ऊंच, का नीच, का धनी, का गरीब, जम्मो कान लगाके सुनव:
PSA 49:3 मोर मुहूं ले बुद्धि के बात निकलही; मोर हिरदय के मनन-चिंतन ह समझ ले भरे होही।
PSA 49:4 मेंह नीतिबचन कोति अपन कान लगाहूं; बीना बजात मेंह जनऊला के बात समझाहूं:
PSA 49:5 जब बिपत्ति के दिन आथे, त मेंह काबर डरंव, जब दुस्ट धोखेबाजमन मोला घेर लेथें—
PSA 49:6 ओ मनखे, जेमन अपन धन ऊपर भरोसा रखथें अऊ अपन बहुंत संपत्ति ऊपर घमंड करथें?
PSA 49:7 कोनो भी मनखे कोनो आने मनखे के जिनगी के उद्धार नइं कर सकय या कोनो भी मनखे परमेसर ला ओकर छुड़ौती के दाम नइं दे सकय—
PSA 49:8 जिनगी के छुड़ौती के दाम ह मंहगा होथे, कोनो भी दाम ओकर बर परयाप्त नो हय—
PSA 49:9 कि ओह सदाकाल तक जीयत रहय अऊ कबर ला झन देखय।
PSA 49:10 काबरकि जम्मो झन देख सकत हें कि बुद्धिमानमन मरथें, अऊ मुरूख अऊ अगियानी मनखेमन घलो अपन धन-संपत्ति ला आने बर छोंड़के मर जाथें।
PSA 49:11 ओमन सोचथें कि ओमन के कबर ह सदाकाल तक ओमन के घर बने रहिही, पीढ़ी-पीढ़ी तक ओमन के निवास होही, काबरकि ओमन अपन भुइयां के नांव अपन नांव म रखथें।
PSA 49:12 अपन धन-संपत्ति के बावजूद, मनखे ह हमेसा बने नइं रहय; ओह पसु जइसन होथे, जऊन ह नास हो जाथे।
PSA 49:13 येह ओमन के दुरभाग्य ए, जेमन अपन ऊपर भरोसा रखथें, अऊ ओमन के पाछू चलइया मनखेमन के घलो, जेमन ओमन के बात म सहमती देथें।
PSA 49:14 ओमन भेड़मन सहीं अंय अऊ ओमन के मरना निस्चित अय; मिरतू ह ओमन के चरवाहा होही (पर सीधवा मनखे ह बिहनियां ओमन ऊपर जय पाही)। ओमन के सुघर महल ले दूरिहा, ओमन के देहें ह कबर म सर जाही।
PSA 49:15 पर परमेसर ह मोला मिरतू-लोक ले छोंड़ाही; खचित, ओह मोला अपन इहां ले जाही।
PSA 49:16 जब आने मन धनी होथें, जब ओमन के घर के सोभा बढ़थे, त झन डरव;
PSA 49:17 काबरकि जब ओमन मरहीं, त अपन संग कुछू नइं ले जावंय, ओमन के सोभा ह ओमन के संग कबर म नइं जावय।
PSA 49:18 हालाकि जब ओमन जीयत रहिथें, त अपनआप ला आसीसित समझथें— अऊ मनखेमन तोर बड़ई करथें जब तेंह उन्नति करथस—
PSA 49:19 ओमन अपन पुरखामन संग मिल जाहीं, जेमन फेर कभू जिनगी के अंजोर ला नइं देखंय।
PSA 49:20 ओ मनखे जेमन करा संपत्ति होथे, पर समझे के सक्ति नइं होवय, ओमन ओ पसु सहीं होथें, जेमन नास हो जाथें।
PSA 50:1 आसाप के एक भजन। सक्तिसाली परमेसर, यहोवा ह उदयाचल ले लेके अस्ताचल तक धरती के मनखेमन ले गोठियाथे अऊ ओमन ला बलाथे।
PSA 50:2 सियोन ले, जेह अब्बड़ सुघर हे, परमेसर के अंजोर चमकत हे।
PSA 50:3 हमर परमेसर ह आथे अऊ ओह चुपेचाप नइं रहय; ओकर आघू म एक भसम करइया आगी, अऊ ओकर चारों कोति एक भयंकर आंधी हवय।
PSA 50:4 ओह अपन मनखेमन के नियाय करे बर ऊपर ले अकास, अऊ धरती ला बलाथे:
PSA 50:5 “ये मोर भक्तमन ला मोर करा इकट्ठा करव, जेमन बलिदान चघाके मोर संग करार करे हवंय।”
PSA 50:6 अऊ स्वरग ह ओकर धरमीपन के घोसना करत हे, काबरकि ओह नियाय के परमेसर अय।
PSA 50:7 “हे मोर मनखेमन, सुनव, अऊ मेंह गोठियाहूं; हे इसरायल, मेंह तोर बिरूध गवाही दूहूं: मेंह परमेसर अंव, तोर परमेसर।
PSA 50:8 मेंह तोर बलिदान के बारे म या ओ होम-बलिदान के बारे म तोर ऊपर दोस नइं लगावंव, जेला हमेसा मोला चढ़ाय जाथे।
PSA 50:9 मोला तोर घर ले बईला या तोर बाड़ा ले बोकरा के जरूरत नइं ए,
PSA 50:10 काबरकि जंगल के हर एक पसु मोर अय, अऊ हजारों पहाड़ीमन ऊपर चरत जानवर घलो मोरेच अंय।
PSA 50:11 मेंह पहाड़मन के जम्मो चिरईमन ला जानथंव, अऊ मैदान के कीड़ा-मकोड़ामन मोरेच अंय।
PSA 50:12 यदि मेंह भूखा होतेंव, त मेंह तोला नइं कहितेंव, काबरकि संसार अऊ ओमा के जम्मो चीजमन मोर अंय।
PSA 50:13 का मेंह सांड़मन के मांस खाथंव या बोकरामन के लहू पीथंव?
PSA 50:14 “परमेसर ला धनबाद रूपी भेंट चघा, सर्वोच्च परमेसर बर अपन मन्नतमन ला पूरा कर,
PSA 50:15 संकट के बेरा म मोला पुकार; मेंह तोला छुड़ाहूं, अऊ तेंह मोर आदरमान करबे।”
PSA 50:16 पर दुस्ट मनखे ला परमेसर ह कहिथे: “मोर कानूनमन के पाठ करे के या मोर करारमन ला बताय के तोला का अधिकार हवय?
PSA 50:17 तेंह तो मोर सिकछा ले घिन करथस अऊ मोर बचन ला तुछ समझथस।
PSA 50:18 जब तेंह कोनो चोर ला देखथस, त ओकर संग सामिल हो जाथस; तेंह बेभिचारीमन के संग भागी होथस।
PSA 50:19 तोर मुहूं ले बुरई के बात निकलथे अऊ तोर जीभ ह छल-कपट के बात करथे।
PSA 50:20 तेंह बईठके अपन भाई के बिरूध गोठियाथस अऊ अपन ही सगा भाई के निन्दा करथस।
PSA 50:21 जब तेंह ये काममन ला करय अऊ मेंह चुप रहेंव, त तेंह समझे कि मेंह घलो बिलकुल तोर सहीं अंव। पर मेंह अब तोर गलतीमन ला बतात हंव अऊ तोर आघू म तोर दोसमन ला रखत हंव।
PSA 50:22 “तुमन, जेमन परमेसर ला भुला जाथव, येकर बारे म बिचार करव, नइं तो मेंह तुमन ला चीरके कुटा-कुटा कर दूहूं, अऊ तुमन ला बचानेवाला कोनो नइं होही:
PSA 50:23 जऊन मन मोला धनबाद-बलिदान चघाथें, ओमन मोर आदर करथें, अऊ निरदोस मनखे ला मेंह अपन उद्धार के अनुभव कराहूं।”
PSA 51:1 संगीत के निरदेसक बर। दाऊद के एक भजन। दाऊद राजा के बतसेबा के संग बेभिचार करे के बाद जब नातान अगमजानी ह दाऊद करा आईस। हे परमेसर, अपन बड़े मया के मुताबिक मोर ऊपर दया कर; अपन बड़े करूना के मुताबिक मोर अपराधमन ला मिटा दे।
PSA 51:2 मोर जम्मो अधरम ला धो डार अऊ मोर पाप ले मोला सुध कर।
PSA 51:3 काबरकि मेंह अपन अपराध ला जानत हंव, अऊ मोर पाप ह हमेसा मोर आघू म रहिथे।
PSA 51:4 मेंह तोर, सिरिप तोर बिरूध म पाप करे हवंव अऊ ओहीच काम करे हवंव, जऊन ह तोर नजर म पाप ए; एकरसेति तेंह अपन फैसला म सही अस अऊ जब नियाय करथस, त सही नियाय करथस।
PSA 51:5 खचित, मेंह जनम ले पापी अंव, जब मोर दाई ह मोला गरभ म धरिस, तब ले मेंह पापी अंव।
PSA 51:6 तभो ले तेंह हिरदय के सच्चई ले खुस होथस; तेंह मोला ओ गुपत जगह म बुद्धि सिखाय।
PSA 51:7 जूफा पऊधा ले मोला साफ कर, अऊ मेंह साफ हो जाहूं; मोला धो, अऊ मेंह बरफ ले घलो जादा सफेद हो जाहूं।
PSA 51:8 मोला आनंद अऊ खुसी सबद सुनन दे; जऊन हाड़ामन ला तेंह कुचर दे हस, ओमन आनंद मनावंय।
PSA 51:9 मोर पापमन ले तेंह अपन मुहूं ला छुपा ले अऊ मोर जम्मो अपराध ला मिटा दे।
PSA 51:10 हे परमेसर, मोर म एक सुध हिरदय बना, अऊ मोर भीतर म नवां किसम ले एक अटल आतमा स्थापित कर।
PSA 51:11 मोला अपन आघू ले झन निकाल या अपन पबितर आतमा ला मोर ले अलग झन कर।
PSA 51:12 अपन करे गय उद्धार के आनंद ले मोला फेर भर दे मोला संभाले बर तोर बात माने के एक आतमा दे।
PSA 51:13 तब मेंह अपराधीमन ला तोर हुकूम के सिकछा दूहूं, ताकि पापीमन तोर करा लहुंट आवंय।
PSA 51:14 हे परमेसर, मोला खून बहाय के अपराध ले छुड़ा ले, तेंह परमेसर मोर उद्धारकर्ता अस, अऊ मेंह तोर धरमीपन के गीत गाहूं।
PSA 51:15 हे परभू, मोर मुहूं ला खोल, अऊ मोर मुहूं ह तोर महिमा करही।
PSA 51:16 तेंह बलिदान चघाय ले खुस नइं होवस, नइं तो मेंह येला लानतेंव; होम-बलिदान म तोला खुसी नइं होवय।
PSA 51:17 टूटे मन ह परमेसर बर योग्य बलिदान ए; एक टूटे अऊ पछतापी मन हे परमेसर, तेंह येला तुछ नइं समझस।
PSA 51:18 सियोन के उन्नति करे म, यरूसलेम सहर के दीवारमन के बनाय जाय म तोला खुसी मिलय।
PSA 51:19 तब तेंह धरमी के बलिदान ले खुस होबे, याने कि पूरा होम-बलिदान चघाय ले खुस होबे; तब तोर बेदी म बईलामन ला चघाय जाही।
PSA 52:1 संगीत के निरदेसक बर। दाऊद के एक मसकील। जब एदोमी दोएग ह साऊल करा जाके ओला कहिस: “दाऊद ह अहीमेलेक के घर गे हवय।” हे बलवान बीर, बुरई ऊपर काबर घमंड करथस? दिन भर काबर घमंड करत रहिथस, जबकि तेंह तो परमेसर के नजर म एक कलंक अस?
PSA 52:2 तेंह धोखाधड़ी करथस, तोर जीभ ह बिनास के योजना बनाथे; येह तो धारवाले एक उस्तरा सहीं अय।
PSA 52:3 तेंह भलई के बदले बुरई ले मया करथस, अऊ सच बोले के बदले लबारी मारे ला पसंद करथस।
PSA 52:4 हे धोखा देवइया जीभ! तेंह हर हानि करइया बात ले मया करथस।
PSA 52:5 खचित परमेसर ह तोला हमेसा बर नास कर दीही: ओह तोला धरके तोर डेरा ले निकाल दीही; ओह तोला जीयत मनखेमन के लोक ले उखान डारही।
PSA 52:6 धरमी मनखेमन येला देखके डरहीं; ओमन ये कहिके तोर ऊपर हंसहीं,
PSA 52:7 “इहां ये मनखे हवय जऊन ह परमेसर ला अपन मजबूत गढ़ नइं बनाईस पर अपन बहुंत धन-संपत्ति ऊपर भरोसा करिस अऊ आने मन ला नास करे के दुवारा मजबूत होवत गीस!”
PSA 52:8 पर मेंह परमेसर के घर म बढ़त एक जैतून के रूख सहीं अंव; मेंह हमेसा-हमेसा बर परमेसर के अटूट मया ऊपर भरोसा रखथंव।
PSA 52:9 जऊन कुछू तेंह करे हस, ओकर बर मेंह हमेसा तोर बिसवासयोग्य मनखेमन के आघू म तोर परसंसा करहूं। अऊ मेंह तोर नांव ऊपर आसा रखहूं, काबरकि तोर नांव ह बने ए।
PSA 53:1 संगीत के निरदेसक बर। महलत के मुताबिक दाऊद के एक मसकील। मुरूख ह अपन मन म कहिथे, “परमेसर नइं ए।” ओमन बिगड़ गे हवंय, अऊ ओमन के चालचलन ह निकम्मा ए; अइसे कोनो नइं ए, जऊन ह भलई करथे।
PSA 53:2 परमेसर ह स्वरग ले जम्मो मानव-जाति ला ये आसा म देखथे कि कोनो समझदार हवय कि नइं, कोनो परमेसर के खोज करथे कि नइं।
PSA 53:3 हर मनखे ह भटक गे हवय, जम्मो झन बिगड़ गे हवंय; अइसे कोनो नइं ए, जऊन ह भलई करथे, एको झन घलो नइं।
PSA 53:4 का ये जम्मो दुस्ट काम करइयामन कुछू नइं जानंय? ओमन मोर मनखेमन ला अइसे खा जाथें, मानो कि रोटी खावत हें; ओमन कभू परमेसर के नांव नइं लेवंय।
PSA 53:5 जिहां डरे के कोनो बात नइं रहय, उहां ओमन डर के मारे घबरा गे हवंय। जऊन मन तोर ऊपर हमला करिन, परमेसर ह ओमन के हाड़ामन ला बिखेर दीस; तेंह ओमन ला लज्जित करय, काबरकि परमेसर ह ओमन ला तुछ जानिस।
PSA 53:6 बने होतिस कि इसरायल बर उद्धार ह सियोन ले बाहिर आतिस! जब परमेसर ह अपन मनखेमन ला पहिले के सहीं कर देथे, त याकूब ह आनंद मनावय अऊ इसरायल ह खुस होवय!
PSA 54:1 संगीत के निरदेसक बर। तारवाले बाजामन के संग। दाऊद के एक मसकील। जब जीपीमन साऊल करा जाके कहिन, “का दाऊद ह हमर बीच म नइं छिपे हे?” हे परमेसर, अपन नांव के दुवारा मोर उद्धार कर; अपन सक्ति के दुवारा मोला सही साबित कर।
PSA 54:2 हे परमेसर, मोर पराथना ला सुन; मोर मुहूं के बात ऊपर धियान दे।
PSA 54:3 घमंडी बईरीमन मोर ऊपर हमला करत हवंय; निरदयी मनखेमन मोला मार डारे के कोसिस करत हवंय— ओ मनखे, जेमन के मन म परमेसर बर कोनो आदर नइं ए।
PSA 54:4 खचित परमेसर ह मोर मददगार ए; परभू ही मोला संभालथे।
PSA 54:5 ओमन के निन्दा होवय, जऊन मन मोर निन्दा करथें; हे परमेसर, अपन बिसवासयोग्यता म ओमन ला नास कर दे।
PSA 54:6 मेंह तोला एक स्वेच्छा-बलिदान चघाहूं; हे यहोवा, मेंह तोर नांव के परसंसा करहूं, काबरकि येह बने ए।
PSA 54:7 तेंह मोला मोर जम्मो समस्या ले छुटकारा दे हस, अऊ मोर आंखी ह मोर बईरीमन ऊपर बिजय ला देखे हवय।
PSA 55:1 संगीत निरदेसक बर। तारवाले बाजामन के संग। दाऊद के एक मसकील। हे परमेसर, मोर पराथना ला सुन, मोर बिनती ला अनसुना झन कर;
PSA 55:2 मोर बात ला सुन अऊ मोला जबाब दे। मोर बिचारमन मोला चिंता म डारत हें अऊ मेंह बियाकुल हंव
PSA 55:3 काबरकि मोर बईरी ह मोर बिरूध कहत हे, अऊ दुस्टमन धमकी देवत हें; काबरकि ओमन मोर ऊपर दुख-तकलीफ लानत हें अऊ गुस्सा होके मोला उल्टा-सीधा कहत हें।
PSA 55:4 मोर हिरदय ह भीतरे-भीतर पीरा म हवय; मिरतू के आतंक मोर ऊपर छा गे हवय।
PSA 55:5 डर अऊ कंपकपी मोला घेर ले हवय; बहुंत भय के कारन मेंह बियाकुल हो गे हंव।
PSA 55:6 मेंह कहेंव, “कास, मोर एक पंड़की सहीं डेना होतिस! त मेंह उड़ जातेंव अऊ अराम करतेंव।
PSA 55:7 मेंह उड़के दूरिहा चले जातेंव अऊ निरजन जगह म रहितेंव;
PSA 55:8 मेंह आंधी अऊ तूफान ले दूरिहा जल्दी से अपन सरन-स्थान म चले जातेंव।”
PSA 55:9 हे परभू, दुस्टमन ला बिचलित कर दे, ओमन के बात म गड़बड़ी कर दे, काबरकि मेंह सहर म हिंसा अऊ झगरा देखत हंव।
PSA 55:10 रात अऊ दिन ओमन सहर के दीवार म चोरी-छुपे घुमथें; सहर के भीतर दुस्टता अऊ गाली भरे हवय।
PSA 55:11 सहर म बिनास करइया ताकतमन काम करत हें; धमकी अऊ लबारी बात येकर गलीमन ला कभू नइं छोंड़ंय।
PSA 55:12 कहूं कोनो बईरी ह मोर बेजत्ती करतिस, त मेंह सह लेतेंव; कहूं कोनो बईरी ह मोर बिरूध खड़े होतिस, त मेंह ओकर ले छिप जातेंव।
PSA 55:13 पर येह तो तें अस, मोर सहीं एक मनखे, मोर संगवारी, मोर लंगोटिया संगी,
PSA 55:14 जेकर संग परमेसर के घर म एक समय मेंह संगति के आनंद उठात रहेंव, जब अराधना करइयामन के बीच हमन आवत-जावत रहेंन।
PSA 55:15 अचानक मोर बईरीमन के मिरतू हो जावय; ओमन मिरतू-लोक म जीयत चले जावंय, काबरकि दुस्टमन ला ओमन के बीच रहे बर मिलथे।
PSA 55:16 पर जहां तक मोर बात ए, मेंह परमेसर के नांव लेथंव, अऊ यहोवा ह मोला बचाथे।
PSA 55:17 सांझ, बिहनियां अऊ मंझन के बेरा मेंह ओला दुख म पुकारथंव, अऊ ओह मोर बात ला सुनथे।
PSA 55:18 मोर बिरूध करे जावत लड़ई म ओह मोला बिगर कोनो हानि के बचा लेथे, हालाकि बहुंते जन मोर बिरोध करथें।
PSA 55:19 परमेसर, जऊन ह आदिकाल ले बिराजमान हे, जऊन ह नइं बदलय— ओह ओमन के सुनही अऊ ओमन ला नम्र करही, काबरकि ओमन म परमेसर के भय नइं ए।
PSA 55:20 मोर संगवारी ह अपन संगीमन ऊपर हमला करथे; ओह अपन करार ला टोरथे।
PSA 55:21 ओकर बातचीत ह मक्खन के सहीं चिक्कन हवय, पर ओकर मन म लड़ई के बात रहिथे; ओकर बचन ह तेल ले जादा नरम हवय, पर ओमन तलवार निकाले सहीं अंय।
PSA 55:22 अपन जिम्मेदारी यहोवा ऊपर डार दे अऊ ओह तोला संभालही; ओह धरमी ला कभू डगमगावन नइं देवय।
PSA 55:23 पर हे परमेसर, तें दुस्टमन ला बिनास के खंचवा म गिराबे; खून के पीयासा अऊ धोखेबाज मनखेमन अपन आधा जिनगी घलो नइं जी सकहीं। पर जहां तक मोर बात ए, मेंह तोर ऊपर भरोसा करथंव।
PSA 56:1 संगीत निरदेसक बर। दूरिहा के बांज रूख म बईठे पंड़की के एक धुन। दाऊद के एक मिकताम। जब पलिस्तीमन दाऊद ला गत म पकड़ ले रिहिन। हे मोर परमेसर, मोर ऊपर दया कर, काबरकि मोर बईरीमन बहुंत पीछा करत हें; दिन भर ओमन अपन हमला करे के दबाव बनाथें।
PSA 56:2 मोर बिरोधीमन दिन भर मोर पीछा करथें; अपन घमंड म बहुंते झन मोर ऊपर हमला करत हें।
PSA 56:3 जब मेंह डर जाथंव, त मेंह तोर ऊपर अपन भरोसा रखथंव।
PSA 56:4 परमेसर ऊपर, जेकर बचन के मेंह परसंसा करथंव— परमेसर ऊपर मेंह भरोसा रखथंव अऊ मेंह नइं डरंव। मरनहार मनखे ह मोर का कर सकत हे?
PSA 56:5 दिन भर ओमन मोर बचन ला तोड़थें-मरोड़थें; ओमन के जम्मो उपाय मोला बरबाद करे बर रहिथे।
PSA 56:6 ओमन सडयंत्र करथें, ओमन घात म लगे रहिथें, ओमन मोर अवई-जवई ऊपर ये आसा म नजर गड़ाय रहिथें, कि ओमन मोर परान ले सकंय।
PSA 56:7 ओमन के दुस्टता के कारन, ओमन ला बचके झन जावन दे; हे परमेसर, अपन कोरोध म, ये मनखेमन ला गिरा दे।
PSA 56:8 मोर दुरगति ला लिख ले; मोर आंसूमन ला अपन कुप्पी म रख ले— का ओमन तोर अभिलेख म नइं लिखे गे हवंय?
PSA 56:9 जब मेंह मदद बर पुकारहूं त ओमन लहुंटके भागहीं। येकर दुवारा जानहूं कि परमेसर ह मोर कोति हवय।
PSA 56:10 परमेसर ऊपर, जेकर बचन के मेंह परसंसा करथंव, यहोवा ऊपर, जेकर बचन के मेंह परसंसा करथंव—
PSA 56:11 ओही परमेसर ऊपर, मेंह भरोसा रखथंव अऊ मेंह नइं डरंव। मनखे ह मोर का कर सकथे?
PSA 56:12 हे मोर परमेसर, मेंह तोर बर सपथ खाय हंव; मेंह तोला धनबाद-बलिदान चघाहूं।
PSA 56:13 काबरकि तेंह मोला मिरतू ले अऊ मोर गोड़मन ला ठोकर खाय ले बचाय हस, ताकि मेंह जिनगी के अंजोर म परमेसर के आघू म चल सकंव।
PSA 57:1 संगीत निरदेसक बर। “झन नास कर” धुन म दाऊद के एक मिकताम। जब ओह साऊल ले भागके गुफा म छुपे रिहिस। हे मोर परमेसर, मोर ऊपर दया कर, मोर ऊपर दया कर, काबरकि मेंह तोर करा सरन लेथंव। जब तक बिपत्ति ह टर नइं जाही मेंह तोर डेनामन के छइहां म सरन लूहूं।
PSA 57:2 मेंह सर्वोच्च परमेसर ला पुकारथंव, ओ परमेसर, जऊन ह मोर रकछा करथे।
PSA 57:3 ओह स्वरग ले पठोथे अऊ मोला बचा लेथे, अऊ ओमन ला डांटथे, जऊन मन मोर बहुंत पीछा करथें— परमेसर ह अपन मया अऊ अपन बिसवासयोग्यता देखाथे।
PSA 57:4 मेंह सिंहमन के बीच म हंव; मेंह भूखा जानवरमन के बीच म रहे बर मजबूर हंव— ओ मनखे, जेमन के दांतमन बरछी अऊ तीर सहीं अंय, जेमन के जीभमन धारवाले तलवार सहीं अंय।
PSA 57:5 हे परमेसर, तोर महिमा ह स्वरगमन ले घलो ऊपर होवय; जम्मो धरती ऊपर तोर महिमा होवय।
PSA 57:6 ओमन मोर गोड़ बर एक जाल बिछाथें— दुख म मोर चेहरा ह झुक गे हवय। ओमन मोर रसता म एक खंचवा खनिन— पर ओमा ओमन खुद गिर गे हवंय।
PSA 57:7 हे परमेसर, मोर मन ह अटल हवय, मोर मन ह अटल हवय; मेंह गाहूं अऊ बाजा बजाहूं।
PSA 57:8 हे मोर आतमा, जाग! हे बीना अऊ सारंगी, जागव! मेंह बड़े बिहनियां ला जगाहूं।
PSA 57:9 हे परभू, मेंह जाति-जाति के मनखेमन के बीच म तोर परसंसा करहूं; मेंह मनखेमन के बीच म तोर गीत गाहूं।
PSA 57:10 काबरकि तोर मया ह अतेक महान ए कि ओह स्वरग तक हबरत हे; तोर बिसवासयोग्यता ह अकास तक हबरत हे।
PSA 57:11 हे परमेसर, तोर महिमा स्वरगमन ले घलो ऊपर होवय; जम्मो धरती ऊपर तोर महिमा होवय।
PSA 58:1 संगीत के निरदेसक बर। दाऊद के “नास झन कर” धुन म एक मिकताम। हे सासन करइयामन, का तुमन सही म नियाय-संगत बात करथव? का तुमन मनखेमन के सही नियाय करथव?
PSA 58:2 नइं, अपन मन म तुमन अनियाय करे के उपाय करथव, अऊ अपन हांथ ले धरती म हिंसा फईलाथव।
PSA 58:3 अऊ त अऊ दुस्टमन जनम ले गलत रसता म चलथें; गरभ ले ही ओमन लबारी बात फईलात भटक जाथें।
PSA 58:4 ओमन के जहर ह एक सांप के जहर सहीं अय, एक नाग सांप के सहीं अय, जऊन ह कि नइं सुनय,
PSA 58:5 अऊ ओह संपेरा के धुन ऊपर धियान नइं देवय, ओ संपेरा ह चाहे कतको मोहित करइया धुन देवय।
PSA 58:6 हे परमेसर, ओमन के मुहूं म ही ओमन के दांत ला टोर दे; हे यहोवा, ओ सिंहमन के दांत ला जड़ ले ही उखान दे!
PSA 58:7 ओमन ओ पानी के सहीं गायब हो जावंय, जऊन ह बहत-बहत आघू निकल जाथे; जब ओमन धनुस तानंय, त ओमन के तीर ह निसाना म झन लगय।
PSA 58:8 ओमन एक घोंघा के सहीं हो जावंय, जऊन ह सरकत-सरकत टघल जाथे, ओमन एक मरे जनमे लइका सहीं होवंय, जऊन ह सूरज ला कभू नइं देखय।
PSA 58:9 येकर पहिले कि कंटिला-झाड़ी म लगे आगी के आंच ह तोर हांड़ी म लगय— चाहे ओमन हरियर होवंय या सूख गे होवंय—ओमन ला बवंडर म उड़ा दिये जाही।
PSA 58:10 जब ओमन ले बदला लिये जाही, त धरमीमन खुस होहीं, जब ओमन अपन पांव दुस्टमन के खून म डारहीं।
PSA 58:11 तब मनखेमन कहिहीं, “खचित धरमीमन ला अभी घलो ईनाम दिये जाथे; खचित एक परमेसर हवय, जऊन ह धरती के नियाय करथे।”
PSA 59:1 संगीत के निरदेसक बर। दाऊद के “नास झन कर” धुन म एक मिकताम। जब साऊल ह दाऊद ला मार डारे बर ओकर घर म मनखेमन ला पठोके पहरा बईठाय रिहिस। हे परमेसर, मोला मोर बईरीमन ले बचा; जऊन मन मोर ऊपर हमला करत हें, ओमन ले मोर रकछा कर।
PSA 59:2 मोला दुस्ट काम करइया मनखेमन ले छोंड़ा अऊ मोला ओमन ले बचा, जऊन मन मोर परान लेय बर चाहथें।
PSA 59:3 देख, ओमन कइसे मोर घात म लगे हवंय! हे यहोवा, मेंह कोनो दोस या पाप नइं करे हंव, तभो ले हिंसा करइया मनखेमन मोर बिरूध सडयंत्र करत हें।
PSA 59:4 मेंह कोनो गलती नइं करे हंव, तभो ले ओमन मोर ऊपर हमला करे बर तियार हवंय। मोर मदद करे बर उठ; मोर दुरदसा ला देख!
PSA 59:5 हे यहोवा, सर्वसक्तिमान परमेसर, तेंह इसरायल के परमेसर अस, जम्मो आनजातमन ला दंड देय बर जाग; दुस्ट बिसवासघातीमन ऊपर कोनो दया झन देखा।
PSA 59:6 ओमन कुकुरमन सहीं गुर्रावत सांझ के लहुंटथें, अऊ छिपके सहर म घुमथें।
PSA 59:7 देख, ओमन अपन मुहूं ले का उछरथें— ओमन के मुहूं ले निकले बात म तलवार सहीं धार हवय, अऊ ओमन सोचथें, “हमर बात ला कोन सुन सकथे?”
PSA 59:8 पर हे यहोवा, तेंह ओमन ऊपर हांसथस; तेंह ओ जम्मो आनजातमन के हंसी उड़ाथस।
PSA 59:9 तेंह मोर ताकत अस, मेंह तोर इंतजार म रहिथंव; हे परमेसर, तेंह मोर गढ़ अस,
PSA 59:10 हे मोर परमेसर, तोर ऊपर मेंह भरोसा करथंव। परमेसर ह मोर आघू-आघू जाही अऊ जऊन मन मोर निन्दा करथें, ओमन ला घूरके देखे के मोला मऊका दीही।
PSA 59:11 पर हे परभू हमर ढाल, ओमन के हतिया झन कर, नइं तो मोर मनखेमन भुला जाहीं। अपन सक्ति ले ओमन ला उखान दे अऊ ओमन ला गिरा दे।
PSA 59:12 ओमन के मुहूं के पाप बर, ओमन के ओंठ ले निकले बचन बर, ओमन अपन घमंड म पकड़े जावंय। ओमन जऊन सराप देथें अऊ लबारी मारथें, ओकर बर
PSA 59:13 ओमन ला अपन कोरोध म जलाके नास कर दे, ओमन ला अइसे जलाके नास कर कि ओमन पूरा नास हो जावंय। तब धरती के छोर तक पता चलही कि परमेसर ह याकूब ऊपर सासन करथे।
PSA 59:14 ओमन कुकुरमन सहीं गुर्रावत, सांझ के लहुंटथें, अऊ छिपके सहर म घुमथें।
PSA 59:15 ओमन जेवन बर भटकथें अऊ कहूं संतोस नइं होवंय, त कुकुर या भेड़िया सहीं रोथें।
PSA 59:16 पर मेंह तोर ताकत के गुन गाहूं, बिहनियां मेंह तोर मया के गीत गाहूं; काबरकि तेंह मोर गढ़ अस, संकट के बेरा म मोर सरन-स्थान अस।
PSA 59:17 तेंह मोर बल अस, मेंह तोर परसंसा के गीत गाथंव; हे परमेसर, तेंह मोर गढ़ अस, मोर परमेसर, जेकर ऊपर मेंह भरोसा करथंव।
PSA 60:1 संगीत के निरदेसक बर। “करार के कुमुदिनी” के धुन म दाऊद के एक मिकताम। सिखाय बर। जब ओह अरम-नहरैम अऊ अरम-सोबा ले लड़िस, अऊ जब योआब ह लहुंटके नून के घाटी म बारह हजार एदोमीमन ला मार गिराईस। हे परमेसर, तेंह हमन ला अस्वीकार कर दे हस, अऊ हमर ऊपर बरस पड़े हस: तेंह हमर ऊपर गुस्सा करे हस—पर अब हमन ला पहिले सहीं कर दे!
PSA 60:2 तेंह भुइयां ला कंपाय हस अऊ येला फोर दे हस; येकर दरारमन ला ठीक कर दे, काबरकि येह कांपत हे।
PSA 60:3 तेंह अपन मनखेमन ला निरासा के दिन देखाय हस; तेंह हमन ला अंगूर के मंद दे हस, जेकर ले हमन लड़खड़ाथन।
PSA 60:4 पर जऊन मन तोर भय मानथें, ओमन बर तेंह एक झंडा उठाय हस ताकि जहाज के आघू म फहराय जावय।
PSA 60:5 अपन जेवनी हांथ उठाके हमन ला बचा अऊ हमर मदद कर, ताकि जऊन मन तोर ले मया करथें, ओमन छोंड़ाय जावंय।
PSA 60:6 परमेसर ह अपन पबितर-स्थान ले कहे हवय: “जीत के खुसी म, मेंह सकेम ला बांट दूहूं अऊ सुक्कोत के घाटी ला नापहूं।
PSA 60:7 गिलाद ह मोर ए, अऊ मनस्से ह घलो मोर ए; एपरैम ह मोर मुड़ के टोप ए, यहूदा ह मोर राजदंड ए।
PSA 60:8 मोआब ह मोर हांथ-मुहूं धोए के बरतन ए, एदोम ऊपर मेंह अपन पनही ला उछालहूं; पलिस्ती ऊपर मेंह जीत के खुसी म चिचियाहूं।”
PSA 60:9 कोन ह मोला गढ़वाले सहर म लानही? कोन ह मोला एदोम देस ले जाही?
PSA 60:10 हे परमेसर, का ये तें नो हस, तें जऊन ह कि हमन ला अस्वीकार करे हस अऊ अब हमर सेना के संग नइं जावस?
PSA 60:11 बईरीमन के बिरूध हमर मदद कर, काबरकि मनखे के दिये मदद ह बेकार ए।
PSA 60:12 परमेसर के मदद ले ही हमन बिजयी होबो, अऊ ओह हमर बईरीमन ला कुचर दीही।
PSA 61:1 संगीत निरदेसक बर। तारवाले बाजामन के संग दाऊद के भजन। हे परमेसर, मोर पुकार ला सुन; मोर पराथना ला सुन।
PSA 61:2 धरती के छोर ले मेंह तोला पुकारत हंव, तोला पुकारत-पुकारत मोर मन ह दुरबल होवथे; मोला ओ चट्टान ऊपर ले जा, जऊन ह मोर ले ऊंच हे।
PSA 61:3 काबरकि तेंह मोर सरन-स्थान ठहिरे हस, अऊ बईरीमन के बिरूध एक मजबूत दीवार अस।
PSA 61:4 मेंह लालसा करथंव कि तोर डेरा म हमेसा बर रहंव अऊ तोर डेनामन के छइहां म सरन लेवंव।
PSA 61:5 हे परमेसर, तेंह मोर मन्नतमन ला सुने हस; तेंह मोला ओमन के कुल-परंपरा ला दे हस; जऊन मन तोर नांव के भय मानथें।
PSA 61:6 राजा के उमर ला बढ़ा, पीढ़ी-पीढ़ी तक ओकर उमर ला बढ़ा दे।
PSA 61:7 परमेसर के उपस्थिति म ओह हमेसा सिंघासन म बईठय; ओकर रकछा म अपन मया अऊ बिसवासयोग्यता ला बनाय रख।
PSA 61:8 तब मेंह हमेसा तोर नांव के परसंसा करहूं अऊ दिन-प्रतिदिन अपन मन्नतमन ला पूरा करहूं।
PSA 62:1 संगीत निरदेसक बर। यदूतून राग म दाऊद के एक भजन। सही म मोर जीव ला परमेसर म अराम मिलथे; मोर उद्धार ओकर करा ले आथे।
PSA 62:2 सही म ओह मोर चट्टान अऊ मोर उद्धार ए; ओह मोर गढ़ ए, मेंह कभू नइं डगमगाहूं।
PSA 62:3 कब तक तुमन मोर ऊपर हमला करत रहिहू? का तुमन जम्मो झन मोला खाल्हे फटिक दूहू— में तो झुके दीवार, गिरत बाड़ा के सहीं अंव?
PSA 62:4 खचित ओमन मोला मोर ऊंच जगह ले गिराय के इरादा रखथें; ओमन लबारी मारे म खुस होथें। अपन मुहूं ले ओमन आसीस देथें, पर अपन मन म सराप देथें।
PSA 62:5 हव, मोर जीव ला परमेसर म अराम मिलथे; ओकर ऊपर मोर आसा हवय।
PSA 62:6 सही म ओह मोर चट्टान अऊ मोर उद्धार ए; ओह मोर गढ़ ए, मेंह नइं डगमगाहूं।
PSA 62:7 मोर उद्धार अऊ मोर आदर परमेसर ऊपर निरभर हवय; ओह मोर मजबूत चट्टान, मोर सरन-स्थान ए।
PSA 62:8 हे मनखेमन, ओकर ऊपर हर समय भरोसा रखव; ओकर आघू म अपन बात खुले मन से कहव, काबरकि परमेसर ह हमर सरन-स्थान ए।
PSA 62:9 सही म नीच कुल म जनमे मनखेमन सिरिप एक सांस अंय, अऊ ऊंच कुल म जनमे मनखेमन सिरिप एक लबारी अंय। कहूं ओमन ला तराजू म तऊले जावय, त ओमन के कुछू वजन नइं ए; एक संग ओमन सिरिप एक सांस अंय।
PSA 62:10 अनुचित वसूली ऊपर भरोसा झन करव या चोरी के चीज म आसा झन रखव; हालाकि तुम्हर संपत्ति बढ़थे, पर ओमा अपन मन झन लगावव।
PSA 62:11 परमेसर ह एक बात कहे हवय, दू बात मेंह सुने हवंव: “हे परमेसर, सामर्थ ह तोर अय,
PSA 62:12 अऊ हे परभू, तोर म अब्बड़ मया हवय”; अऊ, “तेंह हर एक जन ला ओमन के काम के मुताबिक ईनाम देथस।”
PSA 63:1 दाऊद के एक भजन। जब ओह यहूदा के निरजन जगह म रिहिस। हे परमेसर, तेंह मोर परमेसर अस, उत्सुक होके मेंह तोला खोजथंव; सूखा अऊ झुलसत भुइयां म जिहां पानी नइं ए, मेंह तोर पीयासा हंव, मोर पूरा सरीर तोर संगति के कामना करथे।
PSA 63:2 मेंह पबितर-स्थान म तोला देखे हवंव अऊ तोर सामर्थ अऊ तोर महिमा ला निहारेंव।
PSA 63:3 काबरकि तोर मया ह जिनगी ले जादा बने अय, मोर मुहूं ह तोर महिमा करही।
PSA 63:4 जब तक मेंह जीयत हंव, मेंह तोर परसंसा करहूं, अऊ तोर नांव के महिमा म मेंह अपन हांथ उठाहूं।
PSA 63:5 मानो बने जेवन ले मेंह पूरा संतुस्ट होहूं, अऊ मेंह मोर मुहूं ले गावत तोर परसंसा करहूं।
PSA 63:6 अपन दसना म मेंह तोला सुरता करथंव; रथिया के बेरा मेंह तोर बारे म सोचथंव।
PSA 63:7 काबरकि तेंह मोर मददगार अस, मेंह तोर डेना के छइहां म गाथंव।
PSA 63:8 मेंह तोर संग लगे रहिथंव; तोर जेवनी हांथ ह मोला संभालथे।
PSA 63:9 जऊन मन मोला मार डारे चाहथें, ओमन नास हो जाहीं; ओमन धरती के गहरई म दब जाहीं।
PSA 63:10 ओमन तलवार ले मारे जाहीं अऊ सियारमन के जेवन बन जाहीं।
PSA 63:11 पर राजा ह परमेसर म आनंद मनाही; ओ जम्मो जऊन मन परमेसर के सपथ खाथें, ओमन ओकर महिमा करहीं, जबकि लबरामन के मुहूं ला बंद करे जाही।
PSA 64:1 संगीत के निरदेसक बर। दाऊद के एक भजन। हे मोर परमेसर, जब मेंह अपन सिकायत लेके आथंव, त मोर बात ला सुन; बईरीमन के धमकी ले मोर जिनगी ला बचा।
PSA 64:2 दुस्टमन के सडयंत्र ले, दुस्ट काम करइयामन के योजना ले मोला बचा।
PSA 64:3 ओमन तलवार के सहीं अपन जीभ ला तेज करथें अऊ घातक तीर के सहीं करू बचन कहिथें।
PSA 64:4 ओमन घात लगाके निरदोस ऊपर तीर चलाथें; ओमन बिगर डरे, अचानक तीर चलाथें।
PSA 64:5 ओमन दुस्ट योजना बनाय बर एक-दूसर ला उकसाथें, ओमन अपन जाल ला छुपाय के बारे म गोठियाथें; ओमन कहिथें, “कोन ह येला देखही?”
PSA 64:6 ओमन अनियाय करे के सडयंत्र रचथें अऊ कहिथें, “हमन एकदम सही योजना बनाय हन!” सही म मनखे के मन अऊ हिरदय चालबाज अंय।
PSA 64:7 पर परमेसर ह ओमन ऊपर अपन तीर चलाही; ओमन अचानक घात करे जाहीं।
PSA 64:8 परमेसर ह ओमन के खुद के जीभ ला ओमन के बिरूध कर दीही अऊ ओमन के बिनास कर दीही; जऊन मन ओमन ला देखहीं, ओ जम्मो झन ओमन ला तुछ जानके अपन मुड़ हलाहीं।
PSA 64:9 जम्मो मनखेमन डर जाहीं; ओमन परमेसर के काम के बखान करहीं अऊ जऊन कुछू ओह करे हवय, ओकर ऊपर बिचार करहीं।
PSA 64:10 धरमी जन ह यहोवा म आनंद मनाही अऊ ओकर करा सरन लीही; ओ जम्मो मनखे, जऊन मन हिरदय ले ईमानदार अंय, ओमन ओकर परसंसा करहीं!
PSA 65:1 संगीत निरदेसक बर। दाऊद के एक भजन। एक गीत। हे हमर परमेसर, सियोन म परसंसा ह तोर बाट जोहथे; तोर बर हमर दुवारा करे गे मन्नतमन पूरा करे जाहीं।
PSA 65:2 तें, जऊन ह कि पराथना के जबाब देथस, तोर करा जम्मो मनखेमन आहीं।
PSA 65:3 जब हमन बहुंत पाप ले बियाकुल हो जाथन, त तेंह हमर अपराधमन ला छेमा करथस।
PSA 65:4 धइन अंय ओमन, जेमन ला तेंह चुनथस अऊ अपन अंगना म रहे बर ओमन ला लकठा म लानथस! हमन तोर घर के, तोर पबितर मंदिर के बने चीजमन ले भर गे हवन।
PSA 65:5 हे परमेसर हमर उद्धार करइया, तेंह धरती के छोर अऊ दूरिहा समुंदर म रहइया जम्मो झन के आसा अस, तेंह हमन ला अद्भूत अऊ धरमी काम करके हमन ला जबाब देथस,
PSA 65:6 तेंह अपनआप ला ताकत ले भरके, पहाड़मन ला अपन सामर्थ ले बनाय हस,
PSA 65:7 तेंह समुंदर के गरजन ला, समुंदर के लहर के गरजन ला, अऊ देस-देस के कोलाहल ला सांत करथस।
PSA 65:8 जम्मो धरती ह भय अऊ तोर अद्भूत काम ले भर गे हवय; जिहां तेंह बिहनियां के अंजोर अऊ सांझ के अंधियारा लानथस, तेंह आनंद के गीत गवाथस।
PSA 65:9 तेंह भुइयां के खियाल रखथस अऊ ओला पानी ले पलोथस; तेंह येला बहुंत उपजाऊ बनाथस। परमेसर के पानी के सोतमन पानी ले भरे हवंय ताकि मनखेमन ला अनाज मिलय, काबरकि तेंह येला अइसे ठहिराय हस।
PSA 65:10 तेंह येकर घारीमन ला भीगोथस अऊ येकर उभारमन ला समतल करथस; तेंह येला बारिस के पानी ले नरम करथस अऊ येकर फसल ला आसीस देथस।
PSA 65:11 तेंह बछर ला बहुंत फसल ले भर देथस, अऊ बहुंत चीजमन के कारन तोर गाड़ीमन म जगह नइं रहय।
PSA 65:12 निरजन जगह के भुइयांमन कांदी ले भर गे हवंय; पहाड़ीमन खुसी के चादर ओढ़े हवंय।
PSA 65:13 चरागनमन पसुमन के झुंड ले भर गे हवंय अऊ घाटीमन अनाज ले ढंक गे हवंय; ओमन आनंद के मारे जय-जयकार करथें अऊ गीत गाथें।
PSA 66:1 संगीत निरदेसक बर। एक गीत। एक भजन। हे जम्मो धरती के मनखेमन, परमेसर बर आनंद के जय-जयकार करव!
PSA 66:2 ओकर नांव के महिमा के गीत गावव; महिमा के संग ओकर परसंसा करव।
PSA 66:3 परमेसर ला कहव, “का ही अद्भूत अंय तोर काममन! तोर सामर्थ ह अइसे महान हे कि तोर बईरीमन तोर आघू म चापलूसी करथें।
PSA 66:4 जम्मो धरती के मनखेमन तोर दंडवत करथें; ओमन तोर परसंसा के गीत गाथें, ओमन तोर नांव के परसंसा के गीत गाथें।”
PSA 66:5 आवव अऊ देखव कि परमेसर ह का करे हवय, मानव-जाति बर ओकर अद्भूत काममन!
PSA 66:6 ओह समुंदर ला सूखा भुइयां कर दीस, ओमन पैदल नदी के ओ पार चल दीन— आवव, ओमा आनंदित होवव।
PSA 66:7 ओह अपन सामर्थ ले सदाकाल बर सासन करथे, ओकर आंखीमन जाति-जाति के मनखेमन ला देखत रहिथें— ओकर बिरूध बिदरोहीमन झन ठाढ़ होवंय।
PSA 66:8 हे जम्मो मनखेमन, हमर परमेसर के परसंसा करव, ओकर परसंसा के अवाज सुनई देवय;
PSA 66:9 ओह हमर जिनगी ला बचाय हवय अऊ हमर गोड़ ला फिसल जाय ले बचाय हवय।
PSA 66:10 हे परमेसर, तेंह हमन ला परखे हस; तेंह हमन ला चांदी के सहीं साफ करे हस।
PSA 66:11 तेंह हमन ला जेल म ले आय अऊ हमर पीठ म बोझा डार देय।
PSA 66:12 तेंह मनखेमन ला हमर मुड़ ऊपर सवारी करे बर दे हस; हमन आगी अऊ पानी म ले होके गे हवन, पर तेंह हमन ला ओ जगह म ले आय, जिहां चीजमन बहुंतायत म हवंय।
PSA 66:13 मेंह तोर मंदिर म होम-बलिदान लेके आहूं अऊ तोर बर माने गय अपन मन्नतमन ला पूरा करहूं—
PSA 66:14 ओ मन्नत, जेकर परतिगियां मेंह अपन ओंठ ले करे रहंय अऊ अपन मुहूं ले माने रहंय जब मेंह समस्या म पड़े रहंय।
PSA 66:15 मेंह तोला मोटा-ताजा पसु अऊ मेढ़ामन के बलिदान चघाहूं; मेंह तोला सांड़ अऊ बोकरा चघाहूं।
PSA 66:16 ओ जम्मो झन, जऊन मन परमेसर के भय मानथव, आवव अऊ सुनव; मेंह तुमन ला बतावत हंव कि ओह मोर बर का करे हवय।
PSA 66:17 मेंह अपन मुहूं ले ओला पुकारेंव; मोर ओंठ ले ओकर परसंसा करेंव।
PSA 66:18 कहूं मेंह अपन मन म पाप करे होतेंव, त परभू ह मोर बात ला नइं सुनतिस;
PSA 66:19 पर खचित परमेसर ह धियान दे हवय अऊ मोर पराथना ला सुने हवय।
PSA 66:20 परमेसर के परसंसा होवय, जऊन ह मोर पराथना ला सुनिस या अपन मया ला मोर ऊपर ले नइं हटाईस!
PSA 67:1 संगीत निरदेसक बर। तारवाले बाजा के संग। एक भजन। एक गीत। परमेसर ह हमर ऊपर अनुग्रह करय अऊ हमन ला आसीस देवय अऊ अपन मुहूं के अंजोर हमर ऊपर चमकावय—
PSA 67:2 ताकि धरती म तोर ईछा, अऊ जम्मो जाति म तोर उद्धार के पता चलय।
PSA 67:3 हे परमेसर, मनखेमन तोर परसंसा करंय; जम्मो मनखेमन तोर परसंसा करंय।
PSA 67:4 देस-देस के मनखेमन खुसी मनांय अऊ आनंद के गीत गावंय, काबरकि तें मनखेमन ऊपर बिगर पखियपात के सासन करथस अऊ धरती के देस-देस के मनखेमन के अगुवई करथस।
PSA 67:5 हे परमेसर, मनखेमन तोर परसंसा करंय; जम्मो मनखेमन तोर परसंसा करंय।
PSA 67:6 भुइयां ह अपन फसल देथे; परमेसर, हमर परमेसर हमन ला आसीस देथे।
PSA 67:7 परमेसर हमन ला अऊ आसीस देवय, ताकि धरती के जम्मो छोर तक मनखेमन ओकर भय मानंय।
PSA 68:1 संगीत के निरदेसक बर। दाऊद के एक भजन। एक गीत। परमेसर ह उठय, ओकर बईरीमन तितिर-बितिर हो जावंय; ओकर बईरीमन ओकर आघू ले भाग जावंय।
PSA 68:2 तें ओमन ला धुआं के सहीं उड़ा दे— जइसे मोम ह आगी के आंच ले टघलथे, वइसे ही दुस्ट मनखेमन परमेसर के आघू म नास हो जावंय।
PSA 68:3 पर धरमी जन परमेसर के आघू म खुस होवंय अऊ आनंद मनावंय; ओमन खुसी मनावंय अऊ आनंदित होवंय।
PSA 68:4 परमेसर के गीत गावव, ओकर नांव के परसंसा के गीत गावव, ओकर बहुंत परसंसा करव, जऊन ह बादर ऊपर सवारी करथे; ओकर आघू म आनंद मनावव—ओकर नांव यहोवा ए।
PSA 68:5 परमेसर ह अपन पबितर निवास म हवय, ओह अनाथमन बर एक ददा अऊ बिधवामन बर एक रकछा करइया ए।
PSA 68:6 परमेसर ह अकेला मनखे ला परिवार म बसाथे, ओह कैदीमन ला गीत गवात अगुवई करथे; पर बिदरोहीमन सूरज के गरमी ले झुलसत भुइयां म रहिथें।
PSA 68:7 हे परमेसर, जब तेंह अपन मनखेमन के आघू ले निकलय, जब तेंह निरजन जगह ले होके चलय,
PSA 68:8 त धरती ह कांपिस, अकास ह बारिस भेजिस, परमेसर, सीनय पहाड़ के परमेसर के आघू म, परमेसर, इसरायल के परमेसर के आघू म।
PSA 68:9 हे परमेसर, तेंह बहुंत बारिस दे हस; तेंह अपन थके-मांदे निज मनखेमन ला तरो-ताजा करे हस।
PSA 68:10 तोर मनखेमन येमा बस गे हवंय, अऊ हे परमेसर, अपन उदारता से तेंह गरीबमन ला दे हस।
PSA 68:11 परभू ह बचन के घोसना करथे, अऊ येला सुनानेवाली माईलोगनमन के एक बड़े सेना हो जाथे:
PSA 68:12 “राजा अऊ सेनामन जल्दबाजी म भागथें; माईलोगनमन घर म लूट के सामान ला बांटथें।
PSA 68:13 अऊ त अऊ जब तुमन भेड़साला म सुतथव, त मोर पंड़की के डेना म चांदी चढ़ाय जाथे, अऊ येकर पांखीमन म चमकत सोन मढ़े जाथे।”
PSA 68:14 जब सर्वसक्तिमान परमेसर ह राजामन ला देस म तितिर-बितिर करिस, त येह सलमोन पहाड़ म बरफ गिरे के सहीं रिहिस।
PSA 68:15 बासान पहाड़, सानदार पहाड़, बासान पहाड़ उबड़-खाबड़ पहाड़,
PSA 68:16 हे उबड़-खाबड़ पहाड़, तेंह ओ पहाड़ ला टकटकी लगाके काबर देखत हस, जेला परमेसर ह राज करे बर चुने हे, जिहां यहोवा ह खुद सदाकाल बर निवास करही?
PSA 68:17 परमेसर के रथमन बीस हजार अऊ हजारों-हजार हवंय; परभू ह सीनय पहाड़ ले अपन पबितर-स्थान म आय हवय।
PSA 68:18 जब तेंह ऊंचहा जगह म गय, त तेंह अपन संग बहुंत बंधुवामन ला ले गय; तोला मनखेमन ले उपहार मिलिस, अऊ त अऊ बिदरोहीमन ले घलो उपहार मिलिस— कि हे यहोवा परमेसर, तें उहां निवास कर।
PSA 68:19 परभू, परमेसर हमर उद्धारकर्ता के परसंसा होवय, जऊन ह हर दिन हमर बोझा ला उठाथे।
PSA 68:20 हमर परमेसर ह ओ परमेसर अय, जऊन ह हमन ला बचाथे; मिरतू ले बचाव परमपरधान यहोवा ले ही आथे।
PSA 68:21 खचित परमेसर ह अपन बईरीमन के मुड़ ला कुचरही, ओमन के बालवाले मुड़मन ला कुचरही, जऊन मन पाप करत रहिथें।
PSA 68:22 परभू ह कहिथे, “मेंह ओमन ला बासान ले लानहूं; मेंह ओमन ला समुंदर के गहरई ले लानहूं,
PSA 68:23 कि तें अपन बईरीमन के खून म चलके जा सकस, अऊ तोर कुकुरमन ला ओमन के बांटा खाय बर मिलय।”
PSA 68:24 हे परमेसर, तोर जुलूस ला देखे गे हवय, ओ जुलूस, जऊन ह मोर परमेसर अऊ मोर राजा के अय अऊ जऊन ह पबितर-स्थान म जावत हे।
PSA 68:25 आघू-आघू गवइयामन अऊ ओमन के पाछू बाजावाले हवंय; ओमन के संग जवान माईलोगनमन खंजरी बजात हवंय।
PSA 68:26 बड़े सभा म परमेसर के परसंसा करव; इसरायल के सभा म यहोवा के परसंसा करव।
PSA 68:27 बिनयामीन के छोटे गोत्र ह ओमन के अगुवई करत हे, उहां यहूदा के राजकुमारमन के बड़े झुंड हवय, अऊ उहां जबूलून अऊ नपताली के राजकुमारमन हवंय।
PSA 68:28 हे परमेसर, अपन सामर्थ ला देखा; हे हमर परमेसर, हमन ला अपन ताकत देखा, जइसे कि तेंह पहिले करे हस।
PSA 68:29 यरूसलेम म तोर मंदिर के कारन राजामन तोर बर भेंट लेके आहीं।
PSA 68:30 नरकट म रहत जंगली पसुमन ला, देस-देस के बछरूमन के बीच सांड़मन के झुंड ला डांट-फटकार। नम्र होके, ओ जंगली पसुमन चांदी के छड़ लानंय। देस-देस के ओ मनखेमन ला तितिर-बितिर कर दे, जऊन मन लड़ई ले खुस होथें।
PSA 68:31 दूतमन मिसर देस ले आहीं; कूस ह अपनआप ला परमेसर के अधीन कर दीही।
PSA 68:32 हे धरती के राजमन, परमेसर के गीत गावव, परभू के परसंसा के गीत गावव,
PSA 68:33 ओकर परसंसा करव, जऊन ह सनातन स्वरग, सबले ऊंच स्वरग म सवारी करथे, जऊन ह तेज अवाज म गरजथे।
PSA 68:34 परमेसर के सामर्थ के घोसना करव, जेकर वैभव इसरायल ऊपर हवय, जेकर सामर्थ स्वरग म हवय।
PSA 68:35 हे परमेसर, तेंह अपन पबितर-स्थान म अद्भूत अस; इसरायल के परमेसर ह अपन मनखेमन ला सामर्थ अऊ बल देथे। परमेसर के परसंसा होवय!
PSA 69:1 संगीत के निरदेसक बर। कुमुदिनी के धुन म दाऊद के गीत। हे परमेसर, मोला बचा, काबरकि पानी ह मोर घेंच तक आ गे हवय।
PSA 69:2 मेंह चीखला म धंसत जावत हंव, जिहां मोर गोड़ टेकाय के जगह नइं ए। मेंह गहिरा पानी म आ गे हवंव; पानी के बाढ़ म मेंह बुड़त हंव।
PSA 69:3 मेंह मदद बर गोहारत थक गे हंव; मोर गला ह सूख गे हवय। मोर परमेसर के बाट जोहत, मोर आंखीमन कमजोर हो गे हवंय।
PSA 69:4 जऊन मन बिगर कारन के मोर ले घिन करथें, ओमन के गनती मोर मुड़ के बाल ले घलो जादा हवय; बहुंते जन बिगर कारन के मोर बईरी अंय, जऊन मन कि मोला नास करे के फिराक म हवंय। जऊन चीज के चोरी मेंह नइं करे हंव, ओकर भरपई मोर ले करे जावत हे।
PSA 69:5 हे परमेसर, तेंह मोर मुरूखता ला जानत हस; मोर अपराध ह तोर ले छिपे नइं हे।
PSA 69:6 हे परभू, सर्वसक्तिमान यहोवा, जऊन मन तोर ऊपर आसा रखे हवंय ओमन ला मोर कारन कलंकित झन होना पड़य; हे इसरायल के परमेसर, जऊन मन तोर खोज म रहिथें, ओमन ला मोर कारन लज्जित झन होना पड़य।
PSA 69:7 काबरकि तोर हित म मेंह अपमान सहत हंव, अऊ मोर मुहूं ह सरम के मारे ढंक गे हवय।
PSA 69:8 मेंह अपन खुद के परिवार बर परदेसी हो गे हवंव, अपन खुद के भाई-बहिनी बर अजनबी हो गे हवंव;
PSA 69:9 काबरकि तोर घर के धुन ह मोला खावत हे, अऊ जऊन मन तोर बेजत्ती करथें, ओमन के बेजत्ती ह मोर ऊपर आवत हे।
PSA 69:10 जब मेंह रोथंव अऊ उपास करथंव, त जरूरी ए कि मेंह अपमान सहंव;
PSA 69:11 जब मेंह बोरा के कपड़ा पहिरथंव, त मनखेमन मोला हंसी के पात्र बना लेथें।
PSA 69:12 जऊन मन सहर के कपाट म बईठथें, ओमन मोर हंसी उड़ाथें, अऊ मेंह मतवारमन के गीत बन गे हवंव।
PSA 69:13 हे यहोवा, तोर अनुग्रह के बेरा म, मेंह तोर ले पराथना करत हंव; हे परमेसर, अपन बड़े मया के कारन, अपन निस्चित उद्धार के संग मोला जबाब दे।
PSA 69:14 मोला दलदली चीखला ले बचा ले, मोला ओमा झन बुड़न दे; जऊन मन मोर ले घिन करथें, ओमन ले मोला छोंड़ा, मोला गहिरा पानी ले बचा।
PSA 69:15 बाढ़ के पानी म मोला झन बुड़न दे या पानी के गहरई म मेंह झन चले जावंव या खंचवा म मेंह झन समा जावंव।
PSA 69:16 हे यहोवा, अपन मया के भलई के कारन मोला जबाब दे; अपन बड़े दया के कारन मोर कोति देख।
PSA 69:17 अपन सेवक ले मुहूं झन मोड़; मोला जल्दी करके जबाब दे, काबरकि मेंह संकट म हवंव।
PSA 69:18 मोर लकठा म आके मोला बचा ले; मोर बईरीमन के कारन मोला छोंड़ा ले।
PSA 69:19 तेंह जानत हस कि मोर कइसे अपमान करे जाथे, मोला तुछ समझे जाथे अऊ मोला लज्जित करे जाथे; मोर जम्मो बईरीमन तोर आघू म हवंय।
PSA 69:20 अपमान ह मोर हिरदय ला टोर दे हवय अऊ मेंह बेसहारा छोंड़ देय गे हवंव; मोला सहानुभूति के जरूरत हे, पर सहानुभूति देवइया कोनो नइं एं, मोला सांति देवइया के जरूरत हे, पर मोला कोनो नइं मिलिस।
PSA 69:21 ओमन मोर जेवन म पित्त मिला दीन अऊ मोर पीयास बुझाय बर मोला सिरका पीये बर दीन।
PSA 69:22 ओमन के जेवनार ह ओमन के बिनास के कारन बनय; ओमन के संगति करई ह ओमन के फंसे के जाल बन जावय।
PSA 69:23 ओमन के आंखी म अंधियार छा जावय, ताकि ओमन झन देख सकंय, अऊ ओमन के कनिहां ह हमेसा बर मुड़ जावय।
PSA 69:24 अपन कोप ला ओमन ऊपर ढार दे; तोर भयंकर कोरोध ओमन ऊपर पड़य।
PSA 69:25 ओमन के जगह ह खाली हो जावय; ओमन के डेरा म रहइया कोनो झन होवंय।
PSA 69:26 काबरकि ओमन ओ मनखेमन ला सताथें, जेमन ला तेंह घायल करथस अऊ जेमन ला तेंह चोट पहुंचाथस, ओमन के पीरा के बारे म गोठियाथें।
PSA 69:27 ओमन के ऊपर भारी दोस लगा; ओमन ला तोर उद्धार म भागी झन होवन दे।
PSA 69:28 ओमन के नांव जिनगी के किताब ले मिटा दिये जावंय अऊ ओमन के नांव धरमीमन के संग झन लिखे जावय।
PSA 69:29 पर जहां तक मोर बात ए, मेंह दुखित अऊ पीड़ित हंव— हे परमेसर, तोर उद्धार ह मोला बचावय।
PSA 69:30 मेंह गीत गाके परमेसर के नांव के परसंसा करहूं अऊ धनबाद के संग ओकर महिमा करहूं।
PSA 69:31 ये बात ले यहोवा ह बईला के बलिदान ले जादा, या सींग अऊ खुरवाले बईला के बलिदान ले जादा खुस होही।
PSA 69:32 गरीबमन देखहीं अऊ खुस होहीं— तुमन, जेमन कि परमेसर के खोज म रहिथव, तुम्हर मन ह तरो-ताजा रहय!
PSA 69:33 यहोवा ह जरूरतमंद के बात ला सुनथे अऊ अपन बंधुवा मनखेमन ला तुछ नइं समझे।
PSA 69:34 अकास अऊ धरती ओकर परसंसा करंय, समुंदर अऊ ओमा के जम्मो चलत-फिरत जीव घलो परसंसा करंय,
PSA 69:35 काबरकि परमेसर ह सियोन ला बचाही अऊ यहूदा के सहरमन ला फेर बनाही। मनखेमन उहां बस जाहीं अऊ ओला अधिकार म ले लीहीं;
PSA 69:36 ओकर सेवकमन के लइकामन ओला उत्तराधिकार म पाहीं, अऊ जऊन मन ओकर नांव ले मया रखथें, ओमन उहां निवास करहीं।
PSA 70:1 संगीत के निरदेसक बर। दाऊद के एक बिनती। हे परमेसर, जल्दी करके मोला बचा ले; हे यहोवा, मोर मदद करे बर जल्दी आ।
PSA 70:2 जऊन मन मोर परान लेय चाहथें ओमन लज्जित होवंय अऊ घबरावंय; ओ जम्मो, जऊन मन मोर बिनास के ईछा रखथें ओमन कलंकित होके पाछू हटंय।
PSA 70:3 जऊन मन मोला ये कहिथें, “अहा! अहा!” ओमन लज्जा के मारे वापिस जावंय।
PSA 70:4 पर ओ जम्मो, जऊन मन तोर खोज म रहिथें ओमन तोर कारन आनंद मनावंय अऊ खुस होवंय; जऊन मन तोर उद्धार के मदद चाहथें, ओमन हमेसा कहंय, “यहोवा महान ए!”
PSA 70:5 पर जहां तक मोर बात ए, मेंह गरीब अऊ जरूरतमंद अंव; हे परमेसर, मोर करा जल्दी आ। तेंह मोर मददगार अऊ मोर छुड़ानेवाला अस; हे यहोवा, देरी झन कर।
PSA 71:1 हे यहोवा, मेंह तोर सरन म हंव; मोला कभू लज्जित झन होवन दे।
PSA 71:2 अपन धरमीपन म मोला बचा अऊ छोंड़ा; मोर कोति अपन कान लगा अऊ मोर उद्धार कर।
PSA 71:3 मोर सरन के चट्टान बन, जिहां में हमेसा जा सकंव; मोर उद्धार के हुकूम दे, काबरकि तेंह मोर चट्टान अऊ मोर गढ़ अस।
PSA 71:4 हे मोर परमेसर, दुस्टमन के हांथ ले मोला छोंड़ा ले, अऊ ओमन के पकड़ ले मोला छुटकारा दे, जऊन मन दुस्ट अऊ निरदयी अंय।
PSA 71:5 काबरकि हे परमपरधान यहोवा, तेंह मोर आसा अस, मोर लइकापन ले ही मेंह तोर ऊपर भरोसा रखे हंव।
PSA 71:6 जनम ले ही मेंह तोर ऊपर भरोसा रखे हंव; तेंह मोला मोर दाई के गरभ ले बाहिर लानय। मेंह हमेसा तोर परसंसा करहूं।
PSA 71:7 मेंह बहुंते जन बर एक उदाहरन बन गे हंव; तेंह मोर मजबूत सरन-स्थान अस।
PSA 71:8 मोर मुहूं ह तोर परसंसा करत नइं थकय, दिन भर तोर वैभव के गुनगान करत रहिथे।
PSA 71:9 जब मेंह डोकरा हो जाहूं, त मोला झन छोंड़बे; जब मेंह निरबल हो जाहूं, त मोला झन तियागबे।
PSA 71:10 काबरकि मोर बईरीमन मोर बिरूध गोठियाथें; जऊन मन मोला मार डारे चाहथें, ओमन एक संग सडयंत्र रचत हें।
PSA 71:11 ओमन कहिथें, “परमेसर ह ओला तियाग दे हवय; ओकर पीछा करव अऊ ओला पकड़ लव, काबरकि ओला कोनो नइं बचाही।”
PSA 71:12 हे मोर परमेसर, मोर ले दूरिहा झन रह; हे परमेसर, मोर मदद करे बर जल्दी आ।
PSA 71:13 मोर ऊपर दोस लगइयामन सरम के मारे नास हो जावंय; जऊन मन मोर हानि करे चाहथें, ओमन अपमान अऊ कलंक ले भर जावंय।
PSA 71:14 जहां तक मोर बात ए, मेंह हमेसा आसा रखहूं; मेंह तोर परसंसा जादा अऊ जादा करहूं।
PSA 71:15 मेंह अपन मुहूं ले तोर धरमी काम, अऊ तोर उद्धार के काम के बखान दिन भर करत रहिहूं— हालाकि मेंह नइं जानंव कि ये जम्मो म कइसे संबंध जोड़े जावय।
PSA 71:16 हे परमपरधान यहोवा, मेंह आके तोर बड़े काममन के घोसना करहूं; मेंह तोर धरमी काम, सिरिप तोरेच धरमी काम के घोसना करहूं।
PSA 71:17 हे परमेसर, तेंह मोला मोर लइकापन ले सिखोवत आय हस, अऊ आज तक मेंह तोर अद्भूत काम के घोसना करत हंव।
PSA 71:18 जब मेंह डोकरा हो जावंव अऊ मोर बालमन पक जावंय, तब भी, हे मोर परमेसर, मोला झन छोंड़बे, जब तक कि तोर सामर्थ के घोसना अवइया पीढ़ी अऊ तोर बड़े काम के घोसना ओ जम्मो झन ला नइं कर दंव, जऊन मन अवइया हें।
PSA 71:19 हे परमेसर, तोर धरमीपन ह अकास तक हबरत हे, तें, जऊन ह कि बड़े-बड़े काम करे हस। हे परमेसर, तोर सहीं कोन हे?
PSA 71:20 हालाकि तेंह मोला बहुंत संकट अऊ करू चीजमन ला देखाय हस, पर तेंह मोर जिनगी ला फेर पहिले सहीं कर देबे; धरती के गहरई ले तेंह मोला फेर ऊपर ले आबे।
PSA 71:21 तेंह मोर आदरमान ला बढ़ाबे अऊ एक बार फेर मोला अराम देबे।
PSA 71:22 हे मोर परमेसर, मेंह तोर बिसवासयोग्यता बर बीना बजाके तोर परसंसा के गीत गाहूं; हे इसरायल के पबितर परमेसर, मेंह बीना बजाके तोर परसंसा के गीत गाहूं।
PSA 71:23 मोर मुहूं ह आनंद के मारे चिचियाही जब मेंह तोर परसंसा के गीत गाहूं— में, जऊन ला कि तेंह छोंड़ाय हस।
PSA 71:24 मेंह दिन भर तोर धरमी काम के बखान करहूं, काबरकि जऊन मन मोर हानि करे चाहत रिहिन ओमन लज्जा अऊ घबराहट म पड़े हवंय।
PSA 72:1 सुलेमान के गीत। हे परमेसर, राजा ला नियाय के बात बता, राजा के बेटा ला अपन धरमीपन दे।
PSA 72:2 ओह तोर मनखेमन के नियाय धरमीपन ले अऊ दुख म परे तोर मनखेमन के नियाय सही-सही करे।
PSA 72:3 पहाड़मन ले मनखेमन के उन्नति होवय, अऊ पहाड़ीमन ले धरमीपन के फर मिलय।
PSA 72:4 मनखेमन के बीच दुखियारीमन के ओह बचाव करे अऊ जरूरतमंद मनखेमन के लइकामन ला बचावय; सतानेवालामन ला ओह कुचर दे।
PSA 72:5 जब तक सूरज अऊ चंदा हवंय, पीढ़ी-पीढ़ी तक ओह बने रहय।
PSA 72:6 ओह कांदी कटे भुइयां म बारिस के होवई, अऊ धरती म पानी के फुहार पड़े सहीं होवय।
PSA 72:7 ओकर समय म धरमीमन उन्नति करंय अऊ चंदा के रहत तक बहुंतायत ले उन्नति होवय।
PSA 72:8 ओह समुंदर ले समुंदर तक अऊ फरात नदी ले लेके धरती के छोर तक राज करे।
PSA 72:9 मरू-भुइयां के जन-जाति के मनखेमन ओकर आघू म माड़ी टेकंय अऊ ओकर बईरीमन धुर्रा चाटंय।
PSA 72:10 तरसीस अऊ दूरिहा समुंदर तीर के राजामन ओकर बर भेंट लेके आवंय। सेबा अऊ सबा के राजामन ओला उपहार देवंय।
PSA 72:11 जम्मो राजामन ओला दंडवत करंय अऊ जम्मो जाति के मनखेमन ओकर सेवा करंय।
PSA 72:12 काबरकि ओ जरूरतमंद, जऊन मन ओला पुकारथें, अऊ ओ पीरा म परे मनखे, जऊन मन के मदद करइया कोनो नइं एं, ओमन ला ओह छोंड़ाही।
PSA 72:13 ओह दुरबल अऊ जरूरतमंद ऊपर दया करही अऊ जरूरतमंद ला मिरतू ले बचाही।
PSA 72:14 ओह ओमन ला अतियाचार अऊ हिंसा ले बचाही, काबरकि ओकर नजर म ओमन के खून ह कीमती अय।
PSA 72:15 ओकर लम्बा उमर होवय! सेबा के सोन ओला दिये जावय। मनखेमन ओकर बर हमेसा पराथना करंय अऊ दिन भर ओला आसीस देवत रहंय।
PSA 72:16 पूरा देस म बहुंतायत से अनाज उपजे; पहाड़ीमन के चोटी म येह लहलहावय। लबानोन के सहीं फसल म उन्नति होवय अऊ भुइयां के कांदी सहीं बढ़य।
PSA 72:17 ओकर नांव ह सदाकाल तक बने रहय; जब तक सूरज हवय, तब तक येह बने रहय। तब जम्मो जाति के मनखेमन ओकर जरिये आसीस पाहीं, अऊ ओमन ओला धइन कहिहीं।
PSA 72:18 यहोवा परमेसर, इसरायल के परमेसर के परसंसा होवय, सिरिप ओहीच ह अद्भूत काम करथे।
PSA 72:19 ओकर महिमामय नांव के सदाकाल तक परसंसा होवय; जम्मो धरती ह ओकर महिमा ले भर जावय।
PSA 72:20 यिसै के बेटा दाऊद के पराथना इहां खतम होथे।
PSA 73:1 आसाप के एक भजन। सही म परमेसर ह इसरायल बर, याने कि ओमन बर बने अय, जेमन के मन साफ हवय।
PSA 73:2 पर जहां तक मोर बात ए, मोर गोड़ ह लगभग फिसल गे रिहिस; मेंह गिरनेचवाला रहेंव।
PSA 73:3 मेंह घमंडी मनखे ले डाह करेंव जब मेंह दुस्टमन के उन्नति ला देखेंव।
PSA 73:4 ओमन करा कोनो समस्या नइं ए; ओमन के सरीर ह स्वस्थ अऊ मजबूत हे।
PSA 73:5 ओमन के ऊपर समान्य मनखे सहीं बोझ नइं ए; ओमन ला मनखेमन के बेमारी नइं होवय।
PSA 73:6 एकर कारन घमंड ह ओमन के गला के हार ए; हिंसा ह ओमन के कपड़ा सहीं अय।
PSA 73:7 ओमन के कठोर हिरदय ले दुस्ट काम निकलथे; ओमन के दुस्ट कल्पना के कोनो सीमना नइं ए।
PSA 73:8 ओमन ठट्ठा करथें, अऊ बुरई करे के बात करथें; घमंड करके ओमन अतियाचार करे के धमकी देथें।
PSA 73:9 ओमन बड़े डींग मारथें, अऊ ओमन धरती ला अधिकार म लेय के बात करथें।
PSA 73:10 एकरसेति ओमन के मनखेमन ओमन करा लहुंट आथें अऊ बहुंत पानी पीथें।
PSA 73:11 ओमन कहिथें, “परमेसर ह कइसे जानही? का सर्वोच्च परमेसर ह कुछू जानथे?”
PSA 73:12 दुस्ट मनखेमन अइसने अंय— ओमन हमेसा बेपरवाह रहिथें, ओमन धन इकट्ठा करे म लगे रहिथें।
PSA 73:13 ये बात सही ए कि मेंह बेकार म अपन हिरदय ला सुध अऊ अपन हांथमन ला निरदोस बनाय रखेंव।
PSA 73:14 दिन भर मेंह दुख सहत रहेंव, अऊ हर दिन मोला नवां दंड मिलथे।
PSA 73:15 कहूं मेंह वइसने कहे होतेंव, त मेंह तोर लइकामन ला धोखा दे होतेंव।
PSA 73:16 जब मेंह ये जम्मो बात ला समझे के कोसिस करेंव, त येह मोला बहुंत परेसान करिस
PSA 73:17 जब तक कि मेंह परमेसर के पबितर-स्थान म नइं चले गेंव; तब मेंह ओमन के आखिरी परिनाम ला समझेंव।
PSA 73:18 खचित तेंह ओमन ला फिसलनेवाला जगह म रखथस; तेंह ओमन ला गिराके नास कर देथस।
PSA 73:19 कइसे अचानक ओमन नास हो जाथें, आतंक ले पूरा खतम हो जाथें!
PSA 73:20 ओमन जागत मनखे के एक सपना देखे सहीं अंय; हे परभू, जब तेंह उठबे, त कल्पना के बात सहीं तेंह ओमन ला तुछ समझबे।
PSA 73:21 जब मोर हिरदय ह दुखित रिहिस अऊ मोर आतमा ह करू हो गे रिहिस,
PSA 73:22 त मेंह निरबुद्धि अऊ अगियानी रहेंव; मेंह तोर आघू म एक जंगली पसु रहेंव।
PSA 73:23 तभो ले मेंह हमेसा तोर संग हंव; तेंह मोर जेवनी हांथ ला धरके मोला थामे रहिथस।
PSA 73:24 तेंह अपन सलाह देके मोर अगुवई करथस, अऊ ओकर बाद तेंह मोला महिमा म अपन करा ले लेबे।
PSA 73:25 स्वरग म तोर छोंड़ मोर अऊ कोन हवय? अऊ धरती म तोर अलावा मेंह अऊ काकरो ईछा नइं करंव।
PSA 73:26 मोर मांस अऊ मोर हिरदय असफल हो सकथें, पर परमेसर ह हमेसा बर मोर हिरदय के बल अऊ मोर भाग ए।
PSA 73:27 जऊन मन तोर ले दूरिहा हवंय, ओमन नास हो जाहीं; तेंह ओ जम्मो झन ला नास कर देथस, जऊन मन तोर बर ईमानदार नइं एं।
PSA 73:28 पर जहां तक मोर बात ए, परमेसर के लकठा म रहई बने बात ए। मेंह परमपरधान यहोवा ला अपन सरन-स्थान बनाय हंव; मेंह तोर जम्मो काम के बखान करहूं।
PSA 74:1 आसाप के एक मसकील। हे परमेसर, तेंह काबर हमन ला हमेसा बर छोंड़ दे हस? तोर गुस्सा ह तोर चरागन के भेड़मन के बिरूध काबर सुलगत हे?
PSA 74:2 ओ जाति के मनखेमन ला सुरता कर, जेमन ला तेंह बहुंत पहिले बिसाय रहय, तोर निज भाग के ओ मनखेमन, जेमन ला तेंह छोंड़ाय रहय— सियोन पहाड़, जिहां तेंह निवास करय, ओ जम्मो ला सुरता कर।
PSA 74:3 अपन कदम ला ये अनंतकाल के बिनास के तरफ कर, ये जम्मो बिनास, जेला बईरी ह पबितर-स्थान ऊपर लाने हवय।
PSA 74:4 तोर बिरोधीमन ओ जगह म गरजत हें, जिहां तेंह हमर ले मुलाकात करे रहय; ओमन चिनहां के रूप म अपन झंडा गाड़े हवंय।
PSA 74:5 ओमन अइसने बरताव करिन, जइसने मनखेमन घोर जंगल म कुसलता से रूखमन ला टंगिया ले काटथें।
PSA 74:6 ओमन अपन टांगा अऊ टंगिया ले नक्कासी करे गे लकड़ी ला चूर-चूर कर दीन।
PSA 74:7 ओमन तोर पबितर-स्थान ला जलाके धुर्रा म मिला दीन; जिहां तोर अराधना होथे, ओ जगह ला ओमन असुध कर दीन।
PSA 74:8 ओमन अपन मन म कहिन, “हमन ओमन ला पूरा कुचर देबो!” ओमन ओ हर एक जगह ला जला दीन, जिहां देस म परमेसर के अराधना होवत रिहिस।
PSA 74:9 हमन ला परमेसर ले कोनो चिनहां नइं दिये जावत हे; कोनो अगमजानी नइं बचे हें, अऊ हमर म ले कोनो नइं जानय कि अइसने कब तक रहिही।
PSA 74:10 हे परमेसर, कब तक बईरी ह तोर ठट्ठा करत रहिही? का बईरी ह हमेसा तोर नांव के निन्दा करत रहिही?
PSA 74:11 काबर तेंह अपन हांथ ला रोके रहिथस, अपन जेवनी हांथ ला? ओला अपन कपड़ा ले बाहिर निकालके बईरीमन के नास कर दे!
PSA 74:12 पर परमेसर ह बहुंत पहिले से मोर राजा ए; ओह धरती ऊपर उद्धार के काम करथे।
PSA 74:13 येह तें रहय, जऊन ह अपन सक्ति ले समुंदर ला दू भाग कर देय; तेंह पानी म बिकराल जन्तु के मुड़ ला फोर डारय।
PSA 74:14 येह तें रहय, जऊन ह लिबयातान के मुड़ ला कुचरके ओला जंगली पसुमन ला खाय बर देय दे।
PSA 74:15 येह तें रहय, जऊन ह सोता अऊ झरनामन ला खोलके पानी के धारा बहाय; तेंह नदी म हमेसा बहत पानी ला सूखा दे।
PSA 74:16 दिन ह तोर ए, अऊ रथिया ह घलो तोर ए; तेंह सूरज अऊ चंदा ला स्थापित करय।
PSA 74:17 येह तें रहय, जऊन ह धरती के जम्मो सीमना ला बांधय; धूपकाल अऊ जड़काला ला तेंह ठहिराय।
PSA 74:18 हे यहोवा, सुरता कर कि बईरी ह कइसे तोर ठट्ठा करे हवय, मुरूख मनखेमन कइसे तोर नांव के निन्दा करे हवंय।
PSA 74:19 अपन पंड़की के जिनगी ला जंगली पसुमन के हांथ म झन सऊंप दे; दुख म पड़े तोर मनखेमन के जिनगी ला हमेसा बर झन भुला दे।
PSA 74:20 अपन करे गय करार के लाज ला रख, काबरकि देस के अंधियार जगहमन म बहुंत हिंसा होवत हे।
PSA 74:21 अतियाचार सहनेवाला मनखे ला लज्जा म झन पड़न दे; गरीब अऊ जरूरतमंद मनखेमन तोर नांव के परसंसा करंय।
PSA 74:22 हे परमेसर, उठ अऊ अपन मामला के बचाव कर; सुरता कर कि मुरूखमन दिन भर कइसे तोर ठट्ठा करथें।
PSA 74:23 अपन बिरोधीमन के चिचियाई ला अनदेखा झन कर, तोर बईरीमन के कोलाहल, जऊन ह लगातार बढ़त जावत हे।
PSA 75:1 संगीत के निरदेसक बर। “नास झन कर” के धुन म आसाप के एक भजन। एक गीत। हे परमेसर, हमन तोर परसंसा करथन, हमन तोर परसंसा करथन, काबरकि तोर नांव ह लकठा म हवय; मनखेमन तोर अद्भूत काम के बखान करथें।
PSA 75:2 तेंह कहिथस, “ठहिराय गय समय ला मेंह तय करथंव; बिगर पखियपात के मेंहीच ह नियाय करथंव।
PSA 75:3 जब धरती अऊ येकर जम्मो मनखेमन कांपथें, त मेंहीच येकर खंभामन ला मजबूती से थामे रहिथंव।
PSA 75:4 घमंडी ला मेंह कहिथंव, ‘अऊ घमंड झन कर,’ अऊ दुस्टमन ला कहिथंव, ‘अपन सींग ला ऊंच झन करव।
PSA 75:5 स्वरग के बिरूध अपन सींग झन उठावव; बहुंत ढिठई के बात झन करव।’ ”
PSA 75:6 पूरब या पछिम ले या निरजन प्रदेस ले कोनो भी मनखे अपनआप ला ऊपर नइं उठा सकय।
PSA 75:7 येह परमेसर ए, जऊन ह नियाय करथे: ओह एक झन ला खाल्हे गिरा देथे, त दूसर झन ला ऊपर उठाथे।
PSA 75:8 यहोवा के हांथ म एक कटोरा हवय जऊन ह मसाला मिले झागवाला अंगूर के मंद ले भरे हवय; ओह येला ढारथे, अऊ धरती के जम्मो दुस्टमन कटोरा के खाली होवत तक येला पीथें।
PSA 75:9 जहां तक मोर बात ए, मेंह हमेसा येकर घोसना करहूं; मेंह याकूब के परमेसर के परसंसा के गीत गाहूं,
PSA 75:10 जऊन ह कहिथे, “मेंह जम्मो दुस्टमन के सींग ला काट डारहूं, पर धरमीमन के सींग ला ऊपर करे जाही।”
PSA 76:1 संगीत के निरदेसक बर। तारवाले बाजामन के संग आसाप के एक भजन। एक गीत। यहूदा म परमेसर ह प्रसिद्ध हे; इसरायल म ओकर नांव ह महान ए।
PSA 76:2 सालेम म ओकर डेरा हवय, अऊ सियोन म ओकर निवास स्थान।
PSA 76:3 उहां ओह चमचमात तीर, ढाल अऊ तलवार, याने कि लड़ई के हथियारमन ला टोर दीस।
PSA 76:4 तेंह अंजोर ले चमकत हस, सिकार ले भरे पहाड़मन ले जादा सानदार अस।
PSA 76:5 हिम्मती मनखेमन लूट लिये गीन, ओमन अपन मिरतू के नींद म हवंय; योद्धामन ले एको झन घलो अपन हांथ नइं चला सकंय।
PSA 76:6 हे याकूब के परमेसर, तोर डांट के कारन, घोड़ा अऊ रथ दूनों खड़े हवंय।
PSA 76:7 येह सिरिप तेंहीच अस, जेकर भय माने जावय। जब तेंह गुस्सा करथस, त तोर आघू म कोन ह ठाढ़ हो सकथे?
PSA 76:8 स्वरग ले तेंह नियाय के घोसना करय, अऊ देस के मनखेमन डरके चुप हो गीन—
PSA 76:9 हे परमेसर, जब तेंह देस के दुख म परे जम्मो मनखेमन के नियाय करे बर अऊ ओमन ला बचाय बर उठय।
PSA 76:10 खचित मानव-जाति के बिरूध तोर कोप ह तोर परसंसा के कारन बनथे, अऊ तोर कोप ले बचे मनखेमन काबू म रहिथें।
PSA 76:11 यहोवा अपन परमेसर बर मन्नत मानव अऊ ओला पूरा करव; आसपास के जम्मो देस के मनखेमन परमेसर करा भेंट लेके आवंय जऊन ह भय माने के योग्य अय।
PSA 76:12 ओह सासन करइयामन के उत्साह ला टोर देथे; धरती के राजामन ओकर भय मानथें।
PSA 77:1 संगीत के निरदेसक बर। यदूतून के राग म आसाप के एक भजन। मेंह मदद बर परमेसर ला पुकारेंव; मोर बात ला सुने बर मेंह परमेसर ले गोहार पारेंव।
PSA 77:2 जब मेंह तकलीफ म रहेंव, त मेंह परभू ला खोजेंव; रथिया बिगर थके हांथ ला बढ़ांय, अऊ मोला सांति नइं मिलिस।
PSA 77:3 हे परमेसर, मेंह तोला सुरता करेंव अऊ कलहरेंव; मेंह चिंतन-मनन करेंव, अऊ मोर आतमा ह दुरबल हो गीस।
PSA 77:4 तेंह मोर आंखी ला बंद होवन नइं दे; मोला गोठियाय म बहुंत तकलीफ होवत रिहिस।
PSA 77:5 मेंह तइहा जमाना के बारे म सोचेंव, बहुंत साल पहिले के बारे म;
PSA 77:6 मेंह रथिया अपन गीतमन ला सुरता करेंव। मोर मन ह चिंतन-मनन करिस अऊ मोर आतमा ह पुछिस:
PSA 77:7 “का परभू ह हमेसा बर तियाग दीही? का ओह फेर कभू दया नइं देखाही?
PSA 77:8 का ओकर अटूट मया ह हमेसा बर खतम हो गीस? का ओकर परतिगियां ह हमेसा बर खतम हो गीस?
PSA 77:9 का परमेसर ह दयालु होय के बात ला भुला गे हवय? का ओह गुस्सा होके अपन करूना ला रोक ले हवय?”
PSA 77:10 तब मेंह सोचेंव, “मेंह ये अपील करहूं: ओ सालमन म जब सर्वोच्च परमेसर ह अपन जेवनी हांथ ला बढ़ाईस।
PSA 77:11 मेंह यहोवा के काम ला सुरता करहूं; हव, मेंह बहुंत पहिले के तोर चमतकार के काममन ला सुरता करहूं।
PSA 77:12 मेंह तोर जम्मो काम ऊपर बिचार करहूं अऊ तोर जम्मो बड़े काम ऊपर चिंतन-मनन करहूं।”
PSA 77:13 हे परमेसर, तोर रसता ह पबितर ए। कोन देवता ह हमर परमेसर के सहीं महान ए?
PSA 77:14 तेंह ओ परमेसर अस, जऊन ह चमतकार करथे; तेंह मनखेमन के बीच म अपन सामर्थ देखाथस।
PSA 77:15 अपन सक्तिसाली हांथ ले तेंह अपन मनखे, याकूब अऊ यूसुफ के संतानमन ला छोंड़ाय।
PSA 77:16 हे परमेसर, समुंदर ह तोला देखिस, समुंदर ह तोला देखके छटपटाय लगिस; समुंदर के गहरई तक उथल-पुथल हो गीस।
PSA 77:17 बादर ले बारिस होय लगिस, अकास म गरजन होय लगिस; तोर तीरमन आघू-पाछू चले लगिन।
PSA 77:18 तोर गरजन ह बवंडर म सुनई दीस, तोर बिजली ह संसार ला अंजोर कर दीस; धरती ह थरथराय अऊ कांपे लगिस।
PSA 77:19 तोर रसता ह समुंदर म ले होके गीस, तोर डहार ह गहिरा पानी म ले होके गीस, हालाकि तोर गोड़ के चिनहांमन नइं दिखिन।
PSA 77:20 तेंह मूसा अऊ हारून के दुवारा अपन मनखेमन के अगुवई एक झुंड के रूप करे।
PSA 78:1 आसाप के एक मसकील। हे मोर मनखेमन, मोर सिकछा ऊपर धियान देवव; मोर मुहूं के बात ला सुनव।
PSA 78:2 मेंह अपन बात एक पटंतर म करहूं; मेंह गुपत बात, पुराना जमाना के बात बताहूं—
PSA 78:3 ओ बात जेला हमन सुने हन अऊ जान ले हन, ओ बात जेला हमर पुरखामन हमन ला बताय हवंय।
PSA 78:4 यहोवा के परसंसा के काम, ओकर सामर्थ, अऊ ओकर करे गे अद्भूत काममन ला हमन ओमन के संतानमन ले नइं छुपावन; हमन अवइया पीढ़ी के मनखेमन ला बताबो।
PSA 78:5 ओह याकूब बर बिधिमन ला ठहिराईस अऊ इसरायल म कानून स्थापित करिस, जेकर बारे म ओह हमर पुरखामन ला हुकूम दीस कि ओमन अपन लइकामन ला ओकर सिकछा देवंय,
PSA 78:6 ताकि अवइया पीढ़ी के मनखेमन ओला जानंय, अऊ त अऊ ओ लइकामन घलो जेमन जनम लेवइया हें, अऊ बाद म ओमन अपन लइकामन ला सिखोवंय।
PSA 78:7 तब ओमन परमेसर ऊपर अपन भरोसा रखहीं अऊ ओमन ओकर काममन ला नइं भूलहीं पर ओकर हुकूममन ला मानहीं।
PSA 78:8 ओमन अपन पुरखामन सहीं नइं होहीं— जेमन हठीला अऊ बिदरोही रिहिन, जेमन के मन म परमेसर के प्रति भक्ति नइं रिहिस, जेमन के आतमा ह परमेसर बर बिसवासयोग्य नइं रिहिस।
PSA 78:9 एपरैम के मनखेमन हालाकि धनुस धरे रिहिन, पर लड़ई के दिन ओमन वापिस भाग गीन;
PSA 78:10 ओमन परमेसर के करार ला नइं मानिन अऊ ओकर कानून के मुताबिक चले बर इनकार करिन।
PSA 78:11 ओमन भुला गीन कि परमेसर ह ओमन बर का करे रिहिस, ओ अद्भूत काम, जेला ओह ओमन ला देखाय रिहिस।
PSA 78:12 ओह ओमन के पुरखामन के आघू म मिसर देस के सोअन के इलाका म चमतकार के काम करे रिहिस।
PSA 78:13 ओह समुंदर ला दू भाग करके ओमन ला उहां ले निकाले रिहिस; ओह पानी ला दीवार सहीं खड़े करवा दे रिहिस।
PSA 78:14 ओह दिन के समय बादर के दुवारा अऊ रात भर आगी के अंजोर के दुवारा ओमन के अगुवई करय।
PSA 78:15 ओह उजाड़ जगह म पथरामन ला फोरके ओमन ला समुंदर के सहीं बहुंतायत से पानी दीस;
PSA 78:16 ओह उबड़-खाबड़ चट्टान म ले पानी के धारा निकालिस अऊ पानी ला नदी के सहीं बहाईस।
PSA 78:17 पर ओमन निरजन जगह म सर्वोच्च परमेसर के बिरूध बिदरोह करत लगातार पाप करते रिहिन।
PSA 78:18 ओमन लालायित होके जेवन मांगे के दुवारा जानबूझके परमेसर ला परखिन।
PSA 78:19 ओमन परमेसर के बिरूध गोठियाईन; ओमन कहिन, “का परमेसर ह सही म निरजन जगह म हमन ला जेवन दे सकथे?
PSA 78:20 सही म, ओह चट्टान ला मारिस, अऊ उहां ले पानी के तेज धारा फूट निकलिस, अऊ पानी के धारा ह बहुंतायत ले बहे लगिस, पर का ओह हमन ला रोटी घलो दे सकथे? का ओह अपन मनखेमन ला मांस के पूरती कर सकथे?”
PSA 78:21 जब यहोवा ह ओमन के बात ला सुनिस, त ओह बहुंत नराज होईस; याकूब के बिरूध ओकर आगी ह भड़किस, अऊ इसरायल के बिरूध ओकर कोप ह भड़किस,
PSA 78:22 काबरकि ओमन परमेसर ऊपर बिसवास नइं करिन, अऊ न ही ओकर छुटकारा देय के ऊपर भरोसा रखिन।
PSA 78:23 तभो ले ओह ऊपर अकास ला हुकूम दीस अऊ स्वरग के कपाटमन ला खोल दीस;
PSA 78:24 ओह मनखेमन के खाय बर मन्ना के बारिस करिस, ओह ओमन ला स्वरग के अनाज दीस।
PSA 78:25 मनखेमन स्वरगदूतमन के रोटी खावत रिहिन; ओह ओमन ला भरपेट जेवन दीस।
PSA 78:26 ओह अकास ले पूरबी हवा चलाईस अऊ अपन सामर्थ ले दक्खिनी हवा चलाईस।
PSA 78:27 ओह ओमन बर धुर्रा के सहीं मांस के बारिस करिस, समुंदर के बालू सहीं चिरईमन ला पठोईस।
PSA 78:28 ओह ओ चिरईमन ला ओमन के तम्बू के चारों कोति ओमन के डेरा के भीतर लानिस।
PSA 78:29 ओमन गला के आवत तक खाईन— परमेसर ह ओमन ला ओ दीस, जेकर ओमन लालसा करिन।
PSA 78:30 पर येकर पहिले कि ओमन अपन लालसा करे चीज ले फिरतिन, अऊ त अऊ जेवन ह ओमन के मुहूं म ही रिहिस,
PSA 78:31 कि परमेसर के कोरोध ह ओमन के बिरूध भड़किस; ओह इसरायल के जवानमन ला काटके गिरावत ओमन के बीच के हट्टा-कट्टा मनखेमन ला मार डारिस।
PSA 78:32 अतेक होय के बाद घलो ओमन पाप करते रिहिन; ओकर अद्भूत काममन ला देखे के बाद घलो ओमन बिसवास नइं करिन।
PSA 78:33 एकरसेति ओह ओमन के जिनगी के दिनमन ला बेकार म अऊ ओमन के सालमन ला आतंक म खतम कर दीस।
PSA 78:34 जब भी परमेसर ह ओमन के हतिया करय, ओमन ओकर खोज करंय; ओमन उतावला होके ओकर कोति फेर लहुंटंय।
PSA 78:35 ओमन सुरता करंय कि परमेसर ह ओमन के चट्टान ए, ओमन सुरता करंय कि सर्वोच्च परमेसर ह ओमन के छुड़इया ए।
PSA 78:36 पर तब ओमन अपन मुहूं ले ओकर चापलूसी करंय, अऊ ओकर ले लबारी मारंय;
PSA 78:37 ओमन के मन ह ओकर बर ईमानदार नइं रिहिस, ओमन ओकर करार के प्रति बिसवासयोग्य नइं रिहिन।
PSA 78:38 तभो ले ओह ओमन ऊपर दया करिस; ओह ओमन के अपराध ला छेमा करिस अऊ ओमन ला नास नइं करिस। बार-बार ओह अपन गुस्सा ला रोकिस अऊ अपन कोप ला पूरा नइं भड़काईस।
PSA 78:39 ओह सुरता रखिस कि ओमन सिरिप हाड़-मांस के मनखे अंय, एक बहत हवा सहीं अंय, जऊन ह लहुंटके नइं आवय।
PSA 78:40 निरजन जगह म ओमन ओकर बिरूध कतेक बार ले बिदरोह करिन अऊ उजाड़ जगह म ओला दुखी करिन!
PSA 78:41 बार-बार ओमन परमेसर ला परखिन; ओमन इसरायल के पबितर परमेसर ला चिढ़ दिलाईन।
PSA 78:42 ओमन ओकर सामर्थ ला सुरता नइं करिन— ओ दिन जब ओह ओमन ला अतियाचारी ले छोंड़ाय रिहिस,
PSA 78:43 ओ दिन जब ओह मिसर देस म अपन चिनहां, सोअन के इलाका म अपन अद्भूत काम देखाईस।
PSA 78:44 ओह मिसरीमन के नदी के पानी ला खून म बदल दीस; ओमन अपन पानी के सोता ले पानी नइं पी सकिन।
PSA 78:45 ओह ओमन ऊपर मधुमक्खीमन के झुंड पठोईस, जेमन ओमन ला खा गीन, अऊ मेचकामन ला पठोईस, जेमन ओमन ला बरबाद कर दीन।
PSA 78:46 ओह ओमन के फसल ला कीरामन ला, अऊ ओमन के ऊपज ला फांफामन ला दे दीस।
PSA 78:47 ओह ओमन के अंगूर के नारमन ला करा गिराके अऊ ओमन के डूमर रूखमन ला बरफ के संग पानी गिराके नास कर दीस।
PSA 78:48 ओह ओमन के पालतू पसुमन ला करा गिराके, अऊ पसु-धन ला बिजली गिराके नास कर दीस।
PSA 78:49 ओह ओमन के बिरूध अपन भारी गुस्सा, अपन कोप, कोरोध अऊ बईरता देखाईस— येमन नास करइया स्वरगदूतमन के एक दल रिहिन।
PSA 78:50 ओह अपन कोरोध बर एक रसता तियार करिस; ओह ओमन ला मिरतू ले नइं बचाईस पर ओमन ला महामारी के बस म कर दीस।
PSA 78:51 ओह मिसर देस के जम्मो पहिलांतमन ला मार डारिस, जेमन हाम के डेरामन म मरदानगी के पहिला फर रिहिन।
PSA 78:52 पर ओह अपन मनखेमन ला पसुमन के झुंड सहीं बाहिर निकालिस; निरजन जगह म भेड़ के सहीं ओह ओमन के अगुवई करिस।
PSA 78:53 ओह ओमन ला सुरकछित निकालिस, जेकर ले ओमन निडर रिहिन; पर ओमन के बईरीमन समुंदर म बुड़ गीन।
PSA 78:54 अऊ ये किसम ले ओह ओमन ला अपन पबितर देस के सीमना, ओ पहाड़ी देस म लानिस, जेला ओकर जेवनी हांथ ह लेय रिहिस।
PSA 78:55 ओह ओमन के आघू ले जाति-जाति के मनखेमन ला भगा दीस अऊ ओमन के जमीन अपन मनखेमन ला निज भाग के रूप म दे दीस; ओह इसरायल के गोत्रमन ला ओमन के घर म बसाईस।
PSA 78:56 पर ओमन परमेसर के परिछा लीन अऊ सर्वोच्च परमेसर के बिरूध बिदरोह करिन; ओमन ओकर कानून-बिधिमन ला नइं मानिन।
PSA 78:57 अपन पुरखामन के सहीं ओमन बिसवासघाती अऊ बेईमान निकलिन, एक निकम्मा धनुस के सहीं धोखा दीन।
PSA 78:58 ओमन देवतामन बर ऊंच जगहमन ला बनाके ओला गुस्सा दिलाईन; ओमन मूरतीमन ला बनाके ओमा जलन पईदा करिन।
PSA 78:59 जब परमेसर ह ओमन के सुनिस, त ओह बहुंत गुस्सा होईस; ओह इसरायल ला पूरा तियाग दीस।
PSA 78:60 ओह सीलो सहर के ओ पबितर-तम्बू ला तियाग दीस, जेला ओह मनखेमन के बीच खड़े करे रिहिस।
PSA 78:61 ओह अपन ताकत के सन्दूक ला बंधुवई म, अऊ अपन सोभा ला बईरीमन के हांथ म दे दीस।
PSA 78:62 ओह अपन मनखेमन ला तलवार ले मरवा दीस; ओह अपन निज भाग के मनखेमन ऊपर बहुंत गुस्सा होईस।
PSA 78:63 आगी ह ओमन के जवानमन ला भसम कर दीस, अऊ ओमन के जवान छोकरीमन बर कोनो बिहाव के गीत गाय नइं गीस;
PSA 78:64 ओमन के पुरोहितमन तलवार ले मार डारे गीन, अऊ ओमन के बिधवामन रोए नइं सकिन।
PSA 78:65 तब परभू ह मानो नींद ले जागिस, जइसे कोनो योद्धा ह मंद के मूर्छा ले जागथे।
PSA 78:66 ओह अपन बईरीमन ला मार भगाईस; ओह ओमन ला हमेसा बर लज्जित करिस।
PSA 78:67 तब ओह यूसुफ के तम्बू ला तियाग दीस, अऊ एपरैम के गोत्र ला नइं चुनिस;
PSA 78:68 पर ओह यहूदा के गोत्र, सियोन पहाड़ ला चुन लीस, जेला कि ओह मया करिस।
PSA 78:69 ओह अपन पबितर-स्थान ला ऊंचहा जगह सहीं बनाईस, धरती के सहीं बनाईस, जेला ओह हमेसा बर रखिस।
PSA 78:70 ओह अपन सेवक दाऊद ला चुनिस अऊ ओला भेड़मन के बाड़ा ले लेय लीस;
PSA 78:71 भेड़ चराय के काम ले दाऊद ला हटाके ओह ले आईस ताकि दाऊद ह ओकर मनखे याकूब, ओकर निज भाग इसरायल के चरवाहा बनय।
PSA 78:72 अऊ दाऊद ह पूरा ईमानदारी से ओमन के देखरेख करिस; अपन कुसल हांथ ले ओह ओमन के अगुवई करिस।
PSA 79:1 आसाप के एक भजन। हे परमेसर, आनजातमन तोर निज भाग के ऊपर हमला कर दे हवंय; ओमन हमर पबितर मंदिर ला असुध कर दे हवंय, ओमन यरूसलेम ला खंडहर बना दे हवंय।
PSA 79:2 ओमन तोर सेवकमन के लासमन ला अकास के चिरईमन के जेवन बर अऊ तोर खुद के मनखेमन के मांस ला जंगली पसुमन बर छोंड़ दे हवंय।
PSA 79:3 ओमन यरूसलेम के चारों कोति खून ला पानी सहीं बहाय हवंय, अऊ मरे मनखेमन ला माटी देय बर कोनो नइं ए।
PSA 79:4 हमन हमर परोसीमन बर अनादर के पात्र, अऊ हमर आसपास के मनखेमन बर तिरस्कार अऊ हंसी के पात्र बन गे हवन।
PSA 79:5 हे यहोवा, कब तक? का तेंह हमेसा बर कोरोध करते रहिबे? कब तक तोर डाह ह आगी सहीं बरत रहिही?
PSA 79:6 ओ आनजातमन के ऊपर अपन कोप ला भड़का जऊन मन तोला स्वीकार नइं करंय, ओ राजमन ऊपर अपन कोप ला भड़का, जेमन तोर नांव के गुन नइं गावंय;
PSA 79:7 काबरकि ओमन याकूब ला खा गे हवंय अऊ ओकर खुद के देस ला तहस-नहस कर दे हवंय।
PSA 79:8 हमर पहिले के पीढ़ी के मनखेमन के पाप के लेखा हमर ले झन ले; हमर ऊपर बिगर देरी के दया कर, काबरकि हमन बहुंत दुरदसा म हवन।
PSA 79:9 हे परमेसर हमर उद्धारकर्ता, अपन नांव के महिमा बर हमर मदद कर; अपन नांव के हित म हमन ला छोंड़ा अऊ हमर पाप ला छेमा कर।
PSA 79:10 आनजात के मनखेमन काबर कहंय, “ओमन के परमेसर कहां हवय?” हमर देखत म, आनजात के मनखेमन ला बता कि तेंह अपन सेवकमन के बहे खून के बदला लेथस।
PSA 79:11 कैदीमन के कराहे के अवाज तोर करा हबरय; मिरतू के सजा पाय मनखेमन ला अपन मजबूत हांथ ले संभाल।
PSA 79:12 हे परभू, हमर परोसीमन तोर जऊन अपमान करे हवंय, ओकर तेंह ओमन ले सात गुना बदला ले।
PSA 79:13 तब हमन तोर मनखेमन, तोर चरागन के भेड़मन हमेसा तोर परसंसा करबो; पीढ़ी-पीढ़ी तक हमन तोर परसंसा करबो।
PSA 80:1 संगीत के निरदेसक बर। “करार के कुमुदिनी” के राग म आसाप के एक भजन। हे इसरायल के चरवाहा, तें जऊन ह यूसुफ के अगुवई भेड़ के झुंड के सहीं करथस, हमर बात ला सुन। तें जऊन ह करूबमन के बीच म बिराजमान हस,
PSA 80:2 एपरैम, बिनयामीन अऊ मनस्से के आघू म अपन अंजोर ला चमका। अपन ताकत ला जगा; आ अऊ हमन ला बचा।
PSA 80:3 हे परमेसर, हमन ला फेर पहिले के सहीं कर दे; अपन मुहूं के अंजोर हमर ऊपर चमका, कि हमर उद्धार हो जावय।
PSA 80:4 हे यहोवा, सर्वसक्तिमान परमेसर, तोर मनखेमन के पराथना के बिरूध कब तक तोर गुस्सा ह सुलगत रहिही?
PSA 80:5 तेंह ओमन ला आंसू के रोटी खवाय हस; तेंह ओमन ला कटोरा भर-भरके आंसू पीयाय हस।
PSA 80:6 तेंह हमन ला हमर परोसीमन बर हंसी के पात्र बना दे हस, अऊ हमर बईरीमन हमर हंसी उड़ाथें।
PSA 80:7 हे सर्वसक्तिमान परमेसर, हमन ला फेर पहिले सहीं कर दे; अपन मुहूं के अंजोर हमर ऊपर चमका, कि हमर उद्धार हो जावय।
PSA 80:8 तें मिसर देस ले अंगूर के एक नार लानके लगाय; तें आनजातमन ला निकालके ओ अंगूर के नार ला लगाय।
PSA 80:9 येकर बर तेंह भुइयां ला तियार करय, अऊ येह जरी पकड़िस अऊ देस म भर गीस।
PSA 80:10 येकर छइहां ले पहाड़मन, अऊ येकर डारामन ले बड़े देवदारमन ढंक गीन।
PSA 80:11 येकर डारामन समुंदर तक बढ़ गीन, अऊ येकर अंकुरमन नदी तक बगर गीन।
PSA 80:12 तेंह काबर येकर दीवार ला गिरा देय, जेकर कारन जम्मो डहार रेंगइयामन येकर अंगूर ला टोरथें?
PSA 80:13 जंगली सुरामन येला नास करथें, अऊ भुइयां के कीरामन येला खाथें।
PSA 80:14 हे सर्वसक्तिमान परमेसर, हमर करा लहुंट आ! स्वरग ले निहरके देख! ये अंगूर के नार ऊपर धियान दे,
PSA 80:15 ओ जरी जेला तोर जेवनी हांथ ह लगाय हवय, ओ बेटा जेला तेंह अपन बर बढ़ाय हस।
PSA 80:16 तोर अंगूर के नार ह कट गे हवय, येह आगी ले जर गे हवय; तोर डांट-फटकार ले तोर मनखेमन नास होथें।
PSA 80:17 तोर जेवनी हांथ कोति के मनखे ऊपर तोर हांथ रहय, मनखे के ओ बेटा, जेला तेंह अपन बर बढ़ाय हस।
PSA 80:18 तब हमन तोर ले दूरिहा नइं जाबो; हमन ला पहिले सहीं कर दे, अऊ हमन तोर नांव के गुन गाबो।
PSA 80:19 हे यहोवा सर्वसक्तिमान परमेसर, हमन ला फेर पहिले सहीं कर दे; अपन मुहूं के अंजोर हमर ऊपर चमका, कि हमर उद्धार होवय।
PSA 81:1 संगीत के निरदेसक बर। आसाप के गित्तीथ के मुताबिक। परमेसर जऊन ह हमर ताकत ए, ओकर बर आनंद के गीत गावव; याकूब के परमेसर बर चिचियाके जय-जयकार करव!
PSA 81:2 बाजा बजाय के सुरू करव, खंजरी बजावव, सुरीला बीना अऊ सारंगी बजावव।
PSA 81:3 नवां चंदा के दिन, अऊ पून्नी के दिन, जब हमर तिहार होथे, तब नरसिंगा फूंकव;
PSA 81:4 येह इसरायल बर एक बिधि, अऊ याकूब के परमेसर के एक नियम अय।
PSA 81:5 जब परमेसर ह मिसर देस के बिरूध चलिस, त ओह यूसुफ बर येला एक बिधि ठहिराईस। मेंह एक अनजान अवाज ला ये कहत सुनेंव:
PSA 81:6 “मेंह ओमन के ऊपर ले बोझा ला हटा देंव; टोकरी उठाय के काम ले ओमन ला मुक्त कर देंव।
PSA 81:7 तेंह संकट के बेरा पुकारय अऊ मेंह तोला बचांय, मेंह तोला बादर के गरजन ले जबाब देंव; मेंह मरीबा के सोता करा तोला परखेंव।
PSA 81:8 हे मोर मनखेमन, मोर बात ला सुनव, अऊ मेंह तुमन ला चेताहूं— हे इसरायल, यदि तुमन सिरिप मोर सुनहू त!
PSA 81:9 तुमन अपन बीच म कोनो पराया देवता झन रखव; तुमन मोला छोंड़ अऊ कोनो देवता के अराधना झन करव।
PSA 81:10 मेंह यहोवा तुम्हर परमेसर अंव, जऊन ह तुमन ला मिसर देस ले निकाल लानिस। तुमन अपन मुहूं ला पूरा खोलव अऊ मेंह ओला भर दूहूं।
PSA 81:11 “पर मोर मनखेमन मोर बात ला नइं सुनिन; इसरायल ह मोर बात ला नइं मानिस।
PSA 81:12 एकरसेति मेंह ओमन ला ओमन के जिद्दी सुभाव म छोंड़ देंव ताकि ओमन अपन मनमानी करंय।
PSA 81:13 “कहूं मोर मनखेमन सिरिप मोर बात ला सुने होतिन, कहूं इसरायल ह सिरिप मोर रसता म चले होतिस,
PSA 81:14 त बहुंत जल्दी मेंह ओमन के बईरीमन ला दबा दे रहितेंव अऊ मोर हांथ ह ओमन के बिरोधीमन ऊपर चले होतिस!
PSA 81:15 जऊन मन यहोवा ले घिन करथें, ओमन ओकर आघू म चापलूसी करहीं, अऊ ओमन के सजा ह हमेसा बने रहिही।
PSA 81:16 पर तोला सबले बने गहूं ले बने जेवन मिलही; चट्टान के मंधरस ले मेंह तोला भरपूर खवाहूं।”
PSA 82:1 आसाप के एक भजन। परमेसर के सभा म परमेसर ही सभापति होथे; ओह “देवतामन” के बीच म नियाय करथे:
PSA 82:2 “तुमन कब तक अनियायीमन के बचाव करते रहिहू अऊ दुस्टमन के समरथन करत रहिहू?
PSA 82:3 दुरबल अऊ अनाथमन के बचाव करव; गरीब अऊ दुखीमन के मामला के समरथन करव।
PSA 82:4 दुरबल अऊ जरूरतमंद के बचाव करव; दुस्टमन के हांथ ले ओमन ला छोंड़ावव।
PSA 82:5 “ ‘देवतामन’ कुछू नइं जानंय, ओमन कुछू नइं समझंय। ओमन अंधियार म चलथें-फिरथें; धरती के जम्मो नीवमन हालत हें।
PSA 82:6 “मेंह कहेंव, ‘तुमन “ईस्वर” अव; तुमन जम्मो सर्वोच्च परमेसर के बेटा अव।’
PSA 82:7 पर तुमन सिरिप मरनहार मनखे सहीं मरहू; तुम्हर गिरई ह आने सासन करइया सहीं होही।”
PSA 82:8 हे परमेसर, उठ, धरती के नियाय कर, काबरकि जम्मो जाति के मनखेमन तोर भाग एं।
PSA 83:1 एक गीत। आसाप के एक भजन। हे परमेसर, तेंह चुप झन रह; अपन कान ला बंद झन कर, हे परमेसर, दूरिहा झन रह।
PSA 83:2 देख, तोर बईरीमन कइसे गुर्रावत हें, तोर बिरोधीमन कइसे मुड़ उठावत हें।
PSA 83:3 चालबाजी के संग ओमन तोर मनखेमन के बिरूध सडयंत्र करथें; ओमन ओ मनखेमन के बिरूध सडयंत्र रचथें, जेमन के बचाव तेंह करथस।
PSA 83:4 ओमन कहिथें, “आवव, हमन ओमन ला एक जाति के रूप म नास कर देवन, ताकि इसरायल के नांव ला झन सुरता करे जावय।”
PSA 83:5 ओमन एक संग एक मन होके सडयंत्र करथें; ओमन तोर बिरूध म एक जुट होथें—
PSA 83:6 ओमन एदोम अऊ इसमायलीमन के तम्बूवाले, मोआबी अऊ हगरी,
PSA 83:7 गबाली, अमोनी अऊ अमालेकी, पलिस्ती अऊ सूर के मनखेमन संग हवंय।
PSA 83:8 अऊ त अऊ अस्सूरीमन लूत के संतानमन के सक्ति बढ़ाय बर ओमन के संग मिल गे हवंय।
PSA 83:9 ओमन के संग वइसने कर, जइसने तेंह मिदयानीमन के संग, अऊ कीसोन नदी म सीसरा अऊ याबीन के संग करे रहय,
PSA 83:10 जऊन मन एनदोर म नास हो गीन अऊ भुइयां म गिरे गोबर सहीं हो गीन।
PSA 83:11 ओमन के परभावसाली मनखेमन ला ओरेब अऊ जेब सहीं, अऊ ओमन के जम्मो राजकुमारमन ला जेबह अऊ सलमुन्ना सहीं कर दे,
PSA 83:12 जऊन मन कहिन, “आवव, हमन परमेसर के चरागनमन ला अपन अधिकार म कर लेवन।”
PSA 83:13 हे मोर परमेसर, ओमन ला बवंडर म उड़त धुर्रा, हवा म उड़त भूंसा सहीं कर दे।
PSA 83:14 जइसे आगी ह जंगल ला जलाके नास कर देथे या एक चिनगारी ह पहाड़मन म आगी लगा देथे,
PSA 83:15 वइसे तेंह अपन आंधी ले ओमन के पीछा कर अऊ अपन तूफान ले ओमन ला भयभीत कर।
PSA 83:16 हे यहोवा, ओमन ला अइसने सरमिंदा कर, कि ओमन तोर नांव लेवंय।
PSA 83:17 ओमन हमेसा बर लज्जित अऊ भयभीत होवंय; ओमन कलंकित होके नास हो जावंय।
PSA 83:18 ओमन तोला जानंय, जेकर नांव यहोवा ए— ये घलो जानंय कि सिरिप तेंहीच ह जम्मो धरती ऊपर सर्वोच्च परमेसर अस।
PSA 84:1 संगीत के निरदेसक बर। गित्तीथ के राग के मुताबिक कोरह के बेटामन के एक भजन। हे सर्वसक्तिमान यहोवा, तोर निवास ह बहुंत सुघर हे,
PSA 84:2 मोर जीव ह यहोवा के अंगनामन के लालसा करत मूरछित तक हो जाथे; मोर तन अऊ मन जीयत परमेसर ला पुकारथे।
PSA 84:3 हे सर्वसक्तिमान यहोवा, मोर राजा अऊ मोर परमेसर, तोर बेदी के लकठा म, अऊ त अऊ गौरइया चिरई ह बसेरा करे हवय, अऊ अबाबील चिरई ह एक खोंधरा बनाय हवय— कि उहां ओह अपन पीलामन ला रख सकय।
PSA 84:4 धइन अंय ओमन, जऊन मन तोर घर म रहिथें; ओमन हमेसा तोर परसंसा करत रहिथें।
PSA 84:5 धइन अंय ओमन, जेमन ला तोर ले ताकत मिलथे, जेमन के मन ह तीरथ-यातरा म लगे रहिथे।
PSA 84:6 जब ओमन बाका के घाटी ले होके जाथें, त ओमन ओला पानी के सोत के एक जगह बना देथें; सरदकाल के बरसात के पानी घलो येकर तरियामन ला भर देथे।
PSA 84:7 ओमन ताकत के ऊपर ताकत पाके तब तक आघू बढ़त रहिथें, जब तक कि ओमा के हर एक जन सियोन म परमेसर करा नइं हबर जावय।
PSA 84:8 हे यहोवा, सर्वसक्तिमान परमेसर, मोर पराथना ला सुन; हे याकूब के परमेसर, मोर बात ला सुन।
PSA 84:9 हे परमेसर, हमर ढाल ला देख; अपन अभिसिक्त जन ऊपर किरपा कर।
PSA 84:10 तोर अंगना म के एक दिन ह अऊ कहीं के हजार दिन ले जादा बने अय; दुस्टमन के डेरा म रहे के बदले मेंह मोर परमेसर के घर म दुवारपाल होवई जादा पसंद करहूं।
PSA 84:11 काबरकि यहोवा परमेसर ह सूरज अऊ ढाल ए; यहोवा अनुग्रह अऊ सम्मान देथे; जऊन मन निरदोस बने रहिथें, ओमन ले ओह बने चीजमन ला अलग नइं रखय।
PSA 84:12 हे सर्वसक्तिमान यहोवा, धइन अय ओ मनखे, जऊन ह तोर ऊपर भरोसा रखथे।
PSA 85:1 संगीत के निरदेसक बर। कोरह के बेटामन के एक भजन। हे यहोवा, तेंह अपन देस ऊपर दया देखाय हस; तेंह याकूब के दिनमन ला पहिले सहीं बने कर दे हस।
PSA 85:2 तेंह अपन मनखेमन के अपराध ला छेमा करे हस अऊ ओमन के पाप ला ढांप दे हस।
PSA 85:3 तेंह अपन जम्मो कोप ला एक तरफ रख दे हस अऊ अपन भयंकर कोरोध ला छोंड़ दे हस।
PSA 85:4 हे परमेसर हमर उद्धारकर्ता, हमन ला फेर पहिले सहीं कर दे, अऊ हमर बर तोर नराजगी ला हटा ले।
PSA 85:5 का तेंह सदाकाल बर हमर ऊपर गुस्सा करबे? का तेंह अपन गुस्सा ला जम्मो पीढ़ी तक बनाय रखबे?
PSA 85:6 का तेंह हमन ला फेर पुनरजीवित नइं करबे, कि तोर मनखेमन तोर म आनंद मनावंय?
PSA 85:7 हे यहोवा, हमन ला अपन सदा दिन के मया ला देखा, अऊ हमन ला अपन उद्धार दे।
PSA 85:8 परमेसर यहोवा ह जऊन कुछू कहिथे, ओला मेंह सुनहूं; ओह अपन मनखे, अपन बिसवासयोग्य सेवकमन ला सांति देय के वायदा करथे— पर ओमन फेर मुरूखता झन करंय।
PSA 85:9 खचित ओकर उद्धार ह ओमन के लकठा म हवय, जऊन मन ओकर भय मानथें, कि ओकर महिमा ह हमर देस म रहय।
PSA 85:10 मया अऊ ईमानदारी एक संग जूर जाथें; धरमीपन अऊ सांति एक-दूसर ला चूमथें।
PSA 85:11 ईमानदारी ह धरती ले निकलथे, अऊ धरमीपन ह स्वरग ले खाल्हे देखथे।
PSA 85:12 यहोवा ह वास्तव म ओ चीज ला दीही, जऊन ह बने अय, अऊ हमर भुइयां ह येकर फसल दीही।
PSA 85:13 धरमीपन ह ओकर आघू-आघू चलथे अऊ ओकर चले बर रसता तियार करथे।
PSA 86:1 दाऊद के एक पराथना। हे यहोवा, मोर बिनती ला सुन अऊ मोला जबाब दे, काबरकि मेंह गरीब अऊ जरूरतमंद अंव।
PSA 86:2 मोर परान के रकछा कर, काबरकि मेंह तोर बर बिसवासयोग्य हंव; अपन सेवक के उद्धार कर, जऊन ह कि तोर ऊपर भरोसा रखथे। तेंह मोर परमेसर अस;
PSA 86:3 हे परभू, मोर ऊपर दया कर, काबरकि मेंह दिन भर तोला पुकारथंव।
PSA 86:4 हे परभू, अपन सेवक ला आनंदित कर, काबरकि मेंह तोर ऊपर भरोसा रखथंव।
PSA 86:5 हे परभू, तें छेमा करइया अऊ बने अस, जऊन मन तोर नांव लेथें, ओ जम्मो ला तेंह बहुंत मया करथस।
PSA 86:6 हे यहोवा, मोर पराथना ला सुन; मोर बात ला सुनके मोर ऊपर दया कर।
PSA 86:7 जब मेंह संकट म रहिथंव, त मेंह तोला पुकारथंव, काबरकि तेंह मोला जबाब देथस।
PSA 86:8 हे परभू, देवतामन म तोर सहीं कोनो नइं एं; कोनो भी काम के तुलना तोर काम से करे नइं जा सकय।
PSA 86:9 हे परभू, ओ जम्मो जाति के मनखे जेमन ला तेंह बनाय हस, ओमन आहीं अऊ तोर आघू म अराधना करहीं; ओमन तोर नांव के महिमा करहीं।
PSA 86:10 काबरकि तेंह महान अस अऊ अद्भूत काम करथस; सिरिप तेंह परमेसर अस।
PSA 86:11 हे यहोवा, अपन रसता मोला देखा, ताकि मेंह तोर बिसवासयोग्यता ऊपर भरोसा करंव; मोला न भटकनेवाला मन दे, ताकि मेंह तोर नांव के भय मानंव।
PSA 86:12 हे परभू मोर परमेसर, मेंह अपन पूरा मन से तोर परसंसा करहूं; मेंह तोर नांव के महिमा हमेसा करहूं।
PSA 86:13 काबरकि तेंह मोला अब्बड़ मया करथस; तेंह मोला गहरई ले, मिरतू-लोक ले बचाय हस।
PSA 86:14 हे परमेसर, घमंडी बिरोधीमन मोर ऊपर हमला करत हें; निरदयी मनखेमन मोला मार डारे के कोसिस करत हें— ओमन के मन म तोर बर कोनो आदर नइं ए।
PSA 86:15 पर हे परभू, तेंह दयालु अऊ अनुग्रहकारी परमेसर अस, देरी से कोप करइया अस, अऊ बहुंत मया अऊ बिसवासयोग्यता ले भरे हस।
PSA 86:16 मोर कोति देख अऊ मोर ऊपर दया कर; अपन सेवक कोति ले अपन ताकत ला देखा; मोर उद्धार कर, काबरकि मेंह तोर सेवा करथंव जइसे कि मोर दाई घलो करिस।
PSA 86:17 अपन भलई के कोनो चिनहां देखा, ताकि मोर बईरीमन ओला देखें अऊ सरमिंदा होवंय, काबरकि हे यहोवा, तेंह मोर मदद करे हस अऊ मोला सांति दे हस।
PSA 87:1 कोरह के बेटामन के एक भजन। एक गीत। ओह पबितर पहाड़ म अपन सहर के नीव डारे हवय।
PSA 87:2 यहोवा ह सियोन के दुवारमन ला याकूब के आने जम्मो निवासमन ले जादा मया करथे।
PSA 87:3 हे परमेसर के सहर, तोर बारे म महिमामय बात कहे जाथे:
PSA 87:4 “जऊन मन मोला मानथें, ओमन के बीच मेंह राहाब अऊ बेबिलोन के बात ला लिखहूं— पलिस्ती, अऊ सूर के संग कूस के बात ला घलो लिखहूं— अऊ मेंह कहिहूं, ‘येह सियोन म जनमे रिहिस।’ ”
PSA 87:5 वास्तव म, सियोन के बारे म ये कहे जाही, “येह अऊ ओह ओमा जनमे रिहिन, अऊ सर्वोच्च परमेसर ह खुद ओला स्थापित करही।”
PSA 87:6 यहोवा ह मनखेमन के लेखा म लिखही: “येह सियोन म जनमे रिहिस।”
PSA 87:7 बाजा बजाके ओमन गाहीं, “मोर पानी के जम्मो सोतामन तोर म ले निकलथें।”
PSA 88:1 एक गीत। कोरह के बेटामन के एक भजन। संगीत के निरदेसक बर। महलत लीनत के मुताबिक। एजरा के बंस के हेमान के एक मसकील। हे यहोवा, तेंह ओ परमेसर अस, जऊन ह मोर उद्धार करथे; रात अऊ दिन मेंह तोला पुकारथंव।
PSA 88:2 मोर पराथना ह तोर करा हबरे; मोर पुकार कोति अपन कान ला लगा।
PSA 88:3 मेंह बहुंत समस्या म पड़े हंव अऊ मोर परान ह मिरतू के लकठा म हवय।
PSA 88:4 मोर गनती ओमन म होवथे, जऊन मन कबर म जावथें; मेंह एक निरबल मनखे सहीं हो गे हवंव।
PSA 88:5 मोला मरे मनखेमन के संग अलग रखे जावथे, जइसे कि मारे गय मनखेमन कबर म पड़े रहिथें, जेमन ला तेंह फेर सुरता नइं करस, जेमन के तेंह देखरेख नइं करस।
PSA 88:6 तेंह मोला सबले खाल्हे के खंचवा, सबले जादा अंधियार वाले गहरई म रखे हस।
PSA 88:7 तोर कोप ह मोर ऊपर बहुंत भड़के हवय; तेंह मोला अपन जम्मो लहरामन ले बियाकुल कर दे हस।
PSA 88:8 तेंह मोर सबले घनिस्ट संगीमन ला मोर ले दूरिहा कर दे हस अऊ ओमन बर मोला घिनौना बना दे हस। मेंह कैद हो गे हंव अऊ भाग नइं सकंव;
PSA 88:9 मोर आंखीमन दुख के मारे धुंधला गे हवंय। हे यहोवा, मेंह तोला हर दिन पुकारथंव; मेंह तोर कोति अपन हांथ पसारथंव।
PSA 88:10 का मरे मनखेमन ला तेंह अपन अद्भूत काम देखाथस? का ओमन मरे म ले फेर जी जाथें अऊ तोर परसंसा करथें?
PSA 88:11 का कबर म तोर मया के, अऊ बिनास म तोर बिसवासयोग्यता के घोसना करे जाथे?
PSA 88:12 का तोर अद्भूत काम अंधियार के जगह, या तोर धरमी काम अपमान के जगह म जाने जाथे?
PSA 88:13 पर हे यहोवा, मेंह तोला मदद बर पुकारथंव; बिहनियां मोर पराथना ह तोर करा हबरथे।
PSA 88:14 हे यहोवा, तेंह काबर मोला छोंड़ देथस अऊ काबर अपन मुहूं ला मोर ले छुपा लेथस?
PSA 88:15 मेंह अपन जवानी के समय ले दुख भोगे हंव अऊ मिरतू के लकठा म रहे हंव; मेंह तोर आतंक ला सहे हंव अऊ मेंह निरास हंव।
PSA 88:16 तोर कोप ह मोर ऊपर छा गे हवय; तोर आतंक ह मोला नास कर दे हवय।
PSA 88:17 दिन भर ओमन बाढ़ के पानी सहीं मोर चारों कोति रहिथें; ओमन पूरा-पूरा मोला अपन म समा ले हवंय।
PSA 88:18 तेंह मोर ले मोर संगी अऊ परोसीमन ला लेय ले हस— अंधियार ह मोर सबले नजदीकी संगी अय।
PSA 89:1 एजरा के बंस के एतान के एक मसकील। मेंह यहोवा के बड़े मया के हमेसा गीत गाहूं; मेंह पीढ़ी-पीढ़ी तक तोर बिसवासयोग्यता के बखान अपन मुहूं ले करहूं।
PSA 89:2 मेंह घोसना करहूं कि तोर मया ह हमेसा अटल बने रहिथे, तेंह स्वरग म अपन बिसवासयोग्यता ला इस्थिर करे हस।
PSA 89:3 तेंह कहय, “मेंह अपन चुने जन के संग एक करार करे हंव, मेंह अपन सेवक दाऊद ले कसम खाय हंव,
PSA 89:4 ‘मेंह तोर बंस ला हमेसा बर स्थापित करहूं अऊ पीढ़ी-पीढ़ी तक तोर सिंघासन ला अटल बनाय रखहूं।’ ”
PSA 89:5 हे यहोवा, स्वरग म तोर अद्भूत काम के, अऊ पबितर मनखेमन के सभा म तोर बिसवासयोग्यता के परसंसा होथे।
PSA 89:6 काबरकि ऊपर अकास-मंडल म कोन हवय, जेकर तुलना यहोवा ले करे जा सकथे? स्वरगीय जीवमन के बीच म यहोवा के सहीं कोन हवय?
PSA 89:7 पबितर मनखेमन के परिसद म परमेसर के बहुंत भय माने जाथे; ओह अपन चारों कोति रहइया जम्मो झन ले जादा अद्भूत ए।
PSA 89:8 हे यहोवा, सर्वसक्तिमान परमेसर, तोर सहीं कोन हवय? हे यहोवा, तेंह सक्तिसाली अस, अऊ तोर बिसवासयोग्यता तोर चारों कोति रहिथे।
PSA 89:9 उमड़त समुंदर ऊपर तेंह सासन करथस; जब येकर लहरामन उठथें, त तेंह ओमन ला सांत करथस।
PSA 89:10 तेंह राहाब ला मारे गय मनखे सहीं कुचर डारय; अपन सक्तिसाली हांथ ले तेंह बईरीमन ला तितिर-बितिर कर दे हस।
PSA 89:11 स्वरगमन तोर अंय, अऊ धरती घलो तोर अय; संसार अऊ येमा के जम्मो चीज के नीव तेंह रखे हस।
PSA 89:12 उत्तर अऊ दक्खिन ला तेंह बनाय हस; ताबोर अऊ हेरमोन पहाड़ तोर नांव के आनंद के गीत गाथें।
PSA 89:13 तोर बाहां म सक्ति हवय; तोर हांथ ह मजबूत हवय, तोर जेवनी हांथ परबल हे।
PSA 89:14 धरमीपन अऊ नियाय तोर सिंघासन के नीव अंय; मया अऊ बिसवासयोग्यता तोर आघू-आघू चलथें।
PSA 89:15 हे यहोवा, धइन अंय ओमन, जऊन मन तोर जय-जयकार करई सीख गे हवंय, जऊन मन तोर उपस्थिति के अंजोर म चलथें।
PSA 89:16 ओमन दिन भर तोर नांव म आनंद मनाथें; ओमन तोर धरमीपन के आनंद मनाथें।
PSA 89:17 काबरकि तेंह ओमन के महिमा अऊ बल अस, अऊ अपन खुसी ले हमर सींग ला ऊपर उठाथस।
PSA 89:18 वास्तव म, हमर ढाल ह यहोवा के अय, हमर राजा ह इसरायल के पबितर परमेसर के अय।
PSA 89:19 एक बार तें एक दरसन म गोठियाय, अपन बिसवासयोग्य मनखेमन ला तेंह कहय: “मेंह एक योद्धा ला बल दे हवंव; मेंह मनखेमन के बीच ले एक जवान ला खड़े करे हवंव।
PSA 89:20 मोला मोर सेवक दाऊद मिल गे हवय; अपन पबितर तेल ले मेंह ओकर अभिसेक करे हवंव।
PSA 89:21 मोर हांथ ह ओला बनाय रखही; खचित मोर बाहां ह ओला बलवान बनाही।
PSA 89:22 बईरी ह ओला तंग नइं कर सकही; दुस्ट ह ओला दुख नइं देय सकही।
PSA 89:23 मेंह ओकर बिरोधीमन ला ओकर आघू म कुचर दूहूं अऊ ओकर बईरीमन ला मार डारहूं।
PSA 89:24 मोर न टूटनेवाला मया ओकर संग रहिही, अऊ मोर नांव के जरिये ओकर सींग ह ऊपर होही।
PSA 89:25 मेंह समुंदर के ऊपर ओकर हांथ, अऊ नदीमन के ऊपर ओकर जेवनी हांथ ला रखहूं।
PSA 89:26 ओह मोला पुकारके कहिही, ‘तेंह मोर ददा, मोर परमेसर, मोर उद्धारकर्ता चट्टान अस।’
PSA 89:27 मेंह ओला मोर पहिलांत होय बर ठहिराहूं, ओह धरती के राजामन म सबले ऊपर होही।
PSA 89:28 मेंह अपन मया ओकर ऊपर हमेसा बनाय रखहूं, अऊ ओकर संग मोर करार ह कभू नइं टूटही।
PSA 89:29 मेंह ओकर बंस ला हमेसा बर स्थापित करहूं, अऊ जब तक स्वरग हवय, तब तक ओकर सिंघासन बने रहिही।
PSA 89:30 “कहूं ओकर बेटामन मोर कानून ला तियाग देथें अऊ मोर बिधि-बिधान म नइं चलंय,
PSA 89:31 कहूं ओमन मोर नियम ला टोरथें, अऊ मोर हुकूममन ला नइं मानंय,
PSA 89:32 त मेंह ओमन के पाप के दंड सोंटी ले, अऊ ओमन के दुस्टता के दंड कोर्रा ले दूहूं;
PSA 89:33 पर मेंह अपन मया ला ओकर ऊपर ले नइं हटाहूं, अऊ न ही कभू मेंह अपन बिसवासयोग्यता ला छोंड़हूं।
PSA 89:34 मेंह अपन करार ला नइं टोरहूं या अपन कहे बात ला नइं बदलहूं।
PSA 89:35 जम्मो के सेति एक बार, मेंह अपन पबितरता के सपथ खाय हंव— अऊ मेंह दाऊद ले लबारी नइं मारंव—
PSA 89:36 कि ओकर बंस हमेसा चलते रहिही अऊ ओकर सिंघासन ह सूरज के सहीं मोर आघू म बने रहिही;
PSA 89:37 येला अकास म बिसवासयोग्य गवाह के रूप म चंदा के सहीं हमेसा बर स्थापित करे जाही।”
PSA 89:38 पर तेंह छोंड़ दे हस, तेंह तिरस्कार करे हस, अपन अभिसिक्त जन ऊपर तेंह बहुंत गुस्सा करे हस।
PSA 89:39 तेंह अपन सेवक के संग करे करार ला तियाग दे हस अऊ ओकर मुकुट ला धुर्रा म असुध कर दे हस।
PSA 89:40 तेंह ओकर जम्मो दीवार ला गिरा दे हस अऊ ओकर गढ़मन ला खंडहर बना दे हस।
PSA 89:41 ओ जम्मो, जऊन मन उहां ले होके जाथें, ओमन ओला लूट ले हवंय; ओह अपन परोसीमन बर अपमान के चीज बन गे हवय।
PSA 89:42 तेंह ओकर बईरीमन के जेवनी हांथ ला उठाय हस; तेंह ओकर जम्मो बईरीमन ला आनंदित करे हस।
PSA 89:43 वास्तव म, तेंह ओकर तलवार के धार ला मोड़ दे हस अऊ ओकर लड़ई म ओकर मदद नइं करे हस।
PSA 89:44 तेंह ओकर सोभा के अन्त कर दे हस अऊ ओकर सिंघासन ला भुइयां म गिरा दे हस।
PSA 89:45 तेंह ओकर जवानी के दिन ला कम कर दे हस; तेंह ओला लज्जा के ओढ़नी ले ढांप दे हस।
PSA 89:46 हे यहोवा, कब तक? का तेंह हमेसा बर अपनआप ला छिपा लेबे? तोर कोप ह कब तक आगी सहीं बरत रहिही?
PSA 89:47 सुरता कर, मोर जिनगी ह कतेक चंचल ए। का बेकार म तेंह जम्मो मानव-जाति ला सिरजे हस!
PSA 89:48 अइसने कोन हे, जऊन ह जीयथे अऊ मिरतू ला नइं देखही, या कोन ह कबर के सक्ति ले बच सकथे?
PSA 89:49 हे परभू, तोर पहिले के ओ बड़े मया कहां हवय, जेकर संग अपन बिसवासयोग्यता म, तेंह दाऊद ले सपथ खाय रहय?
PSA 89:50 हे परभू, सुरता कर, तोर सेवक के कइसे हंसी उड़ाय गे हवय, मेंह कइसे जम्मो आनजातमन के ताना ला अपन मन म सहत हंव,
PSA 89:51 हे यहोवा, ओ ताना जेकर दुवारा तोर बईरीमन हंसी उड़ाय हवंय, जेकर दुवारा ओमन तोर अभिसिक्त जन के हर कदम म हंसी उड़ाय हवंय।
PSA 89:52 यहोवा के परसंसा सदा-सर्वदा होवत रहय!
PSA 90:1 परमेसर के जन मूसा के एक पराथना। हे परभू, पीढ़ी-पीढ़ी ले तेंह हमर निवास स्थान बने हस।
PSA 90:2 येकर पहिले कि पहाड़मन बनिन या तेंह जम्मो संसार के रचना करय, अनादि ले अनंतकाल तक तेंहीच ह परमेसर अस।
PSA 90:3 तेंह मनखेमन ला ये कहिके वापिस धुर्रा म मिला देथस, “हे मरनहार मनखेमन, धुर्रा म लहुंट जावव।”
PSA 90:4 तोर नजर म हजार साल ह अइसन ए जइसन कि एक दिन, जऊन ह अभी-अभी बीते हवय, या रथिया के एक पहर।
PSA 90:5 तभो ले तेंह मनखेमन ला मिरतू के नींद म बहा ले जाथस— ओमन बिहनियां के नवां कांदी सहीं अंय:
PSA 90:6 जऊन ह बिहनियां निकलथे, पर सांझ के येह सूखके मुरझा जाथे।
PSA 90:7 हमन ला तोर गुस्सा ह खा जाथे अऊ तोर कोरोध ह हमन ला भयभीत करथे।
PSA 90:8 तेंह हमर दुस्टता ला अपन आघू म, अऊ हमर गुपत म करे पाप ला अपन अंजोर म रखे हस।
PSA 90:9 हमर जिनगी के जम्मो दिनमन तोर कोप सहत बीत जाथें; हमर सालमन बिलाप करत बीतथें।
PSA 90:10 यदि हमर देहें म बल हवय, त हमन सत्तर या अस्सी साल जीथन; तभो ले हमन जादा समय समस्या अऊ दुख म पड़े रहिथन, काबरकि ये समय ह जल्दी बीत जाथे, अऊ हमन खतम हो जाथन।
PSA 90:11 कहूं हमन सिरिप तोर कोरोध के सक्ति ला जानतेंन! तोर कोप ह ओ भय के सहीं बड़े अय, जऊन ह मनखेमन के मन म तोर बर होथे।
PSA 90:12 हमर दिनमन ला हमन ला गने बर सिखा, कि हमन बुद्धिमान हो जावन।
PSA 90:13 हे यहोवा, नरम हो जा! येह कब तक होही? अपन सेवकमन ऊपर दया कर।
PSA 90:14 बिहनियां के बेरा, अपन बड़े मया ले हमन ला संतोस कर, कि हमन जिनगी भर आनंद अऊ खुसी के गीत गावन।
PSA 90:15 जतेक दिन तक तेंह हमन ला दुख दे हस, जतेक साल तक हमन समस्या म पड़े रहेंन, ओतेक समय तक हमन ला खुसी दे।
PSA 90:16 तोर काममन तोर सेवकमन ला, अऊ तोर सोभा ह ओमन के लइकामन ऊपर दिखय।
PSA 90:17 परभू हमर परमेसर के अनुग्रह हमर ऊपर बने रहय; हमर बर हमर हांथ के काम ला बनाय रख— हव, हमर हांथ के काम ला बनाय रख।
PSA 91:1 जऊन ह सर्वोच्च परमेसर के सरन म रहिही, ओह सर्वसक्तिमान के छइहां म अराम करही।
PSA 91:2 मेंह यहोवा के बारे म कहिहूं, “ओह मोर सरन-स्थान अऊ मोर गढ़ अय। मोर परमेसर, जेकर ऊपर मेंह भरोसा करथंव।”
PSA 91:3 खचित ओह तोला चिड़ीमार के फंदा अऊ घातक महामारी ले बचाही।
PSA 91:4 ओह अपन पांखी के खाल्हे म तोला ढांप लीही, अऊ ओकर डेनामन के खाल्हे म तोला सरन मिलही; ओकर बिसवासयोग्यता ह तोर ढाल अऊ झिलम होही।
PSA 91:5 रथिया के आतंक ले तोला डर नइं होही, न ही ओ तीर ले डरबे, जेला दिनमान छोंड़े जाथे,
PSA 91:6 न ही ओ महामारी ले, जऊन ह छिपके पीछा करथे, न ही ओ महारोग ले, जऊन ह दिन-दुपहरी म नास करथे।
PSA 91:7 तोर बाजू म एक हजार, अऊ जेवनी हांथ कोति दस हजार गिर सकथें, पर येह तोर लकठा म नइं आही।
PSA 91:8 तेंह अपन आंखी ले सिरिप देखत रहिबे अऊ दुस्टमन के दंड ला देखबे।
PSA 91:9 कहूं तेंह कहिथस, “यहोवा ह मोर सरन-स्थान ए,” अऊ तेंह सर्वोच्च परमेसर ला अपन निवास बनाथस,
PSA 91:10 त तोला कोनो हानि नइं होही, अऊ तोर डेरा के लकठा म कोनो बिपत्ति नइं आही।
PSA 91:11 काबरकि ओह तोर बारे म अपन स्वरगदूतमन ला हुकूम दीही कि ओमन हर काम म तोर रकछा करंय;
PSA 91:12 ओमन तोला अपन हांथ म उठा लीहीं, ताकि तोर गोड़ म पथरा ले चोट झन लगय।
PSA 91:13 तेंह सिंह अऊ नाग सांप ला गोड़ ले कुचरबे; तेंह बड़े सिंह अऊ बड़े सांप ला कुचरबे।
PSA 91:14 यहोवा ह कहिथे, “काबरकि ओह मोर ले मया करथे, मेंह ओला छोंड़ाहूं; मेंह ओला बचाहूं, काबरकि ओह मोर नांव ला मानथे।
PSA 91:15 ओह मोला पुकारही, अऊ मेंह ओला जबाब दूहूं; संकट के बेरा म मेंह ओकर संग रहिहूं, मेंह ओला छोंड़ाहूं अऊ ओला आदर दूहूं।
PSA 91:16 बहुंत उमर देके ओकर मन ला मेंह संतोस करहूं अऊ ओला अपन उद्धार के दरसन कराहूं।”
PSA 92:1 एक भजन। बिसराम दिन बर एक गीत। यहोवा के परसंसा करई अऊ हे सर्वोच्च परमेसर, तोर नांव म बाजा बजई बने बात ए,
PSA 92:2 बिहनियां तोर मया अऊ रथिया तोर बिसवासयोग्यता के घोसना करई,
PSA 92:3 दस तारवाला बाजा अऊ बीना के सुघर राग बजई बने बात ए।
PSA 92:4 काबरकि हे यहोवा, तेंह अपन काम के दुवारा मोला खुस कर देथस; तोर करे गय काम के कारन मेंह आनंद के गीत गाथंव।
PSA 92:5 हे यहोवा, तोर काममन कतेक बड़े हवंय, तोर बिचारमन कतेक गंभीर हवंय!
PSA 92:6 अगियानी मनखे येला नइं जानंय, मुरूखमन येला नइं समझंय,
PSA 92:7 हालाकि दुस्ट मनखे कांदी के सहीं निकलथें अऊ जम्मो दुस्ट काम करइयामन उन्नति करथें, पर ओमन हमेसा बर नास हो जाहीं।
PSA 92:8 पर हे यहोवा, तोर सदा-सर्वदा बड़ई होथे।
PSA 92:9 काबरकि हे यहोवा, खचित तोर बईरीमन, खचित तोर बईरीमन नास हो जाहीं; जम्मो दुस्ट काम करइयामन तितिर-बितिर हो जाहीं।
PSA 92:10 तेंह मोर सींग ला जंगली सांड़ के सहीं ऊंच करे हस; सुघर तेल ह मोर ऊपर रितोय गे हवय।
PSA 92:11 मोर आंखी ह मोर बईरीमन के पराजय ला देखे हवय, मोर कान ह मोर दुस्ट बईरीमन के कोलाहल ला सुने हवय।
PSA 92:12 धरमी मनखे ह खजूर के रूख सहीं फूलही-फरही, ओमन लबानोन के देवदार सहीं बढ़हीं;
PSA 92:13 यहोवा के घर म रोपे जाके, ओमन हमर परमेसर के अंगना म फूलहीं-फरहीं।
PSA 92:14 ओमन बहुंत उमर होय के बाद घलो फर दीहीं, ओमन तरो-ताजा अऊ हरियर रहिहीं,
PSA 92:15 अऊ ये घोसना करहीं, “यहोवा ह नियायी अय; ओह मोर चट्टान ए, अऊ ओमा कोनो दुस्टता नइं ए।”
PSA 93:1 यहोवा ह राज करथे, ओह वैभव के कपड़ा पहिरे हवय; यहोवा ह वैभव के कपड़ा पहिरे हवय अऊ ताकत ले भरे हवय; वास्तव म, संसार ला इस्थिर अऊ सुरकछित बनाय गे हवय।
PSA 93:2 तोर सिंघासन ला अनादिकाल ले स्थापित करे गीस; तेंह अनंतकाल ले हस।
PSA 93:3 हे यहोवा, समुंदर के पानी उठे हवय, समुंदर के अवाज ह उठे हवय, समुंदर के भयंकर लहरामन उठे हवंय।
PSA 93:4 पानी के बड़े लहरामन के गरजन ले घलो सक्तिसाली, समुंदर के बड़े लहरामन ले घलो सक्तिसाली— ऊंचहा जगह म बिराजमान यहोवा ह सक्तिसाली ए।
PSA 93:5 हे यहोवा, तोर बिधिमन इस्थिर बने रहिथें, पबितरता ह तोर घर ला जुग-जुग तक सजाय रहिथे।
PSA 94:1 यहोवा ह बदला लेवइया परमेसर ए। हे बदला लेवइया परमेसर, अपन चमक ला देखा।
PSA 94:2 हे धरती के नियाय करइया, उठ; घमंडीमन ले ओमन के काम के मुताबिक बदला ले।
PSA 94:3 हे यहोवा, दुस्टमन कब तक, ओमन कब तक आनंद मनात रहिहीं?
PSA 94:4 ओमन हमेसा घमंड के बात करत रहिथें; दुस्ट काम करइया जम्मो झन घमंड ले भरे हवंय।
PSA 94:5 हे यहोवा, ओमन तोर मनखेमन ला कुचरथें; ओमन तोर निज भाग के मनखेमन ला सतात हवंय।
PSA 94:6 ओमन बिधवा अऊ परदेसी ला मार डारथें; ओमन अनाथमन ला मार डारथें।
PSA 94:7 ओमन कहिथें, “यहोवा ह नइं देखय; याकूब के परमेसर ह धियान नइं देवय।”
PSA 94:8 हे मनखेमन के बीच निरबुद्धि मनखेमन, तुमन धियान देवव; हे मुरूख मनखेमन, तुमन कब बुद्धिमान बनहू?
PSA 94:9 जऊन ह कान ला बनाईस, का ओह खुद नइं सुनय? जऊन ह आंखी ला बनाईस, का ओह खुद नइं देखय?
PSA 94:10 जऊन ह जाति-जाति के मनखेमन के ताड़ना करथे, का ओह दंड नइं देवय? जऊन ह मानव-जाति ला सिखाथे, का ओकर करा गियान के कमी हवय?
PSA 94:11 यहोवा ह मनखेमन के जम्मो योजना ला जानथे; ओह जानथे कि ओमन बेकार अंय।
PSA 94:12 हे यहोवा, धइन अय ओ, जेकर तेंह ताड़ना करथस, जेला तेंह अपन कानून के बात सिखाथस;
PSA 94:13 समस्या के समय म तेंह ओमन ला तब तक मदद करत रहिथस, जब तक कि दुस्टमन बर खंचवा नइं कोड़े जावय।
PSA 94:14 काबरकि यहोवा ह अपन मनखेमन ला नइं तियागही; ओह अपन निज भाग ला कभू नइं छोंड़ही।
PSA 94:15 नियाय फेर धरमीपन के आधार म करे जाही, अऊ हिरदय के जम्मो सीधवा मनखेमन येकर पाछू चलहीं।
PSA 94:16 दुस्टमन के बिरोध म, मोर बर कोन ठाढ़ होही? दुस्ट काम करइयामन के बिरोध म, मोर कोति कोन होही?
PSA 94:17 यदि यहोवा ह मोर मदद नइं करे होतिस, त मेंह बहुंत जल्दी मिरतू के अधीन म रहितेंव।
PSA 94:18 जब मेंह कहेंव, “मोर गोड़ ह फिसलत हे,” त हे यहोवा, तोर अटूट मया ह मोला संभालिस।
PSA 94:19 जब भीतरे-भीतर मेंह बहुंत बियाकुल रहेंव, त तोर ढाढ़स ह मोला आनंदित करिस।
PSA 94:20 का कोनो दुस्ट सासक ह तोर संग संधि कर सकथे— एक अइसने सासक, जऊन ह अपन कानून के दुवारा दुख लानथे?
PSA 94:21 दुस्टमन धरमी जन के बिरूध एक संग जूरथें अऊ निरदोस ला मिरतू-दंड देथें।
PSA 94:22 पर यहोवा ह मोर गढ़ बन गे हवय, अऊ ओह मोर परमेसर, मोर चट्टान ए, जेमा मेंह सरन लेथंव।
PSA 94:23 ओह ओमन ले ओमन के पाप के बदला लीही अऊ ओमन के दुस्टता बर ओमन ला नास कर दीही; यहोवा हमर परमेसर ह ओमन ला नास करही।
PSA 95:1 आवव, हमन यहोवा बर आनंद के गीत गावन; हमन हमर उद्धार के चट्टान बर जोर से चिचियावन।
PSA 95:2 हमन ओकर आघू म धनबाद के संग आवन अऊ बाजा बजाके अऊ गीत गाके ओकर बहुंत परसंसा करन।
PSA 95:3 काबरकि यहोवा ह महान परमेसर ए, जम्मो देवतामन ऊपर महान राजा ए।
PSA 95:4 ओकर हांथ म धरती के गहरई हवय, अऊ पहाड़ के चोटीमन ओकर अंय।
PSA 95:5 समुंदर ह ओकर अय, काबरकि ओह येला बनाय हवय, अऊ ओकर हांथमन सूखा भुइयां ला रचे हवंय।
PSA 95:6 आवव, हमन मुड़ नवाके अराधना करन, हमन यहोवा हमर सिरजनहार के आघू म माड़ी टेकन;
PSA 95:7 काबरकि ओह हमर परमेसर ए अऊ हमन ओकर चरागन के मनखे अन, अऊ ओकर देखरेख म रहइया एक झुंड अन। यदि आज तुमन सिरिप ओकर ये अवाज ला सुनत हव,
PSA 95:8 “त अपन हिरदय ला कठोर झन करव, जइसे तुम्हर पुरखामन मरीबा म करे रिहिन, जइसे कि तुमन ओ दिन सुन्ना जगह के मस्सा म करे रहेव,
PSA 95:9 जिहां ओमन मोला परखिन; ओमन मोला जांचिन, हालाकि ओमन मोर काममन ला देखे रिहिन।
PSA 95:10 चालीस साल तक मेंह ओ पीढ़ी के मनखेमन ले नराज रहेंव; मेंह कहेंव, ‘येमन अइसे मनखे अंय, जेमन के मन ह एती-ओती होथे, अऊ ओमन मोर रसता ला नइं जानंय।’
PSA 95:11 एकरसेति मेंह कोरोध म कसम खाके कहेंव, ‘ओमन ओ ठऊर म कभू नइं जा सकहीं, जिहां मेंह ओमन ला अराम देवइया रहेंव।’ ”
PSA 96:1 यहोवा बर एक नवां गीत गावव; हे धरती के जम्मो मनखेमन, यहोवा बर गावव।
PSA 96:2 यहोवा बर गावव, ओकर नांव के परसंसा करव; ओकर उद्धार के सुसमाचार हर दिन सुनात रहव।
PSA 96:3 जाति-जाति के मनखेमन के बीच म ओकर महिमा के, अऊ जम्मो मनखेमन के बीच म ओकर अद्भूत काम के बखान करव।
PSA 96:4 काबरकि यहोवा ह महान अऊ अति परसंसा के योग्य अय; ओह जम्मो देवतामन ले जादा भय के योग्य अय।
PSA 96:5 काबरकि जाति-जाति के जम्मो देवतामन सिरिप मूरती अंय, पर यहोवा ह स्वरग ला बनाईस।
PSA 96:6 सोभा अऊ वैभव ओकर आघू म हवय; ताकत अऊ महिमा ओकर पबितर-स्थान म हवय।
PSA 96:7 हे जाति-जाति के जम्मो परिवारमन, यहोवा के बखान करव, यहोवा के महिमा अऊ बल के बखान करव।
PSA 96:8 यहोवा के नांव के मुताबिक ओकर बखान करव; भेंट लेके ओकर अंगना म आवव।
PSA 96:9 पबितरता ले सोभायमान होके यहोवा के अराधना करव; हे धरती के जम्मो मनखेमन, ओकर आघू म कांपव।
PSA 96:10 जाति-जाति के मनखेमन के बीच म कहव, “यहोवा ह सासन करथे।” संसार ला मजबूती से स्थापित करे गे हवय, येला हटाय नइं जा सकय; ओह समान रूप से मनखेमन के नियाय करही।
PSA 96:11 अकास ह आनंद मनावय, धरती ह खुस होवय; समुंदर अऊ ओमा के जम्मो चीजमन गरजंय।
PSA 96:12 भुइयां अऊ ओमा के हर एक चीज बहुंत आनंदित होवंय; जंगल के जम्मो रूखमन आनंदित होके गीत गावंय।
PSA 96:13 पूरा सिरिस्टी ह यहोवा के आघू म आनंद मनावय, काबरकि ओह आवथे, ओह धरती के नियाय करे बर आवथे। ओह धरमीपन ले संसार के अऊ अपन बिसवासयोग्यता से मनखेमन के नियाय करही।
PSA 97:1 यहोवा ह सासन करथे, धरती ह खुस होवय; दूरिहा-दूरिहा के समुंदर-तटमन आनंद मनावंय।
PSA 97:2 बादर अऊ गहिरा अंधियार ओकर चारों कोति हवय; धरमीपन अऊ नियाय ओकर सिंघासन के नीव अंय।
PSA 97:3 आगी ह ओकर आघू-आघू जाथे अऊ ओकर बईरीमन ला चारों कोति ले भसम कर देथे।
PSA 97:4 ओकर बिजली ह संसार ला अंजोर कर देथे; धरती ह येला देखके कांपथे।
PSA 97:5 पहाड़मन यहोवा के आघू म याने कि जम्मो धरती के परभू के आघू म मोम के सहीं टघल जाथें।
PSA 97:6 अकास ह ओकर धरमीपन के बखान करथे, अऊ जम्मो मनखेमन ओकर महिमा ला देखथें।
PSA 97:7 ओ जम्मो, जऊन मन बेकार के देवतामन के अराधना करथें, अऊ जऊन मन मूरतीमन ऊपर घमंड करथें, ओमन लज्जा म पड़थें; हे जम्मो देवतामन, परमेसर के अराधना करव!
PSA 97:8 हे यहोवा, तोर नियाय के बात ला सुनके सियोन ह आनंदित होथे अऊ यहूदा के गांवमन खुस होथें।
PSA 97:9 काबरकि हे यहोवा, तेंह जम्मो धरती के ऊपर सर्वोच्च परमेसर अस; तेंह जम्मो देवतामन ले बहुंत ऊपर उठाय गे हस।
PSA 97:10 जऊन मन यहोवा ले मया करथें, ओमन बुरई ले घिन करंय, काबरकि ओह अपन बिसवासयोग्य जन के परान के रकछा करथे अऊ ओमन ला दुस्टमन के हांथ ले बचाथे।
PSA 97:11 अंजोर ह धरमी ऊपर चमकथे अऊ ईमानदार मनखे के हिरदय म आनंद रहिथे।
PSA 97:12 हे धरमी मनखेमन, यहोवा म आनंद मनावव, अऊ ओकर पबितर नांव के परसंसा करव।
PSA 98:1 एक भजन। यहोवा बर एक नवां गीत गावव, काबरकि ओह अद्भूत काम करे हवय; ओकर जेवनी हांथ अऊ ओकर पबितर बाहां ह ओकर बर उद्धार के काम करे हवय।
PSA 98:2 यहोवा ह जाति-जाति के मनखेमन ला अपन करे गय उद्धार ला बताय हवय अऊ ओमन ऊपर अपन धरमीपन ला परगट करे हवय।
PSA 98:3 ओह इसरायल बर अपन मया अऊ अपन बिसवासयोग्यता ला सुरता करे हवय; धरती के जम्मो छोर तक मनखेमन हमर परमेसर के करे गय उद्धार ला देखे हवंय।
PSA 98:4 हे धरती के जम्मो मनखेमन, यहोवा बर आनंद के मारे चिचियावव, बाजा बजाके आनंद के गीत जोर-जोर से गावव;
PSA 98:5 बीना बजाके यहोवा के इस्तुति करव, बीना बजाके गीत गावत ओकर इस्तुति करव,
PSA 98:6 तुरही अऊ नरसिंगा के ऊंचहा अवाज के संग यहोवा, हमर राजा के आघू म आनंद के मारे जय-जयकार करव।
PSA 98:7 समुंदर, अऊ येमा के जम्मो चीज, संसार, अऊ येमा रहइया जम्मो चीज जय-जयकार करंय।
PSA 98:8 नदीमन ताली बजावंय, पहाड़मन एक संग आनंद के गीत गावंय;
PSA 98:9 ओमन ला यहोवा के आघू म गावन दव, काबरकि ओह धरती के नियाय करे बर आथे। ओह संसार के नियाय धरमीपन के संग अऊ मनखेमन के नियाय बरोबरी के अधार म करही।
PSA 99:1 यहोवा ह सासन करथे, देस-देस के मनखेमन कांपंय; ओह करूबमन के बीच सिंघासन म बिराजमान होथे, धरती ह डोलय।
PSA 99:2 सियोन म यहोवा ह महान ए; ओह जम्मो देसमन के ऊपर उठाय गे हवय।
PSA 99:3 ओमन तोर महान अऊ अद्भूत नांव के परसंसा करंय— ओह पबितर अय।
PSA 99:4 राजा ह सक्तिसाली हवय, ओह नियाय ले मया करथे— तेंह समानता के इस्‍थापना करे हस; याकूब म तेंह ओ करे हस, जऊन ह नियाय-संगत अऊ सही अय।
PSA 99:5 यहोवा हमर परमेसर के बहुंत परसंसा करव अऊ ओकर पांव के चउकी करा अराधना करव; ओह पबितर ए।
PSA 99:6 मूसा अऊ हारून ओकर पुरोहितमन म रिहिन, समूएल ह ओमन के बीच म ले रिहिस, जऊन मन ओकर नांव लेवंय; ओमन यहोवा ला पुकारंय अऊ ओह ओमन ला जबाब देवय।
PSA 99:7 ओह ओमन ले बादर के खंभा म ले बात करय; ओमन ओकर दिये गय नियम अऊ बिधिमन ला मानंय।
PSA 99:8 यहोवा हमर परमेसर, तेंह ओमन ला जबाब देय; इसरायल बर तेंह छेमा करइया परमेसर रहय, हालाकि तेंह ओमन के गलत काम बर दंड देय।
PSA 99:9 परभू हमर परमेसर के बहुंत परसंसा करव अऊ ओकर पबितर पहाड़ करा अराधना करव, काबरकि यहोवा हमर परमेसर ह पबितर ए।
PSA 100:1 धनबाद अऊ महिमा देय बर एक भजन। हे धरती के जम्मो मनखेमन, यहोवा बर आनंद के मारे चिचियावव।
PSA 100:2 खुस होके यहोवा के अराधना करव; आनंद के गीत गावत ओकर आघू म आवव।
PSA 100:3 ये बात ला जानव कि यहोवा ही परमेसर अय। ओही ह हमन ला बनाय हवय, अऊ हमन ओकरेच अन; हमन ओकर मनखे, ओकर चरागन के भेड़ अन।
PSA 100:4 धनबाद करत ओकर कपाट के भीतर अऊ परसंसा करत ओकर अंगना म जावव; ओला धनबाद देवव अऊ ओकर नांव के महिमा करव।
PSA 100:5 काबरकि यहोवा ह बने अय अऊ ओकर मया हमेसा बने रहिथे; ओकर बिसवासयोग्यता ह जम्मो पीढ़ी म बने रहिथे।
PSA 101:1 दाऊद के एक भजन। मेंह तोर मया अऊ नियाय के गीत गाहूं; हे यहोवा, मेंह तोर परसंसा के गीत गाहूं।
PSA 101:2 मेंह निरदोस जिनगी जीये बर धियान दूहूं— तेंह मोर करा कब आबे? मेंह निरदोस हिरदय से अपन घर के मामला म बेवहार करहूं।
PSA 101:3 मेंह कोनो दुस्ट काम बर मंजूरी नइं दूहूं। मेंह बिसवासहीन मनखेमन के काम ले घिन करथंव; अइसन काम ले मोर कोनो लेना-देना नइं होही।
PSA 101:4 जिद्दी सुभाव ले मेंह दूर रहिहूं; दुस्ट काम ले मोर कोनो लेना-देना नइं होही।
PSA 101:5 जऊन कोनो अपन परोसी के पाछू ओकर निन्दा करथे, मेंह ओला नास कर दूहूं; अहंकार ले भरे आंखीवाले अऊ घमंड ले भरे मनखे ला मेंह सहन नइं करहूं।
PSA 101:6 मोर आंखी ह देस म बिसवासयोग्य मनखेमन ऊपर लगे रहिही, ताकि ओमन मोर संग रहंय; जऊन ह निरदोस जिनगी जीथे, ओह मोर सेवा करही।
PSA 101:7 धोखाधड़ी करइया कोनो भी मनखे मोर घर म नइं रहिही; जऊन ह लबारी मारथे, ओह मोर आघू म ठाढ़ नइं हो सकही।
PSA 101:8 हर बिहनियां मेंह देस के जम्मो दुस्टमन ला नास कर दूहूं; यहोवा के सहर ले मेंह हर दुस्ट मनखे ला नास कर दूहूं।
PSA 102:1 एक दुखित मनखे के पराथना, जऊन ह कमजोर हो गे हवय अऊ यहोवा के आघू म खुलके अपन मन के दुख ला रखत हे। हे यहोवा, मोर पराथना ला सुन; मदद बर मोर गोहार ह तोर तक हबरय।
PSA 102:2 जब मेंह दुखित हंव, त अपन मुहूं ला मोर ले झन छिपा। अपन कान ला मोर कोति कर; जब मेंह पुकारंव, जल्दी से मोला जबाब दे।
PSA 102:3 काबरकि मोर जिनगी के समय ह धुआं के सहीं खतम होवत हे; मोर हाड़ामन दहकत अंगरा सहीं बरत हें।
PSA 102:4 मोर हिरदय म रोग लगे हे अऊ कांदी सहीं मुरझा गे हवय; मेंह अपन जेवन जे बर भुला जाथंव।
PSA 102:5 अपन पीरा म मेंह जोर-जोर से कलहरत हंव अऊ सूखके चमड़ी अऊ हाड़ा हो गे हवंव।
PSA 102:6 मेंह सुन्ना जगह के एक उल्लू अंव, खंडहर म रहइया एक उल्लू सहीं अंव।
PSA 102:7 मेंह पड़े-पड़े जागत रहिथंव; मेंह छानी म अकेला बईठे एक चिरई सहीं हो गे हवंव।
PSA 102:8 दिन भर मोर बईरीमन मोला ताना मारत रहिथें; जऊन मन मोला ताना मारथें, ओमन मोर नांव के उपयोग सराप दे बर करथें।
PSA 102:9 काबरकि राख ला मेंह खाना के रूप म खाथंव अऊ आंसू ला मिलाके पानी पीथंव
PSA 102:10 येह तोर बड़े कोप के कारन होय हवय, काबरकि तेंह मोला उठाके अलग फटिक दे हस।
PSA 102:11 मोर उमर ह संझा के ढरत छइहां के सहीं अय; मेंह कांदी के सहीं अइला जाथंव।
PSA 102:12 पर हे यहोवा, तेंह सदाकाल बर बिराजमान हस; तोर खियाती जम्मो पीढ़ी तक बने रहिथे।
PSA 102:13 तेंह उठबे अऊ सियोन ऊपर दया करबे, काबरकि येह ओकर ऊपर किरपा करे के समय ए; ठहिराय गे समय ह आ गे हवय।
PSA 102:14 काबरकि ओकर पथरामन तोर सेवकमन बर मयारू अंय; ओकर धुर्रा ला ही देखके ओमन के मन म दया के भाव आ जाथे।
PSA 102:15 जाति-जाति के मनखेमन यहोवा के नांव के भय मानहीं, धरती के जम्मो राजामन तोर महिमा के आघू म मुड़ नवाहीं।
PSA 102:16 काबरकि यहोवा ह सियोन ला फेर बनाही अऊ अपन महिमा म परगट होही।
PSA 102:17 ओह गरीब-लाचार के पराथना के जबाब दीही; ओह ओमन के बिनती ला तुछ नइं समझय।
PSA 102:18 येला अवइया पीढ़ी के मनखेमन बर लिखे जावय, ताकि ओ मनखे, जेमन अभी सिरजे नइं गे हवंय, ओमन यहोवा के इस्तुति करंय:
PSA 102:19 “यहोवा ह अपन ऊंच पबितर-स्थान ले खाल्हे देखिस, स्वरग ले ओह धरती ला देखिस,
PSA 102:20 ताकि कैदीमन के कलहरई ला सुनय अऊ मिरतू-दंड पाय मनखेमन ला छुड़ावय।”
PSA 102:21 ताकि जब देस-देस अऊ राज-राज के मनखेमन यहोवा के अराधना करे बर जूरंय,
PSA 102:22 त सियोन म यहोवा के नांव के घोसना अऊ यरूसलेम म ओकर परसंसा होवय।
PSA 102:23 मोर जिनगी के यातरा म, ओह मोर बल ला टोर दीस; ओह मोर उमर ला घटा दीस।
PSA 102:24 एकरसेति मेंह कहेंव: “हे मोर परमेसर, मोर जिनगी के बीच म ले मोला झन उठा ले; तोर जिनगी ह तो जम्मो पीढ़ी तक बने रहिथे।
PSA 102:25 सुरूआत म तेंह धरती के नीव रखे, अऊ अकास ह तोर हांथ के दुवारा बनाय गे हवय।
PSA 102:26 ओमन तो नास हो जाहीं, पर तेंह बने रहिबे; ओमन जम्मो पहिरे के कपड़ा के सहीं जुन्ना हो जाहीं। कपड़ा के सहीं तेंह ओमन ला बदल देबे अऊ ओमन तियाग दिये जाहीं।
PSA 102:27 पर तेंह वइसनेच के वइसने रहिथस, अऊ तोर उमर ह कभू खतम नइं होवय।
PSA 102:28 तोर सेवक के लइकामन तोर आघू म रहिहीं; ओमन के संतान तोर आघू म स्थापित करे जाहीं।”
PSA 103:1 दाऊद के भजन। हे मोर मन, यहोवा के परसंसा कर; अऊ जऊन कुछू मोर म हवय, ओकर पबितर नांव के परसंसा करय।
PSA 103:2 हे मोर मन, यहोवा के परसंसा कर, अऊ ओकर कोनो उपकार ला झन भुलाबे—
PSA 103:3 ओह तोर जम्मो पाप ला छेमा करथे अऊ तोर जम्मो बेमारी ला चंगा करथे,
PSA 103:4 ओह तोर जिनगी ला नास होय ले बचाथे अऊ तोला मया अऊ करूना के मुकुट पहिराथे,
PSA 103:5 ओह बने-बने चीज के दुवारा तोर ईछा ला पूरा करथे जेकर ले तोर जवानी ह गिधवा के जवानी सहीं नवां हो जाथे।
PSA 103:6 यहोवा ह जम्मो दुखी मनखेमन बर धरमीपन अऊ नियाय के काम करथे।
PSA 103:7 ओह मूसा ला अपन रसता अऊ इसरायल के मनखेमन ला अपन काम बताईस:
PSA 103:8 यहोवा ह दयालु अऊ अनुग्रहकारी, कोरोध करे म धीमा अऊ मया ले भरे हवय।
PSA 103:9 ओह हमेसा दोस नइं लगाही, न ही हमेसा बर गुस्सा करही;
PSA 103:10 ओह हमर पाप के मुताबिक हमर ले बरताव नइं करिस अऊ न ही हमर अधरम के मुताबिक हमर ले बदला लीस।
PSA 103:11 काबरकि अकास ह धरती ले जतेक ऊपर हे, ओतेक ही ओकर मया ह ओमन बर महान ए, जऊन मन ओकर भय मानथें;
PSA 103:12 पूरब ले पछिम ह जतेक दूरिहा हवय, ओह हमर अपराध ला ओतेक दूरिहा हमर ले कर दे हवय।
PSA 103:13 जइसे एक ददा ह अपन लइकामन ऊपर दया करथे, वइसे ही यहोवा ह ओमन ऊपर दया करथे, जऊन मन ओकर भय मानथें;
PSA 103:14 काबरकि ओह जानथे कि हमन कइसे बनाय जाथन, ओला सुरता रहिथे कि हमन धुर्रा अन।
PSA 103:15 मनखे के जिनगी ह कांदी सहीं होथे, ओमन खेत के फूल सहीं फूलथें;
PSA 103:16 अऊ जब ओकर ऊपर हवा चलथे, त ओह नइं ठहिरय, अऊ ओकर जगह ह ओला फेर सुरता नइं रखय।
PSA 103:17 पर अनंतकाल ले अनंतकाल तक यहोवा के मया ओकर भय मनइयामन ऊपर, अऊ ओकर धरमीपन ओमन के लइकामन के लइकामन ऊपर बने रहिथे—
PSA 103:18 याने कि ओमन ऊपर जऊन मन ओकर करार के पालन करथें अऊ ओकर नियम ला माने बर सुरता करथें।
PSA 103:19 यहोवा ह अपन सिंघासन ला स्वरग म स्थापित करे हवय, अऊ ओकर राज ह जम्मो सिरिस्टी ऊपर चलथे।
PSA 103:20 हे ओकर स्वरगदूतमन, यहोवा के परसंसा करव, तुमन, जऊन मन सक्तिसाली अव अऊ ओकर हुकूम ला मानथव, तुमन, जऊन मन ओकर बात ला मानथव।
PSA 103:21 हे ओकर जम्मो स्वरग के जीवमन, हे ओकर सेवकमन, तुमन जऊन मन ओकर ईछा ला पूरा करथव, यहोवा के परसंसा करव।
PSA 103:22 हे ओकर जम्मो सिरिस्टी, ओकर राज म हर जगह यहोवा के परसंसा करव। हे मोर मन, यहोवा के परसंसा कर।
PSA 104:1 हे मोर मन, यहोवा के परसंसा कर। हे यहोवा मोर परमेसर, तेंह बहुंत महान अस; तेंह सोभा अऊ गौरव के कपड़ा पहिरे हस।
PSA 104:2 यहोवा ह अपनआप ला एक कपड़ा के सहीं अंजोर ले लपेटे रहिथे; ओह अकास ला एक तम्बू के सहीं तानथे
PSA 104:3 अऊ अपन ऊपर के कमरा के मियारमन ला ओमन के पानी म रखथे। ओह बादर ला अपन रथ बनाथे अऊ हवा के डेना म सवारी करथे।
PSA 104:4 ओह हवा ला अपन संदेसिया अऊ आगी के जुवालामन ला अपन सेवक बनाथे।
PSA 104:5 ओह धरती ला ओकर नीव म इस्थिर करथे; येला कभू भी हटाय नइं जा सकय।
PSA 104:6 तेंह येला एक कपड़ा ढांपे सहीं गहिरा समुंदर ले ढांप दे हस; पानी ह पहाड़मन ले ऊपर ठहर गीस।
PSA 104:7 पर तोर डांटे ले पानी ह भाग गीस, तोर गरजन के अवाज ले ओमन उड़िया गीन;
PSA 104:8 ओमन पहाड़मन के ऊपर बहे लगिन, ओमन घाटीमन के खाल्हे म गीन, ओ जगह जेला तेंह ओमन बर ठहिराय रहय।
PSA 104:9 तेंह एक सीमना तय करय, जेला ओमन लांघ नइं सकंय; ओमन फेर कभू धरती ला नइं ढांपहीं।
PSA 104:10 तेंह घाटीमन ले पानी के धारा निकालथस; अऊ ये पानी के धारा पहाड़मन के बीच ले बहथे।
PSA 104:11 ओमन भुइयां के जम्मो पसुमन ला पानी देथें; जंगली गदहामन अपन पीयास बुझाथें।
PSA 104:12 अकास के चिरईमन पानी के तीर म अपन खोंधरा बनाथें; ओमन रूख के डारामन के बीच म गाथें।
PSA 104:13 ओह अपन ऊपरी कमरा ले पहाड़मन ऊपर पानी गिराथे; भुइयां ह ओकर काम के फर ले संतुस्ट होथे।
PSA 104:14 ओह पसुमन बर कांदी उगाथे, अऊ मनखेमन के लुए-काटे बर पऊधा लगाथे— जेकर से धरती ले जेवन के परबंध होथे:
PSA 104:15 अंगूर के मंद, जेह मनखे के मन ला खुसी देथे, तेल, जेकर से ओमन के चेहरा ह चमकथे, अऊ रोटी, जेह ओमन के जिनगी ला बनाय रखथे।
PSA 104:16 यहोवा के रूखमन ला याने कि ओकर लगाय लबानोन के देवदारमन ला बहुंत पानी मिलथे।
PSA 104:17 उहां चिरईमन अपन खोंधरा बनाथें; बगुला के घर सनोवर के रूख म होथे।
PSA 104:18 ऊंच पहाड़मन जंगली छेरीमन बर होथें; करारदार चट्टानमन बिज्जूमन के सरन-स्थान होथें।
PSA 104:19 ओह अलग-अलग मौसम ला बताय बर चंदा ला बनाईस, अऊ सूरज ह जानथे कि कब बुड़ना हे।
PSA 104:20 तेंह अंधियार लानथस, तब रथिया होथे, अऊ जम्मो जंगली जानवरमन चुपेचाप निकलथें।
PSA 104:21 सिंहमन अपन सिकार बर गरजथें अऊ परमेसर ले अपन आहार मांगथें।
PSA 104:22 सूरज ह निकलथे, अऊ ओमन चुपेचाप चले जाथें; ओमन लहुंटके अपन मांद म लेट जाथें।
PSA 104:23 तब मनखेमन अपन-अपन काम म, अऊ सांझ होवत तक मेहनत करे बर बाहिर निकलथें।
PSA 104:24 हे यहोवा, तोर काममन बहुंते हवंय! अपन बुद्धि ले तेंह ओ जम्मो ला बनाय; धरती ह तोर जीव-जन्तुमन ले भरे हवय।
PSA 104:25 समुंदर हवय, बहुंत बड़े अऊ लम्बा अऊ चौड़ा, गनती के बाहिर जीवमन ले भरे— छोटे अऊ बड़े दूनों जीयत चीजमन ले।
PSA 104:26 उहां पानी जहाजमन आथें-जाथें, अऊ लिबयातान, जेला तेंह उहां खेले बर बनाय हस।
PSA 104:27 जम्मो जीवमन तोर कोति ताकथें कि समय म ओमन ला ओमन के जेवन मिलय।
PSA 104:28 जब तेंह ओमन ला जेवन देथस, त ओमन येला इकट्ठा कर लेथें; जब तेंह अपन हांथ खोलथस, त ओमन बने चीजमन के दुवारा संतुस्ट होथें।
PSA 104:29 जब तेंह अपन मुहूं ला छिपा लेथस, त ओमन भयभीत हो जाथें; जब तेंह ओमन के सांस बंद कर देथस, त ओमन मर जाथें अऊ माटी म मिल जाथें।
PSA 104:30 जब तेंह अपन आतमा ला भेजथस, त ओमन बनाय जाथें, अऊ तेंह धरती के रूप ला पहिले सहीं कर देथस।
PSA 104:31 यहोवा के महिमा ह सदाकाल तक बने रहय; यहोवा ह अपन काम म आनंदित होवय—
PSA 104:32 जब ओह धरती ला देखथे, त धरती ह कांपथे, ओह पहाड़मन ला छूथे, त ओमन ले कुहरा निकलथे।
PSA 104:33 मेंह अपन जिनगी भर यहोवा के गीत गाहूं; जब तक मेंह जीयत हंव, मेंह अपन परमेसर के परसंसा के गीत गाहूं।
PSA 104:34 जइसे कि मेंह यहोवा म आनंदित रहिथंव, त मोर मनन-चिंतन ह ओला खुसी देवय।
PSA 104:35 पर पापीमन धरती ले मिट जावंय अऊ दुस्ट मनखेमन खतम हो जावंय। हे मोर मन, यहोवा के परसंसा कर। यहोवा के परसंसा कर।
PSA 105:1 यहोवा के परसंसा करव, ओकर नांव के घोसना करव; जाति-जाति के मनखेमन के बीच म ओकर करे गे काम ला बतावव।
PSA 105:2 ओकर गीत गावव, ओकर परसंसा के गीत गावव; ओकर जम्मो अद्भूत काम के बखान करव।
PSA 105:3 ओकर पबितर नांव के महिमा होवय; जऊन मन यहोवा के खोज करथें, ओमन के मन आनंदित होवय।
PSA 105:4 यहोवा अऊ ओकर बल के खोज म रहव; हमेसा ओकर दरसन के खोज म रहव।
PSA 105:5 ओकर करे गे अद्भूत काम, ओकर चमतकार, अऊ ओकर दिये गय नियाय ला सुरता करव,
PSA 105:6 हे ओकर सेवक, अब्राहम के संतानमन, हे ओकर चुने गय मनखे, याकूब के लइकामन।
PSA 105:7 ओह यहोवा हमर परमेसर ए; जम्मो धरती म ओकर नियाय हवय।
PSA 105:8 ओह अपन करे गे करार, हजार पीढ़ी के मनखेमन बर करे गे वायदा,
PSA 105:9 अब्राहम के संग करे गे करार, अऊ इसहाक के संग खाय गे सपथ ला सदाकाल बर सुरता रखथे।
PSA 105:10 ओह येला याकूब के संग एक बिधि के रूप म, इसरायल के संग हमेसा के एक करार के रूप म ये कहिके मजबूत करिस:
PSA 105:11 “तोला मेंह कनान देस दूहूं, एक निज भाग के रूप म तोला ओह मिलही।”
PSA 105:12 जब ओमन गनती म थोरकन ही रिहिन, वास्तव म थोरकन रिहिन, अऊ ओ देस म अजनबी रिहिन,
PSA 105:13 ओमन एक जाति ले आने जाति, अऊ एक राज ले दूसर राज म भटकत रिहिन।
PSA 105:14 त ओह कोनो ला ओमन ला सताय नइं दीस; ओमन के हित म, ओह राजामन ला दबकारिस:
PSA 105:15 “मोर अभिसिक्त मनखेमन ला झन छुवव; मोर अगमजानीमन के कुछू हानि झन करव।”
PSA 105:16 ओह ओ देस म अकाल लानिस अऊ ओमन के जम्मो भोजन के परबंध करई ला नास कर दीस;
PSA 105:17 अऊ ओह ओमन के आघू एक मनखे यूसुफ ला पठोईस, जेला एक गुलाम के रूप म बेच दिये गे रिहिस।
PSA 105:18 ओमन बेड़ी डालके ओकर गोड़ ला चोट पहुंचाईन, ओकर गरदन ला लोहा ले जकड़िन,
PSA 105:19 जब तक कि ओकर कहे गे बात पूरा नइं होईस, जब तक कि यहोवा के बचन ह ओकर बात ला सही साबित नइं करिस।
PSA 105:20 राजा ह मनखे पठोके ओला छोंड़ दीस, मनखेमन के सासक ह ओला मुक्त कर दीस।
PSA 105:21 ओह ओला अपन घर के परधान, अऊ अपन जम्मो चीज के ऊपर सासक बनाईस,
PSA 105:22 ताकि ओह ओकर हाकिममन ला अपन ईछा के मुताबिक हुकूम देवय अऊ ओकर अगुवामन ला बुद्धि के बात सिखावय।
PSA 105:23 तब इसरायल ह मिसर देस म आईस; याकूब ह हाम के देस म एक परदेसी के रूप म रहे लगिस।
PSA 105:24 यहोवा ह अपन मनखेमन ला गनती म बहुंत बढ़ाईस; ओह ओमन ला ओमन के बईरीमन बर गनती म बहुंत कर दीस,
PSA 105:25 ओह मिसरीमन के मन ला अइसे कर दीस कि ओमन ओकर मनखेमन ले घिन करे लगिन, अऊ ओकर सेवकमन के बिरूध सडयंत्र करे लगिन।
PSA 105:26 ओह अपन सेवक मूसा ला, अऊ हारून ला पठोईस, जेमन ला ओह चुने रिहिस।
PSA 105:27 ओमन मिसरीमन के बीच म ओकर अद्भूत चिनहां, अऊ हाम के देस म अद्भूत काम देखाईन।
PSA 105:28 ओह अंधियार पठोके देस ला अंधियार कर दीस काबरकि ओमन ओकर बचन के पालन नइं करिन।
PSA 105:29 ओह ओमन के पानी ला लहू म बदल दीस, जेकर से ओमन के मछरीमन मर गीन।
PSA 105:30 ओमन के देस ह मेचकामन ले भर गीस, अऊ ये मेचकामन ओमन के सासकमन के सोए के कमरामन तक चल दीन।
PSA 105:31 ओह हुकूम दीस अऊ ओमन के देस म उड़नेवाला कीरामन के दल, अऊ छोटे कीरामन आ गीन।
PSA 105:32 ओह ओमन के बारिस ला करा म बदल दीस, अऊ पूरा देस म बिजली चमके लगिस;
PSA 105:33 ओह ओमन के अंगूर के नार अऊ अंजीर के रूखमन ला गिरा दीस अऊ ओमन के देस के रूखमन ला चकनाचूर कर दीस।
PSA 105:34 ओह हुकूम दीस, अऊ फांफा, अऊ अनगिनत कीरामन आ गीन;
PSA 105:35 ओमन मिसरीमन के देस के जम्मो हरियर चीज, अऊ ओमन के भुइयां के ऊपज ला खा डारिन।
PSA 105:36 तब ओह ओमन के देस म जम्मो पहिलांत, ओमन के मरदानगी के जम्मो पहिला फर ला मार डारिस।
PSA 105:37 ओह सोन अऊ चांदी ले लादके इसरायल ला बाहिर निकाल ले आईस, अऊ ओमन के गोत्रमन ले कोनो नइं लड़खड़ाईन।
PSA 105:38 जब ओमन गीन, त मिसर देस के मनखेमन खुस होईन, काबरकि ओमन ऊपर इसरायल के भय छा गे रिहिस।
PSA 105:39 ओह ढकना के रूप म एक बादर ला फईला दीस, अऊ रथिया के बेरा अंजोर देय बर आगी दीस।
PSA 105:40 ओमन मांस के मांग करिन, अऊ ओह ओमन बर बटेर ले आईस; ओह ओमन ला स्वरग के रोटी पेट भरके खवाईस।
PSA 105:41 ओह चट्टान ला खोलके ओमा ले पानी बहाईस; अऊ येह निरजन भुइयां म नदी सहीं बहे लगिस।
PSA 105:42 काबरकि ओह अपन सेवक अब्राहम ला दिये गय पबितर परतिगियां ला सुरता करिस।
PSA 105:43 ओह अपन मनखेमन ला आनंद के संग, अपन चुने गय मनखेमन ला आनंद के जयकार के संग निकाल लानिस;
PSA 105:44 ओह जाति-जाति के मनखेमन के देस ओमन ला दे दीस, अऊ जेकर बर आने मन मेहनत करे रिहिन, ओकर ओमन उत्तराधिकारी हो गीन—
PSA 105:45 ताकि ओमन ओकर नियममन के पालन करंय अऊ ओकर कानून ला मानंय। यहोवा के परसंसा होवय।
PSA 106:1 यहोवा के परसंसा होवय। यहोवा ला धनबाद देवव, काबरकि ओह बने अय; ओकर मया हमेसा बने रहिथे।
PSA 106:2 कोन ह यहोवा के महान काममन के घोसना कर सकथे या कोन ह ओकर परसंसा के पूरा घोसना कर सकथे?
PSA 106:3 धइन अंय ओमन, जऊन मन नियाय के संग काम करथें, जऊन मन हमेसा ओ काम करथें, जऊन ह सही अय।
PSA 106:4 हे यहोवा, जब तेंह अपन मनखेमन ऊपर किरपा करथस, त मोला सुरता रखबे, जब तेंह ओमन के उद्धार करथस, त मोर मदद करबे,
PSA 106:5 ताकि मेंह तोर चुने गय मनखेमन के उन्नति के आनंद उठावंव, ताकि तोर मनखेमन के आनंद म भागी हो सकंव अऊ परसंसा देय म तोर निज भाग के संग सामिल हो सकंव।
PSA 106:6 हमन हमर पुरखामन सहीं पाप करे हन; हमन गलत काम करे हन अऊ दुस्टता करे हन।
PSA 106:7 जब हमर पुरखामन मिसर देस म रिहिन, तब ओमन तोर चमतकार के काम ऊपर धियान नइं दीन; ओमन तोर बहुंत दया के काममन ला सुरता नइं करिन, अऊ ओमन समुंदर, लाल-समुंदर के तीर म बिदरोह करिन।
PSA 106:8 तभो ले ओह अपन नांव के हित म ओमन ला बचाईस, अऊ अपन बहुंत सामर्थ ला देखाईस।
PSA 106:9 ओह लाल-समुंदर ला डांटिस, अऊ ओह सूख गीस; ओह ओमन ला निरजन जगह म ले जावत सहीं गहरई म ले लेय गीस।
PSA 106:10 ओह ओमन ला बिरोधीमन के हांथ ले बचाईस; अऊ ओमन ला बईरीमन के हांथ ले छुड़ाईस।
PSA 106:11 ओमन के बईरीमन पानी म बुड़ गीन; ओमा ले एको झन घलो नइं बांचिन।
PSA 106:12 तब ओमन ओकर परतिगियांमन ऊपर बिसवास करिन अऊ ओकर परसंसा के गीत गाईन।
PSA 106:13 पर ओमन बहुंत जल्दी ओकर काममन ला भुला गीन अऊ ओकर योजना ला जाने बर इंतजार नइं करिन।
PSA 106:14 निरजन जगह म ओमन अपन लालसा ला रखिन; सुन्ना जगह म ओमन परमेसर ला परखिन।
PSA 106:15 तब ओह ओमन के मांगे गय चीज ला दीस, पर ओमन के बीच म एक बिनास करइया बेमारी भेजिस।
PSA 106:16 डेरा म ओमन मूसा अऊ ओ हारून ले जलन करिन, जऊन ह यहोवा के दुवारा पबितर करे गे रिहिस।
PSA 106:17 धरती ह फटिस अऊ दातान ला लील लीस; येह अबीराम के दल ला दफना दीस।
PSA 106:18 आगी ह ओमन के पाछू चलइयामन के बीच गिरिस; आगी ह दुस्टमन ला भसम कर दीस।
PSA 106:19 होरेब पहाड़ म ओमन एक बछवा के मूरती बनाईन अऊ धातु ले गढ़े एक मूरती के अराधना करिन।
PSA 106:20 ओमन अपन महिमामय परमेसर के बदले एक ठन बईला के मूरती ला रखिन, जऊन ह कि घांस चरथे।
PSA 106:21 ओमन ओ परमेसर ला बिसरा दीन, जऊन ह ओमन ला बचाय रिहिस, जऊन ह मिसर देस म बड़े-बड़े काम करे रिहिस,
PSA 106:22 हाम के देस म चमतकार अऊ लाल-समुंदर के तीर म अद्भूत काम करे रिहिस।
PSA 106:23 एकरसेति परमेसर ह कहिस कि ओह ओमन ला नास कर दीही— का ओकर चुने जन मूसा ह ओकर कोप ला ठंडा करे बर अऊ ओमन ला नास होय ले बचाय बर ओकर आघू दरार म ठाढ़ नइं होईस।
PSA 106:24 तब ओमन मनभावन देस ला तुछ समझिन; ओमन ओकर परतिगियां ऊपर बिसवास नइं करिन।
PSA 106:25 ओमन अपन तम्बू म कुड़कुड़ाईन अऊ यहोवा के बात नइं मानिन।
PSA 106:26 एकरसेति ओह हांथ उठाके कसम खाईस कि ओह ओमन ला निरजन जगह म नास कर दीही,
PSA 106:27 ओमन के संतानमन ला जाति-जाति के मनखेमन के बीच म गिरा दीही अऊ ओमन ला देसमन म तितिर-बितिर कर दीही।
PSA 106:28 ओमन बाल-पेओर देवता ला माने लगिन अऊ निरजीव देवतामन ला चघाय गे बलिदानमन ला खाय लगिन;
PSA 106:29 ओमन अपन दुस्ट काममन के दुवारा यहोवा के कोरोध ला भड़काईन, अऊ ओमन के बीच म एक महामारी फईल गीस।
PSA 106:30 पर पीनहास ह ठाढ़ होईस अऊ ओमन बर बिनती करिस, अऊ महामारी ह खतम हो गीस।
PSA 106:31 येह ओकर बर अवइया पीढ़ी-पीढ़ी के मनखेमन बर धरमीपन गने गीस।
PSA 106:32 मरीबा के पानी के तीर म घलो ओमन यहोवा के कोरोध ला भड़काईन, अऊ ओमन के कारन मूसा ऊपर संकट आईस;
PSA 106:33 काबरकि ओमन परमेसर के आतमा के बिरूध बिदरोह करिन, अऊ उतावलापन के बात मूसा के मुहूं ले निकलिस।
PSA 106:34 जइसे कि यहोवा ह ओमन ला हुकूम दे रिहिस ओमन मनखेमन ला नास नइं करिन,
PSA 106:35 पर ओमन आने जाति के मनखेमन ले मिल गीन अऊ ओमन के रीति-रिवाज ला अपना लीन।
PSA 106:36 ओमन आने जाति के मूरतीमन के पूजा करिन, जऊन ह ओमन बर एक फांदा बन गीस।
PSA 106:37 ओमन अपन बेटा-बेटीमन ला झूठ-मूठ के देवतामन ला बलिदान करिन।
PSA 106:38 ओमन अपन निरदोस बेटा-बेटीमन के खून बहाईन, जेमन ला ओमन कनान के मूरतीमन म बलि चघाईन, अऊ ओमन के खून ले देस ह अपबितर हो गीस।
PSA 106:39 ओमन अपन काम के दुवारा अपनआप ला असुध करिन; अपन काम के दुवारा अपनआप ले बेभिचार करिन।
PSA 106:40 एकरसेति यहोवा ह अपन मनखेमन ले गुस्सा करिस अऊ अपन निज भाग ले घिन करे लगिस।
PSA 106:41 ओह ओमन ला आने जाति के मनखेमन के हांथ म कर दीस, अऊ ओमन के बईरीमन ओमन के ऊपर राज करिन।
PSA 106:42 ओमन के बईरीमन ओमन ऊपर अतियाचार करिन अऊ ओमन ला अपन अधिकार म कर लीन।
PSA 106:43 कतको बार परमेसर ह ओमन ला छोंड़ाईस, पर ओमन ओकर बिरूध बिदरोह करिन अऊ ओमन पाप म नास होवत गीन।
PSA 106:44 तभो ले ओह ओमन के संकट म ओमन ऊपर धियान दीस जब भी ओह ओमन के पुकार ला सुनिस;
PSA 106:45 ओमन के हित म ओह अपन करार ला सुरता करिस अऊ अपन बड़े मया के कारन ओह नरम पड़ गीस।
PSA 106:46 जऊन मन ओमन ला बंधुवा बनाय रिहिन, ओमन के मन म ओह ओमन बर दया पईदा करिस।
PSA 106:47 हे यहोवा हमर परमेसर, हमन ला बचा, अऊ हमन ला जाति-जाति के मनखेमन ले इकट्ठा कर, ताकि हमन तोर पबितर नांव ला धनबाद देवन अऊ तोर परसंसा म बड़ई करन।
PSA 106:48 यहोवा, इसरायल के परमेसर के परसंसा आदिकाल ले अनंतकाल तक होवय। जम्मो मनखेमन कहंय, “आमीन!” यहोवा के परसंसा होवय।
PSA 107:1 यहोवा ला धनबाद देवव, काबरकि ओह बने अय; ओकर मया हमेसा बने रहिथे।
PSA 107:2 यहोवा के दुवारा छोंड़ाय गय मनखेमन ये बात कहंय— जेमन ला ओह बईरीमन के हांथ ले छोंड़ाय हवय,
PSA 107:3 जेमन ला ओह देस-देस ले, पूरब अऊ पछिम ले, उत्तर अऊ दक्खिन ले इकट्ठा करे हवय।
PSA 107:4 कुछू झन निरजन प्रदेस के बेकार जगह म भटकिन, ओमन ला कोनो सहर जाय के रसता नइं मिलिस, जिहां ओमन बस जावंय।
PSA 107:5 ओमन भूखन अऊ पीयासन रिहिन, अऊ ओमन के जिनगी कम होवत गीस।
PSA 107:6 तब ओमन अपन संकट के बेरा म यहोवा ला पुकारिन, अऊ ओह ओमन ला ओमन के संकट ले बचाईस।
PSA 107:7 ओह ओमन ला एक सीधा रसता ले एक सहर म ले गीस जिहां ओमन रह सकंय।
PSA 107:8 ओमन यहोवा के अटूट मया अऊ मानव-जाति बर करे गे अद्भूत काम बर ओला धनबाद देवंय,
PSA 107:9 काबरकि ओह पीयासन के पीयास बुझाथे अऊ भूखन ला बने चीजमन ले संतोस करथे।
PSA 107:10 कुछू मन अंधियार, घोर अंधियार म बईठिन, कैदीमन लोहा के संकली म बंधे दुख झेलत रिहिन,
PSA 107:11 काबरकि ओमन परमेसर के हुकूम के बिरूध चलिन अऊ सर्वोच्च परमेसर के योजनामन ला तुछ समझिन।
PSA 107:12 एकरसेति ओह ओमन ला बहुंत मेहनत के काम म लगाईस; ओमन लड़खड़ाईन, अऊ ओमन के मदद करे बर कोनो नइं रिहिस।
PSA 107:13 तब ओमन अपन संकट के बेरा यहोवा ला पुकारिन, अऊ ओह ओमन ला ओमन के संकट ले बचाईस।
PSA 107:14 ओह ओमन ला अंधियार, घिटके अंधियार ले बाहिर निकालिस, अऊ ओमन के बेड़ीमन ला टोर डारिस।
PSA 107:15 ओमन यहोवा ला ओकर अटूट मया बर धनबाद देवंय अऊ मानव-जाति बर करे गे ओकर अद्भूत काम बर धनबाद देवंय,
PSA 107:16 काबरकि ओह कांसा के दुवारमन ला टोर देथे अऊ लोहा के छड़मन ला काट डारथे।
PSA 107:17 कुछू जन अपन बिदरोही काम के कारन मुरूख बन गीन अऊ अपन अपराध के कारन दुख म पड़िन।
PSA 107:18 ओमन ला जम्मो किसम के जेवन ले अरूचि हो गीस अऊ ओमन मिरतू के दुवार म हबर गीन।
PSA 107:19 तब ओमन अपन संकट म यहोवा ला पुकारिन, अऊ ओह ओमन ला ओमन के संकट ले बचाईस।
PSA 107:20 ओह अपन बचन के दुवारा ओमन ला चंगा करिस; ओह ओमन ला मरे ले बचाईस।
PSA 107:21 ओमन यहोवा के अटूट मया अऊ मानव-जाति बर करे ओकर अद्भूत काम बर ओला धनबाद देवंय।
PSA 107:22 ओमन धनबाद के बलिदान चघावंय अऊ आनंद के गीत गाय के दुवारा ओकर काममन ला बतावंय।
PSA 107:23 कुछू मनखेमन पानी जहाज म समुंदर म गीन; ओमन समुंदर म होके बेपार करत रिहिन।
PSA 107:24 ओमन यहोवा के काममन ला, गहिरा समुंदर म करे गय ओकर अद्भूत काममन ला देखिन।
PSA 107:25 काबरकि ओकर कहे ले आंधी चलिस जेकर ले समुंदर म ऊंचहा-ऊंचहा लहरा उठिस।
PSA 107:26 ओमन अकास तक ऊपर उठिन अऊ खाल्हे गहरई तक गीन; अपन जोखिम म ओमन के हिम्मत खतम होवत रिहिस।
PSA 107:27 ओमन मतवारमन सहीं चक्कर खावत रिहिन अऊ लड़खड़ावत रिहिन; ओमन के बुद्धि काम नइं करत रिहिस।
PSA 107:28 तब ओमन अपन संकट म यहोवा ला पुकारिन, अऊ ओह ओमन ला ओमन के संकट ले बाहिर निकालिस।
PSA 107:29 ओह आंधी ला सांत कर दीस; समुंदर के लहरामन थम गीन।
PSA 107:30 लहरामन के सांत होय ले ओमन खुस होईन, अऊ ओह ओमन ला ओमन के मनचाहा बंदरगाह म ले गीस।
PSA 107:31 ओमन यहोवा ला ओकर अटूट मया अऊ मानव-जाति बर करे ओकर अद्भूत काम बर धनबाद देवंय।
PSA 107:32 ओमन मनखेमन के सभा म ओकर नांव ला ऊंचहा करंय अऊ अगुवामन के सभा म ओकर परसंसा करंय।
PSA 107:33 उहां रहइया मनखेमन के दुस्टता के कारन ओह नदीमन ला निरजन भुइयां,
PSA 107:34 पानी के सोतामन ला सूखा भुइयां, अऊ फलदार भुइयां ला नूनवाले बंजर भुइयां म बदल दीस।
PSA 107:35 ओह निरजन भुइयां ला पानी के तरिया अऊ सूखा भुइयां ला पानी के बहत सोतामन म बदल दीस;
PSA 107:36 उहां ओह भूखा मनखेमन ला रहे बर लानिस, अऊ ओमन एक सहर बनाईन जिहां ओमन रह सकंय।
PSA 107:37 ओमन खेतमन ला बोईन अऊ अंगूर के बारी लगाईन जेमा ले बने फसल मिलिस;
PSA 107:38 ओह ओमन ला आसीस दीस अऊ ओमन के संखिया बहुंत हो गीस, अऊ ओह ओमन के पसुमन के संखिया ला घलो घटे नइं दीस।
PSA 107:39 तब ओमन के संखिया घटे लगिस, अऊ सतावा, बिपत्ति अऊ दुख के दुवारा ओमन नम्र करे गीन;
PSA 107:40 जऊन ह परभावसाली मनखेमन के अपमान करथे, ओह ओमन ला बिगर रसतावाले जंगली भुइयां म भटकाथे।
PSA 107:41 पर ओह जरूरतमंद मनखेमन ला ओमन के दुख ले निकालथे अऊ ओमन के परिवार ला पसुमन के झुंड सहीं बढ़ाथे।
PSA 107:42 सीधवा मनखेमन देखके आनंद मनाथें, पर जम्मो दुस्ट मनखेमन अपन मुहूं बंद रखथें।
PSA 107:43 जऊन ह बुद्धिमान ए, ओह ये बातमन ऊपर धियान देवय अऊ यहोवा के मया के काममन ऊपर बिचार करय।
PSA 108:1 एक गीत। दाऊद के एक भजन। हे परमेसर, मोर मन ह अटल हवय; मेंह अपन पूरा आतमा ले गीत गाहूं अऊ बाजा बजाहूं।
PSA 108:2 हे बीना अऊ सारंगी, जागव! मेंह बड़े बिहनियां ला जगाहूं।
PSA 108:3 हे यहोवा, मेंह जाति-जाति के मनखेमन के बीच म तोर परसंसा करहूं; मेंह मनखेमन के बीच म तोर गीत गाहूं।
PSA 108:4 काबरकि तोर मया ह अतेक महान ए कि ओह स्वरग ले घलो ऊंच हवय; तोर बिसवासयोग्यता ह अकास तक हबरत हवय।
PSA 108:5 हे परमेसर, तोर महिमा ह स्वरगमन ले घलो ऊपर होवय; तोर महिमा ह जम्मो धरती ऊपर होवय।
PSA 108:6 अपन जेवनी हांथ उठाके हमन ला बचा अऊ हमर मदद कर, ताकि जऊन मन तोर ले मया करथें, ओमन छोंड़ाय जावंय।
PSA 108:7 परमेसर ह अपन पबितर-स्थान ले कहे हवय: “जीत के खुसी म, मेंह सकेम ला बांट दूहूं अऊ सुक्कोत के घाटी ला नापहूं।
PSA 108:8 गिलाद ह मोर ए, मनस्से ह घलो मोर ए; एपरैम ह मोर मुड़ के टोप ए, यहूदा ह मोर राजदंड ए।
PSA 108:9 मोआब ह मोर हांथ-मुहूं धोए के बरतन ए, एदोम ऊपर मेंह अपन पनही ला उछालहूं; पलिस्ती ऊपर मेंह जीत के खुसी म चिचियाहूं।”
PSA 108:10 कोन ह मोला गढ़वाले सहर म लानही? कोन ह मोला एदोम देस ले जाही?
PSA 108:11 हे परमेसर, का ये तें नो हस, तें जऊन ह हमन ला अस्वीकार करे हस अऊ अब हमर सेना के संग नइं जावस?
PSA 108:12 बईरीमन के बिरूध हमर मदद कर, काबरकि मनखे के दिये मदद ह बेकार ए।
PSA 108:13 परमेसर के मदद ले ही हमन बिजयी होबो, अऊ ओह हमर बईरीमन ला कुचर दीही।
PSA 109:1 संगीत के निरदेसक बर दाऊद के एक भजन। हे मोर परमेसर, तें जेकर मेंह परसंसा करथंव, चुपेचाप झन रह,
PSA 109:2 काबरकि दुस्ट अऊ धोखा देवइया मनखेमन मोर बिरूध म गोठियावत हवंय; ओमन मोर बिरूध लबारी बात कहत हवंय।
PSA 109:3 घिनौना बचन ले ओमन मोला घेरत हवंय; ओमन बिगर कारन के मोर ऊपर हमला करथें।
PSA 109:4 ओमन के संग मेंह संगी के बरताव करंय, पर बदला म ओमन मोर ऊपर दोस लगावत हें, पर मेंह पराथना करत रहइया मनखे अंव।
PSA 109:5 ओमन मोर भलई के बदले मोर संग बुरई करथें, अऊ संगी बरताव के बदले मोर ले घिन करथें।
PSA 109:6 मोर बईरी के बिरोध करे बर कोनो दुस्ट मनखे ला ठहिरा दे; ओकर जेवनी हांथ कोति एक दोस लगइया ठाढ़ होवय।
PSA 109:7 जब ओकर नियाय करे जावय, त ओह अपराधी ठहिरय, अऊ पराथनामन ओला दोसी ठहिरावंय।
PSA 109:8 ओकर उमर ह थोरकन दिन के होवय; ओकर अगुवई के पद ला कोनो अऊ ले लेवय।
PSA 109:9 ओकर लइकामन अनाथ हो जावंय अऊ ओकर घरवाली ह बिधवा हो जावय।
PSA 109:10 ओकर लइकामन एती-ओती घुमत भिखारी हो जावंय; ओमन ला ओमन के उजाड़ घर ले भगा दिये जावय।
PSA 109:11 साहूकार ह ओकर जम्मो चीज ला जपत कर ले; अजनबीमन ओकर मेहनत के फर ला लूट लेवंय।
PSA 109:12 ओकर ऊपर कोनो दया झन देखावय या ओकर अनाथ लइकामन ऊपर तरस झन खावय।
PSA 109:13 ओकर संतानमन खतम हो जावंय, अगला पीढ़ी ले ओमन के नामोनिसान मिट जावय।
PSA 109:14 यहोवा के आघू म ओकर पुरखामन के दुस्टता ला लाने जावय; ओकर दाई के पाप ला कभू झन मिटाय जावय।
PSA 109:15 ओमन के पापमन यहोवा के आघू म हमेसा बने रहंय, ताकि ओह ओमन के नांव धरती ले मिटा देवय।
PSA 109:16 काबरकि ओ दुस्ट ह कभू दया करे के बात नइं सोचिस, पर गरीब अऊ जरूरतमंद अऊ दुखी मनखेमन ला पीछा करके मार डारिस।
PSA 109:17 सराप देवई ओला बहुंत बने लगिस— ओ सराप ह लहुंटके ओहीच ला लगय। ओला आसीस म कोनो खुसी नइं मिलिस— येह ओकर ले बहुंत दूरिहा रहय।
PSA 109:18 सराप देवई ओकर बर कपड़ा पहिरे सहीं हो गीस; येह ओकर देहें म पानी हमाय सहीं, अऊ ओकर हाड़ामन म तेल सहीं हो गीस।
PSA 109:19 येह ओकर देहें म ओढ़ना ओढ़े सहीं, अऊ ओकर कनिहां म हमेसा एक कमरपट्टा बांधे सहीं होवय।
PSA 109:20 मोर ऊपर दोस लगइयामन ला, मोर बुरई करइयामन ला यहोवा ले येहीच बदला मिलय।
PSA 109:21 पर हे परमपरधान यहोवा, अपन नांव के हित म मोर मदद कर; अपन मया के भलई के कारन मोला छुटकारा दे।
PSA 109:22 काबरकि मेंह गरीब अऊ जरूरतमंद अंव, अऊ मोर भीतर म मोर हिरदय ला चोट लगे हवय।
PSA 109:23 मेंह सांझ के छइहां सहीं खतम होवत हंव; मोला फांफा सहीं झटकार दिये गे हवय।
PSA 109:24 उपास करत मोर माड़ीमन दुरबल होवत हें; मोर देहें ह पातर अऊ कमजोर हो गे हवय।
PSA 109:25 मेंह अपन दोस लगइयामन बर हंसी के पात्र हो गे हवंव; जब ओमन मोला देखथें, त ओमन अपन मुड़ हलाथें।
PSA 109:26 हे यहोवा मोर परमेसर, मोर मदद कर; अपन अटूट मया के मुताबिक मोर उद्धार कर।
PSA 109:27 ओमन जानंय कि एकर पाछू तोर हांथ हवय, अऊ ये कि हे यहोवा, येला तेंह करे हस।
PSA 109:28 जब ओमन सराप देवंय, त तें आसीस दे; जऊन मन मोर ऊपर हमला करथें, ओमन सरमिंदा होवंय, पर तोर सेवक ह आनंद मनावय।
PSA 109:29 मोर ऊपर दोस लगइयामन ला कलंक के कपड़ा पहिराय जावय अऊ ओढ़ना लपेटे सहीं ओमन लज्जा म लपेटे जावंय।
PSA 109:30 अपन मुहूं ले मेंह यहोवा के बहुंत धनबाद करहूं; अराधना करइयामन के बड़े भीड़ म मेंह ओकर परसंसा करहूं।
PSA 109:31 काबरकि ओह जरूरतमंद के जेवनी हांथ कोति ठाढ़ होथे, ताकि ओह ओमन के जिनगी ला ओमन ले बचावय, जेमन ओमन ला अपराधी ठहिराहीं।
PSA 110:1 दाऊद के एक भजन। यहोवा ह मोर परभू ले कहिथे: “मोर जेवनी हांथ कोति बईठ जब तक कि मेंह तोर बईरीमन ला तोर गोड़ रखे के एक चउकी नइं बना देवंव।”
PSA 110:2 यहोवा ह तोर सक्तिसाली राजदंड ला सियोन ले ये कहिके बढ़ाही, “अपन बईरीमन के बीच म सासन कर!”
PSA 110:3 तोर सेना ह तोर लड़ई के दिन म अपन ईछा ले तोर संग चलही। पबितर सोभा ले सजके तोर जवानमन, बिहनियां के गरभ ले निकले ओस के सहीं तोर करा आहीं।
PSA 110:4 यहोवा ह कसम खाय हवय अऊ ओह अपन मन ला नइं बदलय: “तेंह मलकिसिदक के रीति म, सदाकाल बर एक पुरोहित अस।”
PSA 110:5 परभू ह तोर जेवनी हांथ कोति हवय; ओह अपन कोप के दिन म राजामन ला कुचर दीही।
PSA 110:6 मरे मनखेमन के ढेर लगाके अऊ जम्मो धरती के सासन करइयामन ला कुचरके ओह जाति-जाति के मनखेमन के नियाय करही।
PSA 110:7 डहार म रेंगत ओह झरना के पानी पीही, अऊ ये किसम ले अपन मुड़ ला ऊंच करही।
PSA 111:1 यहोवा के परसंसा करव। मेंह सीधवा मनखेमन के मंडली म अऊ सभा म अपन पूरा मन से यहोवा के परसंसा करहूं।
PSA 111:2 यहोवा के काममन महान एं; जऊन मन ओ काममन ले खुस होथें, ओमन ओ काममन के ऊपर बिचार करथें।
PSA 111:3 ओकर काममन महिमामय अऊ सानदार अंय, अऊ ओकर धरमीपन हमेसा बने रहिथे।
PSA 111:4 ओह अपन अद्भूत काममन के सुरता कराय हवय; यहोवा ह अनुग्रहकारी अऊ दयालु अय।
PSA 111:5 ओह ओमन ला जेवन देथे, जेमन ओकर भय मानथें; ओह अपन करार ला हमेसा सुरता रखथे।
PSA 111:6 ओह दिगर जाति के मनखेमन के भुइयां अपन मनखेमन ला देके अपन काम के सक्ति ला देखाय हवय।
PSA 111:7 ओकर हांथ के काममन बिसवासयोग्य अऊ नियाय के अंय; ओकर जम्मो नियममन बिसवासयोग्य अंय।
PSA 111:8 ओमन सदा-सर्वदा अटल रहिहीं, ये कानूनमन बिसवासयोग्यता अऊ ईमानदारी से बनाय गे हवंय।
PSA 111:9 ओह अपन मनखेमन ला पाप ले छुटकारा दे हवय; ओह अपन करार ला हमेसा बर ठहिराय हवय— ओकर नांव पबितर अऊ अद्भूत अय।
PSA 111:10 यहोवा के भय मनई बुद्धि के सुरूआत ए; ओ जम्मो, जऊन मन ओकर नियममन ला मानथें, ओमन अपन म सही समझ रखथें। ओकर महिमा सदाकाल तक होवत रहय।
PSA 112:1 यहोवा के परसंसा करव। धइन अंय ओमन, जऊन मन यहोवा के भय मानथें, जऊन मन ओकर हुकूम के पालन करे म बहुंत खुस होथें।
PSA 112:2 ओमन के लइकामन देस म सक्तिसाली होहीं; ईमानदार मनखे के पीढ़ी ला आसीस मिलही।
PSA 112:3 ओमन के घर म धन अऊ सम्पन्नता होही, अऊ ओमन के धरमीपन ह हमेसा बने रहिही।
PSA 112:4 ईमानदार मनखे बर अंधियार म घलो अंजोर निकलथे, ओमन बर घलो, जऊन मन अनुग्रहकारी अऊ दयालु अऊ धरमी अंय।
PSA 112:5 ओमन के भलई होही, जऊन मन उदार मन के अंय अऊ खुले मन से उधार देथें, जऊन मन अपन काम म नियाय के बरताव करथें।
PSA 112:6 खचित धरमी ह कभू नइं डगमगाही; ओमन ला हमेसा सुरता करे जाही।
PSA 112:7 ओमन खराप संदेस सुनके भयभीत नइं होहीं; यहोवा ऊपर भरोसा रखत ओमन के हिरदय ह इस्थिर रहिथे।
PSA 112:8 ओमन के हिरदय ह सुरकछित हवय, ओमन ला कोनो किसम के भय नइं होवय; आखिरी म ओमन अपन बईरीमन ऊपर बिजयी होके देखहीं।
PSA 112:9 ओमन गरीबमन ला दिल खोलके दान दे हवंय, ओमन के धरमीपन ह सदाकाल तक बने रहिथे; ओमन के सींग ला आदर म ऊंच करे जाही।
PSA 112:10 दुस्टमन येला देखके कुढ़हीं, ओमन अपन दांत पीसहीं अऊ बरबाद हो जाहीं; दुस्टमन के लालसा ह पूरा नइं होही।
PSA 113:1 यहोवा के परसंसा करव। हे यहोवा के सेवकमन, तुमन ओकर परसंसा करव; यहोवा के नांव के परसंसा करव।
PSA 113:2 यहोवा के नांव के परसंसा होवय, अब अऊ हमेसा-हमेसा बर ओकर परसंसा होवय।
PSA 113:3 उदयाचल ले लेके अस्ताचल तक यहोवा के परसंसा होवय।
PSA 113:4 यहोवा ला जम्मो जाति के ऊपर उठाय जाथे, ओकर महिमा अकास ले घलो ऊंच हवय।
PSA 113:5 यहोवा हमर परमेसर सहीं कोन हे, जऊन ह कि ऊंच म बिराजमान हवय,
PSA 113:6 जऊन ह झुकके अकास अऊ धरती ला देखथे?
PSA 113:7 ओह गरीब ला धुर्रा ले उठाथे अऊ राख के कुढ़ा ले जरूरतमंद ला ऊपर करथे;
PSA 113:8 ओह ओमन ला हाकिममन के संग, अपन मनखेमन के हाकिममन संग बईठाथे।
PSA 113:9 ओह बांझ माईलोगन ला ओकर घर म अइसे बसाथे, जइसे लइकामन के खुसी ले भरे एक दाई ला। यहोवा के परसंसा होवय।
PSA 114:1 जब इसरायलीमन मिसर देस ले बाहिर निकलिन, जब याकूब के बंसजमन आने भासा के मनखेमन के बीच ले बाहिर आईन,
PSA 114:2 तब यहूदा ह परमेसर के पबितर-स्थान, अऊ इसरायल ह ओकर राज बन गीस।
PSA 114:3 समुंदर ह देखके भाग गीस, यरदन नदी उल्टा दिग म बहे लगिस;
PSA 114:4 पहाड़मन मेढ़ामन सहीं, अऊ पहाड़ीमन मेढ़ा-पीलामन सहीं उछले-कूदे लगिन।
PSA 114:5 हे समुंदर, का होईस कि तेंह भाग गय? अऊ हे यरदन, तेंह काबर उल्टा बहे लगय?
PSA 114:6 हे पहाड़मन, तुमन काबर मेढ़ामन सहीं, अऊ हे पहाड़ीमन, तुमन काबर मेढ़ा-पीलामन सहीं उछले-कूदे लगेव?
PSA 114:7 हे धरती, परभू के आघू म, याकूब के परमेसर के आघू म कांप,
PSA 114:8 जऊन ह चट्टान ला पानी के कुंड, अऊ कठोर पथरा ला पानी के सोता म बदल दीस।
PSA 115:1 हे यहोवा, हमर नइं, हमर नइं पर तोर मया अऊ बिसवासयोग्यता के कारन, तोर नांव के महिमा होवय।
PSA 115:2 जाति-जाति के मनखेमन काबर कहिथें, “ओमन के परमेसर कहां हवय?”
PSA 115:3 हमर परमेसर ह स्वरग म हवय; ओला जऊन काम बने लगथे, ओला ओह करथे।
PSA 115:4 पर ओमन के मूरतीमन मनखेमन के हांथ के बनाय सोन अऊ चांदी अंय।
PSA 115:5 ओमन के मुहूं तो हवय, पर ओमन गोठियाय नइं सकंय, ओमन के आंखी तो हवय, पर देख नइं सकंय।
PSA 115:6 ओमन के कान तो हवय, पर सुन नइं सकंय, नाक तो हवय, पर सुंघ नइं सकंय।
PSA 115:7 ओमन के हांथ तो हवय, पर ओमन छू नइं सकंय, गोड़ तो हवय, पर ओमन चल नइं सकंय, अऊ न ही ओमन अपन गला ले कोनो अवाज निकाल सकंय।
PSA 115:8 येमन ला बनानेवालामन येमन के सहीं हो जाहीं, अऊ येमन ऊपर भरोसा रखइया जम्मो झन घलो येमन सहीं हो जाहीं।
PSA 115:9 हे जम्मो इसरायलीमन, यहोवा ऊपर भरोसा रखव— ओह तुम्हर मददगार अऊ ढाल ए।
PSA 115:10 हे हारून के घराना, यहोवा ऊपर भरोसा रखव— ओह तुम्हर मददगार अऊ ढाल ए।
PSA 115:11 हे यहोवा के भय माननेवालामन, ओकर ऊपर भरोसा रखव— ओह तुम्हर मददगार अऊ ढाल ए।
PSA 115:12 यहोवा ह हमन ला सुरता करथे अऊ हमन ला आसीस देथे: ओह अपन मनखे इसरायलीमन ला आसीस दीही, ओह हारून के घराना ला आसीस दीही,
PSA 115:13 यहोवा ह छोटे अऊ बड़े ओ जम्मो झन ला आसीस दीही, जऊन मन ओकर भय मानथें।
PSA 115:14 यहोवा ह अइसे करय कि तुमन अऊ तुम्हर लइकामन दूनों उन्नति करव।
PSA 115:15 यहोवा, जऊन ह स्वरग अऊ धरती के बनइया ए, तुमन ला आसीस देवय।
PSA 115:16 सबले ऊंच स्वरग यहोवा के अय, पर धरती ला ओह मनखेमन ला दे हवय।
PSA 115:17 ये ओ मरे मनखेमन नो हंय या येमन चुप रहइया जगह म खाल्हे जवइया ओ मनखे नो हंय, जऊन मन यहोवा के परसंसा करथें;
PSA 115:18 पर ये हमन अन, जऊन मन यहोवा के परसंसा करथन, अब अऊ सदाकाल बर। यहोवा के परसंसा करव।
PSA 116:1 मेंह यहोवा ले मया करथंव, काबरकि ओह मोर बात ला सुनिस; ओह दया के मोर पुकार ला सुनिस।
PSA 116:2 काबरकि ओह मोर कोति अपन कान लगाईस, एकरसेति मेंह अपन जिनगी भर ओला पुकारहूं।
PSA 116:3 मिरतू के डोर म मेंह फंस गेंव, कबर के पीरा ह मोर ऊपर आ गीस; मेंह दुख अऊ पीरा म पड़े रहेंव।
PSA 116:4 तब मेंह यहोवा के नांव ले पराथना करेंव: “हे यहोवा, मोला बचा!”
PSA 116:5 यहोवा ह अनुग्रहकारी अऊ धरमी अय; हमर परमेसर ह दया ले भरे हवय।
PSA 116:6 यहोवा ह सीधा-साधा मनखे के रकछा करथे; जब मोर बेजत्ती करे गीस, त ओह मोला बचाईस।
PSA 116:7 हे मोर परान, अपन बिसराम-स्थान म लहुंट आ, काबरकि यहोवा ह तोर भलई करे हवय।
PSA 116:8 हे यहोवा, तेंह मोला मिरतू ले, मोर आंखीमन ला आंसू बहाय ले, मोर गोड़मन ला ठोकर खाय ले बचाय हस,
PSA 116:9 ताकि मेंह यहोवा के आघू म जीयत परानीमन के लोक म चलंव।
PSA 116:10 मेंह यहोवा ऊपर भरोसा रखेंव, जब मेंह ये कहेंव, “मेंह बहुंत दुखित हंव”;
PSA 116:11 मेंह अपन बेचैनी म कहेंव, “जम्मो मनखेमन लबरा अंय।”
PSA 116:12 यहोवा ह जतेक भलई मोर बर करे हवय, ओ जम्मो के बदले मेंह ओला का दंव?
PSA 116:13 मेंह उद्धार के कटोरा ला ऊपर उठाहूं अऊ यहोवा के नांव ला पुकारहूं।
PSA 116:14 यहोवा के जम्मो मनखेमन के आघू म मेंह ओकर बर करे गय अपन मन्नत ला पूरा करहूं।
PSA 116:15 यहोवा के बिसवासयोग्य सेवकमन के मिरतू ह ओकर नजर म अनमोल अय।
PSA 116:16 हे यहोवा, सही म मेंह तोर सेवक अंव; मेंह तोर सेवा वइसे करथंव, जइसे मोर दाई ह करिस; तेंह मोला मोर बंधना ले छोंड़ाय हस।
PSA 116:17 मेंह तोला धनबाद-बलिदान चघाहूं अऊ यहोवा के नांव ले पराथना करहूं।
PSA 116:18 यहोवा के जम्मो मनखेमन के आघू म मेंह ओकर बर करे गय अपन मन्नत ला पूरा करहूं।
PSA 116:19 हे यरूसलेम, तोर बीच म, यहोवा के घर के अंगनामन म अपन मन्नत ला पूरा करहूं। यहोवा के परसंसा करव।
PSA 117:1 हे जाति-जाति के जम्मो मनखेमन, यहोवा के परसंसा करव; हे जम्मो मनखेमन, ओकर बहुंत परसंसा करव।
PSA 117:2 काबरकि ओह हमन ला बहुंत मया करथे, अऊ यहोवा के बिसवासयोग्यता सदाकाल बर बने रहिथे। यहोवा के परसंसा करव।
PSA 118:1 यहोवा ला धनबाद देवव, काबरकि ओह बने अय; ओकर मया सदाकाल तक बने रहिथे।
PSA 118:2 इसरायल ह कहय: “ओकर मया सदाकाल तक बने रहिथे।”
PSA 118:3 हारून के घराना ह कहय: “ओकर मया सदाकाल तक बने रहिथे।”
PSA 118:4 जऊन मन यहोवा के भय मानथें, ओमन कहंय: “ओकर मया सदाकाल तक बने रहिथे।”
PSA 118:5 जब मेंह संकट म रहेंव, त मेंह यहोवा ला पुकारेंव; ओह मोर बात ला सुनिस अऊ मोला चौरस जगह म लानके संकट ले उबारिस।
PSA 118:6 यहोवा ह मोर संग हवय; मेंह नइं डरंव। मरनहार मनखे ह मोर का कर सकथे?
PSA 118:7 यहोवा ह मोर संग हवय; ओह मोर मददगार ए। मेंह अपन बईरीमन ऊपर बिजयी नजर ले देखथंव।
PSA 118:8 मनखेमन ऊपर भरोसा रखे के बदले यहोवा करा सरन लेवई जादा उत्तम ए।
PSA 118:9 परभावसाली मनखेमन ऊपर भरोसा रखे के बदले यहोवा करा सरन लेवई जादा उत्तम ए।
PSA 118:10 जम्मो जाति के मनखेमन मोला घेर ले रिहिन, पर यहोवा के नांव म मेंह ओमन ला नास कर देंव।
PSA 118:11 ओमन मोला चारों कोति ले घेर ले रिहिन, पर यहोवा के नांव म मेंह ओमन ला नास कर देंव।
PSA 118:12 ओमन मधुमक्खीमन के झुंड सहीं मोर चारों कोति हो गे रिहिन, पर जइसे बरत कंटिली झाड़ी ह तुरते खतम हो जाथे, वइसे ओमन खतम हो गीन; यहोवा के नांव म मेंह ओमन ला नास कर देंव।
PSA 118:13 मोला पाछू कोति धकेले गीस अऊ मेंह गिरनेचवाला रहेंव, पर यहोवा ह मोर मदद करिस।
PSA 118:14 यहोवा ह मोर बल अऊ मोर सुरकछा ए; ओह मोर उद्धार बन गे हवय।
PSA 118:15 धरमीमन के तम्बू म आनंद अऊ जीत के जयघोस होवत हे: “यहोवा के जेवनी हांथ ह बड़े-बड़े काम करे हवय!
PSA 118:16 यहोवा के जेवनी हांथ ह ऊपर उठे हवय; यहोवा के जेवनी हांथ ह बड़े-बड़े काम करे हवय!”
PSA 118:17 मेंह नइं मरंव पर जीयत रहिहूं, अऊ यहोवा ह जऊन कुछू करे हवय, ओकर घोसना करहूं।
PSA 118:18 यहोवा ह मोर कठोर ताड़ना करे हवय, पर ओह मोला मिरतू के बस म नइं करे हवय।
PSA 118:19 मोर बर धरमीमन के दुवार ला खोल दव; मेंह भीतर जाहूं अऊ यहोवा ला धनबाद दूहूं।
PSA 118:20 येह यहोवा के दुवार ए जिहां ले धरमीमन भीतर जावंय।
PSA 118:21 मेंह तोला धनबाद दूहूं, काबरकि तेंह मोर पराथना ला सुने हस; तेंह मोर उद्धार बन गे हस।
PSA 118:22 जऊन पथरा ला घर के बनइयामन बेकार समझे रिहिन; ओह कोना के पथरा बन गे हवय;
PSA 118:23 येह यहोवा के दुवारा होईस, अऊ येह हमर नजर म अद्भूत ए।
PSA 118:24 यहोवा ह आज ही के दिन येला करे हवय; आवव, आज हमन आनंद अऊ खुसी मनावन।
PSA 118:25 हे यहोवा, हमन ला बचा! हे यहोवा, हमन ला सफलता दे!
PSA 118:26 धइन ए ओ, जऊन ह यहोवा के नांव म आथे। यहोवा के घर ले हमन तोला आसीस देथन।
PSA 118:27 यहोवा ह परमेसर ए, अऊ ओह अपन अंजोर ला हमर ऊपर चमकाय हवय। हांथ म रूख के डारामन ला लेके, आनंद के जुलूस म बेदी के सींग तक सामिल हो जावव।
PSA 118:28 तेंह मोर परमेसर अस, अऊ मेंह तोर परसंसा करहूं; तेंह मोर परमेसर अस, अऊ मेंह तोर बहुंत परसंसा करहूं।
PSA 118:29 यहोवा ला धनबाद देवव, काबरकि ओह बने अय; ओकर मया सदाकाल तक बने रहिथे।
PSA 119:1 धइन अंय ओमन, जेमन के चालचलन निरदोस हवय, जेमन यहोवा के कानून के मुताबिक चलथें।
PSA 119:2 धइन अंय ओमन, जेमन ओकर बिधि-बिधान म चलथें अऊ अपन पूरा मन से ओकर खोज म रहिथें—
PSA 119:3 ओमन कोनो गलत काम नइं करंय पर ओकर रसता म चलथें।
PSA 119:4 तेंह नियममन ला बनाय हस जेमन के पूरा पालन करे जावय।
PSA 119:5 तोर बिधि-बिधान ला माने म मोर चालचलन ह अटल रिहिस!
PSA 119:6 जब मेंह तोर जम्मो हुकूममन ऊपर बिचार करहूं त मोला सरमिंदा होय नइं पड़ही।
PSA 119:7 जब मेंह तोर धरमी कानूनमन ला सीखहूं, त मेंह तोर सही मन से परसंसा करहूं।
PSA 119:8 मेंह तोर बिधिमन ला मानहूं; मोला झन तियाग दे।
PSA 119:9 जवान ह अपन चालचलन ला कइसे सुध रख सकथे? तोर बचन के मुताबिक चले के दुवारा।
PSA 119:10 मेंह अपन पूरा मन से तोर खोज म रहिथंव, मोला तोर हुकूममन ले भटकन झन दे।
PSA 119:11 मेंह तोर बचन ला अपन हिरदय म रखे हंव ताकि मेंह तोर बिरूध पाप झन करंव।
PSA 119:12 हे यहोवा, तोर परसंसा होवय; मोला तोर बिधिमन ला सिखा।
PSA 119:13 तोर दिये गय जम्मो कानून ला मेंह अपन मुहूं म दोहरात रहिथंव।
PSA 119:14 जइसे कोनो मनखे ह बहुंत धन पाके आनंदित होथे, वइसे मेंह तोर नियममन ला पालन करके आनंदित होथंव।
PSA 119:15 मेंह तोर उपदेस ऊपर मनन करथंव अऊ तोर बातमन ऊपर बिचार करथंव।
PSA 119:16 मोला तोर बिधि-बिधान ले खुसी होथे; मेंह तोर बचन ऊपर धियान दूहूं।
PSA 119:17 अपन सेवक के भलई कर कि मेंह जीयत रहंव, अऊ तोर बचन के पालन करंव।
PSA 119:18 मोर आंखी ला खोल कि मेंह तोर कानून के अद्भूत चीजमन ला देख सकंव।
PSA 119:19 मेंह धरती म एक अजनबी अंव; अपन हुकूममन ला मोर ले झन छिपा।
PSA 119:20 मोर परान ह तोर कानून के लालसा म हर समय बियाकुल होवत हे।
PSA 119:21 तेंह ओ घमंडी मनखेमन ला डांटथस, जऊन मन सरापित अंय, जऊन मन तोर हुकूममन ले भटक जाथें।
PSA 119:22 मोर ऊपर लगे ओमन के अपमान अऊ तिरस्कार ला हटा, काबरकि मेंह तो नियममन के पालन करथंव।
PSA 119:23 हालाकि सासन करइयामन एक संग बईठके मोर निन्दा करथें, पर तोर सेवक ह तोर बिधिमन ऊपर मनन करत रहिही।
PSA 119:24 तोर नियममन ऊपर मेंह खुस होथंव; ओमन मोर सलाहकार एं।
PSA 119:25 मेंह खाल्हे धुर्रा म पड़े हंव; अपन बचन के मुताबिक मोला बचाय रख।
PSA 119:26 मेंह तोला अपन चालचलन के लेखा-जोखा देंव अऊ तेंह मोला जबाब देय; अपन बिधिमन ला मोला सिखा।
PSA 119:27 तोर उपदेसमन ला समझे के तरीका मोला बता, ताकि मेंह तोर अद्भूत काम ऊपर मनन करंव।
PSA 119:28 मोर जीव ह दुख के मारे थक गे हवय; अपन बचन के मुताबिक मोला मजबूत कर।
PSA 119:29 धोखा देवइया रसता ले मोला अलग रख; मोर ऊपर अनुग्रह कर अऊ मोला तोर कानून सिखा।
PSA 119:30 मेंह सच्चई के रसता ला चुने हवंव; मेंह तोर कानून ऊपर अपन मन ला लगाय हवंव।
PSA 119:31 हे यहोवा, मेंह तोर नियम ला मजबूती से थामे हवंव; मोला लज्जा म झन पड़न दे।
PSA 119:32 मेंह तोर हुकूममन के रसता म दऊड़त हंव, काबरकि तेंह मोर समझ ला बढ़ाय हस।
PSA 119:33 हे यहोवा, तोर बिधिमन ला पालन करे के तरीका मोला सिखा, ताकि आखिरी तक मेंह येकर पालन करंव।
PSA 119:34 मोला समझ दे ताकि मेंह तोर कानून के पालन करंव अऊ पूरा हिरदय ले येला मानंव।
PSA 119:35 तोर हुकूममन के रसता म मोला ले चल, काबरकि उहां मोला खुसी मिलथे।
PSA 119:36 मोर मन ला सुवारथ के लाभ कोति नइं, पर अपन नियम कोति कर।
PSA 119:37 मोर आंखीमन ला बेकार के चीजमन ले हटा दे; अपन बचन के मुताबिक मोर जिनगी ला बनाय रख।
PSA 119:38 अपन सेवक ले करे गे परतिगियां ला पूरा कर, ताकि तोर भय माने जावय।
PSA 119:39 जऊन कलंक ले मेंह डरत हंव, ओला मोर ले दूरिहा कर दे। काबरकि तोर कानूनमन उत्तम अंय।
PSA 119:40 मेंह तोर उपदेसमन के ईछा करथंव; अपन धरमीपन म मोर जिनगी ला बनाय रख।
PSA 119:41 हे यहोवा, तोर उत्तम मया मोर ऊपर होवय, अऊ अपन करे गे वायदा के मुताबिक मोर उद्धार कर;
PSA 119:42 तब में हर ओ मनखे ला जबाब दे सकहूं, जऊन ह मोला ताना मारथे, काबरकि मेंह तोर बचन ऊपर भरोसा करथंव।
PSA 119:43 अपन सच्चई के बचन ला मोर मुहूं ले कभू झन हटा, काबरकि मेंह तोर कानून ऊपर भरोसा रखे हंव।
PSA 119:44 मेंह हमेसा तोर कानून ला मानहूं, सदाकाल तक मानत रहिहूं।
PSA 119:45 मेंह सुतंतर होके चलहूं, काबरकि मेंह तोर उपदेसमन ला पा गे हवंव।
PSA 119:46 मेंह राजामन के आघू म तोर नियममन के बारे म गोठियाहूं अऊ मोला सरमिंदा होय नइं पड़ही,
PSA 119:47 मेंह तोर हुकूममन ला मानके खुस होथंव, काबरकि मेंह ओमन ले मया रखथंव।
PSA 119:48 मेंह तोर हुकूममन कोति हांथ बढ़ाथंव, जेमन ले कि मेंह मया रखथंव, ताकि मेंह तोर बिधिमन ऊपर मनन करंव।
PSA 119:49 जऊन बात अपन सेवक ला कहे रहय, ओला सुरता रख, काबरकि तेंह मोला आसा दे हस।
PSA 119:50 मोर दुख म मोला ये बात ले सांति मिलथे: तोर वायदा ह मोर जिनगी ला बनाय रखथे।
PSA 119:51 घमंडी मनखेमन बिगर रोक-टोक के मोर हंसी उड़ाथें, पर मेंह तोर कानून ले नइं हटंव।
PSA 119:52 हे यहोवा, मेंह तोर पुराना कानूनमन ला सुरता करथंव, अऊ ओमन म मोला सांति मिलथे।
PSA 119:53 जऊन दुस्टमन तोर कानून ला तियाग दे हवंय, ओमन के कारन मोला गुस्सा आथे।
PSA 119:54 जिहां भी मेंह रहिथंव, तोर बिधिमन मोर गीत के बिसय होथें।
PSA 119:55 हे यहोवा, रथिया मेंह तोर नांव ला सुरता करथंव, ताकि मेंह तोर कानून म चल सकंव।
PSA 119:56 येह मोर आदत हो गे हवय: मेंह तोर उपदेस के पालन करथंव।
PSA 119:57 हे यहोवा, तेंह मोर भाग अस; मेंह तोर बचन ला पालन करे के वायदा करे हंव।
PSA 119:58 मेंह अपन पूरा मन से तोला खोजे हंव; अपन वायदा के मुताबिक मोर ऊपर अनुग्रह कर।
PSA 119:59 मेंह अपन चालचलन ऊपर बिचार करे हंव अऊ तोर नियममन ला पालन करे बर गोड़ ला आघू बढ़ाय हंव।
PSA 119:60 मेंह तोर हुकूममन ला पालन करे बर जल्दी से आघू बढ़हूं, देरी नइं करंव।
PSA 119:61 हालाकि दुस्टमन मोला रस्सी ले बांधथें, तभो ले मेंह तोर कानून ला नइं भूलंव।
PSA 119:62 तोर धरमी कानूनमन के सेति तोला धनबाद दे बर मेंह आधा रथिया उठहूं।
PSA 119:63 मेंह ओ जम्मो के संगवारी अंव, जऊन मन तोर भय मानथें, ओ जम्मो जऊन मन तोर नियम म चलथें।
PSA 119:64 हे यहोवा, धरती ह तोर मया ले भर गे हवय; मोला तोर बिधिमन ला सिखा।
PSA 119:65 हे यहोवा, अपन बचन के मुताबिक अपन सेवक के भलई कर।
PSA 119:66 मोला गियान अऊ सही नियाय के बात सिखा, काबरकि मेंह तोर हुकूममन ऊपर भरोसा करथंव।
PSA 119:67 दुख म पड़े के पहिले मेंह भटक गे रहेंव, पर अब मेंह तोर बात ला मानथंव।
PSA 119:68 तेंह बने अस, अऊ जऊन कुछू तेंह करथस, ओह बने अय; मोला अपन बिधिमन ला सिखा।
PSA 119:69 हालाकि घमंडी मनखेमन लबारी बात कहिके मोर ऊपर दाग लगाय हवंय, पर मेंह अपन पूरा मन से तोर नियममन ला मानथंव।
PSA 119:70 ओमन के हिरदय कठोर अऊ भावनाहीन हो गे हवंय, पर मोला तोर कानून म चलके खुसी मिलथे।
PSA 119:71 येह मोर बर बने बात होईस कि मेंह दुख म पड़ेंव ताकि मेंह तोर बिधिमन ला सीख सकंव।
PSA 119:72 तोर मुहूं ले निकले कानून ह मोर बर सोन अऊ चांदी के हजारों टुकड़ामन ले घलो जादा कीमती ए।
PSA 119:73 तोर हांथ ह मोला बनाईस अऊ मोला रचिस; अपन हुकूममन ला सीखे के मोला समझ दे।
PSA 119:74 तोर भय मनइयामन मोला देखके आनंद मनावंय, काबरकि मेंह तोर बचन ऊपर अपन आसा रखे हंव।
PSA 119:75 हे यहोवा, मेंह जानत हंव कि तोर कानूनमन धरमी अंय, अऊ ये घलो कि सच्चई के मुताबिक तेंह मोला दुख दे हस।
PSA 119:76 अपन सेवक बर करे गे तोर वायदा के मुताबिक तोर अटल मया ह मोला सांति देवय।
PSA 119:77 तोर दया मोर ऊपर होवय कि मेंह जीयत रहंव, काबरकि तोर कानून ला माने म मोला खुसी मिलथे।
PSA 119:78 बिगर कोनो कारन के मोर संग गलत बरताव करे के कारन दुस्टमन लज्जित होवंय; पर मेंह तोर उपदेसमन ऊपर मनन करत रहिहूं।
PSA 119:79 जऊन मन तोर भय मानथें, ओमन मोर कोति आवंय, ओमन, जऊन मन तोर नियममन ला समझथें।
PSA 119:80 मेंह पूरा मन से तोर बिधिमन के पालन करंव ताकि मोला लज्जित होना झन पड़य।
PSA 119:81 मोर परान ह तोर उद्धार के ईछा करत थक जावत हे, पर मेंह तोर बचन म अपन आसा रखे हंव।
PSA 119:82 मोर आंखीमन तोर वायदा के पूरा होय के बाट जोहत थक जावत हें; मेंह कहिथंव, “तेंह मोला कब सांति देबे?”
PSA 119:83 हालाकि मेंह कुहरा म अंगूर के मंद के एक कुप्पी सहीं अंव, तभो ले मेंह तोर बिधिमन ला नइं भूलंव।
PSA 119:84 तोर सेवक ला अऊ कब तक इंतजार करे बर पड़ही? तेंह मोला सतानेवालामन ला कब दंड देबे?
PSA 119:85 तोर कानून के उल्टा घमंडीमन मोला फंसाय बर खंचवा कोड़थें।
PSA 119:86 तोर जम्मो हुकूममन बिसवासयोग्य अंय; मोर मदद कर, काबरकि मेंह बिगर कारन के सताय जावत हंव।
PSA 119:87 ओमन मोला धरती ले लगभग मिटा डारे रिहिन, पर मेंह तोर उपदेसमन ला नइं छोड़े हंव।
PSA 119:88 तोर अटल मया म मोर जिनगी ला बनाय रख, ताकि मेंह तोर मुहूं ले दिये गय नियममन ला मानंव।
PSA 119:89 हे यहोवा, तोर बचन ह सदाकाल बर अय; येह अकास म अटल बने रहिथे।
PSA 119:90 तोर बिसवासयोग्यता पीढ़ी दर पीढ़ी बने रहिथे; तेंह धरती ला इस्थिर करय, अऊ येह बने रहिथे।
PSA 119:91 तोर कानूनमन आज तक बने हवंय, काबरकि जम्मो चीजमन तोर सेवा करथें।
PSA 119:92 कहूं तोर कानून ह मोर खुसी के कारन नइं होतिस, त मेंह अपन दुख म नास हो गे रहितेंव।
PSA 119:93 मेंह तोर उपदेसमन ला कभू नइं भूलंव, काबरकि ओमन के दुवारा तेंह मोर जिनगी ला बनाय रखे हस।
PSA 119:94 मोला बचा, काबरकि मेंह तोर अंव; मेंह तोर उपदेसमन ला खोज ले हंव।
PSA 119:95 दुस्टमन मोला नास करे बर बाट जोहत हें, पर मेंह तोर बिधिमन ऊपर बिचार करत रहिहूं।
PSA 119:96 हर सिद्धता म मेंह एक सीमना ला देखथंव, पर तोर हुकूममन के कोनो सीमना नइं ए।
PSA 119:97 अहा! तोर कानून ले मेंह कइसने मया करथंव! दिन भर मेंह येकर ऊपर मनन करत रहिथंव।
PSA 119:98 तोर हुकूममन हमेसा मोर संग हवंय अऊ मोर बईरीमन ले मोला जादा बुद्धिमान बनाथें।
PSA 119:99 मोर जम्मो गुरूमन ले मोर म जादा समझ हवय, काबरकि मेंह तोर नियममन ऊपर चिंतन-मनन करत रहिथंव।
PSA 119:100 मोर म अगुवामन ले जादा समझ हवय, काबरकि मेंह तोर नियममन के पालन करथंव।
PSA 119:101 मेंह अपन गोड़ ला हर एक बुरई के रसता म जाय ले रोके हंव ताकि मेंह तोर बचन के पालन कर सकंव।
PSA 119:102 मेंह तोर कानून के पालन करे ले नइं हटे हंव, काबरकि तेंह खुद मोला ये कानून ला सिखाय हस।
PSA 119:103 तोर बचनमन मोला बहुंत मीठ लगथें, मोर मुहूं म येह मंधरस ले घलो जादा मीठ लगथे!
PSA 119:104 तोर उपदेसमन ले मोला समझ के बात मिलथे; एकरसेति मेंह हर गलत रसता ले घिन करथंव।
PSA 119:105 तोर बचन ह मोर पांव बर दीया, अऊ मोर रसता बर अंजोर अय।
PSA 119:106 मेंह कसम खाय हंव अऊ ठान ले हंव, कि मेंह तोर धरमी कानूनमन के पालन करहूं।
PSA 119:107 में बहुंत दुख झेले हंव; हे यहोवा, अपन बचन के मुताबिक मोर जिनगी ला बनाय रख।
PSA 119:108 हे यहोवा, अपन मन से मोर मुहूं ले निकले परसंसा ला गरहन कर, अऊ तोर कानून मोला सिखा।
PSA 119:109 हालाकि मेंह लगातार अपन परान ला अपन हथेली म लेके चलथंव, तभो ले मेंह तोर कानून ला नइं भूलंव।
PSA 119:110 दुस्टमन मोर बर एक फंदा लगाय हवंय, पर मेंह तोर उपदेसमन ले नइं भटके हंव।
PSA 119:111 तोर बिधिमन सदाकाल बर मोर कुल-परंपरा अंय, ओमन मोर हिरदय के आनंद अंय।
PSA 119:112 मोर हिरदय ला आखिरी तक तोर बिधि-बिधान म चले बर लगाय हवंव।
PSA 119:113 मेंह दोगला मनखेमन ले घिन करथंव, पर मेंह तोर कानून ले मया करथंव।
PSA 119:114 तेंह मोर सरन-स्थान अऊ मोर ढाल अस; मेंह तोर बचन म अपन आसा रखे हंव।
PSA 119:115 हे दुस्ट काम करइयामन, मोर ले दूर हटव, ताकि मेंह अपन परमेसर के हुकूममन ला मान सकंव!
PSA 119:116 हे मोर परमेसर, अपन वायदा के मुताबिक मोला संभाले रख ताकि मेंह जीयत रहंव; मोर आसा ला झन टूटन दे।
PSA 119:117 मोला थाम ले, अऊ मेंह बांचे रहिहूं; मेंह हमेसा तोर बिधिमन के आदर करहूं।
PSA 119:118 तेंह ओमन ला गरहन नइं करस, जऊन मन तोर नियम ले भटक जाथें, काबरकि ओमन के भरम म पड़े ले कोनो फायदा नइं होवय।
PSA 119:119 धरती के जम्मो दुस्टमन ला तेंह कुड़ा-करकट के सहीं छोंड़ देथस; एकरसेति मेंह तोर नियममन ले मया करथंव।
PSA 119:120 तोर डर म मोर देहें ह कांपथे; मेंह तोर कानून के भय म रहिथंव।
PSA 119:121 मेंह ओही काम करे हंव, जऊन ह सही अऊ नियाय-संगत अय; मोला मोर सतानेवालामन के हांथ म झन छोंड़ दे।
PSA 119:122 अपन सेवक के भलई के बात ला निस्चित कर ले; घमंडीमन ला मोर ऊपर अतियाचार झन करन दे।
PSA 119:123 मोर आंखीमन तोर उद्धार के बाट जोहत, तोर धरमी वायदा के बाट जोहत थक गे हवंय।
PSA 119:124 अपन मया के मुताबिक तोर सेवक ले बरताव कर अऊ मोला तोर नियममन ला सिखा।
PSA 119:125 मेंह तोर सेवक अंव; मोला समझ के आतमा दे ताकि मेंह तोर बिधिमन ला समझ सकंव।
PSA 119:126 हे यहोवा, तोर काम करे के समय आ गे हवय; तोर कानून ला टोरे जावत हे।
PSA 119:127 काबरकि मेंह तोर हुकूममन ला सोन ले जादा, सुध सोन ले घलो जादा मया करथंव,
PSA 119:128 अऊ काबरकि मेंह तोर जम्मो उपदेसमन ला सही मानथंव, मेंह हर गलत रसता ले घिन करथंव।
PSA 119:129 तोर नियममन अद्भूत अंय; एकरसेति मेंह ओमन ला मानथंव।
PSA 119:130 तोर बचन के समझ ले अंजोर मिलथे; येह सधारन मनखे ला समझ के आतमा देथे।
PSA 119:131 मेंह अपन मुहूं ला खोलथंव अऊ हांफथंव, काबरकि मेंह तोर हुकूम बर पीयासन हंव।
PSA 119:132 मोर कोति देख अऊ मोर ऊपर दया कर, जइसे कि तेंह हमेसा ओमन ऊपर करथस, जऊन मन तोर नांव ले मया करथें।
PSA 119:133 अपन बचन के मुताबिक मोर गोड़मन ला चले के निरदेस दे; मोर ऊपर कोनो पाप के अधिकार झन होवन दे।
PSA 119:134 मोला मनखेमन के अतियाचार ले छोंड़ा ले, ताकि मेंह तोर उपदेसमन के पालन करंव।
PSA 119:135 अपन दास ऊपर अपन मुहूं के अंजोर ला चमका अऊ मोला अपन बिधिमन ला सिखा।
PSA 119:136 मोर आंखी ले आंसू के धारा बहत हे, काबरकि मनखेमन तोर कानून के पालन नइं करत हंय।
PSA 119:137 हे यहोवा तेंह धरमी अस, अऊ तोर कानूनमन सही अंय।
PSA 119:138 जऊन नियम तेंह बनाय हस, ओमन धरमी अंय; ओमन पूरा बिसवासयोग्य अंय।
PSA 119:139 मोर उत्साह ह मोला भसम करत हवय, काबरकि मोर बईरीमन तोर बचन के अनदेखा करत हवंय।
PSA 119:140 तोर वायदामन पूरा परखे गे हवंय, अऊ तोर सेवक ह ओमन ले मया करथे।
PSA 119:141 हालाकि मेंह नीचा अऊ तुछ समझे जावत हंव, तभो ले मेंह तोर उपदेसमन ला नइं भूलंव।
PSA 119:142 तोर धरमीपन ह सदा बने रहिथे अऊ तोर कानून ह सच ए।
PSA 119:143 समस्या अऊ दुख मोर ऊपर आय हवय, पर तोर हुकूम ह मोला खुसी देथे।
PSA 119:144 तोर नियममन हमेसा सही अंय; मोला समझ के आतमा दे कि मेंह जीयत रहंव।
PSA 119:145 हे यहोवा, मेंह अपन पूरा मन से तोला पुकारत हंव; मोला जबाब दे, अऊ मेंह तोर बिधिमन ला मानहूं।
PSA 119:146 मेंह तोला पुकारत हंव; मोला बचा अऊ मेंह तोर नियममन ला मानहूं।
PSA 119:147 मेंह बिहान होय के पहिले उठथंव अऊ मदद बर गोहारथंव; मेंह तोर बचन ऊपर अपन आसा रखे हंव।
PSA 119:148 मोर आंखी ह रथिया के जम्मो पहर खुला रहिथे, ताकि मेंह तोर वायदामन ऊपर मनन कर सकंव।
PSA 119:149 अपन मया के मुताबिक मोर बात ला सुन; हे यहोवा, अपन कानून के मुताबिक मोर जिनगी ला बनाय रख।
PSA 119:150 जऊन मन दुस्ट योजना बनाथें, ओमन लकठा म हवंय, पर ओमन तोर कानून ले बहुंत दूरिहा हवंय।
PSA 119:151 तभो ले हे यहोवा, तेंह मोर लकठा म हस, अऊ तोर जम्मो हुकूममन सच अंय।
PSA 119:152 बहुंत पहिले मेंह तोर नियममन ले सीखे रहेंव कि तेंह ओमन ला सदाकाल तक बने रहे बर बनाय हस।
PSA 119:153 मोर दुख ला देख अऊ येकर ले मोला छोंड़ा, काबरकि मेंह तोर कानून ला नइं भूले हंव।
PSA 119:154 मोर मामला के बचाव कर अऊ मोला छोंड़ा; अपन वायदा के मुताबिक मोर जिनगी ला बनाय रख।
PSA 119:155 दुस्ट मनखेमन ले उद्धार ह बहुंत दूरिहा हवय, काबरकि ओमन तोर बिधिमन ऊपर धियान नइं देवंय।
PSA 119:156 हे यहोवा, तोर दया ह महान ए; अपन कानून के मुताबिक मोर जिनगी ला बनाय रख।
PSA 119:157 बईरीमन बहुंत हवंय, जऊन मन मोला सताथें, पर मेंह तोर नियममन ला माने ले नइं हटे हंव।
PSA 119:158 मेंह बिसवासहीन मनखेमन ला नफरत के नजर ले देखथंव, काबरकि ओमन तोर बचन के पालन नइं करंय।
PSA 119:159 देख, मेंह तोर नियम ले कइसे मया रखथंव; हे यहोवा, अपन मया के मुताबिक मोर जिनगी ला बनाय रख।
PSA 119:160 तोर जम्मो बचनमन सच अंय; तोर जम्मो धरमी कानूनमन सदाकाल बर अंय।
PSA 119:161 सासन करइयामन बिगर कोनो कारन के मोला सताथें, पर मोर हिरदय ह तोर बचन के खियाल करके कांपथे।
PSA 119:162 जइसे कोनो बड़े लूट के माल मिले ले खुस होथे, वइसे मेंह तोर करे गय वायदामन ले आनंदित होथंव।
PSA 119:163 लबारी बात ले मेंह घिन करथंव अऊ ओला तुछ समझथंव पर मेंह तोर कानून ले मया करथंव।
PSA 119:164 तोर धरमी कानून बर दिन म सात बार मेंह तोर परसंसा करथंव।
PSA 119:165 जऊन मन तोर कानून ले मया करथें, ओमन ला बहुंत सांति मिलथे, अऊ कोनो भी चीज ले ओमन ला ठोकर नइं लगय।
PSA 119:166 हे यहोवा, मेंह तोर उद्धार के इंतजार करथंव, अऊ मेंह तोर हुकूममन के पालन करथंव।
PSA 119:167 मेंह तोर नियममन ला मानथंव, काबरकि मेंह ओमन ले बहुंत मया करथंव।
PSA 119:168 मेंह तोर नियम अऊ बिधिमन के पालन करथंव, काबरकि मोर जम्मो चालचलन ला तेंह जानत हस।
PSA 119:169 हे यहोवा, मोर गोहार ह तोर करा हबरे; अपन बचन के मुताबिक मोला समझ के आतमा दे।
PSA 119:170 मोर बिनती ह तोर करा हबरे; अपन वायदा के मुताबिक मोला छोंड़ा।
PSA 119:171 मोर मुहूं ले बहुंत परसंसा के बात निकले, काबरकि तेंह मोला अपन बिधिमन ला सिखाथस।
PSA 119:172 मोर जीभ ह तोर बचन के गीत गावय, काबरकि तोर जम्मो हुकूममन धरमी अंय।
PSA 119:173 तोर हांथ ह मोर मदद करे बर तियार रहय, काबरकि मेंह तोर उपदेसमन ला अपना ले हंव।
PSA 119:174 हे यहोवा, मेंह तोर ले उद्धार के ईछा करथंव, अऊ तोर कानून ला पालन करके मोला खुसी मिलथे।
PSA 119:175 मोला जीयत रहन दे कि मेंह तोर परसंसा करंव, अऊ तोर कानूनमन मोला संभाले रहंय।
PSA 119:176 मेंह गंवाय भेड़ सहीं भटक गे हंव। अपन सेवक ला खोज, काबरकि मेंह तोर हुकूममन ला नइं भूले हंव।
PSA 120:1 आरोहन के एक गीत। मेंह अपन दुख म यहोवा ला पुकारथंव, अऊ ओह मोला जबाब देथे।
PSA 120:2 हे यहोवा, लबारी मरइया ओंठ अऊ धोखा देवइया जीभ ले मोला बचा।
PSA 120:3 हे धोखा देवइया जीभ, तोर संग परमेसर ह का करही, अऊ येकर अलावा अऊ का होही?
PSA 120:4 ओह तोला एक योद्धा के नुकीला तीरमन ले, बहरी बनइया झाड़ी के बरत कोइलामन ले सजा दीही।
PSA 120:5 धिक्कार ए मोर ऊपर कि मेंह मेसेक देस म निवास करथंव, अऊ ये कि केदार के तम्बूमन के बीच रहिथंव!
PSA 120:6 बहुंत समय तक मेंह ओमन के बीच रहेंव, जऊन मन सांति बिलकुल पसंद नइं करंय।
PSA 120:7 मोला सांति बने लगथे; पर जब मेंह गोठियाथंव, त ओमन लड़ई करे चाहथें।
PSA 121:1 आरोहन के एक गीत। मेंह अपन आंखी ला पहाड़मन कोति लगाथंव— मोर मदद कहां ले आथे?
PSA 121:2 मोर मदद ह यहोवा ले आथे, जऊन ह अकास अऊ धरती के रचइया ए।
PSA 121:3 ओह तोर पांव ला फिसले बर नइं दीही— जऊन ह तोर रखवारी करथे, ओह नइं ऊंघय;
PSA 121:4 वास्तव म, जऊन ह इसरायल के रखवारी करथे, ओह न तो ऊंघय अऊ न ही सुतय।
PSA 121:5 यहोवा ह तोर रखवारी करथे— यहोवा ह तोर जेवनी हांथ कोति बचाव के तोर छइहां ए;
PSA 121:6 न तो दिन के समय सूरज ले अऊ न ही रथिया के बेरा चंदा ले तोला कोनो हानि होही।
PSA 121:7 यहोवा ह तोला जम्मो हानि ले बचाही— ओह तोर जिनगी के रखवारी करही;
PSA 121:8 यहोवा ह तोर अवई-जवई म तोर रकछा अब ले लेके सदाकाल तक करत रहिही।
PSA 122:1 आरोहन के एक गीत। दाऊद के गीत। मेंह ओमन के संग आनंद मनाथंव, जऊन मन मोला कहिन, “आवव, यहोवा के घर चलबो।”
PSA 122:2 हे यरूसलेम, तोर दुवारमन म हमन खड़े हवन।
PSA 122:3 यरूसलेम ला ओ सहर के सहीं बनाय गे हवय, जेकर घरमन एक-दूसर ले एक संग जुड़े हवंय।
PSA 122:4 ओही ह ओ जगह ए, जिहां गोत्र-गोत्र के मनखे— यहोवा के गोत्र के मनखे यहोवा के नांव के परसंसा करे बर जाथें, अऊ ये परसंसा के काम इसरायल ला दिये गय नियम के मुताबिक होथे।
PSA 122:5 उहां नियाय बर सिंघासनमन हवंय, अऊ ओमन दाऊद के घराना के सिंघासन अंय।
PSA 122:6 यरूसलेम के सांति बर पराथना करव: “जऊन मन तोर ले मया करथें, ओमन सुरकछित रहंय।
PSA 122:7 तोर दीवारमन के भीतर म सांति अऊ तोर गढ़मन म सुरकछा बने रहय।”
PSA 122:8 अपन परिवार अऊ संगवारीमन के हित म, मेंह कहिहूं, “तुमन म सांति रहय।”
PSA 122:9 यहोवा, हमर परमेसर के घर के हित म मेंह तुम्हर उन्नति के कोसिस म रहिहूं।
PSA 123:1 आरोहन के एक गीत। मेंह अपन नजर तोर कोति करथंव, तोर कोति, जऊन ह स्वरग म बिराजमान हे।
PSA 123:2 जइसे कि दासमन के नजर ह अपन मालिक के हांथ कोति, जइसे कि दासी के नजर ह अपन मालकिन के हांथ कोति लगे रहिथे, वइसे ही हमर नजर ह यहोवा, हमर परमेसर कोति तब तक लगे रहिथे, जब तक कि ओह हमर ऊपर अपन दया नइं देखावय।
PSA 123:3 हे यहोवा, हमर ऊपर दया कर, हमर ऊपर दया कर, काबरकि हमन बहुंत अपमान सहे हन।
PSA 123:4 घमंडी मनखेमन हमर बहुंत हंसी उड़ाय हवंय, घमंडी मनखेमन के हमन घोर अपमान सहे हन।
PSA 124:1 आरोहन के एक गीत। दाऊद के गीत। कहूं यहोवा ह हमर कोति नइं होतिस— त इसरायल ह कहय—
PSA 124:2 कहूं यहोवा ह हमर कोति नइं होतिस जब मनखेमन हमर ऊपर हमला करिन,
PSA 124:3 त ओमन हमन ला जीयत लील ले रहितिन जब ओमन के गुस्सा हमर ऊपर भड़किस;
PSA 124:4 बाढ़ के पानी म हमन बुड़ गे रहितेंन, पानी के बहाव म हमन बह गे रहितेंन,
PSA 124:5 भयंकर पानी के धारा ह हमन ला बहाके ले गे रहितिस।
PSA 124:6 यहोवा के परसंसा होवय, जऊन ह हमन ला ओमन के दांत के दुवारा फाड़े जाय ले बचाय हवय।
PSA 124:7 हमन चिड़ीमार के जाल ले बचे एक चिरई के सहीं अन; जाल ह फट गे हवय, अऊ हमन बच गे हवन।
PSA 124:8 हमर मदद यहोवा के नांव म होथे, जऊन ह अकास अऊ धरती ला बनाय हवय।
PSA 125:1 आरोहन के एक गीत। जऊन मन यहोवा ऊपर भरोसा रखथें, ओमन सियोन पहाड़ सहीं अंय, जेला हलाय नइं जा सकय पर येह सदा अटल बने रहिथे।
PSA 125:2 जइसे कि पहाड़मन यरूसलेम ला चारों कोति ले घेरे हवंय, वइसे ही यहोवा ह अपन मनखेमन ला अब अऊ सदाकाल तक घेरे रहिथे।
PSA 125:3 दुस्टमन के राजदंड ह धरमीमन ला दिये गय भुइयां ऊपर हमेसा बने नइं रहिही, काबरकि तब धरमीमन अपन हांथ दुस्ट काम करे म लगा सकथें।
PSA 125:4 हे यहोवा, ओमन के भलई कर, जऊन मन सीधवा मनखे अंय, ओमन के भलई कर, जेमन के मन ह ईमानदार अय।
PSA 125:5 पर जऊन मन बेईमानी के रसता ला धरथें यहोवा ह ओमन ला दुस्टमन के संग निकाल दीही। इसरायल ला सांति मिलय।
PSA 126:1 आरोहन के एक गीत। जब यहोवा ह सियोन के भाग्य ला फेर पलटिस, त हमन सपना देखइयामन सहीं हो गे रहेंन।
PSA 126:2 तब खुसी के मारे हमन बहुंत हंसेंन, हमर मुहूं ले आनंद के गीत निकलत रिहिस। तब जाति-जाति के मनखेमन के बीच ये कहे गीस, “यहोवा ह ओमन बर बड़े-बड़े काम करे हवय।”
PSA 126:3 यहोवा ह हमर बर बड़े-बड़े काम करे हवय, अऊ येकर कारन हमन बहुंत आनंदित हन।
PSA 126:4 हे यहोवा, नेगेव म पानी के सोता सहीं, हमर भाग्य ला फेर पलट दे।
PSA 126:5 जऊन मन आंसू बहात बोथें, ओमन आनंद के गीत गावत फसल ला लूहीं।
PSA 126:6 जऊन मन बीजा ला बोए बर रोवत बाहिर निकलथें, ओमन फसल के बीड़ा लेके आनंद के गीत गावत लहुंटहीं।
PSA 127:1 आरोहन के एक गीत। सुलेमान के गीत। यदि घर ला यहोवा ह नइं बनावय, त ओकर बनानेवालामन के मेहनत ह बेकार होथे। यदि सहर के पहरेदारी यहोवा ह नइं करय, त पहरेदारमन के पहरेदारी ह बेकार होथे।
PSA 127:2 तुमन बेकार म बड़े बिहनियां उठथव अऊ देर रात तक जागके जेवन बर मेहनत करथव— काबरकि ओह ओमन ला नींद देथे, जेमन ले ओह मया करथे।
PSA 127:3 लइकामन यहोवा के दुवारा दिये गय भाग होथें, लइका ह ओकर कोति ले दिये गय एक ईनाम ए।
PSA 127:4 जइसे एक योद्धा के हांथ म तीरमन होथें, वइसे जवानी के समय म जनमे लइकामन होथें।
PSA 127:5 धइन अय ओ मनखे जेकर तरकस ह ओमन ले भरे हवय। जब ओमन अदालत म अपन बिरोधीमन के सामना करहीं त ओमन ला लज्जित होना नइं पड़ही।
PSA 128:1 आरोहन के एक गीत। धइन अंय ओ जम्मो, जऊन मन यहोवा के भय मानथें, जऊन मन ओकर हुकूम ला मानत चलथें।
PSA 128:2 तेंह अपन मेहनत के फल खाबे; तोला आसीस मिलही अऊ तोर उन्नति होही।
PSA 128:3 तोर घरवाली ह तोर घर के भीतर फल देवइया अंगूर के एक नार सहीं होही; तोर लइकामन तोर मेज के चारों कोति जैतून रूख के निकले अंकुर सहीं होहीं।
PSA 128:4 हव, येह ओ मनखे बर आसीस होही, जऊन ह यहोवा के भय मानथे।
PSA 128:5 यहोवा ह सियोन ले तोला आसीस देवय; तेंह अपन जिनगी भर यरूसलेम के उन्नति देखत रह।
PSA 128:6 अपन लइकामन के लइकामन ला देखे बर जीयत रह— इसरायल ला सांति मिलय।
PSA 129:1 आरोहन के एक गीत। इसरायल ह कहय, “मोर जवानी के समय ले ओमन मोर ऊपर बहुंत अतियाचार करे हवंय,
PSA 129:2 मोर जवानी के समय ले ओमन मोर ऊपर बहुंत अतियाचार करे हवंय, पर ओमन ला मोर ऊपर कभू जीत नइं मिलिस।
PSA 129:3 नांगर चलइयामन मोर पीठ म नांगर चलाय हवंय अऊ लम्बा-लम्बा घारी बनाय हवंय।
PSA 129:4 पर यहोवा ह धरमी ए; ओह दुस्टमन के डोरी के बंधना ला काटके मोला सुतंतर कर दे हवय।”
PSA 129:5 जऊन मन सियोन ले घिन करथें ओमन सरम के मारे लहुंट जावंय।
PSA 129:6 ओमन छानी ऊपर जामे कांदी सहीं होवंय, जऊन ह बढ़े के पहिले अइला जाथे;
PSA 129:7 जेला कोनो लुवइया अपन हांथ म नइं धर सकय, न ही कोनो ओला अपन हांथ म कुढ़ो सकथे।
PSA 129:8 जऊन मन उहां ले होके जाथें, ओमन ये झन कहंय, “यहोवा के आसीस तुम्हर ऊपर होवय; हमन तुमन ला यहोवा के नांव म आसीस देवत हन।”
PSA 130:1 आरोहन के एक गीत। हे यहोवा, मेंह निरासा के गहरई म ले तोला पुकारत हंव;
PSA 130:2 हे परभू, मोर अवाज ला सुन। तोर कानमन दया के मोर गोहार ला धियान देके सुनंय।
PSA 130:3 हे यहोवा, यदि तेंह पाप के लेखा-जोखा रखते, त हे परभू, कोन ह ठहर सकतिस?
PSA 130:4 पर तेंह छेमा करइया अस, ताकि हमन आदर सहित तोर सेवा करन।
PSA 130:5 मेंह यहोवा के बाट जोहथंव, मोर जम्मो चीज ओकर बाट जोहत रहिथे, अऊ ओकर बचन ऊपर मेंह अपन आसा रखथंव।
PSA 130:6 पहरेदारमन बिहनियां होय के जतेक बाट जोहथें, हां, पहरेदारमन बिहनियां होय के जतेक बाट जोहथें, ओकर ले जादा मेंह परभू के बाट जोहथंव।
PSA 130:7 हे इसरायल, यहोवा ऊपर अपन आसा रख, काबरकि यहोवा म बहुंत मया हवय अऊ ओहीच ह पूरा छुटकारा देथे।
PSA 130:8 ओह खुद इसरायलीमन ला ओमन के जम्मो पाप ले छुटकारा दीही।
PSA 131:1 आरोहन के एक गीत। दाऊद के गीत। हे यहोवा, मोर मन ह घमंडी नो हय, न ही मोर आंखीमन घमंड ले चढ़े हवंय; जऊन ह बड़े बात ए, या ओ बात जऊन ह मोर बर बहुंत अद्भूत ए, अइसन बातमन ले मेंह कोनो मतलब नइं रखंव।
PSA 131:2 पर मेंह अपनआप ला सांत अऊ चुप कर ले हंव, मेंह दाई के कोरा म दूध पीके पड़े एक लइका सहीं अंव; दूध पीये लइका सहीं मेंह संतुस्ट हंव।
PSA 131:3 हे इसरायल, अब ले लेके सदाकाल तक यहोवा ऊपर अपन आसा बनाय रख।
PSA 132:1 आरोहन के एक गीत। हे यहोवा, दाऊद अऊ ओकर जम्मो दुरदसा ला सुरता कर।
PSA 132:2 ओह यहोवा ले एक कसम खाईस, ओह याकूब के सक्तिसाली जन ले वायदा करिस:
PSA 132:3 “मेंह तब तक अपन घर के भीतर नइं जावंव या अपन बिस्तर म नइं जावंव,
PSA 132:4 मेंह अपन आंखी म नींद आवन नइं दंव या अपन आंखी के पलक म झपकी नइं आवन दंव,
PSA 132:5 जब तक कि मोला यहोवा बर एक जगह, याकूब के सक्तिसाली जन बर एक निवास स्थान नइं मिल जाही।”
PSA 132:6 हमन ये बात एपराता म सुने हवन, हमन यार के मैदान म घलो येला पाय हवन।
PSA 132:7 “आवव, ओकर निवास स्थान म चलन, आवव, ओकर पांव के चउकी म ये कहिके अराधना करन,
PSA 132:8 ‘हे यहोवा, उठ अऊ अपन बिसराम के जगह म अपन सक्ति के सन्दूक के संग आ।
PSA 132:9 तोर पुरोहितमन तोर धरमीपन के कपड़ा पहिरंय; तोर बिसवासयोग्य मनखेमन आनंद के गीत गावंय।’ ”
PSA 132:10 अपन सेवक दाऊद के हित म, अपन अभिसिक्त जन ला झन तियाग।
PSA 132:11 यहोवा ह दाऊद ले एक कसम खाईस, एक सच्चा कसम, जेला ओह नइं टोरय: “तोर खुद के संतानमन ले एक झन ला तोर सिंघासन म बईठाहूं।
PSA 132:12 यदि तोर बेटामन मोर करार ला मानहीं अऊ जऊन नियम मेंह सिखाथंव, ओमा चलहीं, त ओमन के बेटामन तोर सिंघासन म सदाकाल बर बईठत रहिहीं।”
PSA 132:13 काबरकि यहोवा ह सियोन ला चुने हवय, ओह ये कहत येला अपन निवास बर पसंद करे हवय,
PSA 132:14 “येह सदाकाल बर मोर अराम के जगह ए; इहां मेंह बिराजमान होहूं, काबरकि येला मेंह पसंद करे हवंव।
PSA 132:15 मेंह येकर खाय-पीये के चीजमन ला बहुंत आसीस दूहूं; येकर गरीब मनखेमन ला मेंह जेवन देके संतुस्ट करहूं।
PSA 132:16 मेंह येकर पुरोहितमन ला उद्धार के कपड़ा पहिराहूं, अऊ येकर बिसवासयोग्य मनखेमन हमेसा आनंद के गीत गाहीं।
PSA 132:17 “इहां मेंह दाऊद बर एक सींग ला बढ़ाहूं अऊ अपन अभिसिक्त जन बर एक दीया ला मढ़ाहूं।
PSA 132:18 मेंह ओकर बईरीमन ला लज्जा के कपड़ा पहिराहूं, पर ओकर मुड़ ला चमकत मुकुट ले सोभायमान करे जाही।”
PSA 133:1 आरोहन के एक गीत। दाऊद के गीत। येह कतेक बने अऊ खुसी के बात होथे जब परमेसर के मनखेमन एकता बनाके एक संग रहिथें!
PSA 133:2 येह अइसने ए, मानो कीमती तेल ला मुड़ म डाले गीस, जऊन ह दाढ़ी तक बहत हे, हव, खाल्हे हारून के दाढ़ी म बहत, ओकर कपड़ा के कालर तक पहुंच जाथे।
PSA 133:3 येह ओकर सहीं ए, मानो हेरमोन के ओस ह सियोन पहाड़ ऊपर गिरत हे। काबरकि ओह ओ जगह ए, जिहां यहोवा ह हमेसा बर अपन आसीस अऊ जिनगी देथे।
PSA 134:1 आरोहन के एक गीत। हे यहोवा के जम्मो सेवकमन, तुमन जऊन मन रथिया यहोवा के घर म सेवा करथव यहोवा के परसंसा करव।
PSA 134:2 पबितर-स्थान म अपन हांथ ला ऊपर उठावव अऊ यहोवा के परसंसा करव।
PSA 134:3 यहोवा, जऊन ह अकास अऊ धरती के रचइता ए, ओह तुमन ला सियोन ले आसीस देवय।
PSA 135:1 यहोवा के परसंसा करव। यहोवा के नांव के परसंसा करव; हे यहोवा के सेवकमन, ओकर परसंसा करव,
PSA 135:2 तुमन, जऊन मन यहोवा के घर म सेवा करथव, तुमन, जऊन मन हमर परमेसर के घर के अंगना म सेवा करथव।
PSA 135:3 यहोवा के परसंसा करव, काबरकि यहोवा ह बने अय, ओकर नांव के परसंसा करव, काबरकि येह मन ला भाथे।
PSA 135:4 यहोवा ह याकूब ला अपन खुद के होय बर चुन ले हवय, इसरायल ला अपन कीमती संपत्ति होय बर चुन ले हवय।
PSA 135:5 मेंह जानत हंव कि यहोवा ह महान ए, ये घलो कि हमर परभू ह जम्मो देवतामन ले महान ए।
PSA 135:6 यहोवा ला जऊन बात बने लगथे, ओह ओला अकास अऊ धरती म, समुंदर अऊ ओकर जम्मो गहरई म करथे।
PSA 135:7 ओह धरती के छोर ले बादरमन ला उठाथे; ओह बारिस के संग बिजली पठोथे अऊ अपन भंडारघर ले हवा ला बाहिर लानथे।
PSA 135:8 ओह मिसर देस के पहिलांत, मनखे अऊ पसुमन के पहिलांत ला मार डारिस।
PSA 135:9 हे मिसर देस, ओह तोर बीच म, फिरौन अऊ ओकर जम्मो सेवकमन के बिरूध चिनहां अऊ चमतकार देखाईस।
PSA 135:10 ओह कतको जातिमन ला नास कर दीस अऊ कतको सक्तिसाली राजामन ला मार डारिस—
PSA 135:11 याने कि अमोरीमन के राजा सीहोन, बासान के राजा ओग, अऊ कनान के जम्मो राजामन ला—
PSA 135:12 अऊ ओमन के देस ला निज भाग के रूप म अपन मनखे इसरायलीमन ला दे दीस।
PSA 135:13 हे यहोवा, तोर नांव सदा बने रहिथे, हे यहोवा, तोर खियाती जम्मो पीढ़ी म बने रहिथे।
PSA 135:14 काबरकि यहोवा ह अपन मनखेमन के नियाय करही अऊ अपन सेवकमन ऊपर दया देखाही।
PSA 135:15 आनजात के मूरतीमन मनखेमन के हांथ के बनाय सोन अऊ चांदी अंय।
PSA 135:16 ओमन के मुहूं तो हवय, पर ओमन गोठियाय नइं सकंय, ओमन के आंखी तो हवय, पर देख नइं सकंय।
PSA 135:17 ओमन के कान तो हवय, पर सुन नइं सकंय, अऊ न ही ओमन के मुहूं म सांस हवय।
PSA 135:18 येमन ला बनानेवालामन येमन के सहीं हो जाहीं, अऊ येमन ऊपर भरोसा रखइया जम्मो झन घलो येमन सहीं हो जाहीं।
PSA 135:19 हे जम्मो इसरायलीमन, यहोवा के परसंसा करव; हे हारून के घराना, यहोवा के परसंसा करव;
PSA 135:20 हे लेवी के घराना, यहोवा के परसंसा करव; तुमन, जऊन मन ओकर भय मानथव, यहोवा के परसंसा करव।
PSA 135:21 सियोन ले यहोवा के परसंसा होवय, ओकर परसंसा होवय, जऊन ह यरूसलेम म निवास करथे। यहोवा के परसंसा होवय।
PSA 136:1 यहोवा ला धनबाद देवव, काबरकि ओह बने अय।
PSA 136:2 ईस्वरमन के परमेसर ला धनबाद देवव।
PSA 136:3 परभूमन के परभू ला धनबाद देवव:
PSA 136:4 ओकर छोंड़ अऊ कोनो बड़े-बड़े अद्भूत काम नइं करंय,
PSA 136:5 जऊन ह अपन समझ से अकास ला बनाईस,
PSA 136:6 जऊन ह पानी के ऊपर धरती ला फईला दीस,
PSA 136:7 जऊन ह बड़े-बड़े अंजोरमन ला बनाईस—
PSA 136:8 जऊन ह दिन म परभूता करे बर सूरज ला बनाईस,
PSA 136:9 जऊन ह रथिया ऊपर परभूता करे बर चंदा अऊ तारामन ला बनाईस;
PSA 136:10 ओला धनबाद देवव, जऊन ह मिसर देस के पहिलऊठामन ला मार डारिस,
PSA 136:11 अऊ ओमन के बीच ले इसरायलीमन ला निकाल लानिस
PSA 136:12 सक्तिसाली हांथ अऊ बढ़े हुए बाहां के दुवारा निकाल लानिस;
PSA 136:13 ओला धनबाद देवव, जऊन ह लाल-समुंदर ला अलग-अलग कर दीस
PSA 136:14 अऊ इसरायलीमन ला येकर बीच म ले पार करवा दीस,
PSA 136:15 पर फिरौन अऊ ओकर सेना ला लाल-समुंदर म बुड़ा दीस;
PSA 136:16 ओला धनबाद देवव, जऊन ह निरजन प्रदेस म अपन मनखेमन के अगुवई करिस;
PSA 136:17 ओला धनबाद देवव, जऊन ह बड़े-बड़े राजामन ला मार डारिस,
PSA 136:18 अऊ सक्तिसाली राजामन ला घलो मार डारिस—
PSA 136:19 याने कि अमोरीमन के राजा सीहोन ला मार डारिस
PSA 136:20 अऊ बासान के राजा ओग ला मार डारिस—
PSA 136:21 अऊ ओमन के देस ला निज भाग के रूप म दे दीस,
PSA 136:22 अपन सेवक इसरायलीमन ला निज भाग के रूप म दे दीस।
PSA 136:23 ओह हमन ला हमर गिरत दसा म सुरता करिस
PSA 136:24 अऊ हमन ला हमर बईरीमन ले छोंड़ाईस।
PSA 136:25 ओह हर एक परानी ला जेवन देथे।
PSA 136:26 स्वरग के परमेसर ला धनबाद देवव।
PSA 137:1 बेबिलोन देस के नदीमन के तीर म हमन बईठेंन अऊ सियोन ला सुरता करके रोए लगेंन।
PSA 137:2 उहां चिनार रूखमन म हमन अपन बीना ला टांग देंन,
PSA 137:3 काबरकि जऊन मन हमन ला बंधुवा बनाके ले गे रिहिन, ओमन उहां हमन ला गीत गाय बर कहिन, हमन ला सतानेवालामन हमन ला आनंद के गीत गाय बर कहिन; ओमन कहिन, “हमर बर सियोन के एक गीत गावव!”
PSA 137:4 एक आने देस म हमन यहोवा के गीत कइसे गा सकत हन?
PSA 137:5 हे यरूसलेम, यदि मेंह तोला भूल जावंव, त मोर जेवनी हांथ अपन योग्यता ला भूल जावय।
PSA 137:6 यदि मेंह तोला सुरता नइं करंव, यदि मेंह यरूसलेम ला अपन सबले बड़े आनंद नइं मानंव, त मोर जीभ ह मोर तालू ले चपक जावय।
PSA 137:7 हे यहोवा, सुरता कर कि ओ दिन एदोमीमन का करिन, जब यरूसलेम ला गिराय गीस। ओमन चिचियाके कहिन, “येला फोरके गिरा दव, येला येकर नीव ले गिरा दव!”
PSA 137:8 हे बेटी बेबिलोन, तोर बिनास होवय, ओ मनखे ह खुस रहय, जऊन ह ओ अतियाचार के मुताबिक तोर ले बदला लेथे, जेला तेंह हमर ऊपर करे हस।
PSA 137:9 ओ मनखे ह खुस रहय, जऊन ह तोर लइकामन ला पकड़के चट्टान ऊपर पटक देथे।
PSA 138:1 दाऊद के गीत। हे यहोवा, मेंह अपन पूरा मन से तोर परसंसा करहूं; देवतामन के आघू म मेंह तोर परसंसा के गीत गाहूं।
PSA 138:2 तोर बहुंत मया अऊ तोर बिसवासयोग्यता के कारन मेंह तोर पबितर मंदिर कोति मुड़ नवाहूं अऊ तोर नांव के परसंसा करहूं, काबरकि तेंह अपन पबितर बचन ला अऊ अपन महिमा ला सबले ऊपर करे हस।
PSA 138:3 जब मेंह तोला पुकारेंव, त तेंह मोर पराथना के उत्तर देय; तेंह मोला बहुंत हिम्मत दे हस।
PSA 138:4 हे यहोवा, जब धरती के जम्मो राजामन तोर बचन ला सुनंय, त ओमन तोर परसंसा करंय।
PSA 138:5 ओमन यहोवा के बिधिमन के गीत गावंय, काबरकि यहोवा के महिमा ह महान ए।
PSA 138:6 हालाकि यहोवा के दरजा बहुंत ऊपर हे, पर ओह नम्र मनखेमन ऊपर दया देखाथे; हालाकि ओह बहुंत ऊंचहा हे, पर ओह ओमन ला दूरिहा ले देखथे।
PSA 138:7 हालाकि मेंह समस्या म ले होके जाथंव, पर तेंह मोर जिनगी ला बनाय रखथस। तेंह मोर बईरीमन के कोरोध के बिरूध अपन हांथ बढ़ाथस; अपन जेवनी हांथ के दुवारा तेंह मोला बचाथस।
PSA 138:8 यहोवा ह मोर रकछा करही, हे यहोवा, तोर मया ह हमेसा बर बने रहिथे— अपन हांथ के काममन ला झन तियाग दे।
PSA 139:1 संगीत निरदेसक बर दाऊद के एक भजन। हे यहोवा, तेंह मोला जांचे हस, अऊ तेंह मोला जानथस।
PSA 139:2 मेंह कब उठथंव अऊ कब बईठथंव, तेंह जानथस, तेंह मोर बिचारमन ला दूरिहा ले ही समझ लेथस।
PSA 139:3 तेंह मोर जवई अऊ मोर लेटई ला जानथस; तोला मोर जम्मो बात के जानकारी हवय।
PSA 139:4 हे यहोवा, येकर पहिले कि कोनो बात मोर मुहूं म आवय तेंह ओला पूरा जानथस।
PSA 139:5 तेंह मोला आघू-पाछू ले घेरे रहिथस, अऊ तेंह मोर ऊपर अपन हांथ रखथस।
PSA 139:6 अइसने गियान ह मोर बर बहुंत अद्भूत ए, येला पाना मोर बर बहुंत दूरिहा के बात ए।
PSA 139:7 तोर आतमा ले बचके मेंह कहां जा सकथंव? तोर आघू ले बचके मेंह कहां भाग सकथंव?
PSA 139:8 कहूं मेंह अकास ऊपर जावंव, त तेंह उहां हस; कहूं मेंह अपन दसना गहरई म दसावंव, त तेंह उहां हस।
PSA 139:9 कहूं मेंह उठके बड़े बिहनियां के डेना म बईठके दूरिहा चले जावंव, कहूं मेंह दूरिहा समुंदर म बस जावंव,
PSA 139:10 त उहां घलो तोर हांथ ह मोर अगुवई करही, तोर जेवनी हांथ ह मोला मजबूती से थामे रहिही।
PSA 139:11 कहूं मेंह कहंव, “खचित अंधियार ह मोला छुपा लीही अऊ चारों कोति के अंजोर ह रथिया के अंधियार हो जाही,”
PSA 139:12 तभो ले अंधियार ह तोर बर अंधियार नइं होही; रथिया ह दिन के सहीं चमकही, काबरकि अंधियार ह तोर बर अंजोर सहीं अय।
PSA 139:13 काबरकि तेंह मोर भीतरी भाग ला बनाय हस; तेंह मोर दाई के गरभ म मोला एक संग जोड़े हस।
PSA 139:14 मेंह तोर परसंसा करथंव काबरकि मेंह भयानक अऊ अद्भूत रीति से बनाय गे हवंव; तोर काममन अद्भूत अंय, मेंह ओला बने करके जानथंव।
PSA 139:15 जब मोला गुपत जगह म बनाय गीस, जब मोला धरती के गहरई म एक संग बुने गीस, त मोर ढांचा ह तोर ले छुपे नइं रिहिस।
PSA 139:16 तोर आंखी ह मोर बिगर आकार के देहें ला देखिस; मोर देहें के अंग, जऊन मन बनत जावत रिहिन, ओमन रचे जाय के पहिले तोर किताब म लिखाय रिहिन।
PSA 139:17 हे परमेसर, तोर बिचारमन मोर बर कतेक कीमती अंय! कुल मिलाके ओमन के जोड़ ह कतेक बड़े हे!
PSA 139:18 कहूं मेंह ओमन के गनती करंव, त ओमन के गनती बालू के कन ले घलो जादा होही— जब मेंह जागथंव, तब भी मेंह तोर संग रहिथंव।
PSA 139:19 हे परमेसर, बने होतिस कि तेंह दुस्टमन ला मार डारते! हे खून के पीयासा मनखेमन, मोर ले दूरिहा हटव!
PSA 139:20 ओमन तोर बारे म बुरई के इरादा से बात करथें; तोर बिरोधीमन तोर नांव के गलत उपयोग करथें।
PSA 139:21 हे यहोवा, का मेंह ओमन ले घिन नइं करंव, जऊन मन तोर ले घिन करथें, अऊ का ओमन ले घिन नइं करंव, जऊन मन तोर बिरूध बिदरोह करथें?
PSA 139:22 मोर करा ओमन बर घिन करे के अलावा अऊ कुछू नइं ए; मेंह ओमन ला अपन बईरी समझथंव।
PSA 139:23 हे परमेसर, मोला जांचके मोर हिरदय ला जान ले; मोला परखके मोर उत्सुक बिचारमन ला जान ले।
PSA 139:24 देख कि कहूं मोर म कोनो खराप चाल तो नइं ए, अऊ अनंत के रसता म मोर अगुवई कर।
PSA 140:1 संगीत के निरदेसक बर दाऊद के एक भजन। हे यहोवा, मोला दुस्ट काम करइयामन ले छुड़ा; हिंसा करइयामन ले मोला बचा,
PSA 140:2 जऊन मन अपन मन म दुस्ट काम करे के योजना बनाथें अऊ हर दिन लड़े बर भड़कावत रहिथें।
PSA 140:3 ओमन के बोलई ह सांप के काटे सहीं अय; ओमन के ओंठ म करैत सांप के जहर हवय।
PSA 140:4 हे यहोवा, दुस्ट मनखेमन के हांथ ले मोर रकछा कर; हिंसक मनखेमन ले मोला बचा, जऊन मन मोर पांव म चोट पहुंचाय के योजना बनाय हवंय।
PSA 140:5 घमंडी मनखेमन मोला फंसाय बर फांदा छुपाय हवंय; ओमन अपन जाल के डोर ला बिछाय हवंय अऊ मोर रसता म मोर बर फांदा लगाय हवंय।
PSA 140:6 मेंह यहोवा ले कहिथंव, “तेंह मोर परमेसर अस।” हे यहोवा, दया के मोर पुकार ला सुन।
PSA 140:7 हे परमपरधान यहोवा, तेंह सामर्थी छुड़ानेवाला अस, तेंह लड़ई के दिन म मोर मुड़ के ढाल बनथस।
PSA 140:8 हे यहोवा, दुस्टमन के ईछा ला पूरा झन कर; ओमन के योजना ला सफल झन होवन दे।
PSA 140:9 जऊन मन मोला चारों कोति ले घेरे हवंय अऊ घमंड से मुड़ उठाय हवंय; ओमन के मुहूं के दुस्टता के बात ओहीचमन ला खा जावय।
PSA 140:10 बरत कोइला ओमन ऊपर गिरय; ओमन ला आगी म झोंके जावय, ओमन चीखला ले भरे खंचवा म फटिक दिये जावंय, जिहां ले ओमन कभू उठ नइं सकंय।
PSA 140:11 निन्दा करइयामन देस म स्थापित झन होवंय; हिंसा करइयामन ऊपर बिपत्ति पड़य।
PSA 140:12 मेंह जानथंव कि यहोवा ह गरीब-दुखीमन के नियाय करथे अऊ जरूरतमंद के मामला ला संभालथे।
PSA 140:13 खचित धरमीमन तोर नांव के परसंसा करहीं अऊ ईमानदारमन तोर आघू म रहिहीं।
PSA 141:1 दाऊद के एक भजन। हे यहोवा, मेंह तोला पुकारत हंव, मोर करा जल्दी आ; जब मेंह तोला पुकारंव, त मोर बात ला सुन।
PSA 141:2 मोर पराथना ह तोर आघू म खुसबूदार धूप के सहीं होवय; मोर हांथ के ऊपर उठई सांझ के बलिदान सहीं होवय।
PSA 141:3 हे यहोवा, मोर मुहूं म एक पहरेदार बईठा दे; मोर ओंठ रूपी दुवार के रखवारी कर।
PSA 141:4 मोर मन ला दुस्टमन कोति झन लगा ताकि मेंह ओ दुस्ट काम करइयामन संग ओमन के दुस्ट काम म भाग झन लेवंव; मोला ओमन के सुवादवाले जेवन ला झन खावन दे।
PSA 141:5 धरमी जन ह मोला मारय—मोर ऊपर येह एक दया के बात होही; ओह मोला डांटय—येह मोर मुड़ म तेल चुपरे सहीं होही। मोर मुड़ ह येला इनकार नइं करही, काबरकि मोर पराथना ह तब भी दुस्ट काम करइयामन के बिरूध होही।
PSA 141:6 ओमन के सासन करइयामन ला खड़े चट्टान म ले फटिक दिये जाही, अऊ दुस्ट मनखेमन जान जाहीं कि मोर बातमन सही अंय।
PSA 141:7 ओमन कहिहीं, “जइसे नांगर जोते के बाद माटी ह टूटके बिखर जाथे, वइसे ही हमर हाड़ामन ला कबर के मुहूं म बगरा दिये गे हवय।”
PSA 141:8 पर हे परमपरधान यहोवा, मोर आंखी ह तोर ऊपर लगे हवय; तोर करा मेंह सरन लेथंव—मोला मिरतू के हांथ म झन दे।
PSA 141:9 मोला दुस्टमन के लगाय गय फांदा ले बचा, ओ फांदा जेला ओमन मोर बर लगाय हवंय।
PSA 141:10 दुस्टमन अपन लगाय गय जाल म खुद फंसंय, अऊ मेंह सही-सलामत बचके निकल जावंव।
PSA 142:1 दाऊद के एक मसकील, जब ओह गुफा म रिहिस। एक पराथना। मेंह यहोवा ला ऊंचहा अवाज म पुकारथंव; मेंह यहोवा ला दया करे बर जोर से गोहारथंव।
PSA 142:2 मेंह ओकर आघू म अपन सिकायत ला खुलके बताथंव; ओकर आघू म मेंह अपन समस्या ला बताथंव।
PSA 142:3 जब मोर आतमा ह मोर भीतरे-भीतर बियाकुल होथे, तब तेंहीच ह मोर दसा ला देखथस। जऊन रसता म मेंह चलथंव, ओ रसता म मनखेमन मोर बर फंदा लगाय हवंय।
PSA 142:4 देख, मोर जेवनी कोति कोनो नइं एं; मोर कोनो चिंता नइं करंय। मोर कोनो सरन-स्थान नइं ए; कोनो मोर जिनगी ऊपर धियान नइं देवंय।
PSA 142:5 हे यहोवा, मेंह तोला पुकारत हंव; मेंह कहिथंव, “तेंह मोर सरन-स्थान, अऊ जीयत परानीमन के देस म मोर भाग अस।”
PSA 142:6 मोर पुकार ला सुन, काबरकि मेंह बहुंत जरूरत म हवंव; जऊन मन मोर पीछा करथें, ओमन ले मोला बचा, काबरकि ओमन मोर ले बहुंत ताकतवर अंय।
PSA 142:7 मोला मोर जेल ले छोंड़ा ले, ताकि मेंह तोर परसंसा करंव। तब मोर ऊपर तोर भलई के कारन धरमी मनखेमन मोर चारों कोति जूरहीं।
PSA 143:1 दाऊद के एक भजन। हे यहोवा, मोर पराथना ला सुन, दया के मोर गोहार ला सुन; अपन बिसवासयोग्यता अऊ धरमीपन के कारन मोर मदद करे बर आ।
PSA 143:2 अपन सेवक ला नियाय के आघू म झन लान, काबरकि कोनो जीयत मनखे तोर आघू म धरमी नो हय।
PSA 143:3 बईरी ह मोर पीछा करथे, ओह मोला कुचरके माटी म मिला देथे; बहुंत पहिले मरे मनखेमन सहीं ओह मोला अंधियार म डार देथे।
PSA 143:4 एकरसेति मोर आतमा ह भीतरे-भीतर बियाकुल होवत हे, मोर मन ह भीतरे-भीतर भयभीत हवय।
PSA 143:5 मेंह बहुंत पहिले के दिनमन ला सुरता करथंव; मेंह तोर जम्मो काम ऊपर मनन-चिंतन करथंव अऊ जऊन कुछू तेंह करे हस, ओकर ऊपर बिचार करथंव।
PSA 143:6 मेंह तोर कोति अपन हांथ बढ़ावत हंव; मेंह सूखा भुइयां सहीं तोर बर पीयासन हंव।
PSA 143:7 हे यहोवा, मोला जल्दी जबाब दे; मोर आतमा ह दुरबल होवत हे। अपन चेहरा ला मोर ले झन छिपा नइं तो मेंह ओमन सहीं हो जाहूं, जऊन मन खाल्हे कबर म चले जाथें।
PSA 143:8 बिहनियां ह मोर बर तोर अटूट मया के खबर लानय, काबरकि मेंह तोर ऊपर भरोसा करे हवंव। मोला ओ डहार देखा, जेमा मोला चलना चाही, काबरकि मेंह अपन जिनगी तोला सऊंपत हंव।
PSA 143:9 हे यहोवा, मोला मोर बईरीमन ले बचा, काबरकि मेंह अपनआप ला तोर आड़ म छुपावत हंव।
PSA 143:10 तोर ईछा ला पूरा करे के बात मोला सिखा, काबरकि तेंह मोर परमेसर अस; तोर बने आतमा ह मोला समतल भुइयां म ले चलय।
PSA 143:11 हे यहोवा, अपन नांव के हित म, मोर जिनगी ला बनाय रख; अपन धरमीपन के कारन, मोला समस्या ले बाहिर निकाल।
PSA 143:12 अपन अटूट मया के कारन, मोर बईरीमन के मुहूं ला बंद कर दे; मोर जम्मो बिरोधीमन ला नास कर दे, काबरकि मेंह तोर सेवक अंव।
PSA 144:1 दाऊद के भजन। यहोवा, जऊन ह मोर चट्टान ए, ओकर परसंसा होवय, जऊन ह मोर हांथ अऊ मोर अंगरीमन ला लड़ई करे बर तियार करथे।
PSA 144:2 ओह मोर मयारू परमेसर अऊ मोर किला, मोर मजबूत गढ़ अऊ मोर छुड़ानेवाला, मोर ढाल ए, जेमा मेंह सरन लेथंव, जऊन ह मनखेमन ला मोर अधीन कर देथे।
PSA 144:3 हे यहोवा, मनखेमन का अंय कि तेंह ओमन के खियाल रखथस? ओमन सिरिप मरनहार मनखे अंय, जेमन के बारे म तेंह सोचथस।
PSA 144:4 ओमन तो सांस के सहीं अंय; ओमन के उमर ह ढरत छइहां सहीं अय।
PSA 144:5 हे यहोवा, अपन स्वरग ला खाल्हे करके उतर आ; पहाड़मन ला छू, ताकि ओमन ले धुआं निकलय।
PSA 144:6 बिजली कड़काके बईरी ला तितिर-बितिर कर दे; अपन तीर चला अऊ ओमन ला हराके भगा दे।
PSA 144:7 ऊंच स्थान ले अपन हांथ बढ़ा; भयंकर पानी ले अऊ ओ परदेसीमन के हांथ ले मोला छोंड़ा अऊ मोला बचा,
PSA 144:8 जेमन के मुहूं ले बहुंत लबारी बात निकलथे, जेमन के जेवनी हांथ ह धोखा के काम करथे।
PSA 144:9 हे मोर परमेसर, मेंह तोर बर एक नवां गीत गाहूं; दस तारवाले बीना ला मेंह तोर बर बजाहूं,
PSA 144:10 तें, जऊन ह कि राजामन ला जय देथस, जऊन ह कि अपन सेवक दाऊद ला छोंड़ाथस। धारवाले तलवार ले मोला बचा;
PSA 144:11 परदेसीमन के हांथ ले मोला बचा जेमन के मुहूं ले बहुंत लबारी बात निकलथे, जेमन के जेवनी हांथ ह धोखा के काम करथे।
PSA 144:12 तब हमर बेटामन अपन जवानी म बढ़िया बढ़े हुए पऊधामन सहीं होहीं, अऊ हमर बेटीमन ओ खंभामन सहीं होहीं जेला महल के सजावट म नक्कासी करे जाथे।
PSA 144:13 हमर कोठारमन हर किसम के अनाज ले भरे रहिहीं। हमर भेड़मन हमर मैदान म हजार के संखिया, दस हजार के संखिया म बढ़हीं;
PSA 144:14 हमर बईलामन भारी सामान खींचके ले जाहीं। दीवार म कोनो किसम के सेंध नइं लगही, कोनो बंधुवई म नइं जाही, हमर गलीमन म दुख के कोनो अवाज नइं होही।
PSA 144:15 धइन अंय ओ मनखेमन, जेमन बर ये बात सही ए; धइन अंय ओ मनखेमन, जेमन के परमेसर यहोवा ए।
PSA 145:1 परसंसा के एक भजन। दाऊद के भजन। हे मोर परमेसर, मोर राजा, मेंह तोर नांव ला ऊपर करहूं; मेंह तोर नांव के परसंसा सदा-सर्वदा करहूं।
PSA 145:2 हर दिन मेंह तोर परसंसा करहूं सदा-सर्वदा तोर नांव के इस्तुति करहूं।
PSA 145:3 यहोवा ह महान ए अऊ सबले जादा परसंसा के योग्य ए; ओकर महानता ला कोनो समझ नइं सकंय।
PSA 145:4 एक पीढ़ी के मनखेमन तोर काम के बारे म आने पीढ़ी के मनखेमन ला बताथें; ओमन तोर पराकरम के काम के बारे म बताथें।
PSA 145:5 ओमन तोर वैभव के महिमामय सोभा के बारे म गोठियाथें— अऊ मेंह तोर अद्भूत काम ऊपर मनन-चिंतन करहूं।
PSA 145:6 ओमन तोर अद्भूत काममन के सक्ति के चरचा करथें— अऊ मेंह तोर बड़े-बड़े काममन के घोसना करहूं।
PSA 145:7 ओमन तोर बहुंत भलई के काम के उत्सव मनाथें अऊ आनंद सहित तोर धरमीपन के गीत गाथें।
PSA 145:8 यहोवा ह अनुग्रहकारी अऊ दयालु अय, कोरोध करे म धीमा अऊ मया के धनी अय।
PSA 145:9 यहोवा ह जम्मो झन बर बने अय; ओह अपन बनाय हर चीज ऊपर दया करथे।
PSA 145:10 हे यहोवा, तोर जम्मो काममन के दुवारा तोर परसंसा होथे; तोर बिसवासयोग्य मनखेमन तोर बहुंत परसंसा करथें।
PSA 145:11 ओमन तोर राज के महिमा के बारे म बताथें अऊ तोर सक्ति के बारे म गोठियाथें,
PSA 145:12 ताकि जम्मो मनखेमन तोर पराकरम के काम अऊ तोर राज के महिमामय सोभा के बारे म जानंय।
PSA 145:13 तोर राज ह एक कभू खतम नइं होनेवाला राज ए, अऊ तोर परभूता ह जम्मो पीढ़ी म बने रहिथे। यहोवा ह अपन जम्मो परतिगियां ला पूरा करे म बिसवासयोग्य अय अऊ अपन जम्मो काम म घलो बिसवासयोग्य अय।
PSA 145:14 यहोवा ह ओ जम्मो ला संभालथे, जेमन खाल्हे गिरथें अऊ जऊन मन खाल्हे झुकथें, ओमन ला ऊपर उठाथे।
PSA 145:15 जम्मो झन के आंखी ह तोर ऊपर लगे रहिथे, अऊ तेंह ओमन ला सही समय म ओमन के जेवन देथस।
PSA 145:16 तेंह अपन हांथ खोलके जम्मो जीयत परानी के ईछा ला पूरा करथस।
PSA 145:17 यहोवा ह अपन जम्मो बात म धरमी अऊ अपन जम्मो काम म बिसवासयोग्य ए।
PSA 145:18 यहोवा ह ओ जम्मो के लकठा म रहिथे, जऊन मन ओला पुकारथें याने कि जऊन मन ओला सच्चई से पुकारथें।
PSA 145:19 ओह ओमन के ईछा ला पूरा करथे, जऊन मन ओकर भय मानथें; ओह ओमन के गोहार ला सुनथे अऊ ओमन ला बचाथे।
PSA 145:20 यहोवा ह ओ जम्मो के रखवारी करथे, जऊन मन ओकर ले मया करथें, पर जम्मो दुस्टमन ला ओह नास कर दीही।
PSA 145:21 मोर मुहूं ह यहोवा के परसंसा के बात करही। हर एक परानी ओकर पबितर नांव के सदा-सर्वदा परसंसा करय।
PSA 146:1 यहोवा के परसंसा करव। हे मोर मन, यहोवा के परसंसा कर।
PSA 146:2 मेंह जिनगी भर यहोवा के परसंसा करहूं, जब तक मेंह जीयत रहिहूं, मेंह अपन परमेसर के परसंसा के गीत गाहूं।
PSA 146:3 हाकिममन ऊपर भरोसा झन रखव, न ही कोनो मनखे ऊपर, जऊन ह कि रकछा नइं कर सकय।
PSA 146:4 जब ओमन के परान चले जाथे, त ओमन माटी म मिल जाथें; ओहीच दिन ओमन के योजना ह खतम हो जाथे।
PSA 146:5 धइन अंय ओमन, जेमन के मददगार याकूब के परमेसर ए, जेमन के आसा ह यहोवा ओमन के परमेसर ऊपर रहिथे।
PSA 146:6 ओह अकास अऊ धरती, समुंदर, अऊ ओमा के जम्मो चीजमन ला रचे हवय— ओह हमेसा बिसवासयोग्य बने रहिथे।
PSA 146:7 ओह दुखित-पीड़ितमन के नियाय करथे अऊ भूखन मनखेमन ला जेवन देथे। यहोवा ह कैदीमन ला छुड़ाथे,
PSA 146:8 यहोवा ह अंधरा ला आंखी देथे, यहोवा ह ओमन ला ऊपर उठाथे, जऊन मन खाल्हे झुकथें, यहोवा ह धरमीमन ले मया करथे।
PSA 146:9 यहोवा ह परदेसीमन के रखवारी करथे अऊ अनाथ अऊ बिधवामन ला संभालथे, पर ओह दुस्टमन के योजना ला बिगाड़ देथे।
PSA 146:10 यहोवा ह सदा-सर्वदा राज करथे, हे सियोन, तोर परमेसर ह पीढ़ी-पीढ़ी तक राज करथे। यहोवा के परसंसा करव।
PSA 147:1 यहोवा के परसंसा करव। हमर परमेसर के परसंसा के गीत गवई ह उत्तम बात ए, ओकर परसंसा करई ह उत्तम अऊ खुसी के बात ए!
PSA 147:2 यहोवा ह यरूसलेम ला बनाथे; ओह इसरायल के बंधुवई म गय मनखेमन ला इकट्ठा करथे।
PSA 147:3 ओह निरास-हतास मनखेमन के दुख ला दूर करथे अऊ ओमन के घाव म पट्टी बांधथे।
PSA 147:4 ओह तारामन के संखिया ला निरधारित करथे अऊ ओमा के हर एक के नांव रखथे।
PSA 147:5 महान ए हमर परभू अऊ अति सामर्थी ए; ओकर समझ के कोनो सीमना नइं ए।
PSA 147:6 यहोवा ह नम्र मनखे ला संभाले रखथे पर दुस्ट मनखे ला भुइयां म गिरा देथे।
PSA 147:7 धनबाद के संग यहोवा के परसंसा के गीत गावव; हमर परमेसर बर बीना बजावव।
PSA 147:8 ओह अकास ला बादरमन ले ढांपथे; ओह धरती ऊपर बारिस भेजथे अऊ पहाड़ीमन म कांदी उगाथे।
PSA 147:9 ओह पसुमन ला आहार देथे अऊ जब कऊआ चिरई के पीलामन चिचियाथें, त ओमन ला चारा खवाथे।
PSA 147:10 ओह घोड़ा के सक्ति ले खुस नइं होवय, न ही ओह योद्धा के गोड़मन ले खुस होथे;
PSA 147:11 यहोवा ह ओमन ले खुस होथे, जऊन मन ओकर भय मानथें, जऊन मन ओकर अटूट मया ऊपर अपन आसा रखथें।
PSA 147:12 हे यरूसलेम, यहोवा के महिमा कर; हे सियोन, अपन परमेसर के परसंसा कर।
PSA 147:13 ओह तोर दुवार के खंभामन ला मजबूत करथे अऊ तोर भीतर तोर मनखेमन ला आसीस देथे।
PSA 147:14 ओह तोर सीमना म सांति बनाय रखथे अऊ सबले उत्तम गहूं के रोटी ले संतुस्ट करथे।
PSA 147:15 ओह धरती ऊपर अपन हुकूम भेजथे; ओकर बचन बहुंत तेजी से जाथे।
PSA 147:16 ओह बरफ ला ऊन के सहीं फईलाथे अऊ पाला ला राख के सहीं बगराथे।
PSA 147:17 ओह पथरा के सहीं करा गिराथे। कोन ह ओकर सीत-लहर ला सह सकथे?
PSA 147:18 ओह हुकूम देके ओमन ला टघला देथे; ओह ठंडा हवा चलाथे, अऊ पानी बहे लगथे।
PSA 147:19 ओह याकूब ला अपन बात, अऊ इसरायल ला अपन कानून अऊ नियम बताय हवय।
PSA 147:20 कोनो आने जाति के मनखेमन बर ओह ये काम नइं करे हवय; ओमन ओकर कानून ला नइं जानंय। यहोवा के परसंसा करव।
PSA 148:1 यहोवा के परसंसा करव। स्वरग ले यहोवा के परसंसा करव; ऊपर ऊंचहा जगह म ओकर परसंसा करव।
PSA 148:2 हे ओकर जम्मो स्वरगदूतमन ओकर परसंसा करव; हे ओकर जम्मो स्वरगीय सेनामन, ओकर परसंसा करव।
PSA 148:3 हे सूरज अऊ चंदा, ओकर परसंसा करव; हे जम्मो चमकत तारामन, ओकर परसंसा करव।
PSA 148:4 हे सबले ऊंच अकास, अऊ हे अकास के ऊपर के पानी, तुमन ओकर परसंसा करव।
PSA 148:5 ओमन यहोवा के नांव के परसंसा करंय, काबरकि ओकर हुकूम ले ओमन बनाय गीन,
PSA 148:6 अऊ ओह ओमन ला सदाकाल बर इस्थिर करिस— ओह एक आदेस निकालिस, जऊन ह कभू खतम नइं होवय।
PSA 148:7 धरती ले यहोवा के परसंसा करव, हे समुंदर के बड़े-बड़े जीव-जन्तुमन अऊ जम्मो समुंदर के गहरई,
PSA 148:8 हे बिजली अऊ करा, बरफ अऊ बादरमन, हे ओकर हुकूम मनइया गरेर,
PSA 148:9 हे पहाड़ अऊ जम्मो पहाड़ीमन, हे फरवाले रूख अऊ जम्मो देवदार रूखमन,
PSA 148:10 हे जंगली पसु अऊ जम्मो घरेलू-पसुमन, हे पेट के बल रेंगइया जीव अऊ उड़इया चिरईमन,
PSA 148:11 हे धरती के राजामन अऊ जाति-जाति के जम्मो मनखेमन, हे हाकिम अऊ धरती ऊपर जम्मो सासन करइया मनखेमन,
PSA 148:12 हे जवान मनखे अऊ माईलोगनमन, हे सियान मनखे अऊ लइकामन।
PSA 148:13 तुमन जम्मो यहोवा के नांव के परसंसा करव, काबरकि सिरिप ओकर नांव ही ऊपर करे जाथे; ओकर सोभा ह धरती अऊ अकास के ऊपर हवय।
PSA 148:14 अऊ ओह अपन मनखेमन बर एक सींग खड़े करे हवय, जऊन ह कि ओकर जम्मो बिसवासयोग्य सेवकमन के, इसरायल के अऊ ओकर दिल के करीब के मनखेमन के परसंसा के बिसय ए। यहोवा के परसंसा करव।
PSA 149:1 यहोवा के परसंसा करव। यहोवा बर एक नवां गीत गावव, ओकर बिसवासयोग्य मनखेमन के सभा म ओकर परसंसा करव।
PSA 149:2 इसरायल ह अपन सिरिस्टीकर्ता म आनंदित होवय; सियोन के मनखेमन अपन राजा म खुस होवंय।
PSA 149:3 ओमन नाचत ओकर नांव के परसंसा करंय अऊ ओकर बर खंजरी अऊ बीना बजावंय।
PSA 149:4 काबरकि यहोवा ह अपन मनखेमन ले खुस रहिथे; ओह नम्र मनखेमन ला जीत के मुकुट पहिराथे।
PSA 149:5 ओकर बिसवासयोग्य मनखेमन ये आदर पाके आनंद मनावंय अऊ अपन दसना म आनंद के गीत गावंय।
PSA 149:6 ओमन के मुहूं ले परमेसर के परसंसा होवय अऊ ओमन के हांथ म दूधारी तलवार रहय,
PSA 149:7 ताकि जाति-जाति के मनखेमन ले ओमन बदला लेवंय अऊ मनखेमन ला दंड देवंय,
PSA 149:8 अऊ ओमन के राजामन ला बेड़ी म, अऊ ओमन के परभावसाली मनखेमन ला लोहा के संकली म बांधंय,
PSA 149:9 अऊ ओमन के बिरूध दंड के हुकूम ले जावंय— येह ओकर जम्मो बिसवासयोग्य मनखेमन के महिमा ए। यहोवा के परसंसा करव।
PSA 150:1 यहोवा के परसंसा करव। परमेसर के ओकर पबितर-स्थान म परसंसा करव; ओकर सक्तिसाली अकास-मंडल म ओकर परसंसा करव।
PSA 150:2 ओकर पराकरम के काम बर ओकर परसंसा करव; ओकर अति महानता बर ओकर परसंसा करव।
PSA 150:3 तुरही बजाके ओकर परसंसा करव, बीना अऊ सारंगी बजाके ओकर परसंसा करव,
PSA 150:4 खंजरी बजात अऊ नाचत ओकर परसंसा करव, तारवाला बाजा अऊ बांसुरी बजात ओकर परसंसा करव,
PSA 150:5 जोर से झांझ बजाके ओकर परसंसा करव, मंजीरा के झंकार ले ओकर परसंसा करव।
PSA 150:6 हर एक जीयत परानी ह यहोवा के परसंसा करय। यहोवा के परसंसा करव।
PRO 1:1 दाऊद के बेटा इसरायल के राजा सुलेमान के नीतिबचन:
PRO 1:2 येमन ला पढ़नेवाला ह बुद्धि अऊ सिकछा पावय; अऊ अंतस के बात ला समझय,
PRO 1:3 अऊ बुद्धि के काम, धरमीपन, नियाय, अऊ जम्मो झन ला एके नजर ले देखे के सिकछा पावय;
PRO 1:4 येमन ला पढ़नेवाला भोला-भाला मनखे ला बुद्धि, अऊ जवान मनखेमन ला गियान अऊ बिबेक मिलय—
PRO 1:5 बुद्धिमान मनखे ह येला सुनके अपन सिकछा ला बढ़ाय, अऊ समझदार मनखे अगुवई पावय—
PRO 1:6 ताकि ओमन नीतिबचन अऊ पटंतर ला, अऊ बुद्धिमान मनखे के बात अऊ पहेली ला समझंय।
PRO 1:7 यहोवा के भय मनई गियान के सुरूआत ए, पर मुरूखमन बुद्धि अऊ सिकछा के बात ला तुछ समझथें।
PRO 1:8 हे मोर बेटा, अपन ददा के सिकछा ला सुन, अऊ अपन दाई के सिकछा ला झन छोंड़,
PRO 1:9 काबरकि ओमन तोर मुड़ म सोभा देवइया मुकुट अऊ तोर गला म कन्ठमाला सहीं अंय।
PRO 1:10 हे मोर बेटा, यदि पापी मनखेमन तोला बहकाथें, त ओमन के बात झन मानबे।
PRO 1:11 यदि ओमन ये कहंय, “हमर संग आ कि हमन खून करे के ताक म रहन; आ, निरदोसमन ऊपर छुपके घात लगावन;
PRO 1:12 आ, हमन ओमन ला अइसन जीयत अऊ सइघो लील लेवन, जइसन कि कबर ह मनखेमन ला लीलथे;
PRO 1:13 हमन ला जम्मो किसम के कीमती चीज मिलही अऊ हमन अपन घर ला लूट के सामान ले भर लेबो;
PRO 1:14 हमर संग चिट्ठी डाल; हमन जम्मो झन लूट के सामान ला बांटबो”—
PRO 1:15 हे मोर बेटा, ओमन के संग झन जा, ओमन के रसता म चले बर अपन गोड़ ला रोक;
PRO 1:16 काबरकि ओमन खराप काम करे बर दऊड़थें, अऊ हतिया करे बर उतावला रहिथें।
PRO 1:17 जब जम्मो चिरईमन देखत रहिथें, तब ओमन ला फंसाय बर जाल डालना बेकार ए!
PRO 1:18 ये मनखेमन अपनेच हतिया करे के ताक म रहिथें; ओमन अपनेच परान के घात म रहिथें!
PRO 1:19 जम्मो लालची मनखेमन के चाल ह अइसनेच होथे; ओमन के जिनगी ह लालच के कारन ही खतम हो जाथे।
PRO 1:20 बुद्धि ह बाहिर म जोर से पुकारत हे, ओह सड़क के चौराहा म जोर से कहिथे;
PRO 1:21 दीवार के ऊपर ले ओह चिचियाथे, सहर के दुवार म ओह ये कहिथे:
PRO 1:22 “हे भोला-भाला मनखेमन, तुमन कब तक अपन भोलापन ले मया करहू? ठट्ठा करइयामन ठट्ठा करई म कब तक खुस रहिहीं अऊ मुरूखमन कब तक गियान ले घिन करहीं?
PRO 1:23 यदि तुमन मोर दबकार ला सुनके मन फिराहू, त मेंह अपन आतमा तुमन ला बहुंतायत से दूहूं; मेंह तुमन ला अपन गियान बताहूं।
PRO 1:24 पर जब में तुमन ला बलाएंव, त तुमन नइं सुने चाहेव, अऊ जब मेंह अपन हांथ तुम्हर कोति पसारेंव, त कोनो धियान नइं दीन,
PRO 1:25 काबरकि तुमन मोर जम्मो सलाह ला अनसुना करेव अऊ मोर डांट ले घलो तुमन ला कुछू फरक नइं पड़िस;
PRO 1:26 एकरसेति, जब तुम्हर ऊपर बिपत्ति पड़ही, त मेंह हंसहूं, अऊ जब तुमन संकट म होहू, त मेंह हंसी उड़ाहूं—
PRO 1:27 जब संकट ह गरेर के सहीं तुम्हर ऊपर आही, अऊ बिपत्ति ह बवंडर के सहीं आही, अऊ दुख अऊ समस्या म तुमन पड़े होहू, त मेंह ठट्ठा करहूं।
PRO 1:28 “तब ओमन मोला बलाहीं, पर में ओमन ला जबाब नइं दूहूं; ओमन मोला खोजहीं, पर मोला नइं पाहीं।
PRO 1:29 काबरकि ओमन गियान के बात ले घिन करिन अऊ यहोवा के भय माने बर नइं चाहिन।
PRO 1:30 ओमन मोर सलाह ला अनसुना करिन अऊ मोर डांट ला तुछ समझिन;
PRO 1:31 एकरसेति, ओमन अपन करनी के फर भोगहीं अऊ अपन गोस्टी के कारन दुख ले भर जाहीं।
PRO 1:32 काबरकि सीधा-साधा मनखेमन के मनमानी ले ओहीचमन के नुकसान होही, अऊ मुरूखमन के आत्म-संतोस होवई ह ओहीचमन ला नास करही;
PRO 1:33 पर जऊन ह मोर बात ला सुनही, ओह सुरकछित रहिही अऊ अराम से रहिही अऊ ओला हानि होय के कोनो डर नइं रहिही।”
PRO 2:1 हे मोर बेटा, यदि तेंह मोर बचन ला गरहन करथस अऊ मोर हुकूममन ला अपन हिरदय म रखथस,
PRO 2:2 अऊ बुद्धि के बात ला धियान से सुनथस अऊ समझदारी के बात म मन लगाथस—
PRO 2:3 वास्तव म, यदि तेंह अंतर-गियान मांगथस अऊ समझदारी बर ऊंच अवाज म पुकारथस,
PRO 2:4 अऊ तेंह येला अइसने खोजथस, जइसने कोनो चांदी ला खोजथे अऊ तेंह येला अइसने खोजथस, जइसने कोनो छुपे खजाना ला खोजथे,
PRO 2:5 त तेंह यहोवा के भय ला समझबे अऊ परमेसर के गियान ला पाबे।
PRO 2:6 काबरकि यहोवा ह बुद्धि देथे; ओह गियान अऊ समझ के बात कहिथे।
PRO 2:7 ओह ईमानदार मनखे ला सफल बनाथे, अऊ निरदोस मनखेमन बर ओह ढाल सहीं अय।
PRO 2:8 काबरकि ओह नियाय के रसता म चलइया के पहरेदारी करथे अऊ अपन बिसवासयोग्य मनखे के रकछा करथे।
PRO 2:9 तब तेंह समझबे कि कते बात ह सही अऊ नियाय अऊ उचित ए—याने कि जम्मो बने बात ला समझबे।
PRO 2:10 काबरकि बुद्धि ह तोर हिरदय म आही, अऊ गियान के बात ले तोला सुख मिलही।
PRO 2:11 तोर बिबेक के बात ह तोर रकछा करही, अऊ समझदारी के बात ह तोर पहरेदारी करही।
PRO 2:12 बुद्धि ह तोला ओ दुस्ट मनखेमन के चाल ले, अऊ दोगला मनखेमन ले बचाही,
PRO 2:13 जऊन मन सही रसता ला छोंड़ दे हवंय ताकि अंधियार के रसता म चलंय,
PRO 2:14 जऊन मन गलत काम म खुस होथें अऊ बुरई के काम म आनंद मनाथें,
PRO 2:15 जऊन मन टेढ़ा चाल चलथें अऊ जऊन मन अपन रसता ले भटक गे हवंय।
PRO 2:16 बुद्धि ह तुमन ला ओ छिनारी माईलोगन, अऊ जिद्दी माईलोगन के गुरतूर बोली ले घलो बचाही,
PRO 2:17 जऊन ह अपन जवानी के संगी ला छोंड़ दे हवय अऊ परमेसर के आघू म करे गे करार ऊपर धियान नइं दे हवय।
PRO 2:18 खचित ओकर घर ह खाल्हे मिरतू कोति ले जाथे अऊ ओकर रसता ह मुरदामन के आतमामन करा जाथे।
PRO 2:19 जऊन मन ओकर करा जाथें, ओमा के कोनो लहुंटके नइं आवंय या ओमा के कोनो जिनगी के रसता ला नइं पावंय।
PRO 2:20 ये किसम ले, तेंह भलई के डहार म चलबे अऊ धरमीमन के रसता ला पकड़े रहिबे।
PRO 2:21 काबरकि धरमी मनखेमन धरती म बसे रहिहीं, अऊ सच्चई के रसता म चलइयामन येमा बने रहिहीं;
PRO 2:22 पर दुस्ट मनखेमन ला धरती ले निकाल दिये जाही, अऊ बिसवासघातीमन ला येमा ले उखान दिये जाही।
PRO 3:1 हे मोर बेटा, मोर सिकछा ला झन भुलाबे, पर मोर हुकूममन ला अपन हिरदय म रखे रह,
PRO 3:2 काबरकि अइसने करे ले तोर उमर ह बढ़ही अऊ तोर जिनगी म सांति आही अऊ तोर उन्नति होही।
PRO 3:3 मया अऊ ईमानदारी तोला कभू झन छोंड़ंय; ओमन ला अपन घेंच म बांध ले, अऊ ओमन ला अपन हिरदय रूपी पटिया म लिख ले।
PRO 3:4 तब तोर ऊपर परमेसर अऊ मनखे दूनों के अनुग्रह होही अऊ दूनों के नजर म बने नांव कमाबे।
PRO 3:5 तें अपन समझ के ऊपर भरोसा झन कर, पर अपन जम्मो हिरदय ले यहोवा ऊपर भरोसा रख;
PRO 3:6 अपन जम्मो काम ओकर ईछा के मुताबिक कर, तब ओह तोर बर सीधा रसता निकालही।
PRO 3:7 अपन नजर म बुद्धिमान झन बन; यहोवा के भय मान अऊ बुरई ले दूरिहा रह।
PRO 3:8 अइसने करे ले तोर देहें ह भला-चंगा अऊ हाड़ामन मजबूत बने रहिहीं।
PRO 3:9 अपन संपत्ति के दुवारा अऊ अपन भुइयां के जम्मो पहिली-फसल देय के दुवारा यहोवा के आदरमान कर;
PRO 3:10 तब तोर कोठार ह फसल ले भरे रहिही, अऊ तोर टंकीमन नवां अंगूर के मंद ले छलकत रहिहीं।
PRO 3:11 हे मोर बेटा, यहोवा के ताड़ना ला तुछ झन जान, अऊ जब ओह तोला डांटय, त ओकर बुरा झन मान,
PRO 3:12 काबरकि यहोवा ह ओमन के ताड़ना करथे, जेमन ले ओह मया करथे, जइसने कि ददा ह ओ बेटा ला डांटथे, जेकर ले ओह खुस रहिथे।
PRO 3:13 धइन अंय ओ मनखेमन, जऊन मन बुद्धि पाथें, अऊ धइन अंय ओ मनखेमन, जऊन मन समझ पाथें,
PRO 3:14 काबरकि बुद्धि पाना चांदी के पाय ले जादा बने अय अऊ ओकर लाभ सोन के लाभ ले घलो जादा होथे।
PRO 3:15 बुद्धि ह मनि ले जादा कीमती अय; जेकर तेंह लालसा करथस, ओमा के कोनो चीज के तुलना ओकर संग नइं करे जा सकय।
PRO 3:16 लम्बा उमर ओकर जेवनी हांथ म हवय; अऊ ओकर डेरी हांथ म धन अऊ आदरमान हवय।
PRO 3:17 ओकर रसतामन खुसी के रसता अंय, अऊ ओकर जम्मो डहारमन सांति के डहार अंय।
PRO 3:18 जऊन मन बुद्धि ला धरे रहिथें, ओमन बर ओह जिनगी के एक रूख अय; अऊ जऊन मन ओला मजबूती से धरे रहिथें, ओमन आसीस पाहीं।
PRO 3:19 बुद्धि के दुवारा यहोवा ह धरती ला बनाईस, अऊ समझ के दुवारा ओह स्वरगमन ला ओमन के जगह म रखिस;
PRO 3:20 ओकर गियान के दुवारा गहिरा समुंदरमन बंट गीन, अऊ बादर ले ओस टपकथे।
PRO 3:21 हे मोर बेटा, बुद्धि अऊ समझ तोर नजर ले झन हटंय, सही नियाय अऊ समझदारी ला धरे रह;
PRO 3:22 येमन तोर बर जिनगी होहीं, अऊ तोर घेंच के हार बनहीं।
PRO 3:23 तब तेंह अपन डहार म निडर होके चलबे, अऊ तोर गोड़ म ठोकर नइं लगही।
PRO 3:24 जब तेंह लेटबे, त तोला डर नइं होही; जब तेंह सुतबे, त तोला सुख के नींद आही।
PRO 3:25 अचानक अवइया बिपत्ति ले झन डरबे या जब दुस्ट मनखे के नास होथे, त झन डरबे,
PRO 3:26 काबरकि यहोवा ह तोर सहारा होही अऊ तोर गोड़ ला फांदा म फंसे ले बचाही।
PRO 3:27 जेमन के भलई करना हे, अऊ यदि तोला ओकर मऊका मिलथे, त ओमन के भलई करे ले अपन ला झन रोक।
PRO 3:28 यदि तोर करा देय बर हवय, त अपन परोसी ले झन कह कि अभी जा, कल फेर आबे, त तोला दूहूं।
PRO 3:29 जब तोर परोसी ह तोर लकठा म भरोसा सहित रहिथे, त ओला नुकसान पहुंचाय के युक्ति झन कर।
PRO 3:30 जब कोनो मनखे ह तोर कुछू नुकसान नइं करे हवय, त ओकर ऊपर बिगर कोनो कारन के दोस झन लगा।
PRO 3:31 उपदरवी मनखे ले जलन झन रखबे अऊ न ही ओकर सहीं चाल चलबे।
PRO 3:32 काबरकि कुटिल मनखे ले यहोवा ह बहुंत घिन करथे, पर ईमानदार मनखे ऊपर ओह भरोसा करथे।
PRO 3:33 दुस्ट मनखे के घर म यहोवा के सराप, पर धरमीमन के घर म ओकर आसीस होथे।
PRO 3:34 घमंडी हंसी उड़इयामन के ओह हंसी उड़ाथे, पर नम्र अऊ दुखी मनखेमन ऊपर अनुग्रह करथे।
PRO 3:35 बुद्धिमान मनखेमन आदरमान पाथें, पर मुरूखमन के सिरिप अपमान होथे।
PRO 4:1 हे मोर बेटामन, अपन ददा के सिकछा ला सुनव, अऊ समझ के बात ला जाने बर मन लगावव।
PRO 4:2 मेंह तुमन ला उत्तम सिकछा देथंव, एकरसेति मोर सिकछा ला झन छोंड़व।
PRO 4:3 जब मेंह घलो अपन ददा के बेटा रहेंव, सुकुमार, अऊ अपन दाई के दुलारा रहेंव;
PRO 4:4 त मोर ददा ह ये कहिके मोला सिखावय, “तोर पूरा मन मोर बचन म लगे रहय; मोर हुकूममन ला मान अऊ जीयत रह।
PRO 4:5 तोला बुद्धि मिलय अऊ समझ घलो मिलय; मोर बातमन ला झन भुलाबे या ओमन ला झन छोंड़बे।
PRO 4:6 बुद्धि ला झन छोंड़बे, अऊ ओह तोर रकछा करही; ओकर ले मया कर, अऊ ओह तोर रखवारी करही।
PRO 4:7 बुद्धि ह सबले उत्तम ए, एकरसेति येला पाय के कोसिस कर, अऊ समझ ला पाय बर जम्मो कुछू कर।
PRO 4:8 ओकर बात मान, त ओह तोला ऊपर उठाही; ओला धरे रह, अऊ ओह तोर आदर करही।
PRO 4:9 ओह तोर मुड़ ला सोभा देवइया एक माला पहिराही अऊ तोला सुघर मुकुट दीही।”
PRO 4:10 हे मोर बेटा, मोर बात ला सुन अऊ ओला मान, तब तेंह बहुंत बछर जीयबे।
PRO 4:11 मेंह तोला बुद्धि के रसता बतात हंव, अऊ सीधई के डहार म ले जावत हंव।
PRO 4:12 जब तेंह रेंगबे, त कोनो बाधा नइं होही, अऊ जब तेंह दऊड़बे, त तोला ठोकर नइं लगही।
PRO 4:13 सिकछा ला मान, ओला झन छोंड़; येकर रखवारी कर, काबरकि येह तोर जिनगी अय।
PRO 4:14 दुस्टमन के डहार म झन जाबे, अऊ न ही खराप मनखेमन के रसता म चलबे।
PRO 4:15 ओ रसता ले अलग रह, ओमा झन जा; ओमा ले हटके अपन रसता म जा।
PRO 4:16 काबरकि दुस्ट मनखेमन जब तक बुरई नइं कर लीहीं, तब तक ओमन ला चैन नइं मिलय; जब तक ओमन काकरो ठोकर खाय के कारन नइं बनंय, तब तक ओमन ला नींद नइं आवय।
PRO 4:17 ओमन दुस्टता ले कमाय रोटी ला खाथें अऊ लड़ई-झगरा करके लाने अंगूर के मंद ला पीथें।
PRO 4:18 धरमीमन के चाल ह बिहनियां निकलत सूरज सहीं अय, जेकर अंजोर ह मंझन होवत तक बढ़त ही रहिथे।
PRO 4:19 पर दुस्टमन के रसता ह भयंकर अंधियार सहीं अय; ओमन नइं जानंय कि ओमन का चीज ले ठोकर खाथें।
PRO 4:20 हे मोर बेटा, जऊन बात मेंह कहत हंव, ओकर ऊपर धियान दे, अऊ मोर बात ला सुन।
PRO 4:21 ये बातमन ला हर समय सुरता रख; येमन ला अपन हिरदय म रख।
PRO 4:22 काबरकि जऊन मन येमन ला पाथें, ओमन ला येमन जिनगी, अऊ ओमन के जम्मो सरीर ला चंगई देथें।
PRO 4:23 सबले जादा अपन मन के रखवारी कर, काबरकि तोर हर काम तोर मन ले ही निकलके आथे।
PRO 4:24 बेईमानी के बात तोर मुहूं ले झन निकलय, अऊ चालबाजी के बात ले दूरिहा रह।
PRO 4:25 तेंह सीधा आघू ला देख, अऊ अपन सामने के बात म सीधा धियान लगा।
PRO 4:26 अपन पांव धरे बर डहार ला समतल कर, अऊ अपन जम्मो रसता म अटल बने रह।
PRO 4:27 न तो जेवनी, अऊ न ही डेरी अंग मुड़, अऊ न ही बुरई के रसता म रेंग।
PRO 5:1 हे मोर बेटा, मोर बुद्धि के बात ऊपर धियान लगा, अऊ मोर समझ के बात ला सुन,
PRO 5:2 ताकि तोर बिबेक ह सही रहय अऊ तोर मुहूं ले गियान के बात निकलय।
PRO 5:3 काबरकि छिनारी माईलोगन के मुहूं ले गुरतूर बात निकलथे, अऊ ओकर बात ह तेल ले घलो जादा चिकना होथे;
PRO 5:4 पर आखिर म, ओह पित्त के सहीं करू, अऊ दूधारी तलवार सहीं चोख होथे।
PRO 5:5 ओकर गोड़मन मिरतू कोति जाथें; अऊ ओकर पांवमन सीधा कबर करा ले जाथें।
PRO 5:6 ओह जिनगी के रसता के बारे म बिचार नइं करय; ओह एती-ओती भटकथे, पर ओह ये बात ला नइं जानय।
PRO 5:7 एकरसेति, हे मोर बेटामन, मोर बात ला सुनव, अऊ जऊन कुछू मेंह कहिथंव, ओला मानव।
PRO 5:8 अइसने छिनारी माईलोगन ले दूरिहा रहव, अऊ ओकर घर के लकठा म घलो झन जावव,
PRO 5:9 नइं तो तुम्हर मान-सम्मान दूसरमन करा चल दीही अऊ निरदयी मनखे ह तुम्हर परतिस्ठा ला ले लीही।
PRO 5:10 या अजनबीमन तुम्हर संपत्ति म मजा उड़ाहीं अऊ तुम्हर मेहनत ह दूसरमन ला धनवान बनाही;
PRO 5:11 अऊ अपन जिनगी के आखिरी बेरा म, जब तुम्हर देहें ह कमजोर हो जाही, त तुमन कलहरहू;
PRO 5:12 अऊ ये कहिहू, “मेंह अनुसासन म काबर नइं रहेंव, अऊ दूसर के डांट ला काबर तुछ जानेंव!
PRO 5:13 मेंह अपन गुरूमन के बात ला नइं मानेंव अऊ अपन सिखोइयामन के बात ला नइं सुनेंव।
PRO 5:14 मेंह तुरते परमेसर के मनखेमन के सभा म गंभीर समस्या म रहेंव।”
PRO 5:15 तें अपन ही जलासय, अऊ अपन ही कुआं के सोत के पानी पीये कर।
PRO 5:16 का तोर झरना के पानी गलीमन म, अऊ पानी के धारा गली के चऊकमन म बहय?
PRO 5:17 ओह सिरिप तोरेच रहय, अऊ अजनबीमन संग बांटे बर नइं।
PRO 5:18 तोर पानी के सोता आसीसित रहय, अऊ तें अपन जवानी के घरवाली संग आनंद मना।
PRO 5:19 ओह तोर बर एक मयारू हिरनी, एक सुघर सांबरनी सहीं होवय— ओकर छाती ह तोला हमेसा खुस रखय, अऊ तेंह ओकर मया म हमेसा बंधे रह।
PRO 5:20 हे मोर बेटा, आने मनखे के घरवाली के मया म तेंह काबर मोहित होबे? अऊ एक छिनार ला अपन छाती ले काबर लगाबे?
PRO 5:21 काबरकि तोर चालचलन ला यहोवा ह देखत हवय, अऊ ओह तोर जम्मो चालचलन ला परखथे।
PRO 5:22 दुस्ट मनखेमन अपनेच अधरम के काम म फंसथें; ओमन अपनेच पाप के बंधन म कसके बंधे रहिथें।
PRO 5:23 ओमन सिकछा के कमी के कारन मर जाहीं, अऊ अपनेच मुरूखता के कारन भटक जाहीं।
PRO 6:1 हे मोर बेटा, यदि तेंह अपन परोसी बर जमानत ले हस, या कोनो अजनबी बर अपन चीज गिरवी म दे हस,
PRO 6:2 तेंह अपन ही बात म फंस गे हस, अऊ अपन ही बात म पकड़े गे हस।
PRO 6:3 त हे मोर बेटा, अपनआप ला बंचाय बर अइसे कर, जब तेंह अपन परोसी के हांथ म पड़ गे हस: त, जा, जल्दी कर, अऊ तुरते अपन परोसी ले बिनती कर।
PRO 6:4 जागत रह; अपन आंखी म झपकी घलो झन आवन दे।
PRO 6:5 अपनआप ला छुड़ा, जइसे हिरन ह सिकारी के हांथ ले, अऊ चिरई ह चिड़ीमार के जाल ले अपनआप ला छुड़ाथे।
PRO 6:6 हे अलाल मनखे, चांटीमन करा जा; ओमन के काम ला देख, अऊ बुद्धिमान बन।
PRO 6:7 ओमन ला न तो कोनो हुकूम देवइया होथे, न देखरेख करइया, अऊ न ही ओमन ऊपर सासन करइया,
PRO 6:8 तभो ले ओमन धूपकाला म अपन खाना संकेलथें अऊ लुवई के बेरा अपन जेवन कुढ़ोथें।
PRO 6:9 हे अलाल मनखे, तेंह कब तक सोवत रहिबे? तोर नींद ह कब टूटही?
PRO 6:10 थोरकन अऊ नींद, थोरकन अऊ ऊंघासी, हांथ म हांथ धरके अऊ थोरकन देर बईठे रहई—
PRO 6:11 अऊ गरीबी ह चोर सहीं, अऊ घटी ह हथियार धरे मनखे सहीं तोर ऊपर आ जाही।
PRO 6:12 समस्या खड़े करइया अऊ दुस्ट मनखे ह बेईमानी के बात करथे;
PRO 6:13 ओह खराप इरादा से आंखी मारथे, अपन पांव ले इसारा करथे अऊ अपन अंगरी ले घलो इसारा करथे।
PRO 6:14 ये काम ओह अपन खराप मन ले बुरई के बात ला सोचके करथे; ओह हमेसा झगरा करे म लगे रहिथे।
PRO 6:15 एकरसेति, बिपत्ति ह ओकर ऊपर अचानक आ जाही; पल भर म, बिगर कोनो बचाव के ओह नास हो जाही।
PRO 6:16 छै ठन चीज ला यहोवा ह नापसंद करथे, अऊ सात ठन चीज ले ओह घिन करथे:
PRO 6:17 घमंड ले भरे आंखी, लबारी बात कहइया जीभ, निरदोस मनखे के खून बहानेवाला हांथ,
PRO 6:18 दुस्टता के बात सोचनेवाला हिरदय, खराप काम करे बर तियार रहइया पांव,
PRO 6:19 लबरा गवाह, जऊन ह लबारी के ऊपर लबारी मारथे अऊ ओ मनखे जऊन ह मनखेमन के बीच म फूट डारथे।
PRO 6:20 हे मोर बेटा, अपन ददा के हुकूम ला मान अऊ अपन दाई के सिकछा ला झन छोंड़।
PRO 6:21 ये बातमन ला हमेसा अपन हिरदय म रख; येमन ला अपन घेंच म माला सहीं पहिर ले।
PRO 6:22 जब तेंह रेंगबे, त येमन तोर अगुवई करहीं; जब तेंह सुतबे, त येमन तोर रखवारी करहीं; अऊ जब तेंह जागबे, त येमन तोर ले गोठियाहीं।
PRO 6:23 काबरकि ये हुकूम ह एक दीया सहीं अय; ये सिकछा ह अंजोर सहीं अय, अऊ सुधार अऊ निरदेस जिनगी के रसता सहीं अंय;
PRO 6:24 येमन तोला परोसी के घरवाली, अऊ छिनार माईलोगन के गुरतूर बोली ले बचाथें।
PRO 6:25 ओकर सुघरता ला देखके अपन मन म ओकर लालसा झन कर अऊ ओकर आंखी के जादू तोला झन मोहय।
PRO 6:26 काबरकि एक बेस्या के कीमत एक रोटी हो सकथे, पर आने मनखे के घरवाली ह तोर खुद के जिनगी ला लूट लेथे।
PRO 6:27 का अइसे हो सकथे कि कोनो मनखे आगी ला अपन कोरा म रखे अऊ ओकर ओनहा ह नइं जरय?
PRO 6:28 या का अइसे हो सकथे कि कोनो मनखे आगी म रेंगे अऊ ओकर पांव ह नइं झुलसय?
PRO 6:29 अइसे ओ मनखे के दसा होथे, जऊन ह आने के घरवाली संग सुतथे; जऊन ह अइसे माईलोगन ला छूथे, ओह दंड के भागी होही।
PRO 6:30 जऊन चोर ह अपन पेट के भूख ला मिटाय बर चोरी करथे, ओला मनखेमन तुछ नइं समझंय।
PRO 6:31 तभो ले यदि ओह पकड़े जाथे, त ओला सात गुना भरना पड़ही; चाहे ओला अपन घर के जम्मो चीज देना पड़य।
PRO 6:32 जऊन ह बेभिचार करथे, ओकर करा बुद्धि नइं ए; जऊन ह अइसे करथे, ओह अपनआप ला नास करथे।
PRO 6:33 ओह मार खाथे अऊ अपमानित होथे, अऊ ओकर कलंक ह कभू नइं मिटय।
PRO 6:34 काबरकि जलन ह घरवाला ला बहुंत गुस्सा देवाथे, अऊ बदला लेवत बेरा ओह दया नइं करय।
PRO 6:35 ओह नुकसान के भरपई नइं चाहय; ओला जतका भी घूस दे दव, ओह नइं मानय।
PRO 7:1 हे मोर बेटा, मोर बातमन ला मान अऊ मोर हुकूममन ला अपन मन म रखे रह।
PRO 7:2 मोर हुकूममन ला मान, त तेंह जीयत रहिबे; मोर सिकछा के मुताबिक अपन जिनगी जी।
PRO 7:3 ओमन ला अपन अंगरीमन म बांध ले, अऊ ओमन ला अपन हिरदय के पटिया म लिख ले।
PRO 7:4 बुद्धि ले कह, “तेंह मोर बहिनी अस,” अऊ समझ ले कह, “तेंह मोर रिस्तेदार अस।”
PRO 7:5 येमन तोला छिनार माईलोगन ले दूरिहा रखहीं, अऊ जिद्दी माईलोगन के गुरतूर बोली ले बचाहीं।
PRO 7:6 मेंह अपन घर के खिड़की के जाली म ले खाल्हे देखेंव।
PRO 7:7 मेंह भोला-भाला मनखेमन ला देखेंव, अऊ मोर धियान ह जवानमन के बीच म, एक निरबुद्धि जवान कोति गीस।
PRO 7:8 ओह ओ माईलोगन के घर के कोना के गली ले होवत, ओकर घर डहार जावत रिहिस।
PRO 7:9 ओ बेरा दिन ढर गे रहय अऊ सांझ हो गे रहय, अऊ रथिया के अंधियार छा गे रहय।
PRO 7:10 तब एक माईलोगन ओकर ले मिले बर घर ले निकलिस; ओकर भेस ह छिनार माईलोगन सहीं रिहिस अऊ ओकर मन म कपट रिहिस।
PRO 7:11 (ओह उदंड अऊ हुकूम नइं माननेवाली रिहिस; ओह बहुंत कम अपन घर म रहय;
PRO 7:12 कभू गली म, कभू बजार म, त कभू गली के कोना म, ओह मनखेमन के बाट जोहय।)
PRO 7:13 तब ओह ओ जवान ला धरके चूमिस, अऊ बिगर लाज-सरम के ओला कहिस,
PRO 7:14 “आज में अपन मन्नत ला पूरा करेंव, अऊ मोर करा घर म मेल-बलिदान म चघाय खाना हवय।
PRO 7:15 एकरसेति मेंह तोर ले मिले बर आय हवंव; मेंह तोला खोजेंव अऊ तोला पा गेंव!
PRO 7:16 मेंह अपन पलंग म मिसर देस म बने सन के रंग-बिरंगी चादर दसाय हंव।
PRO 7:17 मेंह अपन पलंग ला लोहबान, मुसब्बर अऊ दालचीनी ले सुगंधित करे हवंव।
PRO 7:18 आ, हमन बिहान होवत ले एक-दूसर ले मया करन; अऊ मया म हमन आनंद मनावन!
PRO 7:19 काबरकि मोर घरवाला ह घर म नइं ए; ओह दूरिहा देस चले गे हवय।
PRO 7:20 ओह अपन संग रूपिया ले भरे थैली ले गे हवय अऊ ओह पून्नी के दिन घर लहुंटही।”
PRO 7:21 अइसने बात कहिके, ओह ओ जवान ला बहका लीस; अऊ अपन गुरतूर बोली ले ओला मोह लीस।
PRO 7:22 ओ जवान ह तुरते ओकर पाछू हो लीस जइसने कि कोनो पसु ह कसाईखाना जाथे, या जइसने कि कोनो हिरन फांदा म फंसे बर जाथे
PRO 7:23 अऊ ओकर करेजा ला तीर ले बेधे जाथे; या ओ जवान ह ओ चिरई सहीं अय, जऊन ह जाल म जाके फंसथे, अऊ नइं जानय कि ओमा ओकर परान जाही।
PRO 7:24 अब, हे मोर बेटामन, मोर बात ला सुनव; अऊ मोर बात ऊपर धियान दव।
PRO 7:25 तुम्हर मन ह अइसने माईलोगन ऊपर झन लगय, या ओकर डहार म तुमन झन भटकव।
PRO 7:26 ओकर फांदा म फंसके बहुंते झन नास हो गे हवंय; ओकर दुवारा मारे गे मनखेमन के संखिया बहुंत बड़े हवय।
PRO 7:27 ओकर घर ह मरघटी के रसता ए, जऊन ह खाल्हे मिरतू के काल-कोठरी ला जाथे।
PRO 8:1 का बुद्धि ह नइं पुकारय? का समझ ह ऊंचहा अवाज म नइं बोलय?
PRO 8:2 ओह डहार के तीर, ऊंचहा ठऊर म, सड़क के चऊक म खड़े होथे;
PRO 8:3 सहर जाय के रसता, दुवार के बाजू म, प्रवेस दुवार करा, ओह चिचियाके कहिथे:
PRO 8:4 “हे मनखेमन, मेंह तुमन ला पुकारत हंव; मोर बात ह जम्मो मनखेमन बर अय।
PRO 8:5 तुमन, जऊन मन भोला-भाला अव, बुद्धिमान बनव; जऊन मन मुरूख अव, ओमन समझदार बनव।
PRO 8:6 सुनव, मोर करा कहे बर उत्तम बात हवय; मेंह सही बात ला कहिथंव।
PRO 8:7 मोर मुहूं ले सच बात निकलथे, काबरकि दुस्टता के बात ले मेंह घिन करथंव।
PRO 8:8 मोर मुहूं के जम्मो बात धरमीपन के होथे; ओमा कोनो उल्टा या खराप बात नइं रहय।
PRO 8:9 समझनेवाला बर येमन सही अंय; अऊ जऊन मन गियान पा गे हवंय, ओमन बर येमन सीधा अंय।
PRO 8:10 चांदी के बदले मोर सिकछा ला चुनव, अऊ सुध सोन के बदले मोर गियान ला लव,
PRO 8:11 काबरकि बुद्धि ह मनि ले जादा कीमती अय, अऊ कोनो भी मनभावन चीज के तुलना येकर ले नइं करे जा सकय।
PRO 8:12 “में बुद्धि अंव अऊ समझदारी के संग रहिथंव; गियान अऊ बिबेक मोर म हवय।
PRO 8:13 यहोवा के भय मनई के मतलब बुरई ले घिन करई अय। मेंह घमंड अऊ जिद्दीपन, खराप बरताव अऊ बुरई के बात ले घिन करथंव।
PRO 8:14 उत्तम सलाह अऊ सही नियाय मेंह करथंव; मोर करा समझ के बात अऊ सामर्थ हवय।
PRO 8:15 मोर दुवारा राजामन राज करथें अऊ सासन करइयामन सही फैसला करथें।
PRO 8:16 मोर दुवारा ही सासन करइया, अऊ जम्मो हाकिममन सासन करथें।
PRO 8:17 मेंह ओमन ला मया करथंव, जऊन मन मोला मया करथें, अऊ जऊन मन मोला खोजथें, ओमन मोला पाथें।
PRO 8:18 धन अऊ आदरमान मोर करा हवय, ठहरइया धन अऊ उन्नति घलो मोर करा हवय।
PRO 8:19 मोर फर ह चोखा सोन ले घलो जादा बने अय, अऊ जऊन चीज मेंह उतपन करथंव, ओह उत्तम चांदी ले बढ़के होथे।
PRO 8:20 मेंह धरमीपन, अऊ नियाय के रसता म चलथंव,
PRO 8:21 ताकि जऊन मन मोर ले मया करथें, ओमन ला उत्तम उत्तराधिकार दंव, अऊ ओमन के भंडार ला भर दंव।
PRO 8:22 “यहोवा ह अपन काम के सुरूआत ले, अपन पुराना काम के पहिले मोला लानिस;
PRO 8:23 मेंह आदिकाल ले, सिरिस्टी ला रचे के पहिले ठहिराय गे हवंव।
PRO 8:24 जब न तो गहिरा समुंदर रिहिस, अऊ न ही उमड़त पानी के झरना रिहिस, तब ले मेंह जनमे हवंव।
PRO 8:25 पहाड़ अऊ पहाड़ीमन ला बनाय के पहिले, मेंह जनमेंव;
PRO 8:26 येकर पहिले कि परमेसर ह संसार या येकर इलाका, या धरती के धुर्रा ला बनातिस।
PRO 8:27 जब ओह अकासमन ला स्थापित करिस, त मेंह उहां रहेंव, जब ओह समुंदर अऊ अकास के बीच म सीमना बांधिस,
PRO 8:28 जब ओह ऊपर म बादर ला ठहिराईस अऊ गहरई म पानी के सोत बनाईस,
PRO 8:29 जब ओह समुंदर के सीमना ला ठहिराईस, ताकि पानी ह ओकर हुकूम ला झन टारय, अऊ जब ओह धरती के नीव रखिस।
PRO 8:30 तब मेंह हमेसा ओकर संग रहेंव। मेंह हर दिन खुसी म मगन रहेंव, अऊ हमेसा ओकर आघू म आनंदित रहेंव।
PRO 8:31 मेंह ओकर बसाय जम्मो संसार ले आनंदित रहेंव अऊ मनखेमन म रहिके खुस होवत रहेंव।
PRO 8:32 “एकरसेति, अब हे मोर लइकामन, मोर बात ला सुनव; धइन अंय ओमन, जऊन मन मोर बताय रसता म चलथें।
PRO 8:33 मोर सिकछा ला सुनव अऊ बुद्धिमान बनव; येला तुछ झन जानव।
PRO 8:34 धइन अंय ओमन, जऊन मन मोर गोठ ला सुनथें, अऊ मोर कपाट करा हर दिन रखवारी करथें, अऊ मोर कपाट के रसता म अगोरत रहिथें।
PRO 8:35 काबरकि जऊन मन मोला पाथें, ओमन जिनगी पाथें अऊ यहोवा ओमन ऊपर किरपा करथे।
PRO 8:36 पर जऊन मन मोला पाय म असफल होथें, ओमन अपन के हानि करथें; ओ जम्मो जऊन मन मोर ले घिन करथें, ओमन मिरतू ले मया करथें।”
PRO 9:1 बुद्धि ह अपन घर बनाईस; ओह येकर सात ठन खंभा बनाय हवय।
PRO 9:2 ओह अपन पसु के मांस रांधे हवय अऊ अंगूर के मंद तियार करे हवय; अऊ खाना खाय बर अपन मेज म रखे हवय।
PRO 9:3 ओह अपन सेवकमन ला पठोय हवय, अऊ ओह सहर के सबले ऊंच जगह ले, ये कहिके बलाथे,
PRO 9:4 “जऊन मन सीधा-साधा अंय, ओमन मोर घर म आवंय!” जऊन मन निरबुद्धि अंय, ओमन ला ओह कहिथे,
PRO 9:5 “आवव, मोर खाना खावव अऊ मोर तियार करे गे अंगूर के मंद ला पीयव।
PRO 9:6 अपन सीधा-साधा रसता ला छोंड़व, त तुमन जीयत रहिहू; समझवाले रसता म चलव।”
PRO 9:7 जऊन ह ठट्ठा करइया ला सिकछा देथे, ओकर बेजत्ती होथे; जऊन ह दुस्ट मनखे ला डांटथे, ओह गारी खाथे।
PRO 9:8 ठट्ठा करइयामन ला झन डांट, नइं तो ओमन तोर ले घिन करहीं; बुद्धिमान मनखेमन ला डांट, त ओमन तोर ले मया करहीं।
PRO 9:9 बुद्धिमान मनखे ला सिकछा दे, त ओमन अऊ बुद्धिमान होहीं; धरमीमन ला सिखा, त ओमन अपन गियान ला अऊ बढ़ाहीं।
PRO 9:10 यहोवा के भय मनई बुद्धि के सुरूआत अय, पबितर परमेसर ला जानई समझ के बात अय।
PRO 9:11 काबरकि परमेसर के दुवारा तोर उमर बढ़ही, अऊ तोर जिनगी म अऊ बछर जोड़े जाही।
PRO 9:12 कहूं तेंह बुद्धिमान अस, त तोर बुद्धि के कारन तोला ईनाम मिलही; यदि तेंह ठट्ठा करइया अस, त सिरिप तेंहीच ह दुख भोगबे।
PRO 9:13 मुरूखता ह एक ब्यवस्थाहीन माईलोगन सहीं अय; ओह सीधी-साधी अय अऊ कुछू नइं जानय।
PRO 9:14 ओह अपन घर के कपाट करा बईठथे; ओह सहर के सबले ऊंच जगह म आसन जमाथे
PRO 9:15 अऊ जऊन मन उहां ले होवत, अपन रसता म सीधा जावत रहिथें, ओमन ला ओह चिचियाके कहिथे,
PRO 9:16 “जऊन मन सीधा-साधा अंय, ओमन मोर घर म आवंय!” जऊन मन निरबुद्धि अंय, ओमन ला ओह कहिथे,
PRO 9:17 “चोराय पानी ह मीठ लगथे; चोरी-छुपे खाय खाना ह सुवादिस्ट होथे!”
PRO 9:18 पर ओमन नइं जानंय कि उहां मरे मनखेमन हवंय, अऊ ये घलो कि ओकर पहुनामन गहिरा, मिरतू-लोक म हवंय।
PRO 10:1 सुलेमान के नीतिबचन: बुद्धिमान बेटा ले ओकर ददा ह खुस होथे, पर मुरूख बेटा ह अपन दाई ऊपर दुख लानथे।
PRO 10:2 बेईमानी ले कमाय धन ले लाभ नइं होवय, पर मनखे के धरमीपन ह ओला मिरतू ले बचाथे।
PRO 10:3 यहोवा ह धरमी मनखे ला भूखा रहन नइं देवय, पर ओह दुस्ट मनखे के ईछा ला पूरा होवन नइं देवय।
PRO 10:4 काम म ढिलई करइया मनखे गरीब हो जाथे, पर मेहनती मनखे धनी होथे।
PRO 10:5 गरमी के महिना म जऊन ह फसल ला संकेलथे, ओह बुद्धिमान बेटा ए, पर जऊन ह फसल लुवई के बेरा सुतत रहिथे, ओह कलंकित बेटा ए।
PRO 10:6 धरमी मनखे ला बहुंत आसीस मिलथे, पर दुस्ट मनखे के मुहूं ले बहुंत हिंसा के बात निकलथे।
PRO 10:7 धरमी के नांव ह आसीस देय म उपयोग होथे, पर दुस्ट के नांव ह मिट जाथे।
PRO 10:8 बुद्धिमान ह हिरदय म हुकूम ला गरहन करथे, पर बकवास करइया मुरूख ह नास हो जाथे।
PRO 10:9 जऊन ह ईमानदारी से चलथे, ओह निडर रहिथे, पर जऊन ह बेईमानी के रसता म चलथे, ओकर पोल खुल जाथे।
PRO 10:10 जऊन ह गलत इरादा से आंखी मारथे, ओकर ले दुख मिलथे, अऊ बकवास करइया मुरूख ह नास हो जाथे।
PRO 10:11 धरमी मनखे के मुहूं ले जिनगी के बात निकलथे, पर दुस्ट मनखे के मुहूं ले हिंसा के बात निकलथे।
PRO 10:12 काकरो ले घिन करई ह झगरा ला सुरू करथे, पर मया ह जम्मो गलती ला ढांप देथे।
PRO 10:13 समझदार मनखे के बातचीत म बुद्धि पाय जाथे, पर निरबुद्धि ला लउठी के मार पड़थे।
PRO 10:14 बुद्धिमान ह गियान ला इकट्ठा करथे, पर मुरूख ह अपन बात के जरिये बिनास लानथे।
PRO 10:15 धनवानमन के धन ह ओमन के गढ़वाला सहर होथे, पर गरीब के गरीबी ह ओकर बिनास के कारन ए।
PRO 10:16 धरमी मनखे के मजदूरी जिनगी अय, पर दुस्ट मनखे के कमई पाप अऊ मिरतू अय।
PRO 10:17 जऊन ह अनुसासन ला मानथे, ओह जिनगी के रसता ला देखाथे, पर जऊन ह अनुसासन ला नइं मानय, ओह दूसरमन ला गलत रसता म ले जाथे।
PRO 10:18 जऊन ह लबारी मारके बईरता ला छुपाथे अऊ दूसर के निन्दा करथे, ओह मुरूख ए।
PRO 10:19 जिहां जादा बात होथे, उहां पाप घलो होथे, पर जऊन ह अपन मुहूं म लगाम लगाथे, ओह बुद्धिमान ए।
PRO 10:20 धरमी मनखे के बचन ह उत्तम चांदी सहीं अय, पर दुस्ट मनखे के बात बहुंत हल्का होथे।
PRO 10:21 धरमी मनखे के बात ले बहुंते जन के भलई होथे, पर मुरूखमन बुद्धि के कमी के कारन मर जाथें।
PRO 10:22 यहोवा के आसीस ले धन मिलथे, ओकर संग ओह दुख नइं देवय।
PRO 10:23 मुरूख ला खराप काम करई म खुसी मिलथे, पर समझदार मनखे बुद्धि के बात म खुस होथे।
PRO 10:24 जऊन बात ले दुस्ट मनखे ह डरथे, ओहीच बात ओकर संग होही, पर धरमी जन के ईछा ला पूरा करे जाही।
PRO 10:25 जब बिपत्ति चले जाथे, त ओकर संग दुस्टमन के घलो अन्त हो जाथे, पर धरमीमन सदा इस्थिर बने रहिथें।
PRO 10:26 जइसे दांत बर खट्टई अऊ आंखी बर धुआं होथे, वइसे आलसी मनखेमन ओमन बर होथें, जऊन मन ओमन ला पठोथें।
PRO 10:27 यहोवा के भय माने ले मनखे के उमर ह बढ़थे, पर दुस्ट मनखे जादा साल तक नइं जीयय।
PRO 10:28 धरमी जन ला आसा रखई म आनंद मिलथे, पर दुस्ट मनखे के आसा टूट जाथे।
PRO 10:29 यहोवा के रसता ह निरदोसीमन बर सरन-स्थान ए, पर जऊन मन दुस्टता करथें, ओमन बर बिनास के जगह ए।
PRO 10:30 धरमी जन सदा अटल बने रहिही, पर दुस्ट मनखे धरती म बने नइं रह सकय।
PRO 10:31 धरमी के मुहूं ले बुद्धि के बात निकलथे, पर बेकार बात करइया के मुहूं ला बंद करे जाही।
PRO 10:32 धरमी के मुहूं ले समझदारी के बात निकलथे, पर दुस्ट मनखे के मुहूं ले सिरिप बेकार के बात निकलथे।
PRO 11:1 यहोवा ह बेईमानी के तौल ले बहुंत घिन करथे, पर सही तौल ले ओह खुस होथे।
PRO 11:2 जब घमंड आथे, त अपमान घलो आथे, पर नमरता के संग बुद्धि आथे।
PRO 11:3 ईमानदार मनखेमन ला ओमन के ईमानदारी ह अगुवई करथे, पर बिसवासघाती मनखेमन अपन छल-कपट म नास हो जाथें।
PRO 11:4 कोप के बेरा म धन ले कोनो लाभ नइं होवय, पर धरमीपन ह मिरतू ले बचाथे।
PRO 11:5 निरदोस मनखेमन के धरमीपन ह ओमन के रसता ला सीधा करथे, पर दुस्ट मनखेमन अपन ही दुस्टता म गिर जाथें।
PRO 11:6 ईमानदार मनखेमन के धरमीपन ह ओमन ला बचाथे, पर बिसवासघाती मनखेमन अपन ही दुस्ट ईछा म फंसथें।
PRO 11:7 दुस्ट मनखेमन के संग ओमन के आसा घलो टूट जाथे; ओमन के सक्ति के जम्मो परतिगियां बेकार हो जाथे।
PRO 11:8 धरमी मनखेमन बिपत्ति ले बचाय जाथें, पर ओहीच बिपत्ति दुस्ट मनखे ऊपर पड़थे।
PRO 11:9 भक्तिहीन मनखेमन अपन बात ले अपन परोसी ला नास करथें, पर गियान के दुवारा धरमी मनखेमन बच जाथें।
PRO 11:10 जब धरमी मनखेमन उन्नति करथें, त सहर के मनखेमन आनंद मनाथें; जब दुस्ट मनखेमन नास होथें, त आनंद के कारन जयकार होथे।
PRO 11:11 धरमी मनखेमन के आसीस ले सहर के उन्नति होथे। पर दुस्ट मनखेमन के गोठ ले येह नास होथे।
PRO 11:12 जऊन ह अपन परोसी के हंसी उड़ाथे, ओह निरबुद्धि ए, पर समझदार मनखे अपन मुहूं म लगाम लगाथे।
PRO 11:13 लबारी बात ह बिसवास ला टोरथे, पर बिसवासयोग्य मनखे ह गुपत के बात ला बनाय रखथे।
PRO 11:14 मार्ग-दरसन के अभाव म देस ह बिपत्ति म पड़थे, पर जीत ह बहुंत सलाहकारमन के जरिये मिलथे।
PRO 11:15 जऊन ह अजनबी के जमानत लेथे, ओह दुख उठाथे, पर जऊन ह जमानत लेय बर मना करथे, ओह सुखी रहिथे।
PRO 11:16 दयालु माईलोगन ह आदरमान पाथे, पर निरदयी आदमी सिरिप धन कमाथे।
PRO 11:17 दयालु मनखेमन अपन बर लाभ कमाथें, पर निरदयीमन अपन ऊपर बिनास लानथें।
PRO 11:18 दुस्ट मनखे ह छल-कपट के कमई करथे, पर जऊन ह धरमीपन देखाथे, ओह सही म ईनाम पाथे।
PRO 11:19 धरमीमन सही म जिनगी पाथें, पर जऊन ह बुरई के पाछू चलथे, ओह मरथे।
PRO 11:20 यहोवा ह हठी मनखे ले घिन करथे, पर ओह निरदोस चालचलनवाला मनखे ले खुस होथे।
PRO 11:21 ये बात बर निस्चित रहव: दुस्ट ह जरूर दंड पाही, पर जऊन मन धरमी अंय, ओमन छोंड़ दिये जाहीं।
PRO 11:22 जऊन सुघर माईलोगन ह समझदारी नइं देखाय, ओह थोथना म सोन के नथ पहिरे सूरा के सहीं अय।
PRO 11:23 धरमीमन के ईछा के अन्त सिरिप भलई म होथे, पर दुस्टमन के आसा के अन्त सिरिप कोरोध म होथे।
PRO 11:24 एक मनखे ह दिल खोलके देथे, तभो ले ओकर बढ़ती होथे; दूसर मनखे ह देय म कंजूसी करथे, पर ओह गरीब हो जाथे।
PRO 11:25 उदार मनखे के उन्नति होही, अऊ जऊन ह दूसर के खियाल रखथे, ओकर खियाल रखे जाही।
PRO 11:26 मनखेमन ओ मनखे ला सराप देथें, जऊन ह अनाज ला दबाके रखे रहिथे, पर जऊन ह बेचे के ईछा रखथे, ओकर बर मनखेमन आसीस मांगथें।
PRO 11:27 जऊन ह भलई करे चाहथे, ओकर ऊपर किरपा करे जाथे, पर जऊन ह बुरई करे के ईछा रखथे, ओकर ऊपर बुरई आ जाथे।
PRO 11:28 जऊन मन अपन धन ऊपर भरोसा रखथें, ओमन गिरहीं, पर धरमी मनखेमन हरियर पान सहीं बढ़हीं।
PRO 11:29 जऊन ह अपन परिवार ला दुख देथे, ओला बांटा म कुछू नइं मिलय, अऊ मुरूख ह बुद्धिमान के दास होही।
PRO 11:30 धरमी के परतिफल जिनगी के रूख होथे, अऊ जऊन ह बुद्धिमान ए, ओह जिनगी बचाथे।
PRO 11:31 यदि धरमी मनखे ला ये धरती म ओकर फर मिलथे, त भक्तिहीन अऊ पापी ला ओकर परतिफल काबर नइं मिलही!
PRO 12:1 जऊन ह अनुसासन ले मया करथे, ओह गियान ले मया करथे, पर जऊन ह सुधरे बर नइं चाहय, ओह मुरूख अय।
PRO 12:2 बने मनखेमन ऊपर यहोवा के किरपा होथे, पर दुस्ट उपाय करइयामन ला ओह दोसी ठहिराथे।
PRO 12:3 कोनो दुस्ट काम करे के दुवारा इस्थिर नइं रह सकय, पर धरमी मनखे ला कोनो डिगा नइं सकंय।
PRO 12:4 बने चालचलनवाली माईलोगन ह अपन घरवाला के मुकुट ए, पर कलंकित माईलोगन ह अपन घरवाला के सरे हाड़ा सहीं अय।
PRO 12:5 धरमीमन के योजना ह सही होथे, पर दुस्टमन के सलाह धोखा देवइया होथे।
PRO 12:6 दुस्टमन के बातचीत ह हतिया करे बर घात लगाय के बारे म होथे, पर सीधा-साधा मनखे के बातचीत ह ओमन ला बचाथे।
PRO 12:7 दुस्टमन ला नास करे जाथे अऊ ओमन बचे नइं रहंय, पर धरमी के घर ह मजबूत बने रहिथे।
PRO 12:8 मनखे के परसंसा ओकर बुद्धि के अनुसार होथे, पर बिगड़े बुद्धि के मनखे ह तुछ समझे जाथे।
PRO 12:9 जेकर करा खाय बर खाना तक नइं रहय अऊ अपन बड़ई मारथे ओकर ले सेवक रखइया छोटे मनखे ह बने अय।
PRO 12:10 धरमी मनखे अपन पसुमन के घलो चिंता करथे, पर दुस्ट मनखे के दया के काम ह घलो निरदयी होथे।
PRO 12:11 जऊन मन अपन खेत ला कमाथें, ओमन करा बहुंत जेवन होही, पर जऊन मन सिरिप कल्पना करत रहिथें, ओमन निरबुद्धि अंय।
PRO 12:12 दुस्ट मनखेमन, खराप काम करइया मनखेमन ले सुरकछा के मनसा करथें। पर धरमीमन के जरी ह बने रहिथे।
PRO 12:13 खराप मनखेमन अपन खराप गोठ के कारन फंसथें, अऊ निरदोस मनखेमन समस्या ले बच जाथें।
PRO 12:14 मनखेमन अपन सुघर गोठ के कारन बने चीज ले भर जाथें, अऊ ओमन के हांथ के मेहनत ह ओमन ला ईनाम देवाथे।
PRO 12:15 मुरूखमन ला अपनेच रसता ह सही लगथे, पर बुद्धिमान मनखेमन दूसरमन के सलाह ला सुनथें।
PRO 12:16 मुरूखमन तुरते अपन रिस देखाथें, पर समझदार मनखेमन अपन बेजत्ती ला धियान नइं देवंय।
PRO 12:17 एक ईमानदार गवाह ह सच बोलथे, पर लबरा गवाह ह लबारी मारथे।
PRO 12:18 बिगर सोचे-बिचारे बोलनेवाला के गोठ ह तलवार सहीं चूभथे, पर बुद्धिमान मनखे के बात ह दवाई के सहीं बने काम करथे।
PRO 12:19 सच बात ह हमेसा बने रहिथे, पर लबरा गोठ सिरिप पल भर के होथे।
PRO 12:20 खराप काम करइयामन के मन म छल-कपट होथे, पर जऊन मन सांति के बात करथें, ओमन ला आनंद मिलथे।
PRO 12:21 धरमी ला कोनो हानि नइं होवय, पर दुस्ट मनखे ह समस्या ले भरे रहिथे।
PRO 12:22 लबारी बात ले यहोवा बहुंत घिन करथे, पर ओह बिसवासयोग्य मनखे ले बहुंत खुस होथे।
PRO 12:23 समझदार मनखेमन अपन गियान ला अपन म रखथें, पर मुरूख मनखे ह बिगर सोचे अपन मुरूखता ला बक देथे।
PRO 12:24 मेहनती मनखेमन सासन करथें, पर आलसी मनखे ह मजदूरी करे बर बाध्य होथे।
PRO 12:25 मनखे के उतावलापन ह ओकर मन ला उदास कर देथे, पर बने बात ले ओह खुस होथे।
PRO 12:26 धरमी मनखे ह धियान देके अपन संगवारी चुनथे, पर दुस्ट मनखे के चालचलन ह ओला भटका देथे।
PRO 12:27 आलसी मनखे कोनो काम करे नइं चाहय, पर मेहनती मनखे ला अपन मेहनत ले कीमती चीज मिलथे।
PRO 12:28 धरमीपन के रसता म जिनगी हवय, अऊ ओ रसता म मिरतू नइं ए।
PRO 13:1 बुद्धिमान बेटा ह अपन ददा के सिकछा म धियान लगाथे, पर ठट्ठा करइया ह डांट ला घलो नइं सुनय।
PRO 13:2 मनखेमन अपन बने बात के कारन बने चीजमन के आनंद उठाथें, पर बिसवासघाती मनखे के भूख हिंसा करे म मिटथे।
PRO 13:3 जऊन मन अपन मुहूं म लगाम लगाथें, ओमन अपन परान के रकछा करथें, पर जऊन मन बिगर सोचे गोठियाथें, ओमन नास हो जाथें।
PRO 13:4 आलसी मनखे के भूख कभू नइं मिटय, पर मेहनती मनखे के ईछा पूरा होथे।
PRO 13:5 धरमी मनखे लबरा बात ले घिन करथे, पर दुस्ट मनखे अपनआप ला एक दुरगंध के चीज सहीं बना लेथे अऊ अपन ऊपर कलंक लगाथे।
PRO 13:6 धरमीपन ह ईमानदार मनखे के रकछा करथे पर दुस्टता ह पापी मनखे ला नास कर देथे।
PRO 13:7 एक मनखे अपन ला धनवान जताथे, पर ओकर करा कुछू नइं रहय; दूसर ह अपन ला गरीब जताथे, पर ओकर करा बहुंत धन होथे।
PRO 13:8 मनखे के धन ह ओकर जिनगी ला छुड़ा सकथे, पर गरीब मनखे ह धमकी भरे डांट के जबाब घलो नइं दे सकय।
PRO 13:9 धरमी मनखे के अंजोर ह बहुंत चमकथे, पर दुस्ट मनखे के दीया ह बुता जाथे।
PRO 13:10 घमंड के कारन झगरा होथे, पर जऊन मन सलाह लेथें, ओमन म बुद्धि होथे।
PRO 13:11 बेईमानी के पईसा ह खतम हो जाथे, पर जऊन ह थोर-थोर करके पईसा जमा करथे, ओ पईसा ह बढ़थे।
PRO 13:12 जब आसा के पूरा होय म देरी होथे, त मन ह बिचलित होथे, पर मनसा के पूरा होवई ह जिनगी के रूख सहीं अय।
PRO 13:13 जऊन ह हुकूम ला तुछ समझथे, ओह येकर दाम चुकाही, पर जऊन ह हुकूम ला मानथे, ओला ईनाम मिलथे।
PRO 13:14 बुद्धिमान मनखे के सिकछा ह जिनगी के झरना ए, जऊन ह मनखे ला मिरतू के फांदा ले बचाथे।
PRO 13:15 सुबुद्धि ले अनुग्रह मिलथे, पर बिसवासघातीमन के रसता ह ओमन के बिनास कोति जाथे।
PRO 13:16 जम्मो समझदार मनखे गियान के संग काम करथें। पर मुरूखमन अपन मुरूखता देखाथें।
PRO 13:17 दुस्ट संदेसिया ह समस्या म पड़थे, पर बिसवासयोग्य संदेसिया ह बने संदेस लेके आथे।
PRO 13:18 जऊन ह अनुसासन ला तुछ समझथे, ओह गरीबी अऊ लज्जा म पड़थे, पर जऊन ह डांट ऊपर धियान देथे, ओह आदर पाथे।
PRO 13:19 ईछा के पूरा होवई ह मन ला गुरतूर लगथे, पर मुरूख मनखे ह दुस्ट काम ला बिलकुल ही छोंड़े नइं चाहय।
PRO 13:20 बुद्धिमान के संगति कर, त तें घलो बुद्धिमान हो जाबे, काबरकि मुरूख के संगी ला हानि उठाना पड़थे।
PRO 13:21 समस्या ह पापीमन के पाछू लगे रहिथे, पर धरमीमन ला बने चीज के ईनाम मिलथे।
PRO 13:22 बने मनखे ह अपन नाती-पोतामन बर धन-संपत्ति छोंड़ जाथे, पर पापी के संपत्ति धरमी बर रखे जाथे।
PRO 13:23 बंजर भुइयां ह गरीब बर फसल पईदा करथे, पर अनियाय ह येला छीन लेथे।
PRO 13:24 जऊन ह अपन लइकामन ला छड़ी ले अनुसासित नइं करय, ओह ओकर बईरी अय। पर जऊन ह अपन लइकामन ले मया करथे, ओह ओमन ला अनुसासित घलो करथे।
PRO 13:25 धरमी ह पेट भर खाय ला पाथे, पर दुस्ट मनखे ह भूखन ही रहिथे।
PRO 14:1 बुद्धिमान माईलोगन ह अपन घर ला बनाथे, पर मुरूख माईलोगन ह अपन खुद के हांथ ले ओला गिरा देथे।
PRO 14:2 जऊन ह यहोवा के भय मानथे, ओह ईमानदारी से चलथे, पर जऊन मन ओला तुछ जानथें, ओमन अपन डहार ले भटक गे हवंय।
PRO 14:3 मुरूख ला ओकर घमंड के बात के कारन दंड मिलथे, पर बुद्धिमान मनखेमन के बात ह ओमन ला बचाथे।
PRO 14:4 जिहां बईलामन नइं रहंय, त उहां कोटना ह खाली रहिथे, पर बईला के ताकत ले बहुंत फसल होथे।
PRO 14:5 ईमानदार गवाह ह धोखा नइं देवय, पर लबरा गवाह ह अब्बड़ लबारी मारथे।
PRO 14:6 ठट्ठा करइया ह बुद्धि ला खोजथे, पर नइं पावय, पर समझदार मनखे ला आसानी से गियान मिलथे।
PRO 14:7 मुरूख मनखे ले दूरिहा रहव, काबरकि तुमन ला ओकर ले गियान के बात नइं मिलय।
PRO 14:8 बुद्धिमान के बुद्धि ह ओला समझ देथे, पर मुरूख के मुरूखता ह धोखा ए।
PRO 14:9 मुरूख मनखेमन पाप स्वीकार करई ला ठट्ठा के बात समझथें पर समझदार मनखेमन के बीच म सही बिचार पाय जाथे।
PRO 14:10 मन ह अपन खुद के दुख ला जानथे, अऊ कोनो आने ह येकर आनंद ला बांट नइं सकय।
PRO 14:11 दुस्ट के घर ह नास करे जाही, पर धरमी के घर ह बढ़ही।
PRO 14:12 एक डहार हवय, जऊन ह मनखे ला सही जान पड़थे, पर आखिर म येह मिरतू करा ले जाथे।
PRO 14:13 अइसे हो सकथे कि हंसी के बेरा घलो मन उदास होवय, अऊ आनंद मनई के अन्त दुख म होवय।
PRO 14:14 बिसवासहीन मनखे ह अपन काम के पूरा फल भोगही, अऊ बने मनखे ह अपन बने काम के ईनाम पाही।
PRO 14:15 सीधवा मनखे ह कोनो भी बात के बिसवास करथे, पर समझदार मनखे ह सोच-समझके चलथे।
PRO 14:16 बुद्धिमान मनखे ह यहोवा ले डरथे अऊ बुरई ले दूरिहा रहिथे, पर मुरूख ह कोरोधी सुभाव के होथे अऊ तभो ले निडर रहिथे।
PRO 14:17 जऊन ह तुरते गुस्सा होथे, ओह मुरूखता के काम करथे, अऊ जऊन ह खराप चाल चलथे, ओकर ले मनखेमन घिन करथें।
PRO 14:18 सीधा-साधा मनखे के भाग म मुरूखता होथे, पर समझदार मनखे ला गियान के मुकुट पहिराय जाथे।
PRO 14:19 खराप मनखेमन, बने मनखे के आघू म, अऊ दुस्ट मनखेमन धरमी के कपाट म झुकथें।
PRO 14:20 गरीब मनखे ला ओकर परोसीमन घलो छोंड़ देथें, पर धनी मनखे के बहुंत संगवारी होथें।
PRO 14:21 जऊन ह अपन परोसी ला तुछ समझथे, ओह पाप करथे, पर जऊन ह गरीब ऊपर दया करथे, ओह धइन ए।
PRO 14:22 का जऊन मन दुस्ट युक्ति करथें, ओमन अपन रसता ले नइं भटकंय? पर जऊन मन भलई के युक्ति करथें, ओमन ला मया मिलथे अऊ ओमन बिसवासयोग्य होथें।
PRO 14:23 कठिन मेहनत करे ले लाभ होथे, पर सिरिप बात करइया ह गरीब हो जाथे।
PRO 14:24 बुद्धिमान के धन ह ओकर मुकुट ए, पर मुरूख के मुरूखता ह मुरूखता ही लानथे।
PRO 14:25 एक सच्चा गवाह ह जिनगी बचाथे, पर एक लबरा गवाह ह धोखेबाज होथे।
PRO 14:26 जऊन ह यहोवा के भय मानथे, ओकर भरोसा ह मजबूत होथे, अऊ ओमन के लइकामन बर येह एक आसरय होही।
PRO 14:27 यहोवा के डर ह जिनगी के झरना ए, जऊन ह मनखे ला मिरतू के फांदा ले बचाथे।
PRO 14:28 मनखेमन के बहुंत संखिया ह राजा के महिमा अय, पर अधीन म रहइया मनखेमन के बिगर एक राजकुमार ह नास हो जाथे।
PRO 14:29 जऊन ह धीरज धरथे, ओह समझदार अय, पर जऊन ह तुरते गुस्सा होथे, ओह मुरूखता करथे।
PRO 14:30 मन म सांति ह देहें ला जिनगी देथे, पर मन म जलन रखई ह हाड़ा ला सढ़ा देथे।
PRO 14:31 जऊन ह गरीब ला सताथे, ओह ओकर बनानेवाला के अनादर करथे, पर जऊन ह गरीब ऊपर दया करथे, ओह परमेसर के आदर करथे।
PRO 14:32 जब बिपत्ति आथे, त दुस्टमन नास हो जाथें, पर मिरतू के बेरा घलो धरमी ला परमेसर म सरन मिलथे।
PRO 14:33 समझदार मनखे के मन म बुद्धि ह निवास करथे अऊ त अऊ मुरूखमन के बीच म घलो ओह अपनआप ला परगट करथे।
PRO 14:34 धरमीपन ले मनखे के जाति के बढ़ती होथे, पर पाप ले कोनो भी मनखे के अपमान होथे।
PRO 14:35 राजा ह बुद्धिमान सेवक ले खुस होथे, पर लज्जा के काम करइया सेवक ह राजा के कोरोध ला बढ़ाथे।
PRO 15:1 कोमल जबाब ह गुस्सा ला दूर करथे, पर करू बात ह गुस्सा ला बढ़ाथे।
PRO 15:2 बुद्धिमान के बात ह गियान ला बढ़ाथे, पर मुरूख के मुहूं ले मुरूखता के ही बात निकलथे।
PRO 15:3 यहोवा ह जम्मो कोति देखथे, दुस्ट अऊ बने दूनों मनखे ऊपर ओकर नजर लगे रहिथे।
PRO 15:4 सांति देवइया बात ह जिनगी के रूख ए, पर उल्टा-सीधा बात ले आतमा ह दुखी होथे।
PRO 15:5 मुरूख ह दाई-ददा के अनुसासन के तिरस्कार करथे, पर जऊन ह अनुसासन ला मानथे, ओह समझदारी देखाथे।
PRO 15:6 धरमी के घर म बड़े धन रहिथे, पर दुस्ट के कमई ह बिनास लाथे।
PRO 15:7 बुद्धिमान के मुहूं ले गियान बगरथे, पर मुरूखमन के मन ह सही नइं रहय।
PRO 15:8 यहोवा ह दुस्ट के बलिदान ले घिन करथे, पर ईमानदार मनखे के पराथना ले परमेसर ह खुस होथे।
PRO 15:9 यहोवा दुस्ट के काम ले घिन करथे, पर ओह ओमन ले मया करथे, जऊन मन धरमीपन के काम करथें।
PRO 15:10 जऊन ह सही रसता ला छोंड़ देथे, ओह कठोर अनुसासन के सामना करथे; जऊन ह अनुसासन ले घिन करथे, ओह मरही।
PRO 15:11 मिरतू अऊ बिनास यहोवा के आघू म खुले रहिथें— त मनखेमन के मन ला कोन पुछय!
PRO 15:12 ठट्ठा करइयामन डांट खाय ले खुस नइं होवंय, एकरसेति ओमन बुद्धिमान मनखे ले अलग रहिथें।
PRO 15:13 मन ह खुस रहे ले चेहरा ह घलो खुस दिखथे, पर दुखित मन ह आतमा ला निरास करथे।
PRO 15:14 समझदार मनखे ह गियान के खोज म रहिथे, पर मुरूख मनखे ह मुरूखता के बात करथे।
PRO 15:15 दुखी मनखे के जम्मो दिनमन दुख ले भरे रहिथें, पर जेकर मन ह खुस रहिथे, ओकर बर जम्मो दिन भोज खाय सहीं अय।
PRO 15:16 यहोवा के भय के संग थोरकन धन होवई ह समस्या के संग बहुंत धन होवई ले बने अय।
PRO 15:17 मया के घर म थोरकन साग-भाजी के जेवन करई बईरता वाले घर म मोटा-ताजा पसु के मांस खवई ले बने अय।
PRO 15:18 तुरते गुस्सा होवइया मनखे ह झगरा करथे, पर धीरज वाले मनखे ह झगरा ला सांत करथे।
PRO 15:19 आलसी मनखे के रसता ह कांटा ले रूंधे रहिथे, पर सीधा मनखे के रसता ह सुघर सड़क सहीं होथे।
PRO 15:20 बुद्धिमान बेटा ले ददा ह आनंदित होथे, पर मुरूख मनखे ह अपन दाई ला तुछ समझथे।
PRO 15:21 मुरूख ला मुरूखता के बात ले आनंद होथे, पर समझदार मनखे ह सीधा चाल चलथे।
PRO 15:22 बिगर सलाह के योजना ह सफल नइं होवय, पर बहुंत सलाहकारमन के मदद ले ओमन सफल होथें।
PRO 15:23 सही उत्तर देय म मनखे ला आनंद मिलथे— अऊ सही समय म कहे गे बात ह बने होथे।
PRO 15:24 बुद्धिमान बर जिनगी के रसता ह ऊपर कोति जाथे, अऊ ओला खाल्हे मिरतू के राज म जाय ले बचाथे।
PRO 15:25 यहोवा ह घमंडी के घर ला गिरा देथे, पर ओह बिधवा के सीमना ला सही-सलामत रखथे।
PRO 15:26 यहोवा ह दुस्ट के सोच-बिचार ले घिन करथे, पर ओकर नजर म अनुग्रह के बचनमन सुखद होथें।
PRO 15:27 लालची मनखेमन अपन परिवार के नास करथें, पर जऊन ह घूसखोरी ले घिन करथे, ओह जीयत रहिही।
PRO 15:28 धरमी ह अपन मन म सोच-बिचार करके जबाब देथे, पर दुस्ट के मुहूं ले बुरई के बात ही निकलथे।
PRO 15:29 यहोवा ह दुस्ट मनखे ले दूरिहा रहिथे, पर ओह धरमी के पराथना ला सुनथे।
PRO 15:30 संदेसिया के आंखी म चमक ह मन ला आनंदित करथे, अऊ सुघर संदेस ले हाड़ामन मजबूत होथें।
PRO 15:31 जऊन ह जिनगी देवइया ताड़ना ऊपर धियान देथे, ओह बुद्धिमानमन के बीच म निवास करथे।
PRO 15:32 जऊन मन अनुसासन ला नइं मानंय, ओमन अपनआप ला तुछ समझथें, पर जऊन ह अनुसासन ऊपर धियान देथे, ओह समझ के बात ला पाथे।
PRO 15:33 बुद्धि के निरदेस ह यहोवा के भय मानना ए, अऊ आदर के पहिली नमरता आथे।
PRO 16:1 मनखे ह अपन मन के योजना के बस म रहिथे, पर मुहूं के सही जबाब यहोवा करा ले आथे।
PRO 16:2 मनखे के जम्मो चालचलन ओकर नजर म सही जान पड़थे, पर मन के उदेस्य ला यहोवा ह जांचथे।
PRO 16:3 अपन जम्मो काम ला यहोवा ला सऊंप दव, अऊ ओह तुम्हर योजना ला स्थापित करही।
PRO 16:4 यहोवा ह जम्मो काम एक उदेस्य के संग करथे— इहां तक कि दुस्ट ला बिपत्ति के दिन बर रखथे।
PRO 16:5 यहोवा ह मन के जम्मो घमंड के बात ले घिन करथे। ये बात निस्चित ए: ओमन दंड पाय बिगर नइं बचंय।
PRO 16:6 मया अऊ बिसवासयोग्यता के दुवारा पाप के पछताप होथे; यहोवा के भय माने के दुवारा बुरई ले बचे जाथे।
PRO 16:7 जब यहोवा ह काकरो काम ले खुस होथे, त ओह ओकर बईरीमन के घलो ओकर ले मेल-मिलाप कराथे।
PRO 16:8 अनियाय करके बहुंत कमाय ले धरमीपन के दुवारा थोरकन कमई ह बने अय।
PRO 16:9 मनखेमन अपन मन म अपन जिनगी जीये के योजना बनाथें, पर यहोवा ह ओमन के जिनगी के कदम ला इस्थिर करथे।
PRO 16:10 राजा के मुहूं ले गियान के बात निकलथे, अऊ ओह अनियाय के बात नइं करय।
PRO 16:11 ईमानदारी के नाप अऊ तराजू यहोवा के अय; थैली के जम्मो वजन ओकर दुवारा बनाय गे हवंय।
PRO 16:12 राजामन गलत काम ले घिन करथें, काबरकि सिंघासन ह धरमीपन के जरिये इस्थिर रहिथे।
PRO 16:13 राजामन ईमानदारी के बात म खुस होथें; ओमन ओकर बात ऊपर धियान देथें, जऊन ह सही बात गोठियाथे।
PRO 16:14 राजा के गुस्सा ह मिरतू के दूत के सहीं अय, पर बुद्धिमान मनखे ह ओला मना लेथे।
PRO 16:15 जब राजा के चेहरा ह खुस दिखथे, येकर मतलब जिनगी अय; ओकर किरपा बसन्त समय के बारिस के बादर सहीं अय।
PRO 16:16 बुद्धि ला पाना सोन के पाय ले जादा बने अय, अऊ समझ के बात ला जानना, चांदी के पाय ले जादा बने अय।
PRO 16:17 ईमानदार मनखे के रसता ह बुरई ले दूरिहा रहिथे; जऊन मन अपन चालचलन ऊपर धियान देथें, ओमन अपन परान ला बचाथें।
PRO 16:18 बिनास के पहिली घमंड, अऊ ठोकर खाय के पहिली जिद्दी सुभाव आथे।
PRO 16:19 घमंडी मनखेमन संग लूट के बांटा लेय के बदले दुखी मनखेमन के संग नरम सुभाव से रहई बने अय।
PRO 16:20 जऊन ह निरदेस ऊपर धियान देथे, ओह बढ़थे, अऊ जऊन ह यहोवा ऊपर भरोसा रखथे, ओह आसीसित होथे।
PRO 16:21 जेकर हिरदय म बुद्धि हवय, ओला समझदार मनखे कहे जाथे, अऊ मधुर बचन ह मनखेमन ले बात मनवाथे।
PRO 16:22 समझदार मनखे बर समझदारी ह जिनगी के झरना ए, पर मुरूखता ह मुरूख मनखेमन बर दंड लाथे।
PRO 16:23 बुद्धिमान के मन ह ओकर बात ला समझदार बनाथे, अऊ ओमन के बात ला मनखेमन मानथें।
PRO 16:24 गुरतूर बोली ह मधुमक्खी के छत्ता सहीं अय, जऊन ह मन ला सांति अऊ देहें के हाड़ामन ला मजबूत करथे।
PRO 16:25 एक डहार हवय, जऊन ह मनखे ला सही जान पड़थे, पर आखिर म येह मिरतू करा ले जाथे।
PRO 16:26 मेहनती मनखेमन के लालसा ओमन बर काम करथे; ओमन के भूख ह ओमन ला उभारथे।
PRO 16:27 दुस्ट मनखे ह बुरई करे के बात सोचथे, अऊ ओकर बात ह झुलसा देवई आगी सहीं होथे।
PRO 16:28 जिद्दी मनखे ह झगरा ला बढ़ाथे, अऊ कानाफूसी करई या अफवाह फईलई ह नजदीकी संगीमन के बीच फूट डाल देथे।
PRO 16:29 हिंसक मनखे ह अपन परोसी ला बहकाथे अऊ ओला बुरई के रसता म ले चलथे।
PRO 16:30 जऊन ह बार-बार आंखी के पलक झपकाथे, ओह सडयंत्र रचथे; जऊन ह ओंठ दबाथे, ओह बुरई करथे।
PRO 16:31 पाके चुंदी ह सोभा देवइया मुकुट सहीं अय; येह धरमीपन के रसता म चले के दुवारा मिलथे।
PRO 16:32 धीरजवाला मनखे ह एक योद्धा ले बने होथे, अऊ मन ला बस म रखई ह सहर ला जीत लेवई ले उत्तम अय।
PRO 16:33 परची ह कोरा म डाले जाथे, पर येकर हर एक निरनय ह यहोवा कोति ले होथे।
PRO 17:1 सुख अऊ सांति के संग रोटी के एक कुटा खवई ह ओ घर ले बने अय, जिहां जेवनार के संग झगरा होथे।
PRO 17:2 बुद्धिमान सेवक ह कलंक लानेवाला बेटा ऊपर राज करही अऊ परिवार के एक झन सहीं पुरखामन के संपत्ति म बांटा पाही।
PRO 17:3 चांदी ला परखे बर कुठाली अऊ सोन ला परखे बर भट्ठी होथे, पर मन ला यहोवा परखथे।
PRO 17:4 दुस्ट मनखे ह धोखा देवइया के बात ला सुनथे; लबरा मनखे ह नुकसान करइया मनखे के बात ऊपर धियान देथे।
PRO 17:5 जऊन ह गरीब के हंसी उड़ाथे, ओह ओकर बनानेवाला के अपमान करथे; जऊन ह काकरो बिपत्ति ऊपर हंसथे, ओह सजा पाही।
PRO 17:6 डोकरा-डोकरीमन के सोभा ओमन के नाती-पोता अंय, अऊ लइकामन के घमंड ओमन के दाई-ददा अंय।
PRO 17:7 भक्तिहीन मुरूख के मुहूं ले उत्तम बात ह नइं फबे— येकर ले घलो खराप बात ये अय कि सासन करइया ला लबरा बात नइं फबे।
PRO 17:8 घूस देवई ह देवइया के नजर म कोनो ला मोहित करे सहीं अय; ओह सोचथे कि ओला हर जगह सफलता मिलही।
PRO 17:9 जऊन ह मया ला बढ़ाथे, ओह अपराध ला भुलाथे, पर जऊन ह बात ला दोहराथे, ओह नजदीकी संगीमन के बीच फूट डाल देथे।
PRO 17:10 एक डांट ह समझदार मनखे ऊपर जतेक परभाव डालथे एक मुरूख ला सौ कोड़ा मारना घलो ओतेक परभाव नइं डालय।
PRO 17:11 दुस्ट मनखेमन परमेसर के बिरोध म बिदरोह ला बढ़ाथें; एकरसेति मिरतू के दूत ला ओमन के बिरूध पठोय जाही।
PRO 17:12 लइका ले बिछड़े कोनो माई भालू ले भेंट होवई ह जादा बने अय, येकर बदले कि मुरूखता ले भरे कोनो मुरूख ले मिलई।
PRO 17:13 जऊन ह भलई के बदले बुरई करथे, ओकर घर ले बुरई ह कभू नइं जावय।
PRO 17:14 झगरा सुरू करई ह पानी के बांध म छेद करे सहीं अय; एकरसेति झगरा बढ़े के पहिली ओ बात ला छोंड़ दव।
PRO 17:15 दोसी ला छोंड़ देवई अऊ निरदोस ला दोसी ठहिरई— ये दूनों बात ले यहोवा ह बहुंत घिन करथे।
PRO 17:16 बुद्धि बिसाय बर मुरूखमन के हांथ म काबर पईसा होवय, जब ओमन येला नइं समझंय?
PRO 17:17 संगवारी ह हर समय मया करथे, अऊ एक भाई ह बिपत्ति के बेरा म काम आथे।
PRO 17:18 जेकर करा बुद्धि नइं ए, ओह सामान ला गिरवी रख देथे अऊ परोसी के जमानत लेथे।
PRO 17:19 जऊन ह झगरा ले मया करथे, ओह पाप ले मया करथे; जऊन ह ऊंचहा कपाट बनाथे, ओह बिनास ला नेवता देथे।
PRO 17:20 जेकर मन ह टेढ़ा हे, ओह उन्नति नइं करय; अऊ गलत बात करइया ह समस्या म पड़थे।
PRO 17:21 मुरूख लइका के होवई ह दुख के कारन होथे; भक्तिहीन मुरूख के दाई या ददा ला आनंद नइं मिलय।
PRO 17:22 खुसी ले भरे मन ह बढ़िया दवाई ए, पर टूटे मन ह हाड़ा ला सूखा देथे।
PRO 17:23 दुस्ट मनखे ह नियाय ला बिगाड़े बर गुपत म घूस लेथे।
PRO 17:24 समझदार मनखे ह बुद्धि ला धियान म रखथे, पर मुरूख मनखे के आंखी ह धरती के छोर तक भटकत रहिथे।
PRO 17:25 मुरूख बेटा ले ओकर ददा ह दुखी होथे अऊ ओकर जनम देवइया दाई ला तकलीफ होथे।
PRO 17:26 निरदोस ऊपर जुरबाना लगई बने नो हय, अऊ खचित ईमानदार करमचारी ला कोर्रा म पीटवाना सही नो हय।
PRO 17:27 जेकर करा गियान होथे, ओह संभलके गोठियाथे, अऊ जेकर करा समझ होथे, ओह सांत सुभाव के होथे।
PRO 17:28 अऊ त अऊ यदि मुरूखमन सांत रहंय, त ओमन बुद्धिमान समझे जाथें, अऊ यदि ओमन चुप रहंय, त समझदार समझे जाथें।
PRO 18:1 जऊन ह अपनआप ला आने मन ले अलग कर लेथे, ओह अपन खुद के ईछा पूरा करे बर अइसने करथे अऊ जम्मो सही नियाय के बिरूध झगरा सुरू करथे।
PRO 18:2 मुरूख के मन ह समझ के बात म नइं लगय पर ओला अपन खुद के बात कहे म खुसी मिलथे।
PRO 18:3 जब दुस्टता आथे, त अपमान घलो आथे, अऊ लज्जा के संग कलंक आथे।
PRO 18:4 मुहूं के बचन ह गहिरा पानी सहीं अय, पर बुद्धि के झरना ह तेज बहत नरवा के सहीं अय।
PRO 18:5 दुस्ट ला बचई अऊ निरदोस के नियाय बिगड़ई बने नो हय।
PRO 18:6 मुरूखमन के गोठ ह ओमन ला झगरा म डालथे, अऊ ओमन के बात ह ओमन ला मार खाय के लईक बनाथे।
PRO 18:7 मुरूखमन के बिनास ओमन के बात ले होथे, अऊ ओमन के गोठ ह ओमन के खुद के जिनगी के फांदा बन जाथे।
PRO 18:8 बकवास करई ह सुवादवाले जेवन सहीं होथे; येमन मनखे के भीतर तक चले जाथें।
PRO 18:9 जऊन ह अपन काम म ढीला होथे, ओह नास करइया के भाई होथे।
PRO 18:10 यहोवा के नांव ह गढ़वाला महल ए; धरमी जन उहां भागके जाथें अऊ सुरकछित रहिथें।
PRO 18:11 धनवानमन के धन ह ओमन के गढ़वाला सहर होथे; ओमन के कल्पना म येह नाप के बाहिर बहुंत ऊंच दीवार ए।
PRO 18:12 नास होय के पहिली मनखे के मन ह घमंडी हो जाथे, पर आदर पाय के पहिली ओमा नमरता आथे।
PRO 18:13 जऊन ह बात ला सुने के पहिली जबाब देथे, ओह मुरूख होथे अऊ ओकर बेजत्ती होथे।
PRO 18:14 मनखे के आतमा ह बेमारी ला सह सकथे, पर टूटे मन ला कोन सह सकथे?
PRO 18:15 समझदार मनखे के मन ह गियान पाथे, काबरकि बुद्धिमान ह गियान के बात ला खोज लेथे।
PRO 18:16 उपहार ह मनखे बर रसता खोलथे अऊ देवइया ला बड़े मनखेमन करा पहुंचाथे।
PRO 18:17 अदालत के मामला म जऊन ह पहिली बोलथे, ओह सही जान पड़थे, जब तक कि दूसर ह आके ओकर बात ला जांच नइं लेथे।
PRO 18:18 परची डारे ले झगरा के निपटारा होथे अऊ बलवाले बिरोधीमन ला अलग रखथे।
PRO 18:19 गलती करे भाई ला मनाई ह एक गढ़वाले सहर ला जीत लेवई ले कठिन ए; झगरा ह महल के छड़ लगे दुवार के सहीं अय।
PRO 18:20 मनखे के पेट ह ओकर मुहूं के बात ले भरथे; अपन मुहूं के बने बात के दुवारा ओकर मन ला संतोस मिलथे।
PRO 18:21 मनखे के गोठ म जिनगी अऊ मिरतू के ताकत होथे, अऊ जऊन मन येकर ले मया करथें, ओमन येकर फर खाहीं।
PRO 18:22 जऊन ह माईलोगन ले बिहाव करथे, ओह बने चीज पाथे अऊ यहोवा के अनुग्रह ओकर ऊपर होथे।
PRO 18:23 गरीब ह दया पाय बर बिनती करथे, पर धनी मनखे कठोरता से जबाब देथे।
PRO 18:24 जेकर संगीमन भरोसा के लईक नो हंय, ओह जल्दी नास हो जाथे, पर अइसे घलो संगी होथे, जऊन ह भाई ले घलो जादा नजदीक होथे।
PRO 19:1 जऊन गरीब के चालचलन ह सही रहिथे ओह ओ मुरूख ले बने अय, जऊन ह उल्टा-सीधा बात कहिथे।
PRO 19:2 बिगर गियान के ईछा करई ह बने नो हय— जऊन ह उतावली करथे, ओह रसता ले भटक जाथे।
PRO 19:3 मनखे ला ओकर मुरूखता ह बिनास कोति ले जाथे, तभो ले ओकर मन ह यहोवा ऊपर गुस्सा करथे।
PRO 19:4 धनी मनखे के बहुंत संगी बन जाथें, पर गरीब मनखे के खास संगी घलो ओला छोंड़ देथे।
PRO 19:5 लबरा गवाह ह दंड पाही, अऊ जऊन ह लबारी ऊपर लबारी मारथे, ओह बच नइं सकय।
PRO 19:6 नाना किसम के भोजन ले सासन करइया ह खुस होथे, अऊ जऊन ह उपहार देथे, ओकर हर मनखे ह संगी बन जाथे।
PRO 19:7 गरीब मनखे ला ओकर जम्मो रिस्तेदार नापसंद करथें, अऊ ओकर संगीमन घलो ओला छोंड़ देथें। हालाकि गरीब ह बिनती करत ओमन के पीछा करथे, पर ओमन कहीं नइं मिलंय।
PRO 19:8 जऊन ह बुद्धि पाथे, ओह जिनगी ले मया करथे; जऊन ह समझ के बात करथे, ओह जल्दी बढ़थे।
PRO 19:9 लबरा गवाह ह दंड पाही, अऊ जऊन ह लबारी ऊपर लबारी मारथे, ओह नास होही।
PRO 19:10 मुरूख मनखे ला सुबिधा के जिनगी जीना नइं फबे— वइसे ही एक गुलाम के हाकिममन ऊपर राज करई ह अऊ भी नइं फबे।
PRO 19:11 मनखे के बुद्धि ले धीरज आथे; अऊ दूसर के गलती ला धियान नइं देवई ओकर सोभा होथे।
PRO 19:12 राजा के गुस्सा ह सिंह के गरजन सहीं होथे, पर ओकर किरपा ह कांदी ऊपर ओस के सहीं होथे।
PRO 19:13 मुरूख लइका ह अपन ददा के बिनास के कारन होथे, अऊ झगरा करइया घरवाली ह लगातार छानी ले चूहत पानी सहीं अय।
PRO 19:14 घर अऊ संपत्ति दाई-ददा ले उत्तराधिकार म मिलथे, पर एक बुद्धिमान घरवाली यहोवा करा ले मिलथे।
PRO 19:15 आलसीपन ले भारी नींद आथे, अऊ साधनहीन मनखे ह भूखा रहिथे।
PRO 19:16 जऊन ह हुकूम ला मानथे, ओह अपन जिनगी ला बचाथे, पर जऊन ह अपन चालचलन के अपमान करथे, ओह मरही।
PRO 19:17 जऊन ह गरीब ऊपर दया करथे, ओह यहोवा ला उधार देथे, अऊ यहोवा ह ओला ओकर काम के ईनाम दीही।
PRO 19:18 अपन लइकामन के ताड़ना कर, काबरकि येमा आसा हवय; अपन मन म ओमन ला मार डारे के निरनय झन कर।
PRO 19:19 जऊन ह बहुंत गुस्सावाला ए, ओह जरूर दंड पावय; काबरकि यदि तेंह ओला बचाथस, त ओला फेर बचाना पड़ही।
PRO 19:20 सलाह ला मान अऊ ताड़ना ला गरहन कर, अऊ आखिरी म तोर गनती बुद्धिमानमन के संग होही।
PRO 19:21 मनखे ह अपन मन म बहुंत योजना बनाथे, पर येह सिरिप यहोवा के ही उदेस्य अय, जऊन ह पूरा होथे।
PRO 19:22 मनखे ह जेकर ईछा करथे, ओह अटूट मया ए; गरीब मनखे ह एक लबरा मनखे ले जादा बने अय।
PRO 19:23 यहोवा के भय मनई ह जिनगी के तरफ ले जाथे; तब ओकर भय माननेवाला सुखी रहिथे अऊ ओकर ऊपर समस्या नइं आवय।
PRO 19:24 आलसी मनखे ह अपन हांथ जेवन के थाली म तो डालथे; पर ओह हांथ के कऊंरा ला मुहूं तक नइं लानय।
PRO 19:25 ठट्ठा करइया ला कोर्रा म मार, अऊ सीधा मनखे ह समझदारी के बात सीखही; समझदार मनखे ला डांट, अऊ ओह गियान पाही।
PRO 19:26 जऊन ह अपन ददा ला लूटथे अऊ अपन दाई ला निकाल देथे, ओह ओ लइका अय, जऊन ह लज्जा अऊ कलंक लानथे।
PRO 19:27 हे मोर बेटा, यदि तें सिकछा के बात सुने बर बंद कर देबे, त तेंह गियान के बात ले भटक जाबे।
PRO 19:28 भ्रस्ट गवाह ह नियाय ला ठट्ठा म उड़ाथे, अऊ दुस्ट के मुहूं ह बुरई के समरथन करथे।
PRO 19:29 ठट्ठा करइयामन ला दंड मिलथे, अऊ मुरूखमन के पीठ म मार पड़थे।
PRO 20:1 अंगूर के मंद ह ठट्ठा करवाथे अऊ आने मंद ह झगरा करवाथे; जऊन ह येमन ला पीके बहकथे, ओह बुद्धिमान नो हय।
PRO 20:2 एक राजा के गुस्सा ह सेर के गरजन सहीं भय पईदा करथे; जऊन मन राजा ऊपर गुस्सा करथें, ओमन अपन परान गंवाथें।
PRO 20:3 जऊन ह झगरा करे ले बचथे, येह ओकर बर आदर के बात अय, पर जम्मो मुरूख मनखेमन तुरते झगरा करथें।
PRO 20:4 आलसी मनखेमन समय म खेत नइं जोतंय; एकरसेति कटनी के बेरा म ओमन खोजथें, पर ओमन ला कुछू नइं मिलय।
PRO 20:5 मनखे के मन के उदेस्य ह गहिरा पानी के सहीं अय, पर समझदार मनखे ओला बाहिर निकाल लेथे।
PRO 20:6 बहुंते जन सही मया करे के दावा करथें, पर एक बिसवासयोग्य मनखे कोन पा सकथे?
PRO 20:7 धरमी जन निरदोस जिनगी जीथें; ओमन के पाछू ओमन के लइकामन आसीसित होथें।
PRO 20:8 जब राजा ह नियाय करे बर अपन सिंघासन म बईठथे, त ओह अपन नजर ले पछरके जम्मो बुरई ला तुरते जान लेथे।
PRO 20:9 कोन ह कह सकथे, “मेंह अपन हिरदय ला सुध करे हंव; मेंह साफ अऊ बिगर पाप के हंव?”
PRO 20:10 गलत वजन अऊ गलत नाप— ये दूनों ले यहोवा घिन करथे।
PRO 20:11 छोटे लइकामन घलो अपन काम के दुवारा जाने जाथें, कि ओमन के चालचलन ह सुध अऊ ठीक हवय कि नइं?
PRO 20:12 सुने बर कान अऊ देखे बर आंखी— ये दूनों ला यहोवा ह बनाय हवय।
PRO 20:13 नींद ले मया झन कर, नइं तो गरीब हो जाबे; जागत रह, त तोर करा खाय बर बहुंत जेवन होही।
PRO 20:14 बिसात बेरा बिसइया ह कहिथे, “येह बने नो हय, येह बने नो हय!” पर जब ओह चले जाथे, तब ओह ओ सामान के बड़ई करे लगथे।
PRO 20:15 सोन अऊ बहुंत मंहगी रत्न तो हवंय पर गियान के बात कहइया मुहूं ह दुरलभ गहना होथे।
PRO 20:16 ओ मनखे के कपड़ा ला लेय ले, जऊन ह कोनो अजनबी के जिम्मेदारी लेथे; यदि ये काम कोनो बाहिरी मनखे बर करे जाथे, त ओ कपड़ा ला गिरवी के रूप म रख।
PRO 20:17 बेईमानी करके कमाय जेवन ह मनखे ला मीठ लगथे, पर आखिरी म, ओकर मुहूं ह गोटी ले भर जाथे।
PRO 20:18 सलाह लेय के दुवारा योजना ह सफल होथे; एकरसेति यदि तें लड़ई म जाथस, त सलाह लेय कर।
PRO 20:19 बकवास करे ले भरोसा ह टूटथे; एकरसेति ओकर ले बचके रह, जऊन ह बहुंत जादा गोठियाथे।
PRO 20:20 यदि कोनो अपन दाई या ददा ला सराप देथे, त घोर अंधियार म ओकर दीया ह बुता जाही।
PRO 20:21 जऊन ह अपन उत्तराधिकार ला जल्दबाजी म ले लेथे ओह आखिरी म आसीस नइं पावय।
PRO 20:22 अइसे झन कह, “मेंह तोर ये बुरई के बदला लूहूं!” यहोवा के बाट जोह, अऊ ओह तोर बर बदला लीही।
PRO 20:23 यहोवा ह गलत वजन ले घिन करथे, अऊ बेईमानी के नाप ले ओह खुस नइं होवय।
PRO 20:24 मनखे के पांव ला यहोवा ह रसता देखाथे। तब कोनो मनखे अपन रसता ला कइसे समझ सकथे?
PRO 20:25 जऊन ह बिगर सोचे-बिचारे कोनो चीज ला समरपित करथे अऊ पाछू अपन मन्नत के बारे म बिचार करथे, ओह फांदा म फंसथे।
PRO 20:26 बुद्धिमान राजा ह दुस्टमन ला पछरके निकालथे, अऊ ओमन ऊपर दंवरी के चक्का चलाथे।
PRO 20:27 मनखे के आतमा ह यहोवा के दीया ए जऊन ह मनखे के अंतस के बात ला देखाथे।
PRO 20:28 मया अऊ सच्चई राजा ला बनाय रखथे; मया के जरिये ओकर सिंघासन ह सुरकछित रहिथे।
PRO 20:29 जवानमन के गौरव ओमन के ताकत ए, पर सियानमन के सोभा ओमन के पाके चुंदी ए।
PRO 20:30 मुक्का अऊ चोट खाय ले बुरई ह दूर होथे, अऊ मार खाय ले अंतस ह सुध होथे।
PRO 21:1 यहोवा के हांथ म राजा के मन ह पानी के नरवा सहीं अय जऊन ला ओह ओ जम्मो मनखे कोति मोड़ देथे, जेमन ले ओह खुस होथे।
PRO 21:2 मनखे ह सोचथे कि ओकर खुद के चालचलन ह सही अय, पर यहोवा ह मनखे के मन ला जांचथे।
PRO 21:3 सही अऊ नियाय के काम करई ह यहोवा ला बलिदान ले जादा बने लगथे।
PRO 21:4 घमंड ले चढ़े आंखी अऊ घमंडीमन— अऊ दुस्ट मनखे के बिगर जोते खेत—ये तीनों ले पाप होथे।
PRO 21:5 मेहनती मनखे के योजना ले लाभ होथे पर जल्दबाजी करइया ह गरीब हो जाथे।
PRO 21:6 लबारी मारके कमाय गे धन ह तुरते उड़ जानेवाला भाप अऊ मिरतू के फांदा सहीं अय।
PRO 21:7 दुस्टमन के हिंसक काम ह ओमन ला नास कर दीही, काबरकि ओमन सही काम करे बर नइं चाहंय।
PRO 21:8 दोसी मनखे के काम ह टेढ़ा होथे, पर निरदोस मनखे के आचरन ह सीधा होथे।
PRO 21:9 झगड़ालू घरवाली के संग घर म रहई के बदले छानी के कोनटा म रहई ह बने अय।
PRO 21:10 दुस्ट मनखेमन बुरई करे के लालसा करथें; ओमन अपन परोसी ऊपर कोनो दया नइं करंय।
PRO 21:11 जब ठट्ठा करइया ला दंड मिलथे, त सधारन मनखे ह बुद्धि पाथे; बुद्धिमान मनखे के बात ला सुनके ओमन गियान पाथें।
PRO 21:12 धरमी जन ह दुस्ट मनखे के घर ऊपर नजर रखथे अऊ ओला बिनास म पहुंचा देथे।
PRO 21:13 जऊन ह गरीब के गोहार ला नइं सुनय, ओह खुद घलो गोहार पारही, पर ओकर कोनो जबाब नइं मिलही।
PRO 21:14 गुपत म दिये गे भेंट ले गुस्सा ह सांत होथे, अऊ छुपाके दिये गे घूस ह भयंकर गुस्सा ला घलो सांत करथे।
PRO 21:15 जब नियाय मिलथे, त येकर से धरमी ह आनंदित होथे पर दुस्टमन ऊपर आतंक छा जाथे।
PRO 21:16 जऊन ह समझदारी के रसता ले भटक जाथे, ओह मरे मनखेमन के संग ठिकाना पाथे।
PRO 21:17 जऊन ह मऊज-मस्ती ले मया करथे, ओह गरीब हो जाही; जऊन ह अंगूर के मंद अऊ जैतून तेल ले मया करथे, ओह कभू धनी नइं होवय।
PRO 21:18 दुस्ट मनखे ह धरमी जन बर छुड़ौती ठहिरथे, अऊ बिसवासघाती ह ईमानदार मनखे बर छुड़ौती होथे।
PRO 21:19 झगरा करइया अऊ चिढ़ देवइया घरवाली के संग रहे के बदले सुनसान जगह म रहई ह बने ए।
PRO 21:20 बुद्धिमान मनखे ह मनभावन जेवन अऊ जैतून तेल जमा करथे, पर मुरूख मनखे ह ओमन ला गटागट खा जाथे।
PRO 21:21 जऊन ह धरमीपन अऊ मया करे म लगे रहिथे, ओह जिनगी, धन अऊ आदर पाथे।
PRO 21:22 बुद्धिमान मनखे ह सूरबीरमन के सहर म चढ़ई करके ओमन के गढ़ ला गिरा सकथे, जेमा ओमन भरोसा करथें।
PRO 21:23 जऊन मन अपन मुहूं अऊ जीभ ला बस म रखथें, ओमन अपनआप ला बिपत्ति ले बचाथें।
PRO 21:24 घमंडी अऊ जिद्दी मनखे ला “ठट्ठा करइया” कहिथें— ओकर बरताव ह घमंड अऊ गुस्सा ले भरे रहिथे।
PRO 21:25 आलसी मनखे के ईछा ह ओला मार डालथे, काबरकि ओकर हांथमन काम करे बर नइं चाहंय।
PRO 21:26 दिन भर ओह ईछा करते रहिथे, पर धरमी मनखे ह अपन बर बिगर रखे दे देथे।
PRO 21:27 दुस्ट के बलिदान ह घिन के चीज होथे— त ओह अऊ कतेक घिन के लईक होही, जब ओह बुरई करे के ईछा से लाथे!
PRO 21:28 लबरा गवाह ह नास होही, पर धियान से सुनइया ह सही गवाही दीही।
PRO 21:29 दुस्ट मनखे के मुहूं ह कठोर होथे, पर सीधवा मनखे ह अपन चालचलन ऊपर बिचार करथे।
PRO 21:30 अइसे कोनो बुद्धि, समझ या योजना नइं ए, जऊन ह यहोवा के बिरोध म सफल होवय।
PRO 21:31 लड़ई के दिन बर घोड़ा ला तो तियार करे जाथे, पर जीत यहोवा के दुवारा ही मिलथे।
PRO 22:1 बहुंत संपत्ति होवई ले बने नांव होवई ह उत्तम ए; अऊ सोन-चांदी ले आदरमान पाना जादा बने ए।
PRO 22:2 धनी अऊ गरीब म समान्य बात ये अय: यहोवा ह दूनों ला बनाय हवय।
PRO 22:3 समझदार मनखे खतरा ला देखके सरन ले लेथे, पर सीधा-साधा मनखे ह चलते रहिथे अऊ हानि उठाथे।
PRO 22:4 नमरता ह यहोवा के भय ए; येकर मजदूरी धन, आदर अऊ जिनगी होथे।
PRO 22:5 दुस्टमन के रसता म फांदा अऊ संकट होथे, पर जऊन मन अपन परान के रकछा करथें, ओमन येमन ले दूरिहा रहिथें।
PRO 22:6 लइकामन ला ओ बात के सिकछा दव, जेमा ओमन ला चलना चाही, त बुढ़त काल म घलो ओ रसता ले नइं हटहीं।
PRO 22:7 धनी मनखे ह गरीब मनखे ऊपर राज करथे, अऊ उधार लेवइया ह उधार देवइया के गुलाम होथे।
PRO 22:8 जऊन ह अनियाय करथे, ओकर ऊपर बिपत्ति आथे, अऊ जऊन लउठी के उपयोग ओह कोरोध म करथे, ओह टोरे जाही।
PRO 22:9 उदार मनखे ह आसीस पाही, काबरकि ओह गरीबमन ला अपन जेवन म ले देथे।
PRO 22:10 ठट्ठा करइया ला निकाल दे, त झगरा ह खतम हो जाही; बाद-बिबाद अऊ बेजत्ती होवई घलो खतम हो जाही।
PRO 22:11 जऊन ह मन के सुधता ले मया रखथे अऊ जऊन ह अनुग्रह ले भरे बचन कहिथे ओकर संगी राजा होथे।
PRO 22:12 यहोवा ह गियानी ऊपर नजर रखके ओकर रकछा करथे, पर ओह बिसवासघाती के गोठ ला बिफल कर देथे।
PRO 22:13 आलसी मनखे ह कहिथे, “उहां बाहिर म एक सेर हवय! मेंह चऊक म मारे जाहूं!”
PRO 22:14 छिनारी माईलोगन के मुहूं ह एक गहिरा खंचवा सहीं अय; ओ मनखे जेकर ले यहोवा ह गुस्सा करथे, ओही ह ओमा गिरथे।
PRO 22:15 मुरूखता ह लइका के मन म गांठ सहीं बंधे रहिथे, पर अनुसासन के छड़ी ह येला दूरिहा कर देथे।
PRO 22:16 जऊन ह अपन धन-संपत्ति बढ़ाय बर गरीब ऊपर अतियाचार करथे अऊ जऊन ह धनी मनखे ला ईनाम देथे—ओ दूनों गरीब हो जाथें।
PRO 22:17 बुद्धिमान मनखे के बात ऊपर धियान दे अऊ ओमा कान लगा; जऊन बात मेंह सिखावत हंव ओला अपन मन म रख,
PRO 22:18 काबरकि जब तेंह येमन ला अपन मन म रखथस अऊ ये जम्मो तोर मुहूं ले निकलथें, त येकर ले खुसी होथे।
PRO 22:19 मेंह आज ये बातमन एकरसेति तोला सिखावत हंव, ताकि तोर भरोसा यहोवा ऊपर होवय।
PRO 22:20 का मेंह तोर बर तीस कहावतमन ला नइं लिखे हंव, सलाह अऊ गियान के कहावत,
PRO 22:21 ये सिखावत कि तें ईमानदार बन अऊ सच बात गोठिया, ताकि तेंह वापिस आके ओमन ला सही बात बता सकस, जेमन के तेंह सेवा करथस?
PRO 22:22 गरीब ऊपर ये कारन से अंधेर झन करव कि ओह गरीब अय अऊ जरूरतमंद ला कचहरी म झन घसीटव,
PRO 22:23 काबरकि यहोवा ह ओमन के मुकदमा लड़ही अऊ जिनगी के बलदा जिनगी लीही।
PRO 22:24 गुस्सैल मनखे ला संगी झन बनाबे, अऊ जल्दी गुस्सा होवइया के संग संगति झन करबे,
PRO 22:25 नइं तो तेंह ओमन के चालचलन ला सीख जाबे अऊ अपनआप ला फांदा म फंसा लेबे।
PRO 22:26 अइसने मनखे झन बनबे, जऊन मन गिरवी रखे बर हांथ मिलाथें या करजा पटाय बर जमानत लेथें;
PRO 22:27 यदि पटाय बर तोर करा कुछू नइं होही, त तोर खाल्हे ले तोर बिस्तर ला छीन लिये जाही।
PRO 22:28 जऊन सीमना ला तोर पुरखामन बांधे हवंय ओ पुराना सीमना के पथरा ला झन हटाबे।
PRO 22:29 का तेंह अइसने मनखे ला देखथस, जऊन ह अपन काम म कुसल हवय? ओह राजा के आघू म सेवा करही; ओह छोटे पदवाले के आघू म सेवा नइं करय।
PRO 23:1 जब तेंह कोनो हाकिम के संग खाय बर बईठबे, त ये बात के धियान रखबे कि तोर आघू म का हवय,
PRO 23:2 यदि तेंह पेटू अस, त थोरकन खाके उठ जाबे।
PRO 23:3 ओकर सुवादवाले जेवन के लालसा झन करबे, काबरकि ओह धोखा के जेवन अय।
PRO 23:4 धनी होय बर मेहनत झन करबे; अपन होसियारी के ऊपर भरोसा झन करबे।
PRO 23:5 एक नजर उठाके धन ला देख, ओह तुरते गायब हो जाथे, काबरकि ओमा पंख निकल आथे अऊ ओह गिधवा के सहीं अकास म उड़ जाथे।
PRO 23:6 कंजूस मनखे के जेवन झन करबे, ओकर सुवादवाले जेवन के लालसा झन करबे
PRO 23:7 काबरकि ओह अइसने मनखे अय जऊन ह हमेसा खरचा के बारे म सोचत रहिथे। ओह तोला तो कहिथे, “खा अऊ पी,” पर ओकर मन तोर म लगे नइं रहय।
PRO 23:8 जऊन थोरकन तेंह खाय हवस, ओला उछर देबे अऊ तोर कहे परसंसा के बात ह बेकार होही।
PRO 23:9 मुरूखमन के आघू म झन गोठिया, नइं तो ओमन तोर बुद्धि के बात ला तुछ समझहीं।
PRO 23:10 पुराना सीमना के पथरा ला झन हटाबे या अनाथ मनखे के खेत ला झन चपलबे,
PRO 23:11 काबरकि ओमन के बचाव करइया ह सामर्थी ए; ओह तोर बिरूध म ओकर मुकदमा लड़ही।
PRO 23:12 अपन मन ला हुकूम माने बर अऊ अपन कान ला गियान के बात सुने म लगा।
PRO 23:13 लइका के ताड़ना करे बर झन छोंड़; यदि तेंह ओला छड़ी ले मारबे, त ओह नइं मरय।
PRO 23:14 ओला छड़ी ले मार अऊ तेंह ओकर आतमा ला अधोलोक जाय ले बचाबे।
PRO 23:15 हे मोर बेटा, यदि तेंह बुद्धिमान अस, त मोर मन ला सही म खुसी होही;
PRO 23:16 जब तेंह सही बात गोठियाबे, त मोर अंतर-आतमा ह आनंदित होही।
PRO 23:17 पापी मनखेमन के बारे म जलन झन रखबे, पर हमेसा यहोवा के भय मानत रहिबे।
PRO 23:18 खचित तोर बर भविस्य के एक आसा हवय, अऊ तोर आसा ह नइं टूटही।
PRO 23:19 हे मोर बेटा, सुन, अऊ बुद्धिमान बन, अऊ अपन मन ला सही रसता म लगा:
PRO 23:20 जऊन मन बहुंत जादा मंद पीथें या जऊन मन ठूंस-ठूंसके मांस खाथें, ओमन के संग झन जा,
PRO 23:21 काबरकि मतवार अऊ भुक्खड़मन गरीब हो जाथें, अऊ नसा म रहे या उंघत रहे के कारन ओमन फटहा-चीरहा कपड़ा म आ जाथें।
PRO 23:22 अपन जनम देवइया ददा के बात ला सुने कर, अऊ जब तोर दाई ह डोकरी हो जाथे, त ओला तुछ झन समझबे।
PRO 23:23 सच्चई ला बिसा अऊ येला बेचबे झन— बुद्धि, सिकछा अऊ अंतर-गियान ला घलो बिसा ले।
PRO 23:24 धरमी लइका के ददा ह बहुंत आनंदित होथे; बुद्धिमान बेटा ला जनम देवइया ददा ह अपन बेटा के कारन आनंदित होथे।
PRO 23:25 तोर ददा अऊ दाई आनंदित होवंय; जऊन दाई ह तोला जनम दीस, ओह आनंदित होवय!
PRO 23:26 हे मोर बेटा, अपन हिरदय मोला दे अऊ तोर आंखी ह मोर बताय रसता म लगे रहय,
PRO 23:27 काबरकि छिनार माईलोगन ह एक गहिरा खंचवा सहीं अय, अऊ जिद्दी घरवाली ह एक संकरा कुआं सहीं अय।
PRO 23:28 ओह एक डाकू के सहीं घात लगाय रहिथे अऊ बहुंत मनखेमन ला बिसवासघाती कर देथे।
PRO 23:29 कोन ला हाय लगथे? कोन ह दुख म होथे? कोन ह झगरा म फंसे होथे? कोन ह सिकायत करथे? कोन ला बिगर कारन के घाव होथे? काकर लाल-लाल आंखी होथे?
PRO 23:30 ओमन, जऊन मन बहुंत देर तक मंद पीयत रहिथें, जऊन मन मसाला मिले मंद के सुवाद लेथें।
PRO 23:31 जब मंद ह लाल होथे, जब येह कटोरा म चमकथे, जब येला ढारे जाथे, त येला टकटकी लगाके झन देखबे!
PRO 23:32 आखिरी म येह सांप के सहीं चाबथे अऊ येकर जहर ह करैत सांप के सहीं होथे।
PRO 23:33 तेंह अजीब चीजमन ला देखबे, अऊ तोर मन ह उल्टा-सीधा बातमन के कल्पना करही।
PRO 23:34 तेंह समुंदर म उठत लहरामन ऊपर सोवइया, या पानी जहाज के रस्सी के टीप म लेटनेवाला सहीं होबे।
PRO 23:35 तेंह कहिबे, “ओमन मोला मारथें-पीटथें, पर मोला चोट नइं लगय! ओमन मोला मारथें, पर मोला येकर पता नइं चलय! मेंह कब जागहूं कि में फेर मंद पी सकंव?”
PRO 24:1 दुस्ट मनखे के बारे म जलन झन रखबे, ओमन के संगति के ईछा झन करबे;
PRO 24:2 काबरकि ओमन हिंसा के बात सोचथें, अऊ ओमन समस्या खड़े करे के बात करथें।
PRO 24:3 बुद्धि के दुवारा घर ह बनथे, अऊ समझ के जरिये येह इस्थिर होथे;
PRO 24:4 गियान के जरिये येकर कमरामन दुरलभ अऊ सुघर खजाना ले भर जाथें।
PRO 24:5 बुद्धिमान ह अपन बड़े सक्ति के जरिये जय पाथे, अऊ जेकर करा गियान होथे, ओह अपन ताकत बढ़ाथे।
PRO 24:6 खचित, लड़ई बर तोला सही युक्ति के जरूरत हवय, अऊ बिजय बहुंत सलाहकारमन के जरिये मिलथे।
PRO 24:7 बुद्धि ह अतेक ऊपर म हवय कि मुरूख ह ओला पा नइं सकय; ओह सभा के दुवार म कुछू गोठिया नइं सकय।
PRO 24:8 जऊन ह दुस्टता के सडयंत्र रचथे, ओह सडयंत्र रचइया के रूप म जाने जाथे।
PRO 24:9 मुरूखता के योजना बनई ह पाप ए, अऊ मनखेमन ठट्ठा करइया ले घिन करथें।
PRO 24:10 यदि बिपत्ति के बेरा तेंह लड़खड़ाथस, त तोर सक्ति बहुंत कम हवय!
PRO 24:11 जऊन मन ला मार डाले बर ले जावथें, ओमन ला छुड़ा; जऊन मन मरे बर लड़खड़ावत जावथें, ओमन ला रोक ले।
PRO 24:12 यदि तेंह कहिथस, “पर हमन येकर बारे म कुछू नइं जानत रहेंन,” त का मन के जांचनेवाला ह येला नइं समझय? जऊन ह तोर जिनगी के रखवारी करथे, ओह का येला नइं जानय? का ओह हर एक मनखे ला ओकर काम के मुताबिक ओकर परतिफल नइं दीही?
PRO 24:13 हे मोर बेटा, मंधरस ला खा, काबरकि येह बने अय; मधु-छत्ता के मंधरस ह सुवाद म मीठ लगथे।
PRO 24:14 ये बात ला घलो जान ले कि बुद्धि ह तोर बर मंधरस के सहीं अय: यदि येह तोला मिलथे, त भविस्य म तोर बर एक आसा हवय, अऊ तोर आसा ह नइं टूटही।
PRO 24:15 धरमी मनखे के घर के लकठा म एक चोर के सहीं घात झन लगा, ओकर निवास ला झन लूट;
PRO 24:16 काबरकि धरमी जन चाहे सात बार ले गिरे, पर ओह फेर उठही, पर दुस्ट मनखेमन बिपत्ति आय ले लड़खड़ाथें।
PRO 24:17 जब तोर बईरी ह गिरथे, त खुस झन होबे; जब ओह लड़खड़ाथे, त अपन मन म आनंदित झन हो,
PRO 24:18 नइं तो यहोवा ह येला देखही अऊ खुस नइं होही अऊ ओह तोर बईरी ऊपर ले अपन कोप ला हटा लीही।
PRO 24:19 कुकरमीमन के कारन झन कुढ़ या दुस्ट मनखे ले जलन झन रख,
PRO 24:20 काबरकि कुकरमी के कोनो भविस्य नइं ए, अऊ दुस्ट मनखे के दीया ह बुता जाही।
PRO 24:21 हे मोर बेटा, यहोवा अऊ राजा के भय मान, अऊ बिदरोही करमचारीमन के संग झन जा,
PRO 24:22 काबरकि ओ दूनों ओमन के अचानक बिनास कर दीहीं, अऊ कोन जानथे कि ओमन अऊ का बिपत्ति ला सकथें?
PRO 24:23 बुद्धिमान मनखे के कहावत ये घलो अंय: नियाय म पखियपात करई ह बने नो हय:
PRO 24:24 जऊन ह दोसी मनखे ला कहिथे, “तेंह निरदोस अस,” ओला मनखेमन सराप देथें अऊ जाति-जाति के मनखेमन ओकर ले घिन करथें।
PRO 24:25 पर जऊन मन दोसी ला दोसी ठहिराथें, ओमन के भलई होही, अऊ ओमन ऊपर बहुंत आसीस होही।
PRO 24:26 एक ईमानदार जबाब ह ओंठ ला चूमा देय सहीं अय।
PRO 24:27 अपन बाहिर के काम ला ठीक कर ले अऊ अपन खेत ला तियार रख; ओकर बाद, अपन घर ला बना।
PRO 24:28 बिगर कारन के, अपन परोसी के बिरूध गवाही झन देबे, अऊ अपन बात के दुवारा ओला झन बहकाबे।
PRO 24:29 ये झन कहिबे, “जइसने ओमन मोर संग करे हवंय, वइसने मेंह ओमन के संग करहूं; जइसने ओमन करे हवंय, मेंह ओमन ले ओकर बदला लूहूं।”
PRO 24:30 मेंह एक आलसी के खेत ले अऊ एक अगियानी के अंगूर के बारी ले होवत गेंव;
PRO 24:31 त देखेंव कि उहां हर जगह कंटिला पऊधामन भर गे हवंय, भुइयां ह कांदी ले भर गे हवय, अऊ पथरा के बाड़ा ह टूट गे हवय।
PRO 24:32 ओमन ला धियान से देखके, मन म बिचार करेंव अऊ जऊन कुछू मेंह देखेंव, ओकर ले एक बात सीखेंव:
PRO 24:33 थोरकन अऊ नींद, थोरकन अऊ ऊंघासी, हांथ म हांथ धरके अऊ थोरकन देर बईठे रहई—
PRO 24:34 अऊ गरीबी ह चोर सहीं अऊ घटी ह हथियार धरे मनखे सहीं तोर ऊपर आ जाही।
PRO 25:1 येमन सुलेमान के अऊ नीतिबचन अंय, जऊन ला यहूदा के राजा हिजकियाह के मनखेमन संकेलके रखे हवंय:
PRO 25:2 परमेसर के महिमा कोनो बात ला छुपाके रखे म होथे; राजामन के महिमा कोनो बात के पता लगाय म होथे।
PRO 25:3 जइसने अकासमन ऊंच अऊ धरती ह गहिरा हवय, वइसने राजा के मन के थाह ला नइं पाय जा सकय।
PRO 25:4 चांदी ले मईल ला हटावव, अऊ सुनार ह ओकर ले बने चीज बना सकथे;
PRO 25:5 राजा के आघू ले दुस्ट करमचारीमन ला निकाल दव, अऊ ओकर सिंघासन ह धरमीपन के दुवारा बने रहिही।
PRO 25:6 राजा के आघू म अपन बड़ई झन करबे, अऊ ओकर बड़े मनखेमन के बीच म अपन जगह के दावा झन करबे;
PRO 25:7 येह जादा बने बात होही कि ओह तोला कहय, “इहां ऊपर आ,” येकर बदले कि ओह अपन बड़े मनखेमन के आघू म तोर अपमान करय। जऊन कुछू तेंह अपन आंखी ले देखे हस
PRO 25:8 ओला जल्दबाजी म अदालत झन ले जाबे, नइं तो आखिरी म, तेंह का करबे जब तोर परोसी ह तोर बेजत्ती करही?
PRO 25:9 यदि तेंह अपन परोसी ला अदालत म ले जाथस, त दूसर के भरोसा ला झन टोरबे,
PRO 25:10 नइं तो जऊन ह येला सुनही, ओह तोर निन्दा करही अऊ तेंह दोसी गने जाबे।
PRO 25:11 सही बात ला कहई ह चांदी के टुकनी म सोन के सेव फर सहीं अय।
PRO 25:12 जइसने कि सोन के कनफूली या सुध सोन के जेवर होथे वइसने ही बुद्धिमान नियायधीस के डांट ह सुनइया ला बने लगथे।
PRO 25:13 जइसने फसल लुवई के बेरा बरफ के ठंडा पानी होथे वइसने ही बिसवासयोग्य दूत ह अपन भेजइया बर होथे; ओह अपन मालिक के आतमा ला ताजा करथे।
PRO 25:14 जइसने बिगर बारिस के बादर अऊ हवा होथे वइसने ओह होथे, जऊन ह ओ ईनाम के बड़ई करथे, जेला ओह कभू नइं दीस।
PRO 25:15 धीरज के जरिये एक सासन करइया ला मनाय जा सकथे, अऊ नरम बचन ह कठोर मनखे ला घलो नरम कर सकथे।
PRO 25:16 यदि तोला मंधरस मिलथे, त जतेक जरूरत हे, ओतेक खाबे— जादा खाबे, त तोला उछरना पड़ही।
PRO 25:17 अपन परोसी के घर म कभू-कभू जाबे— ओकर इहां बहुंत जादा जाबे, त ओमन तोर ले घिन करहीं।
PRO 25:18 जऊन ह अपन परोसी के बिरूध म लबरा गवाही देथे, ओह गदा या तलवार या नुकीला तीर सहीं अय।
PRO 25:19 बिपत्ति के बेरा बिसवासघाती ऊपर भरोसा करई ह टूटहा दांत या खोरवा गोड़ सहीं अय।
PRO 25:20 जइसने जाड़ा के दिन म काकरो कपड़ा ला ले लेवई, या काकरो घाव म सिरका रितोई, वइसने ही कोनो दुखी मनखे के आघू म गीत गवई होथे।
PRO 25:21 यदि तोर बईरी ह भूखा हवय, त ओला खाय बर जेवन दे; यदि ओह पीयासन हवय, त ओला पीये बर पानी दे।
PRO 25:22 अइसने करे ले, ओह लज्जित होही अऊ यहोवा ह तोला ईनाम दीही।
PRO 25:23 जइसने कि उत्तरी हवा ह बिगर आसा के बारिस लानथे, वइसने ही चुगली करई ह मनखे के गुस्सा ला बढ़ाथे।
PRO 25:24 झगरा करइया घरवाली के संग घर म रहई के बदले छानी के कोनटा म रहई ह बने अय।
PRO 25:25 जइसने कि थके-हारे मनखे बर ठंडा पानी होथे, वइसने ही दूरिहा देस ले आय सुघर संदेस होथे।
PRO 25:26 जइसने कि चीखलावाले झरना या गंदा कुआं होथे, वइसने ही ओ धरमी होथे, जऊन ह दुस्ट मनखे के बात मानथे।
PRO 25:27 जादा मंधरस खवई ह बने नो हय, जादा गहिरा बात के खोज करई घलो आदर के बात नो हय।
PRO 25:28 जऊन मनखे म संयम के कमी होथे, ओह ओ सहर के सहीं होथे, जेकर सुरकछा के दीवारमन ला टोर दिये गे हवय।
PRO 26:1 जइसने कि गरमी के महिना म बरफ गिरई अऊ फसल लुवई के बेरा बारिस होवई ह बने नो हय वइसने ही मुरूख मनखे के आदर करई ह बने नो हय।
PRO 26:2 जइसने कि डेना फड़फड़ावत गौरइया या उड़त अबाबील चिरई नइं बईठ सकय, वइसने ही बेकार के दिये गे सराप ह नइं लगय।
PRO 26:3 घोड़ा बर चाबुक, गदहा बर लगाम, अऊ मुरूखमन के पीठ बर छड़ी अय!
PRO 26:4 कोनो मुरूख ला ओकर मुरूखता के मुताबिक जबाब झन देबे, नइं तो तें खुद घलो ओकर सहीं ठहिरबे।
PRO 26:5 मुरूख ला ओकर मुढ़ता के मुताबिक जबाब देबे, नइं तो ओह अपन खुद के नजर म बुद्धिमान ठहिरही।
PRO 26:6 कोनो मुरूख के हांथ ले खबर पठोई ह अपन गोड़ म टांगा मारई या जहर पीयई सहीं अय।
PRO 26:7 जइसने कि कोनो लंगड़ा के बेकार गोड़ ह होथे वइसने ही कोनो मुरूख के मुहूं ले कहावत निकलई होथे।
PRO 26:8 जइसने कि कोनो पट्टा म बंधई पथरा होथे वइसने ही कोनो मुरूख ला आदर देवई होथे।
PRO 26:9 जइसने कि कोनो मतवार के हांथ म कंटिली झाड़ी होथे वइसने ही कोनो मुरूख के मुहूं ले कहावत निकलई होथे।
PRO 26:10 जइसने कि कोनो धनुसधारी ह बिगर सोचे-समझे चोट पहुंचाथे वइसने ही ओह अय, जऊन ह कोनो मुरूख या डहार-रेंगइया ला काम म रखथे।
PRO 26:11 जइसने कि कुकुर ह अपन उछरे चीज ला खाय बर फेर लहुंटके आथे, वइसने ही मुरूखमन अपन मुरूखता ला दोहराथें।
PRO 26:12 का तेंह अइसे मनखे ला देखथस, जऊन ह अपन खुद के नजर म बुद्धिमान ए? त फेर ओकर ले जादा आसा मुरूख ऊपर रख।
PRO 26:13 आलसी मनखे ह कहिथे, “डहार म सेर हवय, एक भयंकर सेर गली म घुमत हवय!”
PRO 26:14 जइसने कि कपाट ह अपन कब्जा म घुमथे, वइसने ही आलसी मनखे ह अपन खटिया म करवट लेथे।
PRO 26:15 आलसी मनखे ह अपन हांथ जेवन के थाली म तो डालथे; पर आलस के मारे, ओह कऊंरा ला मुहूं तक नइं लानय।
PRO 26:16 आलसी मनखे ह अपनआप ला ओ सात मनखे ले घलो बुद्धिमान समझथे, जऊन मन समझदारी से जबाब देथें।
PRO 26:17 जइसने कि कोनो मनखे ह भटकत कुकुर ला कान ले धरथे वइसने ही ओह अय, जऊन ह आने के झगरा म झंपई होथे।
PRO 26:18 जइसने कि पागल मनखे ह मिरतू के बरत तीरमन ला छोंड़थे
PRO 26:19 वइसने ही ओह अय, जऊन ह अपन परोसी ला धोखा देथे अऊ कहिथे, “मेंह तो मजाक करत रहेंव!”
PRO 26:20 जइसने कि बिगर लकरी के आगी ह बुता जाथे; वइसने ही बक-बक नइं करे ले झगरा ह खतम हो जाथे।
PRO 26:21 जइसने कि कोइला ह आगी ला बनाय रखथे अऊ लकरी ले आगी बरथे वइसने ही झगड़ालू मनखे ह समस्या खड़े करथे।
PRO 26:22 बकवास करई ह सुवादवाले जेवन सहीं होथे; येमन मनखे के भीतर तक चले जाथें।
PRO 26:23 जइसने कि चांदी के परत चढ़ाय माटी के बरतन होथे वइसने ही बुरई ले भरे मनखे के मयारू बचन होथे।
PRO 26:24 बईरीमन अपन बात के दुवारा सीधवा बनथें, पर अपन मन म छल-कपट के बात छुपाके रखथें।
PRO 26:25 हालाकि ओमन खुसी देवइया बात कहिथें, पर ओमन ऊपर बिसवास झन करबे, काबरकि ओमन के मन ह सात ठन घिनौना चीज ले भरे रहिथे।
PRO 26:26 ओमन के बईरता ह छल-कपट के कारन छुप जाथे, पर ओमन के दुस्टता ह भरे सभा म परगट हो जाही।
PRO 26:27 जऊन ह आने बर खंचवा कोड़थे, ओह खुद ओमा गिरही; जऊन ह आने ऊपर पथरा ला ढलंगाथे, ओ पथरा ह वापिस ओकरेच ऊपर ढलंगही।
PRO 26:28 जऊन ह लबारी मारके आने मन ला चोट पहुंचाथे, ओह ओमन ले घिन करथे, अऊ चापलूसी करइया ह बिनास के काम करथे।
PRO 27:1 कल के दिन बर घमंड झन कर, काबरकि तें नइं जानस कि कल का होही।
PRO 27:2 आने मन तोर बड़ई करंय तो करंय, पर तें अपन बड़ई झन करबे; बाहिरी मनखेमन तोर बड़ई करंय, पर तें खुद झन करबे।
PRO 27:3 पथरा ह भारी अऊ बालू ह एक बोझ होथे, पर मुरूख के उकसई ह ये दूनों ले भारी होथे।
PRO 27:4 गुस्सा ह निरदयी ए अऊ उत्तेजना ह बियाकुल कर देथे, पर ईरसा के आघू म कोन ठहर सकथे?
PRO 27:5 खुला डांट ह छुपे मया ले बने अय।
PRO 27:6 कोनो संगी के चोट पहुंचई के भरोसा करे जा सकथे, पर कोनो बईरी के बहुंत चूमा ला घलो भरोसा नइं करे जा सकय।
PRO 27:7 जेकर पेट भरे होथे, ओला मधु-छत्ता के मंधरस घलो बने नइं लगय, पर भूखा मनखे ला करू चीज घलो मीठ लगथे।
PRO 27:8 अपन घर ला छोंड़के भागनेवाला ह ओ चिरई सहीं होथे, जऊन ह अपन खोंधरा छोंड़के भाग जाथे।
PRO 27:9 इतर अऊ खुसबूदार धूप ह मन ला आनंदित करथे, अऊ कोनो संगी के हिरदय ले निकले सलाह ह ओकर खुसी ला देखाथे।
PRO 27:10 अपन संगी या अपन परिवारिक संगी ला झन छोंड़बे, अऊ अपन बिपत्ति के बेरा अपन रिस्तेदार के घर झन जाबे— लकठा म रहइया परोसी ह दूरिहा म रहइया रिस्तेदार ले बने अय।
PRO 27:11 हे मोर बेटा, बुद्धिमान बन अऊ मोर मन ला आनंदित कर; तब मेंह ओला जबाब दे सकहूं, जऊन ह मोर अपमान करथे।
PRO 27:12 समझदार मनखे ह खतरा ला देखके सरन ले लेथे, पर सीधवा मनखे ह चलते रहिथे अऊ हानि उठाथे।
PRO 27:13 ओ मनखे के कपड़ा ला लेय ले, जऊन ह कोनो अजनबी मनखे के जिम्मेदारी लेथे; यदि ये काम कोनो बाहिरी मनखे बर करे जाथे, त ओ कपड़ा ला गिरवी के रूप म रख।
PRO 27:14 यदि कोनो मनखे ह बड़े बिहनियां अपन परोसी ला ऊंचहा अवाज म आसीस देथे, त येला एक सराप समझे जाही।
PRO 27:15 झगरा करइया घरवाली ह बारिस के दिन म छानी ले लगातार चूहत पानी सहीं अय;
PRO 27:16 ओला रोकई, हवा ला रोकई सहीं या हांथ म तेल ला पकड़ई सहीं अय।
PRO 27:17 जइसने कि लोहा ह लोहा ला तेज करथे, वइसने ही एक मनखे ह दूसर मनखे ला तेज बनाथे।
PRO 27:18 जऊन ह अंजीर रूख के रखवारी करथे, ओह ओकर फर खाही, अऊ जऊन ह अपन मालिक के रकछा करथे, ओकर आदर होही।
PRO 27:19 जइसने कि पानी ह चेहरा के परछाई ला देखाथे, वइसने ही मनखे के मन ह ओकर जिनगी ला परगट करथे।
PRO 27:20 मिरतू अऊ बिनास कभू संतोस नइं होवंय, अऊ न ही मनखे के आंखी ह संतोस होवय।
PRO 27:21 चांदी ला परखे बर कुठाली अऊ सोन ला परखे बर भट्ठी होथे, पर मनखे के परख ओकर परसंसा के दुवारा होथे।
PRO 27:22 चाहे तेंह मुरूख ला ओखली म पीस, या ओला लोढ़ा म अनाज सहीं पीस, तभो ले तेंह ओकर मुरूखता ला ओकर ले अलग नइं कर सकस।
PRO 27:23 अपन भेड़-बकरी के झुंड के दसा ला बने करके जान ले, अपन पसु के झुंड के बने करके धियान रख;
PRO 27:24 काबरकि धन ह हमेसा बर नइं रहय, अऊ राज-मुकुट ह पीढ़ी-पीढ़ी तक बने नइं रहय।
PRO 27:25 जब कांदी ला काटके हटाय जाथे, त नवां कांदी निकलथे अऊ पहाड़ ले कांदी ला संकेले जाथे,
PRO 27:26 भेड़ के पीलामन तोर बर कपड़ा दीहीं, अऊ बोकरामन खेत बिसाय बर कीमत दीहीं।
PRO 27:27 तोर करा अपन परिवार के मनखेमन ला पीयाय बर बकरी के बहुंत दूध होही अऊ येकर ले तोर सेविकामन के घलो पालन-पोसन होही।
PRO 28:1 दुस्ट मनखेमन तब भी भागथें जब ओमन के पीछा कोनो नइं करत रहय, पर धरमी मनखेमन सेर के सहीं साहसी होथें।
PRO 28:2 जब कोनो देस ह बिदरोह करथे, त ओकर ऊपर सासन करइया बहुंत होथें, पर समझदार अऊ गियानी सासन करइया ह कानून-ब्यवस्था बनाय रखथे।
PRO 28:3 जऊन सासन करइया ह गरीबमन ऊपर अतियाचार करथे, ओह ओ भारी बारिस सहीं अय, जऊन ह फसल ला नास कर देथे।
PRO 28:4 जऊन मन सिकछा ला नइं मानंय, ओमन दुस्ट मनखे के परसंसा करथें, पर जऊन मन सिकछा ला मानथें, ओमन दुस्ट मनखे के बिरोध करथें।
PRO 28:5 दुस्ट मनखेमन सही बात ला नइं समझंय, पर जऊन मन यहोवा ला खोजथें, ओमन येला पूरा समझथें।
PRO 28:6 उल्टा-सीधा काम करइया धनी मनखे ले निरदोस रहइया गरीब मनखे ह बने अय।
PRO 28:7 समझदार बेटा ह सिकछा ऊपर धियान देथे, पर पेटू के संगी ह अपन ददा ऊपर कलंक लगाथे।
PRO 28:8 जऊन ह गरीबमन ले लाभ लेके या बियाज लेके अपन धन ला बढ़ाथे ओह ओमन बर धन जमा करथे, जऊन मन गरीबमन ऊपर दया करथें।
PRO 28:9 यदि कोनो मनखे ह मोर सिकछा ला अनसुनी करथे, त ओकर पराथना घलो घिन समझे जाथे।
PRO 28:10 जऊन ह ईमानदार मनखे ला बुरई के रसता म ले जाथे, ओह खुद अपन फांदा म फंसही, पर निरदोस मनखे ला बने उत्तराधिकार मिलही।
PRO 28:11 धनी मनखेमन अपन खुद के आंखी म बुद्धिमान होथें; पर गरीब अऊ समझदार मनखे ह देखथे कि धनी मनखेमन कतेक बहक गे हवंय।
PRO 28:12 जब धरमी मनखेमन बिजयी होथें, त बहुंत खुसी होथे; पर जब दुस्ट मनखेमन सक्तिसाली होय लगथें, त मनखेमन छुप जाथें।
PRO 28:13 जऊन ह अपन पाप ला छुपाथे, ओह नइं बढ़य, पर जऊन ह अपन पाप ला मान लेथे अऊ ओमन ला छोंड़ देथे, ओकर ऊपर दया करे जाथे।
PRO 28:14 धइन ए ओ मनखे, जऊन ह हमेसा परमेसर के भय मानथे, पर जऊन ह अपन मन ला कठोर कर लेथे, ओह बिपत्ति म पड़थे।
PRO 28:15 जइसने कि गरजत सेर या हमला करइया भालू होथे वइसने ही असहाय मनखेमन ऊपर दुस्ट सासन करइया होथे।
PRO 28:16 अतियाचारी सासन करइया ह बलपूर्वक छीन लेथे, पर जऊन ह बुरई से कमाय लाभ ले घिन करथे, ओह लम्बा समय तक राज करे के आनंद लीही।
PRO 28:17 जऊन ह हतिया के दोस के पीरा म रहिथे ओह कबर म सरन पाही; कोनो ओला झन रोकय।
PRO 28:18 जेकर चालचलन ह निरदोस रहिथे, ओह बचाय जाथे, पर उल्टा-सीधा काम करइया ह खंचवा म गिरही।
PRO 28:19 जऊन मन अपन खेत ला कमाथें, ओमन करा बहुंत जेवन होही, पर जऊन मन सिरिप कल्पना करत रहिथें, ओमन बहुंत गरीब हो जाहीं।
PRO 28:20 बिसवासयोग्य मनखे ला बहुंत आसीस मिलही, पर जऊन ह धनी बने बर उतावली करथे, ओह दंड ले नइं बचय।
PRO 28:21 पखियपात करई ह बने नो हय— तभो ले रोटी के एक कुटा बर मनखे ह गलती करही।
PRO 28:22 कंजूस मनखे ह धनी बने बर उतावली करथे अऊ नइं जानय कि गरीबी ह ओकर बाट जोहत हे।
PRO 28:23 जऊन ह कोनो मनखे ला डांटथे, ओह आखिरी म चापलूसी करइया ले जादा मयारू होथे।
PRO 28:24 जऊन ह अपन दाई या ददा ला लूटथे अऊ कहिथे, “मेंह गलत नइं करत हंव,” ओह नास करइया के सहभागी होथे।
PRO 28:25 लालची मनखे ह झगरा ला बढ़ाथे, पर जऊन मन यहोवा ऊपर भरोसा रखथें, ओमन उन्नति करहीं।
PRO 28:26 जऊन मन अपन ऊपर भरोसा रखथें, ओमन मुरूख होथें, पर जऊन मन बुद्धि से चलथें, ओमन सुरकछित रहिथें।
PRO 28:27 जऊन मन गरीबमन ला देथें, ओमन ला कुछू चीज के कमी नइं होवय, पर जऊन मन गरीबमन ले नजर फेर लेथें, ओमन ला बहुंत सराप मिलथे।
PRO 28:28 जब दुस्ट मनखेमन सक्तिसाली हो जाथें, त मनखेमन छुपे लगथें; पर जब दुस्ट मनखेमन नास होथें, त धरमी मनखेमन उन्नति करथें।
PRO 29:1 जऊन ह बार-बार डांटे ले घलो हठी बने रहिथे ओह बिगर कोनो उपाय के अचानक नास हो जाही।
PRO 29:2 जब धरमीमन उन्नति करथें, त मनखेमन आनंदित होथें; जब दुस्टमन राज करथें, त मनखेमन कलहरथें।
PRO 29:3 जऊन मनखे ह बुद्धि ले मया करथे, ओह अपन ददा ला आनंदित करथे, पर बेस्यामन के संगति करइया ह अपन संपत्ति ला उड़ा देथे।
PRO 29:4 नियाय के दुवारा राजा ह देस ला इस्थिर करथे, पर जऊन मन घूसखोरी करते रहिथें, ओमन देस ला टोर देथें।
PRO 29:5 जऊन मन अपन परोसीमन के चापलूसी करथें ओमन अपन परोसी के गोड़ बर फांदा लगाथें।
PRO 29:6 दुस्ट मनखेमन अपन खुद के पाप म फंसथें, पर धरमी मनखेमन आनंद के जय-जयकार करके खुसी मनाथें।
PRO 29:7 धरमी मनखे ह गरीब मनखे के नियाय ऊपर धियान देथे, पर दुस्ट मनखे ह ये किसम के चिंता नइं करय।
PRO 29:8 ठट्ठा करइयामन सहर ला उत्तेजित करथें, पर बुद्धिमान मनखेमन गुस्सा ला दूर करथें।
PRO 29:9 यदि कोनो बुद्धिमान मनखे ह कोनो मुरूख मनखे के संग अदालत जाथे, त मुरूख मनखे ह गुस्सा करथे अऊ मजाक उड़ाथे, अऊ उहां सांति नइं रहय।
PRO 29:10 खून करइया मनखेमन ईमानदार मनखे ले घिन करथें अऊ ओमन सीधवा मनखे के परान के खोज म रहिथें।
PRO 29:11 मुरूख मनखेमन अपन गुस्सा ला पूरा परगट करथें, पर बुद्धिमान मनखेमन आखिरी म सांति लाथें।
PRO 29:12 यदि कोनो सासन करइया ह लबारी बात ऊपर कान लगाथे, त ओकर जम्मो करमचारीमन दुस्ट हो जाथें।
PRO 29:13 गरीब अऊ अतियाचारी मनखे म एक बात समान्य हवय: यहोवा ह दूनों के आंखी म रोसनी देथे।
PRO 29:14 यदि कोनो राजा ह गरीब के सही नियाय करथे, त ओकर सिंघासन ह सदा बने रहिही।
PRO 29:15 छड़ी अऊ डांट खाय ले बुद्धि मिलथे, पर जऊन लइका ला अनुसासित नइं करे जावय, ओह अपन दाई के बेजत्ती के कारन होथे।
PRO 29:16 जब दुस्टमन बढ़थें, त पाप ह घलो बढ़थे, पर धरमीमन ओमन के गिरे दसा ला देखहीं।
PRO 29:17 अपन लइकामन ला अनुसासित करव, अऊ ओमन तुमन ला सांति दीहीं; ओमन तुम्हर ईछा मुताबिक तुमन ला खुसी दीहीं।
PRO 29:18 जिहां अगम के बारे म दरसन के बात नइं होवय, उहां मनखेमन निरंकुस हो जाथें; पर धइन ए ओ, जऊन ह बुद्धि के बात ऊपर धियान देथे।
PRO 29:19 सेवकमन ला सिरिप बात के दुवारा सुधारे नइं जा सकय; हालाकि ओमन समझथें, पर ओमन जबाब नइं देवंय।
PRO 29:20 का तेंह अइसने मनखे ला देखथस, जऊन ह उतावली म गोठियाथे? ओकर ले जादा कोनो मुरूख ले आसा करे जा सकथे।
PRO 29:21 जऊन सेवक ला ओकर लइकापन ले बहुंत खवाय-पीयाय जाथे, ओह आखिरी म ढीठ हो जाथे।
PRO 29:22 गुस्सा करइया मनखे ह झगरा ला बढ़ाथे, अऊ तुरते गुस्सा होवइया मनखे ह बहुंत पाप करथे।
PRO 29:23 घमंड ह मनखे ला नीचा देखाथे, पर नम्र आतमावाला ह आदर पाथे।
PRO 29:24 चोरमन के सहभागीमन अपन खुद के बईरी होथें; ओमन किरिया खाके घलो गवाही नइं देवंय।
PRO 29:25 मनखे के भय ह एक फांदा साबित होथे, पर जऊन ह यहोवा ऊपर भरोसा रखथे, ओह सुरकछित रहिथे।
PRO 29:26 बहुंत जन सासन करइया ले भेंट करे बर चाहथें, पर मनखे ला नियाय यहोवा ले ही मिलथे।
PRO 29:27 धरमी मनखे ह बेईमान मनखे ले घिन करथे; अऊ दुस्ट मनखे ह ईमानदार मनखे ले घिन करथे।
PRO 30:1 याके के बेटा आगूर के कहावत—एक परभावसाली बचन। ये मनखे के बचन ईतीएल अऊ उकाल ला: हे परमेसर, मेंह थक गे हंव, पर मेंह जय पा सकत हंव।
PRO 30:2 खचित मेंह मनखे नइं, सिरिप एक पसु के सहीं अंव; मोर करा मनखे के समझ नइं ए।
PRO 30:3 मेंह बुद्धि के बात नइं सीखे हंव, अऊ न ही पबितर परमेसर के गियान ला मेंह पाय हंव।
PRO 30:4 कोन ह स्वरग ऊपर जाके खाल्हे उतरिस? कोन ह अपन हांथ म हवा ला संकेले हवय? कोन ह पानी ला कपड़ा म लपेटे हवय? कोन ह धरती के जम्मो छोरमन ला कायम करे हवय? ओकर का नांव ए, अऊ ओकर बेटा के का नांव ए? खचित तेंह जानत हस!
PRO 30:5 “परमेसर के हर एक बचन बिगर गलती के हवय; ओह ओमन बर एक ढाल सहीं अय, जऊन मन ओकर करा सरन लेथें।
PRO 30:6 ओकर बचन म कुछू झन जोड़व, नइं तो ओह तोला डांटही अऊ तोला लबरा ठहिराही।
PRO 30:7 “हे यहोवा, मेंह तोर ले दू ठन चीज मांगत हंव; मोर मरे के पहिली मोला मना झन कर:
PRO 30:8 लबरापन अऊ लबरा गोठ ला मोर ले दूरिहा रख; मोला न तो गरीब बना अऊ न ही धनी, पर मोला सिरिप हर दिन के जेवन दे।
PRO 30:9 अइसने झन होवय कि मोर करा जादा हो जावय अऊ मेंह तोर अनादर करंव अऊ कहंव, ‘यहोवा ह कोन ए?’ या मेंह गरीब हो जावंव अऊ चोरी करंव, अऊ ये किसम ले अपन परमेसर के नांव के अनादर करंव।
PRO 30:10 “कोनो सेवक के निन्दा ओकर मालिक के आघू म झन करबे, नइं तो ओह तोला सराप दीही, अऊ तोला येकर कीमत चुकाना पड़ही।
PRO 30:11 “अइसने मनखे हवंय, जऊन मन अपन ददा ला सराप देथें अऊ अपन दाई ला आसीस नइं देवंय;
PRO 30:12 अइसने मनखे हवंय, जऊन मन अपन ही नजर म सुध अंय पर ओमन के गंदगी साफ नइं होय हवय;
PRO 30:13 अइसने मनखे हवंय, जऊन मन के आंखी ह घमंड ले भरे हवय, जऊन मन आने मन ला तुछ नजर ले देखथें;
PRO 30:14 अइसने मनखे हवंय, जऊन मन के दांतमन तलवार सहीं अऊ जबड़ामन छुरी सहीं हवंय ताकि ओमन गरीबमन ला धरती ले अऊ जरूरतमंद मनखेमन ला मानव-जाति ले नास कर देवंय।
PRO 30:15 “जोंक के दू झन बेटी हवंय। ओमन चिचियाके कहिथें, ‘दे! दे!’ “तीन ठन चीज हवंय, जऊन मन कभू संतोस नइं होवंय, अऊ चार ठन चीज हवंय, जऊन मन कभू नइं कहंय, ‘बस कर!’:
PRO 30:16 कबर, ठड़गी के कोख, भुइयां, जऊन ह पानी ले कभू संतोस नइं होवय, अऊ आगी, जऊन ह कभू नइं कहय, ‘परयाप्त!’
PRO 30:17 “ओ आंखी जऊन ह अपन ददा के मजाक उड़ाथे, अऊ अपन डोकरी दाई के तिरस्कार करथे, ओ आंखी ला घाटी के कऊआमन फोरके निकाल दीहीं, अऊ गिधवामन ओला खा लीहीं।
PRO 30:18 “तीन चीज हवंय, जेमन मोला बहुंत अद्भूत लगथें, अऊ चार चीज हवंय, जेमन ला मेंह नइं समझंव:
PRO 30:19 अकास म गिधवा के रसता, पथरा म सांप के रसता, समुंदर म पानी जहाज के रसता, अऊ एक जवान माईलोगन के संग एक मनखे के रसता।
PRO 30:20 “एक छिनार माईलोगन के रसता ये अय: ओह खाथे अऊ अपन मुहूं ला पोंछथे अऊ कहिथे, ‘मेंह कुछू गलत नइं करे हंव।’
PRO 30:21 “तीन चीज के कारन धरती ह कांपथे, पर चार चीज हवंय, जेला सहन नइं करे जा सकय:
PRO 30:22 एक सेवक, जऊन ह राजा बन जाथे, एक भक्तिहीन मुरूख, जऊन ह बहुंत खाय बर पाथे,
PRO 30:23 एक तुछ माईलोगन, जऊन ह बिहाव करथे, अऊ एक सेविका, जऊन ह अपन मालकिन के जगह ले लेथे।
PRO 30:24 “धरती म चार चीज छोटे हवंय, तभो ले ओमन बहुंत जादा बुद्धिमान होथें:
PRO 30:25 चांटीमन कम ताकतवाले जीव होथें, तभो ले ओमन अपन जेवन गरमी के महिना म कुढ़ोथें;
PRO 30:26 बिज्जूमन कम सक्तिवाले जन्तु होथें, तभो ले ओमन पथरा के चट्टान म अपन घर बनाथें;
PRO 30:27 फांफामन के राजा नइं होवय, तभो ले ओमन सेना के सहीं कतार बनाके एक संग आघू बढ़थें;
PRO 30:28 एक छिपकली ला हांथ ले धरे जा सकथे, तभो ले येह राजा के महल म पाय जाथे।
PRO 30:29 “तीन चीज हवंय, जेमन के चाल ह परभावसाली होथे, पर चार चीज हवंय, जेमन के बरताव ह परभावसाली होथे:
PRO 30:30 एक सेर, जऊन ह पसुमन म बलवान होथे, ओह काकरो आघू ले डरके नइं हटय;
PRO 30:31 एक अकड़के चलइया मुरगा, एक बोकरा, अऊ एक राजा, जऊन ह बिदरोह ले सुरकछित रहिथे।
PRO 30:32 “यदि तेंह मुरूखता करके अपन बड़ई करथस, या यदि तेंह दुस्ट काम करे के योजना बनाय हस, त अपन मुहूं ऊपर हांथ रख!
PRO 30:33 काबरकि जइसने दूध ला मथे ले मक्खन बनथे, अऊ जइसने नाक ला मरोड़े ले खून निकलथे, वइसने ही गुस्सा के भड़के ले झगरा होथे।”
PRO 31:1 लेमूएल राजा के कहावत—एक परभावसाली बचन, जऊन ला ओकर दाई ह ओला सिखोईस।
PRO 31:2 सुन, हे मोर बेटा! सुन, हे मोर कोख के बेटा! सुन, हे मोर बेटा, तेंह मोर पराथना के जबाब अस!
PRO 31:3 अपन ताकत ला माईलोगन ऊपर झन लगा, अऊ न ही अपन बल के उपयोग ओमन बर करबे, जऊन मन राजामन ला नास करथें।
PRO 31:4 हे लेमूएल, येह राजामन बर नो हय, अंगूर के मंद पीयई राजामन बर ठीक नो हय, अऊ न ही सासन करइयामन बर मंद के लालसा करना बने अय,
PRO 31:5 नइं तो ओमन पीके कानून ला भुला जाहीं, अऊ जम्मो दुखी मनखेमन के हक ला मारहीं।
PRO 31:6 मंद ह ओमन बर होवय, जऊन मन नास होवथें, अऊ अंगूर के मंद ओमन बर अय, जेमन के मन ह उदास हवय!
PRO 31:7 ओमन पीयंय अऊ अपन गरीबी ला भुला जावंय अऊ अपन दुख ला सुरता झन करंय।
PRO 31:8 जऊन मन अपन बर नइं गोठिया सकंय, ओमन बर गोठिया, ओमन के अधिकार बर, जऊन मन गरीब-अनाथ अंय।
PRO 31:9 गोठिया अऊ सही नियाय कर; गरीब अऊ जरूरतमंद मनखेमन के अधिकार के बचाव कर।
PRO 31:10 उत्तम चालचलन के घरवाली कोन पा सकथे? ओकर कीमत मनि ले घलो बहुंत जादा होथे।
PRO 31:11 ओकर घरवाला ला ओकर ऊपर पूरा भरोसा रहिथे अऊ ओला कोनो बने चीज के घटी नइं होवय।
PRO 31:12 ओह अपन जिनगी भर अपन घरवाला बर भलई के काम करथे, बुरई के नइं।
PRO 31:13 ओह ऊन अऊ सन छांटथे अऊ खुस होके अपन हांथ ले काम करथे।
PRO 31:14 ओह बेपारी जहाज के सहीं अपन जेवन दूरिहा ले लानथे।
PRO 31:15 ओह रथिया के रहत उठ जाथे; ओह अपन परिवार के जेवन के परबंध करथे अऊ अपन सेविकामन ला घलो ओमन के हिस्सा देथे।
PRO 31:16 ओह कोनो खेत ला सोच-बिचार करके बिसाथे; ओह अपन कमई ले अंगूर के बारी लगाथे।
PRO 31:17 ओह मेहनत से अपन काम ला जमाथे; ओकर हांथमन ओकर काम बर मजबूत होथें।
PRO 31:18 ओह ये बात के धियान रखथे कि ओला ओकर काम-धंधा म लाभ मिलय, अऊ रथिया ओकर दीया ह झन बुतावय।
PRO 31:19 ओह अटेरन ला अपन हांथ म धरथे अऊ चरखा के धुरा ला अपन अंगरी म पकड़थे।
PRO 31:20 ओह गरीबमन के मदद करे बर अपन हांथ खोलथे अऊ जरूरतमंद मनखे बर अपन हांथ बढ़ाथे।
PRO 31:21 जब बरफ गिरथे, त ओला अपन परिवार के चिंता करे के जरूरत नइं रहय; काबरकि परिवार के जम्मो झन गरम कपड़ा पहिरे रहिथें।
PRO 31:22 ओह अपन बिस्तर बर चादर बनाथे; ओह सुघर सन के बने अऊ बैंगनी कपड़ा पहिरथे।
PRO 31:23 सहर के दुवार म ओकर घरवाला के आदर होथे, जिहां ओह देस के अगुवामन के बीच म बईठथे।
PRO 31:24 ओह सन के कपड़ा बनाके बेचथे, अऊ बेपारीमन ला बेचे बर दुपट्टा देथे।
PRO 31:25 ओह बल अऊ सम्मान के पहिरावा पहिरे रहिथे; ओह अवइया समय ऊपर हंस सकथे।
PRO 31:26 ओह बुद्धि के संग गोठियाथे, अऊ ओकर मुहूं ले सच्चई के सिकछा निकलथे।
PRO 31:27 ओह अपन घर के कामकाज ऊपर नजर रखथे अऊ बिगर मेहनत के रोटी नइं खावय।
PRO 31:28 ओकर लइकामन उठके ओला धइन कहिथें; ओकर घरवाला घलो ओला आसीसित कहिथे, अऊ ये कहिके ओकर परसंसा करथे:
PRO 31:29 “कतको माईलोगनमन उत्तम काम करथें, पर तेंह ओ जम्मो ले बढ़के करथस।”
PRO 31:30 आकरसन ह धोखा देवइया ए अऊ सुन्दरता ह गायब हो जाथे; पर जऊन माईलोगन ह यहोवा के भय मानथे, ओकर परसंसा होथे।
PRO 31:31 ओह जऊन काम करे हवय, ओ जम्मो बर ओकर आदर करव, अऊ ओकर काम के कारन सहर के दुवार म ओकर परसंसा होवय।
ECC 1:1 दाऊद के बेटा, यरूसलेम म राजा, गुरू के बचन:
ECC 1:2 “बेकार! बेकार!” गुरू ह कहिथे। “एकदम बेकार! हर चीज ह बेकार अय।”
ECC 1:3 धरती ऊपर मनखे के दुवारा करे गे ओकर जम्मो मेहनत के का मिलथे?
ECC 1:4 पीढ़ी-पीढ़ी ले मनखेमन आथें अऊ ओमन चले जाथें, पर धरती ह सदाकाल बर बने रहिथे।
ECC 1:5 सूरज निकलथे अऊ सूरज बुड़थे, अऊ बिगर देरी करे येह फेर अपन निकले के जगह म वापिस चले जाथे।
ECC 1:6 हवा ह दक्खिन कोति बहथे अऊ येह उत्तर कोति मुड़थे; गोल-गोल येह घुमथे, अऊ येह अपन घेरा म लहुंट आथे।
ECC 1:7 हालाकि जम्मो नदीमन बहके समुंदर म मिल जाथें, तभो ले समुंदर ह कभू पूरा नइं भरय। जऊन जगह ले नदीमन निकलके आथें, ओ जगह ला ओमन फेर लहुंट जाथें।
ECC 1:8 जम्मो चीजमन थका देनेवाला अंय, कोनो मनखे येकर बखान नइं कर सकय। आंखी ह देखके कभू संतोस नइं होवय, अऊ न ही कान ह सुनके संतोस होवय।
ECC 1:9 जऊन ह हो चुके हे ओहीच ह फेर होही, जेला करे जा चुके हवय, ओला फेर करे जाही; धरती म कुछू घलो नवां नइं ए।
ECC 1:10 का अइसन कुछू हवय, जेकर बारे म कोनो ये कह सकय, “देखव! येह कुछू नवां ए?” येह इहां पहिले ले रिहिस, बहुंत पहिले ले; येह इहां हमर समय के पहिले ले रिहिस।
ECC 1:11 पहिले के पीढ़ीमन ला कोनो सुरता नइं करय, अऊ त अऊ अवइया पीढ़ीमन ला घलो ओमन के दुवारा सुरता नइं करे जाही जऊन मन ओमन के पाछू आहीं।
ECC 1:12 में, गुरू ह यरूसलेम म इसरायल के राजा रहेंव।
ECC 1:13 धरती म जऊन जम्मो काम करे जाथे, मेंह बुद्धि के दुवारा ओ जम्मो काममन ला जांचंय अऊ परखे बर अपन मन लगांय। येह एक भारी बोझ के काम ए, जेला परमेसर ह मानव-जाति ऊपर डार दे हवय!
ECC 1:14 मेंह ओ काम ला देखे हवंव, जेमन ला ये धरती म करे जाथे; ये जम्मो के जम्मो बेकार अंय अऊ हवा के पाछू भगई सहीं अय।
ECC 1:15 जऊन ह टेड़गा हे, ओला सीधा नइं करे जा सकय; जऊन ह हवय ही नइं, ओकर गनती नइं करे जा सकय।
ECC 1:16 मेंह अपनआप ले कहेंव, “देख, मोर पहिली यरूसलेम म जतेक भी राजा होईन, ओ जम्मो झन ले मेंह जादा बुद्धिमान अंव; मेंह जादा बुद्धि अऊ गियान के अनुभव करे हवंव।”
ECC 1:17 तब मेंह अपनआप ला बुद्धि के समझ, अऊ पागलपन अऊ मुरूखता ला जाने बर लगांय, पर मेंह समझ गेंव कि येह घलो हवा के पाछू भागे सहीं अय।
ECC 1:18 काबरकि जादा बुद्धि के संग जादा दुख आथे; जादा गियान बढ़े ले, दुख घलो जादा बढ़थे।
ECC 2:1 मेंह अपनआप ला कहेंव, “अब आ, मेंह तोला सुख-सुबिधा के दुवारा परखहूं अऊ येकर दुवारा ये पता लगाहूं कि का ह बने अय।” पर ये भी बेकार साबित होईस।
ECC 2:2 मेंह कहेंव, “हंसई ह पागलपन ए। अऊ सुख-सुबिधा ले का मिलथे?”
ECC 2:3 मेंह अंगूर के मंद पीके अऊ मुरूखता ला अपनाके खुस रहे के कोसिस करेंव—मोर मन ह अभी घलो बुद्धि के अगुवई म रहय। मेंह देखे चाहत रहेंव कि धरती म मनखे बर ओकर जिनगी के थोरकन दिन म का ह बने अय।
ECC 2:4 मेंह बड़े-बड़े काम करेंव: मेंह अपन बर घरमन ला बनांय अऊ अंगूर के बारी लगांय।
ECC 2:5 मेंह बारी-बगीचा अऊ सार्वजनिक उदयान लगांय अऊ ओमन म जम्मो किसम के फलदार रूखमन ला लगांय
ECC 2:6 मेंह ओ रूखमन म पानी पलोय बर बड़े-बड़े तरिया बनांय।
ECC 2:7 मेंह पुरूस अऊ महिला गुलाममन ला बिसांय अऊ मोर करा आने गुलाममन घलो रिहिन, जऊन मन मोर घर म जनमे रिहिन। यरूसलेम म मोर ले पहिले रहइयामन ले मोर करा जादा गाय-बईला अऊ भेड़-बकरी के झुंड रिहिस।
ECC 2:8 मेंह अपन बर सोन, चांदी अऊ राजा अऊ राजमन ले धन इकट्ठा करेंव। मेंह गायक-गायिका अऊ संग म रखैल घलो रखेंव—जेकर ले मनखे ला खुसी मिलथे।
ECC 2:9 मोर ले पहिले यरूसलेम म जऊन मन रिहिन, ओ सबले मेंह बहुंत महान हो गेंव। ये जम्मो बात म, मोर बुद्धि ह मोर संग रिहिस।
ECC 2:10 मोर आंखीमन जऊन चीज के ईछा करिन, ओ चीज ला मेंह लानेंव; सुख-सुबिधा ले मेंह अपन मन ला दूरिहा नइं रखेंव। मोर जम्मो काम म मोर मन ह खुस होईस, अऊ येह मोर मेहनत के ईनाम रिहिस।
ECC 2:11 तभो ले जब मेंह अपन हांथ ले करे जम्मो काम अऊ मेहनत ले पाय चीजमन के जांच-पड़ताल करेंव, त हर चीज ह बेकार लगिस अऊ हवा के पाछू भागे सहीं लगिस, धरती म येकर कोनो फायदा नइं।
ECC 2:12 तब मेंह अपन सोच-बिचार ला बुद्धि, अऊ पागलपन अऊ मुरूखता के तरफ लगांय। राजा के उत्तराधिकारी ह ओकर ले जादा का कर सकथे जो पहिले ले करे जा चुके हवय?
ECC 2:13 मेंह देखेंव कि बुद्धि ह मुरूखता ले बने अय, जइसे कि अंजोर ह अंधियार ले बने होथे।
ECC 2:14 बुद्धिमान के आंखी ह ओकर मुड़ म होथे, जबकि मुरूख ह अंधियार म चलथे; पर मेंह ये बात ला समझ गेंव कि आखिरी म दूनों के हालत एक समान होथे।
ECC 2:15 तब मेंह अपनआप ले कहेंव, “आखिर म मुरूख के हालत सहीं मोर हालत घलो होही। तब बुद्धिमान बनके मोला का फायदा होथे?” मेंह अपनआप ले कहेंव, “येह घलो बेकार ए।”
ECC 2:16 काबरकि मुरूख के सहीं बुद्धिमान ला जादा समय तक सुरता नइं करे जाही; समय ह पहिले ही आ चुके हवय जब दूनों भुला देय गे हवंय। मुरूख के सहीं, बुद्धिमान घलो जरूर मरथे!
ECC 2:17 एकरसेति मोला जिनगी ले घिन हो गीस, काबरकि धरती म जऊन काम करे गीस, ओह मोर बर दुखदाई रिहिस। ये जम्मो ह बेकार ए, हवा के पाछू भागे सहीं अय।
ECC 2:18 मोला ओ जम्मो चीज ले नफरत हो गीस, जेकर बर मेंह धरती म मेहनत करे रहेंव, काबरकि मोला येमन ला ओकर बर छोंड़ना पड़ही, जऊन ह मोर बाद आही।
ECC 2:19 अऊ कोन जानथे कि ओ मनखे ह बुद्धिमान होही कि मुरूख? तभो ले मोर मेहनत के ओ जम्मो कमई ह ओकर अधिकार म हो जाही, जेकर बर मेंह धरती म पूरा मेहनत अऊ कुसलता देखाय रहेंव। येह घलो बेकार ए।
ECC 2:20 एकरसेति धरती म करे गय मोर जम्मो कठोर मेहनत ऊपर मोर मन ह निरास होय लगिस।
ECC 2:21 काबरकि एक मनखे ह बुद्धि, गियान अऊ कुसलता के संग मेहनत करथे, अऊ तब ओह अपन ओ जम्मो चीज ला ओ मनखे बर छोंड़ देथे, जऊन ह येकर बर मेहनत नइं करे हवय। येह घलो बेकार ए अऊ बड़े दुख के बात ए।
ECC 2:22 मनखे ह धरती म जऊन कठोर मेहनत अऊ काम करथे, ओकर बदले ओला का मिलथे?
ECC 2:23 जिनगी भर ओकर काम ह दुख अऊ दरद ले भरे होथे; अऊ त अऊ रथिया घलो ओकर दिमाग ला अराम नइं मिलय। येह घलो बेकार ए।
ECC 2:24 एक मनखे बर येकर ले बने अऊ कुछू नो हय कि ओह खावय, पीयय अऊ अपन मेहनत म संतोस करय। मेंह देखथंव कि येह घलो परमेसर कोति ले मिलथे,
ECC 2:25 काबरकि ओकर बिगर, कोन ह खा सकथे या आनंद उठा सकथे?
ECC 2:26 जऊन मनखे ले परमेसर ह खुस होथे, ओला ओह बुद्धि, गियान अऊ खुसी देथे, पर पापी मनखे ला परमेसर ह धन इकट्ठा करे अऊ बटोरे के काम देथे कि ओह ओ धन ला ओ मनखे के हांथ म देय दे, जेकर ले परमेसर खुस रहिथे। येह घलो बेकार ए, हवा के पाछू भागे सहीं अय।
ECC 3:1 हर एक काम बर एक तय समय हवय, अऊ धरती म हर काम करे के एक समय होथे:
ECC 3:2 जनम लेय के एक समय अऊ मरे के एक समय, बीजा या पऊधा लगाय के एक समय अऊ लगाय ला उखाने के एक समय,
ECC 3:3 मार डारे के एक समय अऊ चंगा करे के एक समय, टोर-फोरके गिराय के एक समय अऊ बनाय के एक समय;
ECC 3:4 रोए के एक समय अऊ हंसे के एक समय, सोक मनाय के एक समय अऊ नाचे के एक समय,
ECC 3:5 पथरामन ला बगराय के एक समय अऊ ओमन ला संकेले के एक समय, कोनो ला पोटारे के एक समय अऊ नइं पोटारे के एक समय,
ECC 3:6 खोजे के एक समय अऊ छोंड़ देय के एक समय, बचाके रखे के एक समय अऊ फटिक देय के एक समय,
ECC 3:7 चीरे के एक समय अऊ सीले के एक समय, चुप रहे के एक समय अऊ गोठियाय के एक समय,
ECC 3:8 मया करे के एक समय अऊ नफरत करे के एक समय, लड़ई करे के एक समय अऊ सांति के एक समय।
ECC 3:9 काम करइया ला ओकर मेहनत करे ले का मिलथे?
ECC 3:10 मेंह ओ बोझा ला देखे हंव, जेला परमेसर ह मानव-जाति ऊपर रखे हवय।
ECC 3:11 ओह हर एक चीज ला ओकर समय म सुघर बनाय हवय। ओह मनखे के मन म अनंतकाल ला घलो बसाय हवय; तभो ले परमेसर ह सुरू ले लेके आखिरी तक जऊन काम करे हवय, ओला कोनो मनखे समझ नइं सकय।
ECC 3:12 मेंह जानत हंव कि मनखे बर येकर ले बने बात अऊ कुछू नइं हो सकय कि ओह जिनगी म खुस रहय अऊ भलई के काम करय।
ECC 3:13 ये घलो कि हर एक जन खावय-पीयय, अऊ अपन मेहनत के कमई म ओला संतोस मिलय—येह परमेसर के बरदान अय।
ECC 3:14 मेंह जानत हंव कि हर ओ काम जेला परमेसर करथे, हमेसा बर बने रहिही, येमा कुछू घलो जोड़े नइं जा सकय अऊ न ही येमा ले कुछू हटाय जा सकय। परमेसर ह अइसे करथे ताकि मनखेमन ओकर भय मानंय।
ECC 3:15 जऊन कुछू हवय, ओह पहिली ले हवय, अऊ जऊन कुछू होही, ओह पहिले हो चुके हवय; अऊ परमेसर ह बीते बातमन के लेखा लीही।
ECC 3:16 अऊ मेंह धरती म अऊ कुछू घलो देखेंव: फैसला करई के जगह म—दुस्टता रिहिस, अऊ नियाय के जगह म घलो—दुस्टता रिहिस।
ECC 3:17 मेंह अपनआप ले कहेंव, “परमेसर ह धरमी अऊ दुस्ट दूनों के नियाय करही, काबरकि हर एक काम के एक समय होही, हर काम के नियाय करे के एक समय होही।”
ECC 3:18 मेंह अपनआप ला ये घलो कहेंव, “जहां तक मनखेमन के बात ए, परमेसर ह ओमन ला परखथे ताकि ओमन देखंय कि ओमन पसुमन सहीं अंय।
ECC 3:19 खचित मानव-जाति के तकदीर ह पसुमन सहीं अय; ओहीच तकदीर ह दूनों के इंतजार करथे: जइसे एक झन ह मरथे, त वइसे ही दूसर झन घलो मरथे। जम्मो करा ओहीच सांस हवय; मनखे ला पसुमन के तुलना म कोनो फायदा नइं ए। हर चीज ह बेकार ए।
ECC 3:20 जम्मो के जम्मो ओहीच जगह म जाथें; जम्मो के जम्मो धुर्रा ले आथें, अऊ ओ जम्मो धुर्रा म लहुंट जाथें।
ECC 3:21 कोन जानथे कि मनखे के परान ह ऊपर जाथे अऊ पसु के परान ह धरती के खाल्हे म जाथे?”
ECC 3:22 मेंह देखेंव कि मनखे बर येकर ले बने बात कुछू नो हय कि ओह अपन काम म आनंद उठाय, काबरकि ओह ओकर भाग ए। काबरकि कोन ह ओला ये देखे बर ला सकथे कि ओकर मरे के बाद का होही?
ECC 4:1 मेंह फेर ये देखेंव कि धरती म जम्मो किसम के अतियाचार होवत हे: मेंह अतियाचार सहनेवालामन के आंसू ला देखेंव— अऊ ओमन ला सांति देवइया कोनो नइं एं; ओमन के अतियाचार करइयामन करा सक्ति रिहिस— अऊ अतियाचार सहनेवालामन करा सांति देवइया कोनो नइं एं।
ECC 4:2 अऊ मेंह घोसना करेंव कि ओ मरे मनखे, जऊन मन मर गे हवंय, ओमन अभी के जीयत मनखेमन ले जादा खुस हवंय।
ECC 4:3 पर ये दूनों ले बेहतर ओह अय, जेकर कभू जनम ही नइं होय हवय, अऊ जऊन ह ये धरती म होवत दुस्टता ला नइं देखे हवय।
ECC 4:4 अऊ मेंह देखेंव कि जम्मो मेहनत अऊ जम्मो सफलता ह एक मनखे के संग दूसर मनखे के बईरता ले निकलके आथे। येह घलो बेकार ए, हवा के पाछू भगई ए।
ECC 4:5 मुरूख ह अपन हांथ म हांथ धरे बईठे रहिथे, अऊ अपनआप ला नास करथे।
ECC 4:6 मेहनत के संग दू मुठा भर रहई अऊ हवा के पाछू भगई ले अपन करा सांति के संग एक मुठा भर रहई ह जादा बने अय।
ECC 4:7 मेंह फेर धरती म कुछू बेकार के चीज देखेंव:
ECC 4:8 एक मनखे ह अकेला रिहिस; ओकर न बेटा, न भाई रिहिन। ओकर मेहनत के कोनो अन्त नइं रिहिस, तभो ले ओकर आंखीमन ला ओकर धन ले संतोस नइं मिलत रिहिस। ओह पुछिस, “मेंह काकर बर मेहनत करत हंव, अऊ काबर मेंह अपनआप ला आनंद उठाय ले दूर रखत हंव?” येह घलो बेकार ए— येह बहुंत दुख भरे काम अय।
ECC 4:9 एक ले दू झन बेहतर होथें, काबरकि ओमन ला ओमन के मेहनत के बेहतर परतिफल मिलथे।
ECC 4:10 कहूं ओमन ले एक झन ह गिर जावय, त दूसर ह ओला उठे म मदद करथे। पर ओकर ऊपर तरस आथे, जऊन ह गिरथे अऊ ओला उठे म मदद करे बर कोनो नइं रहंय।
ECC 4:11 कहूं दू झन संग म सुतथें, त ओमन एक-दूसर ला गरम रखथें। पर एक झन अकेला अपनआप ला कइसे गरम रख सकथे?
ECC 4:12 अकेला मनखे ला हराय जा सकथे, पर दू झन अपन बचाव कर सकथें। तीन ठन डोरी ले बने रस्सी ह आसानी से नइं टूटय।
ECC 4:13 एक गरीब बुद्धिमान जवान ह ओ डोकरा मुरूख राजा ले बेहतर अय, जऊन ला चेतउनी के ऊपर धियान देय के समझ नइं रहय।
ECC 4:14 जवान ह जेल ले निकलके राजा के पद ला पाय हो, या ओह अपन राज म ही गरीबी म जनमे हो सकथे।
ECC 4:15 मेंह देखेंव कि ओ जम्मो झन, जऊन मन धरती म रहत रिहिन अऊ चलत-फिरत रिहिन, ओमन ओ जवान के पाछू चलिन, जऊन ह राजा के उत्तराधिकारी रिहिस।
ECC 4:16 उहां ओकर आघू म अनगिनत मनखे रिहिन। पर ओकर बाद के पीढ़ी के मनखेमन ओ उत्तराधिकारी ले खुस नइं होईन। येह घलो बेकार ए, हवा के पाछू भगई ए।
ECC 5:1 परमेसर के घर म जाय के बेरा अपन बरताव म सावधानी रखव। लकठा म जा अऊ सुन, येकर बदले कि ओ मुरूखमन सहीं बलिदान चघा, जऊन मन नइं जानंय कि ओमन का गलत करत हवंय।
ECC 5:2 अपन कोनो बात कहे म जल्दबाजी झन कर, न ही अपन मन म परमेसर के आघू म कोनो बात कहे म जल्दबाजी कर। परमेसर ह स्वरग म हवय अऊ तेंह धरती म हस, एकरसेति तोर बात ह थोरकन होवय।
ECC 5:3 बहुंत अकन काम म धियान देय के कारन सपना आथे, अऊ बहुंत अकन बात कहे के कारन मुरूख ह पहिचाने जाथे।
ECC 5:4 जब तेंह कोनो मन्नत मानथस, त ओला पूरा करे म देरी झन कर। काबरकि परमेसर ह मुरूख ले खुस नइं होवय, एकरसेति अपन मन्नत ला पूरा कर।
ECC 5:5 मन्नत मानके ओला पूरा नइं करई ले जादा बने ये अय कि तें मन्नत ही नइं मान।
ECC 5:6 अइसन बात झन कह, जऊन ह तोर पाप म पड़े के कारन होही। अऊ मंदिर के दूत ला ये झन कह, “मोर मन्नत मनई ह एक गलती रिहिस।” तोर कहे बात के कारन परमेसर ला काबर गुस्सा होना पड़य अऊ ओह तोर करे काम ला नास कर डारय?
ECC 5:7 जादा सपना देखई अऊ बहुंत बात कहई ह बेकार अय। एकरसेति परमेसर के भय मान।
ECC 5:8 कहूं तेंह ये देखथस कि कोनो छेत्र म गरीब ऊपर अतियाचार होवत हे, अऊ नियाय अऊ अधिकार नइं मिलत हे, त अइसन बात ऊपर हैरान झन होबे, काबरकि एक अधिकारी के ऊपर दूसर अधिकारी होथे अऊ ओ दूनों के ऊपर घलो अऊ बड़े अधिकारी होथें।
ECC 5:9 जब भुइयां म जादा फसल होथे, त ओकर ले सब ला फायदा होथे, राजा ला खुद खेत ले फायदा होथे।
ECC 5:10 जऊन ह रूपिया-पईसा ले मया करथे, ओकर करा कभू परयाप्त नइं रहय; जऊन ह धन ले मया करथे, ओला कभू अपन कमई ले संतोस नइं होवय। येह घलो बेकार ए।
ECC 5:11 जइसे चीज-वस्तुमन बढ़थें, वइसे ही ओ चीजमन के उपयोग करनेवालामन के संखिया घलो बढ़थे। अऊ मालिक ला ओमन ले का फायदा होथे सिरिप ये कि ओह ओमन ला देखके संतोस होथे?
ECC 5:12 मेहनत करइया ला बने नींद आथे, चाहे ओह जादा खावय या कम, पर जहां तक धनी के बात ए, ओकर धन के बहुंतायत ह ओला सोये बर नइं देय।
ECC 5:13 मेंह धरती म एक बहुंत खराप बात देखे हंव: मालिक ह अपन नुकसान बर धन इकट्ठा करिस,
ECC 5:14 या धन ह कुछू बिपत्ति म खतम हो गीस, अऊ जब ओकर लइकामन होईन त उत्तराधिकार म लइकामन बर कुछू नइं बांचिस।
ECC 5:15 हर एक ह अपन दाई के गरभ ले नंगरा आथे, अऊ जइसे हर एक जन आथे, वइसे ओह चले जाथे। ओह अपन हांथ म अपन मेहनत के कुछू नइं ले जावय।
ECC 5:16 येह घलो बहुंत खराप बात ए: जइसे एक मनखे ह आथे, वइसे ओह चले जाथे, त ओला का फायदा होथे, जबकि ओह बेकार म मेहनत करथे?
ECC 5:17 ओह अपन पूरा जिनगी बहुंत निरासा, दुख अऊ कोरोध के संग अंधियार म खाना खाथे।
ECC 5:18 जऊन बने बात मेंह देखे हंव, ओह ये अय: धरती म परमेसर के दिये जिनगी के थोरकन दिन म, मनखे बर येह उचित अय कि ओह खावय, पीयय अऊ अपन कठोर मेहनत म संतुस्ट रहय—काबरकि येह ओकर भाग ए।
ECC 5:19 येकर अलावा, जब परमेसर ह कोनो ला धन-संपत्ति अऊ अधिकार देथे, अऊ येमन के आनंद उठाय के योग्यता देथे, त ओह अपन भाग ला स्वीकार करय अऊ अपन मेहनत म खुस रहय—येह परमेसर के एक बरदान ए।
ECC 5:20 ओह कभू-कभू ही अपन जिनगी के दिन ऊपर बिचार करथे, काबरकि परमेसर ह ओला ओकर मन के खुसी म लगाय रखथे।
ECC 6:1 मेंह एक आने खराप बात धरती म देखे हंव, अऊ येह मानव-जाति ऊपर बहुंत परभाव डालथे:
ECC 6:2 परमेसर ह कुछू मनखे ला धन-संपत्ति, अधिकार अऊ आदर देथे, जेकर कारन ओकर करा ओकर मनचाहे चीजमन रहिथें, पर परमेसर ह ओमन ला ओ चीजमन के आनंद उठाय के योग्यता नइं देवय, अऊ अजनबीमन ओ चीजमन के आनंद उठाथें। येह बेकार ए, एक बहुंत खराप बात ए।
ECC 6:3 एक मनखे के एक सौ लइका हो सकथें अऊ ओह बहुंत साल तक जी सकथे; चाहे ओह कतको साल जी ले, कहूं ओह अपन धन-संपत्ति के आनंद नइं उठा सकय अऊ मरे के बाद ओला सही ढंग ले माटी नइं मिलय, त मेंह कहिथंव कि एक मरे हुए जनमे लइका ह ओ मनखे ले बेहतर ए,
ECC 6:4 ओह बेकार म आथे, ओह अंधियार म चले जाथे, अऊ अंधियार म ओकर नांव छिप जाथे।
ECC 6:5 हालाकि ओह सूरज ला कभू नइं देखिस या कुछू भी चीज ला नइं जानिस, तभो ले ओला ओ मनखे ले जादा अराम मिलिस—
ECC 6:6 अऊ त अऊ यदि ओ मनखे ह दू बार ले एक-एक हजार साल जीयय, पर अपन धन-संपत्ति के मजा नइं लेवय। का जम्मो झन एक ही जगह म नइं जावंय?
ECC 6:7 मनखे के जम्मो मेहनत ओकर जेवन बर होथे, पर ओकर मन ह कभू नइं भरय।
ECC 6:8 बुद्धिमान ह कोन बात म मुरूख ले बढ़के अय? गरीब ला ये जानके का मिलथे कि ओला दूसरमन के आघू म कइसे बरताव करना चाही?
ECC 6:9 जऊन चीज ला आंखी ह देखथे, ओह मन के एती-ओती भटकई ले बेहतर अय। येह घलो बेकार ए, हवा के पाछू भगई ए।
ECC 6:10 जऊन ह पहिले से हवय, ओकर नांव रखे जा चुके हवय, अऊ ये पता चल चुके हवय कि मनखे ह का सुभाव के अय; कोनो भी अपन ले जादा सक्तिसाली मनखे ले लड़ई नइं कर सकय।
ECC 6:11 जहां जादा बात होथे उहां मतलब कम निकलथे, अऊ ओकर ले कोनो ला का फायदा होथे?
ECC 6:12 काबरकि मनखे के जिनगी के ये थोरकन अऊ बेकार दिन, जऊन ह एक छइहां के सहीं निकल जाथे, कोन ह जानथे कि मनखे बर ये जिनगी म का ह बने ए? ओला कोन ह बता सकथे कि संसार ले ओकर जाय के बाद धरती म का होही?
ECC 7:1 एक बने नांव ह बढ़िया इतर ले कहीं जादा बने होथे, अऊ मिरतू के दिन ह जनम के दिन ले जादा बने होथे।
ECC 7:2 सोकित घर म जवई ह भोज के घर म जवई ले जादा बने अय, काबरकि हर एक मनखे के अन्त मिरतू अय; जीयत मनखेमन ला येकर ऊपर धियान देना चाही।
ECC 7:3 निरास होवई ह हंसई ले बने अय, काबरकि दुख के अनुभव ले मन के बिचार म सुधार होथे।
ECC 7:4 बुद्धिमान के हिरदय ह सोक मनइयामन के घर म होथे, पर मुरूख के हिरदय ह मऊज-मस्ती के घर म होथे।
ECC 7:5 एक बुद्धिमान मनखे के डांट-फटकार ऊपर धियान देवई ह मुरूखमन के गीत ला सुनई ले जादा बने अय।
ECC 7:6 जइसे बरतन के तरी म कांटामन के जरे सहीं अवाज होथे, वइसे मुरूखमन के हंसी होथे। येह घलो बेकार ए।
ECC 7:7 अनुचित मांग एक बुद्धिमान मनखे ला मुरूख बना देथे, अऊ घूसखोरी ह हिरदय ला भ्रस्ट कर देथे।
ECC 7:8 कोनो बात के अन्त ह ओकर सुरूआत ले जादा बने होथे, अऊ धीरज ह घमंड ले बने होथे।
ECC 7:9 अपन आतमा म जल्दी से गुस्सा झन होवव, काबरकि कोरोध ह मुरूखमन के कोरा म रहिथे।
ECC 7:10 ये झन कहव, “बीते जमाना ह आज के समय ले काबर जादा बने रिहिस?” काबरकि अइसे सवाल करई ह बुद्धिमानी नो हय।
ECC 7:11 बुद्धि ह एक उत्तराधिकार के सहीं बने बात ए अऊ येकर ले धरती के जम्मो मनखेमन ला फायदा होथे।
ECC 7:12 बुद्धि ह एक आसरय ए जइसे कि पईसा ह एक आसरय ए, पर गियान के फायदा ये अय: बुद्धि ह बुद्धिमान ला बचाथे।
ECC 7:13 परमेसर के काम ऊपर बिचार करव: जेला ओह टेढ़ा कर दे हवय ओला कोन ह सीधा कर सकथे?
ECC 7:14 जब समय ह बने हवय, त खुस रहव; पर जब समय ह खराप चलथे, त येकर ऊपर बिचार करव: परमेसर ह एक के संग दूसर ला घलो बनाय हवय। एकरसेति, कोनो मनखे अपन अगम के बारे म कोनो बात नइं जान सकय।
ECC 7:15 मोर ये बेकार के जिनगी म मेंह ये दूनों ला देखे हवंव: धरमी ह अपन धरमीपन म नास हो जाथे, अऊ दुस्ट ह अपन दुस्टता म बहुंत दिन जीथे।
ECC 7:16 हद ले जादा धरमी झन बनव, अऊ न ही हद ले जादा बुद्धिमान बनव— अइसन करके अपनआप ला काबर नास करई?
ECC 7:17 हद ले जादा दुस्ट झन बनव, अऊ न ही मुरूख बनव— अइसन करके ठहिराय गय समय ले पहिली काबर मरई?
ECC 7:18 एक ला पकड़ई अऊ दूसर ला जावन नइं देवई ह बने अय। जऊन ह परमेसर के भय मानथे, ओह ये जम्मो अति ले बचथे।
ECC 7:19 बुद्धि ह एक बुद्धिमान मनखे ला एक सहर के दस सासन करइयामन ले घलो जादा बलवान बनाथे।
ECC 7:20 वास्तव म, धरती म एको जन भी धरमी नइं एं, कोनो भी अइसन नइं, जऊन ह बने काम करथे अऊ कभू पाप नइं करय।
ECC 7:21 मनखेमन के कहे हर बात के ऊपर धियान झन देवव, या अइसन होही कि तेंह अपन सेवक ला तोला सराप देवत सुनबे—
ECC 7:22 काबरकि तेंह अपन मन म जानत हस कि तेंह खुद कतको बार आने मन ला सराप दे हस।
ECC 7:23 ये जम्मो ला मेंह बुद्धि के दुवारा जांचेंव अऊ कहेंव, “मेंह बुद्धिमान बने के ठान ले हंव”— पर येह मोर ले बाहिर के बात रिहिस।
ECC 7:24 जऊन कुछू हवय, ओह समझ ले परे अय अऊ सबले गहिरा बात ए— येकर थाह कोन पा सकथे?
ECC 7:25 एकरसेति मेंह अपन मन ला समझे बर, छानबीन करे बर, अऊ बुद्धि अऊ चीजमन के परबंध के खोज म अऊ दुस्ट के मुरूखता अऊ मुरूख के पागलपन ला समझे बर लगांय।
ECC 7:26 मेंह मिरतू ले घलो जादा करू चीज ला पाथंव माईलोगन, जऊन ह कि एक फांदा ए, जेकर हिरदय ह एक फांदा ए अऊ जेकर हांथमन बेड़ी अंय। ओ मनखे, जऊन ह परमेसर ला खुस रखथे, ओही ह ओ माईलोगन ले बचके निकलथे, पर पापी मनखे ला ओ माईलोगन ह फांस लेथे।
ECC 7:27 गुरू ह कहिथे, “देखव, मेंह ये पता लगाय हंव: “चीजमन के बारे म पता लगाय बर मेंह एक चीज म आने ला मिलायेंव—
ECC 7:28 जेकर मेंह अब तक खोज करत रहेंव ओह मोला नइं मिलिस— मोला एक हजार मनखे म एक ईमानदार मनखे मिलिस, पर ओ जम्मो म एको झन ईमानदार माईलोगन नइं मिलिस।
ECC 7:29 मोला सिरिप ये मिलिस: परमेसर ह मनखे-जाति ला ईमानदार बनाईस, पर ओमन बहुंते उपाय के खोज म लगे हवंय।”
ECC 8:1 बुद्धिमान के सहीं कोन हे? चीजमन के मतलब ला कोन ह जानथे? मनखे के बुद्धि ले ओकर चेहरा ह चमकथे अऊ येकर कठोर रूप ह बदल जाथे।
ECC 8:2 मेंह सलाह देवत हंव, “राजा के हुकूम ला मान, काबरकि तेंह परमेसर के आघू म सपथ खाय हस।
ECC 8:3 राजा ला छोंड़के जाय म जल्दबाजी झन करबे। गलत बात के तरफदारी झन करबे, काबरकि राजा ह ओही काम ला करही, जऊन ह ओला बने लगथे।”
ECC 8:4 राजा के बात ह सबले बड़के होथे, त ओला कोन ह कह सकथे, “तेंह का करत हस?”
ECC 8:5 जऊन ह ओकर हुकूम ला मानथे, ओकर नुकसान नइं होवय, अऊ बुद्धिमान हिरदय ह सही समय अऊ सही तरीका ला जानथे।
ECC 8:6 काबरकि हर एक बात बर एक सही समय अऊ तरीका होथे, हालाकि एक मनखे के ऊपर संकट आ सकथे।
ECC 8:7 जब कोनो मनखे अगम के बात ला नइं जानय, त कोन ह दूसर ला बता सकथे कि का होवइया हे?
ECC 8:8 हवा ला एक जगह म रखे के सक्ति काकरो करा नइं ए, वइसे ही अपन मिरतू ऊपर काकरो अधिकार नइं रहय। जइसे कि लड़ई के बेरा कोनो ला छुट्टी नइं मिलय, वइसे ही दुस्टता करइयामन ला दुस्टता ह नइं छोंड़य।
ECC 8:9 ये जम्मो ला मेंह देखेंव, जब धरती ऊपर करे जावत हर एक काम ऊपर मेंह अपन मन ला लगांय। अइसन घलो समय होथे, जब मनखे ह दूसर ऊपर अधिकार करके अपन ही हानि करथे।
ECC 8:10 तब मेंह दुस्टमन ला गाड़े जावत घलो देखेंव—जऊन मन पबितर स्थान ले आवत-जावत रिहिन अऊ सहर म महिमा पावत रिहिन जिहां ओमन दुस्टता करिन। येह घलो बेकार ए।
ECC 8:11 जब अपराध के सजा जल्दी नइं दिये जावय, तब मनखेमन के हिरदय ह बुरई करे के योजना ले भर जाथे।
ECC 8:12 हालाकि एक दुस्ट मनखे ह सौ अपराध करथे अऊ लम्बा समय तक जीयत रहिथे, पर मेंह जानत हंव कि ओमन ऊपर भलई होही, जऊन मन परमेसर के भय मानथें अऊ ओकर बर आदर के भाव रखथें।
ECC 8:13 तभो ले काबरकि दुस्टमन परमेसर के भय नइं मानंय, एकरसेति ओमन के संग बने नइं होवय, अऊ ओमन के जिनगी ह छइहां के सहीं नइं बढ़य।
ECC 8:14 एक अऊ बेकार बात हे, जऊन ह धरती ऊपर होथे: धरमी के संग अइसने बात होथे, जइसने कोनो दुस्ट के संग होना चाही, अऊ दुस्ट के संग अइसने बात होथे, जइसने कोनो धरमी के संग होना चाही। मेंह कहिथंव, येह घलो बेकार ए।
ECC 8:15 एकरसेति मेंह जिनगी के आनंद ला उठाय के सराहना करथंव, काबरकि धरती म एक मनखे बर येकर ले अऊ कोनो बात बने नो हय कि ओह खावय-पीयय अऊ खुस रहय। तब आनंद ह ओमन के ओ जम्मो जिनगी के मेहनत म ओमन के संग रहिही, जेला परमेसर ह ओमन ला धरती म देय हवय।
ECC 8:16 जब मेंह अपन मन बुद्धि ला जाने बर अऊ धरती ऊपर करे गय मेहनत ला समझे बर लगांय—मनखेमन ला दिन अऊ रात नींद नइं आवत रिहिस—
ECC 8:17 तब मेंह ओ जम्मो काम ला देखेंव, जेला परमेसर ह करे हवय। धरती म जऊन कुछू होवत हे, ओला कोनो समझ नइं सकंय। अपन जांच-पड़ताल करे के जम्मो कोसिस के बावजूद, कोनो येला समझ नइं सकंय। चाहे कहूं बुद्धिमान मनखे घलो दावा करे कि ओह जानथे, पर सही म ओह येला समझ नइं सकय।
ECC 9:1 मेंह ये जम्मो बात ऊपर बिचार करेंव अऊ ये निरनय म पहुंचंय कि धरमी अऊ बुद्धिमान अऊ जऊन कुछू ओमन करथें, ओ सब परमेसर के हांथ म होथे, पर ये बात ला कोनो नइं जानय कि अवइया समय म ओला मया या नफरत मिलही।
ECC 9:2 जम्मो के संग एक समान्य बात रहिथे—धरमी अऊ दुस्ट, बने अऊ खराप, सुध अऊ असुध, जऊन मन बलिदान चघाथें अऊ जऊन मन बलिदान नइं चघावंय, जम्मो के दसा एक सहीं होथे। जइसे बने मनखे के संग होथे, वइसे पापी मनखे संग घलो होथे; जइसे सपथ खवइयामन के संग होथे, वइसे ओमन के संग घलो होथे, जऊन मन सपथ खाय बर डरथें।
ECC 9:3 धरती म हर बात म एक बुरई हवय: जम्मो झन के एकेच दसा होथे। मनखेमन के हिरदय ह बुरई ले भरे हवय अऊ जब ओमन जीयत रहिथें, त ओमन के हिरदय म पागलपन रहिथे, अऊ ओकर बाद ओमन मर जाथें।
ECC 9:4 जऊन ह जीयतमन के बीच म हवय, ओकर करा आसा हवय—अऊ त अऊ एक जीयत कुकुर ह मरे सिंह ले जादा बने अय!
ECC 9:5 काबरकि जीयतमन जानथें कि ओमन मरहीं, पर मरे मन कुछू नइं जानंय; ओमन के अऊ कोनो ईनाम नइं रहय, अऊ त अऊ ओमन के नांव घलो सुरता म नइं रहय।
ECC 9:6 ओमन के मया, ओमन के घिन अऊ ओमन के डाह बहुंत पहिले खतम हो गीस; धरती म जऊन कुछू होथे ओमा ओमन के फेर कभू कुछू भाग नइं होही।
ECC 9:7 जावव अऊ खुसी से अपन खाना खावव, अऊ आनंद मन से अपन अंगूर के मंद पीयव, काबरकि परमेसर ह पहिले ही तुम्हर काम ला मंजूरी देय दे हवय।
ECC 9:8 हमेसा सफेद कपड़ा पहिरव, अऊ हमेसा अपन मुड़ म तेल लगावव।
ECC 9:9 धरती म परमेसर ह तुमन ला जऊन बेकार के जिनगी देय हवय, ओमा अपन घरवाली के संग आनंद मनावव, जेला कि तुमन मया करथव—तुम्हर जम्मो बेकार के दिन। काबरकि धरती म येह तुम्हर जिनगी अऊ तुम्हर मेहनत के बांटा ए।
ECC 9:10 तुमन ला जऊन कुछू भी काम मिलथे, ओला पूरा लगन से करव, काबरकि मिरतू-लोक म, जिहां तुमन जावत हव, उहां न तो कोनो काम, न कोनो योजना अऊ न ही गियान अऊ बुद्धि हवय।
ECC 9:11 मेंह धरती म अऊ कुछू घलो देखे हंव: दऊड़ म न तो तेज दऊड़इया अऊ न ही लड़ई म ताकतवाला ह जीतथे, न बुद्धिमान ला खाना मिलथे अऊ न ही अति बुद्धिमान ला संपत्ति अऊ न ही गियानी मनखे ऊपर किरपा करे जाथे; पर ये जम्मो बात समय अऊ मऊका ऊपर निरभर होथें।
ECC 9:12 तभो ले, कोनो नइं जानय कि ओकर समय कब आही: जइसे कि मछरीमन ला निरदयी जाल म, अऊ चिरईमन ला फांदा म फंसाय जाथे, वइसने ही मनखेमन खराप समय के दुवारा फंसथें जऊन ह कि ओमन ऊपर अचानक आ जाथे।
ECC 9:13 मेंह धरती म बुद्धि के ये उदाहरन घलो देखेंव, जऊन ह मोला बहुंत परभावित करिस:
ECC 9:14 एक ठन छोटे सहर रिहिस, जेमा सिरिप कुछू मनखे रहत रिहिन। अऊ एक सक्तिसाली राजा येकर बिरूध आईस, अऊ ओ सहर ला घेर लीस अऊ येकर बिरूध बहुंत बड़े सेना के घेरा डालिस।
ECC 9:15 पर ओ सहर म एक गरीब, पर बुद्धिमान मनखे रहत रिहिस, अऊ ओह अपन बुद्धि के दुवारा ओ सहर ला बचा लीस। पर ओ गरीब मनखे ला कोनो सुरता नइं करिन।
ECC 9:16 एकरसेति मेंह कहेंव, “बुद्धि ह ताकत ले जादा बने अय।” पर गरीब मनखे के बुद्धि ह तुछ समझे जाथे, अऊ ओकर बात ऊपर फेर धियान नइं दिये जावय।
ECC 9:17 मुरूखमन के राजा के चिचियाई ऊपर धियान देय के बदले बुद्धिमान के सांत बातमन ऊपर जादा धियान देना चाही।
ECC 9:18 बुद्धि ह लड़ई के हथियारमन ले जादा बने अय, पर एक पापी मनखे ह बहुंत अकन भलई के नास करथे।
ECC 10:1 जइसे मरे माछीमन खुसबू ला बदबू म बदल देथें, वइसे ही थोरकन मुरूखता ह बुद्धि अऊ आदर ऊपर भारी पड़थे।
ECC 10:2 बुद्धिमान के हिरदय ह ओला सही रसता म ले जाथे, पर मुरूख के हिरदय ह ओला गलत रसता म ले जाथे।
ECC 10:3 जब मुरूखमन रसता म चलत रहिथें, त ओमन म समझ के कमी होथे अऊ हर एक जन ला देखाथें कि ओमन कतेक मुरूख अंय।
ECC 10:4 यदि एक हाकिम के कोरोध ह तोर ऊपर भड़कथे, त अपन पद ला झन छोंड़बे; चुप रहई ह बड़े-बड़े अपराध ला सांत कर सकथे।
ECC 10:5 धरती म मेंह एक बुरई देखे हंव, एक किसम के गलती, जऊन ह हाकिम के दुवारा होथे:
ECC 10:6 मुरूखमन ला बहुंत ऊंच पद दिये जाथे, जबकि धनीमन छोटे पद म होथें।
ECC 10:7 मेंह गुलाममन ला घोड़ा के सवारी करत, पर राजकुमारमन ला गुलाममन सहीं रेंगत देखे हंव।
ECC 10:8 जऊन ह खंचवा कोड़थे, ओह ओमा गिर सकथे; जऊन ह दीवार म सेंध लगाथे, ओला सांप ह चाब सकथे।
ECC 10:9 जऊन ह खदान ले पथरा निकालथे, ओला पथरा से चोट लग सकथे; जऊन ह लकरी चीरथे, ओला लकरी ले खतरा हो सकथे।
ECC 10:10 यदि टांगा म धार नइं ए अऊ येकर किनारे ला तेज नइं करे गे हवय, त जादा ताकत के जरूरत पड़थे, पर कोनो काम म कुसलता ह सफलता देवाथे।
ECC 10:11 यदि सांप ह बस म करे के पहिले कोनो ला काट लेथे, त बस म करइया ला कोनो फायदा नइं होवय।
ECC 10:12 बुद्धिमान मनखे के बात म अनुग्रह होथे, पर मुरूखमन अपन खुद के बात के दुवारा नास हो जाथें।
ECC 10:13 सुरू म ओमन के बातमन मुरूखता के होथें; अन्त म ओमन दुस्ट पागलपन होथें—
ECC 10:14 अऊ मुरूखमन बहुंत बात करथें। कोनो नइं जानय कि का होवइया हे— कोन ह कोनो अऊ ला बता सकथे कि ओमन के बाद का होवइया हे?
ECC 10:15 मुरूखमन के मेहनत ह ओमन ला थका देथे; ओमन नगर के रसता ला घलो नइं जानंय।
ECC 10:16 ओ देस के ऊपर हाय, जेकर राजा ह एक सेवक रिहिस अऊ जेकर हाकिममन बिहनियां मऊज-मस्ती म लग जाथें।
ECC 10:17 धइन अय ओ देस, जेकर राजा ह उत्तम बंस के होथे अऊ जेकर हाकिममन सही समय म जेवन करथें— ओमन के जेवन ह ताकत बर होथे, मतवारपन बर नइं।
ECC 10:18 आलसीपन ले छत के कड़ीमन झुक जाथें; निठल्लापन के कारन घर के छत ले पानी चूहथे।
ECC 10:19 जेवनार ला हंसी-खुसी बर तियार करे जाथे, अंगूर के मंद ह जिनगी ला आनंदित कर देथे, अऊ पईसा के दुवारा हर चीज हो सकथे।
ECC 10:20 अपन मन के बिचार म घलो राजा ला गाली झन देबे, या न ही अपन सोये के कमरा म कोनो धनी मनखे ला सराप देबे, काबरकि अकास के कोनो चिरई ह तोर बातमन ला ले जा सकथे, अऊ कोनो उड़नेवाला चिरई ह तोर कहे बात ला बता सकथे।
ECC 11:1 अपन अनाज ला पानी जहाज ले समुंदर के ओ पार भेजव; बहुंत दिन के बाद तुमन ला येकर लाभ मिल सकथे।
ECC 11:2 अपन पूंजी सात ठन जोखिम के काम म लगावव, हव, बल्कि आठ ठन म लगावव; तुमन नइं जानव कि देस म का बिपत्ति आ सकथे।
ECC 11:3 अगर बादरमन पानी ले भरे हवंय, त ओमन ले धरती म बारिस होथे। एक रूख ह चाहे दक्खिन म गिरय या उत्तर म गिरय, जिहां येह गिरथे, उहां येह पड़े रहिही।
ECC 11:4 जऊन मनखे ह हवा ला देखत रहिथे, ओह बीजा नइं बोए; अऊ जऊन ह बादरमन ला देखत रहिथे, ओह फसल नइं लुए।
ECC 11:5 जइसे कि तुमन हवा के रसता ला नइं जानव, या ये नइं जानव कि दाई के गरभ म लइका के देहें ह कइसे बनथे, ओही किसम ले तुमन परमेसर के काम ला नइं समझ सकव, जऊन ह कि जम्मो चीज के बनानेवाला ए।
ECC 11:6 अपन बीजा ला बिहनियां ही बो देवव, अऊ सांझ के आलसी बनके बईठे झन रहव, काबरकि तुमन नइं जानव कि कते ह फर दीही, येह या ओह, या फेर दूनों बराबर बने फर दीहीं।
ECC 11:7 अंजोर ह मन ला भाथे, अऊ येह सूरज ला देखे म आंखी ला बने लगथे।
ECC 11:8 एक मनखे ह बहुंत साल तक जी सकथे, त ओह जम्मो चीज के आनंद उठाय। पर ओह अपन अंधियार भरे दिनमन ला सुरता रखय, काबरकि येमन बहुंते होहीं। अवइया हर एक चीज ह बेकार ए।
ECC 11:9 हे जवान, तेंह खुस रह, जब तेंह जवान हस, अऊ तोर हिरदय ह तोला तोर जवानी के दिन म आनंदित करय। अपन हिरदय के ईछा अऊ जऊन कुछू तुम्हर आंखी देखथे, ओकर पाछू चलव, पर ये बात ला जानव कि ये जम्मो चीज बर परमेसर ह तुम्हर नियाय करही।
ECC 11:10 एकरसेति अपन हिरदय ले दुख ला दूर करव अऊ अपन देहें के समस्या ला निकाल दव, काबरकि जवानी अऊ ताकत बेकार अंय।
ECC 12:1 अपन जवानी के दिन म अपन सिरिस्टीकर्ता ला सुरता रख, येकर पहिले कि दुख के दिन आवय अऊ ओ बछरमन आवंय, जब तेंह कहिबे, “येमन म मोला थोरकन भी खुसी नइं मिलय”—
ECC 12:2 येकर पहिले कि सूरज अऊ अंजोर अऊ चंदा अऊ तारामन अंधियार हो जावंय, अऊ बारिस के बाद बादरमन लहुंट जावंय;
ECC 12:3 जब घर के रखवारमन कांपे लगंय, अऊ बलवान मनखे के देहें ह झुक जावय, जब पीसनेवालामन रूक जावंय काबरकि ओमन थोरकन हवंय, अऊ खिड़की म ले देखइयामन के आंखी ह कमजोर हो जावय;
ECC 12:4 जब गली तरफ के कपाटमन बंद हो जावंय अऊ चक्की के अवाज ह धीमा हो जावय; जब मनखेमन चिरई के अवाज सुनके उठंय, पर ओ जम्मो के गीतमन के अवाज सुनई नइं देवय;
ECC 12:5 जब मनखेमन ऊंचहा जगह अऊ गली के खतरा ले डरंय; जब बादाम के रूख ह फूलय अऊ फांफा ह ओकर संग घसीटके चलय अऊ ईछा ह फेर नइं जागय। तब मनखेमन अपन सदाकाल के घर म चल देथें अऊ सोक मनइयामन गलीमन म फिरत रहिथें।
ECC 12:6 ओला सुरता करव—येकर पहिले कि चांदी के डोर ह कठोर हो जावय, अऊ सोन के कटोरा ह टूट जावय; येकर पहिले कि घघरी ह बसन्त के समय टूटके चकनाचूर हो जावय, अऊ कुआं म पहिया ह टूट जावय,
ECC 12:7 अऊ धुर्रा ह भुइयां म लहुंट जावय, जिहां ले येह आय रिहिस, अऊ आतमा ह परमेसर करा लहुंट जावय, जऊन ह येला देय रिहिस।
ECC 12:8 “बेकार अय! बेकार अय!” गुरू ह कहिथे। “हर चीज ह बेकार ए!”
ECC 12:9 गुरू ह सिरिप बुद्धिमान ही नइं रिहिस, पर ओह मनखेमन ला गियान घलो दीस। ओह बिचार करिस अऊ खोजबीन करिस अऊ बहुंते नीतिबचनमन ला सही ढंग ले रखिस।
ECC 12:10 गुरू ह सिरिप सही सबद पाय बर खोजबीन करिस, अऊ जऊन बात ओह लिखिस, ओ बातमन सही अऊ सच अंय।
ECC 12:11 बुद्धिमान के बातमन लउठी के धार सहीं होथें, ओमन के सांत मन के कहावतमन बने ढंग ले ठोंके गय खीलामन सहीं होथें—मानो येला एकेच चरवाहा के दुवारा दिये गे हवय
ECC 12:12 हे मोर बेटा, येकर अलावा अऊ आने बातमन के बारे म सावधान रहिबे। बहुंत अकन किताब के लिखे अऊ ओमन के रखे के अन्त नइं ए, अऊ जादा किताब पढ़ई ह देहें ला थका देथे।
ECC 12:13 अब जम्मो बात सुने जा चुके हवय; बात के अन्त ये अय: परमेसर के भय मानव अऊ ओकर हुकूममन ला मानव, काबरकि येह जम्मो मानव-जाति के फर्ज अय।
ECC 12:14 काबरकि परमेसर ह हर काम के नियाय करही, ओमा हर छिपे बातमन घलो होहीं, चाहे ओमन भलई के काम होवंय या बुरई के।
SOL 1:1 सुलेमान के उत्तम गीत।
SOL 1:2 ओह अपन मुहूं ले मोर चूमा लेवय— काबरकि तोर मया ह अंगूर के मंद ले जादा खुसी देथे।
SOL 1:3 तोर इतर के खुसबू ह बने लगथे; तोर नांव ह ढारे गय इतर के सहीं अय। एकरसेति जवान माईलोगनमन तोर ले मया करथें!
SOL 1:4 मोला अपन संग ले चल—आ हमन भाग जावन! राजा ह मोला अपन कमरा म ले जावय। सहेलीमन हमन तोर म आनंद अऊ खुसी मनाथन; हमन अंगूर के मंद ले जादा तोर मया के गुनगान करबो। दुलहिन ओमन तोर ले मया करके सही करथें!
SOL 1:5 हे यरूसलेम के बेटीमन, मेंह कारी तो हंव, फेर सुघर हंव, केदार के तम्बूमन सहीं कारी, सुलेमान के तम्बू के परदामन सहीं।
SOL 1:6 मोला एकटक झन देख, काबरकि मेंह कारी हंव। काबरकि मेंह सूरज ले झोला गे हंव। मोर भाईमन मोर ले गुस्सा करिन अऊ ओमन मोला अंगूर के बारीमन के रखवारीन बना दीन; मेंह अपन खुद के अंगूर के बारी के रखवारी नइं करेंव।
SOL 1:7 मोला बता, तें मोर मयारू, अपन भेड़-बकरीमन ला कहां चराथस? अऊ मंझनियां तेंह ओमन ला कहां सुरताय बर रखथस? तोर संगीमन के भेड़-बकरीमन के बाजू म, मेंह काबर घूंघट ढांके माईलोगन सहीं होवंव?
SOL 1:8 हे सबले सुघर माईलोगन, कहूं तेंह नइं जानत हस, त भेड़मन के खुर के चिनहां ला देखत चल अऊ चरवाहामन के तम्बूमन के तीर म अपन छेरी-पीलामन ला चरा।
SOL 1:9 हे मोर मयारू, मेंह तोर तुलना फिरौन के रथमन म फंदाय घोड़ामन के बीच एक घोड़ी ले करथंव।
SOL 1:10 तोर गाल ह कनफूली के संग, अऊ तोर घेंच ह जेवर ले पीरोय हार के संग सुघर लगथे।
SOL 1:11 हमन तोर बर चांदी के जड़े सोन के कनफूली बनवाबो।
SOL 1:12 राजा ह जब अपन मेज करा बईठे रिहिस, त मोर इतर ह अपन खुसबू फईलाईस।
SOL 1:13 मोर मयारू ह मोर बर लोहबान के छोटे खुसबू के थैली सहीं अय, जऊन ह मोर छाती के बीच म रहिथे।
SOL 1:14 मोर मयारू ह मोर बर मेंहदी के फूलमन के गुच्छा सहीं अय, जऊन ह एन-गदी के अंगूर के बारीमन म मिलथे।
SOL 1:15 हे मोर मयारू, तें कतेक सुघर हस! सिरतों म, कतेक सुघर हस! तोर आंखीमन पंड़की के सहीं हवंय।
SOL 1:16 हे मोर मयारू, तें कतेक सुघर हस! सिरतों म, कतेक मोह लेनेवाला हस! अऊ हमर दसना ह ताजा हवय।
SOL 1:17 हमर घरमन के कड़ीमन देवदार के, अऊ हमर छानी के लकड़ीमन घलो देवदार के अंय।
SOL 2:1 में सारोन के गुलाब, अऊ घाटीमन के कुमुदिनी फूल अंव।
SOL 2:2 मोर मयारू ह जवान माईलोगन के बीच म, कांटामन के बीच म कुमुदिनी फूल सहीं अय।
SOL 2:3 जइसने कि जंगल के रूखमन के बीच म एक सेव के रूख, वइसने ही मोर मयारू ह जवानमन के बीच म अय। मोला ओकर छइहां म बईठके खुसी मिलथे, अऊ ओकर फर के सुवाद ह मोला मीठ लगथे।
SOL 2:4 ओह मोला भोज के घर म ले जावय, अऊ ओकर मया के धजा ह मोर ऊपर होवय।
SOL 2:5 मोला किसमिस के दाना ले ताकत देवव, अऊ सेव के फर ले मोला तरो-ताजा करव, काबरकि मेंह मया म दुरबल हो गे हवंव।
SOL 2:6 ओकर डेरी हांथ ह मोर मुड़ के तरी म हवय, अऊ ओकर जेवनी हांथ ह मोला पोटारथे।
SOL 2:7 हे यरूसलेम के बेटीमन, मेंह तुमन ला सुघर छोटे हिरन अऊ भांठा के हिरनीमन के किरिया खवाके कहत हंव: जब तक मया ह खुदे नइं जाग उठय, तब तक तुमन ओला झन भड़कावव या जगावव।
SOL 2:8 सुन! हे मोर मयारू! देख! ओह आवत हे, ओह पहाड़मन ला पार करके, पहाड़ीमन ले उछलत-कूदत आवत हे।
SOL 2:9 मोर मयारू ह सुघर छोटे हिरन या जवान बारासींगा सहीं अय। देखव! ओह हमर दीवार के पाछू म ठाढ़े हवय, ओह खिड़की म ले देखत हे, ओह जालीमन म ले झांकत हे।
SOL 2:10 मोर मयारू ह मोर ले गोठियाईस अऊ कहिस, “हे मोर मयारू, उठ! हे मोर सुघर जन, मोर संग चल।
SOL 2:11 देख, जड़काला ह बीत गे; अऊ बारिस ह घलो खतम हो गीस अऊ चल दीस।
SOL 2:12 धरती म फूलमन फूलथें; गाना गाय के समय आ गे हवय, हमर भुइयां म पंड़कीमन के गुटरे के बोली सुनई देवत हे।
SOL 2:13 अंजीर के रूख म ओकर छोटे फर लगे के सुरू हो गे हवय; अंगूर के नारमन म फूले फूल के खुसबू बगरत हवय। हे मोर मयारू! उठ, आ; मोर सुघर जन, मोर संग चल।”
SOL 2:14 हे मोर पंड़की! चट्टानमन के दरार म, पहाड़मन के छुपे के जगह म, मोला अपन चेहरा देखा, मोला अपन बोली सुना; काबरकि तोर बोली ह गुरतूर हवय, अऊ तोर चेहरा ह सुघर हवय।
SOL 2:15 हमर बर कोलिहामन ला पकड़व, ओ नान-नान कोलिहामन ला जऊन मन अंगूर के बारीमन ला उजारथें, काबरकि हमर अंगूर के बारीमन म फूल आवत हवंय।
SOL 2:16 मोर मयारू ह मोर अय अऊ मेंह ओकर अंव; ओह भेड़-बकरी ला कुमुदिनी फूलमन के बीच म चराथे।
SOL 2:17 संझा के होवत ले अऊ जब तक छइहां ह लम्बा होके मिटा नइं जावय, लहुंट आ, हे मोर मयारू, अऊ सुघर छोटे हिरन सहीं हो जा या बेतेर के पहाड़ीमन के जवान बारासींगा सहीं हो जा।
SOL 3:1 में रोज रात भर ओला अपन बिस्तर म खोजेंव, जऊन ला मोर हिरदय ह मया करथे। मेंह ओला खोजेंव, फेर ओला नइं पायेंव।
SOL 3:2 अब मेंह उठहूं अऊ सहर म, येकर गली अऊ चऊकमन म ओला खोजहूं; मेंह ओला खोजहूं, जेला मेंह दिल से मया करथंव। एकरसेति मेंह ओला खोजेंव, पर ओह नइं मिलिस।
SOL 3:3 जऊन पहरा देवइयामन सहर के पहरा देवत किंदरत रहिथें, ओमन ला मेंह भेंटेंव, अऊ मेंह ओमन ला पुछेंव “का तुमन ओला देखे हव, जेला मेंह दिल से मया करथंव?”
SOL 3:4 मेंह ओमन ले थोरकून दूरिहा गे रहेंव कि मोला ओह मिलिस, जेला मेंह अपन दिल से मया करथंव। मेंह ओला पोटार लेंव अऊ ओला जावन नइं देंव जब तक कि मेंह ओला अपन दाई के घर म नइं ले गेंव, याने अपन दाई के घर म, जऊन ह मोला अपन गरभ म रखे रिहिस।
SOL 3:5 हे यरूसलेम के बेटीमन, मेंह तुमन ला सुघर छोटे हिरन अऊ भांठा के हिरनीमन के किरिया खवाके कहत हंव: जब तक मया ह खुदे नइं जाग उठय तब तक तुमन ओला झन भड़कावव या जगावव।
SOL 3:6 येह का ए, जऊन ह कुहरा के खंभा सहीं सुन्ना जगह ले आवत हे; येह गंधरस अऊ लोहबान के खुसबू ले भरे हवय अऊ बेपारीमन के जम्मो मसाला ले बने हवय?
SOL 3:7 देखव, येह तो सुलेमान के पालकी अय, साठ जन योद्धा ओला पहरा देवत चलत हें, अऊ येमन इसरायल के सूरबीर अंय,
SOL 3:8 ओ जम्मो के जम्मो तलवार धरे हवंय अऊ लड़ई म अनुभवी अंय, हर एक के बाजू म तलवार बंधाय हवय, अऊ ओमन रथिया के खतरा के सामना करे बर तियार हवंय।
SOL 3:9 राजा सुलेमान ह अपन बर पालकी बनवाय हवय; ओह लबानोन के लकड़ी ले येला बनवाय हवय।
SOL 3:10 ओह येकर खंभामन ला चांदी ले, अऊ ओकर आधार ला सोन ले बनवाय हवय। ओकर बईठे के जगह ला बैंगनी ओनहा ले बनवाय हवय, ओकर भीतर के जगह ला मया ले सजाय गे रहय। हे यरूसलेम के बेटीमन,
SOL 3:11 बाहिर निकलव, अऊ तुमन देखव, हे सियोन के बेटीमन। मुकुट पहिरे सुलेमान राजा ला देखव, ओ मुकुट, जेला ओकर दाई ह ओला ओकर बिहाव के दिन पहिराईस, ओ दिन, जब ओकर मन ह आनंदित रिहिस।
SOL 4:1 हे मोर मयारू, तेंह कतेक सुघर हस! सच म, कतेक सुघर हस! तोर घूंघट के भीतर तोर आंखी ह पंड़की के सहीं अय। तोर चुंदी ह गिलाद के पहाड़ीमन ले उतरत छेरीमन के बरदी सहीं अय।
SOL 4:2 तोर दांतमन अभीच ऊन कतरे भेड़मन के बरदी सहीं अंय, जऊन ह नहा-खोरके ऊपर आवत हवय। जेमा ले हर एक के जुड़वां हवय; ओमा के कोनो अकेला नइं ए।
SOL 4:3 तोर ओंठ ह सिन्दूरी रंग के फीता सहीं अय; तोर मुहूं ह मनमोहना अय। घूंघट के भीतर तोर कनपटी ह अनार के आधा कुटा के सहीं दिखथे।
SOL 4:4 तोर घेंच ह दाऊद के मीनार सहीं अय, जऊन ह पथरा ला रचके बनाय गे हवय; जेकर ऊपर हजार ढालमन टंगाय हवंय, अऊ ओ जम्मो ढालमन सूरबीरमन के अंय।
SOL 4:5 तोर दूनों स्तन हिरन के दू ठन पीलामन के सहीं अंय, हिरन के दू ठन जुड़वां पीला सहीं, जऊन मन कुमुदिनी फूलमन के बीच म चरथें।
SOL 4:6 जब तक दिन जुड़ा नइं जावय अऊ छइहां ह लम्बा होके मिटा नइं जावय, तब तक में लोहबान के पहाड़ अऊ धूप के पहाड़ी ऊपर जाहूं।
SOL 4:7 हे मोर मयारू, तेंह एकदम सुघर हस; तोर म कोनो कमी नइं ए।
SOL 4:8 हे मोर दुलहिन, लबानोन ले मोर संग आ, लबानोन ले मोर संग आ। अमाना के टीप ले, सनीर, याने कि हेरमोन के टीप ले खाल्हे उतर, सेरमन के मांद ले अऊ चीतवामन के पहाड़ी डेरामन ले चले आ।
SOL 4:9 हे मोर बहिनी, मोर दुलहिन, तेंह तो मोर मन ला मोही डारे; अपन आंखी के एक नजर ले, अपन माला के एक ही हीरा ले, मोर मन ला मोही डारे।
SOL 4:10 हे मोर बहिनी, मोर दुलहिन, तोर मया ह कतेक खुसी देवत हे! तोर मया ह अंगूर के मंद ले घलो बढ़के खुसी देवत हे, अऊ तोर इतर के खुसबू ह कोनो मसाला के खुसबू ले घलो जादा बने अय!
SOL 4:11 हे मोर दुलहिन, तोर ओंठ ले मधु-छत्ता के सहीं मिठास ह चूहथे, तोर जीभ के तरी म मंधरस अऊ दूध के मिठास हवय। तोर ओनहा के खुसबू ह लबानोन के खुसबू सहीं अय।
SOL 4:12 हे मोर बहिनी, मोर दुलहिन, तेंह एक ताला लगे बारी के सहीं अस; तेंह बंद करे गय एक झरना अऊ मुहर लगे सोता अस।
SOL 4:13 तोर पऊधामन अनार के एक बारी अंय, जेमा सबले बढ़िया फर, मेंहदी अऊ गुलमेंहदी,
SOL 4:14 गुलमेंहदी अऊ केसर, तेजपान अऊ दालचीनी, खुसबूवाला जम्मो किसम के रूख, लोहबान अऊ मुसब्बर अऊ जम्मो किसम के बढ़िया मसाला के रूख हवंय।
SOL 4:15 तेंह फव्वारा के बारी अस, तेंह बहत पानी के कुआं अऊ लबानोन ले बोहावत पानी के धार अस।
SOL 4:16 हे उत्तर कोति के पवन, जाग, अऊ हे दक्खिन कोति के पवन, आ! मोर बारी म बह ताकि येकर खुसबू ह हर जगह बगरय। मोर मयारू ह ओकर बारी म आवय अऊ येकर मनचाहे फरमन ला खावय।
SOL 5:1 हे मोर बहिनी, मोर दुलहिन, मेंह अपन बारी म आ गे हंव; मेंह अपन लोहबान ला अपन मसाला संग संकेल ले हंव। मेंह मंधरस सहित अपन मधु-छत्ता ला खा ले हंव; मेंह अपन अंगूर के मंद अऊ दूध पी ले हंव। सहेलीमन हे सहेलीमन खावव अऊ पीयव; अपन बड़े मया से पीयव।
SOL 5:2 में तो सुते रहेंव, पर मोर मन ह जागत रिहिस। सुन! मोर मयारू ह कपाट ला खटखटावत हे अऊ कहत हे, “हे मोर बहिनी, मोर मयारू, मोर पंड़की, मोर उत्तम जन! मोर बर कपाट ला खोल। मोर मुड़ ह ओस म, अऊ मोर चुंदी ह रथिया के नमी म भीग गे हवय।”
SOL 5:3 मेंह अपन ओनहा ला उतार चुके हंव— का ओला फेर पहिर लंव? मेंह अपन गोड़ ला धो डारे हंव— का ओला फेर मईला करंव?
SOL 5:4 मोर मयारू ह अपन हांथ ले कपाट के सिटकिनी ला धक्का देवथे; मोर हिरदय ह ओकर मया बर छलकत हे।
SOL 5:5 मेंह अपन मयारू बर कपाट ला खोले बर उठेंव, अऊ मोर हांथ ले लोहबान चूहत रिहिस, मोर अंगठीमन ले लोहबान ह बेड़ी के मुठ म बह गीस।
SOL 5:6 मेंह अपन मयारू बर कपाट ला खोलेंव, पर मोर मयारू ह वापिस चल देय रिहिस; ओह चले गीस। ओकर जाय ले मोर मन ह बियाकुल होईस। मेंह ओला खोजेंव, पर नइं पायेंव। मेंह ओला बलाएंव, पर ओह जबाब नइं दीस।
SOL 5:7 जब पहरेदारमन सहर म पहरा देवत रिहिन, त ओमन मोला भेंटिन। ओमन मोला मारिन अऊ मोला घायल कर दीन; ओ सहर के दीवारमन के पहरेदारमन, मोर ओढ़ना ला लूटके ले गीन।
SOL 5:8 हे यरूसलेम के बेटीमन, तुमन मोर ले वायदा करव— कहूं तुमन ला मोर मयारू ह मिल जावय, त तुमन ओला बताहू कि मोला मया के रोग हो गे हवय।
SOL 5:9 हे माईलोगन म परम सुन्दरी, तोर मयारू ह आने मन ले कोन बात म उत्तम हवय? तोर मयारू ह कोन बात म आने मन ले बने अय, कि तेंह हमन ला अइसने वायदा करवात हस?
SOL 5:10 मोर मयारू ह हंसमुख अऊ चमकीला ए, ओह दस हजार मनखे म उत्तम अय।
SOL 5:11 ओकर मुड़ ह सुध सोन के सहीं अय; ओकर चुंदी ह लहर सहीं अऊ कऊआ सहीं करिया हवय।
SOL 5:12 ओकर आंखीमन पंड़कीमन सहीं अंय जऊन मन बोहावत पानी के तीर म, दूध म धोवाके, माला म पीरोय जेवर सहीं कतार म हवंय।
SOL 5:13 ओकर गालमन खुसबू देवत मसाला के दसना सहीं अंय। ओकर ओंठ ह कुमुदिनी फूल सहीं अय जेमा ले लोहबान चूहत रहिथे।
SOL 5:14 ओकर बाहांमन पुखराज ले सजे सोन के छड़ सहीं अंय। ओकर देहें ह नीलमनि ले सजे चमकत हाथी-दांत सहीं अय।
SOL 5:15 ओकर गोड़मन सुध सोन के नीव म बईठाय संगमरमर के खंभामन सहीं अंय। ओकर रूप ह लबानोन के सहीं हवय, अऊ देवदार के सहीं मनोहर हवय।
SOL 5:16 ओकर मुहूं के अपन मिठास हवय; ओह हर किसम ले मयारू ए। हे यरूसलेम के बेटीमन, येह मोर मयारू ए अऊ येह मोर संगी अय।
SOL 6:1 हे माईलोगन म परम सुन्दरी, तोर मयारू ह कहां चल दीस? तोर मयारू ह कते अंग चल दीस, बता कि हमन घलो तोर संग ओला खोजन?
SOL 6:2 मोर मयारू ह खाल्हे अपन बारी कोति गे हवय जिहां मसाला के पऊधामन के क्यारी हवय, ओह बारी म भेड़-बकरी चराय बर अऊ कुमुदिनी फूल बटोरे बर गे हवय।
SOL 6:3 मेंह अपन मयारू के अंव अऊ मोर मयारू ह मोर अय; ओह भेड़-बकरी ला कुमुदिनी फूलमन के बीच म चराथे।
SOL 6:4 हे मोर मयारू, तें तिरसा के सहीं सुघर, यरूसलेम के सहीं मनभावन, अऊ धजा फहरावत सेना सहीं सानदार हस।
SOL 6:5 अपन नजर ला मोर कोति ले हटा ले; काबरकि ओमन मोला अभिभूत कर देथें। तोर चुंदी ह गिलाद पहाड़ ले उतरत छेरीमन के बरदी सहीं अय।
SOL 6:6 तोर दांतमन नहा-खोरके ऊपर आवत भेड़मन के बरदी सहीं अंय, जेमा ले हर एक के जुड़वां हवय, अऊ ओमा के कोनो नइं गंवाय हवय।
SOL 6:7 तोर घूंघट के भीतर तोर कनपटी ह अनार के आधा फर के सहीं अय।
SOL 6:8 उहां साठ झन रानी, अऊ अस्सी झन रखैल, अऊ अब्बड़ अकन कुंवारी नोनीमन हो सकथें;
SOL 6:9 पर मोर पंड़की, मोर सिद्ध जन ह तो अनोखा अय, ओह तो अपन दाई के एकलऊती बेटी अय, अऊ अपन जनम देवइया दाई के दुलारी अय। जवान माईलोगनमन ओला देखिन अऊ ओला धइन कहिन; रानीमन अऊ रखैलमन ओकर बड़ई करिन।
SOL 6:10 येह कोन ए, जेकर सोभा बिहान पाय के सोभा सहीं हवय, चंदा के सहीं साफ-सुघर, सूरज के सहीं चमकीला, अऊ धजा धरे सेनामन सहीं सोभायमान हवय?
SOL 6:11 मेंह अखरोट के बारी म गेंव कि घाटी म नवां बढ़त रूख-रई ला देखंव, अऊ देखंव कि अंगूर के नारमन म पीका आवत हे कि नइं या अनार के रूख म फूल फूलत हे कि नइं।
SOL 6:12 एकर पहिली कि में ये बात ला समझतेंव, मोर मन ह मोला मोर मनखेमन के राजसी रथमन म लगा दीस।
SOL 6:13 लहुंट आ, लहुंट आ, हे सुलाम के माईलोगन; लहुंट आ, लहुंट आ, कि हमन तोला एकटक देखन! दूल्हा दू ठन दलमन के नाचा ला देखे सहीं, तुमन सुलाम के माईलोगन ला एकटक काबर देखहू?
SOL 7:1 हे राजकुमारी, कतेक सुघर लगत हें, पनही पहिरे तोर पांवमन! तोर सुघर गोड़मन अइसे जेवर के सहीं अंय, जऊन ला कोनो कारीगर ह अपन हांथ ले बनाय हवय।
SOL 7:2 तोर पेट के बोर्री ह गोल कटोरा के सहीं अय, जेमा मसाला मिले मंद के कमी कभू नइं होवय; तोर पेट ह गहूं के कुढ़ा के सहीं अय, जऊन ह चारों कोति कुमुदिनी फूल ले सजे हवय।
SOL 7:3 तोर दूनों स्तन हिरन के दू ठन पीलामन के सहीं अंय, हिरन के दू ठन जुड़वां पीला सहीं।
SOL 7:4 तोर घेंच ह हाथी-दांत के मीनार के सहीं अय। तोर आंखी ह हेसबोन के ओ कुंड के सहीं अय जऊन ह बेथ-रब्बीम के कपाट के लकठा म हवय। तोर नाक ह लबानोन के ओ मीनार के सहीं अय जेकर मुंहटा ह दमिस्क कोति हवय।
SOL 7:5 तोर मुड़ ह करमेल पहाड़ के सहीं तोला सोभा देवत हे। तोर मुड़ के घुंघराली चुंदी ह राजसी कपड़ा के सूंत सहीं हवय; राजा तो तोर बेनीमन म मोहा गे हवय।
SOL 7:6 हे मोर मयारू, तेंह कतेक सुघर अऊ अपन खुसी के संग कतेक मनमोहनी अस!
SOL 7:7 तोर डीलडौल ह खजूर के रूख के सही अय, अऊ तोर स्तन ह खजूर के झोंथामन सहीं अय।
SOL 7:8 मेंह कहेंव, “में खजूर के रूख म चघहूं; मेंह ओकर फर ला धर लूहूं।” तोर स्तन ह अंगूर के झोंथामन सहीं होवय, तोर सांस के महक ह सेव फर के सहीं होवय,
SOL 7:9 अऊ तोर मुहूं ह खांटी अंगूर के मंद सहीं होवय। अंगूर के मंद ह सीधा जाके मोर मयारू के ओंठ अऊ दांत ऊपर धीरे-धीरे बोहावय।
SOL 7:10 मेंह अपन मयारू के अंव, अऊ ओह मोर लालसा करत रहिथे।
SOL 7:11 हे मोर मयारू, आ, हमन गांव के खेत कोति जावन, आ, गांव म हमन अपन रात बितावन।
SOL 7:12 आ, हमन बिहनियां उठके अंगूर के बारी म जावन अऊ ये देखन कि अंगूर के नार म फूल धरत हे कि नइं, ओमन के कलीमन खिलत हें कि नइं, अऊ अनार फूल खिलत हें कि नइं— उहां मेंह तोला अपन मया दूहूं।
SOL 7:13 दूदा फर ह अपन खुसबू बगरावत हे, अऊ हमर मुंहटामन म जम्मो किसम के उत्तम फर हवंय, नवां अऊ जुन्ना दूनों, हे मोर मयारू, मेंह येला तोर बर कुढ़ोके रखे हंव।
SOL 8:1 कास, तेंह मोर भाई के सहीं होते, जऊन ह मोर दाई के छाती ले दूध पीये रिहिस। तब, कहूं मेंह तोला बाहिर म भेंटतेंव, त में तोला चूमतेंव, अऊ कोनो मोला तुछ नइं समझतिन।
SOL 8:2 मेंह तोला डहार देखातेंव अऊ तोला अपन दाई के घर म ले आतेंव— जऊन ह मोला सिखोय हवय। मेंह तोला पीये बर मसाला मिले अंगूर के मंद देतेंव, अऊ अपन अनार के रस घलो देतेंव।
SOL 8:3 ओकर डेरी हांथ मोर मुड़ के तरी म हवय अऊ ओकर जेवनी हांथ ह मोला पोटारथे।
SOL 8:4 हे यरूसलेम के बेटीमन, मेंह तुमन ला किरिया खवाके कहत हंव: जब तक मया ह खुदे नइं जाग उठय, तब तक तुमन ओला झन भड़कावव या जगावव।
SOL 8:5 येह कोन ए जऊन ह अपन मयारू ऊपर मुड़ टेके सुनसान जगह ले चले आवत हे? दुलहिन सेव रूख के तरी म मेंह तोला जगांय; उहां तोर दाई ह तोला गरभ म धरिस, उहां ओह पीरा सहके तोला जनम दीस।
SOL 8:6 तें मोला मुहर के सहीं अपन हिरदय म लगा ले, अऊ मुहर के सहीं अपन बाहां म लगा ले; काबरकि मया ह मिरतू के सहीं बलवान ए, येकर जलन ह कबर के सहीं निरदयी अय। येह धधकत आगी सहीं बरथे, येह एक बड़े जुवाला सहीं बरथे।
SOL 8:7 पानी के बाढ़ ह घलो मया ला नइं बुता सकय; नदीमन येला बहाके नइं ले जा सकंय। यदि कोनो अपन घर के जम्मो संपत्ति ला मया के बदला म दे देवय, तभो ले ओ संपत्ति ला बहुंत तुछ समझे जाही।
SOL 8:8 हमर एक छोटे बहिनी हवय, ओकर छाती ह अभी नइं बढ़े हवय। जऊन दिन हमर बहिनी के बारे म गोठियाय जाही, ओ दिन हमन ओकर बर का करबो?
SOL 8:9 कहूं ओह दीवार होतिस, त हमन ओकर ऊपर चांदी के मीनार बनातेंन। कहूं ओह कपाट होतिस, त हमन देवदार रूख के पल्ला ले ओला बंद करतेंन।
SOL 8:10 मेंह एक दीवार अंव, अऊ मोर छातीमन मीनार के सहीं अंय। ये किसम ले मेंह ओकर आंखी म संतोस देवई सहीं हो गे हंव।
SOL 8:11 बाल-हामोन म सुलेमान के एक ठन अंगूर के बारी रिहिस; ओह अपन अंगूर के बारी ला किरायादारमन ला दे दीस। ये ठहिराय गीस कि हर किरायादार ह फर के बदले चांदी के एक हजार सेकेल दीही।
SOL 8:12 पर मोर खुद के अंगूर के बारी ह तो मोर अय अऊ मेंह येला कोनो ला भी दे सकत हंव; हे सुलेमान, एक हजार सेकेल तो तोर बर अय, अऊ दू सौ सेकेल ओमन बर अय, जऊन मन येकर फर के देखरेख करथें।
SOL 8:13 तें जो बारीमन म, अपन सहेलीमन संग रहिथस, मोला तोर अवाज सुनन दे!
SOL 8:14 हे मोर मयारू, जल्दी आ, अऊ छोटे सुघर हिरन सहीं हो जा या मसाला ले भरे पहाड़मन ऊपर जवान बारासींगा सहीं हो जा।
ISA 1:1 आमोस के बेटा यसायाह के दरसन, जऊन ला ओह यहूदा अऊ यरूसलेम के बारे म उजियाह, योताम, आहाज, अऊ हिजकियाह नांव यहूदा के राजामन के सासन के दौरान देखिस।
ISA 1:2 हे स्वरग, तें मोर बात ला सुन! अऊ हे धरती सुन! काबरकि यहोवा ह कहे हवय: “मेंह लइकामन ला पालेंव-पोसेंव अऊ ओमन ला बढ़ांय, पर ओमन मोर ले बिदरोह करिन।
ISA 1:3 बईला ह तो अपन मालिक ला, अऊ गदहा ह अपन मालिक के कोटना ला चिन्हथे, पर इसरायल ह मोला नइं जानय, मोर मनखेमन नइं समझंय।”
ISA 1:4 हाय लगे ये पापी जाति के मनखेमन ऊपर, जेमन के अपराध ह बहुंत भारी हवय, जेमन कुकरमीमन के पीला अंय, जेमन के लइकामन भ्रस्टाचार करे बर दे दिये जाथें! ओमन यहोवा ला छोंड़ देय हवंय; ओमन इसरायल के पबितर परमेसर के अपमान करे हवंय अऊ ओकर कोति अपन पीठ कर ले हवंय।
ISA 1:5 तुमन काबर अऊ मार खावव? तुमन काबर बिदरोह करते रहिथव? तुम्हर मुड़ म चोट लगे हवय, अऊ तुम्हर पूरा हिरदय ह दुख ले भरे हवय।
ISA 1:6 तुम्हर गोड़ के तलवा ले लेके मुड़ के ऊपर तक कुछू घलो ठीक नइं ए— सिरिप घाव ही घाव अऊ खुला पीरा देवइया फोड़ामन हवंय, जेमन ला न साफ करे गे हवय अऊ न ही पट्टी बांधे गे हवय अऊ न ही जैतून तेल लगाके नरम करे गे हवय।
ISA 1:7 तुम्हर देस ह उजार परे हवय, तुम्हर नगरमन आगी ले जर गे हवंय; तुम्हर खेतमन ला परदेसीमन तुम्हर देखते-देखत ले लेवत हवंय, ओमन उजार परे हवंय, मानो अजनबीमन ओला नास कर दे हवंय।
ISA 1:8 बेटी सियोन ला अंगूर के बारी के आसरय सहीं, खीरा-बारी के झोपड़ी सहीं, या घेराबंदी करे गय एक नगर के सहीं छोंड़ दिये गे हवय।
ISA 1:9 यदि सर्वसक्तिमान यहोवा ह हमर बर कुछू बांचेमन ला नइं छोंड़े होतिस, त हमन घलो सदोम अऊ अमोरा सहरमन सहीं पूरा नास हो गे रहितेंन।
ISA 1:10 हे सदोम के सासन करइयामन, यहोवा के बचन ला सुनव; हे अमोरा के मनखेमन, परमेसर के हुकूम ऊपर धियान देवव!
ISA 1:11 यहोवा ह कहत हे, “तुम्हर बहुंत अकन बलिदानमन मोर का काम के अंय? मोर करा मेढ़ा अऊ मोटा-ताजा पसुमन के चरबी के जरूरत ले जादा होम-बलिदान हवय; मेंह बछवा अऊ मेढ़ा-पीला अऊ बोकरामन के लहू ले खुस नइं होवंव।
ISA 1:12 जब तुमन मोर मेर भेंट करे बर आथव, त कोन ह कहिथे कि तुमन मोर अंगना ला गोड़ ले खुंदव?
ISA 1:13 बेकार के बलिदान लाय बर बंद करव! तुम्हर धूप ले मोला घिन होथे। नवां चंदा, बिसराम दिन अऊ समारोहमन— तुम्हर बेकार के ये सभामन ला मेंह सहन नइं कर सकंव।
ISA 1:14 तुम्हर नवां चंदा के जेवनार अऊ तुम्हर ठहिराय गय तिहारमन ले मेंह अपन पूरा मन से घिन करथंव। येमन मोर बर एक बोझ बन गे हवंय; मेंह येमन के बोझ उठावत थक गे हंव।
ISA 1:15 जब तुमन पराथना म अपन हांथ फईलाथव, त मेंह तुम्हर ले अपन आंखी मुंद लेथंव; अऊ तुम्हर कतको पराथना करे ले घलो मेंह तुम्हर नइं सुनंव। “काबरकि तुम्हर हांथमन खून ले भरे हवंय!
ISA 1:16 “अपनआप ला धोके सुध करव। मोर आंखी के आघू ले अपन दुस्ट काममन ला हटावव; बुरई करई बर छोंड़ दव।
ISA 1:17 भलई करे बर सीखव; नियाय के खोज म रहव। जेमन ऊपर अतियाचार होथे, ओमन के मदद करव। अनाथमन के नियाय करव; बिधवामन के मुकदमा लड़व।”
ISA 1:18 यहोवा ह कहत हे, “अब आवव, हमन मामला ला निपटावन; चाहे तुम्हर पापमन बैंगनी रंग के सहीं होवंय, तभो ले ओमन बरफ के सहीं सफेद हो जाहीं; चाहे तुम्हर पापमन गाढ़ा लाल रंग के होवंय, तभो ले ओमन ऊन कस सादा हो जाहीं।
ISA 1:19 यदि तुम्हर ईछा हवय अऊ मोर हुकूम ला मानव, त तुमन ला देस के बढ़िया-बढ़िया चीज खाय बर मिलही;
ISA 1:20 पर यदि तुमन नइं मानहू अऊ बिदरोह करहू, त तुमन तलवार ले मारे जाहू।” काबरकि यहोवा के मुहूं ले ये बचन निकले हवय।
ISA 1:21 देखव, ओ बिसवासयोग्य नगर ह कइसे एक बेस्या के सहीं हो गे हवय! एक समय रिहिस कि ओह नियाय ले भरे रिहिस; धरमीपन उहां पाय जावत रिहिस— पर अब उहां हतियारामन रहिथें!
ISA 1:22 तुम्हर चांदी ह मईला गे हवय, तुम्हर खांटी अंगूर के मंद म पानी मिला दिये गे हवय।
ISA 1:23 तुम्हर सासन करइयामन बिदरोही अंय, अऊ चोरमन संग मिले हवंय; ओ जम्मो झन ला घूस लेवई बने लगथे अऊ भेंट के लालची अंय। ओमन अनाथमन के नियाय नइं करंय; अऊ ओमन बिधवामन के मामला अपन करा आवन नइं देवंय।
ISA 1:24 येकर कारन परभू, सर्वसक्तिमान यहोवा, इसरायल के सक्तिसाली परमेसर ह घोसना करत हे: “आह! मेंह अपन बईरीमन ला अपन कोप देखाहूं अऊ अपन बईरीमन ले बदला लूहूं।
ISA 1:25 में तुम्हर बिरूध अपन हांथ उठाहूं; मेंह तुम्हर जम्मो मईल ला साफ कर दूहूं अऊ तुम्हर जम्मो असुधता ला दूर कर दूहूं।
ISA 1:26 मेंह पहिली के सहीं अगुवा अऊ सुरूआत के सहीं सासन करइया ठहिराहूं। ओकर बाद तेंह धरमीपन के नगर, बिसवासयोग्य नगर कहाबे।”
ISA 1:27 सियोन ला नियाय के दुवारा, अऊ ओमा के पछतापी मनखेमन ला धरमीपन ले छोंड़ाय जाही।
ISA 1:28 पर बिदरोही अऊ पापीमन नास कर दिये जाहीं, अऊ जेमन यहोवा ला तियाग देथें, ओमन नास हो जाहीं।
ISA 1:29 “जऊन पबितर बलूत रूखमन के कारन तुमन खुस होवत रहेव, ओमन के कारन तुमन लज्जित होहू; अऊ जऊन बारीमन ला तुमन चुने हव, ओमन के कारन तुमन कलंकित होहू।
ISA 1:30 तुमन ओ बलूत रूख जइसन होहू, जेकर पानमन सूखावत हवंय, अऊ तुमन बिन पानी के एक बारी सहीं हो जाहू।
ISA 1:31 बलवान मनखे चिनगारी ले जरोइया चीज हो जाही अऊ ओकर काम ह एक चिनगारी; दूनों एक संग जरहीं, अऊ आगी बुतइया कोनो नइं होहीं।”
ISA 2:1 आमोस के बेटा यसायाह ह यहूदा अऊ यरूसलेम के बारे म ये दरसन देखिस:
ISA 2:2 आखिरी के दिनमन म, यहोवा के मंदिर के पहाड़ ह सबले ऊंच पहाड़ के रूप म स्थापित करे जाही; येला जम्मो पहाड़ीमन ले ऊंचहा करे जाही, अऊ जम्मो जाति के मनखेमन पानी के धारा सहीं येकर करा आहीं।
ISA 2:3 बहुंते मनखेमन आके कहिहीं, “आवव, हमन यहोवा के पहाड़ ऊपर, याकूब के परमेसर के मंदिर म चलन। ओह हमन ला अपन नियम-कानून सिखोही, ताकि हमन ओकर रसता म चलन।” कानून ह सियोन ले, यहोवा के बचन ह यरूसलेम ले निकलही।
ISA 2:4 ओह जाति-जाति के नियाय करही, अऊ बहुंते मनखेमन के झगरा के निपटारा करही। ओमन अपन तलवारमन ला पीट-पीटके नांगर के फाल अऊ अपन बरछीमन ला हंसिया बना डारहीं। एक जाति ह आने जाति के बिरूध लड़ई नइं करही, अऊ न ही ओमन फेर लड़ई करे के सिकछा दीहीं।
ISA 2:5 हे याकूब के संतानमन, आवव, हमन यहोवा के अंजोर म चलन।
ISA 2:6 हे यहोवा, तेंह अपन मनखे, याकूब के संतानमन ला तियाग दे हवस। ओमन पूरब के मनखेमन सहीं पूरा अंधबिसवास ले भरे हवंय; ओमन पलिस्तीमन सहीं टोनहा करथें अऊ मूरती-पूजकमन के रीति-रिवाज म चलथें।
ISA 2:7 ओमन के देस ह सोन अऊ चांदी ले भरे हवय; ओमन के दुवारा जमा करे गय धन के कोनो सीमा नइं ए। ओमन के देस ह घोड़ामन ले भरे हवय; अऊ ओमन करा अनगिनत रथमन हवंय।
ISA 2:8 ओमन के देस ह मूरतीमन ले भरे हवय; ओमन अपन हांथ के काम, अपन अंगरी ले बनाय चीजमन ला दंडवत करथें।
ISA 2:9 एकरसेति मनखेमन ला झुकाय जाही अऊ हर एक जन नम्र करे जाहीं— ओमन ला छेमा झन कर।
ISA 2:10 यहोवा के भययुक्त उपस्थिति अऊ ओकर गौरव के सोभा के कारन चट्टान म घुसर जावव अऊ भुइयां म लुका जावव!
ISA 2:11 घमंडी के आंखी ला झुकाय जाही अऊ मनखे के घमंड ला टोरे जाही; ओ दिन सिरिप यहोवा ला ही ऊपर करे जाही।
ISA 2:12 काबरकि यहोवा ह एक दिन ला ठहिराय हवय जब सबो घमंडी अऊ अहंकारी, अऊ जऊन मन अपनआप ला ऊपर उठाय हवंय, (ओमन के घमंड ला टोरे जाही),
ISA 2:13 काबरकि लबानोन के जम्मो ऊंच अऊ बड़े देवदार रूख, अऊ बासान के जम्मो बलूत रूख,
ISA 2:14 जम्मो ऊंच पहाड़ अऊ जम्मो ऊंच पहाड़ीमन,
ISA 2:15 हर एक ऊंच मीनार अऊ हर एक किलाबंदीवाला दीवार,
ISA 2:16 हर एक बेपारी पानी जहाज अऊ हर एक महत्व के चीजमन ला गिराय जाही।
ISA 2:17 मनखे के घमंड अऊ मनखे के अहंकार ला टोरे जाही; ओ दिन सिरिप यहोवा ला ही ऊपर करे जाही,
ISA 2:18 अऊ मूरतीमन सब के सब नास हो जाहीं।
ISA 2:19 जब यहोवा ह धरती ला कंपवाय बर उठही, तब ओकर भययुक्त उपस्थिति अऊ ओकर गौरव के सोभा ले डरके मनखेमन भागहीं अऊ चट्टान के गुफा अऊ भुइयां के बिल म जाके लुका जाहीं।
ISA 2:20 ओ दिन मनखेमन छूछू अऊ चमगीदड़मन के आघू म अपन सोन अऊ चांदी के मूरतीमन ला फेंक दीहीं, जेमन ला ओमन दंडवत करे बर बनाय रिहिन।
ISA 2:21 जब यहोवा ह धरती ला कंपवाय बर उठही, त ओकर भययुक्त उपस्थिति अऊ ओकर गौरव के सोभा ले डरके ओमन भागहीं अऊ चट्टानमन के गुफा अऊ चट्टानमन के दरार म लुका जाहीं।
ISA 2:22 मनखेमन ऊपर भरोसा करई छोंड़ दव, जेमन करा सिरिप एक सांस ओमन के नथुना म हवय। ओमन के काबर आदर करे जावय?
ISA 3:1 देखव अब, परभू, सर्वसक्तिमान यहोवा ह यरूसलेम सहर अऊ यहूदा प्रदेस बर जरूरी चीज अऊ मदद देवई ला बंद करइया हवय: जम्मो जेवन के चीज अऊ जम्मो पानी के पूरती,
ISA 3:2 बीर अऊ योद्धा, नियायधीस अऊ अगमजानी, सकुन-बिचार करइया अऊ अगुवा,
ISA 3:3 पचास सैनिकमन के मुखिया अऊ उच्च पदवाला मनखे, सलाहकार अऊ कुसल कारीगर अऊ चतुर जादूगर, जम्मो के जम्मो ला हटा लीही।
ISA 3:4 “मेंह सिरिप जवानमन ला ओमन के अधिकारी बनाहूं; लइकामन ओमन ऊपर सासन करहीं।”
ISA 3:5 मनखेमन एक-दूसर के ऊपर अतियाचार करहीं— मनखे के बिरूध मनखे, परोसी के बिरूध परोसी होहीं। जवानमन डोकरामन के बिरूध अऊ तुछ मनखेमन आदरनीय मनखेमन के बिरूध ठाढ़ होहीं।
ISA 3:6 ओ समय एक मनखे ह अपन ददा के घर म अपन भाई ला पकड़के कहिही, “तोर करा एक बने ओनहा हवय, तेंह हमर अगुवा बन जा; अऊ ये देस, जऊन ह उजर गे हवय, ओला अपन अधीन कर ले!”
ISA 3:7 पर ओ दिन ओह चिचियाके कहिही, “मोर करा येकर कोनो ईलाज नइं ए। मोर घर म न तो जेवन हवय अऊ न ही ओनहा; एकरसेति तुमन मोला मनखेमन के अगुवा झन बनावव।”
ISA 3:8 यरूसलेम तो डगमगावथे, अऊ यहूदा गिरत हे; काबरकि ओमन के बचन अऊ काम यहोवा के बिरूध हवंय, ओमन ओकर महिमामय उपस्थिति के परवाह नइं करत हवंय।
ISA 3:9 ओमन के चेहरा ओमन के बिरूध गवाही देथे; ओमन सदोमीमन के सहीं अपन पाप ला बताथें; ओमन ओला नइं लुकावंय। ओमन ऊपर हाय! ओमन अपन ऊपर बिपत्ति लाय हवंय।
ISA 3:10 धरमीमन ला बतावव कि ओमन के भलई होही, काबरकि ओमन अपन काम के फर के आनंद उठाहीं।
ISA 3:11 दुस्टमन ऊपर हाय! ओमन ऊपर घोर बिपत्ति हवय! काबरकि जऊन दुस्ट काम ओमन करे हवंय, ओकर फर ओमन ला मिलही।
ISA 3:12 जवानमन मोर मनखेमन ऊपर अतियाचार करथें, अऊ माईलोगनमन ओमन ऊपर सासन करथें। हे मोर मनखेमन, तुम्हर रसता बतइयामन तुमन ला भटका देथें; ओमन तुमन ला डहार ले आने कोति ले जाथें।
ISA 3:13 यहोवा ह अदालत म अपन जगह बईठथे; ओह मनखेमन के नियाय करे बर ठाढ़ होथे।
ISA 3:14 यहोवा ह अपन मनखेमन के सियान अऊ अगुवामन के बिरूध नियाय सुरू करथे: “येह तुमन अव, जेमन मोर अंगूर के बारी ला नास कर दे हव; अऊ गरीबमन ले लूटे गय चीजमन तुम्हर घर म हवंय।
ISA 3:15 मोर मनखेमन ला कुचरे अऊ गरीब मनखेमन के चेहरा ला पीसे के तुम्हर का मतलब अय?” परभू, सर्वसक्तिमान यहोवा ह घोसना करत हे।
ISA 3:16 यहोवा ह कहिथे, “सियोन के माईलोगनमन घमंडी अंय, ओमन अपन मुड़ उठाके आंखी ले नकली मया देखावत, अपन गोड़ म घुंघरू के अवाज के संग अकड़के एड़ी मटकावत चलथें।
ISA 3:17 एकरसेति परभू ह सियोन के माईलोगनमन के मुड़ ला फोड़ामन ले भर दीही; यहोवा ह ओमन के मुड़ ला चंदवा कर दीही।”
ISA 3:18 ओ दिन परभू ह ओमन के दिखावटी बेसभूसा ला छीन लीही: याने कि ओमन के चूड़ी अऊ मुड़ के फीता, आधा चंदा सहीं हार,
ISA 3:19 कान के फूली अऊ कंगन अऊ ओढ़नी,
ISA 3:20 पगड़ी अऊ पायल अऊ करधनी, इतर के सीसी अऊ बाजूबंद,
ISA 3:21 मुहरवाला मुंदरी अऊ नथनी,
ISA 3:22 सुघर ओनहा अऊ बिगर बाहां के बंडी अऊ कुरतामन, बटुवा,
ISA 3:23 अऊ दरपन, अऊ मलमल के ओनहा अऊ मुकुट अऊ दुसालामन ला छीन लीही।
ISA 3:24 खुसबू के जगह बदबू; करधनी के जगह म रस्सी; सुघर गांथे बाल के जगह म ठेकली मुड़; सुघर ओनहा के जगह म बोरा के ओनहा; अऊ सुन्दरता के जगह म बदसूरती होही।
ISA 3:25 तुम्हर मनखेमन तलवार ले, अऊ तुम्हर योद्धामन लड़ई म मारे जाहीं।
ISA 3:26 सियोन के दुवारमन रोहीं अऊ बिलाप करहीं; गरीबी म, ओह भुइयां म बईठे रहिही।
ISA 4:1 ओ दिन सात माईलोगनमन एक पुरूस ला धरके कहिहीं, “रोटी तो हमन अपन खुद के खाबो अऊ ओनहा घलो अपन खुद के पहिरबो; सिरिप तेंह हमन ला अपन नांव देय दे। हमर कलंक ला दूर कर दे!”
ISA 4:2 ओ दिन यहोवा के डंगाली ह सुघर अऊ महिमामय होही, अऊ देस के फर ह इसरायल के बांचे मनखेमन बर घमंड अऊ महिमा के बात होही।
ISA 4:3 जऊन मन सियोन म बांचे रहिहीं, जऊन मन यरूसलेम म रहिहीं, याने कि ओ जम्मो जेमन के नांव यरूसलेम म जीयतमन के बीच म लिखे गे हवय, ओमन पबितर कहे जाहीं।
ISA 4:4 परभू ह सियोन के माईलोगनमन के गंदगी ला धो दीही; ओह नियाय के आतमा अऊ आगी के आतमा के दुवारा यरूसलेम ले खून के दागमन ला साफ कर दीही।
ISA 4:5 तब यहोवा ह जम्मो सियोन पहाड़ ऊपर अऊ ओ जम्मो जऊन मन उहां जूरहीं, ओमन ऊपर दिन के बेरा धुआं के एक बादर अऊ रथिया के बेरा धधकत आगी के एक अंजोर देखाही; अऊ जम्मो के ऊपर परमेसर के महिमा के एक मंडप छाय रहिही।
ISA 4:6 येह दिन के गरमी बर एक आसरय अऊ छइहां, अऊ आंधी अऊ पानी ले बचे बर एक सरन-स्थान अऊ लुकाय के जगह होही।
ISA 5:1 मेंह अपन मयारू बर गीत गाहूं ओकर अंगूर के बारी के बारे म एक ठन गीत गाहूं: एक बहुंत उपजाऊ पहाड़ी ऊपर मोर मयारू के एक ठन अंगूर के बारी रिहिस।
ISA 5:2 ओह ओकर माटी खनिस अऊ ओमा के पथरामन ला हटाईस अऊ ओमा सबले उत्तम अंगूर के नारमन ला लगाईस। पहरा देय बर ओह ओमा एक गुम्मट बनाईस अऊ एक ठन अंगूर के रसकुंड घलो बनाईस। तब ओह उत्तम अंगूर के फसल के इंतजार करिस, पर ओमा सिरिप खराप अंगूर ही फरिस।
ISA 5:3 “अब हे यरूसलेम के रहइया अऊ यहूदा के मनखेमन, मोर अऊ मोर अंगूर के बारी के बीच नियाय करव।
ISA 5:4 मोर अंगूर के बारी बर अऊ का खंग गीस जऊन ला मेंह नइं करेंव? जब मेंह उत्तम अंगूर के आसा करेंव, त ओमा सिरिप खराप अंगूर ही काबर फरिस?
ISA 5:5 अब मेंह तुमन ला बताहूं कि मेंह अपन अंगूर के बारी के का करइया हंव: मेंह येकर कांटा के रूंधान ला हटा दूहूं, ताकि येह नास हो जावय; मेंह येकर चारों कोति के बाड़ा ला गिरा दूहूं, ताकि ये बारी ला कुचर दिये जावय।
ISA 5:6 मेंह येला उजार दूहूं, येला न तो काटे जाही अऊ न ही जोते जाही, अऊ ओमा नाना किसम के कंटिला रूख अऊ पऊधा जामहीं। मेंह बादरमन ला हुकूम दूहूं कि ओकर ऊपर पानी झन बरसावंय।”
ISA 5:7 सर्वसक्तिमान यहोवा के अंगूर के बारी ह इसरायली जाति अय, अऊ यहूदा के मनखेमन ओकर मनभावन अंगूर के नार अंय। अऊ ओह ओमा नियाय के आसा करिस, पर ओला अनियाय ही दिखाई दीस; ओह धरमीपन के आसा करिस, पर ओला रोवई अऊ दुख ही दिखाई दीस।
ISA 5:8 ओमन ऊपर हाय, जेमन घर ले घर, अऊ खेत ले खेत ला इहां तक मिलात जाथें कि कुछू जगह नइं बांचय अऊ ओमन देस म अकेला रहिथें।
ISA 5:9 सर्वसक्तिमान यहोवा ह मोर सुनत म घोसना करे हवय: “खचित बड़े-बड़े घरमन सुनसान हो जाहीं, सुघर हवेलीमन बिगर मनखे के खाली पड़े होहीं।
ISA 5:10 दस एकड़ के अंगूर के बारी ले सिरिप एक बत अंगूर के मंद मिलही; अऊ होमेर भर के बीज ले सिरिप एक एपा अनाज पईदा होही।”
ISA 5:11 ओमन ऊपर हाय, जेमन मंद पीये बर बड़े बिहनियां उठथें, अऊ बहुंत रथिया तक पीयत रहिथें जब तक कि ओमन पूरा मात नइं जावंय।
ISA 5:12 ओमन के जेवनारमन म बीना, सारंगी, डफ, बांसुरी अऊ अंगूर के मंद होथे, पर ओमन यहोवा के काम कोति धियान नइं देवंय, अऊ न ही ओकर हांथ के काम बर ओमन के मन म कोनो आदर होथे।
ISA 5:13 एकरसेति समझ के कमी के कारन मोर मनखेमन बंधुवई म चल दीहीं; ऊंच पदवाले मनखेमन भूख म मर जाहीं अऊ सधारन मनखेमन पीयास म बियाकुल होहीं।
ISA 5:14 एकरसेति मिरतू ह अपन जबड़ा ला फारके अपन मुहूं ला खोलथे; ओमन के परभावसाली मनखे अऊ मनखेमन के भीड़ ह ओमन के जम्मो झगरा करइया अऊ आनंद मनइयामन के संग ओ मुहूं म चल दीहीं।
ISA 5:15 सधारन मनखेमन दबाय जाहीं अऊ हर एक जन नम्र करे जाही, घमंडीमन के आंखी ला झुकाय जाही।
ISA 5:16 पर सर्वसक्तिमान यहोवा ह अपन नियाय के दुवारा ऊपर उठही, अऊ पबितर परमेसर ह अपन धरमी काममन के दुवारा पबितर ठहिरही।
ISA 5:17 तब भेड़मन अपन चरागन म चरहीं; मेढ़ा-पीलामन ला धनवानमन के उजरे जगह म खाय बर मिलही।
ISA 5:18 ओमन ऊपर हाय, जेमन पाप ला धोखा के डोरी, अऊ दुस्टता ला गाड़ी के रस्सी ले खींचथें,
ISA 5:19 जेमन कहिथें, “परमेसर ह जल्दी करय; ओह अपन काम ला जल्दी करय ताकि हमन ओला देखन। इसरायल के पबितर परमेसर के योजना— येह आवय, येह नजर म आवय, ताकि हमन ओला जानन।”
ISA 5:20 ओमन ऊपर हाय, जेमन बुरा ला भला अऊ भला ला बुरा कहिथें, जेमन अंधियार ला अंजोर अऊ अंजोर ला अंधियार कहिथें, जेमन करू ला मीठ अऊ मीठ ला करू कर देथें।
ISA 5:21 ओमन ऊपर हाय, जेमन अपन खुद के आंखी म बुद्धिमान अऊ अपन खुद के नजर म होसियार अंय।
ISA 5:22 ओमन ऊपर हाय, जेमन अंगूर के मंद पीये म बीर अऊ मंद ला कड़ा बनाय म माहिर अंय,
ISA 5:23 जऊन मन घूस लेके दोसी मनखे ला छोंड़ देथें, अऊ निरदोस मनखे ला दोसी ठहिराथें।
ISA 5:24 एकरसेति, जइसने आगी के जुवाला ले पैंरा ह भसम हो जाथे अऊ सूखा घांस ह जलके राख हो जाथे, वइसने ही ओमन के जरी ह सर जाही अऊ ओमन के फूलमन धुर्रा सहीं उड़िया जाहीं; काबरकि ओमन सर्वसक्तिमान यहोवा के कानून ला स्वीकार नइं करिन अऊ इसरायल के पबितर जन के बचन ला तुछ समझिन।
ISA 5:25 एकरसेति यहोवा के रिस ह अपन मनखेमन ऊपर भड़कथे; ओह अपन हांथ ले ओमन ला मारथे। पहाड़मन कांपथें, अऊ मनखेमन के लास ह गलीमन म कचरा सहीं परे हवंय। एकर बाद घलो ओकर रिस नइं थमिस, ओकर हांथ ह अभी घलो उठे हवय।
ISA 5:26 ओह दूरिहा-दूरिहा के जाति के मनखेमन बर एक झंडा ठाढ़ करथे, ओह धरती के छोर के मनखेमन ला सीटी बजाके बलाथे। ओमन आथें, ओमन तेजी से अऊ दऊड़त आथें!
ISA 5:27 ओमा के कोनो घलो न तो थकंय अऊ न ही कोनो हपटंय, न कोनो ओंघावंय अऊ न ही सुतंय; न तो काकरो कमरपट्टा ह ढीला होथे, अऊ न ही काकरो पनही के बंधना ह टूटथे।
ISA 5:28 ओमन के तीरमन चोख होथें, अऊ ओमन के जम्मो धनुसमन तनाय रहिथें; ओमन के घोड़ामन के खुरमन पथरा कस, अऊ ओमन के रथमन के चक्कामन बवंडर सहीं लगथें।
ISA 5:29 ओमन के गरजन ह सिंह के गरजन सहीं होथे, ओमन जवान सिंह के सही गरजथें; ओमन गुर्राके अपन सिकार ऊपर झपटथें अऊ ओला उठाके ले जाथें, जेला कोनो छोंड़ाय नइं सकंय।
ISA 5:30 ओ दिन ओमन येकर ऊपर समुंदर के गरजन सहीं गरजहीं। अऊ यदि कोनो ओ देस कोति देखही, त ओला सिरिप अंधियार अऊ संकट ही दिखाई दीही; अऊ त अऊ सूरज घलो बादरमन म लुकाके अंधियार हो जाही।
ISA 6:1 जऊन बछर उजियाह राजा ह मरिस, मेंह परभू ला ऊंचहा अऊ महिमा के संग एक सिंघासन म बिराजमान देखेंव; अऊ ओकर ओनहा के घेरा ले मंदिर ढंपा गे रिहिस।
ISA 6:2 ओकर ऊपर म सारापमन रहंय, अऊ हर एक के छै-छै ठन डेना रहंय: दू ठन डेना ले ओमन अपन मुहूं ला अऊ दू ठन डेना ले अपन गोड़मन ला ढांपे रहंय, अऊ दू ठन डेना ले ओमन उड़त रहंय।
ISA 6:3 अऊ ओमन एक-दूसर ला नरिया-नरियाके कहत रिहिन: “सर्वसक्तिमान यहोवा ह पबितर, पबितर, पबितर ए; पूरा धरती ह ओकर महिमा ले भरे हवय।”
ISA 6:4 ओमन के अवाज ले दुवार अऊ चौखटमन डोल गीन, अऊ मंदिर ह धुआं ले भर गीस।
ISA 6:5 तब मेंह चिचियाके कहेंव, “मोर ऊपर हाय! मेंह नास हो गेंव! काबरकि मेंह असुध ओंठवाला मनखे अंव, अऊ मेंह असुध ओंठवाले मनखेमन के बीच म रहिथंव, अऊ मोर आंखीमन राजा, सर्वसक्तिमान यहोवा ला देखे हवंय।”
ISA 6:6 तब एक ठन साराप ह हांथ म एक ठन बरत अंगरा ला धरके मोर करा उड़ियाके आईस; ओह ओ अंगरा ला बेदी म ले चिमटा ले उठाय रिहिस।
ISA 6:7 ओह ओ अंगरा ले मोर मुहूं ला छूके कहिस, “देख, येह तोर ओंठ ला छुये हवय; तोर अपराध ह दूर हो गे हवय अऊ तोर पाप ला छेमा कर दिये गे हवय।”
ISA 6:8 तब मेंह परभू के अवाज ला ये कहत सुनेंव, “मेंह कोन ला पठोवंव? अऊ कोन ह हमर बर जाही?” त मेंह कहेंव, “मेंह इहां हंव। मोला पठो।”
ISA 6:9 ओह कहिस, “जा, अऊ ये मनखेमन ला कह: “ ‘सुनत ही रहव, पर कभू झन समझव; देखत ही रहव, पर कभू झन बुझव।’
ISA 6:10 ये मनखेमन के मन ला कठोर, ओमन के कान ला भारी अऊ ओमन के आंखीमन ला बंद कर दे। अइसन झन होवय कि ओमन अपन आंखी ले देखंय, अपन कान ले सुनंय, अपन मन म समझंय अऊ मन फिराके चंगा हो जावंय।”
ISA 6:11 तब मेंह पुछेंव, “हे परभू, कब तक?” ओह जबाब दीस: “जब तक नगरमन उजड़ नइं जावंय अऊ उहां कोनो झन बचंय, जब तक घरमन ला खाली नइं छोंड़ दिये जावय अऊ खेतमन बरबाद होके नास नइं हो जावंय,
ISA 6:12 जब तक यहोवा ह हर एक जन ला उहां ले दूरिहा नइं कर देवय अऊ देस ला पूरा तियाग नइं दिये जावय।
ISA 6:13 अऊ हालाकि मनखेमन के दसवां हिस्सा उहां रही जाथे, तभो ले येला फेर नास करे जाही। पर जइसे छोटे अऊ बड़े बलूत रूख ला काटे के बाद घलो ओकर ठूंठ ह बांच जाथे, वइसे ही पबितर बीजा ह ओ देस के ठूंठ होही।”
ISA 7:1 यहूदा के राजा आहाज, जऊन ह योताम के बेटा अऊ उजियाह के पोता रिहिस, ओकर समय म अराम के राजा रसीन अऊ इसरायल के राजा रमलियाह के बेटा पेकह ह यरूसलेम ले लड़े बर हमला करिन, पर ओमन ओला हरा नइं सकिन।
ISA 7:2 जब दाऊद के घराना ला ये बताय गीस कि अराम ह एपरैम के संग संधि करे हवय, त आहाज अऊ ओकर मनखेमन डर के मारे अइसन कांपे लगिन, जइसन जंगल के रूखमन हवा चले ले कांपथें।
ISA 7:3 तब यहोवा ह यसायाह ला कहिस, “तें अऊ तोर बेटा सार-यासूब ऊपरवाला कुंड के नहर के आखिरी छोर करा जावव, जऊन ह धोबीमन के खेत कोति जवइया सड़क म हवय अऊ उहां जाके आहाज ले भेंट करव।
ISA 7:4 अऊ ओला कहव, ‘सचेत अऊ सांत रह अऊ झन डर। ये दू ठन धुआं निकलत बारे के लकड़ी के ठूंठमन के कारन याने कि अराम के राजा रसीन अऊ रमलियाह के बेटा के भड़के कोप ले तोर मन ह बियाकुल झन होवय।
ISA 7:5 अराम, एपरैम अऊ रमलियाह के बेटा ये कहिके तोर बिरूध युक्ति करे हवंय,
ISA 7:6 “आवव, हमन यहूदा ऊपर हमला करन; आवव, हमन ओला चीरके कुटा-कुटा कर देवन अऊ अपन बीच म बांट लेवन, अऊ ताबेल के बेटा ला ओकर ऊपर राजा बना देवन।”
ISA 7:7 पर परमपरधान यहोवा ह ये कहत हे: “ ‘ये चाल न तो सफल होही, अऊ न ही ओमन के बात पूरा होही,
ISA 7:8 काबरकि अराम के मुड़ दमिस्क, अऊ दमिस्क के मुड़ सिरिप रसीन ए। पैंसठ बछर के भीतर एपरैम ह अइसे टूट जाही कि ओह एक जाति के रूप म नइं रहय।
ISA 7:9 एपरैम के मुड़ सामरिया, अऊ सामरिया के मुड़ सिरिप रमलियाह के बेटा अय। यदि तुमन अपन बिसवास म बने नइं रहव, त तुमन बिलकुल ही स्थिर नइं रह सकव।’ ”
ISA 7:10 यहोवा ह आहाज ला फेर कहिस,
ISA 7:11 “तेंह यहोवा अपन परमेसर ले कोनो चिनहां मांग, चाहे ओ गहिरा जगह के हो या ऊपर अकास के।”
ISA 7:12 पर आहाज ह कहिस, “मेंह नइं मांगंव, न ही मेंह यहोवा ला परखंव।”
ISA 7:13 तब यसायाह ह कहिस, “हे दाऊद के घराना के मन, सुनव! मनखेमन के धीरज के परखई ह काफी नो हय कि तुमन मोर परमेसर के धीरज ला घलो परखहू?
ISA 7:14 येकर कारन, परभू ह खुद तुमन ला एक चिनहां दीही: सुनव, एक कुंवारी ह गरभवती होही अऊ एक बेटा जनमही, अऊ ओकर नांव इमानुएल रखही।
ISA 7:15 अऊ जब तक ओह बुरा ला छोंड़े अऊ भला ला गरहन करे बर नइं जानही, तब तक ओह दही अऊ मंधरस खाही,
ISA 7:16 काबरकि एकर पहिली कि ओ लड़का ह बुरई ला छोंड़े अऊ भलई ला धरे बर जानय, ओ देस, जेकर दूनों राजा ले तेंह घबराथस, निरजन हो जाही।
ISA 7:17 यहोवा ह तोर ऊपर, तोर मनखेमन ऊपर अऊ तोर ददा के घराना ऊपर अइसे समय ला लानही कि जब ले एपरैम ह यहूदा ले अलग होय हवय, तब ले वइसे दिन कभू नइं आय हवय—याने कि ओह अस्सूर के राजा ला ले आही।”
ISA 7:18 ओ दिन यहोवा ह मिसर म नील के मुहाना ले माछीमन ला अऊ अस्सूर देस ले मधुमक्खीमन ला सीटी बजाके बलाही।
ISA 7:19 ओमन सब के सब आहीं अऊ ये देस के पहाड़ी नरवामन म अऊ चट्टानमन के दरारमन म, जम्मो कंटिली झाड़ी म अऊ जम्मो पानी के सोत के लकठा म बईठ जाहीं।
ISA 7:20 ओ दिन परभू ह फरात नदी के ओ पार अस्सूर के राजा ले भाड़ा म उस्तरा लीही अऊ तुम्हर मुड़ अऊ गुपत भाग के रूआंमन ला मुड़ही, अऊ तुम्हर दाढ़ी ला घलो काटही।
ISA 7:21 ओ दिन एक मनखे ह सिरिप एक ठन बछिया अऊ दू ठन बकरी पोसही।
ISA 7:22 ओमन अतेक दूध दीहीं कि खाय बर दही मिलही। ओ जम्मो, जेमन देस म बांचे होहीं, ओमन दही अऊ मंधरस खाहीं।
ISA 7:23 ओ दिन, हर ओ जगह, जिहां एक हजार चांदी के सेकेल म एक हजार अंगूर के नारमन मिलत रिहिन, उहां सिरिप कंटिली झाड़ी अऊ कांटामन होहीं।
ISA 7:24 सिकारीमन उहां तीर-धनुस लेके जाहीं, काबरकि ओ देस ह कंटिली झाड़ी अऊ कांटामन ले भरे होही।
ISA 7:25 जहां तक जम्मो पहाड़ीमन के बात ए, एक बार जब उहां कुदारी ले खेती हो जाही, त तुमन ला उहां जाय म कंटिली झाड़ी अऊ कांटामन के भय नइं होही; ओमन अइसन जगह हो जाहीं, जिहां पसुमन ला चरे बर खुला छोंड़ दिये जाही अऊ भेड़-बकरीमन एती-ओती कूदहीं-फांदहीं।
ISA 8:1 यहोवा ह मोला कहिस, “एक ठन बड़खा चामपट्टी ले अऊ ओमा एक सधारन कलम ले ये लिख: महेर-सालाल-हास-बज।”
ISA 8:2 मेंह उरियाह पुरोहित अऊ जेबेरेकियाह के बेटा जकरयाह ला मोर भरोसा के लईक गवाह के रूप म बलाएंव।
ISA 8:3 तब मेंह अपन घरवाली करा गेंव, अऊ ओह गरभ म होईस अऊ एक बेटा ला जनम दीस। अऊ यहोवा ह मोला कहिस, “ओकर नांव महेर-सालाल-हास-बज रख।
ISA 8:4 काबरकि एकर पहिली कि ओ लड़का ह दाई अऊ ददा कहे बर सीखय, दमिस्क अऊ सामरिया दूनों के धन-दौलत ला अस्सूर के राजा ह लूटके ले जाही।”
ISA 8:5 यहोवा ह फेर मोला कहिस:
ISA 8:6 “काबरकि मनखेमन सीलोह के धीरे-धीरे बोहावत पानी ला अस्वीकार करे हवंय अऊ रसीन अऊ रमलियाह के बेटा के संग एका करके आनंद मनावत हें,
ISA 8:7 एकरसेति परभू ओमन ऊपर फरात नदी के भयंकर बाढ़ के पानी लानेचवाला हे— याने कि अस्सूर के राजा ला ओकर पूरा परताप के संग ले आही। येकर जम्मो नहर म पूरा आ जाही, अऊ ओमन के किनारा म पानी चढ़ जाही
ISA 8:8 अऊ यहूदा ऊपर पानी चढ़ जाही, ओकर ऊपर बढ़त जाही, येकर ऊपर ले जावत घेंच तक आ जाही। येकर बाहिर फईले डेनामन तुम्हर देस के चौड़ई ला ढांप दीहीं, इमानुएल!”
ISA 8:9 हे जाति-जाति के मनखेमन, लड़ई बर चिचियावव, अऊ कुटा-कुटा हो जावव! हे दूरिहा-दूरिहा के जम्मो देसमन, सुनव। लड़ई बर तियारी करव, अऊ कुटा-कुटा हो जावव! लड़ई बर तियारी करव, अऊ कुटा-कुटा हो जावव!
ISA 8:10 तुमन लड़ई के योजना बनावव, पर ओह बेकार हो जाही; तुमन कुछू घलो कहव, पर तुम्हर कहे ह नइं ठहिरय, काबरकि परमेसर ह हमर संग हवय।
ISA 8:11 अपन मजबूत हांथ मोर ऊपर रखके यहोवा ह मोला ये मनखेमन के रसता म नइं चले के चेतउनी देवत कहत हे:
ISA 8:12 “हर ओ चीज ला सडयंत्र झन कहव जेला ये मनखेमन एक सडयंत्र कहिथें; ओ चीज ले झन डरव, जऊन चीज ले ओमन डराथें, अऊ ओकर ले भयभीत झन होवव।
ISA 8:13 सर्वसक्तिमान यहोवा ही ओ अय, जेकर एक पबितर परमेसर के रूप म तें आदर कर। ओकरेच ले ही तेंह डर, अऊ ओकरेच भय मान।
ISA 8:14 ओह एक पबितर जगह होही; इसरायल अऊ यहूदा दूनों घराना बर ओह एक ठन पथरा होही, जऊन ह मनखेमन के लड़खड़ाय के अऊ एक चट्टान, जऊन ह ओमन के गिरे के कारन बनही। अऊ यरूसलेम के मनखेमन बर ओह एक फंदा अऊ एक जाल होही।
ISA 8:15 ओमा के कतको झन ठोकर खाहीं; ओमन गिरहीं अऊ चकनाचूर हो जाहीं, ओमन फंदा म फंसहीं अऊ धरे जाहीं।”
ISA 8:16 चेतउनी के ये गवाही ला बंद कर देवव अऊ मोर चेलामन के बीच परमेसर के सिकछा म मुहर लगा देवव।
ISA 8:17 मेंह ओ यहोवा के रसता देखहूं, जऊन ह याकूब के संतानमन ले अपन मुहूं ला लुकाय हवय। मेंह ओकर ऊपर अपन भरोसा रखहूं।
ISA 8:18 देख, मेंह इहां हवंव अऊ जऊन लइकामन ला यहोवा ह मोला देय हवय, ओमन घलो हवंय। सर्वसक्तिमान यहोवा, जऊन ह सियोन पहाड़ म निवास करथे, ओकर कोति ले हमन इसरायलीमन बर चिनहां अऊ प्रतीक अन।
ISA 8:19 जब कोनो मनखे तुमन ला ओ ओझा अऊ टोनहामन करा जाके पुछे बर कहय, जेमन फुसफुसाथें अऊ बड़बड़ाथें, तब तुमन अइसन मनखे ले कहव, “का मनखेमन ला अपन परमेसर करा जाके नइं पुछना चाही? जीयत मनखेमन बर मुरदामन ले काबर पुछन?”
ISA 8:20 परमेसर के सिकछा अऊ चेतउनी के गवाही ऊपर धियान देवव। यदि कोनो मनखे ये बचन के मुताबिक नइं बोलय, त ओकर करा बिहान के अंजोर नइं ए।
ISA 8:21 दुख-तकलीफ अऊ भूख म, ओमन देस म एती-ओती फिरत रहिहीं; अऊ जब ओमन भूखन मरहीं, त ओमन गुस्सा करहीं अऊ, ऊपर कोति देखके अपन राजा अऊ अपन परमेसर ला सराप दीहीं।
ISA 8:22 तब ओमन धरती कोति नजर करहीं अऊ ओमन ला सिरिप दुख अऊ अंधियार अऊ भयानक अंधियार दिखाई दीही, अऊ ओमन ला घोर अंधियार म ढकेल दिये जाही।
ISA 9:1 तभो ले, ओमन बर संकट भरे अंधियार खतम हो जाही, जेमन दुख-तकलीफ म रिहिन। बीते समय म तो ओह जबूलून के देस अऊ नपताली के देस के अपमान करिस, पर भविस्य म ओह समुंदर के तरफ जाय के रसता के दुवारा, यरदन नदी के ओ पार, आनजातमन के गलील प्रदेस के आदर करही—
ISA 9:2 जऊन मनखेमन अंधियार म चलत रिहिन ओमन एक बड़े अंजोर ला देखिन; अऊ घोर अंधियार के देस म रहइया मनखेमन के ऊपर एक अंजोर चमकिस।
ISA 9:3 तेंह जाति ला बढ़ाय हवस अऊ ओमन ला बहुंत आनंदित करे हवस; ओमन तोर आघू म वइसने आनंदित होथें, जइसने मनखेमन कटनी के समय आनंदित होथें, ओमन वइसने आनंदित होथें जइसने योद्धामन लूट के सामान ला बांटे के बेरा आनंदित होथें।
ISA 9:4 काबरकि तेंह ओमन के घेंच के भारी जुड़ा ओमन के खांध के बहिंगा, अऊ ओमन ऊपर अंधेर करइयामन के लउठी, ये सबो ला अइसन टोर दे हवस, जइसन मिदयानीमन के हार के दिन करे रहय।
ISA 9:5 लड़ई म उपयोग होवइया हर एक सैनिक के पनही अऊ लहू म लपटे हर एक ओनहा, सब आगी के कौंरा हो जाहीं, सब आगी म बारे के काम आहीं।
ISA 9:6 काबरकि हमर बर एक बालक ह जनमे हे, हमन ला एक बेटा दिये गे हवय, अऊ परभूता ओकर खांध ऊपर होही। अऊ ओकर नांव अद्भूत युक्ति करइया, पराकरमी परमेसर, अनंतकाल के ददा, अऊ सांति के राजकुमार रखे जाही।
ISA 9:7 ओकर परभूता सदा बाढ़त जाही, अऊ ओकर सांति के अन्त नइं होही। ओह दाऊद के सिंघासन अऊ ओकर राज ऊपर सासन करही, ओ समय ले लेके सदाकाल बर नियाय अऊ धरमीपन के संग ओकर राज ह स्थिर रहिही अऊ संभले रहिही। सर्वसक्तिमान यहोवा के धुन ह येला पूरा करही।
ISA 9:8 परभू ह याकूब के बिरूध एक संदेस पठोय हवय; येह इसरायल ऊपर पूरा होही।
ISA 9:9 जम्मो मनखेमन येला जानहीं— एपरैम अऊ सामरिया के रहइया मनखेमन— जेमन घमंड अऊ मन के कठोरता ले गोठियाथें,
ISA 9:10 “ईंटामन तो गिर गे हवंय, पर हमन गढ़े गय पथरा ले फेर बनाबो; डूमर रूखमन ला काटके गिरा देय गे हवय, पर ओमन के बदले हमन देवदार के रूख लगाबो।”
ISA 9:11 पर यहोवा ह रसीन के बईरीमन ला ओमन के बिरूध मजबूत करे हवय अऊ ओमन के बईरीमन ला उकसाय हवय।
ISA 9:12 पूरब ले अरामीमन अऊ पछिम ले पलिस्तीमन मुहूं खोलके इसरायल ला लील ले हवंय। ये जम्मो होय के बाद घलो, ओकर रिस ह सांत नइं होईस, अऊ ओकर हांथ अब तक उठे हवय।
ISA 9:13 तभो ले मनखेमन ओकर मेर लहुंटके नइं गे हवंय, जऊन ह ओमन ला मारिस, अऊ न ही ओमन सर्वसक्तिमान यहोवा के खोज करे हवंय।
ISA 9:14 एकरसेति यहोवा ह इसरायल म ले मुड़ अऊ पुंछी दूनों ला काट डारही, खजूर के डंगाली अऊ सरकंडामन ला एके दिन म काट डारही;
ISA 9:15 अगुवा अऊ नामी मनखेमन तो मुड़ अंय, अऊ लबारी बात सिखोइया अगमजानीमन पुंछी अंय।
ISA 9:16 जेमन ये मनखेमन के अगुवई करथें ओमन येमन ला भटका देथें, अऊ जेमन के अगुवई होथे, ओमन भटक जाथें।
ISA 9:17 एकर कारन परभू ह जवानमन ले खुस नइं होही, अऊ न ही अनाथ अऊ बिधवामन ऊपर दया करही, काबरकि जम्मो झन भक्तिहीन अऊ कुकरमी अंय, अऊ हर एक के मुहूं ले मुरूखता के बात निकलथे। ये जम्मो होय के बाद घलो, ओकर रिस सांत नइं होईस, अऊ ओकर हांथ ह अब तक उठे हवय।
ISA 9:18 खचित दुस्टता ह आगी के सहीं बरथे; येह कंटिली झाड़ी अऊ कांटामन ला भसम कर देथे, येह जंगल के झाड़ीमन म आगी लगा देथे, अऊ येह धुआं के एक खंभा सहीं किंदर-किंदरके ऊपर उठथे।
ISA 9:19 सर्वसक्तिमान यहोवा के कोरोध ले देस ह जलाय जाही अऊ मनखेमन आगी बर लकरी के सहीं होहीं; ओमन एक-दूसर ला नइं छोड़हीं।
ISA 9:20 जेवनी कोति ले ओमन छीन-झपटके खाहीं, पर तभो ले ओमन भूखन रहिहीं; डेरी कोति ले ओमन खाहीं, पर ओमन के पेट नइं भरही। हर एक जन अपन खुद के संतान के मांस ला खाही:
ISA 9:21 मनस्से ह एपरैम ला अऊ एपरैम ह मनस्से ला खाही; एक संग ओमन यहूदा के बिरूध हो जाहीं। ये जम्मो होय के बाद घलो, ओकर रिस ह सांत नइं होईस, अऊ ओकर हांथ अब तक उठे हवय।
ISA 10:1 ओमन ऊपर हाय, जेमन अनियायी कानून बनाथें, जेमन अतियाचारी फैसला सुनाथें,
ISA 10:2 जेकर ले गरीबमन के नियाय बिगड़थे अऊ मोर मनखेमन ला अतियाचार ले नियाय नइं मिलय, जेकर ले ओमन बिधवामन ला अपन सिकार बनाथें अऊ अनाथमन ला लूटथें।
ISA 10:3 ओ दिन तुमन का करहू, जब हिसाब लिये जाही, जब दूरिहा ले बिपत्ति आ जाही? मदद मांगे बर तुमन काकर करा भागके जाहू? तुमन अपन धन-दौलत ला कहां रखहू?
ISA 10:4 कैदीमन के बीच चापलूसी अऊ मुरदामन के बीच पड़े रहई एकर अलावा अऊ कुछू नइं बचही। ये जम्मो होय के बाद घलो, ओकर रिस ह सांत नइं होईस, अऊ ओकर हांथ अब तक उठे हवय।
ISA 10:5 “अस्सूर ऊपर हाय, जऊन ह मोर रिस के लउठी, अऊ मोर कोप के डंडा अय!
ISA 10:6 मेंह ओला एक भक्तिहीन जाति के बिरूध भेजत हंव, मेंह ओला एक अइसन मनखेमन के बिरूध पठोवत हवंव, जेमन मोला रिस दिलाथें, ताकि ओह ओमन के चीजमन ला लूटय अऊ छीनय, अऊ ओमन ला गलीमन के चीखला सहीं खुंदय।
ISA 10:7 पर येह ओकर इरादा नो हय, अऊ न ही ओकर मन म अइसन बिचार हवय; ओकर उदेस्य ये अय कि बहुंते जातिमन ला नास कर देवय अऊ ओमन ला खतम कर देवय।
ISA 10:8 काबरकि ओह कहिथे, ‘का मोर जम्मो सेनापतिमन राजा सहीं नो हंय?
ISA 10:9 का कलनो ह कर्कमीस सहीं नो हय? का हमात ह अरपाद के सहीं, सामरिया ह दमिस्क के सहीं नो हय?
ISA 10:10 जइसन मोर हांथ मूरतीमन ले भरे ओ राजमन ऊपर पहुंचिस, जेकर मूरतीमन यरूसलेम अऊ सामरिया के मूरतीमन ले बढ़के रिहिन—
ISA 10:11 का मेंह यरूसलेम अऊ ओकर मूरतीमन ले वइसे नइं करंव जइसे मेंह सामरिया अऊ ओकर मूरतीमन ले करेंव?’ ”
ISA 10:12 जब परभू ह सियोन पहाड़ अऊ यरूसलेम के बिरूध अपन सब काम ला कर डारही, तब ओह कहिही, “मेंह अस्सूर के राजा ला ओकर घमंड ले भरे बात अऊ घमंड ले चढ़े ओकर आंखी के दंड दूहूं।
ISA 10:13 काबरकि अस्सूर के राजा ह कहिथे: “ ‘अपन ही बाहुबल ले मेंह येला करे हंव, अऊ अपन बुद्धि ले घलो करे हंव, काबरकि मोर करा समझ हवय। मेंह देस-देस के सीमना ला हटा देंव, अऊ ओमन के रखे गय धन ला लूट लेंव; एक बलसाली जन के सहीं मेंह ओमन के राजामन ला अपन अधीन कर लेंव।
ISA 10:14 जइसे कोनो मनखे चिरई के खोंधरा करा हबरथे, वइसे देस-देस के मनखेमन के धन-संपत्ति करा मोर हांथ ह पहुंचे हवय; जइसन छोंड़ दिये गय अंडामन ला मनखेमन बटोरथें, वइसन ही मेंह जम्मो देसमन ला बटोर ले हंव; कोनो घलो अपन डेना नइं फड़फड़ाईन, अऊ न ही कोनो अपन मुहूं खोलके चीं-चीं करिन।’ ”
ISA 10:15 का टंगिया ह अपनआप ला ओकर ले जादा ऊपर करथे, जऊन ह येला चलाथे, या आरी ह ओकर बिरूध बड़ई करथे, जऊन ह येकर उपयोग करथे? येह तो वइसने अय, जइसने सोंटा ह ओ मनखे ला चलाय, जऊन ह येला उठाथे, या छड़ी ह ओला उठाय, जऊन ह लकरी नो हय!
ISA 10:16 एकर कारन परभू, सर्वसक्तिमान यहोवा ह ओकर हट्टा-कट्टा योद्धामन ऊपर एक दुरबल करइया बेमारी पठोही; अऊ ओकर ठाट-बाट के खाल्हे धधकत जुवाला के सहीं आगी जलाय जाही।
ISA 10:17 इसरायल के अंजोर ह एक आगी, अऊ ओमन के पबितर जन ह एक जुवाला हो जाही; एकेच दिन म ओकर कांटा अऊ कंटिली झाड़ीमन जलके भसम हो जाहीं।
ISA 10:18 जइसन कोनो बेमार मनखे ह दुरबल होके बेकार हो जाथे, वइसन ही ओकर जंगल अऊ उपजाऊ खेतमन के सोभा ला पूरा नास कर दिये जाही।
ISA 10:19 अऊ ओकर जंगल के बांचे रूखमन अतेक कम हो जाहीं कि कोनो लइका घलो ओमन ला गनके लिख लीही।
ISA 10:20 ओ दिन इसरायल के बांचे मनखेमन, याकूब के बांचे मनखेमन ओकर ऊपर फेर कभू भरोसा नइं करहीं जऊन ह ओमन ला मारिस पर सही म ओमन यहोवा, इसरायल के पबितर परमेसर ऊपर भरोसा करहीं।
ISA 10:21 एक बांचे भाग ह लहुंट आही, याकूब के एक बांचे भाग ह सक्तिसाली परमेसर करा लहुंट आही।
ISA 10:22 हे इसरायल, चाहे तोर मनखेमन समुंदर के बालू सहीं होहीं, पर सिरिप एक बांचे भाग ही लहुंटही। बिनास के फैसला करे जा चुके हवय ये अभिभूत करइया फैसला नियाय के संग करे गे हवय।
ISA 10:23 परभू, सर्वसक्तिमान यहोवा ह पूरा देस म बिनास के फैसला ला पूरा करही।
ISA 10:24 एकरसेति परभू, सर्वसक्तिमान यहोवा ह ये कहत हे: “हे सियोन म रहइया मोर मनखेमन, अस्सूरीमन ले झन डरव, जेमन तुमन ला सोंटा ले मारथें अऊ मिसर के मनखेमन सहीं तुम्हर ऊपर छड़ी उठाथें।
ISA 10:25 बहुंत जल्दी तुम्हर ऊपर मोर रिस ह सांत हो जाही अऊ मोर कोप ह ओमन के बिनास बर भड़कही।”
ISA 10:26 सर्वसक्तिमान यहोवा ह ओमन ला कोर्रा म अइसन मारही, जइसन ओह ओरेब नांव के चट्टान करा मिदयानीमन ला मारे रिहिस; अऊ ओह समुंदर ऊपर अपन लउठी ला उठाही, जइसे कि ओह मिसर देस म करे रिहिस।
ISA 10:27 ओ दिन ओमन के बोझा तुम्हर खांध ले अऊ ओमन के जुड़ा तुम्हर घेंच ले उतार दिये जाही; ये जुड़ा ला टोर दिये जाही काबरकि तुमन बहुंत मोटा हो गे हव।
ISA 10:28 ओमन अय्यात सहर के भीतर आथें; अऊ मिगरोन नगर म ले होके जाथें; मिकमास नगर म ओमन अपन सामान रखथें।
ISA 10:29 ओमन घाटी ला नाहकके कहिथें, “हमन गेबा नगर म रथिया डेरा डालबो।” रामा नगर ह कांपथे; साऊल के गिबा नगर ह भाग जाथे।
ISA 10:30 हे बेटी गल्लीम, चिचिया! हे लैसा, सुन! बिचारा अनातोत!
ISA 10:31 मदमेना नगर ह भागत हवय; गेबीम नगर के मनखेमन भागे बर अपन सामान ला इकट्ठा करत हवंय।
ISA 10:32 आज ओमन नोब नगर म रूकहीं; बेटी सियोन के पहाड़ ऊपर, यरूसलेम के पहाड़ी ऊपर, ओमन हांथ उठाके धमकाहीं।
ISA 10:33 देखव, परभू, सर्वसक्तिमान यहोवा ह बड़े सक्ति ले डारामन ला काट डारही। बड़े-बड़े रूखमन ला काटके गिराय जाही, अऊ ऊंच-ऊंच रूखमन ला खाल्हे करे जाही।
ISA 10:34 ओह घना जंगल ला टंगिया ले काट डारही; अऊ लबानोन ह परतापी परमेसर के आघू म गिरही।
ISA 11:1 यिसै के ठूंठ म ले एक डंगाल फूट निकलही; ओकर जरी म ले एक ठन डंगाल ह फरही।
ISA 11:2 यहोवा के आतमा ओकर ऊपर ठहिरही— येह बुद्धि अऊ समझ के आतमा, युक्ति अऊ पराकरम के आतमा, गियान के आतमा अऊ यहोवा के डर होही—
ISA 11:3 अऊ ओह यहोवा के डर म खुस होही। ओह मुहूं देखके नियाय नइं करही, या अपन कान ले सुनके निरनय नइं करही;
ISA 11:4 पर धरमीपन ले ओह जरूरतमंद के नियाय करही, अऊ धरती के गरीबमन के निरनय सच्चई से करही। ओह धरती ला अपन बचन के छड़ी ले मारही; अऊ अपन फूंक के झोंका ले ओह दुस्टमन ला मिटा दीही।
ISA 11:5 धरमीपन ह ओकर पट्टा अऊ बिसवासयोग्यता ह ओकर कनिहां के पट्टी होही।
ISA 11:6 भेड़िया ह मेढ़ा-पीला के संग रहिही, अऊ चीतवा ह छेरी संग बईठही, बछवा अऊ सेर अऊ पसु के पीला एक संग रहिहीं; अऊ एक छोटे लड़का ह ओमन के अगुवई करही।
ISA 11:7 गाय अऊ भालू एके संग चरहीं, ओमन के पीलामन एक संग बईठहीं, अऊ सिंह ह बईला सहीं भूंसा खाही।
ISA 11:8 दूध पीयत लइका ह नाग सांप के बिल मेर खेलही, अऊ छोटे लइका ह करैत के बिल म हांथ डालही।
ISA 11:9 मोर जम्मो पबितर पहाड़ ऊपर न तो ओमन चोट पहुंचाहीं अऊ न ही नास करहीं, काबरकि धरती ह यहोवा के गियान ले अइसन भर जाही जइसन पानी समुंदर म भरे रहिथे।
ISA 11:10 ओ दिन यिसै के जरी ह मनखेमन बर एक झंडा होही; जाति-जाति के मनखेमन ओकर करा जूरहीं, अऊ ओकर अराम करे के जगह ह महिमामय होही।
ISA 11:11 ओ दिन परभू ह दूसर बेर अपन बांचे मनखेमन ला सुधारे बर अस्सूर ले, मिसर के खाल्हे भाग ले, ऊपरी मिसर ले, कूस ले, एलाम ले, बेबिलोनिया ले, हमात ले, अऊ भूमध्य सागर के द्वीपमन ले हांथ बढ़ाके लानही।
ISA 11:12 ओह जाति-जाति के मनखे बर एक ठन झंडा ठाढ़ करही अऊ इसरायल के बंधुवामन ला इकट्ठा करही; ओह यहूदा के सब बगर गय मनखेमन ला धरती के चारों कोना ले इकट्ठा करही।
ISA 11:13 फेर एपरैम के डाह करई ह खतम हो जाही, अऊ यहूदा के बईरीमन ला नास करे जाही; एपरैम ह यहूदा ले डाह नइं करही, अऊ न ही यहूदा ह एपरैम ला तंग करही।
ISA 11:14 ओमन पछिम कोति ढाल म पलिस्तीमन ऊपर टूट पड़हीं; एक संग मिलके ओमन पूरब कोति के मनखेमन ला लूटहीं। ओमन एदोम अऊ मोआब ला जीत लीहीं, अऊ अमोनीमन ओमन के अधीन हो जाहीं।
ISA 11:15 यहोवा ह मिसर के समुंदर के खाड़ी ला सूखा दीही; झुलसा देवइया हवा के संग ओह फरात नदी ऊपर अपन हांथ बढ़ाही। ओह येला सात ठन धारा म बांट दीही ताकि मनखेमन रेंगत ओ पार हो जावंय।
ISA 11:16 ओकर बांचे मनखेमन बर अस्सूर ले एक अइसन राजमार्ग होही, जइसन इसरायलीमन बर रिहिस, जब ओमन मिसर देस ले निकलके आईन।
ISA 12:1 ओ दिन तें कहिबे: “हे यहोवा, मेंह तोर परसंसा करहूं। हालाकि तें मोर ऊपर रिस करत रहे, पर तोर रिस ह सांत हो गीस अऊ तेंह मोला सांति देय हवस।
ISA 12:2 खचित परमेसर ह मोर उद्धार अय; मेंह भरोसा रखहूं अऊ नइं डरहूं। काबरकि यहोवा, यहोवा खुद मोर बल अऊ मोर सुरकछा अय; ओह मोर उद्धारकर्ता हो गे हवय।”
ISA 12:3 आनंद समेत तुमन उद्धार के कुआंमन ले पानी भरहू।
ISA 12:4 ओ दिन तुमन कहिहू: “यहोवा के परसंसा करव, ओकर नांव के घोसना करव; जाति-जाति के मनखेमन के बीच ओकर काममन के परचार करव, अऊ घोसना करव कि ओकर नांव महान अय।
ISA 12:5 यहोवा के भजन गावव, काबरकि ओह परतापी काम करे हवय; ये बात जम्मो संसार म बतावव।
ISA 12:6 हे सियोन के मनखेमन, जोर से चिचियावव अऊ आनंद के मारे गावव, काबरकि इसरायल के पबितर परमेसर ह तुम्हर बीच महान अय।”
ISA 13:1 बेबिलोन के बिरूध अगमबानी, जऊन ला आमोस के बेटा यसायाह ह दरसन म पाईस:
ISA 13:2 खाली पहाड़ी के टीप म एक ठन झंडा ठाढ़ करव, ओमन ला पुकारव; ओमन ला हांथ ले इसारा करव कि ओमन परभावसाली मनखेमन के दुवारमन म प्रवेस करंय।
ISA 13:3 मेंह ओमन ला हुकूम दे हंव, जेमन ला मेंह लड़ई बर तियार करे हंव; मेंह अपन कोप ला पूरा करे बर अपन ओ योद्धामन ला बलाय हंव— जेमन मोर जीत म आनंद मनाथें।
ISA 13:4 सुनव, पहाड़मन के ऊपर ले एक बड़े भीड़ सहीं हल्ला-गुल्ला सुनई देवत हवय! सुनव, राज-राजमन के बीच एक कोलाहल होवत हवय, मानो जाति-जाति के मनखेमन इकट्ठा होवत हवंय! सर्वसक्तिमान यहोवा ह युद्ध बर अपन सेना ला इकट्ठा करत हे।
ISA 13:5 ओमन दूर देस म ले, अकास के छोर म ले आथें— हव, यहोवा ह अपन कोप के हथियार के संग पूरा देस ला नास करे बर आवत हवय।
ISA 13:6 बिलाप करव, काबरकि यहोवा के दिन ह लकठा म हवय; येह सर्वसक्तिमान परमेसर करा ले सतियानास करे बर आही।
ISA 13:7 एकर कारन सब के हांथमन कमजोर हो जाहीं, हर मनखे के मन म डर हमा जाही।
ISA 13:8 आतंक ह ओमन ला जकड़ लीही, ओमन के पीरा अऊ सोक ह बढ़ जाही; ओमन छेवारी होवत माईलोगन सहीं छटपटाहीं। ओमन चकित होके एक-दूसर ला ताकहीं, अऊ ओमन के मुहूंमन जल जाहीं।
ISA 13:9 देखव, यहोवा के दिन ह आवत हवय —देस ला उजारे अऊ पापीमन ला ओमा नास करे बर कोप अऊ भयंकर कोरोध के संग एक निरदयता के दिन आवत हवय।
ISA 13:10 अकास के तारामन अऊ ओमन के तारा मंडल अपन अंजोर नइं दीहीं। सूरज ह निकलत-निकलत अंधियार हो जाही अऊ चंदा अपन अंजोर नइं दीही।
ISA 13:11 मेंह संसार ला ओकर दुस्टता बर दुस्ट मनखे ला ओकर पाप बर दंड दूहूं। मेंह घमंडी के घमंड ला खतम कर दूहूं अऊ निरदयी मनखे के घमंड ला टोर दूहूं।
ISA 13:12 मेंह मनखेमन के गनती ला सुध सोन ले घलो कम, ओपीर के सोन ले घलो जादा दुरलभ कर दूहूं।
ISA 13:13 एकरसेति सर्वसक्तिमान यहोवा के कोप म, ओकर भड़के भयंकर कोरोध के दिन मेंह अकास ला कंपवाहूं; अऊ धरती ह अपन जगह ले डोलही।
ISA 13:14 सिकार करे गय हिरन के सहीं, बिन चरवाहा के भेड़मन के सहीं, ओमन अपन खुद के मनखेमन करा लहुंटहीं, ओमन भागके अपन-अपन देस चल दीहीं।
ISA 13:15 जऊन ह बंदी बनाय जाही, ओला छुरा भोंग दिये जाही; जऊन मन पकड़े जाहीं, ओ जम्मो के जम्मो तलवार ले मारे जाहीं।
ISA 13:16 ओमन के छोटे लइकामन ला ओमन के आघू म पटकके कुटा-कुटा कर दिये जाही; ओमन के घरमन लूट लिये जाहीं अऊ ओमन के घरवालीमन के संग कुकरम करे जाही।
ISA 13:17 देखव, मेंह ओमन के बिरूध मादीमन ला भड़काहूं, जेमन के मन म चांदी बर न तो कुछू मोह रहय अऊ न ही सोन के कोनो लालच।
ISA 13:18 ओमन के तीरमन जवानमन ला मार गिराहीं; ओमन छोटे लइकामन ऊपर कुछू दया नइं करहीं, अऊ न ही लइकामन ऊपर कुछू तरस खाहीं।
ISA 13:19 बेबिलोन, जऊन ह सब राजमन के मनि, बेबिलोनीमन के सोभा अऊ घमंड अय, ओला परमेसर ह सदोम अऊ अमोरा सहर के सहीं उखानके फेंक दीही।
ISA 13:20 पीढ़ी-पीढ़ी तक उहां न तो कोनो निवास करहीं अऊ न ही उहां कोनो रहिहीं; घुमंतू जाति के मनखेमन न तो उहां डेरा डालहीं, अऊ न ही चरवाहामन अपन पसुमन ला उहां बईठाहीं।
ISA 13:21 पर मरू-भुइयां के पसुमन उहां रहिहीं, सियारमन ओकर घरमन म भर जाहीं; उहां उल्लूमन के बसेरा होही, अऊ उहां जंगली बोकरामन एती-ओती कूदहीं।
ISA 13:22 उहां के गढ़मन म हुंर्रामन के अऊ सुख-बिलास के महलमन म सियारमन के बसेरा होही। ओकर समय ह लकठा म हवय, अऊ ओकर दिनमन ला अऊ बढ़ाय नइं जावय।
ISA 14:1 यहोवा ह याकूब ऊपर दया करही; एक बार फेर ओह इसरायल ला अपनाही अऊ ओमन ला ओमन के खुद के देस म बसाही। परदेसीमन ओमन के संग जुड़ जाहीं अऊ याकूब के संतानमन के संग मिल जाहीं।
ISA 14:2 जाति-जाति के मनखेमन ओमन ला ओमन के खुद के जगह म पहुंचाहीं। अऊ इसरायल ह जाति-जाति के मनखेमन ऊपर अधिकार कर लीही अऊ ओमन ला यहोवा के देस म दास अऊ दासी बना लीही। इसरायलीमन ओमन ला बंदी बना लीहीं, जेमन इसरायलीमन ला बंदी बनाय रिहिन अऊ इसरायलीमन अपन ऊपर अतियाचार करइयामन ऊपर सासन करहीं।
ISA 14:3 ओ दिन यहोवा ह तुमन ला तुम्हर दुख अऊ घबराहट अऊ ओ कठोर मेहनत ले अराम दीही, जेला तुम्हर ले जबरदस्ती करवाय जावत रिहिस,
ISA 14:4 तुमन बेबिलोन के राजा ऊपर ये ताना मारहू: सतइयामन कइसन नास हो गे हवंय! ओकर कोरोध ह कइसन खतम हो गीस!
ISA 14:5 यहोवा ह दुस्टमन के सोंटा, अऊ सासन करइयामन के राजदंड ला टोर दे हवय,
ISA 14:6 जेकर ले ओमन गुस्सा होके मनखेमन ला लगातार मारत रहंय, अऊ जाति-जाति के मनखेमन ऊपर हमेसा कोरोध करत परभूता करंय।
ISA 14:7 अब पूरा धरती ला अराम अऊ सांति मिले हवय; मनखेमन खुसी म गीत गावत हवंय।
ISA 14:8 अऊ त अऊ सनोवर अऊ लबानोन के देवदार रूख घलो तुम्हर ऊपर खुस होके कहिथें, “जब ले तुमन ला गिराय गे हवय, तब ले कोनो हमन ला काटे बर नइं आवंय।”
ISA 14:9 खाल्हे मिरतू-लोक म तुम्हर आय ले तुम्हर ले मिले बर हलचल होवत हे; येह मुरदामन के आतमामन ला तुम्हर ले भेंट करे बर जगाथे— ओ जम्मो ला, जेमन संसार म अगुवा रिहिन; येह ओमन ला ओमन के सिंघासन ले ठाढ़ कराथे— ओ जम्मो ला, जेमन जाति-जाति के मनखेमन ऊपर राजा रिहिन।
ISA 14:10 ओ जम्मो झन जबाब दीहीं, ओमन तुमन ले कहिहीं, “तुमन घलो हमर सहीं कमजोर हो गे हवव; तुमन हमर सहीं बन गे हवव।”
ISA 14:11 तुम्हर जम्मो ठाट-बाट अऊ तुम्हर बीना के अवाज ला मिरतू-लोक म कर देय गे हवय; कीरामन तोर खाल्हे दसना म अऊ गेंगरूआमन तोला ऊपर ले ढांप लेथें।
ISA 14:12 हे बिहान के तारा, बड़े बिहनियां के बेटा, तें कइसे अकास ले गिरे हवस! एक समय रिहिस, जब तें जाति-जाति के मनखेमन ला गिराय रहे, पर अब तेंह खाल्हे धरती म गिराय गे हवस!
ISA 14:13 तेंह अपन मन म कहय, “मेंह स्वरग ऊपर चघहूं; मेंह अपन सिंघासन ला परमेसर के तारागन ले अधिक ऊंचहा करहूं; मेंह सभा के पहाड़ ऊपर, सापोन पहाड़ ऊपर सबले दूरिहा जगह म बिराजहूं।
ISA 14:14 मेंह बादर ले घलो ऊपर ऊंच जगह म चघहूं; मेंह अपनआप ला सर्वोच्च परमेसर के सहीं बनाहूं।”
ISA 14:15 पर तेंह मिरतू-लोक म खंचवा के गहरई म लाने गे हवस।
ISA 14:16 जेमन के नजर तोर ऊपर जाथे, ओमन टकटकी लगाके तोला देखथें, अऊ तोर बारे म सोचथें अऊ कहिथें: “का येह ओही मनखे अय, जऊन ह धरती ला कंपा देवय अऊ राजमन ला डोला देवय,
ISA 14:17 का येह ओ मनखे अय, जऊन ह संसार ला निरजन प्रदेस बना देवय, अऊ सहरमन ला गिरा देवय अऊ अपन बंधुवा मनखेमन ला ओमन के घर नइं जावन देवय?”
ISA 14:18 जाति-जाति के सब राजामन अपन-अपन कबर म चैन से परे हवंय।
ISA 14:19 पर तेंह कंटिली डाली के सहीं अपन कबर ले फेंक दिये गे हवस; तें मारे गय मनखेमन के लास ले पाट दिये गे हवस, ओ मनखेमन के लास ले, जेमन तलवार ले मारे गीन, ओमन के लास, जेमन ला खंचवा के पथरामन म डारे गीस। गोड़ खाल्हे कुचरे कोनो लास के सहीं,
ISA 14:20 तोला ओमन के संग कबर म नइं गाड़े जावय, काबरकि तेंह अपन देस ला नास कर दे हवस, अऊ अपन मनखेमन ला घात करे हवस। दुस्टमन के संतान के चरचा फेर कभू झन करे जावय।
ISA 14:21 ओमन के पुरखामन के पाप के कारन ओमन के बेटामन ला घात करे बर एक जगह तियार करव; अइसन झन होवय कि ओमन उठके देस के ऊपर अधिकार कर लेवंय अऊ धरती ला अपन सहरमन ले भर देवंय।
ISA 14:22 सर्वसक्तिमान यहोवा ह घोसना करत हे, “मेंह ओमन के बिरूध ठाढ़ होहूं। मेंह बेबिलोन के नांव अऊ ओकर बांचे मनखे, ओकर बंस अऊ संतानमन ला मिटा दूहूं।” यहोवा ह घोसना करत हे,
ISA 14:23 “मेंह ओला उल्लूमन के जगह अऊ चीखला ले भरे भुइयां बना दूहूं; मेंह ओला सतियानास के बहरी ले बहार दूहूं।” सर्वसक्तिमान यहोवा ह घोसना करत हे।
ISA 14:24 सर्वसक्तिमान यहोवा ह सपथ खाके कहे हवय, “बेसक जइसने मेंह ठाने हंव, वइसने ही होही, अऊ जइसने मोर उदेस्य हवय, वइसने ही होही।
ISA 14:25 में अस्सूर ला अपन देस म कुटा-कुटा कर दूहूं; अपन पहाड़मन ऊपर मेंह ओला कुचर डारहूं। ओकर जुड़ा मोर मनखेमन के घेंच ले अऊ ओकर बोझा ओमन के खांधा ऊपर ले हटा लिये जाही।”
ISA 14:26 येह ओ योजना ए, जऊन ह जम्मो संसार बर ठहिराय गे हवय; येह ओ हांथ ए, जऊन ह जम्मो जाति के मनखेमन ऊपर उठे हवय।
ISA 14:27 काबरकि सर्वसक्तिमान यहोवा ह योजना बनाय हवय, त कोन ह ओकर बिरोध कर सकथे? ओकर हांथ ह बढ़े हवय, अऊ कोन ह ओला रोक सकत हे?
ISA 14:28 जऊन बछर आहाज राजा मरिस, ओही बछर ये अगमबानी होईस:
ISA 14:29 हे जम्मो पलिस्तीमन, एकर बर आनंदित झन होवव कि ओ लउठी ह टूट गीस, जेमा ले तुमन ला मार पड़े रिहिस; काबरकि ओ सांप के जरी ले एक करैत सांप ह जनमही, अऊ ओकर फर ह एक उड़इया, जहरिला सांप होही।
ISA 14:30 तब गरीब ले गरीब मनखे घलो खाय बर पाही, अऊ जरूरतमंद ह सुरकछित अराम करही। पर तोर बंस ला मेंह अकाल के दुवारा नास कर दूहूं; येह तोर बांचे मनखेमन ला मार डारही।
ISA 14:31 हे दुवार, तेंह हाय-हाय कर! हे नगर, तें नरिया! हे पलिस्तीमन, तुमन सब के सब पिघल जावव! काबरकि उत्तर दिग ले एक धुआं उठत हे, अऊ ओकर दल म छितरानेवाला कोनो नइं एं।
ISA 14:32 ओ जाति के दूतमन ला का जबाब देय जाही? “यहोवा ह सियोन ला स्थापित करे हवय, अऊ ओमा ओकर दुखी मनखेमन सरन पाहीं।”
ISA 15:1 मोआब देस के बिरूध एक अगमबानी: मोआब के आर नगर ह बरबाद हो गीस, एकेच रात म नास हो गीस! मोआब के कीर नगर ह बरबाद हो गीस, एकेच रात म नास हो गीस!
ISA 15:2 दीबोन ह रोए बर ऊपर अपन मंदिर म, अपन ऊंचहा जगहमन म जाथे; नबो अऊ मेदबा नगर बर मोआब के मनखेमन बिलाप करथें। हर एक झन मुड़ मुड़ाय हवंय, अऊ हर एक झन दाढ़ी कटाय हवंय।
ISA 15:3 सड़कमन म ओमन बोरा के ओनहा पहिरे हवंय; छत ऊपर अऊ चऊकमन म ओमन जम्मो भुइयां म गिरके, रोवत बिलाप करत हें।
ISA 15:4 हेसबोन अऊ एलाले सहर के मनखेमन चिचियावत हें, ओमन के अवाज ह यहस नगर तक सुनई देवत हे। एकरसेति मोआब के हथियारधारी मनखेमन चिचियावत हें, अऊ ओमन के मन बहुंत उदास हवय।
ISA 15:5 मोर हिरदय ह मोआब बर बिनती करत हे; ओकर सोअर नगर तक भगई, ओकर एगलत-सलीसिया नगर तक भगई। ओमन ऊपर पहाड़ी म लूहीत नगर करा जाथें, ओमन रोवत-रोवत जाथें; होरोनैम नगर के रसता म अपन बिनास बर ओमन बिलाप करथें।
ISA 15:6 निमरीम घाटी के पानी ह सूखा गीस अऊ कांदी ह कुम्हला गीस; साग-पात, रूख-रई सब खतम हो गीस अऊ कोनो हरियाली नइं बांचिस।
ISA 15:7 एकर कारन जऊन धन-संपत्ति ओमन बनाय हवंय अऊ संकेले हवंय ओला ओमन चिनार रूखमन के घाटी करा ले जावत हें।
ISA 15:8 ओमन के रोए के अवाज मोआब के सीमना तक सुनई देवत हे; ओमन के सोक मनाय के अवाज एगलैम नगर, अऊ ओमन के बिलाप करे के अवाज बेर-एलीम नगर तक सुनई देवत हे।
ISA 15:9 काबरकि दीमोन के सोतामन लहू ले भर गे हवंय, तभो ले मेंह दीमोन नगर ऊपर अऊ दुख-तकलीफ लानहूं— मेंह मोआब के भागे मनखेमन ऊपर अऊ ओ देस म बांचे मनखेमन ऊपर एक सिंह भेजहूं।
ISA 16:1 भेंट के रूप म मेढ़ा-पीलामन ला देस के सासन करइया करा भेजव, बंजर भुइयां के ओ पार, ओमन ला सेला नगर ले बेटी सियोन के पहाड़ ऊपर भेजव।
ISA 16:2 जइसन डेना फड़फड़ावत चिरई पीला ला उड़े बर खोंधरा ले धकेले जाथे, वइसन मोआब के माईलोगनमन के दसा अरनोन नदी के घाट म हो गे हवय।
ISA 16:3 मोआब ह कहिथे, “अपन मन ला तियार करव, एक निरनय लेवव। भरे मंझनियां के बेरा अपन-अपन छइहां ला रात सहीं करव। घर ले निकाले गय मनखेमन ला छुपा देवव, सरन लेवइयामन ला झन पकड़वावव।
ISA 16:4 भागके आय मोआबीमन ला अपन संग रहन दव; नास करइयामन ले ओमन ला बचावव।” अतियाचार करइया के अन्त हो जाही, अऊ बिनास ह रूक जाही; देस म अंधेर करइया ह नास हो जाही।
ISA 16:5 मया के संग एक सिंघासन ला स्थापित करे जाही; अऊ दाऊद के घराना ले एक झन बिसवासयोग्यता के संग ओमा बईठही— एक अइसन जन, जऊन ह नियाय करत बेरा सच्चई ला देखथे अऊ धरमीपन के मामला ला तेजी से निपटाथे।
ISA 16:6 हमन मोआब के घमंड के बारे म सुने हवन— ओह अति घमंडी अय!— ओकर अभिमान अऊ घमंड अऊ ओकर अहंकार; पर ओकर डींग मरई ह बेकार अय।
ISA 16:7 एकरसेति मोआबीमन बिलाप करथें, ओमन एक संग मोआब बर बिलाप करथें। कीर-हरेसेत सहर के किसमिस के केक बर बिलाप करव अऊ दुख मनावव।
ISA 16:8 हेसबोन के खेत अऊ सिबमा नगर के अंगूर के नारमन मुरझा गे हवंय। जाति-जाति के सासन करइयामन उत्तम-उत्तम नारमन ला कुचर डारे हवंय, ये नारमन एक समय याजेर नगर तक पहुंचत रिहिन अऊ मरू-भुइयां कोति बगरत रिहिन। ओमन के नार बगरके समुंदर तक चले जावत रिहिन।
ISA 16:9 एकरसेति सिबमा के अंगूर के नार बर मेंह वइसने रोथंव, जइसने याजेर ह रोथे। हे हेसबोन अऊ एलाले, मेंह तुमन ला अपन आंसू ले भिगो दूहूं! तुम्हर पाके फरमन अऊ अनाज के कटई के बेरा, खुसी के जऊन ललकार होथे, ओह थम गे हवय।
ISA 16:10 फरवाले बारीमन ले आनंद अऊ खुसी ला ले लिये गे हवय; अंगूर के बारीमन म कोनो न तो गीत गावंय, अऊ न ही खुसी ले चिचियावंय; अऊ अंगूर के रसकुंडमन म कोनो अंगूर नइं खुंदय, काबरकि मेंह ओमन के खुसी के मारे चिचियाई ला खतम कर दे हंव।
ISA 16:11 मोर मन ह मोआब बर अऊ मोर अंतर मन ह कीर-हरेसेत बर बीना के सहीं बिलाप करत हे।
ISA 16:12 जब मोआब ह अपन ऊंचहा जगह म जाथे, त ओह सिरिप अपनआप ला थकाय बर जाथे; अऊ जब ओह पराथना करे बर अपन देव-स्थल म जाथे, त ओला कुछू फायदा नइं होवय।
ISA 16:13 येह यहोवा के ओ बचन अय, जेला ओह पहिली ले ही मोआब के बारे म कहे रिहिस।
ISA 16:14 पर अब यहोवा ह कहिथे: “ठेका म लिये गय एक सेवक के गनती के मुताबिक, तीन बछर के भीतर मोआब के वैभव अऊ ओकर बहुंते मनखेमन तुछ समझे जाहीं, अऊ ओकर बांचे मनखेमन बहुंत कम अऊ कमजोर हो जाहीं।”
ISA 17:1 दमिस्क सहर के बिरूध एक अगमबानी: “देखव, दमिस्क फेर एक नगर नइं रहिही पर ओह पूरा खंडहर हो जाही।
ISA 17:2 अरोएर के नगरमन निरजन हो जाहीं अऊ पसुमन के चरागन अऊ बईठे के जगह हो जाहीं, अऊ ओमन ला डरवइया कोनो नइं होहीं।
ISA 17:3 एपरैम के गढ़वाला नगर अऊ दमिस्क के राजकीय सक्ति खतम हो जाही; अराम के बांचे भाग ह इसरायलीमन के महिमा के सहीं हो जाही,” सर्वसक्तिमान यहोवा ह घोसना करत हे।
ISA 17:4 “ओ दिन याकूब के महिमा ह घट जाही; अऊ ओकर मोटहा देहें ह पातर हो जाही।
ISA 17:5 येह अइसन होही, मानो खड़े फसल ला मनखेमन लुवत हें, करपा ला अपन हांथ म संकेलत हें— या येह अइसन होही मानो रपाईम के घाटी म कोनो सीला बीनत हे।
ISA 17:6 तभो ले कुछू सीला ह छूट जाही, जइसे जैतून रूख ला झर्रावत समय दू तीन ठन फर टीप के डंगाल म छूट जाथें, चार पांच ठन, फरवाले डंगाल म रह जाथें,” यहोवा, इसरायल के परमेसर ह घोसना करत हे।
ISA 17:7 ओ दिन मनखेमन अपन सिरिस्टीकर्ता कोति देखहीं अऊ ओमन के आंखी इसरायल के पबितर परमेसर कोति लगे रहिही।
ISA 17:8 ओमन अपन हांथ के बनाय बेदी ला नइं देखहीं, अऊ असेरा के खंभामन अऊ अपन बनाय धूप के बेदीमन बर ओमन के मन म कोनो आदर नइं होही।
ISA 17:9 ओ दिन ओमन के गढ़वाले नगरमन, जेमन ला ओमन इसरायलीमन के डर के मारे छोंड़ देय रिहिन, अइसन होहीं, जइसन झाड़ी-झंखाड़ अऊ घांस-पूस बर जगहमन ला छोंड़े जाथे। ओ जम्मो उजार परे होहीं।
ISA 17:10 काबरकि तुमन अपन उद्धारकर्ता परमेसर ला भुला गे हव; अऊ अपन चट्टान, अपन गढ़ ला सुरता नइं राखे हव। एकरसेति, हालाकि तुमन सुघर पऊधा अऊ बाहिर ले मंगाय अंगूर के नारमन ला लगाथव,
ISA 17:11 हालाकि तुमन ओ पऊधामन ला बढ़ाय बर बाड़ा लगाथव अऊ बिहनियां जब तुमन ओमन ला लगाथव अऊ ओमा पीका निकलथे, तभो ले बेमारी अऊ असाध्य पीरा के दिन ओमा कुछू फसल नइं होही।
ISA 17:12 ओ बहुंते जाति के मनखेमन ऊपर हाय, जेमन गरजथें— ओमन समुंदर के लहरामन सहीं गरजथें! ओ मनखेमन ऊपर हाय, जेमन गरजथें— ओमन भयंकर पानी के धारा सहीं गरजथें!
ISA 17:13 हालाकि मनखेमन पानी के उमड़त लहरामन सहीं गरजथें, पर जब ओह ओमन ला घुड़कथे, त ओमन अइसे दूरिहा भागथें, जइसे पहाड़ ऊपर के भूंसी ह हवा ले अऊ गरेर आय ले धुर्रा उड़ियाथे।
ISA 17:14 सांझ के बेरा, अचानक आतंक! बिहान होय के पहिली ओमन लापता हो जाथें! येह ओमन के भाग ए जेमन हमन ला लूटथें, अऊ हमन ला सताथें, ओमन के ये दसा होही।
ISA 18:1 सन-सन करत डेना के फड़फड़ाहट के ओ देस ऊपर हाय, जऊन ह कूस के नदीमन के संग-संग फईले हवय,
ISA 18:2 अऊ जऊन ह समुंदर के रसता ले पानी म नरकट के डोंगामन के दुवारा दूतमन ला ये कहिके पठोथे। हे तेज चलइया दूतमन, ओ मनखेमन करा जावव, जेमन ऊंच अऊ चिकना चमड़ी के अंय, जेमन के भय मनखेमन के मन म दूरिहा-दूरिहा तक हवय, ओमन अजीब भासा बोलइया एक हमलावर जाति अंय, अऊ ओमन के देस ह नदीमन के दुवारा बंटे हवय।
ISA 18:3 हे संसार के जम्मो मनखेमन, तुमन जेमन धरती म रहिथव, जब एक झंडा ह पहाड़ ऊपर खड़े करे जाही, त तुमन ओला देखहू, अऊ जब तुरही ह फूंके जाही, त तुमन ओकर अवाज सुनहू।
ISA 18:4 यहोवा ह मोला ये कहत हे: “घाम के तेज गरमी अऊ कटनी के गरमी म ओस के बादर सहीं मेंह चुपचाप रहिहूं अऊ अपन निवास ले देखहूं।”
ISA 18:5 काबरकि कटनी के पहिले, जब फूलमन खतम हो जाथें अऊ फूल ह पके अंगूर बन जाथे, तब ओह अंकुरमन ला चाकू ले काट डारही, अऊ काटके फईले डालीमन ला अलग कर दीही।
ISA 18:6 ओमन ला सिकार करइया पहाड़ी चिरईमन बर अऊ जंगल के पसुमन बर छोंड़ दिये जाही; चिरईमन पूरा घाम के महिना म अऊ जंगली पसुमन पूरा जाड़ के महिना म ओमन ला खाहीं।
ISA 18:7 ओ समय सर्वसक्तिमान यहोवा बर ओ मनखेमन के दुवारा भेंट लाने जाही जेमन ऊंच अऊ चिकना चाम के होहीं, जेमन ले पास अऊ दूरिहा के मनखेमन डरथें, जेमन अजीब भासा बोलइया हमलावर जाति के होहीं, जेमन के देस ह नदीमन के दुवारा बंटे होही— ओ भेंटमन ला सियोन पहाड़, सर्वसक्तिमान यहोवा के नांव के जगह म लाने जाही।
ISA 19:1 मिसर के बिरूध अगमबानी: देखव, यहोवा तेज उड़इया बादर म चघके मिसर म अवइया हवय। ओकर आघू म मिसर के मूरतीमन कांपहीं, अऊ मिसरीमन के मन ह डर के मारे पिघल जाही।
ISA 19:2 “मेंह मिसरीमन ला मिसरीमन के बिरूध भड़काहूं— भाई ह भाई के बिरूध लड़ही, परोसी ह परोसी के बिरूध, नगर ह नगर के बिरूध, अऊ राज ह राज के बिरूध लड़ही।
ISA 19:3 तब मिसरीमन के हिम्मत टूट जाही, अऊ मेंह ओमन के उपाय ला बिफल कर दूहूं; ओमन अपन मूरतीमन ले अऊ मरे आतमामन ले, बईगा अऊ झाड़-फूंक करइयामन ले पुछहीं।
ISA 19:4 मेंह मिसरीमन ला एक निरदयी हाकिम के हांथ म सऊंप दूहूं, अऊ एक भयंकर राजा ह ओमन ऊपर सासन करही,” परभू, सर्वसक्तिमान यहोवा ह घोसना करत हे।
ISA 19:5 तब नदी के पानी सूखा जाही, अऊ नदी के तला तक सूखा जाही।
ISA 19:6 नरवामन ले बदबू आही, अऊ मिसर के सोतामन घलो सूखके खाली हो जाहीं। नरकट अऊ हरियर चीजमन मुरझा जाहीं,
ISA 19:7 नील नदी के तीर के पऊधामन घलो, नदी के मुंहाटी म जामे पऊधामन सूखके नास हो जाहीं। नील नदी के तीर के खेतमन म बोये गय बीजा सूखा जाही, ओह उड़िहा जाही अऊ ओकर पता नइं चलही।
ISA 19:8 ओ जम्मो जेमन नील नदी म गरी खेलथें, ओ मछुआरमन रोहीं अऊ बिलाप करहीं; जेमन मछरी धरे बर पानी म जाल डालथें ओमन सोक मनाहीं।
ISA 19:9 जेमन सन के सूंत बनाथें, ओमन निरास होहीं, सुघर मलमल के ओनहा बुनइयामन के आसा टूट जाही।
ISA 19:10 ओनहा के धंधा करइयामन उदास होहीं, अऊ जम्मो मजदूरमन दुखित हो जाहीं।
ISA 19:11 सोअन सहर के हाकिममन तो एकदम मुरूख अंय; फिरौन के बुद्धिमान सलाहकारमन के सलाह बिलकुल बेकार अय। तें फिरौन ले कइसे कह सकत हस, “मेंह एक बुद्धिमान आदमी अंव, पुराना जमाना के राजामन के एक चेला अंव”?
ISA 19:12 अब तोर बुद्धिमान आदमीमन कहां हवंय? सर्वसक्तिमान यहोवा ह मिसर देस के बिरूध जऊन योजना बनाय हवय ओला ओ बुद्धिमान मनखेमन दिखावंय अऊ तोला बतावंय।
ISA 19:13 सोअन के हाकिममन मुरूख हो गे हवंय, मेमफीस के अगुवामन धोखा खाय हवंय; ओकर मनखेमन के मुखियामन मिसर ला भरमा दे हवंय।
ISA 19:14 यहोवा ह ओमन म एक चक्कर देवइया आतमा डार दे हवय; ओमन मिसर ला ओकर जम्मो काम म भटका देवत हें, जइसे मतवार ह अपन उछरे चीज के चारों कोति डगमगावत रहिथे।
ISA 19:15 मिसर ह कुछू नइं कर सकय— मुड़ी या पुंछी, खजूर के डंगाली या सरकंडा।
ISA 19:16 ओ समय मिसरीमन दुरबल परानी हो जाहीं। सर्वसक्तिमान यहोवा ओमन के बिरूध जऊन हांथ उठाही, ओकर कारन, डर के मारे ओमन कांपे लगहीं।
ISA 19:17 अऊ यहूदा के देस ह मिसरीमन ला आतंकित करही; जेकर ले घलो यहूदा के चरचा करे जाही, ओह भयभीत होही, ये सब ओ योजना के कारन होही, जेला सर्वसक्तिमान यहोवा ह मिसरीमन के बिरूध करत हे।
ISA 19:18 ओ दन म मिसर देस म पांच सहर होहीं, जेकर मनखेमन कनान देस के भासा बोलहीं अऊ सर्वसक्तिमान यहोवा के भक्ति बर किरिया खाहीं। ओमा से एक ठन सहर के नांव सूरज होही।
ISA 19:19 ओ दिन म मिसर देस के बीच म यहोवा बर एक बेदी होही, अऊ ओकर सीमना म यहोवा बर एक स्मारक होही।
ISA 19:20 मिसर देस म येह यहोवा बर एक चिनहां अऊ गवाही होही। अपन ऊपर अंधेर करइयामन के कारन, जब ओमन यहोवा ला पुकारहीं, तब ओह ओमन बर एक उद्धारकर्ता अऊ ओमन के रकछा करइया ला भेजही, अऊ ओह ओमन ला छोंड़ाही।
ISA 19:21 ये किसम ले यहोवा अपनआप ला मिसरीमन ऊपर परगट करही, अऊ ओ दिन ओमन यहोवा ला चिनहीं। ओमन बलिदान अऊ अन्न-बलिदान चघाके ओकर उपासना करहीं; ओमन यहोवा बर मन्रत रखहीं अऊ ओला पूरा घलो करहीं।
ISA 19:22 यहोवा ह मिसर देस ऊपर एक महामारी लानही; ओह ओमन ला मारही अऊ ओमन ला चंगा घलो करही। ओमन यहोवा कोति फिरहीं, अऊ ओह ओमन के बिनती सुनके ओमन ला चंगा करही।
ISA 19:23 ओ दिन म मिसर ले अस्सूर तक एक राजमार्ग होही। अस्सूरीमन मिसर देस जाहीं अऊ मिसरीमन अस्सूर देस जाहीं। अऊ मिसरीमन अस्सूरीमन के संग मिलके अराधना करहीं।
ISA 19:24 ओ दिन म धरती ऊपर इसरायल ह तीसरा देस होही, जेकर नांव मिसर अऊ अस्सूर के संग आसीसित देस के रूप म लिये जाही।
ISA 19:25 सर्वसक्तिमान यहोवा ह ये कहिके ओमन ला आसीस दीही, “धइन होवंय मिसर म मोर मनखेमन, मोर हांथ के बनाय अस्सूर अऊ मोर उत्तराधिकार इसरायल।”
ISA 20:1 जऊन बछर अस्सूर के राजा सरगोन अपन परधान सेनापति ला भेजिस अऊ ओह असदोद म आके ओकर ऊपर हमला करिस अऊ असदोद ला अपन अधिकार म ले लीस—
ISA 20:2 ओही बछर यहोवा ह आमोस के बेटा यसायाह के दुवारा कहिस, “जा अऊ अपन कनिहां ले टाट के ओनहा ला उतार अऊ अपन गोड़ ले जूता ला उतार।” अऊ ओह वइसने ही करिस, ओह नंगरा अऊ खाली गोड़ घुमे-फिरे लगिस।
ISA 20:3 तब यहोवा ह कहिस, “जइसन मोर दास यसायाह ह तीन बछर ले नंगरा होके खाली गोड़ रेंगत रिहिस, कि मिसर अऊ कूस बर एक चिनहां अऊ अपसकुन होवय,
ISA 20:4 वइसन अस्सूर के राजा ह मिसर अऊ कूस के मनखेमन ला कैदी बनाके देस निकाला करही; का जवान का सियान, सबो ला कैदी बनाके नंगरा अऊ खाली गोड़ अऊ कुल्हा खुल्ला करके कैद म ले जाही, ताकि मिसर के बेजत्ती होवय।
ISA 20:5 जेमन कूस ऊपर भरोसा करिन अऊ मिसर ऊपर घमंड करिन, ओमन भयभीत होहीं अऊ ओमन के बेजत्ती होही।
ISA 20:6 ओ दिन म ये समुंदर तीर म रहइया मनखेमन कहिहीं, ‘देखव, जेमन ऊपर हमन भरोसा करत रहेंन अऊ जेमन करा हमन मदद बर अऊ अस्सूर के राजा ले बांचे बर भागके गेंन, ओमन के का होय हवय! त फेर हमन कइसे बच सकत हन?’ ”
ISA 21:1 समुंदर तीर के मरू-भुइयां के बिरूध अगमबानी: जइसन दक्खिन के भुइयां ले आंधी आथे, वइसन ही मरू-भुइयां ले, आतंक के देस ले एक हमला करइया आवत हवय।
ISA 21:2 एक भयानक दरसन मोला देखाय गीस: बिसवासघाती ह बिसवासघात करथे अऊ लूटनेवाला ह लूटथे। हे एलाम, हमला कर! हे मादै, घेराबंदी कर! मेंह ओ सब कराहना ला खतम कर दूहूं, जऊन ह ओकर कारन आय हवय।
ISA 21:3 एकर कारन मोर देहें म भारी पीरा हे, छेवारी होवत माईलोगन के पीरा सहीं मोला पीरा होवत हे; जऊन बात मेंह सुनत हंव, ओकर ले मेंह डर गे हंव, जऊन चीज ला मेंह देखत हंव, ओकर ले घबरा गे हंव।
ISA 21:4 मोर हिरदय ह कांपत हे, डर के मारे मेंह कांपत हंव; जऊन संझा के मेंह रसता देखत रहेंव ओह मोर बर आतंक के बात हो गे हवय।
ISA 21:5 जेवन के तियारी होवत हे, ओमन ओनहा बिछावत हें, ओमन खावथें, ओमन पीयथें! हे हाकिममन, उठव, ढालमन म तेल लगावव!
ISA 21:6 परभू ह मोला ये कहत हे: “जाके एक पहरेदार ठहिरा दे अऊ जऊन कुछू ओह देखथे, ओला आके बतावय।
ISA 21:7 जब ओह रथमन ला घोड़ामन के दल के संग देखथे, जब ओह गदहामन के सवार या ऊंटमन के सवारमन ला देखथे, त ओह सावधान हो जावय, पूरा सावधान हो जावय।”
ISA 21:8 अऊ ओ पहरेदार ह चिचियाके कहिस, “हे मालिक, हर दिन मेंह ठाढ़ होके पहरा देथंव; हर रात मेंह पहरा म काटथंव।
ISA 21:9 देखव, एक आदमी एक रथ म घोड़ामन के एक दल के संग आवथे। अऊ ओह जबाब देथे: ‘गिर परिस, बेबिलोन गिर परिस! येकर देवतामन के जम्मो मूरतीमन गिरके भुइयां म चकनाचूर हो गीन।’ ”
ISA 21:10 कोठार म कुचरे गय हे मोर मनखेमन, जऊन बात मेंह सर्वसक्तिमान यहोवा, इसरायल के परमेसर ले सुने हंव, ओला मेंह तुमन ला बतात हंव।
ISA 21:11 दूमा के बिरूध अगमबानी: सेईर म ले कोनो मोला बलावत हवय, “हे चौकीदार, रथिया के का खबर हे? हे चौकीदार, रथिया के का खबर हे?”
ISA 21:12 चौकीदार ह कहिस, “बिहान पहाथे, पर रथिया घलो होथे। यदि तेंह पुछे चाहत हस, त पुछ; अऊ फेर लहुंटके आ।”
ISA 21:13 अरब के बिरूध अगमबानी: हे ददानीमन के रसता रेंगइया दलमन, जेमन अरब के झाड़ीमन म डेरा डालथव,
ISA 21:14 पीयासन करा पानी लानव; तुमन, जेमन तेमा नगर म रहिथव, भगोड़ामन बर जेवन लेके आवव।
ISA 21:15 ओमन तलवार के डर ले भागत हें, मियान ले खींचे तलवार ले, ताने गय धनुस ले अऊ भारी लड़ई ले भागत हवंय।
ISA 21:16 परभू ह मोला ये कहत हे: “जइसे ठेका म बंधे बनिहार ह येला गनथे, एकेच बछर के भीतर, केदार गोत्र के जम्मो सोभा खतम हो जाही।
ISA 21:17 केदार के धनुसधारी, सूरबीरमन ले थोरकन ही रह जाहीं।” यहोवा, इसरायल के परमेसर ह कहे हवय।
ISA 22:1 दरसन के घाटी के बिरूध अगमबानी: तुम्हर अब का समस्या हे कि तुमन जम्मो के जम्मो छानी ऊपर चढ़ गे हव,
ISA 22:2 हे हाहाकार अऊ उधम ले भरे नगर, हे कोलाहल अऊ उपदरव के सहर? तुम्हर मारे गय मनखेमन तलवार ले नइं मारे गे हवंय, न ही ओमन लड़ई म मारे गे हवंय।
ISA 22:3 तुम्हर जम्मो अगुवामन एक संग भाग गे हवंय; बिगर धनुस के उपयोग करे ही ओमन ला बंदी बना लिये गे हवय। ओ जम्मो जेमन पकड़े गीन, ओमन ला एक संग बंदी बना लिये गीस, जबकि ओमन के भागत बेरा बईरी ह दूरिहा म रिहिस।
ISA 22:4 एकरसेति मेंह कहेंव, “मोर ले मुहूं फेर लव; मोला फूट-फूटके रोवन दव। मोर मनखेमन के बिनास ऊपर मोला सांति देय के कोसिस झन करव।”
ISA 22:5 काबरकि परभू, सर्वसक्तिमान यहोवा के एक दिन हवय, जब दरसन के घाटी म हाहाकार अऊ रऊंदई अऊ आतंक होही, दीवारमन ला टोरके गिराय जाही अऊ पहाड़मन करा रोये जाही।
ISA 22:6 एलाम ह अपन सारथी अऊ घोड़ामन के संग तरकस ला लेथे; कीर सहर ह ढाल ला खोलथे।
ISA 22:7 तोर मनपसंद घाटीमन रथमन ले भरे हवंय, अऊ घुड़सवारमन सहर के दुवारमन म ठहिराय गे हवंय।
ISA 22:8 परभू ह यहूदा के सुरकछा ला हटा दीस, अऊ ओ दिन तेंह जंगल के महल के हथियारमन ला देखे।
ISA 22:9 तेंह देखे कि दाऊद के सहर के दीवारमन बहुंत जगह टूट गे रिहिन; तेंह खाल्हे के पोखरी म पानी ला इकट्ठा करे।
ISA 22:10 तेंह यरूसलेम म भवनमन के गनती करे अऊ दीवार ला मजबूत करे बर घरमन ला टोरके गिरा देय।
ISA 22:11 जुन्ना पोखरी के पानी बर तेंह दू ठन दीवार के बीच एक बांध बनवाय, पर तें ओकर ऊपर धियान नइं देय, जऊन ह येला बनाईस, या ओकर आदर नइं करे, जऊन ह बहुंत पहिले येकर योजना बनाय रिहिस।
ISA 22:12 परभू, सर्वसक्तिमान यहोवा ह ओ दिन तोला रोये अऊ बिलाप करे बर, अपन बाल नोचे बर अऊ बोरा के ओनहा पहिरे बर बलाईस।
ISA 22:13 पर देख, उहां आनंद अऊ खुसी मनाय जावत हे, गरूवा-बईलामन ला काटे अऊ भेड़-बकरी के बध करे जावत हे, मांस खाय अऊ अंगूर के मंद पीये जावत हे! तेंह कहिथस, “आवव, हमन खावन अऊ पीयन, काबरकि कल तो हमन ला मरना हे!”
ISA 22:14 सर्वसक्तिमान यहोवा ह मोर सुनत म ये परगट करे हवय: “तुम्हर मिरतू के दिन तक ये पाप ह छेमा नइं करे जावय,” परभू, सर्वसक्तिमान यहोवा ह कहत हे।
ISA 22:15 परभू सर्वसक्तिमान यहोवा ह ये कहत हे: “जावव, ये परबंधक, महल के अधिकारी सेबना ला कहव:
ISA 22:16 तेंह इहां का करत हस अऊ तोला कोन ह अनुमति दीस कि तेंह इहां अपन बर एक कबर खनवात हस, ऊंचहा जगह म अपन कबर बनवात हस अऊ चट्टान ला काटके अपन अराम के जगह ला बनवात हस?
ISA 22:17 “हे बलवान मनखे, सावधान रह, यहोवा तोला जोर से धरके दूरिहा फेंकनेचवाला हे।
ISA 22:18 ओह तोला गेंद कस बने करके लपेटही अऊ एक बड़े देस म फेंक दीही। उहां तें मर जाबे अऊ जऊन रथमन ऊपर तोला बहुंत घमंड रिहिस उहां ओ रथमन तोर मालिक के घर बर एक कलंक हो जाहीं।
ISA 22:19 मेंह तोला तोर जगह ले हटा दूहूं, अऊ तोला तोर पद ले निकाल दिये जाही।
ISA 22:20 “ओ दिन मेंह हिलकियाह के बेटा अपन दास, एलयाकीम ला बुलवाहूं।
ISA 22:21 मेंह ओला तोर अंगरखा पहिराहूं अऊ ओकर कनिहां म तोर कटिबंध ला बांधहूं अऊ तोर अधिकार ओकर हांथ म कर दूहूं। ओह यरूसलेम म रहइया अऊ यहूदा के मनखेमन बर एक ददा के सहीं ठहिरही।
ISA 22:22 में दाऊद के घराना के कुची ओकर कंधा म मढ़ाहूं; ओह जेला खोलही, ओला कोनो बंद नइं कर सकहीं, अऊ जेला ओह बंद करही, ओला कोनो खोल नइं सकहीं।
ISA 22:23 में ओला ठोस जगह म खूंटी सहीं गड़ियाहूं; ओह अपन ददा के घराना बर आदर के एक आसन बन जाही।
ISA 22:24 ओकर परिवार के पूरा महिमा ओकर ऊपर होही: येकर बंस अऊ संतानमन—येकर जम्मो छोटे-छोटे बरतन, कटोरामन ले लेके जम्मो सुराहीमन ओकर ऊपर टंगाहीं।
ISA 22:25 “ओ दिन म,” सर्वसक्तिमान यहोवा ह घोसना करत हे, “जऊन खूंटी ला ठोस जगह म गड़ियाय गे रिहिस, ओह ढीला हो जाही; येला काटके गिरा दिये जाही, अऊ ओकर ऊपर टंगे बोझा ला काटके गिरा दिये जाही।” यहोवा ह कहे हवय।
ISA 23:1 सूर सहर के बिरूध म अगमबानी: हे तरसीस के जहाजमन, बिलाप करव! काबरकि सूर ह नास हो गीस उहां न तो कोनो घर अऊ न ही कोनो बंदरगाह हवय। ये खबर ओमन ला कित्तीमन के देस ले मिले हवय।
ISA 23:2 हे समुंदर के टापू म रहइयामन अऊ सीदोनी बेपारीमन, जेमन ला नाविकमन धनी कर दे हवंय, चुप रहव।
ISA 23:3 महासागर ले होके सीहोर के अनाज आईस; नील नदी के ऊपज ह सूर के आमदनी रिहिस, अऊ ओह जाति-जाति के मनखेमन के बेपार के जगह हो गीस।
ISA 23:4 हे सीदोन, सरम कर, अऊ तें समुंदर के किला, काबरकि समुंदर ह कहे हवय: “न तो मोला कभू छेवारी के पीरा होईस अऊ न ही मेंह कोनो लइका जनमांय; मेंह न तो बेटामन ला पालें-पोसें अऊ न ही बेटीमन ला पोसके बड़े करेंव।”
ISA 23:5 जब खबर ह मिसर देस म आही, त सूर ले आय खबर ला सुनके ओमन ला पीरा होही।
ISA 23:6 तुमन पार होके तरसीस म जावव; हे टापू म रहइयामन, बिलाप करव।
ISA 23:7 का येह खुसी ले भरे तुम्हर सहर अय, पुराना, पुराना सहर, जेकर गोड़मन ओला दूरिहा देस म बसे बर ले गे हवंय?
ISA 23:8 सूर के बिरूध कोन ह ये योजना बनाईस, जऊन ह राजामन ला गद्दी म बईठावय, जेकर बेपारीमन हाकिम रिहिन, जेकर साहूकारमन धरती म नामी मनखे रिहिन?
ISA 23:9 सर्वसक्तिमान यहोवा ह येकर योजना बनाईस, ताकि ओकर सब गौरव के घमंड ला टोर देय अऊ धरती के जम्मो नामी मनखेमन ला नम्र करे।
ISA 23:10 हे बेटी तरसीस, जइसे ओमन नील नदी के संग करथें, वइसे अपन देस म होके जा, काबरकि तोर मेर अऊ कोनो बंदरगाह नइं ए।
ISA 23:11 यहोवा ह अपन हांथ ला समुंदर ऊपर बढ़ाय हवय राजमन ला हला दे हवय। यहोवा ह फीनीके के बारे म आदेस दे हवय कि ओकर किलामन ला नास करे जावय।
ISA 23:12 यहोवा ह कहिस, “हे कुंवारी बेटी सीदोन, अब तें कुचरे गे हस! तेंह अब खुस नइं हो सकस; “उठ, पार नाहकके कित्तीमन के देस म जा; पर उहां घलो तोला चैन नइं मिलय।”
ISA 23:13 बेबिलोनीमन के देस ला देखव, ये मनखेमन के अब लेखा-जोखा नइं ए! अस्सूर के मनखेमन येला मरू-भुइयां के पसुमन के एक जगह बना दे हवंय; ओमन अपन घेराबंदी के किला बनाय हवंय, ओमन येकर किलामन ला लूट ले हवंय अऊ येला खंडहर कर दे हवंय।
ISA 23:14 हे तरसीस के पानी जहाजमन, बिलाप करव; तुम्हर गढ़ ह नास हो गे हवय!
ISA 23:15 ओ समय सूर ला सत्तर बछर तक भुला दिये जाही, जऊन ह एक राजा के पूरा जिनगी के समय होथे। पर सत्तर बछर के बीते के बाद, येह सूर के संग होही, जइसे कि बेस्या के गीत हवय:
ISA 23:16 “हे बिसरा दिये गय बेस्या, एक ठन बीना लेके सहर म घुम; बने करके बीना ला बजा, बहुंत गीत गा, ताकि तोला सुरता करे जावय।”
ISA 23:17 सत्तर बछर बीते के बाद, यहोवा ह सूर ऊपर धियान दीही। ओह फेर अपन छिनारी के कमई म मन लगाके धरती भर के सब राजमन के संग अपन धंधा करही।
ISA 23:18 तभो ले ओकर लाभ अऊ ओकर कमई यहोवा बर अलग रखे जाही; ओला न तो भंडार म रखे जाही, न ही जमा करे जाही। ओकर आमदनी ह ओमन करा जाही, जेमन यहोवा के आघू म रहिथें, ताकि ओमन ला भरपूर जेवन अऊ सुघर ओनहा मिलय।
ISA 24:1 देखव, यहोवा ह धरती ला निरजन अऊ नास करइया हवय; ओह येकर सतह ला बरबाद कर दीही अऊ येमा निवास करइयामन ला तितिर-बितिर कर दीही—
ISA 24:2 जइसन मनखेमन के, वइसन पुरोहित के दसा होही, जइसन दास के, वइसन मालिक के, जइसन दासी के, वइसन मालकिन के, जइसन बिसोइया के, वइसन बेचइया के, जइसन उधार देवइया के, वइसन उधार लेवइया के, जइसन करजा देवइया के, वइसन करजा लेवइया के दसा होही।
ISA 24:3 धरती ह पूरा सुनसान पड़े होही अऊ पूरा लूट लेय जाही। काबरकि यहोवा ह ये बचन कहे हवय।
ISA 24:4 धरती सूख जाथे अऊ मुरझा जाथे, संसार ह दुरबल हो जाथे अऊ अइला जाथे, अकासमन घलो धरती के संग दुरबल हो जाथें।
ISA 24:5 धरती अपन मनखेमन के दुवारा असुध हो जाथे; काबरकि ओमन परमेसर के कानून अऊ बिधिमन ला नइं माने हवंय अऊ परमेसर के सदाकाल के करार ला टोर देय हवंय।
ISA 24:6 येकर कारन धरती ऊपर एक सराप पड़ही; अऊ येमा रहइयामन अपन दोस के फर भोगहीं। एकरसेति धरती के रहइयामन ला जलाय जाथे, अऊ बहुंत कम झन बांचे हवंय।
ISA 24:7 नवां अंगूर के मंद सूखा जाथे अऊ अंगूर के नार मुरझा जाथे; जम्मो आनंद मनइयामन कराहथें।
ISA 24:8 आनंद के डफली के अवाज ह बंद हो गीस, खुसी मनाय के कोलाहल ह बंद हो गे हवय, आनंदित बीना के अवाज सांत हो गे हवय।
ISA 24:9 ओमन गीत गावत फेर अंगूर के मंद नइं पीयंय; मंद ह येकर पीनेवालामन बर करू हो गे हवय।
ISA 24:10 उजरे सहर ह निरजन परे हवय; हर घर के कपाट ह बंद हो गे हवय।
ISA 24:11 गलीमन म मनखेमन अंगूर के मंद बर हल्ला करत हें; जम्मो खुसी ह दुख म बदल जावत हे, धरती म जम्मो आनंद के अवाज ह खतम हो गे हवय।
ISA 24:12 सहर ह उजाड़ पड़े हे, येकर दुवार ला टोरके कुटा-कुटा कर दे गे हवय।
ISA 24:13 जइसने जब जैतून रूख ला झारे जाथे, या जब अंगूर टोरे के बाद घलो कुछू अंगूरमन नार म बच जाथें, वइसने ही येह धरती ऊपर अऊ जाति-जाति के मनखेमन के बीच होही।
ISA 24:14 ओमन ऊंचहा अवाज म आनंद के मारे जय-जयकार करहीं; पछिम कोति ले ओमन यहोवा के महानता के जय-जयकार करहीं।
ISA 24:15 एकर कारन पूरब म यहोवा के महिमा करव; समुंदर के द्वीपमन म यहोवा, इसरायल के परमेसर के नांव ला ऊंचहा करव।
ISA 24:16 धरती के छोर ले हमन ला अइसन गीत के अवाज सुनई देवत हे: “धरमी जन के महिमा होवय।” पर मेंह कहेंव, “मेंह बेकार हो गेंव, मेंह बेकार हो गेंव! मोर ऊपर हाय! बिसवासघाती धोखा! बिसवासघात के संग बिसवासघाती धोखा!”
ISA 24:17 हे धरती के मनखेमन, तुम्हर बर आतंक अऊ खंचवा अऊ फांदा हवय।
ISA 24:18 जऊन ह घलो आतंक के अवाज ले भागही ओह खंचवा म गिरही; जऊन ह खंचवा म ले निकलही ओह फांदा म फंसही। काबरकि अकास के झरोखामन खुल गे हवंय, अऊ धरती के नीवमन डोलत हें।
ISA 24:19 धरती ह टूट गे हवय, धरती ह टूटके अलग हो गे हवय, धरती ह बहुंत डोलत हे।
ISA 24:20 धरती ह मतवार सहीं लड़खड़ाथे, येह हवा म एक झोपड़ी के सहीं डोलथे; येकर बिदरोह के दोस ह येकर ऊपर बहुंत भारी हवय कि येह गिरथे, अऊ फेर कभू नइं उठय।
ISA 24:21 ओ दिन यहोवा ह ऊपर अकास के सक्ति अऊ खाल्हे धरती के राजामन ला दंड दीही।
ISA 24:22 एक काल-कोठरी म बांधे गय कैदीमन सहीं ओमन ला एक संग संकेले जाही; ओमन ला जेल म बंद कर दिये जाही अऊ बहुंत दिन के बाद ओमन ला दंड दिये जाही।
ISA 24:23 चंदा ला डराय जाही, अऊ सूरज ह लज्जित होही; काबरकि सर्वसक्तिमान यहोवा ह सियोन पहाड़ ऊपर अऊ यरूसलेम म, अऊ येकर अगुवामन के आघू म बड़े महिमा के संग राज करही।
ISA 25:1 हे यहोवा, तें मोर परमेसर अस; मेंह तोर महिमा करत तोला ऊपर उठाहूं अऊ तोर नांव के परसंसा करहूं, काबरकि पूरा बिसवासयोग्यता म तेंह अद्भूत काम करे हस, ओ काम जेकर योजना बहुंत पहिले बनाय गे रिहिस।
ISA 25:2 तेंह सहर ला कचरा के एक ढेर बना दे हस, गढ़वाले नगर ला खंडहर बना दे हस, परदेसीमन के मजबूत गढ़वाला सहर अब नइं ए; येला फेर कभू बसाय नइं जावय।
ISA 25:3 एकरसेति बलवान मनखेमन तोर आदर करहीं; निरदयी जातिमन के नगरमन तोर आदर करहीं।
ISA 25:4 तेंह गरीबमन बर एक सरन-स्थान, जरूरतमंद बर ओमन के बिपत्ति म एक सरन-स्थान, आंधी म एक आसरय, अऊ घाम म एक छइहां के जगह रहे हस। काबरकि निरदयी के सांस ह दीवार म टकरावत एक आंधी के सहीं
ISA 25:5 अऊ मरू-भुइयां के गरमी सहीं अय। तेंह परदेसीमन के कोलाहल ला वइसने सांत करथस; जइसने बादर के छइहां के दुवारा गरमी ह सांत होथे, ओही किसम ले निरदयी के गीत ह सांत हो जाथे।
ISA 25:6 ये पहाड़ ऊपर सर्वसक्तिमान यहोवा ह जम्मो मनखेमन बर बढ़िया जेवन के एक भोज तियार करही, पुराना अंगूर के मंद के एक जेवनार— सबले बढ़िया मांस अऊ सबले बढ़िया अंगूर के मंद होही।
ISA 25:7 ये पहाड़ ऊपर, ओह ओ परदा ला नास करही जऊन ह जम्मो मनखेमन ला लपेटके रखथे, ओ चादर, जऊन ह सब जातिमन ला ढांपे हवय;
ISA 25:8 ओह मऊत ला हमेसा बर नास कर दीही। परमपरधान यहोवा ह सबो के चेहरा ले आंसू ला पोंछ दीही; ओह पूरा धरती ले अपन मनखेमन के कलंक ला हटा दीही। यहोवा ह कहे हवय।
ISA 25:9 ओ दिन ओमन कहिहीं, “खचित येह हमर परमेसर अय; हमन ओकर ऊपर भरोसा करेंन, अऊ ओह हमर उद्धार करिस। येह यहोवा अय, हमन ओकर भरोसा करे हवन; आवव, हमन ओकर उद्धार म आनंद अऊ खुसी मनावन।”
ISA 25:10 यहोवा के हांथ ह ये पहाड़ ऊपर बने रहिही; पर मोआब ह ओमन के देस म अइसन रऊंदे जाही जइसन पैंरा ह खातू म रऊंदे जाथे।
ISA 25:11 ओमन येमा अपन हांथ अइसन फईलाहीं, जइसन तउंरइयामन तउंरे बर अपन हांथ फईलाथें। पर ओमन के हांथ के चतुरई के बावजूद परमेसर ह ओमन के घमंड ला टोर दीही।
ISA 25:12 ओह तुम्हर ऊंच गढ़वाले दीवारमन ला खाल्हे ले आही अऊ खाल्हे गिरा दीही; ओह ओमन ला भुइयां म ले आही, अऊ माटी म मिला दीही।
ISA 26:1 ओ दिन यहूदा देस म ये गीत गाय जाही: हमर एक ठन मजबूत सहर हवय; परमेसर उद्धार ला बनाथे येकर दीवार अऊ गढ़ के घेरामन ला बनाथे।
ISA 26:2 सहर के दुवारमन ला खोलव ताकि धरमी जाति ह भीतर आवय, ओ जाति जऊन ह बिसवास ला बनाय रखथे।
ISA 26:3 जेमन के मन ह तोर बर अटल बने रहिथे, ओमन ला तें पूरा सांति म रखथस, काबरकि ओमन तोर ऊपर भरोसा करथें।
ISA 26:4 यहोवा ऊपर हमेसा बर भरोसा रखव, काबरकि यहोवा, यहोवा खुद सदाकाल के चट्टान अय।
ISA 26:5 ओह ओमन ला नम्र करथे, जेमन डींग मारथें, ओह ऊंच सहर ला खाल्हे ले आथे; ओह येला भुइयां म समतल कर देथे अऊ येला धुर्रा म मिला देथे।
ISA 26:6 गोड़मन येला कुचर देथें— सताय गय मनखेमन के गोड़मन, गरीबमन के गोड़मन येला कुचर देथें।
ISA 26:7 धरमी के डहार ह समतल होथे; तें, धरमी जन अस अऊ धरमी के डहार ला सरल बनाथस।
ISA 26:8 हे यहोवा, हव, तोर कानून के रसता म चलत, हमन तोर बाट जोहत हन; तोर नांव अऊ खियाती के हमर मन ह लालसा करथे।
ISA 26:9 रथिया मोर परान ह तोर लालसा करथे; बिहनियां मोर मन ह तोर लालसा करथे। जब तोर नियाय के काम धरती ऊपर होथे, तब संसार के मनखेमन, धरमीपन सीखथें।
ISA 26:10 पर जब दुस्ट ऊपर दया घलो करे जाथे, तभो ले ओह धरमीपन के बात ला नइं सीखय; सीधवा मनखेमन के देस म घलो ओमन दुस्टता करते रहिथें अऊ यहोवा के महानता के आदर नइं करंय।
ISA 26:11 हे यहोवा तोर हांथ ह उठे हवय, पर ओमन येला नइं देखंय। ओमन तोर मनखेमन बर तोर उत्साह ला देखंय अऊ लज्जित होवंय; तोर बईरीमन बर रखे आगी ह ओमन ला भसम कर देवय।
ISA 26:12 हे यहोवा, तें हमर बर सांति लानथस; हमर करा जऊन कुछू घलो हवय, ओला तेंह हमर बर करे हवस।
ISA 26:13 हे यहोवा हमर परमेसर, तोर अलावा अऊ मालिकमन हमर ऊपर सासन करे हवंय, पर सिरिप तोरेच नांव ला हमन आदर देथन।
ISA 26:14 ओमन मर गीन, ओमन अब जीयत नइं एं; ओमन के आतमा जी नइं उठय तेंह ओमन ला दंड देय अऊ ओमन ला नास कर देय; तें ओमन के सुरता ला घलो मेटा देय।
ISA 26:15 हे यहोवा, तेंह जाति ला बढ़ाय हस; तेंह जाति ला बढ़ाय हस। तेंह अपन बर महिमा देखाय हस; तेंह देस के सब सीमना ला बढ़ाय हस।
ISA 26:16 हे यहोवा, दुख म ओमन तोला सुरता करिन; जब तें ओमन के ताड़ना करे, तब ओमन मुसकिल से फुसफुसाके पराथना कर सकत रिहिन।
ISA 26:17 जइसन गरभवती माईलोगन ह लइका जनमावत बेरा पीरा म छटपटाथे अऊ चिचियाथे, हे यहोवा, हमर स्थिति घलो तोर आघू म वइसन हो गे रिहिस।
ISA 26:18 हमन गरभवती रहेंन, हमन पीरा म छटपटायेंन, पर हमन मानो हवा ला ही जनमेंन। हमन धरती बर कोनो उद्धार के काम नइं करेंन, अऊ न ही संसार के मनखेमन जिनगी पाईन।
ISA 26:19 पर हे यहोवा, तोर मरे मनखेमन जी जाहीं; ओमन के देहेंमन उठके ठाढ़ होहीं— जेमन माटी म निवास करथें, ओमन जागंय अऊ आनंद के मारे जय-जयकार करंय— तोर ओस ह बिहनियां के ओस सहीं अय; धरती ह अपन मुरदामन ला लहुंटा दीही।
ISA 26:20 हे मोर मनखेमन, जावव, अपन खोलीमन म जावव अऊ कपाटमन ला बंद कर लेवव; थोरकन देर बर अपनआप ला छुपाके रखव जब तक कि गुस्सा ह सांत नइं हो जावय।
ISA 26:21 देखव, यहोवा ह अपन निवास ले बाहिर निकलत हे ताकि धरती के मनखेमन ला ओमन के पाप के दंड देवय। धरती ह अपन ऊपर बहे खून ला परगट कर दीही; धरती ह घात करे गय मनखेमन ला अऊ छुपाके नइं रखही।
ISA 27:1 ओ दिन, यहोवा ह अपन तलवार ले— अपन भयंकर, बड़े अऊ मजबूत तलवार ले— लिबयातान नांव के टेड़गा रेंगइया सांप, लिबयातान नांव के कुंडली मरइया सांप ला दंड दीही; ओह समुंदर के बड़े अऊ बिकराल जन्तु ला मार डारही।
ISA 27:2 ओ दिन— “फर देवइया एक अंगूर के बारी के बारे म गीत गाहू:
ISA 27:3 में, यहोवा ह येकर रकछा करथंव; मेंह लगातार येमा पानी पलोथंव। मेंह रात-दिन येकर पहरेदारी करथंव, ताकि कोनो येकर हानि झन करंय।
ISA 27:4 मेंह गुस्सा नइं करत हंव। यदि मोर आघू म उहां सिरिप झाड़ी अऊ कांटामन होतिन! त मेंह ओमन के बिरूध लड़े बर आघू बढ़तेंव; मेंह ओ जम्मो म आगी लगा देतेंव।
ISA 27:5 या फेर ओमन मोर मेर सरन लेय बर आवंय; ओमन मोर संग म मेल-मिलाप कर लेवंय, हव, ओमन मोर संग मेल-मिलाप कर लेवंय।”
ISA 27:6 अवइया दिनमन म याकूब ह जरी धरही, इसरायल ह बढ़ही अऊ ओमा फूल धरही अऊ पूरा संसार ला फर ले भर दीही।
ISA 27:7 का यहोवा ह ओला वइसने मारिस जइसने ओह ओमन ला मारिस, जेमन ओला मारिन? का ओह वइसने मार डारे गीस जइसने ओमन मार डारे गीन, जेमन ओला मार डारिन?
ISA 27:8 लड़ई अऊ बंधुवई के दुवारा तें ओकर संग लड़— अपन भयंकर आंधी ले ओह ओला भगा देथे। जइसे एक दिन पुरवाही हवा चलथे।
ISA 27:9 तब एकर दुवारा, याकूब के अधरम के पछताप करे जाही, अऊ ओकर पाप दूर होय के फर ये होही: जब ओह बेदी के जम्मो पथरामन ला चूना के पथरा सहीं कुचरके कुटा-कुटा कर देथे, तब कोनो असेरा के खंभा या धूप के बेदी ला सही-सलामत नइं छोंड़े जाही।
ISA 27:10 काबरकि गढ़वाला नगर निरजन हो गे हवय, एक छोंड़े गय बस्ती ला निरजन जगह सहीं तियाग दिये गे हवय; उहां बछवामन चरथें, उहां ओमन बईठथें; अऊ येकर डंगालीमन ला खाके ठुठवा कर देथें।
ISA 27:11 जब येकर छोटे डंगालीमन सूख जाथें, त ओमन टूट जाथें अऊ माईलोगनमन आके ओमन ला जला देथें। काबरकि येमन बिगर समझवाले मनखे अंय; एकरसेति ओमन के बनानेवाला ओमन ऊपर दया नइं करय, अऊ ओमन के सिरिस्टी करइया ह ओमन ऊपर किरपा नइं करय।
ISA 27:12 ओ दिन यहोवा ह फरात नदी ले लेके मिसर के नरवा तक अपन अनाज ला पछिनही, अऊ हे इसरायलीमन, तुमन एक-एक करके इकट्ठा करे जाहू।
ISA 27:13 अऊ ओ दिन एक बड़े तुरही फूंके जाही। जेमन अस्सूर देस म नास होवत रिहिन अऊ जेमन मिसर देस म बंधुवई म रिहिन, ओमन आहीं अऊ यरूसलेम म पबितर पहाड़ ऊपर यहोवा के अराधना करहीं।
ISA 28:1 ओ मुकुट ऊपर हाय, जऊन ह एपरैम के मतवारमन के घमंड अय, ओ मुरझावत फूल ऊपर हाय, ओकर महिमामय सुघरता, जऊन ह एक उपजाऊ घाटी के टीप म रखे हवय— ओ सहर ऊपर हाय, जेकर घमंड ला अंगूर के मंद के दुवारा खतम करे गे हवय!
ISA 28:2 देखव, परभू करा एक झन हवय, जऊन ह बलवान अऊ मजबूत हे। करा के आंधी या नास करइया गरेर के सहीं, तेज बारिस अऊ मूसलाधार बारिस के सहीं, ओह येला बहुंत जोर से भुइयां म फटिक दीही।
ISA 28:3 एपरैम के मतवारमन के घमंड के ओ मुकुट ला गोड़ खाल्हे रऊंदे जाही।
ISA 28:4 ओ मुरझावत फूल, ओकर महिमामय सुघरता, जऊन ह एक उपजाऊ घाटी के टीप म रखे हवय, ओह कटनी के पहिले पाके अंजीर के सहीं होही— जेमन ला मनखेमन देखते ही अपन हांथ म लेथें, अऊ ओमन ला लील जाथें।
ISA 28:5 ओ दिन सर्वसक्तिमान यहोवा ह एक महिमामय मुकुट होही, अपन बांचे मनखेमन बर एक सुघर मुकुट ठहिरही।
ISA 28:6 ओह ओकर बर नियाय के एक आतमा होही जऊन ह नियाय के आसन म बईठथे, ओह ओमन बर ताकत के मूल होही जेमन बईरीमन ला वापिस दुवार कोति ढकेल देथें।
ISA 28:7 अऊ येमन घलो अंगूर के मंद पीके डगमगाथें अऊ मंद ले लड़खड़ाथें: पुरोहित अऊ अगमजानीमन मंद पीके डगमगाथें अऊ अंगूर के मंद पीके गिर जाथें; ओमन मंद पीके लड़खड़ाथें, ओमन डगमगाथें, जब ओमन दरसन देखथें, ओमन लड़खड़ाथें, जब ओमन फैसला सुनाथें।
ISA 28:8 जम्मो मेजमन उल्टी ले भरे हवंय अऊ अइसे कोनो जगह नइं बांचे हवय, जिहां गंदगी नइं ए।
ISA 28:9 “येह कोन ए, जेला ओह सिखाय के कोसिस करत हे? कोन ला ओह अपन संदेस के अर्थ समझावत हे? का ओ लइकामन ला, जेमन के दूध छोंड़ाय गे हवय, का ओमन, जेमन ला अभी-अभी दाई के थन ले अलग करे गे हवय?
ISA 28:10 काबरकि येह अय: येला करव, ओला करव, एक नियम येकर बर, एक नियम ओकर बर; थोरकन इहां, थोरकन उहां।”
ISA 28:11 तब बहुंत अछा, परदेसी भासा अऊ अनजान बोली के संग परमेसर ह ये मनखेमन ले गोठियाही,
ISA 28:12 जऊन मन ला ओह कहिस, “येह अराम करे के जगह अय, थके मनखेमन अराम करंय”; अऊ, “येह अराम करे के जगह अय”— पर ओमन सुने नइं चाहिन।
ISA 28:13 एकरसेति, यहोवा के बचन ह ओमन बर बन जाही: येला करव, ओला करव, एक नियम येकर बर, एक नियम ओकर बर; थोरकन इहां, थोरकन उहां— ताकि जब ओमन जावंय, त ओमन पाछू के भार गिरंय; अऊ घायल हो जावंय अऊ फांदा म फंसके पकड़े जावंय।
ISA 28:14 येकर कारन, हे ठट्ठा करइयामन, जेमन यरूसलेम म ये मनखेमन ऊपर सासन करथव, यहोवा के बचन ला सुनव।
ISA 28:15 तुमन ये डींग मारथव, “हमन मऊत के संग करार करे हन, मिरतू-लोक के संग हमन एक समझौता करे हन। एकर कारन जब बिपत्ति बाढ़ सहीं आथे, त येह हमन ला छू नइं सकय, काबरकि हमन झूठ के सरन लेय हवन अऊ लबारी के आड़ म लुकाय हवन।”
ISA 28:16 एकरसेति परमपरधान यहोवा ह ये कहत हे: “देखव, मेंह सियोन म एक ठन पथरा, एक परखे पथरा, एक ठन कीमती कोना के पथरा, एक मजबूत नीव बर रखे हंव; अऊ जऊन कोनो येकर ऊपर बिसवास करही ओह कभू आतंकित नइं होही।
ISA 28:17 मेंह नियाय ला नापे के डोरी अऊ धरमीपन ला साहुल ठहिराहूं; करा ह तुम्हर झूठ के सरन-स्थान ला बोहाके ले जाही, अऊ तुम्हर लुकाय के जगह ह पानी म बुड़ जाही।
ISA 28:18 मऊत के संग तुम्हर करार ह टूट जाही; अऊ मिरतू-लोक के संग तुम्हर समझौता ह नइं ठहिरही। जब बाढ़ सहीं बिपत्ति ह आही, तब तुमन ओमा कुचरे जाहू।
ISA 28:19 जब-जब भी येह आही, येह तुमन ला दूरिहा ले जाही; बिहनियां के बाद बिहनियां, रात अऊ दिन, येह आके नुकसान करही।” ये संदेस के समझ ह भयंकर आतंक लानही।
ISA 28:20 बिछौना ह हांथ-गोड़ फईलाय बर बहुंत छोटे हे, अऊ ओढ़ना ह ओढ़े बर सांकुर हवय।
ISA 28:21 काबरकि यहोवा ह वइसन उठके ठाढ़ होही, जइसन ओह परासीम नांव पहाड़ म ठाढ़ होय रिहिस, ओह अपनआप ला वइसन देखाही, जइसन ओह गिबोन के घाटी म देखाय रिहिस— ताकि ओह अपन काम, अपन अद्भूत काम ला करय, अऊ अपन काम, अपन अलग किसम ला देखावय।
ISA 28:22 एकरसेति अब तुमन ठट्ठा झन करव, नइं तो तुम्हर बेड़ीमन ला अऊ भारी कर दिये जाही; परभू, सर्वसक्तिमान यहोवा ह मोला बताय हवय कि पूरा देस के बिरूध बिनास के फैसला करे गे हवय।
ISA 28:23 धियान दव अऊ मोर अवाज ला सुनव, धियान दव अऊ मोर बात ला सुनव।
ISA 28:24 का कोनो किसान बीज बोय बर नांगर जोतथे, त का लगातार जोतत रहिथे? का ओह लगातार माटी ला फोरथे अऊ काम करत रहिथे?
ISA 28:25 जब ओह भुइयां ला समतल कर लेथे, त का ओह अजवाईन ला नइं बोवय अऊ जीरा ला नइं छिंचय? का ओह गहूं ला येकर जगह म, जौ ला येकर भाग म अऊ कठिया गहूं ला येकर खेत के मुड़ा म नइं बोवय?
ISA 28:26 ओकर परमेसर ह ओला सही तरीका सिखोथे अऊ बताथे।
ISA 28:27 अजवाईन ला बेलन चलाके नइं मिंजे जावय, न ही जीरा ऊपर गाड़ी के चक्का चलाय जावय; अजवाईन ला छड़ी ले अऊ जीरा ला लउठी ले पीटके झर्राय जाथे।
ISA 28:28 रोटी बनाय बर अनाज ला पीसना जरूरी अय; पर ओला कोनो हमेसा मिंजत नइं रहय। मिंजई करे के गाड़ी के चक्का ह येकर ऊपर चल सकत हे, पर कोनो मनखे अनाज ला पीसे बर घोड़ामन के उपयोग नइं करय।
ISA 28:29 ये जम्मो चीज घलो सर्वसक्तिमान यहोवा करा ले आथे, जेकर योजना ह अद्भूत अय, जेकर बुद्धि ह उत्तम अय।
ISA 29:1 तोर ऊपर हाय, अरीएल, अरीएल, ओ नगर जेमा दाऊद निवास करत रिहिस! बछर ऊपर बछर जोड़त जावव अऊ अपन तिहारमन ला मनाते जावव।
ISA 29:2 तभो ले मेंह तो अरीएल ला संकट म डारहूं; ओह रोही अऊ बिलाप करही, अऊ ओह मोर नजर म एक अरीएल सहीं ठहिरही।
ISA 29:3 मेंह तोर बिरूध चारों कोति डेरा डालहूं; मेंह मीनार बनाके तोला घेर लूहूं अऊ तोर बिरूध सैनिक घेरा डालहूं।
ISA 29:4 तोला खाल्हे लाने जाही, तेंह भुइयां ले गोठियाबे; तेंह धुर्रा म ले बड़बड़ाबे। एक भूत सहीं तोर अवाज धरती ले आही; धुर्रा म ले तोर कानाफूसी के अवाज आही।
ISA 29:5 पर तोर बहुंते बईरीमन बारिक धुर्रा सहीं हो जाहीं, निरदयी उपदरवी भीड़ ह उड़ियाय भूंसा सहीं। अचानक, पल भर म,
ISA 29:6 सर्वसक्तिमान यहोवा ह गरजत अऊ भुइंडोल अऊ बड़े अवाज के संग, बवंडर अऊ आंधी अऊ भसम करइया आगी के संग आही।
ISA 29:7 तब जम्मो जाति के उपदरवी भीड़, जेमन अरीएल के बिरूध लड़थें, जेमन ओकर अऊ ओकर किला ऊपर हमला करके ओला घेर लेथें, येह रथिया देखे गय एक सपना, एक दरसन के सहीं होही—
ISA 29:8 येह अइसन होही, जइसे कोनो भूखा मनखे जेवन करे के सपना देखथे, पर जब ओह जागथे, त भूखन ही रहिथे; या कोनो पीयासन मनखे पानी पीये के सपना देखथे, पर जब जागथे, त दुरबल अऊ पीयासन ही रहिथे। अइसन ही ओ जम्मो जातिमन के उपदरवी भीड़ के दसा होही जेमन सियोन पहाड़ के बिरूध लड़थें।
ISA 29:9 ठहर जावव अऊ अचम्भो करव, अपनआप ला अंधरा कर लव अऊ झन देखव; मतवार बन जावव, पर अंगूर के मंद पीके नइं, लड़खड़ावव, पर मंद पीके नइं।
ISA 29:10 यहोवा ह तुमन ला भारी नींद म डाल देय हवय: ओह तुम्हर आंखीमन (अगमजानीमन) म मुहर लगा दे हवय; ओह तुम्हर मुड़मन (अगम-दरसीमन) ला ढांप दे हवय।
ISA 29:11 तुम्हर बर ये पूरा दरसन कुछू नइं, पर एक किताब म लिखे मुहरबंद बचन अय। अऊ कहूं तुमन ये किताब कोनो मनखे ला देथव, जऊन ह पढ़ सकथे, अऊ तुमन कहिथव, “येला पढ़,” अऊ ओह कहिथे, “मेंह नइं पढ़े सकंव, काबरकि येमा मुहर लगे हवय।”
ISA 29:12 या कहूं तुमन ये किताब कोनो अइसने मनखे ला देथव जऊन ह पढ़ नइं सकय, अऊ तुमन कहिथव, “येला पढ़,” त ओह जबाब दीही, “मेंह तो पढ़े बर नइं जानंव।”
ISA 29:13 परभू ह कहिथे: “ये मनखेमन अपन बचन के संग मोर लकठा म आथें अऊ अपन ओंठ ले मोर आदर करथें, पर ओमन के हिरदय ह मोर ले दूरिहा हवय। ओमन के मोर अराधना करई मनखेमन के बनाय नियममन ऊपर अधारित हे, जेला ओमन ला सिखाय गे हवय।
ISA 29:14 एकरसेति, मेंह ये मनखेमन ला एक बार फेर अद्भूत काम ऊपर अद्भूत काम करके चकित करहूं; बुद्धिमान के बुद्धि ह नास होही, होसियारमन के होसियारी ह जावत रहिही।”
ISA 29:15 हाय ओमन ऊपर, जेमन अपन चलाकी ला यहोवा ले लुकाय बर अब्बड़ कोसिस करथें, अऊ अपन काम अंधियार म करके कहिथें अऊ सोचथें, “हमन ला कोन देखत हे? येला कोन ह जानही?”
ISA 29:16 तुमन चीजमन ला उल्टा पुलटा कर देथव, मानो कुम्हार ह माटी के सहीं समझे गीस! का बनाय गय चीज ह अपन बनानेवाला ला कहिथे, “तेंह मोला नइं बनाय हस”? का बरतन ह कुम्हार ले कह सकथे, “तेंह कुछू नइं जानस”?
ISA 29:17 का थोरकन समय म ही, लबानोन ह उपजाऊ भुइयां म नइं बदले जाही अऊ उपजाऊ भुइयां जंगल सहीं जान पड़थे?
ISA 29:18 ओ दिन भैंरामन किताब के बात ला सुनहीं, धुंधलापन ले अऊ अंधियार म ले अंधरामन के आंखीमन देखन लगहीं।
ISA 29:19 एक बार फेर नम्र मनखे ह यहोवा म आनंदित होही; अऊ जरूरतमंद ह इसरायल के पबितर परमेसर म आनंदित होही।
ISA 29:20 निरदयी ह गायब हो जाही, ठट्ठा करइयामन के अन्त हो जाही, अऊ जेमन बुरई करे के नजर रखथें, ओमन काट डारे जाहीं—
ISA 29:21 जेमन अपन बात से आने मनखे ला दोसी ठहिराथें, जेमन अदालत म बचाव करइया ला फंसा लेथें अपन लबारी गवाही के दुवारा निरदोस के नियाय ला बिगाड़थें।
ISA 29:22 एकरसेति यहोवा, जऊन ह अब्राहम ला छोंड़ाईस, याकूब के संतानमन ले ये कहत हे: “याकूब ह अब लज्जित नइं होही; ओमन के चेहरा अब उदास नइं होही।
ISA 29:23 जब याकूब के संतानमन अपन बीच मोर हांथ के काममन ला देखहीं, तब ओमन मोर आदर करहीं, ओमन याकूब के पबितर परमेसर के पबितरता ला मानहीं, अऊ इसरायल के परमेसर के भय म ठाढ़ होहीं।
ISA 29:24 जेमन आतमा म जिद्दी अंय, ओमन समझदार होहीं; जेमन कुड़कुड़ाथें, ओमन सिकछा ला गरहन करहीं।”
ISA 30:1 “जिद्दी लइकामन ऊपर हाय,” यहोवा ह घोसना करत हे, “हाय ओमन ऊपर, जेमन ओ योजना ऊपर काम करथें, जऊन ह मोर नो हय, करार तो करथें, पर मोर आतमा के दुवारा नइं, अऊ अइसन करके पाप ऊपर पाप करत जाथें;
ISA 30:2 जेमन बिगर मोर ले पुछे खाल्हे मिसर देस जाथें; जेमन आसा करथें कि फिरौन ह ओमन के बचाव करे, अऊ ओमन मिसर के छइहां म सरन लेवंय।
ISA 30:3 पर फिरौन के बचाव ले तुमन लज्जित होहू, अऊ मिसर के छइहां ह तुमन ला कलंकित करही।
ISA 30:4 हालाकि ओमन के करमचारीमन सोअन सहर म हवंय अऊ ओमन के दूतमन अब हानेस सहर म हबर गे हवंय।
ISA 30:5 पर हर एक ला लज्जित होय बर पड़ही काबरकि एक किसम के मनखेमन ओमन बर बेकार साबित होहीं, जेमन ले न तो कोनो मदद मिलही अऊ न ही ओमन ले कोनो फायदा होही, पर ओमन सिरिप लज्जा अऊ कलंक के कारन बनहीं।”
ISA 30:6 नेगेव के पसुमन के बारे म एक अगमबानी: कठिनई अऊ दुख ले भरे देस ले होवत, सेर अऊ सेरनीमन ले होवत, बिसैला अऊ फुफकारत सांपमन ले होवत, दूतमन अपन धन-दौलत गदहामन के पीठ ऊपर, अऊ अपन खजानामन ला ऊंटमन के पीठ म लादके ओ देस म लाथें, जिहां ओमन ला कोनो फायदा नइं होवय,
ISA 30:7 याने कि मिसर देस म लाथें, जेकर मदद ह एकदम बेकार अय। एकरसेति मेंह ओकर नांव राहाब, कुछू नइं करइया रखे हंव।
ISA 30:8 अब जा, येला ओमन बर एक ठन पटिया म खोदके लिख, एक किताब म लिख, ताकि अवइया दिनमन बर येह सदाकाल के एक गवाही होवय।
ISA 30:9 काबरकि येमन बिदरोही मनखे, धोखा देवइया लइकामन अंय, अइसन लइकामन अंय, जेमन यहोवा के सिकछा ला सुने नइं चाहत हें।
ISA 30:10 ओमन अगम-दरसीमन ला कहिथें, “अऊ दरसन झन देखव!” अऊ अगमजानीमन ला कहिथें, “हमन ला ओ दरसन के बात झन बतावव, जऊन ह सही अय! हमन ले खुसी देवइया बात कहव, मोह लेवइया बात के अगमबानी करव।
ISA 30:11 ये डहार ला छोंड़व ये रद्दा ले हट जावव, अऊ इसरायल के पबितर परमेसर के संग हमर बिरोध करई बंद करव!”
ISA 30:12 एकर कारन इसरायल के पबितर परमेसर ह ये कहत हे: “काबरकि तुमन ये संदेस ला अस्वीकार करे हव, अतियाचार ऊपर बिसवास करे हव अऊ धोखा ऊपर भरोसा करे हव,
ISA 30:13 एकरसेति ये पाप ह तुम्हर बर अइसन हो जाही जइसन कोनो ऊंचहा दीवार म दरार पड़थे अऊ टूटे लगथे, ओह अचानक पल भर म टूटके गिर जाथे।
ISA 30:14 येह माटी के बरतन सहीं फूटके कुटा-कुटा हो जाही, चकनाचूर होके अइसन बिखर जाही कि ओकर टुकड़ा के एक ठिकरा घलो नइं मिलही जेकर ले अंगीठी म ले आगी निकाले जावय या टांकी म ले पानी निकाले जाय।”
ISA 30:15 परमपरधान यहोवा, इसरायल के पबितर परमेसर ह ये कहत हे: “पछताप करके चुप रहे म तुम्हर उद्धार हवय, सांत रहिके भरोसा करे म तुम्हर ताकत हवय, पर तुमन येमा के एको ठन चीज नइं करेव।
ISA 30:16 तुमन कहेव, ‘नइं, हमन तो घोड़ा म चघके भाग जाबो।’ एकरसेति तुमन भागहू! तुमन कहेव, ‘हमन तेज भगइया घोड़ामन म सवारी करबो।’ एकरसेति तुम्हर पीछा करइयामन तुम्हर ले तेज होहीं!
ISA 30:17 एके जन के धमकी ले एक हजार भागहीं; पांच जन के धमकी ले तुमन जम्मो के जम्मो भागहू, जब तक तुमन कोनो पहाड़ के टीप म झंडा के एक लउठी या पहाड़ी के ऊपर एक झंडा सहीं नइं छोंड़ दिये जावव।”
ISA 30:18 तभो ले यहोवा ह तुम्हर ऊपर अनुग्रह करे के ईछा रखथे; एकरसेति ओह तुम्हर ऊपर दया देखाय बर ठाढ़ होही। काबरकि यहोवा ह नियाय के परमेसर अय धइन अंय ओ जम्मो, जेमन ओकर ऊपर आसा लगाय रहिथें!
ISA 30:19 हे सियोन के मनखेमन, जेमन यरूसलेम म रहिथव, तुमन ला अऊ रोना नइं पड़य। जब तुमन ओला मदद बर पुकारहू, त ओह तुम्हर ऊपर अनुग्रह करही! ओह तुम्हर बात सुनते ही तुमन ला जबाब दीही।
ISA 30:20 हालाकि परभू ह तुमन ला बिपत्ति के रोटी अऊ दुख के पानी देथे, तभो ले तुम्हर गुरूमन अब लुकाय नइं रहंय; तुमन अपन आंखी ले ओमन ला देखहू।
ISA 30:21 चाहे तुमन जेवनी मुड़व या डेरी कोति मुड़व, तुमन ला अपन पाछू म एक अवाज ये कहत सुनई दीही, “येह ओ डहार अय; इही म रेंगव।”
ISA 30:22 तब तुमन ओ मूरतीमन ला अपबितर करहू, जेमन म चांदी मढ़े गे हवय अऊ जेमन ला सोन ले मढ़े गे हवय; तुमन ओमन ला माहवारी के ओनहा सहीं फेंक दूहू अऊ ओमन ला कहिहू, “दूरिहा होवव!”
ISA 30:23 यहोवा ह तुम्हर ओ बीजा बर पानी बरसाही, जेला तुमन भुइयां म बोथव, अऊ भुइयां के ऊपज याने कि जेवन घलो बढ़िया अऊ भरपूर होही। ओ दिन तुम्हर पसुमन बड़े-बड़े चरागन म चरहीं।
ISA 30:24 खेत म काम करइया बईला अऊ गदहामन रांपा अऊ बेलचा ले फईलाय भूंसा अऊ चारा खाहीं।
ISA 30:25 बड़े महा संहार के दिन, जब खंभामन गिरहीं, त पानी के झरनामन हर एक ऊंच पहाड़ अऊ ऊंच पहाड़ी ले बहत आहीं।
ISA 30:26 जब यहोवा ह अपन मनखेमन ला लगे चोट म पट्टी बांधही अऊ ओमन ला दिये घावमन ला चंगा करही, तब चंदा के अंजोर सूरज सहीं, अऊ सूरज के अंजोर सात गुना अऊ अंजोर हो जाही, याने कि पूरा सात दिन के अंजोर सहीं होही।
ISA 30:27 देखव, यहोवा ह दूरिहा ले भड़के गुस्सा अऊ धुआं के घना बादल के संग आवत हे; ओकर ओंठमन कोप ले भरे हवंय, अऊ ओकर जीभ ह भसम करइया आगी सहीं अय।
ISA 30:28 ओकर सांस ह उमड़त पानी के धारा सहीं अय, जऊन ह घेंच तक हबरत हे। ओह सब जातिमन ला बिनास के छननी ले छानथे; ओह मनखेमन के जबड़ा म ओ लगाम लगाथे, जऊन ह ओमन ला रसता ले भटका देथे।
ISA 30:29 तब तुमन अइसन गाहू जइसन तुमन कोनो पबितर तिहार ला मनाय के बेरा रथिया गाथव; तुम्हर मन ह अइसन आनंदित होही जइसन मनखेमन यहोवा के पहाड़, इसरायल के चट्टान मेर ऊपर जाय के बेरा बंसी बजात जाथें।
ISA 30:30 यहोवा अपन परतापी बचन मनखेमन ला सुनाही अऊ भयंकर कोरोध अऊ भसम करइया आगी के संग, भारी बारिस, बादर के गरजन अऊ करा के संग, मनखेमन ला अपन भुजबल देखाही।
ISA 30:31 यहोवा के अवाज ह अस्सूर ला कुटा-कुटा कर दीही; अपन सुंटी ले ओह ओमन ला मार गिराही।
ISA 30:32 अपन दंड देवइया गदा ले ओमन ऊपर जब यहोवा ह चोट करथे त हर एक चोट ह डफली अऊ बीना के संगीत म होही, जब ओह अपन हांथ ले मुक्का मारत ओमन ले लड़ई करथे।
ISA 30:33 बहुंत समय ले तोपेत ला तियार करे गे हवय; येला राजा बर तियार करे गे हवय। येकर आगी के खंचवा ला गहिला अऊ चौड़ा बनाय गे हवय, येमा बहुंत अकन आगी अऊ लकरी हवय; यहोवा के सांस ह बरत गंधक के धारा सहीं ओमा आगी लगा देथे।
ISA 31:1 ओमन ऊपर हाय, जेमन मदद पाय बर खाल्हे मिसर देस म जाथें, जेमन घोड़ामन के आसरा करथें, जेमन अपन भारी संखिया के रथमन ऊपर भरोसा रखथें अऊ अपन घुड़सवारमन के बड़े ताकत ऊपर भरोसा करथें, पर इसरायल के पबितर परमेसर कोति नइं देखंय, अऊ न ही यहोवा ले मदद मांगंय।
ISA 31:2 पर ओह घलो बुद्धिमान अय अऊ बिपत्ति ला सकथे; ओह अपन बचन ला वापिस नइं लेवय। ओह ओ दुस्ट जाति के बिरूध ठाढ़ होही, ओह ओमन के बिरूध ठाढ़ होही, जेमन कुकरमीमन के मदद करथें।
ISA 31:3 पर मिसरीमन सिरिप मरनहार मनखे अंय। परमेसर नइं; ओमन के घोड़ामन आतमा नो हंय, पर मांस ही अंय। जब यहोवा ह अपन हांथ ला बढ़ाही, त जेमन मदद करथें ओमन लड़खड़ाहीं, अऊ जेमन मदद पाथें ओमन गिरहीं; जम्मो के जम्मो एक संग नास होहीं।
ISA 31:4 यहोवा ह मोला ये कहत हे: “जइसन सिंह ह एक बड़े सिंह ह अपन सिकार ऊपर गुर्राथे— अऊ चरवाहामन के पूरा दल येकर बिरूध आय ले घलो येह ओमन के अवाज ले नइं डरावय या ओमन के हल्ला-गुल्ला से येला कोनो फरक नइं पड़य— वइसने ही सर्वसक्तिमान यहोवा ह खाल्हे आके सियोन पहाड़ ऊपर अऊ येकर ऊंचई म लड़ई करही।
ISA 31:5 जइसे चिरईमन मुड़ ऊपर मंडराथें, वइसे सर्वसक्तिमान यहोवा ह यरूसलेम के रकछा करही; ओह ओकर रकछा करही अऊ ओला छोंड़ाही, ओह ओमा ले होके जाही अऊ ओला बचाही।”
ISA 31:6 हे इसरायलीमन, जेकर बिरूध म तुमन भारी बिदरोह करे हवव, ओकर मेर लहुंटके आवव।
ISA 31:7 काबरकि ओ दिन, तुमन म ले हर एक जन ओ सोन अऊ चांदी के मूरतीमन ला अस्वीकार करहू, जेमन ला तुम्हर पापी हांथमन बनाय हवंय।
ISA 31:8 “अस्सूरीमन मनखे के तलवार ले मारे नइं जाहीं; एक अइसन तलवार ह ओमन ला खा जाही, जऊन ह मरनहार मनखेमन के नो हय। ओमन तलवार के सामने ले भागहीं अऊ ओकर जवानमन ले बेगारी कराय जाही।
ISA 31:9 आतंक के मारे ओमन के गढ़ ह गिर जाही; लड़ई के झंडा ला देखके ओमन के सेनापतिमन डर जाहीं,” यहोवा ह घोसना करत हे, जेकर आगी ह सियोन म, अऊ जेकर भट्ठी ह यरूसलेम म हवय।
ISA 32:1 देखव, एक राजा ह धरमीपन से राज करही अऊ सासन करइयामन नियाय के संग सासन करहीं।
ISA 32:2 हर एक झन आंधी ले लुकाय के जगह, अऊ तूफान ले आड़ लेय के जगह सहीं होही, मरू-भुइयां म पानी के झरना, अऊ तपत भुइयां म बड़े चट्टान के छइहां सहीं होही।
ISA 32:3 ओ समय देखइयामन के आंखी ह नइं धुंधलाही, अऊ सुनइयामन के कान ह सुनही।
ISA 32:4 भय माननेवाला मनखे के मन ह जानही अऊ समझही, अऊ तोतरामन के जीभ ह सही अऊ साफ हो जाही।
ISA 32:5 मुरूख ला फेर कभू उत्तम मनखे नइं कहे जाही अऊ न ही दुस्ट मनखे ला बहुंत आदर दिये जाही।
ISA 32:6 काबरकि मुरूखमन तो मुरूखता के ही बात करथें, अऊ ओमन के मन ह दुस्टता के बात म लगे रहिथे: ओमन अधरम के काम करथें अऊ यहोवा के बारे म लबारी बात फईलाथें; भूखा ला भूखन ही रहन देथें अऊ पीयासा ला पानी नइं देवंय।
ISA 32:7 दुस्टमन दुस्ट तरीका अपनाथें, ओमन दुस्ट उपाय निकालत रहिथें ताकि गरीबमन ला लबारी बात कहिके लूटंय, जब जरूरतमंद के बिनती ह सही होथे, तब घलो येमन अइसे ही करथें।
ISA 32:8 पर बने मनखे ह उत्तम उपाय करथे, अऊ ओमन अपन उत्तम काममन के दुवारा बने रहिथें।
ISA 32:9 हे माईलोगनमन, जेमन बहुंत आत्म-संतुस्ट हवव, उठव अऊ मोर बात ला सुनव; हे बेटीमन, जेमन सुरकछित महसूस करथव, मोर बात कोति कान लगावव!
ISA 32:10 एक बछर पूरा होय के थोरकन बाद जेमन सुरकछित महसूस करत हवंय, ओमन कांपहीं; काबरकि अंगूर के फसल ह नइं होही, अऊ न ही कोनो किसम के फर धरही।
ISA 32:11 हे आत्म-संतुस्ट माईलोगनमन, कांपव; हे बेटीमन, जेमन सुरकछित महसूस करथव, तुमन कांपव! अपन सुघर ओनहामन ला उतार दव अऊ फटहा-चीरहा ओनहा ला लपेट लव।
ISA 32:12 बने खेतमन बर अऊ फरवाले अंगूर के नारमन बर छाती पीट-पीटके रोवव
ISA 32:13 अऊ मोर मनखेमन के भुइयां बर, अइसन भुइयां जेमा कांटा अऊ कंटिली झाड़ीमन बढ़ गे हवंय, रोवव— हव, खुसी मनइया जम्मो घरमन बर अऊ चहल-पहल वाले ये सहर बर बिलाप करव।
ISA 32:14 किला ला छोंड़ दिये जाही, हल्ला-गुल्ला ले भरे सहर ला तियाग दिये जाही; किला अऊ पहरेदारी के ऊंचहा जगहमन हमेसा बर सुनसान हो जाहीं येमन गदहामन बर घुमे-फिरे के जगह अऊ पसुमन के चरागन ओ समय तक बने रहिहीं,
ISA 32:15 जब तक कि आतमा ला ऊपर ले हमर ऊपर ढारे नइं जाही, अऊ मरू-भुइयां ह उपजाऊ खेत नइं बन जाही अऊ उपजाऊ भुइयां एक जंगल सहीं नइं जान पड़ही।
ISA 32:16 यहोवा के नियाय ओ मरू-भुइयां म बसही, ओकर धरमीपन ह ओ उपजाऊ भुइयां म रहिही।
ISA 32:17 ओ धरमीपन के फर ह सांति होही; अऊ येकर नतीजा सबो दिन के सांति अऊ बिसवास होही।
ISA 32:18 मोर मनखेमन सांति के जगह म, सुरकछित घरमन म, अराम के जगहमन म निस्चिंत रहिहीं।
ISA 32:19 हालाकि करा ह जंगल ला चौरस कर देथे अऊ सहर ह पूरा समतल हवय,
ISA 32:20 पर कतेक आसीसित होहू तुमन, जब तुमन सोतामन के तीर म बीजा बोहू, अऊ अपन पसु अऊ गदहामन ला चरे बर खुला छोंड़ दूहू।
ISA 33:1 हे नास करइया, तोर ऊपर हाय, तें, जेला नास नइं करे गे हवय! हे बिसवासघात करइया, तोर ऊपर हाय, तें, जेकर संग बिसवासघात नइं करे गे हवय! जब तें नास करई बंद करबे, तब तोला नास करे जाही; जब तें बिसवासघात करई बंद करबे, तब तोर संग बिसवासघात करे जाही।
ISA 33:2 हे यहोवा, हमर ऊपर अनुग्रह कर; हमन तोर ही रसता देखत हवन। हर बिहनियां तें हमर ताकत, संकट के समय तें हमर उद्धारकर्ता बन जा।
ISA 33:3 तोर सेना के हुल्लड़ करे ले मनखेमन भाग जाथें; जब तेंह उठथस, त जाति-जाति के मनखेमन तितिर-बितिर हो जाथें।
ISA 33:4 जइसन जवान फांफामन खेत ला चट कर डारथें; वइसन ही तुम्हर लूट ऊपर मनखेमन फांफामन के झुंड सहीं टूट पड़थें।
ISA 33:5 यहोवा ह ऊपर उठाय जाथे, काबरकि ओह ऊंच जगह म रहिथे; ओह सियोन ला अपन नियाय अऊ धरमीपन ले भर दीही।
ISA 33:6 यहोवा ह तुम्हर समय बर जरूरी आधार, उद्धार अऊ बुद्धि अऊ गियान के एक उत्तम भंडार होही; यहोवा के भय ह ये खजाना के चाबी अय।
ISA 33:7 देख, ओमन के सूरबीरमन गलीमन म जोर-जोर से रोवत हवंय; सांति के दूतमन बिलख-बिलखके रोवत हवंय।
ISA 33:8 राजमार्गमन सुनसान परे हवंय, सड़कमन म कोनो यातरी नइं एं। करार ला टोर दिये गे हवय, येकर गवाहमन ला तुछ समझे जावत हे, कोनो मनखे के आदर नइं होवत हे।
ISA 33:9 भुइयां ह सूखत हे अऊ बेकार होवत हे, लबानोन ह लज्जित होके मुरझावत हे; सारोन ह अराबा के सहीं हो गे हवय, अऊ बासान अऊ करमेल पहाड़ म पतझड़ होवत हवय।
ISA 33:10 यहोवा ह कहिथे, “अब मेंह उठहूं, अब मेंह ऊपर उठाय जाहूं; अब में ऊपर करे जाहूं।
ISA 33:11 तुमन भूंसा ला गरभ म धरथव, तुमन पैंरा ला जनम देथव; तुम्हर सांस ह एक आगी अय, जऊन ह तुमन ला भसम कर देथे।
ISA 33:12 मनखेमन जरके राख हो जाहीं; कटाय कंटिला झाड़ीमन सहीं ओमन ला आगी म जलाय जाही।”
ISA 33:13 तुमन, जेमन बहुंत दूरिहा म हवव, सुनव कि मेंह का करे हंव; तुमन, जेमन लकठा म हवव, मोर ताकत ला जान लव!
ISA 33:14 सियोन के पापीमन डर गे हवंय; भक्तिहीनमन ला कंपकपी होवत हवय: “हमन म ले कोन ह भसम करइया आगी म रह सकत हे? हमन म ले कोन ह सदा बरत रहइया आगी म निवास कर सकत हे?”
ISA 33:15 ओमन, जेमन धरमीपन म चलथें अऊ सही बात बोलथें, जेमन अंधेर के लाभ ले घिन करथें, जेमन घूस नइं लेवंय, जेमन हतिया करे के बात ला नइं सुनंय अऊ बुरई करे के बात ले आंखी मुंद लेथें—
ISA 33:16 ओहीचमन ही ऊंचहा जगह म निवास करहीं, जेमन के सरन-स्थान पहाड़ के किला होही। ओमन ला रोटी दिये जाही, अऊ ओमन ला पानी के कमी नइं होही।
ISA 33:17 तेंह अपन आंखी ले राजा ला ओकर सोभा समेत देखबे अऊ लम्बा-चौड़ा देस ला देखबे।
ISA 33:18 अपन मन म तेंह पहिले के आतंक के दिन ला सुरता करबे: “ओ मुखिया अधिकारी कहां हे? ओह कहां हवय, जऊन ह मालगुजारी लेवय? ऊंचहा महलमन के अधिकारी कहां हवय?”
ISA 33:19 तेंह ओ जिद्दी मनखेमन ला फेर नइं देखबे, ओ मनखे, जेमन के बात साफ नइं ए, जेमन के भासा अजीब अऊ समझ म नइं आवय।
ISA 33:20 सियोन कोति देख, हमर तिहारमन के सहर; तें अपन आंखी ले यरूसलेम ला देखबे, एक सांतिवाला डेरा, एक ठन तम्बू जेला हटाय नइं जावय; येकर खूंटामन ला कभू निकाले नइं जावय, अऊ न ही येकर कोनो रस्सी ला टोरे जावय।
ISA 33:21 उहां यहोवा ह हमर सक्तिसाली जन होही। येह चौड़ा-चौड़ा नदीमन अऊ सोतामन के एक जगह होही। पतवार वाला डोंगा ह ओमन म नइं जा सकही, अऊ न ही बड़े जहाज ह उहां ले होके जाही।
ISA 33:22 काबरकि यहोवा ह हमर नियायी ए, यहोवा ह हमर कानून-देवइया ए, यहोवा ह हमर राजा ए; ओही ह हमर उद्धार करही।
ISA 33:23 तोर जहाज के रस्सीमन ढीला हो गे हवंय: मसतूल के जरी ला मजबूत नइं रखे गे हवय, अऊ न ही पाल ला ताने गे हवय। तब लूट के बहुंत सामान ला बांटे जाही अऊ लंगड़ामन घलो लूटे गय सामान ला ले जाहीं।
ISA 33:24 सियोन म रहइया कोनो घलो ये नइं कहिहीं, “मेंह बेमार हंव”; अऊ जेमन उहां रहिथें, ओमन के पाप छेमा करे जाही।
ISA 34:1 हे जाति-जाति के मनखेमन, लकठा म आवव अऊ सुनव; हे मनखेमन, धियान देके सुनव! धरती अऊ जऊन कुछू ओमा हवय, संसार अऊ जऊन कुछू ओमा ले निकलके आथे, जम्मो के जम्मो सुनव!
ISA 34:2 यहोवा सब जाति के मनखेमन ऊपर रिस करत हवय, ओकर कोप ह ओमन के जम्मो सेना ऊपर हवय। ओह ओमन ला पूरा नास कर दीही, ओह ओमन के हतिया करे बर दे दीही।
ISA 34:3 ओमन के मारे गय मनखेमन ला बाहिर फेंक दिये जाही, ओमन के लास ले दुरगंध आही; पहाड़मन ओमन के लहू ले गीला हो जाहीं।
ISA 34:4 अकास के जम्मो तारामन खतम हो जाहीं अऊ अकास ला कागज सहीं लपेटे जाही; जइसन अंगूर के नार के पानमन मुरझाके अऊ अंजीर रूख ले अंजीरमन सिकुड़के गिर जाथें, वइसन ही जम्मो तारा मंडल गिर जाहीं।
ISA 34:5 मोर तलवार ह अकास म पीके छक गे हवय; देखव, येह नियाय बर एदोम ऊपर उतरत हे, ओ मनखे, जेमन ला मेंह पूरा नास कर दे हंव।
ISA 34:6 यहोवा के तलवार लहू ले भर गे हे, येह चरबी ले ढंक गे हवय— मेढ़ा-पीला अऊ बोकरामन के लहू ले, मेढ़ामन के गुरदा के चरबी ले भरे हवय। काबरकि बोसरा नगर म यहोवा बर एक बलिदान अऊ एदोम देस म बड़े मारकाट करे गे हवय।
ISA 34:7 ओमन के संग जंगली बईलामन, बछवामन अऊ बड़े सांड़मन ला काटे जाही। ओमन के देस ह खून ले भीग जाही, अऊ धुर्रा ह चरबी ले भर जाही।
ISA 34:8 काबरकि पलटा लेय बर यहोवा मेर एक दिन हवय, सियोन के मामला ला उठाय बर, पलटा लेय के एक बछर हवय।
ISA 34:9 एदोम के सोतामन ढलान म बदल जाहीं, अऊ ओकर धुर्रा ह बरत गंधक म; ओकर भुइयां ह बरत ढलान बन जाही!
ISA 34:10 येह रात अऊ दिन नइं बुताही; येकर धुआं हर समय उठत रहिही। पीढ़ी-पीढ़ी तक येह उजाड़ परे रहिही; कोनो ओमा ले होके फेर कभू नइं जाहीं।
ISA 34:11 मरू-भुइयां के उल्लू अऊ चीखनेवाला उल्लू ओमा निवास करहीं; उहां बड़े उल्लू अऊ कऊआ बसेरा करहीं। परमेसर ह एदोम ऊपर गड़बड़ी के नापे के डोरी अऊ सुन्नापन के नापे के बाट ला तानही।
ISA 34:12 ओकर परभावसाली मनखेमन करा उहां अइसे कुछू नइं होही, जेला राजा के राज कहे जा सकय, ओकर सब हाकिममन के अन्त हो जाही।
ISA 34:13 ओकर महलमन म कंटिला रूख, अऊ ओकर गढ़मन म बिच्छू पऊधा अऊ झाड़ीमन उगहीं। ओह सियारमन के डेरा, अऊ उल्लूमन के घर हो जाही।
ISA 34:14 उहां मरू-भुइयां के जन्तुमन हुंर्रामन संग बसहीं, अऊ जंगली बोकरामन एक-दूसर ला बलाहीं; उहां रथिया के जीवमन घलो अराम करहीं अऊ अपन बर अराम करे के जगह बना लीहीं।
ISA 34:15 उहां घुघवा ह खोंधरा बनाही अऊ अंडा दीही, अंडा ले पीलामन निकलहीं, अऊ ओह अपन डेनामन के आड़ म ओ पीलामन के देखभाल करही; उहां बाज चिरईमन घलो अपन-अपन जोड़ीदार के संग जूरहीं।
ISA 34:16 यहोवा के किताब म देखव अऊ पढ़व: येमा के एको ठन घलो बात पूरा होय बिगर नइं रहय, कोनो ला अपन जोड़ीदार के कमी नइं होही। काबरकि येह यहोवा के मुहूं अय, जऊन ह हुकूम देय हवय, अऊ ओकर आतमा ह ओमन ला इकट्ठा करे हवय।
ISA 34:17 ओही ह ओमन के भाग ला बांटथे; ओह अपन हांथ ले नापके ओमन ला बांट देथे। ओमन येला हमेसा बर अपन अधिकार म ले लीहीं अऊ पीढ़ी-पीढ़ी तक उहां निवास करहीं।
ISA 35:1 मरू-भुइयां अऊ सूखा भुइयां खुस होहीं; निरजन भुइयां ह आनंद मनाही अऊ उहां फूल धरही। मरू-भुइयां ह मगन होके,
ISA 35:2 केसर के सहीं फूल धरही; येह बहुंत आनंदित होही अऊ आनंद के मारे जय-जयकार करही। लबानोन के महिमा येला दिये जाही, अऊ येकर सोभा करमेल अऊ सारोन के सहीं होही; ओमन यहोवा के महिमा, हमर परमेसर के सोभा ला देखहीं।
ISA 35:3 ढीला हांथमन ला मजबूत करव, कमजोर माड़ीमन ला मजबूत करव;
ISA 35:4 घबरानेवाला मनखेमन ला कहव, “मजबूत बनव, झन डरव; तुम्हर परमेसर ह आही ओह बदला लेय बर आही; ईस्वरीय बदला के संग ओह तुम्हर उद्धार करे बर आही।”
ISA 35:5 अंधरामन के आंखी खोले जाही अऊ भैंरामन के कान घलो खोले जाही;
ISA 35:6 तब खोरवा ह हिरन सहीं कूदही अऊ कोंदामन अपन जीभ ले आनंद के मारे जय-जयकार करहीं। काबरकि बंजर भुइयां म पानी के सोता फूट निकलही अऊ मरू-भुइयां म नदी बोहाय लगही;
ISA 35:7 घाम ले बरत भुइयां ह तरिया बन जाही अऊ सूखा भुइयां म सोतामन फूटहीं। अऊ एक समय जिहां सियारमन रहत रिहिन उहां घांस अऊ नरकट अऊ सरकंडा जामही।
ISA 35:8 अऊ उहां एक राजमार्ग होही; येला पबितरता के रद्दा कहे जाही; ये रद्दा ह ओमन बर होही, जेमन ओ रद्दा म रेंगथें। कोनो असुध जन ओमा ले होके नइं जा सकही; दुस्ट मुरूख मनखेमन येमा ले होके नइं जा सकहीं।
ISA 35:9 उहां कोनो सिंह नइं होही, अऊ न ही कोनो हिंसक पसु; ये पसुमन उहां नइं मिलहीं। पर सिरिप छोंड़ाय गय मन ओमा रेंगहीं,
ISA 35:10 अऊ जेमन ला यहोवा ह बचाय हवय, ओमन लहुंटके आहीं। ओमन गीत गावत सियोन म आहीं; सदाकाल के आनंद ह ओमन के मुड़ के मुकुट होही। खुसी अऊ आनंद ले ओमन भर जाहीं, अऊ दुख अऊ पीरा के अन्त हो जाही।
ISA 36:1 हिजकियाह राजा के राज के चौदहवां साल म, अस्सूर के राजा सनहेरीब ह यहूदा के जम्मो गढ़वाले सहर ऊपर हमला करिस अऊ ओमन ला अपन अधिकार म कर लीस।
ISA 36:2 अस्सूर के राजा ह अपन मैदान के सेनापति ला एक बड़े सेना के संग लाकीस नगर ले यरूसलेम म हिजकियाह राजा के बिरूध भेजिस। जब सेनापति ह ऊपरी तरिया के नहर करा धोबीमन के खेत के सड़क म जाके रूकिस।
ISA 36:3 तब हिलकियाह के बेटा एलयाकीम, जऊन ह महल के अधिकारी रिहिस, अऊ सेबना, जऊन ह सचिव रिहिस, अऊ आसाप के बेटा योआह, जऊन ह अभिलेखक रिहिस, ये तीनों झन निकलके ओकर करा गीन।
ISA 36:4 मैदान के सेनापति ह ओमन ला कहिस, “हिजकियाह ला बतावव: “ ‘महाराजा, अस्सूर के राजा ह ये कहत हे: तोर ये भरोसा के आधार का ए?
ISA 36:5 तेंह कहिथस कि तोर करा लड़ई बर नीति अऊ ताकत हवय—पर तेंह सिरिप खोखला बात करथस। काकर ऊपर भरोसा करके, तेंह मोर बिरूध बिदरोह करत हस?
ISA 36:6 देख, मेंह जानत हंव कि तेंह मिसर देस ऊपर भरोसा करत हस, ओ एक लउठी के चीरे नरकट ऊपर, जऊन ह ओ मनखे के हांथ म चूभथे, जऊन ह येकर सहारा लेथे। फिरौन, मिसर के राजा ह ओ जम्मो झन बर अइसने ही अय, जेमन ओकर ऊपर भरोसा करथें।
ISA 36:7 पर कहूं तें मोला ये कहिथस, “हमर भरोसा यहोवा, हमर परमेसर ऊपर हवय”—का येह ओ नो हय, जेकर ऊंचहा जगह अऊ बेदीमन ला हिजकियाह ह हटाके यहूदा अऊ यरूसलेम के मनखेमन ला कहिस, “ये जरूरी अय कि तुमन ये बेदी के आघू म उपासना करव”?
ISA 36:8 “ ‘एकरसेति अब आ, अऊ मोर मालिक अस्सूर के राजा के संग मोलभाव कर: मेंह तोला दू हजार घोड़ा दूहूं—यदि तें ओमन बर घुड़सवारमन के परबंध कर सकबे त!
ISA 36:9 हालाकि तेंह रथ अऊ घुड़सवारमन बर मिसर देस ऊपर भरोसा करत हस, पर मोर मालिक के छोटे ले छोटे अधिकारी ला घलो कइसे भगा सकत हस?
ISA 36:10 का मेंह यहोवा के बिगर कहे ये देस ऊपर हमला करेंव अऊ येला नास करे बर आय हवंव? यहोवा ह खुद मोला कहे हवय कि ये देस ऊपर हमला कर अऊ येला नास कर दे।’ ”
ISA 36:11 तब एलयाकीम, सेबना अऊ योआह, मैदान के सेनापति ला कहिन, “अपन सेवकमन ले अरामिक भासा म गोठिया, काबरकि हमन ये भासा ला समझथन। भीथी ऊपर बईठे मनखेमन के सुनत म हमर ले इबरानी म झन गोठिया।”
ISA 36:12 पर सेनापति ह जबाब दीस, “का मोर मालिक ह मोला सिरिप तुम्हर मालिक अऊ तुमन ला ये बात कहे बर पठोय हवय, अऊ दीवार ऊपर बईठे ओ मनखेमन ला नइं, जेमन ला तुम्हर सहीं, अपन खुद के मल ला खाना अऊ अपन खुद के पेसाब ला पीना पड़ही।”
ISA 36:13 तब सेनापति ह ठाढ़ होईस अऊ इबरानी म जोर से कहिस, “महाराजा अस्सूर के राजा के बात ला सुनव!
ISA 36:14 राजा ह ये कहत हे, हिजकियाह तुमन ला धोखा झन देवय। ओह तुमन ला छुड़ा नइं सकय।
ISA 36:15 हिजकियाह के मनाय म झन आवव, जब ओह यहोवा ऊपर भरोसा रखे बर ये कहिथे, ‘खचित यहोवा ह हमन ला छुड़ाही; ये सहर ला अस्सूर के राजा के हांथ म नइं दिये जावय।’
ISA 36:16 “हिजकियाह के बात ला झन सुनव। अस्सूर के राजा ह ये कहिथे: मोर संग मेल-मिलाप करव अऊ बाहिर निकलके मोर करा आवव। तब तुमन म ले हर एक ह अपन खुद के अंगूर के नार के अऊ अंजीर के रूख के फर खाही अऊ अपन खुद के कुंड के पानी पीही,
ISA 36:17 जब तक कि मेंह आके तुमन ला एक अइसन देस म नइं ले जाहूं, जऊन ह तुम्हर खुद के सहीं होही—अनाज अऊ नवां अंगूर के मंद के देस, रोटी अऊ अंगूर के बारीमन के देस।
ISA 36:18 “हिजकियाह ह तुमन ला बहकावन झन पावय, जब ओह कहिथे, ‘यहोवा ह हमन ला छुड़ाही।’ का अऊ जातिमन के देवतामन कभू अपन देसमन ला अस्सूर के राजा के हांथ ले छुड़ाय हवंय?
ISA 36:19 हमात अऊ अरपाद के देवतामन कहां हवंय? सपरवैम के देवतामन कहां हवंय? का ओमन सामरिया ला मोर हांथ ले बचाय हवंय?
ISA 36:20 ये देसमन के जम्मो देवतामन ले कोन ह अपन देस ला मोर हांथ ले बचाय हवय? तब यहोवा ह कइसे यरूसलेम ला मोर हांथ ले छुड़ा सकथे?”
ISA 36:21 पर मनखेमन चुपेचाप रिहिन अऊ जबाब म कुछू नइं कहिन, काबरकि राजा ह ये हुकूम दे रिहिस, “ओला जबाब झन दव।”
ISA 36:22 तब हिलकियाह के बेटा एलयाकीम, जऊन ह महल के अधिकारी रिहिस; सेबना जऊन ह सचिव रिहिस; अऊ आसाप के बेटा योआह, जऊन ह इतिहास के अभिलेखक रिहिस; ये तीनों अपन फटे कपड़ा के संग हिजकियाह मेर गीन, अऊ ओला मैदान के सेनापति के कहे बात ला बताईन।
ISA 37:1 जब हिजकियाह राजा ह ये बात ला सुनिस, त ओह दुख म अपन ओनहा ला चीरिस अऊ बोरा के ओनहा पहिरिस अऊ यहोवा के मंदिर म गीस।
ISA 37:2 ओह महल के अधिकारी एलयाकीम, सचिव सेबना अऊ अगुवा पुरोहितमन ला, जेमन बोरा के कपड़ा पहिरे रहंय, येमन ला आमोस के बेटा यसायाह अगमजानी करा पठोईस।
ISA 37:3 ओमन ओला कहिन, “हिजकियाह ह ये कहत हे: ये दिन ह दुख अऊ फटकार अऊ निन्दा के दिन अय, येह अइसने अय, मानो लइकामन के जनमे के समय आ गे, पर दाई म ओमन ला जनम देय के ताकत नइं ए।
ISA 37:4 ये हो सकत हे कि यहोवा तोर परमेसर ह ओ मैदान के सेनापति के बात ला सुनय, जेला ओकर मालिक, अस्सूर के राजा ह जीयत परमेसर के हंसी उड़ाय बर पठोय हवय, अऊ ये कि यहोवा तोर परमेसर ह ओकर बात ला सुनके ओला डांटय। एकरसेति ओ बांचे भाग बर पराथना कर, जेमन अभी जीयत हें।”
ISA 37:5 जब हिजकियाह राजा के अधिकारीमन यसायाह करा आईन।
ISA 37:6 तब यसायाह ह ओमन ला कहिस, “अपन मालिक ला बतावव, ‘यहोवा ह ये कहत हे: ओ बात ले झन डर, जेला तेंह सुने हस—ओ बात, जेला अस्सूर के राजा के सेवकमन मोर निन्दा करत कहे हवंय।
ISA 37:7 सुन! जब ओह कोनो बिसेस खबर सुनही, त मेंह अइसे करहूं कि ओह अपन खुद के देस ला लहुंट जाही, अऊ उहां मेंह ओला तलवार ले मरवा दूहूं।’ ”
ISA 37:8 जब मैदान के सेनापति ह ये सुनिस कि अस्सूर के राजा ह लाकीस नगर ला छोंड़के चले गे हवय, त ओह लहुंट गीस अऊ देखिस कि राजा ह लिबना के बिरूध लड़त हवय।
ISA 37:9 सनहेरीब ला ये खबर मिलिस कि कूस के राजा तिरहाका ह ओकर बिरूध लड़ई करे बर सेना लेके आवत हे। जब ओह ये बात सुनिस, त ओह हिजकियाह मेर संदेसियामन के हांथ म ये खबर पठोईस:
ISA 37:10 “यहूदा के राजा हिजकियाह ला कहव: तोर परमेसर जेकर ऊपर तेंह भरोसा करथस, ओह तोला ये कहिके धोखा झन देवय, ‘यरूसलेम ला अस्सूर के राजा के हांथ म नइं दिये जावय।’
ISA 37:11 तेंह ये जरूर सुने होबे कि अस्सूर के राजामन जम्मो देसमन ला पूरा नास कर दे हवंय। त का तेंह बच सकबे?
ISA 37:12 मोर ले पहिले के राजामन गोजान, हारान, रेसेप सहरमन के देवता अऊ तेल-अस्सार म रहइया एदेन के मनखेमन ला नास करिन, त का ओ जाति के देवतामन ओमन ला बचा सकिन?
ISA 37:13 हमात के राजा या अरपाद के राजा कहां हवंय? लायर, सपरवैम, हेना अऊ इव्वा के राजामन कहां हवंय?”
ISA 37:14 हिजकियाह ला संदेसियामन ले चिट्ठी मिलिस अऊ ओह ओला पढ़िस। तब ओह यहोवा के मंदिर म गीस अऊ ओ चिट्ठी ला यहोवा के आघू म बगरा दीस,
ISA 37:15 अऊ हिजकियाह ह यहोवा ले पराथना करिस,
ISA 37:16 “हे सर्वसक्तिमान यहोवा, इसरायल के परमेसर, तेंह करूबमन के बीच म बिराजे हस, सिरिप तें ही धरती के जम्मो राजमन के ऊपर परमेसर अस। तें ही स्वरग अऊ धरती ला बनाय हस।
ISA 37:17 हे यहोवा, कान लगाके सुन; हे यहोवा, अपन आंखी ला खोलके देख; सनहेरीब के ओ जम्मो बात ला सुन, जेला ओह जीयत परमेसर के हंसी उड़ाय बर लिखके भेजे हवय।
ISA 37:18 “हे यहोवा, ये बात सच ए कि अस्सूर के राजामन ये जम्मो मनखे अऊ ओमन के देसमन ला उजाड़ दे हवंय।
ISA 37:19 अऊ ओमन के देवतामन ला आगी म फटिकके नास कर दे हवंय, काबरकि ओमन देवता नइं रिहिन; पर मनखेमन के हांथ के बनाय सिरिप लकरी अऊ पथरा ही रिहिन।
ISA 37:20 अब हे यहोवा, हमर परमेसर, हमन ला ओकर हांथ ले बचा, ताकि धरती के जम्मो राजमन जानंय कि सिरिप तें यहोवा ही परमेसर अस।”
ISA 37:21 तब आमोस के बेटा यसायाह ह हिजकियाह करा ये खबर पठोईस: “यहोवा इसरायल के परमेसर ह ये कहत हे: काबरकि तेंह अस्सूर के राजा सनहेरीब के बारे म मोर ले पराथना करे हस,
ISA 37:22 यहोवा ह ओकर बिरूध म ये बात कहे हवय: “कुंवारी बेटी सियोन ह तोला तुछ समझथे अऊ तोर हंसी उड़ाथे। बेटी यरूसलेम ह अपन मुड़ हलाथे, जब तेंह भागथस।
ISA 37:23 तेंह काकर हंसी उड़ाय हस अऊ निन्दा करे हस? काकर बिरूध म, तेंह अपन अवाज उठाय हस अऊ घमंड ले अपन आंखी उठाय हस? इसरायल के पबितर परमेसर के बिरूध!
ISA 37:24 अपन संदेसियामन के दुवारा तेंह परभू के हंसी उड़ाय हस। अऊ तेंह कहे हस, ‘अपन बहुंते रथमन के संग मेंह पहाड़मन के ऊंचई म चघे हंव, लबानोन के टीप तक। मेंह ओकर सबले ऊंच देवदार रूखमन ला अऊ सबले बने सनोवर रूखमन ला काट डारे हंव। मेंह ओकर सबले दुरगम ऊंचई, ओकर जंगल के सबले सुघर भाग म हबर गे हवंव।
ISA 37:25 मेंह परदेस म कुआं खने हंव अऊ उहां पानी पीये हंव। अपन गोड़ के तलवा ले मेंह मिसर के जम्मो झरना ला सूखा दे हंव।’
ISA 37:26 “का तेंह नइं सुने? बहुंत पहिले मेंह ओला ठहिराय रहेंव। बहुंत पहिले ओकर योजना बनाय रहेंव; अब मेंह ओला पूरा करत हंव, कि तेंह गढ़वाले सहरमन ला पथरा के कुढ़ा बना दे।
ISA 37:27 एकरे बर ओमन के ताकत ह चले गे हवय, ओमन डर गे हवंय अऊ ओमन के बेजत्ती होय हवय। ओमन खेत के पऊधा सहीं अंय, हरियर कोअंर पऊधा के पीका सहीं, छानी म उगत कांदी सहीं, जऊन ह बाढ़े के पहिली सूख जाथे।
ISA 37:28 “पर मेंह जानत हंव कि तेंह कहां हस अऊ तें कब आथस अऊ जाथस अऊ कइसे तेंह मोर ऊपर गुस्सा करथस।
ISA 37:29 काबरकि तें मोर ऊपर गुस्सा करथस अऊ तोर घमंड के बात मेंह सुने हवंव, एकरसेति मेंह तोर नाक म नकेल डालहूं अऊ तोर मुहूं म अपन लगाम लगाहूं, अऊ जऊन रसता ले तेंह आय रहे, ओही रसता ले तोला लहुंटा दूहूं।
ISA 37:30 “हे हिजकियाह, तोर बर ये चिनहां होही: “ये बछर तेंह ओला खाबे, जऊन ह अपनआप जामही, अऊ दूसरा बछर ओला खाबे, जऊन ह ओकर ले पईदा होही पर तीसरा बछर तेंह बोबे अऊ फसल लूबे, अंगूर के बारी लगाबे अऊ ओकर फर खाबे।
ISA 37:31 एक बार फेर यहूदा के राज के बांचे भाग ह खाल्हे जरी धरही अऊ ऊपर फर लगही।
ISA 37:32 काबरकि यरूसलेम ले एक बांचे भाग निकलही, अऊ सियोन पहाड़ ले बांचे मनखेमन के एक दल आही। सर्वसक्तिमान यहोवा के उत्साह ह येला पूरा करही।
ISA 37:33 “एकरसेति अस्सूर के राजा के बारे म यहोवा ह ये कहिथे: “ओह ये सहर म न तो घुसही अऊ न ही इहां एको ठन तीर चलाही। ओह येकर आघू म न तो ढाल लेके आही अऊ न ही येकर बिरूध घेराबंदी के कोनो ढलान बनाही।
ISA 37:34 जऊन रसता ले ओह आय हवय, ओही रसता ले ओह लहुंट जाही; ओह ये सहर म नइं घुसही,” यहोवा ह घोसना करत हे।
ISA 37:35 “मेंह अपन हित अऊ अपन सेवक दाऊद के हित म, ये सहर के रकछा करहूं अऊ येला बचाहूं।”
ISA 37:36 तब यहोवा के स्वरगदूत ह निकलके गीस अऊ अस्सूरीमन के सिविर म एक लाख पचयासी हजार मनखेमन ला मार डारिस। जब मनखेमन बिहनियां उठिन, त देखिन कि उहां मनखेमन के लास ही लास पड़े हवय!
ISA 37:37 एकरसेति अस्सूर के राजा सनहेरीब ह सिविर ला उखानके वापिस चल दीस। ओह नीनवे सहर लहुंटिस अऊ उहां रहे लगिस।
ISA 37:38 एक दिन, जब ओह अपन देवता निसरोक के मंदिर म उपासना करत रिहिस, त ओकर बेटा अद्रमेलेक अऊ सरेसेर ह ओला तलवार ले मार डारिन अऊ ओमन अरारात देस भाग गीन। अऊ ओकर बेटा एसरहदोन ह ओकर जगह म राजा बनिस।
ISA 38:1 ओ समय म हिजकियाह ह बेमार हो गीस अऊ मरइयाच रिहिस। तब आमोस के बेटा यसायाह अगमजानी ह ओकर मेर गीस अऊ कहिस, “यहोवा ह ये कहत हे: अपन घर-परिवार ला ठीक कर, काबरकि तेंह मरइयाच हस; तोर बेमारी ह ठीक नइं होवय।”
ISA 38:2 तब हिजकियाह ह भीथी कोति अपन मुहूं करके यहोवा ले पराथना करिस,
ISA 38:3 “हे यहोवा, सुरता कर कि मेंह कइसे सच्चई अऊ पूरा मन लगाके तोर आघू म चलत आय हंव अऊ ओ काम करे हंव, जऊन ह तोर नजर म सही अय।” अऊ हिजकियाह ह फूट-फूटके रोए लगिस।
ISA 38:4 तब यहोवा के ये बचन यसायाह करा आईस:
ISA 38:5 “जा अऊ हिजकियाह ला कह, ‘यहोवा, तोर पुरखा दाऊद के परमेसर ये कहत हे: मेंह तोर पराथना ला सुने हंव अऊ तोर आंसू ला देखे हंव; मेंह तोर उमर पंदरह बछर अऊ बढ़ा दूहूं।
ISA 38:6 अऊ मेंह तोला अऊ ये सहर ला अस्सूर के राजा के हांथ ले छोंड़ाहूं। मेंह ये सहर के रकछा करहूं।
ISA 38:7 “ ‘तोर बर यहोवा के ये चिनहां होही कि यहोवा ह अपन कहे बात ला पूरा करही,
ISA 38:8 धूप के छइहां, जऊन ह आहाज के सीढ़ी के रसता म ढर गे हवय, मेंह दस कदम पाछू कोति लहुंटा दूहूं।’ ” तब ओ छइहां, जऊन ह ढर गे रिहिस, दस कदम पाछू हट गीस।
ISA 38:9 यहूदा के राजा हिजकियाह के लेख जऊन ला ओह रोगी होके चंगा होय के बाद लिखिस, ओह ये अय:
ISA 38:10 मेंह कहेंव, “अपन उमर के उत्तम समय म जरूरी अय कि मेंह मिरतू के दुवारमन म ले होके जावंव अऊ मोर बाकि उमर ह खतम हो जावय।”
ISA 38:11 मेंह कहेंव, “मेंह यहोवा ला जीयतमन के भुइयां म फेर नइं देखहूं; मेंह अपन संगी मनखे ला फेर नइं देखहूं, या ओमन संग नइं रहिहूं, जेमन ये संसार म रहिथें।
ISA 38:12 मोर घर ला चरवाहामन के तम्बू सहीं हटाके मोर ले लेय लिये गे हवय। एक बुनकर सहीं मेंह अपन जिनगी ला लपेट ले हंव, अऊ ओह मोला करघा ले काटके अलग कर दे हवय; एकेच दिन म तेंह मोर अन्त कर डारय।
ISA 38:13 मेंह धीरज धरके बिहान तक इंतजार करेंव, पर एक सिंह के सहीं ओह मोर जम्मो हाड़ा ला टोर दीस; एकेच दिन म तेंह मोर अन्त कर डारय।
ISA 38:14 मेंह सूपाबेनी या तूती चिरई सहीं रोयेंव, मेंह बिलाप करइया पंड़की सहीं बिलाप करेंव। मोर आंखीमन ऊपर देखत-देखत कमजोर हो गीन। हे परभू, मोला धमकाय जावत हे; मोर मदद करे बर आ!”
ISA 38:15 पर मेंह का कह सकत हंव? ओह मोला कहे हवय, अऊ ओह खुद येला करे हवय। मेंह मन के ये पीरा के कारन जिनगी भर नम्र होके चलहूं।
ISA 38:16 हे परभू, अइसन चीज के दुवारा मनखेमन जीयत रहिथें; अऊ मोर आतमा ला घलो ओमन म जिनगी मिलथे। तें मोला चंगा करय अऊ मोला जीयत रखय।
ISA 38:17 खचित येह मोर फायदा बर रिहिस कि मेंह अइसन पीरा भोगंय। तेंह मोला मया करके बिनास के खंचवा ले बचाय हवस; मोर सब पाप ला तेंह अपन पीठ के पाछू म कर दे हवस।
ISA 38:18 काबरकि कबर ह तोर परसंसा नइं कर सकय, न ही मऊत ह तोर इस्तुति कर सकय; जेमन खाल्हे कबर म परे हवंय ओमन तोर बिसवासयोग्यता के आसा नइं कर सकंय।
ISA 38:19 जीयत मनखे, जीयत मनखे—ओमन तोर परसंसा करथें, जइसन मेंह आज करत हंव; दाई-ददामन अपन लइकामन ला तोर बिसवासयोग्यता के बारे बताथें।
ISA 38:20 यहोवा ह मोर उद्धार करही, अऊ हमन जिनगी भर यहोवा के मंदिर म तारवाला बाजा के संग गीत गावत रहिबो।
ISA 38:21 यसायाह ह कहे रिहिस, “अंजीर के एक लेप बनावव अऊ हिजकियाह के फोड़ा म लगावव, अऊ ओह ठीक हो जाही।”
ISA 38:22 हिजकियाह ह पुछे रिहिस, “येकर का चिनहां होही कि मेंह यहोवा के मंदिर म जाहूं?”
ISA 39:1 ओ समय बलदान के बेटा बेबिलोन के राजा मरोदक-बलदान ह हिजकियाह करा दूतमन के दुवारा चिट्ठी अऊ उपहार पठोईस, काबरकि ओह ओकर बेमारी अऊ ओकर चंगई के बारे म सुने रिहिस।
ISA 39:2 एकर ले हिजकियाह ह खुस होके दूतमन के सुवागत करिस अऊ ओमन ला अपन भंडारघर के चीजमन ला देखाईस—सोन, चांदी, मसाला, उत्तम किसम के जैतून तेल—अपन पूरा हथियार-घर अऊ अपन खजाना म रखे जम्मो चीज ला देखाईस। उहां ओकर महल या ओकर जम्मो राज म अइसन कोनो चीज नइं बांचिस, जेला हिजकियाह ह ओमन ला नइं देखाय होही।
ISA 39:3 तब यसायाह अगमजानी ह हिजकियाह राजा मेर जाके पुछिस, “ओ आदमीमन का कहिन अऊ ओमन कहां ले आय रिहिन?” हिजकियाह ह जबाब दीस, “ओमन एक दूरिहा के देस, बेबिलोन ले मोर मेर आय रिहिन।”
ISA 39:4 अगमजानी ह पुछिस, “ओमन तोर महल म का देखिन?” हिजकियाह ह कहिस, “ओमन मोर महल के हर चीज ला देखिन, मोर खजाना म अइसन कोनो चीज नइं ए, जेला मेंह ओमन ला नइं देखाय होहूं।”
ISA 39:5 तब यसायाह ह हिजकियाह ला कहिस, “सर्वसक्तिमान यहोवा के बचन ला सुन:
ISA 39:6 अइसन समय जरूर आही, जब तोर महल के हर एक चीज, अऊ ओ जम्मो चीज, जेला तोर पुरखामन के दुवारा आज तक इकट्ठा करे गे हवय, ओ जम्मो ला बेबिलोन ले जाय जाही। कुछू भी चीज नइं बांचही, यहोवा ह कहत हे।
ISA 39:7 अऊ तोर कुछू संतानमन ला, तोर खुद के मांस अऊ लहू, जऊन मन तोर ले पईदा होहीं, ओमन ला घलो ले जाय जाही, अऊ ओमन बेबिलोन के राजा के महल म खोजा बन जाहीं।”
ISA 39:8 हिजकियाह ह जबाब दीस, “यहोवा के जऊन बात तेंह कहे हस, ओह बने बात ए।” काबरकि ओह सोचिस, “मोर जिनगी भर सांति अऊ सुरकछा बने रहिही।”
ISA 40:1 तुम्हर परमेसर ह कहिथे, मोर मनखेमन ला सांति देवव, सांति!
ISA 40:2 यरूसलेम ला सांत मन से कहव, अऊ घोसना करत ओला कहव कि ओकर कठिन सेवा ह पूरा होईस, ओकर पाप के दाम दे दिये गे हवय, यहोवा के हांथ ले ओह अपन सब पाप के दू गुना दंड पा गे हवय।
ISA 40:3 एक झन के बलाय के अवाज आवत हे: “सुनसान जगह म यहोवा बर डहार तियार करव; हमर परमेसर बर मरू-भुइयां म एक राजमार्ग ला सीधा करव।
ISA 40:4 हर एक घाटी ला पाट दिये जाही, अऊ हर एक पहाड़ अऊ पहाड़ी ला नीचे करे जाही; उबड़-खाबड़ भुइयां ह समतल होही, अऊ ऊंच-नीच जगहमन चौरस हो जाहीं।
ISA 40:5 तब यहोवा के महिमा ह परगट होही, अऊ जम्मो मनखेमन येला एक संग देखहीं। काबरकि यहोवा के मुहूं ले ये बात निकले हवय।”
ISA 40:6 एक अवाज ह कहिथे, “चिचियाके कह!” अऊ मेंह कहेंव, “मेंह चिचियाके का कहंव?” “जम्मो मनखेमन कांदी के सहीं अंय, अऊ ओमन के जम्मो बिसवासयोग्यता ह मैदान के फूल सहीं अंय।
ISA 40:7 कांदी ह मुरझा जाथे अऊ फूलमन झर जाथें, जब यहोवा के सांस ह ओमन ऊपर चलथे। बेसक मनखेमन कांदी अंय।
ISA 40:8 कांदी ह मुरझा जाथे अऊ फूलमन झर जाथें, पर हमर परमेसर के बचन सदाकाल तक बने रहिथे।”
ISA 40:9 तें, जऊन ह सियोन म सुघर संदेस लाथस, एक ठन ऊंचहा पहाड़ ऊपर चढ़ जा। तें, जऊन ह यरूसलेम म सुघर संदेस लाथस, चिचियाके अपन अवाज ला ऊंचा कर, अवाज ला ऊंचा कर, झन डर; यहूदा के नगरमन ले कह, “इहां तुम्हर परमेसर हवय!”
ISA 40:10 देखव, सर्वसक्तिमान यहोवा सामर्थ के संग आवत हे, अऊ ओह अपन भुजबल ले सासन करथे। देखव, ओकर ईनाम ह ओकर मेर हवय, अऊ ओकर परतिफल देवइया ह ओकर संग हवय।
ISA 40:11 ओह एक चरवाहा सहीं अपन झुंड ला चराथे: ओह मेढ़ा-पीलामन ला अपन गोद म लेके संकेलथे अऊ ओमन ला अपन दिल म लगाके चलथे; ओह ओमन ला धीरे-धीरे ले चलथे, जेमन करा पीलामन होथें।
ISA 40:12 कोन ह अपन हांथ के हथेली ले महासागर के पानी ला नापे हवय, या कोन ह अपन हांथ के बित्ता ले अकास ला नापिस? कोन ह धरती के धुर्रा ला एक ठन टुकनी म रखे हवय या कोन ह पहाड़ अऊ पहाड़ीमन ला तराजू म तऊले हवय?
ISA 40:13 कोन ह यहोवा के आतमा के गहरई ला समझ सकत हे, या कोन ह यहोवा ला ओकर सलाहकार के रूप म निरदेस दे सकत हे?
ISA 40:14 यहोवा ह अपन गियान बढ़ाय बर काकर ले सलाह लीस, अऊ कोन ह ओला सही रसता बताईस? कोन ह ओला गियान के बात सिखाईस, या कोन ह ओला समझ के डहार देखाईस?
ISA 40:15 खचित जाति-जाति के मनखेमन बाल्टी म पानी के एक बूंद सहीं अंय; ओमन तराजू म के धुर्रा सहीं अंय; यहोवा ह द्वीपमन ला धुर्रा के कन सहीं उठाथे।
ISA 40:16 लबानोन के रूखमन बेदी के आगी बर परयाप्त नो हंय, अऊ न ही ओमा के पसुमन होम-बलिदान बर परयाप्त होहीं।
ISA 40:17 जम्मो जाति के मनखेमन ओकर आघू म कुछू नो हंय; ओमन ओकर नजर म बेकार समझे जाथें अऊ ओमन कुछू घलो नो हंय।
ISA 40:18 तब तुमन परमेसर के तुलना काकर संग करहू? या ओकर का रूप तुमन बताहू?
ISA 40:19 जहां तक एक मूरती के बात ए, एक मूरतीकार ह येला ढालके बनाथे, अऊ सुनार ह ओला सोन ले मढ़थे अऊ ओकर बर चांदी के संकली गढ़के बनाथे।
ISA 40:20 गरीब मनखे, जऊन ह अइसन भेंट नइं चघा सकय, ओह अइसन रूख ला चुनथे, जऊन ह नइं सरय; ओमन एक कुसल कारीगर खोजथें ताकि ओह मूरती ला अइसन स्थिर करय कि ओह झन हालय।
ISA 40:21 का तुमन नइं जानव? का तुमन नइं सुने हव? का तुमन ला सुरू ले ये नइं बताय गे हवय? का तुमन धरती के नीव रखे के समय ले ही नइं समझे हव?
ISA 40:22 येह ओ अय, जऊन ह धरती के घेरा के ऊपर बिराजमान होथे, अऊ धरती के मनखेमन टिड्डी के सहीं अंय। ओह अकास ला तम्बू के सहीं बगराथे, अऊ ओमन ला रहे के एक तम्बू सहीं तानथे।
ISA 40:23 ओह हाकिममन ला तुछ कर देथे अऊ धरती के अधिकारीमन ला बेकार बना देथे।
ISA 40:24 ओमन ला रोपे जावत ही, ओमन ला बोये जावत ही, भुइयां म ओमन के जरी धरत ही, ओह ओमन ऊपर हवा चलाथे अऊ ओमन सूखा जाथें, अऊ आंधी ह ओमन ला भूंसा सहीं उड़ियाके ले जाथे।
ISA 40:25 “तुमन काकर संग मोर तुलना करहू? या कोन ह मोर बरोबर हवय?” पबितर परमेसर ह कहिथे।
ISA 40:26 अपन आंखी उठाके अकास कोति देखव: ये जम्मो ला कोन ह सिरजिस? ओह अकास-मंडल ला एक के बाद एक बाहिर लानथे अऊ ओमा के हर एक ला नांव लेके बलाथे। ओकर बड़े सक्ति अऊ ताकत के कारन ओमा के एको ठन घलो नइं छूटय।
ISA 40:27 हे याकूब, तेंह काबर सिकायत करथस? हे इसरायल, तेंह काबर बोलथस, “मोर डहार ह यहोवा ले लुकाय हवय; मोर मामला ऊपर परमेसर ह धियान नइं देवत हे?”
ISA 40:28 का तुमन नइं जानव? का तुमन नइं सुने हव? यहोवा ह अनंतकाल के परमेसर, अऊ धरती के सिरजनहार अय। ओह न तो थकय न ही ओला उबासी आवय, ओकर समझ के बात ला कोनो नइं जान सकंय।
ISA 40:29 ओह थके मनखे ला बल देथे अऊ कमजोर मनखेमन के सक्ति ला बढ़ाथे।
ISA 40:30 जवानमन तो थकथें अऊ ओमन ला उबासी आथे, अऊ जवान मनखेमन लड़खड़ाथें अऊ गिर जाथें;
ISA 40:31 पर जेमन यहोवा ऊपर आसा रखथें ओमन नवां बल पावत जाहीं, ओमन गिधवामन सहीं उड़हीं, ओमन दऊड़हीं अऊ नइं थकहीं, ओमन रेंगहीं अऊ नइं हांफहीं।
ISA 41:1 “हे द्वीपमन, मोर आघू म चुप रहव! देस-देस के मनखेमन नवां बल पावंय! ओमन आघू म आके बोलंय; आवव, नियाय के जगह म एक संग जूरन।
ISA 41:2 “कोन ह पूरब दिग ले एक झन ला उभारे हे, अऊ धरमीपन म ओला अपन सेवा बर बलाय हे? ओह जातिमन ला ओकर हांथ म कर देथे अऊ राजामन ला ओकर अधीन कर देथे। ओह अपन तलवार ले ओमन ला धुर्रा, अऊ अपन धनुस ले उड़ियाय भूंसा सहीं कर देथे।
ISA 41:3 ओह ओमन के पीछा करथे अऊ बिगर हानि के, ओह एक अइसन रसता म आघू बढ़थे, जेमा ओह पहिले कभू नइं गे रिहिस।
ISA 41:4 कोन ह ये काम करे हवय अऊ येला इहां तक लाने हवय अऊ सुरू ले पीढ़ी-पीढ़ी के मनखेमन ला बलात आय हवय? में, यहोवा—जऊन ह ओमन के सबले पहिली के संग अऊ आखिरी के संग हंव—में ओही अंव।”
ISA 41:5 द्वीपमन येला देखे हवंय अऊ डरथें; धरती के छोरमन कांपथें। ओमन लकठा म आथें अऊ आघू म आथें;
ISA 41:6 ओमन एक-दूसर के सहायता करथें अऊ अपन संगीमन ला कहिथें, “मजबूत बनव!”
ISA 41:7 लोहार ह सुनार ला अऊ जऊन ह हथौड़ा ले समतल करथे ओह लोहा ऊपर हथौड़ा मरइया ला उत्साहित करथे। जोड़नेवाला एक झन ह कहिथे, “येह बढ़िया हे।” आने ह मूरती म खीला ठोंकथे ताकि येह झन गिरय।
ISA 41:8 “पर हे मोर सेवक, इसरायल, हे मोर चुने गय, याकूब, हे मोर संगी अब्राहम के संतानमन,
ISA 41:9 मेंह तोला धरती के छोर ले लेंव, मेंह तोला धरती के सबले दूरिहा जगहमन ले बलांय। मेंह कहेंव, ‘तेंह मोर सेवक अस’; मेंह तोला चुने हंव अऊ तोला छोंड़े नइं हंव।
ISA 41:10 झन डर, काबरकि में तोर संग हवंव; भयभीत झन हो, काबरकि में तोर परमेसर अंव। में तोला मजबूत करहूं अऊ तोर मदद करहूं; अपन धरमी जेवनी हांथ ले में तोला संभाले रहिहूं।
ISA 41:11 “देख, ओ जम्मो जेमन तोर ले गुस्सा होथें ओमन जरूर लज्जित अऊ कलंकित होहीं; जेमन तोर बिरोध करथें ओमन बेकार अऊ नास हो जाहीं।
ISA 41:12 तेंह अपन बईरीमन ला खोजबे घलो पर ओमन तोला नइं मिलहीं। जेमन तोर ले लड़ई करथें ओमन नास होके मेटा जाहीं।
ISA 41:13 काबरकि में यहोवा तोर परमेसर अंव जऊन ह तोर जेवनी हांथ ला धरथे अऊ तोला कहिथे, झन डर; में तोर सहायता करहूं।
ISA 41:14 हे कीरा सहीं याकूब, झन डर, हे छोटकन इसरायल, झन डर, काबरकि में खुद तोर मदद करहूं,” यहोवा ह घोसना करत हे, तोर छुड़इया, इसरायल के पबितर परमेसर।
ISA 41:15 देख, मेंह तोला बहुंत दांतमन के संग नवां अऊ तेज कुटनेवाला एक बेलन बनाहूं। तेंह पहाड़मन ला कुटबे अऊ ओमन ला चूर-चूर कर देबे, अऊ पहाड़ीमन ला तें भूंसा सहीं कर देबे।
ISA 41:16 तें ओमन ला फटकबे, अऊ हवा ओमन ला उड़ियाके ले जाही, अऊ आंधी ओमन ला तितिर-बितिर कर दीही। पर तें यहोवा म आनंदित होबे अऊ इसरायल के पबितर परमेसर म बड़ई मारबे।
ISA 41:17 “गरीब अऊ जरूरतमंद मनखेमन पानी के खोज करथें, पर पानी कहीं नइं मिलय, ओमन के जीभ ह पीयास के मारे सूखा जाथे। पर में यहोवा ह ओमन ला जबाब दूहूं; में, इसरायल के परमेसर ह ओमन ला छोंड़ नइं देवंव।
ISA 41:18 में सूखा पहाड़ीमन ले नदीमन ला अऊ घाटीमन के बीच म सोतामन ला बहा दूहूं। मेंह मरू-भुइयां ला तरिया म अऊ सूखा भुइयां ला सोतामन म बदल दूहूं।
ISA 41:19 मेंह मरू-भुइयां म देवदार, बंबरी, मेंहदी, अऊ जैतून उगाहूं। मेंह उजाड़ जगह म सनोवर, चिनार अऊ गोपेर के रूख इकट्ठा लगाहूं,
ISA 41:20 ताकि मनखेमन देखंय अऊ जानंय, ओमन बिचार करंय अऊ समझंय, कि येह यहोवा के हांथ के काम अय, अऊ इसरायल के पबितर परमेसर ह येला बनाय हवय।”
ISA 41:21 “अपन मामला ला लानव,” यहोवा ह कहिथे। “अपन तर्क ला सामने रखव,” याकूब के राजा कहिथे।
ISA 41:22 “हे मूरतीमन, हमन ला बतावव, कि भविस्य म का होवइया हे। हमन ला पहिले के चीजमन के बारे बतावव ताकि हमन ओमन ऊपर सोच-बिचार करन अऊ अंतिम बात ला समझन। या होवइया चीजमन के बारे म हमन ला बतावव,
ISA 41:23 भविस्य म जऊन कुछू होवइया हे, तेला बतावव, तभे हमन जानबो कि तुमन देवता अव। भला या बुरा, कुछू घलो करव ताकि हमन भयभीत होवन अऊ डर जावन।
ISA 41:24 पर तुमन कुछू घलो नो हव, अऊ तुम्हर काममन एकदम बेकार अंय; जऊन ह तुमन ला चाहथे, ओह घिनौना मनखे अय।
ISA 41:25 “मेंह उत्तर दिग ले एक झन ला उकसाय हंव, अऊ ओह आवत हे— ओह पूरब दिग के अय अऊ मोर नांव के दुहाई देथे। जइसन एक कुम्हार ह माटी ला खुंदथे, वइसन ही ओह हाकिममन ला खुंदही, मानो ओमन गारा अंय।
ISA 41:26 कोन ह ये बात ला सुरूआत ले बताईस कि हमन ये जानतेंन, या पहिले से कोन ह बताईस कि हमन कहितेंन, ‘ओह सही रिहिस’? ये बात कोनो नइं बताईन, पहिले से येला कोनो नइं बताईस, तोर ले कोनो भी कुछू बात नइं सुनिस।
ISA 41:27 सबले पहिली मेंह सियोन ला बताएंव, ‘देख, ओमन इहां हवंय!’ मेंह यरूसलेम ला सुघर संदेस सुनानेवाला एक संदेसिया देंव।
ISA 41:28 मेंह खोजथंव, पर उहां कोनो नइं एं— देवतामन के बीच म कोनो सलाह देवइया नइं एं, जब मेंह ओमन ले पुछथंव, त जबाब देवइया कोनो नइं एं।
ISA 41:29 देखव, ओमन जम्मो के जम्मो गलत अंय! ओमन के काम बेकार अंय; ओमन के ढारे गय मूरतीमन हवा अऊ गड़बड़ी के अलावा अऊ कुछू नो हंय।
ISA 42:1 “येह मोर सेवक ए, जऊन ला में संभालथंव, मोर चुने हुए जन, जेकर ले मेंह खुस रहिथंव; मेंह येकर ऊपर अपन आतमा डालहूं, अऊ येह जाति-जाति के मनखेमन बर नियाय लानही।
ISA 42:2 न ओह चिचियाही अऊ न ऊंचहा सबद म बोलही, न ही गलीमन म अपन अवाज ऊंचहा करही।
ISA 42:3 कुचरे सरकंडा ला न तो ओह टोरही, अऊ न ही सुलगत दीया के बाती ला बुताही। बिसवासयोग्यता से ओह नियाय करही;
ISA 42:4 ओह नइं डगमगाही अऊ न ही हिम्मत हारही जब तक कि ओह नियाय ला धरती ऊपर स्थापित नइं कर दीही। ओकर सिकछा म द्वीपमन के मनखेमन अपन आसा रखहीं।”
ISA 42:5 परमेसर यहोवा ह ये कहत हे— अकासमन ला बनानेवाला, जऊन ह ओमन ला तानथे, जऊन ह धरती ला ओकर जम्मो चीजमन के संग फईलाथे, जऊन ह येमा के मनखेमन ला सांस अऊ येमा चलनेवालामन ला जिनगी देथे:
ISA 42:6 “में, यहोवा ह तोला धरमीपन म बलाय हंव; में तोर हांथ ला धरके तोर रकछा करहूं। में तोला संभाले रखहूं अऊ मनखेमन बर तोला एक करार अऊ आने जाति के मनखेमन बर एक अंजोर ठहिराहूं,
ISA 42:7 ताकि तें अंधरामन के आंखी ला खोल दे, कैदीमन ला कैदखाना ले बाहिर ले आ अऊ जेमन अंधियार म बईठे हवंय, ओमन ला काल-कोठरी ले मुक्त कर दे।
ISA 42:8 “मेंह यहोवा अंव; येह मोर नांव अय! मेंह आने ला अपन महिमा नइं देवंव या अपन परसंसा मूरतीमन ला नइं देवंव।
ISA 42:9 देखव, पहिली के चीजमन हो गे हवंय, अब नवां चीजमन के में घोसना करत हंव; ओमन के होय के पहिली मेंह तुमन ला ओमन के घोसना करत हंव।”
ISA 42:10 हे समुंदर म चलइया, अऊ ओमा जम्मो रहइयामन, हे द्वीपमन, अऊ ओमन म जम्मो रहइयामन, यहोवा बर एक नवां गीत गावव, अऊ धरती के छोर ले ओकर इस्तुति करव।
ISA 42:11 सुनसान जगह अऊ ओमा के नगरमन अपन अवाज ऊंच करव; केदार के बसे जगहमन आनंदित होवंय। सेला सहर के मनखेमन आनंद के मारे गावंय; ओमन पहाड़मन के टीपमन ले चिचियावंय।
ISA 42:12 ओमन यहोवा के महिमा परगट करंय अऊ द्वीपमन म ओकर परसंसा करंय।
ISA 42:13 यहोवा ह एक बिजेता के सहीं निकलही, एक योद्धा सहीं ओह अपन उत्साह ला भड़काही; ओह चिचियाके लड़ई बर ललकारही अऊ अपन बईरीमन ऊपर जयवंत होही।
ISA 42:14 “बहुंत समय तक मेंह चुप रहेंव, मेंह सांत रहेंव अऊ अपनआप ला रोकके रखे रहेंव। पर अब, लइका जनमावत माईलोगन सहीं, में कलहरत हंव, में जोर-जोर से सांस लेवत हंव अऊ हांफत हंव।
ISA 42:15 मेंह पहाड़ अऊ पहाड़ीमन ला उजार दूहूं अऊ ओमन के सब हरियाली ला सूखा दूहूं; में नदीमन ला द्वीप बना दूहूं अऊ तरियामन ला सूखा डारहूं।
ISA 42:16 मेंह अंधरामन ला ओ रसता म ले जाहूं जऊन ला ओमन नइं जानंय, अनजान रसता म में ओमन के अगुवई करहूं; ओमन के आघू म मेंह अंधियार ला अंजोर कर दूहूं अऊ उबड़-खाबड़ जगहमन ला समतल कर दूहूं। ये सब काम में करहूं; में ओमन ला नइं तियागंव।
ISA 42:17 पर जेमन मूरतीमन ऊपर भरोसा करथें, अऊ मूरतीमन ले कहिथें, ‘तुमन हमर देवता अव,’ ओमन ला लज्जित होके पाछू लहुंटे बर पड़ही।
ISA 42:18 “हे भैंरामन, सुनव; हे अंधरामन, आंखी खोलव अऊ देखव!
ISA 42:19 मोर सेवक के छोंड़ कोन अंधरा अय, अऊ मोर पठोय दूत सहीं कोन भैंरा अय? जऊन ह मोर संग करार करे हवय, ओकर सहीं कोन अंधरा अय, या यहोवा के सेवक सहीं कोन अंधरा अय?
ISA 42:20 तेंह बहुंते चीजमन ला देखे हस, पर तें धियान नइं देवस; तोर कानमन तो खुले हवंय, पर तें सुनस नइं।”
ISA 42:21 यहोवा ला अपन धरमीपन बर ये बने लगिस कि अपन कानून ला ओह बड़े अऊ महिमामय करय।
ISA 42:22 पर येमन एक लूटे अऊ छीने गय मनखे अंय, सब के सब खंचवा म फंसे या जेल म बंद हवंय। येमन लूट के चीज बन गे हवंय, अऊ येमन ला कोनो बचानेवाला नइं एं; येमन लूट लिये गे हवंय, अऊ कोनो ये कहइया नइं एं, “येमन ला वापिस भेज दव।”
ISA 42:23 तुमन म ले कोन ह येला सुनही या अवइया समय म बिसेस धियान दीही?
ISA 42:24 कोन ह याकूब ला लूट के चीज होय बर दे दीस, अऊ इसरायल ला लुटेरामन के हांथ म कर दीस? का येह यहोवा नइं रिहिस, जेकर बिरूध हमन पाप करेंन? काबरकि ओमन ओकर रसता म नइं चलिन; ओमन ओकर कानून ला नइं मानिन।
ISA 42:25 एकरसेति ओमन ऊपर ओकर कोरोध ह भड़किस, ओमन ऊपर लड़ई के हिंसा होईस। येह आगी सहीं ओमन ला घेर लीस, तभो ले ओमन नइं समझिन; येह ओमन ला भसम कर दीस, पर ओमन नइं चेतिन।
ISA 43:1 हे याकूब, जऊन ह तोला बनाईस, हे इसरायल, जऊन ह तोला रचिस, अब ओ यहोवा ह ये कहत हे: “झन डर, काबरकि मेंह तोला छोंड़ाय हंव; मेंह तोला नांव लेके बलाय हंव, तेंह मोरेच अस।
ISA 43:2 जब तेंह पानी म ले होके जाबे, त मेंह तोर संगे-संग रहिहूं; अऊ जब तेंह नदीमन ले होके जाबे, तब ओमन तोला नइं बुड़ो सकंय। जब तेंह आगी म रेंगबे, तब तोला आंच नइं लगय; अऊ ओकर जुवाला ह तोला नइं जला सकय।
ISA 43:3 काबरकि में यहोवा तोर परमेसर अंव, इसरायल के पबितर परमेसर, तोर उद्धार करइया अंव; तोर छुड़ौती म मेंह मिसर देस ला अऊ तोर बदला कूस अऊ सबा देसमन ला देथंव।
ISA 43:4 मोर नजर म तेंह अनमोल अऊ आदर के योग्य अस, अऊ काबरकि मेंह तोर ले मया करथंव, एकर कारन में तोर बदला म मनखेमन ला अऊ तोर परान के बदला म जाति-जाति के मनखेमन ला दे दूहूं।
ISA 43:5 झन डर, काबरकि में तोर संग हवंव; मेंह तोर लइकामन ला पूरब ले लानहूं अऊ पछिम ले घलो तोला इकट्ठा करहूं।
ISA 43:6 मेंह उत्तर ले कहिहूं, ‘ओमन ला देय दे!’ अऊ दक्खिन ले कहिहूं, ‘ओमन ला रोकके झन रख।’ मोर बेटामन ला दूरिहा ले अऊ मोर बेटीमन ला धरती के छोर ले लेय आवव—
ISA 43:7 हर एक जन, जऊन ह मोर नांव ले जाने जाथे, जेला मेंह अपन महिमा बर सिरजेंव, जेला मेंह रचेंव अऊ बनाएंव।”
ISA 43:8 ओमन ला ले आवव, जेमन आंखी के रहत अंधवा अंय, अऊ कान के रहत भैंरा अंय।
ISA 43:9 जाति-जाति के मनखेमन एक संग जूरंय अऊ मनखेमन जमा होवंय। ओमन के कोन देवता ह ये बात ला पहिले ले बताय रिहिस अऊ हमन ला पहिली के चीजमन के घोसना करे रिहिस? ओमन अपन गवाहमन ला लानके साबित करंय कि ओमन सही अंय, ताकि आने मन सुनंय अऊ कहंय, “येह सच अय।”
ISA 43:10 यहोवा ह घोसना करत हे, “तुमन मोर गवाह अव, अऊ मोर सेवक अव, जेमन ला मेंह चुने हंव, ताकि तुमन जानव अऊ मोर ऊपर बिसवास करव अऊ ये बात ला समझव कि में ओही अंव। मोर ले पहिली कोनो देवता के रचना नइं होईस, अऊ न ही कोनो मोर बाद होहीं।
ISA 43:11 में ही यहोवा अंव, अऊ मोला छोंड़ कोनो अऊ उद्धारकर्ता नइं एं।
ISA 43:12 मेंह परगट करे हंव अऊ उद्धार करेंव अऊ घोसना करेंव— में, अऊ तुम्हर बीच म कोनो अऊ पराया देवता नइं। तुमन ही मोर गवाह अव,” यहोवा ह घोसना करत हे, “कि में परमेसर अंव।
ISA 43:13 हव, अऊ प्राचीन समय ले मेंह ओही अंव। मोर हांथ ले कोनो छोंड़ा नइं सकंय। जब मेंह काम करथंव, त कोन ह ओला पलट सकथे?”
ISA 43:14 तुम्हर छुड़इया, इसरायल के पबितर परमेसर, यहोवा ह ये कहत हे: “तुम्हर बर मेंह बेबिलोन ला भेजहूं अऊ जम्मो बेबिलोनीमन ला भगोड़ा के सहीं ले आहूं, ओमन ला पानी जहाज म ले आहूं, जेकर ऊपर ओमन घमंड करथें।
ISA 43:15 में, यहोवा, तुम्हर पबितर परमेसर, इसरायल के सिरजइया, तुम्हर राजा अंव।”
ISA 43:16 यहोवा ह ये कहत हे— जऊन ह समुंदर म एक रसता, पानी के तेज लहरा म एक डहार बनाईस,
ISA 43:17 जऊन ह रथ अऊ घोड़ामन ला, सेना अऊ सैनिक ताकत ला एक संग निकाल लेथे, अऊ ओमन उहां पड़े रहिथें, अऊ फेर कभू नइं उठंय, ओमन खतम हो गीन, एक ठन बाती के सहीं बुता गीन:
ISA 43:18 “पहिली के चीजमन ला सुरता झन करव; भूतकाल म झन जीयव।
ISA 43:19 देखव, में एक नवां चीज करत हंव! येह परगट होवत हे; का तुमन येला नइं समझत हव? मेंह सुनसान जगह म एक रसता अऊ निरजल देस म सोतामन ला बनात हंव।
ISA 43:20 जंगल के पसु, गीदड़ अऊ उल्लूमन मोर आदर करथें, काबरकि में सुनसान जगह म पानी अऊ निरजल जगह म सोतामन ला निकालथंव, ताकि मोर मनखे, मोर चुने मनखेमन पानी पीयंय,
ISA 43:21 ये मनखे, जेमन ला मेंह अपन बर बनाय हंव ताकि ओमन मोर परसंसा करंय।
ISA 43:22 “तभो ले, हे याकूब, तेंह मोला नइं पुकारे हस, हे इसरायल, तेंह अपनआप ला मोर बर नइं थकाय हस।
ISA 43:23 तेंह होम-बलिदान करे बर मोर मेर भेड़ नइं लाने हस, अऊ न ही अपन बलिदानमन ला चघाके मोर आदर करे हस। मेंह अन्न-बलिदान चघाय के बोझ तोर ऊपर नइं डाले हंव, न ही धूप के मांग करके तोला थकाय हंव।
ISA 43:24 तेंह मोर बर कोनो खुसबूवाला तेजपान नइं लाने हस, अऊ न ही मोला अपन बलिदान के चरबी चघाय हस। पर तेंह अपन पापमन के दुवारा मोर ऊपर बोझा डाले हस अऊ अपन अधरम के काम ले मोला थका दे हस।
ISA 43:25 “में, में ही ओ अंव, जऊन ह अपन नांव बर तोर पापमन ला मेटा देथंव, अऊ तोर पापमन ला फेर सुरता नइं करंव।
ISA 43:26 मोर खातिर पहिले के चीजमन ला सुरता कर, आ, हमन ओ बात ऊपर आपस म बहस करन; तें अपन मामला ला बता, जऊन ह तोला निरदोस ठहिराथे।
ISA 43:27 तोर पहिली पुरखा ह पाप करिस; जेमन ला मेंह तोर मेर सिखाय बर पठोंय, ओमन मोर ले बिदरोह करिन।
ISA 43:28 एकर कारन मेंह तोर मंदिर के सम्मानीय मनखेमन ला कलंकित करेंव; मेंह याकूब ला बिनास बर अऊ इसरायल ला अपमानित होय बर सऊंप देंव।
ISA 44:1 “पर अब, हे मोर दास याकूब, हे मोर चुने इसरायल, सुन।
ISA 44:2 यहोवा ह ये कहत हे— ओ, जऊन ह तोला बनाईस, जऊन ह तोला गरभ म रचिस, अऊ जऊन ह तोर सहायता करही: हे मोर दास याकूब, हे मोर चुने यसूरून, झन डर।
ISA 44:3 काबरकि में पीयासन भुइयां म पानी अऊ सूखा जमीन ऊपर पानी के धारा बोहाहूं; में तोर बंस ऊपर अपन आतमा, अऊ तोर संतानमन ऊपर अपन आसीस ढारहूं।
ISA 44:4 ओमन चरागन म कांदी सहीं, पानी के धारामन के तीर म चिनार रूखमन सहीं बाढ़हीं।
ISA 44:5 कोनो कहिही, ‘में यहोवा के अंव’; आने मन अपनआप ला याकूब के नांव म बलाहीं; अऊ कुछू आने मन अपन हांथ म लिखहीं, ‘में यहोवा के अंव,’ अऊ इसरायल के नांव ले लीहीं।
ISA 44:6 “सर्वसक्तिमान यहोवा, जऊन ह इसरायल के राजा अऊ छुड़इया अय, ओ यहोवा ह ये कहत हे: में ही पहिला अंव अऊ में ही अन्त अंव; मोला छोंड़ अऊ कोनो परमेसर नइं एं।
ISA 44:7 मोर सहीं कोन हे? ओह येला बतावय। ओह घोसना करय अऊ मोर आघू म रखय कि जब ले मेंह पुराना जमाना म मनखेमन ला ठहिरांय, तब ले का होय हवय अऊ का होवइया हे— हव, पहिले से बतावय कि का होवइया हे।
ISA 44:8 झन कांपव, झन डरव। का मेंह येकर घोसना नइं करेंव अऊ बहुंत पहिले ही येला नइं बताय रहेंव? तुमन मोर गवाह अव। का मोला छोंड़ अऊ कोनो परमेसर हवय? नइं, मोला छोंड़ अऊ कोनो चट्टान नइं ए; में कोनो अऊ ला नइं जानंव।”
ISA 44:9 ओ जम्मो जेमन मूरतीमन ला बनाथें, ओमन कुछू नो हंय, अऊ जऊन चीजमन ला ओमन जतन के रखथें, ओमन बेकार अंय। जऊन मन ओमन बर गोठियाथें, ओमन अंधरा अंय; ओमन अपन खुद के लज्जा के बारे म अनजान हवंय।
ISA 44:10 कोन ह एक देवता ला आकार देथे अऊ मूरती ला बनाथे, जेकर से कोनो लाभ नइं होवय?
ISA 44:11 ओ मनखे, जेमन ओ काम करथें, ओमन लज्जा म पड़हीं; अइसन कारीगरमन तो मनखे ही अंय। ओ जम्मो एक संग आवंय अऊ अपन बात ला साबित करंय; ओमन आतंकित होहीं अऊ लज्जा म पड़हीं।
ISA 44:12 लोहार ह एक ठन औजार ला लेथे अऊ धातु ला कोइला म गरम करके ये औजार ले काम करथे; ओह हथौड़ा ले मूरती ला रूप देथे, ओह अपन भुजबल ले येला गढ़थे। ओला भूख लगथे अऊ ओकर ताकत कम हो जाथे; ओह पानी नइं पीयय अऊ दुरबल हो जाथे।
ISA 44:13 बढ़ई ह अपन नाप ले नापथे अऊ तब ओ चीज के पेन्सिल से रूप-रेखा बनाथे; अऊ बंसुला ले काम करके चिकना करथे अऊ परकार ले लकीर खींचथे। ओह येला मनखे के रूप देथे, पूरा महिमा म येला मनखे के रूप देथे, ताकि येह कोनो देवालय म रहय।
ISA 44:14 ओह देवदार रूख ला काटथे, या ओह आने कोनो रूख या बलूत रूख लेथे। ओह जंगल के रूखमन के बीच येला बढ़े बर देथे, या देवदार के रूख लगाथे, बरसा के पानी ले येह बाढ़थे।
ISA 44:15 तब ओह आगी बारे के काम आथे; ओह ओमा के कुछू ला सुलगाके आगी तापथे, ओह आगी बारके रोटी बनाथे। पर ओह येला एक देवता के रूप देके येकर अराधना घलो करथे; ओह एक मूरती बनाके येकर आघू म मुड़ नवाथे।
ISA 44:16 आधा लकरी ला तो ओह आगी बारथे; अऊ येमा अपन खाना पकाथे, ओह मांस ला भुंजके भरपेट खाथे। ओह आगी घलो तापथे अऊ कहिथे, “अहा! मेंह गरम हो गेंव; मेंह आगी ला देखत हंव!”
ISA 44:17 अऊ बाकि बांचे लकरी ले ओह एक देवता, अपन बर मूरती बनाथे; ओह ओकर दंडवत करथे अऊ ओकर अराधना करथे। ओह ओकर ले पराथना करके कहिथे, “मोला बचा ले! तेंह मोर देवता अस!”
ISA 44:18 ओमन कुछू नइं जानंय, ओमन कुछू नइं समझंय; ओमन के आंखीमन अइसन बंद रहिथें कि ओमन देख नइं सकंय, अऊ ओमन के दिमाग ह अइसन बंद रहिथे कि ओमन समझ नइं सकंय।
ISA 44:19 सोच-बिचार करे बर कोनो नइं रूकंय, काकरो मेर ये कहे बर गियान अऊ समझ नइं ए, “आधा लकरी के उपयोग मेंह आगी बारे बर करेंव; येकर कोइला म रोटी बनांय, मेंह मांस ला भुंजके खांय। त जऊन लकरी बांच गीस, का ओकर ले में एक घिनौना चीज बनावंव? का मेंह कठवा के एक भाग ला दंडवत करंव?”
ISA 44:20 अइसन मनखे ह राख ला खाथे; ओकर मन ह भटक गे हे अऊ ओला गलत रसता म ले जाथे; ओह अपनआप ला बचा नइं सकय अऊ ये नइं कह सकय, “जऊन चीज ह मोर जेवनी हांथ म हवय, का ओह एक झूठ नो हय?”
ISA 44:21 “हे याकूब, हे इसरायल, ये बातमन ला सुरता कर, काबरकि तेंह मोर सेवक अस। मेंह तोला रचे हंव, तेंह मोर सेवक अस; हे इसरायल, मेंह तोला नइं भुलावंव।
ISA 44:22 मेंह तोर अपराधमन ला बादर सहीं, अऊ तोर पापमन ला बिहनियां के कुहरा सहीं मिटा देय हंव। मोर मेर लहुंट आ, काबरकि मेंह तोला छोंड़ाय हंव।”
ISA 44:23 हे अकासमन, आनंद के मारे गावव, काबरकि यहोवा ह ये काम करे हवय; हे धरती के गहिला जगहमन, जोर-जोर से जय-जयकार करव। हे पहाड़मन, हे जंगलमन अऊ तुमन के जम्मो रूखमन, गला खोलके जोर से गावव, काबरकि यहोवा ह याकूब ला छोंड़ाय हवय, ओह इसरायल म अपन महिमा परगट करथे।
ISA 44:24 यहोवा, तोर छुड़इया, जऊन ह तोला गरभ म रचिस, ओह ये कहत हे: “में ही ओ यहोवा, जम्मो चीज के बनइया अंव, जऊन ह अकास ला तानिस, जऊन ह खुद होके धरती ला फईलाईस,
ISA 44:25 जऊन ह लबरा अगमजानीमन के चिनहां ला बेकार कर देथे अऊ सकुन-बिचार करइयामन ला मुरूख बना देथे। जऊन ह बुद्धिमान के सिकछा ला दूरिहा फटिक देथे अऊ येला बेमतलब के बात बना देथे,
ISA 44:26 जऊन ह अपन सेवक के बचन ला पूरा करथे अऊ अपन दूतमन के बात ला सफल करथे, “जऊन ह यरूसलेम के बारे म कहिथे, ‘येला फेर बसाय जाही,’ अऊ यहूदा के नगरमन के बारे कहिथे, ‘ओमन फेर बनाय जाहीं,’ अऊ ओमन के खंडहरमन के बारे कहिथे, ‘मेंह येमन ला सुधारहूं,’
ISA 44:27 जऊन ह गहिला पानी ला कहिथे, ‘सूखा जा, अऊ मेंह तोर सोतामन ला सूखा दूहूं,’
ISA 44:28 में ही ओ अंव, जऊन ह कुसरू के बारे म कहिथे, ‘ओह मोर चरवाहा अय, अऊ ओह मोर ईछा ला पूरा करही; ओह यरूसलेम के बारे म कहिही, “येला फेर बनाय जावय,” अऊ मंदिर के बारे म कहिही, “येकर नीवमन ला डारे जावय।” ’ ”
ISA 45:1 यहोवा ह अपन अभिसिक्त, कुसरू ला ये कहत हे, ओकर जेवनी हांथ ला मेंह थामे रहिथंव कि ओकर सामने ही जाति-जाति के मनखे ला ओकर अधीन कर देवंव अऊ राजामन ला बिगर हथियार के कर दंव, ओकर सामने म ही कपाटमन ला अइसन खोल देवंव कि ओ दुवारमन बंद झन हो सकंय:
ISA 45:2 मेंह तोर आघू-आघू जाहूं अऊ पहाड़मन ला समतल कर दूहूं; मेंह कांसा के दुवारमन ला टोर दूहूं अऊ लोहा के बेड़ीमन ला काट दूहूं।
ISA 45:3 मेंह तोला छुपे खजाना दूहूं, अऊ गुपत जगह म रखे धन दूहूं, ताकि तेंह जान सकस कि मेंह यहोवा, इसरायल के परमेसर अंव, जऊन ह तोला नांव लेके बलाथे।
ISA 45:4 मोर अपन सेवक याकूब, मोर चुने इसरायल के हित म, मेंह तोला नांव लेके बलात हंव अऊ तोला आदर के एक पदवी देवत हंव, हालाकि तेंह मोला नइं मानस।
ISA 45:5 मेंह यहोवा अंव, अऊ दूसर कोनो नइं; मोला छोंड़ अऊ कोनो परमेसर नइं एं। हालाकि तेंह मोला नइं माने हस तभो ले मेंह तोला मजबूत करहूं,
ISA 45:6 ताकि बेर के उगती ले लेके बुड़ती तक के जगह के मनखेमन ये जान लेवंय कि मोर छोंड़ आने अऊ कोनो नइं एं। मेंह यहोवा अंव, अऊ आने कोनो नइं एं।
ISA 45:7 मेंह अंजोर के बनइया अऊ अंधियार के सिरजनहार अंव, मेंह सुख-सांति के दाता अऊ में ही बिपत्ति ला बनाथंव; में, यहोवा ही ये जम्मो चीज ला करथंव।
ISA 45:8 हे ऊपर के अकास, मोर धरमीपन के बारिस कर; बादरमन येकर बारिस करंय। धरती ह बहुंत खुल जावय, उद्धार ह निकल आवय, अऊ धरमीपन ह येकर संग बढ़त जावय; में, यहोवा ही येकर सिरिस्टी करे हवंव।
ISA 45:9 “ओमन ऊपर हाय, जेमन अपन रचइया ले झगरा करथें, ओमन कुछू नो हंय, पर भुइयां म माटी के बरतन के कुटामन के बीच बरतन के कुटा अंय। का माटी ह कुम्हार ले कहिथे, ‘तें का बनात हस?’ का कारीगर के बनाय चीज ह कहिथे, ‘कुम्हार के तो हांथमन नइं एं’?
ISA 45:10 हाय ओकर ऊपर, जऊन ह अपन ददा ला कहिथे, ‘तेंह का जनमाय हस?’ या अपन दाई ला कहिथे, ‘तेंह का ला जनम दे हस?’
ISA 45:11 “यहोवा, इसरायल के पबितर परमेसर, अऊ ओकर बनइया ह ये कहत हे: अवइया चीजमन के बारे म, का तेंह मोर लइकामन के बारे पुछबे, या मोर हांथ के काम के बारे म मोला हुकूम देबे?
ISA 45:12 येह में अंव, जऊन ह धरती ला बनाईस अऊ येकर ऊपर मानव-जाति ला सिरजिस। मोर खुद के हांथमन अकास ला ताने हवंय; मेंह ओकर तारा मंडल ला सही जगह म रखे हंव।
ISA 45:13 मेंह कुसरू ला अपन धरमीपन म उठाय हंव: मेंह ओकर सबो डहार ला सीधा करहूं। ओह मोर नगर ला फेर बनाही अऊ मोर बंदीमन ला बिगर दाम या बिगर भेंट लिये छोंड़ दीही, सर्वसक्तिमान यहोवा ह कहत हे।”
ISA 45:14 यहोवा ह ये कहत हे: “मिसर देस के कमई अऊ कूस देस के बेपार, अऊ ओ ऊंच सबायीमन— ओमन तोर मेर चले आहीं अऊ तोर हो जाहीं; ओमन थकके तोर पाछू-पाछू आहीं, ओमन सांकल म बंधाय तोर मेर चले आहीं। ओमन तोर आघू म मुड़ नवाहीं अऊ ये कहिके तोर ले बिनती करहीं, ‘निस्चय परमेसर ह तोर संग हवय, अऊ दूसर कोनो नइं ए; कोनो अऊ देवता नइं एं।’ ”
ISA 45:15 सही म तेंह परमेसर अस, जऊन ह अपनआप ला छुपाय रिहिस, परमेसर अऊ इसरायल के उद्धारकर्ता।
ISA 45:16 मूरतीमन के बनइयामन सब के सब लज्जित अऊ कलंकित होहीं; ओमन एक संग अपमानित होहीं।
ISA 45:17 पर इसरायल ह यहोवा के दुवारा सदाकाल के उद्धार के संग बचाय जाही; तेंह अनंतकाल तक न तो कभू लज्जित होबे, अऊ न ही कभू कलंकित होबे।
ISA 45:18 काबरकि यहोवा ह ये कहत हे— ओ, जऊन ह अकास के सिरिस्टी करिस, ओह परमेसर अय; ओ, जऊन ह धरती ला आकार दीस अऊ बनाईस, ओह येकर नीव रखिस; ओह येला खाली रहे बर नइं, पर येला बसे बर रचिस— ओह कहिथे: “मेंह यहोवा अंव, अऊ आने कोनो परमेसर नइं एं।
ISA 45:19 मेंह गुपत म, कोनो अंधियार देस के कोनो जगह ले नइं कहे हंव; मेंह याकूब के संतानमन ले नइं कहे हंव, ‘मोला बेकार म खोजव।’ में, यहोवा, सच कहिथंव; मेंह सही बात के घोसना करथंव।
ISA 45:20 “हे जाति-जाति के भगोड़ा मनखेमन, एक संग जूरव, आवव अऊ इकट्ठा होवव। अगियानी ओमन अंय, जेमन लकरी के मूरतीमन ला धरके चलथें, जेमन अइसन देवतामन ले पराथना करथें, जेमन उद्धार नइं कर सकंय।
ISA 45:21 घोसना करव कि का होना हे, ओला सामने लानव— ओमन एक संग सलाह लेवंय। बहुंत पहिले ये बात कोन ह बताईस, बहुंत पहिले ले कोन ह येकर घोसना करिस? का में यहोवा ही नइं करेंव? अऊ मोला छोंड़ कोनो अऊ दूसर परमेसर हय ही नइं, एक धरमी परमेसर अऊ उद्धारकर्ता; मोला छोंड़ अऊ कोनो नइं एं।
ISA 45:22 “हे जम्मो धरती के मनखेमन, मोर कोति फिरव अऊ उद्धार पावव; काबरकि में ही परमेसर अंव, अऊ दूसर कोनो अऊ परमेसर नइं एं।
ISA 45:23 मेंह अपन ही किरिया खाय हंव, पूरा ईमानदारी से मोर मुहूं ले ये बचन निकले हवय अऊ ये बात ह नइं टरय: हर एक मनखे ह मोर आघू म माड़ी टेकही; हर एक मनखे ह मोर किरिया खाही।
ISA 45:24 मनखेमन मोर बारे म कहिहीं, ‘सिरिप यहोवा ही म छुटकारा अऊ ताकत हवय।’ ” ओ जम्मो जेमन ओकर ले गुस्सा होय रिहिन, ओमन आहीं अऊ लज्जित होहीं।
ISA 45:25 पर इसरायल के जम्मो संतानमन यहोवा म छुटकारा पाहीं अऊ ओमा अपन घमंड करहीं।
ISA 46:1 बेल देवता ह झुकथे, नबो देवता ह घलो खाल्हे झुकथे; ओमन के मूरतीमन ला पसुमन ऊपर लादके ले जाय जाथे। जऊन मूरतीमन ला ले जाय जावत हे, ओमन भारी हवंय, थके पसु बर एक बोझा।
ISA 46:2 ओमन एक संग मुड़ नवाके झुक गीन; बोझा ला उठा नइं सकिन, ओमन खुद बंधुवई म चले गीन।
ISA 46:3 “हे याकूब के संतानमन, हे इसरायल के जम्मो बांचे मनखेमन, मोर बात ला सुनव, तुमन, जेमन ला मेंह तुम्हर जनम ले ही ऊपर उठाय हंव, अऊ तुम्हर जनम ही ले तुमन ला धरके चलत हंव।
ISA 46:4 तुम्हर बुढ़ापा अऊ तुम्हर पाके चुंदी के बेरा घलो मेंह वइसन ही बने रहिहूं, मेंह ओही अंव, जऊन ह तुमन ला संभाले रखही। मेंह तुमन ला बनाय हंव अऊ तुमन ला धरके ले चलहूं; मेंह तुमन ला संभालहूं अऊ तुमन ला बचाहूं।
ISA 46:5 “काकर संग तुमन मोर तुलना करहू या काकर सहीं मोला बताहू? काकर संग मोर मिलान करहू कि हमर तुलना करे जा सकय?
ISA 46:6 कुछू जन अपन थैली ले सोन उंडेलथें अऊ तराजू म चांदी तऊलथें; ओमन सुनार ला बनी देके ये चीजमन ले देवता बनवाथें, अऊ ओमन येला दंडवत करथें अऊ येकर अराधना करथें।
ISA 46:7 ओमन येला अपन कंधा म उठाके ले चलथें, ओमन येला ओकर जगह म रखथें अऊ ओह उहां ठाढ़े रहिथे। ओ जगह ले येह हट नइं सकय। यदि कोनो ओकर मेर जोर से गोहार पारके कहिही, तभो ले येह जबाब नइं दे सकय; येह ओमन ला ओमन के समस्या ले नइं बचा सकय।
ISA 46:8 “येला सुरता रखव, येला मन म रखव, हे बिदरोहीमन, ये बात तुम्हर मन म रहय।
ISA 46:9 पहिले के बातमन ला सुरता करव, बहुंत पहिले के बातमन ला; काबरकि में परमेसर अंव, अऊ दूसर कोनो नइं एं; में ही परमेसर अंव अऊ मोर सहीं अऊ कोना नइं एं।
ISA 46:10 में तो अन्त के बात सुरू ले ही बतात आय हंव, अऊ पुराना जमाना ले बतात आय हंव कि अभी घलो का अवइया हे। में कहिथंव, ‘मोर उपाय स्थिर रहिही, अऊ जऊन बात मोला बने लगथे, ओला मेंह करहूं।’
ISA 46:11 मेंह पूरब ले एक सिकार करइया चिरई, दूरिहा देस ले, अपन उदेस्य ला पूरा करे बर एक मनखे ला बलावत हंव। जऊन बात मेंह कहे हंव, ओला पूरा करहूं; जऊन बात के मेंह योजना बनाय हंव, ओला में करहूं।
ISA 46:12 हे कठोर मन वाले, तुमन मोर बात ला सुनव, तुमन, जऊन मन अब मोर धरमीपन ले दूरिहा हव।
ISA 46:13 मेंह अपन धरमीपन ला लकठा म लावत हंव, येह दूरिहा म नइं ए; अऊ मोर उद्धार करे म देरी नइं होवय। मेंह सियोन के उद्धार करहूं, अऊ इसरायल ला मोर सोभा दूहूं।
ISA 47:1 “हे कुंवारी बेटी बेबिलोन, खाल्हे जा अऊ धुर्रा म बईठ; हे बेबिलोनीमन के रानी सहर, बिगर सिंघासन के भुइयां ऊपर बईठ। तोला अब फेर कभू कोमल या सुकुमार नइं कहे जाही।
ISA 47:2 जांता ला लेके पीसान पीस; अपन घूंघट ला हटा दे। अपन लंहगा ला उठाके उघारे टांग सोतामन के पानी म ले होके जा।
ISA 47:3 तोर नंगई ह उघारे जाही अऊ तोर लाज ह परगट होही। मेंह बदला लूहूं; मेंह कोनो मनखे ला नइं छोड़ंव।”
ISA 47:4 हमर छुड़इया के नांव सर्वसक्तिमान यहोवा अय, ओह इसरायल के पबितर परमेसर अय।
ISA 47:5 “हे बेबिलोनीमन के रानी सहर, चुपेचाप बईठे रह अऊ अंधियार म जा; तोला अऊ फेर राजमन के रानी नइं कहे जाही।
ISA 47:6 मेंह अपन मनखेमन ले नराज रहेंव अऊ अपन निज भाग ला अपबितर करेंव; मेंह ओमन ला तोर बस म कर देंव, अऊ तेंह ओमन ऊपर कुछू दया नइं करे। डोकरामन ऊपर घलो तेंह एक ठन भारी जुड़ा मढ़ा देय।
ISA 47:7 तेंह कहे, ‘मेंह हमेसा बर रानी अंव!’ पर तेंह ये बातमन ऊपर बिचार नइं करे या येकर ऊपर धियान नइं देय कि का हो सकत हे।
ISA 47:8 “तब हे मऊज-मस्ती ले मया करइया, ये बात ला सुन, तेंह जो अपन सुरकछा म निडर रहिके अपनआप ले कहिथस, ‘में ही अंव, अऊ मोला छोंड़ कोनो दूसर नइं एं। मेंह कभू बिधवा नइं होवंव अऊ न ही मोर लइकामन मरहीं।’
ISA 47:9 पर, ये दूनों दुख, लइकामन के मरई अऊ बिधवा होवई अचानक एके दिन तोर ऊपर आ पड़ही। तोर बहुंत जादूगरी अऊ भारी जादू टोनहा करे के बावजूद ये दुखमन तोर ऊपर पूरा ताकत से आ जाहीं।
ISA 47:10 तेंह अपन दुस्टता ऊपर भरोसा करे हस अऊ कहे हस, ‘मोला कोनो नइं देखत हवंय।’ तोर बुद्धि अऊ गियान तोला बहकाथें जब तेंह अपनआप ला कहिथस, ‘में ही अंव, अऊ मोर छोंड़ अऊ कोनो नइं एं।’
ISA 47:11 बिपत्ति ह तोर ऊपर आ जाही, अऊ तेंह नइं जानबे कि येकर ले बाहिर कइसे निकले जाय। तोर ऊपर अइसन संकट आ जाही कि तेंह छुड़ौती देके येकर ले बच नइं सकबे; एक बड़े बिपत्ति, जेकर बारे म तोला मालूम नइं होही, ओह अचानक तोर ऊपर आ पड़ही।
ISA 47:12 “तब, अपन जादू टोनहा अऊ अपन बहुंत जादूगरी के ओ काममन ला करते रह, जेला तेंह अपन लइकापन ले ही सीखे हस। सायद तेंह सफल हो जाबे, सायद तेंह आतंकित कर सकबे।
ISA 47:13 जऊन सलाहमन ला तेंह ले हस, ओकर ले तोला सिरिप थकावट मिले हवय! तोर जोतिसीमन आघू आवंय, ओ तारा देखइयामन, जेमन महिना दर महिना अगम के बात कहिथें, ओमन तोला तोर ऊपर अवइया बिपत्ति ले बचावंय।
ISA 47:14 देख, ओमन भूंसा के सहीं अंय; आगी ह ओमन ला जला दीही। ओमन अपनआप ला आगी के जुवाला ले नइं बचा सकंय। येमन गरम करे कोइला नो हंय, येह ओ आगी नो हय, जिहां बईठके आगी तापथें।
ISA 47:15 जम्मो तोर बर वइसने ही अंय— जेमन के संग तेंह लेन-देन करे हस अऊ लइकापन ले जेमन के संग मेहनत करे हस। ओ जम्मो के जम्मो अपन गलत रद्दा म चले जाथें; अइसे कोनो नइं ए, जऊन ह तोला बचा सकय।
ISA 48:1 “हे याकूब के संतानमन, ये बात ला सुनव, तुमन जेमन ला इसरायल के नांव ले बलाय जाथे अऊ यहूदा के कतार म ले आथव, तुमन जऊन मन यहोवा के नांव के सपथ लेथव अऊ इसरायल के परमेसर के दुहाई देथव— पर सच्चई या धरमीपन म नइं—
ISA 48:2 तुमन जेमन अपनआप ला पबितर सहर के नागरिक बताथव अऊ इसरायल के परमेसर ऊपर भरोसा रखे के घोसना करथव— सर्वसक्तिमान यहोवा ओकर नांव अय:
ISA 48:3 बहुंत पहिले मेंह पहिले के बातमन ला बताय हंव, मोर मुहूं ह ओमन के घोसना करिस अऊ मेंह ओमन ला परगट करेंव; तब अचानक मेंह काम करेंव, अऊ ओ बातमन सच म होईन।
ISA 48:4 काबरकि मेंह जानत रहेंव कि तुमन कतेक ढीठ रहेव; अऊ तुम्हर घेंच के मांस-पेसीमन लोहा सहीं रिहिन, अऊ तुम्हर माथा ह कांसा के सहीं रिहिस।
ISA 48:5 एकर कारन बहुंत पहिले, मेंह ये बातमन ला तुमन ला बताएंव; ओमन के होय के पहिली, मेंह तुमन ला ओमन के घोसना कर दे रहेंव ताकि तुमन ये झन कह सकव, ‘येह हमर देवता के काम अय; मोर लकरी के मूरती अऊ धातु के देवता के हुकूम ले येह होईस।’
ISA 48:6 तुमन ये बातमन ला सुने हवव; ओ जम्मो चीज ला देखव। का तुमन ओमन ला स्वीकार नइं करहू? “अब ले मेंह तोला नवां-नवां बात अऊ गुपत के बातमन ला बताहूं, जेमन ला तेंह नइं जानस।
ISA 48:7 ओमन अभी सिरजे गे हवंय, बहुंत पहिले ले नइं; आज ले पहिली तेंह ओमन के बारे सुने घलो नइं रहे। एकरसेति तें ये नइं कह सकस, ‘हव, में ओमन के बारे म जानत रहेंव।’
ISA 48:8 तेंह ओमन के बारे न तो सुने, अऊ न ही समझे हस; पुराना समय ले, तोर कानमन ला नइं खोले गे रिहिस। काबरकि मेंह जानत रहेंव कि तेंह कतेक बिसवासघाती अस; तोला जनम ले ही बिदरोही कहे गे रिहिस।
ISA 48:9 अपन नांव बर मेंह कोप करे म देरी करथंव; अपन महिमा बर मेंह येला तोर ले रोके रखथंव, अइसन झन होवय कि मेंह तोला पूरा मेटा डारंव।
ISA 48:10 देख, मेंह तोला साफ करे हंव, हालाकि चांदी के सहीं नइं; मेंह दुख के भट्ठी म तोला परखे हंव।
ISA 48:11 अपन हित म, हव, अपनेच हित म, मेंह ये करत हंव। मेंह अपनआप ला बदनाम कइसे कर सकत हंव? में अपन महिमा दूसर ला नइं देवंव।
ISA 48:12 “हे याकूब, हे इसरायल, जेला मेंह बलाय हंव, मोर बात सुन: मेंह ओही अंव; मेंह ही सुरू अऊ में ही आखिरी अंव।
ISA 48:13 मोर खुद के हांथ ह धरती के नीव डारिस, अऊ मोर जेवनी हांथ ह अकास ला बगराईस; जब में ओमन ला बलाथंव, त ओमन एक संग ठाढ़ हो जाथें।
ISA 48:14 “तुमन सब के सब एक संग आवव, अऊ सुनव: मूरतीमन ले कोन ह ये बातमन ला पहिले ले बताईस? यहोवा के चुने संगी ह बेबिलोन के बिरूध ओकर उदेस्य ला पूरा करही; ओकर हांथ ह बेबिलोनीमन के बिरूध उठही।
ISA 48:15 में, हव, मेंह कहे हंव; हव, मेंह ओला बलाय हंव। मेंह ओला लानहूं, अऊ ओह अपन उदेस्य म सफल होही।
ISA 48:16 “मोर लकठा म आके ये बात ला सुनव: “सुरू ले लेके अब तक के घोसना म कोनो बात मेंह गुपत म नइं कहेंव; जब येह होथे, तब में उहां हंव।” अऊ अब परमपरधान यहोवा ह मोला पठोय हवय, अऊ अपन आतमा ले मोला भर दे हवय।
ISA 48:17 यहोवा, तोर छुड़इया, इसरायल के पबितर परमेसर ह ये कहत हे: “मेंह यहोवा तुम्हर परमेसर अंव, जऊन ह तोला ओ बात सिखोथे, जऊन ह तोर बर सबले बने अय, अऊ तोला ओ डहार दिखाथे, जेमा तोला जाना चाही।
ISA 48:18 कहूं तें मोर हुकूम ला धियान देय रहिते, तब तोर सांति ह नदी सहीं, अऊ तोर अच्छई ह समुंदर के लहरा सहीं होतिस।
ISA 48:19 तोर संतानमन बालू के सहीं होतिन, अऊ तोर लइकामन येकर अनगिनत दाना सहीं होतिन; ओमन के नांव मोर आघू ले न कभू मिटाय जातिस न कभू नास करे जातिस।”
ISA 48:20 बेबिलोन ला छोंड़ दव, बेबिलोनीमन ले भाग जावव! आनंद के जय-जयकार करत ये बात के घोसना करव, अऊ येकर परचार करव। धरती के छोर तक येला भेजव, अऊ कहव, “यहोवा ह अपन सेवक याकूब ला छोंड़ाय हवय।”
ISA 48:21 जब यहोवा ह अपन मनखेमन ला मरू-भुइयां म ले होके ले गीस, तब ओमन ला पीयास नइं लगिस; ओह ओमन बर चट्टान म ले पानी निकालिस; ओह चट्टान ला फोर दीस अऊ पानी के तेज धारा निकलिस।
ISA 48:22 “दुस्टमन बर कुछू सांति नइं ए,” यहोवा ह कहिथे।
ISA 49:1 हे द्वीपमन, मोर बात ला सुनव; हे दूरिहा-दूरिहा के जातिमन येला सुनव: मोर जनमे के पहिली, यहोवा ह मोला बलाईस, मोर दाई के गरभ ले ही ओह मोर नांव ला रखिस।
ISA 49:2 ओह मोर मुहूं ला चोख तलवार सहीं बनाईस, अऊ अपन हांथ के आड़ म मोला छुपा लीस; ओह मोला एक चमकीला तीर बनाके अपन तरकस म छुपाके रखिस।
ISA 49:3 ओह मोला कहिस, “तेंह मोर सेवक इसरायल अस, जेमा मेंह अपन महिमा परगट करहूं।”
ISA 49:4 तब मेंह कहेंव, “में तो बेकार म मेहनत करें; मेंह बेकार म अपन ताकत लगांय। तभो ले येह यहोवा के हांथ म हवय कि मोला का मिलही, अऊ मोर ईनाम ह मोर परमेसर के हांथ म हवय।”
ISA 49:5 अऊ अब यहोवा ह कहिथे— जऊन ह मोला गरभ म एकरसेति रचिस कि मेंह ओकर सेवक बनंव अऊ याकूब ला ओकर मेर लहुंटाके ले आवंव अऊ इसरायल ला ओकर मेर इकट्ठा करंव, काबरकि यहोवा के नजर म मोर आदर होय हवय अऊ मोर परमेसर ह मोर ताकत अय—
ISA 49:6 यहोवा ह कहिथे: “येह तोर बर बहुंत छोटे बात ए कि मोर सेवक बनके तें याकूब के गोत्र ला फेर पहिले के सहीं कर दे अऊ इसरायल के ओ बांचे मनखेमन ला वापिस ले आ, जेमन ला मेंह बचाके रखे हंव। में तोला आनजातमन बर एक अंजोर घलो ठहिराहूं, ताकि मोर उद्धार ह धरती के छोर तक हबरे।”
ISA 49:7 जऊन ह मनखेमन म तुछ जाने जाथे, जेकर ले जाति ह घिन करथे, जऊन ह सासन करइयामन के सेवक अय, ओकर ले यहोवा, इसरायल के छुड़इया अऊ पबितर परमेसर ह ये कहत हे: “राजा ह तोला देखके ठाढ़ हो जाही, हाकिममन देखके दंडवत करहीं, येह यहोवा के कारन होही, जऊन ह बिसवासयोग्य, इसरायल के पबितर परमेसर अय अऊ जऊन ह तोला चुने हवय।”
ISA 49:8 यहोवा ह ये कहत हे: “मोर दया के समय म मेंह तोला जबाब दूहूं, अऊ उद्धार के दिन म मेंह तोर सहायता करहूं; में तोर रकछा करके तोला मनखेमन बर एक करार ठहिराहूं, ताकि देस ह स्थिर होवय अऊ उजाड़ पड़े उत्तराधिकार ला फेर सऊंपे जावय,
ISA 49:9 अऊ बंधुवई म गय मनखेमन ला कहे जावय, ‘बाहिर आवव,’ अऊ जेमन अंधियार म हवंय ओमन ला कहे जावय, ‘सुतंतर हो जावव।’ “ओमन रद्दा के तीरे-तीर जेवन पाहीं अऊ हर बंजर पहाड़ी म ओमन ला चरागन मिलही।
ISA 49:10 ओमन न तो भूखन होहीं, न ही पीयासन, अऊ न ही मरू-भुइयां के गरमी अऊ सूरज के घाम ओमन ला लगही। जऊन ह ओमन ऊपर दया करथे, ओह ओमन के अगुवई करही अऊ ओमन ला पानी के सोतामन के तीर म ले जाही।
ISA 49:11 मेंह अपन सब पहाड़मन ला सड़क बना दूहूं, अऊ मोर राजमार्गमन ऊंचहा करे जाहीं।
ISA 49:12 देखव, ओमन दूरिहा ले आहीं— कुछू झन उत्तर ले, कुछू झन पछिम ले, कुछू झन असवान के इलाका ले आहीं।”
ISA 49:13 हे अकास, आनंद के मारे जय-जयकार कर; हे धरती, आनंदित हो; हे पहाड़मन, गला खोलके गीत गावव! काबरकि यहोवा ह अपन मनखेमन ला सांति देथे अऊ अपन दुखित मनखेमन ऊपर दया करही।
ISA 49:14 पर सियोन ह कहिस, “यहोवा ह मोला तियाग दे हवय, परभू ह मोला भुला गे हवय।”
ISA 49:15 “का कोनो दाई अपन दूध पीयत लइका ला भुला सकत हे अऊ अपन जनमाय लइका ऊपर कुछू दया नइं करय? हां, ओह तो भुला सकत हे, पर में तोला नइं भुलावंव!
ISA 49:16 देख, मेंह अपन हथेली म खोदके तोर तसबीर बनाय हंव; तोर दीवारमन हरदम मोर आघू म बने रहिथें।
ISA 49:17 तोर लइकामन जल्दी करके वापिस आवत हें, अऊ जेमन तोला उजाड़ दीन, ओमन तोर करा ले चले जावथें।
ISA 49:18 अपन आंखी उठाके चारों कोति देख; तोर जम्मो लइकामन जूरत हें अऊ तोर मेर आवत हें। मोर जिनगी के कसम,” यहोवा ह घोसना करत हे, “तेंह ओ जम्मो झन ला जेवर सहीं पहिरबे; तें एक दुलहिन के सहीं ओमन ला पहिरबे।
ISA 49:19 “हालाकि तेंह नास होके उजाड़ पड़े रहय अऊ तोर देस ह उजाड़ पड़े रिहिस, पर अब तें अपन मनखेमन बर बहुंत छोटे पड़बे, अऊ जेमन तोला नास करे रिहिन, ओमन दूरिहा हो जाहीं।
ISA 49:20 तोर दुख के समय जनमे लइकामन तोर सुनत म कहिहीं, ‘ये जगह ह हमर बर छोटे हे; हमन ला रहे बर अऊ जगह दे।’
ISA 49:21 तब तें अपन मन म कहिबे, ‘कोन ह येमन ला मोर बर जनमाईस? में तो दुखी अऊ बिगर लइका के रहेंव, मेंह बंधुवई म रहेंव अऊ छोंड़ दिये गे रहेंव। येमन के पालन-पोसन कोन करिस? मेंह एके झन छोंड़ दिये गे रहेंव, पर येमन कहां ले आय हवंय?’ ”
ISA 49:22 परमपरधान यहोवा ह ये कहत हे: “देख, में जाति-जाति के मनखेमन ला इसारा करके बलाहूं, मेंह देस-देस के मनखेमन के आघू म अपन झंडा ठाढ़ करहूं; ओमन तोर बेटामन ला अपन गोदी म धरके लानहीं अऊ तोर बेटीमन ला अपन पीठ म बईठाके लानहीं।
ISA 49:23 राजामन तोर पालक ददा अऊ ओमन के रानीमन तोला दूध पीयानेवाली दाई होहीं। ओमन भुइयां म झुकके तोला दंडवत करहीं; ओमन तोर गोड़ के धुर्रा ला चाटहीं। तब तेंह ये जानबे कि मेंह यहोवा अंव; जेमन मोर ऊपर आसा रखथें, ओमन निरास नइं होवंय।”
ISA 49:24 का बीर के हांथ ले सामान लूटे जा सकथे, या का दुस्ट ले कैदीमन ला छोंड़ाय जा सकथे?
ISA 49:25 पर यहोवा ह ये कहत हे: “हव, बीर ले कैदीमन ला छीने जा सकथे, अऊ दुस्ट ले लूट के सामान लिये जा सकथे; में ओमन ले लड़हूं, जेमन तोर संग लड़थें, अऊ तोर लइकामन ला मेंह बचाहूं।
ISA 49:26 में तोर ऊपर अतियाचार करइयामन ला ओहीचमन के मांस खवाहूं; अऊ ओमन अपन खुद के लहू पीहीं, जइसे मंद पीथें। तब जम्मो मानव-जाति ह जानही कि में, यहोवा ह तोर उद्धारकर्ता, तोर छुड़इया, याकूब के सक्तिमान परमेसर अंव।”
ISA 50:1 यहोवा ह ये कहत हे: “तोर दाई के तियाग पतर कहां हे, जेला मेंह ओला छोंड़त समय देय रहंय? या अपन कोन साहूकार के हांथ म मेंह तोला बेचेंव? सुन, तेंह अपन पाप के कारन बेचे गे रहय; तोर अपराधमन के कारन तोर दाई ला छोंड़ दिये गीस।
ISA 50:2 जब मेंह आयेंव, त काबर उहां कोनो नइं रिहिन? जब मेंह बलांय, त जबाब देय बर उहां काबर कोनो नइं रिहिन? तोला छोंड़ाय बर का मोर हांथ ह बहुंत छोटे हो गीस? तोला बचाय बर का मोर म ताकत के कमी हवय? सिरिप एक डांट के दुवारा मेंह समुंदर ला सूखा देथंव, में नदीमन ला मरू-भुइयां बना देथंव; उहां के मछरीमन पानी बिगर मर जाथें अऊ पीयास म मरके बस्साथें।
ISA 50:3 में अकास ला अंधियार रूपी ओनहा पहिराथंव, अऊ बोरा के ओनहा ला ओकर ओढ़ना बना देथंव।”
ISA 50:4 परमपरधान यहोवा ह मोला एक बने सिखानेवाला के जीभ देय हवय, ताकि मेंह थके-हारे मनखे ला अपन बचन के दुवारा संभाले बर जानंव। ओह मोला हर बिहनियां जगाथे, ओह मोर कान ला खोलथे कि मेंह एक सेवक के सहीं सुनंव।
ISA 50:5 परमपरधान यहोवा ह मोर कानमन ला खोल दे हवय; मेंह बिदरोह नइं करे हंव, अऊ न ही पाछू हटे हंव।
ISA 50:6 जेमन मोला मारिन, ओमन कोति अपन पीठ, अऊ जेमन मोर दाढ़ी नोचिन, ओमन कोति अपन गाल ला कर देंव; मोर हंसी उड़ाय अऊ मोर ऊपर थूके ले घलो मेंह अपन चेहरा ला नइं छुपांय।
ISA 50:7 काबरकि परमपरधान यहोवा ह मोर सहायता करथे, मेंह कलंकित नइं होवंव। एकरसेति मेंह अपन चेहरा ला चकमक पथरा के सहीं कड़ा कर ले हंव, अऊ मेंह जानत हंव कि मोला लजाय बर नइं पड़य।
ISA 50:8 जऊन ह मोर रकछा करथे, ओह मोर लकठा म हवय। तब कोन ह मोर ऊपर दोस लगाही? आवव, हमन एक-दूसर के सामना करन! मोर ऊपर दोस लगइया कोन ए? ओह मोर सामना करय!
ISA 50:9 सुनव, येह परमपरधान यहोवा ए, जऊन ह मोर सहायता करथे। मोला कोन ह दोसी ठहिराही? मोर ऊपर दोस लगानेवाले जम्मो झन ओनहा सहीं जुन्ना हो जाहीं; अऊ ओमन ला कीरामन खा जाहीं।
ISA 50:10 तुम्हर बीच म ले कोन ह यहोवा के भय मानथे अऊ ओकर सेवक के बात ला मानथे? जऊन ह अंधियार म रेंगथे, जेकर मेर अंजोर नइं ए, ओह यहोवा के नांव ऊपर भरोसा रखय अऊ अपन परमेसर ऊपर बिसवास करय।
ISA 50:11 पर अब, तुमन जम्मो झन, जेमन आगी बारथव अऊ अपनआप ला बरत मसाल देथव, जावव, अपन आगी के अंजोर म अऊ अपन बारे गय मसाल के अंजोर म रेंगव। मोर हांथ ले तुमन ला ये चीज ही मिलही: तुमन पीरा म परे रहिहू।
ISA 51:1 “तुमन, जेमन धरमीपन म चलथव अऊ यहोवा के खोज करथव, मोर बात ला सुनव: ओ चट्टान ला देखव, जेमा ले तुमन ला काटे गे हवय अऊ पथरा के ओ खदान ला देखव, जेमा ले तुमन ला निकाले गे हवय;
ISA 51:2 अपन पुरखा अब्राहम अऊ सारा ला देखव, जेकर तुमन संतान अव। जब में ओला बलांय, तब ओह सिरिप एके झन आदमी रिहिस, अऊ मेंह ओला आसीस देंव अऊ ओला बहुंते झन कर देंव।
ISA 51:3 यहोवा ह सियोन ला जरूर सांति दीही ओह ओकर सब खंडहरमन ऊपर दया देखाही; ओह ओकर बंजर जगह ला अदन के बारी सहीं अऊ ओकर उजाड़ जगह ला यहोवा के बारी सहीं बना दीही। ओमा खुसी अऊ आनंद धनबाद अऊ गीत गाय के सबद सुनई पड़ही।
ISA 51:4 “हे मोर मनखेमन, मोर बात ला सुनव; हे मोर जाति के मनखेमन, मोर बात ला सुनव: कानून ह मोर ले निकलके जाही; मोर नियाय ह देस-देस के मनखेमन बर एक अंजोर बन जाही।
ISA 51:5 मोर धरमीपन ह तेजी से लकठा म आथे, मोर उद्धार ह डहार म हवय, अऊ मोर भुजा ह देस-देस के मनखेमन बर नियाय लानही। द्वीपमन मोर कोति देखहीं अऊ मोर भुजा म आसा रखहीं।
ISA 51:6 अकास कोति आंखी उठाके देखव, खाल्हे धरती ला देखव; अकास ह धुआं के सहीं लोप हो जाही, धरती ह ओनहा के सहीं जुन्ना हो जाही अऊ येमा रहइयामन माछीमन कस मर जाहीं। पर मोर उद्धार ह सदाकाल तक बने रहिही, अऊ मोर धरमीपन के कभू अन्त नइं होही।
ISA 51:7 “तुमन, जेमन सही बात ला जानथव, तुमन, जेमन मोर कानून ला अपन मन म रखे हव, मोर बात ला सुनव: मरनहार मनखेमन के निन्दा करई ले झन डरव या ओमन के दुवारा बेजत्ती करे ले भयभीत झन होवव।
ISA 51:8 काबरकि घूना ह ओमन ला ओनहा सहीं अऊ कीरा ह ओमन ला ऊन सहीं खा जाही। पर मोर धरमीपन ह अनंतकाल तक अऊ मोर उद्धार ह पीढ़ी-पीढ़ी तक बने रहिही।”
ISA 51:9 हे यहोवा के भुजा, जाग, जाग, अऊ बल धारन कर! जाग, जब दिनमन बीतत हें, जाग, पुराना पीढ़ी के मनखेमन सहीं। का ये तें नइं रहय, जऊन ह राहाब ला कुटा-कुटा कर देय, जऊन ह ओ बिकराल जन्तु ला छेद दीस?
ISA 51:10 का ये तें नइं रहय, जऊन ह समुंदर ला, गहिला सागर के पानी ला सूखा दीस, जऊन ह समुंदर के गहरई म एक सड़क बना दीस ताकि छोंड़ाय गय मनखेमन ओ पार जा सकंय?
ISA 51:11 जेमन ला यहोवा ह बचाय हवय, ओमन लहुंटके आहीं। ओमन गीत गावत सियोन म आहीं; सदाकाल के आनंद ह ओमन के मुड़ के मुकुट होही। खुसी अऊ आनंद ले ओमन भर जाहीं, अऊ दुख अऊ पीरा के अन्त हो जाही।
ISA 51:12 “में, हव, में ही तो तोला सांति देथंव। तें कोन अस कि तें मरनहार मनखे ले डरथस, ओ मानव-जाति, जेमन घांस के सहीं अंय,
ISA 51:13 तें, यहोवा अपन सिरजनहार ला भुला जाथस जऊन ह अकास ला तानथे अऊ जऊन ह धरती के नीव धरथे, अऊ तें हर दिन लगातार आतंक म जीथस, ओ अतियाचारी के कोप के कारन, जऊन ह बिनास करे म लगे रहिथे। पर ओ अतियाचारी के कोप ह कहां हवय?
ISA 51:14 भयभीत कैदीमन जल्दी ही सुतंतर करे जाहीं; ओमन अपन काल-कोठरी म नइं मरंय, अऊ न ही ओमन ला रोटी के कमी होही।
ISA 51:15 काबरकि मेंह यहोवा तुम्हर परमेसर अंव, जऊन ह समुंदर ला उथल-पुथल करथे, जेकर ले ओकर लहरामन म गरजन होथे, सर्वसक्तिमान यहोवा ओकर नांव ए।
ISA 51:16 मेंह तोर मुहूं म अपन बचन ला डाले हंव अऊ तोला अपन हांथ के छइहां म ढांपे हंव— में, जऊन ह अकास ला तानथंव, जऊन ह धरती के नीव डारेंव, अऊ जऊन ह सियोन ले कहिथे, ‘तुमन मोर मनखे अव।’ ”
ISA 51:17 हे यरूसलेम, जाग, जाग! जाग उठ! तें, जऊन ह यहोवा के हांथ ले ओकर कोप के कटोरा म ले पीये हस, तेंह कटोरा के पूरा मंद ला पी गे हस जेकर से मनखे ह लड़खड़ाथे।
ISA 51:18 ओकर जनमे जम्मो लइका म अइसे कोनो घलो नइं एं, जऊन ह ओकर अगुवई करे; ओकर पाले जम्मो लइका म अइसे कोनो नइं एं, जऊन ह ओकर हांथ ला थामके ले चलय।
ISA 51:19 तोर ऊपर ये दू ठन बिपत्ति आय हवंय— कोन ह तोला सांति दे सकत हे?— उजाड़ अऊ बिनास, अकाल अऊ तलवार आ परे हवय— कोन ह तोला सांति दे सकत हे?
ISA 51:20 तोर लइकामन मूरछित होके हर गली के कोनटा म पड़े हवंय, जइसे हिरन ह जाल म फंसके परे रहिथे। ओमन यहोवा के कोप तुम्हर परमेसर के डांट ले भर गे हवंय।
ISA 51:21 एकर कारन हे दुखियारी मनखे, सुन, तें मतवार तो हवस, पर अंगूर के मंद पीके नइं।
ISA 51:22 तोर परमपरधान यहोवा, तोर परमेसर, जऊन ह अपन मनखेमन के रकछा करथे, ओह ये कहत हे: “देख, मेंह तोर हांथ ले ओ कटोरा ला लेय ले हंव, जेकर मंद ला पीके तें लड़खड़ाथस; ओ कटोरा ले, मोर कोप के कटोरा ले, तेंह फेर कभू नइं पीबे।
ISA 51:23 में येला तोर दुख देवइयामन के हांथ म दे दूहूं, जेमन तोला कहिन, ‘पेट के भार गिर जा, ताकि हमन तोर ऊपर रेंगन।’ अऊ तेंह अपन पीठ ला भुइयां सहीं कर ले हस, एक गली सहीं, जेमा ले रेंगके जाथें।”
ISA 52:1 हे सियोन, जाग, जाग, अपन ताकत ला धर! हे पबितर नगर, यरूसलेम, अपन सोभा के ओनहा ला पहिर ले। काबरकि तोर भीतर खतनारहित अऊ असुध मनखेमन फेर नइं आय पाहीं।
ISA 52:2 अपन ऊपर ले धुर्रा ला झर्रा दे; हे यरूसलेम, उठ, बिराजमान हो। हे बेटी सियोन, अभी तें एक बंदी अस, अपन घेंच के बंधन ला खोल दे।
ISA 52:3 काबरकि यहोवा ह ये कहत हे: “तोला मुफत म बेच दिये गे रिहिस, अऊ बिगर पईसा के तेंह छोंड़ाय जाबे।”
ISA 52:4 परमपरधान यहोवा ह ये कहत हे: “पहिली मोर मनखेमन मिसर देस म रहे बर गीन; बाद म, अस्सूरीमन ओमन ऊपर अतियाचार करिन।
ISA 52:5 “अऊ अब, इहां मोर करा का हवय?” यहोवा ह घोसना करत हे। “काबरकि मोर मनखेमन ला मुफत म ले जाय गे हवय, अऊ जेमन ओमन ऊपर सासन करथें, ओमन ठट्ठा करथें,” यहोवा ह घोसना करत हे। “अऊ दिन भर लगातार मोर नांव के निन्दा होवत हे।
ISA 52:6 एकर कारन मोर मनखेमन मोर नांव ला जानहीं; एकर कारन ओ दिन ओमन जानहीं कि येह में अंव, जऊन ह पहिले ले ये बात बताय रहेंव। हव, येह में अंव।”
ISA 52:7 पहाड़ ऊपर कतेक सुघर होथे ओमन के अवई ह, जऊन मन के पांव सुघर संदेस लेके आथें, जेमन सांति के बात सुनाथें जेमन सुघर संदेस लेके आथें, जेमन उद्धार के घोसना करथें, जेमन सियोन ले कहिथें, “तोर परमेसर ह राज करथे!”
ISA 52:8 सुन! तोर पहरेदारमन ऊंच अवाज म कहत हें; एक संग ओमन आनंद के मारे जय-जयकार करत हें। जब यहोवा ह सियोन म लहुंटके आही त ओमन येला अपन आंखी ले देखहीं।
ISA 52:9 हे यरूसलेम के खंडहरमन, एक संग आनंद के मारे जय-जयकार के गीत गावव, काबरकि यहोवा ह अपन मनखेमन ला सांति देय हवय, ओह यरूसलेम ला छोंड़ाय हवय।
ISA 52:10 यहोवा ह सब जातिमन के आघू म अपन पबितर भुजा परगट करे हवय अऊ धरती के छोर तक के सब मनखेमन हमर परमेसर के करे गय उद्धार ला देखहीं।
ISA 52:11 चले जावव, चले जावव, उहां ले निकल जावव! कोनो असुध चीज ला झन छुवव! येमा ले बाहिर आवव अऊ सुध होवव, तुमन, जेमन यहोवा के घर के चीजमन ला उठाके ले चलथव।
ISA 52:12 पर तुमन ला जल्दबाजी म नइं जाना हे या दऊड़त नइं जाना हे; काबरकि यहोवा ह तुम्हर आघू-आघू जाही, इसरायल के परमेसर ह तुम्हर पाछू कोति के पहरेदार होही।
ISA 52:13 देखव, मोर सेवक ह बुद्धिमानी से काम करही; ओला खड़े करके ऊपर करे जाही अऊ ओला बहुंत उठाय जाही।
ISA 52:14 जइसन बहुंते झन ओला देखके भयभीत होईन— ओकर रूप ह कोनो मनखे के रूप ले बहुंत जादा बिगड़ गे रिहिस ओकर आकार ह मनखे के आकार सहीं नइं जान पड़त रिहिस—
ISA 52:15 वइसन ही ओह बहुंते जातिमन ला छिंचही, अऊ ओकर कारन राजामन अपन मुहूं ला बंद कर लीहीं। काबरकि जऊन बात ओमन ला नइं बताय गीस, ओला ओमन देखहीं, अऊ जऊन बात ओमन नइं सुने रिहिन, ओला ओमन समझहीं।
ISA 53:1 कोन ह हमर संदेस ऊपर बिसवास करिस अऊ काकर ऊपर यहोवा के भुजबल परगट होईस?
ISA 53:2 ओह ओकर आघू म एक कोअंर अंकुर सहीं, अऊ सूखा भुइयां म एक जरी सहीं निकलिस। ओमा कोनो सुन्दरता या महानता नइं रिहिस कि हमर धियान ओकर कोति जातिस, अऊ ओकर रूप म अइसन कोनो चीज नइं रिहिस, जेला हमन देखे के ईछा करतेंन।
ISA 53:3 ओह मानव-जाति के दुवारा तुछ समझे गीस अऊ अस्वीकार करे गीस, ओह दुखी मनखे रिहिस, अऊ पीरा ले ओकर जान-पहिचान रिहिस। जइसे कोनो मनखे ले आने मनखेमन अपन चेहरा छुपाथें। वइसे ओह तुछ समझे गीस अऊ हमन ओकर आदरमान नइं करेंन।
ISA 53:4 सही म ओह हमर पीरा ला ले लीस अऊ हमर दुख ला सहिस, तभो ले हमन ओला परमेसर के दुवारा दंड, ओकर दुवारा मारे-कूटे अऊ दुख देय लईक समझेंन।
ISA 53:5 पर ओह हमर अपराधमन के कारन घायल करे गीस, ओह हमर अधरम के काममन के कारन कुचरे गीस; ओला दिये गय दंड ह हमर बर सांति लानिस, अऊ ओला मिले घावमन के दुवारा हमन ला चंगई मिलथे।
ISA 53:6 हमन सब के सब भेड़मन कस भटक गे रहेंन, हमन म ले हर एक झन अपन-अपन रद्दा धर ले रहेंन; अऊ यहोवा ह हमर सब के अधरम के बोझा ला ओकरे ऊपर लदक दीस।
ISA 53:7 ओह सताय गीस अऊ ओला पीरा दिये गीस, तभो ले ओह कुछू नइं कहिस; ओला बध करे बर ले जाय भेड़ सहीं ले गीन, अऊ जइसने ऊन कतरइयामन के आघू म भेड़ ह चुपेचाप रहिथे, वइसने ओह घलो अपन मुहूं ला नइं खोलिस।
ISA 53:8 अतियाचार करके अऊ दोस लगाके ओमन ओला ले गीन। तभो ले ओकर पीढ़ी के कोन ह ये सब बात के बिरोध करिस? ओह जीयतमन के बीच म ले उठा लिये गीस; मोर मनखेमन के अपराध के कारन ओला दंड मिलिस।
ISA 53:9 ओकर कबर दुस्टमन के संग रखे गीस, अऊ मऊत के समय ओह धनवानमन के संगी होईस, हालाकि ओह कोनो हिंसा के काम नइं करे रिहिस, अऊ न ही ओकर मुहूं ले कोनो छल के बात निकले रिहिस।
ISA 53:10 तभो ले यहोवा ला ये बने लगिस कि ओला कुचरय अऊ ओला दुख देवय, अऊ हालाकि यहोवा ह ओकर जिनगी ला पाप के एक बलिदान बना देथे, तभो ले ओह अपन बंस देखे बर पाही अऊ ओह बहुंत दिन तक जीयत रहिही, ओकर हांथ म यहोवा के ईछा पूरा होही।
ISA 53:11 दुख सहे के बाद, ओह जिनगी के अंजोर ला देखही अऊ संतुस्ट होही; अपन गियान के दुवारा मोर धरमी सेवक ह बहुंते झन ला धरमी ठहिराही, अऊ ओमन के अधरम के बोझा ला उठाही।
ISA 53:12 एकर कारन मेंह ओला महान मनखेमन संग एक भाग दूहूं, अऊ ओह ताकतवर मनखेमन के संग लूटे चीजमन ला बांट दीही, काबरकि ओह अपन जिनगी ला मऊत म ढार दीस, अऊ ओह अपराधीमन संग गने गीस। काबरकि ओह बहुंत झन के पाप के बोझा ला उठाईस, अऊ अपराधीमन बर बिनती करिस।
ISA 54:1 यहोवा ह कहिथे, “हे ठड़गी माईलोगन, गीत गा, तें, जऊन ह कभू लइका नइं जनमाय; तोला लइका जनमे के पीरा कभू नइं होईस, जोर से गीत गा अऊ आनंद के मारे चिचिया; काबरकि तियागे माईलोगन के लइकामन बिहाता माईलोगन के लइकामन ले जादा हवंय,” यहोवा ह कहत हे।
ISA 54:2 “अपन तम्बू के जगह ला चाकर कर, अऊ तम्बू के परदा ला चौड़ा कर, अपन हांथ ला झन रोक; अपन डोरीमन ला लम्बा कर, अऊ खूंटीमन ला मजबूत कर।
ISA 54:3 काबरकि तेंह जेवनी कोति अऊ डेरी कोति बगरबे; तोर संतानमन जाति-जाति के मनखेमन ला बेदखल कर दीहीं अऊ ओमन के उजरे नगरमन म बस जाहीं।
ISA 54:4 “झन डर; तोला लज्जित होना नइं पड़य। कलंक के बात ले झन डर; तेंह अपमानित नइं होवस। तें अपन जवानी के लज्जा ला भुला जाबे अऊ अपन बिधवापन के अपमान ला फेर सुरता नइं करबे।
ISA 54:5 काबरकि तोर रचइया ह तोर घरवाला ए— सर्वसक्तिमान यहोवा ओकर नांव ए— इसरायल के पबितर परमेसर तोर छुड़इया ए; ओला जम्मो धरती के परमेसर कहे जाथे।
ISA 54:6 यहोवा ह तोला वापिस बलाही मानो तेंह एक छोंड़ दिये गय घरवाली रहय अऊ मन म दुखी हस— एक अइसन घरवाली, जेकर बिहाव जवानी म ये कारन होय रिहिस ताकि ओला छोंड़ दिये जावय,” तोर परमेसर ह कहत हे।
ISA 54:7 “पल भर बर ही मेंह तोला छोंड़ दे रहंय, पर अब बड़े दया करके में तोला वापिस लानहूं।
ISA 54:8 रिस म आके पल भर बर मेंह तोर ले अपन मुहूं छुपा ले रहेंव, पर अब अनंत करूना ले में तोर ऊपर दया करहूं,” तोर छुड़इया यहोवा ह कहत हे।
ISA 54:9 “मोर नजर म येह नूह के समय के सहीं अय, जब मेंह किरिया खाय रहेंव कि नूह के समय के सहीं जल-परलय करके मेंह धरती ला फेर कभू नइं बुड़ोवंव। एकरसेति अब मेंह ये किरिया खाय हंव कि फेर कभू तोर ऊपर रिस नइं करंव, तोला फेर कभू नइं डांटंव।
ISA 54:10 चाहे पहाड़मन कांपंय अऊ पहाड़ीमन हट जावंय, पर तोर बर मोर अटल मया ह नइं टलय अऊ न ही सांति के मोर करार ह टलही,” ओ यहोवा ह कहत हे, जऊन ह तोर ऊपर दया करथे।
ISA 54:11 “हे दुखियारी सहर, तें जऊन ह आंधी ले सताय गय अऊ जऊन ला सांति नइं मिलिस, में तोला बहुंत कीमती पथरामन ले फेर बनाहूं, अऊ तोर नीवमन ला नीलमनि ले बनाहूं।
ISA 54:12 में तोर दीवारमन के कलस ला मूंगा ले, तोर दुवारमन ला चमकत मनि ले अऊ तोर जम्मो दीवारमन ला कीमती पथरामन ले बनाहूं।
ISA 54:13 तोर जम्मो लइकामन यहोवा के दुवारा सिखोय जाहीं, अऊ ओमन ला बड़े सांति मिलही।
ISA 54:14 तोला धरमीपन म स्थिर करे जाही: अतियाचार ह तोर ले दूरिहा होही; तोला कोनो डर-भय नइं होही। आतंक ला तोर ले बहुंत दूरिहा कर दिये जाही; येह तोर लकठा म नइं आही।
ISA 54:15 कहूं कोनो तोर ऊपर हमला करथे, त जान ले, येह मोर काम नइं होही; जऊन ह घलो तोर ऊपर हमला करथे, ओह तोर सरन म आही।
ISA 54:16 “देख, येह में अंव, जऊन ह लोहार ला बनाईस जऊन ह धुकके कोइला म आगी लगाथे अऊ सही काम करे बर गढ़के एक हथियार बनाथे। अऊ येह में अंव, जऊन ह नास करइया ला बनाथे कि ओह बिनास के बदला लेवय;
ISA 54:17 तोर बिरूध बनाय गे कोनो घलो हथियार जय नइं पा सकय, अऊ तें हर ओ मनखे ला लबरा साबित करबे, जऊन ह तोर ऊपर दोस लगाही। येह यहोवा के सेवकमन ला मिले भाग ए, अऊ येह मोर कोति ले ओमन बर नियाय के बात ए,” यहोवा ह घोसना करत हे।
ISA 55:1 “हे सब पीयासन मनखेमन, पानी के तीर म आवव; अऊ जेमन करा रूपिया नइं ए, ओमन घलो आवंय, बिसावंय अऊ खावंय! आवव, अंगूर के मंद अऊ दूध बिगर रूपिया अऊ बिगर दाम के ले जावव।
ISA 55:2 जऊन ह खाय के चीज नो हय, ओकर बर काबर रूपिया खरच करन, अऊ जेकर ले पेट नइं भरय, ओकर बर काबर मेहनत करन? सुनव, मोर बात ला सुनव, अऊ ओ चीज ला खावव जऊन ह बने अय, अऊ तुमन खाय के सबले बढ़िया चीजमन के आनंद उठाहू।
ISA 55:3 कान लगावव, अऊ मोर करा आवव; सुनव, ताकि तुमन जीयत रहव। में तुम्हर संग एक सदाकाल के करार करहूं, याने कि मोर बिसवासयोग्य मया, जेकर वायदा मेंह दाऊद ले करे रहेंव।
ISA 55:4 सुनव, मेंह ओला राज-राज के मनखेमन बर एक गवाह, एक सासन करइया अऊ हुकूम देवइया ठहिराय हंव।
ISA 55:5 खचित तें अइसन जातिमन ला बलाबे, जेमन ला तें नइं जानस, अऊ जऊन जातिमन ला तें नइं जानस, ओमन तोर करा दऊड़त आहीं, येह यहोवा तोर परमेसर, इसरायल के पबितर परमेसर के कारन होही, काबरकि ओह तोला सोभायमान करे हवय।”
ISA 55:6 जब तक यहोवा मिल सकथे, तब तक ओकर खोज म रहव; जब तक ओह लकठा म हवय, तब तक ओला पुकारव।
ISA 55:7 दुस्ट ह अपन चालचलन अऊ अधरमी ह अपन सोच-बिचार छोंड़य। ओमन यहोवा कोति फिरंय, अऊ ओह ओमन ऊपर दया करही, अऊ हमर परमेसर कोति फिरंय, काबरकि ओह बिगर कोनो दाम के छेमा करही।
ISA 55:8 “काबरकि मोर बिचार अऊ तुम्हर बिचार एक सहीं नो हंय, न ही तुम्हर चाल अऊ मोर चाल एक सहीं अंय,” यहोवा ह घोसना करत हे।
ISA 55:9 “जइसे अकास ह धरती ले ऊंच हवय, वइसे मोर चाल ह तुम्हर चाल ले अऊ मोर सोच-बिचार ह तुम्हर सोच-बिचार ले बहुंत ऊंच हवय।
ISA 55:10 जइसे बरसा अऊ बरफ अकास ले गिरथें, अऊ धरती म बिगर पानी पलोय अऊ येमा बिगर बीजा के जामय अऊ बढ़य, अकास म वापिस नइं लहुंटंय, जेकर ले बोवइया ला बीजा अऊ खवइया ला रोटी मिलथे,
ISA 55:11 वइसे ही मोर बचन घलो अय, जऊन ह मोर मुहूं ले निकलथे: येह मोर करा खाली नइं लहुंटय, पर जो मोर ईछा हे, ओला पूरा करही अऊ जऊन काम बर मेंह येला पठोय रहेंव, ओला येह पूरा करही।
ISA 55:12 काबरकि तुमन आनंद के संग निकलहू, अऊ सांति के संग अमराय जाहू; पहाड़ अऊ पहाड़ीमन तुम्हर आघू म जय-जयकार के गीत गाहीं, अऊ मैदान के जम्मो रूखमन आनंद के मारे ताली बजाहीं।
ISA 55:13 कंटिली झाड़ी के बदले सनोवर रूख उगही, अऊ जंगली पऊधा के बदले मेंहदी के रूख बढ़ही। येह यहोवा के नांव बर होही, सदाकाल के एक चिनहां बर होही, जऊन ह सदाकाल तक बने रहिही।”
ISA 56:1 यहोवा ह ये कहत हे: “नियाय ला बनाय रखव अऊ ओ काम करव, जऊन ह सही ए, काबरकि में जल्दी ही तुम्हर उद्धार करहूं, अऊ मोर धरमीपन ह जल्दी परगट होही।
ISA 56:2 धइन ए ओ मनखे, जऊन ह ये करथे— ओ मनखे, जऊन ह येमा अटल रहिथे, जऊन ह येकर धियान रखथे कि बिसराम दिन ह अपबितर झन होवय, अऊ अपन हांथ ला कोनो घलो बुरई के काम करे ले रोकथे।”
ISA 56:3 जऊन परदेसी ह यहोवा ले जुड़े हवय, ओह ये झन कहय, “यहोवा ह मोला अपन मनखेमन ले जरूर अलग कर दीही।” अऊ कोनो कोचिया ये सिकायत झन करय, “मेंह तो सिरिप एक सूखा रूख अंव।”
ISA 56:4 काबरकि यहोवा ह ये कहत हे: “ओ कोचियामन, जेमन मोर बिसराम दिन ला मानथें, जेमन ओ चीज ला चुनथें, जऊन ह मोला बने लगथे अऊ मोर करार म मजबूती से बने रहिथें—
ISA 56:5 ओमन ला में अपन मंदिर अऊ येकर भीथीमन के भीतर एक स्मारक अऊ एक नांव दूहूं जऊन ह बेटा अऊ बेटीमन ले कहीं उत्तम होही; मेंह ओमन ला सदाकाल के एक नांव दूहूं जऊन ह हमेसा बने रहिही।
ISA 56:6 अऊ परदेसी, जेमन अपनआप ला यहोवा ले जोड़े रखथें ताकि ओकर सेवा-टहल करंय, यहोवा के नांव ले मया रखंय, अऊ ओकर सेवक बनंय, ओ जम्मो जेमन धियान रखथें कि बिसराम दिन ह अपबितर झन होवय अऊ जेमन मोर करार म मजबूती से बने रहिथें—
ISA 56:7 ओमन ला में अपन पबितर पहाड़ म लानहूं अऊ ओमन ला पराथना के मोर घर म आनंदित करहूं। ओमन के होम-बलिदान अऊ मेल-बलिदान मोर बेदी ऊपर गरहन करे जाहीं; काबरकि मोर भवन ह जम्मो जाति के मनखेमन बर पराथना के घर कहे जाही।”
ISA 56:8 परमपरधान यहोवा ह घोसना करत हे— जऊन ह इसरायल ले निकाले गय मनखेमन ला इकट्ठा करथे: “जेमन इकट्ठा करे गे हवंय ओमन के संग मेंह आने मन ला घलो इकट्ठा करके मिला दूहूं।”
ISA 56:9 हे मैदान के जम्मो पसुमन, आवव, हे जंगल के जम्मो पसुमन, आवव अऊ खावव!
ISA 56:10 इसरायल के पहरेदारमन अंधवा अंय, ओ जम्मो म गियान के कमी हवय; ओमन सब के सब कोंदा कुकुर अंय, जेमन भूंके नइं सकंय; ओमन पड़े रहिथें अऊ सपना देखथें, ओमन ला नींद बहुंत बने लगथे।
ISA 56:11 ओमन बहुंत खानेवाला कुकुर अंय; ओमन के पेट कभू नइं भरय। ओमन अइसन चरवाहा अंय, जेमन म समझ नइं ए; ओमन जम्मो अपन खुद के डहार म चलथें, ओमन अपन खुद के फायदा ला देखथें।
ISA 56:12 ओमा के हर एक ह चिचियाके कहिथे, “आवव, में अंगूर के मंद लेके आवत हंव! आवव, हमन छकके मंद पीयन! अऊ कल के दिन घलो आज के सहीं होही, या येकर ले घलो बेहतर होही।”
ISA 57:1 धरमी जन नास हो जाथें, अऊ कोनो ये बात के चिंता नइं करंय; भक्त जनमन उठा लिये जाथें, अऊ कोनो नइं समझंय धरमी जन एकर बर उठा लिये जाथें ताकि अवइया बिपत्ति ले बांच जावंय।
ISA 57:2 जेमन सीधा चाल चलथें ओमन सांति पाथें; ओमन आराम पाथें, जब ओमन के मऊत होथे।
ISA 57:3 “पर तुमन—इहां आवव, हे जादूगरनी के लइकामन, हे बेभिचारी अऊ बेस्यामन के संतान!
ISA 57:4 तुमन काकर हंसी उड़ात हव? काकर ऊपर तुमन हंसत हव अऊ कोन ला तुमन अपन जीभ देखात हव? का तुमन बिदरोही अऊ लबरामन के संतान नो हव?
ISA 57:5 तुमन बलूत रूखमन के बीच अऊ हर फईले रूखमन के खाल्हे म कामातुर होथव; तुमन अपन लइकामन ला घाटी म अऊ बाहिर निकले चट्टानमन के खाल्हे म बलिदान चघाथव।
ISA 57:6 घाटी के चिकना पथरामन के बीच मूरतीमन तुम्हर हिस्सा अंय; वास्तव म, ओमन तुम्हर भाग अंय। हव, ओमन बर तुमन पेय-बलिदान अऊ अन्न-बलिदान चघाय हव। ये सब ला देखके घलो, का में सांत हो जावंव?
ISA 57:7 तुमन एक ठन ऊंचहा अऊ उठे हुए पहाड़ी ऊपर अपन बिस्तर बिछाय हवव; उहां तुमन अपन बलिदान चघाय बर गे रहेव।
ISA 57:8 अपन कपाट अऊ अपन चौखटमन के पाछू म तुमन अपन मूरती-पूजा के चीजमन ला रखे हव। मोला छोंड़के, तुमन अपन बिस्तर ला खुला रखे हव, तुमन येकर ऊपर चघके येला चौड़ा कर ले हव; तुमन ओमन ले एक समझौता कर ले हव, जेमन के बिस्तर तुमन ला बने लगथे, अऊ तुमन ओमन के नंगरा देहें ला काम-वासना से देखे हव।
ISA 57:9 तें जैतून तेल लेके मोलेक करा गे रहे अऊ अपन खुसबू ला बढ़ाय। तेंह अपन दूतमन ला बहुंत दूरिहा तक पठोय; तें खाल्हे अधोलोक तक चले गेय!
ISA 57:10 तें यातरा के दुवारा अपनआप ला थका लेय, पर तेंह ये नइं कहे, ‘येह बेकार अय।’ तोर म नवां बल के संचार होईस, एकर कारन तेंह नइं थके।
ISA 57:11 “तेंह काकर डर ले अतेक भय खाय हस अऊ डर गे हस कि तेंह मोर ले सच नइं बोलय, अऊ मोला सुरता नइं राखे, न ही येकर ऊपर धियान देय? येकर कारन ये नो हय कि में बहुंत समय ले चुपेचाप हंव जेकर ले तें मोला नइं डरस?
ISA 57:12 मेंह तोर धरमीपन अऊ तोर करम ला परगट कर दूहूं, पर ओमन ले तोला कुछू फायदा नइं होवय।
ISA 57:13 जब तें मदद बर पुकारथस, त तोर जमा करे गय मूरतीमन तोला बचावंय! हवा ह ओ जम्मो ला दूरिहा ले जाही, सिरिप एक सांस ह ओमन ला उड़िहा ले जाही। पर जऊन ह मोर सरन लीही ओह देस के उत्तराधिकारी होही अऊ मोर पबितर पहाड़ ह ओकर अधिकार म रहिही।”
ISA 57:14 अऊ ये कहे जाही: “बनावव, बनावव, सड़क ला तियार करव! मोर मनखेमन के रद्दा ले बाधामन ला हटावव।”
ISA 57:15 काबरकि ऊंच अऊ उठाय गय परमेसर ह ये कहत हे— ओ जऊन ह सदा जीयत हे, जेकर नांव पबितर ए: “मेंह एक ऊंच अऊ पबितर स्थान म रहिथंव, पर ओकर संग घलो रहिथंव, जऊन ह टूटे मन के अऊ आतमा म नम्र ए, कि नम्र मन के आतमा अऊ टूटे मन वाले के हिरदय ला खुस करंव।
ISA 57:16 में हमेसा ओमन ऊपर दोस नइं लगावंव, न ही हमेसा मेंह गुस्सा करहूं, काबरकि तब ओ मोर बनाय मनखेमन मोर कारन मूरछित हो जाहीं।
ISA 57:17 ओमन के पापी लालची सुभाव के कारन मेंह बहुंत गुस्सा करेंव; में ओमन ला दंड देंय, अऊ गुस्सा म अपन चेहरा छुपांय; तभो ले ओमन अपन मन के रद्दा म चलते रिहिन।
ISA 57:18 में ओमन के चालचलन ला देखे हंव, तभो ले ओमन ला चंगा करहूं; मेंह ओमन ला ले चलहूं अऊ इसरायल के सोक करइयामन ला सांति दूहूं,
ISA 57:19 मेंह ओमन के ओंठ म परसंसा के बात लानहूं। सांति, जेमन दूरिहा अऊ लकठा म हवंय, दूनों ला सांति मिलय,” यहोवा ह कहत हे। “अऊ में ओमन ला चंगा करहूं।”
ISA 57:20 पर दुस्टमन लहरावत समुंदर सहीं अंय, जऊन ह आराम नइं कर सकय, अऊ जेकर लहरामन मईला अऊ चीखला उछालथें।
ISA 57:21 “दुस्टमन बर सांति नइं ए,” मोर परमेसर ह कहत हे।
ISA 58:1 “गला फारके चिचियावव, दबाके झन रखव। तुरही के सहीं अपन अवाज ला ऊंचहा करव। मोर मनखेमन ला ओमन के बिदरोह के काम बतावव अऊ याकूब के संतानमन ला ओमन के पाप जता दव।
ISA 58:2 काबरकि ओमन रोज-रोज मोर मेर आथें; अइसे लगथे कि ओमन मोर रसता ला जाने बर उत्सुक हवंय, मानो ओमन एक अइसे जाति अंय, जऊन ह सही काम ला करथे अऊ अपन परमेसर के हुकूममन ला नइं छोंड़े हवय। ओमन मोला सिरिप फैसला के बारे म पुछथें अऊ परमेसर बर उत्सुक जान पड़थें कि ओह ओमन के लकठा म आवय।
ISA 58:3 ओमन कहिथें, ‘का कारन ए कि हमन तो उपास राखेंन, पर तेंह येला नइं देखे? का कारन ए कि हमन अपनआप ला नम्र करे हन, पर तेंह धियान नइं दे हस?’ “काबरकि उपास के दिन म तुमन अपन मन मुताबिक करथव अऊ अपन बनिहारमन के सोसन करथव।
ISA 58:4 तुम्हर उपास ह लड़ई-झगरा अऊ एक-दूसर ला मुक्का मारके झगरा करे म खतम होथे। जइसन उपास तुमन आजकल रखथव, वइसन झन रखव, अइसन उपास रखके तुमन आसा करथव कि तुम्हर अवाज ला ऊपर म सुने जाही।
ISA 58:5 का ये किसम के उपास ले में खुस होथंव, कि सिरिप एके दिन बर मनखेमन अपनआप ला दीन करंय? का येह, नरकट पऊधा सहीं कोनो मनखे के सिरिप अपन मुड़ ला झुकाना ए? अऊ सिरिप बोरा के ओनहा अऊ राख म लेटना ए? का येला तुमन उपास कहिथव, एक अइसन दिन, जेला यहोवा स्वीकार करथे?
ISA 58:6 “का येह ओ किसम के उपास नो हय, जेकर ले में खुस होथंव: कि अनियाय के बंधना ला टोर दिये जावय अऊ जुड़ा के बंधना ला खोलके अतियाचार सहइयामन ला सुतंतर कर दिये जावय अऊ हर एक जुड़ा ला टोर दिये जावय?
ISA 58:7 का येह ओ किसम के उपास नो हय, कि भूखन मन के संग खाना बांटे जावय अऊ गरीब घुमंतू ला आसरय दिये जावय— जब तुमन नंगरामन ला देखथव, त ओमन ला ओनहा पहिरावव, अऊ अपन खुद के रिस्तेदारमन ले मुहूं झन मोड़व?
ISA 58:8 तब तुम्हर अंजोर ह बिहान पहाय सहीं चमकही, अऊ तुम्हर चंगई ह जल्दी दिखही; तब तुम्हर धरमीपन ह तुम्हर आघू-आघू जाही, अऊ यहोवा के तेज ह तुम्हर पाछू तुम्हर रकछा करही।
ISA 58:9 तब तुमन पुकारहू, अऊ यहोवा जबाब दीही; तुमन मदद बर बिनती करहू, अऊ ओह कहिही: में इहां हंव। “यदि तें अंधेर करई के जुड़ा के संग अंगरी उठई अऊ दुस्ट बात करई के आदत ला छोंड़ देबे,
ISA 58:10 अऊ यदि तें भूखन मनखे के सहायता करबे अऊ दीन दुखीमन के दुख ला दूर करबे, तब अंधियार म तोर अंजोर ह चमकही, अऊ तोर रथिया ह मंझनियां सहीं अंजोर हो जाही।
ISA 58:11 यहोवा हमेसा तोर अगुवई करही; ओह सूखा भुइयां म तोर जरूरत ला पूरा करही अऊ तोर हाड़ामन ला मजबूत करही। तें बने पानी पलोय एक बारी सहीं होबे, अऊ अइसन सोता सहीं होबे, जेकर पानी कभू नइं सूखावय।
ISA 58:12 तोर मनखेमन पुराना उजरे जगहमन ला फेर बसाहीं अऊ पीढ़ी-पीढ़ी ले माढ़े नीवमन म घर बनाहीं; तोला टूटहा दीवारमन ला फेर बनानेवाला, अऊ घरमन के संग गलीमन ला ठीक करनेवाला कहे जाही।
ISA 58:13 “यदि तें बिसराम दिन ला असुध नइं करबे अऊ मोर ओ पबितर दिन म अपन ईछा पूरा करे के कोसिस नइं करबे, यदि बिसराम दिन ला आनंद के दिन अऊ यहोवा के पबितर दिन मानके आदर करबे, अऊ यदि तें येकर आदर करके ओ दिन अपन मुताबिक नइं चलबे अऊ अपन ईछा पूरा नइं करबे या बेकार बात नइं बोलबे,
ISA 58:14 त तोला यहोवा के कारन आनंद मिलही, अऊ में तोला देस के ऊंचहा जगह म बिजयी मनखे सहीं चलाहूं अऊ तोर पुरखा याकूब के निज भाग के ऊपज ले तोला भोज खवाहूं।” यहोवा ह ये बात ला कहे हवय।
ISA 59:1 खचित, यहोवा के हांथ अइसन छोटे नइं हो गे हवय कि तुम्हर उद्धार नइं कर सकय, न ही ओह अइसन भैंरा हो गे हवय कि सुन नइं सकय।
ISA 59:2 पर तुम्हर अधरम के काममन तुमन ला तुम्हर परमेसर ले अलग कर दे हवंय; तुम्हर पापमन ओकर मुहूं ला तुम्हर ले छुपा रखे हें, जेकर कारन ओह नइं सुनय।
ISA 59:3 काबरकि तुम्हर हांथमन म खून, अऊ तुम्हर अंगठीमन म अधरम के धब्बा लगे हवय। तुम्हर मुहूं ह लबारी बात कहे हवय, अऊ तुम्हर जीभ ले खराप बात निकलथे।
ISA 59:4 कोनो नियाय के बात नइं करंय; न कोनो सच्चई ले मुकदमा लड़ंय। ओमन लबारी बात ऊपर भरोसा रखथें; ओमन लबारी बात कहिथें; ओमन समस्या ला गरभ म धरथें अऊ पाप ला जनम देथें।
ISA 59:5 ओमन करैत सांप के अंडा ला सेथें अऊ मेकरा के जाली बनाथें। जऊन कोनो ओमन के अंडा ला खाथे, ओह मर जाथे, अऊ जब कोनो एक ठन ला फोरे जाथे, त ओमा ले बिसैला सांप के पीला निकलथे।
ISA 59:6 ओमन के बुने जालीमन ओनहा के काम नइं आवंय; अऊ ओमन जऊन कुछू बनाथें, ओकर ले अपनआप ला ढांप नइं सकंय। ओमन के काममन दुस्टता के काम अंय, अऊ ओमन के हांथ ले हिंसा के काम होथे।
ISA 59:7 ओमन के गोड़मन बुरई करे बर दऊड़थें; ओमन निरदोस के हतिया करे बर तियार रहिथें। ओमन दुस्ट साजिस करे म लगे रहिथें; हिंसा के काममन ले ओमन के डहार भरे हवय।
ISA 59:8 सांति के डहार ला ओमन नइं जानंय; ओमन के सुभाव म नियाय के बात नइं ए। ओमन अपन डहारमन ला बेईमानी के सड़क बना ले हवंय; ओमन के संग रेंगइया कोनो भी मनखे सांति के बात नइं जानंय।
ISA 59:9 एकर कारन ले नियाय ह हमन ले दूरिहा हवय, अऊ धरमीपन हमर मेर नइं आवय। हमन अंजोर के डहार तो देखथन, पर देखव अंधियार ही बने रहिथे; हमन अंजोर के आसा तो लगाय हवन, पर घोर अंधियार म रेंगथन।
ISA 59:10 हमन अंधरा सहीं दीवार पकड़के टमड़त रहिथन, हमन बिन आंखी के मनखे सहीं महसूस करथन। गोधूलि के बेरा सहीं, हमन दिन-दुपहरी म हपटत रहिथन, हट्टा-कट्टामन के बीच म हमन मुरदा सहीं हवन।
ISA 59:11 हमन सब के सब भालू सहीं गुर्राथन; अऊ पंड़की सहीं सोक करत बिलाप करथन। हमन नियाय के डहार तो देखथन, पर नियाय नइं मिलय; हमन छुटकारा के तो डहार देखथन, पर ओह हमन ले दूरिहा ही रहिथे।
ISA 59:12 काबरकि हमर अपराध तोर नजर म बहुंत हो गे हवय, हमर पापमन हमर बिरूध म साखी देथें। हमर अपराधमन हमेसा हमर संग हवंय, अऊ हमन अपन अधरम के काम ला मान लेथन:
ISA 59:13 यहोवा के बिरूध बिदरोह अऊ धोखा, अपन परमेसर कोति अपन पीठ देखई, बिदरोह अऊ अतियाचार करई, अपन मन म रखे लबरा बात कहई।
ISA 59:14 एकरसेति नियाय ह पाछू हट जावत हे, अऊ धरमीपन ह दूरिहा म ठाढ़ रहिथे; सच्चई ह गलीमन म गिर गे हवय, ईमानदारी आ नइं सकय।
ISA 59:15 सच्चई कहूं नइं ए, अऊ जऊन ह बुरई ले भागथे, ओह खुद सिकार हो जाथे। यहोवा ह देखिस अऊ ओला ये बात बने नइं लगिस कि उहां नियाय नइं रिहिस।
ISA 59:16 ओह देखिस कि उहां कोनो नइं एं, अऊ ओह अचम्भो करिस कि कोनो बिचवई करइया नइं एं; तब ओह अपन ही भुजबल ले ओकर बर उद्धार के काम ला करिस, अऊ अपन ही धरमीपन म ओला संभालिस।
ISA 59:17 ओह धरमीपन ला झिलम के सहीं पहिर लीस, अऊ ओकर मुड़ म उद्धार के टोप राखे गीस; ओह बदला लेय के ओनहा पहिरिस अऊ उत्साह के पहिरावा ला अपन म लपेट लीस।
ISA 59:18 ओमन के करम के मुताबिक ओह ओमन ला फर दीही, ओकर बईरीमन ऊपर कोप भड़कही अऊ अपन बिरोधीमन ले बदला लीही; ओह द्वीप म रहइयामन ला ओमन के काम के परतिफल दीही।
ISA 59:19 तब पछिम कोति मनखेमन यहोवा के नांव के भय मानहीं, अऊ पूरब कोति ओकर महिमा के आदर होही। काबरकि ओह बाढ़ के पानी सहीं आही तब यहोवा के आतमा ह ओला भगाही।
ISA 59:20 “छुड़इया ह सियोन मेर ओमन करा आही, जेमन याकूब म हवंय अऊ अपन पाप ले मन फिराथें,” यहोवा ह घोसना करत हे।
ISA 59:21 “जहां तक मोर बात ए, येह ओमन के संग मोर करार ए,” यहोवा ह कहत हे। “मोर आतमा, जऊन ह तोर ऊपर हवय, ओह तोर ले अलग नइं होवय, अऊ मोर जऊन बचन, मेंह तोर मुहूं म डारे हंव, ओह तोर मुहूं म, तोर लइकामन के मुहूं म अऊ ओमन के संतानमन के मुहूं म अब ले लेके हमेसा रहिही,” यहोवा ह कहत हे।
ISA 60:1 “उठ, चमकदार हो; काबरकि तोर अंजोर ह आय हवय, अऊ यहोवा के महिमा तोर ऊपर उदय होवत हे।
ISA 60:2 देख, धरती ऊपर अंधियार अऊ राज-राज के मनखेमन ऊपर बिरबिट अंधियार छावत हे, पर तोर ऊपर यहोवा उदय होवत हे अऊ ओकर तेज तोर ऊपर परगट होवत हे।
ISA 60:3 जाति-जाति के मनखेमन तोर मेर अंजोर बर, अऊ राजामन तोर बिहान के अंजोर कोति आहीं।
ISA 60:4 “अपन चारों कोति आंखी उठाके देख: सब के सब इकट्ठा होके तोर मेर आवत हें; तोर बेटामन दूरिहा ले आवत हें, अऊ तोर बेटीमन ला गोद म उठाके लाय जावत हे।
ISA 60:5 तब तें देखबे अऊ तें चमकबे, तोर हिरदय ह धड़कही अऊ आनंद ले भर जाही; समुंदर के धन-संपत्ति तोर मेर लाय जाही, तोर मेर देस-देस के धन-संपत्ति आही।
ISA 60:6 तोर देस ह ऊंटमन के झुंड ले भर जाही, मिदयान अऊ एपा देसमन के जवान ऊंटमन आहीं। अऊ सेबा के जम्मो झन सोन अऊ खुसबू बर धूप लेके आहीं अऊ यहोवा के गुन गावत आहीं।
ISA 60:7 केदार छेत्र के पसुमन के झुंड ला तोर मेर इकट्ठा करे जाही, नबायोत छेत्र के मेढ़ामन तोर सेवा-टहल के काम म आहीं; ओमन ला मोर बेदी म भेंट के रूप म गरहन करे जाही, अऊ में अपन सोभायमान मंदिर ला सजाहूं।
ISA 60:8 “येमन कोन अंय, जेमन बादर सहीं, अपन खोड़रा कोति पंड़की सहीं उड़त आवत हें?
ISA 60:9 सच म द्वीपमन मोर रसता देखथें; आघू म तरसीस के पानी जहाजमन हवंय, ओमन तोर लइकामन ला दूरिहा ले ओमन के सोन अऊ चांदी समेत लेके आवत हें, ताकि यहोवा तोर परमेसर, इसरायल के पबितर परमेसर के आदर होवय, काबरकि ओह तोला सोभायमान करे हवय।
ISA 60:10 “परदेसीमन तोर सहर के दीवार ला फेर बनाहीं, अऊ ओमन के राजामन तोर सेवा-टहल करहीं। हालाकि मेंह रिस म आके तोला दुख देय रहेंव, पर अब खुस होके मेंह तोर ऊपर दया करहूं।
ISA 60:11 तोर दुवारमन हरदम खुला रहिहीं, दिन अऊ रात ओमन कभू बंद नइं होहीं, ताकि मनखेमन जाति-जाति के मनखेमन के धन-संपत्ति तोर मेर लानंय— ओमन के राजामन ला बंदी बनाके बिजयी जुलूस म लाने जावय।
ISA 60:12 काबरकि जऊन जाति या राज के मन तोर सेवा नइं करहीं, ओमन नास हो जाहीं; हां, अइसन जाति के पूरा सतियानास हो जाही।
ISA 60:13 “लबानोन के वैभव तोर मेर आही, सनोवर, देवदार अऊ गोपेर के रूखमन ला मोर पबितर-स्थान ला सजाय बर लाय जाही; अऊ में अपन पांव बर ओ जगह ला महिमा दूहूं।
ISA 60:14 तोला दुख देवइयामन के लइकामन मुड़ नवाके तोर मेर आहीं; ओ जम्मो जेमन तोला तुछ जानथें, ओमन तोर गोड़ तरी गिरके तोला दंडवत करहीं अऊ ओमन तोला यहोवा के नगर, इसरायल के पबितर परमेसर के सियोन कहिके बलाहीं।
ISA 60:15 “हालाकि तोला छोंड़ दिये गे हवय अऊ तोर ले घिन करे जाथे, अऊ कोनो तोर म ले होके नइं जावंय, पर मेंह तोला सदा के घमंड के चीज अऊ पीढ़ी-पीढ़ी के मनखेमन बर आनंद के चीज ठहिराहूं।
ISA 60:16 तें जाति-जाति के मनखेमन के दूध पीबे अऊ साही माईलोगनमन तोला दूध पीयाहीं। तब तें जानबे कि में, यहोवा ह तोर उद्धारकर्ता, तोर छुड़इया, याकूब के सक्तिसाली परमेसर अंव।
ISA 60:17 में कांसा के बदला सोन, लोहा के बदला चांदी, लकरी के बदला कांसा, अऊ पथरा के बदला लोहा लानहूं। में सांति ला तोर हाकिम अऊ अच्छई ला तोर सासन करइया ठहिराहूं।
ISA 60:18 तोर देस म फेर कभू हिंसा के बात अऊ तोर सीमना के भीतर उतपात या बिनास के चरचा नइं सुनई पड़ही, पर तें अपन सहर के दीवारमन के नांव उद्धार अऊ अपन सहर के दुवारमन के नांव परसंसा रखबे।
ISA 60:19 दिन म सूरज ह फेर तोर अंजोर नइं होही, अऊ न ही चंदा के अंजोर तोर ऊपर फेर चमकही, काबरकि यहोवा ह तोर सदा के अंजोर, अऊ तोर परमेसर ह तोर सोभा ठहिरही।
ISA 60:20 तोर सूरज फेर कभू नइं बुड़ही, अऊ न ही तोर चंदा के अंजोर फेर कभू कम होही; यहोवा ह तोर सदा के अंजोर होही, अऊ तोर दुख के दिनमन खतम हो जाहीं।
ISA 60:21 तब तोर मनखेमन सब के सब धरमी होहीं अऊ देस ह हमेसा बर ओमन के अधिकार म होही। ओमन मोर लगाय पऊधा अऊ मोर हांथ के काम अंय, येकर ले मोर महिमा परगट होही।
ISA 60:22 तुमन म छोटे ले छोटे ह एक हजार हो जाही, अऊ सबले कमजोर ह एक बलवान जाति बन जाही। मेंह यहोवा अंव; सही समय म, मेंह येला तेजी से पूरा करहूं।”
ISA 61:1 परमपरधान यहोवा के आतमा मोर ऊपर हवय, काबरकि यहोवा ह गरीबमन ला सुघर संदेस के परचार करे बर मोर अभिसेक करे हवय। ओह मोला एकर बर पठोय हवय कि दुखित मनखेमन ला सांति दंव, बंधुवा मनखेमन के सुतंतरता के अऊ कैदीमन ला अंधियार ले छुटकारा के परचार करंव,
ISA 61:2 यहोवा के किरपा-दिरिस्टी के बछर के अऊ हमर परमेसर के पलटा लेय के दिन के परचार करंव, जम्मो सोक करइयामन ला सांति दंव,
ISA 61:3 अऊ सियोन म दुखित मनखेमन के जरूरत ला पूरा करंव— राख के बदले ओमन ला सुघरता के मुकुट पहिरावंव, सोक के बदले आनंद के तेल चुपरंव, अऊ उदासी के आतमा के बदले परसंसा के ओढ़ना ओढ़ावंव। ओमन ला यहोवा के लगाय धरमीपन के बलूत रूख कहे जाही अऊ येकर ले यहोवा के महिमा परगट होही।
ISA 61:4 तब ओमन पुराना उजरे जगहमन ला फेर बनाहीं अऊ बहुंत पहिले बरबाद हो गय जगहमन ला फेर ठीक करहीं; ओमन ओ नगरमन ला फेर बसाहीं जेमन पीढ़ी-पीढ़ी ले उजरे परे हवंय।
ISA 61:5 अजनबीमन तुम्हर भेड़-बकरीमन ला चराहीं; परदेसीमन तुम्हर खेत अऊ अंगूर के बारी म काम करहीं।
ISA 61:6 पर तुमन ला यहोवा के पुरोहित कहे जाही, तुमन ला हमर परमेसर के सेवक नांव दिये जाही। तुमन जाति-जाति के मनखेमन के धन-दौलत ला खाहू, अऊ ओमन के संपत्ति ऊपर तुमन घमंड करहू।
ISA 61:7 तुम्हर बदनामी के बदला तुमन ला दू गुना हिस्सा मिलही, अऊ कलंक के बदला म तुमन अपन भाग के कारन आनंदित होहू। अऊ ये किसम ले तुमन ला अपन देस म दू गुना हिस्सा मिलही, अऊ तुमन सदा आनंदित बने रहिहू।
ISA 61:8 “काबरकि में, यहोवा, नियाय ले मया रखथंव; मेंह डकैती अऊ अनियाय ले घिन करथंव। अपन बिसवासयोग्यता म, में अपन मनखेमन ला ईनाम दूहूं, अऊ ओमन के संग सदाकाल के एक करार करहूं।
ISA 61:9 ओमन के संतानमन जाति-जाति के मनखेमन के बीच अऊ ओमन के बंसज मनखेमन के बीच जाने-माने मनखे होहीं। जऊन मन ओमन ला देखहीं, ओ जम्मो स्वीकार करहीं कि येमन ओ मनखे अंय, जेमन ला यहोवा ह आसीस देय हवय।”
ISA 61:10 में यहोवा म अति आनंदित हंव; मोर जीव ह मोर परमेसर म आनंदित होथे। काबरकि ओह मोला उद्धार के ओनहा पहिराय हवय अऊ अपन धरमीपन के पहिरावा ले अइसन सजाय हवय, जइसन कोनो दूल्हा ह अपन मुड़ी ला एक पुरोहित के सहीं सजाथे, अऊ जइसन कोनो दुलहिन अपनआप ला अपन जेवर ले सिंगार करथे।
ISA 61:11 काबरकि जइसन भुइयां म ले बीजा के अंकुर निकलथे अऊ बारी म पऊधामन बढ़थें, वइसन ही परमपरधान यहोवा ह सब जातिमन के सामने धरमीपन अऊ परसंसा ला बढ़ाही।
ISA 62:1 सियोन के हित म, में चुप नइं रहंव, अऊ यरूसलेम के हित म, में सांत नइं रहंव, जब तक कि ओकर धरमीपन बिहान के अंजोर सहीं अऊ ओकर उद्धार ह बरत मसाल सहीं नइं चमकही।
ISA 62:2 तब जाति-जाति के मनखेमन तोर धरमीपन, अऊ सब राजामन तोर महिमा ला देखहीं; तोर एक नवां नांव रखे जाही जऊन ह यहोवा के मुहूं ले निकलही।
ISA 62:3 तें यहोवा के हांथ म एक सोभायमान मुकुट अऊ अपन परमेसर के हथेली म एक राज-मुकुट ठहिरबे।
ISA 62:4 ओमन फेर तोला तियागे गय नइं कहिहीं, या तोर भुइयां के नांव उजरे भुइयां नइं होही। पर तोला हेपसीबा, अऊ तोर भुइयां ला ब्यूला कहे जाही, काबरकि यहोवा तोर ले खुस होही, अऊ तोर भुइयां ह सुहागिन होही।
ISA 62:5 जइसन एक जवान पुरूस एक जवान छोकरी ले बिहाव करथे, वइसन ही तोर बनइया ह तोर ले बिहाव करही; जइसन दूल्हा ह अपन दुलहिन ऊपर आनंदित होथे, वइसन ही तोर परमेसर तोर ऊपर आनंदित होही।
ISA 62:6 हे यरूसलेम, मेंह तोर भीथी म पहरेदार ठहिराय हंव; ओमन दिन-रात कभू चुप नइं रहिहीं। तुमन, जेमन यहोवा ला पुकारथव, अराम झन करव,
ISA 62:7 अऊ जब तक ओह यरूसलेम ला स्थिर करके ओकर परसंसा धरती ऊपर नइं करवाय, तब तक ओला घलो अराम झन करन दव।
ISA 62:8 यहोवा ह अपन जेवनी हांथ के अऊ अपन बलवंत भुजा के किरिया खाय हवय: “मेंह फेर कभू तोर अनाज ला तोर बईरीमन ला खाय बर नइं दंव, अऊ फेर कभू परदेसीमन ओ नवां अंगूर के मंद ला पीये नइं पाहीं जेकर बर तेंह मेहनत करे हवस;
ISA 62:9 पर जेमन येकर पैदावार करथें, ओमन येला खाहीं अऊ यहोवा के इस्तुति करहीं, अऊ जेमन अंगूर के मंद ला भंडार म इकट्ठा करथें, ओमन येला मोर पबितर-स्थान के अंगना म पीये पाहीं।”
ISA 62:10 जावव, दुवारमन म ले होके जावव! मनखेमन बर डहार तियार करव। बनावव, राजमार्ग ला बनावव! पथरामन ला हटावव। जाति-जाति के मनखेमन बर झंडा ठाढ़ करव।
ISA 62:11 देखव, यहोवा ह धरती के छोर तक ये घोसना करे हवय: “बेटी सियोन ला कहव, ‘देख, तोर उद्धारकर्ता आवत हे! देख, ओकर ईनाम ओकर मेर हवय, अऊ जऊन कुछू देना हे, ओह ओला लेके आवत हे।’ ”
ISA 62:12 ओमन ला पबितर मनखे कहे जाही, यहोवा के छोंड़ाय गय; अऊ तोला खोजे गय, कहे जाही, ओ सहर जऊन ह अब तियागे गय नो हय।
ISA 63:1 येह कोन ए, जऊन ह एदोम देस के बोसरा नगर ले आवत हे जेकर ओनहा म गहिरा लाल रंग के धब्बामन लगे हवंय? येह कोन ए, जऊन ह सोभायमान ओनहा पहिरे, अपन बड़े ताकत म, लम्बा कदम डालत चले आवत हे? “येह में अंव, जऊन ह जय के घोसना करत हंव, अऊ मेंह उद्धार करे के सक्ति रखथंव।”
ISA 63:2 तुम्हर ओनहा ह काबर लाल हवय, जइसन रसकुंड म अंगूर खुंदत बेरा मनखेमन के होथे?
ISA 63:3 “मेंह अकेला रसकुंड म अंगूर रऊंदे हंव; अऊ कोनो मनखे मोर संग नइं रिहिन। मेंह अपन रिस म आके ही ओमन ला खुंदेंव अऊ अपन कोप म मेंह ओमन ला कुचरेंव; ओमन के लहू के छींटा मोर ओनहा म पड़िस, अऊ मोर पूरा पहिरावा म दाग लग गीस।
ISA 63:4 येह मोर बर बदला लेय के दिन रिहिस; मोर बर छोंड़ाय के बछर ह आ गे रिहिस।
ISA 63:5 मेंह खोजेंव पर कोनो मदद करइया नइं रिहिन, मेंह डरा गेंव कि कोनो मोर मदद नइं करिन; तब मेंह अपनेच भुजबल ले उद्धार करेंव अऊ मोर खुद के कोरोध ह मोला संभालिस।
ISA 63:6 हां, अपन रिस म आके देस-देस के मनखेमन ला कुचरेंव; अपन रिस म, मेंह ओमन ला मतवाला कर देंव, अऊ ओमन के लहू ला भुइयां म बोहा देंव।”
ISA 63:7 मेंह यहोवा के दया के काम के बखान करहूं, ओ काम जेकर कारन ओकर गुनगान होना चाही, हमर बर यहोवा के करे गय ओ जम्मो काम के मुताबिक ओकर गुनगान होवय— हव, अपन बहुंते दया अऊ करूना के कारन ओह इसरायल बर बहुंते भलई के काम करे हवय।
ISA 63:8 यहोवा ह कहिस, “सही म ओमन मोर मनखे अंय, अइसन लइका, जेमन मोर बर ईमानदार रहिहीं”; अऊ ओह ओमन के उद्धारकर्ता हो गीस।
ISA 63:9 ओमन के सबो दुख म ओह घलो दुख उठाईस, अऊ ओकर उपस्थिति के स्वरगदूत ह ओमन के उद्धार करिस। अपन मया अऊ दया के कारन ओह ओमन ला छोंड़ाईस; ओह ओमन ला उठाईस अऊ पुराना समय ले ओमन ला उठाके चलिस।
ISA 63:10 तभो ले ओमन बिदरोह करिन अऊ ओकर पबितर आतमा ला दुखित करिन। एकर कारन ओह पलटके ओमन के बईरी हो गीस अऊ ओह खुद ओमन ले लड़े लगिस।
ISA 63:11 तब ओकर मनखेमन पुराना दिनमन ला, याने कि मूसा अऊ ओकर मनखेमन के दिनमन ला सुरता करके कहिन— ओह कहां हवय, जऊन ह ओमन ला समुंदर म ले होवत अपन झुंड के चरवाहा के संग ले आईस? ओह कहां हवय, जऊन ह ओमन के बीच म अपन पबितर आतमा डारिस,
ISA 63:12 जऊन ह अपन परतापी भुजबल ला मूसा के जेवनी हांथ म कर दीस, जऊन ह ओमन के आघू म पानी ला दू भाग करके अपन बर सदाकाल के जस कमाईस,
ISA 63:13 जऊन ह ओमन ला गहिला समुंदर म ले होके ले गीस? जइसन घोड़ा ला खुला मैदान म ठोकर नइं लगय, वइसन ही ओमन ला घलो ठोकर नइं लगिस;
ISA 63:14 जइसन घरेलू-पसुमन खाल्हे मैदान म चले जाथें, वइसन ही यहोवा के आतमा ह ओमन ला आराम दीस। अपन एक महिमामय नांव बनाय बर ये किसम ले तेंह अपन मनखेमन के अगुवई करे।
ISA 63:15 स्वरग ले, अपन ऊंच सिंघासन ले, जऊन ह पबितर अऊ महिमा ले भरे हवय, उहां ले खाल्हे देख। तोर जलन अऊ पराकरम कहां हवय? तोर दया अऊ करूना हमर ऊपर ले हट गे हवय।
ISA 63:16 पर तें हमर ददा अस, हालाकि अब्राहम हमन ला नइं जानय या इसरायल हमन ला गरहन नइं करय; तभो ले, हे यहोवा, तें हमर ददा अऊ हमर छुड़इया अस; पुराना जमाना ले ये तोर नांव अय।
ISA 63:17 हे यहोवा, तें काबर हमन ला अपन रद्दा ले भटका देथस अऊ हमर मन ला कठोर कर देथस कि हमन तोर भय नइं मानन? अपन दासमन के हित म, ओ गोत्रमन, जेमन तोर निज भाग अंय, ओमन के हित म लहुंट आ।
ISA 63:18 थोरकन समय तक तोर मनखेमन तोर पबितर जगह ऊपर अधिकार रखिन, पर हमर बईरीमन तोर पबितर-स्थान ला कुचर दे हवंय।
ISA 63:19 पुराना जमाना ले हमन तोर अन; पर हमन तो अइसे हो गे हन मानो तेंह हमर ऊपर कभू परभूता नइं करे, अऊ हमन तोर नांव ले कभू बलाय नइं गे हवन।
ISA 64:1 बने होतिस कि तें अकास ला चीरके खाल्हे उतर आते, कि पहाड़मन तोर आघू म कांप उठतिन!
ISA 64:2 जइसन आगी ह डारामन ला जला देथे अऊ पानी ला डपकाथे, वइसन तें अपन बईरीमन ऊपर अपन नांव परगट करे बर अऊ जाति-जाति के मनखेमन ला अपन आघू म कंपाय बर खाल्हे उतर!
ISA 64:3 काबरकि जब तेंह अद्भूत काम करे, जेकर हमन आसा नइं करत रहेंन, तब तें खाल्हे उतरे, अऊ पहाड़मन तोर आघू म कांप उठिन।
ISA 64:4 पुराना जमाना ले तोला छोंड़ कोनो अऊ परमेसर के बारे म न तो सुने गीस, न कोनो मनखे ओला जानिन, अऊ न कोनो कभू ओला देखिन, तेंह अइसन परमेसर अस, जऊन ह अपन बाट जोहइया कोति ले काम करथस।
ISA 64:5 तें ओमन के मदद करे बर आथस, जेमन खुसी से भलई के काम करथें, जेमन तोर डहारमन ला सुरता म रखथें। पर जब हमन लगातार तोर बिरूध म पाप करेंन, त तें गुस्सा करे। तब हमर उद्धार कइसे हो सकथे?
ISA 64:6 हमन सब के सब असुध मनखे सहीं हो गे हवन, अऊ हमर जम्मो धरमी काममन मईला चेंदरा सहीं अंय; हमन सब के सब पान सहीं मुरझा जाथन, अऊ हवा सहीं हमर पापमन हमन ला उड़ियाके ले जाथे।
ISA 64:7 कोनो तोर नांव नइं लेवंय या तोला धरे रहे के कोसिस कोनो नइं करंय; काबरकि तेंह हमन ले अपन मुहूं ला छुपा ले हस, अऊ हमन ला हमर पाप के बस म कर दे हस।
ISA 64:8 तभो ले, हे यहोवा, तेंह हमर ददा अस। हमन माटी अन, अऊ तें हमर कुम्हार अस; हमन सब के सब तोर हांथ के रचना अन।
ISA 64:9 एकरसेति हे यहोवा, जादा रिस झन कर; अनंतकाल तक हमर पाप ला सुरता झन रख। हमर तरफ धियान दे, हमन पराथना करत हन, काबरकि हमन सब तोर मनखे अन।
ISA 64:10 देख, तोर पबितर नगरमन बंजर भुइयां हो गे हवंय; अऊ त अऊ सियोन ह बंजर भुइयां हो गे हवय, यरूसलेम ह उजरे परे हवय।
ISA 64:11 हमर पबितर अऊ सोभायमान मंदिर, जेमा हमर पुरखामन तोर इस्तुति करत रिहिन, आगी ले जला दे गे हवय, अऊ हमर कीमती चीजमन नास हो गीन।
ISA 64:12 ये सब होय के बाद घलो, हे यहोवा, का तें अपनआप ला रोके रहिबे? का तें चुप रहिबे अऊ हमन ला सीमना के बाहिर सजा देबे?
ISA 65:1 “मेंह अपनआप ला ओमन ऊपर परगट करेंव, जऊन मन मोर बारे म नइं पुछिन; ओमन मोला पा गीन, जऊन मन मोला नइं खोजत रिहिन। ओ जाति के मनखे, जेमन मोर नांव ला नइं पुकारिन, ओमन ला मेंह कहेंव, ‘देखव, में इहां हंव, में इहां हंव।’
ISA 65:2 मेंह एक हठी जाति के मनखेमन कोति दिन भर अपन हांथ ला पसारे रहेंव, जेमन अपन खुद के कल्पना के मुताबिक बुरई के रद्दा म रेंगथें—
ISA 65:3 अइसन मनखे, जेमन मोर आंखी के आघू म ही बारीमन म बलिदान चघाके अऊ ईंटा के बेदीमन म धूप जलाके, मोला लगातार रिस देवाथें।
ISA 65:4 येमन कबरमन के बीच बईठथें अऊ अपन रातमन ला गुपत रतजगा करके काटथें; जेमन सूरा के मांस खाथें, अऊ जेमन के बरतन म असुध मांस के रसा रहिथे;
ISA 65:5 जेमन आने मन ला कहिथें, ‘हट जा; मोर तीर म झन आ, काबरकि में तोर ले बहुंत पबितर हंव!’ अइसन मनखे मोर नाक म धुआं, अऊ ओ आगी सहीं अंय, जऊन ह दिन भर बरत रहिथे।
ISA 65:6 “देखव, ये बात मोर आघू म लिखाय हे: में चुप नइं रहंव, पर येकर पूरा बदला लूहूं; मेंह ओमन के गलत काममन के बदला ओमन के गोदी म डाल दूहूं—
ISA 65:7 तुम्हर पाप अऊ तुम्हर पुरखामन के पाप ला,” यहोवा ह कहिथे। “काबरकि ओमन पहाड़मन ऊपर धूप जलाईन अऊ पहाड़ीमन ऊपर मोर निन्दा करिन, में ओमन के पहिले के काममन के पूरा बदला ओमन के गोदी म तऊलके दूहूं।”
ISA 65:8 यहोवा ह ये कहत हे: “जइसन जब अंगूर के गुच्छा म अंगूर के रस भराय रहिथे, तब मनखेमन कहिथें, ‘येला बरबाद झन करव, येमा अभी भी आसीस हवय,’ वइसन ही में अपन सेवकमन बर करहूं; में ओ सब झन ला नास नइं करंव।
ISA 65:9 में याकूब म ले संतान लानहूं, अऊ यहूदा ले ओमन ला, जेमन मोर पहाड़मन ऊपर अधिकार रखहीं; मोर चुने मनखेमन ओमन के वारिस होहीं, अऊ मोर दासमन उहां निवास करहीं।
ISA 65:10 मोर मनखे, जऊन मन मोला खोजथें, ओमन के भेड़-बकरीमन बर सारोन ह एक चरागन होही, अऊ आकोर के घाटी ह ओमन के गरूवा-बईलामन के अराम करे के जगह होही।
ISA 65:11 “पर जहां तक तुम्हर बात ए, जऊन मन यहोवा ला छोंड़ देथव अऊ मोर पबितर पहाड़ ला भुला जाथव, जऊन मन भाग्य देवता बर मेज ऊपर खाय के चीज सजाथें अऊ तकदीर बर मसाला मिलाय अंगूर के मंद कटोरामन म भरथें,
ISA 65:12 में तुमन ला तलवार के कौंरा बनाहूं, अऊ तुमन जम्मो झन के मुड़ काटे जाही; काबरकि मेंह तुमन ला बलांय, पर तुमन जबाब नइं देव, मेंह बोलेंव, पर तुमन नइं सुनेव। तुमन मोर नजर म दुस्ट काम करेव अऊ जेकर ले में नाखुस होथंव, ओही ला तुमन चुनेव।”
ISA 65:13 एकर कारन परमपरधान यहोवा ह ये कहत हे: “देखव, मोर सेवकमन तो खाहीं, पर तुमन भूखन रहिहू; मोर सेवकमन पीहीं, पर तुमन पीयासन रहिहू; मोर सेवकमन आनंद मनाहीं, पर तुमन लज्जा म पड़हू।
ISA 65:14 मोर सेवकमन अपन मन के खुसी के मारे गीत गाहीं, पर मन म दुख के कारन तुमन रोहू अऊ टूटे मन के कारन बिलाप करहू।
ISA 65:15 तुमन अपन नांव ला छोंड़हू काबरकि मोर चुने मनखेमन तुम्हर नांव ले लेके सराप दीहीं; परमपरधान यहोवा ह तुमन ला नास कर दीही, पर अपन सेवकमन के ओह दूसर नांव रखही।
ISA 65:16 जऊन कोनो देस म आसीस मांगथे ओह सच्चा परमेसर के नांव लेके अइसने करही; जऊन कोनो देस म किरिया खाथे ओह सच्चा परमेसर के नांव म किरिया खाही। काबरकि पहिली के दुखमन भुला दिये जाहीं अऊ मोर आंखी ले लुका जाहीं।
ISA 65:17 “देखव, मेंह नवां अकास अऊ नवां धरती के सिरिस्टी करहूं। अऊ पहिली के चीजमन ला सुरता नइं करे जाही, अऊ न ही ओमन मनखे के मन म आहीं।
ISA 65:18 एकर कारन जऊन कुछू के मेंह सिरिस्टी करथंव, ओमा सदा खुस रहव अऊ आनंदित रहव, काबरकि देखव, में यरूसलेम ला खुसी बर अऊ येकर मनखेमन ला आनंद बर बनाहूं।
ISA 65:19 में यरूसलेम ऊपर आनंदित होहूं अऊ अपन मनखेमन ले खुस होहूं; येमा रोय अऊ नरियाय के अवाज फेर सुनाई नइं पड़ही।
ISA 65:20 “ओमा फेर न तो कुछू दिन के लइका, अऊ न अइसन बुढ़वा मरही जऊन ह अपन उमर पूरा नइं करे होही; काबरकि जऊन ह लड़कपन म मरइया हे ओह सौ बछर के होके मरही, पर जऊन ह सौ बछर के पहिले मरही, ओह सापित समझे जाही।
ISA 65:21 ओमन घर बनाके ओमा बसहीं; ओमन अंगूर के बारी लगाके ओकर फर खाहीं।
ISA 65:22 अइसन नइं होवय कि ओमन बनावंय अऊ दूसरमन ओमा बसंय, या ओमन रूख लगांय, अऊ दूसरमन खावंय। काबरकि जतका उमर रूख के होही, ओतका मोर मनखेमन के उमर होही; मोर चुने गय मनखेमन अपन हांथ के काम के लम्बा समय तक आनंद उठाहीं।
ISA 65:23 ओमन के मेहनत ह बेकार नइं होवय, न ओमन के लइकामन दुख झेले बर पईदा होहीं; काबरकि ओमन यहोवा के दुवारा आसीसित मनखे होहीं, ओमन अऊ ओमन के लइकामन घलो आसीसित होहीं।
ISA 65:24 ओमन के पुकारे के पहिली ही में ओमन ला उत्तर दूहूं; ओमन के गोठियावत बेरा ही, में ओमन के सुन लूहूं।
ISA 65:25 भेड़िया अऊ मेढ़ा-पीला एके संग चरहीं, अऊ सिंह ह बईला सहीं भूंसा खाही, अऊ सांप के जेवन धुर्रा होही। मोर जम्मो पबितर पहाड़ ऊपर न तो कोनो चोट पहुंचाहीं अऊ न ही नुकसान करहीं,” यहोवा ह कहत हे।
ISA 66:1 यहोवा ह ये कहत हे: “स्वरग ह मोर सिंघासन, अऊ धरती ह मोर गोड़ मढ़ाय के चौकी अय। तुमन मोर बर कइसने घर बनाहू? मोर बिसराम के ठऊर कहां होही?
ISA 66:2 का ये जम्मो चीज ला मोर हांथ ह नइं बनाय हे, अऊ ये किसम ले येमन आकार लीन?” यहोवा ह घोसना करत हे। “येमन ऊपर मोर दया-दिरिस्टी रहिथे: जऊन मन नम्र अऊ पछतापी मन के होथें, अऊ जेमन मोर बचन सुनके कांपथें।
ISA 66:3 पर जऊन ह बईला के बलि चघाथे ओह मनखे ला मार डारे के बरोबर अय, अऊ जऊन ह मेढ़ा-पीला के बलि चघाथे ओह कुकुर के घेंच ला काटे के बरोबर अय; जऊन ह अन्न-बलिदान चघाथे ओह सूरा के लहू चघाय सहीं अय, अऊ जऊन ह धूप जलाथे ओह मूरती-पूजा करे सहीं अय। ये जम्मो झन अपन-अपन रद्दा चुन ले हवंय, अऊ ओमन अपन घिनौना चीजमन म खुस रहिथें;
ISA 66:4 एकर कारन में घलो ओमन बर कठोर बात चुनहूं अऊ जऊन बात ले ओमन डराथें, ओही ला ओमन ऊपर लानहूं। काबरकि जब मेंह बलांय तब कोनो जबाब नइं दीन, अऊ जब में ओमन ले बात करेंव, तब कोनो मोर बात ला नइं सुनिन। ओमन मोर नजर म दुस्ट काम करिन अऊ जेकर ले में नाखुस होथंव, ओही काम ला ओमन चुनिन।”
ISA 66:5 तुमन, जेमन यहोवा के बचन सुनके कांपथव, ओकर बचन ला सुनव: “तुम्हर खुद के मनखे, जेमन तुम्हर ले बईर रखथें, अऊ मोर नांव के कारन तुमन ला अलगिया देथें, ओमन कहे हवंय, ‘यहोवा के महिमा होवय, जेकर ले हमन तुम्हर आनंद ला देखन!’ पर ओही मन ला लजाय बर पड़ही।
ISA 66:6 सहर म होवत हल्ला-गुल्ला ला सुनव, मंदिर म होवत ओ कोलाहल ला सुनव! येह यहोवा के अवाज अय, ओह अपन बईरीमन ला ओमन के करनी के फल देवत हे।
ISA 66:7 “छेवारी पीरा सुरू होय के पहिली ही ओह जनम देथे; ओला पीरा होय के पहिली ही ओह एक बेटा ला जनम देथे।
ISA 66:8 अइसन बात कोनो कभू सुने हवंय? अइसन बात कोनो कभू देखे हवंय? का कोनो देस एके दिन म उतपन हो सकथे या कोनो जाति ला छिन भर म उतपन करे जा सकथे? पर सियोन ला छेवारी पीरा उठते ही ओह अपन लइकामन ला जनम देथे।
ISA 66:9 का में लइका जनमाय के समय ला लाथंव अऊ लइका ला पईदा होवन नइं दंव?” यहोवा ह कहत हे। “जब में लइका जनमाय के समय ला लाथंव त का में कोख ला बंद कर देथंव?” तुम्हर परमेसर ह कहत हे।
ISA 66:10 “तुमन जम्मो, जेमन यरूसलेम ले मया करथव, ओकर संग आनंद मनावव अऊ ओकर बर खुसी मनावव; तुमन जम्मो, जेमन ओकर बर सोक करथव, ओकर संग बहुंत आनंदित होवव।
ISA 66:11 काबरकि तुमन ला दूध पिलाय जाही अऊ तुमन ओकर सांति देवइया थन ले संतुस्ट होहू; तुमन बहुंत दूध पीहू अऊ ओकर अधिकता ले तुमन खुस होहू।”
ISA 66:12 काबरकि यहोवा ह ये कहत हे: “देखव, मेंह ओला नदी के सहीं सांति, अऊ नरवा म पूरा आय सहीं जाति-जाति के धन ओला दूहूं; तुमन दूध पीहू अऊ तुमन ला ओह अपन गोदी म लीही अऊ अपन माड़ी म रखके तुमन ला लाड़ करही।
ISA 66:13 जइसन एक दाई ह अपन लइका ला दुलारथे, वइसन ही में घलो तुमन ला दुलारहूं; अऊ तुमन ला यरूसलेम म ही सांति मिलही।”
ISA 66:14 जब तुमन ये देखहू, त तुम्हर मन ह आनंदित होही अऊ तुमन घांस सहीं बाढ़हू; यहोवा के हांथ ओकर सेवकमन ऊपर परगट होही, पर ओकर बईरीमन ऊपर ओकर रिस ह भड़कही।
ISA 66:15 देखव, यहोवा ह आगी के संग आवत हे, अऊ ओकर रथमन बवंडर सहीं अंय; ओह अपन रिस ला जलजलाहट के संग अऊ अपन डांट ला आगी के लपट के संग लानही।
ISA 66:16 काबरकि यहोवा ह जम्मो मनखेमन के नियाय आगी ले अऊ अपन तलवार ले करही, अऊ यहोवा के दुवारा मारे गय मनखेमन अब्बड़ होहीं।
ISA 66:17 यहोवा ह कहिथे, “जेमन अपनआप ला एकर बर पबितर अऊ सुध करथें कि ओमन ओकर पाछू-पाछू बारीमन म जावंय, जऊन ह ओ मनखेमन के बीच हवय, जेमन सूरा अऊ मुसवा के मांस अऊ आने असुध चीजमन ला खाथें—ओमन जेकर पाछू-पाछू जावत हें, ओमन आखिरी म एके संग नास हो जाहीं,” यहोवा ह घोसना करत हे।
ISA 66:18 “ओमन जऊन योजना बनाके काम करे हवंय, ओकर कारन मेंह आनेचवाला हंव अऊ मेंह जाति-जाति अऊ भासा-भासा के मनखेमन ला इकट्ठा करहूं अऊ ओमन आके मोर महिमा देखहीं।
ISA 66:19 “में ओमन म एक चिनहां परगट करहूं, अऊ ओमन के बांचे कुछू मनखेमन ला में ओ जातिमन करा पठोहूं, जेमन न तो मोर बारे म सुने हवंय अऊ न ही मोर महिमा देखे हवंय, याने कि मेंह ओमन ला तरसीसीमन करा, लिबियन अऊ लूदीमन करा (धनुसधारी के रूप म माहिर), तूबली अऊ यूनानीमन करा अऊ दूरिहा के द्वीपवासीमन करा पठोहूं। ओमन जाति-जाति के मनखेमन के बीच मोर महिमा के बखान करहीं।
ISA 66:20 अऊ ओमन जम्मो जातिमन ले तुम्हर जम्मो मनखेमन ला यहोवा बर एक भेंट के रूप म यरूसलेम म मोर पबितर पहाड़ मेर लानहीं—ओमन ला घोड़ा, रथ, गाड़ी, खच्चर अऊ ऊंटमन म बईठाके लानहीं,” यहोवा ह कहत हे। “ओमन ला अइसे लाय जाही, जइसे इसरायलीमन यहोवा के मंदिर म सुध बरतन म अन्न-बलिदान लानथें।
ISA 66:21 अऊ मेंह ओमन के कुछू मनखे ला पुरोहित अऊ लेवी के रूप म काम करे बर अलग करहूं,” यहोवा ह कहत हे।
ISA 66:22 “जइसन नवां अकास अऊ नवां धरती, जेमन ला मेंह बनाहूं, मोर आघू म बने रहिहीं,” यहोवा ह घोसना करत हे, “वइसन तुम्हर नांव अऊ तुम्हर संतानमन घलो बने रहिहीं।
ISA 66:23 एक नवां चंदा ले दूसर नवां चंदा तक अऊ एक बिसराम दिन ले दूसर बिसराम दिन तक, जम्मो मनखेमन आहीं अऊ मोर आघू म मुड़ नवाहीं,” यहोवा ह कहत हे।
ISA 66:24 “अऊ ओमन बाहिर निकलहीं अऊ ओ मनखेमन के लास ला देखहीं, जेमन मोर ले बिदरोह करे रिहिन; जऊन कीरामन ओ लासमन ला खाथें, ओमन नइं मरंय, अऊ जऊन आगी ले ओमन ला जलाय जाथे, ओह नइं बुतावय, अऊ ओमन जम्मो मानव-जाति बर घिनौना हो जाहीं।”
JER 1:1 हिलकियाह के बेटा यरमियाह, जऊन ह बिनयामीन के देस म अनातोत छेत्र के पुरोहितमन ले एक झन रिहिस ओकर ये बचन अय।
JER 1:2 यहोवा के बचन ह यरमियाह करा आमोन के बेटा, यहूदा के राजा योसियाह के सासन के तेरहवां साल म आईस,
JER 1:3 अऊ एकर बाद योसियाह के बेटा यहूदा के राजा यहोयाकीम के सासन के जरिये, येह योसियाह के बेटा यहूदा के राजा सिदकियाह के सासन के गियारहवां साल के पांचवां महिना तक आईस, जब यरूसलेम के मनखेमन बंधुवई म गीन।
JER 1:4 यहोवा के ये बचन मोर करा, ये कहत आईस,
JER 1:5 “गरभ म रचे के पहिले ही मेंह तोला जानत रहेंव, तोर जनम के पहिले ही मेंह तोला अलग करे हंव; मेंह तोला देस-देसमन बर अगमजानी ठहिराय हंव।”
JER 1:6 तब मेंह कहेंव, “आह, हे परमपरधान यहोवा, मेंह नइं जानंव कि कइसे गोठियावंव; मेंह अभी बहुंत छोटे हंव।”
JER 1:7 पर यहोवा ह मोला कहिस, “झन कह, ‘मेंह उमर म बहुंत छोटे हंव।’ तोला ओ जम्मो झन करा जाना हे, जेमन करा मेंह तोला पठोहूं अऊ जऊन हुकूम मेंह तोला दूहूं, ओला बता।
JER 1:8 ओमन ले झन डरबे, काबरकि मेंह तोर संग हवंव अऊ मेंह तोला बचाहूं,” यहोवा ह ये घोसना करत हे।
JER 1:9 तब यहोवा ह अपन हांथ ला बढ़ाके मोर मुहूं ला छुईस अऊ मोला कहिस, “मेंह अपन बचन ला तोर मुहूं म डाल दे हंव।
JER 1:10 सुन, मेंह आज तोला देसमन अऊ राजमन ऊपर ठहिरावत हंव कि तें ओमन ला उखानके गिरा दे, ओमन ला नास करके फटिक दे, ओमन ला बना अऊ बसा दे।”
JER 1:11 तब यहोवा के ये बचन मोर करा आईस: “हे यरमियाह, तोला का दिखत हवय?” मेंह कहेंव, “मोला बादाम के एक रूख के डारा ह दिखत हवय।”
JER 1:12 तब यहोवा ह मोला कहिस, “तोला सही दिखत हवय, काबरकि मेंह ये देखे बर धियान लगाय हंव कि मोर बचन ह पूरा होवय।”
JER 1:13 तब यहोवा के बचन ह मोर करा फेर आईस: “तोला का दिखत हवय?” मेंह जबाब देंव, “मोला डबकत एक बरतन दिखत हवय, जेह उत्तर दिग ले हमर कोति झुकत हवय।”
JER 1:14 तब यहोवा ह मोला कहिस, “ये देस म रहइया जम्मो झन ऊपर उत्तर दिग ले बिपत्ति डाले जाही।
JER 1:15 मेंह उत्तर दिग के राजमन के मनखेमन ला बलानेचवाला हंव,” यहोवा ह ये घोसना करत हे। “ओमन के राजामन आहीं अऊ यरूसलेम के कपाट के प्रवेस दुवार म अपन सिंघासन लगाहीं; ओमन ओकर चारों कोति के जम्मो दीवारमन के बिरूध अऊ यहूदा के जम्मो नगरमन के बिरूध आहीं।
JER 1:16 मेंह अपन मनखेमन ऊपर नियाय के हुकूम दूहूं काबरकि ओमन मोला तियागके, आने देवतामन बर धूप जलाके अऊ अपन हांथ ले बनाय मूरतीमन के अराधना करके दुस्टता करे हवंय।
JER 1:17 “एकरसेति तेंह तियार हो जा! उठ अऊ जऊन बात के हुकूम मेंह तोला देवत हंव, ओला ओमन ला सुना। ओमन ले झन डर, नइं तो मेंह तोला ओमन के आघू म डरवा दूहूं।
JER 1:18 आज मेंह तोला ये जम्मो देस के बिरूध—यहूदा के राजामन, येकर करमचारी, येकर पुरोहित अऊ देस के मनखेमन के बिरूध ठाढ़ होय बर एक किलाबंद सहर, एक लोहा के खंभा, अऊ एक कांसा के दीवार बनाय हवंव।
JER 1:19 देस के मनखेमन तोर बिरूध म लड़हीं, पर तोला जीत नइं सकहीं, काबरकि मेंह तोर संग हवंव अऊ मेंह तोला बचाहूं,” यहोवा ह ये घोसना करत हे।
JER 2:1 यहोवा के ये बचन मोर करा आईस:
JER 2:2 “जा अऊ यरूसलेम के सुनत म घोसना कर: “यहोवा ह ये कहत हे: “ ‘तोर जवानी के समरपन ला मेंह सुरता करथंव, कि कइसे तेंह एक दुलहिन सहीं मोला मया करे अऊ सुनसान जगह ले, ओ भुइयां तक मोर पाछू आय, जिहां बीजा नइं बोय गे रिहिस।
JER 2:3 इसरायल ह यहोवा बर पबितर, अऊ ओकर लुवई के पहिली ऊपज रिहिस; ओ जम्मो जऊन मन ओला नास करिन, ओमन दोसी ठहिराय गीन, अऊ ओमन ऊपर बिपत्ति पड़िस,’ ” यहोवा ह घोसना करत हे।
JER 2:4 हे याकूब के संतानमन, हे इसरायल के बंस के मनखेमन, यहोवा के बचन ला सुनव।
JER 2:5 यहोवा ह ये कहत हे: “तुम्हर पुरखामन मोर म का गलती पाईन, कि ओमन मोर ले बहुंत दूरिहा चल दीन? ओमन बेकार के मूरतीमन के पाछू हो लीन अऊ खुद ही बेकार हो गीन।
JER 2:6 ओमन ये नइं पुछिन, ‘यहोवा ह कहां हवय, जऊन ह हमन ला बंजर सुनसान जगह म ले होवत, मरू-भुइयां अऊ पहाड़ी देस म ले होवत, एक सूखा अऊ बिरबिट अंधियार के देस म ले होवत, एक अइसने देस जिहां कोनो नइं जावंय अऊ जिहां कोनो नइं रहंय, उहां ले होवत, मिसर देस ले निकाल ले आईस?’
JER 2:7 मेंह तुमन ला ये उपजाऊ देस म ले आनेंव ताकि तुमन येकर फर अऊ बने चीजमन के आनंद उठावव। पर तुमन आके मोर देस ला असुध करेव अऊ मोर ये निज भाग ला घिनित कर दे हव।
JER 2:8 पुरोहितमन घलो नइं पुछिन, ‘यहोवा कहां हवय?’ जऊन मन मोर कानून ला सिखाथें, ओमन मोला नइं जानंय; अगुवामन मोर बिरोध म बिदरोह करिन। अगमजानीमन बेकार के मूरतीमन के पाछू चलत, बाल देवता के नांव ले अगमबानी करिन।
JER 2:9 “एकरसेति मेंह तुम्हर ऊपर फेर दोस लगाथंव,” यहोवा ह ये घोसना करत हे। “अऊ मेंह तुम्हर लइकामन के लइकामन ऊपर दोस लगाहूं।
JER 2:10 कित्ती के समुंदर तीर के ओ पार जावव अऊ देखव, केदार देस म दूत पठोवव अऊ धियान से देखव; देखव, यदि अइसने काम कभू उहां होय हवय:
JER 2:11 का कोनो देस ह अपन देवतामन ला बदले हवय? (जबकि ओमन देवता ही नो हें।) पर मोर मनखेमन अपन महिमामय परमेसर ला बेकार के मूरतीमन ले बदल ले हवंय।
JER 2:12 हे अकासमन, येला देखके डरव, अऊ अब्बड़ डर से कांपव,” यहोवा ह ये घोसना करत हे।
JER 2:13 “मोर मनखेमन दू ठन पाप करे हवंय: ओमन मोला, जीयत पानी के सोता ला, तियाग दे हवंय, अऊ अपन खुद के कुंडमन ला खन ले हवंय, अइसने टूटे कुंडमन, जेमा पानी नइं ठहिरय।
JER 2:14 का इसरायल एक सेवक अय, जनम ले एक गुलाम अय? त फेर ओह काबर लूट के सामान बन गे हवय?
JER 2:15 सिंहमन गरजे हवंय; ओमन ओकर ऊपर गुर्राय हवंय। ओमन ओकर देस ला उजाड़ दे हवंय; ओकर नगरमन ला जलाय अऊ तियागे गे हवय।
JER 2:16 मेमफीस अऊ तहपनहेस सहर के मनखेमन घलो तोर खोपड़ी ला फोर दे हवंय।
JER 2:17 जब यहोवा तोर परमेसर ह तोला रसता म ले चलिस, त ओला तियागके, का तें ये बिपत्ति अपन ऊपर खुद नइं लाने हस?
JER 2:18 अब नील नदी के पानी पीये बर मिसर देस ला काबर जाना? अऊ फरात नदी के पानी पीये बर अस्सूर देस म काबर जाना?
JER 2:19 तोर दुस्टता ह तोला दंड दीही; तोर पुराना जिनगी म वापिस जवई ह तोला दबकारही। सोच-बिचार कर अऊ जान ले कि ये कतेक दुस्ट अऊ करू बात अय जब तेंह यहोवा अपन परमेसर ला तियाग देवत हस अऊ मोर भय नइं मानस,” परभू यहोवा सर्वसक्तिमान ह ये घोसना करत हे।
JER 2:20 “बहुंत पहिले तेंह अपन जुड़ा ला टोर डारे अऊ अपन बंधन ला टोर डारे; तेंह कहय, ‘मेंह तोर सेवा नइं करंव!’ वास्तव म, जम्मो ऊंच पहाड़ ऊपर अऊ जम्मो छइहांवाले रूख के खाल्हे म तेंह एक बेस्या जइसे लेटे रहय।
JER 2:21 मेंह तोला अपन पसंद के अंगूर, बने अऊ मजबूत डंगाली म ले लगाय रहेंव। त फेर तेंह मोर बिरूध होके एक खराप अऊ जंगली अंगूर के नार म कइसे बदल गय?
JER 2:22 हालाकि तेंह अपनआप ला साबुन ले धोथस अऊ बहुंत अकन सफई के पाउडर के उपयोग करथस, तभो ले तोर पाप के दाग ह मोर आघू म हवय,” परमपरधान यहोवा ह ये घोसना करत हे।
JER 2:23 “तेंह कइसे कह सकथस, ‘मेंह असुध नइं होय हंव; मेंह बाल देवतामन के पाछू नइं गे हंव’? देख, घाटी म तेंह कइसने बरताव करे हस; सोच-बिचार कर कि तेंह का करे हस। तेंह एक तेज भगइया ऊंटनी अस अऊ एती-ओती भागत रहिथस,
JER 2:24 तेंह सुन्ना जगह म जाय के आदि एक जंगली गदही अस, जऊन ह अपन लालसा म हवा ला सुंघत रहिथे— ओकर गरमी के बेरा, ओला कोन ह काबू म कर सकथे? जऊन गदहामन ओकर पीछा करथें, ओमन अपनआप ला झन थकावंय; काबरकि मिलन के बेरा, ओमन ओला पा जाहीं।
JER 2:25 जब तक तेंह खाली गोड़ नइं अस अऊ तोर गला ह नइं सूखाय हे, तब तक झन दऊड़। पर तेंह कहय, ‘येह बेकार अय! मेंह परदेसी देवतामन ले मया करथंव, अऊ मेंह ओमन के पाछू जरूर जाहूं।’
JER 2:26 “जइसने कि चोर ह पकड़े जाय ले कलंकित होथे, वइसने ही इसरायल के मनखेमन कलंकित होवत हें— ओमन, ओमन के राजामन अऊ ओमन के हाकिममन, ओमन के पुरोहितमन अऊ ओमन के अगमजानीमन।
JER 2:27 ओमन कठवा ला कहिथें, ‘तेंह मोर ददा अस,’ अऊ पथरा ला कहिथें, ‘तेंह मोला जनमाय हस।’ ओमन मोर कोति ले अपन मुहूं नइं, पर पीठ ला फेर ले हवंय; तभो ले, जब ओमन समस्या म पड़थें, त ओमन कहिथें, ‘आ अऊ हमन ला बचा!’
JER 2:28 त ओ देवतामन कहां हवंय, जेमन ला तुमन अपन बर बनाय हवव? जब तुमन समस्या म पड़े हव, यदि ओमन तुमन ला बचा सकथें, त आवंय अऊ बचावंय! काबरकि, हे यहूदा, तोर करा अतेक देवतामन हवंय, जतेक कि तोर नगरमन हवंय।
JER 2:29 “तुमन मोर ऊपर काबर दोस लगाथव? तुमन जम्मो झन मोर बिरोध म बिदरोह करे हवव,” यहोवा ह ये घोसना करत हे।
JER 2:30 “मेंह बेकार म तुम्हर मनखेमन ला दंड देंव; दंड देय के बाद घलो ओमन नइं सुधरिन। एक भूखा सिंह सहीं तुमन अपन अगमजानीमन ला अपन तलवार ले फार डाले हव।
JER 2:31 “ये पीढ़ी के मनखेमन, तुमन यहोवा के बचन म धियान देवव: “का मेंह इसरायल बर एक सुन्ना जगह या एक बिरबिट अंधियार के देस हो गे हवंव? मोर मनखेमन काबर कहिथें, ‘हमन एती-ओती जाय बर सुतंतर हन; हमन तोर करा अऊ नइं आवन’?
JER 2:32 का एक जवान माईलोगन ह अपन जेवर, या एक दुलहिन ह अपन बिहाव के सिंगार ला भुलाथे? तभो ले, मोर मनखेमन मोला बहुंत समय ले भुला गे हवंय।
JER 2:33 मया लगाय बर तेंह कइसे बने चाल चलथस! इहां तक कि खराप ले खराप माईलोगन घलो तोर चाल ले सीख सकत हें।
JER 2:34 तोर कपड़ा म, निरदोस अऊ गरीब मनखेमन के खून के चिनहां पाय जाथे, हालाकि तें ओमन ला सेंध लगात नइं पकड़े। तभो ले ये जम्मो के होवत घलो
JER 2:35 तेंह कहिथस, ‘मेंह निरदोस अंव; ओह मोर ऊपर गुस्सा नइं ए।’ पर, मेंह तोला दंड दूहूं काबरकि तेंह कहिथस, ‘मेंह पाप नइं करे हंव।’
JER 2:36 अपन चालचलन ला बदलके, अतेक दूरिहा काबर जावत हस? जइसने तेंह अस्सूरी मनखेमन ले निरास होय रहय, वइसने मिसर के मनखेमन ले घलो होबे।
JER 2:37 निरासा म अपन मुड़ ला हांथ म धरे तेंह घलो ओ जगह ला छोंड़ देबे, काबरकि जेमन ऊपर तेंह भरोसा करथस, ओमन ला यहोवा ह अस्वीकार करे हवय; ओमन ले तोला मदद नइं मिलय।”
JER 3:1 “यदि कोनो मनखे ह अपन घरवाली ला तियाग देथे अऊ ओ माईलोगन ह ओला छोंड़के आने आदमी ले बिहाव कर लेथे, त का ओ पहिला आदमी ला ओ माईलोगन करा फेर वापिस जाना चाही? का ओ देस ह पूरा असुध नइं हो जाही? पर तेंह कतको मयारूमन संग एक बेस्या सहीं रहे हस— त फेर, का अब तेंह मोर करा लहुंटके आबे?” यहोवा ह ये घोसना करत हे।
JER 3:2 “बंजर टीलामन कोति आंखी उठाके देख। कोनो अइसने जगह हवय, जिहां तेंह कुकरम नइं करे हस? तेंह सड़क-तीर म अइसने बईठके मयारूमन के बाट जोहय, जइसने एक घुमंतू मनखे ह सुन्ना जगह म बईठे रहिथे। तेंह अपन बेभिचार अऊ दुस्टता के काम ले देस ला असुध कर दे हस।
JER 3:3 एकरसेति, बरसात ला रोक दे गे हवय, अऊ बसन्त रितु के बारिस नइं होईस। तभो ले, तेंह एक बेस्या सहीं दिखत हस; तोर म सरम नांव के चीज ही नइं ए।
JER 3:4 का तेंह अभी मोला ये कहिके नइं बलाय: ‘हे मोर ददा, हे मोर जवानी के संगी,
JER 3:5 का तेंह हमेसा गुस्सा करत रहिबे? का तोर कोरोध ह सदाकाल तक बने रहिही?’ तेंह अइसने गोठियाथस, पर तेंह ओ जम्मो दुस्ट काम करथस, जेला तेंह कर सकथस।”
JER 3:6 योसियाह राजा के सासन के समय, यहोवा ह मोला कहिस, “का तेंह देखे हस कि बिसवासहीन इसरायल ह का करे हवय? ओह जम्मो ऊंच पहाड़ अऊ जम्मो छायादार रूखमन के खाल्हे म जाके बेभिचार करे हवय।
JER 3:7 मेंह सोचत रहेंव कि ये जम्मो काम करे बाद, ओह मोर करा लहुंटके आ जाही पर ओह नइं आईस, अऊ ओकर बेईमान बहिनी यहूदा ह येला देखिस हे।
JER 3:8 मेंह बिसवासहीन इसरायल ला ओकर जम्मो बेभिचार के कारन, ओला तियाग पतर देके भगा दे हंव। तभो ले, मेंह देखेंव कि ओकर बेईमान बहिनी यहूदा म कोनो डर नइं रिहिस; ओह घलो बाहिर जाके बेभिचार करिस।
JER 3:9 काबरकि इसरायल के छिनारीपन ह ओकर बर नानकून बात रिहिस, एकरसेति ओह देस ला असुध करिस अऊ पथरा अऊ कठवा के संग बेभिचार करिस।
JER 3:10 ये जम्मो होय के बावजूद, ओकर बेईमान बहिनी यहूदा ह अपन पूरा मन से मोर करा नइं लहुंटिस, पर लहुंटे के सिरिप दिखावा करिस,” यहोवा ह ये घोसना करत हे।
JER 3:11 यहोवा ह मोला कहिस, “बिसवासहीन इसरायल ह बिसवासघाती यहूदा ले जादा धरमी अय।
JER 3:12 जा अऊ उत्तर दिग म ये संदेस के घोसना कर: “ ‘हे बिसवासहीन इसरायल, लहुंट आ,’ यहोवा ह ये घोसना करत हे, ‘मेंह तोर ऊपर अब गुस्सा नइं करंव, काबरकि मेंह बिसवासयोग्य अंव,’ यहोवा ह ये घोसना करत हे, ‘मेंह सदाकाल बर गुस्सा नइं होवंव।
JER 3:13 सिरिप अपन दोस ला मान ले— तेंह यहोवा अपन परमेसर के बिरूध बिदरोह करे हस, तेंह जम्मो छायादार रूखमन के खाल्हे बिदेसी देवतामन बर अपन मया देखाय हस, अऊ मोर बात ला नइं माने हस,’ ” यहोवा ह ये घोसना करत हे।
JER 3:14 “हे बिसवासहीन मनखेमन मोर करा लहुंट आवव,” यहोवा ह ये घोसना करत हे, “काबरकि मेंह तुम्हर घरवाला अंव। मेंह तुमन ला चुनहूं—एक नगर ले एक झन अऊ एक बंस ले दू झन—अऊ तुमन ला सियोन म लानहूं।
JER 3:15 तब मेंह अपन मन मुताबिक तुमन ला चरवाहा दूहूं, जऊन मन गियान अऊ समझ के संग तुम्हर अगुवई करहीं।
JER 3:16 ओ दिनमन म, जब तुम्हर गनती ह देस म बढ़ जाही,” यहोवा ह ये घोसना करत हे, “मनखेमन फेर ये नइं कहिहीं, ‘यहोवा के करार के सन्दूक।’ ये बात ह ओमन के मन म कभू नइं आही या येला ओमन कभू सुरता नइं करहीं; ओकर कमी महसूस नइं होही, अऊ न ही दूसरा बनाय जाही।
JER 3:17 ओ बेरा म, ओमन यरूसलेम ला यहोवा के सिंघासन कहिहीं, अऊ जम्मो जाति के मनखेमन यहोवा के नांव ला आदर देय बर यरूसलेम म जूरहीं। ओमन अपन पापी हिरदय के ढीठपन के पाछू फेर नइं चलहीं।
JER 3:18 ओ दिनमन म, यहूदा के मनखेमन इसरायल के मनखेमन संग मिल जाहीं, अऊ ओमन एक संग उत्तर दिग के एक देस ले ओ देस म आहीं, जेला मेंह तुम्हर पुरखामन ला एक उत्तराधिकार के रूप म देय रहेंव।
JER 3:19 “मेंह खुद कहेंव, “ ‘कतेक खुसी से मेंह तोला अपन लइकामन सहीं समझके तोला एक मनभावन देस दे हंव, जऊन ह कि कोनो भी देस के सबले सुघर उत्तराधिकार अय।’ मेंह सोचेंव कि तेंह मोला ‘ददा’ कहिबे अऊ मुहूं फेरके दूरिहा नइं जाबे।
JER 3:20 पर जइसने ओ माईलोगन, जऊन ह अपन घरवाला संग बिसवासघात करथे, वइसने ही, हे इसरायल, तेंह घलो मोर संग बिसवासघात करे हस,” यहोवा ह ये घोसना करत हे।
JER 3:21 बंजर टीलामन ले एक अवाज आवथे, इसरायली मनखेमन के रोये अऊ गोहारे के अवाज सुनई देवत हे, काबरकि ओमन अपन सही रसता ला छोंड़ दे हवंय अऊ यहोवा अपन परमेसर ला भुला गे हवंय।
JER 3:22 “हे बिसवासहीन मनखेमन, लहुंट आवव; मेंह तुम्हर भटकई ला सुधार दूहूं।” “हव, हमन तोर करा आबो, काबरकि तेंह यहोवा हमर परमेसर अस।
JER 3:23 सच म पहाड़ी अऊ पहाड़मन म मूरती-पूजा के कोलाहल ह एक धोखा अय; निस्चय ही यहोवा हमर परमेसर म इसरायल के उद्धार हवय।
JER 3:24 हमर जवानी के समय ले ओ कलंकित देवतामन हमर पुरखामन के कमई के फर ला— ओमन के भेड़-बकरी, गाय-बईला, अऊ बेटा-बेटीमन ला खा डारे हवंय।
JER 3:25 आवव, हमन लज्जित होके लेट जावन, अऊ हमर कलंक ह हमन ला ढांप लेवय। काबरकि हमर पुरखामन अऊ हमन घलो यहोवा हमर परमेसर के बिरूध पाप करे हन; हमर जवानी के समय ले लेके आज तक हमन यहोवा हमर परमेसर के बात ला नइं माने हन।”
JER 4:1 “हे इसरायल, यदि तें लहुंटके आबे, त मोर करा लहुंटके आ,” यहोवा ह ये घोसना करत हे। “यदि तेंह अपन घिनौना मूरतीमन ला मोर नजर ले दूरिहा हटाबे अऊ सही रसता ले नइं भटकबे,
JER 4:2 अऊ यदि सच्चई, नियाय अऊ धरमीपन म तें ये किरिया खाबे, ‘यहोवा के जिनगी के सपथ,’ त देस-देस के मनखेमन ओकर दुवारा आसीस पाहीं अऊ यहोवा म ओमन घमंड करहीं।”
JER 4:3 यहोवा ह यहूदा अऊ यरूसलेम के मनखेमन ला ये कहत हे: “अपन बंजर भुइयां ला जोतव अऊ कंटिली झाड़ीमन के बीच बीजा झन बोवव।
JER 4:4 हे यहूदा के मनखे अऊ यरूसलेम के निवासीमन, यहोवा बर अपन खतना करव, अपन मन के खतना करव, नइं तो तुम्हर दुस्ट काममन के कारन मोर गुस्सा ह भड़कही अऊ आगी सहीं बरही— अइसने बरही कि ओला कोनो बुता नइं सकहीं।
JER 4:5 “यहूदा अऊ यरूसलेम म घोसना करके कहव: ‘देस के जम्मो अंग तुरही बजावव!’ चिचियाके ये कहव: ‘एक संग जूरव! आवव, हमन गढ़वाले सहरमन म भाग जावन!’
JER 4:6 सियोन जाय बर झंडा ला ऊंचा करव! बिगर देरी करे सुरकछित जगह म भाग जावव! काबरकि मेंह उत्तर दिग ले बिपत्ति, अऊ भयंकर सतियानास लानेवाला हंव।”
JER 4:7 एक सिंह ह अपन मांद ले निकले हवय; देस-देस के मनखेमन ला नास करइया ह निकले हवय। ओह तुम्हर देस ला बरबाद करे बर अपन जगह ले निकले हवय। तुम्हर नगरमन नास हो जाहीं अऊ उहां कोनो रहनेवाला नइं होहीं।
JER 4:8 एकरसेति बोरा के ओनहा ला पहिर लव, रोवव अऊ बिलाप करव, काबरकि यहोवा के भयंकर कोरोध ह हमर ऊपर ले नइं टरे हे।
JER 4:9 यहोवा ह ये घोसना करत हे, “ओ दिन म, राजा अऊ करमचारीमन हतास हो जाहीं, पुरोहितमन अब्बड़ डरा जाहीं, अऊ अगमजानीमन भयभीत होहीं।”
JER 4:10 तब मेंह कहेंव, “हाय, हे परमपरधान यहोवा! तेंह ये मनखेमन अऊ यरूसलेम ला ये कहिके कइसे पूरा धोखा देय हवस, ‘तुमन ला सांति मिलही,’ जबकि तलवार ह हमर घेंच म रखे हवय!”
JER 4:11 ओ बखत ये मनखेमन ला अऊ यरूसलेम ला बताय जाही, “सुन्ना जगह के बंजर टीलामन ले मोर मनखेमन कोति एक झुलसा देवइया हवा चलही, पर येह पछरे बर या साफ करे बर नइं होही;
JER 4:12 ये हवा ह जादा सक्तिसाली होही, जेह मोर करा ले आथे। अब मेंह ओमन के बिरूध दंड के घोसना करत हंव।”
JER 4:13 देखव! ओह बादरमन सहीं आघू बढ़थे, ओकर रथमन बवंडर सहीं आथें, ओकर घोड़ामन गिधवा चिरईमन ले घलो जादा तेज भागथें। हमर ऊपर हाय! हमन नास होवत हन!
JER 4:14 हे यरूसलेम, अपन हिरदय ले बुरई ला धो अऊ तोर उद्धार होवय। तेंह कब तक अपन मन म खराप बिचार रखे रहिबे?
JER 4:15 दान सहर ले एक अवाज सुनई देवत हे, एपरैम के पहाड़मन ले बिपत्ति के घोसना होवत हे।
JER 4:16 “जाति-जाति के मनखेमन ला ये बतावव, यरूसलेम के बारे म घोसना करव: ‘यहूदा के सहरमन के बिरूध लड़ई बर ललकारत, दूरिहा देस ले हमला करइया एक सेना आवत हे।
JER 4:17 ओमन खेत के रखवारमन सहीं यहूदा ला घेरत हवंय, काबरकि ओह मोर बिरूध बिदरोह करे हवय,’ ” यहोवा ह ये घोसना करत हे।
JER 4:18 “तोर बरताव अऊ तोर काममन के कारन ये बिपत्ति तोर ऊपर आय हवय। येह तोर सजा ए। येह कतेक दुखदाई ए! येह कइसे हिरदय ला छेदत हवय!”
JER 4:19 आह, मोर पीरा, मोर पीरा! मेंह पीरा म तड़फत हंव। आह, मोर मन के पीरा! मोर हिरदय ह भीतरे-भीतर कुटा-कुटा होवथे, मेंह चुप नइं रह सकंव। काबरकि मेंह तुरही के अवाज ला सुने हंव; मेंह लड़ई के ललकार ला सुने हंव।
JER 4:20 बिपत्ति ऊपर बिपत्ति आवत हे; जम्मो देस ह नास हो गे हवय। मोर तम्बूमन अऊ मोर डेरामन एक पल म नास हो गीन।
JER 4:21 कब तक ले, मोला लड़ई के झंडा ला देखना पड़ही अऊ तुरही के अवाज ला सुनना पड़ही?
JER 4:22 “मोर मनखेमन मुरूख अंय; ओमन मोला नइं जानंय। ओमन निरबुद्धि लइका अंय; ओमन करा समझ नइं ए। ओमन बुरई के काम करे म निपुन अंय; ओमन भलई करे नइं जानंय।”
JER 4:23 मेंह धरती ला देखेंव, अऊ येह बेडौल अऊ सुनसान परे रिहिस; अऊ अकास ला देखेंव, अऊ ओमा अंजोर नइं रिहिस।
JER 4:24 मेंह पहाड़मन ला देखेंव, अऊ ओमन कांपत रिहिन; अऊ जम्मो पहाड़ीमन डोलत रिहिन।
JER 4:25 मेंह देखेंव, अऊ उहां कोनो मनखे नइं रिहिन; अकास के जम्मो चिरईमन उड़िहा गे रिहिन।
JER 4:26 मेंह देखेंव, यहोवा के आघू, ओकर भयंकर कोरोध के कारन, फलदार देस ह सुन्ना हो गे हवय; येकर जम्मो नगरमन खंडहर हो गे हवंय।
JER 4:27 यहोवा ह ये कहत हे: “जम्मो देस ह उजर जाही, हालाकि मेंह येला पूरा नास नइं करहूं।
JER 4:28 एकरसेति धरती ह बिलाप करही अऊ ऊपर अकासमन अंधियार हो जाहीं, काबरकि मेंह कहे हवंव अऊ दया नइं देखावंव, मेंह फैसला कर ले हंव अऊ अपन बात ले नइं फिरंव।”
JER 4:29 घुड़सवार अऊ धनुसधारीमन के अवाज ला सुनके हर नगर के मनखेमन भाग जाथें। कुछू मनखे झाड़ीमन म चले जाथें; अऊ कुछू मनखेमन, ऊपर चट्टानमन के बीच म चल देथें। जम्मो नगरमन निरजन हो जाथें; ओमन म कोनो नइं रहंय।
JER 4:30 हे नास होय जन, तेंह का करत हस? चमकीला लाल रंग के कपड़ा अऊ सोन के जेवर काबर पहिरे हस? अपन आंखी म काजर काबर आंजे हस? तेंह बेकार म अपनआप ला सजाय हस। तोर मयारूमन तोला तुछ समझथें; ओमन तोला मार डारे चाहत हें।
JER 4:31 मेंह एक अइसने कराहे के अवाज सुनत हंव, जइसे कोनो माईलोगन ह लइका जनमत हे जइसे कोनो माईलोगन ह अपन पहिलांत लइका ला जनमे के बेरा कराहथे— येह सियोन के बेटी के अवाज ए, जेकर सांस ह फूलत हे, अऊ अपन हांथमन ला फईलाके ये कहत हे, “हाय! मेंह बेहोस होवत हंव; मोर जिनगी ला हतियारामन के हांथ म दे दिये गे हवय।”
JER 5:1 “ऊपर अऊ खाल्हे यरूसलेम के गलीमन म जावव, चारों कोति देखव अऊ बिचार करव, ओकर चऊकमन म खोजव। यदि एक जन भी तुमन ला अइसने मिल जाय, जऊन ह ईमानदारी से काम करथे अऊ सच्चई के खोजी अय, त मेंह ये सहर ला छेमा कर दूहूं।
JER 5:2 हालाकि ओमन कहिथें, ‘यहोवा के जिनगी के कसम,’ अभी भी ओमन झूठा कसम खावत हंय।”
JER 5:3 हे यहोवा, का तोर नजर सच्चई ऊपर नइं रहय? तेंह ओमन ला मारे, पर ओमन ला पीरा नइं होईस; तेंह ओमन ला कुचरे, पर ओमन नइं सुधरिन। ओमन अपन चेहरा ला पथरा ले घलो जादा कठोर कर लीन अऊ पछताप करे ले इनकार करिन।
JER 5:4 मेंह सोचेंव, “येमन सिरिप गरीब अंय; येमन मुरूख अंय, काबरकि येमन यहोवा के रद्दा ला, अऊ अपन परमेसर के जरूरत ला नइं जानंय।
JER 5:5 एकरसेति मेंह अगुवामन करा जाके ओमन ले बात करहूं; खचित ओमन यहोवा के रद्दा अऊ अपन परमेसर के जरूरत ला जानथें।” पर एक मन होके, ओमन घलो जुड़ा ला अऊ करार ला टोर दे रिहिन।
JER 5:6 येकरे कारन जंगल के सिंह ह ओमन ऊपर हमला करही, निरजन जगह के एक भेड़िया ह ओमन के नास कर दीही, एक चीतवा ह ओमन के नगरमन के लकठा म घात लगाय रहिही ताकि यदि कोनो जोखिम उठाके बाहिर निकले, त फारके ओला कुटा-कुटा कर दे, काबरकि ओमन के बिदरोह ह बहुंत अय अऊ ओमन के पाछू पलटई भी बहुंत।
JER 5:7 “मेंह तुमन ला काबर छेमा करंव? तुम्हर लइकामन मोला तियाग दे हवंय अऊ ओ देवतामन के किरिया खाय हवंय, जेमन देवता नो हंय। मेंह ओमन के जम्मो जरूरत ला पूरा करेंव, तभो ले, ओमन बेभिचार करिन अऊ बेस्यामन के घरमन म भीड़ के भीड़ जावत रिहिन।
JER 5:8 ओमन बने खवाय-पीयाय, वासना से भरे घोड़ामन सहीं अंय, ओमा के हर एक जन आने मनखे के घरवाली बर हिनहिनावत रहिथें।
JER 5:9 का मेंह ये काम बर ओमन ला सजा नइं देवंव?” यहोवा ह घोसना करत हे। का मेंह अइसने जाति ले खुद बदला नइं लंव?
JER 5:10 “ओमन के अंगूर के बारीमन म जा अऊ ओमन ला नास कर दे, पर ओमन ला पूरा नास झन कर। ओकर डालीमन ला काटके अलग कर दे, काबरकि ये मनखेमन यहोवा के नो हंय।
JER 5:11 इसरायल के मनखे अऊ यहूदा के मनखेमन मोर संग बहुंत बिसवासघात करे हवंय,” यहोवा ह ये घोसना करत हे।
JER 5:12 ओमन यहोवा के बारे म लबारी बात कहे हवंय; ओमन कहिन, “ओह कुछू नइं करही! हमर कुछू हानि नइं होही; हमन न तो कभू तलवार ले मारे जाबो अऊ न ही हमर इहां अकाल पड़ही।
JER 5:13 अगमजानीमन हवा सहीं अंय अऊ ओमन म परमेसर के बचन नइं ए; ओमन जो बात कहिथें, ओमन संग वइसने करे जावय।”
JER 5:14 एकरसेति यहोवा सर्वसक्तिमान परमेसर ह ये कहत हे: “काबरकि ये मनखेमन ये बचन कहे हवंय, मेंह अपन बचन ला तोर मुहूं म आगी अऊ ये मनखेमन ला कठवा सहीं बना दूहूं, अऊ येह ओमन ला भसम कर दीही।”
JER 5:15 यहोवा ह ये घोसना करत हे, “हे इसरायल के मनखेमन, मेंह तुम्हर बिरूध म दूरिहा ले एक अइसने देस ला लानत हंव— जऊन ह एक पुराना अऊ बने रहनेवाला देस ए, अइसने मनखे, जेमन के भासा ला तुमन नइं जानव, अऊ ओमन के बोली ला तुमन नइं समझव।
JER 5:16 ओमन के तरकसमन एक खुला कबर सहीं अंय; ओमा के जम्मो झन सूरबीर अंय।
JER 5:17 ओमन तुम्हर फसल अऊ तुम्हर जेवन ला खा जाहीं, ओमन तुम्हर बेटा-बेटीमन ला खा जाहीं; ओमन तुम्हर भेंड़-बकरी अऊ गाय-बईलामन ला खा जाहीं, ओमन तुम्हर अंगूर के नार अऊ अंजीर के रूखमन ला खा जाहीं। ओमन तलवार ले ओ गढ़वाले सहरमन ला नास कर दीहीं, जेमा तुमन भरोसा रखथव।”
JER 5:18 यहोवा ह ये घोसना करत हे, “तभो ले ओ दिनमन म घलो, मेंह तुमन ला पूरा नास नइं करंव।
JER 5:19 अऊ जब मनखेमन पुछहीं, ‘यहोवा हमर परमेसर ह हमन ले ये जम्मो काम काबर करे हवय?’ तब तें ओमन ला बताबे, ‘जइसने कि तुमन मोला तियाग दे हवव अऊ अपन खुद के देस म आने देवतामन के सेवा करे हवव, वइसने ही अब तुमन परदेस म परदेसीमन के सेवा करहू।’
JER 5:20 “येला याकूब के संतानमन ला घोसना करके बतावव अऊ यहूदा म ये परचार करव:
JER 5:21 हे मुरूख अऊ निरबुद्धि मनखेमन, ये बात ला सुनव, तुमन करा आंखी हवय पर नइं देखव, तुमन करा कान हवय पर नइं सुनव:
JER 5:22 का तुमन ला मोर डर नइं ए?” यहोवा ह ये घोसना करत हे। “का तुमन मोर आघू म नइं थरथरावव? मेंह बालू ला समुंदर के सीमना ठहिरांय, येह सदाकाल बर एक सीमना अय, जेला समुंदर ह नाहक नइं सकय। पानी के लहरामन ओकर ऊपर आ सकत हें, पर ओमन ओला जीत नइं सकंय; ओमन गरज सकत हें, पर ओमन ओला पार नइं कर सकंय।
JER 5:23 पर ये मनखेमन करा जिद्दी अऊ बिदरोही हिरदय हवय; ओमन अलग होके दूरिहा चल दे हवंय।
JER 5:24 ओमन अपनआप ला ये नइं कहंय, ‘आवव, हमन ओ यहोवा हमर परमेसर के भय मानन, जऊन ह समय म, सरद अऊ बसन्त रितु के बारिस देथे, जऊन ह फसल कटई के नियमित हप्तामन के भरोसा देवाथे।’
JER 5:25 तुमन के गलत काममन, येमन ला दूरिहा कर दे हवंय; तुमन के पाप ही के कारन, तुम्हर भलई नइं होवय।
JER 5:26 “मोर मनखेमन के बीच म दुस्ट मनखेमन हवंय जऊन मन अइसने ताक म रहिथें जइसने चिरई मरइयामन रहिथें अऊ येमन ओमन सहीं अंय, जऊन मन मनखेमन ला पकड़े बर फांदा लगाथें।
JER 5:27 चिरईमन ले भरे पिंजरामन सहीं, ओमन के घर ह छल-कपट ले भरे रहिथे; ओमन धनवान अऊ बलवान हो गे हवंय
JER 5:28 अऊ ओमन मोटहा अऊ चिकना हो गे हवंय। ओमन के दुस्ट काममन के कोनो सीमना नइं ए; ओमन नियाय के परवाह नइं करंय। ओमन अनाथमन के नियाय नइं चुकावंय; ओमन गरीबमन के हक के बचाव नइं करंय।
JER 5:29 का मेंह ओमन ला ये बातमन के सजा नइं दंव?” यहोवा ह ये घोसना करत हे। “का मेंह अइसने जाति ले खुद बदला नइं लंव?”
JER 5:30 एक भयंकर अऊ चोट देवइया बात देस म होय हवय:
JER 5:31 अगमजानीमन झूठ-मूठ के अगमबानी करथें, पुरोहितमन अपन खुद के अधिकार ले हुकूम चलाथें, अऊ मोर मनखेमन ला ये बात बहुंत बने लगथे। पर अन्त के बेरा म तुमन का करहू?
JER 6:1 “हे बिनयामीन गोत्र के मनखेमन, अपन सुरकछा बर भागव! यरूसलेम ले भागव! तकोआ सहर म तुरही फूंकव! बेत-हकेरेम नगर म संकेत देवव! काबरकि उत्तर दिग ले बिपत्ति, बल्कि भयंकर बिनास आही सहीं लगत हे।
JER 6:2 मेंह सियोन के, बहुंत सुघर अऊ नाजुक बेटी ला नास कर दूहूं।
JER 6:3 चरवाहामन अपन भेड़-बकरीमन संग ओकर बिरूध आहीं; ओमन अपन तम्बू ओकर चारों कोति गड़ियाहीं, अऊ हर एक झन अपन खुद के भाग म चराहीं।”
JER 6:4 “ओकर बिरूध लड़ई के तियारी करव! उठव, हमन मंझन के बेरा हमला करबो! पर, हाय, दिन के अंजोर ह कम होवत जावत हे, अऊ संझा के परछाई ह लम्बा होवत जावत हे।
JER 6:5 एकरसेति उठव, हमन रथिया के बेरा हमला करबो अऊ ओकर किलामन ला गिरा देबो!”
JER 6:6 सर्वसक्तिमान यहोवा ह ये कहत हे: “रूखमन ला काटव अऊ यरूसलेम के बिरूध घेराबंदी के टीला बनावव। ये सहर ला सजा जरूर मिलना चाही; येह अतियाचार ले भर गे हवय।
JER 6:7 जइसने कुआं म ले पानी निकलथे, वइसने ही यरूसलेम ले बुरई निकलथे। हिंसा अऊ बिनास के बात ओमा सुनई देवत रहिथे; ओकर बेमारी अऊ घावमन हमेसा मोर आघू म हवंय।
JER 6:8 हे यरूसलेम, चेत जा, नइं तो, मेंह तोर ले मुहूं मोड़के दूरिहा चल दूहूं अऊ तोर भुइयां ला उजाड़ दूहूं ताकि येमा कोनो झन रह सकंय।”
JER 6:9 सर्वसक्तिमान यहोवा ह ये कहत हे: “ओमन ला इसरायल के बचे भाग ला अंगूर के नार म बांचे अंगूर सहीं बटोरन दव; जइसने कोनो अंगूरमन ला संकेलथे, वइसने अपन हांथ ला डारामन ऊपर फेर बढ़ा।”
JER 6:10 मेंह काकर ले बात करंव अऊ चेतावंव? कोन ह मोर बात ला सुनही? ओमन के कान ह बंद हो गे हवय एकरसेति ओमन सुन नइं सकंय। यहोवा के बचन ह ओमन ला बने नइं लगय; येमा ओमन ला खुसी नइं मिलय।
JER 6:11 पर मेंह यहोवा के कोरोध ले भर गे हवंव, अऊ मेंह येला भीतर नइं धरे सकंव। “गली म येला लइकामन ऊपर अऊ एक संग जूरे जवानमन ऊपर ढार दे; घरवाला अऊ घरवाली दूनों अऊ डोकरामन जेमन के उमर हो गे हवय, ओमन येमा धरे जाहीं।
JER 6:12 ओ मनखेमन के खेत-खार अऊ ओमन के घरवाली सहित ओमन के घर ला आने मन ला दे दिये जाही, जब मेंह अपन हांथ ला ओमन के बिरूध बढ़ाहूं जऊन मन ये देस म रहिथें,” यहोवा ह ये घोसना करत हे।
JER 6:13 “छोटे ले लेके बड़े तक, जम्मो के जम्मो अनाज के लालची अंय; अगमजानी अऊ पुरोहितमन घलो वइसने जम्मो के जम्मो धोखाधड़ी करथें।
JER 6:14 ओमन मोर मनखेमन के घावमन म अइसे पट्टी बांधथें मानो ओमा जादा चोट नइं लगे रिहिस। ओमन कहिथें, ‘सांति हे, सांति हे,’ जबकि उहां सांति नइं ए।
JER 6:15 का ओमन अपन घिनौना बरताव बर सरमिंदा हवंय? नइं, ओमन बिलकुल ही सरमिंदा नइं एं; ओमन सरमिंदा होवई जानंय ही नइं। एकरसेति ओमन गिरे मनखेमन के बीच म गिरहीं; ओमन गिराय जाहीं, जब मेंह ओमन ला सजा दूहूं,” यहोवा ह कहत हे।
JER 6:16 यहोवा ह ये कहत हे: “सड़क के चऊकमन म ठाढ़ होवव अऊ देखव; पुराना रसता के बारे म पुछव, पुछव कि बने रसता कहां हवय, अऊ ओही म रेंगव, अऊ तुमन ला अपन मन म सांति मिलही। पर तुमन कहेव, ‘हमन येमा नइं रेंगन।’
JER 6:17 मेंह तुम्हर बर पहरेदारमन ला बईठाके कहेंव, ‘तुरही के अवाज ला सुनव!’ पर तुमन कहेव, ‘हमन नइं सुनन।’
JER 6:18 एकरसेति, हे जाति-जाति के मनखेमन, सुनव; तुमन, जऊन मन गवाह अव, धियान देवव कि ओमन के का होही।
JER 6:19 हे धरती, सुन: मेंह ये मनखेमन ऊपर ओ बिपत्ति लानत हंव, जऊन ह ओमन के योजना के फर अय, काबरकि येमन मोर बात ला नइं सुनिन अऊ मोर कानून के इनकार करिन।
JER 6:20 सेबा के सुगंध या दूरिहा देस ले आय मीठ तेजपान ऊपर मेंह का धियान दंव? तुम्हर होम-बलिदानमन गरहन करे लईक नो हंय; तुम्हर बलिदानमन ले मोला खुसी नइं होवय।”
JER 6:21 येकर कारन यहोवा ह ये कहत हे: “मेंह ये मनखेमन के आघू म बाधा डालहूं। दाई-ददा अऊ लइकामन, परोसी अऊ संगवारीमन, ओकर ऊपर ठोकर खाके नास होहीं।”
JER 6:22 यहोवा ह ये कहत हे: “देखव, उत्तर दिग के देस ले एक सेना आवत हे; धरती के छोर ले एक बड़े जाति ला उभारे जावत हे।
JER 6:23 ओमन धनुस अऊ बरछी धरे हवंय; ओमन कठोर अंय अऊ दया नइं देखावंय। जब ओमन अपन घोड़ामन ऊपर सवार होथें त ओमन गरजत समुंदर सहीं अवाज करथें; हे बेटी सियोन, ओमन तोर ऊपर हमला करे बर लड़ई म कतार बांधे मनखेमन सहीं आथें।”
JER 6:24 हमन ओमन के बारे म खबर सुने हन, अऊ हमर हांथमन ढीला पड़ गे हवंय। पीरा ह हमन ला अइसने जकड़े हवय, जइसने छेवारी होवत माईलोगन ला पीरा होथे।
JER 6:25 बाहिर मैदान कोति झन जावव, या सड़कमन म झन रेंगव, काबरकि बईरी करा तलवार हवय, अऊ चारों कोति आतंक छाय हवय।
JER 6:26 हे मोर मनखेमन, बोरा के कपड़ा पहिरव, अऊ राख म लोटव; जइसने एकलऊता बेटा के मरे ले बिलाप होथे वइसने कलप-कलपके बिलाप करव, काबरकि नास करइया ह अचानक हमर ऊपर आ जाही।
JER 6:27 “मेंह तोला धातु के परखनेवाला अऊ मोर मनखेमन ला खदान के धातु बनाय हंव, ताकि तें धियान दे अऊ ओमन के चालचलन ला परख।
JER 6:28 ओमन जम्मो कठोर बिदरोही हो गे हवंय, अऊ निन्दा करत हवंय। ओमन कांसा अऊ लोहा सहीं हो गे हवंय; ओमन जम्मो झन खराप आचरन करथें।
JER 6:29 धूकनी ह सीसा ला आगी म जलाय बर जोर से धूकथे, पर सुध करई ह बेकार हो जावत हे; काबरकि दुस्ट मनखेमन पछताप नइं करिन।
JER 6:30 ओमन ला नकली चांदी कहे जाथे, काबरकि यहोवा ह ओमन ला अस्वीकार करे हवय।”
JER 7:1 यहोवा कोति ले ये बचन यरमियाह करा आईस:
JER 7:2 “यहोवा के घर के दुवार म ठाढ़ हो जा अऊ उहां ये संदेस के घोसना कर: “ ‘हे यहूदा के जम्मो मनखेमन, जऊन मन यहोवा के अराधना करे बर ये दुवारमन ले आथव, यहोवा के ये बचन ला सुनव।
JER 7:3 सर्वसक्तिमान यहोवा, इसरायल के परमेसर ह ये कहत हे: अपन चालचलन अऊ अपन काममन ला सुधारव, तब मेंह तुमन ला ये जगह म रहे बर दूहूं।
JER 7:4 धोखा देवइया बचन म भरोसा करके ये झन कहव, “येह यहोवा के मंदिर अय, यहोवा के मंदिर, यहोवा के मंदिर!”
JER 7:5 यदि तुमन सही म अपन चालचलन अऊ काममन ला बदलथव अऊ एक-दूसर के संग सही बरताव करथव,
JER 7:6 यदि तुमन परदेसी, अनाथ या बिधवा ऊपर अतियाचार नइं करव अऊ ये जगह म निरदोस के हतिया नइं करव, अऊ यदि अपन खुद के हानि करे बर आने देवतामन के पाछू नइं चलव,
JER 7:7 त मेंह तुमन ला ये जगह म, ये देस म रहे बर दूहूं, जऊन ला कि मेंह तुम्हर पुरखामन ला सदाकाल बर दे हवंव।
JER 7:8 पर देखव, तुमन ओ धोखा देवइया बचन ऊपर भरोसा करत हव, जेकर कोनो मतलब नइं ए।
JER 7:9 “ ‘का तुमन चोरी अऊ हतिया करहू, बेभिचार अऊ लबारी गवाही दूहू, बाल देवता बर धूप जलाहू अऊ आने देवतामन के पाछू चलहू, जेमन ला तुमन नइं जानव,
JER 7:10 अऊ तब ये घर, जऊन म कि मोर नांव हवय, तुमन येमा आके मोर आघू म ठाढ़ होहू अऊ ये कहिहू, “हमन सुरकछित हवन”—ये जम्मो घिनौना काम करे बर सुरकछित हवन?
JER 7:11 ये घर, जेमा मोर नांव हवय, का येह तुम्हर बर डाकूमन के गुफा हो गे हवय? पर मेंह देखत आवत हंव! यहोवा ह घोसना करत हे।
JER 7:12 “ ‘अब सीलो नगर म ओ जगह म जावव, जिहां पहिली मेंह मोर नांव बर एक निवास बनाय रहेंव, अऊ देखव कि मेंह अपन मनखे इसरायल के दुस्टता के कारन ओ निवास के का दसा कर दे हंव।
JER 7:13 यहोवा ह घोसना करत हे, जब तुमन ये जम्मो काम करत रहेव, त मेंह तुमन ला बार-बार कहेंव, पर तुमन नइं सुनेव; मेंह तुमन ला बलांय, पर तुमन जबाब नइं देव।
JER 7:14 एकरसेति ये घर, जेमा मोर नांव हवय, ये मंदिर, जेमा तुमन भरोसा करथव, ये जगह, जेला मेंह तुमन ला अऊ तुम्हर पुरखामन ला देय रहेंव, येकर दसा घलो मेंह सीलो के सहीं कर दूहूं।
JER 7:15 जइसने कि मेंह तुम्हर जम्मो संगी इसरायली, एपरैम के मनखेमन संग करे रहेंव, वइसने ही मेंह तुमन ला अपन आघू ले धक्का देके निकाल दूहूं।’
JER 7:16 “एकरसेति ये मनखेमन बर तेंह पराथना झन कर अऊ न ही येमन बर कोनो बिनती या निबेदन कर; मोर करा येमन के तरफ ले झन गोठिया, काबरकि मेंह तोर बात ला नइं सुनंव।
JER 7:17 का तेंह नइं देखत हस कि ये मनखेमन यहूदा के नगरमन म अऊ यरूसलेम के गलीमन म का करत हवंय?
JER 7:18 लइकामन कठवा संकेलथें, ददामन आगी सुलगाथें, अऊ माईलोगनमन पीसान गुंथके स्वरग के रानी ला चघाय बर रोटी बनाथें। ओमन मोर गुस्सा ला भड़काय बर आने देवतामन बर पेय-बलिदान देथें।
JER 7:19 पर का ओमन मोला ही भड़कावथें? यहोवा ह घोसना करत हे। का ओमन बेसरम होके अपनआप के ही हानि नइं करत हें?
JER 7:20 “ ‘एकरसेति परमपरधान यहोवा ह ये कहत हे: मोर गुस्सा अऊ मोर कोप ह ये जगह के ऊपर भड़कही—मनखे अऊ पसु ऊपर, मैदान के रूखमन ऊपर अऊ तुम्हर भुइयां के फसल ऊपर—अऊ ये गुस्सा अऊ कोप के आगी ह जलते रहिही अऊ नइं बुताही।
JER 7:21 “ ‘सर्वसक्तिमान यहोवा, इसरायल के परमेसर ह ये कहत हे: जावव अऊ अपन होम-बलिदानमन ला अपन आने बलिदानमन संग मिलावव अऊ मांस ला खुद खावव!
JER 7:22 काबरकि जब मेंह तुम्हर पुरखामन ला मिसर देस ले बाहिर लानेंव अऊ ओमन ले बात करेंव, त मेंह ओमन ला होम-बलिदान अऊ बलिदानमन के बारे म हुकूम नइं दे रहेंव,
JER 7:23 पर मेंह ओमन ला ये हुकूम देय रहेंव: मोर बात ला मानव, तब मेंह तुम्हर परमेसर होहूं अऊ तुमन मोर मनखे होहू। मोर दिये गय जम्मो हुकूम के पालन करव, ताकि तुम्हर भलई होवय।
JER 7:24 पर ओमन मोर बात ला नइं सुनिन अऊ धियान नइं दीन; येकर बदले, ओमन अपन दुस्ट हिरदय के जिद्दी सुभाव म चलिन। ओमन पाछू हट गीन अऊ आघू नइं बढ़िन।
JER 7:25 जऊन समय ले तुम्हर पुरखामन मिसर देस ला छोंड़िन, बार-बार मेंह अपन सेवक अगमजानीमन ला तुम्हर करा पठोंय।
JER 7:26 पर ओमन मोर बात ला नइं सुनिन अऊ धियान नइं दीन। ओमन हठी रिहिन अऊ अपन पुरखामन ले बढ़के दुस्ट काम करिन।’
JER 7:27 “जब तेंह ओमन ला ये जम्मो बात बताबे, त ओमन तोर बात ला नइं सुनहीं; जब तेंह ओमन ला बलाबे, त ओमन जबाब नइं दीहीं।
JER 7:28 एकरसेति ओमन ले कह, ‘येह ओ जाति ए, जऊन ह यहोवा अपन परमेसर के बात ला नइं माने हे या अपन गलत काममन ला नइं छोंड़े हे। सच्चई ह मर गे हवय; येह ओमन के मुहूं ले गायब हो गे हवय।
JER 7:29 “ ‘अपन चुंदी ला काट अऊ दूरिहा म फटिक दे; बंजर टीला म चघके बिलाप कर, काबरकि यहोवा ह ये पीढ़ी के मनखेमन ला अस्वीकार करे हवय, ओमन ला तियाग दे हवय; ओमन ओकर कोप के भागी अंय।
JER 7:30 “ ‘यहूदा के मनखेमन मोर नजर म दुस्ट काम करे हवंय, यहोवा ह घोसना करत हे। ओमन ओ घर म घिनौना मूरतीमन ला रखे हवंय, जेमा मोर नांव हवय; अइसने करके ओमन ओ घर ला असुध कर दे हवंय।
JER 7:31 ओमन बेन-हिन्नोम के घाटी म अपन बेटा अऊ बेटीमन ला आगी म जलाय बर तोपेत के ऊंचहा जगहमन ला बनाय हवंय—जेकर हुकूम मेंह कभू नइं दे रहेंव अऊ न ही ये बात कभू मोर मन म आईस।
JER 7:32 एकरसेति सचेत रहव, ओ दिनमन आवत हें, यहोवा ह ये घोसना करत हे, जब मनखेमन येला तोपेत या बेन-हिन्नोम के घाटी नइं कहिहीं, पर येला हतिया के घाटी कहिहीं, काबरकि ओमन तोपेत म अतेक मनखेमन ला माटी दीहीं कि उहां जगह ही नइं बचही।
JER 7:33 तब ये मनखेमन के लासमन चिरई अऊ जंगली पसुमन के जेवन होहीं, अऊ ओमन ला भगानेवाला कोनो नइं होहीं।
JER 7:34 मेंह यहूदा के नगरमन म अऊ यरूसलेम के गलीमन म आनंद अऊ खुसी के अवाज अऊ दूल्हा अऊ दुलहिन के अवाज ला खतम कर दूहूं, काबरकि देस ह उजाड़ हो जाही।
JER 8:1 “ ‘यहोवा ह ये घोसना करत हे: ओ बेरा, यहूदा के राजा अऊ करमचारीमन के हाड़ा, पुरोहित अऊ अगमजानीमन के हाड़ा, अऊ यरूसलेम के मनखेमन के हाड़ा ला ओमन के कबरमन ले निकाले जाही।
JER 8:2 ओमन ला सूरज, चंदा अऊ अकास के जम्मो तारामन के आघू म रखे जाही; काबरकि ओ मनखेमन ये चीजमन ले मया करिन, येमन के सेवा करिन, येमन के पाछू चलिन, येमन के सलाह लीन अऊ येमन के अराधना करिन। ये हाड़ामन ला न तो संकेले जाही, न तो येमन ला गाड़े जाही, पर येमन भुइयां म सूखा गोबर सहीं पड़े रहिहीं।
JER 8:3 जिहां कहूं भी मेंह येमन ला भगाहूं, उहां ये दुस्ट जाति के बांचे जम्मो मनखेमन जीयत रहे के बदले मरना पसंद करहीं, सर्वसक्तिमान यहोवा ह घोसना करत हे।’
JER 8:4 “ओमन ला कह, ‘यहोवा ह ये कहत हे: “ ‘जब मनखेमन गिरथें, त का ओमन फेर नइं उठंय? जब कोनो मुहूं मोड़के चल देथे, त का ओह फेर नइं लहुंटय?
JER 8:5 त फेर ये मनखेमन काबर मुहूं मोड़के चल दे हवंय? काबर यरूसलेम ह हमेसा मुहूं मोड़के चल देथे? ओमन धोखा देते रहिथें; ओमन लहुंटे नइं चाहंय।
JER 8:6 मेंह धियान देके ओमन के बात ला सुने हंव, पर ओमन सही बात ला नइं कहंय। ओमा के कोनो भी अपन दुस्टता ले नइं पछतांय, पर ये कहिथें, “मेंह का करे हंव?” जइसने घोड़ा ह लड़ई म हमला करथे, वइसने ही येमा के हर एक झन अपन हिसाब से चलथे।
JER 8:7 इहां तक कि अकास के सारस चिरई ह अपन ठहिराय समय ला जानथे, अऊ पंड़की, सूपाबेनी अऊ तूती चिरई घलो आने जगह जाय के सही बेरा ला जानथें। पर मोर मनखेमन यहोवा के नियममन ला नइं जानंय।
JER 8:8 “ ‘तुमन कइसे कह सकत हव, “हमन बुद्धिमान अन, काबरकि हमर करा यहोवा के कानून हवय,” जबकि असल म, कानून के गुरूमन लबारी बात लिखके येकर गलत तरीका से उपयोग करे हवंय?
JER 8:9 बुद्धिमान मनखेमन लज्जित होहीं; ओमन डराहीं अऊ पकड़े जाहीं। जब ओमन यहोवा के बचन ला नइं माने हवंय, त ओमन करा का किसम के बुद्धि हवय?
JER 8:10 ये कारन से मेंह ओमन के घरवालीमन ला आने मनखेमन ला अऊ ओमन के खेतमन ला नवां मालिकमन ला दे दूहूं। छोटे ले लेके बड़े तक, जम्मो के जम्मो अनाज के लालची अंय; अगमजानी अऊ पुरोहितमन घलो वइसने जम्मो के जम्मो धोखाधड़ी करथें।
JER 8:11 ओमन मोर मनखेमन के घावमन म अइसे पट्टी बांधथें मानो ओमा जादा चोट नइं लगे रिहिस। ओमन कहिथें, “सांति हे, सांति हे,” जबकि उहां सांति नइं ए।
JER 8:12 का ओमन अपन घिनौना बरताव बर सरमिंदा हवंय? नइं, ओमन बिलकुल ही सरमिंदा नइं एं। ओमन सरमिंदा होवई जानंय ही नइं। एकरसेति ओमन गिरे मनखेमन के बीच म गिरहीं; ओमन गिराय जाहीं, जब ओमन ला सजा मिलही, यहोवा ह कहत हे।
JER 8:13 “ ‘मेंह ओमन के फसल ला ले लूहूं, यहोवा ह घोसना करत हे। अंगूर के नार म अंगूर नइं होही। अंजीर के रूख म अंजीर नइं होही, अऊ ओमन के पानमन सूखा जाहीं। जऊन कुछू मेंह ओमन ला देय हवंव, ओह ओमन ले, लेय लिये जाही।’ ”
JER 8:14 हमन इहां काबर बईठे हवन? इकट्ठा हो जावव! आवव, हमन किलाबंदीवाले सहरमन म भाग चलन अऊ उहां नास हो जावन! काबरकि यहोवा हमर परमेसर ह हमन ला नास करे बर ठाने हे अऊ हमन ला जहर-पानी पीये बर दे हवय, काबरकि हमन यहोवा के बिरूध पाप करे हवन।
JER 8:15 हमन सांति के आसा करत रहेंन पर कुछू बने बात नइं होईस, हमन चंगई के आसा करत रहेंन पर उहां सिरिप आतंक ही आतंक हवय।
JER 8:16 बईरी के घोड़ामन के हिनहिनाय के अवाज दान सहर ले सुनई पड़त हे; ओमन के बिगर बधिया करे गे घोड़ामन के हिनहिनाय के अवाज ले जम्मो देस ह कांपत हे। ओमन देस अऊ येमा के हर चीज, सहर अऊ उहां रहइया जम्मो झन ला नास करे बर आय हवंय।
JER 8:17 “देखव, मेंह तुम्हर बीच म अइसने जहरिला सांपमन ला पठोहूं, ओ जहरिला सांपमन, जऊन मन ला बस म नइं करे जा सकय, अऊ ओमन तुमन ला डसहीं,” यहोवा ह घोसना करत हे।
JER 8:18 तेंह दुख म मोला सांति देवइया अस, मोर हिरदय ह मोर भीतर म दुरबल हो गे हवय।
JER 8:19 मोर मनखेमन के चिचियाय के अवाज ला दूरिहा के देस ले सुनव: “का यहोवा ह सियोन म नइं ए? का सियोन के राजा ह अब उहां नइं ए?” “ओमन काबर मोर गुस्सा ला अपन मूरती अऊ परदेस के बेकार मूरतीमन के दुवारा भड़काय हवंय?”
JER 8:20 “फसल लुये के समय ह बीत गीस, गरमी ह खतम हो गीस, अऊ हमर उद्धार नइं होईस।”
JER 8:21 जब मोर मनखेमन कुचरे जाथें, त महूं घलो कुचरे जाथंव; मेंह सोकित हंव, अऊ मोर मन म डर हमा गे हवय।
JER 8:22 का गिलाद देस म कुछू मलहम नइं ए? का उहां कोनो बईद नइं एं? त फेर मोर मनखेमन के घाव ह काबर चंगा नइं होवत हे?
JER 9:1 आह, बने होतिस कि मोर मुड़ ह पानी के सोता अऊ मोर आंखीमन आंसूमन के सोता होतिन! मेंह रात अऊ दिन अपन मारे गय मनखेमन बर रोतेंव।
JER 9:2 आह, बने होतिस कि डहार रेंगइयामन बर मोर करा मरू-भुइयां म ठहिरे के एक जगह होतिस, ताकि मेंह अपन मनखेमन ला छोंड़के ओमन ले दूरिहा चल देतेंव; काबरकि ओमन जम्मो बेभिचारी अंय, बिसवासघाती मनखेमन के एक भीड़ अंय।
JER 9:3 “ओमन अपन जीभ ला धनुस म चघाय तीर सहीं लबारी मारे बर तियार रहिथें; ओमन सच्चई के दुवारा देस म जय नइं पावंय। ओमन एक पाप ले दूसर पाप करते रहिथें; ओमन मोला नइं चिनहंय,” यहोवा ह घोसना करत हे।
JER 9:4 “अपन संगीमन ले सचेत रहव; अपन बंस के कोनो मनखे ऊपर भरोसा झन करव। काबरकि ओमा के हर एक झन एक धोखा देवइया, अऊ हर एक परोसी एक निंदा-करइया ए।
JER 9:5 संगी ह संगी ला धोखा देथे, अऊ सच बात कोनो नइं कहंय। ओमन अपन जीभ ला लबारी मारे बर सिखोय हवंय; ओमन पाप कर-करके अपनआप ला थकात हें।
JER 9:6 तेंह छल-कपट के बीच म रहिथस; अपन छल-कपट म, ओमन मोला चिनहे बर इनकार करथें,” यहोवा ह घोसना करत हे।
JER 9:7 एकरसेति सर्वसक्तिमान यहोवा ह ये कहत हे: “देखव, मेंह ओमन ला तिपोके सुध करहूं अऊ परखहूं, काबरकि मोर मनखेमन के पाप के कारन मेंह अऊ का कर सकत हंव?
JER 9:8 ओमन के जीभ ह मिरतू के तीर सहीं अय; येह छल-कपट के बात करथे। अपन मुहूं ले ओमन अपन परोसीमन ले बड़े मया के संग गोठियाथें, पर ओमन अपन मन म अपन परोसीमन ला फंसाय के बात सोचथें।
JER 9:9 का मेंह अइसने बात बर ओमन ला सजा नइं दंव?” यहोवा ह घोसना करत हे। “का मेंह अइसने जाति ले खुद बदला नइं लंव?”
JER 9:10 मेंह पहाड़मन बर रोहूं अऊ बिलाप करहूं अऊ जंगल के चरागनमन के बारे म बिलाप के गीत गाहूं। ओमन उजाड़ पड़े हवंय अऊ उहां कोनो नइं जावंय, अऊ उहां गरूवा-बईलामन के नरियाय के अवाज सुनई नइं पड़य। जम्मो चिरईमन भाग गे हवंय अऊ पसुमन चले गे हवंय।
JER 9:11 “मेंह यरूसलेम ला एक खंडहर, सियारमन के एक डेरा बना दूहूं; अऊ मेंह यहूदा के नगरमन ला अइसने उजाड़ दूहूं कि उहां कोनो नइं रह सकहीं।”
JER 9:12 कोन ह अतेक बुद्धिमान ए कि येला समझय? यहोवा ह कोन ला बताय हवय कि ओह येला समझा सकय? देस के काबर बिनास हो गे हवय अऊ मरू-भुइयां सहीं उजाड़ पड़े हवय कि येला कोनो पार नइं कर सकंय?
JER 9:13 यहोवा ह कहिस, “येह एकर कारन होईस काबरकि ओमन मोर ओ कानून ला तियाग दे हवंय, जऊन ला मेंह ओमन के आघू रखे रहेंव; ओमन न तो मोर बात मानिन अऊ न ही मोर कानून के मुताबिक चलिन।
JER 9:14 एकर बदला, ओमन अपन मन के जिद्दी सुभाव के मुताबिक चलिन; ओमन बाल देवतामन के पाछू चलिन, जइसने कि ओमन के पुरखामन ओमन ला सिखाय रिहिन।”
JER 9:15 एकरसेति सर्वसक्तिमान यहोवा, इसरायल के परमेसर ह ये कहत हे: “सुनव, मेंह ये मनखेमन ला करू जेवन खवाहूं अऊ जहरिला पानी पीयाहूं।
JER 9:16 मेंह ओमन ला अइसने देसमन के बीच म तितिर-बितिर कर दूहूं, जेला न तो ओमन अऊ न ही ओमन के पुरखामन जानत रिहिन, अऊ जब तक मेंह ओमन के अन्त नइं कर दूहूं, तब तक मेंह तलवार लेके ओमन के पाछू पड़े रहिहूं।”
JER 9:17 सर्वसक्तिमान यहोवा ह ये कहत हे: “अब सोच-बिचार करव! बिलाप करइया माईलोगनमन ला बलावव; ओमा के सबले जादा कुसल माईलोगन ला बलावव।
JER 9:18 ओमन जल्दी आवंय अऊ हमर बर तब तक बिलाप करंय जब तक कि हमर आंखीमन ले आंसू नइं निकलय अऊ हमर आंखी के पलकमन ले पानी बहे नइं लगय।
JER 9:19 सियोन ले बिलाप करे के अवाज सुनई देवत हे: ‘हमन कतेक नास हो गेंन! हमन कतेक बड़े लज्जा म पड़ेंन! जरूरी ए कि हमन हमर देस ला छोंड़ देवन काबरकि हमर घरमन ला गिरा दिये गे हवय।’ ”
JER 9:20 एकरसेति, हे माईलोगनमन, यहोवा के ये बचन ला सुनव; ओकर मुहूं के बचन ला कान लगाके सुनव। अपन बेटीमन ला बिलाप करे बर सिखावव; एक-दूसर ला एक बिलाप के गीत सिखावव।
JER 9:21 मिरतू ह हमर खिड़कीमन ले होके भीतर आ गे हवय अऊ हमर गढ़मन म घुस गे हवय; येह लइकामन ला गलीमन ले अऊ जवानमन ला चऊक ले मिटा दे हवय।
JER 9:22 तेंह कह, “यहोवा ह ये घोसना करत हे: “ ‘मनखेमन के लासमन अइसने पड़े रहिहीं, जइसने खुला मैदान म गोबर, अऊ फसल लुवइया के पाछू लुये गय फसल, जेला कोनो संकेलनेवाला नइं रहंय।’ ”
JER 9:23 यहोवा ह ये कहत हे: “बुद्धिमान ह अपन बुद्धि ऊपर घमंड झन करय या बलवान ह अपन बल ऊपर घमंड झन करय या धनवान ह अपन धन ऊपर घमंड झन करय,
JER 9:24 पर जऊन ह घमंड करथे, ओह ये बात म घमंड करय: कि ओमन करा मोला जाने के समझ हवय, कि में ही ओ यहोवा अंव, जऊन ह धरती म दया, नियाय अऊ धरमीपन के काम करथंव, काबरकि इही बातमन म मेंह खुस होथंव,” यहोवा ह घोसना करत हे।
JER 9:25 “ओ दिनमन आवत हें,” यहोवा ह घोसना करत हे, “जब मेंह ओ जम्मो झन ला सजा दूहूं, जेमन के खतना सिरिप देहें म होय हवय—
JER 9:26 याने कि मिसर, यहूदा, एदोम, अमोन, मोआब के मनखे अऊ ओ जम्मो जऊन मन दूरिहा म सुनसान जगह म रहिथें। काबरकि ये जम्मो जातिमन सही म खतनारहित अंय, अऊ त अऊ इसरायल के जम्मो घराना ह घलो मन म खतनारहित अय।”
JER 10:1 हे इसरायल के मनखेमन, यहोवा ह तुमन ले का कहत हे, ओला सुनव।
JER 10:2 यहोवा ह ये कहत हे: “आने देसमन के चालचलन ला झन सीखव या अकास म चिनहांमन ला देखके आतंकित झन होवव, हालाकि आने देस के मनखेमन ओमन के दुवारा आतंकित होथें।
JER 10:3 काबरकि मनखेमन के रीति-रिवाजमन बेकार अंय; ओमन जंगल ले एक रूख ला काटथें, अऊ कारीगर ह बिंधना ले ओला आकार देथे।
JER 10:4 ओमन ओला सोन अऊ चांदी ले सजाथें; ओमन ओला हथौड़ी ले खीला ठोंकके मजबूत करथें ताकि ओह झन हालय-डोलय।
JER 10:5 खीरा के खेत म ठाढ़े पुतला सहीं, ओमन के मूरतीमन गोठियाय नइं सकंय; ओमन ला उठाके ले जाय ला पड़थे काबरकि ओमन रेंग नइं सकंय। ओमन ले झन डरव; ओमन कोनो हानि नइं कर सकंय न ही ओमन कोनो भलई कर सकंय।”
JER 10:6 हे यहोवा, तोर सहीं कोनो नइं एं; तेंह महान अस, अऊ तोर नांव ह ताकत म बहुंत बड़े अय।
JER 10:7 हे जम्मो जातिमन के राजा, तोर ले कोन नइं डरही? तें ही येकर लईक अस। जातिमन के जम्मो बुद्धिमान अगुवामन के बीच म अऊ ओमन के जम्मो राजमन म, तोर सहीं कोनो नइं एं।
JER 10:8 ओमन जम्मो निरबुद्धि अऊ मुरूख अंय; ओमन बेकार के कठवा के मूरतीमन के दुवारा सिखाय जाथें।
JER 10:9 पीटे गय चांदी ह तरसीस ले अऊ उफाज ले सोन लाय जाथे। जऊन चीज ला कारीगर अऊ सुनार बनाथें, ओला नीला अऊ बैंगनी रंग के ओनहा पहिराय जाथे— जम्मो चीजमन कुसल कारीगरमन के दुवारा बनाय गे रहिथें।
JER 10:10 पर यहोवा ही सच्चा परमेसर अय; ओह जीयत परमेसर अऊ सदाकाल के राजा अय। जब ओह गुस्सा करथे, त धरती ह कांपथे; जाति-जाति के मनखेमन ओकर कोप ला सह नइं सकंय।
JER 10:11 “ओमन ला ये कह: ‘ये देवता, जेमन धरती अऊ अकासमन ला नइं बनाईन, येमन धरती ले अऊ अकासमन के खाल्हे ले नास हो जाहीं।’ ”
JER 10:12 पर परमेसर ह धरती ला अपन सामर्थ ले बनाईस; ओह अपन बुद्धि ले संसार के नीव रखिस अऊ अपन समझ के दुवारा अकासमन ला तानिस।
JER 10:13 जब ओह गरजथे, त अकासमन म पानी ह गरजथे, ओह धरती के छोर ले बादरमन ला उठाथे। ओह बारिस के संग बिजली चमकाथे अऊ अपन भंडारघर ले हवा चलाथे।
JER 10:14 हर एक जन निरबुद्धि अऊ बिगर गियान के हवय; हर एक सुनार ह अपन बनाय मूरतीमन के कारन लज्जित हवय। जऊन मूरतीमन ला ओह बनाथे, ओमन एक धोखा अंय; ओमन म सांस ही नइं ए।
JER 10:15 ओ मूरतीमन बेकार अऊ हंसी उड़ाय के चीज अंय; जब ओमन के फैसला होही, त ओमन नास हो जाहीं।
JER 10:16 ओ, जऊन ह याकूब के भाग ए, ओह तो येमन सहीं नो हय, काबरकि ओह जम्मो चीजमन के बनानेवाला अय, इसरायल, ओकर उत्तराधिकार के मनखेमन घलो ओमा आथें— ओकर नांव सर्वसक्तिमान यहोवा अय।
JER 10:17 तुमन, जेमन बईरी के घेराबंदी म रहत हव, ये देस ला छोंड़के जाय के तियारी म अपन सामानमन ला संकेल लव।
JER 10:18 काबरकि यहोवा ह ये कहत हे: “अब, मेंह ओमन ला जोर से फटिकहूं जऊन मन ये देस म रहिथें; मेंह ओमन ऊपर संकट लानहूं ताकि ओमन पकड़े जावंय।”
JER 10:19 मोला लगे चोट के कारन मोर ऊपर हाय! मोर घाव ह ठीक नइं होवय! तभो ले मेंह अपनआप ला कहेंव, “येह तो मोर बेमारी अय, अऊ येला मोला सहना पड़ही।”
JER 10:20 मोर तम्बू ह नास हो गीस; येकर जम्मो रस्सीमन टूट गीन। मोर लइकामन मोर करा ले चल दीन अऊ ओमन अब नइं अंय; अब मोर तम्बू ला गाड़े बर या मोर निवास ला ठीक करे बर कोनो नइं बचे हवंय।
JER 10:21 चरवाहामन निरबुद्धि अंय अऊ ओमन यहोवा ले नइं पुछंय; एकरसेति ओमन के उन्नति नइं होवय अऊ ओमन के जम्मो पसुमन तितिर-बितिर हो जाथें।
JER 10:22 सुन! समाचार ह आवत हे— उत्तर दिग के देस ले एक बड़े कोलाहल सुनई देवत हे! येह यहूदा के नगरमन ला उजाड़ दीही ओमन ला सियारमन के डेरा बना दीही।
JER 10:23 हे यहोवा, मेंह जानत हंव कि मनखे के जिनगी ह ओमन के खुद के नो हय; येह ओमन के काम नो हय कि ओमन अपन मन के मुताबिक चलंय।
JER 10:24 हे यहोवा, मोर ताड़ना कर, पर सिरिप नियाय से— गुस्सा होके नइं, नइं तो, तेंह मोर नास कर देबे।
JER 10:25 ओ देसमन ऊपर अपन गुस्सा उतार जऊन मन तोला गरहन नइं करंय, अऊ जऊन मनखेमन तोर नांव के महिमा नइं करंय। काबरकि ओमन याकूब ला खतम कर दे हवंय; ओमन ओला पूरा खतम कर दे हवंय अऊ ओकर देस ला नास कर दे हवंय।
JER 11:1 यहोवा कोति ले ये बचन यरमियाह करा आईस:
JER 11:2 “ये करार के नियममन ला सुन अऊ येमन ला यहूदा के मनखे अऊ यरूसलेम म रहइया मनखेमन ला बता।
JER 11:3 ओमन ला बता कि यहोवा, इसरायल के परमेसर ह ये कहत हे: ‘सरापित ए ओ मनखे, जऊन ह ये करार के नियममन ला नइं मानय—
JER 11:4 जेला माने के हुकूम मेंह तुम्हर पुरखामन ला दे रहेंव, जब मेंह ओमन ला मिसर देस ले, लोहा पीघलाय के भट्ठी ले निकालके लाने रहेंव।’ मेंह कहेंव, ‘मोर बात मानव अऊ ओ जम्मो काम करव, जेकर हुकूम मेंह देवत हंव, अऊ तुमन मोर मनखे होहू, अऊ मेंह तुम्हर परमेसर होहूं।
JER 11:5 तब मेंह ओ किरिया ला पूरा करहूं, जऊन ला मेंह तुम्हर पुरखामन ले खाय रहेंव कि मेंह ओमन ला एक अइसने देस दूहूं, जेमा दूध अऊ मंधरस के धारा बोहाथे’—येह ओ देस अय, जेमा आज तुम्हर अधिकार हे।” मेंह जबाब देंव, “हे यहोवा, अइसने ही होवय।”
JER 11:6 तब यहोवा ह मोला कहिस, “यहूदा के नगरमन म अऊ यरूसलेम के गलीमन म ये जम्मो बात के परचार कर: ‘ये करार के नियममन ला सुनव अऊ ओकर मुताबिक चलव।
JER 11:7 जब ले मेंह तुम्हर पुरखामन ला मिसर देस ले निकालके लानेंव, तब ले लेके आज तक, मेंह ओमन ला घेरी-बेरी चेतउनी देके कहेंव, “मोर बात ला मानव।”
JER 11:8 पर ओमन मोर बात ला नइं सुनिन अऊ धियान नइं दीन; ओकर बदले, ओमन अपन दुस्ट हिरदय के जिद्दी सुभाव म चलिन। एकरसेति मेंह ओमन के ऊपर ओ करार के जम्मो सराप ला लानेंव, जेला माने के हुकूम मेंह ओमन ला देय रहेंव, पर ओमन नइं मानिन।’ ”
JER 11:9 तब यहोवा ह मोला ये घलो कहिस, “यहूदा के अऊ यरूसलेम म रहइया मनखेमन के बीच म एक साजिस चलत हे।
JER 11:10 ओमन अपन ओ पुरखामन के पाप कोति लहुंट गे हवंय, जऊन मन मोर बात ला सुने ले इनकार करिन। ओमन आने देवतामन के सेवा करे बर ओमन के पाछू चले गे हवंय। इसरायल अऊ यहूदा दूनों मोर ओ करार ला टोर दे हवंय, जेला मेंह ओमन के पुरखामन के संग करे रहेंव।
JER 11:11 एकरसेति, यहोवा ह ये कहत हे: ‘मेंह ओमन ऊपर अइसने बिपत्ति लानहूं, जेकर ले ओमन बच नइं सकंय। हालाकि ओमन आके मोर करा रोहीं, पर मेंह ओमन के नइं सुनहूं।
JER 11:12 यहूदा के नगरमन के मनखे अऊ यरूसलेम के मनखेमन जाके ओ देवतामन करा रोहीं, जेमन बर ओमन धूप जलाथें, पर ओ देवतामन बिपत्ति के बेरा ओमन के कुछू मदद नइं करहीं।
JER 11:13 हे यहूदा के मनखेमन, जतेक तुम्हर नगरमन हवंय, ओतेक ही तुम्हर देवतामन हवंय; अऊ जतेक यरूसलेम के गलीमन हवंय, ओतेक तुमन ओ कलंकित बाल देवता के आघू म धूप जलाय बर बेदीमन ला बनाय हवव।’
JER 11:14 “एकरसेति, हे यरमियाह, ये मनखेमन बर पराथना झन कर या येमन बर कोनो बिनती या निबेदन झन कर, काबरकि अपन दुख के बेरा म, जब येमन मोला पुकारहीं, त मेंह येमन के नइं सुनंव।
JER 11:15 “मोर मयारू ह मोर मंदिर म का करत हे ओह कतको आने मन संग मिलके अपन दुस्ट योजना ला पूरा करत हे? का पबितर करे गे मांस ह तोर सजा ला दूरिहा कर सकथे? जब तेंह दुस्टता करे म लगे रहिथस, तभे तेंह खुस होथस।”
JER 11:16 यहोवा ह तोला एक हरियर, सुघर फरवाला जैतून रूख कहे रिहिस। पर एक भयंकर आंधी के गरजन के संग, ओह येमा आगी लगा दीही, अऊ येकर डारामन ला टोर दिये जाही।
JER 11:17 सर्वसक्तिमान यहोवा, जऊन ह तोला लगाईस, ओह तोर ऊपर बिपत्ति लाने के फैसला करे हवय, काबरकि इसरायल अऊ यहूदा के मनखेमन दुस्ट काम करे हवंय अऊ बाल देवता बर धूप जलाके मोर गुस्सा ला भड़काय हवंय।
JER 11:18 यहोवा ह ओमन के साजिस ला मोर करा परगट करिस, एकरसेति मेंह येला जान डारेंव, काबरकि ओ बेरा, ओह मोला देखाईस कि ओमन का करत रिहिन।
JER 11:19 मेंह बध होवइया एक सीधा-साधा मेढ़ा-पीला सहीं रहेंव; मेंह नइं जानत रहेंव कि ओमन ये कहिके मोर बिरूध म साजिस करे रिहिन, “आवव, हमन ओ रूख ला ओकर फर समेत नास कर देवन; आवव, हमन ओला जीयतमन के बीच ले काट देवन, ताकि ओकर नांव ला अऊ सुरता झन करे जावय।”
JER 11:20 पर, हे सर्वसक्तिमान यहोवा, तें, जऊन ह सच्चई से नियाय करथस अऊ हिरदय अऊ मन ला परखथस, तेंह मोला देखा कि तेंह ओमन ले बदला लेथस, काबरकि मेंह अपन मामला ला तोर हांथ म छोंड़ दे हवंव।
JER 11:21 एकरसेति यहोवा ह अनातोत नगर के ओ मनखेमन के बारे म कहत हे, जऊन मन ये कहिके तोला मार डारे के धमकी देवत हें, “यहोवा के नांव म अगमबानी झन कर, नइं तो तेंह हमर हांथ ले मारे जाबे”—
JER 11:22 एकरसेति सर्वसक्तिमान यहोवा ह ये कहत हे: “मेंह ओमन ला सजा दूहूं। ओमन के जवान मनखेमन तलवार ले मारे जाहीं, अऊ ओमन के बेटा-बेटीमन अकाल के कारन मरहीं।
JER 11:23 ओमा के एको झन घलो नइं बांचहीं, काबरकि मेंह ओमन के सजा के बछर म अनातोत के मनखेमन ऊपर बिपत्ति लानहूं।”
JER 12:1 हे यहोवा, जब भी मेंह अपन मामला तोर आघू म लानथंव; तेंह हमेसा धरमी ठहिरथस। तभो ले मेंह तोर संग तोर नियाय के बारे म गोठियाहूं: दुस्टमन के काम ह काबर बढ़थे? काबर बेईमान मनखेमन सुख म रहिथें?
JER 12:2 तेंह ओमन ला रोपे हस, ओमन जरी धरे हवंय; ओमन बढ़थें अऊ फरथें। ओमन के मुहूं म हमेसा तोर नांव हवय पर तेंह ओमन के मन ले दूरिहा हस।
JER 12:3 तभो ले, हे यहोवा, तेंह मोला जानत हस; तेंह मोला देखथस अऊ तोर बारे म मोर बिचार ला परखथस। जइसने भेड़ ला काटे बर ले जाथें, वइसने ओमन ला खींचके ले जा! बध के दिन बर ओमन ला अलग रख!
JER 12:4 कब तक देस म सूखा पड़े रहिही अऊ जम्मो मैदान के घांस ह सूखाय रहिही? काबरकि जऊन मन येमा रहिथें, ओमन दुस्ट अंय, एकरसेति पसु अऊ चिरईमन नास हो गीन। तभो ले मनखेमन कहत हें, “हमर का होही, ओह येला नइं देखही।”
JER 12:5 “यदि तेंह मनखेमन के संग दऊड़े हस अऊ ओमन तोला थका दे हवंय, त फेर तेंह घोड़ामन के संग कइसे मुकाबला करबे? यदि तेंह सांति के ये देस म लड़खड़ावत हस, त फेर यरदन नदी के झाड़ीमन के बीच म कइसे करबे?
JER 12:6 तोर रिस्तेदार, तोर खुद के परिवार के मनखेमन घलो तोला धोखा देय हवंय; ओमन तोर बिरूध म बहुंत चिचियाय हवंय। एकरसेति यदि ओमन तोर बारे म बने गोठियाथें, तभो ले ओमन ऊपर भरोसा झन करबे।
JER 12:7 “मेंह अपन घर ला तियाग दूहूं, अपन उत्तराधिकार ला छोंड़ दूहूं; मेंह जऊन ला मया करथंव ओला ओकर बईरीमन के हांथ म कर दूहूं।
JER 12:8 मोर उत्तराधिकार ह मोर बर जंगल के एक सेर सहीं हो गे हवय। ओह मोर ऊपर गरजथे; एकरसेति मेंह ओकर ले घिन करथंव।
JER 12:9 का मोर उत्तराधिकार ह मोर बर धब्बावाले सिकार के चिरई सहीं नइं हो गे हवय जऊन ला आने सिकारी चिरईमन घेरके हमला करथें? जावव अऊ जम्मो जंगली पसुमन ला इकट्ठा करव; ओमन ला लानव कि खा जावंय।
JER 12:10 बहुंत चरवाहामन मोर अंगूर के बारी ला नास कर दीहीं अऊ मोर बारी ला कुचर दीहीं; ओमन मोर बने बारी ला उजारके बेकार कर दीहीं।
JER 12:11 ओला मोर आघू म बेकार, सूखा अऊ उजाड़ कर दिये जाही; जम्मो देस ह बेकार पड़े रहिही काबरकि ओकर देखरेख करइया कोनो नइं एं।
JER 12:12 सुन्ना जगह के जम्मो बेकार टीलामन ऊपर नास करइयामन जूरहीं, काबरकि यहोवा के तलवार ह देस के एक छोर ले लेके दूसर छोर तक मारही; कोनो सुरकछित नइं रहिहीं।
JER 12:13 ओमन गहूं तो बोहीं पर कांटामन ला लूहीं; ओमन काम करके अपनआप ला थकाहीं, पर ओमन ला कुछू नइं मिलही। यहोवा के भयंकर गुस्सा के कारन ओमन अपन कटनी के बिसय म लज्जित होहीं।”
JER 12:14 यहोवा ह ये कहत हे: “जहां तक मोर ओ जम्मो दुस्ट परोसीमन के बात ए, जऊन मन मोर इसरायली मनखेमन ला दिये उत्तराधिकार ऊपर कब्जा करत हें, ओमन ला मेंह ओमन के देस ले उखान दूहूं अऊ मेंह यहूदा के मनखेमन ला घलो ओमन के बीच म ले उखान दूहूं।
JER 12:15 पर ओमन ला उखाने के बाद, मेंह ओमन ऊपर दया करहूं अऊ ओमा ले हर एक झन ला ओमन के उत्तराधिकार के जगह अऊ ओमन के देस म फेर वापिस लानहूं।
JER 12:16 अऊ यदि ओमन मोर मनखेमन के चाल ला बने करके सीखंय अऊ ये कहिके मोर ही नांव के किरिया खावंय, ‘यहोवा के जिनगी के कसम’—जइसे कि एक बार, ओमन मोर मनखेमन ला बाल देवता के किरिया खाय बर सिखोय रिहिन—तब ओमन ला मोर मनखेमन के बीच म बसाय जाही।
JER 12:17 पर यदि ओमा के कोनो जाति ह नइं सुनही, त फेर मेंह ओला पूरा उखानके नास कर दूहूं,” यहोवा ह ये घोसना करत हे।
JER 13:1 यहोवा ह मोर ले ये कहिस: “जा अऊ सन के एक पट्टा बिसा अऊ ओला अपन कनिहां म बांध ले, पर ओला पानी म झन छुआबे।”
JER 13:2 तब यहोवा के कहे मुताबिक मेंह एक पट्टा बिसोंय अऊ ओला अपन कनिहां म बांध लेंव।
JER 13:3 तब यहोवा के ये बचन दूसर बार मोर मेर आईस:
JER 13:4 “जऊन पट्टा ला तेंह बिसाके अपन कनिहां म बांधे हस, ओला ले अऊ फरात नदी म जाके उहां चट्टानमन के दरार म लुका दे।”
JER 13:5 तब यहोवा के कहे मुताबिक मेंह जाके ओला फरात नदी म लुका देंव।
JER 13:6 बहुंत दिन के बाद, यहोवा ह मोला कहिस, “अब फरात नदी म जा अऊ ओ पट्टा ला लेय ले, जऊन ला मेंह तोला उहां लुकाय बर कहे रहेंव।”
JER 13:7 तब मेंह फरात नदी करा गेंव अऊ पट्टा ला खनके उहां ले निकाल लेंव, जिहां मेंह ओला लुकाय रहेंव, पर अब ओह खराप होके पूरा बेकार हो गे रहय।
JER 13:8 तब यहोवा के ये बचन मोर करा आईस:
JER 13:9 “यहोवा ह ये कहत हे: ‘इही किसम ले, मेंह यहूदीमन के घमंड अऊ यरूसलेम के बड़े घमंड ला नास कर दूहूं।
JER 13:10 ये दुस्ट मनखे, जेमन मोर बात ला सुने ले इनकार करथें, जेमन अपन मन के जिद्दी सुभाव म चलथें अऊ आने देवतामन के सेवा अऊ अराधना करे बर ओमन के पाछू चलथें; ओमन ये पट्टा सहीं हो जाहीं—पूरा बेकार!
JER 13:11 काबरकि जइसने एक पट्टा ह कनिहां के चारों कोति बांधे जाथे, वइसने ही मेंह इसरायल के जम्मो मनखे अऊ यहूदा के जम्मो मनखेमन ला अपन म बांधेंव कि ओमन मोर कीरति अऊ परसंसा अऊ आदर बर मोर मनखे होवंय। पर ओमन नइं सुनिन,’ यहोवा ह ये घोसना करत हे।
JER 13:12 “एकरसेति तें ओमन ला कह: ‘यहोवा, इसरायल के परमेसर ह ये कहत हे: अंगूर के मंद रखे के हर एक चाम के थैली ह अंगूर के मंद ले भरे जावय।’ अऊ यदि ओमन तोर ले कहंय, ‘का हमन नइं जानन कि अंगूर के मंद रखे के हर एक चाम के थैली ला अंगूर के मंद ले भर दिये जाना चाही?’
JER 13:13 तब ओमन ला कह, ‘यहोवा ह ये कहत हे: ये देस म रहइया जम्मो झन ला, मेंह मतवारपन ले भर देनेवाला हंव—येमा दाऊद के सिंघासन म बईठइया राजामन, पुरोहितमन, अगमजानीमन अऊ यरूसलेम म रहइया जम्मो मनखेमन होहीं।
JER 13:14 मेंह ओमन ला एक-दूसर ले टकराके कुटा-कुटा कर दूहूं; दाई-ददा अऊ लइकामन ला एक समान, यहोवा ह घोसना करत हे। ओमन ला नास करे म, मेंह कोनो दया या किरपा या सहानुभूति नइं देखाहूं।’ ”
JER 13:15 सुनव अऊ धियान देवव, जिद्दी झन बनव, काबरकि यहोवा ह कहे हवय।
JER 13:16 यहोवा अपन परमेसर ला महिमा देवव, एकर पहिली कि ओह अंधियार ला लानय, एकर पहिली कि तुम्हर गोड़ ह अंधियार वाले पहाड़ी म ठोकर खावय। तुमन अंजोर के आसा करथव, पर ओह ओला बिरबिट अंधियार कर दीही अऊ ओला घोर अंधियार म बदल दीही।
JER 13:17 यदि तुमन नइं सुनहू, त तुम्हर घमंड के कारन मेंह मने-मन रोहूं; मेंह अतेक जादा रोहूं कि मोर आंखीमन ले आंसू बहे लगही, काबरकि यहोवा के झुंड ला बंधुवई म ले जाय जाही।
JER 13:18 राजा अऊ राज-माता ला कह, “अपन सिंघासनमन ले खाल्हे उतरव, काबरकि तुम्हर सोभा देवइया मुकुटमन तुम्हर मुड़ीमन ले गिर जाहीं।”
JER 13:19 नेगेव के सहरमन बंद हो जाहीं, अऊ ओमन ला खोले बर कोनो नइं होहीं। जम्मो यहूदा ला बंधुवई म ले जाय जाही, ओमन पूरा बंधुवई म चल दीहीं।
JER 13:20 आंखी उठाके ओमन ला देख जऊन मन उत्तर दिग ले आवत हें। ओ झुंड कहां हवय, जऊन ह तोला सऊंपे गे रिहिस, ओ भेड़मन, जेमन ऊपर तेंह घमंड करत रहय?
JER 13:21 तेंह का कहिबे, जब यहोवा ह तोर ऊपर ओमन ला मुखिया ठहिरा दीही, जऊन मन ला तेंह अपन बिसेस संगवारी बनाय रहय? त का पीरा ह एक छेवारी माईलोगन के पीरा सहीं तोला नइं जकड़ लीही?
JER 13:22 यदि तेंह अपनआप ले पुछथस, “अइसने मोर संग काबर होईस?”— काबरकि तोर बहुंत पाप के कारन तोर लंहगा ला चीरे गे हवय अऊ तोर देहें के दुरगति करे गे हवय।
JER 13:23 का कोनो इथोपीयन अपन चाम ला या कोनो चीतवा ह अपन धब्बामन ला बदल सकत हे? वइसने तेंह घलो भलई के काम नइं कर सकस काबरकि बुरई के काम करे के तोर आदत हो गे हवय।
JER 13:24 “मेंह भूंसा सहीं तोला बगरा दूहूं जऊन ह कि सुन्ना जगह के हवा ले उड़ियाथे।
JER 13:25 येह तोर हिस्सा ए, ओ भाग, जेला मेंह तोर बर ठहिराय हंव,” यहोवा ह ये घोसना करत हे, “काबरकि तेंह मोला भुला गे हवस अऊ लबरा देवतामन ऊपर भरोसा करे हवस।
JER 13:26 एकरसेति मेंह तोर लंहगा ला तोर मुहूं तक उठा दूहूं ताकि तोर लज्जा ला देखे जा सकय—
JER 13:27 तोर बेभिचार अऊ वासना के अवाज, तोर निरलज बेस्यापन ला देखे जा सकय! मेंह पहाड़ीमन ऊपर अऊ मैदानमन म तोर घिनित काममन ला देखे हंव। हे यरूसलेम, तोर ऊपर हाय! तेंह कब तक असुध रहिबे?”
JER 14:1 सूखा पड़े के बिसय म, यहोवा के ये बचन यरमियाह करा आईस:
JER 14:2 “यहूदा ह बिलाप करत हे, ओकर नगरमन तड़फत हें; ओमन देस बर सोक मनावत हें, अऊ यरूसलेम ले चिचियाय के अवाज उठत हे।
JER 14:3 बड़े मनखेमन अपन सेवकमन ला पानी बर पठोथें; ओमन तरिया म जाथें ओमन ला पानी नइं मिलय। ओमन अपन खाली बरतन लेके लहुंटथें; डराके अऊ निरास होके, ओमन अपन मुड़ ला ढांप लेथें।
JER 14:4 भुइयां ह फाट गे हवय काबरकि देस म पानी नइं बरसत हे; किसानमन डरा गे हवंय अऊ अपन मुड़मन ला ढांप लेवत हें।
JER 14:5 अऊ त अऊ हिरनी ह मैदान म अपन नवां जनमे लइका ला छोंड़ देवत हे काबरकि उहां कांदी नइं ए।
JER 14:6 जंगली गदहामन बंजर टीलामन म ठाढ़े हवंय अऊ सियार सहीं हांफत हवंय; जेवन के कमी के कारन ओमन के आंखी ले नइं दिखत हे।”
JER 14:7 हालाकि हमर पापमन हमर बिरूध म गवाही देवत हवंय, तभो ले, हे यहोवा, अपन नांव के हित म कुछू कर। काबरकि हमन अकसर बिदरोह करे हवन; हमन तोर बिरूध म पाप करे हवन।
JER 14:8 तें, जऊन ह कि इसरायल के आसा अस, संकट के बेरा म ओकर बचानेवाला अस, तेंह काबर ये देस म अजनबी सहीं हवस, एक राहगीर सहीं जऊन ह सिरिप एक रात रूकथे?
JER 14:9 तेंह काबर एक अचम्भो करे मनखे सहीं हो गे हस, एक अइसने योद्धा, जऊन म कोनो ला बचाय बर सक्ति नइं ए? हे यहोवा, तेंह हमर बीच म हवस, अऊ हमर करा तोर नांव हवय; एकरसेति हमन ला झन तियाग दे!
JER 14:10 यहोवा ह ये मनखेमन के बारे म ये कहत हे: “येमन ला एती-ओती भटकई बने लगथे; येमन कुकरम करे बर अपन गोड़ ला नइं रोकंय। एकरसेति यहोवा ह येमन ला गरहन नइं करय; ओह अब येमन के दुस्टता ला सुरता करही अऊ ओमन के पाप के सजा ओमन ला दीही।”
JER 14:11 तब यहोवा ह मोला कहिस, “ये मनखेमन के भलई बर पराथना झन कर।
JER 14:12 चाहे ओमन उपास घलो करंय, तभो ले मेंह ओमन के पुकार ला नइं सुनहूं; चाहे ओमन होम-बलिदान अऊ अन्न-बलिदान चघावंय, तभो ले मेंह ओमन ला गरहन नइं करहूं। पर मेंह ओमन ला तलवार, अकाल अऊ महामारी ले नास करहूं।”
JER 14:13 पर मेंह कहेंव, “हाय, हे परमपरधान यहोवा! अगमजानीमन ओमन ला कहत रहिथें, ‘तुम्हर ऊपर न तो तलवार चलही अऊ न ही अकाल पड़ही। वास्तव म, मेंह तुमन ला ये जगह म सदा के सांति दूहूं।’ ”
JER 14:14 तब यहोवा ह मोला कहिस, “ये अगमजानीमन मोर नांव म लबारी अगमबानी करत हवंय। मेंह ओमन ला नइं पठोय हंव अऊ न तो ओमन ला ठहिराय हंव अऊ न ही ओमन ले गोठियाय हंव। ओमन तुमन ले अपन खुद के मन के लबारी दरसन, सकुन, मूरती-पूजा अऊ भरम के अगमबानी करत हवंय।
JER 14:15 एकरसेति, जऊन अगमजानीमन मोर नांव म अगमबानी करत हवंय, ओमन के बारे म यहोवा ह ये कहत हे: मेंह ओमन ला नइं पठोय हवंव, तभो ले ओमन कहत हवंय, ‘ये देस म न तो तलवार चलही, अऊ न ही अकाल पड़ही।’ ओही अगमजानीमन ही तलवार अऊ अकाल के दुवारा नास होहीं।
JER 14:16 अऊ जऊन मनखेमन बर ओमन अगमबानी करत हवंय, ओमन ला अकाल अऊ तलवार के कारन बाहिर यरूसलेम के गलीमन म फटिक दिये जाही। ओमन ला, ओमन के घरवालीमन ला अऊ ओमन के बेटा-बेटीमन ला उहां माटी देय बर कोनो नइं होहीं। ओमन के बुरई के मुताबिक, मेंह ओमन ऊपर बिपत्ति लानहूं।
JER 14:17 “तें ओमन ले ये बात कह: “ ‘मोर आंखीमन ले रात अऊ दिन बिगर रूके आंसू बहते रहय; काबरकि कुंवारी बेटी, मोर मनखेमन ला भारी चोट लगे हवय, ओमन कुचरे गे हवंय।
JER 14:18 यदि मेंह मैदानी भाग म जाथंव, त मेंह ओमन ला देखथंव, जऊन मन तलवार ले मारे गे हवंय; यदि मेंह सहर म जाथंव, त अकाल ले नास होय चीजमन ला देखथंव। अगमजानी अऊ पुरोहित दूनों एक अइसने देस म चले गे हवंय, जेला ओमन नइं जानंय।’ ”
JER 14:19 हे यहोवा, का तेंह यहूदा ला पूरा इनकार कर दे हस? का तेंह सियोन ला तुछ समझथस? तेंह काबर हमन ला अइसने पीरा दे हवस कि हमन चंगा नइं हो सकन? हमन सांति के आसा करेंन पर हमर कुछू भलई नइं होईस, हमन बने समय के आसा करत रहेंन पर सिरिप आतंक ही मिलिस।
JER 14:20 हे यहोवा, हमन अपन दुस्टता, अऊ अपन पुरखामन के अपराध ला मान लेवत हन; हमन सही म, तोर बिरूध म पाप करे हन।
JER 14:21 अपन नांव के हित म, हमन ला तुछ झन जान; अपन महिमामय सिंघासन के अपमान झन कर। हमर संग करे अपन करार ला सुरता कर अऊ ओला झन टोर।
JER 14:22 का जातिमन के बेकार मूरतीमन बरसात कर सकत हें? का अकास ह खुद पानी के झड़ी लगा सकत हे? नइं, पर हे यहोवा, हमर परमेसर, सिरिप तेंह ये सब करथस? एकरसेति तोर ऊपर हमर आसा हवय, काबरकि ये जम्मो काम, सिरिप तें ही करथस।
JER 15:1 तब यहोवा ह मोला कहिस: “अऊ त अऊ यदि मूसा अऊ समूएल घलो मोर आघू म बिनती करत ठाढ़ होतिन, तब भी मोर मन ह ये मनखेमन कोति नइं फिरतिस। येमन ला मोर आघू ले निकाल दे! ओमन ला जावन दे!
JER 15:2 अऊ यदि ओमन तोर ले पुछथें, ‘हमन कहां जाबो?’ त ओमन ला बता, ‘यहोवा ह ये कहत हे: “ ‘जेमन बर मरना लिखे हवय, ओमन मर जावंय; जऊन मन ला तलवार ले मरना हे, ओमन तलवार ले मरंय; जऊन मन ला भूख ले मरना हे, ओमन भूख ले मरंय; जऊन मन ला बंधुवई म जाना हे, ओमन बंधुवई म चले जावंय।’
JER 15:3 “मेंह ओमन के बिरूध म चार किसम के बिनास करइयामन ला पठोहूं,” यहोवा ह ये घोसना करत हे, “मार डारे बर तलवार, घिल्लाके ले जाय बर कुकुर, अऊ चीथ खाय बर अऊ नास करे बर चिरई अऊ जंगली पसु।
JER 15:4 हिजकियाह के बेटा, यहूदा के राजा मनस्से ह जऊन दुस्ट काम यरूसलेम म करे हवय, ओकर कारन मेंह ओमन ला धरती के जम्मो राजमन म घिनौना कर दूहूं।
JER 15:5 “हे यरूसलेम, तोर ऊपर कोन ह दया करही? तोर बर कोन ह सोक मनाही? कोन ह रूकके तोर हालचाल पुछही?
JER 15:6 तेंह मोला अस्वीकार करे हस,” यहोवा ह ये घोसना करत हे। “तेंह मोर ले अऊ पाछू हटत जावत हस। एकरसेति मेंह हांथ बढ़ाके तोला नास कर दूहूं; मेंह तरस खा-खाके थक गे हंव।
JER 15:7 मेंह ओमन ला देस के सहर के दुवारमन म सूपा ले पछरहूं। मेंह अपन मनखेमन ऊपर मिरतू-सोक अऊ बिनास लानहूं, काबरकि ओमन अपन चालचलन ला नइं बदले हवंय।
JER 15:8 मेंह ओमन के बिधवामन के गनती ला समुंदर के बालू ले घलो जादा कर दूहूं। दिन के मंझन के बेरा, मेंह एक नास करइया ला जवानमन के दाईमन के बिरूध लानहूं; अचानक मेंह ओमन ऊपर पीरा अऊ आतंक लानहूं।
JER 15:9 सात झन के दाई ह दुरबल हो जाही अऊ अपन आखिरी सांस लीही। दिन के रहत ही ओकर सूरज ह बुड़ जाही; ओह कलंकित अऊ अपमानित होही। जऊन मनखेमन बच गे होहीं, ओमन ला मेंह ओमन के बईरीमन के आघू म तलवार ले मरवाहूं,” यहोवा ह ये घोसना करत हे।
JER 15:10 हाय, हे मोर दाई, कि तेंह मोला जनमाय, एक अइसने मनखे, जेकर संग पूरा देस बिबाद अऊ झगरा करत हे! मेंह न तो उधार दे हंव अऊ न ही उधार ले हंव, तभो ले जम्मो झन मोला कोसत हवंय।
JER 15:11 यहोवा ह कहिस, “खचित मेंह तोला भलई बर छोंड़ दूहूं; खचित मेंह बिपत्ति अऊ दुख के बेरा म तोर बईरीमन ला तोर ले बिनती करवाहूं।
JER 15:12 “का कोनो मनखे ह लोहा ला टोर सकत हे— उत्तर दिग के लोहा—या तांबा ला?
JER 15:13 “अपन जम्मो देस म तोर जम्मो पाप के कारन, मेंह तोर धन-संपत्ति अऊ खजाना ला बिगर कोनो दाम के लूट म दे दूहूं।
JER 15:14 एक अइसने देस म, जेला तेंह नइं जानस मेंह तोला तोर बईरीमन के गुलाम बना दूहूं, काबरकि मोर गुस्सा के आगी ह भड़कही अऊ येह तोला जलाही।”
JER 15:15 हे यहोवा, तेंह समझथस; मोला सुरता कर अऊ मोर खियाल रख। मोर सतानेवालामन ले मोर बदला ले। तेंह धीरज धरइया अस—मोला दूरिहा झन कर; सोच कि तोर खातिर मेंह कइसे निन्दा सहे हवंव।
JER 15:16 जब तोर बचन ह आईस, त मेंह ओला अपन मन म रखेंव; अऊ ओकर ले आनंदित अऊ खुस रहेंव, काबरकि, हे यहोवा सर्वसक्तिमान परमेसर, मेंह तोर नांव ले जाने जाथंव।
JER 15:17 मेंह कभू मऊज-मस्ती करइयामन संग नइं बईठेंव, अऊ ओमन संग कभू खुसी नइं मनायेंव; मेंह अकेला बईठेंव, काबरकि तोर हांथ मोर ऊपर रिहिस अऊ तेंह मोला गुस्सा ले भर दे रहय।
JER 15:18 मोर पीरा ह काबर खतम नइं होवय अऊ मोर घाव ह काबर दुख देवत हे अऊ बने नइं होवय? तेंह मोर बर एक धोखा देवइया छोटे झरना सहीं अस, ओ झरना जऊन ह सूखा जाथे।
JER 15:19 एकरसेति यहोवा ह ये कहत हे: “यदि तेंह पछताप करबे, त मेंह तोला पहिले सहीं बने कर दूहूं ताकि तें मोर सेवा कर सकस; यदि तेंह बेकार के बात नइं, पर सही बात कहिबे, त तेंह मोर तरफ ले गोठियानेवाला होबे। ये मनखेमन तोर कोति फिरंय, पर तें ओमन कोति बिलकुल झन फिरबे।
JER 15:20 मेंह तोला ये मनखेमन बर एक दीवार बना दूहूं, कांसा के एक गढ़वाला दीवार; ओमन तोर बिरूध म लड़हीं पर तोला जीत नइं सकहीं, काबरकि तोला छोंड़ाय अऊ बचाय बर मेंह तोर संग हवंव,” यहोवा ह ये घोसना करत हे।
JER 15:21 “मेंह तोला दुस्ट मनखेमन के हांथ ले बचाहूं अऊ निरदयी मनखेमन के पकड़ ले छोंड़ाहूं।”
JER 16:1 तब यहोवा के ये बचन फेर मोर करा आईस:
JER 16:2 “ये जगह म, तेंह बिहाव झन करबे अऊ इहां तोर बेटा-बेटी झन जनमाबे।”
JER 16:3 काबरकि जऊन बेटा-बेटीमन ये देस म जनमहीं अऊ जऊन दाई-ददामन ओमन ला जनमाहीं, ओमन के बारे म यहोवा ह ये कहत हे:
JER 16:4 “ओमन जान-लेवा बेमारीमन ले मरहीं। ओमन बर कोनो सोक नइं मनाहीं अऊ न ही ओमन ला माटी दिये जाही, पर ओमन सूखाय गोबर सहीं भुइयां म पड़े रहिहीं। ओमन तलवार अऊ अकाल ले मारे जाहीं, अऊ ओमन के लासमन चिरई अऊ जंगली पसुमन के जेवन होहीं।”
JER 16:5 काबरकि यहोवा ह ये कहत हे: “जऊन घर म मिरतू-भोज होवत हे, ओ घर म झन जा; उहां सोक मनाय बर या सहानुभूति देखाय बर झन जा, काबरकि मेंह ये मनखेमन ले अपन आसीस, अपन मया अऊ अपन दया ला लेय ले हंव,” यहोवा ह ये घोसना करत हे।
JER 16:6 “छोटे अऊ बड़े दूनों मनखे ये देस म मरहीं। ओमन ला न तो माटी दिये जाही अऊ न ही ओमन बर सोक मनाय जाही, अऊ मरे मनखे बर दुख परगट करे बर कोनो अपनआप ला नइं काटहीं अऊ न ही मुड़ मुड़ाहीं।
JER 16:7 मरे मनखे बर जऊन ह सोक मनाही, ओला अराम देय बर कोनो जेवन नइं दीहीं—अऊ त अऊ काकरो दाई या ददा के मरे म घलो—अऊ न ही सोक मनइयामन ला सांति देय बर, कोनो कुछू पीये बर दीहीं।
JER 16:8 “अऊ जऊन घर म भोज होवथे, उहां झन जाबे अऊ उहां बईठके झन खाबे-पीबे।
JER 16:9 काबरकि सर्वसक्तिमान यहोवा, इसरायल के परमेसर ह ये कहत हे: तोर देखत म अऊ तोर दिन म ही, मेंह आनंद अऊ खुसी के अवाज अऊ दूल्हा अऊ दुलहिन के अवाज ला ये जगह म खतम कर दूहूं।
JER 16:10 “जब तेंह ये मनखेमन ला ये जम्मो बात कहिबे अऊ ओमन तोर ले पुछहीं, ‘यहोवा ह हमर ऊपर अइसने बड़े बिपत्ति के हुकूम काबर देय हवय? हमन का गलत करे हवन? हमन यहोवा हमर परमेसर के बिरूध म का पाप करे हन?’
JER 16:11 तब तें ओमन ला कह, यहोवा ह ये घोसना करत हे: ‘काबरकि तुम्हर पुरखामन मोला तियाग दीन, अऊ आने देवतामन के पाछू चलिन अऊ ओमन के सेवा अऊ अराधना करिन। ओमन मोला तियाग दीन अऊ मोर कानून के पालन नइं करिन।
JER 16:12 पर तुमन तुम्हर पुरखामन ले घलो जादा दुस्टता के काम करे हवव। देखव, तुमन मोर हुकूम माने के बदले, कइसे अपन दुस्टता के जिद्दी सुभाव म चलत हवव।
JER 16:13 एकरसेति मेंह तुमन ला ये देस ले उखानके एक अइसने देस म फेंक दूहूं, जेला न तो तुमन जानत हव अऊ न ही तुम्हर पुरखामन जानत रिहिन, अऊ उहां तुमन रात अऊ दिन आने देवतामन के सेवा करहू, काबरकि मेंह तुम्हर ऊपर कुछू किरपा नइं करहूं।’
JER 16:14 “जइसन भी हो, अइसने दिनमन आवत हें,” यहोवा ह घोसना करत हे, “जब ये फेर नइं कहे जाही, ‘ओ यहोवा के जिनगी के कसम, जऊन ह इसरायलीमन ला मिसर देस ले निकालके ले आईस,’
JER 16:15 पर ये कहे जाही, ‘ओ यहोवा के जिनगी के कसम, जऊन ह इसरायलीमन ला उत्तर के देस ले अऊ ओ जम्मो देसमन ले निकालके ले आईस, जिहां ओह ओमन ला बंधुवा कर दे रिहिस।’ काबरकि मेंह ओमन ला ओ देस म लहुंटाके ले आहूं, जऊन ला मेंह ओमन के पुरखामन ला देय रहेंव।
JER 16:16 “यहोवा ह ये घोसना करत हे: पर अब मेंह बहुंत मछुआरमन ला बुलवाहूं, अऊ ओमन ये मनखेमन ला पकड़ लीहीं। ओकर बाद मेंह बहुंत सिकारीमन ला बुलवाहूं, अऊ ओमन ये मनखेमन ला हर पहाड़ अऊ पठार अऊ चट्टानमन के दरारमन म खोजहीं।
JER 16:17 मोर आंखीमन ओमन के जम्मो चालचलन ला देखत हवंय; ओमन मोर ले लुकाय नइं एं, अऊ न ही ओमन के पाप ह मोर नजर ले लुकाय हवय।
JER 16:18 मेंह ओमन के अधरम अऊ पाप के दू गुना सजा दूहूं, काबरकि ओमन मोर देस ला अपन निरजीव बेकार चीजमन ले असुध कर दे हवंय अऊ मोर निज भाग ला अपन घिनौना मूरतीमन ले भर दे हवंय।”
JER 16:19 हे यहोवा, हे मोर ताकत अऊ मजबूत गढ़, संकट के बेरा म मोला सरन देवइया, जाति-जाति के मनखेमन धरती के छोर ले तोर करा आहीं अऊ कहिहीं, “हमर पुरखामन जुच्छा के देवतामन ला रखे रिहिन, ओमन बेकार के मूरतीमन रिहिन अऊ ओमन के दुवारा हमर पुरखामन के कुछू भलई नइं होईस।
JER 16:20 का मनखेमन अपन खुद के देवतामन ला बनाथें? हव, पर ओमन देवता नो हंय!”
JER 16:21 “एकरसेति मेंह ओमन ला सिखाहूं— ये बेरा मेंह ओमन ला अपन बल अऊ ताकत ला देखाहूं। तब ओमन जानहीं कि मोर नांव यहोवा अय।”
JER 17:1 “यहूदा के पाप ह लोहा के कलम, अऊ चकमक पथरा के छोर ले, ओमन के हिरदय रूपी पटिया अऊ ओमन के बेदीमन के सींगमन म लिखे गे हवय।
JER 17:2 अऊ त अऊ ओमन के लइकामन ओमन के ओ बेदीमन ला अऊ असेरा देवी के खंभामन ला सुरता करथें जऊन मन फईले हुए रूखमन के बाजू अऊ ऊंचहा पठारमन ऊपर हवंय।
JER 17:3 जम्मो जगह म तोर पाप के कारन, देस म मोर पहाड़, अऊ तोर धन-संपत्ति अऊ तोर जम्मो खजाना ला, तोर ऊंचहा जगहमन सहित, मेंह लूट म तोर बईरीमन ला दे दूहूं।
JER 17:4 अपन खुद के गलती के कारन तेंह ओ उत्तराधिकार ला गंवा देबे, जऊन ला मेंह तोला देय रहेंव। मेंह एक अनजान देस म तोला तोर बईरीमन के गुलाम बना दूहूं, काबरकि तेंह मोर गुस्सा रूपी आगी ला भड़काय हस, अऊ येह हमेसा बरत रहिही।”
JER 17:5 यहोवा ह ये कहत हे: “सरापित ए ओ मनखे, जऊन ह मनखे ऊपर भरोसा करथे, जऊन ह मनखे के सहारा लेथे अऊ जेकर मन ह यहोवा ले भटक जाथे।
JER 17:6 ओ मनखे ह बंजर भुइयां के झाड़ी सहीं होही; अऊ जब उन्नति के समय आही, त ओह ओला नइं देख सकही। ओह सुन्ना जगह म गरमी ले झुलसत भुइयां म निवास करही, अइसने नूनचूर भुइयां म निवास करही, जिहां कोनो नइं रहंय।
JER 17:7 “धइन ए ओ मनखे, जऊन ह यहोवा ऊपर भरोसा करथे, जेकर भरोसा परमेसर ऊपर हवय।
JER 17:8 ओह पानी के तीर म लगे रूख के सहीं होही जेकर जरीमन पानी के सोत म फईले रहिथें। जब घाम होथे, त येह नइं डरय; येकर पानमन हमेसा हरियर रहिथें। साल भर के दुकाल म घलो येह चिंता नइं करय अऊ समय म फरे ले नइं चुकय।”
JER 17:9 मन ह जम्मो चीजमन ले जादा धोखा देवइया अय अऊ येकर ईलाज नइं ए। येला कोन समझ सकथे?
JER 17:10 “में यहोवा ह मन ला खोजथंव अऊ दिमाग ला जांचथंव, ताकि हर एक मनखे ला ओकर चालचलन के मुताबिक, अऊ ओकर काम के मुताबिक ईनाम देवंव।”
JER 17:11 जइसने तीतर ह आने चिरई के देय गार ला सेथे वइसने ओमन होथें, जऊन मन अनियाय करके धन कमाथें। जब ओमन के आधा जिनगी खतम हो जाथे, त ओमन के धन ह ओमन ला छोंड़ देथे, अऊ आखिरी म ओमन मुरूख साबित होथें।
JER 17:12 सुरू ले ऊपर उठाय गे एक महिमामय सिंघासन ह, हमर पबितर-स्थान के जगह अय।
JER 17:13 हे यहोवा, तेंह इसरायल के आसा अस; जऊन मन तोला तियाग देथें, ओमन लज्जित होहीं। जऊन मन तोर ले मुहूं फेर लेथें, ओमन के नांव धुर्रा म लिखे जाही काबरकि ओमन ओ यहोवा ला तियाग दे हवंय, जऊन ह जीयत पानी के सोता अय।
JER 17:14 हे यहोवा, मोला चंगा कर, त मेंह चंगा हो जाहूं; मोला बचा, त मेंह बच जाहूं, काबरकि मेंह सिरिप तोर ही महिमा करथंव।
JER 17:15 ओमन मोला कहिते रहिथें, “यहोवा के बचन कहां हवय? ओह अभी पूरा होवय!”
JER 17:16 तोर चरवाहा बने ले मेंह मुहूं नइं मोड़े हंव; तेंह जानत हस कि मेंह निरासा के दिन के ईछा नइं करे हंव। मोर मुहूं ले जऊन बात निकलथे, ओला तेंह जानत हस।
JER 17:17 मोर बर एक आतंक झन बन; बिपत्ति के दिन म तेंह मोला सरन देवइया अस।
JER 17:18 मोला सतानेवालामन लज्जित होवंय, पर मोला लज्जित होय ले बचा; मोला सतानेवालामन भयभीत होवंय, पर मोला भयभीत होय ले बचा। ओमन ऊपर दू गुना बिपत्ति लान; ओमन ला चकनाचूर कर दे।
JER 17:19 यहोवा ह मोला ये कहिस: “जा अऊ मनखेमन के प्रवेस बर जऊन दुवार हे, उहां ठाढ़ हो जा, जिहां ले यहूदा के राजामन भीतर-बाहिर आथें-जाथें; यरूसलेम के आने जम्मो दुवारमन करा घलो ठाढ़ हो जा,
JER 17:20 अऊ ओमन ले कह, ‘हे यहूदा के राजामन अऊ जम्मो यहूदीमन अऊ यरूसलेम के जम्मो रहइयामन, जऊन मन ये दुवारमन ले आथव, यहोवा के बचन ला सुनव।
JER 17:21 यहोवा ह ये कहत हे: सावधान रहव, बिसराम के दिन कोनो बोझा ला झन उठावव या कोनो बोझा यरूसलेम के दुवारमन ले झन लानव।
JER 17:22 बिसराम के दिन अपन घर ले कोनो बोझा ला बाहिर झन लानव या कोनो काम झन करव, पर जइसने कि मेंह तुम्हर पुरखामन ला हुकूम देय रहेंव, बिसराम के दिन ला पबितर माने करव।
JER 17:23 तभो ले ओमन नइं सुनिन या धियान नइं दीन; ओमन हठी रिहिन अऊ ताड़ना देय ले घलो बात ला नइं सुनिन या नइं मानिन।
JER 17:24 पर यदि तुमन सावधानी से मोर बात ला मानव, यहोवा ह ये घोसना करत हे, अऊ बिसराम के दिन ये सहर के दुवारमन ले कोनो बोझा ला झन लानव, पर बिसराम के दिन ला कोनो काम नइं करे के दुवारा पबितर मानव,
JER 17:25 तब ओ राजा, जऊन मन दाऊद के सिंघासन म बईठहीं, ओमन अपन करमचारीमन संग ये सहर के दुवारमन ले आहीं। ओमन अऊ ओमन के करमचारीमन रथ अऊ घोड़ामन म सवार होके आहीं, अऊ ओमन के संग यहूदा के मनखे अऊ यरूसलेम के रहइया मनखेमन घलो आहीं, अऊ ये यरूसलेम सहर म मनखेमन हमेसा बसे रहिहीं।
JER 17:26 मनखेमन यहूदा के नगरमन ले अऊ यरूसलेम के आसपास के गांवमन ले, बिनयामीन के छेत्र अऊ पछिम के पहाड़ी छेत्र ले, पहाड़ी देस अऊ नेगेव ले, होम-बलिदान अऊ बलिदान, अन्न-बलिदान अऊ लोहबान, अऊ धनबाद-बलिदान लेके यहोवा के घर म आहीं।
JER 17:27 पर यदि तुमन मोर बात ला नइं मानहू अऊ बिसराम के दिन यरूसलेम के दुवारमन ले कोनो बोझा उठाके आय के दुवारा बिसराम के दिन ला अपबितर करहू, त फेर मेंह यरूसलेम के कपाटमन म अइसने आगी लगाहूं, जऊन ह नइं बुताही अऊ यरूसलेम के महलमन ला जलाके भसम कर दीही।’ ”
JER 18:1 यहोवा कोति ले ये बचन यरमियाह करा आईस:
JER 18:2 “खाल्हे कुम्हार के घर म जा, अऊ उहां मेंह तोला अपन संदेस दूहूं।”
JER 18:3 एकरसेति मेंह कुम्हार के घर गेंव, अऊ मेंह ओला चाक म काम करत देखेंव।
JER 18:4 पर जऊन माटी के बरतन ओह बनावत रिहिस, ओह ओकर हांथ म बिगड़ गीस; त ओला जइसने बने लगिस, वइसने ओह ओ माटी ला आने बरतन के आकार दे दीस।
JER 18:5 तब यहोवा के ये बचन मोर करा आईस।
JER 18:6 ओह कहिस, “हे इसरायल के मनखेमन, जइसने ये कुम्हार ह करत हे, का मेंह घलो तुम्हर संग वइसने नइं कर सकत हंव?” यहोवा ह घोसना करत हे। “हे इसरायल, जइसने कुम्हार के हांथ म माटी हवय, वइसने तेंह घलो मोर हांथ म हस।
JER 18:7 यदि कोनो भी समय, मेंह घोसना करथंव कि कोनो जाति या राज ला उखान दिये जावय, गिरा दिये जावय अऊ नास कर दिये जावय,
JER 18:8 अऊ यदि ओ देस के मनखेमन पाप ले पछताप करथें, जेला मेंह चेतउनी दे रहेंव, तब मेंह धीरज धरहूं अऊ जऊन बिपत्ति मेंह ओमन ऊपर लाने के ठाने रहेंव, ओला नइं लानहूं,
JER 18:9 अऊ यदि आने समय म, मेंह घोसना करथंव कि कोनो जाति या राज ला बनाय जावय अऊ जगाय जावय,
JER 18:10 अऊ यदि ओ जाति मोर नजर म पाप करथे अऊ मोर बात ला नइं मानय, तब मेंह जऊन भलई करे के इरादा ओमन बर करे रहेंव, ओकर बारे म फेर बिचार करहूं।
JER 18:11 “एकरसेति अब तें यहूदा अऊ यरूसलेम के मनखेमन ला कह, ‘यहोवा ह ये कहत हे: देखव! मेंह तुम्हर बर एक बिपत्ति तियार करत हंव अऊ तुम्हर बिरूध म एक योजना बनात हंव। एकरसेति तुमन ले हर एक जन अपन खराप चालचलन ले फिरव अऊ अपन चालचलन अऊ काममन ला सुधारव।’
JER 18:12 पर ओमन जबाब दीहीं, ‘अइसने नइं होवय। हमन अपन ही चालचलन म चलते रहिबो; हमन जम्मो अपन पापी हिरदय के जिद म बने रहिबो।’ ”
JER 18:13 ये खातिर यहोवा ह ये कहत हे: “जाति-जाति के मनखेमन ले पुछव: अइसने बात कोनो कभू सुने हवय? एक सबले खराप काम कुंवारी इसरायल ह करे हवय।
JER 18:14 का लबानोन के बरफ ह कभू येकर पथरीला-ढालमन ले गायब होथे? दूरिहा के सोतमन ले येकर ठंडा पानी के बहना कभू बंद होथे?
JER 18:15 तभो ले मोर मनखेमन मोला भुला गे हवंय; ओमन ओ बेकार के मूरतीमन बर धूप जलाथें, जऊन मन ओ पुराना जमाना के रसतामन म, ओमन के ठोकर के कारन बनथें। ओ मूरतीमन ओमन ला ओ आने रसतामन म चले बर मजबूर करथें, जऊन रसता ह बने नइं ए।
JER 18:16 ओमन के देस ह निरजन हो जाही, अऊ ओकर ले हमेसा घिन करे जाही; ओ जम्मो, जऊन मन उहां ले होके जाहीं, ओमन डराहीं, अऊ अचम्भो करके अपन मुड़ ला हलाहीं।
JER 18:17 पूरब के हवा सहीं, मेंह ओमन ला ओमन के बईरीमन के आघू म तितिर-बितिर कर दूहूं; ओमन के बिपत्ति के दिन म, मेंह ओमन ला अपन मुहूं नइं, पर अपन पीठ देखाहूं।”
JER 18:18 तब मनखेमन एक-दूसर ला कहिन, “आवव, यरमियाह के बिरूध उपाय करन; काबरकि न तो पुरोहित के दुवारा कानून के सिकछा, न ही बुद्धिमान के सलाह, न ही अगमजानीमन ले बचन ह बंद होही। एकरसेति आवव, हमन अपन बात के दुवारा ओकर ऊपर हमला करन अऊ ओकर कोनो बात ऊपर धियान झन देवन।”
JER 18:19 हे यहोवा, मोर बात ला सुन; मोर ऊपर दोस लगानेवालामन का कहत हें, ओला सुन!
JER 18:20 का भलई के बदले बुरई करे जावय? तभो ले ओमन मोर बर खंचवा कोड़े हवंय। सुरता कर कि मेंह तोर आघू म ठाढ़ होके ओमन बर गोठियाय हंव ताकि तोर गुस्सा ह ओमन ऊपर ले उतर जावय।
JER 18:21 एकरसेति ओमन के लइकामन ला अकाल ला देय दे; ओमन ला तलवार ले कटके मरे बर देय दे। ओमन के घरवालीमन बिगर लइका के रहंय अऊ बिधवा हो जावंय; ओमन के मनखेमन मर जावंय, ओमन के जवानमन लड़ई म तलवार ले मारे जावंय।
JER 18:22 जब तें ओमन ऊपर अचानक हमला करइयामन ला लानबे, त ओमन के घरमन ले रोये के अवाज सुनई देवय, काबरकि ओमन मोला पकड़े बर एक खंचवा कोड़े हवंय अऊ मोला फंसाय बर फांदा लगाय हवंय।
JER 18:23 पर हे यहोवा, ओमन मोला मार डारे बर जऊन उपायमन ला करे हवंय, ओ जम्मो ला तेंह जानत हस। ओमन के अपराध ला छेमा झन करबे या ओमन के पाप ला अपन नजर ले झन हटाबे। ओमन ला तोर आघू ले उखानके फटिक दिये जावय; अपन गुस्सा के बेरा म ओमन के लेखा ले।
JER 19:1 यहोवा ह ये कहत हे: “जा अऊ कुम्हार ले माटी के एक ठन सुराही बिसा ले। अपन संग म मनखेमन के अऊ पुरोहितमन के कुछू अगुवामन ला लेय ले
JER 19:2 अऊ पोटसर्ड दुवार के लकठा म बेन-हिन्नोम के घाटी करा जा अऊ जऊन बचन मेंह तोला कहत हंव, ओकर परचार कर,
JER 19:3 अऊ कह, ‘हे यहूदा के राजामन अऊ यरूसलेम के मनखेमन, यहोवा के बचन ला सुनव, सर्वसक्तिमान यहोवा, इसरायल के परमेसर, ये कहत हे: सुनव! ये जगह म मेंह एक बिपत्ति लानेवाला हंव, जेला सुनके मनखेमन म सनसनी फईल जाही।
JER 19:4 काबरकि ओमन मोला तियाग दे हवंय अऊ येला आने देवतामन के जगह बना दे हवंय; ओमन येमा ओ देवतामन बर धूप जलाय हवंय, जेला न तो ओमन, न ही ओमन के पुरखामन अऊ न ही यहूदा के राजामन कभू जानत रिहिन, अऊ ओमन ये जगह ला निरदोसमन के खून ले भर दे हवंय।
JER 19:5 ओमन बाल देवता के ऊंचहा जगहमन ला बनाय हवंय, ताकि ओमन अपन लइकामन ला बाल देवता बर बलिदान के रूप म आगी म जलावंय—जेकर हुकूम मेंह नइं दे रहेंव या ओकर चरचा नइं करे रहेंव अऊ न ही ये बात मोर मन म कभू आईस।
JER 19:6 एकरसेति यहोवा ह ये घोसना करत हे, सचेत रहव, ओ दिनमन आवत हें, जब मनखेमन ये जगह ला तोपेत या बेन-हिन्नोम के घाटी नइं कहिहीं, पर हतिया के घाटी कहिहीं।
JER 19:7 “ ‘ये जगह म मेंह यहूदा अऊ यरूसलेम के योजनामन ला बेकार कर दूहूं। मेंह ओमन ला ओमन के बईरीमन के आघू म ओ मनखेमन के हांथ ले तलवार ले मरवाहूं, जऊन मन ओमन ला मार डारे चाहत हें, अऊ मेंह ओमन के लासमन ला जेवन के रूप म चिरई अऊ जंगली पसुमन ला दे दूहूं।
JER 19:8 मेंह ये सहर ला बरबाद कर दूहूं अऊ येला डर अऊ ठट्ठा के चीज बना दूहूं; ओ जम्मो, जऊन मन इहां ले होके जाहीं, ओमन येकर बिपत्ति ला देखके डरहीं अऊ येकर हंसी उड़ाहीं।
JER 19:9 मेंह ओमन ला ओमन के बेटा अऊ बेटीमन के मांस खवाहूं, अऊ ओमन एक-दूसर के मांस खाहीं, काबरकि ओमन के बईरीमन ओमन ला नास करे बर ओमन के बिरूध सैनिकमन के दुवारा घेराबंदी करवाहीं।’
JER 19:10 “तब तें ओ सुराही ला ओ मनखेमन के देखत म फोर देबे, जऊन मन तोर संग म जाहीं,
JER 19:11 अऊ ओमन ले कहिबे, ‘सर्वसक्तिमान यहोवा ह ये कहत हे: जइसने ये कुम्हार के सुराही अऊ येला फेर बनाय नइं जा सकय, वइसने मेंह ये देस अऊ ये सहर ला कुटा-कुटा कर दूहूं। तोपेत म ओमन अतेक मनखेमन ला माटी दीहीं कि उहां माटी देय बर अऊ जगह ही नइं बचही।
JER 19:12 ये जगह के संग अऊ जऊन मन इहां रहिथें, ओमन के संग मेंह अइसने ही करहूं, यहोवा ह ये घोसना करत हे। मेंह ये सहर ला तोपेत के सहीं कर दूहूं।
JER 19:13 यरूसलेम के घर अऊ यहूदा के राजामन के महलमन ला, ये जगह तोपेत के सहीं असुध करे जाही—ओ जम्मो घर जिहां मनखेमन छानी म अकास के जम्मो देवतामन बर धूप जलाय रिहिन अऊ आने देवतामन बर पेय-बलिदान देय रिहिन।’ ”
JER 19:14 तब यरमियाह ह तोपेत ले लहुंटिस, जिहां यहोवा ह ओला अगमबानी करे बर पठोय रिहिस, अऊ यहोवा के मंदिर के अंगना म ठाढ़ हो गीस अऊ जम्मो मनखेमन ला कहिस,
JER 19:15 “सर्वसक्तिमान यहोवा, इसरायल के परमेसर ह ये कहत हे: ‘सुनव! मेंह ये सहर अऊ येकर चारों कोति के जम्मो गांवमन म हर ओ बिपत्ति लानहूं, जेकर घोसना मेंह ओमन के बिरूध म करे हवंव, काबरकि ओमन हठी अंय अऊ मोर बचन ला नइं सुनंय।’ ”
JER 20:1 इम्मेर के बेटा पसहूर पुरोहित ह यहोवा के मंदिर के परधान अधिकारी रिहिस, जब ओह यरमियाह ला ये अगमबानी करत सुनिस,
JER 20:2 त पसहूर ह यरमियाह अगमजानी ला पीटवाईस अऊ ओकर गोड़ म बेड़ी लगाके ओला यहोवा के मंदिर म बिनयामीन के ऊपरी दुवार मेर रख दीस।
JER 20:3 ओकर दूसर दिन, जब पसहूर ह यरमियाह ला बेड़ी म ले छोंड़िस, त यरमियाह ह ओला कहिस, “यहोवा ह तोर नांव पसहूर नइं, पर जम्मो कोति के आतंक रखे हे।
JER 20:4 काबरकि यहोवा ह ये कहत हे: ‘मेंह तोला तोर बर अऊ तोर जम्मो संगवारीमन बर आतंक के कारन बनाहूं; तेंह खुद अपन आंखी ले देखबे कि ओमन ला ओमन के बईरीमन तलवार ले मार डारहीं। मेंह जम्मो यहूदीमन ला बेबिलोन के राजा के हांथ म कर दूहूं; ओह ओमन ला बंदी बनाके बेबिलोन ले जाही या ओमन ला तलवार ले मार डारही।
JER 20:5 मेंह ये सहर यरूसलेम के जम्मो धन-संपत्ति ला ओमन के बईरीमन के हांथ म कर दूहूं—येकर जम्मो कमई, येकर जम्मो कीमती सामान अऊ यहूदा के राजामन के जम्मो खजाना। ओमन ये जम्मो चीज ला लूट लीहीं अऊ येमन ला बेबिलोन ले जाहीं।
JER 20:6 अऊ हे पसहूर, तें अऊ, जऊन मन तोर घर म रहिथें, जम्मो के जम्मो बेबिलोन ला बंधुवई म चले जाहीं। तें अऊ तोर जम्मो संगवारी, जेमन ले तेंह झूठा अगमबानी करे हस, तुमन जम्मो के जम्मो उहां मरहू अऊ उहां तुमन ला माटी दिये जाही।’ ”
JER 20:7 हे यहोवा, तेंह मोला धोखा दे हस, अऊ मेंह धोखा खा गेंव; तेंह मोला हराय अऊ मोर ऊपर जय पाय हस। दिन भर मोर हंसी उड़ाय जावत हे; जम्मो झन मोर ठट्ठा करत हें।
JER 20:8 जब भी मेंह गोठियाथंव, मेंह चिचियाके हिंसा अऊ बिनास के घोसना करथंव। एकरसेति यहोवा के बचन ह दिन भर मोर ऊपर निन्दा अऊ कलंक लाने हवय।
JER 20:9 पर यदि में कहंव, “मेंह ओकर बचन के चरचा नइं करंव या ओकर नांव म अऊ नइं गोठियावंव,” त ओकर बचन ह मोर हिरदय म एक आगी सहीं अय, अइसने आगी जऊन ह मोर हाड़ामन म बंद हवय। मेंह येला अपन म रोकत-रोकत थक गे हंव; वास्तव म, में अब येला रोक नइं सकंव।
JER 20:10 मेंह बहुंत कानाफूसी के बात सुनत हंव, “हर तरफ आतंक! ओकर निन्दा करव! आवव, हमन ओकर निन्दा करन!” मोर जम्मो संगवारीमन ये कहत मोर ठोकर खाय के इंतजार करत हें, “सायद ओह धोखा खाही; तब हमन ओकर ऊपर जय पाबो अऊ ओकर ले अपन बदला लेबो।”
JER 20:11 पर यहोवा ह मोर संग एक सक्तिसाली योद्धा सहीं हवय; एकरसेति मोला सतानेवालामन गिर जाहीं अऊ जय नइं पावंय। ओमन असफल होहीं अऊ बहुंत लज्जित होहीं; ओमन के अपमान ह कभू भुलाय नइं जाही।
JER 20:12 हे सर्वसक्तिमान यहोवा, हे धरमीमन ला परखनेवाला अऊ हिरदय अऊ मन ला जांचनेवाला, ओमन ले जऊन बदला तेंह लेबे, ओला मोला देखन दे, काबरकि मेंह अपन मामला तोर ऊपर छोंड़ दे हंव।
JER 20:13 यहोवा बर गावव! यहोवा के परसंसा करव! ओह जरूरतमंद मनखे के जिनगी ला दुस्टमन के हांथ ले बचाथे।
JER 20:14 सरापित होवय ओ दिन, जऊन दिन मेंह जनमें! ओ दिन ह आसीसित झन होवय, जऊन दिन मोर दाई ह मोला जनम दीस!
JER 20:15 सरापित होवय ओ मनखे, जऊन ह ये कहिके मोर ददा ला खुसी के खबर दीस, “तोर एक लइका जनमे हे—एक बेटा!”
JER 20:16 ओ मनखे के दसा ह ओ नगर के सहीं होवय, जऊन ला यहोवा ह बिगर दया के नास कर दीस। ओला बिहनियां बिलाप करे के अऊ मंझनियां लड़ई के ललकार के अवाज सुनई देवय।
JER 20:17 काबरकि ओह मोला गरभ ही म नइं मार डारिस, मोर दाई के गरभ ह मोर कबर सहीं होतिस, अऊ ओकर गरभ ह हमेसा बर फईले रहितिस।
JER 20:18 मेंह काबर समस्या अऊ दुख देखे बर अऊ अपन जिनगी के दिनमन ला लज्जा म बिताय बर जनमेंव?
JER 21:1 ये बचन यहोवा करा ले यरमियाह करा तब आईस, जब सिदकियाह राजा ह ओकर करा मलकियाह के बेटा पसहूर अऊ मासेयाह पुरोहित के बेटा सपनयाह ला पठोईस। ओमन कहिन:
JER 21:2 “हमर बर यहोवा ले पुछ, काबरकि बेबिलोन के राजा नबूकदनेसर ह हमर ऊपर हमला करत हवय। सायद यहोवा ह पहिले के सहीं हमर बर अचरज के काम करय अऊ नबूकदनेसर ह हमर करा ले चले जावय।”
JER 21:3 पर यरमियाह ह ओमन ला जबाब दीस, “तुमन सिदकियाह ला कहव,
JER 21:4 ‘यहोवा, इसरायल के परमेसर ह ये कहत हे: लड़ई के जऊन हथियार तुम्हर हांथ म हवय, जेकर उपयोग तुमन बेबिलोन के राजा अऊ सहर के दीवार के बाहिर घेरा डाले बेबिलोन के मनखेमन के बिरूध करत हव, ओही हथियारमन ला मेंह तुम्हर बिरूध करनेवाला हंव। अऊ मेंह ओ मनखेमन ला ये सहर के भीतर इकट्ठा करहूं।
JER 21:5 मेंह खुद हांथ बढ़ाके अऊ सक्तिसाली ताकतवर भुजा ले भयंकर गुस्सा अऊ कोरोध म तुम्हर बिरूध लड़हूं।
JER 21:6 मेंह ये सहर म रहइया जम्मो मनखे अऊ पसुमन ला मार डारहूं; ओमन एक भयंकर महामारी म मरहीं।
JER 21:7 ओकर बाद, यहोवा ह घोसना करत हे, यहूदा के राजा सिदकियाह, ओकर करमचारीमन अऊ ओ मनखे, जऊन मन ये सहर म महामारी, तलवार अऊ अकाल ले बांच जाहीं, ओ जम्मो ला में बेबिलोन के राजा नबूकदनेसर अऊ ओमन के बईरीमन के हांथ म कर दूहूं, जऊन मन कि ओमन ला मार डारे चाहत हें। ओह ओमन ला तलवार ले मार डारही; ओह ओमन ऊपर कोनो दया या किरपा या सहानुभूति नइं देखाही।’
JER 21:8 “मनखेमन ला ये घलो कह, ‘यहोवा ह ये कहत हे: देखव, मेंह तुम्हर आघू म जिनगी के रद्दा अऊ मिरतू के रद्दा घलो बतावत हंव।
JER 21:9 जऊन कोनो भी ये सहर म रहिही, ओह तलवार, अकाल या महामारी ले मरही। पर जऊन कोनो भी जाके ओ बेबिलोन के रहइयामन करा समरपन कर दीही, जऊन मन कि तुमन ला घेरे हवंय, त ओकर परान ह बच जाही अऊ ओह जीयत रहिही।
JER 21:10 मेंह ये सहर के भलई नइं पर हानि करे के ठान ले हंव, यहोवा ह घोसना करत हे। येला बेबिलोन के राजा के हांथ म कर दिये जाही, अऊ ओह येला आगी लगाके नास कर दीही।’
JER 21:11 “तभो ले यहूदा के राज-परिवार के मनखेमन ला कह, ‘यहोवा के बचन ला सुनव।
JER 21:12 हे दाऊद के संतानमन, यहोवा ह तुमन ला ये कहत हे: “ ‘हर बिहनियां नियाय करव; जऊन ला लूटे गे हवय, ओला दुख देवइया के हांथ ले बचावव, नइं तो जऊन दुस्ट काम तुमन करे हवव, ओकर कारन मोर गुस्सा ह भड़कही अऊ आगी सहीं बरही— अइसने आगी, जऊन ला कोनो बुता नइं सकंय।
JER 21:13 हे यरूसलेम के मनखेमन, जेमन ये घाटी के ऊपर चट्टान के पठार म रहिथव, मेंह तुम्हर बिरूध हंव, यहोवा ह घोसना करत हे— तुमन ये कहिथव, “हमर बिरूध कोन आ सकथे? हमर निवास के भीतर कोन जा सकथे?”
JER 21:14 मेंह तुम्हर काम के मुताबिक तुमन ला सजा दूहूं, यहोवा ह घोसना करत हे। मेंह तुम्हर जंगलमन म आगी लगा दूहूं जऊन ह तुम्हर चारों कोति के जम्मो चीज ला भसम कर दीही।’ ”
JER 22:1 यहोवा ह ये कहत हे: “खाल्हे म यहूदा के राजा के महल करा जा अऊ उहां ये संदेस के घोसना कर:
JER 22:2 ‘दाऊद के सिंघासन म बईठनेवाला, हे यहूदा के राजा, तें, तोर करमचारी अऊ तोर मनखे, जऊन मन ये दुवारमन ले होके आथें, यहोवा के बचन ला सुनव।
JER 22:3 यहोवा ह ये कहत हे: जऊन काम सही अऊ बने अय, ओला करव। जऊन ला लूट लिये गे हवय, ओला दुख देवइया के हांथ ले बचावव। कोनो परदेसी, अनाथ या बिधवा के बिरूध कोनो गलत काम या हिंसा झन करव, अऊ ये जगह म निरदोस के खून झन बहावव।
JER 22:4 काबरकि यदि तुमन धियान से ये हुकूममन ला मानहू, त दाऊद के सिंघासन म बईठइया राजामन रथ अऊ घोड़ामन म सवार होके ये महल के दुवारमन म होके आहीं अऊ ओमन के करमचारी अऊ मनखेमन घलो ओमन के संग होहीं।
JER 22:5 पर यदि तुमन ये हुकूममन ला नइं मानहू, त यहोवा ह घोसना करत हे, मेंह खुद के कसम खाके कहत हंव कि ये महल ह उजड़ जाही।’ ”
JER 22:6 काबरकि यहोवा ह यहूदा के राजा के महल के बारे म ये कहत हे: “हालाकि तेंह मोर बर गिलाद देस सहीं, अऊ लबानोन के चोटी सहीं अस, पर मेंह तोला बंजर भुइयां सहीं, अऊ निरजन नगरमन सहीं कर दूहूं।
JER 22:7 मेंह तोर बिरूध म नास करइयामन ला पठोहूं, ओमा के हर एक जन करा हथियार होही, अऊ ओमन तोर सुघर देवदार रूख के गोलामन ला काटहीं अऊ ओमन ला आगी म झोंक दीहीं।
JER 22:8 “जाति-जाति के मनखेमन ये सहर म ले होके जाहीं अऊ एक-दूसर ले पुछहीं, ‘यहोवा ह ये महान सहर ला अइसने काबर कर दे हवय?’
JER 22:9 तब ओकर ये जबाब दिये जाही: ‘काबरकि ओमन यहोवा अपन परमेसर के करार ला टोर दे हवंय अऊ आने देवतामन के अराधना अऊ सेवा करे हवंय।’ ”
JER 22:10 मरे राजा बर झन रोवव या ओकर मरे ले सोकित झन होवव; पर येकर बदले, ओकर बर फूट-फूटके रोवव, जऊन ह बंधुवई म चल दे हवय, काबरकि ओह फेर लहुंटके कभू नइं आही अऊ न ही अपन जनम भुइयां ला फेर देखही।
JER 22:11 यहूदा के राजा योसियाह के बेटा सल्लूम, जऊन ह अपन ददा योसियाह के जगह म राजा बनिस अऊ ये जगह ले चल दे हवय, ओकर बारे म यहोवा ह ये कहत हे: “ओह फेर कभू लहुंटके नइं आही।
JER 22:12 ओह ओ जगह म मरही, जिहां ओला कैदी बनाके ले गे हवंय; ओह ये देस ला फेर कभू देखन नइं पाही।”
JER 22:13 “ओकर ऊपर हाय, जऊन ह अपन महल ला अधरम, अऊ अपन ऊपर के कमरामन ला अनियाय करके बनाथे, अऊ अपन खुद के मनखेमन ले बेगारी म काम कराथे, अऊ ओमन ला ओमन के बनी नइं देवय।
JER 22:14 ओह कहिथे, ‘मेंह अपन बर एक बड़े महल बनाहूं, जेकर ऊपर म बड़े-बड़े कमरामन होहीं।’ एकरसेति ओह येमा बड़े-बड़े खिड़की लगाथे, अऊ येमा देवदार रूख के तखतामन ला लगाथे अऊ येला लाल रंग ले सजाथे।
JER 22:15 “का तोर करा जादा से जादा देवदार के कठवा होवई ह तोला एक राजा बनाथे? का तोर ददा करा खाय-पीये के चीज नइं रिहिस? ओह धरम अऊ नियाय के काम करिस, एकरसेति ओह सुख से जिनगी बिताईस।
JER 22:16 ओह गरीब अऊ दीन-हीन मनखेमन के बचाव करिस, एकरसेति ओकर संग जम्मो चीज सही होईस। का येह मोर गियान म रखे के बात नो हय?” यहोवा ह ये घोसना करत हे।
JER 22:17 “पर तोर आंखी अऊ तोर मन ह सिरिप अधरम के कमई, निरदोसमन के खून बहई अऊ अतियाचार अऊ लूट-पाट करई म लगे रहिथे।”
JER 22:18 एकरसेति योसियाह के बेटा यहूदा के राजा यहोयाकीम के बारे म यहोवा ह ये कहत हे: “मनखेमन ओकर बर ये कहिके बिलाप नइं करहीं: ‘हाय, हे मोर भाई! हाय, हे मोर बहिनी!’ मनखेमन ओकर बर ये कहिके बिलाप नइं करहीं: ‘हाय, हे मोर मालिक! हाय, हे ओकर सोभा!’
JER 22:19 ओला एक गदहा के सहीं माटी दिये जाही— ओला यरूसलेम के दुवारमन के बाहिर घसीटके फटिक दिये जाही।”
JER 22:20 “ऊपर लबानोन म जा अऊ रो, तोर अवाज ह बासान म सुनई देवय, अबारीम पहाड़ म जाके रो, काबरकि तोर जम्मो संगीमन नास हो गे हवंय।
JER 22:21 तोर सुख के बेरा म, मेंह तोला चेताय रहेंव, पर तेंह कहय, ‘मेंह नइं सुनंव!’ तोर जवानी के समय ले तोर चालचलन अइसनेच हवय; तेंह मोर बात नइं माने हस।
JER 22:22 हवा ह तोर जम्मो चरवाहामन ला उड़ाके ले जाही, अऊ तोर संगीमन बंधुवई म चल दीहीं। तब तेंह अपन जम्मो दुस्ट काम के कारन लज्जित अऊ अपमानित होबे।
JER 22:23 तें, जऊन ह लबानोन म रहिथस, जेमन देवदार के भवनमन म रहिथव, जब तोर ऊपर दुख आही, लइका जनमे के सहीं पीरा होही, त तेंह कइसने कराहबे!”
JER 22:24 यहोवा ह ये घोसना करत हे, “मोर जिनगी के कसम, हे यहूदा के राजा, यहोयाकीम के बेटा यहोयाकीन! चाहे यदि तेंह मोर जेवनी हांथ के मुहरवाला मुंदरी घलो होते, तभो ले मेंह तोला उतारके फटिक देतेंव।
JER 22:25 जऊन मन तोला मार डारे चाहत हें, मेंह तोला ओमन के हांथ म कर दूहूं, जेमन ले तेंह डरथस—याने कि बेबिलोन के राजा नबूकदनेसर अऊ बेबिलोन के रहइयामन के हांथ म कर दूहूं।
JER 22:26 मेंह तोला अऊ तोला जनम देवइया दाई ला एक आने देस म फटिक दूहूं, जिहां न तो तें जनमे रहय अऊ न ही तोर दाई, अऊ उहां तुमन दूनों मर जाहू।
JER 22:27 जऊन देस म तुमन लहुंटे के ईछा करत हव, ओ देस म तुमन कभू लहुंटे नइं पाहू।”
JER 22:28 का ये मनखे यहोयाकीन ह एक तुछ, टूटहा बरतन अय, एक अइसने चीज, जेला कोनो पसंद नइं करंय? ओ अऊ ओकर लइकामन, काबर एक अइसने देस म फटिक दिये जाहीं, जेला ओमन नइं जानंय?
JER 22:29 हे देस के मनखे, देस के मनखे, देस के मनखे, यहोवा के बचन ला सुनव!
JER 22:30 यहोवा ह ये कहत हे: “ये मनखे ला एक निरबंस के रूप म लिखव, एक अइसने मनखे, जऊन ह अपन जिनगी भर उन्नति नइं करही, काबरकि ओकर कोनो भी संतान उन्नति नइं करहीं, ओकर कोनो भी संतान दाऊद के सिंघासन म नइं बईठहीं या कभू यहूदा म राज नइं करहीं।”
JER 23:1 “ओ चरवाहामन ऊपर हाय, जऊन मन मोर चराई के भेड़मन ला नास करत हें अऊ तितिर-बितिर करत हें!” यहोवा ह ये घोसना करत हे।
JER 23:2 एकरसेति यहोवा, इसरायल के परमेसर ह मोर मनखेमन के देखरेख करइया चरवाहामन ला ये कहत हे: “तुमन मोर झुंड ला तितिर-बितिर कर दे हव अऊ ओमन ला भगा दे हव अऊ ओमन के देखरेख नइं करे हव, एकरसेति तुम्हर दुस्ट काम के कारन, मेंह तुमन ला सजा दूहूं,” यहोवा ह ये घोसना करत हे।
JER 23:3 “ओ जम्मो देस, जिहां मेंह अपन झुंड ला भगा दे रहेंव, ओ देसमन ले मेंह खुद ओमन के बांचे भाग ला इकट्ठा करहूं अऊ ओमन ला ओमन के चराई म वापिस लानहूं, जिहां ओमन फूलहीं-फरहीं अऊ गनती म बढ़हीं।
JER 23:4 मेंह ओमन बर चरवाहामन ला ठहिराहूं, जेमन ओमन के देखरेख करहीं अऊ ओमन न तो फेर डरहीं या भय खाहीं अऊ न ही ओमा ले कोनो गंवाही,” यहोवा ह ये घोसना करत हे।
JER 23:5 “ओ दिनमन आवत हें,” यहोवा ह घोसना करत हे, “जब मेंह दाऊद बर एक धरमी मनखे ला बढ़ाहूं, ओह एक राजा होही, जऊन ह बुद्धिमानी से राज करही अऊ देस म नियाय अऊ धरम के काम ला करही।
JER 23:6 ओकर दिनमन म यहूदा के मनखेमन ला बंचाय जाही अऊ इसरायली मनखेमन सुरकछित बसे रहिहीं। ओला ये नांव के दुवारा पुकारे जाही: यहोवा हमर धरमी उद्धारकर्ता।
JER 23:7 “एकरसेति देखव, ओ दिनमन आवत हें,” यहोवा ह घोसना करत हे, “जब मनखेमन फेर नइं कहिहीं, ‘यहोवा के जिनगी के कसम, जऊन ह इसरायलीमन ला मिसर देस ले निकाल लानिस,’
JER 23:8 पर ओमन ये कहिहीं, ‘यहोवा के जिनगी के कसम, जऊन ह उत्तर के देस ले अऊ ओ जम्मो देस ले इसरायल के संतानमन ला ले आईस, जिहां ओमन ला भगा दे रिहिस।’ तब ओमन अपन खुद के देस म रहिहीं।”
JER 23:9 अगमजानीमन के बारे म: मोर हिरदय ह मोर भीतरे-भीतर टूटत हे; मोर जम्मो हाड़ामन कांपत हें। मेंह एक मतवार मनखे सहीं अंव, एक बलवान मनखे सहीं, जेकर ऊपर मंद के नसा छा गे हवय। एकर कारन ए यहोवा अऊ ओकर पबितर बचन।
JER 23:10 ये देस ह बेभिचारीमन ले भरे हवय; सराप पड़े के कारन, ये देस ह सूखा पड़े हे अऊ सुन्ना जगह के चराईमन सूख गे हवंय। अगमजानीमन दुस्टता के जिनगी जीयथें अऊ अपन ताकत के उपयोग अनियाय के काम म करत हें।
JER 23:11 “अगमजानी अऊ पुरोहित दूनों परमेसर ला छोंड़ दे हवंय; अऊ त अऊ मेंह अपन मंदिर म ओमन के दुस्टता ला देखथंव,” यहोवा ह घोसना करत हे।
JER 23:12 “ये खातिर ओमन के रसता म फिसलन होही; ओमन ला अंधियार म डाल दिये जाही अऊ उहां ओमन गिरहीं। जऊन बछर ओमन ला सजा दिये जाही ओ बछर, मेंह ओमन ऊपर बिपत्ति लानहूं,” यहोवा ह घोसना करत हे।
JER 23:13 “सामरिया के अगमजानीमन के बीच म मेंह ये खराप चीज देखेंव: ओमन बाल देवता के नांव म अगमबानी करिन अऊ मोर इसरायली मनखेमन ला डहार ले भटका दीन।
JER 23:14 अऊ यरूसलेम के अगमजानीमन के बीच म मेंह कुछू भयंकर चीज देखे हंव: ओमन बेभिचार करथें अऊ पाखंडी जिनगी जीथें। ओमन दुस्टमन के हांथ ला मजबूत करथें, जेकर कारन ओमा के एको जन भी अपन दुस्टता ला नइं छोंड़य। ओमन मोर बर सदोम के मनखे सहीं अंय; अऊ यरूसलेम के मनखेमन अमोरा के मनखेमन सहीं अंय।”
JER 23:15 ये खातिर सर्वसक्तिमान यहोवा ह अगमजानीमन के बारे म ये कहत हे: “मेंह ओमन ला करू जेवन खवाहूं अऊ जहरवाला पानी पीयाहूं, काबरकि यरूसलेम के अगमजानीमन ले अभक्ति ह जम्मो देस म फईल गे हवय।”
JER 23:16 सर्वसक्तिमान यहोवा ह ये कहत हे: “अगमजानीमन तुमन ले जऊन अगमबानी करत हें, ओला झन सुनव; ओमन तुमन ला लबारी के बात ले भर दीहीं। ओमन यहोवा के मुहूं ले नइं, पर अपन ही मन से दरसन के बात ला गोठियाथें।
JER 23:17 जऊन मनखेमन मोला तुछ समझथें, ओमन ला येमन कहत रहिथें, ‘यहोवा ह कहत हे: तुमन ला सांति मिलही।’ अऊ ओ जम्मो, जऊन मन अपन हठी मन के मुताबिक चलथें ओमन ला येमन कहिथें, ‘तुम्हर कोनो हानि नइं होवय।’
JER 23:18 पर येमा के कोन ह यहोवा के बचन ला देखे या सुने बर ओकर सभा म ठाढ़ होय हवय? कोन ह ओकर बचन ला सुने अऊ धियान दे हवय?
JER 23:19 देखव, यहोवा के आंधी ह कोरोध म फट जाही, एक बवंडर ह दुस्टमन के मुड़ ऊपर घुमत आवत हे।
JER 23:20 जब तक यहोवा ह अपन हिरदय के उदेस्य ला पूरा नइं कर लीही, तब तक ओकर गुस्सा ह सांत नइं होवय। अवइया दिनमन म तेंह ये बात ला साफ-साफ समझबे।
JER 23:21 मेंह ये अगमजानीमन ला नइं पठोय हंव, तभो ले ओमन अपन संदेस बताय बर दऊड़त गे हवंय; मेंह ओमन ले नइं गोठियाय हंव, तभो ले ओमन अगमबानी करे हवंय।
JER 23:22 पर यदि ओमन मोर सिकछा म चले होतिन, त ओमन मोर मनखेमन ला मोर बचन सुनाय रहितिन अऊ मोर मनखेमन ला ओमन के खराप चालचलन अऊ ओमन के दुस्ट काममन ले बंचा ले होतिन।
JER 23:23 “का मेंह सिरिप लकठा रहे म ही परमेसर अंव,” यहोवा ह घोसना करत हे, “अऊ दूरिहा रहे म परमेसर नो हंव?
JER 23:24 गुपत जगह म कोन ह छुप सकथे कि मेंह ओला नइं देख सकंव?” यहोवा ह ये घोसना करत हे। “का मेंह स्वरग अऊ धरती ला भरा-पूरा नइं रखंव?” यहोवा ह घोसना करत हे।
JER 23:25 “मेंह अगमजानीमन के गोठ ला सुने हंव, जऊन मन मोर नांव म ये कहिके लबारी अगमबानी करथें, ‘मेंह एक सपना देखे हंव! मेंह एक सपना देखे हंव!’
JER 23:26 ये लबरा अगमजानीमन अपन ही मन के भरम ला अगमबानी करके कहिथें; येमन के मन म येह कब तक चलत रहिही?
JER 23:27 ओमन सोचथें कि ओमन जऊन सपना के बात एक-दूसर ला बताथें, ओला सुनके मोर मनखेमन मोर नांव ला भुला जाहीं, जइसने कि ओमन के पुरखामन बाल देवता के अराधना करके मोर नांव ला भुला गे रिहिन।
JER 23:28 जऊन अगमजानी ह सपना देखे हवय, ओह अपन सपना ला बतावय, पर जेकर करा मोर बचन हवय, ओह ओ बचन ला ईमानदारी से सुनावय। काबरकि भूंसा अऊ अनाज के दाना के का मेल?” यहोवा ह ये घोसना करत हे।
JER 23:29 “का मोर बचन ह आगी सहीं नो हय,” यहोवा ह घोसना करत हे, “अऊ का ओह हथौड़ा सहीं नो हय, जऊन ह चट्टान ला कुटा-कुटा कर देथे?
JER 23:30 “एकरसेति” यहोवा ह घोसना करत हे, “मेंह ओ अगमजानीमन के बिरूध हंव, जऊन मन मोर बचन समझके एक-दूसर के बचन ला चोरा लेथें।”
JER 23:31 यहोवा ह घोसना करत हे, “हव, मेंह ओ अगमजानीमन के बिरूध हंव, जऊन मन अपन खुद के बात कहिथें अऊ तभो ले ये बताथें, ‘यहोवा ह घोसना करत हे।’
JER 23:32 सच म, मेंह ओमन के बिरूध हंव, जऊन मन झूठा सपना के अगमबानी करथें,” यहोवा ह ये घोसना करत हे। “मेंह ओमन ला न तो पठोय हंव अऊ न ही ठहिराय हंव, तभो ले ओमन मोर मनखेमन के आघू म अगमबानी करथें अऊ बेकार के अपन लबारी बात ले मोर मनखेमन ला भरमाथें। ओमन ले मोर मनखेमन ला कोनो फायदा नइं होवय,” यहोवा ह घोसना करत हे।
JER 23:33 “जब ये मनखे, या कोनो अगमजानी या कोनो पुरोहित तुम्हर ले पुछथे, ‘यहोवा ले का संदेस मिले हवय?’ त ओमन ला कह, ‘का संदेस?’ यहोवा ह ये घोसना करत हे, ‘मेंह तुमन ला तियाग दूहूं।’
JER 23:34 यदि कोनो अगमजानी या कोनो पुरोहित या कोनो अऊ दावा करथे, ‘यहोवा ले ये संदेस आय हवय,’ त मेंह ओमन ला अऊ ओमन के घराना ला सजा दूहूं।
JER 23:35 तुमन ले हर एक जन अपन संगी अऊ आने इसरायलीमन ले ये बात कहिते रहिथे: ‘यहोवा ह का जबाब दे हवय?’ या ‘यहोवा ह का कहे हवय?’
JER 23:36 पर तुमन ये झन कहव ‘यहोवा करा ले आय एक संदेस,’ काबरकि हर एक के बचन ह ओकर खुद के संदेस होथे। ये किसम ले तुमन जीयत परमेसर, यहोवा, हमर सर्वसक्तिमान परमेसर के बचन ला तोड़-मरोड़ के कहिथव।
JER 23:37 तुमन अगमजानी ले अइसने पुछत रहव: ‘यहोवा ह तोला का जबाब दे हवय?’ या ‘यहोवा ह का कहे हवय?’
JER 23:38 हालाकि तुमन दावा करथव, ‘यहोवा ले ये संदेस आय हवय,’ यहोवा ह ये कहत हे: तुमन ये बचनमन के उपयोग करेव, ‘यहोवा ले ये संदेस आय हवय,’ हालाकि मेंह तुमन ला कहे हंव कि तुमन अइसने दावा झन करव, ‘यहोवा ले ये संदेस आय हवय।’
JER 23:39 एकरसेति, मेंह ये सहर सहित तुमन ला बिलकुल ही भुला जाहूं अऊ अपन आघू ले निकाल दूहूं, जेला कि मेंह तुमन अऊ तुम्हर पुरखामन ला देय हंव।
JER 23:40 मेंह तुम्हर ऊपर कभू खतम न होनेवाला कलंक लानहूं—कभू खतम न होनेवाला लज्जा, जेला कभू भुलाय नइं जाही।”
JER 24:1 जब बेबिलोन के राजा नबूकदनेसर ह यहोयाकीम के बेटा, यहूदा के राजा यहोयाकीन ला अऊ यहूदा के करमचारी, कुसल बनिहार अऊ कारीगरमन ला यरूसलेम ले बेबिलोन बंधुवई म ले गीस, त ओकर बाद यहोवा ह मोला ओकर मंदिर के आघू म रखे अंजीर फर ले भरे दू ठन टुकना देखाईस।
JER 24:2 एक टुकना म तो पहिले से पके बने अंजीर रहय; पर दूसर टुकना म बहुंत खराप अंजीर रहय, अतेक खराप कि ओमन खाय के लईक नइं रिहिन।
JER 24:3 तब यहोवा ह मोर ले पुछिस, “हे यरमियाह, तोला का दिखत हे?” मेंह जबाब देंव, “अंजीर, बने अंजीरमन बहुंत बढ़िया हवंय, पर खराप अंजीरमन अतेक खराप कि ओमन ला खाय नइं जा सकय।”
JER 24:4 तब यहोवा के ये बचन मोर करा आईस:
JER 24:5 “यहोवा, इसरायल के परमेसर ह ये कहत हे: ‘ये बने अंजीरमन सहीं, मेंह यहूदा ले बंधुवई म गय ओ मनखेमन ला बने समझथंव, जेमन ला मेंह ये जगह ले बेबिलोन देस पठोय हंव।
JER 24:6 मेंह देखहूं कि ओमन के भलई होवय, अऊ ओमन ला ये देस म वापिस ले आहूं। मेंह ओमन ला बढ़ाहूं अऊ ओमन ला नास नइं करहूं; मेंह ओमन ला लगाहूं अऊ ओमन ला नइं उखानहूं।
JER 24:7 मेंह ओमन के मन ला अइसने कर दूहूं कि ओमन मोला जानहीं कि मेंह यहोवा अंव। ओमन मोर मनखे होहीं अऊ मेंह ओमन के परमेसर होहूं, काबरकि ओमन मोर करा अपन पूरा मन ले लहुंटहीं।
JER 24:8 “ ‘पर यहोवा ह कहत हे, ओ खराप अंजीरमन सहीं, जेमन अतेक खराप हवंय कि खाय नइं जा सकंय, मेंह यहूदा के राजा सिदकियाह, ओकर करमचारी अऊ यरूसलेम के बांचे मनखेमन ले बरताव करहूं, चाहे ओमन ये देस म रहंय या मिसर देस म रहंय।
JER 24:9 जिहां भी मेंह ओमन ला भगाहूं, उहां ओमन ला घिनित अऊ धरती के जम्मो राज बर अप्रिय, एक अपमान अऊ एक कहावत, एक सराप अऊ हंसी के एक चीज बना दूहूं।
JER 24:10 जऊन देस मेंह ओमन ला अऊ ओमन के पुरखामन ला देय हंव, जब तक ओमन ओ देस ले नास नइं हो जाहीं, तब तक मेंह ओमन के बिरूध तलवार चलाहूं, अऊ ओमन ऊपर अकाल अऊ महामारी लानहूं।’ ”
JER 25:1 योसियाह के बेटा यहूदा के राजा यहोयाकीम के राज के चौथा साल म, जऊन ह बेबिलोन के राजा नबूकदनेसर के राज के पहिला साल रिहिस, यहोवा के जऊन बचन यरमियाह अगमजानी करा आईस,
JER 25:2 ओला यरमियाह अगमजानी ह यहूदा के जम्मो मनखे अऊ यरूसलेम म रहइया जम्मो मनखे ला बताईस:
JER 25:3 आमोन के बेटा यहूदा के राजा योसियाह के राज के तेरहवां साल ले लेके आज तक—याने कि तेईस साल ले यहोवा के बचन ह मोर करा आय हवय अऊ मेंह ओ बचन तुमन ला बार-बार बताय हंव, पर तुमन नइं सुनेव।
JER 25:4 अऊ हालाकि यहोवा ह तुम्हर करा अपन जम्मो सेवक अगमजानीमन ला बार-बार पठोय हवय, पर तुमन ओमन के नइं सुनेव या कोनो धियान नइं दे हव।
JER 25:5 ओमन कहिन, “तुमन ले हर एक जन अपन खराप चालचलन अऊ अपन दुस्ट काममन ला छोंड़व, तब तुमन ये देस म रह सकत हव, जेला कि यहोवा ह तुमन ला अऊ तुम्हर पुरखामन ला सदाकाल बर देय हवय।
JER 25:6 आने देवतामन के सेवा अऊ अराधना करे बर ओमन के पाछू झन जावव; अऊ अपन हांथ के बनाय चीजमन के दुवारा मोर गुस्सा ला झन भड़कावव। तब मेंह तुम्हर कुछू हानि नइं करहूं।”
JER 25:7 यहोवा ह घोसना करत हे, “पर तुमन मोर बात ला नइं सुनेव, अऊ अपन हांथ के बनाय चीजमन के दुवारा मोर गुस्सा ला भड़काय हव, अऊ तुमन अपन हानि करे हव।”
JER 25:8 एकरसेति सर्वसक्तिमान यहोवा ह ये कहत हे: “काबरकि तुमन मोर बचन ला नइं सुनेव,
JER 25:9 मेंह उत्तर दिग के जम्मो मनखे अऊ अपन सेवक बेबिलोन के राजा नबूकदनेसर ला बुलवाहूं,” यहोवा ह घोसना करत हे, “अऊ मेंह ओमन ला ये देस अऊ येमा रहइया मनखे अऊ येकर आसपास के जम्मो जाति के मनखेमन के बिरूध म लानहूं। मेंह ओमन के सतियानास करके ओमन ला आतंक अऊ हंसी के चीज बना दूहूं, अऊ सदाकाल बर उजाड़ दूहूं।
JER 25:10 मेंह ओमन के खुसी अऊ आनंद के अवाज, दूल्हा अऊ दुलहिन के अवाज, चक्की के अवाज ला छीन लूहूं अऊ ओमन के दीया के अंजोर ला घलो छीन लूहूं।
JER 25:11 ये जम्मो देस उजाड़ अऊ बेकार हो जाही, अऊ ये जाति के मनखे अऊ आसपास के जाति के मनखेमन सत्तर साल तक बेबिलोन के राजा के सेवा करहीं।
JER 25:12 “पर जब सत्तर साल पूरा हो जाही, तब मेंह बेबिलोन के राजा अऊ ओकर देस अऊ उहां रहइया मनखेमन ला ओमन के अपराध के सजा दूहूं,” यहोवा ह घोसना करत हे, “अऊ ओ देस ला सदाकाल बर उजाड़ दूहूं।
JER 25:13 मेंह ओ देस ऊपर ओ जम्मो चीज ला लानहूं, जेला मेंह ओकर बिरूध म कहे हवंव, ओ जम्मो बात, जऊन ह ये किताब म लिखे हवय अऊ यरमियाह के दुवारा जम्मो जातिमन के बिरूध अगमबानी करे गे हवय।
JER 25:14 बेबिलोनीमन खुद कतको जाति के मनखे अऊ बड़े राजामन के गुलामी करहीं; मेंह ओमन के बरताव अऊ ओमन के हांथ के काम के मुताबिक ओमन ले बदला लूहूं।”
JER 25:15 यहोवा, इसरायल के परमेसर ह मोर ले ये कहिस: “मोर कोरोध के मंद ले भरे ये कटोरा ला मोर हांथ ले लेय ले अऊ ओ जम्मो जाति के मनखेमन ला येला पीया, जेमन करा मेंह तोला पठोवत हंव।
JER 25:16 जब ओमन ओला पीहीं, त ओ तलवार के कारन, जेला मेंह ओमन के बीच म पठोहूं, ओमन लड़खड़ाहीं अऊ पागल हो जाहीं।”
JER 25:17 एकरसेति मेंह यहोवा के हांथ ले ओ कटोरा ला लेंव अऊ जम्मो जाति के मनखेमन ला पीया देंव, जेमन करा यहोवा ह मोला पठोईस:
JER 25:18 यरूसलेम अऊ यहूदा के नगरमन ला, येकर राजामन अऊ अधिकारीमन ला पीयांय, ताकि ओमन उजड़ जावंय अऊ ओमन आतंक अऊ हंसी के चीज बन जावंय, अऊ ओमन सरापित हो जावंय—जइसने कि ओमन आज तक हवंय;
JER 25:19 फिरौन मिसर देस के राजा, ओकर सेवक, ओकर अधिकारी अऊ ओकर जम्मो मनखेमन,
JER 25:20 अऊ उहां के जम्मो परदेसी मनखेमन ला; ऊज देस के जम्मो राजामन ला; पलिस्तीमन के जम्मो राजामन ला (अस्कलोन, गाजा, एकरोन के राजामन अऊ असदोद म बचे मनखेमन);
JER 25:21 एदोमी, मोआबी अऊ अमोनीमन ला;
JER 25:22 सूर अऊ सीदोन के जम्मो राजामन ला; समुंदर के पार समुंदर तीर के राजामन ला;
JER 25:23 ददानी, तेमाई, बूजीमन अऊ ओ जम्मो ला, जऊन मन दूरिहा जगह म रिहिन;
JER 25:24 अरब के जम्मो राजामन अऊ सुन्ना जगह म रहइया परदेसी मनखेमन के जम्मो राजामन ला;
JER 25:25 जिमरी, एलाम अऊ मादै के जम्मो राजामन ला;
JER 25:26 अऊ उत्तर दिग के जम्मो राजामन ला, का लकठा अऊ का दूरिहा, एक के बाद एक—धरती के ऊपर जम्मो राज के मनखेमन ला पीया देंव। अऊ ये जम्मो के बाद, सेसक के राजा घलो येला पीही।
JER 25:27 “तब ओमन ला कह, ‘सर्वसक्तिमान यहोवा, इसरायल के परमेसर ह ये कहत हे: पीयव, मतवार हो जावव अऊ उछर डारव, अऊ अइसने गिरव कि फेर कभू झन उठव, काबरकि मेंह तुम्हर बीच म तलवार चलाहूं।’
JER 25:28 पर यदि ओमन तोर हांथ ले ये कटोरा लेके पीये ले इनकार करहीं, त ओमन ला कह, ‘सर्वसक्तिमान यहोवा ह ये कहत हे: तुमन ला पीना जरूरी अय!
JER 25:29 देखव, जऊन सहर ह मोर नांव ले जाने जाथे, ओ सहर म, मेंह बिपत्ति लाने के सुरू करत हंव, त का तुमन सचमुच सजा ले बच जाहू? तुमन सजा ले नइं बचव, काबरकि मेंह धरती म रहइया जम्मो के ऊपर तलवार चलानेवाला हंव, सर्वसक्तिमान यहोवा ह घोसना करत हे।’
JER 25:30 “अब ये जम्मो बात के अगमबानी ओमन के बिरूध म कर अऊ ओमन ला कह: “ ‘यहोवा ह ऊंच जगह ले गरजही; ओह अपन पबितर निवास ले अपन बात ला कहिही अऊ अपन भुइयां के बिरूध जोर से गरजही। ओह ओमन सहीं चिचियाही, जेमन अंगूर ला गोड़ ले रऊंदथें, ओह धरती ऊपर रहइया जम्मो मनखेमन के बिरूध चिचियाही।
JER 25:31 कोलाहल के अवाज धरती के छोर तक सुनई दीही, काबरकि यहोवा ह जम्मो जाति के मनखेमन के बिरूध दोस लगाही; ओह जम्मो मनखेमन के नियाय करही अऊ दुस्ट मनखेमन ला तलवार ले मारही।’ ” यहोवा ह घोसना करत हे।
JER 25:32 सर्वसक्तिमान यहोवा ह ये कहत हे: “देखव! बिपत्ति ह एक जात ले दूसर जात म फईलत हे; एक भयंकर तूफान ह धरती के छोर ले उठत हे।”
JER 25:33 ओ बेरा, हर एक जगह म मनखेमन यहोवा के दुवारा मारे जाहीं—धरती के एक छोर ले लेके दूसर छोर तक। ओमन बर कोनो बिलाप नइं करहीं, अऊ न ही ओमन के लास ला संकेले जाही अऊ न ही माटी दिये जाही, पर ओमन के लासमन भुइयां म खातू सहीं पड़े रहिहीं।
JER 25:34 हे चरवाहामन, रोवव अऊ बिलाप करव; हे झुंड के अगुवामन, धुर्रा म लोटव। काबरकि तुम्हर कतल होय के बेरा ह आ गे हवय; जइसने सुघर बरतनमन गिरके टूट जाथें, वइसने तुमन गिरके टूट जाहू।
JER 25:35 चरवाहामन ला भागे के कोनो जगह नइं मिलही, झुंड के अगुवामन बर बचके जाय बर कोनो जगह नइं होही।
JER 25:36 चरवाहामन के रोवई, अऊ झुंड के अगुवामन के बिलाप करई ला सुनव, काबरकि यहोवा ह ओमन के चराई के जगह ला नास करत हे।
JER 25:37 यहोवा के भयंकर कोरोध के कारन सांत चराई के जगह ह बेकार हो जाही।
JER 25:38 एक सेर के सहीं यहोवा ह अपन मांद ला छोंड़ दीही, अतियाचार करइया के तलवार के कारन अऊ यहोवा के भयंकर कोरोध के कारन ओमन के देस ह उजड़ जाही।
JER 26:1 योसियाह के बेटा यहूदा के राजा यहोयाकीम के राज के सुरू म, यहोवा ले ये बचन आईस:
JER 26:2 “यहोवा ह ये कहत हे: यहोवा के घर के अंगना म ठाढ़ हो अऊ यहूदा के नगरमन के ओ जम्मो मनखे, जऊन मन यहोवा के घर म अराधना करे बर आथें, ओमन ला कह। ओमन ला ओ बात कह, जेकर हुकूम मेंह तोला देवत हंव; एको ठन बात ला घलो झन छोंड़बे।
JER 26:3 सायद ओमन तोर बात ला सुनंय अऊ हर एक जन अपन दुस्ट चालचलन ला छोंड़ दे। तब मेंह सांत होहूं अऊ ओमन ऊपर ओ बिपत्ति नइं लानहूं, जेकर योजना मेंह ओमन के दुस्ट काममन के कारन बनात रहेंव।
JER 26:4 ओमन ला कह, ‘यहोवा ह ये कहत हे: यदि तुमन मोर बात ला नइं सुनहू अऊ मोर कानून म नइं चलहू, जेला मेंह तुम्हर आघू म रखे हवंव,
JER 26:5 अऊ यदि तुमन मोर ओ सेवक अगमजानीमन के बचन ला नइं सुनहू, जेमन ला मेंह तुम्हर करा बार-बार पठोय हंव (हालाकि तुमन नइं सुने हव),
JER 26:6 त फेर मेंह ये घर ला सीलो नगर के सहीं उजाड़ दूहूं अऊ ये सहर ला धरती के जम्मो जाति के मनखेमन के बीच म सरापित कर दूहूं।’ ”
JER 26:7 जब यरमियाह ह यहोवा के घर म ये बातमन ला कहिस, त पुरोहित, अगमजानी अऊ जम्मो मनखेमन सुनिन।
JER 26:8 जब यरमियाह ह मनखेमन ला ओ जम्मो बात बता चुकिस, जेला कहे के हुकूम यहोवा ह ओला देय रिहिस, ओकर बाद तुरते पुरोहित, अगमजानी अऊ जम्मो मनखेमन ओला पकड़ लीन अऊ कहिन, “तोर मरना जरूरी अय!
JER 26:9 तेंह काबर यहोवा के नांव म ये अगमबानी करत हस कि ये घर ह सीलो के सहीं हो जाही अऊ ये सहर ह उजड़ जाही अऊ येला तियाग दिये जाही?” अऊ यहोवा के घर म, यरमियाह के चारों कोति जम्मो मनखेमन के भीड़ लग गीस।
JER 26:10 जब यहूदा के करमचारीमन ये बात सुनिन, त ओमन राजमहल ले यहोवा के घर म गीन अऊ यहोवा के घर के नवां दुवार के मुंहटा म अपन-अपन जगह ले लीन।
JER 26:11 तब पुरोहित अऊ अगमजानीमन करमचारी अऊ जम्मो मनखेमन ला कहिन, “ये मनखे ला मिरतू-दंड के सजा मिलना चाही, काबरकि ये मनखे ह ये सहर के बिरूध अगमबानी करे हवय, अऊ ये बात ला तुमन घलो अपन कान ले सुने हवव।”
JER 26:12 तब यरमियाह ह जम्मो करमचारी अऊ जम्मो मनखेमन ला कहिस: “जऊन बात तुमन सुनेव, ओला यहोवा ही मोला ये भवन अऊ ये सहर के बिरूध अगमबानी के रूप म कहे बर पठोय हवय।
JER 26:13 एकरसेति अब तुमन अपन चालचलन अऊ अपन काम ला सुधारव अऊ यहोवा अपन परमेसर के बात ला मानव। तब यहोवा ह नरम होही अऊ ओ बिपत्ति नइं लानही, जेकर घोसना ओह तुम्हर बिरूध करे हवय।
JER 26:14 जहां तक मोर बात ए, मेंह तुम्हर हांथ म हवंव; जऊन कुछू तुमन ला सही अऊ बने लगय, मोर संग ओही करव।
JER 26:15 पर ये बात जरूर जान लव कि यदि तुमन मोला मार डारहू, त फेर तुमन अऊ ये सहर अऊ येमा रहइया मनखेमन एक निरदोस मनखे के खून करे के दोसी ठहिरहू; काबरकि सही म यहोवा ह मोला तुम्हर करा पठोय हवय कि मेंह ये जम्मो बात तुमन ला सुनावंव।”
JER 26:16 तब करमचारीमन अऊ जम्मो मनखेमन पुरोहित अऊ अगमजानीमन ले कहिन, “ये मनखे ला मिरतू-दंड नइं मिलना चाही, काबरकि ओह यहोवा हमर परमेसर के नांव म हमन ले गोठियाय हवय।”
JER 26:17 तब देस के कुछू अगुवामन आघू आईन अऊ मनखेमन के जम्मो सभा ला कहिन,
JER 26:18 “यहूदा के राजा हिजकियाह के समय म मोरेसेत नगर के मीका ह अगमबानी करिस। ओह यहूदा के जम्मो मनखेमन ले कहिस, ‘सर्वसक्तिमान यहोवा ह ये कहत हे: “ ‘सियोन ला कोनो खेत के सहीं जोते जाही, यरूसलेम ह गोटी-पथरामन के कुढ़ा हो जाही, अऊ मंदिर के पहाड़ी ह झाड़ीमन ले भरके एक टीला बन जाही।’
JER 26:19 का यहूदा के राजा हिजकियाह या यहूदा के कोनो अऊ ओला मरवा दीन? का हिजकियाह ह यहोवा ले नइं डरिस अऊ ओकर ले दया के आसा नइं करिस? अऊ का यहोवा ह दया नइं देखाईस अऊ ओ बिपत्ति, जेला ओह ओमन ऊपर लाने के घोसना करे रिहिस, ओला लानिस? हमन अपन ऊपर एक भयंकर बिपत्ति लानेवाला हन!”
JER 26:20 (फेर किरयत-यारीम नगर के समायाह के बेटा उरियाह एक आने मनखे रिहिस, जऊन ह यहोवा के नांव म अगमबानी करिस; ओह घलो ये सहर अऊ ये देस के बिरूध म वइसने ही अगमबानी करिस, जइसने यरमियाह ह करे हवय।
JER 26:21 जब यहोयाकीम राजा अऊ ओकर जम्मो अधिकारी अऊ करमचारीमन ओकर बचन ला सुनिन, त राजा ह ओला मरवाय बर ठान लीस। पर उरियाह ह ये बात ला सुनके डर के मारे मिसर देस भाग गीस।
JER 26:22 तब यहोयाकीम राजा ह अकबोर के बेटा एलनातान ला कुछू अऊ मनखेमन के संग मिसर देस पठोईस।
JER 26:23 ओमन उरियाह ला मिसर देस ले निकालके यहोयाकीम राजा करा ले आईन, अऊ ओह उरियाह ला तलवार ले मरवाके ओकर लास ला सधारन मनखेमन के मरघटी म फेंकवा दीस।)
JER 26:24 पर, सापान के बेटा अहीकाम ह यरमियाह के मदद करिस, अऊ एकरसेति ओला मार डारे बर मनखेमन के हांथ म नइं दिये गीस।
JER 27:1 योसियाह के बेटा, यहूदा के राजा सिदकियाह के राज के सुरू म, यहोवा ले ये बचन यरमियाह करा आईस।
JER 27:2 यहोवा ह मोला ये कहिस: “डोरी अऊ लकरी के एक जुड़ा बना अऊ ओला अपन घेंच म रख।
JER 27:3 तब एदोम, मोआब, अमोन, सूर अऊ सीदोन के राजामन करा, ओ दूतमन के जरिये खबर पठो, जऊन मन यहूदा के राजा सिदकियाह करा यरूसलेम आय हवंय।
JER 27:4 ओ दूतमन ला ओमन के मालिकमन बर ये कहिके एक संदेस दे, ‘सर्वसक्तिमान यहोवा, इसरायल के परमेसर ह ये कहत हे: अपन-अपन मालिक ले ये कहव:
JER 27:5 मेंह अपन बड़े सामर्थ अऊ लमाय भुजा ले धरती अऊ येकर मनखे अऊ येमा रहइया पसुमन ला बनाय हंव, अऊ जेकर ले में खुस होथंव, ओला मेंह येमन ला देथंव।
JER 27:6 अब मेंह तुम्हर जम्मो देसमन ला अपन सेवक, बेबिलोन के राजा नबूकदनेसर के हांथ म दे दूहूं; अऊ त अऊ मेंह जंगली पसुमन ला घलो ओकर अधीन कर दूहूं।
JER 27:7 जम्मो जाति के मनखेमन ओकर अऊ ओकर बेटा अऊ ओकर पोता के सेवा तब तक करहीं, जब तक कि ओकर खुद के देस के समय नइं आ जाही; तब बहुंते जाति के मनखेमन अऊ बड़े राजामन ओला अपन अधीन कर लीहीं।
JER 27:8 “ ‘ “पर यदि कोनो जाति या राज ह बेबिलोन के राजा नबूकदनेसर के सेवा नइं करही या ओकर जुड़ा ला अपन गरदन म नइं लीही, त मेंह ओ जाति ला तलवार, अकाल अऊ महामारी के सजा तब तक देवत रहिहूं, जब तक कि मेंह ओ जाति ला ओकर हांथ के दुवारा नास नइं कर दूहूं, यहोवा ह घोसना करत हे।
JER 27:9 एकरसेति तुमन अपन अगमजानीमन अऊ अपन सकुन-बिचार करइयामन, तुम्हर सपना के अर्थ बतइयामन, अपन टोनहामन या अपन जादूगरमन के बात ला झन सुनव, जऊन मन तुमन ला कहिथें, ‘तुमन ला बेबिलोन के राजा के सेवा करना नइं पड़य।’
JER 27:10 ओमन तुमन ले लबारी अगमबानी करथें, जेकर ले तुमन अपन-अपन देस ले दूरिहा हटा दिये जाहू; मेंह तुमन ला निकाल दूहूं अऊ तुमन नास हो जाहू।
JER 27:11 पर जऊन जाति के मनखेमन बेबिलोन के राजा के जुड़ा ला अपन गरदन म लीहीं अऊ ओकर सेवा करहीं, त मेंह ओ जाति के मनखेमन ला ओहीचमन के देस म रहन दूहूं, ताकि ओमन उहां खेती करंय अऊ उहां बसे रहंय, यहोवा ह घोसना करत हे।” ’ ”
JER 27:12 यहूदा के राजा सिदकियाह ला घलो मेंह येहीच संदेस दे हंव। मेंह कहेंव, “बेबिलोन के राजा के जुड़ा ला अपन गरदन म लेय ले; ओकर अऊ ओकर मनखेमन के सेवा कर, त तेंह जीयत रहिबे।
JER 27:13 जऊन जाति के मनखेमन बेबिलोन के राजा के सेवा नइं करहीं, ओमन ला यहोवा ह धमकी दे हवय कि ओमन तलवार, अकाल अऊ महामारी ले मारे जाहीं; त फेर तें अऊ तोर मनखेमन काबर मरे चाहथव?
JER 27:14 ओ अगमजानीमन के बात ला झन सुन, जऊन मन तोला ये कहिथें, ‘तोला बेबिलोन के राजा के सेवा करना नइं पड़य,’ काबरकि ओमन तोर ले लबारी गोठ कहत हवंय।
JER 27:15 ‘मेंह ओमन ला नइं पठोय हवंव,’ यहोवा ह घोसना करत हे। ‘ओमन मोर नांव म लबारी अगमबानी करत हवंय। एकरसेति, मेंह तोला देस ले निकाल दूहूं अऊ तें अऊ ओ अगमजानी, जऊन मन तोर करा अगमबानी करथें, तुमन जम्मो के जम्मो नास हो जाहू।’ ”
JER 27:16 तब मेंह पुरोहितमन ला अऊ ये जम्मो मनखेमन ला कहेंव, “यहोवा ह ये कहत हे: ओ अगमजानीमन के बात ला झन सुनव, जऊन मन ये कहिथें, ‘अब बहुंत जल्दी, बेबिलोन ले यहोवा के भवन के सामानमन ला वापिस लाने जाही।’ ओमन तुम्हर ले लबारी अगमबानी करत हवंय।
JER 27:17 ओमन के बात ला झन सुनव। बेबिलोन के राजा के सेवा करव, त तुमन जीयत रहिहू। ये सहर ह काबर बरबाद होवय?
JER 27:18 यदि ओमन अगमजानी अंय अऊ ओमन करा यहोवा के बचन हवय, त ओमन सर्वसक्तिमान यहोवा ले बिनती करंय कि जऊन सामान यहोवा के भवन म अऊ यहूदा के राजा के महल म अऊ यरूसलेम म बांचे हवय, ओमन ला बेबिलोन झन ले जाय जावय।
JER 27:19 काबरकि सर्वसक्तिमान यहोवा ह ये कहत हवय कि जऊन खंभामन, कांसा के टंकी, खसकानेवाला गोड़ा अऊ आने सामान ये सहर म बांचे हवंय,
JER 27:20 जेमन ला बेबिलोन के राजा नबूकदनेसर ह ओ बेरा नइं ले गीस, जब ओह यहोयाकीम के बेटा, यहूदा के राजा यहोयाकीन ला अऊ यहूदा अऊ यरूसलेम के जम्मो परभावसाली मनखेमन ला बंदी बनाके यरूसलेम ले बेबिलोन ले गे रिहिस—हव,
JER 27:21 जऊन चीजमन यहोवा के भवन म अऊ यहूदा के राजा के महल म अऊ यरूसलेम म बांचे हवंय, ओमन के बारे म सर्वसक्तिमान यहोवा, इसरायल के परमेसर ह ये कहत हे:
JER 27:22 ‘ओ चीजमन ला बेबिलोन पहुंचाय जाही अऊ ओमन उहां तब तक रहिहीं, जब तक कि मेंह ओमन के सुधि लेय बर नइं आ जावंव,’ यहोवा ह घोसना करत हे। ‘तब मेंह ओमन ला वापिस लानहूं अऊ ये जगह म फेर रख दूहूं।’ ”
JER 28:1 ओहीच साल, यहूदा के राजा सिदकियाह के राज के चौथा साल के पांचवां महिना म, अजूर के बेटा हननयाह अगमजानी, जऊन ह गिबोन नगर के रहइया रिहिस, ओह यहोवा के भवन म पुरोहितमन अऊ जम्मो मनखेमन के आघू म मोर ले कहिस:
JER 28:2 “सर्वसक्तिमान यहोवा, इसरायल के परमेसर ह ये कहत हे: ‘मेंह बेबिलोन के राजा के जुड़ा ला टोर दूहूं।
JER 28:3 यहोवा के भवन के जतेक सामान बेबिलोन के राजा नबूकदनेसर ये जगह ले हटाके बेबिलोन ले गे रिहिस, ओ जम्मो ला मेंह दू साल के भीतर ये जगह म वापिस ले आहूं।
JER 28:4 मेंह यहोयाकीम के बेटा, यहूदा के राजा यहोयाकीन अऊ यहूदा के ओ आने जम्मो बंदीमन ला घलो ये जगह म वापिस ले आहूं, जऊन मन बेबिलोन चले गे हवंय, काबरकि मेंह बेबिलोन के राजा के जुड़ा ला टोर दूहूं,’ ” यहोवा ह घोसना करत हे।
JER 28:5 तब यरमियाह अगमजानी ह हननयाह अगमजानी ला पुरोहितमन अऊ ओ जम्मो मनखेमन के आघू म जबाब दीस, जऊन मन यहोवा के भवन म ठाढ़े रिहिन।
JER 28:6 यरमियाह ह कहिस, “आमीन! यहोवा ह अइसने ही करय! यहोवा के भवन के चीजमन ला अऊ जम्मो बंदीमन ला बेबिलोन ले ये जगह म वापिस लानके, यहोवा ह तोर अगमबानी के कहे बात ला पूरा करय।
JER 28:7 तभो ले, जऊन बात मेंह तोर सुनत अऊ जम्मो मनखेमन के सुनत म कहत हंव, ओला सुन:
JER 28:8 सुरू ले, जऊन अगमजानीमन तोर अऊ मोर ले पहिले होवत आय हवंय, ओमन कतको देस अऊ बड़े-बड़े राजमन के बिरूध म लड़ई, बिपत्ति अऊ महामारी के अगमबानी करे हवंय।
JER 28:9 पर जऊन अगमजानी ह सांति के बिसय म अगमबानी करथे, त ओकर पहिचान यहोवा के दुवारा पठोय सही अगमजानी के रूप म तभे होही, जब ओकर अगमबानी के बचन ह पूरा होही।”
JER 28:10 तब हननयाह अगमजानी ह यरमियाह अगमजानी के गरदन म रखे जुड़ा ला लीस अऊ ओला टोर दीस,
JER 28:11 अऊ ओह जम्मो मनखेमन के आघू म कहिस, “यहोवा ह ये कहत हे: ‘येही किसम ले मेंह दू साल के भीतर बेबिलोन के राजा नबूकदनेसर के जम्मो जाति के मनखेमन के गरदन म रखे जुड़ा ला लेके टोर दूहूं।’ ” तब यरमियाह अगमजानी ह अपन डहार चल दीस।
JER 28:12 जब हननयाह अगमजानी ह यरमियाह अगमजानी के गरदन ले जुड़ा ला लेके टोर दीस, त ओकर बाद यहोवा के ये बचन यरमियाह करा आईस:
JER 28:13 “जाके हननयाह ला कह, ‘यहोवा ह ये कहत हे: तेंह कठवा के जुड़ा ला तो टोर देय, पर येकर जगह म तोला लोहा के एक जुड़ा मिलही।
JER 28:14 सर्वसक्तिमान यहोवा, इसरायल के परमेसर ह ये कहत हे: मेंह ये जम्मो जाति के मनखेमन के गरदन म लोहा के एक जुड़ा रखहूं, ताकि ओमन बेबिलोन के राजा नबूकदनेसर के सेवा करंय, अऊ ओमन ओकर सेवा करहीं। अऊ त अऊ मेंह ओला जंगली पसुमन ऊपर घलो अधिकार दूहूं।’ ”
JER 28:15 तब यरमियाह अगमजानी ह हननयाह अगमजानी ला ये घलो कहिस, “हे हननयाह, सुन! यहोवा ह तोला नइं पठोय हवय, तभो ले तेंह ये मनखेमन ला अपन लबारी बात ऊपर भरोसा करवा दे हस।
JER 28:16 एकरसेति यहोवा ह ये कहत हे: ‘मेंह तोला ये धरती ले मिटानेवाला हंव। येहीच साल, तेंह मर जाबे, काबरकि तेंह यहोवा के बिरूध बिदरोह के बात करे हस।’ ”
JER 28:17 अऊ ओहीच साल के सातवां महिना म, हननयाह अगमजानी ह मर गीस।
JER 29:1 यरमियाह अगमजानी ह यरूसलेम ले ये किसम के चिट्ठी बंदीमन म बांचे अगुवामन ला अऊ पुरोहितमन, अगमजानीमन अऊ आने ओ जम्मो मनखेमन ला पठोईस, जेमन ला नबूकदनेसर ह यरूसलेम ले बेबिलोन बंदी बनाके ले गे रिहिस।
JER 29:2 (ये चिट्ठी तब पठोय गे रिहिस, जब यहोयाकीन राजा अऊ राज-माता, दरबार के करमचारी, अऊ यहूदा अऊ यरूसलेम के अगुवा, कुसल बनिहार अऊ कारीगरमन यरूसलेम ले बंधुवई म चले गे रिहिन।)
JER 29:3 ये चिट्ठी सापान के बेटा एलासा अऊ हिलकियाह के बेटा गमरयाह के हांथ म पठोय गीस, जेमन ला यहूदा के राजा सिदकियाह ह नबूकदनेसर राजा करा बेबिलोन पठोईस। चिट्ठी म ये लिखाय रिहिस:
JER 29:4 ओ जम्मो मनखे, जेमन ला यहोवा ह यरूसलेम ले बेबिलोन बंदी बनाके ले गे हवय, ओमन ला सर्वसक्तिमान यहोवा, इसरायल के परमेसर ह ये कहत हे:
JER 29:5 “घर बनाके ओमा बस जावव; बारी लगावव अऊ ओमा जऊन कुछू उपजथे, ओला खावव।
JER 29:6 सादी-बिहाव करके बेटा-बेटी जनमावव; अपन बेटामन के बिहाव करके ओमन बर घरवाली लानव अऊ अपन बेटीमन के बिहाव करव, ताकि ओमन के घलो बेटा-बेटी होवंय। उहां गनती म घटव झन, पर बढ़त जावव।
JER 29:7 जऊन सहर म, मेंह तुमन ला बंदी बनाके ले गे हवंव, ओ सहर म सांति अऊ ओकर उन्नति के कोसिस करव। ओकर बर यहोवा ले पराथना करव, काबरकि यदि ओ सहर के उन्नति होही, त तुम्हर घलो उन्नति होही।”
JER 29:8 हव, सर्वसक्तिमान यहोवा, इसरायल के परमेसर ह ये कहत हे: “तुम्हर बीच के अगमजानी अऊ सकुन-बिचार करइयामन तुमन ला धोखा झन देवंय। ओमन जऊन सपना देखथें, ओ सपना के बातमन ला झन सुनव।
JER 29:9 ओमन मोर नांव म तुम्हर ले लबारी अगमबानी करथें। मेंह ओमन ला नइं पठोय हंव,” यहोवा ह घोसना करत हे।
JER 29:10 यहोवा ह ये कहत हे: “जब बेबिलोन के सत्तर साल पूरा हो जाही, त मेंह तुम्हर करा आहूं अऊ तुमन ला ये जगह म लहुंटा लाने के अपन करे गय बने वायदा ला पूरा करहूं।
JER 29:11 काबरकि तुम्हर बर मोर जऊन योजना हवय, ओला मेंह जानत हंव,” यहोवा ह घोसना करत हे, “तुम्हर नुकसान करे के नइं पर तुम्हर उन्नति के योजना, तुमन ला आसा अऊ एक भविस्य देय के योजना।
JER 29:12 तब तुमन मोला बलाहू अऊ आके मोर ले पराथना करहू, अऊ मेंह तुम्हर सुनहूं।
JER 29:13 तुमन मोला खोजहू अऊ मोला पाहू, जब तुमन मोला अपन पूरा मन से खोजहू।
JER 29:14 मेंह तुमन ला मिल जाहूं,” यहोवा ह घोसना करत हे, “अऊ तुमन ला बंधुवई ले लहुंटा लानहूं। मेंह तुमन ला ओ जम्मो जाति अऊ जगहमन ले इकट्ठा करहूं, जिहां मेंह तुमन ला निकाल दे हवंव,” यहोवा ह घोसना करत हे, “अऊ तुमन ला ओ जगह म लहुंटाके ले आहूं, जिहां ले मेंह तुमन ला बंधुवई म ले गे रहेंव।”
JER 29:15 तुमन कह सकत हव, “यहोवा ह हमर बर बेबिलोन म अगमजानी खड़े करे हवय,”
JER 29:16 पर ओ राजा, जऊन ह दाऊद के सिंघासन म बईठथे अऊ ओ जम्मो मनखे, जऊन मन ये सहर म हवंय, तुम्हर संगी मनखे, जऊन मन तुम्हर संग बंधुवई म नइं गीन, ओ जम्मो ले यहोवा ह ये कहत हे—
JER 29:17 हव, सर्वसक्तिमान यहोवा ह ये कहत हे: “मेंह ओमन के बिरूध तलवार, अकाल अऊ महामारी पठोहूं अऊ मेंह ओमन ला अइसने खराप अंजीर फर सहीं कर दूहूं, जेमन ला खाय नइं जा सकय।
JER 29:18 मेंह तलवार, अकाल अऊ महामारी लेके ओमन के पीछा करहूं अऊ ओमन ला धरती के जम्मो राज बर घिन करे के चीज बना दूहूं अऊ ओ जम्मो जातिमन के बीच म, जिहां मेंह ओमन ला खदेड़हूं, ओमन एक सरापित अऊ भय करे के चीज, कलंकित अऊ तिरस्कार करे के चीज होहीं।
JER 29:19 काबरकि ओमन मोर बात ला नइं सुने हवंय,” यहोवा ह घोसना करत हे, “ओ बात जेला मेंह अपन सेवक अगमजानीमन के दुवारा ओमन ला बार-बार कहेंव। अऊ तुमन बंधुवई म गे मनखेमन घलो नइं सुनेव,” यहोवा ह घोसना करत हे।
JER 29:20 “एकरसेति हे जम्मो बंधुवई म गे मनखेमन, जेमन ला मेंह यरूसलेम ले बेबिलोन पठो देय हंव, तुमन यहोवा के बचन ला सुनव।
JER 29:21 कोलायाह के बेटा अहाब अऊ मासेयाह के बेटा सिदकियाह, जेमन मोर नांव म तुम्हर ले लबारी अगमबानी करत हवंय, ओमन के बारे म सर्वसक्तिमान यहोवा, इसरायल के परमेसर ह ये कहत हे: मेंह ओमन ला बेबिलोन के राजा नबूकदनेसर के हांथ म कर दूहूं, अऊ ओह ओमन ला तुम्हर आंखी के आघू म मार डारही।
JER 29:22 ओमन के कारन, यहूदा ले बंधुवई म बेबिलोन गय जम्मो मनखेमन ये सराप के उपयोग करहीं: ‘यहोवा ह तोर संग ओ सिदकियाह अऊ अहाब सहीं बरताव करय, जेमन ला बेबिलोन के राजा ह आगी म जला दीस।’
JER 29:23 काबरकि ओमन इसरायलीमन के बीच म बहुंते खराप काम करे हवंय; ओमन अपन परोसीमन के घरवाली संग बेभिचार करे हवंय, अऊ मोर नांव म, ओमन लबारी मारे हवंय—जेकर अधिकार मेंह नइं देय रहेंव। मेंह येला जानत हंव अऊ मेंह येकर गवाह अंव,” यहोवा ह घोसना करत हे।
JER 29:24 नेहेलामी समायाह ला ये कह,
JER 29:25 “सर्वसक्तिमान यहोवा, इसरायल के परमेसर ह ये कहत हे: यरूसलेम म रहइया जम्मो मनखेमन ला, मासेयाह के बेटा सपनयाह पुरोहित ला, अऊ आने जम्मो पुरोहितमन ला, तेंह अपन ही नांव म चिट्ठी पठोय हस। तेंह सपनयाह ला कहय,
JER 29:26 ‘यहोवा ह यहोयादा पुरोहित के जगह म तोला यहोवा के भवन के अधिकारी होय बर पुरोहित ठहिराय हे ताकि तें हर ओ पागल मनखे, जऊन ह अगमजानी के सहीं बरताव करथे, ओकर गोड़ म बेड़ी अऊ गरदन म लोहा के पट्टा डार।
JER 29:27 एकरसेति अनातोत नगर के यरमियाह, जऊन ह तुम्हर बीच म एक अगमजानी जइसन रहिथे, ओला तेंह काबर नइं दबकारे?
JER 29:28 ओह हमर करा बेबिलोन म ये संदेस पठोय हवय: तुमन बंधुवई म बहुंत समय तक रहिहू। एकरसेति घर बनावव अऊ बस जावव; बारी लगावव अऊ ओमा जऊन कुछू उपजथे, ओला खावव।’ ”
JER 29:29 ये चिट्ठी ला सपनयाह पुरोहित ह यरमियाह अगमजानी ला पढ़के सुनाईस।
JER 29:30 तब यहोवा के ये बचन यरमियाह करा आईस:
JER 29:31 “जम्मो बंधुवा मनखेमन करा ये संदेस पठो: ‘यहोवा ह नेहेलामी समायाह के बारे म ये कहत हे: काबरकि समायाह ह तुमन ले अगमबानी करे हवय हालाकि मेंह ओला नइं पठोय रहेंव, अऊ तुमन ला लबारी बात ऊपर भरोसा करे बर उकसाय हवय,
JER 29:32 एकरसेति यहोवा ह ये कहत हे: खचित मेंह नेहेलामी समायाह अऊ ओकर संतानमन ला सजा दूहूं। ये मनखेमन के बीच म, ओकर घर के कोनो नइं बचहीं, अऊ न ही ओह ओ बने चीजमन ला देखन पाही, जेला मेंह अपन मनखेमन बर करहूं, यहोवा ह घोसना करत हे, काबरकि ओह मोर बिरूध बिदरोह के परचार करे हवय।’ ”
JER 30:1 यहोवा कोति ले ये बचन यरमियाह करा आईस:
JER 30:2 “यहोवा, इसरायल के परमेसर ह ये कहत हे: ‘जऊन बात मेंह तोर ले कहे हवंव, ओ जम्मो ला एक ठन किताब म लिख ले।
JER 30:3 ओ दिनमन आवत हें,’ यहोवा ह घोसना करत हे, ‘जब मेंह अपन इसरायली अऊ यहूदी मनखेमन ला बंधुवई ले वापिस लानहूं अऊ जऊन देस मेंह ओमन के पुरखामन ला अधिकार करे बर देय रहेंव, ओ देस म, मेंह ओमन ला फेर बसाहूं,’ यहोवा ह कहत हे।”
JER 30:4 जऊन बचन यहोवा ह इसरायली अऊ यहूदीमन के बारे म कहिस, ओमन ये अंय:
JER 30:5 “यहोवा ह ये कहत हे: “ ‘भय के मारे रोये के अवाज सुनई देवत हे— सांति नइं, पर आतंक के अवाज।
JER 30:6 पुछव अऊ देखव: का कोनो आदमी ह लइका ला जनम दे सकथे? त फेर मेंह काबर देखत हंव कि हर एक बलवान मनखे ह छेवारी होवइया माईलोगन सहीं अपन हांथ ला अपन पेट म रखे हवय, हर एक चेहरा मरे सहीं पीला हो गे हवय?
JER 30:7 ओह दिन ह कतेक भयंकर होही! ओ दिन सहीं अऊ कोनो दिन नइं होही। याकूब बर, ओह संकट के बेरा होही, पर ओला ओमा ले बचाय जाही।
JER 30:8 “ ‘ओ दिन,’ सर्वसक्तिमान यहोवा ह घोसना करत हे, ‘मेंह ओमन के गरदन के जुड़ा ला उतारके टोर दूहूं अऊ ओमन के बंधना ला कुटा-कुटा कर दूहूं; अऊ परदेसीमन ओमन ला फेर गुलाम नइं बनाहीं।
JER 30:9 पर ओमन यहोवा अपन परमेसर अऊ अपन राजा दाऊद के सेवा करहीं, जेला मेंह ओमन बर ठाढ़ करहूं।
JER 30:10 “ ‘एकरसेति, हे मोर सेवक याकूब, झन डर; हे इसरायल, भयभीत झन हो,’ यहोवा ह घोसना करत हे। ‘खचित, मेंह तोला दूरिहा जगह ले, अऊ तोर संतानमन ला बंधुवई के देस ले छुड़ाके लानहूं। याकूब ह फेर सांति अऊ सुरकछा म रहिही, अऊ कोनो ओला डरा नइं सकहीं।
JER 30:11 मेंह तोर संग हवंव अऊ मेंह तोला बचाहूं,’ यहोवा ह घोसना करत हे। ‘हालाकि जऊन जातिमन के बीच म, मेंह तुमन ला तितिर-बितिर कर दे हवंव ओ जम्मो जाति ला मेंह पूरा नास कर दूहूं, पर मेंह तुमन ला पूरा नास नइं करंव। मेंह तुम्हर ताड़ना करहूं, पर सिरिप एक सीमना के भीतर; मेंह तुमन ला बिगर ताड़ना के पूरा नइं छोड़ंव।’
JER 30:12 “यहोवा ह ये कहत हे: “ ‘तोर घाव ह नइं भरय, अऊ तोला लगे चोट ह ठीक नइं होवय।
JER 30:13 तोर मामला ला लड़े बर कोनो नइं ए, तोर घाव के कोनो ईलाज नइं ए, तोर बर कोनो चंगई नइं ए।
JER 30:14 तोर जम्मो संगवारीमन तोला भुला गे हवंय; ओमन तोर कोनो चिंता नइं करंय। एक बईरी ह जइसने मारथे, वइसने मेंह तोला मारे हंव अऊ एक निरदयी ह जइसने सजा देथे, वइसने मेंह तोला सजा दे हंव, काबरकि तोर अपराध ह बहुंत बड़े हे अऊ तोर पापमन बहुंत अकन हवंय।
JER 30:15 अपन घाव अऊ ओ पीरा ऊपर काबर रोवत हस, जेकर कोनो ईलाज नइं ए? तोर बड़े अपराध अऊ बहुंते पाप के कारन मेंह तोर संग अइसने करे हवंव।
JER 30:16 “ ‘पर ओ जम्मो, जऊन मन तोला खावत हें, ओमन खुद खा लिये जाहीं; तोर जम्मो बईरीमन बंधुवई म चल दीहीं। जऊन मन तोला लूटत हें, ओमन खुद लूटे जाहीं; ओ जम्मो, जऊन मन तोला लूटत हें, ओमन ला मेंह लूटहूं।
JER 30:17 पर मेंह तोला फेर भला-चंगा करहूं अऊ तोर घावमन ला ठीक कर दूहूं,’ यहोवा ह घोसना करत हे, ‘काबरकि तोला जाति ले निकाले गे मनखे कहे जाथे, येह सियोन ए, जेकर चिंता कोनो नइं करंय।’
JER 30:18 “यहोवा ह ये कहत हे: “ ‘मेंह याकूब के तम्बूमन ला फेर बसाहूं अऊ ओकर निवासमन ऊपर दया देखाहूं; सहर ला अपन ही खंडहर ऊपर फेर बनाय जाही, अऊ महल ह अपन ही जगह म फेर ठाढ़ होही।
JER 30:19 ओमन ले धनबाद के गीत अऊ आनंद मनाय के अवाज आही। मेंह ओमन के गनती ला बढ़ाहूं, अऊ ओमन नइं घटहीं; मेंह ओमन के आदरमान बढ़ाहूं, अऊ ओमन तुछ-नीच नइं समझे जाहीं।
JER 30:20 ओमन के लइकामन पुराना जमाना के सहीं होहीं, अऊ ओमन के समाज ह मोर आघू म स्थापित होही; जऊन मन ओमन ला सताथें, ओ जम्मो ला मेंह सजा दूहूं।
JER 30:21 ओमन के अगुवा ओमन के बीच म ले ही एक झन होही; ओमन ऊपर राज-करइया घलो ओमन के बीच ले ही होही। मेंह ओला लकठा म लानहूं अऊ ओह मोर लकठा म आही— काबरकि कोन ए ओ, जऊन ह मोर लकठा म आय बर अपनआप ला दे दीही?’ यहोवा ह घोसना करत हे।
JER 30:22 ‘ये किसम ले तुमन मोर मनखे होहू, अऊ मेंह तुम्हर परमेसर ठहिरहूं।’ ”
JER 30:23 देखव, यहोवा के कहर ह गुस्सा के कारन भड़क जाही, एक भयंकर आंधी ह दुस्टमन के मुड़ ऊपर किंदरत हवय।
JER 30:24 जब तक यहोवा ह अपन हिरदय के उदेस्य ला पूरा नइं कर लीही तब तक ओकर भड़के गुस्सा ह सांत नइं होही। अवइया दिन म तुमन ये बात ला समझहू।
JER 31:1 यहोवा ह घोसना करत हे, “ओ समय म, मेंह जम्मो इसरायली परिवारमन के परमेसर होहूं, अऊ ओमन मोर मनखे होहीं।”
JER 31:2 यहोवा ह ये कहत हे: “जऊन मनखेमन तलवार ले बच जाथें ओमन ऊपर सुन्ना जगह म दया करे जाही; मेंह इसरायल ला अराम देय बर आहूं।”
JER 31:3 यहोवा ह बहुंत पहिले हमर करा परगट होके कहिस: “मेंह तुमन ला सदा बने रहइया मया करे हवंव; मेंह तुमन ऊपर हमेसा दया देखाय हवंव।
JER 31:4 मेंह तुमन ला फेर बनाहूं, अऊ हे कुंवारी इसरायल! तेंह फेर से बनाय जाबे। तेंह फेर अपन डफली ला लेबे अऊ आनंद सहित नाचे बर बाहिर निकलबे।
JER 31:5 तेंह सामरिया के पहाड़ीमन म अंगूर के बारीमन ला फेर लगाबे; किसानमन ओमन ला लगाहीं अऊ ओमन के फर के आनंद उठाहीं।
JER 31:6 एक अइसने दिन आही, जब रखवारमन एपरैम के पठारमन ले चिचियाके कहिहीं, ‘आवव, हमन सियोन ऊपर, यहोवा हमर परमेसर करा जाबो।’ ”
JER 31:7 यहोवा ह ये कहत हे: “याकूब बर आनंद के गीत गावव; सबले ऊंच जाति बर चिचियावव। परसंसा के बातमन सुनावव, अऊ कहव, ‘हे यहोवा, अपन मनखे, इसरायल के बांचे भाग ला बचा।’
JER 31:8 देखव, मेंह ओमन ला उत्तर दिग के देस ले लेय आहूं अऊ धरती के छोर ले ओमन ला संकेलहूं। ओमन के बीच म अंधरा, खोरवा, देहें बोहे दाई अऊ लइका जनमइया माईलोगनमन होहीं; मनखेमन के एक बड़े भीड़ ह लहुंटके आही।
JER 31:9 ओमन रोवत आहीं; जब मेंह ओमन ला लानहूं, त ओमन पराथना करहीं। मेंह ओमन ला पानी के सोता के तीर म ले समतल रसता म ले जाहूं, जिहां ओमन ठोकर नइं खाहीं, काबरकि मेंह इसरायल के ददा अंव अऊ एपरैम ह मोर पहिली जनमे बेटा अय।
JER 31:10 “हे जाति-जाति के मनखेमन, यहोवा के बचन ला सुनव; दूरिहा-दूरिहा के समुंदर तीर के देसमन म येकर परचार करव: कहव, ‘जऊन ह इसरायलीमन ला तितिर-बितिर करे हवय, ओहीच ह ओमन ला संकेलही अऊ ओमन के अइसने खियाल रखही, जइसने एक चरवाहा ह अपन झुंड के खियाल रखथे।’
JER 31:11 काबरकि यहोवा ह याकूब ला छुड़ा लीही अऊ ओमन ला ओ बईरीमन के हांथ ले छुटकारा दीही, जऊन मन ओमन ले जादा बलवान हवंय।
JER 31:12 ओमन आहीं अऊ सियोन के ऊंचहा जगहमन म आनंद के मारे चिचियाहीं; ओमन यहोवा के उदारता ला देखके आनंद मनाहीं— ओमन करा अनाज, नवां अंगूर के मंद अऊ जैतून तेल, भेड़-बकरी अऊ गाय-बईलामन के बछरूमन होहीं। ओमन बने करके पानी पलोय बारी सहीं होहीं, अऊ ओमन फेर कभू उदास नइं होहीं।
JER 31:13 तब जवान माईलोगनमन नाचहीं अऊ खुसी मनाहीं, जवान मनखे अऊ डोकरामन घलो। मेंह ओमन के सोक ला खुसी म बदल दूहूं; मेंह सोक के बदले ओमन ला सांति अऊ आनंद दूहूं।
JER 31:14 मेंह पुरोहितमन ला बहुंतायत से देके ओमन ला संतोस कर दूहूं, अऊ मोर मनखेमन मोर उदारता से दिये चीजमन ले भर जाहीं,” यहोवा ह घोसना करत हे।
JER 31:15 यहोवा ह ये कहत हे: “रामा सहर म रोये अऊ बहुंते बिलाप करे के अवाज सुनई देवथे। राहेल ह अपन लइकामन खातिर रोवत हे अऊ ओह नइं चाहत रिहिस कि कोनो ओला सांतवना देवंय, काबरकि ओकर लइकामन मर गे हवंय।”
JER 31:16 यहोवा ह ये कहत हे: “तेंह रोना बंद कर अऊ अपन आंसू झन बहा, काबरकि तोला मेहनत के फर मिलही,” यहोवा ह घोसना करत हे। “ओमन बईरीमन के देस ले लहुंट आहीं।
JER 31:17 एकरसेति तोर संतानमन बर आसा हवय,” यहोवा ह घोसना करत हे। “तोर लइकामन अपन देस म लहुंट आहीं।
JER 31:18 “मेंह सही म एपरैम ला ये बिलाप करत सुने हवंव: ‘तेंह एक उदंड बछरू के सहीं मोर ताड़ना करे हस, अऊ मोला सजा मिले हवय। मोला पहिले के सहीं कर दे, अऊ मेंह वापिस आहूं, काबरकि तेंह यहोवा मोर परमेसर अस।
JER 31:19 भटक जाय के बाद, मेंह पछताप करेंव; समझ म आय के बाद, मेंह अपन छाती पीटेंव। मेंह सरमिंदा होयेंव अऊ दीन-हीन करे गेंव काबरकि मोर म अपन जवानी के कलंक रिहिस।’
JER 31:20 का एपरैम ह मोर मयारू बेटा नो हय, जेला देखके मेंह खुसी ले भर जाथंव? हालाकि मेंह अकसर ओकर बिरूध गोठियाथंव, तभो ले मेंह ओला अभी घलो सुरता करथंव। एकरसेति मोर मन ह ओकर ऊपर लगे रहिथे; मोर मन म ओकर बर बहुंत दया हवय,” यहोवा ह घोसना करत हे।
JER 31:21 “हे कुंवारी इसरायल, सड़क के चिनहांमन ला ठीक कर; डहार देखइया खंभामन ला गाड़। जऊन सड़क म तेंह जाथस, ओ राजमार्ग ला धियान म रख। तेंह लहुंट आ, अपन नगरमन म लहुंट आ।
JER 31:22 हे बेईमान बेटी इसरायल, तेंह कब तक भटकत रहिबे? यहोवा ह धरती म एक नवां चीज बनाही— माईलोगन ह आदमी करा लहुंट आही।”
JER 31:23 सर्वसक्तिमान यहोवा, इसरायल के परमेसर ह ये कहत हे: “जब मेंह ओमन ला बंधुवई ले वापिस लानहूं, तब यहूदा देस अऊ येकर नगरमन के मनखेमन एक बार फेर ये बात कहिहीं: ‘हे सम्पन्न सहर, हे पबितर पहाड़, यहोवा ह तोला आसीस देवय।’
JER 31:24 यहूदा अऊ येकर जम्मो नगरमन म मनखेमन एक संग रहिहीं—किसानमन अऊ ओ मनखे, जऊन मन अपन पसु के झुंड के संग एक जगह ले आने जगह जावत रहिथें।
JER 31:25 मेंह थके मनखेमन ला ताजा अऊ दुरबल मनखेमन ला संतुस्ट करहूं।”
JER 31:26 अतका म मेंह जाग गेंव अऊ चारों कोति देखेंव। मोर नींद ह मोला बने लगिस।
JER 31:27 यहोवा ह घोसना करत हे, “ओ दिनमन आवत हें, जब मेंह इसरायल अऊ यहूदा के राजमन ला मनखे अऊ पसु दूनों के संतान सहित बढ़ाहूं।
JER 31:28 जइसने कि मेंह ओमन ला उखाने म अऊ गिराय म, अऊ फटिकके नास करे म अऊ बिपत्ति लाने म नजर रखेंव, वइसने ही मेंह ओमन ला बनाय म अऊ बढ़ाय म नजर रखहूं,” यहोवा ह घोसना करत हे।
JER 31:29 “ओ दिनमन म मनखेमन ये नइं कहिहीं, “ ‘दाई-ददामन तो खट्टा अंगूर खाईन, अऊ दांत खट्टा होईस लइकामन के।’
JER 31:30 येकर उल्टा, हर एक मनखे ह ओकर खुद के पाप के कारन मरही; जऊन ह खट्टा अंगूर खाही—ओकर खुद के दांत ह खट्टा होही।
JER 31:31 “ओ दिनमन आवत हें,” यहोवा ह घोसना करत हे, “जब मेंह इसरायल के मनखेमन संग अऊ यहूदा के मनखेमन संग एक नवां करार करहूं।
JER 31:32 येह ओ करार सहीं नइं होही, जेला मेंह ओमन के पुरखामन संग करे रहेंव जब मेंह ओमन के हांथ धरके ओमन ला मिसर देस ले निकाल लानेंव, काबरकि ओमन मोर करार ला टोर दीन, हालाकि मेंह ओमन के घरवाला रहेंव,” यहोवा ह घोसना करत हे।
JER 31:33 “ओ समय के बाद, मेंह इसरायल के मनखेमन संग ये करार करहूं,” यहोवा ह घोसना करत हे। “मेंह अपन कानून ला ओमन के मन म डालहूं अऊ येला ओमन के हिरदय म लिखहूं। मेंह ओमन के परमेसर होहूं, अऊ ओमन मोर मनखे होहीं।
JER 31:34 ओमन अपन परोसी ला फेर ये कभू नइं सिखोहीं, या एक-दूसर ला ये नइं कहिहीं, ‘यहोवा ला जानव,’ काबरकि छोटे ले लेके बड़े तक, ओ जम्मो झन मोला जानहीं,” यहोवा ह घोसना करत हे। “काबरकि मेंह ओमन के अधरम ला छेमा करहूं अऊ ओमन के पाप ला फेर सुरता नइं करहूं।”
JER 31:35 यहोवा ह ये कहत हे, जऊन ह दिन म अंजोर देय बर सूरज ला ठहिराथे, जऊन ह रथिया अंजोर देय बर चंदा अऊ तारामन ला ठहिराथे, जऊन ह समुंदर ला हलाथे ताकि येकर लहरामन गरजें— ओकर नांव सर्वसक्तिमान यहोवा अय:
JER 31:36 “यदि ये नियममन मोर आघू ले हट जावंय,” यहोवा ह घोसना करत हे, “त का इसरायल ह कभू एक देस के रूप म मोर आघू ले मिट जाही।”
JER 31:37 यहोवा ह ये कहत हे: “यदि ऊपर अकास ला नापे जा सकतिस अऊ खाल्हे धरती के नीव के पता लगाय जा सकतिस त मेंह इसरायल के जम्मो संतान ला ओमन के जम्मो पापमन के कारन तियाग देतेंव,” यहोवा ह घोसना करत हे।
JER 31:38 “ओ दिनमन आवत हें,” यहोवा ह घोसना करत हे, “जब ये सहर ह हनानेल के ऊंच महल ले लेके कोना के दीवार तक मोर बर फेर बनाय जाही।
JER 31:39 नापे के लकीर ह उहां ले आघू बढ़के सीधा गारेब के पहाड़ी तक जाही अऊ तब मुड़के गोआ तक आही।
JER 31:40 ओ जम्मो घाटी जिहां लासमन ला अऊ राख ला फटिक दिये जाथे, अऊ पूरब म घोड़ा दुवार के कोना तक किदरोन घाटी के जम्मो समतल भुइयां यहोवा बर पबितर ठहिरही। ओ सहर ला फेर कभू उखाने या गिराय नइं जाही।”
JER 32:1 यहूदा के राजा सिदकियाह के राज के दसवां साल म, जऊन ह नबूकदनेसर के राज के अठारहवां साल रिहिस, यहोवा के ये बचन यरमियाह करा आईस।
JER 32:2 ओ समय, बेबिलोन के राजा के सेना ह यरूसलेम ला घेर ले रिहिस, अऊ यरमियाह अगमजानी ला यहूदा के राजमहल म पहरेदार के अंगना म बंदी बनाय गे रिहिस।
JER 32:3 यहूदा के राजा सिदकियाह ह ये कहिके ओला बंदी बनाय रिहिस, “तेंह अइसने अगमबानी काबर करथस? तेंह कहिथस, ‘यहोवा ह ये कहत हे: मेंह ये सहर ला बेबिलोन के राजा के हांथ म देवइया हंव, अऊ ओह येकर ऊपर कब्जा कर लीही।
JER 32:4 यहूदा के राजा सिदकियाह ह बेबिलोन के मनखेमन के हांथ ले नइं बचही, पर खचित ओला बेबिलोन के राजा के हांथ म दे दिये जाही, अऊ बेबिलोन के राजा ह ओकर संग आमने-सामने गोठियाही अऊ ओला अपन खुद के आंखी ले देखही।
JER 32:5 ओह सिदकियाह ला बेबिलोन ले जाही, जिहां ओह तब तक रहिही, जब तक कि मेंह ओकर सुधि नइं लूहूं, यहोवा ह घोसना करत हे। यदि तुमन बेबिलोन के मनखेमन ले लड़हू, त तुमन ओमन ला जीत नइं सकहू।’ ”
JER 32:6 यरमियाह ह कहिस, “यहोवा के बचन ह मोर करा आईस:
JER 32:7 देख, तोर कका सल्लूम के बेटा हनमेल तोर करा आही अऊ ये कहिही, ‘मोर जऊन खेत अनातोत नगर म हवय, ओला बिसा ले, काबरकि नजदीकी रिस्तेदार के रूप म येला बिसाय के अधिकार अऊ जिम्मेदारी तोर अय।’
JER 32:8 “तब यहोवा के कहे मुताबिक मोर कका के बेटा हनमेल ह पहरेदार के अंगना म मोर करा आईस अऊ कहिस, ‘मोर जऊन खेत बिनयामीन के देस के अनातोत म हवय, ओला बिसा ले, काबरकि येला छुड़ाय अऊ येकर ऊपर कब्जा करे के अधिकार तोर अय, एकरसेति येला अपन बर बिसा ले।’ “मेंह जानत रहेंव कि येह यहोवा के बचन रिहिस;
JER 32:9 एकरसेति मेंह ओ अनातोत म के खेत ला अपन चचेरा-भाई हनमेल ले बिसा लेंव अऊ ओकर कीमत के रूप म ओला चांदी के सतरह सेकेल तऊलके दे देंव।
JER 32:10 मेंह ओ खेत के खरीदीनामा म दसखत करके मुहर लगांय; गवाहमन के दसखत करवांय, अऊ चांदी ला तराजू म तऊलके ओला दे देंव।
JER 32:11 तब मेंह खरीदीनामा के ओ कागज ला लेंव, जेमा नियम अऊ सर्त लिखाय रिहिन अऊ मुहर लगे रिहिस अऊ संग म ओला घलो लेंव, जेमा मुहर नइं लगे रिहिस—
JER 32:12 अऊ ये कागजमन ला अपन चचेरा-भाई हनमेल अऊ ओ गवाह, जेमन कागज म दसखत करे रिहिन अऊ ओ जम्मो यहूदी, जेमन पहरेदार के अंगना म बईठे रिहिन, ओ जम्मो के आघू म महसेयाह के पोता, नेरियाह के बेटा बारूक ला सऊंप देंव।
JER 32:13 “ओ जम्मो के आघू म मेंह बारूक ला ये निरदेस देंव:
JER 32:14 ‘सर्वसक्तिमान यहोवा, इसरायल के परमेसर ह ये कहत हे: खरीदीनामा के मुहर लगे अऊ मुहर नइं लगे—ये दूनों कागजमन ला ले अऊ माटी के बरतन म रख, ताकि येमन बहुंत समय तक सही-सलामत रहंय।
JER 32:15 काबरकि सर्वसक्तिमान यहोवा, इसरायल के परमेसर ह ये कहत हे: ये देस म घर, खेत अऊ अंगूर के बारीमन फेर बिसाय जाहीं।’
JER 32:16 “खरीदीनामा के कागजमन ला नेरियाह के बेटा बारूक ला देय के बाद, मेंह यहोवा ले ये पराथना करेंव:
JER 32:17 “हे परमपरधान यहोवा, तेंह अपन बड़े सामर्थ अऊ बढ़ाय भुजा के दुवारा अकास अऊ धरती ला बनाय हस। तोर बर कोनो भी काम कठिन नो हय।
JER 32:18 तेंह हजारों मनखे ला अपन मया देखाथस, पर दाई-ददामन के पाप के दंड ओमन के बाद ओमन के लइकामन ला घलो देथस। महान अऊ सक्तिमान परमेसर, जेकर नांव सर्वसक्तिमान यहोवा अय,
JER 32:19 तोर उदेस्यमन महान अंय अऊ तोर काममन बड़े अंय। तोर आंखीमन मानव-जाति के चालचलन ऊपर लगे रहिथे; तेंह हर एक मनखे ला ओकर चालचलन अऊ ओकर करम के मुताबिक ईनाम देथस।
JER 32:20 तेंह मिसर देस म चिनहां अऊ चमतकार देखाय अऊ आज तक इसरायल म अऊ जम्मो मानव-जाति के बीच म चिनहां अऊ चमतकार देखावत हस, अऊ तोर कीरति आज तक फईले हवय।
JER 32:21 तेंह अपन मनखे इसरायलीमन ला चिनहां अऊ चमतकार के संग, एक सक्तिसाली हांथ अऊ बढ़े भुजा के दुवारा अऊ बड़े आतंक के संग मिसर देस ले निकाल लानय।
JER 32:22 तेंह ये देस ओमन ला देय, जेला देय के किरिया तेंह ओमन के पुरखामन के संग खाय रहय, एक देस जिहां दूध अऊ मंधरस के धारा बहथे।
JER 32:23 ओमन आईन अऊ येला अपन अधिकार म ले लीन, पर ओमन तोर बात नइं मानिन या तोर कानून के मुताबिक नइं चलिन; ओमन ओ काम नइं करिन, जेला करे के हुकूम तेंह ओमन ला दे रहय। एकरसेति तेंह ओमन ऊपर ये जम्मो बिपत्ति लानय।
JER 32:24 “देख, सहर ऊपर कब्जा करे बर कइसे घेराबंदी के ढलानमन बनाय गे हवंय। तलवार, अकाल अऊ महामारी के कारन, सहर ला बेबिलोन के ओ मनखेमन के हांथ म दे दिये जाही, जऊन मन हमला करत हवंय। जऊन बात तेंह कहे रहय, ओह होवत हे, जइसे कि तेंह देखत हस।
JER 32:25 अऊ हालाकि सहर ला बेबिलोन के मनखेमन के हांथ म दे दिये जाही, तभो ले, हे परमपरधान यहोवा, तेंह मोला कहिथस, ‘चांदी देके खेत ला बिसा ले अऊ कागज म गवाहमन के दसखत लेय ले।’ ”
JER 32:26 तब यहोवा के ये बचन यरमियाह करा आईस:
JER 32:27 “मेंह जम्मो मानव-जाति के परमेसर, यहोवा अंव। का कोनो घलो काम मोर बर बहुंत कठिन अय?
JER 32:28 एकरसेति यहोवा ह ये कहत हे: मेंह ये सहर ला बेबिलोन के मनखे अऊ बेबिलोन के राजा नबूकदनेसर के हांथ म देवइया हंव, जऊन ह येमा कब्जा कर लीही।
JER 32:29 बेबिलोन के जऊन मनखेमन ये सहर ऊपर हमला करत हवंय, ओमन ये सहर म आहीं अऊ येमा आगी लगा दीहीं; ओमन सहर ला अऊ सहर के ओ घरमन ला जला दीहीं, जिहां मनखेमन छानी म बाल देवता बर धूप जलाके अऊ आने देवतामन बर पेय-बलिदान चढ़ाके मोर गुस्सा ला भड़काय हवंय।
JER 32:30 “इसरायल अऊ यहूदा के मनखेमन अपन जवानी के समय ले मोर नजर म सिरिप दुस्टता के काम करे हवंय; वास्तव म, इसरायल के मनखेमन अपन हांथ ले बनाय चीजमन के दुवारा मोर गुस्सा ला भड़काय के छोंड़ अऊ कुछू नइं करे हवंय, यहोवा ह घोसना करत हे।
JER 32:31 जऊन दिन ये सहर बसाय गीस, तब ले लेके आज तक, ये सहर ह मोर गुस्सा अऊ कोप ला भड़काय के काम करे हवय, एकरसेति मेंह येला अपन आघू ले हटा दूहूं।
JER 32:32 इसरायल अऊ यहूदा के मनखेमन ओमन के राजा अऊ करमचारीमन, ओमन के पुरोहित अऊ अगमजानीमन, यहूदा के मनखे अऊ यरूसलेम म रहइया मनखे, जम्मो के जम्मो दुस्टता के काम करके मोर गुस्सा ला भड़काय हवंय।
JER 32:33 ओमन मोर कोति अपन मुहूं नइं, पर अपन पीठ ला कर दे हवंय; हालाकि मेंह ओमन ला बार-बार सिखांय, पर ओमन मोर बात ला नइं सुनिन या ओकर मुताबिक नइं चलिन।
JER 32:34 ओ घर जऊन ह मोर कहाथे, ओमा ओमन अपन बेकार के मूरतीमन ला मढ़ाईन अऊ मोर घर ला असुध करिन।
JER 32:35 ओमन अपन बेटा अऊ बेटीमन ला मोलेक देवता ला बलिदान करे बर बेन-हिन्नोम के घाटी म बाल देवता बर ऊंच-ऊंच जगहमन ला बनाईन, हालाकि येकर हुकूम मेंह कभू नइं देय रहेंव—अऊ न ही ये बात कभू मोर मन म आईस—कि ओमन अइसने घिनौना काम करंय अऊ ये किसम ले यहूदी मनखेमन ले पाप करावंय।
JER 32:36 “तेंह ये सहर के बारे म कहत हस, ‘तलवार, अकाल अऊ महामारी के दुवारा येला बेबिलोन के राजा के हांथ म दे दिये जाही’; पर यहोवा, इसरायल के परमेसर ह ये कहत हे:
JER 32:37 खचित, मेंह ओमन ला ओ जम्मो देस ले इकट्ठा करहूं, जिहां मेंह अपन बहुंत गुस्सा अऊ भयंकर कोप के कारन ओमन ला निकाल दे रहेंव; मेंह ओमन ला ये जगह म लहुंटाके ले आहूं अऊ ओमन निडर होके रहिहीं।
JER 32:38 ओमन मोर मनखे होहीं, अऊ मेंह ओमन के परमेसर होहूं।
JER 32:39 मेंह ओमन ला एक ही मन अऊ एक ही चालचलन दूहूं, ताकि ओमन हमेसा मोर भय मानंय अऊ ओमन के जिनगी अऊ ओमन के बाद ओमन के लइकामन के जिनगी घलो सही-सलामत बितय।
JER 32:40 मेंह ओमन के संग सदा बने रहइया एक करार करहूं; मेंह ओमन के भलई करई कभू नइं छोंड़हूं, अऊ मेंह ओमन ला मोर भय माने बर उत्साहित करहूं, ताकि ओमन कभू मोर ले अलग झन होवंय।
JER 32:41 मेंह ओमन के भलई करके आनंदित होहूं, अऊ सही म, मेंह अपन पूरा मन अऊ आतमा सहित ओमन ला ये देस म बसाहूं।
JER 32:42 “यहोवा ह ये कहत हे: जइसने मेंह ये मनखेमन ऊपर ये जम्मो बड़े बिपत्ति लाने हवंव, वइसने ही मेंह ओमन ला ओ जम्मो खुसी दूहूं, जेकर वायदा मेंह ओमन ले करे रहेंव।
JER 32:43 एक बार फेर ये देस के भुइयां के दसा ह सुधरही, जेकर बारे म तुमन कहिथव, ‘येह बिगर मनखे या पसु के एक उजाड़ भुइयां ए, काबरकि येला बेबिलोन के मनखेमन के हांथ म दे दिये गे हवय।’
JER 32:44 बिनयामीन के इलाका म, यरूसलेम के चारों कोति के गांवमन म, यहूदा के नगरमन म अऊ पहाड़ी देस, पछिम के खाल्हे के देस अऊ नेगेव के नगरमन म खेतमन ला चांदी देके फेर बिसाय जाही, अऊ लेन-देन के कागज म दसखत करे जाही, ओमा मुहर लगाय जाही अऊ गवाहमन होहीं, काबरकि मेंह ओमन के दिन ला बदलहूं, यहोवा ह घोसना करत हे।”
JER 33:1 जब यरमियाह ह पहरेदार के अंगना म बंद रिहिस, त यहोवा के बचन दूसर बार ओकर मेर आईस:
JER 33:2 “जऊन ह धरती ला बनाईस, यहोवा जऊन ह येला रूप दीस अऊ येला इस्थिर करिस—ओकर नांव यहोवा अय; ओह ये कहत हे:
JER 33:3 ‘मोर ले पराथना कर अऊ मेंह तोला जबाब दूहूं अऊ तोला बड़े-बड़े अऊ कठिन बात बताहूं, जेमन ला तेंह नइं जानस।’
JER 33:4 ये सहर के घर अऊ यहूदा के राजमहलमन एकरसेति गिराय गे हवंय ताकि बेबिलोन के मनखेमन के संग लड़ई म, येमन के उपयोग सैनिकमन के घेरा अऊ तलवार के बिरूध करे जा सकय; ये घर अऊ राजमहलमन के बारे म यहोवा, इसरायल के परमेसर ह ये कहत हे:
JER 33:5 ‘मेंह अपन गुस्सा अऊ कोप म आके ये सहर के मनखेमन ला मारहूं, अऊ सहर ह मनखेमन के लास ले भर जाही। काबरकि ये सहर के मनखेमन के दुस्टता के कारन, मेंह ये सहर ले अपन मुहूं ला फेर लूहूं।
JER 33:6 “ ‘तभो ले, मेंह ये सहर के ईलाज करहूं अऊ येमा चंगई लानहूं; मेंह अपन मनखेमन ला चंगा करहूं अऊ ओमन अपार सांति अऊ सुरकछा के आनंद उठाहीं।
JER 33:7 मेंह यहूदा अऊ इसरायल के मनखेमन ला बंधुवई ले वापिस लानहूं अऊ ओमन ला पहिले के सहीं फेर बसा दूहूं।
JER 33:8 ओमन जतेक पाप मोर बिरूध करे हवंय, ओ जम्मो पाप ले मेंह ओमन ला सुध करहूं अऊ मोर बिरूध म करे गे बिदरोह के ओमन के जम्मो पाप ला छेमा करहूं।
JER 33:9 तब धरती के देसमन, ये सहर बर करे गे मोर भलई के काम के बारे म सुनहीं अऊ मेंह ओ जम्मो देस के आघू म ये सहर म खियाती, आनंद, परसंसा अऊ आदर लानहूं; अऊ जऊन बढ़ती अऊ सांति मेंह ये सहर ला दूहूं, ओला देखके ओ देस के मनखेमन डरहीं अऊ डर के मारे कांपहीं।’
JER 33:10 “यहोवा ह ये कहत हे: ‘तेंह ये जगह के बारे म कहिथस, “येह बिगर मनखे या पसु के एक उजाड़ जगह अय।” हालाकि यहूदा देस के नगर अऊ यरूसलेम के गलीमन सुनसान पड़े हवंय, अऊ येमा न तो कोनो मनखे अऊ न ही कोनो पसु रहत हें, तभो ले उहां एक बार फेर
JER 33:11 आनंद अऊ खुसी के अवाज, दूल्हा अऊ दुलहिन के अवाज, अऊ जऊन मन यहोवा के घर म धनबाद के बलिदान लानथें, ओमन के अवाज ये कहत सुनई दीही, “सर्वसक्तिमान यहोवा ला धनबाद देवव, काबरकि यहोवा ह बने अय; ओकर मया सदाकाल तक बने रहिथे।” काबरकि मेंह ये देस के दसा ला पहिले के सहीं बने कर दूहूं, यहोवा ह कहत हे।
JER 33:12 “सर्वसक्तिमान यहोवा ह ये कहत हे: ‘ये जगह, जऊन ह उजाड़ अऊ बिगर मनखे या पसु के हवय—येकर जम्मो नगर म चरवाहामन के भेड़-बकरी के झुंड बर अराम करे के फेर चरागनमन होहीं।
JER 33:13 पहाड़ी देस, पछिम के खाल्हे पहाड़ी देस अऊ नेगेव के नगरमन म, बिनयामीन के इलाका म, यरूसलेम के चारों कोति के गांवमन म अऊ यहूदा के नगरमन म भेड़-बकरी के झुंडमन फेर ओकर करा आहीं, जऊन ह ओमन के गनती करथे,’ यहोवा ह कहत हे।
JER 33:14 “ ‘ओ दिनमन आवत हें,’ यहोवा ह घोसना करत हे, ‘जब मेंह इसरायल अऊ यहूदा के मनखेमन ले करे गे बने वायदा ला पूरा करहूं।
JER 33:15 “ ‘ओ दिनमन म अऊ ओ बेरा म मेंह दाऊद के बंस म एक धरमी डंगाल के पीका ला ठाढ़ करहूं; ओह ये देस म नियाय के काम अऊ सही काम करही।
JER 33:16 ओ दिनमन म यहूदा के मनखेमन ला बंचाय जाही अऊ यरूसलेम के मनखेमन सुरकछित बसे रहिहीं। ओला ये नांव के दुवारा पुकारे जाही: यहोवा हमर धरमी उद्धारकर्ता।’
JER 33:17 काबरकि यहोवा ह ये कहत हे: ‘दाऊद के बंस म ले इसरायल के सिंघासन म बईठनेवाला हर समय कोनो न कोनो होहीं,
JER 33:18 अऊ लेवीय पुरोहितमन के बंस म ले मोर आघू म होम-बलिदान, अन्न-बलिदान अऊ आने बलिदान चघाय बर हर समय कोनो न कोनो होहीं।’ ”
JER 33:19 यहोवा के ये बचन यरमियाह मेर आईस:
JER 33:20 “यहोवा ह ये कहत हे: ‘मेंह दिन अऊ रात के बारे म करार करे हंव; यदि तुमन ये करार ला टोर दे हव, ताकि दिन अऊ रात अपन ठहिराय समय म झन होवंय,
JER 33:21 त फेर मोर सेवक दाऊद के संग करे मोर करार—अऊ मोर आघू म सेवा करइया लेवी पुरोहितमन के संग करे मोर करार ला टोरे जा सकत हे अऊ दाऊद ले ओकर सिंघासन म राज-करइया फेर ओकर कोनो संतान नइं होहीं।
JER 33:22 जइसने अकास के तारामन ला गने नइं जा सकय अऊ न ही समुंदर तीर के बालू ला नापे जा सकय, वइसने ही मेंह अपन सेवक दाऊद के संतान अऊ मोर आघू म सेवा करइया ओ लेवीमन ला बढ़ाहूं कि ओमन गने नइं जा सकहीं।’ ”
JER 33:23 यहोवा के ये बचन यरमियाह मेर आईस:
JER 33:24 “का तेंह धियान नइं देय कि ये मनखेमन का कहत हवंय, ‘जऊन दू ठन राज ला यहोवा ह चुने रिहिस, ओ दूनों राज ला ओह अब तियाग दे हवय’? एकरसेति ओमन मोर मनखेमन ला तुछ समझथें अऊ ओमन के एक जाति के रूप म आदर नइं करंय।
JER 33:25 यहोवा ह ये कहत हे: ‘यदि दिन अऊ रात के बारे म मेंह अपन करार नइं करे हंव अऊ अकास अऊ धरती के नियममन ला मेंह नइं ठहिराय हंव,
JER 33:26 तब मेंह याकूब के संतानमन ला अऊ मोर सेवक दाऊद ला तियाग दूहूं अऊ ओकर कोनो बेटा ला अब्राहम, इसहाक अऊ याकूब के संतानमन ऊपर राज करे बर नइं चुनहूं। पर मेंह ओमन के तकदीर ला फेर बदलहूं अऊ ओमन ऊपर दया देखाहूं।’ ”
JER 34:1 जब बेबिलोन के राजा नबूकदनेसर अऊ ओकर जम्मो सेना अऊ ओ जम्मो राज अऊ मनखे, जेमन ऊपर ओह सासन करत रिहिस, ओ जम्मो के जम्मो यरूसलेम अऊ येकर चारों कोति के नगरमन ले लड़त रिहिन, त यहोवा के ये बचन यरमियाह मेर आईस:
JER 34:2 “यहोवा, इसरायल के परमेसर ह ये कहत हे: यहूदा के राजा सिदकियाह करा जा अऊ ओला कह, ‘यहोवा ह ये कहत हे: मेंह ये सहर ला बेबिलोन के राजा के हांथ म देनेचवाला हंव, अऊ ओह येला जला दीही।
JER 34:3 तेंह ओकर हांथ ले नइं बच सकस पर येह पक्का ए कि तेंह पकड़े जाबे अऊ तोला ओकर हांथ म कर दिये जाही। तेंह खुद अपन आंखी ले बेबिलोन के राजा ला देखबे, अऊ ओह तोर ले आमने-सामने गोठियाही। अऊ तेंह बंधुवई म बेबिलोन जाबे।
JER 34:4 “ ‘तभो ले, हे यहूदा के राजा सिदकियाह, यहोवा ह जऊन वायदा तोर ले करत हे, ओला सुन। यहोवा ह तोर बारे म ये कहत हे: तेंह तलवार ले मारे नइं जावस।
JER 34:5 तेंह सांति से मरबे। अऊ जइसने मनखेमन तोर पहिले सासन करइया राजामन के आदर म ओमन के चिता म आगी बारे रिहिन, वइसने ही मनखेमन तोर आदर म आगी बारहीं अऊ ये कहिके सोक मनाहीं, “हाय हे मोर मालिक!” मेंह खुद ये वायदा करत हंव, यहोवा ह घोसना करत हे।’ ”
JER 34:6 तब यरमियाह अगमजानी ह ये जम्मो बात यहूदा के राजा सिदकियाह ला यरूसलेम म ओ बेरा कहिस,
JER 34:7 जब बेबिलोन के राजा के सेना ह यरूसलेम ले अऊ यहूदा के आने बांचे सहर—लाकीस अऊ अजेका ले लड़त रिहिस। यहूदा प्रदेस म सिरिप ये दूनों ही गढ़वाले सहर बांचे रिहिन।
JER 34:8 यहोवा के ये बचन यरमियाह करा ओ बेरा आईस, जब सिदकियाह राजा ह यरूसलेम म जम्मो मनखेमन संग ये करार कर लीस कि गुलाममन ला सुतंतर करे के घोसना करे जावय।
JER 34:9 हर एक जन अपन-अपन इबरानी गुलाम, चाहे आदमी हो या माईलोगन दूनों ला सुतंतर कर देवय; अपन कोनो इबरानी संगी ला बंधुवा के रूप म नइं रखना हे।
JER 34:10 तब जम्मो करमचारी अऊ मनखेमन ये करार ऊपर सहमती देखाईन कि ओमन अपन-अपन गुलाम, चाहे आदमी हो या माईलोगन दूनों ला सुतंतर कर दीहीं अऊ ओमन ला फेर बंधुवा के रूप म नइं रखहीं। ओमन राजी होईन, अऊ ओमन ला सुतंतर कर दीन।
JER 34:11 पर येकर बाद ओमन मुकर गीन अऊ जऊन गुलाममन ला ओमन सुतंतर कर दे रिहिन, ओमन ला वापिस लेके फेर गुलाम बना लीन।
JER 34:12 तब यहोवा के ये बचन यरमियाह मेर आईस:
JER 34:13 “यहोवा, इसरायल के परमेसर ह ये कहत हे: जब मेंह तुम्हर पुरखामन ला गुलामी के देस याने कि मिसर देस ले निकालके लानेंव, त मेंह ओमन के संग ये कहिके एक करार करेंव,
JER 34:14 ‘हर सातवां साल म, तुमन ओ संगी इबरीमन ला सुतंतर कर देवव, जऊन मन अपनआप ला तुम्हर हांथ म बेच दे हवंय। जब ओमन तुम्हर छै साल तक सेवा कर लेथें, त तुमन ओमन ला सुतंतर करके जावन देवव।’ पर तुम्हर पुरखामन मोर बात ला नइं सुनिन या मोर बात ला धियान नइं दीन।
JER 34:15 हाल ही म, तुमन पछताप करे रहेव अऊ ओ काम ला करेव, जऊन ह मोर नजर म बने अय: तुमन ले हर एक जन अपन खुद के मनखेमन के सुतंतरता के घोसना करेव। अऊ त अऊ जऊन घर ला मोर कहे जाथे, ओ घर म मोर आघू म तुमन एक करार घलो करेव।
JER 34:16 पर अब तुमन ओ बात ले मुकर गे हव अऊ मोर नांव ला अपबितर करे हव; तुमन ले हर एक जन ओ नर अऊ नारी गुलाममन ला वापिस लेय ले हव, जेमन ला तुमन सुतंतर कर दे रहेव कि ओमन अपन-अपन ईछा के मुताबिक जिहां चाहंय, उहां जावंय। तुमन ओमन ला फेर तुम्हर गुलाम बने बर दबाव डाले हवव।
JER 34:17 “एकरसेति यहोवा ह ये कहत हे: तुमन मोर बात नइं माने हव; तुमन अपन खुद के मनखेमन के सुतंतरता के घोसना नइं करे हव, एकरसेति मेंह अब तुम्हर बर ‘सुतंतरता’ के घोसना करत हंव, यहोवा के ये बचन अय—अइसने ‘सुतंतरता’ कि तुमन तलवार, महामारी अऊ अकाल के सामना करहू। मेंह तुमन ला अइसने कर दूहूं कि धरती के जम्मो राजमन तुम्हर ले घिन करहीं।
JER 34:18 जऊन मनखेमन मोर करार ला टोर दे हवंय अऊ मोर आघू म करे गे करार के बात ला पूरा नइं करे हवंय, ओमन के संग, मेंह ओ बछरू सहीं बरताव करहूं, जेला मनखेमन दू भाग कर दीन अऊ तब ओकर दूनों कुटा के बीच म ले रेंगिन।
JER 34:19 यहूदा अऊ यरूसलेम के अगुवा, अदालत के करमचारी, पुरोहित अऊ देस के ओ जम्मो मनखे, जऊन मन बछरू के कुटा के बीच म ले रेंगिन,
JER 34:20 ओमन ला मेंह ओमन के बईरीमन के हांथ म कर दूहूं, जेमन ओमन ला मार डारे चाहत हें। ओमन के लासमन चिरई अऊ जंगली पसुमन के जेवन हो जाहीं।
JER 34:21 “मेंह यहूदा के राजा सिदकियाह अऊ ओकर करमचारीमन ला ओमन के बईरीमन के हांथ म कर दूहूं, जेमन ओमन ला मार डारे चाहत हें, याने कि मेंह ओमन ला बेबिलोन के ओ राजा के सेना के हांथ म कर दूहूं, जऊन ह तुम्हर करा ले हट गे हवय।
JER 34:22 यहोवा ह घोसना करत हे, मेंह हुकूम देवइया हंव अऊ मेंह ओमन ला ये सहर म वापिस ले आहूं। ओमन येकर बिरूध लड़हीं, अऊ येला लेके येमा आगी लगा दीहीं। अऊ मेंह यहूदा के नगरमन ला अइसने उजाड़ दूहूं कि उहां कोनो नइं रह सकहीं।”
JER 35:1 योसियाह के बेटा यहूदा के राजा यहोयाकीम के राज म यहोवा के ये बचन यरमियाह करा आईस:
JER 35:2 “रेकाबी परिवार म जा अऊ ओमन ला यहोवा के घर के बाजू के एक कमरा म आय बर नेवता दे अऊ ओमन ला पीये बर अंगूर के मंद दे।”
JER 35:3 तब मेंह हबसिनयाह के पोता यरमियाह के बेटा याजनयाह ला, अऊ ओकर भाईमन ला अऊ जम्मो बेटामन ला, याने कि रेकाबीमन के जम्मो परिवार ला बलाय बर गेंव।
JER 35:4 मेंह ओमन ला यहोवा के घर म, परमेसर के जन यिगदलयाह के बेटा हानान, जऊन ह परमेसर के एक जन रिहिस, ओकर बेटामन के कमरा म ले आनेंव। येह करमचारीमन के कमरा के बाजू म अऊ सल्लूम के बेटा, दुवारपाल मासेयाह के कमरा के ऊपर रिहिस।
JER 35:5 तब मेंह रेकाबीमन के आघू म अंगूर के मंद ले भरे घघरी अऊ कटोरामन ला रखके कहेंव, “थोरकन मंद पी लव।”
JER 35:6 पर ओमन कहिन, “हमन मंद नइं पीयन, काबरकि रेकाब के बेटा, हमर पुरखा यहोनादाब ह हमन ला ये हुकूम देय रिहिस, ‘न तो तुमन अऊ न ही तुम्हर संतानमन कभू मंद पीहू।
JER 35:7 तुमन कभू घर घलो झन बनाहू, न बीज बोवव अऊ न ही अंगूर के बारी लगावव, तुम्हर करा ये चीजमन कभू झन होवय, पर तुमन हमेसा तम्बूमन म रहव। तब तुमन ओ देस म लम्बा समय तक रहन पाहू, जिहां तुमन घुमंतू जाति के रूप म रहत हवव।’
JER 35:8 हमन रेकाब के बेटा हमर पुरखा यहोनादाब के ओ जम्मो बात ला माने हवन, जेकर हुकूम ओह देय रिहिस। न तो हमन, न ही हमर घरवाली अऊ न ही हमर बेटा-बेटीमन कभू मंद पीये हवन,
JER 35:9 अऊ न ही कभू घर बनाय हवन अऊ न ही अंगूर के बारी, खेत या अनाज बोये हवन।
JER 35:10 हमन तम्बूमन म रहे हवन अऊ हमन हमर पुरखा यहोनादाब के दिये हुकूम के हर एक बात ला माने हवन।
JER 35:11 पर जब बेबिलोन के राजा नबूकदनेसर ये देस ऊपर चढ़ई करिस, त हमन कहेंन, ‘आवव, बेबिलोनी अऊ अरामीमन के सेना ले बांचे बर, हमन यरूसलेम जावन।’ ये खातिर हमन यरूसलेम म रहत हन।”
JER 35:12 तब यहोवा के बचन ये कहत यरमियाह मेर आईस:
JER 35:13 “सर्वसक्तिमान यहोवा, इसरायल के परमेसर ह ये कहत हे: जा अऊ यहूदा देस के मनखे अऊ यरूसलेम सहर म रहइया मनखेमन ला कह, ‘का तुमन सबक नइं सीखहू अऊ मोर बात ला नइं मानहू?’ यहोवा ह घोसना करत हे।
JER 35:14 ‘रेकाब के बेटा यहोनादाब ह अपन संतानमन ला हुकूम दीस कि ओमन मंद झन पीयंय अऊ ओमन ये हुकूम ला मानिन। आज तक ओमन मंद नइं पीयंय, काबरकि ओमन अपन पुरखा के हुकूम ला मानत हें; पर मेंह तुमन ला बार-बार कहे हंव, तभो ले तुमन मोर बात नइं माने हव।
JER 35:15 बार-बार मेंह अपन जम्मो सेवक अऊ अगमजानीमन ला तुम्हर करा पठोंय। ओमन कहिन, “तुमन ले हर एक जन अपन दुस्ट चालचलन ले फिरव, अऊ अपन चालचलन ला सुधारव; आने देवतामन के सेवा करे बर ओमन के पाछू झन जावव। तब तुमन ये देस म रहे बर पाहू, जेला मेंह तुमन अऊ तुम्हर पुरखामन ला देय हवंव।” पर तुमन मोर बात ला धियान नइं देव अऊ न ही मोर बात ला सुनेव।
JER 35:16 रेकाब के बेटा यहोनादाब के संतानमन अपन पुरखा के दिये हुकूम ला मानिन, पर ये मनखेमन मोर बात नइं मानिन।’
JER 35:17 “एकरसेति यहोवा सर्वसक्तिमान परमेसर, इसरायल के परमेसर ह ये कहत हे: ‘सुनव! यहूदा ऊपर अऊ यरूसलेम सहर म रहइया जम्मो मनखे ऊपर, मेंह ओ जम्मो बिपत्ति लानेवाला हंव, जेकर घोसना मेंह ओमन के बिरूध करे हवंव। काबरकि मेंह ओमन ले बात करेंव, पर ओमन नइं सुनिन; मेंह ओमन ला बलांय, पर ओमन जबाब नइं दीन।’ ”
JER 35:18 तब यरमियाह ह रेकाबीमन के परिवार ला कहिस, “सर्वसक्तिमान यहोवा, इसरायल के परमेसर ह ये कहत हे: ‘तुमन अपन पुरखा यहोनादाब के हुकूम ला माने हव अऊ ओकर जम्मो निरदेस के पालन करे हव अऊ हर ओ काम करे हव, जेकर हुकूम ओह देय रिहिस।’
JER 35:19 एकरसेति सर्वसक्तिमान यहोवा, इसरायल के परमेसर ह ये कहत हे: ‘रेकाब के बेटा यहोनादाब के संतान म हमेसा कोनो न कोनो अइसने आदमी होही, जऊन ह मोर सेवा करही।’ ”
JER 36:1 योसियाह के बेटा यहूदा के राजा यहोयाकीम के राज के चौथा साल म यहोवा के ये बचन यरमियाह मेर आईस:
JER 36:2 “चामपट्टी के एक खाली किताब ले अऊ इसरायल, यहूदा अऊ आने जम्मो जातिमन के बारे म, जतेक बात मेंह तोर ले योसियाह के राज के समय ले लेके आज तक कहे हवंव, ओ जम्मो ला ओ किताब म लिख ले।
JER 36:3 हो सकथे, जब यहूदा के मनखेमन ओ जम्मो बिपत्ति के बारे म सुनंय, जेला मेंह ओमन ऊपर लाने के योजना बनात हंव, त ओमन अपन खराप चालचलन ले मन फिरांय; तब मेंह ओमन के अधरम अऊ पाप ला छेमा करहूं।”
JER 36:4 एकरसेति यरमियाह ह नेरियाह के बेटा बारूक ला बलाईस, अऊ यरमियाह ह यहोवा के कहे जम्मो बात बारूक ला बतात गीस अऊ बारूक ह ओ बातमन ला ओ खाली किताब म लिख लीस।
JER 36:5 तब यरमियाह ह बारूक ला कहिस, “मोर ऊपर तो परतिबंध लगे हवय; मोला यहोवा के मंदिर म जाय के अनुमति नइं ए।
JER 36:6 एकरसेति एक उपास के दिन, तें यहोवा के घर म जा अऊ ये किताब म लिखे यहोवा के ओ बचन मनखेमन ला सुना, जेला तेंह मोर कहे मुताबिक लिखे हवस। यहूदा के ओ जम्मो मनखे, जऊन मन अपन-अपन नगर ले उहां आथें, ओमन ला ये किताब के बात ला पढ़के सुना।
JER 36:7 हो सकथे, ओमन यहोवा के आघू म बिनती करंय अऊ हर एक जन अपन-अपन खराप चालचलन ले मन फिरांय। काबरकि जऊन गुस्सा अऊ कोप के घोसना यहोवा ह ये मनखेमन के बिरूध म करे हवय, ओह बहुंत जादा अय।”
JER 36:8 नेरियाह के बेटा बारूक ह ओ जम्मो काम करिस, जेला यरमियाह अगमजानी ह ओला करे बर कहे रिहिस; यहोवा के मंदिर म, ओह ओ किताब म लिखे यहोवा के बचन ला पढ़के सुनाईस।
JER 36:9 योसियाह के बेटा यहूदा के राजा यहोयाकीम के राज के पांचवां साल के नौवां महिना म, यरूसलेम के जम्मो मनखे अऊ यहूदा के नगरमन ले आय मनखेमन बर यहोवा के आघू म उपास करे के घोसना करे गीस।
JER 36:10 सापान के बेटा गमरयाह ह सचिव रिहिस; ओकर कमरा ह मंदिर के नवां कपाट के प्रवेस दुवार करा ऊपर के अंगना म रिहिस; बारूक ह ओ कमरा ले यहोवा के मंदिर म जम्मो मनखेमन ला किताब म लिखे यरमियाह के बचन ला पढ़के सुनाईस।
JER 36:11 जब सापान के नाती, गमरयाह के बेटा मीकायाह ह किताब म लिखे यहोवा के जम्मो बचन ला सुनिस,
JER 36:12 त ओह राजमहल म खाल्हे सचिव के कमरा म गीस, जिहां जम्मो करमचारीमन बईठे रहंय: एलीसामा सचिव, समायाह के बेटा दलायाह, अकबोर के बेटा एलनातान, सापान के बेटा गमरयाह, हननयाह के बेटा सिदकियाह अऊ आने जम्मो करमचारी।
JER 36:13 मीकायाह ह ओ जम्मो बात ओमन ला बताईस, जेला ओह सुने रिहिस, जब बारूक ह किताब म ले पढ़के मनखेमन ला सुनाईस।
JER 36:14 ये बात ला सुनके, जम्मो करमचारीमन येहूदी ला, जऊन ह नतनयाह के बेटा, सेलेमियाह के पोता अऊ कूसी के परपोता रिहिस, बारूक करा ये कहे बर पठोईन, “जऊन किताब म ले तेंह मनखेमन ला पढ़के सुनाय हस, ओ किताब ला लेके आ जा।” एकरसेति नेरियाह के बेटा बारूक ह ओ किताब ला अपन हांथ म धरके ओमन करा आईस।
JER 36:15 तब ओमन ओला कहिन, “बईठ जा अऊ हमन ला ये किताब म ले पढ़के सुना।” तब बारूक ह ओमन ला किताब ला पढ़के सुना दीस।
JER 36:16 जब ओमन ये जम्मो बात ला सुनिन, त ओमन डर म, एक-दूसर ला देखिन अऊ बारूक ला कहिन, “हमर बर जरूरी अय कि हमन ये जम्मो बात राजा ला बतावन।”
JER 36:17 तब ओमन बारूक ले पुछिन, “हमन ला बता कि तेंह ये जम्मो बात ला कइसे लिखय? का यरमियाह ह ये बातमन ला कहत गीस?”
JER 36:18 बारूक ह जबाब दीस, “हव, ओह ये जम्मो बात मोला कहत गीस, अऊ मेंह येला चाम के किताब म सियाही ले लिखत गेंव।”
JER 36:19 तब अधिकारीमन बारूक ला कहिन, “तें अऊ यरमियाह जावव अऊ छिप जावव। कोनो ला झन बतावव कि तुमन कहां हव।”
JER 36:20 तब अधिकारीमन चाम के किताब ला एलीसामा सचिव के कमरा म रख दीन अऊ राजा करा अंगना म जाके ओ जम्मो बात ओला बताईन।
JER 36:21 तब राजा ह येहूदी ला चाम के किताब लाने बर पठोईस, अऊ येहूदी ह किताब ला एलीसामा सचिव के कमरा ले लानिस अऊ ओला राजा अऊ ओकर बाजू म खड़े जम्मो अधिकारीमन ला पढ़के सुनाईस।
JER 36:22 येह नौवां महिना रिहिस अऊ राजा ह जड़काला के घर म बईठे रहय अऊ ओकर आघू म आगी तापे के चूल्हा बरत रहय।
JER 36:23 जब भी येहूदी ह तीन या चार पन्ना पढ़ डारय, त राजा ह ओ पन्नामन ला एक लेखक के चाकू ले काट देय अऊ ओमन ला आगी तापे के चूल्हा म फटिक देय; ओह तब तक अइसने करिस, जब तक कि जम्मो किताब ह चूल्हा के आगी म जर नइं गीस।
JER 36:24 पर राजा अऊ ओकर जम्मो सेवक, जऊन मन ये बात ला सुनिन, ओमन म न तो कोनो डर के बात दिखिस अऊ न ही ओमन दुखित होके अपन ओनहा ला चीरिन।
JER 36:25 हालाकि एलनातान, दलायाह अऊ गमरयाह, राजा ले बिनती करिन कि किताब ला झन जलावय, पर ओह ओमन के एको ठन बात नइं सुनिस।
JER 36:26 येकर उल्टा, राजा ह अपन एक बेटा यरहमेल अऊ अजरीएल के बेटा सरायाह अऊ अबदेल के बेटा सेलेमियाह ला हुकूम दीस कि ओमन बारूक लेखक अऊ यरमियाह अगमजानी ला बंदी बना लेवंय। पर यहोवा ह ओमन ला छिपा दे रिहिस।
JER 36:27 जब राजा ह ओ किताब ला जला दीस, जेमा बारूक ह यरमियाह के बताय बात ला लिखे रिहिस, तब यहोवा के ये बचन यरमियाह मेर आईस:
JER 36:28 “एक ठन अऊ चामपट्टी ले अऊ ओमा ओ जम्मो बात ला लिख, जऊन ह पहिली चाम के किताब म रिहिस अऊ जेला यहूदा के राजा यहोयाकीम ह जला दीस।
JER 36:29 अऊ यहूदा के राजा यहोयाकीम ला ये घलो कह, ‘यहोवा ह ये कहत हे: तेंह ओ किताब ला जला देय अऊ कहय, “तेंह ओमा काबर लिखे कि बेबिलोन के राजा जरूर आही अऊ ये देस ला नास कर दीही अऊ इहां ले मनखे अऊ पसु दूनों के नामोनिसान मिटा दीही?”
JER 36:30 एकरसेति यहोवा ह यहूदा के राजा यहोयाकीम के बारे म ये कहत हे: दाऊद के सिंघासन म बईठे बर ओकर कोनो संतान नइं होहीं; ओकर लास ला बाहिर अइसे फटिक दिये जाही कि ओह दिन के घाम अऊ रथिया के सीत म पड़े रहिही।
JER 36:31 मेंह ओला अऊ ओकर लइकामन ला अऊ ओकर सेवकमन ला ओमन के अधरम के सजा दूहूं; मेंह ओमन ऊपर अऊ यरूसलेम म रहइया मनखेमन ऊपर अऊ यहूदा के मनखेमन ऊपर ओ जम्मो बिपत्ति लानहूं, जेकर घोसना मेंह ओमन के बिरूध करे हवंव, काबरकि ओमन मोर बात ला नइं सुनिन।’ ”
JER 36:32 तब यरमियाह ह एक आने चाम के खाली किताब लीस अऊ ओला नेरियाह के बेटा बारूक लेखक ला दीस, अऊ यरमियाह के कहे मुताबिक बारूक ह येमा ओ पहिली चाम के किताब के जम्मो बात ला फेर लिखिस, जेला यहूदा के राजा यहोयाकीम ह आगी म जला दे रिहिस। अऊ येमा पहिले के सहीं अऊ कतको बातमन ला जोड़ दिये गीस।
JER 37:1 यहोयाकीम के बेटा यहोयाकीन के जगह म योसियाह के बेटा सिदकियाह ह राज करन लगिस, काबरकि बेबिलोन के राजा नबूकदनेसर ह सिदकियाह ला यहूदा देस के राजा बनाईस।
JER 37:2 पर न तो ओह, न ही ओकर करमचारीमन अऊ न ही देस के मनखेमन यहोवा के ओ बचन ऊपर धियान दीन, जेला ओह यरमियाह अगमजानी के जरिये कहे रिहिस।
JER 37:3 तभो ले, सिदकियाह राजा ह सेलेमियाह के बेटा यहूकल अऊ मासेयाह के बेटा सपनयाह पुरोहित ला यरमियाह अगमजानी करा ये कहे बर पठोईस, “यहोवा हमर परमेसर ले हमर बर पराथना कर।”
JER 37:4 ओ बेरा म यरमियाह ला जेल म नइं डारे गे रिहिस, अऊ ओह मनखेमन के बीच म बिगर रोक-टोक के आवत-जावत रिहिस।
JER 37:5 ओ समय फिरौन के सेना ह मिसर ले निकले रिहिस, अऊ बेबिलोन के सेना ह यरूसलेम ला घेरत रिहिस, पर जब ओमन फिरौन के सेना के बारे म सुनिन, त ओमन यरूसलेम ले हट गीन।
JER 37:6 तब यहोवा के ये बचन यरमियाह अगमजानी मेर आईस:
JER 37:7 “यहोवा इसरायल के परमेसर ह ये कहत हे: यहूदा के राजा जऊन ह तोला मोर करा पठोय हे ओला कह, ‘फिरौन के जऊन सेना तोर मदद करे बर निकले हवय, ओह अपन देस मिसर ला वापिस चल दीही।
JER 37:8 तब बेबिलोन के मनखेमन वापिस आके ये सहर ऊपर हमला करहीं; ओमन येकर ऊपर कब्जा कर लीहीं अऊ येला जलाके फूंक दीहीं।’
JER 37:9 “यहोवा ह ये कहत हे: ये सोचके अपनआप ला धोखा झन देवव, ‘बेबिलोन के मनखेमन हमन ला जरूर छोंड़ दीहीं।’ पर ओमन नइं छोंड़ंय!
JER 37:10 अऊ त अऊ यदि तुमन बेबिलोन के ओ जम्मो सेना ला हरा घलो देथव, जऊन ह तुम्हर ऊपर हमला करत हे अऊ ओमन के सिरिप घायल मनखेमन ओमन के तम्बू म बांचे होहीं, त ओमन बाहिर निकलहीं अऊ ये सहर ला जलाके फूंक दीहीं।”
JER 37:11 जब बेबिलोन के सेना ह फिरौन के सेना के कारन यरूसलेम ले वापिस चल दीस,
JER 37:12 तब यरमियाह ह सहर ला छोंड़के बिनयामीन के राज म जाय बर निकलिस, ताकि ओह उहां मनखेमन के बीच म संपत्ति के अपन बांटा लेवय।
JER 37:13 पर जब ओह बिनयामीन दुवार करा हबरिस, त उहां इरियाह नांव के पहरेदारमन के मुखिया रिहिस, जऊन ह सेलेमियाह के बेटा अऊ हननयाह के पोता रिहिस; ओह यरमियाह अगमजानी ला बंदी बनाके कहिस, “तेंह बेबिलोन के मनखेमन करा जावत हस!”
JER 37:14 तब यरमियाह ह कहिस, “येह सच नो हय! मेंह बेबिलोन के मनखेमन करा नइं जावत हंव।” पर इरियाह ह ओकर बात ला बिसवास नइं करिस; अऊ ओह यरमियाह ला बंदी बनाके करमचारीमन करा ले आईस।
JER 37:15 ओमन यरमियाह ऊपर गुस्सा होईन अऊ ओला पीटवाके योनातन सचिव के ओ घर म बंदी बनाके डलवा दीन, जेला ओमन जेल बना दे रिहिन।
JER 37:16 यरमियाह ला तलघर के एक गुम्मट सहीं कमरा म रखे गीस, जिहां ओह बहुंत समय तक रिहिस।
JER 37:17 तब सिदकियाह राजा ह ओकर करा मनखे पठोके ओला महल म ले आईस अऊ ओला एकांत म पुछिस, “का यहोवा ले कोनो संदेस हवय?” यरमियाह ह कहिस, “हव,” “तोला बेबिलोन के राजा के हांथ म सऊंप दिये जाही।”
JER 37:18 तब यरमियाह ह सिदकियाह राजा ला कहिस, “मेंह तोर या तोर करमचारीमन के या ये मनखेमन के बिरूध म का अपराध करे हंव कि तेंह मोला जेल म डाल दे हस?
JER 37:19 तोर ओ अगमजानीमन कहां हवंय, जऊन मन तोर ले ये अगमबानी करे रिहिन, ‘बेबिलोन के राजा ह तोर ऊपर या ये देस ऊपर हमला नइं करही’?
JER 37:20 पर अब, हे मोर मालिक, हे राजा, मोर बात ला सुन। मेंह तोर ले बिनती करत हंव: मोला योनातन सचिव के घर म वापिस झन भेज, नइं तो मेंह उहां मर जाहूं।”
JER 37:21 तब राजा सिदकियाह ह हुकूम दीस कि यरमियाह ला पहरेदार के अंगना म रखे जावय अऊ ओला हर दिन रोटीवालामन के गली ले एक रोटी तब तक दिये जावय, जब तक कि सहर के जम्मो रोटी सिरा नइं जावय। तब ले यरमियाह ह पहरेदार के अंगना म रहे लगिस।
JER 38:1 एक दिन मतान के बेटा सपतयाह, पसहूर के बेटा गदलयाह, सेलेमियाह के बेटा यूकल अऊ मलकियाह के बेटा पसहूर, यरमियाह के ये बात ला सुनिन, जेला ओह जम्मो मनखेमन ला कहत रिहिस,
JER 38:2 “यहोवा ह ये कहत हे: ‘जऊन कोनो ये सहर म रहिही, ओह तलवार, अकाल या महामारी ले मारे जाही; पर जऊन ह बेबिलोन के मनखेमन करा जाही, ओह जीयत रहिही। ओकर परान ह बांच जाही, अऊ जीयत रहिही।’
JER 38:3 अऊ यहोवा ह ये कहत हे: ‘खचित ये सहर ला बेबिलोन के राजा के सेना के हांथ म कर दिये जाही अऊ राजा ह येकर ऊपर कब्जा कर लीही।’ ”
JER 38:4 तब करमचारीमन राजा ले कहिन, “ये मनखे ला मार डालना चाही, काबरकि ये मनखे ह ये सहर म बांचे सैनिक अऊ जम्मो मनखेमन ला जऊन बात कहत हे, ओकर ले ओमन निरास होवत हें। ये मनखे ह मनखेमन के भलई नइं पर बुरई चाहत हे।”
JER 38:5 राजा सिदकियाह ह जबाब दीस, “ओह तुम्हर हांथ म हवय; राजा तुम्हर बिरोध म कुछू नइं करय।”
JER 38:6 एकरसेति ओमन यरमियाह ला लीन अऊ ओला राजा के बेटा मलकियाह के कुआं म डाल दीन, जऊन ह पहरेदार के अंगना म रहय। ओमन यरमियाह ला रस्सी के दुवारा कुआं म उतार दीन; ओ कुआं म पानी नइं रिहिस, सिरिप चीखला रिहिस, अऊ यरमियाह ह चीखला म बुड़े लगिस।
JER 38:7 पर एबेद-मेलेक, एक कूसी मनखे, जऊन ह राजमहल म एक करमचारी रिहिस, ये सुनिस कि ओमन यरमियाह ला कुआं म डाल दे हवंय। जब राजा ह बिनयामीन दुवार मेर बईठे रिहिस,
JER 38:8 त एबेद-मेलेक ह महल ले निकलके राजा करा गीस, अऊ ओला कहिस,
JER 38:9 “हे मोर मालिक, हे राजा, ओ मनखेमन यरमियाह अगमजानी के संग जऊन कुछू भी करे हवंय, बहुंत दुस्टता के काम करे हवंय। ओमन ओला एक कुआं म फटिक दे हवंय, जिहां ओह भूख के मारे मर जाही, काबरकि सहर म खाय बर कोनो रोटी नइं बचे हवय।”
JER 38:10 तब राजा ह एबेद-मेलेक कूसी ला हुकूम दीस, “इहां ले तीस मनखे अपन संग ले अऊ यरमियाह अगमजानी ला ओ कुआं ले निकाल ले, येकर पहिले कि ओह मर जावय।”
JER 38:11 एकरसेति एबेद-मेलेक मनखेमन ला अपन संग लीस अऊ महल म खजाना के खाल्हे एक कमरा म गीस। ओह उहां ले कुछू फटा-पुराना कपड़ा अऊ चेंदरी लीस अऊ ओमन ला रस्सीमन के दुवारा कुआं म यरमियाह करा उतार दीस।
JER 38:12 तब एबेद-मेलेक कूसी ह यरमियाह ले कहिस, “ये फटा-पुराना कपड़ा अऊ चेंदरीमन ला अपन खंखोरीमन म गद्दी के सहीं रस्सी के ऊपर रख ले।” यरमियाह ह वइसने करिस,
JER 38:13 अऊ ओमन यरमियाह ला रस्सी ले ऊपर खींचिन अऊ ओला कुआं ले बाहिर निकाल लीन। अऊ यरमियाह ह पहरेदार के अंगना म रहे लगिस।
JER 38:14 तब राजा सिदकियाह ह यरमियाह अगमजानी ला बलाय बर मनखे पठोईस अऊ ओला यहोवा के मंदिर के तीसर प्रवेस दुवार करा लानके ओकर ले कहिस, “मेंह तोर ले कुछू पुछे चाहत हंव,” “मोर ले कोनो बात झन छुपाबे।”
JER 38:15 यरमियाह ह सिदकियाह ला कहिस, “यदि मेंह तोला कोनो जबाब दूहूं, त का तेंह मोला मार नइं डारबे? यदि मेंह तोला सलाह दूहूं घलो, तभो ले तेंह मोर बात ला नइं मानबे।”
JER 38:16 पर राजा सिदकियाह ह अकेला म यरमियाह ले ये कसम खाईस, “यहोवा, जऊन ह हमन ला सांस दे हवय, ओकर जिनगी के कसम, न तो मेंह तोला मरवा डालहूं अऊ न ही मेंह तोला ओ मनखेमन के हांथ म सऊंपहूं, जऊन मन तोला मार डाले चाहत हें।”
JER 38:17 तब यरमियाह ह सिदकियाह ले कहिस, “यहोवा सर्वसक्तिमान परमेसर, इसरायल के परमेसर ह ये कहत हे: ‘यदि तेंह अपनआप ला बेबिलोन के राजा के अधिकारीमन के हांथ म कर देबे, त तोर परान ह बच जाही अऊ ये सहर ला जलाय नइं जाही; अऊ तें अऊ तोर परिवार जीयत रहिही।
JER 38:18 पर कहूं तेंह अपनआप ला बेबिलोन के राजा के अधिकारीमन के हांथ म नइं करबे, त ये सहर ला बेबिलोन के मनखेमन के हांथ म कर दिये जाही अऊ ओमन येला जला दीहीं; अऊ तेंह खुद ओमन के हांथ ले बच नइं सकबे।’ ”
JER 38:19 राजा सिदकियाह ह यरमियाह ले कहिस, “जऊन यहूदी मनखेमन बेबिलोन के मनखेमन करा गे हवंय, ओमन ले मेंह डरावत हंव, काबरकि बेबिलोन के मनखेमन मोला ओमन के हांथ म दे सकत हें अऊ ओमन मोर ले गलत बरताव करहीं।”
JER 38:20 यरमियाह ह कहिस, “बेबिलोन के मनखेमन तोला ओमन के हांथ म नइं देवंय; जऊन कुछू मेंह तोर ले कहत हंव, वइसने करके यहोवा के बात ला मान। तब तोर भलई होही, अऊ तोर परान ह बच जाही।
JER 38:21 पर यदि तेंह अपनआप ला ओमन ला नइं सऊंपबे, त जऊन बात यहोवा ह मोला बताय हवय, ओह ये अय:
JER 38:22 यहूदा के राजा के महल म, जतेक माईलोगन बचे हवंय, ओमन ला बेबिलोन के राजा के करमचारीमन करा लाने जाही, अऊ ओ माईलोगनमन तोर ले कहिहीं: “ ‘तोर भरोसा के संगवारीमन तोला बहकाईन अऊ ओमन सफल होईन। तोर गोड़मन चीखला म धंस गीन; तोर संगवारीमन तोला छोंड़ दे हवंय।’
JER 38:23 “तोर जम्मो घरवाली अऊ लइकामन ला बेबिलोन के मनखेमन करा लाने जाही। तेंह खुद ओमन के हांथ ले नइं बांचबे अऊ तेंह बेबिलोन के राजा के दुवारा बंदी बना लिये जाबे; अऊ ये सहर ला जला दिये जाही।”
JER 38:24 तब सिदकियाह ह यरमियाह ला कहिस, “कोनो ला हमर ये बातचीत के बारे म झन बताबे, नइं तो तेंह मार डाले जाबे।
JER 38:25 यदि करमचारीमन ये पता पाथें कि मेंह तोर ले बातचीत करे हंव, अऊ ओमन तोर करा आके पुछथें, ‘हमन ला बता कि तेंह राजा ला का कहय अऊ राजा ह तोला का कहिस; हमन ले कोनो बात झन छिपा, नइं तो हमन तोला मार डालबो,’
JER 38:26 तब तेंह ओमन ले कहिबे, ‘मेंह राजा ले बिनती करत रहेंव कि मोला योनातन के घर म मरे बर वापिस झन पठो।’ ”
JER 38:27 तब जम्मो करमचारीमन यरमियाह करा आईन अऊ ओकर ले पुछिन, अऊ जइसने राजा ह ओला हुकूम देय रिहिस, वइसने ही ओह ओमन ला जबाब दीस। एकरसेति ओमन ओला अऊ कुछू नइं कहिन, काबरकि राजा के संग ओकर बातचीत ला कोनो नइं सुने रिहिन।
JER 38:28 अऊ यरमियाह ह पहरेदार के अंगना म तब तक रिहिस, जब तक कि यरूसलेम सहर ऊपर कब्जा नइं कर लिये गीस। ये किसम ले यरूसलेम ला ले लिये गीस:
JER 39:1 यहूदा के राजा सिदकियाह के राज के नौवां साल के दसवां महिना म, बेबिलोन के राजा नबूकदनेसर ह अपन जम्मो सेना के संग यरूसलेम के बिरूध लड़ई करे बर निकलिस अऊ ओला घेर लीस।
JER 39:2 अऊ सिदकियाह के राज के गियारहवां साल के चौथा महिना के नौवां दिन सहर के दीवार ला टोर दिये गीस।
JER 39:3 तब बेबिलोन के जम्मो अधिकारी अऊ करमचारीमन आईन अऊ मांझा दुवार म अपन-अपन जगह म बईठ गीन। ओमा नेरगल-सरेसेर जऊन ह समगर के रिहिस, अऊ नबो-सरसकीम जऊन ह एक मुखिया अधिकारी रिहिस, नेरगल-सरेसेर जऊन ह एक उच्च अधिकारी रिहिस अऊ बेबिलोन के राजा के आने जम्मो करमचारीमन रिहिन।
JER 39:4 जब यहूदा के राजा सिदकियाह अऊ जम्मो सैनिकमन ओमन ला देखिन, त ओमन भाग गीन; ओमन रथियाच राजा के बारी के रद्दा ले, दूनों दीवार के बीच बने दुवार म ले होके सहर ले निकल गीन, अऊ अराबा के रसता ला धरिन।
JER 39:5 पर बेबिलोन के सेना ह ओमन के पीछा करिस अऊ सिदकियाह ला यरीहो के मैदान म पकड़ लीस। ओमन ओला बेबिलोन के राजा नबूकदनेसर करा हमात देस के रिबला सहर म ले गीन, जिहां ओह सिदकियाह ला सजा के हुकूम दीस।
JER 39:6 उहां रिबला म, बेबिलोन के राजा ह सिदकियाह के बेटामन ला ओकर आंखी के आघू म मार डारिस अऊ यहूदा के जम्मो परभावसाली मनखेमन ला घलो मार डारिस।
JER 39:7 तब ओह सिदकियाह के आंखी ला निकाल दीस अऊ ओला बेबिलोन ले जाय बर कांसा के बेड़ीमन म जकड़वा दीस।
JER 39:8 बेबिलोन के मनखेमन राजमहल अऊ मनखेमन के घरमन म आगी लगाके जला दीन अऊ यरूसलेम के दीवार ला टोरके गिरा दीन।
JER 39:9 तब महाराजा के पहरेदारमन के सेनापति नबूजरदान ह सहर म बांचे मनखे अऊ जऊन मन ओकर करा भागके आ गे रिहिन ओमन ला, अऊ बाकि मनखेमन ला बंदी बनाके बेबिलोन ले गीस।
JER 39:10 पर अइसने गरीब मनखे, जेमन करा कुछू नइं रिहिस, ओमन ला पहरेदारमन के सेनापति नबूजरदान ह यहूदा देस म छोंड़ दीस; अऊ ओ बेरा, ओह ओमन ला अंगूर के बारी अऊ खेतमन ला दे दीस।
JER 39:11 बेबिलोन के राजा नबूकदनेसर ह महाराजा के पहरेदारमन के सेनापति नबूजरदान ला यरमियाह के बारे म ये हुकूम देय रिहिस:
JER 39:12 “ओला ले जा अऊ ओकर देखभाल कर; ओकर कुछू हानि झन करबे, पर जइसने ओह तोर ले कहिथे, वइसने ही ओकर संग बरताव करबे।”
JER 39:13 एकरसेति पहरेदारमन के सेनापति नबूजरदान, एक मुखिया अधिकारी नबूसजबान, एक उच्च अधिकारी नेरगल-सरेसेर अऊ बेबिलोन के राजा के आने जम्मो अधिकारीमन,
JER 39:14 मनखेमन ला पठोके यरमियाह ला पहरेदार के अंगना ले लेय आईन अऊ ओमन यरमियाह ला गदलयाह, जऊन ह अहीकाम के बेटा अऊ सापान के पोता रिहिस, ओकर हांथ म सऊंप दीन, ताकि ओह यरमियाह ला ओकर घर वापिस ले जावय। तब ओह अपन मनखेमन के बीच रहे लगिस।
JER 39:15 जब यरमियाह ह पहरेदार के अंगना म कैद रिहिस, तब यहोवा के ये बचन ओकर करा आईस:
JER 39:16 “जा अऊ एबेद-मेलेक कूसी ले कह, ‘सर्वसक्तिमान यहोवा, इसरायल के परमेसर ह ये कहत हे: मेंह ये सहर के बिरूध कहे मोर बात ला पूरा करनेवाला हंव—बिपत्ति के बात, उन्नति के नइं। ओ बेरा, ओमन तोर आंखी के आघू म पूरा होहीं।
JER 39:17 पर ओ बेरा, मेंह तोला बचाहूं, यहोवा ह घोसना करत हे; जऊन मनखेमन ले तेंह डरथस, ओमन के हांथ म तोला नइं सऊंपे जाही।
JER 39:18 मेंह तोला बचाहूं; तेंह तलवार ले नइं मारे जाबे पर तोर परान ह बच जाही, काबरकि तेंह मोर ऊपर भरोसा करे हस, यहोवा ह घोसना करत हे।’ ”
JER 40:1 जब महाराजा के पहरेदारमन के सेनापति नबूजरदान ह यरमियाह ला यरूसलेम अऊ यहूदा के ओ जम्मो बंदीमन के बीच हथकड़ी म बंधे पाईस, जेमन ला बंधुवई म बेबिलोन लिये जावत रिहिस, त ओह यरमियाह ला रामा नगर म छोंड़ दीस। ओ समय यहोवा के बचन यरमियाह करा आईस।
JER 40:2 जब पहरेदारमन के सेनापति ला यरमियाह मिलिस, त ओह यरमियाह ला कहिस, “यहोवा तोर परमेसर ह ये जगह म ये बिपत्ति लाने के फैसला करे रिहिस।
JER 40:3 अऊ अब यहोवा ह ओ बिपत्ति ला लाने हवय; ओह वइसने ही करे हवय, जइसने कि ओह कहे रिहिस। ये जम्मो बात होईस, काबरकि तुमन यहोवा के बिरूध म पाप करेव अऊ ओकर हुकूम ला नइं मानेव।
JER 40:4 पर आज मेंह तोला तोर ये हथकड़ी ले सुतंतर करत हंव। यदि तोला बने लगे, त आ मोर संग बेबिलोन चल, अऊ मेंह तोर देखभाल करहूं; पर यदि तेंह नइं चाहत हस, त झन आ। देख, पूरा देस तोर आघू म पड़े हवय; जिहां भी तोला बने लगथे, उहां चले जा।”
JER 40:5 पर येकर पहिले कि यरमियाह ह जाय बर मुड़तिस, नबूजरदान ह ये घलो कहिस, “अहीकाम के बेटा अऊ सापान के पोता गदलयाह करा वापिस चले जा, जेला बेबिलोन के राजा ह यहूदा के नगरमन ऊपर अधिकारी ठहिराय हवय, अऊ ओकर संग मनखेमन के बीच म रह, या जिहां कहूं तोला बने लगथे, उहां चले जा।” तब सेनापति ह ओला जेवन के सामान अऊ एक उपहार दीस अऊ ओला बिदा करिस।
JER 40:6 तब यरमियाह ह मिसपा म अहीकाम के बेटा गदलयाह करा गीस अऊ उहां ओकर संग ओ मनखेमन के बीच रहे लगिस, जेमन ला ओ देस म छोंड़ दिये गे रिहिस।
JER 40:7 जब सेना के जम्मो अधिकारी अऊ ओमन के मनखे, जऊन मन अभी घलो खुला देहात म रहत रिहिन, ओमन सुनिन कि बेबिलोन के राजा ह अहीकाम के बेटा गदलयाह ला देस के राजपाल ठहिराय हवय अऊ ओला ओ आदमी, माईलोगन अऊ लइकामन ऊपर अधिकारी ठहिराय गे हवय, जऊन मन देस म सबले गरीब अंय अऊ जेमन ला बंधुवा के रूप म बेबिलोन नइं ले जाय गीस,
JER 40:8 त ओमन मिसपा म गदलयाह करा आईन—ओमा नतनयाह के बेटा इसमायल, कारेह के बेटा योहानान अऊ योनातन, तनहूमेत के बेटा सरायाह, नतोपाती एपै के बेटामन, अऊ माकाती के बेटा याजनयाह, अऊ ओमन के मनखेमन रिहिन।
JER 40:9 अहीकाम के बेटा अऊ सापान के पोता गदलयाह ह ओमन अऊ ओमन के मनखेमन ला बिसवास दिलाय बर कसम खाके कहिस, “बेबिलोन के मनखेमन के सेवा करे बर झन डरव; देस म बस जावव अऊ बेबिलोन के राजा के सेवा करव, तब तुम्हर भलई होही।
JER 40:10 मेंह खुद मिसपा म रहिके ओ बेबिलोन के मनखेमन के आघू म तुम्हर बात रखहूं, जऊन मन हमर इहां आहीं; पर तुमन अंगूर के मंद, घाम महिना के फर अऊ जैतून तेल के फसल उपजावव, अऊ ओमन ला संकेलके अपन बरतनमन म रखव, अऊ जऊन नगरमन ला तुमन लेय ले हव, ओमा बसे रहव।”
JER 40:11 जब मोआब, अमोन, एदोम अऊ आने जम्मो देस म रहइया जम्मो झन सुनिन कि बेबिलोन के राजा ह यहूदा म कुछू मनखेमन ला छोंड़ दे हवय अऊ ओमन ऊपर अहीकाम के बेटा अऊ सापान के पोता गदलयाह ला राजपाल ठहिराय हवय,
JER 40:12 त तितिर-बितिर होके रहइया ओ जम्मो देस ले जम्मो यहूदीमन लहुंटके यहूदा देस के मिसपा नगर म गदलयाह करा आईन। अऊ अब्बड़ अकन अंगूर के मंद अऊ घाम महिना के फर उपजाईन।
JER 40:13 तब कारेह के बेटा योहानान अऊ अभी घलो खुला देहात म रहइया जम्मो सेना के अधिकारीमन मिसपा म गदलयाह करा आईन
JER 40:14 अऊ ओला कहिन, “का तेंह नइं जानत हस कि अमोनीमन के राजा बालीस ह नतनयाह के बेटा इसमायल ला तोला मार डारे बर पठोय हवय?” पर अहीकाम के बेटा गदलयाह ह ओमन के बात के बिसवास नइं करिस।
JER 40:15 तब कारेह के बेटा योहानान ह गदलयाह ला मिसपा म चुपेचाप कहिस, “मोला जाके नतनयाह के बेटा इसमायल ला मार डारन दे, अऊ कोनो ये बात ला नइं जानही। ओह काबर तोर परान लेवय अऊ तोर चारों कोति जूरे जम्मो यहूदीमन तितिर-बितिर हो जावंय अऊ यहूदा के बांचे मनखेमन काबर नास हो जावंय?”
JER 40:16 पर अहीकाम के बेटा गदलयाह ह कारेह के बेटा योहानान ला कहिस, “अइसने काम झन कर! तेंह जऊन बात, इसमायल के बारे म कहत हस, ओह सच नो हय।”
JER 41:1 ओ साल के सातवां महिना म अइसने होईस कि नतनयाह के बेटा अऊ एलीसामा के पोता इसमायल, जऊन ह राजबंस के रिहिस अऊ राजा के अधिकारीमन ले एक झन रिहिस; ओह दस झन मनखे ला संग म लेके अहीकाम के बेटा गदलयाह करा मिसपा म आईस। जब ओमन उहां एक संग जेवन करत रिहिन,
JER 41:2 तब नतनयाह के बेटा इसमायल अऊ ओकर संग के दस झन उठिन अऊ अहीकाम के बेटा अऊ सापान के पोता गदलयाह ला तलवार ले मार डारिन, जेला बेबिलोन के राजा ह देस के राजपाल ठहिराय रिहिस।
JER 41:3 इसमायल ह गदलयाह के संग जतेक यहूदी मिसपा म रिहिन, ओ जम्मो ला मार डारिस, संगे-संग ओह बेबिलोन के ओ सैनिकमन ला घलो मार डारिस, जऊन मन उहां रिहिन।
JER 41:4 गदलयाह के मार डारे जाय के दूसर दिन, ये बात ला कोनो मनखे के जाने के पहिली,
JER 41:5 सकेम, सीलो अऊ सामरिया सहर ले अस्सी मनखे दाढ़ी मुड़ाके, अपन कपड़ा चीरके अऊ अपन देहें म चोट लगाके संग म अन्न-बलिदान अऊ धूप लेके यहोवा के घर म आईन।
JER 41:6 तब नतनयाह के बेटा इसमायल ह ओमन ले मिले बर मिसपा ले बाहिर निकलिस, अऊ ओह जावत बेरा रोवत रिहिस। जब ओह ओमन ले मिलिस, त कहिस, “अहीकाम के बेटा गदलयाह करा चलव।”
JER 41:7 जब ओमन नगर म आईन, त नतनयाह के बेटा इसमायल अऊ ओकर संग के मनखेमन ओमन ला मार डारिन अऊ ओमन ला एक कुआं म फटिक दीन।
JER 41:8 पर ओमन ले बांचे दस झन इसमायल ला कहिन, “हमर हतिया झन कर! हमर करा गहूं, जौ, जैतून तेल अऊ मंधरस हवय, जेला हमन एक ठन खेत म छिपा दे हन।” एकरसेति इसमायल ह ओमन ला छोंड़ दीस अऊ आने मन के संग ओमन ला नइं मारिस।
JER 41:9 जऊन कुआं म इसमायल ह मनखेमन ला मारके ओमन के जम्मो लास अऊ संग म गदलयाह के लास ला घलो फटिक देय रिहिस, ओ कुआं ला राजा आसा ह इसरायल के राजा बासा के बिरूध सुरकछा के एक भाग के रूप म खनवाय रिहिस। ओ कुआं ला नतनयाह के बेटा इसमायल ह लासमन ले भर दीस।
JER 41:10 तब इसमायल ह मिसपा म बांचे जम्मो मनखेमन ला बंदी बना लीस—ओमा राजा के बेटीमन अऊ उहां छोंड़ दिये गय ओ जम्मो मनखे रिहिन, जेमन के ऊपर महाराजा के पहरेदारमन के सेनापति नबूजरदान ह अहीकाम के बेटा गदलयाह ला राजपाल ठहिराय रिहिस। ओ जम्मो ला नतनयाह के बेटा इसमायल ह बंदी बना लीस अऊ अमोनीमन करा जाय बर निकलिस।
JER 41:11 जब कारेह के बेटा योहानान अऊ ओकर संग के सेना के जम्मो अधिकारीमन नतनयाह के बेटा इसमायल के जम्मो अपराध के बारे म सुनिन,
JER 41:12 त ओमन अपन जम्मो मनखेमन ला लीन अऊ नतनयाह के बेटा इसमायल ले लड़े बर गीन। अऊ ओमन ओला गिबोन के बड़े तरिया करा पाईन।
JER 41:13 जब कारेह के बेटा योहानान अऊ ओकर संग के सेना के जम्मो अधिकारीमन ला, इसमायल के संग के जम्मो मनखेमन देखिन, त ओमन खुस होईन।
JER 41:14 ओ जम्मो मनखे, जेमन ला इसमायल ह मिसपा ले बंदी बनाके लानत रिहिस, ओ जम्मो झन पलटके कारेह के बेटा योहानान करा चल दीन।
JER 41:15 पर नतनयाह के बेटा इसमायल अऊ ओकर आठ झन मनखे योहानान के हांथ ले बांचके अमोनीमन करा भाग गीन।
JER 41:16 तब कारेह के बेटा योहानान अऊ ओकर संग के सेना के जम्मो अधिकारीमन मिसपा के बांचे ओ जम्मो मनखेमन ला लेके चल दीन, जेमन ला योहानान ह नतनयाह के बेटा इसमायल के हांथ ले बंचाय रिहिस, जब इसमायल ह अहीकाम के बेटा गदलयाह के हतिया कर दे रिहिस—ओमा गिबोन म बंचाय सैनिक, माईलोगन, लइका अऊ अदालत के करमचारीमन रिहिन।
JER 41:17 ओमन मिसर देस जाय बर चलत गीन, पर ओमन बेबिलोनीमन ले बचे बर बैतलहम के लकठा म गेरूत-किमहाम करा रूक गीन।
JER 41:18 ओमन बेबिलोन के मनखेमन ले डरत रिहिन, काबरकि नतनयाह के बेटा इसमायल ह अहीकाम के बेटा गदलयाह ला मार डारे रिहिस, जेला बेबिलोन के राजा ह देस के ऊपर राजपाल ठहिराय रिहिस।
JER 42:1 तब कारेह के बेटा योहानान, होसायाह के बेटा याजनयाह अऊ आने जम्मो सैनिक अधिकारीमन, अऊ छोटे ले लेके बड़े परभावसाली जम्मो मनखेमन
JER 42:2 यरमियाह अगमजानी करा आके ओला कहिन, “हमर बिनती ला सुन अऊ यहोवा अपन परमेसर ले ये जम्मो बांचे मनखेमन बर पराथना कर। काबरकि जइसे कि अब तेंह देखत हस, हालाकि एक समय म हमन अब्बड़ झन रहेंन, पर अब थोरकन झन बांचे हन।
JER 42:3 पराथना कर कि यहोवा तोर परमेसर ह हमन ला बतावय कि हमन कहां जावन अऊ का करन?”
JER 42:4 यरमियाह अगमजानी ह ओमन ला कहिस, “मेंह तुम्हर बात ला सुन ले हंव; तुम्हर बिनती के मुताबिक जरूर, मेंह यहोवा तुम्हर परमेसर ले पराथना करहूं; अऊ जऊन कुछू भी यहोवा ह कहिथे, ओ जम्मो बात मेंह तुमन ला बताहूं अऊ मेंह तुमन ले कोनो बात नइं छुपावंव।”
JER 42:5 तब ओमन यरमियाह ले कहिन, “यदि यहोवा तोर परमेसर ह तोर दुवारा हमन ला कुछू कहिथे अऊ हमन ओकर मुताबिक नइं करबो, त यहोवा ह हमर बिरूध सच्चा अऊ बिसवासयोग्य गवाह ठहिरय।
JER 42:6 चाहे ओह हमर हित म होवय या अहित म, हमन यहोवा हमर परमेसर के बात ला मानबो, जेकर करा हमन तोला पठोवत हन, ताकि हमर संग भलई होवय, काबरकि हमन यहोवा हमर परमेसर के बात ला मानबो।”
JER 42:7 दस दिन के बाद, यहोवा के बचन यरमियाह करा आईस।
JER 42:8 तब ओह कारेह के बेटा योहानान अऊ ओकर संग के आने जम्मो सैनिक अधिकारी अऊ छोटे ले लेके बड़े जम्मो मनखेमन ला एक संग बलाईस,
JER 42:9 अऊ ओह ओमन ला कहिस, “यहोवा, इसरायल के परमेसर, जेकर करा तुमन मोला अपन बिनती करे बर पठोय रहेव, ओह ये कहत हे:
JER 42:10 ‘यदि तुमन ये देस म रहिहू, त मेंह तुमन ला बनाहूं, नास नइं करंव, तुमन ला बसाहूं, उसालंव नइं, काबरकि जऊन बिपत्ति मेंह तुम्हर ऊपर लाने हवंव, ओकर बारे म मेंह नरम पड़त हंव।
JER 42:11 बेबिलोन के राजा ले तुमन झन डरव, जेकर ले अभी तुमन डरत हव। ओकर ले झन डरव, यहोवा ह घोसना करत हे, काबरकि मेंह तुम्हर संग हवंव अऊ तुमन ला बचाहूं अऊ तुमन ला ओकर हांथ ले छोंड़ाहू।
JER 42:12 मेंह तुम्हर ऊपर दया करहूं, त ओह घलो तुम्हर ऊपर दया करही अऊ तुमन ला तुम्हर देस म फेर बसा दीही।’
JER 42:13 “तभो ले यदि तुमन ये कहव, ‘हमन ये देस म नइं रहन,’ अऊ ये किसम ले यहोवा अपन परमेसर के बात ला नइं मानव,
JER 42:14 अऊ यदि तुमन कहव, ‘नइं, हमन तो मिसर देस जाके उहां रहिबो, जिहां हमन न तो लड़ई देखबो, न ही तुरही के अवाज सुनबो अऊ न ही हमन ला जेवन के कमी होही,’
JER 42:15 त फेर हे बांचे यहूदीमन, यहोवा के बचन ला सुनव। सर्वसक्तिमान यहोवा, इसरायल के परमेसर ह ये कहत हे: ‘यदि तुमन मिसर देस जाय बर ठान ले हव अऊ उहां जाके रहे बर चाहत हव,
JER 42:16 त फेर अइसने होही कि जऊन तलवार ले तुमन डरत हव, ओही ह उहां तुम्हर ऊपर आ जाही, अऊ जऊन अकाल के डर तुमन ला हवय, ओह मिसर म तुम्हर पीछा नइं छोंड़ही, अऊ उहां तुमन मर जाहू।
JER 42:17 वास्तव म, ओ जम्मो मनखे, जऊन मन मिसर देस जाके उहां रहे के ठान ले हवंय, ओमन तलवार, अकाल अऊ महामारी ले मरहीं; जऊन बिपत्ति मेंह ओमन ऊपर लानहूं, ओमा ले एको झन घलो नइं बांचहीं।’
JER 42:18 सर्वसक्तिमान यहोवा, इसरायल के परमेसर ह ये कहत हे: ‘जइसने मोर गुस्सा अऊ कोप ह ओमन ऊपर भड़किस, जऊन मन यरूसलेम म रहत रिहिन, वइसने ही मोर कोप ह तुमन ऊपर भड़कही, जऊन मन मिसर देस जाहू। तुमन एक सराप के पात्र, बहुंत घिन करे के, एक सराप के पात्र अऊ निन्दा करे के चीज होहू; तुमन ये जगह ला फेर कभू नइं देखहू।’
JER 42:19 “हे यहूदा के बांचे मनखेमन, यहोवा ह तुमन ला कहे हवय, ‘मिसर देस झन जावव।’ येला जरूर जान लव: मेंह आज तुमन ला चेतावत हंव
JER 42:20 काबरकि तुमन एक बड़े गलती करेव, जब तुमन मोला ये कहिके यहोवा अपन परमेसर करा पठोय रहेव, ‘हमर बर यहोवा हमर परमेसर ले पराथना कर; अऊ जऊन कुछू ओह कहिथे, ओ जम्मो बात हमन ला बता अऊ हमन वइसने करबो।’
JER 42:21 मेंह आज तुमन ला बता चुके हंव, पर जऊन कुछू यहोवा तुम्हर परमेसर ह तुमन ला कहे बर मोला पठोय हवय, ओला तुमन नइं माने हव।
JER 42:22 एकरसेति अब, तुमन ये जरूर जान लव: जऊन जगह म जाके तुमन रहे चाहत हव, उहां तुमन तलवार, अकाल अऊ महामारी ले मारे जाहू।”
JER 43:1 जब यरमियाह ह मनखेमन ला ओमन के परमेसर यहोवा के ओ जम्मो बात कह चुकिस, जेला कहे बर यहोवा ह ओला ओमन करा पठोय रिहिस,
JER 43:2 तब होसायाह के बेटा अजरयाह अऊ कारेह के बेटा योहानान अऊ जम्मो घमंडी मनखेमन यरमियाह ला कहिन, “तेंह झूठ बोलत हस! यहोवा हमर परमेसर ह तोला ये कहे बर नइं पठोय हवय, ‘तुमन मिसर देस म रहे बर झन जावव।’
JER 43:3 पर नेरियाह के बेटा बारूक ह तोला हमर बिरूध म उकसावत हे कि हमन बेबिलोन के मनखेमन के हांथ म कर दिये जावन, ताकि ओमन हमन ला मार डारंय या हमन ला बंदी बनाके बेबिलोन ले जावंय।”
JER 43:4 एकरसेति कारेह के बेटा योहानान अऊ सेना के जम्मो अधिकारी अऊ जम्मो मनखेमन यहोवा के ये हुकूम ला नइं मानिन कि ओमन यहूदा के देस म ही रहंय।
JER 43:5 येकर बदले कारेह के बेटा योहानान अऊ सेना के जम्मो अधिकारीमन यहूदा के बांचे ओ जम्मो मनखेमन ला ले गीन, जऊन मन पहिली आनजात के बीच म बगर गे रिहिन, पर बाद म लहुंटके आईन अऊ यहूदा देस म रहत रिहिन।
JER 43:6 ओमन ओ जम्मो मनखे, माईलोगन, लइका अऊ राजा के बेटीमन ला घलो ले गीन, जेमन ला महाराजा के पहरेदारमन के सेनापति नबूजरदान ह अहीकाम के बेटा अऊ सापान के पोता गदलयाह संग छोंड़ दे रिहिस। अऊ ओमन यरमियाह अगमजानी अऊ नेरियाह के बेटा बारूक ला घलो अपन संग म ले गीन,
JER 43:7 अऊ ओमन यहोवा के हुकूम ला नइं मानके मिसर देस म तहपनहेस नगर तक चल दीन।
JER 43:8 तब तहपनहेस म, यहोवा के ये बचन यरमियाह करा आईस:
JER 43:9 “यहूदीमन के देखत म, कुछू बड़े पथरामन ला ले अऊ ओ पथरामन ला ईंटा के बने पैदल चले के ओ रसता म माटी म गाड़ दे, जऊन ह तहपनहेस म फिरौन के महल के प्रवेस दुवार करा हवय,
JER 43:10 अऊ तब यहूदीमन ला कह, ‘सर्वसक्तिमान यहोवा, इसरायल के परमेसर ह ये कहत हे: देखव, मेंह अपन सेवक बेबिलोन के राजा नबूकदनेसर ला बुलवाहूं, अऊ मेंह ओकर सिंघासन ला ये पथरामन के ऊपर म लगाहूं, जऊन ला मेंह इहां गाड़े हंव; अऊ ओह अपन राज-मंडप ला ओमन ऊपर तानही।
JER 43:11 ओह आही अऊ मिसर देस ऊपर हमला करही, अऊ जेमन ला मरना होही, ओमन मारे जाहीं, जेमन ला बंधुवई म जाना होही, ओमन बंधुवई म जाहीं, अऊ जेमन ला तलवार ले मरना होही, ओमन तलवार ले मारे जाहीं।
JER 43:12 ओह मिसर देस के देवतामन के मंदिर म आगी लगा दीही; ओह ओमन के मंदिरमन ला जला दीही अऊ ओमन के देवतामन ला बंधुवई म ले जाही। जइसने एक चरवाहा ह अपन ओनहा ला जूहां ले साफ करके धरथे, वइसने ही ओह मिसर देस ला साफ करके चले जाही।
JER 43:13 उहां मिसर देस के सूरज के मंदिर म, ओह पबितर खंभामन ला गिरा दीही अऊ मिसर के देवतामन के मंदिरमन म आगी लगाके जला दीही।’ ”
JER 44:1 मिसर देस के खाल्हे भाग—मिगदोल, तहपनहेस अऊ मेमफीस नगर—अऊ ऊपरी मिसर देस म जऊन यहूदीमन रहत रिहिन, ओ जम्मो के बारे म यरमियाह करा ये बचन आईस:
JER 44:2 “सर्वसक्तिमान यहोवा, इसरायल के परमेसर ह ये कहत हे: तुमन ओ बड़े बिपत्ति ला देखेव, जेला मेंह यरूसलेम अऊ यहूदा के जम्मो नगरमन म लानेंव। आज ओमन निरजन अऊ खंडहर हो गे हवंय
JER 44:3 काबरकि ओमन दुस्टता के काम करिन। ओमन मोर गुस्सा भड़काय बर आने देवतामन के आघू म धूप जलाईन अऊ ओमन के अराधना करिन, जेमन ला न तो ओमन, न ही तुमन अऊ न ही तुम्हर पुरखामन जानत रिहिन।
JER 44:4 बार-बार मेंह अपन सेवक अगमजानीमन ला ये कहे बर ओमन करा पठोंय, ‘ये घिनित काम झन करव, जेकर ले मेंह घिन करथंव!’
JER 44:5 पर ओमन नइं सुनिन अऊ धियान नइं दीन; ओमन अपन दुस्टता के काम ला नइं छोंड़िन या आने देवतामन के आघू म धूप जलाय बर बंद नइं करिन।
JER 44:6 ये खातिर मोर भयंकर कोरोध ह यहूदा के नगरमन म अऊ यरूसलेम के गलीमन म भड़किस अऊ ओमन ला उजाड़के नास कर दीस, जइसने कि ओमन आज हवंय।
JER 44:7 “अब यहोवा सर्वसक्तिमान परमेसर, इसरायल के परमेसर ह ये कहत हे: मनखे, माईलोगन, लइका अऊ दूध पीयत लइका, तुमन जम्मो के जम्मो यहूदा ले अलग होके काबर अइसने भयंकर बिपत्ति अपन ऊपर लानत हव, अऊ ये किसम ले तुम्हर कोनो बंस नइं बचही?
JER 44:8 मिसर देस, जिहां तुमन रहे बर आय हवव, काबर इहां तुमन अपन काम के दुवारा, याने कि आने देवतामन बर धूप जलाके मोर गुस्सा ला भड़कावत हव? तुमन अपनआप ला नास कर डारहू अऊ धरती म जम्मो जातिमन के बीच म अपनआप ला सरापित अऊ एक कलंक के पात्र बनाहू।
JER 44:9 का तुमन ओ दुस्टता के काममन ला भुला गे हव, जेला तुम्हर पुरखामन अऊ यहूदा के राजा अऊ रानीमन करे रिहिन, अऊ ओ दुस्टता के काम, जेला तुमन अऊ तुम्हर घरवालीमन यहूदा देस अऊ यरूसलेम के गलीमन म करत रिहिन?
JER 44:10 आज के दिन तक ओमन अपनआप ला नम्र नइं करे हवंय या आदर नइं देखावत हें, अऊ न ही ओमन ओ कानून अऊ बिधिमन ऊपर चलत हवंय, जेला मेंह तुम्हर अऊ तुम्हर पुरखामन बर ठहिराय हंव।
JER 44:11 “एकरसेति सर्वसक्तिमान यहोवा, इसरायल के परमेसर ह ये कहत हे: मेंह ठान ले हंव कि मेंह तुम्हर ऊपर बिपत्ति लानहूं अऊ जम्मो यहूदा ला नास कर दूहूं।
JER 44:12 मेंह यहूदा के ओ बांचे मनखेमन ला ले लूहूं, जऊन मन मिसर देस जाके उहां रहे बर ठान ले रिहिन। ओ जम्मो झन मिसर देस म नास हो जाहीं; ओमन तलवार ले मारे जाहीं या फेर अकाल के कारन मर जाहीं। छोटे ले लेके बड़े तक, ओमन जम्मो के जम्मो तलवार या अकाल ले मारे जाहीं। ओमन सरापित अऊ बहुंत घिन के पात्र हो जाहीं, एक सराप अऊ कलंक के पात्र।
JER 44:13 जइसने मेंह यरूसलेम ला दंड देय रहेंव, वइसने ही मेंह ओमन ला तलवार, अकाल अऊ महामारी ले दंड दूहूं, जेमन मिसर देस म रहत हवंय।
JER 44:14 यहूदा के ओ बांचे मनखे, जऊन मन मिसर देस म रहे बर गे हवंय, ओमा के कोनो घलो यहूदा देस ला लहुंटे बर नइं बांचहीं, जिहां ओमन लहुंटके आके रहे के ईछा करथें; सिरिप कुछू भगोड़ामन के छोंड़ एको झन भी लहुंटन नइं पाहीं।”
JER 44:15 तब ओ जम्मो यहूदी, जऊन मन जानत रिहिन कि ओमन के घरवालीमन आने देवतामन बर धूप जलाथें, अऊ ओ जम्मो माईलोगन, जऊन मन उहां रिहिन—एक बड़े सभा—अऊ ओ जम्मो मनखे, जऊन मन खाल्हे अऊ ऊपरी मिसर म रहत रिहिन, ओ जम्मो यरमियाह ला कहिन,
JER 44:16 “जऊन बचन तेंह हमन ला यहोवा के नांव म कहे हवस, ओला हमन नइं सुनन!
JER 44:17 हमन ओ हर एक काम ला जरूर करबो, जेला हमन कहे हवन कि हमन करबो: हमन स्वरग के रानी नांव के देवी बर धूप जलाबो अऊ ओला पेय-बलिदान चघाबो जइसने कि हमन अऊ हमर पुरखामन, हमर राजामन अऊ हमर करमचारीमन यहूदा के नगरमन म अऊ यरूसलेम के गलीमन म करत रिहिन। ओ बेरा हमर करा बहुंत जेवन रिहिस अऊ बने रहत रहेंन अऊ हमर कुछू नुकसान नइं होवत रिहिस।
JER 44:18 पर जब ले हमन स्वरग के रानी बर धूप जलाना अऊ ओकर बर पेय-बलिदान चघाना बंद कर दे हवन, तब ले हमर करा कुछू नइं ए अऊ हमन तलवार अऊ अकाल ले नास होवत हन।”
JER 44:19 माईलोगनमन ये घलो कहिन, “जब हमन स्वरग के रानी बर धूप जलात रहेंन अऊ ओला पेय-बलिदान चघावत रहेंन, त का हमर घरवालामन के बिगर जानत हमन स्वरग के रानी के मूरती के परभाव म होके रोटी बनात रहेंन अऊ ओला पेय-बलिदान चघावत रहेंन?”
JER 44:20 तब यरमियाह ह आदमी अऊ माईलोगन, जऊन मन ओला जबाब देवत रिहिन, ओ जम्मो मनखे ला कहिस,
JER 44:21 “तुमन अऊ तुम्हर पुरखामन, तुम्हर राजामन अऊ तुम्हर करमचारीमन अऊ देस के मनखेमन यहूदा देस के नगरमन म अऊ यरूसलेम के गलीमन म जऊन धूप जलावत रिहिन, का ओला यहोवा ह सुरता नइं करिस अऊ ओ बात ह ओकर धियान म नइं आईस?
JER 44:22 जब यहोवा ह तुम्हर दुस्ट अऊ घिनित काममन ला सहन नइं कर सकिस, त तुम्हर देस ह सरापित हो गीस अऊ येह उजड़के निरजन हो गीस, जइसने कि येह आज हवय।
JER 44:23 काबरकि तुमन धूप जलाय हव अऊ यहोवा के बिरूध म पाप करे हव अऊ ओकर बात ला नइं माने हव या ओकर कानून या बिधि या ओकर सर्त के पालन नइं करे हव, येकर खातिर ये बिपत्ति ह तुम्हर ऊपर पड़े हवय, जइसने कि तुमन अब देखत हव।”
JER 44:24 तब यरमियाह ह जम्मो मनखे अऊ माईलोगनमन ला कहिस, “हे मिसर देस म रहइया यहूदा के जम्मो मनखेमन, यहोवा के बचन ला सुनव।
JER 44:25 सर्वसक्तिमान यहोवा, इसरायल के परमेसर ह ये कहत हे: तुमन अऊ तुम्हर घरवालीमन ओ काम ला करे हवव, जेला करे के तुमन वायदा करे रहेव, ‘स्वरग के रानी बर धूप जलाय अऊ ओला पेय-बलिदान चघाय के जऊन वायदा हमन करे हवन, ओला हमन जरूर पूरा करबो।’ “तब तुमन जावव, अपन वायदा के मुताबिक करव! अपन सपथ ला पूरा करव!
JER 44:26 पर हे मिसर देस म रहइया जम्मो यहूदीमन, तुमन यहोवा के बचन ला सुनव: ‘मेंह अपन बड़े नांव के किरिया खावत हंव,’ यहोवा ह कहत हे, ‘मिसर देस म कहीं भी रहइया कोनो भी यहूदी फेर कभू मोर नांव नइं लीहीं या ये किरिया नइं खाहीं, “परमपरधान यहोवा के जिनगी के कसम।”
JER 44:27 काबरकि मेंह ओमन के भलई नइं, पर नुकसान करे के फिराक म हवंव; मिसर देस म रहइया यहूदीमन तलवार अऊ अकाल के दुवारा मारे जाहीं, जब तक कि ओमन के पूरा सतियानास नइं हो जाही।
JER 44:28 जऊन मन तलवार ले बांचके मिसर देस ले लहुंटके यहूदा देस म आहीं, ओमन बहुंत थोरकन ही होहीं। तब मिसर देस म रहे बर आय यहूदा के बांचे ओ जम्मो मनखेमन जान लीहीं कि काकर बात ह सच होही—मोर या ओमन के।
JER 44:29 “ ‘तुम्हर बर ये चिनहां होही कि मेंह तुमन ला ये जगह म सजा दूहूं,’ यहोवा ह घोसना करत हे, ‘ताकि तुमन जान लूहू कि तुम्हर नुकसान करे के मोर धमकी ह सही म सच होही।’
JER 44:30 यहोवा ह ये कहत हे: ‘जइसने मेंह यहूदा के राजा सिदकियाह ला ओकर बईरी बेबिलोन के राजा नबूकदनेसर के हांथ म कर दे रहेंव, जऊन ह ओला मार डारे चाहत रिहिस, वइसने ही मेंह मिसर के राजा फिरौन होपरा ला ओकर बईरीमन के हांथ म कर दूहूं, जऊन मन ओला मार डारे चाहत हें।’ ”
JER 45:1 योसियाह के बेटा यहूदा के राजा यहोयाकीम के राज के चौथा साल म, जब नेरियाह के बेटा बारूक ह यरमियाह अगमजानी के कहे बातमन ला किताब म लिख लीस, त यरमियाह ह बारूक ला ये कहिस:
JER 45:2 “हे बारूक, यहोवा, इसरायल के परमेसर ह तोला ये कहत हे:
JER 45:3 तेंह कहय, ‘हाय मोर ऊपर! यहोवा ह मोर दुख म अऊ दुख दे हवय; मेंह कराहत-कराहत टूट गे हंव अऊ मोला कुछू अराम नइं ए।’
JER 45:4 पर यहोवा ह मोला कहे हवय कि मेंह तोला कहंव, ‘यहोवा ह ये कहत हे: पूरा देस म, जेमन ला मेंह बनाय हंव, ओमन ला गिरा दूहूं अऊ जेमन ला मेंह लगाय हंव, ओमन ला उखान दूहूं।
JER 45:5 त फेर का तें अपन बर बड़े चीजमन के खोज म रहिबे? ओमन के खोज म झन रह। काबरकि मेंह जम्मो मनखे ऊपर बिपत्ति लानहूं, यहोवा ह घोसना करत हे, पर जिहां कहीं भी तेंह जाबे, मेंह तोर परान ला बचाहूं।’ ”
JER 46:1 जाति-जाति के मनखेमन के बारे म, यहोवा के ये बचन यरमियाह अगमजानी करा आईस:
JER 46:2 मिसर के बिसय: येह मिसर के राजा फिरौन नको के सेना के बिरूध म संदेस ए, जेला बेबिलोन के राजा नबूकदनेसर ह योसियाह के बेटा यहूदा के राजा यहोयाकीम के राज के चौथा साल म फरात नदी करा कर्कमीस सहर म हराईस:
JER 46:3 “अपन बड़े अऊ छोटे दूनों ढालमन ला तियार करव, अऊ लड़ई बर आघू बढ़व।
JER 46:4 घोड़ामन ला तियार करव, बने घोड़ामन ऊपर सवार होवव! टोपा पहिरके अपन जगह म ठाढ़ हो जावव! भालामन ला धार करव, अपन हथियारमन ला बांध लव!
JER 46:5 मेंह का देखत हंव? ओमन डर गे हवंय, ओमन पाछू हटत हें, ओमन के सैनिकमन हारत हें। ओमन बिगर पाछू देखे जल्दबाजी म भागत हें, अऊ चारों कोति आतंक छा गे हवय,” यहोवा ह घोसना करत हे।
JER 46:6 “तेज भागनेवाला ह भाग नइं सकय न ही बलवान मनखे ह बच सकय। उत्तर दिग म, फरात नदी के तीर म ओमन ठोकर खाथें अऊ गिर जाथें।
JER 46:7 “येह कोन ए, जऊन ह नील नदी सहीं, उमड़त पानी के नदीमन सहीं बढ़त हे?
JER 46:8 मिसर देस ह नील नदी सहीं, उमड़त पानी के नदीमन सहीं बढ़त हे। ओह कहिथे, ‘मेंह बढ़हूं अऊ धरती ऊपर छा जाहूं; मेंह सहरमन ला ओमन म रहइया मनखेमन सहित नास कर दूहूं।’
JER 46:9 हे घुड़सवारमन, हमला करव! हे सारथीमन, तेजी से रथ चलावव! हे ढाल धरइया कूस अऊ पूत के सैनिकमन, हे धनुसधारी लूदी के सैनिकमन, आघू बढ़व।
JER 46:10 पर ओ दिन ह परभू, सर्वसक्तिमान यहोवा के अय— एक बदला लेय के दिन, जेमा ओह ओकर बिरूध लड़त बईरीमन ले बदला लीही। तलवार ह अपन संतोस होवत तक, अऊ खून ले अपन पीयास बुझावत तक मनखेमन ला मारही। काबरकि उत्तर के देस म फरात नदी के तीर म, परभू, सर्वसक्तिमान यहोवा ह बलिदान करही।
JER 46:11 “हे कुंवारी बेटी मिसर, गिलाद ला जाके मलहम लेय ले। तेंह फालतू म कतको किसम के दवाई लेथस; ओमा तेंह बने नइं होवस।
JER 46:12 जाति-जाति के मनखेमन तोर बेजत्ती के बारे म सुनहीं; तोर रोवई ह धरती म जम्मो कोति सुनई दीही। एक सैनिक ह दूसर सैनिक ऊपर ठोकर खाही; अऊ ओ दूनों एक संग गिरहीं।”
JER 46:13 बेबिलोन के राजा नबूकदनेसर के आय के अऊ मिसर देस ऊपर हमला करे के बारे म यहोवा ह यरमियाह अगमजानी ला ये बात कहिस:
JER 46:14 “मिसर देस म ये घोसना कर, अऊ मिगदोल सहर म ये बात के घोसना कर; मेमफीस अऊ तहपनहेस सहर म घलो ये बात के घोसना कर: ‘अपन जगह लेवव अऊ तियार हो जावव, काबरकि तुम्हर चारों कोति के मनखेमन तलवार ले मारे जाहीं।’
JER 46:15 तुम्हर सैनिकमन काबर नीचा करे जावंय? ओमन सामना नइं कर सकंय, काबरकि यहोवा ह ओमन ला नीचा देखाही।
JER 46:16 ओमन बार-बार ठोकर खाहीं; ओमन एक-दूसर ऊपर गिरहीं। ओमन कहिहीं, ‘उठव, हमन अतियाचार करइया के तलवार ले दूरिहा, अपन मनखेमन करा अऊ अपन जनम भुइयां म वापिस लहुंट जावन।’
JER 46:17 उहां ओमन चिचियाके कहिहीं, ‘मिसर के राजा फिरौन ह सिरिप एक भारी कोलाहल ए; ओह अपन मऊका ला गंवा दे हवय।’
JER 46:18 “राजा, जेकर नांव सर्वसक्तिमान यहोवा अय, ओह घोसना करत हे, मोर जिनगी के कसम, एक जन आही, जऊन ह पहाड़मन के बीच म ताबोर सहीं, अऊ समुंदर के तीर म करमेल सहीं अय।
JER 46:19 हे मिसर म रहइयामन, बंधुवई म जाय बर अपन सामानमन ला बांध लेवव, काबरकि मेमफीस ह उजाड़ हो जाही अऊ बिगर कोनो निवासी के बेकार हो जाही।
JER 46:20 “मिसर ह एक सुघर बछिया सहीं अय, पर उत्तर दिग ले ओकर बिरूध म पसुमन ला काटनेवाला एक कीरा आवत हे।
JER 46:21 ओकर संग के धन के लालची मनखेमन मोटा-ताजा बछवा सहीं अंय। ओमन घलो मुहूं मोड़के भागहीं, ओमन सामना नइं कर सकहीं, काबरकि ओमन के बिपत्ति के दिन, अऊ सजा पाय के बेरा ह आवत हे।
JER 46:22 मिसर देस ह भागत सांप के सहीं फुफकारही जइसे कि बईरी ह बल के संग आघू बढ़थे; ओमन ओकर बिरूध म टंगिया धरके आहीं, जइसने कि मनखेमन रूख ला काटे बर आथें।
JER 46:23 ओमन ओकर जंगल ला काट डारहीं,” यहोवा ह घोसना करत हे, “हालाकि ओह घना जंगल होही। ओमन फांफामन ले घलो जादा संखिया म हवंय। ओमन के गनती नइं करे जा सकय।
JER 46:24 बेटी मिसर के बेजत्ती होही, ओला उत्तर दिग के मनखेमन के हांथ म दे दिये जाही।”
JER 46:25 सर्वसक्तिमान यहोवा, इसरायल के परमेसर ह कहत हे: “मेंह थेबेस के देवता आमोन, फिरौन, मिसर देस अऊ ओकर जम्मो देवता अऊ राजा, अऊ फिरौन ऊपर भरोसा करइयामन ला दंड देनेचवाला हंव।
JER 46:26 मेंह ओमन ला बेबिलोन के राजा नबूकदनेसर अऊ ओकर अधिकारीमन के हांथ म कर दूहूं, जऊन मन ओमन ला मार डारे चाहत हें। तभो ले बाद म, जब समय ह गुजरही, त मनखेमन ला फेर मिसर म बसाय जाही,” यहोवा ह घोसना करत हे।
JER 46:27 “हे मोर सेवक याकूब, झन डर; हे इसरायल, भयभीत झन हो। मेंह तोला दूरिहा जगह ले अऊ तोर संतानमन ला ओमन के बंधुवई के देस ले जरूर बचाहूं। याकूब ला फेर सांति अऊ सुरकछा मिलही, अऊ कोनो ओला नइं डराय सकहीं।
JER 46:28 हे मोर सेवक याकूब, झन डर, काबरकि मेंह तोर संग हवंव,” यहोवा ह घोसना करत हे। “हालाकि मेंह ओ जम्मो जाति के मनखेमन ला पूरा नास कर दूहूं, जेमन के बीच म मेंह तुमन ला तितिर-बितिर कर दे हवंव, पर मेंह तुमन ला पूरा नास नइं करंव। मेंह तुमन ला सजा दूहूं, पर सिरिप एक सीमना के भीतर; मेंह तुमन ला बिगर सजा के पूरा नइं छोंड़ दंव।”
JER 47:1 फिरौन दुवारा गाजा सहर ऊपर हमला करे के पहिली, यरमियाह अगमजानी करा पलिस्तीमन के बारे म यहोवा के ये बचन आईस:
JER 47:2 यहोवा ह ये कहत हे: “देख, उत्तर दिग म पानी ह कइसे बढ़त हे; ओह उछरत बोहाय लगही। ओह देस अऊ ओमा के जम्मो चीज ला डुबो दीही, नगरमन ला अऊ ओमा रहइया जम्मो झन ला डुबो दीही। मनखेमन चिचियाहीं; देस म रहइया जम्मो झन बिलाप करहीं
JER 47:3 सरपट भागत मजबूत घोड़ामन के खुर के अवाज सुनके, बईरी के रथमन के अवाज सुनके अऊ ओमन के चक्का के गड़गड़ाहट के अवाज सुनके। दाई-ददामन अपन लइकामन के मदद करे बर नइं मुड़हीं; ओमन के हांथमन अपंग हो जाहीं।
JER 47:4 काबरकि जम्मो पलिस्तीमन ला नास करे के अऊ ओ जम्मो बांचे मनखे जऊन मन सूर अऊ सीदोन सहर के मदद कर सकत रिहिन, ओमन ला हटाय के दिन आ गे हवय। काबरकि यहोवा ह कपतोर के समुंदर तीर के बांचे पलिस्तीमन ला नास करनेचवाला हे।
JER 47:5 गाजा सहर के मनखेमन सोक म अपन मुड़ मुड़ाहीं; अस्कलोन के मनखेमन ला चुप करा दिये जाही। हे समतल जगह म बांचे मनखेमन, तुमन कब तक अपनआप ला चीरत रहिहू?
JER 47:6 “ ‘आह, हे यहोवा के तलवार, तेंह कब सांत होबे? अपन मियान म लहुंट जा; सांत हो अऊ थम जा।’
JER 47:7 पर येह कइसे सांत हो सकथे जब यहोवा ह येला हुकूम दे हवय, जब ओह अस्कलोन अऊ समुंदर तीर ऊपर हमला करे के हुकूम दे हवय?”
JER 48:1 मोआब देस के बारे म: सर्वसक्तिमान यहोवा, इसरायल के परमेसर ह ये कहत हे: “नबो ऊपर हाय, काबरकि येह नास हो जाही। किरयातैम ह कलंकित होही अऊ ओकर ऊपर कब्जा कर लिये जाही; मजबूत गढ़ ह कलंकित होही अऊ बिखर जाही।
JER 48:2 अब मोआब के परसंसा नइं होही; हेसबोन सहर म मनखेमन ओकर नुकसान करे के योजना बनाहीं: ‘आवव, हमन ओ देस के अन्त कर देवन।’ हे मदमेन के मनखेमन, तुमन ला घलो सांत कर दिये जाही; तलवार ह तुम्हर पीछा करही।
JER 48:3 होरोनैम ले दुख के कारन रोये के अवाज आही, बड़े बिनास अऊ दुख के अवाज सुनई दीही।
JER 48:4 मोआब के सतियानास हो जाही; ओकर छोटे लइकामन चिचियाहीं।
JER 48:5 ओमन लूहीत करा पहाड़ी ऊपर चघहीं, अऊ ओमन अब्बड़ रोवत ऊपर जाहीं; होरोनैम के खाल्हे के रसता म बिनास के कारन दुख के चिचियाहट सुनई देवत हे।
JER 48:6 भागव! अपन परान बचाय बर भागव; सुनसान जगह म एक झाड़ी के सहीं हो जावव।
JER 48:7 काबरकि तुमन अपन काम अऊ धन ऊपर भरोसा रखथव, ये खातिर तुमन ला घलो बंदी बना लिये जाही, कमोस देवता ह अपन पुरोहितमन अऊ अधिकारीमन के संग बंधुवई म जाही।
JER 48:8 बिनास करइया ह हर एक नगर ऊपर चढ़ई करही, अऊ कोनो नगर नइं बांचही। घाटी ह नास हो जाही अऊ पहाड़ी ह सतियानास हो जाही, काबरकि यहोवा ह कहे हवय।
JER 48:9 मोआब के ऊपर नून डाल दे, काबरकि ओह उजाड़ हो जाही; ओकर नगरमन निरजन हो जाहीं, ओमन म कोनो नइं रहिहीं।
JER 48:10 “सरापित होवय ओह, जऊन ह यहोवा के काम ला अलाली म करथे! सरापित होवय ओह, जऊन ह अपन तलवार ला खून बहाय ले रोकथे!
JER 48:11 “जइसने अंगूर के मंद ह एक बरतन ले दूसर बरतन म ढारे नइं जाय ले ओह लद्दी होके खाल्हे म जमके अराम से रहिथे, वइसने मोआब ह जवानी ले अराम से रहत हवय, ओह बंधुवई म नइं गे हवय। एकरसेति ओकर सुवाद ह जस के तस हवय, अऊ ओकर खुसबू ह नइं बदले हवय।
JER 48:12 पर समय आवत हे,” यहोवा ह घोसना करत हे, “जब मेंह मनखेमन ला पठोहूं, जऊन मन घघरीमन ले ढारथें, अऊ ओमन ओला ढार दीहीं; ओमन ओकर घघरीमन ला खाली कर दीहीं अऊ ओकर बरतनमन ला फोर दीहीं।
JER 48:13 तब मोआब के मनखेमन अपन कमोस देवता ले लज्जित होहीं, जइसने इसरायल के मनखेमन लज्जित होईन जब ओमन बेतेल ऊपर भरोसा करिन।
JER 48:14 “तुमन कइसे कह सकत हव, ‘हमन योद्धा, लड़ई म बीर मनखे अन’?
JER 48:15 मोआब ह नास करे जाही अऊ ओकर नगरमन ऊपर चढ़ई करे जाही; ओकर सबले बने जवानमन मारे जाय बर खाल्हे जाहीं,” राजा ह घोसना करत हे, जेकर नांव सर्वसक्तिमान यहोवा अय।
JER 48:16 “मोआब के गिरई ह लकठा म हवय; ओकर ऊपर संकट बहुंत जल्दी आही।
JER 48:17 ओकर आसपास के जम्मो रहइया, अऊ ओकर कीरति ला जाननेवाले जम्मो झन ओकर बर बिलाप करव; कहव, ‘सक्तिसाली राजदंड ह कइसे टूट गीस, महिमामय लउठी ह कइसे टूट गीस!’
JER 48:18 “हे दीबोन बेटी के रहइयामन, अपन महिमा ला छोंड़व अऊ सूखा भुइयां म बईठव, काबरकि जऊन ह मोआब ला नास करथे ओह तुम्हर बिरूध आही अऊ तुम्हर किलाबंदीवाले सहरमन ला नास कर दीही।
JER 48:19 हे अरोएर नगर के रहइयामन, सड़क-तीर म ठाढ़ होके देखव। जऊन मनखेमन भागत हें अऊ जऊन माईलोगनमन बचके निकलत हें, ओमन ले पुछव, ‘का होय हवय?’
JER 48:20 मोआब ह कलंकित होईस, काबरकि ओह कुटा-कुटा हो गीस। सोक मनावव अऊ चिचियाके रोवव! अरनोन म घोसना करव कि मोआब ह नास हो गीस।
JER 48:21 पठारी भुइयां ऊपर नियाय आ गे हवय— होलोन, यहस अऊ मेपात ऊपर,
JER 48:22 दीबोन, नबो अऊ बेत-दिबलातैम ऊपर,
JER 48:23 किरयातैम, बेत-गामूल अऊ बेत-मोन ऊपर,
JER 48:24 करियोत, बोसरा ऊपर— लकठा अऊ दूरिहा, मोआब के जम्मो नगरमन ऊपर नियाय आ गे हवय।
JER 48:25 मोआब के सींग ह कटके अलग हो गीस; ओकर बाहां ह टूट गीस,” यहोवा ह घोसना करत हे।
JER 48:26 “ओला मतवार कर दव, काबरकि ओह यहोवा के परवाह नइं करे हवय। मोआब ला अपन उल्टी म लोटन दव; ओला हंसी के चीज होवन दव।
JER 48:27 का इसरायल ह तुम्हर हंसी उड़ाय के चीज नइं रिहिस? का ओह चोरमन के बीच म पकड़े गे रिहिस, कि जब भी तेंह ओकर चरचा करथस त अपमान म, तेंह अपन मुड़ हलाथस?
JER 48:28 हे मोआब के रहइयामन, अपन नगरमन ला छोंड़के चट्टानमन के बीच म रहव। ओ पंड़की चिरई सहीं बनव जऊन ह गुफा के मुहूं म अपन खोंधरा बनाथे।
JER 48:29 “हमन मोआब के घमंड के बारे म सुने हन— कतेक जादा ओह घमंडी ए! हमन ओकर तिरस्कार, ओकर घमंड, ओकर अभिमान अऊ ओकर मन के अहंकार के बारे म सुने हन।
JER 48:30 मेंह ओकर तिरस्कार ला जानत हंव, पर येह बेकार ए,” यहोवा ह घोसना करत हे, “अऊ ओकर अहंकार से कुछू नइं मिलय।
JER 48:31 ये खातिर मेंह मोआब बर बिलाप करथंव, जम्मो मोआब बर मेंह रोवत हंव, कीर-हरेसेत सहर के मनखेमन बर मेंह बिलाप करथंव।
JER 48:32 हे सिबमा सहर के अंगूर के नारमन, मेंह तुम्हर बर रोथंव, जइसने कि याजेर ह रोथे। तोर डारामन समुंदर तक बगर गे हवंय; ओमन याजेर सहर तक हबर गे हवंय। नास करइया ह तोर पाके फर अऊ अंगूरमन ऊपर गिर गे हवय।
JER 48:33 मोआब के फर के बारी अऊ खेतमन ले आनंद अऊ खुसी ह चले गे हवय। मेंह अंगूर के रसकुंडमन ले अंगूर के मंद बहे ला बंद कर दे हंव; कोनो ओमन ला आनंद के अवाज सहित अपन गोड़ ले नइं कुचरंय। हालाकि उहां अवाज होवथे, पर ओह आनंद के अवाज नो हय।
JER 48:34 “ओमन के रोये के अवाज ह हेसबोन ले एलाले अऊ यहस नगर तक, अऊ सोअर नगर ले होरोनैम अऊ एगलत-सलीसिया तक सुनई देवत हे, काबरकि निमरीम सोता के पानी घलो सुख गे हवय।
JER 48:35 जऊन मन ऊंच जगहमन म बलिदान चघाथें अऊ अपन देवतामन बर धूप जलाथें” ओमन के मेंह मोआब म अन्त कर दूहूं, यहोवा ह घोसना करत हे।
JER 48:36 “एकरसेति मोआब बर मोर मन ह बांसुरी के अवाज सहीं सोक करत हे; येह कीर-हरेसेत के मनखेमन बर बांसुरी के अवाज सहीं सोक करत हे। जऊन धन ओमन कमाय रिहिन, ओह खतम हो गीस।
JER 48:37 हर एक मुड़ ह मुड़ाय हवय अऊ हर एक दाढ़ी कटा ले हवय; हर हांथ म तलवार के चोट हवय अऊ हर कनिहां म बोरा के कपड़ा लपटाय हवय।
JER 48:38 मोआब के जम्मो घर के छानीमन म अऊ चौराहामन म सिरिप रोवई-पीटई होवत हे, काबरकि मेंह मोआब ला ओ बरतन सहीं टोर दे हंव, जेला कोनो पसंद नइं करंय,” यहोवा ह घोसना करत हे।
JER 48:39 “ओह कइसे चकनाचूर हो गीस! ओमन कइसे बिलाप करत हें! मोआब ह लज्जा म, कइसे अपन पीठ दिखावत हवय! मोआब ह अपन चारों कोति के जम्मो मनखे बर एक हंसी के चीज, अऊ बहुंत भय के कारन हो गे हवय।”
JER 48:40 यहोवा ह ये कहत हे: “देखव! एक गिधवा ह मोआब ऊपर अपन डेना फईलाके खाल्हे कोति झपट्टा मारत हे।
JER 48:41 करियोत सहर ऊपर कब्जा कर लिये जाही अऊ मजबूत गढ़मन ला ले लिये जाही। ओ दिन मोआब के योद्धामन के मन ह छेवारी होवत माईलोगन के मन सहीं हो जाही।
JER 48:42 मोआब ह एक देस के रूप म नास हो जाही काबरकि ओह यहोवा के परवाह नइं करे हवय।
JER 48:43 हे मोआब के मनखेमन, आतंक अऊ खंचवा अऊ फांदा तुम्हर डहार देखत हें,” यहोवा ह घोसना करत हे।
JER 48:44 “जऊन कोनो डराके भागही ओह खंचवा म गिरही, जऊन कोनो खंचवा म ले निकलके आही ओह फांदा म फंसही; काबरकि मेंह मोआब ऊपर ओकर दंड के समय ला लानहूं,” यहोवा ह घोसना करत हे।
JER 48:45 “हेसबोन सहर के सरन म आके भगोड़ा मनखेमन कोनो मदद नइं पावंय, काबरकि हेसबोन ले आगी, अऊ सीहोन के बीच ले आगी के एक जुवाला निकले हवय; येह मोआब के माथामन ला, अऊ बक-बक करइया घमंडीमन के खोपड़ी ला जला दीही।
JER 48:46 हे मोआब, तोर ऊपर हाय! कमोस के मनखेमन नास होवथें; तोर बेटामन बंधुवई म जावत हें, अऊ तोर बेटीमन कैद करे जावत हें।
JER 48:47 “तभो ले अवइया समय म, मेंह मोआब के बने दिनमन ला फेर लानहूं,” यहोवा ह घोसना करत हे। मोआब के दंड ह इहां खतम होईस।
JER 49:1 अमोनीमन के बारे म: यहोवा ह ये कहत हे: “का इसरायल के बेटामन नइं एं? का इसरायल के कोनो वारिस नइं एं? त फेर काबर मोलेक ह गाद देस ऊपर अधिकार कर ले हवय? ओकर मनखेमन येकर नगरमन म काबर रहत हें?
JER 49:2 पर ओ दिनमन आवत हें,” यहोवा ह घोसना करत हे, “जब मेंह अमोनीमन के रब्बा नगर के बिरूध लड़ई के ललकार करहूं; येह उजड़के खंडहर हो जाही, अऊ येकर आसपास के गांवमन म आगी लगा दिये जाही। तब इसरायलीमन ओमन ला निकाल दीहीं, जऊन मन ओमन ला निकाले रिहिन,” यहोवा ह कहत हे।
JER 49:3 “हे हेसबोन, बिलाप कर, काबरकि अई नगर ह नास हो गीस! हे रब्बा के रहइयामन, रोवव! बोरा के कपड़ा पहिरव अऊ सोक मनावव; दीवार के भीतर एती-ओती भागव, काबरकि मोलेक ह अपन पुरोहित अऊ करमचारीमन संग बंधुवई म जाही।
JER 49:4 तेंह अपन घाटीमन ऊपर, ओ बहुंत फर देवइया घाटीमन ऊपर काबर घमंड करत हस? हे बेईमान बेटी अमोन, तेंह अपन धन ऊपर भरोसा करके कहिथस, ‘कोन ह मोर ऊपर हमला करही?’
JER 49:5 तोर चारों कोति रहइया मनखेमन ले मेंह तोर ऊपर आतंक लानहूं,” परभू, सर्वसक्तिमान यहोवा ह घोसना करत हे। तुमन के हर एक जन ला निकाल दिये जाही, अऊ कोनो ओ निकाले गय मनखेमन ला जगह नइं दीही।
JER 49:6 “तभो ले बाद म, मेंह अमोनीमन के दिन ला लहुंटाके लानहूं,” यहोवा ह घोसना करत हे।
JER 49:7 एदोम के बारे म: सर्वसक्तिमान यहोवा ह ये कहत हे: “का तेमान म अब कुछू बुद्धि नइं ए? का बुद्धिमानमन के सलाह ह खतम हो गीस? का ओमन के बुद्धि ह नास हो गीस?
JER 49:8 हे ददान के रहइयामन, लहुंटके भागव, गुफा के भीतरी भागमन म छुप जावव, काबरकि जब मेंह एसाव ला सजा दूहूं, तब मेंह ओकर ऊपर बिपत्ति लानहूं।
JER 49:9 यदि अंगूर टोरइयामन तोर करा आतिन, त का ओमन कुछू अंगूर ला नइं छोंड़ जातिन? यदि चोरमन रथिया आतिन, त का ओमन जतेक चाहतिन, ओतेक चोराके नइं ले जातिन?
JER 49:10 पर मेंह एसाव ला नंगरा कर दूहूं; मेंह ओकर छुपे के जगहमन ला उघरा कर दूहूं, ताकि ओह अपनआप ला छुपा झन सकय। ओकर हथियार धरे मनखेमन नास हो गीन, ओकर संग के मन अऊ परोसीमन घलो नास हो गीन, एकरसेति ये कहे बर कोनो नइं एं,
JER 49:11 ‘अपन अनाथ लइकामन ला छोंड़ जावव; मेंह ओमन ला जीयत रखहूं। तुम्हर बिधवामन घलो मोर ऊपर भरोसा कर सकथें।’ ”
JER 49:12 यहोवा ह ये कहत हे: “यदि जऊन मन कटोरा म ले पीये के लईक नो हंय, त ओमन येला जरूर पीयें, तेंह बिगर दंड पाय काबर जाबे? तेंह बिगर दंड पाय नइं जा सकबे, पर तोला येला पीना पड़ही।
JER 49:13 यहोवा ह घोसना करत हे, मेंह अपन कसम खावत हंव,” “कि बोसरा सहर ह एक उजाड़ अऊ एक सराप, एक आतंक अऊ निन्दा के चीज हो जाही; अऊ येकर जम्मो नगरमन सदाकाल बर उजाड़ हो जाहीं।”
JER 49:14 मेंह यहोवा ले एक संदेस सुने हंव; जाति-जाति के मनखेमन ला ये कहे बर एक दूत पठोय गीस, “येकर ऊपर हमला करे बर तुमन एक संग जूरव! लड़ई करे बर उठव!”
JER 49:15 “अब मेंह जाति-जाति के बीच म तोला छोटे बना दूहूं, अऊ मनखेमन तोला तुछ जानहीं।
JER 49:16 हे चट्टानमन के दरार म रहइयामन, हे पहाड़ी के चोटी ऊपर अधिकार करइयामन, तुम्हर बढ़े हुए आतंक अऊ तुम्हर मन के घमंड ह तुमन ला धोखा देय हवय। चाहे तुमन अपन खोंधरा गिधवा के सहीं ऊंच जगह म बनावव, तभो ले मेंह तुमन ला उहां ले खाल्हे ले आहूं,” यहोवा ह घोसना करत हे।
JER 49:17 “एदोम ह एक बहुंत घिन करे के चीज हो जाही; ओकर जम्मो घाव के कारन जऊन मन ओकर लकठा ले जाहीं, ओमन डरहीं अऊ येकर हंसी उड़ाहीं।
JER 49:18 यहोवा ह कहत हे, जइसने सदोम अऊ अमोरा ला ओमन के आसपास के नगरमन सहित नास कर दिये गे रिहिस,” “वइसने ही उहां कोनो नइं रहिहीं; येमा कोनो मनखे निवास नइं करहीं।
JER 49:19 “जइसने यरदन के झाड़ीमन ले कोनो सिंह ह निकलके बने चरागन म आथे, वइसने ही मेंह एदोम के मनखेमन ला ओमन के देस ले तुरते भगा दूहूं। ओ चुने हुए कोन ए, जेला मेंह ये काम बर ठहिरावंव? मोर सहीं कोन हे अऊ कोन ह मोला चुनौती दे सकथे? अऊ कोन चरवाहा ह मोर सामना कर सकथे?”
JER 49:20 एकरसेति, सुनव कि यहोवा ह एदोम के बिरूध का योजना बनाय हवय, अऊ तेमान म रहइयामन के बिरूध ओह का करे के ठाने हवय: पसु के झुंड के पीलामन ला घसीटके अलग करे जाही; ओमन के चरागन ह ओमन के डर के कारन होही।
JER 49:21 ओमन के गिरे के अवाज ले धरती ह कांपही; ओमन के रोये के अवाज ह लाल-समुंदर तक सुनई दीही।
JER 49:22 देखव! एक गिधवा ह ऊपर उड़के खाल्हे झपट्टा मारही, अऊ बोसरा ऊपर अपन डेनामन ला फईलाही। ओ दिन एदोम के सूरबीरमन के मन ह छेवारी होवत माईलोगन के मन सहीं होही।
JER 49:23 दमिस्क के बारे म: “हमात अऊ अरपाद सहर डर गीन, काबरकि ओमन खराप समाचार सुने हवंय। ओमन के मन ह टूट गे हवय, अऊ ओमन के मन अस्थिर समुंदर सहीं असांत हवय।
JER 49:24 दमिस्क ह दुरबल हो गे हवय, ओह भागे बर मुड़े हवय अऊ डर ह ओला जकड़ ले हवय; मन के असांति अऊ पीरा ह ओला जकड़े हवय, ओ पीरा ह छेवारी होवत माईलोगन के पीरा सहीं अय।
JER 49:25 ओ नगर, जेमा मेंह खुस होथंव, ओ खियातीवाला सहर ला काबर तियागे नइं गे हवय?
JER 49:26 सचमुच, ओकर जवानमन गलीमन म गिरहीं; ओ दिन ओकर जम्मो सैनिकमन के बोलती बंद हो जाही,” सर्वसक्तिमान यहोवा ह घोसना करत हे।
JER 49:27 “मेंह दमिस्क के दीवारमन म आगी लगा दूहूं; येह बेन-हदद के किलामन ला भसम कर दीही।”
JER 49:28 केदार गोत्र अऊ हासोर के राजमन के बारे म, जेकर ऊपर बेबिलोन के राजा नबूकदनेसर ह हमला करिस: यहोवा ह ये कहत हे: “उठव, अऊ केदार ऊपर हमला करव अऊ पूरब के मनखेमन के नास कर देवव।
JER 49:29 ओमन के तम्बू अऊ ओमन के पसु के झुंडमन ला ले लिये जाही; ओमन के डेरा ला ओमन के जम्मो सामान अऊ ऊंटमन सहित ले लिये जाही। मनखेमन ओमन ऊपर चिचियाहीं, ‘चारों कोति आतंक ही आतंक!’
JER 49:30 “हे हासोर के रहइयामन, तुरते भागव! गुफामन के भीतर म रहव,” यहोवा ह घोसना करत हे। “बेबिलोन के राजा नबूकदनेसर ह तुम्हर बिरूध साजिस करे हवय; ओह तुम्हर बिरूध एक योजना बनाय हवय।
JER 49:31 “उठव अऊ अराम से रहइया ओ जाति के ऊपर हमला करव, जऊन ह निडर रहत हे,” यहोवा ह घोसना करत हे, “ओ जाति जेकर न कपाट हवय न घेरा; येकर मनखेमन खतरा ले दूरिहा रहिथें।
JER 49:32 ओमन के ऊंटमन ला लूट लिये जाही, अऊ ओमन के बड़े पसु के झुंड ह लड़ई म नास हो जाही। जऊन मन दूरिहा जगह म रहिथें, मेंह ओमन ला उड़ाके तितिर-बितिर कर दूहूं अऊ चारों कोति ले ओमन ऊपर बिपत्ति लानहूं,” यहोवा ह घोसना करत हे।
JER 49:33 “हासोर ह सियारमन के डेरा बनके, हमेसा बर उजाड़ हो जाही। उहां कोनो नइं रहिहीं; ओमा कोनो मनखे निवास नइं करहीं।”
JER 49:34 यहूदा के राजा सिदकियाह के राज के सुरूआत म, यहोवा के ये बचन यरमियाह अगमजानी करा एलाम देस के बारे म आईस:
JER 49:35 सर्वसक्तिमान यहोवा ह ये कहत हे: “देख, मेंह एलाम के धनुस ला टोरहूं, जऊन ह कि ओकर सक्ति के खास चीज अय।
JER 49:36 मेंह अकास के चारों दिग ले एलाम के बिरूध म चार ठन आंधी लानहूं; मेंह ओमन ला चारों आंधी म तितिर-बितिर कर दूहूं, अऊ अइसने कोनो जाति के मनखे नइं होहीं जिहां एलामी मनखेमन भाग के नइं जाहीं।
JER 49:37 मेंह एलाम ला ओमन के बईरीमन के आघू म, अऊ ओमन के परान के खोजीमन के आघू म चकनाचूर कर दूहूं; मेंह अपन भयंकर गुस्सा म, ओमन ऊपर बिपत्ति लानहूं,” यहोवा ह घोसना करत हे। “मेंह तलवार लेके ओमन के पीछा तब तक करहूं जब तक कि मेंह ओमन के अन्त नइं कर दूहूं।
JER 49:38 मेंह एलाम म अपन सिंघासन रखहूं अऊ ओकर राजा अऊ करमचारीमन ला नास कर दूहूं,” यहोवा ह घोसना करत हे।
JER 49:39 “तभो ले अवइया समय म, एलाम के बने दिनमन ला फेर लानहूं,” यहोवा ह घोसना करत हे।
JER 50:1 बेबिलोन सहर अऊ बेबिलोनीमन के देस के बारे म यहोवा ह यरमियाह अगमजानी के जरिये ये बचन कहिस:
JER 50:2 “जाति-जाति के मनखेमन के बीच म बतावव अऊ घोसना करव, झंडा उठाके येकर घोसना करव; कुछू झन छुपावव, पर कहव, ‘बेबिलोन ला ले लिये जाही; बेल के बेजत्ती होही, मरोदक ह आतंकित होईस। ओकर मूरतीमन के बेजत्ती होही अऊ ओकर मूरतीमन आतंकित होईन।’
JER 50:3 उत्तर दिग ले एक जाति ह ओकर ऊपर हमला करही अऊ ओकर देस ला उजाड़ दीही। ओमा कोनो नइं रहिहीं; मनखे अऊ पसु दूनों भाग जाहीं।
JER 50:4 “ओ दिनमन म, ओ समय म,” यहोवा ह घोसना करत हे, “इसरायल के मनखेमन अऊ यहूदा के मनखेमन एक संग रोवत यहोवा अपन परमेसर के खोज म जाहीं।
JER 50:5 ओमन सियोन के रसता ला पुछहीं अऊ ओ रसता कोति अपन मुहूं कर लीहीं। ओमन आहीं अऊ अपनआप ला यहोवा के संग सदाकाल के करार म बांध लीहीं जऊन ला बिसराय नइं जाही।
JER 50:6 “मोर मनखेमन गंवाय भेड़ अंय; ओमन के चरवाहामन ओमन ला रसता ले भटका दे हवंय जेकर कारन ओमन पहाड़मन म एती-ओती घुमत हें। ओमन पहाड़ अऊ पठार ऊपर घुमत हवंय अऊ अपन अराम करे के जगह ला भुला गे हवंय।
JER 50:7 जऊन कोनो भी ओमन ला पाईस, ओह ओमन ला खा लीस; ओमन के बईरीमन कहिन, ‘हमन दोसी नो हन, काबरकि ओमन यहोवा के बिरूध म पाप करिन, जऊन ह कि ओमन के हरा-भरा चरागन ए, यहोवा, ओमन के पुरखामन के आसा ए।’
JER 50:8 “बेबिलोन ले बाहिर भागव; बेबिलोनी मनखेमन के देस ला छोंड़व, अऊ ओ बोकरामन सहीं बनव, जऊन मन झुंड के अगुवई करथें।
JER 50:9 काबरकि मेंह उत्तर के देस ले बड़े जातिमन के एक दल ला उभारहूं अऊ ओ दल ला बेबिलोन के बिरूध लानहूं। ओमन बेबिलोन के बिरूध म कतार बांधहीं, अऊ उत्तर दिग ले ओकर ऊपर कब्जा करे जाही। ओमन के तीरमन कुसल योद्धामन सहीं होहीं, जेमन कि खाली नइं लहुंटंय।
JER 50:10 ये किसम ले बेबिलोनिया ला लूटे जाही; ओ जम्मो जऊन मन ओला लूटहीं, ओमन संतुस्ट हो जाहीं,” यहोवा ह घोसना करत हे।
JER 50:11 “हे मोर भाग ला लूटनेवालामन, काबरकि तुमन आनंद मनाथव अऊ खुस हव, अऊ एक अनाज कुटत बछिया के सहीं उदकत अऊ ताकतवर घोड़ामन के सहीं हिनहिनावत हव,
JER 50:12 तुम्हर दाई ह बहुंत लज्जित होही; जऊन ह तुमन ला जनम दीस, ओह कलंकित होही। ओह जम्मो जाति म सबले छोटे होही— ओह एक निरजन, सूखा देस अऊ मरू-भुइयां सहीं होही।
JER 50:13 यहोवा के गुस्सा के कारन, ओमा कोनो नइं बसहीं पर ओह पूरा उजाड़ हो जाही। जऊन मन बेबिलोन ले होवत जाहीं, ओमन भयभीत होहीं; ओकर जम्मो दुख के कारन ओकर हंसी उड़ाहीं।
JER 50:14 “हे जम्मो धनुसधारीमन, बेबिलोन के चारों कोति ओकर बिरूध म कतार बांध लव। ओकर ऊपर तीर चलावव! कोनो तीर ला बचाके झन रखव, काबरकि ओह यहोवा के बिरूध म पाप करे हवय।
JER 50:15 चारों कोति ले ओकर ऊपर तीर चलावव! ओह हार मानत हे, ओकर मीनारमन गिरत हें, ओकर दीवारमन गिराय जावत हें। काबरकि यहोवा ह ओकर ले बदला लेवत हे, त तुमन घलो ओकर ले बदला लेवव; ओकर संग वइसने करव, जइसने ओह आने मन संग करे हवय।
JER 50:16 बेबिलोन ले बीज बोवइया ला अलग कर दव, अऊ लुवई के बेरा फसल लुवइया ला ओकर हंसिया ले अलग कर दव। अतियाचारी के तलवार के डर के कारन हर एक जन अपन-अपन मनखेमन करा लहुंट जावय, अऊ हर एक जन अपन-अपन देस ला भाग जावय।
JER 50:17 “इसरायल ह तितिर-बितिर करे गे एक झुंड ए, जेला सिंहमन भगा दे हवंय। सबले पहिले ओमन ला खानेवाला अस्सूर के राजा ए; सबले आखिरी म ओमन के हाड़ामन ला टोरनेवाला बेबिलोन के राजा नबूकदनेसर ए।”
JER 50:18 ये खातिर सर्वसक्तिमान यहोवा, इसरायल के परमेसर ह ये कहत हे: “जइसने मेंह अस्सूर के राजा ला सजा दे हंव, वइसने मेंह बेबिलोन के राजा अऊ ओकर देस ला सजा दूहूं।
JER 50:19 पर मेंह इसरायल के मनखेमन ला फेर ओमन के चराई म लहुंटाके लानहूं, अऊ ओमन करमेल पहाड़ अऊ बासान के इलाका म चरहीं; एपरैम अऊ गिलाद के पहाड़ीमन म ओमन भरपेट खाय बर पाहीं।
JER 50:20 ओ दिनमन म, ओ समय म,” यहोवा ह घोसना करत हे, “इसरायल के अपराध ला खोजे जाही, पर ओमा कोनो अपराध नइं मिलही, अऊ यहूदा के पाप ला घलो खोजे जाही, पर ओमा कोनो अपराध नइं मिलही, काबरकि जेमन ला मेंह बचाहूं, ओमन के पाप ला छेमा कर दूहूं।
JER 50:21 “मरातैम देस अऊ पकोद म रहइया मनखेमन ऊपर तेंह हमला कर। ओमन के पीछा कर, मार डार अऊ ओमन ला पूरा नास कर दे,” यहोवा ह घोसना करत हे। “हर ओ काम कर, जेकर हुकूम मेंह तोला दे हवंव।
JER 50:22 ओ देस म लड़ई के अवाज, बड़े बिनास के अवाज होवत हे!
JER 50:23 जम्मो धरती के हथौड़ा ह कइसे टूटके कुटा-कुटा हो गे हवय! बेबिलोन ह जाति-जाति के मनखेमन के बीच म कइसे उजाड़ हो गे हवय!
JER 50:24 हे बेबिलोन, मेंह तोर बर एक फांदा लगाय हंव, अऊ येकर पहिली कि तें ओला जानते, तेंह ओमा फंस गेय; तोला खोजके पकड़ लिये गीस, काबरकि तें यहोवा के बिरोध करे।
JER 50:25 यहोवा ह अपन हथियारमन के घर ला खोल दे हवय, अऊ अपन कोरोध के हथियारमन ला बाहिर निकाले हवय, काबरकि परमपरधान यहोवा सर्वसक्तिमान ला बेबिलोनीमन के देस म एक काम करना हे।
JER 50:26 दूरिहा ले ओकर बिरूध म आवव। ओकर अन्न के भंडारमन ला टोरके खोल दव; अनाज के ढेर सहीं ओला कुढ़ो दव। ओकर पूरा सतियानास कर दव, अऊ ओकर कुछू ला घलो बचाके झन रखव।
JER 50:27 ओकर जम्मो जवान बईलामन ला मार डारव; ओमन ला काटे बर खाल्हे जावन दव! ओमन ऊपर हाय! काबरकि ओमन के दिन ह आ गे हवय, ओमन के सजा पाय के समय ह आ गे हवय।
JER 50:28 सियोन म घोसना होवत हे; बेबिलोन के भगोड़ा अऊ सरनार्थीमन के बात ला सुनव यहोवा हमर परमेसर ह कइसे अपन मंदिर के बदला ले हवय।
JER 50:29 “धनुसधारीमन ला बेबिलोन के बिरूध म लड़े बर बलावव, ओ जम्मो झन ला बलावव, जऊन मन धनुस चलाथें। ओकर चारों कोति डेरा डालव; कोनो बचके झन भागन पावंय। ओकर काममन के बदला ओला देवव; ओकर संग वइसने करव, जइसने ओह करे हवय। काबरकि ओह यहोवा, इसरायल के पबितर परमेसर ला ललकारे हवय।
JER 50:30 ये खातिर ओकर जवानमन गलीमन म गिरहीं; ओ दिन ओकर जम्मो सैनिकमन के बोलती बंद हो जाही,” यहोवा ह घोसना करत हे।
JER 50:31 “हे ढीठ देख, मेंह तोर बिरूध हंव,” परभू सर्वसक्तिमान यहोवा ह घोसना करत हे, “काबरकि तोर दिन ह आ गे हवय, तोर सजा पाय के समय ह आ गे हवय।
JER 50:32 ढीठ ह ठोकर खाके गिरही अऊ कोनो ओला उठे म मदद नइं करहीं; मेंह ओकर नगरमन म आगी लगाहूं, जऊन ह ओकर चारों कोति के जम्मो झन ला भसम कर दीही।”
JER 50:33 सर्वसक्तिमान यहोवा ह ये कहत हे: “इसरायल के मनखेमन सताय जावत हें, अऊ यहूदा के मनखेमन घलो सताय जावत हें। ओमन के जम्मो पकड़नेवालामन ओमन ला कसके पकड़े हवंय, अऊ ओमन ला जावन नइं देवत हें।
JER 50:34 पर ओमन के छुड़इया ह बलवान ए; सर्वसक्तिमान यहोवा ओकर नांव ए। ओह ओमन के मुकदमा ला बने करके लड़ही ताकि ओह ओमन के देस म सांति लानय पर बेबिलोन म रहइयामन ऊपर असांति।
JER 50:35 “बेबिलोन के मनखेमन के बिरूध म तलवार चलही!” यहोवा ह घोसना करत हे— “जऊन मन बेबिलोन म रहिथें, ओमन के बिरूध म अऊ ओकर करमचारी अऊ बुद्धिमान मनखेमन के बिरूध म तलवार चलही!
JER 50:36 ओकर लबरा अगमजानीमन के बिरूध म तलवार चलही! ओमन मुरूख बन जाहीं। ओकर योद्धामन के बिरूध म तलवार चलही! ओमन आतंक ले भर जाहीं।
JER 50:37 ओकर घोड़ा अऊ रथमन के बिरूध म अऊ ओकरे दरजा के जम्मो बिदेसीमन के बिरूध म तलवार चलही! ओमन दुरबल हो जाहीं। ओकर खजानामन के बिरूध म तलवार चलही! ओमन ला लूट लिये जाही।
JER 50:38 ओकर तरियामन म सूखा पड़ही! ओमन सूखा जाहीं। काबरकि येह मूरतीमन ले भरे देस अय, अऊ मूरतीमन आतंक ले पगला जाहीं।
JER 50:39 “एकरसेति मरू-भुइयां के जन्तु अऊ हुंर्रामन उहां रहिहीं, अऊ उहां उल्लू घलो निवास करही। उहां फेर कोनो मनखे निवास नइं करहीं या पीढ़ी-पीढ़ी तक उहां कोनो नइं रहिहीं।
JER 50:40 यहोवा ह घोसना करत हे, जइसने मेंह सदोम अऊ अमोरा ला ओमन के आसपास के नगरमन सहित उखान फेंकें,” “वइसने ही उहां कोनो नइं रहिहीं; येमा कोनो मनखे निवास नइं करहीं।
JER 50:41 “देखव! उत्तर दिग ले एक सेना आवत हे; धरती के छोर ले एक बड़े जाति अऊ बहुंते राजामन ला उभारे जावत हे।
JER 50:42 ओमन धनुस अऊ बरछी धरे हवंय; ओमन कठोर अऊ निरदयी अंय। जब ओमन अपन घोड़ामन ऊपर सवार होथें, त ओमन गरजत समुंदर सहीं अवाज करथें; हे बेटी बेबिलोन, ओमन तोर ऊपर हमला करे बर लड़ई म कतार बांधे मनखेमन सहीं आथें।
JER 50:43 बेबिलोन के राजा ह ओमन के बारे म खबर सुने हवय, अऊ ओकर हांथमन ढीला पड़ गे हवंय। पीरा ह ओला अइसने जकड़े हवय, जइसने छेवारी होवत माईलोगन ला पीरा होथे
JER 50:44 जइसने यरदन के झाड़ीमन ले कोनो सिंह ह निकलके बने चरागन म आथे, वइसने ही मेंह बेबिलोन के मनखेमन ला ओमन के देस ले तुरते भगा दूहूं। ओ चुने हुए कोन ए, जेला मेंह ये काम बर ठहिरावंव? मोर सहीं कोन हे अऊ कोन ह मोला चुनौती दे सकथे? अऊ कोन चरवाहा ह मोर सामना कर सकथे?”
JER 50:45 एकरसेति, सुनव कि यहोवा ह बेबिलोन के बिरूध का योजना बनाय हवय, अऊ बेबिलोनीमन के देस के बिरूध ओह का करे के ठाने हवय: पसु के झुंड के पीलामन ला घसीटके अलग करे जाही; ओमन के चरागन ह ओमन के डर के कारन होही।
JER 50:46 बेबिलोन ला कब्जा करे के अवाज ले धरती ह कांपही; येकर रोये के अवाज जाति-जाति के मनखेमन के बीच म सुनई पड़ही।
JER 51:1 यहोवा ह ये कहत हे: “देखव, मेंह बेबिलोन अऊ लेब-कामै के मनखेमन के बिरूध म एक नास करइया आतमा ला भड़काहूं।
JER 51:2 मेंह बेबिलोन म परदेसीमन ला पठोहूं ओला पछरे बर ताकि ओमन ओला पछरें अऊ ओ देस ला बरबाद करें; ओकर बिपत्ति के दिन म ओमन चारों कोति ले ओकर बिरोध करहीं।
JER 51:3 धनुसधारी ला ओकर धनुस तियार करन झन दव, अऊ न ही ओला अपन हथियार ला बांधन दव। ओकर जवानमन ला झन छोंड़व; ओकर सेना ला पूरा नास कर दव।
JER 51:4 ओमन बेबिलोन के गलीमन म, भयंकर रूप से घायल मरे परे होहीं।
JER 51:5 काबरकि इसरायल अऊ यहूदा के देस ह ओमन के परमेसर, सर्वसक्तिमान यहोवा के दुवारा तियागे नइं गे हवय, हालाकि ओमन के देस ह इसरायल के पबितर परमेसर के नजर म अपराध ले भरे हवय।
JER 51:6 “बेबिलोन ले भागव! अपन परान बचाय बर भागव! ओकर पाप के कारन नास झन होवव। येह यहोवा के बदला लेय के बेरा अय; ओकर अधरम के मुताबिक ओला बदला दीही।
JER 51:7 बेबिलोन ह यहोवा के हांथ म एक सोन के कटोरा रिहिस; ओ कटोरा म ले पीके जम्मो धरती के मनखेमन मतवाला होवत रिहिन। जाति-जाति के मनखेमन ओकर मंद ला पीईन; ये खातिर ओमन अब पगला गे हवंय।
JER 51:8 बेबिलोन ह अचानक गिरही अऊ टूट जाही। ओकर बर बिलाप करव! ओकर घाव बर मलहम लानव; सायद ओह बने हो जावय।
JER 51:9 “ ‘हमन बेबिलोन ला बने करतेंन, पर ओह बने नइं हो सकय। आवव, हमन ओला छोंड़के अपन-अपन देस ला चले जावन, काबरकि ओला दंड देय के फैसला अकास तक हबरत हे, येह ऊंच स्वरग तक चले गे हवय।’
JER 51:10 “ ‘यहोवा ह हमन ला सही ठहिराय हे; एकरसेति आवव, हमन सियोन म बतावन कि यहोवा हमर परमेसर ह का करे हवय।’
JER 51:11 “तीरमन ला धार करव, ढालमन ला ले लव! यहोवा ह मादी के राजामन ला उभारे हवय, काबरकि ओकर उदेस्य ह बेबिलोन ला नास करे के हवय। यहोवा ह बदला लीही, ओह अपन मंदिर के बदला लीही।
JER 51:12 बेबिलोन के दीवार के बिरूध म एक झंडा ठाढ़ करव! पहरेदार के सक्ति बढ़ावव, पहरेदारमन ला पहरा देय बर बईठावव, घात लगाय के तियारी करव! काबरकि यहोवा ह बेबिलोन के बिरूध म फैसला देके, अपन उदेस्य ला पूरा करही।
JER 51:13 हे पानी के तीर म बसे अऊ धन-संपत्ति बनाके धनवान हो गय मनखेमन, तुम्हर अन्त ह आ गे हवय, तुम्हर नास होय के समय आ गे हवय।
JER 51:14 सर्वसक्तिमान यहोवा ह अपन खुद के कसम खाय हवय: फांफामन के दल सहीं, मेंह खचित तोला सैनिक दलमन ले भर दूहूं, अऊ ओमन तोर ऊपर बिजय के नारा लगाहीं।
JER 51:15 “ओह अपन सामर्थ ले धरती ला बनाईस; ओह अपन बुद्धि ले संसार के नीव रखिस अऊ अपन समझ के दुवारा अकासमन ला तानिस।
JER 51:16 जब ओह गरजथे, त अकासमन म पानी ह गरजथे; ओह धरती के छोर ले बादरमन ला उठाथे। ओह बारिस के संग बिजली चमकाथे अऊ अपन भंडारघर ले हवा चलाथे।
JER 51:17 “हर एक जन निरबुद्धि अऊ बिगर गियान के हवय; हर एक सुनार ह अपन बनाय मूरतीमन के कारन लज्जित हवय। जऊन मूरतीमन ला ओह बनाथे, ओमन एक धोखा अंय; ओमन म सांस ही नइं ए।
JER 51:18 ओ मूरतीमन बेकार अऊ हंसी उड़ाय के चीज अंय; जब ओमन के फैसला होही, त ओमन नास हो जाहीं।
JER 51:19 पर ओ, जऊन ह याकूब के भाग ए, ओह येमन सहीं नो हय, काबरकि ओह तो जम्मो चीजमन के बनानेवाला अय, ओकर उत्तराधिकार के मनखेमन घलो ओमा आथें— ओकर नांव सर्वसक्तिमान यहोवा अय।
JER 51:20 “तेंह मोर लड़ई के गदा, अऊ लड़ई करे बर मोर हथियार अस— तोर दुवारा मेंह जाति-जाति के मनखेमन ला कुटा-कुटा कर देथंव, तोर दुवारा राजमन ला नास कर देथंव,
JER 51:21 तोर दुवारा मेंह घोड़ा अऊ ओकर सवार ला कुटा-कुटा कर देथंव, तोर दुवारा मेंह रथ अऊ ओकर सारथी ला कुटा-कुटा कर देथंव,
JER 51:22 तोर दुवारा मेंह आदमी अऊ माईलोगन ला कुटा-कुटा कर देथंव, तोर दुवारा मेंह सियान अऊ लइका ला कुटा-कुटा कर देथंव, तोर दुवारा मेंह जवान मनखे अऊ जवान छोकरी ला कुटा-कुटा कर देथंव,
JER 51:23 तोर दुवारा मेंह चरवाहा अऊ ओकर झुंड ला कुटा-कुटा कर देथंव, तोर दुवारा मेंह किसान अऊ ओकर बईलामन ला कुटा-कुटा कर देथंव, तोर दुवारा ही मेंह राजपाल अऊ करमचारीमन ला घलो कुटा-कुटा कर देथंव।
JER 51:24 “तुम्हर आंखी के आघू म मेंह बेबिलोन अऊ बेबिलोनिया म रहइया जम्मो झन ला, ओमन के ओ जम्मो गलत काम के बदला दूहूं, जेला ओमन सियोन म करे हवंय,” यहोवा ह घोसना करत हे।
JER 51:25 “हे नास करइया पहाड़, तें जऊन ह जम्मो धरती ला नास करथस, मेंह तोर बिरूध म हंव,” यहोवा ह घोसना करत हे। “मेंह तोर बिरूध म अपन हांथ बढ़ाहूं, अऊ तोला खड़े चट्टान म ले लुड़का दूहूं, अऊ तोला एक जले हुए पहाड़ बना दूहूं।
JER 51:26 घर के कोना के पथरा बनाय बर तोर म ले कोनो पथरा नइं लिये जाही, न ही घर के नीव डाले बर तोर म ले कोनो पथरा लिये जाही, काबरकि तेंह हमेसा बर उजाड़ हो जाबे,” यहोवा ह घोसना करत हे।
JER 51:27 “देस म चेतउनी के एक झंडा ठाढ़ करव! जाति-जाति के मनखेमन के बीच म तुरही बजावव! ओकर बिरूध म जाति-जाति के मनखेमन ला लड़ई बर तियार करव; ओकर बिरूध म ये राजमन ला बलावव: अरारात, मिन्नी अऊ असकनज। ओकर बिरूध म एक सेनापति ठहिरावव; फांफामन के दल सहीं घोड़ामन ला ऊपर पठोवव।
JER 51:28 ओकर बिरूध म जाति-जाति के मनखेमन ला तियार करव— मादी के राजामन ला, ओमन के राजपाल अऊ ओमन के जम्मो करमचारी, अऊ ओ जम्मो देस के मनखेमन ला बलावव, जिहां ओमन सासन करथें।
JER 51:29 देस ह कांपत अऊ पीरा के मारे छटपटावत हे, काबरकि बेबिलोन के बिरूध यहोवा के उदेस्य ह पूरा होवत हे— बेबिलोन के देस ला उजाड़े जावत हे ताकि उहां कोनो झन रहंय।
JER 51:30 बेबिलोन के योद्धामन लड़े बर बंद कर दे हवंय; ओमन अपन गढ़मन के भीतर रहत हें। ओमन म अऊ ताकत नइं ए; ओमन दुरबल हो गे हवंय। ओकर निवासमन म आगी लगे हवय; ओकर कपाटमन के बेड़ीमन टूट गे हवंय।
JER 51:31 एक दूत ह दूसर दूत के पाछू अऊ एक संदेसिया ह दूसर संदेसिया के पाछू बेबिलोन के राजा ला ये समाचार देय बर जाथें कि ओकर पूरा सहर ला कब्जा कर लिये गे हवय,
JER 51:32 नदी पार करे के जगहमन ऊपर कब्जा कर लिये गे हवय, कछार-भुइयां म आगी लगा दिये गे हवय, अऊ सैनिकमन आतंकित हवंय।”
JER 51:33 सर्वसक्तिमान यहोवा, इसरायल के परमेसर ह ये कहत हे: “बेटी बेबिलोन ह कुचरे जाय के बेरा म एक कोठार सहीं अय; ओकर कटई के बेरा ह जल्दी आही।”
JER 51:34 “बेबिलोन के राजा नबूकदनेसर ह हमन ला खा डारे हवय, ओह हमन ला असमंजस म डार दे हवय, ओह हमन ला एक खाली बरतन सहीं कर दे हवय। सांप सहीं ओह हमन ला लील डारे हवय अऊ हमन ला खाके अपन पेट भर ले हवय, अऊ तब ओह हमन ला उछर दे हवय।
JER 51:35 जऊन चोट हमर देहें म देय गे हवय, ओ चोट बेबिलोन ला मिलय,” सियोन के रहइयामन कहिथें। “हमर खून के दोस ओमन ऊपर लगे, जऊन मन बेबिलोनिया म रहिथें,” यरूसलेम ह कहिथे।
JER 51:36 एकरसेति यहोवा ह ये कहत हे: “देख, मेंह तोर मुकदमा लड़हूं अऊ तोर बदला लूहूं; मेंह ओकर समुंदर अऊ ओकर सोतामन ला सूखा दूहूं।
JER 51:37 बेबिलोन ह एक खंडहर, अऊ सियारमन के एक डेरा, डर अऊ अपमान करे के चीज, अऊ एक अइसने जगह हो जाही, जिहां कोनो नइं रहिहीं।
JER 51:38 जम्मो बेबिलोनीमन जवान सिंहमन सहीं गरजथें, ओमन सिंह के पीलामन सहीं गुर्राथें।
JER 51:39 पर जब ओमन उतावला होथें, तब मेंह ओमन बर एक भोज तियार करके दूहूं अऊ ओमन ला मतवाला कर दूहूं, ताकि ओमन हंसके चिचियावंय— अऊ तब हमेसा बर सो जावंय अऊ कभू झन उठंय,” यहोवा ह घोसना करत हे।
JER 51:40 “जइसे मेढ़ा-पीलामन ला, मेढ़ामन अऊ बोकरामन ला मारे बर लाय जाथे, वइसे मेंह ओमन ला खाल्हे लानहूं।
JER 51:41 “सेसक ह कइसे पकड़े जाही, जम्मो धरती के घमंड ह खतम हो जाही! बेबिलोन ह जाति-जाति के बीच ले कइसे उजड़ जाही!
JER 51:42 समुंदर ह बेबिलोन ऊपर आ जाही; येकर गरजत लहरामन म ओह बुड़ जाही।
JER 51:43 ओकर नगरमन उजड़ जाहीं, एक सूखा अऊ मरू-भुइयां हो जाहीं, एक अइसने देस, जिहां कोनो नइं रहंय, अऊ जेमा ले होके कोनो बाट नइं रेंगय।
JER 51:44 मेंह बेबिलोन म बेल देवता ला दंड दूहूं अऊ जऊन कुछू ओह निगल गे हवय, ओला ओकर ले उछरवाहूं। जाति-जाति के मनखेमन ओकर कोति अऊ नइं जाहीं। अऊ बेबिलोन के दीवार ह गिर जाही।
JER 51:45 “हे मोर मनखेमन, उहां ले बाहिर निकलव! अपन परान बचाके भागव! यहोवा के भयंकर कोरोध ले भागव।
JER 51:46 जब देस म झूठा खबर फईलथे, त झन घबरावव या झन डरव; एक साल एक झूठा खबर आथे, त आने साल दूसरा झूठा खबर, देस म हिंसा के झूठा खबर अऊ एक सासक के बिरूध दूसर सासक के झूठा खबर उड़ही।
JER 51:47 काबरकि ओ समय ह जरूर आही जब मेंह बेबिलोन के मूरतीमन ला सजा दूहूं; ओकर पूरा देस ह कलंकित होही अऊ ओकर जम्मो मारे गय मनखेमन ओकरे भीतर म परे होहीं।
JER 51:48 तब स्वरग अऊ धरती अऊ जऊन कुछू ओमा हवंय, ओमन आनंद के मारे बेबिलोन ऊपर चिचियाहीं, काबरकि उत्तर दिग ले नास करइया ह ओकर ऊपर हमला करही,” यहोवा ह घोसना करत हे।
JER 51:49 “जइसने बेबिलोन के कारन जम्मो धरती म मनखेमन मारके गिराय गीन, वइसने ही इसरायल के मनखेमन के हतिया के कारन, जरूरी अय कि बेबिलोन के मनखेमन मारके गिराय जावंय।
JER 51:50 हे तलवार ले बांचे मनखेमन, भागव अऊ उहां ठहिरे झन रहव! दूरिहा देस म यहोवा ला सुरता करव, अऊ यरूसलेम ला घलो सुरता करव।”
JER 51:51 “हमन कलंकित होवत हन, काबरकि हमर बेजत्ती करे गे हवय अऊ लज्जा से हमर चेहरामन ढंक गे हवंय, काबरकि परदेसीमन यहोवा के घर के पबितर जगहमन म घुस गे हवंय।”
JER 51:52 “पर अइसन दिनमन आवत हें,” यहोवा ह घोसना करत हे, “जब मेंह ओकर मूरतीमन ला दंड दूहूं, अऊ ओकर जम्मो देस म मनखेमन घायल होके कराहत रहिहीं।
JER 51:53 चाहे बेबिलोन ह अकास तक ऊंचहा हो जावय अऊ अपन ऊंचहा गढ़ ला किलाबंदी कर लेवय, तभो ले मेंह ओकर बिरूध म नास करइयामन ला पठोहूं,” यहोवा ह घोसना करत हे।
JER 51:54 “बेबिलोन ले रोये के अवाज आवत हे, बेबिलोनीमन के देस ले बड़े बिनास के अवाज आवत हे।
JER 51:55 यहोवा ह बेबिलोन ला नास कर दीही; ओह ओकर बड़े कोलाहल ला बंद कर दीही। बईरीमन के लहरामन, समुंदर सहीं भयंकर होहीं; ओमन के अवाज के गरजन ह फेर सुनई दीही।
JER 51:56 एक नास करइया ह बेबिलोन के बिरूध आही; ओकर योद्धामन पकड़ लिये जाहीं, अऊ ओमन के धनुसमन ला टोर दिये जाही। काबरकि यहोवा ह बदला लेवइया परमेसर अय; ओह पूरा बदला लीही।
JER 51:57 मेंह ओकर करमचारी अऊ बुद्धिमान मनखेमन ला, अऊ संग म ओकर राजपाल, अधिकारी अऊ योद्धामन ला अइसन मतवार कर दूहूं कि ओमन हमेसा बर सो जाहीं अऊ फेर नइं जागहीं,” राजा ह घोसना करत हे, जेकर नांव सर्वसक्तिमान यहोवा अय।
JER 51:58 सर्वसक्तिमान यहोवा ह ये कहत हे: “बेबिलोन के मोटा दीवार ला नीव ले गिराय जाही अऊ ओकर ऊंचहा दुवारमन म आगी लगाय जाही; मनखेमन बेकार म अपनआप ला थकाहीं, जाति-जाति के मनखेमन के मेहनत ह आगी बर सिरिप लकरी के सहीं होही।”
JER 51:59 यहूदा के राजा सिदकियाह के राज के चौथा साल म, जब ओकर संग सरायाह ह बेबिलोन गीस, जऊन ह नेरियाह के बेटा महसेयाह के पोता अऊ राजभवन के अधिकारी घलो रिहिस, तब ओला यरमियाह अगमजानी ह ये संदेस दीस।
JER 51:60 यरमियाह ह ओ जम्मो बिपत्तिमन ला एक किताब म लिख ले रिहिस, जऊन ह बेबिलोन ऊपर पड़नेवाला रिहिस—बेबिलोन के बारे म ओ जम्मो बात लिखे गे रिहिस।
JER 51:61 यरमियाह ह सरायाह ला कहिस, “जब तें बेबिलोन म हबरबे, त जरूरी अय कि तें ये जम्मो बचन ला जोर से पढ़बे।
JER 51:62 तब कहिबे, ‘हे यहोवा, तेंह कहे हस कि तें ये जगह ला अइसने नास कर देबे कि येमा न तो मनखे अऊ न ही पसुमन रहिहीं; येह हमेसा बर उजाड़ हो जाही।’
JER 51:63 जब तें ये किताब ला पढ़ लेबे, तब येमा एक पथरा ला बांधके येला फरात नदी म फटिक देबे,
JER 51:64 अऊ तब कहिबे, ‘जऊन बिपत्ति मेंह बेबिलोन ऊपर लानहूं, ओकर कारन येही किसम ले बेबिलोन ह बुड़ जाही अऊ फेर कभू नइं उठही। अऊ ओकर मनखेमन गिरहीं।’ ” यरमियाह के बचन इहां खतम होथे।
JER 52:1 सिदकियाह ह इक्कीस साल के रिहिस, जब ओह राजा बनिस, अऊ ओह यरूसलेम म गियारह साल तक राज करिस। ओकर दाई के नांव हमूतल रिहिस, जऊन ह यरमियाह के बेटी रिहिस; हमूतल ह लिबना सहर के रिहिस।
JER 52:2 सिदकियाह ह यहोवा के नजर म दुस्ट काम करिस, जइसने यहोयाकीम ह करे रिहिस।
JER 52:3 यहोवा के गुस्सा के कारन यरूसलेम अऊ यहूदा ऊपर ये जम्मो बात होईस, अऊ आखिर म यहोवा ह ओमन ला अपन आघू ले भगा दीस। सिदकियाह ह बेबिलोन के राजा के बिरूध बिदरोह करिस।
JER 52:4 एकरसेति सिदकियाह के राज के नौवां साल के दसवां महिना के दसवां दिन, बेबिलोन के राजा नबूकदनेसर ह अपन जम्मो सेना के संग यरूसलेम के बिरूध लड़ई करे बर निकलिस। ओमन सहर के बाहिर डेरा डालिन अऊ सहर ला चारों कोति ले घेर लीन।
JER 52:5 सहर म ये घेराबंदी सिदकियाह राजा के गियारहवां साल तक रिहिस।
JER 52:6 चौथा महिना के नौवां दिन ले सहर म अकाल के असर अतेक भयंकर हो गीस कि मनखेमन बर खाय बर कुछू नइं रिहिस।
JER 52:7 तब सहर के दीवार ला टोर दिये गीस, अऊ पूरा सेना ह रथिया राजा के बारी के लकठा म, दू ठन दीवार के बीच बने दुवार ले भाग गीस, हालाकि बेबिलोनीमन सहर ला घेरे रिहिन। ओमन अराबा कोति भागिन,
JER 52:8 पर बेबिलोनी सेना ह सिदकियाह राजा के पीछा करिस अऊ यरीहो के मैदान म ओकर करा हबर गीस। राजा के जम्मो सैनिकमन ओकर ले अलग होके तितिर-बितिर हो गीन,
JER 52:9 अऊ राजा ला पकड़ लिये गीस। ओला हमात देस के रिबला सहर म बेबिलोन के राजा करा लाने गीस, जिहां ओला सजा सुनाय गीस।
JER 52:10 उहां रिबला म, बेबिलोन के राजा ह सिदकियाह के बेटामन ला ओकर आंखी के आघू म मार डारिस; ओह यहूदा के जम्मो करमचारीमन ला घलो मार डारिस।
JER 52:11 तब बेबिलोन के राजा ह सिदकियाह के आंखीमन ला निकाल दीस अऊ ओला कांसा के बेड़ीमन म जकड़के बेबिलोन ले गीस, जिहां ओह सिदकियाह ला ओकर मिरतू के दिन तक जेल म रखिस।
JER 52:12 नबूजरदान ह बेबिलोन के राजा के सेवा करय अऊ ओह साही पहरेदारमन के सेनापति रिहिस; ओह बेबिलोन के राजा नबूकदनेसर के राज के उन्नीसवां साल के पांचवां महिना के दसवां दिन यरूसलेम आईस।
JER 52:13 नबूजरदान ह यहोवा के मंदिर, राजमहल अऊ यरूसलेम के जम्मो घरमन म आगी लगा दीस। हर एक बड़े भवन ला ओह जला दीस।
JER 52:14 साही पहरेदारमन के सेनापति के अगुवई म, बेबिलोनीमन के जम्मो सेना ह यरूसलेम के चारों कोति के जम्मो दीवारमन ला गिरा दीस।
JER 52:15 पहरेदारमन के सेनापति नबूजरदान ह सबले गरीब कुछू मनखे अऊ सहर म बचे मनखेमन ला, बाकि बचे कारीगरमन अऊ जऊन मनखेमन बेबिलोन के राजा ला छोंड़ दे रिहिन, ओ जम्मो ला बंधुवा करके ले गीस।
JER 52:16 पर नबूजरदान ह देस म बाकि बचे बहुंत गरीब मनखेमन ला अंगूर के बारी अऊ खेतमन म काम करे बर छोंड़ दीस।
JER 52:17 बेबिलोनीमन यहोवा के मंदिर के कांसा के खंभामन ला, सरकनेवाला सहारामन ला अऊ कांसा के हौज ला टोर दीन अऊ ओमन जम्मो कांसा ला बेबिलोन ले गीन।
JER 52:18 ओमन हंड़िया, बेलचा, दीया के बाती ला कतरे के कतरनी, छिंचनेवाला कटोरा, बरतन अऊ मंदिर के सेवा म उपयोग होवइया जम्मो कांसा के चीजमन ला ले गीन।
JER 52:19 घमेला, धूपदान, छिंचे के कटोरा, हंड़िया, दीवट, बरतन अऊ पेय-बलिदान म उपयोग होइवया कटोरामन—ओ चीज, जेमन सुध सोन या चांदी के बने रिहिन, ओ जम्मो ला साही पहरेदारमन के सेनापति ह ले गीस।
JER 52:20 दू ठन खंभा के कांसा, हौज अऊ येकर खाल्हे के कांसा के बारह बईला, अऊ सरकनेवाला सहारामन, जेमन ला सुलेमान राजा ह यहोवा के मंदिर बर बनवाय रिहिस, ओ जम्मो ह अतेक जादा रिहिस कि ओमन ला तऊले नइं जा सकिस।
JER 52:21 हर एक खंभा के ऊंचई अठारह क्यूबीट अऊ बारह क्यूबीट के गोलई म रिहिस; हर एक के मोटई ह चार अंगरी के रिहिस, अऊ ओमन खोखला रिहिन।
JER 52:22 एक खंभा के ऊपर कांसा के बने सिरा ह पांच क्यूबीट ऊंच रिहिस अऊ ओकर ऊपर चारों कोति कांसा के जाली अऊ अनार बनाके सजाय गे रिहिस। आने खंभा घलो अनारमन सहित वइसने ही बने रिहिस।
JER 52:23 बाजूमन म छियानबे ठन अनार बने रिहिन; जाली के ऊपर चारों कोति कुल एक सौ अनार बने रिहिन।
JER 52:24 पहरेदारमन के सेनापति ह मुखिया पुरोहित सरायाह, पद म ओकर बाद वाला पुरोहित सपनयाह अऊ तीन झन दुवारपाल ला कैदी के रूप म ले गीस।
JER 52:25 अऊ सहर म जऊन मन बांचे रिहिन, ओमा के सैनिकमन के मुखिया, अऊ सात साही सलाहकार ला ओह ले गीस। ओह ओ सचिव ला घलो ले गीस, जऊन ह देस के मनखेमन के जरूरी सैनिक सेवा भरती के मुखिया अधिकारी रिहिस, ओमा के साठ झन सहर म मिलिन।
JER 52:26 पहरेदारमन के सेनापति नबूजरदान ओ जम्मो झन ला लीस अऊ ओमन ला रिबला म बेबिलोन के राजा करा लानिस।
JER 52:27 उहां हमात देस के रिबला म, राजा ह ओमन ला मरवा दीस। ये किसम ले यहूदा ह अपन देस ले दूर बंधुवई म चल दीस।
JER 52:28 येह ओ मनखेमन के गनती ए, जेमन ला नबूकदनेसर ह बंधुवई म ले गीस: ओकर राज के सातवां साल म, 3,023 यहूदी;
JER 52:29 अपन राज के अठारहवां साल म, नबूकदनेसर ह यरूसलेम ले 832 मनखेमन ला बंधुवा करके ले गीस;
JER 52:30 फेर नबूकदनेसर के राज के तेईसवां साल म, राजा के पहरेदारमन के सेनापति नबूजरदान ह 745 यहूदी मनखे ला बंधुवई म ले गीस।
JER 52:31 यहूदा के राजा यहोयाकीन के बंधुवई के सैंतीसवां साल म, जब एवील-मरोदक ह बेबिलोन के राजा बनिस, त बारहवां महिना के पच्चीसवां दिन, ओह यहूदा के राजा यहोयाकीन ला छोंड़ दीस अऊ ओला जेल ले मुक्त कर दीस।
JER 52:32 अऊ ओह ओकर संग मया ले बात करिस अऊ ओला ओ राजामन ले एक ऊंच आदर के पद दीस, जेमन ओकर संग बेबिलोन म रिहिन।
JER 52:33 एकरसेति यहोयाकीन ह अपन जेल के कपड़ा ला उतार लीस अऊ जिनगी भर हर दिन राजा के मेज म जेवन करिस।
JER 52:34 अऊ हर दिन के खरचा बर बेबिलोन के राजा ह यहोयाकीन बर एक भत्ता ठहिराय रिहिस, जऊन ह ओला ओकर मिरतू के दिन तक जिनगी भर मिलिस।
LAM 1:1 सहर ह कइसे निरजन हो गे हवय, एक समय रिहिस जब येह मनखेमन ले भरे रहय! कइसे बिधवा के सहीं हो गे हवय, जऊन ह एक समय देस-देस के मनखेमन के बीच म महान रिहिस! ओ जऊन ह राजमन के बीच म रानी रिहिस अब गुलाम बन गे हवय।
LAM 1:2 रथिया ओह फूट-फूटके रोथे, ओकर गाल म आंसू बहत रहिथे। ओकर जम्मो मयारूमन के बीच म ओला कोनो सांतवना देवइया नइं एं। ओकर जम्मो संगीमन ओला धोखा दे हवंय; ओमन ओकर बईरी बन गे हवंय।
LAM 1:3 दुख अऊ कठोर मेहनत के बाद, यहूदा ह बंधुवई म चले गे हवय। ओह जाति-जाति के मनखेमन के बीच म रहिथे; ओला अराम के जगह नइं मिलय। ओकर दुख के बेरा म, ओकर पीछा करइयामन ओला पकड़ ले हवंय।
LAM 1:4 सियोन के रसतामन बिलाप के अंय, काबरकि ठहिराय गे तिहारमन म ओकर करा कोनो नइं आवंय। ओकर जम्मो प्रवेस दुवारमन सुन्ना परे हवंय, ओकर पुरोहितमन कराहथें, ओकर जवान माईलोगनमन दुख मनाथें, अऊ ओह खुद बहुंत पीरा म हवय।
LAM 1:5 ओकर बईरीमन ओकर मालिक बन गे हवंय; ओकर बईरीमन अराम म हवंय। यहोवा ह ओकर ऊपर दुख लाने हवय काबरकि ओह बहुंत पाप करे हवय। ओकर लइकामन ला बईरीमन अपन बंधुवई म ले गे हवंय।
LAM 1:6 बेटी सियोन के पूरा वैभव ह चले गे हवय। ओकर हाकिममन ओ हिरन सहीं हो गे हवंय जेला चरागन नइं मिलय; कमजोरी म ओमन अपन पीछा करइया के आघू ले भाग जाथें।
LAM 1:7 अपन पीरा अऊ एती-ओती भटके के दिन म यरूसलेम ह ओ जम्मो खजाना ला सुरता करथे जऊन ह पुराना जमाना म ओकर रिहिस। जब ओकर मनखेमन बईरीमन के हांथ म पड़िन, त ओकर मदद करइया कोनो नइं रिहिन। ओकर बईरीमन ओला देखिन अऊ ओकर बिनास ऊपर हंसिन।
LAM 1:8 यरूसलेम ह बहुंत पाप करे हवय अऊ एकरसेति ओह असुध हो गे हवय। ओ जम्मो जऊन मन ओकर आदर करंय, ओमन अब ओला तुछ समझथें, काबरकि ओ जम्मो झन ओला नंगरी देखे हवंय; ओह खुदे कराहथे अऊ मुहूं ला आने कोति कर लेथे।
LAM 1:9 ओकर गंदगी ह ओकर लंहगा म रहिथे; ओह अपन भविस्य ऊपर बिचार नइं करिस। ओकर पतन ह चकित करनेवाला रिहिस; ओला सांतवना देवइया कोनो नइं रिहिन। “हे यहोवा, मोर पीरा ला देख, काबरकि बईरी ह जय पाय हवय।”
LAM 1:10 बईरी ह ओकर जम्मो खजाना ऊपर हांथ डाले हवय; ओह मूरती-पूजा करइया जातिमन ला ओकर पबितर-स्थान म घुसत देखिस— ओमन जेमन ला तेंह अपन सभा म आय बर मना करे रहय।
LAM 1:11 ओकर जम्मो मनखेमन कराहथें जइसे ओमन जेवन के खोज म हवंय; ओमन जेवन के बदले अपन खजाना के चीजमन ला दे देथें ताकि अपनआप ला जिंदा रख सकंय। “हे यहोवा, देख अऊ बिचार कर, काबरकि मोला तुछ समझे जावत हे।”
LAM 1:12 “तुमन जम्मो, जऊन मन ये रसता ले होके निकलथव, का तुमन बर येह कुछू नो हय? अपन आसपास धियान से देखव। का मोर दुख सहीं कोनो दुख हवय अइसन दुख, जऊन ह मोर ऊपर पड़े हवय, जेला यहोवा ह अपन भयंकर कोप के दिन म मोर ऊपर लानिस?
LAM 1:13 “ऊंच जगह ले यहोवा ह मोर हाड़ामन म आगी लगाईस। ओह मोर गोड़ बर एक जाल बिछाईस अऊ मोला वापिस लहुंटा दीस। ओह मोला पूरा दिन बर अकेला अऊ दुरबल कर दीस।
LAM 1:14 “मोर पापमन ला एक जुड़ा म बांध दिये गे हवय; यहोवा ह अपन हांथ ले ओमन ला एक संग गांथे हवय। ओमन ला मोर घेंच म टांग दिये गे हवय, अऊ परभू ह मोर बल ला घटा दे हवय। ओह मोला ओमन के हांथ म देय दे हवय जेमन के मेंह सामना नइं कर सकंव।
LAM 1:15 “परभू ह मोर बीच म जम्मो सूरबीरमन ला अयोग्य कर दे हवय; ओह मोर जवानमन ला कुचरे बर मोर बिरूध एक सेना पठोय हवय। परभू ह रसकुंड म अंगूर ला कुचरे सहीं कुंवारी बेटी यहूदा ला कुचरे हवय।
LAM 1:16 “येकरे कारन मेंह रोथंव अऊ मोर आंखीमन ले आंसू ढरत रहिथे। मोला सांतवना देय बर लकठा म कोनो नइं एं, मोर आतमा ला सांत करइया कोनो नइं एं। मोर लइकामन निसहाय हो गे हवंय काबरकि बईरी ह जय पाय हवय।”
LAM 1:17 सियोन ह अपन हांथमन ला फईलाथे, पर ओला सांतवना देवइया कोनो नइं एं। यहोवा ह याकूब बर हुकूम दे हवय कि ओकर परोसीमन ओकर बईरी बन जावंय; यरूसलेम ह ओमन के बीच म एक असुध चीज बन गे हवय।
LAM 1:18 “यहोवा ह धरमी अय, तभो ले मेंह ओकर हुकूम के बिरूध बिदरोह करेंव। हे जम्मो मनखेमन, तुमन सुनव; मोर पीरा ला देखव। मोर जवान मनखे अऊ जवान माईलोगनमन बंधुवई म चले गे हवंय।
LAM 1:19 “मेंह अपन संगीमन ला बलांय पर ओमन मोला धोखा दीन। मोर पुरोहित अऊ मोर अगुवामन सहर म नास हो गीन जब ओमन अपनआप ला जिंदा रखे बर जेवन के खोज म रिहिन।
LAM 1:20 “हे यहोवा, देख, मेंह कतेक पीरा म हंव! मेंह भीतरे-भीतर तकलीफ म हंव, अऊ मेंह अपन हिरदय म बिचलित हंव, काबरकि मेंह सबले जादा बिदरोह करे हंव। बाहिर तो, तलवार ह सोकित करथे; भीतर म, सिरिप मिरतू हवय।
LAM 1:21 “मनखेमन मोर कलहरई ला सुने हवंय, पर मोला सांतवना देवइया कोनो नइं एं। मोर जम्मो बईरीमन मोर दुख के बारे म सुने हवंय; तेंह जऊन काम करे हस, ओकर ऊपर ओमन आनंद मनाथें। बने होतिस, यदि तेंह ओ दिन ला लानते, जेकर घोसना तेंह करे हवस ताकि ओमन मोर सहीं हो जावंय।
LAM 1:22 “ओमन के जम्मो दुस्टता तोर आघू म आ जावय; ओमन के संग वइसे बरताव कर जइसे तेंह मोर संग मोर जम्मो पाप के कारन करे हवस। मेंह बहुंत कलहरत हंव अऊ मोर मन ह दुरबल हवय।”
LAM 2:1 परभू ह कइसे अपन कोरोध के बादर म बेटी सियोन ला ढांप ले हवय! ओह इसरायल के वैभव ला स्वरग ले खाल्हे धरती म जोर से फटिक दे हवय; ओह अपन कोरोध के दिन म अपन पांव के चौकी ला सुरता नइं करिस।
LAM 2:2 परभू ह बिगर दया के याकूब के जम्मो निवासमन ला लील डारे हवय; अपन कोप म ओह बेटी यहूदा के गढ़मन ला टोर-फोर दे हवय। ओह ओकर राज अऊ येकर हाकिममन ला अपमानित करके भुइयां म ले आय हवय।
LAM 2:3 भयंकर कोरोध म ओह इसरायल के हर एक सींग ला काट दे हवय। जब बईरी ह ओमन के लकठा म आथे त ओह अपन जेवनी हांथ ले ओमन के रकछा नइं करय। ओह एक भयंकर आगी सहीं याकूब म बरे हवय जऊन ह आसपास के जम्मो चीज ला भसम कर देथे।
LAM 2:4 एक बईरी सहीं ओह अपन धनुस ला ताने हवय; ओकर जेवनी हांथ ह तियार हवय। एक बईरी सहीं ओह ओ जम्मो झन ला मार डारे हे जऊन मन हमर नजर म बने रिहिन; ओह बेटी सियोन के तम्बू म अपन कोप ला आगी सहीं उंडेल दे हवय।
LAM 2:5 परभू ह एक बईरी सहीं अय; ओह इसरायल ला लील डारे हवय। ओह ओकर जम्मो महलमन ला लील ले हवय अऊ ओकर गढ़मन ला नास कर दे हवय। ओह बेटी यहूदा बर सोक अऊ बिलाप ला बहुंत बढ़ा दे हवय।
LAM 2:6 ओह अपन निवास ला एक बगीचा सहीं उजार दे हवय; ओह अपन मिले-जुले के जगह ला नास कर दे हवय। यहोवा ह सियोन बर अइसे कर दे हवय कि ओह अपन ठहिराय तिहार अऊ बिसराम दिनमन ला भुला जावय; अपन भयंकर कोरोध म ओह राजा अऊ पुरोहित दूनों के तिरस्कार करे हवय।
LAM 2:7 परभू ह अपन बेदी ला अस्वीकार करे हवय अऊ अपन पबितर-स्थान ला तियाग दे हवय। ओह राजमहल के दीवारमन ला बईरी के हांथ म कर दे हवय; एक ठहिराय गे तिहार के दिन सहीं ओमन यहोवा के घर म एक कोलाहल करे हवंय।
LAM 2:8 यहोवा ह बेटी सियोन के चारों कोति के दीवार ला टोरे-फोरे बर ठान ले हवय। ओह नापे के डोर ला निकाले हवय अऊ नास करे बर अपन हांथ ला नइं रोकिस। ओह किला के सुरकछा दीवार अऊ दीवारमन ले बिलाप करवाईस; एक संग ओमन उजड़ गीन।
LAM 2:9 ओकर दुवारमन भुइयां म धंस गे हवंय; ओमन के छड़मन ला ओह टोरके नास कर दे हवय। ओकर राजा अऊ ओकर हाकिममन आनजातमन के बीच म बंधुवई म हवंय, उहां कानून नइं ए, अऊ ओकर अगमजानीमन ला यहोवा ले अब कोनो दरसन नइं मिलय।
LAM 2:10 बेटी सियोन के अगुवामन भुइयां म चुपचाप बईठथें; ओमन अपन मुड़ म धुर्रा छिंचे हवंय अऊ ओमन बोरा के कपड़ा पहिरे हवंय। यरूसलेम के जवान माईलोगनमन भुइयां कोति अपन मुड़ नवाय हवंय।
LAM 2:11 रो-रोके मोर आंखी नइं दिखत हे, मेंह भीतरे-भीतर पीरा म हंव; मोर हिरदय ला भुइयां म ढारे जावत हे काबरकि मोर मनखेमन नास होवत हवंय, काबरकि लइकामन अऊ दूध पीयइया लइकामन सहर के गलीमन म मूर्छा खाके पड़े हवंय।
LAM 2:12 जब ओमन घायल मनखे सहीं सहर के गलीमन म मूर्छा खाथें, जब ओमन अपन दाई के बाहां म परान छोड़त रहिथें। त ओमन अपन-अपन दाई ला कहिथें, “रोटी अऊ अंगूर के मंद कहां हवय?”
LAM 2:13 हे बेटी यरूसलेम, मेंह तोला का कहंव? मेंह तोर तुलना काकर संग करंव? हे कुंवारी बेटी सियोन, मेंह तोर तुलना काकर संग करके तोला सांतवना देवंव? तोर घाव ह समुंदर सहीं गहिला हवय। तोला कोन चंगा कर सकथे?
LAM 2:14 तोर अगमजानीमन के दरसनमन लबारी बात अऊ बेकार अंय; ओमन तोर पाप ला उजागर नइं करिन नइं तो तोर बंधुवई नइं होतिस। जऊन अगमबानी, ओमन तोर बर करिन ओमन लबारी अऊ बहकानेवाला रिहिन।
LAM 2:15 ओ जम्मो जऊन मन तोर रसता ले होके जाथें ओमन ताली बजाके तोर ठट्ठा करथें; ओमन बेटी यरूसलेम के ये कहिके हंसी उड़ाथें अऊ अपन मुड़ ला हलाथें: “का येह ओ सहर अय जेला सुघरता म भरपूर कहे जावय, जऊन ह जम्मो धरती के आनंद रिहिस?”
LAM 2:16 तोर जम्मो बईरीमन तोर बिरूध म अपन मुहूं खोलथें; ओमन हंसी उड़ाथें अऊ दांत किटकिटात कहिथें, “हमन ओला लील डारे हन। येहीच ह ओ दिन ए, जेकर डहार हमन देखत रहेंन; येला देखे बर हमन जीयत रहेंन।”
LAM 2:17 यहोवा ह अपन योजना ला पूरा करे हवय; ओह अपन बचन ला पूरा करे हवय, जेकर आदेस ओह बहुंत पहिले देय रिहिस। ओह बिगर दया के तोला उठाके फटिक दे हवय, ओह तोर ऊपर बईरी ला खराप नजर ले देखे के अनुमति देय हवय, ओह तोर बईरीमन के सींग ला ऊपर करे हवय।
LAM 2:18 मनखेमन के हिरदय ह परभू ला पुकारथे। हे बेटी सियोन के दीवारमन तुम्हर आंसू ह नदी सहीं दिन अऊ रात बहय; अपनआप ला अराम झन दे, तोर आंखीमन ला अराम झन मिलय।
LAM 2:19 उठ, रथिया के बेरा पुकार, जब रथिया के पहरमन सुरू होथें; परभू के आघू म अपन हिरदय ला पानी सहीं ढार दे। अपन ओ लइकामन के जिनगी खातिर ओकर कोति अपन हांथ ला उठा, जेमन गली के हर कोना म भूख के मारे बेहोस होवथें।
LAM 2:20 “हे यहोवा, देख अऊ बिचार कर: तेंह काकर संग अइसने बरताव करे हस? का माईलोगनमन अपन लइकामन ला खावंय, ओ लइका जेमन के ओमन पालन-पोसन करे हवंय? का पुरोहित अऊ अगमजानीमन परभू के पबितर-स्थान म मारे जावंय?
LAM 2:21 “गली के धुर्रा म जवान अऊ डोकरा दूनों एक संग पड़े रहिथें; मोर जवान छोकरा अऊ जवान छोकरीमन तलवार से मारे गे हवंय। तेंह अपन कोरोध के दिन म ओमन ला मार डारे हस; तेंह बिगर दया के ओमन के बध करे हस।
LAM 2:22 “जइसे तेंह भोज के दिन के नेवता देथस, वइसे तेंह मोर बिरूध म आतंक ला हर तरफ ले बलाय हस। यहोवा के कोरोध के दिन म कोनो भाग नइं सकिन या जिंदा नइं बचिन; जऊन मन के मेंह देखभाल करेंव अऊ पालन-पोसन करेंव, मोर बईरी ह ओमन ला नास कर दे हवय।”
LAM 3:1 मेंह ओ मनखे अंव, जऊन ह यहोवा के कोप के छड़ी के दुवारा पीरा ला देखे हवंव।
LAM 3:2 ओह मोला भगा दे हवय अऊ मोला अंजोर के बदले अंधियार म चलाय हवय;
LAM 3:3 वास्तव म, ओह बार-बार, दिन भर अपन हांथ ला मोर बिरूध उठाय हवय।
LAM 3:4 ओह मोर चमड़ी अऊ मोर मांस ला झुर्रीदार कर दे हवय अऊ मोर हाड़ामन ला टोर दे हवय।
LAM 3:5 ओह करूवाहट अऊ कठिन समय के संग मोर ऊपर टूट पड़े हे अऊ मोला घेर ले हवय।
LAM 3:6 ओह बहुंत पहिले मरे मनखे सहीं मोला अंधियार म रहे बर छोंड़ दे हवय।
LAM 3:7 ओह मोला दीवार ले घेर दे हवय ताकि में भाग झन सकंव; ओह मोला भारी बेड़ी ले बांध रखे हे।
LAM 3:8 अऊ त अऊ जब मेंह मदद बर पुकारथंव या गोहारथंव, त ओह मोर पराथना ला नइं सुनय।
LAM 3:9 ओह गढ़े गय पथरामन ले मोर रसता ला रोक दे हवय; ओह मोर रसतामन ला टेढ़ा-मेड़ा कर दे हवय।
LAM 3:10 जइसे भालू ह सिकार के इंतजार म लेटे रहिथे, जइसे सिंह ह सिकार के इंतजार म छुपे रहिथे,
LAM 3:11 ओह मोला रसता ले घसीटके कुटा-कुटा कर दे हवय अऊ मोला बिगर मदद के छोंड़ दे हवय।
LAM 3:12 ओह अपन धनुस ला ताने हवय अऊ मोला अपन तीर के निसाना बनाय हवय।
LAM 3:13 अपन तरकस के तीरमन ले ओह मोर हिरदय ला छेद दीस।
LAM 3:14 मेंह अपन जम्मो मनखेमन बर हंसी के पात्र बन गे हंव; ओमन गीत के दुवारा दिन भर मोर हंसी उड़ाथें।
LAM 3:15 ओह मोला करू पान ले भर दे हवय ओह मोला पीये बर पित्त दे हवय।
LAM 3:16 ओह कंकड़ ले मोर दांतमन ला टोर दे हवय; ओह धुर्रा म मोला कुचर दे हवय।
LAM 3:17 मोर जिनगी ले सांति छीन लेय गे हवय; मेंह भुला गे हंव कि उन्नति का ए।
LAM 3:18 एकरसेति मेंह कहिथंव, “मोर सोभा ह अऊ यहोवा ले मेंह जऊन आसा करत रहेंव, ओह चले गीस।”
LAM 3:19 मेंह अपन पीरा अऊ एती-ओती भटके के बात, करूवाहट अऊ पित्त ला सुरता करथंव।
LAM 3:20 मेंह ओमन ला बने करके सुरता करथंव, अऊ मोर मनोबल ह मोर भीतर म ही गिरत जात हे।
LAM 3:21 तभो ले मेंह ये सुरता करथंव अऊ एकरे कारन मोला आसा हवय:
LAM 3:22 यहोवा के महान मया के कारन हमन खतम नइं होयेंन, काबरकि ओकर दया हमेसा बने रहिथे।
LAM 3:23 हर बिहनियां ओमन नवां होथें; महान ए तोर बिसवासयोग्यता।
LAM 3:24 मेंह अपनआप ले कहिथंव, “यहोवा ह मोर भाग ए; एकरे कारन मेंह ओकर ऊपर आसा रखहूं।”
LAM 3:25 यहोवा ह ओमन बर बने अय, जऊन मन ओकर ऊपर आसा रखथें, जऊन मन ओकर खोज म रहिथें;
LAM 3:26 यहोवा के उद्धार बर चुपेचाप इंतजार करई ह बने बात ए।
LAM 3:27 एक मनखे बर अपन जवानी के समय जुड़ा उठाना बने बात ए।
LAM 3:28 ओह चुपेचाप अकेला बईठे रहय, काबरकि यहोवा ह ये जुड़ा ला ओकर ऊपर डाले हवय।
LAM 3:29 ओह अपन चेहरा ला धुर्रा म तोपय— येमा अभी भी आसा हो सकथे।
LAM 3:30 ओह अपन गाल ला ओकर कोति करय, जऊन ह ओला तमाचा मारे चाहथे, अऊ ओह बहुंत कलंकित होवय।
LAM 3:31 काबरकि परभू ह कोनो ला हमेसा बर नइं तियागे।
LAM 3:32 हालाकि ओह दुख लानथे, पर ओह करूना करही, अइसे महान ए, ओकर न टूटनेवाला मया।
LAM 3:33 काबरकि ओह मन से काकरो ऊपर दुख या पीरा नइं लानय।
LAM 3:34 देस के जम्मो कैदीमन ला गोड़ तरी कुचरई,
LAM 3:35 सर्वोच्च परमेसर के आघू म मनखेमन ला ओमन के अधिकार ले वंचित करई,
LAM 3:36 अऊ ओमन ला नियाय ले वंचित करई— अइसन चीजमन ला परभू ह नइं देख सकय?
LAM 3:37 यदि परभू ह हुकूम नइं दे हवय, त कोन ए ओ, जऊन ह अपन कहे बात ला पूरा कर सकथे?
LAM 3:38 बिपत्ति अऊ बने बात, का ये दूनों सर्वोच्च परमेसर के हुकूम ले नइं आवंय?
LAM 3:39 जीयत मनखे ला काबर सिकायत करना चाही जब ओला ओकर पाप के सजा मिलथे?
LAM 3:40 आवव, हमन अपन चालचलन ला जांचन अऊ परखन, अऊ आवव, हमन यहोवा करा लहुंट आवन।
LAM 3:41 आवव, हमन अपन हिरदय अऊ अपन हांथमन ला स्वरग के परमेसर कोति उठावन अऊ ये कहन:
LAM 3:42 “हमन पाप अऊ बिदरोह करे हन अऊ तेंह हमन ला छेमा नइं करे हस।
LAM 3:43 “तेंह कोरोध ले भरके हमर पीछा करय; तेंह बिगर दया के मनखेमन ला जान से मारे हस।
LAM 3:44 तेंह अपनआप ला बादर ले ढांप ले हस ताकि कोनो पराथना तोर करा झन हबरे।
LAM 3:45 तेंह हमन ला जाति-जाति के मनखेमन के बीच म मईला अऊ अनाथ बना दे हस।
LAM 3:46 “हमर जम्मो बईरीमन हमर बिरूध म बहुंत कुछू कहत हें।
LAM 3:47 हमन आतंक अऊ संकट, बिनास अऊ बरबादी झेलत हन।”
LAM 3:48 मोर आंखीमन ले आंसू के धार बहत हे काबरकि मोर मनखेमन नास होवत हें।
LAM 3:49 मोर आंखीमन ले आंसू ह बिगर कोनो अराम के लगातार बहते रहिही,
LAM 3:50 जब तक कि स्वरग ले यहोवा ह खाल्हे नइं देखही।
LAM 3:51 मोर सहर के जम्मो माईलोगनमन के कारन जऊन कुछू मेंह देखथंव, ओकर से मोर मन ला दुख लगथे।
LAM 3:52 जऊन मन बिगर कारन के मोर बईरी हो गे रिहिन ओमन चिरई सहीं मोर सिकार करिन।
LAM 3:53 ओमन मोला खंचवा म डारके मोर परान लेय के कोसिस करिन अऊ मोर ऊपर पथरा फेंकिन;
LAM 3:54 पानी ह मोर मुड़ ऊपर तक आ गीस, अऊ मेंह सोचेंव कि में नास होनेचवाला हंव।
LAM 3:55 हे यहोवा, गहिला खंचवा ले, मेंह तोर नांव ला पुकारेंव।
LAM 3:56 तेंह मोर बिनती ला सुने: “मदद बर मोर पुकार के सेति अपन कान ला बंद झन कर।”
LAM 3:57 जब मेंह तोला बलांय, त तेंह मोर लकठा म आय, अऊ तेंह कहे, “झन डर।”
LAM 3:58 हे परभू, तेंह मोर मामला ला अपन हांथ म लेय; अऊ तेंह मोर जिनगी ला बचाय।
LAM 3:59 हे यहोवा, जऊन अनियाय मोर ऊपर करे गीस, ओला तेंह देखे हस। मोर मामला ला संभाल!
LAM 3:60 ओमन जऊन बदला लीन अऊ मोर बिरूध करे गे ओमन के जम्मो सडयंत्र ला तेंह देखे हस।
LAM 3:61 हे यहोवा, ओमन के दुवारा करे गे बेजत्ती अऊ मोर बिरूध करे गे जम्मो सडयंत्र के बारे तेंह सुने हस—
LAM 3:62 मोर बईरीमन मोर बिरूध म दिन भर, का कानाफूसी करथें अऊ बड़बड़ाथें।
LAM 3:63 ओमन ला देख! उठत या बईठत, ओमन अपन गीत म मोर हंसी उड़ाथें।
LAM 3:64 हे यहोवा, ओमन के काम के मुताबिक, जऊन दुस्ट काम ओमन अपन हांथ ले करे हवंय, ओकर बदला ले।
LAM 3:65 ओमन के हिरदय ऊपर एक परदा डाल दे, अऊ तोर सराप ओमन ला लगे!
LAM 3:66 हे यहोवा, अकास के खाल्हे ले कोरोध म ओमन के पीछा कर अऊ ओमन ला नास कर दे।
LAM 4:1 सोन ह कइसे अपन चमक गंवा दे हवय, सुध सोन ह खोटा हो गीस! हर एक गली के कोना म पबितर रत्न बगरे परे हवंय।
LAM 4:2 सियोन के कीमती लइकामन, एक समय ओमन के कीमत सोन सहीं रिहिन, पर अब माटी के बरतन सहीं समझे जावत हें, कुम्हार के हांथ के बनाय चीज सहीं!
LAM 4:3 अऊ त अऊ सियार ह अपन लइकामन ला अपन दूध पीयाथे, पर मोर मनखेमन मरू-भुइयां के सुतुरमुर्ग सहीं निरदयी हो गे हवंय।
LAM 4:4 पीयास के मारे दूध पीनेवाला लइका के जीभ ह ओकर तालू म चपक जाथे; लइकामन रोटी मांगथें, पर ओमन ला कोनो रोटी नइं दें।
LAM 4:5 ओ मनखे जऊन मन एक समय सुवादवाला भोजन करत रिहिन ओमन अब गली म अनाथ हो गे हवंय। ओ मनखे जऊन मन राजकीय कपड़ा पहिरे पलिन-बढ़िन ओमन अब राख के कुढ़ा म परे हवंय।
LAM 4:6 मोर मनखेमन के दंड ह सदोम ले कहीं बढ़के हवय, कोनो मदद के हांथ भी नइं उठिस अऊ देखते-देखत ओकर सर्वनास हो गीस।
LAM 4:7 ओमन के राजकुमारमन बरफ ले जादा चमकवाले अऊ दूध ले जादा सफेद रिहिन, ओमन के देहें ह गुलाबी रत्न ले भी जादा चमकीला, अऊ ओमन के रूप ह नीलमनि सहीं रिहिस।
LAM 4:8 पर अब ओमन कालिख ले घलो जादा करिया हो गे हवंय; गली म ओमन ला कोनो नइं चिनहें। ओमन के चमड़ी ह हाड़ामन म चिपक गे हवय, येह छड़ी सहीं सूख गे हवय।
LAM 4:9 जऊन मन तलवार ले मारे गीन, ओमन बेहतर अंय येकर बनिस्पत कि जऊन मन अकाल ले मरथें; खेत म अन्न के कमी के कारन भूख ले मरथें अऊ बेकार होथें।
LAM 4:10 करूना ले भरपूर दाईमन अपन खुद के हांथ ले अपन खुद के लइकामन ला रांधे हवंय, अऊ येह ओमन के जेवन होय हे जब मोर मनखेमन ला नास करे गीस।
LAM 4:11 यहोवा ह अपन कोप ला पूरा भड़काय हवय; ओह अपन भयंकर कोरोध परगट करे हवय। ओह सियोन म एक आगी लगाय हवय जऊन ह ओकर नीव ला जलाके भसम कर दीस।
LAM 4:12 धरती के राजामन बिसवास नइं करिन न ही संसार के कोनो मनखे बिसवास करिन कि बईरी अऊ बिरोधीमन यरूसलेम के दुवारमन के भीतर जा सकहीं।
LAM 4:13 पर ओकर अगमजानीमन के पाप अऊ पुरोहितमन के अपराधमन के कारन अइसने होईस, जऊन मन ओकर भीतर धरमी के खून बहाईन।
LAM 4:14 अब ओमन गलीमन म टटोलत हवंय मानो ओमन अंधरा हो गे हवंय। ओमन खून ले अइसने असुध हो गे हवंय कि कोनो ओमन के कपड़ा ला छुए के हिम्मत नइं करंय।
LAM 4:15 मनखेमन ओमन ले चिचियाके कहिथें, “दूर हटव, तुमन असुध हव। दूरिहा रहव! दूरिहा! हमन ला झन छुवव!” जब ओमन भागथें अऊ भटकथें, त जाति-जाति के मनखेमन कहिथें, “ओमन अब इहां नइं रह सकंय।”
LAM 4:16 यहोवा ह खुद ओमन ला तितिर-बितिर कर दे हवय; ओह अब ओमन के धियान नइं देवय। पुरोहितमन ला आदर नइं दिये जावय, अऊ अगुवामन ऊपर किरपा नइं करे जावय।
LAM 4:17 अऊ ये घलो कि हमर आंखीमन मदद बर बेकार के रसता देखत कमजोर हो गे हवंय; हमन अपन किलामन ले एक जाति कोति देखत रहेंन जऊन ह हमर बचाव नइं कर सकिस।
LAM 4:18 मनखेमन हर कदम म हमर पीछा करिन, जेकर से हमर गलीमन म हमन चल नइं सकेंन। हमर आखिरी समय लकठा म रिहिस, हमर दिनमन गनती के रिहिन, काबरकि हमर अन्त आ गे रिहिस।
LAM 4:19 हमर पीछा करइयामन अकास के गिधवामन ले घलो तेज रिहिन; ओमन पहाड़ ऊपर हमर पीछा करिन अऊ निरजन जगह म हमर घात म रिहिन।
LAM 4:20 यहोवा के अभिसिक्त, हमर खुद के जिनगी के सांस ह ओमन के फांदा म फंस गीस। हमन सोचेंन कि ओकर छइहां म हमन जाति-जाति के मनखेमन के बीच रहिबो।
LAM 4:21 हे बेटी एदोम, तें जो ऊज देस म रहिथस, आनंद मना अऊ खुसी रह। पर ओ कटोरा ह तोर मेर घलो हबरही; तेंह मंद पीके नंगरी हो जाबे।
LAM 4:22 हे बेटी सियोन, तोर सजा ह खतम हो जाही; ओह तोर बंधुवई के समय ला अऊ नइं बढ़ावय। पर हे बेटी एदोम, ओह तोर पाप के दंड दीही, अऊ तोर दुस्टता ला परगट कर दीही।
LAM 5:1 हे यहोवा, हमर ऊपर जऊन बीते हवय, ओला सुरता कर; हमर ऊपर धियान दे, अऊ हमर बेजत्ती ला देख।
LAM 5:2 हमर उत्तराधिकार ह अजनबीमन ला, अऊ हमर घर परदेसीमन ला दे दिये गे हवय।
LAM 5:3 हमन बिगर ददा के हो गे हवन, हमर दाईमन बिधवा हो गे हवंय।
LAM 5:4 पीये के पानी बिसोना जरूरी हो गे हवय; हमन ला लकरी तभे मिलथे, जब हमन ओकर दाम देथन।
LAM 5:5 जऊन मन हमर पीछा करत हें, ओमन हमर गोड़ मेर आ गे हवंय; हमन थक गे हन अऊ हमन ला अराम नइं मिलत हे।
LAM 5:6 हमन भरपूर जेवन पाय बर मिसर अऊ अस्सूर के अधीन हो गेंन।
LAM 5:7 हमर पुरखामन पाप करिन अऊ ओमन खतम हो गीन, अऊ हमन ओमन के दंड भोगत हन।
LAM 5:8 गुलाममन हमर ऊपर सासन करत हें, अऊ हमन ला ओमन के हांथ ले छोंड़ाय बर कोनो नइं एं।
LAM 5:9 निरजन जगह म तलवार के कारन जब हमन अपन जान ला जोखिम म डालथन, त हमन ला जेवन मिलथे।
LAM 5:10 हमर चमड़ी ह भट्ठी सहीं गरम हो गे हवय, भूख के मारे जर आवत हे।
LAM 5:11 सियोन म माईलोगनमन अऊ यहूदा के नगरमन म कुंवारीमन ला भ्रस्ट कर देय गे हवय।
LAM 5:12 हाकिममन ला हांथ के बल लटका देय गे हवय; अगुवामन के आदर नइं करे जावय।
LAM 5:13 जवानमन चक्की चलाय म मेहनत करथें; लड़कामन लकरी के बोझा उठात लड़खड़ाथें।
LAM 5:14 अगुवामन सहर के दुवार ला छोंड़के चले गे हवंय; जवानमन अपन संगीत ला छोंड़ दे हवंय।
LAM 5:15 आनंद ह हमर हिरदय ले चले गे हवय; हमर नचई ह सोक म बदल गे हवय।
LAM 5:16 मुकुट ह हमर मुड़ ले गिर गे हवय। हमन ला धिक्कार ए, काबरकि हमन पाप करे हन!
LAM 5:17 येकर कारन हमर हिरदय ह कमजोर हो गे हवय, ये बातमन के कारन हमर नजर ह कमजोर हो गे हवय
LAM 5:18 काबरकि सियोन पहाड़ उजाड़ पड़े हे, अऊ सियारमन येकर ऊपर घुमत हें।
LAM 5:19 हे यहोवा, तेंह सदाकाल तक राज करथस; तोर सिंघासन ह पीढ़ी-पीढ़ी तक बने रहिथे।
LAM 5:20 तेंह काबर हमन ला हमेसा भुला जाथस? तेंह काबर हमन ला अतेक लम्बा समय तक छोंड़ देथस?
LAM 5:21 हे यहोवा, तोर संग हमर संबंध ला फेर ठीक कर दे, कि हमन लहुंटके आवन; हमर दिनमन ला फेर पुराना समय सहीं कर दे
LAM 5:22 यदि तेंह हमन ला पूरा तियाग नइं दे हस अऊ हमर ऊपर बहुंत नराज नइं अस त।
EZE 1:1 जब मोर उमर ह तीस साल, चार महिना अऊ पांच दिन रिहिस, अऊ मेंह बंधुवामन के बीच कबार नदी के तीर म रहेंव, त अकास खुल गीस अऊ मेंह परमेसर के दरसनमन ला देखेंव।
EZE 1:2 यहोयाकीन राजा के बंधुवई म जाय के पांचवां साल के पांचवां महिना के पांचवां दिन—
EZE 1:3 बेबिलोन देस म कबार नदी के तीर म, यहोवा के बचन ह बूजी के बेटा यहेजकेल पुरोहित करा आईस, अऊ यहोवा के हांथ ह ओकर ऊपर रिहिस।
EZE 1:4 मेंह देखेंव कि उत्तर कोति ले एक बड़े आंधी आवत रिहिस—कड़कत बिजली के संग एक बड़े बादर अऊ चारों कोति बहुंत अंजोर रिहिस। आगी के बीच ह चमकत धातु के सहीं दिखत रिहिस,
EZE 1:5 अऊ आगी म चार जीयत जीवधारी सहीं दिखत रिहिन। देखे म ओमन के रूप ह मनखे असन रिहिस,
EZE 1:6 पर ओमन म ले हर एक के चार ठन मुहूं अऊ चार ठन डेना रिहिस।
EZE 1:7 ओमन के गोड़ सीधा रिहिस; अऊ ओमन के गोड़ के तलवा ह बछरू के खुरमन असन रिहिस अऊ चिक्कन कांसा असन चमकत रिहिस।
EZE 1:8 ओमन के चारों कोति डेनामन के खाल्हे म मनखे सहीं हांथमन रिहिन। ओ चारों के मुहूं अऊ डेनामन रिहिन,
EZE 1:9 अऊ ओमन के डेनामन एक-दूसर के डेना ला छूवत रिहिन। हर एक ह आघू सीधा जावय; अऊ ओमन बिगर मुड़े आघू बढ़त रिहिन।
EZE 1:10 ओमन के मुहूं ह अइसने रिहिस: चारों म ले हर एक के एक मुहूं ह मनखे असन रिहिस, अऊ ओ चारों के जेवनी कोति के मुहूं ह सिंह सहीं, डेरी कोति के मुहूं ह बईला सहीं; अऊ हर एक के गिधवा असन घलो एक मुहूं रिहिस।
EZE 1:11 ओमन के मुहूंमन अइसने ही रिहिन। ओमन के हर एक के दू ठन डेना ऊपर कोति फईले रिहिन, अऊ ये डेनामन अपन दूनों तरफ के जीवधारीमन ला छूवत रिहिन, अऊ हर एक ह दू ठन डेनामन ले अपन देहें ला तोपे रिहिस।
EZE 1:12 ओमन सीधा आघू जावत रिहिन, जेति आतमा जावय, ओमन बिगर मुड़े ओती जावत रिहिन।
EZE 1:13 ओ जीवधारीमन के रूप ह आगी के बरत कोइला या मसाल सहीं रिहिस। ओ आगी ह जीवधारीमन के बीच एती-ओती खसकत रिहिस; येह चमकत रिहिस, अऊ येकर ले बिजली चमकत रिहिस।
EZE 1:14 ओ जीवधारीमन बिजली के चमक सहीं तेजी से एती-ओती होवत रिहिन।
EZE 1:15 जब मेंह जीवधारीमन ला देखत रहेंव, त का देखेंव कि ओ चार मुहूंवाले हर एक जीवधारी के बाजू म भुइयां म एक-एक चक्का रहय।
EZE 1:16 ओ चक्कामन के रूप अऊ बनावट ये किसम ले रहय: ओमन पुखराज असन चमकत रिहिन, अऊ चारों एक समान दिखत रिहिन। ओमन अइसे बनाय गे दिखत रिहिन मानो एक पहिया के भीतर म दूसर पहिया हो।
EZE 1:17 जब ओमन आघू बढ़ंय, त ओमन ओ दिसा म जावंय, जऊन दिसा कोति जीवधारीमन के चेहरा रहय; जब जीवधारीमन चलंय, त पहियामन अपन दिसा नइं बदलंय।
EZE 1:18 ओ चक्कामन के घेरा ह ऊंचा अऊ अद्भूत रिहिस, अऊ चारों पहिया के घेरामन म जम्मो कोति आंखी ही आंखी रिहिस।
EZE 1:19 जब ओ जीवधारीमन आघू बढ़ंय, तब ओमन के बाजू के पहियामन घलो आघू बढ़ंय; अऊ जब ओ जीवधारीमन भुइयां ले ऊपर उठंय, तब पहियामन घलो ऊपर उठंय।
EZE 1:20 जऊन कोति आतमा ह जावय, ओती ओमन घलो जावंय, अऊ ओ पहियामन जीवधारीमन के संग ऊपर उठंय; काबरकि ओमन के आतमा ह ओ पहियामन म रिहिस।
EZE 1:21 जब ओ जीवधारीमन आघू बढ़ंय, त येमन घलो आघू बढ़ंय; अऊ जब ओ जीवधारीमन ठाढ़ होवंय, त येमन घलो ठाढ़ हो जावंय; अऊ जब ओमन भुइयां ले ऊपर उठंय, त ये पहियामन घलो ओमन के संग ऊपर उठंय; काबरकि जीवधारीमन के आतमा ह ये पहियामन म रिहिस।
EZE 1:22 जीवधारीमन के मुड़ के ऊपर जऊन चीज ह फईले रिहिस, ओह अकास-मंडल सहीं दिखत रिहिस, अऊ बरफ असन चमकत रिहिस, अऊ अद्भूत रिहिस।
EZE 1:23 अकास-मंडल के खाल्हे, ओमन के डेनामन एक-दूसर कोति फईले रिहिन; अऊ हर एक जीवधारी ह दू ठन डेना ले अपन देहें ला ढांपे रिहिस।
EZE 1:24 जब ओ जीवधारीमन आघू बढ़ंय, त मेंह सुनंय, ओमन के डेना ले बहत पानी के गरजन सहीं, सर्वसक्तिमान परमेसर के अवाज सहीं, सेना के कोलाहल असन अवाज आवय। जब ओमन ठाढ़ होवंय, तब ओमन अपन डेना ला खाल्हे कर लेवंय।
EZE 1:25 फेर ओमन के मुड़ीमन के ऊपर जऊन अकास-मंडल रिहिस, ओकरे ऊपर ले एक सबद सुनई पड़य जब ओमन डेना ला लटकाके ठाढ़ होवंय।
EZE 1:26 जऊन ह अकास-मंडल अऊ ओमन के मुड़ के ऊपर म रिहिस, ओह नीलमनि के सिंघासन असन दिखत रिहिस; ये सिंघासन के ऊपर एक मनखे असन कोनो दिखई देवत रिहिस।
EZE 1:27 ओकर कनिहां ले लेके ऊपर कोति मोला चमकत धातु असन दिखई पड़त रिहिस, मानो आगी ले भरे हवय, अऊ ओकर कनिहां ले लेके खाल्हे कोति आगी असन दिखई पड़त रिहिस; अऊ ओकर चारों कोति चमकत अंजोर रिहिस।
EZE 1:28 जइसने बरसात के दिन बादर म धनुस दिखई पड़थे, वइसने ही चारों कोति के अंजोर के चमक दिखत रिहिस। यहोवा के महिमा के समानता म ये रूप रिहिस। ओला देखके, मेंह मुहूं के बल गिरेंव, अऊ मेंह एक झन के गोठियाय के अवाज सुनेंव।
EZE 2:1 ओह मोर ले कहिस, “हे मनखे के बेटा, अपन गोड़ म ठाढ़ हो जा, अऊ मेंह तोर ले गोठियाहूं।”
EZE 2:2 जइसने ही ओह मोर ले ये कहिस, वइसने ही आतमा ह मोर म हमाके मोला मोर गोड़ के बल म ठाढ़ कर दीस; अऊ मेंह ओला मोर ले गोठियावत सुनेंव।
EZE 2:3 ओह मोर ले कहिस, “हे मनखे के बेटा, मेंह तोला इसरायलीमन करा याने कि बलवा करइया जाति मेर पठोवत हंव, जेमन मोर बिरूध म बलवा करे हवंय; ओमन अऊ ओमन के पुरखामन आज के दिन तक मोर बिरूध म बिदरोह करत आवत हवंय।
EZE 2:4 जऊन मनखेमन करा मेंह तोला पठोवत हंव, ओमन हठी अऊ जिद्दी अंय। तेंह ओमन ले कहिबे, ‘परमपरधान यहोवा ह ये कहत हे।’
EZE 2:5 अऊ चाहे ओमन सुनंय या झन सुनंय—काबरकि ओमन बलवा करइया मनखे अंय—ओमन अतका जान लीहीं कि ओमन के बीच म एक अगमजानी हवय।
EZE 2:6 अऊ तें, हे मनखे के बेटा, ओमन ले या ओमन के बात ले झन डरबे। झन डरबे, हालाकि कंटिली झाड़ी अऊ कांटामन तोर चारों कोति हवंय अऊ तेंह बिच्छूमन के बीच म रहिथस। ओमन के बात ले झन डरबे अऊ ओमन ले भयभीत झन होबे, हालाकि ओमन बिदरोही मनखे अंय।
EZE 2:7 तेंह ओमन ला मोर बात ला जरूर बताबे, चाहे ओमन सुनंय या झन सुनंय, काबरकि ओमन बिदरोही मनखे अंय।
EZE 2:8 पर तें, हे मनखे के बेटा, मेंह जऊन बात कहत हंव, ओला सुन। ओ बिदरोही मनखेमन असन तेंह बिदरोह झन करबे; जऊन कुछू मेंह तोला देवत हंव, ओला मुहूं खोलके खा ले।”
EZE 2:9 तब मेंह देखेंव कि मोर कोति एक हांथ बढ़िस। ओ हांथ म एक ठन किताब रिहिस,
EZE 2:10 जेला ओह मोर आघू म खोलिस। ओ किताब के दूनों कोति बिलाप अऊ सोक अऊ दुख के बातमन लिखाय रिहिन।
EZE 3:1 अऊ ओह मोर ले कहिस, “हे मनखे के बेटा, तोर आघू म जऊन कुछू हवय, ओला खा ले; याने कि ये किताब ला खा, तब जाके इसरायल के मनखेमन ले गोठिया।”
EZE 3:2 एकरसेति मेंह मुहूं खोलेंव, अऊ ओह ओ किताब ला मोला खाय बर दीस।
EZE 3:3 तब ओह मोर ले कहिस, “हे मनखे के बेटा, ये किताब, जेला मेंह तोला देवत हंव, येला खा अऊ येकर से अपन पेट भर ले।” त मेंह ओला खा लेंव, अऊ ओह मोर मुहूं म मंधरस सहीं मीठ लगिस।
EZE 3:4 तब ओह मोर ले कहिस: “हे मनखे के बेटा, अब तें इसरायल के मनखेमन करा जाके ओमन ला मोर बात सुना।
EZE 3:5 तोला कोनो कठिन बोली या अनजान भासा वाले मनखेमन करा भेजे नइं जावत हे, पर तोला इसरायल के मनखेमन करा पठोय जावत हे—
EZE 3:6 कठिन बोली या अनजान भासा वाले बहुंते मनखेमन करा नइं, जेमन के गोठ ला तें नइं समझ सकस। खचित यदि मेंह तोला ओमन करा पठोय रहितेंव, त ओमन तोर बात ला सुनतिन।
EZE 3:7 पर इसरायल के मनखेमन तोर बात ला सुने नइं चाहत हें, काबरकि ओमन मोर बात ला सुने नइं चाहत हें; जम्मो इसरायलीमन अपन मन ला कठोर कर ले हवंय अऊ जिद्दी हो गे हवंय।
EZE 3:8 पर मेंह तोला ओमन सहीं न झुकनेवाला अऊ कठोर बना दूहूं।
EZE 3:9 मेंह तोर माथा ला सबले कठोर पथरा सहीं कर दूहूं, चकमक पथरा ले घलो कठोर। ओमन ले झन डरबे या ओमन ले भयभीत झन होबे, हालाकि ओमन बिदरोही मनखे अंय।”
EZE 3:10 अऊ ओह मोर ले कहिस, “हे मनखे के बेटा, धियान देके सुन अऊ जऊन बात मेंह तोर ले कहत हंव, ओ जम्मो ला अपन हिरदय म धर।
EZE 3:11 अब बंधुवई म गय अपन ओ मनखेमन करा जाके ओमन ले बातचीत कर। ओमन ले कह, ‘परमपरधान यहोवा ह ये कहत हे,’ चाहे ओमन सुनंय या झन सुनंय।”
EZE 3:12 तब आतमा ह मोला ऊपर उठाईस, अऊ मेंह अपन पाछू बड़े घरघराहट के अवाज सुनेंव, जब यहोवा के तेज ह ओ जगह ले उठिस, जिहां ओह रिहिस।
EZE 3:13 येह जीवधारीमन के ओ डेनामन के अवाज रिहिस, जेमन एक-दूसर ले रगड़ात रिहिन, अऊ येह ओमन के बाजू के पहियामन के अवाज रिहिस, एक बड़े घरघराहट के अवाज।
EZE 3:14 आतमा ह तब मोला उठाके दूरिहा ले गीस, अऊ मोर मन ह करू हो गे अऊ मेंह कोरोध ले भर गेंव, अऊ यहोवा के मजबूत हांथ ह मोर ऊपर रिहिस।
EZE 3:15 मेंह ओ बंधुवा मनखेमन करा आयेंव, जेमन कबार नदी के लकठा म तेल-अबीब म रहत रिहिन। अऊ उहां, जिहां ओमन रहत रिहिन, मेंह सात दिन तक ओमन के बीच म दुखी होके बईठे रहेंव।
EZE 3:16 सात दिन के आखिरी म यहोवा के ये बचन मोर मेर आईस:
EZE 3:17 “हे मनखे के बेटा, मेंह तोला इसरायल के मनखेमन बर एक पहरेदार ठहिराय हंव; एकरसेति जऊन बात मेंह कहत हंव, ओला सुन अऊ ओमन ला मोर कोति ले चेता दे।
EZE 3:18 जब मेंह एक दुस्ट मनखे ला कहिथंव, ‘तेंह जरूर मरबे,’ अऊ यदि तें ओकर जिनगी बचाय बर ओकर दुस्ट चालचलन ला बदले बर नइं चेतावस या नइं कहस, त ओ दुस्ट मनखे ह अपन पाप के कारन मरही, अऊ मेंह तोला ओकर खून बर जिम्मेदार ठहिराहूं।
EZE 3:19 पर यदि तेंह दुस्ट मनखे ला चेताथस अऊ ओह अपन दुस्टता ला या अपन बुरई के काम ला नइं छोंड़य, त ओह अपन पाप के कारन मरही; पर तें अपनआप ला बचा लेबे।
EZE 3:20 “जब कोनो धरमी जन अपन धरमीपन ले फिरके दुस्ट काम करथे, अऊ मेंह ओकर आघू म ठोकर खाय के चीज धर देथंव, त ओह मरही, काबरकि तेंह ओला नइं चेताय, एकरसेति ओह अपन पाप म मरही। अऊ जऊन धरमी काम ओह करे होही, ओला सुरता नइं करे जावय, अऊ मेंह तोला ओकर खून बर जिम्मेदार ठहिराहूं।
EZE 3:21 पर यदि तें धरमी जन ला पाप नइं करे बर चेताथस अऊ ओह पाप नइं करय, त ओह जरूर जीयत रहिही, काबरकि ओह चेतउनी ऊपर धियान दीस, अऊ तें अपनआप ला बचा लेबे।”
EZE 3:22 यहोवा के हांथ ह उहां मोर ऊपर रिहिस, अऊ ओह मोर ले कहिस, “उठ अऊ मैदान म जा, अऊ उहां मेंह तोर ले गोठियाहूं।”
EZE 3:23 तब मेंह उठके मैदान म गेंव, अऊ मेंह देखेंव कि यहोवा के तेज ह उहां रिहिस, ये तेज ह वइसने ही रिहिस, जइसने मेंह कबार नदी के तीर म देखे रहेंव, अऊ मेंह मुहूं के बल गिर पड़ेंव।
EZE 3:24 तब आतमा ह मोर म हमाईस अऊ मोला मोर गोड़मन म ठाढ़ कर दीस। ओह मोर ले गोठियाईस अऊ कहिस: “जा, अपनआप ला अपन घर के भीतरी बंद कर ले।
EZE 3:25 अऊ हे मनखे के बेटा, ओमन तोला रस्सी म बांध दीहीं; तोला बांध दिये जाही, जेकर कारन तेंह निकलके मनखेमन के बीच म नइं जा सकबे।
EZE 3:26 मेंह तोर जीभ ला तोर मुहूं के तालू ले चपका दूहूं; जेकर ले तेंह चुपेचाप रहिबे अऊ ओमन ला डांट नइं सकबे, काबरकि ओमन बिदरोही मनखे अंय।
EZE 3:27 पर जब मेंह तोर ले गोठियाहूं, तब मेंह तोर मुहूं ला खोल दूहूं अऊ तें ओमन ला कहिबे, ‘परमपरधान यहोवा ह ये कहत हे।’ जऊन ह सुने चाहथे, ओह सुनय, अऊ जऊन ह नइं सुने चाहय, ओह झन सुनय; काबरकि ओमन बिदरोही मनखे अंय।
EZE 4:1 “अब, हे मनखे के बेटा, तें माटी के एक ईंटा ला ले अऊ येला अपन आघू म रखके ओकर ऊपर यरूसलेम सहर के तसबीर बना।
EZE 4:2 तब येकर घेराबंदी कर: येकर बिरूध घेराबंदी के काम कर, येमा एक ठन उतारू जगह बना, येकर बिरूध छावनीमन ला देखा अऊ येकर चारों कोति बार-बार पीटके अवाज करइया मसीन लगा।
EZE 4:3 तब तेंह लोहा के एक कढ़ाही ले, अऊ ओला अपन अऊ सहर के बीच लोहा के एक दीवार सहीं रख अऊ अपन मुहूं ला ओकर कोति कर। त ओकर घेराबंदी हो जाही, अऊ तें ओकर घेराबंदी कर लेबे। येह इसरायल के मनखेमन बर एक चिनहां ठहिरही।
EZE 4:4 “फेर तें डेरी करवट लेके लेट जा अऊ इसरायल के मनखेमन के पाप ला अपन ऊपर रख। तोला बहुंत दिन तक अइसने करवट म लेटके ओमन के पाप के बोझा ला सहना हे।
EZE 4:5 ओमन जतेक साल पाप म लगाय हवंय, मेंह ओही संखिया म तोर बर दिन ठहिराय हवंव; याने कि 390 दिन तक तें इसरायल के मनखेमन के पाप के भार ला सहत रहिबे।
EZE 4:6 “जब तें येला पूरा कर लेबे, तब तें फेर लेट जाबे, ये बेरा जेवनी करवट म लेटबे, अऊ यहूदा के मनखेमन के पाप ला सहिबे। मेंह तोर बर 40 दिन ठहिराय हंव, हर साल बर एक दिन।
EZE 4:7 तब तें अपन मुहूं ला यरूसलेम के घेराबंदी कोति कर लेबे अऊ उघरे बाहां ओकर बिरूध अगमबानी करबे।
EZE 4:8 मेंह तोला रस्सीमन ले बांध दूहूं, ताकि तेंह करवट नइं बदल सकबे, जब तक कि तेंह अपन घेराबंदी के दिनमन ला पूरा नइं कर लेबे।
EZE 4:9 “तें गहूं अऊ जौ, सेमी अऊ दाल, बाजरा अऊ कठिया गहूं ला ले; येमन ला एक ठन बड़े बरतन म रख अऊ ओमन ले अपन बर रोटी बनाय करबे। तेंह येला ओ 390 दिन के दौरान खाय करबे, जब तें अपन करवट म लेटे रहिबे।
EZE 4:10 हर दिन तोला तऊलके बीस सेकेल जेवन करना हे अऊ ये जेवन ला ठहिराय गे समय म करना हे।
EZE 4:11 पानी ला घलो तें नापके; हर दिन एक हीन के छठवां भाग ला ठहिराय गय समय म पीबे।
EZE 4:12 तोर जेवन जौ के बने एक रोटी बरोबर होही; येला मनखेमन के देखत म बनाबे अऊ येला बनाय बर मनखे के मल के उपयोग आगी बारे बर करबे।”
EZE 4:13 फेर यहोवा ह कहिस, “ये किसम ले इसरायल के मनखेमन ओ जातिमन के बीच म असुध जेवन खाय करहीं, जिहां मेंह ओमन ला भगा दूहूं।”
EZE 4:14 तब मेंह कहेंव, “हे परमपरधान यहोवा, अइसन झन होवय। मेंह अपनआप ला कभू असुध नइं करे हवंव। अपन जवानी ले लेके अब तक मेंह कोनो मरे पसु अऊ जंगली पसु के दुवारा मारे गय मांस नइं खाय हंव। कोनो भी असुध मांस मोर मुहूं म कभू नइं गे हवय।”
EZE 4:15 तब ओह मोला कहिस, “ठीक हे, मेंह तोला रोटी बनाय बर मनखे के मल के बदले आगी बर गाय के गोबर के उपयोग करे बर देवत हंव।”
EZE 4:16 फेर ओह मोर ले कहिस, “हे मनखे के बेटा, मेंह यरूसलेम म जेवन-पानी देना बंद कर दूहूं। ये खातिर मनखेमन हर दिन तऊल-तऊलके चिंता करत जेवन करहीं अऊ नाप-नापके निरास मन से पानी पीहीं,
EZE 4:17 काबरकि जेवन अऊ पानी के कमी हो जाही। ओमन एक-दूसर ला देखके डर जाहीं अऊ अपन पाप के कारन बरबाद हो जाहीं।
EZE 5:1 “अब, हे मनखे के बेटा, एक धारदार तलवार ला ले, अऊ ओकर उपयोग अपन मुड़ अऊ दाढ़ी के चुंदी ला मुड़ाय बर उस्तरा के रूप म कर। तब तराजू लेके चुंदीमन के भाग कर ले।
EZE 5:2 जब तोर घेराबंदी के दिनमन खतम हो जावंय, तब सहर के भीतर एक तिहाई चुंदी ला जला देबे। तब एक तिहाई चुंदी ला लेके सहर के चारों कोति जाके तलवार ले मारबे। अऊ एक तिहाई चुंदी ला हवा म उड़ा देबे। काबरकि मेंह तलवार खींचके ओमन के पीछा करहूं।
EZE 5:3 पर कुछू चुंदी ला लेके अपन ओनहा के छोर के मोड़ान म खोंच देबे।
EZE 5:4 फेर ये चुंदी म ले कुछू ला लेबे अऊ ओमन ला आगी म फेंकके जला देबे। उहां ले एक ठन जुवाला ह पूरा इसरायल म फईल जाही।
EZE 5:5 “परमपरधान यहोवा ह ये कहत हे: येह यरूसलेम अय, जेला मेंह जाति-जाति के मनखेमन के एकदम मांझा म बसाय हंव, अऊ येह चारों कोति ले देसमन ले घिरे हवय।
EZE 5:6 तभो ले ओह मोर कानून अऊ बिधिमन के बिरूध अपन चारों कोति के जाति अऊ देसमन ले जादा बिदरोह करे हवय। ओह मोर कानूनमन ला नइं माने हे अऊ मोर बिधिमन के पाछू नइं चले हे।
EZE 5:7 “एकरसेति परमपरधान यहोवा ह ये कहत हे: तुमन अपन चारों कोति के जातिमन ले जादा उदंड हो गे हव अऊ मोर बिधिमन म नइं चले हव या मोर कानून ला नइं माने हव। अऊ त अऊ तुमन अपन चारों कोति के जातिमन के बराबरी के भी नइं बने हवव।
EZE 5:8 “ये खातिर परमपरधान यहोवा ह ये कहत हे: हे यरूसलेम, मेंह खुद तोर बिरूध म हवंव, अऊ जाति-जाति के मनखेमन के देखत म ही मेंह तोला दंड दूहूं।
EZE 5:9 तोर जम्मो घिनौना मूरतीमन के कारन, मेंह तोर बीच म अइसन करहूं, जइसन मेंह पहिले कभू नइं करे हंव अऊ न ही भविस्य म कभू करहूं।
EZE 5:10 ये खातिर तोर बीच म दाई-ददामन अपन लइकामन के, अऊ लइकामन अपन दाई-ददामन के मांस ला खाहीं। मेंह तोला सजा दूहूं अऊ तोर जम्मो बांचे मनखेमन ला चारों कोति तितिर-बितिर कर दूहूं।
EZE 5:11 ये खातिर मोर जिनगी के कसम, परमपरधान यहोवा ह घोसना करत हे, काबरकि तेंह मोर पबितर-स्थान ला अपन जम्मो दुस्ट मूरती अऊ घिनौना काममन ले असुध कर दे हस, मेंह खुद तोला छोलहूं; मेंह तोर ऊपर दया-दिरिस्टी नइं करंव अऊ तोला नइं बचावंव।
EZE 5:12 तोर एक तिहाई मनखेमन महामारी ले मरहीं या तोर बीच म ही अकाल ले मर जाहीं; एक तिहाई मनखेमन तोर दीवारमन के बाहिर तलवार ले मारे जाहीं; अऊ एक तिहाई मनखेमन ला मेंह चारों कोति तितिर-बितिर कर दूहूं अऊ तलवार खींचके ओमन के पीछा करहूं।
EZE 5:13 “तब मोर कोरोध ह बंद होही अऊ ओमन के बिरूध मोर कोप ह सांत होही, अऊ मोर बदला लेवई ह पूरा होही। अऊ जब ओमन ऊपर मोर कोप ह भड़कके सांत हो जाही, तब ओमन जानहीं कि में यहोवा ह अपन उत्साह म आके ये कहे हवंव।
EZE 5:14 “मेंह तोला तोर चारों कोति के जातिमन के बीच, जम्मो अवइया-जवइयामन के देखत म उजाड़ दूहूं अऊ तोला कलंकित करहूं।
EZE 5:15 जब मेंह तोला कोरोध म अऊ कोप म पीरा देवइया डांट के संग सजा दूहूं, तब तेंह तोर चारों कोति के जातिमन के मनखेमन बर एक कलंक अऊ एक ठट्ठा, एक चेतउनी अऊ एक आतंक के चीज बन जाबे। में यहोवा ह ये कहे हवंव।
EZE 5:16 जब मेंह अपन घातक अऊ बिनासकारी अकाल के तीरमन ला तोर ऊपर छोंड़हूं, त मेंह तोला नास करे बर येमन ला छोंड़हूं। मेंह तोर ऊपर बार-बार अकाल लानहूं अऊ तोर जेवन-पानी ला बंद कर दूहूं।
EZE 5:17 मेंह तुम्हर बिरूध अकाल अऊ जंगली पसुमन ला पठोहूं, अऊ ओमन तुम्हर लइकामन ला मार डारहीं। महामारी अऊ खून बहई तुम्हर बीच म चलत रहिही, अऊ मेंह तुम्हर ऊपर तलवार चलवाहूं। में यहोवा ह ये कहे हवंव।”
EZE 6:1 यहोवा के ये बचन मोर मेर आईस:
EZE 6:2 “हे मनखे के बेटा, अपन मुहूं ला इसरायल के पहाड़मन कोति करके; ओमन के बिरूध म अगमबानी कर
EZE 6:3 अऊ कह: हे इसरायल के पहाड़मन, तुमन परमपरधान यहोवा के बचन ला सुनव। परमपरधान यहोवा ह पहाड़ अऊ पहाड़ीमन ले, तराई अऊ घाटीमन ले ये कहत हे: मेंह तुम्हर ऊपर एक तलवार चलइया हंव, अऊ मेंह तुम्हर पूजा-पाठ के ऊंचहा जगहमन ला नास कर दूहूं।
EZE 6:4 तुम्हर बेदीमन ला गिरा दिये जाही अऊ तुम्हर धूप के बेदीमन ला कुचर दिये जाही; अऊ मेंह तुम्हर मनखेमन ला तुम्हर मूरतीमन के आघू म मार डारहूं।
EZE 6:5 मेंह इसरायलीमन के लासमन ला ओमन के मूरतीमन के आघू म मढ़ा दूहूं, अऊ मेंह तुम्हर हाड़ामन ला तुम्हर बेदीमन के चारों कोति बगरा दूहूं।
EZE 6:6 जिहां भी तुमन रहिहू, उहां नगरमन उजड़ जाहीं अऊ पूजा के ऊंचहा जगहमन गिर जाहीं, जेकर से तुम्हर बेदीमन उजड़ जाहीं अऊ नास हो जाहीं, तुम्हर मूरतीमन कुचराके नास हो जाहीं, तुम्हर धूप के बेदीमन टूटके गिर जाहीं, अऊ तुम्हर बनाय चीजमन खतम हो जाहीं।
EZE 6:7 तुम्हर मनखेमन तुम्हर बीच म ही मरके गिरहीं, अऊ तुमन जान लूहू कि मेंह यहोवा अंव।
EZE 6:8 “ ‘तभो ले मेंह कतेक झन ला बचाके रखहूं, तुमन म ले कुछू झन तलवार ले बच जाहू जब तुमन देस-देस म अऊ जाति-जाति के मनखेमन के बीच तितिर-बितिर हो जाहू।
EZE 6:9 तब ओ जातिमन के बीच जिहां ओमन बंधुवई म जाहीं, अऊ जेमन बांचे रहिहीं, ओमन मोला सुरता करहीं—ओमन के ओ बेभिचारी हिरदय ले मेंह कतेक दुखी होय हवंव, जऊन ह मोर ले दूरिहा हो गे हवय, अऊ ओमन के ओ आंखीमन ले मेंह कतेक दुखी हंव, जेमन ओमन के मूरतीमन के लालसा करथें। ओमन अपन करे गय बुरई के काम अऊ अपन जम्मो घिनौना बुता के कारन अपनआप ले घिन करहीं।
EZE 6:10 अऊ ओमन जान लीहीं कि मेंह यहोवा अंव; ओमन ऊपर ये बिपत्ति लाने बर, मेंह ओमन ला बेकार म नइं धमकाय रहेंव।
EZE 6:11 “ ‘परमपरधान यहोवा ह ये कहत हे: अपन हांथमन ला एक संग मारके अऊ अपन गोड़मन ला पटकके जोर से कहव, “हाय-हाय!” इसरायल के मनखेमन के जम्मो दुस्ट अऊ घिनौना बुतामन के कारन ओमन तलवार, अकाल अऊ महामारी ले नास हो जाहीं।
EZE 6:12 जऊन ह दूरिहा म हवय, ओह महामारी ले मरही, अऊ जऊन ह लकठा म हवय, ओह तलवार ले मारे जाही, अऊ जऊन ह बांचे हे अऊ छोंड़ दिये जाथे, ओह अकाल ले मरही। ये किसम ले मेंह अपन कोप ओमन ऊपर डालहूं।
EZE 6:13 अऊ ओमन जान लीहीं कि मेंह यहोवा अंव, जब हर एक ऊंचा पहाड़ी अऊ जम्मो पहाड़मन के टीप म, हर एक फईले रूख अऊ हर एक पानवाले बलूत रूख के खाल्हे म—ओ जगह जिहां ओमन अपन जम्मो मूरतीमन ला खुसबूवाला धूप चघाथें, उहां ओमन के मारे गय मनखेमन ओमन के मूरतीमन के बीच ओमन के बेदीमन के चारों कोति पड़े होहीं।
EZE 6:14 अऊ मेंह अपन हांथ ओमन के बिरूध बढ़ाहूं अऊ ओ देस ला मरू-भुइयां ले लेके दिबलाह तक उजाड़ दूहूं—ओ सब जगह, जिहां ओमन रहिथें। तब ओमन जान लीहीं कि मेंह यहोवा अंव।’ ”
EZE 7:1 यहोवा के ये बचन मोर मेर आईस:
EZE 7:2 “हे मनखे के बेटा, परमपरधान यहोवा ह इसरायल देस ला ये कहत हे: “ ‘अन्त! देस के चारों कोना म आखिरी समय आ गे हवय!
EZE 7:3 तोर आखिरी समय आ गे हवय, अऊ मोर कोप ह तोर ऊपर भड़कही। तोर चालचलन के मुताबिक मेंह तोर नियाय करहूं अऊ तोर जम्मो घिनौना काममन के फर तोला दूहूं।
EZE 7:4 मेंह तोर ऊपर दया-दिरिस्टी नइं करंव; मेंह तोला नइं छोड़ंव। खचित मेंह तोर चालचलन के अऊ तुम्हर बीच के घिनौना काममन के बदला लूहूं। तब तेंह जान लेबे कि मेंह यहोवा अंव।’
EZE 7:5 “परमपरधान यहोवा ह ये कहत हे: “ ‘घोर बिपत्ति! नइं सुने गय घोर बिपत्ति! देखव, येह आवत हे!
EZE 7:6 अन्त आ गे हवय! अन्त आ गे हवय! येह खुद तोर बिरूध जाग गे हवय। देखव, येह आवत हे!
EZE 7:7 बिनास ह तुम्हर ऊपर आ गे हवय, तुम्हर ऊपर, जेमन देस म रहिथव। समय ह आ गे हवय! दिन ह लकठा म हवय! पहाड़मन म आनंद नइं, पर आतंक हवय।
EZE 7:8 तोर ऊपर मोर कोप भड़कनेच वाला हे अऊ तोर ऊपर मेंह अपन कोरोध परगट करहूं। मेंह तोर चालचलन के मुताबिक तोर नियाय करहूं अऊ तोर जम्मो घिनौना काममन के फर तोला दूहूं।
EZE 7:9 मेंह तोर ऊपर दया-दिरिस्टी नइं करहूं; मेंह तोला नइं छोंड़हूं। मेंह तोर चालचलन अऊ तुम्हर बीच के घिनौना काममन के फर तोला दूहूं। “ ‘तब तेंह जान लेबे कि येह में यहोवा अंव, जऊन ह तोला सजा देथे।
EZE 7:10 “ ‘देखव, ओ दिन ला! देखव, येह आवत हे! बिनास ह फट गे हवय, लउठी म पीका निकल गे हवय, घमंड के फूल फूले हवय!
EZE 7:11 हिंसा ह ठाढ़ हो गे हवय, दुस्ट ला सजा देय बर एक ठन लउठी बन गे हवय। मनखेमन ले कोनो भी नइं बचंय, ओ भीड़ म के कोनो भी नइं— ओमन के कोनो धन-संपत्ति भी नइं, अऊ न ही कोनो कीमती सामान।
EZE 7:12 समय ह आ गे हवय! ओ दिन ह आ गे हवय! बिसोइया ह आनंद झन मनावय अऊ न ही बेचइया ह सोक करय, काबरकि मोर कोप ह जम्मो भीड़ ऊपर भड़के हवय।
EZE 7:13 बेचइया ला ओ संपत्ति फेर नइं मिलय जेला बेचे जा चुके हवय जब तक कि बिसोइया अऊ बेचइया दूनों जीयत हें। काबरकि जम्मो भीड़ के बारे म ओ दरसन ला पलटे नइं जा सकय। ओमन के पाप के कारन, ओमा के कोनो भी अपन जिनगी ला बचा नइं सकंय।
EZE 7:14 “ ‘ओमन तुरही ला फूंके हवंय, ओमन जम्मो चीजमन ला तियार कर ले हवंय, पर कोनो भी लड़ई म नइं जावंय, काबरकि मोर कोप ह जम्मो भीड़ ऊपर हवय।
EZE 7:15 बाहिर म तलवार हवय; अऊ भीतर म महामारी अऊ अकाल। जेमन गांव-गंवई म हवंय ओमन तलवार ले मरहीं; जेमन सहर म हवंय ओमन अकाल अऊ महामारी ले मारे जाहीं।
EZE 7:16 ओ भागनेवालामन, जेमन बांच निकलहीं ओमन पहाड़मन ऊपर भाग जाहीं। हर एक ह अपन खुद के पाप बर, घाटीमन के पंड़कीमन सहीं, ओमन जम्मो बिलाप करहीं।
EZE 7:17 हर एक के हांथ ह लचक जाही; हर एक के गोड़ ह पेसाब ले गीला हो जाही।
EZE 7:18 ओमन बोरा के कपड़ा पहिरहीं अऊ आतंक ले भर जाहीं। हर एक के मुहूं ह सरम के मारे ढंके रहिही, अऊ हर एक के मुड़ के मुंडन करे जाही।
EZE 7:19 “ ‘ओमन अपन चांदी ला गलीमन म फटिक दीहीं, अऊ ओमन के सोन ला असुध चीज समझे जाही। ओमन के सोन अऊ चांदी ह यहोवा के कोप के दिन म ओमन ला बचा नइं सकही। येह ओमन के भूख ला नइं मिटाही या ओमन के पेट ला नइं भरही, काबरकि येह ओमन के पाप म गिरे के कारन होय हवय।
EZE 7:20 ओमन अपन सुघर जेवर ऊपर घमंड करिन अऊ येकर उपयोग अपन घिनौना मूरतीमन ला बनाय म करिन। ओमन येकर ले नीच मूरतीमन ला बनाईन; एकरसेति मेंह येला ओमन बर एक असुध चीज बना दूहूं।
EZE 7:21 मेंह ओमन के धन-संपत्ति ला लूट के सामान के रूप म ओ परदेसीमन ला अऊ धरती के ओ दुस्टमन ला दे दूहूं, जेमन येला असुध कर दीहीं।
EZE 7:22 मेंह ओमन ले अपन मुहूं मोड़ लूहूं, अऊ लुटेरामन मोर कीमती जगह ला अपबितर करहीं। ओमन येकर भीतर घुसहीं अऊ येला असुध करहीं।
EZE 7:23 “ ‘बेड़ीमन ला तियार करव! काबरकि देस ह खून ले, अऊ सहर ह हिंसा ले भर गे हवय।
EZE 7:24 मेंह जाति-जाति के सबले दुस्ट मनखेमन ला ओमन के घरमन ऊपर कब्जा करे बर लानहूं। मेंह बलवान के घमंड ला टोर दूहूं, अऊ ओमन के पबितर-स्थानमन अपबितर करे जाहीं।
EZE 7:25 जब आतंक आही, तब ओमन बेकार म सांति के खोज करहीं।
EZE 7:26 बिपत्ति के ऊपर बिपत्ति आही, अऊ अफवाह के ऊपर अफवाह फईलही। ओमन अगमजानी ले दरसन के खोज म निकलहीं, कानून म पुरोहिती निरदेस बंद हो जाही, अगुवामन के सलाह देवई ह खतम हो जाही।
EZE 7:27 राजा ह सोक करही, अऊ हाकिम ह उदासी के ओनहा पहिरही, अऊ देस के मनखेमन के हांथमन कांपहीं। मेंह ओमन संग ओमन के चालचलन के मुताबिक बरताव करहूं, अऊ ओमन के खुद के हैसियत के मुताबिक ओमन के नियाय करहूं। “ ‘तब ओमन जान लीहीं कि मेंह यहोवा अंव।’ ”
EZE 8:1 हमर बंधुवई के छठवां साल के छठवां महिना के पांचवां दिन म, जब मेंह अपन घर म बईठे रहेंव अऊ यहूदा के अगुवामन मोर आघू म बईठे रिहिन, तब परमपरधान यहोवा के हांथ उहां मोर ऊपर आईस।
EZE 8:2 तब मेंह देखेंव, अऊ मोला आदमी सहीं एक रूप दिखिस। ओकर कनिहां के तरी कोति आगी सहीं रिहिस, अऊ ओकर कनिहां ले ऊपर कोति लाल धातु सहीं चमकत रिहिस।
EZE 8:3 ओह अपन हांथ असन चीज ला बढ़ाके मोर मुड़ के चुंदी ला पकड़िस। तब परमेसर के आतमा ह मोला धरती अऊ अकास के बीच उठा लीस अऊ परमेसर के दरसन म मोला यरूसलेम ले गीस, याने कि भीतरी अंगना के उत्तर कोति के प्रवेस दुवार करा ले गीस, जिहां जलन के भावना ला भड़कानेवाला मूरती ह रिहिस।
EZE 8:4 अऊ उहां मोर आघू म इसरायल के परमेसर के तेज वइसने ही रिहिस, जइसने मेंह मैदान म दरसन म देखे रहेंव।
EZE 8:5 तब ओह मोला कहिस, “हे मनखे के बेटा, उत्तर कोति देख।” त मेंह आंखी उठाके देखेंव, अऊ बेदी के उत्तर कोति के प्रवेस दुवार म, मेंह ये जलन उपजइया मूरती ला देखेंव।
EZE 8:6 अऊ ओह मोर ले कहिस, “हे मनखे के बेटा, का तेंह देखे कि ओमन का करत हें—इसरायलीमन इहां बहुंत ही घिनौना काम करत हें, अइसन काम, जऊन ह मोला मोर पबितर-स्थान ले दूरिहा ले जाही? पर तें येकर ले घलो जादा घिनौना चीजमन ला देखबे।”
EZE 8:7 तब ओह मोला अंगना के प्रवेस दुवार मेर ले आईस। अऊ मेंह देखेंव कि दीवार म एक छेदा रिहिस।
EZE 8:8 ओह मोर ले कहिस, “हे मनखे के बेटा, दीवार ला फोर।” त मेंह दीवार ला फोरेंव अऊ उहां मोला एक दुवार दिखिस।
EZE 8:9 अऊ ओह मोर ले कहिस, “भीतर जा अऊ देख कि ओमन इहां कइसे दुस्ट अऊ घिनौना काममन ला करत हवंय।”
EZE 8:10 त मेंह भीतर गेंव अऊ देखेंव कि पूरा दीवारमन म जम्मो किसम के रेंगइया जन्तु अऊ असुध पसु अऊ इसरायल के जम्मो मूरतीमन के चित्र बनाय गे हवय।
EZE 8:11 ओमन के आघू म, इसरायल के सत्तर अगुवामन ठाढ़े रहंय, अऊ ओमन के बीच म सापान के बेटा याजनयाह ह ठाढ़े रहय। हर एक मनखे ह अपन हांथ म एक धूपदान धरे रहय, अऊ कहरत धूप के धुआं ह ऊपर उठत रहय।
EZE 8:12 तब ओह मोर ले कहिस, “हे मनखे के बेटा, का तेंह देखे कि इसरायल के अगुवामन अंधियार म, अपन-अपन मूरती के जगह म का करत हवंय? ओमन कहत हें, ‘यहोवा ह हमन ला नइं देखय; यहोवा ह देस ला तियाग दे हवय।’ ”
EZE 8:13 फेर, ओह कहिस, “तें ओमन ला अऊ जादा घिनौना काम करत देखबे।”
EZE 8:14 तब ओह मोला यहोवा के भवन के उत्तर के प्रवेस दुवार मेर ले आईस, अऊ उहां मेंह माईलोगनमन ला बईठे देखेंव अऊ ओमन तम्मूज देवता बर सोक मनात रिहिन।
EZE 8:15 ओह मोर ले कहिस, “हे मनखे के बेटा, का तेंह देखत हस? तेंह येकर ले घलो जादा घिनौना चीजमन ला देखबे।”
EZE 8:16 तब ओह मोला यहोवा के भवन के भीतरी अंगना म ले आईस, अऊ उहां मंदिर के प्रवेस दुवार म, मंडप अऊ बेदी के बीच लगभग पच्चीस आदमीमन रहंय। ओमन के पीठ ह यहोवा के मंदिर कोति अऊ ओमन के मुहूं ह पूरब कोति रहय, ओमन पूरब म सूरज ला दंडवत करत रिहिन।
EZE 8:17 ओह मोर ले कहिस, “हे मनखे के बेटा, का तेंह येला देखे हस? का यहूदा के मनखेमन बर घिनौना काम करई छोटे बात ए, जेला ओमन इहां करत हवंय? खचित ओमन देस ला हिंसा ले घलो भर देवत हें अऊ मोर कोरोध ला लगातार भड़कावत हें। ओमन ला देख, ओमन डारा ला अपन नाक म डारे हवंय!
EZE 8:18 ये खातिर मेंह कोरोध करके ओमन के संग बरताव करहूं, मेंह ओमन ऊपर दया-दिरिस्टी नइं करंव या ओमन ला नइं छोड़ंव। चाहे ओमन मोर कान म चिचियावंय, तभो ले मेंह ओमन के बात ला नइं सुनंव।”
EZE 9:1 तब मेंह ओला ऊंचहा अवाज म ये कहत सुनंय, “ओमन ला लकठा म लानव, जेमन ला सहर के मनखेमन के नियाय करे बर ठहिराय गे हवय, ओमन के हर एक के हांथ म एक हथियार रहय।”
EZE 9:2 अऊ मेंह छै आदमी ला ऊपरी दुवार के तरफ ले आवत देखेंव, जऊन ह उत्तर कोति खुलथे, ओमन के हर एक के हांथ म एक घातक हथियार रहय। ओमन के संग मलमल के कपड़ा पहिरे एक आदमी रहय, जऊन ह अपन बगल म लिखे के सामान के एक झोला धरे रहय। ओमन आईन अऊ कांसा के बेदी के बगल म ठाढ़ हो गीन।
EZE 9:3 तब इसरायल के परमेसर के तेज, जऊन ह करूबमन के ऊपर रिहिस, उहां ले ऊपर उठिस, अऊ मंदिर के दुवार मेर आ गीस। तब यहोवा ह ओ मलमल के ओनहा पहिरे आदमी ला बलाईस, जऊन ह अपन बगल म लिखे के सामान के झोला धरे रिहिस
EZE 9:4 अऊ ओला कहिस, “पूरा यरूसलेम सहर म होवत जा अऊ ओ जम्मो झन के माथा म एक चिनहां लगा, जेमन दुखी हवंय अऊ ओ जम्मो घिनौना काम बर बिलाप करत हें, जेमन ला यरूसलेम म करे जावत हे।”
EZE 9:5 जइसे कि मेंह सुनेंव, ओह आने मन ला कहिस, “पूरा सहर म ओकर पाछू-पाछू जावव, अऊ बिगर दया या सहानुभूति देखाय मनखेमन ला मारत जावव।
EZE 9:6 डोकरा, जवान अऊ जवान छोकरी, दाई अऊ लइकामन ला मार डालव, पर अइसन मनखे ला झन छुवव, जेकर माथा म चिनहां हवय। मोर पबितर-स्थान ले सुरू करव।” तब ओमन ओ डोकरा मनखेमन ले सुरू करिन, जेमन मंदिर के आघू म रिहिन।
EZE 9:7 तब ओह ओमन ले कहिस, “मंदिर ला असुध कर दव अऊ अंगनामन ला लासमन ले भर दव। जावव!” तब ओमन निकलके पूरा सहर म मनखेमन ला मारे के सुरू करिन।
EZE 9:8 जब ओमन मारत रिहिन अऊ मेंह अकेला रह गेंव, तब मेंह मुहूं के बल गिरेंव, अऊ चिचियाके कहेंव, “हाय, हे परमपरधान यहोवा! का तें यरूसलेम ऊपर अपन भयंकर कोप के कारन इसरायल के जम्मो बांचे मनखे ला नास कर देबे?”
EZE 9:9 तब ओह मोला जबाब दीस, “इसरायल अऊ यहूदा के मनखेमन के पाप बहुंत ही जादा हे; देस ह खून बहाय ले अऊ सहर ह अनियाय ले भर गे हवय। ओमन कहिथें, ‘यहोवा ह देस ला तियाग दे हवय; यहोवा ह नइं देखय।’
EZE 9:10 ये खातिर में ओमन ऊपर दया-दिरिस्टी नइं करंव या ओमन ला नइं छोड़ंव, पर मेंह ओमन के काम ला ओहीचमन के मुड़ ऊपर डाल दूहूं।”
EZE 9:11 तब ओ आदमी, जऊन ह मलमल के ओनहा पहिरे रिहिस अऊ अपन बगल म लिखे के सामान धरे के पेटी रखे रिहिस, वापिस आके ये समाचार दीस, “जइसने तेंह हुकूम देय रहय, मेंह वइसने ही करे हवंव।”
EZE 10:1 एकर बाद, मेंह देखेंव कि करूबमन के मुड़ी ऊपर जऊन अकास-मंडल हवय, ओकर ऊपर नीलमनि के सिंघासन असन कुछू दिखत रिहिस।
EZE 10:2 तब यहोवा ह मलमल के ओनहा पहिरे ओ मनखे ला कहिस, “करूबमन के खाल्हे चक्कामन के बीच म जा अऊ अपन दूनों हथेली ला करूबमन के बीच बरत कोइला ले भर ले अऊ ओला सहर के ऊपर बगरा दे।” अऊ ओह मोर देखत म भीतर चल दीस।
EZE 10:3 जब ओ आदमी ह भीतर गीस, तब करूबमन मंदिर के दक्खिन कोति ठाढ़े रिहिन, अऊ भीतरी अंगना ह एक बादर ले भर गे रिहिस।
EZE 10:4 तब यहोवा के तेज ह करूबमन के ऊपर ले उठिस अऊ मंदिर के दुवार मेर आ गीस। मंदिर ह बादर ले भर गीस, अऊ ओ अंगना ह यहोवा के तेज के चमक ले पूरा भर गीस।
EZE 10:5 करूबमन के डेनामन के अवाज ह बाहिर के अंगना तक सुनाई देवत रिहिस, अऊ येह सर्वसक्तिमान परमेसर के गोठियाय असन अवाज रिहिस।
EZE 10:6 जब यहोवा ह मलमल के ओनहा पहिरे आदमी ला हुकूम दीस, “चक्कामन के बीच ले, करूबमन के बीच म ले आगी ला ले,” त ओ आदमी ह भीतर गीस अऊ एक चक्का के बाजू म ठाढ़ हो गीस।
EZE 10:7 तब करूबमन के बीच म ले एक करूब ह अपन बीच के आगी कोति अपन हांथ ला लमाईस अऊ ओमा ले कुछू आगी ला लेके मलमल के ओनहा पहिरे ओ आदमी के हांथ म रख दीस, अऊ ओ आदमी ह ओला धरके बाहिर चल दीस।
EZE 10:8 (करूबमन के डेनामन के खाल्हे म मनखे के हांथमन असन कुछू दिखत रिहिस।)
EZE 10:9 तब मेंह करूबमन के बाजू म चार ठन चक्का देखेंव, याने कि हर करूब के बाजू म एक चक्का; ओ चक्कामन पुखराज के सहीं चमकत रिहिन।
EZE 10:10 जहां तक ओमन के बनावट के बात ए, ओ चारों चक्का के बनावट ह एके सहीं रिहिस, मानो हर चक्का ह आने चक्का म हमाय रिहिस।
EZE 10:11 जब ओमन चलंय, त ओमन चारों दिग म ले ओ दिग कोति चलंय, जऊन कोति करूबमन के मुहूं रहय; चक्कामन एती-ओती नइं मुड़ंय, जब करूबमन चलंय। करूबमन बिगर एती-ओती मुड़े ओ दिग म जावंय, जऊन कोति ओमन के मुहूं रहय।
EZE 10:12 ओमन के पीठ, ओमन के हांथ अऊ ओमन के डेनामन समेत ओमन के जम्मो देहें ह पूरा आंखीमन ले भरे रिहिस, अऊ वइसने ही ओमन के चारों चक्का म आंखी ही आंखी रिहिस।
EZE 10:13 मेंह सुनेंव, ओ चक्कामन ला “तेजी से घुमइया चक्का” कहे गीस।
EZE 10:14 हर एक करूब के चार-चार मुहूं रिहिस: एक मुहूं करूब असन, दूसर मुहूं मनखे असन, तीसर मुहूं सिंह असन, अऊ चौथा मुहूं गिधवा असन।
EZE 10:15 तब करूबमन भुइयां म ले ऊपर उठिन। येमन ओही जीवधारी अंय, जेमन ला मेंह कबार नदी के तीर म देखे रहेंव।
EZE 10:16 जब करूबमन चलंय, तब ओमन के बाजू के चक्कामन घलो चलंय; अऊ जब करूबमन भुइयां ले उठे बर अपन डेनामन ला फईलावंय, तब चक्कामन ओमन के बाजू ला नइं छोंड़ंय।
EZE 10:17 जब करूबमन ठाढ़ हो जावंय, तब चक्कामन घलो ठाढ़ हो जावंय; अऊ जब करूबमन उठंय, तब चक्कामन घलो ओमन के संग उठंय, काबरकि जीवधारीमन के आतमा ह ओमन म रिहिस।
EZE 10:18 तब यहोवा के तेज ह मंदिर के दुवार के ऊपर ले चल दीस अऊ करूबमन के ऊपर आके ठहर गीस।
EZE 10:19 जब मेंह देखत रहेंव, त करूबमन अपन डेनामन ला फईलाके भुइयां ले ऊपर उठिन, अऊ जब ओमन जावत रिहिन, त चक्कामन घलो ओमन के संगे-संग गीन। ओमन जाके यहोवा के भवन के पूरबी दुवार के कपाट मेर रूक गीन, अऊ इसरायल के परमेसर के तेज ह ओमन के ऊपर रिहिस।
EZE 10:20 येमन ओ जीवधारी रिहिन, जेमन ला मेंह कबार नदी के तीर इसरायल के परमेसर के खाल्हे म देखे रहेंव, अऊ मेंह जान गेंव कि ओमन करूब रिहिन।
EZE 10:21 हर एक के चार मुहूं अऊ चार ठन डेना रिहिस, अऊ ओमन के डेनामन के खाल्हे म मनखे के हांथमन असन कुछू दिखत रहंय।
EZE 10:22 ओमन के चेहरा ह ओ जीवधारीमन असन ही रिहिस, जेमन ला मेंह कबार नदी के तीर म देखे रहेंव। हर एक ह आघू सीधा ही चलत रिहिस।
EZE 11:1 तब परमेसर के आतमा ह मोला उठाके यहोवा के भवन के ओ दुवार मेर ले आईस, जेकर मुहूं पूरब कोति हवय। उहां दुवार के कपाट मेर पच्चीस आदमी रिहिन, अऊ मेंह ओमन के बीच अज्जूर के बेटा याजनयाह अऊ बनायाह के बेटा पलतयाह ला देखेंव, जेमन मनखेमन के अगुवा रिहिन।
EZE 11:2 यहोवा ह मोर ले कहिस, “हे मनखे के बेटा, येमन ओ आदमीमन अंय, जेमन खराप साजिस रचत हें अऊ ये सहर म खराप सलाह देवत हें।
EZE 11:3 ओमन कहिथें, ‘का हमर घरमन ला अभी हालेच म नइं बनाय गे हवय? ये सहर ह एक बरतन, अऊ हमन ओमा रखे मांस अन।’
EZE 11:4 ये खातिर, हे मनखे के बेटा, ओमन के बिरूध म अगमबानी कर; अगमबानी कर।”
EZE 11:5 तब यहोवा के आतमा मोर ऊपर आईस, अऊ ओह मोला ये कहे बर कहिस: “यहोवा ह ये कहत हे: हे इसरायल के अगुवामन, तुमन येहीच कहत हव, पर तुम्हर मन म का चलत हे, ओला में जानत हंव।
EZE 11:6 तुमन ये सहर म बहुंते झन ला मार डारे हव अऊ येकर गलीमन ला लासमन ले भर दे हव।
EZE 11:7 “एकरसेति परमपरधान यहोवा ह ये कहत हे: जऊन देहेंमन ला तुमन उहां फेंक दे हव, ओमन मांस अंय अऊ ये सहर ह बरतन, पर मेंह तुमन ला इहां ले भगा दूहूं।
EZE 11:8 तुमन तलवार ले डरथव, अऊ मेंह तलवार के उपयोग तुम्हर बिरूध करहूं, परमपरधान यहोवा ह घोसना करत हे।
EZE 11:9 मेंह तुमन ला सहर ले भगा दूहूं अऊ तुमन ला परदेसीमन के हांथ म दे दूहूं अऊ तुमन ला सजा दूहूं।
EZE 11:10 तुमन तलवार ले मारे जाहू, अऊ मेंह इसरायल के सीमनामन म तुमन ला दंड दूहूं। तब तुमन जानहू कि मेंह यहोवा अंव।
EZE 11:11 ये सहर ह तुम्हर बर एक बरतन नइं होही, अऊ न ही तुमन येमा के मांस होहू; मेंह इसरायल के सीमनामन म तुमन ला दंड दूहूं।
EZE 11:12 अऊ तुमन जानहू कि मेंह यहोवा अंव, काबरकि तुमन मोर बिधिमन म नइं चले हव या मोर कानूनमन ला नइं माने हव पर अपन चारों कोति के जातिमन के रीतिमन म चले हव।”
EZE 11:13 जब मेंह अगमबानी करत रहेंव कि बनायाह के बेटा पलतयाह ह मर गीस। तब मेंह मुहूं के बल गिरेंव अऊ ऊंचहा अवाज म चिचियाके कहेंव, “हाय, हे परमपरधान यहोवा! का तें इसरायल के बांचे मनखेमन ला पूरा नास कर देबे?”
EZE 11:14 यहोवा के ये बचन मोर मेर आईस:
EZE 11:15 “हे मनखे के बेटा, यरूसलेम के मनखेमन, तोर संगी बंधुवा मनखे अऊ आने जम्मो इसरायलीमन के बारे म कहे हवंय, ‘ओमन यहोवा ले बहुंत दूरिहा हवंय; ये देस ह हमन ला हमर अधिकार म देय गे रिहिस।’
EZE 11:16 “एकरसेति ये कह, ‘परमपरधान यहोवा ह ये कहत हे: हालाकि मेंह ओमन ला बहुंत दूरिहा जाति-जाति के मनखेमन के बीच भेज देंव अऊ ओमन ला देस-देस म तितिर-बितिर कर देंव, तभो ले जऊन भी देस म ओमन गीन, ओ देसमन म, थोरकन समय बर मेंह ओमन बर एक पबितर-स्थान ठहिरे हंव।’
EZE 11:17 “एकरसेति ओमन ले कह: ‘परमपरधान यहोवा ह ये कहत हे: मेंह तुमन ला ओ जाति-जाति के मनखेमन के बीच म ले संकेलहूं अऊ जऊन देसमन म तुमन तितिर-बितिर करे गे हवव, उहां ले मेंह तुमन ला वापिस लानहूं, अऊ मेंह फेर तुमन ला इसरायल देस वापिस दे दूहूं।’
EZE 11:18 “ओमन उहां लहुंट आहीं अऊ येकर जम्मो असुध अऊ घिनौना मूरतीमन ला हटा दीहीं।
EZE 11:19 मेंह ओमन के मन ला एक कर दूहूं अऊ ओमन म एक नवां आतमा डालहूं; मेंह ओमन ले ओमन के पथरा सहीं हिरदय ला निकाल दूहूं अऊ ओमन ला मांस के एक हिरदय दूहूं।
EZE 11:20 तब ओमन मोर बिधिमन ला मानहीं अऊ धियान देके मोर कानूनमन म चलहीं। ओमन मोर मनखे होहीं, अऊ मेंह ओमन के परमेसर ठहिरहूं।
EZE 11:21 पर ओ मनखे, जेमन के मन ह ओमन के असुध अऊ घिनौना मूरतीमन म लगे हवय, मेंह ओमन के काम ला ओहीचमन के मुड़ म ले आहूं, परमपरधान यहोवा ह घोसना करत हे।”
EZE 11:22 तब करूबमन अपन डेना ला फईलाईन, अऊ चक्कामन ओमन के बाजू म रहंय, अऊ इसरायल के परमेसर के तेज ओमन ऊपर रिहिस।
EZE 11:23 तब यहोवा के तेज सहर के भीतर ले ऊपर उठिस अऊ सहर के पूरब कोति के पहाड़ ऊपर जाके ठहर गीस।
EZE 11:24 फेर परमेसर के आतमा ह मोला ऊपर उठाईस अऊ परमेसर के आतमा के दुवारा दिये गय दरसन म मोला बेबिलोनिया देस म बंधुवामन करा ले आईस। तब ओ दरसन जेला मेंह देखे रहेंव, ओह गायब हो गीस,
EZE 11:25 अऊ हर ओ बात, जेला यहोवा ह मोला देखाय रिहिस, ओ जम्मो ला मेंह बंधुवामन ला बता देंव।
EZE 12:1 यहोवा के बचन फेर मोर मेर आईस:
EZE 12:2 “हे मनखे के बेटा, तें एक बिदरोही मनखेमन के बीच म रहत हस। ओमन करा देखे बर आंखी तो हवय पर नइं देखंय अऊ सुने बर कान तो हवय पर नइं सुनंय, काबरकि ओमन बिदरोही मनखे अंय।
EZE 12:3 “एकरसेति, हे मनखे के बेटा, बंधुवई म जाय बर अपन सामान ला तियार कर अऊ दिन के बेरा, ओमन के देखत म चले जा अऊ जिहां तें हस, उहां ले आने जगह चले जा। हालाकि ओमन बिदरोही मनखे अंय, तभो ले, सायद ओमन समझ जांय।
EZE 12:4 दिन के बेरा, ओमन के देखत म, बंधुवई बर तियार अपन सामान ला बाहिर ले आ। तब संझा के बेरा, जब ओमन देखत होहीं, तब तें अइसन बाहिर जाबे, जइसन मनखेमन बंधुवई म जाथें।
EZE 12:5 जब ओमन देखत होहीं, तभे दीवार ला फोरबे अऊ ओही म ले अपन सामान ला बाहिर ले जाबे।
EZE 12:6 ओमन के देखत म ही सामान ला अपन खांध म रखबे अऊ बेर बुड़े के बेरा ओमन ला उठाके बाहिर ले जाबे। अपन चेहरा ला ढांप लेबे ताकि तें भुइयां ला झन देख सकस, काबरकि मेंह तोला इसरायलीमन बर एक चिनहां ठहिराय हंव।”
EZE 12:7 त मेंह वइसने करेंव, जइसने मोला हुकूम देय गे रिहिस। दिन के समय, बंधुवई बर तियार अपन सामान ला मेंह बाहिर ले आंय। तब संझा के बेरा, मेंह अपन हांथ ले दीवार ला फोरेंव। सूरज डुबे के बेरा, में अपन सामान ला बाहिर ले गेंव, अऊ ओला ओमन के देखत म अपन कंधा म उठांय अऊ चले गेंव।
EZE 12:8 बिहनियां यहोवा के ये बचन मोर मेर आईस:
EZE 12:9 “हे मनखे के बेटा, ओ इसरायली, बिदरोही मनखेमन का तोर ले नइं पुछिन, ‘तें का करत हस?’
EZE 12:10 “ओमन ले कह, ‘परमपरधान यहोवा ह ये कहत हे: ये अगमबानी यरूसलेम के हाकिम अऊ उहां के जम्मो इसरायलीमन के बारे म अय।’
EZE 12:11 ओमन ले कह, ‘मेंह तुम्हर बर एक चिनहां अंव।’ “जइसने मेंह करे हवंव, वइसने ही इसरायली मनखेमन संग करे जाही। ओमन बंदी होके बंधुवई म चले जाहीं।
EZE 12:12 “ओमन के बीच जऊन हाकिम हवय, ओह सांझ के बेरा अपन सामान ला अपन कंधा म उठाके चले जाही, अऊ दीवार म एक बड़े छेदा करे जाही, ताकि ओह ओमा ले निकलके जा सकय। ओह अपन मुहूं ला ढांप लीही, ताकि ओला भुइयां झन दिखय।
EZE 12:13 मेंह ओकर बर अपन जाल फईलाहूं, अऊ ओह मोर फांदा म फंसही; मेंह ओला बेबिलोनिया, कसदीमन के देस म ले आहूं, पर ओह ओला नइं देखही, अऊ उहां ओह मर जाही।
EZE 12:14 मेंह ओकर आसपास के जम्मो मनखेमन ला तितिर-बितिर कर दूहूं—ओकर करमचारी अऊ ओकर जम्मो सेना ला—अऊ तलवार खींचके मेंह ओमन के पीछा करहूं।
EZE 12:15 “जब मेंह ओमन ला जाति-जाति अऊ देस-देस के बीच तितिर-बितिर कर दूहूं, तब ओमन जानहीं कि मेंह यहोवा अंव।
EZE 12:16 पर मेंह ओमन ले कुछू झन ला तलवार के मार, अकाल अऊ महामारी ले बचाके रखहूं, ताकि ओ जाति-जाति के बीच, जिहां ओमन जावंय, उहां ओमन अपन जम्मो घिनौना काममन ला मान लेवंय। तब ओमन जानहीं कि मेंह यहोवा अंव।”
EZE 12:17 यहोवा के ये बचन मोर मेर आईस:
EZE 12:18 “हे मनखे के बेटा, तें कांपत-कांपत अपन जेवन करबे, अऊ भय म कांपत अपन पानी ला पीबे।
EZE 12:19 देस के मनखेमन ले ये कह: ‘परमपरधान यहोवा ह यरूसलेम अऊ इसरायल देस म रहइया मनखेमन के बारे म ये कहत हे: ओमन चिंतित होके अपन जेवन करहीं, अऊ निरास होके अपन पानी पीहीं, काबरकि देस म रहइया जम्मो मनखेमन के हिंसा के कारन, ओमन के देस के जम्मो चीज ले लिये जाही।
EZE 12:20 बसे हुए नगरमन उजड़ जाहीं अऊ देस ह घलो उजाड़ हो जाही। तब तुमन जानहू कि मेंह यहोवा अंव।’ ”
EZE 12:21 यहोवा के ये बचन मोर मेर आईस:
EZE 12:22 “हे मनखे के बेटा, इसरायल देस म ये का कहावत कहे जाथे: ‘दिनमन बीतत जावत हें अऊ कोनो भी दरसन पूरा नइं होवत हे’?
EZE 12:23 ये खातिर ओमन ले कह, ‘परमपरधान यहोवा ह ये कहत हे: मेंह ये कहावत ला खतम करइया हंव, अऊ ओमन फेर कभू इसरायल म ये कहावत के उपयोग नइं करहीं।’ ओमन ले कह, ‘ओ दिनमन लकठा म हवंय, जब हर एक दरसन ह पूरा होही।
EZE 12:24 काबरकि तब इसरायल के मनखेमन के बीच कोनो झूठा दरसन या चापलूसी ले भरे सकुन-बिचार नइं होही।
EZE 12:25 पर जऊन भी बात बोलहूं, में यहोवा ही बोलहूं, अऊ ओ बात ह बिगर देरी के पूरा होही। काबरकि हे बिदरोही मनखेमन, तुम्हर ही दिनमन म, मेंह ओ बातमन ला पूरा करहूं, जेला मेंह कहत हंव, परमपरधान यहोवा ह घोसना करत हे।’ ”
EZE 12:26 फेर यहोवा के ये बचन मोर मेर आईस:
EZE 12:27 “हे मनखे के बेटा, इसरायलीमन कहत हें, ‘जऊन दरसन ओह देखत हे, ओह बहुंत साल के बाद पूरा होही, अऊ जऊन अगमबानी ओह करत हे, ओह भविस्य म बहुंत समय बाद के बातमन ला करत हे।’
EZE 12:28 “ये खातिर तें ओमन ले कह, ‘परमपरधान यहोवा ह ये कहत हे: मोर कोनो भी बचन के पूरा होय म अऊ देरी नइं होवय; जऊन कुछू मेंह कहत हंव, ओह पूरा होही, परमपरधान यहोवा ह घोसना करत हे।’ ”
EZE 13:1 यहोवा के ये बचन मोर मेर आईस,
EZE 13:2 “हे मनखे के बेटा, इसरायल के जऊन अगमजानीमन अभी अगमबानी करत हें। ओमन के बिरूध अगमबानी कर। ओमन ला कह, जेमन अपन मन के बिचार ले अगमबानी करथें: ‘यहोवा के बचन ला सुनव!
EZE 13:3 परमपरधान यहोवा ह ये कहत हे: हाय, ओ मुरूख अगमजानीमन ऊपर, जेमन अपन ही मन के मुताबिक चलथें, अऊ ओमन कुछू दरसन नइं देखे रहंय!
EZE 13:4 हे इसरायल, तोर अगमजानीमन खंडहरमन म सियार सहीं अंय।
EZE 13:5 तुमन इसरायल के मनखेमन बर दीवार के फटानमन ला सुधारे बर ऊपर नइं चघे हव, ताकि यहोवा के दिन लड़ई म येह मजबूत बने रहय।
EZE 13:6 ओमन के दरसन अऊ अगम के बात एक लबारी बात ए। हालाकि यहोवा ह ओमन ला नइं पठोय हे, तभो ले ओमन कहिथें, “यहोवा ह घोसना करत हे,” अऊ आसा करथें कि यहोवा ह ओमन के अगमबानी ला पूरा करही।
EZE 13:7 का तुमन झूठा दरसन नइं देखेव अऊ लबारी सकुन-बिचार के बात नइं कहे हव, जब तुमन ये कहिथव, “यहोवा ह घोसना करत हे,” हालाकि मेंह नइं कहे हंव?
EZE 13:8 “ ‘ये खातिर परमपरधान यहोवा ह ये कहत हे: तुम्हर लबारी बात अऊ झूठा दरसन के कारन, मेंह तुम्हर बिरूध म हंव, परमपरधान यहोवा ह घोसना करत हे।
EZE 13:9 मोर हांथ ह ओ अगमजानीमन के बिरूध होही, जेमन झूठा दरसन देखथें अऊ लबारी सकुन-बिचार करथें। ओमन मोर मनखेमन के सभा के नइं होहीं या इसरायल के सूची म ओमन के नांव नइं लिखे जावय, अऊ न ही ओमन इसरायल देस म जा सकहीं। तब तुमन जानहू कि मेंह परमपरधान यहोवा अंव।
EZE 13:10 “ ‘काबरकि ओमन मोर मनखेमन ला ये कहिके बहकाथें, “सांति हे,” जबकि उहां सांति नइं हे, अऊ ये खातिर कि जब एक कमजोर दीवार बनाय जाथे, त ओमन ओमा पोताई करके ओला ढांप देथें,
EZE 13:11 एकरसेति जेमन पोताई करके येला ढांप देथें, ओमन ले कह कि येह गिर जाही। बहुंत जोर से बरसात होही, अऊ मेंह बड़े-बड़े करा गिराहूं, जेमन दीवार ले टकराहीं, अऊ भारी आंधी चलही।
EZE 13:12 जब दीवार ह गिर जाही, तब का मनखेमन तुमन ले ये नइं पुछहीं, “जऊन पोताई करके तुमन ढांपे रहेव, ओह कहां गीस?”
EZE 13:13 “ ‘ये खातिर परमपरधान यहोवा ह ये कहत हे: मेंह अपन कोप म एक भारी आंधी चलाहूं, अऊ अपन कोरोध म भयंकर बिनास के संग बड़े-बड़े करा गिराहूं अऊ भारी बारिस भेजहूं।
EZE 13:14 मेंह ओ दीवार ला टोरके गिरा दूहूं, जेला तुमन पोताई करके ढांप दे हवव अऊ मेंह ओला माटी म मिला दूहूं ताकि येकर नीव ह खाली पड़े रहय। जब ओह गिरही, त तुमन ओकर खाल्हे दबके नास हो जाहू; अऊ तुमन जानहू कि मेंह यहोवा अंव।
EZE 13:15 ये किसम ले मोर कोप ह ओ दीवार ऊपर अऊ ओ मनखेमन ऊपर भड़कही, जेमन ओकर ऊपर पोताई करे रिहिन। फेर मेंह तुमन ले कहिहूं, “दीवार ह नास हो गीस, अऊ ओमन घलो नास हो गीन, जेमन येमा पोताई करे रिहिन,
EZE 13:16 इसरायल के ओ अगमजानीमन, जेमन यरूसलेम के बारे म अगमबानी करंय अऊ ओकर सांति के दरसन देखंय, जबकि उहां कोनो सांति नइं रिहिस, परमपरधान यहोवा ह घोसना करत हे।” ’
EZE 13:17 “हे मनखे के बेटा, अब, तें अपन मुहूं अपन मनखेमन के ओ बेटीमन के बिरूध खोल, जेमन अपन ही मन ले अगमबानी करथें। ओमन के बिरूध अगमबानी कर
EZE 13:18 अऊ कह, ‘परमपरधान यहोवा ह ये कहत हे: हाय, ओ माईलोगनमन ला, जेमन अपन कलईमन म जादू के ताबीज बांधथें अऊ मनखेमन ला फंसाय बर अपन मुड़ी बर अलग-अलग लम्बई के घूंघट बनाथें। का तुमन मोर मनखेमन के परान ला खतरा म डालहू पर अपन खुद के परान ला बचाय रखहू?
EZE 13:19 तुमन थोरकन मुट्ठी भर जौ अऊ रोटी के कुटामन बर मोर मनखेमन के बीच मोला अपबितर करे हव। मोर ओ मनखे, जेमन लबारी बात सुनथें, ओमन ले लबारी बात करके तुमन ओमन ला मार डारे हव, जेमन ला जिंदा रहना रिहिस अऊ तुमन ओमन ला छोंड़ देव, जेमन ला जिंदा नइं रहना रिहिस।
EZE 13:20 “ ‘ये खातिर परमपरधान यहोवा ह ये कहत हे: मेंह तुम्हर ओ जादू के ताबीजमन के बिरूध हवंव, जेकर ले तुमन मनखेमन ला चिरई सहीं फंसाथव; मेंह तुम्हर बाहांमन के ओ ताबीजमन ला टोर दूहूं; मेंह ओ मनखेमन ला छोंड़ दूहूं, जेमन ला तुमन चिरई सहीं फंसाथव।
EZE 13:21 मेंह तुम्हर घूंघट ला चीर दूहूं अऊ अपन मनखेमन ला तुम्हर हांथ ले बचाहूं, अऊ ओमन फेर कभू तुम्हर बस म नइं होहीं। तब तुमन जानहू कि मेंह यहोवा अंव।
EZE 13:22 काबरकि तुमन अपन लबारी बात ले धरमी जन ला निरास करे हवव, जबकि मेंह ओमन ऊपर कोनो दुख नइं लाने रहेंव, अऊ काबरकि तुमन दुस्ट मनखे ला ओमन के दुस्ट काम नइं छोंड़े बर उत्साहित करे हव, अऊ अइसने करके ओमन के परान बचाय हव,
EZE 13:23 ये खातिर अब तुमन न तो फेर झूठा दरसन देखहू, अऊ न ही लबारी सकुन-बिचार कर सकहू। मेंह अपन मनखेमन ला तुम्हर हांथ ले बचाहूं। अऊ तब तुमन जानहू कि मेंह यहोवा अंव।’ ”
EZE 14:1 इसरायल के कुछू अगुवामन मोर मेर आके मोर आघू म बईठ गीन।
EZE 14:2 तब यहोवा के ये बचन मोर मेर आईस:
EZE 14:3 “हे मनखे के बेटा, ये मनखेमन अपन हिरदय म मूरतीमन ला बसाय हवंय अऊ अपन चेहरा के आघू म अधरम के ठोकर के चीजमन ला रखे हवंय। त का में ओमन ला मोर ले कुछू जानकारी लेवन दंव?
EZE 14:4 एकरसेति तें ओमन ले बात कर अऊ ओमन ला बता, ‘परमपरधान यहोवा ह ये कहत हे: जब कोनो इसरायली अपन हिरदय म मूरतीमन ला बसाय रखथे अऊ अपन चेहरा के आघू म अधरम के ठोकर के चीजमन ला रखथे अऊ तब ओह कोनो अगमजानी मेर जाथे, त में यहोवा ह ओकर बड़े मूरती-पूजा के बात ला धियान म रखत ओला जबाब दूहूं।
EZE 14:5 मेंह अइसे करहूं ताकि में इसरायल के ओ मनखेमन के हिरदय ला फेर अपन कोति कर सकंव, जेमन अपन मूरतीमन बर मोला तियाग दे हवंय।’
EZE 14:6 “एकरसेति इसरायल के मनखेमन ले कह, ‘परमपरधान यहोवा ह ये कहत हे: पछताप करव! अपन मूरतीमन ले दूरिहा हो जावव अऊ अपन जम्मो घिनौना काममन ला तियाग देवव!
EZE 14:7 “ ‘जब इसरायलीमन के कोनो मनखे या इसरायल म रहइया कोनो परदेसी अपनआप ला मोर ले अलग कर लेथे अऊ अपन हिरदय म मूरतीमन ला बसा लेथे अऊ अपन चेहरा के आघू म अधरम के ठोकर के चीज ला रखथे अऊ तब ओह मोर ले जानकारी लेय बर कोनो अगमजानी मेर जाथे, त में यहोवा खुद ओला जबाब दूहूं।
EZE 14:8 में ओ मनखे के बिरूध अपन मुहूं कर लूहूं अऊ ओला आने मन बर एक चेतउनी अऊ एक कहावत बना दूहूं। मेंह ओला अपन मनखेमन के बीच ले हटा दूहूं। तब तुमन जानहू कि मेंह यहोवा अंव।
EZE 14:9 “ ‘यदि अगमजानी ह अगमबानी करे बर बहकाय जाथे, त ये जानव कि में यहोवा ह ओ अगमजानी ला बहकाय हंव, अऊ मेंह ओकर बिरूध अपन हांथ बढ़ाहूं अऊ ओला अपन मनखे इसरायलीमन के बीच ले नास कर दूहूं।
EZE 14:10 ओमन अपन अपराध के बोझा ला उठाहीं—अगमजानी ह भी ओतकेच दोसी ठहिरही, जतेक ओकर ले सलाह लेवइया मनखे ह ठहिरही।
EZE 14:11 तब इसरायल के मनखेमन फेर कभू मोर ले नइं भटकहीं अऊ न ही फेर कभू ओमन अपन जम्मो पाप के दुवारा अपनआप ला असुध करहीं। ओमन मोर मनखे होहीं, अऊ मेंह ओमन के परमेसर ठहिरहूं, परमपरधान यहोवा ह घोसना करत हे।’ ”
EZE 14:12 तब यहोवा के ये बचन मोर मेर आईस:
EZE 14:13 “हे मनखे के बेटा, यदि कोनो देस बिसवासघात करके मोर बिरूध पाप करथे अऊ मेंह ओकर बिरूध अपन हांथ बढ़ाके ओकर जेवन-पानी ला बंद कर देथंव अऊ ओकर ऊपर अकाल भेजके ओकर मनखे अऊ पसुमन ला मार डालथंव,
EZE 14:14 अऊ चाहे यदि ये तीन मनखे—नूह, दानिएल अऊ अयूब—ओमा होतिन, त ओमन अपन धरमीपन के दुवारा सिरिप अपनआप ला ही बचा सकतिन, परमपरधान यहोवा ह घोसना करत हे।
EZE 14:15 “या यदि मेंह ओ देस म जंगली पसुमन ला भेजंव अऊ ओमन ओ देस ला निरजन करके उजाड़ देवंय ताकि ओ जंगली पसुमन के कारन कोनो ओ देस म ले होके झन जावंय,
EZE 14:16 त मोर जिनगी के कसम, परमपरधान यहोवा ह घोसना करत हे, चाहे ये तीनों मनखे भी उहां होतिन, त ओमन अपन खुद के बेटा-बेटीमन ला घलो नइं बचा पातिन। ओमन अकेला ही बचतिन, पर ओ देस ह उजड़ जातिस।
EZE 14:17 “या यदि मेंह ओ देस के बिरूध तलवार उठांव अऊ कहंव, ‘पूरा देस म तलवार चलय,’ अऊ मेंह ओमा के मनखे अऊ पसुमन ला मार डारंव,
EZE 14:18 त मोर जिनगी के कसम, परमपरधान यहोवा ह घोसना करत हे, चाहे ये तीनों मनखे भी उहां होतिन, त ओमन अपन खुद के बेटा-बेटीमन ला घलो बचा नइं पातिन। ओमन अकेला ही बचतिन।
EZE 14:19 “या यदि में ओ देस म महामारी भेजंव अऊ ओ देस के मनखे अऊ ओमन के पसुमन ला मारत, खून बहाय के दुवारा ओकर ऊपर अपन कोप देखातेंव,
EZE 14:20 त मोर जिनगी के कसम, परमपरधान यहोवा ह घोसना करत हे, चाहे नूह, दानिएल अऊ अयूब भी उहां होतिन, त ओमन न तो अपन बेटा ला बचा पातिन, अऊ न ही अपन बेटी ला। ओमन अपन धरमीपन के कारन सिरिप अपनआप ला बचा पातिन।
EZE 14:21 “काबरकि परमपरधान यहोवा ह ये कहत हे: कतेक खराप दसा होही जब मेंह यरूसलेम म ये चार किसम के भयंकर दंड पठोहूं—तलवार अऊ अकाल अऊ जंगली पसु अऊ महामारी, ताकि येकर आदमी अऊ पसुमन मारे जावंय।
EZE 14:22 तभो ले कुछू मनखेमन बांच जाहीं—बेटा अऊ बेटीमन, जेमन इहां ले बाहिर लाय जाहीं। ओमन तुमन करा आहीं, अऊ जब तुमन ओमन के चालचलन अऊ काममन ला देखहू, त तुमन ला ओ बिपत्ति के बारे म सांति मिलही, जेला मेंह यरूसलेम म डाले हंव—हर एक बिपत्ति जेला मेंह येकर ऊपर लाय हंव।
EZE 14:23 तुमन ला सांति मिलही, जब तुमन ओमन के चालचलन अऊ काममन ला देखहू, काबरकि तब तुमन जानहू कि मेंह यरूसलेम म जऊन कुछू करे हंव, ओला बिगर कारन के नइं करे हंव, परमपरधान यहोवा ह घोसना करत हे।”
EZE 15:1 यहोवा के ये बचन मोर मेर आईस:
EZE 15:2 “हे मनखे के बेटा, कोनो अंगूर के नार के लकरी अऊ जंगल के रूखमन के कोनो लकरी म का फरक होथे?
EZE 15:3 का कोनो उपयोगी चीज बनाय बर अंगूर के नार के लकरी लेय जाथे? का कोनो चीज ला टांगे बर ओमा ले खूंटी बनाय जाथे?
EZE 15:4 अऊ जब येला जलाय बर आगी म डारे जाथे अऊ येकर दूनों छोर आगी म जर जाथें, अऊ बीच के भाग ह झुरा जाथे, तब का कोनो काम म ओकर उपयोग होथे?
EZE 15:5 जब येह सइघो रिहिस, तब येह कोनो काम के नइं रिहिस, त जब येह आगी म जर गीस अऊ झुरा गीस, त फेर येकर का उपयोग हो सकथे?
EZE 15:6 “एकरसेति परमपरधान यहोवा ह ये कहत हे: जइसने जंगल के रूखमन म ले मेंह अंगूर के नार के लकरी ला आगी बर ईंधन के रूप म देय हंव, वइसने ही मेंह यरूसलेम म रहइया मनखेमन के संग बरताव करहूं।
EZE 15:7 मेंह अपन मुहूं ओमन के बिरूध करहूं। हालाकि ओमन आगी म ले निकल आय हवंय, तभो ले आगी ही ओमन ला जलाके नास कर दीही। अऊ जब मेंह अपन मुहूं ओमन के बिरूध करहूं, तब तुमन जानहू कि मेंह यहोवा अंव।
EZE 15:8 मेंह देस ला उजाड़ दूहूं, काबरकि ओमन बिसवासघात करे हवंय, परमपरधान यहोवा ह घोसना करत हे।”
EZE 16:1 यहोवा के ये बचन मोर मेर आईस:
EZE 16:2 “हे मनखे के बेटा, यरूसलेम के जम्मो घिनौना काम बर ओकर बिरोध कर
EZE 16:3 अऊ कह, ‘परमपरधान यहोवा ह यरूसलेम ले ये कहत हे: तोर पुरखा अऊ तोर जनम कनानीमन के देस म होईस; तोर ददा एक अमोरी अऊ तोर दाई एक हित्ती रिहिस।
EZE 16:4 जऊन दिन तें जनमे, न तो तोर नाल काटे गीस, न ही तोला पानी ले धोके साफ करे गीस, अऊ न तो तोला नून ले रगड़े गीस, अऊ न ही तोला ओनहा म लपेटे गीस।
EZE 16:5 तोर खातिर येमा के कोनो भी काम करे बर न तो कोनो तोर ऊपर दया-दिरिस्टी करिन, अऊ न ही तरस खाईन। बल्कि तोला बाहिर खुला मैदान म फटिक दिये गीस, काबरकि तोर जनम के दिन ले ही तोला तुछ समझे गीस।
EZE 16:6 “ ‘तब मेंह उहां ले होके गेंव अऊ तोला अपन खून म लोटत देखेंव, अऊ जब तेंह उहां अपन खून म पड़े रहय, त मेंह तोला कहेंव, “जीयत रह!”
EZE 16:7 मेंह तोला खेत के एक पऊधा सहीं बढ़ांय। तेंह बढ़य अऊ बढ़के जवान हो गय। तोर थन ह बाढ़ गीस, अऊ तोर चुंदी ह बाढ़िस, तब भी तें एकदम नंगरी रहय।
EZE 16:8 “ ‘बाद म, में फेर उहां ले होके गेंव, अऊ जब तोला देखेंव, त तेंह मया करे लईक बड़े हो गे रहय, तब मेंह अपन ओनहा के छोर ला तोर ऊपर ओढ़ाके तोर उघरा देहें ला ढांक देंय। तब में तोर ले सच्चई के संग सपथ खांय अऊ तोर संग एक करार करेंव, अऊ तें मोर हो गेय, परमपरधान यहोवा ह घोसना करत हे।
EZE 16:9 “ ‘तब मेंह तोला पानी म नहवाके तोर ऊपर लगे खून ला धोयेंव, अऊ तोर देहें म तेल लगांय।
EZE 16:10 मेंह तोला कसीदावाला ओनहा अऊ बढ़िया खाल के पनही पहिरांय। मेंह तोला सुघर मलमल के ओनहा पहिरांय अऊ तोला मंहगा ओनहा ओढ़ांय।
EZE 16:11 मेंह जेवर पहिराके तोर सिंगार करेंव: मेंह तोर बाहां म बहुंटा अऊ गला म हार पहिरांय,
EZE 16:12 अऊ मेंह तोर नाक म नथनी, कानमन म बाली अऊ मुड़ म सुघर मुकुट पहिरांय।
EZE 16:13 ये किसम ले सोन अऊ चांदी ले तोर सिंगार करे गीस; तोर ओनहामन सुघर मलमल, मंहगा अऊ कसीदावाला कपड़ा के बनिस। तोर जेवन म मंधरस, जैतून तेल अऊ सुघर आंटा रिहिस। तेंह बहुंत सुघर अऊ रानी होय के लईक हो गेय।
EZE 16:14 तोर सुघरता के कारन तोर कीरति जाति-जाति के मनखेमन के बीच फईल गीस, काबरकि मेंह तोला जऊन सोभा देय रहेंव, ओह तोर सुघरता ला पूरा कर दीस, परमपरधान यहोवा ह घोसना करत हे।
EZE 16:15 “ ‘पर तेंह अपन सुघरता ऊपर भरोसा करय अऊ अपन कीरति के उपयोग बेभिचारिन बने बर करय। जऊन ह भी तोर लकठा म ले होके गीस, तेंह ओकर ऊपर बहुंत किरपा करय अऊ तोर सुघरता ह ओला मोह लीस।
EZE 16:16 तेंह अपन कुछू ओनहा ला लेके भड़कीला ऊंचहा जगहमन ला बनाय, अऊ उहां बेभिचार के काम करय। तें ओकर मेर गेय, अऊ ओह तोर सुघरता ऊपर अधिकार कर लीस।
EZE 16:17 तेंह मोर दिये सुघर जेवरमन ला घलो लेय, ओ जेवर जेमन मोर सोन अऊ चांदी ले बने रिहिन, अऊ ओमन ले तेंह नर मूरतीमन ला बना लेय अऊ ओ मूरतीमन के संग बेभिचार करन लगय।
EZE 16:18 अऊ तें अपन कसीदावाले ओनहा ला लेके ओ मूरतीमन ला पहिराय, अऊ मोर तेल अऊ धूप ओमन के आघू म चघाय।
EZE 16:19 जऊन जेवन मेंह तोर बर देय रहेंव—आंटा, जैतून तेल अऊ मंधरस मेंह तोर खाय बर देय रहेंव—तेंह येमन ला खुसबूवाला धूप के रूप म ओ मूरतीमन के आघू म चघाय। अइसने ही होय हवय, परमपरधान यहोवा ह घोसना करत हे।
EZE 16:20 “ ‘अऊ तेंह अपन बेटा-बेटीमन ला लेय, जेमन ला तेंह मोर बर जनम देय रहय, अऊ ओमन ला ओ मूरतीमन बर भोग करके चघा देय। का तोर बेभिचार ह परयाप्त नइं रिहिस?
EZE 16:21 तेंह मोर लइकामन ला बध करके ओमन ला मूरतीमन ला चघा दे हस।
EZE 16:22 अपन ये जम्मो घिनौना काम अऊ बेभिचार के बीच, तेंह अपन लइकापन के ओ दिनमन ला सुरता नइं करय, जब तेंह नंगरी अऊ उघरा अपन खून म लोटत रहय।
EZE 16:23 “ ‘हाय! तोर ऊपर हाय, परमपरधान यहोवा ह घोसना करत हे। तोर आने जम्मो दुस्टता के अलावा,
EZE 16:24 तेंह अपन बर एक गुम्मट बना लेय अऊ हर एक चऊक म एक ऊंचहा पूजा के जगह बनवा लेय।
EZE 16:25 हर एक गली के कोनटा म तेंह अपन ऊंचहा पूजा के जगह बनवा लेय अऊ उहां ले जावत मनखे के आघू म अपन बढ़त दुराचार काम के संग अपन गोड़मन ला पसारके अपन सुघरता के अपमान करय।
EZE 16:26 तेंह बड़े जनन अंगवाले अपन परोसी मिसरी मनखेमन के संग बेभिचार करय, अऊ अपन बढ़त दुराचार काम ले तेंह मोर कोरोध ला भड़काय हस।
EZE 16:27 एकरसेति मेंह अपन हांथ तोर बिरूध उठाय हंव अऊ तोर इलाका ला कम कर दे हंव; मेंह तोला तोर बईरीमन के किरपा ऊपर छोंड़ दे हंव, याने कि पलिस्तीमन के बेटीमन के किरपा ऊपर, जेमन ला तोर बेभिचारी चालचलन के कारन धक्का लगे हे।
EZE 16:28 तेंह अस्सूरी मनखेमन संग घलो बेभिचार करय, काबरकि तोला संतोस नइं होवत रिहिस; अऊ ओकर बाद घलो तोला संतोस नइं होईस।
EZE 16:29 तब तेंह अपन दुराचार काम ला बढ़ाके ओमा बेबिलोनिया देस ला घलो सामिल कर लेय, जऊन ह बेपारीमन के एक देस अय, पर येकर ले घलो तोला संतोस नइं होईस।
EZE 16:30 “ ‘जब तेंह एक निरलज बेस्या के सहीं ये जम्मो चीज करथस, त मेंह तोर बिरूध कोरोध ले भर जाथंव, परमपरधान यहोवा ह घोसना करत हे!
EZE 16:31 जब तेंह हर एक गली के कोनटा म अपन गुम्मट अऊ हर एक चऊक म अपन ऊंचहा पूजा के जगह बनवाय, त तेंह एक बेस्या सहीं ठहिरय, काबरकि तेंह दिये गय रकम के अपमान करय।
EZE 16:32 “ ‘हे बेभिचारिन घरवाली! तें अपन खुद के घरवाला के बदले पराया मनखेमन ला जादा पसंद करथस।
EZE 16:33 जम्मो बेस्यामन भेंट के रूप म कुछू लेथें, पर तें अपन जम्मो मयारूमन ला घूस के रूप म भेंट म कुछू देथस ताकि ओमन हर जगह ले तोर अवैध किरपा बर आवंय।
EZE 16:34 ये किसम ले तोर बेभिचार ह आने मन के बेभिचार ले उल्टा अय; तोर किरपा बर तोर पाछू कोनो नइं जावंय। तें एकदम उल्टा अस, काबरकि तेंह दाम देथस अऊ तोला कुछू नइं देय जावय।
EZE 16:35 “ ‘ये खातिर, हे बेस्या, यहोवा के बचन ला सुन!
EZE 16:36 परमपरधान यहोवा ह ये कहत हे: काबरकि तेंह अपन काम-वासना ला उंडेले हस अऊ अपन मयारूमन के संग अपन दुराचारी काम म अपन उघरा देहें ला देखाय हस, अऊ तोर जम्मो घिनौना मूरतीमन के कारन, अऊ काबरकि तेंह ओ मूरतीमन ला अपन लइकामन के खून दे हस,
EZE 16:37 ये खातिर मेंह तोर ओ जम्मो मयारूमन ला इकट्ठा करइया हंव, जेमन के संग तोला खुसी मिले हे, जेमन ले तेंह मया करे हस अऊ जेमन ले तेंह घिन करे हस। मेंह ओमन ला चारों कोति ले तोर बिरूध म इकट्ठा करहूं अऊ ओमन के आघू म तोर ओनहा उतारहूं, अऊ ओमन तोर एकदम उघरा देहें ला देखहीं।
EZE 16:38 तब में तोला ओ माईलोगनमन के सजा दूहूं, जेमन बेभिचार करथें अऊ जेमन खून बहाथें; मेंह अपन कोप अऊ जलन के कोरोध के संग तोर ले खून के बदला लूहूं।
EZE 16:39 तब में तोला तोर मयारूमन के हांथ म सऊंप दूहूं, अऊ ओमन तोर गुम्मटमन ला टोरके गिरा दीहीं अऊ तोर ऊंचहा पूजा के जगहमन ला नास कर दीहीं। ओमन तोर ओनहा ला उतार लीहीं अऊ तोर सुघर जेवर ला लूट लीहीं अऊ तोला अबगा नंगरी करके छोंड़ दीहीं।
EZE 16:40 ओमन तोर बिरूध एक उपदरवी भीड़ ले आहीं, जेमन तोर ऊपर पथरवाह करहीं अऊ तोला अपन तलवार ले कुटा-कुटा कर डालहीं।
EZE 16:41 तब ओमन तोर घरमन ला जला दीहीं अऊ बहुंत माईलोगनमन के देखत म सजा दीहीं। मेंह तोर बेभिचार के काम ला बंद कर दूहूं, अऊ तेंह फेर तोर मयारूमन ला दाम नइं देबे।
EZE 16:42 तब तोर बिरूध मोर कोप ह सांत होही अऊ तोर ऊपर ले मोर जलन के कोरोध ह हट जाही; में सांत हो जाहूं अऊ फेर गुस्सा नइं करहूं।
EZE 16:43 “ ‘काबरकि तें अपन जवानी के दिनमन ला सुरता नइं रखय, पर ये जम्मो काममन के दुवारा मोला नराज करय, एकरसेति तें जऊन कुछू करे हस, खचित मेंह ओ बातमन ला तोर ही मुड़ ऊपर ले आहूं, परमपरधान यहोवा ह घोसना करत हे। का तेंह अपन आने जम्मो घिनौना काम के अलावा, फूहड़ काम घलो नइं करय?
EZE 16:44 “ ‘हर ओ मनखे, जऊन ह कहावतमन के उपयोग करथे, ओह तोर बारे म ये कहावत के उपयोग करही: “जइसने दाई, वइसने बेटी।”
EZE 16:45 तेंह अपन दाई के सही बेटी अस, जऊन ह अपन घरवाला अऊ अपन लइकामन ला तुछ समझिस; अऊ तेंह अपन ओ बहिनीमन के सही बहिनी अस, जेमन अपन घरवाला अऊ अपन लइकामन ला तुछ समझिन। तोर दाई ह एक हित्ती अऊ तोर ददा एक अमोरी रिहिस।
EZE 16:46 सामरिया ह तोर बड़े बहिनी रिहिस, जऊन ह अपन बेटीमन के संग तोर उत्तर कोति रहत रिहिस; अऊ तोर छोटे बहिनी सदोम रिहिस, जऊन ह अपन बेटीमन के संग तोर दक्खिन कोति रहत रिहिस।
EZE 16:47 तें न सिरिप ओमन के रसता म चलके ओमन के घिनौना काममन के नकल करय, पर बहुंत जल्दी, तें अपन जम्मो काम म ओमन ले घलो जादा बिगड़ गेय।
EZE 16:48 परमपरधान यहोवा ह घोसना करत हे, मोर जिनगी के कसम, तोर बहिनी सदोम अऊ ओकर बेटीमन अइसने घिनौना काम कभू नइं करिन, जइसने तें अऊ तोर बेटीमन करे हवंय।
EZE 16:49 “ ‘तोर बहिनी सदोम के पाप ये रिहिस: ओह अऊ ओकर बेटीमन घमंडी, खधरी अऊ बेफिकर जिनगी जीनेवाली रिहिन; ओमन गरीब अऊ जरूरतमंद के मदद नइं करिन।
EZE 16:50 ओमन घमंडी रिहिन अऊ ओमन मोर आघू म घिनौना काम करिन। एकरसेति मेंह ओमन ला दूरिहा म कर देंव, जइसे कि तेंह देखे हस।
EZE 16:51 सामरिया ह तोर पापमन के आधा घलो पाप नइं करिस। तेंह ओमन ले जादा घिनौना काम करे हस, अऊ तोर दुवारा करे गय ये जम्मो काम ले तेंह अपन बहिनी ला धरमी देखाय के कोसिस करे हस।
EZE 16:52 अपन कलंक के बोझा उठात रह, काबरकि तेंह अपन बहिनीमन बर कुछू नियाय दे हस। काबरकि तोर पापमन ओमन के पाप ले जादा दुस्टता ले भरे रिहिन, ओमन तोर ले जादा धरमी दिखत हें। एकरसेति तें लज्जित होके अपन कलंक के बोझा ला उठात रह, काबरकि तेंह अपन बहिनीमन ला धरमी देखाय के कोसिस करे हस।
EZE 16:53 “ ‘तभो ले, में सदोम अऊ ओकर बेटीमन के जिनगी, सामरिया अऊ ओकर बेटीमन के जिनगी, अऊ संग म तोर जिनगी ला घलो बदलहूं,
EZE 16:54 ताकि तें अपन कलंक के बोझा ला उठा सकस अऊ ओमन ला सांति देय म जऊन काम करे हस, ओ जम्मो ले लज्जित हो।
EZE 16:55 अऊ तोर बहिनी, सदोम अऊ सामरिया अपन-अपन बेटीमन समेत अपन पहिली दसा म फेर आ जाहीं; अऊ तें अऊ तोर बेटीमन घलो अपन पहिली दसा म फेर आ जाहू।
EZE 16:56 अपन घमंड के दिन म, तें अपन बहिनी सदोम के नांव तक नइं लेवत रहय,
EZE 16:57 जब तोर दुस्टता परगट नइं होय रिहिस। ओही किसम ले, अब एदोम के बेटी अऊ ओकर जम्मो परोसी अऊ पलिस्तीमन के बेटीमन तोला अपमानित करथें—तोर चारों कोति के जम्मो मनखेमन तोला तुछ समझथें।
EZE 16:58 तोला अपन नंगई अऊ अपन घिनौना काममन के परिनाम भुगते बर पड़ही, यहोवा ह घोसना करत हे।
EZE 16:59 “ ‘परमपरधान यहोवा ह ये कहत हे: मेंह तोर संग म वइसनेच बरताव करहूं, जइसने तोर संग होना चाही, काबरकि तेंह करार ला टोरे के दुवारा मोर सपथ ला तुछ समझे हस।
EZE 16:60 तभो ले मेंह ओ करार ला सुरता रखहूं, जेला मेंह तोर संग तोर जवानी के दिन म करे रहेंव, अऊ मेंह तोर संग सदाकाल तक बने रहइया एक करार करहूं।
EZE 16:61 जब तें अपन चालचलन ला सुरता करके सरमिंदा होबे, जब तें अपन बहिनीमन ले मिलबे, याने कि बड़े अऊ छोटे बहिनीमन ले मिलबे। मेंह ओमन ला तोला तोर बेटीमन के रूप म दूहूं, पर येह तोर संग करे गय करार के आधार म नइं होवय।
EZE 16:62 ये किसम ले, मेंह तोर संग अपन करार करहूं, अऊ तेंह जानबे कि मेंह यहोवा अंव।
EZE 16:63 जब मेंह तोर करे गय जम्मो गलत काम ला छेमा करहूं, तब तेंह सुरता करबे अऊ लज्जित होबे अऊ अपमानित होय के कारन फेर कभू अपन मुहूं नइं खोलबे, परमपरधान यहोवा ह घोसना करत हे।’ ”
EZE 17:1 यहोवा के ये बचन मोर मेर आईस:
EZE 17:2 “हे मनखे के बेटा, एक पहेली बना अऊ येला इसरायलीमन ला एक पटंतर के रूप सुना।
EZE 17:3 ओमन ले कह, ‘परमपरधान यहोवा ह ये कहत हे: एक बड़े गिधवा लबानोन म आईस, जेकर सक्तिसाली डेना अऊ लम्बा पांखीमन रिहिन अऊ पूरा पांखीमन रंग-बिरंगा रिहिन। एक देवदार के रूख के चोटी के डारा ला धरके,
EZE 17:4 ओह सबले ऊपर के एक कोअंर डारा ला टोर लीस अऊ ओला बेपारीमन के एक देस म ले गीस, अऊ ओ डारा ला ओह उहां बेपारीमन के एक सहर म जगा दीस।
EZE 17:5 “ ‘ओह इसरायल देस के छोटे बीजामन ले एक ठन बीजा लेके ओला उपजाऊ भुइयां म जगा दीस। ओह ओला बहुंत पानीवाले जगह के तीर म एक सरई असन लगाईस,
EZE 17:6 अऊ ओ बीजा ह जामिस अऊ खाल्हे म फईलके एक ठन अंगूर के नार हो गीस। येकर डारामन ओकर कोति मुड़िन, पर ओकर जरीमन ओकर खाल्हे म रिहिन। ये किसम ले, ओह एक अंगूर के नार हो गीस अऊ ओमा ले डारामन निकलिन अऊ ये डारामन पानमन ले भर गीन।
EZE 17:7 “ ‘पर उहां एक अऊ बड़े गिधवा रिहिस, जेकर सक्तिसाली डेनामन रिहिन अऊ ओह पांखीमन ले भरे रिहिस। ओ अंगूर के नार जिहां ओला लगाय गे रिहिस, उहां ले ओकर जरीमन ओ दूसर गिधवा कोति बढ़े लगिन अऊ ओकर डारामन पानी बर ओकर कोति फईले लगिन।
EZE 17:8 येला बने भुइयां म बहुंत पानीवाले जगह के तीर म लगाय गे रिहिस ताकि ओमा डारामन निकलंय, ओमा फर लगय अऊ ओह एक बहुंत बढ़िया अंगूर के नार होवय।’
EZE 17:9 “तें ओमन ले कह, ‘परमपरधान यहोवा ह ये कहत हे: का येह बाढ़ही? का येला जरी ले उखानके येकर फरमन ला नइं गिरा दिये जाही ताकि येह सूखा जावय? येकर जम्मो नवां पानमन सूखा जाहीं। येला जड़ ले उखाने बर कोनो मजबूत हांथ या जादा मनखेमन के जरूरत नइं होही।
EZE 17:10 येला लगाय गे हवय, पर का येह बाढ़ही? जब पूरबी हवा येकर ऊपर चलही, तब का येह पूरा सूखा नइं जाही? ओ भुइयां म ही सूखा जाही, जिहां येह रिहिस।’ ”
EZE 17:11 तब यहोवा के बचन मोर मेर आईस:
EZE 17:12 “ये बिदरोही मनखेमन ले कह, ‘का तुमन नइं जानव कि ये बातमन के का मतलब अय?’ ओमन ले कह: ‘बेबिलोन के राजा यरूसलेम गीस अऊ ओकर राजा अऊ ओकर परभावसाली मनखेमन ला अपन संग वापिस बेबिलोन ले आईस।
EZE 17:13 तब राज-परिवार के एक सदस्य ला लीस अऊ ओला सपथ खवाके ओकर संग एक करार करिस। ओह अपन संग देस के मुखिया आदमीमन ला घलो ले गीस,
EZE 17:14 ताकि ओ राज ह कमजोर हो जावय, अऊ फेर उन्नति झन कर सकय, अऊ सिरिप ओकर करार के मुताबिक चले के दुवारा ही बचे रहय।
EZE 17:15 पर ओ राज के राजा ह अपन दूतमन ला घोड़ा अऊ एक बड़े सेना लाय बर मिसर देस पठोईस अऊ ये किसम ले ओह बेबिलोन के राजा ले बिदरोह करिस। का ओह सफल होही? का अइसने काम करइया ह बांच जाही? का ओह करार टोरके घलो बांच जाही?
EZE 17:16 “ ‘मोर जिनगी के कसम, परमपरधान यहोवा ह कहत हे: ओह बेबिलोन म, ओ राजा के देस म मर जाही, जऊन ह ओला सिंघासन म बईठाय रिहिस, जेकर कसम ला ओह तुछ जानिस अऊ जेकर करार ला ओह टोरिस।
EZE 17:17 जब ढलानमन बनाय जाहीं अऊ बहुंते मनखेमन ला नास करे बर घेराबंदी के काम करे जाही, तब फिरौन, ओकर सक्तिसाली सेना अऊ बड़े उपदरवी झुंड घलो लड़ई म ओकर कोनो मदद नइं कर सकहीं।
EZE 17:18 ओह करार ला टोरके कसम ला तुछ जानिस। काबरकि ओह हांथ देके कसम खाय रिहिस अऊ तभो ले ये सब काम करिस, एकरसेति ओह बांचे नइं पाही।
EZE 17:19 “ ‘एकरसेति परमपरधान यहोवा ह ये कहत हे: मोर जिनगी के कसम, मेंह ओकर ले मोर कसम ला तुछ समझे के अऊ मोर करार ला टोरे के बदला लूहूं।
EZE 17:20 मेंह ओकर बर अपन जाल फईलाहूं अऊ ओह मोर फांदा म फंसही। मेंह ओला बेबिलोन ले आहूं अऊ उहां ओला दंड दूहूं काबरकि ओह मोर संग बिसवासघात करिस।
EZE 17:21 ओकर चुने गय सेना के दलमन तलवार ले मारे जाहीं, अऊ बांचे मनखेमन चारों कोति तितिर-बितिर हो जाहीं। तब तुमन जानहू कि में यहोवा ह ये कहे हंव।
EZE 17:22 “ ‘परमपरधान यहोवा ह ये कहत हे: में खुद एक ठन देवदार रूख के सबले ऊंच डारा के अंकुर ला लेके लगाहूं; में ओकर सबले ऊंच डारामन ले एक ठन कोअंर अंकुर ला टोरहूं अऊ ओला एक ऊंच पहाड़ म लगाहूं।
EZE 17:23 मेंह ओला इसरायल के पहाड़ के ऊंचई म लगाहूं; येमा डारामन निकलहीं अऊ फर लगही अऊ येह एक सानदार देवदार के रूख हो जाही। हर किसम के चिरईमन ओमा अपन खोंधरा बनाहीं; ओमन ओकर डारामन के छइहां म बसेरा करहीं।
EZE 17:24 जंगल के जम्मो रूखमन जान लीहीं कि में यहोवा ही ऊंचहा रूख ला खाल्हे अऊ छोटे रूख ला बढ़ाके ऊंचहा करथंव। मेंह हरियर रूख ला सूखा देथंव अऊ सूखा रूख ला हरियर करके बढ़ाथंव। “ ‘में यहोवा ह ये कहे हंव, अऊ मेंह येला पूरा करहूं।’ ”
EZE 18:1 यहोवा के ये बचन मोर मेर आईस:
EZE 18:2 “इसरायल देस के बारे म ये कहावत कहे के तुमन के का मतलब ए: “ ‘खट्टा अंगूर त खाईन दाई-ददामन, अऊ दांत खट्टा होईस लइकामन के’?
EZE 18:3 “मोर जिनगी के कसम, परमपरधान यहोवा ह कहत हे, तुमन ला इसरायल म फेर ये कहावत कहे के अवसर नइं मिलही।
EZE 18:4 काबरकि हरेक जन मोर अंय, दाई-ददा के संग लइका घलो—दूनों एके सहीं मोर अंय। एकरसेति जऊन ह पाप करथे, ओही ह मरही।
EZE 18:5 “मानलो, एक धरमी मनखे हवय, जऊन ह ओ काम करथे, जेह उचित अऊ सही अय।
EZE 18:6 ओह पहाड़ के पूजा के जगह म नइं खावय या इसरायल के मूरतीमन कोति नइं देखय। ओह अपन परोसी के घरवाली ला असुध नइं करय या कोनो माईलोगन के संग ओकर महिना के बेरा सारीरिक संबंध नइं बनाय।
EZE 18:7 ओह काकरो ऊपर अतियाचार नइं करय, पर गिरवी रखे चीज के करजा ला लहुंटा देथे। ओह डाका नइं डालय पर अपन जेवन भूखा मनखे ला देथे अऊ नंगरा ला ओनहा देथे।
EZE 18:8 ओह बिगर बियाज के पईसा उधार देथे, या ओमन ले फायदा नइं उठाय। ओह गलत काम करे ले अपन हांथ ला रोकथे अऊ मनखेमन के बीच सही नियाय करथे।
EZE 18:9 ओह मोर बिधिमन म चलथे अऊ बिसवासयोग्यता के संग मोर कानूनमन के पालन करथे। ओ मनखे ह धरमी अय; ओह जरूर जीयत रहिही, परमपरधान यहोवा ह घोसना करत हे।
EZE 18:10 “मानलो, ओकर एक हिंसा करइया बेटा हे, जऊन ह हतिया करथे या येमा के कोनो अऊ काम करथे
EZE 18:11 (हालाकि ओकर ददा ह येमा के कोनो भी काम नइं करे हवय): “ओह पहाड़ के पूजा के जगह म खाथे। ओह अपन परोसी के घरवाली ला असुध करथे।
EZE 18:12 ओह गरीब अऊ जरूरतमंद ऊपर अतियाचार करथे। ओह लूट-पाट करथे। ओह गिरवी म रखे चीज ला नइं लहुंटाय। ओह मूरतीमन कोति देखथे। ओह घिनौना काम करथे।
EZE 18:13 ओह बियाज म रूपिया देथे अऊ लाभ उठाथे। का अइसने आदमी जीयत रहिही? ओह नइं जीयय! काबरकि ओह ये सब घिनौना काम करे हवय, ओह जरूर मार डारे जावय; ओकर खून के दोस ओकरे मुड़ ऊपर पड़ही।
EZE 18:14 “पर मानलो, ये मनखे के एक बेटा हवय, जऊन ह अपन ददा के ये जम्मो पाप ला देखथे, अऊ हालाकि ओह ओ पापमन ला देखथे, पर ओह अइसने कोनो पाप नइं करय:
EZE 18:15 “ओह पहाड़ के पूजा के जगह म नइं खावय या इसरायल के मूरतीमन ला नइं देखय। ओह अपन परोसी के घरवाली ला असुध नइं करय।
EZE 18:16 ओह काकरो ऊपर अतियाचार नइं करय या करजा देय बर कोनो चीज ला गिरवी नइं रखय। ओह लूट-पाट नइं करय पर अपन जेवन भूखा मनखे ला देथे अऊ नंगरा ला ओनहा देथे।
EZE 18:17 ओह गरीबमन ला सताय ले अपन हांथ रोके रहिथे अऊ ओमन ले कोनो बियाज या फायदा नइं उठाय। ओह मोर कानूनमन ला मानथे अऊ मोर बिधिमन म चलथे। ओह अपन ददा के पाप के कारन नइं मरय; ओह जरूर जीयत रहिही।
EZE 18:18 पर ओकर ददा ह अपन खुद के पाप के कारन मरही, काबरकि ओह अवैध वसूली करिस, अपन भाई ला लूटिस अऊ ओ काम करिस, जऊन ह ओकर मनखेमन के बीच गलत अय।
EZE 18:19 “तभो ले, तुमन पुछथव, ‘बेटा ह अपन ददा के दोस के भागीदार काबर नइं होवय?’ जब बेटा ह उचित अऊ सही काम करे हवय अऊ धियान देके मोर जम्मो बिधिमन के पालन करे हवय, त ओह जरूर जीयत रहिही।
EZE 18:20 जऊन ह पाप करथे, ओही ह मरही। कोनो लइका ह अपन दाई-ददा के दोस के भागीदार नइं होही, अऊ न ही दाई-ददा अपन लइका के दोस के भागीदार होहीं। धरमी के धरमीपन के फर ओ धरमी ला ही मिलही, अऊ दुस्ट के दुस्टता के फर ओ दुस्ट ला ही मिलही।
EZE 18:21 “पर यदि कोनो दुस्ट मनखे अपन जम्मो पाप ला छोंड़ देथे अऊ मोर जम्मो बिधिमन के पालन करथे अऊ ओ काम करथे जऊन ह उचित अऊ सही अय, त ओ मनखे ह जरूर जीयत रहिही; ओह नइं मरय।
EZE 18:22 ओह जतेक पाप करे हवय, ओमन फेर सुरता नइं करे जावंय। जऊन धरमी काम ओह करे हवय, ओकर कारन ओह जीयत रहिही।
EZE 18:23 का मेंह कोनो दुस्ट के मिरतू ले खुस होथंव? परमपरधान यहोवा ह घोसना करत हे। बल्कि, का मेंह खुस नइं होवंव, जब ओह खराप काम ला छोंड़के जीयत रहिथे?
EZE 18:24 “पर यदि कोनो धरमी मनखे अपन धरमीपन ला छोंड़के पाप करथे अऊ ओही घिनौना काम करे लगथे, जेला एक दुस्ट मनखे करथे, त का ओह जीयत रहिही? ओकर दुवारा करे गय कोनो भी धरमी काम ला सुरता नइं करे जाही। जऊन बिसवासघात ओह करे हवय, ओकर खातिर ओह दोसी अय अऊ जऊन पाप ओह करे हवय, ओकर कारन ओह मरही।
EZE 18:25 “तभो ले तुमन कहिथव, ‘परभू के नीति ह उचित नो हय।’ हे इसरायलीमन, तुमन सुनव: का मोर नीति ह अनुचित अय? का ये तुम्हर नीतिमन नो हंय, जेमन अनुचित अंय?
EZE 18:26 यदि कोनो धरमी मनखे अपन धरमीपन ला छोंड़के पाप करथे, त ओह अपन दुस्ट काम के कारन मरही; अपन करे गय पाप के कारन ओह मरही।
EZE 18:27 पर यदि कोनो दुस्ट मनखे अपन दुस्ट काममन ला छोंड़ देथे अऊ ओ काम करथे, जऊन ह उचित अऊ सही अय, त ओह अपन जिनगी ला बचाही।
EZE 18:28 काबरकि ओह अपन करे गय जम्मो पाप ऊपर सोच-बिचार करथे अऊ ओमन ला छोंड़ देथे, ये खातिर ओ मनखे ह जरूर जीयत रहिही; ओह नइं मरय।
EZE 18:29 तभो ले इसरायलीमन कहिथंय, ‘परभू के नीति ह उचित नो हय।’ हे इसरायल के मनखेमन, का मोर नीतिमन अनुचित अंय? का येमन तुम्हर नीति नो हंय, जेमन अनुचित अंय?
EZE 18:30 “एकरसेति, हे इसरायलीमन, मेंह तुमन म ले हर एक मनखे के नियाय ओकर खुद के चालचलन के मुताबिक करहूं, परमपरधान यहोवा ह घोसना करत हे। पछताप करव! अपन जम्मो पाप ला छोंड़ दव; तब पाप ह तुम्हर पतन होय के कारन नइं होही।
EZE 18:31 अपन करे गय जम्मो अपराध ले दूरिहा हो जावव अऊ एक नवां हिरदय अऊ एक नवां आतमा ले लव। हे इसरायल के मनखेमन, तुम्हर मिरतू काबर होवय?
EZE 18:32 काबरकि मोला काकरो मिरतू ले खुसी नइं होवय, परमपरधान यहोवा ह घोसना करत हे। एकरसेति पछताप करव अऊ जीयत रहव!
EZE 19:1 “इसरायल के हाकिममन के संबंध म एक बिलापगीत लेय ले
EZE 19:2 अऊ कह: “ ‘सिंहमन के बीच तोर दाई ह एक अद्भूत सिंहनी रिहिस! ओह ओमन के बीच म लेटय अऊ अपन पीलामन के पालन-पोसन करय।
EZE 19:3 ओह अपन पीलामन ले एक ठन ला पालके बड़े करिस, अऊ ओह एक बलवान सिंह हो गीस। ओह सिकार करे बर सीख गीस अऊ ओह आदमी के मांस खानेवाला हो गीस।
EZE 19:4 जाति-जाति के मनखेमन ओकर बारे म सुनिन, अऊ ओह ओमन के दुवारा खोदे गय खंचवा म गिरके फंस गीस। ओमन ओकर ऊपर नकेल डालके ओला मिसर देस ले गीन।
EZE 19:5 “ ‘जब सिंहनी ह देखिस कि ओकर आसा ह पूरा नइं होईस, ओकर आसा ह टूट गीस, तब ओह अपन एक ठन अऊ पीला ला लीस अऊ ओला एक बलवान सिंह बनाईस।
EZE 19:6 ओह आने सिंहमन के बीच म चले-फिरे लगिस, काबरकि अब ओह एक बलवान सिंह हो गे रिहिस। ओह सिकार करे बर सीख गीस अऊ ओह एक आदमी के मांस खानेवाला बन गीस।
EZE 19:7 ओह ओमन के गढ़मन ला टोर दीस अऊ ओमन के नगरमन ला उजाड़ दीस। पूरा देस अऊ ओमा रहइया जम्मो झन ओकर गरजे ले डरात रिहिन।
EZE 19:8 तब ओकर चारों कोति के जाति-जाति के मनखेमन ओकर बिरूध हो गीन। ओमन ओकर बर जाल बिछाईन, अऊ ओह ओमन के कोड़े गय खंचवा म फंस गीस।
EZE 19:9 ओमन नकेल डालके ओला ऊपर खींचिन अऊ ओला एक ठन पिंजरा म डाल दीन अऊ ओला बेबिलोन के राजा करा ले गीन। ओमन ओला जेल म डाल दीन, जेकर कारन ओकर गरजन इसरायल के पहाड़मन म फेर कभू सुनई नइं दीस।
EZE 19:10 “ ‘तोर दाई ह पानी के तीर म लगाय गय तोर अंगूर के बारी म अंगूर के एक नार सहीं रिहिस; बहुंत पानी होय के कारन ओमा फर लगत रिहिस अऊ ओह डारामन ले भरे रिहिस।
EZE 19:11 ओकर डारामन मजबूत रिहिन, अऊ एक सासन करइया के राजदंड सहीं रिहिन। बहुंत पानमन के ऊपर येह ऊंच बाढ़े रिहिस, अपन ऊंचई के कारन बहुंत डारामन के बीच येह साफ दिखत रिहिस।
EZE 19:12 पर ओ अंगूर के नार ला कोरोध म उखान दिये गीस अऊ भुइयां म फटिक दिये गीस। पूरबी हवा ह ओला सूखा दीस, ओकर फरमन गिर गीन; ओकर मजबूत डालीमन सूख गीन अऊ आगी ले जलके ओमन नास हो गीन।
EZE 19:13 अब ओला निरजन जगह म लगाय गे हवय, एक सूखा अऊ निरजल भुइयां म।
EZE 19:14 ओकर एक ठन मुख्य डारा ले आगी ह फईलिस अऊ ओकर फरमन ला जलाके नास कर दीस। ओमा अऊ कोनो मजबूत डाली नइं बचिस जऊन ह सासन करइया के राजदंड बर सही होतिस।’ येह एक बिलापगीत अय अऊ येकर उपयोग एक बिलापगीत के रूप म करे जावय।”
EZE 20:1 हमर बंधुवई के सातवां साल के पांचवां महिना के दसवां दिन इसरायल के कुछू अगुवामन यहोवा ले पुछे बर आईन, अऊ ओमन मोर आघू म बईठ गीन।
EZE 20:2 तब यहोवा के बचन मोर मेर आईस:
EZE 20:3 “हे मनखे के बेटा, इसरायल के अगुवामन ले बात कर अऊ ओमन ला कह, ‘परमपरधान यहोवा ह ये कहत हे: का तुमन मोर ले पुछे बर आय हवव? मोर जिनगी के कसम, मेंह तुमन ला मोर ले पुछे बर नइं दंव, परमपरधान यहोवा ह घोसना करत हे।’
EZE 20:4 “का तें ओमन के नियाय करबे? हे मनखे के बेटा, का तें ओमन के नियाय करबे? तब ओमन के पुरखामन के घिनौना काम ओमन ला बता
EZE 20:5 अऊ ओमन ले कह, ‘परमपरधान यहोवा ह ये कहत हे: जऊन दिन मेंह इसरायल ला चुने रहेंव, मेंह अपन हांथ उठाके याकूब के संतानमन ले सपथ खाय रहेंव अऊ मिसर देस म अपनआप ला ओमन ऊपर परगट करेंव। हांथ उठाके मेंह ओमन ले कहेंव, “मेंह यहोवा तुम्हर परमेसर अंव।”
EZE 20:6 ओही दिन मेंह ओमन ले सपथ खायेंव कि मेंह ओमन ला मिसर देस ले निकालके एक अइसे देस म ले आहूं, जेला मेंह ओमन बर खोजे रहेंव; एक अइसे देस जेमा दूध अऊ मंधरस के धारा बहिथे, अऊ जऊन ह जम्मो देसमन ले सुघर हवय।
EZE 20:7 अऊ मेंह ओमन ले कहेंव, “तुमन म ले हर एक जन ओ निकम्मा मूरतीमन ला निकाल फेंकव, जेमन ऊपर तुम्हर आंखी लगे हवय, अऊ मिसर के मूरतीमन ले अपनआप ला असुध झन करव। मेंह यहोवा तुम्हर परमेसर अंव।”
EZE 20:8 “ ‘पर ओमन मोर बिरूध बिदरोह करिन अऊ मोर बात ला नइं सुनिन; ओमन ओ निकम्मा मूरतीमन ला नइं फेंकिन, जेमा ओमन के आंखी लगे रिहिस, अऊ न ही ओमन मिसर के मूरतीमन ला छोंड़िन। एकरसेति मेंह कहेंव कि में ओमन ऊपर अपन कोप भड़काहू अऊ मिसर देस म ओमन के बिरूध अपन कोरोध देखाहूं।
EZE 20:9 पर अपन नांव के खातिर, में ओमन ला मिसर देस ले निकाल लानेंव। मेंह अइसने एकरसेति करेंव ताकि मोर नांव ओ जाति-जाति के मनखेमन के नजर म अपबितर झन ठहिरय, जेमन के बीच ओमन रहत रिहिन अऊ जेमन के देखत म मेंह अपनआप ला इसरायलीमन ऊपर परगट करे रहेंव।
EZE 20:10 एकरसेति मेंह ओमन ला मिसर देस ले निकालके सुन्ना जगह म ले आयेंव।
EZE 20:11 मेंह ओमन ला अपन बिधिमन ला देंव अऊ ओमन ला अपन कानूनमन ला बतांय, जेकर यदि कोनो मनखे पालन करथे, त ओह जीयत रहिही।
EZE 20:12 मेंह ओमन बर अपन बिसराम दिन घलो ठहिरांय, जऊन ह मोर अऊ ओमन के बीच म एक चिनहां ए, ताकि ओमन जानंय कि में यहोवा ह ओमन ला पबितर बनाय हंव।
EZE 20:13 “ ‘तभो ले इसरायल के मनखेमन सुन्ना जगह म मोर ले बिदरोह करिन। ओमन मोर बिधिमन म नइं चलिन अऊ मोर कानूनमन ला नइं मानिन—जेकर पालन यदि कोनो मनखे करथे, त ओह ओमन के दुवारा जीयत रहिही—अऊ ओमन मोर बिसराम दिनमन ला बहुंत अपबितर करिन। एकरसेति मेंह कहेंव कि ओमन ऊपर मोर कोप भड़कही अऊ सुन्ना जगह म ओमन ला नास कर दूहूं।
EZE 20:14 पर अपन नांव के खातिर मेंह ओ करेंव जेकर ले मोर नांव ओ जाति-जाति के मनखेमन के नजर म अपबितर झन ठहिरे, जेमन के देखत मेंह ओमन ला निकालके लाय रहेंव।
EZE 20:15 हांथ उठाके मेंह ओमन ले सुन्ना जगह म कसम घलो खायेंव कि जऊन देस मेंह ओमन ला दे रहेंव, ओ देस म ओमन ला नइं लानंव—एक अइसने देस जिहां दूध अऊ मंधरस के धारा बोहात हे, जऊन ह जम्मो देसमन ले सुघर हवय—
EZE 20:16 काबरकि ओमन मोर कानूनमन ला नइं मानिन अऊ मोर बिधिमन म नइं चलिन अऊ मोर बिसराम दिन ला अपबितर करिन। काबरकि ओमन के मन ह ओमन के मूरतीमन ऊपर लगे रिहिस।
EZE 20:17 तभो ले मेंह ओमन ऊपर दया-दिरिस्टी करेंव अऊ ओमन ला नास नइं करेंव या निरजन जगह म ओमन के अन्त नइं करेंव।
EZE 20:18 मेंह निरजन जगह म ओमन के लइकामन ले कहेंव, “अपन दाई-ददा के बिधिमन म या ओमन के कानूनमन म झन चलव या ओमन के मूरतीमन ले अपनआप ला असुध झन करव।
EZE 20:19 मेंह यहोवा तुम्हर परमेसर अंव; मोर बिधिमन म चलव अऊ धियान देके मोर कानूनमन के पालन करव।
EZE 20:20 मोर बिसराम दिन ला पबितर मानव कि ओमन मोर अऊ तुम्हर बीच एक चिनहां ठहिरंय। तब तुमन जानहू कि मेंह यहोवा तुम्हर परमेसर अंव।”
EZE 20:21 “ ‘पर ओमन के लइकामन मोर ले बिदरोह करिन: ओमन मोर बिधिमन म नइं चलिन, ओमन मोर कानूनमन के पालन नइं करिन, जेमन के बारे म मेंह कहे रहेंव, “ओ मनखे जऊन ह ओमन के पालन करही, ओह ओमन के दुवारा जीयत रहिही,” अऊ ओमन मोर बिसराम दिन ला अपबितर करिन। एकरसेति मेंह कहेंव ओमन ऊपर मोर कोप भड़कही अऊ निरजन जगह म मेंह अपन कोरोध ओमन ला देखाहूं।
EZE 20:22 पर मेंह अपन हांथ ला रोके रखेंव, अऊ अपन नांव के खातिर मेंह ओ करेंव, जेकर कारन मोर नांव ओ जाति-जाति के मनखेमन के नजर म अपबितर झन ठहिरय, जेमन के देखत म मेंह इसरायलीमन ला निकाल लानेंव।
EZE 20:23 अपन हांथ उठाके सुन्ना जगह म मेंह ओमन ले सपथ घलो खायेंव कि मेंह ओमन ला जाति-जाति के मनखेमन के बीच बगरा दूहूं अऊ देस-देस म ओमन ला तितिर-बितिर कर दूहूं,
EZE 20:24 काबरकि ओमन मोर कानूनमन के पालन नइं करिन पर मोर बिधिमन ला अस्वीकार करिन अऊ मोर बिसराम दिनमन ला अपबितर करिन, अऊ ओमन के आंखी ओमन के दाई-ददा के मूरतीमन म लगे रिहिस।
EZE 20:25 एकरसेति मेंह ओमन ला आने बिधि-बिधान देंव, जेमन ठीक नइं रिहिन अऊ ओमन ला अइसे कानून देंव जेकर दुवारा ओमन जीयत नइं रह सकत रिहिन;
EZE 20:26 मेंह ओमन ला ओमन के ही भेंटमन के जरिये असुध करेंव—हर एक पहिलऊठा के बलिदान—ताकि मेंह ओमन ला भयभीत करंव अऊ ओमन जानंय कि मेंह यहोवा अंव।’
EZE 20:27 “एकरसेति, हे मनखे के बेटा, इसरायल के मनखेमन ले बात कर अऊ ओमन ले कह, ‘परमपरधान यहोवा ह ये कहत हे: येमा घलो तुम्हर पुरखामन मोर ले बिसवासघात करके मोर निन्दा करिन:
EZE 20:28 जब मेंह ओमन ला ओ देस म ले आंय, जेला मेंह ओमन ला देय के कसम खाय रहेंव, त ओमन कोनो ऊंचहा पहाड़ी या कोनो पानवाले रूख ला देखके उहां अपन बलिदान अऊ भेंट चघाय लगिन, अऊ अपन खुसबूवाला धूप जलाके पेय-बलिदान चघाय लगिन, जेकर कारन मोर कोरोध ह भड़किस।
EZE 20:29 तब मेंह ओमन ले कहेंव: ये ऊंचहा जगह का ए कि तुमन उहां जाथव?’ ” (येला आज तक बामाह कहे जाथे।)
EZE 20:30 “एकरसेति इसरायलीमन ले कह: ‘परमपरधान यहोवा ह ये कहत हे: का तुमन अपन पुरखामन सहीं अपनआप ला असुध करहू अऊ ओमन के निकम्मा मूरतीमन बर कामुक होहू?
EZE 20:31 जब तुमन अपन भेंट चघाथव—अपन लइकामन ला आगी म बलिदान करथव—त अइसने करे के दुवारा तुमन आज तक अपनआप ला अपन जम्मो मूरतीमन के दुवारा असुध करत आवत हव। त हे इसरायलीमन, का में तुमन ला मोर ले पुछताछ करन दूहूं? मोर जिनगी के कसम, परमपरधान यहोवा ह घोसना करत हे, में तुमन ला मोर ले पुछताछ करे बर नइं दंव।
EZE 20:32 “ ‘तुमन कहिथव, “हमन ओ जाति-जाति अऊ संसार के मनखेमन सहीं होय चाहथन, जेमन कठवा अऊ पथरा के सेवा करथें।” पर तुम्हर मन म जऊन बात हवय, ओह कभू पूरा नइं होवय।
EZE 20:33 मोर जिनगी के कसम, परमपरधान यहोवा ह घोसना करत हे, में सक्तिसाली हांथ अऊ बढ़ाय हुए बाहां अऊ भड़के हुए कोप के संग तुम्हर ऊपर सासन करहूं।
EZE 20:34 मेंह तुमन ला ओ जाति-जाति के मनखेमन के बीच म ले लानहूं अऊ ओ देसमन ले लानके तुमन ला इकट्ठा करहूं, जिहां तुमन तितिर-बितिर हो गे हव—मेंह तुमन ला सक्तिसाली हांथ अऊ बढ़ाय हुए बाहां अऊ भड़के हुए कोप के संग इकट्ठा करहूं।
EZE 20:35 मेंह तुमन ला जाति-जाति के मनखेमन के निरजन जगह म ले आहूं अऊ उहां, आमने-सामने मेंह तुम्हर नियाय करहूं।
EZE 20:36 जऊन किसम ले, मेंह मिसर देस के सुन्ना जगह म तुम्हर पुरखामन के नियाय करे रहेंव, ओही किसम ले, मेंह तुम्हर नियाय करहूं, परमपरधान यहोवा ह घोसना करत हे।
EZE 20:37 जब तुमन मोर लउठी के अधीन होके चलहू, त मोर धियान तुम्हर ऊपर रहिही, अऊ में तुमन ला करार के बंधना म बांधहू।
EZE 20:38 मेंह तुमन ला ओमन ले हटाके सुध करहूं, जेमन मोर बिरूध बिदरोह अऊ अपराध करथें। हालाकि मेंह ओमन ला ओ देस ले निकालके लानहूं, जिहां ओमन रहत हवंय, तभो ले ओमन इसरायल देस म नइं जाय सकहीं। तब तुमन जानहू कि मेंह यहोवा अंव।
EZE 20:39 “ ‘हे इसरायल के मनखेमन, जहां तक तुम्हर बात ए, परमपरधान यहोवा ह ये कहत हे: तुमन म ले हर एक जन जावव अऊ अपन-अपन मूरतीमन के सेवा करव! पर बाद म तुमन मोर बात ला जरूर सुनहू अऊ मोर पबितर नांव ला अपन भेंट अऊ मूरतीमन के दुवारा फेर अपबितर नइं करहू।
EZE 20:40 काबरकि परमपरधान यहोवा ह घोसना करत हे, मोर पबितर पहाड़, इसरायल के ऊंचहा पहाड़ ऊपर, उहां देस म, इसरायल के जम्मो मनखेमन मोर सेवा करहीं, अऊ उहां में ओमन ला स्वीकार करहूं। उहां मेंह तुम्हर भेंट अऊ तुम्हर उत्तम चीजमन ला तुम्हर जम्मो पबितर बलिदानमन संग लूहूं।
EZE 20:41 मेंह तुमन ला एक खुसबूवाला धूप के रूप म स्वीकार करहूं, जब में तुमन ला जाति-जाति के मनखेमन के बीच ले निकाल लानहूं अऊ ओ देसमन ले तुमन ला इकट्ठा करहूं, जिहां तुमन तितिर-बितिर हो गे हवव, अऊ में जाति-जाति के मनखेमन के नजर म तुम्हर जरिये पबितर ठहिराय जाहूं।
EZE 20:42 तब तुमन जानहू कि मेंह यहोवा अंव, जब में तुमन ला इसरायल देस म ले आहूं, ओ देस जेला मेंह तुम्हर पुरखामन ला देय बर हांथ उठाके सपथ खाय रहेंव।
EZE 20:43 उहां तुमन अपन चालचलन अऊ अपन जम्मो काममन ला सुरता करहू, जेमन के दुवारा तुमन अपनआप ला असुध करे हव, अऊ अपन दुवारा करे गय जम्मो दुस्ट काममन के कारन, तुमन अपनआप ले घिन करहू।
EZE 20:44 हे इसरायल के मनखेमन, जब मेंह तुम्हर दुस्ट काम अऊ तुम्हर खराप चालचलन के मुताबिक नइं, पर अपन नांव के हित म तुमन ले बरताव करहूं, तब तुमन जानहू कि मेंह यहोवा अंव, परमपरधान यहोवा ह घोसना करत हे।’ ”
EZE 20:45 यहोवा के ये बचन मोर मेर आईस:
EZE 20:46 “हे मनखे के बेटा, अपन मुहूं ला दक्खिन कोति कर; दक्खिन के बिरोध म परचार कर, अऊ दक्खिन देस के जंगल के बिरूध अगमबानी कर।
EZE 20:47 दक्खिन के जंगल ला कह: ‘यहोवा के बचन ला सुनव। परमपरधान यहोवा ह ये कहत हे: मेंह तोर म आगी लगानेचवाला हंव, अऊ येह तोर हरियर अऊ सूखा जम्मो रूखमन ला जलाके नास कर दीही। धधकत जुवाला ह नइं बुताही, अऊ दक्खिन ले लेके उत्तर तक हर चेहरा येकर कारन झुलस जाही।
EZE 20:48 हर एक जन ह देखही कि में यहोवा ह येमा आगी लगाय हंव; येह नइं बुताही।’ ”
EZE 20:49 तब मेंह कहेंव, “हे परमपरधान यहोवा, ओ मनखेमन मोर बारे म कहत हें, ‘का ओह सिरिप पटंतर ही नइं कहत हे?’ ”
EZE 21:1 यहोवा के बचन ह मोर मेर आईस:
EZE 21:2 “हे मनखे के बेटा, अपन चेहरा ला यरूसलेम के बिरूध कर अऊ पबितर-स्थान के बिरूध परचार कर। इसरायल देस के बिरूध अगमबानी कर
EZE 21:3 अऊ ओला कह: ‘यहोवा ह ये कहत हे: मेंह तोर बिरूध म हंव। मेंह अपन तलवार मियान ले खींचके तोर म ले धरमी अऊ दुस्ट दूनों ला नास करहूं।
EZE 21:4 काबरकि मेंह धरमी अऊ दुस्टमन ला मार डालनेवाला हंव, एकरसेति मोर तलवार ह दक्खिन ले लेके उत्तर तक जम्मो मनखेमन के बिरूध मियान ले निकलही।
EZE 21:5 तब जम्मो मनखेमन जानहीं कि में यहोवा ह मियान म ले अपन तलवार ला निकाले हंव; येह फेर मियान म नइं रखे जाही।’
EZE 21:6 “एकरसेति हे मनखे के बेटा! तेंह कलहर! टूटे हिरदय अऊ बहुंत दुखी होके ओमन के आघू म कलहर।
EZE 21:7 अऊ जब ओमन तोर ले पुछंय, ‘तेंह काबर कलहरत हस?’ त तेंह कहिबे, ‘ओ खबर के कारन, जऊन ह मोला मिले हवय। हर एक के हिरदय ह डर ले भर जाही अऊ हर एक के हांथ ढीला पड़ जाही; हर एक के आतमा ह दुखी होही अऊ हर एक के टांग ह पेसाब के कारन गीला हो जाही।’ येह आवत हे! येह जरूर होही, परमपरधान यहोवा ह घोसना करत हे।”
EZE 21:8 यहोवा के बचन ह मोर मेर आईस:
EZE 21:9 “हे मनखे के बेटा, अगमबानी करके कह, ‘परभू ह ये कहत हे: “ ‘एक तलवार, एक तलवार, धारवाला अऊ चमकत—
EZE 21:10 मार डारे बर धारदार, बिजली के अंजोर असन चमकत! “ ‘का हमन मोर राजसी बेटा के राजदंड ऊपर आनंद मनावन? तलवार ह अइसने हर एक लउठी ला तुछ समझथे।
EZE 21:11 “ ‘तलवार ला चमकाय बर, अऊ हांथ ले पकड़े बर देय गे हवय; येला धारदार बनाय अऊ चमकाय गे हवय, अऊ मार डालनेवाला के हांथ म देय बर तियार करे गे हवय।
EZE 21:12 हे मनखे के बेटा, रो अऊ बिलाप कर, काबरकि ये तलवार मोर मनखेमन के बिरूध हवय; येह इसरायल के जम्मो हाकिममन के बिरूध हवय। ओमन ला मोर मनखेमन के संग तलवार के आघू म फटिक देय गे हवय। एकरसेति अपन छाती ला पीट।
EZE 21:13 “ ‘परखे के समय ह जरूर आही। अऊ यदि राजदंड ह नइं रहिही, जेला तलवार ह तुछ समझथे, त का होही? परमपरधान यहोवा ह घोसना करत हे।’
EZE 21:14 “एकरसेति, हे मनखे के बेटा, अगमबानी कर अऊ हांथ ऊपर हांथ मार। तलवार ह दू बार, बरन तीन बार घात करय। ये तलवार ह घात करे बर अय— मनखेमन ला जम्मो कोति ले घेरके ये तलवार ह बहुंत घात करे बर अय।
EZE 21:15 ताकि ओमन के हिरदय ह डर ले भर जावय अऊ बहुंत जन भुइयां म गिरंय, मेंह ओमन के जम्मो दुवारमन म घात करे बर तलवार ठहिराय हंव। देखव! बिजली सहीं चोट करे बर येला गढ़े गे हवय, येला घात करे बर उठाय जाथे।
EZE 21:16 हे तलवार, जेवनी कोति काट, फेर डेरी कोति, जेति घलो तोर धार ह मुड़य, ओती काट।
EZE 21:17 मेंह घलो अपन हांथमन ला एक संग मारहूं, अऊ मोर कोप ह सांत हो जाही। में यहोवा ह ये कहे हवंव।”
EZE 21:18 यहोवा के बचन ह मोर मेर आईस:
EZE 21:19 “हे मनखे के बेटा, बेबिलोन के राजा के तलवार ला ले जाय बर दू ठन रसता ला चुन ले; दूनों रसता एकेच देस ले सुरू होवंय। जिहां ले भी एक अलग रसता सहर कोति निकलथे, उहां एक डहार बतइया चिनहां लगावव।
EZE 21:20 एक ठन रसता ला अमोनीमन के रब्बा के बिरूध तलवार के आय बर अऊ दूसर रसता ला यहूदा अऊ गढ़वाला सहर यरूसलेम के बिरूध चुन ले।
EZE 21:21 काबरकि बेबिलोन के राजा ह दुबट्टा म याने कि दूनों रसता के संगम के जगह म सकुन जाने बर रूकही: ओह तीरमन के संग चिट्ठी डालही, ओह अपन मूरतीमन ले सलाह लीही, ओह करेजा के जांच करही।
EZE 21:22 ओकर जेवनी हांथ म यरूसलेम बर चिट्ठी निकलही कि कहां ओह लड़ई के मसीन लगावय, ताकि घात करे के हुकूम देवय, लड़ई के अवाज के ललकार करवाय, दुवारमन करा लड़ई के मसीन लगावय, लड़ई बर ढलान बनावय अऊ घेराबंदी के काम करवाय।
EZE 21:23 येह ओ मनखेमन बर एक गलत सकुन जान पड़ही, जेमन ओकर ले राजभक्ति के सपथ खाय हवंय, पर ओह ओमन ला ओमन के अपराध ला सुरता कराही अऊ ओमन ला बंदी बनाके ले जाही।
EZE 21:24 “एकरसेति परमपरधान यहोवा ह ये कहत हे: ‘काबरकि तुमन अपन करे गय जम्मो पाप ला परगट करके, अपन खुलेआम बिदरोह के दुवारा अपन अपराध ला सुरता करे हवव—काबरकि तुमन ये करे हवव, एकरसेति तुमन ला बंदी बना लिये जाही।
EZE 21:25 “ ‘हे इसरायल के असुध अऊ दुस्ट हाकिम, तोर दिन ह आ गे हवय, तोला दंड देय के आखिरी बेरा आ गे हवय,
EZE 21:26 परमपरधान यहोवा ह ये कहत हे: अपन पगड़ी ला उतार, मुकुट ला घलो उतार। जइसने पहिले रिहिस, वइसने अब नइं रहय: छोटे दरजा के मनखेमन ऊंचहा करे जाहीं अऊ ऊंचहा दरजा के मनखेमन खाल्हे करे जाहीं।
EZE 21:27 बिनास! बिनास! मेंह येकर बिनास कर दूहूं! मुकुट ला वापिस नइं दिये जावय, जब तक कि ओह नइं आ जाही, जऊन ह येकर सही म हकदार ए; तब येला में ओला दे दूहूं।’
EZE 21:28 “अऊ तें, हे मनखे के बेटा, अगमबानी करके कह, ‘परमपरधान यहोवा ह अमोनी अऊ ओमन के बेजत्ती के बारे म ये कहत हे: “ ‘एक तलवार, एक तलवार, घात करे बर निकाले गे हवय, नास करे बर चमकाय गे हवय अऊ बिजली असन चमकय!
EZE 21:29 तुम्हर बारे म लबरा दरसन अऊ लबरा सकुन-बिचार के बावजूद, तलवार ह ओ दुस्टमन के घेंच म रखे जाही, जेमन ला घात करे जाना हे, जेमन के दिन ह आ गे हवय, जेमन ला दंड देय के आखिरी समय आ गे हवय।
EZE 21:30 “ ‘तलवार ला ओकर मियान म रखे जावय। ओ जगह जिहां तुमन सिरजे गेव, तुम्हर पुरखामन के देस म, मेंह तुम्हर नियाय करहूं।
EZE 21:31 तुम्हर ऊपर मोर कोप ह भड़कही अऊ मोर भयंकर कोरोध तुम्हर ऊपर आही; मेंह तुमन ला अइसने निरदयी मनखेमन के हांथ म दे दूहूं, जेमन बिनास करे म माहिर अंय।
EZE 21:32 तुमन आगी ला जलाय के चीज हो जाहू, तुम्हर खून ह तुम्हर देस म गिरही, तुमन ला फेर सुरता नइं करे जाही; काबरकि में यहोवा ह कहे हवंव।’ ”
EZE 22:1 यहोवा के बचन ह मोर मेर आईस:
EZE 22:2 “हे मनखे के बेटा, का तेंह ओकर नियाय करबे? का तेंह ये खून बहानेवाला सहर के नियाय करबे? तब ओकर जम्मो घिनौना काममन ला ओला बता
EZE 22:3 अऊ कह: ‘परमपरधान यहोवा ह ये कहत हे: हे सहर, तें अपन बीच खून बहाय के दुवारा अपनआप ला दंड के भागी बनाथस अऊ मूरतीमन ला बनाके अपनआप ला असुध करथस,
EZE 22:4 तेंह दोसी ठहिरे हस काबरकि तेंह खून बहाय हस अऊ तें मूरतीमन ला बनाय के दुवारा असुध हो गे हस। तेंह अपन दिनमन के आखिरी कर ले हस, अऊ तोर बछरमन के अन्त आ गे हवय। एकरसेति मेंह तोला जाति-जाति के मनखेमन बर तिरस्कार के चीज अऊ जम्मो देसमन बर ठट्ठा के चीज बना दूहूं।
EZE 22:5 हे बदनाम सहर, तें उपदरव ले भरे हस। ओ मनखे, जेमन तोर लकठा म हवंय अऊ ओ मनखे, जेमन तोर ले दूरिहा म हवंय, ओ जम्मो झन तोर ठट्ठा करहीं।
EZE 22:6 “ ‘देख, तोर म रहइया इसरायल के हर एक हाकिम ह कइसे अपन सक्ति के उपयोग खून बहाय म करत हे।
EZE 22:7 तोर म रहिके ओमन अपन दाई अऊ ददा ले अपमान के बरताव करे हवंय; तोर म रहिके ओमन परदेसीमन ला सताईन अऊ अनाथ अऊ बिधवा के संग गलत बरताव करे हवंय।
EZE 22:8 तेंह मोर पबितर चीजमन ला तुछ समझे हस अऊ मोर बिसराम दिनमन ला अपबितर करे हस।
EZE 22:9 तोर म निन्दा करइयामन हवंय, जेमन के झुकाव खून बहाय कोति रहिथे; तोर म ओ मनखेमन हवंय, जेमन पहाड़ के पूजा के जगह म खाथें अऊ बेभिचार के काम करथें।
EZE 22:10 तोर म ओ मनखेमन हवंय, जेमन अपन ददा के बिस्तर के अपमान करथें; तोर म ओ मनखेमन हवंय, जेमन माईलोगनमन ले ओमन के महिना के बेरा सारीरिक संबंध बनाथें, जब ओमन असुध रहिथें।
EZE 22:11 तोर म रहिके एक मनखे अपन परोसी के घरवाली के संग घिनौना काम करथे, त दूसर मनखे बेसरम होके अपन बेटा के घरवाली ला असुध करथे, अऊ एक आने मनखे अपन बहिनी, अपन खुद के ददा के बेटी ला भ्रस्ट करथे।
EZE 22:12 तोर म अइसने मनखे हवंय, जेमन हतिया करे बर घूस लेथें; तेंह बियाज लेथस अऊ गरीब मनखे ले लाभ कमाथस। तेंह अपन परोसीमन ले जबरदस्ती छीनके अनियाय के कमई करथस। अऊ तेंह मोला भुला गे हस, परमपरधान यहोवा ह घोसना करत हे।
EZE 22:13 “ ‘तेंह अनियाय ले जऊन कमई करे हस अऊ अपन बीच म तेंह जऊन खून बहाय हस, ओकर कारन मेंह अपन दूनों हांथ एक संग चलाहूं।
EZE 22:14 ओ दिन का तोर म हिम्मत होही या तोर हांथमन मजबूत होहीं, जब में तोर ले लेखा लूहूं? में यहोवा ह ये कहे हवंव, अऊ में येला करके ही रहिहूं।
EZE 22:15 मेंह तोर मनखेमन ला जाति-जाति के मनखेमन के बीच तितिर-बितिर कर दूहूं, अऊ देस-देस म बगरा दूहूं; अऊ मेंह तोर असुधता ला खतम कर दूहूं।
EZE 22:16 जब तें जाति-जाति के मनखेमन के नजर म असुध हो जाबे; तब तें जानबे कि मेंह यहोवा अंव।’ ”
EZE 22:17 तब यहोवा के बचन मोर मेर आईस:
EZE 22:18 “हे मनखे के बेटा, इसरायल के मनखेमन मोर बर मईल हो गे हवंय; ओ जम्मो झन भट्ठी के भीतर छोंड़े गय तांबा, टीन, लोहा अऊ सीसा अंय। ओमन चांदी के मईल असन हो गे हवंय।
EZE 22:19 एकरसेति परमपरधान यहोवा ह ये कहत हे: ‘काबरकि तुमन जम्मो के जम्मो धातु के मईल असन हो गे हवव, एकरसेति मेंह तुमन ला यरूसलेम म इकट्ठा करहूं।
EZE 22:20 जइसने चांदी, तांबा, लोहा, सीसा अऊ टीन ला भट्ठी म इकट्ठा करके धधकत आगी म टघलाय जाथे, वइसने ही मेंह तुमन ला अपन कोरोध अऊ कोप म आके इकट्ठा करहूं अऊ तुमन ला सहर के भीतर डालके टघलाहूं।
EZE 22:21 मेंह तुमन ला संकेलहूं अऊ बहुंत कोप म आके तुम्हर ऊपर फूंक मारहूं, अऊ तुमन ओकर भीतर टघल जाहू।
EZE 22:22 जइसने चांदी ह भट्ठी म टघल जाथे, वइसने ही तुमन ओकर भीतर टघल जाहू, अऊ तब तुमन जानहू कि में यहोवा ह तुम्हर ऊपर कोप उंडेले हंव।’ ”
EZE 22:23 यहोवा के बचन ह फेर मोर मेर आईस:
EZE 22:24 “हे मनखे के बेटा, ओ देस ले कह, ‘तेंह एक अइसन देस अस, जेला सुध नइं करे गे हवय या कोप के दिन म जेकर ऊपर बारिस नइं होय हवय।’
EZE 22:25 जइसे गरजत सेर ह अपन सिकार ला चीरथे, वइसे ही ओकर भीतर ओकर राजकुमारमन एक साजिस करत हें; ओमन मनखेमन ला मार डालथें, अऊ ओमन खजाना अऊ कीमती चीजमन ला ले लेथें अऊ ओकरे भीतर बहुंते माईलोगन ला बिधवा बना देथें।
EZE 22:26 ओ देस के पुरोहितमन मोर कानून ला टोरथें अऊ मोर पबितर चीजमन ला अपबितर करथें; ओमन पबितर अऊ सधारन चीजमन के बीच कोनो भेद नइं करंय; ओमन सिखाथें कि सुध अऊ असुध म कोनो भेद नइं ए; अऊ ओमन मोर बिसराम दिनमन ला माने बर ढिलई करथें, जेकर कारन मेंह ओमन के बीच अपबितर ठहिरथंव।
EZE 22:27 ओकर भीतर ओकर करमचारीमन ओ भेड़ियामन सहीं अंय, जेमन अपन सिकार ला फार खाथें; ओमन खून बहाथें अऊ अनियाय करके फायदा उठाय बर मनखेमन ला मार डालथें।
EZE 22:28 ओकर अगमजानीमन लबरा दरसन अऊ लबरा सकुन बिचारे के दुवारा ओमन बर ये काममन ऊपर लीपा-पोती करथें। ओमन कहिथें, ‘परमपरधान यहोवा ह ये कहत हे’—जबकि यहोवा ह नइं कहे रहय।
EZE 22:29 देस के मनखेमन जबरदस्ती छीन लेथें अऊ लूट-पाट करथें; ओमन गरीब अऊ जरूरतमंद मनखेमन ऊपर अतियाचार करथें अऊ परदेसी के संग अनियाय करके ओमन ले गलत बरताव करथें।
EZE 22:30 “मेंह ओमन के बीच एक अइसने मनखे ला खोजत रहेंव, जऊन ह दीवार ला बनावय अऊ ओ देस कोति ले दरार म मोर आघू ठाढ़ होवय, ताकि मोला ओकर नास झन करना पड़य, पर मोला अइसने कोनो मनखे नइं मिलिस।
EZE 22:31 एकरसेति ओमन ऊपर मोर कोप ह भड़कही अऊ मोर भयंकर कोरोध ले ओमन नास हो जाहीं, अऊ ओमन के करे गय जम्मो काम ओहीचमन के मुड़ ऊपर आही, परमपरधान यहोवा ह घोसना करत हे।”
EZE 23:1 यहोवा के बचन ह मोर मेर आईस:
EZE 23:2 “हे मनखे के बेटा, दू झन माईलोगन रिहिन, जेमन एकेच दाई के बेटी रिहिन।
EZE 23:3 ओमन मिसर देस म बेस्या बन गीन अऊ अपन जवानी के समय ले बेस्या के काम करत रिहिन। ओ देस म ओमन के छाती मिंजे गीस अऊ ओमन के कुंवारी छातीमन ले मया करे गीस।
EZE 23:4 बड़े बहिनी के नांव ओहोला अऊ छोटे बहिनी के नांव ओहोलीबा रिहिस। ओमन मोर रिहिन अऊ ओमन बेटा-बेटीमन ला जनम दीन। ओहोला ह सामरिया अय, अऊ ओहोलीबा ह यरूसलेम अय।
EZE 23:5 “ओहोला ह मोर रिहिस, तभे बेस्या के काम करे लगिस; अऊ ओह अपन मया करइया अस्सूरीमन ऊपर मोहित रिहिस—जेमन सैनिक रिहिन,
EZE 23:6 जेमन नीला कपड़ा पहिरे रहंय, राजपाल अऊ सेनापतिमन, ये जम्मो के जम्मो सुघर जवान, अऊ घुड़सवार रिहिन।
EZE 23:7 ओह अपनआप ला बेस्या के रूप म सबले बने अस्सूरीमन ला दे दीस अऊ ओ हर एक मूरतीमन ले अपनआप ला असुध करिस, जेकर पाछू ओह मोहित रहय।
EZE 23:8 जऊन बेस्या के काम ओह मिसर देस म सुरू करे रिहिस, ओला ओह नइं छोंड़िस, जब ओकर जवानी के समय म आदमीमन ओकर संग सुतंय, ओकर कुंवारी छाती ला दुलारंय अऊ अपन काम-वासना ओकर ऊपर लुटावंय।
EZE 23:9 “एकरसेति मेंह ओला ओकर मयारू, अस्सूरीमन के हांथ म सऊंप देंव, जेमन ऊपर ओह मोहा गे रिहिस।
EZE 23:10 ओमन ओला नंगरी कर दीन, ओकर बेटा-बेटीमन ला ले लीन अऊ ओला तलवार ले मार डालिन। ओह माईलोगनमन के बीच एक कहावत बन गीस अऊ ओला दंड दिये गीस।
EZE 23:11 “ओकर बहिनी ओहोलीबा ह येला देखिस, तभो ले ओह काम-वासना अऊ बेस्या के काम म अपन बहिनी ले घलो जादा गिर गे रिहिस।
EZE 23:12 ओह घलो अस्सूरीमन के पाछू मोहा गे रिहिस—जेमा राजपाल अऊ सेनापति, पूरा पोसाक पहिरे योद्धा, घुड़सवार अऊ जम्मो सुघर जवान आदमीमन रिहिन।
EZE 23:13 मेंह देखेंव कि ओह घलो अपनआप ला असुध कर ले रिहिस; ओ दूनों बहिनी के चालचलन एक सहीं रिहिस।
EZE 23:14 “पर ओहोलीबा जादा बेभिचार करत गीस। ओह दीवारमन म आदमीमन के चित्र बने हुए देखिस, कसदीमन के चित्र लाल रंग म बने रहय,
EZE 23:15 चित्र म मनखेमन के कनिहां म पट्टा बंधे रहय अऊ ओमन के मुड़ म लहरावत पगड़ी रहय; ओ जम्मो के जम्मो कसदीया के रहइया बेबिलोनी रथ के अधिकारीमन सहीं दिखत रहंय।
EZE 23:16 ओह ओमन ला देखत ही ओमन के पाछू लालायित हो गीस अऊ कसदीया म ओमन करा संदेसियामन ला पठोईस।
EZE 23:17 तब बेबिलोनीमन मया म ओकर संग सुते बर आईन, अऊ अपन काम-वासना म ओला असुध करिन। ओमन के दुवारा असुध होय के बाद, ओह घिन म ओमन ले अलग हो गीस।
EZE 23:18 जब ओह खुलेआम बेस्या के काम करे लगिस अऊ अपन नंगरी देहें ला देखाय लगिस, त मेंह घिन करके ओकर ले दूरिहा हो गेंव, जइसे कि मेंह ओकर बहिनी ले दूरिहा हो गे रहेंव।
EZE 23:19 तभो ले ओह अऊ जादा दुराचारी होवत गीस, अपन जवानी के दिनमन ला सुरता करत, जब ओह मिसर देस म एक बेस्या रिहिस।
EZE 23:20 उहां ओह अपन ओ यारमन के पाछू काम-वासना बर लगे रहय, जेमन के जननांग गदहामन के जननांग सहीं अऊ ओमन के बीर्य घोड़ामन कस रहय।
EZE 23:21 ये किसम ले, तें अपन जवानी के कामुकता के लालसा करत रहय, जब मिसर म तोर छाती ला दुलारे जावय अऊ तोर जवान थन ले लाड़ करे जावय।
EZE 23:22 “एकरसेति हे ओहोलीबा, परमपरधान यहोवा ह ये कहत हे: मेंह तोर मयारूमन ला तोर बिरूध भड़काहूं, जेमन ले तें घिन करत दूरिहा हो गे रहय, अऊ में चारों कोति ले ओमन ला तोर बिरूध लानहूं—
EZE 23:23 बेबिलोनीमन अऊ जम्मो कसदीमन, पकोद, सोआ अऊ कोआ के आदमीमन, अऊ ओमन के संग जम्मो अस्सूरी सुघर जवान, ओमा जम्मो के जम्मो राजपाल अऊ सेनापति, रथ के अधिकारी अऊ बड़े अधिकारी, जम्मो के जम्मो घोड़ा म सवार हवंय।
EZE 23:24 ओमन तोर बिरूध हथियार, रथ अऊ चार पहिया गाड़ी लेके मनखेमन के भीड़ के संग आहीं; ओमन चारों कोति ले छोटे अऊ बड़े ढाल के संग मुड़ म टोपा पहिरके तोर बिरूध मोरचा बांधहीं। मेंह तोला सजा देय बर ओमन के हांथ म सऊंप दूहूं, अऊ ओमन अपन हिसाब से तोला सजा दीहीं।
EZE 23:25 मेंह तोर ऊपर अपन जलन ले भरे कोरोध देखाहूं, ओमन कोरोध म आके तोर ले बरताव करहीं। ओमन तोर नाक अऊ कान ला काट डारहीं, अऊ तुमन म जेमन बांच जाहीं, ओमन तलवार ले मारे जाहीं। ओमन तोर बेटा अऊ बेटीमन ला ले जाहीं, अऊ तोर म जेमन बांच जाहीं, ओमन आगी ले जलके नास हो जाहीं।
EZE 23:26 ओमन तोर ओनहा ला घलो उतार लीहीं अऊ तोर सुघर जेवर ला छीनके ले जाहीं।
EZE 23:27 ये किसम ले मेंह ओ काम-वासना अऊ बेस्या के काम ला बंद कर दूहूं, जेला तेंह मिसर देस म सुरू करे रहय। तेंह ये चीजमन के ईछा नइं करबे या मिसर देस ला फेर सुरता नइं करबे।
EZE 23:28 “काबरकि परमपरधान यहोवा ह ये कहत हे: मेंह तोला ओमन के हांथ म सऊंपनेच वाला हंव, जेमन ले तेंह घिन करथस अऊ घिन करे के कारन जेमन ले दूरिहा हो गे रहय।
EZE 23:29 ओमन तोर संग घिनौना बरताव करहीं अऊ तोर कमाय जम्मो चीज ला ले लीहीं। ओमन तोला एकदम नंगरी करके छोंड़ दीहीं, अऊ तोर बेस्या के काम के पाप ह परगट हो जाही। तोर नंगरीपन अऊ दुराचार के कारन
EZE 23:30 ये सब तोर संग होय हवय, काबरकि तेंह जाति-जाति के मनखेमन के पाछू काम-वासना बर भागे अऊ ओमन के मूरतीमन ले तेंह अपनआप ला असुध करे।
EZE 23:31 तेंह अपन बहिनी के चाल म चले हस; एकरसेति मेंह ओकर कटोरा ला तोर हांथ म दूहूं।
EZE 23:32 “परमपरधान यहोवा ह ये कहत हे: “तेंह अपन बहिनी के कटोरा ले पीबे, जऊन ह बड़े अऊ गहिला हवय; येह तोर ऊपर हंसी अऊ ठट्ठा के बात लानही काबरकि ये कटोरा म बहुंत कुछू धरे जाथे।
EZE 23:33 तेंह मतवारपन अऊ दुख ले भर जाबे, येह बिनास अऊ सुनापन के कटोरा ए, येह तोर बहिनी सामरिया के कटोरा ए।
EZE 23:34 तेंह येमा ले पीबे अऊ येला खाली कर देबे अऊ येकर टुकड़ामन ला चाबबे— अऊ अपन छाती ला घायल करबे। मेंह ये कहे हवंव, परमपरधान यहोवा ह घोसना करत हे।
EZE 23:35 “एकरसेति परमपरधान यहोवा ह ये कहत हे: जब तेंह मोला भुला गे हस अऊ मोर ले अपन मुहूं ला मोड़ ले हस, त जरूरी अय कि तेंह अपन काम-वासना अऊ बेस्या के काम के परतिफल ला भुगतबे।”
EZE 23:36 यहोवा ह मोर ले कहिस: “हे मनखे के बेटा, का तें ओहोला अऊ ओहोलीबा के नियाय करबे? त फेर ओमन के घिनौना काम ओमन ला बता दे,
EZE 23:37 काबरकि ओमन बेभिचार करे हवंय, अऊ ओमन के हांथ म खून लगे हवय। ओमन अपन मूरतीमन के संग म बेभिचार करिन; अऊ त अऊ ओमन अपन लइकामन ला जेवन के रूप म मूरतीमन बर बलिदान करिन, जेमन ला ओमन मोर बर जनमाय रिहिन।
EZE 23:38 ओमन मोर संग अइसने घलो करे हवंय: ओही समय म ओमन मोर पबितर-स्थान ला असुध करिन अऊ मोर बिसराम दिनमन ला अपबितर करे हवंय।
EZE 23:39 जऊन दिन ओमन अपन लइकामन ला अपन मूरतीमन के आघू म बलिदान करिन, ओहीच दिन ओमन मोर पबितर-स्थान म घुसरके ओला अपबितर करिन। ओमन ये किसम के काम मोर भवन म करिन।
EZE 23:40 “अऊ त अऊ ओमन आदमीमन ला बलाय बर दूतमन ला पठोईन, अऊ जब ओमन आ गीन, त तें नहा-धोके अपनआप ला ओमन बर साफ करय, आंखीमन म काजर आंजय अऊ जेवर पहिरय।
EZE 23:41 तें एक सुघर सोफा म बईठेय; जेकर आघू म एक मेज रखे रहय अऊ ओ मेज म तेंह धूप अऊ जैतून तेल ला धरे रहय, जऊन ह मोर रिहिस।
EZE 23:42 “ओकर चारों कोति बेफिकर मनखेमन के भीड़ के कोलाहल होवत रिहिस; मतवारमन के संग निरजन जगह के कोलाहल करइया भीड़ ले आदमीमन ला लाने गे रिहिस, अऊ ओमन ओ माईलोगन अऊ ओकर बहिनी के कलई म कंगन अऊ ओमन के मुड़ म सुघर मुकुट पहिराईन।
EZE 23:43 तब मेंह ओकर बारे म कहेंव, जऊन ह बेभिचार करत-करत बेहाल हो गे रिहिस, ‘ओमन ओ माईलोगन के उपयोग एक बेस्या के रूप म करंय, काबरकि ओह एक बेस्या ही तो अय।’
EZE 23:44 अऊ ओमन ओकर संग सुतिन। जइसने आदमीमन एक बेस्या के संग सुतथें, वइसने ओमन ओ बेभिचारी माईलोगन ओहोला अऊ ओहोलीबा के संग सुतिन।
EZE 23:45 पर धरमी नियायधीसमन ओमन ला ओ माईलोगनमन के दंड दीहीं, जेमन बेभिचार करथें अऊ खून बहाथें, काबरकि ओमन बेभिचारिन अंय अऊ ओमन के हांथ म खून लगे हवय।”
EZE 23:46 “परमपरधान यहोवा ह ये कहत हे: ओमन के बिरूध मनखेमन के एक भीड़ ला ले आवव अऊ ओमन ला आतंकित होय अऊ लूटे जाय बर भीड़ के हांथ म सऊंप दव।
EZE 23:47 ओ भीड़ के मनखेमन ओमन ऊपर पथरवाह करहीं अऊ ओमन ला अपन तलवार ले काट डारहीं; मनखेमन ओमन के बेटा-बेटीमन ला मार डारहीं अऊ ओमन के घरमन ला जला दीहीं।
EZE 23:48 “ये किसम ले मेंह बेभिचार के काम ला देस ले खतम कर दूहूं, ताकि जम्मो माईलोगनमन बर एक चेतउनी होवय अऊ ओमन तोर सहीं काम झन करंय।
EZE 23:49 तुमन ला तुम्हर बेभिचार के सजा मिलही अऊ तुमन ला मूरती-पूजा के पाप के परतिफल भुगतना पड़ही। तब तुमन जानहू कि मेंह परमपरधान यहोवा अंव।”
EZE 24:1 हमर बंधुवई म रहे के नौवां बछर के दसवां महिना के दसवां दिन, यहोवा के ये बचन मोर मेर आईस:
EZE 24:2 “हे मनखे के बेटा, आज के दिन, आज के तारिख ला लिख ले, काबरकि आजेच के दिन बेबिलोन के राजा ह यरूसलेम के घेराबंदी करे हवय।
EZE 24:3 ये बिदरोही मनखेमन ला एक पटंतर सुनाके कह: ‘परमपरधान यहोवा ह ये कहत हे: “ ‘रांधे के बरतन ला मढ़ा; येला चूल्हा म मढ़ा अऊ येमा पानी डाल दे।
EZE 24:4 तब येमा मांस के कुटामन ला डाल, जम्मो बने-बने कुटामन ला—जांघ अऊ कंधा। ये हाड़ामन के बढ़िया भाग ले येला भर दे;
EZE 24:5 झुंड म के सबले बने पसु ला ले। ओ हाड़ामन बर बरतन के तरी म लकरी ला बार; ओला डबकन दे अऊ येमा हाड़ामन ला चुरन दे।
EZE 24:6 “ ‘काबरकि परमपरधान यहोवा ह ये कहत हे: “ ‘खून बहइया सहर ऊपर हाय, मुर्चा लगे ओ बरतन ऊपर हाय, जेकर मुर्चा ह नइं छूटही! मांस ला एक-एक कुटा करके निकालव कोनो भी क्रम म कुटामन निकलथें, ओमन ला निकालव।
EZE 24:7 “ ‘काबरकि ओ नगर ह अपन ही बीच म खून बहाय हवय: ओह खाली चट्टान म येला रितोय हवय; ओह येला भुइयां म नइं रितोय हवय, जिहां धुर्रा ह येला तोप लेतिस।
EZE 24:8 कोप ला भड़काय अऊ बदला लेय बर मेंह ओकर खून ला खाली चट्टान ऊपर रखें, ताकि येला झन तोपे जावय।
EZE 24:9 “ ‘एकरसेति परमपरधान यहोवा ह ये कहत हे: “ ‘खून बहइया सहर ऊपर हाय! मेंह घलो लकरी के कुढ़ा ला बड़े करहूं।
EZE 24:10 एकरसेति लकरी के कुढ़ा लगावव, अऊ ओमा आगी लगावव। मांस म मसाला मिलाके, ओला बने करके पकावव; अऊ हाड़ामन ला हल्का जलन दव।
EZE 24:11 तब खाली बरतन ला अंगरामन ऊपर मढ़ावव जब तक कि येह गरम होके येकर तांबा ह लाल नइं हो जावय, ताकि येकर असुधता ह गलके निकल जावय अऊ ओकर मुर्चा ह जल जावय।
EZE 24:12 येह जम्मो मेहनत ला बेकार कर दीस; येमा लगे भारी मुर्चा ह नइं छूटे हवय, आगी ले घलो नइं छूटे हवय।
EZE 24:13 “ ‘तोर असुधता ह काम-वासना ए। मेंह तोला साफ करे के कोसिस करेंव, पर तेंह अपन असुधता ले साफ नइं होय, अब तोला तब तक साफ करे नइं जावय, जब तक कि तोर बिरूध मोर कोप ह सांत नइं हो जाही।
EZE 24:14 “ ‘में यहोवा ह कहे हवंव। मोर बर काम करे के बेरा आ गे हवय। मेंह नइं छोड़ंव; मेंह तोर ऊपर दया नइं करंव, अऊ न ही नरम पड़ंव। तोर चालचलन अऊ तोर काम के मुताबिक तोर नियाय करे जाही, परमपरधान यहोवा ह घोसना करत हे।’ ”
EZE 24:15 यहोवा के ये बचन ह मोर मेर आईस:
EZE 24:16 “हे मनखे के बेटा, मेंह एकेच चोट म तोर आंखी के खुसी ला छीननेवाला हंव। तभो ले तें न तो सोक मनाबे, न रोबे अऊ न ही आंसू बोहाबे।
EZE 24:17 चुपेचाप कलहरबे; मरे मनखे बर बिलाप झन करबे। अपन पगड़ी ला बांधे रख अऊ गोड़मन म पनही ला पहिरे रह; अपन दाढ़ी अऊ मूंछ ला झन ढांपबे या सोक करइयामन बर ठहिराय जेवन झन करबे।”
EZE 24:18 एकरसेति बिहनियां मेंह मनखेमन ले बात करेंव, अऊ सांझ के बेरा मोर घरवाली ह मर गीस। ओकर दूसर दिन बिहनियां, मेंह वइसने करंय, जइसने मोला हुकूम देय गे रिहिस।
EZE 24:19 तब मनखेमन मोर ले पुछिन, “का तेंह हमन ला नइं बतावस कि ये चीजमन के हमर से का लेना-देना हे? तेंह काबर अइसने करत हस?”
EZE 24:20 तब मेंह ओमन ला जबाब देंव, “यहोवा के ये बचन मोर मेर आईस:
EZE 24:21 इसरायल के मनखेमन ले कह: ‘परमपरधान यहोवा ह ये कहत हे: मेंह अपन पबितर-स्थान ला अपबितर करनेचवाला हंव—ओ गढ़ जेकर ऊपर तुमन घमंड करथव, जेकर ले तुमन ला खुसी मिलथे, जेह तुम्हर मया के चीज अय। जऊन बेटा-बेटीमन ला तुमन अपन पाछू छोंड़ गे हव, ओमन तलवार ले मारे जाहीं।
EZE 24:22 अऊ तुमन वइसनेच करहू, जइसने मेंह करे हवंव। तुमन अपन दाढ़ी अऊ मूंछ ला नइं ढांपहू या सोक करइयामन बर ठहिराय गे जेवन नइं खाहू।
EZE 24:23 तुमन अपन मुड़ म अपन पगड़ी ला बांधे रखहू अऊ गोड़ म अपन पनही ला पहिरे रहिहू। तुमन न तो सोक मनाहू अऊ न ही रोहू, बरन अपन पाप अऊ अपनेच बीच म कलहरे के कारन, तुमन बेकार हो जाहू।
EZE 24:24 यहेजकेल ह तुम्हर बर एक चिनहां ठहिरही; तुमन वइसने ही करहू, जइसने ओह करे हवय। जब येह होही, तब तुमन जानहू कि मेंह परमपरधान यहोवा अंव।’ ”
EZE 24:25 “अऊ हे मनखे के बेटा, जऊन दिन मेंह ओमन के मजबूत गढ़, ओमन के आनंद अऊ महिमा, ओमन के आंखी के खुसी, ओमन के हिरदय के ईछा, अऊ संग म ओमन के बेटा-बेटीमन ला लूट लूहूं—
EZE 24:26 ओही दिन एक भगोड़ा मनखे ह आके तोला खबर दीही।
EZE 24:27 ओ बेरा तोर मुहूं ह खुल जाही; तेंह ओ मनखे ले गोठियाबे अऊ फेर तें चुप नइं रहिबे। ये किसम ले तें ओमन बर एक चिनहां ठहिरबे, अऊ ओमन जानहीं के मेंह यहोवा अंव।”
EZE 25:1 यहोवा के ये बचन मोर मेर आईस:
EZE 25:2 “हे मनखे के बेटा, अमोनीमन कोति अपन मुहूं करके ओमन के बिरूध अगमबानी कर।
EZE 25:3 ओमन ले कह, ‘परमपरधान यहोवा के बचन ला सुनव। परमपरधान यहोवा ह ये कहत हे: काबरकि तुमन मोर पबितर-स्थान ऊपर “अहा!” कहेव, जब ओह अपबितर करे गीस अऊ जब इसरायल ह उजड़ गीस अऊ यहूदा के मनखेमन बंधुवई म गीन,
EZE 25:4 ये खातिर मेंह तुमन ला पूरब देस के मनखेमन के अधीन करनेवाला हंव। ओमन तुम्हर बीच म अपन डेरा डालहीं अऊ अपन तम्बूमन ला गाड़हीं; ओमन तुम्हर फर ला खाहीं अऊ तुम्हर पसुमन के दूध ला पीहीं।
EZE 25:5 मेंह रब्बा सहर ला ऊंटमन के चरागन अऊ अमोन ला भेड़मन के अराम करे के जगह बना दूहूं। तब तुमन जानहू कि मेंह यहोवा अंव।
EZE 25:6 एकरसेति परमपरधान यहोवा ह ये कहत हे: काबरकि तुमन इसरायल देस के बिरूध अपन हिरदय के जम्मो जलन भावना के कारन ताली बजाय हव अऊ अपन गोड़मन ला पटके हव अऊ आनंद मनाय हव,
EZE 25:7 एकरसेति, मेंह अपन हांथ ला तुम्हर बिरूध लमाहूं; अऊ तुमन ला लूट के सामान के रूप म जाति-जाति के मनखेमन ला दे दूहूं। मेंह जाति-जाति के मनखेमन के बीच म ले तुम्हर नामोनिसान मिटा दूहूं अऊ देसमन म मेंह तुमन ला पूरा नास कर दूहूं। मेंह तुमन ला नास कर दूहूं, अऊ तब तुमन जानहू कि मेंह यहोवा अंव।’ ”
EZE 25:8 “परमपरधान यहोवा ह ये कहत हे: ‘काबरकि मोआब अऊ सेईर कहे हवंय, “देखव, यहूदा ह जम्मो आने जातिमन असन हो गे हवय,”
EZE 25:9 ये खातिर मेंह मोआब देस के किनारा ला खुला छोंड़हूं, येकर सीमना के नगरमन ले सुरू करहूं—बेत-यसीमोत, बाल-मेओन अऊ किरयातैम—जेमन ओ देस के महिमा अंय।
EZE 25:10 मेंह अमोनीमन के संग मोआब ला पूरब देस के मनखेमन के अधीन कर दूहूं, जेकर कारन जाति-जाति के बीच म कोनो भी अमोनीमन ला सुरता नइं करहीं;
EZE 25:11 अऊ मेंह मोआब ला दंड दूहूं। तब ओमन जानहीं कि मेंह यहोवा अंव।’ ”
EZE 25:12 “परमपरधान यहोवा ह ये कहत हे: ‘काबरकि एदोम ह यहूदा ले बदला लीस अऊ अइसने करके ओह बहुंत दोसी हो गीस,
EZE 25:13 ये खातिर परमपरधान यहोवा ह ये कहत हे: मेंह एदोम देस के बिरूध अपन हांथ ला लमाहूं अऊ ओमा के आदमी अऊ पसु दूनों ला मार डारहूं। मेंह ओला उजाड़ दूहूं; अऊ तेमान सहर ले लेके ददान सहर तक ओमन तलवार ले मारे जाहीं।
EZE 25:14 मेंह अपन मनखे इसरायलीमन के दुवारा एदोम ले बदला लूहूं, अऊ ओमन एदोम के संग मोर कोरोध अऊ कोप के अनुसार बरताव करहीं; तब ओमन मोर बदला लेवई ला जानहीं, परमपरधान यहोवा ह घोसना करत हे।’ ”
EZE 25:15 “परमपरधान यहोवा ह ये कहत हे: ‘काबरकि पलिस्ती मनखेमन बदला लेवई के भावना से काम करिन अऊ अपन मन म बईरता के कारन बदला लीन, अऊ पुराना बईरता के कारन यहूदा ला नास करे के कोसिस करिन,
EZE 25:16 एकरसेति परमपरधान यहोवा ह ये कहत हे: मेंह पलिस्तीमन के बिरूध अपन हांथ बढ़ानेचवाला हंव, अऊ मेंह करेतीमन ला मिटा दूहूं अऊ समुंदर तीर के बांचे मनखेमन ला नास कर दूहूं।
EZE 25:17 मेंह ओमन ले भयंकर बदला लूहूं अऊ अपन कोप म आके ओमन ला दंड दूहूं। तब ओमन जानहीं कि मेंह यहोवा अंव, जब मेंह ओमन ले बदला लूहूं।’ ”
EZE 26:1 हमर बंधुवई म रहे के बारहवां बछर के गियारहवां महिना के पहिला दिन, यहोवा के ये बचन मोर मेर आईस:
EZE 26:2 “हे मनखे के बेटा, काबरकि सूर सहर ह यरूसलेम के बिसय म ये कहे हवय, ‘अहा! जाति-जाति के मनखेमन के दुवार टूट गे हवय, अऊ ओकर कपाटमन मोर कोति खुल गे हवंय; अब ओह उजड़ गे हवय, त मेंह उन्नति करहूं,’
EZE 26:3 एकरसेति परमपरधान यहोवा ह ये कहत हे: हे सूर, मेंह तोर बिरूध म हवंव, अऊ मेंह बहुंते जाति के मनखेमन ला तोर बिरूध समुंदर के लहरामन सहीं ले आहूं।
EZE 26:4 ओमन सूर के दीवारमन ला नास कर दीहीं अऊ ओकर मीनारमन ला टोरके गिरा दीहीं; मेंह ओकर माटी ला खुरचके ओला एक खाली चट्टान कर दूहूं।
EZE 26:5 बाहिर समुंदर म, ओह मछरी के जाल डाले के एक जगह हो जाही, काबरकि मेंह कहे हवंव, परमपरधान यहोवा ह घोसना करत हे। ओह जाति-जाति के मनखेमन बर लूट के सामान हो जाही,
EZE 26:6 अऊ महाद्वीप म बसे ओकर बस्ती ला तलवार के दुवारा नास करे जाही। तब ओमन जानहीं कि मेंह यहोवा अंव।
EZE 26:7 “काबरकि परमपरधान यहोवा ह ये कहत हे: मेंह सूर के बिरूध उत्तर दिग ले राजाधिराज बेबिलोन के राजा नबूकदनेसर ला घोड़ा, रथ, घुड़सवार अऊ बड़े सेना के संग लानेवाला हंव।
EZE 26:8 ओह महाद्वीप म तोर बस्ती ला तलवार ले नास कर दीही; ओह तोर बिरूध घेराबंदी करही, तोर दीवारमन ले ढलान बनाही अऊ तोर बिरूध अपन ढाल ला उठाही।
EZE 26:9 ओह तोर दीवारमन के बिरूध लड़ई के हथियार चलाही अऊ तोर मीनारमन ला हथियारमन ले गिरा दीही।
EZE 26:10 ओकर घोड़ामन अतेक होहीं कि तेंह ओमन के धुर्रा ले तोपा जाबे। तोर दीवारमन लड़ई के घोड़ा, चार पहिया गाड़ी अऊ रथमन के अवाज ले कांप जाहीं, जब ओह तोर दुवारमन ले अइसने घुसही, जइसने आदमीमन टूटे दीवारमन ले कोनो सहर म घुसथें।
EZE 26:11 ओकर घोड़ामन के खुर ले तोर जम्मो गलीमन खुंदे जाहीं; ओह तोर मनखेमन ला तलवार ले मार डारही, अऊ तोर मजबूत खंभामन भुइयां म गिराय जाहीं।
EZE 26:12 ओमन तोर धन-संपत्ति ला लूटहीं अऊ तोर बेपार के चीजमन ला छीन लीहीं; ओमन तोर दीवारमन ला टोरके गिरा दीहीं अऊ तोर सुघर घरमन ला टोर दीहीं अऊ तोर पथरा, इमारती लकरी अऊ कचरा ला पानी म फटिक दीहीं।
EZE 26:13 मेंह तोर कंझट करइया गीतमन ला खतम कर दूहूं, अऊ तोर बीनामन के संगीत ह फेर सुनई नइं दीही।
EZE 26:14 मेंह तोला एक खाली चट्टान बना दूहूं, अऊ तेंह मछरी के जाल बगराय के एक जगह बन जाबे। तोला फेर बनाय नइं जाही, काबरकि में यहोवा ह कहे हवंव, परमपरधान यहोवा ह घोसना करत हे।
EZE 26:15 “परमपरधान यहोवा ह सूर ले ये कहत हे: का तोर गिरे के अवाज ले समुंदर तीर के भुइयां ह कांप नइं उठही, जब घायल मनखेमन कलहरहीं अऊ तोर बीच म मारकाट होही?
EZE 26:16 तब समुंदर तीर के जम्मो राजकुमारमन अपन-अपन सिंघासन ले उतरहीं अऊ अपन बागा ला अलग रख दीहीं अऊ अपन कसीदावाला ओनहा ला उतार दीहीं। आतंक के ओनहा पहिरके, हर पल कांपत अऊ तोर ले डराके भुइयां म बईठे रहिहीं।
EZE 26:17 तब ओमन तोर बिसय म एक बिलापगीत लीहीं अऊ तोला कहिहीं: “ ‘हे खियाती पाय सहर, तेंह कइसे नास हो गे, समुंदर तीर के मनखेमन तोर म बसे रिहिन! तेंह समुंदर म एक सक्ति रहय, तें अऊ तोर निवासीमन; तेंह ओ जम्मो झन ला आतंकित करय जेमन उहां रहत रिहिन।
EZE 26:18 अब समुंदर तीर के भुइयां ह तोर गिरे के दिन म कांपथे; समुंदर के द्वीपमन तोर गिरे ले भयभीत होवत हें।’
EZE 26:19 “परमपरधान यहोवा ह ये कहत हे: जब मेंह तोला उजड़े सहर बना दूहूं, ओ सहरमन सहीं जिहां कोनो नइं रहंय, अऊ जब मेंह तोर ऊपर समुंदर के गहरई ला ले आहूं, अऊ ओकर बहुंते पानी म तेंह बुड़ जाबे,
EZE 26:20 तब में तोला ओमन के संग खाल्हे ले आहूं, जेमन खाल्हे खंचवा म बहुंत पहिले के मनखेमन करा जाथें। पुराना जमाना के बिनास सहीं, मेंह तोला धरती के खाल्हे ओमन के संग निवास करवाहूं, जेमन खाल्हे खंचवा म जाथें, अऊ तेंह जीयत मनखेमन के भुइयां म रहे बर फेर लहुंटके नइं आबे।
EZE 26:21 मेंह तोर एक भयंकर अन्त कर दूहूं अऊ तेंह खतम हो जाबे। तोला खोजे तो जाही, पर तेंह फेर कभू नइं मिलबे, परमपरधान यहोवा ह घोसना करत हे।”
EZE 27:1 यहोवा के ये बचन मोर मेर आईस:
EZE 27:2 “हे मनखे के बेटा, सूर सहर के बिसय म एक ठन बिलापगीत ले।
EZE 27:3 सूर ले कह, जऊन ह समुंदर के मुंहटा म बसे हवय, अऊ बहुंत अकन समुंदर तीर के मनखेमन के बेपारी अय, ‘परमपरधान यहोवा ह ये कहत हे: “ ‘हे सूर, तेंह कहिथस, “मेंह बहुंत सुघर हंव।”
EZE 27:4 तोर इलाका ह ऊंच समुंदर म रिहिस; तोर बनइयामन तोला एकदम सुघर बनाईन।
EZE 27:5 ओमन तोर जम्मो इमारती लकरी सनीर के सनोवर के लकरी ले लीन; तोर बर पतवार बनाय बर ओमन लबानोन के देवदार के लकरी लीन।
EZE 27:6 ओमन तोर पतवारमन ला बासान के बलूत रूखमन ले बनाईन; कित्ती के समुंदर तीर के गोपेर लकरी ले ओमन तोर पानी जहाज के छत ला बनाईन अऊ हाथी-दांत ले सजाईन।
EZE 27:7 तोर जहाज के तिरपाल ह मिसर देस के कसीदा करे गय मलमल कपड़ा ले बने रिहिस अऊ येह तोर बर झंडा के काम करय; तोर तिरपालमन एलीसाह के समुंदर तीर के नीला अऊ बैंगनी कपड़ा के बने रिहिन।
EZE 27:8 तोर पतवार चलानेवालामन सीदोन अऊ अरवद सहरमन के आदमी रिहिन; हे सूर, तोर कुसल आदमीमन नाविक के रूप म जहाज म रिहिन।
EZE 27:9 गबाल के अनुभवी कारीगरमन जहाज के मरम्मत करे बर जहाज म रिहिन। समुंदर के जम्मो जहाज अऊ ओमन के चलइयामन तोर बेपार के सामान के लेन-देन करे बर संग-संग आ गे रिहिन।
EZE 27:10 “ ‘फारसी, लूदी अऊ पूती मनखेमन तोर सेना म सैनिक के रूप म रिहिन। ओमन अपन ढाल अऊ टोप ला तोर सोभा बढ़ात तोर दीवारमन म टांग दीन।
EZE 27:11 अरवद सहर अऊ हेलेक इलाका के आदमीमन चारों कोति ले तोर दीवारमन के पहरेदारी करिन; गमाद नगर के आदमीमन तोर मीनारमन म रिहिन। ओमन अपन ढाल चारों कोति तोर दीवारमन म टांग दीन; ओमन तोर सुघरता बहुंत बढ़ाईन।
EZE 27:12 “ ‘जम्मो किसम के सामान के बहुंतायत के कारन तरसीस सहर के मनखेमन तोर संग बेपार करिन; ओमन चांदी, लोहा, टीन अऊ सीसा ला देके तोर माल ला बिसाईन।
EZE 27:13 “ ‘यूनान, तूबल अऊ मेसेक देस के मनखेमन तोर संग बेपार करिन; ओमन तोर बेपारी सामान के बदला म दास-दासी अऊ कांसा के चीजमन ला दीन।
EZE 27:14 “ ‘बेत-तोगरमा इलाका के आदमीमन तोर बेपार के सामान के बदला म रथवाला घोड़ा, सेना के घोड़ा अऊ खच्चरमन ला दीन।
EZE 27:15 “ ‘रूदुस के आदमीमन तोर संग बेपार करिन, अऊ बहुंत अकन समुंदर तीर के मनखेमन तोर खरीददार रिहिन; ओमन तोर सामान के बदले हाथी-दांत अऊ तेंदू के कठवा देवत रिहिन।
EZE 27:16 “ ‘तोर मेर बहुंत सामान होय के कारन अराम के मनखेमन तोर ले बेपार करिन; ओमन तोर सामान के बदले हरा लालमनि, बैंगनी रंग के ओनहा, कसीदाकारी करे गय ओनहा, बढ़िया मलमल के ओनहा, मूंगा अऊ लालमनि देवत रिहिन।
EZE 27:17 “ ‘यहूदा अऊ इसरायल घलो तोर ले बेपार करत रिहिन; ओमन तोर सामान के बदले मिन्नीत के गहूं, मिठई, मंधरस, जैतून तेल, अऊ मलहम देवत रिहिन।
EZE 27:18 “ ‘तोर बहुंत अकन सामान अऊ बहुंत धन-संपत्ति के कारन दमिस्क ह तोर संग बेपार करिस। ओमन तोला हेलबोन नगर के अंगूर के मंद, अऊ जाहर नगर के ऊन दीन।
EZE 27:19 अऊ ईजाल ले लकरी के पीपा म भरे अंगूर के मंद के बदला बनाय गय लोहा, दालचीनी अऊ तेजपान दीन।
EZE 27:20 “ ‘घोड़ा के पीठ म बिछाय के कम्बल बर ददान ह तोर संग बेपार करिस।
EZE 27:21 “ ‘अरब के मनखे अऊ केदार के जम्मो राजकुमारमन तोर सामान के खरीददार रिहिन; ओमन मेढ़ा-पीला, मेढ़ा, अऊ बोकरा देके तोर संग लेन-देन करत रिहिन।
EZE 27:22 “ ‘सेबा राज अऊ रामा सहर के बेपारीमन तोर संग बेपार करिन; तोर सामान के बदले म ओमन तोला सबले बने किसम के मसाला अऊ कीमती रत्न, अऊ सोन देवत रिहिन।
EZE 27:23 “ ‘हारान, कन्ने, अऊ एदेन अऊ सेबा, अस्सूर अऊ किलमद सहरमन के बेपारीमन तोर संग बेपार करिन।
EZE 27:24 तोर बजार के जगह म ओमन तोर सामान के बदले सुघर ओनहा, नीला कपड़ा, बूटावाले ओनहा अऊ बंटे अऊ कसके बंधे डोरी वाले रंग-बिरंगा गलीचा देवत रिहिन।
EZE 27:25 “ ‘तोर बेपारी सामान के ढोवई तरसीस के पानी जहाजमन ले होथे। जब तें समुंदर के यातरा म जाथस त जहाज म भारी सामान भरे रहिथे।
EZE 27:26 तोर जहाज के खेवइयामन तोला गहिला समुंदर म ले जाथें। पर पूरब के हवा ह दूरिहा समुंदर म तोर जहाज के कुटा-कुटा कर दीही।
EZE 27:27 तोर संपत्ति, बेपारी सामान अऊ आने सामान, तोर नाविकमन, जहाज खेवइयामन अऊ जहाज ला मरम्मत करइयामन, तोर बेपारी अऊ तोर सैनिकमन, अऊ जहाज म के हर एक चीज ओ दिन समुंदर के बीच डूब जाहीं जब तोर जहाज ह टूट जाही।
EZE 27:28 जब तोर जहाज खेवइयामन चिचियाहीं त समुंदर तीर के भुइयां ह कांप उठही।
EZE 27:29 पतवार चलइया जम्मो झन अपन जहाजमन ला छोंड़ दीहीं; नाविक अऊ जहाज खेवइया जम्मो झन जहाज ले उतरके समुंदर तीर म ठाढ़ हो जाहीं।
EZE 27:30 ओमन तोर ऊपर चिचियाहीं अऊ फूट-फूटके रोहीं; ओमन अपन मुड़ म धुर्रा छिंचके राख म घुंडलहीं।
EZE 27:31 ओमन तोर कारन अपन मुड़ ला मुड़ा लीहीं अऊ बोरा के कपड़ा पहिरहीं। ओमन अपन मन म भारी दुख अऊ भारी सोक ले तोर बर रोहीं।
EZE 27:32 जब ओमन तोर बिसय म रोहीं अऊ सोक मनाहीं, त ओमन तोर बारे म एक बिलापगीत गाहीं: “कोन ह समुंदर ले घिरे के बाद घलो सूर के सहीं चुपेचाप रिहिस?”
EZE 27:33 जब तोर बेपार के माल ह समुंदर म जावय, त तेंह बहुंते जाति के मनखेमन ला संतुस्ट करय; अपन बहुंत धन अऊ बेपार के माल ले तेंह धरती के राजामन ला धनी कर देय।
EZE 27:34 अब तें गहिला पानी म समुंदर के दुवारा चकनाचूर हो गे हस; तोर जहाज के माल अऊ तोर पूरा झुंड तोर संग डूब गे हवय।
EZE 27:35 समुंदर तीर म रहइया जम्मो झन तोर दसा देखके डर गे हवंय; ओमन के राजामन डर के मारे कांपथें अऊ डर के मारे ओमन के चेहरा के रंग उड़ गे हवय।
EZE 27:36 जाति-जाति के बीच बेपारीमन तोर हंसी उड़ाथें; तोर एक भयंकर अन्त हो गे हवय अऊ तोर नामोनिसान नइं रहय।’ ”
EZE 28:1 यहोवा के ये बचन मोर मेर आईस:
EZE 28:2 “हे मनखे के बेटा, सूर के सासन करइया ले कह, ‘परमपरधान यहोवा ह ये कहत हे: “ ‘अपन मन म घमंड करके तेंह कहिथस, “मेंह एक ईस्वर अंव; मेंह समुंदर के बीच ईस्वर के सिंघासन म बईठथंव।” पर तेंह सिरिप एक मरनहार जीव अस, ईस्वर नो हस, हालाकि तेंह सोचथस कि तेंह ईस्वर के सहीं बुद्धिमान अस।
EZE 28:3 का तेंह दानिएल ले जादा होसियार अस? का तोर ले कोनो भेद के बात छुपे नइं ए?
EZE 28:4 अपन बुद्धि अऊ समझ के दुवारा तेंह अपन बर धन कमाय हस अऊ अपन खजाना म सोन अऊ चांदी जमा करे हस।
EZE 28:5 बेपार म अपन बड़े कुसलता के दुवारा तेंह अपन संपत्ति बढ़ाय हस, अऊ तोर धन के कारन तोर मन ह घमंडी हो गे हवय।
EZE 28:6 “ ‘एकरसेति परमपरधान यहोवा ह ये कहत हे: “ ‘काबरकि तें सोचथस कि तें ईस्वर सहीं बुद्धिमान अस,
EZE 28:7 एकरसेति मेंह परदेसीमन ले तोर बिरोध करवाहूं, जेमन जम्मो जातिमन म सबले जादा निरदयी अंय; ओमन तोर सुघरता अऊ बुद्धिमानी ऊपर अपन तलवार चलाहीं अऊ तोर चमकत सोभा ला नास कर दीहीं।
EZE 28:8 ओमन तोला खाल्हे खंचवा म ले आहीं, अऊ समुंदर के बीच म तें भयंकर मिरतू ले मरबे।
EZE 28:9 जेमन तोला मार डालहीं, ओमन के आघू म तब का तें कहिबे, “मेंह ईस्वर अंव?” जेमन तोला मार डालथें, ओमन के हांथ म तें एक मरनहार अस, ईस्वर नइं।
EZE 28:10 तेंह परदेसीमन के हांथ म खतनारहित मनखेमन असन मारे जाबे। मेंह कहे हंव, परमपरधान यहोवा ह घोसना करत हे।’ ”
EZE 28:11 यहोवा के ये बचन मोर मेर आईस:
EZE 28:12 “हे मनखे के बेटा, सूर के राजा के बिसय म एक बिलापगीत ले अऊ ओला कह: ‘परमपरधान यहोवा ह ये कहत हे: “ ‘तें बुद्धि ले भरे अऊ बहुंत सुघर, उत्तमता के मुहर रहय।
EZE 28:13 तेंह परमेसर के बगीचा, अदन म रहय; हर एक कीमती रत्न ले तोला सजाय गे रिहिस: मानिक, हीरा अऊ पन्ना, पुखराज, गोमेदक अऊ मनि, नीलमनि, फिरोजा अऊ मरकत। तोर बईठे के जगह अऊ बईठकमन सोन के बने रिहिन; जऊन दिन तोला बनाय गीस, ओहीच दिन ओमन ला तियार करे गीस।
EZE 28:14 एक अविभावक करूब के रूप म तोर राजतिलक होईस, इही काम बर मेंह तोर अभिसेक करेंव। तें परमेसर के पबितर पहाड़ म रहय; तेंह आगी कस चमकनेवाला पथरामन के बीच चलत-फिरत रहय।
EZE 28:15 अपन सिरजे गय दिन ले तेंह अपन चालचलन म निरदोस रहय जब तक कि तोर दुस्टता नइं पाय गीस।
EZE 28:16 तोर बेपार के फईले होय के कारन तेंह हिंसा ले भर गे रहय, अऊ तेंह पाप करय। एकरसेति मेंह तोला कलंक म परमेसर के पहाड़ ले भगा देंव, अऊ हे अविभावक करूब, मेंह तोला आगी कस चमकत पथरामन के बीच ले निकाल देंव।
EZE 28:17 तोर सुघरता के कारन तोर मन ह घमंडी हो गीस, अऊ तोर सोभा के कारन तोर बुद्धि ह बिगड़ गीस। एकरसेति मेंह तोला भुइयां म फटिक देंव; मेंह तोला राजामन के आघू म एक तमासा बना देंव।
EZE 28:18 अपन बहुंत पाप अऊ बेईमानी के बेपार ले तेंह अपन पबितर-स्थानमन ला अपबितर कर दे हस। एकरसेति मेंह तोर म ले ही एक अइसन आगी ला बनांय, जऊन ह तोला जलाके नास कर दीस, अऊ जेमन तोला देखत रिहिन, ओ जम्मो के आघू म मेंह तोला भुइयां म राख बना देंव।
EZE 28:19 ओ जम्मो जाति के मनखे जेमन तोला जानत रिहिन तोर हालत ले डरा गीन; तोर एक भयानक अन्त होय हवय अऊ अब तोर नामोनिसान नइं रहय।’ ”
EZE 28:20 यहोवा के ये बचन ह मोर मेर आईस:
EZE 28:21 “हे मनखे के बेटा, अपन मुहूं ला सीदोन सहर कोति कर; ओकर बिरूध म अगमबानी कर
EZE 28:22 अऊ कह: ‘परमपरधान यहोवा ये कहत हे: “ ‘हे सीदोन, मेंह तोर बिरूध हवंव, अऊ तोर बीच म मेंह अपन महिमा परगट करहूं। जब मेंह तोला दंड दूहूं तब तेंह जानबे कि मेंह यहोवा अंव, अऊ तोर ही बीच म मेंह पबितर ठहिरहूं।
EZE 28:23 मेंह तोर बीच म महामारी पठोहूं अऊ तोर गलीमन म खून बहाहूं। चारों कोति ले तोर बिरूध तलवार चलही, अऊ मारे गय मनखेमन तोरेच बीच म गिरहीं। तब तेंह जानबे कि मेंह यहोवा अंव।
EZE 28:24 “ ‘तब इसरायली मनखेमन के अइसे पड़ोसी नइं होहीं, जेमन पीरा देवइया कंटिली झाड़ी अऊ तेज गड़नेवाला कांटा सहीं अंय। तब ओमन जानहीं कि मेंह परमपरधान यहोवा अंव।
EZE 28:25 “ ‘परमपरधान यहोवा ह ये कहत हे: जब मेंह इसरायल के मनखेमन ला ओ जातिमन ले इकट्ठा करहूं, जेमन के बीच म ओमन तितिर-बितिर हो गे हवंय, त में ओमन के जरिये ओ जातिमन के मनखे के नजर म पबितर ठहिरहूं। तब ओमन अपन खुद के देस म रहिहीं, जेला मेंह अपन सेवक याकूब ला देय रहेंव।
EZE 28:26 ओमन उहां सुरकछित रहिहीं अऊ घर बनाहीं अऊ अंगूर के बारी लगाहीं; ओमन सुरकछित रहिहीं जब में ओमन के ओ जम्मो परोसीमन ला दंड दूहूं, जेमन ओमन ले बईरता रखत रिहिन। तब ओमन जानहीं कि में यहोवा ओमन के परमेसर अंव।’ ”
EZE 29:1 बंधुवई के दसवां बछर के, दसवां महिना के बारहवां दिन, यहोवा के बचन ह मोर मेर आईस:
EZE 29:2 “हे मनखे के बेटा, अपन मुहूं ला मिसर के राजा फिरौन कोति करके ओकर अऊ जम्मो मिसर के बिरूध अगमबानी कर।
EZE 29:3 ओकर ले बात कर अऊ कह, ‘परमपरधान यहोवा ह ये कहत हे: “ ‘हे मिसर के राजा फिरौन, मेंह तोर बिरूध हंव, तें एक बहुंत बड़े जन्तु अस, जऊन ह अपन पानी के सोतामन के बीच पड़े रहिथस। तेंह कहिथस, “नील नदी ह मोर ए; मेंह ओला अपन बर बनाय हवंव।”
EZE 29:4 पर मेंह तोर जबड़ामन म गरी डालहूं अऊ तोर सोता के मछरीमन ला तोर खाल म चिपका दूहूं। मेंह तोला तोर सोतामन ले बाहिर ले आहूं, अऊ जम्मो मछरीमन तोर खाल म चिपके रहिहीं।
EZE 29:5 मेंह तोला अऊ तोर सोतामन के जम्मो मछरीमन ला मरू-भुइयां म छोंड़ दूहूं। तेंह खुला मैदान म पड़े रहिबे अऊ तोला न तो संकेले जाही अऊ न उठाय जाही। मेंह तोला जेवन के रूप म धरती के पसु अऊ अकास के चिरईमन ला दे दूहूं।
EZE 29:6 तब मिसर देस म रहइया जम्मो झन जानहीं कि मेंह यहोवा अंव। “ ‘तेंह इसरायल के मनखेमन बर सरकंडा के एक लउठी हो गे हस।
EZE 29:7 जब ओमन तोला अपन हांथ म धरिन, त तेंह चीरा गेय अऊ ओमन के कंधामन ला फार डारय; जब ओमन तोर ऊपर टेक लगाईन, त तेंह टूट गेय अऊ ओमन के पीठ के मंझरेटामन लचक गीन।
EZE 29:8 “ ‘एकरसेति परमपरधान यहोवा ह ये कहत हे: मेंह तोर ऊपर तलवार चलाहूं अऊ आदमी अऊ पसु दूनों ला मार डालहूं।
EZE 29:9 मिसर देस ह निरजन अऊ उजाड़ हो जाही। तब ओमन जानहीं कि मेंह यहोवा अंव। “ ‘काबरकि तेंह कहय, “नील नदी ह मोर अय; मेंह ओला बनाय हंव,”
EZE 29:10 एकरसेति मेंह तोर अऊ तोर पानी के सोतामन के बिरूध हवंव, अऊ मिसर देस ला मिगदोल ले लेके असवान तक, बरन कूस देस के सीमना तक खंडहर कर दूहूं अऊ उजाड़ दूहूं।
EZE 29:11 न तो कोनो मनखे अऊ न ही कोनो पसु उहां ले होके जाहीं; उहां चालीस बछर तक कोनो नइं रहिहीं।
EZE 29:12 मेंह बरबाद हो गय देसमन के बीच मिसर देस ला उजाड़ दूहूं, अऊ ओकर सहरमन नास हो गय सहरमन के बीच चालीस बछर तक उजाड़ पड़े रहिहीं। अऊ मेंह मिसरीमन ला जाति-जाति के मनखेमन के बीच एती-ओती कर दूहूं अऊ देस-देस म तितिर-बितिर कर दूहूं।
EZE 29:13 “ ‘तभो ले परमपरधान यहोवा ह ये कहत हे: चालीस बछर के आखिरी म मेंह मिसरीमन ला ओ जातिमन के बीच ले इकट्ठा करहूं, जिहां ओमन तितिर-बितिर हो गे रिहिन।
EZE 29:14 मेंह ओमन ला बंधुवई ले वापिस ले आहूं अऊ ओमन ला ऊपरी मिसर म लहुंटा ले आहूं, जऊन ह ओमन के पुरखामन के देस अय। उहां ओमन एक निचला दरजा के राज के रूप म होहीं।
EZE 29:15 येह जम्मो राजमन म सबले निचला दरजा के राज होही अऊ येह अपनआप ला फेर कभू आने जातिमन ले ऊपर नइं उठा सकही। मेंह येला अतेक कमजोर कर दूहूं कि येह फेर कभू जाति-जाति के मनखेमन ऊपर सासन नइं कर पाही।
EZE 29:16 मिसर ह फेर इसरायल के मनखेमन के भरोसा के कारन नइं होही, पर येह इसरायल ला ओमन के ओ पाप के सुरता करात रहिही, जब ओमन मदद बर मिसर कोति देखिन। तब ओमन जानहीं कि मेंह परमपरधान यहोवा अंव।’ ”
EZE 29:17 फेर सत्ताईसवां बछर के पहिला महिना के पहिला दिन, यहोवा के बचन मोर मेर आईस:
EZE 29:18 “हे मनखे के बेटा, बेबिलोन के राजा नबूकदनेसर ह सूर के बिरूध एक कठोर सैनिक अभियान करवाय हवय; हर एक के मुड़ ह चंदवा हो गीस अऊ हर एक के कंधा के चमड़ी ह निकल गीस। तभो ले ओला अऊ ओकर सेना ला सूर के बिरूध करे गय अभियान ले कोनो फायदा नइं होईस।
EZE 29:19 एकरसेति परमपरधान यहोवा ह ये कहत हे: मेंह बेबिलोन के राजा नबूकदनेसर ला मिसर देस देनेवाला हंव, अऊ ओह मिसर के संपत्ति ला ले जाही। ओह अपन सेना के जरूरत ला पूरा करे बर मिसर देस के चीजमन ला लूटही अऊ छीन लीही।
EZE 29:20 मेंह ओकर मेहनत के बदला म ओला मिसर देस एक ईनाम के रूप म देय हवंव, काबरकि ओ अऊ ओकर सेना ह ये काम मोर बर करिन, परमपरधान यहोवा ह घोसना करत हे।
EZE 29:21 “ओहीच दिन मेंह इसरायलीमन बर एक सींग उगाहूं, अऊ मेंह ओमन के बीच तोर मुहूं ला खोलहूं। तब ओमन जानहीं कि मेंह यहोवा अंव।”
EZE 30:1 यहोवा के बचन ह मोर मेर आईस:
EZE 30:2 “हे मनखे के बेटा, अगमबानी करके कह: ‘परमपरधान यहोवा ह ये कहत हे: “ ‘बिलाप करव अऊ कहव, “हाय ओ दिन बर!”
EZE 30:3 काबरकि ओ दिन ह लकठा म हवय, यहोवा के दिन ह लकठा म हवय— बादरमन के दिन, जाति-जाति के मनखेमन बर दंड के दिन होही।
EZE 30:4 मिसर के बिरूध एक तलवार उठही, अऊ कूस ऊपर पीरा के समय आही। जब मिसर म हतिया करे जाही, तब ओकर धन-संपत्ति ले लिये जाही अऊ ओकर नीवमन ला टोरके गिरा दिये जाही।
EZE 30:5 कूस अऊ लिबिया, लूदी अऊ जम्मो अरब, कूब अऊ करार करे देस के मनखेमन, मिसरीमन के संग म तलवार ले मारे जाहीं।
EZE 30:6 “ ‘यहोवा ह ये कहत हे: “ ‘मिसर के संगी देसमन नास हो जाहीं अऊ ओकर घमंड ले भरे बल ह खतम हो जाही। मिगदोल ले लेके असवान तक ओमन ओकर भीतर ही तलवार ले मारे जाहीं, परमपरधान यहोवा ह घोसना करत हे।
EZE 30:7 ओमन निरजन देसमन के बीच निरजन हो जाहीं, अऊ नास हो गय सहरमन के बीच ओमन के सहरमन नास होके पड़े रहिहीं।
EZE 30:8 जब मेंह मिसर म आगी लगाहूं, अऊ ओकर जम्मो मददगारमन कुचरे जाहीं, तब ओमन जानहीं कि मेंह यहोवा अंव।
EZE 30:9 “ ‘ओ दिन मोर करा ले संदेसियामन जहाजमन म निकलके जाहीं अऊ कूस के मनखेमन ला ओमन के आत्म-संतोस होय ले डराहीं। मिसर के बिनास के दिन ओमन पीरा ले भर जाहीं, काबरकि अइसने जरूर होही।
EZE 30:10 “ ‘परमपरधान यहोवा ह ये कहत हे: “ ‘मेंह बेबिलोन के राजा नबूकदनेसर के हांथ ले मिसर के उपदरवी मनखेमन के अन्त कर दूहूं।
EZE 30:11 ओ अऊ ओकर सेना ला जऊन मन जम्मो जातिमन म बहुंत निरदयी अंय ओ देस ला नास करे बर लाय जाही। ओमन मिसर के ऊपर तलवार चलाहीं अऊ देस ला हतिया करे गय मनखेमन ले भर दीहीं।
EZE 30:12 मेंह नील नदी के पानी ला सूखा दूहूं अऊ देस ला एक दुस्ट जाति के हांथ म बेच दूहूं; परदेसीमन के दुवारा मेंह देस अऊ ओमा के हर एक चीज ला उजाड़ दूहूं। में यहोवा ह कहे हवंव।
EZE 30:13 “ ‘परमपरधान यहोवा ह ये कहत हे: “ ‘मेंह मूरतीमन ला नास कर दूहूं अऊ मेमफीस सहर म मूरतीमन के अन्त कर दूहूं। मिसर देस म फेर कोनो राजकुमार नइं होहीं, अऊ मेंह पूरा देस म डर फईला दूहूं।
EZE 30:14 मेंह ऊपरी मिसर ला उजाड़ दूहूं, सोअन सहर म आगी लगा दूहूं अऊ थेबेस सहर ला सजा दूहूं।
EZE 30:15 पेलुसियम, जऊन ह मिसर के मजबूत नगर अय, ओकरे ऊपर मोर कोप ह भड़कही, अऊ मेंह थेबेस के उपदरवी मनखेमन ला नास कर दूहूं।
EZE 30:16 मेंह मिसर म आगी लगा दूहूं; पेलुसियम ह पीरा म तड़पही। थेबेस नगर गरेर म उड़ जाही; मेमफीस म लगातार दुख-पीरा बने रहिही।
EZE 30:17 ओन अऊ पीवेसेत सहर के जवानमन तलवार ले मारे जाहीं, अऊ ये सहरमन बंधुवई म चले जाहीं।
EZE 30:18 जब मेंह मिसर के जुड़ा ला टोरहूं, तब तहपनहेस नगर म दिन म ही अंधियार हो जाही; तब उहां ओकर घमंड ले भरे बल के अन्त हो जाही। ओकर ऊपर बादर छा जाही, अऊ ओकर गांवमन बंधुवई म चले जाहीं।
EZE 30:19 ये किसम ले मेंह मिसर देस ला सजा दूहूं, अऊ ओमन जानहीं कि मेंह यहोवा अंव।’ ”
EZE 30:20 हमर बंधुवई के गियारहवां बछर के, पहिला महिना के सातवां दिन, यहोवा के बचन ह मोर मेर आईस:
EZE 30:21 “हे मनखे के बेटा, मेंह मिसर के राजा फिरौन के बाहां ला टोर देय हंव। ओकर ईलाज बर ओला बांधे नइं गे हवय या ओमा पलस्तर नइं चघाय गे हवय ताकि ओह मजबूत होके तलवार ला धर सकय।
EZE 30:22 एकरसेति परमपरधान यहोवा ह ये कहत हे: मेंह मिसर के राजा फिरौन के बिरूध म हवंव। मेंह ओकर दूनों बाहांमन ला टोर दूहूं, बने बाहां के संगे-संग टूटे बाहां ला घलो, अऊ तलवार ला ओकर हांथ ले गिरवा दूहूं।
EZE 30:23 मेंह मिसरीमन ला जाति-जाति के मनखेमन के बीच एती-ओती फईला दूहूं अऊ देस-देस म ओमन ला तितिर-बितिर कर दूहूं।
EZE 30:24 मेंह बेबिलोन के राजा के बाहांमन ला मजबूत करहूं अऊ अपन तलवार ला ओकर हांथ म दे दूहूं, पर मेंह फिरौन के बाहांमन ला टोर दूहूं, अऊ ओह बेबिलोन के राजा के आघू म अइसन कलहरही, जइसन मरनेवाला एक घायल मनखे कलहरथे।
EZE 30:25 मेंह बेबिलोन के राजा के बाहांमन ला मजबूत करहूं, पर फिरौन के बाहांमन ढीला पड़ जाहीं। तब ओमन जानहीं कि मेंह यहोवा अंव, जब मेंह अपन तलवार बेबिलोन के राजा के हांथ म दे दूहूं अऊ ओह येकर उपयोग मिसर देस के बिरूध करही।
EZE 30:26 मेंह मिसरीमन ला जाति-जाति के मनखेमन के बीच फईला दूहूं अऊ ओमन ला देस-देस म तितिर-बितिर कर दूहूं। तब ओमन जानहीं कि मेंह यहोवा अंव।”
EZE 31:1 गियारहवां बछर के, तीसरा महिना के पहिला दिन, यहोवा के बचन ह मोर मेर आईस:
EZE 31:2 “हे मनखे के बेटा, मिसर के राजा फिरौन अऊ ओकर उपदरवी मनखेमन ले कह: “ ‘तोर गौरव के तुलना काकर संग करे जाय?
EZE 31:3 अस्सूर ऊपर बिचार कर, जऊन ह एक समय लबानोन के एक देवदार रिहिस, ओकर डारामन सुघर अऊ जंगल ला छइहां देवंय; येह बहुंत ऊंच रिहिस, अऊ ओकर टीप ह घना पानमन ऊपर रिहिस।
EZE 31:4 पानी ले येकर सिंचई होवत रिहिस, गहिला सोतामन येला ऊपर बढ़ाईन; ओकर सोतामन येकर अधार के चारों कोति बहत रिहिन अऊ ओमन के धारामन मैदान के जम्मो रूखमन तक जावंय।
EZE 31:5 एकरसेति मैदान के जम्मो रूखमन ले येह ऊंच हो गीस; येकर डारामन बहुंत होय लगिन अऊ येकर डारामन बढ़के लम्बा हो गीन, काबरकि उहां बहुंत पानी रिहिस।
EZE 31:6 अकास के जम्मो चिरई ओकर डारामन म बसेरा करत रिहिन, ओकर डारामन के खाल्हे म जम्मो जंगली पसुमन पीला जनमात रिहिन; जम्मो बड़े जातिमन ओकर छइहां म रहत रिहिन।
EZE 31:7 येह अपन फईले डारामन के संग, सुघरता म सोभायमान रिहिस, काबरकि येकर जरीमन खाल्हे भरपूर पानी के सोतामन तक गे रिहिन।
EZE 31:8 परमेसर के बारी के देवदार रूखमन येकर तुलना म कुछू नइं रिहिन, न ही सनोवरमन येकर डारामन के बरोबरी कर सकत रिहिन, न ही अरमोन रूखमन के तुलना येकर डारामन ले करे जा सकत रिहिस— परमेसर के बारी के कोनो भी रूख येकर सुघरता के बरोबरी नइं कर सकत रिहिन।
EZE 31:9 मेंह बहुंत डारामन के संग येला सुघर बनांय, परमेसर के बारी, अदन के जम्मो रूख येकर ले जलन करत रिहिन।
EZE 31:10 “ ‘एकरसेति परमपरधान यहोवा ह ये कहत हे: काबरकि बड़े देवदार ह घना पानमन के ऊपर बाढ़िस, अऊ काबरकि येला अपन ऊंचई के घमंड रिहिस,
EZE 31:11 एकरसेति मेंह ओला जाति-जाति के मनखेमन ऊपर सासन करइयामन के हांथ म कर देंव, ताकि ओकर संग ओकर दुस्टता के मुताबिक बरताव करे जावय। मेंह ओला अलग फटिक देंव,
EZE 31:12 अऊ परदेस के जाति-जाति के बीच म, जेमन सबले जादा निरदयी अंय, ओमन ओला काटके छोंड़ दीन। ओकर डारामन पहाड़मन म, अऊ सबो घाटीमन म गिरिन; ओकर साखामन देस के सबो घाटीमन म टूटे पड़े रिहिन। अऊ जाति-जाति के जम्मो मनखेमन ओकर छइहां ले निकल आईन अऊ ओला छोंड़ दीन।
EZE 31:13 ओ गिरे रूख म जम्मो चिरई बसेरा करे लगिन, अऊ जम्मो पसुमन ओकर डारामन के बीच रहे लगिन।
EZE 31:14 एकरसेति पानी के लकठा म आने कोनो रूख घना पानमन के बीच अपन टीप ला ऊपर करत घमंड से ऊंच झन होवय। भरपूर पानी के लकठा के कोनो आने रूख अइसन ऊंच झन होवय; ओ जम्मो के मरना जरूरी अय, काबरकि ओमन के जगह धरती के खाल्हे ओ मरनहार मनखेमन के बीच हवय, जेमन मिरतू-लोक म खाल्हे जाथें।
EZE 31:15 “ ‘परमपरधान यहोवा ह ये कहत हे: जऊन दिन येला मिरतू-लोक म खाल्हे उतारे गीस, ओ दिन मेंह येकर बर सोक के संग गहिला सोतामन ला ढांप देंव, अऊ येकर सोतामन ला रोक देंव, अऊ येकर भरपूर पानी के सोतामन बंद हो गीन। येकर कारन मेंह लबानोन म उदासी ले आंय, अऊ मैदान के सबो रूखमन मुरझा गीन।
EZE 31:16 मेंह येकर गिरे के अवाज ले जाति-जाति के मनखेमन ला कंपा देंव, जब मेंह येला मिरतू-लोक म खाल्हे लानेंव, ताकि येह ओमन के संग रहय, जेमन खाल्हे कबर म जाथें। तब अदन के बारी के जम्मो रूख, लबानोन के चुने अऊ सबले बने, भरपूर पानी ले पलोय गय रूखमन ला धरती के खाल्हे म सांतवना मिलिस।
EZE 31:17 बड़े देवदार के रूख सहीं, ओमन घलो ओ मिरतू-लोक म खाल्हे गीन, जेमन तलवार ले मारे गे रिहिन; संग म ओ हथियारबंद आदमीमन घलो रिहिन, जेमन जाति-जाति के मनखेमन के बीच येकर छइहां म रहत रिहिन।
EZE 31:18 “ ‘सोभा अऊ गौरव म, अदन के कोन रूख के तुलना तोर ले करे जा सकत हे? तभो ले तोला भी अदन के रूखमन के संग धरती के खाल्हे लाय जाही; तें ओ खतनारहित मनखेमन के बीच पड़े रहिबे, जेमन तलवार ले मारे गे हवंय। “ ‘अइसने फिरौन अऊ ओकर जम्मो उपदरवी मनखेमन के संग होही, परमपरधान यहोवा ह घोसना करत हे।’ ”
EZE 32:1 हमर बंधुवई के बारहवां बछर के, बारहवां महिना के पहिला दिन, यहोवा के बचन ह मोर मेर आईस:
EZE 32:2 “हे मनखे के बेटा, मिसर के राजा फिरौन के बिसय म एक बिलापगीत ले अऊ ओला कह: “ ‘जाति-जाति के मनखेमन के बीच तेंह एक सिंह सहीं अस; समुंदर म तें एक बहुंत बड़े जन्तु सहीं अस तें अपन सोतामन म मजा लेथस, अपन पांव ले पानी ला एती-ओती करथस अऊ सोतामन ला चीखला ले भर देथस।
EZE 32:3 “ ‘परमपरधान यहोवा ह ये कहत हे: “ ‘मनखेमन के एक बड़े भीड़ के संग में तोर ऊपर अपन जाल ला फईलाहूं, अऊ ओमन तोला मोर जाल म ऊपर खींच लीहीं।
EZE 32:4 मेंह तोला भुइयां म फटिक दूहूं अऊ खुला मैदान म जोर से पटक दूहूं। मेंह अकास के जम्मो चिरईमन ला तोर ऊपर बसेरा करवाहूं अऊ जंगल के जम्मो पसु तोर मांस ला ठूंस-ठूंसके खाहीं।
EZE 32:5 मेंह तोर मांस ला पहाड़मन म फईला दूहूं अऊ घाटीमन ला तोर बांचे भागमन ले भर दूहूं।
EZE 32:6 मेंह तोर बहत खून ले पहाड़मन तक के भुइयां ला भिगो दूहूं, अऊ घाटीमन तोर मांस ले भर जाहीं।
EZE 32:7 जब मेंह तोला सुंघके निकालहूं, तब मेंह अकास ला ढांप दूहूं अऊ ओकर तारामन ला अंधियार कर दूहूं; मेंह सूरज ला बादर ले ढांप दूहूं, अऊ चंदा ह अपन अंजोर नइं दीही।
EZE 32:8 अकास म चमकत जम्मो अंजोरमन ला मेंह तोर बर अंधियार कर दूहूं; मेंह तोर देस म अंधियार ले आहूं, परमपरधान यहोवा ह घोसना करत हे।
EZE 32:9 जब जाति-जाति के मनखेमन के बीच अऊ ओ देसमन के बीच, जेला तेंह नइं जानस, मेंह तोर बिनास के बात लाहूं, तब मेंह बहुंते मनखेमन के मन ला बियाकुल करहूं।
EZE 32:10 जब में ओमन के आघू म अपन तलवार चलाहूं, तब में बहुंते मनखेमन ला तोर ले भयभीत करवाहूं, अऊ ओमन के राजामन तोर कारन बहुंते भयभीत होके कांपहीं। तोर पतन के दिन ओमा के हर एक झन अपन जिनगी बर हर पल कांपही।
EZE 32:11 “ ‘काबरकि परमपरधान यहोवा ह ये कहत हे: “ ‘बेबिलोन के राजा के तलवार तोर ऊपर चलही।
EZE 32:12 मेंह तोर उपदरवी मनखेमन ला सक्तिसाली आदमीमन के तलवार ले मरवाहूं— ये सक्तिसाली आदमीमन जम्मो जाति म सबले जादा निरदयी अंय। ओमन मिसर के घमंड ला चकनाचूर कर दीहीं, अऊ ओकर जम्मो उपदरवी मनखेमन नास कर दिये जाहीं।
EZE 32:13 में ओकर जम्मो पसुमन ला पानीवाले तरियामन के तीर ले नास कर दूहूं जेकर ले पानी ह मनखे के गोड़ ले मईला नइं होही अऊ न ही पसुमन के खुर ले उहां गंदा चीखला होही।
EZE 32:14 तब मेंह ओमा के पानी ला निरमल कर दूहूं अऊ ओकर सोतामन ले पानी ला तेल असन बहाहूं, परमपरधान यहोवा ह घोसना करत हे।
EZE 32:15 जब मेंह मिसर देस ला उजाड़हूं अऊ देस के जम्मो चीज ला छीन लूहूं, जब में उहां रहइया जम्मो झन ला मार डारहूं, तब ओमन जानहीं कि मेंह यहोवा अंव।’
EZE 32:16 “येह ओ बिलापगीत अय, जेला ओमन ओकर बर गाहीं। जाति-जाति के बेटीमन येला गाहीं; मिसर अऊ ओकर जम्मो उपदरवी मनखेमन बर ओमन येला गाहीं, परमपरधान यहोवा ह घोसना करत हे।”
EZE 32:17 हमर बंधुवई के बारहवां बछर के, पहिला महिना के पंदरहवां दिन, यहोवा के बचन मोर मेर आईस:
EZE 32:18 “हे मनखे के बेटा, मिसर देस के उपदरवी मनखेमन बर सोक मना अऊ ओला अऊ सक्तिसाली जातिमन के बेटीमन ला ओ मनखेमन के संग धरती ला सऊंप दे, जेमन खाल्हे कबर म जाथें।
EZE 32:19 ओमन ले कह, ‘का तुम्हर ऊपर आने मन ले जादा किरपा होथे? खाल्हे जाके खतनारहित मनखेमन के बीच लेट जावव।’
EZE 32:20 ओमन ओहीच मनखेमन के बीच गिरहीं, जेमन तलवार ले मारे गे हवंय। तलवार ला मियान ले निकाले गे हवय; ओला ओकर जम्मो उपदरवी मनखेमन के संग घसीटके ले जावव।
EZE 32:21 मिरतू-लोक के भीतर के ही सक्तिसाली अगुवामन मिसर अऊ ओकर संग के मनखेमन के बारे म कहिहीं, ‘ओमन खाल्हे आ गे हवंय अऊ ओमन ओ खतनारहित मनखेमन के संग पड़े हवंय, जेमन तलवार ले मारे गे हवंय।’
EZE 32:22 “अपन जम्मो सेना समेत अस्सूर घलो उहां हवय; ओकर मारे गय जम्मो मनखेमन के कबर ओकर चारों खूंट म हवय, ओ जम्मो जेमन तलवार ले मारे गे हवंय।
EZE 32:23 ओमन के कबरमन खंचवामन के गहरई म हवंय अऊ ओकर सेना ओकर कबर के चारों खूंट लेटे हवय। ओ जम्मो जेमन जीयतमन के देस म आतंक फईलाय रिहिन, मार डारे गे हवंय, ओमन तलवार ले मारे गे हवंय।
EZE 32:24 “एलाम उहां हवय, अऊ ओकर जम्मो उपदरवी मनखेमन ओकर कबर के चारों खूंट हवंय। ओ जम्मो तलवार ले मारे गे हवंय। ओ जम्मो जेमन जीयत मनखेमन के देस म आतंक फईलाय रिहिन, ओमन खाल्हे धरती म खतनारहित दसा म चले गे हवंय। ओमन ओ मनखेमन के संग सरमिंदा हवंय, जेमन खाल्हे कबर म जाथें।
EZE 32:25 मारे गय मनखेमन के बीच ओकर बर एक बिस्तर बनाय गे हवय, अऊ ओकर जम्मो उपदरवी मनखेमन ओकर कबर के चारों कोति हवंय। ओ जम्मो के जम्मो खतनारहित मनखे अंय अऊ तलवार ले मारे गे हवंय। काबरकि ओमन के आतंक जीयतमन के देस म फईले रिहिस, एकरसेति ओमन ओ मनखेमन के संग सरमिंदा हवंय, जेमन खाल्हे कबर म जाथें; ओमन ला मारे गय मनखेमन के बीच रखे गे हवय।
EZE 32:26 “मेसेक अऊ तूबल उहां हवंय, अऊ ओमन के जम्मो उपदरवी मनखे ओमन के कबर के चारों खूंट हवंय। ओ जम्मो के जम्मो खतनारहित मनखे अंय अऊ तलवार ले मारे गे हवंय काबरकि जीयत मनखेमन के देस म ओमन आतंक फईलाय रिहिन।
EZE 32:27 पर ओमन ओ मर गय पुराना योद्धामन के संग नइं पड़े हवंय, जेमन अपन लड़ई के हथियार के संग मिरतू-लोक म खाल्हे चले गीन—ओमन के तलवारमन ओमन के मुड़ी के खाल्हे म माढ़े रिहिन अऊ ओमन के ढालमन ओमन के हाड़ामन म पड़े रिहिन—हालाकि ये योद्धामन घलो जीयत मनखेमन के देस ला आतंकित करके रखे रिहिन।
EZE 32:28 “हे फिरौन, तोला घलो कुटा-कुटा कर दिये जाही अऊ तेंह घलो ओ खतनारहित मनखेमन के बीच पड़े रहिबे, जेमन तलवार ले मारे गे हवंय।
EZE 32:29 “एदोम, ओकर राजामन अऊ ओकर जम्मो राजकुमारमन उहां हवंय; अपन सक्ति के बावजूद, ओमन ओ मनखेमन के संग पड़े हवंय, जेमन तलवार ले मारे गे हवंय। ओमन ओ खतनारहित मनखेमन के संग पड़े हवंय, जेमन खाल्हे कबर म जाथें।
EZE 32:30 “उत्तर दिग के जम्मो हाकिम अऊ जम्मो सीदोनीमन घलो उहां हवंय; अपन सक्ति ले आतंक फईलाय के बावजूद, ओमन कलंकित होके मारे गय मनखेमन के संग कबर म चले गीन। ओमन खतनारहित दसा म ओमन के संग पड़े हवंय, जेमन तलवार ले मारे गे हवंय अऊ ओमन के संग सरमिंदा हवंय, जेमन खाल्हे कबर म जाथें।
EZE 32:31 “फिरौन—ओ अऊ ओकर जम्मो सेना—येमन ला देखहीं अऊ ओला अपन ओ जम्मो उपदरवी मनखेमन के बारे म सांतवना मिलही, जेमन तलवार ले मारे गे रिहिन, परमपरधान यहोवा ह घोसना करत हे।
EZE 32:32 हालाकि मेंह जीयत मनखेमन के देस म फिरौन के आतंक फईला देय रहेंव, तभो ले ओह अऊ ओकर जम्मो उपदरवी मनखे ओ खतनारहित मनखेमन के बीच पड़े रहिहीं, जेमन तलवार ले मारे गे हवंय, परमपरधान यहोवा ह घोसना करत हे।”
EZE 33:1 यहोवा के ये बचन मोर मेर आईस:
EZE 33:2 “हे मनखे के बेटा, अपन मनखेमन ले गोठिया अऊ ओमन ला कह: ‘जब में कोनो देस ऊपर तलवार चलाथंव, अऊ ओ देस के मनखेमन अपन कोनो आदमी ला चुनके पहरेदार बनाथें,
EZE 33:3 अऊ ओ पहरेदार ह देखथे कि देस के बिरूध तलवार चलइया हे अऊ ओह तुरही फूंकके मनखेमन ला चेताथे,
EZE 33:4 तब कहूं कोनो मनखे तुरही के अवाज ला सुनके चेतउनी ऊपर धियान नइं देवय अऊ तलवार ह आके ओकर परान ले लेथे, त ओकर खून के दोस ओकरेच मुड़ ऊपर होही।
EZE 33:5 ओह तुरही के अवाज ला सुनिस, पर चेतउनी ऊपर धियान नइं दीस, एकरसेति ओकर खून के दोस ओकरेच मुड़ ऊपर होही। यदि ओह चेतउनी ऊपर धियान देय रहितिस, त ओह अपन परान ला बचा लेतिस।
EZE 33:6 पर यदि पहरेदार ह बईरी के तलवार ला आवत देखथे अऊ मनखेमन ला चेतउनी देय बर तुरही नइं फूंकय अऊ तलवार ह आके कोनो मनखे के परान ले लेथे, त ओकर पाप के कारन ओ मनखे के परान ले लिये जाही, पर में ओकर खून बर ओ पहरेदार ला जिम्मेदार ठहिराहूं।’
EZE 33:7 “हे मनखे के बेटा, मेंह तोला इसरायल के मनखेमन बर एक पहरेदार ठहिराय हंव; एकरसेति जऊन बात मेंह कहत हंव, ओला सुन अऊ ओमन ला मोर कोति ले चेता दे।
EZE 33:8 जब मेंह दुस्ट मनखे ला कहिथंव, ‘हे दुस्ट मनखे, तेंह जरूर मरबे,’ अऊ तें ओ मनखे ला ओकर चालचलन बदले बर नइं कहस, त ओ दुस्ट मनखे ह अपन पाप के कारन मरही, अऊ मेंह तोला ओकर खून बर जिम्मेदार ठहिराहूं।
EZE 33:9 पर यदि तेंह दुस्ट मनखे ला ओकर चालचलन बदले बर चेताथस अऊ ओह अपन चालचलन ला नइं बदलय, त ओह अपन पाप के कारन मरही, पर तेंह खुद बच जाबे।
EZE 33:10 “हे मनखे के बेटा, इसरायलीमन ले कह, ‘तुमन ये कहत हव: “हमर पाप अऊ अपराध हमन ला खाल्हे गिराथें, अऊ हमन ओमन के कारन बेकार होवत हन। तब हमन कइसे जीयत रह सकत हन?” ’
EZE 33:11 ओमन ले कह, ‘मोर जिनगी के सपथ, परमपरधान यहोवा ह घोसना करत हे, में दुस्ट मनखे के मरे ले खुस नइं होवंव, पर बने ये होही कि ओह अपन चालचलन ला बदले अऊ जीयत रहय। बदलव! अपन खराप चालचलन ला बदलव! हे इसरायल के मनखेमन, तुमन काबर मरहू?’
EZE 33:12 “एकरसेति, हे मनखे के बेटा, अपन मनखेमन ले कह, ‘यदि कोनो धरमी मनखे हुकूम ला नइं माने, तब ओकर पहिले के धरमीपन के कोनो मतलब नइं होवय। पर यदि दुस्ट मनखे ह पछताप करथे, त ओ मनखे के पहिले के दुस्टता के कारन ओला दंड नइं मिलय। जऊन धरमी मनखे ह पाप करथे, त ओह जीयत नइं रहय, हालाकि पहिले ओह धरमी रिहिस।’
EZE 33:13 यदि मेंह एक धरमी ले कहंव कि ओह जरूर जीयत रहिही, पर तब ओह अपन धरमीपन म भरोसा करके दुस्ट काम करे लगथे, तब ओकर दुवारा करे गय कोनो भी धरमी काम ला सुरता नइं करे जाही; ओह अपन करे गय दुस्ट काम के कारन मरही।
EZE 33:14 अऊ यदि में कोनो दुस्ट मनखे ले ये कहिथंव, ‘तेंह जरूर मरबे,’ पर तब ओह अपन पाप ले मन फिराथे अऊ ओ काम करथे, जऊन ह उचित अऊ सही अय—
EZE 33:15 यदि ओह गिरवी रखे चीज ला लहुंटा देथे, चोरी करे गय चीज ला लहुंटा देथे, जिनगी देवइया नियममन के पालन करथे, अऊ कोनो दुस्टता नइं करय—त ओ मनखे ह जरूर जीयत रहिही; ओह नइं मरय।
EZE 33:16 ओकर दुवारा करे गय कोनो भी पाप ला फेर सुरता नइं करे जाही। ओह उचित अऊ सही काम करे हवय; ओह जरूर जीयत रहिही।
EZE 33:17 “तभो ले तुम्हर मनखेमन कहिथें, ‘परभू के नीति ह उचित नो हय।’ पर येह ओमन के नीति अय, जऊन ह नियाय-संगत नो हय।
EZE 33:18 यदि कोनो धरमी मनखे अपन धरमीपन ला छोंड़के दुस्ट काम करथे, त ओह अपन दुस्ट काम के कारन मरही।
EZE 33:19 अऊ यदि कोनो दुस्ट मनखे अपन दुस्टता ला छोंड़ देथे, अऊ ओ काम करथे, जऊन ह उचित अऊ सही अय, त ओह अपन ये काममन के कारन जीयत रहिही।
EZE 33:20 तभो ले तुम इसरायलीमन कहिथव, ‘परभू के नीति ह उचित नो हय।’ पर में तुमन म ले हर एक के नियाय ओकर काम के मुताबिक करहूं।”
EZE 33:21 हमर बंधुवई के बारहवां बछर के दसवां महिना के पांचवां दिन, एक मनखे, जऊन ह यरूसलेम ले भागके बांच गेय रिहिस, ओह मोर मेर आके कहिस, “सहर के पतन हो गे हवय!”
EZE 33:22 ओ मनखे के आय के पहिली के सांझ के बेरा यहोवा के किरपा मोर ऊपर होईस, अऊ ओह मोर मुहूं ला ओ मनखे के आघू म खोलिस, जेह बिहनियां मोर मेर आईस। ये किसम ले मोर मुहूं ह खुल गीस अऊ फेर मेंह चुप नइं रहेंव।
EZE 33:23 तब यहोवा के बचन ह मोर मेर आईस:
EZE 33:24 “हे मनखे के बेटा, ओ मनखे, जेमन इसरायल देस के खंडहरमन म रहत हवंय, ओमन कहत हें, ‘अब्राहम ह सिरिप एकेच झन रिहिस, तभो ले ओह देस ऊपर अधिकार कर लीस; पर हमन तो अब्बड़ झन हवन; खचित ये देस हमन ला हमर अधिकार म दिये गे हवय।’
EZE 33:25 एकरसेति ओमन ले कह, ‘परमपरधान यहोवा ह ये कहत हे: जब तुमन मांस ला खून समेत खाथव, अऊ अपन मूरतीमन कोति देखके खून करथव, तब का तुमन ला ओ देस ऊपर अधिकार करना चाही?
EZE 33:26 तुमन अपन तलवार ऊपर निरभर रहिथव, तुमन घिनौना काम करथव, अऊ तुमन म ले हर एक अपन परोसी के घरवाली ला असुध करथव। तब का तुमन ला ओ देस ऊपर अधिकार करना चाही?’
EZE 33:27 “तें ओमन ले ये कह: ‘परमपरधान यहोवा ह ये कहत हे: मोर जिनगी के कसम, जेमन ये खंडहरमन म रहत हवंय ओमन तलवार ले मारे जाहीं, जऊन मन खुले मैदान म हवंय, ओमन ला मेंह जंगली पसुमन के आहार होय बर दे दूहूं, अऊ जऊन मन गढ़मन अऊ गुफामन म हवंय, ओमन महामारी ले मारे जाहीं।
EZE 33:28 मेंह ओ देस ला उजाड़ अऊ निरजन बना दूहूं, अऊ ओकर घमंड ले भरे ताकत के अन्त हो जाही, अऊ इसरायल के पहाड़मन सुनसान हो जाहीं, जेकर कारन उहां ले होवत कोनो भी नइं जाहीं।
EZE 33:29 ओ मनखेमन के दुवारा करे गय जम्मो घिनौना काममन के कारन जब में ओ देस ला उजाड़ अऊ निरजन बना दूहूं, तब ओमन जानहीं कि मेंह यहोवा अंव।’
EZE 33:30 “हे मनखे के बेटा, जहां तक तोर बात ए, तोर मनखेमन तोर बारे म भीथीमन के तीर अऊ घरमन के कपाटमन म एक संग गोठियावत हें अऊ एक-दूसर ले ये कहत हें, ‘आवव अऊ ओ संदेस ला सुनव, जऊन ह यहोवा कोति ले आय हवय।’
EZE 33:31 मोर मनखेमन तोर मेर आथें, जइसे कि ओमन सधारन रूप म करथें, अऊ ओमन तोर बचन सुने बर तोर आघू म बईठथें, पर ओमन ओ बचन के मुताबिक नइं चलंय। ओमन मुहूं ले मया के बात तो करथें, पर ओमन के मन ह अनियाय के कमई म लगे रहिथे।
EZE 33:32 वास्तव म, तेंह ओमन के नजर म सिरिप एक अइसने मनखे अस, जऊन ह मीठा अवाज म मया के गीत गाथे अऊ बढ़िया बाजा बजाथे, काबरकि ओमन तोर बचन ला तो सुनथें, पर ओ बचन के मुताबिक नइं चलंय।
EZE 33:33 “जब ये जम्मो बातमन घटहीं—अऊ येमन जरूर होहीं—तब ओमन जानहीं कि ओमन के बीच एक अगमजानी रिहिस।”
EZE 34:1 यहोवा के बचन ह मोर मेर आईस:
EZE 34:2 “हे मनखे के बेटा, इसरायल के चरवाहामन के बिरूध म अगमबानी कर; अगमबानी कर अऊ ओमन ले कह: ‘परमपरधान यहोवा ह ये कहत हे: हे इसरायल के चरवाहामन, तुम्हर ऊपर धिक्कार ए, जेमन सिरिप अपनेच खियाल रखथव! का चरवाहामन ला झुंड के देखरेख नइं करना चाही?
EZE 34:3 तुमन दही खाथव, ऊन के ओनहा पहिरथव अऊ खाय बर छांटके पसुमन ला काटथव, पर तुमन झुंड के खियाल नइं रखव।
EZE 34:4 तुमन बिमरहामन ला बलवान नइं करेव, न ही रोगीमन ला चंगा करेव, अऊ न ही घायलमन ला मरहम पट्टी करेव। तुमन भटके मन ला सही रसता म नइं लानेव या गंवायमन ला नइं खोजेव। तुमन ओमन ऊपर कठोरता अऊ निरदयता से सासन करे हव।
EZE 34:5 कोनो चरवाहा नइं होय के कारन ओमन तितिर-बितिर हो गीन, अऊ जब ओमन तितिर-बितिर हो गीन, त ओमन जम्मो जंगली पसुमन के खाना हो गीन।
EZE 34:6 मोर भेड़मन जम्मो पहाड़मन अऊ ऊंच-ऊंच पहाड़ीमन ऊपर भटकत रिहिन। ओमन जम्मो धरती ऊपर तितिर-बितिर हो गीन, अऊ कोनो भी ओमन ला नइं खोजिन या ओमन के खियाल नइं रखिन।
EZE 34:7 “ ‘एकरसेति हे चरवाहामन, यहोवा के बचन ला सुनव:
EZE 34:8 परमपरधान यहोवा ह घोसना करत हे, मोर जिनगी के कसम, काबरकि मोर झुंड के कोनो चरवाहा नइं एं अऊ एकरसेति ओला लूटे गे हवय अऊ ओह जम्मो जंगली पसुमन के आहार बन गे हवय, अऊ काबरकि मोर चरवाहामन मोर झुंड के खोज नइं करिन अऊ मोर झुंड ऊपर धियान देय के बदले अपनआप के ही धियान रखिन,
EZE 34:9 एकरसेति, हे चरवाहामन, यहोवा के बचन ला सुनव:
EZE 34:10 परमपरधान यहोवा ह ये कहत हे: मेंह चरवाहामन के बिरूध हवंव अऊ मेंह ओमन ले अपन झुंड के लेखा लूहूं। मेंह ओमन ला झुंड ला चराय के काम ले हटा दूहूं ताकि चरवाहामन फेर अपन भरन-पोसन झन कर सकंय। मेंह ओमन के मुहूं ले अपन झुंड ला छोंड़ाहूं, अऊ ओमन फेर चरवाहामन के जेवन नइं होहीं।
EZE 34:11 “ ‘काबरकि परमपरधान यहोवा ह ये कहत हे: मेंह खुद अपन भेड़मन ला खोजहूं अऊ ओमन के देखभाल करहूं।
EZE 34:12 जइसने एक चरवाहा अपन बगरे झुंड के देखभाल करथे, जब ओह ओमन के संग होथे, वइसनेच मेंह घलो अपन भेड़मन के देखभाल करहूं। मेंह ओमन ला ओ जम्मो ठऊरमन ले निकालके ले आहूं, जिहां ओमन बादर अऊ अंधियार के दिन म तितिर-बितिर हो गे रिहिन।
EZE 34:13 मेंह ओमन ला जाति-जाति के मनखेमन के बीच ले निकाल लानहूं अऊ ओमन ला देस-देस ले इकट्ठा करहूं, अऊ मेंह ओमन ला ओमन के खुद के देस म ले आहूं। मेंह ओमन ला इसरायल के पहाड़मन ऊपर, घाटीमन म अऊ देस के ओ जम्मो जगह म चराहूं, जिहां मनखेमन बस गे हवंय।
EZE 34:14 मेंह ओमन ला बने चरागन म चराहूं, अऊ इसरायल के पहाड़ के ऊंच-ऊंच जगहमन ओमन के चरे के भुइयां होहीं। उहां ओमन चरे के बने जगह म बईठहीं, अऊ उहां ओमन इसरायल के पहाड़मन ऊपर एक ठन बने चरागन म चरहीं।
EZE 34:15 मेंह खुद अपन भेड़मन ला चराहूं अऊ ओमन ला अराम करवाहूं, परमपरधान यहोवा ह घोसना करत हे।
EZE 34:16 मेंह गंवायमन ला खोजहूं अऊ भटकेमन ला वापिस ले आहूं। मेंह घायलमन ला मरहम पट्टी करहूं अऊ जेमन कमजोर हवंय, ओमन ला ताकतवर बनाहूं, पर जेमन चिकना अऊ मोटा-ताजा हवंय, ओमन ला नास करहूं। मेंह नियाय के संग झुंड के देखभाल करहूं।
EZE 34:17 “ ‘जहां तक तुम्हर बात ए, हे मोर झुंड, परमपरधान यहोवा ह ये कहत हे: मेंह एक भेड़ अऊ दूसर भेड़ के बीच, अऊ मेढ़ा अऊ बोकरामन के बीच नियाय करहूं।
EZE 34:18 का येह तुम्हर बर परयाप्त नो हय कि तुमन बने चरागन म चरव? का जरूरी अय कि अपन बाकि बचे चरागन ला अपन गोड़ ले कुचर दव? का निरमल पानी पीयई तुम्हर बर परयाप्त नो हय? का जरूरी अय कि बाकि पानी ला अपन गोड़ ले गंदा कर दव?
EZE 34:19 का जरूरी अय कि मोर झुंड ह ओमा ले खावय, जेला तुमन कुचर दे हव अऊ ओमा ले पीयय, जेला तुमन अपन गोड़ ले मतला दे हव?
EZE 34:20 “ ‘एकरसेति परमपरधान यहोवा ह ओमन ले ये कहत हे: देखव, मेंह खुद मोटहा भेड़ अऊ पातर भेड़मन के बीच नियाय करहूं।
EZE 34:21 काबरकि तुमन जम्मो दुरबल भेड़मन ला अपन बाजू अऊ अपन कंधा ले तब तक ढकेलत अऊ सींग मारत रहिहू, जब तक कि ओमन दूरिहा नइं चले जावंय,
EZE 34:22 मेंह अपन झुंड ला बचाहूं, अऊ ओमन ला फेर नइं लूटे जाही। मेंह एक भेड़ अऊ दूसर भेड़ के बीच नियाय करहूं।
EZE 34:23 मेंह ओमन ऊपर एक चरवाहा, अपन सेवक दाऊद ला ठहिराहूं, अऊ ओह ओमन ला चराही; ओह ओमन ला चराही अऊ ओमन के चरवाहा होही।
EZE 34:24 में यहोवा ह ओमन के परमेसर ठहिरहूं, अऊ मोर सेवक दाऊद ह ओमन के बीच हाकिम होही। में यहोवा ह ये कहे हवंव।
EZE 34:25 “ ‘में ओमन के संग सांति के एक करार करहूं अऊ देस ला दुस्ट पसुमन ले छुटकारा दूहूं, ताकि ओमन निरजन प्रदेस म सुरकछित रहंय अऊ जंगल म बिगर डरके सोवंय।
EZE 34:26 मेंह ओमन ला अऊ अपन पहाड़ी के आसपास के ठऊरमन ला आसीस के कारन बना दूहूं। मेंह सही बेरा म बारिस भेजहूं; उहां आसीस के बारिस होही।
EZE 34:27 रूखमन म फर लगहीं अऊ भुइयां ह अपन ऊपज दीही; मनखेमन अपन देस म सुरकछित होहीं। जब में ओमन के जुड़ा ला टोरके ओमन ला ओ मनखेमन के हांथ ले छोंड़ाहूं, जेमन ओमन ला गुलाम बना ले हवंय, तब ओमन जानहीं कि मेंह यहोवा अंव।
EZE 34:28 ओमन जाति-जाति के मनखेमन के दुवारा फेर लूटे नइं जाहीं, अऊ न ही जंगली पसुमन ओमन ला फाड़के खाहीं। ओमन सुरकछित रहिहीं, अऊ ओमन ला कोनो नइं डरवाहीं।
EZE 34:29 मेंह ओमन ला एक अइसन देस दूहूं, जऊन ह अपन फसल बर जाने जाथे, अऊ ओमन देस म फेर अकाल ले पीड़ित नइं होहीं या जाति-जाति के मनखेमन ओमन ला अपमानित नइं करहीं।
EZE 34:30 तब ओमन जानहीं कि में, यहोवा ओमन के परमेसर ओमन के संग हवंव अऊ ये कि ओ, इसरायलीमन, मोर मनखे अंय, परमपरधान यहोवा ह घोसना करत हे।
EZE 34:31 तुमन मोर भेड़ अव, मोर चरागन के भेड़, अऊ मेंह तुम्हर परमेसर अंव, परमपरधान यहोवा ह घोसना करत हे।’ ”
EZE 35:1 यहोवा के बचन मोर मेर आईस:
EZE 35:2 “हे मनखे के बेटा, अपन मुहूं ला सेईर पहाड़ कोति करके; ओकर बिरूध अगमबानी कर
EZE 35:3 अऊ कह: ‘परमपरधान यहोवा ह ये कहत हे: हे सेईर पहाड़, मेंह तोर बिरूध हवंव, अऊ में अपन हांथ तोर बिरूध बढ़ाहूं अऊ मेंह तोला निरजन अऊ उजाड़ कर दूहूं।
EZE 35:4 मेंह तोर नगरमन ला खंडहर कर दूहूं अऊ तेंह निरजन हो जाबे। तब तेंह जान लेबे कि मेंह यहोवा अंव।
EZE 35:5 “ ‘काबरकि तेंह पुराना जमाना ले बईरता रखत रहय अऊ इसरायलीमन के संकट के बेरा म तेंह ओमन ला तलवार के अधीन कर देय, येह ओ समय रिहिस जब ओमन के दंड ह चरम सीमा म रिहिस,
EZE 35:6 एकरसेति मेंह अपन जिनगी के सपथ खाके कहत हंव, परमपरधान यहोवा ह घोसना करत हे, मेंह तोला तोर खून बहाय बर दे दूहूं अऊ खून बहई ह तोर पीछा करही। काबरकि तें खून बहई ले घिन नइं करस, एकरसेति खून बहई ह तोर पीछा करही।
EZE 35:7 मेंह सेईर पहाड़ ला निरजन अऊ उजाड़ कर दूहूं अऊ ओ जम्मो ला नास कर दूहूं, जेमन येमा ले होके आथें-जाथें।
EZE 35:8 मेंह तोर पहाड़मन ला मारे गय मनखेमन ले भर दूहूं; जेमन तलवार ले मारे जाहीं, ओमन तोर पहाड़ीमन ऊपर अऊ तोर घाटीमन म अऊ तोर जम्मो पहाड़ी दर्रामन म गिरहीं।
EZE 35:9 मेंह तोला सदाकाल बर उजाड़ कर दूहूं; तोर नगरमन म फेर कोनो नइं बसहीं। तब तेंह जानबे कि मेंह यहोवा अंव।
EZE 35:10 “ ‘काबरकि तेंह कहे हस, “ये दूनों जाति अऊ ये दूनों देस हमर होहीं अऊ हमन ओमन ला अपन अधिकार म ले लेबो,” हालाकि में यहोवा ह उहां रहेंव,
EZE 35:11 एकरसेति मोर जिनगी के सपथ, परमपरधान यहोवा ह घोसना करत हे, ओमन ले जब तें घिन करत रहय, ओ समय तेंह जऊन कोरोध अऊ जलन देखाय, ओकरे मुताबिक मेंह तोर ले बरताव करहूं अऊ जब मेंह तोर नियाय करहूं, तब में अपनआप ला ओमन के बीच परगट करहूं।
EZE 35:12 तब तेंह जानबे कि में यहोवा ह ओ जम्मो तुछ बातमन ला सुने हवंव, जेला तेंह इसरायल के पहाड़मन के बिरूध कहे हस। तेंह कहय, “ओमन उजाड़ पड़े हवंय अऊ ओमन ला हमर जेवन बर देय गे हवय कि हमन ओमन ला खा डारन।”
EZE 35:13 तेंह मोर बिरूध म डींग मारत रहय अऊ मोर बिरूध म बिगर रूके कहत रहय, अऊ मेंह ओ जम्मो बात ला सुने हंव।
EZE 35:14 परमपरधान यहोवा ह ये कहत हे: जब पूरा धरती ह आनंदित होही, तब मेंह तोला उजाड़ दूहूं।
EZE 35:15 काबरकि जब इसरायल के उत्तराधिकार ह उजड़ गीस, तब तें आनंद मनाय, एकरसेति मेंह वइसने ही बरताव तोर संग करहूं। हे सेईर पहाड़, तें उजड़ जाबे, तें अऊ पूरा एदोम। तब ओमन जान लीहीं कि मेंह यहोवा अंव।’ ”
EZE 36:1 “हे मनखे के बेटा, इसरायल के पहाड़मन बर अगमबानी कर अऊ कह, ‘हे इसरायल के पहाड़मन, यहोवा के बचन ला सुनव।
EZE 36:2 परमपरधान यहोवा ह ये कहत हे: बईरी ह तुम्हर बिसय म कहिस, “अहा! पुराना जमाना के ऊंच ठऊरमन हमर अधिकार म आ गे हवंय।” ’
EZE 36:3 एकरसेति अगमबानी करके कह, ‘परमपरधान यहोवा ह ये कहत हे: काबरकि ओमन तुमन ला जम्मो कोति ले लूटिन अऊ कुचरिन, जेकर कारन तुमन बाकि जातिमन के अधीन हो गेव अऊ मनखेमन तुम्हर बारे म खराप बात कहिके तुम्हर निन्दा करे लगिन,
EZE 36:4 एकरसेति, हे इसरायल के पहाड़मन, परमपरधान यहोवा के बात ला सुनव: परमपरधान यहोवा ह पहाड़ अऊ पहाड़ीमन ले, तराई अऊ घाटीमन ले, उजड़े खंडहर अऊ तियाग दिये गय नगरमन ले, जेमन ला लूट लिये गीस अऊ जेमन के चारों कोति के बाकि जातिमन ओमन के हंसी उड़ाथें, ओ जम्मो ले कहत हे—
EZE 36:5 परमपरधान यहोवा ह ये कहत हे: बहुंत उत्साह म आके, मेंह बाकि जातिमन के बिरूध अऊ जम्मो एदोम के बिरूध कहे हंव, खुसी अऊ अपन मन म जलन के कारन, ओमन मोर देस ला अपन अधिकार म कर लीन ताकि ओमन येकर चरागन ला लूट सकंय।’
EZE 36:6 एकरसेति इसरायल देस के बिसय म अगमबानी कर अऊ पहाड़ अऊ पहाड़ीमन ले, तराई अऊ घाटीमन ले कह: ‘परमपरधान यहोवा ह ये कहत हे: मेंह अपन जलन अऊ कोप म आके कहिथंव, काबरकि तुमन जाति-जाति के मनखेमन के निन्दा ला सहे हवव।
EZE 36:7 एकरसेति परमपरधान यहोवा ह ये कहत हे: मेंह हांथ उठाके कसम खावत हंव कि तुम्हर चारों कोति के जातिमन घलो निन्दा के चीज बनहीं।
EZE 36:8 “ ‘पर हे इसरायल के पहाड़मन, तुमन म मोर इसरायली मनखेमन बर डारामन पनपहीं अऊ ओमा फर धरहीं, काबरकि ओमन जल्दी घर लहुंट आहीं।
EZE 36:9 मेंह तुम्हर बर चिंता करत हंव अऊ तुम्हर ऊपर किरपा-दिरिस्टी करहूं; तुमन ला जोते अऊ बोये जाही,
EZE 36:10 अऊ मेंह तुमन म बहुंत मनखेमन ला बसाहूं—हव, पूरा इसरायल ला। नगरमन ला बसाय जाही अऊ टूटे-फूटे घरमन ला फेर बनाय जाही।
EZE 36:11 मेंह तुमन म रहइया मनखे अऊ पसुमन के संखिया ला बढ़ाहूं, अऊ ओमन फरहीं अऊ बहुंत हो जाहीं। मेंह पहिले सहीं तुमन म मनखेमन ला बसाहूं अऊ मेंह तुम्हर पहिले से जादा उन्नति करहूं। तब तुमन जानहू कि मेंह यहोवा अंव।
EZE 36:12 मेंह अइसे करहूं कि मनखे याने कि मोर मनखे इसरायलीमन तुमन म बसहीं। ओमन तुमन ऊपर अधिकार कर लीहीं, अऊ तुमन ओमन के निज भाग होहू; तुमन फेर कभू ओमन के लइकामन ला छीनके अलग नइं करहू।
EZE 36:13 “ ‘परमपरधान यहोवा ह ये कहत हे: काबरकि कुछू मनखेमन तुम्हर ले कहिथंय, “तुमन मनखेमन ला खा जाथव अऊ अपन जाति के मनखेमन ले ओमन के लइकामन ला छीनके अलग कर देथव,”
EZE 36:14 एकरसेति तुमन फेर मनखेमन ला नइं खाहू या अपन जाति ला संतानहीन नइं करहू, परमपरधान यहोवा ह घोसना करत हे।
EZE 36:15 मेंह अइसे करहूं कि जाति-जाति के मनखेमन तुमन ला फेर ताना नइं मारहीं, अऊ फेर तुमन ला मनखेमन के अपमान सहे बर नइं पड़ही या तुमन अपन जाति के गिरे के कारन नइं बनहू, परमपरधान यहोवा ह घोसना करत हे।’ ”
EZE 36:16 यहोवा के बचन फेर मोर मेर आईस:
EZE 36:17 “हे मनखे के बेटा, जब इसरायल के मनखेमन अपन देस म रहत रिहिन, तब ओमन देस ला अपन चालचलन अऊ काममन के दुवारा असुध करिन। मोर नजर म ओमन के चालचलन ह कोनो माईलोगन के महिना होय के असुधता सहीं रिहिस।
EZE 36:18 एकरसेति मोर कोप ह ओमन ऊपर भड़किस काबरकि ओमन देस म खून बहाय रिहिन अऊ येला अपन मूरतीमन के दुवारा असुध करे रिहिन।
EZE 36:19 मेंह ओमन ला जाति-जाति के मनखेमन के बीच तितिर-बितिर कर देंव, अऊ ओमन देस-देस म बगर गीन; मेंह ओमन के चालचलन अऊ ओमन के काममन के अनुसार ओमन के नियाय करेंव।
EZE 36:20 अऊ जिहां भी ओमन ओ जातिमन के बीच गीन, ओमन मोर नांव ला अपबितर करिन, काबरकि ओमन के बारे म ये कहे गे रिहिस, ‘येमन यहोवा के मनखे अंय, तभो ले ओमन ला ओकर देस ला छोंड़े बर पड़िस।’
EZE 36:21 मोला मोर पबितर नांव के चिंता रिहिस, जेला इसरायल के मनखे जिहां भी गीन, उहां जाति-जाति के मनखेमन के बीच अपबितर करिन।
EZE 36:22 “ये खातिर इसरायलीमन ले कह, ‘परमपरधान यहोवा ह ये कहत हे: हे इसरायल के मनखेमन, जऊन कुछू मेंह करे बर जावत हंव, ओह तुम्हर कारन नइं, पर अपन पबितर नांव के कारन करे बर जावत हंव, जेला तुमन जिहां भी गेव, उहां तुमन जाति-जाति के मनखेमन के बीच अपबितर करेव।
EZE 36:23 मेंह अपन बड़े नांव के पबितरता ला देखाहूं, जेह जाति-जाति के मनखेमन के बीच अपबितर होईस हे, ओ नांव जेला तुमन ओमन के बीच अपबितर करे हव। तब मनखेमन जानहीं कि मेंह यहोवा अंव, परमपरधान यहोवा ह घोसना करत हे, जब में ओमन के आंखी के आघू म तुम्हर जरिये पबितर ठहिरहूं।
EZE 36:24 “ ‘काबरकि मेंह तुमन ला जातिमन ले बाहिर निकाल लूहूं; मेंह तुमन ला सब देसमन ले इकट्ठा करहूं अऊ तुमन ला तुम्हर खुद के देस म ले आहूं।
EZE 36:25 मेंह तुमन ऊपर सुध पानी छिंचहूं, अऊ तुमन सुध हो जाहू; मेंह तुमन ला तुम्हर जम्मो असुधता अऊ तुम्हर जम्मो मूरतीमन ले सुध करहूं।
EZE 36:26 मेंह तुमन ला नवां हिरदय दूहूं अऊ तुमन म एक नवां आतमा डालहूं; मेंह तुमन ले तुम्हर पथरा के हिरदय हटा दूहूं अऊ तुमन ला मांस के एक हिरदय दूहूं।
EZE 36:27 मेंह अपन आतमा तुमन म डालहूं अऊ अइसन करहूं कि तुमन मोर नियम म चलहू अऊ धियान देके मोर कानूनमन के पालन करहू।
EZE 36:28 तब तुमन ओ देस म रहिहू, जेला मेंह तुम्हर पुरखामन ला देय रहेंव; तुमन मोर मनखे होहू, अऊ मेंह तुम्हर परमेसर होहूं।
EZE 36:29 मेंह तुमन ला तुम्हर जम्मो असुधता ले छोंड़ाहूं। मेंह अनाज ला हुकूम दूहूं अऊ येला बहुंत कर दूहूं अऊ तुम्हर ऊपर अकाल नइं लानहूं।
EZE 36:30 मेंह रूखमन के फर के संखिया ला बढ़ाहूं अऊ खेत के फसल ला जादा उपजाहूं, ताकि अकाल के कारन, तुमन जाति-जाति के मनखेमन के बीच कलंकित झन होवव।
EZE 36:31 तब तुमन अपन खराप चालचलन अऊ दुस्टता के काममन ला सुरता करहू, तब तुमन अपन पाप अऊ घिनौना काममन के कारन अपनआप ले घिन करहू।
EZE 36:32 मेंह तुमन ला बताय चाहत हंव कि में ये सब तुम्हर बर नइं करत हंव, परमपरधान यहोवा ह घोसना करत हे। हे इसरायल के मनखेमन, अपन बरताव के कारन लज्जित अऊ कलंकित होवव!
EZE 36:33 “ ‘परमपरधान यहोवा ह ये कहत हे: जऊन दिन मेंह तुमन ला तुम्हर जम्मो पाप ले सुध करहूं, मेंह तुम्हर नगरमन ला फेर बसाहूं, अऊ खंडहरमन फेर बनाय जाहीं।
EZE 36:34 उजाड़ भुइयां म फसल उगाय जाही, एकर बदले कि ओह उहां ले अवइया-जवइया जम्मो मनखेमन के नजर म उजाड़ पड़े रहय।
EZE 36:35 ओमन कहिहीं, “ये भुइयां, जऊन ह उजाड़ पड़े रिहिस, अब अदन के बगीचा असन हो गे हवय, ओ सहर जेमन खंडहर अऊ उजाड़ होके नास हो गे रिहिन, ओमन अब गढ़वाले सहर हो गे हवंय, मनखेमन उहां रहे के सुरू कर दे हवंय।”
EZE 36:36 तब तुम्हर आसपास के बांचे जातिमन के मनखेमन जानहीं कि में, यहोवा ह नास हो गय जगहमन ला फेर बनाय हंव अऊ उजड़े जगहमन ला फेर बसाय हंव। में यहोवा ह ये कहे हंव, अऊ मेंह येला पूरा करहूं।’
EZE 36:37 “परमपरधान यहोवा ह ये कहत हे: एक बार फेर में इसरायल के बिनती ला स्वीकार करहूं अऊ येला ओमन बर करहूं: मेंह ओमन के मनखेमन के गनती ला भेड़-बकरीमन असन बहुंत बढ़ाहूं,
EZE 36:38 ओमन ला पसुमन के ओ झुंड सहीं बहुंत बढ़ाहूं, जेमन यरूसलेम म ठहिराय गय तिहारमन के बेरा बलिदान चघाय बर होथें। ये किसम ले ओ नास हो गय सहरमन मनखेमन के झुंड ले भर जाहीं। तब ओमन जानहीं कि मेंह यहोवा अंव।”
EZE 37:1 यहोवा के हांथ मोर ऊपर रिहिस, अऊ ओह मोला अपन आतमा के दुवारा बाहिर ले आईस अऊ एक घाटी के मांझा म ठाढ़ कर दीस; ओ घाटी ह हाड़ामन ले भरे पड़े रिहिस।
EZE 37:2 ओह मोला ओ हाड़ामन के बीच अवई-जवई म मोर अगुवई करिस, अऊ मेंह घाटी के तल म बहुंत अकन हाड़ा देखेंव, जेमन बहुंत सूखा रिहिन।
EZE 37:3 तब ओह मोर ले पुछिस, “हे मनखे के बेटा, का ये हाड़ामन जी सकत हें?” मेंह कहेंव, “हे परमपरधान यहोवा, येला सिरिप तेंहीच ह जानथस।”
EZE 37:4 तब ओह मोर ले कहिस, “ये हाड़ामन ले अगमबानी करके कह, ‘हे सूखा हाड़ामन, यहोवा के बचन ला सुनव!
EZE 37:5 परमपरधान यहोवा ह ये हाड़ामन ले ये कहत हे: मेंह तुमन म सांस डाल दूहूं, अऊ तुमन जी उठहू।
EZE 37:6 मेंह तुम्हर नसमन ला लगाहूं अऊ तुम्हर ऊपर मांस ले आहूं अऊ तुमन ला चाम ले ढांप दूहूं; अऊ तुमन म सांस फूंक दूहूं, अऊ तुमन जीयत मनखे हो जाहू। तब तुमन जानहू कि मेंह यहोवा अंव।’ ”
EZE 37:7 तब मेंह ये हुकूम के मुताबिक अगमबानी करेंव। अऊ जब मेंह अगमबानी करत रहेंव, त उहां एक अवाज होईस, एक खड़खड़ाहट के अवाज, अऊ हाड़ामन इकट्ठा होके एक-दूसर ले जुड़ गीन।
EZE 37:8 मेंह देखेंव कि ओमन म नस अऊ मांस-पेसी आ गीन अऊ ओमन चाम ले ढंक गीन, पर ओमन म सांस नइं रिहिस।
EZE 37:9 तब ओह मोर ले कहिस, “सांस ले अगमबानी कर; अगमबानी कर, हे मनखे के बेटा, अऊ ओला कह, ‘परमपरधान यहोवा ह ये कहत हे: हे सांस, चारों खूंट ले आके ये घात करे गय मनखेमन म हमा जा ताकि येमन जी उठंय।’ ”
EZE 37:10 यहोवा के ये हुकूम के अनुसार मेंह अगमबानी करेंव, अऊ सांस ह ओमन म हमा गीस; ओमन जीके अपन-अपन गोड़ म ठाढ़ हो गीन—एक बहुंत बड़े सेना।
EZE 37:11 फेर यहोवा ह मोर ले कहिस, “हे मनखे के बेटा, ये हाड़ामन इसरायल के मनखेमन अंय। ओमन कहिथंय, ‘हमर हाड़ामन सूख गे हवंय अऊ हमन कोनो आसा नइं करत हन; हमन अलग हो गे हन।’
EZE 37:12 ये खातिर अगमबानी करके ओमन ले कह: ‘परमपरधान यहोवा ह ये कहत हे: हे मोर मनखेमन, मेंह तुम्हर कबरमन ला खोले बर जावत हंव अऊ तुमन ला उहां ले निकालहूं; मेंह तुमन ला वापिस इसरायल देस म ले आहूं।
EZE 37:13 तब हे मोर मनखेमन, तुमन जानहू कि मेंह यहोवा अंव, जब में तुम्हर कबरमन ला खोल दूहूं अऊ तुमन ला उहां ले बाहिर निकालहूं।
EZE 37:14 मेंह अपन आतमा तुमन म डालहूं अऊ तुमन जीयत मनखे हो जाहू, अऊ मेंह तुमन ला तुम्हर खुद के देस म बसाहूं। तब तुमन जानहू कि में यहोवा ह कहे हंव, अऊ मेंह येला करे हवंव, यहोवा ह घोसना करत हे।’ ”
EZE 37:15 फेर यहोवा के ये बचन मोर मेर आईस:
EZE 37:16 “हे मनखे के बेटा, लकरी के एक ठन लउठी ले अऊ ओमा ये लिख, ‘यहूदा अऊ ओकर संग के इसरायलीमन।’ तब लकरी के एक ठन अऊ लउठी ले अऊ ओमा लिख, ‘यूसुफ (याने कि एपरैम) अऊ ओकर संग के जम्मो इसरायलीमन।’
EZE 37:17 ओ लउठीमन ला जोड़के एके ठन लउठी बना ले ताकि ओमन तोर हांथ म एके ठन हो जावंय।
EZE 37:18 “जब तोर मनखेमन तोर ले पुछहीं, ‘का तेंह हमन ला नइं बताबे कि येमन से तोर का मतलब अय?’
EZE 37:19 तब ओमन ले कहिबे, ‘परमपरधान यहोवा ह ये कहत हे: मेंह यूसुफ के लउठी ला लूहूं—जऊन ह एपरैम के हांथ म हवय—अऊ इसरायल के जऊन गोत्रमन ओकर संग जुड़े हवंय, ओमन ला लेके मेंह यहूदा के लउठी ले जोड़ दूहूं। मेंह ओमन ला लकरी के एके ठन लउठी बना दूहूं, अऊ ओमन मोर हांथ म एकेच लउठी हो जाहीं।’
EZE 37:20 जऊन लउठीमन म तेंह लिखे हस, ओमन ला ओमन के आंखी के आघू म धर
EZE 37:21 अऊ ओमन ले कह, ‘परमपरधान यहोवा ह ये कहत हे: मेंह इसरायलीमन ला ओ जातिमन ले बाहिर निकाल लूहूं, जिहां ओमन गे हवंय। मेंह ओमन ला चारों कोति ले इकट्ठा करहूं अऊ ओमन ला ओमन के खुद के देस म वापिस ले आहूं।
EZE 37:22 मेंह ओमन ला इसरायल के पहाड़मन ऊपर एके ठन जाति बना दूहूं। ओ जम्मो के ऊपर एकेच राजा होही अऊ ओमन फेर कभू दू ठन जाति नइं होहीं या दू ठन राज म नइं बंटहीं।
EZE 37:23 ओमन फेर अपन मूरती अऊ बेकार के चीजमन या अपन कोनो अधरम के दुवारा अपनआप ला असुध नइं करहीं, काबरकि मेंह ओमन ला ओमन के पहिले के जम्मो पाप ले भरे काममन ले बचाहूं, अऊ मेंह ओमन ला सुध करहूं। ओमन मोर मनखे होहीं, अऊ मेंह ओमन के परमेसर होहूं।
EZE 37:24 “ ‘मोर सेवक दाऊद ह ओमन के राजा होही, अऊ ओ जम्मो के एकेच चरवाहा होही। ओमन मोर कानून के पालन करहीं अऊ धियान देके मोर बिधिमन ला मानहीं।
EZE 37:25 ओमन ओ देस म रहिहीं, जेला मेंह अपन सेवक याकूब ला देय रहेंव, ओ देस जिहां तुम्हर पुरखामन रहत रिहिन। ओमन अऊ ओमन के लइकामन अऊ ओमन के लइका के लइकामन सदाकाल तक उहां रहिहीं, अऊ मोर सेवक दाऊद ह सदाकाल बर ओमन के हाकिम होही।
EZE 37:26 मेंह ओमन के संग म सांति के एक करार करहूं; येह हमेसा बने रहइया एक करार ठहिरही। मेंह ओमन ला बसाहूं अऊ ओमन के संखिया ला बढ़ाहूं, अऊ मेंह अपन पबितर-स्थान ला ओमन के बीच सदा बनाय रखहूं।
EZE 37:27 मोर निवास स्थान ओमन के संग होही; मेंह ओमन के परमेसर होहूं, अऊ ओमन मोर मनखे होहीं।
EZE 37:28 जब मोर पबितर-स्थान हमेसा बर ओमन के बीच होही, तब जाति-जाति के मनखेमन जानहीं कि में यहोवा ह इसरायल ला पबितर करथंव।’ ”
EZE 38:1 यहोवा के बचन मोर मेर आईस:
EZE 38:2 “हे मनखे के बेटा, मागोग देस के गोग कोति अपन मुहूं ला कर, जऊन ह रोस, मेसेक अऊ तूबल के मुखिया हाकिम ए; ओकर बिरूध म अगमबानी कर,
EZE 38:3 अऊ कह, ‘परमपरधान यहोवा ह ये कहत हे: हे गोग! रोस, मेसेक अऊ तूबल के मुखिया हाकिम, मेंह तोर बिरूध हवंव।
EZE 38:4 मेंह तोला उल्टा दिग म मोड़ दूहूं अऊ तोर जबड़ामन म कांटा डालके तोला तोर पूरा सेना के संग बाहिर ले आहूं—तोर घोड़ामन, पूरा हथियार धरे तोर घुड़सवारमन, अऊ छोटे अऊ बड़े ढाल धरे बड़े उपदरवी झुंड, जम्मो के जम्मो तलवार धरे हवंय।
EZE 38:5 फारस, कूस अऊ पूत अपन-अपन ढाल लेके अऊ टोप पहिरे ओमन के संग होहीं,
EZE 38:6 गोमेर अपन पूरा सेना के संग, दूरिहा उत्तर दिसा ले बेत-तोगरमा अपन पूरा सेना के संग—बहुंत अकन जातिमन ला तोर संग बाहिर ले आहूं।
EZE 38:7 “ ‘तियार हो जावव; तियारी कर लव, तें अऊ पूरा उपदरवी भीड़, जऊन ह तोर मेर इकट्ठा होय हवय, ओ जम्मो ला अपन अधीन कर ले।
EZE 38:8 बहुंत समय के बाद तोला हथियार धरे बर बलाय जाही। अवइया सालमन म तेंह एक देस ऊपर हमला करबे, जऊन ह लड़ई के बाद संभल गे होही, जेकर मनखेमन बहुंते जातिमन ले आके इसरायल के ओ पहाड़मन म इकट्ठा होहीं, जऊन ह बहुंत समय ले उजाड़ पड़े रिहिस। ओमन ला बहुंत जातिमन ले बाहिर लाय गे रिहिस, अऊ अब ओमन जम्मो सुरकछित रहिथें।
EZE 38:9 तें अऊ तोर पूरा सेना अऊ तोर संग बहुंते जाति के मनखेमन आंधी असन आघू बढ़हीं; तेंह ओ बादर असन होबे, जऊन ह देस के ऊपर छा जाथे।
EZE 38:10 “ ‘परमपरधान यहोवा ह ये कहत हे: ओ दिन तोर मन म अइसन बिचारमन आहीं कि तेंह एक दुस्ट योजना बनाबे।
EZE 38:11 तेंह कहिबे, “मेंह बिगर दीवारवाले गांवमन के एक देस ऊपर हमला करहूं; मेंह ओ मनखेमन ऊपर हमला करहूं, जेमन सांति म अऊ निडर रहिथें—ओमा के जम्मो झन बिगर कोनो दीवार अऊ बिगर दुवार अऊ पल्लामन के रहत हवंय।
EZE 38:12 मेंह ओमन ला लूटहूं अऊ ओमन ले छीन लूहूं अऊ मोर हांथ ह फेर बसाय गय खंडहरमन अऊ जाति-जाति ले इकट्ठा हो गय ओ मनखेमन के बिरूध उठही, जेमन करा बहुंत जादा पसु अऊ संपत्ति हवय अऊ जेमन देस के मांझा म रहिथें।”
EZE 38:13 सेबा अऊ ददान के मनखेमन अऊ तरसीस के बेपारीमन अऊ ओकर जम्मो गांवमन तोर ले कहिहीं, “का तेंह लूटे बर आय हस? का तेंह अपन उपदरवी भीड़ ला लूटे बर, सोन अऊ चांदी ले जाय बर, पसु अऊ सामान ले जाय बर अऊ लूट के सामान ऊपर कब्जा करे बर इकट्ठा करे हस?” ’
EZE 38:14 “एकरसेति, हे मनखे के बेटा, अगमबानी करके गोग ला कह, ‘परमपरधान यहोवा ह ये कहत हे: ओ समय, जब मोर इसरायली मनखेमन सुरकछित रहत होहीं, त का तोर धियान ये तरफ नइं जाही?
EZE 38:15 तेंह अपन जगह बहुंत दूरिहा उत्तर दिग ले आबे, तोर संग बहुंत जाति के मनखेमन होहीं, ओ जम्मो घोड़ामन म चघके आहीं; येह एक बड़े उपदरवी भीड़, एक सक्तिसाली सेना होही।
EZE 38:16 तेंह मोर मनखेमन के बिरूध ओ बादर असन आघू बढ़बे, जऊन ह देस ऊपर छा जाथे। हे गोग, अवइया दिनमन म, मेंह तोर ले मोरेच देस के बिरूध हमला करवाहूं, ताकि जब में तोर जरिये जाति-जाति के मनखेमन के आंखी के आघू म पबितर साबित होवंव, त ओमन मोला जानंय।
EZE 38:17 “ ‘परमपरधान यहोवा ह ये कहत हे: तेंह ओ अस, जेकर चरचा मेंह पहिले के समय म अपन सेवक याने कि इसरायल के अगमजानीमन के दुवारा करे रहेंव। ओ समय ओमन कतको साल तक अगमबानी करते रिहिन कि मेंह तोला ओमन के बिरूध लानहूं।
EZE 38:18 ओ दिन ये बात होही: जब गोग ह इसरायल देस ऊपर हमला करही, तब मोर गुस्सा ह बहुंत भड़कही, परमपरधान यहोवा ह घोसना करत हे।
EZE 38:19 में अपन उत्साह अऊ भयंकर कोप म घोसना करत हंव कि ओ समय इसरायल देस म एक बड़े भुइंडोल होही।
EZE 38:20 समुंदर के मछरी, अकास के चिरई, भुइयां म रेंगइया जम्मो जीव-जन्तु अऊ धरती म रहइया जम्मो मनखे मोर आघू म कांप उठहीं। पहाड़मन पलटा दिये जाहीं, ठाढ़ चट्टानमन कुटा-कुटा हो जाहीं अऊ हरेक भीथी ह भुइयां म गिर जाही।
EZE 38:21 मेंह गोग के बिरूध अपन जम्मो पहाड़मन म तलवार चलवाहूं, परमपरधान यहोवा ह घोसना करत हे। हर एक झन के तलवार ओकर भाई के बिरूध म उठही।
EZE 38:22 मेंह ओकर ऊपर महामारी लानके अऊ खून बहाय के दुवारा नियाय करहूं; मेंह ओकर ऊपर, ओकर सेना ऊपर अऊ ओकर संग के बहुंते जातिमन ऊपर भारी बारिस करवाहूं अऊ ओमन ऊपर बड़े-बड़े करा अऊ बरत गंधक बरसाहूं।
EZE 38:23 अऊ ये किसम ले मेंह अपन महानता अऊ पबितरता देखाहूं, अऊ मेंह बहुंते जाति के मनखेमन के नजर म अपनआप ला परगट करहूं। तब ओमन जानहीं कि मेंह यहोवा अंव।’
EZE 39:1 “हे मनखे के बेटा, गोग के बिरूध अगमबानी करके कह: ‘परमपरधान यहोवा ह ये कहत हे: हे गोग, मेसेक अऊ तूबल के मुखिया हाकिम, मेंह तोर बिरूध हवंव।
EZE 39:2 मेंह तोला गोल घुमा दूहूं अऊ संग म घसीटहूं घलो। मेंह तोला बहुंत दूरिहा उत्तर दिग ले लानहूं अऊ तोला इसरायल के पहाड़मन के बिरूध भेजहूं।
EZE 39:3 तब में तोर डेरी हांथ के धनुस ला मारहूं अऊ तोर जेवनी हांथ के तीरमन ला गिरा दूहूं।
EZE 39:4 इसरायल के पहाड़मन म तेंह गिरबे, तोर संग तोर जम्मो सेना अऊ तोर संग के जातिमन घलो गिरहीं। मेंह तोला जेवन के रूप म सड़े मांस खवइया जम्मो किसम के चिरई अऊ जंगली पसुमन ला दे दूहूं।
EZE 39:5 तेंह खुला मैदान म गिरके मरबे, काबरकि मेंह कहे हवंव, परमपरधान यहोवा ह घोसना करत हे।
EZE 39:6 मेंह मागोग अऊ ओमन ऊपर आगी पठोहूं, जेमन समुंदर तीर म सुरकछित रहिथें, अऊ ओमन जानहीं कि मेंह यहोवा अंव।
EZE 39:7 “ ‘मेंह अपन इसरायली मनखेमन के बीच अपन पबितर नांव ला परगट करहूं। मेंह अपन पबितर नांव ला फेर अपबितर होवन नइं दंव, अऊ जाति-जाति के मनखेमन जानहीं कि में यहोवा ही इसरायल म पबितर अंव।
EZE 39:8 ये घटना होवइया हे! येह जरूर होही, परमपरधान यहोवा ह घोसना करत हे। येह ओही दिन अय, जेकर चरचा मेंह करे हंव।
EZE 39:9 “ ‘तब जेमन इसरायल के नगरमन म रहिथें ओमन बाहिर निकलहीं अऊ हथियारमन के उपयोग आगी बारे बर करहीं अऊ ओमन ला जला दीहीं—छोटे अऊ बड़े ढाल, तीर अऊ धनुस, लड़ई के गदा अऊ बरछी। सात बछर तक ओमन येमन के उपयोग आगी बारे बर करहीं।
EZE 39:10 ओमन ला मैदान ले लकरी इकट्ठा करे के या जंगल ले लकरी काटे के जरूरत नइं होही, काबरकि ओमन हथियारमन के उपयोग आगी बारे बर करहीं। अऊ ओमन ओ मनखेमन ला लूटहीं, जेमन ओमन ला लूटे रिहिन अऊ ओमन ले सामान छीनहीं, जेमन ओमन ले छीन ले रिहिन, परमपरधान यहोवा ह घोसना करत हे।
EZE 39:11 “ ‘ओ दिन मेंह गोग ला इसरायल म मरघटी बर एक जगह दूहूं, ये जगह ओ मनखेमन के घाटी म होही, जेमन समुंदर के पूरब कोति जाथें। ये मरघटी ह उहां ले होके जवइयामन के रसता ला रोकही, काबरकि गोग अऊ ओकर जम्मो उपदरवी भीड़ ला उहां माटी देय जाही। एकरसेति ओ जगह ला हामोन-गोग के घाटी कहे जाही।
EZE 39:12 “ ‘देस ला सुध करे बर इसरायलीमन ओमन ला सात महिना तक माटी देवत रहिहीं।
EZE 39:13 देस के सबो मनखेमन ओमन ला माटी दीहीं, अऊ जऊन दिन मेंह अपन महिमा परगट करहूं, ओह ओमन बर एक सुरता करइया दिन होही, परमपरधान यहोवा ह घोसना करत हे।
EZE 39:14 देस ला सुध करे बर मनखेमन ला लगातार ठहिराय जाही। ओमन पूरा देस म फईल जाहीं अऊ आने मन के संग मिलके ओमन ओ लासमन ला माटी दीहीं, जेमन भुइयां म पड़े मिलहीं। “ ‘सात महिना के बाद, ओमन अऊ बिस्तार से खोज करहीं।
EZE 39:15 जब ओमन देस म ले होके जाहीं अऊ यदि कोनो ला कोनो मनखे के हाड़ा ह दिखही, त ओह ओ हाड़ा के बाजू म एक चिनहां छोंड़ दीही, अऊ ओ चिनहां ह तब तक रहिही, जब तक कि माटी देवइयामन आके ओ लास ला हामोन-गोग के ओ घाटी म माटी नइं दे दीहीं,
EZE 39:16 जऊन ह हामोना नांव के नगर के लकठा म हवय। अऊ ये किसम ले ओमन देस ला सुध करहीं।’
EZE 39:17 “हे मनखे के बेटा, परमपरधान यहोवा ह ये कहत हे: जम्मो किसम के चिरई अऊ जम्मो जंगली पसुमन ला बला: ‘चारों कोति ले आवव अऊ ओ बलिदान बर इकट्ठा हो जावव, जेला मेंह तुम्हर बर तियार करत हंव; येह इसरायल के पहाड़मन के एक बड़े बलिदान होही। उहां तुमन मांस खाहू अऊ खून पीहू।
EZE 39:18 तुमन सक्तिसाली आदमीमन के मांस खाहू अऊ धरती के हाकिममन के खून ला अइसे पीहू, मानो ओमन मेढ़ा अऊ मेढ़ा-पीला, बोकरा अऊ बईलामन अंय—जम्मो के जम्मो बासान के मोटा-ताजा पसु होहीं।
EZE 39:19 जऊन बलिदान मेंह तुम्हर बर तियार करत हंव, ओला खावत-खावत तुमन अघा जाहू अऊ खून ला पीयत-पीयत तुमन छक जाहू।
EZE 39:20 तुमन मोर मेज म घोड़ा अऊ सवारमन, सक्तिसाली आदमी अऊ हर किसम के सैनिकमन ला खाके अघा जाहू,’ परमपरधान यहोवा ह घोसना करत हे।
EZE 39:21 “मेंह जाति-जाति के मनखेमन के बीच अपन महिमा परगट करहूं, अऊ जम्मो जाति के मनखेमन ओमन ला दिये मोर दंड अऊ ओमन ऊपर उठे मोर हांथ ला देखहीं।
EZE 39:22 ओ दिन ले लेके आघू तक इसरायल के मनखेमन जानहीं कि में यहोवा ओमन के परमेसर अंव।
EZE 39:23 अऊ जाति-जाति के मनखेमन जानहीं कि इसरायली मनखेमन अपन पाप के कारन बंधुवई म गेय रिहिन, काबरकि ओमन मोर संग बिसवासघात करिन। एकरसेति मेंह अपन मुहूं ओमन से मोड़ लेंव अऊ ओमन ला ओमन के बईरीमन के अधीन कर देंव, अऊ ओमन जम्मो तलवार ले मारे गीन।
EZE 39:24 मेंह ओमन के असुधता अऊ ओमन के अपराध के मुताबिक ओमन ले बरताव करेंव, अऊ मेंह ओमन ले अपन मुहूं मोड़ लेंव।
EZE 39:25 “एकरसेति परमपरधान यहोवा ह ये कहत हे: अब मेंह याकूब ला बंधुवई ले लहुंटा ले आहूं, अऊ इसरायल के जम्मो मनखेमन ऊपर दया करहूं, अऊ अपन पबितर नांव बर मेंह उत्साही होहूं।
EZE 39:26 जब ओमन अपन देस म सुरकछित रिहिन अऊ ओमन ला कोनो डरवइया नइं रिहिस, तब ओमन जऊन लज्जा अऊ मोर संग बिसवासघात के काम करे रिहिन, ओ जम्मो ला भुला जाहीं।
EZE 39:27 जब मेंह ओमन ला जाति-जाति के बीच ले वापिस ले आहूं, अऊ ओमन के बईरीमन के देसमन ले ओमन ला इकट्ठा करहूं, तब ओमन के जरिये मेंह बहुंते जातिमन के नजर म पबितर ठहिरहूं।
EZE 39:28 तब ओमन जानहीं कि में यहोवा ओमन के परमेसर अंव, हालाकि मेंह ओमन ला जाति-जाति के मनखेमन के बीच बंधुवई म भेज दे रहेंव, पर में ओमन ला ओमन के खुद के देस म इकट्ठा करहूं, अऊ एको झन ला भी परदेस म नइं छोड़ंव।
EZE 39:29 में ओमन ले फेर कभू अपन मुहूं नइं मोड़ंव, काबरकि में इसरायल के मनखेमन ऊपर अपन आतमा उंडेलहूं, परमपरधान यहोवा ह घोसना करत हे।”
EZE 40:1 हमर बंधुवई के पच्चीसवां बछर के सुरू म, महिना के दसवां दिन, जऊन ह यरूसलेम नगर के पतन के बाद के चौदहवां बछर रिहिस, ओहीच दिन यहोवा के हांथ मोर ऊपर रिहिस अऊ ओह मोला उहां ले गीस।
EZE 40:2 परमेसर के दरसन म ओह मोला इसरायल के देस म ले गीस अऊ मोला एक बहुंत ऊंचहा पहाड़ म ठाढ़ कर दीस, जेकर दक्खिन कोति कुछू भवनमन रिहिन, जऊन ह एक सहर सहीं दिखय।
EZE 40:3 ओह मोला उहां ले गीस, अऊ मेंह एक आदमी ला देखेंव, जेकर रूप ह कांसा असन रिहिस; ओह अपन हांथ म सन के रस्सी अऊ नापे के एक लउठी लेके खड़े रिहिस।
EZE 40:4 ओ आदमी ह मोर ले कहिस, “हे मनखे के बेटा, धियान से देख, अऊ लकठा म जाके सुन अऊ जऊन कुछू मेंह तोला देखाहूं, ओ जम्मो ऊपर धियान दे, काबरकि इही काम बर तोला इहां लाय गे हवय। जऊन कुछू तेंह देखथस, ओ जम्मो चीज इसरायल के मनखेमन ला बता।”
EZE 40:5 मेंह एक दीवार देखेंव, जऊन ह मंदिर के इलाका ला पूरा घेरे रहय, ओ मनखे के हांथ म नापे के जऊन लउठी रिहिस, ओकर लम्बई छै क्यूबीट रिहिस, जेमा के हर एक ह एक क्यूबीट अऊ एक हांथ चौड़ा रिहिस। ओह दीवार ला नापिस; ओह एक लउठी मोटा अऊ एक लउठी ऊंचहा रिहिस।
EZE 40:6 तब ओह पूरब के दुवार मेर आईस। ओह ओकर सीढ़ी चघके दुवार के चौखट ला नापिस, जेकर चौड़ई एक लउठी भर रिहिस।
EZE 40:7 पहरेदारमन के खोलीमन एक लउठी भर लम्बा अऊ एक लउठी भर चौड़ा रिहिन, अऊ पहरेदारमन के खोलीमन के बीच के दीवारमन पांच क्यूबीट रिहिन। मंडप के बाद के दीवार, जऊन ह मंदिर कोति रिहिस, ओकर ऊंचई एक लउठी भर रिहिस।
EZE 40:8 तब ओह दुवार के मंडप ला नापिस;
EZE 40:9 ओकर ऊंचई आठ क्यूबीट रिहिस अऊ येकर खंभामन दू क्यूबीट मोटा रिहिन। दुवार के मंडप ह मंदिर कोति रिहिस।
EZE 40:10 पूरबी दुवार के भीतर दूनों कोति तीन-तीन ठन पहरावाली खोलीमन रिहिन; तीनों के नाप एक समान रिहिस, अऊ दूनों कोति के दीवारमन घलो एकेच नाप के रिहिन।
EZE 40:11 तब ओह प्रवेस दुवार के चौड़ई ला नापिस, जऊन ह दस क्यूबीट रिहिस अऊ येकर लम्बई तेरह क्यूबीट रिहिस।
EZE 40:12 हर एक पहरावाली खोली के आघू म एक क्यूबीट ऊंचहा दीवार रिहिस, अऊ पहरावाली खोलीमन छै-छै क्यूबीट के रिहिन अऊ वर्गाकार रिहिन।
EZE 40:13 तब ओह एक पहरावाली खोली के पाछू के दीवार के टीप ले दूसर कोति के टीप तक दुवार ला नापिस; एक तरफ के ऊंचहा दीवार ले लेके दूसर तरफ के ऊंचहा दीवार तक, ओकर दूरी पच्चीस क्यूबीट रिहिस।
EZE 40:14 ओह दुवार के भीतर चारों कोति के निकले दीवारमन ला नापिस, जऊन ह साठ क्यूबीट रिहिस। मंडप तक नापे गीस, जेकर मुहूं ह अंगना कोति रिहिस।
EZE 40:15 प्रवेस दुवार ले लेके येकर मंडप के आखिरी छोर तक के दूरी पचास क्यूबीट रिहिस।
EZE 40:16 पहरावाली खोलीमन म अऊ दुवार के भीतर चारों खूंट दीवारमन म छोटे खिड़कीमन रिहिन, वइसने ही मंडप घलो रिहिस; ये खिड़कीमन भीतर कोति खुलंय। निकले दीवारमन के सामनेवाले भाग म खजूर के रूख बनाके सजाय गे रिहिस।
EZE 40:17 तब ओह मोला बाहिर के अंगना म ले आईस। उहां मेंह कुछू खोली अऊ पक्का बने एक पैदल रसता ला देखेंव, जेला अंगना के चारों कोति बनाय गे रिहिस; ओ रसता के संग तीस ठन खोलीमन बनाय गे रिहिन।
EZE 40:18 येह दुवार के तीर ले मिले हुए रिहिस अऊ येमन के लम्बई अऊ चौड़ई एक बरोबर रिहिस; येह खाल्हे के पैदल रसता रिहिस।
EZE 40:19 तब ओह खाल्हे के दुवार के भीतर ले लेके भीतरी अंगना के बाहिर तक के दूरी ला नापिस; ये दूरी पूरब कोति अऊ संग म उत्तर कोति एक सौ क्यूबीट रिहिस।
EZE 40:20 तब ओह उत्तरी दुवार के लम्बई अऊ चौड़ई ला नापिस, जऊन ह बाहिरी अंगना मेर जावत रिहिस।
EZE 40:21 दुवार के दूनों कोति तीन-तीन ठन पहरावाली खोलीमन रिहिन, येकर ले लगे दीवारमन अऊ येकर मंडप के नाप ठीक पहिला दुवार सहीं रिहिस। येह पचास क्यूबीट लम्बा अऊ पच्चीस क्यूबीट चौड़ा रिहिस।
EZE 40:22 येकर खिड़कीमन, येकर मंडप अऊ येकर खजूर के रूखमन के सजावट के नाप ओ दुवार सहीं रिहिस, जेकर मुहूं पूरब कोति रिहिस। येकर ऊपर जाय बर सीढ़ी म सात ठन पांवदान रिहिन, अऊ येकर मंडप ओमन के सामने म रिहिस।
EZE 40:23 भीतरी अंगना म एक दुवार रिहिस, जऊन ह उत्तर कोति खुलय, जइसे कि उहां पूरब कोति घलो रिहिस। ओह एक दुवार ले लेके सामने के दुवार के दूरी ला नापिस; येह एक सौ क्यूबीट रिहिस।
EZE 40:24 तब ओह मोला दक्खिन कोति ले गीस अऊ मेंह दक्खिन के दुवार ला देखेंव। ओह येकर चौखटमन ला अऊ मंडप ला नापिस, अऊ येमन के नाप घलो आने मन सहीं रिहिस।
EZE 40:25 दुवार अऊ येकर मंडप के चारों कोति छोटे खिड़कीमन रिहिन, जेमन आने खिड़कीमन सहीं रिहिन। येकर लम्बई पचास क्यूबीट अऊ चौड़ई पच्चीस क्यूबीट रिहिस।
EZE 40:26 येकर ऊपर जाय बर सीढ़ी के पांच पांवदान रिहिन, अऊ येकर मंडप ओमन के आघू म रिहिस; येकर दूनों कोति दीवारमन म खजूर के रूख बनाके सजाय गे रिहिस।
EZE 40:27 भीतरी अंगना के घलो एक दुवार रिहिस, जऊन ह दक्खिन कोति खुलत रिहिस, अऊ ओह ये दुवार ले लेके दक्खिन के बाहिरी दुवार तक नापिस, येह एक सौ क्यूबीट रिहिस।
EZE 40:28 तब ओह मोला दक्खिनी दुवार ले होके भीतरी अंगना म ले आईस, अऊ ओह दक्खिनी दुवार ला नापिस; येकर नाप घलो आने मन सहीं ही रिहिस।
EZE 40:29 येकर पहरावाली खोलीमन, येकर ले जुड़े दीवारमन अऊ येकर मंडप के नाप घलो आने मन सहीं रिहिस। दुवार अऊ येकर मंडप के चारों खूंट खिड़कीमन रिहिन। येह पचास क्यूबीट लम्बा अऊ पच्चीस क्यूबीट चौड़ा रिहिस।
EZE 40:30 (भीतरी अंगना के चारों खूंट के दुवारमन के मंडपमन पच्चीस क्यूबीट चौड़ा अऊ पांच क्यूबीट गहरा रिहिन।)
EZE 40:31 येकर मंडप के मुहूं ह बाहिरी अंगना कोति रिहिस; येकर चौखटमन म खजूर के रूखमन ला बनाके सजाय गे रिहिस, अऊ येकर ऊपर जाय बर सीढ़ी के आठ ठन पांवदान रिहिन।
EZE 40:32 तब ओह मोला पूरब कोति भीतरी अंगना म ले आईस, अऊ ओह दुवार ला नापिस; येकर नाप घलो आने मन सहीं रिहिस।
EZE 40:33 येकर पहरावाली खोलीमन, येकर ले जुड़े दीवारमन अऊ येकर मंडप के नाप घलो आने मन सहीं रिहिस। दुवार अऊ येकर मंडप के चारों खूंट खिड़कीमन रिहिन। येह पचास क्यूबीट लम्बा अऊ पच्चीस क्यूबीट चौड़ा रिहिस।
EZE 40:34 येकर मंडप के मुहूं बाहिरी अंगना कोति रिहिस; दूनों कोति येकर चौखट म खजूर के रूखमन ला बनाके सजाय गे रिहिस, अऊ येकर ऊपर जाय बर सीढ़ी के आठ ठन पांवदान रिहिन।
EZE 40:35 तब ओह मोला उत्तरी दुवार मेर ले आईस अऊ ओला नापिस। येकर नाप घलो आने मन सहीं रिहिस,
EZE 40:36 वइसे ही येकर पहरावाली खोलीमन, येकर से लगे दीवारमन अऊ मंडप रिहिस, अऊ येकर चारों खूंट खिड़कीमन रिहिन। येह पचास क्यूबीट लम्बा अऊ पच्चीस क्यूबीट चौड़ा रिहिस।
EZE 40:37 येकर मंडप के मुहूं ह बाहिरी अंगना कोति रिहिस; येकर चौखट म दूनों कोति खजूर के रूखमन ला बनाके सजाय गे रिहिस, अऊ येकर ऊपर जाय बर सीढ़ी के आठ ठन पांवदान रिहिन।
EZE 40:38 हर एक भीतरी दुवार के मंडप के बाजू म एक कपाट के संग एक खोली रिहिस, जिहां होम-बलिदान ला धोय जावत रिहिस।
EZE 40:39 दुवार के मंडप म दूनों कोति दू-दू ठन मेज रिहिन, जेमा होम-बलिदान, पाप-बलिदान अऊ दोस-बलिदान के पसुमन ला बध करे जावत रिहिस।
EZE 40:40 दुवार के मंडप के बाहिरी दीवार के बाजू म, उत्तरी प्रवेस दुवार के लकठा म दू ठन मेज रिहिन, अऊ सीढ़ी के दूसर कोति भी दू ठन मेज रिहिन।
EZE 40:41 ये किसम ले दुवार के एक तरफ चार ठन मेज अऊ दूसर कोति चार ठन मेज रिहिन—कुल आठ ठन मेज रिहिन, जेमा बलिदान के पसुमन के बध करे जावय।
EZE 40:42 होम-बलिदान बर गढ़े गय पथरा ले बने चार ठन मेज रिहिन, येमा के हर एक ह डेड़ क्यूबीट लम्बा, डेड़ क्यूबीट चौड़ा अऊ एक क्यूबीट ऊंचहा रिहिस। येमन म ओ बरतनमन रखे रिहिन, जेमन के उपयोग होम-बलिदान अऊ आने बलिदान के पसुमन ला बध करे म होवय।
EZE 40:43 दीवार के चारों खूंट दोहरा दांतवाले कांटामन ला लगाय गे रिहिस, जेमा के हर एक के लम्बई हथेली भर रिहिस। ये मेजमन बलिदान करे गय पसुमन के मांस रखे बर रिहिन।
EZE 40:44 भीतरी दुवार के बाहिर, भीतरी अंगना के भीतर दू ठन कमरा रिहिन, एक ठन उत्तरी दुवार कोति रिहिस, जऊन ह दक्खिन कोति खुलय, अऊ दूसर ह दक्खिन दुवार कोति रिहिस, जऊन ह उत्तर कोति खुलय।
EZE 40:45 ओह मोर ले कहिस, “जऊन कमरा ह दक्खिन कोति खुलथे, ओह ओ पुरोहितमन बर अय, जेमन मंदिर के पहरेदारी करथें,
EZE 40:46 अऊ ओ कमरा जऊन ह उत्तर कोति खुलथे, ओह ओ पुरोहितमन बर अय, जेमन बेदी के पहरेदारी करथें। येमन सादोक के बेटामन अंय, अऊ येमन ही सिरिप ओ लेवी अंय, जेमन यहोवा के लकठा म जाके ओकर आघू म सेवा-टहल करंय।”
EZE 40:47 तब ओह अंगना ला नापिस: येह वर्गाकार रिहिस—एक सौ क्यूबीट लम्बा अऊ एक सौ क्यूबीट चौड़ा। अऊ बेदी ह मंदिर के सामने म रिहिस।
EZE 40:48 तब ओह मोला मंदिर के मंडप म ले आईस अऊ ओह मंडप के चौखटमन ला नापिस; येमन दूनों कोति पांच-पांच क्यूबीट चौड़ा रिहिन। प्रवेस दुवार के चौड़ई चौदह क्यूबीट अऊ येकर ले लगे दीवारमन के चौड़ई दूनों कोति तीन-तीन क्यूबीट रिहिस।
EZE 40:49 मंडप ह बीस क्यूबीट चौड़ा रिहिस, अऊ सामने ले लेके पाछू तक बारह क्यूबीट रिहिस। ओमा चघे बर सीढ़ीमन रिहिन, अऊ दूनों कोति के चौखट के बाजू म खंभामन रिहिन।
EZE 41:1 तब ओह मोला मुख्य बड़े कमरा म ले आईस अऊ चौखटमन ला नापिस; दूनों कोति के चौखटमन के चौड़ई छै-छै क्यूबीट रिहिस।
EZE 41:2 प्रवेस दुवार के चौड़ई दस क्यूबीट, अऊ येकर ले लगे दूनों कोति के दीवारमन के चौड़ई पांच-पांच क्यूबीट रिहिस। ओह मुख्य बड़े कमरा ला घलो नापिस; येह चालीस क्यूबीट लम्बा अऊ बीस क्यूबीट चौड़ा रिहिस।
EZE 41:3 तब ओह भीतरी पबितर-स्थान म गीस अऊ प्रवेस दुवार के चौखटमन ला नापिस; हर एक ह दू-दू क्यूबीट चौड़ा रिहिस। प्रवेस दुवार ह छै क्यूबीट चौड़ा रिहिस, अऊ येकर ले लगे दूनों कोति के दीवारमन सात-सात क्यूबीट चौड़ा रिहिन।
EZE 41:4 तब ओह भीतरी पबितर-स्थान के लम्बई ला नापिस; येह बीस क्यूबीट रिहिस, अऊ येकर चौड़ई मुख्य बड़े कमरा के आखिरी तक बीस क्यूबीट रिहिस। ओह मोला कहिस, “येह महा पबितर स्थान ए।”
EZE 41:5 तब ओह मंदिर के दीवार ला नापिस; येह छै क्यूबीट मोटा रिहिस, अऊ हर तरफ मंदिर के चारों कोति कमरा के चौड़ई चार-चार क्यूबीट रिहिस।
EZE 41:6 बाजू के कमरामन तीन मंजिला रिहिन, एक के ऊपर दूसरा, हर एक मंजिल म तीस-तीस ठन कमरा रिहिन। बाजू के कमरामन ला सहारा देय बर मंदिर के दीवार के चारों कोति निकले भागमन रिहिन, जेकर कारन सहारा देवइया भागमन ला मंदिर के दीवार म घुसाय नइं गे रिहिस।
EZE 41:7 मंदिर के चारों कोति बाजू के कमरामन हर मंजिल म चौड़ा होवत गे रिहिन। मंदिर के चारों कोति के बनावट हर मंजिल म बड़े होवत गे रिहिस, जेकर कारन ऊपर जाय ले कमरामन चौड़ा होवत गे रिहिन। खाल्हे के मंजिल ले एक सीढ़ी बीच के मंजिल ले होवत ऊपर के मंजिल तक गे रिहिस।
EZE 41:8 मेंह देखेंव कि मंदिर के चारों कोति एक उठे हुए आधार रिहिस, जऊन ह बाजू के कमरामन के नीव बने रिहिस। येह लउठी के लम्बई के रिहिस, छै क्यूबीट लम्बा।
EZE 41:9 बाजू के कमरामन के बाहिरी दीवार पांच क्यूबीट मोटा रिहिस। मंदिर के बाजू के कमरामन के बीच म खुला जगह रिहिस
EZE 41:10 अऊ पुरोहितमन के कमरामन के बीच के खुला भाग ह मंदिर के चारों कोति बीस क्यूबीट चौड़ा रिहिस।
EZE 41:11 खुले भाग ले बाजू के कमरामन म जाय बर प्रवेस दुवारमन रिहिन, एक ठन उत्तर म अऊ एक ठन दक्खिन म रिहिस; अऊ चारों कोति खुले हुए भाग ले जुड़े आधार के चौड़ई पांच क्यूबीट रिहिस।
EZE 41:12 ओ भवन, जेकर मुहूं मंदिर के अंगना कोति पछिम भाग म रिहिस, ओकर चौड़ई सत्तर क्यूबीट रिहिस। चारों कोति ये भवन के दीवार के मोटई पांच क्यूबीट रिहिस, अऊ येकर लम्बई नब्बे क्यूबीट रिहिस।
EZE 41:13 तब ओह मंदिर ला नापिस; येह एक सौ क्यूबीट लम्बा रिहिस, अऊ मंदिर के अंगना अऊ अपन दीवारमन के संग भवन ह घलो एक सौ क्यूबीट लम्बा रिहिस।
EZE 41:14 मंदिर के आघू के भाग ला मिलाके मंदिर के अंगना के चौड़ई पूरब कोति एक सौ क्यूबीट रिहिस।
EZE 41:15 तब ओह मंदिर के पाछू कोति ओ भवन के लम्बई ला नापिस, जेकर मुहूं अंगना कोति रिहिस, येकर दूनों कोति के गैलरी ला मिलाके येकर लम्बई एक सौ क्यूबीट रिहिस। मुख्य बड़े कमरा, भीतरी पबितर-स्थान अऊ अंगना के सामने के मंडप,
EZE 41:16 संगे-संग दुवारमन अऊ संकरा खिड़कीमन अऊ ओ तीनों के चारों कोति के गैलरीमन—हर एक चीज के अलावा अऊ दुवार ला मिलाके जम्मो चीज लकरी ले मढ़े गे रिहिस। फर्स, खिड़की तक के दीवार, अऊ खिड़कीमन घलो मढ़े गे रिहिन।
EZE 41:17 भीतरी पबितर-स्थान के प्रवेस दुवार के ऊपर के जगह अऊ भीतरी अऊ बाहिरी पबितर-स्थान के चारों कोति दीवारमन म बरोबर जगह छोंड़-छोंड़के
EZE 41:18 करूब अऊ खजूर के रूखमन के नक्कासी करे गे रिहिस। खजूर के रूख अऊ करूबमन ला एक के बाद एक बनाय गे रिहिस। हर करूब के दू-दू ठन मुहूं रिहिस:
EZE 41:19 करूब के एक मुहूं ह एक तरफ के खजूर के रूख कोति मनखे के मुहूं सहीं अऊ करूब के दूसरा मुहूं ह दूसर कोति के खजूर के रूख कोति सिंह के मुहूं सहीं रिहिस। ये नक्कासी चारों खूंट पूरा मंदिर म करे गे रिहिस।
EZE 41:20 मुख्य बड़े कमरा के दीवार म फर्स ले लेके प्रवेस दुवार के ऊपरी भाग तक, करूब अऊ खजूर के रूखमन के नक्कासी करे गे रिहिस।
EZE 41:21 मुख्य बड़े कमरा के एक चौकोर चौखट रिहिस, अऊ महा पबितर स्थान के सामने म घलो अइसने ही एक चौखट रिहिस।
EZE 41:22 उहां लकरी के एक बेदी रिहिस, जऊन ह तीन क्यूबीट ऊंचहा रिहिस, अऊ येकर लम्बई अऊ चौड़ई दू-दू क्यूबीट रिहिस; येकर कोना, येकर आधार अऊ येकर किनारामन लकरी के बने रिहिन। ओ आदमी ह मोर ले कहिस, “येह ओ मेज अय, जऊन ह यहोवा के आघू म हवय।”
EZE 41:23 मुख्य बड़े कमरा अऊ महा पबितर स्थान के दू-दू ठन कपाट रिहिन।
EZE 41:24 हर एक कपाट के दू-दू ठन पल्ला रिहिन—हर एक कपाट के पल्ला म दू-दू ठन कब्जा लगे रिहिन।
EZE 41:25 अऊ मुख्य बड़े कमरा के कपाटमन म दीवारमन सहीं करूब अऊ खजूर के रूखमन के नक्कासी करे गे रिहिस, अऊ मंडप के सामने म कठवा के मोटा-मोटा बल्ली रिहिस।
EZE 41:26 मंडप के बाजू के दीवारमन म संकरा खिड़कीमन रिहिन अऊ खिड़कीमन म दूनों कोति खजूर के रूखमन के नक्कासी करे गे रिहिस। मंदिर के बाजू के कमरामन म घलो मोट-मोट बल्लीमन रिहिन।
EZE 42:1 तब ओ आदमी मोला उत्तर कोति बाहिरी अंगना म ले गीस अऊ मंदिर के अंगना के सामने के कमरामन म ले आईस, जऊन ह उत्तर दिग के बाहिरी दीवार के सामने रिहिस।
EZE 42:2 ओ भवन जेकर कपाट उत्तर कोति रिहिस, ओकर लम्बई एक सौ क्यूबीट अऊ चौड़ई पचास क्यूबीट रिहिस।
EZE 42:3 भीतरी अंगना ले दूनों भाग म बीस क्यूबीट अऊ बाहिरी अंगना के पैदल रसता के सामने के भाग म, तीनों मंजिल म गैलरी के सामने गैलरी रिहिस।
EZE 42:4 कमरामन के सामने म एक भीतरी रसता रिहिस, जऊन ह दस क्यूबीट चौड़ा अऊ एक सौ क्यूबीट लम्बा रिहिस। ओमन के कपाटमन उत्तर कोति रिहिन।
EZE 42:5 ऊपर के कमरामन सांकुर रिहिन, काबरकि भवन के पहिला अऊ दूसरा मंजिल के कमरामन के तुलना म ऊपर के मंजिल के कमरामन के कुछू जगह ला गैलरीमन ले लेय रिहिन।
EZE 42:6 अंगनामन सहीं ऊपरी मंजिल के कमरामन म खंभा नइं रिहिन; एकरसेति पहिला अऊ दूसरा मंजिल के कमरामन के फर्स के जगह के तुलना म ऊपरी मंजिल के कमरामन के फर्स के जगह ह कम रिहिस।
EZE 42:7 कमरामन अऊ बाहिरी अंगना के समानांतर एक बाहिरी दीवार रिहिस; येह कमरामन के सामने पचास क्यूबीट तक आघू बढ़े रिहिस।
EZE 42:8 बाहिरी अंगना के बाद, तीर म कमरामन के कतार के लम्बई पचास क्यूबीट रिहिस, पबितर-स्थान के सबले नजदीक, तीर म कतार के लम्बई एक सौ क्यूबीट रिहिस।
EZE 42:9 बाहिरी अंगना ले खाल्हे कमरामन म जाय बर पूरब कोति एक प्रवेस दुवार रिहिस।
EZE 42:10 दक्खिन कोति बाहिरी अंगना के दीवार के लम्बई के संग, मंदिर के अंगना ले जुड़के अऊ बाहिरी दीवार के सामने म कमरामन रिहिन,
EZE 42:11 अऊ ओमन के सामने म एक रसता रिहिस। ये कमरामन उत्तर कोति के कमरामन सहीं रिहिन; ओमन के लम्बई अऊ चौड़ई घलो वइसने ही रिहिस, अऊ ओमन के निकासी अऊ बनावट म घलो समानता रिहिस। उत्तर कोति के कपाटमन सहीं
EZE 42:12 दक्खिन कोति के कमरामन के कपाटमन रिहिन। कमरामन म जाय बर, रसता के सुरूआत म एक ठन कपाट रिहिस, ये रसता पूरब कोति बढ़े दीवार के समानांतर रिहिस, जेकर दुवारा कमरामन के भीतर कोनो मनखे जा सकत रिहिस।
EZE 42:13 तब ओह मोर ले कहिस, “मंदिर के उत्तर अऊ दक्खिन के कमरामन पुरोहितमन के अंय, जिहां यहोवा के सेवा करइया पुरोहितमन महा पबितर बलिदानमन ला खाथें। उहां ओमन महा पबितर बलिदानमन—अन्न-बलिदान, पाप-बलिदान अऊ दोस-बलिदान ला रखंय काबरकि ये जगह ह पबितर अय।
EZE 42:14 जब भी पुरोहितमन पबितर जगह म जावंय, ओमन तब तक बाहिरी अंगना म नइं जावंय, जब तक कि ओमन ओ कपड़ामन ला उतारके पबितर स्थान म रख नइं देवंय, जेमन ला पहिरके ओमन सेवा करथें, काबरकि ओ कपड़ामन पबितर अंय। सधारन मनखेमन बर ठहिराय जगह के लकठा म जाय के पहिले पुरोहितमन आने कपड़ा ला पहिर लेवंय।”
EZE 42:15 जब ओह मंदिर के इलाका के भीतरी भाग ला नाप लीस, तब ओह मोला पूरब के दुवार ले बाहिर ले गीस अऊ चारों कोति के इलाका ला नापिस:
EZE 42:16 ओह नापे के लउठी ले पूरबी भाग ला नापिस; येह पांच सौ क्यूबीट रिहिस।
EZE 42:17 तब ओह उत्तरी भाग ला नापिस; येह घलो नापे के लउठी म पांच सौ क्यूबीट रिहिस।
EZE 42:18 तब ओह दक्खिनी भाग ला नापिस; येह घलो नापे के लउठी म पांच सौ क्यूबीट रिहिस।
EZE 42:19 तब ओह पछिम भाग कोति मुड़िस अऊ ओला नापिस; येह घलो नापे के लउठी म पांच सौ क्यूबीट रिहिस।
EZE 42:20 ये किसम ले ओह चारों कोति के भाग ला नापिस। येकर चारों मुड़ा एक ठन दीवार रिहिस, जऊन ह पांच सौ क्यूबीट लम्बा अऊ पांच सौ क्यूबीट चौड़ा रिहिस, येह पबितर जगह ला सार्वजनिक जगह ले अलग करय।
EZE 43:1 तब ओ मनखे ह मोला ओ दुवार मेर ले आईस, जेकर मुहूं पूरब कोति रिहिस,
EZE 43:2 अऊ मेंह इसरायल के परमेसर के महिमा ला पूरब दिग ले आवत देखेंव। ओकर अवाज ह तेज बहत पानी के गरजन सहीं रिहिस, अऊ ओकर महिमा ले धरती ह जगमगावत रिहिस।
EZE 43:3 जऊन दरसन मेंह देखेंव येह ओ दरसन सहीं रिहिस, जेला मेंह तब देखे रहेंव जब ओह सहर ला नास करे बर आय रिहिस अऊ ओ दरसन असन रिहिस, जेला मेंह कबार नदी के तीर म देखे रहेंव, अऊ मेंह मुहूं के भार गिर पड़ेंव।
EZE 43:4 यहोवा के महिमा ह पूरब के दुवार ले मंदिर भीतर आईस।
EZE 43:5 तब आतमा ह मोला उठाके भीतरी अंगना म ले आईस, अऊ यहोवा के महिमा ले मंदिर ह भर गीस।
EZE 43:6 जब ओ मनखे ह मोर बाजू म खड़े रिहिस, त मेंह सुनेंव कि कोनो मंदिर के भीतर ले मोर ले गोठियावत हे।
EZE 43:7 ओह कहिस: “हे मनखे के बेटा, येह मोर सिंघासन के जगह अऊ मोर पांव के तलवा रखे के जगह अय। येह ओ जगह अय जिहां में इसरायलीमन के बीच सदा निवास करहूं। इसरायल के मनखेमन फेर कभू मोर पबितर नांव ला अपबितर नइं करहीं—न तो ओमन अऊ न ही ओमन के राजामन अपन बेभिचार के दुवारा अऊ अपन राजामन के मिरतू के बेरा ओमन बर बलिदान चघाय के दुवारा अपबितर करहीं।
EZE 43:8 जब ओमन अपन दुवार ला मोर दुवार के लकठा म अऊ अपन चौखट ला मोर चौखट के बाजू म रखिन, अऊ मोर अऊ ओमन के बीच सिरिप एक दीवार रिहिस, त ओमन मोर पबितर नांव ला अपन घिनौना काममन के दुवारा असुध करिन। एकरसेति मेंह अपन कोरोध म ओमन ला नास कर देंव।
EZE 43:9 अब ओमन अपन बेभिचार अऊ अपन राजामन बर माटी देय के बेरा करे जानेवाला बलिदान ला छोंड़ देवंय, तब मेंह ओमन के बीच सदा निवास करहूं।
EZE 43:10 “हे मनखे के बेटा, तेंह इसरायल के मनखेमन ला ये मंदिर के बखान कर, कि ओमन अपन पाप के काम ले लज्जित होवंय। ओमन येकर उत्तमता ऊपर बिचार करंय,
EZE 43:11 अऊ यदि ओमन अपन करे गय जम्मो काममन ले लज्जित होथंय, त ओमन ला मंदिर के बनावट के बारे म बता—येकर रचना, येकर निकास अऊ प्रवेस दुवार—येकर पूरा बनावट अऊ येकर पूरा नियम अऊ कानून। ओमन के आघू म ये बातमन ला लिख ले, ताकि ओमन येकर बनावट बर बिसवासयोग्य रहंय अऊ येकर नियममन ला मानंय।
EZE 43:12 “येह मंदिर के कानून अय: पहाड़ के टीप के चारों खूंट के जम्मो भाग ह महा पबितर होही। येहीच ह ये मंदिर के कानून अय।
EZE 43:13 “क्यूबीट म बेदी के नाप अइसने हवंय, एक क्यूबीट अऊ एक हथेली के नाप: येकर नाली ह एक क्यूबीट गहरा अऊ एक क्यूबीट चौड़ा, अऊ किनारा के चारों कोति एक स्पान के गोट रिहिस। अऊ येह बेदी के ऊंचई ए:
EZE 43:14 भुइयां म नाली ले लेके खाल्हे निकले भाग तक, जऊन ह बेदी के चारों कोति जाथे, येह दू क्यूबीट ऊंचहा हवय, अऊ निकले भाग ह एक क्यूबीट चौड़ा हवय। ये खाल्हे निकले भाग ले लेके ऊपर निकले भाग तक, जऊन ह बेदी के चारों कोति जाथे, येह चार क्यूबीट ऊंचहा हवय, अऊ ओ निकले भाग घलो एक क्यूबीट चौड़ा हवय।
EZE 43:15 ओकर ऊपर, बेदी के चूल्हा ह चार क्यूबीट ऊंचहा हवय, अऊ बेदी के चूल्हा ले ऊपर कोति चार ठन सींग निकले हवंय।
EZE 43:16 बेदी के चूल्हा ह वर्गाकार हवय, जऊन ह बारह क्यूबीट लम्बा अऊ बारह क्यूबीट चौड़ा हवय।
EZE 43:17 ऊपर के निकले भाग ह घलो वर्गाकार हवय, जऊन ह चौदह क्यूबीट लम्बा अऊ चौदह क्यूबीट चौड़ा हवय। बेदी के चारों कोति एक क्यूबीट के एक नाली हवय, जेमा आधा क्यूबीट के एक गोट हवय। बेदी के सीढ़ी ह पूरब कोति हवय।”
EZE 43:18 तब ओह मोर ले कहिस, “हे मनखे के बेटा, परमपरधान यहोवा ह ये कहत हे: जब बेदी ह बन जाही, त होम-बलिदान चघाय अऊ बेदी म लहू छिंचे बर ये बिधिमन होहीं:
EZE 43:19 पाप-बलिदान के रूप म तोला सादोक के परिवार के ओ लेवीय पुरोहितमन ला एक ठन बछवा देना होही, जऊन मन मोर सेवा करे बर मोर लकठा म आथें, परमपरधान यहोवा ह घोसना करत हे।
EZE 43:20 तब तेंह ओकर कुछू खून ला लेबे अऊ ओ खून ला चारों सींग अऊ निकले हुए भाग के चारों कोना अऊ किनारा म चारों कोति लगा देबे, अऊ ये किसम ले बेदी ला सुध करबे अऊ येकर बर प्रायस्चित करबे।
EZE 43:21 तें पाप-बलिदान के बछवा ला लेबे अऊ ओला पबितर-स्थान के बाहिर मंदिर छेत्र म ठहिराय गय भाग म जला देबे।
EZE 43:22 “दूसर दिन, तेंह पाप-बलिदान बर एक ठन निरदोस बोकरा ला चघाबे, अऊ बेदी ला वइसने ही सुध करे जावय, जइसने बछवा ला लेके करे गे रिहिस।
EZE 43:23 जब तेंह ओला सुध कर डारबे, तब तें झुंड ले एक निरदोस बछवा अऊ एक निरदोस मेढ़ा लेके चघाबे।
EZE 43:24 तोला यहोवा के आघू म ओमन ला अरपन करना हे, अऊ पुरोहितमन ओमन ऊपर नून ला छिंचंय अऊ ओमन ला होम-बलिदान के रूप म यहोवा ला चघावंय।
EZE 43:25 “सात दिन तक एक-एक ठन बोकरा तोला हर एक दिन पाप-बलिदान बर देना हे; झुंड म ले तोला एक-एक ठन निरदोस बछवा अऊ मेढ़ा घलो देना हे।
EZE 43:26 सात दिन तक, ओमन बेदी बर प्रायस्चित करंय अऊ सुध करंय; ये किसम ले ओमन येकर संस्कार करहीं।
EZE 43:27 जब ओ सात दिन खतम हो जाहीं, त आठवां दिन ले, पुरोहितमन तुम्हर होम-बलिदान अऊ मेल-बलिदान ला बेदी म चघांय। तब मेंह तुमन ला स्वीकार करहूं, परमपरधान यहोवा ह घोसना करत हे।”
EZE 44:1 तब ओ मनखे ह मोला पबितर-स्थान के ओ बाहिरी दुवार मेर वापिस ले आईस, जेकर मुहूं पूरब कोति रिहिस, अऊ ओह बंद रिहिस।
EZE 44:2 तब यहोवा ह मोर ले कहिस, “ये दुवार ह बंद रहय। येला खोले झन जावय; कोनो भी येमा ले होके भीतर झन जावंय। येह बंद रहय काबरकि यहोवा, इसरायल के परमेसर ह येमा ले भीतर गे हवय।
EZE 44:3 हाकिम ह खुद एके झन दुवार के भीतर यहोवा के आघू म जेवन करे बर बईठ सकत हे। ओह दुवार के मंडप के रसता ले भीतर आवय अऊ ओहीच रसता ले होके बाहिर निकलय।”
EZE 44:4 तब ओ मनखे ह मोला मंदिर के सामने उत्तरी दुवार के रसता मेर ले आईस। तब मेंह यहोवा के मंदिर ला यहोवा के महिमा ले भरत देखेंव, अऊ मेंह मुहूं के भार गिरेंव।
EZE 44:5 यहोवा ह मोर ले कहिस, “हे मनखे के बेटा, धियान से देख, लकठा जाके सुन अऊ यहोवा के मंदिर के बारे, जऊन बिधि अऊ नियममन ला मेंह तोला बतावत हंव, ओ जम्मो बात ऊपर धियान लगा। मंदिर के प्रवेस अऊ पबितर-स्थान के जम्मो निकास दुवारमन म धियान दे।
EZE 44:6 बिदरोही इसरायलीमन ले कह, ‘परमपरधान यहोवा ह ये कहत हे: हे इसरायल के मनखेमन! बहुंत हो गे तुम्हर घिनौना काम।
EZE 44:7 तुम्हर आने जम्मो घिनौना काम के अलावा, तुमन मोर पबितर-स्थान म मन अऊ देहें ले खतनारहित परदेसीमन ला ले आयेव, अऊ मोर मंदिर ला अपबितर करेव जब तुमन मोला जेवन, चरबी अऊ खून चघावत रहेव, अऊ तुमन मोर करार ला टोर देव।
EZE 44:8 मोर पबितर चीजमन के बारे म अपन काम करे के बदले, तुमन आने मन ला मोर पबितर-स्थान के जिम्मेदारी दे देव।
EZE 44:9 परमपरधान यहोवा ह ये कहत हे: मन अऊ देहें ले खतनारहित कोनो भी परदेसी मोर पबितर-स्थान के भीतर झन आवय, अऊ त अऊ इसरायलीमन के बीच रहइया परदेसीमन घलो झन आवंय।
EZE 44:10 “ ‘ओ लेवी, जेमन मोर ले ओ समय दूरिहा हो गीन, जब इसरायली मनखेमन आने कोति चल दीन अऊ जेमन मोर ले भटकके अपन मूरतीमन के पाछू चल दीन, जरूरी अय कि ओमन अपन पाप के फर ला भोगंय।
EZE 44:11 ओमन मोर पबितर-स्थान म सेवा कर सकत हें; मंदिर के दुवारमन के जिम्मेदारी लेके येमा सेवा कर सकत हें; ओमन मनखेमन बर होम-बलिदान अऊ चढ़ावा के पसुमन के बध करंय, अऊ मनखेमन के आघू म ठाढ़ होके ओमन के सेवा करंय।
EZE 44:12 पर काबरकि लेवीमन ओमन के मूरतीमन के आघू म ओमन के सेवा करिन अऊ इसरायल के मनखेमन ला पाप म गिराईन, एकरसेति मेंह हांथ उठाके कसम खाय हंव कि ओमन अपन पाप के फर जरूर भोगंय, परमपरधान यहोवा ह घोसना करत हे।
EZE 44:13 ओमन पुरोहित के रूप म मोर सेवा करे बर मोर लकठा म झन आवंय या मोर कोनो पबितर चीज के लकठा म झन आवंय या मोर परम पबितर बलिदानमन करा झन आवंय; जरूरी ए कि ओमन अपन घिनौना काम बर सरमिंदा होवंय।
EZE 44:14 अऊ मेंह ओमन ला मंदिर के पहरेदारी बर ठहिराहू, ताकि येमा के जम्मो काम हो सकय।
EZE 44:15 “ ‘पर ओ लेवीय पुरोहित, जेमन सादोक के संतान अंय अऊ जेमन ओ बेरा म मोर पबितर-स्थान के पहरेदारी करिन, जब इसरायलीमन मोर ले दूरिहा हो गे रिहिन, ओमन मोर आघू म सेवा करे बर मोर लकठा म आवंय; ओमन चरबी अऊ लहू चघाय बर मोर आघू म ठाढ़ होवंय, परमपरधान यहोवा ह घोसना करत हे।
EZE 44:16 सिरिप ओमन ही मोर पबितर-स्थान म प्रवेस करंय; सिरिप ओमन ही मोर सेवा करे बर मोर मेज के लकठा म आवंय अऊ पहरेदार के रूप म मोर सेवा करंय।
EZE 44:17 “ ‘जब ओमन भीतरी अंगना के दुवारमन ले भीतर आवंय, तब ओमन सन के ओनहा पहिरंय; येह जरूरी अय कि ओमन कोनो भी किसम के ऊन के ओनहा झन पहिरंय, जब ओमन भीतरी अंगना के दुवारमन म या मंदिर के भीतर सेवा करत रहिथें।
EZE 44:18 ओमन अपन मुड़ म सन के ओनहा के पगड़ी पहिरंय अऊ कनिहां म सन के कच्छा पहिरंय। ओमन अइसने कोनो भी चीज झन पहिरंय, जेकर से ओमन ला पसीना आवय।
EZE 44:19 जब ओमन बाहिरी अंगना म मनखेमन करा जावंय, तब ओमन ओ ओनहा ला उतार देवंय, जेला पहिरके ओमन सेवा करत रिहिन अऊ ओमन ओ ओनहा ला पबितर कमरामन म छोंड़ देवंय, अऊ आने कपड़ा पहिर लें, ताकि ओमन के ओनहा ला छुये के दुवारा मनखेमन पबितर झन ठहिरंय।
EZE 44:20 “ ‘ओमन अपन मुड़ के चुंदी ला झन मुड़ावंय या ओमन के चुंदी लम्बा झन होवंय, पर ओमन अपन मुड़ के चुंदी ला कटवांय।
EZE 44:21 कोनो भी पुरोहित अंगूर के मंद झन पीयय, जब ओह भीतरी अंगना म जाथे।
EZE 44:22 ओमन कोनो बिधवा या तलाकसुदा माईलोगन ले बिहाव झन करंय; ओमन सिरिप इसरायली बंस के कुंवारी ले या पुरोहित के बिधवा ले बिहाव करंय।
EZE 44:23 ओमन मोर मनखेमन ला पबितर अऊ सधारन के भेद ला सिखोवंय अऊ ओमन ला देखावंय कि सुध अऊ असुध के बीच कइसे भेद करे जाथे।
EZE 44:24 “ ‘कोनो झगरा म, पुरोहितमन नियायधीस के रूप म काम करंय अऊ झगरा के फैसला मोर नियममन के मुताबिक करंय। मोर ठहिराय गय जम्मो तिहार म, ओमन मोर कानून अऊ बिधिमन के पालन करंय, अऊ ओमन मोर बिसराम दिन ला पबितर मानंय।
EZE 44:25 “ ‘कोनो पुरोहित ह कोनो मनखे के लास के लकठा म जाके अपनआप ला असुध झन करय, पर यदि मरे मनखे ह ओकर दाई या ददा, बेटा या बेटी, भाई या अबिहाता बहिनी होवय, त ओह अपनआप ला असुध कर सकथे।
EZE 44:26 सुध होय के बाद, ओह सात दिन तक इंतजार करय।
EZE 44:27 जऊन दिन ओह पबितर-स्थान के भीतरी अंगना म सेवा करे बर जावय, त ओह अपन बर एक पाप-बलिदान चघावय, परमपरधान यहोवा ह घोसना करत हे।
EZE 44:28 “ ‘पुरोहितमन के सिरिप एकेच उत्तराधिकार हवय अऊ ओह में अंव। तुमन ओमन ला इसरायल म कोनो भी चीज ओमन के अधिकार म झन देवव; ओमन के संपत्ति में अंव।
EZE 44:29 ओमन अन्न-बलिदान, पाप-बलिदान अऊ दोस-बलिदान ला खाहीं; अऊ इसरायल म हर ओ चीज, जऊन ह यहोवा ला चघाय जाथे, ओह ओमन के होही।
EZE 44:30 जम्मो पहिली-फसल के सबले बने चीजमन अऊ तुम्हर जम्मो बिसेस भेंटमन पुरोहितमन के होहीं। तुमन अपन गूंधे पीसान ले बने जेवन के पहिली भाग ओमन ला देवव, ताकि तुम्हर घर-परिवार म आसीस होवय।
EZE 44:31 पुरोहितमन अइसने कोनो चिरई या पसु के मांस ला झन खावंय, जऊन ह मरे पाय गीस या जऊन ह कोनो जंगली पसु के दुवारा फार डाले गे हवय।
EZE 45:1 “ ‘जब तेंह उत्तराधिकार के रूप म भुइयां ला बांटबे, त तेंह भुइयां के एक भाग यहोवा ला पबितर भाग के रूप म देबे, जऊन ह 25,000 क्यूबीट लम्बा अऊ 20,000 क्यूबीट चौड़ा होवय; ये पूरा इलाका ह पबितर होही।
EZE 45:2 इहीच इलाका म 500 क्यूबीट के एक वर्गाकार भाग पबितर-स्थान बर होवय, अऊ येकर चारों कोति 50 क्यूबीट खुला भुइयां रहय।
EZE 45:3 ये पबितर भाग म 25,000 क्यूबीट लम्बा अऊ 10,000 क्यूबीट चौड़ा भाग ला नाप लेबे। येमा पबितर-स्थान याने कि महा पबितर स्थान होही।
EZE 45:4 येह ओ पुरोहितमन बर भुइयां के पबितर भाग होही, जेमन पबितर-स्थान म सेवा करथें अऊ जेमन यहोवा के आघू म सेवा करे बर लकठा म आथें। येह ओ जगह अय, जिहां पुरोहितमन बर घर होही अऊ संग म पबितर-स्थान बर पबितर जगह होही।
EZE 45:5 25,000 क्यूबीट लम्बा अऊ 10,000 क्यूबीट चौड़ा एक भाग ओ लेवीमन के होही, जेमन मंदिर म सेवा करथें, ये भाग म ओमन के अधिकार होही, जेमा ओमन के रहे बर नगरमन होहीं।
EZE 45:6 “ ‘तेंह येकर संपत्ति के रूप म पबितर भाग ले लगे 5,000 क्यूबीट चौड़ा अऊ 25,000 क्यूबीट लम्बा एक भाग सहर बर देबे; येह पूरा इसरायल के होही।
EZE 45:7 “ ‘हाकिम के भुइयां के सीमना ओ इलाका के दूनों कोति होही, अऊ ये इलाका म पबितर जिला अऊ सहर के संपत्ति होही। येकर बिस्तार पछिम म पछिम कोति अऊ पूरब म पूरब कोति होही, जऊन ह लम्बई म पछिम ले लेके पूरबी सीमना तक जवइया गोत्र के भागमन के एक भाग के समानांतर होही।
EZE 45:8 इसरायल म ये भुइयां ऊपर ओ हाकिम के अधिकार होही। अऊ मोर ठहिराय हाकिममन मोर मनखेमन ला फेर नइं सताहीं पर ओमन इसरायल के मनखेमन ला ओकर गोत्र के मुताबिक भुइयां ला ओमन के अधिकार म दे दीहीं।
EZE 45:9 “ ‘परमपरधान यहोवा ह ये कहत हे: हे इसरायल के हाकिममन! तुमन अति कर दे हवव, हिंसा करई अऊ सतावा ला छोंड़ दव अऊ ओ काम करव जऊन ह नियाय के काम ए अऊ सही ए। मोर मनखेमन ला बेदखल करना बंद करव, परमपरधान यहोवा ह घोसना करत हे।
EZE 45:10 तुमन सही नाप के उपयोग करव, सही एपा अऊ सही बत के उपयोग करव।
EZE 45:11 एपा अऊ बत दूनों एकेच नाप के होवंय, बत म होमेर के दसवां अंस समावय अऊ एपा म घलो होमेर के दसवां अंस समावय; होमेर ह दूनों के माने गय नाप होवय।
EZE 45:12 सेकेल म बीस गेरा आवय। बीस सेकेल अऊ पच्चीस सेकेल अऊ पंदरह सेकेल बराबर एक मीना होवय।
EZE 45:13 “ ‘येह बिसेस भेंट ए, जेला तुमन ला चघाना हे: गहूं के हर होमेर म ले एक एपा के छठवां अंस अऊ जौ के हर होमेर म ले एक एपा के छठवां अंस।
EZE 45:14 बत ले नापे, जैतून तेल के ठहिराय अंस, जऊन ह कोर म ले एक बत के दसवां अंस अय (कोर म दस बत या एक होमेर समाथे, काबरकि दस बत बराबर एक होमेर होथे)।
EZE 45:15 इसरायल के बने पानीवाले चरागन ले हर दू सौ भेड़ वाले झुंड ले एक-एक ठन भेड़ लिये जावय। येमन के उपयोग मनखेमन के प्रायस्चित करे बर अन्न-बलिदान, होम-बलिदान अऊ मेल-बलिदान के रूप म करे जावय, परमपरधान यहोवा ह घोसना करत हे।
EZE 45:16 देस के जम्मो मनखेमन ला इसरायल म हाकिम ला ये बिसेस भेंट देना जरूरी अय।
EZE 45:17 येह हाकिम के जिम्मेदारी होही कि ओह तिहारमन म, नवां चंदा के दिनमन म अऊ बिसराम दिन म होम-बलिदान, अन्न-बलिदान अऊ पेय-बलिदान देवय—याने कि इसरायल के ठहिराय जम्मो तिहारमन म। ओह इसरायलीमन के पछताप करे बर पाप-बलिदान, अन्न-बलिदान, होम-बलिदान अऊ मेल-बलिदान दीही।
EZE 45:18 “ ‘परमपरधान यहोवा ह ये कहत हे: साल के पहिला महिना के पहिला दिन तें एक निरदोस बछवा ला लेबे अऊ पबितर-स्थान ला सुध करबे।
EZE 45:19 पुरोहित ह पाप-बलिदान के कुछू खून ला लेवय अऊ ओला मंदिर के चौखटमन म, बेदी के ऊपरी निकले भाग के चारों कोना म अऊ भीतरी अंगना के दुवार के चौखटमन म लगावय।
EZE 45:20 तोला महिना के सातवां दिन ओ मनखे बर अइसने ही करना हे, जऊन ह अनजाने म या अगियानता म पाप करथे; ये किसम ले तोला मंदिर बर प्रायस्चित करना हे।
EZE 45:21 “ ‘पहिला महिना के चौदहवां दिन तुमन फसह के तिहार मनावव; ये तिहार ह सात दिन के होवय, अऊ ये दौरान तुमन बिगर खमीर के बने रोटी ला खावव।
EZE 45:22 ओ दिन हाकिम ह अपन बर अऊ देस के जम्मो मनखेमन बर एक बछवा पाप-बलिदान के रूप म देवय।
EZE 45:23 तिहार के ओ सात दिन तक हर एक दिन ओह यहोवा ला होम-बलिदान के रूप म सात-सात ठन निरदोस बछवा अऊ सात-सात ठन निरदोस मेढ़ा देवय, अऊ पाप-बलिदान बर हर एक दिन एक-एक ठन बोकरा देवय।
EZE 45:24 ओह हर एक बछवा बर एक एपा अऊ हर एक मेढ़ा बर एक एपा अन्न-बलिदान के रूप म देवय, संग म हर एक एपा बर एक हीन जैतून तेल घलो देवय।
EZE 45:25 “ ‘तिहार के सात दिन के दौरान, जऊन ह सातवां महिना के पंदरहवां दिन सुरू होथे, ओह हर दिन पाप-बलिदान, होम-बलिदान, अन्न-बलिदान अऊ तेल के अइसने ही परबंध करय।
EZE 46:1 “ ‘परमपरधान यहोवा ह ये कहत हे: भीतरी अंगना के पूरबमुखी दुवार ह काम-बुता के छै दिन बंद रहय, पर बिसराम दिन अऊ नवां चंदा के दिन येह खुला रहय।
EZE 46:2 हाकिम ह बाहिर ले दुवार के मंडप म ले होके प्रवेस करय अऊ दुवार के चौखट मेर खड़े रहय। पुरोहितमन ओकर होम-बलिदान अऊ मेल-बलिदान ला चघावंय। हाकिम ह दुवार के चौखट मेर भक्ति म मुड़ नवाय अऊ तब बाहिर चले जावय, अऊ दुवार ला संझा होवत तक झन बंद करे जावय।
EZE 46:3 देस के मनखेमन बिसराम दिन अऊ नवां चंदा के दिन ओही दुवार के फाटक मेर यहोवा के आघू म अराधना करंय।
EZE 46:4 हाकिम ह बिसराम दिन म यहोवा बर जऊन होम-बलिदान लाथे, ओमा छै ठन निरदोस मेढ़ा-पीला अऊ एक ठन निरदोस मेढ़ा होवय।
EZE 46:5 मेढ़ा के संग दिये जानेवाला अन्न-बलिदान एक एपा होवय, अऊ मेढ़ा-पीलामन के संग दिये जानेवाला अन्न-बलिदान अपन खुसी से जतेक जादा दे सकत हे, देवय; येकर संग हर एपा के पाछू एक हीन जैतून तेल घलो देवय।
EZE 46:6 नवां चंदा के दिन ओह एक ठन निरदोस बछवा, छै ठन निरदोस मेढ़ा-पीला अऊ एक ठन निरदोस मेढ़ा चघावय, ये जम्मो निरदोस होवंय।
EZE 46:7 ओह अन्न-बलिदान के रूप म बछवा के संग एक एपा, मेढ़ा के संग एक एपा अऊ मेढ़ा-पीलामन के संग जतेक जादा ओह चाहथे, देवय, येकर संग हर एपा के पाछू एक हीन तेल घलो देवय।
EZE 46:8 जब हाकिम ह भीतर जावय, त ओह दुवार के मंडप ले होके जावय, अऊ ओह ओही रद्दा ले बाहिर आवय।
EZE 46:9 “ ‘जब देस के मनखेमन ठहिराय गय तिहार म यहोवा के आघू म आवंय, त जऊन ह अराधना करे बर उत्तरी दुवार ले होके आवय, ओह दक्खिनी दुवार ले होके बाहिर निकलय; अऊ जऊन ह दक्खिनी दुवार ले होके भीतर आवय, ओह उत्तरी दुवार ले होके बाहिर निकलय। कोनो भी ओहीच दुवार ले बाहिर झन निकलय, जेमा ले होके ओह भीतर आय रिहिस, पर हर एक ह बिरूध दिग के दुवार ले बाहिर निकलय।
EZE 46:10 जब ओमन भीतर जावंय, तब हाकिम ह ओमन के बीच म रहिके जावय, अऊ जब ओमन बाहिर निकलंय, तब ओह घलो ओमन के संग बाहिर निकलय।
EZE 46:11 जेवनार अऊ ठहिराय गय तिहारमन म, अन्न-बलिदान एक बछवा के पाछू एक एपा, एक मेढ़ा के पाछू एक एपा, अऊ मेढ़ा-पीलामन के संग अपन खुसी से जतेक जादा ओह दे सकथे, देवय; येकर संग हर एपा के पाछू हीन भर तेल घलो देवय।
EZE 46:12 “ ‘जब हाकिम ह यहोवा ला स्वेच्छा-बलिदान देवय—चाहे येह एक होम-बलिदान या मेल-बलिदान हो, तब पूरबमुखी दुवार ला ओकर बर खोल दिये जावय। ओह अपन होम-बलिदान या मेल-बलिदान ला वइसनेच ही चघावय, जइसने ओह बिसराम दिन म चघाथे। तब ओह बाहिर चले जावय, अऊ ओकर जाय के बाद, दुवार ला बंद कर दिये जावय।
EZE 46:13 “ ‘हर दिन तें यहोवा ला एक साल के एक निरदोस मेढ़ा-पीला होम-बलिदान बर देबे; हर बिहनियां तें येला देय करबे।
EZE 46:14 येकर संग तोला हर बिहनियां एक अन्न-बलिदान घलो देना हे, जेमा एक एपा के छठवां अंस अऊ पीसान म मिलाय बर एक हीन तेल के तिहाई भाग होवय। यहोवा ला ये अन्न-बलिदान देवई ह एक हमेसा के आदेस ए।
EZE 46:15 एकरसेति नियमित होम-बलिदान बर हर बिहनियां मेढ़ा-पीला, अन्न-बलिदान अऊ तेल दिये जावय।
EZE 46:16 “ ‘परमपरधान यहोवा ह ये कहत हे: यदि हाकिम ह अपन उत्तराधिकार म पाय संपत्ति म ले अपन कोनो बेटा ला कुछू ईनाम देथे, त ओह ओकर संतानमन के घलो होही; येह उत्तराधिकार म मिले ओमन के संपत्ति होवय।
EZE 46:17 पर यदि, ओह अपन उत्तराधिकार के संपत्ति म ले कुछू ईनाम अपन कोनो सेवक ला देथे, त सेवक ह ओ ईनाम ला अपन सुतंतर होय के बछर तक रखय, ओकर बाद ओ ईनाम हाकिम ला लहुंटा देय जावय। हाकिम के उत्तराधिकार के संपत्ति सिरिप ओकर बेटामन ला मिलय; येह ओमन के अय।
EZE 46:18 हाकिम ह मनखेमन के उत्तराधिकार के कोनो संपत्ति ला झन लेवय, ओह ओमन ला ओमन के संपत्ति ले बेदखल झन करय। ओह अपन बेटामन ला अपन ही संपत्ति ले उत्तराधिकार देवय, ताकि मोर मनखेमन ले कोनो ला भी ओकर संपत्ति ले अलग झन करे जावय।’ ”
EZE 46:19 तब ओ मनखे मोला दुवार के बाजू म ले पुरोहितमन के पबितर कमरामन म ले आईस, जेमन उत्तर कोति खुलंय, अऊ ओह मोला पछिम छोर म एक जगह देखाईस।
EZE 46:20 तब ओह मोर ले कहिस, “येह ओ जगह अय, जिहां पुरोहितमन दोस-बलिदान अऊ पाप-बलिदान के मांस ला रांधंय अऊ अन्न-बलिदान ला पकावंय, जेकर कारन येमन ला बाहिरी अंगना म लाय के जरूरत नइं होवय अऊ मनखेमन ला पबितर करे के जरूरत घलो नइं होवय।”
EZE 46:21 तब ओह मोला बाहिरी अंगना म ले जाके येकर चारों कोति चारों कोनटा म ले गीस, अऊ मेंह हर एक कोनटा म एक-एक ठन अऊ अंगना देखेंव।
EZE 46:22 बाहिरी अंगना के चारों कोनटा म, चालीस क्यूबीट लम्बा अऊ तीस क्यूबीट चौड़ा घिरे हुए अंगनामन रिहिन; चारों कोनटा म हर एक अंगना एकेच नाप के रिहिन।
EZE 46:23 चारों अंगना के हर एक के भीतर चारों कोति पथरा के एक निकले भाग रिहिस, ओ निकले भाग के खाल्हे चारों कोति आगी बारे के जगह बनाय गे रिहिस।
EZE 46:24 ओ मनखे ह मोला कहिस, “येमन रंधनी खोली अंय, जिहां मंदिर म सेवा करइया लेवीमन, मनखेमन के चघाय बलिदानमन ला रांधंय।”
EZE 47:1 फेर ओ मनखे ह मोला मंदिर के प्रवेस दुवार मेर वापिस ले आईस, अऊ मेंह देखेंव कि मंदिर के चौखट के खाल्हे ले पानी बाहिर निकलके पूरब कोति बोहावत हे (काबरकि मंदिर के मुहूं ह पूरब कोति रिहिस)। मंदिर के दक्खिन भाग के खाल्हे ले, बेदी के दक्खिन ले पानी ह खाल्हे निकलत रिहिस।
EZE 47:2 तब ओह मोला उत्तरी दुवार ले बाहिर ले आईस अऊ मोला बाहिर कोति घुमाके बाहिरी दुवार मेर ले आईस, जेकर मुहूं पूरब कोति रिहिस, अऊ दक्खिन कोति ले पानी ह चूहत रिहिस।
EZE 47:3 तब ओ मनखे ह अपन हांथ म नापे के डोरी ला धरके पूरब कोति गीस, अऊ ओह एक हजार क्यूबीट नापिस, तब ओह मोला पानी म ले रेंगाके ले गीस, अऊ पानी एड़ी तक रिहिस।
EZE 47:4 ओह फेर एक हजार क्यूबीट नापिस अऊ मोला पानी म ले होके ले गीस, जऊन ह माड़ीमन तक गहिरा रिहिस। ओह फेर एक हजार क्यूबीट नापिस अऊ मोला पानी म ले रेंगाके ले गीस, जऊन ह कनिहां तक गहिरा रिहिस।
EZE 47:5 ओह फेर एक हजार क्यूबीट नापिस, पर अब ओह एक नदी हो गीस, अऊ में ओ पार नइं जा सकेंव, काबरकि पानी ह बाढ़ गे रिहिस अऊ अतेक गहिरा रिहिस कि तउंरे जा सकत रिहिस—एक अइसने नदी, जेला कोनो पार नइं कर सकत रिहिन।
EZE 47:6 ओह मोर ले पुछिस, “हे मनखे के बेटा, का तेंह येला देखत हस?” तब ओह मोला वापिस नदी के तीर म ले आईस।
EZE 47:7 जब में उहां हबरेंव, तब मेंह नदी के दूनों कोति अब्बड़ अकन रूखमन ला देखेंव।
EZE 47:8 तब ओह मोर ले कहिस, “ये पानी ह पूरबी इलाका कोति बोहात हे अऊ खाल्हे अराबा म जावत हे, जिहां येह मिरतू सागर म मिल जाथे। जब येह सागर म मिल जाथे, त उहां नूनचूर पानी ह मीठा हो जाथे।
EZE 47:9 जिहां-जिहां नदी ह बोहाथे, उहां-उहां जीवमन के झुंडमन रहिहीं। उहां अब्बड़ अकन मछरीमन होहीं, काबरकि ये पानी ह उहां बोहाथे अऊ नूनचूर पानी ला मीठा बनाथे; एकरसेति जिहां-जिहां नदी ह बोहाथे, उहां हर चीज जीयत रहिहीं।
EZE 47:10 नदी के तीर म मछुआरमन ठाढ़ होहीं; एन-गदी ले लेके एन-एगलेम तक उहां जाल डारे के जगह होही। उहां कतको किसम के मछरी होहीं—भूमध्य सागर के मछरीमन सहीं।
EZE 47:11 पर चीखला भरे खंचवा अऊ पानी के खंचवामन मीठा नइं होहीं, ओमन ला नून बर छोंड़ दिये जाही।
EZE 47:12 जम्मो किसम के फर के रूखमन नदी के दूनों तीर म जामहीं। ओमन के पानमन नइं मुरझाहीं, अऊ न ही ओमन म फर धरई कभू बंद होही। हर महिना ओमन म फर लगही, काबरकि पबितर-स्थान ले पानी बहके ओमन म आथे। ओमन के फर खाय के काम आहीं अऊ ओमन के पान दवाई के काम म आहीं।”
EZE 47:13 परमपरधान यहोवा ह ये कहत हे: “देस के ये सीमनामन अंय, जेला तें इसरायल के बारह गोत्रमन के बीच ओमन के उत्तराधिकार के रूप म बांटबे, अऊ येमा यूसुफ ला दू भाग मिलय।
EZE 47:14 तें येला ओमन के बीच बरोबर-बरोबर बांटबे। काबरकि मेंह हांथ उठाके कसम खाय रहेंव कि मेंह येला तुम्हर पुरखामन ला दूहूं। ये देस तुम्हर उत्तराधिकार म हो जाही।
EZE 47:15 “देस के सीमना ये होवय: “उत्तर कोति के सीमना भूमध्य सागर ले हेतलोन सड़क के बाद लेबो-हमात ले होवत सेदाद सहर तक,
EZE 47:16 बेरोता अऊ सिबरैम (जऊन ह दमिस्क अऊ हमात के बीच सीमना म पड़थे), अऊ हसर-हत्तीकोन सहर तक, जऊन ह हौरान जिला के सीमना म हवय।
EZE 47:17 ये सीमना ह समुंदर ले लेके दमिस्क के उत्तरी सीमना के संगे-संग हसर-एनान सहर तक फईलही, अऊ संग म उत्तर कोति हमात के सीमना होही। येह उत्तरी सीमना होही।
EZE 47:18 पूरब कोति के सीमना हौरान अऊ दमिस्क के बीच होवत, यरदन नदी के संग गिलाद अऊ इसरायल देस के बीच, मिरतू सागर तक होही अऊ तामार नगर तक फईलही। येह पूरबी सीमना होही।
EZE 47:19 दक्खिन कोति के सीमना तामार ले लेके मरीबा-कादेस के पानी के सोता तक होही, तब मिसर के नरवा ले होवत भूमध्य सागर तक। येह दक्खिन के सीमना होही।
EZE 47:20 पछिम कोति के सीमना भूमध्य सागर म लेबो-हमात के सामने के एक जगह तक होही। येह पछिम के सीमना होही।
EZE 47:21 “तोला ये देस ला अपन बीच म इसरायल के गोत्रमन के मुताबिक बांटना हे।
EZE 47:22 तोला ये देस ला एक उत्तराधिकार के रूप म अपन बर अऊ तुम्हर बीच रहइया परदेसी, जेमन के लइकामन हवंय, ओमन बर बांटना हे। ओमन ला तें देस म जनमे इसरायलीमन सहीं ही समझबे; अपन संग, ओमन ला घलो इसरायल के गोत्रमन के बीच एक उत्तराधिकार दिये जावय।
EZE 47:23 जऊन भी गोत्र म कोनो परदेसी रहिथे, उहां तें ओला ओकर भाग ला देबे,” परमपरधान यहोवा ह घोसना करत हे।
EZE 48:1 “सूची म लिखे गय गोत्र के नांव ये अंय: “उत्तरी सीमना म, दान के एक भाग होही; येह हेतलोन सहर के रद्दा के पाछू लेबो-हमात तक जाही; हसर-एनान सहर अऊ हमात ले लगे दमिस्क के उत्तरी सीमना येकर सीमना के भाग होही, जऊन ह पूरब कोति ले पछिम तक होही।
EZE 48:2 आसेर के एक भाग होही; येकर सीमना पूरब ले पछिम तक दान के सीमना ले लगे होही।
EZE 48:3 आसेर के सीमना ले लगके, पूरब ले पछिम तक नपताली के एक भाग होही।
EZE 48:4 नपताली के सीमना ले लगके, पूरब ले पछिम तक मनस्से के एक भाग होही।
EZE 48:5 मनस्से के सीमना ले लगके, पूरब ले पछिम तक एपरैम के एक भाग होही।
EZE 48:6 एपरैम के सीमना ले लगके, पूरब ले पछिम तक रूबेन के एक भाग होही।
EZE 48:7 रूबेन के सीमना ले लगके, पूरब ले पछिम तक यहूदा के एक भाग होही।
EZE 48:8 “यहूदा के सीमना ले लगके, पूरब ले पछिम तक एक भाग होही, जेला तें एक बिसेस भेंट के रूप म अरपन करबे। येकर चौड़ई 25,000 क्यूबीट, अऊ पूरब ले लेके पछिम तक येकर लम्बई कोनो एक गोत्र ला दिये गय भाग के बरोबर होही; ये भाग के बीच म पबितर-स्थान होही।
EZE 48:9 “जऊन बिसेस भाग, तेंह यहोवा ला अरपन करबे, ओकर लम्बई 25,000 क्यूबीट अऊ चौड़ई 10,000 क्यूबीट होही।
EZE 48:10 येह पुरोहितमन बर पबितर भाग होही। उत्तर कोति येकर लम्बई 25,000 क्यूबीट, पछिम कोति येकर चौड़ई 10,000 क्यूबीट, पूरब कोति येकर चौड़ई 10,000 क्यूबीट अऊ दक्खिन कोति येकर लम्बई 25,000 क्यूबीट होही। येकर मांझा म यहोवा के पबितर-स्थान होही।
EZE 48:11 ये भाग ह सादोक के बंस के ओ पबितर करे गय पुरोहितमन बर होही, जेमन मोर सेवा करे म बिसवासयोग्य रिहिन अऊ ओ लेवीमन सहीं नइं भटकिन, जेमन इसरायलीमन के भटके के बेरा, भटक गे रिहिन।
EZE 48:12 देस के पबितर भाग ले येह ओमन बर एक बिसेस भेंट होही, एक महा पबितर भाग, जऊन ह लेवीमन के सीमना ले लगे होही।
EZE 48:13 “पुरोहितमन के इलाका ले लगे एक भाग लेवीमन बर होही, जऊन ह 25,000 क्यूबीट लम्बा अऊ 10,000 क्यूबीट चौड़ा होही। येकर पूरा लम्बई 25,000 क्यूबीट अऊ चौड़ई 10,000 क्यूबीट होही।
EZE 48:14 ओमन येला न तो बेचंय अऊ न ही येकर कोनो भाग ला अदला-बदली करंय। येह देस के सबले बने भाग ए अऊ कोनो भी हालत म येला आने मन के हांथ म झन देय जावय, काबरकि येह यहोवा बर पबितर अय।
EZE 48:15 “बचे 5,000 क्यूबीट चौड़ा अऊ 25,000 क्यूबीट लम्बा भाग ह सहर के सधारन उपयोग बर, घर अऊ चरागन बर होही। सहर ह येकर मांझा म होही
EZE 48:16 अऊ येकर नाप अइसने होही: उत्तर कोति 4,500 क्यूबीट, दक्खिन कोति 4,500 क्यूबीट, पूरब कोति 4,500 क्यूबीट अऊ पछिम कोति 4,500 क्यूबीट।
EZE 48:17 सहर के चरागन बर भुइयां ह उत्तर कोति 250 क्यूबीट, दक्खिन कोति 250 क्यूबीट, पूरब कोति 250 क्यूबीट, अऊ पछिम कोति 250 क्यूबीट होही।
EZE 48:18 पबितर भाग के सीमना ले लगे जऊन बचे भाग होही अऊ पबितर भाग के लम्बई म होही, ओह पूरब कोति 10,000 क्यूबीट अऊ पछिम कोति 10,000 क्यूबीट होही। येकर ऊपज ले सहर के काम करइयामन ला जेवन मिलही।
EZE 48:19 सहर के जऊन काम करइयामन येमा खेती-बारी करहीं, ओमन इसरायल के जम्मो गोत्रमन ले आहीं।
EZE 48:20 ये पूरा भाग ह वर्गाकार होही, हर एक कोति 25,000 क्यूबीट। एक बिसेस भेंट के रूप म, तें पबितर भाग ला, सहर के संपत्ति के संग अलग रखबे।
EZE 48:21 “पबितर भाग ले बने इलाका के दूनों कोति जऊन भाग बच जाथे, ओह अऊ सहर के संपत्ति हाकिम के होही। येह पबितर भाग ले 25,000 क्यूबीट पूरब के सीमना कोति अऊ 25,000 क्यूबीट पछिम के सीमना कोति फईले होही। ये दूनों भाग हाकिम के होहीं, जेमन गोत्र के भागमन के लम्बई म होहीं, अऊ येमन के मांझा म पबितर भाग के संग मंदिर के पबितर-स्थान होही।
EZE 48:22 ये किसम ले लेवीमन के संपत्ति अऊ सहर के संपत्ति ओ इलाका म होही, जऊन ह हाकिम के होही। हाकिम के भाग यहूदा के सीमना अऊ बिनयामीन के सीमना के बीच म होही।
EZE 48:23 “बाकि गोत्रमन के भाग ह ये किसम ले होही: “पूरब कोति ले लेके पछिम तक फईले एक भाग बिनयामीन के होही।
EZE 48:24 बिनयामीन के इलाका के सीमना ले लगके पूरब ले पछिम कोति एक भाग सिमोन के होही।
EZE 48:25 सिमोन के भाग के सीमना ले लगके पूरब ले पछिम कोति एक भाग इस्साकार के होही।
EZE 48:26 इस्साकार के भाग के सीमना ले लगके पूरब ले पछिम कोति एक भाग जबूलून के होही।
EZE 48:27 जबूलून के भाग के सीमना ले लगके पूरब ले पछिम कोति एक भाग गाद के होही।
EZE 48:28 गाद के दक्खिनी सीमना दक्खिन कोति तामार ले लेके मरीबा-कादेस के पानी के सोता तक जाही, तब मिसर के नरवा ले होवत भूमध्य सागर तक होही।
EZE 48:29 “येह ओ देस ए, जेला तें इसरायल के गोत्रमन ला एक उत्तराधिकार के रूप म बांट देबे, अऊ येमन ओमन के भाग होहीं,” परमपरधान यहोवा ह घोसना करत हे।
EZE 48:30 “येमन सहर ले बाहिर निकले के दुवारमन होहीं: “उत्तर कोति ले सुरू होके, जेकर लम्बई 4,500 क्यूबीट हवय,
EZE 48:31 सहर के दुवारमन ला इसरायल के गोत्रमन के नांव दिये जाही। उत्तर कोति तीन ठन दुवारमन के नांव रूबेन के दुवार, यहूदा के दुवार अऊ लेवी के दुवार होही।
EZE 48:32 पूरब कोति, जेकर लम्बई 4,500 क्यूबीट हवय, तीन ठन दुवार होहीं: यूसुफ के दुवार, बिनयामीन के दुवार अऊ दान के दुवार।
EZE 48:33 दक्खिन कोति, जेकर नाप 4,500 क्यूबीट हवय, तीन ठन दुवार होहीं: सिमोन के दुवार, इस्साकार के दुवार अऊ जबूलून के दुवार।
EZE 48:34 पछिम कोति, जेकर लम्बई 4,500 क्यूबीट हवय, तीन ठन दुवार होहीं: गाद के दुवार, आसेर के दुवार अऊ नपताली के दुवार।
EZE 48:35 “चारों कोति के दूरी 18,000 क्यूबीट होही। “अऊ ओ समय ले सहर के नांव होही, ‘यहोवा उहां हवय।’ ”
DAN 1:1 यहूदा प्रदेस के राजा यहोयाकीम के राज के तीसरा बछर म बेबिलोन के राजा नबूकदनेसर ह आईस अऊ यरूसलेम सहर ला घेर लीस।
DAN 1:2 अऊ परभू ह यहूदा के राजा यहोयाकीम ला परमेसर के मंदिर के कुछू चीजमन के संग नबूकदनेसर के अधीन कर दीस। ये चीजमन ला ओह बेबिलोनिया देस म अपन देवता के मंदिर म ले गीस अऊ ओमन ला अपन देवता के खजाना घर म रख दीस।
DAN 1:3 तब राजा ह अपन दरबार के मुखिया अधिकारी असपनाज ला हुकूम दीस कि राज-परिवार अऊ उच्च कुल के कुछू इसरायलीमन ला राजा के सेवा म लाने जावय—
DAN 1:4 येमन अइसन जवान होवंय, जेमन के देहें निरदोस, सुन्दर होवय; ओमन म हर किसम के बात सीखे के योग्यता दिखय; बने जानकार होवंय; बात ला तुरते समझंय, अऊ ओमन म राजा के महल म सेवा करे के योग्यता होवय। राजा ह मुखिया ला हुकूम दीस कि ओह येमन ला बेबिलोनीमन के भासा अऊ साहित्य सिखावय।
DAN 1:5 राजा ह हुकूम दीस कि ओकर खुद के जेवन अऊ मंद म ले ओमन ला हर दिन खाय-पीये बर दिये जावय। ओमन ला तीन बछर तक ट्रेनिंग दिये जावय, अऊ ओकर बाद ओमन ला राजा के सेवा म लाने जावय।
DAN 1:6 जऊन मन चुने गे रिहिन, ओमन म कुछू यहूदा के बंस के रिहिन: दानिएल, हननयाह, मिसाएल अऊ अजरयाह।
DAN 1:7 मुखिया अधिकारी ह ओमन ला नवां नांव दीस: दानिएल ला बेलतसस्सर, हननयाह ला सदरक, मिसाएल ला मेसक अऊ अजरयाह ला अबेदनगो नांव दीस।
DAN 1:8 पर दानिएल ह ठान लीस कि ओह राजसाही जेवन अऊ मंद के दुवारा अपनआप ला असुध नइं करही, अऊ ये किसम ले अपनआप ला असुध नइं करे बर ओह मुखिया अधिकारी ले अनुमति मांगिस।
DAN 1:9 परमेसर ह अधिकारी के मन ला अइसने कर दीस कि ओह दानिएल ऊपर दया अऊ सहानुभूति दिखावय,
DAN 1:10 पर अधिकारी ह दानिएल ला कहिस, “मोला अपन परभू राजा के डर हवय, जऊन ह तुम्हर खाय-पीये के चीजमन ला ठहिराय हवय। अइसने झन होवय कि ओह तुमन ला तुम्हर उमर के आने जवानमन ले कमजोर देखय, अऊ तब तुम्हर कारन, राजा ह मोला मार डारय।”
DAN 1:11 तब दानिएल ह ओ पहरेदार ले कहिस, जऊन ला मुखिया अधिकारी ह दानिएल, हननयाह, मिसाएल अऊ अजरयाह के देखभाल करे बर ठहिराय रिहिस,
DAN 1:12 “किरपा करके तेंह दस दिन तक अपन सेवकमन ला परखके देख: हमन ला खाय-पीये बर सिरिप साकाहारी भोजन अऊ पानी के अलावा कुछू अऊ झन दे।
DAN 1:13 तब हमर देहें ले ओ जवानमन के तुलना करे जावय, जऊन मन राजसाही भोजन खाथें, अऊ ओकर बाद जऊन कुछू तोला दिखय, ओकर मुताबिक अपन सेवकमन संग बरताव कर।”
DAN 1:14 पहरेदार ह ओकर बात ला मान लीस अऊ ओह दस दिन तक ओमन ला परखके देखिस।
DAN 1:15 दस दिन के बाद, ओमन ओ जवानमन ले जादा स्वस्थ अऊ पुस्ट दिखिन, जऊन मन राजसाही भोजन खावत रिहिन।
DAN 1:16 एकरसेति पहरेदार ह ओमन बर ठहिराय उत्तम भोजन अऊ मंद ला हटा लीस अऊ बदले म, ओमन ला साकाहारी भोजन दीस।
DAN 1:17 ये चारों जवान ला परमेसर ह जम्मो किसम के साहित्य अऊ विद्या के गियान अऊ समझ दीस। अऊ दानिएल ह जम्मो किसम के दरसन अऊ सपना ला समझ लेवत रिहिस।
DAN 1:18 तब जतेक समय बाद, राजा ह ओ जवानमन ला अपन सेवा म लाने बर कहे रिहिस, ओ समय पूरा होय के बाद, मुखिया अधिकारी ह ओमन ला नबूकदनेसर के आघू म लानिस।
DAN 1:19 राजा ह ओ जवानमन ले बातचीत करिस अऊ ओह दानिएल, हननयाह, मिसाएल अऊ अजरयाह के बराबर अऊ कोनो जवान ला नइं पाईस; एकरसेति ओमन राजा के सेवा म चुन लिये गीन।
DAN 1:20 बुद्धि अऊ समझ के हर बात म, राजा ह ओमन ले जतेक सवाल करिस, ओमा ओमन राजा के जम्मो राज के सब जादूगर अऊ टोनहामन ले दस गुना जादा बने पाय गीन।
DAN 1:21 अऊ दानिएल ह कुसरू राजा के राज के पहिले बछर तक उहां सेवा करते रिहिस।
DAN 2:1 नबूकदनेसर ह अपन राज के दूसरा बछर म सपना देखिस; जेकर ले ओकर मन ह बियाकुल हो गीस अऊ ओह सुते नइं सकिस।
DAN 2:2 एकरसेति राजा ह जादूगर, टोनहा, तांत्रिक अऊ जोतिसीमन ला बलाईस ताकि ओमन आके बतावंय कि राजा ह का सपना देखे हवय। जब ओमन आईन अऊ राजा के आघू म ठाढ़ होईन,
DAN 2:3 त राजा ह ओमन ले कहिस, “मेंह एक सपना देखे हंव, जेह मोला बियाकुल करत हे अऊ मेंह जाने चाहत हंव कि येकर का मतलब ए।”
DAN 2:4 तब जोतिसीमन राजा ला जबाब दीन, “राजा चिरंजीवी होवय! तेंह अपन सपना अपन सेवकमन ला बता, अऊ हमन ओकर अर्थ बताबो।”
DAN 2:5 राजा ह जोतिसीमन ला जबाब दीस, “मेंह ये ठान ले हंव: यदि तुमन मोला मोर सपना समेत ओकर अर्थ नइं बताहू, त मेंह तुम्हर कुटा-कुटा कर दूहूं अऊ तुम्हर घरमन ला कचरा के कुढ़ा म बदल दूहूं
DAN 2:6 पर यदि तुमन मोला सपना ला बताके ओकर अर्थ घलो बताथव, त तुमन मोर ले उपहार अऊ ईनाम अऊ बहुंत आदरमान पाहू। एकरसेति तुमन मोला सपना बतावव अऊ ओकर अर्थ घलो बतावव।”
DAN 2:7 एक बार फेर ओमन कहिन, “राजा ह अपन सपना अपन सेवकमन ला बतावय, अऊ हमन ओकर अर्थ बताबो।”
DAN 2:8 तब राजा ह जबाब दीस, “मोला निस्चय हो गे हवय कि तुमन समय ला टारे के कोसिस करत हव, काबरकि तुमन समझ गे हव कि मेंह ये ठान ले हंव:
DAN 2:9 यदि तुमन मोला सपना नइं बतात हव, त फेर तुम्हर बर सिरिप एकेच दंड हवय। ये आसा करत कि परिस्थिति ह बदलही, तुमन मोर ले गलत अऊ खराप बात कहे के सडयंत्र रचे हव। एकरसेति अब, तुमन मोला मोर सपना बतावव, अऊ तब मेंह जानहूं कि तुमन मोला ओ सपना के अर्थ घलो बता सकत हव।”
DAN 2:10 जोतिसीमन राजा ला जबाब दीन, “धरती म अइसने कोनो मनखे नइं ए, जऊन ह राजा के दुवारा कहे गय काम ला कर सकय! पर तभो ले, न तो कोनो बड़े अऊ सक्तिसाली राजा ह कोनो जादूगर या टोनहा या जोतिसी ले कभू ये किसम के कोनो बात पुछे हवय।
DAN 2:11 जऊन बात राजा ह पुछत हे, ओह बहुंत कठिन ए। देवतामन ला छोंड़ अऊ कोनो, राजा ला ये बात नइं बता सकंय, अऊ देवतामन मनखेमन के बीच म नइं रहंय।”
DAN 2:12 ये बात ला सुनके राजा ह अतेक गुस्सा होईस अऊ कोरोध करिस कि ओह बेबिलोन के जम्मो बुद्धिमान मनखेमन ला मार डारे के हुकूम दे दीस।
DAN 2:13 एकरसेति बुद्धिमान मनखेमन ला मार डारे के आदेस निकाले गीस, अऊ मनखेमन ला दानिएल अऊ ओकर संगीमन के खोज म पठोय गीस ताकि ओमन घलो मार डारे जावंय।
DAN 2:14 जब राजा के अंगरछकमन के सेनापति अरयोक, बेबिलोन के बुद्धिमान मनखेमन ला मार डारे बर निकले रिहिस, त दानिएल ह ओकर ले बुद्धिमानी अऊ बने बरताव के संग बात करिस।
DAN 2:15 ओह राजा के अधिकारी ले पुछिस, “राजा ह अइसे कठोर आदेस काबर निकाले हवय?” तब अरयोक ह दानिएल ला जम्मो बात बताईस।
DAN 2:16 ये जानके, दानिएल ह राजा करा गीस अऊ कुछू समय देय के मांग करिस, ताकि ओह राजा ला ओकर सपना के अर्थ बता सकय।
DAN 2:17 तब दानिएल ह अपन घर आईस अऊ ओह अपन संगी हननयाह, मिसाएल अऊ अजरयाह ला ओ जम्मो बात बताईस।
DAN 2:18 ओह ओमन ला उत्साहित करिस कि ओमन स्वरग के परमेसर ले ये रहस्य के बारे म किरपा करे बर बिनती करंय, ताकि ओह अऊ ओकर संगीमन बेबिलोन के बाकि बुद्धिमान मनखेमन के संग झन मार डारे जावंय।
DAN 2:19 रात के बेरा, ओ रहस्य ह एक दरसन के रूप म दानिएल ऊपर परगट होईस। तब दानिएल ह स्वरग के परमेसर के महिमा करिस
DAN 2:20 अऊ कहिस: “परमेसर के नांव के महिमा सदाकाल तक होवत रहय; काबरकि बुद्धि अऊ सक्ति ओकर अय।
DAN 2:21 ओह समय अऊ मौसम ला बदलथे; ओह राजामन ला गद्दी ले हटाथे अऊ आने मन ला गद्दी म बईठाथे। ओह बुद्धिमान ला बुद्धि अऊ समझदार ला गियान देथे।
DAN 2:22 ओह गूढ़ अऊ लुकाय बातमन ला परगट करथे; ओह जानथे कि अंधियार म का रखे हवय, अऊ अंजोर ह ओकर संग रहिथे।
DAN 2:23 हे मोर पुरखामन के परमेसर, मेंह तोला धनबाद देथंव अऊ तोर परसंसा करथंव: तेंह मोला बुद्धि अऊ सक्ति दे हवस, तेंह मोला ओ बात बताय हवस, जऊन ला हमन तोर ले पुछे रहेंन, तेंह हमन ला राजा के सपना ला बताय हस।”
DAN 2:24 तब दानिएल ह अरयोक करा गीस, जऊन ला राजा ह बेबिलोन के बुद्धिमान मनखेमन ला मार डारे बर ठहिराय रिहिस, अऊ ओह अरयोक ले कहिस, “बेबिलोन के बुद्धिमान मनखेमन ला मार डारे के काम ला रोक दे। मोला राजा करा ले चल, अऊ मेंह राजा ला ओकर सपना के अर्थ बताहूं।”
DAN 2:25 अरयोक ह तुरते दानिएल ला राजा करा ले गीस अऊ राजा ले कहिस, “यहूदा प्रदेस ले बंधुवई म आय मनखेमन के बीच मोला एक मनखे मिले हवय, जेह राजा ला ओकर सपना के अर्थ बता सकथे।”
DAN 2:26 राजा ह दानिएल ले पुछिस (जऊन ला बेलतसस्सर घलो कहे जावय), “का तेंह मोला बता सकत हस कि मेंह सपना म का देखे हंव अऊ ओकर अर्थ का ए?”
DAN 2:27 दानिएल ह जबाब दीस, “राजा ह जऊन रहस्य के बारे म पुछत हे, ओकर बारे म कोनो घलो बुद्धिमान मनखे, जोतिसी, जादूगर या अगम के बात बतानेवाला राजा ला कुछू नइं बता सकंय,
DAN 2:28 पर स्वरग म एक परमेसर हवय, जऊन ह रहस्यमन ला परगट करथे। ओहीच ह राजा नबूकदनेसर ला देखाय हवय कि अवइया दिन म का होवइया हे। जब तेंह अपन बिस्तर म लेटे रहे, तब तेंह जऊन सपना अऊ दरसन देखे, ओमन ये अंय:
DAN 2:29 “हे महाराज, जब तेंह अपन पलंग म ढलंगे रहे, त तोर मन ह भविस्य म होवइया चीजमन कोति गीस, अऊ रहस्य के परगट करइया ह तोला देखाईस कि भविस्य म का होवइया हे।
DAN 2:30 जहां तक मोर बात ए, त ये रहस्य ह मोर ऊपर एकरसेति परगट नइं करे गीस कि मोर करा कोनो अऊ जीयत मनखे ले जादा बुद्धि हवय, पर एकरसेति परगट करे गीस कि महाराज ला ये रहस्य के अर्थ मालूम होवय अऊ तेंह समझ जा कि तोर मन म का आय रिहिस।
DAN 2:31 “हे महाराज, तेंह देखे कि तोर आघू म एक ठन बड़े मूरती ठाढ़े रिहिस—एक बहुंत बड़े, चकित करइया मूरती, जऊन ह दिखे म अद्भूत रिहिस।
DAN 2:32 ओ मूरती के मुड़ ह सुध सोन के बने रिहिस, ओकर छाती अऊ बाहांमन चांदी के, ओकर पेट अऊ जांघमन कांसा के,
DAN 2:33 ओकर गोड़मन लोहा के, ओकर पांवमन कुछू लोहा अऊ कुछू पकोय गय माटी के रिहिन।
DAN 2:34 जब तेंह देखत रहे, त एक चट्टान ह बिगर कोनो मनखे के कोसिस के अपनआप कटके अलग हो गीस अऊ ओ मूरती के लोहा अऊ माटी के बने पांवमन ला अइसने ठोकर मारिस कि ओमन चकनाचूर हो गीन।
DAN 2:35 तब लोहा, माटी, कांसा, चांदी अऊ सोन—जम्मो टूटके कुटा-कुटा हो गीन अऊ गरमी महिना म कोठार के भूंसा सहीं हो गीन। हवा ह ओमन ला अइसे उड़ाके ले गीस कि ओमन के कोनो छोटे टुकड़ा घलो नइं बचिस। पर जऊन चट्टान ह मूरती ला ठोकर मारे रिहिस, ओ चट्टान ह एक बहुंत बड़े पहाड़ बन गीस अऊ जम्मो धरती म फईल गीस।
DAN 2:36 “येह रिहिस तोर सपना, अऊ अब हमन राजा ला ओकर अर्थ बताबो।
DAN 2:37 हे महाराज, तेंह तो राजामन के राजा अस। स्वरग के परमेसर ह तोला राज अऊ सक्ति अऊ बल अऊ महिमा दे हवय;
DAN 2:38 ओह जम्मो मानव-जाति अऊ धरती के पसु अऊ अकास के चिरईमन ला तोर हांथ म कर दे हवय। ओमन जिहां घलो रहिथें, ओह तोला ओ जम्मो के ऊपर सासन करइया बनाय हवय। मूरती के सोन के ओ मुड़ तेंह अस।
DAN 2:39 “तोर बाद, एक आने राज ठाढ़ होही, जऊन ह तोर राज ले कम स्तर के होही। ओकर बाद, एक तीसरा राज के उदय होही, जऊन ह कांसा के सहीं होही, जेकर सासन जम्मो धरती ऊपर होही।
DAN 2:40 आखिरी म, एक चौथा राज होही, जऊन ह लोहा के सहीं मजबूत होही—काबरकि लोहा जम्मो चीज ला टोर देथे अऊ चूर-चूर कर देथे—अऊ जइसे कि लोहा चीजमन ला टोरके कुटा-कुटा कर देथे, वइसे ही ये राज घलो आने जम्मो राजमन ला कुचरके कुटा-कुटा कर दीही।
DAN 2:41 जइसे कि तेंह देखे कि पांव अऊ अंगरीमन कुछू सेंके गय माटी अऊ कुछू लोहा के रिहिन, एकरसेति येह हिस्सा म बंटे राज होही, तभो ले येमा कुछू लोहा के सहीं बल होही, जइसे कि तेंह लोहा ला माटी के संग मिले देखे।
DAN 2:42 जइसे कि पांव के अंगरीमन कुछू लोहा अऊ कुछू माटी के रिहिन, एकरसेति ये राज ह कुछू तो मजबूत अऊ कुछू कमजोर होही।
DAN 2:43 अऊ जइसे कि तेंह लोहा ला सेंके गय माटी के संग मिले देखे, वइसे ही मनखेमन के एक मिलावट होही अऊ ओमन म एकता नइं होही, काबरकि लोहा के माटी के संग मेल नइं होवय।
DAN 2:44 “ओ राजामन के समय म, स्वरग के परमेसर ह एक अइसने राज ला स्थापित करही, जऊन ह कभू नास नइं होही, अऊ न ही येकर ऊपर कोनो आने ह सासन करही। ये राज ह ओ जम्मो राजमन ला चूर-चूर कर दीही अऊ ओमन के अन्त कर दीही, पर येह खुद सदाकाल तक बने रहिही।
DAN 2:45 येह ओ चट्टान के दरसन के अर्थ अय, जऊन ह मनखेमन के दुवारा नइं, पर अपनआप एक पहाड़ ले कटके अलग होय रिहिस—एक चट्टान, जऊन ह लोहा, कांसा, माटी, चांदी अऊ सोन ला कुटा-कुटा कर दे रिहिस। “महान परमेसर ह राजा ला देखाय हवय कि भविस्य म का होवइया हे। ये सपना ह सच ए अऊ येकर अर्थ बिसवासयोग्य अय।”
DAN 2:46 तब राजा नबूकदनेसर ह दानिएल के गोड़ खाल्हे गिरके ओला दंडवत करिस अऊ ओला आदर दीस अऊ हुकूम दीस कि दानिएल ला भेंट अऊ खुसबूदार चीज उपहार म दिये जावय।
DAN 2:47 राजा ह दानिएल ला कहिस, “सही म तोर परमेसर ह देवतामन के परमेसर अऊ राजामन के परभू अऊ रहस्यमन ला परगट करइया ए, काबरकि तेंह ये रहस्य ला बताय म योग्य ठहिरे।”
DAN 2:48 तब राजा ह दानिएल ला एक ऊंच पद म ठहिराईस अऊ ओला खुले हांथ ले बहुंत अकन ईनाम दीस। राजा ह ओला पूरा बेबिलोन राज के सासक बना दीस अऊ बेबिलोन के जम्मो बुद्धिमान मनखेमन ऊपर ओला अधिकारी ठहिराईस।
DAN 2:49 येकर अलावा, दानिएल के बिनती ले, राजा ह सदरक, मेसक अऊ अबेदनगो ला बेबिलोन राज ऊपर प्रसासक ठहिराईस, पर दानिएल ह खुद राज दरबार म बने रिहिस।
DAN 3:1 राजा नबूकदनेसर ह सोन के एक मूरती बनवाईस, जेकर ऊंचई साठ क्यूबीट अऊ चौड़ई छै क्यूबीट रिहिस, अऊ ये मूरती ला ओह बेबिलोन राज के दूरा नांव के मैदान म स्थापित करिस।
DAN 3:2 तब ओह हाकिम, परधान, राजपाल, सलाहकार, खजांची, नियायधीस, जिलाधीस अऊ राज के आने जम्मो अधिकारीमन ला बलाईस कि ओमन ओ मूरती के समरपन समारोह म सामिल होवंय जऊन ला ओह स्थापित करे रिहिस।
DAN 3:3 एकरसेति हाकिम, परधान राजपाल, सलाहकार, खजांची, नियायधीस, जिलाधीस अऊ राज के आने जम्मो अधिकारी ओ मूरती के समरपन समारोह बर जूरिन, जऊन ला राजा नबूकदनेसर ह स्थापित करे रिहिस, अऊ ओ जम्मो झन ओ मूरती के आघू म ठाढ़ होईन।
DAN 3:4 तब घोसना करइया ह ऊंचहा अवाज म ये घोसना करिस, “हे जाति-जाति अऊ हर भासा के मनखेमन, तुमन ला ये करे के हुकूम दिये जावत हे:
DAN 3:5 जतेक बेरा तुमन नरसिंगा, बांसुरी, सितार, सारंगी, बीना, सहनई अऊ जम्मो किसम के बाजा के अवाज सुनव, त ओहीच बेरा तुमन सीधा गिरके सोन के ओ मूरती के अराधना करव, जऊन ला राजा नबूकदनेसर ह स्थापित करे हवय।
DAN 3:6 जऊन कोनो सीधा गिरके अराधना नइं करही, ओला तुरते धधकत आगी के भट्ठी म डार दिये जाही।”
DAN 3:7 एकरसेति जब ओमन नरसिंगा, बांसुरी, सितार, सारंगी, बीना अऊ जम्मो किसम के बाजा के अवाज सुनिन, त जम्मो जाति अऊ हर भासा के मनखेमन सीधा गिरके ओ सोन के मूरती के अराधना करिन, जऊन ला राजा नबूकदनेसर ह स्थापित करे रिहिस।
DAN 3:8 येहीच बेरा कुछू जोतिसीमन आघू आईन अऊ यहूदीमन ऊपर दोस लगाय लगिन।
DAN 3:9 ओमन राजा नबूकदनेसर ला कहिन, “राजा ह चिरंजीवी होवय!
DAN 3:10 तें राजा ह एक हुकूम निकाले हवस कि नरसिंगा, बांसुरी, सितार, सारंगी, बीना, सहनई अऊ जम्मो किसम के बाजा के अवाज सुनते ही हर मनखे सीधा गिरके सोन के मूरती के अराधना करंय,
DAN 3:11 अऊ जऊन कोनो सीधा गिरके अराधना नइं करय, ओला धधकत आगी के भट्ठी म झोंक दिये जावय।
DAN 3:12 पर कुछू यहूदीमन हवंय, जेमन ला तेंह बेबिलोन राज के कामकाज बर ठहिराय हस—सदरक, मेसक अऊ अबेदनगो। हे महाराज, ओमन तोर हुकूम ला नइं माने हें। ओमन न तो तोर देवतामन के सेवा करथें अऊ न ही तोर दुवारा स्थापित सोन के मूरती के अराधना करथें।”
DAN 3:13 भयंकर गुस्सा होके नबूकदनेसर ह सदरक, मेसक अऊ अबेदनगो ला बलाईस। तब ये तीनों ला राजा करा लाने गीस,
DAN 3:14 अऊ नबूकदनेसर ह ओमन ला कहिस, “हे सदरक, मेसक अऊ अबेदनगो, का येह सच ए कि तुमन मोर देवतामन के सेवा नइं करव या मोर दुवारा स्थापित सोन के मूरती के अराधना नइं करत हव?
DAN 3:15 अब जब तुमन नरसिंगा, बांसुरी, सितार, सारंगी, बीना, सहनई अऊ जम्मो किसम के बाजा के अवाज सुनव, अऊ यदि तुमन सीधा गिरके मोर दुवारा बनाय गय मूरती के अराधना करे बर तियार हव, त बने बात ए। पर यदि तुमन ओकर अराधना नइं करव, त तुमन ला तुरते एक धधकत आगी के भट्ठी म झोंक दिये जाही। तब कोन देवता ह तुमन ला मोर हांथ ले बचाही?”
DAN 3:16 सदरक, मेसक अऊ अबेदनगो राजा ला जबाब दीन, “हे राजा नबूकदनेसर, ये बिसय म हमन ला तोर आघू म अपनआप के बचाव करे के जरूरत नइं ए।
DAN 3:17 यदि हमन ला धधकत आगी के भट्ठी म फटिक दिये जाथे, त हमर परमेसर, जेकर सेवा हमन करथन, हमन ला येकर ले बचाय के सक्ति रखथे, अऊ हे महाराज, ओह हमन ला तोर हांथ ले घलो बचाही।
DAN 3:18 पर यदि ओह हमन ला नइं घलो बचाय, तभो ले, हे महाराज, हमन तोला बता देय चाहत हन कि हमन तोर देवतामन के सेवा नइं करन या तोर दुवारा स्थापित सोन के मूरती के अराधना नइं करन।”
DAN 3:19 तब नबूकदनेसर ह सदरक, मेसक अऊ अबेदनगो ऊपर बहुंत गुस्सा होईस, अऊ ओकर भावना ओमन के प्रति बदल गीस। ओह हुकूम दीस कि भट्ठी ला सधारन ले सात गुना जादा धधकाय जावय,
DAN 3:20 अऊ ओह अपन सेना के सबले बलवान कुछू सैनिकमन ला हुकूम दीस कि सदरक, मेसक अऊ अबेदनगो ला बांधके धधकत भट्ठी म फटिक दिये जाय।
DAN 3:21 एकरसेति ये तीनों ला ओमन के पहिरे लबादा, पजामा, पगड़ी अऊ आने ओनहामन समेत बांधके धधकत भट्ठी म फटिक दिये गीस।
DAN 3:22 राजा के हुकूम ह बहुंत जरूरी रिहिस अऊ भट्ठी ह अतेक गरम रिहिस कि आगी के जुवाला ले ओ सैनिकमन मारे गीन, जऊन मन सदरक, मेसक अऊ अबेदनगो ला भट्ठी करा लेय गे रिहिन,
DAN 3:23 अऊ ये तीनों मनखे कसके बंधाय धधकत आगी के भट्ठी म डार दिये गीन।
DAN 3:24 तब राजा नबूकदनेसर ह चकित होवत कूदके ठाढ़ हो गीस अऊ अपन सलाहकारमन ले पुछिस, “का ओमन तीन झन मनखे नइं रिहिन, जेमन ला हमन बांधके आगी म फटिके रहेंन?” ओमन जबाब दीन, “हव, महाराज।”
DAN 3:25 राजा ह कहिस, “देखव! मेंह आगी के बीच म चार झन मनखे ला चलत देखत हंव; ओमन बंधाय नइं एं अऊ ओमन ला कुछू हानि नइं होय हवय, अऊ चौथा मनखे ह देवतामन के बेटा सहीं दिखत हे।”
DAN 3:26 तब नबूकदनेसर ह धधकत भट्ठी के मुहूं करा गीस अऊ ऊंचहा अवाज म कहिस, “हे सदरक, मेसक अऊ अबेदनगो, सर्वोच्च परमेसर के सेवकमन, बाहिर आ जावव! इहां आवव!” ये सुनके सदरक, मेसक अऊ अबेदनगो आगी ले बाहिर निकल आईन,
DAN 3:27 अऊ ओमन के चारों कोति हाकिम, परधान, राजपाल अऊ राज सलाहकारमन के भीड़ लग गीस। ओमन देखिन कि ओ तीनों के देहें ला आगी ले कुछू नुकसान नइं होय रिहिस, न ही ओमन के मुड़ के कोनो बाल झुलसे रिहिस; ओमन के ओनहामन घलो नइं जले रिहिन, अऊ ओमन ले जले के कोनो गंध नइं आवत रिहिस।
DAN 3:28 तब नबूकदनेसर ह कहिस, “सदरक, मेसक अऊ अबेदनगो के परमेसर के महिमा होवय, जऊन ह अपन स्वरगदूत ला पठोके अपन सेवकमन ला बचाईस! ओमन ओकर ऊपर भरोसा करिन अऊ राजा के हुकूम के परवाह नइं करिन अऊ अपन परान देय बर घलो तियार रिहिन, येकर बनिस्पत कि अपन परमेसर ला छोंड़के कोनो अऊ देवता के सेवा या अराधना करंय।
DAN 3:29 एकरसेति मेंह ये हुकूम देवत हंव कि कोनो घलो जाति या भासा के मनखे, यदि सदरक, मेसक अऊ अबेदनगो के परमेसर के बिरूध कुछू कहिथें, त ओमन ला काटके कुटा-कुटा कर दिये जाय अऊ ओमन के घरमन ला कचरा के कुढ़ा बना दिये जाय, काबरकि अइसन कोनो देवता नइं ए, जऊन ह ये किसम ले बचा सकय।”
DAN 3:30 तब राजा ह सदरक, मेसक अऊ अबेदनगो ला बेबिलोन राज म अऊ ऊंच पद दीस।
DAN 4:1 राजा नबूकदनेसर के तरफ ले, जम्मो धरती म रहइया जाति-जाति अऊ हर भासा के मनखेमन ला ये बचन: तुमन जम्मो के बहुंत उन्नति होवय!
DAN 4:2 सर्वोच्च परमेसर के दुवारा मोर बर करे गय ओ अद्भूत चिनहां अऊ अचरज के काम के बारे म तुमन ला बताके मोला खुसी होवत हे।
DAN 4:3 कइसे बड़े हवंय ओकर चिनहांमन,
DAN 4:4 में, नबूकदनेसर ह अपन महल म संतुस्ट अऊ सम्पन्न रहेंव।
DAN 4:5 मेंह एक सपना देखेंव, जेकर ले मेंह डर्रा गेंव। जब मेंह अपन पलंग म लेटे रहेंव, त जऊन परतिरूप अऊ दरसन मोर मन म आईन, ओमन ले मेंह भयभीत हो गेंव।
DAN 4:6 एकरसेति मेंह हुकूम देंव कि मोर सपना के अर्थ बताय बर बेबिलोन के जम्मो बुद्धिमान मनखेमन ला मोर आघू म लाने जावय।
DAN 4:7 जब जादूगर, टोनहा, जोतिसी अऊ देवीय सक्तिवालामन मोर करा आईन, त मेंह ओमन ला अपन सपना बतांय, पर ओमन मोला ओकर अर्थ नइं बता सकिन।
DAN 4:8 आखिरी म, दानिएल मोर आघू म आईस अऊ मेंह ओला अपन सपना बतांय। (ओकर नांव मोर देवता के नांव ले बेलतसस्सर रखे गे हवय, अऊ पबितर देवतामन के आतमा ओमा हवय।)
DAN 4:9 मेंह कहेंव, “हे बेलतसस्सर, जादूगरमन के मुखिया, मेंह जानत हंव कि पबितर देवतामन के आतमा ह तोर म हवय, अऊ कोनो घलो रहस्य तोर बर कठिन नो हय। येह मोर सपना अय; मोला येकर अर्थ बता।
DAN 4:10 जब मेंह पलंग म लेटे रहेंव, त जऊन दरसनमन ला मेंह देखेंव, ओमन ये अंय: मेंह देखेंव कि धरती के बीच म एक रूख लगे रहय अऊ ओह बहुंत ऊंचा रहय।
DAN 4:11 ओ रूख ह बड़े होके मजबूत हो गीस अऊ ओकर टीप ह अकास ला छुए लगिस; येला धरती के छोर ले घलो देखे जा सकत रिहिस।
DAN 4:12 येकर पानमन सुघर रिहिन, येमा बहुंत अकन फर लगे रिहिस, अऊ येमा जम्मो झन बर जेवन रिहिस। येकर खाल्हे म जंगली पसुमन रहत रिहिन, अऊ चिरईमन येकर डारामन म बसेरा करत रिहिन; येमा ले हर एक जीव-जन्तु ला जेवन मिलत रिहिस।
DAN 4:13 “पलंग म लेटे मेंह दरसन म देखेंव कि स्वरग ले एक पबितर जन, एक संदेसिया खाल्हे आवत रिहिस।
DAN 4:14 ओह ऊंचहा अवाज म कहिस, ‘रूख ला काट डारव अऊ येकर डारामन ला अलग कर दव; येकर पानमन ला गिरा दव अऊ येकर फर ला बगरा दव। पसुमन येकर खाल्हे ले भाग जावंय अऊ चिरईमन येकर डारामन ले उड़ जावंय।
DAN 4:15 पर रूख के ठूंठ अऊ येकर जरीमन ला लोहा अऊ कांसा ले बंधे रहिके जमीन के कांदी ऊपर, भुइयां म रहन दव। “ ‘ओला अकास के ओस ले भीगन दव, अऊ ओला धरती के पऊधामन के बीच पसुमन के संग रहन दव।
DAN 4:16 ओकर मन ला बदल दिये जावय अऊ एक मनखे के सहीं ओकर मन झन रहय अऊ सात कालखंड के खतम होवत तक ओला एक पसु के मन दिये जावय।
DAN 4:17 “ ‘ये निरनय के घोसना संदेसियामन के दुवारा करे जावत हे, पबितर जनमन ये निरनय के घोसना करथें, ताकि जीयत मनखेमन ये बात ला जानंय कि ओ, जऊन ह सर्वोच्च परमेसर ए, ओही ह धरती ऊपर जम्मो राज म परमपरधान ए अऊ ओह जऊन ला चाहथे, ओला ओ राजमन ला दे देथे अऊ छोटे ले छोटे मनखे ला ओमन के ऊपर ठहिरा देथे।’
DAN 4:18 “येह अय ओ सपना, जऊन ला में, राजा नबूकदनेसर ह देखेंव। अब, हे बेलतसस्सर, मोला बता कि येकर अर्थ का ए, काबरकि मोर राज के कोनो घलो बुद्धिमान मनखे मोला येकर अर्थ नइं बता सकंय। पर तेंह बता सकत हस, काबरकि तोर म पबितर देवतामन के आतमा हवय।”
DAN 4:19 तब दानिएल (जऊन ला बेलतसस्सर घलो कहे जावय) कुछू समय बर बहुंत बियाकुल हो गीस, अऊ ओकर बिचारमन ओला भयभीत करिन। एकरसेति राजा ह कहिस, “हे बेलतसस्सर, मोर सपना या येकर अर्थ ले भयभीत झन हो।” बेलतसस्सर ह जबाब दीस, “हे मोर परभू, कास, ये सपना सिरिप तोर बईरी अऊ येकर अर्थ तोर बिरोधीमन ऊपर लागू होतिस!
DAN 4:20 ओ रूख जऊन ला तेंह देखे, जऊन ह बड़े होके मजबूत हो गीस, जेकर टीप ह अकास ला छुए लगिस, अऊ जऊन ला जम्मो धरती ले देखे जा सकत रिहिस,
DAN 4:21 जेकर पानमन सुघर अऊ जेमा बहुंत अकन फर लगे रिहिस, जऊन ह जंगली पसुमन ला आसरय देवत रिहिस, अऊ चिरईमन जेकर डारामन म खोंधरा बनात रिहिन—
DAN 4:22 हे महाराज, तेंह ओ रूख अस! तेंह बड़े अऊ मजबूत हो गे हवस; तोर महानता अतेक हो गे हवय कि येह अकास ला छुए लगत हे, अऊ तोर राज ह धरती म बहुंत दूर तक फईले हवय।
DAN 4:23 “हे महाराज, तेंह एक पबितर जन, एक संदेसिया ला स्वरग ले खाल्हे उतरत देखे, जऊन ह ये कहत रिहिस, ‘ये रूख ला काट डारव अऊ येला नास कर दव, पर येकर ठूंठ ला लोहा अऊ कांसा ले बंधाय जमीन के कांदी म रहन दव, अऊ येकर जरीमन ला भुइयां म रहन दव। ओला अकास के ओस ले भीगन दव; ओला जंगली पसुमन के संग रहन दव, जब तक कि ओकर बर सात कालखंड पूरा नइं हो जावय।’
DAN 4:24 “हे महाराज, येह ओकर अर्थ ए, अऊ येह ओ फैसला ए, जऊन ला सर्वोच्च परमेसर ह मोर मालिक राजा के बिरूध म दिये हवय:
DAN 4:25 तोला मनखेमन के बीच ले भगा दिये जाही अऊ तेंह जंगली पसुमन के संग रहिबे; तेंह बईला के सहीं कांदी खाबे अऊ अकास के ओस ले भीजबे। सात कालखंड के खतम होवत तक तेंह इही हालत म रहिबे, अऊ तब तेंह ये मान लेबे कि धरती म जम्मो राज ऊपर सर्वोच्च परमेसर ही परमपरधान अय अऊ ओह जऊन ला चाहथे, ओला ये राज दे देथे।
DAN 4:26 रूख के ठूंठ ला ओकर जरी समेत छोंड़े के जऊन हुकूम दिये गे हवय, ओकर अर्थ ये अय कि तोला तोर राज लहुंटा दिये जाही, जब तेंह मान लेबे कि स्वरग ही सासन करथे।
DAN 4:27 एकरसेति, हे महाराज, खुसी-खुसी मोर सलाह ला मान ले: अपन पापमन ला छोंड़के भलई के काम कर, अऊ दुस्टता ला छोंड़के सताय गय मनखेमन ऊपर दया कर। तब ये हो सकथे कि तोर उन्नति होय लगे।”
DAN 4:28 ये जम्मो बात राजा नबूकदनेसर के संग होईस।
DAN 4:29 बारह महिना के बाद, जब राजा ह बेबिलोन के राजमहल के छत म टहलत रिहिस,
DAN 4:30 त ओह कहिस, “का येह ओ बड़े बेबिलोन नो हय, जऊन ला मेंह अपन बड़े सक्ति ले साही निवास के रूप म अपन वैभव के महिमा बर बनाय हवंव?”
DAN 4:31 अभी राजा के मुहूं ले ये बात निकले घलो नइं रिहिस कि स्वरग ले एक अवाज आईस, “हे राजा नबूकदनेसर, तोर बर ये फैसला करे जावत हे। तोर राजकीय अधिकार तोर ले छीन लिये गे हवय।
DAN 4:32 तोला मनखेमन के बीच ले भगा दिये जाही अऊ तेंह जंगली पसुमन के संग रहिबे; तेंह बईला के सहीं कांदी खाबे। तोर इही हालत म, सात कालखंड बीतही अऊ तब तेंह ये मान लेबे कि सर्वोच्च परमेसर ही धरती म जम्मो राज ऊपर परमपरधान अय अऊ ओह जऊन ला चाहथे, ओला ये राजमन ला दे देथे।”
DAN 4:33 नबूकदनेसर के बारे म जऊन बात कहे गीस, ओह ओहीच बेरा पूरा हो गीस। ओला मनखेमन के बीच ले भगा दिये गीस अऊ ओह बईला सहीं कांदी खाय लगिस। ओकर देहें ह अकास के ओस ले भीजय, इहां तक कि ओकर चुंदी बढ़के गिधवा के पांखी सहीं अऊ ओकर नख चिरई के पंजामन सहीं हो गीन।
DAN 4:34 ठहिराय समय के आखिरी म, में, नबूकदनेसर ह स्वरग कोति अपन नजर उठांय, अऊ मोर मानसिक हालत फेर पहिले सहीं हो गीस। तब मेंह सर्वोच्च परमेसर के महिमा करेंव; मेंह ओकर आदर अऊ परसंसा करेंव, जऊन ह सदाकाल तक रहिथे।
DAN 4:35 धरती के जम्मो मनखेमन के
DAN 4:36 जऊन बेरा मोर मानसिक हालत पहिली सहीं होईस, ओहीच बेरा मोर सम्मान अऊ वैभव घलो मोर राज के महिमा बर मोर करा लहुंट आईस। मोर सलाहकार अऊ ऊंच कुल के मनखेमन मोला खोज निकालिन, अऊ मोला फेर मोर सिंघासन म बईठाय गीस अऊ मेंह पहिले ले घलो जादा महान हो गेंव।
DAN 4:37 अब में, नबूकदनेसर, स्वरग के राजा के इस्तुति, महिमा अऊ परसंसा करत हंव, काबरकि ओह जऊन कुछू घलो करथे, सही करथे अऊ ओकर जम्मो काम नियाय-संगत होथें। अऊ जऊन मन घमंडी होके चलथें, ओमन ला ओह नम्र बनाय म समर्थ हे।
DAN 5:1 एक दिन राजा बेलसस्सर ह अपन एक हजार परभावसाली मनखेमन ला एक बड़े जेवनार दीस अऊ ओमन के संग मंद पीईस।
DAN 5:2 जब बेलसस्सर ह मंद पीयत रिहिस, तब ओह हुकूम दीस कि जऊन सोन अऊ चांदी के पियाला ओकर ददा नबूकदनेसर ह यरूसलेम के मंदिर ले लाने रिहिस, ओ पियालामन ला लाने जावय, ताकि राजा अऊ ओकर परभावसाली मनखे, ओकर घरवाली, अऊ ओकर रखैलमन मंद पीये बर ओमन के उपयोग करंय।
DAN 5:3 एकरसेति यरूसलेम म परमेसर के मंदिर ले निकालके लाने गय सोन के पियालामन लाने गीन, अऊ राजा अऊ ओकर परभावसाली मनखे, ओकर घरवाली अऊ ओकर रखैलमन ओमा मंद पीईन।
DAN 5:4 जब ओमन मंद पीईन, त ओमन सोन अऊ चांदी, कांसा, लोहा, लकड़ी अऊ पथरा के देवतामन के परसंसा करे लगिन।
DAN 5:5 तब अचानक एक मनखे के हांथ के अंगरीमन परगट होईन अऊ राजमहल म दीवट के लकठा म दीवार के पलस्तर म कुछू लिखे लगिन। लिखत रहय ओ हांथ ऊपर राजा के नजर पड़िस।
DAN 5:6 ओला देखके राजा के चेहरा के रंग उड़ गीस अऊ ओह अतेक डर्रा गीस कि ओकर माड़ीमन ढीला पड़ गीन अऊ कंपई के मारे ओकर माड़ीमन एक-दूसर ले टकराय लगिन।
DAN 5:7 तब राजा ह तांत्रिक, जोतिसी अऊ देवीय सक्तिवालेमन ला बलाईस अऊ ओह बेबिलोन के ओ बुद्धिमान मनखेमन ले कहिस, “जऊन कोनो ये लिखावट ला पढ़ही अऊ ओकर अर्थ मोला बताही, ओला राजसी ओनहा पहिराय जाही अऊ ओकर घेंच म सोन के माला पहिराय जाही, अऊ ओला राज म तीसरा नम्बर के ऊंच पद के सासक बनाय जाही।”
DAN 5:8 तब राजा के जम्मो बुद्धिमान मनखेमन आईन, पर ओमन ओ दीवार म लिखे बात ला नइं पढ़ सकिन अऊ न ही ओमन राजा ला ओकर अर्थ बता सकिन।
DAN 5:9 येकर ले राजा बेलसस्सर ह अऊ भयभीत हो गीस अऊ ओकर चेहरा के रंग अऊ उड़ गीस। ओकर परभावसाली मनखेमन परेसान हो गीन।
DAN 5:10 राजा अऊ ओकर परभावसाली मनखेमन के अवाज ला सुनके, रानी ह भोज के बड़े कमरा म आईस अऊ कहिस, “राजा ह चिरंजीवी होवय! तेंह चिंता झन कर! अऊ तोर चेहरा के रंग झन उड़य!
DAN 5:11 तोर राज म एक अइसने मनखे हवय, जेमा पबितर देवतामन के आतमा रहिथे। तोर ददा के समय म ये मनखे म देवतामन के सहीं समझ-बुझ, बुद्धि अऊ गियान पाय गे रिहिस। तोर ददा, नबूकदनेसर ह ओला जादूगर, तांत्रिक, जोतिसी अऊ देवीय सक्तिवालामन के मुखिया ठहिराय रिहिस।
DAN 5:12 ओह अइसे करिस काबरकि दानिएल नांव के ये मनखे करा, जऊन ला राजा ह बेलतसस्सर नांव ले बलावय, तेज दिमाग अऊ गियान अऊ समझ रिहिस, अऊ ओमा सपनामन के अर्थ बताय के, पहेलीमन ला समझाय के अऊ कठिन समस्यामन के हल निकाले के योग्यता पाय गे रिहिस। एकरसेति दानिएल ला बुलवा ले, अऊ ओह तोला बताही कि लिखावट के का अर्थ अय।”
DAN 5:13 तब दानिएल ला राजा के आघू म लाने गीस, अऊ राजा ह ओला कहिस, “का तेंह दानिएल अस, अऊ ओमन ले एक झन अस, जेमन ला मोर ददा, राजा ह यहूदा प्रदेस ले बंधुवई म लाय रिहिस?
DAN 5:14 मेंह सुने हंव कि तोर म देवतामन के आतमा हवय अऊ ये घलो कि तोर म समझ-बुझ, बुद्धि अऊ असधारन गियान हवय।
DAN 5:15 बुद्धिमान मनखे अऊ तांत्रिकमन ला ये लिखावट ला पढ़े अऊ येकर अर्थ बताय बर मोर करा लाय गे रिहिस, पर ओमन येला समझाय नइं सकिन।
DAN 5:16 मेंह सुने हंव कि तोर म अर्थ बताय अऊ कठिन समस्यामन के हल निकाले के योग्यता हवय। यदि तेंह ये लिखावट ला पढ़के येकर अर्थ मोला बता सकबे, त तोला राजसी ओनहा पहिराके तोर घेंच म सोन के माला पहिराय जाही, अऊ तोला राज म तीसरा ऊंच पद के सासक बनाय जाही।”
DAN 5:17 तब दानिएल ह राजा ला जबाब दीस, “तेंह अपन ईनाममन ला अपन करा रख अऊ अपन पुरस्कार कोनो अऊ ला देय दे। तभो ले, मेंह ये लिखावट ला राजा बर पढ़हूं अऊ ओला येकर अर्थ घलो बताहूं।
DAN 5:18 “हे महाराज, सर्वोच्च परमेसर ह तोर ददा नबूकदनेसर ला राजपाट, महानता, महिमा अऊ वैभव दीस।
DAN 5:19 काबरकि परमेसर ह ओला ऊंच पद दे रिहिस, एकरसेति जम्मो जाति अऊ हर भासा के मनखेमन तोर ददा ले डरत रिहिन अऊ ओकर भय मानत रिहिन। जेमन ला ओह मार डारे चाहय, ओमन ला ओह मार डारय; जेमन ला ओह छोंड़ देय चाहय, ओमन ला ओह छोंड़ देवय; जेमन ला ओह ऊंच पद देय चाहय, ओमन ला ओह ऊंच पद देवय; अऊ जेमन ला ओह नीचा देखाय चाहय, ओमन ला ओह नीचा देखावय।
DAN 5:20 पर जब ओह घमंडी हो गीस अऊ ओकर हिरदय ह घमंड ले कठोर हो गीस, त ओला ओकर राज सिंघासन ले हटा दिये गीस अऊ ओकर मान-सम्मान ले लिये गीस।
DAN 5:21 ओला मनखेमन के बीच ले भगा दिये गीस अऊ ओला एक पसु के मन दिये गीस; ओह जंगली गदहामन के संग रहत रिहिस अऊ बईला के सहीं कांदी खावत रिहिस; अऊ ओकर देहें अकास के ओस ले भीगय; येह तब तक होते रिहिस, जब तक कि ओह ये नइं मान लीस कि धरती म जम्मो राजमन ऊपर सर्वोच्च परमेसर ही परमपरधान अय अऊ ओह जऊन ला चाहथे ओला ओ राजमन ऊपर सासक ठहिराथे।
DAN 5:22 “पर हे बेलसस्सर, तेंह ओकर बेटा अस अऊ अपनआप ला नम्र नइं करे, हालाकि तेंह ये जम्मो बात ला जानत रहे।
DAN 5:23 पर तेंह अपनआप ला स्वरग के परभू ले घलो बड़े बना ले हवस। ओकर मंदिर ले लाने गय पियालामन ला तेंह अपन करा मंगा ले हवस, अऊ तें अऊ तोर परभावसाली मनखेमन, तोर घरवाली अऊ तोर रखैलमन ओमा मंद पीये हव। तेंह चांदी अऊ सोन, कांसा, लोहा, लकड़ी अऊ पथरा के देवतामन के महिमा करे हस, जेमन न तो देख सकंय, न सुन सकंय, अऊ न ही समझ सकंय। पर तेंह ओ परमेसर के आदर नइं करे, जेकर हांथ म तोर जिनगी अऊ तोर जम्मो काम-धाम हवय।
DAN 5:24 एकरसेति परमेसर ह ये हांथ ला पठोईस, जेह ये लेख लिखिस।
DAN 5:25 “येह ओ लेख अय, जऊन ला लिखे गे हवय: मने, मने, तकेल, परसीन।
DAN 5:26 “ये सबदमन के अर्थ ये किसम ले अय: “मने: परमेसर ह तोर राज करे के दिन के गनती कर ले हवय अऊ येकर अन्त आ गे हवय।
DAN 5:27 “तकेल: तेंह तराजू म तऊले जा चुके हवस अऊ तोला हल्का पाय गीस।
DAN 5:28 “परसीन: तोर राज ला बांट देय गे हवय अऊ मादी अऊ फारसीमन ला दे दिये गे हवय।”
DAN 5:29 तब बेलसस्सर के हुकूम ले, दानिएल ला राजसी ओनहा पहिराय गीस, अऊ ओकर घेंच म सोन के एक माला पहिराय गीस, अऊ राज म तीसरा ऊंच पदवाले सासक के रूप म ओकर घोसना करे गीस।
DAN 5:30 ओहीच रथिया, बेबिलोनीमन के राजा बेलसस्सर ह मार डारे गीस,
DAN 5:31 अऊ येकर बाद दारा, जऊन ह मादी रिहिस, बासठ बछर के उमर म ओ राज के राजा बनिस।
DAN 6:1 दारा ला ये बने लगिस कि ओह 120 परधानमन ला ठहिराय, जऊन मन ओकर जम्मो राज म सासन करंय,
DAN 6:2 अऊ ये जम्मो के ऊपर तीन प्रसासक होवंय, जेमा ले एक झन दानिएल रिहिस। ओ परधानमन ला प्रसासकमन के प्रति जबाबदार बनाय गीस ताकि राजा ला कोनो किसम के हानि झन होवय।
DAN 6:3 दानिएल ह अपन असधारन गुन के कारन प्रसासक अऊ परधानमन के बीच म बहुंत मसहूर रिहिस, एकरसेति राजा ह ओला जम्मो राज के ऊपर सासक बनाय के योजना बनाईस।
DAN 6:4 ये कारन, आने प्रसासक अऊ परधानमन सरकारी काम म दानिएल के कामकाज के बिरूध दोस लगाय के अधार खोजे लगिन, पर ओमन अइसे नइं कर सकिन। ओमन ला ओमा कोनो भ्रस्टाचार के बात नइं मिलिस, काबरकि दानिएल ह बिसवासयोग्य रिहिस अऊ ओह न तो भ्रस्टाचारी रिहिस अऊ न ही ओह कोनो काम म असावधानी बरतय।
DAN 6:5 आखिर म, ये मनखेमन कहिन, “ओकर परमेसर के कानून के बिसय ला छोंड़, हमन ला अऊ कोनो घलो बिसय म दानिएल के बिरूध दोस लगाय के अधार नइं मिलय।”
DAN 6:6 एकरसेति ये प्रसासक अऊ परधानमन एक दल के रूप म राजा करा गीन अऊ ओमन कहिन: “राजा दारा चिरंजीवी हो!
DAN 6:7 राज के जम्मो साही प्रसासक, मुखिया, परधान, सलाहकार अऊ राजपालमन ये बात ऊपर सहमत होईन कि राजा ह एक राज हुकूम निकालय अऊ ओ हुकूम ला माने बर कहय कि अगले तीस दिन तक कोनो घलो मनखे महाराजा के छोंड़ कोनो अऊ देवता या मनखे-परानी ले पराथना करय, त ओला सिंहमन के मांद म डाल दिये जावय।
DAN 6:8 हे महाराज, अब अइसे हुकूम दे अऊ ओला लिखित म घलो देय ताकि येला बदले झन जा सकय—मादी अऊ फारसीमन के कानून के मुताबिक जऊन ला रद्द नइं करे जा सकय।”
DAN 6:9 तब राजा दारा ह ओ हुकूम ला लिखित म कर दीस।
DAN 6:10 जब दानिएल ला पता चलिस कि अइसे हुकूम निकाले गे हवय, त ओह अपन घर जाके ऊपर के कमरा म गीस, जिहां खिड़कीमन यरूसलेम कोति खुले रहंय। दिन म तीन बार माड़ी टेकके ओह अपन परमेसर ला धनबाद देवत पराथना करिस, जइसे कि ओह पहिले घलो करय।
DAN 6:11 तब ये मनखेमन एक दल के रूप म उहां गीन अऊ ओमन दानिएल ला परमेसर ले पराथना करत अऊ मदद मांगत पाईन।
DAN 6:12 एकरसेति ओमन राजा करा गीन अऊ ओला ओकर राज हुकूम के बारे म कहे लगिन: “का तेंह अइसे हुकूम नइं निकाले हवस कि अगले तीस दिन तक कोनो घलो मनखे महाराजा के छोंड़ कोनो अऊ देवता या मनखे-परानी ले पराथना करय, त ओला सिंहमन के मांद म डार दिये जाही?” राजा ह जबाब दीस, “ये हुकूम त हवय—जऊन ला मादी अऊ फारसीमन के कानून के मुताबिक रद्द नइं करे जा सकय।”
DAN 6:13 तब ओमन राजा ला कहिन, “दानिएल, जऊन ह यहूदा प्रदेस ले लाने गय बंधुवा मनखेमन ले एक जन अय, हे महाराज, ओह तोर या तोर दुवारा निकाले गय लिखित हुकूम के परवाह नइं करत हे। ओह अभी घलो दिन म तीन बार पराथना करथे।”
DAN 6:14 ये बात ला सुनके राजा ह बहुंत उदास होईस; ओह दानिएल ला बचाय बर ठान ले रिहिस अऊ बेर के बुड़त तक ओह दानिएल ला बचाय के हर किसम के कोसिस करिस।
DAN 6:15 तब मनखेमन एक दल के रूप म राजा दारा करा गीन अऊ ओला कहिन, “हे महाराज, सुरता रख कि मादी अऊ फारसीमन के कानून के मुताबिक राजा के दुवारा दिये गय कोनो घलो फैसला या राज हुकूम बदले नइं जा सकय।”
DAN 6:16 तब राजा ह हुकूम दीस, अऊ ओमन दानिएल ला लानिन अऊ ओला सिंहमन के मांद म डार दीन। राजा ह दानिएल ले कहिस, “तोर परमेसर, जेकर सेवा तेंह ईमानदारी ले करथस, ओह तोला बचावय!”
DAN 6:17 एक पथरा ला लानके मांद के मुंहाटी म रख दिये गीस, अऊ राजा अपन खुद के मुहरवाला मुंदरी अऊ अपन परभावसाली मनखेमन के मुंदरी ले ओकर ऊपर मुहर लगा दीस, ताकि दानिएल के हालत म कोनो बदलाव झन करे जा सकय।
DAN 6:18 तब राजा ह अपन महल म लहुंट आईस अऊ ओह पूरा रथिया बिगर कुछू खाय अऊ बिगर कुछू मनोरंजन के बिताईस। अऊ ओह सुते नइं सकिस।
DAN 6:19 बड़े बिहनियां, राजा ह उठिस अऊ जल्दी करके सिंह के मांद करा गीस।
DAN 6:20 जब ओह मांद के लकठा म आईस, त ओह दुख भरे अवाज म दानिएल ला पुकारिस, “हे दानिएल, जीयत परमेसर के सेवक, का तोर ओ परमेसर ह तोला सिंहमन ले बचाय म समर्थ होईस, जेकर तेंह हमेसा सेवा करथस?”
DAN 6:21 तब दानिएल ह जबाब दीस, “राजा चिरंजीवी होवय!
DAN 6:22 मोर परमेसर ह अपन स्वरगदूतमन ला पठोके सिंहमन के मुहूं ला बंद कर दीस। ओमन मोर कुछू हानि नइं करिन, काबरकि मेंह ओकर नजर म निरदोस पाय गेंव। अऊ हे महाराज, न ही मेंह तोर आघू म कोनो गलत काम करे हंव।”
DAN 6:23 तब राजा ह बहुंत खुस होईस अऊ ओह हुकूम दीस कि दानिएल ला मांद ले निकाले जावय। अऊ जब दानिएल ला मांद ले तीरके बाहिर निकाले गीस, त ओमा कोनो किसम के चोट के निसान नइं मिलिस, काबरकि ओह अपन परमेसर ऊपर भरोसा रखे रिहिस।
DAN 6:24 ओ मनखे, जऊन मन दानिएल ऊपर गलत रूप से दोस लगाय रिहिन, ओमन ला राजा के हुकूम ले लाने गीस, अऊ ओमन ला ओमन के घरवाली अऊ लइकामन सहित सिंह के मांद म डार दिये गीस। अऊ येकर पहिले कि ओमन मांद के तल म हबरतिन, सिंहमन झपटके ओमन ला धर लीन अऊ हाड़ा समेत ओमन ला चबा डारिन।
DAN 6:25 तब राजा दारा ह जम्मो धरती म जम्मो जाति अऊ भासा के मनखेमन ला ये लिख भिजवाईस: “तुमन जम्मो बहुंत उन्नति करव!
DAN 6:26 “मेंह ये हुकूम देवत हंव कि मोर राज के हर भाग म, मनखेमन दानिएल के परमेसर के भय मानंय अऊ ओकर भक्ति करंय।
DAN 6:27 ओह छुड़ाथे अऊ ओह बचाथे;
DAN 6:28 ये किसम ले दानिएल ह दारा अऊ फारस देस के राजा कुसरू के सासनकाल म उन्नति करिस।
DAN 7:1 बेबिलोन के राजा बेलसस्सर के राज के पहिले बछर म, दानिएल जब अपन पलंग म लेटे रिहिस, त ओह एक सपना अऊ मन म दरसन देखिस। ओह अपन सपना के सार बातमन ला लिख लीस।
DAN 7:2 दानिएल ह कहिस: “रथिया मेंह अपन दरसन म देखेंव कि अकास के चारों दिग ले महासागर ऊपर हवा चले लगिस।
DAN 7:3 तब चार बड़े-बड़े पसु समुंदर ले निकलिन, अऊ येमन दिखे म एक-दूसर ले अलग रिहिन।
DAN 7:4 “पहिली पसु ह सिंह के सहीं रिहिस, जेकर गिधवा के सहीं डेना रिहिन, मोर देखत म ही ओकर डेनामन ला चीथ डारे गीस अऊ येला भुइयां ले उठाय गीस, जेकर ले येह मनखे के सहीं दू ठन गोड़ म ठाढ़ हो गीस, अऊ ओला एक मनखे के मन दिये गीस।
DAN 7:5 “अऊ ओकर बाद मेंह दूसरा पसु ला देखेंव, जऊन ह भालू के सहीं दिखत रिहिस। ओला ओकर एक कोति ले उठाय गीस, अऊ ओकर मुहूं म ओकर दांतमन के बीच म तीन ठन पसलीमन रिहिन। ओला कहे गीस, ‘उठ अऊ पेट के भरत ले मांस खा!’
DAN 7:6 “ओकर बाद, मेंह अपन आघू म एक आने पसु ला देखेंव, जऊन ह चीतवा के सहीं दिखत रिहिस। अऊ ओकर पीठ म चिरई के सहीं चार ठन डेना रिहिन। ये पसु के चार ठन मुड़ रिहिन, अऊ येला सासन करे के अधिकार दिये गीस।
DAN 7:7 “ओकर बाद, रथिया मेंह अपन दरसन म एक चौथा पसु ला अपन आघू म देखेंव, जऊन ह भयंकर, डरावना अऊ बहुंत सक्तिसाली रिहिस। येकर बड़े-बड़े लोहा के दांत रिहिन; येह कुचरके अपन सिकार ला खा जावय अऊ बांचे-खुचे ला अपन पांव खाल्हे कुचर डारय। येह पहिली के जम्मो पसुमन ले अलग रिहिस, अऊ येकर दस ठन सींग रिहिन।
DAN 7:8 “जब मेंह ये सींगमन के बारे म सोचत रहेंव, तभे मेंह देखेंव कि ओ सींगमन के बीच म ले एक ठन अऊ छोटकन सींग निकलिस; अऊ ये सींग के निकले ले उहां पहिली के तीन ठन सींग अपन जड़ ले उखन गीन। ये छोटे सींग के एक मनखे के सहीं आंखीमन रहंय अऊ एक मुहूं रिहिस जऊन ह घमंड ले भरे बात करत रिहिस।
DAN 7:9 “जइसे कि मेंह देखेंव, “उहां सिंघासनमन ला रखे गीस, अऊ ओ अति प्राचीन ह अपन आसन म बईठिस। ओकर ओनहा ह बरफ के सहीं सफेद रिहिस; ओकर मुड़ के चुंदी ह ऊन के सहीं सफेद रिहिस। ओकर सिंघासन ह आगी ले जुवालामय रिहिस, अऊ सिंघासन के चक्कामन ले जुवाला निकलत रिहिस।
DAN 7:10 ओकर आघू ले एक आगी के नदी निकलके बोहावत रिहिस। हजारों-हजार मनखेमन ओकर सेवा म लगे रिहिन; लाखों-करोड़ों मनखेमन ओकर आघू म ठाढ़े रिहिन। नियायधीस ह बईठ गीस, अऊ किताबमन खोले गीन।
DAN 7:11 “ओ सींग ह घमंड ले भरे बात करत रिहिस, एकरसेति मेंह ओती लगातार देखत रहेंव। मेंह तब तक देखते रहेंव जब तक कि ओ पसु के बध करके ओकर देहें ला नास नइं कर दिये गीस अऊ धधकत आगी म नइं फटिक दिये गीस।
DAN 7:12 (आने पसुमन के अधिकार ला छीन लिये गे रिहिस, पर एक निरधारित समय तक ओमन ला जीयत रहे के अधिकार दिये गीस।)
DAN 7:13 “रथिया मेंह अपन दरसन म देखेंव कि मनखे के बेटा सहीं एक झन अकास के बादरमन के संग आवत रिहिस। ओह बहुंत प्राचीन करा आईस अऊ ओला ओकर आघू म लाने गीस।
DAN 7:14 ओला अधिकार, महिमा अऊ सर्वोच्च सक्ति दिये गीस; जम्मो जाति अऊ हर भासा के मनखेमन ओकर अराधना करिन। ओकर परभूता सदाकाल बर अय, जेकर अन्त कभू नइं होही, अऊ ओकर राज ह अइसन राज अय, जऊन ह कभू नास नइं होही।
DAN 7:15 “में, दानिएल ह मन म बहुंत बियाकुल होयेंव, अऊ जऊन दरसन मेंह अपन मन म देखेंव, ओह मोर मन ला बिचलित कर दीस।
DAN 7:16 उहां खड़े मनखेमन म ले एक झन करा मेंह गेंव अऊ ओकर ले ये जम्मो बात के अर्थ पुछेंव। “ओह ये कहिके मोला ये बातमन के अर्थ बताईस:
DAN 7:17 ‘चार बड़े पसुमन चार राजा अंय, जेमन धरती म ठाढ़ होहीं।
DAN 7:18 पर सर्वोच्च परमेसर के पबितर मनखेमन ला ही राज मिलही अऊ ओमन ओला अपन अधिकार म सदाकाल तक रखहीं—हव, सदाकाल तक।’
DAN 7:19 “तब मोर मन म ओ चौथा पसु के अर्थ ला जाने के ईछा होईस, जऊन ह आने जम्मो पसुमन ले अलग रिहिस अऊ जऊन ह अपन लोहा के दांत अऊ कांसा के पंजामन के संग बहुंत डरावना रिहिस—ओ पसु जऊन ह अपन सिकार ला कुचरके खा जावय अऊ बचे भाग ला अपन पांव ले कुचर डारय।
DAN 7:20 मोला ये बातमन के घलो अर्थ जाने के ईछा होईस—ओकर मुड़ के दस ठन सींग अऊ ओ आने सींग, जेकर निकल आय ले, उहां के पहिली के तीन सींग गिर गीन—ये सींग जऊन ह आने सींगमन ले जादा रोबदार दिखत रिहिस अऊ जेकर आंखीमन रिहिन अऊ एक मुहूं घलो रिहिस, जेकर ले ओह घमंड ले भरे बात करय।
DAN 7:21 जइसे कि मेंह देखेंव, ये सींग ह पबितर मनखेमन ले लड़ई करत रिहिस अऊ ओमन ला तब तक हरातेच रिहिस,
DAN 7:22 जब तक कि अति प्राचीन ह आके सर्वोच्च परमेसर के पबितर मनखेमन के हित म फैसला नइं दे दीस, अऊ ओ समय आईस, जब ओमन राज ऊपर अधिकार कर लीन।
DAN 7:23 “ओह मोला ये अर्थ बताईस: ‘ओ चौथा पसु ह एक चौथा राज अय, जऊन ह धरती म परगट होही। येह आने जम्मो राजमन ले अलग होही अऊ येह जम्मो धरती ला रऊंदत अऊ कुचरत नास कर दीही।
DAN 7:24 ओ दस ठन सींग दस राजा अंय, जऊन मन ये राज ले आहीं। ओमन के बाद, एक आने राजा आही, जऊन ह पहिली के राजामन ले अलग होही; ओह तीन राजामन ला अपन अधीन म कर लीही।
DAN 7:25 ओह सर्वोच्च परमेसर के बिरूध बोलही अऊ ओकर पबितर मनखेमन ला सताही अऊ ठहिराय गय समय अऊ कानूनमन ला बदले के कोसिस करही। पबितर मनखेमन ला एक समय, समयमन अऊ आधा समय बर ओकर अधीन करे जाही।
DAN 7:26 “ ‘पर नियायधीस ह बईठही, अऊ ओकर सक्ति ओकर ले लेय लिये जाही अऊ ओला हमेसा बर पूरा नास कर दिये जाही।
DAN 7:27 तब सर्वोच्च परमेसर के पबितर मनखेमन ला धरती के जम्मो राज के परभूता, सक्ति अऊ महानता दे दिये जाही। ओकर राज ह सदाकाल तक बने रहइया राज होही, अऊ जम्मो सासकमन ओकर अराधना करहीं अऊ ओकर बात मानहीं।’
DAN 7:28 “इहां ओ बिसय के अन्त होथे। में, दानिएल ह अपन बिचारमन ले बहुंत बियाकुल हो गेंव, अऊ मोर चेहरा ह पिंवरा पड़ गीस, पर ये बात ला मेंह अपन मन म ही रखेंव।”
DAN 8:1 राजा बेलसस्सर के सासन के तीसरा बछर म, में दानिएल ह पहिले के दरसन के बाद एक अऊ दरसन देखेंव।
DAN 8:2 अपन दरसन म, मेंह अपनआप ला एलाम प्रदेस के सूसन सहर के किला म देखेंव, दरसन म, मेंह ऊलई नहर के तीर म रहेंव।
DAN 8:3 मेंह आंखी उठाके देखेंव कि नहर के तीर म एक ठन मेढ़ा खड़े रहय, जेकर दू ठन सींग रिहिन, अऊ ये सींगमन लम्बा रिहिन। येमा ले एक सींग ह दूसर सींग ले बड़े रिहिस अऊ ये बड़े सींग ह बाद म निकले रिहिस।
DAN 8:4 मेंह देखेंव कि ये मेढ़ा ह पछिम अऊ उत्तर अऊ दक्खिन कोति मुड़ ले टक्कर मारत रहय। कोनो घलो पसु ओकर आघू म टिक नइं सकिन, अऊ अइसे कोनो नइं रिहिस, जऊन ह ओकर सक्ति ले बचा सकतिस। ओह जइसे चाहिस, वइसे करिस अऊ बहुंत बड़े हो गीस।
DAN 8:5 जब मेंह येकर बारे म सोचत रहेंव, तब मेंह देखेंव कि अचानक एक बोकरा पछिम दिग ले आईस, जेकर आंखीमन के बीच म एक बिसेस सींग रिहिस, अऊ ये बोकरा ह जम्मो धरती ला पार करके भुइयां ला बिगर छुए आय रिहिस
DAN 8:6 ये बोकरा ह ओ दू ठन सींगवाले मेढ़ा कोति आईस, जऊन ला मेंह नहर के तीर म खड़े देखे रहेंव अऊ बहुंत रिस म होके ओ मेढ़ा ला टक्कर मारिस।
DAN 8:7 मेंह देखेंव कि ये बोकरा ह बहुंत गुस्सा होके ओ मेढ़ा ऊपर हमला करिस, अऊ ओला टक्कर मारत ओकर दूनों सींग ला टोर दीस। मेढ़ा म अतेक ताकत नइं रिहिस कि ओह ओ बोकरा के सामना कर सकय; बोकरा ह मेढ़ा ला भुइयां म गिराके ओला कुचर डारिस, अऊ ओकर सक्ति ले मेढ़ा ला कोनो बचा नइं सकिन।
DAN 8:8 बोकरा ह बहुंत सक्तिसाली हो गीस, पर ओकर सक्ति के ऊंचई म, ओकर बड़े सींग ह टूट गीस, अऊ ओकर जगह म चार बिसेस सींग निकलके चारों दिग म बढ़न लगिन।
DAN 8:9 ओमा के एक ले एक ठन अऊ सींग निकलिस, जेकर सुरूआत छोटकन रूप म होईस पर सक्ति म येह दक्खिन, पूरब अऊ सुघर देस कोति बाढ़ गीस।
DAN 8:10 ओह तब तक बाढ़तेच रिहिस जब तक कि अकास के सेनामन करा नइं हबर गीस, अऊ ओह तारामन के कुछू सेना ला खाल्हे धरती ऊपर फटिक दीस अऊ ओमन ला कुचर डारिस।
DAN 8:11 ओह अपनआप ला यहोवा के सेना के सेनापति के सहीं बड़े बना लीस; ओह यहोवा ला चघाय जवइया रोज के बलिदान ला लूट लीस, अऊ ओकर पबितर-स्थान ला खाल्हे फेंकवा दीस।
DAN 8:12 बिदरोह के कारन, यहोवा के मनखेमन अऊ हर दिन के बलिदान ओला दे दिये गीन। ओह जऊन कुछू घलो करिस, ओमा ओकर बढ़ती होवत गीस, अऊ सच्चई ला भुइयां ऊपर फटिक दिये गीस।
DAN 8:13 तब मेंह एक पबितर जन ला बोलत सुनेंव, फेर एक आने पबितर जन ह पहिलेवाले ले पुछिस, “दरसन ला पूरा होय बर कतेक समय लगही—ओ दरसन, जेमा हर दिन के बलिदान, बिदरोह जऊन ह उजाड़ के कारन बनथे, पबितर-स्थान के समरपन अऊ यहोवा के मनखेमन ला गोड़ खाल्हे रऊंदे जवई देखाय गे हवय?”
DAN 8:14 ओह मोला कहिस, “येला पूरा होय म 2,300 बिहान अऊ सांझ लगही; तब पबितर-स्थान ला फेर सुध करे जाही।”
DAN 8:15 जब में, दानिएल ह दरसन ला देखके, येला समझे के कोसिस करत रहेंव, तभे मेंह देखेंव कि मोर आघू म एक जन खड़े होईस, जऊन ह एक मनखे के सहीं दिखत रहय।
DAN 8:16 अऊ मेंह ऊलई नहर ले एक झन मनखे के अवाज ला सुनेंव, जऊन ह पुकारके कहत रहय, “हे जिब्राएल, ये मनखे ला ओ दरसन के अर्थ बता।”
DAN 8:17 जब ओह ओ जगह के लकठा म आईस, जिहां मेंह खड़े रहेंव, त मेंह डर गेंव अऊ मुहूं के भार गिरेंव। तब ओ मनखे ह मोला कहिस, “हे मनखे के बेटा, ये बात ला समझ ले कि ये दरसन ह अन्त के समय के बारे म अय।”
DAN 8:18 जब ओह मोर ले गोठियावत रिहिस, तब मेंह भुइयां कोति अपन चेहरा करे पड़े रहेंव अऊ गहिरा नींद म रहेंव। तब ओह मोला छुईस अऊ मोला मोर गोड़ म ठाढ़ कर दीस।
DAN 8:19 ओह कहिस, “मेंह तोला ओ बातमन ला बतइया हंव, जऊन ह बाद म कोप के समय होही, काबरकि ये दरसन ह ठहिराय गय अन्त के समय के बारे म अय।
DAN 8:20 जऊन दू सींगवाला मेढ़ा तेंह देखे, ओह मादै अऊ फारसी राजामन ला देखाथे।
DAN 8:21 ओ रूखा बालवाला बोकरा ह यूनान के राजा ए, अऊ ओकर आंखीमन के बीच के ओ बड़े सींग ह पहिला राजा ए।
DAN 8:22 ओ चार ठन सींग, जऊन मन एक टूटे सींग के जगह म निकलिन, ओमन ओ चार राजमन ला देखाथें, जऊन मन ओहीच देस ले निकलहीं, पर ओमन के सक्ति पहिले के राज सहीं नइं होही।
DAN 8:23 “ओमन के सासन के बाद के समय म, जब बिदरोहीमन अपन पूरा बुरई के काम म होहीं, तब भयानक दिखइया एक राजा के उदय होही, जऊन ह सडयंत्र करे म माहिर होही।
DAN 8:24 ओह बहुंत सक्तिसाली हो जाही, पर अपन खुद के सक्ति ले नइं। ओह भयंकर बिनास करही अऊ जऊन कुछू घलो ओह करही, ओमा ओह सफल होही। ओह ओमन ला नास करही, जऊन मन सक्तिसाली, पबितर मनखे अंय।
DAN 8:25 ओह बढ़े बर छल-परपंच करही, अऊ ओह अपनआप ला बहुंत बड़े समझही। जब ओमन सुरकछित महसूस करत होहीं, तभे ओह बहुंते जन ला नास कर दीही अऊ राजकुमारमन के राजकुमार के बिरूध ठाढ़ होही। तभो ले ओह नास करे जाही, पर कोनो मानव सक्ति के दुवारा नइं।
DAN 8:26 “सांझ अऊ बिहनियां के जऊन दरसन तोला दिये गे हवय, ओह सच अय, पर तेंह ये दरसन ला गुपत म रख, काबरकि येह बहुंत आघू के अगम के बारे म अय।”
DAN 8:27 में, दानिएल ह लस्त पड़ गे रहेंव। मेंह थकके बहुंत दिन तक पड़े रहेंव। फेर मेंह उठेंव अऊ राजा के कामकाज म लग गेंव। मेंह दरसन ले डरा गे रहेंव; येह समझ के बाहिर के बात रिहिस।
DAN 9:1 (मादी बंस के) छयर्स के बेटा दारा ला बेबिलोनीमन के राज के सासक बनाय गे रिहिस।
DAN 9:2 ओकर राज के पहिला बछर म, में, दानिएल ह यरमियाह अगमजानी ला दिये गय यहोवा के बचन के मुताबिक ओकर पबितर बचन ले ये समझ गेंव कि यरूसलेम ह सत्तर बछर तक निरजन बने रहिही।
DAN 9:3 एकरसेति मेंह बोरा के ओनहा पहिरे, राख चुपरे, उपास करत परभू परमेसर ले गिड़गिड़ाके पराथना अऊ बिनती करेंव।
DAN 9:4 मेंह यहोवा, अपन परमेसर ले ये किसम ले पराथना करेंव अऊ अपन पापमन ला मान लेंव: “हे परभू, महान अऊ अद्भूत परमेसर, तेंह ओमन के संग अपन मया के करार ला बनाय रखथस, जऊन मन तोर ले मया करथें अऊ तोर हुकूममन ला मानथें,
DAN 9:5 हमन पाप करे हन अऊ गलत काम करे हन। हमन दुस्ट काम करके बिदरोह करे हन; हमन तोर हुकूम अऊ कानूनमन ले दूरिहा चल दे हन।
DAN 9:6 हमन तोर ओ सेवक अगमजानीमन के बात ला नइं सुनेंन, जेमन तोर नांव ले हमर राजा, हमर हाकिम अऊ हमर पुरखा, अऊ देस के जम्मो मनखेमन ले बात करिन।
DAN 9:7 “हे परभू, तेंह धरमी अस, पर आज हमन बहुंत सरमिंदा हवन—यहूदा के मनखे अऊ यरूसलेम के रहइया अऊ जम्मो इसरायली, जऊन मन लकठा या दूरिहा म हवंय, तोर बर बिसवासयोग्य नइं ठहिरे के कारन तेंह ओमन ला जम्मो देस म तितिर-बितिर कर दे हस।
DAN 9:8 हे यहोवा, हमन अऊ हमर राजा, हमर हाकिम अऊ हमर पुरखामन बहुंत सरमिंदा हवंय, काबरकि हमन तोर बिरूध म पाप करे हन।
DAN 9:9 हालाकि हमन तोर बिरूध बिदरोह करे हन, तभो ले हे परभू हमर परमेसर, तेंह दयालु अऊ छेमा करइया अस;
DAN 9:10 हमन यहोवा हमर परमेसर के बात ला नइं माने हन या ओ कानूनमन के पालन नइं करे हन, जऊन ला ओह अपन सेवक अगमजानीमन के जरिये हमन ला देय रिहिस।
DAN 9:11 जम्मो इसरायल ह तोर कानून के उलंघन करे हवय अऊ तोर बातमन ला माने के बदले, ओमन ले दूरिहा हो गे हवय। “एकरसेति परमेसर के सेवक, मूसा के कानून म लिखे सराप अऊ ठहिराय गे दंड हमर ऊपर डार देय गे हवय, काबरकि हमन तोर बिरूध पाप करे हवन।
DAN 9:12 तेंह हमर ऊपर बड़े बिपत्ति लानके हमर अऊ हमर सासकमन के बिरूध कहे गय बचन ला पूरा करे हस। जम्मो धरती म अइसने बिपत्ति अऊ कहूं नइं पड़िस, जइसने बिपत्ति यरूसलेम म पड़े हवय।
DAN 9:13 जइसे कि मूसा के कानून म लिखे हवय, ये जम्मो बिपत्ति हमर ऊपर आय हवय, तभो ले हमन न तो यहोवा हमर परमेसर के अनुग्रह पाय के कोसिस करेंन, अऊ न ही अपन पापमन ला छोंड़के तोर सच्चई ऊपर धियान दे हवन।
DAN 9:14 एकरसेति यहोवा हमर ऊपर बिपत्ति लाय म नइं हिचकिचाईस, काबरकि यहोवा हमर परमेसर जऊन कुछू घलो करथे, ओ जम्मो बात म ओह धरमीपन देखाथे; तभो ले हमन ओकर बात ला नइं मानेंन।
DAN 9:15 “अब, हे परभू हमर परमेसर, जऊन ह अपन सक्तिसाली हांथ ले अपन मनखेमन ला मिसर देस ले निकाल लाने अऊ अपन बर एक नांव बनाय, जऊन ह आज तक बने हवय, पर हमन पाप करे हवन, हमन गलत काम करे हवन।
DAN 9:16 हे परभू, तें अपन जम्मो धरमी काम ला धियान म रखत, अपन कोरोध अऊ कोप ला यरूसलेम सहर ले दूरिहा रख, जऊन ह कि तोर सहर अऊ तोर पबितर पहाड़ी ए। हमर पाप अऊ हमर पुरखामन के अपराध ह यरूसलेम अऊ तोर मनखेमन ला ओ जम्मो झन के आघू म अनादर के चीज बना दे हवय, जऊन मन हमर आसपास म रहिथें।
DAN 9:17 “अब, हे हमर परमेसर, अपन सेवक के पराथना अऊ बिनती ला सुन। हे परभू, अपन हित म, अपन सुनसान पड़े पबितर-स्थान ऊपर किरपा कर।
DAN 9:18 हे हमर परमेसर, कान लगाके सुन अऊ आंखी उघारके ओ सहर के सुन्नापन ला देख, जऊन ह तोर नांव ले जाने जाथे। हमन एकरसेति बिनती नइं करत हवन कि हमन धरमी अन, पर एकरसेति कि तेंह बड़े दयालु अस।
DAN 9:19 हे परभू, सुन! हे परभू, छेमा कर! हे परभू, सुन अऊ जऊन कुछू करना हे, ओला कर! अपन ही हित म, हे मोर परमेसर, देरी झन कर, काबरकि तोर सहर अऊ तोर मनखेमन तोर नांव ले जाने जाथें।”
DAN 9:20 जब मेंह अपन पाप अऊ अपन इसरायली मनखेमन के पाप ला मानत गोठियावत रहेंव अऊ पराथना करत रहेंव अऊ यहोवा मोर परमेसर करा ओकर पबितर पहाड़ी बर बिनती करत रहेंव—
DAN 9:21 जब मेंह पराथना म ही रहेंव, त ओ मनखे जिब्राएल, जऊन ला मेंह पहिले दरसन म देखे रहेंव, सांझ के बलिदान के बेरा तेजी से उड़ियावत मोर करा आईस।
DAN 9:22 ओह निरदेस देके मोला कहिस, “हे दानिएल, अब मेंह तोला अन्तर-दिरिस्टी अऊ समझे के सक्ति देय बर आय हंव।
DAN 9:23 जतेक जल्दी तेंह पराथना करे के सुरू करे, तभे एक हुकूम दिये गीस, जऊन ला मेंह तोला बताय बर आय हंव, काबरकि तेंह बहुंत आदरनीय मनखे अस। एकरसेति ये बातमन ऊपर बिचार कर अऊ दरसन ला समझ ले:
DAN 9:24 “तुम्हर मनखे अऊ तुम्हर पबितर सहर बर सत्तर ‘सात’ के आदेस देय गे हवय कि ओमन अपराध करई छोंड़ देवंय, पाप ला खतम कर देवंय, बुरई बर पछताप करंय, अपनआप म धरमीपन लानंय, दरसन अऊ अगमबानी के बात म मुहर लगाय जावय अऊ महा पबितर स्थान के अभिसेक करे जावय।
DAN 9:25 “ये बात ला जानव अऊ समझ लव: यरूसलेम के फेर स्थापना अऊ पुनरनिरमान बर बचन के निकले के समय ले लेके अभिसिक्त जन तक, याने कि सासक के आवत तक सात ‘सात’ अऊ बासठ ‘सात’ के समय ठहिराय गे हवय। येकर पुनरनिरमान, गलीमन अऊ एक खाई के संग होही, पर येह कठिन समय म होही।
DAN 9:26 बासठ ‘सात’ के बाद अभिसिक्त जन ह मार डारे जाही अऊ कुछू नइं होही। सासन करइया के मनखेमन आहीं अऊ सहर अऊ पबितर-स्थान ला नास कर दीहीं। एक बाढ़ के सहीं अन्त आ जाही: आखिरी तक लड़ई होवत रहिही, अऊ उजाड़ करे के निरनय करे जा चुके हवय।
DAN 9:27 ओह बहुंते जन के संग एक ‘सात’ बर एक करार के पुस्टि करही। ‘सात’ के बीच म ही, ओह बलिदान अऊ भेंट चघाय के अन्त कर दीही। अऊ मंदिर म एक नफरत के चीज ला स्थापित करही, जऊन ह उजाड़ के कारन बनही। येह तब तक होवत रहिही, जब तक कि ठहिराय गे समय के आखिरी म ओकर ऊपर बिनास ला नइं उंडेल दिये जाही।”
DAN 10:1 फारस के राजा कुसरू के सासनकाल के तीसरा बछर म दानिएल (जऊन ला बेलतसस्सर कहे जावय) ऊपर एक संदेस परगट करे गीस। ये संदेस ह सच रिहिस अऊ येकर संबंध एक बड़े लड़ई ले रिहिस। संदेस के समझ ह ओकर करा एक दरसन म आईस।
DAN 10:2 ओ समय, में, दानिएल ह तीन हप्ता तक दुख मनावत रहेंव।
DAN 10:3 जब तक तीन हप्ता पूरा नइं हो गीस, तब तक में कोनो मनपसंद जेवन नइं करेंव; न मांस खांय, न मंद ला मुहूं म लगांय, अऊ न ही कोनो किसम के सुघरता के मलहम लगांय।
DAN 10:4 साल के पहिला महिना के चौबीसवां दिन, जब मेंह महान नदी तिगरीस के तीर म खड़े रहेंव,
DAN 10:5 त मेंह देखेंव कि उहां एक मनखे मलमल के ओनहा पहिरे, अपन कनिहां म उफाज देस के सुध सोन के पट्टा बांधे खड़े रहय।
DAN 10:6 ओकर देहें ह फिरोजा के सहीं, ओकर चेहरा बिजली सहीं, ओकर आंखीमन बरत मसाल सहीं, ओकर बाहां अऊ गोड़मन चमकत कांसा के किरन सहीं, अऊ ओकर अवाज मनखेमन के एक भीड़ के अवाज सहीं रहय।
DAN 10:7 सिरिप में, दानिएल ह ओ दरसन ला देखेंव; जऊन मन मोर संग रिहिन, ओमन येला नइं देखिन, पर ओमन ऊपर अइसे भय छा गीस कि ओमन भागके लुका गीन।
DAN 10:8 एकरसेति मेंह एके झन बांचे रहेंव, अऊ ये बड़े दरसन ला एकटक देखतेच रहेंव; मोर म कुछू ताकत नइं रिहिस, मोर चेहरा ह एकदम उदास हो गीस अऊ मेंह निसहाय हो गेंव।
DAN 10:9 तब मेंह ओला कहत सुनेंव, अऊ जब में ओकर बात ला सुनेंव, त मेंह मुहूं के भार गिरके भारी नींद म पड़ गेंव।
DAN 10:10 तब एक झन के हांथ ह मोला छुईस अऊ मोर कांपत देहें ला मोर हांथ अऊ माड़ीमन म ठाढ़ कर दीस।
DAN 10:11 ओह कहिस, “हे दानिएल, तें जो बहुंत आदरनीय मनखे अस, ओ बातमन ऊपर धियान देके बिचार कर, जऊन ला मेंह तोला बतानेचवाला हंव, अऊ अब तेंह ठाढ़ हो जा, काबरकि मोला तोर करा पठोय गे हवय।” अऊ जब ओह मोला ये बात कहिस, त मेंह कांपत ठाढ़ हो गेंव।
DAN 10:12 तब ओह मोला ये घलो कहिस, “हे दानिएल, झन डर। पहिली ही दिन ले, जब तेंह अपन मन ला समझ के बात ऊपर अऊ अपन परमेसर के आघू म अपनआप ला नम्र करे म लगाय, तब ले तोर बातमन ला सुने गीस, अऊ ओकरे जबाब के रूप म, मेंह इहां आय हवंव।
DAN 10:13 तब फारसी राज के राजकुमार ह इक्कीस दिन तक मोर सामना करिस। तब मुखिया राजकुमारमन ले एक, मिकाएल ह मोर मदद करे बर आईस, काबरकि मोला उहां फारस के राजा करा रोक लिये गे रिहिस।
DAN 10:14 अब मेंह तोला ओ बातमन ला बताय बर आय हवंव, जऊन ह अवइया समय म तुम्हर मनखेमन के संग होवइया हवय, काबरकि ये दरसन के संबंध अवइया एक समय ले हवय।”
DAN 10:15 जब ओह मोला ये कहत रिहिस, त मेंह भुइयां कोति चेहरा झुकाके खड़े रहेंव अऊ मुक्का हो गेंव।
DAN 10:16 तब एक झन, जऊन ह एक मनखे के सहीं दिखत रहय, मोर ओंठ ला छुईस, अऊ मोर मुहूं ह खुल गीस अऊ मेंह बात करे लगेंव। मेंह ओला कहेंव, जऊन ह मोर आघू म खड़े रिहिस, “हे मोर परभू, ओ दरसन के कारन मेंह पीरा ले भर गे हंव, अऊ मोला बहुंत कमजोरी लगत हे।
DAN 10:17 हे मोर परभू, में, तोर सेवक, तोर ले कइसे बात कर सकत हंव? मोर म कुछू ताकत नइं ए अऊ मेंह बड़े मुसकिल से सांस ले सकत हंव।”
DAN 10:18 तब ओ, जऊन ह एक मनखे के सहीं दिखत रिहिस, मोला फेर छुईस अऊ मोला ताकत दीस।
DAN 10:19 ओह कहिस, “झन डर, तेंह बहुंत आदरनीय मनखे अस, तोला सांति मिलय! अब मजबूत रह; मजबूत रह।” जब ओह मोर ले गोठियाईस, त मोला ताकत मिलिस अऊ मेंह ओला कहेंव, “हे मोर परभू, गोठिया, काबरकि तेंह मोला ताकत दे हस।”
DAN 10:20 एकरसेति ओह कहिस, “का तेंह जानत हस कि मेंह तोर करा काबर आय हंव? बहुंत जल्दी मेंह फारस के राजकुमार के बिरूध लड़ई करे बर लहुंटके चल दूहूं, अऊ जब मेंह जाहूं, तब यूनान के राजकुमार ह आही;
DAN 10:21 पर पहिली मेंह तोला बताहूं कि सच्चई के किताब म का लिखे हवय। (तुम्हर राजकुमार, मिकाएल ला छोंड़ अऊ कोनो घलो येमन ले लड़े बर मोर मदद नइं करंय।
DAN 11:1 अऊ मादी बंस के राजा दारा के सासनकाल के पहिले बछर म, मेंह ओकर मदद करे बर अऊ ओकर बचाव करे बर ठाढ़ होंय।)
DAN 11:2 “अब, मेंह तोला सच बात बतावत हंव: फारस म तीन अऊ राजामन होहीं, अऊ ओकर बाद एक चौथा राजा घलो होही, जऊन ह आने जम्मो राजामन ले बहुंत अधिक धनी होही। जब ओह अपन धन ले सक्ति पा लीही, तब ओह जम्मो झन ला यूनान के राज के बिरूध भड़काही।
DAN 11:3 तब एक सक्तिसाली राजा के उदय होही, जऊन ह बड़े सक्ति ले राज करही अऊ ओह अपन मन मुताबिक करही।
DAN 11:4 ओकर उदय होय के बाद, ओकर राज ह टूट जाही अऊ चारों दिग म बंट जाही। येह ओकर संतानमन करा नइं जाही, अऊ न ही ओकर सक्ति ओ राज के ऊपर होही, काबरकि ओकर राज ला ओकर ले लूटके आने मन ला दे दिये जाही।
DAN 11:5 “दक्खिन के राजा ह सक्तिसाली हो जाही, पर ओकर ही एक सेनापति ह ओकर ले घलो जादा सक्तिसाली हो जाही अऊ अपन खुद के राज ऊपर बड़े सक्ति ले सासन करही।
DAN 11:6 कुछू बछर के बाद, ओमन सहयोगी हो जाहीं। दक्खिन के राजा के बेटी ह उत्तर के राजा करा एक संधि करे बर जाही, पर ओकर करा ओकर राज के सक्ति नइं रहिही, अऊ उत्तर के राजा अऊ ओकर सक्ति घलो नइं बांचही। ओ दिनमन म, दक्खिन के राजा के बेटी ला अऊ संग म ओकर साही रकछक अऊ ओकर ददा अऊ ओकर मदद करइया ला धोखा दिये जाही।
DAN 11:7 “ओकर परिवार के एक जन ह ओकर जगह लेय बर ठाढ़ होही। ओह उत्तर के राजा के सेना ऊपर चढ़ई करही अऊ ओकर किला म घुसर जाही; ओह ओमन ले लड़ही अऊ बिजयी होही।
DAN 11:8 ओह ओमन के देवतामन ला, ओमन के धातु के मूरतीमन ला अऊ ओमन के सोन अऊ चांदी के कीमती चीजमन ला घलो जपत कर लीही अऊ अपन संग मिसर देस ले जाही। कुछू बछर तक, ओह उत्तर के राजा ला एके झन छोंड़ दीही।
DAN 11:9 तब उत्तर के राजा ह दक्खिन के राजा के राज ऊपर चढ़ई करही, पर अपन ही देस ला फेर लहुंट जाही।
DAN 11:10 ओकर बेटामन लड़ई के तियारी करहीं अऊ एक बड़े सेना इकट्ठा करहीं, जऊन ह न रोके जा सकनेवाला बाढ़ सहीं तेजी ले आघू बढ़ही अऊ लड़ई ला ओकर किला तक ले जाहीं।
DAN 11:11 “तब दक्खिन के राजा कोरोधित होके आघू बढ़ही अऊ उत्तर के राजा ले लड़ई करही; उत्तर के राजा ह एक बड़े सेना खड़े करही, पर ओह हार जाही।
DAN 11:12 जब ये बड़े सेना ला ले लिये जाही, तब दक्खिन के राजा ह घमंड ले भर जाही अऊ कतको हजार मनखेमन ला मार डारही, तभो ले ओह बिजयी बने नइं रह सकही।
DAN 11:13 काबरकि उत्तर के राजा ह एक आने सेना खड़े कर लीही, जऊन ह ओकर पहिले के सेना ले बड़े होही; अऊ बहुंत बछर के बाद, पूरा तियारी करके, ओह एक बड़े सेना ला लेके आघू बढ़ही।
DAN 11:14 “ओ दिनमन म, बहुंते झन दक्खिन के राजा के बिरूध खड़े होहीं। तुम्हर अपन मनखेमन के बीच म, जऊन मन हिंसक सुभाव के अंय, ओमन बिदरोह करहीं, ताकि दरसन ह पूरा होवय, पर ओमन ला सफलता नइं मिलही।
DAN 11:15 तब उत्तर के राजा ह आके सैनिकमन के घेरा डालही अऊ एक किलावाले सहर ऊपर कब्जा कर लीही। दक्खिन के सेना म बिरोध करे के सक्ति नइं होही; अऊ त अऊ ओमन के सबले बने सैनिक दल करा घलो सामना करे के सक्ति नइं होही।
DAN 11:16 हमला करइया ह जइसे चाहही, वइसे करही; ओकर सामना कोनो नइं कर सकहीं। ओह अपनआप ला ओ सुघर देस म स्थापित करही अऊ ओकर करा ओला नास करे के सक्ति होही।
DAN 11:17 ओह अपन जम्मो राज के सक्ति के संग आय के ठान लीही अऊ ओह दक्खिन के राजा के संग एक संधि करही। अऊ ओकर राज ला जीते बर ओ राजा ला अपन एक बेटी बिहाव म दीही, पर ओकर योजना ह सफल नइं होही या ओकर ले ओला कोनो मदद नइं मिलही।
DAN 11:18 तब ओह अपन धियान समुंदर तीर म लगाही अऊ ओमा ले कतको ला अपन अधिकार म ले लीही, पर एक सेनापति ह ओकर अहंकार के अन्त कर दीही अऊ ओकर अहंकार के मुताबिक ओकर ले बदला लीही।
DAN 11:19 येकर बाद, ओह अपन ही देस के किलामन कोति लहुंटही, पर ओह लड़खड़ाके गिर जाही अऊ ओकर नामोनिसान मिट जाही।
DAN 11:20 “तब जऊन ह ओकर जगह लीही, ओह राज वैभव ला बनाय रखे बर एक लगान इकट्ठा करइया ला पठोही। पर कुछू बछर के भीतर, ओह नास हो जाही, पर ओकर बिनास कोरोध या लड़ई म नइं होही।
DAN 11:21 “ओकर जगह ला लेवइया ह एक तुछ मनखे होही, जऊन ला राजबंस ले आदर नइं मिले होही। जब मनखेमन अपनआप ला सुरकछित महसूस करत होहीं, तभे ओह राज ऊपर हमला करही, अऊ ओह सडयंत्र करके ओला अपन कब्जा म कर लीही।
DAN 11:22 तब एक बड़े सेना ओकर आघू म खतम हो जाही; येला अऊ करार के एक राजकुमार दूनों ला नास कर दिये जाही।
DAN 11:23 ओ राजकुमार के संग एक समझौता करे के बाद, ओह छल-कपट के संग काम करही, अऊ सिरिप थोरकन मनखेमन के संग ओह सक्तिसाली हो जाही।
DAN 11:24 जब सबले धनी राजमन सुरकछित महसूस करत होहीं, तभे ओह ओमन ऊपर हमला करही अऊ अइसन सफल होही, जइसन न तो ओकर बाप-ददा अऊ न ही ओकर पुरखामन कभू होईन। ओह लूटे अऊ छीने गय चीज अऊ संपत्ति ला अपन अनुयायीमन के बीच बांट दीही। ओह किलामन ला जीते बर सडयंत्र करही—पर सिरिप कुछू समय बर।
DAN 11:25 “एक बड़े सेना लेके ओह दक्खिन के राजा के बिरूध अपन सक्ति अऊ साहस के उपयोग करही। दक्खिन के राजा घलो एक बड़े अऊ बहुंत सक्तिसाली सेना लेके लड़ई करही, पर ओकर बिरूध रचे गय सडयंत्र के कारन, ओह ठहर नइं सकही।
DAN 11:26 जऊन मन राजा के दुवारा दिये जेवन करंय, ओमन ही ओला नास करे के कोसिस करहीं; ओकर सेना ला भगा दिये जाही, अऊ बहुंते जन लड़ई म मारे जाहीं।
DAN 11:27 दूनों राजा खराप मनसा ले एक ही मेज म बईठहीं अऊ एक-दूसर ले झूठ बोलहीं, जेकर ले कोनो फायदा नइं होही, काबरकि ठहिराय गे समय म अन्त आ जाही।
DAN 11:28 उत्तर के राजा ह बहुंत संपत्ति के संग अपन देस ला लहुंट जाही, पर ओकर मन ह पबितर करार के बिरूध लगे रहिही। ओह येकर बिरूध कार्यवाही करही अऊ तब ओह अपन देस लहुंट जाही।
DAN 11:29 “ठहिराय गे समय म, ओह फेर दक्खिन ऊपर हमला करही, पर ये समय परिनाम ह पहिले ले अलग होही।
DAN 11:30 पछिमी समुंदर तीर के पानी जहाजमन ओकर बिरोध करहीं, अऊ ओह हिम्मत हार जाही। तब ओह लहुंटही अऊ पबितर करार के बिरूध अपन गुस्सा निकालही। ओह लहुंटही अऊ ओमन ऊपर किरपा करही, जऊन मन पबितर करार ला छोंड़ दीहीं।
DAN 11:31 “हथियार धरे ओकर सेनामन मंदिर के किला ला अपबितर करे बर आघू बढ़हीं अऊ हर दिन चढ़ाय जवइया बलिदान ला बंद कर दीहीं। तब ओमन घिन जिनिस के स्थापना करहीं, जऊन ह उजाड़ के कारन बनथे।
DAN 11:32 चापलूसी करके ओह ओमन ला भ्रस्ट करही, जऊन मन करार ला टोर दिये होहीं, पर जऊन मनखेमन अपन परमेसर ला जानथें, ओमन ओकर जोरदार बिरोध करहीं।
DAN 11:33 “जऊन मन बुद्धिमान अंय, ओमन बहुंते ला समझाहीं, हालाकि कुछू समय बर, ओमन तलवार ले मारे जाहीं या जला दिये जाहीं या पकड़ लिये जाहीं या लूट लिये जाहीं।
DAN 11:34 जब ओमन गिरहीं, त ओमन ला बहुंत कम मदद मिलही, अऊ बहुंत मनखे, जऊन मन ईमानदार नो हंय, ओमन संग सामिल हो जाहीं।
DAN 11:35 बुद्धिमान मनखेमन ले कुछू झन लड़खड़ाहीं, ताकि अन्त के बेरा आवत तक ओमन ला साफ, सुध अऊ दाग रहित करे जा सकय, काबरकि ठहिराय गे समय म ही अन्त होही।
DAN 11:36 “राजा ह अपन मन मुताबिक करही। ओह अपनआप ला जम्मो देवतामन ले ऊंच अऊ बड़े बनाही अऊ देवतामन के परमेसर के बिरूध अइसन बात कहिही, जऊन ह कभू नइं सुने गे होही। ओह तब तक सफल होही, जब तक कि कोप के समय ह पूरा नइं हो जाही, काबरकि जऊन बात ठहिराय गे हवय, ओह जरूर पूरा होही।
DAN 11:37 ओह न तो अपन पुरखामन के देवतामन के कुछू आदर करही अऊ न ही ओह माईलोगनमन के ईछा के चिंता करही, अऊ न ही ओह कोनो देवता के आदर करही, पर ओह अपनआप ला ओ जम्मो ले ऊपर करही।
DAN 11:38 ओमन के बदले, ओह किलामन के एक देवता के आदर करही; एक अइसन देवता, जऊन ला ओकर पुरखामन घलो नइं जानत रिहिन। ओह ओ देवता के आदर सोन, चांदी, कीमती रत्न अऊ मंहगा उपहारमन के दुवारा करही।
DAN 11:39 ओह एक परदेसी देवता के मदद ले सबले सक्तिसाली गढ़मन ऊपर हमला करही अऊ ओमन के बहुंत आदर करही, जऊन मन ओला स्वीकार करहीं। ओह ओमन ला बहुंते मनखेमन ऊपर सासक ठहिराही अऊ एक दाम लेके भुइयां ला बांट दीही।
DAN 11:40 “अन्त के बेरा म, दक्खिन के राजा ह ओला लड़ई म लगाय रखही, अऊ उत्तर के राजा घलो रथ, घुड़सवार अऊ पानी जहाजमन के एक बड़े बेड़ा के संग ओकर ऊपर हमला करही। ओह बहुंते देस ऊपर हमला करही अऊ बाढ़ के पानी के सहीं ओमन ले होवत निकल जाही।
DAN 11:41 ओह सुघर देस ऊपर घलो हमला करही। बहुंत देसमन के अन्त हो जाही, पर एदोम अऊ मोआब देस ला अऊ अमोन के अगुवामन ला ओकर हांथ ले बचाय जाही।
DAN 11:42 ओह बहुंते देस म अपन सक्ति ला फईलाही; मिसर देस घलो नइं बचही।
DAN 11:43 ओह मिसर देस के सोन अऊ चांदी के खजाना अऊ जम्मो कीमती चीजमन ला अपन बस म कर लीही, अऊ लिबिया अऊ कूस देस के मनखेमन ओकर अधीन हो जाहीं।
DAN 11:44 पर पूरब अऊ उत्तर दिग ले अवइया खबर ला सुनके ओह चिंतित हो जाही, अऊ बहुंत गुस्सा होके ओह बहुंते जन ला नास करे अऊ ओमन के नामोनिसान मिटाय बर निकल जाही।
DAN 11:45 ओह अपन राजकीय तम्बू समुंदर के बीच सुघर पबितर पहाड़ ऊपर ठाढ़ करही। तभो ले ओकर अन्त हो जाही, अऊ कोनो ओकर मदद नइं करहीं।
DAN 12:1 “ओ बेरा मिकाएल, महान राजकुमार के उदय होही, जऊन ह तुम्हर मनखेमन ला बचाथे। तब अइसन बिपत्ति के समय होही, जइसन कि जातिमन के सुरू होय के समय ले लेके अब तक कभू नइं होय होही। पर ओ समय तुम्हर मनखेमन ले हर ओ मनखे ह बचाय जाही, जेकर नांव ह किताब म लिखे पाय जाही।
DAN 12:2 मरे मन के जनसमूह, जेमन ला भुइयां म दफनाय गे हवय, ओमन जी उठहीं: कुछू तो सदाकाल के जिनगी बर, अऊ आने मन सरमिंदा होय अऊ सदाकाल के अपमान बर।
DAN 12:3 जऊन मन बुद्धिमान अंय, ओमन अकास के अंजोर सहीं चमकहीं, अऊ जऊन मन बहुंते जन ला धरमीपन कोति ले जाथें, ओमन तारामन सहीं हमेसा चमकत रहिहीं।
DAN 12:4 पर हे दानिएल, तें अन्त के बेरा के आवत तक ये किताब के बातमन ऊपर मुहर लगाके येला बंद रख। बहुंते जन गियान बढ़ाय बर एती-ओती जाहीं।”
DAN 12:5 तब में, दानिएल ह देखेंव कि उहां अऊ दू झन मनखे खड़े रहंय, एक झन ह नदी के ये तीर म अऊ दूसर ह नदी के ओ तीर म।
DAN 12:6 ओमा ले एक झन ह मलमल के ओनहा पहिरे ओ मनखे ला कहिस, जऊन ह नदी के पानी के ऊपर रिहिस, “येकर पहिले कि ये चकित करइया बातमन पूरा होवंय, अऊ कतेक समय लगही?”
DAN 12:7 ओ मनखे जऊन ह मलमल के ओनहा पहिरे रिहिस अऊ नदी के पानी के ऊपर रिहिस, ओह अपन जेवनी हांथ अऊ अपन डेरी हांथ अकास कोति उठाईस अऊ मेंह सुनेंव कि ओह हमेसा जीयत रहइया के कसम खाके कहत रहय, “येह एक समय, समयमन अऊ आधा समय बर होही। जब आखिर म पबितर मनखेमन के सक्ति ह खतम कर दिये जाही, तब ये जम्मो बात पूरा हो जाही।”
DAN 12:8 मेंह ये बात ला सुनेंव, पर नइं समझेंव। एकरसेति मेंह पुछेंव, “हे मोर मालिक, ये जम्मो बात के परिनाम का होही?”
DAN 12:9 ओह जबाब दीस, “हे दानिएल, तेंह जा, काबरकि अन्त के बेरा के आवत तक, ये बातमन ऊपर मुहर लगाके येमन ला बंद कर दिये गे हवय।
DAN 12:10 बहुंत मनखेमन सुध, दाग रहित अऊ साफ करे जाहीं; पर जऊन मन दुस्ट अंय, ओमन दुस्टता करत रहिहीं। दुस्टमन ले कोनो ये बातमन ला नइं समझहीं, पर जऊन मन बुद्धिमान अंय, ओमन समझहीं।
DAN 12:11 “जब ले हर दिन के बलिदान ला बंद कर दिये जाही अऊ उजाड़ करइया घिनित चीज ला स्थापित करे जाही, तब ले 1,290 दिन के समय होही।
DAN 12:12 धइन ए ओ, जऊन ह इंतजार करथे अऊ 1,335 दिन के आखिरी तक पहुंचथे।
DAN 12:13 “जहां तक तोर सवाल ए, तें अन्त के आवत तक अपन रसता म जा। तेंह अराम करबे, अऊ तब दिनमन के अन्त के बेरा, तेंह अपन बर ठहिराय उत्तराधिकार ला पाय बर ठाढ़ होबे।”
HOS 1:1 यहूदा के राजा उजियाह, योताम, आहाज, अऊ हिजकियाह के सासन के समय, अऊ इसरायल के राजा यहोआस के बेटा यरोबाम के सासन के समय, यहोवा के बचन बेरी के बेटा होसे करा आईस।
HOS 1:2 जब यहोवा ह होसे के जरिये गोठियाय के सुरू करिस, त ओह होसे ले कहिस, “जाके एक बेस्या ले बिहाव कर ले, अऊ ओकर ले लइका जनमा, काबरकि एक बेभिचारी घरवाली के सहीं ये देस ह यहोवा ले बिसवासघात करके अपराधी हो गे हवय।”
HOS 1:3 एकरसेति होसे ह जाके दिबलैम के बेटी गोमेर ले बिहाव कर लीस, अऊ ओह होसे कोति ले देहें म होईस अऊ ओह एक बेटा जनमिस।
HOS 1:4 तब यहोवा ह होसे ले कहिस, “ओकर नांव यिजरेल रख, काबरकि बहुंत जल्दी, मेंह येहू के घराना ला यिजरेल म करे गे मारकाट बर दंड दूहूं, अऊ मेंह इसरायल राज के अन्त कर दूहूं।
HOS 1:5 ओ दिन मेंह यिजरेल के घाटी म इसरायल के धनुस ला टोरहूं।”
HOS 1:6 गोमेर ह फेर देहें म होईस अऊ एक बेटी ला जनम दीस। तब यहोवा ह होसे ले कहिस, “ओकर नांव लो-रूहामा रख, काबरकि मेंह अब इसरायल के घराना ला मया नइं देखावंव, अऊ ओमन ला कोनो किसम ले छेमा नइं करंव।
HOS 1:7 पर मेंह यहूदा के घराना ला मया देखाहूं; अऊ ओमन ला बचाहूं—ये बचाव न तो धनुस, तलवार या लड़ई के दुवारा, या घोड़ामन अऊ घुड़सवारमन के दुवारा होही, पर में, यहोवा ओमन के परमेसर ओमन ला बचाहूं।”
HOS 1:8 जब गोमेर ह लो-रूहामा के दूध ला छुड़ाईस, तब ओह देहें म होके एक अऊ बेटा ला जनम दीस।
HOS 1:9 तब यहोवा ह कहिस, “एकर नांव लो-अम्मी रख, काबरकि तुमन मोर मनखे नो हव, अऊ मेंह तुम्हर परमेसर नो हंव।
HOS 1:10 “तभो ले इसरायलीमन के संखिया समुंदर तीर के बालू असन होही, जेमन ला नापे या गने नइं जा सकय। ओ ठऊर जिहां ओमन ला ये कहे गे रिहिस, ‘तुमन मोर मनखे नो हव, ओही जगह म, ओमन ला जीयत परमेसर के संतान कहे जाही।’
HOS 1:11 यहूदी अऊ इसरायलीमन एक संग जूरहीं; ओमन इकट्ठा होके अपन बर एक अगुवा ठहिराहीं अऊ देस ले निकल आहीं, काबरकि यिजरेल के ओ दिन ह महान दिन होही।
HOS 2:1 “अपन भाईमन ले कहव, ‘मोर मनखे,’ अऊ अपन बहिनीमन ले कहव, ‘मोर मयारू।’
HOS 2:2 “अपन दाई ला दबकार, ओला दबकार, काबरकि ओह मोर घरवाली नो हय, अऊ मेंह ओकर घरवाला नो हंव। ओह अपन चेहरा ले छिनारीपन अऊ अपन छातीमन के बीच ले बिसवासघात ला हटा लेवय।
HOS 2:3 नइं तो मेंह ओकर ओनहा ला उतारके अइसने नंगरी कर दूहूं जइसने ओह अपन जनम के बेरा म रिहिस; में ओला मरू-भुइयां असन बना दूहूं, ओला सूखा भुइयां म बदल दूहूं अऊ ओला पीयास ले मार डारहूं।
HOS 2:4 ओकर लइकामन बर मेंह अपन मया नइं देखाहूं, काबरकि ओमन बेभिचार ले जनमे लइका अंय।
HOS 2:5 ओमन के दाई ह छिनारी करे हवय अऊ ओह ओमन ला कलंक ले अपन गरभ म धारन करिस। ओह कहिस, ‘मेंह अपन मया करइयामन के पाछू जाहूं, जऊन मन मोला रोटी-पानी, मोर ऊन अऊ सन के कपड़ा, मोर जैतून तेल अऊ मोर मंद देथें।’
HOS 2:6 एकरसेति, मेंह ओकर रद्दा ला कंटिली झाड़ीमन ले घेर दूहूं, मेंह ओकर आघू म बाड़ा ठाढ़ कर दूहूं ताकि ओला रसता झन मिलय।
HOS 2:7 ओह अपन मया करइयामन के पीछा करही पर ओमन ला पकड़ नइं सकही; ओह ओमन ला खोजही पर ओमन नइं मिलहीं। तब ओह कहिही, ‘मेंह पहिले के सहीं अपन घरवाला करा लहुंट जाहूं, काबरकि मोर तब के दसा ह अभी के दसा ले बने रिहिस।’
HOS 2:8 ओह ये बात ला नइं माने हे कि ओह मेंहीच रहेंव जऊन ह ओला अनाज, नवां अंगूर के मंद अऊ तेल दीस, जऊन ह ओकर ऊपर खुले मन ले सोन अऊ चांदी लुटाईस— जेकर उपयोग ओमन बाल देवता बर करिन।
HOS 2:9 “एकरसेति मेंह अपन अनाज ला ले लूहूं जब ओह पाक जाही, अऊ अपन नवां अंगूर के मंद ला ले लूहूं जब ओह तियार हो जाही। मेंह अपन ऊन अऊ सन के कपड़ा ला वापिस ले लूहूं, जऊन ला मेंह ओकर देहें ला ढांपे बर दे रहेंव।
HOS 2:10 एकरसेति अब मेंह ओकर फूहड़पन ला ओकर मया करइयामन के आघू म उघारहूं; अऊ कोनो ओला मोर हांथ ले छोंड़ाय नइं सकहीं।
HOS 2:11 मेंह ओकर जम्मो उत्सव मनई ला बंद कर दूहूं: ओकर हर बछर के तिहार, ओकर नवां चंदा के उत्सव, ओकर बिसराम दिनमन ला—ओकर जम्मो ठहिराय तिहारमन ला बंद कर दूहूं।
HOS 2:12 मेंह ओकर अंगूर के नार अऊ ओकर अंजीर के रूखमन ला बरबाद कर दूहूं जेकर बारे म ओह कहिथे कि येह मोर मया करइयामन के दुवारा दिये गे मजदूरी अय; मेंह ओमन ला झाड़-झंखाड़ बना दूहूं, अऊ जंगली पसुमन ओमन ला चर डारहीं।
HOS 2:13 मेंह ओला ओ बातमन बर सजा दूहूं कि ओह बाल देवतामन बर धूप जलाईस; ओह अपनआप ला नथनी अऊ गहनामन ले सजाईस, अऊ अपन मया करइयामन के पाछू गीस, पर मोला ओह भुला गीस,” यहोवा ह घोसना करत हे।
HOS 2:14 “एकरसेति, अब मेंह ओला ललचाहूं; मेंह ओला सुनसान जगह म ले जाहूं अऊ ओकर ले कोमल मन ले गोठियाहूं।
HOS 2:15 उहां मेंह ओला ओकर अंगूर के बारीमन ला लहुंटा दूहूं, अऊ आकोर के घाटी ला आसा के दुवार बना दूहूं। उहां ओह अइसने जबाब दीही, जइसने ओह अपन जवानी के दिन म देवत रिहिस, याने कि जइसने ओह मिसर देस ले निकलके आय के बेरा देवत रिहिस।”
HOS 2:16 यहोवा ह घोसना करत हे, “ओ दिन, तेंह मोला ‘मोर घरवाला’ कहिबे; तेंह मोला फेर कभू ‘अपन मालिक’ नइं कहिबे।
HOS 2:17 मेंह ओकर मुहूं ले बाल देवतामन के नांव ला मिटा दूहूं; ओमन के नांव फेर कभू नइं लिये जाही।
HOS 2:18 ओ दिन मेंह ओमन बर जंगली जानवर, अकास के चिरई अऊ भुइयां म रेंगइया जन्तुमन के संग एक करार करहूं। धनुस अऊ तलवार अऊ लड़ई ला मेंह देस ले खतम कर दूहूं, ताकि मनखेमन निडर होके अराम करंय।
HOS 2:19 मेंह तोला हमेसा के खातिर बिहाव के बचन दूहूं; मेंह तोला धरमीपन अऊ नियाय, मया अऊ करूना के संग बिहाव के बचन दूहूं।
HOS 2:20 में तोला सच्चई के संग बिहाव के बचन दूहूं, अऊ तेंह यहोवा ला जान लेबे।”
HOS 2:21 यहोवा ह घोसना करत हे— “ओ दिन मेंह जबाब दूहूं, मेंह अकास-मंडल ला जबाब दूहूं, अऊ ओमन धरती ला जबाब दीहीं;
HOS 2:22 अऊ धरती ह अनाज, नवां अंगूर के मंद अऊ जैतून के तेल ला जबाब दीही, अऊ ओमन यिजरेल ला जबाब दीहीं।
HOS 2:23 मेंह ओला अपन बर देस म लगाहूं; मेंह ओकर ऊपर अपन मया देखाहूं, जऊन ला मेंह अपन मयारू नइं कहंव। ओ मनखे जऊन मन मोर नइं कहे जावंय, ओमन ला मेंह कहिहूं, ‘तुमन मोर मनखे अव’; अऊ ओमन कहिहीं, ‘तेंह हमर परमेसर अस।’ ”
HOS 3:1 यहोवा ह मोर ले कहिस, “जा अऊ अपन मया अपन घरवाली ला फेर देखा, हालाकि ओला कोनो अऊ मनखे ह मया करथे अऊ ओह एक छिनार अय। ओकर ले अइसन मया कर, जइसन यहोवा ह इसरायलीमन ले करथे, हालाकि इसरायलीमन आने देवतामन कोति जाके पबितर किसमिस के टिकियामन ले मया करथें।”
HOS 3:2 एकरसेति मेंह ओला चांदी के पंदरह सेकेल अऊ लगभग एक होमेर अऊ एक लेथेक जौ देके बिसा लेंव।
HOS 3:3 तब मेंह ओला कहेंव, “तोला मोर संग बहुंत दिन तक रहना हे; तोला बेस्या नइं बनना हे या कोनो मनखे के संग सारीरिक संबंध नइं बनाना हे, अऊ मेंह घलो तोर संग अइसनेच बरताव करहूं।”
HOS 3:4 काबरकि इसरायलीमन बहुंत दिन तक बिगर राजा या हाकिम, बिगर बलि या पबितर पथरा, बिगर एपोद या घर-देवता के रहिहीं।
HOS 3:5 ओकर बाद इसरायलीमन लहुंटहीं अऊ यहोवा, अपन परमेसर अऊ अपन राजा, दाऊद ला खोजहीं। ओमन आखिरी के दिनमन म कांपत यहोवा करा अऊ ओकर आसीस पाय बर आहीं।
HOS 4:1 हे इसरायलीमन, यहोवा के बचन ला सुनव, काबरकि तुमन, जऊन मन ये देस म रहिथव तुम्हर ऊपर यहोवा ह एक आरोप लगइया हवय: ये देस के रहइयामन म परमेसर बर न तो कुछू बिसवासयोग्यता, न कुछू मया अऊ न ही परमेसर ला माने के कुछू बात हवय।
HOS 4:2 इहां सिरिप सराप देवई, लबारी बात, हतिया करई, चोरी-चकारी अऊ बेभिचार हवय; ओमन जम्मो कानून ला टोरथें, अऊ खून के ऊपर खून करत रहिथें।
HOS 4:3 एही कारन अय कि ये देस ह सूखा जाथे, अऊ येमा जम्मो रहइयामन बेकार हो जाथें; भुइयां के पसु, अकास के चिरई अऊ समुंदर के मछरीमन नास हो जाथें।
HOS 4:4 “पर कोनो मनखे दोस झन लगावय, न ही कोनो मनखे आने ऊपर आरोप लगावय, काबरकि तोर मनखेमन ओमन के सहीं अंय जऊन मन पुरोहितमन ऊपर दोस लगाथें।
HOS 4:5 तेंह रात-दिन ठोकर खाथस, अऊ तोर संग अगमजानीमन घलो ठोकर खाथें। एकरसेति मेंह तोर दाई ला नास कर दूहूं—
HOS 4:6 मोर मनखेमन गियान के कमी के कारन नास होथें। “काबरकि तेंह गियान ला अस्वीकार करे हस, एकरसेति मेंह घलो तोला अपन पुरोहित के रूप म अस्वीकार करत हंव; काबरकि तेंह अपन परमेसर के कानून ऊपर धियान नइं दे हवस, त मेंह घलो तोर लइकामन ऊपर धियान नइं दूहूं।
HOS 4:7 जतेक जादा पुरोहित रिहिन, ओतेक जादा ओमन मोर बिरूध म पाप करिन; ओमन अपन महिमामय परमेसर के बदला म कलंकित चीज ला अपना लीन।
HOS 4:8 पुरोहितमन मोर मनखेमन के पाप के कमई ला खाथें अऊ ओमन मोर मनखेमन के दुस्टता के मजा लेथें।
HOS 4:9 अऊ येह अइसने होही: जइसने मनखेमन के दसा, वइसने पुरोहितमन के दसा। मेंह ओ दूनों ला ओमन के चालचलन के सजा दूहूं, अऊ ओमन ला ओमन के काम के बदला दूहूं।
HOS 4:10 “ओमन खाना तो खाहीं, पर ओमन करा परयाप्त खाना नइं होही; ओमन बेस्यागमन करहीं, पर बाढ़हीं नइं, काबरकि ओमन यहोवा ला छोंड़ दे हवंय
HOS 4:11 ताकि ओमन बेस्यागमन कर सकंय; पुराना मंद अऊ नवां मंद ओमन के समझ ला भ्रस्ट कर देथे।
HOS 4:12 मोर मनखेमन कठवा के एक मूरती ले सलाह लेथें, अऊ अगम बतइया के लउठी ओमन के अगम के बात ला बताथे। बेभिचार के एक आतमा ह ओमन ला बहका देथे; ओमन अपन परमेसर के संग बिसवासघात करथें।
HOS 4:13 ओमन पहाड़ के टीप म बलिदान चघाथें अऊ पहाड़ीमन ऊपर, बलूत रूख, चिनार रूख अऊ एला रूखमन के खाल्हे म, जिहां बने छइहां होथे, उहां होम-बलिदान चघाथें। ये खातिर तुम्हर बेटीमन छिनारी करे बर जाथें अऊ तुम्हर बहुमन बेभिचार करथें।
HOS 4:14 “जब तुम्हर बेटीमन छिनारी करे बर जाहीं त में ओमन ला सजा नइं दूहूं, अऊ न ही तुम्हर बहुमन ला सजा दूहूं, जब ओमन बेभिचार करहीं, काबरकि आदमीमन खुद बेस्यामन के संग रहिथें अऊ देवालय के बेस्यामन संग बलि चघाथें— नासमझ मनखेमन नास हो जाहीं!
HOS 4:15 “हे इसरायल, हालाकि तेंह बेभिचार करथस, पर यहूदा ला दोसी झन होवन दे। “न तो गिलगाल जावव; अऊ न ही ऊपर बेत-आवेन ला जावव। अऊ न ही ये कसम खावव, ‘यहोवा के जिनगी के कसम।’
HOS 4:16 इसरायलीमन जिद्दी बछरू असन जिद्दी अंय। तब यहोवा ह ओमन ला चरागन म मेढ़ा-पीलामन सहीं कइसे चरा सकत हे?
HOS 4:17 एपरैम ह मूरतीमन के संगवारी हो गे हवय; ओला अकेला छोंड़ दव!
HOS 4:18 अऊ त अऊ जब ओमन के मंद ह खतम हो जाथे, तब घलो ओमन बेस्यागमन करत रहिथें; ओमन के सासन करइयामन लज्जा के काम ले मया करथें।
HOS 4:19 बवंडर ह ओमन ला उड़ाके ले जाही, अऊ ओमन के बलिदानमन के खातिर ओमन ला सरमिंदा होना पड़ही।
HOS 5:1 “हे पुरोहितमन, ये बात ला सुनव! हे इसरायलीमन, धियान देवव! हे राज-घराना, सुनव! ये नियाय ह तुम्हर बिरूध हवय: तुमन मिसपा म एक फांदा बन गे हवव, तुमन ताबोर पहाड़ म बिछाय एक जाल अव।
HOS 5:2 बिदरोहीमन घोर हतिया करे हवंय। में ओ जम्मो झन के ताड़ना करहूं।
HOS 5:3 मेंह एपरैम के जम्मो बात ला जानत हंव; इसरायल के बात मोर ले छिपे नइं ए। हे एपरैम, तेंह अब बेस्यागमन म लग गे हवस; इसरायल ह भ्रस्ट हो गे हवय।
HOS 5:4 “ओमन के काम ओमन ला ओमन के परमेसर कोति फिरन नइं देवय। बेस्यागमन के आतमा ओमन के दिल म हवय; ओमन यहोवा ला नइं मानंय।
HOS 5:5 इसरायल के घमंड ह ओमन के बिरूध म गवाही देवत हे; इसरायलीमन, अऊ त अऊ एपरैम घलो अपन पाप म लड़खड़ावत हवंय; यहूदा घलो ओमन के संग लड़खड़ावत हे।
HOS 5:6 जब ओमन अपन भेड़-बकरी अऊ गाय-बईलामन के झुंड ला लेके यहोवा के खोज म जाथें, त यहोवा ह ओमन ला नइं मिलय; काबरकि ओह अपनआप ला ओमन ले अलग कर ले हवय।
HOS 5:7 ओमन यहोवा के संग बिसवासघात करे हवंय; ओमन अवैध लइका जनमाथें। जब ओमन नवां चंदा के भोज के उत्सव मनाहीं, त ओह ओमन के खेतमन ला नास कर दीही।
HOS 5:8 “गिबा नगर म तुरही ला बजावव, अऊ रामा नगर म नरसिंगा फूंकव। बेत-आवेन नगर म लड़ई बर ऊंचहा अवाज म ललकारव; हे बिनयामीन, हमर अगुवई कर।
HOS 5:9 हिसाब करे के दिन एपरैम ह उजड़ जाही। इसरायल के गोत्रमन के बीच मेंह ओही बात के घोसना करहूं, जेकर होना निस्चित ए।
HOS 5:10 यहूदा के अगुवामन ओमन के जइसे अंय जऊन मन सीमना के पथरामन ला हटाथें। मोर कोरोध ह ओमन ऊपर पानी के बाढ़ सहीं भड़कही।
HOS 5:11 एपरैम ला सताय जाथे, ओला नियाय म कुचरे गे हवय, काबरकि ओह मूरतीमन के पाछू जाय बर ठान ले हवय।
HOS 5:12 मेंह एपरैम बर एक कीरा के असन, अऊ यहूदा के मनखेमन बर सड़ाहट के असन अंव।
HOS 5:13 “जब एपरैम ह अपन रोग, अऊ यहूदा ह अपन घाव ला देखिस, तब एपरैम ह अस्सूर कोति गीस, अऊ बड़े राजा ले मदद बर बिनती करिस। पर ओह तुमन ला न तो चंगा कर सकथे, अऊ न ही तुम्हर घावमन ला ठीक कर सकथे।
HOS 5:14 काबरकि मेंह एपरैम बर एक सिंह, अऊ यहूदा बर एक बड़े सिंह सहीं हो जाहूं। मेंह ओमन ला चीरके कुटा-कुटा कर दूहूं अऊ चले जाहूं; मेंह ओमन ला उठाके ले जाहूं, अऊ ओमन ला बचानेवाला कोनो नइं होहीं।
HOS 5:15 जब तक ओमन अपन अपराध ला मान नइं लीहीं अऊ मोर करा लहुंटके नइं आहीं मेंह अपन ठऊर म नइं लहुंटहूं— अपन दुरगति के बेरा ओमन मन लगाके मोर खोज करहीं।”
HOS 6:1 “आवव, हमन यहोवा कोति लहुंटन। ओह हमन ला चीरके कुटा-कुटा कर दे हवय पर ओह हमन ला चंगा करही; ओह हमन ला चोट पहुंचाय हवय पर ओहीच ह हमर घावमन म मरहम पट्टी करही।
HOS 6:2 दू दिन के बाद ओह हमन म सुधार लानही; अऊ तीसर दिन ओह हमन ला पहिले सहीं कर दीही, ताकि हमन ओकर आघू म बने रहन।
HOS 6:3 आवव, हमन यहोवा ला मान लेवन; आवव, हमन ओला जाने बर कोसिस करन। जइसन कि सूरज के निकलई ह निस्चित अय, वइसने ही ओह घलो निस्चय परगट होही; ओह हमर करा ठंड के बरसात सहीं, बसन्त रितु के ओ बरसात सहीं आही, जऊन ह धरती ला पलोथे।”
HOS 6:4 “हे एपरैम, मेंह तोर बर का कर सकत हंव? हे यहूदा, मेंह तोर बर का कर सकत हंव? तुम्हर मया ह बिहनियां के कुहरा के असन, बड़े बिहनियां पड़नेवाला ओ ओस असन अय, जऊन ह गायब हो जाथे।
HOS 6:5 ये खातिर मेंह तुमन ला अपन अगमजानीमन के दुवारा काटके कुटा-कुटा कर डारेंव, मेंह अपन मुहूं के बात ले तुमन ला मार डारेंव— तब मोर नियाय ह सूरज के सहीं आघू बढ़थे।
HOS 6:6 काबरकि मेंह बलिदान ले नइं, पर दया ले, अऊ होम-बलिदान के बदला परमेसर ला माने ले खुस होथंव।
HOS 6:7 पर आदम असन, ओमन करार ला टोर दे हवंय; ओमन उहां मोर संग बिसवासघात करे रिहिन।
HOS 6:8 गिलाद दुस्ट काम करइयामन के एक सहर अय, उहां लहू ले भरे मनखेमन के चले के निसान हवय।
HOS 6:9 जइसने लुटेरामन अपन सिकार बर लुकाके घात म रहिथें, वइसनेच पुरोहितमन के दल ह करथे; ओमन अपन दुस्ट योजना ला पूरा करत सकेम सहर के रद्दा म हतिया करथें।
HOS 6:10 इसरायल म मेंह एक भयानक चीज देखे हंव: उहां एपरैम ला बेस्यागमन बर दिये जाथे, अऊ इसरायल ह असुध होथे।
HOS 6:11 “हे यहूदा, तोर बर घलो कटनी के एक समय ठहिराय गे हवय। “जब मेंह अपन मनखेमन के बने दिनमन ला लहुंटा लाहूं,
HOS 7:1 जब भी मेंह इसरायल ला चंगा करहूं, त एपरैम के पापमन ला बताय जाही अऊ सामरिया के अपराधमन परगट होहीं। ओमन धोखा देय के काम करथें, चोरमन घरमन म चोरी करथें, लुटेरामन गलीमन म लूटमार करथें;
HOS 7:2 पर ओमन ये नइं समझंय कि में ओमन के जम्मो दुस्ट काममन ला सुरता रखथंव। ओमन के पापमन ओमन ला पूरा खा जाथें; ओमन के काम हमेसा मोर नजर म बने रहिथें।
HOS 7:3 “ओमन राजा ला अपन दुस्टता, अऊ हाकिममन ला अपन लबारी बातमन ले खुस रखथें।
HOS 7:4 ओमन जम्मो के जम्मो बेभिचारी अंय, एक बरत चूल्हा के सहीं जेकर आगी ला रोटी बनइया ह तब तक तेज नइं करय जब तक कि ओह पीसान ला सानके पकाय बर तियार नइं कर लेवय।
HOS 7:5 हमर राजा के तिहार के दिन हाकिममन मंद पीके चूर हो जाथें, अऊ ओह ठट्ठा करइयामन संग सामिल हो जाथे।
HOS 7:6 ओमन के मन ह चूल्हा सहीं अय; ओमन ओकर करा सडयंत्र रचके जाथें। ओमन के लालसा रात भर सुलगत रहिथे; अऊ बिहनियां आगी के लपट सहीं धधकथे।
HOS 7:7 ओमन जम्मो के जम्मो चूल्हा असन गरम हवंय; ओमन अपन सासन करइयामन ला भसम कर देथें। ओमन के जम्मो राजामन मारे जाथें, अऊ ओमा के कोनो घलो मोला नइं पुकारंय।
HOS 7:8 “एपरैम ह देस-देस के मनखेमन संग घुल-मिल जाथे; एपरैम एक सपाट रोटी सहीं अय, जऊन ला पलटे नइं गे हवय।
HOS 7:9 परदेसीमन ओकर ताकत के सोसन करथें, पर ओह ये बात ला नइं समझय। ओकर चुंदी ह पाकत हवय, पर ओह येला धियान नइं देवय।
HOS 7:10 इसरायल के अहंकार ह ओकर बिरूध म गवाही देथे, पर ये जम्मो बात के बावजूद ओह यहोवा अपन परमेसर करा लहुंटके नइं आवय या ओला नइं खोजय।
HOS 7:11 “एपरैम ह एक पंड़की चिरई असन अय, जऊन ह आसानी से धोखा खाथे अऊ निरबुद्धि अय— ओमन मदद बर मिसर ला बलात हें, अब अस्सूर कोति जावत हें।
HOS 7:12 जब ओमन जाहीं, त मेंह ओमन ऊपर अपन जाल डारहूं; मेंह ओमन ला अकास के चिरईमन ला गिराय सहीं खाल्हे म गिरा दूहूं। जब मेंह सुनहूं कि ओमन एक संग झुंड म जूरथें, त मेंह ओमन ला पकड़ लूहूं।
HOS 7:13 ओमन ऊपर हाय, काबरकि ओमन मोर ले अलग हो गे हवंय! ओमन के सतियानास होवय, काबरकि ओमन मोर बिरूध बिदरोह करे हवंय! मेंह ओमन ला छोंड़ाय के ईछा करथंव पर ओमन मोर बारे म झूठ बोलथें।
HOS 7:14 ओमन मोला अपन पूरा मन ले नइं पुकारंय पर अपन बिस्तर म पड़े बिलाप करथें। अनाज अऊ नवां अंगूर के मंद बर ओमन अपन देवतामन ले बिनती करत अपनआप ला घायल करथें, पर ओमन मोर ले दूरिहा रहिथें।
HOS 7:15 मेंह ओमन ला सिकछा देंव अऊ ओमन के हांथ ला मजबूत करेंव, पर ओमन मोर बिरूध सडयंत्र करथें।
HOS 7:16 ओमन सर्वोच्च परमेसर कोति नइं फिरंय; ओमन अइसन धनुस असन अंय, जऊन म दोस हवय। ओमन के अगुवामन घमंड ले भरे बात के कारन तलवार ले मारे जाहीं। एकरे कारन ओमन ला मिसर देस म ठट्ठा म उड़ाय जाही।
HOS 8:1 “तुरही ला अपन ओंठ म रखव! एक गिधवा ह यहोवा के घर ऊपर हवय काबरकि मोर मनखेमन मोर करार ला टोरे हवंय अऊ मोर कानून के बिरूध बिदरोह करे हवंय।
HOS 8:2 इसरायल ह मोला पुकारके कहत हे, ‘हे हमर परमेसर, हमन तोला मानथन!’
HOS 8:3 पर इसरायल ह भलई ला अस्वीकार करे हवय; एक बईरी ह ओकर पीछा करही।
HOS 8:4 ओमन मोर बिगर सहमती के राजामन ला ठहिराथें, ओमन बिगर मोर सहमती के हाकिममन ला चुनथें। ओमन अपन सोन अऊ चांदी ले अपन बिनास बर मूरतीमन ला बनाथें।
HOS 8:5 हे सामरिया, अपन बछवा के मूरती ला बाहिर फटिक दे! मोर गुस्सा ओमन ऊपर भड़कत हे। ओमन कब तक सुध होय के काबिल नइं होहीं?
HOS 8:6 ओमन इसरायल के अंय! ये बछवा—एक कारीगर ह येला बनाय हवय; येह परमेसर नो हय। सामरिया के ओ बछवा ला कुटा-कुटा कर दिये जाही।
HOS 8:7 “ओमन हवा ला बोथें, अऊ बवंडर रूपी फसल लूथें। फसल के डंठल म बाली नइं ए; येमा ले पीसान नइं मिलय। कहूं येकर ले अनाज पईदा होतिस, त परदेसीमन ओला खा जातिन।
HOS 8:8 इसरायल ला लील लिये गे हवय; अब ओह जाति-जाति के मनखेमन के बीच म अइसन हवय जऊन ला कोनो पसंद नइं करंय।
HOS 8:9 काबरकि ओमन एक भटके जंगली गदहा सहीं अस्सूर देस चले गे हवंय। एपरैम ह अपनआप ला मयारूमन के हांथ म बेच दे हवय।
HOS 8:10 हालाकि ओमन अपनआप ला जाति-जाति के मनखेमन के बीच म बेच दे हवंय, तभो ले मेंह अब ओमन ला एक संग इकट्ठा करहूं। सक्तिसाली राजा के सताव के कारन ओमन नास होय लगहीं।
HOS 8:11 “हालाकि एपरैम ह पाप-बलिदान बर बहुंत अकन बेदीमन ला बनाईस, पर ये बेदीमन ओकर पाप करे के कारन बन गे हवंय।
HOS 8:12 मेंह ओमन बर अपन कानून के बहुंत बात लिखेंव, पर ओमन ओ बातमन ला बाहिर के समझिन।
HOS 8:13 हालाकि ओमन भेंट के रूप म बलिदान चघाथें, अऊ हालाकि ओमन मांस खाथें, पर यहोवा ह ओमन ले खुस नइं ए। अब ओह ओमन के दुस्टता के काममन ला सुरता करही अऊ ओमन के पाप खातिर सजा दीही: ओमन मिसर देस ला लहुंटहीं।
HOS 8:14 इसरायल ह अपन बनानेवाला ला भुला गे हवय अऊ महलमन ला बनाय हवय; यहूदा ह बहुंते नगरमन ला किलाबंदी करे हवय। पर मेंह ओमन के सहरमन म आगी लगा दूहूं जेकर ले ओमन के गढ़मन जलके भसम हो जाहीं।”
HOS 9:1 हे इसरायल, आनंद झन मना; आने देसमन सहीं आनंद म मगन झन हो। काबरकि तेंह अपन परमेसर के संग बिसवासघात करे हवस; तेंह हर एक कोठार म बेस्यागमन के कमई ला पसंद करथस।
HOS 9:2 कोठार अऊ अंगूर के रसकुंडमन ले मनखेमन ला खाना नइं मिलय; नवां अंगूर के मंद घलो ओमन ला नइं मिलही।
HOS 9:3 ओमन यहोवा के देस म रहे बर नइं पाहीं; एपरैम ह मिसर देस ला लहुंट जाही अऊ अस्सूर म ओमन असुध चीजमन ला खाहीं।
HOS 9:4 ओमन यहोवा ला अंगूर के मंद के भेंट नइं चघाहीं, अऊ न ही ओमन के बलिदान ले परमेसर ह खुस होही। ओ किसम के बलिदान ओमन बर सोक करइयामन के रोटी सहीं अय; ओला खवइया जम्मो झन असुध हो जाहीं। ये जेवन ह ओमन के खुद बर होही; येला यहोवा के मंदिर म नइं लाय जाही।
HOS 9:5 तुमन अपन ठहिराय तिहारमन के दिन, यहोवा के भोजमन के दिन म का करहू?
HOS 9:6 कहूं ओमन बिनास के दिन बच निकलथें, त मिसर देस ह ओमन ला इकट्ठा करही, अऊ मेमफीस के निवासीमन ओमन ला माटी दीहीं। कंटिली झाड़ीमन ओमन के चांदी के चीजमन ला ले लीहीं, अऊ ओमन के तम्बूमन म कांटामन उगहीं।
HOS 9:7 सजा के दिनमन आवत हवंय, बदला लेय के दिनमन लकठा म हवंय। ये बात ला इसरायल जान लेवय। काबरकि तुम्हर पापमन बहुंत हवंय अऊ तुम्हर बईरता बहुंत जादा हवय, अगमजानी ला मुरूख, अऊ आतमा ले उकसाय मनखे ला बइहा समझे जाथे।
HOS 9:8 अगमजानी ह मोर परमेसर के संग एपरैम के ऊपर पहरेदार हवय, तभो ले ओकर जम्मो रद्दा म फांदा लगे हवय, अऊ ओकर परमेसर के घर म बईरता हवय।
HOS 9:9 ओमन गिबा के समय के सहीं बहुंत भ्रस्टाचार म पड़े हवंय। परमेसर ह ओमन के दुस्ट काममन ला सुरता करही अऊ ओमन के पाप बर ओमन ला सजा दीही।
HOS 9:10 “मेंह इसरायल ला अइसने पायेंव, जइसने कोनो ला निरजन जगह म अंगूर मिलथे; जब मेंह तुम्हर पुरखामन ला देखेंव, त येह अंजीर के रूख म लगे सुरूआती फर ला देखे सहीं रिहिस। पर जब ओमन बाल-पेओर पहाड़ म आईन, त ओमन ओ लज्जा के मूरती बर अपनआप ला पबितर करिन अऊ ओमन ओतेक दुस्ट हो गीन, जतेक ओमन ओ चीजमन ले मया करत रिहिन।
HOS 9:11 एपरैम के गौरव ह चिरई असन उड़ जाही— न तो काकरो जनम होही, न कोनो देहें म होही, अऊ न ही कोनो ला गरभ ठहिरही।
HOS 9:12 चाहे ओमन अपन लइकामन के पालन-पोसन करंय, त घलो, मेंह हर एक ला ओमन ले लेय लूहूं। ओमन ऊपर हाय जब मेंह ओमन ले दूरिहा हो जावंव!
HOS 9:13 मेंह एपरैम ला सूर के सहीं मनभावन जगह म बसे हुए देखे हंव। पर एपरैम ह अपन लइकामन ला बध करइया करा ले आही।”
HOS 9:14 हे यहोवा, ओमन ला दे— तेंह ओमन ला का देबे? ओमन ला अइसन गरभ दे, जेकर ले गरभपात हो जाथे अऊ अइसन थन दे, जेकर ले दूध नइं आवय।
HOS 9:15 “गिलगाल सहर म ओमन के जम्मो दुस्ट काम के कारन, उहां मेंह ओमन ले घिन करेंव। ओमन के पापमय काममन के खातिर, मेंह ओमन ला अपन घर ले निकाल दूहूं। मेंह ओमन ले अब मया नइं रखहूं; ओमन के जम्मो अगुवामन बिदरोही अंय।
HOS 9:16 एपरैम ला बेमारी लग गे हवय, ओमन के जरी ह सूखा गीस, ओमन म फर नइं लगय। चाहे ओमन लइकामन ला जनमांय घलो, तभो ले मेंह ओमन के पाले-पोसे लइकामन ला मार डारहूं।”
HOS 9:17 मोर परमेसर ह ओमन ला स्वीकार नइं करही काबरकि ओमन ओकर बात ला नइं माने हवंय; ओमन जाति-जाति के मनखेमन के बीच म भटकत फिरहीं।
HOS 10:1 इसरायल ह एक ठन बढ़त अंगूर के नार रिहिस; ओह अपन बर फर देवत रिहिस। जइसन-जइसन ओकर फरमन बढ़त गीन, ओह अऊ जादा बेदीमन ला बनाईस; जइसन-जइसन ओकर देस उन्नति करत गीस, ओह अपन पबितर पथरामन ला सजाईस।
HOS 10:2 ओमन के मन ह धोखेबाज ए, अऊ अब ओमन अपन अपराध के सजा जरूर पाहीं। यहोवा ह ओमन के बेदीमन ला गिरा दीही अऊ ओमन के पबितर पथरामन ला नास कर दीही।
HOS 10:3 तब ओमन कहिहीं, “हमर कोनो राजा नइं एं काबरकि हमन यहोवा के आदर नइं करेंन। पर कहूं हमर कोनो राजा होतिस घलो, त ओह हमर बर का करतिस?”
HOS 10:4 ओमन बहुंत अकन वायदा करथें, झूठा किरिया खाथें अऊ करार करथें; ये खातिर नांगर जोते खेत म उगे जहरिला कांदी सहीं मुकदमामन होय लगथें।
HOS 10:5 जऊन मनखेमन सामरिया सहर म रहिथें ओमन बेत-आवेन के बछवा के मूरती के कारन डरात हवंय। एकर मनखेमन एकर बर बिलाप करहीं, अऊ अइसने ही एकर मूरती-पूजा करइया पुरोहितमन घलो करहीं, जऊन मन कि पहिले एकर वैभव ऊपर आनंद मनात रिहिन, काबरकि येला ओमन ले छीनके बंधुवई म ले लिये गे हवय।
HOS 10:6 येला बड़े राजा ला भेंट के रूप म देय बर अस्सूर देस ला ले जाय जाही। एपरैम ला लज्जित करे जाही; इसरायल घलो बाहिरी मनखेमन संग अपन नाता के कारन लज्जित होही।
HOS 10:7 सामरिया के राजा ला अइसन नास करे जाही, जइसन रूख के एक छोटे डारा ह पानी के बहाव म नास हो जाथे।
HOS 10:8 बुरई के ऊंच ठऊरमन नास करे जाहीं— येह इसरायल के पाप अय। कांटावाले पऊधा अऊ झाड़ीमन उगहीं अऊ ओमन के बेदीमन ला ढांप लीहीं। तब ओमन पहाड़मन ले कहिहीं, “हमन ला ढांप लेवव!” अऊ पहाड़ीमन ले कहिहीं, “हमर ऊपर गिर जावव!”
HOS 10:9 “हे इसरायल, तेंह गिबा के समय ले पाप करत आय हवस, अऊ तेंह अभी घलो ओहीच म बने हवस। का दुस्ट काम करइयामन गिबा म फेर लड़ई म नइं फंसहीं?
HOS 10:10 जब मोर ईछा होही, तब मेंह ओमन ला दंड दूहूं; आनजातमन, ओमन के दू गुना पाप के कारन ओमन ला बंधन म डारे बर ओमन के बिरूध म इकट्ठा होहीं।
HOS 10:11 एपरैम ह एक सिखोय गय बछिया अय जऊन ला अनाज मिंजई बने लगथे; एकरसेति मेंह ओकर सुघर घेंच म एक ठन जुड़ा ला रखहूं। मेंह एपरैम ला चलाहूं, यहूदा ला नांगर जोतना जरूरी अय, अऊ जरूरी अय कि याकूब ह ढेला फोरय।
HOS 10:12 अपन बर धरमीपन के बीजा ला बोवव, निस्कपट मया के फसल काटव, अऊ बिगर जोताय खेत के माटी ला फोरव; काबरकि येह यहोवा के खोज म रहे के समय ए, जब तक कि ओह आके तुम्हर ऊपर धरमीपन के बारिस नइं करय।
HOS 10:13 पर तुमन दुस्टता के बीजा लगाय हवव, अऊ बुरई के फसल काटे हवव, तुमन धोखा के फर ला खाय हवव। काबरकि तुमन अपन खुद के सक्ति अऊ अपन बहुंत अकन योद्धामन ऊपर भरोसा रखे रहेव।
HOS 10:14 तुम्हर मनखेमन के बिरूध लड़ई के ललकार होही, ताकि तुम्हर जम्मो गढ़मन ला नास कर दिये जावय— जइसन कि लड़ई के दिन, सलमन ह बेथ-आरबेल ला नास करिस, जब दाईमन ला ओमन के लइकामन के संग भुइयां म पटकके मार डारे गे रिहिस।
HOS 10:15 हे बेतेल, तोर संग घलो अइसनेच होही, काबरकि तेंह बहुंत दुस्ट काम करे हवस। जब बिहनियां होही, इसरायल के राजा ला पूरा नास कर दिये जाही।
HOS 11:1 “जब इसरायल ह लइका रिहिस, त मेंह ओला मया करेंव, अऊ मिसर देस ले मेंह अपन बेटा ला बलांय।
HOS 11:2 पर जतेक जादा ओमन ला बलाय गीस, ओतेक जादा ओमन मोर ले दूरिहा होवत गीन। ओमन बाल देवतामन बर बलि चघाईन अऊ ओमन मूरतीमन के आघू म धूप जलाईन।
HOS 11:3 ओह में रहेंव, जऊन ह एपरैम ला हांथ धरके रेंगे बर सिखोईस; पर ओमन ये बात ला नइं जानिन कि ओह मेंहीच रहेंव, जऊन ह ओमन ला चंगा करिस।
HOS 11:4 मेंह मानव रूपी दया के डोरी ला, मया के बंधन म गुंथके ओमन के अगुवई करेंव। ओमन बर मेंह अइसने रहेंव, जइसने कोनो छोटे लइका ला गाल तक ऊपर उठाथे, अऊ मेंह खाल्हे निहरके ओमन ला जेवन करायेंव।
HOS 11:5 “का ओमन मिसर देस नइं लहुंटहीं अऊ का अस्सूर के राजा ओमन ऊपर राज नइं करही काबरकि ओमन पछताप करे नइं चाहंय?
HOS 11:6 ओमन के सहरमन म एक तलवार चमकही; ओह ओमन के लबरा अगमजानीमन ला मार डारही अऊ ओमन के योजनामन ला खतम कर दीही।
HOS 11:7 मोर मनखेमन मोर ले दूरिहा होय के ठान ले हवंय। हालाकि ओमन मोला सर्वोच्च परमेसर कहिथें, तभो ले मेंह ओमन के कोनो किसम ले परसंसा नइं करहूं।
HOS 11:8 “हे एपरैम, मेंह तोला कइसे छोंड़ सकत हंव? हे इसरायल, मेंह तोला कोनो अऊ ला कइसे सऊंप दंव? मेंह तोर संग अदमा नगर असन बरताव कइसे कर सकत हंव? मेंह तोला सबोईम नगर के असन कइसे बना सकत हंव? मोर हिरदय ह मोर भीतर म बदल गे हवय; मोर जम्मो करूना जाग गे हवय।
HOS 11:9 मेंह अपन भयंकर कोरोध ला भड़कन नइं दंव, न ही मेंह एपरैम ला फेर नास करहूं। काबरकि मेंह मनखे नइं, परमेसर अंव— तुम्हर बीच एक पबितर जन। मेंह ओमन के सहरमन के बिरूध नइं आवंव।
HOS 11:10 ओमन यहोवा के पाछू चलहीं; ओह एक सिंह सहीं गरजही। जब ओह गरजही, त ओकर लइकामन कांपत पछिम दिग ले आहीं।
HOS 11:11 ओमन मिसर देस ले, गौरइया चिरईमन सहीं कांपत, अऊ अस्सूर देस ले पंड़की असन पांखी फड़फड़ावत आहीं। मेंह ओमन ला ओमन के घरमन म बसाहूं,” यहोवा ह घोसना करत हे।
HOS 11:12 एपरैम ह मोर चारों कोति लबारी के, अऊ इसरायल ह धोखा के कुढ़ा लगा दे हवय। अऊ यहूदा ह उदंड होके परमेसर के बिरूध हवय, अऊ त अऊ ओह बिसवासयोग्य पबितर जन के बिरूध हवय।
HOS 12:1 एपरैम ह हवा ला खाथे; ओह पूरा दिन पूरब के हवा के पीछा करथे अऊ अपन लबारी गोठ अऊ हिंसा ला बढ़ावत रहिथे। ओह अस्सूर देस के संग करार करथे अऊ मिसर देस ला जैतून के तेल पठोथे।
HOS 12:2 यहूदा के बिरूध यहोवा के आरोप हे; ओह याकूब ला ओकर चालचलन के मुताबिक सजा दीही अऊ ओकर काममन के मुताबिक ओला बदला दीही।
HOS 12:3 अपन दाई के कोख ही म, ओह अपन भाई के एड़ी ला पकड़ ले रिहिस; एक मनखे के रूप म ओह परमेसर के संग लड़िस।
HOS 12:4 ओह स्वरगदूत के संग लड़िस अऊ स्वरगदूत ऊपर जय पाईस; ओह रोईस अऊ ओकर ले किरपा करे बर बिनती करिस। बेतेल म ओह परमेसर ले मिलिस अऊ उहां ओह ओकर ले गोठियाईस—
HOS 12:5 यहोवा, सर्वसक्तिमान परमेसर, यहोवा ओकर नांव अय।
HOS 12:6 पर ये जरूरी अय कि तें अपन परमेसर करा लहुंट आ; मया अऊ नियाय के काम करते रह, अऊ हमेसा अपन परमेसर ऊपर भरोसा रख।
HOS 12:7 बेपारी ह नाप-तौल म बेईमानी करथे अऊ छल-कपट करई ओला बने लगथे।
HOS 12:8 एपरैम ह ये घमंड करथे, “मेंह बहुंत धनवान अंव, मेंह धनी हो गे हवंव। मोर जम्मो संपत्ति के संग ओमन मोर म कोनो अपराध या पाप नइं पाहीं।”
HOS 12:9 “जब ले तेंह मिसर देस ले निकलके आय में यहोवा तोर परमेसर अंव; मेंह फेर तोला तम्बूमन म बसाहूं, जइसन कि तुम्हर ठहिराय तिहार के दिनमन म होवत रिहिस।
HOS 12:10 मेंह अगमजानीमन ले गोठियांय, ओमन ला कतको दरसन देखांय अऊ ओमन के जरिये पटंतर कहेंव।”
HOS 12:11 का गिलाद सहर ह दुस्ट ए? येकर मनखेमन बेकार अंय! का ओमन गिलगाल म बईलामन के बलिदान करथें? ओमन के बेदीमन जोते गय खेत म पथरामन के ढेर सहीं होहीं।
HOS 12:12 याकूब ह अराम देस ला भाग गीस; इसरायल ह एक घरवाली पाय बर सेवा करिस, अऊ ओकर दाम चुकाय बर ओह भेड़मन ला चराईस।
HOS 12:13 यहोवा ह इसरायल ला मिसर ले निकाले बर एक अगमजानी के उपयोग करिस, एक अगमजानी के दुवारा ओह ओकर खियाल रखिस।
HOS 12:14 पर एपरैम ह यहोवा के कोरोध ला बहुंत भड़काय हवय; ओकर परभू ह ओकर दुवारा करे गय खून के दोस ओकरे ऊपर रहन दीही अऊ ओकर अनादर करे के कारन ओकर ले बदला लीही।
HOS 13:1 जब एपरैम ह गोठियावय, त मनखेमन कांपंय; ओह इसरायल म बड़े आदमी रिहिस। पर ओह बाल देवता के अराधना करे के दोसी होईस अऊ मर गीस।
HOS 13:2 अब ओमन अऊ जादा पाप करत हें; ओमन अपन चांदी ले अपन बर मूरती बनाथें, मूरतीमन म बुद्धिमानी से कारीगरी करे गे हवय, ये जम्मो सिल्पकारमन के काम अय। ये मनखेमन के बारे म कहे जाथे, “ओमन मानव बलि चघाथें! ओमन बछवा के मूरतीमन ला चूमथें!”
HOS 13:3 ये खातिर ओमन बिहनियां के कुहरा, बड़े बिहनियां पड़े ओस सहीं अंय, जऊन ह अइसन गायब होथे, जइसन कोठार ले भूंसी ह हवा म उड़ियाथे, जइसन खिड़की ले धुआं बाहिर निकल जाथे।
HOS 13:4 “पर मेंह तब ले यहोवा तोर परमेसर अंव, जब ले तें मिसर देस ले निकलके आय। तें मोर छोंड़ कोनो अऊ ला परमेसर करके झन मानबे, मोला छोंड़ कोनो अऊ उद्धार करइया नइं ए।
HOS 13:5 मेंह उजाड़ निरजन जगह म, गरमी ले तपत देस म तोर खियाल रखेंव।
HOS 13:6 जब मेंह ओमन ला जेवन करांय, त ओमन खाके अघा गीन; जब ओमन खाके अघा गीन, त ओमन घमंडी हो गीन; तब ओमन मोला बिसरा दीन।
HOS 13:7 एकरसेति मेंह ओमन बर एक सिंह असन होहूं; एक चीतवा के असन मेंह ओमन के रद्दा म घात म रहिहूं।
HOS 13:8 मेंह ओ माई भालू सहीं बनहूं, जेकर लइकामन ला छीन लिये गे हवय, मेंह ओमन ऊपर हमला करहूं अऊ ओमन ला फाड़ डालहूं; एक सिंह असन ओमन ला फाड़ डालहूं— एक जंगली पसु ह ओमन ला फाड़के अलग-अलग कर दीही।
HOS 13:9 “हे इसरायल, तोर बिनास होईस, काबरकि तेंह मोर बिरूध, अपन मददगार के बिरूध हवस।
HOS 13:10 तोर राजा कहां हवय, कि ओह तोला बचावय? कहां हवंय तोर जम्मो नगरमन के सासन करइयामन, जेमन के बारे म तेंह कहे रहे, ‘मोला एक राजा अऊ हाकिम दे’?
HOS 13:11 एकरसेति कोरोध म आके मेंह तोला एक राजा देंव, अऊ अपन कोरोध म ही मेंह ओला हटा देंव।
HOS 13:12 एपरैम के अपराध बहुंत हो गे हवय, ओकर पाप के हिसाब-किताब रखाय हवय।
HOS 13:13 ओला एक माईलोगन के लइका जनमाय सहीं पीरा होही, पर ओह बिगर बुद्धि के एक लइका ए; जब जनमे के बेरा होथे, त ओला गरभ ले बाहिर आय के गियान नइं रहय।
HOS 13:14 “मेंह ये मनखेमन ला कबर के सक्ति ले छुटकारा दूहूं; मेंह ओमन ला मिरतू ले बचाहूं। हे मिरतू, कहां हवय तोर महामारीमन? हे कबर, कहां हवय तोर बिनास? “मेंह कुछू करूना नइं करंव,
HOS 13:15 चाहे एपरैम ह अपन भाईमन के बीच म उन्नति करे। एक पूरब के हवा यहोवा कोति ले मरू-भुइयां ले आही; ओकर सोता ले पानी निकलई बंद हो जाही अऊ ओकर कुआं ह सूखा जाही। ओकर गोदाम म रखे जम्मो कीमती चीजमन ला लूट लिये जाही।
HOS 13:16 जरूरी अय कि सामरिया के मनखेमन अपन अपराध के दंड भोगंय, काबरकि ओमन अपन परमेसर ले बिदरोह करे हवंय। ओमन तलवार ले मारे जाहीं; ओमन के छोटे लइकामन ला भुइयां म पटक दिये जाही, अऊ ओमन के गरभवती माईलोगनमन के पेट ला चीर दिये जाही।”
HOS 14:1 हे इसरायल, यहोवा अपन परमेसर करा लहुंट आ। तोर पापमन तोर पतन होय के कारन अंय!
HOS 14:2 यहोवा के बातमन ला मान अऊ ओकर मेर लहुंट आ। ओकर ले बिनती करके कह: “हमर जम्मो पापमन ला छेमा कर अऊ अनुग्रह के संग हमन ला गरहन कर, कि हमन अपन मुहूं ले धनबाद रूपी भेंट चघा सकन।
HOS 14:3 अस्सूर ह हमर उद्धार नइं कर सकय; हमन लड़ई के घोड़ामन ऊपर सवार नइं होवन। हमन अपन हांथ ले बनाय मूरतीमन ला फेर कभू नइं कहन ‘हमर देवता’, काबरकि अनाथ ला तोर ले ही करूना मिलथे।”
HOS 14:4 यहोवा ह कहिथे, “मेंह ओमन के हठी सुभाव ला ठीक करहूं अऊ खुला रूप ले ओमन ले मया करहूं, काबरकि मोर कोरोध ह ओमन के ऊपर ले हट गे हवय।
HOS 14:5 मेंह इसरायल बर ओस असन होहूं; ओह कुमुदिनी फूल असन खिलही। लबानोन के देवदार रूख असन ओकर जरीमन खाल्हे गहिरा म जाहीं;
HOS 14:6 ओकर कोअंर पीकामन बाढ़हीं। ओकर सोभा एक जैतून रूख सहीं होही, अऊ ओकर खुसबू लबानोन के देवदार रूख सहीं होही।
HOS 14:7 मनखेमन फेर ओकर छइहां म निवास करहीं; ओमन अनाज के असन बाढ़हीं, ओमन अंगूर के नार असन फूलहीं-फरहीं— इसरायल के खियाती ह लबानोन के अंगूर के मंद कस होही।
HOS 14:8 हे एपरैम, मूरतीमन ले अब मोर का काम? मेंह ओला जबाब दूहूं अऊ ओकर खियाल रखहूं। मेंह बाढ़त सनोवर के रूख असन अंव; तोर म फर धरई ह मोर कारन होथे।”
HOS 14:9 बुद्धिमान कोन ए? ओमन ला ये बातमन के अनुभव करन दव। समझदार कोन ए? ओमन ला समझन दव। यहोवा के रद्दामन सही अंय; धरमीमन ओमा चलथें, पर बिदरोही मनखेमन ओमा ठोकर खाके गिरथें।
JOE 1:1 यहोवा के ओ बचन जऊन ह पतूएल के बेटा योएल मेर आईस।
JOE 1:2 हे अगुवामन, ये बात ला सुनव; हे यहूदा देस म रहइया जम्मो मनखेमन, सुनव। का तुम्हर समय म या तुम्हर पुरखामन के समय म अइसन कोनो बात कभू होईस?
JOE 1:3 अपन लइकामन ला ये बात बतावव, अऊ तुम्हर लइकामन ये बात ला अपन लइकामन ला बतावंय, अऊ ओ लइकामन ओमन के आघू के पीढ़ी ला बतावंय।
JOE 1:4 टिड्डीमन के दल ह जऊन ला छोंड़ दे रिहिन ओला बड़े टिड्डीमन खा ले हवंय; जऊन ला बड़े टिड्डीमन छोंड़ दे रिहिन ओला छोटे टिड्डीमन खा ले हवंय; जऊन ला छोटे टिड्डीमन छोंड़ दे रिहिन ओला आने टिड्डीमन खा ले हवंय।
JOE 1:5 हे मतवारमन जागव, अऊ रोवव! हे जम्मो मंद पीनेवालामन, बिलाप करव; नवां मंद के कारन बिलाप करव, काबरकि येला तुम्हर मुहूं ले छीन ले गे हवय।
JOE 1:6 मोर देस ऊपर एक जाति ह चढ़ई कर दे हवय, ओह एक सक्तिसाली सेना ए अऊ ओमन के संखिया अनगिनत हे, ओकर दांत सिंह के दांत सहीं, ओकर जबड़ा सिंहनी के जबड़ा सहीं हवय।
JOE 1:7 ओह मोर अंगूर के नारमन ला उजाड़ दे हवय अऊ मोर अंजीर के रूखमन ला नास कर दे हवय। ओह ओमन के छाली ला निकाल दे हवय अऊ ओमन के साखामन ला सफेद छोंड़के ओमन के छाली ला फटिक दे हवय।
JOE 1:8 अइसन बिलाप करव, जइसन एक कुंवारी ह बोरा के कपड़ा पहिरे अपन जवानी म मंगेतर बर सोक करथे।
JOE 1:9 यहोवा के घर म न तो अन्न-बलिदान अऊ न ही पेय-बलिदान चघाय जाथे। यहोवा के सेवा करइया पुरोहितमन बिलाप करत हवंय।
JOE 1:10 खेतमन नास हो गे हवंय, भुइयां ह सूखा गे हवय; अनाज ह नास हो गे हवय, नवां अंगूर के मंद ह सूखा गे हवय, जैतून के तेल खतम होवथे।
JOE 1:11 हे किसानमन, निरास होवव, हे अंगूर के नार लगानेवालामन, बिलाप करव; गहूं अऊ जौ के अनाज बर दुखी होवव, काबरकि खेत के फसल ह नास हो गे हवय।
JOE 1:12 अंगूर के नार ह सूखा गे हवय अऊ अंजीर के रूख ह मुरझा गे हवय; अनार, खजूर अऊ सेव के रूख— मैदान के जम्मो रूख—सूखा गे हवंय। सही म मनखे के आनंद ह खतम हो गे हवय।
JOE 1:13 हे पुरोहितमन, बोरा के कपड़ा पहिरके बिलाप करव; तुमन जऊन मन बेदी करा सेवा करथव, बिलाप करव। तुमन जऊन मन मोर परमेसर के आघू म सेवा करथव आवव, अऊ बोरा के कपड़ा पहिरके रथिया बितावव; काबरकि तुम्हर परमेसर के घर म अन्न-बलिदान अऊ पेय-बलिदान चघाय बर बंद कर दिये गे हवय।
JOE 1:14 एक पबितर उपास के घोसना करव; एक पबितर सभा के आयोजन करव। अगुवामन ला अऊ ओ जम्मो जऊन मन देस म रहिथें ओमन ला यहोवा तुम्हर परमेसर के घर म बलावव, अऊ यहोवा के आघू म गिड़गिड़ाके बिनती करव।
JOE 1:15 ओ दिन बर हाय! काबरकि यहोवा के दिन ह लकठा म हवय; येह सर्वसक्तिमान कोति ले बिनास के दिन बनके आही।
JOE 1:16 का हमर देखत म दाना-पानी बंद नइं हो गीस— अऊ एही किसम ले हमर परमेसर के घर ले आनंद अऊ खुसी खतम नइं हो गीस?
JOE 1:17 माटी के ढेलामन के खाल्हे बीजामन झुलस गे हवंय। गोदाममन खंडहर होवत हें, अन्न-भंडारमन ला गिरा दिये गे हवय, काबरकि फसल नइं होईस।
JOE 1:18 पसुमन कइसे कराहत हवंय! पसुमन के झुंडमन बियाकुल होके भटकत हवंय काबरकि ओमन बर चरागन नइं ए; इहां तक कि भेड़मन के झुंड घलो तकलीफ म हवंय।
JOE 1:19 हे यहोवा, मेंह तोला पुकारत हंव, काबरकि सुनसान जगह के चरागनमन ला आगी ह नास कर दे हवय अऊ आगी के लपटा ले मैदान के जम्मो रूखमन जर गे हवंय।
JOE 1:20 अऊ त अऊ जंगली पसुमन तोर कामना करथें; पानी के सोतमन सूखा गे हवंय अऊ सुन्ना जगह के चरागनमन ला आगी ह नास कर दे हवय।
JOE 2:1 सियोन म तुरही फूंकव; मोर पबितर पहाड़ी म खतरा के घंटी बजावव। देस म रहइया जम्मो झन कांपंय, काबरकि यहोवा के दिन आवत हे। ओह लकठा म आ गे हवय—
JOE 2:2 ओ दिन ह अंधियार अऊ धुंधलापन के दिन अय, ओह बादर ले भरे अंधियार के दिन अय। जइसने पहाड़ ऊपर बिहनियां के अंजोर बगरथे वइसने ही एक बड़े अऊ सक्तिसाली सेना आथे, अइसने बात जऊन ह कि पुराना जमाना म कभू नइं होईस अऊ न ही अवइया समय म कभू अइसने होही।
JOE 2:3 ओमन के आघू म आगी ह बिनास के काम करथे, ओमन के पाछू कोति आगी के लपटा उठथे। ओमन के आघू म देस ह अदन के बगीचा सहीं हवय, अऊ ओमन के पाछू, एक उजाड़ मरू-भुइयां— कोनो चीज ओमन ले नइं बचय।
JOE 2:4 ओमन घोड़ामन सहीं दिखथें; ओमन घुड़सवार सेना सहीं सरपट भागथें।
JOE 2:5 रथमन सहीं अवाज के संग ओमन पहाड़ के चोटीमन ऊपर कूद जाथें, धधकत आगी सहीं ओमन ठूंठमन ला भसम करत जाथें, ओमन लड़ई बर तियार सक्तिसाली सेना सहीं अंय।
JOE 2:6 ओमन के नजर पड़त ही जाति-जाति के मनखेमन पीरा म पड़ जाथें; हर एक के चेहरा ह डर ले पिंवरा पड़ जाथे।
JOE 2:7 ओमन योद्धा सहीं हमला करथें; ओमन सैनिकमन सहीं सहर के दीवारमन ऊपर चढ़ जाथें। ओमन जम्मो कतार म होके आघू बढ़थें, ओमन अपन क्रम ले नइं हटंय।
JOE 2:8 ओमन एक-दूसर ला नइं ढकेलंय; हर एक ह सीधा आघू बढ़थे। ओमन अपन क्रम ला बिगर टोरे समस्या ले होके निकल जाथें।
JOE 2:9 ओमन तेजी ले सहर म घुसरथें; ओमन दीवारमन के तीरे-तीर दऊड़थें। ओमन घरमन म चघ जाथें; ओमन चोरमन सहीं खिड़कीमन ले भीतर घुसरथें।
JOE 2:10 ओमन के आघू म धरती ह डोल जाथे, अकास ह कांपथे, सूरज अऊ चंदा धुंधला हो जाथें, अऊ तारामन फेर नइं चमकंय।
JOE 2:11 यहोवा ह अपन सेना के आघू म होके ऊंचहा अवाज म आदेस करथे; ओकर सेना के संखिया अनगिनत हे, अऊ ओ सेना ह सक्तिसाली ए, जऊन ह ओकर आदेस ला मानथे। यहोवा के दिन ह महान ए; येह भयानक ए। येला कोन ह सह सकथे?
JOE 2:12 “तभो ले अब,” यहोवा ह घोसना करत हे, “तुमन अपन पूरा मन से उपास करत अऊ रोवत अऊ बिलाप करत मोर करा लहुंट आवव।”
JOE 2:13 अपन कपड़ामन ला नइं, पर अपन मन ला चीरव। यहोवा अपन परमेसर करा लहुंट आवव, काबरकि ओह अनुग्रहकारी अऊ करूनामय, गुस्सा करे म धीमा अऊ बहुंत मया करइया ए, अऊ बिपत्ति भेजे म नमरता देखाथे।
JOE 2:14 कोन जाने? ओह अपन बिचार ला बदलके नमरता देखाय अऊ अपन पाछू एक आसीस छोंड़ जाय— यहोवा तुम्हर परमेसर बर अन्न-बलिदान अऊ पेय-बलिदान।
JOE 2:15 सियोन म तुरही फूंकव, एक पबितर उपास के घोसना करव, एक पबितर सभा करव।
JOE 2:16 मनखेमन ला इकट्ठा करव, सभा ला पबितर करव; अगुवामन ला एक संग लानव, लइकामन ला, दूध पीयइया छोटे लइकामन ला इकट्ठा करव। दूल्हा अपन कमरा ला अऊ दुलहिन अपन कोठरी ला छोंड़के बाहिर आवंय।
JOE 2:17 पुरोहित, जेमन यहोवा के आघू म सेवा करथें, मंडप अऊ बेदी के बीच म रोवंय। ओमन कहंय, “हे यहोवा, अपन मनखेमन ला बचा। अपन खुद के मनखेमन ला जाति-जाति के मनखेमन के बीच म ठट्ठा के बिसय, एक कहावत झन बना। ओमन मनखेमन के बीच म काबर कहंय, ‘कहां हवय ओमन के परमेसर?’ ”
JOE 2:18 तब यहोवा ला अपन देस बर जलन होईस अऊ ओह अपन मनखेमन ऊपर तरस खाईस।
JOE 2:19 यहोवा ह ओमन ला जबाब दीस: “मेंह तुम्हर बर अनाज, नवां अंगूर के मंद अऊ जैतून के तेल भरपूर मात्रा म पठोवत हवंव, ताकि तुमन पूरा संतुस्ट हो जावव; मेंह तुमन ला आनजातमन बर फेर कभू हंसी के पात्र नइं बनावंव।
JOE 2:20 “मेंह उत्तर के उपदरवी दल ला तुम्हर ले दूरिहा भगा दूहूं, अऊ ओला एक सूखा अऊ बंजर देस कर दूहूं; ओकर पूरब के भाग मिरतू सागर अऊ पछिमी भाग भूमध्य सागर म डूब जाही। अऊ येकर दुरगंध ह ऊपर जाही; येकर गंध ह उठते रहिही।” सही म ओह बड़े-बड़े काम करे हवय!
JOE 2:21 हे यहूदा देस, झन डर; खुस अऊ आनंदित हो। सही म यहोवा ह बड़े-बड़े काम करे हवय!
JOE 2:22 हे जंगली पसुमन, झन डरव, काबरकि निरजन जगह के चरागनमन हरा-भरा होवत हें। रूखमन म फर लगत हवंय; अंजीर के रूख अऊ अंगूर के नार भरपूर फसल देवत हें।
JOE 2:23 हे सियोन के मनखेमन, खुस रहव, यहोवा अपन परमेसर म आनंदित रहव, काबरकि ओह तुमन ला सरद महिना के बारिस दे हवय काबरकि ओह बिसवासयोग्य अय। ओह तुमन ला बहुंत बारिस दे हवय, पहिले सहीं सरद अऊ बसन्त महिना के बारिस दे हवय।
JOE 2:24 कोठार ह अनाज ले भर जाही; कुंडमन नवां अंगूर के मंद अऊ तेल के बहुंतायत के कारन छलके लगहीं।
JOE 2:25 “मेंह तुमन ला ओ जम्मो बछर के फसल के भरपई कर दूहूं, जऊन ला फांफामन खा ले हवंय— बड़े फांफा अऊ छोटे फांफा, आने फांफा अऊ फांफामन के दल— मोर बड़े सेना जऊन ला मेंह तुम्हर बीच म पठोय रहेंव।
JOE 2:26 तुम्हर करा खाय बर बहुंत जेवन होही अऊ तुमन पेट भर खाहू, अऊ तुमन यहोवा अपन परमेसर के नांव के इस्तुति करहू, जऊन ह तुम्हर बर अद्भूत काम करे हवय; मोर मनखेमन फेर कभू लज्जा म नइं पड़हीं।
JOE 2:27 तब तुमन जानहू कि मेंह इसरायल म हवंव, अऊ ये कि मेंह यहोवा तुम्हर परमेसर अंव, अऊ ये कि मोर अलावा अऊ कोनो परमेसर नइं ए; मोर मनखेमन फेर कभू लज्जा म नइं पड़हीं।
JOE 2:28 “अऊ ओकर बाद, मेंह अपन आतमा ला जम्मो मनखेमन ऊपर उंडेलहूं। तुम्हर बेटा अऊ बेटीमन अगमबानी करहीं, अऊ तुम्हर सियानमन सपना देखहीं, तुम्हर जवानमन दरसन देखहीं।
JOE 2:29 मेंह अपन दास अऊ अपन दासीमन ऊपर घलो ओ दिन म अपन आतमा उंडेलहूं।
JOE 2:30 मेंह ऊपर अकास म अऊ खाल्हे धरती म अद्भूत काम, याने कि लहू, आगी अऊ धुआं के बादर देखाहूं।
JOE 2:31 यहोवा के महान अऊ भयानक दिन के आय के पहिली सूरज ह अंधियार अऊ चंदा ह लहू सहीं हो जाही।
JOE 2:32 अऊ हर एक, जऊन ह यहोवा के नांव लीही, ओह उद्धार पाही; काबरकि छुटकारा सियोन पहाड़ अऊ यरूसलेम म होही, जइसने कि यहोवा ह कहे हवय, अऊ त अऊ बचनेवालामन म ओ मनखेमन घलो होहीं जेमन ला यहोवा ह बलाही।
JOE 3:1 “ओ दिनमन म अऊ ओ समय म, जब में यहूदा अऊ यरूसलेम के मनखेमन के जिनगी ला फेर ठीक कर दूहूं,
JOE 3:2 त में जम्मो जाति के मनखेमन ला इकट्ठा करहूं अऊ ओमन ला खाल्हे यहोसापात के घाटी म ले आहूं। उहां मेंह ओमन के ओ काम बर परिछा करहूं जऊन काम ओमन मोर निज भाग, मोर मनखे इसरायलीमन संग करे हवंय, काबरकि ओमन मोर मनखेमन ला जाति-जाति के मनखेमन के बीच म तितिर-बितिर कर दे हवंय अऊ मोर देस के बंटवारा कर दे हवंय।
JOE 3:3 ओमन मोर मनखेमन बर चिट्ठी निकालथें अऊ बेस्यामन के बदला म लड़कामन ला देय दे हवंय; ओमन मंद पीये बर नोनीमन ला बेच दे हवंय।
JOE 3:4 “हे सूर अऊ सीदोन अऊ पलिस्ती के जम्मो इलाका के मनखेमन, अब तुम्हर करा मोर बिरूध म का हवय? जऊन काम मेंह करे हवंव, का तुमन ओकर बदला चुकावत हव? यदि तुमन मोला वापिस बदला चुकावत हव, त में तुरते, जल्दी करत, तुम्हर दुवारा करे गे काममन ला वापिस तुम्हरेच मुड़ म डार दूहूं।
JOE 3:5 काबरकि तुमन मोर सोन अऊ मोर चांदी ला लेय ले हव अऊ मोर कीमती खजानामन ला अपन मंदिर म ले गेय हव।
JOE 3:6 तुमन यहूदा अऊ यरूसलेम के मनखेमन ला यूनानीमन के हांथ म बेच दे हवव, ताकि तुमन ओमन ला ओमन के देस ले दूरिहा पठो सकव।
JOE 3:7 “देखव, मेंह ओमन ला ओ जगहमन ले लहुंटाके लानेवाला हंव, जिहां तुमन ओमन ला बेच दे रहेव, अऊ तुम्हर करे गे काममन ला वापिस तुम्हरेच मुड़ ऊपर डाल दूहूं।
JOE 3:8 मेंह तुम्हर बेटा अऊ बेटीमन ला यहूदा के मनखेमन के हांथ म बेच दूहूं, अऊ यहूदा के मनखेमन ओमन ला बहुंत दूर रहइया एक जाति सबायीमन के हांथ म बेच दीहीं।” यहोवा ह कहे हवय।
JOE 3:9 जाति-जाति के मनखेमन के बीच म ये घोसना करव: लड़ई के तियारी करव! योद्धामन ला उत्तेजित करव! लड़इया जम्मो मनखेमन लकठा म आवंय अऊ हमला करंय।
JOE 3:10 अपन नांगर के फाल ला पीटके तलवार बना लव अऊ अपन हंसियामन ला पीटके ओमन के बरछी बना लव। जऊन ह दुरबल हवय, ओह कहय, “मेंह बलवान अंव!”
JOE 3:11 हे चारों कोति के जाति-जाति के जम्मो मनखेमन, जल्दी आवव, अऊ उहां तुमन जूरव। हे यहोवा, अपन योद्धामन ला खाल्हे ले आ!
JOE 3:12 “जाति-जाति के मनखेमन उत्तेजित होवंय; अऊ ओमन यहोसापात के घाटी म जावंय, काबरकि मेंह उहां चारों कोति के जाति-जाति के जम्मो मनखेमन के नियाय करे बर बईठहूं।
JOE 3:13 हंसिया चलाय के सुरू करव, काबरकि फसल ह पाक गे हवय। आवव, अंगूर ला रऊंदव, काबरकि अंगूर-रस के कुंड ह भर गे हवय अऊ कुंडमन छलकत हवंय— ओमन के दुस्टता बहुंत जादा हो गे हवय!”
JOE 3:14 निरनय के घाटी म मनखेमन के भीड़ ही भीड़ हवय! काबरकि निरनय के घाटी म यहोवा के दिन ह लकठा म हवय।
JOE 3:15 सूरज अऊ चंदा म अंधियार छा जाही, अऊ तारामन के चमकई ह बंद हो जाही।
JOE 3:16 यहोवा ह सियोन ले गरजही अऊ यरूसलेम ले गरजन सुनई दीही; अकास अऊ धरती कांप उठहीं। पर यहोवा ह अपन मनखेमन बर एक सरन-स्थान, अऊ इसरायल के मनखेमन बर एक सुरकछा गढ़ होही।
JOE 3:17 “तब तुमन जानहू कि में, यहोवा ही तुम्हर परमेसर अंव, अऊ अपन पबितर पहाड़ी, सियोन म निवास करथंव। यरूसलेम ह एक पबितर सहर होही; परदेसीमन फेर कभू ओकर ऊपर हमला नइं करहीं।
JOE 3:18 “ओ दिन पहाड़मन ले नवां अंगूर के मंद टपकही, अऊ पहाड़ीमन ले दूध के धारा बोहाही; यहूदा के जम्मो टीलामन म पानी बोहाही। यहोवा के घर ले पानी के एक सोता फूट निकलही अऊ सित्तीम घाटी के सिंचई करही।
JOE 3:19 पर मिसर देस उजाड़ हो जाही, अऊ एदोम ह एक बेकार निरजन देस हो जाही, काबरकि येमन यहूदा के मनखेमन ऊपर अतियाचार करिन, अऊ येमन ओमन के देस म निरदोस मनखेमन के खून बोहाईन।
JOE 3:20 यहूदा म मनखेमन हमेसा निवास करत रहिहीं अऊ यरूसलेम म मनखेमन पीढ़ी-पीढ़ी तक रहिहीं।
JOE 3:21 का में ओ निरदोस मनखेमन के खून के बदला लिये बिगर छोंड़ दंव? नइं, बिलकुल नइं।”
AMO 1:1 येह आमोस के बचन अय। ओह तकोआ नगर के चरवाहामन म ले एक झन रिहिस; अऊ भुइंडोल के दू बछर पहिली इसरायल के बारे म ये दरसन देखिस, जब यहूदा प्रदेस के राजा उजियाह रिहिस अऊ इसरायल प्रदेस के राजा यहोआस के बेटा यरोबाम रिहिस।
AMO 1:2 आमोस ह कहिस: “यहोवा ह सियोन ले गरजथे, अऊ यरूसलेम ले ओकर सबद ह गूंजथे; चरवाहामन के चरागनमन सूखा जाथें। अऊ करमेल पहाड़ के टीप ह अइला जाथे।”
AMO 1:3 यहोवा ह ये कहत हे: “दमिस्क सहर के तीन पाप, बल्कि चार पापमन के कारन मेंह ओमन ला सजा देय बिगर नइं छोड़ंव। काबरकि ओह गिलाद ला लोहा के दांतवाला हथियार ले दुख दे हवय,
AMO 1:4 मेंह हजाएल के परिवार ऊपर आगी बरसाहूं, अऊ ओ आगी ह बेन-हदद के गढ़मन ला भसम कर दीही।
AMO 1:5 मेंह दमिस्क के दुवार ला टोर दूहूं, मेंह आवेन घाटी के राजा अऊ बेत-एदेन सहर के राजदंडधारी ला नास कर दूहूं। अऊ अराम के मनखेमन कीर देस के बंधुवई म जाहीं,” यहोवा ह कहत हे।
AMO 1:6 यहोवा ह ये कहत हे: “गाजा सहर के तीन पाप, बल्कि चार पापमन के कारन मेंह ओला सजा देय बर नइं छोड़ंव, काबरकि ओह पूरा समाज ला कैदी बनाके एदोम देस के मनखेमन करा बेच दे हवय,
AMO 1:7 मेंह गाजा के दीवारमन म आगी बरसाहूं, जऊन ह ओकर किलामन ला भसम कर दीही।
AMO 1:8 मेंह असदोद के राजा अऊ अस्कलोन के राजदंडधारी ला नास करहूं। मेंह एकरोन ऊपर अपन हांथ चलाहूं, जब तक कि आखिरी पलिस्ती मनखे घलो नइं मार डारे जाही,” परमपरधान यहोवा ह कहत हे।
AMO 1:9 यहोवा ह ये कहत हे: “सूर सहर के तीन पाप, बल्कि चार पाप के कारन मेंह ओला सजा देय बिगर नइं छोड़ंव। काबरकि ओह पूरा समाज ला बंधुवा बनाके एदोम करा बेच दीस, अऊ भाई-चारा के करार ला नइं मानिस।
AMO 1:10 मेंह सूर के दीवारमन म आगी बरसाहूं जऊन ह ओकर किलामन ला भसम कर दीही।”
AMO 1:11 यहोवा ह ये कहत हे: “एदोम के तीन पाप, बल्कि चार पाप के कारन मेंह ओला सजा देय बिगर नइं छोड़ंव। काबरकि ओह तलवार लेके अपन भाईमन के पीछा करिस अऊ देस के माईलोगनमन ला काट डारिस, काबरकि ओकर रिस ह लगातार बढ़त गीस अऊ ओकर कोरोध ह रूकबे नइं करिस
AMO 1:12 एकरसेति मेंह तेमान सहर म आगी लगाहूं, जऊन ह बोसरा नगर के किलामन ला भसम कर दीही।”
AMO 1:13 यहोवा ह ये कहत हे: “अमोन के तीन पाप, बल्कि चार पाप के कारन मेंह ओमन ला सजा देय बिगर नइं छोड़ंव। काबरकि ओह अपन सिवाना ला बढ़ाय बर गिलाद देस के गरभवती माईलोगन के पेट ला चीर डारिस
AMO 1:14 एकरसेति मेंह रब्बा के दीवारमन म आगी लगाहूं जऊन ह लड़ई के दिन लड़ई के ललकार के बीच, अऊ आंधी चले के दिन हिंसक गरेर के बीच ओकर किलामन ला भसम कर दीही।
AMO 1:15 ओकर राजा ह बंधुवई म जाही, ओ अऊ ओकर करमचारीमन एक संग बंधुवई म जाहीं,” यहोवा ह कहत हे।
AMO 2:1 यहोवा ह ये कहत हे: “मोआब के तीन पाप बल्कि चार पापमन के कारन मेंह ओला सजा देय बिगर नइं छोड़ंव। काबरकि ओह एदोम के राजा के हाड़ामन ला जलाके राख कर दीस,
AMO 2:2 मेंह मोआब म आगी लगाहूं जऊन ह करियोत सहर के किलामन ला जलाके भसम कर दीही। मोआब ह बड़े हुल्लड़ म लड़ई के ललकार अऊ तुरही के अवाज के बीच नास हो जाही।
AMO 2:3 मेंह मोआब के सासन करइया ला अऊ ओकर संग जम्मो अधिकारीमन ला मार डारहूं,” यहोवा ह कहत हे।
AMO 2:4 यहोवा ह ये कहत हे: “यहूदा के तीन पाप, बल्कि चार पापमन के कारन, मेंह ओला सजा देय बिगर नइं छोड़ंव। काबरकि ओमन यहोवा के कानून ला नइं मानिन अऊ ओकर नियममन के पालन नइं करिन, काबरकि ओमन लबरा देवतामन के पाछू चल दीन, ओ देवता, जऊन मन के पाछू म ओमन के पुरखामन रेंगंय,
AMO 2:5 एकरसेति मेंह यहूदा म आगी लगाहूं जऊन ह यरूसलेम के किलामन ला भसम कर दीही।”
AMO 2:6 यहोवा ह ये कहत हे: “इसरायल के तीन पाप, बल्कि चार पापमन के कारन, मेंह ओला सजा देय बिगर नइं छोड़ंव। ओमन निरदोस ला चांदी बर अऊ गरीबमन ला एक जोड़ी जूता खातिर बेच देथें।
AMO 2:7 ओमन गरीबमन के मुड़ ला अइसन कुचरथें जइसन भुइयां के धुर्रा अऊ दुखी मनखे के नियाय ला बिगाड़थें। ददा अऊ बेटा दूनों एके छोकरी ले संबंध बनाथें अऊ मोर पबितर नांव ला अपबितर करथें।
AMO 2:8 ओमन हर बेदी के बाजू म गिरवी म रखे ओनहा ऊपर लेटथें। ओमन अपन देवता के घर म जुरबाना म लिये गय अंगूर के मंद ला पीथें।
AMO 2:9 “तभो ले मेंह अमोरीमन ला ओमन के आघू ले नास करेंव, हालाकि ओमन देवदार रूख सहीं ऊंचहा अऊ बलूत रूख सहीं मजबूत रिहिन। मेंह ऊपर ले ओमन के फर अऊ खाल्हे ओमन के जरी ला नास कर देंव।
AMO 2:10 मेंह तुमन ला मिसर देस ले निकाल लानेंव अऊ चालीस बछर ले सुनसान जगह म तुम्हर अगुवई करेंव ताकि तुमन ला अमोरीमन के देस ला दे दंव।
AMO 2:11 “मेंह तुम्हर लइकामन के बीच ले अगमजानीमन ला अऊ तुम्हर जवानमन के बीच ले नाजीरमन ला घलो चुनेंव। हे इसरायल के मनखेमन, का येह सच नो हय?” यहोवा ह घोसना करत हे।
AMO 2:12 “पर तुमन नाजीरमन ला अंगूर के मंद पीयाएव अऊ अगमजानीमन ला हुकूम देव कि ओमन अगमबानी झन करंय।
AMO 2:13 “त अब, मेंह तुमन ला अइसन कुचरहूं जइसन करपा ले भराय गाड़ी ले दाना ह कुचरे जाथे।
AMO 2:14 तेजी ले भगोइया घलो नइं बांच पाही, अऊ बलवान के ताकत ह कोनो काम नइं आही, अऊ सूरबीर ह अपन जिनगी ला नइं बचाय सकही।
AMO 2:15 धनुसधारी ह मैदान म ठाढ़ नइं हो सकही, तेजी ले दऊड़इया सैनिक ह भाग नइं सकही, अऊ घुड़सवार ह अपन जिनगी ला नइं बचाय सकही।
AMO 2:16 इहां तक कि सबले ताकतवर सूरबीरमन घलो ओ दिन नंगरा भागहीं,” यहोवा ह घोसना करत हे।
AMO 3:1 हे इसरायलीमन, ये बचन ला सुनव, यहोवा के बचन ह तुम्हर बिरूध कहे हवय—तुम्हर पूरा बंस के बिरूध, जेला मेंह मिसर देस ले निकाल लानेंव:
AMO 3:2 “सिरिप तुमन अव, जेला मेंह धरती के सब बंसमन ले चुने हंव; एकरसेति मेंह तुम्हर जम्मो पाप के सजा दूहूं।”
AMO 3:3 का दू झन एक संग रेंगथें जब तक ओमन अइसन करे बर राजी नइं हो जावंय?
AMO 3:4 का सिंह ह बिगर सिकार देखे झाड़ी म ले गरजथे? का ओह बिगर कुछू धरे अपन मांद म गुर्राथे?
AMO 3:5 का कोनो चिरई भुइयां ऊपर बिगर चारा देखे फांदा कोति झपटथे? का फांदा ह भुइयां ले अपनआप उचकथे जब ओमा कुछू नइं फंसे रहय?
AMO 3:6 जब कोनो सहर म लड़ई के तुरही बजथे, त का मनखेमन डर के मारे नइं कांपंय? जब कोनो सहर म बिपत परथे, त का येह यहोवा कोति ले नइं होवय?
AMO 3:7 सही म, परमपरधान यहोवा ह अपन सेवक अगमजानीमन ऊपर अपन योजना ला परगट करे बिगर कुछू नइं करय।
AMO 3:8 जब सिंह ह गरजथे— त कोन ए, जऊन ह नइं डरावय? परमपरधान यहोवा ह कहे हवय— कोन ए, जऊन ह अगमबानी नइं करही?
AMO 3:9 असदोद नगर के किलामन म अऊ मिसर देस के किलामन म हांका पारव: “सामरिया के पहाड़मन म जूर जावव; अऊ देखव कि ओकर भीतर म कइसन असांति अऊ ओकर मनखेमन के बीच म कइसन अतियाचार होवत हवय।”
AMO 3:10 “ओमन सही काम करे बर नइं जानंय,” यहोवा ह घोसना करत हे, “ओमन के लूटे अऊ छीने गय धन ला कोन ह ओमन के किलामन म संकेलके रखथे।”
AMO 3:11 एकरसेति परमपरधान यहोवा ह ये कहत हे: “एक बईरी ह तुम्हर देस ला घेर लीही, तुम्हर गढ़मन ला गिरा दीही, अऊ किलामन ला लूट लीही।”
AMO 3:12 यहोवा ह ये कहत हे: “जइसन चरवाहा ह सिंह के मुहूं ले सिरिप दू ठन टांग या कान के एक ठन कुटा ला छोंड़ाय पाथे, वइसन सामरिया म रहइया इसरायलीमन बचाय जाहीं, सिरिप दसना के मुड़सरिया, अऊ खटिया के बिछौना के एक कुटा के संग बचाय जाहीं।”
AMO 3:13 “येला सुनव अऊ याकूब के संतानमन के बिरूध गवाही दव,” परभू, यहोवा सर्वसक्तिमान परमेसर ह घोसना करत हे।
AMO 3:14 “जऊन दिन मेंह इसरायल ला ओकर पापमन के सजा दूहूं, ओ दिन बेतेल नगर के बेदीमन ला नास कर दूहूं; बेदी के सींगमन ला काट डारे जाही अऊ भुइयां म गिरा दिये जाही।
AMO 3:15 मेंह जड़काला के भवन के संग घमनी के भवन ला टोरके गिरा दूहूं; हाथी-दांत ले सजाय घरमन ला नास करे जाही अऊ महलमन ला गिरा दिये जाही,” यहोवा ह घोसना करत हे।
AMO 4:1 हे सामरिया के पहाड़ ऊपर रहइया बासान के गायमन, ये बचन ला सुनव, हे माईलोगनमन, तुमन जऊन गरीब ला सताथव अऊ जरूरतमंद ला कुचर देथव अऊ अपन घरवाला ला कहिथव, “हमर पीये बर कुछू लेके आ!”
AMO 4:2 परमपरधान यहोवा ह अपन पबितरता के किरिया खाके कहत हवय: “अइसन समय जरूर अवइया हवय, जब तुमन ला गरी ले, आखिरी तक बांचे ला घलो मछरी फंसाय के गरी ले फंसाके ले जाय जाही।
AMO 4:3 तुमन म के जम्मो झन सहर के दीवार के फाटे म ले सीधा बाहिर निकलहू। तुमन ला हरमोन कोति फटिक दिये जाही,” यहोवा ह घोसना करत हे।
AMO 4:4 “बेतेल नगर म जाके पाप करव; अऊ गिलगाल नगर म जाके अऊ जादा पाप करव। अपन बलिदान ला रोज बड़े बिहनियां अऊ अपन दसमांस ला हर तीसरा साल लाने करव।
AMO 4:5 धनबाद-बलिदान के रूप म खमीर मिले रोटी ला जरोवव अऊ अपन स्वेच्छा-बलिदान के बारे डींग मारव— हे इसरायलीमन, ओमन के बारे म घमंड करव, काबरकि तुमन ला अइसने करई ह बने लगथे,” परमपरधान यहोवा ह घोसना करत हे।
AMO 4:6 “मेंह हर सहर म तुमन ला भूखन पेट रखेंव अऊ हर नगर म जेवन के घटी करेंव, तभो ले तुमन मोर कोति नइं लहुंटेव।” यहोवा ह घोसना करत हे।
AMO 4:7 “जब फसल लुवई ह तीन महिना बांचे रिहिस तब मेंह बरसा ला रोक दे रहेंव। में एक नगर म पानी गिरांय, पर दूसर नगर म नइं गिरांय। एक खेत म बारिस होईस; अऊ दूसर म नइं होईस अऊ ओह सूखा गीस।
AMO 4:8 मनखेमन एक सहर ले दूसर सहर म पानी बर भटकिन पर पीये बर भरपूर पानी नइं पाईन, तभो ले तुमन मोर कोति नइं लहुंटेव,” यहोवा ह घोसना करत हे।
AMO 4:9 “कई बार मेंह तुम्हर बारी अऊ अंगूर के बारी म फसल नइं होवन दें, ओमन ला रोग अऊ फफूंदी ले बरबाद कर देंव। फांफामन तुम्हर अंजीर अऊ जैतून के रूख ला खा डारिन, तभो ले तुमन मोर कोति नइं लहुंटेव,” यहोवा ह घोसना करत हे।
AMO 4:10 “मेंह तुम्हर बीच म महामारी पठोंय जइसन मेंह मिसर देस म पठोय रहेंव। मेंह लूटे गय घोड़ामन के संग तुम्हर जवानमन ला तलवार ले मार डारेंव। मेंह तुम्हर छावनी के बदबू ले तुम्हर नाक ला भर देंव, तभो ले तुमन मोर कोति नइं फिरेव। यहोवा ह घोसना करत हे।
AMO 4:11 “मेंह जइसन सदोम अऊ अमोरा सहरमन ला नास करेंव वइसन ही मेंह तुमन म ले कुछू झन ला नास कर देंव। तुमन आगी ले निकाले बरत लकरी कस रहेव, तभो ले तुमन मोर कोति नइं फिरेव,” यहोवा ह घोसना करत हे।
AMO 4:12 “एकरसेति हे इसरायल, मेंह तोर संग अइसन करहूं, हे इसरायल, काबरकि मेंह तोर संग अइसन करहूं, त तेंह अपन परमेसर ले भेंट करे बर तियार हो जा।”
AMO 4:13 ओ, जऊन ह पहाड़मन ला बनाथे, जऊन ह हवा ला सिरजथे, अऊ जऊन ह मानव-जाति ऊपर अपन बिचार ला परगट करथे, जऊन ह बिहान ला अंधियार कर देथे, अऊ जऊन ह धरती के ऊंचहा ठऊरमन म रेंगथे— ओकर नांव यहोवा सर्वसक्तिमान परमेसर अय।
AMO 5:1 हे इसरायल, ये बचन ला सुन, तोर बारे म मेंह ये बिलापगीत सुनावत हंव:
AMO 5:2 “कुंवारी इसरायल ह गिर गे हे, ओह फेर कभू नइं उठय, ओला ओकर खुद के देस म तियाग दिये गे हे, अऊ ओला उठइया कोनो नइं एं।”
AMO 5:3 परमपरधान यहोवा ह इसरायल ले ये कहत हे: “तोर सहर, जेमा ले एक हजार बीर योद्धा निकलथें ओमा सिरिप एक सौ ही बांचहीं; तोर नगर, जेमा ले एक सौ बीर निकलथें ओमा सिरिप दस झन ही बांचहीं।”
AMO 5:4 यहोवा ह इसरायल ले ये कहत हे: “मोला खोजव अऊ जीयत रहव;
AMO 5:5 बेतेल ला झन खोजव, गिलगाल झन जावव, बेरसेबा के यातरा झन करव; काबरकि गिलगाल ह जरूर बंधुवई म जाही, अऊ बेतेल ह सुनसान हो जाही,”
AMO 5:6 यहोवा ला खोजव अऊ जीयत रहव, नइं तो ओह यूसुफ के गोत्र ऊपर आगी सहीं भड़कही; येह ओमन ला भसम कर दीही, अऊ बेतेल म ओ आगी ला बुतइया कोनो नइं होहीं।
AMO 5:7 अइसन मनखेमन हवंय, जेमन नियाय ला करूवाहट म बदल देथें, अऊ धरमीपन ला माटी म मिला देथें।
AMO 5:8 जऊन ह नछत्र-पुंज अऊ मिरगासिरा ला बनाईस, जऊन ह मंझ रथिया ला बिहनियां म अऊ दिन ला रथिया म बदल देथे, जऊन ह महासागर के पानी ला बलाथे अऊ ओला भुइयां ऊपर गिरा देथे— ओकर नांव यहोवा अय।
AMO 5:9 ओह किला ला मिटकी मारते ही नास कर देथे अऊ गढ़वाले सहर ला खंडहर कर देथे।
AMO 5:10 अइसन मनखेमन हवंय, जेमन अदालत म नियाय पसंद करइयामन ले घिन करथें अऊ सच बात कहइयामन ले घलो घिन करथें।
AMO 5:11 तुमन गरीबमन ले भूंसा बर घलो चुंगी लेथव अऊ ओमन के अनाज ऊपर घलो कर लगाथव। एकरसेति, हालाकि तुमन पथरा के महल बनाय हव, पर तुमन ओमा नइं रहे बर पाहू; हालाकि तुमन रसीला अंगूर के बारी लगाय हव, पर तुमन ओमन के मंद नइं पीये सकहू।
AMO 5:12 काबरकि मेंह जानत हंव कि तुम्हर अपराध कतेक जादा हवय अऊ तुम्हर पापमन कतेक बड़े हवंय। अइसन मनखे हवंय, जेमन निरदोस ऊपर अतियाचार करथें अऊ घूस लेथें अऊ अदालत म गरीबमन के नियाय ला बिगाड़थें।
AMO 5:13 एकरसेति, अइसन समय म समझदार ह चुप रहय, काबरकि समय ह खराप हवय।
AMO 5:14 बुरई के नइं, पर भलई के खोज करव, ताकि तुमन जीयत रहव। तभे यहोवा सर्वसक्तिमान परमेसर ह तुम्हर संग रहिही, जइसन कि तुमन कहिथव कि ओह तुम्हर संग हवय।
AMO 5:15 बुरई ले घिन करव, अऊ भलई ले मया; कचहरी म नियाय ला बनाय रखव। सायद यहोवा सर्वसक्तिमान परमेसर ह यूसुफ के बांचे मनखेमन ऊपर दया करय।
AMO 5:16 एकरे बर परभू, यहोवा, सर्वसक्तिमान परमेसर ह ये कहत हे: “सब गलीमन म बिलाप करे जाही अऊ सबो चऊकमन म दुख अऊ पीरा के अवाज सुनई दीही। किसानमन ला रोय बर अऊ बिलाप करइयामन ला बिलाप करे बर बलाय जाही।
AMO 5:17 अंगूर के सब बारीमन म बिलाप होही, काबरकि ओ बेरा मेंह तुम्हर बीच ले होके जाहूं,” यहोवा ह कहत हे।
AMO 5:18 हाय तुम्हर ऊपर, जऊन मन यहोवा के दिन के ईछा करथव! तुमन काबर यहोवा के दिन के ईछा करथव? ओह अंधियार के दिन होही, अंजोर के नइं।
AMO 5:19 ओ दिन ह अइसन होही मानो कोनो मनखे ह सिंह ले बांचे बर भागथे अऊ ओकर सामना भालू ले हो जाथे, या ओह घर के भीतर जाथे अऊ अराम बर भीथी ऊपर हांथ मढ़ाथे अऊ सांप ह ओला चाब देथे।
AMO 5:20 का यहोवा के दिन ह अंजोर के बदले अंधियार के नइं होही— बिरबिट अंधियार, एकोकनी अंजोर नइं?
AMO 5:21 “मेंह घिन करथंव, मेंह तुम्हर धारमिक तिहारमन ला तुछ समझथंव; तुम्हर सभामन मोर बर बदबू सहीं अंय।
AMO 5:22 भले ही तुमन मोर बर होम-बलिदान अऊ अन्न-बलिदान लानव, पर मेंह ओमन ला गरहन नइं करंव। भले ही तुमन मनपसंद मेल-बलिदान लानव, पर मेंह ओमन के आदर नइं करंव।
AMO 5:23 अपन गीतमन के कंझट ला मोर ले दूरिहा रखव! मेंह तुम्हर बीना के संगीत ला नइं सुनंव।
AMO 5:24 पर नियाय ला नदी कस, अऊ धरमीपन ला कभू नइं सूखइया सोता सहीं बोहावन दव!
AMO 5:25 “हे इसरायल के मनखेमन, निरजन जगह म चालीस साल तक का तुमन मोर बर बलिदान अऊ भेंट लानेव?
AMO 5:26 तुमन अपन राजा के देव-स्थल, अपन मूरतीमन के गोड़ के पीढ़ा, अपन देवता के तारा ला हांथ म उठाय हव— जऊन मन ला तुमन खुद अपन बर बनाय हवव।
AMO 5:27 एकरसेति मेंह तुमन ला दमिस्क नगर ले बाहिर बंधुवई म पठो दूहूं,” यहोवा ह ये कहत हे, जेकर नांव सर्वसक्तिमान परमेसर अय।
AMO 6:1 हाय तुमन ऊपर, जेमन सियोन म संतुस्ट हवव, हाय तुमन ऊपर, जेमन सामरिया नगर के पहाड़ म अपनआप ला सुरकछित मानथव, तुमन, जेमन सबले उत्तम देस के नामी आदमी अव, जेमन करा इसरायल के मनखेमन आथें!
AMO 6:2 कलने नगर जाके ओला देखव; उहां ले हमात नांव के बड़े सहर म जावव, अऊ तब खाल्हे पलिस्ती के गत नांव के सहर म जावव। का येमन तुम्हर दूनों राजमन ले जादा बढ़िया हवंय? का तुम्हर देस ले ओमन के देस ह बड़खा हवय?
AMO 6:3 तुमन संकट के दिन ला दूरिहा कर देथव, अऊ आतंक के राज ला लकठा म ले आथव।
AMO 6:4 तुमन हाथी-दांत ले सजे पलंग ऊपर लेटथव अऊ अपन सोफा म अराम करथव। तुमन मनपसंद भेड़ अऊ चरबीदार बछवामन ला खाथव।
AMO 6:5 तुमन दाऊद सहीं अपन बीना ला बजाथव अऊ बाजामन ला तुरते बजाथव।
AMO 6:6 तुमन कटोरा भरके अंगूर के मंद पीथव अऊ सबले बढ़िया तेल ला देहें म चुपरथव, पर तुमन यूसुफ के बरबादी बर दुखी नइं होवव।
AMO 6:7 एकरसेति तुमन सबले पहिली बंधुवई म जाहू; तुम्हर भोज खवई अऊ मऊज करई ह बंद हो जाही।
AMO 6:8 परमपरधान यहोवा ह अपनेच कसम खाय हवय—यहोवा सर्वसक्तिमान परमेसर ह घोसना करत हे: “मेंह याकूब के घमंड ले घिन करथंव अऊ ओकर किलामन ले घलो घिन करथंव; मेंह सहर अऊ ओमा के जम्मो चीज ला बईरी के हांथ म कर दूहूं।”
AMO 6:9 कहूं एक घर म दस मनखे घलो बांचे रहिहीं, त ओमन घलो मर जाहीं।
AMO 6:10 कहूं कोनो रिस्तेदार ह ओमन के देहें ला जराय खातिर घर ले बाहिर ले जाय बर आथे अऊ उहां कोनो लुकाय मनखे ले पुछथे, “इहां तोर संग म कोनो अऊ हवंय?” अऊ ओह कहिथे, “नइं,” तब ओह ये कहिही, “चुपे रह! हमन ला यहोवा के नांव नइं लेना हवय।”
AMO 6:11 काबरकि यहोवा ह हुकूम देय हवय, अऊ ओह बड़े घर ला फोरके कुटा-कुटा अऊ छोटे घर ला चूर-चूर कर दीही।
AMO 6:12 का घोड़ामन ठाढ़ चट्टान म दऊड़थें? का कोनो मनखे बईलामन ले समुंदर म नांगर जोतथे? पर तुमन नियाय ला जहर म अऊ धरमीपन के फर ला करूवाहट म बदल दे हवव—
AMO 6:13 तुमन, जेमन लो-देबार ला अपन बस म करके आनंदित होथव अऊ कहिथव, “हमन का अपन बल म करनेम ला नइं जीत ले हन?”
AMO 6:14 काबरकि यहोवा सर्वसक्तिमान परमेसर ह घोसना करत हे, “हे इसरायल, मेंह तोर बिरूध म एक जाति ला भड़काहूं, जऊन ह तुम्हर ऊपर लेबो-हमात ले लेके अराबा के घाटी तक अतियाचार करही।”
AMO 7:1 परमपरधान यहोवा ह मोला ये देखाईस: जब राजा के हिस्सा के फसल ह लुआ गे रिहिस अऊ बाद के फसल ह आवत रिहिस, तब ओह फांफामन के दल ला तियार करत रिहिस।
AMO 7:2 जब फांफामन सब फसल ला खाके खेत ला साफ कर दीन, तब मेंह पराथना म पुकारेंव, “हे परमपरधान यहोवा, छेमा कर! याकूब ह कइसे जीयत रह सकत हे? ओह बहुंत छोटे हवय!”
AMO 7:3 तब यहोवा ह नरम पड़िस अऊ कहिस, “अब अइसन नइं होवय।”
AMO 7:4 परमपरधान यहोवा ह मोला ये देखाईस: परमपरधान यहोवा ह आगी के दुवारा नियाय करे बर बलावत रिहिस; ओ आगी ह महासागर ला सूखा दीस अऊ भुइयां ला नास कर दीस।
AMO 7:5 तब मेंह पुकारके कहेंव, “हे परमपरधान यहोवा, मेंह तोर ले बिनती करत हंव, येला रोक दे! याकूब ह कइसे जीयत रह सकत हे? ओह बहुंत छोटे हवय!”
AMO 7:6 तब यहोवा ह नरम पड़िस। “अब येह घलो नइं होवय,” परमपरधान यहोवा ह कहिस।
AMO 7:7 ओह मोला ये देखाईस: परभू ह एक ठन भीथी के तीर म ठाढ़े रिहिस, जऊन ह साहुल के भार सहीं बनाय गे रिहिस, अऊ ओकर हांथ म एक ठन साहुल रिहिस।
AMO 7:8 अऊ यहोवा ह मोर ले पुछिस, “हे आमोस, तोला का दिखत हवय?” मेंह जबाब देंव, “एक ठन साहुल।” तब परभू ह कहिस, “देख, मेंह अपन मनखे इसरायलीमन के बीच एक साहुल लगावत हंव; मेंह ओमन ला अब नइं छोड़ंव।
AMO 7:9 “इसहाक के ऊंचहा ठऊरमन ला नास करे जाही अऊ इसरायल के पबितर-स्थानमन खंडहर करे जाहीं; मेंह अपन तलवार लेके राजा यरोबाम के घराना के बिरूध ठाढ़ होहूं।”
AMO 7:10 तब बेतेल के पुरोहित अमसयाह ह इसरायल के राजा यरोबाम करा एक संदेस पठोईस: “आमोस ह इसरायल के बीच म तोर बिरूध एक सडयंत्र करत हे। ये देस ह ओकर बातमन ला सहे नइं सकय।
AMO 7:11 काबरकि आमोस ह ये कहत हे: “ ‘यरोबाम ह तलवार ले मारे जाही, अऊ इसरायल ह अपन जनम भुइयां ले दूरिहा, जरूर बंधुवई म चले जाही।’ ”
AMO 7:12 तब अमसयाह ह आमोस ले कहिस, “हे अगम-दरसी, इहां ले निकल जा! यहूदा प्रदेस ला वापिस चले जा। उहां कमाके खा अऊ उहां अपन अगमबानी कर।
AMO 7:13 बेतेल म फेर कभू अगमबानी झन करबे, काबरकि येह राजा के पबितर-स्थान अऊ राज के मंदिर अय।”
AMO 7:14 आमोस ह अमसयाह ला उत्तर दीस, “मेंह न तो अगमजानी रहेंव अऊ न ही कोनो अगमजानी के बेटा, पर मेंह तो एक चरवाहा रहेंव, अऊ मेंह डूमर रूखमन के देखरेख घलो करेंव।
AMO 7:15 पर यहोवा ह मोला पसुमन ला चराय के काम बर बलाईस अऊ मोला कहिस, ‘जा, मोर मनखे इसरायलीमन ला अगमबानी कर।’
AMO 7:16 एकरसेति अब यहोवा के बचन ला सुन। तेंह कहिथस, “ ‘इसरायल के बिरूध म अगमबानी झन कर, अऊ इसहाक के संतानमन के बिरूध म परचार करई ला बंद कर।’
AMO 7:17 “एकरसेति यहोवा ह ये कहत हे: “ ‘तोर घरवाली ह सहर म एक बेस्या हो जाही, अऊ तोर बेटा अऊ बेटीमन तलवार ले मारे जाहीं। तोर भुइयां ला नापे जाही अऊ बांट दिये जाही, अऊ तेंह खुद मूरती-पूजा करइयामन के एक देस म मरबे। अऊ इसरायल ह अपन जनम भुइयां वाले देस ले दूरिहा, जरूर बंधुवई म चले जाही।’ ”
AMO 8:1 तब परमपरधान यहोवा ह मोला पाके फरमन के एक ठन टुकनी देखाईस,
AMO 8:2 अऊ ओह मोर ले पुछिस, “हे आमोस, तोला का दिखत हे?” मेंह जबाब देंव, “पाके फरमन के एक ठन टुकनी।” तब यहोवा ह मोला कहिस, “मोर मनखे इसरायलीमन के अन्त के समय आ गे हवय; मेंह ओमन ला अब नइं छोड़ंव।”
AMO 8:3 परमपरधान यहोवा ह घोसना करत हे, “ओ दिन, मंदिर के गीतमन बिलाप म बदल जाहीं। कतको लासमन एती-ओती पड़े होहीं! अऊ सुनसान हो जाही!”
AMO 8:4 ये बात ला सुनव, तुमन, जऊन मन जरूरतमंदमन ला कुचरथव अऊ गरीबमन ला देस ले नास करत,
AMO 8:5 ये कहिथव, “नवां चंदा के उत्सव कब खतम होही कि हमन अनाज बेच सकन, अऊ बिसराम दिन ह कब सिराही कि हमन गहूं बेच अऊ बिसो सकन?”— कम चीजमन ला तराजू म तऊलके, दाम ला बढ़ा देवन अऊ लेवइयामन ला बेईमानी के तराजू ले ठगन,
AMO 8:6 अऊ गरीबमन ला चांदी के सिक्का ले, अऊ जरूरतमंदमन ला एक जोड़ी चप्पल म बिसोवन, अऊ त अऊ कचरा-कुढ़ा ला घलो गहूं म मिलाके बेच देवन।
AMO 8:7 यहोवा जऊन ह याकूब के घमंड अय, ओह खुद के सपथ खाके कहे हवय: “ओमन जऊन कुछू घलो करे हवंय, ओला में कभू नइं भुलावंव।
AMO 8:8 “का येकर बर भुइयां ह नइं कांपही, अऊ जेमन येमा रहिथें, ओमन सोक नइं करहीं? पूरा देस ह नील नदी कस उफनही; येह मिसर देस के नदी सहीं उफनही अऊ तब सांत हो जाही।”
AMO 8:9 परमपरधान यहोवा ह घोसना करत हे, “ओ दिन, मेंह सूरज ला मंझन के बेरा बुड़ो दूहूं अऊ मंझन के बेरा धरती ला अंधियार कर दूहूं।
AMO 8:10 मेंह तुम्हर धारमिक तिहारमन ला सोक म अऊ तुम्हर जम्मो गीतमन ला रोवई म बदल दूहूं। मेंह तुमन जम्मो झन ला बोरा के ओनहा पहिराहूं अऊ तुम्हर मुड़मन ला मुड़ा दूहूं। मेंह ओ समय ला अइसन सोकित कर दूहूं, जइसन कि एकलऊता बेटा मरे ले होथे अऊ ओकर अन्त ला एक दुख के दिन कस करू कर दूहूं।”
AMO 8:11 परमपरधान यहोवा ह घोसना करत हे, “ओ दिनमन आवत हवंय, जब मेंह देस भर म दुकाल पठोहूं— ये दुकाल ह जेवन-पानी के नइं, पर येह यहोवा के बचन सुने के दुकाल होही।
AMO 8:12 मनखेमन ये समुंदर ले ओ समुंदर तक अऊ उत्तर ले लेके पूरब तक भटकत यहोवा के बचन ला खोजहीं, पर ओमन ओला नइं पाहीं।
AMO 8:13 “ओ दिन, “सुघर मुटियारी छोकरीमन अऊ मजबूत जवान छोकरामन पीयास के मारे बेहोस हो जाहीं।
AMO 8:14 जऊन मन सामरिया के पाप के कसम खाके कहिथें— ‘हे दान, तोर देवता के जिनगी के कसम,’ या, ‘बेरसेबा के देवता के कसम’— ओमन अइसन गिरहीं कि फेर कभू नइं उठहीं।”
AMO 9:1 मेंह दरसन म परभू ला बेदी के तीर म ठाढ़े देखेंव, अऊ ओह कहिस: “खंभामन के टीप ला मार कि दुवारमन डोल जावंय। ओमन ला जम्मो मनखेमन के मुड़ म गिरा दे; जऊन मन बांच जाहीं, ओमन ला मेंह तलवार ले मार डारहूं। ओमन म के एको झन घलो भाग नइं सकंय, कोनो घलो बच नइं सकंय।
AMO 9:2 चाहे ओमन खंचवा खनके बहुंत गहरई म चले जावंय, उहां ले मोर हांथ ह ओमन ला ले आही। चाहे ओमन अकास के ऊपर घलो चघ जावंय, उहां ले मेंह ओमन ला खाल्हे ले आहूं।
AMO 9:3 चाहे ओमन करमेल पहाड़ के टीप म लुका जावंय, मेंह उहां ले ओमन ला खोजके खाल्हे ले आहूं अऊ बंदी बना लूहूं। चाहे ओमन मोर ले नजर बचाके समुंदर के पेंदी म लुका जावंय, उहां मेंह सांप ला ओमन ला डसे के हुकूम दूहूं।
AMO 9:4 चाहे ओमन बईरीमन के दुवारा बंधुवई म ले जाय जाहीं, उहां मेंह तलवार ला हुकूम देके ओमन ला कटवा दूहूं। “मेंह ओमन ऊपर अपन नजर ओमन के भलई करे बर नइं, पर ओमन के हानि करे बर रखहूं।”
AMO 9:5 परभू, सर्वसक्तिमान यहोवा— ओह धरती ला छूथे अऊ ओह टघल जाथे, अऊ ओमा रहइया जम्मो झन बिलाप करथें; जम्मो देस ह नील नदी कस उफनथे, अऊ तब मिसर के नदी कस सूखा जाथे;
AMO 9:6 ओह अकास म अपन ऊंचहा महल ला बनाथे, अऊ ओकर नीव धरती म रखथे; ओह समुंदर के पानी ला बलाथे अऊ ओला भुइयां ऊपर ढार देथे— यहोवा ओकर नांव ए।
AMO 9:7 “का तुमन इसरायली नो हव का मोर बर कूसीमन सहीं नो हव?” यहोवा ह घोसना करत हे। “का मेंह इसरायलीमन ला मिसर ले, पलिस्तीमन ला कपतोर ले अऊ अरामीमन ला कीर ले निकालके नइं लानेंव?
AMO 9:8 “सही म परमपरधान यहोवा के नजर ह पाप ले भरे राज ऊपर लगे हवय। मेंह येला धरती के ऊपर ले नास कर दूहूं। तभो ले मेंह याकूब के संतानमन ला पूरा नास नइं करंव,” यहोवा ह घोसना करत हे।
AMO 9:9 “काबरकि मेंह हुकूम दूहूं, अऊ मेंह इसरायल के मनखेमन ला जम्मो जाति के मनखेमन के बीच म अइसन हलाहूं जइसन छननी म अन्न ला हलाय जाथे, अऊ भुइयां म एको ठन गोटी नइं गिरय।
AMO 9:10 मोर मनखेमन के बीच ले जम्मो पापीमन तलवार ले मारे जाहीं, ओ जम्मो, जेमन ये कहिथें, ‘न तो हमर ऊपर बिपत्ति आही अऊ न ही बिपत्ति ले हमर सामना होही।’
AMO 9:11 “ओ दिन म, “मेंह दाऊद के गिरे आसरय ला फेर ठीक कर दूहूं— मेंह येकर टूटे भीथीमन के मरम्मत करहूं, अऊ येकर खंडहरमन ला फेर बनाहूं— अऊ येला पहिले के सहीं फेर बना दूहूं,
AMO 9:12 ताकि ओमन एदोम के बांचे मनखेमन ला अऊ मोर नांव लेवइया जम्मो जातिमन ला अपन अधीन कर लेवंय,” ओ यहोवा ह घोसना करत हे, जऊन ह ये चीजमन ला करही।
AMO 9:13 “अइसन दिनमन आवत हवंय।” यहोवा ह घोसना करत हे, “जब नांगर जोतइया ह लुवइया ले, अऊ अंगूर खुंदइया ह अंगूर के नार लगइया ले आघू बढ़ जाही। नवां अंगूर के रस ह पहाड़मन ले थिपही अऊ जम्मो पहाड़ीमन ले बोहा जाही,
AMO 9:14 अऊ मेंह अपन मनखे इसरायलीमन ला बंधुवई ले वापिस ले आहूं। “ओमन उजड़े सहरमन ला फेर बनाहीं अऊ ओमा रहे लगहीं। ओमन अंगूर के बारी लगाहीं अऊ ओमा के मंद ला पीहीं; ओमन बारी लगाहीं अऊ ओकर फर ला खाहीं।
AMO 9:15 मेंह इसरायलीमन ला ओमन के निज देस म बसाहूं, अऊ ओमन फेर कभू ओ देस ले निकाले नइं जाहीं, जऊन ला मेंह ओमन ला देय हवंव,” यहोवा तुम्हर परमेसर ह कहत हे।
OBA 1:1 ओबदयाह के दरसन। एदोम देस के बारे म परमपरधान यहोवा ह ये कहत हे— हमन यहोवा ले एक संदेस सुने हन: जाति-जाति के मनखेमन ला ये कहे बर एक दूत पठोय गीस, “उठव, आवव, हमन ओकर ले लड़ई करे बर जावन।”
OBA 1:2 “देख, मेंह जाति-जाति के बीच म तोला छोटे बना दूहूं; तेंह बहुंते तुछ समझे जाबे।
OBA 1:3 तोर मन के घमंड ह तोला धोखा दे हवय, तें, जऊन ह चट्टानमन के दरार म रहिथस अऊ अपन घर ऊंचहा जगह म बनाथस, तें, जऊन ह अपनआप ले कहिथस, ‘कोन ह मोला खाल्हे भुइयां म ला सकत हे?’
OBA 1:4 हालाकि तें गिधवा के सहीं ऊंचई म उड़ियाथस अऊ तारामन के बीच म अपन खोंधरा बनाथस, पर उहां ले मेंह तोला खाल्हे ले आहूं,” यहोवा ह घोसना करत हे।
OBA 1:5 “यदि चोरमन तोर करा आतिन, यदि डाकूमन रथिया आतिन— ओहो, तोर कतेक बिनास होनेवाला हे!— त का ओमन जतेक चाहतिन ओतेक चोराके नइं ले जातिन? यदि अंगूर टोरइयामन तोर करा आतिन, त का ओमन कुछू अंगूर ला नइं छोंड़ जातिन?
OBA 1:6 पर एसाव ला कइसे लूटे जाही, ओकर लुकाय खजाना ला कइसे खोज निकाले गीस!
OBA 1:7 तोर सबो संगी राज के मन तोला सीमना तक भगा दीहीं; तोर संगीमन तोला धोखा दीहीं अऊ तोर ऊपर अपन अधिकार कर लीहीं; जेमन तोर रोटी खाथें, ओमन तोर बर फांदा लगाहीं, पर तेंह ओकर पता नइं पाबे।”
OBA 1:8 यहोवा ह घोसना करत हे, “ओ दिन, का मेंह एदोम के बुद्धिमान मनखेमन ला, जऊन मन एसाव के पहाड़मन म समझदार अंय, ओमन ला नास नइं करहूं?
OBA 1:9 हे तेमान, तोर सूरबीरमन डरा जाहीं, अऊ एसाव के पहाड़मन म हर एक झन ला घात करके काट डारे जाही।
OBA 1:10 तोर भाई याकूब के बिरूध हिंसा के कारन, तेंह सरम से भर जाबे; तेंह हमेसा बर नास हो जाबे।
OBA 1:11 ओ दिन तें अलग खड़े होके देखत रहय जब अजनबीमन ओकर धन-संपत्ति ला छीनके ले गीन अऊ परदेसीमन ओकर दुवारी ले घुसरके यरूसलेम बर चिट्ठी डारिन, तेंह ओमा के एक झन सहीं रहय।
OBA 1:12 तेंह अपन भाई के दुरदसा के समय म ओकर ऊपर आनंद झन मनाबे, न ही यहूदा के मनखेमन के बिनास के समय म ओमन ऊपर आनंदित होबे, न ही ओमन के संकट के समय म, बहुंत घमंड करबे।
OBA 1:13 मोर मनखेमन के संकट के समय म तें ओमन के दुवारमन ले होके आघू झन बढ़बे, न ही ओमन के बिपत्ति के समय या ओमन के मुसीबत के बेरा ओमन ला खराप नजर से देखबे, न ही ओमन के बिपत्ति के समय ओमन के संपत्ति ऊपर कब्जा करबे।
OBA 1:14 ओमन के भगोड़ामन ला मार डारे बर तेंह चऊकमन म झन अगोरबे न ही संकट के समय म ओमन के बांचे मनखेमन ला बईरीमन के हांथ म पकड़वाबे।
OBA 1:15 “सबो जाति के मनखेमन बर यहोवा के दिन ह लकठा म हवय। जइसन तेंह करे हस, वइसन तोर संग घलो करे जाही; तोर करे गय दुस्ट काममन तोरेच मुड़ ऊपर आ जाहीं।
OBA 1:16 जइसने तेंह मोर पबितर पहाड़ ऊपर पीये, वइसनेच सबो जाति के मनखेमन लगातार पीयत रहिहीं; ओमन पीते अऊ पीते रहिहीं अऊ अइसन हो जाहीं, जइसन ओमन कभू नइं होय रिहिन।
OBA 1:17 पर सियोन पहाड़ ऊपर छुटकारा होही; ओह पबितर होही, अऊ याकूब के बंसजमन अपन निज भाग ऊपर अधिकार करहीं।
OBA 1:18 अऊ याकूब के घराना ह एक आगी अऊ यूसुफ के घराना ह एक जुवाला सहीं होही; एसाव के घराना ह भूंसा सहीं होही, अऊ ओमन ओमा आगी लगाके ओला नास कर दीहीं। एसाव के घराना के कोनो नइं बांचहीं।” यहोवा ह कहे हवय।
OBA 1:19 नेगेव के मनखेमन आके एसाव के पहाड़मन ऊपर अधिकार कर लीहीं, अऊ खाल्हे राज के मनखेमन पलिस्तीमन के देस ऊपर अधिकार कर लीहीं। ओमन एपरैम अऊ सामरिया के खेतमन ऊपर अधिकार कर लीहीं, अऊ बिनयामीनीमन गिलाद ऊपर अधिकार कर लीहीं।
OBA 1:20 कनान म रहइया इसरायली बंधुवामन के ये दल ह देस ऊपर सारपत नगर तक अधिकार कर लीही; सपाराद म रहइया यरूसलेम के बंधुवामन नेगेव के नगरमन ऊपर अधिकार कर लीहीं।
OBA 1:21 छुड़ानेवालामन एसाव के पहाड़मन ऊपर सासन करे बर सियोन पहाड़ ऊपर चघहीं। अऊ राज ह यहोवा के हो जाही।
JON 1:1 एक दिन, यहोवा के ये बचन अमित्तै के बेटा योना करा आईस:
JON 1:2 “उठके ओ बड़े नगर नीनवे ला जा, अऊ ओकर बिरूध परचार कर, काबरकि येकर बुरई ह मोर नजर म आ गे हवय।”
JON 1:3 पर योना ह यहोवा के आघू ले भाग गीस अऊ तरसीस सहर ला जाय बर निकलिस। ओह खाल्हे कोति यापा नगर म गीस; उहां बंदरगाह म एक पानी जहाज जवइया रिहिस। भाड़ा देके ओह जहाज म चघ गीस ताकि यहोवा मेर ले भागके तरसीस जा सकय।
JON 1:4 तब यहोवा ह समुंदर म भयानक आंधी चलाईस, अऊ जोरदार तूफान उठिस जेकर कारन जहाज के टूटे के नौबत आ गीस।
JON 1:5 तब जम्मो डोंगहारमन डराके अपन-अपन देवता ला पुकारे लगिन। अऊ जहाज म लदे सामान ला ओमन समुंदर म फेंके लगिन ताकि जहाज ह हल्का हो जावय। पर योना ह जहाज के खाल्हे भाग म जाके सुत गे रिहिस, अऊ ओह भारी नींद म रिहिस।
JON 1:6 तब जहाज के कप्तान ह ओकर मेर जाके कहिस, “तेंह कइसे सुतत हस? उठ अऊ अपन देवता ला पुकार! सायद ओह हमर कोति धियान देवय कि हमन नास झन होवन।”
JON 1:7 तब डोंगहारमन एक-दूसर ला कहिन, “आवव, हमन चिट्ठी डालके पता लगावन कि काकर कारन से ये बिपत्ति आय हवय।” ओमन चिट्ठी डारिन अऊ चिट्ठी ह योना के नांव म निकलिस।
JON 1:8 तब ओमन योना ले पुछिन, “हमन ला बता कि काकर कारन ये बिपत्ति हमर ऊपर आय हवय? तेंह का बुता करथस? तें कहां ले आवत हस? कोन देस के अस? कोन जाति के मनखे अस?”
JON 1:9 योना ह जबाब दीस, “मेंह एक इबरी अंव अऊ मेंह यहोवा, स्वरग के परमेसर के उपासना करथंव, जऊन ह समुंदर अऊ जमीन दूनों ला बनाय हवय।”
JON 1:10 ये सुनके ओमन डरा गीन अऊ ओमन पुछिन, “तेंह का करे हस?” (ओमन जान डारे रिहिन कि ओह यहोवा मेर ले भाग के आय हे, काबरकि ओह ये बात ओमन ला बता डारे रिहिस।)
JON 1:11 समुंदर के लहरामन बढ़तेच जावत रिहिन। तब ओमन ओला पुछिन, “हमन तोर संग का करन, जेकर से समुंदर ह हमर बर सांत हो जाय?”
JON 1:12 ओह ओमन ला कहिस, “मोला उठाके समुंदर म फेंक दव, तब समुंदर ह सांत हो जाही, काबरकि मेंह जानत हंव कि मोर कारन ही ये भारी तूफान तुम्हर ऊपर आय हवय?”
JON 1:13 तभो ले, डोंगहारमन जहाज ला समुंदर तीर म ले जाय के बहुंत कोसिस करिन। पर ओमन नइं ले जा सकिन, काबरकि समुंदर के लहरामन पहिली ले अऊ भयंकर हो गे रिहिन।
JON 1:14 तब ओमन यहोवा ला पुकारके कहिन, “हे यहोवा, किरपा करके ये आदमी के परान लेय के कारन हमन ला नास झन होवन दे। हमन ला एक निरदोस आदमी ला मारे के दोसी झन ठहिरा, काबरकि हे यहोवा, जऊन बात तोला बने लगिस, वइसन तेंह करे हस।”
JON 1:15 तब ओमन योना ला उठाके समुंदर म फेंक दीन, अऊ समुंदर के भारी लहरामन थम गीन।
JON 1:16 येला देखके ओमन यहोवा के बहुंतेच भय मानिन, अऊ ओमन यहोवा ला भेंट चघाईन अऊ मन्नत मानिन।
JON 1:17 जब योना ला समुंदर म डार दिये गीस, त यहोवा ह एक बड़े मछरी ला ठहिराय रिहिस, जऊन ह योना ला लील डारिस, अऊ योना ह ओ मछरी के पेट म तीन दिन अऊ तीन रात रिहिस।
JON 2:1 योना ह मछरी के पेट ले यहोवा अपन परमेसर ले पराथना करिस।
JON 2:2 ओह कहिस: “अपन संकट म मेंह यहोवा ला पुकारें, अऊ ओह मोला जबाब दीस। मिरतू-लोक के गहरई ले मेंह मदद बर पुकारें, अऊ तेंह मोर पुकार ला सुन लेय।
JON 2:3 तेंह मोला गहिला म, समुंदर के गहरई म डाल देय, अऊ मेंह धारामन के मांझा म पड़े रहेंव; तोर भड़के धारा अऊ लहरामन मोर ऊपर ले बोहा गीन।
JON 2:4 तब मेंह कहेंव, ‘मोला तोर आघू ले निकाल दिये गे हवय; तभो ले मेंह फेर तोर पबितर मंदिर कोति देखहूं।’
JON 2:5 बुड़ोइया पानी ह मोला डरवात रिहिस, गहिला पानी मोला घेरे रिहिस; समुंदरी घांस ह मोर मुड़ म लपटाय रिहिस।
JON 2:6 मेंह पहाड़ के जरी तक चल दे रहेंव; मेंह हमेसा बर भुइयां म गड़ गे रहेंव। पर हे यहोवा मोर परमेसर, तेंह मोला खंचवा म ले निकाले हस।
JON 2:7 “जब मेंह बेहोस होवत रहेंव, तब हे यहोवा, मेंह तोला सुरता करेंव, अऊ मोर पराथना तोर मेर, तोर पबितर मंदिर म पहुंचिस।
JON 2:8 “जऊन मनखेमन बेकार के मूरतीमन म मन लगाथें ओमन अपनआप ला परमेसर के मया ले दूरिहा कर लेथें।
JON 2:9 पर मेंह, ऊंचहा सबद ले परसंसा करके तोला बलिदान चघाहूं। जऊन मन्नत मेंह माने हंव, ओला मेंह पूरा करहूं। मेंह कहिहूं, ‘उद्धार सिरिप यहोवा ही से होथे।’ ”
JON 2:10 तब यहोवा ह ओ बड़े मछरी ला हुकूम दीस, अऊ ओह योना ला सूखा भुइयां म उगल दीस।
JON 3:1 तब यहोवा के बचन दूसर बार योना करा आईस:
JON 3:2 “ओ बड़े नगर नीनवे म जा अऊ जऊन संदेस मेंह तोला दूहूं, ओकर तें उहां परचार कर।”
JON 3:3 तब योना ह यहोवा के हुकूम ला मानके नीनवे ला गीस। नीनवे ह एक बहुंत बड़े सहर रिहिस; येमा ले चलके जाय म तीन दिन लगय।
JON 3:4 योना ह एक दिन तक सहर के भीतर चलिस, अऊ ये परचार करत गीस, “अब ले चालीस दिन के बाद नीनवे ला नास कर दिये जाही।”
JON 3:5 नीनवे के मनखेमन परमेसर ऊपर बिसवास करिन। उपास रखे के घोसना करे गीस अऊ छोटे ले लेके बड़े मनखे, सबो झन बोरा पहिरिन।
JON 3:6 जब योना के चेतउनी ह नीनवे के राजा के कान म पहुंचिस, त ओह सिंघासन ले उठिस, अपन राज पोसाक ला उतारिस अऊ बोरा ला ओढ़के राख ऊपर बईठ गीस।
JON 3:7 ओह नीनवे म ये घोसना करवाईस: “राजा अऊ ओकर परधानमन के फैसला के मुताबिक: “कोनो मनखे या पसु, गरूवा-बईला या भेड़-बकरी, कुछू भी चीज झन खावंय; ओमन ला कुछू खाय या पीये बर झन दिये जावय।
JON 3:8 पर मनखे अऊ पसु दूनों बोरा ओढ़ंय। हर एक झन तुरते परमेसर ला पुकारय। ओमन अपन गलत काम अऊ हिंसा ला छोंड़ंय।
JON 3:9 कोन जाने? सायद परमेसर ह अपन मन ला बदल ले अऊ अपन भयंकर कोरोध ला छोंड़के हमर ऊपर दया करे अऊ हमन नास होय ले बच जावन।”
JON 3:10 जब परमेसर ह ओमन के काम ला देखिस कि कइसे ओमन अपन गलत काम ला छोंड़त हवंय, त परमेसर ह अपन ईछा ला बदल दीस अऊ ओमन के ऊपर ओ बिनास नइं लानिस, जेला लाने के ओह ठाने रिहिस।
JON 4:1 परमेसर के ये बात ह योना ला बहुंतेच गलत लगिस अऊ ओह गुस्सा हो गीस।
JON 4:2 ओह यहोवा ले पराथना करिस, “हे यहोवा, का मेंह ये नइं कहे रहेंव, जब मेंह अपन घर म रहेंव? एकरे कारन तरसीस कोति भागे के दुवारा मेंह अन्दाजा लगाय के कोसिस करेंव। मेंह जानत रहेंव कि तेंह अनुग्रहकारी अऊ दयालु परमेसर अस; तेंह देरी से कोरोध करइया अऊ मया ले भरे हवस; तें अइसे परमेसर अस, जऊन ह बिपत्ति डाले नइं चाहय।
JON 4:3 हे यहोवा, अब तें मोर परान लेय ले, काबरकि मोर जीयत रहई ले मर जवई ह बने बात अय।”
JON 4:4 पर यहोवा ह जबाब दीस, “का तोर कोरोध करई ह सही अय?”
JON 4:5 तब योना ह निकलके ओ सहर के पूरब कोति एक जगह म बईठ गीस। उहां ओह अपन बर एक छाजन बनाईस अऊ ओकर छइहां म बईठके इंतजार करे लगिस कि अब सहर के का होही?
JON 4:6 तब यहोवा परमेसर ह पान-पतईवाला एक पऊधा ला उगाईस अऊ अइसन बढ़ा दीस कि ओकर ले योना के मुड़ म छइहां हो जाय अऊ ओला असुबिधा झन होवय, अऊ योना ह ओ पऊधा के कारन बहुंत खुस हो गीस।
JON 4:7 पर ओकर दूसर दिन, बिहनियां परमेसर ह एक ठन कीरा ला भेजिस, जऊन ह ओ पऊधा ला कुतर दीस, जेकर से ओ पऊधा ह सूखा गीस।
JON 4:8 जब सूरज निकलिस, त परमेसर ह झुलसा देवइया पुरवई हवा चलाईस, अऊ घाम ह योना के मुड़ म पड़े लगिस, जेकर से ओह बेहोस होय लगिस। योना ह मर जाय के ईछा करत कहिस, “बने होतिस कि मेंह जीयत रहे के बदले मर जातेंव।”
JON 4:9 पर परमेसर ह योना ला कहिस, “का ओ पऊधा बर कोरोध करई तोर बर उचित अय?” ओह कहिस, “हव, उचित अय। मेंह अतेक गुस्सा म हंव कि मरे के मन होवत हे।”
JON 4:10 पर यहोवा ह कहिस, “तेंह ये पऊधा बर चिंता करत हस, जेकर तेंह न तो देखभाल करे रहय अऊ न ही तें ओला बढ़ाय रहय। येह रथिया भर म निकलिस अऊ रथिया भर म मर घलो गीस।
JON 4:11 त फेर का में ये बड़े सहर नीनवे के चिंता नइं करंव, जेमा एक लाख बीस हजार ले जादा मनखे हवंय अऊ जेमन अपन डेरी-जेवनी हांथ के भेद ला नइं जानंय—अऊ ये सहर म बहुंत पसु भी हवंय?”
MIC 1:1 यहूदा के राजा योताम, आहाज अऊ हिजकियाह के सासनकाल म मोरेसेत नगर के रहइया मीका करा यहोवा के ये बचन आईस, जेला ओह सामरिया अऊ यरूसलेम सहर के बारे म दरसन म देखिस।
MIC 1:2 हे जम्मो मनखेमन, सुनव, हे धरती अऊ येमा रहइया जम्मो झन, सुनव, कि परभू ह अपन पबितर मंदिर ले, परमपरधान यहोवा ह तुम्हर बिरूध म गवाही देवय।
MIC 1:3 देखव! यहोवा अपन निवास ले निकलके आवत हवय; ओह खाल्हे उतरके धरती के ऊंचहा जगहमन ला कुचरथे।
MIC 1:4 ओकर गोड़ के तरी पहाड़मन पिघल जाथें अऊ घाटीमन तड़कके फट जाथें, जइसने कि आगी के आघू मोम पिघलथे, जइसने कि ढलान ले पानी गिरथे।
MIC 1:5 ये जम्मो ह याकूब के अपराध, अऊ इसरायल के मनखेमन के पाप के परिनाम अय। याकूब के अपराध का ए? का सामरिया नो हय? यहूदा के ऊंचहा जगह का ए? का यरूसलेम नो हय?
MIC 1:6 एकरसेति मेंह सामरिया ला कचरा के कुढ़ा सहीं कर दूहूं, एक अइसन जगह जिहां अंगूर के बारी लगाय जाथे। मेंह ओकर पथरामन ला खाल्हे घाटी म लुड़का दूहूं अऊ ओकर नीवमन ला खुला कर दूहूं।
MIC 1:7 ओकर जम्मो मूरतीमन ला कुटा-कुटा कर दिये जाही; ओकर मंदिर के जम्मो चढ़ावा ला आगी म जरो दिये जाही; मेंह ओकर जम्मो मूरतीमन ला नास कर दूहूं। काबरकि ओह अपन भेंटमन ला बेस्यागमन करके कमाय हवय, अऊ बेस्यागमन के बनी के रूप म ओमन ला फेर उपयोग म लाय जाही।
MIC 1:8 एकरसेति मेंह रोहूं अऊ सोक मनाहूं; में खाली गोड़ अऊ नंगरा चलहूं-फिरहूं। मेंह सियार सहीं नरियाहूं अऊ उल्लू चिरई सहीं कलरहूं।
MIC 1:9 काबरकि सामरिया के महामारी ह ठीक नइं होवय; येह यहूदा तक बगर गे हवय। येह मोर मनखेमन के फाटक तक, अऊ त अऊ येह यरूसलेम तक हबर गे हवय।
MIC 1:10 गत सहर म येकर चरचा झन करव; बिलकुल झन रोवव। बेत-ओपरा म जाके धुर्रा म लोटव।
MIC 1:11 तुमन जऊन मन सापीर सहर म रहिथव, नंगरा अऊ निरलज होके आघू बढ़व। जऊन मन सानान सहर म रहिथें ओमन बाहिर नइं निकलहीं। बेतेसेल नगर सोक मनात हवय; येह तुम्हर कोनो अऊ बचाव नइं कर सकय।
MIC 1:12 जऊन मन मारोत म रहिथें, ओमन पीरा म छटपटावत हवंय, अऊ मदद पाय के इंतजार म हवंय, काबरकि यहोवा कोति ले भेजे गय बिपत्ति यरूसलेम के कपाट तक हबर गे हवय।
MIC 1:13 तुमन जऊन मन लाकीस नगर म रहिथव, रथ म तेज दऊड़इया घोड़ामन ला साज पहिराव। तुम्हर ले ही सियोन के बेटी के पाप के सुरूआत होईस, काबरकि तुमन म ही इसरायल के अपराध पाय गीस।
MIC 1:14 एकरसेति तुमन ला ही मोरेसेत गत ला बिदाई के उपहार देय बर पड़ही। अकजीब सहर के रहइयामन इसरायल के राजामन बर धोखेबाज सिद्ध होहीं।
MIC 1:15 हे मारेसा नगर के रहइयामन, मेंह तुम्हर बिरूध एक बिजेता ला पठोहूं। इसरायल के जाने-माने मनखेमन अदुल्लाम ला भाग जाहीं।
MIC 1:16 अपन मयारू लइकामन बर सोक म अपन मुड़ के चुंदी ला मुड़ावव; गिधवा कस अपन मुड़ ला चंदवा कर लेवव, काबरकि तुम्हर लइकामन तुम्हर करा ले बंधुवई म चले जाहीं।
MIC 2:1 धिक्कार अय ओमन ला, जऊन मन दुस्ट काम करे के योजना बनाथें, अऊ जऊन मन अपन दसना म पड़े-पड़े सडयंत्र करथें! बिहनियां होवत ही ओमन अपन योजना ला पूरा करथें काबरकि येला करे बर ओमन करा सत्ता होथे।
MIC 2:2 ओमन आने के खेत के लोभ करके ओला हड़प लेथें, अऊ आने मन के घर ला घलो छीन लेथें। ओमन मनखेमन के घरमन ला छल करके ले लेथें, अऊ ओमन के पुरखा के संपत्ति ला लूट लेथें।
MIC 2:3 एकरसेति, यहोवा ह कहिथे: “में ये मनखेमन के बिरूध बिपत्ति लाने के योजना बनावत हंव, जेकर ले तुमन अपनआप ला बचा नइं सकव। तुमन घमंड ले मुड़ उठाके फेर कभू नइं चल सकव, काबरकि येह बिपत्ति के घरी होही।
MIC 2:4 ओ दिन मनखेमन तुम्हर हंसी उड़ाहीं; ओमन ये सोक गीत के संग तुमन ला ताना मारहीं: ‘हमन पूरा बरबाद हो गेंन; हमर मनखेमन के संपत्ति ला बांट दे गे हवय। परमेसर येला मोर ले लेय लेथे! ओह हमर खेतमन ला बिसवासघातीमन ला देय देथे।’ ”
MIC 2:5 एकरसेति यहोवा के सभा म भुइयां ला चिट्ठी दुवारा बांटे बर तुम्हर करा कोनो नइं होही।
MIC 2:6 ओमन के अगमजानीमन कहिथें, “अगमबानी झन करव; ये बिसय म अगमबानी झन करव; हमर ऊपर कलंक नइं लगही।”
MIC 2:7 हे याकूब के संतानमन, का अइसे कहे जावय, “का यहोवा ह धीरज नइं धरय? का ओह अइसने काम करथे?” “का मोर बचन ले ओकर भलई नइं होवय, जऊन ह नियाय के रद्दा म चलथे?
MIC 2:8 कुछू समय पहिले ही मोर मनखेमन एक बईरी कस उठ खड़े होय हवंय। तुमन ओ मनखेमन के मंहगा कपड़ा ला छीन लेथव जऊन मन बेफिकर होके जावत रहिथें, मानो ओ मनखेमन लड़ई ले लहुंटत हवंय।
MIC 2:9 तुमन मोर मनखेमन के माईलोगनमन ला ओमन के सुखमय घर ले निकाल देथव। तुमन ओमन के लइकामन ले मोर आसीस ला हमेसा बर छीन लेथव।
MIC 2:10 उठव, इहां ले चले जावव! येह तुम्हर अराम करे के जगह नो हय, काबरकि येह असुध हो गे हवय, येह नास हो गे हवय, अऊ येकर कोनो ईलाज नइं ए।
MIC 2:11 कहूं कोनो लबरा अऊ धोखा देवइया मनखे आथे अऊ ये कहिथे, ‘मेंह अगमबानी करहूं कि तुम्हर करा बहुंत अंगूर के मंद अऊ जौ के मंद होवय,’ त अइसने मनखे ह ये मनखेमन बर सही अगमजानी होही!
MIC 2:12 “हे याकूब के संतानमन, खचित मेंह तुमन जम्मो झन ला इकट्ठा करहूं; खचित मेंह इसरायल के बांचे मनखेमन ला इकट्ठा करहूं। जइसे भेड़मन ला कोठा म ओलियाय जाथे, जइसे चरागन म बरदी ला संकेले जाथे, वइसे ही मेंह ओमन ला इकट्ठा करहूं; ओ जगह म मनखेमन के भीड़ लग जाही।
MIC 2:13 ओ जऊन ह बाड़ा टोरके रद्दा बनाथे, ओह ओमन के आघू-आघू जाही; ओमन दुवार ला टोरके बाहिर निकल जाहीं। ओमन के राजा ह ओमन के आघू-आघू निकलही, यहोवा ह ओमन के अगुवई करही।”
MIC 3:1 तब मेंह कहेंव, “हे याकूब के अगुवामन, सुनव, हे इसरायल के सासन करइयामन, सुनव। का तुमन ला नियाय के काम नइं करना चाही,
MIC 3:2 तुमन जऊन मन भलई ले घिन करथव अऊ बुरई ले मया करथव; तुमन, जऊन मन मोर मनखेमन के चमड़ी अऊ ओमन के हाड़ा म ले मांस ला चीथ लेथव;
MIC 3:3 तुमन, जऊन मन मोर मनखेमन के मांस खाथव, ओमन के खाल खींच लेथव अऊ ओमन के हाड़ामन के कुटा-कुटा कर देथव; तुमन, जऊन मन ओमन ला कराही म रंधइया मांस या बरतन म रखे मांस के सहीं काट डारथव?”
MIC 3:4 तब ओमन यहोवा ला पुकारहीं, पर ओह ओमन के नइं सुनही। ओमन के दुस्ट काम के कारन ओ बेरा ओह अपन मुहूं ला ओमन ले छुपा लीही।
MIC 3:5 यहोवा ह ये कहिथे: “ओ अगमजानी जऊन मन मोर मनखेमन ला भटका देथें, कहूं ओमन ला खाय बर कुछू मिलथे, तब ओमन सांति के घोसना करथें, पर जऊन मनखे ह ओमन ला खवाय बर मना करथे, ओकर बिरूध म लड़ई करे बर तियार हो जाथें।
MIC 3:6 एकरसेति बिगर दरसन के तुम्हर ऊपर रथिया आ जाही अऊ बिगर सकुन-बिचार के तुम्हर ऊपर अंधियार छा जाही। अगमजानीमन बर बेर ह बुड़ जाही, अऊ दिन रहत ओमन ऊपर अंधियार छा जाही।
MIC 3:7 अगम के बात ला देखइयामन लज्जित होहीं अऊ सकुन-बिचार करइयामन कलंकित होहीं। ओमन जम्मो लाज के मारे अपन मुहूं ढांप लीहीं काबरकि ओमन ला परमेसर ले कोनो जबाब नइं मिलही।”
MIC 3:8 पर जहां तक मोर बात ए, मेंह यहोवा के आतमा के संग सक्ति ले अऊ नियाय अऊ बल ले भरे हंव, ताकि याकूब ला ओकर अपराध, अऊ इसरायल ला ओकर पाप बता सकंव।
MIC 3:9 हे याकूब के अगुवामन, ये बात ला सुनव, हे इसरायल के सासन करइयामन, सुनव, तुमन जऊन मन नियाय ला तुछ समझथव अऊ जम्मो सही बातमन ला बिगाड़थव;
MIC 3:10 तुमन जऊन मन सियोन ला खून-खराबा ले, अऊ यरूसलेम ला दुस्टता ले भरथव।
MIC 3:11 ओकर अगुवामन घूस लेके नियाय करथें, ओकर पुरोहितमन दाम लेके सिकछा देथें, अऊ ओकर अगमजानीमन पईसा बर सकुन-बिचार करथें। तभो ले ओमन यहोवा के मदद के आसा करत कहिथें, “का यहोवा हमर बीच म नइं ए? कोनो बिपत्ति हमर ऊपर नइं आही।”
MIC 3:12 एकरसेति तुम्हर कारन, सियोन ला कोनो खेत के सहीं जोते जाही, यरूसलेम ह गोटी-पथरामन के कुढ़ा हो जाही, अऊ मंदिर के पहाड़ी ह झाड़ीमन ले भरके एक टीला बन जाही।
MIC 4:1 आखिरी के दिनमन म, यहोवा के मंदिर के पहाड़ ह सबले ऊंच पहाड़ के रूप म स्थापित करे जाही; येला जम्मो पहाड़ीमन ले ऊंचहा करे जाही, अऊ मनखेमन पानी के धारा सहीं येकर करा आहीं।
MIC 4:2 बहुंत जाति के मनखेमन आके कहिहीं, “आवव, हमन यहोवा के पहाड़ ऊपर, याकूब के परमेसर के मंदिर म चलन। ओह हमन ला अपन नियम-कानून सिखोही, ताकि हमन ओकर रसता म चलन।” कानून ह सियोन ले, यहोवा के बचन ह यरूसलेम ले निकलही।
MIC 4:3 ओह बहुंते मनखेमन के नियाय करही अऊ दूरिहा तक फईले ताकतवर जातिमन के झगरा के निपटारा करही। ओमन अपन तलवारमन ला पीट-पीटके नांगर के फाल अऊ अपन बरछीमन ला हंसिया बना डारहीं। एक जाति ह आने जाति के बिरूध लड़ई नइं करही, अऊ न ही ओमन फेर लड़ई करे के सिकछा दीहीं।
MIC 4:4 हर एक जन अपन ही अंगूर के नार अऊ अपन ही अंजीर के रूख के खाल्हे बईठही, अऊ ओमन ला कोनो नइं डराही, काबरकि सर्वसक्तिमान यहोवा ह कहे हवय।
MIC 4:5 जम्मो जातिमन अपन-अपन देवतामन के नांव लेके चलंय त चलंय, पर हमन सदा-सर्वदा यहोवा अपन परमेसर के नांव लेके चलबो।
MIC 4:6 यहोवा ह घोसना करत हे, “ओ दिन मेंह लंगड़ामन ला इकट्ठा करहूं; मेंह बंधुवा मनखेमन ला अऊ ओमन ला इकट्ठा करहूं, जेमन ला मेंह दुख दे हवंव।
MIC 4:7 मेंह लंगड़ामन ला अपन बांचे भाग, अऊ भगाय गय मन ला एक ताकतवर जाति बनाहूं। तब ओ दिन ले लेके सदा-सर्वदा तक यहोवा ह सियोन पहाड़ म ओमन ऊपर सासन करही।
MIC 4:8 जहां तक तुम्हर बात ए, हे झुंड के पहरेदारी करे के मचान, हे सियोन के बेटी के सुरकछा गढ़, तुमन ला तुम्हर पहिली के राज दे दिये जाही; बेटी यरूसलेम ला राजपद दिये जाही।”
MIC 4:9 तेंह अब ऊंचहा अवाज म काबर चिचियावत हवस— का तोर कोनो राजा नइं ए? का तोर सासन करइया नास हो गे हवय, कि तोला लइका जनमइया माईलोगन सहीं पीरा होवत हे?
MIC 4:10 हे बेटी सियोन लइका जनमइया माईलोगन सहीं पीरा म छटपटा, काबरकि अब तोला सहर ला छोंड़के खुला मैदान म डेरा डालना जरूरी अय। तेंह बेबिलोन जाबे; उहां तोला बचाय जाही। उहां यहोवा ह तोला तोर बईरीमन के हांथ ले छोंड़ाही।
MIC 4:11 पर अब तोर बिरूध म बहुंत जातिमन जूरत हें। ओमन कहिथें, “ओला असुध होवन दव, सियोन के दुरगति हमर आनंद के बिसय होवय!”
MIC 4:12 पर ओमन यहोवा के बिचार ला नइं जानंय; ओमन ओकर योजना ला नइं समझंय, कि ओह ओमन ला फसल के बीड़ा के सहीं कोठार म कुढ़ोय हवय।
MIC 4:13 “हे बेटी सियोन, उठ अऊ मिंजई कर, काबरकि मेंह तोला लोहा के सींग दूहूं; मेंह तोला कांसा के खुर दूहूं, अऊ तेंह बहुंत जातिमन ला कुटा-कुटा कर देबे।” तेंह ओमन के लूटे गय चीजमन ला यहोवा ला, अऊ ओमन के संपत्ति ला पूरा धरती के परभू ला अरपित करबे।
MIC 5:1 हे सैनिक दलमन के सहर, अपन सैनिकमन ला कतार म कर ले, काबरकि हमर बिरूध एक घेरा डाले गे हवय। ओमन इसरायल के सासक के गाल म लउठी ले मारहीं।
MIC 5:2 “पर तेंह, हे बैतलहम एपराता, हालाकि तेंह यहूदा के बंसमन म छोटे अस, तभो ले तोर म ले ही मोर बर एक झन निकलके आही जऊन ह इसरायल ऊपर सासन करही, जेकर आरंभ पुराना समय ले, प्राचीन समय ले होय हवय।”
MIC 5:3 एकरसेति इसरायल ला ओ समय तक तियाग दिये जाही, जब तक ओ जऊन ह छेवारी होय के पीरा म हवय, एक बेटा ला नइं जनमे, अऊ ओकर बाकि भाईमन इसरायलीमन संग मिल जाय बर लहुंटके नइं आ जावंय।
MIC 5:4 यहोवा के सक्ति ले, यहोवा अपन परमेसर के नांव के परताप ले ओह ठाढ़ होही अऊ अपन झुंड के देखरेख करही। अऊ ओमन निरभय रहिहीं, काबरकि तब धरती के छोर तक मनखेमन ओकर महानता ला जानहीं।
MIC 5:5 अऊ ओह हमर सांति होही जब अस्सूरीमन हमर देस ऊपर हमला करहीं अऊ हमर गढ़मन म हमाहीं। हमन ओमन के बिरूध सात चरवाहा, बरन आठ सेनापति ठाढ़ कर देबो,
MIC 5:6 जऊन मन अस्सूर देस ऊपर, निमरोद के देस ऊपर तलवार ले सासन करहीं। ओह हमन ला अस्सूर के निवासीमन ले छोंड़ाही जब ओमन हमर देस ऊपर हमला करहीं अऊ हमर सिवाना ला पार करहीं।
MIC 5:7 याकूब के बांचे भाग बहुंत मनखेमन के बीच म होही। ओह यहोवा के पठोय ओस सहीं, कांदी ऊपर पड़ोइया बारिस सहीं होही, ओह काकरो इंतजार नइं करय या कोनो मनखे ऊपर निरभर नइं रहय।
MIC 5:8 याकूब के बांचे भाग ह जाति-जाति के बीच अऊ मनखेमन के बीच म अइसने होही, जइसने एक सिंह ह जंगल के पसुमन के बीच म होथे, अऊ एक जवान सिंह भेड़मन के झुंड के बीच होथे, अऊ ओह ओमन के बीच ले जावत ओमन ऊपर झपटके ओमन ला चीर देथे, अऊ कोनो ओमन ला बचा नइं सकंय।
MIC 5:9 तुम्हर हांथ ह अपन बईरीमन ऊपर जय पाय के खुसी म ऊपर उठही, अऊ तुम्हर जम्मो बईरीमन नास करे जाहीं।
MIC 5:10 यहोवा ह घोसना करत हे, “ओ दिन मेंह तुम्हर घोड़ामन ला तुम्हर बीच म ले नास कर दूहूं अऊ तुम्हर रथमन ला घलो नास कर दूहूं।
MIC 5:11 मेंह तुम्हर देस के सहरमन ला नास कर दूहूं अऊ तुम्हर जम्मो गढ़मन ला टोर दूहूं।
MIC 5:12 मेंह तुम्हर जादू-टोना ला खतम कर दूहूं अऊ तुमन फेर कभू जादू-टोना के बात नइं करहू।
MIC 5:13 मेंह तुम्हर मूरतीमन ला अऊ तुम्हर बीच ले तुम्हर पबितर पथरामन ला नास कर दूहूं; तुमन फेर कभू अपन हांथ ले बनाय चीजमन के अराधना नइं करहू।
MIC 5:14 जब मेंह तुम्हर सहरमन ला बिनास करहूं त मेंह तुम्हर बीच ले तुम्हर असेरा नांव के खंभामन ला उखान फेंकहूं।
MIC 5:15 मेंह गुस्सा अऊ कोरोध म ओ जातिमन ले बदला लूहूं जऊन मन मोर बात ला नइं माने हवंय।”
MIC 6:1 सुनव कि यहोवा ह का कहत हे: “उठव, अऊ पहाड़मन के आघू म मोर मामला ला रखव; पहाड़ीमन सुनंय कि तुम्हर का कहना हे।
MIC 6:2 “हे पहाड़मन, यहोवा के दुवारा लगाय आरोप ला सुनव; हे धरती के अटल नीव, तुमन घलो सुनव। काबरकि यहोवा के अपन मनखेमन के बिरूध एक मामला हवय; ओह इसरायल के बिरूध एक मामला दायर करत हवय।
MIC 6:3 “हे मोर मनखेमन, मेंह तुम्हर संग का अनियाय करे हवंव? मोला बतावव कि मेंह तुम्हर ऊपर का बोझ डारे हवंव?
MIC 6:4 मेंह तुमन ला मिसर देस ले बाहिर निकालेंव अऊ तुमन ला गुलामी के देस ले छोंड़ांय। मेंह तुम्हर अगुवई करे बर मूसा ला पठोंय, हारून अऊ मिरियम ला घलो पठोंय।
MIC 6:5 हे मोर मनखेमन, सुरता करव मोआब के राजा बालाक ह का सडयंत्र करे रिहिस अऊ बेओर के बेटा बिलाम ह का जबाब दीस। सित्तीम ले गिलगाल तक अपन यातरा ला सुरता करव, ताकि तुमन यहोवा के धरमी काममन ला जान सकव।”
MIC 6:6 में यहोवा के आघू म का लेके आवंव अऊ महिमामय परमेसर के आघू म दंडवत करंव? का में होम-बलिदान बर एक-एक साल के बछरू लेके ओकर आघू म आवंव?
MIC 6:7 का यहोवा ह हजारों मेढ़ा, अऊ जैतून तेल के दस हजार नदीमन ले खुस होही? का में अपन अपराध के पछतावा करे बर अपन पहिलांत बेटा ला बलिदान करंव या अपन आतमा के पाप बर अपन जनमाय कोनो ला बलिदान करंव?
MIC 6:8 हे मरनहार मनखे, ओह तोला देखाय हवय कि का ह बने अय। अऊ यहोवा ह तोर ले का चाहथे? नियाय के काम करव अऊ दया करे बर झन छोंड़व अऊ अपन परमेसर संग नमरता से चलव।
MIC 6:9 सुनव! यहोवा ह सहर ला बलावत हे— अऊ तोर नांव के भय मनई ही बुद्धिमानी ए— “लउठी अऊ येला ठहिरानेवाला के बात ला धियान देके सुनव।
MIC 6:10 हे दुस्ट घर, का में अब घलो तोर दुस्टता ले कमाय धन, अऊ ओ छोटे नाप ला बिसरा दंव, जऊन ह सरापित अय?
MIC 6:11 का में कोनो ला बेईमानी के नाप, अऊ गलत वजन के थैली के संग छोंड़ दंव?
MIC 6:12 तोर धनी मनखेमन हिंसा करथें; तोर निवासीमन लबरा अंय अऊ ओमन धोखा देवइया बात करथें।
MIC 6:13 एकरसेति, मेंह तुम्हर पाप के कारन तुमन ला नास करई, तुम्हर पतन करई सुरू कर चुके हंव।
MIC 6:14 तुमन जेवन तो करहू पर मन ह नइं भरही; खाय के बाद घलो तुम्हर पेट ह खाली रहिही। तुमन जमा तो करहू पर कुछू घलो नइं बांचही, काबरकि तुम्हर जमा-पूंजी ला मेंह तलवार ले लुटवा दूहूं।
MIC 6:15 तुमन अनाज के बोवई तो करहू, पर फसल नइं काटहू; तुमन जैतून के तेल तो निकालहू, पर ओ तेल के उपयोग नइं कर सकहू, तुमन अंगूर ला तो कुचरहू, पर ओकर मंद ला पी नइं सकहू।
MIC 6:16 तुमन ओमरी राजा के बिधि-बिधान अऊ अहाब राजा के घर के जम्मो रीति-रिवाजमन ला पालन करे हव; तुमन ओमन के परंपरा के घलो पालन करे हव। एकरसेति मेंह तुम्हर बिनास कर दूहूं अऊ तुम्हर मनखेमन के ठट्ठा करे जाही; तुमन जाति-जाति के मनखेमन के अपमान सहिहू।”
MIC 7:1 मोर का दुरगति हवय! में ओ मनखे जइसे अंव, जऊन ह धूपकाला के फर ला अंगूर के बारी के बिनई म बटोरथे; खाय बर अंगूर के कोनो गुच्छा नइं बांचे हे, मेंह सुरू के अंजीर के फर के जऊन ईछा करे रहेंव, ओमन घलो नइं एं।
MIC 7:2 बिसवास लईक मनखेमन देस ले नास हो गे हवंय; एको झन ईमानदार मनखे नइं बांचे हवंय। हर एक जन लहू बोहाय के घात म लगे रहिथे; ओमन जाल फईलाके एक-दूसर ला फंसाय के चक्कर म रहिथें।
MIC 7:3 ओमन के दूनों हांथ दुस्ट काम करे म माहिर हवंय; सासन करइयामन ईनाम के मांग करथें, नियायधीसमन घूस लेथें, सक्तिसाली मनखेमन अपन ईछा ला पूरा करे बर मनमानी करथें— ओमन जम्मो मिलके सडयंत्र रचथें।
MIC 7:4 ओमन म जऊन ह सबले बने माने जाथे, ओह एक कांटावाले झाड़ी के सहीं अय, जऊन ह सबले जादा ईमानदार समझे जाथे, ओह एक कांटावाले बाड़ा ले घलो खराप होथे। तुम्हर करा, परमेसर के आय के दिन हो गे हवय, याने कि तुम्हर पहरेदार के खतरा के घंटी बजाय के दिन आ गे हवय। अब तुम्हर घबराय के बेरा ए।
MIC 7:5 कोनो परोसी ऊपर बिसवास झन करबे, अऊ न ही कोनो संगी ऊपर भरोसा करबे। अऊ त अऊ अपन घरवाली, जऊन ह तोला धरके लेटथे, ओकर ले घलो संभलके बात करबे।
MIC 7:6 काबरकि बेटा ह अपन ददा के अनादर करथे, बेटी ह अपन दाई के बिरूध, अऊ बहू ह अपन सास के बिरूध ठाढ़ होथे— मनखे के बईरी ओकर खुद के परिवार के मनखेमन होथें।
MIC 7:7 पर जहां तक मोर बात ए, मोर आसा ह यहोवा ऊपर लगे रहिथे, में अपन उद्धार करइया परमेसर के बाट जोहथंव; मोर परमेसर ह मोर बात ला सुनही।
MIC 7:8 हे मोर बईरी, मोर दसा ऊपर आनंद झन मना! हालाकि मेंह गिर गे हंव, पर मेंह ठाढ़ होहूं। हालाकि मेंह अंधियार म बईठे हंव, पर यहोवा ह मोर अंजोर होही।
MIC 7:9 काबरकि मेंह ओकर बिरूध पाप करे हंव, एकरसेति मेंह तब तक यहोवा के कोरोध ला सहत रहिहूं, जब तक कि ओह मोर मामला ला सुनके मोला नियाय नइं देवय। ओह मोला अंजोर म ले आही; मेंह ओकर धरमीपन ला देखहूं।
MIC 7:10 तब मोर बईरी ह येला देखही अऊ सरम के मारे अपन मुहूं ला ढांप लीही, ये बईरी ओही अय, जऊन ह मोला कहिस, “कहां हवय यहोवा तोर परमेसर?” मेंह ओ बईरी के पतन ला देखहूं; इहां तक कि ओह गली के चीखला सहीं गोड़ खाल्हे रऊंदे जाही।
MIC 7:11 तुम्हर भीथीमन ला बनाय के दिन, अऊ तुम्हर सीमनामन ला बढ़ाय के दिन ह आही।
MIC 7:12 ओ दिन मनखेमन तुम्हर करा अस्सूर ले अऊ मिसर देस के सहरमन ले आहीं, इहां तक कि मिसर देस ले लेके फरात नदी तक ले, अऊ समुंदर ले लेके समुंदर के बीच के अऊ पहाड़ ले लेके पहाड़ के बीच के देसमन ले मनखेमन तुम्हर करा आहीं।
MIC 7:13 धरती के निवासीमन के कारन, ओमन के काम के परिनाम स्वरूप, धरती ह उजड़ जाही।
MIC 7:14 अपन मनखेमन के रखवारी, अपन उत्तराधिकार म पाय झुंड के रखवारी अपन लउठी ले करव, जऊन ह जंगल म, अऊ उपजाऊ चरागन म अपन भरोसा म रहिथे। ओमन ला बहुंत पहिले के सहीं बासान अऊ गिलाद म चरन दव।
MIC 7:15 “जब तुमन मिसर देस ले निकलके आयेव, ओ दिनमन सहीं, मेंह ओमन ला अचरज के काम देखाहूं।”
MIC 7:16 जाति-जाति के मनखेमन येला देखहीं अऊ अपन सक्ति ले बंचित होके सरमिंदा होहीं। ओमन सरम के मारे अपन मुहूं अपन हांथ ले ढांप लीहीं अऊ ओमन के कानमन भैंरा हो जाहीं।
MIC 7:17 ओमन सांप सहीं, अऊ भुइयां म रेंगइया जन्तु सहीं धुर्रा चाटहीं। ओमन अपन मांद ले कांपत निकलहीं; ओमन यहोवा हमर परमेसर ले डरहीं अऊ तोर ले भयभीत होहीं।
MIC 7:18 तोर सहीं अऊ कोन परमेसर हवय, जऊन ह अपन निज भाग के बांचे मनखेमन के पाप अऊ अपराधमन ला छेमा करथे? तोर कोरोध ह हमेसा बर नइं रहय पर दया देखाय म तोला खुसी होथे।
MIC 7:19 तेंह हमर ऊपर फेर दया करबे; तेंह अपन गोड़ खाल्हे हमर पापमन ला कुचर देबे अऊ हमर दुस्टता के जम्मो काम ला गहिरा समुंदर म फटिक देबे।
MIC 7:20 जइसे कि बहुंत पहिले हमर पुरखामन ले किरिया खाके, तेंह परतिगियां करे रहे, ओकरे मुताबिक तेंह याकूब के मनखेमन बर बिसवासयोग्य बने रहिबे, अऊ अब्राहम के बंस के मनखेमन ला मया देखाबे।
NAH 1:1 नीनवे सहर के बारे म अगमबानी। एलकोस के रहइया नहूम के दरसन के किताब।
NAH 1:2 यहोवा जलन रखइया अऊ बदला लेवइया परमेसर अय; यहोवा बदला लेथे अऊ कोरोध ले भरे हवय। यहोवा अपन बईरीमन ले बदला लेथे अऊ अपन कोरोध अपन बईरीमन के बिरूध देखाथे।
NAH 1:3 यहोवा ह कोरोध करे म धीमा, पर सामर्थ म बड़े अय; यहोवा दुस्टमन ला दंड देय बिगर नइं छोंड़ही। ओकर रद्दा ह बवंडर अऊ आंधी म ले होके जाथे, अऊ बादरमन ओकर गोड़ के धुर्रा अंय।
NAH 1:4 ओह समुंदर ला दबकारथे अऊ ओला सूखा देथे; ओह जम्मो नदीमन ला सूखा देथे। बासान के खेत अऊ करमेल पहाड़ के बगीचा कुम्हला जाथें अऊ लबानोन के फूल मुरझा जाथें।
NAH 1:5 यहोवा के आघू म पहाड़मन कांपथें अऊ पहाड़ीमन टघल जाथें। ओकर आघू म धरती, पूरा संसार अऊ ओमा रहइया जम्मो कांपथें।
NAH 1:6 ओकर कोरोध के सामना कोन कर सकथे? ओकर भयंकर कोरोध ला कोन सह सकथे? ओकर कोप ह आगी सहीं भड़कथे; ओकर आघू म चट्टानमन चूर-चूर हो जाथें।
NAH 1:7 यहोवा बने अय, अऊ संकट के बेरा म मजबूत गढ़ अय। ओह ओमन के खियाल रखथे, जऊन मन ओकर ऊपर भरोसा रखथें,
NAH 1:8 पर एक भयंकर बाढ़ के दुवारा ओह नीनवे सहर ला खतम कर दीही; ओह अपन बईरीमन ला अंधियार के राज म भगा दीही।
NAH 1:9 ओमन जऊन भी सडयंत्र यहोवा के बिरूध करहीं ओह ओला असफल कर दीही; संकट ह दूबारा नइं आही।
NAH 1:10 ओकर बईरीमन कंटिला झाड़ीमन म फंस जाहीं अऊ मंद पीके मतवार होहीं; ओमन ला खेत म सूखाय नर्रा सहीं जलाके नास कर दिये जाही।
NAH 1:11 हे नीनवे, तोर ले ही एक जन निकले हवय जऊन ह यहोवा के बिरूध दुस्टता के सडयंत्र करथे, अऊ दुस्ट योजना बनाथे।
NAH 1:12 यहोवा ह ये कहिथे: “हालाकि ओमन संग ओमन ला मदद करइयामन हवंय अऊ ओमन अनगिनत हवंय, पर ओमन नास करे जाहीं अऊ मिट जाहीं। हे यहूदा, हालाकि मेंह तोला पीरा दे हवंव, पर अब मेंह तोला पीरा नइं दंव।
NAH 1:13 अब मेंह तोर गरदन म रखे ओमन के जुड़ा ला टोर दूहूं अऊ तोर बेड़ीमन ला टोर दूहूं।”
NAH 1:14 हे नीनवे, यहोवा ह तोर बारे म एक हुकूम दे हवय: “तोर बंस ला बढ़ाय बर तोर कोनो संतान नइं होहीं। मेंह तोर देवतामन के मंदिर म रखे तोर पूजा के चीज अऊ मूरतीमन ला नास कर दूहूं। में तोर बर कबर कोड़हूं, काबरकि तेंह दुस्ट अस।”
NAH 1:15 देख, उहां पहाड़मन ऊपर, ओकर गोड़मन ला देख, जऊन ह सुघर संदेस लाथे, जऊन ह सांति के घोसना करथे! हे यहूदा, अपन तिहारमन ला मना, अऊ अपन मन्नतमन ला पूरा कर। काबरकि दुस्ट मनखेमन अब तोर ऊपर हमला नइं करंय; ओमन ला पूरा नास करे जाही।
NAH 2:1 हे नीनवे, एक हमला करइया ह तोर बिरूध म आवत हे, एकरसेति गढ़मन के सुरकछा कर, सड़क के रखवारी कर, अपनआप ला मजबूत कर, अपन पूरा सैनिक बल ला तियार कर ले!
NAH 2:2 यहोवा ह याकूब के सोभा ला इसरायल के सोभा सहीं कर दीही, हालाकि नास करइयामन ओमन ला उजाड़ दे हवंय अऊ ओमन के अंगूर के नारमन ला नास कर दे हवंय।
NAH 2:3 ओमन के सैनिकमन के ढाल के रंग ह लाल हे; ओकर योद्धामन भड़कीला लाल कपड़ा पहिरे हवंय। जऊन दिन ओमन ला लड़ई बर तियार करे जाथे, ओमन के रथ के धातु ह चमकथे; सनोवर के बरछीमन ला घुमाय जाथे।
NAH 2:4 गलीमन म रथमन तेजी से दऊड़थें, अऊ चऊक म एती ले ओती भागत रहिथें। ओमन बरत मसाल सहीं दिखथें; ओमन बिजली सहीं भागथें।
NAH 2:5 नीनवे अपन छांटे गय सैनिक दलमन ला आय के आदेस देथे, पर ओमन अपन रद्दा म लड़खड़ाथें। ओमन सहर के दीवार ले टकराथें; सुरकछा के ढाल अपन जगह म खड़े करे गे हवय।
NAH 2:6 नदी के दुवारमन ला खोल दिये गे हवय अऊ महल ह गिरत हे।
NAH 2:7 ये निरनय हो गे हवय कि नीनवे ला बंधुवा बनाके ले जाय जावय। ओकर गुलाम माईलोगनमन पंड़की चिरई सहीं बिलाप करहीं अऊ अपन छाती पीटहीं।
NAH 2:8 नीनवे ह पानी के एक पोखरी सहीं अय, जेकर पानी सूखात जावत हे। ओमन चिचियाके कहिथें, “रूकव! रूकव!” पर कोनो मुड़के नइं देखंय।
NAH 2:9 चांदी ला लूटव! सोन ला लूटव! येकर जम्मो खजानामन ले धन अवई ह खतम नइं होवय!
NAH 2:10 ओला लूट लिये, छीन लिये अऊ ओकर कपड़ा उतार लिये गे हवय! हिम्मत ही नइं ए, माड़ीमन म ताकत नइं ए, देहेंमन कांपत हें, अऊ हर एक के चेहरा के रंग उड़ गे हवय।
NAH 2:11 अब कहां हवय सिंहमन के मांद, ओ जगह जिहां ओमन अपन छोटे सिंहमन ला खाना खवात रिहिन, जिहां सिंह अऊ सिंहनी जावत रिहिन, अऊ ओमन के लइकामन निडर होके रहत रिहिन?
NAH 2:12 सिंह अपन लइकामन बर भरपूर सिकार करत रिहिस अऊ अपन संगी सिंहनी बर सिकार ला गला घोंटके मारत रिहिस, अऊ अपन मांद ला मारे गे पसु ले अऊ अपन गुफा ला सिकार ले भर लेवत रिहिस।
NAH 2:13 सर्वसक्तिमान यहोवा ह घोसना करत हे, “मेंह तुम्हर बिरूध हवंव। मेंह तुम्हर रथमन ला आगी ले जला दूहूं, अऊ तुम्हर जवान सिंह सहीं सैनिकमन तलवार ले मारे जाहीं। मेंह धरती ऊपर तुम्हर सिकार करे बर कुछू नइं छोड़ंव। तुम्हर संदेसियामन के अवाज फेर कभू सुनई नइं दीही।”
NAH 3:1 धिक्कार ए ओ खून के सहर ला, जऊन ह लबारी बात ले भरे हवय, जऊन ह लूट-पाट ले भरे हवय, अऊ जऊन ह दुखित-पीड़ित मनखेमन ले कभू नइं छूटय!
NAH 3:2 कोर्रा के चटके के अवाज, चक्कामन के खड़खड़ई, घोड़ामन के सरपट भगई अऊ रथमन के हालई-डोलई!
NAH 3:3 घुड़सवार सेना के हमला करई, तलवारमन के चमकई बरछीमन के चमकई! मार डारे गय बहुंत मनखे, लासमन के ढेर, अनगिनत मरे मनखेमन के देहें, लासमन के ऊपर लड़खड़ावत मनखे—
NAH 3:4 ये जम्मो एक बेस्या के लम्पट वासना के कारन अय, जऊन ह ललचाथे अऊ जादू-टोना के मालकिन अय, जऊन ह जाति-जाति के मनखेमन ला अपन बेस्यागमन ले अऊ अपन जादू-टोना ले गुलाम बना लेथे।
NAH 3:5 यहोवा ह घोसना करत हे, “मेंह तुम्हर बिरूध हवंव। मेंह तुम्हर लंहगा ला तुम्हर चेहरा ऊपर तक उठा दूहूं। मेंह जाति-जाति के मनखेमन ला तुम्हर नंगई ला देखाहूं अऊ राज-राज म तुमन ला लज्जित करहूं।
NAH 3:6 मेंह तुम्हर ऊपर कचरा-कूटा फटिकहूं, मेंह तुमन ला अपमानित करहूं अऊ तुम्हर तमासा बनाहूं।
NAH 3:7 ओ जम्मो जऊन मन तुमन ला देखहीं, ओमन तुम्हर ले दूरिहा भागहीं अऊ कहिहीं, ‘नीनवे नास हो गीस—कोन ओकर बर बिलाप करही?’ तुमन ला सांति देय बर मोला कोनो कहां मिल सकत हे?”
NAH 3:8 का तुमन ओ थेबेस सहर ले जादा बने अव, जऊन ह नील नदी म बसे हवय, जेकर चारों कोति ह पानी ले घेराय हवय? नदी ह ओकर सुरकछा रिहिस, अऊ पानी ह ओकर बर दीवार रिहिस।
NAH 3:9 कूस अऊ मिसर देस ओकर बर असीमित बल रिहिन, पूत अऊ लिबिया ओकर संगी देसमन रिहिन।
NAH 3:10 तभो ले ओला बंधुवा बनाके बंधुवई म ले जाय गीस। हर गली के मोड़ म ओकर छोटे लइकामन ला पटक-पटकके मार डारे गीस। ओकर परभावसाली मनखेमन बर चिट्ठी निकाले गीस, अऊ ओकर जम्मो बड़े मनखेमन ला बेड़ीमन म बांध दिये गीस।
NAH 3:11 हे नीनवे सहर, तेंह घलो नसा म मतवार हो जाबे; तेंह लुकाय बर चले जाबे अऊ बईरीमन ले बांचे बर आसरय खोजबे।
NAH 3:12 तोर जम्मो गढ़मन ओ अंजीर रूखमन सहीं अंय जेमन म पहिली-फसल के पाके फर होथें; जब ओमन ला हलाय जाथे, त अंजीर के फरमन खानेवाला के मुहूं म गिरथें।
NAH 3:13 अपन सैनिक दलमन ला देख— ओ जम्मो दुरबल हो गे हवंय। तोर देस के दुवारमन तोर बईरीमन बर खुले हवंय; आगी ह तोर दुवारमन के छड़मन ला जलाके नास कर दे हवय।
NAH 3:14 अपन सैनिक घेरा बर पानी भर ले, अपन सुरकछा ला मजबूत कर! माटी ला तियार कर, गोड़ ले खुंदके गारा बना ले, ईंटा बनाय के काम ला सुधार!
NAH 3:15 उहां आगी ह तोला जलाके नास कर दीही; तलवार ह तोला काट डारही— ओमन तोला फांफामन के दल सहीं खा जाहीं। फांफामन सहीं अपन संखिया ला बढ़ावव, टिड्डीमन सहीं अपन संखिया ला बढ़ावव!
NAH 3:16 तुमन अपन बेपारीमन के संखिया अकास के तारामन के संखिया ले घलो जादा बढ़ा ले हवव, पर ओमन टिड्डीमन सहीं देस ला नास करके भाग जाथें।
NAH 3:17 तोर पहरेदारमन टिड्डीमन सहीं अंय, तोर करमचारीमन टिड्डीमन के दल सहीं अंय जऊन मन ठंड के दिन म दीवारमन म रहिथें— पर जब सूरज निकलथे त ओमन उड़ जाथें, अऊ कोनो नइं जानंय कि ओमन कहां जाथें।
NAH 3:18 हे अस्सूर के राजा, तोर चरवाहामन ओंघाथें; तोर परभावसाली मनखेमन अराम करे बर लेट जाथें। तोर मनखेमन पहाड़ ऊपर तितिर-बितिर हो गे हवंय अऊ ओमन ला इकट्ठा करइया कोनो नइं अंय।
NAH 3:19 तोर चंगई नइं हो सकय; तोर घाव ह बहुंत घातक ए। ओ जम्मो, जऊन मन तोर बारे म सुनथें, ओमन तोर पतन ऊपर ताली बजाथें, काबरकि अइसने कोन हे जऊन ह तोर खतम नइं होवइया निरदयता ले बच सके हे?
HAB 1:1 अगमबानी, जेला हबक्कूक अगमजानी ह पाईस।
HAB 1:2 हे यहोवा, मेंह कब तक मदद बर तोर ले गोहार लगावत रहंव, पर तेंह नइं सुनत हस? या मेंह कब तक चिल्लावत रहंव, “हिंसा!” पर तेंह नइं बचात हस?
HAB 1:3 तेंह काबर मोला अनियाय ला देखे बर मजबूर करथस? काबर तेंह गलत काम ला सहत हस? मोर आघू म बरबादी अऊ हिंसा होवथे; झगड़ा अऊ बिबाद बहुंत होवत हे।
HAB 1:4 येकर कारन नियम-कानून ह ढीला पर गे हवय, नियाय मिलत नइं ए। दुस्टमन धरमीमन ला घेर डारे हवंय, जेकर से सही नियाय नइं मिलत हवय।
HAB 1:5 “जाति-जाति के मनखेमन कोति धियान से देखव— अऊ बहुंतेच चकित होवव। काबरकि मेंह तुम्हर समय म कुछू अइसन करे बर जावत हंव यदि ओकर बारे म कोनो तुमन ला बतावय, तभो ले तुमन कभू बिसवास नइं करहू।
HAB 1:6 मेंह बेबिलोनीमन ला उभारत हंव, ओमन निरदयी अऊ दुस्साहसी मनखे अंय, जेमन पूरा धरती ऊपर फईलत हवंय ताकि ओ निवासमन ऊपर कब्जा कर लेवंय, जेमन ओमन के नो हंय।
HAB 1:7 ओमन डरावना अऊ भयानक मनखे अंय; ओमन खुद अपनआप म कानून अंय अऊ ओमन अपन खुद के आदरमान ला बढ़ावा देथें।
HAB 1:8 ओमन के घोड़ामन चीतवामन ले भी जादा तेज दऊड़थें, अऊ संझा समय के भेड़ियामन ले भी जादा घातक होथें। ओमन म सवार सैनिक अपन घोड़ामन ला बिगर सोचे-बिचारे दऊड़ाथें; ओमन के घुड़सवारमन बहुंत दूरिहा ले आथें। झपटके अपन सिकार ला खा जानेवाला गिधवा सहीं ओमन उड़थें;
HAB 1:9 ओमन सब के सब हतिया करे के मनसा से ही आथें। ओमन के उपदरवी झुंडमन मरू-भुइयां के आंधी सहीं आघू बढ़थें अऊ कैदीमन ला बालू कस संकेलथें।
HAB 1:10 ओमन राजामन के ठट्ठा करथें अऊ हाकिममन के हंसी उड़ाथें। ओमन गढ़वाले सहरमन ऊपर हंसथें; माटी के ढलान बनाके ओमन ओ सहरमन ऊपर कब्जा करथें।
HAB 1:11 तब ओमन हवा सहीं निकल जाथें अऊ आघू बढ़त रहिथें— ओमन दोसी मनखे अंय, जेमन के खुद के बल ही ओमन के देवता अय।”
HAB 1:12 हे यहोवा, का तेंह अनादिकाल ले नइं अस? हे मोर परमेसर, मोर पबितर परमेसर, तेंह कभू नइं मरस। हे यहोवा, तेंह ओमन ला नियाय करे बर ठहिराय हस; हे मोर चट्टान, तेंहीच ह ओमन ला दंड देय बर अभिसेक करे हस।
HAB 1:13 तोर आंखीमन अइसन सुध हें कि बुरई ला नइं देख सकंय; तेंह अधरम ला सहे नइं सकस। त फेर तेंह काबर बिसवासघातीमन के सहन करथस? तेंह काबर चुप रहिथस, जब दुस्टमन अपन ले जादा धरमीमन ला लील डारथें?
HAB 1:14 तेंह मनखेमन ला समुंदर के मछरी सहीं, अऊ समुंदर के जीव-जन्तु सहीं बनाय हस, जेमन ऊपर कोनो हाकिम नइं रहय।
HAB 1:15 दुस्ट बईरी ह ओ जम्मो ला गरी म फंसाके खींच लेथे, ओह ओमन ला अपन जाल म पकड़ लेथे, ओह ओमन ला अपन मछरी के जाल म इकट्ठा करथे; अऊ ये किसम ले ओह आनंद अऊ खुसी मनाथे।
HAB 1:16 एकरसेति ओह अपन जाल बर बलि चघाथे, अऊ अपन मछरी के जाल के आघू म धूप जलाथे, काबरकि अपन जाल के कारन ही ओह अराम के जिनगी जीथे अऊ मनपसंद भोजन के मजा लेथे।
HAB 1:17 पर का ओह अपन जाल ला खाली करत, बिगर दया के जाति-जाति के मनखेमन ला नास करते रहिही?
HAB 2:1 मेंह अपन पहरा म ठाढ़े रहिहूं अऊ गढ़ के ऊंच दीवार ऊपर चढ़के ठाढ़े रहिहूं; मेंह देखत रहिहूं कि ओह मोला का कहिही, अऊ में ये सिकायत के का जबाब दंव।
HAB 2:2 तब यहोवा ह मोला जबाब दीस: “दरसन के बात ला पटियामन ऊपर साफ-साफ लिख दे ताकि घोसना करइया ह दऊड़त-दऊड़त येमा लिखे बात पढ़के घोसना करय।
HAB 2:3 काबरकि ये दरसन के बात ह एक ठहिराय समय म पूरा होही; येह आखिरी समय के बारे म बताथे अऊ येह गलत साबित नइं होवय। भले ही येमा देरी होवय, पर ये बात के इंतजार करव; येह जरूर पूरा होही अऊ येमा देरी नइं होवय।
HAB 2:4 “देख, बईरी के मन ह फुल गे हवय; ओह बुरई के ईछा करथे— पर धरमी मनखे ह अपन बिसवासयोग्यता के दुवारा जीयत रहिही—
HAB 2:5 वास्तव म, अंगूर के मंद ह ओला धोखा देथे; ओह घमंडी अय अऊ कभू अराम से नइं रहय। काबरकि ओह कबर सहीं लोभी अय अऊ मिरतू सहीं कभू संतोस नइं होवय, ओह जम्मो जाति के मनखेमन ला अपन करा संकेलथे, अऊ जम्मो मनखेमन ला अपन बंधुवा बनाके ले जाथे।
HAB 2:6 “का ओ जम्मो झन ये कहिके ओकर हंसी नइं उड़ाहीं अऊ बेजत्ती करके ताना नइं मारहीं, “ ‘ओकर ऊपर हाय, जऊन ह चोरी के सामान के ढेर लगाथे लूट के धन ले धनवान बन जाथे! येह कब तक चलत रहिही?’
HAB 2:7 का तुमन ला करजा देवइयामन अचानक तुम्हर मेर नइं आ जाहीं? का ओमन जागके तुमन ला नइं डरवाहीं? तब तुमन ओमन के सिकार बन जाहू।
HAB 2:8 काबरकि तुमन बहुंते जाति के मनखेमन ला लूटे हव, बांचे मनखेमन अब तुमन ला लूटहीं। काबरकि तुमन मनखेमन के लहू बहाय हव; तुमन देस अऊ सहरमन ला उहां रहइया मनखेमन सहित बरबाद कर दे हवव।
HAB 2:9 “ओकर ऊपर हाय, जऊन ह अनियाय के कमई ले अपन घर ला बनाथे, अऊ बरबादी ले बांचे बर अपन खोंधरा ऊंचहा जगह म बनाथे!
HAB 2:10 अपन ही घर ला लज्जित करके अऊ अपन ही परान ला जोखिम म डालके तेंह बहुंते मनखेमन के बिनास के उपाय करे हस।
HAB 2:11 दीवार के पथरामन चिचियाहीं, अऊ लकरी के बल्लीमन येकर जबाब दीहीं।
HAB 2:12 “ओकर ऊपर हाय, जऊन ह लहू बोहाके एक सहर ला बनाथे अऊ अनियाय करके नगर ला बसाथे।
HAB 2:13 का सर्वसक्तिमान यहोवा ह ये बात ला नइं ठान ले हवय कि मनखेमन के मेहनत ह सिरिप आगी बारे के लकरी सहीं अय, अऊ जाति-जाति के मनखेमन बेकार म मेहनत करथें?
HAB 2:14 काबरकि धरती ह यहोवा के महिमा के गियान ले अइसन भर जाही जइसन पानी समुंदर म भरे रहिथे।
HAB 2:15 “ओकर ऊपर हाय, जऊन ह अपन परोसीमन ला मंद पीयाथे, अऊ ओमन ला चाम के थैली ले तब तक ढारके देवत रहिथे, जब तक कि ओमन पीके मतवाला नइं हो जावंय, ताकि ओह ओमन के नंगरा देहें ला निहार सकय!
HAB 2:16 तेंह महिमा के बदले लाज ले भर जाबे। अब तोर पारी ए! तेंह पी अऊ तोर नंगई ह दिखय! यहोवा के जेवनी हांथ के कटोरा तोर मेर आवत हे, अऊ कलंक ह तोर महिमा ला ढांप दीही।
HAB 2:17 तेंह जऊन हिंसा के काम लबानोन म करे हस, ओमन तोला बियाकुल करहीं, अऊ पसुमन के जऊन बिनास तेंह करे हस, ओह तोला भयभीत करही। काबरकि तेंह मनखेमन के लहू बहाय हस; तेंह देस, सहर अऊ उहां के सब निवासीमन ला नास करे हस।
HAB 2:18 “एक कारीगर के दुवारा बनाय गे मूरती के का महत्व? या ओ मूरती ले का लाभ, जऊन ह झूठ बोले बर सिखोथे? काबरकि जऊन ह येला बनाथे, ओह अपनेच बनाय चीज ऊपर भरोसा करथे; ओह मूरतीमन ला बनाथे, जेमन गोठियाय नइं सकंय।
HAB 2:19 ओकर ऊपर हाय, जऊन ह कठवा ले कहिथे, ‘जी उठ!’ या निरजीव पथरा ले कहिथे, ‘उठ!’ का येह सिखो सकथे? येला सोन अऊ चांदी ले मढ़े जाथे; ओमा सांस नइं ए।”
HAB 2:20 यहोवा ह अपन पबितर मंदिर म हवय; पूरा धरती ह ओकर आघू म सांत रहे।
HAB 3:1 सिग्योनोत के रीति म, हबक्कूक अगमजानी के एक पराथना।
HAB 3:2 हे यहोवा, मेंह तोर बड़ई ला सुने हंव; हे यहोवा, मेंह तोर काममन ला देखके भयभीत होथंव। हमर दिन म ओमन ला फेर दोहरा, हमर समय म ओ काममन ला बता; अपन कोप म भी अपन दया ला सुरता रख।
HAB 3:3 परमेसर ह तेमान देस ले आईस, पबितर परमेसर ह पारान पहाड़ ले आईस। ओकर महिमा ह अकास ला ढांप दीस अऊ ओकर इस्तुति ले धरती ह भर गीस।
HAB 3:4 ओकर सोभा ह सूरज निकले सहीं रिहिस; ओकर हांथ ले किरन निकलत रिहिस, जिहां ओकर सामर्थ ह छिपे रिहिस।
HAB 3:5 ओकर आघू-आघू महामारी फईलत जात रिहिस; महारोग ओकर पाछू-पाछू चलत रिहिस।
HAB 3:6 ओह ठाढ़ होके धरती ला कंपा दीस; ओह देखिस, अऊ जाति-जाति के मनखेमन ला कंपा दीस। पुराना पहाड़मन कुटा-कुटा हो गीन अऊ पुराना पहाड़ीमन गिर गीन— पर ओह हमेसा ही आघू बढ़त रहिथे।
HAB 3:7 मेंह कूसान के तम्बू म रहइयामन ला दुख म, अऊ मिदयान देस के रहइयामन ला पीरा म पड़े देखेंव।
HAB 3:8 हे यहोवा, का तेंह नदीमन ऊपर गुस्सा करे? का तोर कोप ह पानी के सोतामन ऊपर रिहिस? का तेंह समुंदर ऊपर कोरोध करे जब तेंह जय पाय बर अपन घोड़ामन ऊपर अऊ अपन रथमन ऊपर सवारी करे?
HAB 3:9 तेंह अपन धनुस ला ओकर खोल ले निकाले, तेंह बहुंत अकन तीर ला मंगाय। तेंह नदीमन ले धरती ला बांट देय;
HAB 3:10 पहाड़मन तोला देखके कांप गीन। भारी पानी तेजी से बहे लगिस; गहिला समुंदर गरज उठिस अऊ ओमा बड़े-बड़े लहरामन उठे लगिन।
HAB 3:11 तोर उड़त तीरमन के चमक ले, तोर चमचमात भाला के तेज ले सूरज अऊ चंदा अकास म ठहर गीन।
HAB 3:12 तेंह कोरोध म आके धरती ऊपर तेजी से रेंगय अऊ रिस म आके जाति-जाति के मनखेमन ला रऊंद देय।
HAB 3:13 तेंह अपन मनखेमन के छुटकारा, अऊ अपन अभिसिक्त जन ला बचाय बर बाहिर निकले। तेंह दुस्ट देस के अगुवा ला कुचर देय, ओला मुड़ ले लेके गोड़ तक नंगरा कर देय।
HAB 3:14 तेंह ओकरेच भाला ले ओकर मुड़ ला छेद देय जब ओकर सैनिकमन हमन ला तितिर-बितिर करे बर हमर ऊपर टूट पड़िन, ओमन अइसन देखत रिहिन, मानो लुकाय दुस्ट मनखेमन ला नास करइया हवंय।
HAB 3:15 तेंह अपन घोड़ामन के दुवारा समुंदर ला खदमदात, ओकर भयंकर पानी ला मथ डारे।
HAB 3:16 मेंह सुनेंव अऊ मोर मन ह टूट गीस, ओ अवाज सुनके मोर ओंठ ह कांपे लगिस; मोर हाड़ामन सरे लगिन, अऊ मोर गोड़मन कांपे लगिन। तभो ले, मेंह धीरज धरके ओ जाति के मनखेमन ऊपर अवइया बिपत्ति के दिन के बाट जोहत रहिहूं, जेमन हमर ऊपर हमला करत हवंय।
HAB 3:17 चाहे अंजीर के रूख म अंकुर झन निकलय अऊ अंगूर के नार म अंगूर झन फरय, चाहे जैतून के रूख म फर झन लगंय अऊ खेत म अनाज झन होवय। चाहे बाड़ा म कोनो भेड़ झन रहंय अऊ कोठा म कोनो पसु झन होवंय,
HAB 3:18 तभो ले मेंह यहोवा म आनंद मनाहूं, मेंह परमेसर अपन उद्धारकर्ता म आनंदित होहूं।
HAB 3:19 परमपरधान यहोवा ह मोर बल अय; ओह मोर पांव ला हिरन के पांव सहीं बना देथे, ओह मोला ऊंच जगह म चले के लईक बनाथे। संगीत निरदेसक बर। मोर तारवाले बाजामन के संग।
ZEP 1:1 आमोन के बेटा, यहूदा प्रदेस के राजा योसियाह के सासनकाल म यहोवा के बचन ह सपनयाह करा आईस; सपनयाह ह कूसी के बेटा, कूसी ह गदलयाह के बेटा, गदलयाह ह अमरयाह के बेटा अऊ अमरयाह ह हिजकियाह के बेटा रिहिस:
ZEP 1:2 “मेंह धरती के जम्मो चीज ला नास करहूं,” यहोवा ह घोसना करत हे।
ZEP 1:3 “मेंह मनखे अऊ पसु दूनों ला नास कर दूहूं; मेंह अकास के चिरई अऊ समुंदर के मछरीमन ला नास कर दूहूं— अऊ मूरतीमन ला नास कर दूहूं, जेमन दुस्ट मनखे के गिरे के कारन बनथें।” “जब में जम्मो मानव-जाति ला धरती ले मिटा दूहूं,” यहोवा ह घोसना करत हे,
ZEP 1:4 “तब मेंह यहूदा के बिरूध अऊ यरूसलेम के जम्मो रहइयामन के बिरूध अपन हांथ बढ़ाहूं। मेंह ये ठऊर ले बाल देवता के उपासना करइया जम्मो बांचे मनखेमन ला, अऊ मूरती-पूजा करइया जम्मो पुरोहितमन के नांव ला घलो मेटा दूहूं—
ZEP 1:5 जऊन मन अपन घर के छानीमन म अकास के तारामन ला गिरके दंडवत करथें, जऊन मन झुकके यहोवा के कसम खाथें अऊ जऊन मन मोलेक देवता के घलो कसम खाथें,
ZEP 1:6 जेमन यहोवा के पाछू चले बर छोंड़ देथें अऊ न तो यहोवा के खोज करथें अऊ न ही ओकर ईछा जाने के कोसिस करथें, ओ जम्मो ला मेटा दूहूं।”
ZEP 1:7 परमपरधान यहोवा के आघू म चुपे रहव, काबरकि यहोवा के दिन ह लकठा म हवय। यहोवा ह एक बलिदान तियार करे हवय; ओह ओमन ला पबितर करे हवय, जेमन ला ओह नेवता देय हवय।
ZEP 1:8 “यहोवा के ठहिराय बलिदान के दिन मेंह अधिकारीमन ला अऊ राजामन के बेटामन ला अऊ ओ जम्मो जेमन बिदेसी ओनहा पहिरथें ओ जम्मो झन ला सजा दूहूं।
ZEP 1:9 ओ दिन मेंह ओमन ला सजा दूहूं जऊन मन मंदिर के दुवार म आय ले बचथें, जऊन मन अपन देवतामन के मंदिर ला हिंसा अऊ छल ले भर देथें।
ZEP 1:10 “ओ दिन” यहोवा ह घोसना करत हे, “मछरी दुवार ले पुकारे के अऊ नवां निवास ले बिलाप के अऊ पहाड़ीमन ले बहुंत जोर से धमाका के अवाज सुनई दीही।
ZEP 1:11 तुमन, जेमन बजारवाले इलाका म रहिथव, बिलाप करव; तुम्हर सबो बेपारीमन ला, ओ जम्मो ला, जेमन चांदी के बेपार करथें, नास कर दिये जाही।
ZEP 1:12 ओ समय, मेंह दीया धरके यरूसलेम म खोजहूं, अऊ ओमन ला दंड दूहूं, जेमन अपनआप म खुस हवंय, जेमन पेंदी म छोंड़े गय अंगूर के मंद के मईल कस अंय, जेमन ये सोचथें, ‘यहोवा ह कुछू नइं करही, न भलई करही अऊ न ही बुरई।’
ZEP 1:13 ओमन के धन-दौलत लूट लिये जाही, ओमन के घरमन गिर जाहीं। हालाकि ओमन घर बनाहीं, पर ओमन ओमा रहे बर नइं पाहीं; हालाकि ओमन अंगूर के बारी लगाहीं, पर ओमन ओकर ले अंगूर के मंद पीये बर नइं पाहीं।”
ZEP 1:14 यहोवा के भयानक दिन ह लकठा म हवय— येह लकठा म हवय अऊ जल्दी आवत हे। यहोवा के दिन के रोवई ह भयंकर ए; बड़े बीर घलो दुख के मारे चिचियाथे।
ZEP 1:15 ओ दिन ह कोप के दिन होही— संकट अऊ पीरा के दिन, समस्या अऊ बिनास के दिन, अंधियार अऊ उदासी के दिन, करिया बादर अऊ अंधियार के दिन होही—
ZEP 1:16 गढ़वाले सहरमन के बिरूध अऊ कोनटा के मीनारमन के बिरूध ओह तुरही फूंके अऊ लड़ई के ललकार के दिन होही।
ZEP 1:17 “मेंह जम्मो मनखेमन ऊपर अइसन बिपत्ति लानहूं कि ओमन अंधरा मनखे कस टमड़हीं, काबरकि ओमन यहोवा के बिरोध म पाप करे हवंय। ओमन के लहू ला धुर्रा कस अऊ ओमन के अंतड़ी ला गोबर कस फटिक दिये जाही।
ZEP 1:18 यहोवा के कोप के दिन न तो ओमन के सोन अऊ न ही ओमन के चांदी ओमन ला बचा सकही।” ओकर जलन के आगी म जम्मो धरती ह भसम हो जाही, काबरकि ओह ओ जम्मो के अचानक अन्त कर दीही जेमन धरती म रहिथें।
ZEP 2:1 हे बेसरम जाति के मनखेमन, एक संग जूरव, तुमन एक संग जूरव,
ZEP 2:2 एकर पहिली कि हुकूम ह लागू होवय अऊ दिन ह भूंसा कस निकल जावय, एकर पहिली कि यहोवा के भयंकर कोरोध ह तुम्हर ऊपर भड़कय, एकर पहिली कि यहोवा के कोप के दिन ह तुम्हर ऊपर आ जावय।
ZEP 2:3 तुमन जम्मो, जेमन देस के नम्र मनखे अव, तुमन जेमन यहोवा के हुकूम ला मानथव, यहोवा के खोज म रहव। धरमीपन के खोज म रहव, नम्र बनव; सायद यहोवा के कोप के दिन म तुमन ला आसरय मिल जावय।
ZEP 2:4 गाजा सहर ला तियाग देय जाही, अऊ अस्कलोन सहर ह बरबाद हो जाही असदोद सहर ला मंझनियां खाली कर देय जाही, अऊ एकरोन सहर ला उखान देय जाही।
ZEP 2:5 तुमन ऊपर हाय, जेमन समुंदर तीर म रहिथव, हे करेती मनखेमन, तुमन ऊपर हाय; हे कनान, पलिस्तीमन के देस, यहोवा के बचन ह तोर बिरूध हवय। ओह कहिथे, “मेंह तुमन ला नास कर दूहूं, कोनो नइं बांचय।”
ZEP 2:6 समुंदर तीर के भुइयां ह चरागन हो जाही, जिहां चरवाहामन बर कुआं अऊ पसु के झुंड बर बाड़ा होही।
ZEP 2:7 ओ देस ह यहूदा के घराना के बांचे मनखेमन के देस होही; उहां ओमन ला चरागन मिलही। सांझ के बेरा, ओमन अस्कलोन के घरमन म लेटके अराम करहीं। यहोवा ओमन के परमेसर ह उहां ओमन के देखरेख करही; ओह ओमन के धन-दौलत ला घलो लहुंटाही।
ZEP 2:8 “मेंह मोआबीमन के बेजत्ती के बात अऊ अमोनीमन के ताना ला सुने हंव, ओमन मोर मनखेमन के बेजत्ती करिन अऊ ओमन के देस ला छीन लेय के धमकी दीन।
ZEP 2:9 एकरसेति, मोर जिनगी के सपथ,” सर्वसक्तिमान यहोवा, इसरायल के परमेसर ह घोसना करत हे, “सही म मोआब ह सदोम कस, अऊ अमोनीमन अमोरा कस हो जाहीं— येमन कांदी-कचरा के ठऊर अऊ नून के खंचवामन हो जाहीं, येमन हमेसा बर उजड़ जाहीं। मोर बांचे मनखेमन ओमन ला लूट लीहीं; मोर जाति के बांचे मनखेमन ओमन के देस ऊपर अधिकार कर लीहीं।”
ZEP 2:10 ओमन के घमंड करे अऊ सर्वसक्तिमान यहोवा के मनखेमन के अपमान करे अऊ हंसी उड़ाय के ओमन ला ये परतिफल मिलही।
ZEP 2:11 यहोवा के भय ओमन म पईदा होही जब यहोवा ह धरती के जम्मो देवतामन ला नास कर दीही। दूरिहा-दूरिहा के जाति-जाति के जम्मो मनखेमन अपन-अपन देस म यहोवा ला झुकके दंडवत करहीं।
ZEP 2:12 “हे कूसी मनखेमन, तुमन घलो मोर तलवार ले मारे जाहू।”
ZEP 2:13 यहोवा ह उत्तर दिग के बिरूध अपन हांथ बढ़ाही अऊ अस्सूर देस ला नास कर दीही, अऊ नीनवे सहर ला पूरा उजारके मरू-भुइयां सहीं सूखा छोंड़ दीही।
ZEP 2:14 गरूवा-बईला अऊ भेड़-बकरीमन अऊ जम्मो किसम के जीव-जन्तुमन उहां अराम करहीं। ओकर खंभामन म मरू-भुइयां के उल्लू अऊ चिचियानेवाला उल्लूमन बसेरा करहीं। खिड़कीमन ले ओ उल्लूमन के अवाज सुनई दीही, पथरा के कुटामन ले कपाट के रसतामन भर जाहीं, देवदार लकरी के बल्लामन उघर जाहीं।
ZEP 2:15 येह ओ चहल-पहल वाले सहर के स्थिति अय जऊन ह एक समय सुरकछित रिहिस। ओह अपनआप ला कहय, “मेंह अकेला अंव! मोला छोंड़ अऊ कोनो दूसरा नइं ए।” अब ओह कइसन उजर गे हवय, जंगली पसुमन के एक मांद बन गे हवय! ओ जम्मो, जेमन उहां ले होके जाथें, ओमन एकर हंसी उड़ाथें अऊ अपन हांथ ला झटकारथें।
ZEP 3:1 दुख देवइया, बिदरोही अऊ असुध मनखेमन के सहर ऊपर हाय!
ZEP 3:2 ओह काकरो बात ला नइं मानय, अऊ न ही काकरो सलाह ला स्वीकार करय। ओह यहोवा ऊपर भरोसा नइं करय, ओह अपन परमेसर के लकठा म नइं आवय।
ZEP 3:3 ओकर अधिकारीमन ओकर भीतर दहाड़त सेर कस, अऊ ओकर सासन करइयामन सांझ के बेरा सिकार करइया ओ भेड़ियामन कस अंय, जेमन बिहनियां बर कुछू ला नइं बचांय।
ZEP 3:4 ओकर अगमजानीमन सही मनखे नो हंय; ओमन बिसवासघाती अंय। ओकर पुरोहितमन पबितर-स्थान ला अपबितर करथें अऊ ओमन कानून ला टोरथें।
ZEP 3:5 यहोवा, जऊन ह ओकर भीतर हवय, ओह धरमी अय; ओह कोनो गलत काम नइं करय। रोज बिहनियां ओह अपन नियाय ला परगट करथे, अऊ कोनो दिन ओह कोनो बात म नइं चुकय, तभो ले अधरमीमन ला लाज नइं आवय।
ZEP 3:6 “मेंह जाति-जाति के मनखेमन ला नास करे हंव; अऊ ओमन के गढ़मन ला गिरा देय गे हवय। मेंह ओमन के गलीमन ला सुन्ना कर दे हंव, अऊ ओ गलीमन ले होके कोनो नइं जावंय। ओमन के सहरमन उजर गे हवंय; ओमन ला छोंड़ देय गे हवय अऊ ओमन खाली हवंय।
ZEP 3:7 यरूसलेम के बारे म मोर ये बिचार रिहिस, ‘तेंह जरूर मोर भय मानबे अऊ मोर सलाह ला मानबे!’ तब ओकर सरन-स्थान ला न तो नास करे जातिस, अऊ न ही मोर कोनो दंड ओमन ऊपर आतिस, पर ओमन तब भी अपन जम्मो काम म उत्सुक होके बुरई के काम करे लगिन।
ZEP 3:8 एकर कारन मोर बर ओ दिन के इंतजार करव,” यहोवा ह घोसना करत हे, “जब मेंह गवाही देय बर ठाढ़ होहूं। मेंह ठान ले हंव कि मेंह जाति-जाति के मनखे, अऊ राज-राज के मनखेमन ला इकट्ठा करहूं अऊ ओमन ऊपर अपन कोप परगट करहूं— मोर पूरा भयानक गुस्सा। मोर जलन के कोरोध के आगी ले पूरा संसार ह जलके नास हो जाही।
ZEP 3:9 “तब में मनखेमन के ओंठ ला सुध करहूं, ताकि ओमन जम्मो झन यहोवा के नांव ला पुकारंय अऊ कंधा ले कंधा मिलाके ओकर सेवा करंय।
ZEP 3:10 कूस के नदीमन के ओ पार ले मोर अराधना करइया, मोर तितिर-बितिर होय मनखेमन मोर बर चढ़ावा लानहीं।
ZEP 3:11 हे यरूसलेम, ओ दिन, तोला मोर बिरूध करे गय खराप काम के कारन लज्जित होय बर नइं पड़य, काबरकि मेंह तोर बीच ले तोर जिद्दी घमंडी मनखेमन ला निकाल दूहूं। अऊ तेंह मोर पबितर पहाड़ी ऊपर फेर कभू घमंड नइं करबे।
ZEP 3:12 पर मेंह तुम्हर बीच म सिरिप नम्र अऊ दीन मनखेमन ला रहन दूहूं। इसरायल के बांचे मनखेमन यहोवा के नांव म भरोसा करहीं।
ZEP 3:13 ओमन कोनो गलत काम नइं करहीं; ओमन लबारी नइं मारहीं। ओमन के मुहूं ले कोनो छल के बात नइं निकलही। ओमन खाहीं अऊ अराम करहीं अऊ कोनो ओमन ला नइं डराहीं।”
ZEP 3:14 हे बेटी सियोन, गा; हे इसरायल, जय-जयकार कर! हे बेटी यरूसलेम, खुसी रह अऊ अपन पूरा मन से आनंद मना!
ZEP 3:15 यहोवा ह तोर दंड ला दूरिहा कर दे हवय, ओह तोर बईरीमन ला हटा दे हवय। यहोवा, इसरायल के राजा ह तोर संग हवय; फेर कभू तोला कोनो हानि के डर नइं होही।
ZEP 3:16 ओ दिन ओमन यरूसलेम ले कहिहीं, “हे सियोन, झन डर; तोर हांथ ह दुरबल झन होवय।
ZEP 3:17 यहोवा, तोर परमेसर ह तोर संग हवय, ओह बड़े सूरबीर अय, जऊन ह तोला बचाथे। ओह तोर कारन बहुंत आनंदित होही; अपन मया म ओह तोला फेर कभू नइं डांटही, पर तोर कारन ओह गीत गावत आनंदित होही।”
ZEP 3:18 “मेंह ओ सबो झन ला तोर बीच ले हटा दूहूं जऊन मन तोर ठहिराय तिहारमन के हट जाय के कारन दुखी हवंय, जऊन ह तोर बर एक बोझा अऊ कलंक अय।
ZEP 3:19 ओ समय मेंह ओ जम्मो झन ले लेखा लूहूं जेमन तोला दुख देय रिहिन। मेंह खोरवा मनखे ला बचाहूं; अऊ बंधुवामन ला संकेलहूं। मेंह ओमन ला हर ओ देस म महिमा अऊ आदर दूहूं जिहां ओमन लज्जित होवत रिहिन।
ZEP 3:20 ओ समय मेंह तुमन ला संकेलहूं; ओ समय मेंह तुमन ला घर ले आनहूं। मेंह धरती के जम्मो मनखेमन के बीच तुमन ला आदर अऊ महिमा दूहूं जब मेंह तुम्हर आंखी के आघू म तुम्हर खुसहाली जिनगी ला लहुंटा लानहूं,” यहोवा ह कहत हे।
HAG 1:1 दारा राजा के सासनकाल के दूसर साल के छठवां महिना के पहिली दिन, यहोवा के ये बचन, हाग्गै अगमजानी के दुवारा, सालतीएल के बेटा जरूब्बाबेल करा, जऊन ह यहूदा के राजपाल रिहिस, अऊ योसादाक के बेटा यहोसू महा पुरोहित करा पहुंचिस:
HAG 1:2 सर्वसक्तिमान यहोवा ह ये कहत हे: “ये मनखेमन कहिथें, ‘यहोवा के भवन ला फेर बनाय के समय अभी नइं आय हवय।’ ”
HAG 1:3 तब यहोवा के बचन हाग्गै अगमजानी के दुवारा आईस:
HAG 1:4 “का ये समय ए कि तुमन खुद अपन बढ़िया घर म रहव, अऊ ये घर ह उजार परे रहय?”
HAG 1:5 अब सर्वसक्तिमान यहोवा ह ये कहत हे: “अपन चालचलन ऊपर सही धियान देवव।
HAG 1:6 तुमन बहुंते बोय रहेव, पर कम फसल मिलिस। तुमन खाथव, पर तुम्हर पेट कभू नइं भरय। तुमन पीथव, पर तुम्हर पीयास कभू नइं बुझय। तुमन ओनहा पहिरथव, पर ओकर ले तुमन ला गरमी नइं मिलय। तुमन मजदूरी कमाथव, पर येह कइसन खरचा हो जाथे, तुमन ला पता नइं चलय।”
HAG 1:7 सर्वसक्तिमान यहोवा ह ये कहत हे: “अपन चालचलन ऊपर सही धियान देवव।
HAG 1:8 ऊपर पहाड़मन म जावव अऊ इमारती लकरी खाल्हे लानके मोर भवन ला बनावव, ताकि येकर से मोला खुसी मिलय अऊ मोर आदर होवय,” यहोवा ह कहत हे।
HAG 1:9 “तुमन बहुंत फसल पाय के आसा करत रहेव, पर थोरकन ही मिलिस। अऊ जब तुमन ओला घर लेके आयेव, त मेंह ओला उड़ा देंव। काबर?” सर्वसक्तिमान यहोवा ह घोसना करत हे। “काबरकि मोर भवन ह उजार परे हवय, अऊ तुमन म ले हर एक झन अपन-अपन घर म ब्यस्त हवव।
HAG 1:10 एकरसेति, तुम्हर कारन ही अकास ह ओस गिरई अऊ धरती ह अनाज उपजई ला बंद कर दे हवय।
HAG 1:11 मेंह हुकूम दे हंव कि खेत अऊ पहाड़मन म, अनाज, नवां अंगूर के मंद, जैतून तेल म अऊ भुइयां के हर एक ऊपज म, मनखे अऊ घरेलू-पसुमन म, अऊ तुम्हर हांथ के जम्मो मेहनत म अकाल पड़य।”
HAG 1:12 तब सालतीएल के बेटा जरूब्बाबेल, योसादाक के बेटा यहोसू महा पुरोहित, अऊ जम्मो बांचे मनखेमन यहोवा, अपन परमेसर के गोठ अऊ हाग्गै अगमजानी के संदेस के पालन करिन, काबरकि यहोवा ओमन के परमेसर ह ओला भेजे रिहिस। अऊ मनखेमन यहोवा के भय मानिन।
HAG 1:13 तब यहोवा के संदेसिया, हाग्गै ह मनखेमन ला यहोवा के ये संदेस दीस: “मेंह तुम्हर संग हवंव,” यहोवा ह घोसना करत हे।
HAG 1:14 तब यहोवा ह सालतीएल के बेटा जरूब्बाबेल के आतमा ला, जऊन ह यहूदा के राजपाल रिहिस, अऊ योसादाक के बेटा यहोसू महा पुरोहित के आतमा ला, अऊ जम्मो बांचे मनखेमन के आतमा ला उभारिस। ओमन आईन अऊ सर्वसक्तिमान यहोवा, अपन परमेसर के भवन ला फेर बनाय के सुरू करिन,
HAG 1:15 ये काम छठवां महिना के चौबीसवां दिन सुरू होईस। राजा दारा के सासनकाल के दूसर बछर म,
HAG 2:1 सातवां महिना के इक्कीसवां दिन, यहोवा के बचन ह हाग्गै अगमजानी के दुवारा पहुंचिस:
HAG 2:2 “सालतीएल के बेटा, यहूदा के राजपाल जरूब्बाबेल, अऊ योसादाक के बेटा यहोसू महा पुरोहित, अऊ जम्मो बांचे मनखेमन ले गोठिया। ओमन ले पुछ,
HAG 2:3 ‘तुमन म ले अब कोन बांचे हवय, जऊन ह ये भवन ला येकर पहिली के महिमा म देखे हवय? अब येह तुमन ला का दसा म दिखत हवय? का तुमन ला ये नइं लगत हे कि येमा अब कुछू नइं रही गे हवय?
HAG 2:4 पर अब, हे जरूब्बाबेल, मजबूत बन,’ यहोवा ह घोसना करत हे। ‘हे योसादाक के बेटा यहोसू महा पुरोहित, मजबूत बन। हे देस के जम्मो मनखेमन, मजबूत बनव,’ यहोवा ह घोसना करत हे, ‘अऊ काम करव। काबरकि मेंह तुम्हर संग हवंव,’ सर्वसक्तिमान यहोवा ह घोसना करत हे।
HAG 2:5 ‘जब मिसर देस ले तुमन निकले रहेव, तब मेंह तुमन ले ये करार करे रहेंव। अऊ मोर आतमा ह तुम्हर बीच म हवय। तुमन झन डरव।’
HAG 2:6 “सर्वसक्तिमान यहोवा ह ये कहत हे: ‘थोरकन समय बाद, एक बार फेर मेंह अकास अऊ धरती, समुंदर अऊ सूखा भुइयां ला कंपाहूं।
HAG 2:7 मेंह जम्मो देसमन ला कंपाहूं, अऊ जम्मो जाति के मनखेमन के ईछा ह पूरा होही, अऊ मेंह ये भवन ला महिमा ले भर दूहूं,’ सर्वसक्तिमान यहोवा ह कहत हे।
HAG 2:8 ‘चांदी ह मोर अय अऊ सोन ह घलो मोर अय,’ सर्वसक्तिमान यहोवा ह घोसना करत हे।
HAG 2:9 ‘ये अभी के भवन के महिमा ह पहिले भवन के महिमा ले बढ़के होही,’ सर्वसक्तिमान यहोवा ह कहत हे। ‘अऊ ये जगह म मेंह सांति दूहूं,’ सर्वसक्तिमान यहोवा ह घोसना करत हे।”
HAG 2:10 राजा दारा के सासनकाल के दूसर साल के नौवां महिना के चौबीसवां दिन, यहोवा के बचन हाग्गै अगमजानी करा पहुंचिस:
HAG 2:11 “सर्वसक्तिमान यहोवा ह ये कहत हे: ‘पुरोहितमन ले पुछ कि कानून ह का कहिथे:
HAG 2:12 यदि कोनो मनखे अपन ओढ़ना म लपेटके पबितर मांस ले जाथे, अऊ ओ ओढ़ना ले कोनो रोटी या खाना, कुछू अंगूर के मंद, जैतून तेल या कोनो आने जेवन छू जाथे, त का ओ चीज घलो पबितर हो जाही?’ ” पुरोहितमन जबाब दीन, “नइं।”
HAG 2:13 तब हाग्गै ह पुछिस, “कोनो लास ला छुए के सेति यदि कोनो मनखे ह असुध हवय, अऊ ओह येमा के कोनो चीज ला छू लेथे, त का ओ चीज घलो असुध हो जाही?” पुरोहितमन जबाब दीन, “हव, ओह असुध हो जाही।”
HAG 2:14 तब हाग्गै ह कहिस, “ ‘मोर नजर म ये मनखेमन अऊ ये जाति घलो अइसनेच अंय,’ यहोवा ह घोसना करत हे। ‘जऊन कुछू ओमन करथें अऊ जऊन कुछू ओमन उहां चघाथें, ओह असुध अय।
HAG 2:15 “ ‘अब धियान देके आज ले ये बात ऊपर बिचार करव—सोच-बिचार करव कि पहिले चीजमन कइसे रिहिन, जब यहोवा के मंदिर म एक पथरा ऊपर दूसर पथरा नइं रखे गे रिहिस।
HAG 2:16 ओ समय, जब कोनो बीस नाप अनाज के ढेर के आसा म आवय, त ओला सिरिप दस नाप ही मिले। जब कोनो अंगूर के मंद के कुंड ले पचास नाप मंद लेय बर जावय, त उहां ओला सिरिप बीस ही मिले।
HAG 2:17 मेंह तुम्हर जम्मो खेती के काम म सूखा अऊ गेरूई रोग लानेंव अऊ फसल ऊपर करा गिरायेंव, तभो ले तुमन मोर मेर लहुंटके नइं आयेव,’ यहोवा ह घोसना करत हे।
HAG 2:18 ‘आज ले, नौवां महिना के ये चौबीसवां दिन ले ओ दिन के बारे म धियान देके सोच-बिचार करव, जब यहोवा के मंदिर के नीव डारे गे रिहिस। धियान देके सोच-बिचार करव:
HAG 2:19 का अभी तक ले कोनो बीजा ह कोठार म परे हवय? अभी तक ले अंगूर के नार, अंजीर के रूख, अनार के रूख अऊ जैतून के रूख म फर नइं लगे हवंय। “ ‘पर आज ले में तुमन ला आसीस दूहूं।’ ”
HAG 2:20 ओही महिना के चौबीसवां दिन, दूसर बार यहोवा के बचन हाग्गै करा आईस:
HAG 2:21 “यहूदा के राजपाल जरूब्बाबेल ला कह कि मेंह अकास अऊ धरती ला कंपाहूं।
HAG 2:22 मेंह राज सिंघासनमन ला उलट दूहूं अऊ बिदेसी राजमन के सक्ति ला चकनाचूर कर दूहूं। मेंह रथ अऊ ओमन के सारथीमन ला पटक दूहूं; घोड़ामन सहित ओमन के घुड़सवारमन एक-दूसर के तलवार ले मारे जाहीं।
HAG 2:23 “ ‘ओ दिन,’ सर्वसक्तिमान यहोवा ह घोसना करत हे, ‘हे सालतीएल के बेटा मोर सेवक जरूब्बाबेल, मेंह तोला लूहूं,’ यहोवा ह घोसना करत हे, ‘अऊ मेंह तोला अपन मुहरवाला मुंदरी सहीं बना दूहूं, काबरकि मेंह तोला चुने हवंव,’ सर्वसक्तिमान यहोवा ह घोसना करत हे।”
ZEC 1:1 राजा दारा के राज के दूसर बछर के आठवां महिना म यहोवा के ये बचन बेरेकियाह के बेटा अऊ इद्दो के पोता जकरयाह अगमजानी करा आईस:
ZEC 1:2 “यहोवा ह तोर पुरखामन ले बहुंत कोरोधित रिहिस।
ZEC 1:3 एकरसेति मनखेमन ला बता: सर्वसक्तिमान यहोवा ह ये कहत हे: ‘मोर करा लहुंट आवव,’ सर्वसक्तिमान यहोवा ह घोसना करत हे, ‘त मेंह घलो तुम्हर करा लहुंट आहूं,’ सर्वसक्तिमान यहोवा ह कहत हे।
ZEC 1:4 अपन पुरखामन कस झन बनव, जेमन ला पहिले के अगमजानीमन घोसना करके बताय रिहिन: सर्वसक्तिमान यहोवा ह ये कहत हे: ‘अपन खराप चालचलन अऊ अपन खराप काममन ला छोंड़ देवव।’ पर ओमन न तो मोर बात ला सुनिन अऊ न ही मोर कोति धियान दीन, यहोवा ह घोसना करत हे।
ZEC 1:5 तुम्हर पुरखामन अब कहां हवंय? अऊ अगमजानीमन, का ओमन सदाकाल बर जीयत हवंय?
ZEC 1:6 पर मोर बचन अऊ मोर कानून, जेला मेंह अपन सेवक अगमजानीमन ला दे रहेंव, का ओमन तुम्हर पुरखामन के मिरतू के बाद घलो बने नइं हवंय? “तब ओमन पछताप करिन अऊ कहिन, ‘सर्वसक्तिमान यहोवा ह ठीक वइसने ही करे हवय जइसने कि हमर चालचलन अऊ हमर काममन के कारन हमर संग करे जाना चाही, जइसे कि ओह करे के ठाने रिहिस।’ ”
ZEC 1:7 राजा दारा के राज के दूसरा साल के गियारहवां महिना याने कि सेबात महिना के चौबीसवां दिन यहोवा के ये बचन बेरेकियाह के बेटा अऊ इद्दो के पोता जकरयाह अगमजानी करा पहुंचिस।
ZEC 1:8 रथिया मेंह एक दरसन देखेंव कि मोर आघू म लाल घोड़ा म बईठे एक मनखे रिहिस। ओह घाटी म मेंहदी के रूखमन के बीच म खड़े रिहिस, अऊ ओकर पाछू लाल, भुरवा अऊ सादा रंग के घोड़ामन रिहिन।
ZEC 1:9 तब मेंह पुछेंव, “हे मोर परभू, येमन का अंय?” जऊन स्वरगदूत ह मोर ले गोठियावत रिहिस, ओह जबाब दीस, “मेंह तोला देखाहूं कि येमन का अंय।”
ZEC 1:10 तब जऊन मनखे ह मेंहदी के रूखमन के बीच खड़े रिहिस, ओह कहिस, “येमन ओ अंय, जेमन ला यहोवा ह जम्मो धरती म पठोय हवय।”
ZEC 1:11 अऊ ओमन यहोवा के ओ स्वरगदूत ला बताईन जऊन ह मेंहदी के रूखमन के बीच म खड़े रिहिस, “हमन जम्मो धरती म गे रहेंन अऊ देखेंन कि जम्मो धरती म अराम अऊ सांति हवय।”
ZEC 1:12 तब यहोवा के स्वरगदूत ह कहिस, “हे सर्वसक्तिमान यहोवा, तेंह यरूसलेम अऊ यहूदा के सहरमन ऊपर पिछले सत्तर साल ले कोरोधित हवस, कब तक तेंह येमन ऊपर दया नइं करबे?”
ZEC 1:13 तब यहोवा ह ओ स्वरगदूत ला, जऊन ह मोर ले गोठियावत रिहिस, दया अऊ सांति के बचन कहिस।
ZEC 1:14 तब ओ स्वरगदूत जऊन ह मोर ले गोठियावत रिहिस, ओह कहिस, “ये बातमन के घोसना कर: सर्वसक्तिमान यहोवा ये कहत हे: ‘यरूसलेम अऊ सियोन बर मोर अब्बड़ जलन हवय,
ZEC 1:15 अऊ में ओ जातिमन ले बहुंत कोरोधित हवंव, जऊन मन अराम म हवंय। पहिली मेंह थोरकन कोरोधित रहेंव, पर ओमन खुदे अपन सजा ला बढ़ा ले हवंय।’
ZEC 1:16 “एकरसेति यहोवा ह ये कहत हे: ‘मेंह दया करे बर यरूसलेम लहुंटहूं, अऊ उहां मोर घर ला फेर बनाय जाही। अऊ यरूसलेम के ऊपर नापे के डोरी ला खींचे जाही,’ सर्वसक्तिमान यहोवा ह घोसना करत हे।”
ZEC 1:17 “ये घलो घोसना कर: सर्वसक्तिमान यहोवा ह ये कहत हे: ‘मोर नगरमन फेर उत्तम चीजमन ले भर जाहीं, अऊ यहोवा ह फेर सियोन ला सांति दीही अऊ यरूसलेम ला चुन लीही।’ ”
ZEC 1:18 तब मेंह देखेंव, अऊ उहां मोर आघू म पसु के चार ठन सींग रिहिन।
ZEC 1:19 त मेंह ओ स्वरगदूत जऊन ह मोर ले गोठियावत रिहिस, ओकर ले पुछेंव, “येमन का अंय?” ओह मोला जबाब दीस, “येमन ओ सींग अंय, जेमन यहूदा, इसरायल अऊ यरूसलेम ला तितिर-बितिर कर दे हवंय।”
ZEC 1:20 तब यहोवा ह मोला चार सिल्पकारमन ला देखाईस।
ZEC 1:21 त मेंह पुछेंव, “येमन का करे बर आय हवंय?” ओह जबाब दीस, “येमन ओ सींग अंय जेमन यहूदा ला तितिर-बितिर कर दे हवंय ताकि कोनो अपन मुड़ झन उठा सकय, पर ये सिल्पकारमन ओमन ला डराय बर अऊ ओ जातिमन के ये सींगमन ला काट डारे बर आय हवंय, जेमन यहूदा देस के बिरोध म ओकर मनखेमन ला तितिर-बितिर करे बर अपन सींग उठाय हवंय।”
ZEC 2:1 तब मेंह अपन आघू म एक मनखे ला देखेंव, जऊन ह अपन हांथ म नापे के डोरी ला धरे रिहिस।
ZEC 2:2 तब मेंह ओकर ले पुछेंव, “तेंह कहां जावत हस?” ओह मोला जबाब दीस, “मेंह यरूसलेम ला नापे बर जावत हंव ताकि पता चलय कि ओकर लम्बई अऊ चौड़ई कतेक हवय।”
ZEC 2:3 जब मोर ले बात करइया स्वरगदूत ह जाय लगिस, त एक आने स्वरगदूत ओकर ले मिले बर आईस
ZEC 2:4 अऊ ओकर ले कहिस: “दऊड़के जा अऊ ओ जवान ले कह, ‘मनखे अऊ पसुमन के बहुंतायत के कारन, यरूसलेम ह बिगर दीवार के सहर हो जाही।
ZEC 2:5 अऊ मेंह खुद येकर चारों कोति आगी के दीवार बन जाहूं,’ यहोवा ह घोसना करत हे, ‘अऊ ओकर भीतर म मेंह ओकर महिमा होहूं।’
ZEC 2:6 “आवव! आवव! उत्तर के देस ले भाग जावव,” यहोवा ह घोसना करत हे, “काबरकि मेंह तुमन ला अकास के चारों दिग के हवा म तितिर-बितिर कर दे हंव,” यहोवा ह घोसना करत हे।
ZEC 2:7 “हे सियोन! आ, तें जऊन ह बेटी बेबिलोन म रहिथस, बचके भाग निकल!”
ZEC 2:8 काबरकि सर्वसक्तिमान यहोवा ह ये कहत हे: “महिमामय परमेसर ह मोला ओ जातिमन के बिरूध म पठोय हवय, जऊन मन तुमन ला लूट ले हवंय—काबरकि जऊन ह तुमन ला छूथे, ओह ओकर आंखी के पुतली ला छूथे—
ZEC 2:9 मेंह खचित ओमन के बिरूध अपन हांथ उठाहूं ताकि ओमन के गुलाममन ओमन ला लूटंय। तब तुमन जानहू कि सर्वसक्तिमान यहोवा ह मोला पठोय हवय।
ZEC 2:10 “हे बेटी सियोन, चिचिया अऊ आनंद मना। काबरकि मेंह आके तोर बीच म निवास करहूं,” यहोवा ह घोसना करत हे।
ZEC 2:11 “ओ दिन बहुंत अकन जातिमन यहोवा के संग मिल जाहीं अऊ मोर मनखे बन जाहीं। मेंह तोर बीच म निवास करहूं अऊ तेंह जान जाबे कि सर्वसक्तिमान यहोवा ह मोला तोर करा पठोय हवय।
ZEC 2:12 यहोवा ह पबितर देस म यहूदा ला अपन भाग के रूप म ले लीही अऊ यरूसलेम ला फेर चुन लीही।
ZEC 2:13 हे जम्मो मनखेमन, यहोवा के आघू म सांत रहव, काबरकि ओह खुद अपन पबितर निवास ले ठाढ़ होय हवय।”
ZEC 3:1 तब ओह मोला देखाईस कि महा पुरोहित यहोसू ह यहोवा के स्वरगदूत के आघू म ठाढ़े हवय, अऊ सैतान ह स्वरगदूत के जेवनी कोति यहोसू ऊपर दोस लगाय बर खड़े हवय।
ZEC 3:2 यहोवा ह सैतान ले कहिस, “हे सैतान, यहोवा ह तोला घुड़के! यहोवा, जऊन ह यरूसलेम ला चुन ले हवय, तोला घुड़के! का ये मनखे ह आगी ले निकाले गय बरत लुठी सहीं नो हय?”
ZEC 3:3 ओ समय यहोसू ह स्वरगदूत के आघू म मईला कपड़ा पहिरे खड़े रिहिस।
ZEC 3:4 तब स्वरगदूत ह ओमन ले कहिस, जेमन ओकर आघू म खड़े रिहिन, “ओकर मईला कपड़ामन ला उतार दव।” तब ओह यहोसू ला कहिस, “देख, मेंह तोर पाप ला दूरिहा कर दे हवंव, अऊ मेंह तोला सुघर कपड़ा पहिराहूं।”
ZEC 3:5 तब मेंह कहेंव, “ओकर मुड़ ऊपर एक ठन साफ पागा रखव।” त ओमन ओकर मुड़ म एक ठन साफ पागा रखिन अऊ ओला ओनहा पहिराईन, अऊ यहोवा के स्वरगदूत ह ओकर करा ठाढ़े रिहिस।
ZEC 3:6 ओकर बाद यहोवा के स्वरगदूत ह यहोसू ला ये जिम्मेदारी दीस:
ZEC 3:7 “सर्वसक्तिमान यहोवा ह ये कहत हे: ‘यदि तेंह मोर हुकूममन ला मानबे अऊ मोर बिधिमन म चलबे, त तेंह मोर भवन ऊपर राज करबे अऊ मोर अंगनामन म तोर अधिकार होही, अऊ मेंह तोला ये मनखेमन के बीच म जगह दूहूं, जऊन मन इहां खड़े हवंय।
ZEC 3:8 “ ‘हे महा पुरोहित यहोसू, सुन, तें अऊ तोर आघू म बईठे तोर सहकरमीमन, तुमन जम्मो, अवइया चीजमन के प्रतीक अव: मेंह अपन सेवक, मोर डंगाली ला लानेवाला हंव।
ZEC 3:9 ओ पथरा ला देखव, जेला मेंह यहोसू के आघू म रखे हंव! ओ एके ठन पथरा म सात ठन आंखी हवंय, अऊ मेंह ओमा खोदके एक लेख लिखहूं,’ सर्वसक्तिमान यहोवा ह कहत हे, ‘अऊ मेंह एकेच दिन म ये देस के पाप ला हटा दूहूं।
ZEC 3:10 “ ‘ओ दिन, तुमन म ले हर एक झन अपन परोसी ला अपन अंगूर के नार अऊ अंजीर रूख के खाल्हे म बईठे बर बलाहू,’ सर्वसक्तिमान यहोवा ह घोसना करत हे।”
ZEC 4:1 तब ओ स्वरगदूत जऊन ह मोर ले बात करे रिहिस, लहुंट आईस अऊ मोला अइसने जगाईस, जइसने कोनो ला नींद ले जगाय जाथे।
ZEC 4:2 ओह मोर ले पुछिस, “तोला का दिखत हे?” मेंह जबाब देंव, “मोला एक ठन सुध सोन के दीवट दिखत हे, जेकर टीप म एक ठन कटोरा हवय, जेमा सात ठन दीया हवंय, अऊ दीयामन ऊपर बाती बर सात-सात ठन नाली हवंय।
ZEC 4:3 दीवट करा दू ठन जैतून के रूख घलो हवंय, एक ठन रूख कटोरा के जेवनी कोति अऊ दूसर रूख ओकर डेरी कोति।”
ZEC 4:4 जऊन स्वरगदूत ह मोर ले गोठियावत रिहिस, मेंह ओकर ले पुछेंव, “हे मोर परभू, येमन का अंय?”
ZEC 4:5 ओह जबाब दीस, “का तेंह नइं जानस कि येमन का अंय?” मेंह कहेंव, “हे मोर परभू, नइं।”
ZEC 4:6 त फेर ओह मोला कहिस, “येह जरूब्बाबेल बर यहोवा के बचन अय: ‘न तो बल ले, न सक्ति ले, पर मोर आतमा के दुवारा,’ सर्वसक्तिमान यहोवा ह कहत हे।
ZEC 4:7 “हे बड़े पहाड़, तेंह का अस? जरूब्बाबेल के आघू म तेंह समतल मैदान बन जाबे। तब ओह चोटी के पथरा ला ये चिचियाय बर ले आही, ‘परमेसर येला आसीस देवय! परमेसर येला आसीस देवय!’ ”
ZEC 4:8 तब यहोवा के बचन मोर करा आईस:
ZEC 4:9 “जरूब्बाबेल ह अपन हांथ ले ये मंदिर के नीव डारे हे; अऊ ओकरे हांथमन ये काम ला पूरा घलो करहीं। तब तेंह जान लेबे कि सर्वसक्तिमान यहोवा ह मोला तोर करा पठोय हवय।
ZEC 4:10 “छोटे बातमन के दिन ला कोन ह तुछ समझे के हिम्मत करथे, जबकि यहोवा के सात ठन आंखी, जऊन मन धरती के जम्मो कोति देखत रहिथें, आनंद मनाहीं, जब ओमन ये देखहीं कि चुने गय चोटी के पथरा ह जरूब्बाबेल के हांथ म हवय?”
ZEC 4:11 तब मेंह स्वरगदूत ले पुछेंव, “ये जैतून के दू ठन रूख के का मतलब अय, जऊन मन दीवट के जेवनी अऊ डेरी कोति हवंय?”
ZEC 4:12 मेंह ओकर ले फेर पुछेंव, “जैतून के ये दू ठन डंगालीमन का अंय, जऊन मन सोन के दू ठन ओ नलीमन के बाजू म हवंय जेमन सुनहरा तेल ढारथें?”
ZEC 4:13 स्वरगदूत ह जबाब दीस, “का तेंह नइं जानस कि येमन का अंय?” मेंह कहेंव, “हे मोर परभू, नइं।”
ZEC 4:14 तब ओह कहिस, “ये दूनों ओ अंय, जेमन ला पूरा धरती के परभू के सेवा करे बर अभिसेक करे गे हवय।”
ZEC 5:1 मेंह फेर देखेंव, अऊ मोर आघू म उड़त एक चामपट्टी रिहिस।
ZEC 5:2 स्वरगदूत ह मोर ले पुछिस, “तोला का दिखत हे?” मेंह जबाब देंव, “मोला उड़त एक चामपट्टी दिखत हवय, जऊन ह बीस क्यूबीट लम्बा अऊ दस क्यूबीट चौड़ा हवय।”
ZEC 5:3 तब ओह मोला कहिस, “ये चामपट्टी म ओ सराप लिखे हवय, जऊन ह जम्मो देस ऊपर लगही; काबरकि ये चामपट्टी के एक तरफ जऊन बात लिखे हवय, ओकर मुताबिक हर एक चोर ला निकाल दिये जाही, अऊ ये चामपट्टी के दूसर तरफ जऊन बात लिखे हवय, ओकर मुताबिक हर ओ मनखे जऊन ह लबारी कसम खाथे, ओला घलो निकाल दिये जाही।
ZEC 5:4 सर्वसक्तिमान यहोवा ह घोसना करत हे, ‘मेंह ये सराप ला भेजहूं, अऊ येह हर चोर के घर म अऊ मोर नांव म लबारी कसम खवइया हर मनखे के घर म जाही। येह ओ घर म बने रहिही अऊ ओला ओकर लकरी अऊ पथरामन समेत पूरा नास कर दीही।’ ”
ZEC 5:5 तब ओ स्वरगदूत जऊन ह मोर ले गोठियावत रिहिस, आघू आके मोर ले कहे लगिस, “ऊपर देख कि उहां का परगट होवत हे।”
ZEC 5:6 मेंह पुछेंव, “येह का अय?” ओह जबाब दीस, “येह एक टुकनी अय।” अऊ ओह ये घलो कहिस, “येह पूरा देस के मनखेमन के पाप अय।”
ZEC 5:7 तब सीसा के ढकना ला उठाय गीस, अऊ उहां टुकनी म एक माईलोगन बईठे रिहिस!
ZEC 5:8 तब स्वरगदूत ह कहिस, “येह दुस्टता अय,” अऊ ओह ओ माईलोगन ला टुकनी म वापिस ढकेल दीस अऊ सीसा के ढकना ला टुकनी ऊपर ढांप दीस।
ZEC 5:9 तब मेंह ऊपर देखेंव—अऊ उहां मोर आघू म दू झन माईलोगन रिहिन, जेमन अपन डेनामन ले हवा म उड़ियात रिहिन! ओमन के डेना ह एक सारस चिरई सहीं रहय, अऊ ओमन ओ टुकनी ला अकास अऊ धरती के बीच म उठा लीन।
ZEC 5:10 तब ओ स्वरगदूत जऊन ह मोर ले गोठियावत रिहिस, ओकर ले मेंह पुछेंव, “ओमन ओ टुकनी ला कहां ले जावत हें?”
ZEC 5:11 ओह जबाब दीस, “बेबिलोनिया देस ला, जिहां ओमन येकर बर एक घर बनाहीं। जब घर ह बन जाही, त टुकनी ला उहां ओकर जगह म रख दिये जाही।”
ZEC 6:1 तब मेंह फेर ऊपर देखेंव, अऊ मोर आघू म चार ठन रथ दू पहाड़मन के बीच म ले निकलके आवत रिहिन, अऊ ये पहाड़मन कांसा धातु के रिहिन।
ZEC 6:2 पहिला रथ म लाल घोड़ा, दूसर म करिया,
ZEC 6:3 तीसर म सफेद अऊ चऊथा म चितकबरा घोड़ामन रिहिन—जम्मो के जम्मो ताकतवर रिहिन।
ZEC 6:4 मोर ले जऊन स्वरगदूत ह गोठियावत रिहिस, ओकर ले मेंह पुछेंव, “हे मोर परभू, येमन का अंय?”
ZEC 6:5 स्वरगदूत ह मोला जबाब दीस, “येमन स्वरग के ओ चार आतमा अंय, जऊन मन जम्मो संसार के परभू के आघू म ठाढ़ रहिथें अऊ अब ओकर आघू ले बाहिर जावत हें।
ZEC 6:6 जऊन रथ म करिया रंग के घोड़ामन हवंय, ओह उत्तर दिग के देस ला जावत हे अऊ जऊन म सफेद रंग के घोड़ामन हवंय, ओह पछिम कोति, अऊ जऊन म चितकबरा घोड़ामन हवंय, ओह दक्खिन कोति जावत हे।”
ZEC 6:7 जब ये ताकतवर घोड़ामन बाहिर निकलिन, त ओमन जम्मो धरती म जाय बर अधीर होवत रिहिन। अऊ ओह कहिस, “जम्मो धरती म जावव!” एकरसेति ओमन धरती के जम्मो अंग गीन।
ZEC 6:8 तब ओह मोला बलाके कहिस, “देख, जऊन मन उत्तर के देस कोति गे हवंय, ओमन उत्तर के देस म मोर आतमा ला सांति दे हवंय।”
ZEC 6:9 यहोवा के बचन ह मोर करा आईस:
ZEC 6:10 “बेबिलोन ले बंधुवई ले लहुंटे ये मनखे हेल्दै, तोबियाह अऊ यदायाह ले सोन अऊ चांदी लेय ले अऊ ओहीच दिन सपनयाह के बेटा योसियाह के घर जा।
ZEC 6:11 सोन अऊ चांदी ला लेके एक मुकुट बना, अऊ ओ मुकुट ला योसादाक के बेटा महा पुरोहित यहोसू के मुड़ म रख।
ZEC 6:12 ओला बता कि सर्वसक्तिमान यहोवा ह ये कहत हे: ‘येह ओ मनखे ए, जेकर नांव डंगाली अय, अऊ ओह अपन ही जगह ले डंगाली निकालके यहोवा के मंदिर ला बनाही।
ZEC 6:13 येह ओ अय, जऊन ह यहोवा के मंदिर ला बनाही, अऊ ओला महिमा दिये जाही अऊ अपन सिंघासन म बईठके राज करही। अऊ ओह अपन सिंघासन म एक पुरोहित होही अऊ ओ दूनों के बीच आपस म समझ-बुझ होही।’
ZEC 6:14 यहोवा के मंदिर म मुकुट ला यादगारी के एक चिनहां के रूप म हेल्दै, तोबियाह, यदायाह अऊ सपनयाह के बेटा हेन ला दिये जाही।
ZEC 6:15 जेमन दूरिहा म हवंय, ओमन आहीं अऊ यहोवा के मंदिर बनाय म मदद करहीं, अऊ तेंह जानबे कि सर्वसक्तिमान यहोवा ह मोला तोर करा पठोय हवय। अऊ येह तभे होही, जब तेंह यहोवा अपन परमेसर के हुकूममन ला मन लगाके मानबे।”
ZEC 7:1 दारा राजा के राज के चऊथा साल के नवां महिना याने कि किसलेव महिना के चऊथा दिन यहोवा के ये बचन जकरयाह करा आईस।
ZEC 7:2 बेतेल के मनखेमन यहोवा ले बिनती करे बर अऊ ये पुछे बर सरेसेर अऊ रेगेम-मेलेक अऊ ओमन के संगीमन ला
ZEC 7:3 सर्वसक्तिमान यहोवा के घर के पुरोहित अऊ अगमजानीमन करा पठोईन, “का हमन पांचवां महिना म सोक अऊ उपास करन, जइसने कि हमन कतको साल ले करत आवत हन?”
ZEC 7:4 तब सर्वसक्तिमान यहोवा के ये बचन मोर करा आईस:
ZEC 7:5 “देस के जम्मो मनखे अऊ पुरोहितमन ले पुछ, ‘जब तुमन पांचवां अऊ सातवां महिना म पिछले सत्तर साल तक उपास अऊ बिलाप करत रहेव, त का सही म तुमन मोर बर ही उपास करेव?
ZEC 7:6 अऊ जब तुमन खावत-पीयत रहेव, त का ये सब सिरिप अपन खाय-पीये बर नइं करत रहेव?
ZEC 7:7 का येमन यहोवा के बचन नो हंय, जेकर घोसना ओह पहिले के अगमजानीमन के जरिये करे रिहिस, जब यरूसलेम अऊ ओकर आसपास के नगरमन सांति म रिहिन अऊ उन्नत रिहिन, अऊ नेगेव अऊ पछिम के खाल्हे के देसमन बस गे रिहिन?’ ”
ZEC 7:8 अऊ यहोवा के ये बचन ह जकरयाह करा फेर आईस:
ZEC 7:9 “सर्वसक्तिमान यहोवा ह ये कहिस: ‘सही के नियाय करव; एक-दूसर के ऊपर दया देखावव अऊ तरस खावव।
ZEC 7:10 बिधवा या अनाथ, परदेसी या गरीब ऊपर अतियाचार झन करव। एक-दूसर के बिरूध सडयंत्र झन करव।’
ZEC 7:11 “पर ओमन ये बात ऊपर कोनो धियान नइं दीन; ढीठ होके ओमन अपन मुहूं फेर लीन अऊ अपन कानमन ला बंद कर लीन।
ZEC 7:12 ओमन अपन हिरदय ला चकमक पथरा सहीं कठोर बना लीन अऊ कानून के बात या सर्वसक्तिमान यहोवा के ओ बचन ला नइं सुनिन, जेला ओह अपन आतमा के दुवारा पहिले के अगमजानीमन के जरिये पठोय रिहिस। एकरसेति सर्वसक्तिमान यहोवा बहुंत गुस्सा होईस।
ZEC 7:13 “ ‘जब मेंह पुकारेंव, त ओमन नइं सुनिन; एकरसेति जब ओमन मोला पुकारहीं, त मेंह घलो ओमन के नइं सुनंव,’ सर्वसक्तिमान यहोवा ह कहत हे।
ZEC 7:14 ‘मेंह एक बवंडर ले ओमन ला जाति-जाति के मनखेमन के बीच म तितिर-बितिर कर देंव, जिहां ओमन अजनबी रिहिन। जऊन देस ला ओमन अपन पाछू छोंड़ आईन, ओह अइसे उजाड़ पड़े रिहिस कि ओमा ले होके कोनो नइं जावंय। ये किसम ले ओमन ओ खुसहाल देस ला उजाड़ दीन।’ ”
ZEC 8:1 सर्वसक्तिमान यहोवा के बचन ह मोर करा आईस।
ZEC 8:2 सर्वसक्तिमान यहोवा ह ये कहत हे: “सियोन बर मोला अब्बड़ जलन होवत हे; मेंह ओकर बर जलन ले जरत हंव।”
ZEC 8:3 यहोवा ह ये कहत हे: “मेंह वापिस सियोन जाहूं अऊ यरूसलेम म निवास करहूं। तब यरूसलेम ला बिसवासयोग्य सहर कहे जाही, अऊ सर्वसक्तिमान यहोवा के पहाड़ ला पबितर पहाड़ कहे जाही।”
ZEC 8:4 सर्वसक्तिमान यहोवा ह ये कहत हे: “एक बार फेर यरूसलेम के गलीमन म डोकरा अऊ डोकरीमन बईठहीं अऊ बहुंत उमर होय के कारन हर एक के हांथ म लउठी होही।
ZEC 8:5 सहर के गलीमन उहां खेलत बाबू-नोनीमन ले भरे होहीं।”
ZEC 8:6 सर्वसक्तिमान यहोवा ह ये कहत हे: “ओ समय मनखेमन के बांचेमन ला ये अद्भूत लग सकथे, पर का येह मोला अद्भूत लगही?” सर्वसक्तिमान यहोवा ह घोसना करत हे।
ZEC 8:7 सर्वसक्तिमान यहोवा ह ये कहत हे: “मेंह अपन मनखेमन ला पूरब अऊ पछिम के देसमन ले बचाहूं।
ZEC 8:8 मेंह ओमन ला यरूसलेम म रहे बर वापिस ले आहूं; ओमन मोर मनखे होहीं, अऊ मेंह ओमन के परमेसर के रूप म ओमन बर बिसवासयोग्य अऊ धरमी ठहिरहूं।”
ZEC 8:9 सर्वसक्तिमान यहोवा ह ये कहत हे: “अब तुमन ये बात ला सुनव, ‘तुम्हर हांथमन मजबूत रहंय ताकि मंदिर ला बनाय जा सकय।’ ये बात ओ अगमजानीमन के दुवारा घलो कहे गे हवय, जऊन मन सर्वसक्तिमान यहोवा के घर के नीव डाले के बेरा उहां रिहिन।
ZEC 8:10 ओ समय के पहिले न तो मनखेमन ला बनी मिलत रिहिस अऊ न ही पसुमन बर भाड़ा। अपन बईरीमन के कारन, कोनो घलो अपन काम-धंधा म सांत मन से नइं जाय सकत रिहिन, काबरकि मेंह ओमन ला एक-दूसर के बिरूध कर दे रहेंव।
ZEC 8:11 पर अब मेंह येमन के बांचे मनखेमन ले वइसने बरताव नइं करंव, जइसने कि पहिले करत रहेंव,” सर्वसक्तिमान यहोवा ह घोसना करत हे।
ZEC 8:12 “बीजा ह बने ढंग ले बढ़ही, अंगूर के नार म फर लगही, भुइयां म फसल होही, अऊ अकास ले ओस पड़ही। मेंह ये जम्मो चीज येमन के बांचे मनखेमन ला एक उत्तराधिकार के रूप म दूहूं।
ZEC 8:13 जइसे कि हे यहूदा अऊ इसरायल, तुमन जाति-जाति के मनखेमन के बीच एक सराप बन गे हवव, त मेंह तुमन ला बचाहूं, अऊ तुमन एक आसीस के कारन बनहू। झन डरव, पर तुम्हर हांथ मजबूत बने रहय।”
ZEC 8:14 सर्वसक्तिमान यहोवा ह ये कहत हे: “जब तुम्हर पुरखामन मोला कोरोधित करे रिहिन, त जइसने मेंह तुम्हर ऊपर बिपत्ति लाने अऊ दया नइं करे बर ठान ले रहेंव,” सर्वसक्तिमान यहोवा ह कहत हे,
ZEC 8:15 “वइसने ही अब मेंह यरूसलेम अऊ यहूदा ऊपर फेर भलई करे बर ठान ले हवंव। झन डरव।
ZEC 8:16 येमन ओ बात अंय, जेला तुमन ला करना हे: एक-दूसर के संग सच बोलव, अऊ अपन अदालतमन म सच अऊ सही निरनय लेय करव;
ZEC 8:17 एक-दूसर के बिरूध दुस्ट चाल झन चलव, अऊ लबरा कसम झन खावव। काबरकि मेंह ये जम्मो बात ले घिन करथंव,” यहोवा ह घोसना करत हे।
ZEC 8:18 सर्वसक्तिमान यहोवा के ये बचन ह मोर करा आईस।
ZEC 8:19 सर्वसक्तिमान यहोवा ह ये कहत हे: “चऊथा, पांचवां, सातवां अऊ दसवां महिना के उपास ह यहूदा के मनखेमन बर आनंद अऊ खुसी के समय अऊ खुसी के तिहार हो जाही। एकरसेति सच अऊ सांति ले मया करव।”
ZEC 8:20 सर्वसक्तिमान यहोवा ह ये कहत हे: “बहुंते मनखे अऊ कतको सहरमन के रहइयामन आहीं,
ZEC 8:21 अऊ एक सहर के रहइयामन दूसर सहर म जाके कहिहीं, ‘आवव, यहोवा ले बिनती करे बर तुरते चलन अऊ सर्वसक्तिमान यहोवा के खोज करन। मेंह खुद जावत हंव।’
ZEC 8:22 अऊ बहुंते मनखे अऊ सक्तिसाली जातिमन के मनखेमन सर्वसक्तिमान यहोवा ला खोजे अऊ ओकर ले बिनती करे बर यरूसलेम आहीं।”
ZEC 8:23 सर्वसक्तिमान यहोवा ह ये कहत हे: “ओ दिनमन म जम्मो भासा अऊ जातिमन ले दस मनखेमन एक यहूदी मनखे ला ओकर कपड़ा के छोर ला पकड़के कहिहीं, ‘हमन तोर संग जाबो, काबरकि हमन ये सुने हन कि परमेसर ह तोर संग हवय।’ ”
ZEC 9:1 एक अगमबानी: हद्राक देस के बिरूध यहोवा के ये बचन अय अऊ येकर परभाव दमिस्क सहर ऊपर पड़ही— काबरकि जम्मो मनखे अऊ इसरायल के जम्मो गोत्र के नजर यहोवा ऊपर हवय—
ZEC 9:2 अऊ येकर सीमना ले लगे देस हमात ऊपर लगे हवय, अऊ सूर अऊ सीदोन ऊपर घलो लगे हवय, हालाकि ओमन बहुंत जानकार अंय।
ZEC 9:3 सूर ह अपन बर एक मजबूत गढ़ बनाय हवय; ओह चांदी ला धुर्रा सहीं, अऊ सोन ला गली के चीखला सहीं कुढ़ोय हवय।
ZEC 9:4 पर परभू ह ओकर जम्मो चीजमन ला ले लीही अऊ ओकर सक्ति ला समुंदर म नास कर दीही, अऊ सहर ह आगी म जलके नास हो जाही।
ZEC 9:5 अस्कलोन सहर ह येला देखके डरही; गाजा सहर ह बहुंत तकलीफ म पड़के छटपटाही, अऊ एहीच हालत एकरोन सहर के घलो होही, काबरकि ओकर आसा ह खतम हो जाही। गाजा ह अपन राजा ला गंवा दीही अऊ अस्कलोन ला तियाग दिये जाही।
ZEC 9:6 एक दोगला जाति के मनखेमन असदोद सहर ऊपर अधिकार कर लीहीं, अऊ मेंह पलिस्तीमन के घमंड ला टोर दूहूं।
ZEC 9:7 मेंह ओमन के मुहूं ले खून, अऊ ओमन के दांतमन के बीच म छोंड़े गय जेवन ला ले लूहूं। तब ओमन, जऊन मन बच जाहीं, ओमन हमर परमेसर के हो जाहीं अऊ यहूदा म एक गोत्र बन जाहीं, अऊ एकरोन ह यबूसीमन सहीं हो जाही।
ZEC 9:8 पर मेंह अपन मंदिर ला लुटेरामन ले बचाय बर ओकर पहरेदारी म डेरा डालहूं। कोनो घलो अतियाचारी फेर कभू मोर मनखेमन ऊपर अधिकार नइं कर सकहीं, काबरकि अब मेंह पहरेदारी करत हंव।
ZEC 9:9 हे बेटी सियोन, बहुंत आनंद मना! हे बेटी यरूसलेम, जय-जयकार कर! देखव, तुम्हर राजा ह तुम्हर करा आवत हे, ओह धरमी अऊ बिजयी होके, बिनम्र अऊ एक गदहा ऊपर, एक बछेड़ा ऊपर, गदही के एक बछेड़ा ऊपर सवारी करे हवय।
ZEC 9:10 मेंह एपरैम ले रथमन ला अऊ यरूसलेम ले लड़ई के घोड़ामन ला ले लूहूं, अऊ लड़ई के धनुसमन ला टोर दिये जाही। तब ओह जाति-जाति के मनखेमन के बीच म सांति के घोसना करही। ओकर राज ह एक समुंदर ले लेके दूसर समुंदर तक अऊ नदी ले लेके धरती के छोर तक बगरही।
ZEC 9:11 जहां तक तुम्हर बात अय, तुम्हर संग मोर करार के लहू के कारन, मेंह तुम्हर कैदीमन ला ओ सूखा खंचवा ले बाहिर निकाल दूहूं।
ZEC 9:12 हे आसा लगाय कैदीमन, अपन गढ़ म लहुंट आवव; अभी घलो मेंह घोसना करत हंव कि मेंह तुमन ला दू गुना लहुंटा दूहूं।
ZEC 9:13 मेंह यहूदा ला अपन धनुस सहीं मोड़हूं अऊ एपरैम ले येला भर दूहूं। हे सियोन, मेंह तोर बेटामन ला यूनान के बेटामन के बिरूध भड़काहूं, अऊ तोला योद्धा के तलवार सहीं कर दूहूं।
ZEC 9:14 तब यहोवा ह ओमन ऊपर परगट होही; अऊ ओकर तीर ह बिजली सहीं चमकही। परमपरधान यहोवा ह तुरही फूंकही; ओह दक्खिन के आंधी म होके चलही,
ZEC 9:15 अऊ सर्वसक्तिमान यहोवा ओमन के रकछा करही। ओमन नास कर दीहीं अऊ गोफन के पथरामन के दुवारा जयवंत होहीं। ओमन पीहीं अऊ अइसने हल्ला करहीं जइसने मनखे मंद पीके करथें; ओमन ओ कटोरा सहीं भर जाहीं जेकर उपयोग बेदी के कोनटामन म छिंचे बर करे जाथे।
ZEC 9:16 जइसन एक चरवाहा ह अपन झुंड ला बचाथे वइसन ही यहोवा ओमन के परमेसर ह ओ दिन अपन मनखेमन ला बचाही। ओमन ओकर देस म अइसने चमकहीं जइसने मुकुट म लगे रत्नमन चमकथें।
ZEC 9:17 कतेक जादा मन ला भानेवाला अऊ सुघर होहीं ओमन! जवान छोकरामन अनाज खाके, अऊ मुटियारी छोकरीमन नवां अंगूर के मंद पीके मजबूत हो जाहीं।
ZEC 10:1 यहोवा ले बिनती करव कि ओह बसन्त रितु म बारिस पठोवय; येह यहोवा ही अय, जऊन ह बादर गरजाथे अऊ गरेर लाथे। ओह जम्मो मनखे ला बारिस देथे, अऊ हर एक झन बर खेत म पऊधा उपजाथे।
ZEC 10:2 मूरतीमन धोखा देवइया बात कहिथें, अऊ सकुन-बिचार करइयामन लबारी दरसन देखथें; ओमन लबारी सपना के बारे म बताथें, अऊ ओमन बेकार म सांतवना देथें। एकरसेति चरवाहा के कमी के कारन दुखी होके मनखेमन भेड़ सहीं भटकथें।
ZEC 10:3 “मोर कोरोध ह चरवाहामन ऊपर भड़कथे, अऊ मेंह अगुवामन ला दंड दूहूं; काबरकि सर्वसक्तिमान यहोवा ह अपन झुंड यहूदा के मनखेमन के देखरेख करही, अऊ ओह ओमन ला लड़ई म घमंड करइया घोड़ा सहीं बनाही।
ZEC 10:4 यहूदा ले कोना के पथरा आही, ओकर ले तम्बू के खूंटी, ओकर ले लड़ई के धनुस, अऊ ओकर ले ही हर एक सासन करइया आहीं।
ZEC 10:5 ओमन एक संग लड़ई म ओ योद्धामन सहीं होहीं, जऊन मन गली के चीखला म अपन बईरीमन ला गोड़ ले कुचरथें। ओमन लड़हीं काबरकि यहोवा ओमन के संग हवय, अऊ ओमन बईरीमन के घुड़सवारमन ला सरमिंदा करहीं।
ZEC 10:6 “मेंह यहूदा के मनखेमन ला मजबूत करहूं अऊ यूसुफ के गोत्र ला बचाहूं। ओमन बर अपन करूना के कारन मेंह ओमन ला पहिले के सहीं बने स्थिति म ले आहूं। ओमन अइसे हो जाहीं मानो मेंह ओमन ला कभू तियागे ही नइं रहेंव, काबरकि मेंह ओमन के परमेसर यहोवा अंव अऊ मेंह ओमन ला जबाब दूहूं।
ZEC 10:7 एपरैमीमन योद्धा सहीं हो जाहीं, अऊ ओमन के मन ह अइसे खुस होही, जइसे मंद पीये ले होथे। ओमन के लइकामन येला देखके आनंदित होहीं; अऊ ओमन के मन ह यहोवा म आनंदित होही।
ZEC 10:8 मेंह ओमन ला इसारा करहूं अऊ भीतर इकट्ठा करहूं। खचित मेंह ओमन ला छोंड़ाहूं; ओमन पहिली सहीं अनगिनत हो जाहीं।
ZEC 10:9 हालाकि मेंह ओमन ला मनखेमन के बीच म तितिर-बितिर कर दे हंव, तभो ले ओ दूरिहा के देसमन म ओमन मोला सुरता करहीं। उहां ओमन अऊ ओमन के संतान बांचे रहिहीं, अऊ ओमन लहुंट आहीं।
ZEC 10:10 मेंह ओमन ला मिसर देस ले वापिस लहुंटा लाहूं अऊ ओमन ला अस्सूर देस ले इकट्ठा करहूं। मेंह ओमन ला गिलाद अऊ लबानोन के इलाका म ले आहूं, अऊ ओमन ला अतेक बढ़ाहूं कि उहां ओमन बर परयाप्त जगह नइं होही।
ZEC 10:11 ओमन समस्या के समुंदर म ले होके जाहीं, उमड़त समुंदर ला सांत कर दिये जाही अऊ नील नदी के जम्मो गहिरा पानी ह सूखा जाही। अस्सूर देस के मनखेमन के घमंड ला टोर दिये जाही अऊ मिसर देस के राजदंड ह चले जाही।
ZEC 10:12 मेंह ओमन के बिसवास ला यहोवा ऊपर मजबूत करहूं अऊ ओकर नांव म ओमन सुरकछित रहिहीं,” यहोवा ह घोसना करत हे।
ZEC 11:1 हे लबानोन, अपन कपाटमन ला खोल, ताकि आगी ह तोर देवदार के रूखमन ला नास कर देवय!
ZEC 11:2 हे सनोवर के रूखमन, बिलाप करव, काबरकि देवदार के रूख ह गिर गे हवय; सानदार रूखमन नास हो गे हवंय! हे बासान के बलूत रूखमन, बिलाप करव; काबरकि घना जंगल ला काट डारे गे हवय!
ZEC 11:3 चरवाहामन के बिलाप ला सुनव; ओमन के हरियर चरागनमन नास हो गे हवंय! सिंहमन के गरजई ला सुनव; यरदन नदी के रसवाला झाड़ीमन नास हो गीन!
ZEC 11:4 यहोवा, मोर परमेसर ह ये कहत हे: “काटे बर चिनहां करे गे पसुमन के झुंड के रखवारी करव।
ZEC 11:5 ओमन ला बिसोईयामन काटथें अऊ ओमन ला कोनो सजा नइं मिलय। जऊन मन ओमन ला बेचथें, ओमन कहिथें, ‘यहोवा के इस्तुति होवय, मेंह धनी हो गे हंव!’ ओमन के खुद के चरवाहामन ओमन ऊपर दया नइं करंय।
ZEC 11:6 मेंह अब ये देस के मनखेमन ऊपर दया नइं करंव,” यहोवा ह घोसना करत हे। “मेंह हर एक ला ओमन के परोसी अऊ ओमन के राजा के बस म कर दूहूं। ओमन ये देस ला नास कर दीहीं, अऊ मेंह कोनो ला ओमन के हांथ ले नइं बचावंव।”
ZEC 11:7 एकरसेति मेंह काटे बर चिनहां करे गे पसुमन के झुंड के रखवारी करेंव, खास करके झुंड के ओ पसुमन के जेमन ऊपर अतियाचार करे जावत रिहिस। तब मेंह दू ठन लउठी लेंव अऊ ओमा ले एक ठन के नांव अनुग्रह अऊ दूसर के नांव एकता रखेंव, अऊ में झुंड के देखरेख करे लगेंव।
ZEC 11:8 ओकर बाद मेंह एक महिना म ही तीन झन चरवाहामन ला काम ले हटा देंव। ओ झुंड ह मोर ले बहुंत घिन करे लगिस, अऊ मेंह ओमन ले असकटा गेंव
ZEC 11:9 अऊ कहेंव, “मेंह अब तुम्हर चरवाहा नइं रहंव। जऊन मन मरत हें ओमन मरंय, अऊ जऊन मन नास होवत हें ओमन नास होवंय, अऊ जऊन मन बच जाथें ओमन एक-दूसर के मांस खावंय।”
ZEC 11:10 तब ओ करार जेला मेंह जम्मो जाति के मनखेमन के संग बांधे रहेंव, ओला टोरत मेंह अपन अनुग्रह नांव के लउठी ला टोर देंव।
ZEC 11:11 ओ करार ला ओहीच दिन टोर दिये गीस, अऊ झुंड के सताय गे जऊन पसुमन मोर कोति देखत रिहिन, ओमन जान डारिन कि येह यहोवा के बचन रिहिस।
ZEC 11:12 तब मेंह ओमन ले कहेंव, “कहूं तुमन ला ये बने लगे, त मोला मोर बनी दे दव; पर कहूं नइं देय चाहत हव, त झन दव।” तब ओमन मोर बनी के तीस चांदी के टुकड़ा मोला दीन।
ZEC 11:13 अऊ यहोवा ह मोला कहिस, “ये बनी ला कुम्हार के आघू म फटिक दे”—ओ बढ़िया दाम जेला ओमन मोर बर ठहिराय हवंय! एकरसेति मेंह चांदी के ओ तीस टुकड़ामन ला लेंव अऊ यहोवा के घर म कुम्हार के आघू म फटिक देंव।
ZEC 11:14 तब मेंह यहूदा अऊ इसरायल के बीच परिवार के संबंध ला टोरत, एकता नांव के अपन दूसर लउठी ला टोर देंव।
ZEC 11:15 तब यहोवा ह मोला कहिस, “एक मुरूख चरवाहा के चीजमन ला फेर लेय ले।
ZEC 11:16 काबरकि मेंह ये देस म एक अइसन चरवाहा ठहिरानेवाला हंव, जऊन ह गंवायमन के चिंता नइं करही, न जवानमन ला खोजही, न घायलमन ला चंगा करही, न ही तंदरूस्तमन ला खवाही, पर ओह बने भेड़मन के मांस ला खाही अऊ ओमन के खुरमन ला फोर दीही।
ZEC 11:17 “ओ बेकार चरवाहा ऊपर हाय, जऊन ह पसु के झुंड ला छोंड़के भाग जाथे! अइसन होवय कि ओकर बाहां अऊ ओकर जेवनी आंखी म तलवार चले! ओकर बाहां ह पूरा सूख जावय, अऊ ओह अपन जेवनी आंखी ले पूरा अंधरा हो जावय!”
ZEC 12:1 एक अगमबानी: इसरायल के बारे म यहोवा के बचन। यहोवा, जऊन ह अकास ला फईलाथे, जऊन ह धरती के नीव रखथे, अऊ जऊन ह मनखे के भीतर मनखे के आतमा ला बनाथे, ओह ये घोसना करत हे:
ZEC 12:2 “मेंह यरूसलेम ला एक अइसन कटोरा बनइया हंव, जऊन ह यरूसलेम सहर के आसपास के मनखेमन ला लड़खड़ा दीही। यहूदा अऊ संगे-संग यरूसलेम ला घलो घेर लिये जाही।
ZEC 12:3 ओ दिन, जब धरती के जम्मो जातिमन यरूसलेम के बिरूध म जूरहीं, त मेंह ओला जम्मो जातिमन बर एक ठन न हटनेवाला चट्टान बना दूहूं। ओ जम्मो जऊन मन ओला हटाय के कोसिस करहीं, ओमन अपनआप ला घायल करहीं।
ZEC 12:4 ओ दिन, मेंह हर एक घोड़ा ला आतंकित करहूं अऊ ओमा सवार मनखे के मति ला भ्रस्ट कर दूहूं,” यहोवा ह घोसना करत हे। “मेंह यहूदा के मनखेमन ऊपर किरपा-दिरिस्टी रखहूं, पर मेंह आनजातमन के जम्मो घोड़ामन ला अंधरा कर दूहूं।
ZEC 12:5 तब यहूदा के बंस के मनखेमन अपन मन म कहिहीं, ‘यरूसलेम के मनखेमन बलवान अंय, काबरकि सर्वसक्तिमान यहोवा ह ओमन के परमेसर अय।’
ZEC 12:6 “ओ दिन, मेंह यहूदा के बंस ला लकरी के कुढ़ा म आगी के एक भट्ठा सहीं, बीड़ामन के बीच बरत एक मसाल सहीं बना दूहूं। ओमन अपन जेवनी अऊ डेरी, आसपास के जम्मो कोति के मनखेमन ला भसम कर दीहीं, पर यरूसलेम ह अपन जगह म अडिग बने रहिही।
ZEC 12:7 “यहोवा ह पहिली यहूदा म रहइयामन ला बचाही, ताकि दाऊद के घराना अऊ यरूसलेम के निवासीमन के आदरमान यहूदा ले बढ़के झन होवय।
ZEC 12:8 ओ दिन खुद यहोवा यरूसलेम म रहइयामन के रकछा करही, जेकर ले ओमा के सबले दुरबल घलो दाऊद सहीं सक्तिसाली हो जाही, अऊ दाऊद के घराना ह परमेसर सहीं, ओमन के आघू-आघू चलइया यहोवा के स्वरगदूत सहीं हो जाही।
ZEC 12:9 ओ दिन, मेंह ओ जम्मो जातिमन ला नास करे बर निकलहूं, जऊन मन यरूसलेम ऊपर हमला करथें।
ZEC 12:10 “अऊ मेंह दाऊद के घराना अऊ यरूसलेम के निवासीमन ऊपर किरपा अऊ बिनती करइया एक आतमा उंडेलहूं। ओमन मोर कोति देखहीं, जेला ओमन छेदे-बेधे हवंय, अऊ ओमन ओकर बर वइसने बिलाप करहीं, जइसने कोनो अपन एके झन लइका बर करथे, अऊ ओमन ओकर बर अइसने दुखी होहीं, जइसने कोनो अपन पहिलांत के मरे म दुखी होथे।
ZEC 12:11 ओ दिन यरूसलेम म अइसे भयंकर बिलाप होही, जइसे हदद-रिम्मोन ह मगिद्दो के मैदान म बिलाप करे रिहिस।
ZEC 12:12 जम्मो देस ह सोक मनाही, हर एक गोत्र खुद, हर एक जन अपन घरवाली संग: दाऊद के घराना के गोत्र के मनखे अऊ ओमन के घरवालीमन, नातान के घराना के गोत्र के मनखे अऊ ओमन के घरवालीमन,
ZEC 12:13 लेवी के घराना के गोत्र के मनखे अऊ ओमन के घरवालीमन, सिमी के गोत्र के मनखे अऊ ओमन के घरवालीमन,
ZEC 12:14 अऊ बांचे जम्मो गोत्र के मनखे अऊ ओमन के घरवालीमन सोक मनाहीं।
ZEC 13:1 “ओ दिन दाऊद के घराना अऊ यरूसलेम के निवासीमन ला ओमन के पाप अऊ असुधता ले सुध करे बर एक सोता फूटही।
ZEC 13:2 “ओ दिन, मेंह देस ले जम्मो मूरतीमन के नांव ला मिटा दूहूं, अऊ ओमन ला फेर कभू सुरता नइं करे जाही।” सर्वसक्तिमान यहोवा ह ये घोसना करत हे। “मेंह देस ले अगमजानीमन ला अऊ असुधता के आतमा ला निकाल दूहूं।
ZEC 13:3 अऊ तभो ले कहूं कोनो अगमबानी करे, त ओला जनम देवइया ओकर दाई-ददा ओला कहिहीं, ‘जरूरी अय कि तें मर जा, काबरकि तेंह यहोवा के नांव म लबरा बात कहे हस।’ तब ओकर खुद के दाई-ददामन ओ अगमबानी करइया ला तलवार ले मार डारहीं।
ZEC 13:4 “ओ दिन हर एक अगमजानी ह अपन अगम के दरसन बर सरमिंदा होही। ओमन मनखेमन ला धोखा देय बर चुंदी ले बने अगमजानीमन के कपड़ा नइं पहिरहीं।
ZEC 13:5 पर हर एक ह कहिही, ‘मेंह अगमजानी नो हंव। मेंह एक किसान अंव; मेंह अपन जवानी ले ही खेत-खार ले अपन जिनगी चलात आय हंव।’
ZEC 13:6 कहूं कोनो ओकर ले पुछय, ‘तोर देहें म ये घावमन कइसे हवंय?’ त ओह जबाब दीही, ‘मोर संगीमन के घर म मोला ये चोट लगे हवय।’ ”
ZEC 13:7 यहोवा ह कहिथे, “हे तलवार, उठ, मोर चरवाहा के बिरूध चल, ओ मनखे के बिरूध जऊन ह मोर घनिस्ट मनखे अय!” सर्वसक्तिमान यहोवा ह घोसना करत हे। “चरवाहा ऊपर तलवार चला, अऊ भेड़मन तितिर-बितिर हो जाहीं, अऊ मेंह लइकामन के बिरूध अपन हांथ उठाहूं।”
ZEC 13:8 यहोवा ह घोसना करत हे, “जम्मो देस म दू-तिहाई मनखेमन ला तलवार चलाके मार डारे जाही; तभो ले एक तिहाई मनखेमन ओमा बांचे रहिहीं।
ZEC 13:9 ये एक तिहाई मनखेमन ला मेंह आगी म डार दूहूं; मेंह ओमन ला चांदी सहीं सुध करहूं अऊ ओमन ला अइसे परखहूं, जइसे सोन ला परखे जाथे। ओमन मोर नांव लेके पुकारहीं अऊ मेंह ओमन के सुनहूं; मेंह कहिहूं, ‘ओमन मोर मनखे अंय,’ अऊ ओमन कहिहीं, ‘यहोवा ह हमर परमेसर अय।’ ”
ZEC 14:1 हे यरूसलेम, यहोवा के एक अइसने दिन अवइया हे, जब तुम्हर संपत्ति ला लूट लिये जाही अऊ तुम्हर अपन घेरा के भीतर ही बांट लिये जाही।
ZEC 14:2 मेंह जम्मो जाति के मनखेमन ला यरूसलेम के बिरूध लड़ई करे बर इकट्ठा करहूं; सहर ऊपर अधिकार कर लिये जाही, घर-दुवारमन लूट लिये जाहीं, अऊ माईलोगनमन के इज्जत लूट लिये जाही। सहर के आधा मनखेमन बंधुवई म चल दीहीं, पर बांचे मनखेमन सहर म ही रहिहीं।
ZEC 14:3 तब यहोवा ह निकलके ओ जातिमन के बिरूध अइसे लड़ही, जइसे ओह लड़ई के दिन लड़थे।
ZEC 14:4 ओ दिन यहोवा ह यरूसलेम के पूरब म जैतून पहाड़ ऊपर जाके ठाढ़ होही, अऊ जैतून पहाड़ ह पूरब अऊ पछिम दू भाग म बंट जाही अऊ मांझा म एक बड़े घाटी बन जाही, जेकर ले आधा पहाड़ उत्तर कोति अऊ आधा पहाड़ दक्खिन कोति हट जाही।
ZEC 14:5 तब तेंह मोर ये पहाड़ के घाटी ले होके भागबे, काबरकि ये घाटी ह आसेल तक फईले होही। तेंह अइसे भागबे, जइसे तेंह यहूदा के राजा उजियाह के दिन म आय भुइंडोल के समय म भागे रहय। तब यहोवा मोर परमेसर ह जम्मो पबितर मनखेमन संग आही।
ZEC 14:6 ओ दिन न तो सूरज के अंजोर होही अऊ न ही ठंडा, पर कुहरा ले भरे अंधियार होही।
ZEC 14:7 ओह एक अलग दिन होही—एक अइसे दिन जेला सिरिप यहोवा ही जानथे—दिन अऊ रथिया के बीच कोनो अंतर नइं होही। जब सांझ होही, तब अंजोर होही।
ZEC 14:8 ओ दिन जिनगी के पानी ह यरूसलेम ले बहके निकलही, येमा के आधा पानी पूरब के मिरतू सागर कोति अऊ आधा पानी पछिम के भूमध्य सागर कोति बहही, अऊ येह धूपकाला अऊ संगे-संग जड़काला म घलो बहते रहिही।
ZEC 14:9 जम्मो धरती ऊपर यहोवा ही राजा होही। ओ दिन एक ही यहोवा होही, अऊ सिरिप ओकरे ही नांव होही।
ZEC 14:10 जम्मो भुइयां, गेबा सहर ले लेके यरूसलेम के दक्खिन म रिम्मोन नगर तक अराबाह के सहीं हो जाही। पर बिनयामीन दुवार ले लेके पहिले दुवार के जगह तक, कोना के दुवार तक, अऊ हनानेल के मीनार ले लेके राजसाही अंगूर के रसकुंडमन तक यरूसलेम ला ऊंचा करे जाही, अऊ येह अपन जगह म बने रहिही।
ZEC 14:11 मनखेमन आके उहां बसहीं; अऊ येला फेर कभू नास नइं करे जाही। यरूसलेम सुरकछित रहिही।
ZEC 14:12 ओ जातिमन, जऊन मन यरूसलेम ले लड़ई करिन, ओ जम्मो ऊपर यहोवा अइसन महामारी लानही कि जब ओमन अपन गोड़ म ठाढ़े रहिहीं, त ओमन के मांस ह सड़ जाही, ओमन के आंखीमन ओमन के गोलक म ही सड़ जाहीं, अऊ ओमन के जीभमन ओमन के मुहूं म ही सड़ जाहीं।
ZEC 14:13 ओ दिन यहोवा के दुवारा मनखेमन म बड़े आतंक के संग घबराहट फईलही। ओमन एक-दूसर ला हांथ से पकड़ लीहीं अऊ एक-दूसर ऊपर हमला करहीं।
ZEC 14:14 यहूदा घलो आके यरूसलेम म लड़ही। आसपास के जम्मो जाति के संपत्ति ला इकट्ठा करे जाही—जेमा बहुंत अकन सोन, चांदी अऊ कपड़ा होही।
ZEC 14:15 अइसने ही किसम के एक महामारी घोड़ा, खच्चर, ऊंट, गदहा अऊ ओ डेरामन के जम्मो पसुमन ऊपर आही।
ZEC 14:16 तब ओ जम्मो जाति के मनखे, जेमन यरूसलेम ऊपर हमला करे रिहिन, ओमा के बांचे मनखेमन हर साल यरूसलेम जाके राजा, सर्वसक्तिमान यहोवा के अराधना करहीं, अऊ पबितर-तम्बूमन के तिहार मनाहीं।
ZEC 14:17 यदि धरती के मनखेमन ले कोनो मनखे राजा, सर्वसक्तिमान यहोवा के अराधना करे बर यरूसलेम नइं जाही, त ओमन के इहां बारिस नइं होही।
ZEC 14:18 कहूं मिसर के मनखेमन अराधना म भाग लेय बर नइं जाहीं, त ओमन के इहां घलो बारिस नइं होही। यहोवा ओमन ऊपर ओ महामारी लानही, जेला ओह ओ जातिमन ऊपर लानथे, जऊन मन पबितर-तम्बूमन के तिहार मनाय बर नइं जावंय।
ZEC 14:19 येह मिसर देस के मनखेमन के सजा अऊ ओ जम्मो जातिमन के सजा होही, जेमन पबितर-तम्बूमन के तिहार मनाय बर नइं जावंय।
ZEC 14:20 ओ दिन घोड़ामन के गरदन म लटके घंटीमन म ये सबद खोदके लिखाय होही, “यहोवा बर पबितर,” अऊ यहोवा के घर म खाना पकाय के बरतनमन बेदी के आघू म रखे पबितर कटोरामन सहीं होहीं।
ZEC 14:21 यरूसलेम अऊ यहूदा म हर एक बरतन सर्वसक्तिमान यहोवा बर पबितर होही, अऊ ओ जम्मो जऊन मन बलि चघाय बर आहीं, ओमन ओ बरतनमन ले कुछू बरतन ला लीहीं अऊ ओमा खाना पकाहीं। अऊ ओ दिन सर्वसक्तिमान यहोवा के घर म फेर कभू कोनो कनानी नइं होही।
MAL 1:1 एक अगमबानी: मलाकी के जरिये इसरायलीमन ला यहोवा के दिये गे बचन।
MAL 1:2 यहोवा ह कहत हे, “मेंह तोर ले मया करे हवंव,” पर तुमन पुछथव, “तेंह कइसे हमन ले मया करे हस?” यहोवा ह ये कहिथे, “का एसाव ह याकूब के भाई नइं रिहिस? तभो ले मेंह याकूब ले मया करेंव,
MAL 1:3 पर मेंह एसाव ले घिन करेंव अऊ ओकर पहाड़ी भागमन ला उजारके निरजन बना देंव अऊ ओकर बपौती भुइयां ला बंजर भुइयां के सियारमन के जगह बना देंव।”
MAL 1:4 एदोम ह कह सकत हे, “हालाकि हमन उजर तो गे हवन, तभो ले हमन टूटे-फूटे ला फेर बनाबो।” पर सर्वसक्तिमान यहोवा ह ये कहत हे: “ओमन फेर बनाहीं, पर मेंह गिरा दूहूं, अऊ ओमन दुस्ट के गढ़, अऊ अइसने मनखे कहाहीं, जेमन के ऊपर यहोवा के रिस ह हमेसा भड़के रहिथे।
MAL 1:5 तुम्हर आंखी ह येला देखही अऊ तुमन कहिहू, ‘यहोवा ह महान ए—अऊ त अऊ ओह इसरायल के सिवाना के बाहिर घलो महान ए!’ ”
MAL 1:6 सर्वसक्तिमान यहोवा ह कहिथे, “बेटा ह अपन ददा के, अऊ गुलाम ह अपन मालिक के आदर करथे। यदि मेंह ददा अंव, त मोर आदर कहां हवय? अऊ यदि मेंह मालिक अंव, त मोर इज्जत कहां हवय, जेकर हकदार मेंह अंव? “ये तुम पुरोहितमन अव, जेमन मोर नांव के आदर नइं करव। “पर तुमन पुछथव, ‘हमन कइसे तोर नांव के आदर नइं करेंन?’
MAL 1:7 “मोर बेदी म असुध जेवन चघाय के दुवारा। “पर तुमन पुछथव, ‘हमन कइसे तोला असुध करे हवन?’ “ये कहे के दुवारा कि यहोवा के मेज ह तुछ ए।
MAL 1:8 जब तुमन अंधरा पसु के बलि चघाथव, त का येह गलत नो हय? अऊ जब तुमन खोरवा अऊ बिमरहा पसु के बलि चघाथव, त का येह गलत नो हय? अइसने भेंट अपन राजपाल ला देय के कोसिस करव! का ओह तुमन ले खुस होही? का ओह तुमन ला गरहन करही?” सर्वसक्तिमान यहोवा ह कहिथे।
MAL 1:9 “पर अब तुमन परमेसर ले बिनती करव कि ओह हमर ऊपर किरपा करय। तुम्हर हांथ के चघाय अइसने भेंट ले, का ओह तुमन ला गरहन करही?” सर्वसक्तिमान यहोवा ह कहिथे।
MAL 1:10 “बने होतिस कि तुमन म ले कोनो मंदिर के कपाट ला बंद कर देतिस, ताकि तुमन मोर बेदी म बेकार के आगी झन बारतेव! मेंह तुमन ले खुस नइं अंव,” सर्वसक्तिमान यहोवा ह कहिथे, “अऊ मेंह तुम्हर हांथ ले कोनो चढ़ावा गरहन नइं करंव।
MAL 1:11 धरती के ये छोर ले लेके ओ छोर तक, जिहां सूरज ह उगथे अऊ जिहां सूरज बुड़थे, उहां जाति-जाति के मनखेमन के बीच मोर नांव ह महान होही। जम्मो जगह म मोर करा धूप अऊ सुध चढ़ावा लाने जाही, काबरकि जाति-जाति के मनखेमन के बीच मोर नांव ह महान होही,” सर्वसक्तिमान यहोवा ह कहिथे।
MAL 1:12 “पर तुमन ये कहिके येला अपबितर करथव, ‘परभू के मेज ह असुध ए,’ अऊ, ‘येकर जेवन ह तुछ अय।’
MAL 1:13 अऊ तुमन ये घलो कहिथव, ‘ये कइसे बोझा अय!’ अऊ ओला तुछ समझके, तुमन ओकर ऊपर नाक सिकोड़थव,” सर्वसक्तिमान यहोवा ह कहिथे। “जब तुमन घायल, खोरवा या बिमरहा पसुमन ला लानथव अऊ ओमन ला बलिदान के रूप म चघाथव, त का मोला अइसने बलिदान ला तुम्हर हांथ ले गरहन करना चाही?” यहोवा ह कहिथे।
MAL 1:14 “ओ ठग ह सरापित ए, जेकर झुंड म बने नर पसु हवय अऊ ओह येला देय बर बदना बदे हवय, पर ओह दोसयुक्त पसु के बलि परभू ला चघाथे। मोर नांव के भय जाति-जाति के मनखेमन म होवय, काबरकि मेंह एक महान राजा अंव,” सर्वसक्तिमान यहोवा ह कहिथे।
MAL 2:1 सर्वसक्तिमान यहोवा ह कहिथे, “अब हे पुरोहितमन, येह तुम्हर बर चेतउनी अय।
MAL 2:2 कहूं तुमन नइं सुनव, अऊ कहूं मोर नांव के आदर करे के नइं ठानव, त मेंह तुमन ला एक सराप दूहूं, अऊ मेंह तुम्हर आसीसमन ला सरापित करहूं। हव, मेंह ओमन ला पहिले ही सरापित कर चुके हंव, काबरकि तुमन मोर आदर करे बर नइं ठाने हव।
MAL 2:3 “तुम्हर कारन मेंह तुम्हर संतानमन ला डांटहूं; मेंह तुम्हर तिहार म बलिदान करे गे पसुमन के गोबर ला तुम्हर मुहूं म चुपराहूं, अऊ तुमन ला अइसने ही ले जाय जाही।
MAL 2:4 तब तुमन जानहू कि मेंह ये चेतउनी दे हंव, ताकि लेवीमन के संग मोर बांधे करार ह बने रहय,” सर्वसक्तिमान यहोवा ह कहिथे।
MAL 2:5 “मोर करार ह ओकर संग रिहिस अऊ येह जिनगी अऊ सांति के करार रिहिस अऊ मेंह ये करार ओला देंव; येह आदर-सम्मान बर रिहिस अऊ ओह मोर आदर-सम्मान करिस अऊ मोर नांव के भय मानिस।
MAL 2:6 ओ सही निरदेस ह ओला कंठस्थ रिहिस, अऊ ओकर मुहूं ले कोनो लबारी बात नइं निकलिस। ओह सांति अऊ सीधई ले मोर संग चलत रिहिस अऊ ओह बहुंत झन ला पाप के रद्दा ले लहुंटा लानिस।
MAL 2:7 “काबरकि एक पुरोहित ला अपन बात के दुवारा गियान ला बनाय रखना चाही, काबरकि ओह सर्वसक्तिमान यहोवा के संदेसिया ए अऊ मनखेमन ओकर मुहूं ले सिकछा पाय के लालसा रखथें।
MAL 2:8 पर तुमन सही रद्दा ले भटक गे हवव अऊ तुम्हर सिकछा ह बहुंत झन के ठोकर खाय के कारन बने हवय; तुमन तो लेवी के संग बांधे करार ला टोर दे हवव,” सर्वसक्तिमान यहोवा ह कहिथे।
MAL 2:9 “एकरसेति मेंह तुमन ला जम्मो झन के आघू म अनादर अऊ अपमानित करे हवंव, काबरकि तुमन मोर रद्दा म नइं रेंगे हवव, पर कानून के मामला म मुहूं देखके नियाय करे हवव।”
MAL 2:10 का हमन जम्मो झन के एकेच ददा नइं ए? का एकेच परमेसर ह हमन ला नइं बनाय हवय? हमन काबर एक-दूसर ले बिसवासघात करके अपन पुरखामन के करार के अपमान करत हन?
MAL 2:11 यहूदा ह बिसवासघात करे हवय। इसरायल अऊ यरूसलेम म घिन काम करे गे हवय: यहूदा ह ओ माईलोगनमन ले बिहाव करे हवय, जऊन मन आने देवता के अराधना करथें अऊ अइसने करके ओह यहोवा के ओ पबितर-स्थान ला अपबितर करे हवय, जऊन ला ओह मया करथे।
MAL 2:12 जऊन मनखे ह अइसने करथे, चाहे ओह कोनो घलो होवय, यहोवा ह ओला याकूब के तम्बूमन ले निकाल देवय—भले ही ओह सर्वसक्तिमान यहोवा ला चघाय बर एक बलिदान लानय।
MAL 2:13 दूसर काम तुमन ये करथव: यहोवा के बेदी ला तुमन अपन आंसू ले भिजो देथव। तुमन रोथव अऊ सोक मनाथव काबरकि ओह अब तुम्हर चढ़ावामन कोति नइं देखय या खुस होके तुम्हर हांथ ले ओमन ला गरहन नइं करय।
MAL 2:14 तुमन पुछथव, “अइसने काबर होथे?” काबरकि यहोवा ह तोर अऊ तोर जवानी के घरवाली के बीच म गवाह हवय। हालाकि ओह तोर जिनगी भरके संगी, बिहाव म करे गे करार के तोर घरवाली अय, तभो ले तेंह ओकर संग बिसवासघात करे हवस।
MAL 2:15 का एके परमेसर ह तुमन ला नइं बनाईस? तोर देहें अऊ आतमा ओकर अय? अऊ परमेसर ह का चाहथे? परमेसर के भक्ति करइया संतान। एकरसेति सावधान रह, अऊ अपन जवानी के घरवाली के संग बिसवासघात झन कर।
MAL 2:16 यहोवा, इसरायल के परमेसर ह कहिथे, “जऊन मनखे ह अपन घरवाली ले घिन करथे अऊ ओला तलाक देथे, ओह ओकर ऊपर हिंसा करथे, जेकर कि ओला रकछा करना चाही,” सर्वसक्तिमान यहोवा ह कहिथे। एकरसेति सावधान रहव अऊ बिसवासघात झन करव।
MAL 2:17 तुमन अपन गोठ ले यहोवा ला निरास कर दे हवव। अऊ तुमन पुछथव, “हमन ओला कइसे निरास करे हवन?” ये कहे के दुवारा, “ओ जम्मो जेमन दुस्ट काम करथें, ओमन यहोवा के नजर म बने मनखे अंय, अऊ यहोवा ह ओमन ले खुस हवय” या “नियायी परमेसर कहां हवय?”
MAL 3:1 सर्वसक्तिमान यहोवा ह कहिथे, “मेंह अपन संदेसिया ला पठोहूं, जऊन ह मोर आय के पहिली रद्दा तियार करही। तब परभू, जऊन ला तुमन खोजत हव, अचानक अपन मंदिर म आ जाही; अऊ करार के ओ संदेसिया जेकर तुमन ईछा रखथव, ओह आ जाही।”
MAL 3:2 पर ओकर आय के दिन ला कोन ह सहे सकही? अऊ जब ओह परगट होही, त ओकर आघू म कोन ठाढ़ हो सकही? काबरकि ओह सुनार के आगी या धोबी के साबुन सहीं होही।
MAL 3:3 ओह चांदी ला साफ करइया अऊ सुध करइया के रूप म बईठही; ओह लेवीमन ला सुध करही अऊ ओमन ला सोन अऊ चांदी सहीं साफ करही। तब यहोवा करा मनखेमन होहीं, जऊन मन धरमीपन म भेंट चघाहीं,
MAL 3:4 तब यहूदा अऊ यरूसलेम के मनखेमन के भेंट ला यहोवा ह अइसे गरहन करही, जइसे कि तइहा के दिनमन म, पहिले के बछरमन म गरहन करत रिहिस।
MAL 3:5 सर्वसक्तिमान यहोवा ह कहिथे, “तब मेंह तुमन ला परखे बर आहूं। मेंह जादू-टोना करइया, बेभिचारी अऊ लबरा गवाही देवइया के बिरोध म, अऊ जऊन मन बनिहार के बनी ला दबाथें, जऊन मन बिधवा अऊ मुरहामन के ऊपर अंधेर करथें, अऊ तुम्हर बीच रहइया परदेसीमन के नियाय ला बिगाड़थें, अऊ मोर भय नइं मानंय, ओ जम्मो झन के बिरोध म तुरते गवाही दूहूं।”
MAL 3:6 सर्वसक्तिमान यहोवा ह कहिथे, “में यहोवा ह नइं बदलंव। एकरसेति, हे याकूब के संतानमन, तुमन नास नइं होय हवव।
MAL 3:7 अपन पुरखामन के समय ले, तुमन मोर हुकूम ले हटत आय हवव अऊ ओकर पालन नइं करे हव। तुमन मोर करा लहुंटके आवव, अऊ मेंह तुम्हर करा लहुंटके आहूं। “पर तुमन पुछथव, ‘हमन कइसे लहुंटके आवन?’
MAL 3:8 “का मरनहार मनखे ह परमेसर ला लूट सकथे? तभो ले तुमन मोला लूटथव। “पर तुमन पुछथव, ‘हमन तोला कइसे लूटत हन?’ ” सर्वसक्तिमान यहोवा ह कहिथे, “दसमांस अऊ भेंटमन म।
MAL 3:9 तुमन एक सराप के बस म हवव—तुम्हर जम्मो जाति ह—काबरकि तुमन मोला लूटत हव।
MAL 3:10 जम्मो दसमांस ला भंडारघर म ले आवव कि मोर घर म जेवन रहय। अइसने करके मोला परखव अऊ देखव कि मेंह स्वरग के झरोखामन ला खोलके तुम्हर ऊपर अइसन अपरमपार आसीस के बरसा करहूं कि तुम्हर करा येला रखे बर परयाप्त जगह नइं होही।
MAL 3:11 मेंह तुम्हर फसल ला नास करइया कीरामन ले बचाहूं, अऊ तुम्हर अंगूर के नारमन के फर ह पाके के पहिली कइंचा नइं गिरही,” सर्वसक्तिमान यहोवा ह कहिथे।
MAL 3:12 “तब जम्मो जाति के मनखेमन तुमन ला धइन कहिहीं, काबरकि तुम्हर देस ह खुसी ले भरे देस होही,” सर्वसक्तिमान यहोवा ह कहिथे।
MAL 3:13 यहोवा ह कहिथे, “तुमन मोर बिरोध म घमंड ले गोठियाय हवव।” “तभो ले तुमन पुछथव, ‘हमन तोर बिरोध म का कहे हन?’
MAL 3:14 “तुमन कहे हवव, ‘परमेसर के सेवा करई ह बेकार अय। ओकर बताय काममन ला पूरा करे ले अऊ सर्वसक्तिमान यहोवा के आघू म दुखियारी सहीं जाय ले हमन ला का फायदा होथे।
MAL 3:15 पर अब हमन घमंडी मनखेमन ला धइन कहत हन। खचित दुस्ट मनखेमन उन्नति करथें, अऊ इहां तक कि जब ओमन परमेसर के परिछा करथें, तभो ले बांच जाथें।’ ”
MAL 3:16 तब जऊन मन यहोवा के भय मानिन, ओमन एक-दूसर ले गोठियाईन, अऊ यहोवा ह धियान देके सुनिस। जऊन मन यहोवा के भय मानिन अऊ ओकर नांव के आदर करिन, ओमन के बारे म परमेसर के आघू म सुरता के एक किताब लिखे गीस।
MAL 3:17 सर्वसक्तिमान यहोवा ह कहिथे, “ठहिराय दिन म जब मेंह अपन काम करहूं, त ओमन मोर कीमती भाग होहीं। मेंह ओमन ला बचाहूं जइसने कि एक ददा ह अपन सेवा करइया बेटा ऊपर करूना करथे अऊ ओला बचाथे।
MAL 3:18 तब तुमन फेर धरमी अऊ दुस्ट के बीच म, अऊ जऊन मन परमेसर के सेवा करथें अऊ जऊन मन सेवा नइं करंय ओमन के बीच म फरक ला देखहू।”
MAL 4:1 सर्वसक्तिमान यहोवा ह कहिथे, “सही म, ओ धधकत भट्ठी सहीं बरत दिन ह आवत हे। जम्मो घमंडी अऊ दुस्ट मनखेमन भूंसा कस हो जाहीं, अऊ ओ अवइया दिन म ओमन ला आगी म डारे जाही, न तो ओमन के कोनो जरी अऊ न ही ओमन के कोनो डारा बांचही।
MAL 4:2 पर तुमन जऊन मन मोर नांव के आदर करथव, धरमीपन के सूरज ह चंगई देवइया अपन किरन के संग उदय होही। अऊ तुमन बाहिर निकलहू अऊ मोटा-ताजा बछवा कस उछल-कूद करहू।
MAL 4:3 तब तुमन दुस्टमन ला कुचरहू; ओमन मोर ठहिराय दिन म तुम्हर गोड़ के खाल्हे के राख हो जाहीं,” सर्वसक्तिमान यहोवा ह कहिथे।
MAL 4:4 “मोर सेवक मूसा के कानून ला सुरता करव, ओ हुकूम अऊ कानून, जऊन ला मेंह ओला जम्मो इसरायलीमन बर होरेब पहाड़ म दे रहेंव।
MAL 4:5 “देखव, यहोवा के ओ बड़े अऊ भयानक दिन के आय के पहिली, मेंह तुम्हर करा एलियाह अगमजानी ला पठोहूं।
MAL 4:6 ओह दाई-ददा के हिरदय ला ओमन के लइकामन कोति, अऊ लइकामन के हिरदय ला ओमन के दाई-ददा कोति करही; नइं तो मेंह आके देस के पूरा सतियानास कर दूहूं।”
MAT 1:1 येह यीसू मसीह के बंसावली अय—यीसू ह दाऊद के बंस के रिहिस अऊ दाऊद ह अब्राहम के बंस के रिहिस।
MAT 1:2 अब्राहम के बेटा इसहाक रिहिस; इसहाक के बेटा याकूब रिहिस; याकूब ह यहूदा अऊ ओकर भाईमन के ददा रिहिस;
MAT 1:3 यहूदा के बेटा पेरेस अऊ जेरह रिहिन; जेमन के दाई के नांव तामार रिहिस; पेरेस के बेटा हेसरोन रिहिस, अऊ हेसरोन के बेटा एराम रिहिस;
MAT 1:4 एराम के बेटा अम्मीनादाब रिहिस; अम्मीनादाब के बेटा नहसोन, नहसोन के बेटा सलमोन रिहिस;
MAT 1:5 सलमोन के बेटा बोअज रिहिस; बोअज के दाई के नांव राहाब रिहिस; बोअज के बेटा ओबेद रिहिस; अऊ ओबेद के दाई के नांव रूत रिहिस; ओबेद के बेटा यिसै रिहिस;
MAT 1:6 यिसै के बेटा राजा दाऊद रिहिस। दाऊद के बेटा सुलेमान रिहिस; सुलेमान ह ओ माईलोगन ले जनमिस, जऊन ह पहिली उरियाह के घरवाली रिहिस;
MAT 1:7 सुलेमान के बेटा रहूबियाम रिहिस; रहूबियाम के बेटा अबियाह रिहिस; अऊ अबियाह के बेटा आसा रिहिस;
MAT 1:8 आसा के बेटा यहोसापात रिहिस; यहोसापात के बेटा योराम रिहिस; अऊ योराम के बेटा उजियाह रिहिस;
MAT 1:9 उजियाह के बेटा योताम रिहिस; योताम के बेटा आहाज रिहिस; अऊ आहाज के बेटा हिजकियाह रिहिस;
MAT 1:10 हिजकियाह के बेटा मनस्से रिहिस; मनस्से के बेटा आमोन रिहिस; अऊ आमोन के बेटा योसियाह रिहिस;
MAT 1:11 बंधुवा होके बेबिलोन देस ले जाय के बेरा म योसियाह के बेटा यकुन्याह, अऊ ओकर भाईमन रिहिन।
MAT 1:12 बंधुवा होके बेबिलोन जाय के पाछू: यकुन्याह के बेटा सालतीएल रिहिस; अऊ सालतीएल के बेटा जरूब्बाबेल रिहिस;
MAT 1:13 जरूब्बाबेल के बेटा अबीहूद रिहिस; अबीहूद के बेटा एलयाकीम रिहिस; अऊ एलयाकीम के बेटा आजोर रिहिस;
MAT 1:14 आजोर के बेटा सादोक रिहिस; सादोक के बेटा अखीम रिहिस; अऊ अखीम के बेटा इलीहूद रिहिस;
MAT 1:15 इलीहूद के बेटा एलिआजर रिहिस; एलिआजर के बेटा मतान रिहिस; अऊ मतान के बेटा याकूब रिहिस;
MAT 1:16 याकूब के बेटा यूसुफ रिहिस; यूसुफ ह मरियम के घरवाला रिहिस, अऊ मरियम ले यीसू जनमिस, जऊन ला मसीह कहे जाथे।
MAT 1:17 ये किसम ले अब्राहम ले लेके दाऊद तक जम्मो चौदह पीढ़ी होईस, अऊ दाऊद ले लेके बेबिलोन म बंधुवई म जावत तक चौदह पीढ़ी, अऊ बंधुवई ले लेके मसीह तक चौदह पीढ़ी होईस।
MAT 1:18 यीसू मसीह के जनम ये किसम ले होईस। यीसू के दाई मरियम के मंगनी यूसुफ के संग होय रिहिस, पर एकर पहिली कि ओमन दूनों घरवाला-घरवाली के रूप म एक संग होतिन, मरियम ह पबितर आतमा के जरिये पेट म पाय गीस।
MAT 1:19 काबरकि मरियम के होवइया घरवाला यूसुफ ह एक धरमी मनखे रिहिस अऊ ओह मरियम ला मनखेमन के आघू म बदनाम करे नइं चाहत रिहिस, एकर खातिर ओह ओला चुपेचाप छोंड़ देय के बिचार करिस।
MAT 1:20 पर ओकर ये बिचार करे के पाछू, परभू के एक स्वरगदूत ह ओला सपना म दिखिस अऊ ओ स्वरगदूत ह ओला कहिस, “हे यूसुफ, दाऊद के संतान, तेंह मरियम ला अपन घरवाली के रूप म घर लाय बर झन डर, काबरकि जऊन ह ओकर गरभ म हवय, ओह पबितर आतमा के तरफ ले अय।
MAT 1:21 ओह एक बेटा ला जनम दीही अऊ तें ओकर नांव यीसू रखबे, काबरकि ओह अपन मनखेमन ला ओमन के पाप ले छुटकारा दीही।”
MAT 1:22 ये जम्मो बात एकर खातिर होईस कि जऊन बात, परभू ह अगमजानी के जरिये कहे रिहिस, ओह पूरा होवय:
MAT 1:23 “देखव, एक कुंवारी ह गरभवती होही, अऊ ओह एक बेटा जनमही, अऊ ओकर नांव इमानुएल रखे जाही” (जेकर मतलब होथे “परमेसर हमर संग”)।
MAT 1:24 जब यूसुफ ह नींद ले जागिस, त ओह वइसनेच करिस जइसने परभू के स्वरगदूत ह ओला हुकूम दे रिहिस अऊ ओह मरियम ला अपन घरवाली के रूप म अपन घर ले गीस।
MAT 1:25 पर जब तक मरियम ह बेटा ला जनम नइं दीस, तब तक यूसुफ ह ओकर करा नइं गीस। अऊ ओह ओकर नांव यीसू रखिस।
MAT 2:1 जब हेरोदेस राजा ह राज करत रिहिस, त यहूदिया प्रदेस के बैतलहम गांव म यीसू के जनम होईस, तब पूरब दिग के देस म ले कुछू जोतिसीमन यरूसलेम सहर म आईन,
MAT 2:2 अऊ मनखेमन ले पुछिन, “ओ लइका के जनम कहां होईस हवय, जऊन ह यहूदीमन के राजा अय? हमन पूरब दिग म ओकर तारा देखे हवन अऊ ओकर अराधना करे बर आय हवन।”
MAT 2:3 ये सुनके हेरोदेस राजा अऊ यरूसलेम सहर के जम्मो मनखेमन घबरा गीन।
MAT 2:4 राजा ह मनखेमन के जम्मो मुखिया पुरोहित अऊ कानून के गुरूमन ला एक जगह म बलाईस अऊ ओमन ले पुछिस, “मसीह के जनम कहां होना चाही?”
MAT 2:5 ओमन कहिन, “यहूदिया प्रदेस के बैतलहम गांव म, काबरकि अगमजानी ह अइसने लिखे हवय:
MAT 2:6 “ ‘हे यहूदा प्रदेस के बैतलहम गांव, तेंह यहूदा प्रदेस के बड़े सहरमन ले कोनो भी किसम ले छोटे नो हस, काबरकि तोर म ले एक झन सासन करइया निकलही, जऊन ह मोर मनखे इसरायलीमन के रखवारी करही।’”
MAT 2:7 तब हेरोदेस राजा ह जोतिसीमन ला चुपेचाप बलाईस अऊ ओमन ले पता लगाईस कि तारा ह ठऊका का बेरा म दिखे रिहिस।
MAT 2:8 तब ओह ओमन ला ये कहिके बैतलहम पठोईस, “जावव अऊ ओ लइका के बारे म सही-सही पता मालूम करव। अऊ जब ओह तुमन ला मिल जावय, त मोला खबर भिजवाव, ताकि महूं घलो जाके ओकर अराधना करंव।”
MAT 2:9 जोतिसीमन राजा के बात ला सुने के पाछू अपन डहार म चल दीन, अऊ जऊन तारा ला ओमन पूरब दिग म देखे रिहिन, ओह ओमन के आघू-आघू गीस अऊ ओ ठऊर के ऊपर जाके ठहर गीस, जिहां लइका ह रहय।
MAT 2:10 जब ओमन ओ तारा ला देखिन, त अब्बड़ आनंदित होईन।
MAT 2:11 घर भीतरी जाके, ओमन लइका ला ओकर दाई मरियम के संग देखिन अऊ भुइयां म गिरके ओला दंडवत करिन। तब ओमन अपन-अपन झोला ला खोलके ओला सोन, लोबान अऊ गंधरस के भेंट चघाईन।
MAT 2:12 अऊ परमेसर ह ओमन ला सपना म चेतउनी दीस कि ओमन हेरोदेस करा झन जावंय, एकरसेति, ओमन आने डहार ले अपन देस लहुंट गीन।
MAT 2:13 जब जोतिसीमन चले गीन, त परभू के एक स्वरगदूत ह सपना म यूसुफ ला दिखाई दीस अऊ ओला कहिस, “उठ, लइका अऊ ओकर दाई ला लेके मिसर देस भाग जा। अऊ जब तक मेंह नइं कहंव, तब तक तें उहेंच रह, काबरकि हेरोदेस राजा ह ये लइका ला मरवाय खातिर खोजवइया हवय।”
MAT 2:14 तब यूसुफ ह उठिस अऊ रथियाच, ओह लइका अऊ ओकर दाई ला लेके, मिसर देस चल दीस,
MAT 2:15 अऊ ओह उहां हेरोदेस के मिरतू तक रिहिस, ताकि जऊन बात परभू ह अगमजानी के दुवारा कहे रिहिस, ओह पूरा होवय: “मिसर देस ले मेंह अपन बेटा ला बलांय।”
MAT 2:16 जब हेरोदेस राजा ला मालूम होईस कि जोतिसीमन ओकर संग धोखा करे हवंय, त ओह बहुंत नराज होईस, अऊ ओह ये हुकूम दीस कि बैतलहम अऊ ओकर आसपास के गांव के दू बछर या ओकर ले छोटे जम्मो लइकामन ला मार डारे जावय। काबरकि येह जोतिसीमन के बताय गय समय के मुताबिक रिहिस।
MAT 2:17 तब जऊन बात यरमियाह अगमजानी कहे रिहिस, ओह पूरा होईस:
MAT 2:18 “रामाह सहर म रोये अऊ बहुंते बिलाप करे के अवाज सुनई दीस, राहेल ह अपन लइकामन खातिर रोवत रिहिस, अऊ ओह नइं चाहत रिहिस कि कोनो ओला सांतवना देवंय, काबरकि ओकर लइकामन मर गे रिहिन।”
MAT 2:19 हेरोदेस राजा के मरे के पाछू, परभू के एक स्वरगदूत ह मिसर देस म यूसुफ ला सपना म दिखाई दीस,
MAT 2:20 अऊ यूसुफ ले कहिस, “उठ! लइका अऊ ओकर दाई ला लेके इसरायल देस चले जा, काबरकि जऊन मन ये लइका के परान लेय के कोसिस करत रिहिन, ओमन मर गे हवंय।”
MAT 2:21 तब यूसुफ ह उठिस, अऊ लइका अऊ ओकर दाई ला लेके इसरायल देस चल दीस।
MAT 2:22 पर जब ओह ये सुनिस कि अरखिलाउस ह अपन ददा हेरोदेस के जगह म यहूदिया प्रदेस म राज करत हवय, त ओह उहां जाय बर डराईस। सपना म चेतउनी पाके, ओह गलील प्रदेस चले गीस,
MAT 2:23 अऊ ओह उहां जाके नासरत नांव के एक नगर म निवास करिस। तब अगमजानीमन के दुवारा कहे गे ये बात ह पूरा होईस: “ओला नासरी कहे जाही।”
MAT 3:1 ओ दिनमन म यूहन्ना बतिसमा देवइया आईस अऊ यहूदिया प्रदेस के सुनसान जगह म ये परचार करे लगिस,
MAT 3:2 “पछताप करव, काबरकि स्वरग के राज ह लकठा आ गे हवय।”
MAT 3:3 ये यूहन्ना ओ मनखे अय, जेकर बारे म यसायाह अगमजानी ह ये कहे रिहिस: “सुनसान जगह म एक झन अवाज देवत रिहिस, ‘परभू बर डहार ला तियार करव, अऊ ओकर डहार ला सीधा करव।’ ”
MAT 3:4 यूहन्ना ह ऊंट के रूआं के बने कपड़ा पहिरय अऊ अपन कनिहां म चमड़ा के बने पट्टा बांधय। ओह फांफा अऊ जंगली मंधरस खावय।
MAT 3:5 फेर यरूसलेम, अऊ जम्मो यहूदिया प्रदेस अऊ यरदन नदी के जम्मो छेत्र के मनखेमन ओकर करा गीन,
MAT 3:6 अऊ अपन-अपन पाप ला मानके, ओमन यरदन नदी म यूहन्ना ले बतिसमा लीन।
MAT 3:7 जब यूहन्ना बतिसमा देवइया ह देखिस कि अब्बड़ फरीसी अऊ सदूकीमन ओकर करा बतिसमा लेय बर आवत हवंय, त ओह ओमन ला कहिस, “हे जहरिला सांप के पीलामन हो! तुमन ला कोन ह चेता दीस कि तुमन परमेसर के अवइया कोरोध ले भागव?
MAT 3:8 अपन काम के दुवारा देखावव कि पाप ले पछतावा करे हवव।
MAT 3:9 अऊ अपन मन म ये बात झन सोचव कि तुमन अब्राहम के संतान अव। मेंह तुमन ला बतावत हंव कि ये पथरामन ले परमेसर ह अब्राहम बर संतान पईदा कर सकथे।
MAT 3:10 टंगिया ला पहिले ही रूखमन के जरी म रखे जा चुके हवय, अऊ जऊन रूख म बने फर नइं फरय, ओह काटे अऊ आगी म झोंके जाही।
MAT 3:11 “जऊन मन अपन पाप ले पछताप करथें, मेंह ओमन ला पानी ले बतिसमा देवत हंव। पर मोर बाद, एक झन आही, जऊन ह मोर ले जादा सक्तिसाली ए। मेंह ओकर पनही ला उठाय के लईक घलो नो हंव। ओह तुमन ला पबितर आतमा अऊ आगी ले बतिसमा दीही।
MAT 3:12 ओकर सूपा ह ओकर हांथ म हवय अऊ ओह अपन कोठार ला साफ करही, अऊ अपन गहूं ला कोठा म कुढ़ोही। पर ओह भूंसा ला ओ आगी म बारही, जऊन ह कभू नइं बुतावय।”
MAT 3:13 तब यीसू ह गलील प्रदेस ले यरदन नदी करा यूहन्ना ले बतिसमा लेय बर आईस।
MAT 3:14 पर यूहन्ना ह ये कहिके ओला रोके के कोसिस करिस, “मोला तोर ले बतिसमा लेय के जरूरत हवय, अऊ तेंह मोर करा आय हवस?”
MAT 3:15 पर यीसू ह ओला ये जबाब दीस, “अभी तो अइसने होवन दे; काबरकि जम्मो धरमीपन ला पूरा करे बर अइसने करई, हमर बर उचित ए।” तब यूहन्ना ह यीसू के बात ला मान लीस।
MAT 3:16 बतिसमा लेय के बाद यीसू ह तुरते पानी ले बाहिर निकलिस। ओहीच समय अकास ह खुल गीस, अऊ ओह परमेसर के आतमा ला पंड़की के सहीं अपन ऊपर उतरत देखिस।
MAT 3:17 अऊ अकास ले ये अवाज आईस, “येह मोर मयारू बेटा अय, जेकर ले मेंह बहुंत खुस हवंव।”
MAT 4:1 तब पबितर आतमा ह यीसू ला निरजन जगह म ले गीस कि सैतान के दुवारा ओकर परिछा होवय।
MAT 4:2 यीसू ह चालीस दिन अऊ चालीस रात उपास रिहिस, ओकर पाछू ओला भूख लगिस।
MAT 4:3 तब सैतान ह ओकर करा आईस अऊ कहिस, “यदि तेंह परमेसर के बेटा अस, त ये पथरामन ले कह कि येमन रोटी बन जावंय।”
MAT 4:4 यीसू ह जबाब दीस, “परमेसर के बचन म लिखे हवय, ‘मनखे ह सिरिप रोटी ले ही जीयत नइं रहय, फेर हर ओ बचन, जऊन ह परमेसर के मुहूं ले निकलथे जीयत रहिही।’”
MAT 4:5 तब सैतान ह यीसू ला पबितर सहर म ले गीस अऊ ओला मंदिर के टीप म ठाढ़ करके कहिस,
MAT 4:6 “कहूं तेंह परमेसर के बेटा अस, त उहां ले खाल्हे कूद जा, काबरकि परमेसर के बचन म ये लिखे हवय, “परमेसर ह तोर बारे म अपन स्वरगदूतमन ला हुकूम दीही, अऊ ओमन तोला अपन हांथ म उठा लीहीं, ताकि तोर गोड़ म पथरा ले चोट झन लगय।”
MAT 4:7 यीसू ह ओला कहिस, “परमेसर के बचन म ये घलो लिखे हवय, ‘परभू अपन परमेसर के परिछा झन कर।’”
MAT 4:8 तब फेर सैतान ह यीसू ला एक ठन बहुंत ऊंच पहाड़ ऊपर ले गीस अऊ ओला संसार के जम्मो राजपाट अऊ ओकर सोभा ला देखाके कहिस,
MAT 4:9 “यदि तेंह झुकके मोर अराधना करबे, त मेंह तोला ये जम्मो ला दे दूहूं।”
MAT 4:10 फेर यीसू ह ओला कहिस, “हे सैतान! मोर ले दूरिहा हट; काबरकि परमेसर के बचन म ये लिखे हवय, तेंह परभू अपन परमेसर के अराधना कर अऊ सिरिप ओकरेच सेवा कर।”
MAT 4:11 तब सैतान ह ओकर करा ले चले गीस, अऊ स्वरगदूतमन आके ओकर सेवा करे लगिन।
MAT 4:12 जब यीसू ह ये सुनिस कि यूहन्ना ला जेल म डार दे गे हवय, त ओह गलील प्रदेस ला चल दीस।
MAT 4:13 यीसू ह, नासरत ला छोंड़ दीस अऊ कफरनहूम सहर म जाके बस गीस, ये सहर ह जबूलून अऊ नपताली के सीमना म झील के तीर म रिहिस।
MAT 4:14 येह एकर खातिर होईस ताकि यसायाह अगमजानी के दुवारा कहे गय ये बात ह पूरा होवय:
MAT 4:15 “जबूलून के देस अऊ नपताली के देस, समुंदर के तरफ जाय के रसता म, यरदन नदी के ओ पार, आनजातमन के गलील प्रदेस,
MAT 4:16 जऊन मनखेमन अंधियार म रहत रिहिन, ओमन एक बड़े अंजोर ला देखिन; अऊ जऊन मन मिरतू के छइहां के प्रदेस म रहत रिहिन, ओमन के ऊपर एक अंजोर चमकिस।”
MAT 4:17 ओ समय ले यीसू ह परचार करन लगिस अऊ कहिस, “अपन पाप ले पछताप करव, काबरकि स्वरग के राज ह लकठा आ गे हवय।”
MAT 4:18 जब यीसू ह गलील झील के तीरे-तीर जावत रिहिस, त ओह दू झन भाईमन ला देखिस; ओमन के नांव सिमोन जऊन ला पतरस कहे जाथे अऊ ओकर भाई अन्द्रियास रिहिस। ये दूनों भाई झील म जाल डारत रिहिन, काबरकि ओमन मछुआर रिहिन।
MAT 4:19 यीसू ह ओमन ला कहिस, “मोर पाछू आवव; मेंह तुमन ला मनखे पकड़इया मछुआर बनाहूं।”
MAT 4:20 ओमन तुरते अपन जाल ला छोंड़के ओकर पाछू हो लीन।
MAT 4:21 उहां ले आघू जाय के बाद, यीसू ह दू झन अऊ भाईमन ला देखिस—याकूब अऊ ओकर भाई यूहन्ना ला, जऊन मन जबदी के बेटा रिहिन। ओमन अपन ददा जबदी के संग एक ठन डोंगा म रहंय अऊ अपन जाल ला सुधारत रहंय। यीसू ह ओमन ला बलाईस,
MAT 4:22 अऊ ओमन तुरते डोंगा अऊ अपन ददा ला छोंड़के यीसू के पाछू हो लीन।
MAT 4:23 यीसू ह जम्मो गलील प्रदेस म जाके, यहूदीमन के सभा-घर म उपदेस दीस, अऊ परमेसर के राज के सुघर संदेस के परचार करिस, अऊ मनखेमन के हर किसम के रोग अऊ बेमारी ला बने करिस।
MAT 4:24 यीसू के खबर ह जम्मो सीरिया देस म फईल गीस, अऊ मनखेमन ओ जम्मो झन ला ओकर करा लाने लगिन, जऊन मन कतको किसम के रोग ले बेमार रहंय, जऊन मन असहनीय पीरा म रहंय, जऊन मन ला परेत आतमा धरे रहय, जऊन मन ला मिरगी के बेमारी रहय, अऊ जऊन मन ला लकवा मारे रहय; यीसू ह ओ जम्मो झन ला चंगा करिस।
MAT 4:25 गलील प्रदेस, दिकापुलिस, यरूसलेम, यहूदिया, अऊ यरदन नदी के ओ पार के मनखेमन के एक बड़े भीड़ ओकर पाछू हो लीस।
MAT 5:1 जब यीसू ह मनखेमन के भीड़ ला देखिस, त ओह पहाड़ ऊपर चघके उहां बईठ गीस। तब ओकर चेलामन ओकर करा आईन,
MAT 5:2 अऊ ओह ओमन ला उपदेस देवन लगिस। ओह कहिस:
MAT 5:3 “धइन अंय ओमन, जऊन मन आतमा म दीन अंय, काबरकि स्वरग के राज ओमन के अय।
MAT 5:4 धइन अंय ओमन, जऊन मन सोक करथें, काबरकि ओमन ला सांति दिये जाही।
MAT 5:5 धइन अंय ओमन, जऊन मन नरम सुभाव के अंय, काबरकि ओमन धरती के उत्तराधिकारी होहीं।
MAT 5:6 धइन अंय ओमन, जऊन मन धरमीपन बर भूखन अऊ पीयासन हवंय, काबरकि परमेसर ह ओमन ला संतोस करही।
MAT 5:7 धइन अंय ओमन, जऊन मन दयालु अंय, काबरकि ओमन के ऊपर दया करे जाही।
MAT 5:8 धइन अंय ओमन, जऊन मन के हिरदय निरमल हवय, काबरकि ओमन परमेसर के दरसन करहीं।
MAT 5:9 धइन अंय ओमन, जऊन मन मेल-मिलाप कराथें, काबरकि ओमन ला परमेसर के बेटा कहे जाही।
MAT 5:10 धइन अंय ओमन, जऊन मन धरमीपन के कारन सताय जाथें, काबरकि स्वरग के राज ओमन के अय।
MAT 5:11 “धइन अव तुमन, जब मनखेमन मोर कारन तुम्हर बेजत्ती करथें, तुमन ला सताथें अऊ झूठ-मूठ के, तुम्हर बिरोध म किसम-किसम के खराप बात कहिथें।
MAT 5:12 आनंद मनावव अऊ खुस रहव, काबरकि स्वरग म तुम्हर बर बड़े ईनाम रखे हवय। तुम्हर ले पहिली अगमजानीमन ला मनखेमन अइसनेच सताय रिहिन।
MAT 5:13 “तुमन धरती के नून अव। पर कहूं नून ह अपन सुवाद ला गंवा देथे, त कोनो किसम ले येला फेर नूनचूर नइं करे जा सकय। येह कोनो काम के नइं रह जावय। येला बाहिर फटिक दिये जाथे अऊ येह मनखेमन के गोड़ तरी रऊंदे जाथे।
MAT 5:14 “तुमन संसार के अंजोर अव। पहाड़ ऊपर बसे सहर ह छिपे नइं रह सकय।
MAT 5:15 अऊ न तो मनखेमन दीया ला बारके बड़े कटोरा के खाल्हे म रखथें, पर दीया ला दीवट ऊपर मढ़ाथें, जिहां ले येह घर के हर एक जन ला अंजोर देथे।
MAT 5:16 ओही किसम ले, तुम्हर अंजोर ह मनखेमन के आघू म चमकय, ताकि ओमन तुम्हर बने काम ला देखंय अऊ स्वरग म रहइया तुम्हर ददा के बड़ई करंय।
MAT 5:17 “ये झन सोचव कि मेंह मूसा के कानून या अगमजानीमन के बातमन ला खतम करे बर आय हवंव। मेंह ओमन ला खतम करे खातिर नइं, पर ओमन ला पूरा करे खातिर आय हवंव।
MAT 5:18 मेंह तुमन ला सच कहत हंव कि जब तक स्वरग अऊ धरती हवय, तब तक मूसा के कानून के एक छोटे अकछर या बिन्दू घलो पूरा होय बिगर खतम नइं होवय।
MAT 5:19 जऊन ह ये हुकूममन के छोटे ले छोटे बात ला घलो नइं मानय अऊ आने मन ला घलो अइसने करे बर सिखोथे, ओह स्वरग के राज म सबले छोटे समझे जाही, पर जऊन ह ये हुकूममन ला मानथे अऊ आने मन ला माने बर सिखोथे, ओह स्वरग के राज म बड़े समझे जाही।
MAT 5:20 काबरकि मेंह तुमन ला कहत हवंव कि जब तक तुम्हर धरमीपन ह फरीसी अऊ कानून के गुरूमन के धरमीपन ले बढ़के नइं होवय, तब तक तुमन स्वरग के राज म नइं जा सकव।
MAT 5:21 “तुमन सुने हवव कि बहुंत पहिले मनखेमन ला ये कहे गे रिहिस, ‘हतिया झन करव, अऊ यदि कोनो हतिया करथे, त ओह कचहरी म दंड के भागी होही।’
MAT 5:22 पर मेंह तुमन ला कहत हंव कि यदि कोनो अपन भाई ऊपर गुस्सा करथे, त ओह दंड के भागी होही। जऊन कोनो अपन भाई के बेजत्ती करथे, त ओला धरम महासभा के आघू म जबाब देना पड़ही। पर जऊन कोनो अपन भाई ला कहिथे, ‘ए मुरूख!’ ओह नरक के आगी म पड़े के खतरा म होही।
MAT 5:23 “एकरसेति, यदि तेंह बेदी म अपन भेंट चघावत हस अऊ उहां तोला सुरता आथे कि तोर भाई के मन म तोर बिरोध म कुछू हवय,
MAT 5:24 त उहां बेदी के आघू म अपन भेंट ला छोंड़ दे अऊ पहिली अपन भाई करा जा अऊ ओकर संग मेल-मिलाप कर, तब आ अऊ अपन भेंट ला चघा।
MAT 5:25 “ओ मनखे जऊन ह तोर बिरोध म अदालत जावत हे, ओकर संग जल्दी करके मामला के निपटारा कर ले। कचहरी जावत बेरा डहार म ही ओकर संग मेल-मिलाप कर ले, नइं तो ओह तोला नियायधीस ला सऊंप दीही, अऊ नियायधीस ह तोला पुलिस अधिकारी ला सऊंप दीही, अऊ तेंह जेल म डाल दिये जाबे।
MAT 5:26 मेंह तोला सच कहत हंव कि जब तक तुमन कौड़ी-कौड़ी नइं चुका दूहू, तब तक उहां ले नइं छूट सकव।
MAT 5:27 “तुमन सुने हवव कि ये कहे गे रिहिस, ‘छिनारी झन करव।’
MAT 5:28 पर मेंह तुमन ला कहत हंव कि जऊन कोनो माईलोगन ला खराप नजर ले देखथे, त ओह अपन मन म ओकर संग पहिली ले छिनारी कर चुकिस।
MAT 5:29 कहूं तोर जेवनी आंखी ह तोर पाप म गिरे के कारन बनथे, त ओला निकालके फटिक दे। तोर बर येह बने अय कि अपन देहें के एक ठन अंग ला गंवा दे, पर तोर जम्मो देहें ह नरक म झन डारे जावय।
MAT 5:30 अऊ कहूं तोर जेवनी हांथ ह तोर पाप म गिरे के कारन बनथे, त ओला काटके फटिक दे। तोर बर येह बने अय कि अपन देहें के एक ठन अंग ला गंवा दे, पर तोर जम्मो देहें ह नरक म झन चले जावय।
MAT 5:31 “ये घलो कहे गे रिहिस, ‘जऊन कोनो अपन घरवाली ला छोंड़ देथे, त ओह ओला तियाग पतर जरूर देवय।’
MAT 5:32 पर मेंह तुमन ला कहत हंव कि जऊन कोनो बेभिचार के छोंड़ कोनो आने कारन ले अपन घरवाली ला छोंड़ देथे, त ओह ओकर छिनारी करे के कारन बनथे, अऊ जऊन ह ओ तियागे गय माईलोगन ले बिहाव करथे, त ओह घलो छिनारी करथे।
MAT 5:33 “तुमन ये घलो सुने हवव कि बहुंत पहिले मनखेमन ला ये कहे गे रिहिस, ‘तुमन झूठ-मूठ के किरिया झन खावव, पर परभू के आघू म करे गे किरिया ला पूरा करव।’
MAT 5:34 पर मेंह तुमन ला कहत हंव कि किरिया कभू झन खावव: न तो स्वरग के, काबरकि ओह परमेसर के सिंघासन अय;
MAT 5:35 न तो धरती के, काबरकि येह परमेसर के गोड़ रखे के चउकी अय; न तो यरूसलेम के, काबरकि ओह महाराजा के सहर अय।
MAT 5:36 अऊ अपन मुड़ के घलो किरिया झन खावव, काबरकि तुमन एको ठन चुंदी ला घलो पंर्रा या करिया नइं कर सकव।
MAT 5:37 साफ-साफ तुम्हर गोठ ह हां के हां अऊ नइं के नइं होवय। एकर ले जादा जऊन कुछू होथे, ओह सैतान के तरफ ले होथे।
MAT 5:38 “तुमन सुने हवव कि ये कहे गे रिहिस, ‘आंखी के बलदा आंखी अऊ दांत के बलदा दांत।’
MAT 5:39 पर मेंह तुमन ला कहत हंव कि दुस्ट मनखे के सामना झन करव। यदि कोनो तुम्हर जेवनी गाल म थपरा मारथे, त अपन डेरी गाल ला घलो ओकर अंग कर देवव।
MAT 5:40 अऊ यदि कोनो तुम्हर ऊपर मुकदमा चलाके तुम्हर कुरता ला लेय चाहथे, त तुमन ओला अपन कोटी ला घलो लेवन दव।
MAT 5:41 यदि कोनो तुमन ला जबरन एक मील ले जाथे, त तुमन ओकर संग दू मील चले जावव।
MAT 5:42 जऊन ह तुम्हर ले मांगथे, ओला देवव, अऊ जऊन ह तुम्हर ले उधार मांगथे, ओला उधार देवव।
MAT 5:43 “तुमन सुने हवव कि ये कहे गे रिहिस, ‘अपन परोसी ले मया अऊ बईरीमन ले नफरत करव।’
MAT 5:44 पर मेंह तुमन ला कहत हंव कि अपन बईरीमन ले मया करव, अऊ जऊन मन तुम्हर ऊपर अतियाचार करथें, ओमन बर पराथना करव।
MAT 5:45 ताकि तुमन अपन स्वरगीय ददा के संतान हो जावव। ओह खराप अऊ बने दूनों मनखेमन ऊपर अपन सूरज चमकाथे, अऊ धरमी अऊ अधरमी दूनों के ऊपर पानी बरसाथे।
MAT 5:46 यदि तुमन ओमन ले मया करथव, जऊन मन तुम्हर ले मया करथें, त तुमन ला का ईनाम मिलही? का लगान लेवइया पापीमन घलो अइसने ही नइं करंय?
MAT 5:47 यदि तुमन सिरिप अपन भाईमन ला ही जोहार करथव, त आने मन ले तुमन का बड़े बुता करथव? का आनजातमन घलो अइसने नइं करंय?
MAT 5:48 एकरसेति, तुमन सिद्ध बनव, जइसने स्वरग म रहइया तुम्हर ददा ह सिद्ध अय।
MAT 6:1 “सचेत रहव! तुमन मनखेमन के आघू म ओमन ला देखाय बर अपन धरमीपन के काम झन करव। नइं तो तुमन ला अपन स्वरगीय ददा ले कुछू ईनाम नइं मिलय।
MAT 6:2 “एकरसेति, जब तुमन जरूरतमंद मनखे ला देथव, त डुगडुगी झन पीटवाव, जइसने कि ढोंगी मनखेमन यहूदीमन के सभा-घर अऊ गलीमन म करथें, ताकि मनखेमन ओमन के बड़ई करंय। मेंह तुमन ला सच कहत हंव कि ओमन अपन जम्मो ईनाम पा गीन।
MAT 6:3 पर जब तुमन जरूरतमंद मनखे ला देथव, त तुम्हर डेरी हांथ ये बात ला झन जानय कि तुम्हर जेवनी हांथ का करत हवय।
MAT 6:4 तुम्हर दान ह गुपत म रहय। तब तुम्हर स्वरगीय ददा, जऊन ह गुपत म करे गय काम ला घलो देखथे, तुमन ला ईनाम दीही।
MAT 6:5 “जब तुमन पराथना करथव, त ढोंगी मनखेमन सहीं झन करव, काबरकि मनखेमन ला देखाय बर, यहूदीमन के सभा-घर अऊ गली के चऊकमन म ठाढ़ होके पराथना करई, ओमन ला बने लगथे। मेंह तुमन ला सच कहत हंव कि ओमन अपन जम्मो ईनाम पा गीन।
MAT 6:6 जब तुमन पराथना करथव, त अपन खोली म जावव, अऊ कपाट ला बंद करके, अपन ददा ले पराथना करव, जऊन ह नइं दिखय। तब तुम्हर ददा, जऊन ह गुपत म करे गय काम ला घलो देखथे, तुमन ला ईनाम दीही।
MAT 6:7 अऊ जब तुमन पराथना करथव, त आनजातमन सहीं बेमतलब के बातमन ला घेरी-बेरी झन दुहराव, काबरकि ओमन ये सोचथें कि ओमन के बहुंत बात बोले के कारन, परमेसर ह ओमन के सुनही।
MAT 6:8 ओमन सहीं झन बनव, काबरकि तुम्हर मांगे के पहिली, तुम्हर ददा ह जानथे कि तुमन ला का चीज के जरूरत हवय।
MAT 6:9 “तुमन ला ये किसम ले पराथना करना चाही: “ ‘हे हमर ददा, तें जो स्वरग म हवस, तोर नांव ह पबितर माने जावय,
MAT 6:10 तोर राज आवय, जइसने तोर ईछा स्वरग म पूरा होथे, वइसने धरती म घलो पूरा होवय।
MAT 6:11 हमन ला हर दिन के सहीं आज के भोजन दे।
MAT 6:12 हमर पापमन ला छेमा कर, जइसने हमन ओमन ला छेमा करे हवन, जऊन मन हमर बिरोध म पाप करे हवंय।
MAT 6:13 अऊ हमन ला परिछा म झन पड़न दे, पर हमन ला बुरई ले बचा, काबरकि राज, अऊ पराकरम अऊ महिमा सदाकाल तक तोर अय। आमीन।’
MAT 6:14 यदि तुमन ओ मनखेमन ला छेमा करथव, जऊन मन तुम्हर बिरोध म पाप करे हवंय, त तुम्हर स्वरगीय ददा घलो तुमन ला छेमा करही।
MAT 6:15 पर यदि तुमन ओ मनखेमन के पाप ला छेमा नइं करव, त तुम्हर ददा घलो तुम्हर पाप ला छेमा नइं करही।
MAT 6:16 “जब तुमन उपास करथव, त तुमन अपन चेहरा ला उदास झन बनावव, जइसने कि ढोंगीमन करथें; ओमन अपन चेहरा ला ओरमाय रहिथें, ताकि मनखेमन देखंय कि ओमन उपास करत हवंय। मेंह तुमन ला सच कहत हंव कि ओमन अपन जम्मो ईनाम पा चुकिन।
MAT 6:17 पर जब तुमन उपास करथव, त अपन मुड़ म तेल चुपरव अऊ मुहूं ला धोवव,
MAT 6:18 ताकि मनखेमन ये झन जानंय कि तुमन उपास करत हवव, पर सिरिप तुम्हर ददा परमेसर ह जानय, जऊन ह नइं दिखय। अऊ तुम्हर ददा, जऊन ह हर गुपत के काम ला देखथे, तुमन ला ईनाम दीही।
MAT 6:19 “अपन खातिर ये धरती म धन जमा झन करव, जिहां कीरा अऊ मुर्चा येला नास करथें, अऊ चोरमन सेंध मारके चोरा लेथें।
MAT 6:20 पर अपन खातिर स्वरग म धन जमा करव, जिहां कीरा अऊ मुर्चा येला नास नइं कर सकंय, अऊ न ही चोरमन सेंध मारके चोरी कर सकंय।
MAT 6:21 काबरकि जिहां तुम्हर धन हवय, उहां तुम्हर मन घलो लगे रहिही।
MAT 6:22 “आंखी ह देहें के दीया अय। यदि तुम्हर आंखीमन ठीक हवंय, त तुम्हर जम्मो देहें ह अंजोर ले भर जाही।
MAT 6:23 पर यदि तुम्हर आंखीमन खराप हवंय, त तुम्हर जम्मो देहें ह अंधियार ले भर जाही। एकरसेति, ओ अंजोर जऊन ह तुमन म हवय, यदि अंधियार हो जाथे, त ओह कतेक भयंकर अंधियार होही।
MAT 6:24 “कोनो भी मनखे दू झन मालिक के सेवा नइं कर सकय। या तो ओह एक झन ले नफरत करही अऊ दूसर झन ले मया; या फेर ओह एक झन बर समरपित रहिही अऊ दूसर झन ला तुछ जानही। तुमन परमेसर अऊ धन दूनों के सेवा नइं कर सकव।
MAT 6:25 “एकरसेति, मेंह तुमन ला कहत हंव कि तुमन अपन जिनगी के बारे म चिंता झन करव कि तुमन का खाहू या का पीहू, अऊ न अपन देहें के बारे म चिंता करव कि तुमन का पहिरहू। का जिनगी ह भोजन ले जादा महत्व के नो हय? अऊ देहें ह ओनहा ले बढ़के नो हय?
MAT 6:26 अकास के चिरईमन ला देखव; ओमन न कुछू बोवंय, न लुवंय अऊ न कोठार म जमा करंय; तभो ले तुम्हर स्वरगीय ददा ह ओमन ला खवाथे। का तुमन चिरईमन ले जादा महत्व के नो हव?
MAT 6:27 तुमन म ले कोन ह चिंता करे के दुवारा अपन जिनगी के एको घरी ला घलो बढ़ा सकथे?
MAT 6:28 “तुमन ओनहा बर काबर चिंता करथव? खेत के जंगली फूलमन ला देखव कि ओमन कइसने बाढ़थें। ओमन न तो मेहनत करंय अऊ न ही ओनहा बिनंय।
MAT 6:29 तभो ले मेंह तुमन ला बतावत हंव कि राजा सुलेमान घलो अपन जम्मो सोभा म येमन ले एको झन सहीं नइं सजे-धजे रिहिस।
MAT 6:30 यदि परमेसर ह भुइयां के कांदी ला, जऊन ह आज इहां हवय अऊ कल आगी म झोंक दिये जाही, अइसने ओनहा पहिराथे, त हे अल्‍प बिसवासीमन ओह तुमन ला अऊ बने ओनहा काबर नइं पहिराही?
MAT 6:31 एकरसेति तुमन चिंता झन करव अऊ ये झन कहव कि हमन का खाबो? या का पीबो? या का पहिरबो?
MAT 6:32 आनजातमन ये जम्मो चीज के खोज म रहिथें। तुम्हर स्वरगीय ददा ह जानथे कि तुमन ला ये जम्मो चीजमन के जरूरत हवय।
MAT 6:33 पहिली परमेसर के राज अऊ ओकर धरमीपन के खोज करव, त ये जम्मो चीजमन घलो संग म तुमन ला दिये जाही।
MAT 6:34 एकरसेति, कल के चिंता झन करव, काबरकि कल के दिन ह अपन चिंता खुद कर लीही। आज के दुख ह आज खातिर बहुंते हवय।
MAT 7:1 “आने मन के गलती झन निकालव, ताकि तुम्हर घलो गलती झन निकाले जावय।
MAT 7:2 काबरकि जऊन किसम ले तुमन आने ऊपर दोस लगाथव, ओही किसम ले तुम्हर ऊपर घलो दोस लगाय जाही, अऊ जऊन नाप ले तुमन नापथव, ओही नाप ले तुम्हर बर नापे जाही।
MAT 7:3 “तुमन काबर अपन भाई के आंखी के छोटे कचरा ला देखथव, जबकि अपन खुद के आंखी के बड़े कचरा ला धियान नइं देवव?
MAT 7:4 जब तुम्हर खुद के आंखी म लकरी के लट्ठा हवय, त तुमन अपन भाई ला कइसने कह सकथव, ‘लान मेंह तोर आंखी के छोटे कचरा ला निकाल दंव?’
MAT 7:5 हे ढोंगीमन हो, पहिली अपन खुद के आंखी के लट्ठा ला निकालव, तभे तुमन अपन भाई के आंखी के छोटे कचरा ला साफ-साफ देखहू अऊ ओला निकाल सकहू।
MAT 7:6 “पबितर चीज कुकुरमन ला झन देवव, अऊ अपन मोती ला सुरामन के आघू म झन डालव, नइं तो ओमन ओला अपन गोड़ तरी कुचरहीं अऊ तब लहुंटके तुम्हर ऊपर चढ़ बईठहीं।
MAT 7:7 “मांगव, त तुमन ला दिये जाही; खोजव, त तुमन पाहू; खटखटावव, त तुम्हर बर कपाट ह खोले जाही।
MAT 7:8 काबरकि जऊन ह मांगथे, ओला मिलथे; जऊन ह खोजथे, ओह पाथे; अऊ जऊन ह खटखटाथे, ओकर खातिर कपाट ला खोले जाथे।
MAT 7:9 “तुमन म अइसने कोन मनखे अय कि यदि ओकर बेटा ह ओकर ले रोटी मांगथे, त ओह ओला पथरा देथे?
MAT 7:10 या यदि ओह एक ठन मछरी मांगथे, त ओला सांप देथे?
MAT 7:11 जब तुम्हर सहीं खराप मनखेमन अपन लइकामन ला बने चीज के भेंट देय बर जानथव, त स्वरग म रहइया तुम्हर ददा ह ओमन ला अऊ जादा बने चीज काबर नइं दीही, जऊन मन ओकर ले मांगथें।
MAT 7:12 आने मन संग वइसने बरताव करव, जइसने तुमन चाहथव कि ओमन तुम्हर संग करंय, काबरकि मूसा के कानून अऊ अगमजानीमन के एहीच सिकछा अय।
MAT 7:13 “संकरा कपाट ले घुसरव। काबरकि चाकर हवय ओ कपाट अऊ सरल हवय ओ रसता, जऊन ह बिनास कोति ले जाथे अऊ बहुंते झन ओमा ले होके जाथें।
MAT 7:14 पर छोटे हवय ओ कपाट अऊ कठिन हवय ओ रसता, जऊन ह जिनगी कोति ले जाथे, अऊ सिरिप थोरकन झन येला पाथें।
MAT 7:15 “लबरा अगमजानीमन ले सचेत रहव। ओमन भेड़ के भेस म तुम्हर करा आथें, पर भीतर ले ओमन भयंकर भेड़िया अंय।
MAT 7:16 ओमन के काम के दुवारा ओमन ला तुमन चिन डारहू। का मनखेमन कंटिली झाड़ी ले अंगूर या ऊंटकटारा झाड़ी ले अंजीर के फर टोरथें?
MAT 7:17 ओही किसम ले बने रूख ह बने फर देथे, अऊ खराप रूख ह खराप फर देथे।
MAT 7:18 बने रूख ह खराप फर नइं दे सकय अऊ न ही खराप रूख बने फर दे सकथे।
MAT 7:19 हर ओ रूख जऊन ह बने फर नइं देवय, काटे अऊ आगी म झोंके जाथे।
MAT 7:20 ये किसम ले, ओमन के फर के दुवारा, तुमन ओमन ला चिन डारहू।
MAT 7:21 “जऊन मन मोला, ‘हे परभू! हे परभू!’ कहिथें, ओमन म ले जम्मो झन स्वरग के राज म नइं जा सकंय, पर जऊन ह स्वरग म रहइया मोर ददा के ईछा ला पूरा करथे, सिरिप ओहीच ह स्वरग के राज म जाही।
MAT 7:22 नियाय के दिन म कतको मनखेमन मोला कहिहीं, ‘हे परभू! हे परभू! का हमन तोर नांव म अगमबानी नइं करेंन? का हमन तोर नांव म परेत आतमामन ला नइं निकालेंन? अऊ तोर नांव म कतको अचरज के काम नइं करेंन?’
MAT 7:23 तब मेंह ओमन ला साफ-साफ बता दूहूं, ‘मेंह तुमन ला कभू नइं जानेंव। हे कुकरमीमन हो, मोर ले दूरिहा हटव।’
MAT 7:24 “एकरसेति, जऊन ह मोर ये गोठमन ला सुनथे अऊ ओकर पालन करथे, ओह ओ बुद्धिमान मनखे सहीं अय, जऊन ह चट्टान ऊपर अपन घर बनाईस।
MAT 7:25 पानी बरसिस, नदीमन म पूरा आईस, गरेर चलिस, अऊ ओ घर ले टकराईस, तभो ले ओ घर ह नइं गिरिस, काबरकि ओकर नीव ह चट्टान ऊपर डारे गे रिहिस।
MAT 7:26 पर जऊन ह मोर ये गोठमन ला सुनथे अऊ ओकर पालन नइं करय, ओह ओ मुरूख मनखे सहीं अय, जऊन ह बालू ऊपर अपन घर बनाईस।
MAT 7:27 पानी बरसिस, नदीमन म पूरा आईस, गरेर चलिस अऊ ओ घर ले टकराईस अऊ ओ घर ह भरभरा के गिर गीस।”
MAT 7:28 जब यीसू ह ये बातमन ला कह चुकिस, त मनखेमन के भीड़ ह ओकर उपदेस ला सुनके चकित हो गीस।
MAT 7:29 काबरकि यीसू ह ओमन के कानून के गुरूमन सहीं नइं, पर अधिकार के संग ओमन ला उपदेस देवत रिहिस।
MAT 8:1 जब यीसू ह पहाड़ ले उतरिस, त एक बड़े भीड़ ओकर पाछू हो लीस।
MAT 8:2 तब एक झन मनखे जऊन ला कोढ़ के बेमारी रहय, ओकर करा आईस, अऊ ओह यीसू ला दंडवत करके कहिस, “हे परभू, यदि तेंह चाहस, त मोला सुध कर सकथस।”
MAT 8:3 यीसू ह अपन हांथ ला ओ मनखे अंग बढ़ाईस अऊ ओला छूके कहिस, “मेंह चाहत हंव; तेंह सुध हो जा!” अऊ तुरते ओ मनखे ह कोढ़ के बेमारी ले सुध हो गीस।
MAT 8:4 तब यीसू ह ओला कहिस, “देख, तें कोनो ला कुछू झन कहिबे। पर जा अऊ अपनआप ला पुरोहित ला देखा, अऊ जइसने मूसा ह हुकूम दे हवय, वइसने भेंट चघा, ताकि मनखेमन म सबूत होवय कि तेंह बेमारी ले ठीक हो गे हवस।”
MAT 8:5 जब यीसू ह कफरनहूम सहर म आईस, त एक झन रोमी सेना के अधिकारी ओकर करा आईस अऊ ओकर ले बिनती करके कहिस,
MAT 8:6 “हे परभू, मोर सेवक ह घर म पड़े हवय; ओला लकवा मार दे हवय, अऊ ओह अब्बड़ दुख भोगत हवय।”
MAT 8:7 यीसू ह ओला कहिस, “मेंह जाहूं अऊ ओला चंगा करहूं।”
MAT 8:8 तब रोमी सेना के अधिकारी ह ये जबाब दीस, “हे परभू, मेंह एकर लईक नो हंव कि तेंह मोर घर म आ। पर सिरिप अपन मुहूं ले कहि दे, त मोर सेवक ह ठीक हो जाही।
MAT 8:9 काबरकि मेंह खुद हाकिम के अधीन म हवंव अऊ सैनिकमन मोर अधीन म हवंय। मेंह एक झन ला कहिथंव, ‘जा’, त ओह जाथे अऊ दूसर ला कहिथंव, ‘आ’, त ओह आथे। मेंह अपन सेवक ला कहिथंव, येला कर, त ओला करथे।”
MAT 8:10 येला सुनके यीसू ह चकित हो गीस, अऊ जऊन मन ओकर पाछू-पाछू आवत रिहिन, ओमन ला ओह कहिस, “मेंह तुमन ला सच कहत हंव कि मेंह इसरायली मनखेमन म घलो अइसने बड़े बिसवास नइं देखेंव।
MAT 8:11 मेंह तुमन ला कहत हंव कि कतको मनखेमन पूरब अऊ पछिम दिग ले आहीं अऊ अब्राहम, इसहाक अऊ याकूब के संग स्वरग के राज के भोज म सामिल होहीं।
MAT 8:12 पर जऊन मन ला स्वरग राज म होना चाही, ओमन ला बाहिर अंधियार म डार दिये जाही, जिहां ओमन रोहीं अऊ अपन दांत पीसहीं।”
MAT 8:13 तब यीसू ह रोमी सेना के अधिकारी ले कहिस, “जा, जइसने तेंह बिसवास करे हवस वइसने तोर बर होही।” अऊ ओकर सेवक ह ओहीच घरी चंगा हो गीस।
MAT 8:14 जब यीसू ह पतरस के घर म आईस, त ओह देखिस कि पतरस के सास ह जर के मारे खटिया म पड़े रहय।
MAT 8:15 यीसू ह ओकर हांथ ला छुईस अऊ ओकर जर ह उतर गीस, अऊ ओह उठके यीसू के सेवा-टहल करे लगिस।
MAT 8:16 जब सांझ होईस, त मनखेमन परेत आतमा ले जकड़े बहुंते मनखेमन ला यीसू करा लानिन। यीसू ह सिरिप गोठ के दुवारा ओ परेत आतमामन ला निकाल दीस अऊ जम्मो बिमरहामन ला चंगा करिस।
MAT 8:17 ये किसम ले, यसायाह अगमजानी के दुवारा कहे गय ये बचन ह पूरा होईस: “ओह हमर कमजोरी ला ले लीस, अऊ हमर रोगमन ला दूर करिस।”
MAT 8:18 जब यीसू ह अपन चारों कोति मनखेमन के भीड़ ला देखिस, त ओह अपन चेलामन ला झील के ओ पार जाय के हुकूम दीस।
MAT 8:19 तब मूसा के कानून के एक गुरू ह यीसू करा आके कहिस, “हे गुरू, तेंह जिहां कहूं घलो जाबे, मेंह तोर पाछू-पाछू चलहूं।”
MAT 8:20 यीसू ह ओला कहिस, “कोलिहामन बर रहे के बिल हवय अऊ अकास के चिरईमन के बसेरा हवय, पर मनखे के बेटा के मुड़ ला थेबे बर घलो कोनो जगह नइं ए।”
MAT 8:21 एक आने चेला ह ओकर ले कहिस, “हे परभू, पहिली मोला जावन दे कि मेंह अपन मरे ददा ला माटी दे दंव।”
MAT 8:22 पर यीसू ह ओला कहिस, “तेंह मोर पाछू हो ले, अऊ मुरदामन ला अपन मुरदा गाड़न दे।”
MAT 8:23 तब यीसू ह डोंगा म चघिस अऊ ओकर चेलामन घलो ओकर संग गीन।
MAT 8:24 अचानक झील म एक भयंकर गर्रा उठिस अऊ डोंगा ह पानी के लहरामन ले भरे लगिस। पर यीसू ह सोवत रहय।
MAT 8:25 चेलामन यीसू करा गीन अऊ ओला उठाके कहिन, “हे परभू, हमन ला बचा। हमन पानी म बुड़त हवन।”
MAT 8:26 यीसू ह ओमन ला कहिस, “हे अल्‍प बिसवासी मनखेमन हो, तुमन काबर डरावत हवव?” तब ओह उठिस अऊ आंधी अऊ पानी के लहरामन ला दबकारिस अऊ जम्मो ह एकदम सांत हो गीस।
MAT 8:27 ओ मनखेमन अचम्भो म पड़ गीन अऊ कहिन, “येह का किसम के मनखे अय? अऊ त अऊ आंधी अऊ पानी के लहरामन घलो एकर हुकूम मानथें।”
MAT 8:28 जब यीसू ह झील के ओ पार गदरेनीमन के इलाका म आईस, त दू झन मनखे, जेमन म परेत आतमा रहंय, मरघटी ले निकलके ओकर करा आईन। ओमन अतेक उदंड रिहिन कि कोनो ओ रसता म आय-जाय नइं सकत रिहिन।
MAT 8:29 ओमन चिचियाके कहिन, “हे परमेसर के बेटा, हमर ले तोला का काम? का तेंह ठहिराय गय समय ले पहिली हमन ला इहां सताय बर आय हवस?”
MAT 8:30 उहां ले कुछू दूरिहा म, सुरामन के एक बड़े झुंड ह चरत रहय।
MAT 8:31 ओ परेत आतमामन यीसू ले बिनती करके कहिन, “यदि तेंह हमन ला निकालत हवस, त हमन ला ओ सुरामन के झुंड म पठो दे।”
MAT 8:32 यीसू ह ओमन ला कहिस, “जावव।” तब परेत आतमामन ओ मनखेमन ले निकलके सुरामन म हमा गीन अऊ सुरामन के जम्मो झुंड ह तीर म निकले पथरा ले झील म झपटके कूदिस, अऊ बुड़ मरिस।
MAT 8:33 सूरा चरइयामन भाग गीन अऊ सहर म जाके जम्मो बात ला बताईन। ओमन ओ परेत आतमा ले बाधित मनखेमन के बारे म घलो बताईन।
MAT 8:34 तब सहर के जम्मो मनखेमन यीसू करा भेंट करे बर आईन, अऊ जब ओमन ओला देखिन, त ओकर ले बिनती करिन कि ओह ओमन के इलाका ले चले जावय।
MAT 9:1 यीसू ह डोंगा म चघिस अऊ झील ला पार करके अपन सहर म आईस।
MAT 9:2 कुछू मनखेमन लकवा के मारे एक मनखे ला ओकर करा लानिन; ओ मनखे ह खटिया म पड़े रहय। जब यीसू ह ओमन के बिसवास ला देखिस, त ओह लकवा के मारे मनखे ला कहिस, “बेटा, खुसी मना! तोर पाप ह छेमा हो गे।”
MAT 9:3 येला सुनके, मूसा के कानून के कुछू गुरूमन अपन मन म कहिन, “ये मनखे ह परमेसर के निन्दा करत हवय!”
MAT 9:4 ओमन के मन के बात ला जानके यीसू ह कहिस, “तुमन अपन मन म काबर अइसने खराप बात सोचत हवव?
MAT 9:5 कते बात ह सरल ए? ये कहई, ‘तोर पाप ह छेमा हो गीस,’ या फेर ये कहई, ‘उठ, अऊ चल फिर।’
MAT 9:6 मेंह तुमन ला देखाहूं कि मनखे के बेटा ला धरती म पाप छेमा करे के अधिकार हवय।” तब ओह लकवा के मारे ला कहिस, “उठ, अपन खटिया ला उठा अऊ घर जा।”
MAT 9:7 अऊ ओ मनखे ह उठिस अऊ अपन घर चल दीस।
MAT 9:8 जब भीड़ के मनखेमन येला देखिन, त ओमन डरा गीन, अऊ ओमन परमेसर के महिमा करे लगिन, जऊन ह मनखेमन ला अइसने अधिकार दे हवय।
MAT 9:9 जब यीसू ह उहां ले आघू बढ़िस, त ओह मत्ती नांव के एक झन मनखे ला लगान पटाय के नाका म बईठे देखिस, त ओह ओला कहिस, “मोर पाछू आ।” अऊ मत्ती ह उठके ओकर पाछू हो लीस।
MAT 9:10 जब यीसू ह मत्ती के घर म खाना खाय बर बईठिस, त कतको लगान लेवइया अधिकारी अऊ पापी मनखेमन आईन अऊ ओमन घलो यीसू अऊ ओकर चेलामन संग खाना खाय बर बईठिन।
MAT 9:11 येला देखके फरीसीमन यीसू के चेलामन ले पुछिन, “तुम्हर गुरू ह लगान लेवइया अऊ पापीमन संग काबर खावत हवय?”
MAT 9:12 येला सुनके, यीसू ह कहिस, “भला-चंगा मनखेमन ला डाक्टर के जरूरत नइं होवय, पर बिमरहामन ला होथे।
MAT 9:13 जावव अऊ सीखव कि परमेसर के ये बचन के का मतलब होथे: ‘मेंह बलिदान नइं, पर दया चाहथंव।’ काबरकि मेंह धरमीमन ला नइं, पर पापीमन ला बलाय बर आय हवंव।”
MAT 9:14 तब यूहन्ना के चेलामन यीसू करा आईन अऊ पुछिन, “का कारन ए कि हमन अऊ फरीसीमन उपास करथन, पर तोर चेलामन उपास नइं करंय?”
MAT 9:15 यीसू ह ओमन ला जबाब दीस, “का बरातीमन दुख मनाथें, जब दूल्हा ह ओमन के संग म रहिथे? पर ओ समय आही जब दूल्हा ह ओमन ले अलग करे जाही; तब ओमन उपास करहीं।
MAT 9:16 “जुन्ना कपड़ा म नवां कपड़ा के खाप कोनो नइं लगावंय, काबरकि ओ खाप ह जुन्ना कपड़ा ला तीरके अऊ चीर दीही।
MAT 9:17 वइसने ही मनखेमन जुन्ना चमड़ा के थैली म नवां अंगूर के मंद ला नइं भरंय। यदि ओमन अइसने करथें, त ओ चमड़ा के थैली फट जाही, अऊ अंगूर के मंद ह बोहा जाही अऊ ओ थैली ह बरबाद हो जाही। एकरे बर ओमन नवां मंद ला नवां चमड़ा के थैली म भरथें, अऊ ये किसम ले दूनों चीज सही-सलामत रहिथे।”
MAT 9:18 जब यीसू ह ओमन ला ये कहत रिहिस, तभे यहूदीमन के सभा-घर के एक अधिकारी आईस अऊ यीसू के आघू म माड़ी टेकके कहिस, “मोर बेटी ह अभीच मरे हवय। पर तेंह चल अऊ अपन हांथ ला ओकर ऊपर रख, अऊ ओह जी जाही।”
MAT 9:19 यीसू ह उठिस अऊ ओकर संग गीस। यीसू के चेलामन घलो ओकर संग गीन।
MAT 9:20 तभे एक झन माईलोगन रहय, जऊन ला बारह बछर ले लहू बोहाय के बेमारी रिहिस, ओह यीसू के पाछू ले आईस अऊ ओकर कपड़ा के छोर ला छू लीस।
MAT 9:21 काबरकि ओह अपन मन म कहत रिहिस, “यदि मेंह ओकर कपड़ा ला ही छू लूहूं, त चंगा हो जाहूं।”
MAT 9:22 यीसू ह पाछू कोति मुड़के ओला देखिस अऊ कहिस, “हिम्मत रख, बेटी। तोर बिसवास ह तोला चंगा करे हवय।” अऊ ओहीच घरी ओ माईलोगन ह बने हो गीस।
MAT 9:23 जब यीसू ह ओ अधिकारी के घर के भीतर गीस अऊ बांसुरी बजइयामन ला अऊ मनखेमन ला रोवत-पीटत देखिस,
MAT 9:24 त ओह कहिस, “घुंच जावव! ये छोकरी ह मरे नइं ए, पर सुतत हवय।” पर ओमन ओकर हंसी उड़ाय लगिन।
MAT 9:25 जब मनखेमन ला घर के बाहिर कर दिये गीस, त यीसू ह भीतर गीस अऊ छोकरी के हांथ ला धरके उठाईस, अऊ ओ छोकरी ह उठ बईठिस।
MAT 9:26 ये बात के चरचा ओ जम्मो इलाका म फईल गीस।
MAT 9:27 यीसू ह उहां ले आघू बढ़िस, त दू झन अंधरा मनखे ये गोहार पारत ओकर पाछू हो लीन, “हे दाऊद के संतान, हमर ऊपर दया कर।”
MAT 9:28 जब यीसू ह घर के भीतर गीस, त ओ अंधरा मनखेमन ओकर करा आईन। यीसू ह ओमन ले पुछिस, “का तुमन ला बिसवास हवय कि मेंह ये काम कर सकत हंव?” ओमन ओला कहिन, “हव परभू।”
MAT 9:29 तब यीसू ह ओमन के आंखी ला छुईस अऊ कहिस, “तुम्हर बिसवास के मुताबिक तुम्हर बर होवय।”
MAT 9:30 अऊ ओमन के आंखीमन देखे लगिन। यीसू ह ओमन ला बहुंत चेताके कहिस, “देखव, ये बात ला अऊ कोनो ला झन बतावव।”
MAT 9:31 पर बाहिर निकलके, ओमन ओ जम्मो इलाका म यीसू के जस ला फईला दीन।
MAT 9:32 जब ओमन बाहिर निकलत रिहिन, त कुछू मनखेमन भूत धरे एक कोंदा मनखे ला यीसू करा लानिन।
MAT 9:33 अऊ जब यीसू ह भूत ला निकाल दीस, त ओ कोंदा मनखे ह गोठियाय लगिस। मनखेमन अचम्भो करत कहे लगिन, “हमन इसरायल देस म अइसने बात कभू नइं देखे रहेंन।”
MAT 9:34 पर फरीसीमन कहिन, “येह परेत आतमामन के सरदार के मदद ले परेत आतमामन ला निकालथे।”
MAT 9:35 यीसू ह जम्मो नगर अऊ गांव म ले होवत गीस, अऊ ओह यहूदीमन के सभा-घरमन म उपदेस देवत, परमेसर के राज के सुघर संदेस के परचार करत अऊ जम्मो किसम के रोग अऊ बेमारी ला बने करत गीस।
MAT 9:36 जब यीसू ह मनखेमन के भीड़ ला देखिस, त ओला ओमन के ऊपर तरस आईस, काबरकि ओमन परेसान अऊ बिन सहारा के रिहिन। ओमन बिन चरवाहा के भेड़ सहीं रिहिन।
MAT 9:37 तब ओह अपन चेलामन ला कहिस, “खेत म फसल तो बहुंते हवय, पर बनिहारमन थोरकन हवंय।
MAT 9:38 एकरसेति, फसल के मालिक ले बिनती करव कि ओह अपन फसल ला लुए बर बनिहार पठोवय।”
MAT 10:1 यीसू ह अपन बारह चेलामन ला अपन करा बलाईस अऊ ओमन ला असुध आतमामन ला निकाले अऊ हर एक किसम के रोग अऊ बेमारी ला बने करे के अधिकार दीस।
MAT 10:2 बारह प्रेरितमन के नांव ये अय: पहिला सिमोन, जऊन ला पतरस कहे जाथे अऊ ओकर भाई अन्द्रियास; जबदी के बेटा याकूब अऊ ओकर भाई यूहन्ना;
MAT 10:3 फिलिप्पुस अऊ बरतुलमै; थोमा अऊ लगान लेवइया मत्ती; हलफई के बेटा याकूब, अऊ तद्दै;
MAT 10:4 सिमोन कनानी अऊ यहूदा इस्करियोती जऊन ह यीसू के संग बिसवासघात करिस।
MAT 10:5 ये बारहों झन ला, यीसू ह ये हुकूम देके पठोईस, “आनजातमन इहां झन जावव अऊ न ही सामरीमन के कोनो सहर म जावव।
MAT 10:6 एकर बदले, इसरायल के घराना के गंवाय भेड़मन करा जावव।
MAT 10:7 जब तुमन जावव, त ये संदेस के परचार करव: ‘स्वरग के राज ह लकठा म आ गे हवय।’
MAT 10:8 बिमरहामन ला चंगा करव, मरे मनखेमन ला जियावव, कोढ़ी मनखेमन ला सुध करव, परेत आतमामन ला निकालव। मुफत म तुमन ला मिले हवय, एकरसेति मुफत म देवव।
MAT 10:9 “अपन पटका म सोन या चांदी या तांबा झन रखव।
MAT 10:10 रसता बर झोला या अतकिहा कुरता या पनही या लउठी झन रखव, काबरकि बनिहार ला ओकर जरूरत के चीज दिये जाना चाही।
MAT 10:11 जऊन कोनो सहर या गांव म तुमन जावव, त उहां कोनो काबिल मनखे के पता लगावव अऊ उहां ले बिदा होवत तक ओकरे घर म ठहिरव।
MAT 10:12 जऊन घर म तुमन जावव, त ओ घर ला आसीस देवव।
MAT 10:13 यदि ओ घर के मनखेमन काबिल होहीं, त तुम्हर सांति ह उहां ठहिरही, पर यदि ओमन काबिल नो हंय, त तुम्हर सांति ह तुम्हर करा लहुंट आही।
MAT 10:14 यदि कोनो तुमन ला गरहन नइं करय या तुम्हर गोठ ला नइं सुनय, त ओ घर या सहर ले निकलत बेरा अपन गोड़ के धुर्रा ला झर्रा देवव।
MAT 10:15 मेंह तुमन ला सच कहत हंव कि नियाय के दिन म, ये सहर के मनखेमन ले सदोम अऊ अमोरा सहर के मनखेमन के दसा ह जादा सहे के लईक होही।
MAT 10:16 “देखव! मेंह तुमन ला भेड़ियामन के बीच म भेड़मन सहीं पठोवत हंव। एकरसेति, सांप के सहीं चतुरा अऊ पंड़की के सहीं निरदोस बनव।
MAT 10:17 मनखेमन ले सचेत रहव। ओमन तुमन ला धरम-सभा ला सऊंप दीहीं अऊ यहूदीमन के सभा-घर म तुमन ला कोर्रा म मारहीं।
MAT 10:18 मोर कारन, तुमन ला हाकिम अऊ राजामन के आघू म लाने जाही कि तुमन मोर बिसय म ओमन ला अऊ आनजातमन ला गवाही देवव।
MAT 10:19 जब ओमन तुमन ला पकड़थें, त एकर चिंता झन करव कि तुमन ला का कहना हे या कइसने कहना हे, काबरकि ओहीच बखत तुमन ला बताय जाही कि का कहना हे।
MAT 10:20 काबरकि बोलइया तुमन नइं, पर तुम्हर ददा परमेसर के आतमा ह तुमन म होके बोलही।
MAT 10:21 “भाई ह अपन भाई ला अऊ ददा ह अपन लइका ला मार डारे बर सऊंप दीही। लइकामन अपन दाई-ददा के बिरोध म खड़े होहीं अऊ ओमन ला मरवा डारहीं।
MAT 10:22 मोर कारन, जम्मो मनखेमन तुम्हर ले नफरत करहीं, पर जऊन ह आखिरी तक अडिग बने रहिही, ओकरेच उद्धार होही।
MAT 10:23 जब ओमन तुमन ला एक सहर म सताथें, त तुमन आने सहर म भाग जावव। मेंह तुमन ला सच कहत हंव कि मनखे के बेटा के आय के पहिली, तुमन इसरायल के जम्मो सहर म नइं जा सके होहू।
MAT 10:24 “चेला ह अपन गुरू ले बड़े नइं होवय अऊ न ही सेवक ह अपन मालिक ले बड़े होथे।
MAT 10:25 चेला ह अपन गुरू सहीं अऊ सेवक ह अपन मालिक सहीं बन जाना ही बहुंत अय। जब ओमन घर के मुखिया ला बालजबूल कहिन, त फेर ओमन ओकर घर के सदस्यमन ला का कुछू नइं कहिहीं।
MAT 10:26 “एकरसेति, ओमन ले झन डरव। काबरकि कुछू घलो बात ढंके नइं ए, जऊन ला उघारे नइं जाही या कुछू भी बात छिपे नइं ए, जऊन ला बताय नइं जाही।
MAT 10:27 जऊन बात मेंह तुमन ला अंधियार म कहत हंव, ओला तुमन अंजोर म कहव। जऊन बात, तुमन ला कान म फुसफुसाके कहे जाथे, ओला तुमन घर के छानी ऊपर ले चिचिया-चिचियाके बतावव।
MAT 10:28 ओमन ले झन डरव, जऊन मन सरीर ला मार डारथें, पर आतमा ला नइं मार सकंय। पर ओकर ले डरव, जऊन ह आतमा अऊ सरीर दूनों ला नरक म नास कर सकथे।
MAT 10:29 एक पईसा म दू ठन गौरइया चिरई बिकथे, तभो ले तुम्हर ददा परमेसर के बिगर ईछा के ओमा ले एको ठन घलो धरती ऊपर नइं गिरय।
MAT 10:30 अऊ त अऊ तुम्हर मुड़ के जम्मो चुंदीमन गने गे हवंय।
MAT 10:31 झन डरव; तुमन गौरइया चिरईमन ले जादा कीमत के अव।
MAT 10:32 “जऊन कोनो मोला मनखेमन के आघू म स्वीकार करथे, ओला मेंह घलो स्वरग म अपन ददा के आघू म स्वीकार करहूं।
MAT 10:33 पर जऊन कोनो मोला मनखेमन के आघू म इनकार करथे, त ओला मेंह घलो स्वरग म अपन ददा के आघू म इनकार करहूं।
MAT 10:34 “ये झन सोचव कि मेंह धरती म सांति इस्‍थापना करे बर आय हवंव। मेंह सांति इस्‍थापना करे बर नइं, पर तलवार चलवाय बर आय हवंव।
MAT 10:35 “मेंह बेटा ला ओकर ददा के बिरूध, बेटी ला ओकर दाई के बिरूध अऊ बहू ला ओकर सास के बिरूध करे बर आय हवंव।
MAT 10:36 मनखे के बईरी ओकर खुद के परिवार के मनखेमन होहीं।
MAT 10:37 “जऊन ह अपन ददा या दाई ला मोर ले जादा मया करथे, ओह मोर लईक नो हय। जऊन ह अपन बेटा या बेटी ला मोर ले जादा मया करथे, ओह मोर लईक नो हय;
MAT 10:38 अऊ जऊन ह अपन कुरूस ला उठाके मोर पाछू नइं आवय, ओह मोर लईक नो हय।
MAT 10:39 जऊन ह अपन परान ला बचाथे, ओह ओला गंवाही, अऊ जऊन ह मोर कारन अपन परान ला गंवाथे, ओह ओला बचाही।
MAT 10:40 “जऊन ह तुमन ला गरहन करथे, ओह मोला गरहन करथे, अऊ जऊन ह मोला गरहन करथे, ओह ओला गरहन करथे जऊन ह मोला पठोय हवय।
MAT 10:41 जऊन ह एक अगमजानी ला अगमजानी जानके गरहन करथे, त ओह एक अगमजानी के ईनाम पाही, अऊ जऊन ह धरमी मनखे ला धरमी मनखे जानके गरहन करथे, ओह एक धरमी मनखे के ईनाम पाही।
MAT 10:42 अऊ जऊन ह ये छोटे मन म ले कोनो ला मोर चेला जानके एक गिलास ठंडा पानी पीये बर देथे, त मेंह तुमन ला सच कहत हंव कि ओह एकर ईनाम जरूर पाही।”
MAT 11:1 अपन बारह चेलामन ला ये हुकूम देय के बाद, यीसू ह उहां ले चल दीस। ओह गलील प्रदेस के सहरमन म सिकछा दे बर अऊ परचार करे बर गीस।
MAT 11:2 जब यूहन्ना ह जेल म मसीह के काम के चरचा ला सुनिस, त ओह अपन चेलामन ला ओकर करा ये पुछे बर पठोईस,
MAT 11:3 “का तेंह ओही अस, जऊन ह अवइया रिहिस या फेर हमन कोनो आने के बाट जोहन।”
MAT 11:4 यीसू ह ओमन ला ये जबाब दीस, “तुमन जावव, अऊ जऊन कुछू तुमन सुनत अऊ देखत हवव, ओला यूहन्ना ला बतावव—
MAT 11:5 अंधरामन देखथें, खोरवामन रेंगथें, कोढ़ीमन सुध करे जावथें, भैंरा मनखेमन सुनथें, मुरदामन जी उठथें, अऊ गरीबमन ला सुघर संदेस के परचार करे जाथे।
MAT 11:6 धइन ए ओह जऊन ह मोर ऊपर संदेह नइं करय।”
MAT 11:7 जब यूहन्ना के चेलामन जावत रिहिन, त यीसू ह मनखेमन ला यूहन्ना के बारे म कहन लगिस, “जब तुमन सुनसान जगह म यूहन्ना करा गेव, त तुमन का देखे के आसा करत रहेव? का हवा म डोलत बड़े घांस के पऊधा ला?
MAT 11:8 यदि नइं! त फेर तुमन का देखे बर गे रहेव? का सुघर कपड़ा पहिरे एक मनखे ला देखे बर? जऊन मन सुघर कपड़ा पहिरथें, ओमन राजा के महल म रहिथें।
MAT 11:9 त तुमन का देखे बर गे रहेव? एक अगमजानी ला देखे बर? हव, मेंह तुमन ला कहथंव कि तुमन एक अगमजानी ले घलो बड़े मनखे ला देखेव।
MAT 11:10 येह ओ मनखे अय, जेकर बारे म परमेसर के बचन म लिखे हवय: “ ‘मेंह अपन संदेसिया ला तोर आघू पठोवत हंव, जऊन ह तोर आघू तोर रसता तियार करही।’
MAT 11:11 मेंह तुमन ला सच कहत हंव कि अभी तक जऊन मनखेमन संसार म माईलोगन ले जनमे हवंय, ओमन म कोनो घलो यूहन्ना बतिसमा देवइया ले बड़े नो हय। पर जऊन ह स्वरग के राज म सबले छोटे अय, ओह यूहन्ना ले घलो बड़े अय।
MAT 11:12 यूहन्ना बतिसमा देवइया के समय ले अभी तक स्वरग के राज ऊपर सतावा होय हवय अऊ सतानेवालामन ताकत के दुवारा येला अपन अधिकार म कर लेथें।
MAT 11:13 काबरकि जम्मो अगमजानी अऊ मूसा के कानून, यूहन्ना के समय तक अगमबानी करत रिहिन।
MAT 11:14 अऊ यदि तुमन ये बात ला मानत हव, त जान लेवव कि ओह एलियाह अय, जऊन ह अवइया रिहिस।
MAT 11:15 जेकर कान हवय, ओह सुन ले।
MAT 11:16 “मेंह ये पीढ़ी के मनखेमन के तुलना काकर ले करंव? ओमन बजार म बईठे लइकामन सहीं अंय, जऊन मन अपन दूसर संगीमन ला पुकारके कहिथंय:
MAT 11:17 “ ‘हमन तुम्हर बर बांसुरी बजाएंन, पर तुमन नइं नाचेव; हमन बिलाप करेंन, अऊ तुमन ला दुख नइं होईस।’
MAT 11:18 काबरकि यूहन्ना आईस, पर ओह सधारन मनखे सहीं, न तो खाईस अऊ न ही पीईस, अऊ मनखेमन कहिथें, ‘ओमा परेत आतमा हवय।’
MAT 11:19 मनखे के बेटा ह आईस, जऊन ह खाथे अऊ पीथे, अऊ मनखेमन कहिथें, ‘देखव, ओह पेटहा अऊ पियक्कड़ अय, अऊ लगान लेवइया अऊ पापीमन के संगवारी अय।’ पर बुद्धि ह अपन काम के दुवारा सही ठहिरथे।”
MAT 11:20 तब यीसू ह ओ सहरमन ला धिक्कारे लगिस, जिहां ओह सबले जादा चमतकार करे रिहिस, पर ओ सहरमन पछताप नइं करिन।
MAT 11:21 यीसू ह कहिस, “धिक्कार ए तोला, खुराजीन! धिक्कार ए तोला, बैतसैदा। जऊन चमतकार के काम तुमन म करे गीस, यदि ओ काम सूर अऊ सीदोन सहर म करे गे होतिस, त ओमन बहुंत पहिली टाट के कपड़ा ओढ़के अऊ राख म बईठके पछताप कर चुके होतिन।
MAT 11:22 पर मेंह तुमन ला कहत हंव कि नियाय के दिन म सूर अऊ सीदोन के दसा ह तुम्हर दसा ले कहूं जादा सहे के लईक होही।
MAT 11:23 अऊ तें कफरनहूम! का तेंह अकास तक ऊंचा उठाय जाबे! नइं! तेंह खाल्हे पाताल-लोक ला चले जाबे। काबरकि जऊन चमतकार के काम तोर म करे गीस, यदि ओ काम सदोम सहर म करे गे होतिस, त ओ सहर ह आज तक ले बने रहितिस।
MAT 11:24 पर मेंह तोला कहत हंव कि नियाय के दिन म सदोम सहर के दसा ह तोर दसा ले कहूं जादा सहे के लईक होही।”
MAT 11:25 ओही बेरा यीसू ह कहिस, “हे ददा! स्वरग अऊ धरती के परभू! मेंह तोर धनबाद करत हंव, काबरकि तेंह ये बातमन ला बुद्धिमान अऊ गियानी मनखेमन ले छुपाय रखय, पर येला छोटे लइकामन ऊपर परगट करय।
MAT 11:26 हव, ददा, ये काम करे म तोला खुसी होईस।
MAT 11:27 “मोर ददा ह मोला जम्मो चीज ला सऊंप दे हवय। ददा के छोंड़ अऊ कोनो, बेटा ला नइं जानंय, अऊ ददा ला कोनो नइं जानंय, सिरिप बेटा ह जानथे अऊ ओमन घलो जानथें, जऊन मन ला बेटा ह चुनथे कि ओमन ऊपर ददा ला उजागर करे।
MAT 11:28 “हे जम्मो थके-मांदे अऊ बोझ ले दबे मनखेमन, मोर करा आवव, मेंह तुमन ला बिसराम दूहूं।
MAT 11:29 मोर जुआड़ी ला अपन ऊपर रखव अऊ मोर ले सीखव, काबरकि मेंह हिरदय म दयालु अऊ नम्र अंव, अऊ तुमन अपन आतमा म बिसराम पाहू।
MAT 11:30 काबरकि मोर जुआड़ी ह सरल अऊ मोर बोझा ह हरू हवय।”
MAT 12:1 ओ समय यीसू ह बिसराम के दिन अनाज के खेत म ले होके जावत रिहिस। ओकर चेलामन ला भूख लगिस, त ओमन अनाज के कुछू दाना ला टोर-टोरके खावन लगिन।
MAT 12:2 येला देखके फरीसीमन यीसू ले कहिन, “देख! तोर चेलामन ओ काम करत हवंय, जेला बिसराम के दिन करई कानून के बिरूध अय।”
MAT 12:3 यीसू ह कहिस, “का तुमन परमेसर के बचन म नइं पढ़ेव कि दाऊद ह का करिस, जब ओला अऊ ओकर संगीमन ला भूख लगिस?
MAT 12:4 ओह परमेसर के घर म गीस, अऊ ओह अऊ ओकर संगवारीमन परमेसर ला भेंट चघाय रोटी ला खाईन, जऊन ला खवई, ओमन बर कानून के बिरूध रिहिस। ओ रोटी ला सिरिप पुरोहितमन खा सकत रिहिन।
MAT 12:5 या का तुमन मूसा के कानून म नइं पढ़े हवव कि पुरोहितमन बिसराम के दिन मंदिर म बिसराम के कानून ला टोरथें, तभो ले ओमन दोसी नइं ठहिरंय?
MAT 12:6 मेंह तुमन ला कहथंव कि इहां एक झन हवय, जऊन ह मंदिर ले घलो बड़े अय।
MAT 12:7 मेंह बलिदान नइं पर दया चाहथंव। परमेसर के बचन म लिखे ये बात ला यदि तुमन समझतेव, त तुमन निरदोसीमन ला दोसी नइं ठहिरातेव।
MAT 12:8 काबरकि मनखे के बेटा ह बिसराम दिन के परभू अय।”
MAT 12:9 उहां ले चलके, यीसू ह यहूदीमन के सभा-घर म आईस।
MAT 12:10 उहां एक झन मनखे रहय, जेकर एक हांथ ह सूख गे रहय। उहां कुछू मनखेमन यीसू ऊपर दोस लगाय बर बहाना खोजत रिहिन, एकरसेति ओमन यीसू ले पुछिन, “का बिसराम के दिन कोनो बिमरहा ला चंगा करई कानून के मुताबिक सही अय?”
MAT 12:11 यीसू ह ओमन ला कहिस, “यदि तुमन के काकरो एक ठन भेड़ हवय अऊ ओह बिसराम के दिन खंचवा म गिर जावय, त का तुमन ओला पकड़के बाहिर नइं निकालहू?
MAT 12:12 मनखे के कीमत ह एक ठन भेड़ ले बहुंत बढ़के होथे। एकरसेति बिसराम के दिन म भलई करई कानून के मुताबिक सही अय।”
MAT 12:13 तब यीसू ह ओ सूखा हांथवाले मनखे ले कहिस, “अपन हांथ ला लमा।” ओह अपन हांथ ला लमाईस अऊ ओ हांथ ह दूसर हांथ सहीं पूरा बने हो गीस।
MAT 12:14 पर फरीसीमन बाहिर निकलिन अऊ ओमन यीसू ला मार डारे के योजना बनाईन।
MAT 12:15 येला जानके यीसू ह उहां ले चल दीस, अऊ बहुंत मनखेमन यीसू के पाछू हो लीन। ओह जम्मो बिमरहा मनखेमन ला चंगा करिस,
MAT 12:16 अऊ ओमन ला चेताके कहिस, “कोनो ला झन बतावव कि मेंह कोन अंव।”
MAT 12:17 ये किसम ले यसायाह अगमजानी के दुवारा कहे गे ये बचन ह पूरा होईस:
MAT 12:18 “देखव, येह मोर सेवक ए, जऊन ला मेंह चुने हवंव, येला मेंह मया करथंव, अऊ येकर ले मेंह बहुंत खुस हवंव। मेंह येकर ऊपर अपन आतमा डालहूं, अऊ येह जाति-जाति के मनखेमन ला नियाय के संदेस दीही।
MAT 12:19 येह न तो झगरा करही अऊ न ऊंचहा सबद म बोलही, अऊ न ही गलीमन म कोनो एकर अवाज सुनहीं।
MAT 12:20 कुचरे सरकंडा ला न तो ओह टोरही, अऊ न ही सुलगत दीया के बाती ला बुताही, जब तक कि येह नियाय ला जीत नइं देवा दीही।
MAT 12:21 जाति-जाति के मनखेमन एकर नांव म अपन आसा रखहीं।”
MAT 12:22 तब मनखेमन एक भूत धरे मनखे ला यीसू करा लानिन, जऊन ह अंधरा अऊ कोंदा रिहिस। यीसू ह ओला चंगा करिस अऊ ओ मनखे ह बोलन अऊ देखन लगिस।
MAT 12:23 जम्मो मनखेमन चकित होके कहे लगिन, “कहूं येह दाऊद के संतान तो नो हय?”
MAT 12:24 पर जब फरीसीमन ये बात ला सुनिन, त ओमन कहिन, “ये मनखे ह परेत आतमामन के सरदार बालजबूल के मदद ले परेत आतमामन ला निकालथे।”
MAT 12:25 यीसू ह ओमन के मन के बात ला जानके ओमन ला कहिस, “जऊन राज म फूट पड़ जाथे, ओह उजर जाथे, अऊ जऊन सहर या घराना म फूट पड़ जाथे, ओह टिके नइं रहय।
MAT 12:26 यदि सैतान ह सैतान ला निकालथे, त ओह अपन खुद के बिरोधी हो गे हवय। तब ओकर राज ह कइसने टिके रह सकथे?
MAT 12:27 यदि मेंह बालजबूल के मदद ले परेत आतमामन ला निकालथंव, त फेर तुम्हर मनखेमन काकर मदद ले ओमन ला निकालथें? एकरसेति, ओही मन तुम्हर नियाय करहीं।
MAT 12:28 पर यदि मेंह परमेसर के आतमा के मदद ले परेत आतमामन ला निकालथंव, त फेर परमेसर के राज ह तुम्हर करा आ गे हवय।
MAT 12:29 “या कोन ह कोनो बलवान मनखे के घर म घुसरके ओकर संपत्ति ला लूट सकथे, जब तक कि पहिली ओह ओ बलवान मनखे ला नइं बांध लेवय? एकर बाद ही ओह ओकर घर ला लूट सकही।
MAT 12:30 “जऊन ह मोर संग नइं ए, ओह मोर बिरोध म हवय, अऊ जऊन ह मोर संग नइं संकेलय, ओह बगराथे।
MAT 12:31 एकरसेति, मेंह तुमन ला कहत हंव कि मनखेमन के हर एक पाप अऊ निन्दा ला छेमा करे जाही, पर पबितर आतमा के निन्दा ला छेमा नइं करे जावय।
MAT 12:32 जऊन ह मनखे के बेटा के बिरोध म कोनो बात कहिथे, त ओला छेमा करे जाही, पर जऊन ह पबितर आतमा के बिरोध म कहिथे, ओला छेमा नइं करे जावय, न तो ये समय म अऊ न ही अवइया समय म।
MAT 12:33 “बने रूख ला लगाहू, त ओमा सुघर फर धरही; यदि खराप रूख लगाहू, त ओमा खराप फर धरही; काबरकि रूख ह अपन फर ले चिनहे जाथे।
MAT 12:34 हे जहरिला सांप के पीलामन हो! तुमन खराप मनखे अव अऊ सुघर गोठ कइसने कह सकथव? काबरकि जऊन बात ले दिल ह भरे रहिथे, ओहीच ह मुहूं ले निकलथे।
MAT 12:35 बने मनखे ह अपन दिल के बने भंडार ले बने बातमन ला निकालथे, अऊ खराप मनखे ह अपन हिरदय म भरे खराप भंडार ले खराप बात निकालथे।
MAT 12:36 पर मेंह तुमन ला कहत हंव कि नियाय के दिन मनखेमन ला ओमन के मुहूं ले निकले हर एक बेकार बात के हिसाब देय पड़ही।
MAT 12:37 काबरकि तुमन अपन गोठ के दुवारा निरदोस ठहिरहू अऊ अपन गोठ के दुवारा ही दोसी ठहिरहू।”
MAT 12:38 तब कुछू फरीसी अऊ कानून के गुरूमन यीसू ले कहिन, “हे गुरू! हमन तोर ले कोनो अचरज के चिनहां देखे चाहत हन।”
MAT 12:39 यीसू ह ओमन ला जबाब दीस, “ये दुस्ट अऊ बेभिचारी पीढ़ी के मनखेमन चिनहां देखाय बर कहत हवंय! पर योना अगमजानी के चिनहां ला छोंड़ येमन ला अऊ कोनो चिनहां नइं दिये जावय।
MAT 12:40 जइसने योना ह तीन दिन अऊ तीन रात एक ठन बड़े मछरी के पेट म रिहिस, वइसने मनखे के बेटा ह घलो तीन दिन अऊ तीन रात धरती के भीतर म रहिही।
MAT 12:41 नियाय के दिन नीनवे सहर के मनखेमन, ये पीढ़ी के मनखेमन संग ठाढ़ होहीं, अऊ येमन ऊपर दोस लगाहीं, काबरकि ओमन योना के संदेस ला सुनके मन फिराईन। पर देखव! इहां एक झन हवय, जऊन ह योना ले घलो बड़के अय।
MAT 12:42 नियाय के दिन दक्खिन दिग के रानी ह ये पीढ़ी के मनखेमन संग ठाढ़ होही अऊ येमन ऊपर दोस लगाही, काबरकि ओ रानी ह राजा सुलेमान के गियान के बात ला सुने बर धरती के छोर ले आय रिहिस। पर देखव! इहां एक झन हवय, जऊन ह राजा सुलेमान ले घलो बड़के अय।
MAT 12:43 “जब एक असुध आतमा ह कोनो मनखे म ले बाहिर निकलथे, त ओह सुरताय के ठिकाना खोजत सूखा ठऊरमन म जाथे, पर ओला कोनो जगह नइं मिलय।
MAT 12:44 तब ओह कहिथे, ‘जऊन घर ला मेंह छोंड़के आय रहेंव, मेंह ओहीच घर म लहुंट जाहूं।’ अऊ जब ओह लहुंटके आथे, त ओह ओ घर ला सूना, झाड़े-बहारे अऊ सजे-धजे पाथे।
MAT 12:45 तब ओह जाथे अऊ अपन ले घलो जादा खराप सात ठन आने आतमामन ला ले आथे, अऊ ओमन ओ मनखे म जाथें अऊ उहां बस जाथें। अऊ ओ मनखे के आखिरी दसा ह पहिली ले अऊ खराप हो जाथे। अइसनेच ये दुस्ट पीढ़ी के मनखेमन के दसा घलो होही।”
MAT 12:46 जब यीसू ह मनखेमन ले गोठियावत रिहिस, त ओकर दाई अऊ भाईमन आके बाहिर खड़े रिहिन अऊ ओमन ओकर ले बात करे चाहत रिहिन।
MAT 12:47 एक झन ह यीसू ला कहिस, “तोर दाई अऊ भाईमन बाहिर म ठाढ़े हवंय अऊ तोर ले बात करे चाहत हवंय।”
MAT 12:48 पर यीसू ह ओ मनखे ला कहिस, “कोन ह मोर दाई अय, अऊ कोन मन मोर भाई अंय?”
MAT 12:49 अऊ यीसू ह अपन चेलामन कोति अपन हांथ ला लमाके कहिस, “येमन अंय मोर दाई अऊ मोर भाई।
MAT 12:50 काबरकि जऊन ह मोर स्वरग के ददा के ईछा मुताबिक चलथे, ओहीच ह मोर भाई, मोर बहिनी अऊ मोर दाई अय।”
MAT 13:1 ओहीच दिन, यीसू ह घर ले निकलिस, अऊ जाके झील के तीर म बईठ गीस।
MAT 13:2 तब ओकर चारों कोति अतेक बड़े भीड़ जूर गीस कि ओला एक ठन डोंगा ऊपर चघके बईठे पड़िस, अऊ जम्मो मनखेमन झील के तीर म ठाढ़े रहंय।
MAT 13:3 तब यीसू ह ओमन ला पटंतर म बहुंत अकन बात बताईस। ओह कहिस, “एक किसान ह बीज बोय बर निकलिस।
MAT 13:4 जब ओह बोवत रिहिस, त कुछू बीजामन रसता के तीर म गिरिन अऊ चिरईमन आके ओला खा लीन।
MAT 13:5 कुछू बीजामन पथर्री भुइयां म गिरिन, जिहां ओमन ला जादा माटी नइं मिलिस। ओ बीजामन जल्दी जाम गीन काबरकि उहां माटी ह गहिरा नइं रिहिस।
MAT 13:6 पर जब सूरज निकलिस, त ओमन मुरझा गीन अऊ जरी नइं धरे रहय के कारन ओमन सूख गीन।
MAT 13:7 कुछू बीजामन कंटिली झाड़ीमन के बीच म गिरिन अऊ ओ झाड़ीमन बढ़के ओमन ला दबा दीन।
MAT 13:8 पर कुछू बीजामन बने भुइयां ऊपर गिरिन अऊ जादा फर लानिन; कोनो सौ गुना, कोनो साठ गुना अऊ कोनो तीस गुना।
MAT 13:9 जेकर कान हवय, ओह सुन ले।”
MAT 13:10 चेलामन यीसू करा आके ओकर ले पुछिन, “तेंह मनखेमन संग पटंतर म काबर गोठियाथस?”
MAT 13:11 ओह जबाब दीस, “स्वरग राज के भेद के गियान तुमन ला देय गे हवय, पर ओमन ला नइं।
MAT 13:12 काबरकि जेकर करा हवय, ओला अऊ दिये जाही अऊ ओकर करा बहुंत जादा हो जाही। पर जेकर करा नइं ए, ओकर करा ले ओला घलो ले लिये जाही, जऊन थोर बहुंत ओकर करा हवय।
MAT 13:13 मेंह ओमन ले एकर कारन पटंतर म गोठियाथंव: “ताकि देखत ले घलो ओमन झन देख सकंय, अऊ सुनत ले घलो ओमन झन सुन सकंय या समझ सकंय।
MAT 13:14 ओमन के बारे म यसायाह अगमजानी के ये अगमबानी ह पूरा होथे: “ ‘तुमन सुनहू जरूर, पर कभू नइं समझहू, अऊ तुमन देखहू जरूर, पर कभू नइं सुझही।
MAT 13:15 काबरकि ये मनखेमन के हिरदय ह कठोर हो गे हवय; अऊ येमन अपन कान ला बंद कर ले हवंय, अऊ येमन अपन आंखी ला मुंद ले हवंय। नइं तो येमन अपन आंखीमन ले देखतिन, अपन कानमन ले सुनतिन, अपन हिरदय ले समझतिन अऊ मोर कोति फिरतिन, अऊ मेंह येमन ला चंगा कर देतेंव।’
MAT 13:16 पर धइन अंय तुम्हर आंखीमन, काबरकि ओमन देखथें, अऊ धइन अंय तुम्हर कानमन, काबरकि ओमन सुनथें।
MAT 13:17 मेंह तुमन ला सच कहथंव कि जऊन चीज ला तुमन देखत हव, ओला कतको अगमजानी अऊ धरमी मनखेमन देखे चाहत रिहिन, पर देख नइं सकिन; अऊ जऊन बात ला तुमन सुनत हवव, ओला ओमन सुने चाहत रिहिन, पर सुन नइं सकिन।
MAT 13:18 “अब तुमन किसान के पटंतर के मतलब ला सुनव।
MAT 13:19 जब कोनो मनखे स्वरग राज के बचन ला सुनथे अऊ ओला नइं समझय, त जऊन बचन ओकर हिरदय म बोय गे रहिथे, ओला दुस्ट सैतान ह आके छीन लेथे। येह ओ बीजा ए, जऊन ह रसता के तीर म बोय गे रिहिस।
MAT 13:20 जऊन बीजा ह पथर्री भुइयां म बोय गे रिहिस, येह ओ मनखे अय, जऊन ह बचन ला सुनके तुरते ओला आनंद सहित गरहन करथे।
MAT 13:21 पर अपन म जरी नइं धरे रहय के कारन, ओकर बिसवास ह कुछू समय तक ही रहिथे। जब बचन के सेति समस्या अऊ सतावा आथे, त ओह तुरते बचन के मुताबिक चले बर बंद कर देथे।
MAT 13:22 जऊन बीजा ह कंटिली झाड़ीमन के बीच म बोय गे रिहिस, येह ओ मनखे अय, जऊन ह बचन ला सुनथे, पर ये जिनगी के चिंता अऊ धन के लोभ ह बचन ला दबा देथे अऊ ओह फर नइं लानय।
MAT 13:23 पर जऊन बीजा ह बने भुइयां म बोय गे रिहिस, येह ओ मनखे अय, जऊन ह बचन ला सुनथे अऊ ओला समझथे। ओह फर लानथे; कोनो सौ गुना, कोनो साठ गुना अऊ कोनो तीस गुना।”
MAT 13:24 यीसू ह ओमन ला एक अऊ पटंतर सुनाईस: “स्वरग के राज ह ओ मनखे के सहीं अय, जऊन ह अपन खेत म बने बीजा ला बोईस।
MAT 13:25 पर जब मनखेमन सुतत रिहिन, त ओ मनखे के बईरी ह आईस अऊ गहूं के बीच म जंगली बीजा ला बोके चल दीस।
MAT 13:26 जब गहूं ह जामिस अऊ एकर बाली दिखे लगिस, त फेर जंगली पऊधामन घलो दिखे लगिन।
MAT 13:27 “तब ओ खेत के मालिक के सेवकमन ओकर करा आईन अऊ कहिन, ‘मालिक, का तेंह अपन खेत म बने बीजा नइं बोय रहय? तब ओमा ये जंगली पऊधामन कहां ले आ गीन?’
MAT 13:28 “ओह ओमन ला कहिस, ‘येह कोनो बईरी के काम अय।’ “तब सेवकमन ओकर ले पुछिन, ‘का तेंह चाहथस कि हमन जाके ओ जंगली पऊधामन ला उखान दन?’
MAT 13:29 “खेत के मालिक ह कहिस, ‘नइं, काबरकि जंगली पऊधा ला उखानत बखत, हो सकथे कि तुमन ओमन के संग म गहूं ला घलो उखान डारव।
MAT 13:30 लुवई के समय तक दूनों ला संगे-संग बढ़न देवव। लुवई के समय, मेंह लुवइयामन ला कहिहूं; पहिली जंगली पऊधामन ला संकेलव अऊ जलाय बर ओमन के बोझा बांध लेवव। तब गहूं ला जमा करके मोर कोठार म ले आवव।’ ”
MAT 13:31 यीसू ह ओमन ला एक अऊ पटंतर सुनाईस: “स्वरग के राज ह सरसों के एक बीजा के सहीं अय, जऊन ला लेके एक मनखे ह अपन खेत म बोईस।
MAT 13:32 सरसों के बीजा ह तो जम्मो बीजामन ले छोटे होथे, पर जब येह बाढ़थे, त जम्मो साग-भाजी ले बड़े हो जाथे अऊ अइसने रूख बन जाथे कि अकास के चिरईमन आके एकर डारामन म बसेरा करथें।”
MAT 13:33 यीसू ह ओमन ला एक ठन अऊ पटंतर सुनाईस: “स्वरग के राज ह खमीर सहीं अय, जऊन ला एक माईलोगन ह लीस अऊ ओला तीन पसेरी पीसान म मिलाके तब तक गुंथिस जब तक कि ओ जम्मो पीसान ह खमीर नइं हो गीस।”
MAT 13:34 यीसू ह मनखेमन ला ये जम्मो बात पटंतर म कहिस, अऊ बिगर पटंतर के ओह ओमन ला कुछू नइं कहत रिहिस।
MAT 13:35 अइसने करे के दुवारा ओह अगमजानी के दुवारा कहे गय ये बात ला पूरा करिस: “मेंह अपन बात पटंतर म करहूं। मेंह ओ बातमन ला उजागर करहूं, जऊन ह संसार के सिरजे के समय ले गुपत म हवय।”
MAT 13:36 तब यीसू ह भीड़ ला छोंड़के घर के भीतर गीस। ओकर चेलामन ओकर करा आके कहिन, “खेत म जंगली बीजा के पटंतर के बारे म हमन ला समझा दे।”
MAT 13:37 यीसू ह जबाब दीस, “जऊन मनखे ह बने बीजा ला बोईस, ओह मनखे के बेटा अय।
MAT 13:38 खेत ह संसार अय, अऊ बने बीजा ह स्वरग राज के संतान अंय। जंगली बीजामन दुस्ट सैतान के संतान अंय,
MAT 13:39 अऊ जऊन बईरी ह येमन ला बोथे, ओह सैतान अय। लुवई ह संसार के अन्त अय, अऊ लुवइयामन स्वरगदूत अंय।
MAT 13:40 “जइसने जंगली पऊधामन ला जमा करके आगी म बार दिये जाथे, वइसने संसार के अन्त समय म होही।
MAT 13:41 मनखे के बेटा ह अपन स्वरगदूतमन ला पठोही, अऊ ओमन ओकर राज के ओ जम्मो झन ला निकालहीं, जऊन मन मनखेमन के पाप के कारन बनथें अऊ जऊन मन कुकरम करथें।
MAT 13:42 स्वरगदूतमन ओमन ला आगी के भट्ठी म झोंक दीहीं, जिहां ओमन रोहीं अऊ अपन दांत पीसहीं।
MAT 13:43 तब धरमी मनखेमन अपन परमेसर ददा के राज म सूरज सहीं चमकहीं। जेकर कान हवय, ओह सुन ले।
MAT 13:44 “स्वरग के राज ह एक खेत म छिपे खजाना के सहीं अय, जऊन ला एक मनखे ह पाईस, अऊ ओह ओला फेर लुका दीस। तब ओह खुसी म गीस अऊ अपन जम्मो कुछू ला बेचके ओ खेत ला बिसा लीस।
MAT 13:45 “फेर, स्वरग के राज ह एक सौदागर के सहीं अय, जऊन ह सुघर मोती के खोज म रहिथे।
MAT 13:46 जब ओला एक ठन मंहगा मोती मिलथे, त ओह जाथे अऊ अपन जम्मो कुछू ला बेचके ओ मोती ला बिसा लेथे।
MAT 13:47 “फेर स्वरग के राज ह एक जाल के सहीं अय, जऊन ला समुंदर म डारे गीस, अऊ ओमा जम्मो किसम के मछरी फंसिन।
MAT 13:48 जब जाल ह भर गीस त मछुआरमन ओला खींचके तीर म ले आईन। तब ओमन बईठ गीन अऊ बने मछरीमन ला निमारके टुकना म संकेलिन, अऊ खराप मछरीमन ला फटिक दीन।
MAT 13:49 संसार के अन्त समय म अइसनेच होही। स्वरगदूतमन आहीं, अऊ दुस्ट मनखेमन ला धरमीमन के बीच ले अलग करहीं,
MAT 13:50 अऊ ओमन ला आगी के भट्ठी म झोंक दीहीं, जिहां ओमन रोहीं अऊ अपन दांत पीसहीं।
MAT 13:51 “का तुमन ये जम्मो गोठ ला समझेव?” यीसू ह अपन चेलामन ले पुछिस। “हव जी।” ओमन जबाब दीन।
MAT 13:52 यीसू ह ओमन ला कहिस, “एकरसेति, मूसा के कानून के हर ओ गुरू, जऊन ह स्वरग राज के चेला बन चुके हवय, ओह एक घर के मालिक सहीं अय, जऊन ह अपन भंडार ले नवां के संग-संग जुन्ना चीजमन ला निकालथे।”
MAT 13:53 यीसू ह ये पटंतरमन ला सुनाय के बाद उहां ले चल दीस।
MAT 13:54 ओह अपन नगर म आईस, अऊ मनखेमन ला ओमन के सभा-घर म सिकछा देवन लगिस। मनखेमन ओकर उपदेस ला सुनके चकित होईन अऊ कहिन, “ये मनखे ला, ये बुद्धि अऊ ये अचरज के काम करे के सामर्थ कहां ले मिलिस?
MAT 13:55 का येह बढ़ई के बेटा नो हय? का एकर दाई के नांव मरियम नो हय? का याकूब, यूसुफ, सिमोन अऊ यहूदा एकर भाई नो हंय?
MAT 13:56 का एकर जम्मो बहिनीमन हमर बीच म नइं रहंय? तब ये मनखे ला ये जम्मो चीज कहां ले मिलिस?”
MAT 13:57 अऊ ओमन ओकर ऊपर नराज होईन। पर यीसू ह ओमन ला कहिस, “अगमजानी ह अपन नगर अऊ अपन घर के छोंड़ जम्मो जगह म आदरमान पाथे।”
MAT 13:58 मनखेमन के अबिसवास के कारन, ओह उहां जादा अचरज के काम नइं करिस।
MAT 14:1 ओ समय चौथाई भाग के राजा हेरोदेस ह यीसू के बारे म सुनिस,
MAT 14:2 अऊ ओह अपन सेवकमन ला कहिस, “येह यूहन्ना बतिसमा देवइया अय। ओह मरे म ले जी उठे हवय। एकर कारन ओकर दुवारा चमतकार के काममन होवत हवंय।”
MAT 14:3 हेरोदेस ह अपन भाई फिलिप्पुस के घरवाली हेरोदियास के कारन यूहन्ना ला पकड़वाके बंदी बनवाय रिहिस अऊ ओला जेल म डलवा दे रिहिस।
MAT 14:4 काबरकि यूहन्ना ह हेरोदेस ला कहे रिहिस, “अपन भाई के घरवाली ला रखई तोर बर कानून के मुताबिक उचित नो हय।”
MAT 14:5 हेरोदेस ह यूहन्ना ला मार डारे चाहत रिहिस, पर ओह मनखेमन ले डरावत रिहिस काबरकि मनखेमन यूहन्ना ला एक अगमजानी मानत रिहिन।
MAT 14:6 हेरोदेस के जनम दिन म हेरोदियास के बेटी ह नेवताहारीमन के आघू म नाचिस अऊ हेरोदेस ला खुस कर दीस।
MAT 14:7 तब हेरोदेस ह किरिया खाके ओला ये बचन दीस, “जऊन कुछू तेंह मांगबे, मेंह तोला दूहूं।”
MAT 14:8 ओह अपन दाई के सिखोय म आके कहिस, “यूहन्ना बतिसमा देवइया के मुड़ ला एक ठन थाली म इहां मोर करा मंगवा दे।”
MAT 14:9 राजा ह दुखी होईस, पर अपन किरिया अऊ जेवनार म आय पहुनामन के सेति ओह हुकूम दीस, “येला यूहन्ना के मुड़ दे दिये जावय।”
MAT 14:10 ओह सिपाहीमन ला पठोके, जेल म यूहन्ना के मुड़ ला कटवा दीस।
MAT 14:11 ओकर मुड़ ला एक ठन थाली म लाय गीस अऊ ओ छोकरी ला दे दिये गीस, अऊ ओह मुड़ ला अपन दाई करा ले गीस।
MAT 14:12 यूहन्ना के चेलामन आईन अऊ ओकर लास ला ले जाके, ओला माटी दे दीन। तब ओमन जाके यीसू ला ये खबर दीन।
MAT 14:13 जब यीसू ह ये खबर ला सुनिस, त एक ठन डोंगा म चघके, ओह एके झन उहां ले एक सुनसान जगह म चल दीस। जब मनखेमन ला ये बात के पता चलिस, त ओमन सहरमन ले निकलके पैदलेच ओकर खोज म गीन।
MAT 14:14 जब यीसू ह डोंगा ले उतरिस अऊ मनखेमन के एक बड़े भीड़ ला देखिस, त ओला ओमन के ऊपर तरस आईस अऊ ओह ओमन के बिमरहामन ला बने करिस।
MAT 14:15 जब सांझ होय लगिस, तब चेलामन ओकर करा आईन अऊ कहिन, “येह एक सुनसान जगह ए, अऊ बेरा ह ढरक गे हवय। भीड़ के मनखेमन ला भेज, ताकि ओमन गांवमन म जाके अपन बर कुछू जेवन बिसो सकंय।”
MAT 14:16 यीसू ह कहिस, “येमन ला कहीं जाय के जरूरत नइं ए। तुमन येमन ला कुछू खाय बर देवव।”
MAT 14:17 ओमन यीसू ला कहिन, “इहां हमर करा सिरिप पांच ठन रोटी अऊ दू ठन मछरी हवय।”
MAT 14:18 यीसू ह कहिस, “ओमन ला इहां मोर करा लानव।”
MAT 14:19 तब यीसू ह मनखेमन ला कांदी म बईठे के हुकूम दीस। ओह पांच रोटी अऊ दू ठन मछरी ला लीस अऊ स्वरग कोति देखके, ओह परमेसर ला धनबाद दीस, अऊ रोटीमन ला टोर-टोरके अपन चेलामन ला दीस अऊ चेलामन मनखेमन ला दीन।
MAT 14:20 ओ जम्मो झन खाईन अऊ खाके अघा गीन। चेलामन बांचे-खुचे टुकड़ा के बारह टुकना भर के उठाईन।
MAT 14:21 जऊन मन भोजन करिन, ओमा माईलोगन अऊ लइकामन ला छोंड़के, करीब पांच हजार आदमीमन रिहिन।
MAT 14:22 एकर बाद, यीसू ह तुरते चेलामन ला डोंगा म चघाईस कि ओमन ओकर ले आघू झील के ओ पार जावंय, तब तक ओह मनखेमन ला बिदा करिस।
MAT 14:23 मनखेमन ला बिदा करे पाछू, यीसू ह एके झन पराथना करे बर पहाड़ ऊपर गीस। जब सांझ होईस, त ओह उहां एके झन रिहिस।
MAT 14:24 ओ समय डोंगा ह भुइयां ले बहुंत दूरिहा म रिहिस, अऊ पानी के लहरा म डगमगावत रिहिस, काबरकि हवा ह ओकर उल्टा बोहावत रहय।
MAT 14:25 झूलझूलहा यीसू ह समुंदर ऊपर रेंगत चेलामन करा आईस।
MAT 14:26 जब चेलामन यीसू ला समुंदर ऊपर रेंगत देखिन, त ओमन डरा गीन अऊ कहिन, “येह भूत अय।” अऊ ओमन डर के मारे चिचियाय लगिन।
MAT 14:27 तब यीसू ह तुरते ओमन ला कहिस, “हिम्मत रखव। येह में अंव। झन डरव।”
MAT 14:28 पतरस ह कहिस, “हे परभू, यदि तें अस, त मोला पानी ऊपर तोर करा आय के हुकूम दे।”
MAT 14:29 यीसू ह कहिस, “आ।” तब पतरस ह डोंगा ले उतरिस अऊ पानी ऊपर रेंगत यीसू कोति आय लगिस।
MAT 14:30 पर जब ओह हवा ला बहत देखिस, त ओह डरा गीस अऊ पानी म बुड़न लगिस, त चिचियाके कहिस, “हे परभू! मोला बचा।”
MAT 14:31 यीसू ह तुरते अपन हांथ बढ़ाके ओला थाम लीस अऊ कहिस, “हे अल्‍प बिसवासी, तेंह संका काबर करय?”
MAT 14:32 जब ओ दूनों डोंगा म चघ गीन, त हवा ह सांत हो गीस।
MAT 14:33 तब जऊन मन डोंगा म रिहिन, ओमन यीसू ला दंडवत करिन अऊ कहिन, “सही म तेंह परमेसर के बेटा अस।”
MAT 14:34 ओमन झील के ओ पार गन्नेसरत सहर म हबरिन।
MAT 14:35 उहां के मनखेमन यीसू ला चिन डारिन अऊ ओमन आसपास के जम्मो गांव म खबर भिजवा दीन। मनखेमन जम्मो बिमरहामन ला यीसू करा लानिन,
MAT 14:36 अऊ ओकर ले बिनती करिन, “ये बिमरहामन ला तोर ओनहा के छोर ला सिरिप छुवन दे।” अऊ जतेक झन ओला छुईन, ओ जम्मो झन चंगा हो गीन।
MAT 15:1 तब यरूसलेम सहर ले कुछू फरीसी अऊ कानून के गुरूमन यीसू करा आईन,
MAT 15:2 अऊ ओकर ले पुछिन, “तोर चेलामन काबर पुरखामन के रीति-रिवाज ला नइं मानंय? खाना खाय के पहिली, ओमन अपन हांथ ला नइं धोवंय।”
MAT 15:3 यीसू ह ओमन ला जबाब दीस, “अऊ तुमन अपन रीति-रिवाज के हित म परमेसर के हुकूम ला काबर नइं मानव?
MAT 15:4 काबरकि परमेसर ह हुकूम दे हवय, ‘अपन दाई अऊ ददा के आदरमान करव, अऊ जऊन ह अपन दाई या ददा के बुरई करथे, ओह मार डारे जावय।’
MAT 15:5 पर तुमन कहिथव कि यदि कोनो अपन दाई या ददा ले कहय कि जऊन मदद तुमन ला मोर कोति ले हो सकत रिहिस, मेंह ओला परमेसर ला भेंट के रूप म चघा दे हवंव।
MAT 15:6 तब ओला अपन ददा या दाई के आदरमान करे के जरूरत नइं अय। ये किसम ले तुमन अपन रीति-रिवाज के हित म परमेसर के बचन ला टार देथव।
MAT 15:7 हे ढोंगी मनखेमन! यसायाह अगमजानी ह तुम्हर बारे म ये कहिके बिलकुल सही अगमबानी करे हवय:
MAT 15:8 “ये मनखेमन अपन ओंठ ले मोर आदर करथें, पर ओमन के हिरदय ह मोर ले दूरिहा हवय,
MAT 15:9 येमन बेकार म मोर अराधना करथें; काबरकि येमन मनखे के बनाय नियममन ला सिखाथें।”
MAT 15:10 यीसू ह मनखेमन के भीड़ ला अपन करा बलाईस अऊ कहिस, “तुमन सुनव अऊ समझव।
MAT 15:11 जऊन चीज ह मुहूं म जाथे, ओह मनखे ला असुध नइं करय, पर जऊन ह मुहूं ले बाहिर निकलथे, ओह मनखे ला असुध करथे।”
MAT 15:12 तब चेलामन यीसू करा आके पुछिन, “का तेंह जानथस कि तोर ये बात ले फरीसीमन ला ठेस लगे हवय?”
MAT 15:13 यीसू ह जबाब दीस, “जऊन पऊधा ला, स्वरग म रहइया मोर ददा ह नइं लगाय हवय, ओला जरी ले उखान दिये जाही।
MAT 15:14 ओमन ला रहन दव। ओमन अंधरा अगुवा अंय। यदि एक अंधरा ह दूसर अंधरा ला रसता देखाही, त ओमन दूनों खंचवा म गिरहीं।”
MAT 15:15 येला सुनके पतरस ह ओला कहिस, “ये पटंतर ला हमन ला समझा दे।”
MAT 15:16 यीसू ह कहिस, “का तुमन अभी तक ले नासमझ हवव?
MAT 15:17 का तुमन नइं जानव कि जऊन चीज ह मुहूं म जाथे, ओह पेट म ले होके संडास ले बाहिर निकल जाथे?
MAT 15:18 पर जऊन चीज ह मुहूं ले निकलथे, ओह हिरदय ले आथे अऊ ओह मनखे ला असुध करथे।
MAT 15:19 काबरकि खराप बिचार, हतिया, बेभिचार, छिनारीपन, चोरी, लबारी गवाही अऊ निन्दा—ये जम्मो बात हिरदय ले निकलथे,
MAT 15:20 अऊ ये बातमन मनखे ला असुध करथें, पर बिगर हांथ धोय भोजन करई, मनखे ला असुध नइं करय।”
MAT 15:21 ओ जगह ला छोंड़के, यीसू ह सूर अऊ सीदोन के सीमना म चले गीस।
MAT 15:22 ओ इलाका के एक कनानी माईलोगन ह ओकर करा आईस अऊ चिचियाके कहिस, “हे परभू, दाऊद के संतान, मोर ऊपर दया कर! मोर बेटी ला भूत धरे हवय अऊ ओला भयंकर सतावत हवय।”
MAT 15:23 पर यीसू ह ओला कुछू जबाब नइं दीस। तब ओकर चेलामन आईन अऊ ओकर ले बिनती करिन, “ओ माईलोगन ला बिदा कर, काबरकि ओह चिचियावत हमर पाछू-पाछू आवत हवय।”
MAT 15:24 यीसू ह कहिस, “मेंह सिरिप इसरायल के गंवाय भेड़मन करा पठोय गे हवंव।”
MAT 15:25 तब ओ माईलोगन ह आईस अऊ यीसू के आघू म माड़ी टेकके कहिस, “हे परभू, मोर मदद कर।”
MAT 15:26 यीसू ह जबाब दीस, “लइकामन के रोटी ला लेके कुकुरमन ला देवई ठीक नो हय।”
MAT 15:27 ओह कहिस, “हव परभू, पर कुकुरमन घलो ओमन के मालिक के मेज ले गिरे जूठा-काठा ला खा लेथें।”
MAT 15:28 तब यीसू ह ओला कहिस, “हे माईलोगन, तोर बिसवास ह बहुंत बड़े अय। जइसने तेंह चाहथस, वइसनेच तोर बर होवय।” अऊ ओकर बेटी ह ओहीच बखत चंगा हो गीस।
MAT 15:29 यीसू ह ओ जगह ला छोंड़ दीस अऊ गलील के झील के तीरे-तीर गीस। तब ओह पहाड़ी ऊपर चघिस अऊ उहां बईठ गीस।
MAT 15:30 भीड़ के भीड़ मनखेमन ओकर करा आईन अऊ ओमन खोरवा, अंधरा, लूलवा, कोंदा अऊ बहुंते आने बिमरहामन ला लानके यीसू के गोड़ करा रख दीन, अऊ यीसू ह ओमन ला चंगा करिस।
MAT 15:31 मनखेमन अब्बड़ अचरज करिन, जब ओमन ये देखिन कि कोंदा ह गोठियावत हवय, लूलवा ह ठीक हो गे हवय, खोरवा ह रेंगत हवय अऊ अंधरा ह देखत हवय। अऊ ओमन इसरायल के परमेसर के महिमा करिन।
MAT 15:32 यीसू ह अपन चेलामन ला अपन करा बलाके कहिस, “मोला ये मनखेमन ऊपर तरस आथे। येमन तीन दिन ले मोर संग म हवंय, अऊ येमन करा खाय बर कुछू नइं ए। मेंह येमन ला भूखन पेट बिदा करे नइं चाहथंव, नइं तो येमन डहार म ही थकके गिर सकथें।”
MAT 15:33 ओकर चेलामन कहिन, “अतेक बड़े भीड़ ला खवाय बर, ये सुनसान जगह म हमन कहां ले अतेक रोटी पाबो?”
MAT 15:34 यीसू ह पुछिस, “तुम्हर करा के ठन रोटी हवय?” ओमन कहिन, “सात ठन, अऊ कुछू छोटे-छोटे मछरी घलो।”
MAT 15:35 यीसू ह मनखेमन ला भुइयां म बईठे बर कहिस।
MAT 15:36 तब ओह ओ सात ठन रोटी अऊ मछरीमन ला लीस, अऊ परमेसर ला धनबाद देके ओमन ला टोरिस अऊ अपन चेलामन ला देवत गीस अऊ चेलामन ओला मनखेमन ला बांट दीन।
MAT 15:37 ओ जम्मो झन खाईन अऊ खाके अघा गीन। ओकर बाद चेलामन बांचे-खुचे टुकड़ा के सात ठन टुकना भरके उठाईन।
MAT 15:38 जऊन मन उहां खाना खाईन, ओमा माईलोगन अऊ लइकामन ला छोंड़के, चार हजार आदमीमन रिहिन।
MAT 15:39 तब यीसू ह भीड़ ला बिदा करिस अऊ डोंगा म चघके ओह मगदन छेत्र म चल दीस।
MAT 16:1 फरीसी अऊ सदूकीमन यीसू करा आईन अऊ ओला परखे खातिर ओकर ले पुछिन, “हमन ला स्वरग ले कोनो चिनहां देखा।”
MAT 16:2 यीसू ह ओमन ला जबाब दीस, “जब संझा होथे, त तुमन कहिथव कि मौसम ह साफ रहिही, काबरकि अकास म लाली हवय,
MAT 16:3 अऊ बड़े बिहनियां के बखत तुमन कहिथव कि आज आंधी चलही, काबरकि अकास म लाली हवय अऊ बादर छाय हवय। तुमन ह अकास के चिनहां ला देखके, मौसम के बारे म बता देथव, पर तुमन समय के चिनहां के बारे नइं बता सकव।
MAT 16:4 ये दुस्ट अऊ बेभिचारी पीढ़ी के मनखेमन अचरज के चिनहां खोजथें, पर योना अगमजानी के चिनहां के छोंड़, येमन ला अऊ कुछू चिनहां नइं दिये जावय।” तब यीसू ह ओमन ला छोंड़के चल दीस।
MAT 16:5 जब ओमन झील के ओ पार गीन, त चेलामन अपन संग रोटी लाने बर भुला गे रिहिन।
MAT 16:6 यीसू ह ओमन ला कहिस, “फरीसी अऊ सदूकीमन के खमीर ले सचेत रहव।”
MAT 16:7 ओमन आपस म एकर बारे म बिचार करिन अऊ कहिन, “हमन रोटी नइं लाने हवन, एकरसेति ओह अइसने कहत हवय।”
MAT 16:8 ओमन के सोच-बिचार ला जानके, यीसू ह ओमन ला कहिस, “हे अल्‍प बिसवासीमन हो! तुमन काबर अपन बीच म अइसने गोठियावत हव कि तुम्हर करा रोटी नइं ए?
MAT 16:9 का तुमन अभी तक ले नइं समझत हवव? पांच हजार मनखेमन बर पांच ठन रोटी के बात, का तुमन सुरता नइं करत हव, अऊ कतेक ठन टुकना भरके तुमन संकेले रहेव?
MAT 16:10 या फेर ओ चार हजार मनखेमन बर सात ठन रोटी के बात, का तुमन ला सुरता नइं ए, अऊ कतेक ठन टुकना भरके तुमन संकेले रहेव?
MAT 16:11 तुमन ये काबर नइं समझव कि मेंह तुमन ला रोटी के बारे म नइं कहत रहेंव? पर तुमन ला फरीसी अऊ सदूकीमन के खमीर ले सचेत रहे बर कहत रहेंव।”
MAT 16:12 तब ओमन समझिन कि यीसू ह ओमन ला रोटी के खमीर के बारे म नइं गोठियावत रिहिस, पर ओह ओमन ला फरीसी अऊ सदूकीमन के सिकछा ले सचेत रहे बर कहत रिहिस।
MAT 16:13 जब यीसू ह कैसरिया-फिलिप्पी के इलाका म आईस, त ओह अपन चेलामन ले पुछिस, “मनखेमन मनखे के बेटा ला कोन ए, कहिथें?”
MAT 16:14 ओमन कहिन, “कुछू मनखेमन कहिथें कि ओह यूहन्ना बतिसमा देवइया अय; कुछू मन एलियाह अय, कहिथें; अऊ कुछू मनखेमन कहिथें कि ओह यरमियाह या अगमजानीमन ले एक झन अय।”
MAT 16:15 यीसू ह ओमन ले पुछिस, “पर तुमन मोला कोन ए, कहत हव?”
MAT 16:16 सिमोन पतरस ह जबाब दीस, “तेंह जीयत परमेसर के बेटा—मसीह अस।”
MAT 16:17 यीसू ह ओला कहिस, “सिमोन, योना के बेटा! धइन अस तेंह, काबरकि ये बात तोला कोनो मनखे ह नइं बताय हवय, पर मोर ददा जऊन ह स्वरग म हवय, ये बात तोर ऊपर उजागर करे हवय।
MAT 16:18 अऊ मेंह तोला कहत हंव कि तेंह पतरस अस, अऊ ये चट्टान ऊपर मेंह अपन कलीसिया बनाहूं, अऊ पाताल-लोक के कपाटमन एकर ऊपर जय नइं पा सकंय।
MAT 16:19 मेंह तोला स्वरग राज के कुचीमन ला दूहूं। जऊन कुछू तेंह धरती ऊपर बांधबे, ओह स्वरग म बंधाही, अऊ जऊन कुछू तेंह धरती ऊपर खोलबे, ओह स्वरग म खुलही।”
MAT 16:20 तब यीसू ह अपन चेलामन ला ये चेतउनी दीस, “तुमन कोनो ला, ये झन बतावव कि मेंह मसीह अंव।”
MAT 16:21 ओ समय ले यीसू ह अपन चेलामन ला ये बताय लगिस, “येह जरूरी अय कि मेंह यरूसलेम जावंव अऊ यहूदीमन के अगुवा, मुखिया पुरोहित अऊ कानून के गुरूमन के हांथ ले बहुंते दुख भोगंव; अऊ मार डारे जावंव; अऊ तीसरा दिन जी उठंव।”
MAT 16:22 पतरस ह यीसू ला अलग ले गीस अऊ ओला ये कहिके डांटे लगिस, “परमेसर ह अइसने झन करय, परभू! तोर संग ये बात कभू झन होवय।”
MAT 16:23 यीसू ह पतरस कोति मुड़के कहिस, “मोर नजर ले दूर हट, सैतान! तेंह मोर रसता म एक बाधा अस। तोर मन म परमेसर के बात नइं, पर मनखेमन के बात हवय।”
MAT 16:24 तब यीसू ह अपन चेलामन ला कहिस, “जऊन कोनो मोर चेला बने चाहत हे, त येह जरूरी ए कि ओह अपन ईछा ला मारय, अऊ दुख उठाय बर तियार रहय अऊ तब मोर पाछू हो लेवय।
MAT 16:25 काबरकि जऊन ह अपन परान ला बचाय चाहथे, ओह ओला गंवाही; पर जऊन ह मोर खातिर अपन परान ला गंवाथे, ओह ओला बचाही।
MAT 16:26 यदि मनखे ह जम्मो संसार ला पा जावय, पर अपन परान ला गंवा दे, त ओला का फायदा? या कोनो मनखे अपन परान के बदले का दे सकथे?
MAT 16:27 काबरकि मनखे के बेटा ह अपन स्वरगदूतमन के संग अपन ददा के महिमा म अवइया हवय, अऊ तब ओह हर एक मनखे ला ओकर काम के मुताबिक ईनाम दीही।
MAT 16:28 “मेंह तुमन ला सच कहत हंव कि कुछू झन, जऊन मन इहां ठाढ़े हवंय, तब तक नइं मरंय, जब तक कि ओमन मनखे के बेटा ला ओकर राज म आवत नइं देख लीहीं।”
MAT 17:1 छै दिन के बाद यीसू ह पतरस, याकूब अऊ याकूब के भाई यूहन्ना ला अपन संग लीस अऊ ओमन ला अकेला एक ऊंचहा पहाड़ म ले गीस।
MAT 17:2 उहां ओमन के आघू म यीसू के रूप ह बदल गीस। ओकर चेहरा ह सूरज सहीं चमकत रहय अऊ ओकर कपड़ा ह अंजोर सहीं पंर्रा हो गीस।
MAT 17:3 तब उहां चेलामन के आघू म मूसा अऊ एलियाह परगट होईन अऊ ओमन यीसू के संग गोठियावत रिहिन।
MAT 17:4 पतरस ह यीसू ला कहिस, “हे परभू, हमन के इहां रहई बने अय। यदि तोर ईछा हवय, त मेंह इहां तीन ठन मंडप बनावत हंव—एक ठन तोर बर, एक मूसा बर अऊ एक एलियाह बर।”
MAT 17:5 जब ओह गोठियावत रिहिस, त एक चमकीला बादर ह ओमन के ऊपर छा गीस, अऊ ओ बादर ले ये अवाज आईस, “येह मोर मयारू बेटा ए। एकर ले मेंह बहुंत खुस हवंव। एकर बात ला सुनव।”
MAT 17:6 येला सुनके चेलामन मुहूं के भार भुइयां म गिरिन अऊ ओमन बहुंत डरा गीन।
MAT 17:7 पर यीसू ह आईस अऊ ओमन ला छूके कहिस, “उठव, झन डरव।”
MAT 17:8 जब ओमन ऊपर देखिन, त ओमन ला यीसू के छोंड़ अऊ कोनो नइं दिखिस।
MAT 17:9 जब ओमन पहाड़ ले उतरत रिहिन, त यीसू ह ओमन ला हुकूम दीस, “जब तक मनखे के बेटा ह मरे म ले नइं जी उठय, तब तक तुमन जऊन कुछू देखे हवव, ओ बात कोनो ला झन बतावव।”
MAT 17:10 तब चेलामन ओकर ले पुछिन, “त फेर कानून के गुरूमन काबर कहिथें कि पहिली एलियाह के अवई जरूरी अय।”
MAT 17:11 यीसू ह जबाब दीस, “ये बात सही अय कि एलियाह ह आवत हवय अऊ ओह जम्मो चीज ला ठीक करही।
MAT 17:12 पर मेंह तुमन ला कहत हंव कि एलियाह ह आ चुके हवय अऊ मनखेमन ओला नइं चिन्हिन। पर ओमन जइसने चाहिन, वइसने ओकर संग बरताव करिन। इही किसम ले मनखे के बेटा घलो ओमन के हांथ ले दुख उठाही।”
MAT 17:13 तब चेलामन समझिन कि यीसू ह ओमन ले यूहन्ना बतिसमा देवइया के बारे म कहत रिहिस।
MAT 17:14 जब ओमन भीड़ करा आईन, त एक मनखे ह यीसू करा आईस अऊ ओकर आघू म माड़ी टेकके कहिस,
MAT 17:15 “हे परभू! मोर बेटा ऊपर दया कर। ओला मिरगी आथे अऊ ओकर कारन बहुंत दुख झेलथे। ओह अकसर आगी या पानी म गिर जाथे।
MAT 17:16 मेंह ओला तोर चेलामन करा लानेंव, पर ओमन ओला ठीक नइं कर सकिन।”
MAT 17:17 यीसू ह कहिस, “हे अबिसवासी अऊ ढीठ पीढ़ी के मनखेमन! कब तक मेंह तुम्हर संग रहिहूं? कब तक मेंह तुम्हर सहत रहिहूं? ओ छोकरा ला इहां मोर करा लानव।”
MAT 17:18 यीसू ह परेत आतमा ला दबकारिस अऊ ओह ओमा ले निकल गीस, अऊ ओ छोकरा ह ओहीच बखत ठीक हो गीस।
MAT 17:19 तब चेलामन यीसू करा अकेला म आईन अऊ पुछिन, “हमन ओला काबर नइं निकाल सकेंन?”
MAT 17:20 यीसू ह ओमन ला कहिस, “काबरकि तुम्हर बहुंत कम बिसवास हवय। मेंह तुमन ला सच कहत हंव कि यदि तुम्हर बिसवास ह सरसों के दाना के बरोबर घलो हवय, अऊ तुमन ये पहाड़ ले कहव, ‘इहां ले घुंचके उहां चले जा,’ त ओह घुंच जाही। तुम्हर बर कोनो घलो बात असंभव नइं होही।
MAT 17:21 पर ये किसम के परेत आतमा ह सिरिप पराथना अऊ उपास के दुवारा निकलथे।”
MAT 17:22 जब चेलामन गलील प्रदेस म जूरिन, त यीसू ह ओमन ला कहिस, “मनखे के बेटा ह मनखेमन के हांथ म पकड़वाय जाही।
MAT 17:23 ओमन ओला मार डारहीं, पर तीसरा दिन ओह जी उठही।” येला सुनके चेलामन बहुंत उदास होईन।
MAT 17:24 जब यीसू अऊ ओकर चेलामन कफरनहूम म आईन, त मंदिर के लगान लेवइयामन पतरस करा आईन अऊ पुछिन, “का तुम्हर गुरू ह मंदिर के लगान नइं पटावय?”
MAT 17:25 ओह कहिस, “हव, ओह पटाथे।” जब पतरस ह घर के भीतर आईस, त ओकर पुछे के पहिली यीसू ह कहिस, “हे सिमोन, तेंह का सोचथस? ये धरती के राजामन काकर ले लगान लेथें? अपन खुद के बेटामन ले या आने मन ले?”
MAT 17:26 पतरस ह कहिस, “आने मन ले।” यीसू ह ओला कहिस, “तब तो बेटामन ला लगान पटाय बर नइं पड़य।
MAT 17:27 पर हमन ओमन ला ठेस पहुंचाय नइं चाहथन, एकरसेति तेंह झील म जा अऊ अपन गरी ला खेल। जऊन मछरी पहिली फंसही, ओला पकड़बे अऊ ओकर मुहूं ला खोलबे, त तोला उहां एक ठन सिक्का मिलही। ओला लेके मोर अऊ तुम्हर तरफ ले ओमन ला लगान पटा देबे।”
MAT 18:1 ओ समय चेलामन यीसू करा आईन अऊ पुछिन, “स्वरग के राज म सबले बड़े कोन ए?”
MAT 18:2 यीसू ह एक छोटे लइका ला बलाईस अऊ ओला ओमन के बीच म ठाढ़ करके कहिस,
MAT 18:3 “मेंह तुमन ला सच कहत हंव कि जब तक तुमन नइं बदलव अऊ छोटे लइकामन सहीं नइं बनव, तब तक तुमन स्वरग के राज म जाय नइं सकव।
MAT 18:4 एकरसेति जऊन ह अपनआप ला ये लइका के सहीं नम्र करथे, ओह स्वरग के राज म सबले बड़े अय।
MAT 18:5 अऊ जऊन ह मोर नांव म अइसने छोटे लइका ला गरहन करथे, ओह मोला गरहन करथे।
MAT 18:6 “पर कोनो मनखे मोर ऊपर बिसवास करइया ये छोटे मन ले कोनो के पाप म गिरे के कारन बनथे, त ओकर बर बने होतिस कि ओकर घेंच म एक ठन बड़े जांता के पथरा ला बांधे जातिस अऊ ओला गहिरा समुंदर म बुड़ो दिये जातिस।
MAT 18:7 संसार ला ओ चीजमन बर धिक्कार अय, जऊन मन मनखेमन के पाप म पड़े के कारन बनथें। अइसने चीजमन के अवई जरूरी अय। पर धिक्कार अय ओ मनखे ला, जेकर दुवारा ओमन आथें।
MAT 18:8 यदि तुम्हर हांथ या तुम्हर गोड़ ह तुम्हर पाप म गिरे के कारन बनथे, त ओला काटके फटिक दव। तुम्हर बर येह बने अय कि तुमन लूलवा या खोरवा होके जिनगी म प्रवेस करव, एकर बनिस्पत कि दूनों हांथ या दूनों गोड़ के रहत, तुमन ला सदाकाल के आगी म डार दिये जावय।
MAT 18:9 अऊ यदि तुम्हर आंखी ह तुम्हर पाप म गिरे के कारन बनथे, त ओला निकालके फटिक दव। तुम्हर बर येह बने अय कि तुमन एक आंखी ले कनवां होके जिनगी म प्रवेस करव, एकर बनिस्पत कि दूनों आंखी के रहत तुमन ला नरक के आगी म डार दिये जावय।”
MAT 18:10 “देखव! तुमन ये छोटे मन ले कोनो ला घलो तुछ झन समझव। काबरकि मेंह तुमन ला कहत हंव कि येमन के दूतमन स्वरग म मोर ददा के आघू म हमेसा रहिथें।
MAT 18:11 काबरकि मनखे के बेटा ह गंवायमन ला बंचाय बर आईस।
MAT 18:12 “तुमन का सोचथव? यदि कोनो मनखे करा सौ ठन भेड़ हवंय, अऊ ओमा के एक ठन भेड़ ह भटक जाथे, त का ओह निनानबे भेड़मन ला पहाड़ी ऊपर छोंड़के ओ एक ठन भटके भेड़ ला खोजे बर नइं जावय?
MAT 18:13 अऊ यदि ओ भेड़ ह ओला मिल जावय, त मेंह तुमन ला सच कहत हंव, ओह ओ भेड़ खातिर जादा आनंद मनाही, एकर बनिस्पत कि ओ निनानबे भेड़ जऊन मन भटके नइं रिहिन।
MAT 18:14 अइसनेच स्वरग म तुम्हर ददा ह नइं चाहत हवय कि ये छोटे मन ले एको झन घलो नास होवंय।”
MAT 18:15 “यदि तोर भाई ह तोर बिरोध म पाप करथे, त जा अऊ ओकर गलती ला बता, अऊ ये बात ह सिरिप तुमन दूनों के बीच म होवय। यदि ओह तोर बात ला मान लेथे, त तेंह अपन भाई ला वापिस पा लेय।
MAT 18:16 यदि ओह तोर बात ला नइं मानय, त अपन संग म एक या दू झन मनखे ला ले, ताकि दू या तीन झन के गवाही ले हर एक बात के पुस्टि करे जावय।
MAT 18:17 यदि ओह ओमन के बात ला घलो नइं सुनय, त ये बात कलीसिया ला बता दे, अऊ यदि ओह कलीसिया के बात ला घलो नइं सुनय, त तेंह ओला एक आनजात या एक लगान लेवइया के सहीं समझ।
MAT 18:18 “मेंह तुमन ला सच कहत हंव कि जऊन कुछू तुमन धरती ऊपर बांधहू, ओह स्वरग म बंधाही, अऊ जऊन कुछू तुमन धरती ऊपर खोलहू, ओह स्वरग म खोले जाही।
MAT 18:19 “मेंह तुम्हर ले फेर सच-सच कहत हंव, यदि तुमन म ले दू झन मनखे एक मन होके धरती ऊपर कोनो बात बर पराथना करहू, त मोर ददा जऊन ह स्वरग म हवय, ओ काम ला तुम्हर बर कर दीही।
MAT 18:20 काबरकि जिहां दू या तीन मनखे मोर नांव म जूरथें, उहां मेंह ओमन के बीच म रहिथंव।”
MAT 18:21 तब पतरस ह यीसू करा आईस अऊ पुछिस, “हे परभू, यदि मोर भाई ह मोर बिरोध म पाप करथे, त मेंह कतेक बार ओला छेमा करंव? का सात बार?”
MAT 18:22 यीसू ह ओला कहिस, “मेंह तोला नइं कहत हंव कि सात बार, पर सात बार के सत्तर गुना तक।
MAT 18:23 “एकरसेति, स्वरग के राज ह ओ राजा के सहीं अय, जऊन ह अपन सेवकमन ले हिसाब लेय बर चाहिस।
MAT 18:24 जब ओह हिसाब लेवन लगिस, त ओकर आघू म एक झन मनखे ला लाने गीस, जऊन ह ओकर दस हजार सोन ले भरे झोलामन के करजा लागत रिहिस।
MAT 18:25 काबरकि ओह करजा चुकाय नइं सकत रिहिस, एकरसेति मालिक ह हुकूम दीस कि ओला अऊ ओकर घरवाली ला अऊ ओकर लइकामन ला अऊ जऊन कुछू ओकर करा हवय, ओ जम्मो ला बेच दिये जावय अऊ करजा के चुकता करे जावय।
MAT 18:26 “येला सुनके ओ सेवक ह मालिक के आघू म अपन माड़ी के भार गिरिस अऊ बिनती करिस, ‘हे परभू, मोर ऊपर धीरज धर। मेंह तोर जम्मो करजा ला चुकता कर दूहूं।’
MAT 18:27 तब ओ सेवक के मालिक ला ओकर ऊपर तरस आईस। ओह ओकर करजा ला माफ कर दीस अऊ ओला छोंड़ दीस।
MAT 18:28 “पर जब ओ सेवक ह बाहिर निकलिस, त ओला ओकर एक संगी सेवक मिलिस, जेकर ऊपर ओकर एक सौ चांदी के सिक्का के करजा रिहिस। ओह ओला पकड़िस अऊ ओकर टोंटा ला दबाके कहिस, ‘तोर ऊपर मोर जऊन करजा हवय, ओला चुकता कर।’
MAT 18:29 “ओकर संगी सेवक ह अपन माड़ी के भार गिरके ओकर ले बिनती करिस, ‘मोला कुछू समय दे। मेंह तोर करजा ला चुकता कर दूहूं।’
MAT 18:30 “पर ओह नइं मानिस अऊ जाके ओ मनखे ला तब तक जेल म डलवा दीस, जब तक कि ओह करजा के चुकता नइं कर दीस।
MAT 18:31 जब आने सेवकमन ये जम्मो ला देखिन, त ओमन अब्बड़ उदास होईन, अऊ अपन मालिक करा जाके, ओमन जम्मो बात ला बता दीन।
MAT 18:32 “तब ओकर मालिक ह ओ सेवक ला बलाईस अऊ कहिस, ‘हे दुस्ट सेवक! मेंह तोर जम्मो करजा ला माफ करेंव, काबरकि तेंह मोर ले बिनती करय।
MAT 18:33 जइसने मेंह तोर ऊपर दया करे रहेंव, वइसने का तोला अपन संगी सेवक ऊपर दया नइं करना चाही?’
MAT 18:34 गुस्सा होके ओकर मालिक ह ओला सजा देवइयामन के हांथ म सऊंप दीस कि ओह तब तक ओमन के हांथ म रहय, जब तक कि ओह जम्मो करजा ला नइं पटा देवय।
MAT 18:35 “यदि तुमन अपन भाई ला अपन हिरदय ले छेमा नइं करहूं, त स्वरग म रहइया मोर ददा ह घलो तुमन म के हर एक के संग अइसनेच करही।”
MAT 19:1 ये बातमन ला कहे के बाद, यीसू ह गलील प्रदेस ले चल दीस, अऊ यरदन नदी के ओ पार यहूदिया प्रदेस के इलाका म आईस।
MAT 19:2 मनखेमन के एक बड़े भीड़ ह ओकर पाछू हो लीस, अऊ यीसू ह उहां बिमरहामन ला चंगा करिस।
MAT 19:3 कुछू फरीसीमन यीसू ला परखे बर ओकर करा आईन अऊ ओमन यीसू ले पुछिन, “कहूं कोनो आदमी कोनो भी कारन ले अपन घरवाली ला तियाग देथे, त का येह कानून के मुताबिक सही अय?”
MAT 19:4 यीसू ह जबाब दीस, “का तुमन परमेसर के बचन म नइं पढ़े हवव कि संसार के रचइया ह ओमन ला सुरूआत ले नर अऊ नारी करके बनाईस,
MAT 19:5 अऊ कहिस, ‘एकरे कारन मरद ह अपन दाई-ददा ले अलग होके अपन घरवाली संग मिले रहिही। अऊ ओ दूनों एक तन होहीं।’
MAT 19:6 ओमन अब दू नइं, पर एक अंय। एकरसेति, जऊन ला परमेसर ह जोड़े हवय, ओला कोनो मनखे अलग झन करय।”
MAT 19:7 ओमन यीसू ला कहिन, “त फेर मूसा ह ये हुकूम काबर देय हवय कि मनखे ह अपन घरवाली ला तियाग पतर देके ओला छोंड़ दे।”
MAT 19:8 यीसू ह ओमन ला जबाब दीस, “तुम्हर हिरदय के कठोरता के कारन, मूसा ह तुमन ला अपन घरवाली ला तियागे के अनुमति दीस। पर सुरू ले अइसने नइं रिहिस।
MAT 19:9 मेंह तुमन ला कहत हंव कि जऊन मनखे ह बेभिचार के छोंड़ कोनो आने कारन ले अपन घरवाली ला छोंड़ देथे, अऊ आने माईलोगन ले बिहाव करथे, त ओह छिनारी करथे।”
MAT 19:10 चेलामन यीसू ला कहिन, “यदि मनखे के संबंध ह अपन घरवाली के संग अइसने अय, तब बिहाव नइं करई ठीक अय।”
MAT 19:11 यीसू ह ओमन ला कहिस, “जम्मो मनखे ये सिकछा ला माने नइं सकंय, पर सिरिप ओहीचमन मान सकथें, जऊन मन ला ये बरदान दिये गे हवय।
MAT 19:12 काबरकि कुछू हिजड़ामन हवंय, जऊन मन अपन दाई के पेट ले अइसने जनमे हवंय। कुछू झन ला मनखेमन हिजड़ा बना देय हवंय, पर कुछू मनखेमन स्वरग राज के खातिर बिहाव नइं करे हवंय। जऊन ह ये बात ला मान सकथे, ओला मानना चाही।”
MAT 19:13 तब मनखेमन लइकामन ला यीसू करा लानिन ताकि यीसू ह ओमन ऊपर अपन हांथ रखय अऊ ओमन बर पराथना करय। पर चेलामन मनखेमन ला डांटिन।
MAT 19:14 यीसू ह कहिस, “छोटे लइकामन ला मोर करा आवन दव, अऊ ओमन ला झन रोकव काबरकि स्वरग के राज ह अइसने मन बर अय।”
MAT 19:15 अऊ ओह लइकामन ऊपर अपन हांथ रखिस अऊ उहां ले चल दीस।
MAT 19:16 एक मनखे ह यीसू करा आईस अऊ पुछिस, “हे गुरू, मेंह का भलई के काम करंव कि मोला परमेसर के संग सदाकाल के जिनगी मिलय?”
MAT 19:17 यीसू ह ओला जबाब दीस, “तेंह मोर ले भलई के बारे म काबर पुछथस? सिरिप एके झन ह बने अय। यदि तेंह जिनगी म जाय चाहथस, त हुकूममन ला माने कर।”
MAT 19:18 ओ मनखे ह पुछिस, “कोन हुकूममन ला?” यीसू ह जबाब दीस, “हतिया झन करव, छिनारी झन करव, चोरी झन करव, लबारी गवाही झन देवव,
MAT 19:19 अपन दाई अऊ ददा के आदर करव, अऊ अपन परोसी ला अपन सहीं मया करव।”
MAT 19:20 ओ जवान ह यीसू ला कहिस, “ये जम्मो बात ला मेंह मानत आवत हंव। तभो ले मोर म अऊ कोन बात के कमी हवय?”
MAT 19:21 यीसू ह ओला कहिस, “यदि तेंह सिद्ध बने चाहत हस, त जा, अपन जायदाद ला बेचके गरीबमन ला देय दे, अऊ तोला स्वरग म धन मिलही। तब आ अऊ मोर पाछू हो ले।”
MAT 19:22 जब ये बात ला ओ जवान ह सुनिस, त ओह उदास होके उहां ले चल दीस, काबरकि ओकर मेर अब्बड़ संपत्ति रिहिस।
MAT 19:23 तब यीसू ह अपन चेलामन ला कहिस, “मेंह तुमन ला सच कहत हंव, धनवान मनखे के स्वरग राज म जवई कठिन अय।
MAT 19:24 मेंह तुमन ला फेर कहत हंव कि परमेसर के राज म धनवान मनखे के जाय के बनिस्पत सूजी के छेदा म ले ऊंट के निकल जवई सरल अय।”
MAT 19:25 ये बात ला सुनके चेलामन अब्बड़ चकित होईन अऊ पुछिन, “त फेर कोन ह उद्धार पा सकथे?”
MAT 19:26 यीसू ह ओमन कोति देखिस अऊ कहिस, “ये बात ह मनखे के दुवारा संभव नो हय, पर परमेसर के दुवारा जम्मो बात ह संभव अय।”
MAT 19:27 तब पतरस ह यीसू ला कहिस, “देख, हमन तो जम्मो कुछू ला छोंड़के तोर पाछू हो ले हवन। त हमन ला का मिलही?”
MAT 19:28 यीसू ह ओमन ला कहिस, “मेंह तुमन ला सच कहत हंव कि नवां संसार म, जब मनखे के बेटा ह महिमा के अपन सिंघासन म बईठही, त तुमन जऊन मन मोर पाछू चलत हव, बारह सिंघासन म बईठहू अऊ इसरायल के बारह गोत्र के नियाय करहू।
MAT 19:29 अऊ जऊन कोनो मोर खातिर अपन घर-दुवार या भाई या बहिनी या ददा या दाई या लइका या खेत-खार ला छोंड़ देय हवय, ओह सौ गुना पाही अऊ ओह सदाकाल के जिनगी के अधिकारी होही।
MAT 19:30 पर कतको झन जऊन मन अभी आघू म हवंय, ओमन आखिरी म हो जाहीं अऊ जऊन मन आखिरी म हवंय, ओमन आघू हो जाहीं।
MAT 20:1 “स्वरग के राज ह ओ घर के मालिक सहीं अय, जऊन ह बड़े बिहनियां घर ले निकलिस ताकि अपन अंगूर के बारी म बनिहारमन ला काम म लगावय।
MAT 20:2 ओह बनिहारमन ला रोजी एक दीनार देय बर तय करिस अऊ ओमन ला अपन अंगूर के बारी म पठोईस।
MAT 20:3 “करीब नौ बजे ओह बाहिर निकलिस अऊ कुछू अऊ बनिहारमन ला बजार के ठऊर म ठलहा खड़े देखिस,
MAT 20:4 त ओह ओमन ला कहिस, ‘तुमन घलो जावव अऊ मोर अंगूर के बारी म काम करव अऊ जऊन कुछू सही मजदूरी होही, मेंह तुमन ला दूहूं।’
MAT 20:5 तब ओमन घलो गीन। “करीब बारह बजे अऊ तीन बजे दूसरइया घलो ओह फेर बाहिर निकलिस अऊ अइसनेच करिस।
MAT 20:6 ओह संझा करीब पांच बजे फेर बाहिर निकलिस अऊ उहां कुछू अऊ बनिहारमन ला ठाढ़े देखिस, त ओह ओमन ला कहिस, ‘तुमन काबर इहां दिन भर ले ठलहा ठाढ़े हवव?’
MAT 20:7 “ओमन जबाब दीन, ‘काबरकि कोनो हमन ला मजदूरी करे बर नइं ले गीस।’ “ओह ओमन ला कहिस, ‘तुमन घलो जावव अऊ मोर अंगूर के बारी म काम करव।’
MAT 20:8 “जब सांझ होईस, त अंगूर के बारी के मालिक ह अपन संपत्ति के देखरेख करइया ला कहिस, ‘बनिहारमन ला बला अऊ आखिरी म अवइया बनिहारमन ले सुरू करके पहिली अवइया बनिहारमन तक जम्मो ला ओमन के बनी देय दे।’
MAT 20:9 “जऊन बनिहारमन संझा करीब पांच बजे काम म लगाय गे रिहिन, ओमन आईन अऊ ओमा के हर एक ला एक-एक दीनार मिलिस।
MAT 20:10 जऊन बनिहारमन पहिली काम म लगाय गे रिहिन, जब ओमन आईन, त सोचिन कि ओमन ला जादा मिलही। पर ओमन ला घलो एक-एक दीनार मिलिस।
MAT 20:11 जब ओमन ला बनी मिलिस, त ओमन मालिक ऊपर कुड़कुड़ाय लगिन
MAT 20:12 अऊ कहिन, ‘ये मनखेमन ला आखिरी म काम म लगाय गे रिहिस अऊ येमन सिरिप एक घंटा काम करे हवंय, तभो ले तेंह येमन ला हमर बरोबर बनी दे हवस। जबकि हमन दिन भर काम के भार उठायेंन अऊ घाम सहे हवन।’
MAT 20:13 “पर ओह ओमन के एक झन ला जबाब दीस, ‘संगी, मेंह तोर संग अनियाय नइं करत हवंव। का तेंह एक दीनार म काम करे बर राजी नइं होय रहय?
MAT 20:14 अपन बनी ला ले अऊ जा। ये मोर ईछा अय कि आखिरी के मनखे ला घलो ओतकीच देवंव जतकी कि तोला दे हवंव।
MAT 20:15 का मोला ये अधिकार नइं अय कि अपन पईसा ला मेंह जइसने चाहंव वइसने करंव? या फेर मोर उदार हिरदय के कारन तोला जलन होवत हवय?’
MAT 20:16 “ए किसम ले जऊन मन आखिरी म हवंय, ओमन पहिली हो जाहीं अऊ जऊन मन पहिली हवंय, ओमन आखिरी म हो जाहीं।”
MAT 20:17 यरूसलेम सहर ला जावत बेरा यीसू ह अपन बारह चेलामन ला अलग ले गीस अऊ ओमन ला कहिस,
MAT 20:18 “देखव, हमन यरूसलेम जावत हन अऊ उहां मनखे के बेटा ला पकड़के मुखिया पुरोहितमन अऊ कानून के गुरूमन के हांथ म सऊंपे जाही, अऊ ओमन ओला मार डारे के सजा दीहीं,
MAT 20:19 अऊ ओला आनजातमन के हांथ म सऊंप दीहीं, जऊन मन ओकर हंसी उड़ाहीं, ओला कोर्रा म मारहीं अऊ कुरूस ऊपर चघाहीं। पर तीसरा दिन ओह जी उठही।”
MAT 20:20 तब जबदी के बेटामन के दाई ह अपन बेटामन के संग यीसू करा आईस अऊ ओकर आघू म माड़ी टेकके कुछू मांगे लगिस।
MAT 20:21 यीसू ह ओकर ले पुछिस, “तेंह का चाहथस?” ओह कहिस, “तेंह हुकूम दे कि तोर राज म मोर ये दूनों बेटामन म ले एक झन तोर जेवनी कोति अऊ दूसर ह तोर डेरी कोति बईठे।”
MAT 20:22 यीसू ह ओमन ला कहिस, “तुमन नइं जानत हव कि तुमन का मांगत हव। जऊन कटोरा म ले मेंह पीवइया हवंव, का तुमन ओला पी सकथव?” ओमन कहिन, “हमन पी सकथन।”
MAT 20:23 यीसू ह ओमन ला कहिस, “तुमन मोर कटोरा ले पी सकथव, पर कोनो ला मोर जेवनी या डेरी कोति बईठाय के मोला अधिकार नइं ए। ये जगह ओमन के अय, जेमन बर मोर ददा ह येला तियार करे हवय।”
MAT 20:24 जब आने दस चेलामन ये बात ला सुनिन, त ओमन ओ दूनों भाई ऊपर गुस्सा करिन।
MAT 20:25 यीसू ह ओमन ला एक संग अपन करा बलाईस अऊ कहिस, “तुमन जानथव कि आनजातमन के सासकमन ओमन ऊपर परभूता रखथंय अऊ ओमन के बड़े अधिकारीमन ओमन ऊपर अधिकार जताथंय।
MAT 20:26 तुमन के संग अइसने नइं होवय। पर जऊन ह तुमन म बड़े होय चाहथे, ओह तुम्हर सेवक बनय,
MAT 20:27 अऊ जऊन ह तुमन म पहिली होय चाहथे, ओह तुम्हर गुलाम बनय।
MAT 20:28 जइसे कि मनखे के बेटा ह अपन सेवा करवाय बर नइं आईस, पर एकर खातिर आईस कि ओह आने मन के सेवा करय अऊ बहुंत झन के छुड़ौती बर अपन परान ला देवय।”
MAT 20:29 जब यीसू अऊ ओकर चेलामन यरीहो सहर ले निकलत रिहिन, त एक बड़े भीड़ यीसू के पाछू हो लीस।
MAT 20:30 सड़क के तीर म दू झन अंधरा मनखे बईठे रिहिन, अऊ जब ओमन सुनिन कि यीसू ह ओ सड़क म जावत हवय, त ओमन चिचियाके कहिन, “हे परभू, दाऊद के संतान, हमर ऊपर दया कर।”
MAT 20:31 भीड़ के मनखेमन ओमन ला दबकारिन अऊ ओमन ला चुपेचाप रहे बर कहिन, पर ओमन अऊ चिचियाके कहिन, “हे परभू, दाऊद के संतान, हमर ऊपर दया कर।”
MAT 20:32 तब यीसू ह रूक गीस अऊ ओह ओमन ला बलाके पुछिस, “तुमन का चाहथव कि मेंह तुम्हर बर करंव?”
MAT 20:33 ओमन कहिन, “हे परभू, हमन चाहथन कि हमर आंखीमन देखे लगंय।”
MAT 20:34 ओमन ऊपर तरस खाके यीसू ह ओमन के आंखीमन ला छुईस। तुरते ओमन देखन लगिन अऊ ओमन यीसू के पाछू हो लीन।
MAT 21:1 जब ओमन यरूसलेम के लकठा म हबरिन अऊ जैतून पहाड़ के बैतफगे गांव करा आईन, त यीसू ह दू झन चेलामन ला ये कहिके पठोईस,
MAT 21:2 “आघू के गांव म जावव। जइसने ही तुमन उहां हबरहू, तुमन ला एक ठन गदही बंधाय मिलही अऊ ओकर संग म ओकर बछेड़ा घलो होही। ओमन ला ढीलके मोर करा ले आवव।
MAT 21:3 यदि कोनो तुमन ला कुछू कहिथे, त ओला कहव कि परभू ला येमन के जरूरत हवय। तब ओह तुरते ओमन ला पठो दीही।”
MAT 21:4 येह एकरसेति होईस ताकि अगमजानी के दुवारा कहे गय ये बात ह पूरा होवय:
MAT 21:5 “बेटी सियोन ले कहव, ‘देख, तोर राजा ह तोर करा आवत हवय। ओह नम्र अय अऊ एक गदही ऊपर, अऊ एक बछेड़ा ऊपर, गदही के एक बछेड़ा ऊपर सवारी करे हवय।’ ”
MAT 21:6 तब दूनों चेलामन गीन, अऊ जइसने यीसू ह ओमन ला करे बर कहे रिहिस, वइसनेच करिन।
MAT 21:7 ओमन गदही अऊ ओकर बछेड़ा ला लानिन अऊ ओमन के ऊपर अपन ओनहामन ला दसा दीन; तब यीसू ह ओमन ऊपर बईठ गीस।
MAT 21:8 भीड़ के बहुंत मनखेमन अपन ओनहा ला डहार म दसा दीन अऊ दूसर मनखेमन रूख के डारामन ला काटके डहार म दसा दीन।
MAT 21:9 भीड़ के मनखेमन यीसू के आघू-आघू अऊ पाछू-पाछू घलो चलत रहंय अऊ ओमन चिचिया-चिचियाके कहत रहंय, “दाऊद के संतान के होसाना!” “धइन ए ओ, जऊन ह परभू के नांव म आथे!” “सबले ऊंच स्वरग म होसाना!”
MAT 21:10 जब यीसू ह यरूसलेम म आईस, त जम्मो सहर म हलचल मच गीस अऊ मनखेमन पुछन लगिन, “येह कोन ए?”
MAT 21:11 भीड़ के मनखेमन कहिन, “येह अगमजानी यीसू ए, अऊ गलील प्रदेस के नासरत के रहइया ए।”
MAT 21:12 यीसू ह मंदिर म गीस, अऊ ओ जम्मो मनखेमन ला निकाल दीस, जऊन मन मंदिर म लेन-देन करत रिहिन। ओह रूपिया-पईसा के अदला-बदली करइयामन के मेज अऊ पंड़की बेचइयामन के बेंचमन ला खपल दीस।
MAT 21:13 अऊ ओह ओमन ला कहिस, “परमेसर के बचन म ये लिखे हवय कि मोर घर ह पराथना के घर कहे जाही, पर तुमन येला डाकूमन के अड्डा बनावत हवव।”
MAT 21:14 अंधरा अऊ खोरवामन यीसू करा मंदिर म आईन अऊ ओह ओमन ला चंगा करिस।
MAT 21:15 पर जब मुखिया पुरोहित अऊ मूसा के कानून के गुरूमन ओकर अद्भूत काम ला देखिन अऊ लइकामन ला मंदिर के इलाका म चिचियाके ये कहत सुनिन, “दाऊद के संतान के होसाना,” त ओमन नराज होईन।
MAT 21:16 ओमन यीसू ला कहिन, “का तेंह सुनत हवस कि ये लइकामन का कहत हवंय?” यीसू ह कहिस, “हव, का तुमन परमेसर के बचन म ये कभू नइं पढ़ेव, “ ‘लइका अऊ छोटे लइकामन के मुहूं ले हे परभू, तें अपन इस्तुति करवाय।’”
MAT 21:17 तब यीसू ह ओमन ला छोंड़के सहर के बाहिर बैतनियाह गांव म गीस अऊ उहां रात बिताईस।
MAT 21:18 बड़े बिहनियां, जब यीसू ह सहर ला वापिस जावत रिहिस, त ओला भूख लगिस।
MAT 21:19 सड़क के तीर म एक ठन अंजीर के रूख ला देखके, ओह उहां गीस, पर ओला पान के छोंड़ ओमा अऊ कुछू नइं मिलिस। तब यीसू ह ओ रूख ला कहिस, “अब ले तोर म फेर कभू फर झन लगय।” अऊ तुरते ओ अंजीर के रूख ह सूख गीस।
MAT 21:20 जब चेलामन येला देखिन, त ओमन अचम्भो करिन अऊ कहिन, “अंजीर के रूख ह तुरते कइसने सूख गीस?”
MAT 21:21 यीसू ह ओमन ला जबाब दीस, “मेंह तुमन ला सच कहत हंव, यदि तुमन बिसवास करव अऊ संका झन करव, त तुमन न सिरिप अइसने करहू, जइसने मेंह ये अंजीर के रूख के संग करे हवंव, पर यदि तुमन ये पहाड़ ले कहिहू, ‘जा अऊ समुंदर म गिर जा।’ अऊ येह हो जाही।
MAT 21:22 यदि तुमन बिसवास करथव, त जऊन कुछू तुमन पराथना म मांगव, ओह तुमन ला मिल जाही।”
MAT 21:23 यीसू ह मंदिर म गीस, अऊ जब ओह उपदेस देवत रिहिस, त मुखिया पुरोहितमन अऊ मनखेमन के अगुवामन ओकर करा आईन अऊ पुछिन, “तेंह कोन अधिकार ले ये चीजमन ला करत हवस? अऊ कोन ह तोला ये अधिकार दे हवय?”
MAT 21:24 यीसू ह ओमन ला जबाब दीस, “मेंह घलो तुमन ले एक सवाल पुछत हंव, यदि तुमन मोला जबाब दूहू, त मेंह घलो तुमन ला बताहूं कि कोन अधिकार ले मेंह ये काममन ला करत हवंव।
MAT 21:25 यूहन्ना के बतिसमा देवई ह कहां ले रिहिस? स्वरग ले रिहिस या मनखे कोति ले?” ओमन आपस म सोच-बिचार करिन अऊ कहिन, “यदि हमन कहन, ‘स्वरग ले’ त ओह कहिही, ‘तब तुमन ओकर ऊपर बिसवास काबर नइं करेव?’
MAT 21:26 पर यदि हमन कहन, ‘मनखे कोति ले,’ त हमन ला मनखेमन के डर हवय, काबरकि ओ जम्मो झन बिसवास करथें कि यूहन्ना ह एक अगमजानी रिहिस।”
MAT 21:27 एकरसेति ओमन यीसू ला जबाब दीन, “हमन नइं जानन।” तब यीसू ह ओमन ला कहिस, “त मेंह घलो नइं बतावंव कि कोन अधिकार ले मेंह ये काममन ला करत हवंव।
MAT 21:28 “तुमन का सोचथव? एक मनखे रिहिस, जेकर दू झन बेटा रिहिन। ओह पहिला बेटा करा गीस अऊ कहिस, ‘बेटा, जा अऊ आज अंगूर के बारी म काम कर।’
MAT 21:29 “ओह जबाब दीस, ‘मेंह नइं जावंव।’ पर बाद म ओह पछताईस अऊ गीस।
MAT 21:30 “तब ददा ह दूसर बेटा करा गीस अऊ ओहीच बात कहिस। ओह जबाब दीस, ‘हव ददा, मेंह जावत हंव।’ पर ओह नइं गीस।
MAT 21:31 “ये दूनों बेटा म ले कोन ह अपन ददा के ईछा ला पूरा करिस?” ओमन कहिन, “पहिला ह।” यीसू ह ओमन ला कहिस, “मेंह तुमन ला सच कहत हंव कि लगान लेवइया अऊ बेस्यामन तुम्हर ले आघू परमेसर के राज म जावत हवंय।
MAT 21:32 काबरकि यूहन्ना ह तुमन ला धरमीपन के रसता देखाय बर आईस, अऊ तुमन ओकर ऊपर बिसवास नइं करेव, पर लगान लेवइया अऊ बेस्यामन ओकर ऊपर बिसवास करिन। येला देखे के बाद घलो, तुमन पछताप नइं करेव अऊ न ही ओकर ऊपर बिसवास करेव।
MAT 21:33 “एक अऊ पटंतर सुनव: एक जमींदार रिहिस, जऊन ह एक अंगूर के बारी लगाईस। ओह बारी के चारों खूंट बाड़ा बांधिस। ओह ओमा एक ठन रस के कुन्ड खनवाईस अऊ एक ठन मचान बनाईस। तब ओह ओ अंगूर के बारी ला कुछू किसानमन ला रेगहा म देके आने देस चल दीस।
MAT 21:34 जब फर के समय ह आईस, त ओह अपन सेवकमन ला किसानमन करा पठोईस ताकि ओमन ओकर बांटा के फर ला लानंय।
MAT 21:35 “पर किसानमन ओकर सेवकमन ला पकड़ लीन, अऊ ओमन कोनो ला मारिन-पीटिन, कोनो ला जान सहित मार डारिन अऊ काकरो ऊपर पथरा फेंकिन।
MAT 21:36 तब जमींदार ह आने सेवकमन ला पठोईस, जऊन मन संखिया म पहिली ले जादा रिहिन; पर किसानमन ओमन के संग घलो वइसनेच करिन।
MAT 21:37 आखिरी म, ओह ये सोचके अपन बेटा ला पठोईस कि ओमन मोर बेटा के आदर करहीं।
MAT 21:38 “पर जब किसानमन जमींदार के बेटा ला देखिन, त एक-दूसर ला कहिन, ‘येह तो अंगूर के बारी के वारिस ए। आवव, हमन येला मार डालन अऊ एकर संपत्ति ला ले लेवन।’
MAT 21:39 ओमन ओला पकड़िन अऊ अंगूर के बारी के बाहिर फटिक दीन अऊ ओला मार डारिन।
MAT 21:40 “एकरसेति जब अंगूर के बारी के मालिक ह आही, त ओह ओ किसानमन के संग का करही?”
MAT 21:41 ओमन यीसू ला कहिन, “ओह ओ दुस्टमन ला पूरा नास कर दीही, अऊ अंगूर के बारी के रेगहा आने किसानमन ला दे दीही, जऊन मन समय म ओकर बांटा के फसल ओला दीहीं।”
MAT 21:42 यीसू ह ओमन ला कहिस, “का तुमन पबितर बचन म कभू नइं पढ़ेव: “ ‘जऊन पथरा ला घर के बनइयामन बेकार समझे रिहिन, ओहीच ह कोना के मुख पथरा हो गीस। येह परभू के दुवारा होईस, अऊ येह हमर नजर म अद्भूत ए।’
MAT 21:43 “एकरसेति मेंह तुमन ला कहत हंव कि परमेसर के राज ह तुम्हर ले लेय लिये जाही, अऊ ओ मनखेमन ला दिये जाही, जऊन मन परमेसर बर फर पईदा करहीं।
MAT 21:44 जऊन ह ये पथरा ऊपर गिरही, ओह कुटा-कुटा हो जाही, पर जेकर ऊपर ये पथरा ह गिरही, ओह पीसा जाही।”
MAT 21:45 यीसू के पटंतर ला सुनके मुखिया पुरोहित अऊ फरीसीमन समझ गीन कि ओह ओमन के बारे म गोठियावत हवय।
MAT 21:46 ओमन ओला पकड़े के उपाय सोचत रिहिन, पर ओमन मनखेमन के भीड़ ले डरावत रिहिन, काबरकि मनखेमन यीसू ला एक अगमजानी मानत रिहिन।
MAT 22:1 यीसू ह फेर ओमन ले पटंतर म गोठियाय लगिस। ओह कहिस,
MAT 22:2 “स्वरग के राज ह एक राजा के सहीं अय, जऊन ह अपन बेटा के बिहाव म एक जेवनार करिस।
MAT 22:3 ओह अपन सेवकमन ला पठोईस कि ओमन नेवताहारीमन ला भोज बर बलाके लानंय, पर नेवताहारीमन आय बर नइं चाहिन।
MAT 22:4 “तब फेर ओह कुछू अऊ सेवकमन ला ये कहिके पठोईस, ‘नेवताहारीमन ला कहव कि मेंह भोज तियार कर चुके हवंव। मोर बईला अऊ मोटहा-मोटहा पसुमन मारे गे हवंय, अऊ जम्मो चीज ह तियार हवय। बिहाव के भोज म आवव।’
MAT 22:5 “पर नेवताहारीमन राजा के नेवता ला धियान नइं दीन अऊ एती-ओती चल दीन—कोनो अपन खेत ला, त कोनो अपन धंधा म।
MAT 22:6 बाकि बचे नेवताहारीमन राजा के सेवकमन ला पकड़िन अऊ ओमन के संग गलत बरताव करिन अऊ ओमन ला मार डारिन।
MAT 22:7 राजा ह बहुंत गुस्सा करिस। ओह अपन सेना ला पठोईस अऊ ओ हतियारामन ला नास कर दीस अऊ ओमन के सहर ला जरा दीस।
MAT 22:8 “तब राजा ह अपन सेवकमन ला कहिस, ‘बिहाव भोज तो तियार हवय, पर नेवताहारीमन एकर लईक नो हंय।
MAT 22:9 एकरसेति गली के चऊक म जावव अऊ तुमन ला जऊन मन घलो मिलथें, ओ जम्मो ला बिहाव भोज के नेवता देवव।’
MAT 22:10 ओ सेवकमन गलीमन म गीन अऊ ओमन ला बने या खराप जऊन ह घलो मिलिस, ओ जम्मो ला संकेलके ले आईन अऊ बिहाव के मड़वा ह पहुनामन ले भर गीस।
MAT 22:11 “पर जब राजा ह पहुनामन ला देखे बर भीतर आईस, त ओह उहां एक मनखे ला देखिस, जऊन ह बिहाव के पोसाक नइं पहिरे रहय।
MAT 22:12 राजा ह ओकर ले पुछिस, ‘संगी, बिहाव के पोसाक पहिरे बिगर तेंह इहां कइसने आ गे।’ ओ मनखे ह कुछू कहे नइं सकिस।
MAT 22:13 “तब राजा ह सेवकमन ला कहिस, ‘एकर हांथ-गोड़ ला बांधव अऊ येला बाहिर अंधियार म फटिक दव, जिहां येह रोही अऊ अपन दांत पीसही।’
MAT 22:14 “काबरकि बलाय गय मनखे तो बहुंत हवंय, पर चुने गय मनखेमन थोरकन हवंय।”
MAT 22:15 तब फरीसीमन बाहिर जाके योजना बनाईन कि ओमन कइसने यीसू ला ओकरेच गोठ म फंसावंय।
MAT 22:16 ओमन अपन चेलामन ला हेरोदीमन के संग यीसू करा ये पुछे बर पठोईन, “हे गुरू, हमन जानत हवन कि तेंह सच्चा अस अऊ तेंह सच्चई के संग परमेसर के रसता के सिकछा देथस। तेंह मनखेमन के बहकावा म नइं आवस, काबरकि तेंह मनखे के मुहूं देखके नइं गोठियावस।
MAT 22:17 त हमन ला बता, तोर का बिचार हवय? रोमी महाराजा ला लगान देवई कानून के मुताबिक ठीक अय कि नइं?”
MAT 22:18 ओमन के दुस्टता ला जानके यीसू ह कहिस, “हे ढोंगी मनखेमन हो! तुमन काबर मोला फंसाय के कोसिस करत हव?
MAT 22:19 मोला ओ सिक्का ला देखावव, जेकर उपयोग तुमन लगान पटाय बर करथव।” ओमन ओकर करा एक सिक्का लानिन।
MAT 22:20 यीसू ह ओमन ले पुछिस, “येमा काकर मूरती अऊ काकर नांव लिखाय हवय?”
MAT 22:21 ओमन कहिन, “महाराजा के।” तब यीसू ह ओमन ला कहिस, “जऊन ह महाराजा के अय, ओला महाराजा ला देवव अऊ जऊन ह परमेसर के अय, ओला परमेसर ला देवव।”
MAT 22:22 येला सुनके, ओमन चकित हो गीन अऊ यीसू ला छोंड़के चल दीन।
MAT 22:23 ओहीच दिन सदूकीमन यीसू करा आईन, जऊन मन ये कहिथंय कि मरे मनखेमन के जी उठई नइं होवय। ओमन यीसू ले पुछिन,
MAT 22:24 “हे गुरू, मूसा ह कहे हवय कि यदि कोनो मनखे ह बिगर संतान के मर जावय, त ओकर भाई ह ओ बिधवा ले बिहाव करय अऊ अपन भाई बर संतान पईदा करय।
MAT 22:25 हमर बीच म सात झन भाई रिहिन। पहिला भाई ह बिहाव करिस, पर ओह बिगर संतान के मर गीस अऊ अपन घरवाली ला अपन भाई बर छोंड़ गीस।
MAT 22:26 दूसरा अऊ तीसरा भाई ले लेके जम्मो सातों भाई के संग अइसनेच होईस। सातों के सातों भाई मर गीन।
MAT 22:27 आखिरी म, ओ माईलोगन घलो मर गीस।
MAT 22:28 तब मरे मनखेमन के जी उठे के बाद, ओह ओ सातों भाई म के काकर घरवाली होही? काबरकि ओ सातों झन ओकर ले बिहाव करे रिहिन।”
MAT 22:29 यीसू ह ओमन ला जबाब दीस, “तुमन गलत समझत हव, काबरकि तुमन परमेसर के बचन या परमेसर के सामर्थ ला नइं जानत हव।
MAT 22:30 मरे मनखेमन के जी उठे के बाद, मनखेमन न तो बिहाव करहीं अऊ न ही ओमन ला बिहाव म दिये जाही; ओमन स्वरग म स्वरगदूतमन सहीं होहीं।
MAT 22:31 मरे मनखेमन के जी उठे के बारे म परमेसर ह तुमन ला का कहे हवय—का तुमन नइं पढ़े हवव,
MAT 22:32 ‘मेंह अब्राहम के परमेसर, इसहाक के परमेसर अऊ याकूब के परमेसर अंव’? ओह मरे मन के नइं, पर जीयतमन के परमेसर अय।”
MAT 22:33 येला सुनके, भीड़ के मनखेमन यीसू के उपदेस ले चकित होईन।
MAT 22:34 जब फरीसीमन सुनिन कि यीसू ह सदूकीमन के मुहूं बंद कर दे हवय, त ओमन जूरिन।
MAT 22:35 ओमा ले एक झन, जऊन ह कानून के एक जानकार रिहिस, यीसू ला परखे बर ये सवाल करिस,
MAT 22:36 “हे गुरू, मूसा के कानून के मुताबिक सबले बड़े हुकूम कते ह अय?”
MAT 22:37 यीसू ह ओला जबाब दीस: “ ‘परभू अपन परमेसर ले अपन पूरा हिरदय अऊ अपन पूरा परान अऊ अपन पूरा मन ले मया करव।’
MAT 22:38 येह पहिली अऊ सबले बड़े हुकूम अय।
MAT 22:39 अऊ दूसरा हुकूम ये किसम ले अय: ‘तेंह अपन परोसी ले अपन सहीं मया कर।’
MAT 22:40 ये दूनों हुकूम जम्मो कानून अऊ अगमजानीमन के सिकछा के सार अंय।”
MAT 22:41 जब फरीसीमन उहां जूरे रिहिन, त यीसू ह ओमन ले पुछिस,
MAT 22:42 “मसीह के बारे म, तुमन का सोचथव? ओह काकर बेटा अय?” “ओमन कहिन,” “दाऊद के बेटा!”
MAT 22:43 यीसू ह ओमन ला कहिस, “त फेर दाऊद ह पबितर आतमा म होके ओला ‘परभू’ काबर कहिथे? दाऊद ह कहिथे,
MAT 22:44 “ ‘परभू ह मोर परभू ले कहिस: “मोर जेवनी हांथ कोति बईठ, जब तक कि मेंह तोर बईरीमन ला तोर गोड़ खाल्हे नइं कर देवंव।” ’
MAT 22:45 जब दाऊद ह ओला परभू कहिथे, त फेर ओह दाऊद के बेटा कइसने हो सकथे?”
MAT 22:46 कोनो ओला कुछू जबाब नइं दे सकिन, अऊ ओ दिन ले, कोनो ओकर ले अऊ कुछू सवाल पुछे के हिम्मत नइं करिन।
MAT 23:1 तब यीसू ह भीड़ के मनखे अऊ अपन चेलामन ला कहिस:
MAT 23:2 “मूसा के कानून के गुरू अऊ फरीसीमन मूसा के कानून ला सिखाथें।
MAT 23:3 एकरसेति, ओमन जऊन कुछू कहिथें ओला मानव अऊ करव। पर ओमन सहीं काम झन करव, काबरकि ओमन जइसने कहिथें वइसने नइं करंय।
MAT 23:4 ओमन कानून के भारी बोझा ला बांधथे, अऊ ओला मनखेमन के खांधा ऊपर लदक देथें, पर ओमन खुदे ओला टारे बर अपन अंगरी घलो उठाय नइं चाहंय।
MAT 23:5 “ओमन अपन जम्मो काम मनखेमन ला देखाय बर करथें। ओमन देखाय बर चाकर-चाकर ताबीज बनाके अपन बाहां अऊ माथा म पहिरथें अऊ अपन कपड़ा म लम्बा झालर लगवाथें।
MAT 23:6 जेवनारमन म आदर के ठऊर अऊ यहूदीमन के सभा-घर म सबले बने आसन म बईठई ओमन ला बने लगथे।
MAT 23:7 बजार के जगह म आदर के संग जोहार झोंकई अऊ मनखेमन के दुवारा गुरूजी कहई ओमन ला बने लगथे।
MAT 23:8 “पर तुमन अपन ला गुरू झन कहावव, काबरकि तुम्हर सिरिप एक गुरू हवय, अऊ तुमन जम्मो झन भाई-भाई अव।
MAT 23:9 धरती म कोनो ला अपन ददा झन कहव, काबरकि तुम्हर एके ददा हवय, जऊन ह स्वरग म हवय।
MAT 23:10 तुमन अपन ला मालिक घलो झन कहावव, काबरकि तुम्हर एके मालिक हवय याने कि मसीह।
MAT 23:11 जऊन ह तुमन जम्मो म बड़े अय, ओह तुम्हर सेवक बनय।
MAT 23:12 काबरकि जऊन ह अपनआप ला बड़े समझथे, ओला दीन-हीन करे जाही, अऊ जऊन ह अपनआप ला दीन-हीन करथे, ओला बड़े करे जाही।
MAT 23:13 “हे ढोंगी, कानून के गुरू अऊ फरीसीमन, तुम्हर ऊपर धिक्कार! तुमन मनखेमन बर स्वरग राज के दुवारी ला बंद कर देथव। न तो तुमन खुदे ओमा जावव अऊ न ही ओमन ला जावन देवव, जऊन मन ओमा जाय के कोसिस करथें।
MAT 23:14 “हे ढोंगी, कानून के गुरू अऊ फरीसीमन, तुम्हर ऊपर हाय! तुमन बिधवामन के घर ला लूटथव अऊ देखाय बर लम्बा-लम्बा पराथना करथव। एकरसेति, तुमन ला जादा कठोर सजा मिलही।
MAT 23:15 “हे ढोंगी, कानून के गुरू अऊ फरीसीमन, तुम्हर ऊपर धिक्कार! तुमन एक झन ला अपन यहूदी बिसवास म लाने बर समुंदर अऊ धरती ऊपर फिरथव, अऊ जब ओह तुम्हर बिसवास म आ जाथे, त तुमन ओला अपन ले दू गुना नरक के लइका सहीं बना देथव।
MAT 23:16 “हे अंधरा अगुवामन, तुम्हर ऊपर धिक्कार! तुमन कहिथव, ‘यदि कोनो मंदिर के कसम खाथे, त ओकर कुछू मतलब नइं होवय, पर यदि कोनो मंदिर के सोन के कसम खाथे, त ओह अपन कसम म बंध जाथे।’
MAT 23:17 हे अंधरा मुरूख मनखेमन! कते ह बड़े अय—सोन या फेर मंदिर जऊन ह ओ सोन ला पबितर बनाथे?
MAT 23:18 तुमन ये घलो कहिथव, ‘यदि कोनो बेदी के कसम खाथे, त ओकर कुछू मतलब नइं होवय, पर यदि कोनो बेदी म चघाय भेंट के कसम खाथे, त ओह अपन कसम म बंध जाथे।’
MAT 23:19 हे अंधरा मनखेमन! कते ह बड़े अय—भेंट, या फेर बेदी जऊन ह ओ भेंट ला पबितर बनाथे?
MAT 23:20 एकरसेति जऊन ह बेदी के कसम खाथे, ओह ओकर अऊ ओकर ऊपर रखे जम्मो चीज के कसम खाथे।
MAT 23:21 अऊ जऊन ह मंदिर के कसम खाथे, ओह ओकर अऊ ओमा रहइया के घलो कसम खाथे।
MAT 23:22 अऊ जऊन ह स्वरग के कसम खाथे, ओह परमेसर के सिंघासन अऊ ओकर ऊपर बईठइया के घलो कसम खाथे।
MAT 23:23 “हे ढोंगी, कानून के गुरू अऊ फरीसीमन, तुम्हर ऊपर धिक्कार ए! तुमन अपन मसाला जइसने कि पोदीना, सौंफ अऊ जीरा के दसवां भाग ला देथव, पर तुमन मूसा के कानून के जादा महत्व के बात जइसने कि नियाय, दया अऊ बिसवास के अनदेखी करथव। तुम्हर बर उचित अय कि ये काममन ला करव अऊ ओ दूसर काम के अनदेखी घलो झन करव।
MAT 23:24 हे अंधरा अगुवामन! तुमन उड़इया छोटे कीरा ला तो छान लेथव, पर ऊंट ला लील लेथव।
MAT 23:25 “हे ढोंगी, कानून के गुरू अऊ फरीसीमन, तुम्हर ऊपर धिक्कार! तुमन कटोरा अऊ थाली के बाहिर ला तो मांजथव, पर भीतर ले, ओमन लोभ अऊ लूट-खसोट ले छीने गय चीजमन ले भरे हवंय।
MAT 23:26 हे अंधरा फरीसीमन हो! पहिली कटोरा अऊ थाली के भीतरी ला मांजव, तब ओमन के बाहिरी भाग घलो साफ होही।
MAT 23:27 “हे ढोंगी, कानून के गुरू अऊ फरीसीमन, तुमन ला धिक्कार ए! तुमन चूना पोताय कबर के सहीं अव, जऊन ह बाहिर ले तो सुघर दिखथे, पर भीतर ह मुरदा मनखेमन के हाड़ा अऊ जम्मो असुध चीज ले भरे रहिथे।
MAT 23:28 ओही किसम ले, तुमन मनखेमन ला बाहिर ले धरमी दिखथव, पर भीतर ले तुमन ढोंग अऊ अधरम ले भरे हवव।
MAT 23:29 “हे ढोंगी, कानून के गुरू अऊ फरीसीमन, तुम्हर ऊपर धिक्कार! तुमन अगमजानीमन के कबर ला बनाथव अऊ धरमीमन के कबर ला सजाथव,
MAT 23:30 अऊ तुमन ये कहिथव, ‘यदि हमन अपन पुरखामन के जुग म होतेंन, त हमन अगमजानीमन के हतिया करई म ओमन संग भागी नइं होतेंन।’
MAT 23:31 ये किसम ले, तुमन खुदे मान लेथव कि तुमन ओमन के संतान अव, जऊन मन अगमजानीमन ला मार डारिन।
MAT 23:32 तब तुमन अपन पुरखामन के छोंड़े पाप के घघरी ला भर देथव।
MAT 23:33 “हे सांपमन हो! हे जहरिला सांप के पीलामन हो! तुमन नरक के सजा ले कइसने बचहू?
MAT 23:34 एकरसेति, मेंह तुम्हर करा अगमजानी, अऊ बुद्धिमान अऊ गुरूजी मन ला पठोवत हंव। ओमा ले कतेक झन ला तुमन मार डारहू अऊ कुरूस ऊपर चघाहू; कतेक झन ला तुमन अपन सभा-घर म कोर्रा म मारहू अऊ सहर-सहर म ओमन ला सताहू।
MAT 23:35 ये किसम ले, जम्मो धरमीमन के लहू, जऊन ह धरती ऊपर बोहाय हवय—धरमी हाबिल के लहू ले लेके बेरेकियाह के बेटा जकरयाह के लहू तक, जऊन ला तुमन मंदिर अऊ बेदी के बीच म मार डारेव; ये जम्मो के दोस तुम्हर ऊपर आही।
MAT 23:36 मेंह तुमन ला सच कहत हंव, ये जम्मो बात, ये पीढ़ी के मनखेमन ऊपर होही।
MAT 23:37 “हे यरूसलेम सहर! हे यरूसलेम सहर! तेंह अगमजानीमन ला मार डारथस अऊ जेमन ला तोर करा पठोय जाथे, ओमन ला तेंह पथरा ले मारथस। मेंह कतेक बार चाहेंव कि तोर लइकामन ला वइसने संकेलंव, जइसने कुकरी ह अपन चियांमन ला अपन डेना खाल्हे संकेलथे, पर तेंह ये नइं चाहय।
MAT 23:38 देख, तोर घर ह उजाड़ पड़े हवय।
MAT 23:39 मेंह तोला कहत हंव कि तेंह मोला तब तक फेर नइं देख सकस, जब तक कि तेंह ये नइं कहस, ‘धइन ए ओह, जऊन ह परभू के नांव म आथे।’ ”
MAT 24:1 जब यीसू ह मंदिर म ले निकलके जावत रिहिस, त ओकर चेलामन ओकर करा आईन अऊ ओला मंदिर के बनावट ला देखाईन।
MAT 24:2 यीसू ह ओमन ला कहिस, “तुमन ये जम्मो चीज ला देखत हवव?” मेंह तुमन ला सच कहत हंव, “इहां एको ठन पथरा अपन जगह म नइं बांचय। जम्मो ला गिरा दिये जाही।”
MAT 24:3 जब यीसू ह जैतून पहाड़ ऊपर बईठे रिहिस, त ओकर चेलामन अकेला ओकर करा आईन अऊ पुछिन, “हमन ला बता कि येह कब होही? तोर आय के समय अऊ ये जुग के अन्त के का चिनहां होही।”
MAT 24:4 यीसू ह ओमन ला जबाब दीस, “सचेत रहव। कोनो तुमन ला धोखा झन देवय।
MAT 24:5 काबरकि कतको झन मोर नांव म आहीं अऊ कहिहीं, ‘मेंह मसीह अंव,’ अऊ बहुंते झन ला भरमाहीं
MAT 24:6 तुमन लड़ई अऊ लड़ई होय के अफवाह सुनहू, पर धियान रहय कि एकर ले तुमन झन घबरावव। अइसने बात के होवई जरूरी अय, पर ओ बखत अन्त नइं होवय।
MAT 24:7 एक देस ह दूसर देस ऊपर अऊ एक राज ह दूसर राज ऊपर चढ़ई करही। कतको जगह म दुकाल पड़ही अऊ भुइंडोल होही।
MAT 24:8 ये जम्मो ह छेवारी होय के पीरा के सुरूआत के सहीं अय।
MAT 24:9 “तब ओमन तुमन ला सताय बर पकड़वाहीं अऊ तुमन ला मार डारहीं। मोर कारन जम्मो जाति के मनखेमन तुम्हर ले घिन करहीं।
MAT 24:10 ओ समय कतको झन अपन बिसवास ला छोंड़ दीहीं। ओमन एक-दूसर के संग बिसवासघात करहीं अऊ एक-दूसर ले घिन करहीं।
MAT 24:11 अऊ कतको लबरा अगमजानीमन आहीं अऊ कतको झन ला धोखा दीहीं।
MAT 24:12 अधरम के बढ़े के कारन, बहुंत झन के मया ह कम हो जाही।
MAT 24:13 पर जऊन ह आखिरी तक अडिग बने रहिही, ओकरेच उद्धार होही।
MAT 24:14 परमेसर के राज के ये सुघर संदेस के परचार जम्मो संसार म करे जाही, ताकि जम्मो जाति के मनखेमन बर एक गवाही होवय, अऊ तब अन्त के बेरा आ जाही।
MAT 24:15 “एकरसेति जब तुमन ‘ओ बिनासकारी घिन चीज’ ला पबितर स्थान म ठाढ़े देखव, जेकर बारे म अगमजानी दानिएल ह कहे हवय, त पढ़इया ह समझ जावय।
MAT 24:16 तब जऊन मन यहूदिया प्रदेस म हवंय, ओमन पहाड़ ऊपर भाग जावंय।
MAT 24:17 जऊन ह अपन घर के छानी ऊपर होवय, ओह अपन घर के चीजमन ला लेय बर खाल्हे झन उतरय।
MAT 24:18 जऊन ह खेत म होवय, ओह अपन कपड़ा ला लेय बर पाछू झन लहुंटय।
MAT 24:19 ओ माईलोगनमन बर कतेक भयानक बात होही, जऊन मन ओ दिन म देहें म होहीं अऊ जऊन दाईमन लइकामन ला दूध पीयावत होहीं!
MAT 24:20 पराथना करव कि तुमन ला जड़काला म या बिसराम के दिन म भागे ला झन पड़य।
MAT 24:21 काबरकि ओ समय अइसने भयंकर बिपत्ति आही, जइसने संसार के सुरू ले लेके अब तक न तो अइसने होय हवय अऊ न कभू फेर होही।
MAT 24:22 “यदि ओ दिनमन ला कम नइं करे जातिस, त कोनो मनखे नइं बांचतिन; पर चुने गय मनखेमन के कारन, परमेसर ह ओ दिनमन ला कम कर दीही।
MAT 24:23 ओ बखत, कहूं कोनो तुमन ला ये कहय, ‘देखव, मसीह ह इहां हवय’ या ‘ओह उहां हवय।’ त बिसवास झन करव।
MAT 24:24 काबरकि लबरा मसीह अऊ लबरा अगमजानीमन परगट होहीं अऊ अइसने बड़े-बड़े चिनहां अऊ चमतकार देखाहीं कि कहूं हो सकय त चुने गय मनखेमन ला घलो भरमा देवंय।
MAT 24:25 देखव, मेंह तुमन ला पहिली ले बता चुके हवंव।
MAT 24:26 “एकरसेति, यदि ओमन तुमन ला ये कहंय, ‘देखव, मसीह ह उहां सुनसान जगह म हवय।’ त उहां झन जावव; या यदि ओमन कहंय, ‘मसीह ह इहां भीतर के खोली म हवय।’ त ओमन के बात ला बिसवास झन करव।
MAT 24:27 काबरकि जइसने बिजली ह पूरब ले निकलथे अऊ पछिम तक चमकथे, वइसने मनखे के बेटा के अवई होही।
MAT 24:28 जिहां लास होथे, उहां गिधवामन जूरथें।
MAT 24:29 “ओ दिनमन म, बिपत पड़े के तुरते बाद, “ ‘सूरज ह अंधियार हो जाही, अऊ चंदा ह अपन अंजोर नइं दीही; तारामन अकास ले गिर जाहीं, अऊ अकास के सक्तिमन हलाय जाहीं।’
MAT 24:30 “तब ओ समय, मनखे के बेटा के चिनहां ह अकास म दिखही अऊ धरती के जम्मो जाति के मनखेमन सोक मनाहीं। ओमन मनखे के बेटा ला सामर्थ अऊ बड़े महिमा के संग अकास के बादर म आवत देखहीं।
MAT 24:31 अऊ ओह तुरही के बड़े अवाज के संग अपन स्वरगदूतमन ला पठोही, अऊ ओमन अकास के एक छोर ले लेके दूसर छोर तक, चारों दिग के हवा ले ओकर चुने मनखेमन ला संकेलहीं।
MAT 24:32 “अब अंजीर के रूख ले ये बात ला सीखव: जब एकर छोटे डारामन कोअंर बन जाथें अऊ ओमा पान निकले लगथें, त तुमन जान लेथव कि घाम के महिना ह अवइया हवय।
MAT 24:33 ओहीच किसम ले, जब तुमन ये जम्मो घटनामन ला देखव, त जान लेवव कि ओ समय ह लकठा म हवय, पर दुवारी म आ गे हवय।
MAT 24:34 मेंह तुमन ला सच कहत हंव कि जब तक ये जम्मो बातमन नइं हो जाहीं, तब तक ये पीढ़ी के मनखेमन नइं मरंय।
MAT 24:35 अकास अऊ धरती ह टर जाही, पर मोर बचन ह कभू नइं टरय।
MAT 24:36 “ओ दिन या समय के बारे म कोनो नइं जानंय; न तो स्वरग के दूत अऊ न ही बेटा, पर सिरिप ददा ह येला जानथे।
MAT 24:37 जइसने नूह के समय म होय रिहिस, वइसनेच मनखे के बेटा के अवई के समय म घलो होही।
MAT 24:38 ओ समय जल-परलय होय के पहिली, नूह के पानी जहाज म चघे के दिन तक, मनखेमन खावत-पीयत रिहिन अऊ ओमन के बीच म सादी-बिहाव होवत रिहिस;
MAT 24:39 जब तक जल-परलय नइं आईस अऊ ओ जम्मो ला बोहाके नइं ले गीस, तब तक ओमन कुछू नइं जानत रिहिन। वइसनेच मनखे के बेटा के अवई ह घलो होही।
MAT 24:40 ओ बखत दू झन मनखे खेत म होहीं; एक झन ला ले लिये जाही, अऊ दूसर ला छोंड़ दिये जाही।
MAT 24:41 दू झन माईलोगनमन जांता म पीसान पीसत होहीं; ओमा ले एक झन ला ले लिये जाही, अऊ दूसर ला छोंड़ दिये जाही।
MAT 24:42 “एकरसेति, सचेत रहव, काबरकि तुमन नइं जानव कि तुम्हर परभू ह कोन दिन आही।
MAT 24:43 पर ये बात ला समझ लेवव: यदि घर के मालिक ला मालूम होतिस कि चोर ह रात के कतेक बेरा आही, त ओह सचेत रहितिस अऊ अपन घर म सेंध नइं लगन देतिस।
MAT 24:44 एकरसेति तुमन घलो तियार रहव, काबरकि मनखे के बेटा ह ओ समय आ जाही, जब तुमन ओकर आय के आसा नइं करत होहू।
MAT 24:45 “तब ओ बिसवासयोग्य अऊ बुद्धिमान सेवक कोन ए, जऊन ला मालिक ह अपन घर के आने सेवकमन ऊपर मुखिया ठहिराय हवय ताकि ओह ओमन ला सही समय म खाना देवय।
MAT 24:46 धइन अय ओ सेवक, जऊन ला ओकर मालिक ह लहुंटके आय के पाछू, अइसने करत पाथे।
MAT 24:47 मेंह तुमन ला सच कहत हंव कि मालिक ह ओ सेवक ला अपन जम्मो संपत्ति के जिम्मेदारी दे दीही।
MAT 24:48 पर यदि ओ सेवक ह दुस्ट अय अऊ अपन मन म ये कहय, ‘मोर मालिक के अवई म देरी हवय’,
MAT 24:49 अऊ तब ओह अपन संगी सेवकमन ला मारन-पीटन लगय अऊ मतवारमन के संग खावय-पीयय,
MAT 24:50 तब ओ सेवक के मालिक ह अइसने दिन म आ जाही, जब ओह ओकर आय के आसा नइं करत होही अऊ अइसने समय, जऊन ला ओह नइं जानत होही।
MAT 24:51 तब मालिक ह ओला सजा दीही, अऊ ओला ढोंगीमन के संग ठऊर दीही, जिहां ओह रोही अऊ अपन दांत पीसही।”
MAT 25:1 “ओ समय स्वरग के राज ह ओ दस कुंवारीमन सहीं होही, जऊन मन अपन-अपन दीया ला लेके दूल्हा के संग भेंट करे बर गीन।
MAT 25:2 ओमन म पांच झन मुरूख अऊ पांच झन बुद्धिमान रिहिन।
MAT 25:3 मुरूख कुंवारीमन दीयामन ला तो लीन, पर अपन संग तेल नइं ले गीन।
MAT 25:4 पर बुद्धिमान कुंवारीमन अपन-अपन दीया के संग बोतल म तेल घलो ले गीन।
MAT 25:5 दूल्हा के आय म देरी होईस, त ओमन ला ऊंघासी आईस अऊ ओमन सुत गीन।
MAT 25:6 “आधा रथिया ये चिचियाय के अवाज आईस, ‘देखव, दूल्हा ह आवत हवय। ओकर संग भेंट करे बर आवव।’
MAT 25:7 “तब जम्मो कुंवारीमन जाग गीन अऊ अपन-अपन दीया ला ठीक करे लगिन।
MAT 25:8 मुरूख कुंवारीमन बुद्धिमान कुंवारीमन ला कहिन, ‘अपन तेल म ले थोरकन हमन ला घलो देवव, काबरकि हमर दीयामन बुतावत हवंय।’
MAT 25:9 “पर बुद्धिमान कुंवारीमन जबाब दीन, ‘सायद, हमर बर अऊ तुम्हर बर तेल ह नइं पूरही, एकरसेति तुमन तेल बेचइयामन करा जावव अऊ अपन बर तेल बिसा लेवव।’
MAT 25:10 “पर जब ओमन तेल बिसाय बर गे रिहिन, त दूल्हा ह आ गीस। जऊन कुंवारीमन तियार रिहिन, ओमन ओकर संग बिहाव के भोज म भीतर गीन। अऊ कपाट ह बंद हो गीस।
MAT 25:11 “बाद म ओ आने कुंवारीमन घलो आईन अऊ कहिन, ‘हे मालिक, हे मालिक! हमर बर कपाट ला खोल दे।’
MAT 25:12 “पर ओह जबाब दीस, ‘मेंह तुमन ला सच कहत हंव, मेंह तुमन ला नइं जानंव।’
MAT 25:13 “एकरसेति, सचेत रहव, काबरकि तुमन न तो ओ दिन ला जानत हव अऊ न ही ओ समय ला।”
MAT 25:14 “स्वरग के राज ह ओ मनखे के सहीं अय, जऊन ह परदेस जावत बेरा अपन सेवकमन ला बलाईस अऊ ओमन ला अपन संपत्ति सऊंप दीस।
MAT 25:15 हर एक ला ओह ओमन के योग्यता के मुताबिक दीस; एक सेवक ला ओह पांच सिक्का, दूसर ला दू सिक्का अऊ तीसरा ला एक सिक्का दीस। अऊ तब ओह परदेस चल दीस।
MAT 25:16 जऊन सेवक ला पांच सिक्का मिले रिहिस, ओह तुरते गीस अऊ ओ सिक्का ले लेन-देन करके पांच सिक्का अऊ कमा लीस।
MAT 25:17 वइसने जऊन सेवक ला दू सिक्का मिले रिहिस, ओह घलो दू सिक्का अऊ कमाईस।
MAT 25:18 पर जऊन सेवक ला एक ठन सिक्का मिले रिहिस, ओह गीस अऊ भुइयां ला खनके अपन मालिक के पईसा ला उहां लुका दीस।
MAT 25:19 “बहुंत समय के बाद, ओ सेवकमन के मालिक ह लहुंटिस अऊ ओमन ले हिसाब मांगिस।
MAT 25:20 जऊन सेवक ला पांच सिक्का मिले रिहिस, ओह पांच सिक्का अऊ लेके आईस अऊ कहिस, ‘मालिक, तेंह मोला पांच सिक्का देय रहय। देख, मेंह पांच सिक्का अऊ कमाय हवंव।’
MAT 25:21 “ओकर मालिक ह ओला कहिस, ‘बहुंत अछा करय। तेंह बने अऊ ईमानदार सेवक अस। तेंह थोरकन म ईमानदार रहय। मेंह तोला बहुंत चीजमन ऊपर अधिकार दूहूं। आ अऊ अपन मालिक के खुसी म सामिल हो जा।’
MAT 25:22 “जऊन सेवक ला दू ठन सिक्का मिले रिहिस, ओह घलो आईस अऊ कहिस, ‘मालिक, तेंह मोला दू ठन सिक्का देय रहय। देख, मेंह दू ठन सिक्का अऊ कमाय हवंव।’
MAT 25:23 “ओकर मालिक ह ओला कहिस, ‘बहुंत अछा करय। तेंह बने अऊ ईमानदार सेवक अस। तेंह थोरकन म ईमानदार रहय। मेंह तोला बहुंत चीजमन ऊपर अधिकार दूहूं। आ अऊ अपन मालिक के खुसी म सामिल हो जा।’
MAT 25:24 “तब जऊन सेवक ला एक सिक्का मिले रिहिस, ओह आईस अऊ कहिस, ‘मालिक, मेंह जानत रहेंव कि तेंह एक कठोर मनखे अस। तेंह जिहां नइं बोए रहस, उहां ले लूथस, अऊ जिहां बीजा नइं बगराय रहस, उहां ले संकेलथस।
MAT 25:25 एकरसेति मेंह डरा गेंव अऊ बाहिर जाके मेंह तोर सिक्का ला भुइयां म गड़िया देंव; ये हवय तोर सिक्का।’
MAT 25:26 “ओकर मालिक ह ओला कहिस, ‘दुस्ट अऊ अलाल सेवक! जब तेंह जानत रहय कि जिहां मेंह नइं बोए रहंव, उहां ले लूथंव, अऊ जिहां बीजा नइं बगराय रहंव, उहां ले संकेलथंव।
MAT 25:27 त तोला मोर पईसा ला बैंक म जमा कर देना रिहिस, ताकि जब मेंह वापिस आयेंव, त ओला बियाज सहित ले लेतेंव।
MAT 25:28 “ ‘एकरसेति ये सिक्का ला एकर ले लेय लव, अऊ ओला दे दव, जेकर करा दस ठन सिक्का हवय।
MAT 25:29 काबरकि जेकर करा हवय, ओला अऊ दिये जाही अऊ ओकर करा बहुंत जादा हो जाही। पर जेकर करा नइं ए, ओकर करा ले ओला घलो ले लिये जाही, जऊन थोर बहुंत ओकर करा हवय।
MAT 25:30 ये बेकार सेवक ला बाहिर अंधियार म फटिक दव, जिहां ओह रोही अऊ अपन दांत पीसही।’
MAT 25:31 “जब मनखे के बेटा ह अपन महिमा म आही अऊ जम्मो स्वरगदूतमन ओकर संग आहीं, त ओह अपन महिमा के सिंघासन म बिराजही।
MAT 25:32 अऊ ओकर आघू म संसार के जम्मो मनखेमन ला लाने जाही। जइसने चरवाहा ह भेड़मन ला बोकरामन ले अलग करथे, वइसने ओह मनखेमन ला एक-दूसर ले अलग करही।
MAT 25:33 ओह भेड़मन ला अपन जेवनी अंग अऊ बोकरामन ला अपन डेरी अंग ठाढ़ करही।
MAT 25:34 “तब राजा ह अपन जेवनी अंग के मनखेमन ला कहिही, ‘तुमन मोर ददा के आसीसित मनखे अव। आवव, अऊ ओ राज के उत्तराधिकारी बन जावव, जऊन ला तुम्हर खातिर संसार के सिरजे के समय ले तियार करे गे हवय।
MAT 25:35 काबरकि मेंह भूखा रहेंव अऊ तुमन मोला खाना खवाएव; मेंह पीयासा रहेंव अऊ तुमन मोला पानी पीयाएव; मेंह परदेसी रहेंव अऊ तुमन मोला अपन घर म रखेव;
MAT 25:36 मोर करा कपड़ा नइं रिहिस अऊ तुमन मोला कपड़ा पहिराएव; मेंह बेमार रहेंव अऊ तुमन मोर देखरेख करेव, मेंह जेल म रहेंव अऊ तुमन मोर ले मिले बर आयेव।’
MAT 25:37 “तब धरमीमन ओला कहिहीं, ‘हे परभू, हमन कब तोला भूखा देखेंन अऊ खाना खवाएंन या कब पीयासा देखेंन अऊ तोला पानी पीयाएंन?
MAT 25:38 हमन कब तोला एक परदेसी के रूप म देखेंन अऊ अपन घर म ठहिराएंन, या कब तोर करा कपड़ा नइं रिहिस अऊ हमन तोला कपड़ा पहिराएंन?
MAT 25:39 हमन कब तोला बेमार या जेल म देखेंन अऊ तोर ले मिले बर आयेंन?’
MAT 25:40 “तब राजा ह ओमन ला ये जबाब दीही, ‘मेंह तुमन ला सच कहथंव कि जऊन कुछू तुमन मोर ये छोटे ले छोटे भाईमन के कोनो एक झन खातिर करेव, त तुमन ओ मोर बर करेव।’
MAT 25:41 “तब राजा ह अपन डेरी अंग के मनखेमन ला कहिही, ‘तुमन सरापित मनखे अव। मोर ले दूरिहा हटव अऊ ओ सदाकाल के आगी म चले जावव, जऊन ला सैतान अऊ ओकर दूतमन बर तियार करे गे हवय।
MAT 25:42 काबरकि मेंह भूखा रहेंव, अऊ तुमन मोला खाना नइं खवाएव; मेंह पीयासा रहेंव अऊ तुमन मोला पानी नइं पीयाएव।
MAT 25:43 मेंह परदेसी रहेंव अऊ तुमन मोला अपन घर म नइं रखेव; मोर करा कपड़ा नइं रिहिस अऊ तुमन मोला कपड़ा नइं पहिराएव; मेंह बेमार रहेंव अऊ जेल म रहेंव अऊ तुमन मोर देखरेख नइं करेव।’
MAT 25:44 “तब ओमन कहिहीं, ‘हे परभू! हमन कब तोला भूखा या पीयासा या परदेसी या बिगर कपड़ा या बेमार या जेल म देखेंन अऊ तोर मदद नइं करेंन?’
MAT 25:45 “तब राजा ह ओमन ला ये जबाब दीही, ‘मेंह तुमन ला सच कहथंव कि जब भी तुमन ये छोटे मन के कोनो एक झन के मदद नइं करेव, त तुमन मोर घलो मदद नइं करेव।’
MAT 25:46 “तब ओमन सदाकाल के दंड भोगहीं, पर धरमीमन परमेसर के संग सदाकाल के जिनगी पाहीं।”
MAT 26:1 ये जम्मो बात ला कहे के बाद, यीसू ह चेलामन ला कहिस,
MAT 26:2 “जइसने कि तुमन जानत हव कि दू दिन के बाद फसह के तिहार मनाय जाही। तब कुरूस ऊपर चघाय बर मनखे के बेटा ह पकड़वाय जाही।”
MAT 26:3 तब काइफा नांव के महा पुरोहित के महल म मुखिया पुरोहितमन अऊ मनखेमन के अगुवामन जूरिन।
MAT 26:4 अऊ ओमन ये बिचार करिन कि कइसने ओमन छल-कपट करके यीसू ला पकड़ंय अऊ ओला मार डारंय।
MAT 26:5 ओमन कहिन, “तिहार के समय नइं। कहूं अइसने झन होवय कि मनखेमन म दंगा हो जावय।”
MAT 26:6 जब यीसू ह बैतनियाह गांव म सिमोन कोढ़ी के घर म रिहिस,
MAT 26:7 त एक झन माईलोगन संगमरमर के बरतन म बहुंत मंहगा इतर तेल लेके आईस, अऊ जब यीसू ह खाना खावत रहय, त ओ माईलोगन ह यीसू के मुड़ ऊपर इतर ला ढार दीस।
MAT 26:8 येला देखके चेलामन नराज होईन अऊ कहिन, “येला काबर बरबाद करिस?
MAT 26:9 ये इतर ला बने दाम म बेचके, ओ रूपिया ला गरीबमन म बांटे जा सकत रिहिस।”
MAT 26:10 येला जानके यीसू ह ओमन ला कहिस, “तुमन ये माईलोगन ला काबर परेसान करत हवव? ओह मोर बर सुघर काम करे हवय।
MAT 26:11 गरीब मनखेमन तुम्हर संग हमेसा रहिहीं, पर मेंह तुम्हर संग हमेसा नइं रहंव।
MAT 26:12 ओह मोर देहें ऊपर जऊन इतर ढारिस, त ओह येला मोर गड़ियाय जाय के तियारी म करिस।
MAT 26:13 मेंह तुमन ला सच कहत हंव कि जम्मो संसार म जिहां-जिहां मोर सुघर संदेस के परचार करे जाही, उहां ओकर ये काम के चरचा घलो ओकर सुरता म करे जाही।”
MAT 26:14 तब यहूदा इस्करियोती जऊन ह बारह चेलामन ले एक झन रिहिस, मुखिया पुरोहितमन करा गीस,
MAT 26:15 अऊ ओमन ला कहिस, “यदि मेंह यीसू ला तुम्हर हांथ म पकड़वा दूहूं, त तुमन मोला का दूहू?” अऊ ओमन यहूदा ला चांदी के तीस ठन सिक्का दीन।
MAT 26:16 ओ समय ले यहूदा ह यीसू ला पकड़वाय बर मऊका खोजे लगिस।
MAT 26:17 बिन खमीर के रोटी के तिहार के पहिली दिन चेलामन यीसू करा आईन अऊ पुछिन, “तेंह कहां चाहथस कि हमन जाके तोर बर फसह के भोज खाय के तियारी करन?”
MAT 26:18 यीसू ह कहिस, “सहर म ओ मनखे करा जावव अऊ ओला कहव, ‘गुरू ह कहिथे: मोर समय ह लकठा आ गे हवय। मेंह फसह के तिहार ला अपन चेलामन संग तोर घर म मनाय चाहथंव।’ ”
MAT 26:19 जइसने यीसू ह हुकूम दे रिहिस, चेलामन वइसनेच करिन अऊ ओमन फसह तिहार के भोज तियार करिन।
MAT 26:20 जब सांझ होईस, त यीसू अपन बारह चेलामन संग खाना खाय बर बईठिस।
MAT 26:21 अऊ जब ओमन खावत रिहिन, त यीसू ह कहिस, “मेंह तुमन ला सच कहथंव, तुमन म ले एक झन मोर संग बिसवासघात करही।”
MAT 26:22 येला सुनके चेलामन बहुंत उदास होईन अऊ एक-एक करके ओकर ले पुछन लगिन, “का ओह में अंव, परभू?”
MAT 26:23 यीसू ह जबाब दीस, “जऊन ह मोर संग कटोरा म अपन हांथ ला डारे हवय, ओहीच ह मोर संग बिसवासघात करही।
MAT 26:24 मनखे के बेटा ह मरही, जइसने ओकर बारे म परमेसर के बचन म लिखे हवय। पर धिक्कार ए, ओ मनखे ऊपर, जऊन ह मनखे के बेटा संग बिसवासघात करत हे। ओ मनखे बर बने होतिस, यदि ओकर जनम ही नइं होय रहितिस।”
MAT 26:25 तब यहूदा जऊन ह यीसू के संग बिसवासघात करइया रिहिस, यीसू ले कहिस, “हे गुरू! का ओह में अंव?” यीसू ह ओला कहिस, “हव, ओ मनखे तेंह अस।”
MAT 26:26 जब ओमन खावत रिहिन, तब यीसू ह रोटी ला लीस अऊ परमेसर ला धनबाद देके ओला टोरिस अऊ अपन चेलामन ला देके कहिस, “लेवव अऊ खावव; येह मोर देहें अय।”
MAT 26:27 तब ओह कटोरा ला लीस अऊ परमेसर ला धनबाद दीस अऊ ओमन ला ये कहिके कटोरा ला दीस, “येमा ले तुमन जम्मो झन पीयव।
MAT 26:28 येह करार के मोर लहू ए, जऊन ह बहुंते जन बर पाप के छेमा खातिर ढारे जावत हे।
MAT 26:29 मेंह तुमन ला कहथंव कि मेंह ये अंगूर के मंद ला ओ दिन तक नइं पीयंव, जब तक कि मेंह तुम्हर संग मोर ददा के राज म नवां अंगूर के मंद ला नइं पी लंव।”
MAT 26:30 तब ओमन एक भजन गाय के बाद, जैतून पहाड़ ऊपर चल दीन।
MAT 26:31 तब यीसू ह चेलामन ला कहिस, “आज रात के तुमन जम्मो झन मोला छोंड़के भाग जाहू, काबरकि परमेसर के बचन म ये लिखे हवय, “ ‘मेंह चरवाहा ला मारहूं। अऊ झुंड के भेड़मन तितिर-बितिर हो जाहीं।’
MAT 26:32 पर मेंह जी उठे के बाद, तुम्हर ले पहिली गलील प्रदेस जाहूं।”
MAT 26:33 तब पतरस ह यीसू ला कहिस, “चाहे जम्मो झन तोला छोंड़के भाग जावंय त भाग जावंय, पर मेंह तोला कभू नइं छोड़ंव।”
MAT 26:34 यीसू ह ओला जबाब दीस, “मेंह तोला सच कहथंव, आजेच रात के, कुकरा के बासे के पहिली तेंह तीन बार मोर इनकार करबे।”
MAT 26:35 पर पतरस ह कहिस, “चाहे मोला तोर संग मरना घलो पड़य, तभो ले मेंह तोर कभू इनकार नइं करंव।” अऊ आने जम्मो चेलामन घलो अइसनेच कहिन।
MAT 26:36 तब यीसू ह अपन चेलामन संग गतसमनी नांव के एक ठऊर म गीस अऊ ओह ओमन ला कहिस, “तुमन इहां बईठव, जब तक कि मेंह उहां जाके पराथना करथंव।”
MAT 26:37 ओह पतरस अऊ जबदी के दू झन बेटा ला अपन संग म लीस, अऊ यीसू के मन ह दुखी अऊ बियाकुल होय लगिस।
MAT 26:38 तब ओह ओमन ला कहिस, “मोर परान ह अतकी उदास हवय कि मेंह मर जावंव सहीं लगत हवय। तुमन इहां ठहिरव अऊ मोर संग जागत रहव।”
MAT 26:39 थोरकन आघू जाके, यीसू ह मुहूं के भार भुइयां म गिरिस अऊ ये पराथना करिस, “हे मोर ददा! कहूं हो सकय, त दुख के ये कटोरा ला मोर म ले टार दे। तभो ले मोर नइं, फेर तोर ईछा पूरा होवय।”
MAT 26:40 तब ओह अपन चेलामन करा आईस अऊ ओमन ला सुतत देखिस, त ओह पतरस ला कहिस, “का तुमन मोर संग एक घंटा घलो नइं जाग सकव?
MAT 26:41 जागत रहव अऊ पराथना करव, ताकि तुमन परिछा म झन पड़व। आतमा त तियार हवय, फेर देहें ह दुरबल अय।”
MAT 26:42 यीसू ह दूसर बार गीस अऊ ये पराथना करिस, “हे मोर ददा! कहूं दुख के ये कटोरा ह मोर पीये बिगर नइं टर सकय, त फेर तोर ईछा पूरा होवय।”
MAT 26:43 जब यीसू ह वापिस आईस, त ओह अपन चेलामन ला फेर सुतत पाईस, काबरकि ओमन के आंखीमन नींद ले भारी हो गे रहंय।
MAT 26:44 एकरसेति ओह ओमन ला छोंड़के फेर एक बार गीस अऊ ओहीच बात ला कहिके, तीसरा बार पराथना करिस।
MAT 26:45 तब ओह चेलामन करा आईस अऊ ओमन ला कहिस, “का तुमन अभी तक ले सुतत हव अऊ सुरतावत हव? देखव, ओ घरी ह लकठा आ गे हवय, अऊ मनखे के बेटा ह पापीमन के हांथ म पकड़वाय जवइया हे।
MAT 26:46 उठव! आवव, हमन चलन! देखव, मोर संग बिसवासघात करइया ह लकठा आ गे हवय!”
MAT 26:47 जब यीसू ह ये बात कहितेच रिहिस, तभे यहूदा जऊन ह बारह चेलामन ले एक झन रहय, आईस। ओकर संग म मनखेमन के एक बड़े भीड़ रहय अऊ मनखेमन तलवार अऊ लउठी धरे रहंय। येमन ला मुखिया पुरोहित अऊ मनखेमन के अगुवामन पठोय रिहिन।
MAT 26:48 बिसवासघात करइया ह ओमन ला पहिली ले ये संकेत बता दे रिहिस, “जऊन ला मेंह चूमहूं, ओहीच मनखे अय; ओला पकड़ लूहू।”
MAT 26:49 यहूदा ह तुरते यीसू करा आईस अऊ कहिस, “हे गुरू, जोहार!” अऊ ओह यीसू ला चूमिस।
MAT 26:50 यीसू ह ओला कहिस, “संगवारी! जऊन काम बर तेंह आय हवस, ओला कर।” तब मनखेमन आघू म आईन अऊ यीसू ला पकड़के गिरफतार कर लीन।
MAT 26:51 तब यीसू के संगवारीमन ले एक झन तलवार ला खींचके निकालिस अऊ महा पुरोहित के सेवक ऊपर चलाके ओकर कान ला काट दीस।
MAT 26:52 यीसू ह ओला कहिस, “अपन तलवार ला मियान म रख, काबरकि जऊन मन तलवार चलाथें, ओमन तलवार ले मारे जाहीं।
MAT 26:53 का तेंह नइं जानस कि मेंह अपन ददा ले बिनती कर सकथंव अऊ ओह मोर बर तुरते स्वरगदूतमन के बारह ठन बड़े-बड़े सैनिक दल ले घलो जादा पठो दीही।
MAT 26:54 पर तब परमेसर के ओ बचन ह कइसे पूरा होही, जऊन ह ये कहिथे कि ये बात ला ये किसम ले होना जरूरी अय।”
MAT 26:55 ओतकीच बेरा यीसू ह मनखेमन के भीड़ ला कहिस, “का तुमन मोला डाकू समझथव कि तलवार अऊ लउठी लेके मोला पकड़े बर आय हवव? मेंह हर दिन मंदिर म बईठके उपदेस देवत रहेंव अऊ तुमन मोला नइं पकड़ेव।
MAT 26:56 पर ये जम्मो बात एकरसेति होईस कि अगमजानीमन के लिखे बचन ह पूरा होवय।” तब जम्मो चेलामन यीसू ला छोंड़के भाग गीन।
MAT 26:57 जऊन मन यीसू ला गिरफतार करे रिहिन, ओमन ओला महा पुरोहित काइफा करा ले गीन, जिहां कानून के गुरू अऊ अगुवामन जूरे रहंय।
MAT 26:58 पर पतरस ह कुछू दूरिहा म रहत ओकर पाछू-पाछू गीस। ओह महा पुरोहित के घर के अंगना तक गीस अऊ ये देखे बर कि का होवइया हे—ओह भीतर जाके पहरेदारमन के संग बईठ गीस।
MAT 26:59 मुखिया पुरोहितमन अऊ धरम महासभा के जम्मो मनखेमन यीसू के बिरूध म लबरा गवाही खोजत रहंय ताकि ओमन ओला मार डारंय।
MAT 26:60 पर ओमन ला एको झन नइं मिलिन, हालाकि कतको लबरा गवाहमन आईन। आखिर म दू झन गवाह आईन
MAT 26:61 अऊ कहिन, “ये मनखे ह कहे हवय, ‘मेंह परमेसर के मंदिर ला गिराके ओला तीन दिन म फेर बना सकत हंव।’ ”
MAT 26:62 तब महा पुरोहित ह ठाढ़ होईस अऊ यीसू ला कहिस, “ये मनखेमन तोर बिरूध जऊन गवाही देवत हवंय, का तेंह ओकर कोनो जबाब नइं देवस?”
MAT 26:63 पर यीसू ह चुपेचाप रिहिस। महा पुरोहित ह यीसू ला कहिस, “मेंह तोला जीयत परमेसर के कसम देवत हंव: कहूं तेंह परमेसर के बेटा मसीह अस, त हमन ला बता।”
MAT 26:64 यीसू ह ओला कहिस, “हव जी। जइसने कि तेंह कहय। पर मेंह तुमन जम्मो झन ला कहत हंव कि एकर बाद तुमन मनखे के बेटा ला सर्वसक्तिमान परमेसर के जेवनी हांथ कोति बईठे अऊ अकास के बादरमन ऊपर आवत देखहू।”
MAT 26:65 तब महा पुरोहित ह अपन कपड़ा ला चीरिस अऊ कहिस, “येह परमेसर के निन्दा करे हवय। हमन ला अऊ कोनो गवाह के जरूरत नइं ए। देखव! अभीच तुमन ये निन्दा ला सुने हवव।
MAT 26:66 तुम्हर का बिचार हवय?” ओमन जबाब दीन, “येह मिरतू-दंड के लईक अय।”
MAT 26:67 तब ओमन यीसू के मुहूं ऊपर थूकिन अऊ ओला मुक्का मारिन। आने मनखेमन ओला थपरा मारके कहिन,
MAT 26:68 “हे मसीह, अगमबानी करके हमन ला बता कि तोला कोन मारिस?”
MAT 26:69 ओ बखत पतरस ह बाहिर अंगना म बईठे रिहिस, तब एक नौकरानी छोकरी ओकर करा आईस अऊ कहिस, “तेंह घलो गलील के रहइया यीसू के संग रहय।”
MAT 26:70 पर ओह ओ जम्मो झन के आघू म इनकार करिस अऊ कहिस, “मेंह नइं जानंव कि तेंह का कहत हवस?”
MAT 26:71 तब पतरस ह बाहिर दुवारी करा गीस, उहां एक आने नौकरानी छोकरी ओला देखिस अऊ उहां मनखेमन ला कहिस, “ये मनखे ह नासरत के यीसू संग रिहिस।”
MAT 26:72 पतरस ह कसम खाके फेर इनकार करिस अऊ कहिस, “मेंह ओ मनखे ला नइं जानंव।”
MAT 26:73 एकर थोरकन देर बाद, जऊन मन उहां ठाढ़े रहंय, ओमन पतरस करा आईन अऊ कहिन, “सही म तेंह घलो ओमन ले एक झन अस, काबरकि तोर बोली ले, ये बात के पता चलत हे।”
MAT 26:74 तब पतरस ह अपनआप ला कोसन लगिस अऊ किरिया खाके कहिस, “मेंह ओ मनखे ला नइं जानंव।” अऊ तुरते कुकरा ह बासिस।
MAT 26:75 तब पतरस ह यीसू के कहे ये बात ला सुरता करिस: “कुकरा बासे के पहिली, तेंह तीन बार मोर इनकार करबे।” अऊ ओह बाहिर गीस अऊ फूट-फूटके रोय लगिस।
MAT 27:1 जब बिहनियां होईस, त जम्मो मुखिया पुरोहित अऊ मनखेमन के अगुवामन यीसू ला मार डारे के फैसला करिन।
MAT 27:2 ओमन यीसू ला बांधिन अऊ ओला ले जाके राजपाल पीलातुस के हांथ म सऊंप दीन।
MAT 27:3 यीसू के संग बिसवासघात करइया यहूदा ह जब देखिस कि यीसू ला दोसी ठहिराय गे हवय, त ओह पछताईस अऊ ओह मुखिया पुरोहित अऊ अगुवामन ला चांदी के तीस सिक्का वापिस कर दीस,
MAT 27:4 अऊ कहिस, “मेंह पाप करे हवंव काबरकि मेंह एक निरदोस मनखे ला मरवाय बर ओकर संग बिसवासघात करेंव।” ओमन कहिन, “हमन ला एकर ले का मतलब! येला तें जान।”
MAT 27:5 तब यहूदा ह ओ चांदी के सिक्कामन ला मंदिर म फटिक दीस अऊ उहां ले चले गीस अऊ जाके फांसी लगा लीस।
MAT 27:6 मुखिया पुरोहितमन ओ सिक्कामन ला उठाईन अऊ कहिन, “ये पईसा ला खजाना म रखना कानून के मुताबिक सही नो हय, काबरकि येह लहू के कीमत अय।”
MAT 27:7 एकरसेति ओमन ओ पईसा ले कुम्हार के खेत ला बिसाय के फैसला करिन ताकि ओ जगह ह परदेसीमन बर मरघटी के रूप म काम आवय।
MAT 27:8 एकरे कारन, ओ खेत ला आज तक ले लहू के खेत कहे जाथे।
MAT 27:9 ये किसम ले यरमियाह अगमजानी के दुवारा कहे गय ये बचन ह पूरा होईस: “ओमन चांदी के तीस टुकड़ामन ला ले लीन, जऊन ला इसरायली मनखेमन ओकर कीमत ठहिराय रिहिन,
MAT 27:10 अऊ ओमन ओ पईसा के उपयोग कुम्हार के खेत बिसाय म करिन जइसने परभू ह मोला हुकूम दे रिहिस।”
MAT 27:11 जब यीसू ह राजपाल के आघू म ठाढ़ होईस, त राजपाल ह ओकर ले पुछिस, “का तेंह यहूदीमन के राजा अस?” यीसू ह ओला जबाब दीस, “हव जी, जइसने तेंह कहत हवस।”
MAT 27:12 जब मुखिया पुरोहित अऊ अगुवामन यीसू ऊपर दोस लगाईन, त ओह कुछू जबाब नइं दीस।
MAT 27:13 तब पीलातुस ह यीसू ला कहिस, “का तेंह नइं सुनत हवस कि ओमन तोर ऊपर कइसने दोस लगावत हवंय।”
MAT 27:14 पर यीसू ह आरोप के जबाब म एको सबद नइं कहिस। जेकर ले राजपाल ला बहुंत अचरज होईस।
MAT 27:15 राजपाल के ये रिवाज रिहिस कि फसह तिहार के मऊका म, ओह एक झन कैदी ला छोंड़ देवय, जऊन ला मनखेमन चाहंय।
MAT 27:16 ओ समय म बरब्बा नांव के एक बदनाम कैदी जेल म रिहिस।
MAT 27:17 जब भीड़ ह जूरे रिहिस, त पीलातुस ह भीड़ के मनखेमन ले पुछिस, “तुमन कोन ला चाहत हव कि मेंह ओला तुम्हर बर छोंड़ देवंव—बरब्बा ला या यीसू ला, जऊन ला मसीह कहे जाथे?”
MAT 27:18 काबरकि पीलातुस ह जानत रिहिस कि ओमन जलन के कारन यीसू ला ओकर हांथ म सऊंपे रिहिन।
MAT 27:19 जब पीलातुस ह नियाय आसन म बईठे रिहिस, त ओकर घरवाली ह ओकर करा ये संदेस पठोईस, “ओ धरमी मनखे संग कुछू झन कर, काबरकि मेंह आज सपना म ओकर कारन बहुंत दुख उठाय हवंव।”
MAT 27:20 पर मुखिया पुरोहित अऊ अगुवामन भीड़ के मनखेमन ला राजी कर लीन कि ओमन बरब्बा ला छोंड़े के अऊ यीसू ला मार डारे के मांग करंय।
MAT 27:21 राजपाल ह ओमन ला फेर पुछिस, “ये दूनों म ले तुमन कोन ला चाहथव कि मेंह तुम्हर खातिर छोंड़ देवंव?” ओमन कहिन, “बरब्बा ला।”
MAT 27:22 पीलातुस ह ओमन ले पुछिस, “तब मेंह यीसू के का करंव, जऊन ला मसीह कहे जाथे।” ओ जम्मो झन जबाब दीन, “येला कुरूस ऊपर चघाय जावय।”
MAT 27:23 पीलातुस ह पुछिस, “काबर? ओह का अपराध करे हवय?” पर ओमन अऊ जादा चिचियाके कहिन, “येला कुरूस ऊपर चघाय जावय।”
MAT 27:24 जब पीलातुस ह देखिस कि ओकर दुवारा कुछू नइं हो सकत हे, पर हुल्लड़ होवत हवय, त ओह पानी लीस अऊ भीड़ के आघू म अपन हांथ ला धोके कहिस, “मेंह ये मनखे के मिरतू के दोसी नो हंव। एकर जिम्मेदार तुमन अव।”
MAT 27:25 जम्मो मनखेमन जबाब दीन, “एकर मिरतू के दोस हमर अऊ हमर संतान ऊपर होवय।”
MAT 27:26 तब पीलातुस ह ओमन खातिर बरब्बा ला छोंड़ दीस अऊ यीसू ला कोर्रा म पीटवाईस, अऊ ओला कुरूस ऊपर चघाय बर सऊंप दीस।
MAT 27:27 तब राजपाल के सैनिकमन यीसू ला राजपाल के महल म ले गीन अऊ सैनिकमन के पूरा दल ला यीसू करा संकेलिन।
MAT 27:28 ओमन यीसू के कपड़ा ला उतारिन अऊ ओला सिन्दूरी लाल रंग के चोगा पहिराईन,
MAT 27:29 अऊ तब कांटा के एक मुकुट गुंथके ओकर मुड़ ऊपर रखिन, अऊ ओकर जेवनी हांथ म एक ठन लउठी धरा दीन अऊ ओकर आघू म माड़ी टेकिन अऊ ये कहिके ओकर हंसी उड़ाईन, “हे यहूदीमन के राजा, तोला जोहार।”
MAT 27:30 ओमन ओकर ऊपर थूकिन अऊ लउठी लेके ओकर मुड़ म मारे लगिन।
MAT 27:31 जब ओमन ओकर हंसी उड़ा चुकिन, त चोगा ला ओकर ऊपर ले उतारके ओला ओकरेच कपड़ा ला पहिराईन अऊ तब ओमन कुरूस ऊपर चघाय बर ओला बाहिर ले गीन।
MAT 27:32 जब ओमन सहर ले बाहिर निकलत रिहिन, त ओमन ला कुरेन के सिमोन नांव के एक झन मनखे मिलिस। ओमन ओकर ले जबरन कुरूस ला उठवाके ले गीन।
MAT 27:33 ओमन “गुलगुता” नांव के ठऊर म आईन (गुलगुता के मतलब होथे—खोपड़ी के ठऊर)।
MAT 27:34 उहां ओमन यीसू ला पित्त मिले अंगूर के मंद पीये बर दीन। यीसू ह ओला चिखिस, पर ओला पीये बर नइं चाहिस।
MAT 27:35 जब ओमन यीसू ला कुरूस ऊपर चघा लीन, त ओमन चिट्ठी डालके ओकर मुताबिक कपड़ा ला अपन म बांट लीन।
MAT 27:36 तब ओमन उहां बईठके ओकर पहरा देवन लगिन।
MAT 27:37 अऊ ओकर मुड़ ऊपर ओकर दोस-पतर टांग दीन, जऊन म ये लिखाय रहय— येह यहूदीमन के राजा यीसू अय।
MAT 27:38 ओ समय यीसू के संग दू झन डाकूमन घलो कुरूस ऊपर चघाय गे रिहिन, एक झन ओकर जेवनी कोति अऊ दूसर झन ओकर डेरी कोति।
MAT 27:39 उहां ले अवइया-जवइयामन यीसू के बेजत्ती करंय अऊ अपन मुड़ ला डोला-डोला के ये कहंय,
MAT 27:40 “तेंह तो मंदिर ला गिराके ओला तीन दिन म बनइया अस, अपनआप ला बचा ले। कहूं तेंह परमेसर के बेटा अस, त फेर कुरूस ऊपर ले उतर आ।”
MAT 27:41 अइसनेच मुखिया पुरोहित, कानून के गुरू अऊ अगुवामन घलो ये कहिके ओकर ठट्ठा करत रिहिन,
MAT 27:42 “येह आने मन ला बचाईस, पर येह अपनआप ला नइं बचा सकय! येह तो इसरायल के राजा अय! अब येह कुरूस ऊपर ले उतर आवय, त हमन एकर ऊपर बिसवास करबो।
MAT 27:43 येह परमेसर ऊपर भरोसा रखथे। यदि परमेसर येला चाहथे, त ओह येला छुड़ा ले, काबरकि येह कहे रिहिस, ‘मेंह परमेसर के बेटा अंव।’ ”
MAT 27:44 अइसनेच ओ डाकूमन घलो जऊन मन ओकर संग कुरूस ऊपर चघाय गे रिहिन, ओकर ठट्ठा करिन।
MAT 27:45 ओ मंझनियां बारह बजे ले लेके तीन बजे तक जम्मो देस ऊपर अंधियार छाय रिहिस।
MAT 27:46 करीब तीन बजे यीसू ह जोर से नरियाके कहिस, “एली, एली, लमा सबकतनी?” (जेकर मतलब होथे, “हे मोर परमेसर, हे मोर परमेसर, तेंह मोला काबर छोंड़ देय?)”
MAT 27:47 जब उहां ठाढ़े मनखेमन ले कुछू झन येला सुनिन, त ओमन कहिन, “येह एलियाह ला बलावत हवय।”
MAT 27:48 ओमन ले एक झन तुरते दऊड़के एक पनसोखवा रबर ला लानिस, अऊ ओह ओला सिरका म बोरिस अऊ एक ठन लउठी म रखके यीसू ला पीये बर दीस।
MAT 27:49 पर बाकि मनखेमन कहिन, “अब ओला रहन दे। आवव, हमन देखन, एलियाह ह येला बचाय बर आथे कि नइं।”
MAT 27:50 अऊ यीसू ह फेर जोर से गोहार पारिस अऊ अपन परान ला तियाग दीस।
MAT 27:51 ओतकीच बेरा मंदिर के परदा ह ऊपर ले खाल्हे तक चीराके दू कुटा हो गीस। धरती ह कांप उठिस अऊ चट्टानमन तड़क गीन
MAT 27:52 अऊ कबरमन उघर गीन अऊ कतको मरे पबितर मनखे के देहेंमन फेर जी उठिन।
MAT 27:53 ओमन कबर म ले बाहिर निकलिन, अऊ यीसू के जी उठे के बाद, ओमन पबितर सहर म गीन अऊ कतको मनखेमन ला दिखिन।
MAT 27:54 जब सिपाहीमन के अधिकारी अऊ ओकर संग के सैनिक, जऊन मन यीसू के पहरा देवत रिहिन, भुइंडोल अऊ ओ जम्मो घटना ला देखिन, त अब्बड़ डरा गीन अऊ ओमन कहिन, “सही म येह परमेसर के बेटा रिहिस।”
MAT 27:55 उहां कतको माईलोगन घलो रिहिन, जऊन मन दूरिहा ले यीसू ला देखत रिहिन। ओमन यीसू के सेवा करत गलील प्रदेस ले ओकर संगे-संग आय रिहिन।
MAT 27:56 ओमन म मरियम मगदलिनी, याकूब अऊ यूसुफ के दाई मरियम अऊ जबदी के बेटामन के दाई रिहिन।
MAT 27:57 जब संझा होईस, त अरमतिया सहर ले एक धनवान मनखे आईस। ओकर नांव यूसुफ रिहिस अऊ ओह खुदे यीसू के चेला बन गे रिहिस।
MAT 27:58 ओ बेरा ओह पीलातुस करा जाके यीसू के लास ला मांगिस अऊ पीलातुस ह यीसू के लास ला ओला सऊंप देय के हुकूम दीस।
MAT 27:59 यूसुफ ह लास ला लीस अऊ ओला एक ठन साफ मलमल के कपड़ा म लपेटिस,
MAT 27:60 अऊ ओला अपन खुद के नवां कबर म रखिस, जऊन ला ओह चट्टान ला काटके बनवाय रिहिस। तब ओह एक ठन बड़े पथरा ला कबर के मुंहाटी म टेका दीस अऊ उहां ले चले गीस।
MAT 27:61 मरियम मगदलिनी अऊ दूसर मरियम उहां कबर के आघू म बईठे रिहिन।
MAT 27:62 ओकर दूसर दिन, जऊन ह तियारी के दिन के बाद के दिन रिहिस, मुखिया पुरोहित अऊ फरीसीमन पीलातुस करा जूरिन
MAT 27:63 अऊ कहिन, “महाराज, हमन ला सुरता हवय कि ओ धोखेबाज ह जब जीयत रिहिस, त कहे रिहिस, ‘तीन दिन के बाद मेंह फेर जी उठहूं।’
MAT 27:64 एकरसेति हुकूम दे कि तीसरा दिन तक ओ कबर के रखवारी करे जावय। अइसने झन होवय कि ओकर चेलामन आवंय अऊ ओकर लास ला चोराके ले जावंय अऊ मनखेमन ला कहंय कि ओह मरे म ले जी उठे हवय। तब ये आखिरी धोखा ह पहिली ले घलो अऊ खराप होही।”
MAT 27:65 पीलातुस ह ओमन ला कहिस, “तुम्हर करा पहरेदारमन हवंय। जावव, अऊ जइसने तुमन उचित समझथव, कबर के रखवारी के परबंध करव।”
MAT 27:66 तब ओमन गीन अऊ कबर के पथरा ऊपर मुहर लगाईन अऊ उहां पहरेदार बईठाके ओमन कबर के रखवारी के परबंध करिन।
MAT 28:1 बिसराम दिन के बाद, हप्ता के पहिली दिन बड़े बिहनियां मरियम मगदलिनी अऊ दूसर मरियम कबर ला देखे बर गीन।
MAT 28:2 ओ समय एक भयंकर भुइंडोल होईस, काबरकि परभू के एक स्वरगदूत ह स्वरग ले उतरिस अऊ कबर करा आईस अऊ पथरा ला ढुनगाके ओकर ऊपर बईठ गीस।
MAT 28:3 ओकर रूप ह बिजली सहीं चमकत रहय अऊ ओकर कपड़ा ह झक पंर्रा रिहिस।
MAT 28:4 पहरेदारमन ओकर ले डरके थर-थर कांपे लगिन अऊ मुरदा के सहीं हो गीन।
MAT 28:5 स्वरगदूत ह माईलोगनमन ला कहिस, “झन डरव, काबरकि मेंह जानत हंव कि तुमन यीसू ला खोजत हव, जऊन ला कुरूस ऊपर चघाय गे रिहिस।
MAT 28:6 ओह इहां नइं ए; ओह जी उठे हवय, जइसने ओह कहे रिहिस। आवव अऊ ओ ठऊर ला देखव, जिहां ओला रखे गे रिहिस।
MAT 28:7 अब तुमन तुरते जाके ओकर चेलामन ला ये बतावव: ‘ओह मरे म ले जी उठे हवय अऊ ओह तुम्हर ले आघू गलील प्रदेस जावत हवय। उहां तुमन ओला देखहू।’ देखव! मेंह तुमन ला बता दे हंव।”
MAT 28:8 एकरसेति ओ माईलोगनमन जल्दी कबर ले चले गीन। ओमन डरा गे रिहिन, पर बड़े आनंद सहित चेलामन ला बताय बर दऊड़के गीन।
MAT 28:9 अचानक यीसू ह ओमन ले मिलिस अऊ कहिस, “खुस रहव।” ओमन ओकर करा आईन अऊ ओकर गोड़ ला धरके ओकर दंडवत करिन।
MAT 28:10 तब यीसू ह ओमन ला कहिस, “झन डरव। जावव अऊ मोर भाईमन ला कहव कि ओमन गलील प्रदेस जावंय। उहां ओमन मोला देखहीं।”
MAT 28:11 जब माईलोगनमन डहार म रिहिन, त कुछू पहरेदारमन सहर म गीन अऊ जऊन कुछू होय रिहिस, ओ जम्मो बात मुखिया पुरोहितमन ला बताईन।
MAT 28:12 तब मुखिया पुरोहितमन अगुवामन संग मिलके एक योजना बनाईन। ओमन सैनिकमन ला बहुंत अकन पईसा देके कहिन,
MAT 28:13 “तुमन मनखेमन ला ये कहव, ‘जब हमन रथिया सुते रहेंन, त ओकर चेलामन आईन अऊ ओला चोराके ले गीन।’
MAT 28:14 यदि ये बात राजपाल के कान म पड़ही, त हमन ओला समझा देबो अऊ तुमन ला मुसीबत ले बचा लेबो।”
MAT 28:15 सैनिकमन पईसा ला लीन अऊ वइसने करिन, जइसने ओमन ला सिखाय गे रिहिस। अऊ ये बात यहूदीमन के बीच म आज तक फईले हवय।
MAT 28:16 तब गियारह चेलामन गलील प्रदेस के ओ पहाड़ ऊपर गीन, जिहां जाय बर यीसू ह ओमन ला कहे रिहिस।
MAT 28:17 अऊ जब ओमन यीसू ला देखिन, त ओला दंडवत करिन, पर कोनो-कोनो ला संका होईस।
MAT 28:18 तब यीसू ह ओमन करा आईस अऊ कहिस, “स्वरग अऊ धरती ऊपर मोला पूरा अधिकार देय गे हवय।
MAT 28:19 एकरसेति जावव अऊ जम्मो जाति के मनखेमन ला मोर चेला बनावव अऊ ओमन ला ददा, बेटा अऊ पबितर आतमा के नांव म बतिसमा देवव,
MAT 28:20 अऊ ओमन ला ओ जम्मो बात मानना सिखोवव, जेकर हुकूम मेंह तुमन ला देय हवंव। अऊ देखव, मेंह संसार के अन्त होवत तक हमेसा तुम्हर संग हवंव।”
MAR 1:1 परमेसर के बेटा यीसू मसीह के सुघर संदेस के सुरूआत।
MAR 1:2 जइसने यसायाह अगमजानी के किताब म लिखे हवय: “देख, मेंह अपन संदेसिया ला तोर आघू पठोवत हंव, जऊन ह तोर रसता तियार करही।”
MAR 1:3 “सुनसान जगह म एक झन अवाज देवत रिहिस, ‘परभू बर डहार ला तियार करव, ओकर डहार ला सीधा करव।’ ”
MAR 1:4 यूहन्ना बतिसमा देवइया, जऊन ह सुनसान जगह म रहत रिहिस, अऊ पाप के छेमा खातिर मन-फिराय के बतिसमा के परचार करत रिहिस।
MAR 1:5 यरूसलेम, अऊ यहूदिया प्रदेस के जम्मो झन निकलके ओकर करा गीन, अऊ अपन-अपन पाप ला मानके, ओमन यरदन नदी म यूहन्ना ले बतिसमा लीन।
MAR 1:6 यूहन्ना ह ऊंट के रूआं के बने कपड़ा पहिरय अऊ अपन कनिहां म चमड़ा के बने पट्टा बांधय, ओह फांफा अऊ जंगली मंधरस खावय।
MAR 1:7 अऊ ओह ये बतात फिरत रिहिस कि मोर बाद एक झन अवइया हवय, जऊन ह मोर ले अऊ सक्तिसाली ए। मेंह एकर लईक घलो नो हंव कि निहरके ओकर पनही के बंधना ला खोलंव।
MAR 1:8 मेंह तुमन ला पानी म बतिसमा देवत हंव, पर ओह तुमन ला पबितर आतमा म बतिसमा दीही।
MAR 1:9 ओ समय म, यीसू ह गलील के नासरत नगर ले आईस अऊ यरदन नदी म यूहन्ना ले बतिसमा लीस।
MAR 1:10 जब यीसू ह पानी ले निकलके ऊपर आईस, तभे ओह स्वरग ला खुलत अऊ परमेसर के आतमा ला पंड़की सहीं अपन ऊपर उतरत देखिस।
MAR 1:11 अऊ स्वरग ले ये अवाज आईस: “तेंह मोर मयारू बेटा अस, तोर ले मेंह बहुंत खुस हवंव।”
MAR 1:12 तब आतमा ह तुरते ओला सुनसान ठऊर म पठोईस।
MAR 1:13 अऊ निरजन जगह म चालीस दिन तक सैतान ह ओकर परिछा लीस। ओह जंगली पसुमन संग रहत रिहिस अऊ स्वरगदूतमन ओकर सेवा करत रिहिन।
MAR 1:14 पाछू जब यूहन्ना ला जेल म डाले गीस, त यीसू ह परमेसर के सुघर संदेस के परचार करत गलील प्रदेस म गीस।
MAR 1:15 ओह कहिस, “समय ह पूरा हो चुके हवय; परमेसर के राज ह लकठा आ गे हवय। मन फिरावव अऊ सुघर संदेस म बिसवास करव।”
MAR 1:16 गलील के झील के तीरे-तीर जावत, ओह सिमोन अऊ ओकर भाई अन्द्रियास ला झील म जाल डारत देखिस, काबरकि ओमन मछुआर रिहिन।
MAR 1:17 यीसू ह ओमन ला कहिस, “मोर पाछू आवव, मेंह तुमन ला मनखे पकड़इया मछुआर बनाहूं।”
MAR 1:18 ओमन तुरते अपन जाल ला छोंड़के ओकर पाछू हो लीन।
MAR 1:19 थोरकन आघू जाय के बाद, ओह जबदी के बेटा याकूब अऊ ओकर भाई यूहन्ना ला डोंगा म जाल सिलत देखिस।
MAR 1:20 यीसू ह तुरते ओमन ला बलाईस, अऊ ओमन अपन ददा जबदी ला बनिहारमन संग डोंगा म छोंड़के ओकर पाछू चल दीन।
MAR 1:21 ओमन कफरनहूम सहर म गीन अऊ यीसू ह बिसराम के दिन, यहूदीमन के सभा-घर म जाके उपदेस देवन लगिस।
MAR 1:22 मनखेमन ओकर उपदेस ला सुनके चकित होवत रहंय, काबरकि ओह कानून के गुरूमन सहीं नइं, पर अधिकार के संग उपदेस देवत रिहिस।
MAR 1:23 ओही बेरा ओमन के सभा-घर म, एक मनखे रिहिस, जऊन म एक असुध आतमा रहय, ओह चिचियाके कहिस,
MAR 1:24 “हे नासरत के यीसू! हमर ले तोर का काम? का तेंह हमन ला नास करे बर आय हवस? मेंह जानत हंव, तेंह कोन अस—तेंह परमेसर के पबितर जन अस।”
MAR 1:25 यीसू ह ओला दबकारके कहिस, “चुपे रह! अऊ ओमा ले निकल आ।”
MAR 1:26 तब असुध आतमा ह ओला अइंठके, अब्बड़ चिचियावत ओमा ले निकल गीस।
MAR 1:27 येला देखके, जम्मो मनखेमन चकित होवत, एक-दूसर ले पुछन लगिन, “येह का बात ए? येह कोनो नवां उपदेस ए, जऊन ह अधिकार के संग हवय! ओह असुध आतमामन ला हुकूम देथे, अऊ ओमन ओकर बात ला मानथें।”
MAR 1:28 तुरते गलील के जम्मो इलाका म ओकर समाचार फईल गीस।
MAR 1:29 तब ओह सभा-घर ले निकलके, याकूब अऊ यूहन्ना संग सिमोन अऊ अन्द्रियास के घर गीस।
MAR 1:30 उहां सिमोन के सास ह जर-बुखार म पड़े रहय, अऊ ओमन तुरते यीसू ला ओकर बारे म बताईन।
MAR 1:31 ओह ओकर मेर गीस अऊ ओकर हांथ ला धरके उठाईस, ओतकीच म ओकर जर ह उतर गीस अऊ ओह उठके, ओमन के सेवा-टहल करे लगिस।
MAR 1:32 संझा के बेरा, जब बेर बुड़ गे, त मनखेमन जम्मो बिमरहा अऊ जऊन मन ला भूत धरे रहय, ओमन ला यीसू करा लानिन।
MAR 1:33 अऊ उहां कफरनहूम सहर के एक बड़े भीड़ घर के दुवारी के आघू म जूर गीस।
MAR 1:34 यीसू ह कतको बिमरहामन ला बने करिस अऊ बहुंत परेत आतमामन ला निकाल दीस, पर ओह परेत आतमामन ला बोलन नइं दीस, काबरकि ओमन ओला जानत रिहिन।
MAR 1:35 बड़े बिहनियां, बेर निकले के पहिली, यीसू ह उठके एक सुनसान ठऊर म गीस अऊ उहां पराथना करन लगिस।
MAR 1:36 सिमोन अऊ ओकर संग के मन ओला खोजत रिहिन।
MAR 1:37 जब ओह मिलिस, त ओला कहिन, “जम्मो झन तोला खोजत हवंय।”
MAR 1:38 यीसू ह कहिस, “आवव, कहूं अऊ लकठा के गांवमन म घलो जावन कि मेंह उहां घलो परचार कर सकंव, काबरकि मेंह एकरे खातिर आय हवंव।”
MAR 1:39 अऊ ओह जम्मो गलील प्रदेस म, ओमन के सभा-घर म जा-जाके परचार करिस अऊ परेत आतमामन ला निकालिस।
MAR 1:40 एक कोढ़ी मनखे ओकर करा आईस अऊ ओकर आघू म माथा टेकके बिनती करिस, “यदि तें चाहबे, त मोला बने कर सकथस।”
MAR 1:41 यीसू ह ओकर ऊपर तरस खाके अपन हांथ ला बढ़ाईस अऊ ओला छूके कहिस, “मेंह चाहत हंव कि तेंह सुध हो जा!”
MAR 1:42 ओतकीच बेरा ओकर कोढ़ ह खतम हो गीस अऊ ओह बने हो गीस।
MAR 1:43 यीसू ह ओला चेताके तुरते बिदा करिस अऊ ओला कहिस,
MAR 1:44 “एकर बारे म कोनो ला कुछू झन कहिबे, पर खुदे जाके पुरोहित ला देखा, अऊ कोढ़ीमन के बने होय के बारे म जइसने मूसा ह ठहिराय हवय, वइसने बलिदान चघा, तब मनखेमन के आघू म तोर बने होय के गवाही होही।”
MAR 1:45 पर ओह बाहिर जाके अपन चंगा होय के बारे म खुलके बताय लगिस, जेकर कारन, यीसू ह फेर नगर म खुल्लम-खुल्ला नइं जा सकिस; ओला नगर के बाहिर एकांत जगह म रहे पड़िस। तभो ले चारों कोति ले मनखेमन ओकर करा आवत रिहिन।
MAR 2:1 कुछू दिन के बाद, यीसू फेर कफरनहूम म आईस, अऊ ये समाचार ह जम्मो नगर म फईल गीस।
MAR 2:2 ओ घर जिहां ओह ठहिरे रहय, उहां अतका झन झूम गीन कि अऊ एको झन बर ठऊर नइं रहय; इहां तक कि कपाट के बाहिर म घलो ठऊर नइं रिहिस। अऊ यीसू ह ओमन ला परमेसर के बचन सुनाईस।
MAR 2:3 उहां, लकवा के मारे एक मनखे ला, चार झन उठाके लानिन।
MAR 2:4 भीड़ के मारे ओमन यीसू के लकठा म नइं जा सकिन, एकर खातिर घर के छानी ला, जेकर तरी म यीसू रहय, उघार दीन, अऊ खटिया ला जेमा लकवा के मारे बिमरहा ह रहय, यीसू के आघू म उतार दीन।
MAR 2:5 यीसू ह ओमन के बिसवास ला देखिस, त ओह लकवा के मारे मनखे ला कहिस, “बेटा! तोर पाप ह छेमा हो गे।”
MAR 2:6 तब कानून के कुछू गुरू, जऊन मन उहां बईठे रिहिन, अपन मन म सोचे लगिन,
MAR 2:7 “ये मनखे ह काबर अइसने कहत हवय। येह तो परमेसर के निन्दा करत हवय, काबरकि परमेसर के छोंड़ अऊ कोन ह पाप ला छेमा कर सकथे?”
MAR 2:8 यीसू ह तुरते अपन आतमा म जान डारिस कि ओमन अपन मन म का गुनत रिहिन, अऊ ओह ओमन ला कहिस, “तुमन ये बात अपन मन म काबर सोचत हवव?
MAR 2:9 सरल का ए? लकवा के मारे ला ये कहई कि तोर पाप ह छेमा हो गे या फेर ये कहई कि अपन खटिया ला उठा अऊ रेंग।
MAR 2:10 मेंह तुमन ला देखाहूं कि मनखे के बेटा ला धरती म पाप छेमा करे के अधिकार हवय।” तब ओह लकवा के मारे ला कहिस,
MAR 2:11 “उठ, अपन खटिया ला उठा अऊ घर जा।”
MAR 2:12 ओह उठिस अऊ खटिया ला लेके जम्मो मनखे के देखत चले गीस। येला देखके जम्मो झन चकित हो गीन अऊ ये कहिके परमेसर के महिमा करिन कि हमन अइसने कभू नइं देखे रहेंन।
MAR 2:13 यीसू ह फेर झील के तीर म गीस, अऊ ओ भीड़ जऊन ह ओकर करा आईस, ओमन ला उपदेस देवन लगिस।
MAR 2:14 जब ओह जावत रिहिस, त ओह हलफई के बेटा लेवी ला लगान पटाय के नाका म बईठे देखिस। यीसू ह ओला कहिस, “मोर पाछू हो ले।” अऊ लेवी ह उठिस अऊ ओकर पाछू हो लीस।
MAR 2:15 जब यीसू ह लेवी के घर म खाना खावत रिहिस, त उहां ओकर अऊ ओकर चेलामन संग कतको लगान लेवइया अऊ पापी मनखेमन घलो खाना खावत रिहिन, काबरकि उहां बहुंत झन ओकर पाछू हो ले रिहिन।
MAR 2:16 जब कानून के गुरूमन, जऊन मन फरीसी रिहिन, यीसू ला पापी अऊ लगान लेवइयामन संग खावत देखिन, त ओमन ओकर चेलामन ले पुछिन, “ओह लगान लेवइया अऊ पापीमन संग काबर खावत हवय?”
MAR 2:17 यीसू ह येला सुनके ओमन ला कहिस, “भला-चंगा मनखेमन ला डाक्टर के जरूरत नइं होवय, पर बिमरहामन ला होथे। मेंह धरमीमन ला नइं, पर पापीमन ला बलाय बर आय हवंव।”
MAR 2:18 यूहन्ना के चेला अऊ फरीसीमन उपास करत रिहिन। कुछू मनखेमन आके यीसू ले पुछिन, “यूहन्ना के चेला अऊ फरीसीमन के चेलामन उपास रखथें, पर तोर चेलामन काबर उपास नइं रखंय?”
MAR 2:19 यीसू ह ओमन ला जबाब दीस, “का बरातीमन उपास रखथें, जब दूल्हा ह ओमन के संग म रहिथे? जब तक दूल्हा ह ओमन के संग हवय, ओमन उपास नइं रखंय।
MAR 2:20 पर एक समय अइसने आही, जब दूल्हा ह ओमन ले अलग करे जाही, तब ओ दिन ओमन उपास करहीं।
MAR 2:21 “नवां कपड़ा के खाप जुन्ना कपड़ा म कोनो नइं लगावंय, कहूं कोनो अइसने करथे, त ओ खाप ह जुन्ना कपड़ा ला तीरके अऊ चीर देथे।
MAR 2:22 कोनो मनखे नवां अंगूर के मंद ला जुन्ना चमड़ा के थैली म नइं भरय। कहूं कोनो अइसने करथे, त अंगूर के मंद ह ओ थैली ला चीर दीही, अऊ मंद अऊ थैली दूनों बरबाद हो जाही। एकरे बर नवां अंगूर के मंद ला नवां चमड़ा के थैली म भरथें।”
MAR 2:23 यीसू ह एक बिसराम के दिन खेत म ले होके जावत रिहिस अऊ ओकर चेलामन रेंगत-रेंगत दाना ला टोरत रिहिन,
MAR 2:24 त फरीसीमन ओला कहिन, “देख, येमन अइसने काबर करत हवंय, जेला बिसराम के दिन करई कानून के बिरूध अय।”
MAR 2:25 यीसू ह ओमन ला कहिस, “का तुमन कभू नइं पढ़ेव कि दाऊद ह का करिस, जब ओला अऊ ओकर संगीमन ला भूख लगिस अऊ ओमन जरूरत म रिहिन?
MAR 2:26 अबियातार महा पुरोहित के समय म, दाऊद ह परमेसर के घर म गीस, अऊ परमेसर ला भेंट चघाय रोटी ला खाईस अऊ अपन संगवारीमन ला घलो खाय बर दीस, जऊन ला कानून के मुताबिक सिरिप पुरोहितमन खा सकत रिहिन।”
MAR 2:27 यीसू ह ओमन ला ये घलो कहिस, “बिसराम दिन ह मनखे बर बनाय गे हवय, न कि मनखे ह बिसराम दिन बर।
MAR 2:28 एकरसेति, मनखे के बेटा ह बिसराम दिन के घलो परभू अय।”
MAR 3:1 यीसू ह सभा-घर म फेर गीस अऊ उहां एक मनखे रहय, जेकर एक हांथ ला लकवा मार दे रिहिस।
MAR 3:2 उहां कुछू झन ओकर ऊपर दोस लगाय बर मऊका खोजत रहंय। एकरे बर ओमन ये देखत रिहिन कि ओह बिसराम के दिन म ओला बने करथे कि नइं।
MAR 3:3 यीसू ह जेकर हांथ ला लकवा मारे रिहिस ओला कहिस, “जम्मो के आघू म ठाढ़ हो जा।”
MAR 3:4 तब ओह मनखेमन ले पुछिस, “बिसराम के दिन म कानून के मुताबिक का ठीक ए? भलई करई या फेर बुरई करई? काकरो परान बचई या हतिया करई?” पर ओमन चुपेचाप रिहिन।
MAR 3:5 यीसू ह ओमन के हिरदय के कठोरता ला जानके उदास होईस, अऊ ओमन ऊपर गुस्सा होके चारों खूंट देखिस अऊ ओ मनखे ला कहिस, “अपन हांथ ला लमा।” ओह अपन हांथ ला लमाईस अऊ ओकर हांथ ह पूरा बने हो गीस।
MAR 3:6 तब फरीसीमन बाहिर निकलके हेरोदीमन संग ओकर बिरोध म सडयंत्र करन लगिन कि ओला कइसने मार डारंय।
MAR 3:7 यीसू ह अपन चेलामन संग झील कोति गीस अऊ गलील ले मनखेमन के एक बड़े भीड़ ओकर पाछू हो लीस।
MAR 3:8 ओकर अचरज के काम के बारे म सुनके अब्बड़ मनखेमन यहूदिया, यरूसलेम, इदूमिया, यरदन के पार अऊ सूर अऊ सीदोन के आसपास ले ओकर करा आईन।
MAR 3:9 भीड़ के खातिर, ओह अपन चेलामन ला कहिस कि ओकर बर ओमन एक ठन छोटे डोंगा तियार रखंय ताकि अइसने झन होवय कि मनखेमन ओला दबा डारंय।
MAR 3:10 ओह बहुंत झन ला चंगा करे रिहिस, एकर खातिर बिमरहा मनखेमन ओला छुए बर गिरे परत रहंय।
MAR 3:11 अऊ जब भी असुध आतमामन ओला देखंय, ओकर आघू म गिर परंय अऊ चिचियाके कहंय, “तेंह परमेसर के बेटा अस।”
MAR 3:12 पर ओह ओमन ला चेताके कहय, “कोनो ला झन बतावव कि मेंह कोन अंव।”
MAR 3:13 तब यीसू ह पहाड़ ऊपर चघ गीस अऊ जऊन मन ला ओह चाहत रिहिस, ओमन ला बलाईस अऊ ओमन ओकर करा आईन।
MAR 3:14 ओह बारह झन ला प्रेरित करके चुनिस कि ओमन ओकर संग रहंय अऊ ओह ओमन ला परचार करे बर पठो सकय,
MAR 3:15 अऊ ओमन परेत आतमामन ला निकाले के अधिकार रखंय।
MAR 3:16 ओ बारह झन ये रिहिन: सिमोन जेकर नांव ओह पतरस रखे रिहिस।
MAR 3:17 जबदी के बेटा—याकूब, अऊ याकूब के भाई यूहन्ना (जेमन के नांव ओह बुअनरगिस रखे रिहिस, जेकर मतलब होथे “गरजन के बेटामन”),
MAR 3:18 अन्द्रियास, फिलिप्पुस, बरतुलमै, मत्ती, थोमा, हलफई के बेटा याकूब, तद्दै, सिमोन कनानी,
MAR 3:19 अऊ यहूदा इस्करियोती जऊन ह यीसू के संग बिसवासघात करिस।
MAR 3:20 जब यीसू ह एक घर म आईस, त फेर अइसने भीड़ जूर गीस कि ओह अऊ ओकर चेलामन खाना तक नइं खा सकिन।
MAR 3:21 जब ओकर परिवार के मन ये सुनिन, त ओला घर ले जाय बर आईन, काबरकि ओमन कहत रिहिन कि ओकर चित ह ठीक नइं ए।
MAR 3:22 अऊ कानून के गुरू, जऊन मन यरूसलेम ले आय रिहिन, अइसने कहंय कि ओमा बालजबूल हवय अऊ ओह परेत आतमामन के सरदार के मदद ले परेत आतमामन ला निकालत हवय।
MAR 3:23 यीसू ह ओमन ला लकठा म बलाके पटंतर म कहिस, “सैतान ह सैतान ला कइसने निकाल सकथे?
MAR 3:24 कहूं कोनो राज म फूट पड़ जावय, त ओ राज ह खुद बने नइं रह सकय।
MAR 3:25 वइसनेच कहूं कोनो घर म फूट पड़ जावय, त ओ घर ह बने नइं रह सकय।
MAR 3:26 कहूं सैतान ह अपनेच बिरोध म होके अपनेच म फूट डारही, त ओह कइसने बने रह सकथे? ओकर बिनास हो जाही।
MAR 3:27 कोनो मनखे कोनो बलवान मनखे के घर म घुसरके ओकर घर संपत्ति ला लूट नइं सकय, जब तक कि ओह पहिली ओ बलवान मनखे ला नइं बांध लीही, तभे ओह ओकर घर ला लूट सकथे।
MAR 3:28 मेंह तुमन ला सच कहत हंव कि मनखेमन के जम्मो पाप अऊ निन्दा करई ह माफ करे जाही,
MAR 3:29 पर जऊन ह पबितर आतमा के बिरोध म निन्दा करथे, ओला कभू माफ नइं करे जावय; ओह अनंत पाप के दोसी ठहिरही।”
MAR 3:30 यीसू ह ये जम्मो बात एकर खातिर कहिस काबरकि ओमन ये कहत रिहिन कि ओमा असुध आतमा हवय।
MAR 3:31 तब यीसू के दाई अऊ भाईमन उहां आईन अऊ बाहिर म खड़े होके, एक झन ला ओला बलाय बर पठोईन।
MAR 3:32 एक बड़े भीड़ यीसू के चारों खूंट बईठे रिहिस, अऊ ओमन ओला कहिन, “देख, तोर दाई अऊ भाईमन बाहिर म तोला खोजत हवंय।”
MAR 3:33 ओह ओमन ले पुछिस, “मोर दाई अऊ भाईमन कोन अंय?”
MAR 3:34 तब ओह अपन चारों खूंट बईठे भीड़ ला देखके कहिस, “येमन मोर दाई अऊ भाई अंय।
MAR 3:35 जऊन कोनो परमेसर के ईछा ला पूरा करथे, ओह मोर भाई, बहिनी अऊ दाई अय।”
MAR 4:1 यीसू ह फेर झील के तीर म उपदेस करन लगिस अऊ उहां अइसने भीड़ जूर गीस कि ओह झील म एक ठन डोंगा ऊपर चघके बईठ गीस अऊ जम्मो मनखेमन झील के तीर म रहंय।
MAR 4:2 ओह ओमन ला पटंतर म बहुंत अकन बात सिखोवन लगिस अऊ अपन उपदेस म कहिस:
MAR 4:3 “सुनव, एक किसान ह बीज बोय बर निकलिस।
MAR 4:4 जब ओह बोवत रिहिस, त कुछू बीजामन रसता के तीर म गिरिन अऊ चिरईमन आके ओला खा लीन।
MAR 4:5 कुछू बीजामन पथर्री भुइयां म गिरिन, जिहां ओमन ला जादा माटी नइं मिलिस। ओ बीजामन जल्दी जाम गीन काबरकि उहां माटी ह गहिरा नइं रिहिस।
MAR 4:6 पर जब सूरज निकलिस, त ओमन मुरझा गीन अऊ जरी नइं धरे रहय के कारन ओमन सूख गीन।
MAR 4:7 कुछू बीजामन कंटिली झाड़ीमन के बीच म गिरिन अऊ ओ झाड़ीमन बढ़के ओमन ला दबा दीन, जेकर कारन ओमन म फर नइं धरिन।
MAR 4:8 पर कुछू बीजामन बने भुइयां ऊपर गिरिन; ओमन जामिन अऊ बाढ़के जादा फर लानिन; कोनो तीस गुना, कोनो साठ गुना अऊ कोनो सौ गुना।”
MAR 4:9 तब यीसू ह कहिस, “जेकर सुने के कान हवय, ओह सुन ले।”
MAR 4:10 जब यीसू ह अकेला रिहिस, तब ओकर बारह चेला अऊ ओकर संग के मन ओकर ले पटंतर के बारे म पुछिन।
MAR 4:11 ओह ओमन ला कहिस, “परमेसर के राज के भेद के गियान तुमन ला देय गे हवय, पर बाहिर वाले मन ला सब गोठ पटंतर म बोले जाथे।
MAR 4:12 ताकि, “ ‘भले ही ओमन देखंय पर कभू झन जानंय, अऊ भले ही ओमन सुनंय, पर कभू झन समझ सकंय; अइसने झन होवय कि ओमन पछताप करंय अऊ ओमन ला छेमा करे जावय।’”
MAR 4:13 तब यीसू ह ओमन ला कहिस, “का तुमन ये पटंतर ला नइं समझेव, तब आने पटंतरमन ला कइसने समझहू?
MAR 4:14 बोवइया ह परमेसर के बचन ला बोथे।
MAR 4:15 कुछू मनखेमन डहार के तीर म परे बीजा सहीं अंय; जब बचन ह बोय जाथे, तब तुरते सैतान ह आके ओमन म बोय गे बचन ला ले जाथे।
MAR 4:16 आने मन ओ बीजा के सहीं अंय, जऊन ला पथर्री भुइयां ऊपर बोय जाथे; ओमन बचन ला सुनके तुरते ओला आनंद सहित गरहन करथें।
MAR 4:17 पर अपन म जरी नइं धरे रहय के कारन, ओमन के बिसवास ह कुछू समय तक ही रहिथे, जब बचन के सेति समस्या अऊ सतावा आथे, त ओमन तुरते बचन के मुताबिक चले बर बंद कर देथें।
MAR 4:18 जऊन ला कंटिली झाड़ीमन म बोय गीस, ओमन ये अंय—ओमन बचन ला सुनथें,
MAR 4:19 पर ये जिनगी के चिंता, धन के लोभ अऊ आने चीजमन के ईछा ओमन म हमाके बचन ला दबा देथें अऊ ओमन फर नइं लानंय।
MAR 4:20 पर जऊन ला बने भुइयां म बोय जाथे, ओमन ये अंय—ओमन बचन ला सुनके गरहन करथें अऊ फर लानथें—कोनो तीस गुना, कोनो साठ गुना अऊ कोनो सौ गुना।”
MAR 4:21 यीसू ह ओमन ला कहिस, “का दीया ला ये खातिर लानथें कि बड़े कटोरा या खटिया के खाल्हे म मढ़ाय जावय? का ये खातिर नइं कि दीया ला दीवट ऊपर मढ़ाय जावय?
MAR 4:22 काबरकि जऊन कुछू छिपे हवय, ओला उघारे जाही, अऊ जऊन कुछू घलो ढंके हवय, ओकर खुलासा करे जाही।
MAR 4:23 कहूं काकरो कान हवय, त ओह सुन ले।”
MAR 4:24 “जऊन कुछू तुमन सुनथव, ओकर ऊपर बने करके बिचार करव। जऊन नाप ले तुमन नापथव, ओही नाप ले तुम्हर बर घलो नापे जाही, बल्कि अऊ जादा।
MAR 4:25 जेकर करा हवय, ओला अऊ दिये जाही, अऊ जेकर करा नइं ए, ओकर ले, जऊन कुछू बांचे हवय, ओला घलो ले लिये जाही।”
MAR 4:26 यीसू ह ये घलो कहिस, “परमेसर के राज ह अइसने अय—एक मनखे ह बीजा ला भुइयां म बोथे।
MAR 4:27 रात अऊ दिन, चाहे ओह सुतय या जागय, बीजा ह अपनआप जामथे अऊ बाढ़थे अऊ ओह नइं जानय कि येह कइसने होईस?
MAR 4:28 माटी ह आपे-आप फसल उपजाथे—पहिली पीका निकलथे, तब बाली, अऊ तब बालीमन म पूरा दाना तियार होथे।
MAR 4:29 जतकी जल्दी दाना पाकथे, मनखे ह हंसिया लेके लुए के सुरू कर देथे, काबरकि येह लुवई के समय होथे।”
MAR 4:30 फेर यीसू ह कहिस, “हमन परमेसर के राज ला काकर सहीं ठहिरावन या कोन पटंतर म ओकर बखान करन?
MAR 4:31 ओह सरसों के बीजा सहीं अय, जब येह बोए जाथे, त येह भुइयां म जम्मो बीजामन ले छोटे होथे।
MAR 4:32 तभो ले लगाय के बाद येह बाढ़के, बारी म जम्मो साग-भाजी ले बड़े हो जाथे, अऊ ओकर अइसने बड़े-बड़े डारामन निकलथें कि अकास के चिरईमन ओकर छइहां म बसेरा कर सकथें।”
MAR 4:33 बचन ला समझाय खातिर, यीसू ह अइसने कतको पटंतर ओमन ला कहिस।
MAR 4:34 बिगर पटंतर के ओह ओमन ला कुछू नइं कहत रिहिस। पर जब ओह अपन चेलामन संग अकेला रहय, त ओमन ला जम्मो गोठमन के मतलब ला साफ-साफ समझावय।
MAR 4:35 ओहीच दिन संझा के बखत, ओह अपन चेलामन ला कहिस, “आवव, हमन झील के ओ पार चलन।”
MAR 4:36 भीड़ ला पाछू छोंड़के, ओमन जइसने यीसू रिहिस, वइसने ओला अपन संग डोंगा म ले गीन। उहां ओकर संग अऊ डोंगामन घलो रहंय।
MAR 4:37 तब एक बड़े भारी आंधी आईस अऊ पानी के बड़े-बड़े लहरा उठिस, जेकर कारन पानी ह डोंगा म हमाय लगिस अऊ डोंगा ह बुड़े बर होवत रहय।
MAR 4:38 यीसू ह डोंगा के पाछू म गद्दी ऊपर सोवत रहय। तब चेलामन ओला उठाके कहिन, “हे गुरू, का तोला कोनो फिकर नइं ए कि हमन पानी म बुड़त हवन?”
MAR 4:39 ओह उठके आंधी ला दबकारिस अऊ पानी के लहरामन ला कहिस, “सांत हो जावव, थम जावव।” तब आंधी ह थम गीस अऊ एकदम सांत हो गीस।
MAR 4:40 ओह अपन चेलामन ला कहिस, “तुमन काबर डरावत हवव? का तुमन ला अब घलो मोर ऊपर बिसवास नइं ए?”
MAR 4:41 ओमन अब्बड़ डरा गे रिहिन अऊ एक-दूसर ला पुछन लगिन, “येह कोन ए? अऊ त अऊ आंधी अऊ पानी के लहरामन घलो एकर हुकूम मानथें।”
MAR 5:1 ओमन झील के ओ पार गिरासेनीमन के इलाका म गीन।
MAR 5:2 जब यीसू ह डोंगा ले उतरिस, तब एक झन मनखे जऊन म असुध आतमा रहय, मरघटी ले निकलके ओकर करा आईस।
MAR 5:3 ये मनखे ह मरघटी म रहत रहय अऊ ओमा अतकी ताकत रहय कि कोनो ओला सांकर म घलो नइं बांधे सकत रिहिन।
MAR 5:4 कतको बार ले ओकर हांथ ला संकली म बांधके गोड़ म बेड़ी पहिराय गे रिहिस, पर हर बार ओह संकली अऊ बेड़ी ला टोर देवय। कोनो ओला काबू म नइं कर सकत रिहिन।
MAR 5:5 रात अऊ दिन, ओह मरघटी अऊ पहाड़ीमन म चिचियावय अऊ अपनआप ला चोख पथरा ले घायल करत रहय।
MAR 5:6 ओह दूरिहाच ले यीसू ला देखके ओकर अंग दऊड़िस अऊ ओकर गोड़ खाल्हे गिरिस,
MAR 5:7 अऊ अब्बड़ चिचियाके कहिस, “हे यीसू, सर्वोच्च परमेसर के बेटा, मोर ले तोला का काम? परमेसर के कसम, तेंह मोला पीरा झन दे।”
MAR 5:8 काबरकि यीसू ह ओला कहत रहय, “हे असुध आतमा, ये मनखे म ले निकल आ।”
MAR 5:9 तब यीसू ह ओकर ले पुछिस, “तोर का नांव ए?” ओह कहिस, “मोर नांव सेना ए, काबरकि हमन अब्बड़ झन हवन।”
MAR 5:10 अऊ ओह यीसू ले बार-बार बिनती करिस कि ओमन ला ओ इलाका ले बाहिर झन पठोवय।
MAR 5:11 उहां लकठा म पहाड़ी कोति सुरामन के एक बड़े झुंड ह चरत रहय।
MAR 5:12 परेत आतमामन यीसू ले बिनती करके कहिन कि हमन ला ओ सुरामन म पठो दे कि हमन ओमन म हमा जावन।
MAR 5:13 ओह ओमन ला हुकूम दीस अऊ असुध आतमामन निकलके सुरामन म हमा गीन। अऊ सुरामन के झुंड ह जेमा करीब दू हजार सूरा रिहिन, तीर म निकले पथरा ले झील म झपटके गिरिन अऊ बुड़ मरिन।
MAR 5:14 सूरा चरइयामन भाग गीन अऊ सहर अऊ गांव-गंवई म ये बात ला बताईन अऊ ओला सुनके, जऊन बात होय रिहिस, ओला देखे बर मनखेमन आईन।
MAR 5:15 जब ओमन यीसू करा आईन, त जऊन म परेत आतमामन के एक सेना रिहिस, ओला कपड़ा पहिरे अऊ सही हालत म बईठे देखिन अऊ ओमन डरा गीन।
MAR 5:16 जऊन मन येला अपन आंखी ले देखे रिहिन, ओमन मनखेमन ला ओ मनखे जऊन म परेत आतमामन रिहिन, ओकर बारे अऊ सुरामन के बारे म जम्मो बात बताईन।
MAR 5:17 तब मनखेमन यीसू ले बिनती करे लगिन कि ओह ओमन के इलाका ले चले जावय।
MAR 5:18 जब यीसू ह डोंगा ऊपर चघन लगिस, तब ओ मनखे जऊन म पहिली परेत आतमामन रिहिन, ओकर ले बिनती करन लगिस, “मोला तोर संग जावन दे।”
MAR 5:19 पर यीसू ह इनकार करके ओला कहिस, “अपन घर जाके अपन मनखेमन ला बता कि दया करके परभू ह तोर बर कइसने बड़े काम करे हवय।”
MAR 5:20 ओ मनखे ह उहां ले चल दीस अऊ दिकापुलिस म बताय लगिस कि यीसू ह ओकर बर कइसने बड़े काम करे हवय। येला सुनके जम्मो मनखेमन अचम्भो करिन।
MAR 5:21 जब यीसू ह फेर डोंगा म झील के ओ पार गीस, त बहुंते मनखेमन ओकर चारों खूंट जूर गीन। जब ओह झील के तीरेच म रिहिस,
MAR 5:22 तभे याईर नांव के एक सभा-घर के अधिकारी आईस अऊ यीसू ला देखके ओकर गोड़ खाल्हे गिरिस,
MAR 5:23 अऊ ओकर ले बहुंत बिनती करके कहिस, “मोर नानकून बेटी ह मरइया हवय, तेंह आके ओकर ऊपर अपन हांथ ला रख कि ओह बने होके जीयत रहय।”
MAR 5:24 तब यीसू ह ओकर संग गीस अऊ एक बड़े भीड़ ह ओकर पाछू हो लीस। भीड़ के कारन मनखेमन ओकर ऊपर गिरे परत रिहिन।
MAR 5:25 ओ भीड़ म एक झन माईलोगन रहय, जऊन ला बारह बछर ले लहू बहे के बेमारी रहय।
MAR 5:26 ओह बहुंत डाक्टरमन के ईलाज ले भारी दुख झेले रिहिस। इहां तक कि अपन जम्मो पूंजी ला खरचा कर डारे रिहिस, पर ओला कुछू फायदा नइं होईस, बल्कि ओकर बेमारी ह अऊ बढ़ गे रहय।
MAR 5:27 यीसू के चरचा ला सुनके, ओह भीड़ म ओकर पाछू आईस अऊ ओकर कपड़ा ला छुईस।
MAR 5:28 काबरकि ओह सोचत रहय कि कहूं मेंह ओकर कपड़ाच ला छू लेवंव, त बने हो जाहूं।
MAR 5:29 जतका जल्दी ओह यीसू के कपड़ा ला छुईस, ओकर लहू बहे के बंद हो गीस अऊ ओह अपन देहें म जान डारिस कि ओह बेमारी ले बने हो गे हवय।
MAR 5:30 यीसू ह तुरते जान डारिस कि ओकर म ले सामर्थ निकले हवय। ओह भीड़ म पाछू मुड़के पुछिस, “मोर कपड़ा ला कोन छुईस?”
MAR 5:31 ओकर चेलामन कहिन, “तेंह देखत हवस कि भीड़ ह तोर ऊपर गिरे परत हवय, तभो ले पुछत हवस कि कोन ह तोला छुईस?”
MAR 5:32 पर यीसू ह ये जाने खातिर कि कोन ह अइसने करे हवय, चारों कोति देखे लगिस।
MAR 5:33 तब ओ माईलोगन ह ये जानके कि ओकर कइसने भलई होय हवय, आईस अऊ यीसू के गोड़ तरी गिरके डरत अऊ कांपत ओला जम्मो बात ला सही-सही बता दीस।
MAR 5:34 यीसू ह ओला कहिस, “बेटी! तोर बिसवास ह तोला बने करे हवय। सांति म जा अऊ अपन दुख ले बांचे रह।”
MAR 5:35 जब यीसू ह ये बात कहत रिहिस, तभे सभा-घर के अधिकारी याईर के घर ले कुछू मनखेमन आईन अऊ कहिन, “तोर बेटी ह तो मर गीस; अब गुरू ला काबर तकलीफ देबो।”
MAR 5:36 ओमन के गोठ ला धियान नइं देवत, यीसू ह सभा-घर के अधिकारी ला कहिस, “झन डर, सिरिप बिसवास रख।”
MAR 5:37 ओह पतरस, याकूब अऊ याकूब के भाई यूहन्ना ला छोंड़के अऊ कोनो ला अपन संग नइं आवन दीस।
MAR 5:38 जब ओमन सभा-घर के अधिकारी के घर आईन, त यीसू ह देखिस कि उहां हल्ला मचे हवय अऊ मनखेमन उहां ऊंचहा अवाज म बहुंत रोवत अऊ गोहारत रहंय।
MAR 5:39 ओह भीतर जाके ओमन ला कहिस, “तुमन काबर रोवत अऊ हल्ला मचावत हवव? लइका ह मरे नइं, सुतत हवय।”
MAR 5:40 पर ओमन ओकर हंसी उड़ाय लगिन। तब ओह जम्मो झन ला बाहिर निकालके, अपन संग म छोकरी के दाई-ददा अऊ अपन चेलामन ला लेके भीतर गीस, जिहां लइका ह रहय।
MAR 5:41 ओह छोकरी के हांथ ला धरके ओला कहिस, “तलिता कुमी!” जेकर मतलब होथे—“ए छोकरी, मेंह तोला कहत हंव, उठ।”
MAR 5:42 अऊ ओ छोकरी ह तुरते उठके चले-फिरे लगिस; (ओ छोकरी ह बारह बछर के रिहिस)। येला देखके ओमन बहुंत अचरज करिन।
MAR 5:43 यीसू ह ओमन ला चेताके कहिस कि ये बात कोनो ला झन बतावव; अऊ ओमन ला कहिस कि ओला कुछू खाय बर देवव।
MAR 6:1 ओ जगह ला छोंड़के, यीसू ह अपन चेलामन संग अपन नगर नासरत म आईस।
MAR 6:2 बिसराम के दिन, ओह सभा-घर म सिकछा देवन लगिस अऊ अब्बड़ मनखेमन ओकर बात ला सुनके चकित होईन। ओमन पुछन लगिन, “ये मनखे ला ये बात कहां ले मिलिस? येला का किसम के बुद्धि मिले हवय? का किसम के चमतकार येह करत हवय?
MAR 6:3 का येह ओ बढ़ई नो हय? का येह मरियम के बेटा अऊ याकूब, योसेस, यहूदा अऊ सिमोन के भाई नो हय? का एकर बहिनीमन हमर संग म इहां नइं अंय?” अऊ ओमन ओकर ऊपर नराज होईन।
MAR 6:4 यीसू ह ओमन ला कहिस, “अगमजानी ह अपन नगर, अपन कुटुम्ब अऊ अपन घर के छोंड़ जम्मो जगह आदरमान पाथे।”
MAR 6:5 ओह उहां एको चमतकार के काम नइं कर सकिस। सिरिप कुछू बिमरहामन ऊपर हांथ रखके ओमन ला बने करिस।
MAR 6:6 अऊ ओह ओमन के कम बिसवास ला देखके अचम्भो करिस। तब यीसू चारों खूंट के गांवमन म उपदेस करत फिरिस।
MAR 6:7 ओह अपन बारहों चेलामन ला बलाके ओमन ला दू-दू झन करके पठोईस अऊ ओमन ला असुध आतमामन के ऊपर अधिकार दीस।
MAR 6:8 ओकर हुकूम ये रिहिस, “डहार बर सिरिप लउठी के छोंड़ अऊ कुछू झन लेवव, न रोटी, न झोला अऊ न पटका म पईसा।
MAR 6:9 पनही ला पहिरव, पर अपन संग म एक ठन घलो अतकिहा कुरता झन लेवव।
MAR 6:10 जब भी तुमन कोनो घर म जावव, त ओ सहर ला छोंड़त तक ओहीच घर म ठहिरव।
MAR 6:11 अऊ कहूं कोनो ठऊर के मनखेमन तुमन ला गरहन नइं करंय अऊ तुम्हर बात ला नइं सुनंय, त उहां ले निकलत बेरा अपन गोड़ के धुर्रा ला झर्रा देवव ताकि येह ओमन के बिरूध एक गवाही होवय।”
MAR 6:12 तब चेलामन जाके परचार करिन कि मनखेमन पाप ले पछताप करंय।
MAR 6:13 ओमन कतको परेत आतमामन ला निकालिन अऊ कतको बिमरहामन ला तेल म अभिसेक करके ओमन ला बने करिन।
MAR 6:14 हेरोदेस राजा एकर बारे म सुनिस, काबरकि यीसू के नांव ह जम्मो अंग फईल गे रहय। कुछू मनखेमन कहत रिहिन, “यूहन्ना बतिसमा देवइया ह मरे म ले जी उठे हवय अऊ एकर कारन ओकर दुवारा चमतकार के काममन होवत हवंय।”
MAR 6:15 आने मन कहिन, “ओह एलियाह अय।” अऊ कतको मन कहत रिहिन, “ओह पहिली के अगमजानीमन सहीं एक झन अगमजानी अय।”
MAR 6:16 पर जब हेरोदेस ह येला सुनिस, त ओह कहिस, “येह यूहन्ना बतिसमा देवइया ए, जेकर मुड़ ला मेंह कटवा दे रहेंव, ओहीच ह जी उठे हवय!”
MAR 6:17 काबरकि हेरोदेस ह खुद हुकूम दे रिहिस कि यूहन्ना ला बंदी बना लव अऊ ओला बांधके जेल म डाल दव। ओह अपन भाई फिलिप्पुस के घरवाली हेरोदियास के कारन अइसने करे रिहिस। ओह हेरोदियास ले बिहाव कर ले रिहिस।
MAR 6:18 काबरकि यूहन्ना ह हेरोदेस ला कहे रिहिस, “अपन भाई के घरवाली ला रखई तोर बर कानून के मुताबिक उचित नो हय।”
MAR 6:19 एकरसेति हेरोदियास ह अपन मन म यूहन्ना बर बईरता रखय अऊ ओला मरवाय बर चाहत रहय। पर ओला मऊका नइं मिलत रिहिस।
MAR 6:20 काबरकि हेरोदेस ह यूहन्ना ला धरमी अऊ पबितर मनखे जानके ओकर ले डराय अऊ ओला बंचाके रखे रहय। हेरोदेस ह यूहन्ना के बात ला सुनके घबरावय, तभो ले ओकर बात ला सुने के ईछा रखय।
MAR 6:21 आखिर म ओ समय आईस, जब हेरोदेस ह अपन जनम दिन म एक बड़े जेवनार करिस। ओह राज के बड़े अधिकारी, पलटन के सेनापति अऊ गलील के बड़े मनखेमन ला नेवता दीस।
MAR 6:22 तब हेरोदियास के बेटी ह आके उहां जम्मो झन के आघू म नाचिस। ओकर नचई ला देखके हेरोदेस अऊ ओकर नेवताहारीमन खुस हो गीन। तब राजा ह छोकरी ला कहिस, “तेंह कोनो घलो चीज मोर ले मांग, अऊ मेंह तोला दूहूं।”
MAR 6:23 ओह किरिया खाके कहिस, “कोनो घलो चीज तेंह मांग, अऊ मेंह तोला दूहूं। इहां तक कि मोर आधा राज घलो।”
MAR 6:24 छोकरी ह बाहिर जाके अपन दाई ले पुछिस, “मेंह का मांगंव?” ओकर दाई ह कहिस, “यूहन्ना बतिसमा देवइया के मुड़।”
MAR 6:25 छोकरी ह तुरते भीतर राजा करा गीस अऊ बिनती करके कहिस, “मेंह चाहथंव कि तेंह यूहन्ना बतिसमा देवइया के मुड़ ला एक ठन थाली म मोर करा मंगवा दे।”
MAR 6:26 तब राजा ह बहुंत दुखी होईस, पर अपन किरिया अऊ जेवनार म आय पहुनामन के सेति ओला इनकार करे नइं चाहिस।
MAR 6:27 एकरसेति, राजा ह तुरते एक सिपाही ला हुकूम देके, यूहन्ना के मुड़ ला लाने बर पठोईस। सिपाही ह जेल म जाके यूहन्ना के मुड़ ला काटिस,
MAR 6:28 अऊ ओ मुड़ ला एक ठन थाली म लानके छोकरी ला दीस अऊ ओ छोकरी ह येला अपन दाई ला दे दीस।
MAR 6:29 येला सुनके यूहन्ना के चेलामन आईन अऊ ओकर लास ला उठाके ले गीन अऊ कबर म रख दीन।
MAR 6:30 प्रेरितमन लहुंटके यीसू करा जूरिन अऊ जऊन कुछू ओमन करे अऊ सिखोय रिहिन, ओ जम्मो बात ओला बताईन।
MAR 6:31 तब ओह ओमन ला कहिस, “चलव, कोनो सुनसान ठऊर म चलके थोरकन सुरता लेवव।” काबरकि अब्बड़ मनखेमन आवत-जावत रिहिन, अऊ ओमन ला खाय के मऊका घलो नइं मिलत रिहिस।
MAR 6:32 एकरसेति ओमन डोंगा म चघके एक ठन सुनसान जगह म चल दीन।
MAR 6:33 ओमन ला जावत देखके, कतको झन ओमन ला चिन डारिन अऊ झील के तीरे-तीर दऊड़िन अऊ आघू हबरके उहां ओमन ले मिलिन।
MAR 6:34 जब यीसू डोंगा ले उतरिस अऊ मनखेमन के एक बड़े भीड़ ला देखिस, त ओला ओमन के ऊपर तरस आईस, काबरकि ओमन बिगर चरवाहा के भेड़मन सहीं रिहिन अऊ ओह ओमन ला बहुंत अकन बात सिखोवन लगिस।
MAR 6:35 जब बेरा ह ढरक गीस, तब ओकर चेलामन ओकर करा आके कहिन, “येह एक सुनसान जगह ए अऊ बेरा ह बहुंत ढरक गे हवय।
MAR 6:36 मनखेमन ला भेज ताकि ओमन आसपास के गांव अऊ बस्तीमन म जाके अपन खाय बर कुछू बिसा सकंय।”
MAR 6:37 पर यीसू ह जबाब दीस, “तुमन ओमन ला कुछू खाय बर देवव।” ओमन ओला कहिन, “अतेक मनखे ला खवाय बर, एक मनखे के छै महिना ले जादा के बनी लगही। का हमन जाके, येमन के खाय बर अतेक जादा पईसा खरचा करन?”
MAR 6:38 ओह ओमन ला कहिस, “जाके देखव कि तुम्हर करा कतेक रोटी हवय?” ओमन पता लगाके कहिन, “पांच ठन रोटी अऊ दू ठन मछरी।”
MAR 6:39 तब यीसू ह ओमन ला हुकूम दीस कि जम्मो झन ला हरियर कांदी ऊपर ओरी-ओरी करके बईठा देवव।
MAR 6:40 ओमन सौ-सौ अऊ पचास-पचास के ओरी-ओरी करके बईठ गीन।
MAR 6:41 तब ओह पांचों रोटी अऊ दूनों मछरी ला लीस अऊ स्वरग कोति देखके परमेसर ला धनबाद दीस अऊ रोटी ला टोर-टोरके अपन चेलामन ला देवत गीस कि ओमन मनखेमन ला परोसंय अऊ दूनों मछरी ला घलो मनखेमन म बांट दीस।
MAR 6:42 ओ जम्मो झन खाईन अऊ खाके अघा गीन।
MAR 6:43 चेलामन बांचे-खुचे रोटी अऊ मछरी के टुकड़ा के बारह टुकना भर के उठाईन।
MAR 6:44 खवइयामन म उहां पांच हजार आदमीमन रिहिन।
MAR 6:45 एकर बाद, यीसू ह तुरते अपन चेलामन ला डोंगा म चघाईस कि ओमन ओकर आघू बैतसैदा ला जावंय, जब तक ओह भीड़ के मनखेमन ला बिदा करय।
MAR 6:46 ओमन ला बिदा करके ओह पहाड़ी ऊपर पराथना करे बर गीस।
MAR 6:47 जब संझा होईस, त डोंगा ह झील के मांझा म रहय अऊ यीसू ह एके झन भांठा म रिहिस।
MAR 6:48 ओह देखिस कि चेलामन डोंगा ला खेवत-खेवत थक गे रहंय, काबरकि हवा ह ओमन के उल्टा दिग म बहत रहय। झूलझूलहा, ओह झील ऊपर रेंगत चेलामन करा गीस, अऊ ओमन ले आघू निकले चाहत रिहिस।
MAR 6:49 पर ओमन ओला जब झील ऊपर रेंगत देखिन, त ओमन ओला भूत समझिन, अऊ ओमन चिचियाय लगिन।
MAR 6:50 काबरकि जम्मो चेलामन ओला देखके डरा गे रहंय। यीसू ह तुरते ओमन ले गोठियाईस अऊ कहिस, “हिम्मत रखव, मेंह अंव, झन डरव।”
MAR 6:51 तब ओह ओमन करा डोंगा म चढ़ गीस, अऊ हवा ह सांत हो गीस। ओमन अब्बड़ अचम्भो करन लगिन।
MAR 6:52 काबरकि पांच रोटी अऊ दू ठन मछरी ले पांच हजार मनखेमन ला खवाय के बाद घलो, ओमन नइं समझे रिहिन कि यीसू ह कोन ए। ओमन के मन ह कठोर हो गे रहय।
MAR 6:53 ओमन झील के ओ पार गन्नेसरत सहर म हबरिन, त डोंगा ला उहां रखके उतरिन।
MAR 6:54 ओमन के डोंगा ले उतरतेच ही, मनखेमन तुरते यीसू ला चिन डारिन।
MAR 6:55 मनखेमन आसपास के जम्मो गांव-गंवई म दऊड़के गीन अऊ बिमरहामन ला चटई अऊ खटिया म उठा-उठाके यीसू करा लाने लगिन।
MAR 6:56 अऊ ओह जिहां कहूं भी गांव, नगर या देहात म गीस, मनखेमन बिमरहामन ला सड़क, गली अऊ बजार मन म रखके ओकर ले बिनती करंय कि येमन ला कम से कम तोर ओनहा के छोर ला छुवन दे; अऊ जतेक झन ओला छुईन, ओ जम्मो झन चंगा हो गीन।
MAR 7:1 तब फरीसी अऊ कुछू कानून के गुरू, जऊन मन यरूसलेम ले आय रिहिन, यीसू करा जूरिन
MAR 7:2 अऊ ओमन ओकर कुछू चेलामन ला बिगर हांथ धोय खाना खावत देखिन।
MAR 7:3 (फरीसी अऊ जम्मो यहूदीमन, अपन पुरखा के रीति-रिवाज के मुताबिक जब तक अपन हांथ ला नइं धो लेवंय तब तक खाना नइं खावंय।
MAR 7:4 जब बजार ले घलो आवंय, त जब तक अइसने अपन हांथ ला नइं धो लेवंय, तब तक खाना नइं खावंय। अऊ ओमन अइसने कतेक अऊ रीति-रिवाज ला मानंय, जइसने कटोरी, लोटा अऊ तांबा के बरतन ला धोवई-मंजई।)
MAR 7:5 एकरसेति ओ फरीसी अऊ कानून के गुरूमन यीसू ले पुछिन, “काबर तोर चेलामन, पुरखामन के रीति-रिवाज के मुताबिक नइं चलंय अऊ बिगर हांथ धोवय खाना खावत हवंय?”
MAR 7:6 ओह जबाब देके कहिस, “यसायाह अगमजानी ह तुम ढोंगीमन के बारे म बिलकुल सही अगमबानी करे हवय, जइसने कि बचन म लिखे हवय: “ ‘ये मनखेमन अपन ओंठ ले मोर आदर करथें पर ओमन के हिरदय ह मोर ले दूरिहा हवय।
MAR 7:7 येमन बेकार म मोर अराधना करथें; काबरकि येमन मनखे के बनाय नियममन ला सिखाथें।’
MAR 7:8 तुमन परमेसर के हुकूम ला टारके मनखेमन के रीति-रिवाज ला मानथव।”
MAR 7:9 अऊ यीसू ह ओमन ला कहिस, “परमेसर के हुकूम ला टारके, अपन रीति-रिवाज ला माने के, तुम्हर करा बहुंत बढ़िया तरीका हवय।
MAR 7:10 काबरकि मूसा ह कहे हवय, ‘अपन दाई अऊ ददा के आदरमान करव अऊ जऊन कोनो अपन दाई या ददा के बुरई करथे, ओह मार डारे जावय।’
MAR 7:11 पर तुमन कहिथव कि यदि कोनो अपन ददा या दाई ले कहय कि जऊन मदद तुमन ला मोर कोति ले हो सकत रिहिस, मेंह ओला कुरबान कर दे हवंव (ओला परमेसर ला भेंट के रूप म चघा दे हवंव)।
MAR 7:12 तब तुमन ओला अपन ददा या दाई खातिर अऊ कुछू करन नइं देवव।
MAR 7:13 ये किसम ले तुमन अपन बनाय रीति-रिवाज के दुवारा परमेसर के बचन ला टार देथव अऊ तुमन अइसने-अइसने कतको अऊ काम करथव।”
MAR 7:14 तब फेर यीसू ह मनखेमन के भीड़ ला अपन करा बलाईस अऊ कहिस, “जम्मो झन मोर गोठ ला सुनव अऊ समझव।
MAR 7:15 अइसने कोनो चीज नइं ए, जऊन ह मनखे म बाहिर ले हमाके असुध करय, पर जऊन चीज मनखे के भीतर ले निकलथे, ओहीच ह ओला असुध करथे।
MAR 7:16 जेकर सुने के कान हवय, ओह सुन ले।”
MAR 7:17 जब यीसू ह भीड़ ला छोंड़के घर के भीतर गीस, तब ओकर चेलामन ये पटंतर के बारे म ओला पुछिन?
MAR 7:18 ओह कहिस, “का तुमन घलो नासमझ अव? का तुमन नइं जानव कि जऊन चीज ह बाहिर ले मनखे के भीतर हमाथे, ओह ओला असुध नइं कर सकय।
MAR 7:19 काबरकि ओह मनखे के हिरदय म नइं, पर पेट म जाथे अऊ फेर संडास दुवारा देहें ले बाहिर निकल जाथे।” ये कहे के दुवारा यीसू ह जम्मो खाय के चीजमन ला सुध ठहिराईस।
MAR 7:20 फेर ओह कहिस, “जऊन ह मनखे के भीतर ले निकलथे, ओहीच ह ओला असुध करथे।
MAR 7:21 काबरकि भीतर ले याने कि मनखे के हिरदय ले खराप बिचार—छिनारीपन, चोरी, हतिया,
MAR 7:22 बेभिचार, लोभ, दुस्टता, छल, उघरापन, जलन, निन्दा, अहंकार अऊ गंवारपन निकलथे।
MAR 7:23 ये जम्मो खराप चीज हिरदय के भीतर ले निकलथे अऊ मनखे ला असुध करथे।”
MAR 7:24 यीसू ह ओ जगह ला छोंड़के सूर सहर के इलाका म गीस अऊ उहां ओह एक ठन घर म गीस अऊ चाहत रिहिस कि ओकर बारे म कोनो झन जानय, पर ये बात ह छिपे नइं रहे सकिस।
MAR 7:25 ओतकीच बेर एक माईलोगन, जेकर नानकून बेटी म असुध आतमा रहय, ओकर मेर आईस। ओह यीसू के बारे म सुने रहय अऊ अब आके ओकर गोड़ खाल्हे म गिरिस।
MAR 7:26 ओ माईलोगन ह यूनानी रिहिस अऊ सुरूफिनीकी जाति म जनमे रिहिस। ओह यीसू ले बिनती करके कहिस कि परेत आतमा ला ओकर बेटी ले निकाल दे।
MAR 7:27 यीसू ह ओला कहिस, “पहिली लइकामन ला पेट भर खावन दे। काबरकि लइकामन के रोटी ला लेके कुकुरमन ला देवई ठीक नो हय।”
MAR 7:28 तब ओ माईलोगन ह कहिस, “येह सही अय, परभू। तभो ले कुकुरमन घलो मेज के खाल्हे म लइकामन के जूठा-काठा ला खा लेथें।”
MAR 7:29 यीसू ह ओला कहिस, “तेंह सही कहय। जा, परेत आतमा ह तोर बेटी ले निकल गे हवय।”
MAR 7:30 तब ओह अपन घर जाके देखिस कि ओकर लइका ह खटिया म लेटे हवय अऊ परेत आतमा निकल गे रहय।
MAR 7:31 तब यीसू ह सूर सहर के इलाका ले निकलके सीदोन होवत, गलील के झील के खाल्हे दिकापुलिस के इलाका म आईस।
MAR 7:32 उहां मनखेमन एक कोंदा अऊ भैंरा मनखे ला ओकर करा लानिन अऊ ओकर ले बिनती करिन कि ओह ओ मनखे ऊपर अपन हांथ रखके ओला बने करय।
MAR 7:33 तब यीसू ह ओला भीड़ ले अलग ले जाके अपन अंगरी ला मनखे के कान म डारिस अऊ थूकिस, अऊ थूक ला लेके ओकर जीभ ला छुईस।
MAR 7:34 अऊ स्वरग कोति निहारके सांस भरिस अऊ ओ मनखे ला कहिस, “इफ्‍फतह,” जेकर मतलब होथे “खुल जा।”
MAR 7:35 ओतकीच बेर ओ मनखे के कानमन खुल गीन अऊ जीभ के रूकावट घलो ठीक हो गीस अऊ ओह साफ-साफ सुने अऊ गोठियाय लगिस।
MAR 7:36 यीसू ह ओमन ला चेताके कहिस कि ये बात कोनो ला झन बतावव, पर जतका ओह ओमन ला चेताईस, ओतका ओमन ओ बात ला अऊ जादा बताय लगिन।
MAR 7:37 मनखेमन बहुंत अचम्भो करके कहन लगिन, “जऊन कुछू ओह करथे, बहुंत बढ़िया करथे। इहां तक कि ओह भैंरामन ला सुने के अऊ कोंदामन ला गोठियाय के सक्ति देथे।”
MAR 8:1 ओ समय म फेर एक बड़े भीड़ जूर गीस अऊ ओमन करा खाय बर कुछू नइं रिहिस। एकरसेति यीसू ह अपन चेलामन ला अपन करा बलाके कहिस,
MAR 8:2 “मोला ये मनखेमन ऊपर तरस आवत हवय। येमन तीन दिन ले मोर संग हवंय अऊ ओमन करा खाय बर कुछू नइं ए।
MAR 8:3 यदि मेंह येमन ला भूखन पेट घर पठो दंव, त डहार म ही थकके गिर जाहीं, काबरकि येमन ले कतको झन अब्बड़ दूरिहा ले आय हवंय।”
MAR 8:4 ओकर चेलामन कहिन, “ये सुनसान जगह म कोनो कहां ले अतेक रोटी पाही कि येमन पेट भर खा सकंय।”
MAR 8:5 यीसू ह पुछिस, “तुम्हर करा के ठन रोटी हवय?” ओमन कहिन, “सात ठन।”
MAR 8:6 तब ओह मनखेमन ला भुइयां म बईठे बर कहिस अऊ सातों रोटी ला लेके परमेसर ला धनबाद दीस अऊ रोटीमन ला टोर-टोरके अपन चेलामन ला देवत गीस कि ओमन मनखेमन ला परोसंय अऊ ओमन मनखेमन ला परोसत गीन।
MAR 8:7 ओमन करा कुछू छोटे-छोटे मछरी घलो रिहिस, ओकर बर घलो यीसू ह परमेसर ला धनबाद दीस अऊ चेलामन ला कहिस कि येला घलो मनखेमन ला बांट देवव।
MAR 8:8 मनखेमन खाके अघा गीन; ओकर बाद चेलामन बांचे-खुचे टुकड़ामन के सात टुकना भर के उठाईन।
MAR 8:9 उहां करीब चार हजार मनखे रिहिन। ओकर बाद ओह ओमन ला बिदा करिस।
MAR 8:10 एकर बाद, ओह तुरतेच अपन चेलामन संग डोंगा म चघिस अऊ दलमनूता के इलाका म चल दीस।
MAR 8:11 तब फरीसीमन आके ओकर संग बहस करन लगिन अऊ ओला परखे खातिर स्वरग ले कोनो चिनहां देखाय बर कहिन।
MAR 8:12 ओह गहरई ले आतमा म दुखित होके कहिस, “काबर ये पीढ़ी के मनखेमन एक चिनहां के मांग करथें? मेंह तुमन ला सच कहत हंव कि येमन ला कोनो चिनहां नइं दिये जावय।”
MAR 8:13 तब ओह ओमन ला छोंड़के फेर डोंगा म चघिस अऊ ओ पार चल दीस।
MAR 8:14 चेलामन रोटी लाने बर भुला गे रिहिन अऊ डोंगा म ओमन करा सिरिप एके ठन रोटी रिहिस।
MAR 8:15 यीसू ह ओमन ला चेताके कहिस, “फरीसीमन के खमीर अऊ हेरोदेस के खमीर ले सचेत रहव।”
MAR 8:16 ओमन एक-दूसर ले एकर बारे म बिचार करिन अऊ कहिन, “हमन रोटी लाने बर भुला गे हवन, तेकर बारे म ओह गोठियावत होही।”
MAR 8:17 ओमन के सोच-बिचार ला जानके यीसू ह ओमन ले पुछिस, “तुमन काबर अइसने गोठियावत हव कि तुम्हर करा रोटी नइं ए? का तुमन अभी तक ले नइं देखत अऊ समझत हवव? का तुम्हर हिरदय ह कठोर हो गे हवय?
MAR 8:18 का तुमन आंखी के रहत नइं देखत हवव अऊ कान के रहत नइं सुनत हवव? का तुमन ला कुछू सुरता नइं ए?
MAR 8:19 जब मेंह पांच ठन रोटी ला टोरके पांच हजार मनखेमन ला खवाय रहेंव, त तुमन, कतेक ठन टुकना भरके टुकड़ामन ला उठाय रहेव?” ओमन कहिन, “बारह टुकना।”
MAR 8:20 “अऊ जब मेंह सात ठन रोटी म ले चार हजार मनखेमन ला खवाय रहेंव, त तुमन, के ठन टुकना भरके टुकड़ामन ला उठाय रहेव?” ओमन कहिन, “सात टुकना।”
MAR 8:21 ओह ओमन ला कहिस, “का तुमन अब तक नइं समझत हवव?”
MAR 8:22 जब ओमन बैतसैदा गांव म आईन, त मनखेमन एक अंधरा ला लानिन अऊ यीसू ले बिनती करिन कि ओला छूके बने करय।
MAR 8:23 ओह ओ अंधरा मनखे के हांथ ला धरके गांव के बाहिर ले गीस अऊ ओकर आंखी म थूकके ओकर ऊपर अपन हांथ रखिस अऊ ओकर ले पुछिस, “का तोला कुछू दिखत हे?”
MAR 8:24 ओह आंखी ला उठाके कहिस, “मेंह मनखेमन ला देखत हंव; ओमन मोला एती-ओती चलत-फिरत रूख सहीं दिखत हवंय।”
MAR 8:25 एक बार फेर यीसू ह अपन हांथ ला ओकर आंखी ऊपर रखिस, तब ओ मनखे ह निहारे लगिस अऊ ओकर आंखीमन बने हो गीन अऊ ओह जम्मो ला साफ-साफ देखन लगिस।
MAR 8:26 यीसू ह ओला ये कहिके घर पठोईस, “गांव म झन जाबे।”
MAR 8:27 यीसू अऊ ओकर चेलामन कैसरिया-फिलिप्पी के गांवमन म गीन। डहार म ओह अपन चेलामन ले पुछिस, “मनखेमन मोला कोन ए कहिथें?”
MAR 8:28 ओमन कहिन, “कुछू मन कहिथें—यूहन्ना बतिसमा देवइया, कोनो-कोनो एलियाह ए कहिथें अऊ कुछू मन तोला अगमजानीमन ले एक झन ए कहिथें।”
MAR 8:29 ओह ओमन ले पुछिस, “पर तुमन मोला का कहिथव?” पतरस ह कहिस, “तेंह मसीह अस।”
MAR 8:30 पर यीसू ह ओमन ला चेताके कहिस कि ओकर बारे म कोनो ला झन बतावंय।
MAR 8:31 तब ओह ओमन ला सिखोय के सुरू करिस कि मनखे के बेटा के खातिर ये जरूरी अय कि ओह बहुंत दुख उठावय, अऊ अगुवा, मुखिया पुरोहित अऊ कानून के गुरूमन के दुवारा तिरस्कार करे जावय अऊ जरूरी ए कि ओह मार डारे जावय, पर तीन दिन के पाछू ओह फेर जी उठय।
MAR 8:32 ओह ये बात ला साफ-साफ कहिस। एकर खातिर पतरस ह ओला अलग ले जाके डांटे लगिस।
MAR 8:33 पर यीसू ह मुड़के अपन चेलामन कोति देखिस अऊ पतरस ला दबकारके कहिस, “मोर नजर ले दूर हट, सैतान! काबरकि तोर मन म परमेसर के बात नइं, पर मनखेमन के बात हवय।”
MAR 8:34 तब ओह भीड़ ला अपन चेलामन संग लकठा म बलाके कहिस, “जऊन कोनो मोर चेला बने चाहत हे, त येह जरूरी ए कि ओह अपन ईछा ला मारय अऊ दुख उठाय बर तियार रहय। अऊ तब मोर पाछू हो लेवय।
MAR 8:35 काबरकि जऊन कोनो अपन परान ला बचाय चाहथे, ओह सदाकाल के जिनगी ला गंवाही, पर जऊन कोनो मोर अऊ सुघर संदेस के खातिर अपन परान ला गंवाथे, ओह ओला बचाही।
MAR 8:36 यदि मनखे ह जम्मो संसार ला पा जावय, पर अपन परान ला गंवा दे, त ओला का फायदा?
MAR 8:37 या कोनो मनखे अपन परान के बदले का दे सकथे?
MAR 8:38 जऊन कोनो ये छिनारी अऊ पापी पीढ़ी के मनखेमन के आघू म मोर अऊ मोर संदेस ले लजाथे, त मनखे के बेटा ह घलो ओकर ले लजाही, जब ओह अपन ददा के महिमा म पबितर स्वरगदूतमन संग आही।”
MAR 9:1 यीसू ह ओमन ला ये घलो कहिस, “मेंह तुमन ला सच कहत हंव कि कुछू झन, जऊन मन इहां ठाढ़े हवंय, तब तक नइं मरंय जब तक कि ओमन परमेसर के राज ला सामर्थ के संग आवत नइं देख लीहीं।”
MAR 9:2 छै दिन के बाद, यीसू ह पतरस, याकूब अऊ यूहन्ना ला एक ठन ऊंचहा पहाड़ ऊपर ले गीस। उहां ओमन के छोंड़ अऊ कोनो नइं रिहिस। तब ओमन के आघू म यीसू के रूप ह बदल गीस।
MAR 9:3 ओकर ओनहा ह झक पंर्रा हो गे अऊ अइसने चमके लगिस कि संसार म कोनो अइसने उज्‍जर नइं कर सकय।
MAR 9:4 अऊ उहां ओमन ला एलियाह अऊ मूसा दिखिन, जऊन मन यीसू के संग गोठियावत रहंय।
MAR 9:5 तब पतरस ह यीसू ला कहिस, “हे गुरू! हमन के इहां रहई बने अय। एकरसेति हमन तीन ठन मंडप बनाथन—एक ठन तोर बर, एक मूसा बर अऊ एक एलियाह बर।”
MAR 9:6 (ओह नइं जानत रहय कि का कहे जावय, काबरकि ओमन अब्बड़ डरा गे रहंय।)
MAR 9:7 तब एक ठन बादर ओमन ला ढांप लीस अऊ ओ बादर म ले ये अवाज आईस, “येह मोर मयारू बेटा ए, एकर बात ला सुनव।”
MAR 9:8 तब अचानक जब ओमन चारों कोति देखिन, त यीसू के छोंड़ अऊ कोनो ला अपन संग नइं देखिन।
MAR 9:9 जब ओमन पहाड़ ले उतरत रिहिन, त यीसू ह ओमन ला हुकूम दीस कि जब तक मनखे के बेटा ह मरे म ले नइं जी उठय, तब तक जऊन कुछू तुमन देखे हवव, कोनो ला झन बतावव।
MAR 9:10 ओमन ये बात ला अपन मन म रखिन अऊ ये बिचार करन लगिन कि “मरे म ले जी उठे” के का मतलब होथे?
MAR 9:11 तब ओमन यीसू ले पुछिन, “कानून के गुरूमन काबर कहिथें कि पहिली एलियाह के अवई जरूरी अय।”
MAR 9:12 यीसू ह ओमन ला ये जबाब दीस, “ये बात सही अय कि एलियाह पहिली आही, अऊ जम्मो चीज ला ठीक करही। पर मनखे के बेटा के बारे म ये काबर लिखे हवय कि ओह अब्बड़ दुख उठाही अऊ तुछ समझे जाही?
MAR 9:13 पर मेंह तुमन ला कहत हंव कि एलियाह ह आ चुके हवय अऊ जइसने कि ओकर बारे म लिखे हवय—ओमन जइसने चाहिन, वइसने ओकर संग बरताव करिन।”
MAR 9:14 जब ओमन बाकि चेलामन करा आईन, त देखिन एक भारी भीड़ ओमन के चारों खूंट जूरे रहय अऊ कानून के गुरूमन ओमन के संग बहस करत रहंय।
MAR 9:15 यीसू ला देखके मनखेमन चकित हो गीन अऊ ओकर से मिले बर दऊड़े लगिन।
MAR 9:16 यीसू ह ओमन ले पुछिस, “तुमन येमन संग का बहस करत हव?”
MAR 9:17 भीड़ म ले एक झन जबाब दीस, “हे गुरू, मेंह अपन बेटा ला जऊन म कोंदा आतमा हमा गे हवय, तोर करा लाने रहेंव।
MAR 9:18 जब भी ओ आतमा ओला धरथे, ओला भुइयां म पटकथे, अऊ ओकर मुहूं ले झाग निकलथे अऊ दांतमन ला किटकिटाथे अऊ अकड़ जाथे। मेंह तोर चेलामन ला कहेंव कि ओ आतमा ला निकाल देवंय, पर ओमन निकाले नइं सकिन।”
MAR 9:19 यीसू ह कहिस, “हे अबिसवासी पीढ़ी के मनखेमन! कब तक मेंह तुम्हर संग रहिहूं, अऊ कब तक तुम्हर सहत रहिहूं? ओ छोकरा ला मोर करा लानव।”
MAR 9:20 तब ओमन ओ छोकरा ला ओकर करा लानिन। जब ओ आतमा ह यीसू ला देखिस, त तुरते ओह छोकरा ला मुरेरिस। ओ छोकरा ह भुइयां म गिरके घोलड़न लगिस अऊ ओकर मुहूं ले झाग निकलत रहय।
MAR 9:21 यीसू ह ओ छोकरा के ददा ले पुछिस, “येला कब ले अइसने होवत हे?” ओह कहिस, “लइकापन ले।
MAR 9:22 परेत आतमा ह येला मारे बर कभू आगी अऊ कभू पानी म गिराथे। पर कहूं तेंह कुछू कर सकथस, त हमर ऊपर दया करके हमर मदद कर।”
MAR 9:23 यीसू ह कहिस, “कहूं तेंह कुछू कर सकथस, एकर का मतलब? का तेंह नइं जानथस कि जऊन ह बिसवास करथे, ओकर बर हर बात हो सकथे।”
MAR 9:24 छोकरा के ददा ह तुरते गुलगुला होके कहिस, “मेंह बिसवास करत हंव, परभू! मोर अबिसवास ला दूर करे बर मोर मदद कर।”
MAR 9:25 जब यीसू ह देखिस कि भीड़ ह बढ़त हे, त ओह असुध आतमा ला दबकारके कहिस, “हे भैंरा अऊ कोंदा आतमा! मेंह तोला हुकूम देवत हंव कि ओमा ले निकल जा अऊ ओमा फेर कभू झन हमाबे।”
MAR 9:26 ओ आतमा ह चिचियाके छोकरा ला अब्बड़ मुरेरिस अऊ ओमा ले निकल गीस। तब ओ छोकरा ह मरे सहीं हो गे, अऊ बहुंत झन कहन लगिन, “ओह मर गीस।”
MAR 9:27 पर यीसू ह ओकर हांथ ला धरके ओला उठाईस अऊ ओह ठाढ़ हो गीस।
MAR 9:28 यीसू के घर के भीतर जाय के पाछू, अकेला म ओकर चेलामन ओकर ले पुछिन, “हमन काबर ओ परेत आतमा ला निकाल नइं सकेंन?”
MAR 9:29 ओह कहिस, “ये किसम के आतमा ह पराथना के छोंड़ अऊ कोनो उपाय ले नइं निकलय।”
MAR 9:30 ओमन ओ जगह ला छोंड़के गलील प्रदेस म ले होके जावत रिहिन अऊ यीसू नइं चाहत रिहिस कि कोनो ओमन के ठिकाना के बारे म जानंय।
MAR 9:31 काबरकि ओह अपन चेलामन ला सिखोवत रिहिस। ओह ओमन ला कहिस, “मनखे के बेटा ह मनखेमन के हांथ म पकड़वाय जाही। ओमन ओला मार डारहीं अऊ मरे के तीन दिन के पाछू ओह जी उठही।”
MAR 9:32 पर ये गोठ ह ओमन के समझ म नइं आईस अऊ ओमन एकर बारे म ओकर ले पुछे बर डरावत रिहिन।
MAR 9:33 फेर ओमन कफरनहूम सहर म आईन अऊ घर म आके यीसू ह चेलामन ले पुछिस, “रसता म तुमन का गोठ ला लेके बहस करत रहेव?”
MAR 9:34 पर ओमन चुपेचाप रिहिन, काबरकि डहार म ओमन एक-दूसर ले ये बहस करत रिहिन कि ओमन के बीच म सबले बड़े कोन ए।
MAR 9:35 बईठे के पाछू, यीसू ह बारह चेलामन ला बलाके कहिस, “कहूं कोनो सबले बड़े होय चाहथे, त ओह सबले छोटे अऊ सब के सेवक बनय।”
MAR 9:36 तब ओह एक छोटे लइका ला लेके ओमन के बीच म ठाढ़ करिस अऊ ओला अपन कोरा म पाके ओमन ला कहिस,
MAR 9:37 “जऊन कोनो मोर नांव म अइसने छोटे लइका ला गरहन करथे, ओह मोला गरहन करथे, अऊ जऊन कोनो मोला गरहन करथे ओह सिरिप मोला नइं, पर मोर पठोइया ला घलो गरहन करथे।”
MAR 9:38 यूहन्ना ह यीसू ला कहिस, “गुरूजी! हमन एक मनखे ला तोर नांव म परेत आतमामन ला निकालत देखेंन, अऊ हमन ओला कहेंन कि ओह अइसने झन करय। काबरकि ओह हमन म ले नो हय।”
MAR 9:39 यीसू ह कहिस, “ओला झन रोकव,” “अइसने कोनो नइं ए जऊन ह मोर नांव म चमतकार के काम करे अऊ तुरते मोर बारे म खराप बात बोल सकय,
MAR 9:40 काबरकि जऊन ह हमर बिरोध म नइं ए, ओह हमर कोति हवय।
MAR 9:41 कहूं कोनो तुमन ला मोर नांव म, मसीह के मनखे जानके एक गिलास पानी देथे, त मेंह तुमन ला सच कहत हंव, ओह एकर ईनाम जरूर पाही।
MAR 9:42 “अऊ कोनो मनखे मोर ऊपर बिसवास करइया ये छोटे मन ले कोनो के पाप म गिरे के कारन बनथे, त ओकर बर बने होतिस कि एक ठन बड़े जांता के पथरा ला ओकर घेंच म बांधके ओला समुंदर म फटिक दिये जावय।
MAR 9:43 कहूं तोर हांथ ह तोर पाप म गिरे के कारन बनथे, त ओला काट डार। तोर बर लूलवा होके सदाकाल के जिनगी म प्रवेस करई ह बने अय, एकर बनिस्पत कि दूनों हांथ के रहत, तोला नरक के आगी म डारे जावय, जऊन ह कभू नइं बुतावय।
MAR 9:44 जिहां, “ ‘जऊन कीरामन ओमन ला खाथें, ओमन नइं मरंय, अऊ आगी ह कभू नइं बुतावय।’
MAR 9:45 अऊ कहूं तोर गोड़ ह तोर पाप म गिरे के कारन बनथे, त ओला काट डार। तोर बर येह बने अय कि खोरवा होके सदाकाल के जिनगी म प्रवेस कर, एकर बनिस्पत कि दूनों गोड़ के रहत, तोला नरक म डारे जावय।
MAR 9:46 जिहां, “ ‘जऊन कीरामन ओमन ला खाथें, ओमन नइं मरंय, अऊ आगी ह कभू नइं बुतावय।’
MAR 9:47 अऊ कहूं तोर आंखी ह तोर पाप म गिरे के कारन बनथे, त ओला निकाल दे। तोर बर येह बने अय कि एक आंखी ले कनवां होके परमेसर के राज म प्रवेस कर, एकर बनिस्पत कि दूनों आंखी के रहत, तोला नरक म डार दिये जावय,
MAR 9:48 जिहां, “ ‘जऊन कीरामन ओमन ला खाथें, ओमन नइं मरंय, अऊ आगी ह कभू नइं बुतावय।’
MAR 9:49 हर एक मनखे आगी के दुवारा नूनचूर करे जाही।
MAR 9:50 “नून ह बने ए। पर कहूं येह अपन सुवाद ला गंवा देथे, त तुमन कइसने येला फेर नूनचूर कर सकथव? अपन म नून के सुवाद रखव, अऊ एक-दूसर के संग मिल जूरके रहव।”
MAR 10:1 तब यीसू ह ओ जगह ला छोंड़के यहूदिया प्रदेस के इलाका अऊ यरदन नदी के ओ पार गीस। अऊ मनखेमन के भीड़ ह फेर ओकर करा जूर गीस, अऊ अपन रीति के मुताबिक ओह ओमन ला उपदेस देवन लगिस।
MAR 10:2 तब कुछू फरीसीमन आके ओला परखे बर पुछन लगिन, “कहूं कोनो आदमी अपन घरवाली ला तियाग देथे, त का येह कानून के मुताबिक सही अय?”
MAR 10:3 ओह ओमन ला कहिस, “मूसा ह तुमन ला का हुकूम दे हवय?”
MAR 10:4 ओमन कहिन, “मूसा ह मरद ला तियाग पतर लिखके अपन घरवाली ला छोंड़े के हुकूम दे हवय।”
MAR 10:5 यीसू ह कहिस, “तुम्हर हिरदय के कठोरता के कारन मूसा ह अइसने हुकूम तुम्हर बर लिखे हवय।
MAR 10:6 पर ये संसार के सुरू म परमेसर ह ओमन ला नर अऊ नारी करके बनाईस।
MAR 10:7 एकरे कारन मरद ह अपन दाई-ददा ले अलग होके अपन घरवाली संग मिले रहिही।
MAR 10:8 अऊ ओ दूनों एक तन होहीं। ओमन अब दू नइं, पर एक अंय।
MAR 10:9 एकरसेति, जऊन ला परमेसर ह जोड़े हवय, ओला कोनो मनखे अलग झन करय।”
MAR 10:10 जब ओमन घर के भीतर आईन, त चेलामन एकर बारे म यीसू ले फेर पुछिन।
MAR 10:11 ओह कहिस, “जऊन कोनो अपन घरवाली ला छोंड़के आने माईलोगन ले बिहाव करथे, त ओह पहिली घरवाली के बिरोध म छिनारी करथे।
MAR 10:12 अऊ कहूं, कोनो माईलोगन ह अपन घरवाला ला छोंड़के आने मनखे ले बिहाव करथे, त ओह घलो छिनारी करथे।”
MAR 10:13 मनखेमन छोटे लइकामन ला यीसू करा लाने लगिन कि ओह ओमन ऊपर अपन हांथ रखय, पर चेलामन मनखेमन ला दबकारे लगिन।
MAR 10:14 जब यीसू ह येला देखिस, त नराज होके ओमन ला कहिस, “छोटे लइकामन ला मोर करा आवन दव; ओमन ला झन रोकव, काबरकि परमेसर के राज ह अइसने मन बर अय।
MAR 10:15 मेंह तुमन ला सच कहत हंव, जऊन ह परमेसर के राज ला एक छोटे लइका सहीं गरहन नइं करही, ओह परमेसर के राज म कभू जाय नइं पाही।”
MAR 10:16 अऊ ओह लइकामन ला अपन कोरा म पाईस अऊ ओमन ऊपर अपन हांथ रखके ओमन ला आसीस दीस।
MAR 10:17 जब यीसू ह फेर डहार म जावत रिहिस, त एक मनखे दऊड़के आईस अऊ ओकर गोड़ खाल्हे माड़ी के भार गिरके ओकर ले पुछिस, “हे बने गुरू! सदाकाल के जिनगी पाय बर मेंह का करंव?”
MAR 10:18 यीसू ह ओला कहिस, “तेंह मोला काबर बने कहत हवस? सिरिप परमेसर के छोंड़, अऊ कोनो बने नो हंय।
MAR 10:19 तेंह हुकूममन ला त जानत हवस: ‘हतिया झन करव, छिनारी झन करव, चोरी झन करव, लबारी गवाही झन देवव, कोनो ला झन ठगव, अपन दाई-ददा के आदरमान करव।’”
MAR 10:20 ओ मनखे ह कहिस, “हे गुरू! ये जम्मो ला मेंह अपन लइकापन ले मानत आवत हंव।”
MAR 10:21 ओला देखके, यीसू ला ओकर ऊपर मया आईस। यीसू ह ओला कहिस, “तोर म एक बात के कमी हवय। जा, जऊन कुछू तोर करा हवय, ओ जम्मो ला बेचके गरीबमन ला देय दे, अऊ तोला स्वरग म धन मिलही। तब आ अऊ मोर पाछू हो ले।”
MAR 10:22 ये बचन सुनके ओ मनखे के चेहरा ह उतर गे अऊ ओह उदास होके उहां ले चल दीस, काबरकि ओकर मेर अब्बड़ संपत्ति रिहिस।
MAR 10:23 यीसू ह चारों कोति देखके अपन चेलामन ला कहिस, “धनवान मनखे के परमेसर के राज म जवई कतेक कठिन ए।”
MAR 10:24 चेलामन ओकर बात ला सुनके चकित हो गीन। पर यीसू ह फेर कहिस, “हे लइकामन हो! परमेसर के राज म जवई कतेक कठिन ए।
MAR 10:25 परमेसर के राज म धनवान मनखे के जाय के बनिस्पत सूजी के छेदा म ले ऊंट के निकल जवई सरल अय।”
MAR 10:26 चेलामन अऊ जादा चकित होके एक-दूसर ला कहिन, “त फेर कोन ह उद्धार पा सकथे?”
MAR 10:27 यीसू ह ओमन कोति देखिस अऊ कहिस, “ये बात ह मनखे के दुवारा संभव नो हय, पर परमेसर के दुवारा जम्मो बात ह संभव अय।”
MAR 10:28 पतरस ह ओला कहिस, “देख, हमन तो जम्मो कुछू ला छोंड़के तोर पाछू हो ले हवन।”
MAR 10:29 यीसू ह कहिस, “मेंह तुमन ला सच कहत हंव कि जऊन कोनो, मोर अऊ सुघर संदेस बर अपन घर या भाई या बहिनी या दाई या ददा या लइकामन या खेत-खार ला छोंड़ दे हवय,
MAR 10:30 ओह ये समय म ये चीजमन ला सौ गुना पाही: घर, भाई, बहिनी, दाई, लइका अऊ खेत-खार—अऊ संग म सतावा अऊ अवइया जुग म ओला सदाकाल के जिनगी मिलही।
MAR 10:31 पर कतको झन जऊन मन अभी आघू म हवंय, ओमन आखिरी म हो जाहीं अऊ जऊन मन आखिरी म हवंय, ओमन आघू हो जाहीं।”
MAR 10:32 ओमन यरूसलेम के डहार म रिहिन अऊ यीसू ह आघू-आघू रेंगत रहय। चेलामन घबरा गे रहंय अऊ पाछू रेंगइयामन डरा गे रहंय। यीसू ह फेर बारहों झन ला अलग ले जाके ओमन ला बताय लगिस कि ओकर संग का होवइया हवय।
MAR 10:33 ओह कहिस, “देखव, हमन यरूसलेम जावत हन अऊ हां मनखे के बेटा ला पकड़के मुखिया पुरोहितमन अऊ कानून के गुरूमन के हांथ म सऊंपे जाही, अऊ ओमन ओला मार डारे के सजा दीहीं अऊ ओला आनजातमन के हांथ म सऊंप दीहीं।
MAR 10:34 जऊन मन ओकर हंसी उड़ाहीं अऊ ओकर ऊपर थूकहीं अऊ ओला कोर्रा म मारहीं अऊ ओला मार डारहीं। पर तीन दिन के पाछू ओह जी उठही।”
MAR 10:35 तब जबदी के बेटा याकूब अऊ यूहन्ना ओकर करा आके कहिन, “हे गुरू, हमन चाहथन कि जऊन कुछू हमन तोर ले मांगबो, ओही ला तेंह हमर बर कर।”
MAR 10:36 ओह पुछिस, “तुमन का चाहथव कि मेंह तुम्हर बर करंव?”
MAR 10:37 ओमन कहिन, “तोर राज म जब तेंह सिंघासन म बईठबे, त हमर दूनों म के एक झन ला तोर जेवनी अऊ दूसर ला तोर डेरी कोति बईठन देबे।”
MAR 10:38 तब यीसू ह ओमन ला कहिस, “तुमन नइं जानत हव कि तुमन का मांगत हव? जऊन दुख के कटोरा म ले मेंह पीवइया हवंव, का तुमन ओला पी सकथव? या जऊन बतिसमा ला मेंह लेवइया हवंव, का तुमन ओ बतिसमा ला ले सकहू?”
MAR 10:39 ओमन कहिन, “हमर ले ये हो सकथे।” तब यीसू ह ओमन ला कहिस, “जऊन कटोरा म ले मेंह पीहूं, ओमा ले तुमन पीहू अऊ जऊन बतिसमा मेंह लूहूं, ओला तुमन लूहू,
MAR 10:40 पर मोर जेवनी या डेरी कोति बईठाय के मोला अधिकार नइं ए। ये जगह ओमन के अय, जेमन बर येला तियार करे गे हवय।”
MAR 10:41 जब आने दस चेलामन ये बात ला सुनिन, त ओमन याकूब अऊ यूहन्ना ऊपर गुस्सा करिन।
MAR 10:42 एकरसेति यीसू ह ओमन ला एक संग अपन लकठा म बलाके कहिस, “जइसने कि तुमन जानथव, जऊन मन आनजातमन के हाकिम समझे जाथें, ओमन आनजातमन ऊपर परभूता करथें अऊ ओमन के बड़े अधिकारीमन ओमन ऊपर अधिकार जमाथें।
MAR 10:43 तुमन के संग अइसने नइं होवय। पर जऊन ह तुमन म बड़े होय चाहथे, ओह तुम्हर सेवक बनय,
MAR 10:44 अऊ जऊन ह सबले पहिली होय चाहथे, ओह जम्मो झन के गुलाम बनय।
MAR 10:45 काबरकि मनखे के बेटा ह अपन सेवा करवाय बर नइं आईस, पर एकर खातिर आईस कि ओह आने मन के सेवा करय अऊ बहुंत झन के छुड़ौती बर अपन परान ला देवय।”
MAR 10:46 तब यीसू अऊ ओकर चेलामन यरीहो सहर म आईन अऊ जब ओमन एक बड़े भीड़ के संग यरीहो ले निकलके जावत रिहिन, त बरतिमाई (जेकर मतलब होथे “तिमाई के बेटा”) नांव के एक अंधरा मनखे सड़क के तीर म बईठके भीख मांगत रहय।
MAR 10:47 ओह ये सुनके कि नासरत के यीसू अय, चिचियाके कहिस, “हे यीसू, दाऊद के संतान, मोर ऊपर दया कर!”
MAR 10:48 कतको झन ओला दबकारके कहिन, “चुपे रह।” पर ओह अऊ चिचियाके कहिस, “हे दाऊद के संतान! मोर ऊपर दया कर।”
MAR 10:49 जब यीसू ह सुनिस, त ठाढ़ होके कहिस, “ओला इहां बलावव।” तब मनखेमन ओ अंधरा ला बलाके कहिन, “खुसी मना अऊ उठ। ओह तोला बलावत हवय।”
MAR 10:50 ओह अपन ओढ़ना ला फटिक दीस अऊ कूदके ठाढ़ हो गीस अऊ यीसू करा आईस।
MAR 10:51 यीसू ह ओकर ले पुछिस, “तेंह का चाहत हस कि मेंह तोर बर करंव?” ओ अंधरा ह कहिस, “हे गुरू! मेंह देखे बर चाहत हंव।”
MAR 10:52 यीसू ह कहिस, “जा, तोर बिसवास ह तोला बने करे हवय।” अऊ तुरते ओह देखे लगिस अऊ डहार म यीसू के पाछू हो लीस।
MAR 11:1 जब ओमन यरूसलेम के लकठा म हबरिन अऊ जैतून पहाड़ के बैतफगे अऊ बैतनियाह गांव करा आईन, त यीसू ह अपन चेलामन ले दू झन ला ये कहिके पठोईस,
MAR 11:2 “तुमन आघू के गांव म जावव, अऊ जइसने ही तुमन उहां हबरहू, तुमन ला उहां एक ठन गदही के बछेड़ा बंधाय मिलही, जेकर ऊपर कभू कोनो सवारी नइं करे हवंय। ओला ढीलके इहां ले आवव।
MAR 11:3 कहूं कोनो तुम्हर ले पुछय कि अइसने काबर करत हव? त ओला कहव कि परभू ला एकर जरूरत हवय, अऊ ओह जल्दी ओला इहां पठो दीही।”
MAR 11:4 ओमन गीन अऊ एक ठन गदही के पीला ला गली म, एक ठन घर के दुवार म बंधाय पाईन, अऊ ओमन जब ओला ढीलन लगिन,
MAR 11:5 त जऊन मन उहां ठाढ़े रहंय, ओमन पुछिन, “ये गदही के पीला ला काबर ढीलत हवव?”
MAR 11:6 जइसने यीसू ह ओमन ला कहे रिहिस, ओमन वइसनेच कहिन। तब मनखेमन ओमन ला जावन दीन।
MAR 11:7 ओमन गदही के बछेड़ा ला यीसू करा लानके, ओकर ऊपर अपन ओनहामन ला डालिन अऊ यीसू ह ओकर ऊपर बईठ गीस।
MAR 11:8 अऊ कतको झन अपन ओनहा ला ओकर आघू, डहार म दसा दीन अऊ कतको झन खेतमन के डारामन ला काटके डहार म दसा दीन।
MAR 11:9 जऊन मन ओकर आघू-आघू जावत अऊ जऊन मन पाछू-पाछू आवत रहंय, ओमन चिचिया-चिचियाके कहत रिहिन, “होसाना!” “धइन ए ओ, जऊन ह परभू के नांव म आथे।”
MAR 11:10 “धइन ए हमर पुरखा दाऊद राजा के अवइया राज के!” “सबले ऊंच स्वरग म होसाना!”
MAR 11:11 यीसू ह यरूसलेम म आके यहूदीमन के मंदिर म गीस अऊ चारों खूंट जम्मो चीजमन ला देखके अपन बारहों चेलामन संग बैतनियाह चल दीस, काबरकि सांझ हो गे रहय।
MAR 11:12 ओकर दूसर दिन जब ओमन बैतनियाह ले जावत रिहिन, त यीसू ला भूख लगिस।
MAR 11:13 थोरकन दूरिहा म, एक ठन हरियर अंजीर के रूख ला देखके, यीसू ह ये सोचके उहां गीस कि ओ रूख म कुछू फर होही, पर ओह जब उहां गीस, त ओला उहां पान के छोंड़ कुछू नइं मिलिस, काबरकि ओह फर के मौसम नइं रिहिस।
MAR 11:14 तब ओह रूख ला कहिस, “अब ले फेर तोर म फर कभू झन लगय।” अऊ ओकर चेलामन ये गोठ ला सुनत रिहिन।
MAR 11:15 ओमन यरूसलेम सहर म आईन। अऊ यीसू ह मंदिर म गीस, अऊ जऊन मन उहां बेचे अऊ बिसाय के काम करत रहंय, ओमन ला बाहिर निकाले के सुरू करिस। ओह रूपिया-पईसा के अदला-बदली करइयामन के मेज अऊ पंड़की बेचइयामन के बेंचमन ला खपल दीस,
MAR 11:16 अऊ मंदिर के सीमना म कोनो ला लेन-देन करे के सामान लेके आवन-जावन नइं दीस।
MAR 11:17 ओह ओमन ला उपदेस देके कहिस, “का परमेसर के बचन म ये नइं लिखे हवय: ‘मोर घर ह जम्मो जाति के मनखेमन बर पराथना के घर होही? पर तुमन येला डाकूमन के अड्डा बना दे हवव।’”
MAR 11:18 येला सुनके, मुखिया पुरोहित अऊ कानून के गुरूमन ओला मार डारे के मऊका खोजन लगिन, पर ओमन ओकर ले डरावत रिहिन, काबरकि भीड़ के जम्मो मनखेमन ओकर उपदेस ला सुनके चकित होवत रिहिन।
MAR 11:19 जब सांझ होईस, त यीसू अऊ ओकर चेलामन सहर ले बाहिर चल दीन।
MAR 11:20 बिहनियां, जब ओमन जावत रिहिन, त देखिन कि ओ अंजीर के रूख ह जरमूर ले सूखा गे रहय।
MAR 11:21 तब पतरस ह ओ गोठ ला सुरता करके यीसू ला कहिस, “हे गुरू! देख, ये अंजीर के रूख जऊन ला तेंह सराप दे रहय, सूखा गे हवय।”
MAR 11:22 यीसू ह ओमन ला कहिस, “परमेसर ऊपर बिसवास रखव।
MAR 11:23 मेंह तुमन ला सच कहत हंव, कहूं कोनो ये पहाड़ ले कहय कि जा अऊ समुंदर म गिर जा, अऊ ओह अपन मन म संका झन करय, पर परमेसर के ऊपर बिसवास करय कि जऊन बात ओह कहत हवय, ओह हो जाही, त ओकर बर वइसनेच करे जाही।
MAR 11:24 एकरसेति, मेंह तुमन ला कहत हंव, जऊन कुछू तुमन पराथना म मांगथव, बिसवास करव कि ओह तुमन ला मिलही अऊ ओह तुम्हर बर हो जाही।
MAR 11:25 जब तुमन ठाढ़ होके पराथना करव, त कहूं तुम्हर मन म काकरो बर कुछू बिरोध हवय, त ओला माफ करव, ये खातिर कि तुम्हर ददा जऊन ह स्वरग म हवय, तुम्हर अपराध ला छेमा करही।
MAR 11:26 अऊ कहूं तुमन माफ नइं करव, त तुम्हर ददा परमेसर घलो जऊन ह स्वरग म हवय, तुम्हर अपराध ला छेमा नइं करही।”
MAR 11:27 ओमन फेर यरूसलेम म आईन अऊ यीसू ह जब मंदिर के अंगना म रेंगत रिहिस, तब मुखिया पुरोहितमन, कानून के गुरूमन अऊ अगुवामन ओकर करा आईन
MAR 11:28 अऊ पुछिन, “कोन अधिकार ले तेंह ये चीजमन ला करत हवस? अऊ ये करे के अधिकार कोन ह तोला दे हवय?”
MAR 11:29 यीसू ह जबाब दीस, “मेंह घलो तुमन ले एक सवाल पुछत हंव, ओकर मोला जबाब देवव, त मेंह तुमन ला बताहूं कि कोन अधिकार ले मेंह ये काममन ला करत हवंव।
MAR 11:30 यूहन्ना के बतिसमा देवई ह, स्वरग ले रिहिस या मनखे कोति ले? मोला बतावव।”
MAR 11:31 ओमन आपस म सोच-बिचार करिन अऊ कहिन, “यदि हमन कहन, ‘स्वरग ले,’ त ओह कहिही, ‘तब तुमन ओकर ऊपर बिसवास काबर नइं करेव?’
MAR 11:32 पर यदि हमन कहन कि मनखे कोति ले,” त मनखेमन के डर हवय, काबरकि जम्मो मनखेमन के बिसवास रहय कि यूहन्ना ह सही म अगमजानी रिहिस।
MAR 11:33 एकरसेति ओमन यीसू ला जबाब दीन, “हमन नइं जानन।” यीसू ह ओमन ला कहिस, “मेंह घलो तुमन ला नइं बतावंव कि कोन अधिकार ले मेंह ये काममन करत हवंव।”
MAR 12:1 तब यीसू ह ओमन ले पटंतर म गोठियाय लगिस अऊ कहिस, “एक मनखे ह अंगूर के बारी लगाईस अऊ बारी के चारों खूंट बाड़ा बांधिस अऊ रसकुंड बर एक ठन खंचवा कोड़िस, अऊ एक ठन मचान घलो बनाईस। तब ओह ओ अंगूर के बारी ला कुछू किसानमन ला रेगहा म देके आने देस चल दीस।
MAR 12:2 जब फर के समय आईस, त ओह अपन एक सेवक ला किसानमन करा पठोईस कि ओह अंगूर के बारी ले ओकर बांटा के फर लानय।
MAR 12:3 पर किसानमन ओला धरके मारिन-पीटिन अऊ ओला जुच्छा हांथ लहुंटा दीन।
MAR 12:4 तब बारी के मालिक ह एक आने सेवक ला ओमन करा पठोईस, पर ओमन ओकर मुड़ ला फोर दीन अऊ ओकर बेजत्ती करिन।
MAR 12:5 बारी के मालिक ह अऊ एक झन ला पठोईस, पर ओमन ओला मार डारिन। ओह अऊ बहुंत झन ला पठोईस, पर ओमन कतको झन ला पीटिन अऊ कतको झन ला मार डारिन।
MAR 12:6 “अब ओकर करा सिरिप एक झन बांचिस, ओकर एके मयारू बेटा! आखिर म ओह ये सोचके ओला पठोईस कि ओमन मोर बेटा के आदर करहीं।
MAR 12:7 “पर जब ओ किसानमन ओला आवत देखिन, त एक-दूसर ला कहिन, ‘येह वारिस ए। आवव, हमन येला मार डालन, तब एकर संपत्ति ह हमर हो जाही।’
MAR 12:8 अऊ ओमन ओला पकड़िन अऊ मार डारिन अऊ अंगूर के बारी के बाहिर फटिक दीन।
MAR 12:9 “तब अंगूर के बारी के मालिक ह का करही? ओह आही अऊ ओ किसानमन ला मार डारही अऊ अंगूर के बारी ला आने मन ला दे दीही।
MAR 12:10 का तुमन परमेसर के ये बचन ला नइं पढ़े हवव: “ ‘जऊन पथरा ला घर के बनइयामन बेकार समझे रिहिन, ओहीच ह कोना के मुख पथरा हो गीस।
MAR 12:11 येह परभू के दुवारा होईस अऊ येह हमर नजर म अद्भूत ए’?”
MAR 12:12 तब मुखिया पुरोहित, कानून के गुरू अऊ अगुवामन यीसू ला पकड़े के उपाय सोचे लगिन काबरकि ओमन समझ गे रहंय कि ओह ये पटंतर ओमन के बिरोध म कहे हवय। पर ओमन मनखेमन के भीड़ ले डरावत रिहिन; एकरसेति ओमन ओला छोंड़के चल दीन।
MAR 12:13 बाद म, ओमन यीसू ला गोठ म फंसाय बर कुछू फरीसी अऊ हेरोदीमन ला ओकर करा पठोईन।
MAR 12:14 ओमन आके ओकर ले कहिन, “हे गुरू! हमन जानत हवन कि तेंह सच्चा अस। अऊ काकरो परवाह नइं करस, काबरकि तेंह मनखे के मुहूं देखके नइं गोठियावस, पर सच्चई के संग परमेसर के रसता के सिकछा देथस। हमन ये जाने बर चाहथन कि का महाराजा ला लगान देवई कानून के मुताबिक ठीक अय कि नइं?
MAR 12:15 हमन ला लगान देना चाही या नइं देना चाही?” यीसू ह ओमन के कपट ला जानके ओमन ला कहिस, “तुमन काबर मोला फंसाय के कोसिस करत हव? मोर करा एक ठन चिल्हर पईसा लानव कि में ओला देखंव।”
MAR 12:16 ओमन पईसा ला लानिन अऊ ओह ओमन ले पुछिस, “येमा काकर मूरती अऊ नांव लिखाय हवय?” ओमन कहिन, “महाराजा के।”
MAR 12:17 तब यीसू ह ओमन ला कहिस, “जऊन ह महाराजा के अय, ओला महाराजा ला देवव अऊ जऊन ह परमेसर के अय, ओला परमेसर ला देवव।” येला सुनके ओमन चकित हो गीन।
MAR 12:18 तब सदूकीमन आईन, जऊन मन ये कहिथंय कि मरे मनखेमन फेर नइं जी उठंय। ओमन यीसू ले आके पुछिन,
MAR 12:19 “हे गुरू! मूसा ह हमर बर लिखे हवय कि यदि कोनो मनखे के भाई ह अपन घरवाली के रहत बिगर संतान के मर जावय, त येह जरूरी ए कि ओ मनखे ह अपन भाई के ओ बिधवा ले बिहाव कर ले, अऊ अपन भाई बर संतान पईदा करे।
MAR 12:20 सात झन भाई रिहिन। पहिला भाई ह बिहाव करिस अऊ बिगर संतान के मर गीस।
MAR 12:21 तब दूसर भाई ह ओकर बिधवा ले बिहाव करिस अऊ ओह घलो बिगर संतान के मर गीस, अऊ वइसनेच तीसरा भाई घलो।
MAR 12:22 अइसने होईस कि सातों म के काकरो संतान नइं होईस अऊ ओमन मर गीन। आखिर म ओ माईलोगन घलो मर गीस।
MAR 12:23 तब मरे मनखेमन के जी उठे के बाद, ओह काकर घरवाली होही? काबरकि ओह सातों भाईमन ले बिहाव करे रिहिस।”
MAR 12:24 यीसू ह ओमन ला जबाब दीस, “का तुमन गलत नइं समझत हव काबरकि तुमन परमेसर के बचन या परमेसर के सामर्थ ला नइं जानत हव?
MAR 12:25 जब मरे मन जी उठहीं, त ओमन न तो बिहाव करहीं अऊ न ही ओमन ला बिहाव म दिये जाही; ओमन स्वरग म स्वरगदूतमन सहीं होहीं।
MAR 12:26 मरे मन के जी उठे के बारे म, का तुमन मूसा के किताब म बरत झाड़ी के बारे म नइं पढ़ेव? जिहां परमेसर ह मूसा ले कहिस, ‘मेंह अब्राहम के परमेसर अऊ इसहाक के परमेसर अऊ याकूब के परमेसर अंव।’
MAR 12:27 परमेसर ह मुरदामन के नइं, पर जीयतमन के परमेसर अय। तुमन भारी गलती म परे हवव।”
MAR 12:28 कानून के गुरूमन ले एक झन आके ओमन ला बहस करत सुनिस अऊ ये जानके कि यीसू ह ओमन ला सही जबाब दे हवय, ओह यीसू ले पुछिस, “सबले बड़े हुकूम कते ह अय?”
MAR 12:29 यीसू ह कहिस, “सबले बड़े हुकूम ये अय: हे इसरायलीमन सुनव! परभू हमर परमेसर ह एके झन परभू अय।
MAR 12:30 परभू अपन परमेसर ले अपन पूरा हिरदय अऊ अपन पूरा परान अऊ अपन पूरा मन अऊ अपन पूरा सक्ति ले मया करव।
MAR 12:31 अऊ दूसरा हुकूम ये अय कि तेंह अपन परोसी ले अपन सहीं मया कर। एकर ले बड़े अऊ कोनो हुकूम नइं ए।”
MAR 12:32 ओ मनखे ह कहिस, “तेंह बने कहे, गुरू! तोर ये कहई सही अय कि परमेसर एके झन अय अऊ ओला छोंड़ कोनो दूसर परमेसर नइं ए।
MAR 12:33 ओला अपन पूरा मन अऊ अपन पूरा बुद्धि अऊ अपन पूरा सक्ति सहित मया करई अऊ अपन परोसी ला अपन सहीं मया करई, जम्मो होम-बलिदान अऊ चढ़ावा ले बढ़के अय।”
MAR 12:34 जब यीसू ह देखिस कि ओ मनखे ह समझके जबाब दे हवय, तब ओह ओला कहिस, “तेंह परमेसर के राज के लकठा म हवस।” अऊ ओकर बाद कोनो ओला कुछू पुछे के हिम्मत नइं करिन।
MAR 12:35 जब यीसू ह मंदिर म उपदेस करत रिहिस, त पुछिस, “कानून के गुरूमन काबर कहिथें कि मसीह ह दाऊद के बेटा अय?
MAR 12:36 दाऊद ह खुदे पबितर आतमा म होके कहे हवय: “ ‘परभू ह मोर परभू ले कहिस, “मोर जेवनी हांथ कोति बईठ, जब तक कि मेंह तोर बईरीमन ला तोर गोड़ खाल्हे नइं कर देवंव।” ’
MAR 12:37 दाऊद ह खुदे ओला परभू कहत हवय। तब मसीह ह ओकर बेटा कइसने होईस?” भीड़ के मनखेमन ओकर गोठ ला बड़े खुसी से सुनत रिहिन।
MAR 12:38 यीसू ह अपन उपदेस म कहिस, “कानून के गुरूमन ले सचेत रहव। ओमन लम्बा-लम्बा ओनहा पहिरके एती-ओती घुमई पसंद करथें अऊ ओमन ला बजार के जगह म आदर के संग जोहार झोंकई,
MAR 12:39 यहूदीमन के सभा-घर म सबले बने आसन अऊ जेवनार म आदर के ठऊर म बईठई बने लगथे।
MAR 12:40 ओमन बिधवामन के घर ला हड़प लेथें, अऊ देखाय बर लम्बा-लम्बा पराथना करथें। अइसने मनखेमन बहुंत दंड पाहीं।”
MAR 12:41 यीसू ह दान चघाय के जगह के आघू म बईठके मनखेमन ला मंदिर के खजाना म अपन दान चघावत देखत रिहिस। कतको धनवान मनखेमन अब्बड़ अकन पईसा ओमा डारिन।
MAR 12:42 अतकी म एक गरीब बिधवा आईस अऊ तांबा के दू ठन छोटे सिक्का डालिस जेकर मूल्य कुछू पईसा रिहिस।
MAR 12:43 यीसू ह अपन चेलामन ला बलाके कहिस, “मेंह तुमन ला सच कहत हंव कि ये गरीब बिधवा ह आने जम्मो झन ले मंदिर के खजाना म जादा दान दे हवय।
MAR 12:44 ओ जम्मो झन अपन बढ़त धन म ले दे हवंय, पर येह अपन गरीबी म ले जम्मो ला देय दे हवय, जेमा ओकर गुजारा होय रहितिस।”
MAR 13:1 जब यीसू ह मंदिर ले निकलत रिहिस, तब ओकर चेलामन ले एक झन ओला कहिस, “हे गुरू! देख, कइसने बड़े-बड़े पथरा अऊ ओमा ले बने सुघर-सुघर भवन।”
MAR 13:2 यीसू ह ओला कहिस, “तेंह जऊन बड़े-बड़े भवन ला देखत हवस? इहां एको ठन पथरा अपन जगह म नइं बांचय; जम्मो ला गिरा दिये जाही।”
MAR 13:3 जब यीसू ह जैतून पहाड़ ऊपर मंदिर कोति मुहूं करके बईठे रिहिस, तब पतरस, याकूब, यूहन्ना अऊ अन्द्रियास अलग म ओकर ले पुछिन,
MAR 13:4 “हमन ला बता कि ये बातमन कब होही? अऊ जब ये बातमन पूरा होय के समय आही, तब ओ बखत का चिनहां दिखही?”
MAR 13:5 यीसू ह ओमन ला कहिस, “सचेत रहव कि कोनो तुमन ला धोखा झन देवय।
MAR 13:6 कतको झन मोर नांव म आहीं अऊ कहिहीं मेंह मसीह अंव, अऊ बहुंते झन ला भरमाहीं।
MAR 13:7 जब तुमन लड़ई अऊ लड़ई होय के अफवाह सुनव, त झन घबरावव। अइसने बात के होवई जरूरी अय, पर ओ बखत अन्त नइं होवय।
MAR 13:8 एक देस ह दूसर देस ऊपर अऊ एक राज ह दूसर राज ऊपर चढ़ई करही। कतको जगह म दुकाल पड़ही अऊ भुइंडोल होही। ये जम्मो ह छेवारी होय के पीरा के सुरूआत के सहीं अय।
MAR 13:9 “अपन बारे म सचेत रहव काबरकि मनखेमन तुमन ला धरके अदालत म ले जाहीं अऊ तुमन ला यहूदीमन के सभा-घर म पीटहीं। मोर खातिर तुमन हाकिम अऊ राजामन के आघू म ठाढ़ होहू कि ओमन ला मोर गवाही देवव।
MAR 13:10 अऊ येह जरूरी ए कि पहिली जम्मो जातिमन के मनखेमन ला सुघर संदेस के परचार करे जावय।
MAR 13:11 जब ओमन तुमन ला पकड़के अदालत म ले जावंय, तब आघू ले फिकर झन करहू कि तुमन ला का कहना हे। पर जऊन कुछू तुमन ला ओ घड़ी बताय जाथे, ओही कहव काबरकि बोलइया तुमन नइं, पर पबितर आतमा अय।
MAR 13:12 “भाई ह अपन भाई ला अऊ ददा ह अपन लइका ला मार डारे बर सऊंप दीही। लइकामन अपन दाई-ददा के बिरोध म खड़े होहीं अऊ ओमन ला मरवा डारहीं।
MAR 13:13 मोर कारन, जम्मो मनखेमन तुम्हर ले नफरत करहीं, पर जऊन ह आखिरी तक अडिग बने रहिही, ओकरेच उद्धार होही।
MAR 13:14 “जब तुमन बिनासकारी घिन चीज ला उहां ठाढ़े देखव जिहां ओकर होना उचित नो हय—त पढ़इया ह समझ जावय—तब जऊन मन यहूदिया म होवंय, ओमन पहाड़ ऊपर भाग जावंय।
MAR 13:15 जऊन ह अपन घर के छानी ऊपर होवय, ओह अपन घर के चीजमन ला लेय बर खाल्हे झन उतरय।
MAR 13:16 जऊन ह खेत म होवय, ओह अपन कपड़ा लेय बर पाछू झन लहुंटय।
MAR 13:17 ओ माईलोगनमन बर कतेक भयानक बात होही, जऊन मन ओ दिन म देहें म होहीं अऊ जऊन दाईमन लइकामन ला दूध पीयावत होहीं!
MAR 13:18 परमेसर ले बिनती करत रहव कि येह जड़काला म झन होवय।
MAR 13:19 काबरकि ओ दिनमन म अइसने बिपत्ति आही कि जब ले परमेसर ह संसार ला रचे हवय, तब ले लेके अब तक न तो अइसने होय हवय अऊ न कभू फेर होही।
MAR 13:20 “यदि परभू ह ओ दिनमन ला कम नइं करे रहितिस, त कोनो मनखे नइं बांचतिन; पर चुने गय मनखेमन के कारन, परमेसर ह ओ दिनमन ला कम करिस।
MAR 13:21 ओ बखत कहूं कोनो तुमन ला ये कहय कि देखव मसीह ह इहां हवय, या देखव, ओह उहां हवय, त बिसवास झन करव।
MAR 13:22 काबरकि लबरा मसीह अऊ लबरा अगमजानीमन परगट होहीं अऊ अइसने चिनहां अऊ चमतकार देखाहीं कि कहूं हो सकय, त चुने गय मनखेमन ला घलो भरमा देवंय।
MAR 13:23 एकरसेति सचेत रहव। मेंह तुमन ला जम्मो बात पहिली ले बता चुके हवंव।
MAR 13:24 “ओ दिनमन म बिपत पड़े के बाद, “ ‘सूरज ह अंधियार हो जाही अऊ चंदा ह अपन अंजोर नइं दीही;
MAR 13:25 तारामन अकास ले गिर जाहीं, अऊ अकास के सक्तिमन हलाय जाहीं।’
MAR 13:26 “तब मनखेमन मनखे के बेटा ला अब्बड़ सक्ति अऊ महिमा के संग बादर म आवत देखहीं।
MAR 13:27 अऊ ओह अपन स्वरगदूतमन ला पठोके धरती के ये छोर ले लेके अकास के ओ छोर तक—चारों दिग ले, अपन चुने मनखेमन ला संकेलही।
MAR 13:28 “अब अंजीर के रूख ले ये बात ला सीखव: जब एकर छोटे डारामन कोअंर बन जाथें अऊ ओमा पानमन निकले लगथें, त तुमन जान लेथव कि घाम के महिना ह अवइया हवय।
MAR 13:29 ओहीच किसम ले, जब तुमन ये जम्मो घटनामन ला देखव, त जान लेवव कि ओ समय ह लकठा म हवय, पर दुवारी म आ गे हवय।
MAR 13:30 मेंह तुमन ला सच कहत हंव कि जब तक ये बातमन नइं हो जाहीं, तब तक ये पीढ़ी के मनखेमन नइं मरंय।
MAR 13:31 अकास अऊ धरती ह टर जाही, पर मोर बचन ह कभू नइं टरय।
MAR 13:32 “ओ दिन या समय के बारे म कोनो नइं जानंय; न तो स्वरग के दूत अऊ न ही बेटा, पर सिरिप ददा ह येला जानथे।
MAR 13:33 सचेत अऊ सावधान रहव काबरकि तुमन नइं जानव कि ओ समय ह कब आही।
MAR 13:34 येह ओ मनखे के सहीं अय, जऊन ह परदेस जाथे अऊ जाय के पहिली अपन घर ला अपन सेवकमन के अधिकार म छोंड़के ओमन ला अपन-अपन काम बता देथे अऊ घर के चौकीदार ला सचेत रहे के हुकूम देथे।
MAR 13:35 “एकरसेति सचेत रहव काबरकि तुमन नइं जानत हव कि घर के मालिक ह कब आ जाही, संझा बखत या आधा रथिया या कुकरा बासत या बड़े बिहनियां।
MAR 13:36 अइसने झन होवय कि ओह अचानक आवय अऊ तुमन ला सुतत पावय।
MAR 13:37 जऊन बात मेंह तुमन ला कहत हंव, ओहीच बात मेंह जम्मो झन ला कहत हंव—सचेत रहव।”
MAR 14:1 दू दिन के बाद, फसह अऊ बिगर खमीर के रोटी के तिहार होवइया रिहिस, अऊ ओ समय मुखिया पुरोहित अऊ कानून के गुरूमन ये ताक म रिहिन कि यीसू ला कइसने चुपेचाप पकड़के मार डारंय।
MAR 14:2 ओमन कहिन, “तिहार के बखत म अइसने नइं करन। कहूं अइसने झन होवय कि मनखेमन म हुड़दंग हो जावय।”
MAR 14:3 ओ समय म, जब यीसू बैतनियाह म सिमोन कोढ़ी के घर म खाना खावत रिहिस, तब एक झन माईलोगन ह संगमरमर के पथरा के चुकिया म सुध गुलमेंहदी के अब्बड़ मंहगा इतर तेल लेके आईस, अऊ ओह चुकिया ला फोरके इतर ला यीसू के मुड़ ऊपर रितोईस।
MAR 14:4 उहां कुछू मनखेमन खिसियाके एक-दूसर ला कहन लगिन, “ये इतर ला काबर बरबाद कर दीस?
MAR 14:5 येला बेचे रहे ले लगभग एक साल के बनी ले घलो जादा पईसा मिले रहितिस, जऊन ला गरीबमन म बांटे जा सकत रिहिस।” अऊ ओमन ओला अब्बड़ डांटिन।
MAR 14:6 यीसू ह कहिस, “ओला छोंड़ दव। ओला काबर सतावत हवव? ओह तो मोर संग सुघर बुता करे हवय।
MAR 14:7 गरीबमन तुम्हर संग हमेसा रहिहीं अऊ तुमन जब चाहव, तब ओमन के मदद कर सकत हव, पर मेंह तुम्हर संग हमेसा नइं रहंव।
MAR 14:8 जऊन कुछू ओह कर सकत रिहिस, ओह करिस। मोर गड़ियाय जाय के तियारी म ओह आघू ले मोर देहें ऊपर इतर लगाय हवय।
MAR 14:9 मेंह तुमन ला सच कहत हंव कि जम्मो संसार म जिहां-जिहां मोर सुघर संदेस के परचार करे जाही, उहां ओकर ये काम के चरचा घलो ओकर सुरता म करे जाही।”
MAR 14:10 तब यहूदा इस्करियोती जऊन ह बारह चेलामन ले एक झन रिहिस, मुखिया पुरोहितमन करा गीस कि ओह यीसू ला ओमन के हांथ म पकड़वा देवय।
MAR 14:11 ओमन ये सुनके बहुंत खुस होईन, अऊ ओला रूपिया दे बर राजी होईन। एकरसेति ओह यीसू ला पकड़वाय बर मऊका खोजन लगिस।
MAR 14:12 बिन खमीर के रोटी के तिहार के पहिली दिन, ये रिवाज रिहिस कि फसह के मेढ़ा-पीला के बलिदान करे जावय; त यीसू के चेलामन ओकर ले पुछिन, “तेंह कहां चाहथस कि हमन जाके तोर बर फसह के भोज खाय के तियारी करन?”
MAR 14:13 ओह अपन चेलामन ले दू झन ला, ये कहिके पठोईस, “सहर म जावव अऊ तुमन ला एक मनखे घघरी म पानी ले जावत मिलही। ओकर पाछू-पाछू जावव।
MAR 14:14 ओह जऊन घर म जाही, ओ घर के मालिक ले कहव, ‘गुरू ह पुछत हवय कि ओकर पहुना कमरा कहां हवय, जिहां ओह अपन चेलामन संग फसह के भोज खा सकय।’
MAR 14:15 ओह तुमन ला अटारी म सजे-सजाय अऊ तियार एक ठन बड़े कमरा देखाही। उहां हमर भोज खातिर तियारी करव।”
MAR 14:16 तब चेलामन सहर म गीन अऊ जइसने यीसू ह ओमन ला कहे रिहिस, वइसनेच पाईन अऊ ओमन फसह के भोज तियार करिन।
MAR 14:17 जब सांझ होईस, त यीसू ह बारहों चेलामन संग आईस।
MAR 14:18 जब ओमन बईठके खावत रिहिन, त यीसू ह कहिस, “मेंह तुमन ला सच कहत हंव—तुमन म ले एक झन मोर संग बिसवासघात करही—ओ जऊन ह मोर संग खाना खावत हे।”
MAR 14:19 चेलामन उदास होके एक-एक करके पुछन लगिन, “का ओह में अंव?”
MAR 14:20 यीसू ह ओमन ला कहिस, “ओह तुमन बारहों म ले एक झन अय, जऊन ह मोर संग कटोरा म हांथ डारत हवय।
MAR 14:21 मनखे के बेटा ह मरही, जइसने परमेसर के बचन म ओकर बारे म लिखे हवय, पर धिक्कार ए, ओ मनखे ऊपर, जऊन ह मनखे के बेटा संग बिसवासघात करत हे! ओ मनखे बर बने होतिस, यदि ओकर जनम ही नइं होय रहितिस।”
MAR 14:22 जब ओमन खावत रिहिन, तब यीसू ह रोटी ला लीस अऊ परमेसर ला धनबाद देके ओला टोरिस अऊ अपन चेलामन ला देके कहिस, “लेवव, येह मोर देहें अय।”
MAR 14:23 तब ओह कटोरा ला लीस अऊ परमेसर ला धनबाद देके ओमन ला दीस, अऊ ओमन जम्मो झन ओमा ले पीईन।
MAR 14:24 यीसू ह ओमन ला कहिस, “येह करार के मोर लहू ए, जऊन ह बहुंते जन बर ढारे जावत हे।
MAR 14:25 मेंह तुमन ला सच कहत हंव कि अंगूर के मंद ला ओ दिन तक फेर नइं पीयंव, जब तक परमेसर के राज म नवां ला नइं पी लूहूं।”
MAR 14:26 तब ओमन एक भजन गाय के बाद, जैतून पहाड़ ऊपर चल दीन।
MAR 14:27 यीसू ह चेलामन ला कहिस, “तुमन जम्मो झन मोला छोंड़के भाग जाहू, काबरकि परमेसर के बचन म लिखे हवय, “ ‘मेंह चरवाहा ला मारहूं, अऊ भेड़मन तितिर-बितिर हो जाहीं।’
MAR 14:28 पर मेंह जी उठे के बाद तुम्हर ले पहिली गलील प्रदेस जाहूं।”
MAR 14:29 पतरस ह ओला कहिस, “कहूं जम्मो झन तोला छोंड़ दीहीं त छोंड़ दीहीं, पर मेंह तोला कभू नइं छोड़ंव।”
MAR 14:30 यीसू ह पतरस ला कहिस, “मेंह तोला सच कहत हंव कि आजेच रथिया कुकरा के दू बार बासे के पहिली, तेंह तीन बार ये बात ले इनकार करबे कि तेंह मोला जानथस।”
MAR 14:31 पर पतरस जोर देके कहिस, “कहूं मोला तोर संग मरना घलो पड़य, तभो ले मेंह तोर कभू इनकार नइं करंव।” अऊ आने जम्मो चेलामन घलो अइसनेच कहिन।
MAR 14:32 तब ओमन गतसमनी नांव के एक ठऊर म आईन। यीसू ह अपन चेलामन ला कहिस, “इहां बईठे रहव, जब तक कि मेंह पराथना करत हंव।”
MAR 14:33 ओह पतरस, याकूब अऊ यूहन्ना ला अपन संग लीस, अऊ अब्बड़ घबराईस अऊ बियाकुल होईस।
MAR 14:34 अऊ ओह ओमन ला कहिस, “मोर परान ह अतकी उदास हवय कि मेंह मर जावंव सहीं लगत हवय। तुमन इहां ठहिरव अऊ जागत रहव।”
MAR 14:35 थोरकन आघू जाके, ओह भुइयां म गिरके पराथना करन लगिस कि कहूं हो सकय, त ये दुख के बेरा ह ओकर ले टर जावय।
MAR 14:36 ओह कहिस, “अब्बा, हे ददा! तोर दुवारा जम्मो बात हो सकथे। ये दुख के कटोरा ला मोर म ले टार दे। तभो ले जइसने मेंह चाहत हवंव वइसने नइं, पर जइसने तेंह चाहत हवस, वइसने होवय।”
MAR 14:37 तब ओह अपन चेलामन करा आईस अऊ ओमन ला सुतत देखके, पतरस ला कहिस, “हे सिमोन! तेंह सुतत हवस। का तेंह एक घंटा घलो नइं जाग सकय?
MAR 14:38 जागत रहव अऊ पराथना करव, ताकि तुमन परिछा म झन पड़व। आतमा त तियार हवय, फेर देहें ह दुरबल अय।”
MAR 14:39 ओह फेर चले गीस अऊ ओहीच बात ला कहिके पराथना करिस।
MAR 14:40 जब ओह चेलामन करा लहुंटिस, त ओमन ला फेर सुतत पाईस, काबरकि ओमन के आंखीमन नींद के मारे बंद होवत रहंय, अऊ ओमन नइं जानत रहंय कि ओला का कहंय।
MAR 14:41 तब तीसरा बार आके, ओह ओमन ला कहिस, “का तुमन अभी तक ले सुतत अऊ अराम करत हवव? बहुंत हो गे। घरी ह आ गे हवय। देखव, मनखे के बेटा ह पापीमन के हांथ म पकड़वाय जावथे।
MAR 14:42 उठव! आवव, हमन चलन! देखव, मोर संग बिसवासघात करइया ह लकठा आ गे हवय!”
MAR 14:43 यीसू ह ये कहितेच रिहिस, तभे यहूदा जऊन ह बारह चेलामन ले एक झन रिहिस, एक बड़े भीड़ ला लेके पहुंचिस। भीड़ के मनखेमन तलवार अऊ लउठी धरे रहंय अऊ येमन ला मुखिया पुरोहित, कानून के गुरू अऊ अगुवामन पठोय रिहिन।
MAR 14:44 बिसवासघात करइया ह ओमन ला पहिली ले ये संकेत बता दे रिहिस, “जऊन ला मेंह चूमहूं, ओहीच मनखे अय; ओला पकड़ लूहू अऊ होसियारी के संग ले जाहू।”
MAR 14:45 यहूदा ह तुरते यीसू करा आईस अऊ कहिस, “हे गुरू!” अऊ ओह यीसू ला चूमिस।
MAR 14:46 तब मनखेमन ओकर ऊपर हांथ लगाके ओला कसके पकड़ लीन।
MAR 14:47 ओकर लकठा म ठाढ़े मनखेमन ले एक झन अपन तलवार ला निकालिस अऊ महा पुरोहित के सेवक ऊपर चलाके ओकर कान ला काट डारिस।
MAR 14:48 यीसू ह ओमन ला कहिस, “का मेंह डाकू अंव कि तुमन तलवार अऊ लउठी लेके मोला पकड़े बर आय हवव?
MAR 14:49 मेंह तुम्हर संग रहिके रोज मंदिर म उपदेस देवत रहेंव, तब तुमन मोला नइं पकड़ेव। पर येह एकर खातिर होईस कि पबितर बचन ह पूरा होवय।”
MAR 14:50 तब जम्मो चेलामन ओला छोंड़के भाग गीन।
MAR 14:51 तब एक जवान ह अपन उघरा देहें ऊपर सिरिप मलमल के चादर ला ओढ़के यीसू के पाछू हो लीस अऊ जब मनखेमन ओला पकड़े लगिन,
MAR 14:52 त ओह चादर ला छोंड़के उघरा देहें भाग गीस।
MAR 14:53 तब ओमन यीसू ला महा पुरोहित करा ले गीन अऊ जम्मो मुखिया पुरोहित, अगुवा अऊ कानून के गुरूमन उहां जूर गीन।
MAR 14:54 पतरस ह कुछू दूरिहा म रहत ओकर पाछू-पाछू महा पुरोहित के अंगना भीतर गीस, अऊ उहां पहरेदारमन के संग बईठके आगी तापन लगिस।
MAR 14:55 मुखिया पुरोहितमन अऊ धरम महासभा के जम्मो मनखेमन यीसू के बिरूध म गवाही खोजत रहंय, ताकि ओमन ओला मार डारंय, पर ओमन ला एको झन नइं मिलिन।
MAR 14:56 बहुंते झन ओकर बिरूध लबारी गवाही दीन, पर ओमन के गोठ एक-दूसर के संग मेल नइं खाईस।
MAR 14:57 तब कतको झन उठके ओकर बिरूध ये लबारी गवाही दीन,
MAR 14:58 “हमन येला ये कहत सुने हवन कि येह मनखे के बनाय मंदिर ला गिरा दीही अऊ तीन दिन म दूसर बना दीही, जऊन ह मनखे के हांथ के बनाय नइं होवय।”
MAR 14:59 तभो ले ओमन के गवाही मेल नइं खाईस।
MAR 14:60 तब महा पुरोहित ह ओमन के आघू म ठाढ़ होके यीसू ले पुछिस, “ये मनखेमन तोर बिरूध जऊन गवाही देवत हवंय, का तेंह ओकर कोनो जबाब नइं देवस?”
MAR 14:61 पर यीसू ह चुपेचाप रिहिस अऊ कुछू जबाब नइं दीस। महा पुरोहित ह ओला फेर पुछिस, “का तेंह महिमामय परमेसर के बेटा मसीह अस?”
MAR 14:62 यीसू ह कहिस, “हां, मेंह अंव। अऊ तुमन मनखे के बेटा ला सर्वसक्तिमान परमेसर के जेवनी हांथ कोति बईठे अऊ अकास के बादरमन ऊपर आवत देखहू।”
MAR 14:63 तब महा पुरोहित ह अपन कपड़ा ला चीरके कहिस, “हमन ला अऊ कोनो गवाह के जरूरत नइं ए?
MAR 14:64 तुमन ये निन्दा ला सुने हवव। तुम्हर का बिचार हवय?” ओमन जम्मो ओला मिरतू-दंड के दोसी ठहिराईन।
MAR 14:65 तब ओमन ले कुछू झन ओकर ऊपर थूकिन। ओमन ओकर आंखी ला ढांपके ओला मुक्का मारिन अऊ कहिन, “बता, तोला कोन मारिस?” अऊ रखवारमन घलो ओला लेके मुहूं म थपरा मारिन।
MAR 14:66 जब पतरस ह खाल्हे अंगना म रिहिस, त महा पुरोहित के एक नौकरानी छोकरी आईस,
MAR 14:67 अऊ पतरस ला आगी तापत देखके, ओला एकटक देखिस अऊ कहिस, “तहूं घलो त ओ यीसू नासरी के संग रहय।”
MAR 14:68 पतरस ह इनकार करके कहिस, “मेंह नइं जानंव कि तेंह का गोठियावत हस।” अइसने कहिके, ओह बाहिर दुवारी म चल दीस अऊ ओतकीच बेरा कुकरा ह बासिस।
MAR 14:69 जब नौकरानी छोकरी ओला उहां देखिस, त ओह जऊन मन उहां ठाढ़े रहंय, ओमन ला फेर कहिस, “ये मनखे ह ओमन म ले एक झन अय।”
MAR 14:70 पतरस ह फेर इनकार करिस। थोरकन देर बाद, जऊन मन लकठा म ठाढ़े रहंय, ओमन पतरस ला कहिन, “सही म, तेंह ओमन ले एक झन अस, काबरकि तहूं घलो गलील के अस।”
MAR 14:71 तब ओह अपनआप ला कोसन लगिस अऊ किरिया खाके कहिस, “जेकर बारे म तुमन गोठियावत हवव, ओला में नइं जानव।”
MAR 14:72 तुरते कुकरा ह दूसर बेर बासिस। तब पतरस ह यीसू के कहे बात ला सुरता करिस कि कुकरा के दू बखत बासे के पहिली, तेंह तीन बार मोर इनकार करबे। अऊ ओह कलप-कलपके रोवन लगिस।
MAR 15:1 बड़े बिहनियां मुखिया पुरोहित, अगुवा, कानून के गुरूमन अऊ जम्मो महासभा मिलके फैसला करिन, अऊ ओमन यीसू ला बांधिन अऊ ओला ले जाके पीलातुस के हांथ म सऊंप दीन।
MAR 15:2 पीलातुस ह यीसू ले पुछिस, “का तेंह यहूदीमन के राजा अस?” यीसू ह कहिस, “हव जी, जइसने कि तेंह कहथस।”
MAR 15:3 मुखिया पुरोहितमन ओकर ऊपर बहुंत अकन दोस लगाईन
MAR 15:4 पीलातुस ह ओकर ले फेर पुछिस, “का तेंह कोनो जबाब नइं देवस? देख येमन तोर ऊपर कतेक दोस लगावत हवंय।”
MAR 15:5 तभो ले यीसू ह कोनो जबाब नइं दीस। येला देखके पीलातुस ह अब्बड़ अचम्भो करिस।
MAR 15:6 ये रिवाज रिहिस कि फसह तिहार के समय म, पीलातुस ह कोनो एक झन कैदी, जऊन ला मनखेमन चाहंय, छोंड़ देवय।
MAR 15:7 बरब्बा नांव के एक मनखे जेल म आने मन संग बंदी रिहिस, जऊन ह सरकार के बिरोध म बलवा करके हतिया करे रिहिस।
MAR 15:8 मनखे के भीड़ ह ऊपर आके पीलातुस ले बिनती करिस, “जइसने तेंह हमर खातिर करत आय हवस, वइसने कर।”
MAR 15:9 पीलातुस ह कहिस, “का तुमन चाहत हव कि मेंह तुम्हर खातिर यहूदीमन के राजा ला छोंड़ देवंव?”
MAR 15:10 काबरकि ओह जानत रिहिस कि मुखिया पुरोहितमन यीसू ला जलन के कारन पकड़वाय रिहिन।
MAR 15:11 पर मुखिया पुरोहितमन भीड़ ला भड़काईन कि पीलातुस ह यीसू के जगह म बरब्बा ला छोंड़ देवय।
MAR 15:12 येला सुनके पीलातुस ह ओमन ले पुछिस, “त फेर मेंह ये मनखे के का करंव, जऊन ला तुमन यहूदीमन के राजा कहत हवव।”
MAR 15:13 ओमन फेर चिचियाके कहिन, “ओला कुरूस ऊपर चघाके मार डार।”
MAR 15:14 पीलातुस ह ओमन ले पुछिस, “काबर? ओह का अपराध करे हवय?” पर ओमन अऊ जादा चिचियाके कहिन, “येला कुरूस ऊपर चघाय जावय।”
MAR 15:15 तब भीड़ ला खुस करे बर पीलातुस ह ओमन खातिर बरब्बा ला छोंड़ दीस अऊ यीसू ला कोर्रा म पीटवाईस, अऊ ओला कुरूस ऊपर चघाय बर सऊंप दीस।
MAR 15:16 सिपाहीमन यीसू ला किला के भीतर अंगना म ले गीन अऊ सिपाहीमन के जम्मो दल ला बलाईन।
MAR 15:17 ओमन बैंगनी रंग के कपड़ा ओला पहिराईन अऊ कांटा के मुकुट गुंथके ओकर मुड़ ऊपर रखिन।
MAR 15:18 अऊ ओमन ओकर हंसी उड़ाके कहिन, “हे यहूदीमन के राजा, जोहार।”
MAR 15:19 बार-बार ओमन ओकर मुड़ ला लउठी म मारंय, अऊ ओकर ऊपर थूकंय अऊ माड़ी टेकके ओला जोहार करंय।
MAR 15:20 जब ओमन ओकर हंसी उड़ा चुकिन, त बैंगनी रंग के कपड़ा ला ओकर ऊपर ले उतारके ओला ओकरेच कपड़ा ला पहिराईन अऊ तब ओमन कुरूस ऊपर चघाय बर ओला बाहिर ले गीन।
MAR 15:21 सिकन्दर अऊ रूफुस के ददा सिमोन नांव के कुरेन के रहइया एक मनखे गांव ले आवत रिहिस। ओह ओहीच डहार ले जावत रिहिस। ओमन ओकर ले जबरन कुरूस ला उठवाके ले गीन।
MAR 15:22 ओमन यीसू ला गुलगुता नांव के ठऊर म लानिन, जेकर मतलब होथे “खोपड़ी के ठऊर।”
MAR 15:23 तब ओमन ओला लोबान म मिले अंगूर के मंद देवन लगिन, पर ओह ओला नइं लीस।
MAR 15:24 तब ओमन ओला कुरूस ऊपर चघाईन। अऊ ओकर ओनहा बर चिट्ठी डालके फैसला करिन कि कोन ला का मिलही, अऊ ओकर हिसाब ले ओला बांट लीन।
MAR 15:25 दिन के करीब 9 बजे के समय होही, जब ओमन यीसू ला कुरूस ऊपर चघाईन।
MAR 15:26 अऊ ओकर ऊपर म ये दोस-पतर लिखके टांग दीन: यहूदीमन के राजा।
MAR 15:27 ओमन ओकर संग दू झन डाकूमन ला घलो कुरूस ऊपर चघाईन; एक झन ला ओकर जेवनी कोति अऊ दूसर ला ओकर डेरी कोति।
MAR 15:28 तब परमेसर के ओ बचन कि ओह पापीमन के संग गने जाही, पूरा होईस।
MAR 15:29 उहां ले अवइया-जवइयामन यीसू के ठट्ठा करंय अऊ अपन मुड़ ला डोला-डोला के ये कहंय, “तेंह तो मंदिर ला गिराके ओला तीन दिन म बनइया अस।
MAR 15:30 कुरूस ऊपर ले उतर आ अऊ अपनआप ला बचा ले!”
MAR 15:31 अइसनेच मुखिया पुरोहित अऊ कानून के गुरूमन घलो आपस म ये कहिके ठट्ठा करत रिहिन, “येह आने मन ला बचाईस, पर अपनआप ला नइं बचा सकय।
MAR 15:32 ये इसरायल के राजा, मसीह, अब कुरूस ले उतर आवय कि हमन देखके बिसवास करन।” जऊन मन ओकर संग कुरूस ऊपर चघाय गे रिहिन, ओमन घलो ओकर ठट्ठा करत रहंय।
MAR 15:33 मंझनियां के बखत तीन बजे तक जम्मो देस म अंधियार छाय रिहिस।
MAR 15:34 तब तीन बजे यीसू ह जोर से नरियाके कहिस, “इलोई, इलोई, लमा सबकतनी?” (जेकर मतलब होथे—“हे मोर परमेसर, हे मोर परमेसर, तेंह मोला काबर छोंड़ देय?”)
MAR 15:35 जब लकठा म ठाढ़े मनखेमन ले कुछू झन येला सुनिन, त ओमन कहिन, “सुनव, येह एलियाह ला बलावत हवय।”
MAR 15:36 ओमा के एक झन दऊड़के गीस अऊ पनसोखवा रबर ला सिरका म बोरिस अऊ ओला एक ठन लउठी म रखके यीसू ला पीये बर दीस अऊ कहिस, “अब ओला रहन दव, आवव, हमन देखन, एलियाह ह ओला उतारे बर आथे कि नइं।”
MAR 15:37 तब यीसू ह अब्बड़ जोर से नरियाके अपन परान ला तियाग दीस।
MAR 15:38 मंदिर के परदा ह ऊपर ले खाल्हे तक चीराके दू कुटा हो गीस।
MAR 15:39 सिपाहीमन के अधिकारी ह यीसू के आघू म ठाढ़े रिहिस। जब ओह यीसू ला अइसने गोहार पारके परान तियागत देखिस, त कहिस, “सिरतों म येह परमेसर के बेटा रिहिस।”
MAR 15:40 उहां कुछू माईलोगन घलो दूरिहा ले देखत रहंय। ओमा मरियम मगदलिनी, अऊ छोटे याकूब अऊ योसेस के दाई मरियम अऊ सलोमी रिहिन।
MAR 15:41 जब यीसू ह गलील म रिहिस, त येमन ओकर पाछू हो ले रिहिन अऊ ओकर सेवा करत रिहिन। बहुंत अऊ माईलोगनमन उहां रिहिन, जऊन मन ओकर संग यरूसलेम आय रिहिन।
MAR 15:42 ओह तियारी के दिन रिहिस जऊन ह कि बिसराम दिन के पहिले आथे। जब संझा होईस,
MAR 15:43 त अरमतिया के रहइया यूसुफ ह आईस, जऊन ह कि महासभा के नामी सदस्य रिहिस अऊ खुदे परमेसर के राज के बाट जोहत रिहिस। ओह हिम्मत करके पीलातुस करा गीस अऊ यीसू के लास ला मांगिस।
MAR 15:44 पीलातुस ह ये सुनके अचम्भो करिस कि यीसू ह अतेक जल्दी मर गीस अऊ ओह सिपाहीमन के अधिकारी ला बलाके पुछिस, “का यीसू ह मर गीस?”
MAR 15:45 जब ओह अधिकारी ले यीसू के मरे के खबर ला जान लीस, त ओकर लास यूसुफ ला देवा दीस।
MAR 15:46 तब यूसुफ ह कुछू मलमल के कपड़ा बिसोईस अऊ यीसू के लास ला उतारके ओ ओनहा म लपेटिस अऊ एक कबर म जऊन ह पथरा म खोदे गे रहय, रखिस, अऊ कबर के मुंहाटी म एक ठन बड़े पथरा ला टेका दीस।
MAR 15:47 मरियम मगदलिनी अऊ योसेस के दाई मरियम देखत रिहिन कि यीसू के लास ला कहां रखे गे हवय।
MAR 16:1 जब बिसराम दिन ह बीत गे, तब मरियम मगदलिनी अऊ याकूब के दाई मरियम अऊ सलोमी, यीसू के देहें म चुपरे बर खुसबूदार मसाला बिसोईन।
MAR 16:2 हप्ता के पहिली दिन, बड़े बिहनियां जब सूरज ह निकलेच रिहिस, तब ओमन कबर म आईन,
MAR 16:3 अऊ ओमन एक-दूसर ला कहत रिहिन, “हमर बर कबर के मुंहाटी ले पथरा ला कोन ह टारही?”
MAR 16:4 जब ओमन आंखी उठाके देखिन, त पथरा जऊन ह बहुंत बड़े रिहिस, अपन ठऊर ले ढुनंग गे रहय।
MAR 16:5 जब ओमन कबर के भीतर गीन, त एक जवान ला सफेद ओनहा पहिरे जेवनी कोति बईठे देखिन अऊ अब्बड़ चकित होईन।
MAR 16:6 ओ जवान ह ओमन ला कहिस, “तुमन चकित झन होवव। यीसू नासरी जऊन ला कुरूस ऊपर चघाय गे रिहिस, ओला तुमन खोजत हवव। ओह जी उठे हवय, अऊ इहां नइं ए। देखव, एही ओ ठऊर ए, जिहां ओमन ओला रखे रिहिन।
MAR 16:7 पर तुमन जावव, अऊ ओकर चेलामन अऊ पतरस ला बतावव कि ओह तुम्हर ले आघू गलील प्रदेस जावत हवय, उहां तुमन ओला देखहू जइसने कि ओह तुमन ला कहे रिहिस।”
MAR 16:8 ओ माईलोगनमन घबराके, कांपत यीसू के कबर ले भागिन अऊ कोनो ला कुछू नइं कहिन काबरकि ओमन डरा गे रिहिन।
MAR 16:9 जब यीसू ह हप्ता के पहिली दिन बिहनियां होतेच ही जी उठिस, त ओह पहिली मरियम मगदलिनी ला दिखिस, जऊन म ले ओह सात परेत आतमामन ला निकाले रिहिस।
MAR 16:10 ओह जाके यीसू के चेलामन ला ये खबर दीस, जऊन मन दुखी होके रोवत रहंय।
MAR 16:11 जब ओमन ये सुनिन कि यीसू ह जी उठे हवय अऊ ओला दरसन दे हवय, त ओमन बिसवास नइं करिन।
MAR 16:12 एकर बाद, यीसू ह आने रूप म ओमा के दू झन ला तब दरसन दीस, जब ओमन गांव कोति जावत रिहिन।
MAR 16:13 ओमन घलो जाके बाकि चेलामन ला बताईन, पर चेलामन ओमन के घलो बिसवास नइं करिन।
MAR 16:14 बाद म, यीसू ह गियारह चेलामन ला घलो, जब ओमन खाय बर बईठे रिहिन, दरसन दीस अऊ ओमन के कम बिसवास अऊ ओमन के ढीठपन ला देखके ओमन ला दबकारिस, काबरकि ओमन ओ मनखेमन के बात ला बिसवास नइं करिन, जऊन मन यीसू ला जी उठे बाद देखे रिहिन।
MAR 16:15 यीसू ह ओमन ला कहिस, “तुमन जम्मो संसार म जाके जम्मो सिरिस्टी ला सुघर संदेस सुनावव।
MAR 16:16 जऊन ह बिसवास करही अऊ बतिसमा लीही, ओह उद्धार पाही। पर जऊन ह बिसवास नइं करही, ओह दोसी ठहिराय जाही।
MAR 16:17 अऊ बिसवास करइयामन म ये चिनहां होही कि ओमन मोर नांव म परेत आतमामन ला निकालहीं, अऊ ओमन नवां-नवां भासा बोलहीं।
MAR 16:18 ओमन सांप ला अपन हांथ म उठा लीहीं, अऊ ओमन कहूं जहर घलो पी लीहीं, तभो ले ओमन ला कुछू हानि नइं होवय। ओमन बेमार मनखे ऊपर हांथ रखहीं, त ओमन बने हो जाहीं।”
MAR 16:19 ये बात, ओमन ला कहे के पाछू, परभू यीसू ह स्वरग म उठा लिये गीस। अऊ ओह परमेसर के जेवनी हांथ कोति बईठ गीस।
MAR 16:20 तब चेलामन जाके जम्मो जगह परचार करिन अऊ परभू ह ओमन के संग काम करत रिहिस अऊ बचन के संग अचरज के चिनहांमन के दुवारा अपन बचन ला पक्का करिस। आमीन!
LUK 1:1 बहुंत आदरनीय थियुफिलुस! कतको झन ओ घटना के बारे म लिखे के काम ला करे हवंय, जऊन ह हमर बीच म घटे हवय।
LUK 1:2 ओमन सुरू ले ये घटनामन ला अपन आंखी ले देखे रिहिन अऊ ओमन परमेसर के बचन के सेवक रिहिन। ओमन ये घटनामन ला लिखके हमन ला सऊंप दीन।
LUK 1:3 एकरसेति, मेंह खुद सुरू ले हर एक बात ला धियान से जांच परताल करेंव अऊ मोला भी ये बने लगिस कि मेंह सिलसिलेबार ये बातमन ला तोर बर लिखंव,
LUK 1:4 ताकि तेंह ओ बातमन के सच्चई ला जान सकस, जेकर सिकछा तोला मिले हवय।
LUK 1:5 यहूदिया प्रदेस के राजा हेरोदेस के समय म एक पुरोहित रिहिस, जेकर नांव जकरयाह रिहिस; ओह अबियाह के पुरोहिती दल के रिहिस; ओकर घरवाली घलो हारून के बंस के रिहिस जेकर नांव इलीसिबा रिहिस।
LUK 1:6 ओ दूनों झन परमेसर के नजर म धरमी रिहिन, अऊ ओमन परभू के जम्मो हुकूम अऊ नियममन ला साफ मन ले मानत रिहिन।
LUK 1:7 पर ओ समय ओमन के कोनो लइका नइं रिहिस, काबरकि इलीसिबा ह बांझ रिहिस अऊ ओ दूनों डोकरा-डोकरी हो गे रिहिन।
LUK 1:8 एक बार जब जकरयाह ह अपन दल के पारी म परमेसर के आघू म पुरोहित के रूप म सेवा करत रिहिस।
LUK 1:9 तब पुरोहितमन के रीति के मुताबिक चिट्ठी निकाले गीस अऊ चिट्ठी ह ओकर नांव म निकलिस कि ओह परभू के मंदिर म जाके धूप जलावय।
LUK 1:10 अऊ धूप जलाय के समय म, मनखेमन के जम्मो भीड़ ह बाहिर म पराथना करत रहय।
LUK 1:11 तब उहां परभू के एक स्वरगदूत ह ओकर करा परगट होईस अऊ ओ स्वरगदूत ह धूप के बेदी के जेवनी कोति ठाढ़े रहय।
LUK 1:12 जकरयाह ह ओला देखके घबरा गीस अऊ ओह डरा गीस।
LUK 1:13 पर स्वरगदूत ह ओला कहिस, “हे जकरयाह, झन डर! तोर पराथना ह सुने गे हवय। तोर घरवाली इलीसिबा तोर बर एक बेटा जनमही, अऊ तें ओकर नांव यूहन्ना रखबे।
LUK 1:14 अऊ तोला आनंद अऊ खुसी होही, अऊ बहुंत झन ओकर जनम के खातिर आनंद मनाहीं,
LUK 1:15 काबरकि ओह परभू के नजर म एक महान मनखे होही। ओह अंगूर के मंद या आने किसम के मंद कभू नइं पीही, अऊ ओह अपन दाई के पेट ले ही पबितर आतमा ले भरे होही।
LUK 1:16 इसरायली मनखेमन ले बहुंते झन ला, ओह परभू ओमन के परमेसर करा लहुंटाके लानही।
LUK 1:17 अऊ ओह अगमजानी एलियाह के आतमा अऊ सामर्थ म, परभू के आघू-आघू चलही ताकि ओह ददामन के हिरदय ला ओमन के लइकामन कोति करय अऊ हुकूम नइं मनइयामन ला धरमी जन के बुद्धि कोति करय, अऊ ये किसम ले ओह परभू खातिर काबिल मनखेमन ला तियार करय।”
LUK 1:18 जकरयाह ह स्वरगदूत ले पुछिस, “मेंह येला कइसने मान लेवंव? काबरकि मेंह एक डोकरा मनखे अंव अऊ मोर घरवाली ह घलो डोकरी हो गे हवय।”
LUK 1:19 स्वरगदूत ह ओला जबाब दीस, “मेंह जिब्राएल अंव, अऊ मेंह परमेसर के आघू म ठाढ़े रहिथंव। मोला एकर बर पठोय गे हवय कि मेंह तोर ले गोठियावंव अऊ तोला ये सुघर संदेस सुनावंव।
LUK 1:20 देख! जब तक ये बात पूरा नइं हो जाही, तब तक तेंह कोंदा रहिबे, अऊ गोठियाय नइं सकबे; काबरकि तेंह मोर बात ला बिसवास नइं करे, जऊन ह अपन सही समय म पूरा होही।”
LUK 1:21 बाहिर मनखेमन जकरयाह के बाट जोहत रहंय अऊ अचम्भो करत रहंय कि ओह काबर अतेक बेर तक मंदिर म रूके हवय।
LUK 1:22 जब ओह बाहिर आईस, त ओमन ले गोठियाय नइं सकिस। तब ओमन समझ गीन कि ओह मंदिर म कोनो दरसन देखे होही, काबरकि ओह ओमन ला इसारा करत रहय, पर गोठियाय नइं सकय।
LUK 1:23 जब ओकर सेवा के समय ह पूरा हो गीस, त ओह अपन घर वापिस चल दीस।
LUK 1:24 एकर बाद ओकर घरवाली इलीसिबा ह देहें म होईस, अऊ ओह पांच महिना तक अपनआप ला मनखेमन ले छुपाय रखिस।
LUK 1:25 ओह कहिस, “परभू ह मोर बर ये करे हवय। ये दिन म, ओह अपन दया देखाके मनखेमन के बीच ले मोर कलंक ला दूर करे हवय।”
LUK 1:26 इलीसिबा के देहें म रहे के छठवां महिना म, परमेसर ह जिब्राएल स्वरगदूत ला गलील प्रदेस के नासरत नांव के नगर म एक कुंवारी छोकरी करा पठोईस।
LUK 1:27 ओ छोकरी के मंगनी यूसुफ नांव के एक मनखे संग होय रिहिस, जऊन ह दाऊद राजा के बंस के रिहिस। ओ कुंवारी के नांव मरियम रिहिस।
LUK 1:28 स्वरगदूत ह ओकर करा आके ओला कहिस, “जोहार लागी! तोर ऊपर बहुंत किरपा होय हवय। परभू ह तोर संग हवय।”
LUK 1:29 मरियम ह स्वरगदूत के बात ले बहुंत घबरा गीस अऊ सोचे लगिस कि ओकर जोहार के का मतलब हो सकथे।
LUK 1:30 पर स्वरगदूत ह ओला कहिस, “हे मरियम, झन डर! काबरकि परमेसर के दया तोर ऊपर होय हवय।
LUK 1:31 देख, तेंह देहें म होबे अऊ एक बेटा ला जनम देबे, अऊ तेंह ओकर नांव यीसू रखबे।
LUK 1:32 ओह महान होही अऊ सर्वोच्च परमेसर के बेटा कहाही। परभू परमेसर ह ओला ओकर पुरखा दाऊद राजा के सिंघासन दीही,
LUK 1:33 अऊ ओह याकूब के बंस ऊपर सदाकाल तक राज करही; ओकर राज के अन्त कभू नइं होही।”
LUK 1:34 मरियम ह स्वरगदूत ले पुछिस, “मेंह तो एक कुंवारी छोकरी अंव। येह कइसने हो सकथे?”
LUK 1:35 स्वरगदूत ह जबाब दीस, “पबितर आतमा ह तोर ऊपर उतरही, अऊ सर्वोच्च परमेसर के सक्ति ह तोर ऊपर छइहां करही। एकरसेति ओ पबितर जन जऊन ह जनमही, ओह परमेसर के बेटा कहाही।
LUK 1:36 अऊ त अऊ तोर रिस्तेदार इलीसिबा के ओकर बुढ़त काल म एक लइका होवइया हवय, ओला ठड़गी कहे जावत रिहिस; छठवां महिना हो गे, ओह देहें म हवय।
LUK 1:37 काबरकि परमेसर के कहे कोनो बात असफल नइं होवय।”
LUK 1:38 मरियम ह कहिस, “देख, मेंह परभू के दासी अंव। तोर कहे बात के मुताबिक होवय।” तब स्वरगदूत ह ओकर करा ले चले गीस।
LUK 1:39 कुछू समय के बाद, मरियम ह तियार होईस अऊ जल्दी-जल्दी यहूदा प्रदेस के पहाड़ी इलाका के एक नगर म गीस,
LUK 1:40 अऊ ओह उहां जकरयाह के घर म जाके इलीसिबा ला जोहार करिस।
LUK 1:41 जब इलीसिबा ह मरियम के जोहार ला सुनिस, त लइका ह ओकर पेट म उछल पड़िस, अऊ इलीसिबा ह पबितर आतमा ले भर गीस,
LUK 1:42 अऊ ओह चिचियाके कहिस, “माईलोगन म तेंह धइन अस, अऊ तोर पेट के लइका ह धइन ए!
LUK 1:43 पर अतेक जादा किरपा मोर ऊपर काबर होईस कि मोर परभू के दाई ह मोर करा आईस?
LUK 1:44 जइसने मेंह तोर जोहार के सबद ला सुनेंव, लइका ह मोर पेट म आनंद के मारे उछल पड़िस।
LUK 1:45 धइन अस तेंह, काबरकि तेंह बिसवास करय कि जऊन कुछू परभू ह तोला कहे हवय, ओह पूरा होही।”
LUK 1:46 तब मरियम ह कहिस: “मोर मन ह परभू के बड़ई करत हवय;
LUK 1:47 अऊ मोर आतमा ह मोर उद्धार करइया परमेसर म आनंद मनावत हवय,
LUK 1:48 काबरकि ओह अपन दासी के दीन-हीन दसा ऊपर धियान दे हवय। अब ले जम्मो पीढ़ी के मनखेमन मोला धइन कहिहीं,
LUK 1:49 काबरकि सामर्थी परमेसर ह मोर बर बड़े-बड़े काम करे हवय— ओकर नांव पबितर ए।
LUK 1:50 ओकर दया ओमन ऊपर, जऊन मन ओकर भय मानथें, पीढ़ी-पीढ़ी तक बने रहिथे।
LUK 1:51 ओह अपन हांथ ले बड़े-बड़े काम करे हवय; ओह अभिमानीमन ला तितिर-बितिर कर दे हवय, जऊन मन अपन मन म घमंड करथें।
LUK 1:52 ओह सक्तिसाली राजामन ला ओमन के सिंघासन ले उतार दे हवय, पर दीन-हीन मन ला ऊपर उठाय हवय।
LUK 1:53 ओह भूखहा मनखेमन ला सुघर चीज ले भर दे हवय, पर धनवानमन ला जुच्छा हांथ निकाल दे हवय।
LUK 1:54 अपन दया ला सुरता करके, ओह अपन सेवक इसरायल के मदद करे हवय,
LUK 1:55 जइसने ओह हमर पुरखामन ले कहे रिहिस कि ओह अब्राहम अऊ ओकर बंस ऊपर सदाकाल तक दया करही।”
LUK 1:56 मरियम ह इलीसिबा के संग करीब तीन महिना रिहिस अऊ तब अपन घर वापिस चल दीस।
LUK 1:57 इलीसिबा के लइका जनमे के समय होईस अऊ ओह एक बेटा ला जनम दीस।
LUK 1:58 जब ओकर परोसी अऊ रिस्तेदारमन सुनिन कि परभू ह ओकर ऊपर बड़े दया करे हवय, त ओमन ओकर संग आनंद मनाईन।
LUK 1:59 आठवां दिन म, ओमन लइका के खतना करे बर आईन अऊ ओमन ओकर नांव ओकर ददा के नांव जकरयाह रखे बर चाहत रिहिन,
LUK 1:60 पर ओकर दाई ह कहिस, “नइं! ओकर नांव यूहन्ना होही।”
LUK 1:61 ओमन ओला कहिन, “पर तोर रिस्तेदारमन म काकरो ये नांव नइं ए।”
LUK 1:62 तब ओमन लइका के ददा ले इसारा करके पुछिन कि ओह लइका के का नांव रखे चाहथे।
LUK 1:63 ओह लिखे के एक पटिया लाने बर कहिस अऊ ओमा लिखिस, “एकर नांव यूहन्ना ए।” येला देखके ओ जम्मो झन अचम्भो करिन।
LUK 1:64 अऊ तुरते जकरयाह के मुहूं ह खुल गे अऊ ओह गोठियाय अऊ परमेसर के इस्तुति करे लगिस।
LUK 1:65 जम्मो पड़ोसीमन ऊपर डर हमा गे अऊ ये जम्मो बात यहूदिया प्रदेस के जम्मो पहाड़ी इलाका म फईल गीस।
LUK 1:66 अऊ ये बात के जम्मो सुनइयामन अपन-अपन मन म सोचिन अऊ कहिन, “ये लइका ह का बनही?” काबरकि परभू के हांथ ओकर संग रहय।
LUK 1:67 यूहन्ना के ददा जकरयाह ह पबितर आतमा ले भर गीस अऊ ये कहिके अगमबानी करिस:
LUK 1:68 “परभू, इसरायल के परमेसर के इस्तुति होवय, काबरकि ओह आय हवय अऊ अपन मनखेमन के छुटकारा करे हवय।
LUK 1:69 ओह अपन सेवक दाऊद के बंस म हमर बर एक सामर्थी उद्धार करइया दे हवय,
LUK 1:70 (जइसने ओह अपन पबितर अगमजानीमन के दुवारा बहुंत पहिली ले कहत आय हवय),
LUK 1:71 कि ओह हमर बईरीमन ले अऊ जऊन मन हमन ले घिन करथें, ओमन ले हमन ला बचाही।
LUK 1:72 ओह हमर पुरखामन ऊपर दया करही अऊ अपन पबितर करार ला सुरता करही।
LUK 1:73 ओह किरिया खाके हमर पुरखा अब्राहम ले कहे रिहिस:
LUK 1:74 ओह हमन ला हमर बईरीमन के हांथ ले बचाही, ताकि हमन निडर होके
LUK 1:75 जिनगी भर पबितर अऊ धरमी बनके ओकर आघू म ओकर सेवा कर सकन।
LUK 1:76 “अऊ ए मोर लइका! तेंह सर्वोच्च परमेसर के अगमजानी कहाबे; काबरकि तेंह परभू के रसता तियार करे बर ओकर आघू-आघू जाबे,
LUK 1:77 अऊ ओकर मनखेमन ला तेंह बताबे कि ओमन के पाप छेमा होय के दुवारा ओमन के उद्धार होही।
LUK 1:78 येह हमर परमेसर के बड़े दया के कारन होही, जब स्वरग ले बिहनियां के अंजोर हमर करा आही,
LUK 1:79 अऊ ओमन ऊपर चमकही जऊन मन अंधियार अऊ मिरतू के छइहां म रहत हवंय, अऊ हमर गोड़ ला सांति के रसता म ले चलही।”
LUK 1:80 अऊ ओ लइका ह बाढ़त अऊ आतमा म मजबूत होवत गीस अऊ ओह तब तक निरजन ठऊर म रिहिस, जब तक ओह इसरायली मनखेमन के आघू म खुलेआम नइं आईस।
LUK 2:1 ओ समय म महाराजा अगस्तुस ये हुकूम निकालिस कि जम्मो रोमन राज म जनसंख्या के गनती करे जावय।
LUK 2:2 (जब ये पहिली जनसंख्या के गनती होईस, त ओ समय क्विरिनियुस ह सीरिया के राजपाल रिहिस)।
LUK 2:3 अऊ जम्मो मनखेमन नांव लिखवाय बर अपन-अपन सहर या गांव म गीन।
LUK 2:4 यूसुफ ह घलो गलील प्रदेस के नासरत सहर ले यहूदिया प्रदेस म दाऊद के गांव बैतलहम गीस, काबरकि ओह दाऊद के परिवार अऊ बंस के रिहिस।
LUK 2:5 ओह उहां मरियम के संग नांव लिखवाय बर गीस, जेकर संग ओकर मंगनी हो गे रिहिस। मरियम ह ओ समय देहें म रहय।
LUK 2:6 जब ओमन उहां रिहिन, त मरियम के लइका जने के समय पूरा होईस।
LUK 2:7 ओह अपन पहिलांत बेटा ला जनम दीस अऊ ओला कपड़ा म लपेटके कोटना म रखिस, काबरकि उहां ओमन बर धरमसाला म जगह नइं रिहिस।
LUK 2:8 उहां लकठा के मैदान म, कुछू चरवाहामन रथिया अपन भेड़ के झुंड के रखवारी करत रहंय।
LUK 2:9 तब परभू के एक स्वरगदूत ह ओमन करा परगट होईस, अऊ परभू के महिमा के तेज ओमन के चारों कोति चमकिस, अऊ ओमन डरा गीन।
LUK 2:10 पर स्वरगदूत ह ओमन ला कहिस, “झन डरव! मेंह तुम्हर बर बड़े आनंद के सुघर संदेस लाने हवंव, जऊन ह जम्मो मनखेमन बर होही।
LUK 2:11 आज राजा दाऊद के नगर म तुम्हर बर एक उद्धार करइया जनमे हवय; अऊ ओहीच ह मसीह परभू अय।
LUK 2:12 अऊ तुम्हर बर एकर ये चिनहां होही कि तुमन एक लइका ला कपड़ा म लपटाय अऊ कोटना म सुते पाहू।”
LUK 2:13 तब अचानक ओ स्वरगदूत के संग स्वरगदूतमन के एक बड़े दल परगट होईस अऊ ओमन परमेसर के महिमा करत ये कहत रहंय,
LUK 2:14 “सबले ऊंच स्वरग म परमेसर के महिमा अऊ धरती म ओ मनखेमन ऊपर सांति होवय, जऊन मन ले ओह खुस हवय।”
LUK 2:15 जब स्वरगदूतमन ओमन करा ले स्वरग चले गीन, त चरवाहामन एक-दूसर ला कहिन, “आवव, हमन बैतलहम जाके ये बात ला देखन, जेकर बारे म परभू ह हमन ला बताय हवय।”
LUK 2:16 एकरसेति ओमन झटपट गीन अऊ मरियम अऊ यूसुफ ला अऊ ओ लइका ला देखिन, जऊन ह कोटना म सुते रहय।
LUK 2:17 ओला देखे के बाद, चरवाहामन ओ बात बताय लगिन, जेला लइका के बारे म ओमन ला कहे गे रिहिस,
LUK 2:18 अऊ जम्मो मनखे चरवाहामन के बात ला सुनके अचम्भो करन लगिन।
LUK 2:19 पर मरियम ह ये जम्मो बात ला सोचत, येला अपन मन म रखिस।
LUK 2:20 जइसने चरवाहामन ला बताय गे रिहिस, वइसनेच ओमन जम्मो चीज ला सुनिन अऊ देखिन अऊ परमेसर के महिमा अऊ बड़ई करत लहुंट गीन।
LUK 2:21 आठवां दिन म, जब लइका के खतना करे के समय आईस, त ओकर नांव “यीसू” रखे गीस। ए नांव ला स्वरगदूत ह ओकर पेट म आय के पहिली ले देय रिहिस।
LUK 2:22 जब मूसा के कानून के मुताबिक ओमन के सुध होय के समय पूरा होईस, त यूसुफ अऊ मरियम लइका ला परभू ला अरपन करे बर यरूसलेम सहर ले गीन।
LUK 2:23 (जइसने परभू के कानून म लिखे हवय, “हर एक पहिलांत बेटा परभू बर पबितर करे जावय”),
LUK 2:24 अऊ परभू के कानून के मुताबिक पंड़की के एक जोड़ा या दू ठन परेवा पीला ला बलिदान करे जावय।
LUK 2:25 यरूसलेम म सिमोन नांव के एक मनखे रहय। ओह धरमी अऊ परमेसर के भक्त रहय। ओह इसरायलीमन बर सांति के बाट जोहत रहय अऊ पबितर आतमा ओकर संग रहय।
LUK 2:26 पबितर आतमा के दुवारा ओला ये बताय गे रहय कि जब तक ओह परभू के मसीह ला पहिली नइं देख लीही, तब तक ओह नइं मरही।
LUK 2:27 ओहीच दिन पबितर आतमा के अगुवई ले, ओह मंदिर म गीस। जब दाई-ददा लइका यीसू ला भीतर लाईन कि ओकर बर कानून के मुताबिक रीति-रिवाज ला पूरा करंय।
LUK 2:28 तब सिमोन ह लइका ला अपन कोरा म लीस अऊ परमेसर के इस्तुति करत कहिस,
LUK 2:29 “हे परमपरधान परभू, अपन परतिगियां के मुताबिक अब तोर सेवक ला सांति के संग बिदा कर।
LUK 2:30 काबरकि मोर आंखीमन उद्धार करइया ला देख ले हवंय,
LUK 2:31 जऊन ला तेंह जम्मो मनखेमन ला दे हवस,
LUK 2:32 कि ओह आनजातमन बर अंजोर, अऊ तोर इसरायली मनखेमन बर महिमा होवय।”
LUK 2:33 यीसू के बारे म जो कहे गीस, ओला सुनके ओकर ददा अऊ दाई अचम्भो करिन।
LUK 2:34 तब सिमोन ह ओमन ला आसीस दीस अऊ ओकर दाई मरियम ला कहिस, “ये लइका ह इसरायल म बहुंते झन के बिनास अऊ उद्धार खातिर चुने गे हवय, अऊ येह परमेसर के एक चिनहां होही, जेकर बिरोध म बोले जाही,
LUK 2:35 ताकि बहुंते झन के हिरदय के बिचार ह परगट हो जावय। अऊ एक तलवार तोर खुद के जीव ला घलो छेदही।”
LUK 2:36 हन्ना नांव के एक अगमबानी करइया माईलोगन रिहिस। ओह पनूएल के बेटी अऊ आसेर के गोत्र के रिहिस। ओह बहुंत डोकरी हो गे रहय। बिहाव होय के बाद ओह अपन घरवाला के संग सात साल तक रिहिस,
LUK 2:37 अऊ तब ले चौरासी बछर हो गे रहय, ओह बिधवा रिहिस। ओह मंदिर ला कभू नइं छोंड़य, पर उपास अऊ पराथना करत, रात अऊ दिन अराधना करत रहय।
LUK 2:38 ओहीच बेरा ओमन करा आके, ओह परमेसर ला धनबाद दीस अऊ ओ जम्मो झन ला लइका के बारे म बताय लगिस, जऊन मन यरूसलेम के छुटकारा के बाट जोहत रिहिन।
LUK 2:39 जब यूसुफ अऊ मरियम परभू के कानून के मुताबिक जम्मो बात ला पूरा कर लीन, त ओमन लइका ला लेके गलील प्रदेस म अपन खुद के सहर नासरत ला लहुंट गीन।
LUK 2:40 अऊ लइका ह बाढ़त अऊ मजबूत होवत गीस; ओह बुद्धि ले भरे रहय, अऊ परमेसर के अनुग्रह ओकर ऊपर रहय।
LUK 2:41 हर एक साल यीसू के दाई-ददा फसह के तिहार खातिर यरूसलेम जाय करत रिहिन।
LUK 2:42 जब यीसू ह बारह साल के होईस, त ओमन रीति-रिवाज के मुताबिक तिहार मनाय बर गीन।
LUK 2:43 जब तिहार ह सिरा गे, त ओमन वापिस घर लहुंटत रिहिन, पर बालक यीसू ह यरूसलेम म रूक गीस, अऊ ओकर दाई-ददा ये बात ला नइं जानत रहंय।
LUK 2:44 ये सोचत कि ओह मनखेमन के संग म होही, ओमन एक दिन के रसता चल दीन। तब ओमन ओला अपन सगा-संबंधी अऊ संगवारीमन के बीच म खोजे लगिन।
LUK 2:45 जब ओह नइं मिलिस, त ओमन ओला खोजत यरूसलेम वापिस चल दीन।
LUK 2:46 तीन दिन के बाद, ओमन ओला मंदिर के अंगना म गुरूमन के बीच म बईठे पाईन। ओह गुरूमन के बात ला सुनत अऊ ओमन ले सवाल पुछत रहय।
LUK 2:47 जऊन मन ओकर बात ला सुनत रहंय, ओ जम्मो झन ओकर समझ अऊ जबाब ले चकित होवत रहंय।
LUK 2:48 जब ओकर दाई-ददा ओला देखिन, त अचम्भो करिन। ओकर दाई ह कहिस, “बेटा, तेंह हमर संग अइसने काबर करे? देख! तोर ददा अऊ में फिकर म पड़के तोला खोजत रहेंन।”
LUK 2:49 ओह अपन दाई-ददा ले पुछिस, “तुमन मोला काबर खोजत रहेव? का तुमन ये नइं जानत रहेव कि मोला अपन ददा के घर म रहना जरूरी ए?”
LUK 2:50 पर ओमन ओकर बात ला नइं समझिन।
LUK 2:51 तब यीसू ह ओमन के संग नासरत गीस अऊ ओमन के अधीन म रिहिस। पर ओकर दाई ह ये जम्मो बात ला अपन मन म रखिस।
LUK 2:52 अऊ यीसू ह बुद्धि अऊ डीलडौल म, अऊ परमेसर अऊ मनखेमन के अनुग्रह म बढ़त गीस।
LUK 3:1 महाराजा तिबिरयुस के सासन के पंदरहवां बछर म, जब पुन्तियुस पीलातुस यहूदिया प्रदेस के राजपाल रिहिस; हेरोदेस ह गलील के राजपाल; ओकर भाई फिलिप्पुस ह इतूरिया अऊ त्रखोनितिस के राजपाल; अऊ लिसानियास ह अबिलेने के राजपाल रिहिस;
LUK 3:2 अऊ हन्ना अऊ काइफा महा पुरोहित रिहिन। तब ओ समय परमेसर के बचन ह निरजन जगह म जकरयाह के बेटा यूहन्ना करा पहुंचिस।
LUK 3:3 यूहन्ना ह यरदन नदी के आसपास के जम्मो इलाका म गीस अऊ पाप के छेमा खातिर मन-फिराय के बतिसमा के परचार करत रिहिस।
LUK 3:4 जइसने कि यसायाह अगमजानी के किताब म लिखे हवय: “सुनसान जगह म एक झन अवाज देवत रिहिस, ‘परभू बर डहार ला तियार करव, ओकर डहार ला सीधा करव।
LUK 3:5 हर एक घाटी ला पाट दिये जाही, अऊ हर एक पहाड़ अऊ पहाड़ी ला नीचे करे जाही। टेड़गा सड़कमन सीधा अऊ खंचवा-डीपरा रसतामन समतल हो जाहीं।
LUK 3:6 अऊ जम्मो मनखेमन परमेसर के उद्धार ला देखहीं।’ ”
LUK 3:7 मनखेमन के भीड़ के भीड़ यूहन्ना ले बतिसमा ले बर आवत रिहिस। त यूहन्ना ह ओमन ला कहिस, “हे जहरिला सांप के पीलामन हो! तुमन ला कोन ह चेता दीस कि तुमन परमेसर के अवइया कोरोध ले भागव?
LUK 3:8 अपन काम के दुवारा देखावव कि पाप ले पछतावा करे हवव। अऊ अपन मन म ये बात झन सोचव कि तुमन अब्राहम के संतान अव। मेंह तुमन ला बतावत हंव कि ये पथरामन ले परमेसर ह अब्राहम बर संतान पईदा कर सकथे।
LUK 3:9 टंगिया ला पहिले ही रूखमन के जरी म रखे जा चुके हवय, अऊ जऊन रूख म बने फर नइं फरय, ओह काटे अऊ आगी म झोंके जाही।”
LUK 3:10 तब भीड़ के मनखेमन ओकर ले पुछिन, “त हमन ला का करना चाही।”
LUK 3:11 यूहन्ना ह जबाब दीस, “जेकर करा दू ठन कुरता हवय, ओह अपन एक कुरता ओला दे देवय, जेकर करा एको ठन नइं ए, अऊ जेकर करा भोजन हवय, ओह घलो भूखहामन संग अइसनेच करय।”
LUK 3:12 लगान लेवइयामन घलो बतिसमा लेय बर आईन अऊ ओमन यूहन्ना ले पुछिन, “हे गुरू, हमन ला का करना चाही?”
LUK 3:13 ओह ओमन ला कहिस, “जतकी ठहिराय गे हवय, ओकर ले जादा लगान झन लेवव।”
LUK 3:14 तब कुछू सैनिकमन ओकर ले पुछिन, “अऊ हमन ला का करना चाही?” ओह ओमन ला कहिस, “काकरो ले जबरदस्ती पईसा झन लेवव अऊ न मनखेमन ऊपर लबारी दोस लगावव। अपन तनखा म संतोस करव।”
LUK 3:15 मनखेमन आस लगाय बाट जोहत रिहिन अऊ जम्मो झन अपन मन म सोचत रिहिन कि कहूं यूहन्ना ह तो मसीह नो हय।
LUK 3:16 यूहन्ना ह ओ जम्मो झन ला कहिस, “मेंह तुमन ला पानी ले बतिसमा देवत हंव। पर एक झन आवत हवय, जऊन ह मोर ले अऊ सक्तिसाली ए। मेंह तो ये लईक घलो नो हंव कि ओकर पनही के बंधना ला खोलंव। ओह तुमन ला पबितर आतमा अऊ आगी ले बतिसमा दीही।
LUK 3:17 ओकर सूपा ह ओकर हांथ म हवय ताकि अपन कोठार ला साफ करय अऊ गहूं ला अपन कोठा म कुढ़ोवय, पर ओह भूंसा ला ओ आगी म बारही, जऊन ह कभू नइं बुतावय।”
LUK 3:18 अऊ बहुंते आने बचन के दुवारा यूहन्ना ह मनखेमन ला उत्साहित करिस अऊ ओमन ला सुघर संदेस के परचार करिस।
LUK 3:19 यूहन्ना ह हेरोदेस राजा ला डांटिस काबरकि ओह अपन भाई के घरवाली हेरोदियास ला रखे रिहिस अऊ बहुंते आने कुकरम करे रिहिस।
LUK 3:20 तब हेरोदेस ह अपन जम्मो कुकरम म एक कुकरम अऊ जोड़ लीस कि ओह यूहन्ना ला पकड़के जेल म डार दीस।
LUK 3:21 जम्मो मनखेमन बतिसमा लेवत रिहिन, त यीसू ह घलो बतिसमा लीस। अऊ जब ओह पराथना करत रहय, त अकास ह खुल गीस।
LUK 3:22 अऊ पबितर आतमा ह देहें के रूप म एक पंड़की सहीं ओकर ऊपर उतरिस, अऊ स्वरग ले ये अवाज आईस: “तेंह मोर मयारू बेटा अस। तोर ले मेंह बहुंत खुस हवंव।”
LUK 3:23 जब यीसू ह अपन सेवा के काम ला सुरू करिस, त ओह करीब तीस साल के रिहिस। जइसने कि मनखेमन समझत रिहिन, ओह यूसुफ के बेटा रिहिस, अऊ यूसुफ ह हेली के बेटा,
LUK 3:24 हेली ह मत्तात के बेटा, मत्तात ह लेवी के बेटा, लेवी ह मलकी के बेटा, मलकी ह यन्नाई के बेटा, यन्नाई ह यूसुफ के बेटा,
LUK 3:25 यूसुफ ह मत्ततियाह के बेटा, मत्ततियाह ह आमोस के बेटा, आमोस ह नहूम के बेटा, नहूम ह एसली के बेटा, एसली ह नोगह के बेटा,
LUK 3:26 नोगह ह मात के बेटा, मात ह मत्ततियाह के बेटा, मत्ततियाह ह सिमी के बेटा, सिमी ह योसेख के बेटा, योसेख ह योदाह के बेटा,
LUK 3:27 योदाह ह योनान के बेटा, योनान ह रेसा के बेटा, रेसा ह जरूब्बाबेल के बेटा, जरूब्बाबेल ह सालतीएल के बेटा, सालतीएल ह नेरी के बेटा,
LUK 3:28 नेरी ह मलकी के बेटा, मलकी ह अद्दी के बेटा, अद्दी ह कोसाम के बेटा, कोसाम ह इलमोदाम के बेटा, इलमोदाम ह एर के बेटा,
LUK 3:29 एर ह यहोसू के बेटा, यहोसू ह एलिएजेर के बेटा, एलिएजेर ह योरीम के बेटा, योरीम ह मत्तात के बेटा, मत्तात ह लेवी के बेटा,
LUK 3:30 लेवी ह सिमोन के बेटा, सिमोन ह यहूदा के बेटा, यहूदा ह यूसुफ के बेटा, यूसुफ ह योनाम के बेटा, योनाम ह एलयाकीम के बेटा,
LUK 3:31 एलयाकीम ह मलेआह के बेटा, मलेआह ह मिन्नाह के बेटा, मिन्नाह ह मत्तता के बेटा, मत्तता ह नातान के बेटा, नातान ह दाऊद के बेटा,
LUK 3:32 दाऊद ह यिसै के बेटा, यिसै ह ओबेद के बेटा, ओबेद ह बोअज के बेटा, बोअज ह सलमोन के बेटा, सलमोन ह नहसोन के बेटा,
LUK 3:33 नहसोन ह अम्मीनादाब के बेटा, अम्मीनादाब ह अरनी के बेटा, अरनी ह हेसरोन के बेटा, हेसरोन ह पेरेस के बेटा, पेरेस ह यहूदा के बेटा,
LUK 3:34 यहूदा ह याकूब के बेटा, याकूब ह इसहाक के बेटा, इसहाक ह अब्राहम के बेटा, अब्राहम ह तेरह के बेटा, तेरह ह नाहोर के बेटा,
LUK 3:35 नाहोर ह सरूग के बेटा, सरूग ह रू के बेटा, रू ह फिलिग के बेटा, फिलिग ह एबेर के बेटा, एबेर ह सेलह के बेटा,
LUK 3:36 सेलह ह केनान के बेटा, केनान ह अर्पछद के बेटा, अर्पछद ह सेम के बेटा, सेम ह नूह के बेटा, नूह ह लेमेक के बेटा,
LUK 3:37 लेमेक ह मतूसेलह के बेटा, मतूसेलह ह हनोक के बेटा, हनोक ह येरेद के बेटा, येरेद ह महललेल के बेटा, महललेल ह केनान के बेटा,
LUK 3:38 केनान ह एनोस के बेटा, एनोस ह सेत के बेटा, सेत ह आदम के बेटा, अऊ आदम ह परमेसर के बेटा रिहिस।
LUK 4:1 यीसू ह पबितर आतमा ले भरे, यरदन नदी ले लहुंटिस अऊ पबितर आतमा के अगुवई म ओह निरजन जगह म गीस,
LUK 4:2 जिहां सैतान ह चालीस दिन तक ओकर परिछा करिस। यीसू ह ओ चालीस दिन तक कुछू नइं खाईस, अऊ तब ओला भूख लगिस।
LUK 4:3 तब सैतान ह यीसू ला कहिस, “यदि तेंह परमेसर के बेटा अस, त ये पथरा ले कह कि येह रोटी बन जावय।”
LUK 4:4 यीसू ह जबाब दीस, “परमेसर के बचन म लिखे हवय: ‘मनखे ह सिरिप रोटी ले ही जीयत नइं रहय।’ ”
LUK 4:5 सैतान ह यीसू ला एक ठन ऊंचहा ठऊर म ले गीस अऊ पल भर म ओला संसार के जम्मो राजपाट ला देखाईस।
LUK 4:6 अऊ ओह यीसू ला कहिस, “मेंह ये जम्मो के अधिकार अऊ सान-सौकत तोला दे दूहूं, काबरकि येह मोला दिये गे हवय, अऊ मेंह जऊन ला चाहंव ओला ये जम्मो दे सकत हंव।
LUK 4:7 यदि तेंह मोर अराधना करबे, त ये जम्मो ह तोर हो जाही।”
LUK 4:8 यीसू ह ओला ये जबाब दीस, “परमेसर के बचन म ये लिखे हवय: ‘तेंह परभू अपन परमेसर के अराधना कर अऊ सिरिप ओकरेच सेवा कर।’ ”
LUK 4:9 तब सैतान ह यीसू ला यरूसलेम म ले गीस अऊ ओला मंदिर के टीप म ठाढ़ करके कहिस, “कहूं तेंह परमेसर के बेटा अस, त उहां ले खाल्हे कूद जा।
LUK 4:10 काबरकि परमेसर के बचन म ये लिखे हवय: “ ‘परमेसर ह तोर बारे म अपन स्वरगदूतमन ला हुकूम दीही कि ओमन तोर रकछा करंय;
LUK 4:11 ओमन तोला अपन हांथ म उठा लीहीं, ताकि तोर गोड़ म पथरा ले चोट झन लगय।’”
LUK 4:12 यीसू ह ओला ये जबाब दीस, “परमेसर के बचन म ये घलो कहे गे हवय: ‘तें परभू अपन परमेसर के परिछा झन कर।’”
LUK 4:13 जब सैतान ह ये जम्मो परिछा कर चुकिस, त ओह आने मऊका के मिलत तक यीसू ला छोंड़के चल दीस।
LUK 4:14 यीसू ह पबितर आतमा के सक्ति ले भरे गलील प्रदेस लहुंटिस, अऊ आसपास के जम्मो इलाका म ओकर बारे म खबर फईल गीस।
LUK 4:15 ओह यहूदीमन के सभा-घरमन म उपदेस दीस, अऊ जम्मो झन ओकर बड़ई करिन।
LUK 4:16 यीसू ह नासरत गांव म गीस, जिहां ओह पले-बढ़े रिहिस, अऊ अपन रीति के मुताबिक, ओह बिसराम के दिन यहूदीमन के सभा-घर म गीस, अऊ ओह परमेसर के बचन ले पढ़े बर ठाढ़ होईस।
LUK 4:17 ओला यसायाह अगमजानी के किताब देय गीस। ओह किताब ला खोलिस अऊ ओ भाग ला निकालिस, जिहां ये लिखे रहय:
LUK 4:18 “परभू के आतमा मोर ऊपर हवय, काबरकि ओह गरीबमन ला सुघर संदेस के परचार करे बर मोर अभिसेक करे हवय। ओह मोला पठोय हवय, ताकि मेंह कैदीमन ला छुटकारा के, अऊ अंधरामन ला आंखी पाय के घोसना करंव, अऊ दुखित-पीड़ितमन ला छोंड़ावंव,
LUK 4:19 अऊ परभू के किरपा-दिरिस्टी के बछर के घोसना करंव।”
LUK 4:20 तब यीसू ह किताब ला बंद करके वापिस सेवक ला दे दीस अऊ बईठ गीस। सभा-घर म जम्मो झन ओला एकटक देखत रिहिन।
LUK 4:21 तब यीसू ह ओमन ला कहिस, “आज परमेसर के ये बचन ह तुम्हर सुनत म पूरा होईस।”
LUK 4:22 जम्मो झन ओकर बड़ई करिन अऊ ओकर मुहूं ले निकले अनुग्रह के बात ला सुनके ओमन अचम्भो करिन अऊ कहिन, “का येह यूसुफ के बेटा नो हय?”
LUK 4:23 यीसू ह ओमन ला कहिस, “तुमन मोर बर ये कहावत जरूर कहिहू, ‘ए डाक्टर, पहिली अपनआप ला चंगा कर!’ अऊ तुमन ये कहिहू, ‘जऊन कुछू तेंह कफरनहूम म करे हवस, ओकर बारे म हमन सुने हवन, अब वइसनेच तेंह इहां अपन नगर म घलो कर।’ ”
LUK 4:24 यीसू ह फेर कहिस, “मेंह तुमन ला सच कहत हंव, कोनो अगमजानी अपन खुद के नगर म आदरमान नइं पावय।
LUK 4:25 मेंह तुमन ला सच कहत हंव कि एलियाह के समय म जब साढ़े तीन साल तक अकास ले पानी नइं बरसिस अऊ जम्मो इलाका म भयंकर अकाल पड़े रिहिस, तब इसरायल देस म बहुंत बिधवामन रिहिन।
LUK 4:26 पर एलियाह ला ओमन ले काकरो करा नइं पठोय गीस, पर सीदोन प्रदेस के सारपत सहर म एक बिधवा करा ओला पठोय गीस।
LUK 4:27 अऊ एलीसा अगमजानी के समय म इसरायल देस म बहुंत कोढ़ीमन रिहिन, पर सीरिया देस के नामान ला छोंड़के ओमन ले कोनो सुध नइं करे गीस।”
LUK 4:28 ये बात ला सुनके सभा-घर के जम्मो मनखेमन कोरोध ले भर गीन।
LUK 4:29 ओमन उठिन अऊ यीसू ला सहर के बाहिर निकालिन। ओमन के सहर ह पहाड़ी ऊपर बसे रहय। ओमन यीसू ला पहाड़ी के छोर म ले गीन ताकि ओला चट्टान म ले ढकेल देवंय।
LUK 4:30 पर ओह भीड़ के बीच म ले निकलके अपन रसता म चल दीस।
LUK 4:31 तब यीसू ह गलील प्रदेस के कफरनहूम सहर म जाके, बिसराम के दिन मनखेमन ला उपदेस देवन लगिस।
LUK 4:32 मनखेमन यीसू के उपदेस ला सुनके चकित होवत रहंय, काबरकि ओह अधिकार के संग गोठियावत रहय।
LUK 4:33 सभा-घर म एक मनखे रिहिस जऊन म एक परेत आतमा रहय। ओह जोर से चिचियाके कहिस,
LUK 4:34 “हे नासरत के यीसू! हमर ले तोर का काम? का तेंह हमन ला नास करे बर आय हवस? मेंह जानत हंव, तेंह कोन अस—तेंह परमेसर के पबितर जन अस!”
LUK 4:35 यीसू ह ओला दबकारके कहिस, “चुपे रह। अऊ ओमा ले निकल आ।” तब परेत आतमा ह ओ मनखे ला ओ जम्मो झन के आघू म पटकिस अऊ ओला बिगर चोट पहुंचाय निकल गीस।
LUK 4:36 जम्मो मनखेमन अचम्भो करिन अऊ एक-दूसर ला कहिन, “येह का सिकछा अय? अधिकार अऊ सक्ति के संग ओह असुध आतमामन ला हुकूम देथे अऊ ओमन निकल जाथें।”
LUK 4:37 अऊ आसपास के जम्मो इलाका म ओकर खबर फईल गीस।
LUK 4:38 यीसू ह सभा-घर ले निकलके सिमोन के घर म गीस। ओ समय सिमोन के सास ला बहुंत जर आवत रहय, अऊ ओमन यीसू ले ओला बने करे बर बिनती करिन।
LUK 4:39 त यीसू ह ओकर बाजू म ठाढ़ होईस अऊ जर ला दबकारिस, अऊ ओकर जर ह उतर गीस। ओह तुरते उठिस अऊ ओमन के सेवा-टहल करे लगिस।
LUK 4:40 जब बेर ह बुड़त रहय, त मनखेमन ओ जम्मो झन, जऊन मन ला कतको किसम के बेमारी रहय, यीसू करा लानिन, अऊ ओह हर एक के ऊपर हांथ रखके ओमन ला बने करिस।
LUK 4:41 परेत आतमामन घलो बहुंत मनखेमन ले चिचियावत अऊ ये कहत निकल गीन कि तेंह परमेसर के बेटा अस। पर यीसू ह ओमन ला दबकारिस अऊ ओमन ला गोठियावन नइं दीस, काबरकि ओमन जानत रिहिन कि ओह मसीह अय।
LUK 4:42 जब बिहान होईस, त यीसू ह एक ठन सुनसान ठऊर म चले गीस। मनखेमन ओला खोजे लगिन, अऊ जब ओमन ओला भेंटिन, त ओला रोके के कोसिस करिन अऊ कहिन कि हमर करा ले झन जा।
LUK 4:43 पर ओह कहिस, “मोला आने सहरमन म घलो परमेसर के राज के सुघर संदेस के परचार करना जरूरी ए, काबरकि एकर खातिर मोला पठोय गे हवय।”
LUK 4:44 अऊ ओह यहूदिया प्रदेस के यहूदीमन के सभा-घरमन म परचार करन लगिस।
LUK 5:1 एक दिन यीसू गन्नेसरत झील के तीर म ठाढ़े रहय अऊ परमेसर के बचन सुने बर मनखेमन के भीड़ ह ओकर ऊपर गिरे पड़त रहय।
LUK 5:2 ओह दू ठन डोंगा पानी के तीर म देखिस, जऊन ला मछुआरमन छोंड़के अपन जालमन ला धोवत रहंय।
LUK 5:3 ओह ओमा के एक ठन डोंगा म चघिस, जऊन ह सिमोन के रिहिस अऊ यीसू ह ओला कहिस, “डोंगा ला पानी के तीर ले थोरकन दूरिहा ले चल।” तब यीसू ह डोंगा म बईठ गीस अऊ उहां ले मनखेमन ला उपदेस देवन लगिस।
LUK 5:4 जब ओह उपदेस दे चुकिस, त सिमोन ला कहिस, “डोंगा ला गहिरा पानी म ले चल अऊ मछरी पकड़े बर अपन जाल ला डार।”
LUK 5:5 सिमोन ह कहिस, “हे मालिक, हमन रात भर बहुंत मेहनत करेंन, तभो ले कुछू नइं पायेंन। पर तोर कहे म मेंह जाल ला फेर डारत हवंव।”
LUK 5:6 जब ओमन अइसने करिन, त जाल म अतकी जादा मछरी फंसिन कि जाल ह चीराय लगिस।
LUK 5:7 एकरसेति ओमन अपन संगवारीमन ला जऊन मन दूसर डोंगा म रहंय, इसारा करिन कि ओमन आके मदद करंय; अऊ ओमन आईन अऊ दूनों डोंगा ला मछरी ले अतका भर लीन कि डोंगामन बुड़न लगिन।
LUK 5:8 जब सिमोन पतरस येला देखिस, त ओह यीसू के गोड़ खाल्हे गिरिस अऊ कहिस, “हे परभू! मोर करा ले चले जा; मेंह एक पापी मनखे अंव।”
LUK 5:9 काबरकि अतका जादा मछरी फंसे के कारन, ओह अऊ ओकर जम्मो संगीमन अचम्भो करत रिहिन,
LUK 5:10 अऊ एहीच दसा जबदी के बेटा याकूब अऊ यूहन्ना के घलो रहय, जऊन मन सिमोन के संगवारी रिहिन। तब यीसू ह सिमोन ला कहिस, “झन डरा; अब ले तेंह मनखेमन ला पकड़े करबे।”
LUK 5:11 ओमन डोंगामन ला पानी के तीर म लानिन अऊ जम्मो कुछू ला छोंड़के यीसू के पाछू हो लीन।
LUK 5:12 जब यीसू ह एक नगर म रिहिस, त उहां कोढ़ ले भरे एक मनखे आईस। जब ओह यीसू ला देखिस, त मुहूं के भार भुइयां म गिरके ओकर ले बिनती करिस, “हे परभू, यदि तेंह चाहस, त मोला सुध कर सकथस।”
LUK 5:13 यीसू ह अपन हांथ ओ मनखे कोति बढ़ाईस अऊ ओला छूके कहिस, “मेंह चाहत हंव कि तेंह सुध हो जा!” अऊ तुरते ओकर कोढ़ ह गायब हो गीस।
LUK 5:14 तब यीसू ह ओला हुकूम दीस, “ये बात कोनो ला झन बताबे, पर जा अऊ अपनआप ला पुरोहित ला देखा अऊ सुध होय के बारे म मूसा ह जइसने हुकूम दे हवय, वइसने बलिदान चघा, ताकि मनखेमन म सबूत होवय कि तेंह बेमारी ले ठीक हो गे हवस।”
LUK 5:15 तभो ले यीसू के बारे म अऊ खबर फईल गीस, अऊ मनखेमन के भीड़ के भीड़ यीसू के बात सुने बर अऊ अपन बेमारी ले बने होय बर आय लगिन।
LUK 5:16 पर यीसू ह अकसर सुनसान जगह म जावय अऊ पराथना करय।
LUK 5:17 एक दिन जब यीसू ह उपदेस देवत रहय, त फरीसीमन अऊ कानून के गुरूमन उहां बईठे रहंय, जऊन मन गलील अऊ यहूदिया प्रदेस के जम्मो गांव ले, अऊ यरूसलेम ले आय रहंय। अऊ परभू के सामर्थ बिमरहामन ला बने करे बर यीसू के संग रहय।
LUK 5:18 कुछू मनखेमन लकवा के मारे एक मनखे ला खटिया म उठाके लानिन। ओमन ओला घर के भीतर ले जाय के कोसिस करिन ताकि ओला यीसू के आघू म रख सकंय।
LUK 5:19 जब ओमन भीड़ के मारे ओला भीतर नइं ले जा सकिन, तब ओमन छानी के ऊपर चघिन अऊ खपरा ला टारके ओमन ओला खटिया म, भीड़ के मांझा म, ठोका यीसू के आघू म उतारिन।
LUK 5:20 जब यीसू ह ओमन के बिसवास ला देखिस, त ओह लकवा के मारे मनखे ला कहिस, “संगी, तोर पाप ह छेमा हो गे।”
LUK 5:21 फरीसीमन अऊ कानून के गुरूमन अपन मन म सोचे लगिन, “ये कोन मनखे ए, जऊन ह परमेसर के निन्दा करत हवय? सिरिप परमेसर के छोंड़ अऊ कोन ह पाप ला छेमा कर सकथे?”
LUK 5:22 यीसू ह ओमन के मन के बात ला जानत रिहिस। ओह ओमन ले पुछिस, “तुमन ये बात अपन मन म काबर सोचत हवव?
LUK 5:23 कते बात ह सरल ए? ये कहई, ‘तोर पाप ह छेमा हो गीस,’ या फेर ये कहई, ‘उठ, अऊ चल फिर।’
LUK 5:24 मेंह तुमन ला देखाहूं कि मनखे के बेटा ला धरती म पाप छेमा करे के अधिकार हवय।” तब ओह लकवा के मारे ला कहिस, “उठ, अपन खटिया ला उठा अऊ घर जा।”
LUK 5:25 तुरते ओह ओमन के आघू म उठिस अऊ जऊन खटिया म ओह पड़े रिहिस, ओला उठाईस अऊ परमेसर के इस्तुति करत अपन घर चल दीस।
LUK 5:26 तब ओ जम्मो झन चकित हो गीन अऊ परमेसर के महिमा करिन। ओमन म डर हमा गीस अऊ ओमन कहे लगिन, “हमन आज चमतकार होवत देखे हवन।”
LUK 5:27 एकर बाद, यीसू ह बाहिर निकलिस अऊ लेवी नांव के एक झन लगान लेवइया ला अपन नाका म बईठे देखिस। यीसू ह ओला कहिस, “मोर पाछू हो ले।”
LUK 5:28 लेवी ह उठिस अऊ जम्मो कुछू ला छोंड़के ओकर पाछू हो लीस।
LUK 5:29 तब लेवी ह यीसू बर अपन घर म एक बड़े भोज के आयोजन करिस, अऊ लगान लेवइया अऊ आने पहुनामन के एक बड़े भीड़ ह ओमन के संग म खावत रिहिस।
LUK 5:30 पर फरीसी अऊ कानून के गुरूमन यीसू के चेलामन ले ये कहिके सिकायत करन लगिन, “तुमन लगान लेवइया अऊ पापीमन संग काबर खाथव अऊ पीथव?”
LUK 5:31 यीसू ह ओमन ला जबाब दीस, “भला-चंगा मनखेमन ला डाक्टर के जरूरत नइं होवय, पर बिमरहामन ला होथे।
LUK 5:32 मेंह धरमीमन ला नइं, पर पापीमन ला पछताप करे बर बलाय आय हवंव।”
LUK 5:33 ओमन यीसू ले कहिन, “यूहन्ना बतिसमा देवइया के चेलामन अकसर उपास रखथें अऊ पराथना करथें, अऊ अइसने फरीसीमन के चेलामन घलो करथें, पर तोर चेलामन खावत-पीयत रहिथंय।”
LUK 5:34 यीसू ह जबाब दीस, “का तुमन बरातीमन ले, जब तक दूल्हा ह ओमन के संग हवय, उपास करा सकथव?
LUK 5:35 पर ओ समय आही, जब दूल्हा ह ओमन ले अलग करे जाही, तब ओमन ओ दिनमन म उपास करहीं।”
LUK 5:36 यीसू ह ओमन ला ये पटंतर घलो सुनाईस, “कोनो मनखे नवां ओनहा ला चीरके ओकर खाप ला जुन्ना ओनहा म नइं सिलय। कहूं ओह अइसने करथे, त नवां ओनहा ह चीरा जाही अऊ नवां ओनहा के खाप जुन्ना ओनहा म नइं लगही।
LUK 5:37 अऊ कोनो मनखे नवां अंगूर के मंद ला जुन्ना चमड़ा के थैली म नइं भरय। कहूं कोनो अइसने करथे, त नवां मंद ह ओ थैली ला चीर दीही, अऊ मंद ह ढर जाही अऊ थैली ह बरबाद हो जाही।
LUK 5:38 नवां अंगूर के मंद ला नवां चमड़ा के थैली म भरना चाही।
LUK 5:39 कोनो मनखे अंगूर के जुन्ना मंद पीये के बाद, नवां मंद पीये नइं चाहय। ओह कहिथे, ‘जुन्ना मंद ही बने हवय।’ ”
LUK 6:1 एक बिसराम के दिन यीसू ह खेत म ले होके जावत रिहिस, अऊ ओकर चेलामन अनाज के कुछू दाना ला टोरत रिहिन अऊ ओला अपन हांथ म रमिंजके खावत जावत रिहिन।
LUK 6:2 तब कुछू फरीसीमन पुछिन, “तुमन अइसने काबर करत हवव, जेला बिसराम के दिन करई कानून के बिरूध अय?”
LUK 6:3 यीसू ह ओमन ला ये जबाब दीस, “का तुमन परमेसर के बचन म कभू नइं पढ़ेव कि दाऊद ह का करिस, जब ओला अऊ ओकर संगीमन ला भूख लगिस?
LUK 6:4 ओह परमेसर के घर म गीस, अऊ परमेसर ला भेंट चघाय रोटी ला लेके खाईस, जऊन ला पुरोहितमन के छोंड़ आने मनखे के खवई कानून के बिरूध रिहिस। अऊ ओह अपन संगवारीमन ला घलो ओ रोटी म ले कुछू खाय बर दीस।”
LUK 6:5 तब यीसू ह ओमन ला कहिस, “मनखे के बेटा ह बिसराम दिन के परभू अय।”
LUK 6:6 एक आने बिसराम के दिन यीसू ह सभा-घर म गीस अऊ उपदेस देवत रिहिस। उहां एक झन मनखे रिहिस जेकर जेवनी हांथ ह सूखा गे रहय।
LUK 6:7 फरीसी अऊ कानून के गुरूमन यीसू ऊपर दोस लगाय के बहाना खोजत रहंय, एकरसेति ओमन धियान लगाके देखत रहंय कि ओह सूखा हांथवाले मनखे ला बिसराम के दिन म बने करथे कि नइं।
LUK 6:8 पर यीसू ह ओमन के मन के बात ला जानत रिहिस अऊ ओह सूखा हांथवाले मनखे ला कहिस, “उठ अऊ जम्मो झन के आघू म ठाढ़ हो जा।” ओ मनखे ह उठिस अऊ उहां ठाढ़ हो गीस।
LUK 6:9 तब यीसू ह ओमन ला कहिस, “मेंह तुमन ला पुछत हंव—बिसराम के दिन म का करना उचित ए—भलई करई या बुरई करई, जिनगी बचई या जिनगी नास करई?”
LUK 6:10 यीसू ह चारों कोति ओ जम्मो झन ला देखिस अऊ तब ओ मनखे ला कहिस, “अपन हांथ ला लमा।” ओह वइसने करिस, अऊ ओकर हांथ ह पूरा बने हो गीस।
LUK 6:11 पर फरीसीमन अऊ कानून के गुरूमन बहुंत नराज होईन अऊ एक-दूसर के संग बिचार करन लगिन कि यीसू के संग का करे जावय।
LUK 6:12 एक दिन यीसू ह पहाड़ ऊपर पराथना करे बर गीस, अऊ परमेसर ले पराथना करत पूरा रात बिताईस।
LUK 6:13 जब बिहान होईस, त ओह अपन चेलामन ला बलाईस अऊ ओमा के बारह झन ला चुन लीस अऊ ओमन ला प्रेरित कहिस:
LUK 6:14 ओमन ये अंय—सिमोन (जेकर नांव यीसू ह पतरस रखिस) अऊ ओकर भाई अन्द्रियास, याकूब, यूहन्ना, फिलिप्पुस, बरतुलमै,
LUK 6:15 मत्ती, थोमा, हलफई के बेटा याकूब, सिमोन जऊन ला जेलोतेस कहे गीस,
LUK 6:16 याकूब के बेटा यहूदा, अऊ यहूदा इस्करियोती जऊन ह यीसू के संग बिसवासघात करिस।
LUK 6:17 यीसू ह अपन चेलामन संग पहाड़ ले उतरिस अऊ एक समतल जगह म ठाढ़ हो गीस। उहां ओकर चेलामन के एक बड़े भीड़ रहय अऊ जम्मो यहूदिया प्रदेस, यरूसलेम सहर, अऊ सूर अऊ सीदोन के समुंदर तीर ले बहुंत मनखे जूरे रिहिन।
LUK 6:18 ओमन यीसू के उपदेस ला सुने बर अऊ अपन बेमारीमन ले छुटकारा पाय बर आय रिहिन। असुध आतमा के सताय मनखेमन घलो बने हो गीन,
LUK 6:19 अऊ जम्मो मनखेमन यीसू ला छुए के कोसिस करत रिहिन, काबरकि ओकर ले सामर्थ निकलत रिहिस अऊ ओ जम्मो ला बने करत रिहिस।
LUK 6:20 अपन चेलामन कोति देखके यीसू ह कहिस, “धइन अव तुमन, जऊन मन गरीब अव, काबरकि परमेसर के राज तुम्हर ए।
LUK 6:21 धइन अव तुमन, जऊन मन अभी भूखा हवव, काबरकि तुमन ला संतोस करे जाही। धइन अव तुमन, जऊन मन अभी रोवत हव, काबरकि तुमन हंसहू।
LUK 6:22 धइन अव तुमन, जब मनखे के बेटा के कारन मनखेमन तुम्हर ले घिन करथें, अऊ तुमन ला निकाल देथें अऊ तुम्हर बेजत्ती करथें अऊ तुम्हर नांव ला खराप जानके काट देथें।
LUK 6:23 “ओ दिन आनंद मनावव अऊ आनंद के मारे कूदव, काबरकि तुम्हर बर स्वरग म बड़े ईनाम रखे हवय। ओमन के पुरखामन अगमजानीमन के संग अइसनेच बरताव करे रिहिन।
LUK 6:24 “पर हाय लगे तुमन ऊपर, जऊन मन धनवान अव, काबरकि तुमन अपन सुख भोग चुके हवव।
LUK 6:25 हाय लगे तुमन ऊपर, जऊन मन अभी भरपेट खावथव, काबरकि तुमन भूखा रहिहू। हाय लगे तुमन ऊपर, जऊन मन अभी हंसत हव, काबरकि तुमन सोक मनाहू अऊ रोहू।
LUK 6:26 हाय लगे तुमन ऊपर, जब जम्मो मनखे तुम्हर बड़ई करथें, काबरकि ओमन के पुरखामन लबरा अगमजानीमन के संग अइसनेच करे रिहिन।
LUK 6:27 “पर मेंह तुमन ला जऊन मन मोर गोठ ला सुनत हव, ये कहत हंव: अपन बईरीमन ले मया करव; ओमन के भलई करव, जऊन मन तुमन ले घिन करथें।
LUK 6:28 ओमन ला आसीस देवव, जऊन मन तुमन ला सराप देथें; ओमन बर पराथना करव, जऊन मन तुम्हर संग गलत बरताव करथें।
LUK 6:29 कहूं कोनो तुम्हर एक गाल म थपरा मारथे, त ओकर कोति दूसर गाल ला घलो कर देवव। कहूं कोनो तुम्हर ओढ़ना ला ले लेथे, त ओला तुम्हर कुरता लेय बर झन रोकव।
LUK 6:30 जऊन कोनो तुम्हर ले मांगथे, ओला देवव; अऊ कहूं कोनो तुम्हर चीज ला ले जावय, त ओला वापिस झन मांगव।
LUK 6:31 जइसने तुमन चाहथव कि मनखेमन तुम्हर संग करंय, वइसने तुमन घलो ओमन के संग करव।
LUK 6:32 “यदि तुमन ओमन ले मया करथव, जऊन मन तुम्हर ले मया करथें, त तुम्हर का बड़ई? काबरकि पापीमन घलो अपन ले मया करइयामन ले मया करथें।
LUK 6:33 अऊ यदि तुमन ओमन के भलई करथव, जऊन मन तुम्हर भलई करथें, त तुम्हर का बड़ई? काबरकि पापीमन घलो अइसने करथें।
LUK 6:34 अऊ यदि तुमन ओमन ला उधार देथव, जऊन मन ले तुमन वापिस पाय के आसा करथव, त तुम्हर का बड़ई? काबरकि पापीमन घलो पापीमन ला ये आसा म उधार देथें कि ओमन ला पूरा वापिस मिलही।
LUK 6:35 पर अपन बईरीमन ले मया करव, ओमन के भलई करव, अऊ बिगर कुछू चीज वापिस पाय के आसा म ओमन ला उधार देवव। तभे तुमन ला बड़े ईनाम मिलही, अऊ तुमन सर्वोच्च परमेसर के संतान होहू, काबरकि ओह गुन नइं चिनहइया अऊ दुस्ट मनखेमन ऊपर दया करथे।
LUK 6:36 दयालु बनव, जइसने स्वरग म रहइया तुम्हर ददा ह दयालु ए।
LUK 6:37 “आने मन के गलती झन निकालव, ताकि तुम्हर घलो गलती झन निकाले जावय। आने मन ला दोसी झन ठहिरावव, त तुमन ला घलो दोसी नइं ठहिराय जाही। आने मन ला छेमा करव, त तुमन ला घलो छेमा करे जाही।
LUK 6:38 आने मन ला देवव, त तुमन ला घलो दिये जाही। बने ढंग ले नापके, दबा-दबाके, हला-हलाके, अऊ छलकत तुम्हर कोरा म डारे जाही। काबरकि जऊन नाप ले तुमन नापथव, ओही नाप ले तुम्हर बर घलो नापे जाही।”
LUK 6:39 यीसू ह ओमन ला ये पटंतर घलो कहिस, “का एक अंधरा ह दूसर अंधरा ला रसता देखा सकथे? का ओमन दूनों खंचवा म नइं गिर जाहीं?
LUK 6:40 चेला ह अपन गुरू ले बड़े नइं होवय, पर पूरा सिकछा पाय के बाद ओह अपन गुरू सहीं हो जाथे।
LUK 6:41 “तेंह काबर अपन भाई के आंखी के छोटे कचरा ला देखथस, जबकि अपन खुद के आंखी के बड़े कचरा ला धियान नइं देवस?
LUK 6:42 जब तुम्हर खुद के आंखी म लकरी के लट्ठा हवय, त तुमन अपन भाई ला कइसने कह सकथव, ‘लान मेंह तोर आंखी के छोटे कचरा ला निकाल दंव?’ हे ढोंगीमन हो, पहिली अपन खुद के आंखी के लट्ठा ला निकालव, तभे तुमन अपन भाई के आंखी के छोटे कचरा ला साफ-साफ देखहू अऊ ओला निकाल सकहू।
LUK 6:43 “बने रूख म खराप फर नइं फरय, अऊ न ही खराप रूख म बने फर फरथे।
LUK 6:44 हर एक रूख ह ओकर फर ले पहिचाने जाथे। काबरकि मनखेमन कंटिली झाड़ीमन ले अंजीर के फर नइं टोरंय, अऊ न ही झरबेरी रूख ले अंगूर।
LUK 6:45 बने मनखे ह अपन दिल के बने भंडार ले बने बातमन ला निकालथे, अऊ खराप मनखे ह अपन दिल के खराप भंडार ले खराप बात ला निकालथे। काबरकि जऊन बात ले दिल ह भरे रहिथे, ओहीच ह मुहूं ले निकलथे।
LUK 6:46 “जब तुमन मोर कहे ला नइं मानव, त मोला काबर ‘हे परभू, हे परभू’ कहिथव?
LUK 6:47 जऊन ह मोर करा आथे, अऊ मोर गोठमन ला सुनथे अऊ ओला मानथे—मेंह तुमन ला बतावत हंव कि ओह काकर सहीं अय।
LUK 6:48 ओह ओ घर बनइया मनखे सहीं अय, जऊन ह भुइयां ला गहिरा कोड़िस अऊ चट्टान ऊपर नीव डारिस। जब बाढ़ आईस अऊ पानी ओ घर ले टकराईस, त ओला हलाय नइं सकिस, काबरकि ओ घर ह मजबूत बने रिहिस।
LUK 6:49 पर जऊन ह मोर गोठ ला सुनथे अऊ ओला नइं मानय, ओह ओ मनखे के सहीं अय, जऊन ह भुइयां म बिगर नीव डारे घर बनाईस, अऊ जब बाढ़ के पानी ओ घर ले टकराईस, त ओह गिरके बरबाद हो गीस।”
LUK 7:1 जब यीसू ह सुनइयामन ला ये जम्मो बात कह चुकिस, तब ओह कफरनहूम सहर म गीस।
LUK 7:2 उहां सेना के अधिकारी के एक सेवक ह बेमारी ले मरइयाच रहय। ओ सेवक ला सेना के अधिकारी ह बहुंत मया करय।
LUK 7:3 सेना के अधिकारी ह यीसू के बारे म सुनिस अऊ यहूदीमन के कुछू अगुवामन ला ओकर करा ये बिनती के संग पठोईस कि ओह आके ओकर सेवक ला बेमारी ले चंगा करय।
LUK 7:4 जब ओमन यीसू करा आईन, त बहुंत बिनती करके ओकर ले कहिन, “ओ अधिकारी ह एकर काबिल अय कि तेंह ओकर बर येला कर,
LUK 7:5 काबरकि ओह हमर जाति ले मया करथे अऊ हमर सभा-घर ला बनवाय हवय।”
LUK 7:6 एकरसेति यीसू ह ओमन के संग गीस। पर जब यीसू ह ओकर घर के लकठा म हबरेच रिहिस, तभे सेना के अधिकारी ह अपन संगवारीमन के हांथ म ओकर करा ये खबर पठोईस, “हे परभू, अपनआप ला तकलीफ झन दे, काबरकि मेंह एकर लईक नो हंव कि तेंह मोर घर म आ।
LUK 7:7 एकरे कारन मेंह अपनआप ला ये काबिल नइं समझेंव कि तोर करा आवंव। पर सिरिप अपन मुहूं ले कहि दे, त मोर सेवक ह ठीक हो जाही।
LUK 7:8 काबरकि मेंह खुद हाकिम के अधीन म हवंव अऊ सैनिकमन मोर अधीन म हवंय। मेंह एक झन ला कहिथंव, ‘जा’, त ओह जाथे अऊ दूसर ला कहिथंव, ‘आ’, त ओह आथे। मेंह अपन सेवक ला कहिथंव, ‘येला कर, त ओह ओला करथे।’ ”
LUK 7:9 येला सुनके यीसू ह चकित हो गीस, अऊ अपन पाछू-पाछू आवत भीड़ कोति मुहूं करके कहिस, “मेंह तुमन ला कहत हंव, इसरायल म घलो मोला अइसने बड़े बिसवास देखे बर नइं मिलिस।”
LUK 7:10 तब जऊन मनखेमन ला पठोय गे रिहिस, ओमन घर लहुंटिन अऊ देखिन कि सेवक ह बने हो गे रहय।
LUK 7:11 एकर बाद, यीसू ह नाइन नांव के एक सहर म गीस, अऊ ओकर संग ओकर चेलामन अऊ एक बड़े भीड़ घलो गीस।
LUK 7:12 जब यीसू ह सहर म जाय के दुवारी करा हबरिस, त देखिस कि मनखेमन एक मुरदा ला बाहिर ले जावत रहंय। ओह अपन दाई के एके झन बेटा रिहिस, अऊ ओकर दाई ह बिधवा रिहिस। सहर के मनखेमन के एक बड़े भीड़ ओ बिधवा के संग रिहिस।
LUK 7:13 जब परभू ह ओला देखिस, त ओला ओकर ऊपर अब्बड़ दया आईस अऊ ओह ओला कहिस, “झन रो।”
LUK 7:14 तब यीसू ह आके अरथी ला छुईस, अऊ अरथी ला कंधा देवइयामन ठाढ़ हो गीन। यीसू ह कहिस, “हे जवान! मेंह तोला कहत हंव, उठ।”
LUK 7:15 मरे मनखे ह उठ बईठिस अऊ गोठियाय लगिस, अऊ यीसू ह ओला ओकर दाई ला सऊंप दीस।
LUK 7:16 ओ जम्मो झन ऊपर डर छा गे, अऊ ओमन परमेसर के महिमा करके कहिन, “हमर बीच म एक महान अगमजानी परगट होय हवय। परमेसर ह अपन मनखेमन के मदद करे बर आय हवय।”
LUK 7:17 यीसू के बारे म ये समाचार जम्मो यहूदिया प्रदेस अऊ आसपास के इलाका म फईल गीस।
LUK 7:18 यूहन्ना बतिसमा देवइया के चेलामन ओला ये जम्मो बात बताईन। तब यूहन्ना बतिसमा देवइया अपन चेलामन के दू झन ला बलाईस
LUK 7:19 अऊ ओमन ला परभू करा ये पुछे बर पठोईस, “का तेंह ओही अस, जऊन ह अवइया रिहिस या फेर हमन कोनो आने के बाट जोहन?”
LUK 7:20 जब ओ मनखेमन यीसू करा आईन, त ओमन कहिन, “यूहन्ना बतिसमा देवइया ह हमन ला तोर मेर ये पुछे बर पठोय हवय, ‘का तेंह ओही अस, जऊन ह अवइया रिहिस या फेर हमन कोनो आने के बाट जोहन?’ ”
LUK 7:21 ओही बेरा यीसू ह बहुंत मनखेमन ला रोग, बेमारी अऊ दुस्ट आतमामन ले बने करिस अऊ कतको अंधरामन ला आंखी दीस।
LUK 7:22 तब यीसू ह यूहन्ना के मनखेमन ला कहिस, “तुमन वापिस जावव अऊ जऊन कुछू तुमन देखे अऊ सुने हवव, ओला यूहन्ना ला बतावव: अंधरामन देखथें, खोरवामन रेंगथें, कोढ़ीमन सुध करे जावथें, भैंरा मनखेमन सुनथें, मुरदामन जी उठथें, अऊ गरीबमन ला सुघर संदेस के परचार करे जाथे।
LUK 7:23 धइन ए ओह जऊन ह मोर ऊपर संदेह नइं करय।”
LUK 7:24 यूहन्ना के संदेसियामन के जाय के बाद, यीसू ह मनखेमन ला यूहन्ना के बारे म कहन लगिस, “जब तुमन सुनसान जगह म यूहन्ना करा गेव, त तुमन का देखे के आसा करत रहेव? का हवा म डोलत बड़े घांस के पऊधा ला?
LUK 7:25 यदि नइं, त फेर तुमन का देखे बर गे रहेव? का सुघर कपड़ा पहिरे एक मनखे ला? देखव, जऊन मन मंहगा कपड़ा पहिरथें अऊ भोग-बिलास म जिनगी बिताथें, ओमन महल म रहिथें।
LUK 7:26 पर तुमन का देखे बर गे रहेव? एक अगमजानी ला? हव! मेंह तुमन ला कहत हंव—तुमन एक अगमजानी ले घलो बड़े मनखे ला देखेव।
LUK 7:27 येह ओ मनखे अय, जेकर बारे म परमेसर के बचन म लिखे हवय: “ ‘मेंह अपन संदेसिया ला तोर आघू पठोवत हंव, जऊन ह तोर आघू तोर रसता तियार करही।’
LUK 7:28 मेंह तुमन ला बतावत हंव, जऊन मन माईलोगनमन ले जनमे हवंय, ओमन म यूहन्ना ले बड़े कोनो नो हंय; पर जऊन ह परमेसर के राज म सबले छोटे अय, ओह यूहन्ना ले घलो बड़े अय।”
LUK 7:29 (जम्मो मनखेमन, इहां तक कि लगान लेवइयामन घलो जब यीसू के बात ला सुनिन, त ओमन यूहन्ना ले बतिसमा लेके परमेसर के रसता ला सही मान लीन।
LUK 7:30 पर फरीसी अऊ कानून के जानकारमन परमेसर के मनसा ला अपन बर स्वीकार नइं करिन, काबरकि ओमन यूहन्ना के बतिसमा नइं लीन।)
LUK 7:31 यीसू ह फेर कहिस, “तब मेंह ये पीढ़ी के मनखेमन के तुलना काकर ले करंव? येमन काकर सहीं अंय?
LUK 7:32 येमन ओ लइकामन सहीं अंय, जऊन मन हाट-बजार म बईठके एक-दूसर ला कहिथें, “ ‘हमन तुम्हर बर बांसुरी बजाएंन, अऊ तुमन नइं नाचेव; हमन बिलाप करेंन, अऊ तुमन नइं रोएव।’
LUK 7:33 यूहन्ना बतिसमा देवइया ह आईस, जऊन ह न तो रोटी खाईस अऊ न ही मंद पीईस, अऊ तुमन कहिथव, ‘ओमा परेत आतमा हवय।’
LUK 7:34 मनखे के बेटा ह आईस, जऊन ह खाथे अऊ पीथे, अऊ तुमन कहिथव, ‘देखव, ओह पेटहा अऊ पियक्कड़ अय, अऊ लगान लेवइया अऊ पापीमन के संगवारी अय।’
LUK 7:35 पर बुद्धि ह ओकर जम्मो लइकामन के दुवारा सही ठहिरथे।”
LUK 7:36 एक फरीसी मनखे यीसू ला अपन संग खाना खाय बर नेवता दीस। यीसू ह ओ फरीसी के घर म गीस अऊ खाना खाय बर बईठिस।
LUK 7:37 ओ सहर के एक माईलोगन ला, जऊन ह पापमय जिनगी बिताय रिहिस, ये पता चलिस कि यीसू ह ओ फरीसी के घर म खाना खावत हे, त ओह एक संगमरमर के बरतन म इतर तेल लेके आईस,
LUK 7:38 अऊ ओह यीसू के पाछू ओकर गोड़ करा रोवत ठाढ़ हो गीस अऊ अपन आंसू ले ओकर गोड़मन ला भिगोय लगिस अऊ ओह अपन मुड़ के चुंदी ले ओमन ला पोंछिस अऊ ओकर गोड़मन ला चूमिस अऊ ओमा इतर तेल ला ढारिस।
LUK 7:39 येला देखके, ओ फरीसी जऊन ह यीसू ला खाय बर बलाय रिहिस, अपन मन म कहिस, “कहूं ये मनखे ह अगमजानी होतिस, त जान लेतिस कि ओला कोन छूवत हवय अऊ ओह का किसम के माईलोगन ए। ओह तो एक पापिन अय।”
LUK 7:40 तब यीसू ह ओला जबाब देवत कहिस, “हे सिमोन, मोला तोर ले कुछू कहना हे।” ओह कहिस, “हे गुरू, कह।”
LUK 7:41 यीसू ह कहिस, “दू झन मनखे एक साहूकार के करजा लगत रिहिन। एक झन ओकर पांच सौ दीनार लगत रिहिस अऊ दूसर झन पचास दीनार।
LUK 7:42 ओ दूनों म के काकरो करा करजा पटाय बर पईसा नइं रिहिस, त साहूकार ह ओ दूनों के करजा ला माफ कर दीस। तब ओ दूनों म ले कोन ह साहूकार ले जादा मया करही?”
LUK 7:43 सिमोन ह जबाब दीस, “मोर समझ म ओह, जेकर जादा करजा माफ करे गीस।” यीसू ह कहिस, “तेंह सही कहय।”
LUK 7:44 तब यीसू ह ओ माईलोगन कोति अपन मुहूं ला करके सिमोन ला कहिस, “का तेंह ये माईलोगन ला देखत हस? मेंह तोर घर म आएंव, अऊ तेंह मोर गोड़ धोय बर पानी नइं देय, पर ये माईलोगन ह अपन आंसू ले मोर गोड़मन ला भिगोईस अऊ अपन चुंदी ले ओमन ला पोंछिस।
LUK 7:45 तेंह मोला नइं चूमे, पर जब ले मेंह इहां आय हवंव, तब ले येह मोर गोड़ ला चूमतेच हवय।
LUK 7:46 तेंह मोर मुड़ म चुपरे बर कोनो तेल नइं देय, पर येह मोर गोड़मन म इतर तेल चुपरे हवय।
LUK 7:47 एकरसेति मेंह तोला कहत हंव, ओकर बहुंत पाप छेमा करे गे हवय; ये बात ह ओकर बहुंत मया ले साबित होवत हे। पर जेकर थोरकन छेमा करे गीस, ओह थोरकन मया करथे।”
LUK 7:48 तब यीसू ह ओ माईलोगन ले कहिस, “तोर पाप छेमा हो गीस।”
LUK 7:49 तब जऊन मन यीसू के संग खाय बर बईठे रिहिन, ओमन अपन बीच म कहे लगिन, “येह कोन ए, जऊन ह पाप ला घलो छेमा करथे।”
LUK 7:50 यीसू ह ओ माईलोगन ले कहिस, “तोर बिसवास ह तोर उद्धार करे हवय, सांति म जा।”
LUK 8:1 एकर बाद, यीसू ह बारह चेलामन संग सहर-सहर अऊ गांव-गंवई मन म जाके परमेसर के राज के सुघर संदेस के परचार करिस।
LUK 8:2 ओकर बारह चेलामन ओकर संग रिहिन, अऊ कुछू माईलोगनमन घलो जऊन मन ला दुस्ट आतमा अऊ बेमारीमन ले ठीक करे गे रिहिस, ओकर संग रिहिन। ओमन ये रिहिन: मरियम जऊन ला मगदलिनी कहे जावय—जेमा ले सात ठन परेत आतमा निकाले गे रिहिस;
LUK 8:3 हेरोदेस के घर के देखरेख करइया खोजा के घरवाली—योअन्ना, सूसन्ना अऊ बहुंत आने माईलोगनमन। ये माईलोगनमन अपन साधन ले यीसू अऊ ओकर चेलामन के मदद करत रिहिन।
LUK 8:4 जब एक बड़े भीड़ ह जूरत रिहिस अऊ आने सहर ले मनखेमन यीसू करा आवत रिहिन, तब ओह ये पटंतर कहिस:
LUK 8:5 “एक किसान ह बीज बोय बर निकलिस। जब ओह बोवत रिहिस, त कुछू बीजामन रसता के तीर म गिरिन; ओमन गोड़ खाल्हे कुचरे गीन, अऊ अकास के चिरईमन ओला खा लीन।
LUK 8:6 कुछू बीजामन पथर्री भुइयां ऊपर गिरिन अऊ ओमन जामिन, पर ओमन पानी के नमी नइं मिले के कारन सूख गीन।
LUK 8:7 कुछू बीजामन कंटिली झाड़ीमन के बीच म गिरिन अऊ ओ झाड़ीमन बढ़के ओमन ला दबा दीन।
LUK 8:8 अऊ कुछू बीजामन बने भुइयां म गिरिन। ओमन बाढ़िन अऊ जतेक बोय गे रिहिस ओकर ले सौ गुना जादा फसल लाईन।” ये कहे के बाद, यीसू ह चिचियाके कहिस, “जेकर सुने के कान हवय, ओह सुन ले।”
LUK 8:9 ओकर चेलामन ओकर ले पुछिन, “ये पटंतर के का मतलब होथे?”
LUK 8:10 ओह कहिस, “तुमन ला परमेसर के राज के भेद के गियान देय गे हवय, पर आने मन ले मेंह पटंतर म गोठियाथंव, ताकि, “ ‘देखत ले घलो, ओमन झन देख सकंय; अऊ सुनत ले घलो, ओमन झन समझ सकंय।’
LUK 8:11 “पटंतर के ये मतलब अय: बीजा ह परमेसर के बचन ए।
LUK 8:12 डहार के तीर म गिरे बीजा ह ओमन अंय, जऊन मन बचन ला सुनथें; पर सैतान ह आथे, अऊ ओमन के हिरदय ले बचन ला ले जाथे, ताकि ओमन बिसवास नइं कर सकंय अऊ ओमन के उद्धार नइं होवय।
LUK 8:13 पथर्री भुइयां के ऊपर गिरे बीजा ह ओमन अंय, जऊन मन बचन ला आनंद सहित गरहन करथें जब ओमन येला सुनथें, पर ओमन म जरी नइं रहय। ओमन कुछू समय बर बिसवास करथें, पर परखे जाय के समय म ओमन गिर जाथें।
LUK 8:14 ओ बीजा जऊन ह कंटिली झाड़ीमन के बीच म गिरिस, ओह ओमन अंय, जऊन मन बचन ला सुनथें, पर आघू चलके ओमन ये जिनगी के चिंता, धन अऊ भोग-बिलास म फंस जाथें, अऊ ओमन विकसित नइं होवंय।
LUK 8:15 पर ओ बीजा जऊन ह बने भुइयां म गिरिस, ओह ओमन अंय, जऊन मन बचन ला सुनथें, अऊ येला सच्चा अऊ बने हिरदय म रखथें, अऊ लगातार फर लाथें।
LUK 8:16 “कोनो मनखे दीया ला बारके ओला बड़े कटोरा म नइं ढांपय या खटिया के खाल्हे म नइं मढ़ाय। पर ओह दीया ला दीवट ऊपर रखथे, ताकि जऊन मन भीतर आवंय, ओमन अंजोर ला देखंय।
LUK 8:17 काबरकि कुछू भी बात छिपे नइं ए, जऊन ला उघारे नइं जाही, अऊ कुछू भी ढंके नइं ए, जऊन ला बताय नइं जाही या जेकर खुलासा नइं करे जाही।
LUK 8:18 एकरसेति, सचेत रहव कि तुमन कइसने सुनथव। जेकर करा हवय, ओला अऊ दिये जाही; अऊ जेकर करा नइं ए, ओकर ले ओला घलो ले लिये जाही, जऊन ला ओह अपन समझथे।”
LUK 8:19 यीसू के दाई अऊ भाईमन ओला देखे बर आईन, पर भीड़ के मारे ओमन ओकर करा नइं जा सकिन।
LUK 8:20 एक झन ह यीसू ला कहिस, “तोर दाई अऊ भाईमन बाहिर ठाढ़े हवंय, अऊ तोला देखे बर चाहथें।”
LUK 8:21 यीसू ह ओ जम्मो झन ला कहिस, “मोर दाई अऊ भाई ओमन अंय, जऊन मन परमेसर के बचन ला सुनथें अऊ ओला मानथें।”
LUK 8:22 एक दिन यीसू ह अपन चेलामन ला कहिस, “आवव, हमन झील के ओ पार चलन।” तब ओमन डोंगा म चघिन अऊ जाय लगिन।
LUK 8:23 जब ओमन डोंगा ला खेवत रिहिन, त यीसू ह सुत भुलाईस। तब झील के ऊपर एक आंधी चलिस, अऊ डोंगा ह पानी ले भरे लगिस, अऊ ओमन बड़े जोखिम म पड़ गीन।
LUK 8:24 चेलामन यीसू करा गीन अऊ ओला उठाके कहिन, “मालिक, मालिक, हमन पानी म बुड़इया हवन।” यीसू ह उठिस, अऊ आंधी अऊ उफनत पानी ला दबकारिस। ओमन थम गीन अऊ जम्मो ह सांत हो गीस।
LUK 8:25 तब यीसू ह अपन चेलामन ले कहिस, “तुम्हर बिसवास ह कहां हवय?” ओमन म डर हमा गे अऊ अचम्भो करके एक-दूसर ला कहिन, “येह कोन ए? येह आंधी अऊ पानी ला घलो हुकूम देथे अऊ ओमन एकर हुकूम मानथें।”
LUK 8:26 ओमन डोंगा ला खेवत गिरासेनीमन के इलाका म हबरिन, जऊन ह झील के ओ पार, गलील के उल्टा दिग म हवय।
LUK 8:27 जब यीसू ह झील के तीर म उतरिस, त ओला ओ सहर के एक मनखे मिलिस, जऊन म परेत आतमामन रिहिन। ओ मनखे ह कतको दिन ले कपड़ा नइं पहिरत रिहिस अऊ न ही घर म रहत रिहिस, पर ओह मरघटी म रहत रहय।
LUK 8:28 जब ओह यीसू ला देखिस, त नरियाईस अऊ यीसू के गोड़ खाल्हे गिरिस, अऊ अब्बड़ चिचियाके कहिस, “हे यीसू, सर्वोच्च परमेसर के बेटा! मोर ले तोला का काम? मेंह तोर ले बिनती करत हंव कि मोला पीरा झन दे।”
LUK 8:29 काबरकि यीसू ह असुध आतमा ला ओ मनखे म ले बाहिर निकले के हुकूम देय रिहिस। कतको बार ले परेत आतमा ह ओला पटके रिहिस, अऊ ओकर हांथ अऊ गोड़मन संकली म बंधाय रिहिन अऊ ओह निगरानी म रहय, पर ओह संकलीमन ला टोर देवत रहय अऊ परेत आतमा के दुवारा ओह निरजन जगह म भगाय गे रहय।
LUK 8:30 यीसू ह ओकर ले पुछिस, “तोर का नांव ए?” ओह कहिस, “एक बड़े सेना,” काबरकि बहुंत परेत आतमामन ओमा हमाय रहंय।
LUK 8:31 ओ परेत आतमामन यीसू ले बिनती करिन कि ओह ओमन ला अथाह कुन्ड म जाय के हुकूम झन देवय।
LUK 8:32 उहां पठार कोति सुरामन के एक बड़े खेरखा ह चरत रहय। परेत आतमामन यीसू ले बिनती करिन कि ओह ओमन ला सुरामन म जावन दे अऊ ओह ओमन ला जावन दीस।
LUK 8:33 तब परेत आतमामन ओ मनखे ले बाहिर निकलिन, अऊ सुरामन म हमा गीन, अऊ सुरामन के जम्मो झुंड ह तीर म निकले पथरा ले झील म झपटके कूदिस अऊ बुड़ मरिस।
LUK 8:34 जब सूरा चरइयामन ये घटना ला देखिन, त ओमन भाग गीन, अऊ सहर अऊ गांव-गंवई म ये बात ला बताईन।
LUK 8:35 तब जऊन कुछू होय रिहिस, ओला देखे बर मनखेमन बाहिर निकलिन। जब ओमन यीसू करा आईन, त ओमन ओ मनखे ला, जऊन म ले परेत आतमामन निकले रिहिन, यीसू के गोड़ करा बईठे देखिन। ओह कपड़ा पहिरे अपन सही हालत म रहय; अऊ ओमन डरा गीन।
LUK 8:36 जऊन मन येला अपन आंखी ले देखे रिहिन, ओमन मनखेमन ला बताईन कि परेत आतमा के धरे मनखे ह कइसने चंगा होईस।
LUK 8:37 तब गिरासेनी इलाका के जम्मो मनखेमन यीसू ला कहिन कि ओह उहां ले चले जावय, काबरकि ओमन बहुंत डरा गे रिहिन। एकरसेति ओह डोंगा में चघिस अऊ चले गीस।
LUK 8:38 जऊन मनखे ले परेत आतमामन निकले रिहिन, ओह यीसू ले बिनती करिस, “मोला तोर संग जावन दे।” पर यीसू ह ओला ये कहिके बिदा करिस,
LUK 8:39 “अपन घर ला लहुंट जा, अऊ मनखेमन ला बता कि परमेसर ह तोर बर कतेक बड़े काम करे हवय।” ओ मनखे ह चले गीस अऊ जम्मो सहर म बताईस कि यीसू ह ओकर बर कतेक बड़े काम करिस।
LUK 8:40 जब यीसू ह झील के ओ पार वापिस लहुंटिस, त मनखेमन के एक भीड़ ह ओकर सुवागत करिस, काबरकि ओ जम्मो झन ओकर बाट जोहत रिहिन।
LUK 8:41 तभे, याईर नांव के सभा-घर के एक अधिकारी आईस अऊ यीसू के गोड़ खाल्हे गिरके बिनती करिस कि यीसू ह ओकर घर म आवय,
LUK 8:42 काबरकि ओकर बारह बछर के एके झन बेटी ह मरइया रिहिस। जब यीसू ह जावत रिहिस, त ओह भीड़ के मारे दबे जावत रहय।
LUK 8:43 अऊ उहां एक झन माईलोगन रहय, जऊन ला बारह बछर ले लहू बहे के बेमारी रिहिस, पर ओला कोनो बईद बने नइं कर सके रिहिन।
LUK 8:44 ओह यीसू के पाछू ले आईस अऊ ओकर कपड़ा के छोर ला छुईस, अऊ तुरते ओकर लहू बहई बंद हो गीस।
LUK 8:45 यीसू ह पुछिस, “मोला कोन ह छुईस?” जब ओ जम्मो झन इनकार करिन, तब पतरस ह कहिस, “हे मालिक, मनखेमन के भीड़ तोर चारों कोति हवय अऊ तोर ऊपर गिरे पड़त हवय।”
LUK 8:46 पर यीसू ह कहिस, “कोनो मोला छुए हवय, काबरकि मेंह जानत हंव कि मोर म ले सामर्थ निकले हवय।”
LUK 8:47 जब ओ माईलोगन ह देखिस कि ओह छिपे नइं रह सकय, तब ओह कांपत आईस अऊ यीसू के गोड़ खाल्हे गिरिस। अऊ जम्मो मनखेमन के आघू म ओह कारन बताईस कि काबर ओह यीसू ला छुईस अऊ कइसने ओह तुरते चंगा हो गीस।
LUK 8:48 तब यीसू ह ओला कहिस, “बेटी, तोर बिसवास ह तोला ठीक करे हवय। सांति म जा।”
LUK 8:49 जब यीसू ह ये बात कहत रिहिस, तभे सभा-घर के अधिकारी याईर के घर ले एक झन मनखे आईस अऊ कहिस, “तोर बेटी ह काल कर दारिस, गुरू ला अऊ तकलीफ झन दे।”
LUK 8:50 येला सुनके, यीसू ह याईर ला कहिस, “झन डर; सिरिप बिसवास रख, त ओह बच जाही।”
LUK 8:51 जब यीसू ह याईर के घर म आईस, त ओह पतरस, यूहन्ना, याकूब अऊ लइका के दाई-ददा ला छोंड़के अऊ एको झन ला अपन संग भीतर नइं आवन दीस।
LUK 8:52 जम्मो मनखेमन ओ लइका बर रोवत अऊ दुख मनावत रहंय। यीसू ह कहिस, “झन रोवव, काबरकि लइका ह मरे नइं ए, पर ओह सुतत हवय।”
LUK 8:53 ओमन ये बात ला जानत रिहिन कि ओ छोकरी ह मर गे हवय, एकरसेति ओमन यीसू के ऊपर हंसे लगिन।
LUK 8:54 पर यीसू ह छोकरी के हांथ ला पकड़िस अऊ कहिस, “हे मोर लइका, उठ!”
LUK 8:55 ओ छोकरी के परान लहुंट आईस, अऊ तुरते ओह ठाढ़ हो गीस। तब यीसू ह ओमन ला कहिस कि ओला कुछू खाय बर देवंय।
LUK 8:56 ओकर दाई-ददा चकित हो गीन, पर यीसू ह ओमन ला ये हुकूम दीस कि जऊन कुछू होय रिहिस, ओकर बारे म कोनो ला झन बतावंय।
LUK 9:1 यीसू ह अपन बारह चेलामन ला एक संग बलाईस, अऊ ओह ओमन ला जम्मो परेत आतमामन ला निकाले अऊ बेमारीमन ला ठीक करे के सामर्थ अऊ अधिकार दीस,
LUK 9:2 अऊ ओह ओमन ला परमेसर के राज के परचार करे बर अऊ बिमरहामन ला बने करे बर पठोईस।
LUK 9:3 ओह ओमन ला कहिस, “डहार बर कुछू झन लेवव—न चले के लउठी, न झोला, न रोटी, न रूपिया-पईसा, अऊ न अतकिहा कुरता रखव।
LUK 9:4 जऊन भी घर म तुमन जावव, त ओ सहर ला छोंड़त तक ओहीच घर म ठहिरव।
LUK 9:5 जिहां मनखेमन तुमन ला गरहन नइं करंय, त जब ओ नगर ले जावव, त अपन गोड़ के धुर्रा ला झर्रा देवव ताकि येह ओमन के बिरूध एक गवाही होवय।”
LUK 9:6 तब चेलामन उहां ले चल दीन, अऊ ओमन गांव-गांव म सुघर संदेस के परचार करत अऊ हर एक जगह मनखेमन ला बेमारी ले ठीक करत गीन।
LUK 9:7 गलील म राज-करइया हेरोदेस ह जऊन कुछू होवत रहय, ओ जम्मो के बारे म सुनिस, त ओह दुबिधा म पड़ गीस, काबरकि कुछू मनखेमन कहत रिहिन कि यूहन्ना ह मरे मन ले जी उठे हवय;
LUK 9:8 आने मन कहत रिहिन कि एलियाह ह परगट होय हवय, जबकि अऊ आने मन कहंय कि बहुंत पहिली के अगमजानीमन ले एक झन जी उठे हवय।
LUK 9:9 पर हेरोदेस ह कहिस, “यूहन्ना के मुड़ ला तो मेंह कटवा दे रहेंव। पर ये मनखे कोन ए, जेकर बारे म मेंह अइसने बात सुनत हवंव।” अऊ ओह यीसू ला देखे के कोसिस करिस।
LUK 9:10 जब प्रेरितमन लहुंटके आईन, त जऊन कुछू ओमन करे रिहिन, ओ जम्मो बात यीसू ला बताईन। तब यीसू ह ओमन ला अपन संग लीस अऊ ओमन बैतसैदा नांव के एक नगर म चल दीन।
LUK 9:11 पर मनखेमन के भीड़ ला ये बात के पता चल गीस अऊ ओमन ओकर पाछू गीन। यीसू ह ओमन के सुवागत करिस अऊ ओमन ले परमेसर के राज के बारे म गोठियाय लगिस अऊ जऊन मन बेमारी ले बने होय चाहत रिहिन, ओमन ला चंगा करिस।
LUK 9:12 जब बेरा ह ढरक गे, तब बारहों चेलामन यीसू करा आके कहिन, “ये भीड़ ला जावन दे ताकि ओमन आसपास के गांव अऊ बस्ती म जावंय, अऊ अपन खाय अऊ रहे के परबंध करंय, काबरकि हमन इहां सुनसान जगह म हवन।”
LUK 9:13 पर यीसू ह ओमन ला कहिस, “तुमन ओमन ला कुछू खाय बर देवव।” ओमन कहिन, “हमर करा सिरिप पांच ठन रोटी अऊ दू ठन मछरी हवय। यदि हमन जाके ये जम्मो भीड़ बर खाना बिसोवन, त येह हो सकथे।”
LUK 9:14 (उहां करीब पांच हजार आदमीमन रिहिन।) पर यीसू ह अपन चेलामन ला कहिस, “हर एक मनखेमन ला करीब पचास-पचास के दल बनाके बईठा देवव।”
LUK 9:15 चेलामन अइसनेच करिन अऊ ओमन जम्मो झन ला बईठा दीन।
LUK 9:16 तब यीसू ह पांचों रोटी अऊ दूनों मछरी ला लीस अऊ स्वरग कोति देखके ओह परमेसर ला धनबाद दीस, अऊ रोटी अऊ मछरीमन ला टोरिस अऊ चेलामन ला देवत गीस कि ओमन मनखेमन ला परोसंय।
LUK 9:17 ओ जम्मो झन खाईन अऊ खाके अघा गीन। चेलामन बांचे-खुचे टुकड़ा के बारह टुकना भर के उठाईन।
LUK 9:18 एक दिन यीसू ह एके झन पराथना करत रिहिस अऊ ओकर चेलामन ओकर संग रिहिन, त ओह ओमन ले पुछिस, “मनखेमन मोला कोन ए कहिथें?”
LUK 9:19 ओमन जबाब दीन, “कुछू मनखेमन कहिथें—यूहन्ना बतिसमा देवइया; पर आने मन कहिथें—एलियाह; जबकि अऊ आने मन कहिथें कि बहुंत पहिली के अगमजानीमन ले एक झन जी उठे हवय।”
LUK 9:20 यीसू ह ओमन ले पुछिस, “पर तुमन मोला कोन ए कहिथव?” पतरस ह जबाब दीस, “तेंह परमेसर के मसीह अस।”
LUK 9:21 यीसू ह ओमन ला बने करके चेताके कहिस कि ओमन ये बात कोनो ला झन बतावंय।
LUK 9:22 अऊ ओह कहिस, “येह जरूरी ए कि मनखे के बेटा ह बहुंत दुख भोगय अऊ अगुवा, मुखिया पुरोहित अऊ कानून के गुरूमन के दुवारा तिरस्कार करे जावय, अऊ जरूरी ए कि ओह मार डारे जावय अऊ तीसरा दिन जी उठय।”
LUK 9:23 अऊ ओह ओ जम्मो झन ला कहिस: “यदि कोनो मोर पाछू आय चाहथे, त येह जरूरी ए कि ओह अपन ईछा ला मारय अऊ हर दिन दुख उठाय बर तियार रहय अऊ तब मोर पाछू हो लेवय।
LUK 9:24 काबरकि जऊन कोनो अपन जिनगी ला बचाय चाहथे, ओह ओला गंवाही, पर जऊन कोनो मोर खातिर अपन जिनगी ला गंवाथे, ओह परमेसर के संग सदाकाल के जिनगी पाही।
LUK 9:25 यदि एक मनखे ह जम्मो संसार ला पा जाथे, पर अपन जिनगी ला गंवा देथे या अपन परान के हानि उठाथे, त ओला का लाभ?
LUK 9:26 यदि कोनो मोर ले अऊ मोर बचन ले लजाथे, त मनखे के बेटा ह घलो ओकर ले लजाही, जब ओह अपन महिमा अऊ ददा अऊ पबितर स्वरगदूतमन के महिमा संग आही।
LUK 9:27 “मेंह तुमन ला सच कहत हंव कि कुछू झन, जऊन मन इहां ठाढ़े हवंय, तब तक नइं मरंय, जब तक कि ओमन परमेसर के राज ला नइं देख लीहीं।”
LUK 9:28 यीसू के ये कहे के करीब आठ दिन के बाद, ओह पतरस, यूहन्ना, अऊ याकूब ला अपन संग लीस अऊ एक ठन पहाड़ म पराथना करे बर गीस।
LUK 9:29 जब ओह पराथना करत रिहिस, त ओकर चेहरा के रूप ह बदल गीस अऊ ओकर कपड़ा ह पंर्रा होके बहुंत चमके लगिस।
LUK 9:30 अऊ दू झन मनखे मूसा अऊ एलियाह महिमा म परगट होईन अऊ यीसू संग गोठियावत रिहिन।
LUK 9:31 ओमन यीसू के मरे के समय के बारे म बातचीत करत रिहिन, जऊन ला यीसू ह यरूसलेम म पूरा करइया रिहिस।
LUK 9:32 पतरस अऊ ओकर संगवारीमन बहुंत नींद म रहंय, पर जब ओमन जागिन, त ओमन यीसू के महिमा अऊ दू झन मनखे ला ओकर संग ठाढ़े देखिन।
LUK 9:33 जब दूनों मनखे ओकर करा ले जाय लगिन, तब पतरस ह यीसू ला कहिस, “हे मालिक, हमन के इहां रहई बने अय। हमन तीन ठन मंडप बनाथन—एक तोर बर, एक मूसा बर अऊ एक ठन एलियाह बर।” (ओह नइं जानत रहय कि ओह का कहत रिहिस।)
LUK 9:34 जब ओह गोठियावत रिहिस, त एक बादर ह आईस अऊ ओमन ला ढांप लीस अऊ ओमन डरा गीन जब ओमन बादर म हमाईन।
LUK 9:35 बादर म ले ये अवाज आईस, “येह मोर बेटा ए, जऊन ला मेंह चुने हवंव; एकर बात ला सुनव।”
LUK 9:36 जब अवाज ह बंद हो गीस, त ओमन यीसू ला एके झन पाईन। चेलामन ये बात ला चुप होके अपन म रखिन, अऊ जऊन कुछू ओमन देखे रिहिन, ओला ओ समय कोनो ला नइं बताईन।
LUK 9:37 दूसर दिन जब ओमन पहाड़ ले उतरिन, त एक बड़े भीड़ ह यीसू ले मिलिस।
LUK 9:38 भीड़ म ले एक मनखे ह चिचियाके कहिस, “हे गुरू, मेंह तोर ले बिनती करत हंव कि मोर बेटा ला देख; ओह मोर एके झन लइका ए।
LUK 9:39 एक परेत आतमा ओला पकड़थे अऊ ओह अचानक चिचियाथे; ओह ओला अइसने अइंठथे कि ओकर मुहूं ले झाग निकलथे; ओह ओला मुसकुल से छोंड़थे अऊ ओह ओला नास करत हवय।
LUK 9:40 मेंह तोर चेलामन ले बिनती करेंव कि ओमन ओला निकाल देवंय, पर ओमन ओला नइं निकाल सकिन।”
LUK 9:41 यीसू ह जबाब दीस, “हे अबिसवासी अऊ ढीठ पीढ़ी के मनखेमन, कब तक मेंह तुम्हर संग रहिहूं अऊ तुम्हर सहत रहिहूं? तोर बेटा ला इहां लान।”
LUK 9:42 जब छोकरा ह आवत रिहिस, त परेत आतमा ह ओला भुइयां म पटकके अइंठिस। पर यीसू ह असुध आतमा ला दबकारिस अऊ ओ छोकरा ला बने करिस अऊ ओला ओकर ददा ला सऊंप दीस।
LUK 9:43 अऊ ओमन जम्मो झन परमेसर के महान सामर्थ ला देखके चकित हो गीन। जब जम्मो झन यीसू के काम ला देखके अचम्भो करत रिहिन, त ओह अपन चेलामन ला कहिस,
LUK 9:44 “जऊन बात मेंह तुमन ला कहइया हंव, ओला धियान देके सुनव: मनखे के बेटा ह मनखेमन के हांथ म पकड़वाय जाही।”
LUK 9:45 पर ओमन नइं जानिन कि ये बात के का मतलब ए। येला ओमन ले छुपाय गे रिहिस, ताकि ओमन येला झन समझंय अऊ ओमन एकर बारे म यीसू ले पुछे बर डरावत रिहिन।
LUK 9:46 चेलामन के बीच म ये बहस होय लगिस कि ओमन म सबले बड़े कोन होही?
LUK 9:47 यीसू ह ओमन के मन के बिचार ला जानके, एक छोटे लइका ला लीस अऊ अपन बाजू म ठाढ़ करिस
LUK 9:48 अऊ ओमन ला कहिस, “जऊन कोनो ये छोटे लइका ला मोर नांव म गरहन करथे, ओह मोला गरहन करथे; अऊ जऊन कोनो मोला गरहन करथे, ओह ओला गरहन करथे, जऊन ह मोला पठोय हवय। काबरकि जऊन ह तुम्हर जम्मो झन के बीच म सबले छोटे ए, ओही ह सबले बड़े ए।”
LUK 9:49 यूहन्ना ह यीसू ला कहिस, “हे परभू, हमन एक मनखे ला तोर नांव म परेत आतमामन ला निकालत देखेंन अऊ हमन ओला अइसने करे बर मना करेंन, काबरकि ओह हमन म ले नो हय।”
LUK 9:50 यीसू ह कहिस, “ओला झन रोकव, काबरकि जऊन ह तुम्हर बिरोध म नइं ए, ओह तुम्हर कोति हवय।”
LUK 9:51 जब यीसू के स्वरग म उठाय जाय के दिन ह लकठा आईस, त ओह यरूसलेम जाय बर पूरा ठान लीस,
LUK 9:52 अऊ ओह अपन आघू संदेसियामन ला पठोईस। ओमन सामरीमन के एक ठन गांव म गीन कि यीसू बर जम्मो चीज ला तियार करंय,
LUK 9:53 पर मनखेमन उहां यीसू ला स्वीकार नइं करिन, काबरकि ओह यरूसलेम जावत रिहिस।
LUK 9:54 जब यीसू के चेला याकूब अऊ यूहन्ना येला देखिन, त ओमन कहिन, “हे परभू, का तेंह चाहथस कि हमन हुकूम देवन कि अकास ले आगी गिरय अऊ ये सामरीमन ला नास कर देवय।”
LUK 9:55 पर यीसू ह पलटिस अऊ ओमन ला दबकारिस।
LUK 9:56 तब ओमन आने गांव ला चल दीन।
LUK 9:57 जब ओमन डहार म जावत रिहिन, त एक मनखे ह यीसू ला कहिस, “तेंह जिहां कहूं घलो जाबे, मेंह तोर पाछू-पाछू चलहूं।”
LUK 9:58 यीसू ह ओला कहिस, “कोलिहामन बर रहे के बिल हवय अऊ अकास के चिरईमन के बसेरा हवय, पर मनखे के बेटा के मुड़ ला थेबे बर घलो कोनो जगह नइं ए।”
LUK 9:59 यीसू ह आने मनखे ला कहिस, “मोर पाछू हो ले।” पर ओ मनखे ह जबाब दीस, “हे परभू, पहिली मोला जावन दे कि मेंह अपन मरे ददा ला माटी दे दंव।”
LUK 9:60 यीसू ह ओला कहिस, “मुरदामन ला अपन मुरदा गाड़न दे, पर तेंह जा अऊ परमेसर के राज के परचार कर।”
LUK 9:61 एक अऊ मनखे ह कहिस, “मेंह तोर पाछू चलहूं, परभू; पर पहिली मोला जावन दे कि मेंह अपन परिवार के मनखेमन ले बिदा होके आवंव।”
LUK 9:62 यीसू ह ओला कहिस, “जऊन कोनो हांथ ले मुठिया पकड़के नांगर जोते के सुरू करथे अऊ बार-बार मुड़के पाछू ला देखथे, ओह परमेसर के राज के लईक नो हय।”
LUK 10:1 एकर बाद, परभू ह अऊ आने बहत्तर मनखेमन ला चुनिस। जऊन-जऊन सहर अऊ जगह म ओह खुदे जवइया रिहिस, उहां ओमन ला दू-दू झन करके अपन आघू पठोईस।
LUK 10:2 यीसू ह ओमन ला कहिस, “खेत म फसल तो बहुंते हवय, पर बनिहारमन थोरकन हवंय। एकरसेति, फसल के मालिक ले बिनती करव कि ओह अपन फसल ला लुए बर बनिहारमन ला पठोवय।
LUK 10:3 जावव! मेंह तुमन ला मेढ़ा-पीलामन सहीं भेड़ियामन के बीच म पठोवत हंव।
LUK 10:4 अपन संग म पईसा रखे के थैली या झोला या पनही झन लेवव; अऊ डहार म कोनो ला जोहार झन करव।
LUK 10:5 “जब तुमन कोनो घर म जावव, त पहिली ये कहव, ‘ये घर म सांति होवय,’
LUK 10:6 यदि उहां कोनो सांति के लईक होही, त तुम्हर सांति ह ओकर ऊपर ठहिरही, नइं तो येह तुम्हर करा लहुंट आही।
LUK 10:7 ओहीच घर म ठहिरव, अऊ जऊन कुछू ओमन तुमन ला देथें—खावव अऊ पीयव, काबरकि बनिहार ला ओकर बनी मिलना चाही। घर-घर झन फिरत रहव।
LUK 10:8 “जब तुमन कोनो सहर म जावव अऊ मनखेमन उहां तुम्हर सुवागत करथें, त जऊन कुछू तुमन ला परोसे जावय, ओला खावव।
LUK 10:9 उहां के बेमार मनखेमन ला बने करव अऊ ओमन ला कहव, ‘परमेसर के राज ह तुम्हर लकठा म आ गे हवय।’
LUK 10:10 पर जब तुमन कोनो सहर म जावव अऊ मनखेमन उहां तुम्हर सुवागत नइं करंय, त उहां के सड़कमन म जावव अऊ कहव,
LUK 10:11 ‘अऊ त अऊ तुम्हर सहर के धुर्रा ला घलो जऊन ह हमर गोड़ म लगे हवय, हमन तुमन ला चेतउनी के रूप म झर्रा देवत हन। तभो ले तुमन येला निस्चित रूप से जान लेवव कि परमेसर के राज ह लकठा म आ गे हवय।’
LUK 10:12 मेंह तुमन ला कहत हंव कि नियाय के दिन म परमेसर ह सदोम सहर के ऊपर जादा दया करही, एकर बनिस्पत कि ओ सहर ऊपर।
LUK 10:13 “धिक्कार ए तोला, खुराजीन! धिक्कार ए तोला, बैतसैदा। जऊन चमतकार के काम तुमन म करे गीस, यदि ओ काम सूर अऊ सीदोन सहर म करे गे होतिस, त ओमन बहुंत पहिली टाट के कपड़ा ओढ़के अऊ राख म बईठके पछताप कर चुके होतिन।
LUK 10:14 पर परमेसर ह नियाय के दिन सूर अऊ सीदोन सहर के मनखेमन ऊपर जादा दया करही, एकर बनिस्पत कि तुम्हर ऊपर।
LUK 10:15 अऊ तें कफरनहूम! का तेंह अकास तक ऊंचा उठाय जाबे! नइं! तेंह खाल्हे पाताल-लोक ला चले जाबे।
LUK 10:16 “जऊन कोनो तुम्हर बात ला सुनथे, ओह मोर बात ला सुनथे। जऊन कोनो तुमन ला स्वीकार नइं करय, ओह मोला स्वीकार नइं करय; अऊ जऊन कोनो मोला स्वीकार नइं करय, ओह परमेसर ला स्वीकार नइं करय, जऊन ह मोला पठोय हवय।”
LUK 10:17 बाद म, जब ओ बहत्तर मनखेमन आनंद सहित लहुंटिन अऊ कहिन, “हे परभू, अऊ त अऊ परेत आतमामन हमर बस म हो गीन, जब हमन ओमन ला तोर नांव म हुकूम देंन।”
LUK 10:18 यीसू ह ओमन ला कहिस, “मेंह सैतान ला बिजली सहीं स्वरग ले गिरत देखेंव।
LUK 10:19 सुनव! मेंह तुमन ला अधिकार दे हवंव कि तुमन सांप अऊ बिच्छूमन ला गोड़ ले कुचरव अऊ सैतान के जम्मो सक्ति ऊपर जय पावव, अऊ कोनो चीज ले तुम्हर हानि नइं होही।
LUK 10:20 पर ये बात खातिर आनंद झन मनावव कि परेत आतमामन तुम्हर बस म हो जाथें, पर ये बात खातिर आनंद मनावव कि तुम्हर नांव ह स्वरग म परमेसर के किताब म लिखाय हवय।”
LUK 10:21 ओही बेरा यीसू ह पबितर आतमा के दुवारा आनंद ले भर गीस अऊ कहिस, “हे ददा, स्वरग अऊ धरती के परभू, मेंह तोर धनबाद करत हंव, काबरकि तेंह ये बातमन ला बुद्धिमान अऊ गियानी मनखेमन ले छुपाय रखय, पर येला छोटे लइकामन ऊपर परगट करय। हव, ददा, ये काम करे म तोला खुसी होईस।
LUK 10:22 “मोर ददा ह मोला जम्मो चीज ला सऊंप दे हवय। ददा के छोंड़ अऊ कोनो बेटा ला नइं जानंय, अऊ ददा ला कोनो नइं जानंय, सिरिप बेटा ह जानथे अऊ ओमन घलो जानथें, जऊन मन ला बेटा ह चुनथे कि ओमन ऊपर ददा ला उजागर करे।”
LUK 10:23 तब यीसू ह अपन चेलामन कोति मुहूं करके ओमन ला चुपेचाप कहिस, “धइन अंय ओ मनखेमन, जऊन मन ये चीजमन ला देखथें, जऊन ला तुमन देखत हवव।
LUK 10:24 काबरकि मेंह तुमन ला कहथंव कि कतको अगमजानी अऊ राजामन चाहिन कि जऊन चीज ला तुमन देखत हवव, ओला देखंय, पर देख नइं सकिन, अऊ ओमन चाहिन कि जऊन बात ला तुमन सुनत हव, ओला सुनंय, पर ओमन सुन नइं सकिन।”
LUK 10:25 एक बार अइसने होईस कि मूसा के कानून के एक जानकार ह ठाढ़ होईस अऊ यीसू ला परखे बर ओह कहिस, “हे गुरू, परमेसर के संग सदाकाल के जिनगी पाय बर मेंह का करंव।”
LUK 10:26 यीसू ह ओला कहिस, “मूसा के दुवारा लिखे कानून ह का कहिथे? तेंह येला कइसने समझथस?”
LUK 10:27 ओ मनखे ह जबाब दीस, “परभू अपन परमेसर ले अपन पूरा हिरदय अऊ अपन पूरा परान अऊ अपन पूरा सक्ति अऊ अपन पूरा मन ले मया करव अऊ अपन परोसी ला अपन सहीं मया करव।”
LUK 10:28 यीसू ह कहिस, “तेंह सही जबाब दे हवस, अइसनेच कर, त तेंह जीयत रहिबे।”
LUK 10:29 पर ओ मनखे ह अपनआप ला सही ठहिराय चाहत रिहिस, एकरसेति ओह यीसू ले पुछिस, “मोर परोसी कोन ए?”
LUK 10:30 यीसू ह ये जबाब दीस, “एक मनखे ह यरूसलेम सहर ले यरीहो सहर जावत रिहिस अऊ डहार म ओह डाकूमन के हांथ म पड़ गीस। डाकूमन ओकर कपड़ा ला उतार लीन, ओला मारिन-पीटिन अऊ ओला अधमरहा छोंड़के चले गीन।
LUK 10:31 अइसने होईस कि एक पुरोहित ह ओहीच डहार म जावत रहय, अऊ जब ओह ओ मनखे ला उहां पड़े देखिस, त ओह आने कोति ले कतरा के निकल गीस।
LUK 10:32 अइसनेच एक लेवी घलो उहां आईस अऊ ओ मनखे ला देखिस, अऊ आने कोति ले कतरा के चल दीस।
LUK 10:33 पर एक सामरी मनखे जऊन ह ओ डहार म जावत रिहिस; ओ मनखे करा हबरिस, अऊ जब ओला देखिस, त ओ सामरी मनखे ला ओकर ऊपर दया आईस।
LUK 10:34 ओह ओकर करा गीस अऊ ओकर घावमन म तेल अऊ अंगूर के मंद डारके ओमा पट्टी बांधिस। तब ओह ओ मनखे ला अपन खुद के गदहा ऊपर चघाईस अऊ ओला एक ठन धरमसाला म ले गीस अऊ ओकर देखभाल करिस।
LUK 10:35 दूसर दिन ओह दू ठन दीनार निकालिस अऊ ओला धरमसाला के रखवार ला देके कहिस, ‘तें एकर देखभाल कर, अऊ जब मेंह लहुंटके आहूं, त तोर जऊन अतकिहा खरचा ओकर ऊपर होही, तोला वापिस कर दूहूं।’ ”
LUK 10:36 अब यीसू ह कानून के जानकार ले पुछिस, “तोर बिचार म, ओ तीनों म ले कोन ह ओ मनखे के परोसी होईस, जऊन ह डाकूमन के हांथ म पड़ गे रिहिस?”
LUK 10:37 कानून के जानकार ह कहिस, “ओ मनखे जऊन ह ओकर ऊपर दया करिस।” यीसू ह ओला कहिस, “तेंह जा अऊ वइसनेच कर।”
LUK 10:38 यीसू अऊ ओकर चेलामन जावत रिहिन, त ओमन एक गांव म आईन। उहां मारथा नांव के एक माईलोगन ह ओला अपन घर म ठहिराईस।
LUK 10:39 ओकर मरियम नांव के एक बहिनी रिहिस, जऊन ह परभू के गोड़ खाल्हे बईठके ओकर उपदेस ला सुनत रिहिस।
LUK 10:40 पर मारथा ह बहुंत काम करत बिचलित हो गीस; अऊ ओह परभू करा आके कहिस, “हे परभू, का तोला कुछू धियान नइं ए कि मोर बहिनी ह मोला काम करे बर एके झन छोंड़ दे हवय? ओला कह कि ओह मोर मदद करय।”
LUK 10:41 परभू ह ओला जबाब दीस, “मारथा, हे मारथा, तेंह बहुंते बातमन के बिसय म चिंता करथस अऊ परेसान होथस,
LUK 10:42 पर सिरिप एके ठन बात के जरूरत हवय। मरियम ह उत्तम भाग ला चुन ले हवय, अऊ येला ओकर ले अलग नइं करे जावय।”
LUK 11:1 एक दिन यीसू ह एक जगह म पराथना करत रिहिस। जब ओह पराथना कर लीस, त ओकर एक झन चेला ह ओला कहिस, “हे परभू, जइसने यूहन्ना बतिसमा देवइया ह अपन चेलामन ला पराथना करे बर सिखोय रिहिस, वइसने तेंह घलो हमन ला पराथना करे बर सिखा।”
LUK 11:2 यीसू ह ओमन ला कहिस, “जब तुमन पराथना करव, त अइसने कहव: “ ‘हे ददा, तोर नांव ह पबितर माने जावय, तोर राज आवय।
LUK 11:3 हमन ला हर दिन हमर भोजन दे।
LUK 11:4 हमर पापमन ला छेमा कर दे, काबरकि जऊन मन हमर बिरूध पाप करथें, ओमन ला हमन छेमा करथन। अऊ हमन ला परिछा म झन पड़न दे।’ ”
LUK 11:5 तब यीसू ह अपन चेलामन ले कहिस, “मान लव, तुमन ले एक झन के एक संगवारी हवय अऊ ओह अपन संगवारी करा आधा रथिया जाके कहिथे, ‘ए संगवारी, मोला तीन ठन रोटी उधार देय दे,
LUK 11:6 काबरकि एक झन मोर संगवारी ह कहीं जावथे अऊ ओह अभीच मोर करा आय हवय, अऊ मोर करा ओला खवाय बर कुछू नइं ए।’
LUK 11:7 तब भीतर ले ओह जबाब देथे, ‘मोला परेसान झन कर। कपाट म ताला लग चुके हवय, अऊ मोर लइकामन मोर संग खटिया म हवंय। एकरसेति मेंह उठके तोला कुछू नइं दे सकंव।’
LUK 11:8 मेंह तुमन ला कहत हंव, हालाकि एक संगवारी के रूप म ओह उठके ओला रोटी नइं दीही, पर लाज-सरम ला छोंड़के ओकर मांगे के कारन, ओह उठही अऊ ओकर जरूरत के मुताबिक ओला दीही।
LUK 11:9 “एकरसेति, मेंह तुमन ला कहत हंव: मांगव, त तुमन ला दिये जाही; खोजव, त तुमन पाहू; खटखटावव, त कपाट ह तुम्हर बर खोले जाही।
LUK 11:10 काबरकि जऊन ह मांगथे, ओला मिलथे; जऊन ह खोजथे, ओह पाथे; अऊ जऊन ह खटखटाथे, ओकर बर कपाट ह खोले जाथे।
LUK 11:11 “तुमन ले अइसने कोन ददा होही कि कहूं ओकर बेटा ह एक ठन मछरी मांगथे, त ओला सांप देथे?
LUK 11:12 या कहूं ओह एक ठन अंडा मांगय, त ओह ओला बिच्छू दीही?
LUK 11:13 जब तुम्हर सहीं खराप मनखेमन अपन लइकामन ला बने चीज के भेंट देय बर जानथव, त स्वरग म रहइया तुम्हर ददा ह कतेक जादा ओमन ला पबितर आतमा दीही, जऊन मन ओकर ले मांगथें!”
LUK 11:14 यीसू ह एक कोंदा परेत आतमा ला निकालत रिहिस। जब परेत आतमा ह निकल गीस, त कोंदा मनखे ह गोठियाय लगिस, अऊ मनखेमन अचम्भो करिन।
LUK 11:15 पर ओमा ले कुछू झन कहिन, “येह परेत आतमामन के सरदार बालजबूल के मदद ले परेत आतमामन ला निकालत हवय।”
LUK 11:16 आने मन ओला परखे खातिर स्वरग ले कोनो चिनहां देखाय बर कहिन।
LUK 11:17 यीसू ह ओमन के मन के बात ला जानत रिहिस, एकरसेति ओह ओमन ला कहिस, “कोनो राज म फूट पड़ जावय, त ओह नास हो जाही, अऊ वइसनेच कोनो परिवार म फूट पड़ जावय, त ओह अलग-अलग हो जाही।
LUK 11:18 एकरसेति कहूं सैतान ह अपन खुद के बिरोधी हो गे हवय, तब ओकर राज ह कइसने बने रह सकथे? मेंह ये बात कहत हंव काबरकि तुमन कहिथव कि मेंह बालजबूल के सक्ति ले परेत आतमामन ला निकालथंव।
LUK 11:19 यदि मेंह बालजबूल के मदद ले परेत आतमामन ला निकालथंव, त फेर तुम्हर चेलामन काकर मदद ले ओमन ला निकालथें? एकरसेति, ओही मन तुम्हर नियाय करहीं।
LUK 11:20 पर यदि मेंह परमेसर के सामर्थ ले परेत आतमामन ला निकालथंव, त फेर परमेसर के राज ह तुम्हर करा आ गे हवय।
LUK 11:21 “जब एक बलवान मनखे, अपन जम्मो हथियार सहित अपन घर के रखवारी करथे, तब ओकर संपत्ति ह सही-सलामत रहिथे।
LUK 11:22 पर जब कोनो ओकर ले बलवान मनखे ओकर ऊपर चढ़ई करथे अऊ ओला काबू म कर लेथे, तब ओह ओ घरवाला के जम्मो हथियार जेकर ऊपर ओकर भरोसा रिहिस, छीन लेथे, अऊ ओह लूटके संपत्ति ला बांट देथे।
LUK 11:23 “जऊन ह मोर संग नइं ए, ओह मोर बिरोध म हवय, अऊ जऊन ह मोर संग नइं संकेलय, ओह बगराथे।
LUK 11:24 “जब एक असुध आतमा ह कोनो मनखे म ले बाहिर निकलथे, त ओह सुरताय के ठिकाना खोजत सूखा ठऊरमन म जाथे, पर ओला कोनो जगह नइं मिलय। तब ओह कहिथे, ‘जऊन घर ला मेंह छोंड़के आय रहेंव, मेंह ओहीच घर म लहुंट जाहूं।’
LUK 11:25 अऊ जब ओह लहुंटके आथे, त ओह ओ घर ला सूना, झाड़े-बहारे अऊ सजे-धजे पाथे।
LUK 11:26 तब ओह जाथे अऊ अपन ले घलो जादा खराप सात ठन आने आतमामन ला ले आथे, अऊ ओमन ओ मनखे म जाथें अऊ उहां बस जाथें। अऊ ओ मनखे के आखिरी दसा ह पहिली ले अऊ खराप हो जाथे।”
LUK 11:27 जब यीसू ह ये बातमन ला कहत रिहिस, त भीड़ म ले एक माईलोगन ह उठके चिचियाके कहिस, “धइन ए ओ दाई, जऊन ह तोला अपन पेट ले जनम दीस अऊ तोला अपन छाती के दूध पीयाईस।”
LUK 11:28 पर यीसू ह कहिस, “हव! पर जादा धइन ओ मनखेमन अंय, जऊन मन परमेसर के बचन ला सुनथें अऊ ओकर पालन करथें।”
LUK 11:29 जब भीड़ ह बढ़त गीस, त यीसू ह कहिस, “ये पीढ़ी के मनखेमन दुस्ट अंय। येमन चिनहां के मांग करथें, पर येमन ला योना अगमजानी के चिनहां के छोंड़ अऊ कोनो चिनहां नइं दिये जावय।
LUK 11:30 जइसने योना अगमजानी नीनवे सहर के मनखेमन बर एक ठन चिनहां रिहिस, वइसने मनखे के बेटा ह ये पीढ़ी के मनखेमन बर एक ठन चिनहां होही।
LUK 11:31 नियाय के दिन दक्खिन दिग के रानी ह ये पीढ़ी के मनखेमन संग ठाढ़ होही अऊ येमन ऊपर दोस लगाही, काबरकि ओ रानी ह राजा सुलेमान के गियान के बात ला सुने बर धरती के छोर ले आय रिहिस। पर देखव! इहां एक झन हवय, जऊन ह राजा सुलेमान ले घलो बड़के हवय।
LUK 11:32 नियाय के दिन नीनवे सहर के मनखेमन, ये पीढ़ी के मनखेमन संग ठाढ़ होहीं, अऊ येमन ऊपर दोस लगाहीं, काबरकि ओमन योना के संदेस ला सुनके मन फिराईन। पर देखव! इहां एक झन हवय, जऊन ह योना ले घलो बड़के अय।
LUK 11:33 “कोनो घलो मनखे दीया ला बारके अइसन जगह म नइं रखय, जिहां ओह छुप जावय या ओला बड़े कटोरा के खाल्हे म नइं रखय। पर ओह दीया ला दीवट ऊपर रखथे, ताकि जऊन मन भीतर आवंय, ओमन अंजोर ला देखंय।
LUK 11:34 तोर आंखी ह तोर देहें के दीया अय। जब तोर आंखीमन ठीक हवंय, त तोर जम्मो देहें ह घलो अंजोर ले भरे हवय। पर जब तोर आंखीमन खराप हवंय, त तोर देहें ह घलो पूरा अंधियार ले भरे हवय।
LUK 11:35 एकरसेति धियान रहय कि जऊन अंजोर तुमन म हवय, ओह अंधियार नो हय।
LUK 11:36 यदि तोर जम्मो देहें ह अंजोर ले भरे हवय, अऊ एकर कोनो भाग अंधियार म नइं ए, त तोर जम्मो देहें ह अइसने पूरा अंजोर हो जाही, जइसने जब कोनो दीया के अंजोर ह तोर ऊपर चमकथे।”
LUK 11:37 जब यीसू ह गोठिया चुकिस, त एक फरीसी ह ओला अपन संग खाना खाय बर नेवता दीस। यीसू ह ओकर घर म गीस अऊ खाय बर बईठिस।
LUK 11:38 फरीसी ह ये देखके अचम्भो करिस कि यीसू ह खाना खाय के पहिली अपन हांथ ला नइं धोईस।
LUK 11:39 तब परभू ह ओला कहिस, “तुम फरीसीमन कटोरा अऊ थाली के बाहिर ला तो मांजथव, पर तुम्हर भीतर म लालच अऊ बुरई भरे हवय।
LUK 11:40 हे मुरूख मनखेमन! परमेसर, जऊन ह बाहिर भाग ला बनाईस, का ओह भीतरी भाग ला घलो नइं बनाईस?
LUK 11:41 पर जहां तक ओ चीज के बात ए, जऊन ह तुम्हर भीतर म हवय—ओकर बारे म गरीबमन बर उदार बनव, अऊ हर एक चीज तुम्हर बर साफ हो जाही।
LUK 11:42 “हे फरीसीमन! तुम्हर ऊपर धिक्कार ए, काबरकि तुमन परमेसर ला अपन पोदीना, सुदाब, अऊ बारी के जम्मो किसम के साग-भाजी के दसवां भाग ला देथव, पर तुमन नियाय अऊ परमेसर के मया ला टार देथव। तुमन ला चाही कि ये दूसर काम ला करव अऊ पहिली ला घलो झन छोंड़व।
LUK 11:43 “हे फरीसीमन, तुमन ला धिक्कार ए, काबरकि तुमन ला यहूदीमन के सभा-घर म सबले बने आसन म बईठई अऊ बजार के जगह म आदर के संग जोहार झोंकई, बने लगथे।
LUK 11:44 “तुमन ला धिक्कार ए, काबरकि तुमन बिगर चिनहां लगाय कबरमन सहीं अव, जेकर ऊपर मनखेमन बिगर जाने चलथें।”
LUK 11:45 कानून के एक जानकार ह यीसू ला कहिस, “हे गुरू, ये बातमन ला कहिके, तेंह हमर घलो बेजत्ती करत हस।”
LUK 11:46 यीसू ह कहिस, “अऊ हे कानून के जानकारमन! तुमन ला धिक्कार ए, काबरकि तुमन मनखेमन ला बोझा ले लाद देथव, जऊन ला ओमन बहुंत मुसकुल से उठा सकथें, पर तुमन खुद ओमन के मदद करे बर अपन एक ठन अंगरी घलो नइं उठावव।
LUK 11:47 “तुमन ला धिक्कार ए, काबरकि तुमन ओ अगमजानीमन के कबर बनाथव, जऊन मन ला तुम्हर पुरखामन मार डारे रिहिन।
LUK 11:48 ये किसम ले तुमन खुदे मान लेथव कि जऊन कुछू तुम्हर पुरखामन करिन, ओह सही रिहिस; काबरकि ओमन अगमजानीमन ला मार डारिन, अऊ तुमन ओमन के कबर बनाथव।
LUK 11:49 एकर कारन, परमेसर ह अपन बुद्धि म कहिस, ‘मेंह ओमन करा अगमजानी अऊ प्रेरितमन ला पठोहूं। ओमा ले कुछू झन ला ओमन मार डारहीं अऊ आने मन ला सताहीं।’
LUK 11:50 एकर खातिर, ये पीढ़ी के मनखेमन ओ जम्मो अगमजानीमन के खून के जिम्मेदार ठहिराय जाहीं, जऊन मन ला संसार के सुरू ले मार डारे गे हवय,
LUK 11:51 हाबिल के खून ले लेके जकरयाह के खून तक, जऊन ला बेदी अऊ पबितर-स्थान के बीच म मारे गे रिहिस। हव, मेंह तुमन ला कहत हंव, ये पीढ़ी के मनखेमन ये जम्मो बात के जिम्मेदार ठहिराय जाहीं।
LUK 11:52 “कानून के जानकारमन! तुमन ला धिक्कार ए, काबरकि तुमन गियान के कुची ला ले लेय हव। तुमन खुद ओकर भीतर नइं गेव, अऊ तुमन ओमन ला घलो रोक दे हवव, जऊन मन भीतर जावत रिहिन।”
LUK 11:53 जब यीसू ह बाहिर निकल गीस, त फरीसी अऊ कानून के गुरूमन ओकर पाछू पड़के बहुंत बिरोध करे लगिन अऊ ओकर ले बहुंते चीज के बारे म सवाल करे लगिन।
LUK 11:54 असल म ओमन ये ताक म रहंय कि यीसू के मुहूं ले कोनो गलत बात निकले अऊ ओमन ओला पकड़ लें।
LUK 12:1 इही दौरान हजारों मनखेमन के भीड़ लग गीस अऊ ओमन एक-दूसर ऊपर गिरे पड़त रिहिन, त यीसू ह पहिली अपन चेलामन ला कहे के सुरू करिस, “फरीसीमन के खमीर ले सचेत रहव, मतलब कि ओमन के ढोंगीपन ले सचेत रहव।
LUK 12:2 कुछू घलो बात ढंके नइं ए, जऊन ला उघारे नइं जाही या कुछू भी बात छिपे नइं ए, जऊन ला बताय नइं जाही।
LUK 12:3 एकरसेति, जऊन बात तुमन अंधियार म कहे हवव, ओह दिन के अंजोर म सुने जाही, अऊ जऊन बात तुमन भीतर के खोली म मनखेमन के कान म चुपेचाप कहे हवय, ओला घर के छानी ऊपर ले खुलेआम बताय जाही।
LUK 12:4 “मोर संगवारीमन, मेंह तुमन ला कहत हंव कि ओमन ले झन डरव, जऊन मन देहें ला घात करथें अऊ ओकर बाद ओमन अऊ कुछू नइं कर सकंय।
LUK 12:5 पर मेंह तुमन ला बतावत हंव कि तुमन ला काकर ले डरना चाही। ओकर ले डरव, जेकर करा तुमन ला मारे के बाद नरक म डारे के अधिकार हवय। हव, मेंह तुमन ला कहत हंव, ओकरेच ले डरव।
LUK 12:6 पांच ठन गौरइया चिरई कतेक म बेचाथे? दू पईसा ले जादा म नइं बेचावय। तभो ले परमेसर ह ओमा ले एको ठन ला नइं भुलावय।
LUK 12:7 अऊ त अऊ तुम्हर मुड़ के जम्मो चुंदीमन गने गे हवंय। झन डरव; तुमन गौरइया चिरईमन ले जादा कीमत के अव।
LUK 12:8 “मेंह तुमन ला कहत हंव कि जऊन कोनो मोला मनखेमन के आघू म स्वीकार करथे, ओला मनखे के बेटा घलो परमेसर के स्वरगदूतमन के आघू म स्वीकार करही।
LUK 12:9 पर जऊन ह मोला मनखेमन के आघू म इनकार करथे, ओला मनखे के बेटा घलो परमेसर के स्वरगदूतमन के आघू म इनकार करही।
LUK 12:10 अऊ जऊन ह मनखे के बेटा के बिरोध म कोनो बात कहिथे, त ओला माफ करे जाही, पर जऊन ह पबितर आतमा के बिरोध म निन्दा करथे, ओला माफ नइं करे जावय।
LUK 12:11 “जब मनखेमन तुमन ला यहूदीमन के सभा-घर, सासन करइया अऊ अधिकारीमन के आघू म लानथें, त ये बात के चिंता झन करव कि तुमन अपन बचाव कइसने करहू या ओमन के आघू म का कहिहू,
LUK 12:12 काबरकि पबितर आतमा ह ओहीच बेरा तुमन ला ये बात ला सिखा दीही कि तुमन ला का कहना चाही।”
LUK 12:13 भीड़ म ले एक मनखे ह यीसू ला कहिस, “हे गुरू, मोर भाई ले कह कि ओह मोर संग ओ संपत्ति के बंटवारा करय, जऊन ला हमर ददा हमर बर छोंड़ गे हवय।”
LUK 12:14 यीसू ह ओला कहिस, “हे मनखे, कोन ह मोला तुम्हर नियायधीस या तुम्हर बीच म संपत्ति के बंटवारा करइया ठहिराईस?”
LUK 12:15 तब ओह ओमन ला कहिस, “सचेत रहव! अपनआप ला जम्मो किसम के लालच ले दूर रखव; काबरकि मनखे के जिनगी ह ये बात ले नइं बनय कि ओकर करा कतेक जादा संपत्ति हवय।”
LUK 12:16 तब यीसू ह ओमन ला ये पटंतर कहिस, “एक धनवान मनखे के खेत म बहुंत फसल होईस।
LUK 12:17 ओह अपन मन म सोचिस, ‘अब मेंह का करंव? मोर करा मोर फसल ला कुढ़ोय के जगह नइं ए।’
LUK 12:18 “ओह कहिस, ‘मेंह अइसने करहूं—मेंह अपन कोठारमन ला टोरके ओकर ले बड़े-बड़े कोठार बनाहूं, अऊ उहां मेंह अपन जम्मो अनाज अऊ दूसर माल-मत्ता ला रखहूं।’
LUK 12:19 तब में अपनआप ले कहिहूं, ‘तोर करा बहुंत संपत्ति हवय, जऊन ह बहुंते साल तक चलही। अपन जिनगी के चिंता झन कर; खा, पी अऊ खुसी मना।’
LUK 12:20 “पर परमेसर ह ओला कहिस, ‘हे मुरूख मनखे! इहीच रथिया तोर परान ला ले लिये जाही; तब ये जम्मो चीज काकर होही, जऊन ला तेंह अपन बर रखे हवस।’
LUK 12:21 “अइसनेच हर एक ओ मनखे के संग होही, जऊन ह अपन बर धन संकेलथे, पर परमेसर के नजर म धनवान नो हय।”
LUK 12:22 तब यीसू ह अपन चेलामन ला कहिस, “एकरसेति मेंह तुमन ला कहत हंव, अपन जिनगी के बारे म चिंता झन करव कि तुमन का खाहू, या अपन देहें के बारे म चिंता झन करव कि तुमन का पहिरहू।
LUK 12:23 जिनगी ह भोजन ले जादा महत्व के अय, अऊ देहें ह ओनहा ले जादा महत्व रखथे।
LUK 12:24 कऊआ चिरईमन के बारे सोचव: ओमन न कुछू बोवंय अऊ न लुवंय; ओमन करा न भंडारघर हवय न ही कोठार; तभो ले परमेसर ओमन ला खवाथे। तुमन तो चिरईमन ले जादा महत्व के अव।
LUK 12:25 तुमन म अइसने कोनो हवय, जऊन ह चिंता करे के दुवारा अपन जिनगी के एको घरी ला घलो बढ़ा सकथे?
LUK 12:26 जब तुमन ये बहुंत छोटे चीज ला नइं कर सकव, त तुमन आने बड़े चीजमन के बारे म चिंता काबर करथव?
LUK 12:27 “सोचव कि जंगली फूलमन कइसने बाढ़थें; ओमन न मेहनत करंय अऊ न ही अपन बर ओनहा बिनंय। पर मेंह तुमन ला बतावत हंव, अऊ त अऊ सुलेमान सहीं धनी राजा घलो येमन ले काकरो सहीं सुघर कपड़ा नइं पहिरे रिहिस।
LUK 12:28 जब परमेसर ह भुइयां के कांदी ला अइसने ओनहा पहिराथे, जऊन ह आज इहां हवय अऊ कल आगी म झोंक दिये जाही, त हे अल्‍प बिसवासीमन, का ओह तुमन ला अऊ बने ओनहा नइं पहिराही।
LUK 12:29 अऊ एकर धियान म झन रहव कि तुमन का खाहू या का पीहू; एकर चिंता झन करव।
LUK 12:30 काबरकि ये संसार म मूरती-पूजा करइयामन ये जम्मो चीज के खोज म रहिथें, अऊ तुम्हर ददा परमेसर ह जानथे कि तुमन ला ये चीजमन के जरूरत हवय।
LUK 12:31 परमेसर के राज के खोज म रहव, त संग म ये चीजमन घलो तुमन ला दिये जाही।
LUK 12:32 “हे छोटे झुंड! झन डर, काबरकि तोर ददा परमेसर ह तोला राज देके खुस हवय।
LUK 12:33 अपन संपत्ति ला बेच अऊ गरीबमन ला दे। अपन बर अइसने बटुवा बनावव, जऊन ह जुन्ना नइं होवय, याने स्वरग म अपन धन जमा करव, जऊन ह कभू नइं घटय; जेकर लकठा म चोर नइं आ सकय अऊ जऊन ला कीरा घलो नास नइं कर सकय।
LUK 12:34 काबरकि जिहां तुम्हर धन हवय, उहां तुम्हर मन घलो लगे रहिही।
LUK 12:35 “तुमन सेवा करे बर हमेसा तियार रहव अऊ अपन दीया ला बारे रखव;
LUK 12:36 ओ सेवकमन सहीं, जऊन मन अपन मालिक के एक बिहाव भोज ले लहुंटे के बाट जोहत हवंय, ताकि जब ओह आवय अऊ कपाट ला खटखटावय, त ओमन तुरते ओकर बर कपाट ला खोल सकंय।
LUK 12:37 ओ सेवकमन बर येह खुसी के बात होही, जब ओमन के मालिक लहुंटके आथे, त ओमन ला जागत पाथे। मेंह तुमन ला सच कहत हंव—ओह खुदे सेवा करे बर सेवक के कपड़ा पहिरही; ओह ओमन ला खाना खवाय बर बईठाही अऊ आके ओमन के सेवा करही।
LUK 12:38 ओ सेवकमन बर येह बने बात होही, यदि ओमन के मालिक रथिया के दूसर या तीसरा पहर म आवय अऊ ओमन ला सचेत पावय।
LUK 12:39 पर ये बात ला समझ लेवव: यदि घर के मालिक ला मालूम होतिस कि चोर ह कतेक बेरा आही, त ओह अपन घर म सेंध नइं लगन देतिस।
LUK 12:40 तुमन घलो हमेसा तियार रहव, काबरकि मनखे के बेटा ह अइसने बेरा म आ जाही, जब तुमन ओकर आय के आसा नइं करत होहू।”
LUK 12:41 पतरस ह पुछिस, “हे परभू, ये पटंतर ला का तेंह हमर बर कहत हवस या फेर जम्मो झन बर?”
LUK 12:42 परभू ह जबाब देके कहिस, “तब ओ बिसवासयोग्य अऊ बुद्धिमान परबंधक कोन ए, जऊन ला मालिक ह अपन सेवकमन ऊपर मुखिया ठहिराथे, ताकि ओह सेवकमन ला सही समय म ओमन के खाना के भत्ता देवय।
LUK 12:43 येह ओ सेवक बर खुसी के बात होही कि जब ओकर मालिक ह आथे, त ओला अइसने करत पाथे।
LUK 12:44 मेंह तुमन ला सच कहत हंव कि मालिक ह ओ सेवक ला अपन जम्मो संपत्ति के जिम्मेदारी दे दीही।
LUK 12:45 पर यदि ओ सेवक ह अपन मन म ये कहय, मोर मालिक ह आय म अब्बड़ देरी करत हवय। अऊ अइसने सोचके ओह आने सेवक अऊ सेविकामन ला मारन-पीटन लगय, अऊ खावय-पीयय अऊ मतवार हो जावय।
LUK 12:46 तब ओ सेवक के मालिक ह एक अइसने दिन म आ जाही, जब ओह ओकर आय के आसा नइं करत होही अऊ ओकर आय के बेरा ला घलो नइं जानत होही। तब मालिक ह ओला कठोर सजा दीही अऊ ओला अबिसवासीमन के संग म रखही।
LUK 12:47 “ओ सेवक जऊन ह अपन मालिक के ईछा ला जानथे, पर तियार नइं रहय या जऊन बात ला ओकर मालिक चाहथे ओला नइं करय, त ओ सेवक ह बहुंत मार खाही।
LUK 12:48 पर जऊन सेवक ह अपन मालिक के ईछा ला नइं जानत हवय, अऊ बिगर जाने ओह गलत काम करथे, त ओह कम मार खाही। जऊन ला बहुंत दिये गे हवय, ओकर ले बहुंत मांगे जाही, अऊ जऊन ला बहुंत सऊंपे गे हवय, ओकर ले बहुंत लिये जाही।
LUK 12:49 “मेंह धरती म आगी लगाय बर आय हवंव, अऊ मेंह ये चाहत हंव कि बने होतिस कि येमा पहिली ले आगी लगे होतिस।
LUK 12:50 मोला एक बतिसमा म ले होके जाना हवय, अऊ जब तक ओह पूरा नइं हो जावय, मेंह बहुंत बियाकुल हवंव।
LUK 12:51 का तुमन ये सोचत हव कि मेंह धरती म सांति लाने बर आय हवंव। नइं, मेंह तुमन ला कहत हंव कि मेंह फूट डारे बर आय हवंव।
LUK 12:52 अब ले जब एक परिवार म पांच झन होहीं, त ओमन म फूट पड़ही; तीन झन ह दू झन के बिरोध म अऊ दू झन ह तीन झन के बिरोध म रहिहीं।
LUK 12:53 ददा ह अपन बेटा के बिरूध होही, त बेटा ह अपन ददा के बिरूध। दाई ह अपन बेटी के बिरूध होही, त बेटी ह अपन दाई के बिरूध; अऊ सास ह अपन बहू के बिरूध होही, त बहू ह अपन सास के बिरूध।”
LUK 12:54 यीसू ह मनखेमन के भीड़ ला घलो कहिस, “जब तुमन पछिम दिग म एक बादर उठत देखथव, त तुरते तुमन कहिथव कि ‘बारिस होवइया हवय;’ अऊ अइसनेच होथे।
LUK 12:55 अऊ जब दक्खिन दिग के हवा चलथे, ‘त तुमन कहिथव कि गरमी बढ़इया हवय,’ अऊ अइसनेच होथे।
LUK 12:56 हे ढोंगी मनखेमन! धरती अऊ अकास ला तुमन देखके जान लेथव कि एकर का मतलब होथे; तब तुमन ये समय के मतलब ला काबर नइं जानव?
LUK 12:57 “तुमन खुदे काबर फैसला नइं कर लेवव कि का सही ए?
LUK 12:58 यदि कोनो मनखे तुम्हर बिरोध म नालिस करय अऊ तुमन ला कचहरी म ले जावय, त तुमन भरसक कोसिस करव कि ओकर संग डहार म ही मामला के निपटारा हो जावय, नइं तो ओह तुमन ला नियायधीस करा खींचके ले जाही, अऊ नियायधीस ह तुमन ला पुलिस अधिकारी ला सऊंप दीही, अऊ पुलिस ह तुमन ला जेल म डार दीही।
LUK 12:59 मेंह तुमन ला कहत हंव कि जब तक तुमन कौड़ी-कौड़ी नइं चुका दूहू, तब तक उहां ले नइं छूट सकव।”
LUK 13:1 ओ समय उहां कुछू मनखेमन रिहिन। ओमन यीसू ला ओ गलील के मनखेमन के बारे म बताईन, जेमन ला पीलातुस ह मरवाय रिहिस, जब ओमन परमेसर ला बलिदान चघावत रिहिन।
LUK 13:2 ये सुनके यीसू ह ओमन ला जबाब दीस, “का तुमन ये सोचथव कि ये गलीलीमन आने जम्मो गलीली मनखेमन ले जादा पापी रिहिन, काबरकि ओमन ये किसम ले मारे गीन?
LUK 13:3 नइं! पर मेंह तुमन ला कहत हंव कि यदि तुमन अपन पाप ले पछताप नइं करहू, त तुमन जम्मो झन घलो ओमन सहीं नास होहू।
LUK 13:4 या ओ अठारह झन के बारे म का सोचथव, जऊन मन मर गीन, जब ओमन के ऊपर सीलोम म गुम्मट ह गिरिस, का ओमन यरूसलेम म रहइया अऊ आने जम्मो झन ले जादा कसूरदार रिहिन?
LUK 13:5 नइं! मेंह तुमन ला कहत हंव कि यदि तुमन अपन पाप ले पछताप नइं करहू, त तुमन जम्मो झन घलो ओमन सहीं नास होहू।”
LUK 13:6 तब यीसू ह ये पटंतर कहिस, “एक मनखे के अंगूर के बारी म एक ठन अंजीर के रूख रिहिस। एक दिन ओ मनखे ह ओ रूख म फर देखे बर गीस, पर ओह एको ठन फर नइं पाईस।
LUK 13:7 एकरसेति ओह अपन बारी के माली ला कहिस, ‘देख, तीन साल ले मेंह ये अंजीर के रूख म फर देखे बर आवत हवंव पर एको ठन नइं पाय हवंव। ये रूख ला काट डार। येह काबर भुइयां ला घेरे रहिही।’
LUK 13:8 “पर बारी के माली ह कहिस, ‘हे मालिक, येला एक बछर अऊ रहन दे; मेंह एकर चारों कोति माटी ला कोड़हूं अऊ ओमा खातू डालहूं।
LUK 13:9 कहूं येह अगले साल फरही, त ठीक। कहूं नइं फरही, त येला काट डारबे।’ ”
LUK 13:10 एक बिसराम के दिन, यीसू ह एक ठन यहूदीमन के सभा-घर म उपदेस देवत रिहिस।
LUK 13:11 उहां एक माईलोगन रिहिस, जऊन ला परेत आतमा ह अठारह साल ले अपंग कर दे रिहिस। ओह कुबड़ी हो गे रिहिस अऊ कइसने करके घलो पूरा ठाढ़ नइं हो सकत रिहिस।
LUK 13:12 जब यीसू ह ओला देखिस, त ओला आघू म बलाईस अऊ ओकर ले कहिस, “हे नारी! तोर दुरबलता ह दूर हो जावय।”
LUK 13:13 तब यीसू ह ओकर ऊपर अपन हांथ रखिस, अऊ तुरते ओ माईलोगन ह सीधा ठाढ़ हो गीस अऊ परमेसर के महिमा करिस।
LUK 13:14 काबरकि यीसू ह ओ माईलोगन ला बिसराम दिन म बने करे रिहिस, एकरसेति सभा-घर के अधिकारी ह खिसियाईस अऊ मनखेमन ला कहिस, “काम करे बर छै दिन हवय। एकरसेति ओ दिनमन म आवव अऊ बने होवव, पर बिसराम दिन म नइं।”
LUK 13:15 परभू ह ओला ये जबाब दीस, “हे ढोंगी मनखेमन, का तुमन ले हर एक मनखे बिसराम दिन म अपन बईला या गदहा ला कोठा ले ढीलके पानी पीयाय बर नइं ले जावय?
LUK 13:16 तब ये माईलोगन जऊन ह अब्राहम के संतान अय, अऊ जऊन ला सैतान ह अठारह साल ले बांधके रखे रिहिस। का येह ठीक नो हय कि ओला बिसराम दिन म ये बंधन ले छुटकारा मिलय?”
LUK 13:17 जब यीसू ह ये बात कहिस, त ओकर जम्मो बिरोधीमन के बेजत्ती होईस, पर जऊन अद्भूत काम ओह करत रिहिस, ओकर ले मनखेमन खुस होईन।
LUK 13:18 तब यीसू ह पुछिस, “परमेसर के राज ह काकर सहीं अय? मेंह एकर तुलना काकर संग करंव?
LUK 13:19 येह ओकर सहीं अय, जब एक मनखे ह एक ठन सरसों के बीजा ला लीस अऊ अपन बारी म बोईस। ओह बाढ़िस, अऊ बाढ़के एक ठन रूख हो गीस, अऊ अकास के चिरईमन एकर डारामन म बसेरा करिन।”
LUK 13:20 यीसू ह फेर पुछिस, “मेंह परमेसर के राज के तुलना काकर संग करंव?
LUK 13:21 येह खमीर सहीं अय, जऊन ला एक माईलोगन ह लीस अऊ ओला तीन पसेरी पीसान म मिलाके तब तक गुंथिस, जब तक कि जम्मो पीसान ह खमीर नइं हो गीस।”
LUK 13:22 यीसू ह यरूसलेम सहर जावत बेरा, डहार म ओह सहर अऊ गांवमन म उपदेस करत गीस।
LUK 13:23 एक झन ओकर ले पुछिस, “हे परभू, का सिरिप थोरकन मनखेमन उद्धार पाहीं?” यीसू ह ओमन ला कहिस,
LUK 13:24 “संकरा कपाट ले होके जाय के भरसक कोसिस करव; काबरकि मेंह तुमन ला कहत हंव कि बहुंते मनखेमन येमा ले जाय के कोसिस करहीं, पर जाय नइं सकहीं।
LUK 13:25 जब एक बार घर के मालिक ह उठही अऊ कपाट ला बंद कर दीही, त तुमन बाहिर म ठाढ़े रही जाहू अऊ कपाट ला खटखटावत ये बिनती करहू, ‘हे परभू, हमर बर कपाट ला खोल दे।’ “पर ओह तुमन ला ये जबाब दीही, ‘मेंह नइं जानंव कि तुमन कहां ले आय हवव।’
LUK 13:26 “तब तुमन कहिहू, ‘हमन तोर संग खाय-पीये रहेंन, अऊ तेंह हमर गली म उपदेस दे हवस।’
LUK 13:27 “पर ओह जबाब दीही, मेंह नइं जानंव कि तुमन कहां ले आय हवव। हे कुकरमीमन! तुमन जम्मो झन मोर ले दूरिहा हटव।
LUK 13:28 “जब तुमन उहां अब्राहम, इसहाक, याकूब अऊ जम्मो अगमजानीमन ला परमेसर के राज म बईठे अऊ अपनआप ला बाहिर फेंके हुए देखहू, त तुमन रोहू अऊ अपन दांत पीसहू।
LUK 13:29 मनखेमन पूरब, पछिम अऊ उत्तर, दक्खिन, चारों दिग ले आहीं अऊ परमेसर के राज के भोज म सामिल होहीं।
LUK 13:30 अऊ देखव! जऊन मन आखिरी म हवंय, ओमन पहिली हो जाहीं; अऊ जऊन मन पहिली हवंय, ओमन आखिरी म हो जाहीं।”
LUK 13:31 ओतकी बेरा कुछू फरीसीमन यीसू करा आईन अऊ ओला कहिन, “तेंह ये जगह ला छोंड़के कहीं अऊ चल दे; काबरकि हेरोदेस राजा ह तोला मार डारे बर चाहथे।”
LUK 13:32 यीसू ह ओमन ला कहिस, “जावव अऊ ओ कोलिहा ले कहव, ‘आज अऊ कल मेंह परेत आतमामन ला निकालहूं अऊ बेमार मनखेमन ला बने करहूं, अऊ तीसरा दिन मोर काम ह पूरा हो जाही।’
LUK 13:33 कुछू घलो होवय, मोला आज, कल अऊ परसों चलते रहना जरूरी ए—काबरकि येह नइं हो सकय कि एक अगमजानी ह यरूसलेम सहर के बाहिर म मरय।
LUK 13:34 “हे यरूसलेम सहर! हे यरूसलेम सहर! तेंह अगमजानीमन ला मार डारथस अऊ जेमन ला तोर करा पठोय जाथे, ओमन ला तेंह पथरा ले मारथस। मेंह कतेक बार चाहेंव कि तोर लइकामन ला वइसने संकेलंव, जइसने कुकरी ह अपन चियांमन ला अपन डेना खाल्हे संकेलथे, पर तेंह ये नइं चाहय।
LUK 13:35 देख, तोर घर ह उजाड़ पड़े हवय। मेंह तोला कहत हंव कि तेंह मोला तब तक फेर नइं देख सकस, जब तक कि तेंह ये नइं कहस, ‘धइन ए ओह, जऊन ह परभू के नांव म आथे।’”
LUK 14:1 एक बिसराम के दिन, यीसू ह एक मुखिया फरीसी के घर म खाना खाय बर गीस, अऊ मनखेमन ओला धियान से देखत रहंय।
LUK 14:2 उहां ओकर आघू म एक झन मनखे रहय, जऊन ला जलोदर के बेमारी रिहिस।
LUK 14:3 यीसू ह फरीसी अऊ कानून के जानकारमन ले पुछिस, “बिसराम दिन म कोनो ला बेमारी ले ठीक करे के अनुमति कानून ह देथे कि नइं देवय?”
LUK 14:4 पर ओमन चुपेचाप रिहिन। तब यीसू ह ओ बिमरहा मनखे के हांथ ला धरके ओला बने करिस, अऊ ओला जावन दीस।
LUK 14:5 तब यीसू ह ओमन ले कहिस, “यदि तुमन के काकरो एक बेटा या एक बईला हवय अऊ ओह बिसराम के दिन एक ठन कुआं म गिर जाथे, त का तुमन तुरते ओला खींचके बाहिर नइं निकालहू।”
LUK 14:6 अऊ ओमन एकर कोनो जबाब नइं दे सकिन।
LUK 14:7 जब यीसू ह देखिस कि नेवताहारीमन कइसने चुन-चुनके बढ़िया जगह म बईठत हवंय, त ओह ओमन ला ये पटंतर कहिस,
LUK 14:8 “जब कोनो तुमन ला बिहाव के भोज बर नेवता देथे, त उहां जाके सबले बढ़िया जगह म झन बईठव, काबरकि हो सकथे कि उहां तोर ले घलो जादा बड़े मनखे ला नेवता देय गे होही,
LUK 14:9 यदि अइसने अय, तब ओ मनखे जऊन ह तुमन दूनों ला नेवता देय हवय, आही अऊ तोला कहिही, ‘तोर जगह ये मनखे ला देय दे।’ तब तोर बेजत्ती होही अऊ तोला छोटे जगह म बईठना पड़ही।
LUK 14:10 एकरसेति जब तोला नेवता दिये जाथे, त जाके छोटे जगह म बईठ, ताकि जब नेवता देवइया ह आवय, त ओह तोर ले कहय, ‘हे संगवारी, जाके बने जगह म बईठ।’ तब आने जम्मो संगी पहुनामन के आघू म तोर आदरमान होही।
LUK 14:11 काबरकि जऊन ह अपनआप ला बड़े समझथे, ओला दीन-हीन करे जाही अऊ जऊन ह अपनआप ला दीन-हीन करथे, ओला बड़े करे जाही।”
LUK 14:12 तब यीसू ह अपन नेवता देवइया ला कहिस, “जब तेंह मंझन या रथिया कोनो भोज देथस, त अपन संगवारी या अपन भाई या अपन रिस्तेदार या अपन धनी परोसीमन ला झन नेवता दे; यदि तेंह ओमन ला नेवता देथस, त ओमन घलो बदले म तोला नेवता दे सकथें, अऊ ये किसम ले जऊन कुछू तेंह करे हवस, ओकर भरपई हो जाही।
LUK 14:13 पर जब तेंह कोनो भोज देथस, त गरीब, अपंग, खोरवा अऊ अंधरामन ला बलाय कर।
LUK 14:14 तब परमेसर ह तोला आसीस दीही। हालाकि ओमन बदले म तोला कुछू नइं दे सकंय, पर तोला एकर परतिफल ओ समय मिलही, जब धरमी मनखेमन फेर जी उठहीं।”
LUK 14:15 जऊन मन यीसू के संग खाय बर बईठे रिहिन, ओमा ले एक झन जब येला सुनिस, त ओह यीसू ले कहिस, “धइन ए ओ मनखे जऊन ह ओ भोज म खाही, जऊन ह परमेसर के राज म होही।”
LUK 14:16 यीसू ह ओला कहिस, “एक बार एक मनखे ह एक बड़े भोज करिस, अऊ बहुंत मनखेमन ला नेवता दीस।
LUK 14:17 जब भोज ह तियार हो गीस, त ओह अपन सेवक ला नेवताहारीमन करा ये कहे बर पठोईस, ‘आवव, जम्मो चीज तियार हो गे हवय।’
LUK 14:18 “पर ओमन जम्मो झन बहाना करे लगिन। पहिली मनखे ह ओ सेवक ला कहिस, ‘मेंह अभी एक ठन खेत बिसोय हवंव, अऊ मोर उहां जाना अऊ ओला देखना जरूरी ए। मेंह तोर ले बिनती करत हंव कि मोला माफ कर दे।’
LUK 14:19 “आने झन ह कहिस, ‘मेंह अभी पांच जोड़ी बईला बिसोय हवंव, अऊ मेंह ओमन ला परखे बर जावत हंव। मेंह तोर ले बिनती करत हंव कि मोला माफ कर दे।’
LUK 14:20 “अऊ एक झन ह कहिस, ‘मेंह अभी बिहाव करे हवंव, एकरसेति मेंह नइं आ सकंव।’
LUK 14:21 “ओ सेवक ह वापिस आईस अऊ ये बात अपन मालिक ला बताईस। तब घर के मालिक ह गुस्सा होईस अऊ अपन सेवक ला हुकूम दीस, ‘सहर के सड़क अऊ गलीमन म तुरते जा अऊ गरीब, अपंग, अंधरा अऊ खोरवामन ला ले आ।’
LUK 14:22 “ओ सेवक ह कहिस, ‘हे मालिक, जइसने तेंह कहे रहय, वइसने करे गे हवय, पर तभो ले जगह खाली हवय।’
LUK 14:23 “तब मालिक ह अपन सेवक ला कहिस, ‘बाहिर सड़क अऊ गांव तरफ के गलीमन म जा अऊ कइसने करके मनखेमन ला ले आ, ताकि मोर घर ह भर जावय।
LUK 14:24 मेंह तोला कहत हंव कि ओ नेवताहारी मनखेमन ले एको झन घलो मोर भोज के सुवाद ला चखे नइं पाहीं।’ ”
LUK 14:25 एक बड़े भीड़ ह यीसू के संग जावत रिहिस, अऊ यीसू ह मनखेमन कोति मुहूं करके कहिस,
LUK 14:26 “यदि कोनो मोर करा आथे, त ये जरूरी ए कि ओह अपन ददा अऊ दाई, अपन घरवाली अऊ लइका, अपन भाई अऊ बहिनी अऊ इहां तक कि अपन जिनगी ले घलो जादा मोला मया करय, नइं तो ओह मोर चेला नइं हो सकय।
LUK 14:27 अऊ जऊन ह अपन कुरूस ला उठाके मोर पाछू नइं आवय, ओह मोर चेला नइं हो सकय।
LUK 14:28 “मान लव, तुमन ले कोनो मनखे एक भवन बनाय चाहथे। त का ओह पहिली बईठके खरचा के हिसाब नइं करही, ये देखे बर कि काम ला पूरा करे बर ओकर करा पईसा हवय कि नइं?
LUK 14:29 काबरकि यदि ओह नीव धरथे अऊ काम ला पूरा नइं कर सकय, त येला जम्मो देखइयामन ये कहिके ओकर हंसी उड़ाहीं,
LUK 14:30 ‘ये मनखे ह भवन बनाय के सुरू त करिस, पर काम ला पूरा नइं कर सकिस।’
LUK 14:31 “या मान लव, एक राजा ह आने राजा के बिरूध लड़ई म जवइया हवय, त का ओह पहिली बईठके ये नइं सोचही कि का ओह अपन दस हजार मनखेमन के संग ओकर सामना कर सकथे, जऊन ह बीस हजार मनखे लेके ओकर बिरोध म आवथे?
LUK 14:32 यदि ओह सामना नइं कर सकय, त ओह आने राजा करा, जऊन ह अभी दूरिहा म हवय, अपन दूतमन ला पठोही अऊ मेल-मिलाप करे बर बिनती करही।
LUK 14:33 ओही किसम ले, तुमन ले जऊन ह जब तक अपन जम्मो चीज ला नइं छोंड़ दीही, तब तक ओह मोर चेला नइं हो सकय।
LUK 14:34 “नून ह बने ए, पर कहूं येह अपन सुवाद ला गंवा देथे, त कोनो किसम ले येला फेर नूनचूर नइं करे जा सकय।
LUK 14:35 येह न तो माटी के काम आवय अऊ न तो खातू के। येला बाहिर फटिक दिये जाथे। “जेकर सुने के कान हवय, ओह सुन ले।”
LUK 15:1 एक बार जम्मो लगान लेवइया अऊ पापी मनखेमन यीसू करा जूरत रिहिन कि ओमन ओकर बात ला सुनंय।
LUK 15:2 पर फरीसी अऊ कानून के गुरूमन ये कहिके कुड़कुड़ाय लगिन, “ये मनखे ह पापीमन के सुवागत करथे अऊ ओमन के संग खाथे।”
LUK 15:3 एकरसेति यीसू ह ओमन ला ये पटंतर कहिस,
LUK 15:4 “मान लव, तुमन ले एक झन करा सौ ठन भेड़ हवंय अऊ ओमा के एक ठन गंवा जाथे, त का ओह निनानबे भेड़मन ला मैदान म छोंड़के ओ गंवाय भेड़ ला तब तक नइं खोजही, जब तक कि ओह मिल नइं जावय?
LUK 15:5 अऊ जब भेड़ ह ओला मिल जाथे, त ओह ओला खुसी के मारे अपन कंधा म उठा लेथे,
LUK 15:6 अऊ अपन घर जाथे। अऊ तब ओह अपन संगवारी अऊ परोसीमन ला एक संग बलाथे अऊ कहिथे, ‘मोर संग आनंद मनावव, काबरकि मोर गंवाय भेड़ ह मोला मिल गे हवय।’
LUK 15:7 मेंह तुमन ला कहत हंव कि ओही किसम ले एक पापी मनखे के पछताप करे ले स्वरग म बहुंत आनंद मनाय जाथे, जतेक कि निनानबे धरमी मनखेमन बर नइं मनाय जावय, जऊन मन ला पछताप करे के जरूरत नइं ए।
LUK 15:8 “या मान लव, एक माईलोगन करा दस ठन चांदी के सिक्का हवय अऊ ओमा ले एक ठन गंवा जाथे, त का ओह दीया बारके घर ला नइं बहारे अऊ मन लगाके खोजय, जब तक कि ओह मिल न जावय।
LUK 15:9 अऊ जब ओला सिक्का ह मिल जाथे, त ओह अपन संगवारी अऊ परोसीमन ला बलाथे अऊ कहिथे, ‘मोर संग आनंद मनावव, काबरकि मोर गंवाय सिक्का ह मोला मिल गे हवय।’
LUK 15:10 मेंह तुमन ला कहत हंव कि ओही किसम ले, जब एक पापी मनखे पछताप करथे, त उहां स्वरग म परमेसर के स्वरगदूतमन के आघू म आनंद मनाय जाथे।”
LUK 15:11 यीसू ह ये घलो कहिस, “एक मनखे के दू झन बेटा रिहिन।
LUK 15:12 छोटे बेटा ह अपन ददा ला कहिस, ‘ददा! मोर बांटा के संपत्ति मोला देय दे।’ अऊ ओ मनखे ह अपन दूनों बेटा के बीच म संपत्ति के बंटवारा कर दीस।
LUK 15:13 “कुछू दिन के बाद, छोटे बेटा ह अपन बांटा के जम्मो संपत्ति ला संकेलके एक दूरिहा के देस म चल दीस अऊ उहां ओह फालतू काम म जिनगी बितात अपन संपत्ति ला उड़ा दीस।
LUK 15:14 जब ओह जम्मो ला खरचा कर डारिस, त उहां ओ जम्मो देस म एक भयंकर दुकाल पड़िस, अऊ ओकर करा कुछू नइं बचिस।
LUK 15:15 एकरसेति ओह ओ देस के रहइया एक मनखे करा काम करे बर गीस, जऊन ह ओला अपन खेत म, सुरामन ला चराय बर पठोईस।
LUK 15:16 ओकर ईछा होवय कि ओह ओ फली ले अपन पेट भरय, जऊन ला सुरामन खावत रहंय, पर कोनो ओला खाय बर कुछू नइं देवंय।
LUK 15:17 “जब ओह अपन होस म आईस, त कहन लगिस, ‘मोर ददा के घर म कतेक बनी-भूती करइयामन करा जरूरत ले जादा खाय बर हवय, अऊ इहां मेंह भूखन मरत हंव।
LUK 15:18 मेंह उठके अपन ददा करा वापिस जाहूं अऊ ओला ये कहिहूं: हे ददा, मेंह स्वरग के परमेसर के बिरोध अऊ तोर बिरोध म पाप करे हवंव।
LUK 15:19 मेंह तोर बेटा कहाय के लईक नो हंव; मोला अपन एक बनिहार मनखे सहीं रख ले।’
LUK 15:20 अऊ ओह उठिस अऊ अपन ददा करा जाय बर निकलिस। “पर जब ओह अभी दूरिहाच म ही रिहिस, त ओकर ददा ह ओला देख डारिस, अऊ ओकर हिरदय ह दया ले भर गे। ओह अपन बेटा करा दऊड़के गीस अऊ ओला अपन बाहां म पोटारके चूमिस।
LUK 15:21 “बेटा ह ओला कहिस, ‘हे ददा, मेंह स्वरग के परमेसर के बिरोध अऊ तोर बिरोध म पाप करे हवंव। मेंह तोर बेटा कहाय के लईक नो हंव।’
LUK 15:22 “पर ददा ह अपन सेवकमन ला कहिस, ‘जल्दी करव। सबले बढ़िया ओनहा लानव अऊ येला पहिरावव। एकर अंगरी म मुंदरी अऊ एकर गोड़ म पनही पहिरावव।
LUK 15:23 मोटा-ताजा बछवा लानके काटव, ताकि हमन खावन अऊ खुसी मनावन।
LUK 15:24 काबरकि मोर ये बेटा ह मर गे रिहिस, पर अब जी गे हवय; येह गंवा गे रिहिस, पर अब मिल गे हवय।’ अऊ ओमन खुसी मनाय लगिन।
LUK 15:25 “ओ बेरा म, ओकर बड़े बेटा ह खेत म रिहिस। जब ओह उहां ले घर के लकठा म आईस, त ओह गाय-बजाय अऊ नाचे के अवाज सुनिस।
LUK 15:26 ओह एक सेवक ला बलाईस अऊ ओकर ले पुछिस, ‘का होवत हवय?’
LUK 15:27 ओ सेवक ह कहिस, ‘तोर भाई ह आय हवय, अऊ तोर ददा ह मोटा-ताजा बछवा कटवाय हवय, काबरकि ओह ओला सही-सलामत पाय हवय।’
LUK 15:28 “येला सुनके बड़े भाई ह गुस्सा करिस अऊ घर के भीतर जाय नइं चाहिस। एकरसेति ओकर ददा ह बाहिर आईस अऊ भीतर आय बर ओकर ले बिनती करे लगिस।
LUK 15:29 पर ओह अपन ददा ला जबाब दीस, ‘देख, अतेक साल तक मेंह तोर गुलाम के सहीं काम करे हवंव अऊ मेंह तोर हुकूम ला कभू नइं टारेंव। तभो ले तेंह मोला एक बोकरा के पीला तक कभू नइं देय कि मेंह अपन संगवारीमन संग आनंद मना सकंव।
LUK 15:30 पर जब तोर ये बेटा ह घर आईस, जऊन ह कि तोर संपत्ति ला बेस्यामन संग उड़ा दे हवय, त तेंह ओकर बर मोटा-ताजा बछवा कटवाय हवस!’
LUK 15:31 “तब ददा ह ओला कहिस, ‘हे मोर बेटा! तेंह सदा मोर संग हवस, अऊ जऊन कुछू मोर करा हवय, ओ जम्मो तोर ए।
LUK 15:32 पर हमन ला आनंद मनाना अऊ खुस होना चाही, काबरकि तोर ये भाई ह मर गे रिहिस, पर अब जी उठे हवय; येह गंवा गे रिहिस, पर अब मिल गे हवय।’ ”
LUK 16:1 यीसू ह अपन चेलामन ला कहिस, “एक धनी मनखे रिहिस। ओह अपन संपत्ति के देखरेख करे बर एक परबंधकर्ता रखे रिहिस, अऊ ओला ये बताय गीस कि ओकर परबंधकर्ता ह ओकर संपत्ति ला बरबाद करत हवय।
LUK 16:2 एकरसेति ओह अपन परबंधकर्ता ला बलाईस अऊ कहिस, ‘मेंह तोर बारे म ये का सुनत हवंव? अपन काम के हिसाब-किताब मोला दे, काबरकि तेंह अब मोर परबंधकर्ता नइं रह सकस।’
LUK 16:3 “परबंधकर्ता ह अपनआप ले कहिस, ‘अब मेंह का करंव? मोर मालिक ह मोला मोर काम ले छुट्टी करइया हवय। मोर अतकी ताकत नइं ए कि माटी कोड़ सकंव, अऊ भीख मांगे म मोला सरम आथे।
LUK 16:4 अब मेंह समझ गेंव कि मोला का करना चाही, ताकि जब इहां ले मोला काम ले निकाल दिये जावय, त मनखेमन अपन घर म मोर सुवागत करंय।’
LUK 16:5 “एकरसेति ओह ओ जम्मो मनखेमन ला बलाईस, जऊन मन ओकर मालिक के उधारी लगत रहंय। ओह पहिली मनखे ले पुछिस, ‘तोर ऊपर मोर मालिक के कतेक उधारी हवय?’
LUK 16:6 “ओह कहिस, ‘करीब तीन हजार लीटर जैतून के तेल।’ “तब परबंधकर्ता ह ओला कहिस, ‘अपन खाता-बही ला लेके बईठ अऊ तुरते येला डेड़ हजार लीटर लिख दे।’
LUK 16:7 “तब ओह दूसरा मनखे ले पुछिस, ‘तोर ऊपर कतेक उधारी हवय?’ “ओह कहिस, ‘एक सौ मन गहूं।’ “तब परबंधकर्ता ह ओला कहिस, ‘अपन खाता-बही ला ले अऊ येला अस्सी लिख दे।’
LUK 16:8 “मालिक ह ओ बेईमान परबंधकर्ता के बड़ई करिस, काबरकि ओह चतुरई ले काम करे रिहिस। अऊ येह सच ए कि ये संसार के मनखेमन अपन मामला के निपटारा करे म परमेसर के मनखेमन ले जादा चतुर अंय।
LUK 16:9 मेंह तुमन ला कहत हंव कि संसारिक धन ले अपन बर संगवारी बना लेवव, ताकि जब ओ धन ह सिरा जावय, त तुम्हर सुवागत सदाकाल के घर म होवय।
LUK 16:10 “जऊन ह बहुंत छोटे चीज म ईमानदार रहिथे, ओह बहुंत म घलो ईमानदार रहिही; अऊ जऊन ह बहुंत छोटे चीज म बेईमान ए, ओह बहुंत चीज म घलो बेईमान होही।
LUK 16:11 एकरसेति यदि तुमन संसारिक धन म बिसवासयोग्य नइं ठहिरे हव, त तुमन ला स्वरग के सच्चा धन कोन सऊंपही?
LUK 16:12 अऊ यदि तुमन पराय संपत्ति म ईमानदार नइं ठहिरेव, त तुम्हर खुद के संपत्ति तुमन ला कोन दीही?
LUK 16:13 “कोनो भी मनखे दू झन मालिक के सेवा नइं कर सकय। या तो ओह एक झन ले नफरत करही अऊ दूसर झन ले मया, या फेर ओह एक झन बर समरपित रहिही अऊ दूसर झन ला तुछ जानही। तुमन परमेसर अऊ धन दूनों के सेवा नइं कर सकव।”
LUK 16:14 ओ फरीसी जऊन मन पईसा के लोभी रिहिन, ओमन ये जम्मो ला सुनके यीसू के हंसी उड़ाय लगिन।
LUK 16:15 यीसू ह ओमन ला कहिस, “तुमन ओ मनखे अव, जऊन मन अपनआप ला आने मनखेमन के आघू म सही ठहिराथव, पर परमेसर ह तुम्हर मन के बात ला जानथे। काबरकि जऊन चीज ला मनखेमन बहुंत कीमती समझथें, ओह परमेसर के नजर म तुछ ए।
LUK 16:16 “मूसा के कानून अऊ अगमजानीमन के लिखे बचन के परचार यूहन्ना बतिसमा देवइया तक करे गीस। ओकर बाद ले परमेसर के राज के सुघर संदेस के परचार करे जावथे, अऊ हर एक झन येमा जाय के भरसक कोसिस करत हवय।
LUK 16:17 अकास अऊ धरती के मिट जवई सरल ए, पर मूसा के कानून के एक ठन बिन्दू घलो नइं मिटय।
LUK 16:18 “जऊन ह अपन घरवाली ला छोंड़के आने माईलोगन ले बिहाव करथे, ओह छिनारी करथे, अऊ जऊन मनखे एक छोंड़े गे माईलोगन ले बिहाव करथे, ओह छिनारी करथे।
LUK 16:19 “एक धनवान मनखे रिहिस, जऊन ह बने अऊ बहुंत मंहगा कपड़ा पहिरे अऊ हर दिन सुख-सुबिधा म जिनगी बितावय।
LUK 16:20 लाजर नांव के एक भिखमंगा घलो रिहिस, जेकर जम्मो देहें ह घाव ले भर गे रहय, अऊ ओह धनवान मनखे के दुवार म पड़े रहय,
LUK 16:21 अऊ ये आसा करय कि धनवान मनखे के मेज ले गिरे जूठा खाना ले अपन पेट भरय। अऊ त अऊ कुकुरमन आके ओकर घावमन ला चाटंय।
LUK 16:22 “एक समय आईस, जब ओ भिखमंगा ह मर गीस अऊ स्वरगदूतमन ओला अब्राहम के तरफ ले गीन। ओ धनवान मनखे घलो मर गीस अऊ ओला माटी दिये गीस।
LUK 16:23 मरे के बाद, ओह पाताल-लोक म पीरा भोगत रहय, अऊ जब ओह अपन आंखी उठाके देखिस, त बहुंत दूरिहा म अब्राहम अऊ ओकर बाजू म लाजर रहय।
LUK 16:24 तब ओह नरियाके कहिस, ‘हे ददा अब्राहम, मोर ऊपर दया कर अऊ लाजर ला मोर करा पठो दे कि ओह अपन अंगरी के टीप ला पानी म भिगोवय अऊ मोर जीभ ला ठंडा करय, काबरकि मेंह ये आगी के जुवाला म बहुंत पीरा भोगत हवंव।’
LUK 16:25 “पर अब्राहम ह कहिस, ‘ए बेटा, सुरता कर कि तोला तोर जिनगी म जम्मो बने चीज मिले रिहिस, जबकि लाजर ला खराप चीज मिले रिहिस, पर अब ओह इहां सांति पावथे, अऊ तेंह दुख भोगत हस।
LUK 16:26 अऊ एकर अलावा, हमर अऊ तोर बीच म एक बहुंत गहिरा खंचवा बनाय गे हवय, ताकि जऊन मन इहां ले तोर करा जाना चाहंय घलो, त नइं जा सकंय अऊ न ही उहां ले हमर करा कोनो पार होके आ सकय।’
LUK 16:27 “ओ मनखे ह कहिस, ‘तब मेंह तोर ले बिनती करत हंव, ददा; लाजर ला मोर ददा के घर म पठो दे,
LUK 16:28 काबरकि मोर पांच झन भाई हवंय। ओह जाके ओमन ला चेतावय, ताकि ओमन पीरा भोगे के ये जगह म झन आवंय।’
LUK 16:29 “पर अब्राहम ह कहिस, ‘ओमन करा मूसा अऊ अगमजानीमन के किताब हवय। ओमन ओ किताब म लिखे संदेस ला सुनंय।’
LUK 16:30 “ओ मनखे ह कहिस, ‘नइं, हे ददा अब्राहम, यदि मरे मनखे म ले कोनो उठके ओमन करा जावय, त ओमन अपन पाप के पछताप करहीं।’
LUK 16:31 “पर अब्राहम ह ओला कहिस, ‘यदि ओमन मूसा अऊ अगमजानीमन के बात ला नइं सुनंय, त कहूं कोनो मरे म ले जी घलो उठय, तभो ले ओमन ओकर बात ला नइं मानहीं।’ ”
LUK 17:1 यीसू ह अपन चेलामन ला कहिस, “जऊन चीजमन मनखेमन के पाप म पड़े के कारन बनथें, ओमन जरूर आहीं, पर धिक्कार अय ओ मनखे ला, जेकर दुवारा ओमन आथें।
LUK 17:2 कोनो मनखे ये छोटे मन ले कोनो के पाप म गिरे के कारन बनथे, त ओकर बर बने होतिस कि ओकर घेंच म एक ठन चक्की के पाटा ला बांधे जातिस अऊ ओला समुंदर म फटिक दिये जातिस।
LUK 17:3 एकरसेति, सचेत रहव। “यदि तुम्हर भाई ह पाप करथे, त ओला दबकारव, अऊ यदि ओह पछताप करे, त ओला माफ कर देवव।
LUK 17:4 यदि दिन म, ओह सात बार ले तुम्हर बिरोध म पाप करय अऊ सातों बार तुम्हर करा वापिस आके कहय, ‘मेंह पछतावत हंव,’ त ओला जरूर माफ कर देवव।”
LUK 17:5 प्रेरितमन परभू ला कहिन, “हमर बिसवास ला बढ़ा!”
LUK 17:6 परभू ह कहिस, “यदि तुम्हर बिसवास ह सरसों के एक छोटे बीजा बरोबर घलो हवय, त तुमन ये सहतूत के रूख ला कह सकथव, ‘अपनआप जरी सहित उखनके समुंदर म लग जा,’ अऊ येह तुम्हर हुकूम ला मानही।
LUK 17:7 “मान लव, तुमन ले एक झन के एक सेवक हवय, जऊन ह खेत म नांगर जोतथे या मेढ़ामन ला चराथे। जब ओह खेत ले आवय, त का तुमन ओला ये कहिहू, ‘जल्दी आ अऊ खाय बर बईठ’?
LUK 17:8 नइं! बल्कि तुमन ओला ये कहिहू, ‘मोर बर खाना तियार कर; जब तक मेंह खावत-पीयत हवंव, तेंह तियार रह अऊ मोर सेवा कर, अऊ ओकर बाद तेंह घलो खा-पी ले’?
LUK 17:9 का तुमन अपन ओ सेवक ला धनबाद दूहू काबरकि ओह ओ काम ला करिस, जऊन ला ओला करे बर कहे गीस?
LUK 17:10 एही बात तुम्हर बर घलो लागू होथे। जब तुमन ओ जम्मो काम ला कर चुकव, जऊन ला करे बर तुमन ला कहे गे रिहिस, तब ये कहव, ‘हमन अयोग्य सेवक अन; हमन सिरिप हमर बुता ला करे हवन।’ ”
LUK 17:11 यीसू ह यरूसलेम सहर जावत बखत, सामरिया अऊ गलील प्रदेस के बीच ले होवत गीस।
LUK 17:12 जब ओह एक गांव म हबरिस, त ओला दस आदमी मिलिन, जेमन ला कोढ़ के बेमारी रहय। ओमन दूरिहा म ठाढ़ हो गीन
LUK 17:13 अऊ चिचियाके कहिन, “हे यीसू, हे मालिक! हमर ऊपर दया कर!”
LUK 17:14 जब यीसू ह ओमन ला देखिस, त कहिस, “जावव, अऊ अपनआप ला पुरोहितमन ला देखावव।” अऊ ओमन जावत-जावत बेमारी ले सुध हो गीन।
LUK 17:15 ओमा ले एक झन, जब अपनआप ला देखिस कि ओह बने हो गे हवय, त ओह चिचिया-चिचियाके परमेसर के महिमा करत वापिस लहुंटके आईस,
LUK 17:16 ओह यीसू के गोड़ खाल्हे गिरिस अऊ ओला धनबाद दीस—अऊ ओह एक सामरी मनखे रिहिस।
LUK 17:17 यीसू ह कहिस, “दस मनखेमन कोढ़ ले बने होईन, त फेर ओ नौ झन कहां हवंय?
LUK 17:18 का ये परदेसी के छोंड़ अऊ कोनो नइं आईन कि परमेसर के बड़ई करंय।”
LUK 17:19 अऊ यीसू ह ओला कहिस, “उठ अऊ जा; तोर बिसवास ह तोला बने करे हवय।”
LUK 17:20 एक बार, फरीसीमन यीसू ले पुछिन कि परमेसर के राज ह कब आही, त ओह जबाब दीस, “परमेसर के राज ह अइसने नइं आवय कि ओला तुमन देख सकव,
LUK 17:21 अऊ न कोनो कह सकंय, ‘देखव, ओह इहां हवय,’ या ‘ओह उहां हवय,’ काबरकि परमेसर के राज ह तुम्हर बीच म हवय।”
LUK 17:22 तब ओह अपन चेलामन ला कहिस, “ओ समय ह आवत हवय, जब तुमन मनखे के बेटा के एक दिन ला देखे के ईछा करहू, पर ओह तुमन ला देखे बर नइं मिलही।
LUK 17:23 मनखेमन तुमन ला कहिहीं, ‘ओह उहां हवय’ या ‘ओह इहां हवय!’ पर तुमन ओमन के पाछू झन जावव।
LUK 17:24 काबरकि मनखे के बेटा ह अपन दिन म ओ बिजली के सहीं होही, जऊन ह अकास म एक छोर ले दूसर छोर तक चमकथे अऊ अंजोर देथे।
LUK 17:25 पर पहिली ये जरूरी ए कि ओह बहुंत दुख भोगय अऊ ये पीढ़ी के मनखेमन के दुवारा अस्वीकार करे जावय।
LUK 17:26 “जइसने नूह के समय म होय रिहिस, वइसनेच मनखे के बेटा के समय म घलो होही।
LUK 17:27 नूह के पानी जहाज के भीतर जावत तक, मनखेमन खावत-पीयत रिहिन, अऊ ओमन के बीच सादी-बिहाव होवत रिहिस, पर नूह के जहाज म चघे के बाद पानी के बाढ़ आईस अऊ ओ जम्मो झन ला नास कर दीस।
LUK 17:28 “अइसनेच, लूत के समय म घलो होईस। मनखेमन खावत-पीयत रहंय, लेन-देन करत रहंय, रूख लगावत रहंय अऊ घर बनावत रहंय।
LUK 17:29 पर जऊन दिन लूत ह सदोम सहर ला छोंड़के चल दीस, ओहीच दिन अकास ले आगी अऊ गंधक गिरिस अऊ ओ जम्मो झन ला नास कर दीस।
LUK 17:30 “जऊन दिन मनखे के बेटा ह परगट होही, ओ दिन घलो बिलकुल अइसनेच होही।
LUK 17:31 ओ दिन जऊन ह अपन घर के छानी म होवय, ओह घर ले अपन सामान लेय बर छानी से झन उतरय। ओही किसम ले जऊन ह बाहिर खेत म होवय, ओह कोनो चीज बर घर ला झन लहुंटय।
LUK 17:32 लूत के घरवाली ला सुरता करव।
LUK 17:33 जऊन ह अपन जिनगी ला बचाय के कोसिस करथे, ओह ओला गंवाही अऊ जऊन ह अपन जिनगी ला गंवाथे, ओह ओला बचाही।
LUK 17:34 मेंह तुमन ला कहत हंव, ओ रथिया दू झन मनखे एक ठन खटिया म सुते होहीं, ओमा ले एक झन ला ले लिये जाही, अऊ दूसर ला छोंड़ दिये जाही।
LUK 17:35 दू माईलोगनमन एक संग पीसान पीसत होहीं, ओमा ले एक झन ला ले लिये जाही, अऊ दूसर ला छोंड़ दिये जाही।
LUK 17:36 दू झन खेत म होहीं, ओमा ले एक झन ला ले लिये जाही, अऊ दूसर झन ला छोंड़ दिये जाही।”
LUK 17:37 चेलामन ओकर ले पुछिन, “हे परभू, ओमन ला कहां ले लिये जाही?” यीसू ह ओमन ला कहिस, “जिहां लास हवय, उहां गिधवामन जूरहीं।”
LUK 18:1 तब यीसू ह अपन चेलामन ला ये सिखोय बर एक पटंतर कहिस कि ओमन हमेसा पराथना करंय अऊ हिम्मत रखंय।
LUK 18:2 ओह कहिस, “एक सहर म एक नियायधीस रिहिस, जऊन ह न परमेसर ले डरय अऊ न ही मनखेमन के परवाह करय।
LUK 18:3 ओहीच सहर म एक बिधवा रहय, जऊन ह ओ नियायधीस करा बार-बार आके बिनती करय, ‘मोर बईरी के बिरोध म मोर नियाय कर।’
LUK 18:4 “कुछू समय तक तो ओह बिधवा के बात ला नइं मानिस। पर आखिर म ओह अपन मन म कहिस, ‘हालाकि मेंह परमेसर ले नइं डरंव या मनखेमन के परवाह नइं करंव,
LUK 18:5 पर ये बिधवा ह बार-बार आके मोला तकलीफ देवत हे, मेंह देखहूं कि येला नियाय मिलय, ताकि येह बार-बार आके मोला परेसान झन करय।’ ”
LUK 18:6 अऊ परभू ह कहिस, “सुनव, ये अधरमी नियायधीस ह का कहिथे?
LUK 18:7 त का परमेसर ह अपन चुने मनखेमन के नियाय नइं करही, जऊन मन दिन अऊ रात ओकर से गोहार पारथें? का ओह ओमन के बारे म देरी करही?
LUK 18:8 मेंह तुमन ला कहत हंव, ओह देखही कि ओमन ला नियाय मिलय अऊ जल्दी मिलय। पर जब मनखे के बेटा ह आही, त का ओह धरती म अपन ऊपर बिसवास करइया मनखेमन ला पाही।”
LUK 18:9 यीसू ह ये पटंतर ओमन बर कहिस, जऊन मन अपनआप ला बहुंत धरमी अऊ आने मन ला तुछ समझंय।
LUK 18:10 “दू झन मनखे मंदिर म पराथना करे बर गीन; ओमा के एक झन फरीसी रिहिस अऊ एक झन लगान लेवइया।
LUK 18:11 फरीसी ह ठाढ़ होईस अऊ अइसने पराथना करन लगिस, ‘हे परमेसर, मेंह तोर धनबाद करत हंव कि मेंह आने मनखेमन सहीं लालची, बेईमान अऊ बेभिचारी नो हंव, अऊ मेंह ये लगान लेवइया के सहीं घलो नो हंव।
LUK 18:12 मेंह हप्ता म दू दिन उपास रखथंव अऊ मेंह अपन जम्मो कमई के दसवां भाग तोला देथंव।’
LUK 18:13 “पर लगान लेवइया ह दूरिहा म ठाढ़ होईस। अऊ त अऊ ओह स्वरग कोति आंखी उठाके देखे के हिम्मत घलो नइं करिस, पर ओह अपन छाती ला पीट-पीटके कहिस, ‘हे परमेसर, मोर ऊपर दया कर, मेंह एक पापी मनखे अंव।’
LUK 18:14 “मेंह तुमन ला कहत हंव कि ओ फरीसी ह नइं, पर ये लगान लेवइया ह परमेसर के आघू म धरमी गने गीस, जब ओह अपन घर गीस। काबरकि जऊन ह अपनआप ला बड़े समझथे, ओला दीन-हीन करे जाही, अऊ जऊन ह अपनआप ला दीन-हीन करथे, ओला बड़े करे जाही।”
LUK 18:15 मनखेमन छोटे लइकामन ला यीसू करा लानत रहंय, ताकि ओह ओमन के ऊपर अपन हांथ रखय। पर जब चेलामन येला देखिन, त ओमन मनखेमन ला दबकारे लगिन।
LUK 18:16 पर यीसू ह लइकामन ला अपन करा बलाईस अऊ कहिस, “छोटे लइकामन ला मोर करा आवन दव, अऊ ओमन ला झन रोकव, काबरकि परमेसर के राज ह अइसने मन बर अय।
LUK 18:17 मेंह तुमन ला सच कहत हंव, जऊन ह परमेसर के राज ला एक छोटे लइका सहीं गरहन नइं करही, ओह परमेसर के राज म कभू जाय नइं पाही।”
LUK 18:18 एक यहूदी अधिकारी ह यीसू ले पुछिस, “हे बने गुरू! परमेसर के संग सदाकाल के जिनगी पाय बर मोला का करना पड़ही?”
LUK 18:19 यीसू ह ओला कहिस, “तेंह मोला काबर बने कहत हवस? सिरिप परमेसर के छोंड़, अऊ कोनो बने नो हंय।
LUK 18:20 तेंह हुकूममन ला त जानत हवस: ‘हतिया झन करव, छिनारी झन करव, चोरी झन करव, लबारी गवाही झन देवव, कोनो ला झन ठगव, अपन दाई-ददा के आदरमान करव।’”
LUK 18:21 ओ मनखे ह कहिस, “ये जम्मो बात ला मेंह अपन लइकापन ले मानत आवत हंव।”
LUK 18:22 ये सुनके यीसू ह ओला कहिस, “तोर म अभी घलो एक बात के कमी हवय। जऊन कुछू तोर करा हवय, ओ जम्मो ला बेचके गरीबमन ला देय दे; अऊ तोला स्वरग म धन मिलही। तब आ अऊ मोर पाछू हो ले।”
LUK 18:23 ये बात ला सुनके ओह बहुंत उदास होईस, काबरकि ओह एक बहुंत धनवान मनखे रिहिस।
LUK 18:24 यीसू ह ओला देखके कहिस, “धनवान मनखे के परमेसर के राज म जवई कतेक कठिन अय,
LUK 18:25 वास्तव म, एक धनवान मनखे के परमेसर के राज म जाय के बनिस्पत सूजी के छेदा म ले ऊंट के निकल जवई सरल अय।”
LUK 18:26 जऊन मन येला सुनत रिहिन, ओमन पुछिन, “त फेर कोन ह उद्धार पा सकथे?”
LUK 18:27 यीसू ह जबाब दीस, “जऊन बात ह मनखे के दुवारा संभव नो हय, ओह परमेसर के दुवारा संभव अय।”
LUK 18:28 तब पतरस ह ओला कहिस, “देख! हमन हमर जम्मो चीज ला छोंड़के तोर पाछू हो ले हवन।”
LUK 18:29 यीसू ह ओमन ला कहिस, “मेंह तुमन ला सच कहत हंव, जऊन ह परमेसर के राज के हित म, घर या घरवाली या भाई या दाई-ददा या लइकामन ला छोंड़ देय हवय,
LUK 18:30 ओह इही जुग म कतको गुना अधिक पाही, अऊ अवइया जुग म सदाकाल के जिनगी घलो पाही।”
LUK 18:31 यीसू ह अपन बारह चेलामन ला एक तरफ ले गीस अऊ ओमन ला कहिस, “सुनव, हमन यरूसलेम जावत हवन, अऊ मनखे के बेटा के बारे म अगमजानीमन के दुवारा लिखे हर एक बात ह पूरा होही।
LUK 18:32 ओला आनजातमन के हांथ म सऊंपे जाही। ओमन ओकर हंसी उड़ाहीं, ओकर बेजत्ती करहीं, ओकर ऊपर थूकहीं,
LUK 18:33 ओला कोर्रा म मारहीं अऊ ओला मार डारहीं। पर ओह तीसरा दिन फेर जी उठही।”
LUK 18:34 चेलामन यीसू के बात ला नइं समझिन। ये बात के मतलब ह ओमन ले छिपे रिहिस, अऊ ओमन नइं जानिन कि ओह काकर बारे म गोठियावत रिहिस।
LUK 18:35 जब यीसू ह यरीहो सहर के लकठा म हबरिस, त उहां एक अंधरा मनखे ह सड़क-तीर म बईठके भीख मांगत रहय।
LUK 18:36 जब ओह मनखेमन के भीड़ के रेंगे के अवाज सुनिस, त पुछिस, “का होवत हवय?”
LUK 18:37 मनखेमन ओला बताईन, “नासरत के यीसू ह जावत हवय।”
LUK 18:38 तब ओह चिचियाके कहिस, “हे यीसू, दाऊद के संतान, मोर ऊपर दया कर।”
LUK 18:39 जऊन मन यीसू के आघू म जावत रिहिन, ओमन ओला दबकारे लगिन अऊ ओला चुपेचाप रहे बर कहिन, पर ओह अऊ जोर से चिचियाके कहिस, “हे दाऊद के संतान, मोर ऊपर दया कर।”
LUK 18:40 तब यीसू ह उहां ठाढ़ हो गीस अऊ हुकूम दीस, “ओ मनखे ला मोर करा लानव।” जब ओह लकठा म आईस, त यीसू ह ओकर ले पुछिस,
LUK 18:41 “तेंह का चाहथस कि मेंह तोर बर करंव?” ओह कहिस, “हे परभू, मेंह देखे बर चाहत हंव।”
LUK 18:42 यीसू ह ओला कहिस, “तेंह देखन लग; तोर बिसवास ह तोला बने करे हवय।”
LUK 18:43 अऊ तुरते ओह देखे लगिस अऊ परमेसर के महिमा करत ओह यीसू के पाछू हो लीस। जब जम्मो मनखेमन येला देखिन, त ओमन घलो परमेसर के महिमा करिन।
LUK 19:1 यीसू ह यरीहो सहर म ले होके जावत रिहिस।
LUK 19:2 उहां जक्कई नांव के एक मनखे रहय। ओह लगान लेवइयामन के मुखिया रहय अऊ धनी मनखे रहय।
LUK 19:3 ओह ये देखे चाहत रहय कि यीसू ह कोन ए, पर बुटरा होय के कारन भीड़ के मारे ओह यीसू ला नइं देखे सकत रिहिस।
LUK 19:4 एकरसेति ओह भीड़ के आघू दऊड़िस अऊ यीसू ला देखे बर एक ठन डूमर रूख म चघ गीस, काबरकि यीसू ह ओही डहार म आवत रहय।
LUK 19:5 जब यीसू ह ओ जगह म हबरिस, त ओह ऊपर देखिस अऊ जक्कई ला कहिस, “हे जक्कई, तुरते खाल्हे उतर आ काबरकि आज मोला तोर घर म रूकना जरूरी ए।”
LUK 19:6 ओह तुरते खाल्हे उतरिस अऊ खुस होके यीसू ला अपन घर ले गीस।
LUK 19:7 येला देखके जम्मो मनखेमन कुड़कुड़ाय लगिन अऊ कहिन, “यीसू ह एक पापी मनखे के घर म पहुना होय बर गे हवय।”
LUK 19:8 पर जक्कई ह ठाढ़ होईस अऊ परभू ला कहिस, “हे परभू, अब मेंह अपन आधा संपत्ति गरीबमन ला देवत हवंव, अऊ यदि मेंह काकरो ले कुछू ठगके ले लेय हवंव, त मेंह ओकर चार गुना लहुंटाहूं।”
LUK 19:9 यीसू ह ओला कहिस, “आज परमेसर ह ये मनखे अऊ एकर परिवार ला उद्धार दे हवय, काबरकि ये मनखे ह घलो अब्राहम के एक संतान ए।
LUK 19:10 मनखे के बेटा ह एकर सहीं गंवायमन ला खोजे बर अऊ ओमन के उद्धार करे बर आय हवय।”
LUK 19:11 जब मनखेमन ये बात ला सुनत रहंय, तब यीसू ह ओमन ला एक पटंतर कहिस, काबरकि ओह यरूसलेम सहर के लकठा म हबर गे रिहिस अऊ मनखेमन सोचत रहंय कि परमेसर के राज ह तुरते सुरू होवइया हवय।
LUK 19:12 एकरसेति ओह कहिस, “एक ऊंच कुल के मनखे ह एक बहुंत दूरिहा देस ला गीस कि ओह उहां राजपद पावय अऊ फेर लहुंटके आवय।
LUK 19:13 जाय के पहिली, ओह अपन दस झन सेवक ला बलाईस अऊ ओमन ला दस ठन सोन के सिक्का देके कहिस, ‘मोर वापिस लहुंटत तक ये पईसा ले बेपार करत रहव।’
LUK 19:14 “पर ओ देस के मनखेमन ओला बिलकुल ही पसंद नइं करत रिहिन, एकरसेति ओमन कुछू झन ला ओकर पाछू ये कहे बर पठोईन, ‘हमन नइं चाहत हवन कि ये मनखे ह हमर राजा बनय।’
LUK 19:15 “तभो ले, ओह राजा बनाय गीस अऊ फेर घर लहुंटिस। तब ओह जऊन सेवकमन ला पईसा दे रिहिस, ओमन ला बलाईस अऊ ये जाने चाहिस कि ओमन कतेक कमाय हवंय।
LUK 19:16 “पहिली सेवक ह आईस अऊ कहिस, ‘मालिक, तोर दिये सोन के सिक्का ले मेंह दस ठन अऊ सोन के सिक्का कमाय हवंव।’
LUK 19:17 “ओकर मालिक ह कहिस, ‘बहुंत बने करय। तेंह बने सेवक अस, काबरकि तेंह थोरकन चीज म ईमानदार रहय, मेंह तोला दस ठन सहर के अधिकारी बनावत हंव।’
LUK 19:18 “दूसरा सेवक ह आईस अऊ कहिस, ‘मालिक, तोर दिये सिक्का ले मेंह पांच ठन अऊ सोन के सिक्का कमाय हवंव।’
LUK 19:19 “ओकर मालिक ह कहिस, ‘मेंह तोला पांच ठन सहर के अधिकारी बनावत हंव।’
LUK 19:20 “तब एक आने सेवक आईस अऊ कहिस, ‘मालिक, ये हवय तोर सोन के सिक्का, मेंह येला एक ठन कपड़ा के टुकड़ा म छुपाके रखे रहेंव।
LUK 19:21 मेंह तोर ले डरत रहेंव, काबरकि तेंह एक कठोर मनखे अस। तेंह ओला ले लेथस, जऊन ह तोर नो हय, अऊ जऊन ला तेंह नइं बोय रहस, ओला लूथस।’
LUK 19:22 “ओकर मालिक ह कहिस, ‘हे दुस्ट सेवक! मेंह तोर नियाय तोर कहे बचन के मुताबिक करहूं। तेंह जानत रहय कि मेंह एक कठोर मनखे अंव; मेंह ओला ले लेथंव, जऊन ह मोर नो हय, अऊ ओला लू लेथंव, जऊन ला मेंह नइं बोय रहंव।
LUK 19:23 तब तेंह मोर पईसा ला बैंक म काबर जमा नइं कर देवय, ताकि जब मेंह वापिस आयेंव, त ओला बियाज सहित ले लेतेंव?’
LUK 19:24 “तब जऊन मन उहां ठाढ़े रिहिन, ओमन ला ओह कहिस, ‘एकर ले सोन के सिक्का ला लेय लव अऊ ओला दे दव, जेकर करा दस ठन सिक्का हवय।’
LUK 19:25 “ओमन कहिन, ‘हे मालिक, ओकर करा तो आघू ले दस ठन सिक्का हवय।’
LUK 19:26 “ओह जबाब देवत कहिस, ‘मेंह तुमन ले कहत हंव कि हर एक झन जेकर करा हवय, ओला अऊ दिये जाही, पर जेकर करा नइं ए, ओकर ले ओ चीज घलो ले लिये जाही, जऊन ह ओकर करा बांचे हवय।
LUK 19:27 पर मोर ओ बईरीमन ला इहां लानव, जऊन मन नइं चाहत रिहिन कि मेंह ओमन के राजा बनंव अऊ ओमन ला मोर आघू म मार डारव।’ ”
LUK 19:28 जब यीसू ह ये कह चुकिस, त ओह यरूसलेम कोति ओमन के आघू-आघू गीस।
LUK 19:29 जब यीसू ह जैतून पहाड़ करा बैतफगे अऊ बैतनियाह गांव के लकठा म आईस, त ओह अपन चेलामन ले दू झन ला ये कहिके पठोईस,
LUK 19:30 “अपन आघू के गांव म जावव, अऊ जइसने ही तुमन गांव म हबरहू, तुमन ला उहां एक ठन गदही के बछेड़ा बंधाय मिलही, जेकर ऊपर कभू कोनो सवारी नइं करे हवंय। ओला ढीलके इहां ले आवव।
LUK 19:31 कहूं कोनो तुम्हर ले पुछय, ‘येला काबर ढीलत हवव?’ त ओला कहव, ‘परभू ला एकर जरूरत हवय।’ ”
LUK 19:32 जऊन चेलामन यीसू के दुवारा पठोय गे रिहिन, ओमन उहां जाके वइसनेच पाईन, जइसने यीसू ह ओमन ला कहे रिहिस।
LUK 19:33 जब ओमन गदही के बछेड़ा ला ढीलत रिहिन, त ओकर मालिकमन ओमन ले पुछिन, “तुमन ये गदही के बछेड़ा ला काबर ढीलत हवव?”
LUK 19:34 ओमन कहिन, “परभू ला एकर जरूरत हवय।”
LUK 19:35 ओमन गदही के बछेड़ा ला यीसू करा लानिन। तब ओमन अपन ओनहामन ला गदही के बछेड़ा ऊपर डालिन अऊ यीसू ला ओकर ऊपर बईठा दीन।
LUK 19:36 जब यीसू ह गदही के बछेड़ा म बईठके जावत रिहिस, त मनखेमन अपन ओनहा ला डहार म दसावत जावत रहंय।
LUK 19:37 जब यीसू ह ओ जगह के लकठा म आईस, जिहां सड़क ह खाल्हे जैतून पहाड़ कोति जावत रिहिस, त ओकर चेलामन के जम्मो भीड़ ह आनंद मनाय लगिस अऊ ओमन जऊन चमतकार के काम देखे रिहिन, ओकर सेति चिचिया-चिचियाके परमेसर के महिमा करके कहिन:
LUK 19:38 “धइन ए ओ राजा, जऊन ह परभू के नांव म आथे!” “स्वरग म सांति अऊ सबले ऊंच म परमेसर के महिमा होवय!”
LUK 19:39 भीड़ म के कुछू फरीसीमन यीसू ला कहिन, “हे गुरू! अपन चेलामन ला दबकार।”
LUK 19:40 “यीसू ह कहिस,” “मेंह तुमन ला कहत हंव कि यदि येमन चुप रहिहीं, त पथरामन चिचिया उठहीं।”
LUK 19:41 जब यीसू ह यरूसलेम सहर के लकठा म आईस, त ओह सहर ला देखके रोईस,
LUK 19:42 अऊ कहिस, “बने होतिस कि कहूं तेंह आज के दिन सिरिप ये जान गे रहितय कि का बात म तोला सांति मिलही। पर अब ओ चीजमन तोर आंखी ले छुपाय गे हवंय।
LUK 19:43 ओ समय ह तोर ऊपर आही, जब तोर बईरीमन तोर चारों कोति घेरा बनाहीं अऊ तोला घेरहीं अऊ तोला जम्मो कोति ले बंद कर दीहीं।
LUK 19:44 ओमन तोला अऊ तोर घेरा के भीतर रहइया मनखेमन ला पूरा नास कर दीहीं; ओमन एको ठन पथरा ला अपन जगह म नइं छोड़हीं, काबरकि तेंह ओ समय ला नइं चिनहय, जब परमेसर ह तोर करा आईस।”
LUK 19:45 तब यीसू ह मंदिर म गीस अऊ ओमन ला निकाले के सुरू करिस, जऊन मन उहां सामान बेचत रिहिन,
LUK 19:46 अऊ ओह ओमन ला कहिस, “परमेसर के बचन म ये लिखे हवय, ‘मोर घर ह पराथना के घर होही।’ पर तुमन येला डाकूमन के अड्डा बना दे हवव।”
LUK 19:47 यीसू ह हर दिन मंदिर म उपदेस करत रिहिस। अऊ मुखिया पुरोहित, कानून के गुरू अऊ मनखेमन के अगुवामन ओला मार डारे के कोसिस करत रिहिन।
LUK 19:48 पर ओमन ला अइसने करे बर कोनो उपाय नइं मिलिस, काबरकि जम्मो मनखेमन बड़े लगन से यीसू के बात ला सुनंय।
LUK 20:1 एक दिन जब यीसू ह मंदिर के अंगना म मनखेमन ला उपदेस देवत रिहिस अऊ सुघर संदेस के परचार करत रिहिस, त मुखिया पुरोहित अऊ कानून के गुरूमन अगुवामन के संग ओकर करा आईन,
LUK 20:2 अऊ ओमन यीसू ले पुछिन, “हमन ला बता, कोन अधिकार ले तेंह ये चीजमन ला करत हवस? कोन ह तोला ये अधिकार दे हवय?”
LUK 20:3 ओह ओमन ला जबाब देवत कहिस, “मेंह घलो तुमन ले एक सवाल पुछत हंव। मोला बतावव,
LUK 20:4 यूहन्ना के बतिसमा देवई ह स्वरग ले रिहिस या मनखे कोति ले?”
LUK 20:5 ओमन आपस म सोच-बिचार करिन अऊ कहिन, “यदि हमन कहन, ‘स्वरग ले,’ त ओह कहिही, ‘तब तुमन ओकर ऊपर बिसवास काबर नइं करेव?’
LUK 20:6 पर यदि हमन कहन, ‘मनखेमन ले,’ त जम्मो मनखे हमन ला पथरा फेंकके मारहीं, काबरकि ओमन बिसवास करथें कि यूहन्ना ह एक अगमजानी रिहिस।”
LUK 20:7 एकरसेति ओमन जबाब दीन, “हमन नइं जानन कि ओह काकर कोति ले रिहिस।”
LUK 20:8 तब यीसू ह ओमन ला कहिस, “त मेंह घलो तुमन ला नइं बतावंव कि कोन अधिकार ले मेंह ये काममन ला करत हवंव।”
LUK 20:9 तब यीसू ह मनखेमन ला ये पटंतर कहिस, “एक मनखे ह एक अंगूर के बारी लगाईस, अऊ ओला कुछू किसानमन ला रेगहा म दे दीस अऊ बहुंत दिन बर परदेस चल दीस।
LUK 20:10 जब अंगूर के फसल के समय आईस, त ओह अपन एक सेवक ला ओ किसानमन करा पठोईस ताकि ओमन अंगूर के बारी के कुछू फर ओला देवंय। पर किसानमन ओ सेवक ला मारिन-पीटिन अऊ ओला जुच्छा हांथ लहुंटा दीन।
LUK 20:11 तब ओह दूसर सेवक ला पठोईस, पर किसानमन ओला घलो मारिन-पीटिन; ओकर बेजत्ती करिन अऊ ओला जुच्छा हांथ वापिस पठो दीन।
LUK 20:12 फेर ओह तीसरा सेवक ला पठोईस, अऊ किसानमन ओला घायल करके बारी के बाहिर फटिक दीन।
LUK 20:13 “तब अंगूर के बारी के मालिक ह कहिस, ‘मेंह का करंव? मेंह अपन मयारू बेटा ला पठोहूं। हो सकथे कि ओमन ओकर आदर करंय।’
LUK 20:14 “पर जब किसानमन मालिक के बेटा ला देखिन, त ओमन आपस म बात करिन अऊ कहिन, ‘येह तो बारी के वारिस ए। आवव, हमन येला मार डालन, तब एकर संपत्ति ह हमर हो जाही।’
LUK 20:15 अऊ ओमन ओला अंगूर के बारी के बाहिर फटिक दीन अऊ ओला मार डारिन। “तब अंगूर के बारी के मालिक ह ओमन के संग का करही?
LUK 20:16 ओह आही अऊ ओ किसानमन ला मार डारही अऊ अंगूर के बारी ला आने मन ला दे दीही।” जब मनखेमन येला सुनिन, त ओमन कहिन, “अइसने कभू झन होवय।”
LUK 20:17 यीसू ह ओमन ला देखके कहिस, “तब परमेसर के बचन म लिखे ये बात के का मतलब होथे: “ ‘जऊन पथरा ला घर के बनइयामन बेकार समझे रिहिन, ओहीच ह कोना के मुख पथरा हो गीस’?
LUK 20:18 जऊन कोनो ओ पथरा ऊपर गिरही, ओह कुटा-कुटा हो जाही, पर जेकर ऊपर ये पथरा ह गिरही, ओह पीसा जाही।”
LUK 20:19 कानून के गुरू अऊ मुखिया पुरोहितमन ओतकीच बेरा यीसू ला पकड़े के उपाय सोचे लगिन, काबरकि ओमन जानत रिहिन कि ओह ये पटंतर ला ओमन के बिरोध म कहे हवय। पर ओमन मनखेमन ले डर्राईन।
LUK 20:20 ओमन यीसू ऊपर नजर रखे रहंय अऊ ओमन भेदियामन ला पठोईन, जऊन मन ईमानदार होय के ढोंग करत रहंय। ओमन ये आसा करत रहंय कि यीसू के मुहूं ले कोनो अइसने बात निकले, जेकर ले ओला ओमन पकड़ंय अऊ राजपाल के हांथ अऊ अधिकार म सऊंप देंय।
LUK 20:21 एकरसेति ओ भेदियामन यीसू ले पुछिन, “हे गुरू, हमन जानथन कि तेंह ओ बात ला कहिथस अऊ सिखोथस जऊन ह सही ए, अऊ तेंह मुहूं देखके नइं गोठियावस, पर सच्चई के संग परमेसर के बात ला सिखोथस।
LUK 20:22 हमन ला बता कि महाराजा ला लगान पटाना हमर बर ठीक अय कि नइं?”
LUK 20:23 पर यीसू ह ओमन के चाल ला समझ गीस अऊ कहिस,
LUK 20:24 “मोला एक ठन सिक्का देखावव। एकर ऊपर काकर मूरती अऊ नांव हवय?” ओमन कहिन, “महाराजा के।”
LUK 20:25 यीसू ह ओमन ला कहिस, “जऊन ह महाराजा के अय, ओला महाराजा ला देवव, अऊ जऊन ह परमेसर के अय, ओला परमेसर ला देवव।”
LUK 20:26 जऊन बात, ओह मनखेमन के आघू म कहिस, ओमा ओमन ओला फंसाय नइं सकिन। अऊ ओकर जबाब ले चकित होके, ओमन चुप हो गीन।
LUK 20:27 सदूकीमन कहिथंय कि मरे मनखेमन के जी उठई, नइं होवय, ओमा के कुछू झन यीसू करा आईन अऊ ओकर ले पुछिन,
LUK 20:28 “हे गुरू, मूसा ह हमर बर लिखे हवय कि यदि कोनो मनखे के भाई ह अपन घरवाली के रहत बिगर संतान के मर जावय, त येह जरूरी ए कि ओ मनखे ह अपन भाई के बिधवा ले बिहाव कर ले अऊ अपन भाई बर संतान पईदा करय।
LUK 20:29 एक जगह सात झन भाई रिहिन। पहिला भाई ह एक माईलोगन ले बिहाव करिस अऊ बिगर कोनो लइका के मर गीस।
LUK 20:30 तब दूसरा भाई ह ओ माईलोगन ले बिहाव करिस,
LUK 20:31 अऊ तब तीसरा भाई ह ओकर ले बिहाव करिस, अऊ इही किसम ले सातों भाई बिगर कोनो संतान के मर गीन।
LUK 20:32 आखिर म ओ माईलोगन घलो मर गीस।
LUK 20:33 तब मरे मनखेमन के जी उठे के बाद, ओह काकर घरवाली होही? काबरकि ओह सातों भाईमन ले बिहाव करे रिहिस?”
LUK 20:34 यीसू ह ओमन ला जबाब दीस, “ये जुग के आदमी अऊ माईलोगनमन सादी-बिहाव करथें,
LUK 20:35 पर जऊन मन ये लईक ठहिरथें कि ओमन अवइया जुग अऊ मरे मनखेमन के जी उठई म भाग लेवंय, त ओमन न तो बिहाव करहीं अऊ न ही ओमन ला बिहाव म दिये जाही।
LUK 20:36 अऊ ओमन फेर कभू नइं मरंय; काबरकि ओमन स्वरगदूतमन सहीं अंय। ओमन परमेसर के संतान अंय, काबरकि ओमन मरे मनखेमन ले जी उठे हवंय।
LUK 20:37 मरे मन जी उठथें, येला मूसा ह घलो जरत झाड़ी के घटना म बताथे, जिहां ओह परभू ला ‘अब्राहम के परमेसर, अऊ इसहाक के परमेसर, अऊ याकूब के परमेसर,’ कहिथे।
LUK 20:38 एकर मतलब होथे कि ओह मरे मन के नइं, पर जीयतमन के परमेसर अय, काबरकि ओकर बर जम्मो झन जीयत हवंय।”
LUK 20:39 कुछू कानून के गुरूमन कहिन, “हे गुरू, तेंह बने कहे!”
LUK 20:40 एकर बाद ओमन ओला अऊ कोनो सवाल करे के हिम्मत नइं करिन।
LUK 20:41 तब यीसू ह ओमन ला कहिस, “ओमन कइसने कह सकथें कि मसीह ह दाऊद के संतान अय?
LUK 20:42 काबरकि दाऊद ह खुदे भजन-संहिता के किताब म कहिथे: “ ‘परभू ह मोर परभू ले कहिस: “मोर जेवनी हांथ कोति बईठ,
LUK 20:43 जब तक कि मेंह तोर बईरीमन ला तोर गोड़ रखे के चउकी नइं बना देवंव।” ’
LUK 20:44 जब दाऊद ह ओला ‘परभू’ कहिथे, तब मसीह ह दाऊद के संतान कइसने हो सकथे?”
LUK 20:45 जब जम्मो मनखेमन यीसू के बात ला सुनत रिहिन, त यीसू ह अपन चेलामन ला कहिस,
LUK 20:46 “कानून के गुरूमन ले सचेत रहव। ओमन लम्बा-लम्बा ओनहा पहिरके एती-ओती घुमई पसंद करथें अऊ ओमन ला बजार के जगह म आदर के संग जोहार झोंकई, यहूदीमन के सभा-घर म सबले बने आसन अऊ जेवनार म आदर के ठऊर म बईठई बने लगथे।
LUK 20:47 ओमन बिधवामन के घर ला हड़प लेथें, अऊ देखाय बर लम्बा-लम्बा पराथना करथें। अइसने मनखेमन बहुंत दंड पाहीं।”
LUK 21:1 यीसू ह देखिस कि धनी मनखेमन अपन दान ला मंदिर के खजाना म डारत रहंय।
LUK 21:2 ओह उहां एक गरीब बिधवा ला घलो ओमा दू ठन तांबा के छोटे सिक्का डारत देखिस।
LUK 21:3 यीसू ह कहिस, “मेंह तुमन ला सच कहत हंव कि ये गरीब बिधवा ह आने जम्मो झन ले जादा दान दे हवय।
LUK 21:4 काबरकि ओ जम्मो मनखे अपन बढ़त धन ले दान दे हवंय; पर येह अपन गरीबी म ले जम्मो ला देय दे हवय, जेमा ओकर गुजारा होय रहितिस।”
LUK 21:5 यीसू के कुछू चेलामन मंदिर के बारे म गोठियावत रिहिन कि मंदिर ह कइसने सुघर पथरामन ले अऊ परमेसर ला चघाय दान ले सजाय-संवारे गे हवय। पर यीसू ह कहिस,
LUK 21:6 “ओ चीज जऊन ला तुमन इहां देखत हवव, एक समय आही, जब एको ठन पथरा उहां अपन जगह म नइं बांचही; हर एक पथरा ला गिरा दिये जाही।”
LUK 21:7 ओमन पुछिन, “हे गुरू, ये बातमन कब होही? अऊ ये बातमन के होय के पहिली, का चिनहां दिखही?”
LUK 21:8 यीसू ह कहिस, “सचेत रहव कि तुमन धोखा झन खावव। काबरकि कतको झन मोर नांव म आहीं अऊ कहिहीं ‘मेंह मसीह अंव’ अऊ ‘समय ह लकठा आ गे हवय।’ पर ओमन के पाछू झन जावव।
LUK 21:9 जब तुमन लड़ई अऊ उपदरव के बात सुनव, त झन डरव। पहिली ये बातमन के होना जरूरी अय, पर ओ समय तुरते अन्त नइं होवय।”
LUK 21:10 तब यीसू ह ओमन ला कहिस: “एक देस ह दूसर देस ऊपर अऊ एक राज ह दूसर राज ऊपर चढ़ई करही।
LUK 21:11 कतको जगह म भयंकर भुइंडोल, अकाल अऊ महामारी होही, अऊ अकास ले भयंकर घटना अऊ बड़े-बड़े चिनहां परगट होहीं।
LUK 21:12 “पर ये जम्मो होय के पहिली, मनखेमन तुमन ला पकड़हीं अऊ सताहीं। ओमन तुमन ला यहूदीमन के सभा-घर म सऊंप दीहीं अऊ तुमन ला जेल म डार दीहीं। तुमन ला राजा अऊ हाकिममन के आघू म लाने जाही अऊ ये जम्मो बात मोर नांव के कारन होही।
LUK 21:13 येह तुम्हर बर मोर गवाही देय के मऊका होही।
LUK 21:14 अपन मन म ठान लेवव कि एकर बारे म आघू ले फिकर करे के जरूरत नइं ए कि अपन बचाव कइसने करहू।
LUK 21:15 काबरकि मेंह तुमन ला बचन अऊ बुद्धि दूहूं कि तुम्हर कोनो घलो बईरी तुम्हर बिरोध या खंडन नइं कर सकहीं।
LUK 21:16 अऊ त अऊ तुम्हर दाई-ददा, भाई, रिस्तेदार अऊ संगवारीमन तुमन ला पकड़वाहीं अऊ ओमन तुमन म ले कुछू झन ला मरवा डारहीं।
LUK 21:17 मोर कारन, जम्मो मनखेमन तुम्हर ले घिन करहीं।
LUK 21:18 पर तुम्हर मुड़ के कोनो बाल घलो बांका नइं होवय।
LUK 21:19 मोर बिसवास म मजबूत रहे के दुवारा तुमन अपन जिनगी ला बचाहू।
LUK 21:20 “जब तुमन यरूसलेम ला सेनामन ले चारों कोति घेराय देखव, त तुमन जान लेवव कि एकर बिनास होवइया हवय।
LUK 21:21 तब जऊन मन यहूदिया प्रदेस म हवंय, ओमन पहाड़ ऊपर भाग जावंय; जऊन मन सहर म हवंय, ओमन सहर ले निकल जावंय, अऊ जऊन मन सहर के बाहिर हवंय, ओमन सहर के भीतर झन जावंय।
LUK 21:22 काबरकि येह दंड के समय होही। ये किसम ले परमेसर के बचन म लिखे ओ जम्मो बात पूरा होही।
LUK 21:23 ओ माईलोगनमन बर कतेक भयानक बात होही, जऊन मन ओ दिन म देहें म होहीं अऊ जऊन दाईमन लइकामन ला दूध पीयावत होहीं! देस म भयंकर बिपत्ति पड़ही अऊ परमेसर के कोरोध ये मनखेमन ऊपर भड़कही।
LUK 21:24 ओमन तलवार ले मारे जाहीं अऊ मनखेमन ला बंदी के रूप म जम्मो देस म पहुंचाय जाही। यरूसलेम सहर ला आनजातमन तब तक कुचरहीं, जब तक कि आनजातमन के समय ह पूरा नइं हो जावय।
LUK 21:25 “सूरज, चंदा अऊ तारामन म चिनहां दिखहीं। धरती म, जम्मो देस के मनखेमन दुख भोगहीं अऊ ओमन समुंदर के गरजन अऊ भयंकर लहरा ले घबराहीं।
LUK 21:26 भय अऊ संसार म अवइया संकट के कारन मनखेमन के जी म जी नइं रहिही, काबरकि अकास के सक्तिमन हलाय जाहीं।
LUK 21:27 ओ समय मनखेमन ‘मनखे के बेटा’ ला एक बादर म सक्ति अऊ बड़े महिमा के संग आवत देखहीं।
LUK 21:28 जब ये बातमन होवन लगय, त ठाढ़ हो जावव अऊ अपन मुड़ ला ऊपर करव, काबरकि तुम्हर उद्धार ह लकठा म होही।”
LUK 21:29 तब यीसू ह ओमन ला ये पटंतर कहिस, “अंजीर के रूख अऊ जम्मो आने रूखमन ला देखव।
LUK 21:30 जब ओमा पान निकलथे, त तुमन देखके खुदे जान लेथव कि घाम के महिना अवइया हवय।
LUK 21:31 ओहीच किसम ले, जब तुमन ये जम्मो घटनामन ला देखव, त जान लेवव कि परमेसर के राज ह अवइया हवय।
LUK 21:32 “मेंह तुमन ला सच कहत हंव कि जब तक ये जम्मो बातमन नइं हो जाहीं, तब तक ये पीढ़ी के मनखेमन नइं मरंय।
LUK 21:33 अकास अऊ धरती ह टर जाही, पर मोर बचन ह कभू नइं टरय।
LUK 21:34 “सचेत रहव, नइं तो तुम्हर हिरदय ह खराप जिनगी, मतवारपन अऊ जिनगी के चिंता करे म लग जाही, अऊ ओ दिन ह एक ठन फांदा के सहीं अचानक तुम्हर ऊपर आ जाही।
LUK 21:35 फांदा ह ओ जम्मो झन के ऊपर आही, जऊन मन धरती म रहिथें।
LUK 21:36 हमेसा सचेत रहव अऊ पराथना करत रहव कि तुमन ओ जम्मो अवइया संकट ले बच सकव, अऊ तुमन ‘मनखे के बेटा’ के आघू म ठाढ़ होय के लईक बन सकव।”
LUK 21:37 हर एक दिन यीसू ह मंदिर म उपदेस करय, अऊ हर संझा ओह बाहिर जैतून नांव के पहाड़ म रात बिताय बर चले जावय,
LUK 21:38 अऊ जम्मो मनखेमन बड़े बिहनियां ले ओकर बात सुने बर मंदिर म आवंय।
LUK 22:1 यहूदीमन के बिन खमीर के रोटी के तिहार जऊन ला फसह तिहार कहे जाथे, लकठा आवत रहय,
LUK 22:2 अऊ मुखिया पुरोहित अऊ कानून के गुरूमन चुपेचाप यीसू ला मार डारे के कुछू उपाय खोजत रहंय, पर ओमन मनखेमन ले डरावत रहंय।
LUK 22:3 तब सैतान ह यहूदा के भीतर म हमाईस, जऊन ला इस्करियोती घलो कहे जावय, अऊ जऊन ह यीसू के बारह चेलामन ले एक झन रिहिस।
LUK 22:4 यहूदा ह मुखिया पुरोहित अऊ मंदिर के रखवारमन के अधिकारीमन करा गीस अऊ ओमन के संग बातचीत करिस कि ओह यीसू ला कइसने ओमन के हांथ म पकड़वाही।
LUK 22:5 ओमन खुस होईन अऊ ओला पईसा देय बर राजी हो गीन।
LUK 22:6 यहूदा घलो तियार हो गीस, अऊ मऊका खोजे लगिस कि जब उहां भीड़ झन रहय, तब ओह यीसू ला ओमन के हांथ म पकड़वा देवय।
LUK 22:7 तब यहूदीमन के बिन खमीर के रोटी के दिन ह आईस अऊ ये दिन म फसह के मेढ़ा-पीला ला बलिदान करना जरूरी रहय।
LUK 22:8 यीसू ह पतरस अऊ यूहन्ना ला ये कहिके पठोईस, “जावव अऊ हमर बर फसह तिहार के भोजन के तियारी करव।”
LUK 22:9 ओमन पुछिन, “तेंह कहां चाहथस कि हमन एकर तियारी करन?”
LUK 22:10 यीसू ह ओमन ला कहिस, “जब तुमन सहर म जाहू, त तुमन ला एक मनखे घघरी म पानी ले जावत मिलही। जऊन घर म ओह जावय, तुमन ओकर पाछू-पाछू जावव,
LUK 22:11 अऊ ओ घर के मालिक ले कहव, ‘गुरू ह पुछत हवय कि ओ पहुना कमरा कहां हवय, जिहां ओह अपन चेलामन संग फसह के भोज खा सकय?’
LUK 22:12 ओह तुमन ला अटारी म सजे-सजाय अऊ तियार एक ठन बड़े कमरा देखा दीही। उहां तुमन तियारी करव।”
LUK 22:13 ओमन गीन अऊ हर चीज ला वइसनेच पाईन, जइसने यीसू ह ओमन ला कहे रिहिस, अऊ ओमन फसह तिहार के भोजन के तियारी करिन।
LUK 22:14 जब समय आईस, त यीसू अऊ ओकर प्रेरितमन खाय बर बईठिन।
LUK 22:15 अऊ ओह ओमन ला कहिस, “एकर पहिली कि मेंह दुख भोगंव, मोर बहुंत ईछा रिहिस कि मेंह तुम्हर संग ये फसह के भोजन ला खावंव।
LUK 22:16 काबरकि मेंह तुमन ला कहत हंव, जब तक जम्मो बात परमेसर के राज म पूरा नइं हो जावय, तब तक मेंह येला फेर नइं खावंव।”
LUK 22:17 तब यीसू ह अंगूर के मंद के कटोरा ला लेके परमेसर ला धनबाद दीस अऊ कहिस, “येला लेवव अऊ आपस म बांट लेवव।
LUK 22:18 काबरकि मेंह तुमन ला कहत हंव कि जब तक परमेसर के राज नइं आ जावय, तब तक मेंह अंगूर के मंद ला फेर नइं पीयंव।”
LUK 22:19 तब ओह कुछू रोटी लीस, अऊ परमेसर ला धनबाद देके ओला टोरिस अऊ अपन चेलामन ला देके कहिस, “येह मोर देहें ए, जऊन ह तुम्हर बर देय जावत हवय; मोर सुरता म एही करे करव।”
LUK 22:20 ओही किसम ले भोजन के पाछू, यीसू ह कटोरा ला लीस अऊ कहिस, “ये कटोरा ह मोर लहू म परमेसर के नवां करार ए, जऊन ह तुम्हर बर ढारे जावथे।
LUK 22:21 पर जऊन ह मोला धोखा दीही, ओकर हांथ ह मोर संग मेज म हवय।
LUK 22:22 मनखे के बेटा ह मरही, जइसने परमेसर ह ठहिराय हवय; पर धिक्कार ए, ओ मनखे ऊपर, जऊन ह ओकर संग बिसवासघात करत हे!”
LUK 22:23 तब चेलामन आपस म पुछे लगिन, “हमन म ओह कोन हो सकथे, जऊन ह ये काम करही।”
LUK 22:24 ओमन म ये बिवाद घलो होय लगिस कि ओमन के बीच म कोन चेला सबले बड़े माने जाही।
LUK 22:25 यीसू ह ओमन ला कहिस, “आनजातमन के राजामन अपन मनखेमन ऊपर हुकूम चलाथें; अऊ जऊन मन ओमन के ऊपर अधिकार रखथें, ओमन अपनआप ला भलई करइया कहिथें।
LUK 22:26 पर तुमन ला वइसने नइं बनना हवय। एकर बदले, जऊन ह तुम्हर बीच म सबले बड़े ए, ओह सबले छोटे सहीं बनय, अऊ जऊन ह हुकूम चलाथे, ओह सेवक के सहीं बनय।
LUK 22:27 कोन ह बड़े ए, ओ जऊन ह खाय बर बईठथे या ओ जऊन ह ओकर सेवा करथे? ओही जऊन ह खाय बर बईठथे। पर मेंह तुम्हर बीच म एक सेवक के सहीं अंव।
LUK 22:28 तुमन ओ मनखे अव, जऊन मन मोर दुख के समय म मोर संग रहेव।
LUK 22:29 अऊ मेंह तुमन ला एक राज के ऊपर सासन करे के अधिकार देवत हंव, जइसने मोर ददा ह मोला एक राज के ऊपर सासन करे के अधिकार दे हवय,
LUK 22:30 ताकि तुमन मोर राज म मोर संग बईठके खावव अऊ पीयव अऊ सिंघासनमन म बईठके, इसरायल के बारह गोत्र के नियाय करव।
LUK 22:31 “हे सिमोन, सिमोन, सुन! सैतान ह तुमन ला परखे बर अनुमति मांगे हवय कि जइसने किसान ह गहूं ला भूंसी से अलग करथे, वइसने ओह तुमन ला अलग करय।
LUK 22:32 पर मेंह तोर बर पराथना करे हवंव, सिमोन! ताकि तोर बिसवास ह बने रहय। अऊ जब तेंह मोर करा लहुंटके आ जाबे, त अपन भाईमन ला बिसवास म मजबूत करबे।”
LUK 22:33 पर सिमोन पतरस ह यीसू ला कहिस, “हे परभू, मेंह तोर संग जेल जाय बर तियार हवंव अऊ मरे बर घलो तियार हवंव।”
LUK 22:34 यीसू ह कहिस, “पतरस, मेंह तोला कहत हंव कि आज कुकरा के बासे के पहिली, तेंह तीन बार इनकार करबे कि तेंह मोला जानथस।”
LUK 22:35 तब यीसू ह ओमन ले पुछिस, “जब मेंह तुमन ला बिगर पईसा, झोला या पनही के पठोय रहेंव, त का तुमन ला कोनो चीज के कमी होईस?” ओमन कहिन, “कोनो चीज के कमी नइं होईस।”
LUK 22:36 यीसू ह ओमन ला कहिस, “पर अब जेकर करा पईसा हवय, ओह ओला ले लेय, अऊ झोला घलो धर ले; अऊ जेकर करा तलवार नइं ए, ओह अपन ओनहा ला बेचके एक ठन तलवार बिसो ले।
LUK 22:37 परमेसर के बचन म ये लिखे हवय: ‘अऊ ओह अपराधीमन संग गने गीस’; अऊ मेंह तुमन ला कहथंव कि ये बात के मोर ऊपर पूरा होना जरूरी ए। काबरकि जऊन बात ह मोर बारे म लिखे गे हवय, ओह पूरा होवत हवय।”
LUK 22:38 चेलामन कहिन, “हे परभू, देख, इहां दू ठन तलवार हवय।” ओह कहिस, “ओह परयाप्त अय।”
LUK 22:39 यीसू ह घर के बाहिर निकलिस अऊ अपन रीति के मुताबिक ओह जैतून पहाड़ ला गीस अऊ ओकर चेलामन ओकर पाछू-पाछू गीन।
LUK 22:40 ओ जगह म हबरके यीसू ह ओमन ला कहिस, “पराथना करव ताकि तुमन परिछा म झन पड़व।”
LUK 22:41 तब ओह ओमन ले करीब पथरा फेंके के दूरिहा तक गीस अऊ माड़ी टेकके ये पराथना करे लगिस,
LUK 22:42 “हे ददा, कहूं तोर ईछा हवय, त ये दुख के कटोरा ला मोर करा ले टार दे; तभो ले मोर नइं, पर तोर ईछा पूरा होवय।”
LUK 22:43 तब स्वरग ले एक स्वरगदूत ओकर करा आईस अऊ ओला मजबूत करिस।
LUK 22:44 अऊ ओह बहुंते बियाकुल होके, अऊ लगन से पराथना करे लगिस, अऊ ओकर पसीना ह लहू के बूंद सहीं भुइयां म गिरत रहय।
LUK 22:45 जब ओह पराथना करके उठिस, अऊ चेलामन करा गीस, त ओह ओमन ला दुख के मारे सोवत अऊ थके पाईस।
LUK 22:46 ओह ओमन ला कहिस, “तुमन काबर सुतत हवव? उठव अऊ पराथना करव ताकि तुमन परिछा म झन पड़व।”
LUK 22:47 जब यीसू ह ये बात कहितेच रिहिस, तभे मनखेमन के एक भीड़ आईस; अऊ यहूदा जऊन ह यीसू के बारह चेलामन ले एक झन रिहिस, ओमन के आघू-आघू चलत रहय। ओह यीसू करा ओला चूमे बर आईस।
LUK 22:48 पर यीसू ह ओला कहिस, “हे यहूदा, चूमा देके, का तेंह मनखे के बेटा ला पकड़वावत हस?”
LUK 22:49 यीसू के चेलामन जब देखिन कि का होवइया हवय, त ओमन कहिन, “हे परभू, का हमन अपन तलवार चलावन?”
LUK 22:50 अऊ ओमन ले एक झन महा पुरोहित के सेवक ऊपर तलवार चलाके ओकर जेवनी कान ला काट दीस।
LUK 22:51 तब यीसू ह कहिस, “येला बंद करव।” अऊ ओह मनखे के कान ला छुईस अऊ ओला बने कर दीस।
LUK 22:52 तब यीसू ह ओ मुखिया पुरोहित, मंदिर के रखवारमन के अधिकारी अऊ अगुवामन ला कहिस, जऊन मन ओला पकड़े बर आय रिहिन, “का मेंह डाकू अंव कि तुमन तलवार अऊ बड़े-बड़े लउठी लेके आय हवव?
LUK 22:53 मेंह हर दिन तुम्हर संग मंदिर म रहेंव, अऊ तुमन मोला नइं पकड़ेव। पर येह तुम्हर समय ए, जब अंधियार के सक्ति ह राज करथे।”
LUK 22:54 तब ओमन यीसू ला पकड़िन अऊ ओला महा पुरोहित के घर ले गीन। पतरस ह कुछू दूरिहा म रहत ओकर पाछू-पाछू गीस।
LUK 22:55 पर जब ओमन मांझा अंगना म आगी बारके चारों अंग बईठ गीन, त पतरस ह ओमन के संग जाके बईठ गीस।
LUK 22:56 एक झन नौकरानी छोकरी ओला आगी के अंजोर म उहां बईठे देखिस। ओ छोकरी ह ओला टक लगाके देखिस अऊ कहिस, “ये मनखे ह यीसू के संग रिहिस।”
LUK 22:57 पर पतरस ह इनकार करिस अऊ कहिस, “ए छोकरी, मेंह ओला नइं जानंव।”
LUK 22:58 थोरकन देर बाद, एक आने मनखे ओला देखिस अऊ कहिस, “तेंह घलो ओमन ले एक झन अस।” पर पतरस ह कहिस, “ए मनखे, मेंह नो हंव।”
LUK 22:59 करीब एक घंटा के बाद, एक आने मनखे ह जोर देके कहिस, “सही म, ये मनखे ह ओकर संग रिहिस, काबरकि येह घलो गलील प्रदेस के रहइया ए।”
LUK 22:60 पतरस ह जबाब देके कहिस, “ए मनखे, मेंह नइं जानंव कि तेंह का कहथस।” जब ओह ये कहितेच रिहिस कि तुरते कुकरा ह बासिस।
LUK 22:61 अऊ परभू ह लहुंटके पतरस ला सीधा देखिस, तब पतरस ह परभू के कहे ओ बात ला सुरता करिस, “एकर पहिली कि आज कुकरा ह बासे, तेंह तीन बार मोर इनकार करबे।”
LUK 22:62 अऊ ओह बाहिर गीस अऊ फूट-फूटके रोय लगिस।
LUK 22:63 जऊन मनखेमन यीसू के रखवारी करत रहंय, ओमन यीसू के ठट्ठा करिन अऊ ओला मारे-पीटे लगिन।
LUK 22:64 ओमन यीसू के आंखी ला ढांपके ओकर ले पुछिन, “अगमबानी करके हमन ला बता कि तोला कोन मारिस?”
LUK 22:65 ओमन अऊ बहुंत बेजत्ती के बात ओला कहिन।
LUK 22:66 जब दिन होईस, त मनखेमन के अगुवामन के एक सभा होईस, जेमा मुखिया पुरोहित अऊ कानून के गुरूमन रिहिन, अऊ यीसू ला ओमन के आघू म लाने गीस।
LUK 22:67 ओमन यीसू ले पुछिन, “यदि तेंह मसीह अस, त हमन ला बता?” यीसू ह जबाब दीस, “यदि मेंह तुमन ला बताहूं, त तुमन मोर ऊपर बिसवास नइं करहू,
LUK 22:68 अऊ यदि मेंह तुमन ले पुछहूं, त तुमन जबाब नइं दूहू।
LUK 22:69 पर अब ले, मनखे के बेटा ह सर्वसक्तिमान परमेसर के जेवनी हांथ कोति बईठही।”
LUK 22:70 ओमन जम्मो झन पुछिन, “त का तेंह परमेसर के बेटा अस?” ओह ओमन ला जबाब दीस, “तुमन कहत हव, काबरकि मेंह अंव।”
LUK 22:71 तब ओमन कहिन, “हमन ला अऊ कोनो गवाह के जरूरत नइं ए। हमन खुदे ओकर मुहूं ले सुन लेय हवन।”
LUK 23:1 तब मनखेमन के जम्मो सभा ह उठिस अऊ यीसू ला पीलातुस करा ले गीस।
LUK 23:2 अऊ उहां ओमन ओकर ऊपर ये कहिके दोस लगाय लगिन, “हमन देखे हन कि ये आदमी ह हमर जाति के मनखेमन ला बहकावत रिहिस। ओह मनखेमन ला महाराजा ला लगान पटाय बर मना करथे अऊ अपनआप ला मसीह—एक राजा कहिथे।”
LUK 23:3 पीलातुस ह यीसू ले पुछिस, “का तेंह यहूदीमन के राजा अस?” यीसू ह ओला जबाब दीस, “हव जी, जइसने तेंह कहत हस।”
LUK 23:4 तब पीलातुस ह मुखिया पुरोहित अऊ मनखेमन के भीड़ ला कहिस, “मोला ये मनखे ऊपर दोस लगाय के कोनो आधार नइं मिलिस।”
LUK 23:5 पर ओमन अऊ जोर देके कहिन, “ओह जम्मो यहूदिया प्रदेस म अपन उपदेस के दुवारा मनखेमन ला भड़काय हवय। ओह गलील प्रदेस म सुरू करिस अऊ अब इहां तक आ गे हवय।”
LUK 23:6 ये सुनके पीलातुस ह पुछिस, “का ये मनखे ह गलील प्रदेस के रहइया ए?”
LUK 23:7 जब ओह ये जानिस कि यीसू ह हेरोदेस के अधिकार म आथे, त ओह यीसू ला हेरोदेस राजा करा पठो दीस। ओ समय म हेरोदेस राजा घलो यरूसलेम सहर म रिहिस।
LUK 23:8 जब हेरोदेस ह यीसू ला देखिस, त ओह बहुंत खुस होईस, काबरकि ओह बहुंत समय ले ओला देखे चाहत रिहिस। ओह यीसू के बारे म सुने रिहिस अऊ ओह आसा करत रिहिस कि यीसू ह कुछू चमतकार के काम देखाही।
LUK 23:9 एकरसेति, ओह यीसू ले बहुंत सवाल करिस, पर यीसू ह ओला कोनो जबाब नइं दीस।
LUK 23:10 मुखिया पुरोहित अऊ कानून के गुरूमन उहां ठाढ़े रहंय, अऊ ओमन तन-मन ले यीसू ऊपर दोस लगावत रहंय।
LUK 23:11 तब हेरोदेस अऊ ओकर सैनिकमन यीसू के ठट्ठा करिन अऊ हंसी उड़ाईन, अऊ ओमन ओला भड़कीला कपड़ा पहिराके पीलातुस करा वापिस पठो दीन।
LUK 23:12 अऊ ओही दिन ले हेरोदेस अऊ पीलातुस एक-दूसर के संगवारी बन गीन; एकर पहिली ओमन एक-दूसर के बईरी रिहिन।
LUK 23:13 पीलातुस ह मुखिया पुरोहित, अधिकारी अऊ मनखेमन ला बलाईस
LUK 23:14 अऊ ओमन ला कहिस, “तुमन ये मनखे ला मोर करा लानके ये कहेव कि येह मनखेमन ला भड़कावत रिहिस। मेंह तुम्हर आघू म एकर जांच करेंव, पर तुमन जऊन बात के दोस ओकर ऊपर लगावत हव, ओमा मेंह ओला दोसी नइं पायेंव।
LUK 23:15 अऊ न हेरोदेस ओमा कोनो दोस पाईस काबरकि ओह येला हमर करा वापिस पठो दे हवय। देखव, येह अइसने कुछू नइं करे हवय कि येह मार डारे जावय।
LUK 23:16 एकरसेति, मेंह येला पीटवाके छोंड़ दूहूं।”
LUK 23:17 यहूदीमन के हर फसह के तिहार के समय म, पीलातुस ह ओमन बर एक कैदी ला छोंड़य।
LUK 23:18 पर मनखेमन एक संग चिचियाके कहिन, “ओला मार डार अऊ हमर बर बरब्बा ला छोंड़ दे।”
LUK 23:19 (बरब्बा ला सहर म दंगा करे के कारन अऊ हतिया के दोस म जेल म डारे गे रिहिस।)
LUK 23:20 पीलातुस ह यीसू ला छोंड़े बर चाहत रिहिस, एकरसेति, ओह मनखेमन ला फेर समझाईस।
LUK 23:21 पर ओमन ये कहिके चिचियावत रहंय, “येला कुरूस ऊपर चघावव! येला कुरूस ऊपर चघावव!”
LUK 23:22 पीलातुस ह ओमन ला तीसरा बार कहिस, “काबर? ये मनखे ह का अपराध करे हवय? मेंह ओमा अइसने कोनो बात नइं पायेंव कि ओह मार डारे जावय। एकरसेति, मेंह येला पीटवाके छोंड़ दूहूं।”
LUK 23:23 पर ओमन जोर देके अऊ चिचियाके मांग करिन कि यीसू ला कुरूस ऊपर चघाय जावय; अऊ आखिरी म, ओमन के चिचियाय के जीत होईस।
LUK 23:24 पीलातुस ह ओमन के मांग ला मान लीस।
LUK 23:25 ओमन जऊन मनखे ला चाहत रिहिन, ओह ओला छोंड़ दीस, जऊन ह दंगा अऊ हतिया के दोस म जेल म डारे गे रिहिस, जऊन ला ओमन छोंड़े के मांग करत रिहिन अऊ पीलातुस ह ओमन के ईछा के मुताबिक यीसू ला ओमन के हांथ म सऊंप दीस।
LUK 23:26 जब सैनिकमन यीसू ला ले जावत रिहिन, त डहार म, ओमन ला सिमोन नांव के एक झन मनखे मिलिस, जऊन ह कुरेन के रहइया रिहिस अऊ गांव ले आवत रिहिस। ओमन ओला पकड़िन अऊ कुरूस ला ओकर ऊपर लाद दीन, ताकि ओह ओला उठाके यीसू के पाछू-पाछू चलय।
LUK 23:27 मनखेमन के एक बहुंत बड़े भीड़ यीसू के पाछू-पाछू चलत रहय; ओमा कुछू माईलोगन घलो रहंय, जऊन मन यीसू बर रोवत अऊ बिलाप करत रहंय।
LUK 23:28 यीसू ह ओमन कोति मुहूं करके कहिस, “हे यरूसलेम के बेटीमन, मोर बर झन रोवव, पर अपनआप अऊ अपन लइकामन बर रोवव।
LUK 23:29 काबरकि ओ समय ह आवत हवय, जब मनखेमन कहिहीं, ‘धइन एं ओ बांझ माईलोगनमन, जऊन मन अपन कोख ले कभू लइका नइं जनमाईन अऊ अपन छाती से कभू दूध नइं पीयाईन!’
LUK 23:30 “ ‘तब ओमन पहाड़मन ले कहिहीं, “हमर ऊपर गिर जावव!” अऊ पहाड़ीमन ले कहिहीं, “हमन ला ढांप लेवव!” ’
LUK 23:31 जब मनखेमन हरियर रूख के संग अइसने करथें, तब सूखा रूख के संग का कुछू नइं करहीं?”
LUK 23:32 ओमन दू झन अऊ मनखे ला घलो जऊन मन बदमास रिहिन, यीसू के संग मार डारे बर ले गीन।
LUK 23:33 जब ओमन ओ जगह म आईन, जऊन ला खोपड़ी कहिथें, त उहां ओमन यीसू ला अऊ ओ दू झन बदमास ला अलग-अलग कुरूस ऊपर चघा दीन। एक बदमास ला यीसू के जेवनी कोति अऊ दूसर ला यीसू के डेरी कोति कुरूस ऊपर चघाईन।
LUK 23:34 यीसू ह कहिस, “हे ददा, ये मनखेमन ला माफ कर दे, काबरकि येमन नइं जानथें कि येमन का करत हवंय।” अऊ ओमन चिट्ठी डालके ओकर मुताबिक यीसू के कपड़ा ला अपन म बांट लीन।
LUK 23:35 मनखेमन उहां ठाढ़ होके ये जम्मो ला देखत रिहिन, अऊ अधिकारीमन ये कहिके ओकर हंसी उड़ाईन, “येह आने मन ला बचाईस, अब अपनआप ला बचावय, यदि येह परमेसर के मसीह अऊ चुने हुए जन अय त।”
LUK 23:36 सैनिकमन घलो आईन अऊ ओकर ठट्ठा करिन। ओमन यीसू ला सिरका ला देके कहिन,
LUK 23:37 “अपनआप ला बचा, यदि तेंह यहूदीमन के राजा अस त।”
LUK 23:38 यीसू के कुरूस ऊपर ये लिखाय रहय: “येह यहूदीमन के राजा अय।”
LUK 23:39 जऊन दू झन बदमास उहां कुरूस म लटकाय गे रिहिन, ओमा ले एक झन यीसू के बेजत्ती करत कहिस, “का तेंह मसीह नो हस? त फेर अपनआप ला अऊ हमन ला बचा।”
LUK 23:40 पर आने बदमास ह ओला दबकारके कहिस, “का तेंह परमेसर ले नइं डरस? तेंह घलो तो ओहीच दंड भोगत हवस।
LUK 23:41 हमन सही सजा पावत हन, काबरकि हमन जइसने काम करे हवन, वइसने सजा पावत हन। पर ये मनखे ह कुछू गलती नइं करे हवय।”
LUK 23:42 तब ओह यीसू ला कहिस, “हे यीसू, जब तेंह अपन राज म आबे, त मोला सुरता करबे।”
LUK 23:43 यीसू ह ओला कहिस, “मेंह तोला सच कहथंव कि आजेच तेंह मोर संग स्वरग-लोक म होबे।”
LUK 23:44 मंझन के करीब बारह बजे ले लेके तीन बजे तक जम्मो देस म अंधियार छा गीस,
LUK 23:45 काबरकि सूरज ह अंजोर दे बर बंद कर दीस। अऊ मंदिर के परदा ह चीराके दू कुटा हो गीस।
LUK 23:46 यीसू ह जोर से चिचियाके कहिस, “हे ददा, तोर हांथ म मेंह अपन आतमा ला सऊंपत हवंव।” अऊ ये कहिके ओह अपन परान ला तियाग दीस।
LUK 23:47 जऊन कुछू होईस, ओला देखके, सिपाहीमन के अधिकारी ह परमेसर के महिमा करिस अऊ कहिस, “सही म, येह एक धरमी मनखे रिहिस।”
LUK 23:48 मनखेमन के एक भीड़ ह उहां कुरूस म चघाय जाय के घटना ला देखे बर जूरे रिहिस। जऊन कुछू उहां होईस, ओला जब ओ जम्मो झन देखिन, त ओमन दुख के मारे अपन छाती पीटत घर लहुंट गीन।
LUK 23:49 पर यीसू के जम्मो जान-पहिचान के मनखे अऊ ओ माईलोगन जऊन मन गलील प्रदेस ले यीसू के पाछू-पाछू आय रिहिन, ओ जम्मो झन दूरिहा म ठाढ़ होके ये जम्मो बात ला देखत रिहिन।
LUK 23:50 यूसुफ नांव के एक मनखे रिहिस, जऊन ह महासभा के एक सदस्य रिहिस। ओह एक बने अऊ धरमी मनखे रिहिस।
LUK 23:51 हालाकि ओह यहूदीमन के धरम महासभा के एक सदस्य रिहिस, पर ओह ओमन के फैसला अऊ काम म सहमत नइं रिहिस। ओह अरमतिया नांव के यहूदी सहर के रहइया रिहिस अऊ ओह परमेसर के राज के बाट जोहत रिहिस।
LUK 23:52 ओह पीलातुस करा गीस अऊ यीसू के लास ला मांगिस।
LUK 23:53 तब ओह यीसू के लास ला कुरूस ले उतारिस अऊ ओला मलमल के कपड़ा म लपेटिस, अऊ ओला एक ठन कबर म रखिस, जऊन ह चट्टान ला काटके बनाय गे रिहिस अऊ ओमा कभू कोनो लास नइं रखाय रिहिस।
LUK 23:54 येह बिसराम दिन बर तियारी करे के दिन रिहिस, अऊ बिसराम के दिन ह सुरू होवइया रिहिस।
LUK 23:55 ओ माईलोगन, जऊन मन यीसू के संग गलील प्रदेस ले आय रिहिन, ओमन यूसुफ के पाछू-पाछू गीन अऊ ओ कबर ला देखिन अऊ ओमन ये घलो देखिन कि यीसू के देहें ह उहां कइसने रखाय रहय।
LUK 23:56 तब ओमन घर वापिस गीन अऊ यीसू के देहें बर मसाला के लेप अऊ खुसबूदार तेल तियार करिन। पर ओमन कानून के मुताबिक बिसराम के दिन सुरताईन।
LUK 24:1 हप्ता के पहिली दिन बड़े बिहनियां, ओ माईलोगनमन जऊन मसाला के लेप तियार करे रिहिन, ओला लेके यीसू के कबर करा गीन।
LUK 24:2 ओमन पथरा ला कबर के मुंहाटी ले ढलंगे पाईन।
LUK 24:3 पर जब ओमन कबर के भीतर गीन, त ओमन उहां परभू यीसू के देहें ला नइं पाईन।
LUK 24:4 जब ओमन ये बात ला देखके अचम्भो करत रिहिन, त अचानक दू झन मनखे चमकीला कपड़ा पहिरे ओमन करा आके ठाढ़ हो गीन।
LUK 24:5 ओमन बहुंत डरा गीन अऊ अपन चेहरा ला तरी करके ठाढ़ हो गीन, तब ओ मनखेमन ओमन ला कहिन, “जऊन ह जीयत हवय, ओला तुमन मरे मन के बीच म काबर खोजत हवव?
LUK 24:6 ओह इहां नइं ए। ओह जी उठे हवय। सुरता करव, जब ओह तुम्हर संग गलील प्रदेस म रिहिस, त तुमन ला का कहे रिहिस:
LUK 24:7 ‘मनखे के बेटा ह पापी मनखेमन के हांथ म सऊंपे जाही अऊ ओह कुरूस ऊपर चघाय जाही, पर तीसरा दिन ओह फेर जी उठही।’ ”
LUK 24:8 तब ओ माईलोगनमन यीसू के बात ला सुरता करिन।
LUK 24:9 जब ओमन कबर ले वापिस आईन, त ओमन ये जम्मो बात गियारह चेला अऊ दूसर जम्मो झन ला बताईन।
LUK 24:10 ये माईलोगनमन मरियम मगदलिनी, योअन्ना अऊ याकूब के दाई मरियम रिहिन। येमन अऊ आने माईलोगनमन ये बात प्रेरितमन ला बताईन।
LUK 24:11 पर ओमन माईलोगनमन के बात ला बिसवास नइं करिन काबरकि ओमन ला येह बेकार के बात लगिस।
LUK 24:12 पर पतरस ह उठिस अऊ दऊड़त कबर म गीस। जब ओह निहरके देखिस, त उहां सिरिप मलमल के कपड़ा ह पड़े रहय। तब जऊन कुछू होय रिहिस, ओकर बारे म अचम्भो करत, ओह अपन घर लहुंट गीस।
LUK 24:13 ओहीच दिन, यीसू के चेलामन ले दू झन इम्माऊस नांव के एक गांव ला जावत रिहिन, जऊन ह यरूसलेम सहर ले करीब गियारह किलोमीटर दूरिहा रिहिस।
LUK 24:14 जऊन कुछू होय रिहिस, ओकर बारे म ओ दूनों गोठियावत जावत रिहिन।
LUK 24:15 जब ओमन आपस म गोठियावत अऊ बिचार करत जावत रिहिन, त यीसू ह खुदे आईस अऊ ओमन के संग हो लीस;
LUK 24:16 पर ओमन ओला चिनहे नइं सकिन।
LUK 24:17 यीसू ह ओमन ले पुछिस, “तुमन रेंगत-रेंगत दूनों झन काकर बारे म गोठियावत हवव?” उदास होके ओमन ठाढ़े रह गीन।
LUK 24:18 ओमा ले एक झन के नांव क्लियुपास रिहिस, ओह कहिस, “का तेंह यरूसलेम म रहइया एके झन मनखे अस, जऊन ह नइं जानस कि ये दिनमन म यरूसलेम म का होय हवय?”
LUK 24:19 यीसू ह पुछिस, “का होय हवय?” ओमन यीसू ला कहिन, “नासरत के यीसू के बारे म। ओह एक अगमजानी रिहिस अऊ ओकर बात अऊ काममन परमेसर अऊ जम्मो मनखेमन के नजर म बहुंत सामर्थी रिहिन।
LUK 24:20 मुखिया पुरोहित अऊ हमर अधिकारीमन मिरतू-दंड बर यीसू ला सऊंप दीन, अऊ ओमन ओला कुरूस ऊपर चघा दीन।
LUK 24:21 पर हमन ला आसा रिहिस कि येह ओहीच ए, जऊन ह इसरायलीमन ला छुड़ाही। ये जम्मो के अलावा एक बात अऊ ए कि ये बात ला होवय आज तीसरा दिन ए।
LUK 24:22 हमर संग के कुछू माईलोगनमन हमन ला अचम्भो म डार दे हवंय। ओमन आज बड़े बिहनियां कबर म गे रिहिन।
LUK 24:23 पर ओमन ला उहां यीसू के देहें ह नइं मिलिस। ओमन आके हमन ला बताईन कि ओमन ला स्वरगदूतमन दरसन देके कहिन कि यीसू ह जी उठे हवय।
LUK 24:24 तब हमर कुछू संगवारीमन कबर म गीन अऊ जइसने माईलोगनमन कहे रिहिन, वइसनेच पाईन; पर ओमन यीसू ला उहां नइं देखिन।”
LUK 24:25 यीसू ह ओमन ला कहिस, “तुमन बहुंत मुरूख मनखे अव। अगमजानीमन जऊन बात कहे हवंय, ओ जम्मो ला बिसवास करे म तुमन बहुंत मंदमति अव।
LUK 24:26 का येह जरूरी नइं रिहिस कि मसीह ह ये जम्मो दुख भोगय अऊ तब परमेसर ओकर बहुंत महिमा करय।”
LUK 24:27 मूसा अऊ जम्मो अगमजानीमन के किताबमन ले सुरू करके परमेसर के जम्मो बचन म ओकर खुद के बारे म का कहे गे हवय—यीसू ह ओ जम्मो बात ओमन ला समझाईस।
LUK 24:28 जब ओमन ओ गांव म हबरिन, जिहां ओमन ला जाना रिहिस, त यीसू ह अइसने देखाईस, जइसने ओला अऊ आघू जाना हवय।
LUK 24:29 पर ओमन ओकर ले बहुंत बिनती करके कहिन, “हमर संग रूक जा, काबरकि दिन ह बहुंत ढर गे हवय, अऊ सांझ होवइया हे।” एकरसेति यीसू ह ओमन के संग रूके बर भीतर गीस।
LUK 24:30 जब यीसू ह ओमन के संग खाय बर बईठिस, त ओह रोटी लीस अऊ परमेसर ला धनबाद दीस; अऊ रोटी ला टोरके ओमन ला देय लगिस।
LUK 24:31 तब ओमन के आंखीमन खुल गीन अऊ ओमन यीसू ला चिन डारिन; पर ओह ओमन के नजर ले गायब हो गीस।
LUK 24:32 ओमन एक-दूसर ला कहिन, “का हमर मन म एक किसम के उत्साह नइं होवत रिहिस, जब ओह डहार म हमर ले गोठियावत रिहिस अऊ हमन ला परमेसर के बचन समझावत रिहिस?”
LUK 24:33 ओमन उठिन अऊ तुरते यरूसलेम वापिस चल दीन। उहां ओमन गियारह चेला अऊ आने मन ला एके ठऊर म पाईन,
LUK 24:34 अऊ ओमन ये कहत रिहिन, “येह सच ए! परभू ह जी उठे हवय अऊ ओह सिमोन ला दिखे हवय।”
LUK 24:35 तब ओ दूनों झन बताईन कि डहार म का होईस, अऊ ओमन कइसने यीसू ला चिन्हिन, जब ओह रोटी टोरत रिहिस।
LUK 24:36 जब ओमन एकर बारे म गोठियावत रिहिन, त यीसू ह खुद ओमन के बीच आके ठाढ़ हो गीस अऊ ओमन ला कहिस, “तुमन ला सांति मिलय।”
LUK 24:37 ओमन घबरा गीन अऊ डर गीन। ओमन समझिन कि ओमन कोनो भूत ला देखत हवंय।
LUK 24:38 यीसू ह ओमन ला कहिस, “तुमन काबर घबरावत हव, अऊ तुम्हर मन म काबर संका होवत हवय?
LUK 24:39 मोर हांथ अऊ गोड़मन ला देखव। इहां मेंह खुदे ठाढ़े हवंव। मोला छूके देखव। भूत के हाड़ा अऊ मांस नइं होवय, जइसने कि तुमन देखत हव, मोर हवय।”
LUK 24:40 ये कहिके, यीसू ह ओमन ला अपन हांथ अऊ गोड़मन ला देखाईस।
LUK 24:41 अऊ जब आनंद अऊ अचम्भो के मारे ओमन अभी घलो बिसवास नइं करत रिहिन, त यीसू ह ओमन ले पुछिस, “का तुम्हर करा इहां कुछू खाय बर हवय?”
LUK 24:42 ओमन ओला आगी म भूंजाय मछरी के एक टुकड़ा दीन।
LUK 24:43 यीसू ह ओला लीस अऊ ओमन के आघू म खाईस।
LUK 24:44 तब यीसू ह ओमन ला कहिस, “जब मेंह तुम्हर संग रहत रहेंव, त मेंह तुमन ला ये बातमन ला कहे रहेंव। मोर बारे म जऊन बातमन मूसा के कानून, अगमजानीमन के किताब अऊ भजन-संहिता म लिखे हवय, ये जरूरी अय कि ओ जम्मो बात पूरा होवय।”
LUK 24:45 तब यीसू ह ओमन के दिमाग ला खोल दीस ताकि ओमन परमेसर के बचन ला समझ सकंय।
LUK 24:46 ओह ओमन ला कहिस, “परमेसर के बचन म ये लिखे हवय: ‘मसीह ह दुख भोगही अऊ तीसरा दिन मरे म ले जी उठही,
LUK 24:47 अऊ ओकर नांव म पछताप अऊ पाप छेमा के परचार जम्मो देस म करे जाही अऊ ये काम यरूसलेम ले सुरू होही।’
LUK 24:48 तुमन ये जम्मो बात के गवाह अव।
LUK 24:49 मेंह तुम्हर करा ओला पठोहूं, जेकर वायदा मोर ददा ह करे हवय; पर तुमन ये सहर म ठहिरे रहव, जब तक कि तुमन ला स्वरग ले सामर्थ नइं मिल जावय।”
LUK 24:50 तब यीसू ह ओमन ला बाहिर बैतनियाह गांव के लकठा म ले गीस अऊ उहां ओह अपन हांथ उठाके ओमन ला आसीस दीस।
LUK 24:51 यीसू ह आसीस देवत ओमन ले अलग हो गीस अऊ स्वरग म उठा लेय गीस।
LUK 24:52 तब ओमन ओकर अराधना करिन अऊ बहुंत आनंद के संग यरूसलेम लहुंट गीन।
LUK 24:53 अऊ परमेसर के इस्तुति करत, ओमन अपन पूरा समय मंदिर म बिताय करत रिहिन।
JOH 1:1 सुरू म बचन ह रिहिस, अऊ ओ बचन ह परमेसर के संग रिहिस, अऊ ओही बचन ह परमेसर रिहिस।
JOH 1:2 ओह सुरू ले परमेसर के संग रिहिस।
JOH 1:3 ओकरे जरिये, परमेसर ह संसार के जम्मो चीजमन ला बनाईस, अऊ जऊन कुछू परमेसर ह बनाईस, ओमा एको ठन चीज अइसने नइं ए, जऊन ह ओकर बिगर बनाय गे रिहिस।
JOH 1:4 ओ बचन म जिनगी रिहिस, अऊ ओ जिनगी ह मनखेमन बर अंजोर लानिस।
JOH 1:5 ओ अंजोर ह अंधियार म चमकथे, अऊ अंधियार ह ओकर ऊपर जय नइं पा सकिस।
JOH 1:6 परमेसर ह एक मनखे ला पठोईस, जेकर नांव यूहन्ना रिहिस।
JOH 1:7 यूहन्ना ह ओ अंजोर के बारे म गवाही दे बर आईस, ताकि जम्मो मनखेमन ओकर गवाही के जरिये ओ अंजोर ऊपर बिसवास करंय।
JOH 1:8 यूहन्ना ह खुद तो अंजोर नइं रिहिस, पर ओह अंजोर के बारे म गवाही दे बर आय रिहिस।
JOH 1:9 ओ सही अंजोर जऊन ह जम्मो मनखे ला अंजोर देथे, संसार म अवइया रिहिस।
JOH 1:10 ओह संसार म रिहिस, अऊ ओकरे जरिये, परमेसर ह संसार ला बनाईस, पर संसार के मनखेमन ओला नइं चिन्हिन।
JOH 1:11 ओह अपन खुद के मनखेमन करा आईस, पर ओकर मनखेमन ओला गरहन नइं करिन।
JOH 1:12 पर जतेक झन ओला गरहन करिन अऊ ओकर नांव ऊपर बिसवास करिन, ओमन ला ओह परमेसर के संतान होय के अधिकार दीस।
JOH 1:13 ये संतानमन न तो सुभाविक बंस ले, न देहें के ईछा ले, अऊ न कोनो मनखे के ईछा ले, पर परमेसर के ईछा ले जनमिन।
JOH 1:14 ओ बचन ह मनखे के देहें धारन करिस, अऊ हमर बीच म कुछू समय बर डेरा करिस। हमन ओकर महिमा देखे हवन, ओ एकलऊता बेटा के महिमा, जऊन ह अनुग्रह अऊ सच्चई ले भरपूर होके स्वरगीय ददा करा ले आईस।
JOH 1:15 यूहन्ना ह ओकर बारे म गवाही देथे। ओह पुकारके कहिथे, “येह ओही अय, जेकर बारे म मेंह कहे रहेंव, जऊन ह मोर पाछू आवत हवय, ओह मोर ले बड़े अय, काबरकि ओह मोर जनमे के पहिली ले रिहिस।”
JOH 1:16 ओकर अनुग्रह के भरपूरी ले, हमन जम्मो झन आसीस के ऊपर आसीस पाय हवन।
JOH 1:17 काबरकि परमेसर ह कानून ला मूसा के दुवारा दीस; पर अनुग्रह अऊ सच्चई यीसू मसीह के दुवारा आईस।
JOH 1:18 परमेसर ला कोनो कभू नइं देखे हवंय, पर सिरिप एकलऊता बेटा, जऊन ह खुदे परमेसर अय, अऊ जऊन ह ददा के कोरा म हवय, ओही ह ओला परगट करे हवय।
JOH 1:19 यूहन्ना के ये गवाही ए, जब यरूसलेम सहर के यहूदी अगुवामन कुछू पुरोहित अऊ लेवीमन ला यूहन्ना करा ये पुछे बर पठोईन कि ओह कोन ए?
JOH 1:20 त यूहन्ना ह जबाब दे बर आनाकानी नइं करिस, पर साफ-साफ मान लीस अऊ कहिस, “मेंह मसीह नो हंव।”
JOH 1:21 तब ओमन यूहन्ना ले पुछिन, “त फेर तेंह कोन अस? का तेंह एलियाह अस?” ओह कहिस, “नइं।” ओमन पुछिन, “त फेर का तेंह अगमजानी अस?” ओह जबाब दीस, “नइं।”
JOH 1:22 आखिर म ओमन कहिन, “त फेर तेंह कोन अस? हमन ला बता ताकि जऊन मन हमन ला पठोय हवंय, ओमन ला हमन जाके जबाब दे सकन। तेंह अपन बारे म का कहत हवस?”
JOH 1:23 यूहन्ना ह जबाब दीस, “जइसने यसायाह अगमजानी ह ये कहे रिहिस, मेंह सुनसान जगह म एक झन अवाज देवइया अंव, ‘परभू बर डहार ला तियार करव, अऊ ओकर डहार ला सीधा करव।’ ”
JOH 1:24 जऊन मनखेमन फरीसीमन के दुवारा पठोय गे रिहिन।
JOH 1:25 ओमन यूहन्ना ले पुछिन, “यदि तेंह मसीह नो हस, न एलियाह अऊ न अगमजानी अस, त फेर तेंह काबर बतिसमा देवत हस?”
JOH 1:26 यूहन्ना ह ओमन ला जबाब दीस, “मेंह तो पानी म बतिसमा देवत हंव, पर तुम्हर बीच म एक झन ठाढ़े हवय, जऊन ला तुमन नइं जानव।
JOH 1:27 येह ओ अय, जऊन ह मोर पाछू आवत हवय। मेंह ओकर पनही के बंधना ला खोले के लईक घलो नो हंव।”
JOH 1:28 ये जम्मो बात यरदन नदी के ओ पार बैतनियाह गांव म होईस, जिहां यूहन्ना ह मनखेमन ला बतिसमा देवत रिहिस।
JOH 1:29 ओकर दूसर दिन यूहन्ना ह यीसू ला अपन कोति आवत देखिस, त कहिस, “देखव, परमेसर के मेढ़ा-पीला, जऊन ह संसार के पाप ला उठा ले जाथे।
JOH 1:30 येह ओही अय, जेकर बारे म मेंह कहे रहेंव, ‘जऊन ह मोर पाछू आवत हवय, ओह मोर ले बड़े अय, काबरकि ओह मोर जनमे के पहिली ले रिहिस।’
JOH 1:31 मेंह खुदे ओला नइं जानत रहेंव, पर मेंह ये खातिर पानी ले बतिसमा देवत आयेंव ताकि ओह इसरायली मनखेमन ऊपर परगट हो जावय।”
JOH 1:32 तब यूहन्ना ह ये गवाही दीस, “मेंह देखेंव कि पबितर आतमा ह स्वरग ले एक पंड़की सहीं उतरिस अऊ ओकर ऊपर ठहर गीस।
JOH 1:33 मेंह ओला नइं जाने रहितेंव, पर परमेसर, जऊन ह मोला पानी ले बतिसमा दे बर पठोय हवय, मोला कहिस, ‘तेंह पबितर आतमा ला उतरत अऊ एक झन मनखे ऊपर ठहिरत देखबे, ओहीच ह पबितर आतमा ले बतिसमा दीही।’
JOH 1:34 मेंह येला देखेंव अऊ मेंह गवाही देवत हंव कि एहीच ह परमेसर के बेटा अय।”
JOH 1:35 ओकर दूसर दिन, यूहन्ना ह फेर उहां अपन दू झन चेलामन संग ठाढ़े रहय।
JOH 1:36 अऊ जब यूहन्ना ह यीसू ला जावत देखिस, त ओह कहिस, “देखव, येह परमेसर के मेढ़ा-पीला ए।”
JOH 1:37 जब ओ दूनों चेलामन यूहन्ना ला ये कहत सुनिन, त ओमन यीसू के पाछू हो लीन।
JOH 1:38 यीसू ह लहुंटके देखिस कि ओमन ओकर पाछू-पाछू आवत हवंय, त ओह ओमन ले पुछिस, “तुमन कोन ला खोजत हवव?” ओमन कहिन, “हे रब्बी” (जेकर मतलब होथे “गुरू”), “तेंह कहां रहिथस?”
JOH 1:39 यीसू ह ओमन ला कहिस, “मोर संग आवव अऊ देख लेवव।” तब ओमन ओकर संग गीन अऊ ओकर रहे के ठऊर ला देखिन, अऊ ओ दिन भर ओकरे संग बिताईन। ओह करीब सांझ के चार बजे के समय रिहिस।
JOH 1:40 जऊन दू झन चेला, यूहन्ना ला कहत सुनिन अऊ यीसू के पाछू हो ले रिहिन, ओमा ले एक झन सिमोन पतरस के भाई अन्द्रियास रिहिस।
JOH 1:41 पहिली काम अन्द्रियास ह ये करिस कि ओह अपन भाई सिमोन ले जाके मिलिस अऊ ओला बताईस, “हमन ला मसीह मिल गे हवय।”
JOH 1:42 तब अन्द्रियास ह सिमोन ला यीसू करा लानिस। यीसू ह ओला देखिस अऊ कहिस, “तेंह यूहन्ना के बेटा सिमोन अस। तेंह कैफा कहाबे।” (कैफा के अनुवाद पतरस करे गे हवय)।
JOH 1:43 दूसर दिन यीसू ह गलील प्रदेस जाय के मन बनाईस। जाय के पहिली ओह फिलिप्पुस ले मिलिस अऊ ओला कहिस, “मोर पाछू हो ले।”
JOH 1:44 फिलिप्पुस ह बैतसैदा सहर के रहइया रिहिस। अन्द्रियास अऊ पतरस घलो ओहीच सहर के रहइया रिहिन।
JOH 1:45 फिलिप्पुस ह नतनएल ले मिलिस अऊ ओला बताईस, “हमन ला ओह मिल गे हवय, जेकर बारे म मूसा ह कानून के किताब म लिखे हवय अऊ जेकर बारे म अगमजानीमन घलो लिखे हवंय। ओह यूसुफ के बेटा, नासरत गांव के यीसू अय।”
JOH 1:46 नतनएल ह ओकर ले पुछिस, “का कोनो बने चीज नासरत ले आ सकथे?” फिलिप्पुस ह कहिस, “तेंह आके खुद देख ले।”
JOH 1:47 जब यीसू ह नतनएल ला अपन कोति आवत देखिस, त ओह ओकर बारे म कहिस, “येह एक सच्चा इसरायली अय; येमा कोनो छल-कपट नइं ए।”
JOH 1:48 नतनएल ह यीसू ले पुछिस, “तेंह मोला कइसने जानत हवस?” त यीसू ह ओला जबाब दीस, “एकर पहिली कि फिलिप्पुस ह तोला बलाईस, जब तेंह अंजीर के रूख के खाल्हे म रहय, त मेंह तोला देखे रहेंव।”
JOH 1:49 नतनएल ह कहिस, “हे रब्बी, तेंह परमेसर के बेटा अस; तेंह इसरायल के राजा अस।”
JOH 1:50 यीसू ह कहिस, “का तेंह एकरसेति बिसवास करत हस, कि मेंह तोला ये कहेंव कि तोला अंजीर के रूख के खाल्हे म देखे रहेंव। तेंह एकर ले घलो बड़े-बड़े काम देखबे।”
JOH 1:51 यीसू ह ये घलो कहिस, “मेंह तुमन ला सच कहथंव कि तुमन स्वरग ला खुला अऊ परमेसर के स्वरगदूतमन ला मनखे के बेटा बर उतरत अऊ चघत देखहू।”
JOH 2:1 ओकर तीसरा दिन, गलील प्रदेस के काना नगर म एक बिहाव होवत रहय। यीसू के दाई ह उहां रिहिस।
JOH 2:2 यीसू अऊ ओकर चेलामन ला घलो बिहाव के नेवता मिले रिहिस।
JOH 2:3 जब अंगूर के मंद ह सिरा गीस, त यीसू के दाई ह ओला कहिस, “ओमन करा अऊ अंगूर के मंद नइं ए।”
JOH 2:4 त यीसू ह ओला कहिस, “हे नारी, तेंह मोला ये बात काबर बतावत हस? अभी मोर कुछू करे के समय नइं आय हवय।”
JOH 2:5 तब यीसू के दाई ह सेवकमन ला कहिस, “जऊन कुछू ओह तुमन ला कहिथे, वइसने करव।”
JOH 2:6 उहां पानी धरे के छै ठन पथरा के मटका माढ़े रहंय ताकि यहूदीमन सुध होय के धारमिक संस्कार ला कर सकंय। हर एक मटका म करीब सत्तर ले लेके एक सौ दस लीटर तक पानी धरय।
JOH 2:7 यीसू ह सेवकमन ला कहिस, “मटकामन म पानी भर देवव।” ओमन मटकामन के मुहूं तक ले पानी भर दीन।
JOH 2:8 तब यीसू ह ओमन ला कहिस, “अब तुमन ओमा ले थोरकून निकालके भोज के मुखिया करा ले जावव,” अऊ ओमन अइसनेच करिन।
JOH 2:9 जब भोज के मुखिया ह ओला चिखिस, त पानी ह अब अंगूर के मंद बन गे रहय, अऊ ओह नइं जानत रिहिस कि ये अंगूर के मंद ह कहां ले आईस, पर ओ सेवक जऊन मन पानी निकाले रिहिन, ओमन येला जानत रिहिन। तब भोज के मुखिया ह दूल्हा ला बलाईस,
JOH 2:10 अऊ ओला कहिस, “हर एक झन ह पहिली बढ़िया मंद ला देथे, अऊ जब पहुनामन पीके छक जाथें, तब सस्ता मंद ला देथे, पर तेंह तो बढ़िया मंद ला अब तक बंचाके रखे हवस।”
JOH 2:11 यीसू ह गलील प्रदेस के काना नगर म ये पहिली चमतकार करिस अऊ ओह ये किसम ले अपन महिमा देखाईस, अऊ ओकर चेलामन ओकर ऊपर बिसवास करिन।
JOH 2:12 एकर बाद यीसू, ओकर दाई, भाई अऊ ओकर चेलामन कफरनहूम सहर गीन अऊ उहां कुछू दिन ठहिरिन।
JOH 2:13 जब यहूदीमन के फसह तिहार अवइया रिहिस, त यीसू ह यरूसलेम सहर गीस।
JOH 2:14 उहां ओह देखिस कि मंदिर के अंगना म, मनखेमन बईला, भेड़, अऊ पंड़की चिरई बेचत रहंय अऊ आने मन मेज करा बईठके रूपिया-पईसा के लेन-देन करत रहंय।
JOH 2:15 तब यीसू ह डोरी के एक कोर्रा बनाईस अऊ जम्मो भेड़ अऊ बईलामन ला मंदिर के सीमना ले बाहिर खेद दीस अऊ रूपिया-पईसा के अदला-बदली करइयामन के सिक्कामन ला छितिर-बितिर कर दीस अऊ ओमन के मेजमन ला खपल दीस।
JOH 2:16 पंड़की बेचइयामन ला ओह कहिस, “येमन ला इहां ले निकालव। मोर ददा परमेसर के घर ला बजार झन बनावव।”
JOH 2:17 तब यीसू के चेलामन सुरता करिन कि परमेसर के बचन म ये लिखे हवय: “तोर घर के उत्साह ह मोर हिरदय म आगी सहीं बरथे।”
JOH 2:18 तब यहूदीमन यीसू ले पुछिन, “तोला ये जम्मो करे के अधिकार हवय, ये बात ला साबित करे बर तेंह हमन ला का चिनहां देखा सकथस?”
JOH 2:19 यीसू ह ओमन ला ये जबाब दीस, “तुमन ये मंदिर ला गिरा देवव, अऊ मेंह येला तीन दिन म फेर ठाढ़ कर दूहूं।”
JOH 2:20 यहूदीमन कहिन, “ये मंदिर ला बनाय म छियालीस साल लगे हवय, अऊ का तेंह येला तीन दिन म फेर ठाढ़ कर देबे?”
JOH 2:21 पर यीसू ह जऊन मंदिर के बारे म गोठियावत रिहिस ओह ओकर देहें रिहिस।
JOH 2:22 जब यीसू ह मरे म ले जी उठिस, तब ओकर चेलामन ला सुरता आईस कि यीसू ह ये कहे रिहिस। तब ओमन परमेसर के बचन अऊ यीसू के कहे बात ऊपर बिसवास करिन।
JOH 2:23 जब यीसू ह फसह तिहार के समय यरूसलेम म रिहिस, त जऊन चमतकार के काम उहां ओह करत रिहिस, ओला देखके बहुंत मनखेमन ओकर ऊपर बिसवास करिन।
JOH 2:24 पर यीसू ह अपनआप ला ओमन के भरोसा म नइं छोंड़िस, काबरकि ओह जम्मो झन ला जानत रिहिस।
JOH 2:25 ओला एकर जरूरत नइं रिहिस कि कोनो मनखे ह कोनो मनखे के बारे म गवाही देवय, काबरकि यीसू ह खुद जानत रिहिस कि कोन मनखे के मन म का हवय।
JOH 3:1 निकुदेमुस नांव के एक मनखे रिहिस। ओह फरीसी मत के रिहिस अऊ यहूदी महासभा के एक सदस्य रिहिस।
JOH 3:2 ओह रथिया यीसू करा आईस अऊ कहिस, “हे गुरू, हमन जानत हन कि तेंह एक गुरू अस अऊ परमेसर करा ले आय हवस। काबरकि जऊन चमतकार के काम तेंह करथस, ओला कोनो नइं कर सकंय, जब तक कि परमेसर ह ओकर संग नइं रहय।”
JOH 3:3 यीसू ह ओला ये जबाब दीस, “मेंह तोला सच-सच बतावत हंव, जब तक कोनो मनखे के नवां जनम नइं होवय, तब तक ओह परमेसर के राज ला नइं देख सकय।”
JOH 3:4 निकुदेमुस ह कहिस, “पर जब एक मनखे ह डोकरा हो गीस, त ओह फेर कइसने जनम ले सकथे? निस्चित रूप ले, ओह दूसर बार अपन दाई के कोख म जाके फेर जनम नइं ले सकय।”
JOH 3:5 त यीसू ह कहिस, “मेंह तोला सच-सच बतावत हंव कि जब तक कोनो मनखे पानी अऊ पबितर आतमा ले नइं जनमे, तब तक ओह परमेसर के राज म नइं जा सकय।
JOH 3:6 मनखे ह मनखे ला जनम देथे, पर पबितर आतमा ह नवां आतमा ला जनम देथे।
JOH 3:7 तोला मोर ये बात ले अचरज नइं होना चाही कि तोर नवां जनम होना जरूरी अय।
JOH 3:8 हवा ह जेति चाहथे ओती चलथे। तेंह सिरिप एकर आरो भर ला सुनथस, पर तेंह नइं बता सकस कि येह कहां ले आथे या येह कहां जाथे। हर ओ मनखे जऊन ह पबितर आतमा ले जनम लेथे, ओकर संग घलो अइसनेच होथे।”
JOH 3:9 निकुदेमुस ह पुछिस, “येह कइसने हो सकथे?”
JOH 3:10 यीसू ह जबाब दीस, “तेंह इसरायली मनखेमन के एक गुरू अस, अऊ का तेंह ये बातमन ला नइं समझत हस?
JOH 3:11 मेंह तोला सच कहत हंव, जऊन बात ला हमन जानथन, ओकरे बारे म हमन गोठियाथन, अऊ जऊन ला हमन देखे हवन, ओकर गवाही देथन, पर तुमन हमर गवाही ला नइं मानव।
JOH 3:12 मेंह तुमन ला ये धरती के बातमन ला बताएंव अऊ तुमन बिसवास नइं करत हव, पर कहूं मेंह स्वरग के बातमन ला बताहूं, त तुमन कइसने बिसवास करहू।
JOH 3:13 कभू कोनो स्वरग ला नइं गे हवय, सिरिप एक झन के छोंड़, जऊन ह स्वरग ले आईस याने कि मनखे के बेटा।
JOH 3:14 जइसने मूसा ह निरजन जगह म पीतल के सांप ला ऊपर चघाईस, वइसने मनखे के बेटा बर घलो जरूरी अय कि ओला ऊपर चघाय जावय,
JOH 3:15 ताकि जऊन कोनो ओकर ऊपर बिसवास करय, ओह परमेसर के संग सदाकाल के जिनगी पावय।
JOH 3:16 “काबरकि परमेसर ह संसार ले अइसने मया करिस कि ओह अपन एकलऊता बेटा ला दे दीस, ताकि जऊन कोनो ओकर बेटा ऊपर बिसवास करय, ओह नास नइं होवय, पर परमेसर के संग सदाकाल के जिनगी पावय।
JOH 3:17 परमेसर ह अपन बेटा ला एकर खातिर नइं पठोईस कि ओह संसार ला दोसी ठहिरावय, पर ये खातिर पठोईस कि ओकर जरिये संसार के उद्धार करे।
JOH 3:18 जऊन कोनो ओकर ऊपर बिसवास करथे, ओह दोसी नइं ठहिरय, पर जऊन ह बिसवास नइं करय, ओह पहिले ले दोसी ठहर चुकिस, काबरकि ओह परमेसर के एकलऊता बेटा ऊपर बिसवास नइं करिस।
JOH 3:19 नियाय करइया के फैसला ये अय: अंजोर ह संसार म आईस, पर मनखेमन अंजोर के बदले अंधियार ले मया करिन, काबरकि ओमन के काम खराप रिहिन।
JOH 3:20 जऊन ह खराप काम करथे, ओह अंजोर ले घिन करथे अऊ ओह अंजोर म नइं आवय, काबरकि ओला डर रहिथे कि ओकर खराप काममन उजागर हो जाहीं।
JOH 3:21 पर जऊन ह सही काम ला करथे, ओह अंजोर म आथे, ताकि ये साफ दिख जावय कि ओकर काम ह परमेसर के जरिये करे गे हवय।”
JOH 3:22 एकर बाद, यीसू अऊ ओकर चेलामन यहूदिया प्रदेस के गंवई इलाका म गीन। उहां ओह ओमन के संग कुछू समय तक रिहिस अऊ मनखेमन ला बतिसमा दीस।
JOH 3:23 यूहन्ना ह घलो सलीम के लकठा म एनोन म बतिसमा देवत रिहिस, काबरकि उहां बहुंत पानी रिहिस अऊ मनखेमन उहां आके ओकर ले बतिसमा लेवत रिहिन।
JOH 3:24 यूहन्ना ह अभी तक जेल म नइं डारे गे रिहिस।
JOH 3:25 यूहन्ना के कुछू चेलामन के, एक यहूदी संग सुध होय के बारे म बहस होय लगिस।
JOH 3:26 ओमन यूहन्ना करा जाके कहिन, “हे गुरूजी, ओ मनखे जऊन ह यरदन नदी के ओ पार तोर संग रिहिस अऊ जेकर बारे म तेंह गवाही दे रहय—देख, ओह घलो बतिसमा देवत हवय, अऊ जम्मो मनखे ओकर करा जावत हवंय।”
JOH 3:27 यूहन्ना ह ओमन ला जबाब दीस, “मनखे ह कुछू नइं पा सकय, जब तक कि परमेसर ह स्वरग ले ओला नइं देवय।
JOH 3:28 तुमन खुदे मोर गवाह हव कि मेंह कहे रहेंव, ‘मेंह मसीह नो हंव, पर मेंह ओकर आघू पठोय गे हवंव।’
JOH 3:29 दुलहिन ह दूल्हा के होथे। दूल्हा के संगवारी ह तीर म ठाढ़े रहिथे अऊ ओकर सुनथे अऊ जब ओह दूल्हा के अवाज ला सुनथे, त ओह बहुंत खुस होथे। ओही किसम के खुसी मोर अय, जऊन ह अब पूरा हो गे।
JOH 3:30 ये जरूरी अय कि ओह बाढ़े अऊ मेंह घटंव।”
JOH 3:31 जऊन ह ऊपर ले आथे, ओह सबले बड़े होथे। जऊन ह धरती ले आथे, ओह धरती के होथे अऊ ओह धरती के बात गोठियाथे। जऊन ह स्वरग ले आथे, ओह जम्मो के ऊपर होथे।
JOH 3:32 ओह ओ बात ला बताथे, जऊन ला ओह देखे अऊ सुने रहिथे, पर ओकर गवाही ला कोनो नइं मानंय।
JOH 3:33 जऊन ह ओकर गवाही ला मानथे, ओह ये साबित करथे कि परमेसर ह सच्चा ए।
JOH 3:34 काबरकि जऊन ला परमेसर ह पठोय हवय, ओह परमेसर के गोठ गोठियाथे। परमेसर ह ओला अपन आतमा ले भर देथे।
JOH 3:35 ददा ह अपन बेटा ले मया करथे अऊ ओह जम्मो चीज ला ओकर हांथ म कर दे हवय।
JOH 3:36 जऊन ह बेटा के ऊपर बिसवास करथे, ओकर करा परमेसर के संग सदाकाल के जिनगी हवय, पर जऊन ह बेटा के बात ला नइं मानय, ओह ओ सदाकाल के जिनगी के अनुभव कभू नइं करही, काबरकि परमेसर के कोरोध ह ओकर ऊपर बने रहिथे।
JOH 4:1 फरीसीमन सुनिन कि यीसू ह यूहन्ना ले घलो जादा मनखेमन ला चेला बनाथे अऊ बतिसमा देवत हवय।
JOH 4:2 असल म, यीसू ह खुद कोनो ला बतिसमा नइं देवत रिहिस, पर ओकर चेलामन बतिसमा देवत रिहिन।
JOH 4:3 तब ओह यहूदिया प्रदेस ला छोंड़के गलील प्रदेस म फेर वापिस चल दीस।
JOH 4:4 जब यीसू ह गलील ला वापिस जावत रिहिस, त ओला सामरिया प्रदेस ले होके जाय ला पड़िस।
JOH 4:5 ओह सामरिया प्रदेस के सूखार नांव के एक सहर म आईस। ये सहर ह ओ भुइयां के लकठा म रिहिस, जऊन ला याकूब ह अपन बेटा यूसुफ ला देय रिहिस।
JOH 4:6 उहां याकूब के कुआं रहय; यीसू ह रेंगत-रेंगत थक गे रहय, एकरसेति ओह ओ कुआं के लकठा म बईठ गीस। येह करीब मंझन के बेरा रिहिस।
JOH 4:7 ओतकीच बेरा, एक सामरी माईलोगन ह ओ कुआं ले पानी भरे बर आईस, त यीसू ह ओला कहिस, “मोला, पीये बर थोरकन पानी दे ओ।”
JOH 4:8 (यीसू के चेलामन खाय के चीज बिसोय बर सहर गे रहंय।)
JOH 4:9 ओ सामरी माईलोगन ह ओला कहिस, “यहूदी जात के होके, तेंह मोर ले पानी काबर मांगत हस? मेंह एक सामरी माईलोगन अंव।” (यहूदीमन सामरीमन के संग कोनो संबंध नइं रखत रिहिन।)
JOH 4:10 यीसू ह जबाब दीस, “कहूं तेंह परमेसर के बरदान ला जानते अऊ ये घलो जानते कि जऊन ह तोर ले पीये के पानी मांगत हवय, ओह कोन ए, त तेंह ओकर ले मांगते अऊ ओह तोला जिनगी के पानी देतिस।”
JOH 4:11 ओ माईलोगन ह कहिस, “ए महाराज, पानी भरे बर तो तोर करा कोनो बाल्टी नइं ए, अऊ ये कुआं ह गहिरा हवय। त फेर तोर करा ओ जिनगी के पानी कहां ले आही?
JOH 4:12 का तेंह हमर पुरखा याकूब ले बड़े अस, जऊन ह हमन ला ये कुआं देय हवय। अऊ ओह खुद अऊ ओकर बेटामन अऊ ओकर पसुमन घलो ये कुआं ले पानी पीये हवंय।”
JOH 4:13 यीसू ह जबाब दीस, “जऊन ह ये पानी ला पीही, ओह फेर पीयासन होही,
JOH 4:14 पर जऊन ह ओ पानी ला पीही, जऊन ला मेंह दूहूं, ओह फेर कभू पीयासन नइं होही। जऊन पानी मेंह ओला दूहूं, ओह ओमा सोता के पानी सहीं होही, जऊन ह हर समय बहते रहिथे, अऊ येह ओला परमेसर के संग सदाकाल के जिनगी देथे।”
JOH 4:15 तब ओ माईलोगन ह यीसू ला कहिस, “हे महाराज, मोला ओ पानी दे ताकि मेंह फेर पीयासन झन होवंव अऊ न ही मोला इहां पानी भरे बर फेर आना पड़य।”
JOH 4:16 यीसू ह ओला कहिस, “जा, अऊ अपन घरवाला ला इहां बलाके ले आ।”
JOH 4:17 ओ माईलोगन ह कहिस, “मोर कोनो घरवाला नइं ए।” यीसू ह कहिस, “तेंह सही कहथस कि तोर कोनो घरवाला नइं ए।
JOH 4:18 काबरकि तेंह पांच घरवाला बना चुके हवस, अऊ जऊन मनखे के संग अभी तेंह रहत हवस, ओह घलो तोर घरवाला नो हय। अभी तेंह जऊन बात कहय, ओह बिलकुल सही ए।”
JOH 4:19 ओ माईलोगन ह कहिस, “महाराज, मोला अइसने लगथे कि तेंह एक अगमजानी अस।
JOH 4:20 हमर पुरखामन ये पहाड़ ऊपर परमेसर के अराधना करत रिहिन, पर तुम यहूदीमन ये कहिथव कि ओ जगह यरूसलेम म हवय, जिहां हमन ला परमेसर के अराधना करना चाही।”
JOH 4:21 यीसू ह ओला कहिस, “हे नारी, मोर ऊपर बिसवास कर। ओ समय ह आही, जब मनखेमन परमेसर ददा के अराधना न तो ये पहाड़ ऊपर करहीं अऊ न ही यरूसलेम म।
JOH 4:22 तुमन सामरीमन जेकर अराधना करथव, ओला तुमन नइं जानव; हमन यहूदीमन जेकर अराधना करथन, ओला हमन जानथन, काबरकि उद्धार के संदेस ह यहूदीमन के जरिये आही।
JOH 4:23 पर ओ समय ह आवत हवय, अऊ अब आ गे हवय, जब सही भक्ति करइयामन परमेसर ददा के भक्ति आतमा अऊ सच्चई ले करहीं। काबरकि परमेसर ददा ह अइसने भक्ति करइयामन ला चाहथे।
JOH 4:24 परमेसर ह आतमा अय, अऊ ये जरूरी अय कि ओकर भक्ति करइयामन आतमा अऊ सच्चई ले ओकर भक्ति करंय।”
JOH 4:25 तब ओ माईलोगन ह कहिस, “मेंह जानत हंव कि मसीह (जऊन ला ख्रिस्त कहे जाथे) अवइया हवय। जब ओह आही, त हमन ला जम्मो बातमन ला बताही।”
JOH 4:26 तब यीसू ह ओला कहिस, “में जऊन ह तोर ले गोठियावत हंव, ओहीच अंव।”
JOH 4:27 ओतकी बेरा यीसू के चेलामन लहुंटके आईन अऊ ये देखके अचरज करे लगिन कि यीसू ह एक माईलोगन ले गोठियावत हवय। पर एको झन ओकर ले ये नइं पुछिन, “तेंह का चाहथस?” या “तेंह ओकर ले काबर गोठियावत हस?”
JOH 4:28 तब ओ माईलोगन ह अपन घघरी ला उहां छोंड़ दीस अऊ सहर म वापिस जाके मनखेमन ला कहिस,
JOH 4:29 “आवव, अऊ ओ मनखे ला देखव, जऊन ह ओ जम्मो बात बता दीस, जेला मेंह करे हवंव। ओह मसीह हो सकथे।”
JOH 4:30 मनखेमन सहर ले निकलके यीसू करा आवन लगिन।
JOH 4:31 ये दरमियान यीसू के चेलामन ओकर ले बिनती करिन, “हे रब्बी, कुछू खा ले।”
JOH 4:32 पर यीसू ह ओमन ला कहिस, “मोर करा खाय बर अइसने भोजन हवय, जेकर बारे म तुमन कुछू नइं जानत हव।”
JOH 4:33 तब चेलामन एक-दूसर ले पुछे लगिन, “का कोनो एकर बर कुछू खाय बर लाय हवय?”
JOH 4:34 यीसू ह ओमन ला कहिस, “मोर भोजन ये अय कि मेंह अपन पठोइया परमेसर के ईछा ला पूरा करंव अऊ ओ काम ला पूरा करंव, जऊन ला ओह मोला दे हवय।
JOH 4:35 का तुमन ये नइं कहव, ‘फसल ला पके बर अभी चार महिना बांचे हवय, तब लुवई सुरू होही।’ अपन चारों कोति देखव—मनखेमन के आतमा के खेत ला, जऊन ह लुवई बर तियार हवय।
JOH 4:36 ओ मनखे जऊन ह फसल लूथे, ओला ओकर बनी मिलथे अऊ ओह परमेसर के संग सदाकाल के जिनगी बर फर संकेलथे, ताकि बोवइया अऊ लुवइया दूनों मिलके खुसी मनावंय।
JOH 4:37 एकरसेति ये कहावत ह सही ए, ‘कोनो बोथे, त कोनो आने ओला लूथे।’
JOH 4:38 मेंह तुमन ला उहां फसल लुए बर पठोएंव, जिहां तुमन नइं बोए रहेव; आने मन उहां कठोर मेहनत करिन, अऊ तुमन ला ओमन के मेहनत के फर मिलिस।”
JOH 4:39 ओ सहर के बहुंत सामरी मनखेमन यीसू ऊपर बिसवास करिन, काबरकि ओ माईलोगन ह ये बताय रिहिस, “ओह मोला ओ जम्मो बात बता दीस, जेला मेंह करे हवंव।”
JOH 4:40 एकरसेति जब ओ सामरी मनखेमन यीसू करा आईन, त ओमन यीसू ले बिनती करिन, “हमर संग रही जा।” अऊ यीसू ह उहां दू दिन रिहिस।
JOH 4:41 ओकर बचन ला सुनके अऊ बहुंत झन ओकर ऊपर बिसवास करिन।
JOH 4:42 ओमन ओ माईलोगन ला कहिन, “अब हमन सिरिप तोर कहे ले ही बिसवास नइं करथन, पर हमन खुदे ओकर बात ला सुने हवन, अऊ हमन जान गे हवन कि ओह सही म संसार के उद्धार करइया अय।”
JOH 4:43 दू दिन के बाद, यीसू ह उहां ले गलील प्रदेस ला चल दीस।
JOH 4:44 (काबरकि यीसू खुदे कहे रिहिस कि एक अगमजानी ला ओकर खुद के देस म आदरमान नइं मिलय।)
JOH 4:45 जब ओह गलील प्रदेस म आईस, त गलील के मनखेमन ओकर सुवागत करिन, काबरकि ओमन फसह तिहार के बखत यरूसलेम गे रिहिन अऊ ओमन ओ जम्मो बात ला देखे रिहिन, जऊन ला यीसू ह उहां तिहार के बखत करे रिहिस।
JOH 4:46 यीसू ह एक बार फेर गलील के काना सहर म गीस, जिहां ओह पानी ला अंगूर के मंद बनाय रिहिस। एक साही अधिकारी रिहिस, जेकर बेटा ह कफरनहूम सहर म बेमार पड़े रहय।
JOH 4:47 जब ये अधिकारी ह सुनिस कि यीसू ह यहूदिया प्रदेस ले गलील म आय हवय, त ओह ओकर करा गीस अऊ बिनती करिस कि ओह आके ओकर बेटा ला चंगा कर देवय, जऊन ह मरइया रिहिस।
JOH 4:48 यीसू ह ओला कहिस, “जब तक तुमन चिनहां अऊ चमतकार नइं देखहू, तब तक बिसवास नइं करव।”
JOH 4:49 ओ अधिकारी ह कहिस, “हे महाराज, एकर पहिली कि मोर लइका ह मर जावय, तेंह जल्दी चल।”
JOH 4:50 यीसू ह ओला कहिस, “तेंह जा। तोर बेटा ह जीयत हवय।” ओ मनखे ह यीसू के बात ला बिसवास करके उहां ले चल दीस।
JOH 4:51 जब ओह अपन घर जावत रिहिस, त रसता म ओकर सेवकमन मिलिन अऊ ओला बताईन, “तोर बेटा ह जीयत हवय।”
JOH 4:52 ओह ओमन ले पुछिस, “कतेक बेरा ओह बने होईस?” ओमन कहिन, “कल मंझन के एक बजे ओकर जर ह उतर गीस।”
JOH 4:53 तब ओ लइका के ददा ह सुरता करिस कि येह तो ओहीच बेरा ए, जब यीसू ह ओला कहे रिहिस, “तोर बेटा ह जीयत हवय।” तब ओह अऊ ओकर घराना के जम्मो झन यीसू ऊपर बिसवास करिन।
JOH 4:54 येह दूसरा अचरज के चिनहां रिहिस जऊन ला यीसू यहूदिया प्रदेस ले आके गलील प्रदेस म करिस।
JOH 5:1 एकर बाद, यहूदीमन के एक तिहार होईस, जेकर कारन यीसू ह यरूसलेम गीस।
JOH 5:2 यरूसलेम म भेड़ दुवार के लकठा म एक ठन पानी के कुन्ड हवय, जऊन ला इबरानी म बेतहसदा कहिथें। ओकर चारों कोति पांच ठन खुला परछी हवय।
JOH 5:3 ओमा कतको बेमार, अंधरा, खोरवा अऊ लूलवा मनखेमन (पानी के हाले के आसा म) पड़े रहंय।
JOH 5:4 एक ठहिराय समय म परभू के स्वरगदूत ह खाल्हे उतरय अऊ पानी ला हलाय करय। पानी के हालते ही जऊन बिमरहा ह सबले पहिली ओ कुन्ड म उतरे, ओह चंगा हो जावय, चाहे ओकर कोनो भी बेमारी होवय।
JOH 5:5 उहां एक मनखे रहय, जऊन ह अड़तीस साल ले बेमारी म पड़े रहय।
JOH 5:6 जब यीसू ह ओला उहां पड़े देखिस अऊ ये जानिस कि ओह बहुंत दिन ले ये दसा म हवय, त यीसू ह ओकर ले पुछिस, “का तेंह बने होय बर चाहथस?”
JOH 5:7 ओ बिमरहा मनखे ह यीसू ला कहिस, “हे परभू! मोर करा इहां कोनो नइं ए कि जब पानी ह हलाय जाथे, त मोला कुन्ड म उतारे, अऊ जब मेंह उतरे के कोसिस करथंव, त कोनो आने मोर ले आघू कुन्ड म उतर जाथे।”
JOH 5:8 तब यीसू ह ओला कहिस, “उठ! अपन खटिया ला उठा अऊ रेंग।”
JOH 5:9 तुरते ओ मनखे ह बने हो गीस; ओह अपन खटिया ला उठाईस अऊ चले-फिरे लगिस। जऊन दिन ये काम होईस, ओह यहूदीमन के बिसराम दिन रिहिस।
JOH 5:10 एकरसेति यहूदी अगुवामन ओ मनखे, जऊन ह बने होय रिहिस, ओला कहिन, “आज बिसराम के दिन ए, अऊ आज के दिन खटिया ला उठई हमर कानून के बिरूध ए।”
JOH 5:11 पर ओह ओमन ला ये जबाब दीस, “जऊन ह मोला बने करिस, ओह मोला कहिस, ‘अपन खटिया ला उठा अऊ रेंग।’ ”
JOH 5:12 ओमन ओकर ले पुछिन, “ओह कोन मनखे ए, जऊन ह तोला कहिस कि अपन खटिया उठा अऊ रेंग?”
JOH 5:13 पर जऊन मनखे ह बने होय रिहिस, ओह ये नइं जानत रिहिस कि ओला कोन ह बने करिस, काबरकि ओ जगह म मनखेमन के भीड़ रहय अऊ यीसू ह उहां ले निकल गे रहय।
JOH 5:14 बाद म, यीसू ओला मंदिर म भेंटिस, त ओला कहिस, “देख, तेंह अब बने हो गे हवस। अब पाप झन करबे, नइं तो एकर ले भारी बिपत्ति तोर ऊपर पड़ सकथे।”
JOH 5:15 ओ मनखे ह जाके यहूदी अगुवामन ला बताईस कि जऊन मनखे ह मोला बने करिस, ओह यीसू ए।
JOH 5:16 यीसू ह ये काममन ला यहूदीमन के बिसराम दिन म करत रिहिस, एकरसेति यहूदी अगुवामन यीसू ला सताय लगिन।
JOH 5:17 यीसू ह ओमन ला कहिस, “मोर ददा ह हमेसा अपन काम करत हवय, अऊ मेंह घलो काम करत हवंव।”
JOH 5:18 एकरे कारन यहूदीमन यीसू ला मार डारे के अऊ कतको उपाय करे लगिन, काबरकि यीसू ह न सिरिप बिसराम दिन के कानून ला टोरत रिहिस, पर ओह परमेसर ला अपन खुद के ददा कहिके, अपनआप ला परमेसर के बरोबर घलो रखत रिहिस।
JOH 5:19 यीसू ह ओमन ला कहिस, “मेंह तुमन ला सच कहथंव; बेटा ह अपनआप ले कुछू नइं कर सकय; ओह सिरिप ओही ला करथे, जऊन ला ओह अपन ददा ला करत देखथे। जऊन कुछू ददा ह करथे, बेटा ह घलो वइसने करथे।
JOH 5:20 काबरकि ददा ह बेटा ला मया करथे अऊ जऊन कुछू ओह करथे, ओ जम्मो ला अपन बेटा ला देखाथे। एकर ले घलो बड़े काम ओह ओला देखाही ताकि तुमन अचम्भो करव।
JOH 5:21 काबरकि जइसने ददा ह मरे मनखे ला जियाथे अऊ ओमन ला जिनगी देथे, वइसनेच बेटा ह घलो जऊन ला चाहथे, ओला जिनगी देथे।
JOH 5:22 ददा ह काकरो नियाय नइं करय, पर ओह नियाय करे के जम्मो अधिकार अपन बेटा ला सऊंप दे हवय,
JOH 5:23 ताकि जम्मो मनखे जइसने ददा के आदर करथें, वइसनेच बेटा के घलो आदर करंय। जऊन ह बेटा के आदर नइं करय, ओह ददा के घलो आदर नइं करय, जऊन ह बेटा ला पठोय हवय।
JOH 5:24 “मेंह तुमन ला सच कहत हंव, जऊन ह मोर बचन ला सुनथे, अऊ मोर पठोइया के ऊपर बिसवास करथे, ओकर करा परमेसर के संग सदाकाल के जिनगी हवय; ओह दंड के भागी नइं होवय; ओह मिरतू ले पार होके जिनगी पा चुके हवय।
JOH 5:25 मेंह तुमन ला सच कहत हंव, ओ समय ह आवत हे, अऊ आ गे हवय, जब मरे मनखेमन परमेसर के बेटा के अवाज ला सुनहीं, अऊ जऊन मन येला सुनहीं, ओमन जिनगी पाहीं।
JOH 5:26 काबरकि जइसने ददा ह अपन म जिनगी रखथे; ओही किसम ले, ओह बेटा ला घलो अधिकार दे हवय कि ओह अपन म जिनगी रखय।
JOH 5:27 अऊ मनखे के बेटा होय के कारन, ओला नियाय करे के अधिकार घलो दे हवय।
JOH 5:28 “ये बात ले अचम्भो झन करव, काबरकि ओ समय ह आवत हे, जब कबर के जम्मो मरे मनखेमन ओकर अवाज ला सुनहीं
JOH 5:29 अऊ बाहिर निकल आहीं; जऊन मन भलई करे हवंय, ओमन जिनगी पाय बर जी उठहीं, अऊ जऊन मन कुकरम करे हवंय, ओमन सजा पाय बर जी उठहीं।
JOH 5:30 मेंह अपनआप ले कुछू नइं कर सकंव। जइसने परमेसर ह मोला कहिथे, वइसने मेंह नियाय करथंव, अऊ मोर नियाय ह सही अय, काबरकि मेंह अपनआप ला खुस करे के कोसिस नइं करंव, पर ओला खुस करथंव, जऊन ह मोला पठोय हवय।
JOH 5:31 “यदि मेंह अपन बारे म खुद गवाही देथंव, त मोर गवाही ह सही नो हय।
JOH 5:32 पर एक झन अऊ हवय, जऊन ह मोर बारे म गवाही देथे, अऊ मेंह जानत हंव कि मोर बारे म ओकर गवाही ह सही ए।
JOH 5:33 “तुमन यूहन्ना करा अपन संदेसियामन ला पठोय रहेव अऊ ओह सच्चई के गवाही दे हवय।
JOH 5:34 अइसने बात नो हय कि मेंह मनखे के गवाही चाहत हंव; पर मेंह ये बात एकरसेति कहत हंव कि तुम्हर उद्धार होवय।
JOH 5:35 यूहन्ना ह एक ठन दीया के सहीं रिहिस, जऊन ह बरिस अऊ अंजोर दीस, अऊ तुमन ला ओकर अंजोर म कुछू समय तक आनंद मनई बने लगिस।
JOH 5:36 “पर मोर करा यूहन्ना के देय गवाही ले घलो बड़े गवाही हवय। जऊन काम ला ददा ह मोला पूरा करे बर देय हवय, अऊ जऊन ला मेंह करत हवंव, ओ काममन खुदे गवाही देथें कि ददा ह मोला पठोय हवय।
JOH 5:37 ददा, जऊन ह मोला पठोय हवय, ओह खुद मोर बारे म गवाही देय हवय। तुमन ओकर अवाज ला कभू नइं सुनेव अऊ न ही ओकर रूप ला देखे हवव,
JOH 5:38 अऊ न ही ओकर बचन तुम्हर हिरदय म रहिथे, काबरकि जऊन ला ओह पठोईस, ओकर ऊपर तुमन बिसवास नइं करेव।
JOH 5:39 तुमन परमेसर के बचन ला लगन ले पढ़थव, काबरकि तुमन सोचथव कि ओमा तुमन ला परमेसर के संग सदाकाल के जिनगी मिलही; येह परमेसर के ओही बचन अय, जऊन ह मोर बारे म गवाही देथे।
JOH 5:40 तभो ले तुमन जिनगी पाय बर मोर करा नइं आय चाहव।
JOH 5:41 “मेंह मनखेमन ले महिमा पाय बर नइं चाहंव,
JOH 5:42 पर मेंह जानत हंव कि तुम्हर हिरदय म परमेसर बर मया नइं ए।
JOH 5:43 मेंह अपन ददा परमेसर के नांव म आय हवंव, अऊ तुमन मोला गरहन नइं करव; पर यदि कोनो आने मनखे अपन खुद के नांव म आही, त तुमन ओला गरहन कर लूहू।
JOH 5:44 तुमन एक-दूसर ले महिमा पाय बर चाहथव, अऊ ओ महिमा जऊन ह सिरिप परमेसर करा ले आथे, ओला पाय के कोनो कोसिस नइं करव; तब तुमन कइसने बिसवास कर सकथव?
JOH 5:45 “ये झन सोचव कि मेंह ददा के आघू म तुम्हर ऊपर दोस लगाहूं। ओह मूसा ए, जऊन ह तुम्हर ऊपर दोस लगाथे, जेकर ऊपर तुमन अपन आसा रखे हवव।
JOH 5:46 यदि तुमन मूसा ऊपर बिसवास करे होतेव, त मोर ऊपर घलो बिसवास करतेव, काबरकि ओह मोर बारे म लिखे हवय।
JOH 5:47 जब तुमन मूसा के लिखे ओ बातमन ला बिसवास नइं करव, तब तुमन मोर बात ला कइसने बिसवास करहू?”
JOH 6:1 एकर बाद, यीसू ह गलील के झील के ओ पार गीस। (गलील के झील ला तिबिरियास के झील घलो कहिथें।)
JOH 6:2 अऊ एक बड़े भीड़ ओकर पाछू हो लीस, काबरकि मनखेमन ओ अचरज के चिनहांमन ला देखे रिहिन, जऊन ला ओह बिमरहामन ला बने करे के दुवारा देखाय रिहिस।
JOH 6:3 तब यीसू ह पहाड़ी ऊपर गीस अऊ अपन चेलामन संग उहां बईठ गीस।
JOH 6:4 यहूदीमन के फसह तिहार ह लकठा आवत रहय।
JOH 6:5 जब यीसू ह आंखी उठाके देखिस, त मनखेमन के एक बड़े भीड़ ओकर कोति आवत रहय। तब ओह फिलिप्पुस ला कहिस, “ये मनखेमन ला खवाय बर हमन कहां ले रोटी बिसोबो?”
JOH 6:6 यीसू ह ओला सिरिप परखे बर ये बात ला पुछिस, काबरकि ओह पहिली ले जानत रहय कि ओह का करइया रिहिस।
JOH 6:7 फिलिप्पुस ह जबाब देके कहिस, “यदि दू सौ दीनार के रोटी बिसोथन, तभो ले येमा के हर एक मनखे ला मुसकुल से एक-एक कऊंरा मिलही।”
JOH 6:8 ओकर एक आने चेला, सिमोन पतरस के भाई अन्द्रियास ह ओला कहिस,
JOH 6:9 “इहां एक झन छोकरा हवय, जेकर करा जवांर के पांच रोटी अऊ दू ठन मछरी हवय; पर अतेक झन बर येह कुछू नो हय?”
JOH 6:10 यीसू ह कहिस, “मनखेमन ला बईठा देवव।” ओ जगह म अब्बड़ कांदी रहय। तब जम्मो मनखेमन बईठ गीन; उहां करीब पांच हजार आदमीमन रिहिन।
JOH 6:11 तब यीसू ह रोटी ला लीस अऊ परमेसर ला धनबाद देके उहां बईठे मनखेमन ला बांट दीस, अऊ वइसनेच ओह मछरीमन ला घलो बांट दीस। ओमन जतकी चाहिन, ओह ओमन ला ओतकी दीस।
JOH 6:12 जब ओ जम्मो झन खाके अघा गीन, त यीसू ह अपन चेलामन ला कहिस, “बांचे-खुचे टुकड़ामन ला संकेल लेवव, ताकि कुछू ह बरबाद झन होवय।”
JOH 6:13 तब ओमन बांचे ला संकेलिन अऊ बारह ठन टुकना ओ पांच ठन जवांर के रोटी के टुकड़ा ले भर गीस, जऊन ला खवइयामन उहां छोंड़ दे रिहिन।
JOH 6:14 जब मनखेमन यीसू के ओ अचरज के चिनहां ला देखिन, त कहे लगिन, “येह सही म ओ अगमजानी अय, जऊन ह संसार म अवइया रिहिस।”
JOH 6:15 ओमन आके यीसू ला जबरदस्ती राजा बनाय के इरादा करत रिहिन; ये बात ला जानके, यीसू ह फेर एके झन पहाड़ ऊपर चल दीस।
JOH 6:16 जब सांझ होईस, त यीसू के चेलामन उतरके झील के तीर म गीन,
JOH 6:17 अऊ उहां झील के ओ पार कफरनहूम जाय बर, एक ठन डोंगा म बईठ गीन। जब ओमन जावत रिहिन, त अंधियार हो गे रहय, अऊ यीसू ह अभी तक ले ओमन करा नइं आय रहय।
JOH 6:18 तब एक बड़े आंधी झील के ऊपर चले लगिस, जेकर कारन पानी के बड़े-बड़े लहरा उठिस।
JOH 6:19 जब ओमन समुंदर म डोंगा ला खेवत-खेवत पांच-छै किलोमीटर चल दीन, त ओमन यीसू ला अपन डोंगा कोति आवत देखिन; ओह पानी ऊपर चलत रहय, अऊ ओमन डरा गीन।
JOH 6:20 पर यीसू ह ओमन ला कहिस, “येह में अंव, झन डरव।”
JOH 6:21 तब ओमन ओला डोंगा म चघाय बर चाहत रिहिन कि डोंगा ह ओ तीर म पहुंच गीस, जिहां ओमन जवइया रिहिन।
JOH 6:22 दूसर दिन, ओ मनखेमन के भीड़, जऊन ह समुंदर के ओ पार तीर म रूके रहय, ये देखिस कि उहां सिरिप एक ठन डोंगा रिहिस, अऊ ओमन जानत रिहिन कि यीसू ह अपन चेलामन संग ओ डोंगा म नइं गे हवय, पर चेलामन यीसू के बिगर डोंगा म चल दे रिहिन।
JOH 6:23 तब कुछू आने डोंगामन तिबिरियास ले ओ जगह के लकठा म आईन, जिहां परभू के धनबाद करे के बाद मनखेमन रोटी खाय रिहिन।
JOH 6:24 जब भीड़ ह ये देखिस कि उहां न तो यीसू हवय अऊ न ही ओकर चेलामन, त ओमन डोंगामन म चघिन अऊ यीसू के खोज म कफरनहूम गीन।
JOH 6:25 जब ओ मनखेमन ला यीसू ह समुंदर के ओ पार मिलिस, त ओमन ओकर ले पुछिन, “हे गुरू! तेंह इहां कब आय?”
JOH 6:26 यीसू ह ओमन ला कहिस, “मेंह तुमन ला सच कहथंव, तुमन मोला एकरसेति नइं खोजत हव कि तुमन अचरज के चिनहां ला देखेव, पर एकरसेति कि तुमन छकके रोटी खाय रहेव।
JOH 6:27 ओ भोजन बर मेहनत झन करव, जऊन ह नास हो जाथे, पर ओ भोजन बर मेहनत करव, जऊन ह परमेसर के संग सदाकाल के जिनगी तक ठहिरथे, जऊन ला मनखे के बेटा ह तुमन ला दीही। काबरकि परमेसर ददा ह ओकर ऊपर अपन मंजूरी के मुहर लगाय हवय।”
JOH 6:28 तब ओमन ओकर ले पुछिन, “परमेसर के काम करे बर, हमन का करन?”
JOH 6:29 यीसू ह ये जबाब दीस, “परमेसर के काम ये अय कि जऊन ला ओह पठोय हवय, ओकर ऊपर बिसवास करव।”
JOH 6:30 तब ओमन ओकर ले पुछिन, “तेंह हमन ला का अचरज के चिनहां देखाबे कि हमन ओला देखके तोर ऊपर बिसवास करन? तेंह का काम करबे?
JOH 6:31 हमर पुरखामन निरजन जगह म मन्ना खाय रिहिन; जइसने परमेसर के बचन म ये लिखे हवय: ‘ओह ओमन ला खाय बर स्वरग ले रोटी दीस।’ ”
JOH 6:32 यीसू ह ओमन ला कहिस, “मेंह तुमन ला सच कहथंव कि मूसा ह तुमन ला स्वरग ले ओ रोटी नइं देय रिहिस, पर ओह मोर ददा ए, जऊन ह तुमन ला स्वरग ले सच्चई के रोटी देथे।
JOH 6:33 काबरकि परमेसर के रोटी ओह अय, जऊन ह स्वरग ले उतरथे अऊ संसार ला जिनगी देथे।”
JOH 6:34 ओमन कहिन, “हे महाराज, ओ रोटी हमन ला हमेसा देय कर।”
JOH 6:35 तब यीसू ह ओमन ला कहिस, “जिनगी के रोटी मेंह अंव। जऊन ह मोर करा आथे, ओह कभू भूखन नइं होवय अऊ जऊन ह मोर ऊपर बिसवास करथे, ओह कभू पीयासन नइं होवय।
JOH 6:36 पर जइसने मेंह तुमन ला कहेंव कि तुमन मोला देख भी ले हवव, अऊ तभो ले तुमन बिसवास नइं करथव।
JOH 6:37 जऊन कुछू ददा ह मोला देथे, ओ जम्मो ह मोर करा आही अऊ जऊन कोनो मोर करा आथे, मेंह ओला कभू नइं निकालंव।
JOH 6:38 काबरकि मेंह अपन ईछा ला नइं, पर अपन पठोइया के ईछा ला पूरा करे बर स्वरग ले उतरे हवंव।
JOH 6:39 अऊ मोर पठोइया के ईछा ये अय कि जऊन कुछू ओह मोला देय हवय, ओमा ले कोनो ला घलो मेंह झन गंवांवंव, पर आखिरी दिन म ओमन ला जियावंव।
JOH 6:40 काबरकि मोर ददा के ईछा ये अय कि जऊन कोनो बेटा ला देखथे अऊ ओकर ऊपर बिसवास करथे, ओह परमेसर के संग सदाकाल के जिनगी पाही, अऊ मेंह आखिरी दिन म ओला जियाहूं।”
JOH 6:41 तब यहूदीमन यीसू ऊपर बड़बड़ाय लगिन, काबरकि ओह ये कहे रिहिस, “मेंह ओ रोटी अंव, जऊन ह स्वरग ले उतरिस।”
JOH 6:42 ओमन कहिन, “का येह यूसुफ के बेटा यीसू नो हय, जेकर दाई-ददा ला हमन जानथन? तब ओह कइसने कह सकथे कि ओह स्वरग ले उतरे हवय?”
JOH 6:43 यीसू ह ओमन ला ये जबाब दीस, “आपस म बड़बड़ाय बर बंद करव।
JOH 6:44 मोर करा कोनो नइं आ सकय, जब तक ददा जऊन ह मोला पठोय हवय, ओला मोर तरफ नइं खींचय; अऊ मेंह ओला आखिरी दिन म जियाहूं।
JOH 6:45 अगमजानीमन के किताब म ये लिखे हवय: ‘ओ जम्मो झन परमेसर के दुवारा सिखोय जाहीं।’ जऊन कोनो ददा के सुनथे अऊ ओकर ले सीखथे, ओह मोर करा आथे।
JOH 6:46 कोनो भी ददा ला नइं देखे हवंय, सिरिप ओकर छोंड़, जऊन ह परमेसर कोति ले आय हवय, सिरिप ओहीच ह ददा ला देखे हवय।
JOH 6:47 मेंह तुमन ला सच कहथंव, जऊन ह बिसवास करथे, ओह परमेसर के संग सदाकाल के जिनगी पाथे।
JOH 6:48 जिनगी के रोटी मेंह अंव।
JOH 6:49 तुम्हर पुरखामन निरजन जगह म मन्ना खाईन, पर ओमन मर गीन।
JOH 6:50 पर येह ओ रोटी अय, जऊन ह स्वरग ले उतरे हवय ताकि मनखे ह येला खावय अऊ झन मरय।
JOH 6:51 मेंह ओ जीयत रोटी अंव, जऊन ह स्वरग ले उतरिस। यदि कोनो ये रोटी म ले खाही, त ओह सदाकाल तक जीयत रहिही। ओ रोटी जऊन ला मेंह संसार के जिनगी बर दूहूं, ओह मोर मांस ए।”
JOH 6:52 येला सुनके यहूदीमन आपस म ये कहिके बहस करे लगिन, “ये मनखे ह हमन ला अपन मांस खाय बर कइसने दे सकथे?”
JOH 6:53 यीसू ह ओमन ला कहिस, “मेंह तुमन ला सच कहथंव, जब तक तुमन मनखे के बेटा के मांस ला नइं खावव अऊ ओकर लहू ला नइं पीयव, तब तक तुमन म जिनगी नइं ए।
JOH 6:54 जऊन कोनो मोर मांस खाथे अऊ मोर लहू पीथे, ओकर करा परमेसर के संग सदाकाल के जिनगी हवय, अऊ मेंह ओला आखिरी दिन म जियाहूं।
JOH 6:55 काबरकि मोर मांस ह सही भोजन अय अऊ मोर लहू ह सही म पीये के चीज अय।
JOH 6:56 जऊन कोनो मोर मांस खाथे अऊ मोर लहू पीथे, ओह मोर म बने रहिथे, अऊ मेंह ओमा बने रहिथंव।
JOH 6:57 जइसने जीयत ददा ह मोला पठोईस अऊ ददा के कारन मेंह जीयत हवंव, ओहीच किसम ले जऊन ह मोला खाही, ओह मोर कारन जीयत रहिही।
JOH 6:58 येह ओ रोटी ए, जऊन ह स्वरग ले उतरिस। हमर पुरखामन मन्ना खाईन अऊ मर गीन, पर जऊन ह ये रोटी ला खाही, ओह सदाकाल तक जीयत रहिही।”
JOH 6:59 यीसू ह ये बातमन ला कफरनहूम के एक सभा-घर म उपदेस देवत कहिस।
JOH 6:60 येला सुनके, यीसू के कतको चेलामन कहिन, “ये उपदेस ला गरहन करई कठिन ए।”
JOH 6:61 यीसू ह अपन मन म जान डारिस कि ओकर चेलामन कुड़कुड़ावत हवंय; एकरसेति ओह ओमन ला कहिस, “का ये बात ले तुमन ला ठेस लगथे?
JOH 6:62 तब तुम्हर का होही, यदि तुमन मनखे के बेटा ला जिहां ओह पहिली रिहिस, उहां ऊपर जावत देखहू त?
JOH 6:63 पबितर आतमा ह जिनगी देथे; मांस ले कोनो फायदा नइं होवय। जऊन बात मेंह तुमन ला कहे हवंव, ओमन आतमा अऊ जिनगी अंय।
JOH 6:64 पर तुमन म कुछू मनखे हवंय, जऊन मन ये बातमन ला बिसवास नइं करंय।” काबरकि यीसू ह सुरू ले जानत रिहिस कि ओमा ले कोन बिसवास नइं करंय अऊ कोन ह ओला धोखा दीही।
JOH 6:65 यीसू ह ये घलो कहिस, “एकरे कारन मेंह तुमन ला कहेंव कि जब तक ददा कोति ले बरदान नइं मिलय, तब तक कोनो मोर करा नइं आ सकय।”
JOH 6:66 एकर बाद, यीसू के कतको चेलामन ओला छोंड़के वापिस चल दीन अऊ ओकर पाछू नइं गीन।
JOH 6:67 तब यीसू ह बारह चेलामन ले पुछिस, “का तुमन घलो मोला छोंड़के जाय चाहत हव?”
JOH 6:68 सिमोन पतरस ह जबाब देके कहिस, “हे परभू, हमन काकर करा जाबो? परमेसर के संग सदाकाल के जिनगी के बात तो तोर करा हवय।
JOH 6:69 हमन बिसवास करथन अऊ जानत हवन कि तेंह परमेसर के पबितर बेटा अस।”
JOH 6:70 तब यीसू ह ओमन ला कहिस, “का मेंह तुमन बारहों झन ला नइं चुने हवंव? तभो ले तुमन ले एक झन सैतान ए?”
JOH 6:71 (यीसू ह ये बात सिमोन इस्करियोती के बेटा यहूदा के बारे म कहिस, काबरकि ओह ओ बारहों म ले ओ मनखे रहय, जऊन ह बाद म यीसू ला धोखा देवइया रिहिस।)
JOH 7:1 एकर बाद, यीसू ह गलील प्रदेस म एती-ओती गीस। ओह यहूदिया प्रदेस ला नइं जाय चाहत रिहिस, काबरकि यहूदीमन उहां ओला मार डारे बर बाट जोहत रिहिन।
JOH 7:2 पर जब यहूदीमन के पबितर-तम्बूमन के तिहार ह लकठा आईस,
JOH 7:3 त यीसू के भाईमन ओला कहिन, “तेंह ये जगह ला छोंड़के यहूदिया प्रदेस म चले जा, ताकि जऊन काम तेंह करथस, ओला तोर चेलामन घलो देखंय।
JOH 7:4 काबरकि जऊन मनखे ह नांव कमाय चाहथे, ओह गुपत म काम नइं करय। जब तेंह ये काम करथस, त अपनआप ला संसार के मनखेमन ला देखा।”
JOH 7:5 अऊ त अऊ ओकर खुद के भाईमन ओकर ऊपर बिसवास नइं करत रिहिन।
JOH 7:6 तब यीसू ह अपन भाईमन ला कहिस, “मोर बर सही समय अभी तक नइं आय हवय। तुम्हर बर कोनो घलो समय ह सही ए।
JOH 7:7 संसार ह तुम्हर ले बईरता नइं कर सकय, पर मोर ले बईरता रखथे, काबरकि मेंह एकर बिरोध म गवाही देथंव कि एकर काममन खराप अंय।
JOH 7:8 तुमन ये तिहार म जावव। मेंह अभी ये तिहार म नइं जावंव, काबरकि मोर बर अभी तक सही समय नइं आय हवय।”
JOH 7:9 ये कहिके, ओह गलील प्रदेस म रूक गीस।
JOH 7:10 पर जब यीसू के भाईमन तिहार मनाय बर चल दीन, त ओह घलो गीस, पर ओह खुलेआम नइं जाके गुपत ढंग ले उहां गीस।
JOH 7:11 तिहार के बखत यहूदीमन ओला खोजत रिहिन अऊ ये पुछत रिहिन, “ओ मनखे ह कहां हवय?”
JOH 7:12 मनखेमन के भीड़ म ओकर बारे म बहुंत कानाफूसी होवत रहय। कुछू मनखेमन कहत रिहिन, “ओह बने मनखे ए।” पर कुछू मनखेमन कहंय, “नइं, ओह मनखेमन ला धोखा देथे।”
JOH 7:13 पर यहूदीमन के डर के कारन, यीसू के बारे म कोनो मनखे खुलेआम कुछू नइं कहत रिहिन।
JOH 7:14 जब तिहार के आधा समय बीत गे, तब यीसू ह मंदिर म जाके उपदेस देवन लगिस।
JOH 7:15 यहूदीमन अचम्भो करके कहन लगिन, “बिगर सीखे ये मनखे ह अतेक जादा कइसने जानथे?”
JOH 7:16 यीसू ह ओमन ला जबाब दीस, “जऊन उपदेस मेंह देवत हंव, ओह मोर खुद के नो हय। येह ओकर करा ले आथे, जऊन ह मोला पठोय हवय।
JOH 7:17 जऊन ह परमेसर के ईछा म चले बर चाहथे, ओह जान डारही कि मोर उपदेस ह परमेसर कोति ले आथे या फेर मेंह अपन खुद के अधिकार ले गोठियावत हंव।
JOH 7:18 जऊन ह अपन खुद के अधिकार ले गोठियाथे, ओह अपन खुद के महिमा चाहथे, पर जऊन ह अपन पठोइया के महिमा चाहथे, ओह सच्चा मनखे ए, अऊ ओमा कुछू भी गलत बात नइं ए।
JOH 7:19 का मूसा ह तुमन ला कानून नइं देय हवय? तभो ले तुमन ले एको झन घलो ओ कानून ला नइं मानय। तुमन काबर मोला मार डारे के कोसिस करत हव?”
JOH 7:20 भीड़ के मनखेमन ओला जबाब दीन, “तोर म परेत आतमा हवय। कोन ह तोला मार डारे के कोसिस करत हे?”
JOH 7:21 यीसू ह ओमन ला कहिस, “मेंह एक ठन अचरज के काम करेंव, अऊ तुमन जम्मो झन अचम्भो करत हव।
JOH 7:22 मूसा ह तुमन ला खतना करे के हुकूम दीस, (असल म येह मूसा करा ले नइं आईस, पर येह कुल के मुखियामन ले चले आवत हवय), अऊ तुमन बिसराम के दिन म घलो लइका के खतना करथव।
JOH 7:23 यदि बिसराम के दिन म एक लइका के खतना करे जा सकथे, अऊ मूसा के कानून ह नइं टूटय, त तुमन मोर ऊपर काबर नराज होवत हव कि मेंह बिसराम के दिन म एक मनखे ला बेमारी ले पूरा ठीक कर दे हवंव?
JOH 7:24 मुहूं देखके नियाय झन करव। पर सही-सही नियाय करव।”
JOH 7:25 तब यरूसलेम के कुछू मनखेमन कहन लगिन, “का येह ओ मनखे नो हय, जऊन ला मनखेमन मार डारे बर खोजत हवंय?
JOH 7:26 ओह इहां हवय अऊ खुल्लम-खुल्ला गोठियावत हवय, अऊ ओमन ओला कुछू नइं कहत हवंय। हो सकथे कि अधिकारीमन सही म जान गे हवंय कि एहीच ह मसीह अय?
JOH 7:27 पर हमन तो जानथन कि ये मनखे ह कहां के अय; जब मसीह ह आही, त कोनो ला पता नइं चलही कि ओह कहां के अय।”
JOH 7:28 तब यीसू ह मंदिर म उपदेस देवत पुकारके कहिस, “तुमन मोला जानथव अऊ तुमन ये घलो जानथव कि मेंह कहां के अंव। मेंह इहां खुद नइं आय हवंव, पर जऊन ह मोला पठोय हवय, ओह सच्चा ए। तुमन ओला नइं जानव।
JOH 7:29 पर मेंह ओला जानथंव काबरकि मेंह ओकर करा ले आय हवंव अऊ ओह मोला पठोय हवय।”
JOH 7:30 तब ओमन ओला पकड़े के कोसिस करिन, पर कोनो ओकर ऊपर हांथ नइं लगाईन, काबरकि ओकर समय ह अब तक नइं आय रिहिस।
JOH 7:31 तभो ले भीड़ म ले बहुंत झन ओकर ऊपर बिसवास करिन। ओमन कहिन, “जब मसीह ह आही, त का ओह ये मनखे ले बड़के अचरज के चिनहां देखाही?”
JOH 7:32 फरीसीमन मनखेमन ला यीसू के बारे म अइसने कानाफूसी करत सुनिन, त मुखिया पुरोहित अऊ फरीसीमन यीसू ला पकड़े बर मंदिर के सिपाहीमन ला पठोईन।
JOH 7:33 तब यीसू ह कहिस, “मेंह तुम्हर संग सिरिप थोरकन समय तक हवंव, तब मेंह ओकर करा चले जाहूं, जऊन ह मोला पठोय हवय।
JOH 7:34 तुमन मोला खोजहू, पर मोला नइं पाहू, अऊ जिहां मेंह हवंव, उहां तुमन नइं आ सकव।”
JOH 7:35 यहूदीमन एक-दूसर ले कहिन, “ये मनखे ह कहां जाही कि हमन ओला नइं पाबो? का येह हमर ओ मनखेमन करा जाही, जऊन मन यूनानीमन के बीच म तितिर-बितिर होके रहिथें, अऊ यूनानीमन ला घलो उपदेस दीही?
JOH 7:36 ओकर ये कहे के का मतलब ए, ‘तुमन मोला खोजहू, पर मोला नइं पाहू,’ अऊ ‘जिहां मेंह हवंव, उहां तुमन नइं आ सकव?’ ”
JOH 7:37 तिहार के आखिरी दिन जऊन ह सबले जादा महत्व के दिन रिहिस, यीसू ह ठाढ़ होईस अऊ चिचियाके कहिस, “कहूं कोनो पीयासन हवय, त ओह मोर करा आके पीयय।
JOH 7:38 जऊन ह मोर ऊपर बिसवास करथे, परमेसर के बचन के कहे के मुताबिक ओकर हिरदय ले जीयत पानी के नदी बहे लगही।”
JOH 7:39 यीसू ह येला ओ पबितर आतमा के बारे म कहिस, जऊन ह यीसू ऊपर बिसवास करइयामन ला बाद म मिलने वाला रिहिस। ओ समय तक पबितर आतमा ह नइं दिये गे रिहिस, काबरकि यीसू ह अब तक अपन महिमा म नइं पहुंचे रिहिस।
JOH 7:40 ओकर ये बात ला सुनके कुछू मनखेमन कहिन, “सही म ये मनखे ह ओ अगमजानी ए, जऊन ह अवइया रिहिस।”
JOH 7:41 आने मन कहिन, “येह मसीह अय।” पर कुछू अऊ मनखेमन कहिन, “गलील प्रदेस ले मसीह ह कइसने आ सकथे?
JOH 7:42 का परमेसर के बचन म ये नइं लिखे हवय कि मसीह ह दाऊद के बंस अऊ बैतलहम गांव ले आही, जिहां दाऊद रहत रिहिस?”
JOH 7:43 ये किसम ले यीसू के कारन मनखेमन म मतभेद हो गीस।
JOH 7:44 ओमा ले कुछू झन ओला पकड़े चाहत रिहिन, पर कोनो ओकर ऊपर हांथ नइं डारिन।
JOH 7:45 आखिर म, मंदिर के सिपाहीमन मुखिया पुरोहित अऊ फरीसीमन करा वापिस चल दीन। तब ओमन मंदिर के सिपाहीमन ले पुछिन, “तुमन यीसू ला पकड़के काबर नइं लानेव?”
JOH 7:46 सिपाहीमन जबाब दीन, “जऊन किसम ले ये मनखे ह गोठियाथे, वइसने आज तक कोनो नइं गोठियाय हवय।”
JOH 7:47 फरीसीमन ओमन ला कहिन, “का ओह तुमन ला घलो भरमा दीस?
JOH 7:48 का अधिकारी या फरीसीमन ले कोनो ओकर ऊपर बिसवास करे हवंय?
JOH 7:49 नइं न! पर ये भीड़ के मनखे, जऊन मन कानून के बारे म कुछू नइं जानंय, ओमन सरापित अंय।”
JOH 7:50 निकुदेमुस जऊन ह यीसू करा पहिली गे रिहिस अऊ अगुवामन ले एक झन रिहिस, ओमन ला कहिस,
JOH 7:51 “हमर कानून के मुताबिक, हमन कोनो मनखे ला दोसी नइं ठहिरा सकन, जब तक कि पहिली ओकर बात ला नइं सुन लेवन अऊ ये नइं जान लेवन कि ओह का करे हवय?”
JOH 7:52 ओमन कहिन, “का तेंह घलो गलील प्रदेस के अस? परमेसर के बचन म खोज, त तेंह पाबे कि गलील प्रदेस ले कोनो अगमजानी नइं आवय।”
JOH 7:53 तब ओमन जम्मो झन अपन-अपन घर चल दीन।
JOH 8:1 पर यीसू ह जैतून पहाड़ ऊपर गीस।
JOH 8:2 अऊ बड़े बिहनियां ओह फेर मंदिर म आईस। उहां जम्मो मनखेमन ओकर चारों खूंट जूर गीन; अऊ ओह बईठके ओमन ला उपदेस देवन लगिस।
JOH 8:3 तब कानून के गुरू अऊ फरीसीमन एक माईलोगन ला लानिन, जऊन ह छिनारी म पकड़े गे रिहिस। ओमन ओला ओ जम्मो झन के आघू म ठाढ़ करिन अऊ यीसू ला कहिन,
JOH 8:4 “हे गुरू, ये माईलोगन ह छिनारी करत पकड़े गे हवय।
JOH 8:5 हमर कानून म, मूसा ह हमन ला हुकूम दे हवय कि अइसने माईलोगन ला पथरा फटिक-फटिक के मार डारव। पर तेंह एकर बारे म का कहिथस?”
JOH 8:6 ओमन ये सवाल यीसू ला फंसाय खातिर पुछत रिहिन, ताकि ओमन ला ओकर ऊपर दोस लगाय बर एक बहाना मिल जावय। पर यीसू ह झुकिस अऊ अपन अंगरी ले भुइयां ऊपर लिखे लगिस।
JOH 8:7 जब ओमन ओकर ले बार-बार पुछे लगिन, त ओह सीधा ठाढ़ होईस अऊ ओमन ला कहिस, “यदि तुमन के बीच म कोनो बिगर पाप के हवय, त ओही ह ओला पहिली पथरा मारय।”
JOH 8:8 अऊ ओह फेर झुकके अपन अंगरी ले भुइयां ऊपर लिखे लगिस।
JOH 8:9 जब ओमन येला सुनिन, त जम्मो झन बड़े ले लेके छोटे तक, एक-एक करके उहां ले चल दीन। सिरिप यीसू अऊ ओ माईलोगन जऊन ह ओकर आघू म ठाढ़े रहय, उहां रही गीन।
JOH 8:10 तब यीसू ह सीधा ठाढ़ होईस अऊ ओ माईलोगन ले पुछिस, “हे नारी, ओमन कहां गीन? का कोनो तोला दंड नइं दीन?”
JOH 8:11 ओह कहिस, “हे परभू, कोनो नइं।” तब यीसू ह कहिस, “मेंह घलो तोला दंड नइं देवंव। जा अऊ फेर पाप झन करबे।”
JOH 8:12 यीसू ह मनखेमन ले फेर कहिस, “मेंह संसार के अंजोर अंव। जऊन कोनो मोर पाछू आही, ओह अंधियार म कभू नइं चलही, पर ओह जिनगी के अंजोर ला पाही।”
JOH 8:13 फरीसीमन ओला कहिन, “तेंह अपन गवाही खुद देथस; तोर गवाही सच नो हय।”
JOH 8:14 यीसू ह जबाब दीस, “यदि मेंह अपन गवाही खुद देथंव, तभो ले मोर गवाही सच ए काबरकि मेंह जानथंव कि मेंह कहां ले आय हवंव अऊ मेंह कहां जावत हंव। पर तुमन नइं जानव कि मेंह कहां ले आय हवंव अऊ मेंह कहां जावत हंव।
JOH 8:15 तुमन अपन मनखे बुद्धि के मुताबिक नियाय करथव; मेंह खुद काकरो नियाय नइं करंव।
JOH 8:16 अऊ कहूं मेंह नियाय करंव घलो, त मोर नियाय ह सही ए, काबरकि मेंह एके झन नियाय नइं करंव, पर ददा ह मोर संग रहिथे, जऊन ह मोला पठोय हवय।
JOH 8:17 तुम्हर खुद के कानून म ये बात लिखे हवय कि दू झन के गवाही ह सच माने जाथे।
JOH 8:18 मेंह अपन गवाही खुद देथंव, अऊ मोर आने गवाह ददा ए, जऊन ह मोला पठोय हवय।”
JOH 8:19 तब ओमन ओकर ले पुछिन, “तोर ददा कहां हवय?” यीसू ह जबाब देके कहिस, “तुमन न तो मोला जानथव अऊ न ही मोर ददा ला। यदि तुमन मोला जानतेव, त मोर ददा ला घलो जान जातेव।”
JOH 8:20 यीसू ह ये बात मंदिर के अंगना म उपदेस देवत समय उहां कहिस जिहां दान के सन्दूकमन रखे रहंय। तभो ले ओला कोनो नइं पकड़िन, काबरकि ओकर समय अब तक नइं आय रिहिस।
JOH 8:21 यीसू ह फेर ओमन ला कहिस, “मेंह जावत हंव। तुमन मोला खोजहू अऊ अपन पाप म मरहू। जिहां मेंह जावत हंव, उहां तुमन नइं आ सकव।”
JOH 8:22 तब यहूदीमन कहिन, “का ओह अपनआप ला मार डारही, काबरकि ओह कहत हवय, जिहां मेंह जावत हंव, उहां तुमन नइं आ सकव?”
JOH 8:23 यीसू ह ओमन ला कहिस, “तुमन खाल्हे के अव, अऊ मेंह ऊपर के अंव। तुमन ये संसार के अव, पर मेंह ये संसार के नो हंव।
JOH 8:24 एकरसेति मेंह तुमन ला कहेंव कि तुमन अपन पाप म मरहू; यदि तुमन बिसवास नइं करव कि मेंह ओही अंव, त तुमन सही म अपन पाप म मरहू।”
JOH 8:25 ओमन ओकर ले पुछिन, “तेंह कोन अस?” यीसू ह जबाब दीस, “मेंह ओही अंव, जऊन ला सुरू ले मेंह तुमन ला कहत आय हवंव।
JOH 8:26 मोला तुम्हर बारे म बहुंत बात कहना हे, अऊ तुम्हर फैसला करना हे; पर जऊन ह मोला पठोय हवय, ओह सच्चा ए, अऊ जऊन कुछू मेंह ओकर ले सुने हवंव, ओहीच बात मेंह संसार ला बताथंव।”
JOH 8:27 पर ओमन नइं समझिन कि यीसू ह ओमन ला अपन ददा परमेसर के बारे म कहत रिहिस।
JOH 8:28 तब यीसू ह कहिस, “जब तुमन मनखे के बेटा ला ऊपर चघाहू, तभे तुमन जानहू कि मेंह कोन अंव, अऊ मेंह अपनआप ले कुछू नइं करंव, पर जइसने ददा ह मोला सिखोय हवय, ओहीच बात गोठियाथंव।
JOH 8:29 जऊन ह मोला पठोय हवय, ओह मोर संग हवय, ओह मोला अकेला नइं छोंड़ दे हवय, काबरकि मेंह हमेसा ओही काम करथंव, जेकर ले ओह खुस होथे।”
JOH 8:30 जब ओह ये बात कहिस, त बहुंत मनखेमन ओकर ऊपर बिसवास करिन।
JOH 8:31 जऊन यहूदीमन यीसू ऊपर बिसवास करे रिहिन, ओमन ला यीसू ह कहिस, “यदि तुमन मोर उपदेस के मुताबिक चलथव, त तुमन सही म मोर चेला अव।
JOH 8:32 तब तुमन सच ला जानहू अऊ सच ह तुमन ला सुतंतर करही।”
JOH 8:33 ओमन ओला जबाब दीन, “हमन तो अब्राहम के संतान अन अऊ कभू काकरो गुलाम नइं रहेंन। तोर ये कहे के का मतलब ए कि हमन सुतंतर हो जाबो?”
JOH 8:34 यीसू ह ओमन ला कहिस, “मेंह तुमन ला सच कहथंव कि जऊन ह पाप करथे, ओह पाप के गुलाम ए।
JOH 8:35 गुलाम ह हमेसा घर म नइं रहय, पर बेटा ह हमेसा घर म रहिथे।
JOH 8:36 एकरसेति यदि बेटा ह तुमन ला सुतंतर करही, त सही म तुमन सुतंतर हो जाहू।
JOH 8:37 मेंह जानथंव कि तुमन अब्राहम के संतान अव। तभो ले तुमन मोला मार डारे चाहत हव, काबरकि मोर बचन बर तुम्हर हिरदय म कोनो जगह नइं ए।
JOH 8:38 मेंह तुमन ला ओहीच बात कहत हंव, जऊन ला मेंह अपन ददा के इहां देखे हवंव अऊ तुमन ओही करथव, जऊन ला तुमन अपन ददा ले सुने हवव।”
JOH 8:39 ओमन यीसू ला कहिन, “हमर पुरखा तो अब्राहम ए।” तब यीसू ह कहिस, “यदि तुमन अब्राहम के संतान होतेव, त तुमन अब्राहम के सहीं काम घलो करतेव।
JOH 8:40 पर अब तुमन मोर सहीं मनखे ला मार डारे चाहथव, जऊन ह परमेसर ले सुने सच बात तुमन ला बता दीस। अब्राहम ह अइसने नइं करिस।
JOH 8:41 तुमन अपन ददा के सहीं काम करत हव।” ओमन ओला कहिन, “हमन बेभिचार ले नइं जनमे हवन। हमर सिरिप एके झन ददा हवय, अऊ ओह खुद परमेसर ए।”
JOH 8:42 यीसू ह ओमन ला कहिस, “यदि परमेसर ह तुम्हर ददा होतिस, त तुमन मोर ले मया करतेव, काबरकि मेंह परमेसर म ले आय हवंव अऊ अब इहां हवंव। मेंह अपन खुद होके नइं आय हवंव, पर ओही ह मोला पठोय हवय।
JOH 8:43 तुमन मोर बात ला काबर नइं समझव? काबरकि जऊन बात मेंह कहथंव, ओला सुन नइं सकव।
JOH 8:44 तुमन तो अपन ददा सैतान के अव, अऊ तुमन अपन ददा के ईछा ला पूरा करे चाहथव। ओह तो सुरूच ले हतियारा रिहिस। ओह सच के रसता म नइं चलिस, काबरकि ओमा सच हवेच नइं। जब ओह लबारी गोठियाथे, त ओह अपन आदत के मुताबिक गोठियाथे, काबरकि ओह लबरा ए अऊ लबारी के ददा ए।
JOH 8:45 पर मेंह सच कहिथंव, तुमन मोर ऊपर बिसवास नइं करव।
JOH 8:46 का तुमन ले कोनो मोला पापी ठहिरा सकथे? यदि मेंह सच कहत हंव, तब तुमन मोर ऊपर काबर बिसवास नइं करव?
JOH 8:47 जऊन ह परमेसर के अय, ओह परमेसर के बात ला सुनथे। तुमन परमेसर के नो हव, एकरसेति तुमन ओकर बात ला नइं सुनव।”
JOH 8:48 यहूदीमन ओला जबाब दीन, “का हमन सही नइं कहिथन कि तेंह एक सामरी मनखे अस, अऊ तोर म परेत आतमा हवय।”
JOH 8:49 यीसू ह कहिस, “मोर म परेत आतमा नइं ए, पर मेंह अपन ददा के आदर करथंव, अऊ तुमन मोर निरादर करथव।
JOH 8:50 मेंह अपन महिमा नइं चाहंव, पर परमेसर ह मोर महिमा करे चाहथे अऊ ओही ह नियाय करथे।
JOH 8:51 मेंह तुमन ला सच कहथंव, यदि कोनो मोर बात ला मानही, त ओह कभू नइं मरही।”
JOH 8:52 तब यहूदीमन ओला कहिन, “अब हमन सही म जान डारेंन कि तोर म परेत आतमा हवय। अब्राहम ह मर गीस अऊ अगमजानीमन घलो मर गीन, पर तेंह कहिथस कि यदि कोनो तोर बात ला मानही, त ओह कभू नइं मरय।
JOH 8:53 का तेंह हमर पुरखा अब्राहम ले बड़े अस? ओह मर गीस, अऊ अगमजानीमन घलो मर गीन। तेंह अपनआप ला का समझथस?”
JOH 8:54 यीसू ह जबाब दीस, “यदि मेंह अपनआप के महिमा करंव, त मोर महिमा के कुछू मतलब नो हय। पर मोर ददा ह मोर महिमा करथे, जऊन ला तुमन अपन परमेसर कहिथव।
JOH 8:55 तुमन ओला नइं जानव, पर मेंह ओला जानथंव। यदि मेंह कहंव कि मेंह ओला नइं जानंव, त मेंह घलो तुम्हर सहीं लबरा ठहिरहूं, पर मेंह ओला जानथंव अऊ ओकर बात ला मानथंव।
JOH 8:56 तुम्हर पुरखा अब्राहम ह मोर दिन ला देखे के आसा म आनंद मनाईस, अऊ ओह येला देखिस अऊ खुस होईस।”
JOH 8:57 यहूदीमन ओला कहिन, “तेंह अभी तो पचास साल के घलो नइं होय हवस, अऊ तेंह कइसने कह सकथस कि तेंह अब्राहम ला देखे हवस।”
JOH 8:58 यीसू ह ओमन ला कहिस, “मेंह तुमन ला सच कहथंव, अब्राहम के जनम होय के पहिली ले मेंह हवंव।”
JOH 8:59 येला सुनके, ओमन यीसू ला मार डारे बर पथरा उठाईन; पर यीसू ह लुकाके मंदिर ले निकल गीस।
JOH 9:1 जब यीसू ह जावत रिहिस, त रसता म ओह एक जनम के अंधरा मनखे ला देखिस।
JOH 9:2 तब ओकर चेलामन ओकर ले पुछिन, “हे गुरू, कोन ह पाप करे रिहिस कि ये मनखे ह अंधरा जनमिस, खुद ये मनखे या फेर ओकर दाई-ददा?”
JOH 9:3 यीसू ह कहिस, “येह एकर या एकर दाई-ददा के पाप के कारन नो हय; पर येह एकरसेति होईस कि परमेसर के काम ह एकर जिनगी म परगट होवय।
JOH 9:4 जऊन ह मोला पठोय हवय, ओकर काम ला दिन के रहिते-रहत हमन ला करना जरूरी ए। रात आवत हे, जब कोनो मनखे काम नइं कर सकंय।
JOH 9:5 जब तक मेंह संसार म हवंव, तब तक मेंह संसार के अंजोर अंव।”
JOH 9:6 ये कहिके यीसू ह भुइयां म थूकिस, अऊ थूक ले माटी ला सानिस अऊ ओला ओ अंधरा के आंखीमन म लगाईस,
JOH 9:7 अऊ ओला कहिस, “जा अऊ सीलोम (एकर मतलब होथे—पठोय गेय) के कुन्ड म धो ले।” तब ओ मनखे ह कुन्ड म जाके अपन आंखीमन ला धोईस, अऊ ओह देखे लगिस, अऊ देखत वापिस आईस।
JOH 9:8 ओकर परोसीमन अऊ जऊन मन ओला पहिली भीख मांगत देखे रिहिन, ओमन कहिन, “का येह ओहीच मनखे नो हय, जऊन ह बईठके भीख मांगे करत रिहिस?”
JOH 9:9 कुछू मनखेमन कहिन, “हव, येह ओहीच अय।” आने मन कहिन, “नइं, ओह सिरिप ओकर सहीं दिखथे।” पर ओ मनखे ह कहिस, “मेंह ओहीच मनखे अंव।”
JOH 9:10 ओमन ओकर ले पुछिन, “तब तोर आंखीमन के अंधरापन ह कइसे ठीक हो गे?”
JOH 9:11 ओह जबाब दीस, “ओ मनखे जऊन ला यीसू कहिथें, ओह थोरकन माटी ला सानिस अऊ ओला मोर आंखीमन म लगाईस, अऊ मोला कहिस कि सीलोम के कुन्ड म जाके धो ले। तब मेंह उहां जाके अपन आंखीमन ला धोएंव अऊ तब देखन लगेंव।”
JOH 9:12 ओमन ओकर ले पुछिन, “ओह कहां हवय?” ओह कहिस, “मेंह नइं जानंव।”
JOH 9:13 ओमन ओ मनखे जऊन ह पहिली अंधरा रिहिस, ओला फरीसीमन करा लानिन।
JOH 9:14 जऊन दिन यीसू ह माटी सानके ओ मनखे के आंखीमन ला ठीक करे रिहिस, ओह बिसराम के दिन रिहिस।
JOH 9:15 एकरसेति फरीसीमन घलो ओ मनखे ले पुछिन कि कइसने ओकर आंखीमन ठीक हो गीन। ओ मनखे ह ओमन ला कहिस, “ओह मोर आंखीमन म माटी ला सानके लगाईस, अऊ मेंह आंखीमन ला धोएंव अऊ अब देखत हंव।”
JOH 9:16 कुछू फरीसीमन कहिन, “ओ मनखे ह परमेसर करा ले नइं आय हवय, काबरकि ओह बिसराम दिन के कानून ला नइं मानय।” पर आने मन कहिन, “एक पापी मनखे ह अइसने चमतकार के काम कइसने कर सकथे?” अऊ ओमन के बीच म फूट पड़ गीस।
JOH 9:17 आखिर म, ओमन फेर एक बार ओ अंधरा मनखे ले पुछिन, “ओ मनखे जऊन ह तोर आंखीमन ला ठीक करिस, ओकर बारे म तेंह का कहिथस?” ओ मनखे ह कहिस, “ओह एक अगमजानी ए।”
JOH 9:18 यहूदीमन अभी तक ले बिसवास नइं करत रिहिन कि ओह अंधरा रिहिस अऊ अब देखत हवय; एकरसेति ओमन ओकर दाई-ददा ला बलाके पुछिन,
JOH 9:19 “का येह तुम्हर बेटा ए, जऊन ला तुमन कहिथव कि येह अंधरा जनमे रिहिस? पर येह कइसने होईस कि ओह अब देखत हवय?”
JOH 9:20 ओकर दाई-ददा जबाब दीन, “हमन जानथन कि येह हमर बेटा ए, अऊ येह अंधरा जनमे रिहिस।
JOH 9:21 पर येह अब कइसने देखे लगिस या कोन ह एकर आंखीमन ला ठीक करिस, हमन नइं जानन। एकरे ले पुछव। येह लइका नो हय; येह अपन बारे म खुद बताही।”
JOH 9:22 ओकर दाई-ददा ये बात एकर खातिर कहिन, काबरकि ओमन ओ यहूदीमन ले डरावत रिहिन, जेमन पहिली ले ठान ले रिहिन कि यदि कोनो यीसू ला मसीह मान लीही, त ओला सभा-घर ले निकाल दिये जाही।
JOH 9:23 एकरसेति ओकर दाई-ददा कहिन, “येह लइका नो हय; एकरे ले पुछव।”
JOH 9:24 तब ओमन दूसर बार ओ मनखे ला बलाईन जऊन ह पहिली अंधरा रिहिस, अऊ ओला कहिन, “परमेसर के महिमा कर। हमन जानथन कि ओ मनखे ह पापी ए।”
JOH 9:25 ओह जबाब दीस, “ओह पापी ए या नो हय, मेंह नइं जानंव। पर मेंह एक बात ला जानथंव कि मेंह अंधरा रहेंव, पर अब देखत हंव।”
JOH 9:26 तब ओमन ओकर ले पुछिन, “ओह तोर संग का करिस? ओह तोर आंखीमन ला कइसने ठीक करिस?”
JOH 9:27 ओह जबाब दीस, “मेंह तुमन ला पहिलेच बता डारे हवंव अऊ तुमन नइं सुनेव। तुमन येला फेर काबर सुने चाहत हव? का तुमन घलो ओकर चेला बने बर चाहत हव?”
JOH 9:28 तब ओमन ओकर बेजत्ती करके कहिन, “तेंह ओकर चेला अस! हमन तो मूसा के चेला अन!
JOH 9:29 हमन जानथन कि परमेसर ह मूसा ले गोठियाईस, पर जहां तक ओ मनखे के बात ए, हमन ये घलो नइं जानन कि ओह कहां के अय।”
JOH 9:30 ओ मनखे ह जबाब दीस, “येह अचम्भो के बात ए। तुमन नइं जानव कि ओह कहां के अय, जबकि ओह मोर आंखीमन ला ठीक कर दे हवय।
JOH 9:31 हमन जानथन कि परमेसर ह पापीमन के नइं सुनय, पर जऊन मनखे ह परमेसर के भक्ति करथे अऊ ओकर ईछा के मुताबिक चलथे, परमेसर ह ओकर सुनथे।
JOH 9:32 संसार के सुरू ले लेके आज तक, ये कभू सुने म नइं आईस कि कोनो जनम के अंधरा मनखे के आंखीमन ला ठीक करिस।
JOH 9:33 यदि ये मनखे ह परमेसर करा ले नइं आय होतिस, त ओह कुछू नइं कर सकतिस।”
JOH 9:34 ओमन ओला कहिन, “तेंह तो पूरा पाप म जनमे हवस, अऊ तेंह हमन ला का सिखोथस!” अऊ ओमन ओला सभा-घर ले बाहिर निकाल दीन।
JOH 9:35 यीसू ह सुनिस कि ओमन ओ मनखे ला बाहिर निकाल दे हवंय, अऊ जब ओह ओला भेंटिस त कहिस, “का तेंह मनखे के बेटा ऊपर बिसवास करथस?”
JOH 9:36 ओ मनखे ह पुछिस, “ए महाराज, ओह कोन ए? मोला बता, ताकि मेंह ओकर ऊपर बिसवास करंव।”
JOH 9:37 यीसू ह ओला कहिस, “तेंह ओला देख डारे हस। येह ओहीच अय, जऊन ह तोर संग गोठियावत हवय।”
JOH 9:38 तब ओ मनखे ह कहिस, “हे परभू, मेंह बिसवास करथंव।” अऊ ओह ओकर दंडवत करिस।
JOH 9:39 यीसू ह कहिस, “मेंह ये संसार म मनखेमन के नियाय करे बर आय हवंव, ताकि जऊन मन अंधरा अंय, ओमन देखंय अऊ जऊन मन देखत हवंय, ओमन अंधरा हो जावंय।”
JOH 9:40 कुछू फरीसी, जऊन मन यीसू के संग रिहिन, जब ओमन यीसू के ये गोठ ला सुनिन, त ओकर ले पुछिन, “का तेंह ये कहिथस कि हमन घलो अंधरा अन?”
JOH 9:41 यीसू ह ओमन ला कहिस, “यदि तुमन अंधरा होतेव, त तुमन पाप के दोसीदार नइं होतेव, पर जब तुमन ये कहिथव कि तुमन देख सकत हव, त तुम्हर दोस ह तुमन म बने रहिथे।”
JOH 10:1 “मेंह तुमन ला सच कहत हंव कि जऊन मनखे ह दुवारी म ले होके भेड़ के कोठा म नइं आवय, पर कोनो आने कोति ले चघके आथे, ओह चोर अऊ डाकू अय।
JOH 10:2 जऊन मनखे ह दुवारी म ले होके भीतर जाथे, ओह अपन भेड़मन के चरवाहा अय।
JOH 10:3 ओकर बर रखवार ह दुवारी ला खोल देथे अऊ भेड़मन ओकर अवाज ला सुनथें। ओह अपन भेड़मन ला नांव लेके बलाथे अऊ ओमन ला बाहिर ले जाथे।
JOH 10:4 जब ओह अपन जम्मो भेड़मन ला बाहिर निकाल लेथे, तब ओह ओमन के आघू-आघू जाथे अऊ ओकर भेड़मन ओकर पाछू-पाछू चलथें, काबरकि ओमन ओकर अवाज ला चिनथें।
JOH 10:5 ओमन कोनो अनजान मनखे के पाछू नइं जावंय, पर ओमन ओकर ले दूरिहा भाग जाथें, काबरकि ओमन अनजान मनखे के अवाज ला नइं चिनहें।”
JOH 10:6 यीसू ह ओमन ला ये पटंतर कहिस, पर ओमन नइं समझिन कि ओह का कहत रिहिस।
JOH 10:7 एकरसेति यीसू ह ओमन ला फेर कहिस, “मेंह तुमन ला सच कहत हंव कि भेड़मन बर मेंह दुवारी अंव।
JOH 10:8 ओ जम्मो जऊन मन मोर पहिली आईन, ओमन चोर अऊ डाकू रिहिन, अऊ भेड़मन ओमन के नइं सुनिन।
JOH 10:9 दुवारी मेंह अंव, जऊन ह मोर ले होके भीतर जाही, ओह उद्धार पाही। ओह भीतर-बाहिर आय-जाय करही अऊ चारा पाही।
JOH 10:10 चोर ह सिरिप चोरी करे बर, हतिया करे बर अऊ नास करे बर आथे, पर मेंह एकरसेति आय हवंव, ताकि ओमन जिनगी पावंय अऊ भरपूर जिनगी पावंय।
JOH 10:11 “में ही बने चरवाहा अंव। बने चरवाहा ह भेड़मन बर अपन परान देथे।
JOH 10:12 बनिहार ह न तो चरवाहा अय अऊ न तो भेड़मन के मालिक। एकरसेति जब ओह भेड़िया ला आवत देखथे, त ओह भेड़मन ला छोंड़के भाग जाथे। तब भेड़िया ह भेड़मन ऊपर झपटथे अऊ ओमन ला तितिर-बितिर कर देथे।
JOH 10:13 ओ मनखे ह भाग जाथे काबरकि ओह एक बनिहार ए अऊ ओला भेड़मन के कोनो फिकर नइं रहय।
JOH 10:14 “में ही बने चरवाहा अंव; मेंह अपन भेड़मन ला जानथंव, अऊ मोर भेड़मन मोला जानथें—
JOH 10:15 जइसने ददा ह मोला जानथे अऊ मेंह ददा ला जानथंव—अऊ मेंह भेड़मन बर अपन परान देथंव।
JOH 10:16 मोर अऊ घलो भेड़ हवंय, जऊन मन ये भेड़ के कोठा म नइं एं। मोला ओमन ला घलो लाना जरूरी ए। ओमन घलो मोर अवाज ला सुनहीं; तब एके ठन झुंड अऊ एके झन चरवाहा होही।
JOH 10:17 मोर ददा ह मोर ले एकरसेति मया करथे, काबरकि मेंह अपन परान ला देथंव कि मेंह ओला फेर लेय लंव।
JOH 10:18 कोनो मोर परान नइं ले सकय; पर मेंह अपन खुद के ईछा ले येला देथंव। मोर करा ये अधिकार हवय कि मेंह अपन परान ला दे दंव अऊ ओला फेर लेय लंव। ये हुकूम मोला मोर ददा ले मिले हवय।”
JOH 10:19 यीसू के ये गोठ के खातिर, यहूदीमन के बीच म फेर फूट पर गीस।
JOH 10:20 ओमन ले कतको झन कहिन, “ओमा परेत आतमा हवय अऊ ओह बइहा ए। ओकर गोठ ला काबर सुनबो?”
JOH 10:21 पर आने मन कहिन, “एक परेत आतमा के धरे मनखे ह अइसने नइं गोठियावय। का एक परेत आतमा ह अंधरा के आंखीमन ला बने कर सकथे?”
JOH 10:22 जड़काला के समय रहय, अऊ ओ समय यरूसलेम सहर म अरपन के तिहार मनाय जावत रहय।
JOH 10:23 यीसू ह मंदिर के इलाका म रहय अऊ ओह सुलेमान के परछी म टहलत रहय।
JOH 10:24 यहूदीमन ओकर चारों खूंट जूरके ओला कहिन, “तेंह कब तक हमन ला दुबिधा म रखबे? यदि तेंह मसीह अस, त हमन ला साफ-साफ बता दे।”
JOH 10:25 यीसू ह जबाब देके कहिस, “मेंह तुमन ला बता डारे हवंव, पर तुमन बिसवास नइं करव। जऊन काममन ला मेंह अपन ददा के नांव म करथंव, ओही काममन मोर गवाह हवंय,
JOH 10:26 पर तुमन बिसवास नइं करव, काबरकि तुमन मोर भेड़ नो हव।
JOH 10:27 मोर भेड़मन मोर अवाज ला सुनथें; मेंह ओमन ला जानथंव, अऊ ओमन मोर पाछू-पाछू चलथें।
JOH 10:28 मेंह ओमन ला परमेसर के संग सदाकाल के जिनगी देथंव, अऊ ओमन कभू नास नइं होहीं; अऊ ओमन ला कोनो मोर हांथ ले छीनके नइं ले जा सकय।
JOH 10:29 मोर ददा जऊन ह ओमन ला मोला दे हवय, ओह सबले बड़े अय, अऊ कोनो ओमन ला मोर ददा के हांथ ले छीन नइं सकय।
JOH 10:30 मेंह अऊ मोर ददा एकेच अन।”
JOH 10:31 यहूदीमन यीसू ला मारे बर फेर पथरा उठाईन।
JOH 10:32 पर यीसू ह ओमन ला कहिस, “मेंह तुमन ला ददा कोति ले बहुंते बने काम देखाय हवंव। येमा के कोन काम के सेति तुमन मोर ऊपर पथरा फेंकथव?”
JOH 10:33 यहूदीमन ओला ये जबाब दीन, “कोनो बने काम बर हमन तोला पथरा नइं मारत हवन, पर परमेसर के निन्दा करे के कारन अइसने करथन, काबरकि तेंह एक मनखे होके अपनआप ला परमेसर बनावत हस।”
JOH 10:34 यीसू ह जबाब दीस, “का तुम्हर कानून म ये नइं लिखे हवय, जिहां परमेसर ह कहिस, ‘तुमन ईस्वर अव?’
JOH 10:35 ओह ओमन ला ईस्वर कहिस, जेमन करा परमेसर के बचन आईस अऊ परमेसर के बचन गलत नइं हो सकय।
JOH 10:36 ओकर बारे म तुमन का कहिथव, जऊन ला ददा ह अपन खुद के रूप म अलग करिस अऊ ओला संसार म पठोईस? तुमन ओकर ले कहिथव कि तेंह परमेसर के निन्दा करथस, काबरकि मेंह ये कहेंव कि मेंह परमेसर के बेटा अंव।
JOH 10:37 यदि मेंह अपन ददा के काममन ला नइं करत हंव, त मोर ऊपर बिसवास झन करव।
JOH 10:38 पर यदि मेंह ओ काममन ला करथंव, त चाहे तुमन मोर ऊपर बिसवास झन करव, पर मोर काम ऊपर तो बिसवास करव, ताकि तुमन जान सकव अऊ समझ सकव कि ददा ह मोर म हवय अऊ मेंह ददा म हवंव।”
JOH 10:39 तब ओमन फेर यीसू ला पकड़े के कोसिस करिन, पर ओह ओमन के हांथ ले बचके निकल गीस।
JOH 10:40 तब यीसू ह यरदन नदी के ओ पार वापिस ओ जगह म गीस, जिहां यूहन्ना ह पहिली बतिसमा देवत रिहिस। अऊ ओह उहां रूक गीस।
JOH 10:41 बहुंते मनखेमन ओकर करा आईन अऊ ओमन कहिन, “हालाकि यूहन्ना ह कोनो चमतकार के काम नइं देखाईस, पर जऊन बात यूहन्ना ह ये मनखे के बारे म कहिस, ओ जम्मो बात सच रिहिस।”
JOH 10:42 अऊ उहां बहुंते मनखेमन यीसू ऊपर बिसवास करिन।
JOH 11:1 लाजर नांव के एक मनखे बेमार रहय। ओह, मरियम अऊ ओकर बहिनी मारथा के गांव बैतनियाह के रहय।
JOH 11:2 येह ओहीच मरियम रिहिस, जऊन ह परभू ऊपर इतर तेल ला ढारके ओकर गोड़मन ला अपन बाल ले पोंछे रिहिस; एकरे भाई लाजर ह बेमार रहय।
JOH 11:3 एकरसेति ओ दूनों बहिनी यीसू करा ये खबर पठोईन, “हे परभू, जेकर ले तेंह मया करथस, ओह बेमार हवय।”
JOH 11:4 जब यीसू ह येला सुनिस, त ओह कहिस, “ये बेमारी ले ओकर मिरतू नइं होवय। ये बेमारी ह परमेसर के महिमा खातिर अय, ताकि एकर दुवारा परमेसर के बेटा के महिमा होवय।”
JOH 11:5 यीसू ह मारथा अऊ ओकर बहिनी मरियम, अऊ लाजर ले मया करय।
JOH 11:6 तभो ले जब ओह सुनिस कि लाजर ह बेमार हवय, त ओह जिहां रहय, उहां दू दिन अऊ रूक गीस,
JOH 11:7 अऊ तब ओह अपन चेलामन ला कहिस, “आवव, हमन यहूदिया प्रदेस ला वापिस चलन।”
JOH 11:8 चेलामन ओला कहिन, “हे गुरू, थोरकन देर पहिली यहूदीमन तोर ऊपर पथरा फेंके बर चाहत रिहिन, अऊ तभो ले तेंह उहां वापिस जावत हस।”
JOH 11:9 यीसू ह जबाब दीस, “का दिन म बारह घंटा नइं होवय? यदि कोनो मनखे दिन म चलय, त ओह ठोकर नइं खावय, काबरकि ओह ये संसार के अंजोर ला देखथे।
JOH 11:10 पर यदि कोनो मनखे रात म चलथे, त ओह ठोकर खाथे, काबरकि ओकर करा अंजोर नइं रहय।”
JOH 11:11 ये कहे के बाद, यीसू ह ओमन ला ये घलो कहिस, “हमर संगी लाजर ह सुत गे हवय; पर मेंह उहां ओला जगाय बर जावत हवंव।”
JOH 11:12 ओकर चेलामन कहिन, “हे परभू, यदि ओह सुतत हवय, त ओह बने हो जाही।”
JOH 11:13 यीसू ह ये बात लाजर के मिरतू के बारे म कहत रिहिस, पर ओकर चेलामन ये समझिन कि ओह नींद म सोय के बारे म कहत हवय।
JOH 11:14 तब यीसू ह ओमन ला साफ-साफ बताईस, “लाजर ह मर गे हवय।
JOH 11:15 तुम्हर हित म, मोला खुसी हवय कि मेंह उहां नइं रहंय। एकरे कारन तुमन मोर ऊपर बिसवास करे बर सीखहू। पर अब आवव, हमन ओकर करा चलन।”
JOH 11:16 तब थोमा जऊन ला दिदुमुस घलो कहे जावय, अपन संगी चेलामन ला कहिस, “आवव, हमन घलो चलके ओकर संग मरन।”
JOH 11:17 जब यीसू उहां हबरिस, त ओला पता चलिस कि लाजर के लास ला कबर म रखे चार दिन हो गे हवय।
JOH 11:18 बैतनियाह गांव ह यरूसलेम सहर ले लगभग तीन किलोमीटर के दूरिहा म रहय।
JOH 11:19 अऊ कतको यहूदीमन मारथा अऊ मरियम ला ढाढ़स बंधाय बर आय रहंय, काबरकि ओ दूनों के भाई ह मर गे रहय।
JOH 11:20 जब मारथा ह सुनिस कि यीसू ह आवत हवय, त ओह ओकर ले भेंट करे बर गीस, पर मरियम ह घरेच म बईठे रहय।
JOH 11:21 मारथा ह यीसू ला कहिस, “हे परभू, कहूं तेंह इहां होते, त मोर भाई ह नइं मरतिस।
JOH 11:22 पर अभी घलो मेंह जानथंव कि जऊन कुछू तेंह परमेसर ले मांगबे, ओह तोला दीही।”
JOH 11:23 यीसू ह ओला कहिस, “तोर भाई ह फेर जी उठही।”
JOH 11:24 त मारथा ह कहिस, “मेंह जानथंव कि आखिरी दिन म, जब मरे मनखेमन जी उठहीं, त ओह घलो जी उठही।”
JOH 11:25 यीसू ह ओला कहिस, “मेंह मरे मन ला जियाथंव अऊ जिनगी देथंव। जऊन ह मोर ऊपर बिसवास करथे, कहूं ओह मर घलो जावय, तभो ले ओह जीयत रहिही,
JOH 11:26 अऊ जऊन ह जीयथे अऊ मोर ऊपर बिसवास करथे, ओह परमेसर के संग सदाकाल तक जीही। का तेंह ये बात ला बिसवास करथस?”
JOH 11:27 मारथा ह ओला कहिस, “हां परभू, मेंह बिसवास करथंव कि तेंह परमेसर के बेटा मसीह अस, जऊन ह संसार म अवइया रिहिस।”
JOH 11:28 ये कहे के बाद, मारथा ह वापिस चल दीस अऊ अपन बहिनी मरियम ला बलाके चुपेचाप कहिस, “गुरूजी ह इहां हवय अऊ तोला बलावत हवय।”
JOH 11:29 येला सुनके, मरियम ह तुरते उठिस अऊ यीसू करा गीस।
JOH 11:30 यीसू ह अभी तक ले गांव के भीतर नइं आय रिहिस, पर ओह ओही ठऊर म रहय, जिहां मारथा ह ओकर ले भेंट करे रिहिस।
JOH 11:31 ओ यहूदी जऊन मन मरियम के संग घर म रिहिन अऊ ओला ढाढ़स देवत रिहिन, जब ओमन उहां ये देखिन कि कइसने ओह तुरते उठिस अऊ बाहिर चल दीस, त ओमन ये सोचके ओकर पाछू-पाछू गीन कि ओह कबर म रोये बर जावत होही।
JOH 11:32 जब मरियम ह ओ ठऊर म आईस जिहां यीसू ह रिहिस अऊ ओला देखिस, त ओह यीसू के गोड़ खाल्हे गिरके कहिस, “हे परभू, यदि तेंह इहां होते, त मोर भाई ह नइं मरतिस।”
JOH 11:33 जब यीसू ह ओला अऊ जऊन यहूदीमन ओकर संग आय रिहिन, ओमन ला घलो रोवत देखिस, त आतमा म बहुंत उदास अऊ बियाकुल होईस,
JOH 11:34 अऊ ओह ओमन ले पुछिस, “तुमन ओला कहां रखे हवव?” ओमन ओला कहिन, “हे परभू, चलके देख ले।”
JOH 11:35 यीसू ह रोवन लगिस।
JOH 11:36 तब यहूदीमन कहिन, “देखव, ओह ओकर ले कतेक मया करत रिहिस!”
JOH 11:37 पर ओमा ले कुछू मनखेमन कहिन, “येह अंधरा के आंखी ला बने करिस, पर येह का अतका नइं कर सकिस कि ये मनखे ह नइं मरतिस?”
JOH 11:38 यीसू ह फेर बहुंत उदास होके कबर करा आईस। ओ कबर ह एक खोड़रा म रिहिस, जेकर मुंहाटी म एक ठन बड़े पथरा रखे रहय।
JOH 11:39 यीसू ह कहिस, “पथरा ला टारव।” तब मरे मनखे के बहिनी मारथा ह कहिस, “पर हे परभू, अब ओमा ले बास आवत होही, काबरकि ओला कबर म रखे चार दिन हो गे हवय।”
JOH 11:40 तब यीसू ह कहिस, “का मेंह तोला नइं कहे रहेंव कि यदि तेंह बिसवास करबे, त परमेसर के महिमा ला देखबे?”
JOH 11:41 तब मनखेमन ओ पथरा ला टारिन अऊ यीसू ह ऊपर कोति देखिस अऊ कहिस, “हे ददा, मेंह तोला धनबाद देवत हंव कि तेंह मोर पराथना ला सुन ले हवस।
JOH 11:42 मेंह जानथंव कि तेंह हमेसा मोर पराथना ला सुनथस, पर मेंह ये बात इहां ठाढ़े मनखेमन के सेति कहेंव कि ओमन बिसवास करंय कि तेंह मोला पठोय हवस।”
JOH 11:43 ये कहे बाद, यीसू ह चिचियाके कहिस, “हे लाजर, बाहिर निकल आ।”
JOH 11:44 ओ मरे मनखे ह कबर ले बाहिर निकल आईस। ओकर हांथ अऊ गोड़मन म मलमल कपड़ा के पट्टी लपटाय रहय अऊ ओकर चेहरा म घलो एक कपड़ा लपटाय रहय। यीसू ह मनखेमन ला कहिस, “ओकर कबर के कपड़ा ला खोल दव अऊ ओला जावन देवव।”
JOH 11:45 यहूदीमन ले बहुंते झन, जऊन मन मरियम करा आय रिहिन अऊ यीसू के ये काम ला देखिन, यीसू ऊपर बिसवास करिन।
JOH 11:46 पर ओमा ले कुछू झन फरीसीमन करा गीन अऊ यीसू ह जऊन कुछू करे रिहिस, ओमन ला बताईन।
JOH 11:47 तब मुखिया पुरोहित अऊ फरीसीमन धरम महासभा बलाईन अऊ सभा म ओमन पुछिन, “हमन का करत हवन? इहां ये मनखे ह बहुंते चमतकार के काम देखावत हवय।
JOH 11:48 यदि हमन ओला अइसनेच छोंड़ देबो, त जम्मो मनखेमन ओकर ऊपर बिसवास करे लगहीं अऊ तब रोमी मनखेमन आके हमर जगह अऊ हमर देस दूनों ला ले लीहीं।”
JOH 11:49 तब ओमा ले काइफा नांव के एक झन मनखे, जऊन ह ओ बछर के महा पुरोहित रिहिस, ओमन ले कहिस, “तुमन कुछू नइं जानव।
JOH 11:50 तुमन नइं समझत हव कि तुम्हर बर ये उचित ए कि मनखेमन खातिर एक आदमी ह मरय अऊ पूरा देस ह नास झन होवय।”
JOH 11:51 ओह ये बात ला अपन कोति ले नइं कहिस, पर ओ बछर के महा पुरोहित के रूप म, ओह अगमबानी करिस कि यीसू ह यहूदी जाति खातिर मरही।
JOH 11:52 अऊ न सिरिप यहूदी जाति खातिर पर परमेसर के तितिर-बितिर होय संतानमन खातिर घलो, कि ओमन ला संकेलके एक कर देवय।
JOH 11:53 ओही दिन ले ओमन यीसू ला मार डारे के उपाय करे लगिन।
JOH 11:54 एकर खातिर, यीसू ह यहूदीमन के बीच म खुलेआम आय-जाय ला बंद कर दीस, अऊ उहां ले निरजन प्रदेस के लकठा के एपरैम नांव के एक गांव म चल दीस अऊ उहां अपन चेलामन संग रहे लगिस।
JOH 11:55 जब यहूदीमन के फसह तिहार लकठा आईस, त बहुंत मनखेमन देहात ले यरूसलेम सहर ला गीन, ताकि ओमन उहां अपनआप ला फसह तिहार के पहिली सुध करंय।
JOH 11:56 ओमन यीसू ला खोजत रहंय अऊ मंदिर के अंगना म ठाढ़ होके एक-दूसर ला कहे लगिन, “तोर का बिचार ए? का ओह तिहार म नइं आही?”
JOH 11:57 पर मुखिया पुरोहित अऊ फरीसीमन ये हुकूम दे रिहिन कि कहूं कोनो ला ये पता चलथे कि यीसू ह कहां हवय, त ओह आके बतावय ताकि ओमन यीसू ला पकड़ सकंय।
JOH 12:1 फसह तिहार के छै दिन पहिली यीसू ह बैतनियाह गांव म आईस, जिहां लाजर ह रहत रहय, जऊन ला यीसू ह मरे म ले जियाय रिहिस।
JOH 12:2 उहां यीसू के आदर म एक भोज तियार करे गीस। मारथा ह सेवा करत रहय, अऊ लाजर ह ओमन ले एक झन रहय, जऊन ह यीसू के संग खावत रहय।
JOH 12:3 तब मरियम ह सुध गुलमेंहदी के करीब आधा लीटर बहुंत मंहगा इतर तेल लीस अऊ यीसू के गोड़मन ऊपर ढारिस, अऊ ओह ओकर गोड़मन ला अपन बाल ले पोंछिस। ओ घर ह इतर के महक ले भर गीस।
JOH 12:4 पर यहूदा इस्करियोती नांव के यीसू के एक चेला, जऊन ह पाछू ओला दगा देवइया रहय, कहिस,
JOH 12:5 “ये इतर तेल ला बेचके, पईसा ला गरीबमन ला काबर नइं बांटे गीस? येह तीन सौ दीनार के होय रहितिस।”
JOH 12:6 ओह ये बात एकरसेति नइं कहिस कि ओह गरीबमन के फिकर करय, पर ओह एकरसेति कहिस, काबरकि ओह चोर रिहिस। ओकर करा रूपिया-पईसा के थैली रहय, अऊ जऊन कुछू ओमा डाले जावय, ओमा ले ओह निकाल लेवत रिहिस।
JOH 12:7 यीसू ह कहिस, “ओला छोंड़ देवव। ओह मोर गाड़े जाय के दिन बर इतर तेल ला लगाय हवय।
JOH 12:8 गरीबमन तो हमेसा तुम्हर संग रहिहीं, पर मेंह हमेसा तुम्हर संग नइं रहंव।”
JOH 12:9 इही बीच म, यहूदीमन के एक बड़े भीड़ ला पता चलिस कि यीसू ह बैतनियाह गांव म हवय, त ओमन सिरिप ओकर खातिर ही नइं, पर लाजर ला देखे बर घलो आईन, जऊन ला यीसू ह मरे म ले जियाय रिहिस।
JOH 12:10 तब मुखिया पुरोहितमन लाजर ला घलो मार डारे के उपाय करन लगिन।
JOH 12:11 काबरकि ओकर खातिर कतको यहूदीमन ओमन ला छोंड़के यीसू करा जावत रिहिन अऊ यीसू ऊपर बिसवास करत रिहिन।
JOH 12:12 ओकर दूसर दिन, एक बड़े भीड़ जऊन ह तिहार मनाय बर आय रिहिस, ये सुनिस कि यीसू ह यरूसलेम आवत हवय।
JOH 12:13 त ओमन खजूर के डालीमन ला लेके ओकर ले भेंट करे बर गीन अऊ चिचिया-चिचियाके कहत रिहिन, “होसाना!” “धइन ए ओ, जऊन ह परभू के नांव म आथे!” “धइन ए, इसरायल के राजा!”
JOH 12:14 यीसू ला एक ठन गदही के बछरू मिलिस अऊ ओह ओकर ऊपर बईठ गीस, जइसने कि परमेसर के बचन म लिखे हवय:
JOH 12:15 “हे बेटी सियोन, झन डर; देख, तोर राजा ह गदही के बछेड़ा ऊपर बईठके आवत हवय।”
JOH 12:16 ओकर चेलामन पहिली ये बात ला नइं समझिन। पर जब यीसू के महिमा होईस, त ओमन सुरता करिन कि ये बातमन यीसू के बारे म लिखे गे रिहिस अऊ मनखेमन ओकर संग बचन के मुताबिक करिन।
JOH 12:17 मनखेमन के ओ भीड़ जऊन ह यीसू के संग ओ बखत रिहिस, जब यीसू ह लाजर ला कबर म ले बलाईस अऊ ओला मरे म ले जियाईस, ओमन ये बात के गवाही देवत रिहिन।
JOH 12:18 ये खातिर, बहुंते मनखेमन यीसू ले भेंट करे बर गीन, काबरकि ओमन सुने रहंय कि ओह ये चमतकार के काम करे हवय।
JOH 12:19 तब फरीसीमन एक-दूसर ले कहिन, “हमन कुछू नइं कर सकत हन। देखव, जम्मो संसार ह ओकर पाछू हो गे हवय।”
JOH 12:20 जऊन मन तिहार के समय म अराधना करे बर गे रिहिन, ओमन म कुछू यूनानी मनखे रिहिन।
JOH 12:21 ओमन फिलिप्पुस करा आईन, जऊन ह गलील प्रदेस के बैतसैदा सहर के रिहिस, अऊ ओकर ले बिनती करिन, “हे महाराज, हमन यीसू ला देखे बर चाहथन।”
JOH 12:22 फिलिप्पुस ह जाके अन्द्रियास ला कहिस, तब अन्द्रियास अऊ फिलिप्पुस जाके यीसू ला कहिन।
JOH 12:23 यीसू ह कहिस, “ओ समय ह आ गे हवय, जब मनखे के बेटा के महिमा होवय।
JOH 12:24 मेंह तुमन ला सच-सच कहथंव कि जब तक गहूं के बीजा ह भुइयां म गिरके मर नइं जावय, तब तक ओ बीजा ह सिरिप अकेला रहिथे, पर जब येह मर जाथे, त बहुंत फर देथे।
JOH 12:25 जऊन ह अपन परान ले मया करथे, ओह ओला गंवाही, पर जऊन ह ये संसार म अपन परान ला जादा महत्व नइं देवय, ओह ओला परमेसर के संग सदाकाल के जिनगी बर बंचाके रखही।
JOH 12:26 यदि कोनो मोर सेवा करथे, त ओह मोर पाछू जरूर हो लेवय; जिहां मेंह हवंव, उहां मोर सेवक ह घलो होही। यदि कोनो मोर सेवा करथे, त मोर ददा ह ओकर आदर करही।
JOH 12:27 “अब मोर परान ह बहुंते बियाकुल होवथे अऊ मेंह का कहंव? हे ददा, मोला ये घरी ले बचा। पर एहीच कारन बर तो मेंह ये घरी म पहुंचे हवंव।
JOH 12:28 हे ददा, अपन नांव के महिमा कर!” तब स्वरग ले ये अवाज आईस, “मेंह एकर महिमा करे हवंव अऊ एकर महिमा फेर करहूं।”
JOH 12:29 मनखेमन के जऊन भीड़ उहां ठाढ़े रिहिस, जब ओमन येला सुनिन, त कहिन कि येह बादर के गरजन रिहिस, अऊ आने मन कहिन, “एक स्वरगदूत ह ओकर ले गोठियाईस।”
JOH 12:30 यीसू ह कहिस, “ये अवाज ह मोर बर नइं, पर तुम्हर भलई बर होईस।
JOH 12:31 अब ये संसार के नियाय के समय ए; अब ये संसार के राजकुमार ला निकाल दिये जाही।
JOH 12:32 पर जब मेंह धरती ले ऊपर उठाय जाहूं, त जम्मो झन ला मेंह अपन तरफ खींच लूहूं।”
JOH 12:33 यीसू ह ये कहे के दुवारा इसारा करिस कि ओह कोन किसम ले मरइया रिहिस।
JOH 12:34 भीड़ के मनखेमन कहिन, “हमन मूसा के कानून ले ये बात सुने हवन कि मसीह ह सदाकाल तक रहिही। तब तेंह कइसने कहथस कि मनखे के बेटा के ऊपर उठाय जाना जरूरी ए। ये मनखे के बेटा कोन ए?”
JOH 12:35 तब यीसू ह ओमन ला कहिस, “अंजोर ह थोरकन समय तक तुम्हर संग म रहिही। जब तक तुम्हर करा अंजोर हवय, रेंगत रहव, नइं तो अंधियार ह तुमन ला घेर लीही। जऊन ह अंधियार म रेंगथे, ओह नइं जानय कि ओह कहां जावथे।
JOH 12:36 जब तक तुम्हर करा अंजोर हवय, ओमा अपन बिसवास रखव, ताकि तुमन अंजोर के संतान बन जावव।” ये कहे के बाद, यीसू ह उहां ले चल दीस अऊ अपनआप ला ओमन ले छुपाय रखिस।
JOH 12:37 हालाकि यीसू ह बहुंते चमतकार के काम ओमन के आघू म करे रिहिस, तभो ले ओमन ओकर ऊपर बिसवास नइं करिन।
JOH 12:38 जेकर ले यसायाह अगमजानी के ये बचन ह पूरा होईस: “हे परभू, हमर संदेस ऊपर कोन ह बिसवास करिस अऊ परभू के भुजबल काकर ऊपर परगट होईस?”
JOH 12:39 एकर कारन ओमन बिसवास नइं कर सकिन, काबरकि यसायाह ये घलो कहे हवय:
JOH 12:40 “परमेसर ह ओमन के आंखीमन ला अंधरा कर दे हवय, अऊ ओमन के मन ला कठोर कर दे हवय, ताकि ओमन न तो अपन आंखी ले देख सकंय, अऊ न तो अपन मन ले समझ सकंय, अऊ ओमन मोर तरफ नइं फिरंय कि मेंह ओमन ला चंगा करंव।”
JOH 12:41 यसायाह ये बात एकरसेति कहिस काबरकि ओह यीसू के महिमा ला देखिस अऊ ओह ओकर बारे म गोठियाईस।
JOH 12:42 तभो ले अगुवामन ले बहुंते झन यीसू ऊपर बिसवास करिन। पर फरीसीमन के कारन ओमन अपन बिसवास ला खुलेआम नइं मानिन। ओमन डरत रहंय कि ओमन ला यहूदीमन के सभा-घर ले निकाल दिये जाही।
JOH 12:43 ओमन ला परमेसर के परसंसा करई ले मनखे के परसंसा करई जादा बने लगिस।
JOH 12:44 तब यीसू ह चिचियाके कहिस, “जऊन ह मोर ऊपर बिसवास करथे, ओह न सिरिप मोर ऊपर बिसवास करथे, पर ओह ओकर ऊपर घलो बिसवास करथे, जऊन ह मोला पठोय हवय।
JOH 12:45 अऊ जब ओह मोला देखथे, त ओह ओला देखथे जऊन ह मोला पठोय हवय।
JOH 12:46 मेंह संसार म अंजोर के रूप म आय हवंव, ताकि जऊन कोनो मोर ऊपर बिसवास करय, ओह अंधियार म झन रहय।
JOH 12:47 “यदि कोनो मोर बचन ला सुनथे, अऊ ओकर मुताबिक नइं चलय, त मेंह ओकर नियाय नइं करंव। काबरकि मेंह संसार के नियाय करे बर नइं, पर संसार के उद्धार करे बर आय हवंव।
JOH 12:48 जऊन ह मोर तिरस्कार करथे अऊ मोर बचन ला गरहन नइं करय, ओकर एक नियाय करइया हवय। जऊन बचन मेंह कहे हवंव, ओहीच बचन ह आखिरी दिन म ओला दोसी ठहिराही।
JOH 12:49 काबरकि मेंह अपन कोति ले कुछू नइं कहेंव, पर ददा जऊन ह मोला पठोय हवय, ओह खुद मोला हुकूम दे हवय कि मेंह का कहंव अऊ कइसने कहंव।
JOH 12:50 मेंह जानथंव कि ओकर हुकूम ह सदाकाल के जिनगी करा ले जाथे, एकरसेति जऊन कुछू मेंह कहिथंव, ओला वइसनेच कहिथंव, जइसने ददा ह मोला कहे हवय।”
JOH 13:1 फसह तिहार के ठीक पहिली, यीसू ह जान लीस कि ओकर समय ह आ गे हवय, अऊ ओला ये संसार ला छोंड़के ददा करा जाना हवय, त ओह अपन मनखेमन ले जऊन मन संसार म रिहिन, जइसने मया करत रिहिस, आखिरी तक ओह ओमन ले वइसनेच मया करिस।
JOH 13:2 रात के भोजन परोसे जावत रहय, अऊ सैतान ह सिमोन के बेटा यहूदा इस्करियोती के मन ला पहिली ले उकसाय रहय कि ओह यीसू ला दगा देवय।
JOH 13:3 यीसू ह जानत रहय कि ददा ह हर चीज ला ओकर हांथ म कर दे हवय, अऊ ये घलो कि ओह परमेसर करा ले आय हवय अऊ परमेसर करा जावत हवय।
JOH 13:4 एकरसेति ओह भोजन ले उठिस अऊ अपन बाहिरी कपड़ा ला उतारिस अऊ अपन कनिहां म एक ठन गमछा लपेटिस।
JOH 13:5 तब ओह एक ठन परात म पानी डारिस अऊ अपन चेलामन के गोड़ ला धोवन लगिस, अऊ अपन कनिहां म लपटाय गमछा ले ओमन के गोड़ ला पोंछन लगिस।
JOH 13:6 जब ओह सिमोन पतरस करा आईस, तब पतरस ह ओला कहिस, “हे परभू, का तेंह मोर गोड़ ला धोवन जावत हस?”
JOH 13:7 यीसू ह जबाब दीस, “तेंह अभी नइं समझस कि मेंह का करत हवंव, पर पाछू तेंह समझबे।”
JOH 13:8 तब पतरस ह कहिस, “नइं, मेंह तोला मोर गोड़ ला कभू नइं धोवन देवंव।” ये सुनके यीसू ह कहिस, “यदि मेंह तोर गोड़ ला नइं धोवंव, त मोर संग तोर कुछू संबंध नइं ए।”
JOH 13:9 सिमोन पतरस ह ओला कहिस, “तब हे परभू, सिरिप मोर गोड़ ला ही नइं, पर मोर हांथ अऊ मुड़ ला घलो धो दे।”
JOH 13:10 यीसू ह ओला कहिस, “जऊन ह नहा डारे हवय, ओला सिरिप अपन गोड़ ला धोय के जरूरत होथे। ओकर जम्मो देहें ह साफ होथे। तुमन ह साफ हवव, पर तुमन म हर एक झन साफ नइं ए।”
JOH 13:11 काबरकि ओह जानत रहय कि कोन ह ओला दगा देवइया रिहिस, एकरसेति ओह कहिस, “हर एक झन साफ नइं ए।”
JOH 13:12 जब यीसू ह अपन चेलामन के गोड़ ला धो डारिस, त ओह अपन कपड़ा ला पहिरके अपन जगह म वापिस आईस अऊ खाय बर बईठिस, तब ओह ओमन ले पुछिस, “का तुमन समझत हव कि मेंह तुम्हर बर का करेंव?
JOH 13:13 तुमन मोला गुरू अऊ परभू कहिथव अऊ येह सही ए, काबरकि मेंह एहीच अंव।
JOH 13:14 जब मेंह तुम्हर परभू अऊ गुरू होके तुम्हर गोड़ ला धोएंव, तब तुमन ला घलो एक-दूसर के गोड़ धोना चाही।
JOH 13:15 मेंह तुम्हर आघू म एक नमूना रखे हवंव कि जइसने मेंह तुम्हर बर करे हवंव, वइसनेच तुमन घलो करव।
JOH 13:16 मेंह तुमन ला सच कहथंव कि एक सेवक ह अपन मालिक ले बड़े नइं होवय, अऊ न ही संदेसिया ह अपन पठोइया ले बड़े होथे।
JOH 13:17 अब तुमन ये बातमन ला जानथव; यदि तुमन अइसने करहू, त तुमन ला आसीस मिलही।
JOH 13:18 “मेंह तुमन जम्मो झन के बारे म नइं कहत हंव; जऊन मन ला मेंह चुने हवंव, ओमन ला मेंह जानथंव। पर येह एकरसेति होवत हवय, ताकि परमेसर के ये बचन ह पूरा होवय: ‘जऊन ह मोर संग खाना खावत रिहिस, ओह मोर बिरूध हो गे हवय।’
JOH 13:19 “ये बात होय के पहिली, मेंह तुमन ला अभी बता देवत हंव, ताकि जब ये बात ह होवय, तब तुमन बिसवास करव कि मेंह ओही अंव।
JOH 13:20 मेंह तुमन ला सच कहथंव, जऊन कोनो मोर पठोय मनखे ला गरहन करथे, ओह मोला गरहन करथे; अऊ जऊन कोनो मोला गरहन करथे, ओह ओला गरहन करथे, जऊन ह मोला पठोय हवय।”
JOH 13:21 ये कहे के बाद, यीसू ह आतमा म बहुंत बियाकुल होईस अऊ ये गवाही दीस, “मेंह तुमन ला सच कहथंव, तुमन म ले एक झन मोर संग बिसवासघात करही।”
JOH 13:22 ये सुनके, ओकर चेलामन दुबिधा म पड़ गीन कि ओह काकर बारे म कहत हवय, अऊ ओमन एक-दूसर के मुहूं ताके लगिन।
JOH 13:23 ओकर चेलामन ले एक झन जऊन ला यीसू मया करय, यीसू के छाती कोति झुकके बईठे रिहिस।
JOH 13:24 सिमोन पतरस ह ओ चेला कोति इसारा करिस अऊ कहिस, “ओकर ले पुछ कि ओह काकर बारे म कहत हवय।”
JOH 13:25 ओ चेला ह वइसनेच यीसू कोति छाती के भार झुकके पुछिस, “हे परभू, ओह कोन ए?”
JOH 13:26 यीसू ह जबाब दीस, “जऊन ला मेंह ये रोटी के कुटा ला बरतन म बोरके दूहूं, ओहीच ह ओ मनखे अय।” तब ओह रोटी के टुकड़ा ला बोरके सिमोन के बेटा यहूदा इस्करियोती ला दीस।
JOH 13:27 यहूदा के रोटी के कुटा ला लेतेच ही सैतान ह ओमा हमा गीस। तब यीसू ह ओला कहिस, “जऊन काम तेंह करइया हवस, ओला जल्दी कर।”
JOH 13:28 पर उहां जतेक झन खाना खाय बर बईठे रिहिन, ओमन ले एको झन घलो नइं समझिन कि यीसू ह ओला काबर ये बात कहिस।
JOH 13:29 यहूदा करा रूपिया-पईसा के थैली के जिम्मेदारी रहय, त कुछू झन ये समझिन कि यीसू ह ओला कहत होही कि जऊन कुछू के, हमन ला तिहार बर जरूरत हवय, ओला बिसा ले या फेर गरीबमन ला कुछू देय दे।
JOH 13:30 यहूदा ह रोटी के कुटा ला लेके तुरते बाहिर चल दीस। अऊ ओह रथिया के बेरा रहय।
JOH 13:31 जब यहूदा इस्करियोती ह चल दीस, तब यीसू ह कहिस, “अब मनखे के बेटा के महिमा होईस अऊ ओकर दुवारा परमेसर के महिमा होईस।
JOH 13:32 अऊ जब ओकर दुवारा परमेसर के महिमा होईस, त परमेसर ह घलो अपन म बेटा के महिमा करही अऊ तुरते ओकर महिमा करही।
JOH 13:33 “हे मोर लइकामन हो, अऊ थोरकन बेर मेंह तुम्हर संग रहिहूं। तुमन मोला खोजहू अऊ जइसने मेंह यहूदीमन ला कहे हवंव, वइसने अब मेंह तुमन ला घलो कहत हंव: जिहां मेंह जावत हंव, उहां तुमन नइं आ सकव।
JOH 13:34 “एक नवां हुकूम मेंह तुमन ला देवत हंव: एक-दूसर ले मया करव। जइसने मेंह तुमन ला मया करे हवंव, वइसने तुमन घलो एक-दूसर ले मया करव।
JOH 13:35 यदि तुमन एक-दूसर ले मया करहू, त एकर ले जम्मो मनखेमन जान लीहीं कि तुमन मोर चेला अव।”
JOH 13:36 सिमोन पतरस ह यीसू ले पुछिस, “हे परभू, तेंह कहां जावत हस?” यीसू ह जबाब दीस, “जिहां मेंह जावत हंव, उहां तेंह अभी मोर पाछू नइं आ सकस, पर बाद म तेंह आबे।”
JOH 13:37 पतरस ह ओला कहिस, “हे परभू, अभी मेंह तोर पाछू काबर नइं आ सकंव? मेंह तोर बर अपन परान ला घलो दे दूहूं।”
JOH 13:38 तब यीसू ह जबाब दीस, “का सही म, तेंह मोर बर अपन परान देबे? मेंह तोला सच कहथंव, कुकरा के बासे के पहिली, तेंह तीन बार मोर इनकार करबे।”
JOH 14:1 यीसू ह कहिस, “तुम्हर हिरदय बियाकुल झन होवय। परमेसर ऊपर बिसवास करव अऊ मोर ऊपर घलो बिसवास करव।
JOH 14:2 मोर ददा के घर म बहुंत जगह हवय; यदि नइं होतिस, त मेंह तुमन ला बता देतेंव। मेंह उहां तुम्हर बर जगह तियार करे बर जावत हंव।
JOH 14:3 अऊ जब मेंह जाके तुम्हर बर जगह तियार कर लूहूं, त मेंह फेर आहूं अऊ तुमन ला मोर इहां ले जाहूं ताकि जिहां में रहंव उहां तुमन घलो रहव।
JOH 14:4 जिहां मेंह जावत हंव, तुमन ओ जगह के रसता ला जानत हव।”
JOH 14:5 थोमा ह यीसू ला कहिस, “हे परभू, हमन नइं जानन कि तेंह कहां जावत हस, त फेर हमन रसता ला कइसने जानबो?”
JOH 14:6 यीसू ह ओला जबाब दीस, “रसता, सत अऊ जिनगी मेंहीच अंव। मोर बिगर कोनो ददा करा नइं आ सकय।
JOH 14:7 यदि तुमन मोला जाने होतेव, त मोर ददा ला घलो जानतेव। फेर अब ले तुमन ओला जानत हव अऊ ओला देखे घलो हवव।”
JOH 14:8 फिलिप्पुस ह ओला कहिस, “हे परभू, हमन ला ददा के दरसन करा दे। हमर बर अतका ह बहुंत होही।”
JOH 14:9 यीसू ह जबाब दीस, “हे फिलिप्पुस, मेंह अतेक दिन ले तुम्हर संग म हवंव अऊ तभो ले का तेंह मोला नइं जानस? जऊन ह मोला देखिस, ओह ददा ला घलो देख डारिस। फेर तेंह कइसने कह सकथस कि हमन ला ददा के दरसन करा दे।
JOH 14:10 का तेंह बिसवास नइं करस कि मेंह ददा म हवंव अऊ ददा ह मोर म हवय? जऊन बचन मेंह तुमन ला कहिथंव, ओह मोर अपन कोति ले नो हय। पर ददा जऊन ह मोर म रहिथे; ओह अपन काम करत हवय।
JOH 14:11 मोर बिसवास करव कि मेंह ददा म हवंव अऊ ददा ह मोर म हवय। या फेर मोर चमतकार के काममन के सेति मोर बिसवास करव।
JOH 14:12 मेंह तुमन ला सच कहथंव कि जऊन ह मोर ऊपर बिसवास करथे, ओह ओ काममन ला करही, जऊन ला मेंह करत हवंव। अऊ त अऊ ओह येमन ले घलो बड़े-बड़े काम करही, काबरकि मेंह ददा करा जावत हंव।
JOH 14:13 जऊन कुछू तुमन मोर नांव म मांगहू, ओला मेंह पूरा करहूं ताकि बेटा के दुवारा ददा के महिमा होवय।
JOH 14:14 यदि तुमन मोर नांव म मोर ले कुछू मांगहू, त मेंह ओला पूरा करहूं।
JOH 14:15 “यदि तुमन मोर ले मया करथव, त मोर हुकूममन ला मानव।
JOH 14:16 मेंह ददा ले पराथना करहूं, अऊ ओह तुमन ला एक आने मददगार दीही, ओह हमेसा तुम्हर संग रहिही।
JOH 14:17 जऊन ला सत के आतमा कहे जाथे। संसार ह ये मददगार ला गरहन नइं कर सकय, काबरकि संसार ह न तो ओला देखे हवय अऊ न ही ओला जानय। पर तुमन ओला जानथव, काबरकि ओह तुम्हर संग रहिथे अऊ तुमन म रहिही।
JOH 14:18 मेंह तुमन ला अनाथ नइं छोड़ंव; मेंह तुम्हर करा आहूं।
JOH 14:19 थोरकन देर अऊ हवय, तब संसार ह मोला फेर नइं देखही, पर तुमन मोला देखहू। काबरकि मेंह जीयत हंव; तुमन घलो जीयत रहिहू।
JOH 14:20 ओ दिन तुमन जानहू कि मेंह अपन ददा म हवंव, अऊ तुमन मोर म हवव, अऊ मेंह तुमन म हवंव।
JOH 14:21 जेकर करा मोर हुकूम हवय, अऊ ओह ओमन ला मानथे, ओहीच ह मोर ले मया करथे। अऊ जऊन ह मोर ले मया करथे, ओकर ले मोर ददा ह मया करही, अऊ मेंह घलो ओकर ले मया करहूं अऊ ओला अपन दरसन दूहूं।”
JOH 14:22 तब यहूदा (जऊन ह यहूदा इस्करियोती नइं रिहिस) यीसू ला कहिस, “हे परभू, का बात ए कि तेंह हमन ला अपन दरसन देबे, पर संसार के मनखेमन ला नइं।”
JOH 14:23 यीसू ह ओला जबाब दीस, “यदि कोनो मनखे ह मोर ले मया करथे, त ओह मोर बचन ला मानही। अऊ मोर ददा ह ओकर ले मया करही, अऊ हमन ओकर करा आबो अऊ ओकर संग रहिबो।
JOH 14:24 जऊन ह मोला मया नइं करय, ओह मोर बचन ला नइं मानय। ये बचन जऊन ला तुमन सुनत हव, येमन मोर नो हंय; येमन ददा के अंय, जऊन ह मोला पठोय हवय।
JOH 14:25 “तुम्हर संग रहत मेंह तुमन ला ये बात कहे हवंव।
JOH 14:26 पर मददगार याने पबितर आतमा जऊन ला ददा ह मोर नांव म पठोही, ओह तुमन ला जम्मो बात सिखाही अऊ ओ हर एक बात तुमन ला सुरता कराही, जऊन ला मेंह तुमन ला कहे हवंव।
JOH 14:27 मेंह अपन सांति तुम्हर संग छोंड़त हवंव; अपन सांति मेंह तुमन ला देवत हंव। मेंह तुमन ला वइसने नइं देवंव जइसने संसार ह देथे। तुम्हर हिरदय बियाकुल झन होवय अऊ झन डरव।
JOH 14:28 “तुमन मोला ये कहत सुने हवव, ‘मेंह जावत हंव अऊ मेंह तुम्हर करा फेर आहूं।’ यदि तुमन मोर ले मया करतेव, त तुमन खुस होतेव कि मेंह ददा करा जावत हंव, काबरकि ददा ह मोर ले महान ए।
JOH 14:29 ये बात होय के पहिली मेंह तुमन ला बता दे हवंव, ताकि जब ये बात होवय, त तुमन बिसवास करव।
JOH 14:30 मेंह तुम्हर संग अऊ जादा देर तक नइं गोठियावंव, काबरकि ये संसार के राजकुमार ह आवत हवय। ओकर मोर ऊपर कोनो अधिकार नइं ए।
JOH 14:31 पर जइसने ददा ह मोला हुकूम दे हवय, वइसने मेंह करथंव, ताकि संसार ह ये जान लेवय कि मेंह ददा ले मया करथंव। “अब आवव, इहां ले चलन।
JOH 15:1 “सही अंगूर के नार मेंह अंव अऊ मोर ददा ह किसान ए।
JOH 15:2 ओ डंगाल जऊन ह मोर म हवय अऊ नइं फरय, ओह ओला काट डारथे; अऊ ओ डंगाल जऊन ह फरथे, ओला ओह छांटथे, ताकि ओह अऊ फरय।
JOH 15:3 जऊन बचन मेंह तुमन ला कहे हवंव, ओकर कारन तुमन पहिली ले सुध हो गे हवव।
JOH 15:4 तुमन मोर म बने रहव अऊ मेंह तुमन म बने रहिहूं। जइसने डंगाल ह यदि अंगूर के नार म बने नइं रहय, त ओ डंगाल ह अपनआप म नइं फर सकय, वइसने यदि तुमन मोर म बने नइं रहव, त तुमन घलो नइं फर सकव।
JOH 15:5 “मेंह अंगूर के नार अंव अऊ तुमन डंगाल अव। जऊन मनखे ह मोर म बने रहिथे अऊ मेंह ओमा, त ओह बहुंत फरथे, काबरकि मोर ले अलग होके तुमन कुछू नइं कर सकव।
JOH 15:6 कहूं कोनो मनखे मोर म बने नइं रहय, त ओह ओ डंगाल सहीं अय, जऊन ला फटिक दिये जाथे अऊ ओह सूखा जाथे; अइसने डारामन ला मनखेमन संकेलथें अऊ आगी म झोंक के जरा देथें।
JOH 15:7 यदि तुमन मोर म बने रहव अऊ मोर बचन ह तुमन म बने रहय, त जऊन कुछू तुमन चाहव अऊ मांगव; ओह तुमन ला दिये जाही।
JOH 15:8 मोर ददा के महिमा इही म होथे कि तुमन बहुंत फर लानव अऊ अपनआप ला देखा दव कि तुमन मोर चेला अव।
JOH 15:9 “जइसने ददा ह मोला मया करिस, वइसने मेंह तुमन ले मया करे हवंव। अब तुमन मोर मया म बने रहव।
JOH 15:10 यदि तुमन मोर हुकूममन ला मानहू, त मोर मया म बने रहिहू; जइसने मेंह अपन ददा के हुकूममन ला माने हवंव अऊ ओकर मया म बने रहिथंव।
JOH 15:11 मेंह ये बात तुमन ला ये खातिर कहे हवंव, ताकि मोर आनंद ह तुमन म रहय अऊ तुम्हर आनंद ह पूरा हो जावय।
JOH 15:12 मोर हुकूम ये अय: जइसने मेंह तुमन ला मया करे हवंव, वइसनेच तुमन घलो एक-दूसर ले मया करव।
JOH 15:13 एकर ले बड़े मया अऊ काकरो नइं ए कि कोनो मनखे अपन संगवारीमन बर अपन परान देवय।
JOH 15:14 जऊन हुकूम मेंह देवत हंव, ओला यदि तुमन मानव, त तुमन मोर संगवारी अव।
JOH 15:15 अब ले मेंह तुमन ला सेवक नइं कहंव, काबरकि सेवक ह नइं जानय कि ओकर मालिक ह का करथे। पर मेंह तुमन ला संगवारी कहे हवंव काबरकि जऊन कुछू मेंह अपन ददा ले सुनेंव, ओ जम्मो बात तुमन ला बता दे हवंव।
JOH 15:16 तुमन मोला नइं चुनेव, पर मेंह तुमन ला चुने अऊ ठहिराय हवंव कि तुमन जावव अऊ फरव—अइसने फर जऊन ह बने रहय। तब जऊन कुछू तुमन मोर नांव म ददा ले मांगहू, ओह तुमन ला दीही।
JOH 15:17 मोर हुकूम ये अय: एक-दूसर ले मया करव।
JOH 15:18 “यदि संसार ह तुम्हर ले घिन करथे, त ये बात ला जान लेवव कि येह तुम्हर ले पहिली मोर ले घिन करिस।
JOH 15:19 यदि तुमन संसार के होतेव, त संसार ह तुमन ला अपन समझके मया करतिस। पर तुमन संसार के नो हव, पर मेंह तुमन ला संसार म ले चुन ले हवंव। एकरसेति संसार ह तुम्हर ले घिन करथे।
JOH 15:20 जऊन बचन मेंह तुमन ला कहे हवंव, ओला सुरता रखव: ‘एक सेवक ह अपन मालिक ले बड़े नइं होवय।’ जब ओमन मोला सताईन, त तुमन ला घलो सताहीं। अऊ यदि ओमन मोर बचन ला मानिन, त तुम्हर बचन ला घलो मानहीं।
JOH 15:21 मोर नांव के सेति ओमन तुम्हर संग अइसने बरताव करहीं, काबरकि ओमन ओला नइं जानंय, जऊन ह मोला पठोय हवय।
JOH 15:22 कहूं मेंह नइं आतेंव अऊ ओमन ले नइं गोठियातेंव, त ओमन पाप के दोसीदार नइं होतिन, पर अब ओमन करा अपन पाप के कोनो बहाना नइं ए।
JOH 15:23 जऊन ह मोर ले घिन करथे, ओह मोर ददा ले घलो घिन करथे।
JOH 15:24 ओमन पाप के दोसीदार नइं होतिन, कहूं मेंह ओमन के आघू म ओ काममन ला नइं करे होतेंव, जऊन ला कोनो कभू नइं करिन। पर अब ओमन ये चमतकार के काममन ला देखके घलो मोर अऊ मोर ददा दूनों ले घिन करे हवंय।
JOH 15:25 येह एकरसेति होईस ताकि ओमन के कानून म लिखे ये बचन ह पूरा होवय: ‘ओमन मोर ले बिगर कोनो कारन के घिन करिन।’
JOH 15:26 “पर जब मददगार ह आही, जऊन ला मेंह ददा के इहां ले तुमन करा पठोहूं। ओह सत के आतमा ए, जऊन ह ददा म ले निकलथे। ओह मोर बारे म गवाही दीही।
JOH 15:27 अऊ तुमन ला घलो मोर बारे म गवाही देना जरूरी ए, काबरकि तुमन सुरू ले मोर संग रहे हवव।
JOH 16:1 “मेंह तुमन ला ये जम्मो बात एकरसेति बताय हवंव कि तुम्हर बिसवास ह झन टूटय।
JOH 16:2 ओमन तुमन ला सभा-घर ले निकाल दीहीं। अऊ ओ समय ह आवत हवय, जब तुम्हर हतिया करइया ह ये समझही कि ओह परमेसर के सेवा करत हवय।
JOH 16:3 ओमन ये काममन ला एकरसेति करहीं काबरकि ओमन न तो ददा ला जानंय अऊ न ही मोला।
JOH 16:4 पर मेंह तुमन ला ये बात एकरसेति बतांय ताकि जब ओ समय ह आवय, त तुमन ला सुरता रहय कि मेंह तुमन ला चेताय रहेंव। मेंह तुमन ला ये बात सुरू म एकरसेति नइं बतांय काबरकि मेंह तुम्हर संग म रहेंव।
JOH 16:5 अब मेंह ओकर करा जावत हंव जऊन ह मोला पठोय हवय, पर तुमन ले कोनो नइं पुछत हव कि मेंह कहां जावत हंव।
JOH 16:6 मेंह तुमन ला ये बात कहेंव, एकरसेति तुम्हर हिरदय ह दुख ले भर गे हवय।
JOH 16:7 पर मेंह तुमन ला सच कहथंव: येह तुम्हर बर बने ए कि मेंह जावत हंव; काबरकि यदि मेंह नइं जावंव, त मददगार ह तुम्हर करा नइं आवय, पर यदि मेंह जाहूं, त मेंह ओला तुम्हर करा पठोहूं।
JOH 16:8 अऊ जब ओह आही, त संसार के मनखेमन ला पाप अऊ धरमीपन अऊ नियाय के बारे म दोसी ठहिराही।
JOH 16:9 ओह पाप के बारे म दोसी ठहिराही, काबरकि ओमन मोर ऊपर बिसवास नइं करंय।
JOH 16:10 ओह धरमीपन के बारे म दोसी ठहिराही, काबरकि मेंह ददा करा जावत हंव अऊ तुमन मोला फेर नइं देखहू।
JOH 16:11 अऊ ओह नियाय के बारे म दोसी ठहिराही, काबरकि ये संसार के राजकुमार ला पहिली ले दोसी ठहिराय गे हवय।
JOH 16:12 “तुमन ला कहे बर मोर करा बहुंत कुछू हवय, पर अभी तुमन ओ बातमन ला सहन नइं कर सकव।
JOH 16:13 पर जब ओ सत के आतमा ह आही, त ओह तुमन ला सत के जम्मो बात म अगुवई करही। ओह अपन तरफ से कुछू नइं कहिही; जऊन कुछू ओह सुनही, सिरिप ओहीच बात ला कहिही, अऊ ओह तुमन ला ओ बातमन ला बताही, जऊन ह अवइया हवय।
JOH 16:14 ओह मोर महिमा करही, काबरकि ओह मोर बातमन ला लीही अऊ ओला तुमन ला बताही।
JOH 16:15 जऊन कुछू ददा के अय, ओ जम्मो मोर अय। एकरसेति मेंह कहेंव कि आतमा ह मोर म ले लीही अऊ ओला तुमन ला बताही।”
JOH 16:16 यीसू ह ये घलो कहिस, “थोरकन देर बाद तुमन मोला नइं देखहू अऊ फेर थोरकन देर बाद तुमन मोला देखहू।”
JOH 16:17 यीसू के कुछू चेलामन एक-दूसर ले कहिन, “ओकर ये कहे के का मतलब ए, ‘थोरकन देर बाद तुमन मोला नइं देखहू अऊ फेर थोरकन देर बाद तुमन मोला देखहू,’ अऊ ‘काबरकि मेंह ददा करा जावत हंव?’ ”
JOH 16:18 चेलामन बार-बार पुछन लगिन, “ये थोरकन देर के का मतलब ए? हमन नइं समझत हन कि ओह का कहत हवय।”
JOH 16:19 यीसू ह ये जानके कि ओमन ओकर ले पुछे चाहत हवंय, ओह ओमन ला कहिस, “का तुमन एक-दूसर ले पुछत हव कि मोर ये कहे के का मतलब ए, ‘थोरकन देर बाद तुमन मोला नइं देखहू अऊ फेर थोरकन देर बाद तुमन मोला देखहू?’
JOH 16:20 मेंह तुमन ला सच-सच कहथंव, तुमन रोहू अऊ बिलाप करहू, जबकि संसार ह आनंद मनाही। तुमन ला दुख होही, पर तुम्हर दुख ह आनंद म बदल जाही।
JOH 16:21 जब एक माईलोगन ह लइका जनथे, त ओला पीरा होथे काबरकि ओकर बेरा ह आ गे हवय; पर जब ओला लइका हो जाथे, त आनंद के मारे कि एक लइका ह संसार म पईदा होईस, ओह पीरा ला भुला जाथे।
JOH 16:22 इही किसम ले, अभी तुमन ला दुख होवथे, पर मेंह तुमन ला फेर देखहूं, अऊ तुमन आनंद मनाहू, अऊ तुम्हर हिरदय के आनंद ला कोनो नइं छीन सकही।
JOH 16:23 ओ दिन म तुमन मोर ले कुछू नइं पुछहू। मेंह तुमन ला सच-सच कहत हंव, जऊन कुछू तुमन मोर नांव म मांगहू, ओ चीज ददा ह तुमन ला दीही।
JOH 16:24 अभी तक तुमन मोर नांव म कुछू नइं मांगे हवव। मांगव, त तुमन पाहू अऊ तुम्हर आनंद ह पूरा हो जाही।
JOH 16:25 “मेंह तुमन ला ये बात पटंतर म कहे हवंव, पर ओ समय ह आवत हवय, जब मेंह तुम्हर ले पटंतर म नइं गोठियावंव, पर मेंह तुमन ला अपन ददा के बारे म साफ-साफ बताहूं।
JOH 16:26 ओ दिन तुमन मोर नांव म मांगहू, अऊ मेंह ये नइं कहथंव कि मेंह तुम्हर बर ददा ले बिनती करहूं।
JOH 16:27 ददा ह खुदे तुम्हर ले मया करथे, काबरकि तुमन मोर ले मया करे हवव अऊ बिसवास करे हवव कि मेंह परमेसर करा ले आय हवंव।
JOH 16:28 मेंह ददा म ले निकलके संसार म आय हवंव; अऊ अब मेंह संसार ला छोंड़के वापिस ददा करा जावत हंव।”
JOH 16:29 तब यीसू के चेलामन कहिन, “अब तेंह साफ-साफ बिगर पटंतर के गोठियावत हस।
JOH 16:30 अब हमन जान डारेंन कि तेंह जम्मो बात ला जानथस अऊ एकर जरूरत नइं ए कि कोनो तोर ले सवाल पुछय। एकर दुवारा हमन बिसवास करथन कि तेंह परमेसर करा ले आय हवस।”
JOH 16:31 यीसू ह ओमन ला जबाब दीस, “आखिर म तुमन बिसवास करेव।
JOH 16:32 पर देखव, ओ बेरा ह आवत हवय अऊ आ घलो गे हवय, जब तुमन तितिर-बितिर हो जाहू; हर एक झन अपन-अपन घर चल दीही। तुमन मोला एकदम अकेला छोंड़ दूहू। तभो ले मेंह अकेला नइं अंव, काबरकि मोर ददा ह मोर संग हवय।
JOH 16:33 “मेंह तुमन ला ये बात एकरसेति कहेंव ताकि तुमन ला मोर म सांति मिलय। ये संसार म तुमन तकलीफ पाहू। पर हिम्मत रखव! मेंह संसार ऊपर जय पाय हवंव।”
JOH 17:1 ये कहे के बाद, यीसू ह स्वरग कोति देखिस अऊ कहिस, “हे ददा, बेरा ह आ गे हवय। अपन बेटा के महिमा कर कि तोर बेटा ह घलो तोर महिमा करय।
JOH 17:2 तेंह ओला जम्मो मनखेमन ऊपर अधिकार दे हवस, ताकि जऊन मन ला तेंह ओला दे हवस, ओ जम्मो झन ला ओह तोर संग सदाकाल के जिनगी देवय।
JOH 17:3 अऊ तोर संग सदाकाल के जिनगी ये अय कि ओमन सिरिप तोला एकेच सत परमेसर के रूप म जानंय अऊ यीसू मसीह ला जानंय, जऊन ला तेंह धरती म पठोय हवस।
JOH 17:4 जऊन काम तेंह मोला करे बर दे रहय, ओला पूरा करके, मेंह धरती म तोर महिमा करे हवंव।
JOH 17:5 अब, हे ददा, अपन आघू म मोर महिमा कर—ओ महिमा जऊन ह संसार ला बनाय के पहिली मोर, तोर संग रिहिस।
JOH 17:6 “मेंह तोर नांव ला ओमन ऊपर परगट करे हवंव, जऊन मन ला तेंह मोला संसार म ले देय हवस। ओमन तोर रिहिन; तेंह ओमन ला मोला देय हवस अऊ ओमन तोर बचन ला माने हवंय।
JOH 17:7 अब ओमन जानथें कि जऊन कुछू तेंह मोला देय हवस, ओ जम्मो चीज तोर करा ले आय हवय।
JOH 17:8 काबरकि मेंह ओमन ला ओ बचन दे हवंव, जऊन ला तेंह मोला देय रहय, अऊ ओमन ओला गरहन करे हवंय। ओमन सही म जान गीन कि मेंह तोर करा ले आय हवंव अऊ ओमन बिसवास कर ले हवंय कि तेंह मोला पठोय हवस।
JOH 17:9 मेंह ओमन बर पराथना करत हंव। मेंह संसार बर नइं, पर ओमन बर पराथना करत हंव, जऊन मन ला तेंह मोला देय हवस, काबरकि ओमन तोर अंय।
JOH 17:10 जऊन कुछू मोर करा हवय, ओ जम्मो ह तोर अय अऊ जऊन कुछू तोर करा हवय, ओ जम्मो ह मोर अय। अऊ येमन के दुवारा मोर महिमा होथे।
JOH 17:11 मेंह अब संसार म नइं रहंव, पर ओमन संसार म रहिहीं, अऊ मेंह तोर करा आवत हवंव। हे पबितर ददा, ओमन ला जतन के रख अपन ओ नांव के सक्ति के दुवारा, जऊन नांव ला तेंह मोला देय हवस, ताकि ओमन एक हो जावंय जइसने हमन एक हवन।
JOH 17:12 जब मेंह ओमन के संग रहेंव, त ओ नांव के दुवारा जऊन ला तेंह मोला देय हवस, ओमन ला जतन के रखेंव अऊ ओमन ला सही-सलामत रखेंव। ओमा ले कोनो नइं गंवाईन, सिरिप बिनास के बेटा के छोंड़, ताकि परमेसर के बचन ह पूरा होवय।
JOH 17:13 “अब मेंह तोर करा आवत हंव, पर मेंह ये बातमन ला संसार म रहत कहथंव, ताकि ओमन मोर आनंद ले पूरा भर जावंय।
JOH 17:14 मेंह ओमन ला तोर बचन देय हवंव अऊ संसार ह ओमन ले नफरत करिस, काबरकि ओमन संसार के नो हंय, जइसने मेंह संसार के नो हंव।
JOH 17:15 मेंह ये पराथना नइं करत हंव कि तेंह ओमन ला संसार ले निकाल ले, पर ये पराथना करत हंव कि ओमन ला तेंह सैतान ले बचाय रख।
JOH 17:16 ओमन संसार के नो हंय, जइसने मेंह संसार के नो हंव।
JOH 17:17 सत के दुवारा ओमन ला पबितर कर, तोर बचन ह सत ए।
JOH 17:18 जइसने तेंह मोला संसार म पठोय, वइसने मेंह ओमन ला संसार म पठोय हवंव।
JOH 17:19 ओमन खातिर मेंह अपनआप ला तोर हांथ म अरपन करथंव ताकि ओमन घलो सही म अपनआप ला तोला अरपन करंय।
JOH 17:20 “मेंह सिरिप ओमन खातिर ही पराथना नइं करथंव, पर ओमन बर घलो जऊन मन ओमन के संदेस के दुवारा मोर ऊपर बिसवास करहीं,
JOH 17:21 कि ओ जम्मो झन एक हो जावंय। हे ददा, जइसने तेंह मोर म हवस अऊ मेंह तोर म हवंव। वइसने ओमन घलो हमर म होवंय ताकि संसार ह बिसवास करय कि तेंह मोला पठोय हवस।
JOH 17:22 जऊन महिमा तेंह मोला देय हवस, ओही महिमा मेंह ओमन ला देय हवंव, ताकि ओमन एक हो जावंय, जइसने हमन एक हवन।
JOH 17:23 मेंह ओमन म अऊ तेंह मोर म, कि ओमन पूरा एक हो जावंय, ताकि संसार ह जानय कि तेंह मोला पठोय हवस अऊ जइसने तेंह मोर ले मया करे हवस, वइसने ओमन ले घलो मया करय।
JOH 17:24 “हे ददा मेंह चाहथंव कि जऊन मन ला तेंह मोला देय हवस, ओमन मोर संग उहां रहंय, जिहां में हवंव अऊ ओमन मोर ओ महिमा ला देखंय, जऊन ला तेंह मोला देय हवस, काबरकि तेंह संसार के रचे के पहिली मोर ले मया करय।”
JOH 17:25 “हे धरमी ददा, संसार ह तोला नइं जानय, पर मेंह तोला जानथंव, अऊ ओमन जानथें कि तेंह मोला पठोय हवस।
JOH 17:26 मेंह ओमन ला तोर बारे म बताय हवंव अऊ बतावत रहिहूं, ताकि तोर ओ मया जऊन ह मोर बर हवय, ओमन म घलो रहय अऊ मेंह खुद ओमन म रहंव।”
JOH 18:1 ये पराथना करे के बाद, यीसू ह अपन चेलामन संग किदरोन घाटी के ओ पार गीस। उहां एक जैतून के बारी रहय, जिहां ओ अऊ ओकर चेलामन गीन।
JOH 18:2 यहूदा जऊन ह यीसू ला धोखा दीस, ओ ठऊर ला जानत रिहिस, काबरकि यीसू ह हमेसा अपन चेलामन संग उहां जूरय।
JOH 18:3 तब यहूदा ह कुछू सैनिक अऊ मुखिया पुरोहित अऊ फरीसीमन के कुछू अधिकारीमन ला लेके उहां आईस। ओमन मसाल, कंडिल अऊ हथियार धरे रहंय।
JOH 18:4 यीसू ह ओ जम्मो बात ला जानत रिहिस, जऊन ह ओकर संग होवइया रहय; एकरसेति ओह निकलिस अऊ ओमन ले पुछिस, “तुमन कोन ला खोजत हव?”
JOH 18:5 ओमन जबाब दीन, “नासरत के यीसू ला।” यीसू ह कहिस, “ओह में अंव।” (अऊ दगाबाज यहूदा ह उहां ओमन संग ठाढ़े रहय।)
JOH 18:6 जब यीसू ह ओमन ला ये कहिस, “ओह में अंव,” त ओमन पाछू घुंचिन अऊ भुइयां म गिर पड़िन।
JOH 18:7 यीसू ह ओमन ले फेर पुछिस, “तुमन कोन ला खोजत हव?” ओमन कहिन, “नासरत के यीसू ला।”
JOH 18:8 यीसू ह जबाब दीस, “मेंह तुमन ला कह चुके हंव कि ओह में अंव। यदि तुमन मोला खोजत हव, त ये मनखेमन ला जावन दव।”
JOH 18:9 ये बात एकरसेति होईस, ताकि यीसू के कहे ये बचन ह पूरा होवय, “जऊन मन ला तेंह मोला देय रहय, ओमा ले मेंह एको झन ला घलो नइं गंवांय।”
JOH 18:10 तब सिमोन पतरस जेकर करा एक ठन तलवार रहय, ओह ओला खींचके निकालिस अऊ महा पुरोहित के सेवक ऊपर चलाके ओकर जेवनी कान ला काट दीस। ओ सेवक के नांव मलखुस रिहिस।
JOH 18:11 यीसू ह पतरस ला हुकूम दीस, “अपन तलवार ला मियान म रख। जऊन दुख के कटोरा ददा ह मोला दे हवय, का ओला मेंह नइं पीयंव?”
JOH 18:12 तब सैनिकमन अऊ ओमन के कप्तान अऊ यहूदी अधिकारीमन यीसू ला पकड़के बांध लीन,
JOH 18:13 अऊ ओमन ओला पहिली हन्ना करा लानिन, जऊन ह ओ साल के महा पुरोहित काइफा के ससुर रिहिस।
JOH 18:14 येह ओहीच काइफा रिहिस, जऊन ह यहूदी अगुवामन ला ये सलाह देय रिहिस कि बने होतिस यदि एक आदमी ह जम्मो मनखेमन खातिर मरय।
JOH 18:15 सिमोन पतरस अऊ एक आने चेला यीसू के पाछू-पाछू गीन। काबरकि ये चेला ह महा पुरोहित के पहिचान के रिहिस; एकरसेति ओह घलो महा पुरोहित के अंगना म जाय सकिस, जिहां यीसू ला लेय गे रिहिन।
JOH 18:16 पर पतरस ह बाहिर कपाट करा ठाढ़े रहय। तब ओ आने चेला जऊन ह महा पुरोहित के पहिचान के रिहिस, बाहिर आईस अऊ दुवारपालिन छोकरी ला कहिके पतरस ला भीतर ले गीस।
JOH 18:17 ओ दुवारपालिन छोकरी ह पतरस ले पुछिस, “का तेंह घलो त ये मनखे के चेलामन ले एक झन नो हस?” ओह कहिस, “मेंह नो हंव।”
JOH 18:18 जाड़ के मारे सेवक अऊ अधिकारीमन कोइला ला जलाय रहंय अऊ ओकर चारों खूंट ठाढ़ होके आगी तापत रहंय। पतरस ह घलो ओमन के संग उहां ठाढ़ होके आगी तापत रहय।
JOH 18:19 इही बीच म महा पुरोहित ह यीसू ले ओकर चेलामन अऊ ओकर उपदेस के बारे म पुछताछ करिस।
JOH 18:20 यीसू ह जबाब दीस, “मेंह संसार के मनखेमन ले खुलेआम बात करे हवंव। मेंह यहूदीमन के सभा-घर अऊ मंदिर के अंगना म, जिहां जम्मो यहूदीमन जूरथें, हमेसा उपदेस देय हवंव। मेंह गुपत म कुछू नइं कहेंव।
JOH 18:21 तेंह मोर ले काबर पुछताछ करथस? ओमन ले पुछ जऊन मन मोर बात ला सुने हवंय। ओमन जानत हवंय कि मेंह का कहे हवंव।”
JOH 18:22 जब यीसू ह ये कहिस, त ओकर लकठा म ठाढ़े एक अधिकारी ह यीसू ला एक थपरा मारिस अऊ कहिस, “महा पुरोहित ला का तेंह अइसने जबाब देथस।”
JOH 18:23 यीसू ह ओला जबाब दीस, “यदि मेंह कुछू गलत बात कहे हवंव, त ओला बता। पर यदि मेंह सच बात कहे हवंव, त तेंह मोला काबर मारथस?”
JOH 18:24 तब हन्ना ह यीसू ला वइसनेच बंधे-बंधाय महा पुरोहित काइफा करा पठो दीस।
JOH 18:25 सिमोन पतरस ह उहां अंगना म ठाढ़े आगी तापत रहय, तब मनखेमन ओकर ले पुछिन, “का तेंह घलो ओकर चेलामन ले एक झन अस?” ओह इनकार करके कहिस, “मेंह नो हंव।”
JOH 18:26 महा पुरोहित के एक सेवक जऊन ह ओ मनखे के रिस्तेदार रिहिस, जेकर कान ला पतरस काट दे रिहिस, पतरस ले पुछिस, “का मेंह तोला ओकर संग जैतून के बारी म नइं देखे रहेंव?”
JOH 18:27 पतरस ह फेर इनकार करिस अऊ तुरते कुकरा ह बासिस।
JOH 18:28 तब यहूदी अगुवामन यीसू ला काइफा करा ले रोमी राजपाल के महल म ले गीन अऊ ओह बड़े बिहनियां के बेरा रिहिस। यहूदीमन खुद महल के भीतर नइं गीन ताकि ओमन असुध झन होवंय अऊ फसह के भोज खा सकंय।
JOH 18:29 एकरसेति पीलातुस ह बाहिर ओमन करा आईस अऊ पुछिस, “ये मनखे के ऊपर तुमन का दोस लगाथव?”
JOH 18:30 ओमन जबाब दीन, “यदि ये मनखे ह अपराधी नइं होतिस, त येला हमन तोर हांथ म नइं सऊंपतेंन।”
JOH 18:31 पीलातुस ह ओमन ला कहिस, “तुमन येला ले जावव अऊ अपन खुद के कानून के मुताबिक ओकर नियाय करव।” यहूदीमन ओला कहिन, “हमन करा कोनो ला मिरतू-दंड देय के अधिकार नइं ए।”
JOH 18:32 येह एकरसेति होईस ताकि यीसू के ओ बचन ह पूरा होवय, जऊन ला यीसू ह इसारा म कहे रिहिस कि ओकर मिरतू कइसने होही।
JOH 18:33 तब पीलातुस फेर महल भीतर गीस अऊ यीसू ला बलाके ओकर ले पुछिस, “का तेंह यहूदीमन के राजा अस?”
JOH 18:34 यीसू ह जबाब देके कहिस, “का तेंह ये बात अपन कोति ले कहथस कि आने मन तोला ये बात मोर बारे म कहे हवंय?”
JOH 18:35 पीलातुस ह जबाब दीस, “का तेंह सोचथस कि मेंह एक यहूदी अंव? तोर खुद के मनखे अऊ मुखिया पुरोहितमन तोला मोर हांथ म सऊंपे हवंय। तेंह का करे हस?”
JOH 18:36 यीसू ह कहिस, “मोर राज ह ये संसार के नो हय। यदि मोर राज ह ये संसार के होतिस, त मोर सेवकमन लड़तिन अऊ मेंह यहूदी अगुवामन के हांथ म नइं सऊंपे जातेंव; पर मोर राज ह इहां के नो हय।”
JOH 18:37 पीलातुस ह यीसू ला कहिस, “त का तेंह एक राजा अस?” यीसू ह जबाब दीस, “तेंह सही कहथस कि मेंह एक राजा अंव। मेंह ये खातिर जनम लेंव अऊ ये खातिर संसार म आयेंव कि सत के गवाही देवंव। जऊन ह सत के तरफ हवय, ओह मोर बात ला सुनथे।”
JOH 18:38 पीलातुस ह ओकर ले पुछिस, “का ह सत ए?” ये कहिके पीलातुस ह बाहिर यहूदीमन करा फेर गीस अऊ ओमन ला कहिस, “मेंह ओमा कोनो दोस नइं पायेंव।
JOH 18:39 पर येह तुम्हर रिवाज ए कि फसह के तिहार के बेरा म मेंह तुम्हर खातिर एक कैदी ला छोंड़ देवंव। का तुमन चाहथव कि मेंह यहूदीमन के राजा ला छोंड़ देवंव?”
JOH 18:40 ओमन फेर चिचियाके कहिन, “नइं, ये मनखे ला नइं, पर हमर बर बरब्बा ला छोंड़ दे।” अऊ बरब्बा ह एक डाकू रिहिस।
JOH 19:1 तब पीलातुस ह यीसू ला लेके ओला कोर्रा म पीटवाईस।
JOH 19:2 सैनिकमन गुंथके कांटा के एक मुकुट बनाईन अऊ ओला यीसू के मुड़ ऊपर रखिन अऊ ओमन यीसू ला बैंगनी कपड़ा पहिराईन,
JOH 19:3 अऊ ओमन ओकर मेर बार-बार आके कहिन, “हे यहूदीमन के राजा, जोहार लागी।” अऊ ओमन यीसू के मुहूं म थपरा मारिन।
JOH 19:4 पीलातुस ह फेर महल ले बाहिर आईस अऊ उहां जूरे यहूदीमन ला कहिस, “देखव, मेंह ओला तुम्हर करा बाहिर लानत हंव ताकि तुमन जान लेवव कि मेंह ओमा कुछू दोस नइं पायेंव।”
JOH 19:5 जब यीसू ह कांटा के मुकुट अऊ बैंगनी कपड़ा पहिरे बाहिर आईस, त पीलातुस ह ओमन ला कहिस, “देखव, येह ओ मनखे ए।”
JOH 19:6 जब मुखिया पुरोहित अऊ अधिकारीमन यीसू ला देखिन, त ओमन चिचियाके कहिन, “येला कुरूस ऊपर चघावव। येला कुरूस ऊपर चघावव।” पर पीलातुस ह जबाब दीस, “तुमन येला ले जावव अऊ कुरूस ऊपर चघावव। काबरकि मेंह येमा कुछू दोस नइं पायेंव।”
JOH 19:7 यहूदी अगुवामन जोर देके कहिन, “हमर एक ठन कानून हवय अऊ ओ कानून के मुताबिक एकर मरना जरूरी ए, काबरकि येह अपनआप ला परमेसर के बेटा कहिथे।”
JOH 19:8 जब पीलातुस ह ये बात ला सुनिस, त ओह अब्बड़ डरा गीस,
JOH 19:9 अऊ ओह वापिस महल भीतर जाके यीसू ले पुछिस, “तेंह कहां के अस?” पर यीसू ह ओला कोनो जबाब नइं दीस।
JOH 19:10 तब पीलातुस ह कहिस, “का तेंह मोर ले बात नइं करस? का तेंह नइं जानस कि मोर करा तोला छोंड़ देय के या फेर तोला कुरूस ऊपर चघाय के अधिकार हवय?”
JOH 19:11 यीसू ह जबाब दीस, “यदि तोला ऊपर ले अधिकार नइं दिये जातिस, त मोर ऊपर तोर कुछू अधिकार नइं होतिस। एकरसेति जऊन ह मोला तोर हांथ म सऊंपे हवय, ओह बड़े पाप के दोसीदार ए।”
JOH 19:12 एकर बाद पीलातुस ह यीसू ला छोंड़ देय के कोसिस करिस, पर यहूदी अगुवामन बार-बार चिचियाके कहिन, “यदि तेंह ये मनखे ला छोंड़ देबे, त तेंह महाराजा के संगवारी नो हस। जऊन ह अपनआप ला राजा कहिथे, ओह महाराजा के बिरोधी होथे।”
JOH 19:13 जब पीलातुस ह ये बात ला सुनिस, त ओह यीसू ला बाहिर लानिस अऊ नियाय आसन म बईठिस, जऊन ह पथरा के चंउरा नांव के जगह म रहय अऊ ओ चंउरा ला इबरानी भासा म गब्बता कहे जावय।
JOH 19:14 येह फसह तिहार के तियारी के दिन रहय अऊ दिन के करीब बारह बजे के समय रहय। पीलातुस ह यहूदीमन ला कहिस, “देखव, एही अय तुम्हर राजा।”
JOH 19:15 पर ओमन चिचियाके कहिन, “येला ले जावव। येला ले जावव। येला कुरूस ऊपर चघाय जावय।” पीलातुस ह ओमन ले पुछिस, “का मेंह तुम्हर राजा ला कुरूस ऊपर चघा देवंव?” मुखिया पुरोहितमन जबाब दीन, “महाराजा के छोंड़ हमर अऊ कोनो राजा नइं ए।”
JOH 19:16 आखिर म पीलातुस ह यीसू ला कुरूस ऊपर चघाय बर ओमन के हांथ म सऊंप दीस।
JOH 19:17 तब ओमन यीसू ला ले गीन अऊ ओह अपन कुरूस ला बोहके बाहिर निकलिस अऊ ओ ठऊर म गीस, जऊन ला खोपड़ी के ठऊर कहे जावय अऊ इबरानी भासा म येला गुलगुता घलो कहे जाथे।
JOH 19:18 उहां ओमन यीसू ला कुरूस ऊपर चघा दीन, अऊ ओकर संग अऊ दू झन ला घलो कुरूस ऊपर चघाईन, एक झन ला ओकर जेवनी कोति अऊ दूसर झन ला ओकर डेरी कोति, अऊ यीसू ला मांझा म।
JOH 19:19 पीलातुस ह एक सूचना लिखके कुरूस ऊपर टंगवा दे रहय, जेमा ये लिखाय रहय, नासरत के यीसू, यहूदीमन के राजा।
JOH 19:20 बहुंते यहूदीमन ये सूचना ला पढ़िन, काबरकि जऊन ठऊर म यीसू ला कुरूस ऊपर चघाय गे रिहिस, ओह सहर के लकठा म रहय अऊ ओ सूचना ह इबरानी, लतीनी अऊ यूनानी भासा म लिखाय रहय।
JOH 19:21 तब यहूदीमन के मुखिया पुरोहितमन पीलातुस ला कहिन, “यहूदीमन के राजा झन लिख, पर ये लिख कि ये मनखे ह कहिस, ‘मेंह यहूदीमन के राजा अंव।’ ”
JOH 19:22 पीलातुस ह जबाब दीस, “मेंह जऊन लिख देंव, त लिख देंव।”
JOH 19:23 जब सैनिकमन यीसू ला कुरूस ऊपर चघा लीन, त ओमन ओकर कपड़ामन ला लेके चार बांटा करिन अऊ हर एक ह एक बांटा लीस। ओमन ओकर कुरता ला घलो लीन, पर ओ कुरता ह सिये नइं गे रहय। येह ऊपर ले तरी तक एक ठन करके बुने गे रहय।
JOH 19:24 एकरसेति ओमन एक-दूसर ला कहिन, “येला हमन नइं चीरन, पर एकर बर चिट्ठी निकालबो अऊ देखबो कि येह कोन ला मिलही।” येह एकरसेति होईस ताकि परमेसर के बचन म लिखे बात ह पूरा होवय, “ओमन मोर ओनहा ला आपस म बांट लीन अऊ मोर कुरता बर चिट्ठी निकालिन।” एकरसेति सैनिकमन अइसने करिन।
JOH 19:25 यीसू के कुरूस के लकठा म ओकर दाई, अऊ ओकर दाई के बहिनी, क्लोपास के घरवाली मरियम, अऊ मरियम मगदलिनी ठाढ़े रिहिन।
JOH 19:26 जब यीसू ह अपन दाई अऊ ओ चेला ला जेकर ले ओह मया करय, तीर म ठाढ़े देखिस, त ओह अपन दाई ला कहिस, “हे नारी, येह तोर बेटा ए।”
JOH 19:27 अऊ ओ चेला ले कहिस, “येह तोर दाई ए।” ओही बखत ले ओ चेला ह यीसू के दाई ला अपन घर ले गीस।
JOH 19:28 एकर बाद, यीसू ह ये जानके कि अब जम्मो बात पूरा हो चुके हवय, परमेसर के बचन ला पूरा करे बर कहिस, “मेंह पीयासन हंव।”
JOH 19:29 उहां सिरका ले भरे एक ठन बरतन रखे रहय। ओमन पनसोखवा रबर ला ओ सिरका म भिगोईन अऊ ओ पनसोखवा रबर ला एक ठन जूफा के डंडी म रखके यीसू के मुहूं ले लगाईन।
JOH 19:30 जब यीसू ह ओ सिरका ला ले लीस, त कहिस, “पूरा होईस।” अऊ ओह मुड़ ला नवाके अपन परान तियाग दीस।
JOH 19:31 ओह तियारी के दिन रिहिस, अऊ ओकर दूसर दिन बिसेस बिसराम के दिन रिहिस। यहूदी अगुवामन नइं चाहत रिहिन कि ओमन के देहेंमन बिसराम के दिन कुरूस म टंगे रहंय, एकरसेति ओमन पीलातुस ले बिनती करिन कि कुरूस म चघाय मनखेमन के गोड़ ला टोर दिये जावय अऊ ओमन के देहें ला कुरूस ले उतार दिये जावय।
JOH 19:32 एकरसेति सैनिकमन आईन अऊ ओमन पहिली मनखे के गोड़ ला टोरिन, अऊ तब दूसर मनखे के, जऊन मन कि यीसू संग कुरूस ऊपर चघाय गे रिहिन।
JOH 19:33 पर जब ओमन यीसू करा आईन अऊ देखिन कि ओह मर गे हवय, त ओमन ओकर गोड़ ला नइं टोरिन।
JOH 19:34 पर एक सैनिक ह यीसू के पंजरा ला बरछी म बेधिस अऊ तुरते ओमा ले लहू अऊ पानी निकलिस।
JOH 19:35 जऊन मनखे ह येला देखिस ओह गवाही दे हवय अऊ ओकर गवाही ह सच ए। ओह जानथे कि ओह सच कहत हवय, अऊ ओह गवाही देथे ताकि तुमन घलो बिसवास करव।
JOH 19:36 ये बात एकरसेति होईस ताकि परमेसर के ये बचन ह पूरा होवय: “ओकर एको ठन हाड़ा टोरे नइं जाही।”
JOH 19:37 अऊ परमेसर के बचन म फेर आने जगह ये लिखे हवय, “ओमन ओला देखहीं, जेला ओमन छेदे-बेधे हवंय।”
JOH 19:38 एकर बाद अरमतिया सहर के यूसुफ जऊन ह यीसू के चेला रिहिस, पर ओह ये बात ला यहूदी अगुवामन के डर के मारे छुपाके रखे रहय। ओह पीलातुस ले बिनती करिस, “का मेंह यीसू के लास ला ले जावंव?” पीलातुस ह ओकर बिनती ला मान लीस। तब यूसुफ ह आईस अऊ यीसू के लास ला ले गीस।
JOH 19:39 निकुदेमुस जऊन ह पहिली यीसू करा एक बार रथिया आय रिहिस, करीब तैंतीस किलो गंधरस अऊ एलवा के मिले मसाला लीस अऊ ओह घलो यूसुफ के संग गीस।
JOH 19:40 ओमन यीसू के लास ला लीन अऊ यहूदीमन के दफनाय के रीति के मुताबिक लास म ओ मसाला के लेप ला लगाईन अऊ ओला मलमल के कपड़ा म लपेटिन।
JOH 19:41 जऊन जगह म यीसू ला कुरूस ऊपर चघाय गे रिहिस, उहां एक ठन बारी रिहिस अऊ ओ बारी म एक ठन नवां कबर रिहिस, जऊन म कभू कोनो ला नइं रखे गे रिहिस।
JOH 19:42 काबरकि ओह यहूदीमन के तियारी के दिन रहय अऊ ओ कबर ह लकठा म रहय; एकरसेति ओमन यीसू के लास ला उहां रखिन।
JOH 20:1 हप्ता के पहिली दिन बड़े बिहनियां, जब अंधियार रहय, मरियम मगदलिनी कबर करा आईस अऊ देखिस कि पथरा ह कबर के मुंहाटी ले हट गे हवय।
JOH 20:2 तब ओह दऊड़त सिमोन पतरस अऊ ओ आने चेला करा गीस, जेकर ले यीसू मया रखय, अऊ ओमन ला कहिस, “ओमन परभू ला कबर ले निकालके ले गे हवंय अऊ हमन नइं जानन कि ओमन ओला कहां रखे हवंय।”
JOH 20:3 तब पतरस अऊ ओ आने चेला घर ले निकलिन अऊ कबर कोति गीन।
JOH 20:4 ओ दूनों दऊड़त गीन, पर ओ आने चेला ह तेज दऊड़के पतरस ले आघू निकल गीस अऊ कबर करा पहिली हबरिस।
JOH 20:5 निहरके ओह कबर म देखिस, त मलमल के कपड़ा ह उहां माढ़े रहय, पर ओह कबर के भीतर नइं गीस।
JOH 20:6 तब ओकर पाछू सिमोन पतरस ह आईस अऊ कबर के भीतर गीस। ओह देखिस कि मलमल के कपड़ा ह उहां माढ़े रहय।
JOH 20:7 ओह ये घलो देखिस कि ओ गमछा जऊन ला यीसू के मुड़ म लपेटे गे रिहिस, मलमल के कपड़ा ले अलग मोड़ाके माढ़े रहय।
JOH 20:8 तब ओ आने चेला घलो जऊन ह कबर करा पहिली हबरे रिहिस, भीतर गीस अऊ देखके बिसवास करिस।
JOH 20:9 ओमन अभी तक ले परमेसर के बचन ले नइं समझे रिहिन कि यीसू ह मरे म ले जरूर जी उठही।
JOH 20:10 तब चेलामन वापिस अपन-अपन घर चल दीन।
JOH 20:11 पर मरियम ह रोवत कबर के बाहिर ठाढ़े रिहिस। रोवत-रोवत ओह कबर के भीतर ला देखे बर झुकिस,
JOH 20:12 अऊ ओह देखिस कि दू झन स्वरगदूत सफेद कपड़ा पहिरे उहां बईठे रहंय, जिहां यीसू के देहें रखाय रिहिस; एक झन मुड़ कोति बईठे रहय अऊ दूसर झन गोड़ कोति।
JOH 20:13 स्वरगदूतमन ओकर ले पुछिन, “हे नारी, तेंह काबर रोवत हवस?” ओह कहिस, “ओमन मोर परभू ला ले गे हवंय, अऊ मेंह नइं जानव कि ओमन ओला कहां रखे हवंय।”
JOH 20:14 ये कहिके, ओह पाछू मुड़िस अऊ यीसू ला उहां ठाढ़े देखिस, पर ओह नइं चिन्हिस कि येह यीसू अय।
JOH 20:15 यीसू ह ओला कहिस, “हे नारी, तेंह काबर रोवत हवस? तेंह कोन ला खोजत हवस?” ओह यीसू ला माली समझके कहिस, “हे महाराज, कहूं तेंह ओला ले गे हवस, त मोला बता कि तेंह ओला कहां रखे हवस। मेंह ओला ले जाहूं।”
JOH 20:16 यीसू ह ओला कहिस, “मरियम!” मरियम ह यीसू कोति मुड़िस, अऊ चिचियाके इबरानी म कहिस, “रब्बूनी!” (जेकर मतलब होथे “गुरूजी”)।
JOH 20:17 यीसू ह ओला कहिस, “मोला झन छू, काबरकि मेंह अभी तक ले ददा करा ऊपर नइं गे हवंव। पर मोर भाईमन करा जा अऊ ओमन ला बता कि मेंह ओकर करा ऊपर जावत हंव, जऊन ह मोर ददा अऊ तुम्हर ददा, मोर परमेसर अऊ तुम्हर परमेसर ए।”
JOH 20:18 मरियम मगदलिनी चेलामन करा जाके कहिस, “मेंह परभू ला देखे हवंव, अऊ ओह मोर ले ये बात कहे हवय।”
JOH 20:19 ओहीच दिन जऊन ह हप्ता के पहिली दिन रिहिस, संझा के बेरा, जब चेलामन एक जगह म जूरे रहंय अऊ कपाटमन भीतर ले यहूदी अगुवामन के डर के मारे बंद रहंय, तब यीसू ह आईस अऊ ओमन के बीच म ठाढ़ होके ओमन ला कहिस, “तुमन ला सांति मिलय।”
JOH 20:20 ये कहे के बाद यीसू ह अपन हांथ अऊ अपन पंजरा ओमन ला देखाईस। तब चेलामन परभू ला देखके बहुंत खुस होईन।
JOH 20:21 यीसू ह ओमन ला फेर कहिस, “तुमन ला सांति मिलय। जइसने ददा ह मोला पठोय हवय, वइसने मेंह तुमन ला पठोवत हवंव।”
JOH 20:22 ये कहिके, ओह ओमन ऊपर फूंकिस अऊ कहिस, “पबितर आतमा ला गरहन करव।
JOH 20:23 यदि तुमन काकरो पाप छेमा करहू, त ओ पाप छेमा हो जाही; यदि तुमन ओमन के पाप छेमा नइं करहू, त ओमन छेमा नइं होवंय।”
JOH 20:24 जब यीसू ह आईस, त ओ बखत बारहों चेलामन ले एक झन थोमा ह (जऊन ला दिदुमुस घलो कहे जावय) ओमन संग नइं रिहिस।
JOH 20:25 जब आने चेलामन ओला कहिन, “हमन परभू ला देखे हवन।” त ओह ओमन ला कहिस, “जब तक मेंह ओकर हांथमन म खीला के चिनहांमन ला नइं देख लूहूं अऊ जिहां खीलामन रिहिन, उहां अपन अंगरी नइं डार लूहूं अऊ ओकर पंजरा म अपन हांथ नइं डार लूहूं, तब तक मेंह बिसवास नइं करंव।”
JOH 20:26 एक हप्ता के बाद यीसू के चेलामन फेर घर म रिहिन अऊ थोमा ह ओमन के संग म रिहिस। कपाटमन भीतर ले बंद रहंय, तब फेर यीसू ह आईस अऊ ओमन के बीच म ठाढ़ होके कहिस, “तुमन ला सांति मिलय।”
JOH 20:27 तब ओह थोमा ला कहिस, “तोर अंगरी ला इहां रख अऊ मोर हांथमन ला देख। अपन हांथ ला लानके मोर पंजरा म रख अऊ अबिसवासी नइं, पर बिसवासी बन।”
JOH 20:28 ये सुनके थोमा ह ओला कहिस, “हे मोर परभू, हे मोर परमेसर!”
JOH 20:29 तब यीसू ह कहिस, “तेंह मोला देखे के बाद बिसवास करय; पर धइन अंय ओमन, जऊन मन मोला बिगर देखे बिसवास करथें।”
JOH 20:30 यीसू ह कतको आने अचरज के चिनहां अपन चेलामन के आघू म देखाईस, जऊन मन ये किताब म नइं लिखे गे हवंय।
JOH 20:31 पर येमन एकरसेति लिखे गे हवंय कि तुमन बिसवास करव कि यीसू ह मसीह अऊ परमेसर के बेटा अय, अऊ ये बिसवास करे के दुवारा तुमन ओकर नांव म जिनगी पावव।
JOH 21:1 एकर बाद यीसू ह अपन चेलामन ला तिबिरियास झील के तीर म दरसन दीस अऊ ओह ये किसम ले दरसन दीस:
JOH 21:2 सिमोन पतरस, थोमा (जऊन ला दिदुमुस कहे जाथे), नतनएल जऊन ह गलील प्रदेस के काना सहर के रिहिस, जबदी के बेटामन अऊ दू झन आने चेलामन जूरे रिहिन।
JOH 21:3 सिमोन पतरस ह ओमन ला कहिस, “मेंह मछरी मारे बर जावत हंव,” त ओमन कहिन, “हमन घलो तोर संग जाबो।” तब ओमन जाके डोंगा म चघिन, पर ओ रथिया ओमन एको ठन मछरी नइं पाईन।
JOH 21:4 बड़े बिहनियां, यीसू ह आके झील के तीर म ठाढ़ हो गीस, पर चेलामन पहिली नइं चिन्हिन कि ओह यीसू अय।
JOH 21:5 तब यीसू ह ओमन ला कहिस, “ए संगवारी हो, का तुम्हर करा कोनो मछरी हवय?” ओमन जबाब दीन, “नइं।”
JOH 21:6 ओह ओमन ला कहिस, “डोंगा के जेवनी कोति अपन जाल ला डारव, त तुमन ला मिलही।” जब ओमन जाल ला डारिन, त जाल म अतेक मछरी फंस गीन कि ओमन जाल ला खींच नइं सकिन।
JOH 21:7 तब ओ चेला जेकर ले यीसू मया करय, पतरस ला कहिस, “येह तो परभू अय।” जब सिमोन पतरस सुनिस कि येह परभू अय, त ओह अपन कपड़ा ला अपन कनिहां म लपेटिस (काबरकि ओह कुछू नइं पहिरे रिहिस) अऊ झील म कूद पड़िस।
JOH 21:8 पर आने चेलामन मछरी ले भरे जाल ला खींचत डोंगा म आईन। ओमन पानी के तीर ले जादा दूरिहा म नइं रिहिन। तीर ह करीब एक सौ मीटर दूरिहा रहय।
JOH 21:9 जब ओमन भुइयां म उतरिन, त देखिन कि उहां कोइला के आगी बरत रहय अऊ ओमा मछरी रखाय रहय अऊ उहां कुछू रोटी घलो रहय।
JOH 21:10 यीसू ह ओमन ला कहिस, “जऊन मछरीमन ला तुमन अभी पकड़े हवव, ओमा के कुछू लानव।”
JOH 21:11 सिमोन पतरस ह डोंगा ऊपर चघिस अऊ मछरी ले भरे जाल ला पानी के तीर म खींचके लानिस; जाल म 153 बड़े मछरी रहंय, पर अतकी जादा मछरी होय के बावजूद जाल ह नइं चीराईस।
JOH 21:12 यीसू ह ओमन ला कहिस, “आवव अऊ नास्ता करव।” कोनो चेला ला हिम्मत नइं होईस कि ओकर ले ये पुछय कि तेंह कोन अस? काबरकि ओमन जानत रिहिन कि येह परभू अय।
JOH 21:13 यीसू ह आईस अऊ रोटी ला लेके ओमन ला दीस, अऊ ओह मछरी ला घलो अइसनेच करिस।
JOH 21:14 येह तीसरा बार रिहिस, जब यीसू ह मरे म ले जी उठे के बाद अपन चेलामन ला दरसन दीस।
JOH 21:15 जब ओमन खा डारिन, त यीसू ह सिमोन पतरस ला कहिस, “हे सिमोन, यूहन्ना के बेटा! का तेंह येमन ले बढ़के मोला मया करथस?” ओह कहिस, “हव परभू, तेंह त जानथस कि मेंह तोर ले मया करथंव।” यीसू ह कहिस, “मोर मेढ़ा-पीलामन ला चरा।”
JOH 21:16 यीसू ह ओला फेर कहिस, “हे सिमोन, यूहन्ना के बेटा! का तेंह मोला मया करथस?” ओह जबाब दीस, “हव परभू, तेंह जानथस कि मेंह तोर ले मया करथंव।” यीसू ह कहिस, “मोर भेड़मन के रखवारी कर।”
JOH 21:17 यीसू ह तीसरा बार ओला कहिस, “हे सिमोन, यूहन्ना के बेटा! का तेंह मोला मया करथस?” पतरस ह उदास हो गीस काबरकि यीसू ह तीसरा बार ओकर ले पुछिस, “का तेंह मोला मया करथस?” पतरस ह कहिस, “हे परभू, तेंह तो जम्मो बात ला जानथस; तेंह जानथस कि मेंह तोला मया करथंव।” यीसू ह कहिस, “मोर भेड़मन ला चरा।
JOH 21:18 मेंह तोला सच कहथंव कि जब तेंह जवान रहय, त खुद कपड़ा पहिरके जिहां चाहय, उहां चल देवत रहय; पर जब तेंह डोकरा हो जाबे, तब तेंह अपन हांथ ला लमाबे, अऊ कोनो आने मनखे तोला कपड़ा पहिराही, अऊ जिहां तेंह जाय बर नइं चाहबे, उहां ओह तोला ले जाही।”
JOH 21:19 ये कहे के दुवारा यीसू ह इसारा कर दीस कि पतरस ह कोन किसम के मिरतू ले परमेसर के महिमा करही। तब यीसू ह ओला कहिस, “मोर पाछू हो ले!”
JOH 21:20 पतरस ह मुड़के देखिस कि ओ चेला ह ओमन के पाछू-पाछू आवत रहय, जेकर ले यीसू मया करय, अऊ येह ओही चेला रिहिस, जऊन ह खाना खाय के बखत यीसू कोति छाती के भार झुकके पुछे रिहिस, “हे परभू, ओह कोन ए, जऊन ह तोला दगा दीही?”
JOH 21:21 जब पतरस ह ओला देखिस, त ओह यीसू ले पुछिस, “हे परभू, एकर का होही?”
JOH 21:22 यीसू ह जबाब दीस, “यदि में चाहंव, त ओह मोर लहुंटके आवत तक जीयत रहिही, एकर ले तोला का? तेंह मोर पाछू हो ले।”
JOH 21:23 एकरसेति भाईमन के बीच म ये अफवाह फईल गीस कि ये चेला ह नइं मरही। पर यीसू ह ये नइं कहे रिहिस कि ओह नइं मरही; ओह सिरिप ये कहिस, “यदि में चाहंव, त ओह मोर लहुंटके आवत तक जीयत रहिही, एकर ले तोला का?”
JOH 21:24 येह ओही चेला अय, जऊन ह ये बातमन के गवाही देवत हवय अऊ जऊन ह ये बातमन ला लिखे हवय, अऊ हमन जानत हवन कि ओकर गवाही ह सच ए।
JOH 21:25 यीसू ह आने अऊ कतको काम करिस, यदि ओमा के हर एक बात ला लिखे जातिस, त मेंह सोचथंव कि जऊन किताबमन लिखे जातिन, ओमन ला रखे बर जम्मो संसार म जगह नइं होतिस।
ACT 1:1 हे थियुफिलुस, मेंह अपन पहिली किताब म ओ जम्मो गोठ के बारे म लिखे हवंव, जऊन ला यीसू ह अपन सेवा के सुरूआत ले करे अऊ सिखोय रिहिस,
ACT 1:2 जब तक कि ओह पबितर आतमा के सामर्थ ले प्रेरितमन ला, जेमन ला ओह चुने रिहिस, हुकूम नइं दे लीस अऊ परमेसर के दुवारा स्वरग म नइं उठाय गीस।
ACT 1:3 यीसू ह दुख सहे के बाद, ये मनखेमन ला दिखिस अऊ बहुंत अकन पक्का सबूत दीस कि ओह जीयत हवय। ओह चालीस दिन तक ओमन ला दिखाई देते रिहिस अऊ परमेसर के राज के बारे म बताते रिहिस।
ACT 1:4 एक बार, जब ओह ओमन के संग खाना खावत रिहिस, त ओह ओमन ला ये हुकूम दीस, “यरूसलेम सहर ला झन छोंड़व, पर ओ बरदान के बाट जोहव, जेकर वायदा मोर ददा ह करे हवय अऊ जेकर बारे म तुमन मोर ले सुने हवव।
ACT 1:5 यूहन्ना तो पानी ले बतिसमा दीस, पर थोरकन दिन के बाद, तुमन पबितर आतमा ले बतिसमा पाहू।”
ACT 1:6 जब ओमन ओकर संग इकट्ठा रिहिन, त ओमन यीसू ले पुछिन, “हे परभू, का तेंह इही घड़ी इसरायलीमन ला राज ला लहुंटा देबे?”
ACT 1:7 यीसू ह ओमन ला कहिस, “ओ बेरा या तारिख, जऊन ला ददा ह अपनेच अधिकार म रखे हवय, तुमन के जाने के काम नो हय।
ACT 1:8 पर जब पबितर आतमा तुम्हर ऊपर आही, त तुमन सक्ति पाहू; अऊ यरूसलेम म, अऊ जम्मो यहूदिया अऊ सामरिया म, अऊ धरती के छोर तक तुमन मोर गवाह होहू।”
ACT 1:9 ये जम्मो बात कहे के बाद, यीसू ह ओमन के देखते-देखत परमेसर के दुवारा स्वरग म उठा लिये गीस, अऊ एक बादर ह ओला ओमन के नजर ले छिपा लीस।
ACT 1:10 जब ओमन यीसू के जावत बेरा ऊपर अकास कोति आंखी गड़ियाय देखत रिहिन, त अचानक दू झन मनखे सफेद कपड़ा पहिरे ओमन के बाजू म ठाढ़ हो गीन,
ACT 1:11 अऊ ओमन कहिन, “हे गलील के मनखेमन, तुमन काबर अकास कोति देखत इहां ठाढ़े हवव? एही यीसू, जऊन ह तुमन करा ले स्वरग म उठा लिये गीस, ओहीच ढंग ले ओह फेर आही, जऊन ढंग ले ओला तुमन स्वरग कोति जावत देखे हवव।”
ACT 1:12 तब चेलामन जैतून पहाड़ ले यरूसलेम सहर लहुंट गीन। ये पहाड़ी ह यरूसलेम ले एक बिसराम दिन के रेंगई के दूरिहा म हवय।
ACT 1:13 जब ओमन यरूसलेम हबरिन, त ओमन ऊपर के कमरा म गीन जिहां ओमन ठहिरे रिहिन। उहां ये चेलामन रिहिन: पतरस, यूहन्ना, याकूब अऊ अन्द्रियास; फिलिप्पुस अऊ थोमा; बरतुलमै अऊ मत्ती; हलफई के बेटा याकूब, सिमोन जेलोतेस अऊ याकूब के बेटा यहूदा।
ACT 1:14 ये जम्मो झन, माईलोगनमन अऊ यीसू के दाई मरियम, अऊ ओकर भाईमन के संग एक चित होके पराथना करे म लगे रहंय।
ACT 1:15 तब कुछू दिन के बाद, पतरस ह बिसवासीमन के बीच म (ओमन करीब एक सौ बीस झन रिहिन) ठाढ़ होके कहिस,
ACT 1:16 “हे भाईमन हो, ये जरूरी रिहिस कि परमेसर के बचन ह पूरा होवय, जऊन ला पबितर आतमा ह दाऊद के मुहूं ले बहुंत पहिली यहूदा के बारे म कहे रिहिस, जऊन ह यीसू के पकड़वइयामन के अगुवा रिहिस।
ACT 1:17 ओह हमन के संग गने गीस अऊ ये सेवा के काम म भागीदार होईस।”
ACT 1:18 (ओह पाप के कमई ले एक ठन खेत बिसाईस; उहां ओह मुड़ के भार गिरिस; ओकर देहें ह बीच ले फाटके खुल गे अऊ ओकर जम्मो पोटा ह बाहिर निकल गीस।
ACT 1:19 यरूसलेम म जम्मो झन एकर बारे म सुनिन, एकरसेति ओमन ओ खेत के नांव अपन भासा म हकलदमा रखिन, जेकर मतलब होथे—लहू के खेत।)
ACT 1:20 पतरस ह आगे कहिस, “काबरकि भजन-संहिता के किताब म ये लिखे हवय: “ ‘ओकर घर ह खाली हो जावय; ओमा रहइया कोनो झन होवंय,’ अऊ, “ ‘ओकर अगुवई के पद ला कोनो अऊ ले लेवय।’
ACT 1:21 एकरसेति जतेक दिन तक परभू यीसू ह हमर संग आवत-जावत रिहिस,
ACT 1:22 याने कि यूहन्ना के बतिसमा ले लेके यीसू के हमर करा ले ऊपर उठाय जावत तक—जऊन मनखेमन बरोबर हमर संग रिहिन; बने होतिस कि ओ मनखेमन ले एक झन ह हमर संग, यीसू के जी उठे के गवाह बन जातिस।”
ACT 1:23 एकरसेति ओमन दू झन के नांव लीन, यूसुफ जऊन ला बरसबा कहे जाथे (ओला युसतुस घलो कहे जावय) अऊ दूसर झन मत्तियाह।
ACT 1:24 तब ओमन ये पराथना करिन, “हे परभू, तेंह हर एक झन के मन ला जानथस। हमन ला देखा कि ये दूनों म ले कोन ला तेंह चुने हवस
ACT 1:25 कि ओह ये प्रेरितई सेवा के पद ला लेवय, जऊन ला यहूदा ह छोंड़के ओ जगह म चले गीस जिहां ओला जाना चाही।”
ACT 1:26 तब ओमन दूनों झन के नांव म चिट्ठी डारिन, अऊ चिट्ठी ह मत्तियाह के नांव म निकलिस अऊ ओह गियारह प्रेरितमन के संग म गने गीस।
ACT 2:1 जब पिनतेकुस्त तिहार के दिन आईस, त जम्मो चेलामन एक ठऊर म जूरे रिहिन।
ACT 2:2 अचानक अकास ले एक बड़े गरेर सहीं सनसनाहट के अवाज होईस, अऊ ओ अवाज ले जम्मो घर ह, जिहां ओमन बईठे रिहिन, गूंज गीस।
ACT 2:3 ओमन ला आगी के जीभमन सहीं दिखिस अऊ ओह अलग होके ओमन के हर एक झन के ऊपर आके ठहर गीस।
ACT 2:4 अऊ ओमन जम्मो झन पबितर आतमा ले भर गीन अऊ जइसने पबितर आतमा ह ओमन ला बोले के सामर्थ दीस, ओमन आने-आने भासा म गोठियाय लगिन।
ACT 2:5 ओ घरी धरती के हर एक देस ले आय परमेसर के भक्त यहूदीमन यरूसलेम सहर म ठहिरे रिहिन।
ACT 2:6 जब ओमन ये अवाज सुनिन, त उहां एक भीड़ जूर गीस अऊ मनखेमन घबरा गीन, काबरकि हर एक झन ला ये सुनई देवत रिहिस कि येमन मोरेच भासा म गोठियावत हवंय।
ACT 2:7 ओ जम्मो झन अचम्भो म पड़के पुछे लगिन, “देखव, ये जम्मो मनखे जऊन मन गोठियावत हवंय, का येमन गलील प्रदेस के नो हंय?
ACT 2:8 त फेर कइसने हमन जम्मो मनखेमन अपन-अपन जनम भुइयां के भासा सुनत हवन?
ACT 2:9 हमन के बीच म पारथी, मेदी, एलामी मनखे हवंय; अऊ हमन म ले कोनो-कोनो मेसोपोटामिया, यहूदिया अऊ कप्पदुकिया, पुनतुस, एसिया,
ACT 2:10 फ्रूगिया, पंफूलिया, मिसर अऊ लिबिया देस जऊन ह कुरेन के लकठा म हवय, के रहइया अंय। रोम ले आय मनखेमन
ACT 2:11 (यहूदी अऊ यहूदी मत म चलइया, दूनों), क्रेती अऊ अरबी घलो हवंय। पर हमन जम्मो झन अपन-अपन भासा म येमन ले परमेसर के बड़े-बड़े काम के चरचा सुनत हवन।”
ACT 2:12 ओ जम्मो झन अचम्भो म पड़के अऊ घबराके एक-दूसर ला पुछे लगिन, “एकर का मतलब ए?”
ACT 2:13 पर कुछू मनखेमन, चेलामन के ठट्ठा करिन अऊ ये कहिन, “येमन तो अंगूर के मंद के नसा म हवंय।”
ACT 2:14 तब पतरस ह गियारह प्रेरितमन के संग ठाढ़ होईस अऊ ऊंचहा अवाज म भीड़ ला ये कहिस, “हे संगी यहूदी अऊ यरूसलेम के जम्मो रहइयामन, मोर गोठ ला कान लगाके सुनव अऊ समझव।
ACT 2:15 हमन नसा म नइं अन, जइसने कि तुमन समझत हवव, काबरकि अभी तो बिहान के नौ बजे हवय।
ACT 2:16 पर येह ओ बात ए, जऊन ला योएल अगमजानी के दुवारा कहे गे रिहिस:
ACT 2:17 “ ‘परमेसर ह कहिथे, आखिरी के दिन म अइसने होही कि मेंह अपन आतमा ला जम्मो मनखेमन ऊपर उंडेलहूं। तुम्हर बेटा अऊ बेटीमन अगमबानी करहीं। तुम्हर जवानमन दरसन देखहीं, अऊ तुम्हर सियानमन सपना देखहीं।
ACT 2:18 मेंह अपन दास अऊ अपन दासीमन ऊपर घलो ओ दिन म अपन आतमा उंडेलहूं अऊ ओमन अगमबानी करहीं।
ACT 2:19 मेंह ऊपर अकास म अद्भूत काम अऊ खाल्हे धरती म चिनहां, याने कि लहू, आगी अऊ धुआं के बादर देखाहूं।
ACT 2:20 परभू के महान अऊ महिमामय दिन के आय के पहिली सूरज ह अंधियार अऊ चंदा ह लहू सहीं हो जाही।
ACT 2:21 अऊ हर एक, जऊन ह परभू के नांव लीही, ओह उद्धार पाही।’
ACT 2:22 “हे इसरायलीमन हो, ए बात ला सुनव: यीसू ह नासरत के रहइया एक मनखे रिहिस। ओह परमेसर कोति ले आय रिहिस। ये बात के सबूत ओकर सामर्थ के काम, चमतकार के काम अऊ चिनहां ले परगट होथे, जऊन ला परमेसर ह तुमन के बीच म ओकर दुवारा करिस, जइसने कि तुमन खुदे जानत हवव।
ACT 2:23 जब ओह परमेसर के ठहिराय योजना अऊ पूर्व गियान के मुताबिक तुम्हर हांथ म पकड़वाय गीस, त तुमन अधरमीमन के मदद ले ओला कुरूस म चघाके मार डारेव।
ACT 2:24 पर ओला परमेसर ह मिरतू के बंधना ले छोंड़ाके जियाईस, काबरकि येह असंभव रिहिस कि ओह मिरतू के बस म रहय।
ACT 2:25 दाऊद ह ओकर बारे म कहिस, “ ‘मेंह परभू ला हमेसा अपन आघू म देखत रहेंव, काबरकि ओह मोर जेवनी हांथ कोति हवय; मेंह नइं डोलंव।
ACT 2:26 एकरसेति मोर मन ह खुस हवय, अऊ मोर मुहूं ह आनंद मनाथे; मोर देहें घलो आसा म अराम करही,
ACT 2:27 काबरकि तेंह मोला मरे मनखेमन के लोक म नइं छोंड़बे, अऊ न अपन पबितर जन ला तेंह सड़न देबे।
ACT 2:28 तेंह मोला जिनगी के रसता बताय हवस; तेंह अपन आघू म मोला आनंद ले भर देबे।’
ACT 2:29 “हे भाईमन हो, मेंह ओ कुल के मुखिया दाऊद के बारे म तुमन ला बिसवास के संग ये कह सकत हंव कि ओह तो मर गीस, अऊ दफनाय घलो गीस अऊ ओकर कबर ह आज तक इहां हवय।
ACT 2:30 पर ओह अगमजानी रिहिस अऊ ओह ये जानत रिहिस कि परमेसर ह ओकर ले ये कसम खाय रिहिस, ‘मेंह तोर बंस म ले एक झन ला तोर सिंघासन म बईठाहूं।’
ACT 2:31 ओह, का होवइया हवय येला जानके, मसीह के जी उठे के बारे म अगमबानी करिस, ‘ओकर जीव ला मरे मनखेमन के लोक म नइं छोंड़े गीस अऊ न ओकर देहें ह सड़े पाईस।’
ACT 2:32 एही यीसू ला परमेसर ह जियाईस, जेकर हमन जम्मो झन गवाह हवन।
ACT 2:33 इहीच ढंग ले ओह परमेसर के जेवनी हांथ कोति जम्मो ले बड़े पद पाईस। ददा ले ओह पबितर आतमा पाके, जेकर परतिगियां करे गे रिहिस, ओह हमर ऊपर येला उंड़ेर दीस, जऊन ला तुमन देखत अऊ सुनत हवव।
ACT 2:34 काबरकि दाऊद ह तो स्वरग म नइं चघिस, पर ओह ये कहिस, “ ‘परभू ह मोर परभू ले कहिस: “मोर जेवनी हांथ कोति बईठ
ACT 2:35 जब तक कि मेंह तोर बईरीमन ला तोर गोड़ रखे के चउकी नइं बना देवंव।” ’
ACT 2:36 “एकरसेति जम्मो इसरायली मनखेमन ये जरूर जान लेवंय कि ओही यीसू, जऊन ला तुमन कुरूस ऊपर चघाय रहेव, परमेसर ह ओला परभू अऊ मसीह दूनों ठहिराईस।”
ACT 2:37 तब सुनइयामन के हिरदय ह कलपे लगिस, अऊ ओमन पतरस अऊ बाकि प्रेरितमन ले पुछे लगिन, “हे भाईमन हो, हमन का करन?”
ACT 2:38 पतरस ह ओमन ला कहिस, “अपन पाप के पछताप करव, अऊ तुमन म ले, हर एक झन अपन-अपन पाप के छेमा खातिर यीसू मसीह के नांव म बतिसमा लेवव, अऊ तुमन पबितर आतमा के दान पाहू।
ACT 2:39 काबरकि ये परतिगियां ह तुम्हर अऊ तुम्हर संतान बर अऊ ओ जम्मो दूरिहा-दूरिहा के मनखेमन के खातिर घलो अय, जऊन मन ला परभू हमर परमेसर ह अपन लकठा म बलाही।”
ACT 2:40 पतरस ह अऊ बहुंते बात के दुवारा समझाईस अऊ ओमन ले बिनती करिस, “अपनआप ला ये खराप पीढ़ी के मनखेमन ले बचावव।”
ACT 2:41 तब जऊन मन पतरस के बात ला मानिन, ओमन बतिसमा लीन, अऊ ओहीच दिन करीब तीन हजार मनखेमन ओमन के संग मिल गीन।
ACT 2:42 ओमन प्रेरितमन ले सिकछा पाय लगिन, अऊ अपनआप ला संगति रखे म, परभू भोज के रोटी टोरे म अऊ पराथना करे म मगन रखिन।
ACT 2:43 जम्मो मनखेमन म डर हमा गे अऊ बहुंते चमतकार के काम अऊ अद्भूत काम प्रेरितमन के दुवारा होवत रिहिस।
ACT 2:44 ओ जम्मो बिसवास करइयामन लगातार एक संग संगति करत रिहिन अऊ ओमन के जम्मो चीज म जम्मो झन के हक रिहिस।
ACT 2:45 ओमन अपन-अपन संपत्ति अऊ सामान ला बेच-बेचके, जेकर जइसने जरूरत रहय वइसने ओला बांट देवंय।
ACT 2:46 ओमन हर एक दिन एक मन होके मंदिर के अंगना म जूरंय, अऊ ओमन घर-घर म रोटी टोरत, खुसी अऊ निस्कपट मन ले एक संग खावत रिहिन।
ACT 2:47 ओमन परमेसर के भजन करंय अऊ जम्मो मनखेमन के किरपा ओमन के ऊपर रिहिस। अऊ जऊन मन उद्धार पावंय, ओमन ला परभू ह हर दिन ओमन के संग मिला देवत रिहिस।
ACT 3:1 एक दिन पतरस अऊ यूहन्ना मंझनियां के तीन बजे पराथना के बेरा मंदिर जावत रिहिन।
ACT 3:2 मनखेमन एक जनम के खोरवा ला लावत रिहिन। ओमन ओला हर दिन मंदिर के सुघर नांव के दुवारी म बईठा देवंय कि ओह मंदिर म जवइयामन ले भीख मांगय।
ACT 3:3 जब ओह पतरस अऊ यूहन्ना ला मंदिर म जावत देखिस, त ओमन ले भीख मांगिस।
ACT 3:4 पतरस ह यूहन्ना के संग ओकर कोति एकटक देखके कहिस, “हमर कोति देख!”
ACT 3:5 ओह ओमन ले कुछू पाय के आसा म ओमन कोति ताके लगिस।
ACT 3:6 तब पतरस ह कहिस, “सोन अऊ चांदी तो मोर करा नइं ए, पर जऊन चीज मोर करा हवय, मेंह तोला देवत हंव। यीसू मसीह नासरी के नांव म, तेंह उठ अऊ रेंग।”
ACT 3:7 पतरस ह ओकर जेवनी हांथ ला धरके ओला ठाढ़ होय म मदद करिस अऊ तुरते खोरवा के गोड़ अऊ एड़ीमन म बल आ गीस।
ACT 3:8 ओह कूदके ठाढ़ हो गीस अऊ चले-फिरे लगिस। ओह चलत, कूदत अऊ परमेसर के भजन करत ओमन के संग मंदिर म गीस।
ACT 3:9 जब जम्मो मनखेमन ओला चलत-फिरत अऊ परमेसर के भजन करत देखिन,
ACT 3:10 त ओमन ओला चिन डारिन कि येह ओहीच ए, जऊन ह मंदिर के सुघर नांव के दुवारी म बईठके भीख मांगे करत रिहिस, अऊ ओमन ओकर संग जऊन कुछू होय रिहिस, ओला देखके अचरज अऊ अचम्भो करिन।
ACT 3:11 जब ओ भिखमंगा ह पतरस अऊ यूहन्ना के संग रहय, त जम्मो मनखेमन बहुंत अचरज करत सुलेमान के मंडप म ओमन करा दऊड़त आईन।
ACT 3:12 येला देखके पतरस ह मनखेमन ला कहिस, “हे इसरायलीमन, तुमन ये मनखे ला देखके काबर अचरज करत हव? तुमन हमर कोति अइसने एकटक काबर देखत हव कि मानो हमीचमन अपन सक्ति या भक्ति ले येला चले-फिरे के लईक बना दे हवन?
ACT 3:13 अब्राहम, इसहाक, अऊ याकूब के परमेसर, हमर बाप-ददामन के परमेसर ह अपन दास यीसू के महिमा करिस, जऊन ला तुमन मरवाय बर पकड़वाय रहेव। अऊ जब पीलातुस ह ओला छोंड़ देके फैसला करिस, त तुमन ओकर आघू म यीसू के इनकार करेव।
ACT 3:14 तुमन ओ पबितर अऊ धरमी जन के इनकार करेव, अऊ पीलातुस ले ये बिनती करेव कि एक हतियारा ला तुम्हर खातिर छोंड़ देवय।
ACT 3:15 तुमन जिनगी के देवइया ला मार डारेव, जऊन ला परमेसर ह मरे मन ले जियाईस, अऊ हमन ये बात के गवाह हवन।
ACT 3:16 ओहीच यीसू के नांव म बिसवास के दुवारा, ये मनखे ह सक्ति पाईस, जऊन ला तुमन देखत अऊ जानत हवव। येह यीसू के नांव अऊ बिसवास, जऊन ह यीसू के दुवारा आथे, येला एकदम भला-चंगा कर दे हवय जइसने कि तुमन जम्मो देखत हवव।
ACT 3:17 “हे भाईमन हो, मेंह जानत हंव कि ये काम ला तुमन अगियानता म करेव अऊ वइसनेच तुम्हर अगुवामन घलो करिन।
ACT 3:18 पर जऊन बातमन ला परमेसर ह जम्मो अगमजानीमन के दुवारा आघू ले बताय रिहिस कि ओकर मसीह ह दुख उठाही, ओ बातमन ला ओह अइसने पूरा करिस।
ACT 3:19 एकरसेति, अब तुमन अपन पापमन ले मन फिरावव अऊ परमेसर करा लहुंटव कि तुम्हर पापमन मिटाय जावंय, अऊ परभू करा ले आनंद मिलय,
ACT 3:20 अऊ ओह ओ मसीह यीसू ला पठोवय, जऊन ह तुम्हर बर आघूच ले ठहिराय गे हवय।
ACT 3:21 ये जरूरी ए कि ओह स्वरग म ओ बखत तक रहय, जब तक कि ओह जम्मो बातमन के सुधार नइं कर लेवय, जेकर बारे म परमेसर ह अपन पबितर अगमजानीमन के दुवारा बहुंत पहिली कहे रिहिस।
ACT 3:22 जइसने मूसा ह कहे रिहिस, ‘परभू तुम्हर परमेसर ह तुम्हर बर तुम्हर अपन मनखेमन के बीच ले मोर सहीं एक अगमजानी ठाढ़ करही; जऊन कुछू ओह तुम्हर ले कहय, तुमन ओकर जरूर सुनव।
ACT 3:23 पर जऊन मनखे ओ अगमजानी के बात ला नइं सुनही, ओला अपन मनखेमन ले पूरा अलग करे जाही।’
ACT 3:24 “वास्तव म, समूएल अगमजानी ले लेके ओकर बाद अवइया जम्मो अगमजानीमन परमेसर के जऊन बचन कहे हवंय, ओ जम्मो झन इहीच दिनमन के बारे म कहे हवंय।
ACT 3:25 तुमन अगमजानीमन के संतान अऊ ओ करार के संतान अव, जऊन ला परमेसर ह तुम्हर बाप-ददा संग करे रिहिस। ओह अब्राहम ले कहे रिहिस, ‘तोर बंस के दुवारा धरती के जम्मो मनखेमन आसीस पाहीं।’
ACT 3:26 जब परमेसर ह अपन दास ला जियाईस, त ओह ओला पहिली तुम्हर करा पठोईस कि ओह तुमन ले हर एक ला ओकर बुरई ले बचाय के दुवारा आसीस देवय।”
ACT 4:1 जब पतरस अऊ यूहन्ना मनखेमन ले गोठियावत रिहिन, त पुरोहितमन, अऊ मंदिर के रखवारमन के अधिकारी अऊ सदूकीमन ओमन करा आईन।
ACT 4:2 ओमन बहुंते गुस्सा करिन, काबरकि पतरस अऊ यूहन्ना मनखेमन ला सिखोवत रिहिन अऊ यीसू म मरे मनखेमन के जी उठे के बारे म परचार करत रिहिन।
ACT 4:3 ओमन पतरस अऊ यूहन्ना ला धरके दूसर दिन तक हवालात म रखिन, काबरकि संझा हो गे रिहिस।
ACT 4:4 पर संदेस के सुनइया बहुंत झन बिसवास करिन, अऊ ओमन के गनती बढ़के पांच हजार मनखे के आसपास हो गीस।
ACT 4:5 दूसर दिन अधिकारी, अगुवा अऊ कानून के गुरूमन यरूसलेम म जूरे रिहिन।
ACT 4:6 महा पुरोहित हन्ना ह उहां रिहिस, अऊ काइफा, यूहन्ना, सिकन्दर अऊ महा पुरोहित के घर के जम्मो झन घलो उहां जूरे रिहिन।
ACT 4:7 ओमन पतरस अऊ यूहन्ना ला मांझा म ठाढ़ करके ओमन ले पुछिन, “तुमन ये काम ला कोन सक्ति या काकर नांव ले करे हवव?”
ACT 4:8 तब पतरस ह पबितर आतमा ले भरके ओमन ला कहिस, “हे मनखेमन के अधिकारी अऊ अगुवामन!
ACT 4:9 ये खोरवा मनखे संग जऊन भलई करे गे हवय, आज हमन ले ओकर बारे म पुछताछ करे जावत हवय कि ओह कइसने बने होईस,
ACT 4:10 त तुमन अऊ जम्मो इसरायली मनखेमन येला जान लेवव कि यीसू मसीह नासरी, जऊन ला तुमन कुरूस ऊपर चघाय रहेव, पर परमेसर ह ओला मरे म ले जियाईस, ओकरे नांव म ये मनखे ह तुम्हर आघू म चंगा होके ठाढ़े हवय।
ACT 4:11 यीसू ह ओही पथरा ए, “ ‘जऊन ला तुम घर के बनइयामन बेकार समझेव, ओह कोना के मुख पथरा बन गीस।’
ACT 4:12 कोनो आने के दुवारा उद्धार नइं मिलय, काबरकि स्वरग के खाल्हे, मनखेमन ला अऊ कोनो आने नांव नइं दिये गीस, जेकर दुवारा हमन उद्धार पा सकन।”
ACT 4:13 जब ओमन पतरस अऊ यूहन्ना के हिम्मत ला देखिन अऊ ये जानिन कि येमन अनपढ़ अऊ सधारन मनखे अंय, त ओमन अचरज करिन। अऊ ओमन पतरस अऊ यूहन्ना ला चिन डारिन कि येमन यीसू के संग म रिहिन।
ACT 4:14 पर ओमन ओ मनखे ला जऊन ह चंगा होय रिहिस, ओमन के संग ठाढ़े देखके बिरोध म कुछू नइं कह सकिन।
ACT 4:15 पर ओमन पतरस अऊ यूहन्ना ला धरम महासभा ले बाहिर जाय के हुकूम दीन अऊ फेर ओमन आपस म बिचार करन लगिन,
ACT 4:16 “हमन ये मनखेमन के संग का करन? काबरकि यरूसलेम के जम्मो रहइयामन जानत हवंय कि येमन एक बहुंत बड़े चमतकार के काम करे हवंय, अऊ हमन येला इनकार नइं कर सकन।
ACT 4:17 पर ये बात ह मनखेमन म अऊ जादा झन फईले, एकरसेति हमन येमन ला चेता देवन कि येमन फेर कोनो मनखे ले ये नांव लेके झन गोठियावंय।”
ACT 4:18 तब ओमन पतरस अऊ यूहन्ना ला फेर भीतर बलाके हुकूम दीन कि यीसू के नांव म न तो कुछू बोलव अऊ न कुछू सिखोवव।
ACT 4:19 पर पतरस अऊ यूहन्ना ओमन ला जबाब दीन, “तुहीच मन नियाय करव कि का येह परमेसर के नजर म ठीक ए कि हमन परमेसर के बात ला छोंड़के तुम्हर बात ला मानन।
ACT 4:20 ये हमर ले नइं हो सकय कि जऊन ला हमन देखे अऊ सुने हवन, ओकर बारे म झन गोठियावन।”
ACT 4:21 तब ओमन पतरस अऊ यूहन्ना ला धमकाके छोंड़ दीन। ओमन दंड देय के बारे म कुछू फईसला नइं कर सकिन, काबरकि जऊन घटना होय रिहिस, ओकर खातिर जम्मो मनखेमन परमेसर के इस्तुति करत रिहिन।
ACT 4:22 ओ मनखे जऊन ह अद्भूत ढंग ले बने होय रिहिस, ओह चालीस साल ले जादा उमर के रिहिस।
ACT 4:23 पतरस अऊ यूहन्ना उहां ले छूटके अपन संगीमन करा आईन अऊ मुखिया पुरोहित अऊ अगुवामन के कहे ओ जम्मो बात ओमन ला बताईन।
ACT 4:24 येला सुनके ओमन के संगीमन एक मन होके, चिचिया-चिचियाके परमेसर ले ये पराथना करिन, “हे परमपरधान परभू, तेंह अकास अऊ धरती अऊ समुंदर अऊ जऊन कुछू ओमा हवय, ओ जम्मो ला बनाय हवस।
ACT 4:25 तेंह पबितर आतमा के दुवारा अपन दास हमर पुरखा दाऊद के मुहूं ले ये कहय: “ ‘जाति-जाति के मनखेमन काबर हो-हल्ला मचाथें अऊ मनखेमन काबर बेकार म सडयंत्र रचथें?
ACT 4:26 परभू के बिरूध अऊ ओकर अभिसिक्त जन के बिरूध धरती के राजामन ठाढ़ होथें अऊ सासन करइयामन एक संग जूरथें।’
ACT 4:27 सही म, तोर पबितर सेवक यीसू, जऊन ला तेंह अभिसेक करे हवस, ओकर बिरोध म, हेरोदेस अऊ पुन्तियुस पीलातुस, आनजात अऊ इसरायलीमन के संग ये सहर म सडयंत्र करे बर जूरिन,
ACT 4:28 अऊ ओमन ओहीच काम करिन जऊन ह पहिली ले तोर सामर्थ अऊ ईछा म ठहिराय गे रिहिस।
ACT 4:29 अब हे परभू, ओमन के धमकी ला धियान दे अऊ अपन दासमन के मदद कर कि तोर बचन ला बड़े हिम्मत के संग बोलंय।
ACT 4:30 चंगा करे बर अपन हांथ ला लमा अऊ अद्भूत चिनहां अऊ चमतकार के काम तोर पबितर सेवक यीसू के नांव म देखा।”
ACT 4:31 जब ओमन पराथना कर चुकिन, त ओ जगह जिहां ओमन जूरे रिहिन, डोल गीस, अऊ ओमन जम्मो झन पबितर आतमा ले भर गीन अऊ परमेसर के बचन ला हिम्मत के संग सुनाईन।
ACT 4:32 जम्मो बिसवास करइयामन एक हिरदय अऊ एक चित के रहंय। इहां तक कि कोनो अपन संपत्ति ला अपन नइं कहय, पर जम्मो झन के संपत्ति म जम्मो झन के हक रहय।
ACT 4:33 प्रेरितमन बड़े सामर्थ ले परभू यीसू के जी उठे के गवाही देवत रिहिन अऊ ओ जम्मो के ऊपर परभू के अब्बड़ अनुग्रह रिहिस।
ACT 4:34 ओमन म कोनो जरूरतमंद नइं रिहिन, काबरकि जेमन जमीन या घर के मालिक रिहिन, ओमन ओला समय-समय म बेचके, ओकर दाम ला लानंय
ACT 4:35 अऊ ओला प्रेरितमन के गोड़ म मढ़ा देवंय, अऊ जेकर जइसने जरूरत रहय, वइसने ओला बांट देवंय।
ACT 4:36 यूसुफ नांव के एक मनखे रिहिस; ओह लेवी बंस के रिहिस, अऊ साइप्रस दीप के रहइया रिहिस। प्रेरितमन ओकर नांव बरनबास (जेकर मतलब उत्साहित करइया के बेटा होथे) रखे रिहिन।
ACT 4:37 ओह अपन एक ठन खेत ला बेचिस अऊ ओ रकम ला लानके प्रेरितमन के गोड़ म मढ़ा दीस।
ACT 5:1 हनन्याह नांव के एक मनखे रिहिस। ओह अऊ ओकर घरवाली सफीरा अपन कुछू भुइयां ला बेचिन।
ACT 5:2 हनन्याह ह ओकर दाम म ले कुछू रकम अपन करा रख लीस अऊ ये बात ला ओकर घरवाली घलो जानत रिहिस। ओह रकम के एक भाग ला लानके प्रेरितमन के गोड़ करा मढ़ा दीस।
ACT 5:3 तब पतरस ह कहिस, “हे हनन्याह, सैतान ह तोर मन म, ये बात ला डारिस कि तेंह पबितर आतमा ले लबारी मारय अऊ जमीन म ले मिले कुछू रकम ला अपन करा रख ले हवस।
ACT 5:4 जब जमीन ह नइं बेचाय रिहिस, त का ओह तोर नइं रिहिस? अऊ जब बेचा गे, त पईसा ह का तोर अधिकार म नइं रिहिस? अइसन काम करे के बिचार तोर मन म कइसे आईस? तेंह मनखे ले नइं, पर परमेसर ले लबारी मारे हवस।”
ACT 5:5 ये बात ला सुनतेच ही हनन्याह ह गिर पड़िस अऊ मर गीस। येला देखके जम्मो सुनइयामन अब्बड़ डरा गीन।
ACT 5:6 पर जवानमन उठके ओकर लास ला कपड़ा म लपेटिन अऊ बाहिर म ले जाके ओला माटी दे दीन।
ACT 5:7 लगभग तीन घंटा के बाद ओकर घरवाली ह पतरस करा घर के भीतर आईस। जऊन कुछू होय रिहिस, ओह ओला नइं जानत रिहिस।
ACT 5:8 पतरस ह ओकर ले पुछिस, “मोला बता, का तें अऊ तोर घरवाला ओ जमीन ला अतकेच म बेचे रहेव?” त ओह कहिस, “हां, अतकेच म बेचे रहेंन।”
ACT 5:9 पतरस ह ओला कहिस, “ये का बात ए कि तुमन दूनों परभू के आतमा ला परखे बर एका करे रहेव? देख, तोर घरवाला ला माटी देवइयामन दुवारीच म ठाढ़े हवंय, अऊ ओमन तोला घलो बाहिर ले जाहीं।”
ACT 5:10 तब ओह तुरते ओकर गोड़ तरी गिर पड़िस अऊ ओह घलो मर गीस। तब जवानमन भीतर आके ओला मरे पाईन, अऊ बाहिर ले जाके ओला ओकर घरवाला के लकठा म माटी दे दीन।
ACT 5:11 अऊ जम्मो कलीसिया ऊपर अऊ ये बात के जम्मो सुनइयामन ऊपर अब्बड़ डर हमा गे।
ACT 5:12 प्रेरितमन बहुंते चमतकार अऊ अचरज के काम मनखेमन के बीच म करत रिहिन। अऊ जम्मो बिसवासीमन एक दल होके राजा सुलेमान के मंडप म जूरंय।
ACT 5:13 पर आने मनखेमन ले काकरो ये हिम्मत नइं होवत रिहिस कि आके ओमन के संग मिल जावंय। तभो ले मनखेमन ओमन के बहुंत बड़ई करत रिहिन।
ACT 5:14 परभू म बिसवास करइया अब्बड़ मनखे अऊ माईलोगनमन कलीसिया म मिलत रिहिन।
ACT 5:15 इहां तक कि मनखेमन बिमरहामन ला सड़क ऊपर लान-लानके खटिया अऊ चटई मन म सुता देवत रिहिन कि जब पतरस ह आवय, त कम से कम ओकर छइहां ह ओमन के कुछू झन ऊपर पड़ जावय।
ACT 5:16 यरूसलेम के आसपास के नगर ले घलो कतको मनखेमन बिमरहा अऊ असुध आतमा के सताय मन ला लानय, अऊ ओ जम्मो झन बने हो जावत रिहिन।
ACT 5:17 तब महा पुरोहित अऊ ओकर जम्मो संगवारी जऊन मन सदूकीमन के दल के रिहिन, जलन करे लगिन।
ACT 5:18 ओमन प्रेरितमन ला पकड़के जेल म डाल दीन।
ACT 5:19 पर ओ रथिया परभू के एक स्वरगदूत ह जेल के कपाटमन ला खोलके ओमन ला बाहिर ले आईस,
ACT 5:20 अऊ ओमन ला कहिस, “जावव, मंदिर म ठाढ़ होके ये नवां जिनगी के जम्मो बात मनखेमन ला सुनावव।”
ACT 5:21 जइसने ओमन ला कहे गे रिहिस, ओमन बिहनियां होतेच ही मंदिर म जाके मनखेमन ला उपदेस देवन लगिन। जब महा पुरोहित अऊ ओकर संगीमन आईन, त ओमन धरम महासभा जऊन ह इसरायलीमन के मुखियामन के पंचायत रिहिस, बलाईन अऊ जेल ला संदेस पठोईन कि प्रेरितमन ला ओमन करा लाने जावय।
ACT 5:22 पर जब सिपाहीमन जेल म हबरिन, त ओमन पतरस अऊ यूहन्ना ला उहां नइं पाईन। तब ओमन लहुंटके बताईन,
ACT 5:23 “हमन जेल ला बड़े हिफाजत ले बंद अऊ पहरेदारमन ला बाहिर कपाटमन म ठाढ़े पायेंन, पर जब हमन कपाटमन ला खोलेंन, त भीतर म हमन ला कोनो नइं मिलिन।”
ACT 5:24 जब मंदिर के सिपाहीमन के अधिकारी अऊ मुखिया पुरोहितमन ये बात ला सुनिन, त चिंता करके सोचे लगिन कि ये का होवइया हवय?
ACT 5:25 तब एक झन आके ओमन ला बताईस, “देखव! जऊन मन ला तुमन जेल म बंद करे रहेव, ओमन मंदिर के अंगना म ठाढ़ होके मनखेमन ला उपदेस देवत हवंय।”
ACT 5:26 तब अधिकारी ह अपन सिपाहीमन संग गीस अऊ प्रेरितमन ला ले आईस। ओमन बल के उपयोग नइं करिन, काबरकि ओमन डरावत रिहिन कि कहूं मनखेमन ओमन ला पथरा फेंकके मार झन डारंय।
ACT 5:27 ओमन प्रेरितमन ला लानके धरम महासभा के आघू म ठाढ़ करिन। तब महा पुरोहित ह ओमन ले पुछिस,
ACT 5:28 “का हमन तुमन ला चेतउनी देके ये हुकूम नइं दे रहेंन कि तुमन ये नांव म उपदेस झन देवव? तभो ले, तुमन जम्मो यरूसलेम सहर ला अपन उपदेस ले भर दे हवव, अऊ ओ मनखे के हतिया के दोस हमर ऊपर लाने चाहत हव।”
ACT 5:29 तब पतरस अऊ आने प्रेरितमन जबाब दीन: “मनखेमन के हुकूम ले बढ़के परमेसर के हुकूम ला मानना हमर काम ए।
ACT 5:30 हमर पुरखामन के परमेसर ह यीसू ला मरे म ले जियाईस, जऊन ला तुमन कुरूस म लटकाके मार डारे रहेव।
ACT 5:31 ओहीच ला परमेसर ह अगुवा अऊ उद्धार करइया ठहिराके अपन जेवनी हांथ कोति सबले बड़े जगह दीस, ताकि ओह इसरायलीमन ला ओमन के पाप ले मन-फिराय के सक्ति अऊ ओमन के पाप के छेमा देवय।
ACT 5:32 हमन ये बातमन के गवाह हवन अऊ पबितर आतमा घलो गवाह हवय, जऊन ला परमेसर ह ओ मनखेमन ला दे हवय, जऊन मन ओकर हुकूम मानथें।”
ACT 5:33 येला सुनके ओमन अब्बड़ गुस्सा करिन अऊ ओमन प्रेरितमन ला मार डारे चाहिन।
ACT 5:34 पर गमलीएल नांव के एक फरीसी, जऊन ह कानून के गुरू रिहिस अऊ जम्मो मनखेमन ओकर आदर करंय। ओह धरम महासभा म ठाढ़ होके प्रेरितमन ला थोरकन देर बर बाहिर कर देय के हुकूम दीस
ACT 5:35 अऊ ओह धरम महासभा ले कहिस, “हे इसरायलीमन, जऊन कुछू तुमन ये मनखेमन के संग करे चाहत हव, ओला सोच-समझके करव।
ACT 5:36 कुछू समय पहिली थियूदास ह ये कहत उठे रिहिस कि ओह घलो कुछू अय अऊ करीब चार सौ मनखेमन ओकर संग हो लीन। पर ओह मार डारे गीस, अऊ ओकर पाछू चलइया जम्मो झन एती-ओती हो गीन, अऊ कुछू नइं होईस।
ACT 5:37 ओकर बाद जनसंख्या के गनती होय के दिन म गलील प्रदेस के यहूदा ह उठिस। ओह घलो कुछू मनखेमन ला अपन संग कर लीस। पर ओह घलो मार डारे गीस, अऊ ओकर पाछू चलइया जम्मो झन एती-ओती हो गीन।
ACT 5:38 एकरसेति मेंह तुमन ला कहत हंव कि ये मनखेमन ले दूरिहा रहव, अऊ ओमन ला अकेला छोंड़ देवव, काबरकि कहूं ओमन के ये काम मनखेमन कोति ले अय, त आपे-आप बंद हो जाही।
ACT 5:39 पर कहूं येह परमेसर कोति ले अय, तब तुमन ओमन ला कइसने घलो करके नइं रोक सकव; अइसने झन होवय कि तुमन परमेसर ले अपनआप ला लड़त पावव।”
ACT 5:40 तब ओमन गमलीएल के बात ला मान लीन। ओमन प्रेरितमन ला बलाईन अऊ ओमन ला कोर्रा म पीटवाईन, अऊ ये हुकूम देके छोंड़ दीन कि यीसू के नांव म फेर कभू बात झन करिहव।
ACT 5:41 प्रेरितमन ये बात म खुस होईन कि ओमन यीसू के नांव के खातिर निरादर होय के काबिल ठहिरिन, अऊ ओमन खुसी मनावत धरम महासभा ले बाहिर चले गीन।
ACT 5:42 पर ओमन हर एक दिन मंदिर म अऊ घर-घर म उपदेस करे बर, अऊ ये बात के सुघर संदेस सुनाय बर बंद नइं करिन कि यीसू ह मसीह अय।
ACT 6:1 ओ दिन म जब चेलामन के गनती ह अब्बड़ बढ़त रिहिस, तब यूनानी भासा बोलइया यहूदीमन इबरानी भासा बोलइया यहूदीमन के सिकायत करे लगिन। ओमन कहिन, “हर दिन के भोजन बंटई म हमर बिधवामन के धियान नइं दिये जावत हवय।”
ACT 6:2 एकरसेति ओ बारह प्रेरितमन जम्मो चेलामन के सभा ला अपन करा बलाके कहिन, “येह ठीक नो हय कि हमन परमेसर के बचन के सेवा ला छोंड़के, खवाय-पीयाय के काम म लगे रहन।
ACT 6:3 एकरसेति हे भाईमन! अपन बीच म ले सात झन मनखे ला जऊन मन पबितर आतमा अऊ बुद्धि ले भरपूर हवंय, चुन लेवव कि हमन ओमन के हांथ म ये बुता ला सऊंप देवन।
ACT 6:4 पर हमन तो पराथना अऊ परमेसर के बचन के सेवा म लगे रहिबो।”
ACT 6:5 ये बात जम्मो सभा ला बने लगिस अऊ ओमन स्तिफनुस नांव के एक मनखे ला चुनिन, जऊन ह बिसवास अऊ पबितर आतमा ले भरपूर रहय; एकर संग ओमन फिलिप्पुस, प्रखुरूस, नीकानोर, तीमोन, परमिनास अऊ अंताकिया के रहइया नीकुलाउस ला जऊन ह यहूदी बिसवास म आ गे रिहिस, चुन लीन।
ACT 6:6 ओमन येमन ला प्रेरितमन के आघू म लानिन अऊ प्रेरितमन पराथना करके ओमन ऊपर हांथ रखिन।
ACT 6:7 अऊ परमेसर के बचन बगरत गीस अऊ यरूसलेम सहर म चेलामन के गनती अब्बड़ बाढ़त गीस। पुरोहितमन घलो बहुंत बड़े संखिया म ये बिसवास म चलनेवाला हो गीन।
ACT 6:8 स्तिफनुस ह परमेसर के अनुग्रह अऊ सक्ति ले भरपूर होके मनखेमन के बीच म बड़े-बड़े अचरज के काम अऊ चमतकार के चिनहां देखावत रिहिस।
ACT 6:9 तभो ले सुतंतर मनखेमन के सभा-घर के सदस्यमन ओकर बिरोध करिन। ओमन ये रिहिन—कुरेन, सिकन्दरिया अऊ संग म किलिकिया अऊ एसिया प्रदेस के यहूदीमन। ये मनखेमन स्तिफनुस के संग बिवाद करन लगिन।
ACT 6:10 पर ओमन ओकर गियान अऊ पबितर आतमा के सामना नइं कर सकिन, जेकर सक्ति ले ओह गोठियावत रिहिस।
ACT 6:11 तब ओमन कुछू मनखेमन ला चुपेचाप अपन कोति कर लीन, जऊन मन ये कहे लगिन, “हमन येला मूसा अऊ परमेसर के बिरोध म निन्दा करत सुने हवन।”
ACT 6:12 ये किसम ले ओमन मनखेमन ला अऊ अगुवामन ला अऊ कानून के गुरूमन ला भड़काईन अऊ ओमन स्तिफनुस ला पकड़के धरम महासभा म ले गीन।
ACT 6:13 ओमन लबरा गवाह खड़े करिन, जऊन मन ये कहिन, “ये मनखे ह ये पबितर जगह अऊ मूसा के कानून के बिरोध म हमेसा बोलत रहिथे।
ACT 6:14 हमन येला ये कहत सुने हवन कि नासरत के यीसू ह ये मंदिर ला गिरा दीही अऊ ओ रीति-रिवाजमन ला बदल दीही, जऊन ला मूसा ह हमन ला सऊंपे हवय।”
ACT 6:15 तब धरम महासभा म बईठे जम्मो झन स्तिफनुस ला टकटकी लगाके देखिन अऊ ओमन ला ओकर चेहरा ह स्वरगदूत के चेहरा सहीं दिखत रिहिस।
ACT 7:1 तब महा पुरोहित ह स्तिफनुस ले पुछिस, “का तोर ऊपर लगाय गे दोसमन सच अंय?”
ACT 7:2 स्तिफनुस ह जबाब दीस, “हे भाई अऊ ददामन हो, सुनव! हमर पुरखा अब्राहम ह हारान देस म रहे के पहिली मेसोपोटामिया म रहत रिहिस, तब महिमामय परमेसर ह ओला दरसन दीस,
ACT 7:3 अऊ अब्राहम ला कहिस, ‘तें अपन देस अऊ अपन मनखेमन ला छोंड़के ओ देस म चले जा, जेला मेंह तोला देखाहूं।’
ACT 7:4 “तब ओह कसदीमन के देस ले निकलके हारान म जाके बस गीस। ओकर ददा के मरे के बाद, परमेसर ह ओला उहां ले लानके ये देस म बसाईस, जिहां अब तुमन रहत हव।
ACT 7:5 परमेसर ह इहां अब्राहम ला कुछू जायदाद नइं दीस। इहां तक कि गोड़ मढ़ाय के ठऊर घलो नइं। पर परमेसर ह ओकर ले वायदा करिस, ‘मेंह ये देस ला, तोर अऊ तोर पाछू तोर बंस के अधिकार म कर दूहूं।’ जबकि ओ समय अब्राहम के कोनो लइका नइं रिहिस।
ACT 7:6 परमेसर ह ओला ये घलो कहिस, ‘तोर संतानमन आने देस म परदेसी होहीं, अऊ ओमन गुलाम बनाय जाहीं अऊ चार सौ साल तक ओमन के ऊपर अतियाचार करे जाही।’
ACT 7:7 फेर परमेसर ह कहिस, ‘जऊन देस के ओमन गुलाम के रूप म सेवा करहीं, ओ देस ला में दंड दूहूं, अऊ ओकर बाद ओमन ओ देस ले निकलके इही ठऊर म मोर सेवा करहीं।’
ACT 7:8 तब परमेसर ह अब्राहम ले खतना कराय के करार करिस। अऊ अब्राहम के बेटा इसहाक पईदा होईस। ओकर जनम के आठ दिन के पाछू ओकर खतना करे गीस। इसहाक ले याकूब अऊ याकूब ले बारह कुल के मुखियामन पईदा होईन।
ACT 7:9 “याकूब के बड़े बेटामन छोटे बेटा यूसुफ ले जलन रखे लगिन अऊ ओला मिसर देस जवइयामन के हांथ म गुलाम के रूप में बेच दीन। पर परमेसर ह यूसुफ के संग रहय।
ACT 7:10 अऊ परमेसर ह ओला, ओकर जम्मो दुख-तकलीफ ले छुड़ाके, बुद्धि दीस अऊ मिसर के राजा फिरौन के मन जीते के काबिल बनाईस। फिरौन राजा ह ओला मिसर देस अऊ अपन जम्मो महल ऊपर सासन करइया ठहिराईस।
ACT 7:11 “तब जम्मो मिसर अऊ कनान देस म अकाल पड़िस, जेकर खातिर मनखेमन के ऊपर भारी संकट आ गीस, अऊ हमर पुरखामन ला खाय बर अन्न नइं मिलिस।
ACT 7:12 जब याकूब ह ये सुनिस कि मिसर देस म अनाज हवय, त ओह हमर पुरखामन ला पहिली बार पठोईस।
ACT 7:13 जब ओमन दूसर बार आईन, त यूसुफ ह अपन भाईमन ला बताईस कि ओह कोन ए अऊ फिरौन राजा ह यूसुफ के कुटुम्ब के बारे म जानिस।
ACT 7:14 एकर बाद, यूसुफ ह अपन ददा याकूब अऊ अपन जम्मो कुटुम्ब ला, जऊन मन पचहत्तर मनखे रिहिन, अपन करा मिसर देस म बलाईस।
ACT 7:15 तब याकूब ह मिसर देस गीस, जिहां ओह अऊ हमर पुरखामन मर गीन।
ACT 7:16 ओमन के लासमन ला सकेम सहर म वापिस लाने गीस अऊ ओ कबर म रखे गीस, जऊन ला अब्राहम ह सकेम म हमोर के बेटामन ले पईसा देके बिसाय रिहिस।
ACT 7:17 “जब ओ परतिगियां के पूरा होय के समय लकठा आईस, जऊन ला परमेसर ह अब्राहम ले करे रिहिस, त ओ समय मिसर देस म हमर मनखेमन के संखिया बहुंत बाढ़ गे रहय।
ACT 7:18 तब मिसर देस म एक नवां राजा ह राज करन लगिस, जऊन ह यूसुफ ला नइं जानत रिहिस।
ACT 7:19 ओह हमर मनखेमन ले छल-कपट करिस अऊ हमर पुरखामन के ऊपर बहुंत अतियाचार करिस अऊ दबाव डालिस कि ओमन अपन नवां जनमे लइकामन ला मरे बर बाहिर फटिक देवंय।
ACT 7:20 “ओही समय म मूसा के जनम होईस अऊ ओह परमेसर के नजर म बहुंत सुघर रिहिस। ओह तीन महिना तक ले अपन ददा के घर म पाले-पोसे गीस।
ACT 7:21 पर जब ओला बाहिर रख दिये गीस, त फिरौन के बेटी ह ओला ले लीस, अऊ अपन बेटा बनाके ओला पालिस-पोसिस।
ACT 7:22 मूसा ला मिसर देस के जम्मो गियान सिखोय-पढ़ोय गीस। ओह बात अऊ काम करे म सामर्थी रिहिस।
ACT 7:23 “जब मूसा ह चालीस साल के होईस, त अपन मन म कहिस कि मेंह अपन इसरायली भाईमन ले मुलाकात करंव।
ACT 7:24 मूसा ह अपन एक जाति-भाई के ऊपर अनियाय होवत देखके ओला बचाईस अऊ ओ मिसरी मनखे ला मारके बदला लीस, जऊन ह अनियाय करत रहय।
ACT 7:25 मूसा ह सोचिस कि मोर जाति-भाईमन समझहीं कि परमेसर ह मोर दुवारा ओमन के जान बचाही, पर ओमन नइं समझिन।
ACT 7:26 दूसर दिन जब दू झन इसरायलीमन आपस म लड़त रिहिन, त मूसा ह उहां आईस अऊ ये कहिके ओमन म मेल-मिलाप कराय के कोसिस करिस, ‘ए मनखेमन! तुमन त भाई-भाई अव; एक-दूसर ला काबर हानि पहुंचाय चाहत हव?’
ACT 7:27 “पर जऊन इसरायली ह दूसर ऊपर अनियाय करत रिहिस, ओह ये कहिके मूसा ला हटा दीस कि तोला कोन ह हमर ऊपर हाकिम अऊ नियाय करइया ठहिराय हवय।
ACT 7:28 कल जइसने तेंह ओ मिसरी मनखे ला मार डारे रहय, वइसने का तेंह मोला घलो मार डारे चाहत हस।
ACT 7:29 ये बात ला सुनके मूसा ह उहां ले भाग गीस अऊ मिदयान देस म आके परदेसी सहीं रहे लगिस। उहां ओकर दू झन बेटा पईदा होईन।
ACT 7:30 “जब चालीस साल बीत गे, तब एक स्वरगदूत ह सीनय पहाड़ के लकठा म निरजन प्रदेस म मूसा करा बरत झाड़ी के आगी म परगट होईस।
ACT 7:31 मूसा ह ओ दरसन ला देखके अचम्भो करिस। जब ओह ओला देखे बर अऊ लकठा म गीस, तब ओह परभू के ये अवाज सुनिस:
ACT 7:32 ‘मेंह तोर पुरखा—अब्राहम, इसहाक अऊ याकूब के परमेसर अंव।’ येला सुनके मूसा ह डर के मारे कांपे लगिस, अऊ ओह ऊपर देखे के घलो हिम्मत नइं करिस।
ACT 7:33 “तब परभू ह मूसा ला कहिस, ‘अपन पांव के पनही ला उतार ले, काबरकि जऊन ठऊर म तेंह ठाढ़े हस, ओह पबितर भुइयां ए।
ACT 7:34 मेंह सही म मिसर देस म अपन मनखेमन के दुरदसा ला देखे हवंव। मेंह ओमन के कलहरई अऊ रोवई सुने हवंव। एकरसेति, मेंह ओमन ला छोंड़ाय बर उतरे हवंव। अब तेंह आ, मेंह तोला मिसर देस वापिस पठोहूं।’
ACT 7:35 “जऊन मूसा ला ओमन ये कहिके नकारे रिहिन कि तोला कोन ह हमर ऊपर हाकिम अऊ नियाय करइया ठहिराय हवय? ओही मूसा ला परमेसर ह हाकिम अऊ उबार करइया ठहिराके, ओ स्वरगदूत के दुवारा ओला पठोईस, जऊन ह ओला झाड़ी म दरसन दे रिहिस,
ACT 7:36 एही मनखे मूसा ह मिसर देस म अऊ लाल-समुंदर अऊ निरजन प्रदेस म चालीस साल तक अचरज के काम अऊ चमतकार के चिनहां देखा-देखाके ओमन ला गुलामी ले निकालके ले आईस।
ACT 7:37 “येह ओही मूसा ए, जऊन ह इसरायलीमन ले कहे रिहिस, ‘परमेसर ह तुम्हर बर तुम्हर अपन मनखेमन ले मोर सहीं एक अगमजानी ठाढ़ करही।’
ACT 7:38 येह ओही मूसा ए, जऊन ह निरजन प्रदेस म सभा म ओ स्वरगदूत संग रिहिस, जऊन ह सीनय पहाड़ ऊपर ओकर ले गोठियाईस। ओह हमर पुरखामन के संग रिहिस। ओही मूसा ला परमेसर के जीयत बचन मिलिस कि ओह ओ जीयत बचन ला हमर करा अमरावय।
ACT 7:39 “पर हमर पुरखामन मूसा के बात ला नइं मानिन। ओमन मूसा ला नकारके अपन हिरदय ला फेर मिसर देस कोति लगाईन।
ACT 7:40 ओमन हारून ला कहिन, ‘हमर बर अइसन देवता बना, जऊन ह हमर आघू-आघू चलही, काबरकि ये मूसा जऊन ह हमन ला मिसर देस ले निकालके लानिस, हमन नइं जानन कि ओला का होईस?’
ACT 7:41 ओ दिन म ओमन एक ठन बछवा के मूरती बनाईन अऊ ओ मूरती के आघू म बलिदान चघाईन। अइसने किसम ले ओमन अपन हांथ के काम म खुस होय लगिन।
ACT 7:42 तब परमेसर ह मुहूं मोड़के ओमन ला छोंड़ दीस कि ओमन अकास के तारामन के पूजा करंय, जइसने कि अगमजानीमन के किताब म लिखे हवय: “ ‘हे इसरायल के मनखेमन, निरजन जगह म चालीस साल तक का तुमन मोर बर बलिदान अऊ भेंट लानेव?
ACT 7:43 नइं, तुमन मोलेक के तम्बू अऊ अपन रिफान देवता के तारा ला लेके फिरत रहेव, याने कि ओ मूरतीमन जऊन ला तुमन पूजा करे बर बनाय रहेव। एकरसेति, मेंह तुमन ला बेबिलोन ले बाहिर बंधुवई म पठो दूहूं।’
ACT 7:44 “करार कानून के पबितर-तम्बू ह निरजन प्रदेस म हमर पुरखामन के संग रिहिस। परमेसर ह मूसा ला कहे रिहिस, ‘जऊन नमूना ला तेंह देखे हवस, ओकरे मुताबिक ओला बना।’
ACT 7:45 ओह ओही नमूना के मुताबिक बनाय गीस। ओहीच पबितर-तम्बू ला हमर पुरखामन पाछू यहोसू के संग ये ठऊर म लानिन जब ओमन आनजातमन के देस म अधिकार पाईन, जऊन मन ला परमेसर ह हमर पुरखामन के आघू ले निकाल दीस। अऊ ओह दाऊद के समय तक देस म रिहिस।
ACT 7:46 दाऊद के ऊपर परमेसर के दया रिहिस अऊ दाऊद ह बिनती करिस, ‘मेंह याकूब के परमेसर बर रहे के एक ठऊर बनाहूं।’
ACT 7:47 पर येह सुलेमान रिहिस, जऊन ह परमेसर खातिर घर बनाईस।
ACT 7:48 “पर सर्वोच्च परमेसर ह मनखे के बनाय घरमन म नइं रहय, जइसने कि अगमजानी ह कहिथे:
ACT 7:49 “ ‘परभू ह कहिथे—स्वरग ह मोर सिंघासन अऊ धरती ह मोर गोड़ रखे के चउकी अय। मोर बर तुमन कोन किसम के घर बनाहू? या मोर बिसराम के ठऊर कहां होही?
ACT 7:50 का ये जम्मो चीज ला मोर हांथ ह नइं बनाय हे?’
ACT 7:51 “हे ढीठ मनखेमन! तुमन हिरदय म परमेसर के संदेस ला सुने नइं चाहत हव। तुमन हमेसा पबितर आतमा के बिरोध करथव, जइसने तुम्हर पुरखामन करत रिहिन।
ACT 7:52 अगमजानीमन ले कोन ला तुम्हर पुरखामन नइं सताय हवंय? ओमन ओ संदेसियामन ला मार डारिन, जऊन मन ओ धरमी जन के आय के खबर बहुंत पहिली दे रिहिन। अऊ अब तुमन घलो ओला धोखा दे हवव अऊ मार डारे हवव।
ACT 7:53 तुमन स्वरगदूत के दुवारा लाने कानून ला त पाय हवव, पर ओकर पालन नइं करेव।”
ACT 7:54 ये बात ला सुनके ओमन अब्बड़ गुस्सा करिन अऊ ओकर ऊपर दांत पीसन लगिन।
ACT 7:55 पर स्तिफनुस ह पबितर आतमा ले भरके, स्वरग कोति देखिस अऊ ओह परमेसर के महिमा, अऊ यीसू ला परमेसर के जेवनी कोति ठाढ़े देखिस।
ACT 7:56 अऊ ओह कहिस, “देखव! मेंह स्वरग ला खुला, अऊ मनखे के बेटा ला परमेसर के जेवनी कोति ठाढ़े देखत हवंव।”
ACT 7:57 तब ओमन अब्बड़ चिचियाके अपन कान ला बंद कर लीन, अऊ ओ जम्मो झन ओकर ऊपर लपकिन,
ACT 7:58 अऊ ओला घसीटत नगर के बाहिर ले गीन, अऊ उहां ओला पथरवाह करे लगिन। अऊ गवाहमन अपन-अपन ओनहा ला साऊल नांव के एक जवान के जिम्मा म उतारके रख दीन।
ACT 7:59 जब ओमन स्तिफनुस ला पथरवाह करत रहंय, त ओह ये कहिके पराथना करिस, “हे परभू यीसू! मोर आतमा ला गरहन कर।”
ACT 7:60 तब ओह माड़ी टेकिस अऊ पुकारके कहिस, “हे परभू! ये पाप ला ओमन ऊपर झन लगा।” ये कहिके ओह मर गीस।
ACT 8:1 अऊ ओमन के दुवारा ओकर मारे जाय म साऊल के सहमती रिहिस। ओहीच दिन यरूसलेम म कलीसिया ऊपर भारी अतियाचार होईस, अऊ प्रेरितमन ला छोंड़के जम्मो बिसवासीमन, यहूदिया अऊ सामरिया प्रदेस म तितिर-बितिर हो गीन।
ACT 8:2 परमेसर के भक्तमन स्तिफनुस के लास ला माटी दीन अऊ ओकर बर अब्बड़ बिलाप करिन।
ACT 8:3 पर साऊल ह कलीसिया ला उजारत रिहिस। ओह घर-घर घुसरके मरद अऊ माईलोगनमन ला घसीट-घसीटके लानय अऊ जेल म डाल देवय।
ACT 8:4 जऊन बिसवासीमन तितिर-बितिर हो गे रिहिन, ओमन जिहां-जिहां भी गीन, उहां सुघर संदेस के परचार करिन।
ACT 8:5 फिलिप्पुस ह सामरिया के एक सहर म गीस अऊ उहां मनखेमन ला यीसू मसीह के परचार करे लगिस।
ACT 8:6 जब भीड़ के मनखेमन फिलिप्पुस के बात ला सुनिन अऊ ओकर चमतकार के काममन ला देखिन, त एक मन होके ओकर बात म धियान लगाईन।
ACT 8:7 काबरकि कतको झन म ले असुध आतमामन अब्बड़ चिचियावत निकल गीन, अऊ कतको लकवा के मारे अऊ खोरवामन बने हो गीन।
ACT 8:8 एकरसेति ओ सहर के मनखेमन अब्बड़ खुस होईन।
ACT 8:9 ओ सहर म सिमोन नांव के एक झन मनखे रहय। ओह जादू-टोना करके सामरी मनखेमन ला चकित करय, अऊ अपनआप ला बहुंत बड़े मनखे बतावय।
ACT 8:10 अऊ जम्मो—छोटे ले लेके बड़े तक ओकर बात ऊपर धियान देवंय अऊ ए कहंय, “ये मनखे ह परमेसर के ओ सक्ति ए, जऊन ला महान सक्ति कहे जाथे।”
ACT 8:11 ओह अब्बड़ दिन तक ओमन ला अपन जादू-टोना के काम ले चकित करके रखे रिहिस। एकरसेति, ओमन ओला अब्बड़ मानत रिहिन।
ACT 8:12 पर जब ओमन फिलिप्पुस के बात ला बिसवास करिन, जऊन ह परमेसर के राज के सुघर संदेस अऊ यीसू मसीह के नांव के परचार करत रिहिस, तब ओमन—का मनखे, का माईलोगन, जम्मो झन बतिसमा लेय लगिन।
ACT 8:13 तब सिमोन ह खुदे बिसवास करिस अऊ बतिसमा लेके फिलिप्पुस के पाछू चले लगिस। ओह चिनहां अऊ चमतकार के काममन ला देखके चकित होवत रिहिस।
ACT 8:14 जऊन प्रेरितमन यरूसलेम म रिहिन, जब ओमन सुनिन कि सामरिया के मनखेमन परमेसर के बचन ला मान ले हवंय, त ओमन पतरस अऊ यूहन्ना ला ओमन करा पठोईन।
ACT 8:15 पतरस अऊ यूहन्ना उहां गीन अऊ ओ मनखेमन बर पराथना करिन कि ओमन पबितर आतमा पावंय,
ACT 8:16 काबरकि पबितर आतमा अभी तक ले ओमन म के काकरो ऊपर नइं आय रिहिस। ओमन सिरिप परभू यीसू के नांव म बतिसमा ले रिहिन।
ACT 8:17 तब पतरस अऊ यूहन्ना ओमन ऊपर अपन हांथ रखिन अऊ ओमन पबितर आतमा पाईन।
ACT 8:18 जब सिमोन ह देखिस कि प्रेरितमन के हांथ रखे ले पबितर आतमा मिलथे, त ओह ओमन करा रूपिया लानके कहिस,
ACT 8:19 “ये अधिकार मोला घलो देवव ताकि जेकर ऊपर मेंह हांथ रखंव, ओह पबितर आतमा पावय।”
ACT 8:20 पतरस ह ओला कहिस, “तोर रूपिया ह तोर संग नास होवय, काबरकि तेंह परमेसर के दान ला रूपिया म बिसाय के सोचे हवस।
ACT 8:21 हमर काम म, न तोर हिस्सा हवय अऊ न बांटा, काबरकि तोर मन ह परमेसर के आघू म सही नइं ए।
ACT 8:22 एकरसेति अपन ये बुरई ले पछताप करके परभू ले पराथना कर। हो सकथे ओह तोर मन के अइसने बिचार ला माफ कर दीही।
ACT 8:23 मेंह देखत हंव कि तेंह कड़ुवाहट ले भरे अऊ पाप के बंधना म पड़े हवस।”
ACT 8:24 सिमोन ह जबाब दीस, “तेंह मोर बर परभू ले पराथना कर कि जऊन बात तेंह कहे हवस, ओमा ले कोनो भी बात मोर ऊपर झन होवय।”
ACT 8:25 पतरस अऊ यूहन्ना गवाही देके अऊ परभू के बचन सुनाके यरूसलेम वापिस लहुंट गीन। ओमन लहुंटत बेरा सामरिया के कतको गांव म सुघर संदेस सुनावत गीन।
ACT 8:26 परभू के एक स्वरगदूत ह फिलिप्पुस ला कहिस, “उठ, अऊ दक्खिन कोति ओ रसता म जा, जऊन ह यरूसलेम ले गाजा ला जाथे, अऊ जऊन ह निरजन जगह म हवय।”
ACT 8:27 तब ओह उठके चल दीस अऊ देखिस कि इथोपिया देस के एक झन मनखे आवत रहय। ओह एक खोजा रिहिस अऊ इथोपिया देस के रानी कन्दाके के एक खास अधिकारी अऊ खजांची रिहिस। ओह अराधना करे बर यरूसलेम गे रिहिस,
ACT 8:28 अऊ ओह अपन रथ म बईठके, यसायाह अगमजानी के किताब ला पढ़त अपन घर लहुंटत रहय।
ACT 8:29 तब पबितर आतमा ह फिलिप्पुस ला कहिस, “लकठा म जाके ओ रथ के संग हो ले।”
ACT 8:30 फिलिप्पुस ह खोजा कोति दऊड़के गीस अऊ ओह ओला यसायाह अगमजानी के किताब ला पढ़त सुनिस, त ओकर ले पुछिस, “तेंह जऊन ला पढ़त हवस, का ओला समझत घलो हवस?”
ACT 8:31 खोजा ह कहिस, “जब तक कोनो मोला नइं समझाही, तब तक मेंह कइसने समझहूं?” ओह फिलिप्पुस ले बिनती करिस कि ओह रथ म चघके ओकर संग बईठे।
ACT 8:32 परमेसर के बचन के जऊन पाठ ला ओ खोजा पढ़त रिहिस, ओह ये रिहिस: “ओला बध करे बर ले जाय भेड़ सहीं ले गीन, अऊ जइसने ऊन कतरइयामन के आघू म मेढ़ा-पीला ह चुपेचाप रहिथे, वइसने ओह घलो अपन मुहूं ला नइं खोलिस।
ACT 8:33 ओकर बेजत्ती करे गीस अऊ ओकर नियाय नइं होईस। ओकर बंस के मनखेमन के बखान कोन कर सकथे? काबरकि धरती ले ओकर जीव ला ले लिये गीस।”
ACT 8:34 खोजा ह फिलिप्पुस ले पुछिस, “मेंह तोर ले बिनती करत हंव, मोला बता कि अगमजानी ह येला काकर बारे म कहे हवय, अपन बारे म या कोनो आने के बारे म?”
ACT 8:35 तब फिलिप्पुस ह कहे के सुरू करिस अऊ परमेसर के बचन के ये पाठ ले सुरू करके ओला यीसू के बारे म सुघर संदेस सुनाईस।
ACT 8:36 रसता म चलत-चलत ओमन एक ठन पानी के ठऊर म हबरिन, त खोजा ह कहिस, “देख, इहां पानी हवय, अब मोला बतिसमा लेय म का अड़चन हवय?”
ACT 8:37 फिलिप्पुस ह कहिस, “कहूं तेंह पूरा हिरदय ले बिसवास करत हवस, त येह हो सकथे।” ओह जबाब दीस, “मेंह बिसवास करत हंव कि यीसू मसीह ह परमेसर के बेटा ए।”
ACT 8:38 अऊ ओह रथ ला ठाढ़ करे के हुकूम दीस। तब फिलिप्पुस अऊ खोजा दूनों पानी म उतर गीन अऊ फिलिप्पुस ह ओला बतिसमा दीस।
ACT 8:39 जब ओमन पानी ले बाहिर निकलके ऊपर आईन, तब परभू के आतमा ह अचानक फिलिप्पुस ला कहीं ले गीस अऊ खोजा ह ओला फेर नइं देखिस, पर ओह आनंद मनावत अपन रसता म चल दीस।
ACT 8:40 फिलिप्पुस ह असदोद म परगट होईस अऊ कैसरिया ला हबरत तक, ओह नगर-नगर सुघर संदेस सुनावत गीस।
ACT 9:1 साऊल ह अब तक परभू के चेलामन ला डराय-धमकाय अऊ ओमन ला मार डारे के धुन म रहय। ओह महा पुरोहित करा गीस
ACT 9:2 अऊ दमिस्क के यहूदीमन के सभा-घरमन के नांव म ये खातिर चिट्ठी मांगिस कि आदमी या माईलोगन जऊन ला घलो, ओह मसीह के बिसवास म पावय, त ओला बंदी बनाके यरूसलेम म ले आवय।
ACT 9:3 जब ओह चलते-चलत दमिस्क के लकठा म हबरिस, त अचानक अकास म ले ओकर चारों कोति एक अंजोर चमकिस।
ACT 9:4 ओह भुइयां म गिर पड़िस अऊ एक अवाज ला ये कहत सुनिस, “हे साऊल! हे साऊल! तेंह मोला काबर सतावत हस।”
ACT 9:5 साऊल ह पुछिस, “हे परभू! तेंह कोन अस?” ओह कहिस, “मेंह यीसू अंव, जऊन ला तेंह सतावत हस।
ACT 9:6 पर अब उठ अऊ सहर म जा। जऊन काम तोला करना हवय, ओला उहां तोला बताय जाही।”
ACT 9:7 जऊन मनखेमन ओकर संग म रिहिन, ओमन हक्का-बक्का हो गीन, काबरकि ओमन अवाज ला तो सुनिन, पर कोनो ला नइं देखिन।
ACT 9:8 साऊल भुइयां ले उठिस, फेर जब ओह अपन आंखी ला खोलिस, त ओला कुछू दिखाई नइं दीस। एकर खातिर ओकर संगीमन ओकर हांथ ला धरके दमिस्क सहर ले गीन।
ACT 9:9 ओह तीन दिन तक नइं देखे सकिस अऊ ओह न कुछू खाईस न पीईस।
ACT 9:10 दमिस्क म हनन्याह नांव के एक झन चेला रहय। परभू ह ओला दरसन म कहिस, “हे हनन्याह!” ओह कहिस, “हां, परभू।”
ACT 9:11 त परभू ह ओला कहिस, “उठ, अऊ ओ गली म जा, जऊन ला ‘सीधा’ कहे जाथे। उहां यहूदा के घर म साऊल नांव के एक झन तरसुस के रहइया मनखे के बारे पुछबे। देख, ओह पराथना करत हवय।
ACT 9:12 ओह दरसन म हनन्याह नांव के एक मनखे ला घर के भीतर आवत अऊ अपन ऊपर हांथ रखत देखे हवय कि ओह फेर देखे लगय।”
ACT 9:13 हनन्याह ह कहिस, “हे परभू! मेंह ये मनखे के बारे म बहुंते झन ले सुने हवंव कि येह यरूसलेम म तोर पबितर मनखेमन ऊपर भारी अतियाचार करे हवय।
ACT 9:14 अऊ इहां दमिस्क म घलो ओह मुखिया पुरोहितमन ले अधिकार लेके आय हवय कि जऊन मनखेमन तोर नांव लेथें, ओ जम्मो झन ला बंदी बनाके यरूसलेम ले जावय।”
ACT 9:15 पर परभू ह हनन्याह ला कहिस, “तेंह उहां जा, काबरकि ओह आनजातमन के अऊ ओमन के राजामन के अऊ इसरायली मनखेमन के आघू म मोर नांव के परचार करे बर मोर दुवारा चुने गे साधन अय।
ACT 9:16 अऊ मेंह ओला देखाहूं कि मोर नांव के खातिर ओला कतेक दुख उठाय बर पड़ही।”
ACT 9:17 तब हनन्याह ह उठके ओ घर म गीस। उहां ओह साऊल ऊपर अपन हांथ ला रखके कहिस, “हे भाई साऊल! परभू याने यीसू, जऊन ह तोला ओ रसता म आवत बेरा दिखाई दे रिहिस, ओही ह मोला पठोय हवय कि तेंह फेर देखे लग अऊ पबितर आतमा ले भर जा।”
ACT 9:18 तुरते साऊल के आंखीमन ले कुछू छिलका सहीं गिरिस अऊ ओह फेर देखे लगिस। ओह उठके बतिसमा लीस,
ACT 9:19 अऊ खाना खाके फेर बल पाईस। साऊल ह कुछू दिन तक चेलामन के संग दमिस्क म रिहिस।
ACT 9:20 ओह तुरते यहूदीमन के सभा-घरमन म परचार करे लगिस कि यीसू ह परमेसर के बेटा अय।
ACT 9:21 जम्मो सुनइयामन चकित होके कहे लगिन, “का येह ओही मनखे नो हय, जऊन ह यरूसलेम म यीसू के नांव लेवइयामन ला नास करत रिहिस? अऊ का ओह इहां घलो एकर बर नइं आय रिहिस कि यीसू के नांव लेवइयामन ला बंदी बनाके मुखिया पुरोहितमन करा ले जावय?”
ACT 9:22 पर साऊल ह अऊ सामर्थी होवत गीस। ओह ये बात के सबूत दे देके कि यीसू ही मसीह अय, दमिस्क म रहइया यहूदीमन के मुहूं बंद कर दीस।
ACT 9:23 जब बहुंत दिन बीत गे, तब यहूदीमन मिलके साऊल ला मार डारे के उपाय करिन।
ACT 9:24 पर ओमन के उपाय ला साऊल जान डारिस। यहूदीमन साऊल ला मार डारे खातिर रात-दिन दमिस्क के दुवारी म घात लगाके बईठे रहंय।
ACT 9:25 पर रथिया साऊल के चेलामन ओला एक ठन टुकना म बईठाईन अऊ भीथी के छेदा ले लटकाके ओला सहर के बाहिर उतार दीन।
ACT 9:26 जब साऊल ह यरूसलेम म आईस, त ओह चेलामन संग मिले के कोसिस करिस, पर ओ जम्मो झन ओकर ले डरावत रिहिन, काबरकि ओमन ला बिसवास नइं होवत रहय कि ओह घलो यीसू के चेला बन गे हवय।
ACT 9:27 पर बरनबास ह ओला अपन संग प्रेरितमन करा ले गीस अऊ ओमन ला बताईस कि साऊल ह कइसने रसता म परभू ला देखिस अऊ परभू ह ओकर ले बात करिस अऊ दमिस्क म ओह कइसने हिम्मत के संग यीसू के नांव के परचार करिस।
ACT 9:28 तब साऊल ह ओमन के संग रहिके यरूसलेम म जम्मो जगह आवत-जावत रिहिस। ओह निडर होके परभू के नांव के परचार करत रिहिस।
ACT 9:29 ओह यूनानी भासा बोलइया यहूदीमन के संग बातचीत अऊ बाद-बिबाद करय, पर ओमन ओला मार डारे के कोसिस करिन।
ACT 9:30 जब बिसवासी भाईमन ला ये बात के पता चलिस, त ओमन ओला कैसरिया ले गीन अऊ उहां ले ओला तरसुस पठो दीन।
ACT 9:31 तब जम्मो यहूदिया, गलील अऊ सामरिया प्रदेस म कलीसिया ला सांति मिलिस अऊ कलीसिया ह मजबूत होवत गीस अऊ पबितर आतमा के मदद ले परभू के डर म रहत गनती म बढ़त गीस।
ACT 9:32 पतरस ह जम्मो जगह होवत, परमेसर के ओ मनखेमन करा गीस, जऊन मन लुद्दा नगर म रहत रिहिन।
ACT 9:33 उहां पतरस ला एनियास नांव के लकवा के मारे एक झन मनखे मिलिस। ओह आठ साल ले खटिया म पड़े रहय।
ACT 9:34 पतरस ह ओला कहिस, “हे एनियास! यीसू मसीह ह तोला बने करत हवय। उठ, अपन बिछौना ला संभाल।” एनियास तुरते उठके ठाढ़ हो गीस।
ACT 9:35 लुद्दा अऊ सारोन के जम्मो रहइयामन ओला चंगा देखके परभू ऊपर बिसवास करिन।
ACT 9:36 यापा म तबीता नांव के एक बिसवासी माईलोगन रहय (तबीता ला यूनानी म दोरकास कहे जाथे, जेकर मतलब हिरन होथे)। ओह हमेसा भलई करय अऊ गरीबमन के मदद करय।
ACT 9:37 ओही दिन म, ओह बेमार पड़िस अऊ मर गीस। मनखेमन ओकर लास ला नहवाके ऊपर के कमरा म रख दीन।
ACT 9:38 लुद्दा नगर यापा के लकठा म रिहिस। चेलामन जब ये सुनिन कि पतरस ह लुद्दा म हवय, त ओमन दू झन ला पठोके ओकर ले बिनती करिन, “हमर करा तुरते आ!”
ACT 9:39 तब पतरस ह उठके ओमन के संग यापा गीस अऊ जब ओह उहां हबरिस, त मनखेमन ओला ऊपर के कमरा म ले गीन। जम्मो बिधवामन रोवत पतरस करा आके ठाढ़ हो गीन अऊ जऊन कुरता अऊ आने कपड़ामन ला दोरकास ह ओमन के संग रहत बनाय रहय, ओ जम्मो ला पतरस ला देखाय लगिन।
ACT 9:40 तब पतरस ह जम्मो झन ला कमरा ले बाहिर कर दीस अऊ माड़ी टेकके पराथना करिस अऊ लास कोति देखके कहिस, “हे तबीता, उठ।” ओह अपन आंखी ला उघारिस अऊ पतरस ला देखके उठ बईठिस।
ACT 9:41 पतरस ह ओकर हांथ ला सहारा देके ओला उठाईस। तब पतरस ह बिसवासी मनखे अऊ खास करके बिधवामन ला बलाईस अऊ ओला जीयत-जागत देखाईस।
ACT 9:42 ये बात ह जम्मो यापा सहर म फईल गीस अऊ बहुंते मनखेमन परभू ऊपर बिसवास करिन।
ACT 9:43 पतरस ह यापा म सिमोन नांव के चमड़ा के धंधा करइया एक मनखे के इहां कुछू दिन रिहिस।
ACT 10:1 कैसरिया सहर म कुरनेलियुस नांव के एक मनखे रिहिस। ओह इतालियानी रेजिमेन्ट नांव के रोमन सेना के अधिकारी रिहिस।
ACT 10:2 ओह परमेसर के भक्त रिहिस अऊ अपन जम्मो परिवार के संग परमेसर के भय मानय। ओह जरूरतमंद ला उदार मन से दान देवय अऊ परमेसर ले हमेसा पराथना करय।
ACT 10:3 ओह एक दिन-मंझनियां, तीन बजे एक दरसन देखिस। दरसन म ओह साफ देखिस कि परमेसर के एक स्वरगदूत ह ओकर करा आके कहिस, “हे कुरनेलियुस!”
ACT 10:4 कुरनेलियुस ह डरा गीस अऊ ओला एकटक देखके कहिस, “हे परभू, का ए?” स्वरगदूत ह ओला कहिस, “तोर पराथना अऊ गरीबमन बर तोर दान ह परमेसर करा हबरे हवय।
ACT 10:5 अब यापा सहर म कुछू मनखेमन ला भेज अऊ सिमोन नांव के एक मनखे, जऊन ला पतरस कहे जाथे, बला ले।
ACT 10:6 ओह उहां चमड़ा के धंधा करइया सिमोन के इहां ठहिरे हवय, जेकर घर समुंदर के तीर म हवय।”
ACT 10:7 जब ओकर ले बात करइया स्वरगदूत ह चले गीस, तब ओह अपन दू झन सेवक अऊ अपन सेना के एक सिपाही ला जऊन ह परमेसर के भक्त रिहिस, बलाईस,
ACT 10:8 अऊ ओमन ला जम्मो बात बताके यापा सहर पठोईस।
ACT 10:9 दूसर दिन लगभग मंझन के बेरा, जब ओमन सहर के लकठा म हबरत रहंय, त पतरस ह छानी ऊपर पराथना करे बर चघिस।
ACT 10:10 ओही घरी ओला भूख लगिस अऊ ओह कुछू खाय बर चाहत रिहिस अऊ जब खाना ह बनत रहय, त ओह अचेत हो गीस।
ACT 10:11 ओह देखिस कि स्वरग ह खुल गे हवय अऊ एक ठन बड़े चादर सहीं चीज ह चारों खूंट ले ओरमत धरती कोति उतरत हवय।
ACT 10:12 ओमा धरती के जम्मो किसम के चरगोड़िया, पेट के बल रेंगइया जीव-जन्तु अऊ अकास के चिरईमन रहंय।
ACT 10:13 तब पतरस ह ये अवाज सुनिस, “हे पतरस! उठ! मार अऊ खा।”
ACT 10:14 पर पतरस ह कहिस, “नइं परभू, कभू नइं। मेंह कभू कुछू असुध अऊ मईलाहा चीज नइं खाय हवंव।”
ACT 10:15 फेर दूसर बार पतरस ओ अवाज सुनिस, “जऊन कुछू ला परमेसर ह सुध करे हवय, ओला तेंह असुध झन कह।”
ACT 10:16 तीन बार ले अइसनेच होईस, तब तुरते ओ चादर ला स्वरग म वापिस उठा लिये गीस।
ACT 10:17 जब पतरस ह ये दरसन के मतलब के बारे म सोचत रिहिस, तभे ओ मनखेमन, जेमन ला कुरनेलियुस ह पठोय रिहिस, सिमोन के घर के पता लगावत दुवारी म आके ठाढ़ होईन।
ACT 10:18 ओमन अवाज देके पुछिन, “का सिमोन जऊन ला पतरस कहे जाथे, इहां हवय?”
ACT 10:19 पतरस ह ओ दरसन के बारे म सोचत रहय, तब परमेसर के आतमा ह ओला कहिस, “देख, तीन झन मनखेमन तोला खोजत हवंय।
ACT 10:20 एकरसेति उठ अऊ खाल्हे उतर अऊ ओमन के संग बिगर झिझके चले जा, काबरकि मेंह ओमन ला पठोय हवंव।”
ACT 10:21 तब पतरस ह छानी ले उतरिस अऊ ओ मनखेमन ला कहिस, “देखव, जऊन ला तुमन खोजत हवव, ओह में अंव। तुम्हर आय के का कारन ए?”
ACT 10:22 ओ मनखेमन कहिन, “हमन ला कुरनेलियुस सूबेदार ह पठोय हवय। ओह धरमी अऊ परमेसर के भय मनइया मनखे ए अऊ जम्मो यहूदी मनखेमन ओकर आदर करथें। ओला एक पबितर स्वरगदूत ले ये हुकूम मिले हवय कि ओह तोला अपन घर म बलाके तोर ले परमेसर के बचन सुनय।”
ACT 10:23 तब पतरस ह ओमन ला घर म बलाईस अऊ ओमन के पहुनई करिस। दूसर दिन पतरस ह ओमन के संग गीस अऊ यापा के कुछू भाईमन घलो ओकर संग गीन।
ACT 10:24 ओकर दूसर दिन ओमन कैसरिया हबरिन। उहां कुरनेलियुस ह अपन रिस्तेदार अऊ मयारू संगीमन संग ओमन के बाट जोहत रहय।
ACT 10:25 जब पतरस ह घर भीतर आवत रिहिस, त कुरनेलियुस ह ओकर ले भेंट करिस अऊ ओकर गोड़ खाल्हे गिरके ओकर आदर करिस।
ACT 10:26 पर पतरस ह ओला उठाके कहिस, “ठाढ़ हो जा, मेंह घलो एक मनखे अंव।”
ACT 10:27 पतरस ह ओकर संग गोठियावत भीतर गीस अऊ उहां अब्बड़ मनखेमन ला देखके कहिस,
ACT 10:28 “तुमन जानत हव कि येह हमर यहूदी कानून के बिरोध म अय कि एक यहूदी ह आनजात के संगति करय या ओकर इहां जावय। पर परमेसर ह मोला देखाय हवय कि मेंह कोनो मनखे ला असुध या मईलाहा झन कहंव।
ACT 10:29 एकरसेति जब मोला बलाय गीस, त बिगर कुछू आपत्ति के मेंह आ गेंव। अब मेंह पुछत हंव कि तेंह मोला काबर बलाय हवस?”
ACT 10:30 तब कुरनेलियुस ह जबाब दीस, “चार दिन पहिली, मेंह इहीच बेरा मंझनियां के तीन बजे, अपन घर म पराथना करत रहेंव कि अचानक एक झन मनखे चिकमिकी कपड़ा पहिरे मोर आघू म आके ठाढ़ हो गीस
ACT 10:31 अऊ ओह कहिस, ‘हे कुरनेलियुस! परमेसर ह तोर पराथना ला सुने हवय अऊ तोर दान, जऊन ला गरीबमन ला देथस, ओला सुरता करे हवय।
ACT 10:32 एकरसेति अब कोनो ला यापा सहर पठोके उहां ले सिमोन जऊन ला पतरस कहे जाथे, बला ले। ओह चमड़ा के धंधा करइया सिमोन के घर म पहुना हवय, जऊन ह समुंदर के तीर म रहिथे।’
ACT 10:33 तब मेंह तुरते तोर करा मनखेमन ला पठोएंव। तेंह बने करय कि इहां आ गय। अब हमन जम्मो झन इहां परमेसर के आघू म हवन कि ओ हर बात ला सुनन, जऊन ला परभू ह तोला सुनाय के हुकूम दे हवय।”
ACT 10:34 तब पतरस ह कहे के सुरू करिस: “अब मेंह जान गेंव कि येह सच ए कि परमेसर ह काकरो पखियपात नइं करय,
ACT 10:35 पर हर जाति के मनखेमन ला गरहन करथे, जऊन मन ओकर भय मानथें अऊ सही काम करथें।
ACT 10:36 परमेसर ह इसरायलीमन करा संदेस पठोईस; ओमन ला यीसू मसीह के जरिये, जऊन ह जम्मो झन के परभू ए, सांति के सुघर संदेस सुनाईस।
ACT 10:37 ओ बात ला तुमन जानत हव, जऊन ह यूहन्ना के बतिसमा के परचार के पाछू गलील प्रदेस ले सुरू होके पूरा यहूदिया प्रदेस म फईल गे हवय—
ACT 10:38 कि कइसने परमेसर ह नासरत के यीसू ला पबितर आतमा अऊ सामर्थ ले अभिसेक करिस, अऊ यीसू ह हर जगह भलई करत अऊ सैतान के सताय जम्मो मनखेमन ला बने करत रिहिस, काबरकि परमेसर ह ओकर संग म रिहिस।
ACT 10:39 “हमन ओ जम्मो काम के गवाह अन, जऊन ला ओह यहूदीमन के देस म अऊ यरूसलेम म करिस। ओमन ओला एक ठन कुरूस म लटकाके मार डारिन,
ACT 10:40 पर ओला परमेसर ह तीसरा दिन मरे म ले जियाईस अऊ ओला परगट घलो करिस कि मनखेमन ओला देखंय।
ACT 10:41 ओह जम्मो मनखेमन ला देखई नइं दीस, पर ओ गवाहमन ला देखई दीस, जऊन मन ला परमेसर ह पहिली ले चुन ले रिहिस; याने कि हमन ला, जऊन मन ओकर मरे म ले जी उठे के पाछू ओकर संग खायेंन-पीयेंन।
ACT 10:42 परभू यीसू ह हमन ला हुकूम दीस कि हमन जम्मो मनखेमन म परचार करन अऊ गवाही देवन कि येह ओही ए, जऊन ला परमेसर ह जीयत अऊ मरे मन के नियाय करइया ठहिराईस।
ACT 10:43 जम्मो अगमजानीमन ओकर बारे गवाही देथें कि जऊन कोनो यीसू ऊपर बिसवास करही, ओला यीसू के नांव म पाप के छेमा मिलही।”
ACT 10:44 जब पतरस ह ये बचन कहत रिहिस, तभे पबितर आतमा ओ जम्मो झन ऊपर उतरिस, जऊन मन संदेस ला सुनत रहंय।
ACT 10:45 जऊन खतना करवाय बिसवासीमन पतरस के संग आय रिहिन, ओमन ये देखके चकित होईन कि पबितर आतमा के दान ह आनजातमन ऊपर घलो उंडेरे गीस।
ACT 10:46 काबरकि ओमन आनजातमन ला आने-आने भासा बोलत अऊ परमेसर के महिमा करत सुनिन। तब पतरस ह कहिस,
ACT 10:47 “का कोनो अब ये मनखेमन ला पानी ले बतिसमा ले बर मना कर सकथे? येमन घलो हमर सहीं पबितर आतमा पाय हवंय।”
ACT 10:48 एकरसेति ओह हुकूम दीस कि ओमन ला यीसू मसीह के नांव म बतिसमा देय जावय। तब ओमन पतरस ले बिनती करिन कि ओह कुछू दिन ओमन के संग रहय।
ACT 11:1 प्रेरितमन अऊ जम्मो यहूदिया म रहइया भाईमन सुनिन कि आनजातमन घलो परमेसर के बचन ला गरहन कर ले हवंय।
ACT 11:2 एकरसेति जब पतरस ह यरूसलेम म आईस, त खतना करवाय बिसवासीमन ओकर आलोचना करे लगिन
ACT 11:3 अऊ कहिन, “तेंह बिगर खतना वाले मनखेमन के घर गे रहय अऊ ओमन के संग खाना खाय हवस।”
ACT 11:4 तब पतरस ह ओमन ला जऊन बात होय रिहिस, ओला सुरू ले एक-एक करके बताय लगिस:
ACT 11:5 “मेंह यापा सहर म पराथना करत रहेंव अऊ बेसुध हो गेंव अऊ ओ दसा म एक दरसन देखेंव कि एक ठन बड़े चादर के सहीं चीज ह चारों खूंट ले ओरमत स्वरग ले मोर करा उतरिस।
ACT 11:6 जब मेंह ओमा धियान देवंय, त ओमा मेंह धरती के चरगोड़िया पसु, जंगली पसु, रेंगइया जीव-जन्तु अऊ अकास के चिरईमन ला देखेंव।
ACT 11:7 तब मेंह एक अवाज सुनेंव जऊन ह मोला ये कहत रहय, ‘हे पतरस! उठ! मार अऊ खा।’
ACT 11:8 “मेंह कहेंव, ‘नइं परभू, कभू नइं! काबरकि कुछू असुध या मईलाहा चीज मोर मुहूं म आज तक कभू नइं गे हवय।’
ACT 11:9 “तब अकास ले दूसर बार ये अवाज आईस, ‘जऊन कुछू ला परमेसर ह सुध करे हवय, ओला तेंह असुध झन कह।’
ACT 11:10 तीन बार ले अइसनेच होईस, अऊ तब ओ जम्मो चादर ला स्वरग म फेर खींच लिये गीस।
ACT 11:11 “ठीक ओतकीच बेरा, तीन झन मनखे जऊन मन ला कैसरिया सहर ले मोर करा पठोय गे रिहिस, ओ घर म आके ठाढ़ होईन, जिहां मेंह रहेंव।
ACT 11:12 तब आतमा ह मोला ओमन के संग बेखटके चले जाय बर कहिस। यापा के ये छै भाईमन घलो मोर संग हो लीन अऊ हमन कुरनेलियुस के घर म गेंन,
ACT 11:13 जऊन ह हमन ला बताईस कि कइसने ओह एक स्वरगदूत ला ओकर घर म परगट होवत देखिस, अऊ कहिस, ‘यापा सहर म मनखे भेज अऊ सिमोन जऊन ला पतरस कहे जाथे, बला ले।
ACT 11:14 ओह तोर खातिर एक संदेस लानही, जेकर दुवारा तें अऊ तोर पूरा घराना उद्धार पाही।’
ACT 11:15 “जब मेंह कहे के सुरू करेंव, त पबितर आतमा ओमन ऊपर उतरिस, जइसने सुरू म हमर ऊपर उतरे रिहिस।
ACT 11:16 तब मोला परभू के कहे ओ बचन सुरता आईस, ‘यूहन्ना ह तो पानी ले बतिसमा दीस, पर तुमन पबितर आतमा ले बतिसमा पाहू।’
ACT 11:17 जब परमेसर ह ओमन ला घलो ओहीच दान दीस, जऊन ह हमन ला परभू यीसू मसीह के ऊपर बिसवास करे ले मिले रिहिस, त मेंह कोन होथंव कि परमेसर के काम म रूकावट करे के सोच सकतेंव?”
ACT 11:18 जब ओमन ये सुनिन, त चुप हो गीन अऊ परमेसर के महिमा करके कहिन, “परमेसर ह आनजातमन ला घलो जिनगी पाय बर, मन-फिराय के मऊका दे हवय।”
ACT 11:19 स्तिफनुस के कारन बिसवासीमन ला सताय गीस, जेकर कारन ओमन तितिर-बितिर हो गीन। ओमन फिरते-फिरत फीनीके, साइप्रस अऊ अंताकिया म हबरिन अऊ ओमन यहूदीमन के छोंड़ अऊ कोनो ला संदेस नइं सुनावत रिहिन।
ACT 11:20 ओमन ले कुछू झन साइप्रस अऊ कुरेन के रहइया रिहिन, जऊन मन अंताकिया म आके यूनानीमन ला घलो परभू यीसू के सुघर संदेस सुनाय लगिन।
ACT 11:21 परभू के सामर्थ ओमन के संग रिहिस अऊ बहुंते मनखेमन बिसवास करके परभू करा आईन।
ACT 11:22 ये संदेस ह यरूसलेम के कलीसिया के मनखेमन करा पहुंचिस, त ओमन बरनबास ला अंताकिया पठोईन।
ACT 11:23 जब ओह उहां हबरिस अऊ परमेसर के अनुग्रह के काम ला देखिस, त ओह खुस होईस अऊ जम्मो झन ला उत्साहित करिस कि ओमन अपन पूरा हिरदय ले परभू के बिसवास म ईमानदार बने रहंय।
ACT 11:24 बरनबास ह एक बने मनखे रिहिस। ओह पबितर आतमा अऊ बिसवास ले भरे रिहिस अऊ बहुंते मनखेमन परभू करा आईन।
ACT 11:25 तब बरनबास ह साऊल ला खोजे बर तरसुस सहर गीस,
ACT 11:26 अऊ जब ओला साऊल मिलिस, त ओह ओला अंताकिया म ले आईस। बरनबास अऊ साऊल एक साल तक कलीसिया के संग मिलते रिहिन अऊ बहुंते मनखेमन ला उपदेस दीन। चेलामन ला सबले पहिली अंताकिया म ही मसीही कहे गीस।
ACT 11:27 ओही दिन म कुछू अगमजानीमन यरूसलेम ले अंताकिया म आईन।
ACT 11:28 ओमा ले एक अगमजानी जेकर नांव अगबुस रिहिस, ठाढ़ होईस अऊ आतमा के अगुवई म, ये बताईस कि जम्मो रोमन राज म भारी अकाल पड़ही (ओ अकाल ह क्लौदियुस राजा के समय म पड़िस)।
ACT 11:29 तब चेलामन, हर एक अपन सक्ति के मुताबिक यहूदिया प्रदेस म रहइया भाईमन के मदद करे के ठानिन।
ACT 11:30 अऊ ओकरे मुताबिक ओमन बरनबास अऊ साऊल के हांथ म अगुवामन करा अपन दान पठो दीन।
ACT 12:1 ओही समय हेरोदेस राजा ह कलीसिया के कुछू मनखेमन ला सताय बर ओमन ला बंदी बनाईस।
ACT 12:2 ओह यूहन्ना के भाई याकूब ला तलवार ले मरवा दीस।
ACT 12:3 जब ओह देखिस कि यहूदीमन अइसने करे ले खुस होवत हवंय, त ओह पतरस ला घलो पकड़ लीस अऊ ओह फसह तिहार के समय रहय।
ACT 12:4 पतरस ला पकड़े के बाद, ओह ओला जेल म डार दीस अऊ रखवारी करे बर चार-चार सिपाहीमन ला पारी-पारी चारों पहर पहरा म लगा दीस। हेरोदेस राजा चाहत रिहिस कि फसह तिहार के पाछू पतरस ला मनखेमन के आघू म पुछताछ करे बर लानय।
ACT 12:5 पतरस ला जेल म रखे गे रहय, पर कलीसिया ह ओकर बर लगन से परमेसर ले पराथना करत रहय।
ACT 12:6 जऊन दिन हेरोदेस ह पतरस ला यहूदीमन के आघू म पुछताछ करे बर लवइया रिहिस, ओकर पहिली रथिया पतरस ह दू ठन सांकर म बंधाय दू झन सिपाही के मांझा म सुतत रहय अऊ पहरेदारमन दुवारी म जेल के रखवारी करत रहंय।
ACT 12:7 तभे अचानक परभू के एक स्वरगदूत परगट होईस अऊ पतरस के कोठरी म अंजोर हो गीस। स्वरगदूत ह पतरस के बाजू म हांथ मारके ओला उठाईस अऊ कहिस, “उठ, जल्दी कर।” अऊ पतरस के हांथ ले सांकर ह खुलके गिर गीस।
ACT 12:8 तब स्वरगदूत ह ओला कहिस, “अपन कपड़ा अऊ पनही ला पहिर ले।” पतरस ह वइसनेच करिस। स्वरगदूत ह फेर कहिस, “अपन ओढ़ना ला ओढ़ ले अऊ मोर पाछू-पाछू आ।”
ACT 12:9 पतरस ह ओकर पाछू-पाछू हो लीस, पर ओह नइं जानत रहय कि जऊन कुछू स्वरगदूत ह करत हवय, ओह सही म होवत हवय। ओह सोचिस कि ओह कोनो दरसन देखत हवय।
ACT 12:10 तब ओमन पहिली अऊ दूसर पहरेदार ले निकलके लोहा के दुवारी म हबरिन, जिहां ले सहर कोति रसता जावय। दुवार ह ओमन बर आपे-आप खुल गीस; अऊ ओमन बाहिर निकल गीन; जब ओमन एक गली के बरोबर दूरिहा गे होहीं, त अचानक स्वरगदूत ह पतरस ला छोंड़के चले गीस।
ACT 12:11 तब पतरस ह चेत म आईस अऊ कहिस, “अब मेंह सही म जान डारेंव कि परभू ह अपन स्वरगदूत ला पठोके मोला हेरोदेस के हांथ ले छोंड़ाय हवय अऊ यहूदीमन के आसा ला टोर दे हवय।”
ACT 12:12 जब ओह ये बात ला जानिस, त ओह यूहन्ना के दाई मरियम के घर गीस। यूहन्ना ला मरकुस घलो कहे जाथे। उहां बहुंत मनखेमन जूरके पराथना करत रहंय।
ACT 12:13 पतरस ह बाहिर के कपाट ला खटखटाईस, त रूदे नांव के एक नौकरानी छोकरी ह अवाज सुनके कपाट करा आईस।
ACT 12:14 जब ओह पतरस के अवाज ला चिन्हिस, त ओह खुसी के मारे कपाट ला खोले बर भुला गीस। ओह दऊड़के भीतर गीस अऊ मनखेमन ला बताईस कि पतरस ह कपाट करा ठाढ़े हवय।
ACT 12:15 ओमन ओला कहिन, “तेंह बही हो गे हवस।” जब ओह जोर देके कहितेच रहय कि पतरस ह कपाट करा हवय। त ओमन कहिन, “येह जरूर पतरस के स्वरगदूत होही।”
ACT 12:16 फेर पतरस ह कपाट ला खटखटातेच रहय अऊ जब ओमन कपाट ला खोलिन अऊ पतरस ला देखिन, त ओमन चकित हो गीन।
ACT 12:17 पतरस ह ओमन ला चुपेचाप रहे बर इसारा करिस अऊ बताईस कि कइसने परभू ह ओला जेल ले बाहिर निकालिस। ओह कहिस, “याकूब अऊ आने भाईमन ला ये बात बता देवव।” तब ओह निकलके आने जगह चले गीस।
ACT 12:18 बिहनियां, सिपाहीमन म भारी हलचल मच गे अऊ ओमन पुछे लगिन, “पतरस के का होईस?”
ACT 12:19 हेरोदेस राजा ह पतरस के बहुंत खोज कराईस अऊ जब ओह नइं मिलिस, त हेरोदेस ह पहरेदारमन के जांच-पड़ताल कराईस अऊ ओमन ला मार डारे के हुकूम दीस। एकर बाद, हेरोदेस राजा यहूदिया ले कैसरिया चल दीस अऊ उहां कुछू समय तक रिहिस।
ACT 12:20 हेरोदेस के, सूर अऊ सीदोन के मनखेमन संग झगरा चलत रहय। एकरसेति ओ मनखेमन एक दल बनाके ओकर करा आईन। पहिली ओमन बलास्तुस ला मनाईन, जऊन ह राजा के एक नजदीकी सेवक रिहिस अऊ तब ओकर जरिये राजा ले मेल-मिलाप करे चाहिन, काबरकि राजा के देस ले ओमन के पालन-पोसन होवत रिहिस।
ACT 12:21 एक ठहिराय गे दिन म हेरोदेस ह राजवस्त्र पहिरके अपन सिंघासन म बईठिस अऊ ओमन ला भासन देवन लगिस।
ACT 12:22 तब मनखेमन चिचिया उठिन, “येह मनखे के नइं, पर परमेसर के अवाज ए।”
ACT 12:23 ओहीच बेरा परभू के एक स्वरगदूत ह ओला मारिस अऊ ओला कीरा पर गे अऊ ओह मर गीस काबरकि ओह परमेसर के महिमा नइं करिस।
ACT 12:24 पर परमेसर के बचन ह लगातार बाढ़त अऊ बगरत गीस।
ACT 12:25 जब बरनबास अऊ साऊल अपन सेवा ला पूरा कर लीन, त ओमन यूहन्ना ला जऊन ह मरकुस घलो कहाथे, अपन संग लेके यरूसलेम ले लहुंटिन।
ACT 13:1 अंताकिया के कलीसिया म कुछू अगमजानी अऊ गुरूमन रहंय, जेमन के नांव रिहिस—बरनबास, सिमोन जऊन ला नीगर कहे जाथे, कुरेन के रहइया लूकियुस, मनायेन (जऊन ह हेरोदेस राजपाल के संग पले-बढ़े रिहिस), अऊ साऊल।
ACT 13:2 जब ओमन उपास अऊ परभू के अराधना करत रहंय, त पबितर आतमा ह कहिस, “मोर बर बरनबास अऊ साऊल ला ओ काम बर अलग करव, जेकर बर मेंह ओमन ला चुने हवंव।”
ACT 13:3 तब ओमन उपास अऊ पराथना करिन, अऊ बरनबास अऊ साऊल ऊपर अपन हांथ रखके ओमन ला बिदा करिन।
ACT 13:4 पबितर आतमा के पठोय बरनबास अऊ साऊल सिलूकिया म गीन अऊ उहां ले ओमन पानी जहाज म चघके साइप्रस दीप चल दीन।
ACT 13:5 जब ओमन सलमीस सहर म हबरिन, त उहां परमेसर के बचन ला यहूदीमन के सभा-घर म सुनाईन। यूहन्ना ह ओमन के संग म एक सहायक के रूप म रहय।
ACT 13:6 ओ जम्मो दीप म ले होवत ओमन पाफुस सहर आईन। उहां ओमन ला बार-यीसू नांव के एक यहूदी टोनहा अऊ लबरा अगमजानी मिलिस।
ACT 13:7 ओह दीप के राजपाल सिरगियुस पौलुस के सेवक रिहिस। सिरगियुस ह एक बुद्धिमान मनखे रहय। ओह बरनबास अऊ साऊल ला अपन करा बलाईस काबरकि ओह परमेसर के बचन सुने चाहत रिहिस।
ACT 13:8 पर बार-यीसू जऊन ला यूनानी भासा म इलीमास टोनहा कहे जावय, ओमन के बिरोध करिस अऊ राजपाल सिरगियुस ला बिसवास करे ले रोके के कोसिस करिस।
ACT 13:9 तब साऊल जेकर नांव पौलुस घलो अय, पबितर आतमा ले भरके इलीमास ला एकटक देखिस अऊ कहिस,
ACT 13:10 “तेंह सैतान के संतान अस अऊ जम्मो बने चीज के बईरी अस। तेंह जम्मो किसम के कपट अऊ धोखा ले भरे हवस। का तेंह परभू के सीधा रसता ला टेढ़ा करे बर कभू नइं छोंड़स?
ACT 13:11 अब परभू के हांथ ह तोर बिरोध म उठे हवय। तेंह अंधरा हो जाबे अऊ कुछू समय तक सूरज के अंजोर ला नइं देख सकबे।” तुरते ओकर आंखी म धुंध अऊ अंधियार छा गे, अऊ ओह एती-ओती टमड़े लगिस ताकि कोनो ओकर हांथ ला धरके ओला ले जावंय।
ACT 13:12 जब राजपाल ह ये घटना ला देखिस, त ओह मसीह ऊपर बिसवास करिस, काबरकि ओह परभू के बारे म उपदेस सुनके चकित हो गे रिहिस।
ACT 13:13 पौलुस अऊ ओकर संगीमन पाफुस ले पानी जहाज खोलके पंफूलिया प्रदेस के पिरगा म आईन, जिहां यूहन्ना ओमन ला छोड़के यरूसलेम लहुंट गीस।
ACT 13:14 ओमन पिरगा ले आघू बढ़िन अऊ पिसिदिया प्रदेस के अंताकिया सहर म आईन। बिसराम के दिन, ओमन सभा-घर म जाके बईठिन।
ACT 13:15 मूसा के कानून के किताब अऊ अगमजानीमन के किताब म ले पढ़े के बाद, सभा-घर के अधिकारीमन ओमन करा ये संदेस पठोईन, “हे भाईमन, यदि तुम्हर करा मनखेमन बर कोनो उत्साह के संदेस हवय, त सुनावव।”
ACT 13:16 तब पौलुस ह ठाढ़ होईस अऊ हांथ ले इसारा करके कहिस, हे इसरायली अऊ परमेसर के अराधना करइया—आनजात के मनखेमन, मोर बात ला सुनव!
ACT 13:17 इसरायली मनखेमन के परमेसर ह हमर पुरखामन ला चुनिस अऊ जब ओमन मिसर देस म परदेसी के सहीं रहत रिहिन, त ओमन ला बढ़ाईस अऊ अपन अपार बाहुबल ले ओमन ला ओ देस ले बाहिर निकाल लानिस।
ACT 13:18 अऊ चालीस साल तक निरजन जगह म ओमन के गलत बरताव ला सहत रिहिस।
ACT 13:19 ओह कनान देस म सात ठन जात के मनखेमन ला उखान फेंकिस अऊ ओमन के जमीन ला अपन मनखेमन के अधिकार म दे दीस।
ACT 13:20 ए जम्मो काम म लगभग चार सौ पचास बछर लगिस। “एकर बाद, समूएल अगमजानी के आवत तक, परमेसर ह ओमन के बीच म नियाय करइया मनखेमन ला ठहिराईस।
ACT 13:21 तब ओमन अपन बर एक राजा मांगिन। परमेसर ह साऊल ला राजा ठहिराईस, जऊन ह बिनयामीन के गोत्र म ले कीस के बेटा रिहिस। ओह चालीस साल तक राज करिस।
ACT 13:22 साऊल ला हटाय के बाद, ओह दाऊद ला ओमन के राजा बनाईस। दाऊद के बारे म परमेसर ह ये गवाही दीस: ‘मोला मोर मन के मुताबिक एक मनखे, यिसै के बेटा दाऊद मिल गे हवय। ओह ओ जम्मो काम करही, जऊन ला मेंह चाहथंव।’
ACT 13:23 “ओही दाऊद के बंस म ले परमेसर ह अपन परतिगियां के मुताबिक इसरायली मनखेमन बर उद्धार करइया यीसू ला पठोईस।
ACT 13:24 यीसू के आय के पहिली यूहन्ना ह जम्मो इसरायली मनखेमन ला मन-फिराय अऊ बतिसमा के परचार करिस।
ACT 13:25 जब यूहन्ना ह अपन काम पूरा करइया रिहिस, त ओह कहिस, ‘तुमन मोला कोन ए समझत हव? मेंह ओ नो हंव जऊन ला परमेसर ह पठोय के परतिगियां करे हवय। पर मोर बाद, ओह आवत हवय, जेकर गोड़ के पनही घलो खोले के काबिल मेंह नो हंव।’
ACT 13:26 “हे भाईमन हो! अब्राहम के संतान अऊ परमेसर ले डरइया आनजातमन, हमर करा ये उद्धार के संदेस पठोय गे हवय।
ACT 13:27 यरूसलेम के मनखे अऊ ओकर अधिकारीमन यीसू ला नइं चिन्हिन अऊ न ही ओमन अगमजानीमन के बचन ला समझिन, जऊन ह हर बिसराम के दिन पढ़े जाथे। एकरसेति ओमन यीसू ला दोसी ठहिराके ओ बातमन ला पूरा करिन।
ACT 13:28 हालाकि ओमन मार डारे जाय के लईक कोनो दोस ओमा नइं पाईन, तभो ले ओमन पीलातुस ले मांग करिन कि ओह मार डारे जावय।
ACT 13:29 जब ओमन ओकर बारे म लिखे जम्मो बात ला पूरा कर लीन, तब ओला कुरूस ले उतारके एक कबर म रखिन।
ACT 13:30 पर परमेसर ह ओला मरे म ले जियाईस।
ACT 13:31 अऊ ओह ओमन ला जऊन मन ओकर संग गलील ले यरूसलेम आय रिहिन, बहुंत दिन तक देखई देवत रिहिस। ओमन अब हमर मनखेमन के आघू म ओकर गवाह अंय।
ACT 13:32 “हमन तुमन ला सुघर संदेस सुनावत हवन, जेकर वायदा परमेसर ह हमर पुरखामन ले करे रिहिस।
ACT 13:33 परमेसर ह यीसू ला जियाके, ओ वायदा ला अपन संतान, हमर बर पूरा करिस। जइसने कि भजन दू म लिखे हवय: “ ‘तेंह मोर बेटा अस; आज मेंह तोर ददा बन गे हवंव।’
ACT 13:34 परमेसर ह ओला मरे म ले जियाईस ताकि ओह कभू झन सड़य। ये बात ला बचन म अइसने कहे गे हवय, “ ‘तोला पबितर अऊ अटल आसीस दूहूं, जेकर वायदा मेंह दाऊद ले करे रहेंव।’
ACT 13:35 ओह भजन के एक अऊ जगह म घलो अइसने कहिस: “ ‘अपन पबितर जन ला तेंह सड़न नइं देबे।’
ACT 13:36 “दाऊद ह अपन समय म परमेसर के ईछा मुताबिक सेवा करिस अऊ ओह मर गीस। ओला ओकर पुरखामन के संग माटी दिये गीस अऊ ओकर देहें ह सड़ गीस।
ACT 13:37 पर जऊन ला परमेसर ह मरे म ले जियाईस, ओह सड़े नइं पाईस।
ACT 13:38 “एकरसेति हे मोर भाईमन! मेंह चाहत हंव कि तुमन जान लेवव कि यीसू के दुवारा पाप के छेमा के संदेस तुमन ला दिये जावत हवय।
ACT 13:39 ओकर जरिये ही हर ओ मनखे ला पाप ले मुक्त करे जाथे, जऊन ह बिसवास करथे, ओला ओ नियाय मिलथे, जेला तुमन मूसा के कानून के अधीन रहिके नइं पा सकत रहेव।
ACT 13:40 एकरसेति सचेत रहव कि जऊन बात ला अगमजानीमन कहे हवंय, ओह तुम्हर ऊपर झन आ पड़य:
ACT 13:41 “ ‘हे निन्दा करइयामन! देखव! चकित होवव अऊ मिट जावव, काबरकि मेंह तुम्हर समय म कुछू अइसन करे बर जावत हंव, यदि ओकर बारे म कोनो तुमन ला बतावय, तभो ले तुमन कभू बिसवास नइं करहू।’”
ACT 13:42 जब पौलुस अऊ बरनबास सभा के घर ले निकलके बाहिर जावत रिहिन, त मनखेमन ओमन ले बिनती करिन कि अवइया बिसराम के दिन हमन ला एकर बारे म अऊ बतावव।
ACT 13:43 जब सभा ह उसल गीस, त बहुंते यहूदीमन अऊ यहूदी मत म आय भक्तमन पौलुस अऊ बरनबास के पाछू हो लीन। ओ दूनों ओमन ले बात करके ओमन ला उत्साहित करिन कि ओमन परमेसर के अनुग्रह म बने रहंय।
ACT 13:44 ओकर आने बिसराम के दिन लगभग जम्मो सहर के मनखेमन परमेसर के बचन सुने बर जूर गीन।
ACT 13:45 जब यहूदीमन मनखेमन के भीड़ ला देखिन, त जलन ले भर उठिन अऊ ओमन पौलुस के बात के बिरोध करके ओकर बेजत्ती करिन।
ACT 13:46 तब पौलुस अऊ बरनबास निडर होके ओमन ला कहिन, “हमन के दुवारा पहिली परमेसर के बचन तुमन ला सुनाना जरूरी रिहिस, पर तुमन ओला गरहन नइं करेव अऊ अपनआप ला परमेसर के संग सदाकाल के जिनगी के काबिल नइं समझेव। एकरसेति, हमन आनजातमन कोति जावत हन।
ACT 13:47 काबरकि परभू ह हमन ला ये हुकूम दे हवय, “ ‘मेंह तोला आनजातमन बर एक अंजोर ठहिराय हवंव ताकि तेंह जम्मो धरती के छोर तक उद्धार के रसता बन।’”
ACT 13:48 जब आनजातमन येला सुनिन, त ओमन खुस होईन अऊ परभू के बचन के महिमा करिन अऊ जतेक मनखेमन परमेसर के संग सदाकाल के जिनगी बर चुने गे रिहिन, ओमन बिसवास करिन।
ACT 13:49 परभू के बचन ह ओ जम्मो इलाका म फईल गीस।
ACT 13:50 पर यहूदीमन, परमेसर ले डरइया बड़े घराना के माईलोगन ला अऊ सहर के बड़े मनखेमन ला भड़काईन, अऊ ओमन पौलुस अऊ बरनबास के बिरोध म उपदरव करवाके ओमन ला अपन इलाका ले निकाल दीन।
ACT 13:51 एकरसेति पौलुस अऊ बरनबास ओमन ला चेतउनी के रूप म अपन गोड़ के धुर्रा ला झर्राके इकुनियुम सहर चल दीन।
ACT 13:52 अऊ चेलामन आनंद अऊ पबितर आतमा ले भरपूर होवत गीन।
ACT 14:1 अपन आदत के मुताबिक, इकुनियुम म घलो पौलुस अऊ बरनबास यहूदीमन के सभा-घर म गीन। उहां ओमन अइसने परभावसाली ढंग ले गोठियाईन कि बहुंते यहूदी अऊ आनजातमन बिसवास करिन।
ACT 14:2 पर बिसवास नइं करइया यहूदीमन आनजातमन ला भड़काईन अऊ ये भाईमन के बिरोध म ओमन के मन म जहर भरिन।
ACT 14:3 पौलुस अऊ बरनबास उहां बहुंत दिन तक रिहिन, अऊ परभू के सेवा बड़े हिम्मत के संग करिन। परभू ह ओमन के दुवारा चिनहां-चमतकार अऊ अचरज के काम देखाके अपन अनुग्रह के संदेस ला मजबूत करत गीस।
ACT 14:4 पर सहर के मनखेमन म फूट पड़ गे; कुछू मनखेमन यहूदीमन कोति अऊ कुछू मनखेमन प्रेरितमन कोति हो गीन।
ACT 14:5 आनजातमन अऊ यहूदीमन अपन अगुवामन संग प्रेरितमन ला सताय बर अऊ ओमन के ऊपर पथरवाह करे बर सडयंत्र करिन।
ACT 14:6 पर प्रेरितमन ला ये बात के पता चल गीस, अऊ उहां ले ओमन लुकाउनिया छेत्र के लुस्त्रा अऊ दिरबे सहर म अऊ आसपास के जगह म भाग गीन,
ACT 14:7 अऊ उहां सुघर संदेस सुनाय लगिन।
ACT 14:8 लुस्त्रा सहर म एक खोरवा मनखे बईठे रिहिस, जेकर गोड़मन जनम ले दुरबल रिहिन अऊ ओह कभू नइं रेंगे रिहिस।
ACT 14:9 ओह पौलुस के गोठ ला सुनत रिहिस। पौलुस ह ओला टकटकी लगाके देखिस अऊ जान गीस कि ओला बने होय के बिसवास हवय।
ACT 14:10 तब पौलुस ह ऊंचहा अवाज म ओला कहिस, “अपन गोड़ म सीधा ठाढ़ हो जा!” अतकी म ओ मनखे ह कूदके ठाढ़ हो गीस अऊ चले-फिरे लगिस।
ACT 14:11 जब मनखेमन पौलुस के ये काम ला देखिन, त ओमन लुकाउनिया भासा म चिचियाके कहिन, “देवतामन मनखेमन के रूप म हमर करा उतर आय हवंय।”
ACT 14:12 ओमन बरनबास ला ज्यूस देवता अऊ पौलुस ला हिरमेस देवता कहिन, काबरकि पौलुस ह गोठ-बात करे म मुखिया रिहिस।
ACT 14:13 ज्यूस देवता के मंदिर ओमन के सहर के बाहिरेच म रिहिस। ओ मंदिर के पुजारी ह बईला अऊ फूलमाला धरके सहर के कपाट म गीस, काबरकि ओह अऊ भीड़ के मनखेमन बरनबास अऊ पौलुस ला देवता समझके ओमन के आघू म बलि चघाय चाहत रिहिन।
ACT 14:14 जब प्रेरित बरनबास अऊ पौलुस ये बात ला सुनिन, त दुखी होके अपन कपड़ा ला चीरिन अऊ भीड़ के भीतर दऊड़के गीन अऊ चिचियाके ये कहिन,
ACT 14:15 “हे मनखेमन हो! तुमन ये का करत हव? हमन घलो तुम्हर सहीं मनखे अन। हमन तुमन ला सुघर संदेस सुनावत हन ताकि तुमन ये बेकार चीजमन ला छोंड़के जीयत परमेसर कोति फिरव, जऊन ह अकास, धरती, समुंदर अऊ जऊन कुछू ओमा हवय, ओ जम्मो ला बनाय हवय।
ACT 14:16 बीते जमाना म, ओह जम्मो जाति के मनखेमन ला अपन-अपन रसता म चलन दीस।
ACT 14:17 तभो ले ओह अपन उपस्थिति के सबूत देवत रिहिस; ओह अकास ले बारिस अऊ सही समय म फसल देके तुम्हर ऊपर दया देखाईस; ओह तुमन ला बहुंतायत ले भोजन देथे अऊ तुम्हर हिरदय ला आनंद ले भर देथे।”
ACT 14:18 ये कहे के बाद घलो, ओमन मनखेमन ला ओमन बर बलि चघाय ले मुसकुल से रोकिन।
ACT 14:19 तब कुछू यहूदीमन अंताकिया अऊ इकुनियुम सहर ले आईन अऊ ओमन मनखे के भीड़ ला अपन कोति राजी कर लीन। ओमन पौलुस ऊपर पथरवाह करिन अऊ ओला मरे समझके सहर के बाहिर घसीटके ले गीन।
ACT 14:20 पर जब चेलामन पौलुस के चारों कोति जूरिन, त ओह उठिस अऊ सहर ला वापिस चल दीस। दूसर दिन ओह अऊ बरनबास दिरबे सहर ला चल दीन।
ACT 14:21 ओमन ओ सहर के मनखेमन ला सुघर संदेस सुनाईन, अऊ उहां बहुंत चेला बनाईन। ओकर बाद ओमन लुस्त्रा, इकुनियुम अऊ अंताकिया ला लहुंट गीन।
ACT 14:22 अऊ ओमन चेलामन ला मजबूत करत अऊ बिसवास म बने रहे बर उत्साहित करत गीन। ओमन ये कहंय, “हमन ला परमेसर के राज म प्रवेस करे बर बहुंत तकलीफ उठाना पड़ही।”
ACT 14:23 पौलुस अऊ बरनबास हर एक कलीसिया म अगुवा ठहिराईन अऊ उपास अऊ पराथना करके ओमन ला परभू के हांथ म सऊंप दीन, जेकर ऊपर ओमन बिसवास करे रिहिन।
ACT 14:24 ओमन पिसिदिया ले होवत पंफूलिया म आईन
ACT 14:25 अऊ पिरगा सहर म परमेसर के बचन सुनाय के बाद, ओमन अत्तलिया चल दीन।
ACT 14:26 अत्तलिया ले ओमन पानी जहाज म चघके अंताकिया म वापिस आईन, जिहां ओमन ला परमेसर के अनुग्रह म ओ काम सऊंपे गे रिहिस, जऊन ला ओमन अब पूरा करिन।
ACT 14:27 उहां हबरे के बाद, ओमन कलीसिया के मनखेमन ला इकट्ठा करिन अऊ ओ जम्मो काम, जऊन ला परमेसर ह ओमन के दुवारा करे रिहिस, ओ मनखेमन ला बताईन, अऊ ये घलो बताईन कि कइसने परमेसर ह आनजातमन बर बिसवास के रसता खोलिस।
ACT 14:28 अऊ ओमन उहां चेलामन के संग बहुंत दिन तक रिहिन।
ACT 15:1 कुछू मनखेमन यहूदिया ले अंताकिया म आईन अऊ ओमन भाईमन ला ये सिखोय लगिन, “यदि मूसा के सिखोय रीति के मुताबिक तुम्हर खतना नइं होय हवय, त तुम्हर उद्धार नइं हो सकय।”
ACT 15:2 एकर बारे म पौलुस अऊ बरनबास के, ओमन के संग बहुंत झगरा अऊ बाद-बिबाद होईस। एकरसेति ये ठहिराय गीस कि पौलुस अऊ बरनबास कुछू अऊ बिसवासीमन के संग, ये बिसय के बारे म चरचा करे बर प्रेरित अऊ अगुवामन करा यरूसलेम जावंय।
ACT 15:3 कलीसिया के मनखेमन ओमन ला यरूसलेम पठोईन। ओमन फीनीके अऊ सामरिया होवत गीन, अऊ ओमन ये बतावत गीन कि कइसने आनजातमन परमेसर कोति लहुंटिन। ये बात ला सुनके जम्मो भाईमन बहुंत खुस होईन।
ACT 15:4 जब ओमन यरूसलेम हबरिन; त कलीसिया, प्रेरित अऊ अगुवामन ओमन के सुवागत करिन। ओमन कलीसिया, प्रेरित अऊ अगुवामन ला बताईन कि परमेसर ह कइसने ओमन के दुवारा बड़े-बड़े काम करे हवय।
ACT 15:5 तब फरीसीमन के दल ले जऊन मन बिसवास करे रिहिन, ओमा ले कुछू झन उठके कहिन, “आनजातमन बर खतना करवाना अऊ मूसा के कानून ला मानना जरूरी ए।”
ACT 15:6 तब प्रेरित अऊ अगुवामन ये बिसय के बारे म बिचार करे बर जूरिन।
ACT 15:7 बहुंत बिचार करे के बाद, पतरस ह ठाढ़ होके कहिस, “हे भाईमन हो! तुमन जानत हव कि कुछू समय पहिली परमेसर ह तुमन ले मोला चुनिस ताकि मोर मुहूं ले आनजातमन सुघर संदेस सुनंय अऊ बिसवास करंय।
ACT 15:8 परमेसर ह मनखे के मन के बिचार ला जानथे अऊ ओह हमन ला देखाईस कि ओह आनजातमन ला घलो हमर सहीं पबितर आतमा देके गरहन करे हवय।
ACT 15:9 ओह बिसवास के दुवारा ओमन के हिरदय ला सुध करके, हमन अऊ ओमन के बीच म कुछू फरक नइं करिस।
ACT 15:10 अब तुमन काबर परमेसर ला परखे के कोसिस करत हवव? तुमन चेलामन के खांधा म अइसने जुआड़ी रखत हवव, जऊन ला न तो हमन अऊ न ही हमर पुरखामन उठा सकिन।
ACT 15:11 हमन बिसवास करथन कि हमर परभू यीसू के अनुग्रह के दुवारा हमन उद्धार पाय हवन, वइसने ओमन घलो उद्धार पाय हवंय।”
ACT 15:12 एकर बाद, जम्मो सभा के मनखेमन चुपेचाप बरनबास अऊ पौलुस के बात ला सुने लगिन कि परमेसर ह कइसने ओमन के दुवारा आनजातमन के बीच म अद्भूत चिनहां अऊ चमतकार के काम करिस।
ACT 15:13 जब ओमन अपन बात खतम कर लीन, त याकूब ह कहिस, हे भाईमन, मोर बात ला सुनव।
ACT 15:14 सिमोन ह हमन ला बताईस कि कइसने परमेसर ह पहिली-पहल आनजातमन ऊपर दया करिस कि ओमन ले मनखेमन के एक दल ला अपन बर ले लीस।
ACT 15:15 ये बात ह अगमजानीमन के बचन के मुताबिक होईस, जइसने कि परमेसर के बचन म लिखे हवय:
ACT 15:16 “ ‘एकर बाद मेंह वापिस आहूं, अऊ दाऊद के गिरे घर ला फेर बनाहूं, येकर खंडहरमन ला मेंह फेर बनाहूं, अऊ मेंह येला पहिले के सहीं कर दूहूं,
ACT 15:17 ताकि बांचे मनखेमन अऊ जम्मो आनजात जऊन मन मोर नांव के कहे जाथें, परभू ला खोजंय। येला ओही परभू कहत हवय, जऊन ह ये चीजमन ला करथे’—
ACT 15:18 ओ चीज जेमन ला ओह बहुंत पहिली ले बतावत आय हवय।
ACT 15:19 “एकरसेति मोर ये बिचार ए कि आनजात म ले जऊन मनखेमन परमेसर कोति लहुंटत हवंय, हमन ओमन ऊपर कानून के बोझ ला डारके ओमन ला दुख झन देवन।
ACT 15:20 बल्कि हमन ओमन ला लिखके पठोवन कि ओमन मूरतीमन ला चघाय खाय के चीज, छिनारी काम, गला घोंटके मारे पसु के मांस अऊ लहू ले दूरिहा रहंय।
ACT 15:21 काबरकि बहुंत पहिली ले हर एक सहर म मूसा के कानून के परचार होवत आवत हवय अऊ येला हर बिसराम दिन यहूदीमन के सभा-घर म पढ़े जाथे।”
ACT 15:22 तब प्रेरित अऊ अगुवामन जम्मो कलीसिया के संग फैसला करिन कि अपन म ले कुछू मनखे ला चुनंय अऊ ओमन ला पौलुस अऊ बरनबास के संग अंताकिया पठोवंय। ओमन यहूदा जऊन ला बरसबा कहे जाथे अऊ सीलास ला चुनिन। ये दूनों झन भाईमन म मुखिया रिहिन।
ACT 15:23 ओमन के हांथ म ये चिट्ठी पठोईन: अंताकिया सहर अऊ सीरिया अऊ किलिकिया प्रदेस के रहइया आनजात बिसवासी भाईमन ला, हमन प्रेरित अऊ अगुवामन ले जऊन मन कि तुम्हर भाई अन, जोहार मिलय।
ACT 15:24 हमन सुने हवन कि हमन ले कुछू झन उहां जाके अपन बात ले तुम्हर हिरदय ला बिचलित करके तुमन ला दुबिधा म डार दे हवंय। पर हमन ओमन ला ये हुकूम नइं देय रहेंन।
ACT 15:25 एकरसेति हमन एक मन होके ये ठीक समझेंन कि कुछू मनखेमन ला चुनके अपन मयारू भाई बरनबास अऊ पौलुस के संग तुम्हर करा पठोवन।
ACT 15:26 येमन अइसने मनखे अंय, जऊन मन हमर परभू यीसू मसीह खातिर अपन जिनगी ला जोखिम म डारे हवंय।
ACT 15:27 एकरसेति हमन यहूदा अऊ सीलास ला पठोय हवन, जऊन मन अपन मुहूं ले घलो हमर लिखे बात ला बताहीं।
ACT 15:28 पबितर आतमा अऊ हमन ला ये ठीक लगिस कि ये जरूरी बातमन ला छोंड़के अऊ कुछू बोझा तुम्हर ऊपर झन लादे जावय:
ACT 15:29 तुमन मूरती ला चघाय खाना ले, लहू ले, गला घोंटके मारे पसु के मांस ले अऊ छिनारी काम ले दूरिहा रहव। येमन ले बांचे रहे म तुम्हर भलई हवय। खुसी रहव।
ACT 15:30 तब पठोय गे मनखेमन बिदा होके अंताकिया म गीन, जिहां ओमन कलीसिया के सभा बलाके ओमन ला ओ चिट्ठी दीन।
ACT 15:31 मनखेमन चिट्ठी ला पढ़िन अऊ ओमा लिखे उत्साह देवइया संदेस ला सुनके खुस होईन।
ACT 15:32 यहूदा अऊ सीलास जऊन मन खुद अगमजानी रिहिन, ओमन घलो कतको बात कहिके भाईमन ला उत्साहित अऊ मजबूत करिन।
ACT 15:33 ओमन उहां कुछू दिन बिताके भाईमन ले सांति के संग बिदा होईन, अऊ अपन पठोइयामन करा वापिस लहुंट गीन।
ACT 15:34 पर सीलास ह उहां रूके के फैसला करिस।
ACT 15:35 पौलुस अऊ बरनबास अंताकिया म रूक गीन, जिहां ओमन अऊ कतको आने मन परभू के बचन ला सिखाईन अऊ परचार करिन।
ACT 15:36 कुछू दिन के बाद पौलुस ह बरनबास ला कहिस, “आ, जऊन-जऊन सहर म हमन परभू के बचन सुनाय रहेंन, हमन फेर उहां चलके अपन भाईमन ला देखन कि ओमन कइसने हवंय।”
ACT 15:37 बरनबास ह यूहन्ना ला जऊन ह मरकुस कहाथे, अपन संग म ले गे बर चाहिस,
ACT 15:38 पर पौलुस ह यूहन्ना ला अपन संग ले जाना ठीक नइं समझिस, काबरकि ओह पंफूलिया म ओमन ला छोंड़ दे रिहिस अऊ ओमन के संग काम म नइं गे रिहिस।
ACT 15:39 एकर बारे म ओमन म अतेक मतभेद हो गीस कि ओमन एक-दूसर ले अलग हो गीन। बरनबास ह मरकुस ला लेके पानी जहाज म साइप्रस चल दीस।
ACT 15:40 पर पौलुस ह सीलास ला अपन संग ले बर चुनिस अऊ भाईमन परभू के अनुग्रह म ओमन ला सऊंपिन।
ACT 15:41 ओह कलीसियामन ला मजबूत करत सीरिया अऊ किलिकिया होवत गीस।
ACT 16:1 पौलुस ह दिरबे अऊ ओकर बाद लुस्त्रा नगर म आईस, जिहां तीमुथियुस नांव के एक चेला रहय। ओकर दाई ह यहूदी रिहिस अऊ यीसू मसीह के एक बिसवासिनी रिहिस, पर तीमुथियुस के ददा ह यूनानी रिहिस।
ACT 16:2 लुस्त्रा अऊ इकुनियुम के जम्मो भाईमन तीमुथियुस के बारे म बने गोठियावंय।
ACT 16:3 पौलुस ह तीमुथियुस ला अपन संग ले जाय बर चाहिस। जऊन यहूदीमन ओ छेत्र म रहत रिहिन, ओमन के कारन पौलुस ह ओकर खतना कराईस काबरकि ओ जम्मो यहूदीमन जानत रहंय कि तीमुथियुस के ददा ह यूनानी रिहिस।
ACT 16:4 तब सहर-सहर जा-जाके ओमन ओ नियममन ला मनखेमन ला माने बर कहिन, जऊन ला यरूसलेम के प्रेरित अऊ अगुवामन ठहिराय रिहिन।
ACT 16:5 ये किसम ले कलीसियामन बिसवास म मजबूत होवत गीन अऊ हर दिन गनती म बढ़त गीन।
ACT 16:6 पौलुस अऊ ओकर संगीमन फ्रूगिया अऊ गलातिया के इलाका ले होवत गीन। पबितर आतमा ह ओमन ला एसिया प्रदेस म परमेसर के बचन सुनाय बर मना करिस।
ACT 16:7 जब ओमन मूसिया के सीमना म आईन, त उहां ले ओमन बितूनिया जाय के कोसिस करिन, पर यीसू के आतमा ह ओमन ला उहां जाय बर मना करिस।
ACT 16:8 एकरसेति ओमन मूसिया ले होवत त्रोआस सहर म आईन।
ACT 16:9 पौलुस ह रथिया एक दरसन देखिस कि मकिदुनिया के एक मनखे ह ठाढ़ होके ओकर ले ये बिनती करत रहय, “मकिदुनिया म आके हमर मदद कर।”
ACT 16:10 पौलुस के दरसन देखे के बाद, हमन तुरते मकिदुनिया जाय बर तियार हो गेंन, ये समझके कि परमेसर ह हमन ला उहां के मनखेमन ला सुघर संदेस सुनाय बर बलावत हवय।
ACT 16:11 त्रोआस ले पानी जहाज म चघके हमन सीधा सुमात्राके दीप पहुंचेंन अऊ उहां ले दूसर दिन नियापुलिस सहर म आयेंन।
ACT 16:12 उहां ले हमन फिलिप्पी हबरेंन, जऊन ह एक रोमन बस्ती ए अऊ मकिदुनिया प्रदेस के एक खास सहर ए अऊ हमन उहां कुछू दिन रहेंन।
ACT 16:13 बिसराम के दिन, हमन सहर के दुवारी के बाहिर नदी करा गेंन। हमन ये सोचत रहेंन कि उहां पराथना करे के ठऊर होही। उहां कुछू माईलोगनमन जूरे रिहिन। हमन बईठके ओमन के संग गोठियाय लगेंन।
ACT 16:14 हमर बात ला सुनइयामन म लुदिया नांव के थुआतीरा सहर के बैंगनी कपड़ा बेचइया एक माईलोगन रिहिस, जऊन ह परमेसर के भक्त रिहिस। ओह हमर बात ला सुनत रहय। परभू ह ओकर हिरदय ला खोलिस कि ओह पौलुस के संदेस म धियान लगावय।
ACT 16:15 जब ओह अऊ ओकर घर के मन बतिसमा लीन, त ओह हमन ला नेवता देके कहिस, “यदि तुमन मोला परभू के बिसवासिनी समझत हव, त आवव अऊ मोर घर म रहव।” अऊ ओह हमन ला राजी करके ले गीस।
ACT 16:16 एक बार जब हमन पराथना करे के जगह ला जावत रहेंन, त हमन ला एक गुलाम छोकरी मिलिस, जऊन म अगम के बात बताय के आतमा रिहिस। ओह अगम के बात बताके अपन मालिकमन बर अब्बड़ पईसा कमावत रिहिस।
ACT 16:17 ओ छोकरी ह पौलुस अऊ हमर पाछू आईस अऊ चिचियाके कहिस, “ये मनखेमन सर्वोच्च परमेसर के सेवक अंय अऊ तुमन ला उद्धार पाय के रसता बतावत हवंय।”
ACT 16:18 ओह बहुंत दिन तक अइसनेच करते रिहिस। आखिर म, पौलुस ह बहुंत चिढ़ गीस अऊ पाछू मुड़के ओ छोकरी म हमाय आतमा ला कहिस, “यीसू मसीह के नांव म मेंह तोला हुकूम देवत हंव कि ओमा ले निकल आ।” अऊ ओही घरी आतमा ह ओमा ले निकल गीस।
ACT 16:19 जब ओकर मालिकमन देखिन कि ओमन के कमई करे के आसा ह चले गीस, त ओमन पौलुस अऊ सीलास ला पकड़के बजार के ठऊर म अधिकारीमन करा घसीटके लानिन।
ACT 16:20 ओमन ओ दूनों ला नियायधीसमन के आघू म लानके कहिन, “ये मनखेमन यहूदी अंय अऊ हमर सहर म भारी गड़बड़ी करत हवंय।
ACT 16:21 येमन अइसने रीति-बिधि बतावत हवंय, जऊन ला स्वीकार करना या मानना, हमन रोमी मनखेमन बर उचित नो हय।”
ACT 16:22 तब भीड़ के मनखेमन पौलुस अऊ सीलास के ऊपर चढ़ बईठिन अऊ नियायधीसमन ओमन के कपड़ा उतारके ओमन ला पीटवाय के हुकूम दीन।
ACT 16:23 ओमन ला कोर्रा म बहुंत मारे के बाद, जेल म डार दीन अऊ जेलर ला हुकूम दीन कि सचेत होके ओमन के रखवारी करय।
ACT 16:24 जेलर ह हुकूम के मुताबिक ओमन ला भीतर के खोली म रखिस अऊ ओमन के गोड़ म लकड़ी के बेड़ी जकड़ दीस।
ACT 16:25 लगभग आधा रथिया, पौलुस अऊ सीलास पराथना करत अऊ परमेसर के भजन गावत रहंय अऊ आने कैदीमन येला सुनत रहंय।
ACT 16:26 अतकी म अचानक एक भारी भुइंडोल होईस। इहां तक कि जेल के नीव घलो डोलन लगिस। तुरते जेल के जम्मो कपाटमन खुल गीन अऊ जम्मो कैदीमन के बेड़ीमन घलो खुल गीन।
ACT 16:27 जेलर ह जागिस अऊ जब ओह देखिस कि जेल के कपाटमन खुल गे हवंय, त अपन तलवार ला खींचके अपनआप ला मार डारे चाहिस, काबरकि ओह सोचत रिहिस कि कैदीमन भाग गे हवंय।
ACT 16:28 पर पौलुस ह चिचियाके जेलर ला कहिस, “अपनआप ला नुकसान झन पहुंचा। हमन जम्मो झन इहां हवन।”
ACT 16:29 तब जेलर ह दीया मंगाके तेजी से भीतर गीस अऊ कांपत पौलुस अऊ सीलास के गोड़ खाल्हे गिरिस।
ACT 16:30 ओह तब ओमन ला बाहिर लानिस अऊ पुछिस, “हे महाराजमन, उद्धार पाय बर मेंह का करंव?”
ACT 16:31 ओमन कहिन, “परभू यीसू ऊपर बिसवास कर, त तें अऊ तोर घर के मन उद्धार पाहीं।”
ACT 16:32 तब ओमन ओला अऊ ओकर घर के जम्मो मनखेमन ला परभू के बचन सुनाईन।
ACT 16:33 ओहीच घरी रथिया, जेलर ह ओमन ला ले जाके ओमन के घाव धोईस अऊ तब तुरते ओह अऊ ओकर घर के जम्मो मनखेमन बतिसमा लीन।
ACT 16:34 ओह पौलुस अऊ सीलास ला अपन घर म लानिस अऊ ओमन ला जेवन कराईस अऊ घर के जम्मो झन आनंद मनाईन, काबरकि ओमन परमेसर ऊपर बिसवास करे रिहिन।
ACT 16:35 जब बिहान होईस, त नियायधीसमन अपन सिपाहीमन के हांथ जेलर करा ये हुकूम पठोईन कि ओ मनखेमन ला छोंड़ देवय।
ACT 16:36 जेलर ह पौलुस ला कहिस, “नियायधीसमन तोला अऊ सीलास ला छोंड़ देय के हुकूम दे हवंय। अब तुमन सांति से जा सकत हव।”
ACT 16:37 पर पौलुस ह सिपाहीमन ला कहिस, “ओमन बिगर जांच करे हमन ला मनखेमन के आघू म मारिन, जबकि हमन रोमी नागरिक अन अऊ हमन ला जेल म डारिन। अऊ अब ओमन हमन ला चुपेचाप छोंड़ देय चाहत हवंय। अइसने नइं हो सकय। ओमन खुदे इहां आवंय अऊ हमन ला जेल ले बाहिर ले जावंय।”
ACT 16:38 सिपाहीमन वापिस जाके ये बात नियायधीसमन ला बताईन; तब ओमन ये सुनके डरा गीन कि पौलुस अऊ सीलास रोमी नागरिक अंय।
ACT 16:39 तब ओमन आके ओमन ला मनाईन अऊ ओमन ला जेल ले बाहिर ले जाके बिनती करिन कि ओमन सहर ले चले जावंय।
ACT 16:40 जेल ले निकले के बाद, पौलुस अऊ सीलास लुदिया के घर गीन, अऊ उहां ओमन भाईमन ले मिलिन अऊ ओमन ला ढाढ़स बंधाके उहां ले चल दीन।
ACT 17:1 पौलुस अऊ सीलास अमफिपुलिस अऊ अपुलोनिया सहर ले होवत थिस्सलुनीके सहर म आईन, जिहां यहूदीमन के एक सभा-घर रिहिस।
ACT 17:2 जइसने कि पौलुस के आदत रिहिस, ओह सभा-घर म गीस अऊ तीन बिसराम के दिन तक ओमन के संग परमेसर के बचन म ले तर्क देके बताईस।
ACT 17:3 ओह ये साबित करत ओमन ला समझाईस कि मसीह ला दुख उठाना अऊ मरे म ले जी उठना जरूरी रिहिस। एहीच यीसू जेकर बारे, मेंह तुमन ला बतावत हंव, मसीह अय।
ACT 17:4 तब उहां के कुछू यहूदी अऊ परमेसर के भय मनइया कतको यूनानी मनखे अऊ नामी माईलोगनमन ओकर बात ला मान लीन अऊ ओमन पौलुस अऊ सीलास के संग मिल गीन।
ACT 17:5 पर यहूदीमन जलन ले भर गीन। एकरसेति ओमन बजार ले कुछू खराप मनखेमन ला अपन संग मिला लीन अऊ भीड़ लगाके सहर म हो-हल्ला मचाय लगिन। पौलुस अऊ सीलास के खोज म ओमन यासोन के घर आईन ताकि ओमन ला भीड़ के आघू म लानंय।
ACT 17:6 पर जब ओमन ला पौलुस अऊ सीलास उहां नइं मिलिन, त यासोन अऊ कुछू आने भाईमन ला घसीटत सहर के अधिकारीमन करा लानिन अऊ चिचियाके कहिन, “ये मनखे जऊन मन जम्मो संसार म समस्या खड़े करे हवंय, अब इहां आय हवंय।
ACT 17:7 अऊ यासोन ह ओमन ला अपन घर म रखे हवय अऊ ये जम्मो झन महाराजा के हुकूम के बिरोध करके कहत हवंय कि यीसू नांव के एक आने राजा हवय।”
ACT 17:8 जब भीड़ के मनखे अऊ सहर के अधिकारीमन ये बात ला सुनिन, त ओमन म कोलाहल मच गीस।
ACT 17:9 तब ओमन यासोन अऊ बाकि भाईमन ले जमानत लेके ओमन ला छोंड़ दीन।
ACT 17:10 रथिया होतेच ही, भाईमन पौलुस अऊ सीलास ला बिरिया सहर पठो दीन। उहां हबरके ओमन यहूदीमन के सभा-घर म गीन।
ACT 17:11 बिरिया के मनखेमन थिस्सलुनीके सहर के मनखेमन ले जादा बने सुभाव के रिहिन, काबरकि ओमन बड़े उत्साह के संग परमेसर के बचन ला गरहन करिन अऊ हर एक दिन ये जाने बर परमेसर के बचन म ले खोजंय कि पौलुस जऊन बात कहत हवय, ओह सच ए कि नइं।
ACT 17:12 उहां के बहुंते यहूदीमन बिसवास करिन अऊ बहुंत संखिया म नामी यूनानी माईलोगन अऊ यूनानी मनखेमन घलो बिसवास करिन।
ACT 17:13 जब थिस्सलुनीके के यहूदीमन ला ये पता चलिस कि पौलुस ह बिरिया म परमेसर के बचन के परचार करत हवय, त ओमन उहां घलो पहुंच गीन अऊ मनखेमन के भीड़ ला भड़काईन अऊ हो-हल्ला मचाय लगिन।
ACT 17:14 तब भाईमन तुरते पौलुस ला समुंदर तीर म पठो दीन, पर सीलास अऊ तीमुथियुस बिरिया म रूक गीन।
ACT 17:15 ओ मनखे जऊन मन पौलुस ला पहुंचाय गे रिहिन, ओमन ओला अथेने सहर म ले आईन अऊ सीलास अऊ तीमुथियुस बर पौलुस के ये संदेस लेके लहुंटिन कि ओमन जतकी जल्दी हो सके, पौलुस करा आ जावंय।
ACT 17:16 जब पौलुस ह अथेने म सीलास अऊ तीमुथियुस के बाट जोहत रिहिस, तब सहर ला मूरतीमन ले भरे देखके ओह आतमा म बहुंत उदास होईस।
ACT 17:17 एकरसेति ओह सभा-घर म यहूदीमन ले अऊ परमेसर के भक्त यूनानीमन ले अऊ बजार म जऊन कोनो मिलंय, ओमन ले हर दिन बहस करय।
ACT 17:18 कुछू इपिकूरी अऊ इस्तोईकी पंडितमन ओकर ले बिवाद करन लगिन। ओमन ले कुछू झन कहिन, “ये बकवादी ह का कहे चाहत हवय?” आने मन कहिन, “अइसने जान पड़थे कि ओह बिदेसी देवतामन के बारे म गोठियावत हवय।” काबरकि पौलुस ह यीसू के अऊ ओकर मरे म ले जी उठे के परचार करत रहय।
ACT 17:19 तब ओमन पौलुस ला ले गीन अऊ ओला अरियुपगुस के सभा म लानिन अऊ ओकर ले पुछिन, “का हमन जान सकथन कि ये जो नवां बात तेंह बतावत हवस, येह का ए?
ACT 17:20 तेंह हमन ला भाला रकम के बात बतावत हस। हमन जाने बर चाहथन कि येमन के का मतलब होथे?”
ACT 17:21 (अथेने सहर के जम्मो रहइया अऊ परदेसी जऊन मन उहां रहत रिहिन, ओमन नवां-नवां बात कहे अऊ सुने के छोंड़ अऊ कोनो काम म समय नइं बितावत रिहिन।)
ACT 17:22 तब पौलुस ह अरियुपगुस के सभा के बीच म ठाढ़ होके कहिस, “हे अथेने सहर के मनखेमन, मेंह देखत हंव कि तुमन हर बात म बहुंत धारमिक अव।
ACT 17:23 काबरकि जब मेंह घुमत-घुमत तुम्हर पूजा-पाठ के चीजमन ला धियान लगाके देखत रहेंव, त मोला एक ठन अइसने बेदी दिखिस, जऊन म ये लिखाय रहय: एक अनजान परमेसर खातिर। जऊन ला तुमन बिगर जाने पूजा करत हव, मेंह ओकरेच सुघर संदेस तुमन ला सुनाय चाहत हवंव।
ACT 17:24 “जऊन परमेसर ह संसार अऊ ओमा के जम्मो चीजमन ला बनाईस, ओह स्वरग अऊ धरती के परभू ए अऊ ओह मनखे के बनाय मंदिरमन म नइं रहय।
ACT 17:25 अऊ न तो ओला कोनो चीज के घटी हवय कि मनखे ह काम करके ओकर पूरती कर सकय, काबरकि ओह खुद जम्मो झन ला जिनगी अऊ परान अऊ जम्मो कुछू देथे।
ACT 17:26 ओह एकेच मनखे ले जम्मो जात के मनखेमन ला बनाईस कि ओमन जम्मो धरती म रहंय। ओह ओमन बर समय अऊ रहे-बसे के जगह ठहिराईस।
ACT 17:27 परमेसर ह अइसने करिस ताकि ओमन परमेसर के खोज म रहंय अऊ ओकर करा पहुंचके ओला पा जावंय। तभो ले, ओह हमन ले कोनो ले दूरिहा नइं ए।
ACT 17:28 काबरकि ओही म हमन जीयत अऊ चलत-फिरत हवन अऊ हमर जिनगी हवय। जइसने कि तुम्हर कुछू कबिमन कहे हवंय, ‘हमन ओकर संतान अन।’
ACT 17:29 “एकरसेति जब हमन परमेसर के संतान अन, त हमन ला ये नइं सोचना चाही कि ईस्वर ह सोन या चांदी या पथरा के मूरती सहीं ए, जऊन ह मनखे के कारीगरी अऊ सोच ले बनाय जाथे।
ACT 17:30 पहिली समय म, परमेसर ह ये किसम के मनखे के अगियानता ला धियान नइं दीस, पर अब ओह हर जगह जम्मो मनखेमन ला पाप ले मन फिराय के हुकूम देवत हवय।
ACT 17:31 काबरकि ओह एक ठन दिन ठहिराय हवय, जब ओह अपन ठहिराय मनखे के दुवारा संसार के नियाय सही-सही करही। परमेसर ह ओ मनखे ला मरे म ले जियाके ये बात के सबूत जम्मो मनखेमन ला दे हवय।”
ACT 17:32 जब ओमन मरे मनखेमन के जी उठे के बात ला सुनिन, त कुछू मनखेमन पौलुस के हंसी उड़ाईन, पर आने मन कहिन, “एकर बारे म हमन तोर ले फेर कभू सुनबो।”
ACT 17:33 एकरसेति पौलुस ह सभा के बीच ले निकलके चले गीस।
ACT 17:34 तभो ले कुछू मनखेमन पौलुस के बात ला मानिन अऊ बिसवास करिन। ओमन म दियुनुसियुस जऊन ह अरियुपगुस सभा के सदस्य रिहिस अऊ दमरिस नांव के एक माईलोगन घलो रिहिस। ओमन के संग अऊ कतको मनखेमन घलो रिहिन।
ACT 18:1 एकर बाद पौलुस ह अथेने ला छोंड़के कुरिन्थुस सहर म गीस।
ACT 18:2 उहां ओला अक्विला नांव के एक यहूदी मिलिस, जेकर जनम पुनतुस म होय रिहिस। ओह हाल ही म अपन घरवाली प्रिसकिल्ला के संग नवां-नवां इटली देस ले आय रिहिस, काबरकि महाराजा क्लौदियुस ह जम्मो यहूदीमन ला रोम ले चले जाय के हुकूम दे रिहिस। पौलुस ह ओमन ला देखे बर गीस,
ACT 18:3 अऊ काबरकि पौलुस ह तम्बू बनाय के धंधा करय अऊ ओमन घलो ओहीच धंधा करंय, एकरसेति ओह उहां ओमन के संग रूक गीस अऊ काम करे लगिस।
ACT 18:4 पौलुस ह हर बिसराम के दिन, सभा-घर म बाद-बिबाद करय अऊ यहूदी अऊ यूनानीमन ला मनाय के कोसिस करय।
ACT 18:5 जब सीलास अऊ तीमुथियुस मकिदुनिया ले आईन, त पौलुस ह पूरा संदेस सुनाय के काम म लग गीस अऊ ओह यहूदीमन ला ये गवाही देवत रिहिस कि यीसू ह मसीह अय।
ACT 18:6 पर जब यहूदीमन बिरोध करिन अऊ ओकर बारे खराप बात कहे लगिन, त पौलुस ह बिरोध म अपन कपड़ा ला झारके ओमन ला कहिस, “तुम्हर लहू ह तुम्हर मुड़ ऊपर होवय। मेंह निरदोस अंव। अब ले मेंह आनजातमन करा जाहूं।”
ACT 18:7 तब पौलुस ह सभा-घर ला छोंड़के तीतुस युसतुस नांव के परमेसर के भक्त के घर म गीस, जेकर घर सभा-घर के बाजूच म रहय।
ACT 18:8 सभा-घर के अधिकारी क्रिसपुस अऊ ओकर जम्मो घराना परभू म बिसवास करिन; कुरिन्थुस सहर के मनखे अऊ बहुंते झन घलो पौलुस के बात ला सुनके बिसवास करिन अऊ बतिसमा लीन।
ACT 18:9 एक रथिया, परभू ह दरसन म पौलुस ला कहिस, “झन डर, पर कहे जा अऊ चुप झन रह।
ACT 18:10 काबरकि मेंह तोर संग हवंव, अऊ कोनो हमला करके तोर कुछू नइं बिगाड़ सकंय, काबरकि ये सहर म मोर बहुंत मनखे हवंय।”
ACT 18:11 एकरसेति पौलुस ह डेड़ साल तक उहां रिहिस, अऊ ओमन ला परमेसर के बचन सिखोवत रिहिस।
ACT 18:12 जब गल्लियो ह अखया प्रदेस के राजपाल रिहिस, तब यहूदीमन पौलुस ऊपर एक संग हमला करके ओला कचहरी म लानिन,
ACT 18:13 अऊ ये कहिके ओकर ऊपर दोस लगाईन, “ये मनखे ह कानून के मुताबिक नइं, पर ओकर खिलाप परमेसर के अराधना करे बर मनखेमन ला सिखोवत हवय।”
ACT 18:14 जब पौलुस ह बोलनेच वाला रिहिस, त राजपाल गल्लियो ह यहूदीमन ला कहिस, “कहूं येह कुछू दुराचार या अपराध के बात होतिस, त मेंह तुम्हर बात ला सुनतेंव।
ACT 18:15 पर जब ये बिवाद ह गोठ अऊ नांव अऊ तुमन के खुद के कानून के बारे म अय, त तुमन खुद ये मामला ला निपटाव। मेंह अइसने बात के नियाय नइं करंव।”
ACT 18:16 अऊ ओह ओमन ला कचहरी ले चले जाय के हुकूम दीस।
ACT 18:17 तब जम्मो मनखेमन सभा-घर के अधिकारी सोसथिनेस ला पकड़िन अऊ ओला कचहरी के आघू म मारिन-पीटिन। पर गल्लियो ह ये बात के कुछू चिंता नइं करिस।
ACT 18:18 पौलुस ह कुछू दिन कुरिन्थुस म रिहिस, तब ओह भाईमन ला छोंड़के पानी जहाज म प्रिसकिल्ला अऊ अक्विला के संग सीरिया चल दीस। पर जाय के पहिली ओह किंख्रिया म अपन मुड़ मुड़ाईस, काबरकि ओह मन्नत माने रिहिस।
ACT 18:19 जब ओमन इफिसुस सहर म हबरिन, त पौलुस ह प्रिसकिल्ला अऊ अक्विला ला उहां छोंड़ दीस अऊ ओह खुद सभा-घर म जाके यहूदीमन के संग बहस करे लगिस।
ACT 18:20 जब ओमन पौलुस ला कहिन कि ओह ओमन के संग कुछू अऊ समय तक रहय, त ओह नइं मानिस।
ACT 18:21 पर ओह ओमन ले ये वायदा करके गीस, “कहूं परमेसर के ईछा होही, त मेंह तुम्हर करा फेर आहूं।” तब ओह पानी जहाज म चघके इफिसुस ले चल दीस।
ACT 18:22 जब ओह कैसरिया नगर म उतरिस, त ओह जाके कलीसिया के मनखेमन ले भेंट करिस अऊ तब उहां ले अंताकिया नगर चल दीस।
ACT 18:23 कुछू समय अंताकिया म बिताय के बाद, पौलुस ह उहां ले चल दीस अऊ गलातिया अऊ फ्रूगिया के इलाका म जगह-जगह जाके, ओह जम्मो चेलामन ला बिसवास म मजबूत करत गीस।
ACT 18:24 अपुल्‍लोस नांव के एक झन यहूदी रहय, जेकर जनम सिकन्दरिया सहर म होय रिहिस। ओह एक बिद्वान मनखे रिहिस अऊ परमेसर के बचन के बने जानकार रिहिस। ओह इफिसुस सहर म आईस।
ACT 18:25 ओह परभू के बारे म सिकछा पाय रिहिस, अऊ ओह भारी उत्साह ले बात करय अऊ यीसू के बारे म एकदम सही-सही सिखोवय, पर ओह सिरिप यूहन्ना के बतिसमा के बात ला जानत रिहिस।
ACT 18:26 ओह सभा-घर म बेधड़क गोठियाय लगिस। जब प्रिसकिल्ला अऊ अक्विला ओकर बात ला सुनिन, त ओमन ओला अपन घर ले गीन अऊ ओला परमेसर के रसता के बारे म अऊ सही-सही बताईन।
ACT 18:27 जब अपुल्‍लोस ह अखया जाय बर चाहिस, त भाईमन ओला उत्साहित करिन अऊ उहां के चेलामन ला चिट्ठी लिखिन कि ओमन ओकर सुवागत करंय। अखया पहुंचके, अपुल्‍लोस उहां ओ मनखेमन के अब्बड़ मदद करिस, जऊन मन परमेसर के अनुग्रह के दुवारा बिसवासी बने रिहिन।
ACT 18:28 ओह परमेसर के बचन ले सबूत दे देके कि यीसू ह मसीह अय, भारी मेहनत करके यहूदीमन ला जम्मो मनखेमन के आघू म लबरा साबित करय।
ACT 19:1 जब अपुल्‍लोस ह कुरिन्थुस सहर म रिहिस, त पौलुस ह प्रदेस के भीतरी भाग के सहरमन ले होवत इफिसुस म आईस। उहां पौलुस ला कुछू चेलामन मिलिन।
ACT 19:2 पौलुस ह ओमन ले पुछिस, “बिसवास करत बखत का तुमन पबितर आतमा पाय हवव?” ओमन कहिन, “नइं! हमन सुने घलो नइं अन कि कोनो पबितर आतमा भी होथे।”
ACT 19:3 तब पौलुस ह ओमन ले पुछिस, “त तुमन काकर बतिसमा पाय हवव?” ओमन कहिन, “यूहन्ना के बतिसमा।”
ACT 19:4 पौलुस ह कहिस, “यूहन्ना तो पाप ले पछताप करे के बतिसमा दीस अऊ मनखेमन ला कहिस कि जऊन ह ओकर बाद अवइया हवय, ओकर ऊपर याने कि यीसू ऊपर बिसवास करव।”
ACT 19:5 ये सुनके ओमन परभू यीसू के नांव म बतिसमा लीन।
ACT 19:6 जब पौलुस ह ओमन ऊपर अपन हांथ रखिस, त ओमन ऊपर पबितर आतमा उतरिस, अऊ ओमन आने-आने भासा बोले अऊ अगमबानी करे लगिन।
ACT 19:7 ओमन जम्मो झन लगभग बारह मनखे रिहिन।
ACT 19:8 पौलुस ह सभा-घर म जाके उहां तीन महिना तक बेधड़क गोठियाईस। ओह मनखेमन ला परमेसर के राज के बारे म समझाय बर बहस करय।
ACT 19:9 पर कुछू मनखेमन हठ म आके ओकर बात ला बिसवास नइं करिन अऊ मनखेमन के आघू म परभू के रसता के बारे म खराप बात कहिन। एकरसेति पौलुस ह ओमन ला छोंड़ दीस अऊ बिसवासीमन ला अपन संग लेके हर दिन तरन्नुस के भासन-घर म बिचार-बिमर्स करे लगिस।
ACT 19:10 दू बछर तक ले एहीच होते रिहिस। एकरे कारन एसिया प्रदेस म रहइया जम्मो यहूदी अऊ यूनानीमन परभू के बचन ला सुनिन।
ACT 19:11 परमेसर ह पौलुस के दुवारा असधारन चमतकार करय।
ACT 19:12 मनखेमन रूमाल अऊ अंगछा मन ला पौलुस के देहें म छुआ के बिमरहामन करा ले जावंय अऊ ओमन के बेमारी ठीक हो जावय अऊ दुस्ट आतमामन ओमन ले निकल जावंय।
ACT 19:13 कुछू यहूदी ओझा जऊन मन एती-ओती जाके दुस्ट आतमामन ला निकालंय, ओमन घलो परभू यीसू के नांव लेके अइसने करे के कोसिस करिन। ओमन परेत आतमामन ला कहंय, “यीसू के नांव म, जेकर परचार पौलुस ह करथे, मेंह तोला हुकूम देवत हंव कि निकल आ।”
ACT 19:14 स्किवा नांव के एक यहूदी मुखिया पुरोहित के सात झन बेटा रहंय अऊ ओमन घलो अइसने करंय।
ACT 19:15 एक दुस्ट आतमा ह ओमन ला कहिस, “यीसू ला मेंह जानथंव अऊ पौलुस ला घलो जानथंव; पर तुमन कोन अव?”
ACT 19:16 तब ओ मनखे जऊन म दुस्ट आतमा रिहिस, ओमन ऊपर झपटिस अऊ ओ जम्मो झन ला बस म कर लीस अऊ ओह ओमन ला अइसने मारिस कि ओमन नंगरा अऊ घायल होके ओ घर ले भाग निकलिन।
ACT 19:17 जब इफिसुस के रहइया यहूदी अऊ यूनानीमन ला ये बात के पता चलिस, त ओमन जम्मो डरा गीन अऊ परभू यीसू के नांव के अब्बड़ बड़ई होईस।
ACT 19:18 जऊन मन बिसवास करे रिहिन, ओमा के कतको झन आके खुल्लम-खुल्ला अपन खराप काममन ला मान लीन।
ACT 19:19 जादू-टोना करइयामन ले कतको झन अपन पोथीमन ला संकेलिन अऊ मनखेमन के आघू म ओ किताबमन ला आगी म बार दीन। जब ओ किताबमन के दाम के हिसाब करे गीस, त ओह लगभग पचास हजार ड्राचमास के बराबर रिहिस।
ACT 19:20 ये किसम ले परभू के बचन ह चारों खूंट फईलत गीस अऊ एकर परभाव बाढ़त गीस।
ACT 19:21 ये जम्मो घटना ला देखे के बाद, पौलुस ह मकिदुनिया अऊ अखया प्रदेस होवत यरूसलेम जाय के फैसला करिस। ओह कहिस, “उहां जाय के बाद, मोला रोम घलो जाना जरूरी ए।”
ACT 19:22 पौलुस ह अपन मदद करइयामन ले दू झन—तीमुथियुस अऊ इरासतुस ला मकिदुनिया पठो दीस अऊ खुदे कुछू दिन बर एसिया प्रदेस म रूक गीस।
ACT 19:23 ओही समय परभू के रसता के बारे म बहुंत बड़े दंगा होईस।
ACT 19:24 देमेतिरियुस नांव के एक झन सुनार रहय। ओह अरतिमिस देवी के चांदी के छोटे-छोटे मंदिर बनाके कारीगरमन संग बड़े बेपार करय।
ACT 19:25 ओह ओमन ला अऊ आने चीज के कारीगरमन ला एक संग बलाईस अऊ ओमन ला कहिस, “हे मनखेमन हो! तुमन जानत हव कि ये धंधा ले हमन ला बने आमदनी होवथे।
ACT 19:26 पर तुमन देखत अऊ सुनत हव कि ये मनखे पौलुस ह सिरिप इफिसुस म ही नइं, पर जम्मो एसिया प्रदेस म कतको मनखेमन ला समझाके ओमन ला भरमा दे हवय। ओह कहिथे कि मनखे के बनाय मूरतीमन ईस्वर नो हंय।
ACT 19:27 अब सिरिप ये बात के ही खतरा नइं ए कि हमर धंधा के परतिस्ठा चले जाही बल्कि ये घलो कि महान देवी अरतिमिस के मंदिर तुछ समझे जाही अऊ देवी जऊन ला कि पूरा एसिया प्रदेस अऊ संसार म पूजे जाथे, ओकर जस खतम हो जाही।”
ACT 19:28 जब ओमन ये सुनिन, त अब्बड़ गुस्सा होईन अऊ चिचिया-चिचियाके कहिन, “इफिसीमन के अरतिमिस देवी महान ए।”
ACT 19:29 अऊ जम्मो सहर म कोलाहल मच गीस। मनखेमन मकिदुनिया के गयुस अऊ अरिसतर्खुस ला, जऊन मन पौलुस के संगी यातरी रिहिन, पकड़ लीन, अऊ एक संग नाचा-घर म दऊड़ गीन।
ACT 19:30 पौलुस ह भीड़ करा जाय बर चाहत रिहिस, पर चेलामन ओला जावन नइं दीन।
ACT 19:31 ओ प्रदेस के कुछू अधिकारीमन पौलुस के संगी रिहिन। ओमन ओकर करा बिनती करके ये खबर पठोईन कि ओह नाचा-घर म झन जावय।
ACT 19:32 सभा म गड़बड़ी होवत रिहिस। कोनो मन एक बात बर चिचियावत रहंय, त कोनो मन कुछू आने बात बर। जादा मनखेमन तो ये नइं जानत रहंय कि ओमन उहां काबर जूरे रिहिन।
ACT 19:33 भीड़ के कुछू मनखेमन सिकन्दर ला उकसाईन, जऊन ला यहूदीमन आघू म कर दे रहंय। सिकन्दर ह हांथ ले इसारा करिस कि जम्मो चुप हो जावंय ताकि ओह मनखेमन के आघू म जबाब दे सकय।
ACT 19:34 पर जब मनखेमन ये जानिन कि ओह यहूदी अय, त ओमन जम्मो झन लगभग दू घंटा तक ये कहिके चिचियाईन, “इफिसीमन के अरतिमिस महान ए।”
ACT 19:35 तब सहर के बाबू साहेब ह भीड़ ला सांत करके कहिस, “हे संगी इफिसीमन! जम्मो संसार ह जानत हवय कि इफिसुस सहर ह महान अरतिमिस के मंदिर अऊ अकास ले गिरे ओकर मूरती के संरछक ए।
ACT 19:36 ये बात ला कोनो इनकार नइं कर सकंय, त तुमन सांत रहव अऊ बिगर सोचे-बिचारे उतावलापन म कुछू झन करव।
ACT 19:37 तुमन ये मनखेमन ला इहां लाने हवव, जऊन मन न मंदिर ला लूटे हवंय अऊ न हमर देवी के निन्दा करे हवंय।
ACT 19:38 यदि देमेतिरियुस अऊ ओकर संगी कारीगरमन ला काकरो बिरोध म कोनो सिकायत हवय, त कचहरी खुला हवय अऊ उहां हाकिममन हवंय। ओमन उहां जाके नालिस कर सकथें।
ACT 19:39 यदि तुमन कोनो अऊ बात के बारे म पुछे चाहत हव, त ओकर फैसला ठहिराय गे सभा म करे जाही।
ACT 19:40 आज के घटना के कारन हमर ऊपर दंगा करवाय के दोस लगे के खतरा हवय। ये हो-हल्ला करे के, हमर करा कोनो कारन नइं ए। हमन एकर बारे म कोनो जबाब नइं दे सकन।”
ACT 19:41 ये कहे के बाद, ओह सभा ला बिदा कर दीस।
ACT 20:1 जब हुल्लड़ ह सांत हो गे, त पौलुस ह चेलामन ला बलाके ओमन ला उत्साहित करिस अऊ तब ओमन ले बिदा लेके मकिदुनिया चल दीस।
ACT 20:2 ओह ओ इलाका म होवत, मनखेमन ला उत्साहित करत गीस अऊ आखिर म यूनान देस हबरिस।
ACT 20:3 ओह उहां तीन महिना तक रिहिस। ओह पानी जहाज म सीरिया जवइयाच रिहिस कि यहूदीमन ओकर बिरोध म सडयंत्र करे लगिन। एकरसेति पौलुस ह मकिदुनिया होवत लहुंट जाय के फैसला करिस।
ACT 20:4 ओकर संग बिरिया के पुर्रूस के बेटा सोपत्रुस, थिस्सलुनीके के अरिसतर्खुस अऊ सिकुन्दुस, दिरबे के गयुस अऊ तीमुथियुस, अऊ एसिया प्रदेस के तुखिकुस अऊ त्रुफिमुस घलो गीन।
ACT 20:5 येमन हमर ले आघू जाके, त्रोआस म हमर बाट जोहत रिहिन।
ACT 20:6 पर हमन बिन खमीर के रोटी के तिहार के बाद, फिलिप्पी म पानी जहाज चघेंन अऊ पांच दिन के बाद, त्रोआस म ओमन करा हबरेंन अऊ हमन उहां सात दिन तक रहेंन।
ACT 20:7 हप्ता के पहिली दिन जब हमन रोटी टोरे बर जूरेंन, त पौलुस ह मनखेमन ले गोठियाय लगिस। दूसर दिन, ओह त्रोआस सहर ले जवइया रिहिस, एकरसेति ओह आधा रथिया तक गोठियाते रिहिस।
ACT 20:8 जऊन ऊपर के कमरा म हमन जूरे रहेंन, उहां बहुंत दीयामन बरत रहंय।
ACT 20:9 यूतुखुस नांव के एक जवान ह खिड़की म बईठे रहय अऊ ओह बहुंत नींद म झुमरत रहय। जब पौलुस ह बहुंत देर तक गोठियातेच रहय, त ओ जवान भारी नींद के कारन तीसरा मंजिल ले भुइयां म गिर पड़िस, अऊ मनखेमन ओला मरे हुए उठाईन।
ACT 20:10 पौलुस ह खाल्हे उतरिस अऊ ओ मरे जवान ऊपर पसर गीस अऊ ओला पोटारके कहिस, “घबरावव झन, येह जीयथे।”
ACT 20:11 तब ओह फेर ऊपर के कमरा म गीस अऊ रोटी टोरके ओमन के संग खाईस अऊ बिहनियां होवत तक, ओह ओमन ले गोठियाते रिहिस, तब ओह चले गीस।
ACT 20:12 मनखेमन ओ जवान ला जीयत घर ले गीन अऊ बहुंत सांति पाईन।
ACT 20:13 हमन पहिली ले पानी जहाज म चघके अस्सुस सहर म गेंन, जिहां पौलुस ह हमर संग जहाज म चघइया रहय। पौलुस ह ये परबंध करे रहय, काबरकि ओह उहां रेंगत जवइया रिहिस।
ACT 20:14 जब ओह हमन ला अस्सुस म मिलिस, त ओला हमन पानी जहाज म लेके मितिलेने सहर चल देंन।
ACT 20:15 अऊ ओकर दूसर दिन हमन उहां ले जहाज खोलके खियुस टापू के आघू म हबरेंन। ओकर दूसर दिन हमन सामुस दीप ला पार करेंन, अऊ ओकर दूसर दिन हमन मिलेतुस नगर पहुंचेंन।
ACT 20:16 पौलुस ह इफिसुस ले निकल जाय के फैसला करिस, काबरकि ओह एसिया प्रदेस म समय बिताय नइं चाहत रहय। ओह यरूसलेम जल्दी हबरे के कोसिस म रहय, ताकि ओह पिनतेकुस्त तिहार के दिन यरूसलेम म रहय।
ACT 20:17 मिलेतुस ले पौलुस ह इफिसुस म खबर भेजिस कि कलीसिया के अगुवामन ओकर ले भेंट करंय।
ACT 20:18 जब ओमन आईन, त पौलुस ह ओमन ला कहिस, “तुमन जानत हव कि जब मेंह एसिया प्रदेस म आएंव, त पहिली ही दिन ले, मेंह तुम्हर संग पूरा समय कइसने रहंय।
ACT 20:19 मेंह परभू के सेवा बहुंत दीन होके अऊ आंसू बहा-बहाके करेंव, हालाकि यहूदीमन के सडयंत्र के कारन मोर ऊपर बहुंत समस्या आईस।
ACT 20:20 तुमन जानत हव कि जऊन बातमन तुम्हर फायदा के रिहिस, ओकर परचार करे बर मेंह संकोच नइं करेंव। पर मेंह तुमन ला मनखेमन के आघू म अऊ घर-घर जाके सिखोएंव।
ACT 20:21 मेंह यहूदी अऊ यूनानीमन ला जोर देके कहेंव कि ओमन पछताप करके परमेसर कोति लहुंटंय अऊ हमर परभू यीसू ऊपर बिसवास करंय।
ACT 20:22 “अब, मेंह पबितर आतमा के दुवारा बाध्य होके यरूसलेम जावत हंव। मेंह नइं जानंव कि उहां मोर ऊपर का बीतही।
ACT 20:23 मेंह सिरिप ये जानथंव कि हर सहर म पबितर आतमा ह मोला चेताथे कि जेल अऊ दुख-तकलीफ तोर बर तियार हवंय।
ACT 20:24 पर मेंह अपन परान के कुछू फिकर नइं करंव; मेंह सिरिप अपन जिनगी के दऊड़ ला अऊ ओ काम जऊन ला परभू यीसू ह मोला दे हवय, याने कि परमेसर के अनुग्रह के सुघर संदेस के गवाही के काम ला पूरा करे चाहथंव।
ACT 20:25 “मेंह तुमन जम्मो के बीच म परमेसर के राज के परचार करे हवंव। अऊ अब मेंह जानत हंव कि तुमन कोनो मोर मुहूं फेर कभू नइं देख पाहू।
ACT 20:26 एकरसेति मेंह आज तुम्हर आघू म ये बात कहत हंव कि मेंह तुमन जम्मो झन के लहू ले निरदोस अंव।
ACT 20:27 काबरकि मेंह परमेसर के जम्मो ईछा ला तुमन ला बताय म संकोच नइं करेंव।
ACT 20:28 एकरसेति तुमन अपन अऊ अपन ओ झुंड के रखवारी करव, जेकर ऊपर पबितर आतमा ह तुमन ला अगुवा ठहिराय हवय। अऊ परमेसर के कलीसिया के खियाल रखव, जऊन ला ओह अपन खुद के लहू ले बिसाय हवय।
ACT 20:29 मेंह जानत हंव कि मोर जाय के पाछू जंगली भेड़ियामन तुम्हर बीच म आहीं, अऊ ओमन झुंड ला नास करहीं।
ACT 20:30 अइसने समय आही, जब तुमन ले कुछू मनखेमन उठहीं अऊ भरमा के चेलामन ला अपन पाछू कर लीहीं।
ACT 20:31 एकरसेति सचेत रहव! अऊ सुरता करव कि मेंह तीन साल ले रात अऊ दिन आंसू बहा-बहाके तुमन ले हर एक ला चेताय बर कभू नइं छोंड़ंय।
ACT 20:32 “अब मेंह तुमन ला परमेसर के हांथ अऊ ओकर अनुग्रह के बचन म सऊंपत हवंव, जऊन ह बिसवास म तुम्हर उन्नति कर सकथे, अऊ अपन बर अलग करे गय जम्मो मनखेमन संग तुमन ला उत्तराधिकार दे सकथे।
ACT 20:33 मेंह काकरो चांदी या सोन या कपड़ा के लोभ नइं करे हवंव।
ACT 20:34 तुमन खुद जानथव कि मोर इही हांथमन मोर घटी अऊ मोर संगीमन के घटी ला पूरा करे हवंय।
ACT 20:35 मेंह जम्मो चीज म तुमन ला नमूना देखाय हवंव कि अइसने कठोर मेहनत करके हमन निरबल मनखेमन के मदद जरूर करन, अऊ परभू यीसू के कहे ये बचन ला सुरता करन: ‘लेना ले देना ह जादा धइन ए।’ ”
ACT 20:36 ये कहे बाद, पौलुस ह ओ जम्मो झन संग माड़ी टेकके पराथना करिस।
ACT 20:37 ओ जम्मो झन बहुंत रोईन अऊ पौलुस ला पोटारके ओला चूमे लगिन।
ACT 20:38 खास करके, ओमन पौलुस के कहे ये बात ले दुखी होईन कि तुमन मोर मुहूं ला फेर कभू नइं देखहू। तब ओमन ओला पानी जहाज तक छोंड़े बर आईन।
ACT 21:1 हमन ओमन ले अलग होय के बाद, पानी जहाज म चघके सीधा कोस दीप म आयेंन। ओकर दूसर दिन हमन रूदुस दीप गेंन अऊ फेर उहां ले पतरा नगर गेंन।
ACT 21:2 उहां हमन ला एक पानी जहाज पार करत मिलिस, जऊन ह फीनीके प्रदेस जावत रिहिस। हमन ओही जहाज म चघके चल देंन।
ACT 21:3 जब हमन ला साइप्रस दीप दिखिस, त हमन ओकर दक्खिन दिग ले होवत सीरिया कोति बढ़ेंन अऊ सूर म उतरेंन, जिहां पानी जहाज ले माल उतारे बर रिहिस।
ACT 21:4 उहां कुछू चेलामन ला पाके, हमन ओमन के संग सात दिन रहेंन। ओमन पबितर आतमा के सामर्थ म होके पौलुस ले बिनती करिन कि ओह यरूसलेम झन जावय।
ACT 21:5 पर जब उहां हमर ठहिरे के दिन पूरा होईस, त हमन उहां ले चल देंन। अऊ जम्मो चेला अऊ ओमन के घरवाली अऊ लइकामन हमन ला सहर के बाहिर तक अमराय बर आईन, अऊ उहां समुंदर तीर म, हमन माड़ी टेकके पराथना करेंन।
ACT 21:6 अऊ ओमन ले बिदा होय के बाद, हमन पानी जहाज म चघेंन अऊ ओमन अपन-अपन घर लहुंट गीन।
ACT 21:7 हमन सूर ले समुंदर म यातरा करत पतुलिमयिस पहुंचेंन; उहां हमन भाईमन ले जोहार-भेंट करेंन अऊ ओमन के संग एक दिन रहेंन।
ACT 21:8 दूसर दिन हमन उहां ले चलके कैसरिया सहर म पहुंचेंन अऊ उहां सुघर संदेस के परचारक फिलिप्पुस के घर म रूकेंन। ओह यरूसलेम म चुने गे सात सेवक म ले एक झन रिहिस।
ACT 21:9 ओकर चार कुंवारी बेटी रिहिन, जऊन मन ला अगमबानी करे के बरदान मिले रिहिस।
ACT 21:10 हमर उहां कतको दिन रहे के बाद, अगबुस नांव के एक अगमजानी यहूदिया प्रदेस ले आईस।
ACT 21:11 ओह हमर करा आके पौलुस के कमरपट्टा ला लीस अऊ अपन हांथ-गोड़ ला बांधके कहिस, “पबितर आतमा ह कहत हवय कि जऊन मनखे के ये कमरपट्टा अय, ओला यरूसलेम म यहूदीमन अइसने बांधहीं अऊ ओला आनजातमन ला सऊंप दीहीं।”
ACT 21:12 जब हमन ये बात ला सुनेंन, त हमन अऊ उहां के मनखेमन पौलुस ले बिनती करेंन कि ओह यरूसलेम झन जावय।
ACT 21:13 तब पौलुस ह जबाब दीस, “तुमन काबर रोवत अऊ मोर हिरदय ला टोरत हवव? मेंह तो परभू यीसू के नांव खातिर यरूसलेम म न सिरिप बंदी बने बर, पर मरे बर घलो तियार हवंव।”
ACT 21:14 जब हमन पौलुस ला मनाय नइं सकेंन, त कहेंन, “परभू के ईछा पूरा होवय।”
ACT 21:15 कुछू दिन के बाद, हमन तियार होके यरूसलेम सहर चल देंन।
ACT 21:16 कैसरिया के कुछू चेलामन घलो हमर संग गीन अऊ हमन ला मनासोन के घर ले गीन, जिहां हमन ला ठहरना रिहिस। मनासोन ह साइप्रस दीप के रहइया एक बहुंत पुराना चेला रिहिस।
ACT 21:17 जब हमन यरूसलेम हबरेंन, त भाईमन बड़े आनंद सहित हमर ले मिलिन।
ACT 21:18 दूसर दिन पौलुस ह हमर संग याकूब ले मिले बर गीस, जिहां जम्मो अगुवामन जूरे रहंय।
ACT 21:19 पौलुस ह ओमन ला जोहार करिस अऊ परमेसर ह ओकर सेवा के दुवारा जऊन कुछू काम आनजातमन के बीच म करे रिहिस, ओह एक-एक करके ओमन ला बताईस।
ACT 21:20 जब ओमन ये सुनिन, त परमेसर के महिमा करिन। पर ओमन पौलुस ला कहिन, “तेंह देखत हवस, भाई! हजारों यहूदीमन बिसवास करे हवंय अऊ ओ जम्मो झन मूसा के कानून ला माने के धुन म हवंय।
ACT 21:21 ओमन ला तोर बारे म, ये बताय गे हवय कि तेंह आनजातमन के बीच म रहइया जम्मो यहूदीमन ला मूसा के कानून ला नइं माने के सिकछा देथस। तेंह कहिथस कि अपन लड़कामन के खतना झन करावव या यहूदी रीति-रिवाज के मुताबिक झन चलव।
ACT 21:22 ओमन ला जरूर पता चल जाही कि तेंह इहां आय हवस। अब हमन का करन?
ACT 21:23 एकरसेति जऊन कुछू हमन तोला कहत हवन, वइसनेच कर। हमर संग चार झन मनखे हवंय, जऊन मन एक मन्नत माने हवंय।
ACT 21:24 ये मनखेमन ला ले जा अऊ ओमन के संग अपन ला घलो सुध कर अऊ ओमन के खरचा दे, ताकि ओमन अपन मुड़ मुड़वावंय। तब जम्मो झन जान जाहीं कि जऊन बात तोर बारे म बताय गे हवय, ओह सच नो हय, अऊ तेंह खुद मूसा के कानून के पालन करथस।
ACT 21:25 आनजात बिसवासीमन बर हमन ये फैसला करके लिख भेजे हवन कि ओमन मूरती ला चघाय खाना ले, लहू ले, गला घोंटके मारे पसु के मांस ले अऊ छिनारी काम ले दूरिहा रहंय।”
ACT 21:26 दूसर दिन पौलुस ह ओ मनखेमन ला लीस अऊ ओमन के संग अपनआप ला घलो सुध करिस। तब ओह मंदिर म गीस अऊ उहां बताईस कि सुध होय के दिन ह कब पूरा होही अऊ ओमन म के हर एक के खातिर दान चघाय जाही।
ACT 21:27 जब सात दिन पूरा होवइया रिहिस, तब एसिया प्रदेस के कुछू यहूदीमन पौलुस ला मंदिर म देखिन। ओमन जम्मो मनखेमन ला भड़काके पौलुस ला पकड़ लीन,
ACT 21:28 अऊ चिचियाके ये कहे लगिन, “हे संगी इसरायलीमन हो, हमर मदद करव। येह ओही मनखे ए, जऊन ह हर जगह जम्मो मनखेमन ला हमर यहूदी जात, हमर कानून अऊ ये मंदिर के बिरोध म सिखोथे। इहां तक कि ओह यूनानीमन ला मंदिर के भीतर लानके, ये पबितर स्थान ला असुध कर दे हवय।”
ACT 21:29 (ओमन एकर पहिली इफिसी त्रुफिमुस ला पौलुस के संग सहर म देखे रिहिन। एकरसेति ओमन ये समझिन कि पौलुस ह ओला मंदिर म लाने हवय।)
ACT 21:30 तब जम्मो सहर म खलबली मच गीस। मनखेमन जम्मो कोति ले दऊड़के आईन अऊ पौलुस ला पकड़ लीन, अऊ ओला घसीटत मंदिर के बाहिर ले गीन अऊ तुरते कपाटमन ला बंद कर दीन।
ACT 21:31 जब ओमन ओला मार डारे के कोसिस करत रिहिन, तभे रोमी सेनापति ला ये संदेस मिलिस कि जम्मो यरूसलेम सहर म खलबली मच गे हवय।
ACT 21:32 तब ओह तुरते कुछू अधिकारी अऊ सैनिकमन ला लीस अऊ दऊड़के भीड़ करा खाल्हे आईस। जब मनखेमन सेनापति अऊ ओकर सैनिकमन ला देखिन, त ओमन पौलुस ला मारे-पीटे ला छोंड़ दीन।
ACT 21:33 तब सेनापति ह लकठा म आके पौलुस ला बंदी बना लीस अऊ ओला दू ठन संकली म बांधे के हुकूम दीस अऊ ये पुछिस, “येह कोन ए अऊ येह का करे हवय?”
ACT 21:34 भीड़ म कोनो मन एक बात बर, त कोनो मन कुछू आने बात बर चिचियावन लगिन, अऊ जब हो-हल्ला के मारे सेनापति ह सच बात ला नइं जान सकिस, त ओह पौलुस ला गढ़ म ले जाय के हुकूम दीस।
ACT 21:35 जब पौलुस ह सीढ़ीमन करा हबरिस, त भीड़ के उपदरव के कारन सैनिकमन ओला उठाके ले गीन।
ACT 21:36 भीड़ के जऊन मनखेमन ओकर पाछू-पाछू आवत रिहिन, ओमन चिचिया-चिचियाके ये कहत रहंय, “येला मार डारव।”
ACT 21:37 जब सैनिकमन पौलुस ला गढ़ म ले जवइया रिहिन, त ओह सेनापति ले पुछिस, “का मोला कुछू कहे बर हुकूम मिलही?” सेनापति ह कहिस, “का तेंह यूनानी भासा जानथस?
ACT 21:38 का तेंह मिसर के रहइया ओ मनखे नो हस, जऊन ह कुछू समय पहिली बिदरोह करके चार हजार उग्रवादीमन ला निरजन प्रदेस म ले गे रिहिस?”
ACT 21:39 पौलुस ह कहिस, “मेंह एक यहूदी अंव अऊ किलिकिया के नामी सहर तरसुस के निवासी अंव। मेंह तोर ले बिनती करत हंव कि मोला मनखेमन ले बात करन दे।”
ACT 21:40 सेनापति ले हुकूम पाके, पौलुस ह सीढ़ी के ऊपर ठाढ़ होईस अऊ भीड़ ला अपन हांथ ले इसारा करिस। जब ओमन सांत हो गीन, त पौलुस ह ओमन ला इबरानी म कहे लगिस।
ACT 22:1 “हे भाई अऊ ददामन हो, अब तुमन मोर जबाब ला सुनव।”
ACT 22:2 जब ओमन ओला इबरानी म गोठियावत सुनिन, त ओमन चुप हो गीन। तब पौलुस ह कहिस,
ACT 22:3 “मेंह एक यहूदी अंव अऊ किलिकिया के तरसुस म पईदा होएंव, पर ये सहर म पले-बढ़े हवंव। गमलीएल के अधीन म रहिके हमर पुरखामन के कानून ला सही ढंग ले सीखेंव, अऊ परमेसर के अइसने धुन म रहेंव, जइसने आज तुमन हवव।
ACT 22:4 मेंह मरद अऊ माईलोगनमन ला बंदी बना-बनाके जेल म डारेंव, अऊ ये पंथ के बिसवासीमन ला इहां तक सताएंव कि ओमन ला मरवा घलो डारेंव।
ACT 22:5 मोर ये बात के, महा पुरोहित अऊ जम्मो महासभा गवाह हवय। अऊ त अऊ ओमन ले चिट्ठी लेके, मेंह दमिस्क म रहइया यहूदी भाईमन करा जावत रहेंव ताकि मेंह उहां ये मनखेमन ला सजा देवाय बर बंदी बनाके यरूसलेम म लानंव।
ACT 22:6 “लगभग मंझन के बेरा, जब मेंह दमिस्क के लकठा हबरेंव, त अचानक एक बड़े अंजोर अकास ले मोर चारों खूंट चमकिस।
ACT 22:7 मेंह भुइयां म गिर पड़ेंव अऊ मोर ले ये कहत एक अवाज सुनेंव, ‘हे साऊल! हे साऊल! तेंह मोला काबर सतावत हस?’
ACT 22:8 “मेंह पुछेंव, ‘हे परभू! तेंह कोन अस?’ “ओह कहिस, ‘मेंह नासरत के यीसू अंव, जऊन ला तेंह सतावत हस।’
ACT 22:9 मोर संगीमन ओ अंजोर ला तो देखिन, पर जऊन ह मोर ले गोठियावत रहय, ओकर बात ला नइं समझिन।
ACT 22:10 “मेंह कहेंव, ‘हे परभू! मेंह का करंव?’ “त परभू ह कहिस, ‘उठ अऊ दमिस्क सहर म जा अऊ जऊन कुछू तोला करे बर हवय, उहां ओ जम्मो बात तोला बताय जाही।’
ACT 22:11 मोर संगीमन मोर हांथ ला धरके दमिस्क सहर ले गीन। काबरकि अंजोर के चमक के मारे मेंह अंधरा हो गे रहेंव।
ACT 22:12 “उहां हनन्याह नांव के एक मनखे मोर करा आईस। ओह मूसा के कानून के मुताबिक एक बने भक्त रिहिस अऊ उहां रहइया यहूदीमन ओकर बहुंत आदर करंय।
ACT 22:13 ओह मोर बाजू म ठाढ़ होके कहिस, ‘हे भाई साऊल! तेंह फेर देखे लग।’ अऊ ओहीच बेरा मेंह देखे लगेंव अऊ मेंह ओला देखेंव।
ACT 22:14 “तब हनन्याह ह कहिस, ‘हमर पुरखामन के परमेसर ह तोला चुने हवय कि तेंह ओकर ईछा ला जान अऊ ओ धरमी जन ला देख अऊ ओकर मुहूं के बात ला सुन।
ACT 22:15 तेंह जम्मो मनखेमन के आघू म, ओकर ओ बातमन के गवाह होबे, जऊन ला तेंह देखे अऊ सुने हवस।
ACT 22:16 अब तेंह काबर देरी करथस? उठ! बतिसमा ले अऊ ओकर नांव लेके अपन पापमन ला धो डार।’
ACT 22:17 “एकर बाद, मेंह यरूसलेम लहुंटंय अऊ जब मंदिर म पराथना करत रहेंव, त मेंह एक दरसन देखेंव।
ACT 22:18 मेंह परभू ला देखेंव अऊ ओह मोला कहिस, ‘जल्दी कर अऊ यरूसलेम ले तुरते निकल जा, काबरकि ओमन मोर बारे म तोर गवाही ला नइं मानंय।’
ACT 22:19 “मेंह कहेंव, ‘हे परभू! ओमन तो खुद जानत हवंय कि मेंह सभा-घरमन म जा-जाके तोर ऊपर बिसवास करइयामन ला जेल म डारत अऊ मारत रहेंव।
ACT 22:20 जब तोर गवाह स्तिफनुस के लहू बहाय जावत रिहिस, त मेंह घलो उहां ठाढ़े रहेंव अऊ ओ बात म राजी रहेंव अऊ मेंह उहां हतियारामन के कपड़ा के रखवारी करत रहेंव।’
ACT 22:21 “तब परभू ह मोला कहिस, ‘जा! मेंह तोला आनजातमन करा बहुंत दूरिहा-दूरिहा पठोहूं।’ ”
ACT 22:22 मनखेमन अब तक पौलुस के बात ला सुनत रिहिन। तब ओमन उठके चिचियाके कहिन, “धरती ले एकर नामोनिसान मिटा देवव। ओह जीयत रहे के लईक नो हय।”
ACT 22:23 जब ओमन चिचियावत अऊ अपन-अपन कपड़ा फेंकत अऊ हवा म धुर्रा उड़ावत रहंय,
ACT 22:24 तब सेनापति ह हुकूम दीस, “येला, गढ़ म ले जावव अऊ येला कोर्रा मारके पुछव कि मनखेमन काबर एकर बिरोध म अइसने चिचियावत हवंय।”
ACT 22:25 जब ओमन पौलुस ला कोर्रा मारे बर बांधे लगिन, त ओह उहां ठाढ़े अधिकारी ले कहिस, “का ये उचित ए कि तुमन एक रोमी नागरिक ला कोर्रा म मारव अऊ ओ भी ओला बिगर दोसी ठहिराय?”
ACT 22:26 जब अधिकारी ह ये सुनिस, त ओह सेनापति करा जाके कहिस, “तेंह ये का करथस? ये मनखे ह तो रोमी नागरिक ए।”
ACT 22:27 तब सेनापति ह पौलुस करा आईस अऊ ओकर ले पुछिस, “मोला बता, का तेंह रोमी नागरिक अस?” पौलुस ह कहिस, “हव जी।”
ACT 22:28 सेनापति ह कहिस, “मेंह अपन रोमी नागरिक के पद ला बहुंत पईसा देके पाय हवंव।” त पौलुस ह कहिस, “मेंह तो जनम ले रोमी नागरिक अंव।”
ACT 22:29 तब जऊन मन पौलुस के जांच करइया रिहिन, ओमन तुरते उहां ले हट गीन। सेनापति खुद ये सोचके डरा गीस कि पौलुस ह रोमी नागरिक ए अऊ ओह ओला संकली म बंधवाय हवय।
ACT 22:30 ओकर आने दिन, सही-सही बात ला जाने बर कि यहूदीमन पौलुस ऊपर काबर दोस लगावत हवंय, सेनापति ह ओकर संकली ला खुलवा दीस अऊ मुखिया पुरोहितमन ला अऊ जम्मो धरम महासभा के मनखेमन ला जूरे के हुकूम दीस। तब ओह पौलुस ला लानके ओमन के आघू म ठाढ़ करिस।
ACT 23:1 पौलुस ह धरम महासभा कोति एकटक देखिस अऊ कहिस, “हे मोर भाईमन हो! मेंह आज तक परमेसर खातिर सही बिबेक से काम करे हवंव।”
ACT 23:2 अतकी म महा पुरोहित हनन्याह ह ओमन ला, जऊन मन पौलुस के लकठा म ठाढ़े रहंय, ओकर मुहूं म मारे के हुकूम दीस।
ACT 23:3 तब पौलुस ह ओला कहिस, “हे चूना पोताय भीथी! परमेसर ह तोला मारही। तेंह इहां कानून के मुताबिक मोर नियाय करे बर बईठे हवस, पर कानून के उल्टा मोला मारे के हुकूम देवत हस।”
ACT 23:4 पौलुस के लकठा म ठाढ़े मनखेमन ओला कहिन, “तेंह परमेसर के महा पुरोहित के बेजत्ती करत हस।”
ACT 23:5 पौलुस ह कहिस, “हे भाईमन हो! मेंह नइं जानत रहेंव कि येह महा पुरोहित ए, काबरकि परमेसर के बचन ह कहिथे, ‘अपन मनखेमन के हाकिम के बारे म खराप बात झन कह।’”
ACT 23:6 तब पौलुस ह ये जानके कि इहां कुछू सदूकी अऊ फरीसीमन घलो हवंय, ओह महासभा म चिचियाके कहिस, “हे मोर भाईमन! मेंह एक फरीसी अंव अऊ एक फरीसी के बेटा अंव। मरे मनखेमन के जी उठे के मोर आसा के बारे म मोर ऊपर मुकदमा चलत हवय।”
ACT 23:7 जब पौलुस ह ये बात कहिस, त फरीसी अऊ सदूकीमन म झगरा होय लगिस अऊ सभा म फूट पड़ गे।
ACT 23:8 (काबरकि सदूकीमन बिसवास करथें कि मरे मनखेमन नइं जी उठंय अऊ न स्वरगदूत हवय, न आतमा; पर फरीसीमन ये जम्मो बात म बिसवास करथें।)
ACT 23:9 तब अब्बड़ हो-हल्ला होईस अऊ फरीसी दल के कानून के कुछू गुरूमन ठाढ़ होके जोरदार बहस करन लगिन अऊ कहिन, “हमन ये मनखे म कोनो खराप बात नइं पावत हवन। कहूं कोनो आतमा या स्वरगदूत येला कुछू कहे हवय, त का होईस?”
ACT 23:10 जब बहुंत झगरा होय लगिस, त सेनापति ह डरा गे कि कहूं ओमन पौलुस के कुटा-कुटा झन कर डारंय। एकरसेति, ओह सैनिकमन ला हुकूम दीस कि ओमन उतरके पौलुस ला मनखेमन के बीच ले निकाल लें अऊ ओला गढ़ म ले जावंय।
ACT 23:11 ओ रथिया परभू ह पौलुस के लकठा म ठाढ़ होके कहिस, “हिम्मत रख। जइसने तेंह यरूसलेम म मोर गवाही दे हवस, वइसने तोला रोम म घलो मोर गवाही दे बर पड़ही।”
ACT 23:12 ओकर दूसर दिन, बिहनियां, यहूदीमन एक सडयंत्र करिन अऊ ये कसम खाईन कि जब तक हमन पौलुस ला नइं मार डारबो, तब तक हमन न तो कुछू खाबो, न पीबो।
ACT 23:13 चालीस ले जादा मनखे ये सडयंत्र म सामिल रिहिन।
ACT 23:14 ओमन मुखिया पुरोहित अऊ अगुवामन करा गीन अऊ कहिन, “हमन कसम खाय हवन कि जब तक हमन पौलुस ला नइं मार डारन, तब तक हमन कुछू नइं खावन।
ACT 23:15 अब तुमन अऊ धरम महासभा के सदस्यमन सेनापति ला समझावव कि ओह पौलुस ला तुम्हर आघू म लानय, ये ढोंग करव कि तुमन ओकर बारे म अऊ सही-सही बात जाने चाहत हव। पर ओकर इहां आय के पहिली हमन ओला मार डारे बर तियार हवन।”
ACT 23:16 पर जब पौलुस के भांचा ह ये सडयंत्र के बारे सुनिस, त ओह गढ़ म जाके पौलुस ला बताईस।
ACT 23:17 तब पौलुस ह एक अधिकारी ला बलाके कहिस, “ये जवान ला सेनापति करा ले जावव। येह ओला कुछू बताय चाहत हवय।”
ACT 23:18 ओ अधिकारी ह पौलुस के भांचा ला सेनापति करा ले जाके कहिस, “ओ कैदी पौलुस ह मोला बलाके कहिस कि ये जवान ला तोर करा ले आवंव। येह तोला कुछू बताय चाहत हवय।”
ACT 23:19 सेनापति ह जवान के हांथ ला धरके अलग ले गीस अऊ ओकर ले पुछिस, “तेंह मोला का बताय चाहत हस?”
ACT 23:20 ओह कहिस: “कुछू यहूदीमन एका करे हवंय कि ओमन तोर ले बिनती करहीं कि कल पौलुस ला धरम महासभा म लाने जावय, मानो धरम महासभा ह ओकर बारे म अऊ सही-सही बात जाने चाहत हवय।
ACT 23:21 पर तेंह ओमन के बात ला झन मानबे, काबरकि ओमा ले चालीस ले जादा मनखेमन पौलुस के घात म हवंय। ओमन ये कसम खाय हवंय कि जब तक ओमन पौलुस ला नइं मार डारहीं, तब तक ओमन न तो खाहीं अऊ न पीहीं। ओमन अभी तियार हवंय अऊ तोर हुकूम के बाट जोहत हवंय।”
ACT 23:22 तब सेनापति ह पौलुस के भांचा ला बिदा करिस, पर ओला चेताके कहिस, “कोनो ला झन कहिबे कि तेंह मोला ये बात बताय हवस।”
ACT 23:23 तब सेनापति अपन दू झन अधिकारीमन ला बलाके हुकूम दीस, “दू सौ सैनिक, सत्तर घुड़सवार अऊ दू सौ बरछीधारी मनखेमन ला आज रथिया लगभग नौ बजे कैसरिया जाय बर तियार रखव।
ACT 23:24 पौलुस के सवारी बर घोड़ा रखव कि ओला राजपाल फेलिक्स करा सही-सलामत पहुंचा दिये जावय।”
ACT 23:25 ओह ये चिट्ठी घलो लिखिस:
ACT 23:26 महा परतापी, राजपाल फेलिक्स ला क्लौदियुस लुसियास के जोहार।
ACT 23:27 ये मनखे ला यहूदीमन धरके के मार डारे चाहत रिहिन। पर जब मोला पता चलिस कि येह रोमी नागरिक ए, त मेंह सेना ले जाके येला छुड़ाके ले आएंव।
ACT 23:28 मेंह ये जाने बर चाहत रहेंव कि ओमन एकर ऊपर काबर दोस लगावत रिहिन। एकरसेति येला ओमन के धरम महासभा म ले गेंव।
ACT 23:29 तब मोला पता चलिस कि ओमन अपन कानून के बारे म कतको ठन सवाल ला लेके ओकर ऊपर दोस लगावत हवंय। पर मार डारे जावय या जेल म डारे जावय लईक ओमा कोनो दोस नइं ए।
ACT 23:30 जब मोला ये बताय गीस कि कुछू यहूदीमन ओकर बिरोध म एक सडयंत्र रचे हवंय, त मेंह तुरते ओला तोर करा पठो देंव। मेंह ओकर ऊपर दोस लगइयामन ला घलो हुकूम दे हवंव कि ओमन तोर आघू म एकर ऊपर नालिस करंय।
ACT 23:31 सैनिकमन ला जइसने हुकूम दिये गे रिहिस, ओमन वइसने करिन। ओमन पौलुस ला रातों-रात अंतिपतरिस सहर ले आईन।
ACT 23:32 ओकर आने दिन, ओमन घुड़सवारमन ला पौलुस के संग जाय बर छोंड़के, खुद गढ़ म लहुंट गीन।
ACT 23:33 घुड़सवारमन कैसरिया पहुंचके राजपाल फेलिक्स ला चिट्ठी दीन अऊ पौलुस ला घलो ओला सऊंप दीन।
ACT 23:34 राजपाल ह चिट्ठी ला पढ़के पुछिस, “ओह कोन प्रदेस के अय?” जब ओह जानिस कि पौलुस ह किलिकिया के अय,
ACT 23:35 त राजपाल ह ओला कहिस, “जब तोर ऊपर दोस लगइयामन इहां आहीं, तब मेंह तोर मामला ला सुनहूं।” तब ओह हुकूम दीस कि पौलुस ला हेरोदेस के महल म पहरा म रखे जावय।
ACT 24:1 पांच दिन के बाद महा पुरोहित हनन्याह ह कुछू अगुवा अऊ तिरतुल्लुस नांव के एक वकील ला लेके कैसरिया आईस। ओमन राजपाल फेलिक्स के आघू म, पौलुस के बिरोध म दोस लगाईन।
ACT 24:2 जब पौलुस ला बलाय गीस, तब वकील तिरतुल्लुस ह फेलिक्स के आघू म दोस लगाके कहिस: “तोर सासन म हमन ला अब्बड़ सांति मिले हवय, अऊ तोर कुसल परबंध के कारन ये देस म कतको सुधार के काम होय हवय।
ACT 24:3 हे महा परतापी फेलिक्स! ये बात ला हमन हर जगह अऊ हर किसम ले धनबाद के संग सुवागत करत हवन।
ACT 24:4 मेंह तोर अऊ समय नइं लेय चाहत हवंव, पर मेंह तोर ले बिनती करत हंव कि दया करके हमर दू-एक बातमन ला सुन ले।
ACT 24:5 “हमन ये मनखे ला उपदरव करइया अऊ संसार के जम्मो यहूदीमन म बलवा करइया पाय हवन। येह नासरीमन के दल के मुखिया ए।
ACT 24:6 अऊ त अऊ येह मंदिर ला असुध करे के कोसिस करे हवय, एकरसेति हमन येला बंदी बना लेंन।
ACT 24:7 हमन अपन कानून के मुताबिक एकर नियाय करे चाहत रहेंन, पर सेनापति लुसियास ह आके येला जबरन हमर करा ले लेय गीस अऊ एकर ऊपर दोस लगइयामन ला तोर करा पठोय हवय।
ACT 24:8 ये जम्मो बात ला, जेकर बारे म हमन एकर ऊपर दोस लगावत हन, तेंह खुद एकर जांच करके सच ला जान लेबे।”
ACT 24:9 आने यहूदीमन घलो वकील के संग सहमत होके कहिन कि ये जम्मो बात सही ए।
ACT 24:10 जब राजपाल ह पौलुस ला बोले बर इसारा करिस, त पौलुस ह जबाब दीस: “मेंह जानत हंव कि तेंह बहुंत साल ले ये देस के नियायधीस अस; एकरसेति, खुसी से मेंह अपन सफई देवत हंव।
ACT 24:11 तेंह आसानी से जान सकत हस कि बारह दिन ले जादा नइं होवत हवय, जब मेंह यरूसलेम ला अराधना करे बर गेंव।
ACT 24:12 यहूदीमन मोला न तो मंदिर म, न ओमन के सभा-घर म, न सहर म काकरो संग बिवाद करत या भीड़ लगावत पाईन।
ACT 24:13 अब ओमन जऊन बात के दोस मोर ऊपर लगावत हवंय, ओला तोर आघू म सच साबित नइं कर सकंय।
ACT 24:14 तभो ले मेंह मान लेवत हंव कि जऊन पंथ ला, ओमन कुपंथ कहत हवंय, ओकरे मुताबिक मेंह हमर पुरखामन के परमेसर के अराधना करथंव। जऊन बातमन कानून ले मेल खाथें अऊ अगमजानीमन के किताब म लिखे हवंय, ओ जम्मो बात ऊपर मेंह बिसवास करथंव,
ACT 24:15 अऊ मोर घलो ओमन सहीं परमेसर म आसा हवय कि धरमी अऊ अधरमी दूनों मरे के बाद फेर जी उठहीं।
ACT 24:16 एकरसेति मेंह हमेसा ये कोसिस करथंव कि परमेसर अऊ मनखेमन के आघू म मोर बिबेक ह साफ रहय।
ACT 24:17 “बहुंत साल के बाद, मेंह गरीबमन बर अपन मनखेमन के दान पहुंचाय अऊ मंदिर म भेंट चघाय बर यरूसलेम आय रहेंव।
ACT 24:18 जब यहूदीमन मंदिर म मोला ये करत पाईन, त रीति-बिधि के मुताबिक मेंह सुध रहेंव। मोर संग कोनो भीड़ नइं रिहिस अऊ मेंह कोनो दंगा नइं करत रहेंव।
ACT 24:19 पर एसिया प्रदेस के कुछू यहूदीमन रिहिन; यदि ओमन ला मोर बिरोध म कुछू कहना रिहिस, त इहां तोर आघू म आके ओमन ला मोर ऊपर दोस लगाना चाही।
ACT 24:20 या आज जऊन मन इहां हाजिर हवंय, ओमन खुद बतावंय कि जब मेंह धरम महासभा के आघू म ठाढ़े रहेंव, त ओमन मोर म का दोस पाईन?
ACT 24:21 एके ठन बात के छोंड़, जऊन ला मेंह ओमन के बीच म ठाढ़ होके चिचियाके कहे रहेंव कि मरे मनखेमन के जी उठे के बारे म, आज मोर तुम्हर आघू म मुकदमा चलत हवय।”
ACT 24:22 राजपाल फेलिक्स ह ये पंथ के बात ला ठीक-ठीक जानत रहय। ओह ओ मुकदमा ला टालके कहिस, “जब सेनापति लुसियास ह आही, त तुम्हर मामला के फैसला करहूं।”
ACT 24:23 ओह सेना के अधिकारी ला हुकूम दीस कि पौलुस ला हवालात म रखे जावय, पर ओला कुछू सुतंतरता दिये जावय अऊ ओकर संगीमन ला ओकर जरूरत के चीजमन के पूरती करे के अनुमति दिये जावय।
ACT 24:24 कुछू दिन के बाद, फेलिक्स ह अपन घरवाली दुरसिल्ला के संग आईस। दुरसिल्ला ह एक यहूदी रिहिस। फेलिक्स ह पौलुस ला बलाईस अऊ ओकर ले ओ बिसवास के बारे म सुनिस, जऊन ह मसीह यीसू म हवय।
ACT 24:25 पर जब पौलुस ह धरमीपन, संयम अऊ अवइया नियाय के बारे म चरचा करिस, त फेलिक्स ह डरा गीस अऊ कहिस, “अब तेंह जा। जब मऊका मिलही, त मेंह तोला फेर बलाहूं।”
ACT 24:26 फेलिक्स ला पौलुस ले घूस म कुछू रूपिया मिले के आसा घलो रहय, एकरसेति, ओह पौलुस ला घेरी-बेरी बलाय अऊ ओकर ले बात करय।
ACT 24:27 जब दू साल बीत गे, त फेलिक्स के जगह म पुरकियुस फेसतुस राजपाल बनिस। पर फेलिक्स ह यहूदीमन ला खुस करे चाहत रहय, ओकर सेति ओह पौलुस ला जेल म ही बंदी के रूप म छोंड़ गीस।
ACT 25:1 ओ प्रदेस म आय के तीन दिन के बाद, फेसतुस ह कैसरिया ले यरूसलेम सहर गीस?
ACT 25:2 जिहां मुखिया पुरोहितमन अऊ यहूदीमन के अगुवामन ओकर आघू म पौलुस के बिरोध म नालिस करिन।
ACT 25:3 ओमन फेसतुस ले बिनती करके, ये किरपा करे बर कहिन कि ओह पौलुस ला यरूसलेम सहर लाने के परबंध करवाय, काबरकि ओमन रसता म ही ओला मार डारे के उपाय करे रिहिन।
ACT 25:4 तब फेसतुस ह जबाब दीस, “पौलुस ला कैसरिया म एक कैदी के रूप म रखे गे हवय, अऊ मेंह खुद उहां जल्दी जवइया हंव।
ACT 25:5 तुम्हर कुछू अगुवामन मोर संग चलंय अऊ कहूं ओ मनखे ह कुछू गलत काम करे हवय, त ओकर ऊपर उहां दोस लगावंय।”
ACT 25:6 आठ-दस दिन ओमन के संग रहे के बाद, फेसतुस ह कैसरिया गीस। दूसर दिन ओह नियाय आसन म बईठिस अऊ पौलुस ला लाने के हुकूम दीस।
ACT 25:7 जब पौलुस ह आईस, त ओ यहूदी जऊन मन यरूसलेम ले आय रिहिन, ओमन ओकर आसपास ठाढ़ हो गीन अऊ ओकर ऊपर कतको किसम के दोस लगाईन, पर ओकर सबूत ओमन नइं दे सकिन।
ACT 25:8 तब पौलुस ह जबाब देके कहिस, “मेंह न तो यहूदीमन के कानून के अऊ न मंदिर के, अऊ न रोम के महाराजा के बिरोध म कुछू गलत काम करे हवंव।”
ACT 25:9 यहूदीमन ला खुस करे के बिचार ले, फेसतुस ह पौलुस ला कहिस, “का तोर यरूसलेम जाय के ईछा हवय कि उहां मोर आघू म, तोर ये मामला निपटाय जावय।”
ACT 25:10 पौलुस ह कहिस, “मेंह महाराजा के नियाय आसन के आघू म ठाढ़े हवंव। मोर मुकदमा के फैसला इहां होना चाही। मेंह यहूदीमन के बिरोध म कोनो गलत काम नइं करे हवंव, जऊन ला तेंह खुद जानथस।
ACT 25:11 तभो ले, कहूं मेंह दोसी अंव अऊ मार डारे जाय के लईक कुछू काम करे हवंव, त मेंह मरे बर नइं डर्रावंव, पर जऊन बातमन के येमन मोर ऊपर दोस लगावत हंय, यदि ओ बातमन सच नो हंय, त काकरो करा ये अधिकार नइं ए कि ओह मोला येमन के हांथ म सऊंप देवय। मेंह महाराजा करा अपील करत हंव।”
ACT 25:12 तब फेसतुस ह अपन सलाहकारमन के संग बिचार करे के बाद, पौलुस ला जबाब दीस, “तेंह महाराजा करा अपील करे हवस, त तेंह महाराजा करा जाबे।”
ACT 25:13 कुछू दिन के बाद, राजा अगरिप्पा अऊ बिरनीके, कैसरिया म आईन अऊ फेसतुस ले भेंट करिन।
ACT 25:14 जब ओमन ला उहां रहे बहुंत दिन हो गे, तब फेसतुस ह पौलुस के बारे म राजा अगरिप्पा ला बताईस, इहां एक मनखे हवय, जऊन ला फेलिक्स ह कैदी छोंड़ गे हवय।
ACT 25:15 जब मेंह यरूसलेम गेंव, त मुखिया पुरोहितमन अऊ यहूदीमन के अगुवामन ओकर ऊपर दोस लगाईन अऊ मांग करिन कि ओला दंड दिये जावय।
ACT 25:16 “मेंह ओमन ला कहेंव कि येह रोमीमन के रिवाज नो हय कि कोनो मनखे ला दंड के खातिर सऊंप दिये जावय, जब तक कि ओला पहिली अपन ऊपर दोस लगइयामन के आघू म ठाढ़ होके अपन ऊपर लगे दोस के बारे म बयान देय के मऊका नइं मिल जावय।
ACT 25:17 जब ओमन इहां मोर संग आईन, तब मेंह बिगर देरी करे, ओकर आने दिन नियाय आसन म बईठें अऊ ओ मनखे ला लाने के हुकूम देंय।
ACT 25:18 जब ओकर ऊपर दोस लगइयामन बोले बर ठाढ़ होईन, त ओमन अइसने कोनो दोस नइं लगाईन, जइसने कि मेंह समझत रहेंव।
ACT 25:19 ओमन अपन धरम के बारे अऊ यीसू नांव के कोनो मनखे के बारे म बहस करत रिहिन, जऊन ह मर गे रिहिस, पर पौलुस ओला जीयत बतावत रिहिस।
ACT 25:20 मेंह उलझन म रहेंव कि ये बातमन के कइसने पता लगावंव, एकरसेति मेंह पौलुस ले पुछेंव, का तेंह यरूसलेम जाय के ईछा करथस कि उहां ये बातमन के फैसला हो सकय।
ACT 25:21 पर पौलुस ह अपन मुकदमा के फैसला महाराजा के इहां करे के अपील करिस। एकरसेति, मेंह हुकूम देवंय कि जब तक मेंह ओला महाराजा करा नइं पठोवंव, तब तक ओला पहरा म रखे जावय।”
ACT 25:22 राजा अगरिप्पा ह फेसतुस ला कहिस, “मेंह खुद ये मनखे के बात ला सुने चाहत हंव।” फेसतुस ह कहिस, “तेंह कल ओकर बात ला सुन सकथस।”
ACT 25:23 दूसर दिन अगरिप्पा अऊ बिरनीके बड़े ठाट-बाट के संग दरबार म आईन। ओमन के संग बड़े अधिकारी अऊ सहर के बड़े-बड़े मनखेमन रहंय। फेसतुस ह पौलुस ला लाने के हुकूम दीस।
ACT 25:24 फेसतुस ह कहिस, “हे राजा अगरिप्पा अऊ इहां हाजिर जम्मो मनखेमन! तुमन ये मनखे ला देखत हव, जेकर बारे म जम्मो यहूदीमन यरूसलेम म अऊ इहां कैसरिया म घलो चिचिया-चिचियाके मोर करा नालिस करे हवंय कि एकर अऊ जीयत रहई ठीक नो हय।
ACT 25:25 पर मेंह पता लगाके ये पायेंव कि येह अइसने कुछू नइं करे हवय कि येला मार डारे जावय। पर येह महाराजा करा अपील करे हवय, एकरसेति मेंह येला रोम पठोय के फैसला करेंव।
ACT 25:26 पर एकर बारे म मेंह महाराजा ला का लिखंव? मोला अइसने कोनो बात नइं सुझिस। एकरसेति मेंह येला तुम्हर जम्मो के आघू म अऊ बिसेस करके, हे राजा अगरिप्पा, तोर आघू म लाने हवंव ताकि येला जांचे के बाद, मोला लिखे बर कुछू मिलय।
ACT 25:27 काबरकि कैदी ला अइसने पठोना अऊ ओकर खिलाप लगे दोस ला नइं लिखना, मोला नियाय-संगत नइं लगत हे।”
ACT 26:1 राजा अगरिप्पा ह पौलुस ला कहिस, “तोला अपन बारे म बोले के अनुमति हवय।” तब पौलुस ह अपन हांथ ले इसारा करिस अऊ अपन बचाव म ये किसम ले जबाब दीस,
ACT 26:2 “हे राजा अगरिप्पा! यहूदीमन जऊन बात के मोर ऊपर दोस लगावथें, आज तोर आघू म ओकर जबाब देय म, मेंह अपनआप ला भाग्यवान समझत हंव।
ACT 26:3 अऊ बिसेस करके एकरसेति कि तेंह यहूदीमन के जम्मो रीति-रिवाज अऊ बिवादमन ला बने करके जानथस। मेंह तोर ले बिनती करत हंव कि धीरज धरके मोर बात ला सुन।
ACT 26:4 “मेंह लइकापन ले, अपन जिनगी के सुरूआत ले अब तक कइसने अपन देस म अऊ यरूसलेम म जीये हवंव, यहूदीमन ओ जम्मो ला जानत हवंय।
ACT 26:5 ओमन बहुंत समय ले मोला जानत हवंय, अऊ कहूं चाहंय, त ओमन गवाही घलो दे सकत हें कि मेंह एक फरीसी के रूप म हमर धरम के सबले कठोर पंथ के मुताबिक जिनगी बिताय हवंव।
ACT 26:6 अऊ अब येह मोर ओ आसा के कारन जेकर वायदा परमेसर ह हमर पुरखामन ले करे रिहिस, मोर ऊपर मुकदमा चलत हवय।
ACT 26:7 ओहीच वायदा के पूरा होय के आसा म, हमर बारह गोत्र के मनखेमन अपन जम्मो हिरदय ले दिन अऊ रात परमेसर के सेवा करत आय हवंय। हे राजा! इही आसा के कारन, यहूदीमन मोर ऊपर दोस लगावत हवंय।
ACT 26:8 तुमन येला काबर अबिसवास के बात समझत हव कि परमेसर ह मरे मनखे ला जियाथे?
ACT 26:9 “मेंह घलो ये समझत रहेंव कि यीसू नासरी के नांव के बिरोध म, जऊन कुछू हो सकथे, मोला करना चाही।
ACT 26:10 अऊ मेंह यरूसलेम म अइसनेच करेंव। मेंह मुखिया पुरोहितमन ले अधिकार पाके परमेसर के बहुंते मनखेमन ला जेल म डारेंव, अऊ जब ओमन मार डारे जावंय, त मेंह ओमन के बिरोध म अपन सहमती देवत रहेंव।
ACT 26:11 कतको बार मेंह ओमन ला सजा देवाय बर एक सभा-घर ले दूसर सभा-घर म गेंव, अऊ ओमन ले जबरन यीसू के निन्दा करवाय के कोसिस करेंव। ओमन के बिरोध म गुस्सा के मारे, मेंह ओमन ला सताय बर इहां तक कि दूसर देस के सहरमन म घलो गेंव।
ACT 26:12 “एही काम खातिर, मेंह मुखिया पुरोहितमन ले अधिकार अऊ हुकूम पाके दमिस्क सहर ला जावत रहेंव।
ACT 26:13 तब हे राजा! मंझन के बेरा, रसता म मेंह अकास ले एक अंजोर देखेंव, जऊन ह सूरज ले जादा चमकत रहय अऊ ओह मोर अऊ मोर संगीमन के चारों खूंट चमकिस।
ACT 26:14 हमन जम्मो भुइयां म गिर पड़ेंन, अऊ मेंह इबरानी म मोर ले ये कहत एक अवाज सुनेंव, ‘हे साऊल, हे साऊल, तेंह मोला काबर सतावत हस? नुकीला छड़ी म लात मारना तोर बर कठिन ए।’
ACT 26:15 “तब मेंह पुछेंव, ‘हे परभू, तेंह कोन अस?’ “त परभू ह कहिस, ‘मेंह यीसू अंव, जऊन ला तेंह सतावत हस।
ACT 26:16 अब उठ अऊ अपन गोड़ म ठाढ़ हो जा। मेंह तोला एकर खातिर दरसन दे हवंव कि मेंह तोला ओ बातमन के सेवक अऊ गवाह बनावंव, जऊन ला तेंह मोर म देखे हवस अऊ जऊन ला मेंह तोला देखाहूं।
ACT 26:17 मेंह तोला इसरायली अऊ आनजातमन ले बचाहूं, जेमन करा मेंह तोला पठोवत हवंव।
ACT 26:18 मेंह तोला एकरसेति पठोवत हवंव कि तेंह ओमन के आंखी ला उघार अऊ ओमन ला अंधियार ले अंजोर कोति अऊ सैतान के सक्ति ले परमेसर कोति बहुर के लान, ताकि मोर ऊपर बिसवास करे के दुवारा ओमन ला पाप के माफी मिलय अऊ परमेसर के चुने मनखेमन के बीच म ओमन जगह पावंय।’
ACT 26:19 “एकरसेति, हे राजा अगरिप्पा, मेंह ओ स्वरगीय दरसन के बात ला नइं टारंय।
ACT 26:20 पहिली मेंह दमिस्क म, तब यरूसलेम म अऊ जम्मो यहूदिया प्रदेस म, यहूदीमन ला अऊ आनजातमन ला घलो परचार करंय कि ओमन पाप ले मन फिरावंय अऊ परमेसर कोति लहुंटंय अऊ अपन काम के दुवारा मन-फिराय के सबूत देवंय।
ACT 26:21 एकरे कारन यहूदीमन मोला मंदिर म पकड़के मार डारे के कोसिस करिन।
ACT 26:22 पर परमेसर के मदद ले, मेंह आज इहां ठाढ़े हवंव अऊ छोटे-बड़े जम्मो ला बरोबर गवाही देवत हवंव। मेंह ओ बातमन ला छोंड़के, अऊ कुछू नइं कहत हंव जऊन ला अगमजानीमन अऊ मूसा ह घलो कहिस कि ये बातमन पूरा होवइया हवय—
ACT 26:23 कि मसीह ला दुख उठाय बर पड़ही, अऊ ओह सबले पहिली मरे मन ले जी उठही अऊ अपन यहूदी मनखे अऊ आनजातमन ला उद्धार के संदेस के परचार करही।”
ACT 26:24 जब पौलुस ह अपन बारे म अइसने जबाब देवत रिहिस, त फेसतुस ह ओला चिचियाके कहिस, “हे पौलुस, तेंह बइहा गे हवस। तोर बहुंते गियान ह तोला बइहा कर दे हवय।”
ACT 26:25 पौलुस ह कहिस, “हे महा परतापी फेसतुस, मेंह बइहा नो हंव। मेंह सच अऊ गंभीर बात कहत हंव।
ACT 26:26 राजा अगरिप्पा घलो ये बातमन ला जानत हवय। मेंह बिगर डरे ओला कह सकत हंव। मोला बिसवास हवय कि ये बातमन ओकर ले छुपे नइं एं, काबरकि ये बात ह अंधियार म नइं होय हवय।
ACT 26:27 हे राजा अगरिप्पा! का तेंह अगमजानीमन ऊपर बिसवास करथस? मेंह जानत हंव कि तेंह करथस।”
ACT 26:28 तब राजा अगरिप्पा ह पौलुस ला कहिस, “का तेंह सोचथस कि ये थोरकन समय म मोला मसीही बने बर राजी कर लेबे?”
ACT 26:29 पौलुस ह कहिस, “थोरकन समय या बहुंते समय म—मेंह परमेसर ले पराथना करत हंव कि तें ही नइं, पर जम्मो झन जऊन मन मोर बात ला सुनत हवंय, आज ही मोर सहीं बन जावंय। पर मेंह ये नइं चाहंव कि ओमन मोर सहीं कैदी बनंय।”
ACT 26:30 तब राजा अगरिप्पा, राजपाल, बिरनीके अऊ जऊन मन ओमन के संग बईठे रहंय, ओ जम्मो झन ठाढ़ हो गीन।
ACT 26:31 अऊ कमरा ले निकलके एक-दूसर ले गोठियावत ये कहिन, “ये मनखे ह अइसने कुछू नइं करे हवय, जेकर कारन येला मार डारे जावय या येला जेल म रखे जावय।”
ACT 26:32 तब राजा अगरिप्पा ह फेसतुस ला कहिस, “यदि ये मनखे ह रोमी महाराजा करा अपील नइं करे होतिस, त येला छोंड़े जा सकत रिहिस।”
ACT 27:1 जब ये फैसला होईस कि हमन पानी जहाज म इटली देस जाबो, तब ओमन पौलुस अऊ कुछू आने कैदीमन ला यूलियुस नांव के एक सेना के अधिकारी के हांथ म सऊंप दीन, जऊन ह रोमी पलटन के रिहिस।
ACT 27:2 हमन अद्रमुतियुम के एक पानी जहाज म चघेंन, जऊन ह एसिया प्रदेस के तीर के बंदरगाहमन म जवइया रहय। हमन जहाज के लंगर ला समुंदर म खोल देंन। थिस्सलुनीके के एक मकिदूनी मनखे अरिसतर्खुस घलो हमर संग म रिहिस।
ACT 27:3 ओकर आने दिन हमन सीदोन म उतरेंन, अऊ यूलियुस ह पौलुस ऊपर दया करके ओला ओकर संगीमन करा जाय बर हुकूम दीस ताकि ओमन पौलुस के जरूरत के चीजमन के पूरती करंय।
ACT 27:4 तब उहां ले हमन फेर जहाज म चघेंन अऊ हवा ह हमर उल्टा दिग म बहे के कारन, हमन साइप्रस दीप के आड़ म होवत गेंन।
ACT 27:5 हमन किलिकिया अऊ पंफूलिया टापू के समुंदर तीर म ले होवत लूसिया प्रदेस के मूरा म उतरेंन।
ACT 27:6 सेना के अधिकारी ला उहां सिकन्दरिया के एक पानी जहाज मिलिस, जऊन ह इटली जावत रहय। ओह हमन ला ओही जहाज म चघा दीस।
ACT 27:7 हमन बहुंत दिन तक धीरे-धीरे चलत बड़े मुसकुल म कनिदुस नगर हबरेंन। हवा ह हमन ला आघू बढ़न नइं देवत रहय। एकरसेति, हमन सलमोने टापू के आघू म ले होवत क्रेते दीप के आड़ म चलेंन।
ACT 27:8 हमन तीरे-तीर चलत बड़े मुसकुल म सुभ लंगरबारी नांव के एक जगह म हबरेंन, जऊन ह लसया सहर के लकठा म रहय।
ACT 27:9 बहुंत दिन हो गे रिहिस अऊ समुंदर के यातरा के जोखिम बढ़ गे रहय, अऊ तब तक उपास के दिन घलो बीत गे रिहिस। एकरसेति पौलुस ह ओमन ला ये सलाह दीस,
ACT 27:10 “हे मनखेमन, मेंह देखत हंव कि हमर ये यातरा म बिपत्ति अवइया हवय अऊ न सिरिप जहाज अऊ माल के बहुंत नुकसान होही, पर हमन ला हमर परान के घलो हानि उठाना पड़ही।”
ACT 27:11 पर सेना के अधिकारी ह पौलुस के बात ला माने के बदले, कप्तान के बात अऊ जहाज के मालिक के बात ला मानिस।
ACT 27:12 ओ बंदरगाह ह जड़काला काटे बर ठीक नइं रिहिस, एकरसेति बहुंते मनखेमन ये कहिन कि जहाज ला खोलके यदि हो सकय, त फीनिक्स तक पहुंचे के कोसिस करे जावय अऊ उहां जड़काला काटे जावय। फीनिक्स ह क्रेते के एक बंदरगाह रिहिस, जऊन ह दक्खिन-पछिम अऊ उत्तर-पछिम अंग खुलथे।
ACT 27:13 जब हवा ह दक्खिन कोति ले धीरे-धीरे चले के सुरू होईस, त ओमन सोचिन कि ओमन जो चाहथें, ओह पूरा होही। ओमन जहाज ला खोल दीन अऊ क्रेते के तीरे-तीर चले लगिन।
ACT 27:14 पर थोरकन देर म, दीप ले एक बड़े आंधी उठिस जऊन ह उत्तर-पूरबी आंधी कहाथे।
ACT 27:15 आंधी ह जहाज ले टकराईस अऊ जब हवा के उल्टा जहाज ला चलाना असंभव हो गीस, त हमन कोसिस करे बर छोंड़ देंन, अऊ अइसने हवा म बोहावत चले गेंन।
ACT 27:16 कौदा नांव के एक छोटकन टापू के आड़ म जावत-जावत, हमन बड़े मुसकुल म जहाज के डोंगी ला संभालेंन।
ACT 27:17 मनखेमन ओला जहाज म रखिन अऊ जहाज ला संभाले बर ओकर चारों कोति दऊंरा बांध दीन। सुरतिस के बालू म जहाज के फंस जाय के डर म, ओमन जहाज के लंगर ला खाल्हे उतारिन अऊ जहाज ला अइसने हवा म चलन दीन।
ACT 27:18 आंधी ह भयंकर रूप से जहाज म टकराय लगिस, त दूसर दिन ओमन जहाज के माल ला फटिके लगिन।
ACT 27:19 तीसरा दिन ओमन अपन हांथ ले जहाज म लदे वजन नापे के मसीन ला फटिक दीन।
ACT 27:20 जब हमन ला कुछू दिन तक न सूरज अऊ न तारामन दिखिन अऊ लगातार भारी आंधी चलत रहय, त आखिर म हमन हमर बांचे के जम्मो आसा छोंड़ देंन।
ACT 27:21 जब मनखेमन बहुंत दिन तक खाना नइं खाईन, त पौलुस ह ओमन के आघू म ठाढ़ होके कहिस, “हे मनखेमन, यदि तुमन मोर बात ला सुनके जहाज ला क्रेते ले नइं खोले रहितेव, तब हमन ला ये बिपत अऊ हानि नइं उठाय पड़तिस।
ACT 27:22 पर अब मेंह तुमन ले बिनती करत हंव कि हिम्मत करव, काबरकि तुमन के काकरो परान के हानि नइं होवय, सिरिप जहाज ह नास होही।
ACT 27:23 काबरकि जऊन परमेसर के मेंह अंव अऊ जेकर मेंह सेवा करथंव, ओकर एक स्वरगदूत ह बीते रथिया मोर करा आके कहिस,
ACT 27:24 ‘हे पौलुस, झन डर। तोला महाराजा के आघू म ठाढ़ होना जरूरी ए, अऊ परमेसर ह अपन दया ले, ये जम्मो झन के जिनगी ला, जऊन मन तोर संग जावत हवंय, तोला दे हवय।’
ACT 27:25 एकरसेति, हे मनखेमन हो, हिम्मत करव, काबरकि मोला परमेसर ऊपर बिसवास हवय कि जइसने ओह मोला कहे हवय, वइसनेच होही।
ACT 27:26 पर हमन ला कोनो टापू म पहुंचे बर पड़ही।”
ACT 27:27 चौदह रात हो गे, हमन अद्रिया समुंदर म भटकत फिरत रहेंन, तब आधा रथिया के करीब मांझीमन ला लगिस कि ओमन भुइयां के लकठा म आ गे हवंय।
ACT 27:28 ओमन पानी के थाह लगाईन, त ओमन एक सौ बीस फीट गहिरा पाईन। थोरकन देर बाद, ओमन फेर गहरई नापिन, त नब्बे फीट गहिरा पाईन।
ACT 27:29 तब ये डरके कि कहूं जहाज ह पथरा ले टकरा जाही, ओमन जहाज के पाछू के भाग म चार ठन लंगर डारिन अऊ दिन के अंजोर बर पराथना करे लगिन।
ACT 27:30 मांझीमन पानी जहाज ले भागे चाहत रहंय, एकरसेति ओमन जहाज के आघू म कुछू लंगर डारे के ओढ़र म, डोंगी ला समुंदर म उतार दीन।
ACT 27:31 तब पौलुस ह सेना के अधिकारी अऊ सैनिकमन ला कहिस, “कहूं ये मनखेमन जहाज ला छोंड़ दीन, त तुमन नइं बांचव।”
ACT 27:32 तब सैनिकमन डोंगी ले बंधे डोर ला काटके डोंगी ला गिरा दीन।
ACT 27:33 बिहान होय के पहिली, पौलुस ह ओ जम्मो झन ला खाना खाय बर समझाईस। ओह कहिस, “आज चौदह दिन हो गे, तुमन आस लगाय हवव अऊ अभी तक ले कुछू नइं खाय हवव।
ACT 27:34 मेंह तुमन ले बिनती करत हंव कि कुछू खा लेवव। जीयत रहे बर तुमन ला कुछू खाना जरूरी ए। तुमन के काकरो मुड़ के एको ठन बाल घलो बांका नइं होवय।”
ACT 27:35 ये कहिके पौलुस ह कुछू रोटी लीस अऊ जम्मो के आघू म परमेसर ला धनबाद दीस अऊ टोरके खावन लगिस।
ACT 27:36 ओमन जम्मो झन उत्साहित होईन अऊ कुछू खाना खाईन।
ACT 27:37 हमन जम्मो झन मिलके पानी जहाज म दू सौ छिहत्तर मनखे रहेंन।
ACT 27:38 जब खाना खाके ओमन के मन ह भर गे, त अनाज ला समुंदर म फटिकके जहाज ला हरू करन लगिन।
ACT 27:39 जब बिहनियां होईस, त ओमन ओ देस ला नइं चिन्हिन, पर ओमन ला एक रेतिला समुंदर के खाड़ी दिखिस, तब ओमन उहां जहाज ला टिकोय के फैसला करिन।
ACT 27:40 अऊ ओमन लंगरमन ला खोलके समुंदर म ओमन ला छोंड़ दीन अऊ संग म पतवारमन के डोर ला घलो खोल दीन अऊ हवा के आघू म पाल ला चघाके, ओमन समुंदर के तीर कोति चले लगिन।
ACT 27:41 जहाज ह बालू म फंसके अटक गे। जहाज के आघू के भाग ह बालू म धंस गीस अऊ आघू नइं बढ़िस, जबकि पाछू के भाग ह समुंदर के भयंकर लहरा ले टूटके कुटा-कुटा हो गीस।
ACT 27:42 तब सैनिकमन कैदीमन ला मार डारे के बिचार करिन, ताकि ओमा ले कोनो पानी म उतरके झन भाग सकय।
ACT 27:43 पर सेना के अधिकारी ह पौलुस ला बंचाय बर चाहत रहय, एकरसेति ओह ओमन ला अइसने करे बर मना करिस। ओह ये हुकूम दीस कि जऊन मन तउंर सकथें, ओमन पहिली जहाज ले कूदके तीर म हबरंय।
ACT 27:44 बांचे मनखेमन लकड़ी के पटिया या जहाज के टूटे चीजमन के सहारा लेके उहां हबरंय। ये किसम ले जम्मो झन भांठा म पहुंचके बांच गीन।
ACT 28:1 जब हमन बांचके तीर म आ गेंन, तब हमन ला पता चलिस कि ये दीप ला मिलिते कहे जाथे।
ACT 28:2 दीप के रहइया मनखेमन हमर ऊपर अब्बड़ दया करिन। पानी गिरत रहय अऊ जाड़ घलो लगत रहय, एकरसेति ओमन आगी बारिन अऊ हमर सुवागत करिन।
ACT 28:3 पौलुस ह लकड़ी के बोझा बटोरिस अऊ जब ओला आगी म डारत रिहिस, त एक ठन जहरिला सांप आगी के आंच पाके निकलिस अऊ पौलुस के हांथ म लपट गीस।
ACT 28:4 जब दीप के रहइया मनखेमन ओकर हांथ म सांप ला लपटे देखिन, त ओमन एक-दूसर ले कहिन, “ये मनखे ह सही म हतियारा ए। हालाकि येह समुंदर ले बांच तो गीस, पर नियाय ह ओला जीयन नइं दीस।”
ACT 28:5 पर पौलुस ह सांप ला आगी म झटकार दीस अऊ ओला कुछू नइं होईस।
ACT 28:6 मनखेमन ये आसा करत रहंय कि पौलुस के देहें ह फूल जाही या ओह अचानक गिरके मर जाही। पर बहुंत देर तक देखे के बाद घलो ओला कुछू नइं होईस, त ओमन के मन के बिचार बदल गीस अऊ ओमन कहिन, “येह तो कोनो देवता ए।”
ACT 28:7 लकठा म, ओ दीप के मुखिया के कुछू खेत रहय। मुखिया के नांव पुबलियुस रिहिस। ओह हमन ला अपन घर ले गीस अऊ तीन दिन तक हमर पहुनई करिस।
ACT 28:8 पुबलियुस के ददा ह बेमार रहय। ओला जर आवत रहय अऊ अब्बड़ बहिर फिरत रहय। पौलुस ह ओला देखे बर गीस अऊ पराथना करे के बाद ओकर ऊपर अपन हांथ रखिस अऊ ओला चंगा कर दीस।
ACT 28:9 जब अइसने होईस, त दीप के बाकि बिमरहामन घलो आईन अऊ चंगा हो गीन।
ACT 28:10 ओमन हमर बहुंत आदरमान करिन अऊ जब हमन जाय बर तियार होएंन, त यातरा बर हमन ला जऊन कुछू चीज के जरूरत रिहिस, ओ जम्मो चीज ओमन दीन।
ACT 28:11 तीन महिना के बाद हमन सिकन्दरिया के एक पानी जहाज म चघेंन, जेकर आघू के भाग म जुड़वां-देवता दियुसकूरी के छाप रिहिस। ये जहाज ह ओ दीप म जड़काला काटत रिहिस।
ACT 28:12 हमन सुरकूसा सहर म हबरेंन अऊ उहां तीन दिन तक रूके रहेंन।
ACT 28:13 उहां ले हमन पानी जहाज म रेगियुम सहर पहुंचेंन। दूसर दिन दक्खिन दिग ले हवा चले लगिस अऊ ओकर आने दिन हमन पुतियुली सहर म आयेंन।
ACT 28:14 उहां हमन ला कुछू भाईमन मिलिन, जऊन मन हमन ला ओमन के संग एक हप्ता रूके बर कहिन। एकर बाद, हमन रोम सहर गेंन।
ACT 28:15 जब रोम म भाईमन हमर आय के बारे म सुनिन, त ओमन हमर ले भेंट करे बर अप्पियुस के बजार अऊ तीन-सराय तक आईन। पौलुस ह ओ भाईमन ला देखके परमेसर ला धनबाद दीस अऊ उत्साहित होईस।
ACT 28:16 जब हमन रोम हबरेंन, त पौलुस ला एके झन रहे के अनुमति मिल गीस, पर एक झन सैनिक ओकर रखवारी करय।
ACT 28:17 तीन दिन के बाद पौलुस ह यहूदीमन के अगुवामन ला बलाईस अऊ जब ओमन जूरिन, त ओमन ला कहिस, “ए मोर संगी यहूदीमन, मेंह हमर मनखेमन के बिरोध म या हमर पुरखामन के रीति-रिवाज के बिरोध म कुछू नइं करे हवंव। तभो ले मोला यरूसलेम म बंदी बनाके रोमीमन के हांथ म सऊंप दे गे हवय।
ACT 28:18 ओमन मोर ले पुछताछ करिन अऊ मोला छोंड़ दे बर चाहिन, काबरकि ओमन मिरतू-दंड के लईक मोर म कोनो दोस नइं पाईन।
ACT 28:19 पर जब यहूदीमन बिरोध करिन, त मेंह बाध्य होके महाराजा करा अपील करेंव, अइसने बात नो हय कि मेंह अपन मनखेमन ऊपर कोनो दोस लगाय चाहत रहेंव।
ACT 28:20 एकरे कारन मेंह तुमन ला बलाय हवंव कि तुमन ले मिलंव अऊ बातचीत करंव। काबरकि जेकर ऊपर इसरायल के मनखेमन आसा रखथें, ओकर खातिर मेंह ये संकली म जकड़े गे हवंव।”
ACT 28:21 ओमन पौलुस ला कहिन, “हमन ला तोर बारे म यहूदिया ले कोनो चिट्ठी नइं मिले हवय, अऊ न तो हमर संगी यहूदीमन ले कोनो इहां आके तोर बारे म कुछू बताय हवंय, अऊ न ही कुछू खराप बात कहे हवंय।
ACT 28:22 पर तोर का बिचार ए, हमन जाने बर चाहथन, काबरकि हमन जानथन कि जम्मो जगह मनखेमन ये पंथ के बिरोध म गोठियावत हवंय।”
ACT 28:23 तब ओमन पौलुस बर एक दिन ठहिराईन अऊ ओ दिन बहुंत मनखेमन ओ जगह म आईन जिहां पौलुस ह ठहिरे रिहिस। बिहनियां ले सांझ तक, ओह ओमन ला समझाईस अऊ परमेसर के राज के बारे म संदेस दीस। ओह मूसा के कानून अऊ अगमजानीमन के किताबमन ले यीसू के बारे म बतावत ओमन ला मनाय के कोसिस करिस।
ACT 28:24 कुछू मनखेमन ओकर बात ला मान लीन, पर कुछू मनखेमन बिसवास नइं करिन।
ACT 28:25 ओमन आपस म एक मत नइं होईन अऊ उहां ले जावन लगिन, जब पौलुस ह ये आखिरी बात कह लीस: “पबितर आतमा ह यसायाह अगमजानी के दुवारा तुम्हर पुरखामन ला सच कहे हवय:
ACT 28:26 “ ‘जा अऊ ये मनखेमन ला कह, “तुमन सुनत तो रहिहू, फेर कभू नइं समझहू; तुमन देखत तो रहिहू, फेर कभू नइं बुझहू।”
ACT 28:27 काबरकि ये मनखेमन के हिरदय ह कठोर हो गे हवय, येमन अपन कान ला बंद कर ले हवंय, अऊ अपन आंखी ला मुंद ले हवंय। नइं तो येमन अपन आंखीमन ले देखतिन, अपन कानमन ले सुनतिन, अपन हिरदय ले समझतिन, अऊ येमन मोर कोति फिरतिन अऊ मेंह ओमन ला चंगा कर देतेंव।’
ACT 28:28 “एकरसेति, मेंह चाहथंव कि तुमन जान लेवव कि परमेसर के उद्धार के संदेस आनजातमन करा पठोय गे हवय, अऊ ओमन येला सुनहीं!”
ACT 28:29 पौलुस के अइसने कहे के बाद, यहूदीमन आपस म बहुंत बिवाद करत उहां ले चल दीन।
ACT 28:30 पौलुस ह उहां पूरा दू साल तक किराय के घर म रिहिस, अऊ ओह ओ जम्मो झन के सुवागत करय, जऊन मन ओकर ले मिले बर आवंय।
ACT 28:31 ओह निधड़क होके अऊ बिगर रोक-टोक के परमेसर के राज के परचार करय अऊ परभू यीसू मसीह के बारे म सिखोवय!
ROM 1:1 ये चिट्ठी ह मसीह यीसू के सेवक पौलुस के तरफ ले अय, जऊन ह प्रेरित होय बर बलाय गीस, अऊ परमेसर के सुघर संदेस के परचार करे बर अलग करे गे हवय।
ROM 1:2 परमेसर ह बहुंत पहिली ले अपन अगमजानीमन के जरिये अपन पबितर बचन म ये सुघर संदेस के वायदा करे रिहिस।
ROM 1:3 ये सुघर संदेस ह ओकर बेटा हमर परभू यीसू मसीह के बारे म अय, जऊन ह मनखे रूप धरके दाऊद के बंस म पईदा होईस,
ROM 1:4 अऊ पबितर आतमा के मुताबिक, ओह सामर्थ के संग परमेसर के बेटा ठहिरिस, जब परमेसर ह यीसू मसीह ला मरे म ले जियाईस।
ROM 1:5 ओकरे जरिये हमन ला अनुग्रह अऊ प्रेरित के पद मिलिस, ताकि ओकर नांव के हित म, हमन जम्मो जाति के मनखेमन ला बलावन कि ओमन बिसवास करंय अऊ ओकर हुकूम ला मानंय।
ROM 1:6 अऊ तुम्हर घलो गनती ओमन म होथे, जऊन मन यीसू मसीह के होय बर बलाय गे हवंय।
ROM 1:7 ये चिट्ठी ह ओ जम्मो झन ला लिखे जावत हे, जऊन मन रोम सहर म हवंय अऊ परमेसर के मयारू अंय अऊ पबितर होय बर बलाय गे हवंय।
ROM 1:8 सबले पहिली, मेंह तुमन जम्मो झन बर यीसू मसीह के दुवारा अपन परमेसर के धनबाद करत हंव, काबरकि तुम्हर बिसवास के चरचा जम्मो संसार म होवत हवय।
ROM 1:9 परमेसर, जेकर सेवा मेंह अपन आतमा ले, ओकर बेटा के सुघर संदेस के परचार करे के दुवारा करथंव; ओह मोर गवाह हवय कि मेंह अपन पराथना म हमेसा तुमन ला सुरता करथंव
ROM 1:10 अऊ पराथना करथंव कि कोनो किसम ले, परमेसर के ईछा ले, मोला तुम्हर करा आय के मऊका मिलय।
ROM 1:11 तुमन ला देखे के, मोर बहुंत ईछा हवय ताकि मेंह तुम्हर संग कुछू आतमिक बरदान बांट सकंव कि तुमन बिसवास म मजबूत होवव।
ROM 1:12 मोर कहे के मतलब ये अय कि तुमन अऊ में आपस म एक-दूसर के बिसवास ले उत्साहित होवन।
ROM 1:13 हे भाईमन हो! मेंह तुमन ला बताय चाहथंव कि कतको बार मेंह तुम्हर करा आय के सोचेंव ताकि मोला तुम्हर बीच म परभावसाली रूप से काम करे के मऊका मिलय, जइसने आने आनजातमन के बीच म मोला मिलिस। पर अभी तक ले, मोला तुम्हर करा आय बर रोके गे हवय।
ROM 1:14 मेंह यूनानी अऊ गैर यूनानी के अऊ बुद्धिमान अऊ मुरूख दूनों मनखेमन बर बचनबद्ध हंव।
ROM 1:15 एकरसेति, मेंह तुमन ला घलो जऊन मन रोम म रहत हवव, सुघर संदेस सुनाय बर उत्सुक हवंव।
ROM 1:16 मेंह सुघर संदेस सुनाय बर नइं लजावंव, काबरकि जऊन मन एकर ऊपर बिसवास करथें, ओमन के उद्धार बर येह परमेसर के सामर्थ अय: पहिली यहूदीमन बर, तब फेर आनजातमन बर।
ROM 1:17 काबरकि सुघर संदेस म, परमेसर के धरमीपन ह बिसवास के दुवारा सुरू ले आखिरी तक परगट होथे, जइसने परमेसर के बचन म लिखे हवय: “धरमी मनखे ह बिसवास के दुवारा जीयत रहिही।”
ROM 1:18 परमेसर के कोरोध ह स्वरग ले ओ मनखेमन के जम्मो अभक्ति अऊ बुरई ऊपर परगट होवत हवय, जऊन मन सत ला अपन बुरई के दुवारा दबाय रखथें।
ROM 1:19 परमेसर के बारे म जऊन बात जानना चाही, ओ बात साफ हवय, काबरकि परमेसर ह ओ बात ओमन ऊपर परगट करे हवय।
ROM 1:20 जब ले संसार के सिरिस्टी होईस, तब ले परमेसर के अनदेखे गुन, ओकर सनातन सक्ति अऊ ईस्वरीय सुभाव ला साफ-साफ देखे गे हवय अऊ ओकर बनाय चीजमन के दुवारा येला समझे जावत हवय। एकरसेति मनखेमन करा कोनो बहाना नइं ए।
ROM 1:21 हालाकि ओमन परमेसर ला जानत रिहिन, पर ओमन परमेसर के न तो महिमा करिन अऊ न ही ओला धनबाद दीन; ओमन के सोच-बिचार ह बेकार हो गीस अऊ ओमन के मुरूख हिरदय ह अंधियार हो गीस।
ROM 1:22 ओमन अपनआप ला बुद्धिमान जताईन, पर ओमन मुरूख बन गीन,
ROM 1:23 अऊ अजर-अमर परमेसर के महिमा करे के बदले, ओमन नासमान मनखे, चिरई, पसु अऊ रेंगइया जीव-जन्तुमन के मूरती बनाके ओमन के महिमा करिन।
ROM 1:24 एकरसेति परमेसर ह ओमन ला ओमन के हिरदय के पापमय ईछा म छोंड़ दीस ताकि ओमन बेभिचार करके असुध हो जावंय अऊ आपस म अपन देहें के अनादर करंय।
ROM 1:25 ओमन परमेसर के सच्चई ला लबारी म बदल दीन, अऊ सिरिस्टी के पूजा अऊ सेवा करिन, न कि ओ सिरजनहार के, जेकर बड़ई सदाकाल ले होवत हवय। आमीन।
ROM 1:26 एकरे कारन, परमेसर ह ओमन ला निरलज वासना म छोंड़ दीस। इहां तक कि ओमन के माईलोगनमन सुभाविक संबंध ला छोंड़के असुभाविक वासना करन लगिन।
ROM 1:27 वइसने मरदमन घलो माईलोगनमन संग सुभाविक संबंध ला छोंड़के एक-दूसर के संग काम-वासना म जरन लगिन; मरदमन दूसर मरद संग निरलज काम करिन अऊ अपन खराप काम के सजा खुदे भोगिन।
ROM 1:28 जब ओमन परमेसर के गियान म बने रहना उचित नइं समझिन, त परमेसर ह ओमन ला एक नीच मानसिकता म छोंड़ दीस ताकि ओमन अनुचित चाल चलंय।
ROM 1:29 ओमन जम्मो किसम के दुस्टता, बुरई, लोभ अऊ नीचता ले भर गे हवंय। ओमन जलन, हतिया, झगरा, छल अऊ दुरभाव ले भरे हवंय। ओमन बकवादी,
ROM 1:30 बदनाम करइया, परमेसर ले घिन करइया, बेजत्ती करइया, घमंडी अऊ डींगमार अंय। ओमन खराप काम करे के उपाय खोजथें। ओमन अपन दाई-ददा के बात नइं मानंय।
ROM 1:31 ओमन मुरूख, बिगर बिसवास के, बिगर मया के अऊ निरदयी अंय।
ROM 1:32 हालाकि ओमन परमेसर के ये फैसला ला जानत हवंय कि जऊन मन अइसने कुकरम करथें, ओमन मिरतू के भागी होहीं, तभो ले ओमन न सिरिप खुदे अइसने काम करथें, पर अइसने काम करइयामन के ओमन समरथन करथें।
ROM 2:1 एकरसेति, हे आने ऊपर दोस लगइया मनखे, तेंह चाहे कोनो होवस, तोर करा कोनो बहाना नइं ए। आने ऊपर दोस लगाय के दुवारा, तेंह अपनआप ला दोसी ठहिराथस, काबरकि तेंह आने ऊपर दोस लगाथस अऊ ओहीच गलती तेंह खुदे करथस।
ROM 2:2 हमन जानथन कि जऊन मन अइसने काम करथें, ओमन के बिरोध म परमेसर के नियाय ह सच्चई के आधार म होथे।
ROM 2:3 जब तेंह एक मनखे होके, ओमन के ऊपर दोस लगाथस अऊ ओहीच काम खुदे करथस, त का तेंह परमेसर के नियाय ले बच जाबे?
ROM 2:4 का तेंह परमेसर के दया, सहनसीलता अऊ धीरज रूपी धन ला तुछ समझथस? का तेंह ये नइं जानस कि परमेसर के दया ह तोला पछताप करे बर सिखोथे?
ROM 2:5 पर तेंह ढीठ अऊ हिरदय म कठोर हो गे हवस अऊ एकर कारन ले परमेसर के कोरोध के दिन बर, जब ओकर सही नियाय ह परगट होही, तेंह अपन बिरोध म कोरोध बटोरत हवस।
ROM 2:6 परमेसर ह हर एक मनखे ला ओकर काम के मुताबिक फर दीही।
ROM 2:7 जऊन मन धीरज धरके बने काम करथें अऊ महिमा, आदर अऊ अमरता के खोज म रहिथें, ओमन ला ओह सदाकाल के जिनगी दीही।
ROM 2:8 पर जऊन मन सुवारथी अंय अऊ सच्चई ला नइं मानंय, पर बुरई के पाछू चलथें, ओमन ऊपर परमेसर के कोप अऊ कोरोध ह भड़कही।
ROM 2:9 हर एक मनखे जऊन ह खराप काम करथे, ओकर ऊपर दुख अऊ बिपत्ति आही: पहिली यहूदी, तब फेर आनजात ऊपर;
ROM 2:10 पर जऊन ह भलई के काम करथे, ओला महिमा, आदर अऊ सांति मिलही: पहिली यहूदी ला, तब फेर आनजात ला।
ROM 2:11 काबरकि परमेसर ह काकरो पखियपात नइं करय।
ROM 2:12 ओ जम्मो झन, जऊन मन मूसा के कानून ला बिगर जाने पाप करिन, ओमन बिगर कानून के नास होहीं, अऊ ओ जम्मो झन, जऊन मन मूसा के कानून ला जानके पाप करिन, ओमन के नियाय कानून के मुताबिक होही।
ROM 2:13 काबरकि परमेसर के आघू म, मूसा के कानून के सुनइयामन धरमी नइं ठहिरंय, पर मूसा के कानून म चलइयामन धरमी ठहिराय जाहीं।
ROM 2:14 आनजातमन, जेमन करा मूसा के कानून नइं ए, जब ओमन सुभाव ले मूसा के कानून के मुताबिक चलथें, त ओमन करा कानून नइं होवत घलो, ओमन खुदे अपन बर एक कानून अंय।
ROM 2:15 ओमन मूसा के कानून ला अपन चालचलन के दुवारा परगट करथें; ओमन के बिबेक ह घलो गवाही देथे, अऊ ओमन के सोच-बिचार ह कभू ओमन ला दोसी ठहिराथे, त कभू ओमन के बचाव करथे।
ROM 2:16 मोर सुघर संदेस के मुताबिक ये बात ह ओ दिन परगट होही, जब परमेसर ह मनखेमन के गुपत बात के नियाय यीसू मसीह के जरिये करही।
ROM 2:17 यदि तेंह अपनआप ला यहूदी कहिथस अऊ मूसा के कानून ऊपर भरोसा रखथस अऊ तेंह परमेसर के बारे म घमंड करथस,
ROM 2:18 यदि तेंह परमेसर के ईछा ला जानथस अऊ सही बात के पहिचान रखथस, काबरकि तोला मूसा के कानून के सिकछा मिले हवय;
ROM 2:19 यदि तोला भरोसा हवय कि तेंह अंधरामन बर डहार दिखइया, अंधियार म परे मनखेमन बर अंजोर,
ROM 2:20 मुरूखमन के सिखोइया अऊ लइकामन के गुरू अस, काबरकि तोला मूसा के कानून के पूरा गियान अऊ सत मिले हवय—
ROM 2:21 तब, जब तेंह आने मन ला सिखोथस, त का अपनआप ला नइं सिखोवस? तेंह उपदेस देथस कि चोरी झन करव, त का तेंह खुदे चोरी करथस?
ROM 2:22 तेंह कहिथस कि छिनारी झन करव अऊ का तेंह खुदे छिनारी करथस? तेंह मूरतीमन ले घिन करथस अऊ का तेंह खुदे मंदिरमन ला लूटथस?
ROM 2:23 तेंह मूसा के कानून के बारे म घमंड करथस अऊ का तेंहीच ह कानून ला टोरके परमेसर के अनादर करथस?
ROM 2:24 जइसने परमेसर के बचन म लिखे हवय: “तुम्हर कारन आनजातमन के बीच म परमेसर के नांव के निन्दा होवत हवय।”
ROM 2:25 यदि तेंह मूसा के कानून के पालन करथस, त तोर खतना के मतलब हवय, पर यदि तेंह कानून के पालन नइं करस, त तोर खतना ह बिगर खतना के सहीं हो जाथे।
ROM 2:26 ओ मनखे जऊन मन खतना नइं करवाय हवंय, यदि ओमन कानून के मुताबिक चलथें, त का ओमन खतना करवाय मनखे सहीं नइं माने जाहीं?
ROM 2:27 तब जऊन मन सारीरिक रूप ले खतना नइं करवाय हवंय, ओमन तुमन ला दोसी ठहिराहीं, काबरकि ओमन कानून ला मानथें, पर तुमन कानून ला नइं मानव, हालाकि तुम्हर करा लिखित कानून हवय अऊ तुमन खतना करवाय हवव।
ROM 2:28 ओ मनखे ह सही के यहूदी नो हय, जऊन ह सिरिप बाहिरी रूप ले यहूदी अय, अऊ ओ खतना ह सही खतना नो हय जऊन ह सिरिप बाहिरी अऊ सारीरिक अय।
ROM 2:29 पर सही यहूदी ओ मनखे अय, जऊन ह भीतरी रूप ले यहूदी अय अऊ सही खतना ओह अय, जऊन ह हिरदय म पबितर आतमा के लिखे के दुवारा होथे, सरीर म नइं होवय। अइसने मनखे के बड़ई मनखेमन के दुवारा नइं, पर परमेसर के दुवारा होथे।
ROM 3:1 तब यहूदी होय के का फायदा या खतना करवाय के का महत्व हवय?
ROM 3:2 हर किसम ले बहुंत फायदा हवय। सबले पहिली यहूदीमन ला परमेसर के बचन सऊंपे गीस।
ROM 3:3 यदि ओमा ले कुछू झन बिसवासघाती निकलिन, त का होईस? का ओमन के बिसवासघाती होय ले परमेसर ह बिसवास के लईक नइं रहय?
ROM 3:4 बिलकुल ही नइं! परमेसर ह सच्चा अऊ जम्मो मनखेमन लबरा अंय। जइसने कि परमेसर के बचन म लिखे हवय: “ताकि तेंह अपन बात म सही साबित हो जा, अऊ जब नियाय करथस, त तोला जीत मिलय।”
ROM 3:5 पर यदि हमर अधरम ह परमेसर के धरमीपन ला जादा साफ-साफ देखाथे, त हमन का कहन? का ये कहन, कि परमेसर ह हमर ऊपर कोरोध करके अनियाय करथे? (मेंह येला मनखे के सोच के मुताबिक कहत हंव।)
ROM 3:6 बिलकुल ही नइं! यदि परमेसर ह अनियायी होतिस, त ओह संसार के नियाय कइसने कर सकही?
ROM 3:7 यदि मोर लबारी के कारन परमेसर के सच्चई अऊ महिमा ह बढ़थे, त फेर मेंह काबर एक पापी के सहीं दोसी ठहिराय जावत हंव?
ROM 3:8 “तब आवव, हमन बुरई करन कि भलई होवय”—जइसने कि कुछू मनखेमन हमर ऊपर दोस लगाके कहिथें कि हमन अइसने कहिथन। अइसने मनखेमन ला दोसी ठहिराय जाना उचित अय।
ROM 3:9 त फेर हमन का कहन? का हमन यहूदीमन आने मन ले बने हवन? बिलकुल नइं! काबरकि हमन पहिली ये दोस लगा चुके हवन कि यहूदी अऊ आनजात जम्मो मनखेमन पाप के अधीन हवंय।
ROM 3:10 जइसने कि परमेसर के बचन म लिखे हवय: “कोनो धरमी नो हंय, एको झन घलो नइं।
ROM 3:11 कोनो नइं समझंय, कोनो परमेसर के खोज नइं करंय।
ROM 3:12 जम्मो झन भटक गे हवंय अऊ एक संग ओमन बेकार हो गे हवंय; अइसे कोनो नइं ए, जऊन ह भलई करथे, एको झन घलो नइं।”
ROM 3:13 “ओमन के टोंटा ह खुले कबर अय, ओमन के जीभ ह छल-कपट के बात करथे।” “ओमन के ओंठ म करैत सांप के जहर हवय।”
ROM 3:14 “ओमन के मुहूं ह सराप अऊ करूपन ले भरे हवय।”
ROM 3:15 “ओमन के गोड़ ह लहू बोहाय बर तेज भागथे,
ROM 3:16 ओमन के डहार म नास अऊ दुरगति हवय,
ROM 3:17 अऊ सांति के डहार ला ओमन नइं जानंय।”
ROM 3:18 “ओमन के आंखी के आघू म परमेसर के डर नइं अय।”
ROM 3:19 हमन जानत हवन कि मूसा के कानून ह जऊन कुछू कहिथे, ओह ओमन ला कहिथे जऊन मन कानून के अधीन हवंय, ताकि हर एक के मुहूं ह बंद हो जावय अऊ जम्मो संसार ह परमेसर के दंड के अधीन रहय।
ROM 3:20 एकरसेति मूसा के कानून ला माने के दुवारा कोनो परमेसर के नजर म धरमी नइं ठहिरंय, पर कानून के जरिये मनखे ह पाप के पहिचान करथे।
ROM 3:21 पर अब परमेसर ह परगट करे हवय कि मनखेमन ओकर नजर म बिगर कानून के कइसने धरमी हो सकथें; एकर गवाही, मूसा के कानून अऊ अगमजानीमन देथें।
ROM 3:22 परमेसर के ये धरमीपन ओ जम्मो झन ऊपर यीसू मसीह म बिसवास के दुवारा आथे, जऊन मन ओकर ऊपर बिसवास करथें। येमा कुछू भेदभाव नइं ए।
ROM 3:23 काबरकि जम्मो झन पाप करे हवंय अऊ ओमन परमेसर के महिमा ले अलग हवंय,
ROM 3:24 अऊ परमेसर ह सेंतमेंत म अपन अनुग्रह ले मनखेमन ला धरमी ठहिराईस अऊ ओमन ला पाप ले मुक्ति दीस, अऊ पाप ले ये मुक्ति ह मसीह यीसू के दुवारा आईस।
ROM 3:25 परमेसर ह यीसू ला एक बलिदान के रूप म दे दीस, जऊन ह अपन लहू बहाय के दुवारा पाप के पछताप करिस अऊ जऊन ह ये बात ला बिसवास करथे, ओकर पाप ह छेमा होथे। ये किसम ले परमेसर ह अपन धरमीपन ला देखाईस, काबरकि अपन धीरज धरे के कारन, परमेसर ह ओ पापमन के दंड नइं दीस, जऊन ला पहिली जुग म करे गे रिहिस।
ROM 3:26 परमेसर ह ये काम ला एकरसेति करिस, ताकि ये समय म, ये साबित हो जावय कि ओह धरमी अय अऊ ओह ओ मनखे ला सही ठहिराथे, जऊन ह यीसू ऊपर बिसवास करथे।
ROM 3:27 तब हमर घमंड करई कहां रिहिस? एकर बर तो जगह नइं ए। कोन नियम के आधार म? का कानून ला माने के आधार म? नइं, पर बिसवास के आधार म।
ROM 3:28 काबरकि हमन ये मानथन कि मनखे ह कानून ला माने के दुवारा नइं, पर मसीह यीसू म बिसवास करे के दुवारा सही ठहिरथे।
ROM 3:29 का परमेसर ह सिरिप यहूदीमन के परमेसर अय? का ओह आनजातमन के घलो परमेसर नो हय? हव, ओह आनजातमन के घलो परमेसर अय।
ROM 3:30 जब सिरिप एक परमेसर हवय, जऊन ह खतना करइयामन ला बिसवास के दुवारा अऊ बिगर खतना करइयामन ला घलो ओहीच बिसवास के दुवारा सही ठहिराही,
ROM 3:31 त का हमन ये बिसवास के दुवारा कानून ला बेकार कर देवन? बिलकुल नइं! पर, हमन कानून ला बनाय रखथन।
ROM 4:1 तब हमन का कहन—हमर पुरखा अब्राहम के ये बिसय म का अनुभव रिहिस?
ROM 4:2 यदि अब्राहम ह अपन काम के दुवारा सही ठहिराय जातिस, त ओकर करा घमंड करे के कुछू बात होतिस, पर परमेसर के आघू म ओह घमंड नइं कर सकय।
ROM 4:3 परमेसर के बचन ह का कहिथे? “अब्राहम ह परमेसर के ऊपर बिसवास करिस अऊ ये बात ह ओकर बर धरमीपन गने गीस।”
ROM 4:4 जब कोनो मनखे ह बुता करथे, त ओला बनी देना, दान नइं समझे जावय, पर येला ओकर हक समझे जाथे।
ROM 4:5 पर जऊन मनखे ह काम नइं करय, पर परमेसर के ऊपर बिसवास करथे जऊन ह अधरमी ला सही ठहिराथे, ओ मनखे बर ओकर बिसवास ह धरमीपन के रूप म गने जाथे।
ROM 4:6 जऊन मनखे ला परमेसर ह बिगर करम के धरमी ठहिराथे, ओला दाऊद राजा घलो धइन कहिथे:
ROM 4:7 “धइन अंय ओमन, जऊन मन के अपराध छेमा करे जाथे, अऊ जऊन मन के पाप तोपे जाथे।
ROM 4:8 धइन अय ओ मनखे, जेकर पाप के हिसाब परभू ह नइं करय।”
ROM 4:9 ये धइन कहई—का सिरिप खतना करइयामन बर अय, या फेर बिगर खतना करइयामन बर घलो? हमन कहिथन कि अब्राहम के बिसवास ह ओकर बर धरमीपन गने गीस।
ROM 4:10 तब ओह कोन दसा म धरमी गने गीस? ओकर खतना के बाद या फेर ओकर खतना के पहिली? खतना के बाद नइं, पर खतना के पहिली ओह धरमी गने गीस।
ROM 4:11 अब्राहम के खतना ह ओकर धरमीपन के एक चिनहां या मुहर के रूप म रिहिस, पर ओह अपन बिसवास के कारन धरमी ठहिराय गीस, जब ओह बिगर खतना के दसा म रिहिस। एकरसेति, ओह ओ जम्मो झन के ददा ए, जऊन मन बिगर खतना करवाय बिसवास करथें, अऊ ये किसम ले ओमन घलो धरमी ठहिरथें।
ROM 4:12 अऊ ओह ओ खतना करइयामन के घलो ददा ए, जऊन मन न सिरिप खतना कराय हवंय, पर ओ बिसवास के रसता म चलथें, जऊन म हमर ददा अब्राहम ह अपन खतना के पहिली चलिस।
ROM 4:13 जब परमेसर ह अब्राहम अऊ ओकर बंस ले परतिगियां करिस कि ओमन संसार के वारिस होहीं, त येह मूसा के कानून के दुवारा नइं मिलिस, पर येह अब्राहम के बिसवास के धरमीपन के दुवारा मिलिस।
ROM 4:14 जऊन मन कानून के पालन करथें, यदि ओमन वारिस अंय, त फेर बिसवास ह बिन मतलब के अय अऊ परतिगियां ह बेकार अय।
ROM 4:15 काबरकि कानून ह परमेसर के कोरोध ला पईदा करथे। अऊ जिहां कानून नइं ए, उहां कानून ला माने के सवाल ही नइं ए।
ROM 4:16 एकरसेति, परतिगियां ह बिसवास ऊपर अधारित हवय, ताकि येह अनुग्रह के दुवारा होवय अऊ अब्राहम के जम्मो संतानमन येला जरूर पावंय, अऊ न सिरिप ओमन जऊन मन कानून के पालन करथें, पर ओमन घलो पावंय जऊन मन अब्राहम के सहीं बिसवास करथें। ओह हमन जम्मो झन के ददा अय।
ROM 4:17 जइसने कि परमेसर के बचन म लिखे हवय: “मेंह तोला बहुंते जाति के मनखेमन के ददा ठहिराय हंव।” अब्राहम ह परमेसर के नजर म हमर ददा अय; ओ परमेसर जेकर ऊपर अब्राहम ह बिसवास करिस, ओ परमेसर जऊन ह मुरदामन ला जियाथे अऊ ओ चीजमन ला बनाथे, जेमन के असतित्व नइं ए।
ROM 4:18 अब्राहम ह निरासा म घलो आसा रखके बिसवास करिस अऊ एकरसेति, ओह बहुंते जाति के मनखेमन के ददा बन गीस, जइसने कि परमेसर के बचन म ओकर बारे म ये कहे गे हवय, “तोर संतान ह अइसने होही।”
ROM 4:19 अब्राहम ह करीब एक सौ साल के रिहिस, तभो ले ओह अपन मरे सहीं सरीर अऊ सारा के बांझपन ला जानके घलो अपन बिसवास म कमजोर नइं होईस।
ROM 4:20 ओह अपन बिसवास म नइं डगमगाईस अऊ परमेसर के परतिगियां के बारे म ओह संदेह नइं करिस। पर ओह अपन बिसवास म मजबूत होईस अऊ परमेसर के महिमा करिस।
ROM 4:21 अऊ ओह पूरा जानत रिहिस कि जऊन बात के परतिगियां परमेसर ह करे हवय, ओला पूरा करे के ओह सामर्थ रखथे।
ROM 4:22 एकरसेति ये बात ह ओकर बर धरमीपन गने गीस।
ROM 4:23 “ओह धरमी माने गीस”, ये बचन ह सिरिप ओकरे बर ही नइं लिखे गीस,
ROM 4:24 पर हमर बर घलो। परमेसर ह हमन ला घलो धरमी गनही, जऊन मन ओकर ऊपर बिसवास करथन, जऊन ह हमर परभू यीसू ला मरे म ले जियाईस।
ROM 4:25 यीसू ह हमर पाप के खातिर मार डारे गीस अऊ हमर सही नियाय बर ओला मरे म ले जियाय गीस।
ROM 5:1 एकरसेति, जब हमन बिसवास के दुवारा सही ठहिराय गे हवन, त हमर अपन परभू यीसू मसीह के जरिये परमेसर के संग सांति हवय।
ROM 5:2 मसीह के जरिये बिसवास के दुवारा हमन ये अनुग्रह ला पाय हवन, जऊन म हमन अब रहिथन। अऊ हमन ये आसा म आनंद मनाथन कि हमन परमेसर के महिमा के भागी होबो।
ROM 5:3 सिरिप एही भर नइं, पर हमन दुख-पीरा म घलो आनंद मनाथन, काबरकि हमन जानथन कि दुख-पीरा ले सहनसीलता,
ROM 5:4 सहनसीलता ले बने चालचलन अऊ बने चालचलन ले आसा पईदा होथे।
ROM 5:5 अऊ आसा ह हमन ला निरास नइं करय, काबरकि परमेसर ह हमन ला पबितर आतमा दे हवय, अऊ ये पबितर आतमा के जरिये ओह अपन मया ला हमर हिरदय म डारे हवय।
ROM 5:6 जब हमन निरबल ही रहेंन, तभे सही समय म मसीह ह भक्तिहीन मनखेमन बर मरिस।
ROM 5:7 येह मुसकुल अय कि एक धरमी मनखे बर कोनो मरय, सायद ये हो सकथे कि एक बने मनखे बर कोनो मरे के हिम्मत करय।
ROM 5:8 पर परमेसर ह हमर बर अपन मया ला ये किसम ले देखाथे: जब हमन पापी ही रहेंन, तभे मसीह ह हमर बर मरिस।
ROM 5:9 जब हमन मसीह के लहू के कारन सही ठहिराय गे हवन, त फेर ओकर दुवारा हमन परमेसर के कोरोध ले काबर नइं बांचबो?
ROM 5:10 काबरकि जब हमन परमेसर के बईरी रहेंन, त ओकर बेटा के मिरतू के दुवारा ओकर संग हमर मेल-मिलाप होईस, त फेर मेल-मिलाप होय के बाद, मसीह के जिनगी के दुवारा हमन उद्धार काबर नइं पाबो?
ROM 5:11 सिरिप एहीच नइं, पर हमन परमेसर म घलो, हमर परभू यीसू मसीह के जरिये आनंद मनाथन, जेकर दुवारा अब परमेसर के संग हमर मेल-मिलाप होय हवय।
ROM 5:12 जइसने कि एक मनखे के दुवारा पाप ह संसार म आईस, अऊ पाप के दुवारा मिरतू आईस, अऊ ये किसम ले मिरतू ह जम्मो मनखे ऊपर बगर गीस, काबरकि जम्मो झन पाप करिन।
ROM 5:13 मूसा के कानून ला देय जाय के पहिली, पाप ह संसार म रिहिस; पर जिहां कानून नइं ए, उहां पाप नइं गने जावय।
ROM 5:14 तभो ले आदम ले लेके मूसा तक मिरतू ह जम्मो मनखे ऊपर आईस, इहां तक कि ओमन ऊपर घलो मिरतू आईस, जऊन मन आदम सहीं हुकूम ला टोरे के पाप नइं करे रिहिन। आदम ह ओ मनखे के एक नमूना रिहिस, जऊन ह अवइया रहय।
ROM 5:15 पर परमेसर के बरदान ह पाप के सहीं नो हय। काबरकि यदि एक मनखे के पाप के कारन बहुंते झन मरिन, त परमेसर के अनुग्रह अऊ बरदान ह बहुंते मनखेमन ऊपर बहुंतायत ले आईस। अऊ ये बरदान ह एक मनखे याने कि यीसू मसीह के अनुग्रह के दुवारा आईस।
ROM 5:16 परमेसर के बरदान अऊ एक मनखे के पाप के परतिफल एक सहीं नो हय। एक पाप के पाछू परमेसर के फैसला आईस अऊ येह दंड लानिस, पर बहुंत पाप होय के पाछू, बरदान आईस अऊ येह नियाय लानिस।
ROM 5:17 काबरकि यदि एक मनखे के पाप के कारन मिरतू ह ओ एक मनखे के दुवारा राज करिस, त जऊन मन परमेसर के अधिकाधिक अनुग्रह अऊ धरमीपन के बरदान ला बहुंतायत म पाईन, ओमन एक मनखे याने कि यीसू मसीह के जरिये जिनगी म जरूर राज करहीं।
ROM 5:18 एकरसेति, जइसने एक पाप ह जम्मो मनखेमन बर दंड के कारन बनिस, वइसनेच धरमीपन के एक काम ह घलो नियाय दीस अऊ ओह जम्मो मनखेमन बर जिनगी लानिस।
ROM 5:19 जइसने एक मनखे के हुकूम नइं माने के कारन बहुंते मनखेमन पापी ठहिरिन, वइसनेच एक मनखे के हुकूम माने के कारन बहुंते मनखेमन धरमी ठहिरहीं।
ROM 5:20 मूसा के कानून ह दिये गीस, ताकि पाप ह बढ़य। पर जिहां पाप अधिक होईस, उहां अनुग्रह ओकर ले अऊ जादा होईस,
ROM 5:21 ताकि जइसने पाप ह मिरतू के दुवारा राज करिस, वइसने परमेसर के अनुग्रह ह घलो धरमीपन के दुवारा राज करय, कि यीसू मसीह हमर परभू के दुवारा हमन ला सदाकाल के जिनगी मिलय।
ROM 6:1 तब हमन का कहन? का हमन पाप करतेच रहन ताकि अनुग्रह अऊ होवय?
ROM 6:2 बिलकुल नइं! हमन पाप खातिर मर गे हवन; त फेर हमन येमा अऊ कइसने जिनगी बीता सकथन?
ROM 6:3 का तुमन नइं जानव कि हमन जम्मो झन जऊन मन मसीह यीसू के बतिसमा ले हवन, त हमन ओकर मिरतू के बतिसमा ले हवन?
ROM 6:4 एकरसेति, हमन मिरतू के बतिसमा के दुवारा मसीह के संग गड़ियाय गेंन ताकि जइसने मसीह ह ददा के महिमा के दुवारा मरे म ले जी उठिस, वइसने हमन घलो एक नवां जिनगी जीयन।
ROM 6:5 यदि हमन यीसू के मिरतू म ओकर संग एक हो गे हवन, त निस्चित रूप ले, ओकर जी उठे के समानता म घलो हमन एक हो जाबो।
ROM 6:6 हमन जानथन कि हमर पुराना सुभाव मसीह के संग कुरूस ऊपर चघाय गे हवय, ताकि पाप के देहें ह नास हो जावय, अऊ हमन फेर पाप के गुलाम झन होवन।
ROM 6:7 काबरकि जऊन ह मर गीस, ओह पाप ले मुक्त हो गीस।
ROM 6:8 यदि हमन मसीह के संग मर गेंन, त हमन ला बिसवास हवय कि हमन ओकर संग जीयबो घलो।
ROM 6:9 काबरकि हमन जानथन कि जब मसीह ह मरे म ले जी उठिस, त ओह अऊ कभू नइं मरय। ओकर ऊपर मिरतू के अऊ कोनो अधिकार नइं ए।
ROM 6:10 जऊन मिरतू ओह मरिस, त ओह पाप बर एकेच बार जम्मो झन खातिर मर गीस। पर जऊन जिनगी ओह जीयथे, ओह परमेसर बर जीयथे।
ROM 6:11 ओही किसम ले, तुमन घलो अपनआप ला पाप बर मरे समझव, पर मसीह यीसू म परमेसर बर जीयत समझव।
ROM 6:12 एकरसेति, पाप ला अपन नासमान देहें ऊपर अधिकार झन करन देवव अऊ तुमन एकर खराप ईछा ला झन मानव।
ROM 6:13 अपन देहें के कोनो अंग ला एक साधन के रूप म अधरमी काम करे बर पाप ला झन सऊंपव, पर अपनआप ला मरे म ले जीयत जानके परमेसर ला सऊंप देवव अऊ अपन देहें के अंगमन ला धरमी काम करे बर ओला देय दव।
ROM 6:14 तब पाप के परभूता तुम्हर ऊपर नइं होवय, काबरकि तुमन मूसा के कानून के अधीन नइं, पर परमेसर के अनुग्रह के अधीन हवव।
ROM 6:15 त का होईस? का हमन पाप करन काबरकि हमन मूसा के कानून के अधीन नइं पर अनुग्रह के अधीन म हवन? बिलकुल नइं!
ROM 6:16 का तुमन नइं जानव कि जब तुमन अपनआप ला गुलाम के रूप म, जेकर हुकूम माने बर सऊंप देथव, त तुमन ओकर गुलाम अव, जेकर हुकूम तुमन मानथव—चाहे पाप के गुलाम, जेकर अन्त मिरतू अय, या फेर परमेसर के हुकूम माने के गुलाम, जेकर अन्त धरमीपन अय।
ROM 6:17 पर परमेसर के धनबाद होवय कि हालाकि एक समय तुमन पाप के गुलाम रहेव, पर अब तुमन जम्मो हिरदय ले परमेसर के उपदेस के मनइया हो गे हवव, जेकर बर तुमन ला सऊंपे गे हवय।
ROM 6:18 तुमन ला पाप के गुलामी ले छोंड़ाय गे हवय अऊ तुमन धरमीपन के गुलाम हो गे हवव।
ROM 6:19 तुम्हर सुभाविक कमजोरी के कारन मेंह मनखे के रीति म गोठियावत हंव। एक समय तुमन अपन देहें के अंगमन ला असुधता अऊ बढ़त कुकरम के गुलाम बना दे रहेव; पर अब अपन सरीर के अंगमन ला पबितरता बर धरमीपन के गुलाम बनावव।
ROM 6:20 जब तुमन पाप के गुलाम रहेव, त तुमन धरमीपन के अधीन नइं रहेव।
ROM 6:21 जऊन बातमन ले तुमन अब लजाथव, ओ बातमन ले तुमन ला पहिली का फायदा होईस? ओ बातमन के नतीजा तो मिरतू अय।
ROM 6:22 पर अब तुमन पाप ले छोंड़ाय गे हवव अऊ परमेसर के गुलाम बन गे हवव। एकर ले जऊन फायदा तुमन ला मिलथे, ओह पबितरता अय, अऊ एकर नतीजा परमेसर के संग सदाकाल के जिनगी अय।
ROM 6:23 काबरकि पाप के मजदूरी त मिरतू अय, पर परमेसर के बरदान हमर परभू मसीह यीसू म सदाकाल के जिनगी अय।
ROM 7:1 हे भाईमन! का तुमन नइं जानव, मेंह ओमन ला कहत हंव, जऊन मन मूसा के कानून ला जानथें—कि जब तक मनखे ह जीयत रहिथे, तब तक ओकर ऊपर कानून के अधिकार रहिथे?
ROM 7:2 उदाहरन के रूप म—एक बिहाता माईलोगन कानून के दुवारा अपन घरवाला ले बंधे रहिथे जब तक कि ओकर घरवाला जीयत रहिथे, पर यदि ओकर घरवाला ह मर जावय, त ओ माईलोगन ह बिहाव के कानून ले छूट जाथे।
ROM 7:3 यदि ओ माईलोगन ह अपन घरवाला के जीयत-जीयत, कोनो आने मनखे ले बिहाव कर लेथे, त ओला छिनार कहे जाही। पर यदि ओकर घरवाला ह मर जावय, त ओ माईलोगन ह कानून के बंधना ले छूट जाथे। तब यदि ओह कोनो आने मनखे ले बिहाव घलो कर लेथे, तभो ले ओला छिनार नइं कहे जावय।
ROM 7:4 अइसनेच, हे भाईमन हो! तुमन घलो मसीह के देहें के जरिये कानून बर मर गे हवव, ताकि ओ आने के हो जावव, जऊन ह मरे म ले जी उठिस कि हमन परमेसर बर फर लानन।
ROM 7:5 जब हमन हमर पापमय देहें के अधीन रहेंन, त पापमय लालसा कानून के दुवारा पईदा होवय अऊ हमर देहें म काम करय, जेकर परतिफल मिरतू रिहिस।
ROM 7:6 पर अब हमन कानून ले छूट गे हवन, अऊ जेकर बंधना म हमन रहेंन, ओकर बर मर गे हवन, ताकि लिखित कानून के पुराना रीति म नइं, पर पबितर आतमा के नवां रीति के मुताबिक सेवा करन।
ROM 7:7 तब हमन का कहन? का मूसा के कानून ह पाप अय? बिलकुल नइं! वास्तव म, कानून के बिगर, मेंह पाप ला नइं जाने रहितेंव। काबरकि यदि कानून ह नइं कहितिस, “लालच झन करव”, त लालच का ए, मेंह नइं जानतेंव।
ROM 7:8 पर पाप ह हुकूम के दुवारा दिये गय मऊका ला लीस अऊ मोर भीतर म जम्मो किसम के लालच ला पईदा करिस, काबरकि बिगर कानून के पाप ह मुरदा अय।
ROM 7:9 एक समय, मेंह बिगर कानून के जीयत रहेंव, पर जब हुकूम ह आईस, त पाप ह जीवित हो गीस अऊ मेंह मर गेंव।
ROM 7:10 अऊ ओही हुकूम जऊन ला जिनगी बर लाने गे रिहिस, मोर बर मिरतू के कारन बनिस।
ROM 7:11 काबरकि पाप ह हुकूम के दुवारा दिये गय मऊका ला पाके, मोला धोखा दीस, अऊ हुकूम के जरिये मोला मार डारिस।
ROM 7:12 एकरसेति, कानून ह पबितर अय, अऊ हुकूम ह घलो पबितर, धरमी अऊ बने अय।
ROM 7:13 त कानून जऊन ह कि बने अय, का ओह मोर बर मिरतू के कारन होईस? बिलकुल नइं! येह एकरसेति होईस ताकि पाप ह पाप के रूप म पहिचाने जावय। पाप ह ओकर जरिये मोर बर मिरतू लानिस, जऊन ह बने अय, ताकि हुकूम के दुवारा पाप ह बहुंते पापमय ठहिरय।
ROM 7:14 हमन जानथन कि मूसा के कानून ह आतमिक अय; पर मेंह संसारिक मनखे अंव अऊ गुलाम के रूप म पाप के हांथ म बेचे गे हवंव।
ROM 7:15 जऊन काम मेंह करथंव, मेंह ओला नइं समझंव। काबरकि जऊन बुता ला, मेंह करे बर चाहथंव, ओला नइं करंव, पर जऊन चीज ले मोला घिन आथे, ओहीच ला करथंव।
ROM 7:16 अऊ यदि मेंह ओ बुता ला करथंव, जऊन ला मेंह नइं चाहंव, त मेंह ये बात ला मान लेथंव कि मूसा के कानून ह सही अय।
ROM 7:17 त अइसने दसा म, ओ चीज ला करइया, सही म मेंह नो हंव, पर जऊन पाप मोर म बसे हवय, ओह अय।
ROM 7:18 मेंह जानथंव कि मोर म याने कि मोर पापी सरीर म एको ठन बने चीज नइं ए। काबरकि जऊन ह सही अय, ओला करे के ईछा तो मोर म हवय, पर ओला मेंह नइं करंव।
ROM 7:19 काबरकि जऊन भलई करे के मेंह ईछा करथंव, ओला नइं करंव, पर जऊन बुरई के ईछा मेंह नइं करंव, ओहीच ला करते रहिथंव।
ROM 7:20 एकरसेति यदि मेंह ओ बुता ला करथंव, जऊन ला मेंह नइं चाहंव, त ओकर करइया मेंह नो हंव, पर ओकर करइया ओ पाप ए, जऊन ह मोर म बसे हवय।
ROM 7:21 तब मेंह ये कानून ला काम करत पाथंव: जब मेंह भलई करे चाहथंव, तभेच बुरई ह मोर करा आथे।
ROM 7:22 मेंह अपन अंतस म परमेसर के कानून ले खुस रहिथंव,
ROM 7:23 पर मेंह अपन देहें म एक आने कानून ला काम करत देखथंव, जऊन ह मोर बुद्धि के कानून ले लड़थे अऊ येह मोला पाप के कानून के गुलाम बनाथे, जऊन ह मोर देहें के अंग म बसे हवय।
ROM 7:24 मोर कइसने दयनीय दसा हवय! मोला कोन ह मिरतू के ये देहें ले छोंड़ाही?
ROM 7:25 परमेसर के धनबाद होवय, जऊन ह मोला हमर परभू यीसू मसीह के जरिये छुड़ाथे। एकरसेति तब, मेंह खुद अपन मन म परमेसर के कानून के गुलाम अंव, पर अपन पापमय सुभाव म पाप के कानून ला मानथंव।
ROM 8:1 एकरसेति, अब जऊन मन मसीह यीसू के अंय, ओमन बर दंड के हुकूम नइं होवय।
ROM 8:2 काबरकि, जिनगी देवइया पबितर आतमा के कानून ह मसीह यीसू के दुवारा मोला, पाप अऊ मिरतू के कानून ले सुतंतर कर दे हवय।
ROM 8:3 काबरकि जऊन बुता ला मूसा के कानून ह हमर पापी सुभाव के कारन कमजोर होके नइं कर सकिस; ओ बुता ला परमेसर ह अपन खुद के बेटा ला पठोके करिस, जऊन ह पापी मनखे के रूप म संसार म आईस अऊ अपनआप ला हमर खातिर पाप बलि के रूप म चघाईस। अऊ ये किसम ले परमेसर ह पापी मनखे म पाप ला सजा दीस,
ROM 8:4 ताकि मूसा के कानून के धरमीपन के मांग ह हमन म पूरा होवय, जऊन मन पापी सुभाव के मुताबिक नइं, पर पबितर आतमा के मुताबिक जिनगी बिताथन।
ROM 8:5 जऊन मन सारीरिक ईछा के मुताबिक जिनगी बिताथें, ओमन सरीर के बात म अपन चित लगाथें, पर जऊन मन पबितर आतमा के मुताबिक चलथें, ओमन पबितर आतमा के बात म चित लगाथें।
ROM 8:6 सरीर के ऊपर चित लगई ह मिरतू अय, पर पबितर आतमा के ऊपर चित लगई ह हमन ला जिनगी अऊ सांति देथे,
ROM 8:7 काबरकि जऊन ह सरीर के बात म चित लगाथे, ओह परमेसर ले बईरता रखथे। ओह परमेसर के कानून ला नइं मानय; वास्तव म ओह अइसने कर ही नइं सकय।
ROM 8:8 जऊन मन अपन सरीर के बात ला मानथें, ओमन परमेसर ला खुस नइं कर सकंय।
ROM 8:9 पर यदि परमेसर के आतमा ह तुमन म बसथे, त तुमन पबितर आतमा के चलाय चलथव, अपन सरीर के चलाय नइं। अऊ यदि काकरो करा मसीह के आतमा नइं ए, त ओह मसीह के नो हय।
ROM 8:10 पर यदि मसीह तुम्हर जिनगी म हवय, त तुम्हर सरीर ह पाप के कारन मर गे हवय, पर तुम्हर आतमा ह धरमीपन के कारन जीयत हवय।
ROM 8:11 परमेसर जऊन ह यीसू ला मरे म ले जियाईस, यदि ओकर आतमा तुमन म रहिथे, त ओ जऊन ह मसीह ला मरे म ले जियाईस, ओह तुम्हर नासमान सरीर ला घलो अपन आतमा के दुवारा जिनगी दीही अऊ ये आतमा ह तुमन म बसे हवय।
ROM 8:12 एकरसेति, हे भाईमन हो! हमर बर ये जरूरी अय कि हमन अपन सरीर के सुभाव के मुताबिक जिनगी झन बितावन।
ROM 8:13 काबरकि यदि तुमन सरीर के सुभाव के मुताबिक जिनगी बिताथव, त मरहू, पर यदि पबितर आतमा के दुवारा तुमन सरीर के काममन ला मारथव, त तुमन जीयत रहिहू।
ROM 8:14 काबरकि जऊन मन परमेसर के आतमा के अगुवई म चलथें, ओमन परमेसर के संतान अंय।
ROM 8:15 तुमन ला गुलामी के आतमा नइं मिले हवय कि तुमन फेर डर म पड़व; पर तुमन ला पबितर आतमा मिले हवय, जऊन ह तुमन ला परमेसर के संतान बनाथे। अऊ ओकरे दुवारा हमन परमेसर ला ये कहिके पुकारथन, “हे अब्बा, हे ददा!”
ROM 8:16 पबितर आतमा ह खुद हमर आतमा के संग गवाही देथे कि हमन परमेसर के संतान अन।
ROM 8:17 अऊ यदि हमन परमेसर के संतान अन, त हमन परमेसर के वारिस अऊ मसीह के संगी वारिस अन; यदि हमन ओकर दुख म भागी होथन, त ओकर महिमा म घलो भागी होबो।
ROM 8:18 मेंह ये समझथंव कि जऊन महिमा हमर ऊपर परगट होही, ओकर तुलना म, हमर अभी के दुख ह कुछू नो हय।
ROM 8:19 ये सिरिस्टी ह बड़े आसा भरे नजर ले परमेसर के संतानमन के परगट होय के बाट जोहथे।
ROM 8:20 काबरकि ये सिरिस्टी ला बेकार कर दिये गीस, अऊ येह एकर खुद के ईछा ले नइं, पर परमेसर के ईछा ले ये आसा म करे गीस
ROM 8:21 कि सिरिस्टी ह खुद बिनास के अपन गुलामी ले छुटकारा पावय अऊ परमेसर के संतानमन के महिमा के सुतंतरता के भागीदार होवय।
ROM 8:22 हमन जानथन कि जम्मो सिरिस्टी ह अभी तक ले छेवारी होय के पीरा सहीं कलहरत हवय।
ROM 8:23 अऊ सिरिप सिरिस्टी ही नइं, पर हमन करा पबितर आतमा के पहिली फर हवय अऊ हमन खुदे भीतरे-भीतर कलहरत हवन, अऊ ये बात के बाट जोहथन कि परमेसर ह हमन ला अपन बेटा के रूप म गोद लीही, याने कि हमन ला हमर सरीर ले छुटकारा दीही।
ROM 8:24 काबरकि ये आसा म हमर उद्धार होय हवय, पर जऊन चीज के हमन आसा करथन, यदि ओह हमन ला दिख जावय, त ओ आसा के अन्त हो जाथे। कोनो मनखे कोनो अइसने चीज के आसा नइं करय, जऊन ह पहिली ले ओकर करा हवय।
ROM 8:25 पर यदि हमन ओ चीज के आसा करथन, जऊन ह हमर करा नइं ए, त हमन धीर धरके ओकर बर बाट जोहथन।
ROM 8:26 ओही किसम ले, पबितर आतमा ह हमर दुरबलता म हमर मदद करथे। हमन नइं जानन कि हमन ला कइसने पराथना करना चाही, पर पबितर आतमा ह खुद अइसने कल्हर-कल्हरके बिनती करथे, जेकर बयान नइं करे जा सकय।
ROM 8:27 अऊ जऊन ह मनखेमन के हिरदय ला जांचथे, ओह जानथे कि पबितर आतमा के का मनसा हवय, काबरकि पबितर आतमा ह परमेसर के मनसा के मुताबिक पबितर मनखेमन बर बिनती करथे।
ROM 8:28 हमन जानथन कि जऊन मन परमेसर ले मया करथें अऊ ओकर ईछा के मुताबिक बलाय गे हवंय, ओमन बर परमेसर ह जम्मो बात म भलई पईदा करथे।
ROM 8:29 काबरकि जऊन मन ला परमेसर ह पहिली ले जानत हवय, ओमन ला ओह चुने घलो हवय कि ओमन ओकर बेटा के सरूप म होवंय अऊ ओकर बेटा ह बहुंते भाईमन म पहिलांत ठहिरय।
ROM 8:30 अऊ जऊन मन ला ओह पहिली ले चुन लीस, ओमन ला ओह बलाईस घलो; अऊ जऊन मन ला ओह बलाईस, ओमन ला धरमी घलो ठहिराईस; अऊ जऊन मन ला ओह धरमी ठहिराईस, ओमन के महिमा घलो करिस।
ROM 8:31 तब एकर बारे म हमन का कहन? यदि परमेसर ह हमर संग हवय, त हमर बिरोधी कोन हो सकथे?
ROM 8:32 जऊन ह अपन खुद के बेटा ला घलो नइं रख छोंड़िस, पर हमन जम्मो के खातिर ओला दे दीस; त ओह हमन ला अपन बेटा संग अऊ जम्मो चीज काबर नइं दीही?
ROM 8:33 ओमन ऊपर कोन दोस लगाही, जऊन मन ला परमेसर ह चुने हवय? येह परमेसर अय, जऊन ह ओमन ला धरमी ठहिराथे।
ROM 8:34 ओह कोन ए, जऊन ह सजा देथे? येह मसीह यीसू अय, जऊन ह मर गीस अऊ एकर बाद मरे म ले जी उठिस अऊ ओह परमेसर के जेवनी हांथ कोति हवय, अऊ हमर बर बिनती घलो करत हवय।
ROM 8:35 तब कोन ह हमन ला मसीह के मया ले अलग कर सकथे? का संकट या बिपत्ति या सतावा या अकाल या गरीबी या जोखिम या तलवार के भय?
ROM 8:36 जइसने कि परमेसर के बचन म लिखे हवय: “तोर बर, हमन दिन भर मिरतू के जोखिम म रहिथन; हमन ओ भेड़ सहीं समझे जाथन, जऊन मन के बध होवइया हवय।”
ROM 8:37 ये जम्मो चीज म, हमन मसीह यीसू के जरिये बिजयी होथन, जऊन ह हमर ले मया करिस।
ROM 8:38 काबरकि मोला पूरा भरोसा हवय कि न तो मिरतू, न जिनगी, न स्वरगदूतमन, न परेत आतमामन, न तो बर्तमान न भविस्य, न कोनो सक्ति,
ROM 8:39 न तो ऊंचई न गहरई अऊ न जम्मो सिरिस्टी म कोनो आने चीज हमन ला परमेसर के मया ले अलग कर सकथे, जऊन ह हमर परभू मसीह यीसू म हवय।
ROM 9:1 मेंह मसीह म होके सच कहत हंव; मेंह लबारी नइं मारत हंव। मोर बिबेक घलो पबितर आतमा म होके गवाही देवत हवय—
ROM 9:2 कि मोला बहुंते दुख हवय अऊ मोर हिरदय ह हमेसा दुख ले भरे हवय।
ROM 9:3 मेंह चाहत रहेंव कि मोर मनखेमन बर जऊन मन मोर खुद के बंस के अंय, ओमन के हित म मेंह खुदे सरापित हो जातेंव अऊ मसीह ले अलग हो जातेंव।
ROM 9:4 ओमन इसरायली मनखे अंय। परमेसर ह ओमन ला गोद लेके बेटा बनाईस; ओमन के ऊपर महिमा परगट करिस; ओमन के संग करार करिस; ओमन ला मूसा के कानून दीस। ओमन ला बताईस कि मंदिर म ओकर अराधना कइसने करे जावय अऊ ओह ओमन ले परतिगियां करिस।
ROM 9:5 कुल के मुखियामन येमन के पुरखा रिहिन अऊ मसीह ह मनखे के रूप म येमन के बंस ले आईस, जऊन ह जम्मो के ऊपर परमेसर अय, ओकर परसंसा सदा होवय! आमीन।
ROM 9:6 अइसने नो हय कि परमेसर के बचन ह सच नइं होईस। काबरकि ओ जम्मो, जऊन मन इसरायल के बंस म जनम ले हवंय, जम्मो के जम्मो इसरायली नो हंय,
ROM 9:7 अऊ ओ जम्मो अब्राहम के संतान नो हंय, जऊन मन ओकर बंस म जनम लीन, काबरकि परमेसर के बचन ह कहिथे, “इसहाक के जरिये तोर बंस ह चलही।”
ROM 9:8 एकर मतलब ये अय कि मनखे के ईछा के मुताबिक जनमे लइकामन परमेसर के संतान नो हंय, पर परमेसर के परतिगियां के मुताबिक जनमे लइकामन सही बंसज समझे जाथें।
ROM 9:9 काबरकि परमेसर के बचन म ये किसम ले परतिगियां के बचन कहे गे हवय, “ठहिराय समय म, मेंह फेर आहूं, अऊ सारा के एक बेटा होही।”
ROM 9:10 अऊ सिरिप अतका ही नइं, पर रिबका के दूनों लइकामन के एके ददा रिहिस, याने कि हमर पुरखा इसहाक।
ROM 9:11 पर जब ओ जुड़वां लइकामन जनमे घलो नइं रिहिन अऊ कुछू भला-बुरा घलो नइं करे रिहिन, ताकि परमेसर के चुनाव के उदेस्य ह बने रहय:
ROM 9:12 येह ओमन के कुछू करम के कारन नइं, पर परमेसर के बुलाहट के कारन होईस—रिबका ला कहे गीस, “बड़खा बेटा ह छोटे के सेवा करही।”
ROM 9:13 जइसने कि परमेसर के बचन म लिखे हवय: “याकूब ले मेंह मया करेंव पर एसाव ला अप्रिय जानेंव।”
ROM 9:14 तब हमन का कहन? का परमेसर ह अनियाय करथे? बिलकुल नइं!
ROM 9:15 काबरकि ओह मूसा ले कहिस, “जेकर ऊपर मेंह दया करे चाहंव, ओकर ऊपर दया करहूं, अऊ जेकर ऊपर मेंह तरस खाय चाहंव, ओकर ऊपर तरस खाहूं।”
ROM 9:16 एकरसेति येह मनखे के ईछा या काम के ऊपर निरभर नइं करय, पर परमेसर के दया ऊपर निरभर करथे।
ROM 9:17 काबरकि परमेसर के बचन म फिरौन राजा ला ये कहे गे हवय, “मेंह तोला एकरसेति राजा बनाके उठाय हवंव ताकि मेंह तोर ऊपर अपन सामर्थ ला देखावंव अऊ धरती भर म मोर नांव के परचार होवय।”
ROM 9:18 एकरसेति परमेसर ह जेकर ऊपर दया करे चाहथे, ओकर ऊपर दया करथे, अऊ जेकर हिरदय ला कठोर करे चाहथे, ओला कठोर कर देथे।
ROM 9:19 तब तुमन मोला कहिहू, “त फेर परमेसर ह मनखे ऊपर काबर दोस लगाथे? कोन ह ओकर ईछा के बिरोध कर सकथे?”
ROM 9:20 हे मनखे! तेंह कोन अस कि परमेसर ला जबाब देथस? का गढ़े गे चीज ह अपन गढ़इया ला कह सकथे, “तेंह मोला अइसने काबर बनाय हवस?”
ROM 9:21 का कुम्हार ला ये अधिकार नइं ए कि माटी के एके लोंदा ले, ओह कुछू बरतन ला बिसेस उपयोग खातिर अऊ कुछू बरतन ला सधारन उपयोग खातिर बनावय?
ROM 9:22 येह कोनो अचरज के बात नो हय, यदि परमेसर ह अपन कोरोध अऊ सक्ति देखाय के ईछा करिस अऊ ओमन ला बड़े धीर धरके सहिस जऊन मन कोरोध के पात्र रिहिन अऊ बिनास खातिर बनाय गे रिहिन।
ROM 9:23 येह कोनो अचरज के बात नो हय, यदि परमेसर ह ये करे के दुवारा, अपन बड़े महिमा के धन ला ओमन ला देखाय चाहिस, जऊन मन दया के पात्र रिहिन अऊ महिमा के खातिर पहिली ले तियार करे गे रिहिन।
ROM 9:24 अऊ त अऊ हमन ला घलो ओह बलाईस, न सिरिप यहूदी जात म ले, पर आनजात म ले घलो बलाईस।
ROM 9:25 जइसने कि ओह होसे के किताब म कहिथे: “जऊन मन मोर मनखे नो हंय, ओमन ला मेंह अपन मनखे कहिहूं; अऊ जऊन ह मोर मयारू नो हय, ओला मेंह अपन मयारू कहिहूं,”
ROM 9:26 अऊ, “जऊन ठऊर म ओमन ला ये कहे गे रिहिस, ‘तुमन मोर मनखे नो हव,’ ओही जगह म, ओमन ला जीयत परमेसर के संतान कहे जाही।”
ROM 9:27 यसायाह अगमजानी ह इसरायलीमन के बारे म पुकारके कहिथे, “हालाकि इसरायलीमन के गनती ह समुंदर के बालू सहीं होही, पर ओमा ले थोरकन मनखे ही बचाय जाहीं।
ROM 9:28 काबरकि परभू ह अपन फैसला ला धरती म जल्दी अऊ कड़ई से लागू करही।”
ROM 9:29 जइसने कि यसायाह अगमजानी ह पहिली कहे रिहिस: “यदि सर्वसक्तिमान परभू ह हमर बर बंस ला नइं छोंड़े होतिस, त हमन घलो सदोम अऊ अमोरा सहरमन सहीं पूरा नास हो गे रहितेंन।”
ROM 9:30 तब, हमन का कहन? कि आनजात के मनखे जऊन मन परमेसर के धरमीपन के खोज नइं करत रिहिन, ओमन धरमीपन ला पा गीन, याने कि ओ धरमीपन जऊन ह बिसवास करे के दुवारा मिलथे;
ROM 9:31 पर इसरायलीमन ओ धरमीपन के खोज मूसा के कानून ला माने के आधार म करिन, पर ओ धरमीपन ओमन ला नइं मिलिस।
ROM 9:32 ओमन ला काबर नइं मिलिस? काबरकि ओमन ओ धरमीपन के खोज बिसवास के दुवारा नइं, पर अपन काम के आधार म करिन। ओमन ठोकर के पथरा म हपट के गिरिन।
ROM 9:33 जइसने कि परमेसर के बचन म लिखे हवय: “देखव, मेंह सियोन म एक ठन पथरा मढ़ावत हवंव, जऊन ह मनखेमन के लड़खड़ाय के अऊ एक चट्टान, जऊन ह ओमन के गिरे के कारन बनही, पर जऊन ह ओकर ऊपर बिसवास करथे, ओह कभू लज्जित नइं होही।”
ROM 10:1 हे भाईमन हो! इसरायलीमन बर मोर दिल के ईछा अऊ परमेसर ले पराथना हवय कि ओमन उद्धार पावंय।
ROM 10:2 काबरकि मेंह ओमन बर गवाही दे सकथंव कि ओमन के हिरदय म परमेसर खातिर उत्साह हवय, पर ओमन के उत्साह ह गियान के ऊपर अधारित नइं ए।
ROM 10:3 ओमन ओ बात ला नइं जानिन कि कइसने परमेसर ह मनखे ला धरमी बनाथे, पर ओमन मूसा के कानून ला माने के दुवारा खुद धरमी बने के कोसिस करिन। ओमन परमेसर के मुताबिक धरमी बने नइं चाहिन।
ROM 10:4 मसीह ह मूसा के कानून के अन्त अय, ताकि जऊन कोनो ओकर ऊपर बिसवास करय, ओह परमेसर के नजर म धरमी ठहिरय।
ROM 10:5 कानून ला माने के दुवारा जऊन धरमीपन होथे, ओकर बारे म मूसा ह ये किसम ले लिखथे, “जऊन मनखे ह कानूनमन के पालन करही, ओह ओमन के दुवारा जीयत रहिही।”
ROM 10:6 पर जऊन धरमीपन ह बिसवास ऊपर अधारित अय, ओकर बारे म ये कहे गे हवय, “तुमन अपन हिरदय म ये झन कहव, कि कोन ह अकास ऊपर जाही।” (कि ओह मसीह ला उहां ले उतार लानय)
ROM 10:7 या अइसने घलो झन कहव, “गहरई म कोन उतरही।” (कि ओह मसीह ला मरे म ले जियाके ऊपर लानय)।
ROM 10:8 पर येह का कहिथे? “परमेसर के बचन ह तुम्हर लकठा म हवय; येह तुम्हर मुहूं म अऊ तुम्हर मन म हवय।” येह ओही बिसवास के बचन अय, जेकर परचार हमन करथन।
ROM 10:9 यदि तेंह अपन मुहूं ले कबूल करथस कि यीसू ह परभू अय अऊ अपन हिरदय म बिसवास करथस कि परमेसर ह ओला मरे म ले जियाईस, त तेंह उद्धार पाबे।
ROM 10:10 काबरकि मनखे ह अपन हिरदय म बिसवास करे के दुवारा परमेसर के नजर म सही ठहिरथे अऊ मुहूं ले कबूल करे के दुवारा उद्धार पाथे।
ROM 10:11 परमेसर के बचन ह ये कहिथे, “जऊन कोनो ओकर ऊपर बिसवास करही, ओह कभू लज्जित नइं होही।”
ROM 10:12 यहूदी अऊ आनजात म कोनो फरक नइं ए। ओही परभू ह जम्मो झन के परभू अय, अऊ ओह ओमन ला बहुंते आसीस देथे, जऊन मन ओकर नांव लेथें,
ROM 10:13 काबरकि “हर एक, जऊन ह परभू के नांव लीही, ओह उद्धार पाही।”
ROM 10:14 पर जब ओमन ओकर ऊपर बिसवास नइं करे हवंय, त ओकर नांव कइसने ले सकथें? अऊ ओमन ओकर ऊपर कइसने बिसवास कर सकथें, जब ओमन ओकर बारे म कभू नइं सुने हवंय? अऊ ओमन ओकर बारे म कइसने सुनंय, जब तक कि कोनो ओमन ला नइं बतावय?
ROM 10:15 अऊ ओमन ओकर परचार कइसने कर सकथें, जब तक ओमन ला पठोय नइं जावय? जइसने कि परमेसर के बचन म लिखे हवय, “कतेक सुघर होथे ओमन के अवई ह, जऊन मन के पांव सुघर संदेस लेके आथें।”
ROM 10:16 पर जम्मो इसरायलीमन सुघर संदेस ला नइं मानिन। यसायाह अगमजानी ह कहे हवय, “हे परभू! कोन ह हमर संदेस ऊपर बिसवास करिस?”
ROM 10:17 येह साफ ए कि बिसवास ह संदेस के सुने ले होथे, अऊ संदेस के सुनई ह मसीह के बचन ले होथे।
ROM 10:18 पर मेंह पुछत हंव: का ओमन नइं सुनिन? ओमन जरूर सुनिन: “ओमन के अवाज ह जम्मो धरती म, अऊ ओमन के बचन ह संसार के छोर तक हबर गे हवय।”
ROM 10:19 मेंह फेर पुछत हंव—का इसरायलीमन नइं समझिन? पहिली मूसा ह कहिस, “मेंह तुमन म ओमन के दुवारा जलन पईदा करहूं, जेमन एक जाति नो हंय; मेंह तुमन ला एक अइसे जाति के दुवारा गुस्सा देवाहूं, जेमन म समझ नइं ए।”
ROM 10:20 यसायाह अगमजानी ह बहुंत हिम्मत के संग कहिथे, “जऊन मन मोला नइं खोजत रिहिन, ओमन मोला पा गीन; जऊन मन मोर बारे म नइं पुछिन, ओमन ऊपर मेंह अपनआप ला परगट करेंव।”
ROM 10:21 पर इसरायलीमन के बारे म, ओह कहिथे, “मेंह दिन भर अइसने मनखेमन कोति अपन हांथ ला पसारे रहेंव, जऊन मन हुकूम मनइया नो हंय अऊ ढीठ अंय।”
ROM 11:1 तब मेंह ये पुछत हंव: का परमेसर ह अपन मनखेमन ला तियाग दीस? बिलकुल नइं! मेंह खुद एक इसरायली मनखे अंव, अऊ मेंह अब्राहम के बंस अऊ बिनयामीन के गोत्र के अंव।
ROM 11:2 परमेसर ह अपन मनखेमन ला नइं तियागे हवय, जऊन मन ला ओह सुरू ले चुनिस। का तुमन नइं जानव कि परमेसर के बचन ह एलियाह अगमजानी के बारे म का कहिथे? ओह इसरायलीमन के बिरोध म परमेसर ले बिनती करिस:
ROM 11:3 “हे परभू, ओमन तोर अगमजानीमन ला मार डारिन अऊ तोर बेदीमन ला गिरा दे हवंय। सिरिप मेंह भर बांचे हवंव, अऊ ओमन मोला घलो मार डारे के कोसिस म हवंय।”
ROM 11:4 अऊ परमेसर ह ओला का जबाब दीस? ओह कहिस, “मेंह अपन बर सात हजार मनखेमन ला बंचाके रखे हवंव, जऊन मन बाल देवता के आघू म माड़ी नइं टेके हवंय।”
ROM 11:5 एही किसम ले, ये समय म घलो मनखेमन के एक बांचे भाग हवय, जेमन ला परमेसर के अनुग्रह के दुवारा चुने गे हवय।
ROM 11:6 अऊ यदि येह परमेसर के अनुग्रह ले होईस, त फेर येह बने करम करे के आधार म नो हय। यदि येह बने करम करे के आधार म होतिस, त फेर अनुग्रह के कोनो मतलब नइं होतिस।
ROM 11:7 तब एकर का मतलब ए? इसरायली मनखेमन जेकर खोज म रिहिन, ओह ओमन ला नइं मिलिस, पर ओह चुने गय मनखेमन ला मिलिस। आने मनखेमन के हिरदय ला कठोर करे गीस,
ROM 11:8 जइसने कि परमेसर के बचन म लिखे हवय: “परमेसर ह ओमन ला जड़ के आतमा दे हवय, ओह ओमन ला अइसने आंखी दे हवय, जऊन ह देखय नइं, अऊ अइसने कान दे हवय, जऊन ह सुनय नइं; ओमन के दसा आज तक अइसनेच हवय।”
ROM 11:9 अऊ दाऊद राजा ह कहिथे: “ओमन के जेवन ह ओमन बर फांदा अऊ जाल बन जावय; ओह ओमन बर ठोकर अऊ सजा के कारन बन जावय।
ROM 11:10 ओमन के आंखी म अंधियार छा जावय, ताकि ओमन झन देख सकंय, अऊ ओमन के कनिहां ह हमेसा बर मुड़ जावय।”
ROM 11:11 मेंह फेर पुछत हंव, का इसरायलीमन एकरसेति ठोकर खाईन कि ओमन हमेसा के खातिर गिर पड़ंय? बिलकुल नइं! पर इसरायलीमन के पाप के कारन आनजातमन ला उद्धार मिलिस कि इसरायलीमन ला जलन होवय।
ROM 11:12 यदि इसरायलीमन के पाप ह संसार बर आसीस के धन लानथे, अऊ ओमन के नुकसान ह आनजातमन बर आसीस के कारन बनथे, त फेर जब जम्मो इसरायलीमन परमेसर करा लहुंटके आहीं, त आनजातमन ला अऊ कतेक आसीस मिलही।
ROM 11:13 अब मेंह तुमन ले गोठियावत हंव, आनजातमन हो! जब तक मेंह तुमन खातिर प्रेरित अंव, तब तक मेंह अपन सेवा ला बढ़ावत हंव,
ROM 11:14 ताकि कोनो भी किसम ले, मेंह अपन यहूदी मनखेमन म जलन पईदा करंव अऊ ओमा के कुछू झन के उद्धार होवय।
ROM 11:15 काबरकि यदि ओमन के तियागे जवई ह परमेसर के संग संसार के मेल-मिलाप के कारन बनिस, त ओमन के गरहन करे जवई के मतलब ओमन बर जिनगी होही, जऊन मन मर गे हवंय।
ROM 11:16 यदि पहिली फर के रूप म, परमेसर ला चघाय गुंथे पीसान के कुछू भाग ह पबितर अय, त फेर जम्मो गुंथे पीसान ह घलो पबितर अय, अऊ यदि रूख के जरी ह पबितर अय, त फेर ओ रूख के डारामन घलो पबितर अंय।
ROM 11:17 यदि जैतून रूख के कुछू डारामन ला टोर देय गे हवय; अऊ ओमन के जगह म, तुमन ला जऊन मन जंगली जैतून रूख के पीका सहीं अव, जोड़े गे हवय अऊ तुम्हर पालन-पोसन ओ जैतून रूख के जरी ले होवत हवय, याने कि तुम आनजातमन यहूदीमन के आसीस म भागीदार हो गे हवव,
ROM 11:18 त ओ डारामन ऊपर घमंड झन कर। यदि तेंह घमंड करथस, त ये बात ला सुरता रख कि तेंह जरी ला नइं संभाले हवस, पर जरी ह तोला संभाले हवय।
ROM 11:19 तब तेंह कहिबे, “डारामन ला टोरे गीस ताकि मेंह ओमन के जगह म जोड़े जावंव।”
ROM 11:20 येह सही ए। ओमन ला ओमन के अबिसवास के कारन टोरे गीस, पर तेंह बिसवास के दुवारा ओमा बने हवस। एकरसेति, घमंड झन कर, पर परमेसर के भय मानके चल।
ROM 11:21 काबरकि यदि परमेसर ह यहूदीमन ला नइं छोंड़िस, जऊन मन असली डारा अंय, त ओह तोला घलो नइं छोंड़य।
ROM 11:22 एकरसेति, परमेसर के दया अऊ कठोरता के बारे म सोच। जऊन मन गिर गीन, ओमन ऊपर ओह कठोरता देखाईस, पर तोर ऊपर ओह दया देखाईस, त तेंह ओकर दया म बने रह। नइं तो ओह तोला घलो काटके अलग कर दीही।
ROM 11:23 अऊ यदि ओ यहूदीमन अपन अबिसवास ला छोंड़ देथें, त ओमन घलो जोड़े जाहीं, काबरकि परमेसर करा ओमन ला फेर जोड़े के सामर्थ हवय।
ROM 11:24 जब तुम आनजातमन सुभाव ले जंगली जैतून के डंगाली अव, अऊ सुभाव के उल्टा, तुमन ला काटके असली जैतून रूख म जोड़े गे हवय, त फेर ये यहूदी जऊन मन सुभाविक डंगाली अंय, अपन ही जैतून रूख म काबर अऊ बने ढंग ले जोड़े नइं जाहीं?
ROM 11:25 हे भाईमन हो, अइसन झन होवय कि तुमन घमंडी हो जावव, एकरसेति मेंह चाहत हंव कि तुमन ये भेद ला जानव: जब तक आनजात म ले चुने जम्मो मनखेमन परमेसर करा नइं आ जावंय, तब तक इसरायलीमन के एक भाग ह अइसनेच अपन हिरदय ला कठोर बनाय रखही।
ROM 11:26 अऊ ये किसम ले जम्मो इसरायलीमन उद्धार पाहीं, जइसने परमेसर के बचन म लिखे हवय: “मुक्ति देवइया ह सियोन ले आही; ओह याकूब के बंस ले अभक्ति ला दूरिहा कर दीही।
ROM 11:27 अऊ ओमन के संग मोर ये करार होही, जब मेंह ओमन के पाप ला दूरिहा कर दूहूं।”
ROM 11:28 जहां तक सुघर संदेस के बात ए, त ओमन तुम्हर हित म परमेसर के बईरी अंय; पर जहां तक चुने गय मनखेमन के बात ए, त ओमन अपन कुल के मुखियामन के कारन परमेसर के मयारू अंय।
ROM 11:29 काबरकि जब परमेसर ह कोनो ला बरदान देथे अऊ चुनथे, त ओह अपन बिचार ला फेर नइं बदलय।
ROM 11:30 एक समय रिहिस, जब तुम आनजातमन परमेसर के हुकूम ला नइं मानेव, पर अब यहूदीमन के दुवारा हुकूम नइं माने के कारन, तुम्हर ऊपर परमेसर के दया होईस।
ROM 11:31 तुम्हर ऊपर परमेसर के दया होय के कारन अब यहूदीमन परमेसर के हुकूम नइं मानथें, ताकि ओमन के ऊपर घलो परमेसर के दया होवय।
ROM 11:32 काबरकि परमेसर ह जम्मो मनखेमन ला हुकूम नइं माने के पाप म बांधके रखे हवय ताकि ओह जम्मो झन के ऊपर दया देखावय।
ROM 11:33 अहा! परमेसर के बुद्धि अऊ गियान के धन के गहरई ह कतेक अथाह अय! ओकर सहीं नियाय कोनो नइं कर सकंय, अऊ ओकर काम करे के तरीका ला कोनो नइं जान सकंय!
ROM 11:34 “परभू के मन ला कोन ह जाने हवय? अऊ कोनो ओला सलाह देय के लईक नो हंय।”
ROM 11:35 “कोन ह आज तक परमेसर ला कभू कुछू दे हवय कि परमेसर ह ओला वापिस देवय?”
ROM 11:36 काबरकि जम्मो चीज ह परमेसर ले आय हवय, अऊ ओकर दुवारा बनाय गे हवय अऊ ओकर खातिर बनाय गे हवय। ओकर महिमा सदाकाल तक होवत रहय! आमीन।
ROM 12:1 एकरसेति, हे भाईमन हो! परमेसर के दया के कारन, मेंह तुम्हर ले बिनती करत हंव कि अपन देहें ला जीयत बलिदान के रूप म परमेसर ला दे दव अऊ अपनआप ला निस्कलंक बनाके परमेसर के अइसने सेवा करव कि ओह खुस होवय—एहीच ह परमेसर बर तुम्हर सही अराधना अय।
ROM 12:2 तुमन ये संसार के मनखेमन सहीं झन बनव, पर तुमन के मन ह नवां हो जाय के कारन, तुम्हर चालचलन घलो बदल जावय। तब तुमन परमेसर के ओ ईछा ला परखके जान सकहू जऊन ह बने, मनभावन अऊ सिद्ध अय।
ROM 12:3 परमेसर के दुवारा मोला दिये गय अनुग्रह के कारन, मेंह तुमन जम्मो झन ला ये कहत हंव: अपनआप ला जतेक समझना चाही, ओकर ले जादा झन समझव, पर परमेसर के दुवारा दिये गय बिसवास के तदाद के मुताबिक अपनआप ला समझव।
ROM 12:4 जइसने हमर एक देहें हवय अऊ ओकर बहुंते अंग हवंय अऊ हर एक अंग के अलग-अलग काम हवय।
ROM 12:5 वइसने, हालाकि हमन बहुंते हवन, पर मसीह म हमन एक देहें के सहीं अन अऊ हर एक सदस्य एक-दूसर ले जुड़े हवन।
ROM 12:6 परमेसर के दुवारा दिये गय अनुग्रह के मुताबिक हमन ला अलग-अलग किसम के बरदान मिले हवय। जऊन ला अगमबानी करे के बरदान मिले हवय, त ओह परमेसर म अपन बिसवास के मुताबिक ओकर उपयोग करय।
ROM 12:7 कहूं कोनो ला सेवा करे के बरदान मिले हवय, त ओह सेवा करय। जऊन ला सिकछा देय के बरदान हवय, ओह सिखोय म लगे रहय।
ROM 12:8 जऊन ला उत्साहित करे के बरदान मिले हवय, ओह आने मन ला उत्साहित करय। जऊन ला दान देय के बरदान मिले हवय, त ओह दिल खोलके दान करय। जऊन ला अगुवई करे के बरदान हवय, त ओह उत्साह से अगुवई करय, अऊ जऊन ला दया करे के बरदान मिले हवय, ओह खुसी से आने ऊपर दया करय।
ROM 12:9 आने मन ला निस्कपट मया करव। बुरई ले घिन करव; भलई करे म लगे रहव।
ROM 12:10 भाई-चारा के मया करत एक-दूसर बर समरपित रहव। एक-दूसर ला अपन ले बढ़के आदर देवव।
ROM 12:11 काम-बुता करे म अलाली झन करव; पर परभू के सेवा करत अपन आतमिक उत्साह ला बनाय रखव।
ROM 12:12 परभू के ऊपर आसा म आनंदित रहव; दुख-तकलीफ के समय धीरज धरे रहव; पराथना म हमेसा लगे रहव।
ROM 12:13 परमेसर के मनखेमन ला, ओमन के जरूरत के मुताबिक मदद करव, अऊ पहुनई करे म लगे रहव।
ROM 12:14 जऊन मन तुमन ला सताथें, ओमन ला आसीस देवव, हां! आसीस देवव, सराप झन देवव।
ROM 12:15 आनंद मनइयामन के संग आनंद मनावव अऊ रोवइयामन के संग रोवव।
ROM 12:16 एक-दूसर के संग संगति रखव; घमंडी झन बनव, पर दीन-हीन मन के संग संगति रखव; अपन नजर म बुद्धिमान झन बनव।
ROM 12:17 कहूं कोनो तुम्हर बुरई करथे, त बदले म, ओकर बुरई झन करव। ओ काम करे के कोसिस करव, जऊन ला जम्मो झन सही समझथें।
ROM 12:18 जिहां तक हो सकय, तुमन जम्मो झन के संग सांति के साथ रहे के भरसक कोसिस करव।
ROM 12:19 हे मोर मयारू संगवारीमन! काकरो ले बदला झन लेवव, पर येला परमेसर के ऊपर छोंड़ देवव; परमेसर के कोरोध ओकर ऊपर भड़कही। काबरकि परमेसर के बचन म ये लिखे हवय, “परभू ह कहिथे, ‘बदला लेवई मोर काम ए, मेंह बदला लूहूं।’”
ROM 12:20 परमेसर के बचन म ये घलो लिखे हवय, “यदि तोर बईरी ह भूखा हवय, त ओला खाना खवा, यदि ओह पीयासन हवय, त ओला पीये बर कुछू दे। अइसने करे ले, ओह लज्जित होही।”
ROM 12:21 बुरई ले झन हारव, पर भलई करे के दुवारा बुरई ला जीत लेवव।
ROM 13:1 हर एक मनखे सासन करइया अधिकारीमन के अधीन रहय, काबरकि परमेसर कोति ले अधिकार दिये जाथे। अभी जऊन अधिकार हवय, ओह परमेसर के दुवारा दिये गे हवय।
ROM 13:2 एकरसेति, जऊन ह अधिकार के बिरोध करथे, ओह परमेसर के ठहिराय अधिकार के बिरोध करथे अऊ अइसने मनखे ह अपन ऊपर दंड लानथे।
ROM 13:3 जऊन ह सही काम करथे, ओकर ऊपर अधिकारी के भय नइं रहय, पर जऊन ह गलत काम करथे, ओकर ऊपर अधिकारी के डर बने रहिथे। का तुमन अधिकारी के भय ले मुक्त होय चाहथव? त फेर सही काम करव अऊ ओह तुम्हर बड़ई करही।
ROM 13:4 काबरकि ओह तुम्हर भलई खातिर परमेसर के सेवक अय। पर यदि तुमन गलत करथव, त ओकर ले डरव, काबरकि ओला बेकार म अधिकार नइं दिये गे हवय। ओह परमेसर के दास ए अऊ कुकरमीमन ला दंड देथे।
ROM 13:5 एकरसेति, न सिरिप दंड ले बांचे खातिर, पर अपन बिबेक के खातिर घलो, अधिकारीमन के अधीन रहना जरूरी अय।
ROM 13:6 एकरे कारन, तुमन लगान घलो पटाथव, काबरकि अधिकारीमन परमेसर के सेवक अंय, जऊन मन अपन पूरा समय अइसने काम बर देथें।
ROM 13:7 हर ओ मनखे के चुकता कर देवव, जेकर तुमन लगत हवव; जऊन ला लगान पटाना हवय, ओला लगान पटावव; जऊन ला मालगुजारी देना हवय, ओला मालगुजारी देवव; जेकर ले डरना चाही, ओकर ले डरव अऊ जेकर आदरमान करना चाही, ओकर आदरमान करव।
ROM 13:8 आपस म मया रखव अऊ मया के छोंड़ अऊ कोनो चीज म काकरो करजदार झन बनव। जऊन ह अपन संगी मनखे ला मया करथे, ओह मूसा के कानून ला मनइया समझे जाथे।
ROM 13:9 “छिनारी झन करव,” “हतिया झन करव,” “चोरी झन करव,” “लालच झन करव।” ये हुकूम अऊ जऊन आने हुकूम हवंय, ये जम्मो के सार ये अय: “अपन परोसी ले अपन सहीं मया कर।”
ROM 13:10 जऊन ह मया करथे ओह अपन परोसी के कोनो नुकसान नइं करय। एकरसेति, जऊन ह मया करथे, ओह मूसा के कानून ला पूरा करथे।
ROM 13:11 अभी के समय ला जानके, तुमन अइसनेच करव। तुम्हर नींद ले जागे के बेरा ह आ गे हवय। काबरकि जब हमन यीसू के ऊपर पहिली बिसवास करे रहेंन, ओ समय के बनिस्पत अब हमर उद्धार ह अऊ लकठा म हवय।
ROM 13:12 रात ह लगभग बीत गे हवय, अऊ दिन ह निकलइया हवय। एकरसेति, आवव, हमन अंधियार के गलत काममन ला छोंड़ देवन अऊ अंजोर के हथियारमन ला बांध लेवन।
ROM 13:13 जइसने दिन के समय उचित ए, आवव, हमन सही चालचलन म रहन अऊ अपनआप ला रंगरेली, पियक्कड़पन, छिनारी, दुराचार, लड़ई-झगरा, अऊ जलन ले दूरिहा रखन।
ROM 13:14 तुम्हर चालचलन ह परभू यीसू मसीह के चालचलन सहीं होवय अऊ तुमन अपन पापी हिरदय के ईछा ला पूरा करे के बिचार ला छोंड़ देवव।
ROM 14:1 जऊन ह बिसवास म कमजोर हवय, ओला अपन संगति म ले लव, पर ओकर अलग बिचार के ऊपर ओकर संग बहस झन करव।
ROM 14:2 एक झन बिसवास करथे कि ओह जम्मो चीज ला खा सकथे, पर जऊन मनखे ह बिसवास म कमजोर हवय, ओह सोचथे कि सिरिप साग-भाजी खाना उचित ए।
ROM 14:3 जऊन मनखे ह जम्मो चीज ला खाथे, ओह साग-भाजी खवइया ला तुछ झन समझय, अऊ जऊन ह सिरिप साग-भाजी खाथे, ओह जम्मो चीज खवइया मनखे ला दोसी झन ठहिरावय, काबरकि परमेसर ह ओला गरहन करे हवय।
ROM 14:4 तेंह कोन अस कि आने के सेवक ऊपर दोस लगाथस? ओह सफल होथे या असफल हो जाथे, ये बात ओकर मालिक ले संबंध रखथे। अऊ ओ सेवक ह बिसवास म बने रहिही, काबरकि परभू ह ओला बिसवास म स्थिर कर सकथे।
ROM 14:5 कोनो मनखे ह एक दिन ला आने दिन ले जादा महत्व के समझथे, त कोनो मनखे ह जम्मो दिन ला एके बरोबर समझथे। हर एक मनखे ला अपन सोच के बारे म निस्चय होना चाही।
ROM 14:6 जऊन ह कोनो दिन ला बिसेस दिन समझथे, त ओह परभू बर अइसने समझथे। जऊन ह कुछू चीज ला खाथे, त ओह परभू के आदर म खाथे, काबरकि ओह परमेसर ला धनबाद देके खाथे, अऊ जऊन ह कुछू चीज ला खाय म परहेज करथे, ओह परभू के आदर म अइसने करथे अऊ परमेसर ला धनबाद देथे।
ROM 14:7 काबरकि हमन ले कोनो न तो अपन खातिर जीथे, अऊ न कोनो अपन खातिर मरथे।
ROM 14:8 यदि हमन जीयत हवन, त परभू खातिर जीयत हवन, अऊ यदि हमन मरथन, त परभू के खातिर मरथन। एकरसेति चाहे हमन जीयन या मरन, हमन परभू के अन।
ROM 14:9 मसीह ह एकर कारन मरिस अऊ फेर जी उठिस कि ओह जीयत अऊ मरे दूनों मनखेमन के परभू होवय।
ROM 14:10 तब तुमन काबर अपन भाई ऊपर दोस लगाथव? या अपन भाई ला काबर तुछ समझथव? हमन जम्मो झन ला परमेसर के नियाय आसन के आघू म ठाढ़ होना पड़ही।
ROM 14:11 काबरकि परमेसर के बचन म ये लिखे हवय, “परभू ह कहिथे, ‘मोर जिनगी के कसम हर एक मनखे ह मोर आघू म माड़ी टेकही; हर एक मनखे ह परमेसर ला मानही।’ ”
ROM 14:12 एकरसेति, हमन ले हर एक झन परमेसर ला अपन काम के लेखा-जोखा दीही।
ROM 14:13 एकरसेति, हमन एक-दूसर के ऊपर दोस झन लगावन। पर अपन मन म, ये ठान लेवन कि हमन न तो अपन भाई के रसता म कोनो बाधा डालन अऊ न ही ओकर पाप म पड़े के कारन बनन।
ROM 14:14 मेंह जानत हंव अऊ परभू यीसू के संगति म रहे के कारन मोला पूरा बिसवास हवय कि कोनो चीज ह अपनआप म असुध नइं होवय। पर कहूं कोनो मनखे कोनो चीज ला असुध समझथे, त फेर ओकर बर ओह असुध अय।
ROM 14:15 कहूं तेंह कुछू अइसने खाना खाथस, जेकर ले तोर भाई ह उदास होथे, त फेर तेंह अपन भाई ले मया नइं करथस। अइसने खाना ला झन खा, जऊन ह कोनो मनखे के पाप म पड़े के कारन बनथे, जेकर बर मसीह ह मरिस।
ROM 14:16 जऊन बात ला तुमन सही समझथव, ओकर बारे म कोनो मनखे ला खराप गोठियाय के मऊका झन देवव।
ROM 14:17 काबरकि परमेसर के राज ह खाना अऊ पीना नो हय, पर येह धरमीपन, सांति अऊ आनंद के बात अय, जऊन ह पबितर आतमा ले मिलथे।
ROM 14:18 जऊन ह अइसने मसीह के सेवा करथे, ओकर ले परमेसर ह खुस होथे अऊ मनखेमन घलो ओला सही समझथें।
ROM 14:19 एकरसेति हमन ओ बातमन के ऊपर धियान लगावन, जेकर ले सांति होथे अऊ एक-दूसर के चालचलन ह सुधरथे।
ROM 14:20 भोजन के खातिर परमेसर के काम ला झन बिगाड़व। वास्तव म, जम्मो भोजन ह सुध अय, पर यदि कोनो मनखे ह अइसने चीज ला खाथे, जऊन ला देखके आने मनखे ह पाप म गिरथे, त ओ खवइया ह गलत करथे।
ROM 14:21 बने बात तो ये अय कि तुमन न तो मांस खावव, अऊ न ही मंद पीयव, अऊ न ही अइसने कोनो काम करव, जेकर ले तुम्हर भाई ह पाप म गिरय।
ROM 14:22 अइसने चीजमन के बारे म, तोर जऊन बिसवास हवय, ओला अपन अऊ परमेसर के बीच म रहन दे। धइन ए ओ मनखे, जऊन ह कोनो चीज ला सही समझथे अऊ ओकर बारे म अपनआप ला दोसी नइं मानय।
ROM 14:23 पर जऊन ह कुछू चीज ला संका करके खाथे, त ओला परमेसर ह दोसी ठहिराथे, काबरकि ओह बिसवास के संग नइं खावय; अऊ हर ओ काम जऊन ह बिसवास के संग नइं करे जावय, ओह पाप अय।
ROM 15:1 हमन ला जऊन मन बिसवास म मजबूत हवन, ओमन के कमजोरी ला सहन करना चाही, जऊन मन बिसवास म कमजोर हवंय अऊ हमन ला अपनआप ला खुस नइं करना चाही।
ROM 15:2 हमन ले हर एक झन ला अपन परोसी ला खुस करना चाही, ताकि ओकर भलई होवय अऊ ओह बिसवास म बढ़य।
ROM 15:3 काबरकि मसीह ह अपनआप ला खुस नइं करिस, पर जइसने कि परमेसर के बचन म लिखे हवय, “मनखेमन तोर जऊन बेजत्ती करिन, ओ बेजत्ती ह मोर ऊपर आ गीस।”
ROM 15:4 परमेसर के बचन म जऊन बातमन पहिली ले लिखे गे हवंय, ओमन हमर सिकछा बर अंय, ताकि हमन धीरता अऊ बचन के उत्साह के जरिये मसीह यीसू के आसा म बने रहन।
ROM 15:5 परमेसर जऊन ह हमन ला धीरज अऊ उत्साह देथे, तुमन ला अइसने सोच देवय कि तुमन मसीह यीसू के हुकूम ला मानत एकता म बने रहव,
ROM 15:6 ताकि एक संग तुमन एक स्वर म हमर परभू यीसू मसीह के ददा परमेसर के इस्तुति कर सकव।
ROM 15:7 जइसने मसीह ह तुमन ला परमेसर के महिमा खातिर गरहन करिस, वइसने तुमन घलो एक-दूसर ला गरहन करव।
ROM 15:8 काबरकि मेंह तुमन ला बतावत हंव कि मसीह ह परमेसर के सच्चई ला परगट करे बर यहूदीमन के सेवक बनिस, ताकि ओह परमेसर के दुवारा हमर कुल के मुखियामन ला दिये गय परतिगियां ला पूरा करय,
ROM 15:9 अऊ आनजातमन के ऊपर परमेसर के दया होवय अऊ ओमन परमेसर के महिमा करंय, जइसने कि परमेसर के बचन म लिखे हवय: “एकरसेति आनजातमन के बीच म, मेंह तोर परसंसा करहूं; मेंह तोर नांव के परसंसा के भजन गाहूं।”
ROM 15:10 परमेसर के बचन म ये घलो कहे गे हवय, “हे आनजातमन, तुमन परमेसर के मनखेमन के संग आनंद मनावव।”
ROM 15:11 परमेसर के बचन म ये घलो कहे गे हवय, “हे आनजात के जम्मो मनखेमन, परभू के परसंसा करव; जम्मो मनखेमन ओकर बहुंत परसंसा करंय।”
ROM 15:12 अऊ यसायाह अगमजानी ह घलो कहे हवय, “यिसै के जरी म ले एक झन आही, ओह जम्मो जाति के मनखेमन ऊपर राज करे बर उठही; अऊ आनजातमन ओकर ऊपर अपन आसा रखहीं।”
ROM 15:13 परमेसर जऊन ह आसा देथे, तुम्हर बिसवास के कारन तुमन ला पूरा आनंद अऊ सांति ले भर देवय, ताकि पबितर आतमा के सामर्थ के दुवारा मसीह म तुम्हर आसा अऊ बढ़ते रहय।
ROM 15:14 हे मोर भाईमन हो! मोला पूरा बिसवास हवय कि तुमन म भलई के बात भरे हवय अऊ तुम्हर करा परमेसर के बारे म जम्मो गियान हवय अऊ तुमन एक-दूसर ला सिखोय के काबिल हवव।
ROM 15:15 पर कुछू बातमन ला मेंह फेर सुरता कराय बर तुमन ला बड़े हिम्मत के साथ लिखे हवंव। परमेसर ह मोला अनुग्रह दीस
ROM 15:16 कि आनजातमन बर मेंह मसीह यीसू के सेवक बनंव अऊ एक पुरोहित के सहीं परमेसर के सुघर संदेस के परचार करंव, ताकि आनजातमन परमेसर ला गरहनयोग्य अइसने बलिदान बन जावंय, जऊन ह पबितर आतमा के दुवारा सुध करे गे हवय।
ROM 15:17 तब मेंह मसीह यीसू के संगति म रहिके परमेसर बर मोर जऊन सेवा हवय, ओकर ऊपर घमंड कर सकत हंव।
ROM 15:18 जऊन काम ला मसीह मोर जरिये करे हवय, ओकर छोंड़ मेंह अऊ कोनो बिसय म गोठियाय के हिम्मत नइं करंव। मसीह ह आनजातमन ला परमेसर करा लाने बर मोर उपयोग करिस—ओह ये बुता ला मोर बचन अऊ काम के दुवारा करिस;
ROM 15:19 मोर दुवारा परमेसर के आतमा के सामर्थ म चिनहां अऊ चमतकार होईस। ये किसम ले, मेंह यरूसलेम सहर ले लेके इल्लुरिकुम प्रदेस तक, मसीह के सुघर संदेस के पूरा परचार करे हवंव।
ROM 15:20 येह हमेसा मोर ईछा अय कि मेंह सुघर संदेस के परचार उहां करंव, जिहां मनखेमन मसीह के बारे म नइं सुने हवंय। मेंह नइं चाहथंव कि जिहां सुघर संदेस के परचार हो गे हवय, उहां जाके मेंह कलीसिया के इस्‍थापना करंव।
ROM 15:21 पर जइसने परमेसर के बचन म लिखे हवय: “जऊन मन ला ओकर सुघर संदेस के परचार नइं करे गीस, ओमन ओकर दरसन करहीं, अऊ जऊन मन सुघर संदेस नइं सुने हवंय, ओमन समझहीं।”
ROM 15:22 एकरे कारन कतको बार ले बाधा डाले गीस अऊ मेंह तुम्हर करा नइं आ सकंय।
ROM 15:23 पर अब, ये इलाका म मोर काम करे बर अऊ कोनो जगह नइं बचे हवय। कतेक साल ले तुम्हर करा आय के मोर मन हवय,
ROM 15:24 एकरसेति जब मेंह स्पेन देस जाहूं, त तुम्हर इहां ले होवत जाहूं। मोला आसा हवय कि तुम्हर संग कुछू समय बिताके मोला आनंद मिलही, अऊ तुमन आघू के मोर यातरा म मदद करहू।
ROM 15:25 अभी तो मेंह संतमन के सेवा करे बर यरूसलेम सहर जावत हंव।
ROM 15:26 काबरकि मकिदुनिया अऊ अखया के कलीसिया के मनखेमन ला ये बने लगिस कि यरूसलेम के गरीब संतमन बर कुछू दान पठोवंय।
ROM 15:27 ओमन दान पठोके खुस हवंय अऊ वास्तव म, ओमन यरूसलेम के संतमन के करजदार अंय। काबरकि जब आनजातमन यहूदीमन के आतमिक आसीस म भागीदार होय हवंय, त आनजातमन बर ये उचित अय कि ओमन अपन संसारिक धन के दुवारा यहूदीमन के मदद करंय।
ROM 15:28 ये बुता ला पूरा करके अऊ ये बात ला निस्चित करके कि ये चंदा ह ओमन ला मिल गे हवय, तब मेंह उहां ले स्पेन देस जाहूं, अऊ उहां जावत बेरा डहार म तुम्हर करा आहूं।
ROM 15:29 मोला बिसवास हवय कि जब मेंह तुम्हर करा आहूं, त मसीह के जम्मो आसीस के संग आहूं।
ROM 15:30 हे भाईमन हो! हमर परभू यीसू मसीह अऊ पबितर आतमा के मया के सुरता कराके, मेंह तुम्हर ले बिनती करत हंव कि मोर खातिर परमेसर ले पराथना करे म उत्साह के संग मोर साथ देवव।
ROM 15:31 पराथना करव कि मोला यहूदिया प्रदेस म अबिसवासीमन ले कोनो हानि झन होवय, अऊ जऊन सेवा, मेंह यरूसलेम म करंव ओकर ले उहां के संतमन खुस होवंय।
ROM 15:32 तब परमेसर के ईछा के मुताबिक, मेंह तुम्हर करा आनंद सहित आ सकंव अऊ तुम्हर संगति पाके तरो-ताजा होवंव।
ROM 15:33 सांति के देवइया परमेसर तुमन जम्मो झन संग रहय। आमीन।
ROM 16:1 मेंह हमर बहिनी फीबे बर तुम्हर ले बिनती करत हंव, जऊन ह किंख्रिया के कलीसिया म एक सेविका ए।
ROM 16:2 परभू म एक संत सहीं ओला गरहन करव अऊ यदि ओला कोनो चीज के जरूरत हवय, त ओमा ओकर मदद करव, काबरकि ओह कतको मनखेमन के मदद करे हवय अऊ संग म मोर घलो मदद करे हवय।
ROM 16:3 प्रिसकिल्ला अऊ अक्विला ला मोर जोहार दे दव; मसीह यीसू के सेवा करे म ओमन मोर सहकरमी अंय।
ROM 16:4 ओमन मोर खातिर अपन जान ला जोखिम म डार दे रिहिन। ओमन ला सिरिप में ही नइं, पर आनजातमन के जम्मो कलीसियामन घलो धनबाद देवत हवंय।
ROM 16:5 ओ कलीसिया ला घलो मोर जोहार कहव, जऊन ह ओमन के घर म जूरथे। मोर मयारू संगी इपैनितुस ला मोर जोहार कहव, जऊन ह एसिया प्रदेस म सबले पहिली मसीह के ऊपर बिसवास करिस।
ROM 16:6 मरियम ला जोहार दे दव, जऊन ह तुम्हर खातिर कठिन मेहनत करे हवय।
ROM 16:7 अन्‍द्रुनीकुस अऊ यूनियास ला मोर जोहार मिलय। ओमन मोर रिस्तेदार अंय अऊ ओमन मोर संग जेल म रिहिन। प्रेरितमन के बीच म ओमन नामी अंय अऊ ओमन मोर ले पहिली मसीह के ऊपर बिसवास करिन।
ROM 16:8 अम्‍पलियातुस ला जोहार कहव, जऊन ह परभू म मोर मयारू ए।
ROM 16:9 उरबानुस ला मोर जोहार मिलय, जऊन ह मसीह के सेवा म हमर सहकरमी अय, अऊ मोर मयारू संगी इस्तखुस ला मोर जोहार कहव।
ROM 16:10 अपिल्लेस ला जोहार कहव, जेकर मसीह म बिसवास ह साबित हो गे हवय। अरिसतुबुलस के घराना ला मोर जोहार कहव।
ROM 16:11 मोर रिस्तेदार हेरोदियोन ला मोर जोहार। नरकीसुस के घराना के जऊन मन परभू के ऊपर बिसवास करथें, ओमन ला मोर जोहार।
ROM 16:12 त्रुफेना अऊ त्रुफोसा ला मोर जोहार मिलय। ये माईलोगनमन परभू खातिर कठिन मेहनत करथें। आने माईलोगन पिरसिस ला मोर जोहार। ओह मोर मयारू संगी ए अऊ परभू खातिर अब्बड़ मेहनत करे हवय।
ROM 16:13 रूफुस ला मोर जोहार कहव, जऊन ला परभू ह चुने हवय, अऊ ओकर दाई ला जऊन ह मोर दाई सहीं अय, ओला मोर जोहार।
ROM 16:14 असुक्रितुस, फिलगोन, हिरमेस, पत्रुबास, हिरमास अऊ जऊन भाईमन ओमन के संग हवंय ओ जम्मो झन ला मोर जोहार।
ROM 16:15 फिलुलुगुस, यूलिया, नेरयुस, अऊ ओकर बहिनी अऊ उलुम्पास अऊ जम्मो संत, जऊन मन येमन के संग हवंय, ओमन ला मोर जोहार कहव।
ROM 16:16 पबितर चूमा लेके एक-दूसर ला जोहार करव। इहां मसीह के जम्मो कलीसियामन तुमन ला जोहार कहथें।
ROM 16:17 हे मोर भाईमन हो! मेंह तुम्हर ले बिनती करत हंव कि तुमन ओ मनखेमन ले सचेत रहव, जऊन मन तुम्हर बीच म फूट डारथें अऊ तुम्हर आतमिक जिनगी के बढ़ोतरी म बाधा डारथें। येह ओ सिकछा ले मेल नइं खावय, जऊन ह तुमन ला दिये गे हवय। अइसने मनखेमन ले दूरिहा रहव।
ROM 16:18 काबरकि अइसने मनखेमन हमर परभू यीसू मसीह के सेवा नइं करंय, पर येमन अपन मन के ईछा ला पूरा करथें। येमन गुरतूर बोली अऊ चापलूसी करके सीधा-साधा मनखेमन ला भरमा देथें।
ROM 16:19 तुमन के, परभू यीसू के हुकूम माने के चरचा ह जम्मो मनखेमन के बीच म बगर गे हवय, एकरसेति मेंह तुम्हर बारे म बहुंत आनंदित हंव। पर मेंह चाहत हंव कि तुमन बुद्धिमानी के संग दूसर के भलई करव अऊ अपनआप ला बुरई करे ले दूरिहा रखव।
ROM 16:20 सांति देवइया परमेसर ह जल्दी सैतान ला तुम्हर गोड़ खाल्हे कुचरही। हमर परभू यीसू के अनुग्रह तुम्हर ऊपर होवत रहय।
ROM 16:21 मोर सहकरमी तीमुथियुस ह तुमन ला जोहार कहत हवय अऊ वइसने मोर रिस्तेदार लूकियुस, यासोन अऊ सोसीपत्रुस घलो तुमन ला जोहार कहत हवंय।
ROM 16:22 में, तिरतियुस ये चिट्ठी के लिखइया तुमन ला परभू म जोहार कहत हंव।
ROM 16:23 गयुस, जेकर पहुनई के, में अऊ जम्मो कलीसिया आनंद उठाथन, ओह तुमन ला जोहार कहत हे। इरासतुस, जऊन ह सहर म मनखेमन ले संबंधित काम के संचालक ए, ओह अऊ हमर भाई क्वारतुस घलो तुमन ला जोहार कहत हवंय।
ROM 16:24 हमर परभू यीसू के अनुग्रह, तुमन जम्मो झन ऊपर होवय। आमीन।
ROM 16:25 ओ परमेसर के इस्तुति होवय, जऊन ह तुमन ला मसीह के बिसवास म मजबूत कर सकथे—यदि तुमन मोर दुवारा सुनाय गय यीसू मसीह के सुघर संदेस के परचार ऊपर बिसवास करहू त। परमेसर के उद्धार के योजना के भेद ह कतेक जुग ले छिपे रिहिस,
ROM 16:26 पर अब अनादि-अनंत परमेसर के हुकूम के मुताबिक, अगमजानीमन के लिखे बचन के जरिये, येह परगट होईस अऊ येला संसार के जम्मो जाति के मनखेमन ला बताय जावत हवय, ताकि ओमन मसीह ऊपर बिसवास करंय अऊ ओकर हुकूम ला मानंय।
ROM 16:27 सिरिप परमेसर एके झन बुद्धिमान ए; ओकर महिमा यीसू मसीह के जरिये सदाकाल तक होवत रहय! आमीन।
1CO 1:1 पौलुस कोति ले जऊन ह परमेसर के ईछा ले मसीह यीसू के प्रेरित होय बर बलाय गे हवय अऊ हमर भाई सोसथिनेस कोति ले ये चिट्ठी,
1CO 1:2 परमेसर के ओ कलीसिया ला जऊन ह कुरिन्थुस सहर म हवय; कलीसिया याने कि ओमन जऊन मन कि मसीह यीसू म पबितर करे गे हवंय अऊ पबितर होय बर बलाय गे हवंय; अऊ संग म ओ जम्मो झन जऊन मन हर जगह हमर परभू यीसू मसीह के नांव लेथें। ओह ओमन के परभू अऊ हमर परभू घलो अय।
1CO 1:3 हमर ददा परमेसर अऊ परभू यीसू मसीह कोति ले तुमन ला अनुग्रह अऊ सांति मिलय।
1CO 1:4 मेंह तुम्हर बर हमेसा परमेसर के धनबाद करथंव काबरकि ओह मसीह यीसू के जरिये तुमन ला अनुग्रह दे हवय।
1CO 1:5 मसीह म तुम्हर बिसवास के कारन तुमन ला हर एक बात म सम्पन्न करे गे हवय याने कि बचन बोले म अऊ जम्मो गियान म।
1CO 1:6 काबरकि मसीह के बारे म हमन जऊन गवाही दे हवन, ओह तुमन म पक्का हो गे हवय।
1CO 1:7 एकरसेति तुमन म कोनो आतमिक बरदान के घटी नइं ए, जब तुमन हमर परभू यीसू मसीह के परगट होय के बाट जोहथव।
1CO 1:8 ओह तुमन ला आखिरी तक मजबूत बनाय रखही, ताकि तुमन हमर परभू यीसू मसीह के दिन म निरदोस ठहिरव।
1CO 1:9 परमेसर ह बिसवासयोग्य अय अऊ ओह तुमन ला अपन बेटा याने हमर परभू यीसू मसीह के संगति म बलाय हवय।
1CO 1:10 हे भाईमन हो, मेंह तुमन ले हमर परभू यीसू मसीह के नांव म बिनती करत हंव कि तुमन जम्मो झन एक-दूसर के बात म सहमती रखव, ताकि तुम्हर बीच म फूट झन पड़य अऊ तुमन म एक मन अऊ एक बिचार के संग पूरा एकता रहय।
1CO 1:11 हे मोर भाईमन हो, खलोए के परिवार के कुछू मनखेमन मोला बताय हवंय कि तुम्हर बीच म झगरा होवत हवय।
1CO 1:12 मोर कहे के मतलब ये अय कि तुमन ले कोनो ये कहिथे, “मेंह पौलुस के अंव”; त कोनो कहिथे, “मेंह अपुल्‍लोस के अंव”; त कोनो कहिथे, “मेंह कैफा के अंव”; अऊ कोनो कहिथे, “मेंह मसीह के अंव।”
1CO 1:13 का मसीह के बांटा हो गे हवय? का पौलुस ह तुम्हर बर कुरूस ऊपर चघाय गीस? का तुमन पौलुस के नांव में बतिसमा ले हवव?
1CO 1:14 मेंह परमेसर के धनबाद करथंव कि क्रिसपुस अऊ गयुस के छोंड़, मेंह तुमन ले कोनो ला बतिसमा नइं दे हवंव।
1CO 1:15 एकरसेति कोनो नइं कह सकय कि तुमन मोर नांव म बतिसमा ले हवव।
1CO 1:16 (अऊ हां, मेंह स्तिफनास के परिवार ला घलो बतिसमा दे हवंव; एकर छोंड़, मोला सुरता नइं ए कि मेंह अऊ कोनो ला बतिसमा दे हवंव।)
1CO 1:17 काबरकि मसीह ह मोला बतिसमा दे बर नइं, पर सुघर संदेस के परचार करे बर पठोईस; अऊ ये सुघर संदेस के परचार मेंह संसारिक बुद्धि ले नइं करंय, ताकि मसीह के कुरूस के सक्ति ह बेकार झन होवय।
1CO 1:18 काबरकि जऊन मन भटक गे हवंय, ओमन बर कुरूस म मसीह के मिरतू के संदेस ह मुरूखता ए, पर हमन उद्धार पवइयामन बर येह परमेसर के सामर्थ ए।
1CO 1:19 काबरकि परमेसर के बचन म ए लिखे हवय: “मेंह बुद्धिमान के बुद्धि ला नास करहूं; अऊ होसियारमन के होसियारी ला मेंह बेकार कर दूहूं।”
1CO 1:20 कहां गीन गियानी मनखेमन? कहां गीन कानून के गुरूमन? अऊ ये पीढ़ी के बाद-बिबाद करइयामन कहां हवंय? परमेसर ह संसार के गियान ला मुरूख साबित कर दे हवय।
1CO 1:21 काबरकि परमेसर के गियान म ये बात साफ ए कि संसार के मनखेमन अपन गियान के दुवारा परमेसर ला नइं जानिन। परमेसर ह ओ मुरूखता के संदेस म खुस होईस, जेकर परचार हमन ओमन के उद्धार बर करथन, जऊन मन बिसवास करथें।
1CO 1:22 यहूदीमन चमतकार के काम देखाय के मांग करथें अऊ यूनानीमन गियान के खोज म रहिथें।
1CO 1:23 पर हमन तो मसीह के परचार करथन, जऊन ह कुरूस ऊपर चघाय गीस। येह अइसने संदेस ए, जऊन ह यहूदीमन बर ठोकर के कारन अऊ आनजातमन बर मुरूखता ए।
1CO 1:24 पर जऊन मन ला परमेसर ह बलाय हवय, चाहे ओमन यहूदी होवंय या यूनानी, ओमन बर मसीह ह परमेसर के सामर्थ अऊ परमेसर के बुद्धि अय।
1CO 1:25 काबरकि परमेसर के मुरूखता ह मनखेमन के गियान ले जादा बुद्धि के बात ए अऊ परमेसर के कमजोरी ह मनखेमन के बल ले जादा बलवान ए।
1CO 1:26 हे भाईमन हो, जरा सोचव, जब परमेसर ह तुमन ला बलाईस, त तुमन के का स्थिति रिहिस। तुमन ले बहुंत झन, मनखेमन के नजर म न तो बुद्धिमान रिहिन, न बहुंते मन परभावसाली अऊ न ही बहुंते मन ऊंच घराना के रिहिन।
1CO 1:27 पर परमेसर ह संसार के मुरूखमन ला चुनिस ताकि गियानी मनखेमन लज्जित होवंय; परमेसर ह दुरबलमन ला चुनिस ताकि बलवानमन लज्जित होवंय।
1CO 1:28 परमेसर ह संसार के नीच अऊ तुछ चीजमन ला चुनिस अऊ ओह ओ चीजमन ला चुनिस, जऊन मन कुछू नो हंय, ताकि ओह ओ चीजमन ला बेकार ठहिराय, जऊन ला मनखेमन बड़े महत्व के समझथें,
1CO 1:29 ताकि कोनो मनखे परमेसर के आघू म घमंड झन कर सकय।
1CO 1:30 परमेसर के कारन ही हमर संगति मसीह यीसू म हवय, जऊन ह हमर बर परमेसर ले बुद्धि बन गे हवय, जेकर दुवारा हमन धरमी अऊ पबितर ठहिरथन अऊ ओकर दुवारा हमर छुटकारा होथे।
1CO 1:31 एकरसेति, जइसने कि परमेसर के बचन म लिखे हवय: “जऊन ह घमंड करथे, ओह परभू के काम ऊपर घमंड करय।”
1CO 2:1 हे भाईमन हो, जब मेंह तुम्हर करा परमेसर के गवाही के परचार करत आएंव, त मेंह एक बने बक्ता के रूप म या उत्तम गियान के संग नइं आएंव।
1CO 2:2 काबरकि जब मेंह तुम्हर संग रहेंव, त मेंह ये ठान ले रहेंव कि यीसू मसीह अऊ ओकर कुरूस ऊपर चघाय जाय के बात ला छोंड़ अऊ कोनो बात ला नइं जानंव।
1CO 2:3 मेंह तुम्हर करा निरबल मनखे के रूप म भय के संग अऊ बहुंत कांपत आएंव।
1CO 2:4 मोर संदेस अऊ परचार म गियान अऊ मोह लेवइया बात नइं रिहिस, पर येमा परमेसर के आतमा के सामर्थ के सबूत रिहिस,
1CO 2:5 ताकि तुम्हर बिसवास ह मनखेमन के बुद्धि के ऊपर नइं, पर परमेसर के सामर्थ ऊपर निरभर रहय।
1CO 2:6 तभो ले, हमन समझदार मनखेमन के बीच म गियान के बात जरूर बताथन, पर येह ये जुग के गियान या ये जुग म ओ सासन करइयामन के गियान नो हय, जऊन मन खतम हो जाहीं।
1CO 2:7 पर हमन परमेसर के गुपत बुद्धि के बारे म गोठियाथन, जऊन ह लुकाय गे रिहिस अऊ जऊन ला परमेसर ह संसार ला बनाय के पहिली हमर महिमा बर ठहिराय रिहिस।
1CO 2:8 ये जुग म सासन करइया कोनो घलो येला नइं समझिन, काबरकि यदि ओमन येला समझे रहितिन, त ओमन ओ महिमामय परभू ला कुरूस ऊपर चघाके नइं मारे होतिन।
1CO 2:9 पर जइसने परमेसर के बचन म ये लिखे हवय: “जऊन चीज ला कोनो मनखे नइं देखे हवंय, जऊन बात ला कोनो मनखे नइं सुने हवंय, अऊ जऊन बात ला कोनो मनखे समझ नइं सकिन,” ओहीच बात ला परमेसर ह ओमन बर तियार करे हवय, जऊन मन ओकर ले मया करथें।
1CO 2:10 पर परमेसर ह ये बात ला अपन आतमा के दुवारा हमन ला बताय हवय। आतमा ह हर एक चीज ला खोज लेथे, अऊ त अऊ परमेसर के गहरई के बातमन ला घलो।
1CO 2:11 मनखेमन म कोन ए जऊन ह कोनो आने मनखे के मन के बात ला जानथे? सिरिप ओ मनखे के आतमा ही ओकरेच मन के बात ला जानथे। ओही किसम ले परमेसर के बातमन ला कोनो नइं जानय। सिरिप परमेसर के आतमा ही येला जानथे।
1CO 2:12 हमन संसार के आतमा नइं पाय हवन, पर हमन परमेसर के पठोय आतमा ला पाय हवन, ताकि हमन ओ बात ला समझ सकन, जऊन ला परमेसर ह हमन ला मुफत म दे हवय।
1CO 2:13 जऊन मन करा पबितर आतमा हवय, ओमन ला जब हमन आतमिक सच ला बताथन, त हमन मनखे के बुद्धि के दुवारा सिखोय बात ला नइं, पर पबितर आतमा के दुवारा सिखोय बातमन ला बताथन।
1CO 2:14 जऊन मनखे करा पबितर आतमा नइं ए, ओह ओ बातमन ला गरहन नइं करय, जऊन ह परमेसर के आतमा करा ले आथे, काबरकि ओ बातमन ओकर बर मुरूखता के बात अंय, अऊ ओमन ला ओह नइं समझ सकय, काबरकि ओ बातमन ला सिरिप ओह समझ सकथे, जेकर करा पबितर आतमा हवय।
1CO 2:15 जऊन मनखे करा पबितर आतमा हवय, ओह हर एक चीज ला सही या गलत रूप म परखथे, पर कोनो आने मनखे ओला परखे नइं सकंय।
1CO 2:16 काबरकि, “परभू के मन ला कोन ह जाने हवय कि ओह ओला सिखोवय?” पर हमन करा मसीह के मन हवय।
1CO 3:1 हे भाईमन हो, मेंह तुमन ले वइसने बात नइं कर सकेंव, जइसने मेंह आतमिक मनखेमन ले करथंव, पर मेंह तुमन ले वइसने बात करेंव, जइसने कि संसारिक मनखे अऊ जऊन मन मसीह के बिसवास म लइका एं, ओमन ले करे जाथे।
1CO 3:2 मेंह तुमन ला दूध पीयांय, ठोस आहार नइं खवांय, काबरकि तुमन एकर बर तियार नइं रहेव। वास्तव म, तुमन अभी घलो ठोस आहार बर तियार नइं अव।
1CO 3:3 तुमन अभी घलो संसारिक मनखे हव। जब तुमन एक-दूसर ले जलन रखथव अऊ तुमन एक-दूसर ले झगरा करथव, त का तुमन संसारिक मनखे नो हव? का तुमन सधारन मनखेमन सहीं नइं चलथव?
1CO 3:4 काबरकि जब एक झन कहिथे, “मेंह पौलुस के अंव” अऊ दूसर झन कहिथे, “मेंह अपुल्‍लोस के अंव”, त का तुमन सधारन मनखे नो हव?
1CO 3:5 अपुल्‍लोस ह कोन ए? अऊ पौलुस ह कोन ए? सिरिप परमेसर के सेवक, जेमन के दुवारा तुमन बिसवास म आय हवव, जइसने कि परभू ह हर एक ला ओकर काम सऊंपे हवय।
1CO 3:6 मेंह बीजा ला बोएंव, अपुल्‍लोस ह येमा पानी डारिस, पर परमेसर ह येला बढ़ाईस।
1CO 3:7 एकरसेति, न तो बोवइया अऊ न तो पानी डलइया कुछू अंय, पर सिरिप परमेसर के महत्व हवय, जऊन ह पऊधा ला बढ़ाथे।
1CO 3:8 जऊन ह बोथे अऊ जऊन ह पानी डारथे, ये दूनों के एकेच उदेस्य ए। परमेसर ह हर एक ला ओकर मेहनत के हिसाब ले ईनाम दीही।
1CO 3:9 काबरकि हमन परमेसर के सेवा म सहकरमी अन; तुमन परमेसर के खेत अऊ परमेसर के भवन अव।
1CO 3:10 परमेसर ह मोला अनुग्रह दीस अऊ ओ अनुग्रह के मुताबिक, मेंह एक कुसल घर बनइया के रूप म नीव डारेंव, अऊ आने मन ओकर ऊपर घर बनावत हवंय। पर हर एक झन सचेत रहय कि ओह कइसने घर बनावत हवय।
1CO 3:11 काबरकि पहिली ले एक नीव डारे गे हवय, जऊन ह यीसू मसीह ए, अऊ ये नीव के छोंड़ कोनो अऊ आने नीव नइं डार सकंय।
1CO 3:12 कहूं कोनो मनखे ये नीव ऊपर सोन, चांदी, कीमती पथरा, कठवा, कांदी या पैंरा डारके घर बनाथे,
1CO 3:13 त ओकर काम ह उजागर हो जाही; मसीह ह येला ओ दिन अंजोर म लानही, जब ओह लहुंटके आही। येह आगी के संग परगट करे जाही, अऊ आगी ह हर एक मनखे के काम ला परखही कि ओह कइसने हवय।
1CO 3:14 ये जांच म, कहूं ओ मनखे के काम ह बने रहिथे, त ओह ईनाम पाही।
1CO 3:15 पर कहूं ओकर काम ह जर जाथे, त ओला नुकसान होही; ओह खुद तो बच जाही, पर अइसने बचही, जइसने कोनो आगी म जरत-जरत बचथे।
1CO 3:16 का तुमन नइं जानव कि तुमन खुद परमेसर के मंदिर अव अऊ परमेसर के आतमा तुमन म बसथे।
1CO 3:17 यदि कोनो परमेसर के मंदिर ला नास करथे, त परमेसर ह ओला नास करही; काबरकि परमेसर के मंदिर ह तो पबितर ए, अऊ तुमन ओ मंदिर अव।
1CO 3:18 अपनआप ला धोखा झन देवव। कहूं तुमन ले कोनो ये संसार के सोच के मुताबिक अपनआप ला बुद्धिमान समझथे, त ओला मुरूख बन जाना चाही ताकि ओह सही म बुद्धिमान बन सकय।
1CO 3:19 काबरकि ये संसार के बुद्धि ह परमेसर के नजर म मुरूखता ए। जइसने कि परमेसर के बचन म ये लिखे हवय, “परमेसर ह बुद्धिमानमन ला ओहीचमन के चतुरई म फंसो देथे।”
1CO 3:20 अऊ ये घलो लिखे हवय, “परभू ह जानथे कि बुद्धिमानमन के बिचार ह बेकार अंय।”
1CO 3:21 एकरसेति मनखेमन ऊपर कोनो घमंड झन करय। जम्मो चीज ह तुम्हर ए,
1CO 3:22 चाहे ओह पौलुस ए या अपुल्‍लोस या कैफा या ये संसार या जिनगी या मिरतू या ये जुग या अवइया जुग—ये जम्मो ह तुम्हर ए,
1CO 3:23 अऊ तुमन मसीह के अव अऊ मसीह परमेसर के अय।
1CO 4:1 एकरसेति, मनखेमन हमन ला मसीह के सेवक अऊ परमेसर के भेद के बातमन के रखवार के रूप म जानंय।
1CO 4:2 अब ये बात के जरूरत हवय कि जऊन मन ला ये जिम्मेदारी देय गे हवय, ओमन अपनआप ला बिसवास के लईक साबित करंय।
1CO 4:3 यदि तुमन या कोनो अदालत मोला परखथे, त मेंह जादा धियान नइं देवंव। वास्तव म, मेंह खुद अपनआप ला नइं परखंव।
1CO 4:4 मोर बिबेक ह साफ हवय, पर एकर मतलब ये नो हय कि मेंह निरदोस अंव, काबरकि मोला परखइया तो परभू ए।
1CO 4:5 एकरसेति, ठहिराय गे समय के पहिली कोनो भी चीज ला झन परखव। परभू के आवत तक इंतजार करव। ओह अंधियार म छुपे बातमन ला अंजोर म लानही अऊ ओह मनखेमन के हिरदय के बात ला परगट करही। ओतकी बेरा हर एक झन परमेसर ले परसंसा पाही।
1CO 4:6 हे भाईमन, तुम्हर लाभ खातिर, मेंह ये बातमन म अपन अऊ अपुल्‍लोस के चरचा उदाहरन के रूप म करे हवंव, ताकि तुमन हमर ले ये कहावत के मतलब ला समझव, “परमेसर के बचन म लिखे बातमन ले बाहिर झन जावव।” तब तुमन एक मनखे ला छोंड़के आने के ऊपर घमंड नइं करहू।
1CO 4:7 कोन ह तुमन ला आने ले फरक करके बने मनखे बनाथे? तुम्हर करा जऊन कुछू हवय, ओह परमेसर के दुवारा दिये गे हवय। अऊ जब तुमन ला ये चीजमन मिले हवय, त तुमन काबर अइसने घमंड करथव, जइसने येमन परमेसर के दान नो हंय?
1CO 4:8 तुमन जऊन कुछू चाहथव, ओ जम्मो चीज तुम्हर करा पहिली ले हवय। तुमन पहिले ही धनी बन गे हवव। तुमन हमर बिगर राजा बन गे हवव। बने होतिस कि तुमन सहीच म राजा बन जातेव, ताकि हमन घलो तुम्हर संग राजा बन जातेंन।
1CO 4:9 काबरकि मोला अइसने लगथे कि परमेसर ह हमन ला सबले आखिरी म प्रेरित ठहिराय हवय अऊ ओ भी ओ मनखेमन सहीं, जऊन मन ला खुलेआम मिरतू-दंड के सजा सुनाय गे हवय। हमन स्वरगदूत अऊ मनखेमन के जम्मो संसार बर एक तमासा बन गे हवन।
1CO 4:10 हमन मसीह के खातिर मुरूख अन, पर तुमन मसीह म बहुंत बुद्धिमान अव। हमन दुरबल अन, पर तुमन बलवान अव। तुमन आदर पाथव, पर हमर अपमान होथे।
1CO 4:11 हमन ये बखत घलो भूखन अऊ पीयासन हवन, हमन फटहा-चीरहा कपड़ा पहिरे हवन, हमन मार खावथन, हमर करा रहे बर घर नइं ए।
1CO 4:12 हमन अपन हांथ ले कठोर मेहनत करथन। जब मनखेमन हमन ला गाली बकथें, त हमन ओमन ला आसीस देथन। जब हमर ऊपर अतियाचार करे जाथे, त हमन सह लेथन।
1CO 4:13 जब मनखेमन हमर बदनामी करथें, त हमन नरम अऊ सांत मन होके जबाब देथन। अभी हमन धरती के कुड़ा-कचरा सहीं संसार के बेकार चीज अन।
1CO 4:14 मेंह तुम्हर बेजत्ती करे बर ये बात नइं लिखत हवंव, पर अपन मयारू लइका जानके तुमन ला चेतावत हवंव।
1CO 4:15 हालाकि मसीह म तुम्हर संरछकमन हजारों मनखे हो सकथें, पर तुम्हर बहुंते ददा नइं एं, काबरकि सुघर संदेस के परचार करे के दुवारा मसीह यीसू म, मेंह तुम्हर ददा बन गेंव।
1CO 4:16 एकरसेति, मेंह तुम्हर ले बिनती करथंव कि तुमन मोर सहीं चाल चलव।
1CO 4:17 एकरे कारन, मेंह अपन मयारू बेटा तीमुथियुस ला तुम्हर करा पठोवत हवंव। ओह परभू म बिसवास के लईक अय। ओह तुमन ला, मसीह यीसू म मोर चालचलन के सुरता कराही अऊ जऊन बात, मेंह हर जगह कलीसिया म सिखोथंव, ओह मोर चालचलन ले मेल खाथे।
1CO 4:18 तुमन ले कुछू झन घमंडी हो गे हवंय, जइसने कि मेंह अब तुम्हर करा आबेच नइं करंव।
1CO 4:19 पर कहूं परभू के ईछा होही, त मेंह तुम्हर करा बहुंत जल्दी आहूं अऊ तब मेंह देखहूं कि ये घमंडी मनखेमन का गोठियावत हवंय अऊ ओमन करा का सक्ति हवय।
1CO 4:20 काबरकि परमेसर के राज ह बात करे के चीज नो हय, पर येह सामर्थ के बात ए।
1CO 4:21 तुमन का चाहथव? का मेंह तुमन बर सुंटी लेके सजा दे बर आवंव? या फेर मेंह तुम्हर करा मया अऊ दयालु आतमा म होके आवंव?
1CO 5:1 ये बात बताय गे हवय कि तुम्हर बीच म छिनारी होवथे अऊ ओ भी अइसने किसम के छिनारी, जऊन ह आनजातमन म घलो नइं होवय: एक मनखे ह अपन ददा के घरवाली ला रख ले हवय।
1CO 5:2 अऊ तुमन घमंड करथव। तुमन ला तो एकर कारन ले दुखी होना चाही अऊ जऊन मनखे ह अइसने काम करे हवय, ओला अपन संगति ले निकाल बाहिर करना चाही।
1CO 5:3 हालाकि मेंह सारीरिक रूप म तुम्हर संग नइं अंव, पर आतमा म मेंह तुम्हर संग हाजिर हवंव अऊ अइसने सोचव कि मेंह उहां हाजिर होके, ओ मनखे के बिरोध म फैसला सुना चुके हवंव, जऊन ह अइसने काम करे हवय।
1CO 5:4 जब तुमन हमर परभू यीसू के नांव म जूरथव अऊ मेंह तुम्हर संग आतमा म हवंव अऊ हमर परभू यीसू के सामर्थ उहां हवय,
1CO 5:5 त ये मनखे ला सैतान के हांथ म सऊंप देवव, ताकि ओकर देहें ह नास हो जावय अऊ परभू के दिन म ओकर आतमा ह बच जावय।
1CO 5:6 तुम्हर घमंड करई ह ठीक नो हय। का तुमन नइं जानव कि थोरकन खमीर ह जम्मो गुंथाय पीसान ला खमीर कर देथे?
1CO 5:7 जुन्ना खमीर सहीं पाप ला अपन म ले निकाल दव, ताकि तुमन बिगर खमीर के नवां गुंथाय पीसान सहीं बिगर पाप के हो जावव—जइसने कि सही म तुमन हवव। काबरकि मसीह ह हमर बर बलिदान हो गे हवय, जऊन ह फसह के मेढ़ा-पीला ए।
1CO 5:8 एकरसेति आवव, हमन तिहार ला, ये जुन्ना खमीर के रोटी के संग झन मनई, काबरकि ये जुन्ना खमीर ह पाप अऊ दुस्टता ए। पर आवव, हमन बिगर खमीर के रोटी के संग तिहार ला मनई, काबरकि बिगर खमीर के रोटी ह ईमानदारी अऊ सच्चई ए।
1CO 5:9 मेंह अपन चिट्ठी म तुमन ला लिखे हवंव कि छिनार मनखेमन संग संगति झन करव।
1CO 5:10 मोर कहे के मतलब ये संसार के ओ मनखेमन नो हंय, जऊन मन अनैतिक, या लोभी अऊ धोखेबाज या मूरती-पूजा करइया अंय। काबरकि अइसने दसा म तो तुमन ला ये संसार ला छोड़ना पड़ जाही।
1CO 5:11 पर मोर लिखे के मतलब ये अय कि तुमन ओ मनखे के संग संगति झन करव, जऊन ह अपनआप ला भाई कहिथे, पर ओह छिनार या लोभी, मूरती-पूजा करइया या बदनामी करइया, पियक्कड़ या धोखेबाज ए। अइसने मनखे संग खाना घलो झन खावव।
1CO 5:12 कलीसिया के बाहिर के मनखेमन के बारे म नियाय करई मोर काम नो हय। पर कलीसिया के मनखेमन के नियाय करई तुम्हर काम ए।
1CO 5:13 परमेसर ह बाहिर के मनखेमन के नियाय करही। परमेसर के बचन म लिखे हवय, “कुकरमी मनखे ला अपन बीच ले निकाल दव।”
1CO 6:1 यदि तुमन ले काकरो, अपन संगी बिसवासी के संग कोनो बिवाद हवय, त ओह अबिसवासीमन करा नियाय बर जाय के हिम्मत कइसने करथे, एकर बनिस्पत कि ओह संतमन ले ये झगरा के निपटारा करवाय?
1CO 6:2 का तुमन नइं जानव कि परमेसर के मनखेमन संसार के नियाय करहीं? अऊ जबकि तुमन ला संसार के नियाय करना हवय, त का तुमन छोटे-छोटे झगरा के निपटारा करे के लईक नो हव?
1CO 6:3 का तुमन नइं जानव कि हमन स्वरगदूतमन के नियाय करबो? त ये जिनगी के समस्या ला तुमन ला आसानी से निपटाना चाही।
1CO 6:4 एकरसेति, यदि तुम्हर बीच म अइसने बिवाद हवय, त का तुमन नियाय करे बर ओमन ला कहिहू, जेमन के चालचलन कलीसिया म सही नइं ए।
1CO 6:5 मेंह ये बात एकरसेति कहथंव कि तुमन ला कुछू तो सरम होवय। का ये हालत हो गे हवय कि तुम्हर बीच म अइसने कोनो बुद्धिमान मनखे नइं ए, जऊन ह बिसवासी भाईमन म झगरा के निपटारा कर सकय?
1CO 6:6 पर एकर बदले एक भाई ह दूसर भाई के बिरोध म अदालत जाथे अऊ अबिसवासीमन एकर नियाय करथें।
1CO 6:7 तुम्हर बीच म मुकदमा होथे; एकर मतलब ये अय कि तुमन पूरा हार मान ले हवव। असल म तुमन खुद अनियाय काबर नइं सहव? तुमन खुद हानि काबर नइं उठावव?
1CO 6:8 एकर बदले कि तुमन खुद अनियाय करथव अऊ हानि पहुंचाथव, अऊ ओ भी अपन भाईमन ला।
1CO 6:9 का तुमन नइं जानव कि दुस्ट मनखेमन परमेसर के राज के वारिस नइं हो सकंय? धोखा झन खावव। न तो छिनारी करइया, न मूरती-पूजा करइया, न दूसर के माईलोगन संग बेभिचार करइया, न पुरूस बेस्या, न समलैंगिक,
1CO 6:10 न चोर, न लोभी, न मतवार, न बदनामी करइया अऊ न तो धोखेबाजमन परमेसर के राज के वारिस होहीं।
1CO 6:11 तुमन ले कुछू मनखेमन अइसने रिहिन। पर परभू यीसू मसीह के नांव म अऊ हमर परमेसर के आतमा के दुवारा तुमन ला धोय गे हवय, तुमन ला पाप ले सुध करे गे हवय अऊ तुमन ला धरमी ठहिराय गे हवय।
1CO 6:12 “मोला कुछू भी चीज करे के अनुमति हवय”—पर हर चीज ह लाभ के नो हय। “मोला कुछू भी चीज करे के अनुमति हवय”—पर मेंह कोनो भी चीज के गुलाम नइं बनंव।
1CO 6:13 “भोजन ह पेट खातिर अऊ पेट ह भोजन खातिर अय”—पर परमेसर ह ये दूनों ला नास करही। देहें ह बेभिचार करे बर नो हय, पर परभू के सेवा करे बर अय अऊ परभू ह देहें के खियाल रखथे।
1CO 6:14 परमेसर ह अपन सामर्थ ले परभू ला मरे म ले जियाईस, अऊ ओह हमन ला घलो जियाही।
1CO 6:15 का तुमन नइं जानव कि तुम्हर देहें ह मसीह के अंग ए? त का मेंह मसीह के अंग ला लेके बेस्या के संग जोड़ंव? अइसने कभू नइं होवय।
1CO 6:16 का तुमन नइं जानव कि जऊन ह अपनआप ला एक बेस्या के संग जोड़थे, ओह ओकर संग म एकेच तन हो जाथे? काबरकि परमेसर के बचन ह कहिथे, “ओ दूनों एक तन होहीं।”
1CO 6:17 पर जऊन ह अपनआप ला परभू के संग जोड़थे, ओह ओकर संग आतमा म एक हो जाथे।
1CO 6:18 एकरसेति छिनारी करई ले दूर रहव। आने जम्मो पाप जऊन ला मनखे ह करथे, ओह ओकर देहें के बाहिर होथे, पर जऊन ह छिनारी करथे, ओह अपन खुद के देहें के बिरोध म पाप करथे।
1CO 6:19 का तुमन नइं जानव कि तुम्हर देहें ह पबितर आतमा के मंदिर ए, जऊन ह तुमन म रहिथे अऊ जऊन ला परमेसर ह तुमन ला दे हवय? तुमन अपन खुद के नो हव।
1CO 6:20 परमेसर ह दाम देके तुमन ला बिसाय हवय। एकरसेति, अपन देहें के दुवारा परमेसर के आदर करव।
1CO 7:1 अब मेंह ओ बातमन ला लिखत हंव, जेकर बारे म तुमन अपन चिट्ठी म पुछे हवव: एक आदमी बर येह बने बात ए कि ओह कोनो माईलोगन के संग सारीरिक संबंध झन बनावय।
1CO 7:2 पर छिनारी ले बचे बर, हर एक मनखे के अपन घरवाली अऊ हर एक माईलोगन के अपन घरवाला होवय।
1CO 7:3 घरवाला ह अपन घरवाली के बिहाव हक ला पूरा करय, अऊ वइसने घरवाली ह अपन घरवाला के हक ला पूरा करय।
1CO 7:4 घरवाली के देहें ऊपर सिरिप ओकर ही अधिकार नइं रहय, फेर येह ओकर घरवाला के घलो अय। ओही किसम ले घरवाला के देहें ह सिरिप ओकर अपन के ही नो हय, फेर येह ओकर घरवाली के घलो अय।
1CO 7:5 एक-दूसर के बिहाव हक ला झन मारव, पर सिरिप एक-दूसर के सहमती ले कुछू समय बर सारीरिक संबंध ला बंद रखव, ताकि तुमन अपन ओ समय ला पराथना म बीता सकव। तब फेर एक संग हो जावव ताकि तुम्हर धीरज म कमी के कारन, सैतान ह तुमन ला झन परख सकय।
1CO 7:6 मेंह ये बात तुम्हर भलई खातिर कहथंव, येह हुकूम नो हय।
1CO 7:7 मेंह चाहथंव कि जइसने मेंह हवंव, वइसने जम्मो मनखेमन रहंय। पर परमेसर ह हर एक मनखे ला अलग-अलग बरदान दे हवय; कोनो ला ये बरदान, त कोनो ला ओ बरदान।
1CO 7:8 पर मेंह अबिवाहित अऊ बिधवामन ला ये कहथंव कि येह ओमन बर बने अय कि ओमन मोर सहीं अबिवाहित रहंय।
1CO 7:9 पर कहूं ओमन अपनआप ला संभाल नइं सकंय, त ओमन ला बिहाव कर लेना चाही, काबरकि कामातुर रहे के बदले बिहाव कर लेना उचित ए।
1CO 7:10 सादी-सुदा मनखेमन ला मेंह ये हुकूम देवत हंव (मेंह नइं, पर परभू ह हुकूम देवत हवय): घरवाली ह अपन घरवाला ला झन छोंड़य।
1CO 7:11 पर यदि ओह अपन घरवाला ला छोंड़ देथे, त ओह दूसर बिहाव झन करय या फेर ओह अपन घरवाला ले फेर मेल-मिलाप कर ले। अऊ घरवाला ह अपन घरवाली ला झन छोंड़य।
1CO 7:12 बाकि मनखेमन ला परभू ह नइं, पर मेंह कहथंव कि यदि कोनो भाई के घरवाली ह परभू ऊपर बिसवास नइं करय, पर ओह ओ भाई के संग रहे चाहथे, त ओ भाई ह ओला झन छोंड़य।
1CO 7:13 अऊ यदि कोनो माईलोगन के घरवाला ह परभू ऊपर बिसवास नइं करय, पर ओह ओ माईलोगन के संग रहे चाहथे, त ओ माईलोगन ह ओला झन छोंड़य।
1CO 7:14 काबरकि जऊन घरवाला ह परभू के ऊपर बिसवास नइं करय, ओह अपन बिसवासी घरवाली के जरिये पबितर हो जाथे, अऊ जऊन घरवाली ह परभू ऊपर बिसवास नइं करय, ओह अपन बिसवासी घरवाला के जरिये पबितर हो जाथे। नइं तो तुम्हर लइकामन असुध होतिन, पर अब ओमन पबितर हवंय।
1CO 7:15 पर जऊन मनखे ह परभू के ऊपर बिसवास नइं करय, यदि ओह छोंड़के चल देथे, त ओला जावन दव। अइसने दसा म बिसवासी भाई या बहिनी ऊपर कोनो बंधन नइं ए। परमेसर ह हमन ला सांति से रहे बर बलाय हवय।
1CO 7:16 हे घरवाली, तेंह कइसे जानत हस कि तेंह अपन घरवाला के उद्धार करा लेबे? या हे घरवाला, तेंह कइसे जानत हस कि तेंह अपन घरवाली के उद्धार करा लेबे?
1CO 7:17 हर एक मनखे ह जिनगी म वइसने ही चलय, जइसने परभू ह ओला दे हवय अऊ जइसे कि परमेसर ह ओला बलाय हवय। एहीच नियम ला मेंह जम्मो कलीसिया म बताथंव।
1CO 7:18 परमेसर के बलाय के पहिली जेकर खतना हो गे रिहिस, ओह खतनारहित झन बनय; अऊ परमेसर के बलाय के पहिली जेकर खतना नइं होय रिहिस, ओह खतना झन करावय।
1CO 7:19 न तो खतना ह कुछू अय अऊ न ही खतनारहित; पर परमेसर के हुकूम ला मानना ही जम्मो कुछू अय।
1CO 7:20 हर एक मनखे ला ओहीच दसा म रहना चाही, जऊन दसा म, ओह परमेसर के बलाय के बेरा म रिहिस।
1CO 7:21 यदि तेंह गुलाम रहय, जब परमेसर ह तोला बलाईस, त एकर फिकर झन कर। पर यदि तेंह गुलामी ले छुटकारा पा सकथस, त ओकर उपाय कर।
1CO 7:22 काबरकि जऊन ला परभू ह ओकर गुलामी के दसा म बलाईस, ओह परभू के दुवारा सुतंतर करे गे मनखे अय। ओहीच किसम ले जऊन ला सुतंतर दसा म बलाय गीस, ओह मसीह के गुलाम ए।
1CO 7:23 दाम देके तुमन ला बिसाय गे हवय; मनखेमन के गुलाम झन बनव।
1CO 7:24 हे भाईमन हो, हर एक मनखे परमेसर के संग ओ दसा म रहय, जऊन दसा म ओला बलाय गे रिहिस।
1CO 7:25 कुंवारीमन के बारे म, मोला परभू ले कोनो हुकूम नइं मिले हवय, पर परभू के दया ले एक बिसवासयोग्य मनखे के रूप म, मेंह अपन बिचार ला बतावत हंव।
1CO 7:26 अभी के संकट के कारन मेंह सोचथंव कि तुम्हर बर येह बने होही कि जइसने तुमन हवव, वइसने रहव।
1CO 7:27 कहूं तुमन सादी-सुदा अव, त अपन घरवाली ला छोंड़े के कोसिस झन करव, अऊ कहूं तुमन बिहाव नइं करे हवव, त बिहाव करे के बारे म झन सोचव।
1CO 7:28 पर कहूं तुमन बिहाव करथव, त येह पाप नो हय; अऊ कहूं कोनो कुंवारी कन्या ह बिहाव करथे, त ओह पाप नो हय। पर जऊन मन बिहाव करथें, ओमन ये जिनगी म बहुंत समस्या म पड़हीं, अऊ मेंह तुमन ला ये समस्या ले बचाय चाहथंव।
1CO 7:29 हे भाईमन हो, मोर कहे के मतलब ये अय कि जादा समय नइं ए। एकरसेति अब ले, जऊन मन सादी-सुदा अंय, ओमन अइसने रहंय जइसने कि ओमन के बिहाव नइं होय रिहिस।
1CO 7:30 जऊन मन दुख मनाथें; ओमन अइसने रहंय, जइसने ओमन ला कोनो दुख नइं रिहिस। जऊन मन खुस हवंय, ओमन अइसने रहंय जइसने ओमन खुस नइं रिहिन। जऊन मन कुछू बिसाथें, ओमन अइसने देखावंय जइसने कि ओ सामान ह ओमन के नो हय।
1CO 7:31 जऊन मन संसार के चीजमन के उपयोग करथें, ओमन अइसने रहंय जइसने कि ओमन ये चीजमन म मगन नइं रिहिन। काबरकि ये संसार के अभी जऊन दसा हवय, ओह बदलत जावत हवय।
1CO 7:32 में चाहथंव कि तुमन कोनो किसम के चिंता झन करव। जेकर बिहाव नइं होय हवय, ओह परभू के काम के फिकर म रहिथे कि ओह परभू ला कइसने खुस करय।
1CO 7:33 पर एक सादी-सुदा मनखे, ये संसार के काम के फिकर म रहिथे कि ओह अपन घरवाली ला कइसने खुस रखय,
1CO 7:34 अऊ ओकर मन ह एती-ओती होवत रहिथे। जऊन माईलोगन के बिहाव नइं होय हवय, ओह या एक कुंवारी ह परभू के काम के फिकर म रहिथे। ओकर उदेस्य ये रहिथे कि ओह अपन देहें अऊ आतमा दूनों के दुवारा परभू के सेवा म लगे रहय। पर सादी-सुदा माईलोगन ह ये संसार के काम के फिकर म रहिथे कि ओह अपन घरवाला ला कइसने खुस रखय।
1CO 7:35 मेंह ये बात तुम्हर भलई खातिर कहथंव, तुमन म बंधना डाले बर नइं। मेंह चाहथंव कि तुमन सही अऊ बने काम करव अऊ अपन हिरदय ला बिगर एती-ओती लगाय, पूरा अपनआप ला परभू के सेवा म दे दव।
1CO 7:36 यदि काकरो मंगनी हो गे हवय अऊ ओकर हाव-भाव ह ओ कुंवारी छोकरी के प्रति उचित नइं ए, अऊ यदि ओ छोकरी के जवानी ह ढरत जावथे अऊ ओ मनखे ह महसूस करथे कि ओला बिहाव कर लेना चाही, त ओला अइसनेच करना चाही। येह पाप नो हय। ओमन ला बिहाव कर लेना चाही।
1CO 7:37 पर ओ मनखे जऊन ह अपन मन म अटल बिचार कर ले हवय, अऊ ओला जरूरत नइं ए, अऊ ओह अपन ईछा ला काबू म रखथे, अऊ ओह अपन मन म ठान ले हवय कि ओह लड़की ले अभी बिहाव नइं करय, त ये मनखे घलो सही काम करथे।
1CO 7:38 एकरसेति, जऊन ह लड़की ले बिहाव करथे, ओह बने करथे, पर जऊन ह लड़की ले बिहाव नइं करय, ओह अऊ घलो बने करथे।
1CO 7:39 जब तक कोनो माईलोगन के घरवाला ह जीयत हवय, तब तक ओह ओकर ले बंधे हवय। पर यदि ओकर घरवाला ह मर जावय, त ओह जेकर ले चाहय, ओकर ले बिहाव करे बर सुतंतर ए, पर ओह परभू के ही मनखे होना चाही।
1CO 7:40 मोर बिचार म, ओह जादा खुस रहिही, यदि ओह जइसने हवय वइसनेच रहय, अऊ में सोचथंव कि परमेसर के आतमा ह मोर म घलो हवय।
1CO 8:1 अब मूरतीमन ला चघाय गे जेवन के बारे म: हमन जानथन कि हमन जम्मो झन करा गियान हवय। गियान ह घमंड ला लाथे, पर मया के दुवारा बढ़ती होथे।
1CO 8:2 यदि कोनो सोचथे कि ओह कुछू जानथे, त ओला जइसने जानना चाही, ओह अभी तक ले नइं जानथे।
1CO 8:3 पर जऊन ह परमेसर ले मया करथे, ओला परमेसर ह जानथे।
1CO 8:4 एकरसेति, मूरतीमन ला चघाय गे जेवन ला खाय के बारे म: हमन जानथन कि संसार म मूरती के कोनो सच्चई नइं ए, अऊ एके झन परमेसर ला छोंड़के अऊ कोनो परमेसर नइं ए।
1CO 8:5 हालाकि अकास म या धरती ऊपर बहुंते मन देवता कहाथें (अऊ जइसे कि वास्तव म ये किसम के बहुंते “देवता” अऊ बहुंते “परभू” हवंय),
1CO 8:6 पर हमर बर तो सिरिप एकेच परमेसर हवय याने कि परमेसर ददा जऊन ह जम्मो चीज ला बनाईस अऊ जेकर बर हमन जीयत हवन; अऊ सिरिप एकेच परभू हवय याने कि यीसू मसीह जेकर जरिये जम्मो चीजमन बनाय गीन अऊ जेकर जरिये हमन जीयत हवन।
1CO 8:7 पर हर एक झन ये बात ला नइं जानय। कुछू मनखेमन ला मूरतीमन के अइसने आदत हो गे हवय कि जब ओमन ये किसम के खाना ला खाथें, त येला मूरती ला चघाय खाना समझथें, अऊ ओमन के बिबेक ह कमजोर होय के कारन येह असुध ठहिरथे।
1CO 8:8 खाना ह हमन ला परमेसर के लकठा म नइं लानय। यदि हमन येला नइं खाथन, त कोनो नुकसान नइं होवय, अऊ यदि खाथन, त कुछू फायदा नइं होवय।
1CO 8:9 सचेत रहव, ताकि तुम्हर ये सुतंतरता के अधिकार ह बिसवास म कमजोर मनखे के पाप म गिरे के कारन झन बनय।
1CO 8:10 तुमन ला मूरती के मंदिर म खाय के बारे म गियान हवय, पर यदि कोनो कमजोर बिबेक वाला तुमन ला उहां खावत देखथे, त का ओह मूरती ला चघाय खाना ला खाय बर उत्साहित नइं होही।
1CO 8:11 ये किसम ले, ये भाई ह जेकर बिबेक ह कमजोर हवय अऊ जेकर बर मसीह ह मरिस, ओह तुम्हर गियान के कारन नास हो जाही।
1CO 8:12 जब तुमन ये किसम ले अपन भाई के बिरोध म पाप करथव अऊ ओमन के कमजोर बिबेक ला चोट पहुंचाथव, त तुमन मसीह के बिरोध म पाप करथव।
1CO 8:13 एकरसेति, यदि मोर कुछू खाय के कारन मोर भाई ह पाप म गिरथे, त मेंह मांस ला फेर कभू नइं खावंव ताकि मेंह ओकर पाप म गिरे के कारन झन बनंव।
1CO 9:1 का मेंह सुतंतर नइं अंव? का मेंह प्रेरित नो हंव? का मेंह हमर परभू यीसू ला नइं देखे हवंव? का तुमन परभू म मोर काम के फर नो हव?
1CO 9:2 भले ही मेंह आने मन बर प्रेरित नो हंव, पर तुम्हर बर तो प्रेरित अंव। काबरकि एक प्रेरित के रूप म मेंह जऊन काम, परभू म करे हवंव, तुमन ओकर छाप अव।
1CO 9:3 जऊन मन मोला परखत हवंय, ओमन बर मोर ये जबाब अय।
1CO 9:4 का हमन ला खाय-पीये के अधिकार नइं ए?
1CO 9:5 का हमन ला ये अधिकार नइं ए कि कोनो बिसवासी बहिनी ले बिहाव करके, ओला अपन संग यातरा म लेके चलन, जइसने कि आने प्रेरित अऊ परभू के भाईमन अऊ कैफा करत हवंय?
1CO 9:6 या फेर सिरिप मोर अऊ बरनबास बर ये जरूरी अय कि हमन अपन भरन-पोसन बर काम करन?
1CO 9:7 कोन ह अपन खुद के खरचा ले सेना म सैनिक के काम करथे? कोन ह अंगूर के बारी लगाथे अऊ ओकर अंगूर ला नइं खावय? कोन ह पसुमन के झुंड के देखरेख करथे अऊ ओमन के दूध नइं पीयय?
1CO 9:8 का मेंह ये बात सिरिप मनखे के सोच के मुताबिक कहथंव? का मूसा के कानून घलो एहीच बात नइं कहय?
1CO 9:9 काबरकि मूसा के कानून म ये लिखे हवय: “दंवरी म चलत बईला के मुहूं ला झन बांधव।” का येह बईला ए, जेकर बारे म परमेसर ह फिकर करथे?
1CO 9:10 का ओह हमर बारे म नइं कहत हवय? निस्चित रूप ले, येह हमर बर लिखे गे हवय, काबरकि नांगर जोतइया अऊ दंवरी चलइयामन ला, ये आसा म अपन काम ला करना चाही कि ओमन ला फसल के बांटा मिलही।
1CO 9:11 यदि हमन तुम्हर बीच म आतमिक बीज बोय हवन, अऊ तुम्हर ले संसारिक मदद लेथन, त का येह जादाती ए?
1CO 9:12 यदि आने मन तुम्हर ले ये मदद लेय के अधिकार रखथें, त का हमर अऊ घलो जादा हक नइं बनय? पर हमन ये अधिकार के उपयोग नइं करेंन। एकर बदले, हमन जम्मो बात ला सहे हवन ताकि हमन मसीह के सुघर संदेस के परचार म कोनो बाधा झन होवन।
1CO 9:13 का तुमन नइं जानव कि जऊन मन मंदिर म काम करथें, ओमन ला मंदिर म ले खाना मिलथे, अऊ जऊन मन बेदी म सेवा करथें, ओमन ला बेदी म चघाय गे चीज म ले बांटा मिलथे?
1CO 9:14 ओहीच किसम ले, परभू ह हुकूम दे हवय कि जऊन मन सुघर संदेस के परचार करथें, ओमन के भरन-पोसन सुघर संदेस म ले होवय।
1CO 9:15 पर मेंह येमा ले कोनो भी अधिकार के उपयोग नइं करेंव। अऊ मोर लिखे के ये मतलब नो हय कि तुमन मोर बर अइसने करव। काबरकि मेंह मर जाना पसंद करहूं, एकर बनिस्पत कि कोनो मोर ये घमंड ला बेकार समझय।
1CO 9:16 तभो ले जब मेंह सुघर संदेस के परचार करथंव, त येह मोर बर कुछू घमंड के बात नो हय, काबरकि परचार करे बर, मेंह बाध्य अंव। यदि मेंह सुघर संदेस के परचार नइं करंव, त मोर ऊपर धिक्कार ए।
1CO 9:17 यदि मेंह अपन ईछा ले परचार करथंव, त मोर बर एक ईनाम रखे हवय; पर यदि मेंह अपन ईछा ले येला नइं करंव, त मेंह सिरिप ओ जिम्मेदारी ला पूरा करत हंव, जऊन ला परभू ह मोला सऊंपे हवय।
1CO 9:18 तब का ए मोर ईनाम? सिरिप ये कि मेंह सुघर संदेस के परचार मुफत म करंव, अऊ एकर परचार करे म अपन अधिकार के उपयोग नइं करंव।
1CO 9:19 हालाकि मेंह कोनो मनखे के अधीन म नइं अंव, तभो ले मेंह अपनआप ला हर एक जन के दास बना ले हंव, ताकि जादा से जादा मनखेमन ला मेंह परभू बर जीत सकंव।
1CO 9:20 यहूदीमन बर मेंह यहूदी सहीं बन गेंव, ताकि यहूदीमन ला जीत सकंव। जऊन मन मूसा के कानून के अधीन म हवंय, ओमन बर मेंह मूसा के कानून के अधीन म रहे सहीं बनेंव (हालाकि मेंह कानून के अधीन नइं अंव), ताकि जऊन मन मूसा के कानून के अधीन म हवंय, ओमन ला परभू बर जीत सकंव।
1CO 9:21 जेमन करा मूसा के कानून नइं ए याने कि आनजातमन बर, मेंह आनजात सहीं बन गेंव ताकि मेंह आनजातमन ला परभू बर जीत सकंव। एकर मतलब ये नो हय कि मेंह परमेसर के कानून ला नइं मानंव; मेंह मसीह के कानून के अधीन म हवंव।
1CO 9:22 बिसवास म कमजोर मनखेमन बर, मेंह कमजोर बनेंव, ताकि कमजोर मनखेमन ला परभू बर जीत सकंव। मेंह जम्मो मनखे बर जम्मो कुछू बनेंव, ताकि कोनो भी किसम ले ओमा के कुछू मनखे के उद्धार करा सकंव।
1CO 9:23 मेंह सुघर संदेस के हित म, ये जम्मो काम करथंव ताकि एकर आसीस म भागीदार हो सकंव।
1CO 9:24 का तुमन नइं जानव कि दऊड़ म जम्मो झन दऊड़थें, पर सिरिप एके झन ला ईनाम मिलथे? एकरसेति अइसने दऊड़व कि तुमन ला ईनाम मिलय।
1CO 9:25 हर खिलाड़ी ह सीखे के समय म अपनआप ला बहुंत अनुसासन म रखथे। ओमन एक नासमान मुकुट ला पाय बर, अइसने करथें, पर हमन तो ओ मुकुट ला पाय बर काम करथन, जऊन ह सदाकाल तक रहिही।
1CO 9:26 एकरसेति, मेंह ओ मनखे सहीं नइं दऊड़ंव, जऊन ह बिगर कोनो उदेस्य के दऊड़थे; मेंह ओ मनखे सहीं नइं लड़ंव, जऊन ह हवा म मुक्का मारथे।
1CO 9:27 पर मेंह अपन देहें ला तकलीफ देथंव अऊ येला अपन बस म रखथंव, ताकि आने मन ला परचार करे के बाद, मेंह खुद ईनाम ले बंचित झन होवंव।
1CO 10:1 हे भाईमन हो, मेंह नइं चाहत हंव कि तुमन ये बात ले अनजान रहव कि हमर पुरखामन बादर के छइहां म रिहिन अऊ ओ जम्मो झन समुंदर के बीच म ले पार हो गीन।
1CO 10:2 मूसा के पाछू चलइया के रूप म, ओमन बादर म अऊ समुंदर म बतिसमा लीन।
1CO 10:3 ओ जम्मो झन एकेच आतमिक भोजन करिन;
1CO 10:4 अऊ जम्मो झन एकेच आतमिक पानी ला पीईन; काबरकि ओमन ओ आतमिक चट्टान म ले पीयत रिहिन, जऊन ह ओमन के संगे-संग चलत रिहिस अऊ ओ चट्टान ह मसीह रिहिस।
1CO 10:5 तभो ले परमेसर ह ओमा के जादातर मनखेमन ले खुस नइं रिहिस, एकरसेति ओमन सुनसान जगह म एती-ओती होके मर गीन।
1CO 10:6 ये बातमन हमर बर एक चेतउनी के रूप म अय, ताकि हमन, ओमन सहीं अपन मन ला खराप बात म झन लगावन।
1CO 10:7 मूरती-पूजा करइया झन बनव, जइसने कि ओमा के कुछू मनखेमन रिहिन। परमेसर के बचन म लिखे हवय: “मनखेमन खाय-पीये बर बईठिन अऊ उठके उछल-मंगल करे लगिन।”
1CO 10:8 हमन छिनारी झन करन जइसने कि ओमा के कुछू मनखेमन करिन अऊ एके दिन म ओमा ले तेईस हजार मनखे मर गीन।
1CO 10:9 हमन मसीह ला झन परखन, जइसने कि ओमा के कुछू मनखेमन करिन अऊ सांपमन के चाबे ले मर गीन।
1CO 10:10 तुमन झन कुड़कुड़ावव जइसने कि ओमा के कुछू मनखेमन करिन अऊ नास करइया स्वरगदूत के दुवारा मारे गीन।
1CO 10:11 जऊन बातमन ओमन के ऊपर होईस, ओह उदाहरन के रूप म रिहिस अऊ ओ बातमन ला हमर बर चेतउनी के रूप म लिखे गीस, काबरकि हमन ओ जुग म रहत हवन, जब संसार के अन्त होवइया हवय।
1CO 10:12 एकरसेति, यदि तुमन ये सोचथव कि तुमन बिसवास म मजबूत हवव, त सचेत रहव, ताकि तुमन पाप म झन गिर पड़व।
1CO 10:13 तुमन कोनो अइसने परिछा म नइं पड़े हवव, जऊन ह मनखे के सहे के बाहिर ए। परमेसर ह बिसवासयोग्य अय अऊ ओह तुमन ला तुम्हर सक्ति ले बाहिर परिछा म पड़न नइं देवय। पर जब तुमन परिछा म पड़ जावव, त ओह तुमन ला परिछा ले बाहिर निकले के उपाय घलो बताही, ताकि तुमन ओला सह सकव।
1CO 10:14 एकरसेति, हे मोर मयारू संगीमन हो! मूरती-पूजा ले दूरिहा रहव।
1CO 10:15 मेंह तुमन ला बुद्धिमान मनखे जानके कहथंव; जऊन बात मेंह कहथंव, ओला तुमन खुदे परखव।
1CO 10:16 ओ धनबाद के कटोरा, जेकर बर हमन परमेसर ला धनबाद देथन, का येह मसीह के लहू म भागीदारी नो हय? अऊ जऊन रोटी ला हमन टोरथन, का येह मसीह के देहें म भागीदारी नो हय?
1CO 10:17 काबरकि एकेच रोटी ए; हमन हालाकि बहुंत झन हवन, पर हमन एकेच देहें अन, काबरकि हमन जम्मो झन ओ एकेच रोटी म भागी होथन।
1CO 10:18 इसरायली मनखेमन ला देखव: जऊन मन बलिदान म चघाय गे चीज ला खाथें, का ओमन बेदी म भागी नइं होवंय?
1CO 10:19 तब मोर कहे के का मतलब ए? का मूरती ला चघाय खाना ह कुछू ए, या मूरती ह कुछू ए?
1CO 10:20 कुछू घलो नइं। पर में कहथंव कि मूरती-पूजा करइयामन जऊन बलिदान चघाथें, ओमन परेत आतमामन ला चघाथें, परमेसर ला नइं, अऊ मेंह नइं चाहंव कि तुमन परेत आतमामन के संग भागीदार होवव।
1CO 10:21 तुमन परभू के कटोरा अऊ परेत आतमामन के कटोरा, दूनों म ले नइं पी सकव। तुमन परभू के भोज अऊ परेत आतमामन के भोज, दूनों म सामिल नइं हो सकव।
1CO 10:22 का हमन परमेसर के जलन ला भड़काय के कोसिस करत हन? का हमन ओकर ले जादा बलवान अन?
1CO 10:23 “मोला हर चीज करे के अनुमति हवय,” तुमन कहिथव—पर हर चीज ह लाभ के नो हय। “मोला हर चीज करे के अनुमति हवय”—पर हर चीज ले उन्नति नइं होवय।
1CO 10:24 हमन ला सिरिप अपन भलई ही नइं, पर आने मन के भलई घलो देखना चाही।
1CO 10:25 बजार म जऊन मांस बिकथे, ओला खावव अऊ बिबेक के कारन कोनो सवाल झन पुछव,
1CO 10:26 काबरकि परमेसर के बचन ह कहिथे, “धरती अऊ येमा के हर एक चीज परभू के अय।”
1CO 10:27 यदि कोनो अबिसवासी तुमन ला खाय बर बलाथे, अऊ तुमन जाय बर चाहथव, त जऊन कुछू तुम्हर आघू म परोसे जाथे, ओला खावव अऊ बिबेक के कारन कोनो सवाल झन पुछव।
1CO 10:28 पर यदि कोनो तुमन ला बता देथे कि येह बलिदान म चघाय गे खाना अय; त ओ बतइया के सेति अऊ बिबेक के सेति, ओ खाना ला झन खावव।
1CO 10:29 मोर कहे के मतलब तुम्हर बिबेक नइं, पर आने मनखे के बिबेक। काबरकि मोर सुतंतरता ह आने मनखे के बिबेक दुवारा काबर परखे जावय?
1CO 10:30 यदि मेंह परमेसर ला धनबाद देके ओ खाना म सामिल होथंव, त ओकर बर मोर ऊपर काबर दोस लगना चाही?
1CO 10:31 एकरसेति, चाहे तुमन खावव या पीयव या जऊन कुछू घलो करव, ये जम्मो काम परमेसर के महिमा बर करव।
1CO 10:32 तुमन काकरो पाप म गिरे के कारन झन बनव, चाहे ओह यहूदी होवय या यूनानी होवय या परमेसर के कलीसिया।
1CO 10:33 जऊन कुछू मेंह करथंव, ओकर दुवारा मेंह हर एक मनखे ला खुस रखे के कोसिस करथंव। काबरकि मेंह अपन खुद के भलई नइं, पर बहुंते झन के भलई ला देखथंव कि ओमन उद्धार पावंय।
1CO 11:1 मोर चालचलन के नकल करव, जइसने मेंह मसीह के चालचलन के नकल करथंव।
1CO 11:2 मेंह तुम्हर परसंसा करत हंव काबरकि तुमन हर एक बात म मोला सुरता करथव अऊ जऊन सिकछा मेंह तुमन ला देय रहेंव, ओकर मुताबिक चलथव।
1CO 11:3 अब मेंह चाहथंव कि तुमन ये बात ला जान लेवव कि हर आदमी के मुड़ मसीह ए, अऊ माईलोगन के मुड़ ह ओकर घरवाला ए अऊ मसीह के मुड़ ह परमेसर ए।
1CO 11:4 ओ मनखे जऊन ह अपन मुड़ ला ढांकके पराथना या अगमबानी करथे, ओह अपन मुड़ के अपमान करथे।
1CO 11:5 अऊ ओ माईलोगन जऊन ह अपन मुड़ ला बिगर ढांके पराथना या अगमबानी करथे, ओह अपन मुड़ के अपमान करथे—ये बात ह अइसने अय मानो ओह अपन बाल ला मुड़वा ले हवय।
1CO 11:6 यदि कोनो माईलोगन अपन मुड़ ला नइं ढांकय, त ओला अपन मुड़ ला मुड़वा लेना चाही; अऊ यदि माईलोगन बर ओकर बाल कटई या बाल मुड़वई कलंक के बात ए, त ओला अपन मुड़ ढांकना चाही।
1CO 11:7 आदमी ला अपन मुड़ नइं ढांकना चाही, काबरकि ओह परमेसर के सरूप अऊ महिमा ए, पर माईलोगन ह आदमी के महिमा ए।
1CO 11:8 आदमी ह माईलोगन ले बनाय नइं गीस, पर माईलोगन ह आदमी ले बनाय गीस;
1CO 11:9 अऊ आदमी ह माईलोगन बर बनाय नइं गीस, पर माईलोगन ह आदमी बर बनाय गीस।
1CO 11:10 एकरे कारन, अऊ स्वरगदूतमन के कारन, माईलोगन ला अपन मुड़ म अधिकार के चिनहां होना चाही।
1CO 11:11 तभो ले परभू म न तो माईलोगन ह आदमी ले अलग अय अऊ न ही आदमी ह माईलोगन ले अलग अय।
1CO 11:12 काबरकि जइसने माईलोगन ह आदमी ले बनाय गीस, वइसने आदमी ह घलो माईलोगन ले जनमे हवय। पर हर चीज परमेसर करा ले आथे।
1CO 11:13 तुमन खुदे फैसला करव: का कोनो माईलोगन बर येह उचित ए कि ओह बिगर मुड़ ढांके परमेसर ले पराथना करय?
1CO 11:14 सुभाविक रूप ले का तुमन नइं जानव कि यदि कोनो आदमी ह लम्बा बाल रखथे, त येह ओकर बर कलंक के बात ए,
1CO 11:15 पर यदि कोनो माईलोगन ह लम्बा बाल रखथे, त येह ओकर सोभा ए? काबरकि लम्बा बाल, ओला ढांके बर दिये गे हवय।
1CO 11:16 यदि कोनो एकर बारे म बहस करे चाहथे, त मेंह सिरिप ये कह सकथंव कि न तो हमर अऊ न ही परमेसर के कलीसियामन के कोनो आने रीति-रिवाज हवय।
1CO 11:17 अब जऊन बात मेंह तुमन ला लिखत हवंव, ओमा मेंह तुम्हर बड़ई नइं करंव, काबरकि कलीसिया के सभा म तुमन जूरथव, त भलई करे के बदले जादा नुकसान करथव।
1CO 11:18 पहिली बात, मेंह ये सुने हवंव कि जब तुमन एक कलीसिया के रूप म जूरथव, त तुम्हर बीच म दलबंदी दिखथे; अऊ मेंह ये बात ला कुछू हद तक बिसवास घलो करथंव।
1CO 11:19 येह जरूरी ए कि तुमन म दलबंदी होवय ताकि तुमन के बीच म जऊन मन सही अंय, ओमन के पहिचान होवय।
1CO 11:20 जब तुमन एक संग जूरथव अऊ जऊन चीज ला खाथव, ओह परभू भोज नो हय,
1CO 11:21 काबरकि हर मनखे ह दूसर ला अगोरे बिगर खा लेथे। कोनो तो भूखन रही जाथे अऊ कोनो मतवार हो जाथे।
1CO 11:22 खाय-पीये बर का तुम्हर घर नइं ए? या फेर तुमन परमेसर के कलीसिया ला तुछ समझथव अऊ जऊन मन करा कुछू नइं ए, ओमन के अपमान करथव। मेंह तुमन ला का कहंव? ये बात बर का मेंह तुम्हर बड़ई करंव? बिलकुल नइं।
1CO 11:23 काबरकि जऊन बात परभू ह मोला बताईस, ओला मेंह तुमन ला घलो बता देंव: जऊन रथिया परभू यीसू ला पकड़े गीस, ओ रथिया ओह रोटी लीस
1CO 11:24 अऊ परमेसर ला धनबाद देके ओला टोरिस अऊ कहिस, “येह मोर देहें अय, जऊन ह तुम्हर बर अय। मोर सुरता म एही करे करव।”
1CO 11:25 खाना खाय के बाद, ओही किसम ले परभू ह कटोरा ला लीस अऊ कहिस, “ये कटोरा ह मोर लहू म नवां करार ए; जब कभू तुमन येला पीयव, त ये काम ला मोर सुरता म करे करव।”
1CO 11:26 काबरकि जब कभू तुमन ये रोटी ला खाथव अऊ ये कटोरा म ले पीथव, त तुमन परभू के मिरतू के परचार तब तक करथव, जब तक कि ओह फेर नइं आ जावय।
1CO 11:27 एकरसेति, जऊन ह गलत ढंग ले परभू के रोटी ला खाथे या ओकर कटोरा म ले पीथे, त ओह परभू के देहें अऊ लहू के बिरोध म पाप करे के दोसी ठहिरथे।
1CO 11:28 एकरसेति, हर एक झन रोटी ला खाय अऊ कटोरा म ले पीये के पहिली अपनआप ला जांचय।
1CO 11:29 काबरकि जऊन ह परभू के देहें के महत्व ला समझे बिगर, रोटी ला खाथे अऊ कटोरा म ले पीथे, ओह अपन ऊपर दंड लाथे।
1CO 11:30 एकरे कारन तुमन ले कतको झन दुरबल अऊ बेमार पड़े हवंय अऊ कतको झन तो मर घलो गे हवंय।
1CO 11:31 पर यदि हमन अपनआप ला जांचबो, त हमन सजा के भागी नइं होबो।
1CO 11:32 जब परभू ह हमन ला जांचथे-परखथे, त ओह हमर ताड़ना करथे ताकि हमन संसार के मनखेमन संग दोसी झन ठहिरन।
1CO 11:33 एकरसेति, हे मोर भाईमन हो, जब तुमन परभू भोज खाय बर जूरथव, त एक-दूसर खातिर अगोरव।
1CO 11:34 यदि कोनो ला भूख लगथे, त ओला घर म खा लेना चाही, ताकि जब तुमन जूरव, त ये बात ह दंड के कारन झन बनय। अऊ जब मेंह आहूं, त अऊ आने चीजमन के बारे म बताहूं।
1CO 12:1 हे भाईमन हो, मेंह चाहथंव कि तुमन ओ बरदानमन के बारे म जानव, जऊन ला पबितर आतमा देथे।
1CO 12:2 तुमन जानथव कि जब तुमन आनजात रहेव, त कोनो न कोनो किसम ले तुमन मूरतीमन के परभाव म रहेव अऊ ओमन के पाछू चलत रहेव, जऊन मन कि गोठियाय नइं सकंय।
1CO 12:3 एकरसेति, तुमन ये बात ला जान लेवव कि जऊन ह परमेसर के आतमा म होके गोठियाथे, ओह ये नइं कहय, “यीसू ह सरापित ए।” अऊ पबितर आतमा के अगुवई के बिगर कोनो ये नइं कह सकय, “यीसू ह परभू ए।”
1CO 12:4 कतको किसम के आतमिक बरदान हवय, पर एकेच पबितर आतमा हवय, जऊन ह ये बरदान देथे।
1CO 12:5 कतको किसम के सेवा हवय, पर एकेच परभू ए, जेकर सेवा हमन करथन।
1CO 12:6 काम करे के कतको तरीका हवय, पर एकेच परमेसर ह जम्मो काम ला करे के काबिल जम्मो मनखेमन ला बनाथे।
1CO 12:7 हर एक मनखे ला जम्मो के भलई करे बर पबितर आतमा के बरदान दिये जाथे।
1CO 12:8 एक झन ला पबितर आतमा ह बुद्धि के बात देथे, त ओहीच आतमा ह दूसर ला गियान के बात देथे।
1CO 12:9 कोनो ला ओहीच आतमा ह बिसवास, त कोनो ला ओहीच आतमा ले चंगा करे के बरदान मिलथे।
1CO 12:10 कोनो ला चमतकार के काम करे के, त कोनो ला अगमबानी करे के, त कोनो ला आतमामन ला परखे के, त कोनो ला अनजान भासा म गोठियाय के अऊ कोनो ला अनजान भासामन के अनुवाद करे के बरदान मिलथे।
1CO 12:11 ये जम्मो काम ला एकेच अऊ ओहीच पबितर आतमा ह करथे अऊ ओह जइसने चाहथे, वइसने हर एक मनखे ला ये बरदान बांट देथे।
1CO 12:12 जइसने कि देहें ह एक अय अऊ एकर बहुंते अंग हवंय, अऊ ये जम्मो अंग मिलके एकेच देहें बनथे। वइसनेच बात, मसीह के संग घलो अय।
1CO 12:13 काबरकि हमन जम्मो झन ला एकेच पबितर आतमा के दुवारा, एकेच देहें होय बर बतिसमा मिलिस—चाहे ओमन यहूदी होवंय या यूनानी, चाहे गुलाम होवंय या सुतंतर मनखे; हमन जम्मो झन ला ओहीच पबितर आतमा दिये गे हवय।
1CO 12:14 देहें ह एक अंग ले नइं, फेर बहुंते अंग ले मिलके बने हवय।
1CO 12:15 कहूं गोड़ ह कहय, “मेंह हांथ नो हंव, एकरसेति मेंह देहें के नो हंव,” त एकर मतलब ये नइं होवय कि गोड़ ह देहें ले अलग हो जाथे।
1CO 12:16 अऊ कहूं कान ह कहय, “मेंह आंखी नो हंव, एकरसेति मेंह देहें के नो हंव,” त एकर मतलब ये नइं होवय कि कान ह देहें ले अलग हो जाथे।
1CO 12:17 कहूं जम्मो देहें ह एक ठन आंखी होतिस, त सुने के काम कइसने होतिस? यदि जम्मो देहें ह एक ठन कान होतिस, त फेर सुंघे के काम कइसने होतिस?
1CO 12:18 पर परमेसर ह जइसने उचित समझिस, वइसने हर अलग-अलग अंग ला देहें म रखिस।
1CO 12:19 कहूं ये जम्मो ह एके ठन अंग होतिस, त फेर देहें ह कहां होतिस?
1CO 12:20 पर जइसने कि येह हवय, अंग तो बहुंते हवंय, पर देहें ह एक अय।
1CO 12:21 आंखी ह हांथ ला नइं कहे सकय, “मोला तोर जरूरत नइं ए।” अऊ मुड़ ह गोड़ ला नइं कहे सकय, “मोला तोर जरूरत नइं ए।”
1CO 12:22 एकर उल्टा, देहें के जऊन अंगमन आने ले कमजोर दिखथें, ओमन बहुंत जरूरी अंय,
1CO 12:23 अऊ जऊन अंगमन ला हमन कम महत्व के समझथन, ओमन ला हमन जादा महत्व देथन। अऊ देहें के जऊन अंगमन जादा बने नइं दिखंय, हमन ओमन ला जादा धियान देथन,
1CO 12:24 जबकि हमर देहें के सुघर अंगमन ला जादा धियान देके जरूरत नइं ए। पर परमेसर ह देहें के अंगमन ला एक संग जोड़े हवय, अऊ जऊन अंगमन कम महत्व के रिहिन, ओमन ला ओह जादा महत्व दे हवय,
1CO 12:25 ताकि देहें के अंगमन म फूट झन पड़य, पर एकर अंगमन एक-दूसर बर बरोबर चिंता करंय।
1CO 12:26 कहूं एक अंग ह दुख पाथे, त ओकर संग जम्मो अंगमन दुख पाथें; अऊ कहूं एक अंग के बड़ई होथे, त जम्मो अंगमन ओकर संग खुसी मनाथें।
1CO 12:27 अब तुमन मसीह के देहें अव, अऊ तुमन के हर एक एकर अंग अय।
1CO 12:28 अऊ परमेसर ह कलीसिया म अलग-अलग मनखेमन ला ठहिराय हवय: पहिली प्रेरितमन ला, दूसरा अगमजानीमन ला, तीसरा गुरूमन, तब चमतकार के काम करइयामन, तब ओमन ला, जऊन मन करा चंगा करे के बरदान हवय, अऊ आने के मदद करइयामन, अऊ तब ओमन ला, जऊन मन ला सासन-परबंध करे के बरदान हवय अऊ आखिरी म नाना किसम के भासा बोलइयामन।
1CO 12:29 का जम्मो झन प्रेरित अंय? का जम्मो झन अगमजानी अंय? का जम्मो झन गुरू अंय? का जम्मो झन चमतकार के काम करथें?
1CO 12:30 का जम्मो झन करा चंगा करे के बरदान हवय? का जम्मो झन नाना किसम के भासा म गोठियाथें? का जम्मो झन नाना किसम के भासा के अनुवाद करथें?
1CO 12:31 पर तुमन बड़े ले बड़े बरदान पाय के धुन म रहव। पर अब मेंह तुमन ला सबले उत्तम बात बतावत हंव।
1CO 13:1 कहूं मेंह मनखेमन अऊ स्वरगदूतमन के भासा म गोठियावंव, पर मया नइं रखंव, त मेंह सिरिप टनटनावत घंटा या फेर झनझनावत झांझ सहीं अंव।
1CO 13:2 कहूं मोर करा अगमबानी करे के बरदान हवय, अऊ मेंह जम्मो भेद अऊ जम्मो गियान के बात ला समझथंव, अऊ कहूं मोला इहां तक बिसवास हवय कि मेंह पहाड़मन ला घलो हटा सकथंव; पर मया नइं रखंव, त मेंह कुछूच नो हंव।
1CO 13:3 कहूं मेंह अपन जम्मो संपत्ति गरीबमन ला बांट देवंव अऊ अपन देहें ला जलाय बर दे दंव; पर मया नइं रखंव, त मोला कुछू फायदा नइं।
1CO 13:4 मया ह धीरज धरथे अऊ येह दयालु ए। मया ह जलन नइं रखय, येह डींग नइं मारय, अऊ येह घमंड नइं करय।
1CO 13:5 मया ह खराप बरताव नइं करय; येह अपन खुद के भलई नइं देखय, येह जल्दी गुस्सा नइं होवय; येह काकरो बात के बुरा नइं मानय।
1CO 13:6 मया ह कुकरम ले खुस नइं होवय, पर सच बात ले खुस होथे।
1CO 13:7 मया ह जम्मो बात ला सह लेथे, जम्मो बात ऊपर बिसवास करथे, जम्मो बात के आसा रखथे अऊ जम्मो बात म धीरज धरे रहिथे।
1CO 13:8 मया ह कभू खतम नइं होवय। अगमबानी बंद हो जाही; आने-आने भासा म गोठियाई बंद हो जाही; गियान ह खतम हो जाही।
1CO 13:9 काबरकि हमर गियान ह अधूरा हवय अऊ हमर अगमबानी ह अधूरा हवय,
1CO 13:10 पर जब सर्वसिद्ध आही, त अधूरापन ह मिट जाही।
1CO 13:11 जब मेंह लइका रहेंव, त लइकामन सहीं गोठियावत रहेंव, लइकामन सहीं सोचत रहेंव, अऊ मोर समझ ह लइकामन सहीं रिहिस। पर जब मेंह सियाना हो गेंव, त मेंह लइकापन के बात ला छोंड़ देंव।
1CO 13:12 अभी हमन ला दरपन म धुंधला दिखथे, पर बाद म हमन आमने-सामने देखबो। अभी मेंह पूरा नइं जानत हंव, पर बाद म मेंह पूरा जानहूं, जइसने कि परमेसर ह मोला पूरा जान गे हवय।
1CO 13:13 पर अब ये तीनों बचे हवंय: बिसवास, आसा अऊ मया। पर ये तीनों म सबले बड़े मया ए।
1CO 14:1 मया म चलव अऊ आतमिक बरदानमन के धुन म रहव, खास करके अगमबानी करे के बरदान पाय के धुन म रहव।
1CO 14:2 कहूं कोनो अनजान भासा म बोलथे, त ओह मनखेमन ले नइं, पर परमेसर ले गोठियाथे, काबरकि ओकर बात ला कोनो नइं समझंय; ओह अपन आतमा म भेद के बात गोठियाथे।
1CO 14:3 पर जऊन ह अगमबानी करथे, ओह मनखेमन ले ओमन के उन्नति, उत्साह अऊ सांति के बात करथे।
1CO 14:4 जऊन ह अनजान भासा म गोठियाथे, ओह अपन खुद के मदद करथे, पर जऊन ह अगमबानी करथे, ओह कलीसिया के उन्नति म मदद करथे।
1CO 14:5 मेंह चाहथंव कि तुमन जम्मो झन अनजान भासा म गोठियावव, पर ओकर ले घलो जादा मेंह ये चाहथंव कि तुमन अगमबानी करव। काबरकि जऊन ह अनजान भासा म गोठियाथे, यदि ओह कलीसिया के उन्नति बर अनुवाद नइं करय, त फेर अगमबानी करइया के महत्व ओकर ले बढ़के अय।
1CO 14:6 एकरसेति, हे भाईमन हो, कहूं मेंह तुम्हर करा आके अनजान भासामन म गोठियावंव, अऊ तुम्हर ले नवां बात, या गियान या अगमबानी या उपदेस के बात नइं करंव, त फेर मोर ले तुमन ला का फायदा होही?
1CO 14:7 एहीच किसम ले ओ निरजीव बाजामन, जेमन ले अवाज निकलथे, जइसने कि बांसुरी या बीना; यदि येमन के स्वर म फरक नइं ए, त कोनो कइसने जानही कि का बाजा ह बजत हवय?
1CO 14:8 अऊ यदि बिगुल के अवाज ह साफ सुनई नइं देवय, त फेर कोन ह लड़ई बर तियार होही?
1CO 14:9 वइसनेच बात, तुम्हर संग घलो अय। यदि तुमन साफ-साफ बात नइं कहिथव, त फेर कोनो कइसने जानही कि तुमन का गोठियावत हव? तुमन तो हवा ले बात करइया होहू।
1CO 14:10 संसार म कतको किसम के भासा हवय; पर ओमा के कोनो घलो भासा बिगर अर्थ के नइं ए।
1CO 14:11 यदि कोनो गोठियावत हवय अऊ मेंह ओकर भासा ला नइं समझत हवंव, त मेंह ओकर नजर म परदेसी ठहिरहूं अऊ ओह मोर नजर म परदेसी ठहिरही।
1CO 14:12 वइसनेच बात तुम्हर संग घलो अय। जब तुमन आतमिक बरदान के धुन म हवव, त ये कोसिस करव कि ये बरदानमन के जादा से जादा उपयोग कलीसिया के उन्नति बर होवय।
1CO 14:13 एकरे कारन, जऊन मनखे ह अनजान भासा बोलथे, त ओला पराथना करना चाही कि ओह ओ भासा के अर्थ घलो बता सकय।
1CO 14:14 काबरकि यदि मेंह अनजान भासा म पराथना करथंव, त मोर आतमा ह पराथना करथे, पर मोर बुद्धि के येमा कोनो काम नइं ए।
1CO 14:15 तब मोला का करना चाही? मेंह अपन आतमा ले पराथना करहूं, पर मेंह अपन समझ ले घलो पराथना करहूं; मेंह अपन आतमा ले गीत गाहूं, पर मेंह अपन समझ ले घलो गीत गाहूं।
1CO 14:16 यदि तुमन अपन आतमा म परमेसर के इस्तुति करत हव, त जऊन ह तुम्हर भासा ला नइं समझय, ओह तुम्हर धनबाद के बात म कइसने “आमीन” कहिही, काबरकि ओह नइं जानय कि तुमन का कहत हवव?
1CO 14:17 तुमन तो परमेसर ला बने करके धनबाद देवत होहू, पर एकर ले आने मनखे ला कोनो फायदा नइं होवय।
1CO 14:18 मेंह परमेसर के धनबाद करथंव कि मेंह तुमन जम्मो झन ले अधिक अनजान भासामन म गोठियाथंव।
1CO 14:19 पर कलीसिया म, अनजान भासा म दस हजार सबद कहे के बदले, आने मन ला सिखोय बर, मेंह समझ म अवइया पांच सबद कहना जादा बने समझथंव।
1CO 14:20 हे भाईमन हो, अपन सोच-समझ म, लइकामन सहीं झन बनव। बुरई के बात म छोटे लइका सहीं बने रहव, पर अपन सोच-समझ म सियान बनव।
1CO 14:21 मूसा के कानून म लिखे हवय: “परभू ह कहिथे, ‘अनजान भासा बोलइया मनखे के जरिये अऊ परदेसी मनखेमन के जरिये मेंह ये मनखेमन ले गोठियाहूं, तभो ले ओमन मोर नइं सुनहीं।’ ”
1CO 14:22 अनजान भासा ह बिसवासीमन बर नइं, पर अबिसवासीमन बर एक चिनहां अय, जबकि अगमबानी ह अबिसवासीमन बर नइं, पर बिसवासीमन बर चिनहां ए।
1CO 14:23 एकरसेति कहूं जम्मो कलीसिया एक जगह जूरथे अऊ हर एक जन अनजान भासा म गोठियाय लगथे; तब कहूं कुछू बाहिर के मनखे या फेर कुछू अबिसवासी मनखे उहां आथें, त का ओमन ये नइं कहिहीं कि तुम्हर दिमाग ह खराप हो गे हवय?
1CO 14:24 पर यदि जम्मो झन अगमबानी करे लगंय अऊ कोनो अबिसवासी या फेर कोनो बाहिर के मनखे उहां आ जावय, त उहां जऊन कुछू सुनथे, ओकर दुवारा ओला बिसवास हो जाही कि ओह एक पापी मनखे ए, अऊ जऊन कुछू ओह सुनथे, ओकर दुवारा ओह परखे जाही,
1CO 14:25 अऊ ओकर मन के भेद ह खुल जाही। तब ओह माड़ी के भार गिरके परमेसर के अराधना करही अऊ चिचियाके कहिही, “परमेसर ह सही म तुम्हर बीच म हवय।”
1CO 14:26 हे भाईमन हो, तब हमन ला का करना चाही? जब तुमन एक जगह म जूरथव, त हर एक जन करा एक भजन या निरदेस, परमेसर के बात के परकासन, अनजान भासा या अनजान भासा के अर्थ बताय के गुन रहिथे। ये जम्मो चीज कलीसिया के बढ़ोतरी बर होना चाही।
1CO 14:27 यदि कोनो अनजान भासा म गोठियाथे, त दू झन या जादा से जादा तीन झन एक-एक करके बोलंय, अऊ कोनो एक झन ओकर अर्थ ला जरूर बतावय।
1CO 14:28 यदि कोनो अर्थ बतइया नइं ए, त अनजान भासा म बात करइया ला कलीसिया म चुप रहना चाही, अऊ ओला अपनआप ले अऊ परमेसर ले बात करना चाही।
1CO 14:29 अगमजानीमन के दू या तीन झन बोलंय अऊ आने मन ओमन के बात ला परखें।
1CO 14:30 अऊ जऊन मन उहां बईठे हवंय, यदि ओमा के कोनो ला परमेसर ले कोनो संदेस मिलथे, त जऊन ह गोठियावत हवय, ओह चुप हो जावय।
1CO 14:31 काबरकि तुमन जम्मो झन एक-एक करके अगमबानी कर सकथव ताकि हर एक जन ह सीखय अऊ उत्साहित होवय।
1CO 14:32 अगमजानीमन के आतमा ला अगमजानीमन के अधीन रहना चाही।
1CO 14:33 काबरकि परमेसर ह गड़बड़ी के परमेसर नो हय, पर सांति के परमेसर अय, जइसने कि पबितर मनखेमन के जम्मो कलीसिया म हवय।
1CO 14:34 माईलोगनमन ला कलीसिया म चुप रहना चाही। ओमन ला बोले के अनुमति नइं ए, पर ओमन अधीन म रहंय जइसने कि मूसा के कानून म लिखे हवय।
1CO 14:35 यदि ओमन कुछू चीज के बारे म जाने बर चाहथें, त ओमन ला घर म अपन-अपन घरवाला ले पुछना चाही; काबरकि कलीसिया म एक माईलोगन के गोठियाना सरम के बात ए।
1CO 14:36 का परमेसर के बचन ह तुमन ले सुरू होईस? या परमेसर के बचन ह का सिरिप तुम्हर करा ही हबरिस?
1CO 14:37 यदि कोनो ये सोचथे कि ओह एक अगमजानी ए या फेर ओला पबितर आतमा ले बरदान मिले हवय, त ओह ये बात ला मान ले कि जऊन कुछू मेंह तुमन ला लिखत हवंव, ओह परभू के हुकूम ए।
1CO 14:38 कहूं ओह ये बात ला धियान नइं देवय, त ओकर कोति घलो धियान नइं दिये जाही।
1CO 14:39 एकरसेति, हे मोर भाईमन हो, अगमबानी करे बर उत्सुक रहव, अऊ जऊन ह अनजान भासा म गोठियाथे, ओला मना झन करव।
1CO 14:40 पर हर एक चीज उचित ढंग अऊ तरीका ले करे जावय।
1CO 15:1 अब हे भाईमन हो, मेंह तुमन ला ओ सुघर संदेस के सुरता कराय चाहथंव, जऊन ला मेंह तुमन ला सुनाय हवंव, जेला तुमन गरहन करेव अऊ जेकर ऊपर तुम्हर बिसवास ह मजबूत हवय।
1CO 15:2 एहीच सुघर संदेस ह तुम्हर उद्धार करथे, यदि तुमन ओ बचन म अटल बने रहव, जऊन ला मेंह तुमन ला सुनाय हवंव। नइं तो तुम्हर बिसवास करई ह बेकार होही।
1CO 15:3 एकरे कारन जऊन बात मोला मिलिस, ओला सबले जादा महत्व के बात समझके, मेंह तुमन ला सऊंप देंव, अऊ ओह ये अय—परमेसर के बचन के मुताबिक मसीह ह हमर पाप खातिर मरिस
1CO 15:4 अऊ गाड़े गीस, अऊ परमेसर के बचन के मुताबिक, ओह तीसरा दिन जी उठिस,
1CO 15:5 अऊ ओह कैफा ला दिखाई दीस अऊ तब ओह बारहों चेलामन करा परगट होईस।
1CO 15:6 ओकर बाद, ओह पांच सौ ले जादा भाईमन ला एक संग दिखाई दीस, जऊन म ले कतको झन अभी घलो जीयत हवंय, पर कुछू झन मर चुके हवंय।
1CO 15:7 तब ओह याकूब ला दिखाई दीस, अऊ तब जम्मो प्रेरितमन ला दिखिस
1CO 15:8 अऊ सबले आखिरी म ओह मोला घलो दिखाई दीस, जइसने कि मेंह असामान्‍य रूप म जनमे हवंव।
1CO 15:9 मेंह प्रेरितमन म सबले छोटे अंव, अऊ प्रेरित कहाय के लईक घलो नो हंव, काबरकि मेंह परमेसर के कलीसिया ला दुख दे हवंव।
1CO 15:10 पर मेंह जऊन कुछू घलो अंव, परमेसर के अनुग्रह के कारन से अंव, अऊ ओकर अनुग्रह मोर म बेकार नइं गीस। एकर उल्टा, मेंह ओ जम्मो झन ले जादा मेहनत करेंव, पर येह मोर खुद के ताकत ले नइं, पर परमेसर के अनुग्रह ले होईस, जऊन ह मोला दिये गे रिहिस।
1CO 15:11 तब, चाहे येह मेंह अंव या ओमन, ओहीच बात के हमन परचार करथन अऊ ओहीच बात म तुमन बिसवास करे हवव।
1CO 15:12 अब जबकि ये परचार करे जावथे कि मसीह ह मरे म ले जी उठिस, तब तुमन ले कुछू झन कइसने कहिथव कि मरे मनखेमन फेर नइं जी उठंय?
1CO 15:13 कहूं मरे मनखेमन नइं जी उठंय, त फेर मसीह घलो जी नइं उठिस।
1CO 15:14 अऊ कहूं मसीह ह नइं जी उठिस, त फेर हमर परचार करई ह बेकार ए, अऊ तुम्हर बिसवास ह घलो बेकार ए।
1CO 15:15 यदि येह सच ए कि मरे मनखेमन जी नइं उठंय, त फेर परमेसर ह मसीह ला मरे म ले नइं जियाईस अऊ तब परमेसर के बारे म हमर गवाही ह लबारी हो गीस, काबरकि हमन परमेसर के बारे म ए गवाही दे हवन कि ओह मसीह ला मरे म ले जियाईस।
1CO 15:16 अऊ कहूं मरे मनखेमन नइं जी उठंय, त फेर मसीह घलो जी नइं उठिस।
1CO 15:17 अऊ कहूं मसीह ह नइं जी उठिस, त फेर तुम्हर बिसवास ह बिन मतलब के ए, अऊ तुमन अभी तक अपन पाप म पड़े हवव।
1CO 15:18 एकर मतलब ये घलो होईस कि जऊन मन मसीह म मरे हवंय, ओमन घलो नास हो गीन।
1CO 15:19 कहूं सिरिप एहीच जिनगी बर हमर आसा मसीह म हवय, तब हमन ला आने जम्मो मनखेमन ले जादा दया के जरूरत हवय।
1CO 15:20 पर येह सच बात अय कि मसीह ह मरे म ले जी उठिस, अऊ ओह ओमन म पहिला फर ए, जऊन मन मर गे हवंय।
1CO 15:21 जइसने मिरतू ह एक मनखे के दुवारा आईस, वइसनेच मरे मनखेमन के जी उठई ह घलो एक मनखे के दुवारा आईस।
1CO 15:22 जइसने आदम म जम्मो मनखे मरथें, वइसनेच मसीह म जम्मो झन जियाय जाहीं।
1CO 15:23 पर हर एक झन अपन-अपन पारी म जियाय जाही; मसीह जऊन ह पहिली जियाय गीस, जब ओह वापिस आही, त ओमन जियाय जाहीं, जऊन मन मसीह के अंय।
1CO 15:24 अऊ जब मसीह ह सैतान के जम्मो राज, अधिकार अऊ सक्ति ला नास कर चुकही, त ओह ओ राज ला परमेसर ददा के हांथ म सऊंप दीही, तब संसार के अन्त हो जाही।
1CO 15:25 काबरकि जब तक परमेसर ह जम्मो बईरीमन ला ओकर गोड़ खाल्हे नइं कर दीही, तब तक मसीह के राज करना जरूरी ए।
1CO 15:26 सबले आखिरी बईरी, जऊन ला नास करे जाही, ओह मिरतू ए।
1CO 15:27 परमेसर के बचन ह कहिथे, “परमेसर ह हर एक चीज ला ओकर गोड़ खाल्हे कर दीस।” हर एक चीज ला ओकर अधीन करे गीस, एकर मतलब ह साफ ए कि ये “हर एक चीज” म परमेसर खुद नइं गने जावय, जऊन ह जम्मो चीज ला मसीह के अधीन करिस।
1CO 15:28 जब परमेसर ह ये जम्मो कर चुकही, तब बेटा ह खुदे परमेसर के अधीन हो जाही, जऊन ह कि जम्मो चीज ला बेटा के अधीन करिस, ताकि परमेसर ह जम्मो चीज के ऊपर होवय।
1CO 15:29 यदि मरे मनखेमन नइं जी उठंय, तब ओमन का करहीं, जऊन मन मरे मनखे खातिर बतिसमा लेथें? यदि मरे मनखेमन बिलकुल ही नइं जियाय जावंय, तब मनखेमन काबर ओमन बर बतिसमा लेथें।
1CO 15:30 अऊ हमन काबर हर समय अपनआप ला जोखिम म डारथन?
1CO 15:31 मेंह हर दिन मिरतू के सामना करथंव—हे भाईमन हो, मेंह दावा के संग कह सकथंव कि तुमन हमर परभू मसीह यीसू म मोर घमंड अव।
1CO 15:32 यदि सिरिप मनखे के सोच के कारन, मेंह इफिसुस नगर म जंगली पसुमन ले लड़ेंव, त फेर मोला का फायदा होईस? यदि मरे मन नइं जियाय जावंय, “त आवव, हमन खावन अऊ पीयन, काबरकि कल तो हमन ला मरना हे।”
1CO 15:33 धोखा झन खावव: “खराप संगति ह बने चालचलन ला नास कर देथे।”
1CO 15:34 अपन होस म आवव, अऊ अपन पाप के काम ला बंद करव; काबरकि कुछू अइसने मनखे हवंय, जऊन मन परमेसर ला नइं जानंय। मेंह ये बात तुम्हर सरम खातिर कहत हंव।
1CO 15:35 पर कोनो ये बात पुछ सकथे, “मरे मनखेमन कइसने जी उठथें? ओमन के देहें ह कइसने ढंग के होही?”
1CO 15:36 तुमन मुरूख अव! जऊन बीजा ला तुमन बोथव, जब तक ओह मर नइं जावय, तब तक ओह नइं जामय।
1CO 15:37 जब तुमन बोथव, त सइघो पऊधा ला नइं बोवव, पर सिरिप बीजा ला बोथव—जइसने कि गहूं के बीजा या कोनो अऊ बीजा।
1CO 15:38 पर परमेसर ह अपन ईछा के मुताबिक ओला आकार देथे, अऊ हर किसम के बीजा ला ओह ओ बीजा के मुताबिक आकार देथे।
1CO 15:39 जम्मो के देहें ह एक जइसने नइं होवय—मनखे, पसु, चिरई या मछरी; ये जम्मो के अलग-अलग किसम के देहें होथे।
1CO 15:40 स्वरगीय देहें होथे, अऊ संसारिक देहें घलो हवय, पर स्वरगीय देहें के सोभा ह एक किसम के होथे, त संसारिक देहें के सोभा कुछू अऊ किसम के।
1CO 15:41 सूरज के सोभा एक किसम के हवय, त चंदा के सोभा आने किसम के, अऊ तारामन के कुछू अऊ किसम के हवय। अऊ हर तारा के सोभा अलग-अलग होथे।
1CO 15:42 अइसनेच मरे म ले जी उठइयामन के संग होही। जऊन देहें ला बोय जाथे, ओह नासमान ए, पर येह अबिनासी दसा म जी उठथे।
1CO 15:43 येह अनादर म बोय जाथे, पर येह महिमा के संग जी उठही। येह दुरबलता म बोय जाथे, पर येह सामर्थ के संग जी उठही।
1CO 15:44 येह सारीरिक देहें के रूप म बोय जाथे, पर येह एक आतमिक देहें के रूप म जी उठही। जब सारीरिक देहें हवय, त फेर आतमिक देहें घलो हवय।
1CO 15:45 जइसने कि परमेसर के बचन म लिखे हवय: “पहिला मनखे आदम ह एक जीयत परानी बन गीस”, पर आखिरी आदम ह जिनगी देवइया आतमा बनिस।
1CO 15:46 आतमिक ह पहिले नइं आईस, पर सारीरिक ह पहिले आईस, अऊ तब आतमिक ह आईस।
1CO 15:47 पहिला मनखे ह धरती के धुर्रा म ले बनाय गीस, पर दूसरा मनखे ह स्वरग ले आईस।
1CO 15:48 जऊन मन धरती के अंय, ओमन ओकर सहीं अंय जऊन ह धरती म ले बनाय गे रिहिस, पर जऊन मन स्वरग के अंय, ओमन ओकर सहीं अंय जऊन ह स्वरग ले आईस।
1CO 15:49 जइसने हमन धरती के मनखे के रूप ला धारन करे हवन, वइसने हमन ओ स्वरग के मनखे के रूप ला घलो धारन करबो।
1CO 15:50 हे भाईमन हो, मेंह तुमन ला ये बात बतावत हंव; जऊन ह मांस अऊ लहू के बने हवय, ओह परमेसर के राज के भागी नइं हो सकय, अऊ न ही नासमान ह अमरता ला पा सकथे।
1CO 15:51 सुनव, मेंह तुमन ला एक भेद के बात बतावत हंव: हमन जम्मो झन नइं मरन, पर हमन जम्मो झन बदल जाबो,
1CO 15:52 अऊ येह एक पल म, पलक झपकत, आखिरी तुरही फूंकते ही हो जाही। काबरकि जब तुरही ह फूंके जाही, त मरे मनखेमन अबिनासी रूप म जी उठहीं अऊ हमन बदल जाबो।
1CO 15:53 काबरकि ये जरूरी अय कि ये नासमान सुभाव ह अबिनासी सुभाव ला पहिर ले अऊ ये मरनहार सुभाव ह अमरता ला पहिर ले।
1CO 15:54 जब नासमान ह अबिनासी ला अऊ मरनहार ह अमरता ला पहिर लीही, तब परमेसर के बचन म लिखे ये बात ह सही होही: “मिरतू ला नास करे गीस, अऊ जीत ह पूरा होईस।”
1CO 15:55 “हे मिरतू, तोर जीत कहां हवय? हे मिरतू, तोर डंक कहां हवय?”
1CO 15:56 मिरतू के डंक तो पाप ए, अऊ पाप के ताकत मूसा के कानून ए।
1CO 15:57 पर परमेसर के धनबाद होवय! ओह हमन ला हमर परभू यीसू मसीह के दुवारा जीतवाथे।
1CO 15:58 एकरसेति, हे मोर मयारू भाईमन हो, मजबूत अऊ अटल रहव। परभू के काम बर अपनआप ला हमेसा पूरा दे दव, काबरकि तुमन जानथव कि जऊन मेहनत तुमन परभू बर करथव, ओह बेकार नइं होवय।
1CO 16:1 अब ओ दान के बारे म बतावत हवंव, जऊन ला परमेसर के मनखेमन बर दिये जाथे—एकर बारे म जऊन बात मेंह गलातिया के कलीसियामन ला करे बर कहे हवंव, तुमन घलो वइसनेच करव।
1CO 16:2 हर हप्ता के पहिली दिन, तुमन ले हर एक झन अपन कमई के मुताबिक कुछू पईसा अलग रखव, अऊ येला बचाके रखव, ताकि जब मेंह आवंव, त तुमन ला पईसा जमा करना झन पड़य।
1CO 16:3 अऊ जब मेंह आहूं, त जऊन मन ला तुमन चुनहू, ओमन ला मेंह परिचय के चिट्ठी दे दूहूं, ताकि ओमन तुम्हर दान ला यरूसलेम पहुंचा देवंय।
1CO 16:4 यदि ये उचित जान पड़ही कि मेंह घलो जावंव, त ओमन मोर संग जाहीं।
1CO 16:5 मकिदुनिया ले होवत, मेंह तुम्हर करा आहूं काबरकि मेंह मकिदुनिया होवत जाहूं।
1CO 16:6 सायद मेंह तुम्हर संग कुछू समय तक ठहिरहूं, अऊ हो सकय, त मेंह जाड़ा के समय म तुम्हर संग रहंव, ताकि जिहां भी मेंह जावंव, तुमन मोर आघू के यातरा म मदद कर सकव।
1CO 16:7 अभी मेंह नइं चाहथंव कि मेंह आवंव अऊ सिरिप तुमन ला देखके चल दंव। मोला आसा हवय कि यदि परभू के ईछा होही, त मेंह कुछू समय तक तुम्हर संग रहिहूं।
1CO 16:8 पर मेंह पिनतेकुस्त के तिहार तक इफिसुस म रहिहूं।
1CO 16:9 काबरकि परभू के काम करे बर, मोला एक बहुंत अछा मऊका मिले हवय अऊ मोर बिरोध करइया कतको हवंय।
1CO 16:10 कहूं तीमुथियुस तुम्हर करा आथे, त तुमन ये बात के खियाल रखव कि तुम्हर संग रहत ओला कोनो बात के चिंता झन होवय, काबरकि ओह घलो मोर सहीं परभू के काम करत हवय।
1CO 16:11 एकरसेति कोनो ओला तुछ झन समझय। ओला सांति के संग बिदा करव, ताकि ओह मोर करा वापिस आवय। काबरकि मेंह ओकर बाट जोहत हवंव कि ओह आने भाईमन संग आही।
1CO 16:12 अब हमर भाई अपुल्‍लोस के बारे म: मेंह ओकर ले अब्बड़ बिनती करेंव कि ओह भाईमन के संग तुम्हर करा जावय। ओह अभी बिलकुल नइं जाय चाहिस, पर जब ओला मऊका मिलही, त ओह जाही।
1CO 16:13 सचेत रहव; बिसवास म मजबूत बनव; साहसी बनव; बलवान बनव।
1CO 16:14 जऊन कुछू तुमन करथव, मया ले करव।
1CO 16:15 तुमन जानत हव कि स्तिफनास के परिवारवाले अखया म सबले पहिली मसीह के बिसवास म आईन अऊ ओमन अपनआप ला संतमन के सेवा म लगा दे हवंय। हे भाईमन हो! मेंह तुमन ले बिनती करथंव
1CO 16:16 कि तुमन अइसने मनखेमन के बात ला मानव अऊ हर ओ मनखे के बात मानव, जऊन ह ये काम म मदद करथे अऊ मेहनत करथे।
1CO 16:17 मेंह स्तिफनास, फूरतूनातुस अऊ अखइकुस के आय ले खुस हवंव, काबरकि ओमन तुम्हर कमी ला पूरा करे हवंय।
1CO 16:18 ओमन मोर आतमा अऊ संगे-संग तुम्हर आतमा ला घलो तरो-ताजा करे हवंय। अइसने मनखेमन के सम्मान करव।
1CO 16:19 एसिया प्रदेस के कलीसियामन तुमन ला जोहार कहत हवंय। अक्विला अऊ प्रिसकिल्ला ह परभू म तुमन ला बहुंते-बहुंत जोहार कहत हवंय, अऊ वइसने ओ कलीसिया के मनखेमन घलो जोहार कहथें, जऊन मन ओमन के घर म जूरथें।
1CO 16:20 इहां जम्मो भाईमन तुमन ला जोहार कहत हवंय। एक-दूसर ला पबितर चूमा देके जोहार करव।
1CO 16:21 में, पौलुस ह अपन हांथ ले ये लिखके जोहार कहथंव।
1CO 16:22 यदि कोनो परभू ले मया नइं करय, त ओकर ऊपर सराप लगय। हे परभू, आ!
1CO 16:23 परभू यीसू के अनुग्रह तुम्हर ऊपर होवय।
1CO 16:24 मसीह यीसू म मोर मया तुमन जम्मो झन ला मिलय। आमीन।
2CO 1:1 में, पौलुस, जऊन ह परमेसर के ईछा ले मसीह यीसू के एक प्रेरित अंव, हमर भाई तीमुथियुस के संग मेंह कुरिन्थुस सहर के परमेसर के कलीसिया अऊ अखया के जम्मो संतमन ला, ये चिट्ठी लिखत हवंव।
2CO 1:2 तुमन ला, परमेसर हमर ददा अऊ परभू यीसू मसीह कोति ले अनुग्रह अऊ सांति मिलत रहय।
2CO 1:3 परमेसर जऊन ह हमर परभू यीसू मसीह के ददा ए, दयालु ददा अऊ जम्मो किसम के सांति के परमेसर ए, ओकर महिमा होवय।
2CO 1:4 परमेसर ह हमन ला हर दुख-तकलीफ म सांति देथे, ताकि ये सांति के कारन हमन ओमन ला सांति दे सकन, जऊन मन तकलीफ म हवंय।
2CO 1:5 काबरकि जइसने हमन मसीह के दुख म पूरा भागीदार होथन, वइसने हमन मसीह के संग सांति म घलो पूरा भागीदार होथन।
2CO 1:6 यदि हमन दुख सहथन, त येह तुम्हर सांति अऊ उद्धार खातिर ए; यदि हमन ला सांति मिलथे, त येह तुम्हर सांति खातिर ए, ताकि तुमन ओ दुख ला धीर धरके सह सकव, जऊन ला हमन घलो सहथन।
2CO 1:7 हमर आसा ह तुम्हर बारे म मजबूत हवय, काबरकि हमन जानथन कि जइसने तुमन हमर दुख म भागीदार हवव, वइसने तुमन हमर सांति म घलो भागीदार हवव।
2CO 1:8 हे भाईमन, हमन नइं चाहथन कि तुमन ओ दुख के बारे म अनजान रहव, जऊन ह हमर ऊपर एसिया प्रदेस म पड़े रिहिस। ओह बहुंत भारी अऊ हमर सहे के बाहिर हो गे रिहिस अऊ हमन जीये के आसा छोंड़ दे रहेंन।
2CO 1:9 वास्तव म, हमन ये महसूस करेंन कि हमर मिरतू के हुकूम दिये गे हवय। पर येह एकरसेति होईस, ताकि हमन अपन ऊपर भरोसा झन रखन, पर परमेसर ऊपर भरोसा रखन, जऊन ह मुरदामन ला फेर जियाथे।
2CO 1:10 ओह हमन ला अइसने भयंकर मिरतू के संकट ले बचाईस, अऊ ओह हमन ला आघू घलो बचाही। ओकर ऊपर हमर आसा हवय कि ओह हमेसा हमन ला बचाते रहिही,
2CO 1:11 जइसने कि तुमन पराथना के दुवारा हमर मदद करथव। तब बहुंते झन के पराथना के कारन, जऊन आसीस हमन पाय हवन, ओकर बर कतको झन परमेसर ला हमर कोति ले धनबाद दीहीं।
2CO 1:12 अब हमर घमंड के बात ये अय: हमर बिबेक ह हमन ला बिसवास देवाथे कि ये संसार म हमर आचरन, खास करके तुम्हर संग हमर संबंध ह पबितरता अऊ ईमानदारी के संग रिहिस अऊ येह परमेसर कोति ले अय। अइसने हमन संसारिक बुद्धि ले नइं करेंन, पर परमेसर के अनुग्रह के मुताबिक करे हवन।
2CO 1:13 हमन तुमन ला अइसने कुछू नइं लिखथन, जऊन ला तुमन पढ़े या समझे नइं सकव। अऊ मोला आसा हवय कि,
2CO 1:14 जइसने तुमन अभी हमर कुछू भाग ला समझे हवव, बाद म ओला पूरा समझहू ताकि तुमन हमर ऊपर घमंड कर सकव, जइसने हमन घलो परभू यीसू के आय के दिन तुम्हर ऊपर घमंड करबो।
2CO 1:15 काबरकि मोला ये बात के भरोसा रिहिस तेकर खातिर, मेंह पहिली तुम्हर करा आय के योजना बनाएंव ताकि तुमन ला दूबारा फायदा होवय।
2CO 1:16 मोर ये योजना रिहिस कि मकिदुनिया जावत बेरा मेंह तुम्हर करा आवंव। अऊ मकिदुनिया ले लहुंटके तुम्हर करा फेर आवंव, अऊ तब तुमन मोला यहूदिया जाय बर मोर मदद करव।
2CO 1:17 जब मेंह ये योजना बनाएंव, त का में येला अइसनेच हल्का समझेंव? या का मेंह अपन योजना ला संसारिक ढंग ले बनाएंव ताकि कभू “हां हां” कहंव अऊ कभू “नइं नइं” घलो कहंव?
2CO 1:18 पर जइसे कि परमेसर ह बिसवासयोग्य अय, तुम्हर बर हमर संदेस ह “हां” अऊ “नइं” दूनों नो हय।
2CO 1:19 काबरकि परमेसर के बेटा यीसू मसीह, जेकर परचार में अऊ सीलास अऊ तीमुथियुस तुम्हर बीच म करेंन, ओह “हां” अऊ “नइं” दूनों नइं रिहिस; पर येह हमेसा “हां” रिहिस।
2CO 1:20 काबरकि परमेसर के जम्मो परतिगियां ह मसीह म “हां” अय। अऊ एकरसेति, ओकर जरिये, हमन परमेसर के महिमा म, “आमीन” कहिथन।
2CO 1:21 येह परमेसर ए जऊन ह हमन ला अऊ तुमन ला मसीह म मजबूत बनाय रखथे अऊ ओह हमर अभिसेक करे हवय।
2CO 1:22 ओह हमर ऊपर मालिकाना हक के अपन मुहर लगाय हवय अऊ अमानत के रूप म अपन आतमा ला हमर हिरदय म दे हवय, जऊन ह कि ओकर बात के गारंटी अय।
2CO 1:23 मेंह आतमा म परमेसर ला अपन गवाह मानके कहत हंव कि तुमन ला दुख ले बचाय खातिर, मेंह कुरिन्थुस सहर ला लहुंटके नइं आयेंव।
2CO 1:24 ये बात नो हय कि हमन तुम्हर बिसवास ऊपर परभूता करे चाहथन, पर तुम्हर आनंद के खातिर हमन तुम्हर संग काम करथन, काबरकि बिसवास के दुवारा ही तुमन मजबूत बने रहिथव।
2CO 2:1 एकरसेति, मेंह अपन मन म ठान ले हंव कि मेंह फेर तुमन ला दुखी करे बर नइं आवंव।
2CO 2:2 काबरकि यदि मेंह तुमन ला दुखी करथंव, त फेर मोला खुसी देवइया कोन होही? सिरिप तुमन जऊन मन ला मेंह दुखी करेंव।
2CO 2:3 एकरसेति मेंह ओ चिट्ठी लिखेंव ताकि जब मेंह आवंव, त ओमन के दुवारा मोला दुख झन मिलय, जऊन मन के दुवारा मोला आनंद मिलना चाही। मोला तुमन जम्मो झन ऊपर भरोसा हवय कि तुमन मोर आनंद म भागीदार होहू।
2CO 2:4 मेंह तुमन ला बड़े दुखी अऊ पीरा भरे मन ले अऊ आंसू बहा-बहाके लिखे रहेंव; मेंह तुमन ला दुखी करे बर नइं लिखेंव, पर तुमन ला ये बताय बर कि मेंह तुमन ला कतेक जादा मया करथंव।
2CO 2:5 यदि कोनो मनखे ह दुख दे हवय, त ओह मोला जादा नइं, पर तुमन जम्मो झन ला दुख दे हवय। मेंह ओकर संग जादा कठोर बरताव नइं करे चाहथंव।
2CO 2:6 जऊन सजा बहुंते झन के दुवारा ओला मिले हवय, ओह ओकर बर बहुंत ए।
2CO 2:7 अब एकर बदले, तुमन ओला छेमा करव अऊ ढाढ़स बंधावव, ताकि ओह जादा दुख म झन बुड़ जावय।
2CO 2:8 एकरसेति, मेंह तुम्हर ले बिनती करथंव कि ओला अपन मया के सबूत देवव।
2CO 2:9 मेंह एकरसेति घलो लिखे रहेंव कि तुमन ला परखंव अऊ जान लेवंव कि तुमन जम्मो बात म हुकूम मानथव कि नइं।
2CO 2:10 यदि तुमन कोनो ला छेमा करथव, त मेंह घलो ओला छेमा करथंव। अऊ जऊन कुछू ला मेंह छेमा करे हवंव—त मेंह मसीह ला हाजिर जानके तुम्हर हित म छेमा करे हवंव—यदि छेमा के लईक कोनो बात रिहिस त,
2CO 2:11 ताकि सैतान के कोनो चाल हमर ऊपर सफल झन होवय। काबरकि हमन ओकर योजनामन ला जानथन।
2CO 2:12 जब मेंह मसीह के सुघर संदेस सुनाय बर त्रोआस सहर ला गेंव अऊ ये जानेंव कि परभू ह मोर काम खातिर एक रसता खोल दे हवय,
2CO 2:13 तभो ले मोर मन म सांति नइं रिहिस, काबरकि मोला उहां मोर भाई तीतुस नइं मिलिस। एकरसेति ओमन ले बिदा होके मेंह मकिदुनिया ला चल देंव।
2CO 2:14 पर परमेसर के धनबाद होवय, जऊन ह मसीह म हमेसा हमन ला जय देवाथे अऊ ओह हमर जरिये, हर जगह मसीह के गियान के खुसबू ला बगराथे।
2CO 2:15 काबरकि हमन परमेसर के खातिर नास होवइयामन अऊ उद्धार पवइयामन के बीच म मसीह के खुसबू सहीं अन।
2CO 2:16 एक झन बर हमन मिरतू के दुरगंध अन, त आने बर हमन जिनगी के खुसबू। कोन ह अइसने काम करे के लईक हवय?
2CO 2:17 हमन ओ बहुंते मनखेमन सहीं नो हन, जऊन मन अपन फायदा बर परमेसर के बचन के काम ला फेरीवालामन सहीं करथें। पर एकर उल्टा, ईमानदारी के संग, परमेसर ले पठोय गय मनखे सहीं, हमन मसीह के सेवक के रूप म परमेसर ला हाजिर जानके मनखेमन के आघू म गोठियाथन।
2CO 3:1 का हमन फेर अपन बड़ई करत हवन? या आने मनखेमन सहीं, हमन ला तुम्हर करा सिफारिसी चिट्ठी लाने या तुम्हर करा ले, ले जाय के जरूरत हवय?
2CO 3:2 तुमन खुद हमर चिट्ठी अव, जऊन ह हमर हिरदय म लिखाय हवय अऊ जऊन ला जम्मो झन जानथें अऊ पढ़थें।
2CO 3:3 तुम्हर जिनगी ह देखाथे कि तुमन मसीह के चिट्ठी अव अऊ हमर सेवा के फर अव अऊ ये चिट्ठी ह सियाही ले नइं, पर जीयत परमेसर के आतमा ले लिखे गे हवय अऊ येह पथरा के पटिया म नइं, पर मनखेमन के हिरदय रूपी पटिया म लिखे गे हवय।
2CO 3:4 मसीह के जरिये, परमेसर के ऊपर हमर अइसनेच भरोसा हवय।
2CO 3:5 हमन म अइसने कुछू नइं ए कि हमन कह सकन कि हमन ये काम करे के लईक हवन। हमर काबिलियत परमेसर करा ले आथे।
2CO 3:6 ओह हमन ला एक नवां करार के सेवक होय के लईक बनाय हवय अऊ ये नवां करार ह लिखित म नइं ए, पर येह पबितर आतमा म हवय; काबरकि लिखित कानून ह मिरतू लानथे, पर पबितर आतमा ह जिनगी देथे।
2CO 3:7 यदि लिखित कानून, जऊन ह मिरतू लानिस, अऊ जऊन ह पथरा के पटिया म लिखे गे रिहिस; अइसने महिमा के संग आईस, कि एकर तेज के कारन इसरायलीमन मूसा के चेहरा ला एकटक नइं देख सकिन, हालाकि ओ तेज ह कम होवत जावत रिहिस;
2CO 3:8 त का पबितर आतमा के सेवा ह ओकर ले जादा महिमामय नइं होही?
2CO 3:9 यदि लिखित कानून के सेवा ह महिमामय रिहिस, जऊन ह मनखेमन ला दोसी ठहिराथे, त फेर ओ सेवा ह कतेक जादा महिमामय होही, जऊन ह मनखेमन ला धरमी ठहिराथे।
2CO 3:10 वास्तव म, पहिली जऊन ह महिमामय रिहिस, ओमा अऊ तेज नइं ए, काबरकि अभी के महिमा के तेज ह ओकर ले बढ़के हवय।
2CO 3:11 जऊन तेज ह कम होवत जावत रिहिस, ओह अतेक महिमा के संग आईस, त फेर जऊन ह हमेसा रहिथे, ओकर महिमा ह कतेक जादा बढ़के होही!
2CO 3:12 एकरसेति, जब हमन करा अइसने आसा हवय, त हमन बहुंत हिम्मती अन।
2CO 3:13 हमन मूसा सहीं नो हन, जऊन ह अपन चेहरा म परदा डाले रिहिस ताकि इसरायलीमन ओ तेज ला झन देख सकंय, जऊन ह फीका पड़त जावत रिहिस।
2CO 3:14 पर इसरायलीमन के बुद्धि ला कमजोर कर दिये गे रिहिस, अऊ आज घलो, जब ओमन ओ पुराना करार ला पढ़थें, त ओमन के मन म ओ परदा पड़े रहिथे। ये परदा ह टारे नइं गे हवय; पर जब कोनो मसीह ला गरहन करथे, तभे ये परदा ह टरथे।
2CO 3:15 आज घलो जब मूसा के किताब ला पढ़े जाथे, त ओमन के मन म एक परदा पड़े रहिथे।
2CO 3:16 पर जब भी कोनो परभू करा लहुंटके आथे, त ओ परदा ला टार दिये जाथे।
2CO 3:17 परभू ह तो आतमा ए, अऊ जिहां परभू के आतमा हवय, उहां सुतंतरता हवय।
2CO 3:18 अऊ हमर चेहरा ले परदा हट गे हवय अऊ हमन जम्मो परभू के महिमा ला परगट करथन, अऊ बढ़त महिमा के संग हमन ओकर रूप म बदलत जावत हन, अऊ ये बढ़त महिमा ह परभू करा ले आथे, जऊन ह आतमा ए।
2CO 4:1 एकरसेति, जब हमन ला परमेसर के दया ले ओकर सेवा के काम मिले हवय, त हमन हिम्मत नइं हारन।
2CO 4:2 हमन गुपत अऊ लज्जा के काममन ला छोंड़ दे हवन; हमन ठगी नइं करन अऊ न ही परमेसर के बचन ला तोड़-मरोड़ के बतावन। एकर उल्टा सच्चई ला साफ-साफ बताय के दुवारा, हमन अपनआप ला परमेसर के आघू म हर मनखे के बिबेक के ऊपर छोंड़ देथन।
2CO 4:3 अऊ यदि मनखेमन के दिमाग म परदा पड़े हवय, जब हमन सुघर संदेस सुनाथन, त ये परदा ह सिरिप ओमन के ऊपर हवय, जऊन मन नास होवत हवंय।
2CO 4:4 ये जुग के देवता ह अबिसवासीमन के बुद्धि ला अंधरा कर दे हवय; ताकि ओमन परमेसर के रूप याने मसीह के अंजोर ला झन देख सकंय, अऊ ये अंजोर ह मसीह के महिमा के सुघर संदेस ले आथे।
2CO 4:5 हमन अपन परचार नइं करन, पर ये परचार करथन कि यीसू मसीह ह परभू ए अऊ हमन यीसू के हित म तुम्हर सेवक अन।
2CO 4:6 काबरकि येह परमेसर ए, जऊन ह कहिस, “अंधियार म ले अंजोर चमकय।” ओहीच परमेसर ह अपन अंजोर ला हमर हिरदय म चमकाईस ताकि हमन ओकर महिमा के गियान के अंजोर ला पा सकन, जऊन ह यीसू मसीह के चेहरा म हवय।
2CO 4:7 पर हमर करा माटी के बरतन म ये आतमिक धन ह ये दिखाथे, कि ये महान सामर्थ ह हमर नो हय, पर परमेसर के अय।
2CO 4:8 हमन जम्मो कोति ले दुख तो भोगथन, पर टूटन नइं; बियाकुल तो होथन, पर निरास नइं होवन।
2CO 4:9 हमन सताय तो जाथन, पर तियागे नइं जावन; मार तो खाथन, पर नास नइं होवन।
2CO 4:10 हमन हमेसा अपन देहें म यीसू के मिरतू ला अनुभव करथन, ताकि यीसू के जिनगी घलो हमर देहें म दिखय।
2CO 4:11 काबरकि हमन, जऊन मन जीयत हन, हमन हमेसा यीसू खातिर मिरतू के खतरा म रहिथन, ताकि ओकर जिनगी ह हमर नासमान सरीर म दिखय।
2CO 4:12 ये किसम ले, मिरतू ह हमन म काम करत हवय, पर जिनगी ह तुमन म काम करत हवय।
2CO 4:13 परमेसर के बचन म ये लिखे हवय, “मेंह बिसवास करेंव; एकरसेति मेंह गोठियाएंव।” बिसवास के ओहीच आतमा के संग हमन घलो बिसवास करथन अऊ एकरसेति हमन गोठियाथन।
2CO 4:14 हमन जानथन कि परमेसर जऊन ह परभू यीसू ला मरे म ले जियाईस; ओह हमन ला घलो यीसू के संग जियाही अऊ तुम्हर संग हमन ला अपन आघू म लानही।
2CO 4:15 ये जम्मो ह तुम्हर फायदा बर ए, ताकि जऊन अनुग्रह ह जादा से जादा मनखेमन करा हबरत हवय, ओ अनुग्रह के कारन मनखेमन परमेसर के महिमा बर अऊ जादा धनबाद देवंय।
2CO 4:16 एकरसेति, हमन हिम्मत नइं हारन। हालाकि हमर देहें के बल ह धीरे-धीरे कमजोर होवत जावत हवय, पर आतमिक रूप ले दिन ब दिन हमन नवां होवत जावत हन।
2CO 4:17 काबरकि हमर ये छोटे अऊ पल भर के समस्या ह हमर बर एक अनंत महिमा लावत हवय, जऊन ह सदाकाल तक बने रहिही।
2CO 4:18 एकरसेति, हमन ओ चीज ऊपर धियान नइं देवन, जऊन ह दिखत हवय, पर हमन ओ चीज ऊपर धियान लगाथन, जऊन ह नइं दिखत हवय। काबरकि जऊन चीज ह दिखत हवय, ओह सिरिप कुछू समय बर अय, पर जऊन चीज ह नइं दिखय, ओह सदाकाल तक बने रहिथे।
2CO 5:1 हमन जानथन कि ये संसारिक देहें जऊन म हमन रहिथन, जब नास करे जाही, तब परमेसर कोति ले हमन ला एक भवन मिलही; अऊ येह स्वरग म सदाकाल के घर ए, जऊन ह मनखे के हांथ के बनाय नो हय।
2CO 5:2 इहां रहत हमन दुख म कलहरत हवन अऊ हमर स्वरगीय घर ला पहिरे के ईछा रखथन।
2CO 5:3 अऊ जब हमन येला पहिरबो, त हमन नंगरा नइं पाय जाबो।
2CO 5:4 ये देहें म रहे के दौरान, हमन कलहरत रहिथन अऊ बोझ ले दबे रहिथन, काबरकि हमन बिगर कपड़ा पहिरे नइं रहे चाहन, पर हमन स्वरगीय घर ला पहिरे चाहथन, ताकि नासमान देहें ह सदाकाल के जिनगी म बदल दिये जावय।
2CO 5:5 ये उदेस्य खातिर जऊन ह हमन ला बनाय हवय, ओह खुद परमेसर ए अऊ ओह हमन ला सदाकाल के घर के गारंटी के रूप म पबितर आतमा दे हवय।
2CO 5:6 एकरसेति, हमन हमेसा भरोसा करथन अऊ जानथन कि जब तक हमन ये देहें के घर म रहिथन, तब तक हमन परभू ले दूरिहा हवन।
2CO 5:7 अब हमन कोनो चीज ला देखके नइं, पर बिसवास के दुवारा चलथन।
2CO 5:8 हमन ला भरोसा हवय अऊ हमन ये देहें के घर ले अलग होके परभू के संग रहई अऊ बढ़िया समझथन।
2CO 5:9 एकरसेति, चाहे हमन ये देहें के घर म रहन या एकर ले अलग रहन, हमर उदेस्य ये अय कि हमन परभू ला खुस रखन।
2CO 5:10 काबरकि हमन जम्मो झन ला मसीह के नियाय आसन के आघू म जाना जरूरी ए, ताकि हर एक मनखे सरीर म रहत, जऊन काम करे हवय, चाहे भलई के काम होवय या बुरई के, ओला ओकर परतिफल मिलय।
2CO 5:11 एकरसेति, परभू के भय ला जानके, हमन मनखेमन ला मनाय के कोसिस करथन। हमन का अन, येला परमेसर ह जानथे अऊ मोला आसा हवय कि तुम्हर बिबेक घलो येला जानथे।
2CO 5:12 हमन तुम्हर आघू म फेर अपनआप के बड़ई करे के कोसिस नइं करथन, पर हमन तुमन ला हमर बारे म घमंड करे के एक मऊका देवत हवन; ताकि तुमन ओमन ला जबाब दे सकव, जऊन मन मनखे के सुघर चालचलन ऊपर नइं, पर मनखे के पद ऊपर घमंड करथें।
2CO 5:13 यदि हमन सुध-बुध खो दे हवन, त येह परमेसर खातिर ए, अऊ यदि हमन सुध-बुध म हवन, त येह तुम्हर खातिर ए।
2CO 5:14 मसीह के मया ह हमन ला बाध्य करथे। हमन समझ गे हवन कि एक झन ह जम्मो झन बर मरिस अऊ एकरसेति जम्मो झन मर गीन।
2CO 5:15 अऊ ओह जम्मो झन बर मरिस ताकि जऊन मन जीयथें, ओमन अब अपन बर नइं, पर मसीह बर जीयंय, जऊन ह ओमन बर मरिस अऊ फेर जी उठिस।
2CO 5:16 एकरसेति, हमन अब संसारिक नजर ले काकरो बारे म अपन बिचार नइं रखन। हालाकि एक समय रिहिस जब मसीह के बारे म, हमर ये किसम के बिचार रिहिस, पर हमन अब अइसने नइं करन।
2CO 5:17 यदि कोनो मनखे मसीह म हवय, त ओह एक नवां सिरिस्टी ए। पुराना बात खतम हो गीस, अऊ जम्मो बात ह नवां हो गे हवय।
2CO 5:18 ये जम्मो ह परमेसर के दुवारा होईस, जऊन ह मसीह के जरिये अपन संग हमर मेल-मिलाप करिस अऊ हमन ला मेल-मिलाप के सेवा दीस।
2CO 5:19 एकर मतलब ए कि परमेसर ह मसीह के जरिये अपन संग संसार के जम्मो मनखेमन के मेल-मिलाप करिस अऊ ओह मनखेमन ऊपर ओमन के पाप के दोस नइं लगाईस। अऊ ओह मेल-मिलाप के संदेस के परचार के जिम्मेदारी हमन ला दीस।
2CO 5:20 एकरसेति, हमन मसीह के राजदूत अन, मानो परमेसर ह हमर जरिये तुमन ले बिनती करत हवय। मसीह कोति ले, हमन तुम्हर ले बिनती करथन कि परमेसर के संग मेल-मिलाप कर लेवव।
2CO 5:21 मसीह ह कोनो पाप नइं करे रिहिस, पर हमर हित म, परमेसर ह हमर पाप ला ओकर ऊपर डार दीस ताकि मसीह के जरिये परमेसर के धरमीपन ह हमन म आ जावय।
2CO 6:1 हमन परमेसर के संगी करमी के रूप म, तुमन ले बिनती करत हन कि परमेसर ले मिले अनुग्रह ला बेकार झन होवन देवव।
2CO 6:2 काबरकि परमेसर ह कहिथे, “मोर दया के समय म मेंह तुम्हर पराथना ला सुनेंव, अऊ उद्धार के दिन म मेंह तुम्हर मदद करेंव।” मेंह तुमन ला बतावत हंव, देखव, येह सही समय ए, येह उद्धार के दिन ए।
2CO 6:3 हमन काकरो रसता म बाधा नइं डालन, ताकि कोनो हमर सेवा म दोस झन पावय।
2CO 6:4 पर हर बात म हमन अपनआप ला परमेसर के सेवक जताथन—सहन करे म, समस्या, दुख, अऊ बिपत्ति म,
2CO 6:5 मार खाय, जेल जाय म अऊ मनखेमन के हंगामा करे म; कठोर मेहनत, रात-रात भर जगई अऊ भूख म;
2CO 6:6 सुधता, समझ, धीरज अऊ दयालुता म; पबितर आतमा म अऊ निस्कपट मया म;
2CO 6:7 सच बात गोठियाय म, अऊ परमेसर के सामर्थ म; धरमीपन के हथियार जऊन ह डेरी अऊ जेवनी हांथ म हवय लड़े म अऊ बचाव करे म;
2CO 6:8 आदर अऊ अनादर म, बड़ई अऊ बदनामी म। हमन सच गोठियाथन, तभो ले हमर संग लबरामन सहीं बरताव करे जाथे।
2CO 6:9 हमन ला जम्मो झन जानथें, तभो ले हमर संग अनजानमन सहीं बरताव करे जाथे। हमन मरे सहीं रहिथन, पर हमन जीयत हवन। हमन मार खाथन, पर मार डारे नइं जावन।
2CO 6:10 हमन दुखी तो हवन, पर हमेसा आनंद मनावत रहिथन। हमन गरीब अन, पर बहुंत झन ला धनवान बनाथन। हमर करा कुछू नइं ए, तभो ले हमन जम्मो चीज ऊपर अधिकार रखथन।
2CO 6:11 हे कुरिन्थुस सहर के मनखेमन, हमन तुमन ले खुलके गोठियाय हवन अऊ हमर हिरदय तुम्हर बर खुला हवय।
2CO 6:12 तुम्हर बर हमन अपन मया ला नइं रोकत हवन, पर हमर बर तुमन अपन मया ला रोकत हवव।
2CO 6:13 मेंह तुमन ला अपन लइका जानके कहथंव कि एकर बदला म, तुमन घलो अपन हिरदय ला खोल देवव।
2CO 6:14 अबिसवासीमन के संग साझीदार झन बनव। काबरकि धरमीपन अऊ अधरम म का समानता? या अंजोर अऊ अंधियार के का संगति?
2CO 6:15 मसीह अऊ सैतान के बीच म का मेल हवय? एक बिसवासी के एक अबिसवासी संग का समानता?
2CO 6:16 परमेसर के मंदिर अऊ मूरतीमन के बीच म का सहमती? काबरकि हमन जीयत परमेसर के मंदिर अन; जइसने कि परमेसर ह कहे हवय: “मेंह ओमन के संग रहिहूं अऊ ओमन के बीच चलहूं-फिरहूं, अऊ मेंह ओमन के परमेसर होहूं, अऊ ओमन मोर मनखे होहीं।”
2CO 6:17 एकरसेति, “ओमन के बीच म ले निकल आवव अऊ अलग रहव, परभू ह कहिथे। असुध चीज ला झन छुवव, त मेंह तुमन ला गरहन करहूं।”
2CO 6:18 अऊ, “मेंह तुम्हर ददा होहूं, अऊ तुमन मोर बेटा अऊ बेटी होहू, सर्वसक्तिमान परभू ह कहिथे।”
2CO 7:1 एकरसेति, हे मयारू संगवारीमन, जब हमर संग परमेसर ह ये परतिगियां करे हवय, त आवव, हमन अपन देहें अऊ आतमा ला जम्मो गंदगी ले सुध करन, अऊ परमेसर के भय म रहत अपनआप ला पूरा पबितर करन।
2CO 7:2 हमर बर अपन हिरदय ला खोलव। हमन काकरो अनियाय नइं करे हवन; हमन काकरो नइं बिगाड़े हवन अऊ हमन काकरो ले कोनो फायदा नइं उठाय हवन।
2CO 7:3 मेंह तुमन ला दोसी ठहिराय बर, ये नइं कहत हवंव। काबरकि मेंह पहिली ले कह चुके हवंव कि तुमन हमर हिरदय म अइसने बस गे हवव कि हमन तुम्हर संग जीये या मरे बर घलो तियार हवन।
2CO 7:4 मेंह तुम्हर ले बहुंत खुले मन से गोठियाय हवंव; मोला तुम्हर ऊपर बहुंत घमंड हवय। मेंह बहुंत उत्साहित हवंव। अपन जम्मो समस्या म घलो, मेंह बहुंत आनंदित हवंव।
2CO 7:5 काबरकि जब हमन मकिदुनिया म आयेंन, त हमन ला कोनो अराम नइं मिलिस, पर हमन हर तरफ ले दुख पायेंन—बाहिर म झगरा होवत रहय अऊ हमर हिरदय म डर बने रहय।
2CO 7:6 पर परमेसर जऊन ह उदास मनखेमन ला सांति देथे, तीतुस के आय के दुवारा हमन ला सांति दीस,
2CO 7:7 अऊ सिरिप ओकर आय के दुवारा ही नइं, पर जऊन सांति ओला तुमन दे हवव, ओकर दुवारा घलो। ओह हमन ला तुम्हर मया, तुम्हर दुख अऊ मोर बर तुम्हर चिंता के बारे बताईस, जेकर ले मेंह अऊ आनंदित होवत हवंव।
2CO 7:8 हालाकि मोर चिट्ठी के दुवारा तुमन ला दुख पहुंचिस, पर मेंह ओकर बर नइं पछतावत हंव, जइसने कि पहिली पछतावत रहेंव; काबरकि मेंह देखत हंव कि मोर चिट्ठी ले तुमन ला दुख तो पहुंचिस, पर ओह थोरकन समय बर रिहिस।
2CO 7:9 पर अब मेंह खुस हवंव। मोर खुसी ह एकरसेति नो हय कि तुमन ला दुख पहुंचिस, पर एकरसेति अय कि ओ दुख के कारन तुमन पछताप करेव। परमेसर के ईछा के मुताबिक तुमन ला दुख पहुंचिस अऊ ये किसम ले तुमन ला हमर कोति ले कोनो नुकसान नइं होईस।
2CO 7:10 काबरकि परमेसर के ईछा के मुताबिक दुख सहे ले पछतावा होथे, जेकर ले उद्धार मिलथे अऊ एकर ले दुख नइं होवय, पर संसारिक दुख ह मिरतू लाथे।
2CO 7:11 देखव, ये दुख, जऊन ह तुमन ला परमेसर के ईछा के मुताबिक मिलिस, तुमन म कतेक उत्सुकता अऊ अपनआप ला निरदोस साबित करे बर उत्साह, कोरोध, भय, लालसा, बियाकुलता अऊ नियाय देवाय बर तत्परता लानिस। हर किसम ले तुमन अपनआप ला ये बात म निरदोस साबित करे हवव।
2CO 7:12 मेंह तुमन ला ओ चिट्ठी एकरसेति नइं लिखेंव कि मोला अनियाय करइया या अनियाय सहइया के चिंता रिहिस, पर एकरसेति लिखेंव कि परमेसर के आघू म तुमन खुद जान लेवव कि हमर बर तुम्हर कतेक लगाव हवय।
2CO 7:13 ये जम्मो के दुवारा हमन ला उत्साह मिलिस। अऊ हमन सिरिप उत्साहित ही नइं होएंन, पर हमन ला ये देखके खुसी होईस कि जऊन मदद तुमन तीतुस ला दे रहेव, ओकर सेति ओह बड़े खुस हवय।
2CO 7:14 मेंह तीतुस के आघू म तुम्हर बड़ई करे रहेंव अऊ तुमन एकर बारे म मोला सरमिंदा नइं करेव। पर जइसने हमन तुम्हर ले हमेसा सच गोठियाय हवन, वइसने तुम्हर बारे म हमर बड़ई ह तीतुस के आघू म सच साबित होय हवय।
2CO 7:15 जब ओह सुरता करथे कि कइसने तुमन जम्मो झन हुकूम ला मानत रहेव अऊ कइसने तुमन डरत अऊ कांपत ओला गरहन करेव, त तुम्हर बर ओकर मया ह अऊ बढ़ जाथे।
2CO 7:16 मोला खुसी हवय कि मेंह तुम्हर ऊपर पूरा भरोसा कर सकथंव।
2CO 8:1 हे भाईमन हो, हमन चाहथन कि तुमन ओ अनुग्रह के बारे म जानव, जऊन ला परमेसर ह मकिदुनिया के कलीसियामन ला दे हवय।
2CO 8:2 दुख के भारी परिछा म ओमन बड़े आनंद मनावत हवंय अऊ भयंकर गरीबी म ओमन अब्बड़ दानी हो गे हवंय।
2CO 8:3 काबरकि मेंह गवाही दे सकथंव कि अपन सक्ति के मुताबिक ओमन जतकी जादा हो सकिस, दे हवंय; अऊ त अऊ ओमन अपन सक्ति ले बाहिर घलो दे हवंय। अऊ अपन पूरा ईछा ले दे हवंय।
2CO 8:4 ओमन बार-बार हमर ले बिनती करिन कि ओमन ला संतमन के सेवा म मदद करे बर मऊका मिलय।
2CO 8:5 अऊ ओमन हमर आसा ले बढ़के करिन: ओमन पहिली अपनआप ला परभू ला दे दीन अऊ तब परमेसर के ईछा के मुताबिक अपनआप ला हमर अधीन कर दीन।
2CO 8:6 तीतुस ह पहिली ये काम ला सुरू करे रिहिस, एकरसेति हमन ओकर ले बिनती करेंन कि ओह अनुग्रह के ये काम ला तुम्हर बीच म पूरा घलो करय।
2CO 8:7 पर जइसने तुमन हर बात म बढ़त जावत हव—बिसवास म, बचन बोलई म, गियान म, उत्साह से काम करई म अऊ हमर बर तुम्हर मया म—वइसने ही तुमन दान देय के अनुग्रह म घलो बढ़त जावव।
2CO 8:8 मेंह तुमन ला हुकूम नइं देवत हंव, पर आने मन के उत्साह के तुलना म, मेंह परखे चाहथंव कि तुम्हर मया म कतेक सच्चई हवय।
2CO 8:9 काबरकि तुमन हमर परभू यीसू मसीह के अनुग्रह ला जानत हव। हालाकि ओह धनी रिहिस, पर तुम्हर हित म ओह गरीब बन गीस, ताकि ओकर गरीबी के जरिये तुमन धनवान हो जावव।
2CO 8:10 इहां मेंह तुमन ला एकर बारे म सलाह देवत हंव कि तुम्हर बर का बुता ह सबले बने होही। पऊर साल, तुमन सिरिप देय के मामला म ही पहिली नइं रहेव, पर तुम्हर अइसने करे के ईछा घलो रिहिस।
2CO 8:11 अब ओ काम ला पूरा करव ताकि येला करे के तुम्हर जऊन उत्सुकता हवय, ओह काम के पूरा करे म मेल खावय, अऊ जऊन कुछू तुम्हर करा हवय, ओकर मुताबिक येला करव।
2CO 8:12 काबरकि यदि तुम्हर देय के ईछा हवय, त जऊन कुछू तुम्हर करा हवय, ओकर आधार म तुम्हर दान ह गरहन होही, जऊन ह तुम्हर करा नइं ए, ओकर आधार म नइं।
2CO 8:13 येह हमर ईछा नो हय कि आने मन ला अराम मिलय अऊ तुम्हर ऊपर बोझ पड़य, पर हमन चाहथन कि बरोबरी के बात होवय।
2CO 8:14 अभी तुम्हर करा बहुंत हवय, त तुमन ओमन के जरूरत म देवव, ताकि बदले म, जब ओमन करा बहुंत होही, त ओमन तुम्हर जरूरत म दीहीं। तभे बरोबरी होही।
2CO 8:15 जइसने कि परमेसर के बचन म ये लिखे हवय: “जऊन ह जादा संकेले रिहिस, ओकर करा बहुंत जादा नइं रिहिस, अऊ जऊन ह थोरकन संकेले रिहिस, ओकर करा कम नइं रिहिस।”
2CO 8:16 मेंह परमेसर ला धनबाद देथंव कि ओह तीतुस के मन म ओहीच चिंता डाल दीस, जऊन ह मोर मन म तुम्हर बर हवय।
2CO 8:17 तीतुस ह सिरिप हमर बात ला ही नइं मानिस, पर ओह अपन ईछा ले बहुंत उत्साह के संग तुम्हर करा आवत हवय।
2CO 8:18 अऊ हमन ओकर संग ओ भाई ला पठोवत हन, जेकर बड़ई जम्मो कलीसिया के मन सुघर संदेस के ओकर सेवा खातिर करथें।
2CO 8:19 एकर अलावा, ओह कलीसियामन के दुवारा चुने गे हवय ताकि ओह हमर संग जावय, जब हमन दान लेके जाथन। हमन ये सेवा ला परभू के महिमा बर करथन अऊ ये देखाय बर करथन कि हमन आने के मदद करे बर उत्सुक हवन।
2CO 8:20 हमन ये धियान रखथन कि उदारता के दान के हमर जऊन सेवा हवय, ओकर बारे म कोनो हमर ऊपर दोस झन लगावंय।
2CO 8:21 हमर उदेस्य ये अय कि हमन सही काम करन, सिरिप परभू के नजर म ही नइं, पर मनखेमन के नजर म घलो।
2CO 8:22 एकरसेति, ओमन के संग हमन अपन भाई ला पठोवत हन, जऊन ला हमन कतको बार परखे हवन अऊ ये पायेंन कि ओह तुम्हर मदद करे बर हमेसा उत्सुक रहिथे, अऊ अब ओह अऊ घलो उत्सुक हवय, काबरकि तुम्हर ऊपर ओला बहुंत भरोसा हवय।
2CO 8:23 यदि कोनो तीतुस के बारे म पुछथे, त बतावव कि ओह मोर भागीदार अऊ तुम्हर बीच म मोर सहकरमी अय; अऊ यदि कोनो हमर भाईमन के बारे म पुछथे, त बतावव कि ओमन कलीसिया के परतिनिधि अऊ मसीह के महिमा अंय।
2CO 8:24 एकरसेति तुम्हर मया अऊ तुम्हर बारे म हमर जऊन घमंड हवय, ओला ये मनखेमन के आघू म साबित करव, ताकि जम्मो कलीसियामन येला देख सकंय।
2CO 9:1 संतमन बर जऊन सेवा करे जाथे, ओकर बारे म तुमन ला लिखे के जरूरत नइं ए।
2CO 9:2 काबरकि मेंह जानथंव कि तुमन मदद करे बर उत्सुक रहिथव अऊ मेंह मकिदुनिया के मनखेमन के आघू म तुम्हर बारे म डींग हांकके ये कहे हवंव कि पऊर साल ले तुमन, जऊन मन अखया म रहिथव, मदद करे बर तियार हवव अऊ तुम्हर उत्साह ह ओमा के बहुंते झन ला उत्साहित करे हवय।
2CO 9:3 पर मेंह ये भाईमन ला एकरसेति पठोवत हवंव ताकि ये बिसय म तुम्हर बारे, हमन जऊन घमंड करे हवन, ओह लबरा साबित झन होवय, पर जइसने मेंह कहे हवंव, तुमन तियार रहव।
2CO 9:4 काबरकि यदि कोनो मकिदुनिया के मनखे ह मोर संग आथे अऊ ये देखथे कि तुमन तियार नइं अव, त हमन तुम्हर बारे म कुछू कहे नइं सकबो, अऊ तुम्हर ऊपर अतेक भरोसा करे के बाद हमर बेजत्ती होही।
2CO 9:5 एकरसेति, मेंह भाईमन ले ये बिनती करई जरूरी समझेंव कि ओमन पहिली ले तुम्हर करा जावंय अऊ ओ दान के परबंध करंय, जऊन ला तुमन देय के वायदा करे हवव। तब येह दबाव म दिये गय दान नइं, पर उदार मन ले दिये गय दान होही।
2CO 9:6 ये बात ला सुरता रखव: जऊन ह थोरकन बोथे, ओह थोरकन काटही घलो, अऊ जऊन ह बहुंत बोथे, ओह बहुंते काटही घलो।
2CO 9:7 हर एक मनखे वइसने ही दान करय, जइसने ओह अपन मन म ठाने हवय; न अनिछा ले अऊ न ही दबाव ले, काबरकि परमेसर ह ओकर ले मया करथे, जऊन ह खुसी मन ले देथे।
2CO 9:8 परमेसर ह तुमन ला जम्मो किसम के आसीस बहुंतायत ले देय म सामर्थी अय, ताकि तुम्हर करा जरूरत के हर चीज हमेसा बहुंतायत म रहय अऊ तुमन हर एक बने काम म बहुंतायत से दे सकव।
2CO 9:9 जइसने कि परमेसर के बचन म लिखे हवय: “ओमन गरीबमन ला दिल खोलके दान दे हवंय; ओमन के धरमीपन ह सदाकाल तक बने रहिथे।”
2CO 9:10 जऊन परमेसर ह बोवइया ला बीजा अऊ खाय बर रोटी देथे, ओह तुमन ला घलो बीजा अऊ खाय बर रोटी दीही अऊ तुम्हर बीजा के भंडार ला बढ़ाही अऊ तुम्हर धरमीपन के काम ला बगराही।
2CO 9:11 तुमन ला हर किसम ले धनवान बनाय जाही, ताकि तुमन हर समय उदार बनव अऊ हमर जरिये तुमन जऊन उदारता ले देथव, ओकरे कारन बहुंते झन परमेसर ला धनबाद दीहीं।
2CO 9:12 तुम्हर ये सेवा के कारन, परमेसर के मनखेमन के सिरिप जरूरत ही पूरा नइं होवत हवय, पर कतेक किसम ले बहुंतायत ले परमेसर के धनबाद घलो होवत हवय।
2CO 9:13 ये सेवा के दुवारा तुमन अपनआप ला साबित कर चुके हवव, एकरसेति मनखेमन परमेसर के महिमा करहीं, काबरकि तुमन मसीह के सुघर संदेस ला गरहन करके ओकर मुताबिक चलत हवव अऊ दिल खोलके तुमन ओमन ला अऊ आने जम्मो झन ला दान देवत हवव।
2CO 9:14 ओमन तुम्हर बर पराथना करथें अऊ ओमन के मन ह तुमन म लगे रहिथे, काबरकि परमेसर के अनुग्रह तुम्हर ऊपर बहुंतायत ले होय हवय।
2CO 9:15 परमेसर के धनबाद होवय ओकर ओ दान खातिर, जेकर बयान नइं करे जा सकय!
2CO 10:1 में, पौलुस ह मसीह के कोमलता अऊ नमरता के कारन तुमन ले बिनती करत हंव—जब मेंह तुम्हर आघू म रहिथंव, त डरपोक हो जाथंव, पर जब तुम्हर ले दूरिहा रहिथंव, त साहसी हो जाथंव।
2CO 10:2 मेंह तुम्हर ले बिनती करथंव कि तुमन अइसने काम करव कि जब मेंह आवंव, त मोला तुम्हर संग कड़ई झन करना पड़य, जइसने कि मोला ओमन के संग करना चाही, जऊन मन ये समझथें कि हमन ये संसार के मुताबिक आचरन करथन।
2CO 10:3 हालाकि हमन संसार म रहिथन, पर हमन संसारिक उदेस्य बर नइं लड़न।
2CO 10:4 हमर लड़ई के हथियारमन संसारिक नो हंय, पर येमन परमेसर के सामर्थी हथियार अंय, जेमन सैतान के गढ़ ला नास कर देथें।
2CO 10:5 हमन बहस अऊ ओ हर एक घमंड ले भरे बात ला नास कर देथन, जऊन ह परमेसर के गियान के बिरोध म ठाढ़ होथे अऊ हमन मनखेमन के हर एक बिरोध के बात ला कैद कर लेथन ताकि ओमन मसीह के बात ला मानंय।
2CO 10:6 अऊ जब तुम्हर हुकूम माने के बात ह साबित हो जाही, त हमन हर एक ओ हुकूम नइं मनइयामन ला सजा दे बर तियार रहिबो।
2CO 10:7 तुमन सिरिप बाहिर के चीज ला देखत हवव। यदि कोनो ला ये भरोसा हवय कि ओह मसीह के अय, त ओला फेर बिचार करना चाही कि जइसने ओह मसीह के अय, वइसने हमन घलो मसीह के अन।
2CO 10:8 काबरकि यदि मेंह हमर अधिकार के बारे म कुछू घमंड करथंव, त येह मोर बर सरम के बात नो हय, काबरकि ये अधिकार, परभू ह हमन ला तुम्हर उन्नति बर दे हवय, तुमन ला नास करे बर नइं।
2CO 10:9 मेंह नइं चाहत हंव कि तुमन ये समझव कि मेंह अपन चिट्ठी के दुवारा तुमन ला डराय के कोसिस करत हंव।
2CO 10:10 काबरकि कुछू मनखेमन कहिथें, “पौलुस के चिट्ठी ह असरदार अऊ कठोर होथे, पर जब ओह हमर संग रहिथे, त ओह मनखे के रूप म कमजोर अऊ ओकर बातचीत ह हल्का जान पड़थे।”
2CO 10:11 अइसने मनखेमन ये बात ला जान लेवंय कि पीठ पाछू जइसने हमन अपन चिट्ठी म लिखथन, वइसनेच हमर काम घलो होही, जब हमन तुम्हर करा आबो।
2CO 10:12 जऊन मन खुद के बड़ई करथें, हमन अपन ला ओ मनखेमन के बरोबर रखे के या ओमन के संग अपन तुलना करे के हिम्मत नइं करन। जब ओमन अपन ला एक-दूसर के संग नापथें अऊ अपन तुलना एक-दूसर के संग करथें, त ओमन नासमझ एं।
2CO 10:13 पर हमन हद के बाहिर घमंड नइं करन। हमर घमंड ह परमेसर के ठहिराय हद के भीतर होही, अऊ ये हद म तुमन घलो आथव।
2CO 10:14 हमन जादा घमंड नइं करत हवन, यदि हमन तुम्हर करा नइं आय रहितेंन, त ये मामला होतिस; पर हमन सबले पहिली मनखे रहेंन, जऊन मन तुम्हर करा मसीह के सुघर संदेस लेके आयेंन।
2CO 10:15 आने मन के मेहनत ऊपर हमन सीमना के बाहिर घमंड नइं करन। पर हमन ला आसा हवय कि जइसने-जइसने मसीह म तुम्हर बिसवास ह बढ़त जाही, त हमर काम के इलाका ह घलो तुम्हर बीच म बहुंत बाढ़त जाही।
2CO 10:16 अऊ हमन तुम्हर इलाका के बाहिर सुघर संदेस के परचार कर सकबो। काबरकि आने मनखे के इलाका म पहिली ले करे गे काम के बारे म, हमन घमंड करे नइं चाहन।
2CO 10:17 पर जऊन ह घमंड करथे, ओह परभू ऊपर घमंड करय।
2CO 10:18 काबरकि जऊन ह अपन बड़ई आप करथे, ओला सही मनखे नइं समझे जावय, पर जऊन मनखे के बड़ई परभू ह करथे, ओह सही मनखे समझे जाथे।
2CO 11:1 मोला आसा हवय कि तुमन मोर थोरकन मुरूखता ला सह लूहू, अऊ हां तुमन येला सहत घलो हवव।
2CO 11:2 मेंह तुम्हर बर ईस्वरीय धुन रखथंव। मेंह तुम्हर ले सिरिप एकेच घरवाला के वायदा करे हवंव, जऊन ह मसीह अय, ताकि मेंह तुमन ला एक पबितर कुंवारी के रूप म ओला दे सकंव।
2CO 11:3 पर मेंह डरत हवंव कि मसीह म तुम्हर जऊन ईमानदारी अऊ सुध भक्ति हवय, तुमन ओकर ले भटक झन जावव, जइसने हवा ह सांप के छल-कपट ले धोखा खाय रिहिस।
2CO 11:4 काबरकि यदि कोनो तुम्हर करा आथे अऊ आने यीसू के परचार करथे, जेकर परचार हमन नइं करे हवन या फेर जऊन आतमा तुमन ला पहिली मिले हवय, ओला छोंड़के कोनो अऊ आतमा के बारे म गोठियाथे या फेर कोनो अऊ किसम के सुघर संदेस सुनाथे, जऊन ला तुमन नइं सुने रहेव, त तुमन ओला आसानी से मान लेथव।
2CO 11:5 पर मेंह अपनआप ला ओ बड़े प्रेरितमन ले कोनो बात म कम नइं समझंव।
2CO 11:6 मेंह गोठियाय म अनाड़ी अंव, पर मोर करा गियान हवय। हर किसम ले, हमन ये बात ला तुम्हर आघू म साफ कर दे हवन।
2CO 11:7 का मेंह कोनो पाप करेंव कि तुमन ला परमेसर के सुघर संदेस बिगर कोनो दाम लिये सुनांय, अऊ अपनआप ला दीन-हीन करेंव ताकि तुमन ऊपर उठाय जावव।
2CO 11:8 तुम्हर बीच म सेवा करे बर, मेंह आने कलीसियामन ले मदद लेंव, ताकि तुम्हर सेवा कर सकंव।
2CO 11:9 जब मेंह तुम्हर संग रहेंव अऊ मोला कोनो चीज के जरूरत होईस, त मेंह काकरो ऊपर बोझ नइं बनेंव, काबरकि जऊन भाईमन मकिदुनिया ले आईन, ओमन मोर जरूरत के चीज ला पूरा करिन। मेंह अब तक तुम्हर ऊपर कोनो बोझ नइं बने हवंव, अऊ भविस्य म घलो, मेंह तुम्हर ऊपर कोनो किसम ले बोझ नइं बनंव।
2CO 11:10 जब तक मसीह के सच्चई मोर म हवय, तब तक अखया छेत्र म कोनो मोर ये घमंड करई ला नइं रोकय।
2CO 11:11 काबर? का एकरसेति कि मेंह तुम्हर ले मया नइं करंव? परमेसर ह जानत हवय कि मेंह तुम्हर ले मया करथंव।
2CO 11:12 जऊन काम मेंह करत हवंव, ओला मेंह करतेच रहिहूं, ताकि ओ लबरा प्रेरितमन के घमंड करे अऊ ये कहे के मऊका ला लबरा साबित करंव कि ओमन घलो ओहीच किसम के काम करथें, जइसने हमन करथन।
2CO 11:13 काबरकि अइसने मनखेमन लबरा प्रेरित, छल-कपट ले काम करइया अऊ मसीह के प्रेरित के सहीं रूप धरे हवंय।
2CO 11:14 अऊ येह कोनो अचम्भो करे के बात नो हय, काबरकि सैतान ह खुद ज्योतिमय स्वरगदूत सहीं रूप धरथे।
2CO 11:15 एकरसेति यदि ओकर सेवकमन घलो धरमीपन के सेवक सहीं रूप धरंय, त कोनो बड़े बात नो हय, पर ओमन के अन्त ह ओमन के काम के मुताबिक होही।
2CO 11:16 मेंह फेर कहत हंव, कोनो मोला मुरूख झन समझय। पर यदि तुमन मोला मुरूख समझथव, त मोला एक मुरूख के रूप म ही गरहन करव, ताकि मेंह घलो थोरकन घमंड कर सकंव।
2CO 11:17 घमंड के ये बात म, मेंह एक मुरूख मनखे के सहीं बेधड़क गोठियावत हंव, मेंह वइसने नइं गोठियावत हवंव, जइसने परभू ह गोठियाही।
2CO 11:18 जब कतको झन संसारिक बात के घमंड करथें, त मेंह घलो घमंड करहूं।
2CO 11:19 तुमन खुसी ले मुरूखमन के सह लेथव, काबरकि तुमन बहुंत समझदार अव।
2CO 11:20 अऊ त अऊ, कहूं कोनो तुमन ला गुलाम बना लेथे, या तुमन ला ठगथे या तुम्हर ले फायदा उठाथे या तुम्हर आघू म अपनआप ला बड़े बनाथे या फेर तुम्हर गाल म थपरा मारथे, तभो ले तुमन ओकर सह लेथव।
2CO 11:21 मोला ये कहत सरम आथे कि हमन ओ जम्मो काम म बहुंत कमजोर रहेंन। पर यदि कोनो मनखे कोनो बात म घमंड करे के हिम्मत करथे, त मेंह एक मुरूख मनखे के सहीं कहत हंव कि मेंह घलो ओ बात म घमंड करे के हिम्मत कर सकथंव।
2CO 11:22 का ओमन इबरी अंय? मेंह घलो अंव। का ओमन इसरायली अंय? मेंह घलो अंव। का ओमन अब्राहम के बंस के अंय? मेंह घलो अंव।
2CO 11:23 का ओमन मसीह के सेवक अंय? मेंह ओमन ले जादा बने सेवक अंव—मेंह ये बात एक पागल मनखे के सहीं कहत हंव। मेंह जादा मेहनत करे हवंव, अऊ जादा बार ले जेल गे हवंव, मोला जादा कोर्रा म मारे गे हवय अऊ मेंह बार-बार मिरतू के जोखिम म पड़े हंव।
2CO 11:24 पांच बार मेंह यहूदीमन के हांथ ले एक कम चालीस कोर्रा खाय हवंव।
2CO 11:25 तीन बार मोला लउठी ले मारे गीस, एक बार मोर ऊपर पथरवाह करे गीस, तीन बार पानी जहाजमन टूट गीन, जऊन म मेंह जावत रहेंव, एक रात अऊ एक दिन मेंह खुला समुंदर म काटेंव।
2CO 11:26 मेंह बार-बार एती-ओती होवत रहेंव। मेंह नदी के खतरा म, डाकूमन के खतरा म, मोर अपन देस के मनखेमन के खतरा म, आनजातमन के खतरा म, सहर के खतरा म, उजरे जंगल के खतरा म, समुंदर के खतरा म अऊ लबरा बिसवासीमन के खतरा म ले गुजर चुके हवंव।
2CO 11:27 मेंह मेहनत करे हंव अऊ कठिन मेहनत करे हवंव अऊ कतको रथिया ले उसनिंदा रहे हवंव, मेंह भूख अऊ पीयास ला जानत हंव अऊ अकसर बिगर खाय भूख ला सहे हवंव, मेंह जाड़ा म कम कपड़ा म रहे हवंव।
2CO 11:28 ये जम्मो बातमन के अलावा, हर दिन, जम्मो कलीसियामन बर मोला चिंता खाय जावथे।
2CO 11:29 जब कोनो कमजोर होथे, त मेंह घलो ओकर कमजोरी महसूस करथंव; जब कोनो पाप म गिरथे, त मोला दुख होथे।
2CO 11:30 यदि मोला घमंड करना जरूरी ए, त मेंह ओ बात बर घमंड करहूं, जऊन ह मोर कमजोरी ला देखाथे।
2CO 11:31 परभू यीसू के ददा परमेसर जेकर महिमा सदा होवय, ओह जानत हवय कि मेंह लबारी नइं मारत हवंव।
2CO 11:32 दमिस्क म अरितास राजा के अधीन म जऊन राजपाल रिहिस, ओह मोला पकड़े बर दमिस्क सहर म पहरेदार लगाय रिहिस।
2CO 11:33 पर मनखेमन मोला एक ठन टुकना म बईठारके, सहर के दीवार म बने एक खिड़की म ले खाल्हे उतार दीन अऊ मेंह ओकर हांथ ले बांच गेंव।
2CO 12:1 मेंह घमंड जरूर करहूं, हालाकि एकर ले कुछू लाभ नइं होवय। पर मेंह परभू के दुवारा दिये गय दरसन अऊ परकासन के बारे म गोठियाहूं।
2CO 12:2 मेंह मसीह म एक मनखे ला जानत हंव, जऊन ह चौदह बछर पहिली तीसरा स्वरग म उठा लिये गे रिहिस। मेंह नइं जानंव, पर परमेसर ह जानथे कि ओह देहें म उठाय गीस या बिगर देहें के।
2CO 12:3 अऊ मेंह जानत हंव कि ये मनखे ह स्वरग-लोक म लाने गीस। मेंह नइं जानंव, पर परमेसर ह जानथे कि ओह देहें म लाने गीस या बिगर देहें के।
2CO 12:4 ओह अइसने बातमन ला सुनिस, जेकर बयान नइं करे जा सकय, अइसने बातमन जेला बताय के अनुमति मनखे ला नइं दे गे हवय।
2CO 12:5 मेंह अइसने मनखे के ऊपर घमंड करहूं, पर अपन कमजोरी के छोंड़ मेंह अपन ऊपर अऊ कोनो बात म घमंड नइं करंव।
2CO 12:6 पर कहूं मेंह घमंड करे चाहंव घलो, त येह मोर मुरूखता नइं होही, काबरकि मेंह सच गोठियाहूं। पर मेंह घमंड नइं करंव, ताकि जऊन कुछू मेंह करथंव या कहिथंव, कोनो मोला ओकर ले बढ़के झन समझय।
2CO 12:7 ये अद्भूत चीजमन ला देखे के कारन, मेंह घमंडी झन हो जावंव, एकरसेति मोर देहें म एक कांटा गड़ाय गीस, याने कि सैतान के एक दूत ह मोला परेसान करे बर आईस।
2CO 12:8 तीन बार मेंह परभू ले बिनती करेंव कि ओह येला मोर ले हटा देवय।
2CO 12:9 पर ओह मोला कहिस, “मोर अनुग्रह ह तोर बर बहुंते ए, काबरकि मोर सामर्थ ह दुरबलता म सिद्ध होथे।” एकरसेति खुसी ले, मेंह अपन दुरबलता के ऊपर अऊ घमंड करहूं, ताकि मसीह के सामर्थ ह मोर ऊपर बने रहय।
2CO 12:10 एकर कारन मसीह के हित म मेंह दुरबलता म, बेजत्ती म, तकलीफ म, सतावा म अऊ कठिनई म खुस रहिथंव। काबरकि जब मेंह दुरबल हंव, तभे मेंह बलवान अंव।
2CO 12:11 मेंह अपनआप ला मुरूख बनाएंव, पर तुमन मोला एकर बर लाचार करे हवव। तुमन ला तो मोर परसंसा करना रिहिस। हालाकि मेंह कुछू नो हंव, तभो ले ओ बड़े प्रेरितमन ले मेंह कोनो बात म कम नो हंव।
2CO 12:12 जऊन बातमन कोनो ला एक प्रेरित के रूप म साबित करथे, ओमन चिनहां, अचरज अऊ चमतकार के काम अंय अऊ ये बातमन तुम्हर बीच म बड़े धीरज के साथ करे गीस।
2CO 12:13 तुमन कोन बात म आने कलीसिया ले कम रहेव, सिवाय ये कि मेंह तुम्हर ऊपर कभू बोझ नइं बनेंव। तुमन मोला ये गलती बर छेमा करव!
2CO 12:14 अब मेंह तीसरा बार तुम्हर करा आय बर तियार हवंव, अऊ मेंह तुम्हर ऊपर कोनो बोझ नइं बनंव, काबरकि मेंह तुम्हर संपत्ति नइं, पर तुमन ला चाहथंव। काबरकि लइकामन ला अपन दाई-ददा खातिर धन नइं जमा करना चाही, पर दाई-ददामन ला अपन लइकामन खातिर धन जमा करना चाही।
2CO 12:15 एकरसेति, जऊन कुछू मोर करा हवय, ओला मेंह खुसी ले तुम्हर बर खरचा कर दूहूं, अऊ मेंह खुद अपनआप ला घलो दे दूहूं। यदि मेंह तुमन ला जादा मया करथंव, त का तुमन मोला कम मया करहू?
2CO 12:16 तब तुमन मान लेथव कि मेंह तुम्हर ऊपर बोझ नइं बनेंव। पर तुमन कह सकत हव कि मेंह चालबाज अंव अऊ छल करके मेंह तुम्हर ले मदद ले हवंव।
2CO 12:17 जऊन मन ला मेंह तुम्हर करा पठोंय, का ओमन के दुवारा मेंह तुम्हर ले फायदा उठांय?
2CO 12:18 मेंह तीतुस ले बिनती करेंव कि ओह तुम्हर करा जावय अऊ मेंह हमर भाई ला घलो ओकर संग पठोंय। का तीतुस ह तुम्हर ले फायदा उठाईस। नइं ना। का हमन एकेच आतमा म होके काम नइं करेंन? का हमर चालचलन ह एक सहीं नइं रिहिस?
2CO 12:19 का तुमन अभी तक ये सोचत हव कि हमन तुम्हर आघू म अपन सफई देवत हवन? परमेसर ला हाजिर जानके, हमन मसीह म होके गोठियावत हवन। हे मयारू संगवारीमन हो! जऊन कुछू हमन करथन, तुम्हर उन्नति बर करथन।
2CO 12:20 काबरकि मोला डर हवय कि जब मेंह उहां आवंव, त मेंह तुमन ला वइसने नइं पावंव, जइसने कि मेंह चाहथंव, अऊ तुमन मोला वइसने झन पावव, जइसने तुमन चाहथव। मोला डर हवय कि उहां झगरा, जलन, कोरोध, सुवारथीपन, निन्दा, अफवाह, घमंड अऊ हंगामा होवत होही।
2CO 12:21 मोला डर हवय कि जब मेंह फेर आवंव, त मोर परमेसर ह मोला तुम्हर आघू म नम्र करय अऊ मोला ओ बहुंते मनखेमन बर दुखी होना पड़य, जऊन मन पहिली पाप करिन अऊ अपन असुधता, अनैतिकता अऊ छिनारीपन ले पछताप नइं करे हवंय, जऊन म ओमन सामिल रिहिन।
2CO 13:1 मेंह तीसरा बार तुम्हर करा आवत हंव। परमेसर के बचन म लिखे हवय, “हर एक बात के पुस्टि करे बर दू या तीन गवाह के गवाही जरूरी अय।”
2CO 13:2 जब मेंह दूसर बार तुम्हर करा आय रहेंव, त तुमन ला चेताय रहेंव। जब मेंह तुम्हर बीच म नइं अंव, त मेंह ओ बात ला फेर कहत हंव: जब मेंह आहूं, त ओमन ला नइं छोड़ंव, जऊन मन पहिली पाप करे रिहिन।
2CO 13:3 तुमन एकर सबूत चाहथव कि मसीह ह मोर दुवारा गोठियाथे। मसीह ह तुम्हर बर निरबल नो हय, पर ओह तुम्हर बीच म अपन सामर्थ ला देखाथे।
2CO 13:4 ये बात तो सच ए कि ओह निरबलता म कुरूस ऊपर चघाय गीस, पर ओह परमेसर के सामर्थ के दुवारा जीयत हवय। वइसनेच हमन ओमा निरबल हवन, पर परमेसर के सामर्थ ले तुम्हर सेवा करे बर हमन ओकर संग जीयत रहिबो।
2CO 13:5 तुमन अपनआप ला परखव अऊ देखव कि तुमन बिसवास के मुताबिक चलत हवव कि नइं। अपनआप ला जांचव। का तुमन नइं जानव कि मसीह यीसू ह तुमन म हवय? यदि नइं ए, त फेर तुमन जांच म फेल हो गे हवव।
2CO 13:6 पर मोला बिसवास हवय कि तुमन जान जाहू कि हमन जांच म पास हो गे हवन।
2CO 13:7 अब हमन परमेसर ले पराथना करत हवन कि तुमन कोनो गलत काम झन करव। एकरसेति नइं कि हमन जांच म पास हो गे हवन, पर एकरसेति कि तुमन ओ काम करव जऊन ह सही ए, चाहे हमन फेल हो गे हवन सहीं भले ही लगय।
2CO 13:8 काबरकि हमन सच के बिरोध म कुछू नइं कर सकन, पर हमन सिरिप सच के खातिर ही कर सकथन।
2CO 13:9 हमन ला खुसी हवय कि जब भी हमन निरबल हवन, त तुमन मजबूत हवव अऊ हमन पराथना करथन कि तुमन पूरा सिद्ध बनव।
2CO 13:10 एकरे कारन, जब मेंह तुम्हर संग नइं अंव, त ये बातमन ला लिखत हवंव, ताकि जब मेंह तुम्हर करा आवंव, त मोला अपन अधिकार के उपयोग करे म कठोर झन होना पड़य; काबरकि परभू ह मोला ये अधिकार तुम्हर आतमिक उन्नति बर दे हवय, तुम्हर बिनास बर नइं।
2CO 13:11 आखिर म, हे भाई-बहिनीमन हो, आनंदित रहव! सिद्ध बने के कोसिस म रहव; एक-दूसर ला उत्साहित करव; एक मत होके रहव अऊ सांति बनाय रखव। तभे मया अऊ सांति देवइया परमेसर ह तुम्हर संग रहिही।
2CO 13:12 पबितर चूमा के संग एक-दूसर ला जोहार करव।
2CO 13:13 इहां के जम्मो संत मनखेमन तुमन ला अपन जोहार कहत हवंय।
2CO 13:14 परभू यीसू मसीह के अनुग्रह, अऊ परमेसर के मया, अऊ पबितर आतमा के संगति तुमन जम्मो झन संग रहय।
GAL 1:1 में, पौलुस एक प्रेरित अंव अऊ मेंह मनखेमन कोति ले या कोनो मनखे के दुवारा पठोय नइं गे हवंव, पर मेंह यीसू मसीह अऊ परमेसर ददा के दुवारा पठोय गे हवंव, जऊन ह यीसू मसीह ला मरे म ले जियाईस—
GAL 1:2 मोर अऊ ओ जम्मो भाई जऊन मन मोर संग हवंय, हमर जम्मो कोति ले,
GAL 1:3 परमेसर हमर ददा अऊ परभू यीसू मसीह कोति ले तुमन ला अनुग्रह अऊ सांति मिलय।
GAL 1:4 एहीच परभू यीसू ह अपनआप ला हमर पाप खातिर दे दीस ताकि ओह हमर परमेसर अऊ ददा के ईछा के मुताबिक हमन ला ये जुग के पापी संसार ले बचावय।
GAL 1:5 परमेसर के महिमा जुग-जुग होवत रहय। आमीन।
GAL 1:6 मोला अचरज होवत हवय कि जऊन ह तुमन ला मसीह के अनुग्रह के दुवारा बलाईस, ओला तुमन अतेक जल्दी छोंड़ देवत हव, अऊ आने किसम के सुघर संदेस कोति जावत हवव।
GAL 1:7 असल म, अऊ आने किसम के सुघर संदेस हवय ही नइं। पर कुछू मनखेमन तुम्हर बीच म गड़बड़ी करत हवंय अऊ ओमन तुमन ला मसीह के सुघर संदेस ले हटाय के कोसिस करत हवंय।
GAL 1:8 पर कहूं हमन या स्वरग ले कोनो दूत घलो ओ सुघर संदेस ला छोंड़, जऊन ला हमन तुमन ला सुनाय हवन, कोनो आने किसम के सुघर संदेस सुनाथे, त ओह परमेसर के दुवारा सरापित होवय!
GAL 1:9 जइसने कि हमन पहिले बताय हवन, ओ बात ला, मेंह फेर कहत हंव: जऊन सुघर संदेस ला तुमन गरहन करे हवव ओला छोंड़, यदि कोनो अऊ आने किसम के सुघर संदेस के परचार करथे, त ओह परमेसर के दुवारा सरापित होवय!
GAL 1:10 का मेंह अब मनखे के मन ला जीते के कोसिस करत हवंव या फेर परमेसर के? या का मेंह मनखेमन ला खुस करे के कोसिस करत हवंव? यदि मेंह अभी तक ले मनखेमन ला खुस करे के कोसिस करत रहितेंव, त मेंह मसीह के सेवक नइं होतेंव।
GAL 1:11 हे भाईमन हो, मेंह चाहथंव कि तुमन जानव कि जऊन सुघर संदेस के परचार मेंह करेंव, ओह मनखे के बनाय नो हय।
GAL 1:12 येह मोला कोनो मनखे ले नइं मिलिस अऊ न ही मोला येह सिखोय गीस, पर यीसू मसीह खुद येला मोर ऊपर परगट करिस।
GAL 1:13 यहूदी मत म मोर जऊन पहिली के जिनगी रिहिस, ओकर बारे म तुमन सुन डारे हवव; मेंह कइसने परमेसर के कलीसिया ऊपर घोर अतियाचार करत रहेंव अऊ ओला नास करे के कोसिस करत रहेंव।
GAL 1:14 यहूदी मत म, मेंह अपन उमर के कतको यहूदीमन ले बहुंते आघू रहेंव अऊ मोर पुरखामन के रीति-रिवाज बर मेंह बहुंते समरपित रहेंव।
GAL 1:15 पर जब परमेसर, जऊन ह मोला मोर दाई के पेट ले ही चुन ले रिहिस अऊ अपन अनुग्रह के दुवारा मोला बलाईस,
GAL 1:16 ओला ये बने लगिस कि ओह अपन बेटा ला मोर ऊपर परगट करय, ताकि मेंह ओकर परचार आनजातमन के बीच म करंव। एकर बर, मेंह तुरते न तो कोनो मनखे ले सलाह लेंव,
GAL 1:17 अऊ न ही में यरूसलेम म ओमन करा गेंव, जऊन मन मोर ले पहिले प्रेरित रिहिन, पर मेंह तुरते अरब देस चले गेंव अऊ बाद म दमिस्क सहर लहुंटके आएंव।
GAL 1:18 तब तीन साल के बाद, मेंह कैफा ले मिले बर यरूसलेम सहर गेंव अऊ ओकर संग पंदरह दिन तक रहेंव।
GAL 1:19 पर उहां मेंह परभू के भाई याकूब ला छोंड़ अऊ कोनो प्रेरित ला नइं देखेंव।
GAL 1:20 मेंह परमेसर के आघू म तुमन ला भरोसा दिलाके कहथंव कि जऊन कुछू मेंह तुमन ला लिखत हवंव, ओह कोनो लबारी गोठ नो हय।
GAL 1:21 बाद म, मेंह सीरिया अऊ किलिकिया देसमन म गेंव।
GAL 1:22 यहूदिया प्रदेस के कलीसिया के मनखे जऊन मन मसीह म हवंय, मोला नइं देखे रिहिन।
GAL 1:23 ओमन सिरिप ये सुने रिहिन: “जऊन मनखे ह हमर ऊपर पहिले अतियाचार करत रिहिस, अब ओह ओहीच बिसवास के परचार करत हवय, जऊन ला ओह एक बार नास करे के कोसिस करत रिहिस।”
GAL 1:24 अऊ मोर कारन ले, ओमन परमेसर के महिमा करिन।
GAL 2:1 तब चौदह साल के बाद, मेंह बरनबास के संग फेर यरूसलेम सहर गेंव। मेंह अपन संग तीतुस ला घलो ले गेंव।
GAL 2:2 मेंह उहां गेंव काबरकि परमेसर ह अगुवई करिस कि मेंह उहां जावंव अऊ ओमन ला, ओ सुघर संदेस बतावंव, जेकर परचार मेंह आनजातमन के बीच म करथंव। पर मेंह ये सुघर संदेस सिरिप ओमन ला निजी तौर म बताएंव, जऊन मन मोला मुखिया सहीं लगिन, काबरकि मेंह नइं चाहत रहेंव कि मोर पहिली के या अभी के काम ह बेकार हो जावय।
GAL 2:3 पर अऊ त अऊ तीतुस, जऊन ह एक यूनानी मनखे रिहिस अऊ मोर संग रिहिस, ओकर ऊपर खतना कराय बर दबाव नइं डाले गीस।
GAL 2:4 ये बात ह उठिस काबरकि कुछू लबरा भाईमन हमर बीच म चुपेचाप आ गे रिहिन, ताकि मसीह यीसू म हमर जऊन सुतंतरता हवय, ओमन ओकर बारे म पता लगावंय अऊ हमन ला यहूदी रीति-रिवाज अऊ कानून के गुलाम बना लेवंय।
GAL 2:5 ओमन के अधीन होवई बर हमन एक छिन बर घलो तियार नइं रहेंन, ताकि सुघर संदेस के सच्चई ह तुमन म बने रहय।
GAL 2:6 पर जऊन मन बड़े मनखे जान पड़त रिहिन, ओमन जऊन कुछू घलो रिहिन, एकर ले मोला कोनो फरक नइं पड़य; परमेसर ह भेदभाव नइं करय—ओ बड़े मनखेमन ले मोला कोनो नवां बात नइं मिलिस।
GAL 2:7 एकर उल्टा, ओमन देखिन कि जइसने यहूदीमन ला सुघर संदेस सुनाय के काम पतरस ला सऊंपे गे रिहिस, वइसने आनजातमन ला सुघर संदेस सुनाय के काम मोला दिये गे हवय।
GAL 2:8 काबरकि परमेसर, जऊन ह पतरस के सेवा के जरिये काम करिस, ओह मोर सेवा के जरिये घलो काम करिस। पतरस ह यहूदीमन बर प्रेरित ए अऊ मेंह आनजातमन बर।
GAL 2:9 याकूब, कैफा अऊ यूहन्ना के खियाती, कलीसिया के खंभा के रूप म रिहिस। जब ओमन मोला दिये गय परमेसर के अनुग्रह ला जानिन, त ओमन बरनबास अऊ मोला संगति के जेवनी हांथ दीन, अऊ हमर बीच म ये सहमती होईस कि हमन आनजातमन करा जावन अऊ ओमन यहूदीमन करा।
GAL 2:10 ओमन हमन ला सिरिप ये सलाह दीन कि हमन गरीबमन ला हमेसा सुरता करत रहन, अऊ एहीच काम ला करे बर, मेंह खुद उत्सुक रहेंव।
GAL 2:11 जब कैफा ह अंताकिया सहर म आईस, त मेंह ओकर सामने ही ओकर बिरोध करंय, काबरकि ओह गलत करत रिहिस।
GAL 2:12 याकूब के इहां ले कुछू मनखेमन के आय के पहिली, ओह आनजातमन के संग खाय करत रिहिस। पर जब ओमन आईन, त ओह पाछू हटे लगिस अऊ अपनआप ला आनजातमन ले अलग करे लगिस, काबरकि ओह ओमन ले डरत रिहिस, जऊन मन ये कहत रिहिन कि खतना करवाना जम्मो बिसवासी बर जरूरी ए।
GAL 2:13 आने यहूदीमन घलो ओकर ढोंग म सामिल हो गीन। अऊ त अऊ बरनबास घलो ओमन के ढोंग के कारन, बहकावा म आ गीस।
GAL 2:14 जब मेंह देखेंव कि ओमन सुघर संदेस के सच्चई के मुताबिक सही बरताव नइं करत हवंय, त मेंह जम्मो झन के आघू म कैफा ला कहेंव, “तेंह एक यहूदी अस, पर तेंह एक आनजात सहीं जिनगी जीथस, यहूदी सहीं नइं। तब तेंह कइसने आनजातमन ऊपर यहूदी रीति-रिवाज ला माने बर दबाव डालथस?
GAL 2:15 “हमन जनम ले यहूदी अन अऊ पापी आनजात के नो हन।
GAL 2:16 हमन जानथन कि मनखे ह मूसा के कानून ला पालन करे के दुवारा सही नइं ठहिरय, पर ओह यीसू मसीह म बिसवास करे के दुवारा सही ठहिरथे। एकरसेति, हमन घलो मसीह यीसू ऊपर अपन बिसवास रखे हवन, ताकि हमन मसीह म हमर बिसवास के दुवारा सही ठहिरन, मूसा के कानून ला पालन करे के दुवारा नइं। काबरकि मूसा के कानून ला पालन करे के दुवारा कोनो सही नइं ठहिरय।
GAL 2:17 “पर यदि हमन मसीह म सही ठहिरे के खोज म रहिथन, त येह साबित करथे कि हमन खुदे पापी अन, त का एकर मतलब ये अय कि मसीह ह पाप ला बढ़ावा देथे? बिलकुल नइं!
GAL 2:18 ओ चीज जऊन ला मेंह नास कर दे हवंव, यदि मेंह ओला फेर बनाथंव, त मेंह ये साबित करथंव कि मेंह एक कानून टोरइया अंव।
GAL 2:19 “काबरकि कानून के जरिये, मेंह कानून बर मर गेंव, ताकि मेंह परमेसर बर जीयंव।
GAL 2:20 मेंह मसीह के संग कुरूस म चघाय जा चुके हवंव अऊ अब मेंह जीयत नइं अंव, पर मसीह ह मोर म जीयत हवय। ओ जिनगी जऊन ला मेंह देहें म जीयत हवंव, ओला मेंह परमेसर के बेटा म बिसवास के दुवारा जीयत हवंव, जऊन ह मोर ले मया करिस अऊ अपनआप ला मोर बर दे दीस।
GAL 2:21 मेंह परमेसर के अनुग्रह ला खारिज नइं करथंव, काबरकि कहूं मूसा के कानून के जरिये मनखे ह धरमी ठहिरतिस, त मसीह के मिरतू ह बेकार होतिस!”
GAL 3:1 हे मुरूख गलातीमन हो! तुमन ला कोन ह मोह ले हवय? तुम्हर आंखी के आघू म यीसू मसीह ला कुरूस ऊपर चघाय साफ-साफ देखाय गे रिहिस।
GAL 3:2 मेंह तुम्हर ले सिरिप एक बात जाने चाहत हंव: का तुमन ला मूसा के कानून ला पालन करे दुवारा, पबितर आतमा मिलिस या फेर जऊन बात तुमन सुनेव, ओकर ऊपर बिसवास करे दुवारा।
GAL 3:3 का तुमन अतेक मुरूख अव? पबितर आतमा के संग सुरू करके, का अब अपन खुद के सक्ति ले सिद्ध बने के कोसिस करत हवव?
GAL 3:4 का तुम्हर अतेक दुख उठई बेकार म गीस? मोला बिसवास नइं होवत हवय।
GAL 3:5 जब परमेसर ह तुमन ला अपन आतमा देथे अऊ तुम्हर बीच म चमतकार के काम करथे, त का येह तुमन मूसा के कानून ला पालन करथव, ओकर सेति ए, या फेर जऊन बात तुमन सुनेव अऊ ओकर ऊपर बिसवास करेव, ओकर कारन ए?
GAL 3:6 वइसने ही अब्राहम ह घलो “परमेसर के ऊपर बिसवास करिस अऊ ये बात ह ओकर बर धरमीपन गने गीस।”
GAL 3:7 तब तुमन ये बात ला जान लेवव कि जऊन मन परमेसर ऊपर बिसवास करथें, ओमन अब्राहम के संतान अंय।
GAL 3:8 परमेसर के बचन ह पहिली ले बता दीस कि परमेसर ह आनजातमन ला बिसवास के दुवारा सही ठहिराही, अऊ पहिली ले ही अब्राहम ला सुघर संदेस बता दीस: “तोर जरिये जम्मो जाति के मनखेमन आसीस पाहीं।”
GAL 3:9 एकरसेति जऊन मन बिसवास करथें, ओमन अब्राहम याने कि बिसवास के पुरूस के संग आसीस पाथें।
GAL 3:10 ओ जम्मो झन, जऊन मन मूसा के कानून ला पालन करे म भरोसा रखथें, ओमन एक सराप के अधीन हवंय, काबरकि परमेसर के बचन म ये लिखे हवय: “हर ओ मनखे ह सरापित ए, जऊन ह मूसा के कानून के किताब म लिखे जम्मो बात के पालन नइं करय।”
GAL 3:11 ये बात साफ ए कि परमेसर के आघू म, मूसा के कानून के दुवारा कोनो सही नइं ठहिरंय, काबरकि परमेसर के बचन ह कहिथे, “धरमी मनखे ह बिसवास के दुवारा जीयत रहिही।”
GAL 3:12 मूसा के कानून ह बिसवास के ऊपर अधारित नइं ए; पर जऊन मनखे ह कानूनमन के पालन करही, ओह ओमन के दुवारा जीयत रहिही।
GAL 3:13 मसीह ह हमर बर सरापित होईस अऊ हमन ला मूसा के कानून के सराप ले दाम देके छोंड़ाईस, काबरकि परमेसर के बचन म ये लिखे हवय: “हर ओ मनखे ह सरापित ए, जेला खंभा म टांगे जाथे।”
GAL 3:14 ओह हमन ला दाम देके छोंड़ाईस ताकि अब्राहम ला दिये गे आसीस, मसीह यीसू के जरिये आनजातमन ला मिलय, अऊ बिसवास के दुवारा हमन ला ओ पबितर आतमा मिलय, जेकर वायदा परमेसर ह करे रिहिस।
GAL 3:15 हे भाईमन हो, मेंह मनखे के जिनगी ले एक उदाहरन देवत हवंव। जब दू झन मनखे करार करके ओला पक्का करथें, त ओला कोनो न तो रद्द कर सकंय अऊ ओमा न कुछू जोड़ सकंय। अइसने बात येमा घलो अय।
GAL 3:16 परतिगियां के बात अब्राहम ले अऊ ओकर संतान ले करे गे रिहिस। परमेसर के बचन ये नइं कहय, “अऊ संतानमन ला” जेकर मतलब होथे—बहुंत मनखे; पर परमेसर के बचन ये कहिथे, “अऊ तोर संतान ला” जेकर मतलब होथे—एक झन, जऊन ह मसीह अय।
GAL 3:17 मोर कहे के मतलब ये अय: परमेसर ह करार करिस अऊ ओला पूरा करे बर परतिगियां करिस। मूसा के कानून ह एकर 430 साल के बाद आईस अऊ ये कानून परमेसर के करार ला रद्द नइं कर सकय अऊ ओकर परतिगियां ला बेकार नइं कर सकय।
GAL 3:18 काबरकि यदि उत्तराधिकार ह मूसा के कानून के दुवारा मिलथे, त फेर येह परतिगियां के दुवारा नइं मिल सकय; पर परमेसर ह येला एक परतिगियां के दुवारा अब्राहम ला दीस।
GAL 3:19 तब, मूसा के कानून के का उदेस्य रिहिस? येला तो पाप के कारन जोड़े गे रिहिस कि येह अब्राहम के ओ बंस के आवत तक रहय, जेकर परतिगियां परमेसर ह करे रिहिस। मूसा के कानून ह स्वरगदूतमन के जरिये एक बिचवई के दुवारा दिये गीस।
GAL 3:20 बिचवई तो दू झन या दू ठन दल के बीच म ठहिराय जाथे; पर परमेसर ह एके झन अय।
GAL 3:21 तब का मूसा के कानून ह परमेसर के परतिगियां के बिरोध म हवय? बिलकुल नइं! काबरकि यदि अइसने कानून दिये गे होतिस, जऊन ह मनखेमन ला जिनगी दे सकथे; तब सही म धरमीपन ह मूसा के कानून के दुवारा होतिस।
GAL 3:22 पर परमेसर के बचन ह कहिथे कि जम्मो संसार ह पाप के अधीन हवय, ताकि यीसू मसीह म बिसवास के जरिये, जऊन चीज ला दिये जाय के परतिगियां करे गे रिहिस, ओ चीज ह ओमन ला दिये जा सकय, जऊन मन बिसवास करथें।
GAL 3:23 ये बिसवास के आय के पहिली, हमन मूसा के कानून के दुवारा कैदी के सहीं रखे गे रहेंन अऊ बिसवास के परगट होवत तक हमन बंद रहेंन।
GAL 3:24 ये किसम ले, मूसा के कानून ह मसीह के आवत तक हमर देखरेख करिस कि हमन बिसवास के दुवारा सही ठहिरन।
GAL 3:25 अब बिसवास के समय ह आ गे हवय, अऊ हमन अब मूसा के कानून के अधीन नइं अन।
GAL 3:26 मसीह यीसू म बिसवास करे के सेति, तुमन जम्मो झन परमेसर के संतान अव,
GAL 3:27 काबरकि तुमन ले जतेक झन मसीह म एक होय बर बतिसमा ले हवव, तुमन मसीह के सुभाव ला अपना ले हवव।
GAL 3:28 अब न कोनो यहूदी ए अऊ न ही यूनानी, न कोनो गुलाम न सुतंतर, न कोनो नर न नारी, काबरकि तुमन जम्मो झन मसीह यीसू म एक अव।
GAL 3:29 यदि तुमन मसीह के अव, त तुमन अब्राहम के बंस अव अऊ परमेसर के परतिगियां के मुताबिक वारिस अव।
GAL 4:1 मोर कहे के मतलब ए कि जब तक वारिस ह नबालिक हवय, तब तक ओमा अऊ गुलाम म कोनो अंतर नइं ए, हालाकि ओह जम्मो संपत्ति के मालिक ए।
GAL 4:2 ओह अपन ददा के ठहिराय समय तक संरछक अऊ संपत्ति के देखरेख करइयामन के अधीन रहिथे।
GAL 4:3 ओही किसम ले जब हमन लइका रहेंन, त हमन संसार के अंधियार के सक्ति के गुलाम रहेंन।
GAL 4:4 पर जब आखिर म सही समय आईस, त परमेसर ह अपन बेटा ला पठोईस, जऊन ह एक माईलोगन ले जनमिस अऊ ओह मूसा के कानून के अधीन पईदा होईस,
GAL 4:5 ताकि जऊन मन मूसा के कानून के अधीन हवंय, ओमन ला दाम देके छोंड़ावय अऊ हमन ला बेटा के पूरा अधिकार मिलय।
GAL 4:6 काबरकि तुमन ओकर बेटा अव, परमेसर ह अपन बेटा के आतमा ला हमर हिरदय म पठोय हवय अऊ ये आतमा ह ऊंचहा अवाज म कहिथे, “हे अब्बा, हे ददा।”
GAL 4:7 एकरसेति अब तुमन गुलाम नो हव, पर तुमन बेटा अव, अऊ जब तुमन बेटा अव, त परमेसर ह तुमन ला वारिस घलो बनाय हवय।
GAL 4:8 पहिली जब तुमन परमेसर ला नइं जानत रहेव, त तुमन ओमन के गुलाम रहेव, जऊन मन बिलकुल ही परमेसर नो हंय।
GAL 4:9 पर अब तुमन परमेसर ला जानथव, या फेर मोला ये कहना चाही कि परमेसर ह तुमन ला जानथे, त का बात ए कि तुमन ओ निरबल अऊ दयनीय अंधियार के सक्तिमन कोति फेर वापिस लहुंटत हवव? का तुमन ओमन के फेर गुलाम बने चाहथव?
GAL 4:10 तुमन बिसेस दिन, महिना, मौसम अऊ सालमन ला मानथव।
GAL 4:11 मेंह तुम्हर बारे म डरत हवंव कि तुम्हर बर जऊन मेहनत मेंह करे हवंव, ओह बेकार झन हो जावय।
GAL 4:12 हे भाईमन हो, में तुमन ले बिनती करत हंव, तुमन मोर सहीं बन जावव, काबरकि मेंह तुम्हर सहीं बन गे हवंव। तुमन मोर कुछू गलत नइं करे हवव।
GAL 4:13 जइसने कि तुमन जानथव कि पहिली बार एक बेमारी के कारन, मेंह तुमन ला सुघर संदेस सुनाय रहेंव,
GAL 4:14 अऊ हालाकि मोर बेमारी ह तुम्हर बर एक परिछा के बेरा रिहिस, फेर तुमन मोर अनादर या अपमान नइं करेव। एकर बदले, तुमन मोर अइसने सुवागत करेव जइसने कि मेंह परमेसर के एक स्वरगदूत रहेंव या फेर मेंह खुद मसीह यीसू रहेंव।
GAL 4:15 तुम्हर ओ जम्मो आनंद ला का होईस? मेंह तुम्हर बर गवाही दे सकथंव कि यदि संभव होतिस, त तुमन अपन आंखी निकालके मोला दे देतेव।
GAL 4:16 तुमन ला सच कहे के कारन, का अब मेंह तुम्हर बईरी हो गे हवंव?
GAL 4:17 ओ आने मनखेमन तुम्हर बर बहुंत लगाव रखथें, पर ओमन के मनसा ठीक नइं ए। ओमन तुमन ला हमर ले अलग करे चाहथें, ताकि तुमन ओमन के प्रति लगाव बनाय रखव।
GAL 4:18 कहूं उदेस्य ह सही हवय, त लगाव रखई हमेसा बने बात होथे, अऊ हमेसा अइसने होना चाही, ये नइं कि जब मेंह तुम्हर संग रहिथंव, सिरिप ओही समय तुमन लगाव बनाय रखव।
GAL 4:19 हे मोर मयारू लइकामन हो, जब तक मसीह के सुभाव ह तुमन म नइं बन जावय, मेंह फेर ओ पीरा ला सहथंव, जइसने एक दाई ह लइका जनमे के बेरा पीरा सहथे।
GAL 4:20 मोर बहुंत ईछा हवय कि अब मेंह तुम्हर संग रहंव अऊ तुम्हर बर अपन बोले के ढंग ला बदलंव, काबरकि मेंह तुम्हर बारे म दुबिधा म हवंव!
GAL 4:21 जऊन मन मूसा के कानून के अधीन रहे चाहथव, मोला बतावव, का तुमन नइं जानव कि मूसा के कानून ह का कहिथे?
GAL 4:22 ओमा ये लिखे हवय कि अब्राहम के दू झन बेटा रिहिन; एक झन ह गुलाम माईलोगन हाजिरा ले अऊ दूसर झन ह सुतंतर माईलोगन सारा ले।
GAL 4:23 गुलाम माईलोगन ले ओकर बेटा ह सधारन तरीका ले जनमे रिहिस, पर सुतंतर माईलोगन ले ओकर बेटा ह परमेसर के परतिगियां के मुताबिक जनमे रिहिस।
GAL 4:24 ये बातमन ला एक पटंतर के रूप म लिये जा सकथे: ये माईलोगनमन दू ठन करार सहीं अंय। एक करार ह सीनय पहाड़ ले अय, जेकर ले गुलाम लइकामन पईदा होथें, अऊ येह हाजिरा ए।
GAL 4:25 हाजिरा ह अरब देस के सीनय पहाड़ सहीं अय अऊ येह अभी के यरूसलेम सहर ला दरसाथे, काबरकि ओह अपन लइकामन संग गुलामी म हवय।
GAL 4:26 पर जऊन यरूसलेम स्वरग म हवय, ओह सुतंतर हवय अऊ ओह हमर दाई ए।
GAL 4:27 काबरकि परमेसर के बचन म ये लिखे हवय: “हे ठड़गी माईलोगन, खुसी मना, तें, जऊन ह कभू लइका नइं जनमाय; आनंद के मारे चिचिया अऊ जोर से पुकार, तें, जेला लइका जनमे के पीरा कभू नइं होईस; काबरकि तियागे माईलोगन के लइकामन बिहाता माईलोगन के लइकामन ले जादा हवंय।”
GAL 4:28 अब, हे भाईमन हो, तुमन इसहाक के सहीं परमेसर के परतिगियां के संतान अव।
GAL 4:29 ओ समय, सधारन तरीका ले जनमे बेटा ह परमेसर के आतमा के मुताबिक जनमे बेटा ऊपर अतियाचार करत रिहिस, अऊ अभी घलो वइसनेच होवत हवय।
GAL 4:30 पर परमेसर के बचन ह का कहिथे? “गुलाम माईलोगन अऊ ओकर बेटा ला घर ले निकाल दे, काबरकि गुलाम माईलोगन के बेटा ह सुतंतर नारी के बेटा संग पुरखा के संपत्ति म कभू भागी नइं होही।”
GAL 4:31 एकरसेति, हे भाईमन हो, हमन गुलाम माईलोगन के संतान नो हन, पर हमन सुतंतर माईलोगन के संतान अन।
GAL 5:1 सुतंतर रहे खातिर, मसीह ह हमन ला सुतंतर करे हवय। इही म मजबूती से बने रहव अऊ अपनआप ला फेर गुलाम झन बनावव।
GAL 5:2 मोर बातमन ला धियान देवव! में, पौलुस, तुमन ला कहत हंव कि यदि तुमन अपन खतना करवाथव, तब मसीह ह तुम्हर बर कोनो मतलब के नइं होही।
GAL 5:3 मेंह हर एक झन ला फेर बता देवत हंव कि जऊन ह अपन खतना करवाथे, ओकर बर ये जरूरी अय कि ओह मूसा के जम्मो कानून के पालन करय।
GAL 5:4 तुमन जऊन मन मूसा के कानून के दुवारा सही ठहिरे के कोसिस करत हवव, तुमन मसीह ले दूरिहा हो गे हवव, अऊ तुमन अनुग्रह ले घलो दूरिहा हो गे हवव।
GAL 5:5 पर हमन धरमीपन के आसा करथन अऊ बिसवास के दुवारा, हमन पबितर आतमा के जरिये, ये धरमीपन के बाट जोहथन।
GAL 5:6 काबरकि मसीह यीसू म, न तो खतना के अऊ न ही बिगर खतना के कोनो मतलब हवय। सिरिप एक बात के महत्व हवय, अऊ ओह बिसवास अय, जऊन ह मया के जरिये परगट होथे।
GAL 5:7 तुमन बहुंत बढ़िया चलत रहेव। सच ला माने बर तुम्हर रसता म कोन ह बाधा डारिस?
GAL 5:8 ये किसम के सिकछा परमेसर कोति ले नइं होवय, जऊन ह तुमन ला बलाथे।
GAL 5:9 “थोरकन खमीर ह जम्मो गुंथाय पीसान ला खमीर कर देथे।”
GAL 5:10 परभू म मोला भरोसा हवय कि मोर ले अलग तुम्हर अऊ कोनो आने बिचार नइं होही। जऊन ह तुमन ला संका म डारथे, ओह चाहे कोनो होवय, अपन सजा ला पाही।
GAL 5:11 हे भाईमन हो, कहूं मेंह अभी घलो खतना करवाय के परचार करत हवंव, त फेर काबर मोर ऊपर अब तक अतियाचार करे जावत हवय? ओ स्थिति म, कुरूस म मसीह के मिरतू के बारे म परचार करे म कोनो बाधा नइं होही।
GAL 5:12 बने होतिस कि जऊन मन तुमन ला भड़कावथें, ओमन जाके अपनआप ला नपुंसक बना डारतिन!
GAL 5:13 हे मोर भाईमन हो, तुमन सुतंतर होय बर बलाय गे रहेव। पर अपन सुतंतरता के उपयोग पाप के काम करे बर झन करव, पर नम्र होके मया के संग एक-दूसर के सेवा करव।
GAL 5:14 काबरकि मूसा के जम्मो कानून ह एकेच हुकूम म पूरा हो जाथे: “तें अपन परोसी ले अपन सहीं मया कर।”
GAL 5:15 यदि तुमन एक-दूसर ला चोट पहुंचाथव अऊ एक-दूसर के नुकसान करथव, तब सचेत रहव, नइं तो तुमन एक-दूसर के दुवारा नास हो जाहू।
GAL 5:16 एकरसेति, मेंह कहत हंव कि पबितर आतमा के अगुवई म चलव, त तुमन अपन पापी सुभाव के ईछा ला पूरा करे ले बचे रहिहू।
GAL 5:17 काबरकि पापी सुभाव के ईछा ह पबितर आतमा के बिरोध म होथे, अऊ पबितर आतमा के ईछा ह पापी सुभाव के बिरोध म होथे। येमन एक-दूसर के बिरोधी अंय, ताकि तुमन ओ काम ला झन कर सकव, जऊन ला तुमन करे चाहथव।
GAL 5:18 पर, कहूं पबितर आतमा ह तुम्हर अगुवई करथे, तब तुमन मूसा के कानून के अधीन नइं अव।
GAL 5:19 देहें के काममन तो साफ अंय: छिनारी, असुधता, दुराचार,
GAL 5:20 मूरती-पूजा, जादू-टोना, बईरता, झगरा, जलन, कोरोध, सुवारथीपन, फूट, गुटबंदी,
GAL 5:21 डाह, मतवारपन, रंगरेली मनई अऊ ये किसम के आने काम। मेंह तुमन ला चेतावत हवंव, जइसने मेंह पहिली घलो चेताय रहेंव कि जऊन मन ये किसम के काम ला करथें, ओमन परमेसर के राज के भागीदार नइं होवंय।
GAL 5:22 पर पबितर आतमा के फर ह मया, आनंद, सांति, धीरज, दया, भलई, बिसवास,
GAL 5:23 नमरता अऊ संयम अय। अइसने-अइसने बात के बिरोध म कोनो कानून नइं ए।
GAL 5:24 जऊन मन मसीह यीसू के अंय, ओमन अपन देहें ला एकर लालसा अऊ ईछा सहित कुरूस ऊपर चघा दे हवंय।
GAL 5:25 जब हमन पबितर आतमा के दुवारा जिनगी जीयथन, त आवव, हमन पबितर आतमा के मुताबिक चलन घलो।
GAL 5:26 हमन घमंडी झन होवन, एक-दूसर ला झन भड़कावन अऊ हमन एक-दूसर ले डाह झन करन।
GAL 6:1 हे भाईमन हो, यदि कोनो मनखे ह कोनो पाप म पड़ जाथे, त तुमन जऊन मन पबितर आतमा के चलाय चलथव, ओला नमरता से संभालव। पर अपन धियान रखव कि कहूं तुमन घलो परिछा म झन पड़ जावव।
GAL 6:2 तुमन एक-दूसर के बोझा उठावव, तब ये किसम ले तुमन मसीह के कानून ला पूरा करहू।
GAL 6:3 कहूं कोनो मनखे ह ये सोचथे कि ओह कुछू अय, जबकि सही म ओह कुछू नो हय, त ओह अपनआप ला धोखा देथे।
GAL 6:4 हर एक झन अपन खुद के चालचलन ला जांचय, तब ओह आने मनखे संग तुलना करे बिगर, अपन चालचलन के ऊपर घमंड करय।
GAL 6:5 काबरकि हर एक मनखे ला अपन बोझा खुद उठाय बर पड़ही।
GAL 6:6 तुमन अपन जम्मो सुघर चीज ला ओकर संग बांटव, जऊन ह तुमन ला परमेसर के बचन के सिकछा देथे।
GAL 6:7 धोखा झन खावव: परमेसर के ठट्ठा नइं करे जा सकय। मनखे ह जऊन कुछू बोथे, ओहीच ला लूथे।
GAL 6:8 जऊन ह अपन पापी सुभाव ला खुस करे बर बोथे, ओह ओ पापी सुभाव ले बिनास के फसल लूथे; अऊ जऊन ह पबितर आतमा ला खुस करे बर बोथे, ओह पबितर आतमा के दुवारा परमेसर के संग सदाकाल के जिनगी के फसल ला काटही।
GAL 6:9 आवव, हमन भलई के काम करे बर झन छोंड़न। काबरकि यदि हमन हिम्मत नइं हारन, त सही मऊका म फसल ला लूबो।
GAL 6:10 एकरसेति, आवव, जिहां तक हो सकय, हमन जम्मो मनखे के भलई करन, खास करके ओमन के भलई करन, जऊन मन मसीह ऊपर बिसवास करइया परिवार ले आथें।
GAL 6:11 देखव, मेंह कइसने बड़े-बड़े अकछर म तुमन ला अपन हांथ ले लिखत हवंव!
GAL 6:12 जऊन मन बाहिरी रूप ले परभाव जमाय चाहथें, ओमन तुम्हर ऊपर दबाव डारे के कोसिस करथें कि तुमन खतना करवाव। ओमन ये काम सिरिप एकरसेति करथें, ताकि मसीह के कुरूस के कारन ओमन के ऊपर सतावा झन आवय।
GAL 6:13 अऊ त अऊ जऊन मन खतना करवाथें, ओमन मूसा के कानून ला नइं मानंय, तभो ले ओमन चाहथें कि तुमन खतना करवाव, ताकि ओमन तुम्हर देहें के बारे म डींग मार सकंय।
GAL 6:14 ये बात ह मोर ले दूरिहा रहय कि मेंह अऊ काकरो ऊपर घमंड करंव, सिरिप हमर परभू यीसू मसीह के कुरूस के छोंड़, जेकर दुवारा संसार ह मोर बर कुरूस ऊपर चघाय गीस अऊ मेंह संसार बर कुरूस ऊपर चघाय गेंव।
GAL 6:15 न तो खतना के अऊ न ही बिगर खतना के कोनो मतलब हवय; सिरिप नवां सिरिस्टी होना ही जम्मो कुछू अय।
GAL 6:16 जऊन मन ये नियम म चलथें, ओ जम्मो झन ऊपर अऊ परमेसर के इसरायल ऊपर सांति अऊ दया होवय।
GAL 6:17 आखिरी बात ये अय कि कोनो मोर बर समस्या झन ठाढ़ करय, काबरकि जऊन दागमन मोर देहें म हवंय, ओमन साबित करथें कि मेंह यीसू के गुलाम अंव।
GAL 6:18 हे भाईमन हो, हमर परभू यीसू मसीह के अनुग्रह तुम्हर आतमा ऊपर बने रहय। आमीन।
EPH 1:1 में, पौलुस जऊन ह कि परमेसर के ईछा ले मसीह यीसू के एक प्रेरित अंव,
EPH 1:2 तुमन ला, हमर ददा परमेसर अऊ परभू यीसू मसीह ले अनुग्रह अऊ सांति मिलय।
EPH 1:3 परमेसर अऊ हमर परभू यीसू मसीह के ददा के परसंसा होवय, जऊन ह हमन ला स्वरगीय ठऊर म मसीह म हर एक आतमिक आसीस दे हवय।
EPH 1:4 काबरकि परमेसर ह हमन ला संसार ला रचे के पहिली मसीह म चुन लीस कि हमन ओकर नजर म पबितर अऊ निरदोस ठहिरन।
EPH 1:5 अपन खुसी अऊ ईछा मुताबिक, मया म, ओह पहिलेच ले ये फैसला करे रिहिस कि हमन यीसू मसीह के दुवारा ओकर बेटा बनबो,
EPH 1:6 ताकि ओकर महिमामय अनुग्रह के परसंसा होवय, जेला ओह अपन मयारू बेटा म हमन ला मुफत म दे हवय।
EPH 1:7 यीसू मसीह म हमन ला ओकर लहू के दुवारा पाप ले मुक्ति मिलिस—याने कि पाप के छेमा परमेसर के बहुंतायत अनुग्रह के मुताबिक होईस,
EPH 1:8 जऊन ला ओह जम्मो बुद्धि अऊ समझ सहित हमर ऊपर बहुंतायत ले खरचा करिस।
EPH 1:9 अऊ ओह अपन ईछा के भेद ला, अपन सुमति के मुताबिक हमन ला बताईस; जऊन ला ओह मसीह म ठान ले रिहिस।
EPH 1:10 ताकि जब समय ह पूरा होही, त परमेसर ह अपन ये योजना ला पूरा करही—याने कि ओह स्वरग म अऊ धरती म जम्मो चीजमन ला एक संग एके झन मसीह के अधिकार म कर दीही।
EPH 1:11 परमेसर के योजना के मुताबिक, येह पहिली ले फैसला करे गे हवय कि ओमा हमन घलो चुने गे हवन। ओह हर एक चीज ला अपन ईछा के उदेस्य के संग पूरा करथे,
EPH 1:12 ताकि हमन जऊन मन कि पहिली मसीह ऊपर आसा रखे रहेंन, ओकर महिमा के इस्तुति के कारन बनन।
EPH 1:13 अऊ तुमन घलो मसीह म मिलाय गे रहेव, जब तुमन सत के बचन ला सुनेव, जऊन ह उद्धार के सुघर संदेस अय। ओमा, जब तुमन बिसवास करेव, त परतिगियां करे गय पबितर आतमा के मुहर तुमन म लगिस।
EPH 1:14 अऊ ये पबितर आतमा ह हमर उत्तराधिकारी बने के गारंटी ए, जब तक कि परमेसर ह ओमन ला जऊन मन ओकर संपत्ति अंय, पाप ले मुक्ति नइं दे देवय, जेकर ले ओकर महिमा के इस्तुति होवय।
EPH 1:15 एकरसेति, जब ले मेंह परभू यीसू म तुम्हर बिसवास के बारे अऊ जम्मो संतमन बर तुम्हर मया के बारे म सुने हवंव,
EPH 1:16 तब ले मेंह तुमन ला अपन पराथना म सुरता करत, तुम्हर बर धनबाद देवई बंद नइं करे हवंव।
EPH 1:17 मेंह हमेसा बिनती करथंव कि हमर परभू यीसू मसीह के परमेसर, महिमामय ददा ह तुमन ला बुद्धि अऊ आतमिक परकासन के आतमा देवय, ताकि तुमन ओला अऊ बने करके जानव।
EPH 1:18 मेंह ये घलो पराथना करथंव कि तुम्हर हिरदय के आंखीमन अंजोर होवंय, ताकि तुमन ओ आसा ला जानव, जेकर बर ओह तुमन ला बलाय हवय अऊ ये घलो जानव कि संतमन म ओकर उत्तराधिकार के महिमा के धन का अय,
EPH 1:19 अऊ हमन बर जऊन मन कि बिसवास करथन, ओकर अतुलनीय महान सक्ति का अय। ओ सक्ति ह ओकर सक्तिसाली बल के सहीं अय, जऊन ह काम करत हवय,
EPH 1:20 जेकर उपयोग ओह तब करिस, जब ओह मसीह ला मरे म ले जियाईस अऊ ओला स्वरगीय ठऊर म अपन जेवनी हांथ कोति बईठाईस।
EPH 1:21 मसीह ह जम्मो नियम, अधिकार, सक्ति अऊ परभूता के बहुंत ऊपर हवय अऊ ओह ओ हर एक नांव के ऊपर हवय, जऊन ला कि ये समय या अवइया समय म दिये जा सकथे।
EPH 1:22 अऊ परमेसर ह जम्मो चीजमन ला ओकर गोड़ खाल्हे कर दीस अऊ ओला जम्मो चीजमन के ऊपर कलीसिया बर मुखिया ठहिराईस,
EPH 1:23 अऊ ये कलीसिया ह ओकर देहें अय अऊ येह ओकर परिपूर्नता अय, जऊन ह हर एक चीज ला हर किसम ले पूरा करथे।
EPH 2:1 पहिली तुमन अपन अपराध अऊ पाप के कारन मर गे रहेव।
EPH 2:2 ये अपराध अऊ पाप म रहत, तुमन ये संसार के रीति अऊ सैतान के पाछू चलत रहेव, जऊन ह अकास के सासन करइया ए अऊ येह ओ आतमा अय, जऊन ह अब ओमन म काम करथे, जऊन मन परमेसर के हुकूम नइं मानंय।
EPH 2:3 हमन जम्मो झन एक समय येमन के बीच, हमर देहें के लालसा म दिन बितावत रहेंन अऊ देहें अऊ मन के ईछा ला पूरा करत रहेंन, अऊ ये किसम ले बाकि मानव-जाति सहीं, सुभाव ले कोरोध के संतान रहेंन।
EPH 2:4 पर परमेसर जऊन ह कि दया के धनी अय, हमर बर अपन बड़े मया के कारन,
EPH 2:5 ओह हमन ला मसीह के संग जियाईस, जब हमन अपराध म मर गे रहेंन—अनुग्रह के दुवारा तुम्हर उद्धार होईस।
EPH 2:6 अऊ परमेसर ह हमन ला मसीह के संग जियाईस अऊ मसीह यीसू म स्वरगीय राज म हमन ला ओकर संग बईठाईस,
EPH 2:7 ताकि अवइया समय म, ओह अपन अनुग्रह के असीम धन ला देखावय, जऊन ला ओह अपन दया ले मसीह यीसू म हमर ऊपर परगट करिस।
EPH 2:8 काबरकि अनुग्रह ले, बिसवास के दुवारा, तुम्हर उद्धार होईस। अऊ येह तुम्हर अपन कोति ले नइं, फेर येह परमेसर के दान ए।
EPH 2:9 अऊ येह मनखे के करम करे के कारन नो हय, ताकि कोनो घमंड झन करंय।
EPH 2:10 काबरकि परमेसर ह हमन ला बनाईस अऊ मसीह यीसू म ओ बने करम करे बर गढ़िस, जऊन ला परमेसर ह पहिली ले हमर बर तियार करे हवय कि हमन ओ काममन ला करन।
EPH 2:11 एकरसेति, सुरता रखव कि तुमन जनम ले आनजात अव। अऊ जऊन मन अपनआप ला खतना वाले कहिथें (ओमन के खतना, देहें म मनखेमन के हांथ ले करे गीस), ओमन तुमन ला बिगर खतना वाले कहिथें—
EPH 2:12 सुरता रखव, ओ समय तुमन बिगर मसीह के अऊ परमेसर के मनखे इसरायलीमन ले अलग रहेव अऊ परतिगियां के करार ले अनजान रहेव, अऊ बिगर आसा के अऊ संसार म बिगर परमेसर के रहेव।
EPH 2:13 मसीह यीसू म, तुमन एक समय बहुंत दूरिहा रहेव, पर अब मसीह के लहू के दुवारा तुमन लकठा म लाय गे हवव।
EPH 2:14 काबरकि मसीह ह खुद हमर सांति ए अऊ ओह यहूदी अऊ आनजातमन के बीच बईरता के ओ दीवार ला नास कर दे हवय, जऊन ह ओमन ला अलग कर दे रिहिस अऊ ओह दूनों दल ला एक कर दे हवय।
EPH 2:15 मसीह ह अपन देहें म यहूदी कानून ला, हुकूम अऊ नियम सहित खतम कर दीस, ताकि ये दूनों जाति म ले ओह अपन खुद म एक नवां मनखे बनावय अऊ ये किसम ले सांति के इस्‍थापना करय।
EPH 2:16 कुरूस म अपन मिरतू के दुवारा, मसीह ह ओमन के बईरता ला नास करिस अऊ ये किसम ले एक देहें म, ओह दूनों दल के मेल-मिलाप परमेसर करा कुरूस के दुवारा कराईस।
EPH 2:17 मसीह ह आईस अऊ तुमन ला जऊन मन बहुंत दूरिहा रहेव अऊ ओमन ला जऊन मन लकठा म रिहिन, दूनों ला सांति के परचार करिस।
EPH 2:18 काबरकि मसीह के दुवारा, हमन यहूदी अऊ आनजात, दूनों पबितर आतमा के जरिये परमेसर ददा करा आ सकथन।
EPH 2:19 एकरसेति, तुमन अब परदेसी अऊ अजनबी नो हव, पर तुमन परमेसर के मनखेमन संग रहइया अऊ परमेसर के परिवार के सदस्य अव।
EPH 2:20 अऊ तुमन प्रेरित अऊ अगमजानीमन के नीव के ऊपर बनाय गे हवव, जेकर कोना के पथरा खुद मसीह यीसू अय।
EPH 2:21 ओमा जम्मो भवन ह एक संग जुड़े हवय अऊ परभू म एक पबितर मंदिर के रूप म बाढ़त जावत हवय।
EPH 2:22 अऊ ओमा तुमन घलो एक संग एक घर के रूप म बनाय जावत हवव, जऊन म परमेसर ह अपन आतमा म होके रहिथे।
EPH 3:1 एकरे कारन, में पौलुस, तुम आनजातमन के हित म मसीह यीसू के कैदी अंव।
EPH 3:2 तुमन परमेसर के ओ अनुग्रह के काम के बारे म जरूर सुने हवव, जऊन ला परमेसर ह तुम्हर बर मोला करे बर दे हवय।
EPH 3:3 अऊ ओ काम ये अय कि परमेसर ह अपन भेद ला परगट करिस अऊ मोला बताईस, जइसने कि मेंह पहिली थोरकन लिखे हवंव।
EPH 3:4 जब तुमन येला पढ़हू, तब तुमन मसीह के भेद के बारे म मोर गियान ला समझहू,
EPH 3:5 जऊन ला आने पीढ़ी के मनखेमन ला नइं बताय गीस, जइसने येह अब पबितर आतमा के दुवारा परमेसर के पबितर प्रेरित अऊ अगमजानीमन ऊपर परगट करे गे हवय।
EPH 3:6 अऊ भेद ह ये अय—कि आनजातमन, सुघर संदेस के दुवारा इसरायलीमन के संग वारिस, एकेच देहें के अंग अऊ मसीह यीसू म परतिगियां के भागी अंय।
EPH 3:7 मेंह ये सुघर संदेस के सेवक, परमेसर के अनुग्रह के दान के दुवारा बने हवंव, जऊन ला कि ओकर सामर्थ के परभाव के दुवारा मोला दिये गीस।
EPH 3:8 हालाकि मेंह परमेसर के जम्मो पबितर मनखे म सबले छोटे अंव, तभो ले ये अनुग्रह मोला दिये गीस कि मेंह आनजातमन ला मसीह के अगम धन के परचार करंव,
EPH 3:9 अऊ येला अइसने साफ-साफ बतावंव कि हर एक झन ये भेद के बात ला देख सकंय, जऊन ह कि जम्मो चीज के गढ़इया परमेसर म जुग-जुग ले लुकाय रिहिस।
EPH 3:10 ताकि अब कलीसिया के दुवारा परमेसर के नाना किसम के बुद्धि ला ओ सासन करइया अऊ अधिकारीमन ला बताय जावय, जऊन मन स्वरगीय जगह म हवंय।
EPH 3:11 येह ओकर सदाकाल के मनसा के मुताबिक रिहिस, जऊन ला ओह हमर परभू मसीह यीसू म पूरा करिस।
EPH 3:12 अऊ मसीह म हमर संगति अऊ मसीह म हमर बिसवास के दुवारा, हमन निधड़क अऊ भरोसा के संग परमेसर करा आ सकथन।
EPH 3:13 एकरसेति, मेंह तुम्हर ले बिनती करत हंव कि जऊन दुख-तकलीफ तुम्हर बर मेंह सहथंव, ओकर कारन तुमन हिम्मत झन हारव। येह तुम्हर महिमा अय।
EPH 3:14 एकरे कारन मेंह ददा परमेसर के आघू म माड़ी टेकथंव,
EPH 3:15 जेकर ले स्वरग म अऊ धरती ऊपर, बिसवासीमन के हर एक घराना के नांव रखे जाथे।
EPH 3:16 मेंह पराथना करथंव कि अपन महिमा के धन के मुताबिक, ओह तुम्हर अंतस ला अपन आतमा के दुवारा, सामर्थ के संग मजबूत करय,
EPH 3:17 ताकि मसीह ह तुम्हर हिरदय म बिसवास के दुवारा रहय। अऊ मेंह पराथना करथंव कि तुमन मया म जरी पकड़त अऊ बढ़त जावव,
EPH 3:18 ताकि संतमन संग तुम्हर करा घलो समझे के ये सक्ति होवय कि मसीह के मया ह कतेक लम्बा अऊ चाकर अऊ ऊंचहा अऊ गहिरा अय,
EPH 3:19 अऊ तुमन जान सकव कि मसीह के मया ह हमर गियान ले बढ़के होथे, ताकि तुमन परमेसर के जम्मो भरपूरी ले भर जावव।
EPH 3:20 अब ओ, जऊन ह अइसने सामर्थी अय कि हमन जतकी मांगथन या सोचथन, ओकर ले घलो बहुंत जादा कर सकथे, अऊ येह ओकर ओ सामर्थ के मुताबिक होथे, जऊन ह हमन म काम करथे।
EPH 3:21 ओकर महिमा, कलीसिया म अऊ मसीह यीसू म पीढ़ी दर पीढ़ी, जुग-जुग होवत रहय। आमीन।
EPH 4:1 तब परभू खातिर एक कैदी के रूप म, मेंह तुमन ले बिनती करथंव कि ओ बुलावा के लईक जिनगी जीयव, जेकर बर तुमन बलाय गे हवव।
EPH 4:2 पूरा दीन अऊ नम्र बनव अऊ धीर धरके मया म एक-दूसर के सह लेवव।
EPH 4:3 सांति के बंधन म बंधाके पबितर आतमा के एकता ला बनाय रखे के पूरा कोसिस करव।
EPH 4:4 एक देहें अऊ एक पबितर आतमा हवय, जइसने कि एके आसा हवय, जेकर बर परमेसर ह तुमन ला बलाय हवय।
EPH 4:5 एक परभू, एक बिसवास अऊ एक बतिसमा अय।
EPH 4:6 अऊ जम्मो झन के एके परमेसर अऊ ददा अय, जऊन ह जम्मो के ऊपर अऊ जम्मो के बीच म अऊ जम्मो म हवय।
EPH 4:7 मसीह के ईछा के मुताबिक, हमन ले हर एक झन ला अनुग्रह दिये गे हवय।
EPH 4:8 एकरसेति परमेसर के बचन ह कहिथे: “जब ओह ऊंचहा जगह म गीस, ओह अपन संग बहुंत बंधुवामन ला ले गीस अऊ मनखेमन ला बरदान दीस।”
EPH 4:9 (ओह ऊपर चघिस—एकर मतलब होथे कि ओह पहिली, धरती के खाल्हे भागमन म उतरिस।
EPH 4:10 जऊन ह खाल्हे उतरिस, येह ओहीच अय, जऊन ह अकासमन ले घलो बहुंत ऊपर चघिस, ताकि जम्मो संसार ला अपन उपस्थिति ले भर देवय।)
EPH 4:11 येह ओ अय, जऊन ह कुछू झन ला प्रेरित, कुछू झन ला अगमजानी, कुछू झन ला सुघर संदेस के परचारक अऊ कुछू झन ला पास्टर अऊ गुरूजी होय के बरदान दीस,
EPH 4:12 ताकि परमेसर के मनखेमन सेवा के काम खातिर तियार करे जावंय अऊ मसीह के देहें ह बढ़त जावय,
EPH 4:13 जब तक कि हमन जम्मो झन बिसवास म अऊ परमेसर के बेटा के गियान म एक सहीं नइं होवन, अऊ परिपक्व मनखे बनके ओ पूरा सिद्धता ला नइं पा लेवन, जऊन ह मसीह म पाय जाथे।
EPH 4:14 तब हमन लइकामन सहीं नइं रहिबो, जऊन मन मनखेमन के धूर्तता अऊ चतुरई के दुवारा ओमन के धोखा देवइया योजना म पड़ जाथें अऊ ओमन के उपदेस के झोंका ले डावांडोल होके एती-ओती बहकाय जाथें।
EPH 4:15 पर मया म सच ला गोठियाबो अऊ हमन जम्मो बात म, ओमा बाढ़त जाबो जऊन ह मुड़ अय याने कि मसीह।
EPH 4:16 अऊ ओकर ले जम्मो देहें जुड़े रहिथे, अऊ ओमा हर एक जोड़ के दुवारा जम्मो देहें ह एक संग बंधे रहिथे; अऊ जब हर भाग ह अपन काम करथे, त येह अपनआप मया म बढ़त अऊ बनत जाथे।
EPH 4:17 एकरसेति, मेंह तुमन ला कहत हंव अऊ परभू म जोर देवत हंव कि जइसने आनजातमन अपन मन के बेकार सोच म चलथें, वइसने तुमन बिलकुल झन चलव।
EPH 4:18 ओमन के मन ह अंधियार म हवय। ओमन अपन हिरदय ला कठोर कर ले हवंय, जेकर कारन ओमन म अगियानता हवय अऊ अगियानता के कारन ओमन परमेसर के जिनगी ले अलग हो गे हवंय।
EPH 4:19 ओमन ला कोनो सरम नइं ए, ओमन अपनआप ला दुराचार के काम बर दे देय हवंय, ताकि हर किसम के असुध काम म हमेसा देहें के वासना म बने रहंय।
EPH 4:20 पर तुमन मसीह के अइसने सिकछा नइं पाय हवव।
EPH 4:21 तुमन सही रूप म, ओकर सुने हवव अऊ ओ सच्चई के सिकछा पाय हवव, जऊन ह यीसू म हवय।
EPH 4:22 एकरसेति अपन पुराना चालचलन ला छोंड़ देवव, जऊन ह तुम्हर पहिली के जिनगी ले संबंध रखथे अऊ अपन धोखा देवइया लालसा के दुवारा बिगड़त जाथे;
EPH 4:23 अऊ अपन मन के आतमा म नवां बन जावव;
EPH 4:24 अऊ नवां चालचलन ला धर लेवव, जऊन ह सही के धरमीपन अऊ पबितरता म, परमेसर के सरूप म सिरजे गे हवय।
EPH 4:25 एकरसेति, लबारी गोठियाय ला छोंड़ देवव अऊ तुमन ले हर एक झन अपन परोसी ले सच गोठियावय, काबरकि हमन जम्मो झन एके देहें के सदस्य अन।
EPH 4:26 गुस्सा त करव, फेर पाप झन करव; सूरज के बुड़त के पहिली अपन गुस्सा ला थूक देवव।
EPH 4:27 अऊ सैतान ला कोनो मऊका झन देवव।
EPH 4:28 जऊन ह चोरी करथे, ओह अब चोरी झन करय, पर ईमानदारी के काम म अपन हांथ ले मेहनत करय; ताकि जऊन मन ला जरूरत हवय, ओमन ला देय बर ओकर करा कुछू रहय।
EPH 4:29 तुम्हर मुहूं ले कोनो खराप बात झन निकलय, पर सिरिप ओहीच बात निकलय, जऊन ह जरूरत के मुताबिक आने मन के बढ़ती म मददगार होथे, ताकि जऊन मन सुनंय, ओमन ला एकर ले फायदा होवय।
EPH 4:30 अऊ परमेसर के पबितर आतमा ला उदास झन करव, जेकर दुवारा तुम्हर ऊपर ओ दिन बर मुहर लगे हवय, जब पाप ले मुक्ति होही।
EPH 4:31 जम्मो किसम के करू बात, रोस, गुस्सा, कलह, निन्दा अऊ जम्मो किसम के बईरता ला छोंड़ देवव।
EPH 4:32 एक-दूसर के ऊपर दया अऊ किरपा करव, अऊ जइसने परमेसर ह मसीह म तुमन ला छेमा करिस, वइसने तुमन घलो एक-दूसर ला छेमा करव।
EPH 5:1 एकरसेति, मयारू लइकामन सहीं परमेसर के अनुसरन करव,
EPH 5:2 अऊ मया के जिनगी जीयव, जइसने मसीह ह हमन ला मया करिस अऊ अपनआप ला हमर बर महकत भेंट अऊ बलिदान के रूप म परमेसर ला दे दीस।
EPH 5:3 पर तुम्हर बीच म छिनारी या कोनो किसम के असुध बात या लालच के चरचा तक झन होवय, काबरकि ये बातमन परमेसर के पबितर मनखेमन बर उचित नो हंय।
EPH 5:4 अऊ तुम्हर बीच म न खराप बात, न मुरूखता के बात अऊ न खराप हंसी-ठट्ठा होवय, काबरकि ये बातमन तुम्हर बर ठीक नो हंय, पर तुम्हर बीच म धनबाद के बात होवय।
EPH 5:5 तुमन ये निस्चित जानव कि जऊन ह छिनार, असुध या लालची मनखे अय, ओह एक मूरती-पूजा करइया के सहीं अय अऊ अइसने मनखे बर मसीह के अऊ परमेसर के राज म कोनो भाग नइं ए।
EPH 5:6 कोनो तुमन ला बेकार के बात करके धोखा झन देवय, काबरकि अइसने बात के कारन परमेसर के परकोप ओमन ऊपर भड़कथे, जऊन मन ओकर बात नइं मानंय।
EPH 5:7 एकरसेति, ओमन के संग कोनो नाता झन रखव।
EPH 5:8 काबरकि एक समय रिहिस, जब तुमन अंधियार म रहेव, पर अब तुमन परभू के चेला बने के कारन अंजोर म हवव। एकरसेति अंजोर के संतान सहीं जिनगी बितावव,
EPH 5:9 (काबरकि जिहां अंजोर हवय, उहां जम्मो किसम के भलई, धरमीपन अऊ सच्चई होथे)
EPH 5:10 अऊ ये पता लगावव कि परभू ह कोन बात ले खुस होथे।
EPH 5:11 अंधियार के बेकार के काम म भागी झन होवव; फेर ओमन के खरापी ला परगट करव।
EPH 5:12 काबरकि जऊन काम ओमन गुपत म करथें, ओकर बारे म चरचा करई घलो सरम के बात अय।
EPH 5:13 पर हर ओ चीज जऊन ह अंजोर के दुवारा परगट करे जाथे, ओह दिखे लगथे—अऊ हर ओ चीज जेला अंजोर करे जाथे, ओह एक अंजोर बन जाथे।
EPH 5:14 एकरे कारन, ये कहे गे हवय: “हे सोवइया, जाग, मरे मन ले जी उठ, अऊ मसीह ह तोर ऊपर चमकन लगही।”
EPH 5:15 एकरसेति बहुंत सचेत रहव कि तुमन जिनगी म कइसने चलत हव—मुरूख मनखे सहीं नइं, पर बुद्धिमानमन सहीं चलव।
EPH 5:16 तुमन ला मिले हर मऊका के जादा से जादा फायदा उठावव, काबरकि समय ह खराप हवय।
EPH 5:17 एकरसेति, मुरूख झन बनव, पर जानव कि परभू के मनसा का हवय।
EPH 5:18 मंद पीके मतवार झन बनव, काबरकि एकर ले बहुंत खराप काममन होथें। एकर बदले अपनआप ला पबितर आतमा ले भर लेवव।
EPH 5:19 एक-दूसर ले परमेसर के भजन, इस्तुति अऊ आतमिक गीत के संग गोठियावव। परभू बर अपन जम्मो हिरदय ले गावव अऊ बजावव।
EPH 5:20 अऊ हमेसा, हर एक बात बर, हमर परभू यीसू मसीह के नांव म परमेसर ददा ला धनबाद देवव।
EPH 5:21 मसीह के आदर म, एक-दूसर के अधीन रहव।
EPH 5:22 हे घरवालीमन, अपन-अपन घरवाला के अधीन रहव, जइसने कि परभू के अधीन रहिथव।
EPH 5:23 काबरकि घरवाला ह घरवाली के मुड़ अय, जइसने मसीह ह कलीसिया के मुड़ अय। कलीसिया ह ओकर देहें अऊ ओह कलीसिया के उद्धार करइया ए।
EPH 5:24 जइसने कलीसिया ह मसीह के अधीन रहिथे, वइसने घरवालीमन घलो हर एक बात म अपन घरवालामन के अधीन रहंय।
EPH 5:25 हे घरवालामन, अपन-अपन घरवाली ला मया करव, जइसने मसीह ह कलीसिया ला मया करिस अऊ अपनआप ला ओकर बर दे दीस,
EPH 5:26 ताकि बचन के परचार के जरिये ओला पानी म धोके साफ करय अऊ ओला पबितर बनावय;
EPH 5:27 अऊ ओला एक अइसने महिमामय कलीसिया के रूप म अपनआप ला पेस करय, जऊन म न कोनो दाग, न झुर्री, न कोनो आने दोस रहय। पर ओह पबितर अऊ निरदोस होवय।
EPH 5:28 एही किसम ले घरवालामन बर उचित ए कि अपन-अपन घरवालीमन ले अपन खुद के देहें सहीं मया करंय। जऊन ह अपन घरवाली ले मया करथे, ओह अपनआप ले मया करथे।
EPH 5:29 कोनो मनखे अपन खुद के देहें ले घिन नइं करय, पर ओह ओकर पालन-पोसन करथे अऊ देखरेख करथे, जइसने कि मसीह ह कलीसिया के संग करथे;
EPH 5:30 काबरकि हमन ओकर देहें के अंग अन।
EPH 5:31 “एकरे कारन मरद ह अपन दाई-ददा ले अलग होके अपन घरवाली संग मिले रहिही। अऊ ओ दूनों एक तन होहीं।”
EPH 5:32 येह एक बड़े भेद के बात अय—पर मेंह मसीह अऊ कलीसिया के बारे म कहत हवंव।
EPH 5:33 पर जइसने घलो होवय, तुमन ले हर एक झन अपन घरवाली ला अपन सहीं मया करय, अऊ घरवाली ह अपन घरवाला के आदरमान करय।
EPH 6:1 हे लइकामन हो, परभू म अपन दाई-ददा के बात मानव, काबरकि येह उचित अय।
EPH 6:2 “अपन दाई अऊ ददा के आदर करव”, जऊन ह एक परतिगियां के संग पहिली हुकूम ए,
EPH 6:3 “ताकि तुम्हर भलई होवय अऊ तुमन धरती म बहुंत दिन तक जीयत रहव।”
EPH 6:4 हे ददामन हो, अपन लइकामन ला गुस्सा झन दिलावव, पर परभू के अनुसासन अऊ सिकछा के मुताबिक ओमन के पालन-पोसन करव।
EPH 6:5 हे गुलाममन हो, जइसने तुमन मसीह के बात मानथव, वइसने आदर, भय, अऊ निस्कपट हिरदय ले अपन संसारिक मालिकमन के बात ला मानव।
EPH 6:6 जब ओमन तुमन ला देखत रहिथें, त सिरिप ओमन के दिल जीते बर ही ओमन के बात नइं मानव, पर मसीह के गुलाम सहीं अपन हिरदय ले परमेसर के ईछा म चलव।
EPH 6:7 पूरा हिरदय ले सेवा करव, ये समझके कि तुमन मनखेमन के नइं, पर परभू के सेवा करत हव,
EPH 6:8 काबरकि तुमन जानथव कि हर एक झन चाहे ओह गुलाम होवय या सुतंतर मनखे, जऊन भलई के काम ओह करथे, परभू ह ओला ओकर ईनाम दीही।
EPH 6:9 हे मालिकमन हो, ओहीच किसम ले तुमन अपन गुलाममन संग बरताव करव। ओमन ला झन डरावव-धमकावव, काबरकि तुमन जानथव कि ओमन के मालिक अऊ तुम्हर मालिक ओहीच अय, जऊन ह स्वरग म हवय, अऊ ओह काकरो संग पखियपात नइं करय।
EPH 6:10 आखिरी बात ये अय कि परभू म अऊ ओकर बड़े सामर्थ के परभाव म मजबूत बनव।
EPH 6:11 परमेसर के जम्मो हथियार ला बांध लेवव ताकि तुमन सैतान के छल-कपट के मुकाबला कर सकव।
EPH 6:12 काबरकि हमर लड़ई हाड़ा अऊ मांस ले बने मनखे के बिरोध म नो हय, पर हमर लड़ई ह ये अंधियार संसार के सासन करइयामन ले, अधिकारीमन ले अऊ अंधियार संसार के सक्तिमन के बिरोध म अय अऊ हमर लड़ई ह अकास म सैतान के आतमिक सेनामन के बिरोध म अय।
EPH 6:13 एकरसेति, परमेसर के जम्मो हथियार ले लव ताकि जब सैतान ह हमला करय, त तुमन अपन जगह म मजबूत ठाढ़े रह सकव, अऊ मजबूत ठाढ़े रहे बर जम्मो चीज करे के बाद,
EPH 6:14 सच के कमरपट्टा ले अपन कनिहां ला कस लेवव। धरमीपन के झिलम पहिर लेवव,
EPH 6:15 अऊ अपन गोड़मन म सांति के सुघर संदेस के तियारी के पनही पहिर लव।
EPH 6:16 ये जम्मो चीज के अलावा बिसवास के ढाल ले लव, जेकर ले तुमन ओ दुस्ट के जम्मो अगनी बान ला बुझा सकव।
EPH 6:17 उद्धार के टोप अऊ आतमा के तलवार जऊन ह कि परमेसर के बचन ए, ले लव।
EPH 6:18 जम्मो किसम के पराथना अऊ बिनती के संग हर समय आतमा म पराथना करव। मन म येला रखके सचेत रहव अऊ जम्मो संत मनखेमन बर हमेसा पराथना करत रहव।
EPH 6:19 मोर बर घलो पराथना करव कि जब भी मेंह गोठियावंव, परमेसर ह मोला बचन देवय, ताकि निडर होके मेंह सुघर संदेस के भेद ला खोलके बता सकंव,
EPH 6:20 जेकर खातिर मेंह कैद म, एक राजदूत अंव। पराथना करव कि मेंह ये बात ला निधड़क बोलंव, जइसने कि मोला करना चाही।
EPH 6:21 तुखिकुस ह हमर मयारू भाई अऊ परभू म बिसवासयोग्य सेवक ए। ओह तुमन ला हर एक बात बताही ताकि तुमन घलो जान लेवव कि मेंह कइसने हवंव अऊ का करत हवंव।
EPH 6:22 मेंह ओला तुम्हर करा एकर खातिर पठोवत हवंव कि तुमन जान लेवव कि हमन कइसने हवन अऊ ये घलो कि ओह तुमन के हिरदय ला उत्साहित करय।
EPH 6:23 परमेसर ददा अऊ परभू यीसू मसीह कोति ले भाईमन ला सांति अऊ बिसवास के संग मया मिलय।
EPH 6:24 ओ जम्मो झन ला अनुग्रह मिलय, जऊन मन हमर परभू यीसू मसीह ले अइसने मया करथें, जऊन ह कभू खतम नइं होवय।
PHI 1:1 मसीह यीसू म फिलिप्पी सहर के जम्मो संत, कलीसिया के अगुवा अऊ डीकनमन ला,
PHI 1:2 हमर ददा परमेसर अऊ परभू यीसू मसीह ले तुमन ला अनुग्रह अऊ सांति मिलय।
PHI 1:3 जब भी मेंह तुमन ला सुरता करथंव, मेंह अपन परमेसर ला धनबाद देथंव।
PHI 1:4 मेंह हमेसा अपन जम्मो पराथना म तुमन जम्मो झन बर आनंद के संग पराथना करथंव।
PHI 1:5 काबरकि सुरू ले लेके अब तक तुमन सुघर संदेस के परचार म सहभागी रहे हवव।
PHI 1:6 अऊ मोला ये बात के भरोसा हवय कि जऊन ह तुमन म ये बने काम सुरू करे हवय, ओह येला मसीह यीसू के आय के दिन तक पूरा करही।
PHI 1:7 येह मोर बर उचित ए कि मेंह तुमन जम्मो झन के बारे म ये किसम ले सोचंव, काबरकि तुमन मोर हिरदय म बसे हवव; अऊ चाहे मेंह जेल म रहंव या सुघर संदेस के बचाव अऊ सुघर संदेस ला मजबूत करे म रहंव, तुमन जम्मो झन मोर संग परमेसर के अनुग्रह म भागीदार हवव।
PHI 1:8 परमेसर ह मोर गवाह ए कि कइसने मेंह मसीह यीसू के मया के संग, तुमन जम्मो झन ला चाहथंव।
PHI 1:9 मोर ये पराथना अय कि तुम्हर मया ह गियान अऊ समझ के संग अऊ बढ़त जावय,
PHI 1:10 ताकि तुमन समझ सकव कि का ह सबले बने ए अऊ तुमन मसीह के आय के दिन तक सुध अऊ निरदोस बने रहव,
PHI 1:11 अऊ धरमीपन के ओ फर ले भर जावव, जऊन ह यीसू मसीह के जरिये आथे, अऊ ये किसम ले परमेसर के महिमा अऊ परसंसा होवय।
PHI 1:12 हे भाईमन हो, मेंह चाहथंव कि तुमन जानव कि जऊन कुछू मोर ऊपर बीते हवय, ओह सही म सुघर संदेस के बढ़ती म मददगार होईस।
PHI 1:13 एकर नतीजा ये होईस कि महल के जम्मो सिपाही अऊ आने जम्मो झन म ये बात ह साफ हो गे हवय कि मेंह मसीह खातिर जेल म हवंव।
PHI 1:14 मोर जेल म रहे के कारन, बहुंते भाईमन के परभू ऊपर बिसवास ह बढ़ गे हवय अऊ ओमन परमेसर के बचन ला अऊ साहसी अऊ निडर होके सुनावत हवंय।
PHI 1:15 येह सच ए कि कुछू झन जलन अऊ झगरा के कारन मसीह के परचार करथें, पर आने मन भले मनसा ले परचार करथें।
PHI 1:16 ये मनखेमन मया म अइसने करथें, काबरकि येमन जानथें कि सुघर संदेस के बचाव खातिर मेंह जेल म रखे गे हवंव।
PHI 1:17 पहिलेवाले मनखेमन ईमानदारी से नइं, पर सुवारथी भावना ले मसीह के परचार करथें। ओमन सोचथें कि जब मेंह जेल म हवंव, त मोर बर ओमन समस्या खड़े कर सकथें।
PHI 1:18 पर कोनो बात नइं! बने बात ये अय कि हर किसम ले, चाहे गलत मनसा ले या सही मनसा ले, मसीह के परचार होवथे। अऊ एकरे कारन मेंह आनंदित हवंव। हव, मेंह हमेसा आनंदित रहिहूं।
PHI 1:19 काबरकि मेंह जानत हंव कि तुम्हर पराथना के जरिये अऊ यीसू मसीह के आतमा के मदद के दुवारा, मेंह छूट जाहूं।
PHI 1:20 मोर दिली ईछा अऊ आसा हवय कि मेंह बिलकुल झन लजावंव, पर मोर करा पूरा हिम्मत रहय, ताकि मोर देहें म हमेसा मसीह के बड़ई होवत रहय, चाहे मोर जिनगी रहय या मर जावंव।
PHI 1:21 काबरकि मोर बर जीयत रहई मसीह अय अऊ मर जवई फायदा के बात अय।
PHI 1:22 यदि मेंह सरीर म होके जीयत रहिथंव, त एकर मतलब मोर मेहनत ह फर लानही, तभो ले मेंह नइं जानत हंव कि मेंह कते ला चुनंव?
PHI 1:23 मेंह दूनों के मांझा म अधर म लटके हवंव। मोर जी ह तो चाहथे कि मेंह जावंव अऊ मसीह के संग रहंव, जऊन ह बहुंत बने बात अय,
PHI 1:24 पर येह तुम्हर बर जादा जरूरी अय कि मेंह देहें म जीयत रहंव।
PHI 1:25 मोला एकर भरोसा हवय कि मेंह बने रहिहूं, अऊ मेंह तुमन जम्मो झन संग बिसवास म तुम्हर बढ़ती अऊ आनंद खातिर जीयत रहिहूं।
PHI 1:26 ताकि तुम्हर संग मोर फेर रहे के दुवारा, मसीह यीसू म तुम्हर आनंद ह मोर कारन अऊ बढ़ जावय।
PHI 1:27 कुछू भी होवय, तुम्हर चालचलन ह मसीह के सुघर संदेस के लईक रहय। तब चाहे, मेंह आके तुमन ला देखंव, चाहे झन आवंव, पर मेंह तुम्हर बारे म सिरिप ये सुनंव कि तुमन एके आतमा म अटल खड़े हवव अऊ एक मन होके, सुघर संदेस के बिसवास खातिर बहुंत मेहनत करत हवव।
PHI 1:28 तुमन कोनो भी किसम ले, ओमन ले झन डरव, जऊन मन तुम्हर बिरोध करथें। येह ओमन बर एक चिनहां ए कि ओमन नास हो जाहीं अऊ तुमन उद्धार पाहू। अऊ येह परमेसर के दुवारा होही।
PHI 1:29 काबरकि मसीह कोति ले, तुमन ला ये मऊका देय गे हवय कि न सिरिप तुमन ओकर ऊपर बिसवास करव, पर ओकर बर दुख घलो उठावव।
PHI 1:30 तुमन घलो ओहीच लड़ई लड़त हवव, जऊन ला तुमन पहिली मोला लड़त देख चुके हवव, अऊ जइसने कि तुमन सुनत हवव, मेंह अभी घलो लड़त हवंव।
PHI 2:1 एकरसेति, कहूं मसीह म तुम्हर करा कोनो उत्साह हवय, कहूं ओकर मया म तुमन ला कोनो सांति मिले हवय, कहूं पबितर आतमा के संग तुम्हर कोनो संगति हवय, कहूं तुमन म कोनो दया अऊ सहानुभूति हवय,
PHI 2:2 त तुमन ये बातमन ला करे के दुवारा मोर आनंद ला पूरा करव कि तुमन एके मन के रहव, तुमन म एके मया रहय अऊ तुमन आतमा म एक होके एके उदेस्य बर जीयव।
PHI 2:3 सुवारथीपन या बेकार के घमंड म पड़के कुछू झन करव, पर नमरता से आने मन ला अपनआप ले उत्तम समझव।
PHI 2:4 तुमन ले हर एक झन सिरिप अपन हित के ही नइं, पर आने मन के हित के घलो खियाल रखय।
PHI 2:5 जइसने मसीह यीसू के सुभाव रिहिस, वइसने तुम्हर सुभाव घलो होवय।
PHI 2:6 मसीह करा परमेसर के जम्मो सुभाव रिहिस, फेर ओह अपनआप ला परमेसर के बरोबर रखे के काबिल नइं समझिस,
PHI 2:7 पर, ओह जम्मो चीज ला तियाग दीस, अऊ सेवक के जम्मो सुभाव ला लीस अऊ मनखे के रूप धरके जनमिस।
PHI 2:8 अऊ ओह मनखे के रूप म परगट होके अपनआप ला दीन-हीन करिस, अऊ इहां तक हुकूम मानिस कि मिरतू, हां ओह कुरूस के मिरतू ला घलो सह लीस।
PHI 2:9 एकरसेति, परमेसर ह ओला अति महान करिस, अऊ ओला ओ नांव दीस, जऊन ह जम्मो नांव ले उत्तम ए।
PHI 2:10 ताकि स्वरग अऊ धरती अऊ धरती के खाल्हे म, हर एक झन यीसू के नांव म माड़ी टेकंय,
PHI 2:11 अऊ परमेसर ददा के महिमा खातिर, हर एक झन ये मान लेवय कि यीसू मसीह ह परभू ए।
PHI 2:12 एकरसेति, मोर मयारू संगवारीमन हो, जइसने तुमन हमेसा हुकूम मानत आय हवव, जब मेंह तुम्हर संग रहेंव, पर अब, जब मेंह तुम्हर ले दूरिहा हवंव, त तुमन डरत अऊ कांपत, अऊ जादा अपन उद्धार के काम म लगे रहव।
PHI 2:13 काबरकि येह परमेसर ही अय, जऊन ह तुमन म काम करथे कि तुमन ओकर सही उदेस्य के मुताबिक ईछा करव अऊ काम करव।
PHI 2:14 बिगर कुड़कुड़ाय या बिगर बहस करे, जम्मो काम ला करव,
PHI 2:15 ताकि तुमन निरदोस, अऊ सही मनखे बनव अऊ बेईमान अऊ भ्रस्ट मनखेमन के ये संसार म परमेसर के निरदोस संतान बने रहव। ओमन के बीच म, तुमन अकास के तारामन के सहीं चमकव।
PHI 2:16 जिनगी के बचन ला कसके थामे रहव, ताकि मसीह के दिन म, मेंह घमंड कर सकंव कि मोर दऊड़ या मोर मेहनत ह बेकार नइं गीस।
PHI 2:17 पर कहूं बलिदान म, मोर खून ह एक भेंट के रूप म ढारे जाथे अऊ तुम्हर बिसवास ले परमेसर के सेवा होथे, त मेंह खुस हवंव अऊ तुमन जम्मो झन के संग आनंद मनाथंव।
PHI 2:18 वइसने तुमन घलो खुस होवव अऊ मोर संग आनंद मनावव।
PHI 2:19 परभू यीसू म मोला आसा हवय कि मेंह तीमुथियुस ला तुम्हर करा जल्दी पठोहूं, ताकि जब मोला तुम्हर खबर मिलय, त मेंह घलो आनंदित होवंव।
PHI 2:20 मोर करा ओकर सहीं अऊ कोनो नइं ए, जऊन ह सही म तुम्हर मामला म रूचि रखथे।
PHI 2:21 काबरकि हर एक झन अपन खुद के खियाल रखथें, यीसू मसीह के बारे म नइं।
PHI 2:22 पर तुमन जानथव कि तीमुथियुस ह ये साबित कर चुके हवय अऊ जइसने एक बेटा ह अपन ददा संग सेवा करथे, वइसने ओह मोर संग सुघर संदेस के काम म सेवा करे हवय।
PHI 2:23 एकरसेति, जतेक जल्दी मोला ये मालूम होही कि मोर संग का होवइया हवय, मेंह ओला तुम्हर करा पठोय के आसा करथंव।
PHI 2:24 अऊ मोला परभू म भरोसा हवय कि मेंह घलो जल्दी आहूं।
PHI 2:25 पर में सोचथंव कि इपफ्रुदीतुस ला तुम्हर करा वापिस पठोना जरूरी ए, जऊन ह कि मोर भाई, सहकरमी अऊ संगी योद्धा ए अऊ ओह तुम्हर संदेसिया घलो ए, जऊन ला तुमन मोर सेवा-टहल करे बर पठोय रहेव।
PHI 2:26 ओकर मन ह तुमन जम्मो झन म लगे रहिथे अऊ ओह बियाकुल हवय काबरकि तुमन सुने रहेव कि ओह बेमार रिहिस।
PHI 2:27 सही म, ओह बेमार रिहिस, इहां तक कि ओह लगभग मरइया रिहिस। पर परमेसर ह ओकर ऊपर दया करिस, अऊ सिरिप ओकर ऊपर ही नइं, पर मोर ऊपर घलो दया करिस कि मोला दुख के ऊपर दुख झन होवय।
PHI 2:28 एकरसेति, मेंह ओला तुम्हर करा पठोय बर अऊ जादा उत्सुक हवंव, ताकि जब तुमन ओला फेर देखव, त खुस होवव अऊ मोर फिकर घलो कम होवय।
PHI 2:29 परभू म, बड़े आनंद सहित, ओकर सुवागत करव, अऊ ओकर सहीं मनखेमन के आदर करव,
PHI 2:30 काबरकि मसीह के काम खातिर, अपन जिनगी ला जोखिम म डालके, ओह मरे सहीं हो गे रिहिस, ताकि ओह मोर ओ जरूरत ला पूरा करय, जऊन ला तुमन नइं कर सकेव।
PHI 3:1 कुछू घलो होवय, हे मोर भाईमन हो, परभू म आनंदित रहव। तुमन ला ओहीच बात फेर लिखे म, मोला कोनो तकलीफ नइं होवय अऊ येमा तुम्हर भलई हवय।
PHI 3:2 ओ कुकुरमन ले सचेत रहव। येमन ओ मनखे अंय, जऊन मन खराप काम करथें अऊ देहें के अंगमन ला काट-छांट करथें।
PHI 3:3 काबरकि खतना वाले मनखे तो सिरिप हमन अन, जऊन मन परमेसर के अराधना पबितर आतमा के दुवारा करथन अऊ मसीह यीसू म महिमा करथन अऊ देहें के ऊपर भरोसा नइं करन—
PHI 3:4 हालाकि मोर करा अइसने भरोसा करे के कारन हवय। कहूं कोनो ये सोचथे कि ओकर करा देहें के ऊपर भरोसा करे के कारन हवय, त मोर करा जादा कारन हवय:
PHI 3:5 जनम के आठवां दिन म मोर खतना होईस। मेंह इसरायल के बंस अऊ बिनयामीन के गोत्र के अंव। मेंह इबरीमन के इबरी अंव। मूसा के कानून के मुताबिक मेंह एक फरीसी अंव।
PHI 3:6 यदि तुमन जोस के बारे कहिथव, त मेंह कलीसिया के एक सतानेवाला रहेंव। मूसा के कानून के धरमीपन के बारे यदि तुमन कहिथव, त मेंह निरदोस अंव।
PHI 3:7 पर जऊन कुछू घलो मोर फायदा के रिहिस, मेंह अब ओला मसीह के हित म हानि समझथंव।
PHI 3:8 वास्तव म, मसीह यीसू, मोर परभू ला जाने के महानता के तुलना म, मेंह हर एक बात ला एक हानि समझथंव। मसीह यीसू, मोर परभू के हित म, मेंह जम्मो बात के हानि उठाय हवंव अऊ मेंह ओ बातमन ला कचरा समझथंव, ताकि मेंह मसीह ला पा जावंव,
PHI 3:9 अऊ ओकर संग एक हो जावंव अऊ येह मोर खुद के धरमीपन ले नइं, जऊन ह कि मूसा के कानून ला पालन करे ले आथे, पर येह मसीह म बिसवास के जरिये—ओ धरमीपन ले अय, जऊन ह परमेसर करा ले आथे अऊ येह बिसवास के दुवारा अय।
PHI 3:10 मेंह मसीह ला अऊ ओकर फेर जी उठे के सामर्थ ला जाने चाहथंव अऊ मेंह ओकर दुख-पीरा म भागी होय चाहथंव अऊ मेंह ओकर मिरतू म ओकर सहीं बने चाहथंव,
PHI 3:11 ताकि कोनो घलो किसम ले, मेंह घलो मरे मन ले जी उठंव।
PHI 3:12 मेंह ये नइं कहंव, कि ये जम्मो ला पहिले ही पा चुके हवंव या मेंह सिद्ध हो चुके हवंव, पर मेंह ओला पाय बर आघू बढ़त हवंव, जेकर खातिर मसीह यीसू ह मोला अपन बनाय हवय।
PHI 3:13 हे भाईमन हो, मेंह ये नइं सोचत हंव कि मेंह येला पा चुके हवंव। पर मेंह एक काम करथंव: पाछू के बातमन ला भुला के, मेंह आघू के चीज ला पाय बर बढ़त जावत हंव।
PHI 3:14 निसाना के तरफ मेंह दऊड़े चले जावत हंव, ताकि ओ ईनाम ला जीतंव, जेकर खातिर परमेसर ह मोला मसीह यीसू म ऊपर स्वरग म बलाय हवय।
PHI 3:15 हमन म जतेक झन आतमिक रूप ले समझदार हवन, एहीच बिचार रखना चाही। अऊ कहूं कोनो बात म तुम्हर अलग बिचार हवय, त ओ बात ला घलो, परमेसर ह तुम्हर बर परगट कर दीही।
PHI 3:16 जऊन ला हमन पा चुके हवन, आवव, हमन सिरिप ओकरे मुताबिक जिनगी बितावन।
PHI 3:17 हे भाईमन हो, आने मन के संग मिलके मोर नकल करव, अऊ ओमन ऊपर धियान देवव, जऊन मन ओ नमूना के मुताबिक जिनगी बितावत हवंय, जऊन ला हमन तुमन ला देय हवन।
PHI 3:18 काबरकि, जइसने मेंह तुमन ला पहिली अकसर कहे हवंव अऊ अब फेर मेंह रो-रोके कहथंव कि कतको झन मसीह के कुरूस के बईरी सहीं जिनगी जीयथें।
PHI 3:19 ओमन के अन्त ह बिनास अय। ओमन के ईस्वर ह ओमन के पेट अय, अऊ ओमन अपन कलंक के काम ला अपन महिमा समझथें। ओमन के मन ह संसारिक बात म लगे रहिथे।
PHI 3:20 पर हमर देस ह स्वरग अय। अऊ हमन उत्साह के संग उहां ले एक उद्धार करइया याने परभू यीसू मसीह के बाट जोहथन,
PHI 3:21 जऊन ह सामर्थ के दुवारा हमर नासमान देहें ला बदल दीही अऊ ओमन ओकर महिमामय देहें सहीं हो जाहीं। अऊ येह ओहीच सामर्थ ए, जेकर दुवारा, ओह हर एक चीज ला अपन अधीन कर लेथे।
PHI 4:1 एकरसेति, हे मोर भाईमन हो! तुमन ले मेंह मया करथंव अऊ तुमन म मोर जी लगे रहिथे। तुमन मोर आनंद अऊ मोर मुकुट अव। हे मयारू संगवारीमन, अइसनेच तुमन परभू के बिसवास म मजबूत बने रहव।
PHI 4:2 मेंह यूओदिया ले बिनती करथंव अऊ सुन्तुखे ले घलो बिनती करथंव कि तुमन परभू म एक-दूसर के संग एक मन होके रहव।
PHI 4:3 अऊ हे सच्चा सहकरमी, मेंह तोर ले घलो कहथंव कि तेंह ये माईलोगनमन के मदद कर, काबरकि येमन मोर संग सुघर संदेस ला फईलाय म, क्लेमेंस अऊ मोर ओ जम्मो सहकरमीमन संग मेहनत करे हवंय, जेमन के नांव जिनगी के किताब म लिखे हवय।
PHI 4:4 परभू म सदा आनंदित रहव। मेंह येला फेर कहथंव: आनंदित रहव!
PHI 4:5 जम्मो झन जान जावंय कि तुमन नम्र मनखे अव। परभू ह लकठा म हवय।
PHI 4:6 कोनो बात के फिकर झन करव, पर हर एक बात म, पराथना अऊ निबेदन के दुवारा, धनबाद के संग तुमन अपन बिनती ला परमेसर के आघू म रखव।
PHI 4:7 तब परमेसर के सांति, जऊन ह मनखे के समझ के बाहिर अय, तुम्हर हिरदय अऊ मन के रखवारी मसीह यीसू म करही।
PHI 4:8 आखिर म, हे भाईमन हो, जऊन बात ह सच ए, जऊन बात ह आदर के लईक ए, जऊन बात ह सही ए, जऊन बात ह निरमल ए, जऊन बात ह मयारू ए, जऊन बात ह मन ला भाथे—यदि कोनो बात ह उत्तम या परसंसा के लईक ए, त अइसने बात के बारे म सोचव।
PHI 4:9 जऊन बात तुमन मोर ले सीखे हवव या मोर ले पाय हवव या मोर ले सुने हवव या मोर म देखे हवव, ओकरेच मुताबिक चलव। अऊ सांति के परमेसर ह तुमन के संग रहिही।
PHI 4:10 मेंह परभू म बहुंत आनंदित हवंव कि आखिर म, तुमन फेर एक बार मोर फिकर करे हवव। वास्तव म, तुमन मोर फिकर करत तो रहेव, पर येला परगट करे के तुमन ला मऊका नइं मिलत रिहिस।
PHI 4:11 मेंह ये बात एकरसेति नइं कहथंव कि मोला कोनो चीज के घटी हवय, काबरकि कोनो घलो दसा म मेंह संतोस रहना सीख ले हवंव।
PHI 4:12 मेंह जानथंव कि घटी म रहे के मतलब का होथे। मेंह ये घलो जानथंव कि बेसी म रहे के का मतलब होथे। मेंह कोनो भी दसा म संतोस रहे के भेद ला सीख गे हवंव; चाहे मेंह भरपेट खावंव या भूखा रहंव, चाहे मोर करा बहुंत रहय या मेंह घटी म रहंव।
PHI 4:13 जऊन ह मोला ताकत देथे, ओकर जरिये, मेंह हर चीज ला कर सकथंव।
PHI 4:14 तभो ले, तुमन बने करेव कि मोर तकलीफ म मदद करेव।
PHI 4:15 हे फिलिप्पीमन, जइसने कि तुमन जानथव कि सुघर संदेस के परचार के सुरूआती दिन म, जब मेंह मकिदुनिया प्रदेस ले चलेंव, त सिरिप तुम्हर छोंड़ अऊ कोनो घलो कलीसिया देय अऊ लेय के मामला म मोर मदद नइं करिस।
PHI 4:16 अऊ त अऊ जब मेंह थिस्सलुनीके सहर म रहेंव अऊ मोला घटी रिहिस, त तुमन बार-बार मोर करा मदद पठोय रहेव।
PHI 4:17 अइसने बात नो हय कि मेंह दान चाहथंव, पर मेंह चाहथंव कि तुमन अइसने काम करव, जऊन ह तुम्हर जिनगी के खाता म जोड़े जावय।
PHI 4:18 मेंह जम्मो चीज ला पा गे हवंव, बल्कि मोला जरूरत ले जादा मिल गे हवय। तुमन इपफ्रुदीतुस के हांथ म जऊन भेंट ला पठोय रहेव, ओला पाके मोर मन ह संतोस हो गे हवय। ओमन एक खुसबूदार भेंट, गरहन करे लईक बलिदान अंय, जेकर ले परमेसर ला खुसी होथे।
PHI 4:19 अऊ मोर परमेसर ह मसीह यीसू म अपन महिमामय धन के मुताबिक तुम्हर जम्मो जरूरत ला पूरा करही।
PHI 4:20 परमेसर, हमर ददा के महिमा जुग-जुग होवय। आमीन।
PHI 4:21 जम्मो संतमन ला, जऊन मन मसीह यीसू म हवंय, जोहार कहव। जऊन भाईमन मोर संग इहां हवंय, ओमन तुमन ला जोहार कहत हवंय।
PHI 4:22 इहां के जम्मो संत, खास करके जऊन मन महाराजा के घराना के अंय, तुमन ला जोहार कहत हवंय।
PHI 4:23 परभू यीसू मसीह के अनुग्रह तुम्हर आतमा के संग रहय। आमीन।
COL 1:1 में पौलुस, जऊन ह कि परमेसर के ईछा ले मसीह यीसू के एक प्रेरित अंव, हमर भाई तीमुथियुस के संग,
COL 1:2 कुलुस्सी सहर के परमेसर के ओ पबितर भाईमन ला ये चिट्ठी लिखत हंव, जऊन मन मसीह म बिसवासयोग्य अंय:
COL 1:3 जब हमन तुम्हर बर पराथना करथन, त हमन हमेसा परमेसर, हमर परभू यीसू मसीह के ददा ला धनबाद देथन।
COL 1:4 काबरकि हमन सुने हवन कि मसीह यीसू म तुम्हर बिसवास हवय अऊ तुमन परमेसर के जम्मो संतमन ला मया करथव।
COL 1:5 तुम्हर ये बिसवास अऊ मया ओ आसा के कारन हवय, जऊन ह स्वरग म रखे हवय अऊ जेकर बारे म तुमन पहिली ले सच के बचन याने कि सुघर संदेस म सुन चुके हवव,
COL 1:6 जऊन ह तुम्हर करा आय हवय। जम्मो संसार म ये सुघर संदेस ह फर लानथे अऊ बढ़त जावत हवय, जइसने कि येह तुम्हर बीच म ओ दिन ले फरत अऊ बाढ़त जावत हवय, जऊन दिन तुमन येला सुनेव अऊ एकर जम्मो सच्चई के संग परमेसर के अनुग्रह ला समझेव।
COL 1:7 तुमन ला ये सिकछा, हमर मयारू संगी सेवक इपफ्रास ले मिले हवय, जऊन ह हमर तरफ ले मसीह के एक बिसवासयोग्य सेवक अय,
COL 1:8 अऊ ओह हमन ला तुम्हर मया के बारे म बताईस, जऊन ह पबितर आतमा के दुवारा देय गे हवय।
COL 1:9 एकर कारन, जऊन दिन ले हमन तुम्हर बारे म सुने हवन, ओ दिन ले हमन तुम्हर बर हमेसा पराथना करत हवन अऊ परमेसर ले बिनती करथन कि ओह तुमन ला जम्मो आतमिक बुद्धि अऊ समझ के जरिये अपन ईछा के गियान ले भर देवय,
COL 1:10 ताकि तुमन परभू के लईक जिनगी जीयव अऊ ओला हर किसम ले खुस रखव: तुमन हर एक बने काम के दुवारा फर लानव, अऊ परमेसर के गियान म बाढ़त जावव,
COL 1:11 अऊ ओकर महिमामय सामर्थ के मुताबिक जम्मो किसम के सक्ति म मजबूत होवत जावव, ताकि तुमन म जादा सहन सक्ति अऊ धीरज होवय,
COL 1:12 अऊ आनंद सहित परमेसर ददा के धनबाद करव, जऊन ह कि तुमन ला एकर लईक बनाईस कि तुमन अंजोर के राज म ओकर संतमन के संग वारिस होवव।
COL 1:13 काबरकि परमेसर ह हमन ला अंधियार के सक्ति ले छोंड़ाईस अऊ अपन मयारू बेटा के राज म लानिस,
COL 1:14 जेकर दुवारा हमन ला पाप ले मुक्ति याने कि पाप के छेमा मिलथे।
COL 1:15 मसीह ह अदृस्य परमेसर के सरूप अऊ जम्मो सिरिस्टी म पहिलांत अय।
COL 1:16 काबरकि ओकरे दुवारा जम्मो चीज सिरजे गीस: ओ जम्मो चीज जऊन ह स्वरग अऊ धरती म हवय, देखे अऊ अनदेखे चीज; चाहे सिंघासन हो या राज; सासन करइया हो या अधिकारी; जम्मो चीज ह ओकरे दुवारा सिरजे गीस अऊ ओकरे बर सिरजे गीस।
COL 1:17 ओह जम्मो चीज ला सिरजे के पहिली रिहिस अऊ ओमा जम्मो चीज एक संग टिके रहिथें।
COL 1:18 अऊ ओह देहें याने कि कलीसिया के मुड़ अय। ओहीच ह सुरू ए अऊ मरे मनखे म ले पहिली जी उठइया घलो, ताकि हर एक बात म ओह मुखिया ठहिरय।
COL 1:19 काबरकि परमेसर ला ये बात म खुसी होईस कि ओकर जम्मो सुभाव ओमा रहय,
COL 1:20 अऊ कुरूस म बहे ओकर लहू के दुवारा सांति स्थापित करय अऊ ये किसम ले अपन संग ओ जम्मो चीजमन के मेल-मिलाप करय; चाहे ओ चीज धरती म के होवय या फेर स्वरग म के।
COL 1:21 एक समय रिहिस, जब तुमन परमेसर ले बहुंत दूरिहा हो गे रहेव अऊ अपन मन म खराप बरताव के कारन ओकर बईरी रहेव।
COL 1:22 पर अब परमेसर ह, मसीह के सारीरिक मिरतू के दुवारा तुम्हर मेल-मिलाप करे हवय, ताकि ओह तुमन ला अपन आघू म पबितर, निस्कलंक अऊ निरदोस करके लानय—
COL 1:23 यदि तुमन अपन बिसवास म स्थिर अऊ अटल बने रहव अऊ सुघर संदेस के आसा ले नइं डिगव त। येह ओ सुघर संदेस ए, जऊन ला तुमन सुनेव अऊ जेकर परचार अकास के खाल्हे म हर एक जीव ला करे गे हवय, अऊ जेकर में पौलुस ह सेवक बने हवंव।
COL 1:24 तुम्हर हित म, मेंह जऊन दुख उठाय हवंव, अब मेंह ओकर बर आनंद मनावत हंव। अऊ मसीह के दुख म जऊन कमी हवय, ओला मेंह अपन देहें म पूरा करथंव। मेंह येला मसीह के देहें के हित म करथंव अऊ ओकर देहें ह कलीसिया अय।
COL 1:25 परमेसर के दिये हुकूम के दुवारा मेंह ये कलीसिया के सेवक बने हवंव, ताकि परमेसर के बचन ला मेंह तुमन ला पूरा-पूरा बता सकंव—
COL 1:26 येह ओ भेद ए, जऊन ला ओह जुग-जुग अऊ पीढ़ी-पीढ़ी तक लुकाके रखे रिहिस, पर अब येला ओकर संतमन के ऊपर परगट करे गे हवय।
COL 1:27 ओमन ला परमेसर ह चुनिस ताकि ओमन ये भेद के महिमामय धन ला आनजातमन के बीच म बतावंय। अऊ भेद ये अय कि मसीह ह तुमन म रहिथे अऊ ओह महिमा के आसा अय।
COL 1:28 हमन ओकर परचार करथन। हमन जम्मो गियान के संग हर एक झन ला चेताथन अऊ सिखोथन, ताकि हमन हर एक झन ला सिद्ध करके मसीह म ला सकन।
COL 1:29 एकरसेति, मेंह पूरा ताकत सहित मेहनत अऊ संघर्स करथंव, अऊ ये ताकत मोला मसीह ले मिलथे अऊ मोला उत्साहित करथे।
COL 2:1 मेंह चाहथंव कि तुमन जान लेवव कि तुमन बर अऊ जऊन मन लौदीकिया सहर म हवंय, ओमन बर अऊ ओ जम्मो झन जऊन मन मोर चेहरा नइं देखे हवंय ओमन बर, मेंह कतेक कठोर मेहनत करत हवंव।
COL 2:2 मेंह ये मेहनत एकरसेति करत हवंव, ताकि ओमन हिरदय म उत्साहित होवंय अऊ मया म एक होके रहंय, अऊ ओमन ला पूरा समझ के जम्मो धन मिलय; अऊ ओमन परमेसर के भेद ला जानंय, अऊ ओ भेद ह मसीह अय,
COL 2:3 जऊन म बुद्धि अऊ गियान के जम्मो भंडार छुपे हवय।
COL 2:4 मेंह तुमन ला ये बात एकरसेति कहत हंव, ताकि कोनो तुमन ला, भरमाने वाला बात करके धोखा झन देवय।
COL 2:5 हालाकि मेंह देहें के मुताबिक तुमन ले दूरिहा हवंव, पर आतमा म मेंह तुम्हर संग हवंव, अऊ मेंह ये देखके खुस हवंव कि तुमन सही जिनगी जीयत हवव अऊ मसीह म तुम्हर बिसवास ह मजबूत हवय।
COL 2:6 जब तुमन मसीह यीसू ला परभू मान ले हवव, त ओहीच म अपन जिनगी बितावव।
COL 2:7 ओमा जरी धरत अऊ बढ़त जावव, अऊ जइसने तुमन ला सिखोय गे हवय, बिसवास म मजबूत होवत जावव, अऊ धनबादी हिरदय ले भरे रहव।
COL 2:8 सचेत रहव कि कोनो बेकार के गियान अऊ चापलूसी गोठ के दुवारा तुमन ला अपन बस म झन कर लेवय, जऊन ह मनखे के रीति अऊ ये संसार के मूल नियम के ऊपर निरभर रहिथे, पर मसीह के ऊपर निरभर नइं रहय।
COL 2:9 काबरकि मसीह म जम्मो ईस्वरीय सुभाव ह देहें के रूप म वास करथे,
COL 2:10 अऊ ये परिपूर्नता मसीह म तुम्हर करा हवय, जऊन ह हर सक्ति अऊ अधिकार के ऊपर मुखिया ए।
COL 2:11 तुम्हर पापी सुभाव ला अलग करके, मसीह म तुम्हर घलो खतना करे गे हवय। ये खतना अइसने नो हय, जऊन ह मनखेमन के हांथ ले करे जाथे, पर ये खतना मसीह के दुवारा करे गे हवय।
COL 2:12 मसीह संग तुमन बतिसमा म दफनाय गेव अऊ अपन बिसवास के जरिये ओकर संग जी उठेव, अऊ येह परमेसर के सामर्थ के दुवारा होईस, जऊन ह मसीह ला मरे म ले जियाईस।
COL 2:13 जब तुमन अपन पाप म अऊ अपन देहें के बिगर खतना के दसा म मर गे रहेव; तभे परमेसर ह मसीह के संग तुमन ला जियाईस। ओह हमर जम्मो पाप ला छेमा करिस।
COL 2:14 अऊ ओ लिखित बंधक नामा, जऊन ह हमर बिरोध म रिहिस अऊ जेकर बिधि-बिधान घलो रिहिस; ओह ओ जम्मो ला खारिज कर दीस। ओह ओला कुरूस म खीला ठोंकके हटा दीस।
COL 2:15 ओह अपनआप ला सक्ति अऊ अधिकार के बंधन ले मुक्त करिस अऊ कुरूस के दुवारा ओमन के ऊपर जय पाईस अऊ ओह ओमन के खुल्लम-खुल्ला तमासा बनाईस।
COL 2:16 एकरसेति, तुम्हर खाना-पीना या धारमिक तिहार या नवां चंदा के उत्सव या बिसराम दिन के बारे म कोनो ला तुम्हर ऊपर दोस लगाय के कोनो मऊका झन देवव।
COL 2:17 ये जम्मो ह अवइया बातमन के सिरिप एक छइहां अय। पर सही बात ह मसीह म मिलथे।
COL 2:18 सचेत रहव कि जऊन ह झूठ-मूठ के दीनता अऊ स्वरगदूतमन के पूजा म खुस रहिथे, ओह तुमन ला ईनाम ले अलग झन कर देवय। अइसने मनखे ह जऊन चीज ला देखथे, ओहीच म अपन मन ला लगाथे अऊ बिगर कारन के अपन सोच-बिचार म घमंड करके फूलथे।
COL 2:19 ओह मुड़ याने मसीह ले जूरे नइं रहय, जेकर ले जम्मो देहें के पालन-पोसन होथे अऊ देहें के जोड़ अऊ नसमन ले एक संग जुड़े रहिथे अऊ जइसने परमेसर चाहथे, वइसने बाढ़त जाथे।
COL 2:20 यदि तुमन मसीह के संग मर गेव अऊ ये संसार के अंधियार के सक्ति ले छुटकारा पा गे हवव, त फेर तुमन काबर अइसने जिनगी बितावत हव, जइसने कि अभी घलो तुमन संसार के अव? तुमन काबर एकर बिधि-बिधान ला मानथव?
COL 2:21 एकर ले दूरिहा रहव! येला झन चखव! येला झन छुवव।
COL 2:22 ये जम्मो चीजमन काम म आवत नास हो जाहीं, काबरकि येमन मनखे के बनाय नियम अऊ उपदेस अंय।
COL 2:23 वास्तव म, अइसने बिधि-बिधान म बुद्धि के एक दिखावा हवय। ये नियम म ओमन के खुद के गढ़े भक्ति, झूठ-मूठ के दीनता अऊ ओमन के देहें के कठोर अभियास घलो हवय, पर देहें के लालसा ला रोके बर, येमन कोनो काम के नो हंय।
COL 3:1 जब तुमन मसीह के संग जियाय गे हवव, त अपन मन ला ऊपर, स्वरगीय बातमन म लगावव, जिहां मसीह ह परमेसर के जेवनी हांथ कोति बईठे हवय।
COL 3:2 अपन मन ला ऊपर, स्वरगीय बातमन म लगावव, धरती के बात म नइं।
COL 3:3 काबरकि तुमन मर गे हवव, अऊ तुम्हर जिनगी ह अब मसीह के संग परमेसर म लुकाय हवय।
COL 3:4 जब मसीह, जऊन ह तुम्हर जिनगी ए, परगट होही, तब तुमन घलो ओकर संग महिमा म परगट होहू।
COL 3:5 एकरसेति, अपन ओ सुभावमन ला मार डारव, जऊन मन संसारिक अंय—जइसने कि बेभिचार, असुधता, काम-वासना, खराप लालसा अऊ लोभ जऊन ह मूरती-पूजा सहीं अय।
COL 3:6 एकरे कारन परमेसर के परकोप ओमन ऊपर आथे, जऊन मन ओकर हुकूम नइं मानय।
COL 3:7 एक समय रिहिस, जब तुमन घलो अइसने जिनगी जीयत रहेव, अऊ ये किसम के बात म चले के तुम्हर आदत रिहिस।
COL 3:8 पर अब ये जरूरी अय कि तुमन अइसने जम्मो बात ला छोंड़ दव, याने कोरोध, रोस, बईरता, निन्दा अऊ अपन मुहूं ले खराप गोठ करई।
COL 3:9 एक-दूसर के संग लबारी झन मारव, काबरकि तुमन अपन जुन्ना सुभाव ला ओकर आदत सहित निकाल दे हवव,
COL 3:10 अऊ नवां सुभाव ला पहिर ले हवव, जऊन ह गियान म नवां बनत जावत हवय अऊ येह अपन सिरजनहार के सरूप म होवथे।
COL 3:11 ये नवां जिनगी म, न तो कोनो यूनानी ए अऊ न यहूदी, न खतनावाला अऊ न खतनारहित, न जंगली, न असभ्य, न गुलाम अऊ न सुतंतर। पर मसीह ह जम्मो कुछू ए, अऊ ओह जम्मो म हवय।
COL 3:12 तुमन पबितर अऊ बहुंते मयारू अव। एकरसेति, परमेसर के चुने मनखेमन सहीं, अपनआप ला करूना, दया, दीनता, नमरता अऊ धीरज ले भर लेवव।
COL 3:13 एक-दूसर के सहन करव अऊ एक-दूसर ला छेमा करव, चाहे एक-दूसर के बिरोध म कोनो घलो किसम के सिकायत होवय। छेमा करव, जइसने परभू ह तुमन ला छेमा करिस।
COL 3:14 अऊ ये जम्मो बात के ऊपर मया ला बनाय रखव, जऊन ह तुमन ला सही एकता म एक संग बांधके रखथे।
COL 3:15 मसीह के सांति तुम्हर हिरदय म बने रहय, जइसने कि तुमन एक देहें के अंग के रूप म बलाय गे हवव। अऊ धनबाद देवइया बने रहव।
COL 3:16 मसीह के बचन ह तुमन म बहुंतायत से बने रहय, जइसने कि तुमन बड़े समझदारी के संग एक-दूसर ला सिखोथव अऊ सलाह देथव, अऊ जइसने कि अपन हिरदय म धनबाद सहित परमेसर बर भजन, इस्तुति अऊ आतमिक गीत गाथव।
COL 3:17 अऊ जऊन कुछू घलो तुमन कहिथव अऊ करथव, ये जम्मो बात परभू यीसू के नांव म करव अऊ परभू यीसू के जरिये परमेसर ददा ला धनबाद देवव।
COL 3:18 हे घरवालीमन हो, अपन-अपन घरवाला के अधीन रहव, जइसने कि येह परभू म उचित अय।
COL 3:19 हे घरवालामन हो, अपन-अपन घरवाली ला मया करव अऊ ओमन के संग कठोर बरताव झन करव।
COL 3:20 हे लइकामन हो, हर एक बात म अपन-अपन दाई-ददा के बात मानव, काबरकि परभू ह एकर ले खुस होथे।
COL 3:21 हे ददामन हो, अपन लइकामन ला तंग झन करव, नइं तो ओमन हतास हो जाहीं।
COL 3:22 हे गुलाममन हो, हर एक बात म अपन-अपन मालिक के हुकूम मानव। सिरिप जब ओमन तुमन ला देखत रहिथें या सिरिप मनखेमन के दिल जीते बर ही ये काम झन करव, पर निस्कपट हिरदय ले परभू के आदर खातिर ये काम करव।
COL 3:23 जऊन कुछू घलो तुमन करथव, अपन पूरा मन लगाके करव। ये समझके कि तुमन परभू खातिर करथव, मनखेमन खातिर नइं।
COL 3:24 तुमन जानथव कि ईनाम के रूप म, तुमन ला परभू ले एक बिरासत मिलही। काबरकि ओह परभू मसीह ए, जेकर सेवा तुमन करत हव।
COL 3:25 जऊन ह खराप काम करथे, ओह अपन खराप काम के परतिफल पाही, काबरकि परमेसर ह काकरो संग पखियपात नइं करय।
COL 4:1 हे मालिकमन हो, अपन गुलाममन के संग सही अऊ बने बरताव करव, काबरकि तुमन जानत हव कि स्वरग म तुम्हर घलो एक मालिक हवय।
COL 4:2 सचेत होके, धनबाद सहित पराथना म लगे रहव।
COL 4:3 अऊ संगे-संग हमर बर घलो पराथना करव कि परमेसर ह सुघर संदेस सुनाय खातिर हमर बर दुवार खोलय, ताकि हमन मसीह के ओ भेद के परचार कर सकन, जेकर खातिर मेंह जेल म बंदी हवंव।
COL 4:4 पराथना करव कि मेंह येला साफ-साफ बता सकंव, जइसने कि मोला करना चाही।
COL 4:5 अबिसवासीमन के संग बुद्धिमानी ले बरताव करव। दिये गय हर एक मऊका के सही उपयोग करव।
COL 4:6 तुम्हर गोठ ह हमेसा अनुग्रह ले भरे रहय अऊ मनभावन होवय, ताकि तुमन ये जानव कि हर एक झन ला सही जबाब कइसने दिये जावय।
COL 4:7 तुखिकुस ह तुमन ला, मोर बारे म जम्मो बात बताही। ओह एक मयारू भाई ए अऊ परभू म एक बिसवासयोग्य अऊ संगी सेवक ए।
COL 4:8 एकरे कारन, मेंह ओला तुम्हर करा पठोवत हवंव, ताकि तुमन जानव कि हमन कइसने हवन अऊ ये घलो कि ओह तुमन के हिरदय ला ढाढ़स बंधावय।
COL 4:9 ओह हमर बिसवासयोग्य अऊ मयारू भाई उनेसिमुस के संग आवत हवय, जऊन ह तुमन ले ही एक झन अय। इहां के जम्मो हालचाल, ओमन तुमन ला बताहीं।
COL 4:10 अरिसतर्खुस, जऊन ह मोर संग जेल म हवय, तुमन ला अपन जोहार कहिथे, अऊ वइसने मरकुस घलो, जऊन ह बरनबास के (चचेरा या ममेरा) भाई ए, तुमन ला अपन जोहार कहिथे। (जेकर बारे म तुमन ला ये संदेस भेजे गे रिहिस कि यदि ओह तुम्हर करा आथे, त ओकर सुवागत करव)।
COL 4:11 यीसू घलो, जऊन ला युसतुस कहिथें, तुमन ला जोहार कहत हवय। यहूदीमन ले सिरिप येमन परमेसर के राज खातिर, मोर सहकरमी अंय, अऊ येमन के कारन मोला सांति मिलथे।
COL 4:12 इपफ्रास, जऊन ह तुमन ले एक झन अय, अऊ मसीह यीसू के एक सेवक अय, तुमन ला जोहार कहत हवय। ओह हमेसा बड़े उत्साह के संग तुम्हर बर पराथना करथे, ताकि तुमन परमेसर के जम्मो ईछा म मजबूत अऊ समझदार रहव अऊ ओमा पूरा भरोसा रखव।
COL 4:13 मेंह ओकर गवाह अंव कि ओह तुम्हर बर अऊ जऊन मन लौदीकिया अऊ हियरापुलिस म हवंय, ओ जम्मो बर कठोर मेहनत करत हवय।
COL 4:14 लूका, हमर मयारू संगी अऊ डाक्टर घलो अय, ओह अऊ देमास तुमन ला जोहार कहत हवंय।
COL 4:15 लौदीकिया के भाईमन ला अऊ बहिनी नुमफास अऊ ओ कलीसिया, जऊन ह ओकर घर म जूरथे, ओ जम्मो झन ला मोर जोहार कहव।
COL 4:16 ये चिट्ठी ला पढ़े के बाद, येला लौदीकिया के कलीसिया म पहुंचा देवव, ताकि ओमन घलो येला पढ़ेंय अऊ बदले म ओ चिट्ठी जऊन ह लौदीकिया ले आथे, ओला तुमन पढ़व।
COL 4:17 अरखिप्पुस ला कहव: “देख जऊन सेवा, परभू म तोला मिले हवय, ओला तें जरूर पूरा कर।”
COL 4:18 में, पौलुस ह अपन हांथ ले ये लिखके जोहार कहथंव। सुरता रखव कि मेंह जेल म हवंव। तुम्हर ऊपर अनुग्रह होवत रहय।
1TH 1:1 थिस्सलुनीके सहर के कलीसिया ला, जऊन ह परमेसर ददा अऊ परभू यीसू मसीह म बिसवास करथे,
1TH 1:2 जब भी हमन तुमन बर पराथना करथन, हमन हमेसा तुमन जम्मो बर परमेसर ला धनबाद देथन।
1TH 1:3 हमन अपन परमेसर ददा के आघू म तुम्हर बिसवास के काम, मया के मेहनत अऊ हमर परभू यीसू मसीह म तुम्हर आसा के धीरज ला हमेसा सुरता करत रहिथन।
1TH 1:4 हे भाईमन हो, तुमन परमेसर के मयारू अव; हमन जानथन कि परमेसर ह तुमन ला चुने हवय,
1TH 1:5 काबरकि हमर सुघर संदेस ह तुम्हर करा न सिरिप बचन के संग, पर सामर्थ अऊ पबितर आतमा के अगुवई म, पूरा बिसवास के संग आईस। तुमन जानथव कि तुम्हर हित म, हमन कइसने रहत रहेंन, जब हमन तुम्हर संग रहेंन।
1TH 1:6 तुम्हर चालचलन हमर अऊ हमर परभू के चालचलन सहीं हो गीस; बहुंत दुख-तकलीफ सहे के बावजूद तुमन संदेस ला आनंद के संग गरहन करेव, जऊन ह पबितर आतमा के दुवारा दिये गे रिहिस।
1TH 1:7 ये किसम ले, तुमन मकिदुनिया अऊ अखया प्रदेस के जम्मो बिसवासीमन बर एक नमूना बन गे हवव।
1TH 1:8 परभू के संदेस ह तुम्हर दुवारा सिरिप मकिदुनिया अऊ अखया प्रदेस म ही नइं गीस, पर परमेसर म तुम्हर बिसवास के संदेस ह बहुंते जगह म चल दे हवय। एकरसेति हमन ला परमेसर म तुम्हर बिसवास के बारे म, कुछू कहे के जरूरत नइं ए।
1TH 1:9 काबरकि ये जम्मो जगह के मनखेमन खुदे बताथें कि कइसने सुघर ढंग ले तुमन हमन ला गरहन करेव। ओमन बताथें कि कइसने तुमन मूरतीमन ला छोंड़के परमेसर कोति लहुंटे हवव कि जीयत अऊ सच्चा परमेसर के सेवा करव,
1TH 1:10 अऊ ओकर बेटा के स्वरग ले आय के बाट जोहव, जऊन ला ओह मरे म ले जियाईस—याने कि यीसू जऊन ह हमन ला परमेसर के अवइया परकोप ले बचाथे।
1TH 2:1 हे भाईमन हो, तुमन जानत हव कि हमन के तुम्हर करा अवई ह बेकार नइं होईस।
1TH 2:2 तुमन खुदे जानत हव कि हमन फिलिप्पी म पहिली दुख भोगे रहेंन अऊ हमर बेजत्ती करे गे रिहिस, फेर भारी बिरोध के बावजूद, परमेसर के मदद ले हमन तुमन ला ओकर सुघर संदेस सुनाय के हिम्मत करेंन।
1TH 2:3 काबरकि जऊन अपील हमन तुम्हर ले करथन, ओह न तो गलती से या असुध उदेस्य से अय, अऊ न ही हमन तुमन ला छले के कोसिस करथन।
1TH 2:4 एकर बदले, हमन जइसने परमेसर चाहथे, वइसने गोठियाथन, काबरकि ओह हमन ला ठहिराय हवय अऊ हमन ला सुघर संदेस सऊंपे हवय, कि हमन येला आने मन ला बतावन। हमन मनखेमन ला नइं, पर परमेसर ला खुस करे के कोसिस करथन, जऊन ह हमर हिरदय ला जांचथे।
1TH 2:5 तुमन तो जानथव कि हमन कभू चापलूसी नइं करेंन, अऊ न ही हमन लालच खातिर बहाना करेंन—परमेसर ह एकर बारे म हमर गवाह हवय।
1TH 2:6 हमन मनखेमन ले परसंसा नइं चाहेंन, न तुम्हर ले या अऊ कोनो दूसर ले। मसीह के प्रेरित के रूप म, हमन तुम्हर ले अपन हक के मांग कर सकत रहेंन।
1TH 2:7 पर जब हमन तुम्हर संग रहेंन, त नम्र बनके रहेंन। जइसने एक दाई ह अपन छोटे लइकामन के देखरेख करथे,
1TH 2:8 वइसने हमन तुम्हर देखरेख करेंन। हमन तुमन ला अतेक जादा मया करेंन कि हमन खुसी ले तुमन ला सिरिप परमेसर के सुघर संदेस ही नइं सुनायेंन, पर हमन अपन जिनगी घलो तुम्हर संग बांटेंन।
1TH 2:9 हे भाईमन हो, तुमन हमर मेहनत अऊ तकलीफ ला जरूर सुरता करथव; जब हमन परमेसर के सुघर संदेस के परचार तुमन ला करत रहेंन, त हमन रात अऊ दिन काम घलो करेंन, ताकि हमन काकरो ऊपर बोझा झन होवन।
1TH 2:10 तुमन हमर गवाह अव अऊ परमेसर घलो गवाह हवय कि हमर चालचलन ह तुम बिसवासीमन के संग कतेक पबितर, धरमी अऊ निरदोस रिहिस।
1TH 2:11 तुमन जानत हव कि हमन तुमन ले हर एक के संग अइसने बरताव करेंन, जइसने एक ददा ह अपन खुद के लइकामन संग करथे।
1TH 2:12 हमन तुमन ला उत्साहित करेंन, ढाढ़स बंधायेंन अऊ तुमन ले बिनती करेंन, ताकि तुमन ओ परमेसर ला भाय के लईक जिनगी जीयव, जऊन ह तुमन ला अपन राज म ओकर महिमा के भागी होय बर बलाथे।
1TH 2:13 अऊ हमन घलो परमेसर ला हमेसा धनबाद देथन कि जब तुमन परमेसर के बचन ला पायेव, जऊन ला कि तुमन हमर ले सुनेव, त तुमन येला मनखे के बचन सहीं नइं, पर परमेसर के बचन (येह सही म अइसनेच अय) जानके गरहन करेव, अऊ ये बचन ह तुमन म जऊन मन बिसवास करथव, काम करत हवय।
1TH 2:14 काबरकि हे भाईमन हो, तुमन के चालचलन परमेसर के ओ कलीसियामन सहीं हो गीस, जऊन मन यहूदिया प्रदेस म मसीह यीसू म हवंय। तुमन अपन खुद के मनखेमन ले वइसनेच दुख पायेव, जइसने ओ कलीसियामन यहूदीमन ले पाय रिहिन।
1TH 2:15 ये यहूदीमन परभू यीसू अऊ अगमजानीमन ला मार डारिन अऊ हमन ला घलो सताईन। ओमन परमेसर ला नराज करथें, अऊ जम्मो मनखेमन के बिरोध करथें।
1TH 2:16 इहां तक कि ओमन हमन ला रोके के कोसिस करिन कि हमन आनजातमन ला सुघर संदेस के परचार झन कर सकन, जेकर दुवारा कि ओमन ला उद्धार मिलही। ये किसम ले ओमन हमेसा अपन पाप के घघरी ला भरत रहिथें। फेर आखिर म, परमेसर के परकोप ह ओमन ऊपर आ गे हवय।
1TH 2:17 पर हे भाईमन हो, जब हमन तुम्हर ले कुछू समय बर अलग हो गे रहेंन, हिरदय ले नइं, पर सरीर म, त हमर ईछा के कारन, हमन तुम्हर ले मिले के बहुंते कोसिस करेंन।
1TH 2:18 हमन तुम्हर करा आय बर चाहत रहेंन—में पौलुस ह बार-बार कोसिस करेंव, पर सैतान ह हमन ला हर एक बार रोकिस।
1TH 2:19 हमर आसा, हमर आनंद या हमर घमंड के मुकुट का ए कि जब हमर परभू यीसू आवय, त ओकर आघू म घमंड करन? का येह तुमन नो हव?
1TH 2:20 सही म, हमर महिमा अऊ आनंद तो तुमन अव।
1TH 3:1 एकरसेति, जब हमर ले अऊ नइं सहे गीस, त हमन अथेने म अकेला रहे के फैसला करेंन,
1TH 3:2 अऊ हमन तीमुथियुस ला तुम्हर करा पठोएंन, जऊन ह परमेसर के सेवा, मसीह के सुघर संदेस फईलाय म, हमर भाई अऊ सहकरमी ए, ताकि ओह तुमन ला तुम्हर बिसवास म मजबूत अऊ उत्साहित करय।
1TH 3:3 अऊ तुमन ले कोनो ये दुख-तकलीफ के कारन अपन बिसवास ले झन फिरय। तुमन खुदे जानत हव कि ये दुख-तकलीफ ह हमर बर परमेसर के ईछा के एक भाग ए।
1TH 3:4 काबरकि जब हमन तुम्हर संग रहत रहेंन, त हमन तुमन ला कहे रहेंन कि हमर ऊपर सतावा आही। अऊ वइसनेच होईस, जइसने हमन तुमन ला कहे रहेंन।
1TH 3:5 एकर कारन जब मोर ले अऊ नइं सहे गीस, त मेंह तुम्हर बिसवास के बारे म जाने बर तीमुथियुस ला पठोएंव। मेंह डरत रहेंव कि कोनो किसम ले लालच देवइया ह तुमन ला लालच देय होही अऊ हमर मेहनत ह बेकार हो गे होही।
1TH 3:6 पर तीमुथियुस ह अभीचे तुम्हर इहां ले हमर करा आय हवय अऊ तुम्हर बिसवास अऊ मया के बारे म हमन ला बढ़िया खबर दे हवय। ओह हमन ला बताईस कि तुमन हमेसा हमन ला खुसी ले सुरता करथव अऊ हमन ला देखे के ईछा करथव, जइसने कि हमन घलो तुमन ला देखे के ईछा करथन।
1TH 3:7 एकरसेति हे भाईमन, हमन ला हमर जम्मो बिपत अऊ दुख-तकलीफ म, तुम्हर बिसवास के कारन खुसी मिले हवय,
1TH 3:8 काबरकि ये जानके हमन म, अब नवां जिनगी के संचार होय हवय कि तुमन परभू के बिसवास म मजबूत हवव।
1TH 3:9 तुम्हर कारन ले, हमन ला हमर परमेसर के आघू म जऊन आनंद मिले हवय, ओ जम्मो के सेति, हमन परमेसर के कइसने धनबाद करन।
1TH 3:10 रात अऊ दिन हमन ईमानदारी ले पराथना करथन कि हमन फेर तुम्हर मुहूं देख सकन अऊ तुम्हर बिसवास म जऊन कमी हवय, ओकर पूरती कर सकन।
1TH 3:11 हमन पराथना करथन कि हमर ददा परमेसर ह खुदे, अऊ हमर परभू यीसू ह तुम्हर करा आय बर हमर खातिर डहार खोलय।
1TH 3:12 जइसने हमर मया तुम्हर बर हवय, परभू करय कि वइसनेच तुम्हर मया एक-दूसर बर अऊ जम्मो झन बर बढ़य अऊ बढ़के छलकय।
1TH 3:13 ओह तुम्हर हिरदय ला मजबूत करय ताकि जब हमर परभू यीसू अपन जम्मो पबितर मनखेमन संग आवय, त तुमन हमर ददा परमेसर के आघू म निरदोस अऊ पबितर बने रहव।
1TH 4:1 आखिर म, हे भाईमन, जइसने तुमन हमर ले सीखे हवव कि परमेसर ला खुस करे बर कइसने जिनगी जीना चाही; वास्तव म, तुमन वइसने जिनगी जीयत हवव घलो। पर हमन परभू यीसू म तुमन ले बिनती करत अऊ समझावत हवन कि ओमा अऊ बढ़त जावव।
1TH 4:2 तुमन जानत हव कि परभू यीसू कोति ले हमन तुमन ला का हुकूम दे हवन।
1TH 4:3 येह परमेसर के ईछा ए कि तुमन पबितर बनव—तुमन बेभिचार ले दूर रहव;
1TH 4:4 तुमन ले हर एक मनखे सीखय कि अपन देहें ला कइसने बस म करके, ओला पबितर अऊ आदर के लईक रखे जावय।
1TH 4:5 ये काम मूरती-पूजा करइयामन सहीं काम-वासना ले नइं होवय, जऊन मन परमेसर ला नइं जानंय;
1TH 4:6 अऊ ये बिसय म, कोनो अपन भाई के बिरोध म गलत काम झन करय या ओकर ले कोनो लाभ झन उठावय। परभू ह ओमन ला सजा दीही, जऊन मन अइसने पाप करथें, जइसने कि हमन पहिली ले, तुमन ला बताय हवन अऊ चेतउनी दे हवन।
1TH 4:7 काबरकि परमेसर ह हमन ला असुध होय बर नइं, पर पबितर जिनगी जीये बर बलाय हवय।
1TH 4:8 एकरसेति जऊन कोनो ये हुकूम ला नइं मानय, ओह मनखे के नइं, पर परमेसर के अनादर करथे, जऊन ह तुमन ला अपन पबितर आतमा देथे।
1TH 4:9 अब संगी बिसवासीमन बर, मया के बारे म तुमन ला लिखे के जरूरत नइं ए, काबरकि एक-दूसर ले मया करई तुमन खुद परमेसर ले सीखे हवव।
1TH 4:10 अऊ वास्तव म, मकिदुनिया के जम्मो भाईमन ला तुमन मया करथव। तभो ले, हे भाईमन हो, हमन तुम्हर ले बिनती करथन कि अइसने अऊ करते रहव।
1TH 4:11 सांति ले जिनगी जीयई, अपन खुद के काम ले मतलब रखई, अऊ अपन हांथ ले मेहनत करई—ये बातमन ला अपन उदेस्य बना लेवव, जइसने कि हमन तुमन ला कहे हवन,
1TH 4:12 ताकि अबिसवासी मनखेमन तुम्हर आदर करंय अऊ तुमन काकरो ऊपर बोझा झन बनव।
1TH 4:13 हे भाईमन हो, हमन नइं चाहत हन कि तुमन ओमन के बारे म अनजान रहव, जऊन मन मरे के पहिली बिसवासी रिहिन, ताकि तुमन ला ओमन सहीं दुखी होना झन पड़य, जेमन करा कोनो आसा नइं ए।
1TH 4:14 हमन तो बिसवास करथन कि यीसू ह मर गीस अऊ फेर जी उठिस अऊ अइसनेच हमन ये घलो बिसवास करथन कि परमेसर ह यीसू के संग ओमन ला जिनगी दीही, जऊन मन यीसू म बिसवास करत मर गे हवंय।
1TH 4:15 परभू के बचन के मुताबिक, हमन तुमन ला बतावत हन कि हमन जऊन मन जीयत हवन, परभू के आय के दिन, हमन ओमन ले आघू नइं जावन, जऊन मन मर गे हवंय।
1TH 4:16 काबरकि परभू ह खुद स्वरग ले उतरही। ओकर आय के बेरा म ऊंचहा अवाज म हुकूम दिये जाही, परधान स्वरगदूत के अवाज होही अऊ परमेसर के तुरही बजही अऊ जऊन मन मसीह म बिसवास करके मर गे हवंय, ओमन पहिली जी उठहीं।
1TH 4:17 ओकर बाद, हमन बिसवासीमन जऊन मन जीयत हवन अऊ बांचे हवन, ओमन के संग बादर म उठा लिये जाबो ताकि परभू के संग हवा म भेंट करन। अऊ ये किसम ले हमन हमेसा परभू के संग रहिबो।
1TH 4:18 एकरसेति, एक-दूसर ला, ये बातमन के दुवारा उत्साहित करव।
1TH 5:1 अब हे भाईमन हो, परभू के आय के समय अऊ तारिख के बारे म तुमन ला लिखे के जरूरत नइं ए?
1TH 5:2 काबरकि तुमन खुद जानत हव कि परभू के दिन ह अइसने आही, जइसने चोर ह रथिया आथे।
1TH 5:3 जब मनखेमन कहत होहीं कि सांति हवय अऊ जम्मो बने हवय, तभे जइसने देहें बोहे माईलोगन ला छेवारी होय के पीरा होथे, वइसने अचानक बिनास ह ओमन के ऊपर आ पड़ही अऊ ओमन बिनास ले बच नइं सकहीं।
1TH 5:4 पर हे भाईमन हो, तुमन तो अंधियार म नइं अव कि ये दिन ह तुमन ला एक चोर के सहीं अचम्भो म डारय।
1TH 5:5 तुमन जम्मो झन अंजोर के संतान अऊ दिन के संतान अव। हमन रथिया या अंधियार के संतान नो हन।
1TH 5:6 एकरसेति, आवव, हमन आने मन सहीं सोवत नइं रहन, पर जागत अऊ सचेत रहन।
1TH 5:7 काबरकि जऊन मन सुतथें, ओमन रथिया सुतथें अऊ जऊन मन पीके मतवार बनथें, ओमन रथिया पीके मतवार बनथें।
1TH 5:8 पर जब हमन दिन के अन, त आवव, हमन छाती के कवच के रूप म बिसवास अऊ मया ला पहिरके अऊ टोप के रूप म उद्धार के आसा ला पहिरके सचेत रहन।
1TH 5:9 काबरकि परमेसर ह हमन ला दंड भोगे बर नइं, पर हमर परभू यीसू मसीह के दुवारा उद्धार पाय बर ठहिराय हवय।
1TH 5:10 मसीह ह हमर खातिर मर गीस, ताकि चाहे हमन जीयत रहन या मर जावन, हमन ओकरे संग रहन।
1TH 5:11 एकर खातिर, एक-दूसर ला उत्साहित करव अऊ एक-दूसर के बढ़ती म मदद करव, जइसने कि तुमन अभी करत घलो हवव।
1TH 5:12 अब हे भाईमन हो, हमन तुम्हर ले बिनती करथन कि ओमन के आदर करव, जऊन मन तुम्हर बीच म कठोर मेहनत करथें, जऊन मन परभू म तुम्हर अगुवा अंय अऊ जऊन मन तुमन ला सचेत करत रहिथें।
1TH 5:13 ओमन के काम के कारन, मया के संग ओमन के बहुंत आदर करव। एक-दूसर के संग सांति से रहव।
1TH 5:14 अऊ हे भाईमन, हमन तुम्हर ले बिनती करथन कि आलसी मनखेमन ला चेतउनी देवव; डरपोकमन ला उत्साहित करव; निरबलमन के मदद करव; जम्मो झन के संग सहनसीलता के बरताव करव।
1TH 5:15 ये बात के धियान रखव कि तुमन ले कोनो बुरई के बदले बुरई झन करय, पर हमेसा एक-दूसर के अऊ जम्मो झन के भलई करे के कोसिस करव।
1TH 5:16 हमेसा आनंदित रहव,
1TH 5:17 लगातार पराथना करत रहव,
1TH 5:18 हर परिस्थिति म धनबाद देवव; काबरकि तुम्हर बर मसीह यीसू म परमेसर के एहीच ईछा अय।
1TH 5:19 पबितर आतमा के काम ला रोके के कोसिस झन करव।
1TH 5:20 अगमबानी के बात ला तुछ झन समझव
1TH 5:21 हर बात ला परखव; जऊन ह बने बात ए, ओहीच म बने रहव।
1TH 5:22 हर किसम के बुरई ले अलग रहव।
1TH 5:23 सांति देवइया परमेसर ह खुद तुमन ला हर किसम ले पबितर करय। हमर परभू यीसू मसीह के आवत तक, तुम्हर जम्मो आतमा, जीव अऊ देहें ह निरदोस रहय।
1TH 5:24 परमेसर ह तुमन ला बलाय हवय; ओह बिसवासयोग्य अय अऊ ओह येला करही।
1TH 5:25 हे भाईमन, हमर बर पराथना करव।
1TH 5:26 पबितर चूमा के संग जम्मो भाईमन ला जोहार करव।
1TH 5:27 परभू के नांव म, मेंह तुमन ला ये जिम्मेदारी देवत हंव कि ये चिट्ठी ला जम्मो भाईमन ला पढ़के सुनाय जावय।
1TH 5:28 हमर परभू यीसू मसीह के अनुग्रह तुम्हर ऊपर होवत रहय।
2TH 1:1 थिस्सलुनीके सहर के कलीसिया ला,
2TH 1:2 परमेसर ददा अऊ परभू यीसू मसीह कोति ले तुमन ला अनुग्रह अऊ सांति मिलत रहय।
2TH 1:3 हे भाईमन, तुम्हर बर हमन हमेसा परमेसर के धनबाद करथन अऊ अइसने करई उचित घलो अय, काबरकि तुम्हर बिसवास ह बहुंत बढ़त जावत हवय अऊ तुमन जम्मो झन के मया एक-दूसर बर बढ़त जावत हवय।
2TH 1:4 एकरसेति हमन परमेसर के कलीसियामन म तुम्हर बर घमंड करथन कि जम्मो सतावा अऊ तकलीफ ला सहत तुमन स्थिर रहिथव अऊ बिसवास म बने रहिथव।
2TH 1:5 ये जम्मो ह परमेसर के सही नियाय के सबूत ए अऊ एकर नतीजा के रूप म तुमन परमेसर के राज के लईक समझे जाहू, जेकर बर तुमन दुख भोगत हवव।
2TH 1:6 परमेसर ह नियायी ए: ओह ओमन ला तकलीफ दीही, जऊन मन तुमन ला तकलीफ देथें
2TH 1:7 अऊ ओह तुमन ला, जऊन मन तकलीफ उठावत हवव, अराम दीही, अऊ संग म हमन ला घलो। येह तभे होही, जब परभू यीसू ह अपन सक्तिसाली स्वरगदूतमन संग धधकत आगी म स्वरग ले परगट होही।
2TH 1:8 ओह ओमन ला सजा दीही, जऊन मन परमेसर ला गरहन नइं करंय अऊ हमर परभू यीसू के सुघर संदेस ला नइं मानंय।
2TH 1:9 ओमन सदाकाल के बिनास के सजा पाहीं अऊ ओमन परभू के आघू ले अऊ ओकर सामर्थ के तेज ले दूरिहा करे जाहीं।
2TH 1:10 येह ओ दिन होही, जब ओह अपन पबितर मनखेमन म महिमा पाय बर अऊ जऊन मन बिसवास करे हवंय, ओ जम्मो के बीच म आदर पाय बर आही। येमा तुमन घलो सामिल हवव, काबरकि तुमन हमर गवाही ला बिसवास करे हवव।
2TH 1:11 एकरे कारन, हमन हमेसा तुम्हर बर पराथना करथन कि हमर परमेसर ह तुमन ला अपन बुलाहट के काबिल समझय अऊ ओह तुम्हर हर बने ईछा ला अऊ बिसवास के काम ला, अपन सामर्थ के दुवारा पूरा करय।
2TH 1:12 हमन ये पराथना करथन, ताकि हमर परमेसर अऊ परभू यीसू मसीह के अनुग्रह के मुताबिक, हमर परभू यीसू के नांव ह तुमन म महिमा पावय अऊ तुमन ओमा महिमा पावव।
2TH 2:1 हे भाईमन, हमर परभू यीसू मसीह के फेर आय के बारे म अऊ ओकर करा हमर जूरे के बिसय म हमन तुम्हर ले बिनती करथन
2TH 2:2 कि कोनो आतमा के दुवारा या बचन के दुवारा या कोनो चिट्ठी के दुवारा ये कहे जाथे कि परभू के दिन ह पहिली ही आ गे हवय अऊ ये बात ह हमर इहां ले आय हवय सहीं लगथे, त तुमन आसानी ले दुबिधा म झन पड़व अऊ झन घबरावव।
2TH 2:3 कोनो तुमन ला कोनो घलो किसम ले धोखा झन देवन पावय, काबरकि ओ दिन ह तब तक नइं आवय, जब तक कि परमेसर के बिरोध म पहिली बिदरोह नइं होवय, अऊ अधरम के मनखे ह परगट नइं होवय, जेकर बिनास ह तय हवय।
2TH 2:4 ओह हर ओ चीज के बिरोध करही अऊ ओ चीज ले अपनआप ला बड़े करही, जऊन ला परमेसर कहे जाथे या जेकर अराधना करे जाथे। अऊ त अऊ ओह अपनआप ला परमेसर कहत, परमेसर के मंदिर म बईठही।
2TH 2:5 का तुमन ला सुरता नइं ए कि जब मेंह तुम्हर संग रहेंव, त मेंह तुमन ला ये बातमन ला बताय करत रहेंव?
2TH 2:6 अब तुमन जानत हव कि कोनो सक्ति ह ओला रोकत हवय, ताकि ओह परमेसर के ठहिराय समय म परगट होवय।
2TH 2:7 काबरकि अधरम के भेद भरे सक्ति ह पहिली ले काम करत हवय, पर जऊन ह अब ओला रोके हवय, सिरिप ओह तब तक रोके रहिही, जब तक कि ओला रसता ले हटाय नइं जाही।
2TH 2:8 अऊ तब ओ अधरमी ह परगट होही, जऊन ला परभू यीसू ह अपन मुहूं के फूंक ले मार डारही अऊ अपन परगट होय के तेज ले ओला नास कर दीही।
2TH 2:9 अधरमी ह सैतान के सक्ति के संग आही अऊ जम्मो किसम के चमतकार, लबरा चिनहां अऊ अचरज के काम करही,
2TH 2:10 अऊ नास होवइयामन ला जम्मो किसम के धोखा देवइया खराप काम म डारही। ओमन नास हो जाहीं काबरकि ओमन सत ले मया करे बर नइं चाहिन, जेकर दुवारा ओमन के उद्धार होय रहितिस।
2TH 2:11 एकर कारन, परमेसर ह ओमन ऊपर एक भरमइया सक्ति ला पठोही, ताकि ओमन लबारी ऊपर बिसवास करंय।
2TH 2:12 अऊ ओ जम्मो झन सजा पाहीं, जऊन मन सत ऊपर बिसवास नइं करिन अऊ अधरम म खुस होईन।
2TH 2:13 पर हे भाईमन, तुमन ला परभू मया करथे; तुम्हर खातिर हमन ला हमेसा परमेसर के धनबाद करना चाही, काबरकि सिरिस्टी के सुरू ले, परमेसर ह तुमन ला चुन लीस कि पबितर आतमा के पबितर काम के दुवारा अऊ सत म तुम्हर बिसवास करे के दुवारा तुमन उद्धार पावव।
2TH 2:14 एकर खातिर, ओह तुमन ला हमर सुघर संदेस के दुवारा बलाईस, ताकि तुमन हमर परभू यीसू मसीह के महिमा म भागी होवव।
2TH 2:15 एकरसेति, हे भाईमन, बिसवास म मजबूत बनव अऊ ओ सिकछा के बातमन ला थामे रहव, जऊन ला हमन चाहे मुहूं के बचन ले या चिट्ठी के दुवारा तुमन ला सिखोय हवन।
2TH 2:16 खुद हमर परभू यीसू मसीह अऊ परमेसर हमर ददा, जऊन ह हमर ले मया करिस अऊ अपन अनुग्रह के दुवारा हमन ला सदाकाल के उत्साह अऊ उत्तम आसा दे हवय,
2TH 2:17 तुम्हर हर एक सुघर काम अऊ बचन म तुम्हर मन ला उत्साहित अऊ मजबूत करय।
2TH 3:1 आखिर म, हे भाईमन हो, हमर बर पराथना करव कि परभू के संदेस ह तेजी से बगरय अऊ आदर के संग गरहन करे जावय, जइसने कि तुम्हर बीच म होय हवय।
2TH 3:2 अऊ पराथना करव कि परमेसर ह हमन ला खराप अऊ दुस्ट मनखेमन ले बचावय, काबरकि जम्मो झन हमर संदेस ला बिसवास नइं करंय।
2TH 3:3 पर परभू ह बिसवासयोग्य अय, अऊ ओह तुमन ला बिसवास म मजबूत करही अऊ दुस्ट जन ले बचाही।
2TH 3:4 तुम्हर बारे म, परभू के ऊपर हमन ला भरोसा हवय कि जऊन बात के हमन तुमन ला हुकूम देथन, ओकर तुमन पालन करत हव अऊ हमेसा करत रहिहू।
2TH 3:5 परमेसर के मया अऊ मसीह के धीरज म, परभू ह तुम्हर हिरदय ला लगाय रखय।
2TH 3:6 हे भाईमन हो, हमन तुमन ला परभू यीसू मसीह के नांव म हुकूम देवत हन कि हर ओ भाई ले अलग रहव, जऊन ह आलसी ए अऊ ओ सिकछा के मुताबिक नइं चलय, जऊन ला तुमन हमर ले पाय हवव।
2TH 3:7 काबरकि तुमन खुदे जानत हव कि तुमन ला कइसने हमर चालचलन के नकल करना चाही। जब हमन तुम्हर संग रहेंन, त आलसी बनके नइं रहेंन,
2TH 3:8 अऊ बिगर दाम चुकाय मुफत म हमन काकरो इहां खाना नइं खायेंन। पर हमन लगन अऊ मेहनत ले रात अऊ दिन काम करेंन, ताकि तुमन के काकरो ऊपर हमन बोझा झन होवन।
2TH 3:9 ये बात नो हय कि हमन ला ये किसम के मदद पाय के हक नइं ए, पर हमन तुम्हर आघू म एक नमूना पेस करे बर वइसने करेंन कि तुमन ओकर नकल करव।
2TH 3:10 जब हमन तुम्हर संग रहेंन, त तुमन ला हुकूम देय रहेंन कि कहूं कोनो मनखे काम नइं करय, त ओह खाय घलो झन पावय।
2TH 3:11 हमर सुनई म आवत हवय कि तुम्हर बीच म कुछू झन आलसी हवंय। ओमन कुछू बुता नइं करंय, पर आने मन के काम म बाधा डारथें।
2TH 3:12 परभू यीसू मसीह के नांव म, हमन अइसने मनखेमन ला हुकूम देवत हन अऊ बिनती करत हन कि ओमन चुपेचाप अपन काम करंय अऊ अपन कमई के रोटी खावंय।
2TH 3:13 अऊ हे भाईमन हो, तुमन भलई के काम करे म कभू झन थकव।
2TH 3:14 यदि कोनो, ये चिट्ठी म बताय हमर बात ला नइं मानय, त ओकर ऊपर बिसेस धियान रखव। ओकर संग संगति झन करव ताकि ओह बेजत्ती महसूस करय।
2TH 3:15 तभो ले ओला बईरी सहीं झन समझव, पर एक भाई जानके ओला चेतउनी देवव।
2TH 3:16 अब, सांति के परभू ह खुद तुमन ला हर समय अऊ हर किसम ले सांति देवय। परभू तुमन जम्मो झन के संग रहय।
2TH 3:17 में, पौलुस ह अपन हांथ ले ये लिखके जोहार कहथंव, जऊन ह कि मोर हर चिट्ठी के अलग पहिचान ए। एहीच किसम ले, मेंह लिखथंव।
2TH 3:18 हमर परभू यीसू मसीह के अनुग्रह तुमन जम्मो झन ऊपर बने रहय।
1TI 1:1 में, पौलुस ह हमर उद्धार करइया परमेसर अऊ हमर आसा मसीह यीसू के हुकूम ले मसीह यीसू के प्रेरित अंव,
1TI 1:2 बिसवास म मोर पक्का बेटा तीमुथियुस, तोला मेंह ये चिट्ठी लिखत हवंव:
1TI 1:3 जइसने कि मेंह मकिदुनिया जावत बेरा तोर ले बिनती करे रहेंव कि तें इफिसुस म रहिके ओ कुछू मनखेमन ला हुकूम दे कि ओमन गलत बात झन सिखोवंय,
1TI 1:4 अऊ न ही ओमन कथा-कहानी अऊ अन्तहीन बंसावलीमन म मन लगावंय, जेकर ले बिवाद होथे। अइसने बात ले परमेसर के काम, जऊन ह बिसवास म अधारित हवय, नइं होवय।
1TI 1:5 ये हुकूम के उदेस्य ह मया अय, जऊन ह साफ मन, बने बिबेक अऊ निस्कपट बिसवास ले पईदा होथे।
1TI 1:6 कुछू मनखेमन ये बातमन ले भटकके बेकार के बात म मन लगाय हवंय।
1TI 1:7 ओमन चाहत हवंय कि मनखेमन ओमन ला मूसा के कानून के गुरू के रूप म जानंय, पर ओमन अपनेच बातमन ला नइं समझंय या ओ बात ला नइं जानंय, जेकर बारे म ओमन बहुंत जोर देके गोठियाथें।
1TI 1:8 हमन जानत हन कि मूसा के कानून ह बने ए, यदि मनखे ह ओकर सही उपयोग करय त।
1TI 1:9 हमन ये घलो जानत हन कि कानून ह बने मनखेमन बर नो हय, पर येह कानून टोरइया, निरंकुस, भक्तिहीन, पापी, अपबितर मनखे अऊ अधरमी, दाई-ददा के हतिया करइया, हतियारा,
1TI 1:10 छिनारी करइया, बेभिचारी, गुलाममन ला बेचइया या बिसोइया, लबरा अऊ लबरा गवाही देवइया अऊ सही उपदेस के बिरोध करइयामन बर अय।
1TI 1:11 एहीच ह परमधन्य परमेसर के महिमामय सुघर संदेस के मुताबिक ए, जऊन ला मोला सऊंपे गे हवय।
1TI 1:12 मेंह अपन परभू मसीह यीसू के धनबाद करत हंव, जऊन ह मोला ताकत दे हवय अऊ मोला बिसवास के लईक समझके अपन सेवा बर ठहिराय हवय।
1TI 1:13 मेंह तो पहिली ओकर निन्दा करइया, अतियाचारी अऊ ओकर बेजत्ती करइया रहेंव, तभो ले परमेसर के दया मोर ऊपर होईस काबरकि मेंह ये जम्मो ला नासमझी अऊ अबिसवास म करेंव।
1TI 1:14 हमर परभू के अनुग्रह, ओ बिसवास अऊ मया के संग, जऊन ह मसीह यीसू म हवय, मोर ऊपर बहुंत अकन होईस।
1TI 1:15 ये बात सच ए अऊ पूरा माने अऊ बिसवास करे के लईक अय कि मसीह यीसू ह ये संसार म पापीमन के उद्धार करे बर आईस, जेमा सबले बड़े पापी मेंह अंव।
1TI 1:16 पर मोर ऊपर एकरसेति दया होईस कि मोर म, जऊन ह कि सबले बड़े पापी अंव, मसीह यीसू ह अपन पूरा सहनसीलता देखावय, ताकि जऊन मनखेमन मसीह ऊपर बिसवास करहीं अऊ परमेसर के संग सदाकाल के जिनगी पाहीं, ओमन बर मेंह एक नमूना बनंव।
1TI 1:17 सदाकाल के राजा, अबिनासी, अनदेखे, सिरिप एकेच परमेसर के आदर अऊ महिमा जुग-जुग होवत रहय। आमीन।
1TI 1:18 हे बेटा तीमुथियुस, ओ अगम बात के मुताबिक, जऊन ह पहिली तोर बारे म कहे गे रिहिस, मेंह तोला ये हुकूम देवत हंव कि ओकर मुताबिक सही जिनगी म चलत रह,
1TI 1:19 अऊ बिसवास अऊ सही बिबेक म बने रह। कुछू मनखेमन येला नइं मानिन अऊ एकरसेति ओमन के बिसवास ह खतम हो गीस।
1TI 1:20 ओमन म हुमिनयुस अऊ सिकन्दर अंय, जेमन ला मेंह सैतान ला सऊंप दे हवंव, ताकि ओमन सीखंय अऊ परमेसर के निन्दा झन करंय।
1TI 2:1 एकरसेति, सबले पहिली ये अनुरोध करत हंव कि बिनती, पराथना, निबेदन अऊ धनबाद जम्मो मनखे बर करे जावय—
1TI 2:2 राजा अऊ जम्मो ऊंच पद के मनखे बर ये करे जावय, ताकि हमन सांत अऊ सुख के जिनगी भक्ति अऊ पबितरता के संग जीयन।
1TI 2:3 येह बने बात ए अऊ येह हमर उद्धार करइया परमेसर ला भाथे।
1TI 2:4 ओह चाहथे कि जम्मो मनखेमन के उद्धार होवय अऊ ओमन सत के गियान ला जानंय।
1TI 2:5 काबरकि सिरिप एके परमेसर हवय अऊ परमेसर अऊ मनखेमन के बीच म एकेच बिचवई हवय, याने ओ मनखे मसीह यीसू,
1TI 2:6 जऊन ह जम्मो मनखेमन के पाप के छुटकारा खातिर अपनआप ला दे दीस अऊ ये गवाही ह ठीक समय म दिये गीस।
1TI 2:7 मेंह सच कहत हंव, लबारी नइं मारत हंव। एकरे खातिर, मेंह सुघर संदेस के परचारक, प्रेरित अऊ आनजातमन बर एक सच्चा अऊ बिसवासयोग्य गुरू ठहिराय गे हवंव।
1TI 2:8 एकरसेति मेंह चाहत हंव कि जम्मो जगह मनखेमन बिगर गुस्सा या बिवाद के, पबितरता के संग अपन हांथ ऊपर उठाके पराथना करंय।
1TI 2:9 मेंह ये घलो चाहत हंव कि माईलोगनमन संकोच अऊ बने आचरन के संग ठीक से कपड़ा पहिरंय, न कि बाल गुंथके या सोन या मोती या मंहगा कपड़ा ले अपनआप ला संवारंय,
1TI 2:10 पर भलई के काम करंय, जइसने कि ओ माईलोगनमन ला सोभा देथे, जऊन मन परमेसर के अराधना करे के घोसना करथें।
1TI 2:11 माईलोगन ला चुपेचाप अऊ पूरा अधीनता म रहिके सीखना चाही।
1TI 2:12 मेंह कोनो माईलोगन ला ये अनुमति नइं देवंव कि ओह सिखोय या मरद के ऊपर अधिकार रखय, पर ओह एकदम चुपेचाप रहय।
1TI 2:13 काबरकि आदम ह पहिली बनाय गीस अऊ ओकर बाद हवा बनाय गीस।
1TI 2:14 अऊ आदम ह बहकाय नइं गीस, पर माईलोगन ह बहकाय गीस अऊ पापिन बनिस।
1TI 2:15 पर माईलोगनमन लइका जने के दुवारा उद्धार पाहीं, यदि ओमन बने आचरन के संग बिसवास, मया अऊ पबितरता म बने रहंय।
1TI 3:1 ए बात सही ए: कहूं कोनो मनखे पास्टर बने चाहथे, त ओह बहुंत बढ़िया काम करे के ईछा करथे।
1TI 3:2 पास्टर ला बिलकुल निरदोस होना चाही। ओकर सिरिप एकेच घरवाली होवय। ओह संयमी, सुसील, सभ्य, पहुनई करइया अऊ बने गुरू होवय।
1TI 3:3 ओह पियक्कड़ या मारपीट करइया झन होवय, पर नम्र सुभाव के होवय। ओह न झगरा करइया अऊ न रूपिया-पईसा के लोभी होवय।
1TI 3:4 ओह अपन परिवार के सुघर परबंध करइया होवय, अऊ ओह ये देखय कि ओकर लइकामन पूरा आदरमान के संग ओकर बात मानंय।
1TI 3:5 (कहूं कोनो अपन खुद के परिवार के परबंध नइं कर सकय, त फेर ओह परमेसर के कलीसिया के खियाल कइसने रख सकथे?)
1TI 3:6 ओह नवां मसीही झन होवय, नइं तो ओला घमंड हो सकथे अऊ सैतान के सहीं दंड पा सकथे।
1TI 3:7 कलीसिया के बाहिर के मनखेमन म घलो ओकर बने नांव होना चाही, ताकि ओकर निन्दा झन होवय अऊ ओह सैतान के फांदा म झन फंसय।
1TI 3:8 एही किसम ले, डीकनमन ला घलो आदर के लईक होना चाही। ओमन ईमानदार होवंय अऊ पियक्कड़ अऊ नीच कमई के लोभी झन होवंय।
1TI 3:9 ओमन बिसवास के गहिरा सच ला सही बिबेक के संग थामे रहंय।
1TI 3:10 ओमन पहिली जरूर परखे जावंय अऊ यदि निरदोस निकलंय, त ओमन डीकन के रूप म सेवा करंय।
1TI 3:11 ओही किसम ले, डीकनमन के घरवालीमन ला घलो आदर के लईक होना चाही। ओमन बक-बक करइया झन होवंय, पर संयमी अऊ जम्मो बात म बिसवास के लईक होवंय।
1TI 3:12 डीकन के सिरिप एक घरवाली होवय अऊ ओह अपन लइकामन के अऊ घर के सुघर परबंध करय।
1TI 3:13 जऊन मन बने सेवा करे हवंय, ओमन बने आदरमान पाथें अऊ मसीह यीसू म अपन बिसवास के दुवारा भरोसा के लईक समझे जाथें।
1TI 3:14 हालाकि मेंह तोर करा जल्दी आय के आसा करत हंव, तभो ले तोला ये बात लिखत हवंव,
1TI 3:15 ताकि कहूं मोर आय म देरी होवय, त तोला जानकारी होना चाही कि मनखेमन परमेसर के घराना म कइसने बरताव करंय अऊ ये परिवार ह जीयत परमेसर के कलीसिया ए, अऊ येह सच्चई के खंभा अऊ नीव ए।
1TI 3:16 ये बात म कोनो संका नइं ए कि परमेसर के भक्ति के भेद ह महान ए: ओह मनखे के रूप म परगट होईस, पबितर आतमा के दुवारा साबित करे गीस, स्वरगदूतमन ला दिखाई दीस, जाति-जाति म ओकर परचार होईस, जम्मो संसार म मनखेमन ओकर ऊपर बिसवास करिन, अऊ ओह महिमा म स्वरग ऊपर उठा लिये गीस।
1TI 4:1 पबितर आतमा ह साफ-साफ कहिथे कि अवइया समय म कुछू मनखेमन बिसवास ला छोंड़ दीहीं अऊ धोखा देवइया आतमा अऊ परेत आतमामन के सिखोय बात ला मानहीं।
1TI 4:2 ये बातमन ढोंगी मनखेमन ले आथे, जऊन मन लबारी मारथें अऊ जेमन के बिबेक ह मर गे हवय, मानो ओह गरम लोहा ले दागे गे हवय।
1TI 4:3 ओमन मनखेमन ला बिहाव करे बर मना करथें अऊ कुछू खाय के चीजमन ला खाय बर मना करथें जऊन ला परमेसर ह एकरसेति बनाईस कि सत ला जाननेवाला बिसवासीमन, ये भोजन-बस्तु बर धनबाद के पराथना करंय अऊ ओला खावंय।
1TI 4:4 परमेसर के बनाय हर चीज ह बने ए, अऊ कोनो घलो चीज अस्वीकार करे के लईक नो हय, यदि ओला परमेसर ला धनबाद देके खाय जाथे।
1TI 4:5 काबरकि ओह परमेसर के बचन अऊ पराथना के दुवारा सुध हो जाथे।
1TI 4:6 कहूं तेंह बिसवासी भाईमन ला ये बातमन के सुरता कराथस, त तेंह मसीह यीसू के बने सेवक बनबे, जइसने कि तेंह परमेसर के बचन के बिसवास म पले-बढ़े अऊ सही सिकछा म चले हवस।
1TI 4:7 अपनआप ला अधरमी अऊ डोकरीमन के कथा-कहानी ले दूरिहा रख अऊ अपनआप ला आतमिक बात म अनुसासित कर।
1TI 4:8 सारीरिक कसरत करे ले कुछू फायदा होथे, पर भक्ति के साधना ले जम्मो बात म फायदा होथे, काबरकि येह ये जिनगी अऊ अवइया जिनगी दूनों के वायदा करथे।
1TI 4:9 ये बात सच ए अऊ हर किसम ले माने अऊ बिसवास करे के लईक ए।
1TI 4:10 एकरसेति हमन मेहनत अऊ संघर्स करथन, काबरकि हमर आसा ओ जीयत परमेसर ऊपर हवय, जऊन ह जम्मो मनखेमन के, अऊ बिसेस करके बिसवासीमन के उद्धार करइया अय।
1TI 4:11 ये बातमन के हुकूम दे अऊ सिखोय कर।
1TI 4:12 अइसने कर कि कोनो मनखे तोर जवानी के कारन, तोला तुछ झन समझय, पर बिसवासीमन खातिर अपन गोठ-बात, अपन जिनगी, अपन मया, बिसवास अऊ सुधता के दुवारा एक नमूना पेस कर।
1TI 4:13 जब तक मेंह नइं आ जावंव, तब तक अपनआप ला मनखेमन के आघू म परमेसर के बचन पढ़े, उपदेस करे अऊ सिखोय म लगाय रख।
1TI 4:14 अपन बरदान के खियाल रख, जऊन ह तोला एक अगमबानी के जरिये दिये गे रिहिस, जब अगुवामन अपन हांथ ला तोर ऊपर रखिन।
1TI 4:15 ये काममन ला करते रह; अऊ येमन खातिर अपनआप ला पूरा लगा दे, ताकि हर एक झन तोर बढ़ती ला देख सकंय।
1TI 4:16 अपन जिनगी अऊ अपन सिकछा ला बिसेस धियान दे। ओमा लगे रह, काबरकि यदि तेंह अइसने करबे, त तेंह, तोर अऊ तोर बात सुनइया, दूनों के उद्धार करबे।
1TI 5:1 कोनो सियान मनखे ला झन डांट, पर ओला अपन ददा सहीं जानके समझा दे। जवानमन ला भाई,
1TI 5:2 डोकरी माईलोगनमन ला दाई अऊ जवान माईलोगनमन ला पूरा सुध मन ले बहिनी जानके ओमन के संग बरताव कर।
1TI 5:3 ओ बिधवामन के आदर कर, जऊन मन ला सही म मदद के जरूरत हवय।
1TI 5:4 कहूं कोनो बिधवा के लइका अऊ नाती-नतनीन हवंय, त ओमन ला अपन परिवार के देखरेख करे के दुवारा पहिली अपन धरम के काम ला पूरा करना चाही। ये किसम ले ओमन अपन दाई-ददा अऊ डोकरी-डोकरा दाई-ददामन के बदला चुकावंय, काबरकि ये काम ह परमेसर ला भाथे।
1TI 5:5 ओह सही बिधवा ए, जेकर कोनो नइं ए अऊ जऊन ह परमेसर ऊपर भरोसा रखथे अऊ रात-दिन पराथना म लगे रहिथे अऊ परमेसर ले मदद मांगथे।
1TI 5:6 पर ओ बिधवा, जऊन ह भोग-बिलास म जिनगी बिताथे, ओह जीते-जीयत मर गीस।
1TI 5:7 ओमन ला हुकूम दे, ताकि ओमन निरदोस जिनगी जीयंय।
1TI 5:8 यदि कोनो अपन रिस्तेदार अऊ बिसेस करके अपन परिवार के देखरेख नइं करय, त एकर ले पता चलथे कि ओह मसीह के ऊपर बिसवास करे बर छोंड़ दे हवय, अऊ एक अबिसवासी ले घलो खराप हो गे हवय।
1TI 5:9 बिधवामन के सूची म, ओ बिधवा के नांव लिखे जावय, जेकर उमर साठ साल ले ऊपर हवय अऊ जऊन ह एके झन मनखे के घरवाली रहे हवय।
1TI 5:10 अऊ भलई के काम करे म ओकर बने नांव होवय—जइसने कि अपन लइकामन के पालन-पोसन करई, पहुनई करई, परमेसर के मनखेमन के गोड़ धोवई, जऊन मन मुसीबत म हवंय, ओमन के मदद करई अऊ अपनआप ला जम्मो किसम के बने काम म लगाय रखई।
1TI 5:11 पर जवान बिधवामन ला अइसने सूची म झन रख, काबरकि जब ओमन के सारीरिक भोग-बिलास के ईछा ह ओमन ला मसीह ले दूरिहा ले जाथे, त ओमन बिहाव करे चाहथें।
1TI 5:12 ये किसम ले ओमन दोसी होथें, काबरकि ओमन मसीह के संग करे अपन पहिली परतिगियां ला टोर देथें।
1TI 5:13 एकर अलावा, ओमन घर-घर जाके आलसी बन जाथें। अऊ सिरिप आलसी ही नइं बनंय, पर बक-बक करथें अऊ आने मन के काम म दखल देथें, ओ बातमन ला कहिके जऊन ला कि नइं कहना चाही।
1TI 5:14 एकरसेति, बने होतिस कि जवान बिधवामन बिहाव करंय अऊ लइका जनमावंय, अपन घर-बार ला संभालंय अऊ बईरी ला बदनाम करे के कोनो मऊका झन देवंय।
1TI 5:15 काबरकि कुछू बिधवामन पहिले ही बहकके सैतान के पाछू चलत हवंय।
1TI 5:16 कहूं कोनो बिसवासी माईलोगन के अइसने रिस्तेदार हवंय, जऊन मन बिधवा अंय, त ओह ओमन के मदद करय ताकि ओमन के बोझा कलीसिया ऊपर झन होवय अऊ कलीसिया ह आने मन के मदद कर सकय, जऊन मन सही म बिधवा अंय।
1TI 5:17 ओ अगुवा जऊन मन कलीसिया के बने काम करथें, ओमन दू गुना आदर के लईक समझे जावंय, बिसेस करके जऊन मन परमेसर के बचन के परचार अऊ सिखोय के काम करथें।
1TI 5:18 काबरकि परमेसर के बचन ह कहिथे, “दंवरी म चलत बईला के मुहूं ला झन बांधव” अऊ “बनिहार ला ओकर बनी मिलना चाही।”
1TI 5:19 कहूं कोनो मनखे ह कोनो अगुवा ऊपर दोस लगाथे, त बिगर दू या तीन गवाह के ओकर झन सुने कर।
1TI 5:20 जऊन मन पाप करथें, ओमन ला जम्मो के आघू म डांट, ताकि आने मन पाप करे बर डरंय।
1TI 5:21 परमेसर, मसीह यीसू अऊ चुने स्वरगदूतमन ला हाजिर जानके, मेंह तोला हुकूम देवत हंव कि ये बातमन ला बिगर काकरो तरफदारी के माने कर अऊ कोनो काम म पखियपात झन कर।
1TI 5:22 कोनो मनखे ला परभू के सेवा खातिर चुने म जल्दबाजी करके ओकर ऊपर हांथ झन रख अऊ आने मन के पाप म भागीदार झन हो। अपनआप ला सुध बनाय रख।
1TI 5:23 सिरिप पानी झन पीये कर, पर अपन पेट खातिर अऊ बार-बार बेमार पड़े के कारन, थोरकन अंगूर के मंद घलो पीये कर।
1TI 5:24 कुछू मनखेमन के पाप ह साफ-साफ दिख जाथे अऊ ओमन के पाप ह ओमन ले पहिले नियाय बर पहुंच जाथे; पर आने मन के पाप ह बाद म दिखथे।
1TI 5:25 वइसनेच बने काममन साफ-साफ दिखथें अऊ कहूं साफ नइं घलो दिखंय, त ओमन सदाकाल तक छुपे नइं रह सकंय।
1TI 6:1 जऊन मन गुलाम अंय, ओमन अपन मालिक ला बड़े आदर के लईक समझंय, ताकि परमेसर के नांव अऊ हमर सिकछा के निन्दा झन होवय।
1TI 6:2 जेमन के मालिकमन बिसवासी अंय, एकर खातिर ओमन अपन मालिक के आदर करे म कमी झन करंय कि ओमन संगी बिसवासी अंय। बल्कि ओमन ला अपन मालिकमन के अऊ बने सेवा करना चाही काबरकि जऊन मन सेवा के लाभ उठाथें, ओ मालिकमन संगी बिसवासी अऊ ओमन के मयारू अंय अऊ अपन गुलाममन के खुसी के खियाल रखथें। ये बात तेंह ओमन ला सिखोय अऊ समझाय कर। ये बातमन ला, तें सिखोय अऊ समझाय कर।
1TI 6:3 कहूं कोनो आने किसम के उपदेस देथे अऊ हमर परभू यीसू मसीह के सही निरदेस अऊ परमेसर के सिकछा ले सहमत नइं ए,
1TI 6:4 त ओह घमंडी हो गे हवय अऊ कुछू नइं जानय। ओह बाद-बिबाद अऊ परमेसर के बचन के बारे झगरा करे म बेकार के रूचि रखथे, जेकर ले जलन, झगरा, निन्दा के बात, खराप भरम,
1TI 6:5 अऊ बिगड़े बुद्धि वाले मनखेमन के बीच म लगातार मतभेद पईदा होथे, जेमन कि सत ले दूरिहा हो गे हवंय। अऊ ओमन सोचथें कि परमेसर के भक्ति ह पईसा कमाय के रसता ए।
1TI 6:6 पर संतोस सहित परमेसर के भक्ति म जिनगी बितई ह बहुंत बड़े कमई ए।
1TI 6:7 काबरकि हमन ये संसार म कुछू नइं लाने हवन अऊ हमन इहां ले कुछू नइं ले जा सकन।
1TI 6:8 एकरसेति कहूं हमर करा भोजन अऊ कपड़ा हवय, त हमन ला ओहीच म संतोस रहना चाही।
1TI 6:9 जऊन मन धनी होय चाहथें, ओमन लालच म, अऊ फांदा म अऊ कतको किसम के मुरूख अऊ हानिकारक ईछा म फंसथें, जऊन ह मनखेमन ला बरबादी अऊ बिनास म बुड़ो देथे।
1TI 6:10 काबरकि रूपिया-पईसा ले मया करई ह जम्मो बुरई के जरी अय। कुछू मनखेमन रूपिया-पईसा के लोभ म पड़के बिसवास ले भटक गे हवंय अऊ अपनआप ला नाना किसम के दुख म डार दे हवंय।
1TI 6:11 पर, हे परमेसर के जन, तेंह ये जम्मो चीज ले दूरिहा रह अऊ धरमीपन, भक्ति, बिसवास, मया, सहनसीलता अऊ नमरता के काम म अपन मन ला लगाय रख।
1TI 6:12 बिसवास के बने लड़ई लड़त रह अऊ परमेसर के संग सदाकाल के जिनगी ला थामे रह, काबरकि एकरे बर तोला बलाय गे रिहिस, जब तेंह कतको गवाहमन के आघू म अपन बिसवास के सही गवाही देय रहय।
1TI 6:13 परमेसर ला हाजिर जानके, जऊन ह जम्मो ला जिनगी देथे अऊ मसीह यीसू ला हाजिर जानके, जऊन ह पुन्तियुस पीलातुस के आघू म निडर होके गवाही दीस, मेंह तोला हुकूम देवत हंव
1TI 6:14 कि तेंह हमर परभू यीसू मसीह के परगट होवत तक, ये हुकूम ला निस्कलंक अऊ सही-सही मानत रह।
1TI 6:15 यीसू ला परमेसर ह अपन सही समय म परगट करही। परमेसर ह परमधन्य अऊ सिरिप एके सासक, राजामन के राजा अऊ परभूमन के परभू अय।
1TI 6:16 ओह एके झन अमर अय, ओह अगम-अपार अंजोर म रहिथे, जेला कोनो नइं देखे हवंय अऊ न कोनो ओला देख सकंय। ओकर आदर अऊ पराकरम जुग-जुग होवत रहय। आमीन।
1TI 6:17 ये संसार के धनवानमन ला हुकूम दे कि ओमन घमंडी झन होवंय अऊ नासमान धन ऊपर आसा झन रखंय, पर परमेसर ऊपर आसा रखंय, जऊन ह हमन ला आनंद मनाय बर हर चीज उदार मन ले देथे।
1TI 6:18 ओमन ला हुकूम दे कि ओमन भलई करंय अऊ भलई के काम म धनी बनंय अऊ ओमन उदार बनंय अऊ मदद करे बर तियार रहंय।
1TI 6:19 ये किसम ले ओमन अपन बर खजाना बटोरहीं, जऊन ह अवइया समय बर एक मजबूत नीव होही, अऊ तब ओमन ओ जिनगी म बने रह सकथें, जऊन ह कि सही के जिनगी ए।
1TI 6:20 हे तीमुथियुस, जऊन चीज ला तोर देखरेख म दिये गे हवय, ओकर रखवारी कर। अऊ जऊन गियान ला गियान कहना ही गलत ए, ओकर बिरोध के बात अऊ भक्तिहीन बातचीत ले दूरिहा रह।
1TI 6:21 काबरकि कुछू मनखेमन ये गियान ला मानके बिसवास ले दूरिहा हो गे हवंय। तोर ऊपर अनुग्रह होवत रहय।
2TI 1:1 में पौलुस, ओ जिनगी के वायदा के मुताबिक, जऊन ह मसीह यीसू म हवय, परमेसर के ईछा ले मसीह यीसू के प्रेरित अंव,
2TI 1:2 ये चिट्ठी मोर मयारू बेटा तीमुथियुस ला लिखत हंव:
2TI 1:3 मेंह हमेसा तोला रात अऊ दिन अपन पराथना म सुरता करत, परमेसर के धनबाद करथंव, जेकर सेवा मेंह साफ मन ले करथंव जइसने कि मोर पुरखामन घलो करत रिहिन।
2TI 1:4 तोर आंखी के आंसू ला सुरता करके, मेंह तोला देखे के ईछा करथंव, ताकि मेंह आनंद ले भर जावंव।
2TI 1:5 मेंह तोर निस्कपट बिसवास ला सुरता करथंव, जऊन ह कि पहिली तोर ममा दाई लोइस अऊ तोर दाई यूनीके म रिहिस, अऊ मोला भरोसा हवय कि एहीच बिसवास तोर म घलो हवय।
2TI 1:6 एकर कारन मेंह तोला सुरता करावत हंव कि परमेसर के ओ बरदान के उपयोग जादा से जादा कर, जऊन ह तोला मोर हांथ रखे के जरिये मिले रिहिस।
2TI 1:7 काबरकि परमेसर ह हमन ला डर के आतमा नइं, पर ओह सामर्थ, मया अऊ संयम बरते के आतमा दे हवय।
2TI 1:8 एकरसेति, हमर परभू के गवाही दे बर झन लजा अऊ न मोर बर लजा, जऊन ह परभू खातिर कैदी अंव। पर परमेसर के सामर्थ के दुवारा सुघर संदेस बर दुख उठाय म मोर संग हो ले।
2TI 1:9 परमेसर ह हमर उद्धार करे हवय अऊ हमन ला एक पबितर जिनगी जीये बर बलाय हवय। परमेसर ह येला हमर बने करम के कारन नइं, पर ओह येला अपन उदेस्य अऊ अनुग्रह के कारन करे हवय। ओह ये अनुग्रह ला समय के सुरू होय के पहिली ले मसीह यीसू के जरिये हमन ला दे हवय,
2TI 1:10 पर ये अनुग्रह अब हमर उद्धार करइया मसीह यीसू के आय के दुवारा परगट होय हवय। ओह मिरतू के सक्ति ला नास करिस, अऊ सुघर संदेस के दुवारा जिनगी अऊ अमर जिनगी ला अंजोर म लानिस।
2TI 1:11 मेंह एही सुघर संदेस के परचारक, प्रेरित अऊ गुरू ठहिराय गे हवंव।
2TI 1:12 एकर कारन मेंह ये दुख सहत हवंव। पर मेंह नइं लजावंव काबरकि मेंह जानथंव कि काकर ऊपर मेंह बिसवास रखे हवंव अऊ मेंह ये निस्चय जानत हंव कि ओह ओ चीज के रखवारी कर सकथे, जऊन ला मेंह ओकर आय के दिन तक ओला सऊंपे हवंव।
2TI 1:13 ओ बने बात, जऊन ला मेंह तोला सिखोय हवंव, ओला अपन जिनगी म एक नमूना के रूप म ले अऊ संगे-संग मसीह यीसू के बिसवास अऊ मया म बने रह।
2TI 1:14 ओ बने चीजमन के रखवारी कर, जऊन ह तोला सऊंपे गे हवय। ये बने चीजमन के रखवारी पबितर आतमा के मदद ले कर, जऊन ह कि हमन म रहिथे।
2TI 1:15 तेंह जानथस कि एसिया प्रदेस म जम्मो झन मोला छोंड़ दे हवंय, ओमन म फूगिलुस अऊ हिरमुगिनेस घलो हवंय।
2TI 1:16 उनेसिफुरूस के परिवार ऊपर परभू दया करय, काबरकि ओह अकसर मोर मदद करे हवय अऊ ओह मोर जेल म रहे के कारन नइं लजाईस।
2TI 1:17 पर जब ओह रोम सहर म आईस, त ओह मोला तब तक खोजते रिहिस, जब तक कि ओह मोला नइं पा गीस।
2TI 1:18 परभू करय कि परभू के आय के दिन ओकर ऊपर परभू के दया होवय। तेंह येला बने करके जानथस कि ओह इफिसुस म मोर कतेक जादा मदद करिस।
2TI 2:1 एकरसेति, हे मोर बेटा, ओ अनुग्रह म मजबूत हो जा, जऊन ह मसीह यीसू म हवय।
2TI 2:2 जऊन बातमन ला, मेंह तोला कतको गवाहमन के आघू म कहे हवंव, ओ बातमन ला बिसवासयोग्य मनखेमन ला सऊंप दे, जऊन मन आने मन ला घलो सिखोय म काबिल हवंय।
2TI 2:3 मसीह यीसू के एक बने सैनिक के सहीं, हमर संग दुख सहे कर।
2TI 2:4 एक सैनिक ह सेवा करत आम आदमी के रोज के जिनगी के मामला म दखल नइं देवय, पर ओह अपन हुकूम देवइया अधिकारी ला खुस करे चाहथे।
2TI 2:5 ओही किसम ले, जब एक खिलाड़ी ह खेल-कूद म भाग लेथे, त ओला तब तक ईनाम नइं मिलय, जब तक कि ओह खेल के नियम के मुताबिक नइं खेलय।
2TI 2:6 कठोर मेहनत करइया किसान ला फसल के बांटा पहिली मिलना चाही।
2TI 2:7 जऊन बात मेंह कहत हंव, ओकर बारे म सोच-बिचार कर, काबरकि परभू ह जम्मो चीज ला समझे म तोर मदद करही।
2TI 2:8 यीसू मसीह ला सुरता कर, जऊन ह मरे म ले जी उठिस अऊ जऊन ह दाऊद राजा के बंस के रिहिस। येह मोर सुघर संदेस ए, जेकर परचार मेंह करत हंव,
2TI 2:9 अऊ एकरे कारन मेंह दुख उठावत हंव, इहां तक कि एक अपराधी के सहीं मेंह जेल म हवंव। पर परमेसर के बचन ह सुतंतर हवय।
2TI 2:10 एकरसेति, मेंह चुने मनखेमन खातिर हर चीज ला सहत हवंव कि ओमन घलो सदाकाल के महिमा के संग ओ उद्धार ला पावंय, जऊन ह मसीह यीसू के जरिये मिलथे।
2TI 2:11 ये कहावत ह बिलकुल सही ए: यदि हमन ओकर संग मरथन, त हमन ओकर संग जीयबो घलो;
2TI 2:12 यदि हमन दुख सहथन, त हमन ओकर संग राज घलो करबो। यदि हमन ओकर इनकार करथन, त ओह घलो हमर इनकार करही;
2TI 2:13 यदि हमन बिसवास के लईक नइं रहन, तभो ले ओह बिसवास के लईक रहिही, काबरकि ओह अपन बात ले कभू नइं मुकरय।
2TI 2:14 मनखेमन ला ये बातमन के सुरता करावत रह, अऊ परमेसर के आघू म ओमन ला चेतउनी दे कि ओमन कोनो बचन के बारे म झगरा झन करंय, जेकर ले कोनो फायदा नइं होवय, बल्कि येह सुनइयामन के बिनास होय के कारन बनथे।
2TI 2:15 अपनआप ला परमेसर के गरहन करे लईक अऊ अइसन काम करइया बनाय के कोसिस कर, जऊन ला लजाय के जरूरत नइं होवय अऊ जऊन ह सत के बचन ला सही ढंग ले बताथे।
2TI 2:16 अभक्ति अऊ मुरूखता के बातचीत ले दूरिहा रहे कर, काबरकि जऊन मन अइसने बातचीत म सामिल होथें, ओमन परमेसर ले अऊ दूरिहा होवत जाथें।
2TI 2:17 ओमन के सिकछा ह सरहा घाव सहीं बगरत जाथे। हुमिनयुस अऊ फिलेतुस इही मन ले अंय
2TI 2:18 अऊ येमन सत के बचन ले दूरिहा हो गे हवंय। येमन कहिथें कि मरे मनखेमन के जी उठई त पहिले ही हो चुके हवय अऊ अइसने कहिके, येमन कुछू मनखेमन के बिसवास ला नास कर देथें।
2TI 2:19 पर परमेसर के पक्का नीव ह मजबूत हवय अऊ ओमा ये बचन के मुहर लगे हवय: “परभू ह अपन मनखेमन ला जानथे” अऊ “हर ओ मनखे, जऊन ह परभू ऊपर बिसवास करथे, ओह बुरई ले दूरिहा रहय।”
2TI 2:20 एक बड़े घर म सिरिप सोन अऊ चांदी के ही नइं, पर उहां कठवा अऊ माटी के बरतन घलो रहिथें, कुछू बरतन बिसेस उपयोग खातिर अऊ कुछू बरतन सधारन उपयोग खातिर।
2TI 2:21 यदि कोनो अपनआप ला ये जम्मो बुरई ले दूरिहा रखही, त ओह खास काम म उपयोग होही अऊ पबितर होही अऊ ओह अपन मालिक के काम आही अऊ कोनो भी बने काम करे बर तियार रहिही।
2TI 2:22 तेंह जवानी के वासना ले दूरिहा रह, अऊ जऊन मन साफ मन ले परभू के नांव लेथें, ओमन संग धरमीपन, बिसवास, मया अऊ सांति के साधना म लगे रह।
2TI 2:23 पर मुरूखता अऊ अगियानता के बहस ले दूरिहा रह, काबरकि तेंह जानथस, एकर ले झगरा होथे।
2TI 2:24 परभू के सेवक ला झगरहा नइं होना चाही, पर ओला हर एक के ऊपर दया करइया, सिखोय म माहिर अऊ सहनसील होना चाही।
2TI 2:25 ओह अपन बिरोधीमन ला ये आसा म नमरता ले समझावय कि परमेसर ह ओमन ला मन-फिराय के मऊका दीही अऊ ओमन सच ला जानहीं,
2TI 2:26 अऊ तब ओमन अपन चेत म आके, ओ सैतान के फांदा ले बचहीं, जऊन ह अपन ईछा पूरा करे बर ओमन ला पकड़े हवय।
2TI 3:1 ये बात ला जान ले कि संसार के आखिरी दिनमन म कठिन समय आही।
2TI 3:2 मनखेमन अपनआप ले अऊ पईसा ले मया करइया, डींगमार, घमंडी, गाली-गलौच करइया, दाई-ददा के कहना नइं मनइया, गुन नइं चिनहइया, अपबितर,
2TI 3:3 बिगर मया के, छेमा नइं करइया, निन्दा करइया, असंयमी, निरदयी, भलई के बईरी,
2TI 3:4 बिसवासघात करइया, उतावला, अभिमानी अऊ परमेसर ले नइं, पर भोग-बिलास ले मया करइया होहीं।
2TI 3:5 ओमन भक्ति के भेस धरहीं, पर एकर सामर्थ ला नइं मानहीं। अइसने मनखेमन ले दूरिहा रहे कर।
2TI 3:6 ओमन अइसने मनखे अंय, जऊन मन घर म कलेचुप घुसरथें अऊ ओ छिछोरी माईलोगनमन ला बस म कर लेथें, जऊन मन पाप ले दबे अऊ जम्मो किसम के वासना के बस म हवंय।
2TI 3:7 ये माईलोगनमन हमेसा सीखत तो रहिथें, पर सच्चई के पहिचान कभू नइं कर सकंय।
2TI 3:8 जइसने यन्नेस अऊ यम्ब्रेस, मूसा के बिरोध करिन, वइसने ये मनखेमन घलो सच्चई के बिरोध करथें। येमन अइसने मनखे अंय, जेमन के दिमाग ह खराप हो गे हवय अऊ येमन बिसवास ला छोंड़ दे हवंय।
2TI 3:9 पर येमन जादा आघू नइं जा सकंय, काबरकि जम्मो झन ओमन के मुरूखता ला जान लीहीं, जइसने कि मूसा के बिरोधीमन संग होय रिहिस।
2TI 3:10 पर तेंह मोर जम्मो उपदेस, मोर चालचलन, मोर उदेस्य, बिसवास, धीरज, मया, सहनसीलता,
2TI 3:11 सताय जवई अऊ मोर दुख उठई ला जानथस। तेंह जानथस कि अंताकिया, इकुनियुम अऊ लुस्त्रा सहर म, मेंह कतेक दुख-तकलीफ सहे हवंव। पर परभू ह मोला ओ जम्मो ले बचाईस।
2TI 3:12 येह सच ए कि जऊन ह मसीह यीसू म भक्ति के जिनगी जीये चाहथे, ओला सताय जाही।
2TI 3:13 जबकि दुस्ट मनखे अऊ धोखेबाजमन धोखा देवत अऊ खुदे धोखा खावत अऊ बिगड़त जाहीं।
2TI 3:14 पर तेंह जऊन बातमन ला सीखे अऊ अटल बिसवास करे हवस, ओमा मजबूत होवत जा, काबरकि तेंह ओमन ला जानथस, जेमन ले तेंह ये बातमन ला सीखे हवस,
2TI 3:15 अऊ सुरता रख कि कइसने लइकापन ले, तेंह परमेसर के पबितर बचन ला जाने हवस, जऊन ह तोला मसीह यीसू म बिसवास के दुवारा, उद्धार पाय खातिर सिकछा दे सकथे।
2TI 3:16 परमेसर के जम्मो बचन ह परमेसर के परेरना ले लिखे गे हवय अऊ येह उपदेस देय बर, गलती म डांटे बर, सुधारे बर अऊ धरमीपन के सिकछा देय बर उपयोगी ए,
2TI 3:17 ताकि परमेसर के जन ह सिद्ध बनय अऊ हर बने काम बर पूरा तियार हो सकय।
2TI 4:1 परमेसर ला हाजिर जानके अऊ मसीह यीसू ला हाजिर जानके, जऊन ह जीयत अऊ मरे मन के नियाय करही, अऊ मसीह के परगट होय अऊ ओकर राज करे के संबंध म, मेंह तोला ये जिम्मा देवत हंव:
2TI 4:2 तेंह बचन के परचार कर; समय अऊ बेसमय तियार रहे कर। बड़े धीरज अऊ सही सिकछा के संग मनखेमन ला समझा, डांट अऊ उत्साहित कर।
2TI 4:3 काबरकि अइसने समय आही, जब मनखेमन सही सिकछा ला नइं सुनहीं अऊ अपन ईछा ला पूरा करहीं। ओमन अपन बर अइसने गुरूमन ला बलाहीं, जऊन मन ओमन के ईछा के मुताबिक सिकछा दीहीं।
2TI 4:4 ओमन सच बात ला नइं सुनहीं पर कथा-कहानी म अपन मन लगाहीं।
2TI 4:5 पर तेंह ये जम्मो बात म सचेत रहे कर; दुख ला सहे कर, सुघर संदेस के परचार कर, अऊ परमेसर के सेवक के रूप म अपन जम्मो सेवा ला कर।
2TI 4:6 मेंह पहिले से ही पेय-बलिदान के सहीं ढारे जावत हंव, अऊ मोर मरे के बेरा आ गे हवय।
2TI 4:7 मेंह अपन परभू बर बने लड़ई लड़े हवंव। मेंह अपन दऊड़ ला पूरा कर ले हवंव। मेंह परभू ऊपर बिसवास रखे हवंव।
2TI 4:8 मोर बर धरमीपन के ओ मुकुट रखे हवय, जऊन ला धरमी नियायी परभू ह मोला नियाय के दिन दीही, अऊ सिरिप मोला ही नइं, पर ओ जम्मो झन ला घलो दीही, जऊन मन लालसा से ओकर परगट होय के बाट जोहथें।
2TI 4:9 मोर करा जल्दी आय के कोसिस कर,
2TI 4:10 काबरकि अब देमास ह ये संसार के मया म पड़के मोला छोंड़ दे हवय अऊ ओह थिस्सलुनीके सहर चले गे हवय। क्रेसकेंस ह गलातिया अऊ तीतुस ह दलमतिया चले गे हवय।
2TI 4:11 सिरिप लूका ह मोर संग हवय। मरकुस ला लेके मोर करा आ, काबरकि ओह परभू के सेवा म मोर बहुंत मदद करथे।
2TI 4:12 तुखिकुस ला मेंह इफिसुस सहर पठोय हवंव।
2TI 4:13 जब तेंह आबे, त जऊन कोट ला मेंह त्रोआस म करपुस के इहां छोंड़ आय रहेंव, ओला अऊ किताबमन ला घलो, खास करके चमड़ा के बने किताब ला लेके आबे।
2TI 4:14 धातु के काम करइया सिकन्दर ह मोर बहुंत नुकसान करे हवय। परभू ह ओकर करम के बदला ओला दीही।
2TI 4:15 तेंह घलो ओकर ले सचेत रहे कर, काबरकि ओह हमर संदेस के बहुंत बिरोध करे हवय।
2TI 4:16 अदालत म, जब मेंह पहिली बार अपन सफई पेस करत रहेंव, तब कोनो मोर संग नइं दीस, जम्मो झन मोला छोंड़ दे रिहिन। अइसने होवय कि परमेसर ह ये बात ला ओमन के बिरोध म झन लेवय।
2TI 4:17 पर परभू ह मोर मदद करिस अऊ मोला बल दीस ताकि मोर दुवारा संदेस के पूरा परचार होवय अऊ जम्मो आनजातमन येला सुनंय। मेंह सिंह के मुहूं ले बचाय गे हवंव।
2TI 4:18 परभू ह मोला जम्मो बुरई के काम ले बचाही अऊ अपन स्वरगीय राज म मोला सही-सलामत ले जाही। ओकर महिमा जुग-जुग होवत रहय। आमीन।
2TI 4:19 प्रिसकिल्ला अऊ अक्विला ला अऊ उनेसिफुरूस के घराना के मनखेमन ला मोर जोहार कहि देबे।
2TI 4:20 इरासतुस ह कुरिन्थुस सहर म रूक गीस अऊ मेंह त्रुफिमुस ला मिलेतुस म छोंड़ दे हवंव, काबरकि ओह बेमार हवय।
2TI 4:21 जड़काला आय के पहिली, तेंह इहां आय के कोसिस कर। यूबूलुस ह तोला जोहार कहत हे, अऊ वइसने ही पुदेंस, लीनुस, क्लौदिया अऊ जम्मो भाईमन तोला जोहार कहत हवंय।
2TI 4:22 परभू तोर आतमा के संग रहय। तोर ऊपर परमेसर के अनुग्रह होवत रहय।
TIT 1:1 पौलुस कोति ले, जऊन ह परमेसर के सेवक अऊ यीसू मसीह के प्रेरित ए, परमेसर के चुने मनखेमन के बिसवास खातिर अऊ ओ सच के गियान खातिर जऊन ह भक्ति के रसता म ले जाथे,
TIT 1:2 सदाकाल के जिनगी के आसा म, जेकर परतिगियां परमेसर ह समय के सुरू होय के पहिली ले करे हवय अऊ ओह लबारी नइं मारय,
TIT 1:3 अऊ ओह ठहिराय समय म अपन बचन ला परचार के दुवारा साफ बताईस, अऊ ये परचार के जिम्मेदारी, हमर उद्धार करइया परमेसर के हुकूम ले मोला सऊंपे गे हवय,
TIT 1:4 मेंह तीतुस ला ए चिट्ठी लिखत हवंव। तेंह मोर सच के बेटा सहीं अस, काबरकि तेंह मसीह ऊपर वइसने बिसवास करथस, जइसने मेंह करथंव:
TIT 1:5 मेंह एकर खातिर तोला क्रेते दीप म छोंड़ आय रहेंव कि तेंह उहां बांचे काम ला पूरा कर, अऊ मोर बताय मुताबिक नगर-नगर म अगुवामन ला ठहिरा।
TIT 1:6 अगुवा ह निरदोस अऊ ओकर एकेच घरवाली होवय। ओकर लइकामन बिसवासी रहंय अऊ ओमन लुच्चा-लफंगा अऊ हुकूम नइं मनइया झन होवंय।
TIT 1:7 काबरकि पास्टर के ऊपर परमेसर के काम के जिम्मेदारी होय के कारन, ओला निरदोस होना चाही—ओह मनमानी करइया, कोरोधी, पियक्कड़, मारपीट करइया अऊ नीच कमई के लोभी झन होवय।
TIT 1:8 पर ओह पहुनई करइया, भलई करइया, संयमी, नियायी, पबितर अऊ अनुसासन म रहइया होवय।
TIT 1:9 ओह सिखोय गय बिसवास के बचन म स्थिर रहय, ताकि ओह आने मन ला सही सिकछा देय के दुवारा उत्साहित करय, अऊ बिरोधीमन के मुहूं ला बंद कर सकय।
TIT 1:10 काबरकि बहुंते मनखेमन बिदरोही, बकवास करइया अऊ धोखा देवइया अंय, खास करके खतना वाले मनखेमन।
TIT 1:11 येमन के मुहूं ला बंद करे जावय, काबरकि ये मनखेमन नीच कमई ले पईसा बनाय खातिर गलत सिकछा देथें अऊ परिवारमन ला बिगाड़ देथें।
TIT 1:12 ओमन के खुद के एक अगमजानी ह ये कहे हवय: “क्रेतीमन हमेसा लबरा, दुस्ट पसु के सहीं अऊ अलाल पेटहा होथें।”
TIT 1:13 ओकर ये गवाही ह सही ए। एकरसेति ओमन ला बने करके चेता दे कि ओमन बिसवास म मजबूत हो जावंय।
TIT 1:14 अऊ ओमन यहूदीमन के कथा-कहानी अऊ ओ मनखेमन के हुकूम ला धियान झन देवंय, जऊन मन सत के बिरोध करथें।
TIT 1:15 आतमिक रूप ले सुध मनखे खातिर जम्मो चीज ह सुध ए, पर आतमिक रूप ले असुध अऊ अबिसवासी मनखे खातिर कोनो चीज ह सुध नो हय। ओमन के मन अऊ बिबेक दूनों ह खराप हो गे हवय।
TIT 1:16 ओमन कहिथें कि ओमन परमेसर ला जानथें, पर अपन काम के दुवारा ओकर इनकार करथें। ओमन घिन करे लईक अऊ हुकूम नइं मनइया मनखे अंय अऊ ओमन कोनो बने काम करे के लईक नो हंय।
TIT 2:1 पर तेंह अइसने बातमन ला सिखोय कर, जऊन ह जिनगी बर सही अय।
TIT 2:2 सियानमन ला संयमी, आदर के लईक अऊ समझदार होय के सिकछा दे अऊ ओमन बिसवास, मया अऊ धीरज म पक्का होवंय।
TIT 2:3 इही किसम ले सियानीनमन ला ये सिखोय कर कि अपन चालचलन म पबितर मनखे सहीं रहंय; ओमन निन्दा करइया अऊ पियक्कड़ झन होवंय, पर सही बात के सिखोइया होवंय
TIT 2:4 ताकि ओमन जवान माईलोगनमन ला ये सिखोय सकंय कि ओमन अपन-अपन घरवाला अऊ लइकामन ला मया करंय,
TIT 2:5 अऊ ओमन समझदार, पतिबरता, घर के कामकाज करइया, दयालु अऊ अपन-अपन घरवाला के बस म रहइया होवंय, ताकि परमेसर के बचन के निन्दा झन होवय।
TIT 2:6 अइसनेच जवान मनखेमन ला घलो उत्साहित कर कि ओमन संयमी होवंय।
TIT 2:7 जम्मो बात म सही काम करे के दुवारा, अपनआप ला ओमन के आघू म एक नमूना बना। तोर उपदेस म ईमानदारी, गंभीरता
TIT 2:8 अऊ अइसने बने बात रहय कि कोनो ओला खराप नइं कह सकय, ताकि बिरोध करइयामन हमर ऊपर कोनो दोस नइं पाके लज्जित होवंय।
TIT 2:9 गुलाममन ला सिखा कि ओमन अपन-अपन मालिक के अधीन रहंय, अऊ जम्मो बात म ओमन ला खुस रखंय, अऊ उलटके जबाब झन देवंय,
TIT 2:10 अऊ ओमन चोरी-चलाकी झन करंय, पर अपनआप ला पूरा बिसवास के लईक साबित करंय। अइसने करे के दुवारा ओमन जम्मो बात म हमर उद्धार करइया परमेसर के उपदेस के सोभा बढ़ाहीं।
TIT 2:11 काबरकि परमेसर के अनुग्रह जम्मो मनखेमन ऊपर परगट होईस कि ओमन के उद्धार होवय।
TIT 2:12 अब येह हमन ला सिखोथे कि हमन अभक्ति अऊ संसारिक लालसा ला छोंड़के, ये संसार म संयम अऊ ईमानदारी अऊ भक्ति म जिनगी बितावन,
TIT 2:13 अऊ हमन धइन आसा के याने हमर महान परमेसर अऊ उद्धार करइया यीसू मसीह के महिमा के परगट होय के बाट जोहत रहन।
TIT 2:14 यीसू ह अपन परान ला हमर खातिर दे दीस कि हमन ला जम्मो किसम के अधरम ले छुड़ा लेवय अऊ अपन बर अइसने सुध मनखे बनावय, जऊन मन भलई के काम करे बर उत्सुक रहंय।
TIT 2:15 तेंह ये बातमन ला सिखोय कर। उत्साहित कर अऊ पूरा अधिकार के संग मनखेमन ला डांट। कोनो तोला तुछ झन समझंय।
TIT 3:1 मनखेमन ला सुरता देवा कि ओमन हाकिम अऊ अधिकारीमन के अधीन रहंय, अऊ ओमन के हुकूम मानंय, अऊ जम्मो किसम के भलई के काम करे बर तियार रहंय।
TIT 3:2 कोनो ला बदनाम झन करंय; झगरा करइया झन होवंय, पर नम्र सुभाव के रहंय अऊ जम्मो मनखे के संग पूरा नमरता ले बरताव करंय।
TIT 3:3 एक समय रिहिस, जब हमन घलो मुरूख अऊ परमेसर के हुकूम नइं मनइया रहेंन अऊ धोखा म पड़के हर किसम के लालसा अऊ सुख-बिलास के गुलामी म रहेंन। हमन बईरता अऊ जलन म जिनगी बितावत रहेंन अऊ एक-दूसर ले घिन करत रहेंन।
TIT 3:4 पर हमर उद्धार करइया परमेसर ह अपन दया अऊ मया ला परगट करिस,
TIT 3:5 अऊ ओह हमर उद्धार करिस, अऊ येह हमर कोनो धरमी काम के कारन नइं, पर ओह अपन दया के कारन करिस। ओह हमर पाप ला धोके हमर उद्धार करिस अऊ पबितर आतमा के दुवारा नवां जिनगी दीस।
TIT 3:6 परमेसर ह ये पबितर आतमा ला हमर उद्धार करइया यीसू मसीह के दुवारा हमन ला बहुंतायत ले दीस,
TIT 3:7 ताकि हमन ओकर अनुग्रह ले धरमी ठहिरके सदाकाल के जिनगी के आसा म ओकर वारिस बनन।
TIT 3:8 ये कहावत ह सही ए। अऊ मेंह चाहत हंव कि तेंह ये बातमन ला जोर देके बताय कर, ताकि जऊन मन परमेसर ऊपर बिसवास करे हवंय, ओमन भलई के काम म अपन धियान लगावंय। ये बातमन बहुंत बढ़िया अऊ मनखेमन के फायदा के अंय।
TIT 3:9 पर मुरूखता के बिवाद अऊ बंसावली अऊ बहस अऊ झगरा मन ले बचके रह; ये चीजमन यहूदीमन के कानून के बिसय म अंय अऊ येमन बिगर फायदा के अऊ बेकार अंय।
TIT 3:10 मनखेमन के बीच म फूट करइया ला, एक या दू बार समझा-बुझा दे, ओकर बाद ओकर ले दूरिहा रह,
TIT 3:11 ये बात ह निस्चित ए, कि अइसने मनखे ह सत ले भटक गे हवय अऊ पापी ए अऊ अपनआप ला दोसी ठहिराथे।
TIT 3:12 जब मेंह अरतिमास या तुखिकुस ला तोर करा पठोहूं, त तेंह मोर करा नीकुपुलिस सहर आय के भरसक कोसिस कर, काबरकि मेंह उहां जाड़ा काटे के फैसला करे हवंव।
TIT 3:13 जेनास वकील अऊ अपुल्‍लोस के आघू के यातरा बर, तोर ले जो भी हो सकथे, ओमन के मदद कर अऊ देख कि ओमन ला कोनो चीज के कमी झन होवय।
TIT 3:14 जरूरी अय कि हमर मनखेमन भलई के काम म लगे रहे बर सीखंय, ताकि जऊन मन ला मदद के जरूरत हवय, ओमन के जरूर मदद करे जा सकय, अऊ ओमन के जिनगी ह बिरथा झन होवय।
TIT 3:15 मोर संग इहां रहइया जम्मो झन तोला जोहार कहथें। जऊन मन मसीह यीसू म बिसवास के कारन हमर ले मया रखथें, ओमन ला हमर जोहार कहि दे। तुमन जम्मो झन ऊपर परमेसर के अनुग्रह होवत रहय।
PHM 1:1 ये चिट्ठी पौलुस कोति ले, जऊन ह मसीह यीसू के एक कैदी ए अऊ हमर भाई तीमुथियुस कोति ले,
PHM 1:2 अऊ ओ कलीसिया, जऊन ह ओकर घर म जूरथे, अऊ हमर बहिनी अपफिया, अऊ हमर संगी योद्धा अरखिप्पुस ला लिखे जावत हवय:
PHM 1:3 हमर ददा परमेसर अऊ परभू यीसू मसीह कोति ले तुमन ला अनुग्रह अऊ सांति मिलत रहय।
PHM 1:4 भाई फिलेमोन, जब मेंह अपन पराथना म तोला सुरता करथंव, त अपन परमेसर ला हमेसा धनबाद देथंव,
PHM 1:5 काबरकि मेंह परभू यीसू ऊपर तोर बिसवास अऊ परमेसर के जम्मो पबितर मनखेमन बर तोर मया के बारे म सुनत रहिथंव।
PHM 1:6 मेंह पराथना करत हंव कि परभू यीसू ऊपर बिसवास म हमर संग तोर सहभागी होवई ह परभावसाली होवय ताकि मसीह खातिर जऊन भलई के काम हमन करथन, ओकर तोला पूरा समझ होवय।
PHM 1:7 हे मोर भाई, तोर मया ह मोला अब्बड़ आनंद अऊ उत्साह दे हवय, काबरकि तेंह परमेसर के मनखेमन के हिरदय ला ताजा कर दे हवस।
PHM 1:8 एकरसेति, हालाकि मेंह मसीह के सेवक के रूप म, हिम्मत के संग तोला हुकूम दे सकत हंव कि तोला का करना चाही,
PHM 1:9 पर मया के कारन, मेंह तोर ले बिनती करत हंव। में पौलुस, एक सियान मनखे अंव अऊ अब मसीह यीसू खातिर एक कैदी घलो अंव—
PHM 1:10 मेंह तोर ले, मोर बेटा उनेसिमुस बर बिनती करत हंव, जऊन ह जेल म रहे के बखत, मोर सुनाय सुघर संदेस ऊपर बिसवास करिस अऊ मोर बेटा सहीं हो गीस।
PHM 1:11 ओह पहिली तोर कुछू काम के नइं रिहिस, पर अब ओह तोर अऊ मोर दूनों बर बड़े काम के हो गे हवय।
PHM 1:12 मेंह ओला, जऊन ह मोर हिरदय के एक टुकड़ा सहीं अय, तोर करा वापिस पठोवत हंव।
PHM 1:13 मेंह ओला मोर संग रखे चाहत रहेंव, ताकि ओह तोर बदले म मोर मदद कर सकय, जब मेंह इहां सुघर संदेस के परचार करे के कारन जेल म हवंव।
PHM 1:14 पर मेंह बिगर तोर सहमती के कुछू नइं करे चाहेंव, ताकि जऊन भलई तेंह करथस, ओह कोनो दबाव ले नइं, पर तोर खुद के ईछा ले होवय।
PHM 1:15 उनेसिमुस ह थोरकन समय बर तोर ले अलग होय रिहिस, एकर कारन सायद ये हो सकथे कि ओह तोर संग हमेसा रहय।
PHM 1:16 पर अब एक गुलाम के रूप म नइं, पर एक गुलाम ले घलो बड़के एक मयारू भाई के रूप म रहय। ओह मोर बहुंत मयारू ए, पर एक मनखे के रूप म अऊ संगे-संग परभू म एक भाई के रूप म, ओह तोर अऊ मयारू ए।
PHM 1:17 एकरसेति, यदि तेंह मोला अपन सहभागी समझथस, त ओला अइसने गरहन कर, जइसने तेंह मोला गरहन करबे।
PHM 1:18 कहूं ओह तोर कुछू नुकसान करे हवय या ओह तोर कुछू उधार लगथे, त ओला मोर नांव म लिख ले।
PHM 1:19 में, पौलुस ह अपन हांथ ले ये लिखत हंव कि मेंह तोला ओकर चुकता कर दूहूं, पर ये कहे के जरूरत नइं ए कि मोर जऊन करजा तोर ऊपर हवय, ओ करजा तेंह खुद अस।
PHM 1:20 हे भाई, मेंह चाहत हंव कि परभू खातिर, तेंह मोर ऊपर ये भलई कर; मसीह म मोर हिरदय ला ताजा कर दे।
PHM 1:21 मेंह पूरा भरोसा करके लिखत हंव कि तेंह मोर बात ला मानबे, अऊ मेंह जानत हंव कि जऊन कुछू भी मेंह तोला करे बर कहत हंव, तेंह ओकर ले घलो जादा करबे।
PHM 1:22 अऊ हां, एक बात अऊ हवय: मोर ठहिरे बर एक कमरा तियार रख, काबरकि मोला आसा हवय कि तुम्हर पराथना के जबाब म, परमेसर ह मोला तुम्हर करा दूबारा लानही।
PHM 1:23 इपफ्रास, जऊन ह मसीह यीसू म मोर संगी कैदी ए, तोला अपन जोहार कहत हे।
PHM 1:24 अऊ वइसने मोर सहकरमी मरकुस, अरिसतर्खुस, देमास अऊ लूका घलो तोला अपन जोहार कहत हें।
PHM 1:25 परभू यीसू मसीह के अनुग्रह तुम्हर आतमा के संग रहय।
HEB 1:1 पहिली जमाना म, परमेसर ह हमर पुरखामन ले, कतको बार अऊ कतको किसम ले अगमजानीमन के दुवारा गोठियाईस,
HEB 1:2 पर ये आखिरी दिन म, ओह हमर ले अपन बेटा के दुवारा गोठियाईस, जऊन ला ओह जम्मो चीज के ऊपर वारिस ठहिराईस अऊ ओकरे दुवारा, ओह संसार ला बनाईस।
HEB 1:3 बेटा ही परमेसर के महिमा के अंजोर ए अऊ ओह परमेसर के रूप के एकदम सही परतिनिधि ए अऊ ओह अपन सामर्थी बचन के दुवारा जम्मो चीजमन ला संभालके रखथे। ओह मनखेमन के पाप ला सुध करे के बाद, स्वरग म महामहिम परमेसर के जेवनी हांथ कोति जा बईठिस।
HEB 1:4 एकरसेति ओह स्वरगदूतमन ले जादा उत्तम ठहिरिस, जइसने कि परमेसर ह ओला स्वरगदूतमन ले उत्तम नांव घलो दे रिहिस।
HEB 1:5 काबरकि परमेसर ह कोनो स्वरगदूत ला कभू ये नइं कहिस, “तेंह मोर बेटा अस; आज मेंह तोर ददा बन गे हवंव।” या फेर ये नइं कहिस, “मेंह ओकर ददा होहूं, अऊ ओह मोर बेटा होही।”
HEB 1:6 पर जब परमेसर ह अपन पहिलांत बेटा ला संसार म लानथे, त कहिथे, “परमेसर के जम्मो स्वरगदूतमन ओकर अराधना करंय।”
HEB 1:7 स्वरगदूतमन के बारे म परमेसर ह ये कहिथे, “परमेसर ह अपन स्वरगदूतमन ला आतमा, अऊ अपन सेवकमन ला आगी के जुवाला बनाथे।”
HEB 1:8 पर बेटा के बारे म ओह कहिथे, “हे परमेसर, तोर सिंघासन ह सदाकाल तक बने रहिही, अऊ धरमीपन के राजदंड ह तोर राज के राजदंड होही।
HEB 1:9 तेंह धरमीपन ले मया करय अऊ दुस्टता ले घिन करय; एकरसेति, परमेसर, तोर परमेसर ह आनंद के तेल ले तोर अभिसेक करे के दुवारा तोला तोर संगीमन ले ऊपर करे हवय।”
HEB 1:10 ओह ये घलो कहिथे, “हे परभू, सुरूआत म, तेंह धरती के नीव रखे, अऊ अकास ह तोर हांथ के दुवारा बनाय गे हवय।
HEB 1:11 ओमन तो नास हो जाहीं, पर तेंह बने रहिबे; ओमन जम्मो, पहिरे के कपड़ा सहीं जुन्ना हो जाहीं।
HEB 1:12 तेंह ओमन ला चादर सहीं घरियाबे; कपड़ा के सहीं ओमन बदल दिये जाहीं। पर तेंह वइसनेच के वइसने रहिथस, अऊ तोर समय ह कभू अन्त नइं होवय।”
HEB 1:13 परमेसर ह कभू कोनो स्वरगदूत ला ये नइं कहिस, “मोर जेवनी हांथ कोति बईठ, जब तक कि मेंह तोर बईरीमन ला तोर गोड़ रखे के चउकी नइं बना देवंव।”
HEB 1:14 का जम्मो स्वरगदूतमन सेवा करइया आतमा नो हंय? हव, ओमन अंय। अऊ ये स्वरगदूतमन ओमन के सेवा करे खातिर पठोय जाथें, जऊन मन उद्धार पाहीं।
HEB 2:1 एकरसेति, जऊन बातमन ला हमन सुने हवन, ओकर ऊपर हमन अऊ जादा धियान देवन, ताकि हमन ओ बातमन ले झन भटक जावन।
HEB 2:2 काबरकि स्वरगदूतमन के दुवारा कहे गे संदेस ह सच रिहिस अऊ जऊन कोनो ओकर पाछू नइं चलिस या ओला नइं मानिस, ओला ओकर उचित दंड मिलिस।
HEB 2:3 यदि हमन अइसने बड़े उद्धार ला धियान नइं देवन, त हमन कइसने बच सकथन। ये उद्धार के बखान पहिली परभू के दुवारा करे गीस, अऊ जऊन मन येला सुनिन, ओमन के दुवारा हमन ला एकर निस्चय होईस।
HEB 2:4 परमेसर ह घलो चिनहां, अद्भूत काम अऊ कतको किसम के चमतकार के दुवारा एकर गवाही दीस अऊ ओह पबितर आतमा के बरदान के दुवारा घलो एकर गवाही दीस, जऊन ला कि ओह अपन ईछा के मुताबिक मनखेमन ला दे दीस।
HEB 2:5 अवइया संसार, जेकर बारे म हमन चरचा करत हवन, परमेसर ह ओला स्वरगदूतमन के अधीन म नइं करिस।
HEB 2:6 परमेसर के बचन म एक झन एक जगह गवाही दे हवय: “मनखे ह का ए कि तेंह ओकर ऊपर धियान देथस, या मनखे के बेटा ह का ए कि तेंह ओकर खियाल रखथस?
HEB 2:7 तेंह ओला स्वरगदूतमन ले थोरकन कम करके बनाय, तेंह ओला महिमा अऊ आदर के मुकुट पहिराय।
HEB 2:8 अऊ हर एक चीज ला ओकर गोड़ खाल्हे कर देय।” हर एक चीज ला ओकर अधीन करके, परमेसर ह अइसने कोनो चीज ला नइं छोंड़िस, जऊन ह ओकर अधिकार म नइं ए। पर अभी हमन हर एक चीज ला ओकर अधीन म नइं देखथन।
HEB 2:9 पर हमन यीसू ला देखथन, जऊन ह स्वरगदूतमन ले थोरकन समय बर थोरकन कम करके बनाय गीस अऊ अब मिरतू के दुख उठाय के कारन, ओह महिमा अऊ आदर के मुकुट पहिरे हवय, ताकि परमेसर के अनुग्रह के दुवारा ओह जम्मो मनखे बर मर जावय।
HEB 2:10 येह उचित रिहिस कि परमेसर, जेकर दुवारा अऊ जेकर बर हर एक चीज बनाय गीस, ओह यीसू ला दुख उठाय के जरिये सिद्ध करय, ताकि ओह बहुंते बेटामन ला लानय अऊ यीसू के महिमा म भागी बनावय। काबरकि यीसू ह ओ जन ए, जेकर दुवारा ओमन उद्धार पाथें।
HEB 2:11 जऊन ह मनखेमन ला पबितर करथे अऊ जऊन मन पबितर करे जाथें; ये दूनों एक ही परिवार के अंय। एकरसेति, यीसू ह ओमन ला अपन भाई कहे ले नइं लजावय।
HEB 2:12 ओह कहिथे, “हे परमेसर, मेंह अपन भाईमन ला तोर बारे म बताहूं; सभा के आघू म तोर परसंसा के गीत गाहूं।”
HEB 2:13 ओह फेर कहिथे, “मेंह ओकर ऊपर अपन भरोसा रखहूं।” अऊ ओह फेर कहिथे, “मेंह इहां हवंव, अऊ जऊन लइकामन ला परमेसर ह मोला देय हवय, ओमन घलो हवंय।”
HEB 2:14 जब लइकामन मांस अऊ लहू के बने हवंय, त यीसू ह खुद ओमन के सहीं बनिस अऊ ओमन के मनखे सुभाव म भागी होईस, ताकि अपन मिरतू के दुवारा, ओह सैतान के नास करय, जेकर करा मिरतू के सक्ति हवय—
HEB 2:15 अऊ ओह ओमन ला छोंड़ावय, जऊन मन अपन मिरतू के डर के कारन जिनगी भर गुलामी म रिहिन।
HEB 2:16 काबरकि ये बात ह पक्का ए कि ओह स्वरगदूतमन के नइं, पर अब्राहम के संतानमन के मदद करथे।
HEB 2:17 एकरसेति, ओला हर किसम ले अपन भाईमन सहीं बने बर पड़िस, ताकि ओह परमेसर के सेवा म, एक दयालु अऊ बिसवास लईक महा पुरोहित बनय अऊ ओह मनखेमन के पाप के पछताप करय।
HEB 2:18 काबरकि जब ओकर परिछा करे गीस, त ओह खुद दुख उठाईस, एकरसेति ओह ओमन के मदद कर सकथे, जऊन मन परिछा म पड़थें।
HEB 3:1 एकरसेति, हे पबितर भाईमन, जऊन मन स्वरगीय बुलावा म सहभागी हवव, अपन धियान यीसू ऊपर लगावव, जऊन ला हमन प्रेरित अऊ महा पुरोहित मानथन।
HEB 3:2 परमेसर ह ओला चुने रिहिस, अऊ ओह परमेसर के बिसवासयोग्य रिहिस, जइसने कि मूसा ह परमेसर के जम्मो घराना म बिसवासयोग्य रिहिस।
HEB 3:3 घर के बनइया ह घर ले जादा आदर पाथे, वइसनेच यीसू ह मूसा ले बढ़के आदर पाय के लईक समझे गीस।
HEB 3:4 काबरकि हर एक घर के कोनो न कोनो बनइया होथे। पर जऊन ह जम्मो चीज ला बनाईस, ओह परमेसर ए।
HEB 3:5 “एक सेवक के रूप म मूसा ह परमेसर के जम्मो घराना म बिसवासयोग्य रिहिस,” अऊ ओह ओ बात के गवाही दीस, जऊन ला परमेसर ह अवइया समय म बतानेवाला रिहिस।
HEB 3:6 पर मसीह ह एक बेटा के रूप म, परमेसर के घराना ऊपर बिसवासयोग्य अय। अऊ हमन ओकर घराना अन, यदि हमन अपन बिसवास अऊ आसा म मजबूती से बने रहिथन, जेकर कि हमन ला घमंड हवय।
HEB 3:7 एकरसेति, जइसने कि पबितर आतमा ह कहिथे: “यदि आज, तुमन ओकर अवाज ला सुनथव,
HEB 3:8 त अपन हिरदय ला कठोर झन करव, जइसने कि तुम्हर पुरखामन निरजन प्रदेस म, बिदरोही होके परखे जाय के बेरा परमेसर के बिरोध म करे रिहिन।
HEB 3:9 ओमन उहां मोला परखिन अऊ जांचिन, हालाकि ओमन चालीस साल तक मोर काममन ला देखिन।
HEB 3:10 एकरे कारन, मेंह ओ पीढ़ी के मनखेमन ले नराज रहेंव, अऊ मेंह कहेंव, ‘ओमन के मन ह हमेसा भटकत रहिथे, अऊ ओमन मोर रसता ला नइं जानंय।’
HEB 3:11 एकरसेति, मेंह कोरोध म कसम खाके कहेंव, ‘ओमन ओ ठऊर म कभू नइं जा सकहीं, जिहां मेंह ओमन ला अराम देवइया रहेंव।’ ”
HEB 3:12 हे भाईमन हो, एकर धियान रखव कि तुमन ले काकरो पापमय अऊ अबिसवासी हिरदय झन होवय, जऊन ह कि जीयत परमेसर ले दूरिहा हो जाथे।
HEB 3:13 पर हर एक दिन, एक-दूसर ला ढाढ़स बंधावव, जब तक कि येला आज कहे जाथे, ताकि तुमन कोनो घलो पाप के छल म पड़के कठोर झन होवव।
HEB 3:14 जऊन बिसवास, हमर करा सुरू म रिहिस, यदि हमन ओमा आखिरी तक मजबूत बने रहन, तभे मसीह के काम म हमर बांटा हवय।
HEB 3:15 जइसने कि परमेसर के बचन म ये कहे गे हवय: “यदि आज तुमन ओकर अवाज ला सुनथव, त अपन हिरदय ला कठोर झन करव, जइसने कि तुम्हर पुरखामन परमेसर के बिरोध म बिदरोही होके करिन।”
HEB 3:16 ओमन कोन रिहिन, जऊन मन परमेसर के अवाज ला सुनिन, अऊ ओकर बिरोध म बिदरोह करिन? का ओमन ओ जम्मो मनखे नइं रिहिन, जऊन मन ला मूसा ह मिसर देस ले निकालके लानिस?
HEB 3:17 अऊ काकर ले परमेसर ह चालीस साल तक नराज रिहिस? का ओमन ले नो हय, जऊन मन पाप करिन अऊ निरजन प्रदेस म गिरके मर गीन?
HEB 3:18 अऊ परमेसर ह कसम खाके कोन ला कहिस कि ओमन ओकर बिसराम म कभू नइं जा सकहीं? सिरिप ओमन ला, जऊन मन ओकर हुकूम नइं मानिन।
HEB 3:19 ये किसम ले, हमन देखथन कि ओमन अपन अबिसवास के कारन ओ देस म नइं जा सकिन।
HEB 4:1 एकरसेति, जब परमेसर के बिसराम म जाय के वायदा ह अभी तक कायम हवय, त हमन ला सचेत रहना चाही ताकि तुमन ले कोनो घलो ओ बिसराम म जाय बर नकाबिल झन होवव।
HEB 4:2 काबरकि हमन ला घलो सुघर संदेस सुनाय गीस, जइसने ओमन ला सुनाय गे रिहिस, पर जऊन संदेस ओमन सुनिन, ओकर ले ओमन ला कोनो फायदा नइं होईस, काबरकि जऊन मन येला सुनिन, ओमन बिसवास के संग येला गरहन नइं करिन।
HEB 4:3 हमन जऊन मन कि बिसवास करे हवन, ओ बिसराम म जाथन, जइसने कि परमेसर ह कहे हवय, “एकरसेति मेंह नराज होके कसम खाएंव, ओमन मोर बिसराम म कभू नइं जा सकहीं।” हालाकि ओकर काम ह ओ समय पूरा हो गे रिहिस, जब ओह संसार ला बनाईस।
HEB 4:4 काबरकि कोनो मेर, ओह सातवां दिन के बारे म अइसने कहे हवय, “अऊ सातवां दिन, परमेसर ह अपन जम्मो काम ले बिसराम करिस।”
HEB 4:5 अऊ फेर, ओही बिसय म, ओह ये कहिथे, “ओमन मोर बिसराम म कभू नइं जा सकहीं।”
HEB 4:6 येह अभी तक लागू हवय कि कुछू मनखे, ओ बिसराम म जा सकहीं अऊ जऊन मन ला पहिली सुघर संदेस सुनाय गे रिहिस, ओमन येमा नइं जा सकिन, काबरकि ओमन परमेसर के हुकूम ला नइं मानिन।
HEB 4:7 एकरसेति, परमेसर ह एक आने दिन ला तय करथे, जऊन ला “आज” कहे जाथे। बहुंत समय के बाद, ओह दाऊद राजा के जरिये एकर बारे म कहिस, जइसने कि परमेसर के बचन म लिखाय हवय: “यदि आज तुमन ओकर अवाज ला सुनथव, त अपन हिरदय ला कठोर झन करव।”
HEB 4:8 काबरकि, यदि यहोसू ह ओमन ला बिसराम दे रिहिस, त परमेसर ह बाद म, आने दिन के बारे म नइं गोठियाय रहितिस।
HEB 4:9 एकरसेति, परमेसर के मनखेमन बर, एक बिसराम बचे हवय;
HEB 4:10 काबरकि जऊन ह परमेसर के बिसराम म जाथे, ओह अपन काम ले घलो बिसराम करथे, जइसने परमेसर ह अपन काम ले बिसराम करिस।
HEB 4:11 एकरसेति, आवव, हमन ओ बिसराम म जाय के पूरा कोसिस करन, ताकि अइसने झन होवय कि कोनो मनखे ओमन सहीं हुकूम नइं मानके मर जावंय।
HEB 4:12 परमेसर के बचन ह जीयत अऊ काम करत हवय। येह दू धारवाले तलवार ले घलो जादा चोख हवय। येह जीव अऊ आतमा, जोड़ अऊ गुदा मन ला अलग-अलग करके आर-पार छेदथे। येह मनखे के मन के बिचार अऊ ईछा ला जांचथे।
HEB 4:13 संसार के कोनो घलो चीज परमेसर के नजर ले छिपे नइं ए। ओकर आंखी के आघू म जम्मो चीजमन खुला अऊ बिगर परदा के हवंय अऊ हमर बर ये जरूरी अय कि हमन ओला अपन लेखा देवन।
HEB 4:14 एकरसेति, जब हमर एक बड़े महा पुरोहित हवय, जऊन ह स्वरगमन ले होके गे हवय। ओह परमेसर के बेटा यीसू ए; त आवव, हमन ओ बिसवास म मजबूत बने रहन, जऊन ला हमन अंगीकार करथन।
HEB 4:15 काबरकि हमर महा पुरोहित अइसने नो हय, जऊन ह हमर कमजोरी म, हमर संग सहानुभूति नइं रखय, पर हमर महा पुरोहित हमर सहीं हर किसम ले परखे गीस, पर ओह पाप नइं करिस।
HEB 4:16 एकरसेति आवव, हमन बिसवास के संग अनुग्रह के सिंघासन करा चलन, ताकि हमर ऊपर दया होवय अऊ जरूरत के बखत, हमन ला मदद करे बर अनुग्रह मिलय।
HEB 5:1 हर एक महा पुरोहित ह मनखेमन ले चुने जाथे अऊ ओह मनखेमन कोति ले परमेसर के सेवा करे बर ठहिराय जाथे कि ओह परमेसर ला पाप खातिर भेंट अऊ बलिदान चघावय।
HEB 5:2 ओह अगियानी अऊ भटके मनखेमन ले नरमी से बरताव करे के योग्य अय, काबरकि ओह खुद एक निरबल मनखे ए।
HEB 5:3 एकरे कारन, ओला खुद के पाप खातिर अऊ संगे-संग मनखेमन के पाप खातिर बलिदान चघाना जरूरी ए।
HEB 5:4 कोनो खुद होके आदर के ये पद ला नइं लेवय; ओकर बुलाहट परमेसर के दुवारा होना जरूरी ए, जइसने कि हारून ह बलाय गे रिहिस।
HEB 5:5 एकरसेति, मसीह घलो महा पुरोहित बने के महिमा ला अपन ऊपर नइं लीस। पर परमेसर ह ओला कहिस, “तेंह मोर बेटा अस; आज मेंह तोर ददा बन गे हवंव।”
HEB 5:6 ओह दूसर जगह म घलो कहिथे, “तेंह मलकिसिदक के सहीं सदाकाल बर एक पुरोहित अस।”
HEB 5:7 धरती म जब यीसू ह सरीर म रिहिस, त ओह चिचिया-चिचियाके अऊ आंसू बोहाके परमेसर ले पराथना अऊ बिनती करिस, जऊन ह ओला मिरतू ले बचा सकत रिहिस, अऊ ओकर भक्ति के कारन, परमेसर ह ओकर बात ला सुनिस।
HEB 5:8 ओह परमेसर के बेटा रिहिस, पर दुख सहे के दुवारा, ओह हुकूम माने बर सिखिस,
HEB 5:9 अऊ जब ओह सिद्ध हो गीस, त ओह ओ जम्मो मन बर सदाकाल के उद्धार के जरिया बन गीस, जऊन मन ओकर हुकूम ला मानथें,
HEB 5:10 अऊ मलकिसिदक के सहीं, परमेसर ह ओला महा पुरोहित के पद दीस।
HEB 5:11 एकर बारे म कहे बर, हमर करा कतको बात हवय, पर येला समझाना कठिन ए, काबरकि तुमन अब समझे के कोसिस नइं करव।
HEB 5:12 वास्तव म, अब तक तुमन ला गुरू जरूर बन जाना रिहिस, पर अभी घलो ये बात के जरूरत हवय कि कोनो तुमन ला फेर परमेसर के बचन के सुरू के बातमन ला सिखोवय। ठोस भोजन के बदले, तुमन ला अभी घलो दूध के जरूरत हवय।
HEB 5:13 जऊन ह दूध पीके जीथे, ओला धरमीपन के पहिचान नइं रहय, काबरकि ओह अभी तक लइका हवय।
HEB 5:14 पर ठोस भोजन ह सियाना मनखेमन बर अय, जऊन मन लगातार अभियास के दुवारा भलई अऊ बुरई के पहिचान करे म, अपनआप ला पक्का कर ले हवंय।
HEB 6:1 एकरसेति आवव, मसीह के बारे म जऊन सुरू के सिकछा ए, ओला छोंड़के हमन ओकर सिकछा म सियान होवत जावन। हमन ये बातमन के नीव फेर झन रखन—जइसने कि ओ काम ले पछतावा करई, जऊन ह हमन ला मिरतू कोति ले जाथे, परमेसर के ऊपर बिसवास करई,
HEB 6:2 बतिसमा, हांथ रखई, मरे मनखेमन के जी उठई अऊ सदाकाल के नियाय के बारे निरदेस।
HEB 6:3 अऊ कहूं परमेसर के अनुमति होही, त हमन ये काम घलो करबो।
HEB 6:4 जऊन मन एक बार परमेसर के अंजोर म आ गे हवंय, स्वरगीय बरदान के सुवाद ला चिख ले हवंय, जऊन मन पबितर आतमा के भागीदार हो गे हवंय,
HEB 6:5 जऊन मन परमेसर के बचन के भलई अऊ अवइया समय के सक्ति ला जान गे हवंय,
HEB 6:6 कहूं ओमन बिसवास ले भटक जावंय, त ओमन ला पछताप करे बर वापिस लाना असंभव ए, काबरकि अपन नुकसान करके, ओमन परमेसर के बेटा ला फेर कुरूस म चघावत हवंय अऊ खुलेआम ओकर ऊपर कलंक लगावथें।
HEB 6:7 परमेसर ह ओ भुइयां ला आसीस देथे, जऊन ह अकसर अपन ऊपर गिरइया बरसात के पानी ला सोंख लेथे अऊ ओमन बर बने फसल उपजाथे, जऊन मन येमा खेती-बारी करथें।
HEB 6:8 पर ओ भुइयां, जऊन ह कांटा अऊ कंटिली झाड़ी उपजाथे, ओह बेकार ए, अऊ ओकर ऊपर परमेसर ले सराप पाय के खतरा हवय। आखिरी म, येह आगी म बारे जाही।
HEB 6:9 मयारू संगवारी हो, हालाकि हमन अइसने गोठियावत हन, पर हमन ला तुम्हर बारे म अऊ बने बातमन के भरोसा हवय, जेमन के संबंध उद्धार से हवय।
HEB 6:10 परमेसर ह अनियायी नो हय; ओह तुम्हर काम ला नइं भुलावय, अऊ ओ मया ला नइं भुलावय, जऊन ला तुमन ओकर मनखेमन के मदद करे के दुवारा ओला देखाय हवव अऊ तुमन अभी घलो ओमन के मदद करत हवव।
HEB 6:11 हमन चाहथन कि तुमन ले हर एक झन आखिरी तक अइसनेच उत्साह से मेहनत करते रहय, ताकि तुम्हर आसा ह पक्का होवय।
HEB 6:12 हमन नइं चाहथन कि तुमन आलसी बनव, पर ओमन के नकल करव, जऊन मन बिसवास अऊ धीरज के दुवारा ओ चीज के वारिस बनथें, जेकर वायदा परमेसर ह करे हवय।
HEB 6:13 जब परमेसर ह अब्राहम ले परतिगियां करिस, त ओकर ले बड़े अऊ कोनो नइं रिहिन, जेकर ओह किरिया खा सकय, एकरसेति ओह अपनेच ही किरिया खाके
HEB 6:14 कहिस, “ये बात पक्का अय कि मेंह तोला जरूर आसीस दूहूं अऊ तोर बंस म बहुंत संतान होहीं।”
HEB 6:15 अब्राहम ह धीरज धरके बाट जोहिस; अऊ तब ओह ओ चीजमन ला पाईस, जेकर परतिगियां परमेसर ह करे रिहिस।
HEB 6:16 मनखेमन अपन ले कोनो बड़े के कसम खाथें, अऊ कसम ह कहे गे बात ला पक्का करथे अऊ जम्मो बिवाद के निपटारा करथे।
HEB 6:17 काबरकि परमेसर ह अपन परतिगियां के वारिसमन ला, ये साफ-साफ बता दे बर चाहिस कि ओकर उदेस्य ह कभू नइं बदलय; एकरसेति ओह कसम खाय के दुवारा येला पक्का करिस।
HEB 6:18 परमेसर ह ये करिस, ताकि नइं बदलइया दू ठन बात के जरिये परमेसर ला लबरा साबित करना असंभव होवय, अऊ हमन ला, जऊन मन कि सरन पाय बर भागे हवन, बहुंते उत्साह मिलय, अऊ हमन ओ आसा ला पा सकन, जऊन ला हमर आघू म रखे गे हवय।
HEB 6:19 हमर करा ये आसा ह हमर जीव बर पानी जहाज के एक लंगर सहीं अय—मजबूत अऊ सुरकछित। येह पबितर-स्थान के भीतरी भाग म जाथे, जऊन ह परदा के पाछू म हवय,
HEB 6:20 जिहां यीसू ह हमर ले पहिली, हमर कोति ले गे हवय। ओह मलकिसिदक के सहीं सदाकाल बर एक महा पुरोहित बन गे हवय।
HEB 7:1 ये मलकिसिदक सालेम के राजा अऊ सर्वोच्च परमेसर के पुरोहित रिहिस। जब अब्राहम ह राजामन ला हराके लहुंटत रिहिस, त ओह अब्राहम ले भेंट करिस अऊ ओला आसीस दीस,
HEB 7:2 अऊ अब्राहम ह ओला हर एक चीज के दसवां भाग दीस। मलकिसिदक नांव के पहिली मतलब होथे “धरमीपन के राजा” तब ये नांव के मतलब “सालेम के राजा” याने कि “सांति के राजा” घलो होथे।
HEB 7:3 मलकिसिदक के दाई या ददा या ओकर पुरखा के कोनो पता नइं ए। ओकर जनम अऊ ओकर जिनगी के अन्त के घलो कोनो लेखा नइं ए। ओह परमेसर के बेटा के सहीं सदाकाल बर एक पुरोहित अय।
HEB 7:4 तुमन सोचव कि ओह कतेक महान रिहिस: अऊ त अऊ कुल के मुखिया अब्राहम ह ओला लड़ई म लूटे गय माल के दसवां भाग दीस।
HEB 7:5 लेवी के बंस म ले जऊन मन पुरोहित बनथें, ओमन ला मूसा के कानून ह हुकूम देथे कि ओमन मनखेमन ले दसवां भाग जमा करंय, अऊ ये मनखेमन ओमन के भाई अंय, हालाकि ये भाईमन घलो अब्राहम के बंस अंय।
HEB 7:6 पर मलकिसिदक ह लेवी के बंस के नइं रिहिस, तभो ले ओह अब्राहम ले दसवां भाग लीस अऊ ओला आसीस दीस, जेकर करा परमेसर के परतिगियां रिहिस।
HEB 7:7 अऊ ये बात म कोनो संदेह नइं ए कि छोटे मनखे ह बड़े मनखे ले आसीस पाथे।
HEB 7:8 पुरोहितमन के मामला म, दसवां भाग ओ मनखेमन के दुवारा लिये जाथे, जऊन मन मर जाथें, पर मलकिसिदक के मामला म, दसवां भाग ओकर दुवारा लिये गीस, जेकर बारे म ये गवाही दे गे हवय कि ओह जीयथे।
HEB 7:9 त हमन ये कह सकथन कि लेवी जऊन ह दसवां भाग लेथे, ओह अब्राहम के जरिये दसवां भाग दीस।
HEB 7:10 काबरकि जब मलकिसिदक ह अब्राहम ले मिलिस, त ओ समय लेवी ह अपन पुरखा अब्राहम के सरीर म ही रिहिस।
HEB 7:11 यदि लेवीमन के पुरोहित पद के जरिये सिद्धता मिलतिस—अऊ वास्तव म ओ पुरोहित पद ला बनाय रखे बर मनखेमन ला कानून दिये गीस—त फेर एकर का जरूरत रिहिस कि एक आने पुरोहित ह हारून के जाति म ले नइं, पर मलकिसिदक के जाति म ले आवय?
HEB 7:12 काबरकि जब पुरोहित पद ह बदले जाथे, तब मूसा के कानून घलो बदलना जरूरी ए।
HEB 7:13 हमर परभू जेकर बारे म ये जम्मो बात कहे जाथे, ओह एक आने गोत्र के अय अऊ ओ गोत्र म ले, कोनो अभी तक बेदी म पुरोहित के रूप म सेवा नइं करे हवंय।
HEB 7:14 काबरकि ये बात ह साफ ए कि हमर परभू ह यहूदा के गोत्र म ले आईस अऊ ये गोत्र के बिसय म मूसा ह पुरोहित पद के कुछू चरचा नइं करे हवय।
HEB 7:15 अऊ जऊन बात हमन कहे हवन, ओह अऊ साफ हवय कि मलकिसिदक के सहीं एक आने पुरोहित परगट होईस,
HEB 7:16 जऊन ह अपन पुरखामन के नियम के आधार म पुरोहित नइं बनिस, पर ओह अमर जिनगी के सामर्थ के आधार म पुरोहित बनिस।
HEB 7:17 काबरकि ओकर बारे म ये कहे गे हवय: “तेंह मलकिसिदक के सहीं सदाकाल बर एक पुरोहित अस।”
HEB 7:18 पहिली के नियम ला अलग कर दिये गीस, काबरकि येह कमजोर अऊ बेकार रिहिस।
HEB 7:19 (काबरकि मूसा के कानून ह कोनो भी चीज ला सिद्ध नइं बनाईस), अऊ अब एक उत्तम आसा दिये गे हवय, जेकर दुवारा हमन परमेसर के लकठा म जाथन।
HEB 7:20 अऊ येह बिगर कसम खाय नइं होईस! आने मन बिगर कोनो कसम के पुरोहित बनिन,
HEB 7:21 पर ओह एक कसम के संग पुरोहित बनिस, जब परमेसर ह ओला कहिस: “परभू ह कसम खाईस अऊ ओह अपन मन ला नइं बदलय: ‘तेंह सदाकाल बर एक पुरोहित अस।’ ”
HEB 7:22 ये कसम के कारन, यीसू ह अऊ बने करार के जमानतदार हो गीस।
HEB 7:23 पहिली बहुंत पुरोहितमन रिहिन, पर ओमन अपन सेवा ला पूरा नइं कर सकिन काबरकि ओमन मर गीन;
HEB 7:24 पर यीसू ह सदाकाल बर जीयथे; ओकर पुरोहित पद ह सदाकाल बर ए।
HEB 7:25 एकरसेति, ओह ओमन के पूरा उद्धार कर सकथे, जऊन मन ओकर जरिये परमेसर करा आथें, काबरकि ओह ओमन खातिर बिनती करे बर हमेसा जीयत हवय।
HEB 7:26 अइसने महा पुरोहित ह हमर जरूरत ला पूरा करथे, जऊन ह पबितर, निरदोस अऊ सुध ए; ओह पापीमन ले अलग करे गे हवय अऊ स्वरगमन ले ऊंचा उठाय गे हवय।
HEB 7:27 आने महा पुरोहितमन सहीं, ओला दिन-प्रतिदिन पहिली अपन खुद के पाप खातिर अऊ तब मनखेमन के पाप खातिर बलिदान चघाय के जरूरत नइं ए। ओह अपनआप ला ओमन के पाप बर बलिदान चघाके, ये काम ला सदाकाल बर एकेच बार म पूरा कर दीस।
HEB 7:28 काबरकि मूसा के कानून ह ओ मनखेमन ला महा पुरोहित के रूप म ठहिराथे, जऊन मन सिद्ध नो हंय; पर परमेसर के कसम, जऊन ह मूसा के कानून के बाद आईस, ओ बेटा ला ठहिराईस, जऊन ह सदाकाल के खातिर सिद्ध बनाय गे हवय।
HEB 8:1 हमर कहे के सार बात ये अय: हमर करा एक अइसने महा पुरोहित हवय, जऊन ह स्वरग म महामहिम परमेसर के सिंघासन के जेवनी हांथ कोति जा बईठिस,
HEB 8:2 अऊ ओह ओ पबितर-स्थान म सेवा करथे, जऊन ह सही के पबितर-तम्बू ए अऊ येह मनखे के दुवारा नइं, पर परभू के दुवारा खड़े करे गे हवय।
HEB 8:3 हर एक महा पुरोहित ह भेंट अऊ बलिदान चघाय बर ठहिराय जाथे, एकरसेति ये महा पुरोहित बर घलो जरूरी रिहिस कि ओकर करा चघाय बर कुछू रहय।
HEB 8:4 यदि ओह धरती म होतिस, त ओह एक पुरोहित नइं होतिस, काबरकि मूसा के कानून के मुताबिक भेंट चघाय बर पहिले से पुरोहितमन हवंय।
HEB 8:5 जऊन सेवा ओमन पुरोहित के रूप म पबितर-स्थान म करथें, ओह ओकर एक नकल अऊ छइहां ए, जऊन ह स्वरग म हवय। एकरसेति जब मूसा ह पबितर-तम्बू ला बनइया रिहिस, त ओला ये चेतउनी मिले रिहिस: “धियान रहय कि जऊन नमूना तोला पहाड़ ऊपर देखाय गीस, ओकरे मुताबिक ही तेंह हर एक चीज ला बनाबे।”
HEB 8:6 पर जऊन सेवकई यीसू ला मिले हवय, ओह अऊ उत्तम अय, जइसने कि ओ करार जेकर मध्यस्थ यीसू अय, जुन्ना करार ले अऊ उत्तम अय, काबरकि येह अऊ उत्तम परतिगियां ऊपर अधारित हवय।
HEB 8:7 यदि पहिली करार म कुछू गलती नइं होतिस, त दूसर करार के जरूरत नइं होतिस।
HEB 8:8 पर परमेसर ह मनखेमन ला दोसी पाईस अऊ कहिस: “ओ दिनमन आवत हें, परभू ह घोसना करत हे, जब मेंह इसरायल के मनखेमन संग अऊ यहूदा के मनखेमन संग एक नवां करार करहूं।
HEB 8:9 येह ओ करार सहीं नइं होही, जेला मेंह ओमन के पुरखामन संग करे रहेंव, जब मेंह ओमन के हांथ धरके ओमन ला मिसर देस ले निकाल लानेंव, काबरकि ओमन मोर करार के पालन नइं करिन, एकर खातिर मेंह ओमन के खियाल नइं रखेंव, परभू ह घोसना करत हे।
HEB 8:10 ओ समय के बाद, मेंह इसरायल के मनखेमन संग ये करार करहूं, परभू ह घोसना करत हे। मेंह अपन कानून ला ओमन के मन म डालहूं अऊ ओमन ला ओमन के हिरदय म लिखहूं। मेंह ओमन के परमेसर होहूं अऊ ओमन मोर मनखे होहीं।
HEB 8:11 ओमन अपन परोसी ला फेर ये कभू नइं सिखोहीं, या एक-दूसर ला ये नइं कहिहीं, ‘परभू ला जानव,’ काबरकि छोटे ले लेके बड़े तक, ओ जम्मो झन मोला जानहीं।
HEB 8:12 काबरकि मेंह ओमन के अधरम ला छेमा करहूं, अऊ ओमन के पाप ला फेर सुरता नइं करहूं।”
HEB 8:13 ये करार ला “नवां करार” कहे के दुवारा, परमेसर ह पहिली के करार ला बिगर काम के ठहिराईस; अऊ जऊन चीज ह बिगर काम के अऊ जुन्ना हो जाथे, ओह जल्दी लोप हो जाही।
HEB 9:1 पहिली करार म, अराधना के नियम रिहिस अऊ अराधना के एक संसारिक पबितर-स्थान घलो रिहिस, जऊन ह ये धरती म रिहिस।
HEB 9:2 एक पबितर-तम्बू बनाय गीस। एकर पहिली कमरा म दीवट, मेज अऊ परमेसर ला चघाय गे रोटी रहय; येला पबितर स्थान कहे जावय।
HEB 9:3 दूसरा परदा के पाछू एक ठन कमरा रहय, जऊन ला महा पबितर स्थान कहे जावय,
HEB 9:4 उहां धूप जलाय बर सोन के बेदी अऊ सोन ले मढ़े गय करार के सन्दूक रहय। ये सन्दूक म मन्ना ले भरे सोन के कटोरा, हारून के लउठी, जऊन म पीका आ गे रहय अऊ ओमा करार के पथरा के पटियामन घलो रहंय।
HEB 9:5 सन्दूक के ऊपर म महिमा के करूबमन रहंय, जेमन पछताप के ढपना ला छइहां करे रहंय। पर हमन अभी ये जम्मो बातमन के चरचा नइं कर सकन।
HEB 9:6 ये किसम ले, जब हर एक चीजमन ला रखे जा चुकिस, त पुरोहितमन बाहिर के कमरा म जावंय अऊ अपन सेवा ला करंय।
HEB 9:7 पर सिरिप महा पुरोहित ह भीतर के कमरा म जावय अऊ ओ घलो साल म सिरिप एक बार खून लेके उहां जावय अऊ ओ खून ला, ओह खुद के अऊ मनखेमन के ओ पाप के खातिर परमेसर ला चघावय, जऊन ला ओमन बिगर जाने करे रहंय।
HEB 9:8 एकर दुवारा पबितर आतमा ह ये बतावत रिहिस कि जब तक पहिली पबितर-तम्बू ह खड़े रिहिस, तब तक महा पबितर स्थान के रसता ह नइं खोले गे रिहिस।
HEB 9:9 येह आज के समय बर एक नमूना ए, जऊन ह ये बताथे कि जऊन भेंट अऊ बलिदानमन चघाय जावत रिहिन, ओमन अराधना करइयामन के बिबेक ला साफ नइं कर सकंय।
HEB 9:10 ओमन सिरिप खाय-पीये के चीज अऊ नाना किसम के सुध होय के रीति-रिवाज अंय। येमन बाहिरी नियम अंय, जऊन ह नवां हुकूम के आवत तक लागू रहिथे।
HEB 9:11 जब मसीह ह बने चीजमन के महा पुरोहित के रूप म आईस, जऊन मन पहिली ले इहां हवंय, त ओह अऊ बड़े अऊ जादा सिद्ध पबितर-तम्बू म ले होके गीस, जऊन ह मनखे के बनाय नो हय, याने कि ओ तम्बू ह ये संसार के नो हय।
HEB 9:12 ओह महा पबितर स्थान म बोकरा अऊ बछवामन के लहू के संग नइं गीस, पर ओह उहां जम्मो के सेति एकेच बार अपन खुद के लहू के दुवारा गीस अऊ हमर बर सदाकाल के छुटकारा लानिस।
HEB 9:13 बोकरा अऊ बईलामन के लहू अऊ जरे बछवा के राख ला, ओमन के ऊपर छिंचे जाथे, जऊन मन रिवाज के मुताबिक असुध रहिथें। येह ओमन ला पबितर करथे अऊ ओमन बाहिरी रूप ले सुध हो जाथें।
HEB 9:14 तब मसीह, जऊन ह निरदोस रिहिस, सदाकाल के आतमा के जरिये अपनआप ला परमेसर ला भेंट चघा दीस। ओकर लहू ह हमर बिबेक ला बेकार के काममन ले बहुंत जादा सुध करथे, ताकि हमन जीयत परमेसर के सेवा कर सकन!
HEB 9:15 एकरे खातिर मसीह ह एक नवां करार के मध्यस्थ ए, ताकि जऊन मन बलाय गे हवंय, ओमन ओ सदाकाल के वारिस बन जावंय, जेकर वायदा परमेसर ह करे हवय। अब मसीह अपन मिरतू के दुवारा एक छुड़ौती के कीमत दीस, ताकि ओह ओमन ला छोंड़ा सकय, जऊन मन पहिली करार के समय पाप करे रिहिन।
HEB 9:16 जब कोनो वसीयत लिखथे अऊ मर जाथे, तब ओकर वारिस बर येह जरूरी ए कि ओह वसीयत करइया के मिरतू ला साबित करय।
HEB 9:17 काबरकि वसीयत ह तभे लागू होथे, जब वसीयत करइया ह मर जाथे। जब तक कि ओह जीयत हवय, तब तक वसीयत के कोनो मतलब नइं रहय।
HEB 9:18 एकरे कारन, पहिली करार ह घलो बिगर लहू के परभावी नइं रिहिस।
HEB 9:19 जब मूसा ह जम्मो मनखेमन ला कानून म बताय जम्मो हुकूम ला पढ़के सुना चुकिस, तब ओह पानी के संग बछवामन के लहू, सिन्दूरी लाल रंग के ऊन अऊ जूफा के डारा लीस अऊ ये चीजमन ला कानून के किताब अऊ जम्मो मनखेमन ऊपर छिंचिस,
HEB 9:20 अऊ ओह कहिस, “येह ओ करार के लहू ए, जऊन ला पालन करे के हुकूम, परमेसर ह तुमन ला देय हवय।”
HEB 9:21 एहीच किसम ले, मूसा ह पबितर-तम्बू अऊ येकर संस्कार म उपयोग होवइया जम्मो चीज ऊपर लहू छिंचिस।
HEB 9:22 वास्तव म, मूसा के कानून के मुताबिक लगभग हर एक चीज लहू के दुवारा सुध करे जाथे अऊ बिगर लहू बोहाय पाप के छेमा नइं होवय।
HEB 9:23 तब येह जरूरी रिहिस कि स्वरगीय चीजमन के नकल ह ये बलिदानमन के दुवारा सुध करे जावय, पर स्वरग के चीजमन खुद एकर ले अऊ बने बलिदान के दुवारा सुध करे जाथें।
HEB 9:24 काबरकि मसीह ह मनखे के बनाय ओ पबितर-स्थान म नइं गीस, जऊन ह सही के पबितर-स्थान के नमूना रिहिस, पर ओह स्वरग म गीस कि अब हमर बर, ओह परमेसर के आघू म परगट होवय।
HEB 9:25 मसीह ह स्वरग म अपनआप ला बार-बार भेंट चघाय बर नइं गीस, जइसने महा पुरोहित ह हर साल महा पबितर स्थान म ओ लहू लेके जाथे, जऊन ह ओकर खुद के नो हय।
HEB 9:26 नइं तो जब ले संसार ह रचे गे हवय, तब ले अब तक, मसीह ला कतको बार दुख उठाना पड़तिस। पर अब ओह ये जुग के आखिरी म, जम्मो के सेति एकेच बार परगट होईस, ताकि अपन खुद के बलिदान के दुवारा पाप ला दूर करय।
HEB 9:27 जइसने मनखे के एक बार मरई अऊ ओकर बाद ओकर नियाय होवई तय हवय,
HEB 9:28 ओहीच किसम ले, मसीह घलो अपनआप ला एक बार बलिदान कर दीस कि ओह बहुंते मनखे के पाप ला दूर करय; अऊ ओह दूसर बार परगट होही, पर पाप के भार उठाय बर नइं, पर ओमन के उद्धार करे बर, जऊन मन ओकर बाट जोहत हवंय।
HEB 10:1 मूसा के कानून ह अवइया बने चीजमन के सिरिप एक छइहां ए। येमन अपनआप म सही के चीज नो हंय। कानून के मुताबिक, एकेच किसम के बलिदान नियमित रूप ले हर साल चघाय जाथे, अऊ येह ओमन ला कभू सिद्ध नइं कर सकय, जऊन मन अराधना करे बर आथें।
HEB 10:2 यदि ये बलिदानमन के दुवारा मनखेमन सिद्ध हो जातिन, त ओमन के बलिदान चघई बंद हो जातिस। काबरकि अराधना करइयामन जम्मो के सेति एकेच बार म सुध हो जातिन अऊ ओमन अपन पाप के दोसी नइं होतिन।
HEB 10:3 पर ओ बलिदानमन हर साल ओमन के पाप के सुरता कराथें।
HEB 10:4 काबरकि बईला अऊ बोकरामन के लहू ह पाप ला कभू दूरिहा नइं कर सकय।
HEB 10:5 एकरसेति, जब मसीह ह संसार म आईस, त ओह कहिस: “बलिदान अऊ भेंट तेंह नइं चाहय, पर तेंह एक ठन देहें, मोर बर तियार करय;
HEB 10:6 तेंह होम-बलिदान अऊ पाप-बलिदान चघाय ले खुस नइं होवय।
HEB 10:7 तब मेंह कहेंव, ‘मेंह इहां हंव—जइसने पबितर बचन म मोर बारे म लिखे हवय— हे मोर परमेसर, मेंह तोर ईछा ला पूरा करे बर आय हवंव।’ ”
HEB 10:8 पहिली मसीह ह कहिस, “न तो तेंह बलिदान अऊ भेंट, होम-बलिदान अऊ पाप-बलिदान ला चाहय, अऊ न ही ओमन ले खुस होवय,” हालाकि ये जम्मो बलिदान, मूसा के कानून के मुताबिक चघाय जाथें।
HEB 10:9 तब ओह कहिस, “मेंह इहां हंव, मेंह तोर ईछा ला पूरा करे बर आय हवंव।” ओह पहिली के बात ला छोंड़ देथे ताकि दूसर बात ला स्थापित करय।
HEB 10:10 अऊ ओहीच ईछा के दुवारा हमन यीसू मसीह के देहें के बलिदान के जरिये पबितर करे गे हवन अऊ ये बलिदान ह जम्मो के सेति एकेच बार करे गीस।
HEB 10:11 हर एक पुरोहित ह दिन-प्रतिदिन ठाढ़ होके अपन धारमिक सेवा ला करथे। ओह बार-बार ओहीच बलिदान ला चघाथे, जऊन ह पाप ला कभू दूरिहा नइं कर सकय।
HEB 10:12 पर मसीह ह पाप के खातिर एकेच बलिदान सदाकाल के सेति चघाईस अऊ ओह परमेसर के जेवनी हांथ कोति जा बईठिस।
HEB 10:13 ओहीच बेरा ले, ओह इंतजार करथे कि परमेसर ह ओकर बईरीमन ला ओकर गोड़ रखे के चउकी बना देवय।
HEB 10:14 काबरकि एकेच बलिदान के दुवारा, ओह ओमन ला सदाकाल बर सिद्ध कर दे हवय, जऊन मन पाप ले पबितर करे जावत हें।
HEB 10:15 पबितर आतमा घलो हमन ला एकर बारे म गवाही देथे। पहिली ओह कहिथे:
HEB 10:16 “परभू ह कहिथे कि ओ समय के बाद मेंह ओमन के संग ये करार करहूं, मेंह अपन कानून ला ओमन के हिरदय म धरहूं अऊ मेंह ओमन ला ओमन के मन म लिखहूं।”
HEB 10:17 तब ओह ये घलो कहिथे: “ओमन के पाप अऊ अधरम के काम ला मेंह फेर सुरता नइं करहूं।”
HEB 10:18 अऊ जब एकर छेमा हो गे हवय, त फेर पाप खातिर अऊ कोनो बलिदान के जरूरत नइं ए।
HEB 10:19 एकरसेति, हे भाईमन हो, जब हमन ला भरोसा हवय कि यीसू के लहू के दुवारा हमन महा पबितर स्थान म जाबो,
HEB 10:20 ओह हमर बर एक नवां अऊ जीयत रसता खोलिस, जऊन ह ओ परदा म ले होके जाथे, जऊन ह ओकर देहें अय,
HEB 10:21 अऊ जब हमर करा एक बड़े पुरोहित हवय, जेकर ऊपर परमेसर के घर के जिम्मा हवय,
HEB 10:22 त आवव, हमन परमेसर के लकठा म साफ हिरदय अऊ पूरा बिसवास के संग जावन। एक अइसने हिरदय, जऊन म पाप भावना नइं ए अऊ अइसने देहें, जऊन ह सुध पानी म धोय गे हवय।
HEB 10:23 आवव, हमन ओ आसा ला मजबूती ले धरे रहन, जऊन ला हमन स्वीकार करथन, काबरकि जऊन ह वायदा करे हवय, ओह बिसवासयोग्य अय।
HEB 10:24 अऊ आवव, हमन ये बिचार करन कि कइसने हमन एक-दूसर ला मया म अऊ बने काम म उत्साहित कर सकथन।
HEB 10:25 आवव, हमन एक-दूसर के संग मिले बर नइं छोंड़न, जइसने कि कुछू झन के ये आदत बन गे हवय, पर आवव, हमन एक-दूसर ला अऊ जादा उत्साहित करन, जइसने कि तुमन देखत हवव कि परभू के दिन ह लकठा आवत हवय।
HEB 10:26 सत के गियान ला पाय के बाद, कहूं हमन जानबूझके पाप करते रहिथन, त फेर कोनो घलो बलिदान हमर पाप ला दूरिहा नइं कर सकय,
HEB 10:27 पर सिरिप नियाय के एक भयानक बाट जोहई अऊ भयंकर आगी ह बांचही, जऊन ह परमेसर के बिरोधीमन ला जलाके भसम कर दीही।
HEB 10:28 जऊन कोनो मूसा के कानून ला नइं मानिस, ओह बिगर दया के दू या तीन मनखे के गवाही ले मारे गीस।
HEB 10:29 त तुमन सोचव कि ओ मनखे ह कतेक कठोर सजा के भागी ए, जऊन ह परमेसर के बेटा ला गोड़ खाल्हे कुचरे हवय अऊ करार के ओ लहू ला तुछ जाने हवय, जेकर दुवारा ओह पबितर करे गे रिहिस, अऊ जऊन ह अनुग्रह के आतमा के बेजत्ती करे हवय।
HEB 10:30 काबरकि हमन ओला जानथन, जऊन ह ये कहिस, “बदला लेवई मोर काम ए; मेंह बदला लूहूं” अऊ ओह फेर ये कहिस, “परभू ह अपन मनखेमन के नियाय करही।”
HEB 10:31 जीयत परमेसर के हांथ म पड़ई बहुंत भयानक बात ए।
HEB 10:32 सुरू के ओ दिनमन ला सुरता करव, परमेसर के अंजोर ला पाय के बाद, जब तुमन कतको दुख सहत घलो स्थिर रहेव।
HEB 10:33 कभू तुम्हर खुलेआम बेजत्ती करे गीस अऊ तुमन ला सताय गीस, त कभू तुमन हर किसम ले ओमन के मदद करेव, जऊन मन के संग ये किसम के गलत बरताव करे जावत रिहिस।
HEB 10:34 तुमन कैदीमन बर सहानुभूति रखेव अऊ जब तुम्हर धन-संपत्ति ला लूटे गीस, त तुमन येला आनंद के संग स्वीकार करेव, काबरकि तुमन जानत रहेव कि तुम्हर करा एकर ले घलो उत्तम अऊ सदा बने रहइया संपत्ति हवय।
HEB 10:35 एकरसेति अपन भरोसा ला झन छोंड़व, काबरकि तुमन ला एकर एक बड़े ईनाम मिलही।
HEB 10:36 तुमन ला धीरज धरई जरूरी ए, ताकि जब तुमन परमेसर के ईछा ला पूरा कर लेवव, त तुमन ला ओ ईनाम मिलय, जेकर वायदा परमेसर ह तुम्हर ले करे हवय।
HEB 10:37 काबरकि परमेसर के बचन ह कहिथे, “अब बहुंते कम समय बचे हवय; जऊन ह अवइया हवय, ओह आही अऊ ओह देरी नइं करय।”
HEB 10:38 अऊ, “पर मोर धरमी मनखे ह बिसवास के दुवारा जीयत रहिही। अऊ कहूं ओह पाछू हटथे, त मेंह ओकर ले खुस नइं होवंव।”
HEB 10:39 पर हमन ओ मनखे नो हन, जऊन मन पाछू हट जाथें अऊ नास हो जाथें, पर हमन ओ मनखे अन, जऊन मन बिसवास करथें अऊ बचाय जाथें।
HEB 11:1 बिसवास करे के मतलब ये अय कि ओ बात ह निस्चय होही, जेकर आसा हमन करथन अऊ बिसवास करे के मतलब ओ बात के निस्चयता घलो अय, जऊन ला हमन नइं देखन।
HEB 11:2 बिसवास के कारन ही पुराना जमाना के मनखेमन के परमेसर ह परसंसा करिस।
HEB 11:3 बिसवास के दुवारा, हमन जानथन कि जम्मो संसार ह परमेसर के हुकूम ले सिरजे गीस, अऊ जऊन चीज ह दिखथे, ओह दिखत चीज ले बनाय नइं गीस।
HEB 11:4 बिसवास के दुवारा, हाबिल ह कैन ले उत्तम बलिदान परमेसर ला चघाईस। बिसवास के दुवारा, हाबिल ह एक धरमी मनखे समझे गीस, काबरकि परमेसर ह ओकर भेंट के बारे म बने बात कहिस। अऊ बिसवास के दुवारा, ओह अभी घलो गोठियाथे, हालाकि ओह मर गे हवय।
HEB 11:5 बिसवास के दुवारा, हनोक ह उठा लिये गीस, जेकर ले ओला मिरतू के अनुभव नइं होईस: “ओह फेर कोनो ला नइं दिखिस, काबरकि परमेसर ह ओला उठा लीस।” हनोक के उठाय जाय के पहिली, ओकर बारे म, ये कहे गे रिहिस कि ओह परमेसर ला खुस करिस।
HEB 11:6 बिगर बिसवास के परमेसर ला खुस करई असंभव ए, काबरकि जऊन ह परमेसर करा आथे, ओला ये बिसवास करना जरूरी ए कि परमेसर हवय अऊ ओह ओमन ला ईनाम देथे, जऊन मन सही मन ले ओला खोजथें।
HEB 11:7 जब परमेसर ह नूह ला ओ बातमन के बारे म चेतउनी दीस, जऊन मन ओ समय नइं दिखत रिहिन, त बिसवास के दुवारा, परमेसर के पबितर भय म, नूह ह अपन परिवार ला बचाय बर पानी जहाज बनाईस। अपन बिसवास के दुवारा, ओह संसार ला दोसी ठहिराईस अऊ ओ धरमीपन के वारिस बन गीस, जऊन ह बिसवास के दुवारा होथे।
HEB 11:8 जब परमेसर ह अब्राहम ला एक ठन जगह ला जाय बर कहिस, जऊन ला ओह बाद म वारिस के रूप म पवइया रिहिस, त बिसवास के दुवारा, अब्राहम ह परमेसर के बात ला मानिस अऊ चल दीस, हालाकि ओला ये बात मालूम नइं रिहिस कि ओह कहां जावत रिहिस।
HEB 11:9 बिसवास के दुवारा, ओह परतिगियां के भुइयां म अपन घर बनाईस अऊ एक अजनबी के सहीं, ओह एक आने देस म रिहिस। ओह तम्बूमन म रहय अऊ वइसने इसहाक अऊ याकूब घलो करिन, जऊन मन अब्राहम के संग ओहीच परतिगियां के वारिस रिहिन।
HEB 11:10 काबरकि अब्राहम ह ओ सहर के बाट जोहत रिहिस, जेकर नीव हवय अऊ जेकर नक्सा बनइया अऊ गढ़इया परमेसर ए।
HEB 11:11 हालाकि सारा ह लइका जनमाय के उमर ला पार कर ले रिहिस, पर बिसवास के दुवारा, ओह लइका जनमाईस, काबरकि ओह परमेसर ला बिसवासयोग्य जानिस, जऊन ह येकर वायदा करे रिहिस।
HEB 11:12 अऊ ये किसम ले, ये एक झन ले, जऊन ह मुरदा सहीं रिहिस, अतेक संतान होईन कि ओमन अकास के तारामन अऊ समुंदर तीर के बालू सहीं अनगिनत हो गीन।
HEB 11:13 ये जम्मो मनखे बिसवास म रहत मर गीन। ओमन ओ चीजमन ला नइं पाईन, जेकर वायदा परमेसर ह ओमन ले करे रिहिस, पर ओमन ओ चीजमन ला सिरिप देखिन अऊ दूरिहा ले ओमन के सुवागत करिन। अऊ ओमन ये बात ला मान लीन कि ओमन ये धरती म परदेसी अऊ अजनबी रिहिन।
HEB 11:14 जऊन मनखेमन अइसने बात कहिथें, ओमन ये परगट करथें कि ओमन अपन खुद के एक देस के खोज म हवंय।
HEB 11:15 यदि ओमन ओ देस के बारे म सोचे होतिन, जऊन ला छोंड़के ओमन आ गे रिहिन, त ओमन करा वापिस जाय के मऊका रिहिस।
HEB 11:16 पर ओमन एक उत्तम देस, याने कि स्वरगीय देस के खोज म रिहिन। एकरसेति परमेसर ह नइं लजावय, जब ओमन ओला अपन परमेसर कहिथें काबरकि ओह ओमन बर एक सहर तियार करे हवय।
HEB 11:17 जब परमेसर ह अब्राहम ला परखिस, त बिसवास के दुवारा, अब्राहम ह इसहाक ला बलिदान के रूप म चघाईस। अब्राहम ह ओ मनखे रिहिस, जऊन ह परमेसर ले परतिगियां पाय रिहिस, पर ओह अपन एकलऊता बेटा ला बलिदान चघाय बर तियार रिहिस,
HEB 11:18 हालाकि परमेसर ह ओला ये कहे रिहिस, “इसहाक के जरिये तोर बंस ह चलही।”
HEB 11:19 अब्राहम ह बिसवास करिस कि परमेसर ह मरे मनखे ला जियाय सकथे। हमन एक रीति म कह सकथन कि अब्राहम ह इसहाक ला मिरतू म ले फेर पा गीस।
HEB 11:20 बिसवास के दुवारा, इसहाक ह याकूब अऊ एसाव ला ओमन के भविस्य बर आसीस दीस।
HEB 11:21 बिसवास के दुवारा, याकूब ह अपन मरत समय यूसुफ के दूनों बेटा ला आसीस दीस, अऊ अपन लउठी के मुठ के ऊपर निहरके परमेसर के अराधना करिस।
HEB 11:22 जब यूसुफ ह मरइया रिहिस, त बिसवास ही के दुवारा, ओह इसरायलीमन के बारे म कहिस कि ओमन मिसर देस के गुलामी से निकल जाहीं अऊ ये हुकूम घलो दीस कि ओकर मरे के बाद, ओकर हाड़ामन के का करे जावय।
HEB 11:23 जब मूसा ह जनमिस, त बिसवास के दुवारा, ओकर दाई-ददा ओला तीन महिना तक छुपाय रखिन, काबरकि ओमन देखिन कि लइका ह सुघर हवय अऊ ओमन राजा के हुकूम ले नइं डर्राईन।
HEB 11:24 जब मूसा ह बड़े हो गीस, त बिसवास के दुवारा ही, ओह फिरौन राजा के बेटी के बेटा कहाय बर इनकार करिस।
HEB 11:25 थोरकन दिन पाप के सुख भोगे के बदले, ओह परमेसर के मनखेमन संग दुख भोगई ला बने समझिस।
HEB 11:26 मूसा ह मसीह के हित म कलंकित होवई ला बड़े धन समझिस, एकर बनिस्पत कि मिसर देस के खजाना के उपयोग करई, काबरकि ओह अवइया समय म अपन ईनाम के बाट जोहत रिहिस।
HEB 11:27 बिसवास ही के दुवारा, ओह राजा के कोरोध के चिंता नइं करिस अऊ मिसर देस ला छोंड़ दीस। ओह बिसवास म बने रिहिस, काबरकि ओह ओ परमेसर ला देखिस, जऊन ह नइं दिखय।
HEB 11:28 बिसवास ही के दुवारा, ओह फसह तिहार ला मानिस अऊ कपाटमन म लहू छिंचे के हुकूम दीस ताकि मिरतू के दूत ह इसरायलीमन के पहिलांत बेटामन ला झन मार डारय।
HEB 11:29 बिसवास के दुवारा ही, इसरायली मनखेमन लाल-समुंदर म ले अइसने पार हो गीन, जइसने कि सूखा भुइयां म पार होथें; पर जब मिसर देस के मनखेमन पार होय के कोसिस करिन, त ओ जम्मो झन बुड़ मरिन।
HEB 11:30 बिसवास ही के दुवारा, जब इसरायलीमन सात दिन तक यरीहो के दीवार के चक्कर लगाईन, त ओ दीवार ह गिर गीस।
HEB 11:31 बिसवास ही के कारन, राहाब नांव के बेस्या ह ओमन के संग मारे नइं गीस, जऊन मन परमेसर के हुकूम नइं मानिन। ओह भेदियामन ला छुपाय रखिस।
HEB 11:32 मेंह अऊ का कहंव? गिदोन, बाराक, सिमसोन, यिप्तह, दाऊद, समूएल अऊ अगमजानीमन के बारे म बताय बर, मोर करा समय नइं ए।
HEB 11:33 बिसवास ही के दुवारा, ओमन देसमन ला जीतिन, नियाय के मुताबिक काम करिन अऊ ओ चीज ला पाईन, जेकर वायदा परमेसर ह करे रिहिस। ओमन सिंहमन के मुहूं ला बंद कर दीन,
HEB 11:34 धधकत आगी ला बुझा दीन, अऊ तलवार के मार ले बच निकलिन। ओमन के कमजोरी ह ताकत म बदल गीस। ओमन लड़ई म बीरता देखाईन अऊ बिदेसी सेनामन ला मार भगाईन।
HEB 11:35 माईलोगनमन अपन मरे लोगनमन ला फेर जीयत पा गीन। अनेक बिसवासीमन अब्बड़ दुख अऊ पीरा सहिन, पर ओमन एकर ले छूटे बर नइं चाहिन, ताकि ओमन ला जी उठे के बाद एक उत्तम जिनगी मिलय।
HEB 11:36 कुछू बिसवासीमन के ठट्ठा करे गीस अऊ ओमन ला कोर्रा म मारे गीस, जबकि कतको झन ला संकली म बांधके जेल म डार दिये गीस।
HEB 11:37 ओमन ला पथरवाह करे गीस; ओमन के देहें ला आरी म चीरके दू भाग कर दिये गीस; ओमन तलवार ले मार डारे गीन। ओमन मेढ़ा अऊ बोकरा के चाम के कपड़ा पहिरे एती-ओती मारे-मारे फिरिन; ओमन खंगी म रिहिन अऊ सताय गीन अऊ ओमन के संग गलत बरताव करे गीस।
HEB 11:38 संसार ह ओमन के लईक नइं रिहिस। ओमन उजाड़ जगह अऊ पहाड़ अऊ भुइयां के खोह अऊ गड्ढामन म भटकत फिरिन।
HEB 11:39 ये जम्मो झन अपन बिसवास के कारन परसंसा पाईन, पर ओमा ले कोनो ला ओ चीज नइं मिलिस, जेकर वायदा परमेसर ह करे रिहिस।
HEB 11:40 परमेसर ह हमर खातिर अऊ उत्तम योजना बनाय रिहिस, ताकि ओमन हमर संग ही एक साथ सिद्ध बनाय जावंय।
HEB 12:1 एकरसेति, जब हमर चारों कोति अइसने बहुंते गवाहमन के बड़े दल हवय, त आवव, हमन हर ओ बाधा देवइया चीज अऊ फंसा लेवइया पाप ले दूरिहा रहन अऊ ओ दऊड़ ला मन लगाके दऊड़न, जऊन ह हमर आघू म रखे हवय।
HEB 12:2 आवव, हमन यीसू कोति अपन धियान लगाय रखन, जऊन ह सुरू ले लेके आखिरी तक हमर बिसवास के आधार ए अऊ जऊन ह अपन आघू म रखे आनंद खातिर कुरूस के मिरतू ला सहिस। ओह एकर दुवारा बेजत्ती होय के चिंता नइं करिस अऊ परमेसर के सिंघासन के जेवनी हांथ कोति बईठ गीस।
HEB 12:3 एकरसेति, यीसू ऊपर अपन मन लगावव, जऊन ह पापी मनखेमन ले अइसने बिरोध सहिस, ताकि तुमन निरास झन होवव अऊ हिम्मत झन हारव।
HEB 12:4 पाप के बिरूध लड़ई म, तुमन अभी तक ओ जगह म नइं आय हवव, जिहां तुमन ला अपन खून बहाना पड़े।
HEB 12:5 अऊ का तुमन उत्साह के ओ बचन ला भुला गे हवव, जऊन म परमेसर ह तुमन ला बेटा कहिके संबोधित करथे? येह कहिथे, “हे मोर बेटा, परभू के ताड़ना ला हल्का झन समझ, अऊ जब ओह तोला दबकारथे, त हिम्मत झन हार,
HEB 12:6 काबरकि परभू ह ओकर ताड़ना करथे, जऊन ला ओह मया करथे, अऊ ओह हर ओ मनखे ला दंड देथे, जऊन ला ओह बेटा बना लेथे।”
HEB 12:7 दुख-तकलीफ ला ताड़ना समझके सह लेवव; परमेसर ह तुमन ला अपन बेटा जानके तुम्हर संग बरताव करत हवय। काबरकि का अइसने कोनो बेटा हवय, जेकर ताड़ना ओकर ददा ह नइं करय?
HEB 12:8 हर एक झन के ताड़ना होथे, पर कहूं तुम्हर ताड़ना नइं होईस, त तुमन नजायज संतान अव, अऊ सही के बेटा नो हव।
HEB 12:9 हमन के हर एक के सारीरिक ददा हवंय, जऊन मन हमर ताड़ना करथें अऊ हमन एकर खातिर ओमन के आदर करथन। तब हमन ला हमर आतमा के ददा के अधीन, अऊ जादा रहना चाही ताकि हमन जीयत रहन।
HEB 12:10 हमर ददामन थोरकन समय बर हमर ताड़ना करथें, जइसने ओमन उचित समझथें; पर परमेसर ह हमर भलई बर ताड़ना करथे ताकि हमन ओकर पबितरता म भागीदार होवन।
HEB 12:11 ओतकीच बेरा, कोनो घलो किसम के ताड़ना बने नइं लगय, पर पीरा देथे। पर बाद म, येह ओमन के जिनगी म धरमीपन अऊ सांति के फर लाथे, जऊन मन ये ताड़ना म ले होके गुजर चुके होथें।
HEB 12:12 एकरसेति, अपन कमजोर हांथ अऊ कमजोर माड़ीमन ला मजबूत करव।
HEB 12:13 “अपन गोड़ खातिर डहारमन ला समतल करव,” ताकि खोरवा ह अपंग झन होवय, पर ओह चंगा हो जावय।
HEB 12:14 जम्मो मनखेमन संग सांति ले रहे के पूरा कोसिस करव अऊ पबितर बने बर घलो पूरा कोसिस करव, काबरकि बिगर पबितरता के, कोनो परभू ला नइं देख सकय।
HEB 12:15 एकर ऊपर धियान रखव कि हर एक झन ला परमेसर के अनुग्रह मिलय अऊ ओमन म कोनो किसम के कड़ुवाहट झन पनपे, जऊन ह समस्या खड़े करथे अऊ बहुंते झन ला असुध करथे।
HEB 12:16 एकर घलो धियान रखव कि कोनो छिनारी झन करय या एसाव के सहीं भक्तिहीन झन होवय, जऊन ह एक बखत के जेवन खातिर अपन पहिलांत के अधिकार ला बेच दीस।
HEB 12:17 जइसने कि तुमन जानत हव, बाद म, जब ओह ये आसीस ला पाय चाहिस, त ओला अस्वीकार करे गीस। हालाकि ओह रो-रोके ओ आसीस ला पाय के कोसिस करिस, पर ओकर करा अपन ददा के मन ला बदले के अऊ कोनो आने उपाय नइं रिहिस।
HEB 12:18 तुमन अब तक ओ जगह म नइं आय हवव अऊ अनुभव नइं करे हवव, जइसने इसरायलीमन सीनय पहाड़ म अनुभव करे रिहिन, जिहां आगी बरत रिहिस; अंधियार, धुंधलापन अऊ आंधी-तूफान रिहिस;
HEB 12:19 अऊ जिहां तुरही के अवाज अऊ एक झन के अइसने गोठियाय के अवाज आवत रिहिस, जऊन ला सुनके मनखेमन बिनती करे लगिन कि ओमन ले अऊ कोनो बात झन कहे जावय
HEB 12:20 काबरकि ओमन ओ हुकूम ले घबरा गीन, जेमा ये कहे गे रिहिस, “अऊ त अऊ कहूं कोनो पसु घलो पहाड़ ला छुवय, त ओला पथरवाह करके मार डारे जावय।”
HEB 12:21 ओ दरसन ह अइसने भयानक रिहिस कि मूसा ह कहिस, “मेंह डर के मारे कांपत हवंव।”
HEB 12:22 पर तुमन सियोन पहाड़, जीयत परमेसर के सहर, स्वरगीय यरूसलेम करा आ गे हवव। तुमन हजारों-हजार स्वरगदूतमन के संग आनंद के सभा,
HEB 12:23 अऊ पहिलांतमन के कलीसिया म आय हवव, जेमन के नांव स्वरग म लिखे गे हवय। तुमन परमेसर करा आय हवव, जऊन ह जम्मो मनखेमन के नियाय करथे, अऊ तुमन ओ धरमीमन के आतमामन करा आ गे हवव, जऊन मन सिद्ध बनाय गे हवंय।
HEB 12:24 तुमन यीसू करा आ गे हवव, जऊन ह एक नवां करार के मध्यस्थ ए अऊ तुमन ओ छिड़काय लहू करा आ गे हवव, जऊन ह हाबिल के लहू ले घलो अऊ उत्तम बात कहिथे।
HEB 12:25 ये बात ला धियान देवव कि जऊन ह गोठियाथे, ओकर बात ला सुनव। काबरकि ओ मनखेमन बच नइं सकिन, जऊन मन ओकर बात ला नइं सुनिन, जऊन ह धरती म ओमन ला चेतउनी देवत रिहिस, त फेर हमन कइसने बच सकबो, कहूं हमन ओकर बात ला नइं सुनन, जऊन ह हमन ला स्वरग ले चेतउनी देथे?
HEB 12:26 ओ समय ओकर अवाज ह धरती ला कंपा दीस, पर अब ओह ये वायदा करे हवय, “एक बार फेर, मेंह सिरिप धरती ला ही नइं, पर अकासमन ला घलो हलाहूं।”
HEB 12:27 ये सबद “एक बार फेर” ये बात ला बताथे कि जऊन चीजमन हलाय जा सकथें, ओमन ला हटाय जाही, काबरकि येमन सिरजे गय चीज अंय, ताकि जऊन चीजमन हलाय नइं जा सकंय, ओमन अटल बने रहंय।
HEB 12:28 एकरसेति, जब हमन ला एक अइसने राज मिलत हवय, जऊन ला हलाय नइं जा सकय, त आवव, हमन धनबाद देवन, अऊ आदर अऊ भय के संग परमेसर के अइसने अराधना करन, जेकर ले ओह खुस होवय,
HEB 12:29 काबरकि हमर “परमेसर ह एक भसम करइया आगी अय।”
HEB 13:1 भाईमन सहीं एक-दूसर ले मया करते रहव।
HEB 13:2 अनजान मनखेमन के आव-भगत करे बर झन भूलव, काबरकि अइसने करे के दुवारा कुछू मनखेमन अनजाने म स्वरगदूतमन के आव-भगत करे हवंय।
HEB 13:3 जऊन मन जेल म हवंय, ओमन के खियाल रखव, ये सोचके कि मानो तुमन घलो ओमन संग कैद म हवव, अऊ जऊन मन के संग गलत बरताव करे जाथे, ओमन के घलो खियाल रखव, ये सोचके कि मानो तुमन खुद दुख उठावत हवव।
HEB 13:4 बिहाव ह जम्मो मनखे म आदर के बात समझे जावय। बिहाव के बिछौना ह सुध रहय, काबरकि परमेसर ह ओ जम्मो झन के नियाय करही, जऊन मन बेभिचारी अंय अऊ आने के संग गलत संबंध रखथें।
HEB 13:5 तुमन अपन जिनगी ला रूपिया-पईसा के मोह-मया ले दूर रखव अऊ जऊन कुछू तुम्हर करा हवय, ओमा संतोस रहव, काबरकि परमेसर ह कहे हवय, “मेंह तोला कभू नइं छोड़ंव; मेंह तोला कभू नइं तियागंव।”
HEB 13:6 एकरसेति हमन बेधड़क कहिथन, “परभू ह मोर सहायक ए; मेंह नइं डरंव। मनखे ह मोर का कर सकथे?”
HEB 13:7 अपन ओ अगुवामन के खियाल रखव, जऊन मन तुमन ला परमेसर के बचन सुनाईन। ओमन के जिनगी के जम्मो बने बात के बारे म सोचव अऊ ओमन के बिसवास के नकल करव।
HEB 13:8 यीसू मसीह ह कल, आज अऊ सदाकाल बर उसनेच ए।
HEB 13:9 नाना किसम के अनजान उपदेस के दुवारा धोखा झन खावव। येह बने अय कि हमर हिरदय ह परमेसर के अनुग्रह ले मजबूत होवय, न कि ओ रीति-रिवाज के भोजन ले, जऊन ला खाय ले कोनो फायदा नइं होवय।
HEB 13:10 हमर एक बेदी हवय, जिहां ले पबितर-तम्बू म सेवा करइयामन ला खाय के अधिकार नइं ए।
HEB 13:11 महा पुरोहित ह पसुमन के लहू ला पाप-बलिदान के रूप म महा पबितर स्थान म ले जाथे, पर ओमन के देहें ह डेरा के बाहिर म जलाय जाथे।
HEB 13:12 एकर खातिर, यीसू घलो सहर के दुवार के बाहिर दुख भोगिस, ताकि ओह अपन खुद के लहू ले मनखेमन ला पबितर करय।
HEB 13:13 त आवव, हमन डेरा के बाहिर ओकर करा चलन अऊ ओ कलंक म भागी होवन जऊन ला ओह सहिस।
HEB 13:14 काबरकि इहां, हमर कोनो स्थायी सहर नइं ए, पर हमन ओ सहर के बाट जोहथन, जऊन ह अवइया हवय।
HEB 13:15 एकरसेति आवव, हमन यीसू के जरिये परमेसर ला लगातार इस्तुति के बलिदान चघावन अऊ ये बलिदान ह हमर मुहूं के ओ बचन ए, जऊन ह ओकर नांव ला मानथे।
HEB 13:16 अऊ भलई करे बर अऊ आने मन के मदद करे बर झन भूलव, काबरकि अइसने बलिदान परमेसर ला भाथे।
HEB 13:17 अपन अगुवामन के ऊपर भरोसा रखव अऊ ओमन के अधीन म रहव। ओमन तुम्हर खियाल ओ मनखेमन सहीं रखथें, जऊन मन ला अपन काम के लेखा देना जरूरी ए। ओमन के बात मानव, ताकि ओमन के काम ह एक बोझा सही नइं, पर एक आनंद के बात होवय, नइं तो ओह तुम्हर कुछू फायदा के नइं होही।
HEB 13:18 हमर बर पराथना करव। हमन ला भरोसा हवय कि हमर बिबेक ह साफ हवय अऊ हर किसम ले, आदर के जिनगी जीये के ईछा हवय।
HEB 13:19 मेंह तुमन ले खास करके बिनती करत हवंव कि तुमन पराथना करव, ताकि मेंह तुम्हर करा जल्दी वापिस आ सकंव।
HEB 13:20 सदाकाल के करार के लहू के जरिये, सांति के परमेसर ह हमर परभू यीसू ला मरे म ले जियाईस, जऊन ह भेड़मन के महान चरवाहा ए।
HEB 13:21 सांति के ओ परमेसर ह तुम्हर जिनगी ला जम्मो बने चीजमन ले भर देवय, ताकि तुमन ओकर ईछा ला पूरा करव अऊ जऊन बात ओला बने लगथे, ओह ओ बात ला यीसू मसीह के जरिये हमर जिनगी म पूरा करय। यीसू मसीह के महिमा सदाकाल तक होवत रहय। आमीन।
HEB 13:22 हे भाईमन हो, मेंह तुम्हर ले बिनती करत हंव कि उत्साह के मोर ये बचन ला धीर धरके सुनव, काबरकि ये चिट्ठी म मेंह जादा नइं लिखे हवंव।
HEB 13:23 मेंह तुमन ला बताय चाहथंव कि हमर भाई तीमुथियुस ह जेल ले छूट गे हवय। यदि ओह इहां जल्दी आथे, त मेंह ओकर संग तुम्हर ले भेंट-घाट करे बर आहूं।
HEB 13:24 अपन जम्मो अगुवा अऊ परमेसर के जम्मो मनखेमन ला हमर जोहार कहव। इटली देस के मनखेमन तुमन ला जोहार कहत हें।
HEB 13:25 तुमन जम्मो झन ऊपर परमेसर के अनुग्रह होवत रहय।
JAM 1:1 परमेसर अऊ परभू यीसू मसीह के सेवक याकूब कोति ले,
JAM 1:2 हे मोर भाईमन, जब तुम्हर ऊपर नाना किसम के परिछा आथे, त येला बड़े आनंद के बात समझव,
JAM 1:3 काबरकि तुमन जानत हव कि तुम्हर बिसवास के परखे जाय ले तुम्हर धीरज ह बढ़थे।
JAM 1:4 पर धीरज ला अपन काम करन दव कि तुमन परिपक्व अऊ सिद्ध हो जावव अऊ तुमन म कोनो बने बात के कमी झन रहय।
JAM 1:5 कहूं तुमन ले कोनो म बुद्धि के कमी हवय, त ओह परमेसर ले मांगय, जऊन ह बिगर दोस लगाय जम्मो झन ला उदार मन से देथे अऊ येह ओला दिये जाही।
JAM 1:6 पर ओह बिसवास के संग मांगय अऊ ओकर मन म कुछू संका झन रहय, काबरकि संका करइया ह समुंदर के लहरा के सहीं अय, जऊन ह हवा ले एती-ओती बहथे अऊ उछलथे।
JAM 1:7 अइसने मनखे ह ये झन सोचय कि ओला परभू ले कुछू मिलही।
JAM 1:8 ओह दुचित्ता मनखे ए अऊ ओह अपन जम्मो काम म स्थिर नइं ए।
JAM 1:9 बिसवासीमन नम्र होके अपन ऊंच पद ऊपर घमंड करंय।
JAM 1:10 अऊ धनवान मनखे ह ये बात म घमंड करे कि परमेसर ह ओला दीन-हीन करे हवय। काबरकि ओह जंगली फूल सहीं खतम हो जाही।
JAM 1:11 जब सूरज ह निकलथे, त अब्बड़ घाम पड़थे अऊ पऊधा ला मुरझा देथे; ओकर फूल ह झर जाथे अऊ ओकर सुघरपन ह खतम हो जाथे। ओहीच किसम ले, धनवान घलो अपन काम ला करत नास हो जाही।
JAM 1:12 धइन ए ओ मनखे, जऊन ह जिनगी के परिछा म डोले नइं; काबरकि ओह चोखा निकलके जिनगी के ओ मुकुट ला पाही, जेकर वायदा परभू ह अपन मया करइयामन ले करे हवय।
JAM 1:13 जब काकरो परिछा होथे, त ओह ये झन कहय कि मोर परिछा परमेसर ह करत हवय, काबरकि न तो खराप बात ले परमेसर के परिछा हो सकथे अऊ न ही ओह काकरो परिछा खुद करथे।
JAM 1:14 पर हर एक मनखे अपनेच खराप ईछा के कारन फंसथे अऊ परिछा म पड़थे।
JAM 1:15 तब खराप ईछा ह बढ़के पाप ला जनमथे अऊ जब पाप ह बढ़ जाथे, त मनखे के मिरतू हो जाथे।
JAM 1:16 हे मोर मयारू भाईमन, भोरहा म झन रहव।
JAM 1:17 काबरकि हर एक बने अऊ उत्तम बरदान स्वरग ले आथे अऊ परमेसर ददा, जऊन ह अंजोर ला बनाईस, ओकर कोति ले, ये बरदान ह मिलथे, अऊ ओह बदलत छइहां सहीं नइं बदलय।
JAM 1:18 ओह अपन ईछा ले हमन ला सुघर संदेस के दुवारा नवां जिनगी दीस, ताकि हमन परमेसर बर ओकर बनाय जम्मो चीजमन ले पहिली फर हो जावन।
JAM 1:19 हे मोर मयारू भाईमन, ये गोठ ला तुमन जान लेवव: हर एक मनखे पहिली धियान देके सुनय अऊ धीर धरके बोलय अऊ तुरते गुस्सा झन होवय,
JAM 1:20 काबरकि मनखे के गुस्सा ह परमेसर के धरमीपन नइं लाने सकय।
JAM 1:21 एकरसेति, जम्मो गंदगी अऊ बईरता ला छोंड़ देवव, अऊ दीन-हीन होके ओ बचन ला गरहन कर लेवव, जऊन ह तुम्हर हिरदय म बोय गे हवय अऊ तुम्हर उद्धार कर सकथे।
JAM 1:22 बचन के मुताबिक चलइया बनव अऊ बचन के सिरिप सुनइया बनके अपनआप ला धोखा झन देवव।
JAM 1:23 जऊन ह बचन ला सुनथे अऊ ओकर मुताबिक नइं चलय, त ओह ओ मनखे सहीं अय, जऊन ह अपन चेहरा ला दरपन म देखथे
JAM 1:24 अऊ ओह अपनआप ला देखके चल देथे अऊ तुरते भुला जाथे कि ओह कइसने दिखथे।
JAM 1:25 पर जऊन मनखे ह ओ सिद्ध कानून ऊपर धियान लगाय रहिथे, जऊन ह हमन ला सुतंतर करथे, ओ मनखे ह अपन काम म एकरसेति आसीस पाही, काबरकि ओह सुनके भूलय नइं, पर ओकर मुताबिक चलथे।
JAM 1:26 कहूं कोनो अपनआप ला धारमिक समझथे अऊ अपन जीभ ला अपन बस म नइं रखय, त ओह अपनआप ला धोखा देथे अऊ ओकर धरम ह बेकार ए।
JAM 1:27 हमर परमेसर ददा के नजर म सही अऊ बने धरम ये अय कि दुख म अनाथ अऊ बिधवामन के देखरेख करय, अऊ अपनआप ला संसार के बुरई ले अलग रखय।
JAM 2:1 हे मोर भाईमन हो, जब तुमन हमर महिमामय परभू यीसू मसीह ऊपर बिसवास करथव, त काकरो संग भेदभाव झन करव।
JAM 2:2 कहूं कोनो मनखे सोन के मुंदरी अऊ सुघर कपड़ा पहिरके तुम्हर सभा म आवय अऊ एक गरीब मनखे घलो चिरहा-फटहा कपड़ा पहिरके आवय,
JAM 2:3 अऊ कहूं तुमन ओ सुघर कपड़ा पहिरे मनखे के मुहूं देखके कहव, “तेंह इहां बने ठऊर म बईठ” अऊ ओ गरीब मनखे ला कहव, “तेंह इहां खड़े रह या मोर गोड़ करा भुइयां म बईठ।”
JAM 2:4 त का तुमन आपस म भेदभाव नइं करेव अऊ खराप बिचार ले नियाय करइया नइं ठहिरेव?
JAM 2:5 हे मोर मयारू भाईमन, सुनव: का परमेसर ह ये संसार के गरीबमन ला नइं चुनिस कि ओमन बिसवास म धनी, अऊ ओ स्वरग राज के भागीदार बनंय, जेकर वायदा परमेसर ह ओमन ले करिस, जऊन मन ओकर ले मया करथें।
JAM 2:6 पर तुमन ओ गरीब के बेजत्ती करेव। का धनी मनखे तुम्हर ऊपर अतियाचार नइं करंय अऊ का ओमन तुमन ला कचहरी म घसीटके नइं ले जावंय?
JAM 2:7 का ओमन परमेसर के सुघर नांव के निन्दा नइं करंय, जेकर तुमन अव?
JAM 2:8 कहूं तुमन परमेसर के बचन म लिखाय ये राजकीय कानून ला पूरा करथव, “तें अपन परोसी ले अपन सहीं मया कर,” त सही म बने करथव।
JAM 2:9 पर कहूं तुमन भेदभाव करथव, त पाप करथव अऊ परमेसर के कानून ह तुमन ला दोसी ठहिराथे।
JAM 2:10 काबरकि जऊन कोनो जम्मो कानून के पालन करथे, पर एकेच बात म चूक जाथे, त ओह जम्मो बात म दोसी ठहिरही।
JAM 2:11 काबरकि परमेसर ह ये कहे हवय, “छिनारी झन करव।” ओही परमेसर ह ये घलो कहे हवय, “हतिया झन करव।” कहूं तुमन छिनारी नइं करव, पर काकरो हतिया करथव, त तुमन कानून म दोसी ठहिरेव।
JAM 2:12 तुमन ओ मनखेमन सहीं गोठियावव, अऊ काम करव, जऊन मन के नियाय ओ कानून के मुताबिक होही, जऊन ह सुतंतर करथे,
JAM 2:13 काबरकि जऊन ह दया नइं करय, ओकर नियाय परमेसर ह बिगर दया के करही। दया ह नियाय ऊपर जय पाथे।
JAM 2:14 हे मोर भाईमन हो, कहूं कोनो कहय कि ओह बिसवास करथे, पर ओह बिसवास के मुताबिक काम नइं करय, त एकर ले का फायदा? का अइसने बिसवास ह कभू ओकर उद्धार कर सकथे?
JAM 2:15 कहूं कोनो भाई या बहिनी उघरा हवय अऊ ओला रोज खाय बर नइं मिलथे
JAM 2:16 अऊ तुमन ले कोनो ओला कहय, “सांति से जा, गरम रह अऊ तोला भरपेट खाना मिलय।” पर जऊन चीजमन देहें बर जरूरी अंय, ओमन ला नइं देवय, त का फायदा?
JAM 2:17 वइसनेच बिसवास घलो करम के बिगर मरे सहीं होथे।
JAM 2:18 पर कोनो ये कहय, “तोर करा बिसवास हवय अऊ मोर करा करम हवय।” तेंह अपन बिसवास ला मोला करम के बिगर तो देखा, अऊ मेंह अपन बिसवास ला मोर करम के दुवारा तोला देखाहूं।
JAM 2:19 तेंह बिसवास करथस कि एकेच परमेसर हवय। बने करथस! परेत आतमामन घलो अइसनेच बिसवास रखथें अऊ कांपथें।
JAM 2:20 पर हे मुरूख मनखे, का तेंह सबूत चाहत हस कि करम बिगर बिसवास ह बेकार ए।
JAM 2:21 जब हमर पुरखा अब्राहम ह अपन बेटा इसहाक ला बेदी ऊपर चघाईस, त का ओह अपन करम के दुवारा परमेसर के नजर म धरमी नइं ठहिरिस?
JAM 2:22 तेंह देखे कि ओकर करम ह बिसवास के मुताबिक रिहिस अऊ करम के दुवारा ओकर बिसवास ह पूरा होईस।
JAM 2:23 अऊ परमेसर के ये बचन ह पूरा होईस, “अब्राहम ह परमेसर के ऊपर बिसवास करिस अऊ ये बात ह ओकर बर धरमीपन गने गीस,” अऊ ओला परमेसर के संगवारी कहे गीस।
JAM 2:24 तुमन देख डारेव कि मनखेमन सिरिप बिसवास के दुवारा ही नइं, पर संग म करम के दुवारा धरमी ठहिरथें।
JAM 2:25 वइसनेच, का राहाब बेस्या ह घलो अपन करम के दुवारा धरमी नइं ठहिरिस, जब ओह इसरायली भेदियामन ला अपन घर म ठऊर दीस, अऊ आने रसता ले ओमन ला बिदा कर दीस?
JAM 2:26 जइसने देहें ह आतमा के बिगर मरे हवय, वइसनेच बिसवास ह घलो करम के बिगर मरे हवय।
JAM 3:1 हे मोर भाईमन हो, तुमन ले बहुंत झन गुरू झन बनव, काबरकि तुमन जानत हव कि गुरूमन के अऊ कड़ई ले नियाय होही।
JAM 3:2 हमन जम्मो झन अकसर गलती करथन। जऊन कोनो अपन गोठ म कभू गलती नइं करय, ओह सिद्ध मनखे ए; अऊ ओह अपन देहें ला बस म कर सकथे।
JAM 3:3 जब हमन अपन गोठ ला मनवाय बर घोड़ामन के मुहूं म लगाम लगाथन, त हमन ओकर पूरा देहें ला घलो अपन बस म कर लेथन।
JAM 3:4 देखव, पानी जहाज घलो, जऊन ह बहुंत बड़े होथे अऊ तेज हवा के दुवारा चलथे, तभो ले एक नानकून पतवार के दुवारा मांझी ह अपन ईछा के मुताबिक ओला जिहां चाहथे उहां ले जाथे।
JAM 3:5 वइसनेच जीभ ह घलो देहें के एक नानकून अंग ए, पर ओह बहुंते डींग मारथे। देखव, एक नानकून आगी के चिनगारी ले कतेक बड़े जंगल म आगी लग जाथे।
JAM 3:6 जीभ ह घलो आगी सहीं अय। येह हमर देहें म अधरम के एक संसार ए। येह एक अइसने आगी ए, जऊन ला नरक कुन्ड के आगी ले बारे गे हवय अऊ पूरा जिनगी म आगी लगाके मनखे ला बरबाद कर देथे।
JAM 3:7 हर एक किसम के जीव-जन्तु, चिरई अऊ पेट के भार रेंगइया जीव-जन्तु अऊ पानी के जीव-जन्तु, मनखेमन के बस म हो सकथें अऊ ओमन बस म हो घलो गे हवंय।
JAM 3:8 पर जीभ ला कोनो मनखे अपन बस म नइं कर सकय। ओह अइसने सैतान ए, जऊन ह कभू चुप नइं रहय। ओह अइसने जहर ले भरे हवय, जऊन ह परान ले लेथे।
JAM 3:9 जीभ ले हमन परभू अऊ ददा के महिमा करथन अऊ इही जीभ ले मनखेमन ला सराप घलो देथन, जऊन मन परमेसर के सरूप म बनाय गे हवंय।
JAM 3:10 ओहीच मुहूं ले महिमा अऊ सराप दूनों निकलथे। हे मोर भाईमन हो, अइसने नइं होना चाही।
JAM 3:11 का मीठा अऊ नूनचूर पानी झरना के एकेच मुहूं ले निकल सकथे?
JAM 3:12 हे मोर भाईमन, का अंजीर के रूख म जैतून या अंगूर के नार म अंजीर फर सकथे? वइसने ही नूनचूर झरना ले मीठा पानी नइं निकल सकय।
JAM 3:13 तुमन म बुद्धिमान अऊ समझदार कोन ए? ओह अपन काम अऊ बने चालचलन के दुवारा येला नमरता सहित देखावय, जऊन ह बुद्धि ले उपजथे।
JAM 3:14 पर कहूं तुमन अपन मन म भारी जलन अऊ सुवारथ रखथव, त एकर बर घमंड झन करव अऊ सत के बिरोध झन करव।
JAM 3:15 अइसने बुद्धि ह स्वरग ले नइं आवय, पर येह संसारिक, सारीरिक अऊ सैतान के अय।
JAM 3:16 काबरकि जिहां जलन अऊ सुवारथ होथे, उहां झंझट अऊ हर किसम के बुरई पाय जाथे।
JAM 3:17 पर जऊन बुद्धि ह स्वरग ले आथे, ओह सबले पहिली सुध, ओकर बाद मिलनसार, कोमल, नम्र सुभाव, दया अऊ बने फर ले भरे रहिथे अऊ ओमा भेदभाव अऊ कपट नइं रहय।
JAM 3:18 जऊन मेल-मिलाप करइयामन मेल-मिलाप करवाथें, ओमन धरमीपन के फर उपजाथें।
JAM 4:1 तुमन म लड़ई अऊ झगरा कहां ले आ गीस? का येमन तुम्हर संसारिक ईछा ले नइं आवंय, जऊन मन तुम्हर भीतर लड़त-भिड़त रहिथें?
JAM 4:2 तुमन कुछू चीज ला पाय के आसा रखथव, पर तुमन ला नइं मिलय। तुमन मनखे के हतिया करथव अऊ लालच करथव, अऊ जऊन कुछू के ईछा रखथव, ओह तुमन ला नइं मिलय। तुमन लड़थव-झगरथव। तुमन ला नइं मिलय, काबरकि तुमन परमेसर ले नइं मांगव।
JAM 4:3 जब तुमन मांगथव, त तुमन ला नइं मिलय, काबरकि तुमन गलत मनसा ले मांगथव कि ओला अपन भोग-बिलास म उड़ा देवव।
JAM 4:4 हे छिनारी करइया मनखेमन, का तुमन नइं जानव कि संसार ले मितानी करई के मतलब परमेसर ले बईरता करई ए? जऊन कोनो संसार के संगवारी होय चाहथे, ओह अपनआप ला परमेसर के बईरी बनाथे।
JAM 4:5 का तुमन ये समझथव कि परमेसर के बचन ह बिगर कारन के कहिथे कि जऊन आतमा ला ओह हमन म बसाय हवय, ओकर दुवारा जलन पईदा होवय।
JAM 4:6 ओह अऊ जादा अनुग्रह देथे। एकर कारन परमेसर के बचन ह कहिथे: “परमेसर ह घमंडी मनखे के बिरोध करथे, पर नम्र मनखेमन ऊपर अनुग्रह करथे।”
JAM 4:7 एकरसेति तुमन परमेसर के बस म रहव, अऊ सैतान के सामना करव, त सैतान ह तुम्हर करा ले भाग जाही।
JAM 4:8 परमेसर के लकठा म आवव, त ओह घलो तुम्हर लकठा म आही। हे पापी मनखेमन, अपन हांथ ला धोवव, अऊ हे ढोंगी मनखेमन, अपन हिरदय ला सुध करव।
JAM 4:9 दुखी होवव, सोक मनावव अऊ बिलाप करव। तुम्हर हंसई ह सोक म अऊ तुम्हर आनंद ह उदासी म बदल जावय।
JAM 4:10 परभू के आघू म दीन-हीन बनव, त ओह तुमन ला बढ़ाही।
JAM 4:11 हे भाईमन हो, एक-दूसर ला बदनाम झन करव। जऊन ह अपन भाई के बदनामी करथे अऊ अपन भाई ऊपर दोस लगाथे, ओह परमेसर के कानून ला बदनाम करथे अऊ कानून ऊपर दोस लगाथे। जब तेंह कानून ऊपर दोस लगाथस, त तेंह कानून म चलइया नइं, पर ओकर ऊपर हाकिम ठहिरे।
JAM 4:12 कानून के देवइया अऊ नियाय करइया एकेच झन अय अऊ ओह परमेसर ए, जेकर करा बचाय अऊ नास करे के सामर्थ हवय। पर तेंह कोन अस कि अपन परोसी ऊपर दोस लगाथस?
JAM 4:13 सुनव, तुमन जऊन मन ये कहिथव कि आज या कल हमन कोनो अऊ सहर म जाके उहां एक बछर रहिबो, अऊ काम-धंधा करके पईसा कमाबो।
JAM 4:14 तुमन ये नइं जानत हव कि कल का होही। तुम्हर जिनगी ह का ए? तुमन त भाप के सहीं अव, जऊन ह छिन भर दिखथे, अऊ तब लोप हो जाथे।
JAM 4:15 एकर बदले, तुमन ला ये कहना चाही कि कहूं परभू के ईछा होही, त हमन जीयत रहिबो अऊ ये या ओ बुता ला करबो।
JAM 4:16 पर तुमन अपन डींग मारथव अऊ घमंड करथव। अइसने जम्मो घमंड के बात ह गलत ए।
JAM 4:17 एकरसेति, जऊन मनखे ह भलई करे ला जानथे अऊ नइं करय, ओकर बर येह पाप ए।
JAM 5:1 हे धनवान मनखेमन, अब मोर बात ला सुनव, तुमन अपन ऊपर अवइया बिपत के कारन रोवव अऊ बिलाप करव।
JAM 5:2 तुम्हर धन-दौलत ह सड़ गे हवय अऊ तुम्हर कपड़ामन ला कीरा खा गे हवय।
JAM 5:3 तुम्हर सोन अऊ चांदी म जंक लग गे हवय, अऊ ये जंक ह तुम्हर बिरूध गवाही दीही अऊ येह तुम्हर देहें ला आगी सहीं जला दीही। तुमन संसार के आखिरी समय म धन बटोरे हवव।
JAM 5:4 देखव! जऊन बनिहारमन तुम्हर खेत के फसल ला लुईन, ओमन के बनी ला तुमन धोखा देके रख ले हवव, एकरसेति ओमन रोवत हवंय, अऊ ओमन के रोवई ह सर्वसक्तिमान परभू के कान तक पहुंच गे हवय।
JAM 5:5 तुमन धरती म भोग-बिलास अऊ सुख के जिनगी बिताय हवव। तुमन बध होय के दिन खातिर अपनआप ला मोटा-ताजा कर ले हवव।
JAM 5:6 तुमन धरमी मनखे ऊपर दोस लगाके ओला मार डारेव। ओह तुम्हर बिरोध नइं करत रिहिस।
JAM 5:7 एकरसेति, हे भाईमन, परभू यीसू के वापिस आवत तक ले धीरज धरे रहव। देखव, किसान ह कइसने खेत के कीमती फसल के बाट जोहथे अऊ कइसने पहिली अऊ आखिरी बरसा होवत तक धीरज धरे रहिथे।
JAM 5:8 तुमन घलो धीरज धरव, अऊ अपन हिरदय ला मजबूत करव, काबरकि परभू के अवई लकठा म हवय।
JAM 5:9 हे भाईमन, एक-दूसर ऊपर दोस झन लगावव ताकि परमेसर तुमन ला दोसी झन ठहिरावय। देखव, मसीह ह नियाय करे बर बहुंत जल्दी अवइया हवय। ओह दुवारी म ठाढ़े हे सहीं समझव!
JAM 5:10 हे भाईमन, ओ अगमजानीमन ला सुरता करव, जऊन मन परभू के नांव म तुम्हर ले गोठियाईन। दुख के बेरा म ओमन जऊन धीरज धरिन, ओला एक उदाहरन के रूप म लेवव।
JAM 5:11 जइसने कि तुमन जानत हव कि धीरज धरइयामन ला हमन आसीसित मनखे समझथन। तुमन अयूब के धीरज के बारे म तो सुने हवव अऊ परभू ह आखिरी म कइसने ओकर धीरज के परतिफल दीस, ओला घलो जानत हव। परभू ह अब्बड़ किरपालु अऊ दयालु अय।
JAM 5:12 हे मोर भाईमन, जम्मो ले बड़े बात ये अय कि कोनो बात म, तुमन कसम झन खावव—न स्वरग के, न धरती के, अऊ न कोनो आने चीज के। पर तुम्हर गोठ ह “हां” के “हां”, अऊ “नइं” के “नइं” होवय, ताकि तुमन दंड के भागीदार झन होवव।
JAM 5:13 कहूं तुमन म कोनो दुखी हवय, त ओह पराथना करय, अऊ कहूं कोनो खुस हवय, त ओह परभू के भजन गावय।
JAM 5:14 कहूं तुमन म कोनो बेमार हवय, त ओह कलीसिया के अगुवामन ला बलावय कि ओमन परभू के नांव म ओकर ऊपर तेल लगाके ओकर बर पराथना करंय।
JAM 5:15 अऊ बिसवास के पराथना ले बिमरहा ह बने हो जाही, अऊ परभू ह ओला ठाढ़ कर दीही। अऊ कहूं ओह पाप घलो करे होही, त ओकर छेमा हो जाही।
JAM 5:16 एकरसेति, तुमन एक-दूसर के आघू म अपन-अपन पाप ला मान लेवव अऊ एक-दूसर बर पराथना करव, ताकि तुम्हर बेमारी ह ठीक हो जावय। धरमी मनखे के पराथना ह सक्तिसाली अऊ परभावी होथे।
JAM 5:17 एलियाह घलो हमरेच सहीं दुख-सुख भोगी मनखे रिहिस। ओह गिड़गिड़ाके पराथना करिस कि पानी झन बरसय, अऊ साढ़े तीन बछर तक ले धरती म पानी नइं गिरिस।
JAM 5:18 तब ओह फेर पराथना करिस कि बरसा होवय, त अकास ले बरसा होईस, अऊ भुइयां म फेर फसल होईस।
JAM 5:19 हे मोर भाईमन, कहूं तुमन ले कोनो सत के रसता ले भटक जावय, अऊ कोनो ओला सही रसता म फेर वापिस ले आवय,
JAM 5:20 त येला जान लेवव कि जऊन कोनो भटके पापी ला सही रसता म फेर वापिस ले आही, ओह ओकर परान ला मिरतू ले बचाही, अऊ बहुंते पाप के छेमा के कारन बनही।
1PE 1:1 पतरस कोति ले, जऊन ह यीसू मसीह के प्रेरित ए,
1PE 1:2 जऊन मन परमेसर ददा के पूर्व गियान के मुताबिक पबितर आतमा के पबितर करे के दुवारा, यीसू मसीह के हुकूम माने बर अऊ ओकर लहू के छिड़के जाय बर चुने गे हवंय:
1PE 1:3 हमर परभू यीसू मसीह के ददा अऊ परमेसर के धनबाद होवय! ओह यीसू मसीह के मरे म ले जी उठे के दुवारा, अपन बड़े दया के कारन, हमन ला जीयत आसा खातिर नवां जनम दे हवय,
1PE 1:4 ताकि तुमन ला ओ वारिस के अधिकार मिलय, जऊन ह तुमन बर स्वरग म रखे गे हवय, अऊ ओह कभू नास नइं होवय, खराप नइं होवय या मुरझावय नइं।
1PE 1:5 तुमन बिसवास के दुवारा, परमेसर के सामर्थ ले, ओ उद्धार खातिर, जऊन ह आखिरी समय म परगट होय बर तियार हवय, सही रखे गे हवव।
1PE 1:6 येमा तुमन बहुंत आनंद मनावव, हालाकि अब कुछू समय बर, तुमन ला जम्मो किसम के परिछा के कारन दुख सहे बर पड़त हवय।
1PE 1:7 येह एकरसेति होईस ताकि तुम्हर बिसवास के असली परख हो सकय, जऊन ह सोन ले घलो जादा कीमती अय; सोन ह आगी म परखे जाय के बाद घलो नास हो सकथे; अऊ जब यीसू मसीह ह परगट होथे, तब तुम्हर ये बिसवास के नतीजा ह इस्तुति, बड़ई अऊ आदर म होवय।
1PE 1:8 हालाकि तुमन ओला नइं देखे हवव, तभो ले तुमन ओला मया करथव, अऊ हालाकि तुमन ओला अब नइं देखत हवव, पर ओकर ऊपर बिसवास करत हवव अऊ आनंद मनावत हवव, जेकर बखान नइं करे जा सकय अऊ जऊन ह महिमा ले भरे हवय,
1PE 1:9 काबरकि तुमन, अपन बिसवास के मकसद ला पावत हवव, जेकर मतलब होथे—तुम्हर आतमा के उद्धार।
1PE 1:10 एही उद्धार के बिसय म, अगमजानीमन बहुंत खोजिन। ओमन ओ अनुग्रह के बारे म कहिन, जऊन ह तुमन करा अवइया रिहिस अऊ बहुंत धियान लगाके,
1PE 1:11 ओमन ओ समय अऊ हालत ला जाने के कोसिस करिन, जऊन ला मसीह के आतमा, जऊन ह कि ओमन म हवय, इसारा करत रिहिस, जब ओह मसीह के दुख उठाय अऊ ओकर तुरते बाद ओकर आय के महिमा के बारे म अगमबानी करिस।
1PE 1:12 परमेसर ह येला अगमजानीमन ला बताईस कि ओमन अपन खुद के सेवा नइं करत रिहिन, पर ओमन तुम्हर सेवा करत रिहिन, जब ओमन ओ बातमन के बारे म कहिन, जऊन ला अब तुमन ओमन ले सुने हवव, जऊन मन स्वरग ले पठोय पबितर आतमा के दुवारा तुमन ला सुघर संदेस के परचार करे हवंय। अऊ त अऊ स्वरगदूतमन ये चीजमन ला देखे के ईछा करथें।
1PE 1:13 एकरसेति, अपन मन ला काम करे बर तियार करव; संयमी बनव; ओ अनुग्रह ऊपर अपन पूरा आसा रखव, जऊन ह तुमन ला यीसू मसीह के परगट होय के समय दिये जाही।
1PE 1:14 परमेसर के लइकामन सहीं हुकूम ला मानव अऊ जब तुमन अगियानता म रहत रहेव, ओ समय के खराप ईछा के मुताबिक आचरन झन करव।
1PE 1:15 पर जऊन ह तुमन ला बलाय हवय, ओह पबितर ए, त तुमन घलो अपन जम्मो काम म पबितर बनव।
1PE 1:16 काबरकि परमेसर के बचन म ये लिखे हवय: “पबितर बनव, काबरकि मेंह पबितर अंव।”
1PE 1:17 जब तुमन अपन पराथना म, ओला “हे ददा” कहिथव, जऊन ह हर एक मनखे के काम के नियाय बिगर पखियपात के करथे, त तुमन अपन जिनगी ला इहां परदेसी के सहीं ओकर भय म बितावव।
1PE 1:18 काबरकि तुमन जानत हव कि तुम्हर खोखला जिनगी, जऊन ह तुम्हर पुरखामन ले चले आवथे, ओकर छुटकारा सोन या चांदी जइसने नासमान चीज के दुवारा नइं होय हवय,
1PE 1:19 पर तुम्हर जिनगी के उद्धार एक निरदोस अऊ निस्कलंक मेढ़ा-पीला याने कि मसीह के कीमती लहू के दुवारा होय हवय।
1PE 1:20 ओह संसार के सिरिस्टी के पहिली ले चुने गे रिहिस, पर तुम्हर खातिर, ये आखिरी समय म ओह परगट होईस।
1PE 1:21 तुमन ओकर दुवारा, ओ परमेसर ऊपर बिसवास करथव, जऊन ह ओला मरे म ले जियाईस अऊ ओकर महिमा करिस, अऊ एकरसेति तुम्हर बिसवास अऊ आसा परमेसर ऊपर हवय।
1PE 1:22 अब सत ला माने के दुवारा, तुमन अपनआप ला सुध करे हवव अऊ तुमन म अपन भाईमन बर निस्कपट मया हवय, त अपन जम्मो हिरदय के संग एक-दूसर ला गहरई ले मया करव।
1PE 1:23 तुमन नासमान नइं, पर अबिनासी बीजा ले परमेसर के जीयत अऊ सदा ठहरइया बचन के दुवारा नवां जनम पाय हवव।
1PE 1:24 काबरकि, “जम्मो मनखेमन कांदी के सहीं अंय, अऊ ओमन के जम्मो महिमा ह जंगली फूल सहीं अय; कांदी ह मुरझा जाथे अऊ फूलमन झर जाथें,
1PE 1:25 पर परभू के बचन सदाकाल तक बने रहिथे।” अऊ येह ओही सुघर संदेस के बचन ए, जऊन ह तुमन ला सुनाय गे हवय।
1PE 2:1 एकरसेति, अपनआप ला जम्मो किसम के बईरता, छल-कपट, ढोंगीपन, जलन, अऊ बदनामी ले दूर रखव।
1PE 2:2 नवां जनमे लइकामन सहीं सुध आतमिक दूध के लालसा करव, ताकि एकर दुवारा अपन उद्धार म बढ़ सकव,
1PE 2:3 अब तुमन ये जान गे हवव कि परभू ह बने अय।
1PE 2:4 जब तुमन ओकर करा, जऊन ह जीयत पथरा ए, आथव, जऊन ला मनखेमन अस्वीकार करिन, पर ओह परमेसर के नजर म चुने हुए अऊ कीमती अय—
1PE 2:5 त तुमन घलो जीयत पथरामन सहीं एक ठन आतमिक घर बनत जावत हव, जेकर ले पबितर पुरोहित बनके अइसने आतमिक बलिदान चघावव, जऊन ह यीसू मसीह के दुवारा परमेसर ला गरहन लईक होवय।
1PE 2:6 काबरकि परमेसर के बचन ह ये कहिथे: “देखव, मेंह सियोन म एक ठन पथरा रखत हवंव, ओह चुने हुए अऊ कीमती कोना के पथरा ए, अऊ जऊन ह ओकर ऊपर बिसवास करथे, ओह कभू लज्जित नइं होही।”
1PE 2:7 अब तुमन बर, जऊन मन बिसवास करथव, ये पथरा ह कीमती ए। पर जऊन मन बिसवास नइं करंय, ओमन बर, “जऊन पथरा ला घर बनइयामन बेकार समझे रिहिन, ओहीच ह कोना के पथरा हो गे हवय।”
1PE 2:8 अऊ, “एक ठन पथरा मनखेमन के लड़खड़ाय के अऊ एक ठन चट्टान, जऊन ह ओमन के गिरे के कारन बनही।” ओमन लड़खड़ाथें, काबरकि ओमन ओ संदेस ला नइं मानंय, जेकर बर ओमन ठहिराय गे रिहिन।
1PE 2:9 पर तुमन एक चुने बंस, राज-पदधारी पुरोहित, पबितर जाति अऊ परमेसर के खुद के मनखे अव, ताकि तुमन ओकर परसंसा करव, जऊन ह तुमन ला अंधियार म ले अपन अद्भूत अंजोर म बलाय हवय।
1PE 2:10 पहिली तुमन परमेसर के मनखे नइं रहेव, पर अब तुमन परमेसर के मनखे अव; एक समय रिहिस, जब तुमन परमेसर के दया ला नइं पाय रहेव, पर अब तुमन ओकर दया ला पा गे हवव।
1PE 2:11 मयारू संगवारीमन हो, मेंह तुमन ले बिनती करत हंव कि अपनआप ला, ये संसार म परदेसी अऊ अजनबी जानके, पापी ईछा ले बचाय रखव, जऊन ह कि तुम्हर आतमा के बिरोध म लड़थे।
1PE 2:12 मूरती-पूजा करइयामन के बीच म तुम्हर चालचलन ह सही रहय, ताकि कहूं ओमन तुम्हर ऊपर गलत काम करे के दोस लगाथें, त ओ दिन, जब परमेसर ह हमर करा आही, त ओमन हमर बने काममन ला देख सकंय अऊ परमेसर के महिमा करंय।
1PE 2:13 परभू के हित म, अपनआप ला मनखेमन के बीच ठहिराय हर हाकिम के अधीन रखव; चाहे परधान हाकिम के रूप म राजा के अधीन होवय,
1PE 2:14 या राजपाल के अधीन होवय, काबरकि ओमन कुकरमीमन ला दंड दे बर अऊ बने काम करइयामन के परसंसा करे बर राजा के दुवारा ठहिराय जाथें।
1PE 2:15 काबरकि येह परमेसर के ईछा ए कि भलई करे के दुवारा तुमन मुरूख मनखेमन के अगियानता के बात ला बंद कर देवव।
1PE 2:16 सुतंतर मनखेमन सहीं रहव, पर अपन सुतंतरता के आड़ म बुरई ला तोपे के काम झन करव; परमेसर के सेवकमन सहीं रहव।
1PE 2:17 जम्मो झन के आदर करव; संगी बिसवासीमन ला मया करव; परमेसर के भय मानव अऊ राजा के आदर करव।
1PE 2:18 हे गुलाममन हो, पूरा आदर के संग अपन मालिकमन के अधीन रहव, न सिरिप बने अऊ समझदार मालिक के, पर निरदयी मालिक के भी अधीन रहव।
1PE 2:19 काबरकि यदि कोनो परमेसर ला जानके, अनियाय के दुख-तकलीफ सहथे, त येह परसंसा के बात अय।
1PE 2:20 कहूं तुमन गलत काम करे के कारन मार खाथव अऊ ओला सहथव, त तुम्हर बर येह कोनो बड़ई के बात नो हय। पर कहूं तुमन भलई करे के कारन दुख सहथव, त येह परमेसर के आघू म बड़ई के बात अय।
1PE 2:21 तुमन ला एकरे खातिर बलाय गे रिहिस, काबरकि मसीह ह तुम्हर खातिर दुख भोगिस अऊ तुम्हर बर एक नमूना रखे हवय कि तुमन ओकर मुताबिक चलव।
1PE 2:22 “ओह कोनो पाप नइं करिस, अऊ ओकर मुहूं ले कोनो कपट के बात नइं निकलिस।”
1PE 2:23 जब मनखेमन मसीह के बेजत्ती करिन, त ओकर जबाब म ओह ओमन के बेजत्ती नइं करिस; जब ओह दुख उठाईस, त ओह कोनो धमकी नइं दीस; पर बदले म, ओह अपन आसा परमेसर ऊपर रखिस, जऊन ह धरमी नियायी अय।
1PE 2:24 “ओह खुद हमर पापमन” ला अपन देहें म कुरूस ऊपर उठा लीस, ताकि हमन पाप खातिर मर जावन अऊ धरमीपन खातिर जीयन। “ओकर घावमन के दुवारा तुमन चंगा होय हवव।”
1PE 2:25 काबरकि “तुमन भटके भेड़मन सहीं रहेव,” पर अब तुमन चरवाहा अऊ अपन आतमा के रखवार करा लहुंटके आ गे हवव।
1PE 3:1 हे घरवालीमन हो, तुमन अपन-अपन घरवाला के अधीन रहव, ताकि कहूं ओमन ले कोनो परमेसर के बचन ऊपर बिसवास नइं करय, त ओमन घरवाली के सुघर बरताव के दुवारा जीते जा सकंय,
1PE 3:2 जब ओमन तुमन के सुधता अऊ बने चालचलन ला देखंय।
1PE 3:3 तुमन के सुघरता बाहिरी सिंगार के दुवारा झन होवय, जइसने कि बाल गुंथई, अऊ सोन के जेवर अऊ आने-आने किसम के कपड़ा पहिरई।
1PE 3:4 एकर बदले, तुमन म मनखे के भीतरी गुन, नमरता अऊ सांत सुभाव के आतमा होना चाही, जऊन ह नइं मुरझावय अऊ अइसने बातमन परमेसर के नजर म बहुंत कीमती होथें।
1PE 3:5 एही किसम ले, पहिली जमाना के पबितर माईलोगनमन, जऊन मन अपन आसा परमेसर के ऊपर रखत रिहिन, अपनआप ला सुघर बनाय करत रिहिन। ओमन अपन घरवालामन के अधीन रहत रिहिन।
1PE 3:6 जइसने कि सारा ह अब्राहम के बात मानय अऊ ओला अपन सुवामी कहय। कहूं तुमन सही काम करव अऊ कोनो चीज ले झन डरव, त तुमन ओकर बेटी अव।
1PE 3:7 हे घरवालामन हो, ओही किसम ले अपन-अपन घरवाली के संग रहत समझदार बनव अऊ ओला निरबल संगी जानके अऊ अपन संग ओला जिनगी के अनुग्रह के बरदान के वारिस जानके ओकर आदर करव, ताकि तुम्हर पराथना म कोनो बाधा झन पड़य।
1PE 3:8 आखिरी म, तुमन जम्मो एक मन होके रहव; सहानुभूति रखव; एक-दूसर ले मया करव; दयालु अऊ नम्र बनव।
1PE 3:9 बुरई के बदले बुरई या बेजत्ती के बदले बेजत्ती झन करव, पर बदले म आसीस देवव काबरकि तुमन एकरे बर बलाय गे हवव, ताकि तुमन ला आसीस मिलय।
1PE 3:10 जइसने कि परमेसर के बचन ह कहिथे, “जऊन कोनो, जिनगी ले मया करे चाहथे अऊ सुघर दिन देखे के ईछा करथे, ओकर बर जरूरी अय कि ओह अपन जीभ ला बुरई ले अऊ अपन ओंठ ला छल-कपट के बात ले दूरिहा रखय।
1PE 3:11 ये जरूरी अय कि ओह बुरई ला छोंड़के भलई करय; अऊ ये घलो जरूरी अय कि ओह सांति के खोज करय अऊ ओकर पाछू लगे रहय।
1PE 3:12 काबरकि परभू के नजर ह धरमीमन ऊपर लगे रहिथे अऊ ओकर कान ह ओमन के पराथना के तरफ लगे रहिथे, पर परभू ह बुरई करइयामन के बिरोध करथे।”
1PE 3:13 यदि तुमन भलई करे बर उत्सुक हवव, त तुम्हर हानि कोन करही?
1PE 3:14 पर कहूं तुमन बने काम करे के कारन दुख उठाथव, त तुमन आसीस पाहू। मनखेमन ले झन डरव अऊ न घबरावव।
1PE 3:15 पर अपन हिरदय म मसीह ला परभू के रूप म आदर देवव। जऊन कोनो तुमन ला तुम्हर आसा के बिसय म कुछू पुछय, त ओला जबाब देय बर हमेसा तियार रहव।
1PE 3:16 पर ये काम ला सुध बिबेक म, नमरता अऊ आदर के संग करव ताकि मसीह म तुम्हर बने चालचलन के बिरोध म, जऊन मन खराप बात कहिथें, ओमन अपन बात ले सरमिंदा होवंय।
1PE 3:17 कहूं ये परमेसर के ईछा अय, त बुरई करके दुख भोगे के बदले, भलई करके दुख भोगे ह बने अय।
1PE 3:18 काबरकि मसीह ह याने धरमी ह अधरमीमन खातिर या तुम्हर पाप खातिर जम्मो के सेति एकेच बार मरिस कि ओह तुमन ला परमेसर करा लानय। ओह देहें म मारे गीस, पर आतमा के दुवारा जियाय गीस,
1PE 3:19 अऊ आतमिक दसा म, ओह जाके कैदी आतमामन ला परचार करिस,
1PE 3:20 जऊन मन बहुंत पहिली परमेसर के हुकूम नइं मानिन, जब परमेसर ह नूह के दिन म धीर धरके इंतजार करत रहय, अऊ पानी जहाज ह बनत रहय। जहाज म सिरिप थोरकन मनखे याने जम्मो मिलाके आठ झन पानी ले बांचिन,
1PE 3:21 अऊ ये पानी ह बतिसमा के चिनहां अय, जऊन ह अब तुमन ला घलो बचाथे। येह देहें के मईल धोवई नो हय, पर येह सुध बिबेक म परमेसर ले एक वायदा करई अय। यीसू मसीह के फेर जी उठे के दुवारा, ये बतिसमा ह तुमन ला बचाथे।
1PE 3:22 यीसू मसीह ह स्वरग चले गीस, अऊ ओह परमेसर के जेवनी हांथ कोति हवय अऊ जम्मो स्वरगदूत, अधिकार अऊ सामर्थ ओकर अधीन म हवंय।
1PE 4:1 एकरसेति, जब मसीह ह देहें म दुख भोगिस, त तुमन घलो ओहीच सोच के मुताबिक अपनआप ला मजबूत करव, काबरकि जऊन ह देहें म दुख भोगिस, ओह पाप ले छूट गीस।
1PE 4:2 एकर नतीजा ये होथे कि ओह बांचे संसारिक जिनगी मनखेमन के खराप ईछा मुताबिक नइं, पर परमेसर के ईछा मुताबिक जीथे।
1PE 4:3 काबरकि तुमन ओ काम म पहिली बहुंत समय बीता चुके हवव, जऊन ला मूरती-पूजा करइयामन पसंद करथें। तुमन अपन जिनगी ला छिनारीपन, काम-वासना, मतवारपन, भोग-बिलास, खाय-पीये, अऊ घिन-घिन मूरती-पूजा म बिताय हवव।
1PE 4:4 मूरती-पूजा करइयामन अचरज करथें, जब तुमन ओमन के संग जंगली अऊ लापरवाही के जिनगी म सामिल नइं होवव, अऊ ओमन तुम्हर बेजत्ती करथें।
1PE 4:5 पर ओमन परमेसर ला लेखा दीहीं, जऊन ह जीयत अऊ मरे मन के नियाय करे बर तियार हवय।
1PE 4:6 एकरे कारन मरे मन ला घलो सुघर संदेस के परचार करे गीस, ताकि मनखेमन के मुताबिक ओमन के देहें म नियाय होवय, पर ओमन आतमा म परमेसर के मुताबिक जीयंय।
1PE 4:7 जम्मो चीजमन के अन्त जल्दी होवइया हवय। एकरसेति, साफ मन अऊ संयमी होवव, ताकि तुमन पराथना कर सकव।
1PE 4:8 जम्मो ले बड़े बात ये अय कि एक-दूसर ला बहुंते मया करव, काबरकि मया ह बहुंते पापमन ला तोप देथे।
1PE 4:9 बिगर कुड़कुड़ाय एक-दूसर के पहुनई करव।
1PE 4:10 हर एक झन आने मन के सेवा करे बर, जऊन आतमिक बरदान पाय हवय, ओकर उपयोग ओह बिसवासयोग्य सेवक के रूप म परमेसर के अनुग्रह म रहत अनेक किसम ले करय।
1PE 4:11 कहूं कोनो गोठियावय, त अइसने गोठियावय मानो परमेसर के बचन ओकर मुहूं ले निकलथे। कहूं कोनो सेवा करय, त ओह ओ ताकत ले करय, जऊन ला परमेसर देथे, ताकि जम्मो बात म, यीसू मसीह के दुवारा परमेसर के परसंसा हो सकय। महिमा अऊ सामर्थ जुग-जुग ओकर होवय। आमीन।
1PE 4:12 मयारू संगवारीमन, जऊन पीरा भरे दुख, परखे बर तुम्हर ऊपर पड़े हवय, ओकर ले अचम्भो झन करव कि कोनो अनहोनी बात तुम्हर ऊपर होवत हवय।
1PE 4:13 पर आनंद मनावव कि तुमन मसीह के दुख म सामिल हवव, ताकि जब ओकर महिमा परगट होवय, त तुमन आनंद ले मगन हो जावव।
1PE 4:14 कहूं मसीह के नांव के कारन तुम्हर बेजत्ती होथे, त अपनआप ला धइन समझव, काबरकि महिमा अऊ परमेसर के आतमा तुम्हर ऊपर छइहां करथे।
1PE 4:15 कहूं तुमन दुख भोगव, त ये दुख भोगई ह एक हतियारा या चोर या कोनो आने किसम के अपराधी के रूप म झन होवय, अऊ येह आने मन के काम म बाधा डलइया के रूप म घलो झन होवय।
1PE 4:16 पर कहूं तुमन एक मसीही के रूप म दुख भोगथव, त एकर बर झन लजावव, पर परमेसर के इस्तुति करव कि मसीह के नांव तुम्हर संग हवय।
1PE 4:17 नियाय के समय आ गे हवय अऊ परमेसर के घराना के नियाय पहिली करे जाही, अऊ कहूं एकर सुरूआत हमर ले होथे, त ओमन के अन्त कइसने होही, जऊन मन परमेसर के सुघर संदेस ला नइं मानंय?
1PE 4:18 अऊ, “यदि धरमी मनखे बर उद्धार पाना कठिन ए, त भक्तिहीन अऊ पापी के का होही?”
1PE 4:19 एकरसेति, जऊन मन परमेसर के ईछा के मुताबिक दुख उठाथें, ओमन अपनआप ला अपन बिसवासयोग्य सिरिस्टी करइया परमेसर के हांथ म सऊंप देवंय, अऊ बने काम करे म लगे रहंय।
1PE 5:1 तुमन म जऊन मन अगुवा अंय, ओमन ला मेंह एक संगी अगुवा के रूप म, अऊ मसीह के दुख उठाय के एक गवाह के रूप म अऊ परगट होवइया महिमा म सामिल होवइया के रूप म बिनती करत हंव:
1PE 5:2 परमेसर के ओ झुंड के, जऊन ह तुम्हर अधीन हवय, ओकर देखरेख करत ओ झुंड के चरवाहा बनव। येह दबाव ले नइं, पर जइसने परमेसर तुमन ले चाहथे, अपन ईछा ले करव; पईसा के लालच म नइं, पर सेवा-भाव ले करव।
1PE 5:3 जऊन मनखेमन तुमन ला सऊंपे गे हवंय, ओमन ऊपर हुकूम झन चलावव, पर झुंड खातिर एक नमूना बनव।
1PE 5:4 अऊ जब मुखिया चरवाहा परगट होही, त तुमन महिमा के ओ मुकुट पाहू, जऊन ह अपन चमक कभू नइं खोवय।
1PE 5:5 हे जवानमन, तुमन घलो ओही किसम ले सियानमन के अधीन रहव। एक-दूसर के संग नमरता ले बरताव करव, काबरकि, “परमेसर ह घमंडी मनखे के बिरोध करथे, पर नम्र मनखेमन ऊपर अनुग्रह करथे।”
1PE 5:6 एकरसेति, परमेसर के सामर्थी हांथ के तरी अपनआप ला नम्र करव, ताकि ओह तुमन ला उचित समय म बढ़ावय।
1PE 5:7 अपन जम्मो चिंता ला ओकर ऊपर छोंड़ देवव, काबरकि ओह तुम्हर खियाल रखथे।
1PE 5:8 तुमन संयमी अऊ सचेत रहव। काबरकि तुम्हर बईरी सैतान ह एक गरजत सिंह के सहीं एती-ओती गिंजरथे अऊ ये फिराक म रहिथे कि कोनो ला चीरके खावय।
1PE 5:9 बिसवास म मजबूत होके ओकर मुकाबला करव, काबरकि तुमन जानत हव कि तुम्हर संगी बिसवासीमन, जम्मो संसार म एही किसम के दुख भोगत हवंय।
1PE 5:10 अऊ तुम्हर थोरकन समय तक दुख भोगे के बाद, जम्मो अनुग्रह के परमेसर, जऊन ह तुमन ला मसीह म अपन सदाकाल के महिमा बर बलाय हवय, ओह खुद तुमन ला संभालही, अऊ तुमन ला, बलवान, मजबूत अऊ स्थिर करही।
1PE 5:11 ओकर सामर्थ जुग-जुग तक बने रहय। आमीन।
1PE 5:12 सीलास ला मेंह एक बिसवासयोग्य भाई समझथंव अऊ ओकरे मदद ले मेंह तुमन ला ये थोरकन बात लिखत हवंव। मेंह तुमन ला उत्साहित करे चाहथंव अऊ अपन गवाही देवत हंव कि येह परमेसर के सच्चा अनुग्रह अय। येमा मजबूत बने रहव।
1PE 5:13 ओ कलीसिया, जऊन ह बेबिलोन सहर म हवय अऊ एक साथ तुम्हर संग चुने गे हवय, तुमन ला अपन जोहार कहत हवय अऊ अइसनेच मरकुस घलो जऊन ह मोर बेटा सहीं अय, तुमन ला जोहार कहत हवय।
1PE 5:14 मसीही मया म एक-दूसर के चूमा लेके जोहार कहव। तुमन जम्मो झन ला, जऊन मन मसीह म हवव, सांति मिलय।
2PE 1:1 ये चिट्ठी सिमोन पतरस के तरफ ले, जऊन ह यीसू मसीह के एक सेवक अऊ प्रेरित ए,
2PE 1:2 तुमन ला परमेसर अऊ यीसू हमर परभू के गियान के जरिये, अनुग्रह अऊ सांति बहुंतायत ले मिलय।
2PE 1:3 परमेसर के ईस्वरीय सामर्थ ह हमन ला ओ जम्मो चीज दे हवय, जेकर जरूरत हमन ला जिनगी अऊ भक्ति खातिर होथे अऊ येह हमन ला ओकर बारे म हमर गियान के जरिये मिले हवय, जऊन ह हमन ला अपन खुद के महिमा अऊ भलई के दुवारा बलाय हवय।
2PE 1:4 येमन के जरिये, ओह हमन ला अपन बहुंत महान अऊ कीमती परतिगियां दे हवय, ताकि ओमन के जरिये, तुमन ईस्वरीय सुभाव म सहभागी होवव, अऊ ओ बुरई के काम ले बच जावव, जऊन ह संसार म हवय अऊ खराप लालसा ले आथे।
2PE 1:5 एकरे कारन, तुमन हर किसम ले कोसिस करके अपन बिसवास म भलई, अऊ भलई म गियान,
2PE 1:6 अऊ गियान म संयम, अऊ संयम म भक्ति,
2PE 1:7 अऊ भक्ति म भाई-चारा के दया, अऊ भाई-चारा के दया म मया जोड़त जावव।
2PE 1:8 काबरकि कहूं ये गुन तुमन म रहिथें अऊ येमन बढ़त जाथें, त येमन तुमन ला हमर परभू यीसू मसीह के गियान म निठल्ला अऊ असफल नइं होवन देवंय।
2PE 1:9 पर जेकर म ये गुन नइं ए, ओला धुंधला दिखथे अऊ ओह अंधरा ए, अऊ ओह भुला गे हवय कि ओह अपन पहिली के पाप ले धोवाके साफ हो गे हवय।
2PE 1:10 एकरसेति, हे मोर भाईमन, अपन बुलावा अऊ चुनाव ला निस्चित करे बर अऊ उत्सुक रहव, काबरकि कहूं तुमन अइसने करहू, त तुमन अपन बिसवास ले कभू नइं हटहू,
2PE 1:11 अऊ हमर परभू अऊ उद्धार करइया यीसू मसीह के सदाकाल के राज म तुम्हर जोरदार सुवागत होही।
2PE 1:12 एकरसेति, मेंह तुमन ला हमेसा ये बातमन के सुरता करावत रहिहूं, हालाकि तुमन येमन ला जानथव अऊ ओ सच, जऊन ह तुम्हर करा हवय, ओमा तुमन मजबूत हो गे हवव।
2PE 1:13 मेंह सोचथंव कि मोर बर येह उचित ए कि जब तक मेंह ये देहें के तम्बू म रहत हवंव, तुम्हर सुरता ला ताजा करत रहंव,
2PE 1:14 काबरकि मेंह जानथंव कि मेंह ये देहें ला जल्दी छोंड़ दूहूं जइसने कि हमर परभू यीसू मसीह ह मोला बताय हवय।
2PE 1:15 अऊ मेंह ये बात के पूरा कोसिस करहूं कि मोर मरे के बाद, तुमन ये बातमन ला हमेसा सुरता करव।
2PE 1:16 जब हमन तुमन ला हमर परभू यीसू मसीह के सामर्थ अऊ अवई के बारे बताएंन, त हमन चतुरई ले गढ़े गय कहानीमन के नकल नइं करेंन, पर हमन यीसू के महिमा ला अपन आंखी ले देखे रहेंन।
2PE 1:17 काबरकि ओह, परमेसर ददा ले आदर अऊ महिमा पाईस, जब वैभवसाली महिमा ले ओकर करा ये कहिके अवाज आईस, “येह मोर मयारू बेटा ए; एकर ले मेंह बहुंत खुस हवंव।”
2PE 1:18 जब हमन पबितर पहाड़ ऊपर ओकर संग रहेंन, त हमन खुद ये अवाज ला सुनेंन, जऊन ह स्वरग ले आवत रिहिस।
2PE 1:19 अऊ हमर करा अगमजानीमन के बचन हवय, जऊन ह ये बात ला अऊ मजबूत करिस। तुमन एकर ऊपर धियान देके बने करहू। काबरकि येह एक दीया सहीं अय, जऊन ह एक अंधियार जगह म चमकत हवय, अऊ येह तब तक चमकथे, जब तक कि दिन नइं निकलय अऊ तुम्हर हिरदय म बिहनियां के तारा नइं निकल आवय।
2PE 1:20 सबले पहिली, तुमन ये बात ला जरूर समझ लेवव कि परमेसर के बचन म बताय अगम के बात ह काकरो खुद के बचन के बखान नो हय।
2PE 1:21 काबरकि अगमबानी के सुरूआत मनखे के ईछा ले कभू नइं होईस, पर मनखेमन पबितर आतमा के अगुवई म, परमेसर कोति ले बोलिन।
2PE 2:1 पर मनखेमन के बीच म लबरा अगमजानीमन घलो रिहिन अऊ ओही किसम ले तुम्हर बीच म लबरा गुरूमन होहीं। ओमन गुपत रूप ले बिनासकारी लबारी सिकछा ला तुम्हर बीच म लानहीं, अऊ त अऊ ओमन परमपरधान परभू के इनकार करहीं, जऊन ह ओमन ला बिसाय हवय अऊ ये किसम ले ओमन अपन ऊपर अचानक बिनास लानहीं।
2PE 2:2 बहुंते झन ओमन के खराप जिनगी के नकल करहीं, अऊ ओमन के कारन, सत के रसता के अनादर होही।
2PE 2:3 अपन लालच म, ये गुरूमन अपन खुद के बनाय कथा-कहानी के दुवारा तुम्हर ले फायदा उठाहीं। ओमन के दंड के फैसला बहुंत पहिली हो चुके हवय, अऊ ओमन के बिनास जरूर होही।
2PE 2:4 जब परमेसर ह ओ स्वरगदूतमन ला नइं छोंड़िस, जऊन मन पाप करे रिहिन, पर ओमन ला अंधियार के बंधना म रखके नरक पठो दीस, ताकि ओमन नियाय बर उहां बंदी रहंय।
2PE 2:5 जब परमेसर ह पहिली जुग के संसार ला नइं छोंड़िस, जब ओह जल-परलय ले भक्तिहीन मनखेमन ला नास करिस, पर ओह धरमीपन के परचारक—नूह अऊ सात झन आने मनखेमन ला बचाईस;
2PE 2:6 अऊ जब सजा के रूप म, परमेसर ह सदोम अऊ अमोरा सहरमन ला जलाके राख कर दीस, अऊ येला एक नमूना के रूप म रखिस—ये देखाय बर कि भक्तिहीन मनखेमन के का होवइया हवय;
2PE 2:7 अऊ जब ओह धरमी मनखे लूत ला बचाईस, जऊन ह दुस्ट मनखेमन के खराप चालचलन के कारन बहुंत दुखी रिहिस
2PE 2:8 (काबरकि ओ धरमी जन ह ओमन के बीच म रहत रिहिस अऊ ओमन के अधरम के काम ला देखके अऊ सुनके दिन ब दिन, अपन मन म पीरा के अनुभव करत रिहिस)—
2PE 2:9 जब अइसने बात ए, तब परभू ह जानथे कि धरमी मनखेमन ला परिछा म ले कइसने निकालथें अऊ अधरमीमन ला कइसने सजा देवत नियाय के दिन बर रखथें।
2PE 2:10 येह खास करके, ओमन बर सही ए, जऊन मन अपन पापमय सुभाव के खराप ईछा के मुताबिक चलथें अऊ अधिकारीमन ला तुछ समझथें। ये मनखेमन हिम्मती अऊ ढीठ अंय अऊ ओमन स्वरगीय जीवमन के बदनामी करे बर नइं डरंय;
2PE 2:11 जबकि स्वरगदूत, जऊन मन जादा बलवान अऊ सक्तिसाली अंय, परभू के आघू म अइसने जीवमन के बिरोध म बदनामी के दोस नइं लगावंय।
2PE 2:12 पर ये मनखेमन ओ बात के बदनामी करथें, जेला येमन समझंय नइं। येमन जंगली पसुमन सहीं बिगर बुद्धि के जीव अंय, जऊन मन कि सिरिप पकड़े जाय बर अऊ नास होय बर जनमे हवंय, अऊ ओमन पसु के सहीं नास घलो होहीं।
2PE 2:13 जऊन हानि येमन करे हवंय, ओकर परतिफल येमन ला मिलही। दिन-मंझनियां म खा-पीके मऊज करई, येमन ला बने लगथे। येमन कलंकित अऊ दूसित अंय अऊ जब येमन तुम्हर संग जेवनार करथें, त अपन खुसी म मऊज-मस्ती करथें।
2PE 2:14 येमन के आंखीमन छिनारीपन ले भरे हवंय; येमन पाप करई कभू बंद नइं करंय; येमन चंचल मनखेमन ला बहका लेथें; येमन के हिरदय ह लालच म महारथ हासिल करे हवय; येमन परमेसर दुवारा सरापित अंय।
2PE 2:15 येमन सही रसता ला छोंड़ दे हवंय अऊ भटकके येमन बओर के बेटा बिलाम के रसता म हो ले हवंय, जऊन ह गलत काम के बनी ला पसंद करिस।
2PE 2:16 पर ओला ओकर गलत काम बर एक गदही ह दबकारिस। गदही जऊन ह एक पसु अय अऊ गोठियाय नइं सकय, पर ओ गदही ह मनखे के अवाज म गोठियाईस अऊ ओ अगमजानी के बईहापन ला रोकिस।
2PE 2:17 ये मनखेमन बिगर पानी के सोता अऊ गरेर ले उड़ाय गय बादर अंय। घोर अंधियार ह येमन बर रखे गे हवय।
2PE 2:18 काबरकि येमन जुच्छा अऊ घमंड ले भरे बात करथें अऊ अपन पापी सुभाव के छिनारी ईछा के दुवारा ओ मनखेमन ला फंसाथें, जऊन मन गलत काम करइयामन के संगति ला मुसकिल ले छोंड़के आय हवंय।
2PE 2:19 येमन ओमन ले सुतंतरता के वायदा करथें, जबकि येमन खुद भ्रस्ट जिनगी के गुलाम अंय, काबरकि जऊन चीज ह मनखे ऊपर काबू पा लेथे, मनखे ह ओ चीज के गुलाम हो जाथे।
2PE 2:20 कहूं ओमन हमर परभू अऊ उद्धार करइया यीसू मसीह ला जाने के दुवारा संसार के असुधता ले बच गे हवंय, पर ओमन फेर ओमा फंसके ओकर बस म हो जाथें, त ओमन के दसा ह आखिरी म, ओमन के सुरू के दसा ले घलो अऊ खराप हो जाही।
2PE 2:21 ओमन बर बने होतिस कि ओमन धरमीपन के रसता ला नइं जाने रहितिन, एकर बदले कि ओला जाने के बाद, पबितर हुकूम के पालन नइं करई, जऊन ह ओमन ला दिये गे रिहिस।
2PE 2:22 ओमन बर ये कहावत सही बईठथे: “कुकुर ह अपन उछरे चीज ला खाय बर फेर लहुंटके आथे,” अऊ “नहलाय-धूलाय माई सूरा ह चीखला म लोटे बर फेर चले जाथे।”
2PE 3:1 हे मयारू संगवारीमन हो, येह दूसरा चिट्ठी ए, जऊन ला मेंह तुमन ला लिखत हवंव। मेंह दूनों चिट्ठी ये सुरता कराय बर लिखे हवंव कि तुमन सही सोच-बिचार म बढ़त जावव।
2PE 3:2 मेंह चाहथंव कि तुमन ओ बचनमन ला सुरता करव, जऊन ह बहुंत पहिली पबितर अगमजानीमन के दुवारा कहे गे रिहिस अऊ हमर परभू अऊ उद्धार करइया के हुकूम ला सुरता करव, जऊन ह तुमन ला प्रेरितमन के जरिये दिये गे रिहिस।
2PE 3:3 सबले पहिली, तुमन ये जरूर समझ लेवव कि आखिरी के दिन म ठट्ठा करइयामन आहीं अऊ ठट्ठा करत अपन खुद के खराप ईछा ला पूरा करहीं।
2PE 3:4 ओमन कहिहीं, “ओह आय के वायदा करे रिहिस, पर का होईस ओकर अवई के? हमर पुरखामन के मरे के समय ले, हर एक चीज ह वइसनेच हवय, जइसने ये संसार के सुरू ले रिहिस।”
2PE 3:5 पर ओमन जानबूझके ये बात ला भुला जाथें कि बहुंत पहिली, परमेसर के बचन के दुवारा अकासमन बनाय गीन अऊ धरती ह पानी म ले अऊ पानी के संग बनाय गीस।
2PE 3:6 पानी के दुवारा ही ओ समय के संसार म भयंकर बाढ़ आईस अऊ ओह नास हो गीस।
2PE 3:7 ओहीच बचन के दुवारा, ये समय के अकासमन अऊ धरती ला आगी म नास करे बर बचाके रखे गे हवय। ओमन नियाय के दिन बर अऊ भक्तिहीन मनखेमन के बिनास बर रखे गे हवंय।
2PE 3:8 पर हे मयारू संगवारीमन हो, ये बात ला झन भूलव: परभू के नजर म एक दिन ह एक हजार साल सहीं अय, अऊ एक हजार साल ह एक दिन सहीं अय।
2PE 3:9 परभू ह अपन वायदा ला पूरा करे बर देरी नइं करय, जइसने कि कुछू मनखेमन समझत हवंय। पर ओह तुम्हर संग धीरज धरे हवय, अऊ नइं चाहथे कि कोनो नास होवंय, पर ओह चाहथे कि हर एक झन ला पछताप करे के मऊका मिलय।
2PE 3:10 पर परभू के दिन ह चोर के सहीं अचानक आ जाही। अकासमन एक गरजन के संग गायब हो जाहीं। सार-तत्व मन आगी के दुवारा नास हो जाहीं। धरती अऊ येमा करे गय जम्मो काम ला जला दिये जाही।
2PE 3:11 जब हर चीज ह, ये किसम ले नास करे जाही, त तुमन ला चाही कि पबितर अऊ भक्तिमय जिनगी जीयव,
2PE 3:12 जइसने कि तुमन परमेसर के दिन के बाट जोहथव अऊ भरसक कोसिस करथव कि येह जल्दी आवय। ओ दिन, अकासमन आगी म जरके नास हो जाहीं, अऊ सार-तत्व मन गरमी के मारे टघल जाहीं।
2PE 3:13 पर परमेसर के परतिगियां के मुताबिक, हमन एक नवां अकास अऊ नवां धरती के बाट जोहथन, जिहां सिरिप धरमीपन होही।
2PE 3:14 एकरसेति, हे मयारू संगवारीमन हो, जब तुमन ये बात के बाट जोहथव, त भरसक कोसिस करव कि तुमन निस्कलंक अऊ निरदोस पाय जावव अऊ तुमन ला ओकर संग सांति मिलय।
2PE 3:15 अपन मन म ये समझ लेवव कि हमर परभू के धीरज के मतलब उद्धार होथे, जइसने कि हमर मयारू भाई पौलुस घलो परमेसर के दुवारा दिये बुद्धि के मुताबिक तुमन ला लिखे हवय।
2PE 3:16 ओह अपन जम्मो चिट्ठी म, ये बातमन ला बतावत ओही किसम ले लिखथे। ओकर चिट्ठीमन म कुछू अइसने बातमन हवंय, जऊन ला समझना कठिन ए। अगियानी अऊ अस्थिर मनखेमन एकर गलत मतलब निकालथें, जइसने कि ओमन परमेसर के बचन के आने भागमन ला घलो करथें, अऊ ये किसम ले ओमन अपन बिनास करथें।
2PE 3:17 एकरसेति, हे मयारू संगवारीमन हो, जब तुमन ला पहिले ही चेताय गे हवय, त सचेत रहव ताकि तुमन दुस्ट मनखेमन के बहकावा म झन आवव अऊ अपन बिसवास के स्थिरता ला झन गंवावव।
2PE 3:18 पर हमर परभू अऊ उद्धार करइया यीसू मसीह के अनुग्रह अऊ गियान म बाढ़त जावव। ओकर महिमा अभी अऊ सदाकाल तक होवत रहय! आमीन।
1JO 1:1 जिनगी के ओ बचन, जऊन ह संसार के रचे के पहिली ले रिहिस; ओला हमन सुने हवन; ओला हमन अपन आंखी ले देखे हवन, ओला धियान लगाके देखे हवन अऊ हमर हांथ ले छुए हवन—ओहीच जिनगी के बचन के बारे म, हमन तुमन ला बतावत हन।
1JO 1:2 ये जिनगी ह परगट होईस, अऊ हमन ओला देखे हवन अऊ ओकर गवाही देथन, अऊ हमन तुमन ला, ओ सदाकाल के जिनगी के बारे म बतावत हन, जऊन ह ददा के संग रिहिस अऊ हमर करा परगट होईस।
1JO 1:3 जऊन ला हमन देखे हवन अऊ सुने हवन, ओकरे बारे म हमन तुमन ला बतावत हन, ताकि तुमन ला घलो हमर संग संगति मिलय। अऊ हमर संगति ह ददा के संग अऊ ओकर बेटा यीसू मसीह के संग हवय।
1JO 1:4 ये बातमन ला हमन एकरसेति लिखत हवन, ताकि हमर आनंद ह पूरा हो जावय।
1JO 1:5 ओ संदेस जऊन ला हमन ओकर बेटा यीसू ले सुने हवन अऊ तुमन ला सुनावत हवन; ओह ये अय—परमेसर ह अंजोर अय; अऊ ओमा कुछू घलो अंधियार नइं ए।
1JO 1:6 कहूं हमन ये कहन कि हमर संगति ओकर संग हवय अऊ हमन अंधियार म चलथन, तब हमन लबारी मारथन, अऊ सच के मुताबिक नइं चलन।
1JO 1:7 पर कहूं हमन अंजोर म चलथन, जइसने परमेसर ह अंजोर म हवय, त हमर संगति एक-दूसर के संग हवय, अऊ ओकर बेटा यीसू के लहू ह हमन ला जम्मो पाप ले सुध करथे।
1JO 1:8 कहूं हमन कहिथन कि हमन म कुछू पाप नइं ए, त हमन अपनआप ला धोखा देथन अऊ हमन म सत नइं ए।
1JO 1:9 कहूं हमन अपन पापमन ला मान लेथन, त परमेसर ह हमर पाप ला छेमा करही अऊ हमन ला जम्मो अधरम ले सुध करही, काबरकि ओह बिसवासयोग्य अऊ धरमी अय।
1JO 1:10 कहूं हमन ये कहिथन कि हमन पाप नइं करे हवन, त हमन ओला लबरा ठहिराथन, अऊ ओकर बचन ह हमन म नइं ए।
1JO 2:1 हे मोर मयारू लइकामन हो, मेंह ये बात तुमन ला एकरसेति लिखत हंव, ताकि तुमन पाप झन करव। पर कहूं कोनो पाप करथे, त हमर करा एक मददगार हवय, जऊन ह हमर बचाव म परमेसर ददा ले गोठियाथे, अऊ ओ धरमी जन ह यीसू मसीह अय।
1JO 2:2 अऊ ओहीच ह हमर पाप खातिर पछतावा के बलिदान ए, अऊ सिरिप हमर पाप ही नइं, पर जम्मो संसार के पाप बर घलो।
1JO 2:3 कहूं हमन ओकर हुकूममन ला मानथन, त एकर दुवारा हमन ला भरोसा हो जाही कि हमन ओला जानथन।
1JO 2:4 जऊन मनखे ह ये कहिथे, “मेंह ओला जानथंव।” पर ओकर हुकूममन ला नइं मानय, त ओह लबरा अय, अऊ ओमा सत नइं ए।
1JO 2:5 पर जऊन ह ओकर बचन ला मानथे, त सही म परमेसर के मया ह ओमा पूरा होथे। ये किसम ले, हमन जानथन कि हमन परमेसर म हवन:
1JO 2:6 जऊन मनखे ह ये कहिथे कि ओह परमेसर म होके जिनगी बिताथे, त ओला अइसने जिनगी जीना चाही, जइसने यीसू ह ये संसार म रहत, जिनगी बिताईस।
1JO 2:7 हे मयारू भाईमन हो, मेंह तुमन ला कोनो नवां हुकूम नइं लिखत हंव, पर ओहीच जुन्ना हुकूम, जऊन ह तुमन ला सुरू ले मिले हवय। ये जुन्ना हुकूम ओ संदेस अय, जऊन ला तुमन सुने हवव।
1JO 2:8 तभो ले मेंह तुमन ला एक नवां हुकूम लिखत हंव। एकर सच्चई ह ओमा अऊ तुमन म दिखथे, काबरकि अंधियार ह छंटत जावथे, अऊ सच के अंजोर ह अब चमकत हवय।
1JO 2:9 जऊन ह ये कहिथे कि ओह अंजोर म हवय अऊ अपन भाई ले बईरता रखथे, त ओह अभी तक ले अंधियार म हवय।
1JO 2:10 जऊन ह अपन भाई ले मया करथे, ओह अंजोर म चलथे, अऊ ओमा अइसने कुछू नइं ए, जऊन ह ओला ठोकर खवाही।
1JO 2:11 फेर जऊन ह अपन भाई ले बईरता रखथे, ओह अंधियार म हवय, अऊ अंधियार म रेंगथे अऊ ओह नइं जानय कि ओह कहां जावत हवय, काबरकि अंधियार ह ओकर आंखीमन ला अंधरा कर दे हवय।
1JO 2:12 हे मोर लइकामन हो, मेंह तुमन ला लिखत हंव, काबरकि तुम्हर पाप ह मसीह के नांव खातिर छेमा हो गे हवय।
1JO 2:13 हे ददामन हो, मेंह तुमन ला लिखत हंव, काबरकि तुमन ओला जानथव, जऊन ह सुरूच ले हवय। हे जवानमन हो, मेंह तुमन ला लिखत हंव, काबरकि तुमन ओ दुस्ट ऊपर जय पाय हवव। हे मोर लइकामन हो, मेंह तुमन ला लिखत हंव, काबरकि तुमन ददा परमेसर ला जानथव।
1JO 2:14 हे ददामन हो, मेंह तुमन ला लिखत हंव, काबरकि तुमन ओला जानथव, जऊन ह संसार के रचे के पहिली ले हवय। हे जवानमन हो, मेंह तुमन ला लिखत हंव, काबरकि तुमन मजबूत हवव, अऊ परमेसर के बचन ह तुमन म बने रहिथे, अऊ तुमन ओ दुस्ट ऊपर जय पाय हवव।
1JO 2:15 तुमन न तो संसार ले अऊ न संसार के कोनो चीज ले मया करव। कहूं कोनो संसार ले मया करथे, त ओह परमेसर ददा ले मया नइं करय।
1JO 2:16 काबरकि संसार के हर एक चीज जइसने कि—मनखे के देहें के लालसा, आंखी के लालसा अऊ जिनगी के घमंड—ये जम्मो चीज परमेसर ददा के नो हय, पर येह संसार के अय।
1JO 2:17 संसार अऊ एकर लालसा ह खतम हो जाही, पर जऊन मनखे ह परमेसर के मनसा ला पूरा करथे, ओह सदाकाल तक परमेसर के संग रहिथे।
1JO 2:18 हे मोर लइकामन हो, येह अन्त के बेरा अय; अऊ जइसने कि तुमन सुने हवव कि मसीह के बिरोधी ह आवत हवय, पर अब मसीह के कतको बिरोधीमन आ गे हवंय। एकरसेति, हमन जानथन कि येह अन्त के बेरा अय।
1JO 2:19 ओमन हमन ले निकलके गीन, पर ओमन सही म हमन के नो हंय। काबरकि यदि ओमन हमर बीच के होतिन, त ओमन हमर संग बने रहितिन; पर ओमन के चले जाना, ये साबित करथे कि ओमा ले कोनो हमन के नो हंय।
1JO 2:20 पर तुम्हर अभिसेक पबितर जन के दुवारा करे गे हवय, अऊ तुमन जम्मो झन सच ला जानथव।
1JO 2:21 मेंह तुमन ला एकरसेति नइं लिखत हंव कि तुमन सच ला नइं जानव, पर मेंह एकरसेति लिखत हंव कि तुमन सच ला जानथव, अऊ ये घलो जानथव कि कोनो लबारी बात सत के तरफ ले नइं आवय।
1JO 2:22 कोन ह लबरा ए? ओ मनखे, जऊन ह यीसू ला मसीह नइं मानय। अइसने मनखे ह मसीह के बिरोधी अय। ओह ददा अऊ बेटा दूनों के इनकार करथे।
1JO 2:23 जऊन ह परमेसर के बेटा के इनकार करथे, ओह परमेसर ददा ला नइं जानय, अऊ जऊन ह बेटा ला मान लेथे, ओह परमेसर ददा ला घलो जानथे।
1JO 2:24 देखव, जऊन कुछू तुमन सुरू ले सुने हवव, ओह तुमन म बने रहय। कहूं ओह तुमन म बने रहिही, त तुमन घलो बेटा अऊ ददा दूनों म बने रहिहू।
1JO 2:25 अऊ ओह हमर ले जऊन बात के वायदा करे हवय—ओह “परमेसर के संग सदाकाल के जिनगी” अय।
1JO 2:26 मेंह ये बात तुमन ला ओमन के बारे म लिखत हंव, जऊन मन तुमन ला धोखा देय के कोसिस करथें।
1JO 2:27 पर ओ अभिसेक, जऊन ला तुमन ओकर ले पाय हवव, ओह तुमन म बने रहिथे, अऊ तुमन ला एकर जरूरत नइं ए कि कोनो तुमन ला सिखोवय। मसीह के अभिसेक ह तुमन ला जम्मो बात सिखोथे, अऊ ओ अभिसेक ह सही अय, लबारी नो हय। जइसने येह तुमन ला सिखोय हवय, वइसने तुमन ओमा बने रहव।
1JO 2:28 अब हे मोर लइकामन हो, मसीह म बने रहव, ताकि जब ओह परगट होवय, त ओकर आय के बेरा ओकर आघू म, हमन बिसवास ले भरे रहन अऊ हमन ला लजाय ला झन पड़य।
1JO 2:29 कहूं तुमन जानथव कि ओह धरमी अय, त तुमन ये घलो जानथव कि जऊन ह भलई के काम करथे, ओह परमेसर ले जनमे हवय।
1JO 3:1 देखव, परमेसर ददा ह हमन ला कतेक मया करे हवय कि हमन परमेसर के संतान कहाथन, अऊ सही म हमन परमेसर के संतान अन। संसार ह एकरसेति हमन ला नइं जानय, काबरकि ओह परमेसर ला नइं जानिस।
1JO 3:2 हे मयारू संगवारीमन हो, अब हमन परमेसर के संतान अन अऊ अभी तक ले, ये पता नइं चले हवय कि हमन का बनबो। पर हमन ये जानथन कि जब मसीह ह परगट होही, त हमन घलो ओकर सहीं बन जाबो, काबरकि हमन ओला वइसनेच देखबो, जइसने ओह हवय।
1JO 3:3 हर एक मनखे, जऊन ह मसीह ऊपर ये आसा रखथे, ओह अपनआप ला वइसने सुध करथे, जइसने मसीह ह सुध हवय।
1JO 3:4 हर एक मनखे, जऊन ह पाप करथे, ओह परमेसर के कानून ला टोरथे; काबरकि पाप करे के मतलब परमेसर के कानून टोरई अय।
1JO 3:5 पर तुमन जानथव कि मसीह ह एकरसेति परगट होईस, ताकि ओह हमर पापमन ला ले जावय। अऊ ओमा कोनो पाप नइं ए।
1JO 3:6 जऊन मनखे मसीह म जीयथे, ओह पाप करते नइं रहय, पर जऊन मनखे ह पाप करथे, ओह न तो ओला देखे हवय, अऊ न ही ओला जानथे।
1JO 3:7 हे लइकामन हो, काकरो बहकावा म झन आवव। जऊन ह परमेसर के नजर म सही काम करथे, ओह धरमी अय, जइसने कि मसीह ह धरमी अय।
1JO 3:8 जऊन ह पाप करते रहिथे, ओह सैतान कोति ले अय, काबरकि सैतान ह सुरूच ले पाप करत आय हवय। परमेसर के बेटा ह एकरसेति परगट होईस कि ओह सैतान के काम ला नास करय।
1JO 3:9 जऊन ह परमेसर ले जनमथे, ओह पाप करतेच नइं रहय, काबरकि परमेसर के सुभाव ओमा बने रहिथे। ओह पाप नइं कर सकय, काबरकि ओह परमेसर ले जनमे हवय।
1JO 3:10 ये किसम ले, हमन जानथन कि कोन ह परमेसर के संतान अय अऊ कोन ह सैतान के संतान अय। जऊन ह सही काम नइं करय, ओह परमेसर के संतान नो हय; अऊ ओह घलो परमेसर के संतान नो हय, जऊन ह अपन भाई ले मया नइं करय।
1JO 3:11 ओ संदेस, जऊन ला तुमन सुरूच ले सुने हवव, ओह ये अय कि हमन एक-दूसर ले मया करन।
1JO 3:12 हमन कैन के सहीं झन बनन, जऊन ह दुस्ट जन के तरफ ले रिहिस अऊ अपन भाई ला मार डारिस। अऊ ओह ओला काबर मार डारिस? काबरकि ओकर अपन के काममन खराप रिहिन, अऊ ओकर भाई के काममन परमेसर के नजर म सही रिहिन।
1JO 3:13 हे भाईमन हो, कहूं संसार के मनखेमन तुम्हर ले बईरता रखथें, त अचरज झन करव।
1JO 3:14 हमन जानथन कि हमन मिरतू ले पार होके जिनगी म आ गे हवन, काबरकि हमन अपन भाईमन ला मया करथन। जऊन ह मया नइं करय, ओह मिरतू म बने रहिथे।
1JO 3:15 जऊन ह अपन भाई ले बईरता रखथे, ओह हतियारा अय, अऊ तुमन जानथव कि कोनो हतियारा करा परमेसर के संग सदाकाल के जिनगी नइं रहय।
1JO 3:16 मया के मतलब ला हमन अइसने जानथन: यीसू मसीह ह हमर खातिर अपन जिनगी ला दे दीस। अऊ हमन ला घलो अपन भाईमन खातिर अपन जिनगी ला देना चाही।
1JO 3:17 यदि काकरो करा संसार के संपत्ति हवय अऊ ओह देखथे कि ओकर भाई ला कोनो चीज के जरूरत हवय, पर ओकर ऊपर दया नइं करय, त परमेसर के मया ओमा नइं रह सकय।
1JO 3:18 हे लइकामन हो, आवव, हमन सिरिप अपन गोठ अऊ मुहूं ले ही मया नइं करन, पर अपन काम अऊ सत के दुवारा घलो मया करन।
1JO 3:19 एकर दुवारा हमन जानबो कि हमन सत म हवन अऊ परमेसर के आघू म हमर हिरदय ला भरोसा होही,
1JO 3:20 चाहे जब भी हमर हिरदय ह हमन ला दोसी ठहिराय। काबरकि परमेसर ह हमर हिरदय ले बड़े अय अऊ ओह हर एक बात ला जानथे।
1JO 3:21 हे मयारू संगवारीमन हो, यदि हमर हिरदय ह हमन ला दोसी नइं ठहिराय, त हमन ला परमेसर के आघू म भरोसा होथे,
1JO 3:22 अऊ जऊन कुछू घलो हमन ओकर ले मांगथन, ओह हमन ला देथे, काबरकि हमन ओकर हुकूम ला मानथन अऊ ओहीच काम करथन, जेकर ले ओला खुसी होथे।
1JO 3:23 अऊ परमेसर के हुकूम ये अय कि हमन ओकर बेटा यीसू मसीह के नांव म बिसवास करन, अऊ एक-दूसर ला मया करन, जइसने कि ओह हमन ला हुकूम दे हवय।
1JO 3:24 जऊन मन परमेसर के हुकूम ला मानथें, ओमन परमेसर म अऊ परमेसर ह ओमन म बने रहिथें अऊ ये किसम ले, हमन जानथन कि ओह हमन म रहिथे: हमन येला ओ पबितर आतमा के दुवारा जानथन, जऊन ला ओह हमन ला दे हवय।
1JO 4:1 हे मयारू संगवारीमन हो, हर एक आतमा ऊपर बिसवास झन करव, पर आतमामन ला परखव कि ओमन परमेसर कोति ले अंय कि नइं, काबरकि कतको लबरा अगमजानीमन संसार म आ गे हवंय।
1JO 4:2 परमेसर के आतमा ला तुमन ये किसम ले पहिचान सकत हव: हर ओ मनखे जऊन ह मान लेथे कि यीसू मसीह ह देहें धारन करके आईस, ओमा परमेसर के आतमा हवय,
1JO 4:3 पर हर ओ मनखे जऊन ह यीसू ला नइं मानय, ओमा परमेसर के आतमा नइं ए। येह ओ मनखे ए, जऊन म मसीह के बिरोधी के आतमा हवय, जेकर बारे म तुमन सुने हवव कि ओह अवइया हवय, अऊ अब ओह संसार म आ चुके हवय।
1JO 4:4 हे मोर लइकामन हो, तुमन परमेसर के अव अऊ तुमन ये लबरा अगमजानीमन ऊपर जय पाय हवव, काबरकि जऊन ह तुमन म हवय, ओह ओकर ले बड़े अय, जऊन ह संसार म हवय।
1JO 4:5 ओमन संसार के अंय, अऊ एकरसेति ओमन संसार के गोठ गोठियाथें, अऊ संसार ह ओमन के सुनथे।
1JO 4:6 हमन परमेसर के अन, अऊ जऊन ह परमेसर ला जानथे, ओह हमर सुनथे; पर जऊन ह परमेसर के नो हय, ओह हमर बात ला नइं सुनय। ये किसम ले हमन मनखेमन के पहिचान करथन कि काकर करा सत के आतमा हवय अऊ काकर करा लबारी आतमा हवय।
1JO 4:7 हे मयारू संगवारीमन हो, हमन एक-दूसर ले मया करन, काबरकि मया ह परमेसर करा ले आथे। जऊन ह मया करथे, ओह परमेसर ले जनमे हवय, अऊ ओह परमेसर ला जानथे।
1JO 4:8 जऊन ह मया नइं करय, ओह परमेसर ला नइं जानय, काबरकि परमेसर ह मया अय।
1JO 4:9 परमेसर ह ये किसम ले अपन मया ला हमर बीच म परगट करिस: ओह अपन एकलऊता बेटा ला ये संसार म पठोईस, ताकि हमन ला ओकर दुवारा सदाकाल के जिनगी मिलय।
1JO 4:10 मया येमा नइं अय कि हमन परमेसर ले मया करेंन, पर मया येमा हवय कि परमेसर ह हमर ले मया करिस, अऊ अपन बेटा ला पठोईस कि ओह कुरूस म मरे के दुवारा हमर पाप के सजा ला अपन ऊपर ले लेवय।
1JO 4:11 हे मयारू संगवारीमन हो, जब परमेसर ह हमर ले अइसने मया करिस, त हमन ला घलो एक-दूसर ले मया करना चाही।
1JO 4:12 परमेसर ला कभू कोनो नइं देखे हवंय; पर यदि हमन एक-दूसर ले मया करन, त परमेसर ह हमन म रहिथे अऊ ओकर मया ह हमन म पूरा हो जाथे।
1JO 4:13 हमन जानथन कि हमन परमेसर म रहिथन अऊ ओह हमन म, काबरकि ओह अपन आतमा हमन ला दे हवय।
1JO 4:14 अऊ हमन देख घलो डारेंन अऊ गवाही देवत हन कि परमेसर ददा ह अपन बेटा ला संसार के उद्धार करइया के रूप म पठोय हवय।
1JO 4:15 कहूं कोनो ये मान लेथे कि यीसू ह परमेसर के बेटा अय, त परमेसर ह ओमा रहिथे अऊ ओह परमेसर म।
1JO 4:16 अऊ हमन जानथन अऊ बिसवास करथन कि परमेसर ह हमन ला मया करथे। परमेसर ह मया अय। जऊन ह मया करते रहिथे, ओह परमेसर म बने रहिथे अऊ परमेसर ह ओमा।
1JO 4:17 मया ला हमर बीच म पूरा करे गीस, ताकि हमन ला नियाय के दिन भरोसा होवय कि ये संसार म हमन वइसने जिनगी जीये हवन, जइसने यीसू ह जीये रिहिस।
1JO 4:18 मया म डर नइं होवय। पर सही के मया ह डर ला निकाल देथे, काबरकि डर के संबंध, सजा के संग होथे। जऊन ह डरथे, ओमा सही के मया नइं ए।
1JO 4:19 हमन एकरसेति मया करथन, काबरकि पहिली परमेसर ह हमर ले मया करिस।
1JO 4:20 कहूं कोनो ये कहिथे, “मेंह परमेसर ले मया करथंव,” अऊ ओह अपन भाई ले बईरता रखथे, त ओह लबरा अय। काबरकि जऊन ह अपन ओ भाई ले मया नइं करय, जऊन ला ओह देखे हवय, त ओह परमेसर ले मया नइं कर सकय, जऊन ला ओह देखे नइं हवय।
1JO 4:21 अऊ परमेसर ह हमन ला, ये हुकूम दे हवय: जऊन ह परमेसर ले मया करथे, ओला अपन भाई ले घलो मया करना जरूरी अय।
1JO 5:1 जऊन ह ये बिसवास करथे कि यीसू ह मसीह अय, ओह परमेसर के लइका अय, अऊ जऊन ह परमेसर ददा ले मया करथे, ओह ओकर लइका ले घलो मया करथे।
1JO 5:2 जब हमन परमेसर ले मया करथन अऊ ओकर हुकूममन ला मानथन, त एकर ले हमन जानथन कि हमन परमेसर के लइकामन ले घलो मया करथन।
1JO 5:3 परमेसर बर हमर मया ये अय कि हमन ओकर हुकूममन ला मानन। अऊ ओकर हुकूममन ला मानना कठिन नो हय।
1JO 5:4 काबरकि जऊन ह परमेसर ले जनमथे, ओह संसार ऊपर जय पाथे। हमन यीसू मसीह ऊपर बिसवास करे के दुवारा संसार ऊपर जय पाथन।
1JO 5:5 संसार ऊपर कोन ह जय पाथे? सिरिप ओहीच, जऊन ह ये बिसवास करथे कि यीसू ह परमेसर के बेटा अय।
1JO 5:6 यीसू मसीह ह ओ अय, जऊन ह पानी अऊ लहू के दुवारा आईस। ओह सिरिप पानी के दुवारा ही नइं आईस, पर पानी अऊ लहू दूनों के दुवारा आईस। अऊ ये पबितर आतमा अय, जऊन ह एकर बारे म गवाही देथे, काबरकि पबितर आतमा ह सत अय।
1JO 5:7 गवाही देवइयामन तीन हवंय:
1JO 5:8 पबितर आतमा, पानी अऊ लहू; अऊ ये तीनों म सहमती हवय।
1JO 5:9 हमन मनखेमन के गवाही ला मान लेथन, पर परमेसर के गवाही त, ओकर ले बढ़के अय; काबरकि परमेसर के गवाही ये अय कि ओह अपन बेटा के बारे म गवाही दे हवय।
1JO 5:10 जऊन ह परमेसर के बेटा के ऊपर बिसवास करथे, ओह अपन हिरदय म ये गवाही रखथे। जऊन ह परमेसर ऊपर बिसवास नइं करय, ओह परमेसर ला लबरा बनाथे, काबरकि ओह ओ गवाही ऊपर बिसवास नइं करिस, जऊन ला परमेसर ह अपन बेटा के बारे म दे हवय।
1JO 5:11 अऊ ओ गवाही ये अय: परमेसर ह हमन ला सदाकाल के जिनगी दे हवय, अऊ ये जिनगी ओकर बेटा म हवय।
1JO 5:12 जेकर करा परमेसर के बेटा हवय, ओकर करा जिनगी हवय; अऊ जेकर करा परमेसर के बेटा नइं ए, ओकर करा जिनगी घलो नइं ए।
1JO 5:13 मेंह तुमन ला, जऊन मन परमेसर के बेटा ऊपर बिसवास करथव, ये बात लिखत हंव, ताकि तुमन जानव कि तुम्हर करा परमेसर के संग सदाकाल के जिनगी हवय।
1JO 5:14 हमन ला परमेसर ऊपर ये बिसवास हवय कि यदि हमन ओकर मन मुताबिक कुछू मांगथन, त ओह हमर सुनथे।
1JO 5:15 अऊ जब हमन जानथन कि जऊन कुछू हमन मांगथन, ओह हमर सुनथे, तब हमन ये घलो जानथन कि जऊन कुछू हमन ओकर ले मांगे हवन, ओ चीज हमन ला मिल गे हवय।
1JO 5:16 यदि कोनो अपन भाई ला ओ पाप करत देखथे, जेकर नतीजा मिरतू नो हय, त ओह पराथना करय अऊ परमेसर ह ओला जिनगी दीही। मेंह ओमन के बारे म कहत हवंव, जऊन मन ओ पाप करथें, जेकर नतीजा मिरतू नो हय। एक अइसने पाप घलो हवय, जेकर नतीजा मिरतू होथे। मेंह ये नइं कहत हंव कि ओह ओकर बारे म पराथना करय।
1JO 5:17 जम्मो गलत काम ह पाप अय, पर अइसने पाप घलो हवय, जेकर नतीजा मिरतू नो हय।
1JO 5:18 हमन जानथन कि जऊन ह परमेसर ले जनमे हवय, ओह पाप करतेच नइं रहय; परमेसर के बेटा ह ओकर बचाव करथे, अऊ दुस्ट जन ह ओला छू नइं सकय।
1JO 5:19 हमन जानथन कि हमन परमेसर के लइका अन, अऊ जम्मो संसार ह ओ दुस्ट के अधीन म हवय।
1JO 5:20 हमन ये घलो जानथन कि परमेसर के बेटा ह आ गे हवय, अऊ ओह हमन ला ये समझ दे हवय कि हमन ओला चिनहे सकन, जऊन ह सत ए। अऊ हमन ओमा हवन, जऊन ह सत अय, याने कि ओकर बेटा यीसू मसीह। एहीच ह सच्चा परमेसर अऊ सदाकाल के जिनगी अय।
1JO 5:21 हे मोर लइकामन हो, अपनआप ला मूरतीमन ले बचाय रखव।
2JO 1:1 कलीसिया के अगुवा कोति ले,
2JO 1:2 काबरकि सत ह हमन म रहिथे अऊ हमर संग सदाकाल तक रहिही:
2JO 1:3 परमेसर ददा अऊ ओकर बेटा यीसू मसीह कोति ले अनुग्रह, दया अऊ सांति हमर संग सत अऊ मया के संग बने रहिही।
2JO 1:4 मेंह ये जानके अब्बड़ आनंद मनावत हवंव कि तोर कुछू लइकामन सत म चलत हवंय, जइसने कि परमेसर ददा ह हमन ला हुकूम दे हवय।
2JO 1:5 अब हे मयारू माईलोगन, मेंह तोला कोनो नवां हुकूम नइं लिखत हंव, पर ओहीच हुकूम, जऊन ह हमन ला सुरू म मिले रिहिस। मेंह कहत हंव कि हमन एक-दूसर ले मया करन।
2JO 1:6 अऊ मया के मतलब ये अय कि हमन परमेसर के हुकूम के मुताबिक चलन। जइसने कि तेंह सुरू ले सुने हस, ओकर हुकूम ये अय कि तें मया के जिनगी जी।
2JO 1:7 कतको धोखा देवइयामन ये संसार म आ गे हवंय, जऊन मन ये नइं मानंय कि यीसू मसीह ह मनखे के देहें धरके आईस। ये किसम के मनखेमन आने मन ला धोखा देथें अऊ मसीह के बिरोधी अंय।
2JO 1:8 सचेत रहव कि तुमन ओ चीज ला झन गंवावव, जेकर खातिर हमन मेहनत करे हवन, अऊ तुमन ला ओकर पूरा ईनाम मिलय।
2JO 1:9 ओ मनखे जऊन ह मसीह के उपदेस ले भटक जाथे अऊ ओमा बने नइं रहय, ओकर करा परमेसर नइं ए। पर जऊन ह ओकर उपदेस म बने रहिथे, ओकर करा परमेसर ददा अऊ बेटा दूनों हवंय।
2JO 1:10 कहूं कोनो तुम्हर करा आथे अऊ ये सिकछा नइं देवय, त ओला न तो अपन घर ले जावव अऊ न ही ओकर सुवागत करव।
2JO 1:11 जऊन ह अइसने मनखे के सुवागत करथे, ओह ओकर गलत काम म भागीदार होथे।
2JO 1:12 मोर करा तुमन ला लिखे बर कतको बात हवय, पर मेंह कागज अऊ सियाही के उपयोग नइं करे चाहत हवंव। मोला आसा हवय कि मेंह तुम्हर करा आहूं अऊ तुम्हर संग बईठके गोठियाहूं, ताकि हमर आनंद ह पूरा हो जावय।
2JO 1:13 परमेसर के दुवारा चुने तोर बहिनी के लइकामन तोला जोहार कहत हवंय।
3JO 1:1 कलीसिया के अगुवा कोति ले,
3JO 1:2 हे मयारू संगी, मेंह पराथना करत हंव कि तेंह भला-चंगा रह अऊ हर एक बात म तोर भलई होवय, जइसने कि तेंह आतमा म उन्नति करत हस।
3JO 1:3 मेंह अब्बड़ आनंद ले भर गेंव, जब कुछू भाईमन आईन अऊ ये गवाही दीन कि तेंह परमेसर के सत बचन म चलत हस। ओमन बताईन कि तेंह कइसने परमेसर के सत बचन के मुताबिक जिनगी बितावत हस।
3JO 1:4 एकर ले बड़के मोर करा अऊ कोनो आनंद के बात नइं हो सकय कि मेंह ये सुनंव कि मोर लइकामन परमेसर के सत बचन के मुताबिक चलत हवंय।
3JO 1:5 हे मयारू संगी, तेंह ओ काम म बिसवासयोग्य ठहिरे हस, जऊन ला तेंह भाईमन बर करत हवस, खास करके जब ओमन तोर बर अनजान अंय।
3JO 1:6 ओमन कलीसिया ला तोर मया के बारे म बताय हवंय। तेंह अइसने कर: ओमन के आघू के यातरा के अइसने परबंध कर कि परमेसर ह खुस होवय।
3JO 1:7 काबरकि ओमन मसीह के सेवा म निकले हवंय अऊ मसीह ऊपर बिसवास नइं करइयामन ले येमन कुछू नइं लेवंय।
3JO 1:8 एकरसेति हमन ला अइसने मनखेमन के सेवा-सतकार करना चाही, ताकि हमन परमेसर के सत बचन खातिर एक संग काम कर सकन।
3JO 1:9 मेंह कलीसिया ला लिखे हवंव, पर दियुत्रिफेस, जऊन ह ओमन के मुखिया बने चाहत हवय, हमर बात ला नइं मानय।
3JO 1:10 एकरसेति जब मेंह आहूं, त ओ बातमन ला बताहूं जेला ओह करत हवय। ओह हमर बदनामी करत हवय। ओला एकर ले संतोस नइं होईस, त ओह आने भाईमन ला घलो गरहन नइं करय, अऊ जऊन मन भाईमन ला गरहन करे चाहथें, ओह ओमन ला मना करथे अऊ ओमन ला कलीसिया ले निकाल देथे।
3JO 1:11 हे मयारू संगी, बुरई के नइं पर भलई के नकल कर। जऊन ह भलई के काम करथे, ओह परमेसर के अय, अऊ जऊन ह बुरई के काम करथे, ओह परमेसर ला नइं देखे हवय।
3JO 1:12 देमेतिरियुस के बारे म जम्मो झन बने बात कहिथें—अऊ त अऊ सत ह खुद एही कहिथे। हमन घलो ओकर बारे म बने बात कहिथन, अऊ तेंह जानथस कि हमर गवाही ह सही ए।
3JO 1:13 मोर करा तोला लिखे बर कतको बात हवय, पर मेंह कलम अऊ सियाही ले लिखे नइं चाहत हंव।
3JO 1:14 मोला आसा हवय कि तोर संग जल्दी भेंट होही अऊ तब हमन एक संग बईठके गोठियाबो।
3JO 1:15 तोला सांति मिलय। इहां के संगवारीमन तोला जोहार कहत हवंय। उहां संगवारीमन ला नांव ले-लेके मोर जोहार कहि देबे।
JUD 1:1 ये चिट्ठी ह यीसू मसीह के सेवक अऊ याकूब के भाई यहूदा के तरफ ले,
JUD 1:2 तुमन ला परमेसर के दया, सांति अऊ मया बहुंतायत ले मिलय।
JUD 1:3 हे मयारू संगीमन हो, हालाकि मेंह तुमन ला उद्धार के बारे म लिखे बर बहुंत उत्सुक रहेंव, जऊन म हमन सहभागी हवन, पर मेंह ये जरूरी समझेंव कि तुमन ला लिखंव अऊ बिनती करंव कि तुमन ओ बिसवास खातिर पूरा मेहनत करव, जऊन ला परमेसर ह अपन पबितर मनखेमन ला जम्मो के सेति एकेच बार म दे हवय।
JUD 1:4 काबरकि कुछू मनखेमन गुपत रूप ले तुमन म आके मिल गे हवंय, जऊन मन के दंड के हुकूम बहुंत पहिली ले लिखे गे हवय। ओमन अधरमी मनखे अंय। ओमन हमर परमेसर के अनुग्रह ला दुराचार म बदल देथें अऊ हमर एकेच परमपरधान परभू यीसू मसीह के इनकार करथें।
JUD 1:5 हालाकि तुमन ये जम्मो बात ला पहिली ले जानत हव, पर मेंह सुरता कराय चाहत हंव कि परभू ह अपन मनखेमन ला मिसर देस ले एक बार छोंड़ाईस, पर बाद म ओमन ला नास कर दीस, जऊन मन बिसवास नइं करिन।
JUD 1:6 अऊ ओ स्वरगदूत, जऊन मन अपन अधिकार के सीमना म नइं रिहिन अऊ स्वरग म अपन खुद के घर ला तियाग दीन—ओमन ला परमेसर ह नियाय के महान दिन खातिर अंधियार म, सदाकाल के बेड़ी म बांधके रखे हवय।
JUD 1:7 एही किसम ले सदोम, अमोरा अऊ आसपास के सहर के मनखेमन अपनआप ला छिनारी काम अऊ खराप चालचलन म लगाईन। येमन ओमन बर एक नमूना ठहिरिन, जऊन मन सदाकाल के आगी के सजा भोगत हवंय।
JUD 1:8 ओहीच किसम ले, ये मनखेमन सपना म अपन खुद के देहें ला असुध करथें; परमेसर के परभूता के इनकार करथें, अऊ स्वरगीय जीवमन ला बदनाम करथें।
JUD 1:9 अऊ त अऊ परधान स्वरगदूत मिकाएल ह जब सैतान के संग अगमजानी मूसा के लास के बारे म बिवाद करत रिहिस, त ओह सैतान ऊपर बदनामी के दोस लगाय के हिम्मत नइं करिस, पर ये कहिस, “परभू ह तोला दबकारय।”
JUD 1:10 पर ये मनखेमन, जऊन बातमन ला नइं समझंय, ओकर बारे म खराप गोठ गोठियाथें, अऊ जऊन बातमन ला, येमन जंगली पसुमन के सहीं सरल रूप म जानथें, ओहीच बातमन येमन ला नास कर दीहीं।
JUD 1:11 येमन ऊपर हाय! काबरकि येमन कैन के डहार म चलथें; येमन फायदा खातिर, बिलाम के सहीं गलती करथें; येमन कोरह के सहीं बिदरोह करथें, अऊ ओकरे सहीं नास हो जाथें।
JUD 1:12 ये मनखेमन तुम्हर मया के जेवनार म गंदगी के सहीं अंय, येमन तुम्हर संग बेसरम सहीं खाथें-पीथें अऊ सिरिप अपनआप के खियाल रखथें। येमन बिगर पानी के बादर अंय, जऊन ला हवा उड़ा ले जाथे। येमन पतझड़ के ओ रूख सहीं अंय, जऊन म फर नइं लगय अऊ उखाने जाथें अऊ दूबारा मर जाथें।
JUD 1:13 येमन समुंदर के भयानक लहरा सहीं अंय, जऊन मन अपन लाज के फेन ला निकालथें। येमन किंदरत तारामन सहीं अंय, जेमन खातिर परमेसर ह सदाकाल बर घोर अंधियार ठहिराय हवय।
JUD 1:14 हनोक, जऊन ह आदम के सातवां पीढ़ी के रिहिस, ये मनखेमन के बारे म ये अगमबानी करे रिहिस, “देखव, परभू ह हजारों-हजार अपन पबितर स्वरगदूतमन संग आवत हवय
JUD 1:15 ताकि हर एक के नियाय करय, अऊ ओ जम्मो अधरमीमन ला दोसी ठहिराय, जऊन मन कुकरम करके अधरम के काम करे हवंय, अऊ परमेसर के बिरोध म ओ जम्मो कठोर बचन, ये अधरमी पापीमन कहे हवंय।”
JUD 1:16 ये मनखेमन कुड़कुड़ावत अऊ आने ऊपर दोस लगावत रहिथें; येमन अपन खुद के खराप ईछा के मुताबिक चलथें; येमन अपन खुद के बड़ई मारथें अऊ अपन खुद के फायदा बर दूसर के चापलूसी करथें।
JUD 1:17 पर, हे मयारू संगवारीमन हो, तुमन ओ बातमन ला सुरता करव, जऊन ला हमर परभू यीसू मसीह के प्रेरितमन तुमन ला पहिली कहे रिहिन।
JUD 1:18 ओमन तुमन ला कहे रिहिन, “आखिरी समय म, ठट्ठा करइयामन होहीं, जऊन मन अपन खुद के खराप ईछा के मुताबिक चलहीं।”
JUD 1:19 येमन ओ मनखे अंय, जऊन मन तुम्हर बीच म फूट डारथें; येमन अपन संसारिक ईछा के मुताबिक चलथें अऊ येमन करा पबितर आतमा नइं ए।
JUD 1:20 पर हे मयारू संगवारीमन, तुमन अपनआप ला अपन परम पबितर बिसवास म बढ़ावव, अऊ पबितर आतमा के सामर्थ म पराथना करव।
JUD 1:21 अपनआप ला परमेसर के मया म बनाय रखव, अऊ हमर परभू यीसू मसीह के दया के बाट जोहत रहव, जऊन ह तुमन ला परमेसर के संग सदाकाल के जिनगी दीही।
JUD 1:22 जऊन मन बचन ऊपर संका करथें, ओमन ऊपर दया करव;
JUD 1:23 आने मन ला लबरा गुरूमन के सिकछा ले बचावव, जइसने तुमन कोनो ला आगी ले खींचके बचाथव; भय के संग आने मन ऊपर दया करव; पर ओ मनखेमन के ओ ओनहा ले घलो घिन करव, जऊन म ओमन के पापी सरीर के दाग लगे हवय।
JUD 1:24 अब जऊन ह तुमन ला गिरे ले बचा सकथे अऊ तुमन ला निरदोस अऊ बड़े आनंद के संग ओकर महिमा ला देखा सकथे—
JUD 1:25 ओहीच एके परमेसर, हमर उद्धार करइया के महिमा, गौरव, पराकरम अऊ अधिकार, हमर परभू यीसू मसीह के जरिये सनातन काल, अब अऊ सदाकाल तक होवत रहय। आमीन।
REV 1:1 ये किताब ह यीसू मसीह के दिब्य परकासन के बारे म अय, जऊन ला परमेसर ह ओला दीस कि ओह अपन सेवकमन ला निकट भविस्य म होवइया घटनामन ला देखावय। मसीह ह अपन स्वरगदूत ला पठोके ये दिब्य परकासन के बात ला अपन सेवक यूहन्ना ला बताईस।
REV 1:2 यूहन्ना ओ जम्मो बात के गवाही देवत हवय, जऊन ला ओह देखिस—कि येह परमेसर के संदेस अऊ यीसू मसीह के गवाही ए।
REV 1:3 ओ मनखे ह आसीस पाही, जऊन ह ये अगमबानी के बचन ला पढ़थे अऊ ओमन आसीस पाहीं, जऊन मन येला सुनथें अऊ येमा लिखे बात ला मानथें, काबरकि ये बातमन के पूरा होय के समय ह लकठा आ गे हवय।
REV 1:4 में यूहन्ना,
REV 1:5 अऊ यीसू मसीह, जऊन ह बिसवासयोग्य गवाह ए, अऊ मरे म ले जी उठे म पहिलांत ए अऊ धरती के राजामन ऊपर सासन करइया ए, ओकर कोति ले तुमन ला अनुग्रह अऊ सांति मिलय। यीसू, जऊन ह हमन ला मया करथे अऊ हमन ला अपन लहू के दुवारा हमर पाप ले छुटकारा दे हवय,
REV 1:6 अऊ हमन ला एक देस अऊ पुरोहित बनाय हवय, ताकि हमन ओकर परमेसर अऊ ददा के सेवा करन—ओ यीसू के महिमा अऊ सामर्थ जुग-जुग होवय! आमीन।
REV 1:7 “देखव, ओह बादर म आवत हवय,” अऊ “जम्मो झन ओला देखहीं, अऊ त अऊ जऊन मन ओला छेदे-बेधे रिहिन, ओमन घलो ओला देखहीं”; अऊ धरती के जम्मो मनखेमन “ओकर बर सोक मनाहीं।”
REV 1:8 परभू परमेसर ह कहिथे, “मेंह अलफा अऊ ओमेगा अंव। मेंह ओ सर्वसक्तिमान अंव, जऊन ह हवय, अऊ जऊन ह रिहिस, अऊ जऊन ह अवइया हवय।”
REV 1:9 मेंह तुम्हर भाई यूहन्ना अंव अऊ यीसू के दुख, परमेसर के राज अऊ धीरज सहित सहन करे म तुम्हर संग भागीदार अंव। परमेसर के बचन अऊ यीसू के बारे म गवाही देय के कारन मेंह पतमुस नांव के टापू म बंदी रहेंव।
REV 1:10 परभू के दिन, मेंह पबितर आतमा ले भर गेंव अऊ मेंह अपन पाछू कोति तुरही के सहीं एक ऊंचहा अवाज सुनेंव,
REV 1:11 जऊन ह ये कहिस: “जऊन कुछू तेंह देखत हवस, ओला एक ठन किताब म लिख अऊ ओला सात कलीसिया—इफिसुस, स्मुरना, पिरगमुन, थुआतीरा, सरदीस, फिलाडेलफिया अऊ लौदीकिया ला पठो दे।”
REV 1:12 जऊन ह मोर ले गोठियावत रहय, ओला देखे बर जब मेंह पाछू कोति किंजरेंव, त मोला दीया ला मढ़ाय के सात ठन सोन के दीवटमन दिखिन,
REV 1:13 अऊ दीवटमन के मांझा म मनखे के बेटा सहीं एक झन मनखे ला देखेंव, जऊन ह गोड़ तक लम्बा पोसाक पहिरे रहय अऊ ओकर छाती ऊपर चौरस सुनहरा पट्टा रहय।
REV 1:14 ओकर मुड़ अऊ चुंदी ह ऊन अऊ बरफ सहीं एकदम पंर्रा रहय अऊ ओकर आंखीमन धधकत आगी सहीं रिहिन।
REV 1:15 ओकर गोड़मन भट्ठी म तिपोय कांसा सहीं चमकत रहंय अऊ ओकर अवाज ह गरजत पानी सहीं रहय।
REV 1:16 ओह अपन जेवनी हांथ म सात ठन तारामन ला धरे रहय अऊ ओकर मुहूं ले एक ठन चोखा, दूधारी तलवार ह निकलत रहय। ओकर चेहरा ह अइसने चमकत रहय, जइसने सूरज ह भरे मंझनियां के बखत चमकथे।
REV 1:17 जब मेंह ओला देखेंव, त मरे मनखे सहीं ओकर गोड़ करा गिर पड़ेंव। तब ओह अपन जेवनी हांथ ला मोर ऊपर रखके कहिस: “झन डर। मेंहीच ह पहिली अऊ आखिरी अंव।
REV 1:18 मेंह जीयत हवंव। मेंह मर गे रहेंव, पर देख, अब मेंह सदाकाल बर जीयत हवंव! अऊ मोर करा मिरतू अऊ पाताल-लोक ऊपर अधिकार हवय।
REV 1:19 “एकरसेति, जऊन कुछू तेंह देखे हवस, जऊन ह अभी होवत हवय, अऊ जऊन ह एकर बाद होवइया हवय, ओ जम्मो बात ला लिख ले।
REV 1:20 जऊन सात ठन तारा, तेंह मोर जेवनी हांथ म देखे, ओ सातों तारा अऊ सोन के सात दीवटमन के मतलब ये अय: ओ सात तारामन सात ठन कलीसिया के दूत अंय, अऊ ओ सात दीवटमन सात ठन कलीसिया अंय।
REV 2:1 “इफिसुस के कलीसिया के दूत ला ये लिख: जऊन ह जेवनी हांथ म सात ठन तारा धरे हवय अऊ सोन के सात ठन दीवट के बीच म चलते-फिरथे, ओकर ये बचन अय:
REV 2:2 मेंह तुम्हर काम, तुम्हर कठोर मेहनत अऊ तुम्हर धीरज ला जानत हंव। मेंह जानत हंव कि तुमन दुस्ट मनखेमन ला सहे नइं सकव। जऊन मन अपनआप ला प्रेरित कहिथें, पर अंय नइं, तुमन ओमन ला परखे हवव अऊ ओमन ला लबरा पाय हवव।
REV 2:3 तुमन धीरज धरे हवव अऊ मोर नांव खातिर तुमन दुख सहे हवव अऊ हिम्मत नइं हारे हवव।
REV 2:4 तभो ले मेंह तुम्हर बिरोध म, ये कहत हंव: तुमन अब मोला वइसने मया नइं करव, जइसने पहिली-पहिली करत रहेव।
REV 2:5 सोचव कि तुमन कतेक गिर गे हवव। पछताप करव अऊ ओ काम करव, जऊन ला तुमन पहिली करत रहेव। यदि तुमन पछताप नइं करहू, त मेंह तुम्हर करा आके तुम्हर दीवट ला ओकर जगह ले टार दूहूं।
REV 2:6 पर तुमन म एक बने बात ये हवय कि मोर सहीं, तुमन घलो नीकुलईमन के काम ले घिन करथव।
REV 2:7 जेकर कान हवय, ओह सुन ले कि पबितर आतमा ह कलीसियामन ला का कहिथे। जऊन ह बिजयी होही, ओला मेंह जिनगी के रूख के फर खाय बर अधिकार दूहूं, जऊन ह परमेसर के स्वरग-लोक के बगीचा म हवय।
REV 2:8 “स्मुरना के कलीसिया के दूत ला ये लिख: जऊन ह पहिली अऊ आखिरी ए, जऊन ह मर गे रिहिस अऊ फेर जी उठिस, ओकर ये बचन अय:
REV 2:9 मेंह तुम्हर दुख-तकलीफ अऊ तुम्हर गरीबी ला जानथंव—तभो ले तुमन धनवान अव! मेंह जानथंव कि ओमन तुम्हर बदनामी करथें, जऊन मन अपनआप ला यहूदी कहिथें, पर अंय नइं। ओमन सैतान के सभा-घर अंय।
REV 2:10 तुम्हर ऊपर जऊन दुख-तकलीफ अवइया हवय, ओकर ले झन डरव। मेंह तुमन ला बतावत हंव, सैतान ह तुमन ला परखे बर, तुमन ले कतको झन ला जेल म डारही, अऊ तुमन दस दिन तक दुख भोगहू। मरते दम तक मोर बिसवासी रहव अऊ मेंह तुमन ला जिनगी के मुकुट दूहूं।
REV 2:11 जेकर कान हवय, ओह सुन ले कि पबितर आतमा ह कलीसियामन ला का कहिथे। जऊन ह बिजयी होही, ओला दूसरा मिरतू ले कोनो नुकसान नइं होवय।
REV 2:12 “पिरगमुन के कलीसिया के दूत ला ये लिख: जेकर करा तेज दूधारी तलवार हवय, ओकर ये बचन अय।
REV 2:13 मेंह जानथंव कि तेंह कहां रहिथस—तेंह उहां रहिथस, जिहां सैतान के सिंघासन हवय। तभो ले तेंह मोर ऊपर अपन बिसवास म स्थिर हवस। तेंह ओ दिन म घलो मोर ऊपर अपन बिसवास ला नइं तियागे, जब मोर बिसवासयोग्य गवाह अंतिपास ह तुम्हर सहर म मारे गीस—जिहां सैतान रहिथे।
REV 2:14 तभो ले, मोर करा तुम्हर बिरोध म कहे बर कुछू हवय: तुम्हर बीच म कुछू मनखेमन हवंय, जऊन मन बिलाम के सिकछा ला मानथें। बिलाम ह बालाक ला सिखोय रिहिस कि ओह इसरायलीमन ला ठोकर के रसता म ले जावय, ताकि ओमन मूरती ला चघाय खाना ला खावंय अऊ छिनारी करंय।
REV 2:15 तुम्हर बीच म कुछू अइसने मनखेमन घलो हवंय, जऊन मन नीकुलईमन के सिकछा ला मानथें।
REV 2:16 एकरसेति, पछताप करव! नइं त मेंह तुम्हर करा जल्दी आहूं अऊ अपन मुहूं के तलवार ले ओमन के बिरूध लड़हूं।
REV 2:17 जेकर कान हवय, ओह सुन ले कि पबितर आतमा ह कलीसियामन ला का कहिथे। जऊन ह बिजयी होही, ओला मेंह लुकाय मन्ना म ले कुछू दूहूं। मेंह ओला एक ठन सफेद पथरा घलो दूहूं, जऊन म एक नवां नांव लिखाय होही, जेला सिरिप ओहीच जानही, जऊन ह ओला पाही।
REV 2:18 “थुआतीरा के कलीसिया के दूत ला ये लिख: येह परमेसर के बेटा के बचन ए, जेकर आंखी ह धधकत आगी सहीं हवय अऊ जेकर गोड़मन पालीस करे कांसा सहीं चमकत हवंय।
REV 2:19 मेंह तुम्हर काम, तुम्हर मया, तुम्हर बिसवास, तुम्हर सेवा अऊ तुम्हर धीरज ला जानत हंव। मेंह ये घलो जानत हंव कि तुम्हर अभी के काम ह पहिली के काम ले बढ़के हवय।
REV 2:20 तभो ले मोला तुम्हर बिरोध म ये कहना हवय: तुमन ओ माईलोगन ईजेबेल ला कुछू नइं कहव, जऊन ह अपनआप ला अगमजानी कहिथे अऊ अपन सिकछा के दुवारा मोर सेवकमन ला छिनारी करे बर अऊ मूरती ला चघाय खाना ला खाय बर बहकाथे।
REV 2:21 मेंह ओला अपन पाप ले पछताप करे के मऊका देय हवंव, पर ओह बेभिचार ले पछताप नइं करे चाहथे।
REV 2:22 एकरसेति, मेंह ओला तकलीफ के खटिया म डालहूं अऊ जऊन मन ओकर संग छिनारी करथें, कहूं ओमन अपन पाप ला छोंड़के पछताप नइं करहीं, त मेंह ओमन ऊपर घोर दुख-तकलीफ डालहूं।
REV 2:23 मेंह ओ माईलोगन के लइकामन ला मार डालहूं। तब जम्मो कलीसियामन जान लीहीं कि मेंह ओ अंव, जऊन ह मनखे के हिरदय अऊ मन ला जांचथे, अऊ मेंह तुमन ले हर एक ला तुम्हर काम के मुताबिक परतिफल दूहूं।
REV 2:24 अब थुआतीरा के ओ बांचे मनखेमन, जऊन मन ओ माईलोगन के सिकछा ला नइं मानव अऊ ओ बात ला नइं सीखेव, जऊन ला कुछू मनखेमन सैतान के गहिरा भेद कहिथें, मेंह तुमन ला कहत हंव कि मेंह तुम्हर ऊपर अऊ कोनो आने बोझ नइं डालंव।
REV 2:25 पर जऊन सिकछा तुम्हर करा हवय, मोर आवत तक सिरिप ओहीच म बने रहव।
REV 2:26 जऊन ह बिजयी होही, अऊ मोर ईछा मुताबिक आखिरी तक चलते रहिही, मेंह ओला जम्मो जाति के मनखे ऊपर अधिकार दूहूं।
REV 2:27 ओह ओमन ऊपर लोहा के राजदंड ले राज करही, अऊ ओह ओमन ला माटी के बरतन सहीं टोर-फोर दीही—जइसने कि मोर ददा ह ओमन ऊपर राज करे बर मोला अधिकार दे हवय।
REV 2:28 मेंह ओला बिहनियां के तारा घलो दूहूं।
REV 2:29 जेकर कान हवय, ओह सुन ले कि पबितर आतमा ह कलीसियामन ला का कहिथे।
REV 3:1 “सरदीस के कलीसिया के दूत ला ये लिख: जऊन ह परमेसर के सात आतमा अऊ सात तारामन ला धरे हवय, ओकर ये बचन अय: मेंह तुम्हर काममन ला जानत हंव; तुमन जीयत कलीसिया कहिलाथव, पर असल म तुमन मर गे हवव।
REV 3:2 जागव! ओ चीज जऊन ह बांचे हवय अऊ मरइयाच हवय, ओला मजबूत करव, काबरकि मेंह तुम्हर काम ला अपन परमेसर के नजर म सही नइं पाय हवंव।
REV 3:3 जऊन सिकछा तुमन पाय हवव अऊ सुने हवव, ओला सुरता रखव; ओकर पालन करव अऊ पाप ले पछताप करव। पर कहूं तुमन नइं जागहू, त मेंह चोर के सहीं आ जाहूं, अऊ तुमन ला पता नइं चलही कि कते बेरा मेंह तुम्हर करा आ जाहूं।
REV 3:4 तभो ले सरदीस सहर म, तुम्हर इहां कुछू मनखे हवंय, जऊन मन अपन जिनगी ला असुध नइं करे हवंय। ओमन सफेद कपड़ा पहिरके मोर संग चलहीं, काबरकि ओमन एकर काबिल हवंय।
REV 3:5 जऊन ह बिजयी होही, ओला येमन के सहीं सफेद कपड़ा पहिराय जाही। मेंह ओकर नांव ला जिनगी के किताब ले कभू नइं मिटावंव, पर अपन ददा अऊ ओकर स्वरगदूतमन के आघू म ओला गरहन करहूं।
REV 3:6 जेकर कान हवय, ओह सुन ले कि पबितर आतमा ह कलीसियामन ला का कहिथे।
REV 3:7 “फिलाडेलफिया के कलीसिया के दूत ला ये लिख: जऊन ह पबितर अऊ सत ए अऊ जेकर करा दाऊद राजा के कुची हवय। जऊन ला ओह खोलथे, ओला कोनो बंद नइं कर सकंय, अऊ जऊन ला ओह बंद करथे, ओला कोनो खोल नइं सकंय, ओकर ये बचन अय।
REV 3:8 मेंह तुम्हर काममन ला जानथंव। देखव, मेंह तुम्हर आघू म एक कपाट खोलके रखे हवंव, जऊन ला कोनो बंद नइं कर सकंय। मेंह जानथंव कि तुम्हर ताकत थोरकन हवय, तभो ले तुमन मोर बचन माने हवव अऊ मोर बिसवास म बने हवव।
REV 3:9 जऊन मन सैतान के सभा-घर के अंय अऊ अपनआप ला यहूदी कहिथें, पर अंय नइं, ओमन लबारी मारथें। मेंह अइसने करहूं कि ओमन तुम्हर करा आके तुम्हर गोड़ खाल्हे गिरहीं अऊ मान लीहीं कि मेंह तुमन ले मया करथंव।
REV 3:10 काबरकि तुमन मोर हुकूम ला धीरज धरके माने हवव, त मेंह घलो तुमन ला ओ परिछा के घड़ी ले बंचाके रखहूं, जऊन ह जम्मो संसार ऊपर अवइया हवय। एकर दुवारा ये धरती म रहइया मनखेमन परखे जाहीं।
REV 3:11 मेंह जल्दी अवइया हवंव। जऊन सिकछा तुम्हर करा हवय, ओहीच म बने रहव, ताकि तुम्हर मुकुट ला कोनो झन ले सकय।
REV 3:12 जऊन ह बिजयी होही, मेंह ओला अपन परमेसर के मंदिर म खंभा बनाहूं। ओह एकर ले कभू बाहिर नइं जाही। मेंह अपन परमेसर के नांव, अपन परमेसर के सहर के नांव—नवां यरूसलेम, जऊन ह मोर परमेसर करा ले स्वरग ले उतरही ओकर ऊपर लिखहूं; अऊ मेंह अपन नवां नांव ला घलो ओकर ऊपर लिखहूं।
REV 3:13 जेकर कान हवय, ओह सुन ले कि पबितर आतमा ह कलीसियामन ला का कहिथे।
REV 3:14 “लौदीकिया के कलीसिया के दूत ला ये लिख: येह आमीन के बचन अय, जऊन ह बिसवासयोग्य अऊ सच्चा गवाह अऊ परमेसर के सिरिस्टी के अधिकारी ए।
REV 3:15 मेंह तुम्हर काममन ला जानत हंव। तुमन न तो ठंडा हवव अऊ न तात। बने होतिस कि तुमन या तो ठंडा रहितेव या फेर तात।
REV 3:16 काबरकि तुमन कुनकुना हवव, न ठंडा अऊ न तात; एकरसेति मेंह तुमन ला अपन मुहूं ले उछर दूहूं।
REV 3:17 तुमन कहिथव कि तुमन धनवान अव; तुम्हर करा संपत्ति हवय, अऊ तुमन ला कोनो चीज के जरूरत नइं ए। पर तुमन ये नइं जानत हव कि तुमन अभागा, दयनीय, गरीब, अंधरा अऊ नंगरा अव।
REV 3:18 मेंह तुमन ला सलाह देवत हंव कि आगी म सुध करे गेय सोन मोर करा ले बिसोवव अऊ धनवान हो जावव। तुमन मोर करा ले सफेद कपड़ा पहिरे बर बिसावव कि अपन नंगरई के लाज ला ढांक सकव अऊ अपन आंखी म लगाय बर मरहम बिसावव कि तुमन देख सकव।
REV 3:19 जऊन मन ला मेंह मया करथंव, ओमन ला मेंह दबकारथंव अऊ दंड देथंव। एकरसेति ईमानदार बनव अऊ अपन पाप ले पछताप करव।
REV 3:20 देखव! मेंह कपाट के आघू म ठाढ़ होके खटखटावत हंव। कहूं कोनो मोर अवाज ला सुनके कपाट ला खोलही, त मेंह ओकर करा भीतर आके ओकर संग खाना खाहूं अऊ ओह मोर संग खाही।
REV 3:21 जऊन ह बिजयी होही, ओला मेंह मोर संग सिंघासन म बईठे के अधिकार दूहूं, जइसने कि मेंह जय पाके अपन ददा के संग ओकर सिंघासन म बईठे हवंव।
REV 3:22 जेकर कान हवय, ओह सुन ले कि पबितर आतमा ह कलीसियामन ला का कहिथे।”
REV 4:1 एकर बाद, मेंह स्वरग म एक उघरे कपाट ला देखेंव। अऊ ओ तुरही के सहीं अवाज, जऊन ला मेंह पहिली अपन ले गोठियावत सुने रहेंव, मोला कहिस, “इहां ऊपर आ, अऊ मेंह तोला देखाहूं कि एकर बाद का होवइया हवय।”
REV 4:2 मेंह तुरते पबितर आतमा ले भर गेंव अऊ देखेंव कि स्वरग म एक सिंघासन रखे हवय अऊ ओमा एक झन बईठे रहय।
REV 4:3 अऊ जऊन ह ओमा बईठे रहय, ओकर रूप ह मानिक्य अऊ यसब सहीं रहय अऊ सिंघासन के चारों कोति एक मेघ-धनुस रहय, जऊन ह पन्ना सहीं दिखय।
REV 4:4 ओ सिंघासन के चारों कोति अऊ चौबीस ठन सिंघासन रहंय, जेमा चौबीस झन धरम अगुवामन बईठे रहंय। ओमन सफेद कपड़ा पहिरे रहंय अऊ ओमन के मुड़ म सोन के मुकुट रहय।
REV 4:5 ओ सिंघासन म ले बिजली, गड़गड़ाहट के अवाज अऊ बादर के गरजन निकलत रहय। अऊ ओ सिंघासन के आघू म सात ठन मसाल बरत रहंय, जऊन मन परमेसर के सात आतमा अंय।
REV 4:6 ओ सिंघासन के आघू म कांच के समुंदर सहीं घलो कुछू रहय, जेकर आर-पार जम्मो चीज साफ-साफ दिखय। सिंघासन के चारों कोति, एकर चारों किनारा म चार जीयत परानी रहंय, जेमन के आघू अऊ पाछू म आंखीच आंखी रहय।
REV 4:7 पहिली जीयत परानी ह सिंह के सहीं रहय; दूसरा परानी ह बईला सहीं; तीसरा परानी के चेहरा ह मनखे सहीं रहय अऊ चौथा परानी ह उड़त गिधवा सहीं रहय।
REV 4:8 चारों जीयत परानीमन ले हर एक के छै-छै ठन डेना रहय अऊ ओमन जम्मो अंग, डेना के भीतर घलो आंखीमन ले भरे रहंय। रात अऊ दिन, ओमन लगातार ये कहत रहंय:
REV 4:9 जब-जब ओ जीयत परानीमन ओकर महिमा, आदर अऊ धनबाद करंय, जऊन ह सिंघासन म बिराजे रहय अऊ जुग-जुग ले जीयत हवय,
REV 4:10 तब-तब ओ चौबीस धरम अगुवामन ओकर आघू म माड़ी टेकंय, जऊन ह सिंघासन म बिराजे रहय, अऊ ओकर अराधना करंय, जऊन ह जुग-जुग ले जीयत हवय। ओमन अपन-अपन मुकुट ला सिंघासन के आघू म मढ़ाके ये कहंय:
REV 4:11 “हमर परभू अऊ परमेसर! तेंह महिमा, आदर अऊ सामर्थ पाय के काबिल अस, काबरकि तेंह जम्मो चीज ला बनाय हवस, अऊ तोर ईछा के दुवारा ओमन बनाय गीन अऊ ओमन के असतित्व हवय।”
REV 5:1 तब मेंह देखेंव कि जऊन ह सिंघासन म बिराजे रहय, ओकर जेवनी हांथ म एक ठन किताब रहय, जेकर दूनों कोति लिखाय रहय अऊ ओला सात ठन मुहर लगाके बंद करे गे रहय।
REV 5:2 अऊ मेंह देखेंव कि एक सक्तिसाली स्वरगदूत ह ऊंचहा अवाज म ये घोसना करत रहय, “मुहर ला टोरके किताब ला खोले के काबिल कोन ए?”
REV 5:3 पर स्वरग म या धरती ऊपर या धरती के खाल्हे म कोनो घलो ओ किताब ला खोले के या ओला देखे के काबिल नइं रिहिस।
REV 5:4 मेंह अब्बड़ रोवंय काबरकि अइसने कोनो नइं मिलिस, जऊन ह किताब ला खोले या ओला देखे के काबिल होवय।
REV 5:5 तब ओ अगुवामन ले एक झन ह मोला कहिस, “झन रो! देख, जऊन ह यहूदा गोत्र के सिंह ए, अऊ दाऊद राजा के बंसज ए, ओह जय पाय हवय अऊ ओह सातों मुहर ला टोरे अऊ किताब ला खोले के काबिल हवय।”
REV 5:6 तब मेंह एक ठन मेढ़ा-पीला ला देखेंव, जऊन ह अइसने दिखत रहय, मानो ओकर बध करे गे हवय। ओ मेढ़ा-पीला ह सिंघासन के आघू म चारों जीयत परानी अऊ अगुवामन के बीच म ठाढ़े रहय। ओकर सात ठन सींग अऊ सात ठन आंखी रिहिस, जऊन मन परमेसर के सात आतमा अंय अऊ येमन ला जम्मो धरती म पठोय गे हवय।
REV 5:7 तब मेढ़ा-पीला ह आईस अऊ जऊन ह सिंघासन म बिराजे रहय, ओकर जेवनी हांथ ले ओह किताब ला ले लीस।
REV 5:8 अऊ जब मेढ़ा-पीला ह किताब ला ले लीस, त ओ चारों जीयत परानी अऊ ओ चौबीस अगुवामन मेढ़ा-पीला के आघू म गिर पड़िन। हर एक के हांथ म बीना अऊ धूप ले भरे सोन के कटोरा रहय, जऊन ह पबितर मनखेमन के पराथना अय।
REV 5:9 अऊ ओमन एक नवां गीत गाईन: “तेंह किताब ला लेय के अऊ ओकर मुहरमन ला खोले के काबिल अस, काबरकि तोर बध करे गीस, अऊ अपन लहू के दुवारा तेंह जम्मो जाति, भासा, देस अऊ गोत्र के मनखेमन ला परमेसर बर बिसाय हवस।
REV 5:10 तेंह ओमन ला एक ठन देस अऊ पुरोहित बना दे हवस कि ओमन हमर परमेसर के सेवा करंय, अऊ ओमन धरती ऊपर राज करहीं।”
REV 5:11 तब मेंह लाखों-करोड़ों स्वरगदूतमन ला देखेंव अऊ ओमन के अवाज सुनेंव। ओमन सिंघासन, जीयत परानी अऊ अगुवामन के चारों कोति रहंय।
REV 5:12 ओमन ऊंचहा अवाज म गावत रहंय: “जऊन मेढ़ा-पीला के बध करे गीस, ओह सामर्थ, धन, बुद्धि, बल, आदर, महिमा अऊ परसंसा पाय के काबिल अय!”
REV 5:13 तब मेंह अकास, धरती अऊ धरती के खाल्हे अऊ समुंदर के जम्मो परानीमन ला अइसने गावत सुनेंव: “जऊन ह सिंघासन म बईठथे, ओकर अऊ ओ मेढ़ा-पीला के परसंसा, आदर, महिमा अऊ सामर्थ
REV 5:14 चारों जीयत परानीमन कहिन, “आमीन,” अऊ अगुवामन माड़ी के भार गिरके अराधना करिन।
REV 6:1 मेंह देखेंव कि मेढ़ा-पीला ह जब ओ सात ठन मुहर ले पहिली मुहर ला टोरिस, त मेंह ओ चार जीयत परानीमन ले एक झन ला बादर के गरजन सहीं अवाज म, ये कहत सुनेंव, “आ!”
REV 6:2 अऊ मेंह देखेंव कि उहां एक सफेद घोड़ा रहय। ओ घोड़ा के सवार ह एक ठन धनुस धरे रहय! ओला एक ठन मुकुट दिये गीस अऊ ओह एक बिजयी योद्धा सहीं जय पाय बर निकल गीस।
REV 6:3 जब मेढ़ा-पीला ह दूसरा मुहर ला टोरिस, त मेंह दूसरा जीयत परानी ला ये कहत सुनेंव, “आ!”
REV 6:4 तब एक आने घोड़ा निकलिस। ओकर लाल रंग रहय। ओकर सवार ला ये सामर्थ दिये गीस कि ओह धरती के सांति ला लेय ले, ताकि मनखेमन एक-दूसर ला मार डारंय। ओला एक बड़े तलवार दिये गीस।
REV 6:5 जब मेढ़ा-पीला ह तीसरा मुहर ला टोरिस, त मेंह तीसरा जीयत परानी ला ये कहत सुनेंव, “आ!” मेंह देखेंव कि उहां एक ठन करिया घोड़ा रहय! ओकर सवार के हांथ म एक तराजू रहय।
REV 6:6 तब मेंह ओ चारों जीयत परानी के बीच म ले, ये अवाज आवत सुनेंव, “एक दिन के बनी के एक किलो गहूं अऊ एक दिन के बनी के तीन किलो जवांर। पर तेल अऊ अंगूर के मंद ला नुकसान झन करव!”
REV 6:7 जब मेढ़ा-पीला ह चौथा मुहर ला टोरिस, त मेंह चौथा जीयत परानी ला ये कहत सुनेंव, “आ!”
REV 6:8 अऊ मेंह देखेंव कि उहां एक ठन पिंवरा रंग के घोड़ा रहय! ओकर सवार के नांव मिरतू रहय, अऊ ओकर पाछू-पाछू पाताल-लोक ह आवत रहय। ओमन ला धरती के एक चौथाई भाग ऊपर अधिकार दिये गे रिहिस कि ओमन तलवार, अकाल, महामारी अऊ धरती के जंगली पसुमन के दुवारा मनखेमन ला मार डारंय।
REV 6:9 जब मेढ़ा-पीला ह पांचवां मुहर ला टोरिस, त मेंह बेदी के खाल्हे म ओमन के जीव ला देखेंव, जऊन मन परमेसर के बचन अऊ मसीह के गवाही देय के कारन मार डारे गे रिहिन।
REV 6:10 ओमन ऊंचहा अवाज म कहत रहंय, “हे परमपरधान परभू! तेंह पबितर अऊ सत अस। तेंह धरती ऊपर रहइयामन ला कब सजा देबे अऊ ओमन ले हमर लहू के बदला लेबे?”
REV 6:11 ओमन ले हर एक ला एक सफेद ओनहा दिये गीस अऊ ओमन ला अऊ थोरकन इंतजार करे बर कहे गीस, जब तक कि ओमन के संगी सेवक अऊ भाईमन के गनती ह पूरा नइं हो लेवय, जऊन मन ओकरेच मन सहीं मार डारे जवइया रिहिन।
REV 6:12 जब मेढ़ा-पीला ह छठवां मुहर ला टोरिस, त मेंह देखेंव कि उहां एक भारी भुइंडोल होईस। सूरज ह बोकरा के रूआं ले बने बोरा सहीं करिया हो गीस अऊ चंदा ह पूरा लहू सहीं लाल हो गीस,
REV 6:13 अऊ अकास के तारामन धरती ऊपर अइसने गिर पड़िन, जइसने गरेर म अंजीर के रूख के डोले ले अंजीरमन गिरथें।
REV 6:14 अकास ह अइसने लोप हो गीस, जइसने कागज के पुलिंदा ला कोनो लपेट लेथे, अऊ जम्मो पहाड़ अऊ टापू मन ला ओमन के जगह ले हटा दिये गीस।
REV 6:15 तब धरती के राजा, अऊ बड़े मनखे, सेनापति, धनवान, सक्तिसाली अऊ गुलाम अऊ सुतंतर मनखेमन गुफा अऊ पहाड़मन के चट्टानमन के बीच म लुका गीन।
REV 6:16 ओमन पहाड़ अऊ चट्टानमन ले कहे लगिन, “हमर ऊपर गिर पड़व अऊ ओकर नजर ले हमन ला छिपा लेवव, जऊन ह सिंघासन म बिराजे हवय अऊ मेढ़ा-पीला के कोरोध ले हमन ला बचा लेवव।
REV 6:17 काबरकि ओमन के कोरोध के भयानक दिन ह आ गे हवय, अऊ कोन ह येमन के सामना कर सकथे?”
REV 7:1 एकर बाद मेंह धरती के चारों कोना म चार स्वरगदूतमन ला ठाढ़े देखेंव। ओमन धरती के चारों दिग के हवा ला थामे रिहिन, ताकि धरती या समुंदर या रूख ऊपर हवा झन चलय।
REV 7:2 तब मेंह एक अऊ स्वरगदूत ला पूरब दिग ले आवत देखेंव। ओह जीयत परमेसर के मुहर ला धरे रहय। ओह ओ चारों स्वरगदूत ले, जऊन मन ला धरती अऊ समुंदर के नुकसान करे के अधिकार दिये गे रिहिस, पुकारके कहिस,
REV 7:3 “जब तक हमन अपन परमेसर के सेवकमन के माथा म मुहर नइं लगा लेवन, तब तक धरती या समुंदर या रूखमन के नुकसान झन करव।”
REV 7:4 तब मेंह मुहर लगे मनखेमन के गनती ला सुनेंव। येमन इसरायल के जम्मो गोत्र म ले 1,44,000 रिहिन।
REV 7:5 यहूदा के गोत्र के 12,000; रूबेन के गोत्र के 12,000; गाद के गोत्र के 12,000;
REV 7:6 आसेर के गोत्र के 12,000; नपताली के गोत्र के 12,000; मनस्से के गोत्र के 12,000;
REV 7:7 सिमोन के गोत्र के 12,000; लेवी के गोत्र के 12,000; इस्साकार के गोत्र के 12,000;
REV 7:8 जबूलून के गोत्र के 12,000; यूसुफ के गोत्र के 12,000; अऊ बिनयामीन के गोत्र के 12,000 मनखेमन म मुहर लगिस।
REV 7:9 एकर बाद मेंह जम्मो देस, गोत्र, जाति अऊ भासा के मनखेमन के एक बड़े भीड़ ला देखेंव, जेकर गनती कोनो नइं कर सकत रिहिन। ओमन सफेद ओनहा पहिरे अऊ हांथ म खजूर के डालीमन ला धरके सिंघासन अऊ मेढ़ा-पीला के आघू म ठाढ़े रिहिन।
REV 7:10 अऊ ओमन ऊंचहा अवाज म चिचियाके कहत रिहिन: “सिंघासन म बिराजे हमर परमेसर अऊ मेढ़ा-पीला के दुवारा उद्धार होथे।”
REV 7:11 सिंघासन, अगुवा अऊ चारों जीयत परानी के चारों कोति जम्मो स्वरगदूतमन ठाढ़े रहंय। ओमन सिंघासन के आघू म मुहूं के भार गिरिन अऊ ये कहत परमेसर के अराधना करिन:
REV 7:12 “आमीन! हमर परमेसर के इस्तुति, महिमा बुद्धि, धनबाद, आदर सामर्थ अऊ बल जुग-जुग तक होवय। आमीन!”
REV 7:13 तब अगुवामन ले एक झन मोर ले पुछिस, “जऊन मन सफेद ओनहा पहिरे हवंय, ओमन कोन अंय, अऊ ओमन कहां ले आय हवंय?”
REV 7:14 मेंह कहेंव, “हे महाराज, तेंह जानथस।” अऊ ओह कहिस, “येमन ओ मनखे अंय, जऊन मन भारी सतावा म ले होके आय हवंय। येमन मेढ़ा-पीला के लहू म अपन ओनहा ला धोके सफेद कर ले हवंय।
REV 7:15 एकरसेति, “येमन परमेसर के सिंघासन के आघू म ठाढ़े हवंय अऊ रात-दिन परमेसर के सेवा ओकर मंदिर म करथें; अऊ जऊन ह सिंघासन म बिराजे हवय, ओह ओमन के संग रहिके ओमन के रकछा करही।
REV 7:16 ‘येमन ला न तो कभू भूख लगही, अऊ न कभू पीयास। सूरज के घाम ह येमन के कुछू नइं कर सकय,’ अऊ तीपत गरमी के कुछू असर येमन ऊपर नइं होवय।
REV 7:17 काबरकि जऊन मेढ़ा-पीला ह सिंघासन के मांझा म हवय, ओह ओमन के चरवाहा होही; ‘ओह ओमन ला जिनगी के पानी के सोतामन करा ले जाही।’ ‘अऊ परमेसर ह ओमन के आंखी के जम्मो आंसू ला पोंछही।’”
REV 8:1 जब मेढ़ा-पीला ह सातवां मुहर ला टोरिस, त करीब आधा घंटा तक स्वरग म सन्नाटा छा गीस।
REV 8:2 तब मेंह ओ सात स्वरगदूतमन ला देखेंव जऊन मन परमेसर के आघू म ठाढ़े रहिथें। ओमन ला सात ठन तुरही दिये गीस।
REV 8:3 तब एक आने स्वरगदूत, जऊन ह सोन के धूपदान धरे रहय, आईस अऊ बेदी करा ठाढ़ हो गीस। ओला अब्बड़ अकन धूप दिये गीस कि ओह ओला जम्मो पबितर मनखेमन के पराथना के संग सिंघासन के आघू म सोन के बेदी ऊपर चघावय।
REV 8:4 अऊ स्वरगदूत के हांथ ले धूप के धुआं ह पबितर मनखेमन के पराथना के संग ऊपर उठिस अऊ परमेसर के आघू म हबरिस।
REV 8:5 तब स्वरगदूत ह धूपदान ला लीस अऊ ओला बेदी के आगी ले भरिस अऊ ओला धरती ऊपर फटिक दीस, त बादर के गरजन, गड़गड़ाहट, बिजली के कड़क अऊ भुइंडोल होईस।
REV 8:6 तब ओ सात स्वरगदूत, जेमन करा सात ठन तुरही रिहिस, अपन-अपन तुरही ला फूंके के तियारी करिन।
REV 8:7 पहिली स्वरगदूत ह अपन तुरही ला फूंकिस, त लहू म मिले करा अऊ आगी आईस अऊ येला धरती ऊपर डारे गीस। येमा एक तिहाई धरती ह जर गीस, एक तिहाई रूखमन जर गीन, अऊ जम्मो हरियर कांदी घलो जर गीस।
REV 8:8 दूसरा स्वरगदूत ह अपन तुरही ला फूंकिस, त आगी म जरत एक बड़े पहाड़ सहीं चीज ला समुंदर म फटिके गीस; अऊ एक तिहाई पानी ह लहू हो गीस,
REV 8:9 समुंदर के एक तिहाई जीयत परानीमन मर गीन, अऊ एक तिहाई पानी जहाजमन नास हो गीन।
REV 8:10 तब तीसरा स्वरगदूत ह अपन तुरही ला फूंकिस, त मसाल के सहीं बरत एक बड़े तारा ह अकास ले एक तिहाई नदीमन ऊपर अऊ पानी के सोतामन ऊपर गिरिस।
REV 8:11 ओ तारा के नांव नागदऊना ए। अऊ धरती के एक तिहाई पानी ह करू हो गीस, अऊ ओ करू पानी ला पीके कतको मनखेमन मर गीन।
REV 8:12 तब चौथा स्वरगदूत ह अपन तुरही ला फूंकिस, त एक तिहाई सूरज अऊ एक तिहाई चंदा अऊ एक तिहाई तारामन ऊपर बिपत पड़िस, जेकर ले ओमन के एक तिहाई भाग ह अंधियार हो गीस अऊ दिन के एक तिहाई भाग म अंजोर नइं होईस, अऊ रात के एक तिहाई भाग म घलो अंजोर नइं होईस।
REV 8:13 तब मेंह देखेंव अऊ सुनेंव कि ऊंच अकास म उड़त एक गिधवा ह ऊंचहा अवाज म ये कहत रहय: “बाकि बचे तीन स्वरगदूतमन जऊन तुरही फूंकइया हवंय, ओकर कारन धरती के रहइयामन ऊपर हाय! हाय! हाय!”
REV 9:1 तब पांचवां स्वरगदूत ह अपन तुरही ला फूंकिस, अऊ मेंह एक तारा ला देखेंव, जऊन ह अकास ले धरती ऊपर गिरे रिहिस। ओ तारा ला अथाह कुन्ड के कुची दिये गीस।
REV 9:2 जब ओह अथाह कुन्ड ला खोलिस, त उहां ले अइसने धुआं निकलिस, जइसने कि एक बड़े भट्ठी ले निकलथे। ओ कुन्ड के धुआं ले सूरज अऊ अकास अंधियार हो गीन।
REV 9:3 अऊ ओ धुआं म ले धरती ऊपर फांफामन आईन अऊ ओमन ला धरती के बिच्छूमन सहीं सक्ति दिये गीस।
REV 9:4 ओमन ला ये कहे गीस कि धरती के कांदी, या कोनो पऊधा या रूख ला हानि झन पहुंचावंय, पर सिरिप ओ मनखेमन ला नुकसान पहुंचावंय, जेमन के माथा म परमेसर के मुहर नइं लगे हवय।
REV 9:5 फांफामन ला ये सक्ति नइं दिये गीस कि ओमन मनखेमन ला मार डारें, पर ओमन ला ये सक्ति दिये गीस कि ओमन पांच महिना तक मनखेमन ला पीरा देवंय। ओ पीरा ह अइसने रिहिस, जइसने बिच्छू के डंक मारे ले मनखे ला पीरा होथे।
REV 9:6 ओ दिनमन म मनखेमन मिरतू ला खोजहीं, पर ओमन ला ओह नइं मिलही। ओमन मरे के ईछा करहीं, पर मिरतू ह ओमन ले दूर भागही।
REV 9:7 ओ फांफामन लड़ई बर तियार घोड़ामन सहीं दिखत रहंय। अपन मुड़ म, ओमन सोन के मुकुट सहीं कुछू पहिरे रहंय अऊ ओमन के मुहूं मनखेमन के मुहूं सहीं रहय।
REV 9:8 ओमन के चुंदी ह माईलोगन के चुंदी सहीं रहय अऊ ओमन के दांतमन सिंह के दांत सहीं रिहिस।
REV 9:9 ओमन के छाती ह लोहा के कवच सहीं चीज ले ढंकाय रिहिस अऊ ओमन के डेना के अवाज ह लड़ई म दऊड़त बहुंते घोड़ा अऊ रथमन के अवाज सहीं रिहिस।
REV 9:10 ओमन के पुंछी अऊ डंक ह बिच्छूमन के पुंछी अऊ डंक सहीं रहय अऊ ओमन के पुंछी म मनखेमन ला पांच महिना तक पीरा देय के सक्ति रहय।
REV 9:11 अथाह कुन्ड के दूत ह ओमन के राजा रिहिस। ओकर नांव इबरानी म “अबद्दोन” अऊ यूनानी भासा म “अपुल्‍लयोन” ए।
REV 9:12 पहिली बिपत्ति पड़ चुके हवय; एकर बाद दू अऊ बिपत्ति अवइया हवंय।
REV 9:13 तब छठवां स्वरगदूत ह अपन तुरही ला फूंकिस, त मेंह एक अवाज सुनेंव, जऊन ह परमेसर के आघू म रखाय सोन के बेदी के चारों कोना म ले आवत रहय।
REV 9:14 ओ अवाज छठवां स्वरगदूत ला जेकर करा तुरही रिहिस, ये कहत रहय, “ओ चारों स्वरगदूत ला छोंड़ दे, जऊन मन महान नदी फरात करा बंधाय हवंय।”
REV 9:15 अऊ ओ चारों स्वरगदूतमन ला छोंड़ दिये गीस। ओमन ला एही घरी अऊ दिन अऊ महिना अऊ साल बर तियार रखे गे रिहिस कि ओमन एक तिहाई मनखेमन ला मार डारें।
REV 9:16 घुड़सवार सेनामन के गनती ह बीस करोड़ रिहिस। मेंह ओमन के गनती ला सुनेंव।
REV 9:17 मेंह अपन दरसन म देखेंव कि घोड़ामन अऊ ओकर सवारमन अइसने दिखत रहंय: घुड़सवारमन के कवच ह आगी सहीं लाल, गहिरा नीला अऊ गंधक के सहीं पीला रंग के रहय। घोड़ामन के मुड़ ह सिंहमन के मुड़ सहीं रहय अऊ ओमन के मुहूं ले आगी, धुआं अऊ गंधक निकलत रहय।
REV 9:18 एक तिहाई मनखेमन ये तीन महामारी के दुवारा मार डारे गीन—याने कि आगी, धुआं अऊ गंधक के दुवारा, जऊन ह घोड़ामन के मुहूं ले निकलत रहय।
REV 9:19 घोड़ामन के सक्ति ह ओमन के मुहूं अऊ ओमन के पुंछी म रहय; काबरकि ओमन के पुंछीमन सांपमन सहीं रहय, जेमा मुड़ीमन रहंय अऊ मुड़ ले ओमन मनखेमन ला चाबके पीरा देवत रिहिन।
REV 9:20 बाकि बचे मनखे, जऊन मन ये महामारी म नइं मारे गीन, ओमन अपन गलत काम ले नइं मन फिराईन। ओमन परेत आतमामन के, अऊ सोन, चांदी, कांसा, पथरा, अऊ कठवा के मूरतीमन के पूजा करे बर नइं छोंड़िन, जऊन मन न तो देख सकंय, न सुन सकंय अऊ न तो रेंग सकंय।
REV 9:21 जऊन हतिया, जादू टोनहा, छिनारीपन अऊ चोरी ओमन करे रिहिन; ओमन ओकर बर घलो पछताप नइं करिन।
REV 10:1 तब मेंह एक अऊ सक्तिसाली स्वरगदूत ला स्वरग ले उतरत देखेंव। ओह चारों कोति ले बादर ले घेराय रहय अऊ ओकर मुड़ ऊपर मेघ-धनुस रहय। ओकर चेहरा ह सूरज सहीं रहय अऊ ओकर गोड़मन आगी के खंभा सहीं रहंय।
REV 10:2 ओह अपन हांथ म एक छोटे किताब धरे रहय, जऊन ह खुला रहय। ओह अपन जेवनी गोड़ समुंदर ऊपर अऊ डेरी गोड़ ला भुइयां ऊपर रखिस,
REV 10:3 अऊ सिंह के गरजन सहीं ओह ऊंचहा अवाज म चिचियाईस। जब ओह चिचियाईस, त सात ठन बादर के गरजन मन गोठियाईन।
REV 10:4 अऊ जब सात ठन बादर के गरजन मन गोठियाईन, त ओला मेंह लिखनेच वाला रहेंव कि मेंह स्वरग ले एक अवाज ला ये कहत सुनेंव, “जऊन बात सात ठन बादर के गरजन मन कहिन, ओला गुपत म रख अऊ ओला झन लिख।”
REV 10:5 तब जऊन स्वरगदूत ला मेंह समुंदर अऊ भुइयां ऊपर ठाढ़े देखे रहेंव, ओह अपन जेवनी हांथ ला स्वरग कोति उठाईस।
REV 10:6 अऊ ओह ओकर किरिया खाईस, जऊन ह सदाकाल तक जीयत हवय, जऊन ह स्वरग अऊ ओमा जऊन कुछू हवय, धरती अऊ ओमा जऊन कुछू हवय अऊ समुंदर अऊ ओमा जऊन कुछू हवय, ओ जम्मो ला गढ़िस, अऊ ओ स्वरगदूत ह कहिस, “अब अऊ देरी नइं होवय!
REV 10:7 पर जऊन दिन सातवां स्वरगदूत ह अपन तुरही ला फूंकही, ओ दिन परमेसर के गुपत योजना ह पूरा हो जाही, जइसने कि ओह अपन अगमजानी सेवकमन ला कहे रिहिस।”
REV 10:8 तब स्वरग ले जऊन अवाज ला मेंह गोठियावत सुने रहेंव, ओह फेर एक बार मोर ले कहिस, “जा, अऊ जऊन स्वरगदूत ह समुंदर अऊ भुइयां ऊपर ठाढ़े हवय, ओकर हांथ ले ओ खुला किताब ला लेय ले।”
REV 10:9 एकरसेति, ओ स्वरगदूत करा जाके मेंह ओला कहेंव, “मोला ओ छोटे किताब ला देय दे।” ओह मोला कहिस, “येला ले अऊ खा ले। येह तोर पेट ला करू कर दीही, पर तोर मुहूं म येह मंधरस सहीं मीठ लगही।”
REV 10:10 स्वरगदूत के हांथ ले मेंह ओ छोटे किताब ला लेके, ओला खा लेंव। ओह मोर मुहूं म मंधरस के सहीं मीठ लगिस, पर जब मेंह ओला खा चुकेंव, त मोर पेट ह करू हो गीस।
REV 10:11 तब मोला ये कहे गीस, “तोला फेर बहुंते मनखे, देस, भासा अऊ राजामन के बारे म अगमबानी करना जरूरी ए।”
REV 11:1 तब मोला एक झन नापे के एक ठन लउठी दीस अऊ कहिस, “जा अऊ परमेसर के मंदिर अऊ बेदी ला नाप अऊ जऊन मन उहां अराधना करत हवंय, ओमन के गनती कर।
REV 11:2 पर बाहिरी अंगना ला छोंड़ दे; ओला झन नाप, काबरकि ओला आनजातमन ला दिये गे हवय, अऊ ओमन 42 महिना तक पबितर सहर ला रऊंदत रहिहीं।
REV 11:3 अऊ मेंह अपन दू झन गवाह ला सक्ति दूहूं, अऊ ओमन 1,260 दिन तक बोरा के कपड़ा पहिरके अगमबानी करहीं।”
REV 11:4 ये दू गवाहमन दू ठन जैतून के रूख अऊ दू ठन दीवट अंय, जऊन मन धरती के परभू के आघू म ठाढ़े रहिथें।
REV 11:5 कहूं कोनो ओमन ला हानि पहुंचाय के कोसिस करथे, त ओमन के मुहूं ले आगी निकलथे अऊ ओमन के बईरीमन ला भसम कर देथे। जऊन कोनो येमन के हानि करे के कोसिस करथे, ओह अइसने मरही।
REV 11:6 ये दूनों झन करा अकास के कपाटमन ला बंद करे के सक्ति हवय, ताकि जब ओमन अगमबानी करंय, त पानी झन गिरय, अऊ येमन करा ये सक्ति घलो हवय कि पानी ला लहू म बदल दें अऊ जब कभू चाहंय, तब धरती ऊपर जम्मो किसम के महामारी लानंय।
REV 11:7 जब येमन अपन गवाही दे चुकहीं, त ओ पसु जऊन ह अथाह कुन्ड ले निकलही, येमन ले लड़ही, अऊ ओह येमन ला हराके मार डारही।
REV 11:8 येमन के लासमन ओ महान सहर के गली म पड़े रहिहीं, जिहां ओमन के परभू ला कुरूस ऊपर चघाय गे रिहिस। ये महान सहर ला सांकेतिक रूप म सदोम अऊ मिसर कहे जाथे।
REV 11:9 साढ़े तीन दिन तक जम्मो जाति, भासा, देस अऊ बंस के मनखेमन येमन के लास ला देखहीं, पर ओमा के कोनो घलो ओमन ला माटी नइं दीहीं।
REV 11:10 धरती के मनखेमन येमन के मरे ले आनंद मनाहीं अऊ खुस होवत एक-दूसर करा भेंट पठोहीं, काबरकि ये दूनों अगमजानीमन धरती के रहइयामन ला अब्बड़ दुख देय रिहिन।
REV 11:11 पर साढ़े तीन दिन के बाद, परमेसर के जिनगी देवइया सांस, ये दूनों म हमाईस अऊ ओमन अपन गोड़ म ठाढ़ हो गीन, अऊ जऊन मन ओमन ला देखिन, ओमन म बहुंते भय छा गीस।
REV 11:12 तब ओमन स्वरग ले एक ऊंचहा अवाज सुनिन, जऊन ह ओमन ला ये कहत रहय, “इहां ऊपर आ जावव।” अऊ ओमन अपन बईरीमन के देखते-देखत एक बादर म स्वरग चले गीन।
REV 11:13 ओहीच बेरा एक भारी भुइंडोल होईस अऊ सहर के दसवां भाग ह भरभरा के गिर गीस। सात हजार मनखेमन ओ भुइंडोल म मारे गीन अऊ जऊन मन बच गीन, ओमन डरा गीन अऊ स्वरग के परमेसर के महिमा करिन।
REV 11:14 दूसरा बिपत्ति बीत गीस, पर देखव! तीसरा बिपत्ति ह जल्दी अवइया हवय।
REV 11:15 तब सातवां स्वरगदूत ह अपन तुरही ला फूंकिस, अऊ स्वरग म ऊंचहा अवाज सुनई पड़िस, जऊन ह ये कहत रहय: “संसार के राज ह हमर परभू अऊ ओकर मसीह के राज बन गे हवय, अऊ ओह सदाकाल तक राज करही।”
REV 11:16 अऊ चौबीस झन अगुवा, जऊन मन परमेसर के आघू म अपन सिंघासन ऊपर बिराजे रिहिन, मुहूं के भार गिरिन अऊ ये कहत परमेसर के अराधना करिन:
REV 11:17 “हे सर्वसक्तिमान परभू परमेसर, ओ जऊन ह हवय, अऊ जऊन ह रिहिस; हमन तोला धनबाद देवत हवन, काबरकि तेंह अपन बड़े सामर्थ ला उपयोग करके राज करे के सुरू करे हवस।
REV 11:18 देसमन गुस्सा करत रिहिन अऊ तोर परकोप ह आ गे हवय। मरे मनखेमन के नियाय करे के बेरा आ गे हवय, अऊ ओ बेरा घलो आ गे हवय कि तोर सेवक अगमजानी अऊ तोर पबितर मनखे, जऊन मन तोर भय मानथें, छोटे अऊ बड़े दूनों ला ईनाम दिये जावय— अऊ जऊन मन धरती ला नास करथें, ओमन ला नास करे जावय।”
REV 11:19 तब स्वरग म परमेसर के मंदिर ह खुल गीस, अऊ ओकर मंदिर म ओकर करार के सन्दूक ह दिखाई दीस। अऊ उहां बिजली के चमक, अवाज, बादर के गरजन अऊ भुइंडोल होईस अऊ भारी करा गिरिस।
REV 12:1 अकास म एक बड़े चिनहां परगट होईस: एक झन माईलोगन ह सूरज ला पहिरे रहय। ओकर गोड़ के खाल्हे म चंदा रहय अऊ ओकर मुड़ म बारह ठन तारामन के मुकुट रहय।
REV 12:2 ओह पेट म रिहिस, अऊ लइका जनमे के पीरा ले कलपत रिहिस।
REV 12:3 तब एक अऊ चिनहां अकास म परगट होईस: एक बड़े लाल रंग के सांप सहीं पसु रहय। ओकर सात ठन मुड़ अऊ दस ठन सींग रहंय अऊ सातों मुड़ म सात ठन मुकुट रहंय।
REV 12:4 ओकर पुंछी ह अकास के एक तिहाई तारामन ला खींचके धरती ऊपर फटिक दीस। सांप सहीं पसु ह ओ माईलोगन के आघू म ठाढ़ हो गीस, जेकर लइका होवइया रहय, ताकि ओह लइका के जनमतेच ही ओ लइका ला लील सकय।
REV 12:5 ओ माईलोगन ह एक बेटा ला जनमिस, जऊन ह लोहा के राजदंड ले जम्मो देस ऊपर राज करही। अऊ ओ लइका ला झपटके परमेसर अऊ ओकर सिंघासन करा लाने गीस।
REV 12:6 तब ओ माईलोगन ह सुनसान जगह ला भाग गीस, उहां परमेसर ह ओकर बर एक जगह तियार करे रिहिस, जिहां 1,260 दिन तक ओकर देखभाल करे जा सकय।
REV 12:7 तब स्वरग म लड़ई होय लगिस। मिकाएल अऊ ओकर दूतमन सांप सहीं पसु के संग लड़िन, अऊ सांप सहीं पसु अऊ ओकर दूतमन येमन के संग लड़िन।
REV 12:8 पर सांप सहीं पसु ह हार गीस, अऊ ओला अऊ ओकर दूतमन ला स्वरग म अपन जगह ला छोड़ना पड़िस।
REV 12:9 ओ सांप सहीं पसु ला फटिक दिये गीस। ये सांप सहीं पसु ह ओ पुराना सांप ए, जऊन ला इबलीस या सैतान कहे जाथे अऊ जऊन ह संसार के जम्मो मनखेमन ला धोखा देथे। ओला अऊ ओकर दूतमन ला धरती म फटिक दिये गीस।
REV 12:10 तब मेंह स्वरग ले एक ऊंचहा अवाज आवत सुनेंव, जऊन ह ये कहत रहय: “अब हमर परमेसर के उद्धार अऊ सामर्थ अऊ परमेसर के राज, अऊ ओकर मसीह के अधिकार आ गे हवय। काबरकि हमर भाईमन ऊपर ओ दोस लगइया ला स्वरग ले फटिक दे गे हवय, जऊन ह दिन-रात हमर परमेसर के आघू म ओमन ऊपर दोस लगावत रिहिस।
REV 12:11 हमर भाईमन मेढ़ा-पीला के लहू अऊ अपन गवाही के बचन के दुवारा ओ सैतान ऊपर जय पाईन; ओमन अपन जिनगी ले मया नइं करिन अऊ मरे बर तियार रिहिन।
REV 12:12 एकरसेति, हे स्वरग अऊ ओमा रहइयामन, आनंद मनावव! पर हे धरती अऊ समुंदर, तुमन ला धिक्कार ए, काबरकि सैतान ह उतरके तुम्हर करा आय हवय! ओह बड़े कोरोध ले भरे हवय, काबरकि ओह जानथे कि ओकर करा थोरकन समय बचे हवय।”
REV 12:13 जब ओ सांप सहीं पसु ह देखिस कि ओला धरती ऊपर फटिक दिये गे हवय, त ओह ओ माईलोगन के पाछू पड़ गीस, जऊन ह एक बेटा ला जनमे रिहिस।
REV 12:14 ओ माईलोगन ला एक बड़े गिधवा के दू ठन डेना दिये गीस, ताकि ओह सुनसान जगह म ओ ठऊर ला उड़के जा सकय, जिहां सांप के पहुंच ले बाहिर, ओकर साढ़े तीन साल तक देखभाल करे जावय।
REV 12:15 तब सांप ह अपन मुहूं ले ओ माईलोगन कोति नदी सहीं पानी के धार छोंड़िस, ताकि माईलोगन ह पानी के धार म बोहा जावय।
REV 12:16 पर धरती ह ओ माईलोगन के मदद करिस। धरती ह अपन मुहूं ला खोलके ओ पानी ला पी गीस, जऊन ह ओ सांप सहीं पसु के मुहूं ले निकलत रिहिस।
REV 12:17 तब ओ सांप सहीं पसु ह ओ माईलोगन ऊपर गुस्सा करिस अऊ ओह माईलोगन के बांचे संतानमन ले लड़ई करे बर निकलिस—याने कि ओ मनखेमन ले, जऊन मन परमेसर के हुकूम ला मानथें अऊ यीसू के गवाह अऊ ओकर ऊपर बिसवास म अटल रहिथें।
REV 13:1 ओ सांप सहीं पसु ह समुंदर तीर म ठाढ़ हो गीस। अऊ मेंह एक ठन पसु ला समुंदर ले निकलत देखेंव। ओकर दस ठन सींग अऊ सात ठन मुड़ रिहिस। ओकर दस ठन सींग म दस ठन मुकुट रहंय अऊ ओकर हर एक मुड़ म एक-एक निन्दा करइया नांव लिखाय रहय।
REV 13:2 जऊन पसु ला मेंह देखेंव, ओह चीतवा के सहीं रहय, पर ओकर गोड़मन भालू के गोड़ सहीं रहंय अऊ ओकर मुहूं ह सिंह के मुहूं सहीं रहय। सांप सहीं पसु ह ये पसु ला अपन सक्ति, अपन सिंघासन अऊ बहुंते अधिकार दीस।
REV 13:3 अइसने लगत रहय कि ओ पसु के एक ठन मुड़ म एक बड़े घाव होय रिहिस, पर ओ बड़े घाव ह बने हो गे रिहिस। जम्मो संसार के मनखेमन अचरज करिन अऊ ओ पसु के पाछू हो लीन।
REV 13:4 मनखेमन सांप सहीं पसु के पूजा करिन, काबरकि ओह पसु ला अधिकार दे रिहिस, अऊ ओमन ये कहत पसु के घलो पूजा करिन, “ये पसु के सहीं कोन हवय? एकर संग कोन लड़ई कर सकथे?”
REV 13:5 ओ पसु ला डींग मारे के अऊ निन्दा करे के अनुमति दिये गीस। ओला बियालीस महिना तक अपन अधिकार के उपयोग करे के अनुमति घलो दिये गीस।
REV 13:6 ओह परमेसर के निन्दा करिस। ओह परमेसर के नांव अऊ ओकर निवास के अऊ ओ मनखेमन के निन्दा करिस, जऊन मन स्वरग म रहिथें।
REV 13:7 ओला अनुमति दिये गीस कि ओह पबितर मनखेमन संग लड़ई करय अऊ ओमन ऊपर जय पावय। अऊ ओला हर एक जाति, मनखे, भासा अऊ देस ऊपर अधिकार दिये गीस।
REV 13:8 धरती के रहइया जम्मो मनखेमन ओ पसु के पूजा करहीं—याने कि ओ जम्मो मनखे, जेमन के नांव ह ओ मेढ़ा-पीला के जिनगी के किताब म नइं लिखाय हवय, जऊन ह संसार के रचे के समय ले मार डारे गीस।
REV 13:9 जेकर कान हवय, ओह सुन ले!
REV 13:10 “कहूं कोनो ला कैद म जाना हवय, त ओह कैद म जाही। कहूं कोनो ला तलवार ले मरना हवय, त ओह तलवार ले मारे जाही।” एकर खातिर पबितर मनखेमन ला धीरज अऊ बिसवासयोग्यता के जरूरत हवय।
REV 13:11 तब मेंह एक ठन अऊ पसु ला देखेंव, जऊन ह धरती म ले निकलत रहय। ओकर, मेढ़ा-पीला के सींग सहीं दू ठन सींग रहय, पर ओह सांप सहीं पसु जइसने गोठियावय।
REV 13:12 ओह पहिली पसु कोति ले ओकर जम्मो अधिकार के उपयोग करथे। ओह धरती अऊ ओकर रहइयामन ला बाध्य करथे कि ओमन ओ पहिली पसु के पूजा करंय, जेकर एक बड़े घाव ह बने हो गे रिहिस।
REV 13:13 ये दूसरा पसु ह बड़े-बड़े चमतकार देखाईस, अऊ त अऊ ओह मनखेमन के देखत म अकास ले धरती ऊपर आगी बरसा देवत रिहिस।
REV 13:14 पहिली पसु कोति ले, ओला जऊन चमतकार देखाय के अधिकार मिले रिहिस, ओ चमतकार के दुवारा ओह धरती के मनखेमन ला भरमा दीस। ओह मनखेमन ला हुकूम दीस कि ओमन ओ पसु के आदर म एक मूरती बनावंय, जऊन ह तलवार ले घात करे के बाद घलो जीयत रिहिस।
REV 13:15 ओला पहिली पसु के मूरती ला जियाय के सक्ति दिये गीस, ताकि ओ मूरती ह गोठियावय, अऊ ओ जम्मो झन ला मरवा देवय, जऊन मन ओ मूरती के पूजा नइं करिन।
REV 13:16 ओह छोटे या बड़े, धनी या गरीब, सुतंतर या गुलाम, जम्मो मनखेमन ला बाध्य करथे कि ओमन जेवनी हांथ या अपन माथा म एक छाप लगावंय।
REV 13:17 बिगर ओ छाप के, कोनो घलो मनखे लेन-देन नइं कर सकंय। ओ छाप म पसु के नांव या ओकर नांव के संखिया लिखाय रहय।
REV 13:18 एकर खातिर बुद्धि के जरूरत हवय। ओ मनखे, जेकर करा बुद्धि हवय, त ओह ये पसु के संखिया के हिसाब कर ले, काबरकि येह एक मनखे के संखिया ए। एकर संखिया 666 ए।
REV 14:1 तब मेंह देखेंव कि मेढ़ा-पीला ह सियोन पहाड़ ऊपर ठाढ़े हवय अऊ ओकर संग 1,44,000 ओ मनखेमन रहंय, जेमन के माथा म ओकर नांव अऊ ओकर ददा के नांव लिखाय रहय।
REV 14:2 तब मेंह स्वरग ले एक अवाज सुनेंव, जऊन ह तेजी से बोहावत पानी के अवाज अऊ बादर के भयंकर गरजन सहीं रहय। जऊन अवाज ला मेंह सुनेंव, ओह अइसने रिहिस, मानो बीना बजइयामन बीना बजावत हवंय।
REV 14:3 ओ मनखेमन सिंघासन अऊ चार जीयत परानी अऊ अगुवामन के आघू म एक नवां गीत गावत रहंय। ओ 1,44,000 मनखे, जऊन मन ला धरती म ले दाम देके छोंड़ाय गे रिहिस, ओमन के छोंड़, अऊ कोनो ओ गीत ला सीख नइं सकिन।
REV 14:4 येमन ओ मनखे रिहिन, जेमन के सारीरिक संबंध माईलोगनमन संग नइं रिहिस अऊ ओमन अपनआप ला असुध नइं करे रिहिन। अऊ जिहां कहूं मेढ़ा-पीला ह जाथे; येमन ओकर पाछू-पाछू चलथें। येमन ला मनखेमन ले बिसाय गे रिहिस अऊ येमन ला परमेसर अऊ मेढ़ा-पीला करा पहिली फर के रूप म चघाय गे रिहिस।
REV 14:5 येमन कभू लबारी नइं मारिन; येमन म कोनो किसम के दोस नइं ए।
REV 14:6 तब मेंह एक अऊ स्वरगदूत ला अकास म उड़त देखेंव। ओकर करा धरती के जम्मो देस, जाति अऊ भासा के मनखेमन ला सुनाय बर एक सदाकाल के सुघर संदेस रहय।
REV 14:7 ओह ऊंचहा अवाज म कहिस, “परमेसर के भय मानव अऊ ओकर महिमा करव, काबरकि ओकर नियाय करे के बेरा ह आ गे हवय। जऊन ह स्वरग, धरती, समुंदर अऊ पानी के सोतमन ला बनाईस, ओकर अराधना करव।”
REV 14:8 एकर बाद एक दूसरा स्वरगदूत ह पाछू हो लीस अऊ कहिस, “सतियानास हो गीस। बड़े सहर बेबिलोन के सतियानास हो गीस, जऊन ह अपन छिनारीपन के पागल करइया मंद जम्मो जाति के मनखेमन ला पीयाय रिहिस।”
REV 14:9 एकर बाद, एक तीसरा स्वरगदूत ह पाछू हो लीस अऊ ऊंचहा अवाज म कहिस, “कहूं कोनो ओ पसु या ओकर मूरती के पूजा करथे अऊ अपन माथा म या अपन हांथ म ओ पसु के छाप ला लेथे,
REV 14:10 त ओला घलो परमेसर के कोरोध रूपी मंद ला पीये पड़ही, जऊन ला ओकर कोरोध रूपी कटोरा म पूरा बल सहित ढारे गे हवय। ओह पबितर स्वरगदूतमन के अऊ मेढ़ा-पीला के आघू म आगी अऊ गंधक के पीरा ला भोगही।
REV 14:11 जऊन मन ओ पसु अऊ ओकर मूरती के पूजा करथें या ओकर नांव के छाप ला लेथें, ओमन के पीरा के धुआं ह जुग-जुग तक उठते रहिही; अऊ ओमन ला रात अऊ दिन कभू चैन नइं मिलही।”
REV 14:12 एकर खातिर, ओ पबितर मनखेमन ला धीरज के जरूरत हवय, जऊन मन परमेसर के हुकूम ला मानथें अऊ यीसू म अपन बिसवास ला बनाय रखथें।
REV 14:13 तब मेंह स्वरग ले एक अवाज सुनेंव, जऊन ह मोला ये कहत रहय, “लिख! धइन एं ओ मनखेमन, जऊन मन अब ले परभू म बिसवास करत मरथें।” पबितर आतमा ह कहिथे, “हव, ओमन धइन अंय। ओमन अपन मेहनत के बाद अराम पाहीं, काबरकि ओमन के भलई के काममन ओमन के संग जाही।”
REV 14:14 तब मोला उहां एक सफेद बादर दिखिस अऊ ओ बादर ऊपर मनखे के बेटा सहीं कोनो बईठे रहय। ओकर मुड़ म सोन के मुकुट अऊ ओकर हांथ म तेज धारदार हंसिया रहय।
REV 14:15 तब एक आने स्वरगदूत मंदिर म ले निकलिस अऊ ऊंचहा अवाज म बादर ऊपर बईठे मनखे ला कहिस, “अपन हंसिया ला ले अऊ लुवई कर, काबरकि लुवई के बेरा आ गे हवय, अऊ धरती के फसल ह पक चुके हवय।”
REV 14:16 तब जऊन ह बादर ऊपर बईठे रिहिस, ओह अपन हंसिया ला धरती ऊपर चलाईस, अऊ धरती के फसल ह लुवा गे।
REV 14:17 तब एक अऊ स्वरगदूत स्वरग के मंदिर म ले निकलिस, अऊ ओकर करा घलो एक तेज धारदार हंसिया रहय।
REV 14:18 तब एक अऊ स्वरगदूत, जऊन ला आगी ऊपर अधिकार दिये गे रिहिस, बेदी म ले आईस अऊ ऊंचहा अवाज म ओ स्वरगदूत ला कहिस, जेकर करा तेज धारदार हंसिया रहय, “अपन हंसिया ला ले अऊ धरती के अंगूर के नार के गुच्छामन ला काट अऊ अंगूर ला संकेल ले, काबरकि ओकर अंगूरमन पाक गे हवंय।”
REV 14:19 तब ओ स्वरगदूत ह अपन हंसिया ला धरती के अंगूर के नारमन म चलाईस अऊ अंगूर ला संकेलिस अऊ ओला परमेसर के कोरोध रूपी अंगूर के बड़े कुन्ड म झोंक दीस।
REV 14:20 ओमन ला सहर के बाहिर अंगूर के कुन्ड म कुचरे गीस अऊ ओ कुन्ड ले जऊन लहू निकलिस, ओह घोड़ा के लगाम के करीब पांच फीट ऊंच होके तीन सौ किलोमीटर तक बोहाईस।
REV 15:1 तब मेंह अकास म एक ठन अऊ महान अऊ अद्भूत चिनहां देखेंव: सात स्वरगदूत सात ठन महामारी ला धरे रहंय। येमन आखिरी बिपत्ति अंय, काबरकि एकर बाद परमेसर के कोरोध ह पूरा हो जाही।
REV 15:2 अऊ मेंह अइसने चीज देखेंव, जऊन ह आगी म मिले कांच के एक समुंदर सहीं दिखत रहय अऊ ओ कांच के समुंदर के तीर म ओ मनखेमन ठाढ़े रिहिन, जऊन मन ओ पसु अऊ ओकर मूरती अऊ ओकर नांव के संखिया ऊपर जय पाय रिहिन। ओमन परमेसर के दुवारा दिये गय बीनामन ला धरे रहंय
REV 15:3 अऊ ओमन परमेसर के सेवक मूसा के गीत अऊ मेढ़ा-पीला के ये गीत गावत रहंय: “हे सर्वसक्तिमान परभू परमेसर! तोर काम महान अऊ अद्भूत ए। हे जाति-जाति के राजा! तोर रसता ह सही अऊ सच्चा ए।
REV 15:4 हे परभू! जम्मो झन तोर भय मानहीं, अऊ तोर नांव के महिमा करहीं। काबरकि तेंहीच ह पबितर अस। जम्मो देस के मनखेमन आहीं अऊ तोर अराधना करहीं, काबरकि तोर धरमी काममन परगट हो गे हवंय।”
REV 15:5 एकर बाद मेंह स्वरग म मंदिर ला याने कि करार कानून के पबितर-तम्बू ला देखेंव, जऊन ला खोले गीस।
REV 15:6 अऊ ओ मंदिर म ले सात स्वरगदूत निकलिन, जेमन करा सात ठन महामारी रहय। ओ स्वरगदूतमन साफ अऊ चमकत सन के कपड़ा पहिरे रहंय अऊ ओमन के छाती म सुनहरा पट्टा बंधाय रहय।
REV 15:7 तब ओ चार जीयत परानी म ले एक झन ओ सातों स्वरगदूतमन ला सात ठन सोन के कटोरा दीस, जऊन म जुग-जुग तक जीयत रहइया परमेसर के कोरोध भराय रहय।
REV 15:8 अऊ परमेसर के महिमा अऊ ओकर सामर्थ के कारन मंदिर ह धुआं ले भर गीस अऊ कोनो ओ मंदिर भीतर नइं जा सकिन, जब तक कि ओ सात स्वरगदूतमन के सात महामारीमन पूरा नइं हो गीन।
REV 16:1 तब मंदिर म ले मोला एक ऊंचहा अवाज सुनई पड़िस, जऊन ह सातों स्वरगदूतमन ले ये कहत रहय, “जावव, अऊ परमेसर के कोरोध के सातों कटोरा ला धरती ऊपर उंड़ेर दव।”
REV 16:2 पहिला स्वरगदूत ह गीस अऊ धरती ऊपर अपन कटोरा ला उंड़ेर दीस। जऊन मनखेमन ऊपर पसु के छाप लगे रिहिस अऊ जऊन मन ओकर मूरती के पूजा करे रिहिन, ओमन के ऊपर घिनौना अऊ पीरा देवइया फोड़ा निकल आईस।
REV 16:3 दूसरा स्वरगदूत ह समुंदर ऊपर अपन कटोरा ला ढारिस अऊ समुंदर के पानी ह मरे मनखे के लहू सहीं हो गीस अऊ समुंदर के जम्मो जीव मर गीन।
REV 16:4 तीसरा स्वरगदूत ह अपन कटोरा ला नदी अऊ पानी के सोतामन ऊपर ढारिस अऊ ओमन के पानी ह लहू बन गीस।
REV 16:5 तब मेंह ओ स्वरगदूत, जेकर करा पानी के ऊपर अधिकार रिहिस, ये कहत सुनेंव: “हे परम पबितर! तेंह जीयत हवस अऊ तेंह हमेसा जीयत रहय; तेंह नियाय करे म धरमी अस, काबरकि तेंह अइसने नियाय करे हवस।
REV 16:6 मनखेमन तोर पबितर मनखे अऊ अगमजानीमन के लहू बहाय हवंय, अऊ तेंह ओमन ला पीये बर लहू दे हवस, काबरकि ओमन एकरे लईक अंय।”
REV 16:7 अऊ बेदी ला मेंह ये कहत सुनेंव: “हव, हे सर्वसक्तिमान परभू परमेसर, तोर नियाय ह सच्चा अऊ सही अय।”
REV 16:8 तब चौथा स्वरगदूत ह अपन कटोरा ला सूरज ऊपर ढारिस, अऊ सूरज ला मनखेमन ला आगी ले लेसे के अनुमति दिये गीस।
REV 16:9 मनखेमन भारी गरमी ले लेसा गीन अऊ ओमन परमेसर के नांव ला सराप दीन, जऊन ह कि ये महामारी ऊपर अधिकार रखथे, पर ओमन पछताप नइं करिन अऊ परमेसर के महिमा करे नइं चाहिन।
REV 16:10 तब पांचवां स्वरगदूत ह अपन कटोरा ला पसु के सिंघासन ऊपर ढारिस, अऊ पसु के राज म अंधियार छा गीस। मनखेमन पीरा के मारे अपन जीभ चबाय लगिन,
REV 16:11 अऊ अपन पीरा अऊ फोड़ामन के कारन स्वरग के परमेसर ला सराप देय लगिन, पर ओमन अपन कुकरम खातिर पछताप नइं करिन।
REV 16:12 तब छठवां स्वरगदूत ह अपन कटोरा ला महान नदी फरात ऊपर ढारिस, नदी के पानी ह सूखा गीस, ताकि पूरब दिग ले अवइया राजामन बर रसता बन जावय।
REV 16:13 तब मेंह सांप सहीं पसु के मुहूं ले, अऊ ओ पसु के मुहूं ले अऊ लबरा अगमजानी के मुहूं ले तीन असुध आतमामन ला निकलत देखेंव। ये असुध आतमामन मेचका के रूप म रहंय।
REV 16:14 येमन परेत आतमा अंय, जऊन मन चमतकार देखाथें। येमन जम्मो संसार के राजामन करा जाथें अऊ ओमन ला ओ लड़ई बर संकेलथें, जऊन ह सर्वसक्तिमान परमेसर के महान दिन म होही।
REV 16:15 “देख! मेंह एक चोर के सहीं आवत हंव! धइन ए ओह, जऊन ह जागत रहिथे, अऊ अपन कपड़ा ला पहिरे रहिथे, ताकि ओह नंगरा होके झन जावय, अऊ मनखेमन के आघू म ओकर बेजत्ती झन होवय।”
REV 16:16 तब आतमामन राजामन ला ओ ठऊर म संकेलिन, जऊन ला इबरानी म हरमगिदोन कहे जाथे।
REV 16:17 तब सातवां स्वरगदूत ह हवा म अपन कटोरा ला ढारिस, अऊ मंदिर के सिंघासन म ले एक ऊंचहा अवाज आईस, जऊन ह ये कहत रिहिस, “पूरा हो गीस!”
REV 16:18 तब बिजली के चमक, अवाज, बादर के गरजन अऊ भारी भुइंडोल होईस। अइसने भारी भुइंडोल मनखे के गढ़े जाय के समय ले अब तक कभू नइं होय रिहिस।
REV 16:19 बड़े सहर के तीन भाग हो गीस अऊ देसमन के सहरमन नास हो गीन। परमेसर ह बड़े सहर बेबिलोन ला सुरता करिस अऊ ओला अपन भयंकर कोरोध ले भरे मंद के कटोरा ला पीये बर दीस।
REV 16:20 जम्मो टापू अऊ पहाड़मन गायब हो गीन।
REV 16:21 अकास ले करीब पैंतालीस-पैंतालीस किलो के बड़े-बड़े करा मनखेमन ऊपर गिरिस, अऊ ये करा के महामारी के कारन मनखेमन परमेसर ला सराप दीन, काबरकि ये महामारी ह बहुंत भयंकर रिहिस।
REV 17:1 तब जऊन सात स्वरगदूतमन सात ठन कटोरा धरे रिहिन, ओमा के एक झन मोर करा आईस अऊ कहिस, “आ, मेंह तोला ओ बड़े बेस्या के दंड ला देखाहूं, जऊन ह कतको पानीमन ऊपर बईठे हवय।
REV 17:2 ओकर संग धरती के राजामन छिनारी करे हवंय अऊ धरती के मनखेमन ओकर छिनारीपन के मंद ला पीके मतवाला हो गे हवंय।”
REV 17:3 तब ओ स्वरगदूत ह मोला आतमा म एक ठन सुनसान जगह म ले गीस। उहां मेंह एक झन माईलोगन ला सिन्दूरी लाल रंग के एक पसु ऊपर बईठे देखेंव। पसु के जम्मो देहें म खराप नांवमन लिखाय रहंय, अऊ ओकर सात ठन मुड़ अऊ दस ठन सींग रहय।
REV 17:4 ओ माईलोगन ह बैंगनी अऊ सिन्दूरी लाल रंग के कपड़ा पहिरे रहय अऊ सोन, कीमती पथरा अऊ मोतीमन ले सजे रहय। ओह अपन हांथ म एक ठन सोन के कटोरा धरे रहय। ओ कटोरा ह घिन-घिन चीज अऊ ओकर छिनारीपन के गंदगी ले भरे रहय।
REV 17:5 अऊ ओकर माथा म एक भेद के नांव लिखाय रहय: महान बेबिलोन, धरती के बेस्यामन के अऊ घिन-घिन चीजमन के दाई।
REV 17:6 मेंह देखेंव कि ओ माईलोगन ह पबितर मनखेमन के लहू अऊ यीसू के बिसवासयोग्य गवाहमन के लहू ला पीके माते हवय। जब मेंह ओला देखेंव, त बहुंत अचरज म पड़ गेंव।
REV 17:7 तब स्वरगदूत ह मोला कहिस: “तेंह काबर अचम्भो करत हवस? मेंह तोला ओ माईलोगन के भेद ला बताहूं अऊ ओ पसु के भेद ला घलो बताहूं, जेकर ऊपर ओ माईलोगन ह सवारी करे हवय अऊ जेकर सात ठन मुड़ अऊ दस ठन सींग हवय।
REV 17:8 जऊन पसु ला तेंह देखे, ओह पहिली रिहिस, पर अब नइं ए; ओह अथाह कुन्ड ले निकलके आही अऊ ओह नास हो जाही। धरती के ओ मनखेमन, जेमन के नांव संसार के रचे के समय ले जिनगी के किताब म नइं लिखे हवय, ओमन पसु ला देखके अचम्भो करहीं, काबरकि ओह पहिली रिहिस, पर अब नइं ए, पर ओह फेर आही।
REV 17:9 “येला समझे बर बुद्धि के जरूरत हवय। ओ सात ठन मुड़ीमन सात ठन पहाड़ अंय, जेकर ऊपर ओ माईलोगन ह बईठे हवय।
REV 17:10 ओमन सात झन राजा घलो अंय। ओमा ले पांच झन गिर गे हवंय; एक झन अभी राज करत हवय, अऊ दूसर ह अभी तक नइं आय हवय; पर जब ओह आही, त थोरकन समय तक राज करही।
REV 17:11 ओ पसु जऊन ह पहिली रिहिस, पर अब नइं ए, ओह आठवां राजा ए। असल म, ओह ओ सातों म ले अय अऊ ओह नास हो जाही।
REV 17:12 “जऊन दस ठन सींग तेंह देखे, ओमन दस राजा अंय। ओमन ला अभी तक राज नइं मिले हवय, पर ओमन ला एक घंटा बर पसु के संग म राजामन सहीं अधिकार मिलही।
REV 17:13 ओमन के एकेच उदेस्य हवय अऊ ओमन अपन सक्ति अऊ अधिकार पसु ला दे दीहीं।
REV 17:14 ओमन मेढ़ा-पीला के बिरोध म लड़ई करहीं, पर मेढ़ा-पीला ह ओमन ऊपर जय पाही, काबरकि ओह परभूमन के परभू अऊ राजामन के राजा अय, अऊ जऊन मन ओकर संग रहिहीं, ओमन बलाय गे हवंय अऊ चुने गे हवंय अऊ ओमन बिसवासयोग्य अंय।”
REV 17:15 तब स्वरगदूत ह मोला कहिस, “जऊन पानी ला तेंह देखे, जिहां ओ बेस्या ह बईठे हवय, ओ पानी ह मनखेमन के भीड़, देस अऊ भासामन अंय।
REV 17:16 जऊन पसु अऊ दस सींगमन ला तेंह देखे, ओमन ओ बेस्या ले घिन करहीं। ओमन ओला नंगरी करके अकेला छोंड़ दीहीं। ओमन ओकर मांस ला खाहीं अऊ ओला आगी म जला दीहीं।
REV 17:17 काबरकि परमेसर ह ओमन के मन म ये बात ला डाले हवय कि ओमन ओकर उदेस्य ला पूरा करंय अऊ जब तक परमेसर के बचन ह पूरा नइं हो जावय, तब तक ओमन एक मत होके अपन राज करे के अधिकार ला ओ पसु ला दे देवंय।
REV 17:18 जऊन माईलोगन ला तेंह देखे, ओह ओ महान सहर ए, जऊन ह धरती के राजामन ऊपर राज करथे।”
REV 18:1 एकर बाद मेंह एक अऊ स्वरगदूत ला स्वरग ले उतरत देखेंव। ओकर करा बड़े अधिकार रिहिस अऊ धरती ह ओकर सोभा ले जगमगा गीस।
REV 18:2 ओह ऊंचहा अवाज म चिचियाके कहिस: “ ‘गिर परिस! बड़े सहर बेबिलोन ह गिर परिस!’ ओह परेत आतमामन के, जम्मो असुध आतमामन के, जम्मो असुध चिरईमन के, जम्मो असुध अऊ घिनौना पसुमन के डेरा हो गे हवय।
REV 18:3 काबरकि जम्मो देस के मनखेमन ओकर छिनारीपन के पागल करइया मंद ला पीये हवंय। धरती के राजामन ओकर संग छिनारी करिन, अऊ धरती के बेपारीमन ओकर बिलासिता के धन ले धनवान हो गे हवंय।”
REV 18:4 तब मेंह स्वरग ले एक अऊ अवाज सुनेंव, जऊन ह ये कहत रहय: “ ‘हे मोर मनखेमन, ओ सहर म ले निकल आवव,’ ताकि तुमन ओकर पाप के भागी झन होवव, अऊ ओकर कोनो बिपत्ति तुम्हर ऊपर झन पड़य;
REV 18:5 काबरकि ओकर पाप के घघरी ह भर गे हवय, अऊ परमेसर ह ओकर अपराधमन ला सुरता करे हवय।
REV 18:6 ओकर संग वइसने करव, जइसने ओह तुम्हर संग करे हवय; ओकर कुकरम के दू गुना बदला चुकावव। जऊन कटोरा म ओह भरे हवय, ओ कटोरा म ओकर बर दू गुना भर देवव।
REV 18:7 ओह जतेक डींग मारे हवय अऊ जतेक भोग-बिलास करे हवय, ओला ओतेक दुख अऊ तकलीफ देवव। ओह अपन मन म घमंड करके कहिथे, ‘मेंह रानी सहीं बईठथंव। मेंह बिधवा नो हंव; अऊ मेंह कभू दुख नइं मनाहूं।’
REV 18:8 एकरसेति एकेच दिन म ओकर ऊपर मिरतू, सोक अऊ दुकाल के बिपत्ति आ पड़ही। ओह आगी म भसम हो जाही, काबरकि जऊन ह ओकर नियाय करथे, ओह सक्तिमान परभू परमेसर ए।
REV 18:9 “धरती के जऊन राजामन ओकर संग छिनारी अऊ भोग-बिलास करिन, ओमन जब ओकर जरे के धुआं ला देखहीं, त ओमन रोहीं अऊ ओकर बर सोक मनाहीं।
REV 18:10 ओमन ओकर पीरा ले डरके दूरिहा म ठाढ़ होहीं अऊ ये कहिहीं, “ ‘हे महान सहर! हाय! तोर ऊपर हाय! हे बेबिलोन, सक्तिसाली सहर! एकेच घंटा म तोला तोर दंड मिल गीस!’
REV 18:11 “धरती के बेपारीमन ओकर बर रोहीं अऊ कलपहीं, काबरकि अब कोनो ओमन के ये मालमन ला नइं बिसाही—
REV 18:12 पानी जहाज म लदे सोन, चांदी, कीमती पथरा, मोती; सुघर मलमल, बैंगनी, रेसमी अऊ सिन्दूरी लाल कपड़ा; जम्मो किसम के महकत कठवा, अऊ हाथी-दांत, कीमती कठवा, कांसा, लोहा अऊ संगमरमर के बने जम्मो किसम के चीज;
REV 18:13 पानी जहाज म लदे दालचीनी, मसाला, धूप, इतर, लोबान, अंगूर के मंद, जैतून के तेल, सुघर पीसान अऊ गहूं; पसु-धन अऊ भेड़; घोड़ा अऊ रथ; अऊ गुलाम के रूप म बेचे गय मनखेमन।
REV 18:14 “बेपारीमन कहिहीं, ‘जऊन फर के लालसा तेंह करत रहय, ओह तोर ले दूरिहा हो गे हवय। तोर जम्मो धन-संपत्ति अऊ तड़क-भड़क खतम हो गीस, अऊ ओह तोला फेर कभू नइं मिलय।’
REV 18:15 जऊन बेपारीमन ये चीजमन ला बेचके बेबिलोन सहर ले धन कमाय रिहिन, ओमन ओकर पीरा ले डरके दूरिहा म ठाढ़ होहीं। ओमन रोहीं अऊ सोक मनाहीं
REV 18:16 अऊ कलपत ये कहिहीं: “ ‘हे महान सहर! हाय! तोर ऊपर हाय! तेंह सुघर मलमल, बैंगनी अऊ सिन्दूरी लाल कपड़ा पहिरे रहय, अऊ सोन, कीमती पथरा अऊ मोती ले सजे रहय!
REV 18:17 एकेच घंटा म ये जम्मो धन ह नास हो गीस!’ “पानी जहाज के हर कप्तान, पानी जहाज म हर यातरा करइया, हर डोंगा खेवइया अऊ हर ओ मनखे, जऊन ह समुंदर ले अपन जिनगी चलाथे, ये जम्मो के जम्मो दूरिहा म ठाढ़े रहिहीं।
REV 18:18 जब ओमन ओकर जरे के धुआं ला देखहीं, त ओमन चिचियाके कहिहीं, ‘का ये महान सहर सहीं कभू कोनो सहर रिहिस?’
REV 18:19 ओमन अपन मुड़ ऊपर धुर्रा ला डारहीं, अऊ रोवत अऊ कलपत ओमन चिचिया-चिचियाके कहिहीं: “ ‘हे महान सहर! हाय! तोर ऊपर हाय! येह ओ सहर ए, जेकर धन के जरिये समुंदर के जम्मो जहाज के मालिकमन धनी हो गीन! एकेच घंटा म, ओह नास हो गीस!’
REV 18:20 “हे स्वरग म रहइयामन, ओकर ऊपर आनंद मनावव! हे पबितर मनखेमन आनंद मनावव! हे प्रेरित अऊ अगमजानीमन, आनंद मनावव! काबरकि ओह तुम्हर संग जइसने बरताव करे रिहिस, परमेसर ह ओला ओकर सजा दे हवय।”
REV 18:21 तब एक सक्तिसाली स्वरगदूत ह चक्की के एक बड़े पाट सहीं पथरा ला उठाईस अऊ ये कहत ओला समुंदर म फटिक दीस: “महान सहर बेबिलोन ह अइसने बेरहमी ले फटिक दिये जाही, अऊ ओकर फेर कभू पता नइं चलही।
REV 18:22 बीना बजइया अऊ संगीतकार, बांसुरी बजइया अऊ तुरही बजइयामन के संगीत के अवाज, ये सहर म फेर कभू सुनई नइं पड़ही। कोनो काम के कोनो घलो कारीगर, ये सहर म फेर कभू नइं मिलही। जांता चले के अवाज, ये सहर म फेर कभू सुनई नइं पड़ही।
REV 18:23 दीया के अंजोर, ये सहर म फेर कभू नइं चमकही। दूल्हा अऊ दुलहिन के अवाज, ये सहर म फेर कभू सुनई नइं पड़ही। ये सहर के बेपारीमन संसार के खास मनखे रिहिन। ये सहर ह अपन जादू के दुवारा जम्मो देस के मनखेमन ला बहकाय रिहिस।
REV 18:24 ये सहर म अगमजानी अऊ परमेसर के पबितर मनखेमन के लहू पाय गीस, अऊ धरती ऊपर जऊन मनखेमन मार डारे गीन, ओ जम्मो के लहू ये सहर म पाय गीस।”
REV 19:1 एकर बाद मेंह स्वरग म, एक बड़े भीड़ के गरजन सहीं अवाज सुनेंव, जऊन ह चिचियाके ये कहत रहय: “हलिलूयाह! उद्धार, महिमा अऊ सामर्थ हमर परमेसर के अय,
REV 19:2 काबरकि ओकर नियाय सच्चा अऊ सही अय। ओह ओ बड़े बेस्या ला दंड दे हवय, जऊन ह अपन छिनारीपन ले धरती के मनखेमन ला खराप करत रिहिस। परमेसर ह ओकर ले अपन सेवकमन के लहू के बदला ले हवय।”
REV 19:3 ओमन फेर चिचियाके कहिन: “हलिलूयाह! ओ बड़े सहर के जरे के धुआं जुग-जुग तक उठत रहिथे।”
REV 19:4 चौबीस अगुवा अऊ चारों जीयत परानीमन माड़ी के भार गिरिन अऊ ओमन सिंघासन ऊपर बिराजे परमेसर के अराधना करिन। अऊ ओमन ऊंचहा अवाज म कहिन: “आमीन, हलिलूयाह!”
REV 19:5 तब सिंघासन ले ये कहत एक अवाज आईस: “तुमन जम्मो परमेसर के सेवकमन, का छोटे का बड़े तुमन, जऊन मन ओकर भय मानथव, हमर परमेसर के परसंसा करव!”
REV 19:6 तब मेंह एक बड़े भीड़ के अवाज ला सुनेंव, जऊन ह पानी के लहरामन सहीं अऊ बादर के बड़े गरजन सहीं रहय; भीड़ ह चिचियाके ये कहत रहय: “हलिलूयाह! काबरकि हमर सर्वसक्तिमान परभू परमेसर ह राज करत हवय।
REV 19:7 आवव! हमन आनंद अऊ खुसी मनावन, अऊ परमेसर के महिमा करन! काबरकि मेढ़ा-पीला के बिहाव के बेरा ह आ गे हवय, अऊ ओकर दुलहिन ह अपनआप ला तियार कर ले हवय।
REV 19:8 सुघर, चमकत अऊ साफ मलमल के कपड़ा, ओला पहिरे बर दिये गे हवय।” (सुघर मलमल कपड़ा ह पबितर मनखेमन के धरमी काम के चिनहां ए।)
REV 19:9 तब स्वरगदूत ह मोला कहिस, “येला लिख: धइन अंय ओमन, जऊन मन मेढ़ा-पीला के बिहाव भोज के नेवता पाथें।” अऊ स्वरगदूत ह ये घलो कहिस, “येमन परमेसर के सत बचन अंय।”
REV 19:10 तब मेंह ओकर अराधना करे बर ओकर गोड़ खाल्हे गिरेंव। पर ओह मोला कहिस, “अइसने झन कर! मेंह घलो तोर अऊ तोर ओ भाईमन संग एक संगी सेवक अंव, जऊन मन यीसू के गवाही रखथें। परमेसर के अराधना कर! काबरकि यीसू के गवाही ह अगमबानी के आतमा ए।”
REV 19:11 तब मेंह स्वरग ला खुले हुए देखेंव अऊ उहां एक सफेद घोड़ा रहय, अऊ जऊन ह ओ घोड़ा ऊपर सवारी करे रहय, ओला बिसवासयोग्य अऊ सच कहे जाथे। ओह धरमीपन के संग नियाय करथे अऊ लड़ई करथे।
REV 19:12 ओकर आंखीमन आगी सहीं धधकत रहंय, अऊ ओकर मुड़ म कतको मुकुटमन रहंय। ओकर देहें म एक नांव लिखाय रहय, जऊन ला ओकर छोंड़ अऊ कोनो नइं जानंय।
REV 19:13 ओह लहू म डुबोय कपड़ा पहिरे रहय, अऊ ओकर नांव परमेसर के बचन ए।
REV 19:14 स्वरग के सेनामन सुघर, सफेद अऊ साफ मलमल के कपड़ा पहिरे अऊ सफेद घोड़ामन म सवार होके ओकर पाछू-पाछू आवत रहंय।
REV 19:15 ओकर मुहूं ले एक तेज धारदार तलवार निकलत रहय, जेकर दुवारा ओह देस-देस के मनखेमन ला मारही। ओह लोहा के राजदंड ले ओमन ऊपर राज करही। ओह सर्वसक्तिमान परमेसर के भयानक कोरोध रूपी मंद के कुन्ड ला रऊंदही।
REV 19:16 ओकर कपड़ा अऊ ओकर जांघ म ये नांव लिखाय रहय: राजामन के राजा अऊ परभूमन के परभू।
REV 19:17 तब मेंह एक स्वरगदूत ला सूरज ऊपर ठाढ़े देखेंव। ओह ऊंचहा अवाज म अकास म उड़त जम्मो चिरईमन ला पुकारके कहिस, “आवव! परमेसर के बड़े भोज म सामिल होय बर जूरव,
REV 19:18 ताकि तुमन राजा, सेनापति, सक्तिसाली मनखे, घोड़ा अऊ ओकर सवारमन के मांस, अऊ सुतंतर अऊ गुलाम, छोटे अऊ बड़े जम्मो झन के मांस खा सकव।”
REV 19:19 तब मेंह देखेंव कि ओ पसु अऊ धरती के राजामन अपन सेनामन संग, घोड़ा म बईठे ओ घुड़सवार अऊ ओकर सेना ले लड़े बर जूरे रहंय।
REV 19:20 पर ओ पसु ह पकड़े गीस अऊ ओकर संग ओ लबरा अगमजानी घलो पकड़े गीस, जऊन ह पसु के आघू म अचरज के चिनहां देखाके, ओ मनखेमन ला बहकाय रिहिस, जऊन मन ओ पसु के छाप लेय रिहिन अऊ ओकर मूरती के पूजा करे रिहिन। ओ दूनों जीयते-जीयत धधकत गंधक के आगी के कुन्ड म झोंक दिये गीन।
REV 19:21 ओमा के बांचे मनखेमन घोड़ा म बईठे घुड़सवार के मुहूं ले निकले तलवार ले मारे गीन, अऊ जम्मो चिरईमन ओमन के मांस खाके अघा गीन।
REV 20:1 तब मेंह एक स्वरगदूत ला स्वरग ले उतरत देखेंव। ओह अपन हांथ म अथाह कुन्ड के कुची अऊ एक बड़े सांकर धरे रहय।
REV 20:2 ओह ओ सांप सहीं पसु याने कि पुराना सांप ला पकड़िस, जऊन ह इबलीस या सैतान ए, अऊ ओला एक हजार साल बर सांकर म बांध दीस।
REV 20:3 स्वरगदूत ह ओला अथाह कुन्ड म डार दीस अऊ ओमा ताला लगाके ओकर ऊपर मुहर लगा दीस, ताकि ओ पुराना सांप ह एक हजार साल के पूरा होवत तक, देसमन के मनखेमन ला बहकाय झन सकय। ओकर बाद, ये जरूरी अय कि ओला थोरकन समय बर छोंड़े जावय।
REV 20:4 तब मेंह सिंघासनमन ला देखेंव, जऊन म ओ मनखेमन बईठे रहंय, जऊन मन ला नियाय करे के अधिकार देय गे रिहिस। मेंह ओ मनखेमन के आतमामन ला घलो देखेंव, जेमन के मुड़ ला यीसू के गवाही देय के कारन अऊ परमेसर के बचन म बने रहे के कारन काट डारे गे रिहिस। ओमन पसु या ओकर मूरती के अराधना नइं करे रिहिन अऊ ओमन अपन माथा या अपन हांथ म ओकर छाप नइं लेय रिहिन। ओमन जी उठिन अऊ मसीह के संग म एक हजार साल तक राज करिन।
REV 20:5 बाकि मरे मनखेमन एक हजार साल के पूरा होवत तक जी नइं उठिन। येह मरे मनखेमन के पहिली जी उठई अय।
REV 20:6 धइन अऊ पबितर अंय ओ मनखेमन, जऊन मन ये पहिली जी उठई म भागीदार होथें। येमन ऊपर दूसरा मिरतू के कोनो अधिकार नइं रहय। येमन परमेसर अऊ मसीह के पुरोहित होहीं अऊ ओकर संग एक हजार साल तक राज करहीं।
REV 20:7 जब एक हजार साल पूरा हो जाही, त सैतान ला कैद ले छोंड़ दिये जाही
REV 20:8 अऊ ओह धरती के जम्मो देस के मनखेमन ला बहकाय बर निकलही; ये देसमन याजूज अऊ माजूज अंय। सैतान ह ओमन ला लड़ई बर संकेलही। ओमन समुंदर तीर के बालू सहीं अनगिनत होहीं।
REV 20:9 ओमन जम्मो धरती ऊपर बगर गीन। ओमन पबितर मनखेमन के डेरा अऊ परमेसर के मयारू सहर ला घेर लीन, पर स्वरग ले आगी उतरिस अऊ ओमन ला भसम कर दीस।
REV 20:10 तब ओमन ला बहकवइया सैतान ला आगी अऊ गंधक के कुन्ड म डार दिये गीस, जिहां ओ पसु अऊ लबरा अगमजानी ला डारे गे रिहिस। ओमन सदाकाल तक दिन-रात पीरा भोगहीं।
REV 20:11 तब मेंह एक बड़े सफेद सिंघासन अऊ ओकर ऊपर बिराजे एक मनखे ला देखेंव। धरती अऊ अकास ओकर आघू ले भाग गीन, अऊ ओमन बर कोनो जगह नइं बांचिस।
REV 20:12 अऊ मेंह छोटे-बड़े जम्मो मरे मनखेमन ला सिंघासन के आघू म ठाढ़े देखेंव, अऊ किताबमन खोले गीन। तब एक आने किताब खोले गीस, जऊन ह जिनगी के किताब ए। किताबमन म लिखाय मरे मनखेमन के काम के मुताबिक ओमन के नियाय करे गीस।
REV 20:13 तब समुंदर ह अपन मरे मनखेमन ला दे दीस। मिरतू अऊ पाताल-लोक अपन मरे मनखेमन ला दे दीन, अऊ हर एक के नियाय ओकर काम के मुताबिक करे गीस।
REV 20:14 तब मिरतू अऊ पाताल-लोक ला आगी के झील म डार दिये गीस। आगी के झील ह दूसरा मिरतू ए।
REV 20:15 जेमन के नांव जिनगी के किताब म लिखाय नइं मिलिस, ओमन आगी के झील म डार दिये गीन।
REV 21:1 तब मेंह एक नवां अकास अऊ एक नवां धरती देखेंव। पहिली अकास अऊ पहिली धरती दूनों लोप हो गे रिहिन, अऊ कोनो समुंदर घलो नइं रिहिस।
REV 21:2 अऊ मेंह पबितर सहर नवां यरूसलेम ला परमेसर के इहां ले स्वरग ले उतरत देखेंव। ओह अपन घरवाला खातिर दुलहिन के सहीं सुघर सजे रहय।
REV 21:3 अऊ मेंह सिंघासन ले ऊंचहा अवाज म, ये कहत सुनेंव, “देखव! अब परमेसर के निवास मनखेमन के बीच हवय, अऊ ओह ओमन के संग रहिही। ओमन ओकर मनखे होहीं, अऊ परमेसर ह खुद ओमन के संग रहिही।
REV 21:4 ओह ओमन के आंखी के जम्मो आंसू ला पोंछही। उहां न मिरतू होही, न कोनो सोक मनाही या रोही, अऊ न ही कोनो ला कोनो किसम के पीरा होही, काबरकि पुराना बातमन खतम हो गे हवंय।”
REV 21:5 जऊन ह सिंघासन म बिराजे रिहिस ओह कहिस, “मेंह हर एक चीज ला नवां बनावत हवंव।” तब ओह कहिस, “येला लिख ले, काबरकि ये बात ह बिसवास लईक अऊ सत ए।”
REV 21:6 ओह मोला कहिस, “येह पूरा होईस। मेंह अलफा अऊ ओमेगा, आदि अऊ अन्त अंव। जऊन ह पीयासा हवय, ओला मेंह जिनगी के पानी के सोता म ले मुफत म पीये बर दूहूं।
REV 21:7 जऊन ह जय पाही, ओला ये जम्मो चीज मिलही, अऊ मेंह ओकर परमेसर होहूं, अऊ ओह मोर बेटा होही।
REV 21:8 पर डरपोक, अबिसवासी, दुस्ट, हतियारा, छिनारी करइया, जादू-टोना करइया, मूरती-पूजा करइया अऊ जम्मो लबरामन ओ झील म जगह पाहीं, जऊन ह आगी अऊ गंधक ले धधकत हवय। येह दूसरा मिरतू ए।”
REV 21:9 तब ओ सात स्वरगदूतमन, जेमन करा सात ठन आखिरी महामारी ले भरे सात ठन कटोरा रहंय, ओमा ले एक झन मोर करा आईस अऊ कहिस, “आ, मेंह तोला दुलहिन याने कि मेढ़ा-पीला के घरवाली ला देखाहूं।”
REV 21:10 ओ स्वरगदूत ह आतमा के सामर्थ ले मोला एक बड़े अऊ ऊंच पहाड़ ऊपर ले गीस, अऊ ओ पबितर सहर—यरूसलेम ला देखाईस, जऊन ह स्वरग ले परमेसर के इहां ले उतरत रहय।
REV 21:11 ओह परमेसर के महिमा ले चमकत रहय अऊ ओकर चमक ह एक बहुंत मंहगा पथरा—मनि सहीं एकदम साफ रहय।
REV 21:12 ओकर चारों कोति एक बड़े अऊ ऊंच दीवार रहय। दीवार म बारह ठन कपाट रहंय अऊ ये कपाटमन म बारह झन स्वरगदूत ठाढ़े रहंय। ये कपाटमन म इसरायल के बारह गोत्र के नांव लिखाय रहय—हर कपाट म एक नांव।
REV 21:13 पूरब म तीन, उत्तर म तीन, दक्खिन म तीन अऊ पछिम म तीन कपाट रिहिन।
REV 21:14 सहर के दीवार के बारह ठन नीव के पथरामन रहंय अऊ ओमन म मेढ़ा-पीला के बारह प्रेरितमन के नांव लिखाय रहय—हर पथरा म एक नांव।
REV 21:15 जऊन स्वरगदूत ह मोर ले गोठियावत रिहिस, ओकर करा सहर, ओकर कपाट अऊ दीवार ला नापे बर नापे के सोन के एक छड़ रहय।
REV 21:16 ओ सहर ह चौखट्टा आकार म बसे रिहिस। ओकर लम्बई ह ओकर चौड़ई के बरोबर रहय। स्वरगदूत ह सहर ला छड़ म नापिस, त ओह करीब 12,000 सटेडिया निकलिस। ओकर लम्बई, चौड़ई अऊ ऊंचई बरोबर रिहिस।
REV 21:17 ओह सहर के दीवार ला घलो नापिस। स्वरगदूत ह मनखे के नाप के हिसाब म नापिस, अऊ सहर के दीवार के ऊंचई ह करीब 65 मीटर निकलिस।
REV 21:18 सहर के दीवार ह मनि के बने रिहिस अऊ सहर ह चोखा सोन के बने रिहिस, जऊन ह कांच सहीं सुध रिहिस।
REV 21:19 सहर के दीवार के नीव ह जम्मो किसम के कीमती पथरा ले सजे रहय। पहिली नीव ह मनि के रिहिस, दूसरा ह नीलम, तीसरा ह सुलेमानी, चौथा ह पन्ना,
REV 21:20 पांचवां ह गोमेदक, छठवां ह मानिक्य, सातवां ह पीतमनी, आठवां ह फिरोजा, नौवां ह पुखराज, दसवां ह लहसनिये, गियारहवां ह नगीना अऊ बारहवां ह नीलमनि के बने रिहिस।
REV 21:21 बारह कपाटमन बारह मोतीमन ले बने रिहिन। एक-एक कपाट ह एक-एक मोती के बने रिहिस। सहर के गली ह आर-पार दिखइया साफ कांच सहीं चोखा सोन के बने रिहिस।
REV 21:22 मेंह सहर म कोनो मंदिर नइं देखेंव, काबरकि सर्वसक्तिमान परभू परमेसर अऊ मेढ़ा-पीला एकर मंदिर अंय।
REV 21:23 अऊ सहर ला सूरज या चंदा के अंजोर के जरूरत नइं रिहिस, काबरकि परमेसर के महिमा ओला अंजोर देवत रिहिस अऊ मेढ़ा-पीला ओकर दीया रिहिस।
REV 21:24 संसार के मनखेमन ओकर अंजोर म रेंगही अऊ संसार के राजामन ओमा अपन सोभा लानहीं।
REV 21:25 ओ सहर के कपाटमन कभू बंद नइं होहीं, अऊ उहां कभू रात नइं होही।
REV 21:26 जम्मो देस के महिमा अऊ आदर ओमा लाने जाही।
REV 21:27 कोनो असुध चीज कभू ओ सहर म घुसरे नइं पाही अऊ न ही ओ मनखे, जऊन ह लज्जा के काम करथे या धोखा देवइया काम करथे, पर सिरिप ओमन घुसरे पाहीं, जेमन के नांव मेढ़ा-पीला के जिनगी के किताब म लिखाय हवय।
REV 22:1 तब स्वरगदूत ह मोला जिनगी देवइया पानी के नदी ला देखाईस, जेकर पानी ह इसफटिक के सहीं साफ रिहिस। ओ नदी ह परमेसर अऊ मेढ़ा-पीला के सिंघासन ले निकलके
REV 22:2 सहर के बड़े गली के बीचों-बीच बोहावत रिहिस। नदी के दूनों तीर म जिनगी के रूख रिहिस, जऊन म एक साल म बारह किसम के फर धरय—याने कि हर एक महिना ओमा फर धरय अऊ ओ रूख के पान ले देस-देस के मनखेमन ला चंगई मिलत रिहिस।
REV 22:3 अब ले उहां कोनो किसम के सराप नइं होही। ओ सहर म परमेसर अऊ मेढ़ा-पीला के सिंघासन होही, अऊ ओकर सेवकमन ओकर अराधना करहीं।
REV 22:4 ओमन ओकर चेहरा ला देखहीं अऊ ओकर नांव ह ओमन के माथा म लिखाय होही।
REV 22:5 उहां अब कभू रात नइं होही। ओमन ला दीया या सूरज के अंजोर के जरूरत नइं पड़ही, काबरकि परभू परमेसर ह ओमन ला अंजोर दीही, अऊ ओमन सदाकाल तक राज करहीं।
REV 22:6 तब स्वरगदूत ह मोला कहिस, “ये बातमन बिसवास के लईक अऊ सच अंय। परभू, परमेसर जऊन ह अगमजानीमन के आतमा ला उभारथे, ओह अपन स्वरगदूत ला अपन सेवकमन करा ओ बातमन ला देखाय बर पठोय हवय, जऊन ह निकट भविस्य म होवइया हवय।”
REV 22:7 यीसू ह कहिस, “देखव! मेंह जल्दी आवत हंव। धइन ए ओ, जऊन ह ये किताब म लिखे अगम के बातमन ला मानथे।”
REV 22:8 में, यूहन्ना ये बातमन ला सुने अऊ देखे हवंव। अऊ जब मेंह येमन ला सुन अऊ देख चुकेंव, त जऊन स्वरगदूत ह मोला ये बातमन ला देखाईस, ओकर गोड़ खाल्हे मेंह ओकर अराधना करे बर गिरेंव।
REV 22:9 पर ओह मोला कहिस, “अइसने झन कर। मेंह घलो तोर सहीं अऊ तोर भाई अगमजानीमन सहीं अऊ ओ जम्मो झन जऊन मन ये किताब के बात ला मानथें, ओमन सहीं एक संगी सेवक अंव। परमेसर के अराधना कर!”
REV 22:10 अऊ ओह मोला फेर कहिस, “तेंह ये किताब के अगम के बातमन ला मुहर लगाके बंद झन कर, काबरकि समय ह लकठा आ गे हवय।
REV 22:11 जऊन ह अधरम करथे, ओह अधरम करते रहय। जऊन ह दुस्ट मनखे ए, ओह दुस्ट मनखे बने रहय। जऊन ह धरमी ए, ओह भलई करते रहय; अऊ जऊन ह पबितर ए, ओह पबितर बने रहय।”
REV 22:12 यीसू ह कहिस, “देखव! मेंह जल्दी आवत हंव। मेंह अपन ईनाम ला अपन संग लेके आहूं अऊ हर एक मनखे ला ओकर काम के मुताबिक ईनाम दूहूं।
REV 22:13 मेंह अलफा अऊ ओमेगा, पहिली अऊ आखिरी, आदि अऊ अन्त अंव।
REV 22:14 “धइन अंय ओमन, जऊन मन अपन ओनहा ला धोथें ताकि ओमन ला जिनगी के रूख म ले फर खाय के अधिकार अऊ कपाट म ले होके सहर के भीतर जाय के अधिकार मिलय।
REV 22:15 पर कुकुर, जादू-टोना करइया, छिनारी करइया, हतियारा, मूरती-पूजा करइया अऊ हर ओ मनखे, जऊन ला लबरा बात अऊ लबरा काम करई बने लगथे, ये जम्मो के जम्मो सहर ले बाहिर रहिहीं।
REV 22:16 “में यीसू ह, अपन स्वरगदूत ला तुम्हर करा पठोय हवंव कि ओह कलीसियामन ला ये बात बतावय। मेंह दाऊद राजा के मूल अऊ बंसज अंव, अऊ मेंह बिहनियां के चमकत तारा अंव।”
REV 22:17 पबितर आतमा अऊ दुलहिन कहिथें, “आवव!” अऊ जऊन ह सुनथे, ओह कहय, “आवव!” जऊन ह पीयासा हवय, ओह आवय; अऊ जऊन ह चाहथे, ओह जिनगी के पानी ला बिगर कोनो दाम के ले लेवय।
REV 22:18 में यूहन्ना ओ जम्मो मनखे ला चेतावत हंव, जऊन मन ये किताब के अगम के बात ला सुनथें: कहूं कोनो येमा कुछू जोड़ही, त परमेसर ह ये किताब म लिखाय महामारीमन ला ओकर ऊपर लानही।
REV 22:19 अऊ कहूं कोनो अगमबानी के ये किताब म ले कुछू बात ला निकालही, त परमेसर ह ये किताब म लिखाय जिनगी के रूख अऊ पबितर सहर म ले ओकर बांटा ला निकाल दीही।
REV 22:20 जऊन ह ये बातमन के गवाही देथे, ओह कहिथे, “हव, मेंह जल्दी आवत हंव।” आमीन! हे परभू यीसू, आ।
REV 22:21 परभू यीसू के अनुग्रह परमेसर के मनखेमन ऊपर होवय। आमीन।
