﻿भजन-संहिता.
126.
आरोहन के एक गीत। जब यहोवा ह सियोन के भाग्य ला फेर पलटिस, त हमन सपना देखइयामन सहीं हो गे रहेंन। 
तब खुसी के मारे हमन बहुंत हंसेंन, हमर मुहूं ले आनंद के गीत निकलत रिहिस। तब जाति-जाति के मनखेमन के बीच ये कहे गीस, “यहोवा ह ओमन बर बड़े-बड़े काम करे हवय।” 
यहोवा ह हमर बर बड़े-बड़े काम करे हवय, अऊ येकर कारन हमन बहुंत आनंदित हन। 
हे यहोवा, नेगेव म पानी के सोता सहीं, हमर भाग्य ला फेर पलट दे। 
जऊन मन आंसू बहात बोथें, ओमन आनंद के गीत गावत फसल ला लूहीं। 
जऊन मन बीजा ला बोए बर रोवत बाहिर निकलथें, ओमन फसल के बीड़ा लेके आनंद के गीत गावत लहुंटहीं। 
