﻿भजन-संहिता.
54.
संगीत के निरदेसक बर। तारवाले बाजामन के संग। दाऊद के एक मसकील। जब जीपीमन साऊल करा जाके कहिन, “का दाऊद ह हमर बीच म नइं छिपे हे?” हे परमेसर, अपन नांव के दुवारा मोर उद्धार कर; अपन सक्ति के दुवारा मोला सही साबित कर। 
हे परमेसर, मोर पराथना ला सुन; मोर मुहूं के बात ऊपर धियान दे। 
घमंडी बईरीमन मोर ऊपर हमला करत हवंय; निरदयी मनखेमन मोला मार डारे के कोसिस करत हवंय— ओ मनखे, जेमन के मन म परमेसर बर कोनो आदर नइं ए। 
खचित परमेसर ह मोर मददगार ए; परभू ही मोला संभालथे। 
ओमन के निन्दा होवय, जऊन मन मोर निन्दा करथें; हे परमेसर, अपन बिसवासयोग्यता म ओमन ला नास कर दे। 
मेंह तोला एक स्वेच्छा-बलिदान चघाहूं; हे यहोवा, मेंह तोर नांव के परसंसा करहूं, काबरकि येह बने ए। 
तेंह मोला मोर जम्मो समस्या ले छुटकारा दे हस, अऊ मोर आंखी ह मोर बईरीमन ऊपर बिजय ला देखे हवय। 
