﻿भजन-संहिता.
11.
संगीत के निरदेसक बर दाऊद के एक भजन। मेंह यहोवा करा सरन लेथंव। तब तेंह मोला कइसे कह सकत हस: “चिरई के सहीं अपन पहाड़ करा उड़ जा। 
काबरकि देख, दुस्ट मनखेमन अपन धनुस ला साधत हें; ओमन तीर ला धनुस के डोरी म रखत हें ताकि अंधियार म ले सीधवा मनखे ऊपर तीर चलावंय। 
जब नीव ला गिराय जावत हे, त फेर धरमी ह का कर सकथे?” 
यहोवा ह अपन पबितर मंदिर म हवय; यहोवा ह अपन स्वरग के सिंघासन म बिराजे हवय। ओह धरती ऊपर हर एक जन ला देखत रहिथे; ओकर आंखी ह ओमन ला परखथे। 
यहोवा ह धरमी ला परखथे, पर ओह ओ दुस्टमन ले बहुंत घिन करथे, जेमन हिंसा ले मया करथें। 
दुस्ट मनखेमन ऊपर परमेसर ह बरत कोइला अऊ बरत गंधक बरसाही; लेसा देवइया हवा ह ओमन के भाग होही। 
काबरकि यहोवा ह धरमी अय, ओह नियाय ले मया करथे; धरमी मनखे ह ओकर दरसन करही। 
