﻿गनती.
26.
महामारी के बाद यहोवा ह मूसा अऊ हारून पुरोहित के बेटा एलिआजर ला कहिस, 
“जम्मो इसरायली समाज के गनती परिवार के मुताबिक करव—जेमन बीस साल या जादा उमर के हवंय अऊ इसरायल के सेना म सेवा दे सकत हें।” 
तब मूसा अऊ एलिआजर पुरोहित, यरीहो के ओ पार यरदन नदी के तीर, मोआब के मैदान म इसरायलीमन ले बात करिन अऊ कहिन, 
“बीस साल या ओकर ले जादा उमर के मनखेमन के गनती करव, जइसने यहोवा ह मूसा ला हुकूम दे हवय।” 
इसरायल के पहिलांत बेटा रूबेन के संतान: हनोक के जरिये हनोकी गोत्र; पल्लू के जरिये पल्लूयी गोत्र; 
हेसरोन के जरिये हेसरोनी गोत्र; करमी के जरिये करमी गोत्र। 
येमन रूबेनी गोत्र के रिहिन; जेमन के गनती, 43,730 रिहिस। 
पल्लू के बेटा एलीआब रिहिस, 
अऊ एलीआब के बेटामन नमूएल, दातान अऊ अबीराम रिहिन। इही दातान अऊ अबीराम समाज के करमचारी रिहिन अऊ येमन मूसा अऊ हारून के बिरूध बिदरोह करिन अऊ येमन कोरह के ओ अनुयायीमन के संग रिहिन, जब ओमन यहोवा के बिरूध बिदरोह करिन। 
धरती ह अपन मुहूं फारिस अऊ ओमन ला कोरह के संग लील लीस; ओकर पाछू चलइयामन मर गीन, जब आगी ह 250 मनखे ला भसम कर दीस। अऊ ओमन चेतउनी के एक चिनहां होईन। 
तभो ले कोरह के बंस ह खतम नइं होईस। 
सिमोन के संतान ओमन के गोत्र के मुताबिक: नमूएल के जरिये नमूएली गोत्र; यामीन के जरिये यामीनी गोत्र; याकीन के जरिये याकीनी गोत्र; 
जेरह के जरिये जेरही गोत्र; साऊल के जरिये साऊली गोत्र। 
येमन सिमोन गोत्र के रिहिन; जेमन के गनती, 22,200 रिहिस। 
गाद के संतान ओमन के गोत्र के मुताबिक: सपोन के जरिये सपोनी गोत्र; हाग्गी के जरिये हाग्गी गोत्र; सूनी के जरिये सूनी गोत्र; 
ओजनी के जरिये ओजनी गोत्र; एरी के जरिये एरी गोत्र; 
अरोद के जरिये अरोदी गोत्र; अरेली के जरिये अरेली गोत्र। 
येमन गाद गोत्र के रिहिन; जेमन के गनती 40,500 रिहिस। 
यहूदा के बेटा एर अऊ ओनान रिहिन, पर ओमन कनान देस म मर गीन। 
यहूदा के संतान ओमन के गोत्र के मुताबिक: सेलह के जरिये सेलानी गोत्र; पेरेस के जरिये पेरेसी गोत्र; जेरह के जरिये जेरही गोत्र। 
पेरेस के संतान येमन रिहिन: हेसरोन के जरिये हेसरोनी गोत्र; हामूल के जरिये हामूली गोत्र। 
येमन यहूदा गोत्र के रिहिन; जेमन के गनती 76,500 रिहिस। 
इस्साकार के संतान ओमन के गोत्र के मुताबिक: तोला के जरिये तोलायी गोत्र; पुआ के जरिये पुवी गोत्र; 
यासूब के जरिये यासूबी गोत्र; सिमरोन के जरिये सिमरोनी गोत्र। 
येमन इस्साकार गोत्र के रिहिन; जेमन के गनती 64,300 रिहिस। 
जबूलून के संतान ओमन के गोत्र के मुताबिक: सेरेद के जरिये सेरेदी गोत्र; एलोन के जरिये एलोनी गोत्र; यहलेल के जरिये यहलेली गोत्र। 
येमन जबूलूनी गोत्र के रिहिन; जेमन के गनती, 60,500 रिहिस। 
यूसुफ के संतान, जेमन गोत्र के मुताबिक मनस्से अऊ एपरैम के जरिये होईन: 
मनस्से के संतान: माकीर के जरिये माकीरी गोत्र (माकीर ह गिलाद के ददा रिहिस); गिलाद के जरिये गिलादी गोत्र। 
गिलाद के संतान येमन रिहिन: ईएजेर के जरिये ईएजेरी गोत्र; हेलेक के जरिये हेलेकी गोत्र; 
असरीएल के जरिये असरीएली गोत्र; सकेम के जरिये सकेमी गोत्र; 
समीदा के जरिये समीदायी गोत्र; हेपेर के जरिये हेपेरी गोत्र। 
(हेपेर के बेटा सलोफाद के कोनो बेटा नइं रिहिन; ओकर सिरिप बेटीमन रिहिन, जेमन के नांव महला, नोआ, होगला, मिलका अऊ तिरसा रिहिस।) 
येमन मनस्से के गोत्र रिहिन; जेमन के गनती 52,700 रिहिस। 
एपरैम के संतान ओमन के गोत्र के मुताबिक येमन रिहिन: सूतेलह के जरिये सूतेलही गोत्र; बेकेर के जरिये बेकेरी गोत्र; तहान के जरिये तहानी गोत्र। 
सूतेलह के संतान येमन रिहिन: एरान के जरिये एरानी गोत्र। 
येमन एपरैम के संतान रिहिन; जेमन के गनती, 32,500 रिहिस। 
बिनयामीन के संतान ओमन के गोत्र के मुताबिक: बेला के जरिये बेलायी गोत्र; असबेल के जरिये असबेली गोत्र; अहीराम के जरिये अहीरामी गोत्र; 
सूपाम के जरिये सूपामी गोत्र; हूपाम के जरिये हूपामी गोत्र। 
बेला के संतान अर्द अऊ नामान के जरिये: अर्द के जरिये अर्दी गोत्र; नामान के जरिये नामानी गोत्र। 
येमन बिनयामीन के गोत्र रिहिन; जेमन के संखिया 45,600 रिहिस। 
दान के संतान ओमन के गोत्र के मुताबिक येमन रिहिन: सूहाम के जरिये सूहामी गोत्र। 
येमा के जम्मो झन सूहामी गोत्र के रिहिन; जेमन के संखिया 64,400 रिहिस। 
आसेर के संतान ओमन के गोत्र के मुताबिक: यिमना के जरिये यिमनी गोत्र; इसवी के जरिये इसवी गोत्र; बरीया के जरिये बरीयी गोत्र; 
अऊ बरीया के संतान के जरिये: हेबेर के जरिये हेबेरी गोत्र; मलकीएल के जरिये मलकीएली गोत्र। 
आसेर के सेरह नांव के एक बेटी रिहिस। 
येमन आसेर के गोत्र रिहिन; जेमन के गनती 53,400 रिहिस। 
नपताली के संतान ओमन के गोत्र के मुताबिक: यहसेल के जरिये यहसेली गोत्र; गूनी के जरिये गूनी गोत्र; 
येसेर के जरिये येसेरी गोत्र; सिल्लेम के जरिये सिल्लेमी गोत्र। 
येमन नपताली गोत्र के रिहिन; जेमन के गनती 45,400 रिहिस। 
इसरायल के पुरूसमन के कुल संखिया 6,01,730 रिहिस। 
यहोवा ह मूसा ला कहिस, 
“नांव के गनती के आधार म ओमन के बीच म भुइयां ला ओमन के उत्तराधिकार के रूप म बांटना हे। 
बड़े दल ला बड़े भाग दे, अऊ छोटे दल ला छोटे भाग; सूची म ओमन के गनती के मुताबिक हर एक ला ओकर उत्तराधिकार मिलय। 
येकर धियान रखबे कि भुइयां ला चिट्ठी के जरिये बांटे जावय। हर एक दल ला जऊन भाग मिलथे, ओह ओकर पुरखा के गोत्र के नांव के मुताबिक होवय। 
हर उत्तराधिकार ला चिट्ठी के दुवारा बड़े अऊ छोटे दलमन के बीच बांटे जावय।” 
ये लेवीमन रिहिन, जेमन के गनती ओमन के गोत्र के मुताबिक होईस: गेरसोन के जरिये गेरसोनी गोत्र; कहात के जरिये कहाती गोत्र; मरारी के जरिये मरारी गोत्र। 
लेवी गोत्र के येमन घलो रिहिन: लिबनी गोत्र, हेबरोनी गोत्र, महली गोत्र, मूसी गोत्र, कोरही गोत्र। (कहात ह अमराम के पुरखा रिहिस; 
अमराम के घरवाली के नांव योकेबेद रिहिस, जऊन ह लेवी के एक संतान रिहिस, अऊ मिसर म लेवी बंस म जनमे रिहिस। अमराम कोति ले ओह हारून, मूसा अऊ ओमन के बहिनी मिरियम ला जनम दीस। 
हारून ह नादाब, अबीहू, एलिआजर अऊ ईतामार के ददा रिहिस। 
पर नादाब अऊ अबीहू मर गीन, जब ओमन यहोवा के आघू म बिगर अधिकार वाले आगी ले एक बलिदान चघाईन।) 
जम्मो लेवी पुरूस, जेमन एक महिना अऊ जादा उमर के रिहिन, गनती म 23,000 रिहिन। येमन ला आने इसरायलीमन संग नइं गने गीस, काबरकि येमन ला ओमन के बीच उत्तराधिकार नइं मिले रिहिस। 
मूसा अऊ एलिआजर पुरोहित के दुवारा येमन ला गने गीस, जब ओमन यरीहो के ओ पार यरदन नदी के तीर मोआब के मैदान म इसरायलीमन के गनती करिन। 
जऊन इसरायलीमन ला मूसा अऊ हारून पुरोहित, सीनय के सुन्ना जगह म गने रिहिन, ओमा के एको झन घलो अभी गने गय मनखेमन के बीच नइं रिहिन। 
काबरकि यहोवा ह ओ इसरायलीमन ला कहे रिहिस कि ओमन खचित सुन्ना जगह म मर जाहीं, अऊ सिरिप यपुन्ने के बेटा कालेब अऊ नून के बेटा यहोसू ला छोंड़ ओमा के एको झन घलो नइं बांचिन। 
