﻿ESTHER (GREEK).
10.
Manghai tah a ram kah diklai, tuitunli kah mangmu dongah kho a sak. 
A thadueng neh a thinomnah bangla, a khuehtawn neh ramkah thangpomnah bangla Mede Persia manghai rhoek kah khokhuen cabu dongah a khoem. 
Mordekai tah manghai Artaxerxes yuengla saithainah a khueh tih a ram khaw rhoeng. Judah rhoek long khaw a hinyah uh. A khosak long bangla anih te namtom boeih loh a lungnah. 
Te vaengah Mordekai loh, “He olka he Pathen taeng lamkah ha thoeng coeng. 
He olka neh tukkai tih mang ka man te khaw ka poek coeng. Te a soep mueh la aka hloo he om pawh. 
Tuisih ca khaw tuiva la poeh coeng, vangnah khomik neh tui a yet khaw om coeng. Esther tah tuiva la om. Anih te manghai loh a yunah tih manghainu la a khueh. 
Tuihnam rhoi tah Haman neh kamah coeng ni. 
Namtom rhoek tah Judah ming aka phae hamla tingtun uh. 
Tedae ka namtu Israel tah, Pathen a khue dongah daem uh. Boeipa loh a pilnam te a khang. Boeipa loh mamih he boethae cungkuem khui lamkah n'hlawt coeng. Pathen loh khobae rhambae neh miknoek a len la a saii dongah ni. 
He poeknah dongah hmulung panit a khueh. Pakhat tah Pathen kah pilnam ham neh, pakhat tah namtom boeih hamla a khueh. 
He hmolung panit he tah Pathen hmai neh namtom boeih laklikah oltloeknah khohnin, a tuek, khonoek vaengah thoeng coeng. 
Pathen loh a pilnam a poek dongah a rho te ah a tang sak. 
Te dongah Adar hla hin hlai li neh hlai nga tah boeih yaeh uh saeh. Tekah hla tah Pathen mikhmuh ah omngaih kohoe la tingtun uh saeh. A pilnam Israel laklikah cadilcahma lamloh cadilcahma due khaw. 
