GEN 1:1 Tsutɨapai Kakaɨyari muyuawi meta kwie kaniutawewieni.
GEN 1:2 Kwie puyuxamuriekai meta pakumawekai, hapa 'ameukateewa yɨriya penukanakai. Kakaɨyari 'iyarieya haa heima pɨyeyeikakai.
GEN 1:3 Hikɨ Kakaɨyari mɨpaɨ kaniutayɨni: «Hekɨariya ke'uneni». 'Ana hekɨariya kaniuneni.
GEN 1:4 Kakaɨyari hekɨariya 'aixɨa katiniuxeiya, 'ana yɨriyatsata kanipata.
GEN 1:5 Hekɨariya «tukari» katiniuterɨwa, yɨriyata «tɨkari». Hikɨ kaniukɨyɨre, ximerita kanayani, mexɨakame tukari kanayani.
GEN 1:6 Kakaɨyari mɨpaɨ kaniutayɨni: «'Amakuyewa ke'uneni haa hixɨapa ke'ipata haa taheima mieme meta kwiepa mieme».
GEN 1:7 Mɨpaɨ katiniuyɨni. Kakaɨyari 'amakuyewa kaniutawewieni, mipataxɨanikɨ haa, tahetɨa mɨtamakakɨ, taheimata muyemakakɨ.
GEN 1:8 'Amakuyewa, Kakaɨyari «muyuawi» katiniuterɨwa. Hikɨ kaniukuyɨre, ximerita kanayani, Hutarieka tukari kanayani.
GEN 1:9 Hikɨ Kakaɨyari mɨpaɨ kaniutayɨni: «Haa muyuawitɨa mɨtama ke'uyukuxeɨrieni 'axeikɨa, 'uwakitɨ ke'ayani». Kemutayɨ mɨpaɨ pɨtiɨyɨ.
GEN 1:10 Muwaki «kwie» Kakaɨyari katiniterɨwa, haa muyukuxeɨri «haramara» katiniterɨwa. 'Ixeiyatɨ Kakaɨyari «'Aixɨa pɨ'ane», kaniutayɨni.
GEN 1:11 Hikɨta Kakaɨyari mɨpaɨ kaniutayɨni: «Ketiutineni kwiepa, ke'utineni tupiriyate yuhatsiyarite hexeiyatɨ, 'iteɨrite yutakari kehexeiyatɨkani meta yuhatsiyarite. Naitɨ xexuitɨ kemɨtiupitɨarie». Mɨpaɨ katiniuyɨni.
GEN 1:12 'Ana katiniutineni naitɨ, tupiriyate yuhatsiyari hexeiyatɨ, kɨyexi yu'ikwaxi yuhatsiyari hexeiyatɨ kanayani, naitɨ kemɨtiupitɨarie. Kakaɨyari mɨkɨ 'aixɨa katiniuxeiya.
GEN 1:13 Hikɨ kaniukuyɨre, ximerita kanayani, hairieka tukari kanayani.
GEN 1:14 Kakaɨyari mɨpaɨta kaniutayɨni: «Meke'utixuawere muyuawitsie hekɨariwiwamete, meke'ipata tukari tɨkari, mɨkɨ 'inɨari meke'akɨne taxarita, witarita, 'ahurakaku, xexerixa, tukari meta wiyari, 'inɨariyari meke'akɨne.
GEN 1:15 Muyuawitsie meke'utimerɨkani, kwiepata memɨhekɨariwiekakɨ». Mɨpaɨ katiniuyɨni.
GEN 1:16 Kakaɨyari hutame mamariwaweme hekɨariwiwamete kaniutiwewieni, xeime 'anekame tau tukarikɨ mieme, xeimeta yakɨ tixawatɨme metseri tɨkarikɨ mieme, meta xurawetsixi tɨkarikɨ miemete.
GEN 1:17 Kakaɨyari hekɨariwiwamete muyuawitsie katiniwarukayatsa memɨhekɨariwiekakɨ kwiepa.
GEN 1:18 Pɨwarutiwewi mɨme matsi waɨkawa memɨmamariwawenikɨ tukarikɨ tɨkarikɨ, hekɨariya memɨpatanikɨ. Hikɨ Kakaɨyari «'Aixɨa pɨ'ane», kaniutayɨni.
GEN 1:19 Hikɨ kaniukɨyɨre, ximerita kanayani. Naurieka tukari kanayani.
GEN 1:20 Mɨpaɨ kaniutayɨni Kakaɨyari: «Yumɨiretɨ haapa meketeye'uwani, meketeheɨwɨtɨkani wikixi kwie heima muyuawi kemɨyewa».
GEN 1:21 Hikɨ Kakaɨyari katiniwarutiwewieni yunaime metemamariwaweme haramaratsie miemete, meta yunaime memɨte'ayeneniere 'etsimepepetɨ memɨkuyuatɨka memɨyuxiɨtɨa haata paitɨ, meta yunaime memɨte'awɨwawe, yuxexuime kemɨtiwarupitɨa. Hikɨ Kakaɨyari 'aixɨa katiniwaruxeiya.
GEN 1:22 'Aixɨa kaniwaruyurieni mɨpaɨ 'utaitɨ: «Xekeneyuxiɨtɨaka xekeneyumɨiriyani, xekenehɨneni haapa haramaratsie. Wikixi meta xekeneyɨmɨiriyani kwiepa».
GEN 1:23 Hikɨ kaniukuyɨre, ximerita kanayani, 'auxɨwirieka tukari kanayani.
GEN 1:24 Kakaɨyari mɨpaɨ kaniutayɨni: «Xekeneyɨmɨiriyani kwiepa yunaitɨ xemayeyuyurini, yunaitɨ memɨteyutewatsinɨa, yeutari meta, yuhukama memuku'uwa kwiepa, yunaime kememɨteheupaɨme». Mɨpaɨ pɨtiuyɨ.
GEN 1:25 Kakaɨyari yunaime katiniwarunetɨani memɨteyutewatsinɨa, yeutari, yunaime yuhukama memɨteku'uwa, yunaime kemɨtiwarupitɨa. Kakaɨyari mɨpaɨ kaniutayɨni: «'Aixɨa pɨ'ane».
GEN 1:26 Mɨpaɨta kaniutayɨni: «Tewi tepɨtawewieni tahepaɨ tiyuxexeiyame tahepaɨ tiyɨkɨhɨaweme. Pɨtiwata'aitɨani ketsɨte haramaratsie miemete, wikixi meta muyuawitsie miemete, yunaime memɨteyutewatsinɨa, yeutari, yunaime memɨka'ukɨniwawe yuhukama memuku'uwa kwiepa».
GEN 1:27 Kakaɨyari tewi kaniutawewieni yuhepaɨ 'anekame, pitawewi 'inɨarieya mayanikɨ yuhepaɨ 'anekame. 'Uki meta 'uka pɨwarutiwewi.
GEN 1:28 'Aixɨa kaniwaruyurieni mɨpaɨ 'utaitɨ: «Xekeneyuxiɨtɨaka xekeneyɨmɨiriyani, kwiepa xekenehɨneni xeketene'aitani. Xepɨhɨritɨarieni ketsɨte haramaratsie miemete, wikixi yunaime muyuawitsie miemete, yunaime memɨka'ukɨniwawe yuhukama memuku'uwa kwiepa».
GEN 1:29 Mɨpaɨta katiniwarutahɨawe: «Ne nepɨxeyetuiri kwiepa mieme 'iteɨrite, naime 'iteɨrite yuhatsiyari hexeiyakame, naime 'iteɨrite yutakari yuhatsiyari hexeiyakame. Mɨkɨ naitɨ xe'ikwai pɨrayani.
GEN 1:30 Tupiriya nepɨxeyetuirieni, xe'ikwai mayanikɨ, yunaitɨ yeutari kwiepa memɨtexuawe, yunaitɨ wikixi muyuawitsie miemete yunaitɨ memeumaketɨka kwiepa». Kemutayɨ mɨpaɨ pɨtiuyɨ.
GEN 1:31 Kakaɨyari naime katiniuxeiya tita mɨtiutiwewi. «'Aixɨa pɨ'ane», kaniutayɨni. Hikɨ kaniukuyɨre, ximerita kanayani, 'ataxewirieka tukari kanayani.
GEN 2:1 Mɨpaɨ katiniutinɨrieni muyuawi, kwie meta naitɨ tita hetsiena mɨtixuawe.
GEN 2:2 'Atahutarieka tukaritsie, Kakaɨyari kaniuka'uxipieni, naime mɨtiutinɨkɨ yu'uximayatsika kemɨtiuyɨhɨawixɨ.
GEN 2:3 Kakaɨyari 'aixɨa kaniyurieni 'atahutarieka tukari hetsiena mieme mɨpatsiekakɨ, 'ana muka'uxipikɨ, naime yu'uximayatsika tiutinɨka muyuawi meta kwie kemɨtiutawewi.
GEN 2:4 Kepauka mɨtiutiwewiya muyuawi meta kwie, 'ikɨ pɨ'ɨxatsiyari. Kepauka Yawé Kakaɨyari muyuawi meta kwie mutiwewi,
GEN 2:5 'ana 'akuxi 'iteɨrite pɨtiumawekai pɨkatitinewekai tupiriyate. 'Ana 'akuxi wiyeri Yawé Kakaɨyari pɨkakuyuitɨwakai, 'ana 'akuxi 'apɨka'uyeikakai tewi mɨtita'uximayatakɨ.
GEN 2:6 Matsi kwiepa kaniti'ekekaitɨni 'aɨxi. Mɨkɨ naime kwie puyuniyakai.
GEN 2:7 Hikɨ Yawé Kakaɨyari tewi kaniutawewieni kwiekɨ. Tsurieyatsie 'ihɨtsieka tukari kanipitɨani mayenierenikɨ muta'iwenikɨ. 'Ana 'ayeyuritɨ tewi kanayani.
GEN 2:8 Yawé Kakaɨyari haraweri kaniutawewieni 'Ereni mɨrakutewatsie, tau manatineika hepatsie. Tewi mutawewi muwa katiniuhɨritɨani.
GEN 2:9 Yawé Kakaɨyari kanitinetɨani mɨtiwerekɨ naime xexuime 'iteɨrite witsitiuxuxuawereme 'aixɨa 'aneneme kwaiyari. Haraweri hixɨapa 'iteɨri tukari tiyupitɨwame kaniutinetɨani, xeimeta 'iteɨri putinetɨa mɨtimaikakɨ tita 'aixɨa mɨti'ane tita 'axamɨti'ane.
GEN 2:10 'Ereni payeneikakai hatuxame mariwetɨ pɨ'ipakai harawerita, manata nauka 'akiyarite puhapanekai pɨtihatuiyakai harawerita.
GEN 2:11 Mexɨakame pɨtitewakai Pitsuni, naitsarie puyehanekai Kawira mɨrakutewatsie hakewa huru maxuawekaitsie.
GEN 2:12 Huru 'aixɨa pɨ'ane 'iya kwieyaritsie mieme. Puxuaweta xetsina witsi'anetɨ, puxuaweta 'unitse teteyari mutuxa.
GEN 2:13 Hutarieka mieme haa pɨtitewakai Kikuni mɨkɨ Kutsi kwieyaritsie 'aurie kananakuneka naitsarie.
GEN 2:14 Hairieka mieme haa, Tikɨritsi pɨtitewakai mɨkɨ 'Atsiriya tserieta puyehane. Naurieka mieme 'Eupɨrate hatuxameyari pɨhɨkɨ.
GEN 2:15 Merikɨtsɨ Yawé Kakaɨyari tewi kaniuhɨritɨani haraweri 'Ereni mɨti'uximayakakɨ, mɨti'ɨwiyanikɨ.
GEN 2:16 Yawé Kakaɨyari kanihɨritɨani mɨpaɨ rehɨawetɨ: «Ketinekwaka naime 'ikwaxi harawerita mieme.
GEN 2:17 Peru mɨkɨ 'iteɨri xeikɨa, tewi xɨka 'itikwani 'ikwaxiyari mɨkɨ tewi pɨretimani tita 'aixɨa mɨti'ane tita 'axamɨti'ane, mɨkɨ 'iteɨri 'ikwaxiyari pepɨkakwaka. Mexɨka pe'itikwani, 'ana pepɨmɨni».
GEN 2:18 Hikɨta Yawé Kakaɨyari mɨpaɨ kaniutayɨni: «'Aixɨa pɨka'ane, 'uki yuxaɨta muyeikanikɨ. Peiyehɨwa yuteɨtame. Nepitawewirieni 'iparewiwame hetsiena mieme».
GEN 2:19 Yawé Kakaɨyari katiniwarunetɨani 'ena kwiepa yunaime memɨte'awɨwawe meta yunaime yeutari, hikɨ Kakaɨyari 'uki hetsɨa kaniwa'atɨani muwatiterɨwakɨ yuxexuime. 'Uki kaniwarutiterɨwa yunaime kememɨteheupaɨme, hikɨ mɨpaɨ mepɨtematiwa.
GEN 2:20 Mɨpaɨ 'ana tewi kaniwarutiterɨwa yunaime keyupaɨmetɨ memɨtexɨawe memɨteyutewatsinɨa, yunaime memɨte'awɨwawe, yunaime yeutari. Matsi mɨkɨ nixewitɨ tewi parewiwameya yemekɨ pɨka'atɨa.
GEN 2:21 Hikɨ Yawé Kakaɨyari 'uki heukutɨaka, waɨkawa kutsukaku kaniwakuhana 'akieya, hutariekata waiyarieya kaneunani.
GEN 2:22 Mɨkɨ 'uki 'akieyakɨ, Yawé Kakaɨyari 'uka kaniutawewieni, hikɨ 'uki kani'atɨirieni.
GEN 2:23 'Arani 'uka xeiyatɨ mɨpaɨ kaniutayɨni: «'Ikɨ hɨrixɨa waiyarieya newaiyaritsie pumieme, 'umeyarieyata ne'umeyaritsie pumieme. “'Uka” katinitewakamɨkɨ 'uki waiyarieyakɨ mutawewiyakɨ».
GEN 2:24 Mɨpaɨ mɨtiuyɨkɨ, 'ayumieme 'uki kaniyupatamɨkɨ yupaapa yumaama wahetsɨa kaniyeyeimɨkɨ, yɨ'ɨya hamatɨa mekaniyutaxewirikuni meyunaki'erietɨ, xeiwaiyari mekanakɨnikuni.
GEN 2:25 Hikɨ 'uki meta 'uka mepumamawekai mepɨkayutetewiyakai.
GEN 3:1 Kuu, kwinimieme katinimaiwekaitɨni keyuri hipatɨ yeutari Yawé Kakaɨyari muwarutawewiekai, hikɨ 'uka mɨpaɨ pɨtiuta'iwawiyaxɨ: ―¿Kakaɨyari mɨpaɨ pɨkahainekai xɨari kename xeka'ikwaka naime 'ikwaxi harawerita mieme?
GEN 3:2 'Uka mɨpaɨ katinita'eiya: —Tepɨyɨwawe naime 'ikwaxi temɨtikwanikɨ.
GEN 3:3 Mɨkɨ xeikɨa 'iteɨri 'ikwaxiyari haraweri hixɨapa muwe, tepɨkayɨwawe temitikwanikɨ Kakaɨyari pɨtarahɨawekai kename teka'ikwakakekai 'ikwaxi mɨkɨ 'iteɨritsiemieme, xɨka te'itikwani tepɨkwini.
GEN 3:4 Kuu 'uka mɨpaɨ kaniutahɨawe: —Tixaɨ xepɨkakwini.
GEN 3:5 Kakaɨyari katinimaika kepauka xemitikwani mɨkɨ 'ikwaxi, kwinimieme xetemaiwawetɨ xepakɨne, xepɨtemaika tita 'aixɨa mɨti'ane, tita 'axamɨti'ane, Kakaɨyari hepaɨ xepɨ'aneneni.
GEN 3:6 Hikɨ 'uka mɨkɨ 'ikwaxi witsi'anekame kaniuxeiya kanitihiwe'erieni mitakwanikɨ, timaiwetɨ mayanikɨ. Hikɨ kaneka'inɨni kanitakwani. Kwitɨta yɨkɨna kaniumini mɨkɨta kanitakwani.
GEN 3:7 'Ana kwitɨ mekananutaneniere yuhutatɨ 'arike mɨpaɨ mepɨtehetima mepɨmamawekai, hikɨ piní xawarikɨ petsera mekaniyutiwewirieni memuyutetewiyakaikɨ.
GEN 3:8 'Uki yɨ'ɨya hamatɨa mekani'enieni Yawé Kakaɨyari harawerita 'uyeikame taikai 'ekatsie, hikɨ mekaniyuti'awieta memɨmamawekaikɨ 'iteɨritsata harawerita.
GEN 3:9 Peru Yawé Kakaɨyari 'uki kaniutahɨawe mɨpaɨ 'utaitɨ: —¿Hakewa pepeyeika?
GEN 3:10 'Uki mɨpaɨ kaniutayɨni: —Nepɨmatsi'u'eni 'uwa pe'uyeikame nepɨmatsi'utimaka nemɨmawekaikɨ, 'ayumieme nepɨyuti'awietaxɨ.
GEN 3:11 Hikɨ Kakaɨyari mɨpaɨ kaniutayɨni: —¿Kemɨ'ane mɨpaɨ matiutahɨawixɨ kename pemawekai? Mɨkɨ 'ikwaxi nemɨxemaiwe'erikatsitɨakai xekate'utikwai.
GEN 3:12 'Uki mɨpaɨ kaniutayɨni: —Mɨkɨ 'uka pemɨnetsi'uwitɨtɨa, pɨnetsi'umi nepitakwai.
GEN 3:13 Hikɨ Yawé Kakaɨyari 'uka mɨpaɨ katiniuta'iwawiya: —'Uka 'aku kepetiuyuri. 'Uka mɨpaɨ kaniutayɨni: —Kuu pɨnetiu'irɨwiyaxɨ 'ayumieme 'ikwaxi neputakwai.
GEN 3:14 Yawé Kakaɨyari 'ayumieme kuu mɨpaɨ katiniutahɨawe: «Kuu 'aku 'axapepɨtiuyuri, Yeuta kiekatari watsata pe'uyeikatɨ, 'axapekani'itɨariekamɨkɨ. 'Ayumieme 'ahukama pepukuyeikani, tumuanari pekwatɨ yuheyemekɨ.
GEN 3:15 'Ekɨ kuu 'ukamatɨa xepayuye'unieka, meta 'aniwema 'uka niwemama wahamatɨa, 'uka nu'aya xewitɨ pumatikwinitɨani 'amu'utsie, 'ekɨta pepɨtikwinitɨani keputsayatsie».
GEN 3:16 Meta 'uka mɨpaɨ katiniutahɨawe: «Kukuiniya nepɨtimɨiriya kepauka pemɨtiniweyanitsie, matsi 'akɨna pepinaki'erieka, mɨkɨ mati'aitɨwame payani».
GEN 3:17 'Uki meta mɨpaɨ katiniutahɨawe: «'Uki 'aku 'Arani, 'ekɨtsɨ pepenu'eni 'a'ɨya, pepitakwai 'ikwaxi, mɨkɨ kɨyetsie mieme tsepa mɨpaɨ nematiutahɨawixɨ pemɨka'ikwakakɨ. 'Ayumieme kwie 'axakani'itɨariekamɨkɨ mɨpaɨ pemɨtiuyurikɨ, haweri mieme peti'uximayatɨ xeikɨa pepɨtikwaka kwiepa mieme, mexi 'ape'uyeikani.
GEN 3:18 Kwie kanitinetɨamɨkɨ xuya 'ahetsiemieme, yeuta mɨtiutixuxuawereni 'a'ikwai payeikani.
GEN 3:19 Tukarikɨ peti'uximayatɨ pekwaxiyatɨ 'a'ikwaite pekatinexeiyakamɨkɨ, mexi kwiepa pekanuaweni, hakewa pemetawewiya. Tumuanari pekanihɨkɨtɨni, hutarieka pekaninuamɨkɨ tumuanari pemayanikɨ».
GEN 3:20 'Uki yu'ɨya 'Ewa pɨtiuterɨwaxɨ, mɨkɨ yunaime nuiwarite wamaama mayanikekaikɨ.
GEN 3:21 Yawé Kakaɨyari puwarutiwewiri nawi kamixayari 'Arani meta 'ɨyaya, mɨkɨkɨ puwarutikemaritɨa.
GEN 3:22 Hikɨ Yawé mɨpaɨ kaniutayɨni: «Hikɨri 'uki meta 'uka tahepaɨ mekani'aneneni, metemaitɨ tita 'aixɨa mɨti'ane tita 'axamɨti'ane, xɨka me'itikwani 'ikwaxi tukari mɨtiyupitɨwa, mepɨyɨwaweni yuheyemekɨ me'ayeyuyuritɨ memuyuhayewanikɨ».
GEN 3:23 'Ayumieme Yawé Kakaɨyari kaniwaranuyeweiya teɨteri 'Ereni haraweriyarita, kaniwarupitɨani memɨte'uximayakakɨ kwiepa, 'Arani kwiekɨ mutawewiyakɨ.
GEN 3:24 Waranuyeweiyaka, haraweri 'Ereni tau manatineika hepatsie Kakaɨyari teɨtametemama memayeneniere meta xeime 'ixipara takame naitsarie 'uyuaneme, huye mɨ'ɨwiyanikɨ kɨye tukari tiyupitɨwame hetsɨa meutayune.
GEN 4:1 'Arani yu'ɨya 'Ewa hamatɨa xeime nunutsi mekanayexeiya Kahini katiniterɨwa. Mɨpaɨ kaniutayɨni 'Ewa: «Yawé netsiparewiekaku nunutsi 'ukitɨme nepayexei».
GEN 4:2 'Ariketa hutarieka 'Aweri kanayexeiya, Kahini mutaya. 'Aweri muxatsi wahɨweme kanayani, meta Kahini kwiepa ti'uximayatame patɨa.
GEN 4:3 Mɨixa tukari 'anuyeyaku Kahini Yawé katiniutimawirieni tita kwiepa mɨtiuka'e.
GEN 4:4 'Aweri kani'atɨanita Yawé hetsiemieme muxa 'aixɨa mɨ'ane matɨari mieme muwaiya mawari mayanikɨ, Yawé 'Aweri 'aixɨa katiniuxeiya meta mawarieya pinakixɨ,
GEN 4:5 peru Kahini mɨpaɨ pɨkatiuxei meta mawarieya pɨka'inakixɨ. 'Ayumieme Kahini kaniuyeha'ani, yu'uximatɨatɨ 'aniuyeikakaitɨni.
GEN 4:6 Hikɨ Yawé mɨpaɨ katinitahɨawe: «¿Titayari kwinimieme petiha'a? ¿Titayari peti'uxiwa'a petitihɨximawe?
GEN 4:7 Xɨka 'aixɨa petiyurienenike heitserie pekanatinierenikeyu. Xɨka 'aixɨa pekatiyurieneni, 'axamɨ'ane kamenihupieka metsiwiyake tiyukwa'ame hepaɨ. Peru 'ekɨ pekaniyɨweni peme'iwa».
GEN 4:8 Hikɨ Kahini yumuta 'Aweri hamatɨa katiniutixata. Kepauka yeuta yuxaɨta memu'uwakai, Kahini yumuta kaniumieni.
GEN 4:9 Hikɨ Yawé Kahini mɨpaɨ katiniuta'iwawiya: —¿Hakewari 'a'iwa 'Aweri? Kahini mɨpaɨ kaniutayɨni: —Nepɨkatimate. ¿Nekuta ne'iwa neti'ɨwiyame?
GEN 4:10 Yawé mɨpaɨ katinitahɨawe: —Kepetiuyuri. 'A'iwa xuriyaya kwiepa kumatɨ kanahiwani ne kename 'aixɨa neketiuyurieni.
GEN 4:11 'Ayumieme 'axapepɨ'itɨarieka kwie hepaɨtsita, 'a'iwa xuriyaya muta'itsikɨ, 'ekɨ pemitayeuri.
GEN 4:12 Kepauka kwiepa pemɨka'eni, pɨkatiutixuxuawereni, kwiepa pepuyeikani peyuku'unanetɨ.
GEN 4:13 Kahini Yawé mɨpaɨ katiniutahɨawe: —Kwinimiemeri pepɨnetikwinitɨa nepɨkayɨweri neminewieka.
GEN 4:14 Hikɨ pepɨnetsi'ayewei, tawarita 'ahɨxie nepɨka'uyeikani. 'Ena kwiepa nepuyeikani neyuku'awietanetɨ yu'uname hepaɨ, xewitɨ xɨka netsihanukunake pɨnetsihemieni.
GEN 4:15 Yawé mɨpaɨ katinita'eiya: —Mɨpaɨ pepɨkaranuyeyani. Kemɨ'ane Kahini mɨmieni, katinikwinitɨariemɨkɨ 'atahutamexɨa. Hikɨ Yawé Kahini kaniu'inɨaritɨani, kemɨ'ane menukunake mɨka'ikumemiwanikɨ.
GEN 4:16 'Ana Kahini Yawé kaniuku'eirieni, Nuri kwieyaritsie kaneyani, 'Ereni makuma tau manatineika hepatsie.
GEN 4:17 Kahini yu'ɨya hamatɨa xeime nunutsi kanayexeiya 'Enuki katiniterɨwa. Kahini kiekari kanikamaximekaitɨni, 'Enuki katiniterɨwa yuniwe hepaɨ.
GEN 4:18 'Enuki xeimeta yuniwe kanayexeiya 'Irari katiniterɨwa, mɨkɨ pupaapayatɨkai Mekuyaheri. Mɨkɨta pupaapayatɨkai Metutsaheri, Metutsaherita pupaapayatɨkai Rameki.
GEN 4:19 Rameki yuhutame puwarutiwitɨ. Xewitɨ pɨtitewakai 'Ara meta Tsira.
GEN 4:20 'Ara Kawari titewakame kanayexeiya, mɨkɨ 'ixuriki kiiyari memukii meta wakaitsixi memɨwaxiɨtɨa watutsi kanayani.
GEN 4:21 Kawari yumuta pexeiyakai Kuwari titewakame, mɨkɨ haripakɨ meta pirikɨxakɨ memɨteyuitɨawawe watutsi patɨa.
GEN 4:22 Tsira meta Tuwari-Kahini kanayexeiya, tepɨa tsuname kanayani meta purunitsekɨ tiwewiwame meta tepɨakɨ. Tuwari-Kahini xeime yutaru 'ukatɨme kanexeiyakaitɨni Nuhama titewakame.
GEN 4:23 Rameki mɨpaɨ katiniwarutahɨawe yu'ɨitama 'Ara meta Tsira: «Xekeneu'enana 'ukari Rameki 'ɨitamama. Xekeneu'eni neniuki. Xeime nepumi tewi netiukwinitɨaku, xeimetatsiere temaikɨ netsihetamieku.
GEN 4:24 Xɨka kemɨ'ane Kahini mɨmieni 'atahutamexɨa tikwinitɨariemɨkɨ, matsi kemɨ'ane Rameki mɨmieni haika tewiyari heimana tamamata heimana 'atahutamexɨa katinikwinitɨariemɨkɨ».
GEN 4:25 'Arani hairiekata yɨ'ɨya matɨa xeime nunutsi mekanayexeiya, Tseti katiniterɨwa, mɨpaɨ 'utayɨka: «Kakaɨyari pɨtatsi'upitɨa xeimeta nunutsi temayexeiyakɨ, 'Aweri hetsiemieme, Kahini mimiekaikɨ».
GEN 4:26 Tseti xeimeta yuniwe kanayexeiya 'Enuxi katiniterɨwa. Hikɨ mana mekanitsutɨani teɨteri Yawé mehahɨawetɨ kemɨtitewa.
GEN 5:1 'Ikɨ 'Arani nuiwarimama mekanihɨkɨtɨni. Kepauka Kakaɨyari tewi mutawewi, yuhepaɨ 'aneme putawewi.
GEN 5:2 'Uki 'uka puwarutiwewi, meta 'aixɨa kaniwaruyurieni. Kepauka muwarutiwewi «teɨteri».
GEN 5:3 Kepauka 'Arani xeitsienituyari heimana xeitewiyari heimana tamamata wiyari mexeiyakai, xeimeta kaniutinuarieni yuhepaɨ 'anekame yuhepaɨ tiyuxexeiyame, Tseti katiniterɨwa.
GEN 5:4 Tseti 'utinuiwaku, 'Arani kaniuyurieni 'atahaika tsienituyari wiyari, warayexeiyaka tawarita 'ukitsi meta 'ukari.
GEN 5:5 'Arani kaniumɨni 'atanauka tsienituyari heimana xeitewiyari heimana tamamata wiyari hexeiyatɨ.
GEN 5:6 Tseti pexeiyakai xeitsienituyari heimana 'auxɨwime wiyari kepauka 'Enuxi mayexei.
GEN 5:7 'Utinuiwaku 'Enuxi, Tseti kaniuyurieni 'atahaika tsienituyari heimana 'atahuta wiyari, warayexeiyaka tawarita 'ukitsi meta 'ukari.
GEN 5:8 Tseti kaniumɨni 'atanauka tsienituyari heimana tamamata heimana huta wiyari hexeiyatɨ.
GEN 5:9 'Enuxi pexeiyakai nauka tewiyari heimana tamamata wiyari kepauka Kainahani mayexei.
GEN 5:10 Kainahani 'utinuiwaku, 'Enuxi kaniuyurieni 'atahaika tsienituyari heimana tamamata heimana 'auxɨwime wiyari, warayexeiyaka tawarita 'ukitsi 'ukari.
GEN 5:11 'Enuxi kaniumɨni 'atanauka tsienituyari heimana 'auxɨwime wiyari hexeiyatɨ.
GEN 5:12 Kainahani pexeiyakai haika tewiyari heimana tamamata wiyari kepauka Marareri mayexei.
GEN 5:13 Marareri 'utinuiwaku, Kainahani kaniuyurieni 'atahaika tsienituyari heimana huta tewiyari wiyari, tawarita warayexeiyaka 'ukitsi 'ukari.
GEN 5:14 Kainahani kaniumɨni 'atanauka tsienituyari heimana tamamata wiyari hexeiyatɨ.
GEN 5:15 Marareri pexeiyakai haika tewiyari heimana 'auxɨwime wiyari kepauka Kareri mayexei.
GEN 5:16 Kareri 'utinuiwaku, Marareri kaniuyurieni 'atahaika tsienituyari heimana xeitewiyari heimana tamamata wiyari, tawarita warayexeiyaka 'ukitsi 'ukari.
GEN 5:17 Marareri kaniumɨni 'atahaika tsienituyari heimana nauka tewiyari heimana tamamata heimana 'auxɨwime (895) wiyari hexeiyatɨ.
GEN 5:18 Kareri pexeiyakai xeitsienituyari heimana haika tewiyari heimana huta wiyari kepauka 'Enuki mayexei.
GEN 5:19 'Utinuiwaku 'Enuki, Kareri kaniutihuni 'atahaika tsienituyari wiyari, tawarita warayexeiyaka 'ukitsi 'ukari.
GEN 5:20 Kareri kaniumɨni 'atanauka tsienituyari heimana haika tewiyari heimana huta (962) wiyari hexeiyatɨ.
GEN 5:21 'Enuki pexeiyakai haika tewiyari heimana 'auxɨwime wiyari kepauka Matutsareni mayexei.
GEN 5:22 'Utinuiwaku Matutsareni, 'Enuki Kakaɨyari hamatɨa 'aixɨa pɨtiuyeikakai haika tsienituyari wiyari, tawarita hipame pɨwarayexei 'ukitsi 'ukari.
GEN 5:23 'Enuki kaniuyurieni haika tsienituyari heimana haika tewiyari heimana 'auxɨwime wiyari,
GEN 5:24 'aixɨa mɨtiyurienekaikɨ Kakaɨyari hamatɨa, kaniutatɨmaiyarieni Kakaɨyari meiwitɨkɨ.
GEN 5:25 Matutsareni pexeiyakai xeitsienituyari heimana nauka tewiyari heimana 'atahuta wiyari kepauka Rameki mayexei.
GEN 5:26 'Utinuiwaku Rameki, Matutsareni kaniuyurieni 'atahuta tsienituyari heimana nauka tewiyari heimana huta wiyari, tawarita warayexeiyaka 'ukitsi 'ukari.
GEN 5:27 Matutsareni kaniumɨni, 'atanauka tsienituyari heimana haika tewiyari heimana 'atanauka (969) wiyari hexeiyatɨ.
GEN 5:28 Rameki pexeiyakai xeitsienituyari heimana nauka tewiyari heimana huta wiyari kepauka Nuhexi mayexei.
GEN 5:29 Rameki Nuhexi pɨtiterɨwaxɨ mɨpaɨ mutayɨkɨ: «'Ikɨ nunutsi pɨtatsika'uxipitɨani ketemɨte'uximaya tete'uka'eniwatɨ meta ketemɨte'uximaya kwiepa Yawé 'axa'iyurieku».
GEN 5:30 Nuhexi 'utinuiwaku, Rameki kaniuyurieni 'auxɨwime tsienituyari heimana nauka tewiyari heimana tamamata heimana 'auxɨwime (595) wiyari, tawarita warayexeiyaka 'ukitsi 'ukari.
GEN 5:31 Rameki kaniumɨni 'atahuta tsienituyari heimana haika tewiyari heimana tamamata heimana 'atahuta (777) wiyari hexeiyatɨ.
GEN 5:32 Nuhexi peixeiyakai 'auxɨwime tsienituyari wiyari kepauka Tsemi, Kami, Kapeti, muwapaapatɨkai.
GEN 6:1 Merikɨtsɨ kepauka teɨteri memutamɨirixɨ kwiepa meta 'ukari memɨwarayexei,
GEN 6:2 Kakaɨyari niwemama mekaniwaruxeiya teɨteri waniwema witsimemɨte'ɨimarixitɨkai, hikɨ mekaniwarutiwitɨni kemɨ'ane memɨwarutihiwe'eri.
GEN 6:3 Hikɨ Yawé mɨpaɨ kaniutayɨni: «'Ari ne'iyari tewi hetsie pɨkayekani, tewi mɨmɨwe xeikɨa kanihɨkɨtɨni, xeitsienituyari heimana xeitewiyari wiyari xeikɨa puyuruwani».
GEN 6:4 Kepauka Kakaɨyari niwemama teɨteri waniwema memɨwarutiwitɨ, tɨɨri kwinimieme me'utɨtɨme mekaniwarayexeiya, kwinimieme mete'ayu'iwatɨ mekanakɨne meripaitɨ. Mana mɨtiyetɨa kwinimieme me'utɨtɨ mekaniutixuawere kwiepa.
GEN 6:5 Hikɨ Yawé nieretɨ teɨteri ke'axa kwinimieme memɨteyuriekai, 'axamɨti'ane hetsie xeikɨa memɨyɨkɨhɨawekaikɨ,
GEN 6:6 kaniuta'iyarixieni titayari kwiepa tewi mɨtiutawewiekai, hikɨ 'iyarieyatsie neikwine.
GEN 6:7 'Ayumieme Yawé mɨpaɨ kaniutayɨni: «Tewi kwiepa nemitawewi nekanekumaweriyamɨkɨ, yaxeikɨata nekatiniyurimɨkɨ yeutari wahetsie, kuterixi meta memɨte'awɨwawe. ¿Titayari netiwarutawewi?»
GEN 6:8 Matsi Yawé Nuhexi kanixeiyakaitɨni, kaninakekaitɨni ke'aixɨa mɨtiuyeikakai.
GEN 6:9 'Ikɨ Nuhexi kemuyɨ pɨ'ɨxatsiyari. Nuhexi 'aixɨa katiniuka'iyarikaitɨni, yakatinikamiekaitɨni yuteɨterima wahamatɨa. Kakaɨyari hetsiemieme 'aixɨa katiniuyeikakaitɨni.
GEN 6:10 Yuniwema yuhaikame kaniwarayexeiya: Tsemi, Kami meta Kapeti.
GEN 6:11 Kakaɨyari kaniuniere kwiepa 'axamɨti'ane kemɨtixuawekai, teɨteri kememɨteyunanaimakai.
GEN 6:12 Kakaɨyari 'uniereka kwiepa kwinimiemeri matsi 'axamɨti'ane muxuawekaikɨ teɨteri wahetsie,
GEN 6:13 Nuhexi mɨpaɨ katiniutahɨawe: «Teɨteri nekaniwatayuniyamɨkɨ, mɨkɨ meteyuriekaku kwiepa 'axamɨti'ane kwinimieme katinixuaweni. 'Ayumieme teɨteri nekaniwareuyehɨamɨkɨ meta kwie naime.
GEN 6:14 Kɨye maye'utsiya kanuwayari keneutawewi 'apakame, 'uyewaɨkawame kenayeitɨa, kwetsɨka mɨyɨwikɨ kenewakuwiri taɨtana meta herie.
GEN 6:15 Mɨpaɨ pakame: xeitsienituyari heimana huta tewiyari meturuyari 'ayetewime, xeitewiyari heimana haika meturuyari 'atayeukame, tamamata heimana nauka meturuyari heutitewame.
GEN 6:16 Kii yuheima haikakɨa manawewiya hepaɨ mɨpaɨ paɨmeme hexeiyakame keneutawewi, meriumeturuyari heutitewame 'axawatɨkaime 'anakunekame yukanamiki hetɨa meta yu'etsata yu'itupari hexeiyakame.
GEN 6:17 Ne haa waɨkawa nekananɨ'amɨkɨ kwiepa, yunaitɨ memɨtekwinikɨ kwiepa memɨte'u'uwa memɨte'ayeneniere.
GEN 6:18 Peru 'ekɨ hamatɨa ne tɨratu tepexeiyani, kanuwa 'amɨtimariwetsie xekaneutahaxɨakuni 'ekɨ meta 'aniwema, 'a'ɨya meta 'amu'e'ema.
GEN 6:19 Ketiniwareuta'ɨna kanuwa 'amɨtimariwetsie yuhuhutame yunaime kwiepa memɨte'u'uwa memɨte'ayeneniere, 'uki 'uka mame xeikɨa, yunaime memɨtexuawe.
GEN 6:20 'Ahamatɨa mekaneutahaxɨakuni yuhuhutatɨ memɨte'awɨwawe, tewaxi meta yeutari, kuterixi, memɨtawikwenikɨ.
GEN 6:21 Meta waɨkawa 'ikwaite ketinekuwawa ketineuta'ɨna, 'ahetsiemieme meta tewaxi wahetsiemieme, xemɨtekwakakɨ».
GEN 6:22 Hikɨ Nuhexi mɨpaɨ katiniuyurieni, Kakaɨyari kemɨtita'aitɨa.
GEN 7:1 Hikɨ Yawé Nuhexi mɨpaɨ katiniutahɨawe: «'Ekɨ xeikɨa 'aixɨa pekatiniuka'iyarini 'ena pemuyeika, kanuwa 'amɨtimariwetsie keneutahaki 'atɨɨriyama xeyunaitɨ.
GEN 7:2 Yunaime tewaxi mawariyari memɨnaki'eriwa, keniwareuta'ɨna me'atahutame 'ukitsi meta 'ukari, yeutari 'aixɨa memɨka'anene mawariyari yuxexuime 'ukitsi meta 'ukari.
GEN 7:3 Memɨte'awɨwaweta yunaime me'atahutame, 'ukitsi meta 'ukari, memɨkaheuyewautsenikɨ 'ena kwiepa.
GEN 7:4 Karikɨ 'atahutarieka tukari 'aye'ayu, wiyeri nekaniyuitɨamɨkɨ 'ena kwiepa mɨkawiyekɨ huta tewiyari tukari meta tɨkarikɨ, mɨpaɨ nekatiniwarakumaweriyamɨkɨ kwiepa memɨtama nemɨwarutawewi».
GEN 7:5 Nuhexi naime yakatiniuyurieni Yawé kemɨtita'aitɨa.
GEN 7:6 'Ataxewime tsienituyari wiyari pexeiyakai Nuhexi, kepauka mɨtiutihauritɨxɨ.
GEN 7:7 Hikɨ kaneutahani kanuwa 'amɨtimariwetsie niwemama yunaitɨ, 'ɨyaya meta mu'e'emama, meyutawikweitsitɨanike mɨtitihauritɨkekaikɨ.
GEN 7:8 Yunaitɨ tewatsiekate memɨmawarɨwa meta memɨkamawarɨwa yeutari, memɨte'awɨwawe meta kuterixi,
GEN 7:9 mekaneutahaxɨani Nuhexi hamatɨa yuhuhutatɨ meheuyuti'iwatɨkaitɨ 'uki 'uka, Kakaɨyari kemɨra'aitakai.
GEN 7:10 'Atahutarieka tukari 'anukayaku, wiyeri kanitsutɨani kwiepa memɨtihaunitsie mieme.
GEN 7:11 Kepauka Nuhexi 'ataxewime tsienituyari wiyari mexeiyakai, hutarieka metseriyaritsie tamamata heimana 'atahuta tukariyaritsie, 'ana haramaratsie haa patinexɨa, muyuawitsie pɨreuyepierixɨa mɨkawiyekɨ.
GEN 7:12 Huta tewiyari tukari meta tɨkari kaniwiyekaitɨni kwiepa.
GEN 7:13 Mɨkɨ tukaritsie Nuhexi kanuwatsie mekaneutahaxɨani, niwemama Tsemi, Kami meta Kapeti, Nuhexi 'ɨyaya meta mu'e'emama yuhaikatɨ.
GEN 7:14 Wahamatɨa mekaneutahaxɨani yunaitɨ yeutari meta tewaxi, kuterixi metatsiere memɨte'awɨwawe.
GEN 7:15 Mɨpaɨ mekateneutahaxɨani kanuwa 'amɨtimariwetsie Nuhexi hamatɨa yunaitɨ meheuyuti'iwatɨkaitɨ kwiepa memɨtexuawe,
GEN 7:16 yunaitɨ memɨtexuawe yɨkɨ mete'anenetɨ, mekaneutahaxɨani meheuyutinɨtɨ 'uki 'uka, Kakaɨyari Nuhexi kemɨra'aitɨwakai. Hikɨ Yawé 'ana katineunani kitenie kanuwatsie.
GEN 7:17 Hikɨ karima kaniwiyekaitɨni huta tewiyari tukari. Kepauka haa muwayenexɨa kanuwa 'amɨtimariwe kananuyewiere kwie heima.
GEN 7:18 Hikɨ matsi haa waɨkawa kanewayenetɨkateitɨni haa kanitimiekaitɨni, kanuwata kananuyewiekaitɨni hetsiena.
GEN 7:19 Waɨkawa haa kanitiyani hɨri 'amanutitɨtɨ kwiepa meutitekai naime kaneuyunitɨaxɨani.
GEN 7:20 Hɨri heima 'atahuta meturuyari kuxi haa kanitiyani.
GEN 7:21 Mɨpaɨ mekateneuyehɨiyani kwiepa memɨte'u'uwakai: memɨte'awɨwawe, yeutari, tewaxi, kuterixi, metatsiere teɨteri.
GEN 7:22 Yunaitɨ mekateniukwini kwiepa memɨte'u'uwakai, yunaitɨ memɨte'ayeyuyurikai.
GEN 7:23 Kakaɨyari kwiepa katiniwarakuyeitɨani yunaime memɨte'u'uwakai, teɨteri meta tewaxi meta yeutari, kuterixi, meta memɨte'awɨwawe meteyunaime. Yunaitɨ mekatenakuyeituarieni kwiepa memu'uwakai. Nuhexi xeikɨa mekaniuyuhayewa meta kemɨ'ane hamatɨana memɨyetekai kanuwa 'amɨtimariwetsie.
GEN 7:24 Xeitsienituyari heimana huta tewiyari heimana tamamata tukari kwie kaneuyunekaitɨni.
GEN 8:1 Merikɨtsɨ Kakaɨyari Nuhexi kanaye'erieni meta yeutari, tewaxi hamatɨana memɨyetekai kanuwatsie. 'Eka kaniuyuitɨani, waɨkawa tɨrɨkaɨyetɨ kaniuku'eka, 'ana haa kanitsutɨani 'etsiwa kawaximetɨ.
GEN 8:2 Haramara tetɨata haa matineikakai kaneunarixɨani, muyuawitsieta katineunarixɨani, wiyerita katiniuhayewa.
GEN 8:3 Haa kanikawaximekaitɨni 'anɨari kwiepa. Xeitsienituyari heimana huta tewiyari heimana tamamata tukari heutineku, haa waɨkawa kanikawaximekaitɨni.
GEN 8:4 'Atahuta metseritsie tamamata heimana 'atahuta tukaritsie kanuwa kananutateni 'Ararati hɨriyaritsie.
GEN 8:5 Haa tsietɨ kanikamiekaitɨni, tamamata metseritsie mexɨakame tukaritsie waɨkawa hɨri petihekɨarixɨa.
GEN 8:6 Huta tewiyari tukari 'aye'aku, Nuhexi 'itupari 'etsimɨyewa kaneuyepieni kanuwa 'amɨtimariwe kanamikieyatsie mewewiekai,
GEN 8:7 hikɨ kwatsa kaniutatuani, mɨkɨ mana xeikɨa kaniuwietɨyeikakaitɨni, 'ikwewietɨ haa mɨkawanikɨ.
GEN 8:8 Tawarita kukuru meutuxa kaniutatuani, timaimɨtɨ xɨka'akuri haa waɨkawa kawatɨyani.
GEN 8:9 Kukuru kaninuani kanuwatsie memawekaikɨ hakewatsɨ heka'uxipieni haa 'akuxi kwie manukanakaikɨ. Nuhexi yumama kaneutatsera, 'enutuka mana kanuwatsie kaneitatuani.
GEN 8:10 Tawarita 'atahuta tukari 'anukayaku, hutariekata kukuru kaniutatuani.
GEN 8:11 Kɨyɨrirɨmekaku kukuru kaninuani, yuyekaraukɨ huriwa yɨrariyari 'atɨtɨ hekwame yurime. 'Anari Nuhexi mɨpaɨ katinetimani kename haa kawatɨyakai kwieri hahekɨakai.
GEN 8:12 Tawarita 'atahuta tukari kanikakwewieni, hairiekari kukuru kanenɨ'ani, 'anari kukuru pɨkanua.
GEN 8:13 'Ataxewime tsienituyari heimana xewi wiyari pexeiyakai Nuhexi kepauka haa mukawa. Mexɨakame metseriyaritsie mexɨakame tukaritsie Nuhexi kanuwa 'amɨtimariwe kanamikieya kananutiyepieni meta kwie mɨwakini hepaɨ katinixeiyakaitɨni.
GEN 8:14 Hutarieka metseritsie xeitewiyari heimana 'atahuta tukaritsie, kwieri waɨkawa kaniwakikaitɨni.
GEN 8:15 'Anari Kakaɨyari Nuhexi mɨpaɨ katiniutahɨawe:
GEN 8:16 «Kanuwatsie kenanayeye'ari 'atɨɨriyama, 'a'ɨya, 'amu'e'ema yunaitɨ.
GEN 8:17 Yaxeikɨata keniwaranaye'ari 'ahamatɨa memɨteye'ɨnekai: memɨte'awɨwawe, tewaxi meta kuterixi. Mekeyumɨiriyani, mekeyuxiɨtɨaka, kwiepa mekehɨneni».
GEN 8:18 Hikɨ kanuwatsie mekananayekɨne, Nuhexi meta niwemama, 'ɨyaya meta mu'e'emama.
GEN 8:19 Mekatenanayekɨneta yunaitɨ: tewaxi, memɨte'awɨwawe, metatsiere yunaitɨ kuterixi, meta kwiepa memɨtexuawe yuxexuitɨ yɨkɨ memɨte'anene.
GEN 8:20 Hikɨ Nuhexi mawari tenutsariyari kaniutawewieni Yawé hetsiemieme, mana katiniwarutitaiya tewaxi memɨmawarɨwa meta memɨte'awɨwawe memɨmawarɨwa.
GEN 8:21 Kepauka Yawé 'ɨakariyari witsimu'ɨa mu'ukwixɨ mɨpaɨ katiniuyuhɨawe: «Tsepa teɨteri tɨɨriyari paitɨ 'axamemɨteyurie, tawarita kwie 'axanepɨkayurieni tewi ya'ane wiwiekaku. Metatsiere hatsuakuri nepɨkatiwakwini kwiepa memɨtexɨawe, hikɨ kenemɨtiuyuri.
GEN 8:22 »Mexi'akuxi kwie 'atsikayɨwe, pɨtiuka'etsitɨreni pɨtiuka'itsanatɨreni, Xexerixa payeikani meta pukuxɨxɨreni, witarita payeikani meta taxarita, pukuhekɨkɨareni meta pukuyɨyɨreni».
GEN 9:1 Kakaɨyari Nuhexi 'aixɨa kaniuyurieni meta niwemama mɨpaɨ 'utaitɨ: «Xekeneyuxiɨtɨaka, xekeneyumɨiriyani kwiepa xekenehɨneni.
GEN 9:2 Yunaitɨ kwiepa memɨtexuawe mepɨtexemakaxeni: memɨte'awɨwawe, yeutari, kuterixi, ketsɨte haramaratsie memɨteye'uwa. Yunaime xepɨtewata'aitɨani.
GEN 9:3 Yunaitɨ memɨtekuyuatɨka memɨte'ayeneniere meta mɨtitsitsiɨrawi tupiriyate xe'ikwaite katinayeimɨkɨ. Ne naime 'ikɨ nekatinixeyetuirieka.
GEN 9:4 Peru xeikɨa 'ayeniereme xepɨkakwa'ani, wai 'ayexureme nekanixatani xuriyatsie tukari muxuawekɨ.
GEN 9:5 Yurikɨtsɨ xuriyakɨ nekatinixetawawiriemɨkɨ. Yunaime yeutari yunaime teɨteri kememuyuyurieka nekaniwaxeiyakamɨkɨ.
GEN 9:6 »Xɨka xewitɨ tewi xuriyaya 'utayeurieni, mɨkɨta xewitɨ tewi kanimiemɨkɨ, tewi mutawewiyakɨ Kakaɨyari hepaɨ 'anetɨ.
GEN 9:7 »Xeme matsi xekeneyumɨiriyani, xekeneyuxiɨtɨaka, kwiepa xekenehɨneni».
GEN 9:8 Tawarita Kakaɨyari Nuhexi meta niwemama katiniwarutaxatɨani, mɨpaɨ katiniwarutahɨawe:
GEN 9:9 «Ne tɨratu nepɨwewieni xehetsie, xexiɨyarimata wahetsie,
GEN 9:10 meta yunaime xehamatɨa memɨte'u'uwa wahamatɨa, tatsɨari yunaitɨ kwiepa memɨtexuawe kanuwatsie memɨyetekai: memɨte'awɨwawe, tewaxi meta yeutari.
GEN 9:11 'Ikɨ netɨratu kanihɨkɨtɨni: Tawarita teɨteri mepɨkaheuyehɨiyani wiyerikɨ, tawariri pɨkatitihauritɨ yunaime mɨtiwareuyehɨpakɨ».
GEN 9:12 Tawarita Kakaɨyari mɨpaɨ kaniutayɨni: «Tɨratu 'inɨariyari nepɨxexeitsitɨani yuheyemekɨ xehetsiemieme meta yunaime xehamatɨa memɨte'u'uwa memɨte'ayeneniere:
GEN 9:13 Haiwitɨritsie nekuwiwi nekaniuyeteni, mɨkɨ kani'inɨaritɨkamɨkɨ kwie hamatɨa tɨratu kenemɨtiuwewi.
GEN 9:14 Kepauka kwiepa haiwitɨri nemanunɨ'ani, hetsiena xɨka nekuwiwi 'uyehuni,
GEN 9:15 nepaye'erieni tɨratu kenemɨtiuwewi xehamatɨa meta yunaime kwiepa memɨtexuawe wahamatɨa. Hatsuakuri waɨkawa pɨkakawiye mɨtiwareuyehɨanikɨ memɨtekwiwawe.
GEN 9:16 Kepauka nekuwiwi haiwitɨritsie manutahuni, ne ne'ixeiyame nepaye'erieni tɨratu kenemɨtiuwewi yuheyemekɨ xehamatɨa meta yunaime kwiepa memɨtexuawe wahamatɨa».
GEN 9:17 Kakaɨyari katinanunɨni Nuhexi mɨpaɨ tikɨhɨawetɨ: «'Ikɨ kanihɨkɨtɨni tɨratu nemuwewi yunaime kwiepatari wahetsiemieme».
GEN 9:18 Nuhexi niwemama kanuwatsie memanayekɨ mekanihɨkɨtɨkaitɨni: Tsemi, Kami meta Kapeti. Mɨkɨ Kami xeime payexei yuniwe Kanani titewakame.
GEN 9:19 'Ikɨ meyuhaikatɨ Nuhexi niwemama kiekari mepukama naitsarie kwiepa.
GEN 9:20 Hikɨ Nuhexi kwiepa kaniuti'etɨyani, meta kaxie kaniuka'iteɨta.
GEN 9:21 Heiwa kaxie winuyari kaniuti'ieni kaniutitaweni, mawetɨ katiniuhuni 'ixuriki kiiyarita paitɨ.
GEN 9:22 Kami Kanani paapaya, yupaapa kaniuxeiya maweme, hikɨ mɨkɨ katiniwarekuxatɨani yu'iwama.
GEN 9:23 Tsemi Kapeti hamatɨa mata 'ixurikiyari me'utihurieka yunaiparitsie meheitiyexɨaka, yukutama me'uhutɨ mekanenukanani yupaapa mɨmawekaikɨ. Mɨkɨ mepɨka'ixei maweme, xaɨtsiepɨta memeukunenierekaikɨ.
GEN 9:24 Hikɨ kepauka Nuhexi mukatawaiparixɨ, pɨretima nu'aya hetsimɨyumate mixeiyakaikɨ.
GEN 9:25 Mɨpaɨ kaniutayɨni: «Kanani 'axake'itɨarieka. 'Iwamama memɨyuhuta yemekɨ mepɨte'i'aitɨaka waɨriyarika».
GEN 9:26 Mɨpaɨta kaniutayɨni: «'Aixɨa ketikɨhɨawarɨwani Yawé Tsemi Kakaɨyarieya. Kanani ke'ayani waɨriyarika ti'uximayatsiriwame.
GEN 9:27 Kakaɨyari Kapeti kwieya 'ake'utayeuriya. Tsemi manukatsie Kapeti ke'ukani, Kanani tiwa'uximayatsiriwame ke'ayani».
GEN 9:28 Kepauka memutihau waritana Nuhexi 'apuyeikakai 'akuxi haika tsienituyari heimana huta tewiyari heimana tamamata wiyari.
GEN 9:29 'Atanauka tsienituyari heimana huta tewiyari heimana tamamata (950) wiyari hexeiyatɨ kaniumɨni.
GEN 10:1 'Ikɨ mepɨhɨkɨ Tsemi, Kami meta Kapeti Nuhexi niwemama meta wanuiwarima, tiutihauritɨkuke memɨwarayexei.
GEN 10:2 Kapeti tɨɨriyamama mɨpaɨ mepɨtetetewakai: Kumexi, Makuki, Marahi, Kawani, Tuwari, Metseki meta Tiratsi.
GEN 10:3 Kumexi tɨɨriyamamata: 'Atsikenatsi, Xipati meta Tukaxima.
GEN 10:4 Kawani tɨɨriyamamata: 'Eritsaha, Taritsi, Kitini meta Xuranini.
GEN 10:5 Hipatɨ mɨkɨ haramara tetsita memɨtiyaxixɨ, yuxexuitɨ yunuiwarima mehexeiyatɨ mepakɨ yukwie meta yuniuki.
GEN 10:6 Kami tɨɨriyamamata mɨpaɨ mepɨtetewakai: Kutsi, Mitsirahini, Puti meta Kanani.
GEN 10:7 Kutsi tɨɨriyamamata mepɨtetewakai: Tsewa, Kawira, Tsaweta, Xakama meta Tsaweteka. Xakama niwemama Tsawa meta Rerani mepɨhɨkɨ.
GEN 10:8 Kutsi Nimiruri paapaya pɨhɨkɨtɨkai, mutamariwaxɨ mexɨakame tewi kwinimieme titɨrɨkaɨyetɨ matɨakɨ 'ana,
GEN 10:9 mɨkɨ waɨkawa reutamiewetɨ meta heuyutamiewetɨ kamatɨ kanayani Yawé hɨxie. 'Ayumieme hipatɨ mɨpaɨ meputiyuane: «'Ikɨ tewi Nimiruri hepaɨ pɨreuyutamiewe Yawé hɨxie».
GEN 10:10 Kiekarieya 'amɨtimamariwawekai mɨra'aitakaitsie kanihɨkɨtɨkaitɨni Waweri, 'Ereki, 'Akari, meta Karine, Tsinaxi kwieyaritsie.
GEN 10:11 Mɨkɨ kwieyaritsie 'uyeikatɨ Nimiruri kaneyani 'Atsuxi paitɨ, manata kanitiwewieni Niniwe kiekariyari, Xekuwuti-'Ixi meta Kahara
GEN 10:12 meta Xetseni, kiekari mɨmariwe Niniwe meta Kahara wahixɨapa mɨyema.
GEN 10:13 Mitsirahini, watutsi kanayani rureutsixi, 'anameutsixi, rehawitsixi, natuhitsixi,
GEN 10:14 paturutseutsixi, katsurukitsixi meta katuritsixi mɨkɨ piritsiteutsixi wanuiwarima memakɨ.
GEN 10:15 Kanani nu'aya Tsiruni kanayani matɨarieya, hutarieka mieme Heti,
GEN 10:16 meta nuiwarimama kewutseutsixi mekanihɨkɨtɨkaitɨni metatsiere 'amuxeutsixi, keriketseutsixi,
GEN 10:17 heweutsixi, 'aratseutsixi, tsineutsixi,
GEN 10:18 'axiwareutsixi, tsemareutsixi metatsiere kamatitsixi. Hikɨta 'ikɨ nuiwarite kananeutsixi mekaneuyutaxɨriexɨani,
GEN 10:19 mɨkɨ wakwie kaniye'atɨyani Tsiruni tsutɨarietɨ Keraxi paitɨ 'u'atɨ meta Kahatsa paitɨ, Tsuruma hepatsieta, Kumuxa, 'Arimaha, meta Tsewuhini, metatsiere Ratsa paitɨ.
GEN 10:20 'Ikɨ Kami nuiwarimama mekanakɨne, yuxexuitɨ yuxiɨyarima mewarexeiyatɨ meta yuniuki, yukwie meta yunuiwarite.
GEN 10:21 Tsemi, Kapeti matsikaya, 'Ewexi niwemama watutsi kanihɨkɨtɨkaitɨni, mɨkɨta tɨɨri kaniwarayexeiya.
GEN 10:22 Tsemi niwemama mekanihɨkɨtɨkaitɨni: 'Erami, 'Atsuxi, 'Axipatsari, Ruri, meta 'Arami.
GEN 10:23 'Arami niwemamata mekanakɨne: 'Utsi, Huri, Ketexi, meta Mahatsi.
GEN 10:24 'Axipatsari Tseraki paapaya kanayani. Meta Tseraki 'Ewexi paapaya patɨa.
GEN 10:25 'Ewexi yuhutame yuniwema pɨwarayexei: matɨarieya Pereki pɨtitewakai, 'ana kwie mutixitekiekɨ, hutarieka miemeta pɨtitewakai Kutani.
GEN 10:26 Kutani meta puwapaapatɨkai: 'Arimurari, Tserepi, Katsaxi-Maweti, Yeraki,
GEN 10:27 Harurani, 'Utsari, Rikɨra.
GEN 10:28 'Uwari, 'Awimaheri, Tsawa,
GEN 10:29 'Upixi, Kawira meta Kuwawi. Yunaitɨ 'ikɨ Kutani niwemama mepakɨ,
GEN 10:30 mɨkɨ Metsa kwieyaritsie mepɨtitekai meta Tsepaxi paitɨ, tau manatineika hepatsie mɨhɨriyatsie.
GEN 10:31 'Ikɨ mepɨhɨkɨ Tsemi niwemama wanuiwarima meta yuniuki mehexeiyatɨkaitɨ yukwie meta yunuiwarite.
GEN 10:32 'Ikɨ mekanihɨkɨtɨni Nuhexi xiɨyarimama waniwema, kememɨteheukunuiwa, meta wakwie naitɨ. 'Ikɨ waxiɨyarima wahetsie mekanayenexɨani naitɨ kiekari mɨtama kwiepa, kepauka memutihau reutiyetana.
GEN 11:1 Merikɨtsɨ mɨkɨ tukaritsie teɨteri xeiniukiyari xeikɨa mekanexeiyakaitɨni naitsarie kwiepa.
GEN 11:2 Hikɨ mehekɨneka tau manatineika hepatsie, mekanitaxeiya hakuwerime Tsinaxi kwieyaritsie, mana mekanikuyaxe.
GEN 11:3 Hikɨ mɨpaɨ mekateniuxata: «Kiekari tepɨkamani xeime tuxiyu hexeiyakame muyuawitsie heuti'akame, xɨnariya tepɨtiwewieni tepititaiya. Mɨpaɨ teteyurieyu 'aixɨa tepɨtexeiyarieni, meta tepɨkataxɨriyaxɨani naitsarie kwiepa». 'Ana xɨnariya mekaniuyurieni tetexi mɨkaxuawekaikɨ, kwetsɨka mɨyɨwi mekaniuyurieni mana kwieta matineikakaikɨ tsepa haxu muxuawekai.
GEN 11:5 Hikɨ Yawé kaniukateni kiekari mɨxeiyakɨ meta tuxiyu teɨteri memiwewietɨwekaikɨ,
GEN 11:6 mɨpaɨ kaniutayɨni: «Yunaitɨ mepɨxeikiekariyari meta xeiniukiyari xeikɨa mepexeiya, 'ayumieme mɨkɨ 'uximayatsika meputsutɨa, kememɨtexata yamepɨteyurieni.
GEN 11:7 Matsi 'aixɨa pɨyɨni waniuki nepɨpataxɨani, memɨkayu'eniekakɨri yunaitɨ».
GEN 11:8 Mɨpaɨ Yawé waruyurieku mekaneutayeixɨani naitsarie kwiepa, mekateniuhayewata me'iwewietɨwetɨ kiekari.
GEN 11:9 'Ayumieme mɨkɨ kiekari Waweri katiniuterɨwarieni, mana Yawé waniuki kaniupataxɨani teɨteri kwiepa memɨtama yunaime memɨkayu'eniekakɨ, manata yaxeikɨa naitsarie mɨwareutaxɨriexɨakɨ.
GEN 11:10 'Ikɨ Tsemi nuiwarimama wa'ɨxatsi kanihɨkɨtɨni: Kepauka teɨteri memutihau huta wiyari 'anuyemiekaku kepauka Tsemi xeitsienituyari mexeiyakai, 'ana nu'aya 'Axipatsari kaniutinuiwa.
GEN 11:11 'Axipatsari 'utinuiwaku Tsemi kaniutihuni 'akuxi 'auxɨwime tsienituyari wiyari, tawarita warayexeiyaka 'ukitsi 'ukari.
GEN 11:12 Kepauka 'Axipatsari xeitewiyari heimana tamamata heimana 'auxɨwime wiyari mexeiyakai, niweya Tseraki kaniutinuiwa.
GEN 11:13 Tseraki 'utinuiwaku, 'Axipatsari kaniutihuni 'akuxi nauka tsienituyari heimana haika wiyari, tawarita warayexeiyaka 'ukitsi 'ukari.
GEN 11:14 Kepauka Tseraki xeitewiyari heimana tamamata wiyari mexeiyakai, niweya 'Ewexi kaniutinuiwa.
GEN 11:15 'Ewexi 'utinuiwaku Tseraki kaniutihuni 'akuxi nauka tsienituyari heimana haika wiyari, tawarita warayexeiyaka 'ukitsi 'ukari.
GEN 11:16 Kepauka 'Ewexi xeitewiyari heimana tamamata heimana nauka wiyari mexeiyakai, niweya Pereki kaniutinuiwa.
GEN 11:17 Pereki 'utinuiwaku 'Ewexi kaniutihuni 'akuxi nauka tsienituyari heimana xeitewiyari heimana tamamata wiyari, tawarita warayexeiyaka 'ukitsi 'ukari.
GEN 11:18 Kepauka Pereki xeitewiyari heimana tamamata wiyari mexeiyakai, niweya Xehu kaniutinuiwa.
GEN 11:19 Xehu 'utinuiwaku Pereki kaniutihuni 'akuxi huta tsienituyari heimana 'atanauka wiyari, tawarita warayexeiyaka 'ukitsi 'ukari.
GEN 11:20 Kepauka Xehu xeitewiyari heimana tamamata heimana huta wiyari mexeiyakai, niweya Tseruki kaniutinuiwa.
GEN 11:21 Tseruki 'utinuiwaku Xehu kaniutihuni 'akuxi huta tsienituyari heimana 'atahuta wiyari, tawarita warayexeiyaka 'ukitsi 'ukari.
GEN 11:22 Kepauka Tseruki xeitewiyari heimana tamamata wiyari mexeiyakai, niweya Nakuxi kaniutinuiwa.
GEN 11:23 Nakuxi 'utinuiwaku Tseruki kaniutihuni 'akuxi huta tsienituyari wiyari, tawarita warayexeiyaka 'ukitsi 'ukari.
GEN 11:24 Kepauka Nakuxi xeitewiyari heimana 'atanauka wiyari mexeiyakai, niweya Teraki kaniutinuiwa.
GEN 11:25 Teraki 'utinuiwaku Nakuxi kaniutihuni 'akuxi xeitsienituyari heimana tamamata heimana 'atanauka wiyari, tawarita warayexeiyaka 'ukitsi 'ukari.
GEN 11:26 Kepauka Teraki haika tewiyari heimana tamamata wiyari mexeiyakai, mekaniutinunuiwakaitɨniri niwemama 'Apɨrami, Nakuxi, Karani.
GEN 11:27 'Ikɨ Teraki kemuyɨ 'ɨxatsieya kanihɨkɨtɨni, 'Apɨrami, Nakuxi meta Karani wapaapa. Karani Ruti pupaapayatɨkai,
GEN 11:28 Karani kaniumɨni 'Uxi karireutsixi wakwieyaritsie, matinuiwaxɨtsie, paapaya Teraki 'ayeyurikaku 'akuxi.
GEN 11:29 'Apɨrami Tsarahi kaniutiwitɨni, meta Nakuxi Mirika kaniutiwitɨni Karani niweya, mɨkɨ tawarita xeime 'uka kanayexeiya 'Itsika titewakame.
GEN 11:30 Perutsɨ Tsarahi pɨkaniwewekai, pɨkayɨwekai tɨɨri mɨwarayexeiya.
GEN 11:31 Teraki kanayeyani 'Uxi karireutsixi wakwieyaritsie Kanani 'uta'eriwatɨ. Yuniwe 'Apɨrami 'awitɨtɨ meta yuteukari Ruti, meta yumu'e Tsarahi 'Apɨrami 'ɨyaya. Peru Karani kiekariyaritsie me'u'axɨaka mana mekanikuyaxe,
GEN 11:32 mana Teraki kaniumɨni huta tsienituyari heimana 'auxɨwime wiyari hexeiyatɨ.
GEN 12:1 Merikɨtsɨ Yawé 'Apɨrami mɨpaɨ katiniutahɨawe: «Keneuku'eiri 'akwie, 'amarema meta 'apaapa kie, kenemie kemɨ'ane kwie nemɨmatsixeitsitɨanitsie.
GEN 12:2 »'Ekɨ 'ahetsie nuiwari mariweme nepɨnetɨani, 'aixɨa nepɨmatsiyurieni, 'aixɨa petikuxaxatsiwame nepɨmatsi'ayeitɨani, 'ahekɨ hipatɨta 'aixɨa mepɨ'itɨarieni.
GEN 12:3 Ne 'aixɨa nepɨwayurieka kemɨ'ane 'aixɨa memɨmatexeiyani, meta 'axanepɨwayurieni kemɨ'ane 'axamemɨmatsiyurieni. 'Ekɨ 'akɨmana 'aixɨa mepɨ'itɨarieka yunaitɨ nuiwarite kwiepa memɨtama».
GEN 12:4 Hikɨ 'Apɨrami kanayeyani, Yawé kemɨrehɨawekai, meta Ruti hamatɨana kaneyani. Kepauka mayetɨa 'Apɨrami Karani kiekariyaritsie haika tewiyari heimana tamamata heimana 'auxɨwime wiyari pexeiyakai.
GEN 12:5 Kepauka metɨa 'Apɨrami Kanani paitɨ, yu'ɨya pewitɨ Tsarahi, meta yumatsu Ruti, yaxeikɨa yunaime te'i'uximayatsiriwamete Karani mɨwarutinanekai, meta tita memɨtehexeiyakai. Kepauka Kanani memuye'axɨa,
GEN 12:6 'Apɨrami mana 'uyeyaka Tsikeni mɨrakutewatsiepai kaninuani, xiu manuwe mɨrayutimawatɨre Mure mɨrakutewatsie. 'Ana mana kananeutsixi mepɨtitekai mɨkɨ kwieyaritsie.
GEN 12:7 Mana Yawé 'Apɨrami mɨpaɨ katiniutahɨawe: «Ne 'ikɨ kwie 'anuiwarima nekaniwayetuiriemɨkɨ». Hikɨ mana 'Apɨrami tenutsari mawari wewiwame kaniutawewieni Yawé hetsiemieme, mana mitahɨawixɨkɨ.
GEN 12:8 Mana mɨyetɨa kaneyani muhɨriyatsie Weteri 'aurie, mana nuaka kaniuyutaxamarutɨani, Weteri tau makayuyuipike katini'anekaitɨni 'Ahi kiekariyarita tau manatineika. Manatatsiere tenutsari timawame kaniutawewieni, Yawé mahɨawenikɨ.
GEN 12:9 Manata mɨyetɨa 'Apɨrami 'axɨkai 'umietɨ 'uyerɨximetɨ Nekexi kwieyaritsie paitɨ kaniye'ani.
GEN 12:10 Hikɨ 'ana haakaxa kanayani waɨkawa 'Apɨrami manukateitsie, 'ayumieme kaneyani 'Ekipitu paitɨ.
GEN 12:11 Hikɨ kepauka 'Ekipitu meutahanikekai, mɨpaɨ yu'ɨya Tsarahi katiniutahɨawe: «Ne nepɨtimate 'ekɨ 'uka witsipepɨti'ɨimari.
GEN 12:12 Nepɨtimate kepauka memɨmatsihexeiya 'ekipitutari mɨpaɨ mepetiyuani: “Ti'a'ɨya 'ikɨ”, 'anari mekanenemiekuni, 'ekɨta mekamanehayewakuni.
GEN 12:13 Peru neuxei mɨpaɨ kenetayɨki ximɨxi kename ne'iwa pehɨkɨ, ne 'atsinemɨkaheku'itɨariwanikɨ 'ekɨ mɨpaɨ pehetayɨyu, nemɨkahekumemieriwanikɨ».
GEN 12:14 Kepauka meta'a 'Apɨrami 'Ekipitu kwieyaritsie, 'ekipitutari Tsarahi witsimekateniuxeiya.
GEN 12:15 Yaxeikɨata mekanixeiya, te'uximayatamete Parahuni hetsɨa miemete, hikɨ mekanekɨne meteheitaxatɨanike 'uka witsikemɨti'ɨimarikaikɨ. Hikɨ 'ayumieme kanewitɨkieni paratsiyu paitɨ.
GEN 12:16 Tsarahi hetsiemieme 'Apɨrami 'aixɨa mekateniuxeiya. Katiniyetuiriyarieni muxatsi, wakaitsixi, puxuri, kameyutsixi meta te'uximayatamete 'ukitsi 'ukari.
GEN 12:17 Perutsɨ Tsarahi hetsiemiemekɨ 'Apɨrami 'ɨyaya, Yawé Parahuni kaniu'uximatɨani meta yunaime tɨɨriyamama waɨkawa kwiniyakɨ.
GEN 12:18 'Ayumieme Parahuni pɨtiutanɨ'a, mɨwitɨkiemiekɨ 'Apɨrami, mɨpaɨ katinitahɨawe: «¿Titayari mɨya penetiuyuri? ¿Titayari mɨpaɨ pekanetiutahɨawixɨ kename 'ikɨ 'a'ɨyatɨkai?
GEN 12:19 ¿Titayari kename 'a'iwa petiutayɨ? Ketakuta matsi ne'itiwitɨnike. Hikɨri 'a'ɨya kenawitɨtɨ keneumieni».
GEN 12:20 Parahuni yuteɨterima kaniwaruta'aitɨani 'Apɨrami memayeweiyakɨ meta 'ɨyaya metatsiere tita mɨrexeiyakai.
GEN 13:1 Merikɨtsɨ 'Apɨrami kanayeyani 'Ekipitutsie yu'ɨya hawitɨtɨ meta yumatsu Ruti yunaitɨ, yunaime metewara'arietɨ yutewama, Nekexi mɨrakutewatsie me'erietɨ.
GEN 13:2 'Apɨrami pɨxikutɨkai tewaxi pɨwarexeiyakai, pɨrata pexeiyakai meta huru.
GEN 13:3 Kepaukata Nekexi kwieyaritsie mɨyetɨa, 'Apɨrami 'axɨkai kaneyani Weteri kanakunuani tatsɨari meripaitɨ matɨari manukateitsie Weteri meta 'Ahi wahixɨapa.
GEN 13:4 Mana meripaitɨ mawari taiyame mutawewiekaitsie, mana 'Apɨrami Yawé kaniutahɨawe.
GEN 13:5 Meta Ruti 'Apɨrami maweiyakai pukatewakai, muxatsi, wakaitsixi, meta waɨkawa 'ixuriki kiyari pexeiyakai.
GEN 13:6 Peru hakewa memakutekai pɨkawareunanakekai yuhutatɨ mana memɨtitenikɨ, memɨyuwaɨkawakaikɨ watewama.
GEN 13:7 'Ayumieme mekaniuyutikwitɨkɨne 'Apɨrami memɨtehɨiriekai meta Ruti tehɨwemetemama wahamatɨa. Metatsiere mana mekanikiekaitɨni 'ana kananeutsixi meta peretseutsixi.
GEN 13:8 Hikɨ 'Apɨrami mɨpaɨ Ruti katiniutahɨawe: «Pɨkaheuyewetse tame temɨtakwitɨweni, meta tateɨterima, hurawa temɨ'iwamarixikɨ.
GEN 13:9 Mana pukuma kwie 'apɨyewa. Nepɨmatsiwawirie nexaɨtame pemɨnetsihayewakɨ. Xɨka 'ekɨ peheyani ta'utata neta tatserieta nepɨyemie, xɨka tatserieta peheyani neta ta'utata nepɨyemie».
GEN 13:10 Ruti kananieretɨyani naitsarie, Kurutani 'utɨma muweritsie kaneuyeniere, naitɨ 'aixɨa katiniu'anekaitɨni Tsuhaxi paitɨ 'uyenieretɨ, 'aixɨa katiniuhaxiekaitɨni, Yawé harawerita hepaɨ meta 'Ekipitu kwieyaritsie hepaɨ. Mɨpaɨ katiniu'anekaitɨni mana Tsuruma meta Kumuxa kepauka Yawé mɨka'ika'unawekaitsie.
GEN 13:11 Hikɨ Ruti kaninakire hetsiena mieme mayanikɨ naitɨ haa Kurutani 'utɨma muyeweritsie, 'ayumieme kaneyani tau manatineika hepatsie. Mɨpaɨ mekateneuyutaxɨriexɨani 'Apɨrami meta Ruti.
GEN 13:12 'Apɨrami Kanani kwieyaritsie kaniuyuhayewa, Ruti kaneyani mayeweritsie kiekari makumanetsie, Tsuruma 'aurie kaniutayerɨni.
GEN 13:13 Teɨteri Tsuruma kiekatari 'axamekateniu'iyarikaitɨni, Yawé hepaɨtsita waɨkawa 'axamɨti'ane mekateniyuriekaitɨni.
GEN 13:14 'Arike Ruti 'Apɨrami 'uku'eirieku Yawé mɨpaɨ katinitahɨawe: «'Apɨrami 'aku, mana pemanuwetsie keneutanierixɨa, ta'utata, tatserieta, tayeta meta tatsutɨa.
GEN 13:15 Mɨkɨ nepɨmatsiyetuirieni meta 'anuiwarima yuheyemekɨ pemixeiya kwie naime.
GEN 13:16 Ne yumɨireme nepɨwarayeitɨani 'anuiwarima tumuanari hepaɨ. Xewitɨ xɨka tumuanari 'inɨataweni, kaniyɨwemɨkɨta 'anuiwarima mɨwati'inɨatakɨ.
GEN 13:17 Kenemie kenayekexiya 'ikɨ kwie kemayetewi meta kematayewa, ne nekamaniyetuiriemɨkɨ».
GEN 13:18 Hikɨ 'Apɨrami kaniuyupata kaneyani Hewuruni 'aurie paitɨ makuxiuya, Mamɨre 'iteɨrieya maku'u 'aurie. Manata mawari taiyame kaniutawewieni Yawé hetsiemieme.
GEN 14:1 Hikɨ 'ana tukaritsie te'aitamete: 'Amɨxaperi Tsinaxi kiekame, 'Ariuki 'Eratsaxi kiekame, Keruxirahumexi 'Erami kiekame, Tirari Kuyetihimi kiekame,
GEN 14:2 mɨkɨ mekaniwarutakwini te'aitamete: Wera Tsuruma kiekame, Wiritsa Kumuxa kiekame, Tsinawi 'Arimaha kiekame, Tsemewexi Tsewuhini kiekame, meta ti'aitame Tsuhaxi kiekame.
GEN 14:3 Mɨkɨ meyu'auxɨwitɨ me'uyutinɨka mepɨwarukuxeɨri yukuyaxima mayeweritsie Tsirini mɨrayetewatsie, metatsiere Haramara Mɨmɨki mɨtimatiwatsie.
GEN 14:4 Ti'aitame Keruxirahumexi tamamata heimana huta wiyari katiniwa'aitɨakaitɨni, tamamata heimana haika wiyaritsieke mewaraye'unietɨ mekanakɨne.
GEN 14:5 Xeiwiyari 'anuyeyaku, Keruxirahumexi meta hipatɨ te'aitamete memitinɨkai mekanayekɨne, mekaniwaruka'una xepahitsixi 'Atsitaruti-Karinahini kwieyaritsie meta mekaniwaruka'una tsutsitsixi Kami kwieyaritsie meta 'emitsixi Tsawe-Kiriyatahini kwieyaritsie,
GEN 14:6 yaxeikɨata hureutsixi Tsehixi hɨriyaritsie kiekatari, 'atsitapaitɨ Parani mekaniye'axɨani makumawe meuhuratsie.
GEN 14:7 Me'akunuaxɨaka 'Enimitsipati paitɨ mekaniye'axɨani, tatsɨari Karetsi mɨtiyetewatsie, 'amarekitsixi wakwie naime mepɨwarunawairi, 'amuxeutsixi wakwietsie mekaniye'axɨani Katsetsuni-Tamaxi kwieyari mekaniwarunawairieni.
GEN 14:8 Hikɨ Tsuruma te'aitamete, Kumuxa kiekame, 'Arimaha kiekame, Tsewuhini kiekame, meta Wera kiekame, tatsɨari Tsuhaxi manuyɨne, mekanayekɨne mayeweritsie Tsirini mɨtiuyetewatsie muwa mekaniwarutakwini,
GEN 14:9 te'aitamete, Keruxirahumexi 'Erami kiekame, Tirari Kuyehini kiekame, 'Amɨxaperi Tsinaxi kiekame, meta 'Ariuki 'Eratsaxi kiekame. Mekaniyunaukakaitɨni yu'auxɨwime mewaraye'unietɨ.
GEN 14:10 Mayeweritsie Tsirini putsu puxuawekai waɨkawa kwetsɨka mɨyɨwi 'uyemanetɨ, kepauka memeuyuta'unaxɨa te'aitamete Tsuruma kiekame meta Kumuxa kiekame, muwa mekaneukaxɨrieni, hipatɨ xeikɨa mekaniuyɨwekaxɨani mekaniuyuta'una hɨritsie paitɨ.
GEN 14:11 Mɨkɨ memɨte'ayu'iwaxɨ, Tsuruma meta Kumuxa timieme mekateniunawani naime tewaxi, meta wa'ikwaite, mɨpaɨ mete'uyurieka mekanekɨne.
GEN 14:12 Ruti mana mukateikɨ Tsuruma kiekariyaritsie 'Apɨrami matsuya, mɨkɨta mekanehana meta yunaime tewamama.
GEN 14:13 Perutsɨ xewitɨ 'uyuta'unaka, 'Apɨrami hepɨrayu tewiyari katinekuxatɨani kemɨtiuyɨ, Mamɨre 'amuxeu tewiyari xiuya makuma mukateikɨ. Mamɨre pɨ'iwayatɨkai 'Etsikuri meta 'Anexi, mɨkɨ 'Apɨrami matɨa mekaniyu'eniekaitɨni.
GEN 14:14 Hikɨ kepauka 'Apɨrami 'amɨtiutaxatɨarie kename matsuya hehanie, kaniwaruta'inieni haika tsienituyari heimana tamamata heimana 'atahaika teɨteri me'u'ixiparame kiena memutinunuiwaxɨ xeikɨa, hikɨ mekaniwaranukuweiya Rani kwieyaritsie paitɨ.
GEN 14:15 Yɨwikɨta 'Apɨrami yuteɨterima yunaitɨ mekaniwarutakwini mekaniwara'iwa, mekaniwaranukuweiya Huwa mɨtiyetewatsie paitɨ Ramatsiku yeta.
GEN 14:16 Mɨpaɨ mekateniwarunawairieni tinaime, metatsiere yumatsu Ruti kaniutawikweitsitɨani meta tinaime piiniteya, hipame 'ukarawetsixi meta hipame teɨteri.
GEN 14:17 Kepauka 'Apɨrami makunua ti'aitame Keruxirahumexi ha'iwaka meta hipame te'aitamete memeweiyakai, ti'aitame Tsuruma kiekame neikunake mayeweritsie Tsawe meta Ti'aitame mɨrayetewatsie.
GEN 14:18 Meta Merikitsereki, ti'aitame Tsareme kiekariyaritsie meta mawari wewiwame Kakaɨyari 'Amutewi hetsiemieme, paa meta winu kanimini.
GEN 14:19 Hikɨ Kakaɨyari kaniutawawirieni 'Apɨrami 'aixɨa muyurienikɨ, mɨpaɨ 'utaitɨ: «Kakaɨyari 'Amutewi, muyuawi mutawewi meta kwie, 'Apɨrami 'aixɨa keyurieka.
GEN 14:20 Kakaɨyari 'Amutewi naimekɨmɨyɨwe pamɨpariyutsi nekanipitɨaka, mɨmatsi'uparewi memɨmatsi'aye'unie pemɨwara'iwakɨ». Hikɨ 'Apɨrami pɨtiyetuiri, tamamatatsie timieme xeime naime.
GEN 14:21 Ti'aitame Tsuruma kiekame, mɨpaɨ 'Apɨrami katiniutahɨawe: —Neteɨterima keneneyetuiri, piinite ketinapitɨ.
GEN 14:22 'Apɨrami mɨpaɨ katinita'eiya: —Yawé hɨxie mɨpaɨ neputayɨ, Kakaɨyari 'Amutewi, muyuawi mutawewi meta kwie,
GEN 14:23 kename nitixaɨtɨ nekaranupini mɨti'apiini, hiru tɨma, nawi kakaitsie mieme tɨma. Mɨpaɨ hatsuaku pepɨkayɨwe mɨpaɨ pemɨtayɨni: “Ne 'Apɨrami xiku nepeyeitɨa”.
GEN 14:24 Ne tixaɨtɨ nepɨkareuyehɨwa nehetsiemieme, hɨrixɨatsɨ neteɨterima memɨte'utikwai. Meta memɨnetsi'aweiya 'Anexi, 'Etsikuri meta Mamɨre, mɨkɨ hɨrixɨa mekete'utipini yuhetsiemieme.
GEN 15:1 Hikɨ mɨpaɨri tiɨyɨku, Yawé 'Apɨrami kaniutahɨawe heinɨtsika hepaɨ tiyuxexeiyamekɨ: «'Apɨrami, pepɨkaheumaka. Ne 'ahetsie nunuwame nekanihɨkɨtɨni, kenemɨmatiyetuirieni waɨkawa katinayeimɨkɨ».
GEN 15:2 Hikɨ 'Apɨrami mɨpaɨ katinita'eiya: —Yawé nekakaɨyari, ¿titayari 'imikieri penetiyetuirieni, ne nunutsi 'akuxi nepɨkahexeiya, tita nemɨrexeiya neti'uximayatsiriwame 'Eriyetsexi Ramatsiku kiekame tipiinieya katinayeimɨkɨ?
GEN 15:3 Xeimetɨma nunutsi pemɨkanetsiyetuiriewekɨ, xewitɨ netsiparewiwame nepiinite katinanupimɨkɨ.
GEN 15:4 Yawé mɨpaɨ katinitahɨawe: —Hawaikɨ mɨkɨ tewi 'apiinite mɨranupini pɨka'ayani, 'apiinite mɨranupini yurikɨ 'aniwe pɨyɨaneni.
GEN 15:5 Hikɨ Yawé kanenuyewitɨni takwa paitɨ, mana mɨpaɨ katinitahɨawe: —Muyuawitsie keneutinieri, keniwaruti'inɨata xurawetsixi, xɨka peyɨweni pemɨwaruti'inɨata. Mɨpaɨ mekaniyupaɨmekakuni 'anuiwarima.
GEN 15:6 'Apɨrami Yawé yuri pɨtiuta'eriri, 'ayumieme Yawé mɨkɨ heitserie hexeiyame kanayeitɨani.
GEN 15:7 Mɨpaɨta katinitahɨawe: —Ne Yawé nekanihɨkɨtɨni, nemɨmatsi'ayewitɨ 'Uxi karireutsixi wakwieyaritsie nemɨmatsiyetuirienikɨ 'ikɨ kwie.
GEN 15:8 Perutsɨ 'Apɨrami mɨpaɨ katinita'iwawiya: —Yawé neti'aitɨwame, ¿kehepaɨ neretimani kename penetsiyetuirieni?
GEN 15:9 Yawé mɨpaɨ katinita'eiya: —Kenene'atɨiri xeime wakaxi, xeimeta kapura, xeimeta tuuru muxa yunaitɨ haika wiyari mehɨtɨkaime, yaxeikɨata xeime haɨmɨ 'amɨnena xeimeta kukuru yakɨmɨnena.
GEN 15:10 'Apɨrami 'ikɨ naime katini'atɨirieni, hixɨata kaniwaxitexɨani, huhutatame 'anuyutaxeiyatɨkaime katiniuyatsa, peru pɨkawarutixite memawɨwawe.
GEN 15:11 Hikɨ wirɨkɨxi mekani'axekaitɨni wahetsie memɨkwikwi'ikaikɨ, matsi 'Apɨrami kaniwatatuaxakaitɨni.
GEN 15:12 Kepauka kɨyɨrirumekakɨ, 'Apɨrami kaniukumɨni, yapauka yɨriya kananukateni hetsiena, hikɨ kanimakaitɨni.
GEN 15:13 Yawé mɨpaɨ 'Apɨrami katiniutahɨawe: —Mɨpaɨ ketinemaika 'anuiwarima xeime kwieyaritsie mepɨtiteni yapaɨmexɨa, mana mepɨteta'aitɨarieni, menanaimarietɨ, nauka tsienituyari wiyari.
GEN 15:14 Peru neta yaxeikɨa nepɨwa'uximatɨani mɨkɨ teɨteri memɨtewata'uximayatsitɨani, 'ana mepayekɨne 'anuiwarima metixɨnarieme, waɨkawa mɨraye'atɨka mete'upitɨ.
GEN 15:15 'Ekɨta pekanikumawerimɨkɨ peka'uximatɨarietɨ, waɨkawa pe'ukiratsitɨtɨke pekanimɨmɨkɨ.
GEN 15:16 Nauka nuiwariyari me'anuyeyayu, waxiɨyarima 'ena mekani'axɨakuni, hikɨ 'ena memɨtama 'amuxeutsixi 'axamekateniu'iyarini 'ana nekaniwarakumaweriyamɨkɨ.
GEN 15:17 Kepauka tau makayunixɨ, kepauka mukuyɨrixɨ, kaniuhekɨare huxunu hepaɨ 'anetɨ kɨtsi watiwietɨ, meta tai mana puyewiekai, mɨkɨ tewaxi memɨxitekietɨka wahixɨata mekaniuyekɨkakaitɨni.
GEN 15:18 Mɨkɨ tukaritsie Yawé 'Apɨrami hetsɨa tɨratu kaniuwewieni. Mɨpaɨ katinitahɨawe: —'Ikɨ kwie nepɨwayetuirieni 'anuiwarima, haa 'Ekipitu mieme manuyeka, meta 'amɨpa manuyekatsie paitɨ 'Eupɨrate mɨtitewatsie.
GEN 15:19 Keni teɨteriyari wakwie nekanixatani, meta kenitsixi, karimuneutsixi,
GEN 15:20 hetitsixi, peretseutsixi, xepahitsixi,
GEN 15:21 'amuxeutsixi, kananeutsixi, keriketseutsixi meta kewutseutsixi wakwie.
GEN 16:1 Merikɨtsɨ Tsarahi 'Apɨrami hamatɨa nunutsi mepɨkahexeiyakai. Tsarahi xeime pexeiyakai 'uka ti'uximayatame 'ekipitutanaka Hakari titewakame,
GEN 16:2 hikɨ Tsarahi mɨpaɨ katinitahɨawe yukɨna: —Yawé pɨkanetsipitɨawe nunutsi nemayexeiyakɨ. 'Ayumieme, keneukahu'i neti'uximayatsiriwame Hakari hamatɨa. Heiwatɨ mɨkɨ 'utiniweni neniwema memakɨnekɨ. 'Apɨrami yakatiniutanaki'erieni 'ɨyaya kemɨrehɨawekai.
GEN 16:3 Hikɨ Tsarahi tiyu'uximayatsiriwame 'ekipitutanaka Hakari 'uwiyaka, 'Apɨrami kaniyetuirieni mɨ'ɨyayatɨnikɨ. Mɨpaɨ katiniuyɨni kepauka 'Apɨrami tamamata wiyari muyuriekai Kanani kwieyaritsie.
GEN 16:4 'Apɨrami Hakari hamatɨa kaniukahuni, mɨkɨ kaniutihukata. Kepauka Hakari mɨretima kename 'ayehukakai, kaniyuti'ɨretɨyani yukutsiyari Tsarahi hɨxie.
GEN 16:5 Hikɨ Tsarahi 'Apɨrami mɨpaɨ katiniutahɨawe: —'Ekɨtsɨ ya'anekame pekaniwiwieka kenemɨtinanaimarie. Ne nepɨmatsiyetuiri ti'uximayatame 'a'ɨya mayanikɨ, hikɨri mayehuka mariweme kanayuyeitɨwani. Yawé yake'utayɨni kemɨ'ane heitserie mexeiya, xɨka 'ekɨ yatɨni ne.
GEN 16:6 'Apɨrami mɨpaɨ katinita'eiya: —'Ekɨ heitserie pepexeiya ti'uximayatame pemɨti'aitɨakakɨ, ketine'aitɨaka kemɨmatinake kehepaɨ 'aixɨa mɨ'ane. Hikɨ Tsarahi waɨkawa kaniti'uximatɨatɨyani, 'ana Hakari kaniuyuta'una makumawetsie paitɨ.
GEN 16:7 Mana niuki tuayame Yawé hetsɨa mieme kanitaxeiya, haixa matinieretsie huye Tsuhuxi mieme manuyehanetsie
GEN 16:8 mɨpaɨ katinita'iwawiya: —Hakari, Tsarahi ti'uximayatsiriwame, ¿hakewa pepeyetɨa, hakewa pepeutɨa? Hakari mɨpaɨ kaniutayɨni: —Nepeyuta'unaxɨ nekutsiyari Tsarahi hetsɨa.
GEN 16:9 Niuki tuayame mɨpaɨ katinitahɨawe: —Kenakunua hetsɨana, yaketinekamieni kemɨmare'aitɨa.
GEN 16:10 Yaxeikɨata 'anuiwarima nepɨwatimɨiriya, xewitɨ pɨkayɨweni mɨwaruti'inɨata.
GEN 16:11 »Hikɨri pemayehuka xeime nunutsi 'uki pekanayexeiyamɨkɨ, 'Itsimaheri pekatiniterɨwamɨkɨ, Yawé mi'enikɨ 'ahiwerika.
GEN 16:12 Tewi mɨkatiyu'aitɨarinɨa kanayeimɨkɨ, puxu tsimaruni hepaɨ. Yunaime kaniwatakwimɨkɨ, yunaitɨta mekanitamiekuni, yu'uximatɨatɨ puyeikani yu'iwama yunaime wahamatɨa».
GEN 16:13 Yawé Hakari mɨtiutaxatɨakɨ mɨpaɨ pɨtiterɨwaxɨ «Kakaɨyari pemɨniere». Mɨpaɨ mutainekaikɨ: «Hikɨ nepixei kemɨ'ane mɨnetsixeiya».
GEN 16:14 'Ayumiemeta mɨpaɨ pɨtitewa putsu Karetsi Wereri wahixɨapa mɨtiniere «Kakaɨyari mayeyuri putsuya mɨnetsixeiya».
GEN 16:15 Hakari xeime nunutsi kaniutiniweni 'Apɨrami niweyatɨme, 'Apɨrami mɨkɨ 'Itsimaheri katiniuterɨwa.
GEN 16:16 'Apɨrami nauka tewiyari heimana 'ataxewi wiyari kanexeiyakaitɨni kepauka 'Itsimaheri mutinuiwaxɨtsie.
GEN 17:1 Kepauka 'Apɨrami nauka tewiyari heimana tamamata heimana 'atanauka wiyari mexeiyakai, Yawé mɨpaɨ katinitahɨawe: «Ne Kakaɨyari Naimekɨmɨtɨrɨkaɨye nekanihɨkɨtɨni, nehɨxie keneuyeikani 'aixɨa ketineyurienetɨ.
GEN 17:2 Mɨpaɨ nepeye'atɨani 'ahetsɨa tɨratu meta yumɨireme nepɨwarayeitɨani 'anuiwarima».
GEN 17:3 Hikɨ mɨpaɨ tiu'enaka 'Apɨrami, kwiepa kaniukahɨximakeni, Kakaɨyari 'akuxi kaniyeweiyakaitɨni tikuxatatɨ:
GEN 17:4 «'Ikɨ tɨratu 'ahamatɨa nekaniwewieka: 'Ekɨ yumɨireme nuiwarite wapaapa pekanayeimɨkɨ.
GEN 17:5 Hikɨri 'Apɨrami pepɨkatitewaka, matsi pɨtari 'Apɨrahami pepɨtitewaka, mɨpaɨ nemɨmarahɨawekɨ kename yumɨireme nuiwarite wapaapa nematsi'ayeitɨani.
GEN 17:6 Kwinimieme petixiɨweme nepɨmatsi'ayeitɨani 'ahetsie mepɨyekɨne te'aitamete meta nuiwarite.
GEN 17:7 'Ahetsiemieme 'ikɨ tɨratu nepɨwewie meta 'anuiwarite wahetsiemieme, 'ikɨ tɨratu yuheyemekɨ mieme payani, yunaime 'anuiwarima wahetsiemieme. Ne 'akakaɨyari nepɨhɨkɨtɨni, meta 'anuiwarima wakakaɨyari.
GEN 17:8 'Ekɨ meta 'anuiwarima nepɨxeyetuirieni naime Kanani kwieyari, yuheyemekɨ mɨxekwietɨnikɨ, hakewa hikɨ xeme'uwa teewatari wahepaɨ xe'anetɨ. Neta xekakaɨyari nepɨhɨkɨtɨni».
GEN 17:9 Kakaɨyari 'Apɨrahami mɨpaɨ katiniutahɨawe: «Netɨratu xekenaye'atɨa, 'ekɨ meta yaxeikɨa 'anuiwarima yuheyemekɨ.
GEN 17:10 'Ikɨ kanihɨkɨtɨni tɨratu 'ahamatɨa nemiwewie meta 'anuiwarima wahamatɨa, meta yunaitɨ xemeye'atɨanikɨ: Yunaitɨ 'ukitsi xitekiya 'inɨariyari meke'uwewiyarieni.
GEN 17:11 Yuwaiyaritsie xitekiya 'inɨariyari xepɨwewieni, mɨkɨ pɨ'inɨaritɨni tɨratu kenemɨtiwewie ne xehamatɨa.
GEN 17:12 Hikɨ 'ena mɨtiyehane memɨtinunuiwa yunaitɨ xitekiya 'inɨariyari mekekuwewiyarɨwani 'atahaika tukaritsie, meta yunaitɨ tɨɨri 'akie memɨtinunuiwa, meta nanaiyakate teɨteri tsepa xenuiwarima wahetsiemieme mekahɨkɨ.
GEN 17:13 Yunaitɨ xewitɨ pɨkayukuhayeikawani, 'akie memɨtinunuiwa meta kemɨ'ane pemɨwatinawe, xitekiya 'inɨariyari meke'uwewiyarieni. Mɨpaɨ pɨtiyuhayewa netɨratu xewaiyaritsie kayeiwetɨ, tɨratu yuheyemekɨ mɨhɨkɨkɨ.
GEN 17:14 Merikɨte kemɨ'ane mɨka'inɨaritɨarieni, yuwaiyaritsie mɨka'uxitekieni, mɨkɨ pukumaweriyarieni xehetsɨa. Yamɨkatikatɨakɨ netɨratu kemaine».
GEN 17:15 Mɨpaɨtatsiere Kakaɨyari 'Apɨrahami katiniutahɨawe: «Tsarahi 'a'ɨya, Tsarahi pepɨkatiuterɨwaniri, Tsara pɨta pɨtitewaka.
GEN 17:16 Ne 'aixɨa nepiyurieni, nunutsi xeime nepɨxeyetuirieni. Waɨkawa 'aixɨa nepiyurieni, mɨkɨ yumɨireme nuiwarite wamaama payani, hetsiena mepɨyekɨne te'aitamete kiekaritsie memɨteta'aitaxɨani».
GEN 17:17 Hikɨ 'Apɨrahami kaniutihɨximakeni kwiepa kaniutananeni mɨpaɨ tiku'eriwatɨ: «¿Kamɨtsɨ tiyɨwe 'uki nunutsi mayexeiya xeitsienituyari wiyari hexeiyatɨ, meta tiyɨwe mɨtiniweni Tsara nauka tewiyari heimana tamamata wiyari hexeiyatɨ?»
GEN 17:18 'Ayumieme 'Apɨrahami Kakaɨyari mɨpaɨ katiniutahɨawe: —'Itsimaheri 'aixɨa pe'iyuriekaku ke'uyeikani.
GEN 17:19 Kakaɨyari mɨpaɨ katinita'eiya: —Tsara nepɨxata 'a'ɨya xeime nunutsi payexeiya 'aniwetɨme, 'Itsahaki pekatiniterɨwamɨkɨ. Mɨkɨ hamatɨa netɨratu payeyurini meta nuiwarimama wahetsɨa, tɨratu yuheyemekɨ mieme mɨhɨkɨkɨ.
GEN 17:20 'Itsimaheri hetsiemiemeta nepɨmatsi'enie. Ne 'aixɨa nepiyurieni, waɨkawa mɨiriweme nepayeitɨani, yuwaɨkawa nuiwarimama nepɨwarayeitɨani. Tamamata heimana huta te'aitamete wapaapa kanayeimɨkɨ. Hetsiena nuiwari mariweme nekaninetɨamɨkɨ.
GEN 17:21 Matsi netɨratu 'aniwe 'Itsahaki hetsie kanayeyurikamɨkɨ, Tsara peyexeiya yurika 'epauka xeiwiyari 'anuyeyayu.
GEN 17:22 Kepauka Kakaɨyari mɨtiutahayewaxɨ 'Apɨrahami hamatɨa tikuxatatɨ kaniukumawere hɨxiena.
GEN 17:23 Mɨkɨ tukaritsie kwitɨwa 'Apɨrahami yuniwe 'Itsimaheri xitekiya 'inɨariyari kaniwewirieni, meta kiena memutinunuiwakai metatsiere muwarutinanekai, meta hipame 'ukitsi kiena memɨtitekai yunaime, Kakaɨyari kemɨre'aitɨwakai.
GEN 17:24 Nauka tewiyari heimana tamamata heimana 'atanauka wiyari pexeiyakai, 'Apɨrahami kepauka xitekiya 'inɨariyari muwewiyarie,
GEN 17:25 nu'aya 'Itsimaheri tamamata heimana haika wiyari kanihɨkaitɨni.
GEN 17:26 Meta 'Apɨrahami yuniwematɨ yunaitɨ xitekiya 'inɨariyari mekaniuwewiyarieni mɨkɨ tukaritsie
GEN 17:27 yunaitɨ meyunɨtɨ 'ukitsi wahetsɨa kiekatari, meta memutinunuiwaxɨ wahetsɨa, meta nanaiyakate teewatari waniwema.
GEN 18:1 Merikɨtsɨ Yawé kaniuyuhekɨata 'Apɨrahami hetsɨa Mamɨre makuxiuyatsie, 'Apɨrahami 'ixuriki kiiyari hɨxie 'uxipiekaku tuka 'uxɨkakaku.
GEN 18:2 Hikɨ 'Apɨrahami kepauka manukunierixɨ, yuhaikame 'ukitsi kaniwaruxeiya yateewa meti'ukame. Waruxeiyaka kaniutanautsa yuxamaru hɨxie tikeka watahɨaweke. Wahɨxie 'utihɨximakeka,
GEN 18:3 mɨpaɨ kaniutayɨni: —Neti'aitɨwame, xɨka yapera'eriwani, yemekɨ nepɨmatsiwawirie ne'aurie xeikɨa pemɨka'uyeyeikanikɨ.
GEN 18:4 Haa nepɨta'aita kɨmana yu'ɨkate xemɨtihauxinikɨ, 'anake xepɨka'uxipieni 'ikɨ kɨye 'etɨpiwari hetɨa.
GEN 18:5 Tixe'uximayatsiriwame manukatsie xemɨye'axɨakɨ, 'ikwai nekanita'aitamɨkɨ 'aixɨa xeteheu'erietɨ xemɨyehukɨ kexemɨtehu. Mɨkɨ mɨpaɨ mekaniutiyuani: —Kamɨtsɨ 'aixɨa pɨ'ane, mɨpaɨ ketineuyuri.
GEN 18:6 'Apɨrahami kaneyani yapauka Tsara 'ixuriki kiiyarita, hikɨ mɨpaɨ Tsara katiniutahɨawe: —Mexɨiwa 'aixɨa. Harina 'aixɨa mɨ'ane xeitewiyari kiruyari keneuhawiya, paa keneutiwewi.
GEN 18:7 Meta 'Apɨrahami kaneyani 'unautsarɨmetɨ hakewa tewaxi memeyenakai, muwa xeime tsikeru kaniwayehana waiyakame waiyarieya mɨkatse'i, ti'uximayatame kaniyetuirieni, mɨkɨta mexɨima kanitawarɨka.
GEN 18:8 Hikɨ katiniwarumini kunerekɨ retsikɨ meta tsikeru warɨkariyarikɨ. Kepauka memɨtekwakai 'Apɨrahami kɨyetɨa kaniuwekaitɨni wa'aurie.
GEN 18:9 —¿Hakewari 'a'ɨya, Tsara? 'Apɨrahami mɨpaɨ katiniwaruta'eiya: —Huma payeka 'ixuriki kiiyarita.
GEN 18:10 Hikɨ xewitɨ mɨpaɨ katinitahɨawe: —Xeiwiyari 'anuyeyayu tawarita nepɨmatsiha'iwatamie, 'ana 'a'ɨya Tsara nunutsi kanexeiyakamɨkɨ. Tsara kanita'enakaitɨni yu'ixuriki kiiyari hɨxie, mɨyamɨtikuxatakai waritana yateewa pɨti'enakai.
GEN 18:11 'Apɨrahami Tsara hamatɨa mepɨ'ukirawetsixitɨkai, Tsara mɨtihukata pɨkayɨwekairi.
GEN 18:12 'Ayumieme, Tsara kaniutananeni mɨpaɨ tiku'eriwatɨ: «Pɨkayɨwe nemuyutemawieka mɨyamɨraniuwakɨ, neri 'ari nepɨkayɨwe, nekɨnatari pɨ'ukiratsi».
GEN 18:13 Hikɨ Yawé mɨpaɨ 'Apɨrahami katiniutahɨawe: —¿Titayari Tsara tiutanawe? ¿Kamɨtsɨ yurikati'erie mɨtiniwenikɨ mɨyayumaitɨ?
GEN 18:14 ¿Kamɨtsɨ Yawé hepaɨtsita tixaɨtɨ tixuawe katiyɨwetɨ? Yurika nekanayenemɨkɨ 'epauka, 'ana Tsara nunutsi kanexeiyakamɨkɨ.
GEN 18:15 Tsara kaniutimani, katini'itaiya mɨpaɨ katinitahɨawe: —Nematsi nepɨka'utanawekai. Peru Yawé tawarita mɨpaɨ katinitahɨawe: —Huu, peputananai.
GEN 18:16 Hikɨ mekananuku'uni 'iwatamete mekanekɨne Tsuruma hepatsie. 'Apɨrahami wahamatɨa kaneyani waretateutɨanike.
GEN 18:17 Yawé mɨpaɨ katiniku'eriwakaitɨni: «¿Nekapɨtitaxatɨani 'aumɨ 'Apɨrahami kenemɨtiyurieni?
GEN 18:18 'Apɨrahami nuiwarieya mariwetɨ payani meta tɨrɨkaɨyetɨ, mɨkɨ kɨmana yunaitɨ nuiwarite kwiepa memɨtama 'aixɨa mepɨ'itɨarieni.
GEN 18:19 Ne nepenayexei yuniwema muwata'ɨxatsitɨanikɨ meta watɨɨriyama, Yawé huyeya'utɨa memuhunikɨ, yamemɨteyuriekakɨri tita 'aixɨa mɨti'ane tita mɨtiheitserie. Hikɨ mɨpaɨ me'anekaku Yawé pɨraye'atɨani 'Apɨrahami kemɨtiutahɨawixɨ».
GEN 18:20 Hikɨ 'ayumieme Yawé 'Apɨrahami mɨpaɨ katiniutahɨawe: —Nepɨka'inewieri hiwerika Tsuruma Kumuxa wahepaɨtsita mieme, waɨkawa 'axamepɨteyurie.
GEN 18:21 'Ayumieme nepɨnierimie, xɨka 'aku yuritɨni 'axamete'u'iyarini kememutiyuane memutitsuana, yatɨ pɨtikatixaɨ nekatinetimaimɨkɨ.
GEN 18:22 Yuhutatɨ 'iwatamete xeikɨa mekanekɨne Tsuruma, 'Apɨrahami 'akuxi kaniuyuhayewa Yawé hamatɨa.
GEN 18:23 Hikɨ 'Apɨrahami Yawé hɨxie hurawa kaniuyani mɨpaɨ katinitahɨawe: —¿Kamɨtsɨ yurikɨ petika'una heitseriemekɨ yamɨtikamie 'axamɨtiyuriene hamatɨa?
GEN 18:24 Mɨkɨ kiekaritsie xɨka me'u'uwani huta tewiyari heimana tamamata heitseriemekɨ yamemɨtekahu. ¿Yunaime petiwaka'una, pekareiyehɨwirieni kiekari pewanaki'erietɨ heitserie memexeiya?
GEN 18:25 Mɨpaɨ pemɨtiyurieneni matsi 'aixɨa pɨka'ane. Heitseriemekɨ yamɨtikamie xɨka 'umieni 'axamɨtiyuriene hamatɨa meta yaxeikɨa memɨte'anuyehuni yunaitɨ. Mɨpaɨ matsi hatsuaku pepɨkatiyurieneni. 'Ekɨ 'itsɨkame pekanihɨkɨtɨni 'ikɨ kwie naime hetsiemieme. ¿Tamɨ kemɨtiheitserie pekatiyurieni?
GEN 18:26 Yawé mɨpaɨ katinita'eiya: —Xɨka huta tewiyari heimana tamamata heitserie yamemɨtekahu Tsuruma kiekariyaritsie newarukaxeiya, wahetsiemieme kiekari naime nekatineuyehɨwiriemɨkɨ.
GEN 18:27 'Apɨrahami mɨpaɨ katinitahɨawe: —Ne nepɨnemate kenetineuyehɨwirieka kwinimieme nematiku'iwawiyakɨ neti'aitɨwame, ne tumuanari naxi nepɨhɨkɨ.
GEN 18:28 Peru xɨka meheuyewekake yu'auxɨwitɨ mema'atɨkɨnekɨ huta tewiyari heimana tamamata. ¿Petika'una naime kiekari yu'auxɨwitɨ memeuyewetsekɨ? Yawé mɨpaɨ katinita'eiya: —Xɨka huta tewiyari heimana yu'auxɨwime newaretaxeiya heitserie memexeiya nepɨka'ika'una.
GEN 18:29 'Apɨrahami tawarita mɨpaɨ kaniutayɨni: —Keri xɨka huta tewiyari xeikɨa pewaretaxeiya. Yawé mɨpaɨ katinita'eiya: —Heitserie memexeiya mɨkɨ huta tewiyari meyupaɨmemekɨ nepɨka'ika'una kiekari.
GEN 18:30 'Apɨrahami tawarita mɨpaɨ kaniutayɨni: —Pepɨkaha'aka neti'aitɨwame, matsi kenenepitɨaka nemɨtikuxatanikɨ. Keri xɨka xeitewiyari heimana tamamata xeikɨa pewaretaxeiya. Yawé mɨpaɨ katinita'eiya: —Nepihayewa xeitewiyari heimana tamamata wahetsiemiemekɨ.
GEN 18:31 'Apɨrahami tawarita mɨpaɨ kaniutayɨni: —Kenetineuyehɨwirieka mɨya nematikuxaxatɨwakɨ neti'aitɨwame, peru xɨka pewaretaxeiya xeikɨa xeitewiyari heitserie memexeiya. Yawé mɨpaɨ katinita'eiya: —Mɨkɨ xeitewiyarikɨ nepɨka'ika'una.
GEN 18:32 Mɨkɨ tawarita mɨpaɨ katinitahɨawe: —Pepɨka'uyeha'arɨweni neti'aitɨwame, keneneupitɨa tawarita nemɨtaniunikɨ. Xɨkata tamamata pewaretaxeiya xeikɨa. Yawé 'imatɨrieka mɨpaɨ katinitahɨawe: —Mɨkɨ tamamata wahekɨ nepɨka'ika'una.
GEN 18:33 Kepauka mɨtiutahayewaxɨ Yawé tikuxatatɨ kaneyani, 'Apɨrahami meta kanakunuani yukie 'ixuriki kiiyarita.
GEN 19:1 Merikɨtsɨ kanikuyɨrirɨmekaitɨniri kepauka niuki tuayamete Tsuruma memɨye'axɨa. Ruti kiekari kitenie kanakateitɨni mɨranutakɨkatɨretsie. Kepauka mɨkɨ mɨwaruxei, kananukukeni watahɨaweke, wahɨxie kwiepa kaniukahɨximakeni.
GEN 19:2 Mɨpaɨ katiniwarutahɨawe: —Neuxei 'iwatamete, nepɨxewawirie waɨkawa 'ikɨ tɨkaritsie nekiita xemuyuhayewanikɨ. Muwa yɨ'ɨkate xemetihauxini peyɨwe, 'uxa'akeri ximeri xekaniyehuni kexemɨtehu. Peru mɨkɨ mɨpaɨ mekaniutiyuani: —'Aixɨa pɨ'ane mɨyapemɨtarahɨawe, matsi tame kiekari hixɨapa teɨteri memayutixexeɨriwatsie tepetiheni.
GEN 19:3 Peru Ruti katihayewakaku yukie wa'inietɨ mepekɨ 'utɨmana, kiitana mekaniu'axɨani. Ruti wa'ikwai muwa putiwarukawewiri 'aixɨa ti'anekame, paa mɨkakuxanariyarietɨka kaniutikwaxiya, mɨkɨ mekateniukwani.
GEN 19:4 Hikɨ mekakakutsiwawekaku 'akuxi, kii 'aurie mekanaketɨkɨne teɨteri mana Tsuruma kiekariyaritsie kiekatari. Yunaitɨ teɨteri kiekatari mekaniyɨakaitɨni xewitɨ tɨma kayuhayewatɨ, temari 'ukirawetsixi yunaitɨ mekateniyɨakaitɨni.
GEN 19:5 Ruti mekanewaye'inieni, mɨpaɨ mekatenitahɨawe: —¿Hakewari 'ukitsi memu'axɨa 'akie metihenike? Keniwarayenɨ'a. Tame wahamatɨa tepɨkahini.
GEN 19:6 Hikɨ Ruti yukiita hewayeyaka, reunaka kitenie,
GEN 19:7 mɨpaɨ katiniwarutahɨawe: —Neuxei nehamikuma, mɨpaɨ xepɨkayɨaka.
GEN 19:8 Ne yuhutame nepɨwarexeiya neniwema 'ukari 'ɨimarixi 'akuxi, nekaniwarayenɨ'amɨkɨ tsepa kexemɨwayuriku mɨkɨ, peru 'ikɨ 'ukitsi 'axaxepɨkawayurieka, mɨkɨ mekaniu'axɨani nekiita memayehenikɨ.
GEN 19:9 Peru mɨkɨ mɨpaɨ mekatenita'eiya: —Mana keneukuye'a. 'Ikɨ 'ena pɨkakiekame, hikɨta tati'aitɨamɨkɨ. Hikɨtsɨari matsi 'ekɨ kwinimieme 'axatekamaniyuriekakuni 'ena mɨtiyehane pemɨkawatauniekɨ. Hikɨ Ruti mekaneukutaima hurawa kitenie mekaniuti'uni 'itupari meheu'unake.
GEN 19:10 Peru memuyuhuta 'ukitsi yumamate mekaniutitsera, Ruti mekaneutahana kiitana meta mekateneunani kitenie.
GEN 19:11 Hikɨ mɨkɨ, 'itupari memeu'unakai temari 'ukirawetsixi mekaheunenieretɨ mekanayeitɨarieni, kitenie hakewa mehɨkɨtɨkai mepɨka'itaxeiri.
GEN 19:12 Hikɨ Ruti mɨpaɨ mekateneye'eritɨani: —¿Tawarita 'atɨɨriyama pekatiwarexeiya 'ena? Keniwaranuwitɨki xaɨtsie yunaime 'amunema, 'aniwema 'ukitsi meta 'ukari, yunaime kemɨ'ane memɨ'a'iwama, 'ikɨ kiekaritsie mepɨkayuhayewani,
GEN 19:13 hikɨ tame tekanika'unakuni. 'Axamɨti'ane hiwerika Yawé hetsɨa paitɨ kaniye'ani, 'ari 'iyarieyatsie katineuyeyani. 'Ayumieme tame pɨtatsiheyenɨ'a temika'unakɨ.
GEN 19:14 Hikɨ Ruti kanayeyani wata'inienike yuniwema wakɨnama memakɨnekekai, kemɨ'ane memɨwatiwitɨnikekai. Mɨpaɨ katiniwarutahɨawe: —Mexɨima. Kiekaritsie xekenayekɨni, Yawé kanika'unarɨmeni. Matsi mɨkɨ yakɨ 'utaineme mepɨ'eriekai.
GEN 19:15 'Ari kuhekɨarirɨmekaku tawarita Ruti yaxeikɨa mekatenikɨhɨawekaitɨni niuki tuayamete. Karima mɨpaɨ mekaniutiyuani: —Keneyumexɨitɨatɨ. Keniwaranuwitɨki 'a'ɨya meta 'aniwema memuyuhuta, xemɨkakukukuwenikɨ kepauka kiekari mɨka'unarieni.
GEN 19:16 Ruti kayumexɨitɨakaku, niuki tuayamete mamayatsie mekanikawɨre, 'ɨyaya meta niwemama memuyuhutakai, kiekaritsie mekaniwaranuyewitɨni, Yawé mɨwarutinenimayataxɨkɨ.
GEN 19:17 Mewarayewitɨkari kiekaritsie, xewitɨ niuki tuayame mɨpaɨ kaniutayɨni: —Xekeneuyuta'una. Yu'utɨma xepɨka'anakuneniereni mayeweritsie xepɨkahewa'uweni. Hɨritsie paitɨ xekeneuyuta'una, nɨkahɨrixɨa xe'ukwini.
GEN 19:18 Ruti mɨpaɨ kaniutayɨni: —Neuxeitsɨ hawaikɨ, waɨkawamekɨ nepɨmatsiwawirie, neti'aitɨwame.
GEN 19:19 'Ekɨtsɨ 'aixɨa pekanetiniuxeiya, ke'aixɨa nehetsiemieme pemɨtiuyuri pɨmariwe netukari pemutawikweitsitɨakɨ. Ne matsi nepɨkayɨwe nemɨneta'una hɨritsie paitɨ, nɨka netsi'anuku'axe kepauka mɨka'unarieni kiekari, tietɨtsɨ nemɨnemɨ.
GEN 19:20 'Ena kiekari yateewa pukuma 'etsiyeutɨ, mana nepɨneta'una. ¿Xekaneneupitɨa mana pɨta nemɨneta'unakɨ? Mɨkɨ kiekari 'etsikaniyeuka, mɨkɨtsie nekaniyuti'awietamɨkɨ.
GEN 19:21 Hikɨ xewitɨ mɨkɨ mɨpaɨ katinitahɨawe: —Kepemɨnerawawiriwa yanepɨra'eriwa. Nepɨka'ika'una kiekari pemexaxata.
GEN 19:22 Keneumienitsɨari xeiya, kene'ata'una mana paitɨ, peheta'ayuke yanepɨtiyurieni. 'Ayumieme mɨkɨ kiekari Tsuhaxi titewatɨ patɨa.
GEN 19:23 Ruti Tsuhaxi peta'a tau haneximekaku.
GEN 19:24 Hikɨ Yawé tai wiyeriyari kaneyenɨ'ani meta 'atsupɨre taiyari kaniukawiwieni muyuawitsie mieme Tsuruma meta Kumuxa wahetsie.
GEN 19:25 Mɨpaɨ katiniwaruka'una mɨkɨ kiekarite meta yunaime mana kiekatari, naime mayeweritsie meta tita mana mɨtixuawekai.
GEN 19:26 Peru Ruti 'ɨyaya yu'utɨma kananakuniere 'una teteyari kanayani.
GEN 19:27 Hikɨ 'uxa'arieka ximeri paitɨ 'Apɨrahami kananukukeni, kaneyani hakewa Yawé hamatɨa mɨrekuxatakai.
GEN 19:28 Kaneutaniere Tsuruma meta Kumuxa wahepatsie meta naitsarie mayeweritsie, hikɨ mana kɨtsi kaniuxeiya mana hatineikame, huxunuta wa'atɨ pɨratineika.
GEN 19:29 Mɨpaɨ Kakaɨyari pɨtika'unaxɨ mɨkɨ kiekarite makuweritsie mukumanekai, peru 'Apɨrahami kemɨrehɨawekai paye'eri, Ruti mana putawikweitsitɨa kiekari ka'unarieximekaku mana mukateikɨ.
GEN 19:30 Hikɨ Ruti marikakɨ Tsuhaxi kayuhayewamɨtɨ, kaneyani hɨritsie paitɨ yuniwema memuyuhuta warawitɨtɨ. Mana paitɨ terɨta kanayekateitɨni wahamatɨa.
GEN 19:31 Merikɨtsɨ mɨixari muwa me'ayetetɨ, Ruti niweya 'amɨyumate yutaru mɨpaɨ katiniutahɨawe: —Tapaapa pɨ'ukiratsiri, meta naitsarie 'ena mɨtiuyehanetsie mepumawe 'ukitsi memɨtatsitiwitɨnikɨ, naitsarie teɨteri kememɨteyutiwitɨkɨ.
GEN 19:32 Hikɨmɨ, tepititawaitɨani, 'anari hamatɨana tekanikahikuni, mɨpaɨ teyɨme tanuiwarima tepɨwarayexeiya.
GEN 19:33 Hikɨ mɨkɨ tɨkaritsie yupaapa mekaniuti'itɨani, hikɨ kahayu'eriwakaku, 'ana niweya 'amɨyumate kaniukahuni hamatɨana.
GEN 19:34 'Uxa'arieka, 'amɨyumate mɨpaɨ yutaru katiniutahɨawe: —Neuxei, ne hikɨ tɨkaritsie nepaapa hamatɨa nepukahui. Yaxeikɨata hikɨ taikai tepiti'itɨani, 'ekɨta hamatɨana pepɨkahuni, mɨpaɨ teyɨme tanuiwarima tepɨwarayexeiya.
GEN 19:35 Mɨkɨ tɨkaritsieta yupaapa mekaniuti'itɨani, mɨkɨ kahayu'eriwakaku, niweya yakɨmɨyumate hamatɨana kaniukahuni.
GEN 19:36 Mɨpaɨ me'uyɨka yuhutatɨ Ruti niwemama mekaniutihukataxɨani yupapatsie miemekɨ.
GEN 19:37 'Amɨyumate xeime 'ukitɨme kaniutiniweni, Muhawi katiniterɨwa, muhawitsixi wapaapa matɨa.
GEN 19:38 Taruyata yaxeikɨa, 'ukitɨme kaniutiniweni, Weni-'Ami katiniterɨwa, 'amunitsixi wapaapa matɨa.
GEN 20:1 'Apɨrahami mana mɨyetɨa kaneyani Nekexi mɨrakutewatsie 'erietɨ, Karetsi Tsuhuxi wahixɨapa kaniuyuhayewa Keraxi mɨrakutewatsie.
GEN 20:2 'Apɨrahami, Tsara mɨ'ɨyayatɨkai, kename 'iwayatɨkai kaniutainekaitɨni. 'Ayumieme mana 'Awimereki, Keraxi kwieyaritsie ti'aitame, katiniuta'aita mɨwitɨkiemiekɨ Tsara, neiwitɨni 'ɨyaya mayanikɨ.
GEN 20:3 Hikɨ mɨkɨ tɨkaritsie, Kakaɨyari 'Awimereki kaniutahɨawe heinɨtsitana, mɨpaɨ katinitahɨawe: —Neuxei 'ekɨ pekanimɨmɨkɨ 'ukaratsi pemewitɨkɨ, mɨkɨ 'ukaratsi kaniwikieka.
GEN 20:4 Hikɨ 'Awimereki 'ukaratsi hamatɨa mɨkakahuiwekaikɨ, mɨpaɨ katinitahɨawe: —Ti'aitame, pepɨkanetsikumemiwani, ne 'axanepɨkatiuyuri,
GEN 20:5 'Apɨrahami mɨpaɨ pɨnerahɨawekai kename 'iwayatɨkai, 'ukaratsi yaxeikɨata pɨnetiutahɨawixɨ, neri yurikɨ neti'erietɨ nepeiwitɨ, peru ne'ɨyaya ne'inawairienike nepɨkatiuyuri.
GEN 20:6 Kakaɨyari mɨpaɨ katinita'eiya: —Mɨpaɨ nepɨtimate, yuri petiwa'eririetɨ pepeiwitɨ, 'ayumieme nepɨkamatsi'upitɨa pemikumayɨanikɨ, xurikime pemɨkatiwiwiwanikɨ nehetsɨa.
GEN 20:7 Peru mɨkɨ 'ukaratsi keneyetua hikɨ, mɨkɨ kɨnaya niukame kanihɨkɨtɨni nehetsiemieme, kanenitawawiriemɨkɨ 'ahetsiemieme pemuyeikanikɨ 'akuxi, peru xɨka peka'iyetuani 'ekɨ yaxeikɨa 'akie kiekatari wahamatɨa pekanimɨmɨkɨ.
GEN 20:8 'Uxa'arieka ximeri 'Awimereki yuteɨterima warutahɨaweka, katiniwarutaxatɨani kemɨtiuheinɨkai. Mɨkɨ me'i'enieka waɨkawa mekaniutimamani.
GEN 20:9 Hikɨ 'Awimereki, 'Apɨrahami katiniutanɨ'airieni mɨpaɨ katinitatieni: —Neuxei, kepetatsi'uyuri. ¿Kepaukakuta 'axanepɨmatsi'uyuri, titayari xurikime petatitiwiwiriwa nehetsie meta nemɨra'aita wahetsie? 'Axamemɨte'u'iyari kememɨkanetsi'uyuri 'ekɨ pɨta waɨkawa 'axapepɨnetsi'uyuri.
GEN 20:10 ¿Kepetiku'eriwatɨ mɨyapeputayɨ? 'Awimereki mɨpaɨ titatieku,
GEN 20:11 hikɨ 'Apɨrahami mɨpaɨ katinita'eiya: —Ne mɨpaɨ nepɨtiku'eriwakai, xeme Kakaɨyari xeka'ayemakaxeme nepɨ'eriekai, xenetsimienike nepɨ'eriekai ne'ɨya hetsiemieme.
GEN 20:12 Peru kaniyuritɨni mɨkɨ kanine'iwatɨni, nepaapa niweya kanihɨkɨtɨni, peru nemaama pɨkaniweya, 'ayumieme pɨyɨwekai ne'ɨya mayanikɨ.
GEN 20:13 Kepauka mɨpaɨ mɨnetiuta'aitɨa Kakaɨyari, kename nepaapa nemaama newaku'eirienikekai, kename 'ateewa neyemiekai, ne ne'ɨya mɨpaɨ nepɨtiutahɨawixɨ: «Neuxei mɨpaɨ nepɨmatiwawirie: Tsepa hakewa temekɨ, kename ne 'amatsika nehɨkɨ peputaineni».
GEN 20:14 Hikɨ 'Awimereki Tsara 'Apɨrahami kaniyetuirieni meta katinimini muxatsi, wakaitsixi, te'uximayatamete 'ukitsi meta 'ukarawetsixi.
GEN 20:15 Meta 'Awimereki mɨpaɨ katinitahɨawe: —Neuxei, nekwie 'ena kanikumaka, hakewa mɨmatsihenakeni mana keneukani.
GEN 20:16 Tsara meta mɨpaɨ katiniutahɨawe: —Neuxei, 'a'iwa nepu'ɨitɨa tamamata heimana xewi kiruyari heimana 'imeriyu pɨrata tepɨayari, mɨkɨ kani'ayumiemetɨni 'axapemɨkaramamatiwanikɨ, mɨpaɨ memɨtehetimanikɨ 'a'iwama kename 'ekɨ 'atsipekatiuyuri, mɨpaɨ xewitɨ 'atsipɨkametitamani.
GEN 20:17 Hikɨ 'Apɨrahami Kakaɨyari kaniutawawirieni, kepauka muyutanenewi Kakaɨyari 'aixɨa kaniwaruyurieni 'Awimereki meta 'ɨyaya, metatsiere mɨtiwa'aitɨakai, memɨniwewawenikɨ hutarieka,
GEN 20:18 Tsara mɨya mɨranuyetɨakɨ, 'Apɨrahami 'ɨyaya, Yawé 'Awimereki kie kiekatari 'ukarawetsixi mekaniwewaweme kaniwarayeitɨakaitɨni.
GEN 21:1 Yawé kemainekai, Tsara 'aixɨa kaniuyurieni, katinaye'atɨani kemɨrehɨawekai.
GEN 21:2 Tsara kaniutihukata 'Apɨrahami nu'ayatɨme kanayexeiya 'ukiratsitɨkaku. Kakaɨyari kepauka mainekai 'ana katiniunake.
GEN 21:3 'Apɨrahami yuniwe 'Itsahaki katiniuterɨwa, Tsara hamatɨa memeyexei.
GEN 21:4 'Apɨrahami xitekiya 'inɨariyari 'Itsahaki kaniuwewirieni 'atahaika tukari 'anukayaku, Kakaɨyari kemɨtita'aitɨa.
GEN 21:5 Xeitsienituyari wiyari kanexeiyakaitɨni 'Apɨrahami kepauka 'Itsahaki mutinuiwaxɨ.
GEN 21:6 Hikɨ Tsara mɨpaɨ kaniutayɨni: «Kakaɨyari nemutanawenikɨ yapɨnetiupitɨa, yaxeikɨata kemɨ'ane memɨtehetimani meputinaweni nehamatɨa.
GEN 21:7 Matsi nixewitɨ 'Apɨrahami mɨpaɨ pɨkarehɨawekai kename ne tɨɨri newatitsitsitɨanikekai, matsi hikɨ nunutsi nepayexei nu'ayatɨme 'ukiratsitɨkaku».
GEN 21:8 Nunutsi 'Itsahaki kaniutawere, tsitsieya mekaniku'eiritsitɨani. Mɨkɨ tukaritsie 'Apɨrahami 'ixɨarari kaniuwewieni yuniwe hetsiemieme.
GEN 21:9 'Ana Tsara mɨpaɨ katinetimani 'Itsahaki 'ekipitutanaka Hakari nu'aya 'Apɨrahami hamatɨa meyexeiyakai kaninanaimakaitɨni 'i'atsetɨ.
GEN 21:10 Hikɨ 'ayumieme Tsara 'Apɨrahami mɨpaɨ katiniutahɨawe: —Kenanunɨ'a ti'a'uximayatsiriwame yuniwemakame, neniwe 'Itsahaki tita pemɨtiyetuirieni 'apiini, mɨkɨ mana heitserie pɨkahexeiyani ti'a'uximayatsiriwame nu'aya.
GEN 21:11 Kepauka 'Apɨrahami mɨyamɨtiutahɨawarie, kaniuyukahiwerieni nu'aya mɨhɨkɨtɨkaikɨ Hakari hetsiemieme.
GEN 21:12 Peru Kakaɨyari 'Apɨrahami mɨpaɨ katiniutahɨawe: «Pepɨka'a'iyaritɨaka nunutsikɨ meta maamaya ti'uximayatamekɨ. Tsara kemerahɨawe yaketineuyuri, 'anuiwarima 'Itsahaki hetsie pɨta mekaniyekɨnikuni.
GEN 21:13 Meta ti'uximayatame nu'aya nuiwari mariweme nepayeitɨani, 'aniwe mɨhɨkɨkɨ».
GEN 21:14 'Uxa'arieka, ximeripaitɨ 'Apɨrahami nanukukeni, paa, nawi haa 'uyemakame Hakari naiparieyatsie nekawirieni. Hikɨta nu'aya kaniyetuirieni, meta kaniwarutateutɨani. Hakari kanayeyani, mekaniuhukaitɨni me'u'erietɨ makumawetsie Weritsewa mɨrakutewatsie.
GEN 21:15 Kepauka yuhaa memayexɨ nawita mɨyemakai, Hakari yuniwe 'ɨtsitɨa 'itiyeka,
GEN 21:16 kaneyani yateewa mana 'ukaitɨ kaniutitsɨatɨyani maamaya, temaikɨ kaxeiyamɨtɨ kepauka mɨmɨnikekai.
GEN 21:17 Hikɨ Kakaɨyari temaikɨ tsuarieya kaniu'enieni, Hakari kaniutahɨawe muyuawitsie paitɨ niuki tuayame Kakaɨyari hetsiemieme mɨpaɨ katinitahɨawe: «Hakari mɨpaɨ pepɨkayɨaneni. Pepɨkamaka, Kakaɨyari temaikɨ tsuarieya kaniu'enieni.
GEN 21:18 Xeiya kenemie hetsɨana keneuwitɨximeni pepɨka'itatuayani, ne mɨkɨ nuiwarieya mariweme nekanayeitɨamɨkɨ».
GEN 21:19 Hikɨ Kakaɨyari Hakari haixa kaniuxeitsitɨani. 'Anari yapauka 'utihanɨka nawi kɨxauriyaritsie temaikɨ kaniuharitɨani.
GEN 21:20 Hikɨ Kakaɨyari temaikɨ hamatɨa kaniuyeikakaitɨni, mɨkɨ kaniwerekaitɨni makumawetsie kaniukateitɨni, tupi 'ɨrɨkɨ kwinimieme timɨiwetɨ kanayani.
GEN 21:21 Parani mɨrakutewatsie kaniukateitɨni makumawetsie, maamaya 'ekipitutanaka kaniwitɨtɨani.
GEN 21:22 'Ana 'Awimereki 'Apɨrahami hetsɨa kaninuani, Pikuuri titewatɨ kaneteɨtakaitɨni kuyaximama wa'ukiyari, mɨpaɨ 'Apɨrahami katiniutahɨawe: —Mɨpaɨ tepɨtemate, Kakaɨyari waɨkawa pɨmatsiparewie naime kepemɨtiyuriene.
GEN 21:23 'Ayumieme, yakenetineutahɨawi Kakaɨyari hɨxie, hikɨ kwitɨwa, kename pekaneti'itaiyani meta neniwema yaxeikɨa nenuiwarima, yakeneutayɨki kename yaxeikɨa penetixeiyani kenemɨmatixeiya, meta yunaime teɨteri 'ikɨ kwieyaritsie kiekatari pemanuyeika 'ateewa kiekame hepaɨ.
GEN 21:24 'Apɨrahami mɨpaɨ kaniutayɨni: —Huu, yanepɨra'eriwa.
GEN 21:25 Peru 'Apɨrahami 'Awimereki katiniutaxatɨani putsu hepaɨtsita, mɨkɨ teɨterimama meminawairiekaikɨ.
GEN 21:26 'Awimereki mɨpaɨ kaniutayɨni: —Nematsi mɨpaɨ nepɨkatimaikai, 'ekɨtsɨ mɨpaɨ penerahɨaweka, ne 'atsinepɨkatimate kemɨ'ane mɨyamɨtiuyuri.
GEN 21:27 Hikɨ 'Apɨrahami wakaitsixi kaniwarutiwiya muxatsi meta, 'Awimereki kaniumini, mɨkɨ tukaritsie yuhutatɨ tɨratu mekaniuwewieni.
GEN 21:28 Peru 'Apɨrahami 'atahutame muxatsi 'ukarawetsixi kaniwarayehapani yukuraruta,
GEN 21:29 'Awimereki 'Apɨrahami mɨpaɨ katiniuta'iwawiya: —¿Titayari petiwarayehapana mɨkɨ 'atahutame muxatsi?
GEN 21:30 'Apɨrahami mɨpaɨ katinita'eiya: —'Ikɨ 'atahuta muxatsi 'ukari keniwarutanaki'eri. Matsi mɨpaɨ mɨtimatsiɨkɨnikɨ kename ne putsu ne'utawewi.
GEN 21:31 'Ayumieme mana Weritsewa pɨtiuterɨwarie, mana tɨratu memuwewikɨ yuhutatɨ.
GEN 21:32 Hikɨ tɨratu me'uwewiekari Weritsewa, 'Awimereki Pikuuri matɨa kuyaxi wa'ukiyari piritsiteutsixi yukwieyaritsie mekanakunuaxɨani.
GEN 21:33 Hikɨ mana Weritsewa, 'Apɨrahami tamaritsiku titewakame kaniuka'eni, mɨkɨtɨa Yawé Kakaɨyari 'atsimɨkayɨwe kaniutahɨawekaitɨni.
GEN 21:34 Mɨixa wiyari 'Apɨrahami kaniutihuni piritsiteutsixi wakwieyaritsie 'ukaitɨ.
GEN 22:1 Merikɨtsɨ yapaɨmexɨa tukari 'anukayaku, Kakaɨyari 'Apɨrahami kaniuta'inɨata, mɨpaɨ katinitahɨawe: —'Apɨrahami 'aku. 'Apɨrahami mɨpaɨ katinita'eiya: —'Ena nepuyeika.
GEN 22:2 Kakaɨyari mɨpaɨ katinita'aitɨani: —'Aniwe muyuxewi 'a'iyarikɨ peminakierie, kenawitɨtɨ kenemie Muriya kwieyaritsie paitɨ. Hikɨ mana keneutimawa mawari naitɨ mɨtaiyarɨwa hepaɨ, xeime hɨri nemɨmatsixeitsitɨanitsie.
GEN 22:3 'Uxa'arieka ximeri paitɨ kananukukeni 'Apɨrahami yupuxu kaniutixiratɨani mɨranu'ikatakɨ. Meta kɨye kaniutiwiteni mɨretimawarieni hetsiemieme, hikɨ meyuhutame te'uximayatamete meta yuniwe 'Itsahaki warawitɨtɨ kanayeyani hakewa Kakaɨyari mɨrehɨawekai.
GEN 22:4 Hairieka tukaritsie me'uhutɨ, 'Apɨrahami hɨri 'ateewa kaniuxeiya hakewa Kakaɨyari mexatakai.
GEN 22:5 Hikɨ 'Apɨrahami mɨwarawitɨkɨ te'uximayatamete yuhutame, mɨpaɨ katiniwarutahɨawe: —'Ena xekeneyuhayewa puxu hamatɨa. 'Akuxi temaikɨ meta ne tepuhuni, Kakaɨyari temetahɨawekɨ, kwitɨwata tepakunuaxɨani xehetsɨa.
GEN 22:6 'Apɨrahami kɨyexi 'uti'ɨka 'Itsahaki kaniutitɨtɨani, mɨkɨta tai kaniutikweni meta nawaxa kanakakeni. Hikɨ mekanekɨne yunaitɨ me'uhutɨ.
GEN 22:7 'Itsahaki 'Apɨrahami mɨpaɨ katiniutahɨawe: —Nepaapa. Paapaya mɨpaɨ katinita'eiya: —¿Tita neniwe? 'Itsahaki mɨpaɨ kaniutayɨni: —Neuxei, kɨyexi tema'ɨ, tai temakwe'e, peru ¿hakewa muxa temeitimawa?
GEN 22:8 'Apɨrahami mɨpaɨ katinita'eiya: —Neniwe. Kakaɨyari kaniyɨweni mɨkɨ muxa kaneyetuamɨkɨ. Hikɨ mekaniuhukaitɨni.
GEN 22:9 Hikɨ kepauka memuye'axɨa Kakaɨyari hakewa mexatakai, mana 'Apɨrahami mawari taiyame kaniutawewieni meta kɨyexi 'aixɨa katiniunetɨani mana. Hikɨ yuniwe 'Itsahaki 'uwiyaka kanihɨani mawari taiyametsie kaneteni kɨyexi heima.
GEN 22:10 Hikɨ 'Apɨrahami yunawaxa kaniwatihana yuniwe mienike mawari mayanikɨ,
GEN 22:11 peru Yawé niuki tuayameya 'anakwitɨ heimana kanetaniuni karima mɨpaɨ tikɨhɨawetɨ: —'Apɨrahami. 'Apɨrahami 'aku. Mɨkɨta mɨpaɨ katinita'eiya: —'Ena nepuyeika.
GEN 22:12 Hikɨ niuki tuayame mɨpaɨ katinitahɨawe: —Keneuhayewa temaikɨ, pepɨkatikwinitɨaka. Nepɨretimari 'ekɨ Kakaɨyari pepayemakaxe, pepɨka'uyuta'ima 'aniwe penetsiyetuirienike muyuxewi.
GEN 22:13 Hikɨ 'Apɨrahami kananieretɨyani, muxa kaniuxeiya yu'awatekɨ tsekame 'ɨtsitsie. Hikɨ 'Apɨrahami 'ixɨnaka kanitimawa taipa yuniwe hetsiemieme.
GEN 22:14 'Ayumieme 'Apɨrahami mana pɨtiuterɨwaxɨ: «Yawé pɨrayetuirieni tita mɨreuyehɨaka». 'Ayumieme teɨteri mɨpaɨ meputiyuane: «Hɨritsie Yawé pɨrayetuirieni».
GEN 22:15 Yawé niuki tuayameya 'Apɨrahami kaniutahɨawe hutarieka taheima paitɨ,
GEN 22:16 mɨpaɨ katinitahɨawe: —'Ekɨ pepɨraye'atɨa kenemutayɨ, 'aniwe muyuxewi pepɨka'utikweri, 'ayumieme ne yurikɨ nekanaineni ―Yawé mɨpaɨ kanaineni—.
GEN 22:17 'Aixɨa nepɨmatsiyurieni waɨkawamekɨ, 'anuiwarima yɨmɨireme nepuwarayeitɨani xurawetsixi muyuawitsie memɨtama wahepaɨ meta xiekari haramara tetsita mɨtika hepaɨ. Meta 'anuiwarima mepɨte'ayu'iwani kemɨ'ane memɨwaraye'unie wakiekarite mepɨwanawairieni.
GEN 22:18 Yemekɨ kenematiutahɨawixɨ yapemɨtikatɨakɨ, yunaitɨ nuiwarite kwiepa memɨtama 'aixɨa mepɨ'itɨarieka 'anuiwarima wahekɨ.
GEN 22:19 'Apɨrahami kanakunuani hakewa memeyuhayewakai te'i'uximayatsiriwametemama, hikɨ yunaitɨ mekanekɨne Weritsewa, hakewa 'Apɨrahami mekatei.
GEN 22:20 Hikɨ kepauka, 'Apɨrahami katiniutamarieni kename 'iwaya Nakuxi yɨ'ɨya Mirika hamatɨa, tɨɨri mewarayexei.
GEN 22:21 Matɨarieya 'Utsi titewatɨ kanayani, 'utɨmanata mekaniutinunuiwa Wutsi, Kemuheri matɨa. 'Ikɨ wa'utɨamieme 'Arami paapaya kanayani.
GEN 22:22 Mɨkɨ wa'utɨata mekaniutinunuiwa Ketseri, Katsú, Piriratsi, Hirurapi, 'imatɨrieka Wetuheri,
GEN 22:23 mɨkɨ Xeweka paapaya patɨa. 'Ikɨ mepɨhɨkɨ 'atahaika tɨɨri Mirika Nakuxi hamatɨa memɨwarayexei, 'Apɨrahami 'iwaya.
GEN 22:24 Nakuxi meta kaniwarayexeiya tɨɨri Xeuma titewakametsie, hutarieka yɨ'ɨyatsie. Mɨkɨ mepɨtetetewakai, Tewaki, Kakani, Takatsi, meta Mahaka.
GEN 23:1 Tsara xeitsienituyari heimana xeitewiyari heimana 'atahuta wiyari kaniutihuni,
GEN 23:2 kaniumɨni Kiriati-'Ariwa mɨrakutewatsie, tatsɨari Hewuruni kiekariyaritsie Kanani kwieyaritsie. 'Apɨrahami puyuheiweriekai waɨkawa hetsiena mieme.
GEN 23:3 Hikɨ 'Apɨrahami mana 'auriena 'anukukeka, kaneyani Heti nuiwarimama mɨpaɨ tiwaretahɨaweke:
GEN 23:4 —Neuxei, ne 'ena nepɨkakiekame, peru kwie terɨ xepɨnetsituirieni muwa ne'ɨya nemeutatenikɨ.
GEN 23:5 Hikɨ hetitsixi mɨpaɨ 'Apɨrahami mekateniuta'eiya:
GEN 23:6 —Neuxei 'ekɨ ketaneu'eni, 'ekɨ mariweme mexɨakame pepɨhɨkɨ. Keneuka'awieta 'a'ɨya taterɨ 'aixɨa mɨ'aneneta tsepa kemɨ'ane terɨyarita. Xewitɨ yuterɨ pɨkametsitikweririeni 'a'ɨya muwa pemeutatenikɨ.
GEN 23:7 Hikɨ 'Apɨrahami kananukukeni nakatutsita hetitsixi wahɨxie,
GEN 23:8 mɨpaɨ katiniwarutahɨawe: —Xɨka yurikɨ xenakeni ne'ɨya 'ena nemɨka'awietakɨ, xekeneneuparewi, 'Epuruni mɨpaɨ xeteneutahɨawi Tsukaxi nu'aya,
GEN 23:9 kenetsi'utuirieni terɨ Makipera mɨrakutewatsie muka, mɨkɨ kwieya maka'atɨkatsie. Mɨpaɨ xeketeneutahɨawi kenetsi'utuirieni yemekɨ kemɨraye'axe, mɨpaɨ ne 'ena mɨkite wateukume nehexeiyatɨ nepayani netɨɨriyama wahetsiemieme.
GEN 23:10 Hikɨ 'Epuruni Heti tewiyari mana kaniukateitɨni yuteɨterima wahamatɨa, 'ayumieme 'Apɨrahami katiniutaxatɨani humapaitɨ 'eniɨriɨkɨmekɨ, hipatɨta memi'enienikɨ yaxeikɨata kiekari kitenie memuyekɨkakai:
GEN 23:11 —Hawaikɨ, neti'aitɨwame keneneu'eni, nematsi nepɨmatsimikwa mɨkɨ terɨ meta kwie naime. Ne'iwama mepɨ'enana kename nematsimikwa. Mana keneukateuki 'a'ɨya.
GEN 23:12 Peru 'Apɨrahami tawarita nakatutsita yunaime wahɨxie mana kiekatari,
GEN 23:13 hikɨ yunaitɨ me'enanakaku 'Epuruni mɨpaɨ katiniutahɨawe: —Neuxei, keneneu'eni kwerietɨ. Ne tawarita yanepaine nemɨmatipitɨanikɨ kwie kemɨraye'axe. 'Ekɨ yaketineutanaki'eri, mɨpaɨke ne'ɨya mana nepɨka'awieta.
GEN 23:14 Hikɨ 'Epuruni mɨpaɨ 'Apɨrahami katiniuta'eiya:
GEN 23:15 —Neti'aitɨwame, keneneu'eni. Kwie nauka tsienituyari pɨrata tuminiyarikɨ pɨraye'axe. Mɨpaɨ paɨmemekɨ 'atsitepɨkatiyuani. Hikɨ 'a'ɨya keneka'awieta.
GEN 23:16 'Apɨrahami 'Epuruni matɨa 'aixɨa mekateniuxata, hikɨ hetitsixi wahɨxie katinayukatuani kemɨtiheitserie: nauka tsienituyari pɨrata tuminiyarikɨ, tumini waɨkawa mɨti'axe hepaɨ katininaneni tetuayamete wahepaɨ.
GEN 23:17 Mɨpaɨ 'Apɨrahami kwie katiniunaneni 'Epuruni tipiinieya, Makipera mɨrakutewa Mamɨre 'aurie tserietana. Mɨkɨ terɨ naime kɨyexite mɨreuti'ukai mɨkɨ kwieyaritsie 'Apɨrahami tipiinieya kanayani.
GEN 23:18 'Apɨrahami tipiinieya pɨratɨa yuheyemekɨ hetitsixi teɨteriyari wahɨxie meta kiekari kitenie memutakɨkakai.
GEN 23:19 Hikɨ 'Apɨrahami yu'ɨya Tsara kaniukateuku terɨta kaneitateni, Makipera mɨrakutewatsie Mamɨre tserieta, yaxeikɨata Hewurunikɨ pumatiwa, Kanani kwieyaritsie katini'aneni.
GEN 23:20 Mɨpaɨ tiuyɨku mɨkɨ kwie meta terɨ hetitsixi wapiini pɨkaratɨari, 'Apɨrahami tipiinieya pɨta kanayani mɨkite wateukume mayanikɨ yuheyemekɨ.
GEN 24:1 Merikɨtsɨ 'Apɨrahami kani'ukiratsitɨkaitɨniri waɨkawa wiyari kanexeiyakaitɨni, Yawé Kakaɨyari kaniparewiekaitɨni naimekɨ.
GEN 24:2 Hikɨ 'Apɨrahami 'ukiratsi meripaitɨ miparewi kaniuta'inieni, kiena naime mɨti'uximayatsiriekai tita mɨrexeiyakai, mɨpaɨ katinitahɨawe: —Neteuritɨa keneutame'i,
GEN 24:3 Yawé hɨxie yurikɨ yakenetineutahɨawi, kemɨ'ane kwie meta muyuawi mutawewi, kename 'uka 'ena kiekame Kanani peka'iwitɨtɨani neniwe
GEN 24:4 'Itsahaki, matsi pekaniyemieni nemarema wahetsɨa, muwa neniwe 'ɨyaya mayani pekananuyewaumɨkɨ.
GEN 24:5 Ti'uximayatame mɨpaɨ katinitahɨawe: —¿Perutsɨ xɨka 'uka ne'utɨma mamie kaheyuwaɨriyani 'ikɨ kwieyaritsie paitɨ? ¿Kamɨtsɨ neramie 'aniwe neranuwitɨni wakie paitɨ?
GEN 24:6 'Apɨrahami mɨpaɨ katinitahɨawe: —Hawaikɨ, neniwe pepɨkahewitɨkɨni muwa paitɨ,
GEN 24:7 Yawé Kakaɨyari muyuawi mutawewi nekie pɨnetseheyewitɨ ne'iwama wahetsɨa, mɨpaɨ netihɨritɨatɨ: «'Anuiwarima nepɨwayetuirieni 'ikɨ kwie», mɨkɨ yuniuki tuayame kananunɨ'amɨkɨ 'ahamatɨa mɨmatsi'anuwitɨnikɨ, 'ekɨ pemeyɨwekaxɨanikɨ 'uka pemawitɨni neniwe 'Itsahaki hetsiemieme.
GEN 24:8 Xɨka 'uka 'a'utɨa mamie kaheyuwaɨriyani, 'ekɨ pepɨxɨne kenemerahɨawe, peru neniwe pepɨkahewitɨkɨni muwa paitɨ.
GEN 24:9 Hikɨ ti'uximayatame 'Apɨrahami teurieyatɨa kaneutameni, mɨpaɨ katinitahɨawe kename yurikɨ yatikayani kemɨtihɨritɨa.
GEN 24:10 Hikɨ kameyutsixi kaniwarukuha'aritɨani tamamata meyupaɨmeme 'Apɨrahami tewamama, meta waɨkawa 'imikierite katiniukuha'aritɨani, kaneyani Nakuxi manukateitsie Metsuputamiya kwieyaritsie.
GEN 24:11 Mana nuaka kiekari warita haputsu 'aurie yukameyutsixi kaniwarukatuani. Hikɨ kaniukutaikaire, kepauka 'ɨimarixi mematihanɨwetsie kanaye'ani.
GEN 24:12 Hikɨ ti'uximayatame mɨpaɨ katiniuyutanenewieni: «Yawé, 'Apɨrahami neti'aitɨwame Kakaɨyarieya, waɨkawa nepɨmatsiwawirie hikɨ 'aixɨa nemɨtiyurienikɨ, 'Apɨrahami nekutsiyari kepemɨtinaki'erie yaketineuyuri.
GEN 24:13 Ne 'ena nepuwe haa matineika newatakwewietɨ, 'ena kiekatari waniwema memayekɨnirɨme metihanɨnike.
GEN 24:14 Keneupitɨa 'iya 'uka kemɨ'ane mɨpaɨ nemɨtitahɨawe: “Neuxei 'aye'ɨ kenanakahani 'etsiwa nemanuharenikɨ”, mɨkɨta mɨpaɨ kenetiuta'eiya: “Kenanutihareka, 'akameyutsixita nekaniwatiharitɨamɨkɨ”, mɨkɨ 'uka kehɨkɨtɨni pemenayexei 'Itsahaki hetsiemieme mati'uximayatsiriwame. 'Ana mɨpaɨ nepɨretimani kename yapetiuyuri pe'inaki'erie 'Apɨrahami neti'aitɨwame».
GEN 24:15 Hikɨ yunenewietɨ karanunɨwekaku Xeweka kaniuxeiya, 'akanamiekaitɨni yuye'ɨ 'anakayetɨ. Xeweka Wetueri kaniniweyatɨkaitɨni, Wetuheri kaniwaniwetɨkaitɨni Mirika Nakuxi hamatɨa, Nakuxi 'Apɨrahami 'iwaya.
GEN 24:16 Mɨkɨ 'uka witsipɨti'ɨimarikai, pɨkawikiekai, 'uki pɨkamaikai 'akuxi. Mɨkɨ haa matineika nuaka kaniutihanɨni. 'Ari pɨyemieximekai
GEN 24:17 hikɨ ti'uximayatame kaniutanautsa hepana, mɨpaɨ katinitahɨawe: —¿'Etsiwa 'ekɨ pekanetiuharitɨawe haa 'aye'ɨta miemekɨ?
GEN 24:18 'Uka mɨpaɨ katinita'eiya: —Kenanuhareka. Yuye'ɨ 'anakahanaka kanenutiharitɨani.
GEN 24:19 Kepauka ti'uximayatame 'anuharekuri, Xeweka mɨpaɨ katinitahɨawe: —Nekaniwatihanɨimɨkɨta 'akameyutsixi wahetsiemieme memɨtiharenikɨ kememɨteuhariku.
GEN 24:20 Hikɨ tewaxi mematiharewetsie 'ikatuaka, waɨkawamexɨa kanakunuani hanɨnetɨ memɨte'atiharewetsie 'ikatu'atɨ, yunaitɨ memɨtiharenikɨ kameyutsixi.
GEN 24:21 'Apɨrahami ti'uximayatsiriwame kanixeiyakaitɨni, mɨpaɨ tiku'eriwatɨ xɨka'aku Yawé tiyurienekaitɨni, 'aixɨa 'anemekɨ makunuanikɨ.
GEN 24:22 Kepauka kameyutsixi memɨte'utahayewaxɨ meharetɨ, ti'uximayatame huru nakɨtsayari hewati'ɨka tsurieyatsie kaniyewirieni 'ataxewime kɨramuyari raheteme, meta huru matsɨwayari kaneimaniriexɨani hutame, xeitsienituyari kɨramuyari raheteme, ti'uximayatame mɨpaɨ katinita'iwawiya:
GEN 24:23 —Neuxei, ¿kemɨ'ane 'ekɨ pepɨraniwe, 'apaapa kie meyekani 'aumɨ reyɨwe?
GEN 24:24 Mɨkɨ mɨpaɨ katinita'eiya: —Ne Wetuheri nepɨniweya, Mirika meta Nakuxi waniwe,
GEN 24:25 mana xemetiheni peyɨwe meta mɨaxa waɨkawa pexɨawe kameyutsixi wahetsiemieme.
GEN 24:26 Hikɨ ti'uximayatame kaniutitunumakeni Yawé pamɨpariyutsi kaniupitɨani
GEN 24:27 mɨpaɨ 'utaitɨ: «'Aixɨa pepɨtiuka'iyari Yawé 'Apɨrahami neti'aitɨwame Kakaɨyarieya, pe'inaki'erietɨ pepɨkatihayewa meta 'aixɨa pepɨnetiuye'atɨa 'iwamama wahetsɨa».
GEN 24:28 Xeweka kaneyani 'unautsarɨmetɨ yumaama hetsɨa, mana katinitaxatɨani kemɨreiyuriekai.
GEN 24:29 Xeweka xeime yumatsika kanexeiyakaitɨni Rawani titewakame, mɨkɨ 'unautsarɨmetɨ kanayeyani ti'uximayatame heuwaumieka, haa matineika 'akuxi mɨkɨ kaniukateitɨni.
GEN 24:30 Rawani yu'iwa nakɨtsa kaniuxeirieni meta matsɨwa metatsiere kani'enieni tikuxatakaku ti'uximayatame kemɨrehɨawekai. 'Ayumieme kanayeyani ti'uximayatame heuwaumieka, haputsu matiniere kanitaxeiya, yukameyutsixi wahamatɨa.
GEN 24:31 Mɨpaɨ katinitahɨawe: —Kɨmɨ, 'ekɨ 'aixɨa pepɨ'itɨarie Yawé yametipitɨakaku. ¿Titayari 'ena peti'akuhayeikawani kiekari warita? Neri 'aixɨa nepɨrekuyuri kiita xemeyehenikɨ, meta 'akameyutsixi wahetsiemieme.
GEN 24:32 Hikɨ ti'uximayatame kiepa kaniye'ani. Yapauka Rawani kameyutsixi kaniwaruti'ikapieni mɨaxa kaniwarutimini, meta haa kaniwaruhanitɨani ti'uximayatame meta mɨwarawitɨkɨkai yu'ɨkatetsie memauyuhauxixɨanikɨ.
GEN 24:33 Kepauka memɨtekwanikekai 'Apɨrahami ti'uximayatameya mɨpaɨ kaniutayɨni: —Ne, nepɨkatikwani yanetayɨmeke titakɨ nemɨtikuyɨane. Hikɨ Rawani mɨpaɨ katinitahɨawe: —Yakeneutayɨkikuta.
GEN 24:34 Ti'uximayatame mɨpaɨ katinitsutɨani: —Ne 'Apɨrahami ti'uximayatsiriwame nekanihɨkɨtɨni.
GEN 24:35 Yawé waɨkawa 'aixɨa kaniyurieka kaniparewieka. Katinikupinirieka muxatsi, wakaitsixi, huru, pɨrata, te'uximayatamete 'ukitsi 'ukari, kameyutsixi, meta puxuri.
GEN 24:36 Meta neti'aitɨwame 'ukiratsitɨtɨri yu'ɨya Tsara hamatɨa xeime nunutsi mekanayexeiya, neti'aitɨwame yuniwe naime katiniupitɨani.
GEN 24:37 Hikɨ neti'aitɨwame mɨpaɨ pɨnerehɨritɨa: “Neniwe pepɨkakuwitɨtɨwani 'ena kiekame kananeutsixi waniwe, nemanukatsie.
GEN 24:38 Matsi pɨta kenemie ne'iwama memanu'uwatsie, mana kenetiwawa 'uka neniwe 'ɨyaya mayanikɨ”.
GEN 24:39 Ne mɨpaɨ nekatineitahɨawe neti'aitɨwame: “Neuxeitsɨ. ¿Peru xɨka 'uka kaheyuwaɨriyani ne 'utɨma mamie?”
GEN 24:40 Hikɨ mɨpaɨ nerahɨawe: “Yawé nehamatɨa puyeika, mɨkɨ 'ahamatɨa yuniuki tuayame panunɨ'ani, 'aixɨa 'anemekɨ pemakunuanikɨ pemeikaxeiyakɨta 'uka neniwe hetsiemieme nepaapa tɨɨriyamama wahetsɨa.
GEN 24:41 Xɨka ne'iwama mekaheitaunieni 'uka, mɨpaɨ 'ekɨri pepɨkaraye'atɨani kepemutayɨ neri waɨriyarika nepɨkamatsipitɨani”.
GEN 24:42 »Kepauka haa matineika nemunua mɨpaɨ neputayɨ: “Yawé 'Apɨrahami Kakaɨyarieya, xɨka mɨpaɨ matinakeni, waɨkawamekɨ nepɨmatsiwawirie 'aixɨa ketineuyuri 'aixɨa nemɨrakunuanikɨ.
GEN 24:43 'Ena nepuka, neta'ikwewatɨ haputsu matinieretsie. Xɨka xewitɨ 'ɨimari hayeyani kuhanɨnetɨ, mɨpaɨ nepɨtitahɨawe: ‘Neuxei, 'Etsiwa keneneuharitɨa 'aye'ɨta mieme’,
GEN 24:44 xɨka kemɨ'ane mɨpaɨ mɨtayɨni: ‘Kenanuhareka 'ekɨ, nekaniwatihanɨimɨkɨta kameyutsixi wahetsiemieme’, mɨkɨ kehɨkɨtɨni 'uka pemanayexei Yawé, neti'aitɨwame nu'aya hetsiemieme”.
GEN 24:45 »'Akuxi nekaranunɨwekaku neyunenewietɨ, Xeweka nekaniuxeiya mana 'amiekame yuye'ɨ 'anakayetɨ. Hikɨ kaniutihanɨni haputsuta, mɨpaɨ nekatineitahɨawe: “Neuxei, keneneuharitɨa”.
GEN 24:46 Mɨkɨ yapauka yuye'ɨ 'anakahanaka mɨpaɨ kanetinetahɨawe: “Kenanutihareka 'ekɨ, meta 'akameyutsixi nekaniwatiharitɨamɨkɨ”. Mexi ne neheharekai mɨkɨta nekameyutsixi kaniwaretiharitɨani.
GEN 24:47 Hikɨ nekaneita'iwawiya: “¿Kemɨ'ane pepɨraniwe?” Kepauka mɨkɨ mɨpaɨ mɨnereta'ei: “Wetuheri nepɨniweya, Nakuxi Mirika waniwe”, ne tsurieyatsie nekaneiyewirieni nakɨtsa meta matsɨwa hutame nekaneimini,
GEN 24:48 hikɨ nekanetitunumakeni Yawé pamɨpariyutsi nekanepitɨani, 'Apɨrahami Kakaɨyarieya, 'aixɨa mɨnetiuye'atɨa 'uka nemɨtaxeiyakɨ 'iwamama waniwetɨme neti'aitɨwame nu'aya hetsiemieme.
GEN 24:49 Hikɨ, yaxekeneteneutahɨawi xɨka 'aixɨa xetekakɨnikuni xe'inaki'erietɨ neti'aitɨwame, metatsiere yaxeneteneutahɨawi xɨka katixaɨtɨni. Netari kenemɨyɨaneni».
GEN 24:50 Hikɨ Rawani Wetuheri hamatɨa mɨpaɨ mekaniutiyuani: —Xɨari Yawé matsi mɨpaɨ paine, tame huu temaitɨkani tepɨkayɨwawe meta tixaɨ.
GEN 24:51 Mana puka Xeweka kenanuwitɨki mati'aitɨwame nu'aya 'ɨyaya kanayeimɨkɨ, heitseriemekɨ Yawé kemaine.
GEN 24:52 Hikɨ kepauka 'Apɨrahami ti'uximayatsiriwame mɨpaɨ mɨtiutahɨawarie, kaniukatunumakeni kananakatutsire Yawé hɨxie.
GEN 24:53 Hikɨ katinewatipini hurukɨ mɨtiwewiyatɨka meta pɨratakɨ metatsiere 'ixurikite mɨraye'atɨka Xeweka katiniupitɨani. Yaxeikɨa matsikaya meta maamaya katiniwayetuirieni 'imikierite.
GEN 24:54 'Anari mɨkɨ meta mɨwarawitɨkɨkai mekateniukwani mekateniu'ieni, mana mekanikuheteitɨni wahetsɨa. 'Uxa'arieka ximeri kepauka memanuku'ui, 'Apɨrahami ti'uximayatsiriwame mɨpaɨ kaniutayɨni: —Nekanakunuamɨkɨtsɨari neti'aitɨwame hetsɨa.
GEN 24:55 Peru Xeweka matsikaya meta maamaya mɨpaɨ mekaniutiyuani: —Tamamata tukari 'akuxi ke'ukunuani Xeweka, 'anake tsepa metɨa.
GEN 24:56 Ti'uximayatame mɨpaɨ kaniutayɨni: —Neuxeitsɨ xepɨkanetsi'ukununuitɨwani, 'aixɨa 'anemekɨ nemakunuanikɨ Yawé yapɨtiuyuri, 'ayumieme xekeneneupitɨa nemɨyemiekɨ neti'aitɨwame kie.
GEN 24:57 Hikɨ mɨkɨ mɨpaɨ mekaniutiyuani: —Xeweka tepɨta'iwawiya ketayɨni.
GEN 24:58 Mɨkɨ me'ita'inieka mɨpaɨ mekatenita'iwawiya: —¿Petiyemie 'ikɨ 'utɨa? Xeweka mɨpaɨ katiniwaruta'eiya: —Huu.
GEN 24:59 Hikɨ mekanipitɨani Xeweka mɨyemiekɨ, meta 'ukaratsi yamɨti'ɨwiyakai mitaweriyaxɨ 'Apɨrahami ti'uximayatsiriwame 'utɨa meta memeweiyakai.
GEN 24:60 Hikɨ Kakaɨyari mekaniutawawirieni Xeweka hetsiemieme 'aixɨa miyurienikɨ mɨpaɨ me'utiyuatɨ: «Ta'iwa, tame mɨpaɨ tepɨteku'eriwa: Yuwaɨkawame wamaama peke'ayani. 'Anuiwarima kemɨ'ane memɨwaraye'unie meketewaruta'aitɨani wakiekaritetsie».
GEN 24:61 Hikɨ Xeweka meta memɨte'ita'uximayatsirieni me'anutiyaxeka kameyutsixi wahetsie mekanekɨne 'Apɨrahami ti'uximayatsiriwame 'utɨa. Mɨpaɨ Xeweka katinewitɨkieni, 'ana kanayeyani.
GEN 24:62 Hikɨ 'Itsahaki kaninuakaitɨni haputsu matinieretsie «'Amuyeika Mɨnetsixeiya» mɨtitewatsie, 'anatsɨ Nekexi mɨrakutewatsie kaniuyeikakaitɨni.
GEN 24:63 Merikɨtsɨ taikai kanikuyani yeuta. Hikɨ yapauka kameyutsixi kaniwaruxeiya me'aye'axɨaximeme mematiteitsie.
GEN 24:64 Yaxeikɨata Xeweka 'Itsahaki kaniuxeiya, 'ixeiyaka kananakayani kameyutsie
GEN 24:65 ti'uximayatame mɨpaɨ katiniuta'iwawiya: —¿Kemɨ'ane pɨyɨane mana yeuta matimie tahepa? Ti'uximayatame mɨpaɨ kaniutayɨni: —Neti'aitɨwame kaniyɨaneni. Hikɨ Xeweka kaneuyuku'eima yɨhɨxie 'ixurikikɨ.
GEN 24:66 Hikɨ ti'uximayatame 'Itsahaki naime katiniutaxatɨani kemɨrakunua.
GEN 24:67 Hikɨ 'Itsahaki Xeweka 'ixuriki kiiyarita kaneutawitɨni maamaya muyehupukaitsie Tsara, kanitiwitɨni waɨkawa 'inaki'erietɨ, 'ɨyaya kanayani. Mɨpaɨ 'Itsahaki yu'iyaritsie katiniuyɨnɨtɨani maamaya mumɨkaikɨri.
GEN 25:1 Merikɨtsɨ 'Apɨrahami tawarita 'ukaratsi kaniutiwitɨni Tsetura titewakame.
GEN 25:2 Mɨkɨ hamatɨa yuniwema kaniwarayexeiya: Tsimɨrani, Kutsani, Merani, Mariyani, 'Itsiwaki 'imatɨrieka Tsuhaki.
GEN 25:3 Kutsani Tsawa paapaya kanayani meta Rerani. Rerani nuiwarimama mekanakɨne 'atsureutsixi, retutseutsixi, rehumeutsixi.
GEN 25:4 Mariyani niwemama mekanakɨne, 'Epa, 'Epexi, Kanuki, 'Awiraha, 'imatɨrieka 'Eriraha. 'Ikɨ yunaitɨ Tsetura niwemama mekanihɨkɨtɨni.
GEN 25:5 'Apɨrahami yuniwe 'Itsahaki naime katiniyetuirieni tita mɨrexeiyakai.
GEN 25:6 Meta 'Apɨrahami hipame yɨ'ɨitama waniwema tiwayetuirieka kaniwarenɨ'ani, mexi'akuxi 'a'uyeikakai, 'Itsahaki hamatɨa memɨkatitenikɨ, tau manatineika hepatsie kaniwarenɨ'ani.
GEN 25:7 'Apɨrahami kaniutihuni xeitsienituyari heimana haika tewiyari heimana tamamata heimana 'auxɨwi (175) wiyari.
GEN 25:8 Mɨya paɨmexɨa 'utihuka 'Apɨrahami kaniumɨni waɨkawa 'ukiratsitɨtɨri, tutsimama memakuhe wahetsɨa kaneyani.
GEN 25:9 Niwemama 'Itsahaki meta 'Itsimaheri meyunaitɨ mekanika'awieta terɨta Makipera mɨrakutewatsie Mamɨre 'aurie, 'Epuruni kwieyatsie, Heti tewiyari Tsukaxi nu'aya.
GEN 25:10 'Apɨrahami minanekai pɨhɨkɨtɨkai hetitsixi muwarunanairiekai, muwa mekaneitateni 'ɨyaya Tsara hamatɨa.
GEN 25:11 Hikɨ 'Apɨrahami 'ukumawereku, Kakaɨyari 'Itsahaki 'aixɨa kaniuyurieni 'Apɨrahami nu'aya, putsu 'aurie kaniuyuhayewa «'Amuyeika Mɨnetsixeiya» mɨtitewa 'aurie.
GEN 25:12 'Ikɨ mekanihɨkɨtɨni 'Itsimaheri nuiwarimama, 'Apɨrahami nu'aya Hakari hetsie meyexei, 'ekipitutanaka Tsara parewiwameya.
GEN 25:13 Mɨpaɨ mekatenitetewaka 'Itsimaheri niwemama: Newayuti, Tseraxi, 'Ariweheri, Miwitsani,
GEN 25:14 Mitsima, Rumaha, Matsa,
GEN 25:15 Haraxi, Temaha, Ketuxi, Napitsi meta Tserema.
GEN 25:16 'Ikɨ mepɨhɨkɨ 'Itsimaheri niwemama, tamamata heimana huta nuiwarite mepakɨ kememɨtetetewa yaxeikɨa, yuxexuitɨ kwie mehexeiyatɨ mepakɨ me'ukutetɨkaitɨ.
GEN 25:17 'Itsimaheri xeitsienituyari heimana xeitewiyari heimana tamamata heimana 'atahuta (137) wiyari puyeikakai. Kaniumɨni tutsimama memakuhe wahetsɨa kaneyani.
GEN 25:18 Nuiwarimama Kawira mekaniuyuhayewa meta Tsuhuxi, 'Ekipitu 'aurie mekatenitekaitɨni, huye 'Atsiriya haneme manuyehanetsie, mana mekaniuyuhayewa yu'iwama mewaraye'unietɨ.
GEN 25:19 'Ikɨ 'Itsahaki kemuyɨ pɨ'ɨxatsiyari, 'Apɨrahami nu'aya.
GEN 25:20 'Itsahaki huta tewiyari wiyari kanexeiyakaitɨni kepauka Xeweka mutiwitɨ, Wetuheri niweya, Rawani taruya. Wetuheri Rawani hamatɨa 'arameu teɨteriyari mepɨhɨkɨtɨkai Parani-'Arami mepɨkiekataritɨkai.
GEN 25:21 Hikɨ Xeweka pɨkaniwewekai, 'ayumieme 'Itsahaki Yawé kaniutawawirieni hetsiena mieme, hikɨ Yawé kani'enieni nenewierieya, Xeweka kaniutihukata.
GEN 25:22 Peru hukayahetsie paitɨ meyetetɨ yuhutatɨ tɨɨri mekaniyukwitɨwekaitɨni, mɨkɨ 'ayumieme mɨpaɨ kaniutayɨni: «Xɨka mɨpaɨ netiuka'eniwamɨkɨ, ¿titayari 'anetiuyeikani?» Hikɨ Yawé kaniutahɨawe kanita'iwawiya.
GEN 25:23 Mɨkɨ mɨpaɨ katinita'eiya: «'Ahukatsie huta nuiwariyari mepɨyetei, huta nuiwariyari 'ahukatsie meyetetɨ mepayuye'unie. Xewitɨ tɨrɨkaɨyetɨ kanayeimɨkɨ xewitɨta hawaikɨ, 'amɨyumate yutaru katinita'uximayatsiriemɨkɨ».
GEN 25:24 Hikɨ Xeweka kepauka maye'atɨarie matiniwenitsie, yuhutame kaniwarayexeiya tɨɨri.
GEN 25:25 Matɨari mutinuiwaxɨ kɨpateya kanitataɨrawikaitɨni, naitɨ hauhuxatɨ. 'Etsahu mekateniterɨwa.
GEN 25:26 'Utɨmanata mutinuiwaxɨ yu'iwa 'Etsahu keputsayatsie 'awietɨ kaniutinuiwa. Mɨkɨ Kakuwu mekateniterɨwa. Kepauka mɨkɨ tɨɨri yuhutatɨ memutinunuiwaxɨ 'Itsahaki haika tewiyari wiyari kanexeiyakaitɨni.
GEN 25:27 Tɨɨri mekaniutiwawere. 'Etsahu yeuta kaninakekaitɨni, yeutari kwinimieme tiwareutakwiwetɨ kanayani. Kakuwu meta kayuwatɨ muyeika kanayani, yukie mukani kaninakekaitɨni.
GEN 25:28 'Itsahaki matsi waɨkawa 'Etsahu kaninaki'eriekaitɨni, minakekaikɨ xɨ'erikaya mɨtikwaka, Xeweka matsi Kakuwu waɨkawa kaninaki'eriekaitɨni.
GEN 25:29 Hikɨ Kakuwu pɨtiyuwewiriekai tikwanike, mana 'Etsahu kaninuani 'uxetɨ yeuta hanuyaka mɨpaɨ katinitahɨawe:
GEN 25:30 —Netineumikwa mɨkɨ 'itsari mɨxetakɨ, kwinimieme nepɨti'uxe. ('Ayumieme 'Etsahu 'Erumi pɨtiuterɨwarie).
GEN 25:31 Kakuwu mɨpaɨ katinita'eiya: —Keneneutuiriekameri heitserie kepemɨrexeiya 'ekɨ meri pemɨmiemekɨ.
GEN 25:32 'Etsahu mɨpaɨ kaniutayɨni: —Haakakɨ nepɨmɨxime, tixaɨtɨkɨ pɨkatiyunaki'erie heitserie kenemɨrexeiya nemexɨakametɨtɨ.
GEN 25:33 Kakuwu matsi tawarita mɨpaɨ katinitahɨawe: —Kamɨtsɨ keneneutuiri heitserie kepemɨrexeiya yanetineutahɨawi 'aheyemekɨ. 'Etsahu yurikɨ yakaniutayɨni, mɨkɨ mɨpaɨ katiniyetuirieni heitserie kemɨrexeiyakai mexɨakametɨtɨ.
GEN 25:34 Kakuwu 'Etsahu katiniumini mume 'etsimɨpepe 'itsariyarikɨ meta paa kanimini. Hikɨ tiukwaka 'anutihareka kaneyani. Mɨpaɨ tiuyurieka tixaɨtɨ katiyunaki'erikame payeitɨa heitserie kemɨrexeiyakai mexɨakametɨtɨ.
GEN 26:1 Mɨkɨ tukaritsie waɨkawa haakaxa kanayani mɨkɨ kwieyaritsie, meripaitɨ 'Apɨrahami muyeikakaitsie hepaɨ. 'Ayumieme 'Itsahaki kaneyani Keraxi, 'Awimereki manuyeikakai piritsiteutsixi tiwa'aitɨwame.
GEN 26:2 Mana Yawé kaniyuhekɨata mɨpaɨ katinitahɨawe: «Pepɨkaheyeikani 'Ekipitu. Mɨkɨ kwieyaritsie keneuyuhayewa kemɨ'ane nemɨmatsi'uxeitsitɨatsie.
GEN 26:3 Mana keneuyeikani yatewimekɨ. Ne'ahamatɨa nepuyeikani, 'aixɨa nepɨmatsiyurieka, karikɨ matsi 'ekɨ meta 'anuiwarima nepɨxeyetuirieni 'ikɨ naime kwie. Mɨpaɨ yurikɨ nepɨreye'atɨani 'apaapa 'Apɨrahami kenemɨrahɨawekai.
GEN 26:4 Nepɨwatimɨiriya 'anuiwarima xurawetsixi wahepaɨ, 'ikɨ naime kwie nepɨxeyetuirieni, 'anuiwarima wahekɨ yunaitɨ nuiwarite kwiepa memɨtama 'aixɨa mepɨ'itɨarieka.
GEN 26:5 'Apɨrahami mɨnetsi'anu'enikɨ naime kenemɨti'aitɨakai, 'inɨari niukiyarikɨ, kenemɨrehɨawekai meta kenemɨti'ɨkitɨakai».
GEN 26:6 Hikɨ 'Itsahaki Keraxi kaniuyuhayewa.
GEN 26:7 Kepauka teɨteri mana kiekatari memiku'iwawiyakai 'ɨyaya hepaɨtsita, mɨkɨ kename 'iwaya kaniutainekaitɨni, Xeweka kwinimieme witsikatini'ɨimarikaitɨni, 'Itsahaki kaneumakaitɨni heitserie mɨtiwataxatɨanikɨ, mɨpaɨ pɨtiku'eriwakai me'imienike 'ɨyayakɨ pɨ'eriekai.
GEN 26:8 Mɨixa tukari 'anukayakuke, 'Awimereki piritsiteutsixi tiwa'aitɨwame yukiita paitɨ 'ayekaitɨ kanitanierekaitɨni kiekaritsie, hikɨ 'Itsahaki kaniuxeiya yɨ'ɨya Xeweka 'ikamaɨwame.
GEN 26:9 Hikɨ 'Awimereki 'Isahaki hekɨ katiniutanɨ'ani, mɨpaɨ katinitahɨawe: —¿Kamɨtsɨ mɨkɨ ti'a'ɨya? ¿Titayari kename 'a'iwa petiutayɨ? 'Itsahaki mɨpaɨ kaniutayɨni: —Ne nepɨxemakakai, xe'iwitɨkutɨ xenetsimienike nepɨ'eriekai.
GEN 26:10 Peru 'Awimereki mɨpaɨ katinitahɨawe: —Mɨpaɨ pepɨkatatsiyurieneni 'ekɨ tame, tawarita xeitɨkari xɨka 'anukayanike, xewitɨ hamatɨana xɨka 'ukahunike, hikɨ 'ekɨ teyunaime 'axapepɨtatsiyurienikekai.
GEN 26:11 Hikɨ 'Awimereki yunaime yuteɨterima mɨpaɨ katiniwarutahɨawe: —Kemɨ'ane 'ikɨ tewi 'axamɨmatɨaka yatɨni 'ɨyaya, kanimieriemɨkɨ.
GEN 26:12 Mɨkɨ wiyaritsie 'Itsahaki kaniuka'eni mɨkɨ kwieyaritsie, 'aixɨa katiniuxuawere Yawé miparewiekaikɨ.
GEN 26:13 Mɨpaɨ titsutɨaka 'Itsahaki waɨkawa rexeiyatɨ kanayani.
GEN 26:14 Muxatsi waɨkawa pɨwarexeiyakai, wakaitsixi, meta teɨteri mɨtiwa'aitɨakai, piritsiteutsixi waɨkawa piiniteyakɨ mekaniniukimakaitɨni.
GEN 26:15 Kepauka 'Itsahaki paapaya mayeyurikaitsie 'Apɨrahami, mɨkɨ teɨterimama putsu meputiwewiekai, peru 'ariketa piritsiteutsixi mepenuteukixɨa.
GEN 26:16 Hikɨ 'Awimereki 'Itsahaki mɨpaɨ katiniutahɨawe: —Hikɨri 'ekɨ matsi waɨkawa pepɨrexeiya, pepɨtatsi'a'iwari, 'ayumieme keneumieni 'enari pepɨka'ukani.
GEN 26:17 Hikɨ 'Itsahaki kaneyani mayeweritsie Keraxi mɨrayetewatsie, mana kaniuyuhayewa.
GEN 26:18 Tawarita putsu kanewatiwiwiexɨani, paapaya 'Apɨrahami muyeikakaitsie mieme, piritsiteutsixi memeikanaxɨakai 'umɨkuri, 'Itsahaki yaxeikɨata katiniterɨwaxɨani paapaya kemɨtiterɨwaxɨakai.
GEN 26:19 Hikɨ heiwa mieme 'Itsahaki hetsɨa te'uximayatamete putsu mekaniutawewieni mana mayeweritsie, hikɨ haixa mekaniutaxeiya.
GEN 26:20 Peru manata Keraxi kiekatari mana memɨtetihɨwekai mekaniwarutitieni 'Itsahaki teɨterimama muxatsi wahɨwemete, mɨkɨ mɨpaɨ me'utiyuatɨ kename mɨkɨ pɨta wahetsiemiemetɨkai. 'Ayumieme 'Itsahaki Mɨrayukwine katiniterɨwa mɨkɨ putsu, kɨmana meyukwitɨwekaikɨ.
GEN 26:21 Tawarita xaɨtsie 'Itsahaki teɨterimama putsu mekaniutawewieni, hutariekata mana mekaniuyutitieni, mɨkɨ putsu 'Itsahaki Temataye'unie katiniterɨwa.
GEN 26:22 'Itsahaki kaneyani 'aheteewakaku mana tawarita putsu kaniutawewieni, mɨkɨkɨ hɨrixɨa mepɨka'uyutikwi, 'ayumieme katiniterɨwa 'Amakuyewa, mɨpaɨ kaniutayɨni: «Hikɨ Yawé pɨtatsi'upitɨa 'ena temu'uwanikɨ».
GEN 26:23 Mana mɨyetɨa Weritsewa kaneyani.
GEN 26:24 'Ana tɨkaritsie Yawé kaniuyuhekɨata mɨpaɨ katinitahɨawe: «Ne 'apaapa 'Apɨrahami Kakaɨyarieya nekanihɨkɨtɨni. Pepɨkamaka, ne 'ahamatɨa nepuyeika. 'Apɨrahami 'aixɨa mɨtiuyurikɨ, 'aixɨa nepɨmatsiyurieni nepɨwatimɨiriya 'anuiwarima».
GEN 26:25 Hikɨ 'Itsahaki mawari taiyame kaniutawewieni, mana Yawé kaniutahɨawe. Mana kaniuyuhayewa, teɨterimamata mana putsu mekaniutawewieni.
GEN 26:26 Hikɨ 'Awimereki kaninuani Keraxi paitɨ 'ayeneka, 'Itsahaki hamatɨa titaxatake, 'Akutsati kaneweiyakaitɨni tixaxatɨwameya meta Pikuuri kuyaximama wa'ukiyari.
GEN 26:27 'Itsahaki mɨpaɨ katinita'iwawiya: —Xeme xepɨkanetsinaki'erie, xepɨnetsi'ayewei, ¿titayarita 'uxete'ahu?
GEN 26:28 Mɨkɨ mɨpaɨ mekatenita'eiya: —Mɨpaɨ tepɨtehetima Yawé 'ahamatɨa puyeika, mɨpaɨ tepɨteku'eriwakaku tɨratu tepɨwewienikeyu. Yurikɨ tepɨtahɨritɨanikeyu. Mɨpaɨ tɨratu tepuyurienikeyu:
GEN 26:29 'Ekɨ 'atsipepɨkatatsiyurienekɨ, tameta 'axatepɨkamatsiyuriekɨ, matsi pɨta 'aixɨa 'anemekɨ tepɨmatsixeiya, 'aixɨa 'anemekɨ tematsihetateutɨa. Hikɨ 'ekɨ Yawé 'aixɨa kameniyurieka.
GEN 26:30 Hikɨ 'Itsahaki 'ixɨarari kaniwaruwewirieni, mekateniukwani mɨkɨ mekateniu'ieni.
GEN 26:31 'Uxa'arieka ximeri me'anuku'uka yunaitɨ me'uyu'enieka tɨratu mekaniuwewieni, hikɨ 'Itsahaki kaniwarutateutɨani, mɨkɨta mekanitahɨawe hamikutsixi mekanakɨne.
GEN 26:32 Mɨkɨ tukaritsie 'Itsahaki teɨterimama mekaniu'axɨani mɨpaɨ me'utiyuatɨ xeime putsu hepaɨtsita: —Haa tekanetaxeiya tewati'ineka.
GEN 26:33 'Itsahaki kanitaterɨwa mɨkɨ haputsu, Tsewa katiniterɨwa, 'ayumieme hikɨ mana kiekari Weritsewa katinakutewaka.
GEN 26:34 Kepauka 'Etsahu huta tewiyari wiyari mexeiyakai Yuhuri titewakame kaniutiwitɨni, Weherí niweya Heti tewiyari. Tawarita xeime tiutiwitɨ Watsemati titewakame, 'Eruni Heti tewiyari niweya.
GEN 26:35 'Ikɨ 'ukari yuhutatɨ 'Itsahaki meta Xeweka waɨkawa mekaniwaru'uximatɨani, mete'uka'eniwatɨ 'amepu'uwakai hipatɨ memɨhɨkɨtɨkaikɨ.
GEN 27:1 Merikɨtsɨ 'Itsahaki kepauka 'ukiratsi matɨa kahaunieretɨ kanayani. Hikɨ kepauka 'Etsahu katiniutanɨ'airieni yuniwe matɨari mieme, mɨpaɨ katinitahɨawe: —Neniwe. 'Etsahu mɨpaɨ katinita'eiya: —Tita perayexeiya nepaapa.
GEN 27:2 'Itsahaki mɨpaɨ kaniutayɨni: ―Pepɨnetsixeiya nepu'ukiratsiri, kwitɨwa nepumɨwe.
GEN 27:3 Hikɨ yeuta kenemie 'atupi meta 'a'ɨrɨ perapitɨ tixaɨtɨ ketinemi'a mɨtikwaiwa.
GEN 27:4 Witsi'anekame kenenekawewiri mɨnetsinake hepaɨ, kenene'atɨiri nemikwanikɨ. Hikɨ 'ana Kakaɨyari nepɨtawawirieni 'aixɨa mɨmatsiyurienikɨ nekamɨwetɨkuxi.
GEN 27:5 Hikɨ Xeweka kanita'enakaitɨni, 'Itsahaki yuniwe 'Etsahu kemɨtikɨhɨawekai, 'ayumieme 'amɨretɨa 'Etsahu yeuta reumiemieka yupaapa hetsiemieme,
GEN 27:6 Xeweka yuniwe Kakuwu mɨpaɨ katiniutahɨawe: —Neuxei, 'apaapa nepe'eni 'Etsahu matɨa pɨrekuxatakai, mɨpaɨ pɨreikɨhɨawekai:
GEN 27:7 ketinemiemie kenenekawewiri tsiha'anekame nemikwanikɨ. Mɨpaɨtsiere pɨrehɨawe kename 'aixɨa 'iyurieni Yawé hɨxie mexi kamɨwe.
GEN 27:8 Hikɨ keneneu'eni neniwe kenemɨmatitahɨawe, yaketinekaye'a.
GEN 27:9 Kenemie tsipuri memuyename keniwarahapani yuhutame 'etsimemɨpepe 'aixɨa memɨ'anene nepikawewirieni 'apaapa 'itsari tsiha'anekame minake.
GEN 27:10 'Ekɨ pepenu'ɨirieni meikwanikɨ mɨpaɨ mɨkɨ Kakaɨyari petawawirieni 'aixɨa mɨmatsiheyurienikɨ kamɨwetɨ 'akuxi.
GEN 27:11 Perutsɨ Kakuwu yumaama mɨpaɨ katiniutahɨawe: —Neuxeitsɨ, peru nematsika 'Etsahu kwinimieme pɨreuhuxa neta hawaikɨ.
GEN 27:12 Xɨka nepaapa netsihemayɨani, pɨretimani kename neti'itaiyane, 'anari peitawawirieni 'axanemɨ'itɨariekakɨ, 'aixɨa nemɨ'itɨariekakɨ pɨkatixaɨ.
GEN 27:13 Hikɨ maamaya mɨpaɨ katinitahɨawe: —Neuxei nepɨta nehetsie ketiunake mɨkɨ 'axamɨ'ane. 'Ekɨtɨ yaketineuyuri kenemɨmarahɨawe, kenemie kapuratsixi kenenehapaniriemie.
GEN 27:14 Kakuwu tsipuri kaniwarekuhapani yumaama kani'atɨirieni, mɨkɨ 'itsari kanikawewirieni kemɨtinakekai 'Itsahaki.
GEN 27:15 Hikɨ Xeweka 'Etsahu kamixaya kaniwayehurieni 'aixɨa mɨ'ane mi'utakai yukiita, mɨkɨ Kakuwu kananakatɨtɨani.
GEN 27:16 Hikɨta kapuratsixi wanawiyarikɨ mamateya kaniuti'eima, meta kɨipitɨana hakewa mɨkaheuhuxakai,
GEN 27:17 hikɨ Xeweka Kakuwu yuniwe katiniyetuirieni 'itsari paa mame.
GEN 27:18 Kakuwu yupaapa hetsɨa nuaka mɨpaɨ katinitahɨawe: —Nepaapa. 'Itsahaki mɨpaɨ katiniuta'iwauni: —¿Kemɨ'ane neniwe 'ekɨ peputaine?
GEN 27:19 Kakuwu mɨpaɨ katinita'eiya: —Ne 'Etsahu neputaine, 'aniwe mexɨakame. 'Ari nepɨrekawewi kepemɨnerahɨawekai. Kenanukukeka ketineukwa'i tita nemɨremi, 'anari Kakaɨyari pepɨtawawirieni 'aixɨa mɨnetsiyurienikɨ.
GEN 27:20 Hikɨ 'Itsahaki kanita'iwawiya: —¿Kwitɨwa kuta peremi, neniwe? Kakuwu mɨpaɨ katinita'eiya: —Yawé 'akakaɨyari pɨnetsiheparewi nemeitaxeiyakɨ kwitɨwa.
GEN 27:21 Hutarieka 'Itsahaki mɨpaɨ katinitahɨawe: —'Ena 'aurawa kenayaka nemetsimayɨani mɨpaɨ nemɨretimanikɨ xɨka 'aku neniwe 'Etsahu peyɨaneni.
GEN 27:22 Kakuwu 'aurawa kaniuyani paapaya 'imayɨaka mɨpaɨ kaniutayɨni: —Kakuwu hepaɨ pepɨtiuxaxata, peru mamate 'Etsahu pɨmamateya.
GEN 27:23 Hikɨ paapaya pɨkaheitima, mamateya muhuxatɨkateikɨ 'Etsahu hepaɨ. Kepaukari Kakaɨyari mɨtawawirienikekai 'aixɨa miyurienikɨ,
GEN 27:24 tawarita kanita'iwawiya: —¿Yurikɨ 'aku neniwe 'Etsahu petiyɨane? Kakuwu mɨpaɨ katinita'eiya: —Yurikɨ ne nekaniyɨaneni.
GEN 27:25 Hikɨ paapaya mɨpaɨ kaniutayɨni: —Netinatuiri neniwe nemɨtikwanikɨ tita pemɨremi, hikɨ Kakaɨyari nekanitawawiriemɨkɨ 'aixɨa mɨmatsiyurienikɨ. Kakuwu katinekatu'irieni paapaya mɨtikwanikɨ, meta kaxie winuyari kanikatu'irieni, 'Itsahaki katiniukwani meta kananu'ieni.
GEN 27:26 Hikɨ paapaya mɨpaɨ katinitahɨawe: —'Aurawa kenaye'a neniwe, keneneu'itsi.
GEN 27:27 Kakuwu 'aurawa kaniuyani kani'itseni. Kepauka 'Itsahaki mi'ɨkwixɨ kamixaya, hikɨ Kakaɨyari kaniutawawirieni 'aixɨa miyurienikɨ, mɨpaɨ 'utaitɨ: «Huu, 'ikɨ neniwe 'ɨtsita timieme hepaɨ pɨ'ɨa Yawé 'aixɨa miyuriekaikɨ.
GEN 27:28 Kakaɨyari waɨkawa wiyeri kematsiheyenɨ'airiwani muyuawitsie mieme, waɨkawa pemɨtiukaxexeiyanikɨ 'ena kwiepa timieme tɨriku meta kaxie winuyari.
GEN 27:29 Waɨkawa teɨteri 'ahetsɨa mekete'uta'uximayata, nuiwarite 'ahɨxie meke'utitunuma'uni. 'A'iwamatɨme peketiwaruta'aitɨani, 'amaama niwemama 'ahɨxie meke'utitunuma'uni. Kemɨ'ane 'axamɨmatsiyurieni mɨkɨta 'axapɨ'itɨarieka, meta kemɨ'ane 'aixɨa mɨmatixeiyani mɨkɨta 'aixɨa pɨ'itɨarieka».
GEN 27:30 Hikɨ 'Itsahaki yuniwe hetsiemieme Kakaɨyari 'utawawirieku, Kakuwu 'amɨtiwayetɨa 'Etsahu kaninuani rekumieka.
GEN 27:31 Mɨkɨta katiniukawewieni 'ikwaiya, yupaapa katine'ɨirieni, mɨpaɨ katinitahɨawe: —Nepaapa, kenanukukeka ketineukwa'i tita nemɨremi. Hikɨ Kakaɨyari keneutawawiri 'aixɨa mɨnetsiyurienikɨ.
GEN 27:32 Hikɨ 'Itsahaki kanita'iwawiya. —¿Kemɨ'aneta 'ekɨ peputaine? 'Etsahu mɨpaɨ kaniutayɨni: —Ne 'Etsahu neputaine, 'aniwe 'anemɨyumate.
GEN 27:33 'Itsahaki kaniutimani 'uyɨyɨakatɨ mɨpaɨ kaniutayɨni: —¿Kamɨtsɨ kemɨ'ane pɨyɨanekai xikepaitɨ mɨnerekumi 'itsari mɨnetsi'atɨiri? 'Ekɨ 'akuxi pekanuawekaku, ne nekanikwani naime. Meta Kakaɨyari nekaniutawawirieni hetsiena mieme 'aixɨa nekaniyurieni, mɨkɨri 'aixɨa 'itɨarietɨ kanayeimɨkɨ.
GEN 27:34 Kepauka 'Etsahu mu'enaxɨ paapaya kemainekai karima kaniutatsuani yuhiwerietɨ, mɨpaɨ yupaapa katiniutahɨawe ha'atɨ: —Ne waɨkawa nepɨmatsiwawirie, nepaapa 'aku, Kakaɨyari keneutawawiri nehetsiemieme neta 'aixɨa mɨnetsiyurienikɨ.
GEN 27:35 Peru 'Itsahaki mɨpaɨ katinitahɨawe: —'Amuta kaneukuyeixɨani kanetiniu'itaiya, mɨkɨri naime katinepiini tita mɨti'ahetsiemiemetɨkai.
GEN 27:36 'Etsahu mɨpaɨ kaniutayɨni: —'Ayumieme xɨari Kakuwu xepɨte'iterɨwaxɨ, hikɨri hutarieka kaneniukwamana, matɨari meri kaneniunawairieni kenemɨtimexɨakame, hikɨta 'aixɨa kenemɨ'itɨarienikekai kaneniunawairieni. ¿Pekatiyɨwe Kakaɨyari pemɨtawawirieni 'aixɨa mɨnetsiyurienikɨta ne?
GEN 27:37 'Itsahaki mɨpaɨ katinita'eiya: —Neuxei ne, Kakaɨyari neputawawiri Kakuwu hetsiemieme mɨmati'aitɨakakɨ, nepitawawiri tsiere maremama yunaitɨ memɨte'ita'uximayatsirienikɨ, tɨriku waɨkawa mukaxexeiyanikɨ meta kaxie winuyari. ¿Hikɨ tita netiutawauni 'ahetsiemieme pɨtiumaweri, neniwe 'aku?
GEN 27:38 Peru 'Etsahu pɨkatihayewakai: —¿Xeimieme xeikɨa petiyɨwekai Kakaɨyari pemɨtawawirieni 'aixɨa xewitɨ xeikɨa mɨ'itɨarienikɨ? Keneutawawiri Kakaɨyari neta 'aixɨa mɨnetsiyurienikɨ. Mɨpaɨ 'utayɨka tawarita kaniutatsuani karima.
GEN 27:39 Hikɨ 'Itsahaki mɨpaɨ katinitahɨawe: «'Ekɨ kwiepa 'aixɨa mɨraku'anetsie pepɨka'uyeikani, wiyeri muyuawitsie makaneika makaxɨruwe pepɨka'uyeikani.
GEN 27:40 'A'ixiparakɨ pe'amienetɨ pepuyeikani, 'amuta pepɨti'uximayatsirieka. Peru kepauka petɨrɨkaɨyetɨ pemayani, pepɨyuxɨna kemɨmati'aitɨa».
GEN 27:41 Mana mɨtiyetɨa, 'Etsahu Kakuwu kanihekakaitɨni paapaya Kakaɨyari mutawawirikɨ hetsiena mieme 'aixɨa miyuriekakɨ. 'Etsahu mɨpaɨ katiniku'eriwakaitɨni: «'Arikutari kwitɨwa pɨmɨni nepaapa mɨyuke, nemuta Kakuwu nepɨmieni».
GEN 27:42 Hikɨ kepauka Xeweka mɨretima 'Etsahu kemɨtiku'eriwakai, Kakuwu kaniuta'inieni mɨpaɨ katinitahɨawe: —Neuxei, 'a'iwa 'Etsahu pɨmatsimiemɨkɨ pemɨtinawairikɨ.
GEN 27:43 'Ayumieme neniwe, keneneu'eni: Keneuyuta'una Karani paitɨ, ne'iwa kie Rawani,
GEN 27:44 mɨkɨ hetsɨa kenekani kepaukake 'amatsika mɨratɨmaiya ha'atɨ.
GEN 27:45 Ratɨmaiyayu kepemɨtiuyuri, 'anake niuki nepanunɨ'ani pemamiekɨ. Yanepɨkara'eriwa tietɨtsɨ xeitukaritsie yunaitɨ xemɨneuyukwixɨa.
GEN 27:46 Hikɨ Xeweka 'Itsahaki mɨpaɨ katiniutahɨawe: —Neri nepɨkayɨwe 'anemuyeikani 'ikɨ hetitsixi wahamatɨa 'Etsahu 'ɨitamama mepɨnetsihiweritɨa. Xɨkata Kakuwu Heti tewiyari 'utiwitɨni 'ena kiekame Kanani matsi 'aixɨa pɨyɨnikeyu xɨka ne'umɨnike.
GEN 28:1 Hikɨ 'Itsahaki Kakuwu katiniutanɨ'airieni. 'Aixɨa kaniyurieni, meta mɨpaɨ katinita'aitɨani: —'Uka 'ena Kanani kiekame pepɨka'utiwitɨkɨni.
GEN 28:2 Hikɨ kwitɨwa kenemie Parani-'Arami paitɨ, 'ateukari Wetuheri hetsɨa, xeime kenetiwitɨki 'atatatsi Rawani niweya.
GEN 28:3 Kakaɨyari Naimekɨmɨtɨrɨkaɨye 'aixɨa kematsiyurieka waɨkawa peke'utaxiɨni, 'ahetsie memɨyekɨnekɨ nuiwarite yuwaɨkawatɨ.
GEN 28:4 'Ekɨta kematsiyetuirieni meta 'anuiwarima 'Apɨrahami 'aixɨa kemuyuriekai, 'ikɨ xepiini mayanikɨ hikɨ temanu'uwa teewanarixi wahepaɨ, 'Apɨrahami kemɨtiutahɨawarie 'ikɨ kwie hepaɨtsita.
GEN 28:5 Mɨpaɨ titahɨaweka kaneinɨ'ani yuniwe 'Itsahaki Parani-'Arami kwieyaritsie Rawani hetsɨa, 'Etsahu meta Kakuwu wamaama Xeweka matsikaya hetsɨa, Rawani matɨa Xeweka Wetuheri pɨwapaapatɨkai 'arameu tewiyari kanihɨkɨtɨkaitɨni.
GEN 28:6 'Etsahu katinetimani kepauka 'Itsahaki Kakuwu 'aixɨa miyuriekai meta kename heinɨ'akai Parani-'Arami kwieyaritsie paitɨ mana metineɨkekɨ. Yaxeikɨata katinetimani kepauka paapaya 'aixɨa 'iyurieka, mɨpaɨ mɨtitahɨawixɨ kename 'uka mana Kanani kiekame katiwitɨkɨnikekai,
GEN 28:7 meta Kakuwu kepauka metɨa Parani-'Arami paapaya meta kememɨtehehɨawekai.
GEN 28:8 'Ana mɨpaɨ katinetimani 'Etsahu, kename paapaya 'ukarawetsixi Kanani kiekatari kawanaki'eriekai.
GEN 28:9 'Ayumieme tsepa mɨneɨkekai 'Etsahu kaneyani hakewa paitɨ tatatsieya mekatei 'Itsimaheri 'Apɨrahami nu'aya. Mana xeime kaniutiwitɨni nu'ayatɨme Makarati titewakame, Newayuti taruya kanihɨkɨtɨkaitɨni.
GEN 28:10 Kakuwu kanayeyani Weritsewa, huye kananukuweiya Karani haneme.
GEN 28:11 Kepauka tau makayunixɨ 'umiekaku mana kaniukateitɨni, tete kaniutituni kanikamu'urita, hikɨ 'ukahuka kaneukuni.
GEN 28:12 Mana katiniuheinɨni, 'imɨmui 'ahatayeume kaniuxeiya kwiepa yuwetɨkaime muyuawitsie heutiyuneme, mɨkɨ 'ɨtɨma mekananutikɨkaitɨni niuki tuayamete Kakaɨyari hetsɨa miemete me'anutikɨkame me'anakakɨkame.
GEN 28:13 Metatsiere Yawé kaniuxeiya 'auriena 'uweme, mɨpaɨ tikɨhɨaweme: «Ne Yawé nepɨhɨkɨ 'ateukari Kakaɨyarieya 'Apɨrahami meta 'apaapa 'Itsahaki. 'Ekɨ yaxeikɨa 'anuiwarima 'ikɨ kwie nepɨxeyetuirieni mana hikɨ pemanukatsie.
GEN 28:14 Mɨkɨ yumɨiretɨ mepakɨne kwie tumuanariyari hepaɨ. 'Amepɨtayeure 'ayeta, 'atsutɨa, 'atserieta, 'a'utata meye'atɨkaitɨ meta yunaitɨ nuiwarite kwiepa memɨtama 'aixɨa mepɨ'itɨarieni 'ekɨ 'akɨmana meta 'anuiwarima».
GEN 28:15 Ne 'ahamatɨa nepuyeikani. Nepɨmatsi'ɨwiyani tsepa hakewa pemeyeika, meta nepɨmatsi'akunuitɨani 'ikɨ kwieyaritsie. Nepɨkamatsiku'eirieni neraye'atɨameke kenemutayɨkai».
GEN 28:16 Kepauka Kakuwu manutanierixɨ mɨpaɨ katiniu'erieni: «Yurikɨ Yawé 'ena puyeika, ne 'atsinepɨkatimaikai».
GEN 28:17 Heumatɨri waɨkawa tawarita mɨpaɨ kaniutayɨni: «'Ena xɨari pakupatsie, 'ena xɨari pɨhɨkɨ Kakaɨyari kie, muyuawi kitenie pɨti'ane».
GEN 28:18 'Uxa'arieka ximeripaitɨ kananukukeni Kakuwu, tete kaniutituni mimu'uritakai 'a'uweme kanayeitɨani huriwa hatseitiyarikɨ kanika'ɨya patsiekame kanayeitɨani.
GEN 28:19 'Ana mana kiekari kanikumakaitɨni 'Arimetɨra maku'u titewatɨ, peru Kakuwu kanipata Weteri pɨta katiniterɨwa.
GEN 28:20 Hikɨ mana Kakuwu mɨpaɨ kaniutayɨni: «Xɨka Kakaɨyari nehamatɨa 'uyeikani netsi'ɨwiyani hakewa nemeutɨa, xɨka neremikwani meta nereketɨaka,
GEN 28:21 xɨka ne'akunuani 'aixɨa nereu'erietɨ nepaapa hetsɨa, hikɨ 'ana Yawé nekakaɨyari kanayeimɨkɨ.
GEN 28:22 'Ikɨta tete 'anemitake Kakaɨyari kiiya kanayeimɨkɨ, naime tita Kakaɨyari mɨnetimini, nekaniyetuiriemɨkɨ tamamata hetsiemieme xeime».
GEN 29:1 Merikɨtsɨ Kakuwu kaneyani, tau manatineika hepatsie kiekatari wakwieyaritsie kaniye'ani.
GEN 29:2 Hikɨ mana 'uta'aka yeuta haputsu kaniuxeiya, 'auriena haika tewayari muxatsi mekani'uxipitɨariekaitɨni mana memɨtiharewekaikɨ. Mɨkɨ haputsu tete 'ayeukamekɨ kananukanakaitɨni.
GEN 29:3 'Ayumieme yunaitɨ tehɨwemete meyukuxeɨriemeke mekaniyexɨrakaitɨni, hikɨ yunaime mewatiharitɨame, tawarita yunaitɨ mekanenukanarɨmakaitɨni haputsu.
GEN 29:4 Hikɨ Kakuwu kaniwaruta'iwawiya tehɨwemete: —¿Hakewa xepekiekatari xeme? Mɨkɨ mɨpaɨ mekatenita'eiya: —Karani tepɨkiekatari.
GEN 29:5 Tawarita Kakuwu kaniuta'iwauni: —¿Kamɨtsɨ xeme Rawani xetemate, Nakuxi nu'aya? —Huu tepimate —mekatenita'eiya.
GEN 29:6 Tawarita mɨpaɨ Kakuwu katiniwaruta'iwawiya: —¿'Aixɨa kapɨreu'erietɨtɨ? Mɨkɨta mɨpaɨ mekatenita'eiya: —'Aixɨa pɨreu'erie. Kamɨmatsi niweya huma kanamieni Xakeri muxatsi wara'arietɨ.
GEN 29:7 Hikɨta Kakuwu mɨpaɨ katiniwarutahɨawe: —Matsi 'akuxi puximeri, yakɨpupauka 'akuxi muxatsi xemɨwareunaxɨanikɨ wakuraruta, 'aixɨa pɨyɨni yumuxatsima xekeniwarutiharitɨaka xeketenewamiyu.
GEN 29:8 Mɨkɨ mɨpaɨ mekatenita'eiya: —Hawaikɨ tepɨkayɨwawe mɨpaɨ temɨte'uyurieni taxaɨtame, teyukwewiemeke tanaitɨ tehɨwemete tepenuku'ɨwe tete. 'Anake tepɨyɨwawe tamuxatsima temɨwarutiharitɨani.
GEN 29:9 Wahamatɨa tikuxatakaku 'akuxi, Xakeri kaninuani muxatsi wara'arietɨ yupaapa tewamama, mɨkɨ kaniwahɨwemetɨkaitɨni.
GEN 29:10 Hikɨ kepauka Kakuwu Xakeri muxei, yutatatsi Rawani niweya, mana 'uyaka haputsu kananutiyepieni, muxatsimama kaniwarutiharitɨani.
GEN 29:11 'Anata kwitɨwa Xakeri kaniu'itseni, meta kaniutatsuani,
GEN 29:12 mɨkɨ katinitaxatɨani kename me'iwamarixi Xeweka mɨnu'ayatɨkaikɨ. Hikɨ 'ayumieme Xakeri yapauka 'unautsarɨmetɨ kaneyani yupaapa hetsɨa reitaxatɨanike.
GEN 29:13 Hikɨ Rawani yumatsu Kakuwu 'utamarieka kaneyani kaneikunake kanitatapa meta kani'itseni, yukie kanei'inieni. Hikɨ Kakuwu naime katinitaxatɨani naime kemɨreyɨ,
GEN 29:14 Rawani mɨpaɨ katinitahɨawe: «'Ekɨtsɨ yuheyemekɨ ta'iwa pekanihɨkɨtɨni». Merikɨtsɨ Kakuwu xeimetseri kaniukateitɨni Rawani hetsɨa.
GEN 29:15 Mɨpaɨ katinitahɨawe: —Tsepanetɨ hurawa pemɨne'iwa yakɨxeikɨa pepɨkati'uximayaka nehetsɨa. Yakenetineutahɨawi kepaɨmeme pepeu'iwamɨkɨ.
GEN 29:16 Rawani yuhutame kaniwarexeiyakaitɨni yuniwema 'ukari, kurieya Reya pɨtitewakai, taruyata Xakeri.
GEN 29:17 Reya hɨxiteya witsipɨ'anenekai, peru Xakeri witsipɨtiyuxexeiyakai naitɨ.
GEN 29:18 Hikɨ Kakuwu Xakeri mɨhiwe'eriekaikɨ yutatatsi mɨpaɨ katiniutahɨawe: —'Atahuta wiyari nepɨti'uximayaka 'ahetsɨa, 'aniwe yakɨ mɨyumate Xakeri nemɨtiwitɨnikɨ.
GEN 29:19 Rawani mɨpaɨ katinita'eiya: —'Aixɨa kaniyɨmɨkɨ nemɨmatsiwitɨtɨanikɨ 'ekɨ, xeime nemɨka'imate nemɨkakuwitɨtɨwanikɨ. Nehetsɨa keneuyuhayewa.
GEN 29:20 Hikɨ Kakuwu 'atahuta wiyari katini'uximayakaitɨni Xakeri mɨtiwitɨnikɨ, hikɨ 'apɨkareuterixɨ tsepa mɨixa tukari manuyetɨa waɨkawa minaki'eriekaikɨ.
GEN 29:21 Hikɨ Kakuwu mɨpaɨ Rawani katiniutahɨawe: —'Ari nepɨraye'atɨa kenemutayɨ. Keneneyetuiriri nemitiwitɨnikɨ.
GEN 29:22 Rawani mana kiekatari yunaime kaniwaruta'inieni, 'ixɨarari mariweme kaniuwewieni.
GEN 29:23 Peru kepauka mukɨyɨrixɨ, kurieya pɨta Kakuwu kaniyetuirieni Reya mɨtitewakai, 'ana Kakuwu hamatɨana kaniukahuni.
GEN 29:24 Reya xeime ti'uximayatame pexeiyakai Tsiripa titewakame, 'ayumiemeta Rawani kanixatɨani miparewiekakɨ.
GEN 29:25 Hikɨ 'uxa'arieka katinetimani Reya matɨa pɨta mukateikɨ, 'ayumieme Rawani mɨpaɨ katiniutahɨawe: —¿Titayari mɨyapenetiuyuri? ¿Netamɨ nekamatiuta'uximayatsiri Xakeri nemɨtiwitɨnikɨ? ¿Ketitayari penetiu'itai?
GEN 29:26 Rawani mɨpaɨ katinita'eiya: —Tame tayeiyari mɨpaɨ pɨ'ane 'ikɨ kwieyaritsie, Kurieya meri pɨtiwikieni 'ariketa taruya.
GEN 29:27 'Ayumieme hikɨ kenaye'atɨa tsemana kemɨreuyewetse, tawarita 'uximayatsikakɨ 'atahuta wiyarikɨ tawarita xeime nepɨmatsiwitɨtɨani.
GEN 29:28 Kakuwu mɨpaɨ katinikayani, kepauka tsemana maye'atɨa xeimetsie mieme kemɨreuyewetse, Rawani Xakeri kaniyetuirieni 'ɨyaya mayanikɨ.
GEN 29:29 Xakeri xeimeta ti'uximayatame kanexeiyakaitɨni Wiriha titewakame, Rawani kaniyetuirieni miparewiekakɨ.
GEN 29:30 Hikɨ Kakuwu kaniukahuni hamatɨana, waɨkawa matsi Xakeri kaninaki'eriekaitɨni Reya 'akuxi matsi 'etsiwa, tsepa 'akuxi 'atahuta wiyari tawarita Rawani mɨtiuta'uximayatsiri.
GEN 29:31 Kepauka Yawé Reya muxei kanaki'eriwame, kanipitɨani tɨɨri mɨwarayexeiyakɨ, Xakeri 'akuxi pɨkaniwewekai.
GEN 29:32 Hikɨ Reya kaniutihukata, xeime 'ukitɨme kaniutiniweni Xuweni katiniterɨwa, mɨpaɨ 'utayɨka: «Yawé pɨnetsi'uxei kenemɨtinehiweriekai, hikɨrixɨa nekɨna pɨnetsinaki'erieka».
GEN 29:33 Hutarieka kaniutihukata xeimetsiere 'ukitɨme kanayexeiya, Tsimehuni katiniterɨwa, mɨpaɨ 'utayɨka: «Yawé pe'enaxɨ, kename nekanaki'eriwa, 'ayumieme xeimeta pɨnetsiheyenɨ'airi nunutsi 'ukitɨme».
GEN 29:34 Hairiekata kaniutihukata xeime nunutsi 'ukitɨme kanayexeiya, Rewi katiniterɨwa, mɨpaɨ 'utayɨka: «Hikɨrixɨari nekɨna netsinaki'erietɨ payani, yuhaikameri tɨɨri hetsiena mieme nemɨwarayexeikɨ».
GEN 29:35 Nauriekata kaniutihukata Reya, xeime 'ukitɨme kaniutiniweni, Kura katiniterɨwa, mɨpaɨ 'utayɨka: «Hikɨ Yawé nekanitanɨawamɨkɨ». Mɨpaɨ tiuniweka tawarita pɨka'utiniwexɨ.
GEN 30:1 Kepauka Xakeri tɨɨri mɨkawarayexeiyawekai Kakuwu hetsiemieme, yukuri kani'uxiwe'erikaitɨni, hikɨ Kakuwu mɨpaɨ katiniutahɨawe: —Neta keneneupitɨa tɨɨri nemɨwaraxeiyakɨ, xɨka pekanetsi'upitɨani, nepɨmɨni.
GEN 30:2 Hikɨ Kakuwu kaniuyeha'ani waɨkawa, mɨpaɨ katinitahɨawe: —¿Ne Kakaɨyari peneti'erie? Mɨkɨ kanihɨkɨtɨni pekaniweweme mɨmatsi'ayeitɨa.
GEN 30:3 Xakeri mɨpaɨ katinitahɨawe: —Mana puka neti'uximayaitsiriwame Wiriha, hamatɨana keneukahu'i. Kepauka meyexeiya netunutetɨa pihɨani, neta 'ana nepɨwarexeiyani tɨɨri mɨkɨ tiyurieyu.
GEN 30:4 Hikɨ Xakeri Kakuwu kaniyetuirieni tiyu'uximayatsiriwame Wiriha 'ɨyaya mayanikɨ, Kakuwu hamatɨana kaniukahuni.
GEN 30:5 'Ana Wiriha kaniutihukata, xeime nunutsi mekanayexeiya Kakuwu matɨa.
GEN 30:6 Xakeri mɨpaɨ kaniutayɨni: «Kakaɨyari nehetsiemieme 'aixɨa katiniuyurieni. Kenemɨtiyuhiweriekai kaneniu'enieni, xeime nunutsi kaneneyenɨ'airieni». 'Ayumieme Xakeri Rani katiniterɨwa.
GEN 30:7 Tawarita Wiriha Xakeri parewiwameya, hutarieka kaniutihukata mekaneyexeiya xeime tawarita nunutsi 'ukitɨme Kakuwu matɨa.
GEN 30:8 Xakeri mɨpaɨ kaniutayɨni: «Mariwemekɨ nepɨnemiene nekuri hamatɨa, hikɨ peru nepɨrayu'iwa». 'Ayumieme Xakeri Nepɨtahari katiniterɨwa.
GEN 30:9 Reya timaitɨri tawarita mɨkatiniwekekaikɨ, tiyu'uximayatsiriwame Tsiripa Kakuwu kaniyetuirieni 'ɨyaya mayanikɨ,
GEN 30:10 mɨkɨta xeime mekanayexeiya nunutsi Kakuwu matɨa.
GEN 30:11 Hikɨ Reya mɨpaɨ kaniutayɨni: «Nehetsie pɨreuyɨwe». 'Ayumieme Kahari pɨtiterɨwaxɨ.
GEN 30:12 Hutarieka Tsiripa, Reya ti'uximayatameya, Kakuwu matɨa xeime nunutsi 'ukitɨme mekanayexeiya.
GEN 30:13 Reya mɨpaɨ kaniutayɨni: «Waɨkawa nepɨnetemawie. 'Ukarawetsixi mɨpaɨ mepɨnetekɨhɨaweni pepɨ'atemawie». 'Ayumieme mɨkɨ 'Atsexi katiniterɨwa.
GEN 30:14 Merikɨtsɨ tɨriku mati'itsanarɨwa tukariyaritsie, Xuweni kaneyani mɨrati'uximayatsiwatsie, mana 'ikwaxi kanetaxeiya manirakura, yumaama Reya kanetɨkirieni. Hikɨ Xakeri mɨpaɨ Reya katiniutahɨawe: —Neuxei, mɨkɨ manirakura keneneumikwa 'etsiwa 'aniwe mɨmatsi'atɨiri.
GEN 30:15 Peru Reya mɨpaɨ katinita'eiya: —'A'iyari 'aixɨa kati'ane nekɨna pemɨnetsi'unawairi, 'akuxita hikɨ manirakura penetinawairiemɨkɨ neniwe mi'atɨa. Mɨpaɨ katinita'eiya Xakeri: —Xɨka penetsi'umini manirakura 'aniwe mi'atɨa hikɨ tɨkarikɨ Kakuwu 'ahamatɨa pɨkahuni.
GEN 30:16 Hikɨ kepauka Kakuwu munua taikai, Reya kaneikunake mɨpaɨ katinitahɨawe: —Hikɨ tɨkarikɨ nehamatɨa pekanikahuimɨkɨ, ne 'akɨmana nekatiniupata 'ikwaxi manirakurakɨ neniwe mi'atɨa. 'Ana tɨkarikɨ kaniukahuni Kakuwu Reya matɨa.
GEN 30:17 Kakaɨyari Reya kaniu'enieni, mɨkɨ kaniutihukata 'auxɨwirieka nunutsi 'ukitɨme Kakuwu matɨa mekaneyexeiya.
GEN 30:18 Reya mɨpaɨ kaniutayɨni: «Kakaɨyari kanetiniupitɨani ti'uximayatame nekɨna nemuwitɨtɨakɨ». 'Ayumieme 'Itsakaxi katiniterɨwa.
GEN 30:19 Tawarita Reya kaniutihukata, 'ataxewirieka nunutsi 'ukitɨme mekanayexeiya Kakuwu matɨa.
GEN 30:20 Reya mɨpaɨ kaniutayɨni: «Kakaɨyari 'aixɨa pɨnetsi'uyuri 'aixɨa ti'aneme pɨnetiumi, hikɨri nekɨna 'aixɨa pɨnetixeiyani, 'ataxewirieka nunutsi temayexeikɨ». 'Ayumieme Tsawuruni pɨtiterɨwaxɨ.
GEN 30:21 'Imatɨrieka Reya xeime 'ukatɨme kanayexeiya Rina katiniterɨwa.
GEN 30:22 Meta Kakaɨyari Xakeri kanaye'erieni, nenewierieya kaniu'enieni kanipitɨani mɨtiniwenikɨ.
GEN 30:23 Hikɨ mɨkɨ kaniutihukata xeime 'ukitɨme kanayexeiya. Mɨpaɨ kaniutayɨni: «'Axanemɨkaramamatiwanikɨ pɨneranuyeitɨiri Kakaɨyari».
GEN 30:24 'Ayumieme Kutse pɨtiterɨwaxɨ, mɨpaɨ 'utayɨka: «Xɨka tɨma tiyɨwenike Yawé netsi'upitɨanike xeime tawarita nemɨtiniwenikɨ».
GEN 30:25 Hikɨ 'ari Xakeri Kutse 'ayexeiyaku, Kakuwu Rawani mɨpaɨ katiniutahɨawe: —Keneneupitɨa nemɨyemiekɨ nekiepaitɨ.
GEN 30:26 Keneneyetuiriri ne'ɨitama kɨmana nemɨmatiuta'uximayatsiri meta neniwema, keneneupitɨa nemɨyemiekɨ. 'Ekɨ pepɨtimate kenemɨti'uximayakai 'ahetsiemieme.
GEN 30:27 Rawani mɨpaɨ katinita'eiya: —Neuxeitsɨ, pepɨkaheyeikani. Ne mɨpaɨ nepɨretima Yawé 'aixɨa pɨnetsiyurie, 'ekɨ penetsiparewiekaku.
GEN 30:28 Mɨpaɨtatsiere katinitahɨawe: —'Ekɨ yakeneutayɨki kepaɨmeme pemeu'iwamɨkɨ, ne mɨpaɨ nepɨmatipitɨani.
GEN 30:29 Kakuwu mɨpaɨ katinita'eiya: —'Ekɨ pepɨtimate kehepaɨ nemɨti'uximayakai, neyuhɨtɨatɨ kenemɨtiwa'ɨwiyakai 'atewama.
GEN 30:30 Kepauka nekanuawekaku pemɨrexeiyakai pɨkatimɨirekai, hikɨri waɨkawa mepɨte'utamɨirixɨ, ne netiyurienekaku Yawé 'aixɨa pɨmatsiyurie. Hikɨri ne xaɨtsie nepɨtita'uximayata netɨɨriyama wahetsiemieme.
GEN 30:31 Rawani mɨpaɨ katinita'iwawiya: —¿Kepaɨmeme pepau'iwamɨkɨ? Kakuwu mɨpaɨ katinita'eiya: —Pepɨkanetikupitɨwani. Xɨka 'ekɨ yapetiutanaki'erieni kenemɨmatitahɨawe, nekaniwa'ɨwiyakamɨkɨ 'amuxatsima.
GEN 30:32 Hikɨ ne kepauka yunaime 'amuxatsima memuyenatɨkatsie nemuyeyani, 'ekɨ pepɨwaranuyeteɨxɨ memeuyɨyɨwi, memeukutuxa, meta tsipuri memeukɨyɨyɨwi memeukutuxa. Mɨkɨ nemɨwa'iwani mekanihɨkɨtɨkakuni.
GEN 30:33 Hikɨ kepauka 'uxa'a pemɨnierimie keyupaɨmeme nemɨwara'iwaxɨri ke'aixɨa nemɨtiuka'iyari pekatinetimaimɨkɨ: Xɨka xeime pehetaxeiya muxa yatɨni tsipu kaheukɨyɨyɨwime kaheukutuxame meta muxa kaheuyɨwime tatsɨari ne nematsi'unawatsirieku.
GEN 30:34 Rawani mɨpaɨ kaniutayɨni: —'Aixɨa pɨyɨni, yanepɨra'eriwa kepemaine.
GEN 30:35 Hikɨ kwitɨwa mɨkɨ tukaritsie kaniwaranuyeteɨxɨ tsipuri 'ukitsi 'ukari, memeukuyɨyɨwi, memeuririnawi, yunaime kemɨ'ane 'etsiwa memeukutuxa, metatsiere yunaime muxatsi memeuyɨyɨwi, mɨkɨ yunaime kaniwaruhɨritɨani yuniwema.
GEN 30:36 'Ana Rawani kaneyani haika tukari heteewakaku Kakuwu manukateitsie yeyaka. Peru Kakuwu yaxeikɨa kaniwa'ɨwiyakaitɨni memuyuhayewaxɨ Rawani tewamama.
GEN 30:37 Kakuwu meta haramu kaniutiwiteni yuyurime meta 'arimerituru metatsiere karu kɨyeyari, mɨkɨ kanikaxixiexɨani 'ukatuxatɨ kanayani.
GEN 30:38 Mɨkɨ kɨyexi mɨxixiyatɨka kaniuka'uitɨani muxatsi wahareweme matinenieretsie 'auriena memɨtiharewenikɨ. Kepauka muxatsi 'ukari meyuweiyanɨatɨ mematiharewetsie mekani'axekaitɨni,
GEN 30:39 'ukitsi mekaniwarutiweweiyakaitɨni 'ukari mana kɨyexi mɨxixiyatɨka hɨxie, mɨpaɨ 'ana mekaniwarayexexeiyakaitɨni meheuririnawime, meheukutuxame, meheukuyɨyɨwime.
GEN 30:40 Hikɨ Kakuwu xaɨtsie kaniwakupatakaitɨni memeuririnawi wahetsɨa, memeuyɨyɨwi Rawani muxatsimama wahetsɨa. Mɨpaɨ tiuyurieka yutewama warexeiyatɨ kanayani Rawani tewamama wahepaɨ meka'aneneme.
GEN 30:41 Matsi kepauka muxatsi 'ukari memɨ'axekai 'amemɨpapa, Kakuwu kanika'uitɨwakaitɨni kɨyexi, hɨxiena memuyutiweiyakɨ.
GEN 30:42 Peru kepauka memɨ'axekai memɨwawaki, 'ana pɨka'ika'uitɨwakai kɨyexi. Mɨkɨ memɨwawaki Rawani hetsɨa miemete mepɨhɨkɨtɨkai, memɨwaiyatɨkata Kakuwu hetsɨa miemete.
GEN 30:43 Mɨpaɨ 'ana Kakuwu waɨkawa rexeiyatɨ kanayani, yuwaɨkawame muxatsi, te'uximayatamete 'ukitsi 'ukari, puxuri meta kameyutsixi.
GEN 31:1 Hikɨ Kakuwu mɨpaɨ katiniuyumarieni kename Rawani niwemama mɨpaɨ me'utiyuanekai: «Kakuwu naime katinepiini tapaapa tewamama, piiniteyakɨ waɨkawa rexeiyatɨ kanayuyeitɨani».
GEN 31:2 Yaxeikɨata Kakuwu katinetimani Rawani 'aixɨari mɨkatixeiyakaikɨ meripaitɨ kemɨkatixeiyakai.
GEN 31:3 Hikɨ Yawé Kakuwu mɨpaɨ katiniutahɨawe: «Kenakunua 'apaapa kwieyatsie, hakewa 'a'iwama meme'uwa, ne 'ahamatɨa nepuyeikani».
GEN 31:4 Hikɨ Kakuwu katiniutanɨ'ani yu'ɨitama Xakeri meta Reya wahekɨ, muxatsi mɨwarahɨnetsie paitɨ,
GEN 31:5 mɨpaɨ katiniwarutahɨawe: —Mɨpaɨ nepɨtimate xepaapa 'aixɨa pɨkanetixeiyari meripaitɨ hepaɨ. Peru tsepa, nepaapa Kakaɨyarieya pɨnetsiparewie.
GEN 31:6 Xeme xekatenimaika kenemɨtiuta'uximayataxɨ xepaapa Rawani hetsiemieme neyutatuatɨ yuheyemekɨ.
GEN 31:7 Peru mɨkɨ matsi mɨixa pɨnetsi'ukwamanaxɨ, waɨkawa 'ikupatatɨ ne'iwarika. Peru Kakaɨyari pɨka'ipitɨa 'axamɨnetsiyurienikɨ.
GEN 31:8 Kepauka mɨpaɨ mɨnetikɨhɨawekai: «Yunaitɨ tewaxi memeupipitu 'a'iwarika mepakɨne», 'ana 'ukari yunaitɨ mepɨwatiniweyakai meheupipitume xeikɨa. Kepaukata mɨpaɨ mɨnetikɨhɨawekai: «Yunaitɨ tewaxi memeuririnawi 'a'iwarika mepakɨne», 'ana 'ukari yunaitɨ mepɨwatiniweyakai meheuririnawime xeikɨa.
GEN 31:9 Mɨpaɨ Kakaɨyari xepaapa tewamamata katiniunawairieni, nepɨta kanetiniupitɨani.
GEN 31:10 »Merikɨtsɨ kepauka tewaxi mematiniweiyatsie 'ana mɨpaɨ nekatiniuheinɨni. 'Ukitsi mekaniwaweiyatɨwekaitɨni 'ukari, memeuririnawi meta memeupipitu.
GEN 31:11 Mɨkɨ heinɨtsikatsie meta niuki tuayame Kakaɨyari hetsɨa mieme, mɨpaɨ kanetiniutahɨawe: “Kakuwu”. 'Ana mɨpaɨ nekatinita'eiya: “'Ena nepuyeika”.
GEN 31:12 Hikɨ mɨkɨ mɨpaɨ kanetiniutahɨawe: “Paratsɨ keneuyɨ'ɨwiya, tuurutsixi 'ukari memɨwaweiyatɨwe mekaneuririnawini meta mekaneupipitɨni. Ne nepɨtimate kemɨmatsi'uyuri Rawani.
GEN 31:13 Ne Kakaɨyari nekanihɨkɨtɨni Weteri nemunehekɨataxɨ, hakewa mawari pemewewi nehetsiemieme tetetsie, meta kepemainekai nehɨxie. 'Ayumieme kenanukukexi 'ikɨ kwieyaritsie, kenemie kemɨ'ane kwieyaritsie pemetinuiwaxɨ”».
GEN 31:14 Xakeri Reya matɨa mɨpaɨ mekatenita'eiya: —Tixaɨtɨri tame pɨkatatikupinierie tapaapa tahetsie timieme.
GEN 31:15 Matsi mɨkatatsimateni hepaɨ pɨtatixeiya. Pɨtatsi'utua, mɨkɨ naimeri pɨtiutixɨtɨa tita mɨrakapitɨarie tahetsiemieme.
GEN 31:16 Kaniyuritɨni Kakaɨyari naime mɨtinawairi tapaapa mɨrexeiyakai tahetsiemieme katinihɨkɨtɨni meta tatɨɨriyama wahetsiemieme. 'Ayumieme yaketineuyuri Kakaɨyari kemɨmarahɨawe.
GEN 31:17 Hikɨ Kakuwu kaniyukuha'aritɨani, yuniwema yu'ɨitama kaniwaranutiyatsa kameyutsixi wahetsie.
GEN 31:18 Yunaime tiwara'arietɨ yutewama Parani-'Arami mɨtiukaxeiyakai, mekanekɨne Kanani me'erietɨ, 'ukiyarieya 'Itsahaki manukateitsie.
GEN 31:19 Mexi Rawani yumuxatsima warexinekai, Xakeri yapauka heyaka kaniwarunawani kakaɨyariximama.
GEN 31:20 Mɨpaɨ katinikwamana Kakuwu Rawani 'arameu tewiyari, kaniuyuta'una 'atsikatitahɨaweka.
GEN 31:21 Kakuwu kaneyani yunaime tiwara'arietɨ tita mɨrexeiyakai. 'Epɨrata hatuxameyaritsie 'uyeyaka, muhɨriyatsie Karaha kanitiyune.
GEN 31:22 Hairieka tukari 'anukayaku Rawani katiniutaxatɨarieni, kename Kakuwu 'uyuta'unakai.
GEN 31:23 Hikɨ Rawani kaniwarukuxeɨrieni yu'iwamarixi, mɨkɨ mekaniwaranukuweiya 'atahuta tukari mekaniuhukaitɨni, mekaniwaranuku'axeke Karaha hɨriyaritsie paitɨ.
GEN 31:24 Perutsɨ mɨkɨ tɨkaritsie Kakaɨyari Rawani 'arameu tewiyari katiniutaxatɨani kutsukaku mɨpaɨ katinitahɨawe: «'Amarima 'aixɨa Kakuwu pepɨka'utate'ani».
GEN 31:25 Rawani Kakuwu kaniwaranuku'axe Karaha hɨriyaritsie mɨkɨ mana me'uxipiekaku. Metatsiere Rawani mana kaniyuhayewa yu'iwama warawitɨtɨ.
GEN 31:26 Mɨpaɨ Kakuwu katiniutahɨawe: —¿Kepetiuyuri 'aku? Pekanetiniu'itaiya, neniwema pekaniwareyewitɨni pɨretsutsixi wahepaɨ.
GEN 31:27 ¿Ketitayari pereyetɨa 'atsipekaneretahɨaweka? Ne 'aixɨa 'anemekɨ nekamenetateutɨanikekaitɨni neyutemawietɨ ne xawererutsixi nepɨwareta'inienikekai.
GEN 31:28 Tsikere neniwema nemɨwareti'itsenikekai pepɨkanetsihepitɨa meta neteukarima. Pemɨka'uka'iyarini hepaɨ pepeyɨ.
GEN 31:29 Ne nekaniyɨweni nemɨtixe'utikwinitɨani, peru 'ikɨ tɨkaritsie 'apaapa Kakaɨyarieya pɨneretaxatɨa mɨpaɨ pɨneretahɨawixɨ: “'Amarima 'aixɨa Kakuwu pepɨka'utate'ani”.
GEN 31:30 Mɨpaɨ nepɨretima 'apaapa manuyeikatsie peyeimɨtɨ pepɨyɨane, ¿peru ketitayari petiwarenawa nekakaɨyarixi?
GEN 31:31 Kakuwu mɨpaɨ katinita'eiya: —Ne yemekɨ waɨkawa ne petima, mɨpaɨ nepɨre'eri ne'ɨitama penetsihenawairienike nepe'eriekai.
GEN 31:32 Keniwarutiwawa 'akakaɨyarixi, kemɨ'ane pemɨtaxeirieni mɨkɨ ke'ukumawere. Ta'iwama memunenierixɨ mekanakɨnikuni: Ketineutiwawa tita mɨti'apiini, ketinapitɨ. Perutsɨ Kakuwu 'atsipɨkatimaikai, Xakeri Rawani kakaɨyariximama mɨwarenawakai,
GEN 31:33 Hikɨ Rawani Kakuwu xamaruyata meri kaniuti'iwauni, kwitɨwata Reya xamaruyata meta memɨyuhuta te'uximayatamete 'ukarawetsixi waxamaruta, nitixaɨtɨ pɨkatiukaxei. Kepauka Reya xamaruyata mɨwayetɨa, Xakeri xamaruyata kaneutahani.
GEN 31:34 Hikɨ Xakeri kakaɨyarixi kaniwaruti'awieta kameyu xirayatɨa, mɨpaɨ tiuyurieka waheima kanayerɨni. Rawani naime kaniu'iwauxiwiya, mɨkɨ pɨkawarutaxei.
GEN 31:35 Hikɨ Xakeri yupaapa mɨpaɨ katiniutahɨawe: —Neuxeitsɨ, nepɨtikuye, nepaapa, 'ukarawetsixi ketemɨyɨtɨka mɨpaɨ nepɨ'ane, nepɨkayɨwe 'anemutakeni pepɨkaha'aka. Rawani kakaɨyarixi kaniwarutiwauni, peru pɨkawarutaxei.
GEN 31:36 Merikɨtsɨ Kakuwu kaniuyeha'ani, Rawani hepaɨtsita mɨpaɨ katinenutahɨawixɨani: —¿Kekuta yemekɨ netiuyuri, xurikime nekapeutiwiwiexɨa, titayari mɨya petatiyuriene?
GEN 31:37 Nepiinite naime pemɨtiutixei, ¿tita petiukaxei mɨti'apiini? Xɨka tixaɨtɨ petiutaxeiya, ta'iwama wahɨxie ketinekupini, mɨkɨ yameke'utiyuani kemɨ'ane tame temɨtahuta heitserie pexeiya.
GEN 31:38 Xeitewiyari wiyari 'ahetsɨa nepuyeikakai, 'amuxatsima 'atsipurima hatsuaku mepɨka'anuye'ikwitɨaxɨa, nitɨma xeime muxa nepɨka'utakwai 'akurarutamieme.
GEN 31:39 Xeime hatsuaku nepɨka'atɨa 'ɨrawe 'itexierieya, nepɨta nepɨrayukatuayakai mɨkɨkɨ. Yaxeikɨata hekɨta tɨkarikɨ memɨnawarietɨwekai 'ekɨ mɨkɨkɨ pepɨnetsiwiyakai.
GEN 31:40 Tukarikɨ xɨrikɨ nepɨtiuka'eniwakai, tɨkarikɨ xerikɨ neputimɨmɨwekaitɨma, yemekɨ nepɨkatikukutsukai.
GEN 31:41 Xeitewiyari wiyari 'akie nepuyuri, tamamata heimana nauka wiyari nepɨti'uximayakai 'aniwema wahetsiemieme, 'ataxewime wiyari 'atewama nepuwahɨkai, peru 'ekɨ mɨixa pepipataxɨ kenemɨti'iwakai.
GEN 31:42 Xɨka nepaapa Kakaɨyarieya 'Itsahaki meyemakaxe, meta 'Apɨrahami Kakaɨyarieya, xɨka kanetsiparewiekake, 'ekɨ nemaweme pekanenanunɨ'anikekaitɨni. Kakaɨyari pɨnetsi'uxei kenemɨtiuka'eniwakai neti'uximayatɨ, 'ayumieme takai tɨkarikɨ kename ne heitserie nehexeiya putayɨ.
GEN 31:43 Rawani Kakuwu mɨpaɨ katiniuta'eiya: —'Ikɨ 'ukari mepɨneniwema, 'ikɨ temari mepɨneteukarima, muxatsitsiere mepɨnetewama, tita pemɨrexeiya nepiini pɨtihɨkɨ naitɨ. ¿Ketsukuta newaruyurieni 'ikɨ neniwema neteukarima?
GEN 31:44 Matsi tɨratu tepɨwewieni 'ekɨ matɨa ne, mɨkɨ tɨratu teme'eriwanikɨ mɨpaɨ temɨtemaikakɨ.
GEN 31:45 Hikɨ Kakuwu tete 'anukutuka 'akanitakeni 'inɨari hepaɨ,
GEN 31:46 mɨpaɨ katiniwarutahɨawe yu'iwama: —Tetexi xekeneukuxeɨri. Mɨkɨ mepititɨkixɨa, 'axeikɨa mepikuxeɨri, mana mepɨte'ukwai, tetexi makuxeɨrietsie.
GEN 31:47 Mana Rawani Yekaxi-Tsaruta katiniuterɨwa meta Kakuwu Karaha katiniterɨwa.
GEN 31:48 Rawani mɨpaɨ kaniutayɨni: —'Ikɨ tetexi 'ena mukuxeɨrie teme'eriwanikɨ pɨ'inɨaritɨni. 'Ayumieme mana Karaha pɨtiuterɨwarɨwakai,
GEN 31:49 metatsiere Mitsipa pɨtiuterɨwarɨwakai, Rawani mɨpaɨ mutayɨkɨ: —Yawé ketatsixeiyani kepauka tahamatɨa temɨka'u'uwanitsie tame teyuhutatɨ.
GEN 31:50 Xɨka 'ekɨ neniwema 'axapewareyurieneni, xɨka hipame pɨta pewaretiwitɨni 'ukari, kena'eriwani Kakaɨyari yapɨretima, tsepa xewitɨ tawarita mɨkatatsixeiya.
GEN 31:51 Rawani tetexi 'itɨiyatɨ mɨpaɨ kaniutayɨni: —Keneuxeiya tetexi mukuxeɨrie meta tete temikake.
GEN 31:52 Mɨkɨ ya'ane mepɨmaika kename 'ekɨ meta ne 'ena teka'anuyekɨkani 'axatetatiyuriexɨanike.
GEN 31:53 'Apɨrahami Kakaɨyarieya meta Nakuxi Kakaɨyarieya ta'itsɨkame kehɨkɨtɨni. Hikɨ Kakuwu 'aixɨa kaniutayɨni Kakaɨyari hepaɨtsita paapaya 'Itsahaki mimakaxekai hetsie.
GEN 31:54 Hikɨ mawari kaniuwewieni yemuri 'amanutitewatsie paitɨ, yu'iwama waruta'inieka yunaitɨ memɨtehekwanikɨ. Yunaitɨ mete'ukwakari, mana mekanitiheteitɨni.
GEN 31:55 'Uxa'arieka ximeripaitɨ Rawani 'anukukeka, yuteukarima kaniwaruti'itseni Yawé wawirietɨ 'aixɨa mɨwayuriekakɨ meta yuniwema, hikɨ nakunuani yukie.
GEN 32:1 Merikɨtsɨ Kakuwu kanayeyani kemɨtimiekai, 'umiekaku mekanenukunake niuki tuayamete Kakaɨyari hetsɨa miemete.
GEN 32:2 Kakuwu waruxeiyaka mɨpaɨ kaniutayɨni: «'Ena xɨari Kakaɨyari manuka pɨti'ane». 'Ayumieme mana Makanahini pɨtiuterɨwaxɨ.
GEN 32:3 Hikɨ Kakuwu kaniwarenɨ'ani yuteɨterima 'Etsahu hetsɨa, Tsehixi kwieyaritsie paitɨ, 'Erumi mɨrakutewatsie.
GEN 32:4 Mɨpaɨ katiniwarutahɨawe mɨpaɨ memɨteheitahɨawekɨ: «Neti'aitɨwame 'Etsahu, mati'uximayatsiriwame Kakuwu, pɨtatsiheyenɨ'a mɨpaɨ tematetaxatɨanikɨ mɨkɨ Rawani kie pekatei kemɨreuterixɨ,
GEN 32:5 hikɨ pɨwarexeiya wakaitsixi, puxuri, muxatsi, te'uximayatamete 'ukitsi 'ukari. Mɨpaɨ pɨreyenɨ'a, 'aixɨa 'anemekɨ pemitakwewiekakɨ».
GEN 32:6 Kepauka teɨterimama memakunuaxɨa, Kakuwu mɨpaɨ mekateniutaxatɨani: «'A'iwa 'Etsahu tepɨtehetaxatɨa, 'upamie pɨmatsihanakimie nauka tsienituyari wara'inietɨ yuteɨterima».
GEN 32:7 Kakuwu waɨkawa kanekamatɨyani yu'iyaritɨatɨ. 'Ayumieme yuteɨterima muwarawitɨkɨkai hixɨapa kaniwatsana, yaxeikɨata kaniwarukuxeɨrieni muxatsi, wakaitsixi, kameyutsixi,
GEN 32:8 mɨpaɨ tiu'erieka: «Xɨka 'Etsahu warutakwini hipame, hipatɨ xeikɨa mepɨyuta'una».
GEN 32:9 Hikɨ Kakuwu 'ayumieme kaniuyutanenewieni: «Yawé neteukari 'Apɨrahami meta nepaapa 'Itsahaki wakakaɨyari pemɨhɨkɨ, mɨpaɨ pemɨnerahɨawekai nekehakunuanike nekie ne'iwama wahetsɨa, meta kename penetsiparewiekakekai:
GEN 32:10 ne xɨari mati'uximayatsiriwame heitserie nepɨkahexeiya 'aixɨa pemɨnetixeiyanikɨ pemɨnetsiparewiekaku. Kepauka Kurutani hatuxameyaritsie nemanatɨa tixaɨtɨ nepɨkarexeiyakai ne'itsɨ xeikɨa nepakwekai, peru hikɨ hutakɨa mepukutei neteɨterima.
GEN 32:11 Kenenewikweitsitɨaka ne'iwa 'Etsahu netsi'umienikɨ nepeuma 'ukarawetsixi warukwini meta tɨɨri.
GEN 32:12 'Ekɨ mɨpaɨ pepɨnetiutahɨawixi kename penetsiparewiekakekai, kename nexiɨyarima yumuiretɨ mehakɨnekekai, xiekari haramara tetsita mɨtixeɨrie mɨkayu'inɨatsinɨa hepaɨ».
GEN 32:13 Mɨkɨ tɨkaritsie Kakuwu mana puyuhayewaxɨ, kepaɨmeme mɨrexeiyakai katiniwaranuyeteɨxɨ yu'iwa 'Etsahu mɨtiminikɨ,
GEN 32:14 huta tsienituyari tsipuri 'ukari, xeitewiyari tsipuri tuurutsixi, huta tsienituyari muxatsi 'ukari meta xeitewiyari muxatsi 'ukitsi,
GEN 32:15 xeitewiyari heimana tamamata kameyutsixi 'ukari meniwetɨkaime, huta tewiyari wakaitsixi, tamamata tsikerutsixi xeiwiyari mehɨtɨkaime, xeitewiyari puxuri 'ukari meta tamamata puxuri 'ukitsi.
GEN 32:16 Hikɨ kaniwaruhɨritɨani yuxexɨime te'uximayatamete mɨpaɨ katiniwarutahɨawe: «Xeme xekenanuyeyaxi xete'u'arietɨ perutsɨ yunaitɨ xeka'uhutɨ yaxe'ayuxeiyatɨ».
GEN 32:17 Manuyehaitɨanikekai mɨpaɨ katiniuhɨritɨani: «Kepauka mɨmatsihanukunake ne'iwa 'Etsahu, xɨka matsiheta'iwawiya, kemɨ'ane hetsɨa pepɨmieme, hakewa pepeutɨa, kemɨ'ane mepɨtehatewama 'ikɨ pemɨwara'arie,
GEN 32:18 mɨpaɨ pepɨreita'eiya: “'Ikɨ 'imikieri 'ahetsie pɨtimieme neti'aitɨwame 'Etsahu, Kakuwu mati'uximayatsiriwame pɨmatsiheyenɨ'airi yutewama wahetsie waranuyeteɨxɨka, mɨkɨtatsiere ta'utɨma kanamieni”».
GEN 32:19 Kakuwu yaxeikɨata katiniuhɨritɨani hutarieka mieme, meta hairieka mieme, yaxeikɨa yunaime katiniwarutahɨawe tewaxi memuwaru'ariekai. Mɨpaɨ katiniwarutahɨawe: «Kepauka 'Etsahu xemanukunake mɨpaɨ xekateneitahɨawikuni,
GEN 32:20 mɨpaɨtatsiere xekateneitahɨawikuni: “Mati'uximayatsiriwame Kakuwu ta'utɨma 'ukanamieni”». Mɨpaɨ pɨtiku'eriwakai Kakuwu: «'Imikierikɨ meri nekaninɨtɨamɨkɨ, 'ariketa ne kanenanukunakimɨkɨ heiwatɨ 'aixɨa netiutahɨawe».
GEN 32:21 Hikɨ mɨpaɨ 'imikieri meri katinenɨ'ani, Kakuwu 'akuxi mana puyuhayewaxɨ mɨkɨ tɨkaritsie mematitekaitsie.
GEN 32:22 Hikɨ mɨkɨ tɨkaritsie Kakuwu kaniuyukuha'aritɨani, yu'ɨitama meta memuyuhuta te'uximayatamete, meta tamamata heimana xewi wara'inietɨ yuniwema, haa 'etsimɨpetsie mekaniukɨne Kawuki mɨrayetewatsie.
GEN 32:23 Hikɨ kepauka muwaranutua, yutewama yupiinite naime katinanutuanita,
GEN 32:24 hikɨ yuxaɨtame kaniuyuhayewa. 'Ana xewitɨ tewi kanitamieni kaniukatare 'imienekaku.
GEN 32:25 Kepauka 'iya tewi mɨpaɨ mɨretima Kakuwu mɨkaha'iwakaikɨ, teurieya mɨtiwayewiyatsie kanitahutsuni, 'anari kaniwayexɨne 'uti'ɨtsaiwatɨ kanayani meyukwitɨwekaku.
GEN 32:26 Hikɨ tewi mɨpaɨ katinitahɨawe: —Keneneutatua, 'ari pɨkahekɨarirɨme. Kakuwu mɨpaɨ katinitahɨawe: —Kepaukake 'aixɨa pemɨnetsiyurieni 'anake nepɨmatsitatuani.
GEN 32:27 Tewi mɨpaɨ katinita'iwawiya: —¿Kepetitewa? —Kakuwu nepɨtitewa —katinita'eiya.
GEN 32:28 Hikɨ tewi mɨpaɨ katinitahɨawe: —Kakuwu pepɨkatitewakari, 'Ixaheri pɨta, Kakaɨyari pemutamikɨ meta teɨteri, pemɨrayu'iwakɨ.
GEN 32:29 Kakuwu mɨpaɨta katinita'iwawiya: —'Ekɨta, ¿kepetitewa? Tewi mɨpaɨ kaniutayɨni: —¿Titayarikuta penetiku'iwawiya kenemɨtitewa? Mana kwitɨwa 'aixɨa kaniyurieni.
GEN 32:30 Hikɨ Kakuwu mana Penuheri katiniuterɨwa, mɨpaɨ 'utayɨka: «Kakaɨyari nierikaya nepuxei, 'ayɨwekatɨka nepayeyuri 'akuxi».
GEN 32:31 Tau panatine Penuheri 'uyemiekaku Kakuwu. Mutiteurimɨrariekaikɨ 'uti'ɨtsaiwatɨ kaneyani.
GEN 32:32 'Ayumieme 'ixaheritsixi wai teuri mɨrawiyatsie mieme mepɨkakwa'a, Kakuwu mana mutahutsunariekɨ.
GEN 33:1 Kepauka Kakuwu 'Etsahu muxei 'a'amiekame teɨteri nauka tsienituyari warawitɨkɨme, yu'ɨitama waniwema me'ayenaukame kaniwarayeitɨani Reya, Xakeri meta te'uximayatamete memuyuhuta.
GEN 33:2 Mɨkɨ 'ukarawetsixi memuyuhuta te'uximayatamete kaniwaranuyeyatsa yuniwemakame, wa'utɨmata Reya yuniwemakame, 'imatɨrieka Xakeri yuniwe Kutse matɨa.
GEN 33:3 Hikɨ Kakuwu meri nanuyeyerɨni, 'atahutamexɨa 'umietɨ kananakatutsitakaitɨni kwiepa paitɨ yu'iwa 'anukunakirɨmetɨ.
GEN 33:4 Peru 'Etsahu kaniutanautsa 'enukunakeke, 'itapaka kani'itseni. Hikɨ yuhutatɨ mekaniutitsuani.
GEN 33:5 Kepauka 'Etsahu 'ukarawetsixi mɨwaruxei meta tɨɨri, mɨpaɨ katiniuta'iwauni: —¿Kemɨ'aneta 'ikɨ mepɨyɨa, memɨmatsi'aweiya? Kakuwu mɨpaɨ katinita'eiya: —Mɨkɨ tɨɨri mepɨhɨkɨ Kakaɨyari ti'a'uximayatsiriwame meyenɨ'airi.
GEN 33:6 Mɨkɨ yuhutatɨ te'uximayatamete 'ukarawetsixi 'amenakɨne yuniwema mewaruwitɨtɨ 'Etsahu hɨxie mekanakatutsitaxɨani.
GEN 33:7 Kwitɨta Reya meta niwemama yaxeikɨata mekaniuyɨni, 'imatɨrieka Kutse Xakeri matɨa yaxeikɨata mekaniutihɨxima'uni.
GEN 33:8 'Etsahu mɨpaɨ katiniuta'iwauni: —¿Kepaɨtɨtɨri mɨkɨ tewaxi pemɨnetsihenɨ'airi? Kakuwu mɨpaɨ katinita'eiya: —Kɨmana 'aixɨa pemɨneranunakekɨ nepɨtiuyuri.
GEN 33:9 'Etsahu mɨpaɨ kaniutayɨni: —Neuxeitsɨ, nemuta, matsi neta waɨkawari nepɨrexeiya. Ketinapitɨ 'apiinite.
GEN 33:10 Kakuwu mɨpaɨ kaniutayɨni: —Neuxeitsɨ hawaikɨ, xɨkari 'aixɨa 'anemekɨ penetsi'utahɨawe, ketineutanaki'eri tita nematimikwa. 'Aixɨa 'anemekɨri pekaneniutahɨawe, 'anierika nexeiyatɨ Kakaɨyari nemɨxeiyani hepaɨ nekatinimaika.
GEN 33:11 Ketineutanaki'eri 'imikieri nemɨmati'atɨiri. Kakaɨyari 'aixɨa pɨtiuka'iyari nehetsiemieme, waɨkawa matsi nepɨrexeiya tita nemɨreuyehɨwa. Mɨya tikɨhɨawetɨ Kakuwu 'ameteneutere, 'imatɨrieka 'Etsahu yakatiniutanaki'erieni.
GEN 33:12 'Arikekeri 'Etsahu mɨpaɨ katinitahɨawe: —Kɨmɨtsɨari tekaniyehuni, ne nekamenanuteɨtamɨkɨ.
GEN 33:13 Peru Kakuwu mɨpaɨ kaniutayɨni: —Neuxeitsɨ, nematsika meta neti'aitɨwame, tɨɨri mepɨka'ɨkɨniwawe meta muxatsi wakaitsixi meputiniwexɨa, nepɨwata'ɨwiya. Xɨka xeiya neware'arieni yunaitɨ xeitukaritsie mepɨkwini.
GEN 33:14 'Ayumieme peuyewetse pemanuyeyerɨni mati'uximayatsiriwame hɨxie, ne'anɨkai nepɨyemie netewama wahamatɨa meta tɨɨri, Tsehixi paitɨke tekaneyukaxeiyakuni.
GEN 33:15 'Etsahu mɨpaɨ kaniutayɨni: —'Aixɨa kani'aneni, peru neteɨterima nekaniwaku'eirimɨkɨ yayupaɨmeme memɨmatsi'anuteɨtakɨ. Kakuwu mɨpaɨ katinita'eiya: —Neuxeitsɨ pepɨka'a'iyaritɨaka, matsi 'aixɨa 'anemekɨri tepuyutahɨawixɨ, mɨkɨ matsi waɨkawa peuyewekai.
GEN 33:16 Mɨkɨ tukaritsie kwitɨwa 'Etsahu kanakunuani Tsehixi paitɨ.
GEN 33:17 Kakuwu, kaneyani Tsukuti 'erietɨ, mana kaniuyutakitɨani meta kuraru kaniutiwewieni yutewama wahetsiemieme. 'Ayumieme mana pɨtiuterɨwarie Tsukuti.
GEN 33:18 Kepauka Kakuwu makunua Parani-'Arami, 'aixɨa 'anemekɨ meta 'aixɨa reu'erietɨ Tsikeni kiekariyaritsie kaninuani, Kanani kwieyaritsie, mɨkɨ hɨxie kaniutayerɨni.
GEN 33:19 Hikɨ xeitsienituyari pɨrata tuminiyarikɨ kwie kaniunaneni, Kamuxi niwemama kaniwarunanairieni Tsikeni paapaya mana kaniyutaxamarutɨani.
GEN 33:20 Metatsiere mana mawari taiyame kaniutawewieni, 'Eruhe-'Ixaheri katiniterɨwa.
GEN 34:1 Merikɨtsɨ Rina Kakuwu niweya Reya hetsie meyexei, hipame 'ukarawetsixi kaniwareku'iwata mana kiekatari.
GEN 34:2 Kepauka mixei Tsikeni, Kamuxi nu'aya, heweu tewiyari, mana mɨtiwa'aitɨakai, 'iwiyaka waɨriyarika 'ipitɨatɨ hamatɨana kaniukahuni kaninanaimani.
GEN 34:3 Mɨya 'iyuriekaketa kanitihiwe'erieni 'aixɨa katinixeiyakaitɨni pitiwitɨnikekai.
GEN 34:4 Hikɨ yupaapa mɨpaɨ katiniutahɨawe: «Mɨkɨ 'uka keneutawawa ne'ɨya mayanikɨ».
GEN 34:5 Hikɨ Kakuwu mɨpaɨ katinetimani kename Tsikeni nu'aya Rina 'unanaimakai, 'atsipɨka'utayɨ niwemama yeuta meme'uwakaikɨ tewaxi metewarehɨtɨwetɨ, me'u'axɨakuke katiniwarutaxatɨani.
GEN 34:6 Hikɨ Kamuxi Tsikeni paapaya, Kakuwu hetsɨa kaneyani hamatɨana titaxatake.
GEN 34:7 Kepauka Kakuwu niwemama memu'axɨa mekateniutamarieni kemɨtiɨyɨkai, pɨkawarunakixɨ waɨkawa meha'atɨ mekaniuyuhayewa. Tsikeni waɨkawa 'axakatiniuyuriekaitɨni 'Ixaheri hepaɨtsita niweya munanaimakɨ, pɨkaheuyewekai matsi mɨpaɨ mɨtiyurienikɨ.
GEN 34:8 Kamuxi peru mɨpaɨ katiniwarutahɨawe: —Neniwe Tsikeni xe'iwa 'uka kanihiwe'erieka. Neuxeikuta xekeneupitɨa memuyutiwitɨnikɨ.
GEN 34:9 Tepɨtatimareta. Taniwema mepuyuwitɨtɨweni.
GEN 34:10 Mɨpaɨ xepɨteyuhayewani xeme tahamatɨa, 'ikɨ kwie xehetsiemieme pɨhɨkɨtɨni 'ena xekeneu'uwani kemɨtixenake xete'uximayatɨ, meta kwie xekeneukukurarutɨiyaxɨa.
GEN 34:11 Hikɨ Tsikeni mɨpaɨta katiniwarutahɨawe Rina 'iwamama meta paapaya: —Xɨka xeme xenetsi'utanaki'erieni, ne nepɨtixepitɨani tita xemɨnetetawawirieni.
GEN 34:12 Xepɨyɨwawe tita xemɨnete'utawawirieni kɨmana, meta 'imikieri nemɨtixeminikɨ, peru yemekɨ xekeneneupitɨa 'uka ne nemɨtiwitɨnikɨ.
GEN 34:13 Hikɨ wa'iwa Rina munanaimariekɨ, Kakuwu niwemama mekaniwaruta'eiya kwamanarikakɨ Tsikeni meta paapaya Kamuxi.
GEN 34:14 Mɨpaɨ mekateniwarutahɨawe: —Tame tepɨkayɨwawe mɨpaɨ temɨte'uyurieni. Xɨka ta'iwa teyetuani xeime xitekiya 'inɨariyari kahexeiyame hetsɨa tepɨtatewiyatsitɨani tame.
GEN 34:15 Ketemɨtexetahɨawe xɨka mɨpaɨ xe'uyɨni 'ana yatepɨtetanaki'erieni: yunaitɨ xeme 'ukitsi xitekiya 'inɨariyari xekeneuyuwewiri tahepaɨ xemɨ'anenenikɨ.
GEN 34:16 'Anake taniwema temɨwatawitɨtɨwani kaniyɨwemɨkɨ, xehamatɨa temɨtiteni xeikiekariyari temɨhɨkɨtɨni.
GEN 34:17 Mexɨka yaxekate'utanaki'erieni xitekiya xeka'uyuwewirieni, ta'iwa te'awitɨtɨ tame tekaniyehuni.
GEN 34:18 Kamuxi Tsikeni matɨa yameteniutanaki'erieni kememutiyua,
GEN 34:19 Tsikeni kwitɨwa kaniuyu'inɨaritɨani Kakuwu nu'aya kwiniemieme mɨtinaki'eriekaikɨ. Tsikeni waɨkawa 'iwamama memei'eniekaikɨ,
GEN 34:20 paapaya Kamuxi kaneiteɨta kiekari kitenie paitɨ, mana mekateniutixata kiekatari wahamatɨa. Mɨpaɨ mekateniwarutahɨawe:
GEN 34:21 —'Ikɨ teɨteri 'aixɨa mepɨtekahu mepɨhamikutsixi. Xekeniwarupitɨa takwieyaritsie memu'uwanikɨ, mekete'uximayaka 'ena, 'apakuyewakuta wahetsiemieme. Meta tame tepɨyɨwaweni temɨwatiwitɨni waniwema, mɨkɨta taniwema.
GEN 34:22 Mɨkɨ yamepɨteha'eriwa tahamatɨa memuyuhayewakɨ xeikiekariyari temakɨnekɨ, xɨka yatetekakɨne kememaitɨka: xɨka teyunaitɨ 'ukitsi xitekiya 'inɨariyari te'uyuwewirieni, mɨkɨ kememɨte'uhu.
GEN 34:23 Hikɨmɨtɨka yatepɨtekakɨne, tahamatɨa memuyuhayewanikɨ. Mɨpaɨ wawakaitsixi naime tita memɨtehexeiya tapiini mepɨtehɨkɨtɨni.
GEN 34:24 Yunaitɨ kiekari kitenie memuyuxeɨriekai, yameteniutanaki'erieni Kamuxi meta nu'aya Tsikeni kememaitɨkatei, 'ana yunaitɨ 'ukitsi mekaniu'inɨaritɨarieni xitekiyakɨ.
GEN 34:25 Hairieka tukaritsie, 'ukitsi 'akuxi mete'ukakukuinekaku, yuhutatɨ Kakuwu niwemama Tsimehuni Rewi matɨa, Rina matsikamama, yu'ixipara me'u'ɨtɨ kiekaritsie mekanekɨne, 'ukitsi memuyeheitɨkateitsie mekayɨ'ɨwiyatɨ, yunaime mekaniwarukwini.
GEN 34:26 Kamuxi meta nu'aya Tsikeni mekaniumieni, Rina Tsikeni kiita mewayehanaka mekanekɨne.
GEN 34:27 Hikɨ hipatɨta Kakuwu niwemama mekaniu'axɨani, mɨkite watsata me'utakɨneka, kiekaritsie naime wapiini mekatene'arieni wa'iwa munanaimariekɨ.
GEN 34:28 Yupiini mekatenayeitɨani wamuxatsima, wawakaitsixima, wapuxurima, naime tita kiekaritsie mɨtiyepikai meta tita memɨte'ekai.
GEN 34:29 Naime mekatenepini tita memɨtehexeiyakai, meta waniwema wa'ɨitamata naime mekateniunawani kiita mɨrayepitɨkatei.
GEN 34:30 Hikɨ Kakuwu mɨpaɨ katiniwarutahɨawe Tsimehuni Rewi mame: —Waɨkawa 'uximatɨarika xepɨnetsiheutiwiwiriexɨa. Hikɨ 'ena mɨtiyehane kananeutsixi, peretseutsixi, 'enakiekatari yunaitɨ, menetsi'aye'unietɨ mepakɨne. Xɨka mɨkɨ me'uyukuxeɨrieni menetsi'utamieni, mepɨnetsimieni netɨɨriyama yunaime mepɨwakwini, waɨkawa teɨteri nepɨkawarexeiya.
GEN 34:31 Peru mɨkɨ mɨpaɨ mekatenita'eiya: —Kamɨtsɨ tete'ihayewakekai tsepa 'iya ta'iwa tuminikɨ muyumayɨinɨa hepaɨ mɨranuyemienikɨ.
GEN 35:1 Merikɨtsɨ Kakaɨyari Kakuwu mɨpaɨ katiniutahɨawe: «Kenemie, Weteri kenekani. Mana mawari taiyame kenetawewi nehetsiemieme hakewa pemɨnetsihexei mana pe'uyemietɨ 'Etsahu hekɨ pe'uyu'unarɨmetɨ».
GEN 35:2 Hikɨ Kakuwu mɨpaɨ katiniwarutaxatɨani yutɨɨriyama meta hamatɨana memu'uwakai: «Xekeniwaruhayewa hipame wakakaɨyarixi yuhetsɨa xemɨwarexeiya, xekeneuyu'iti, hipame pɨta yu'ixurikite xeketenanakatɨxɨa.
GEN 35:3 Weteri paitɨ tekaniyehuni. Mana tenari mawari taiyame nekanetawewimɨkɨ Kakaɨyari hetsiemieme mɨnetsi'uparewi ne'uweiyariekaku, huyeta nehamatɨa mumie».
GEN 35:4 Hikɨ Kakuwu mekateniyetuirieni yukakaɨyarixi memɨwarexeiyakai, yunakɨtsate yunakatesie memanuyewutɨakai, Kakuwu katiniukateuku xiu hetɨa Tsikeni hehurakaku muwekai.
GEN 35:5 Kepauka memekɨ, nixewitɨ pɨkawaranukuwei Kakuwu tɨɨriyamama, waɨkawa memutimamakaikɨ kiekari mamanetɨkatsie.
GEN 35:6 Mɨpaɨ tiɨyɨku Kakuwu 'Arimetɨra maku'u kaninuani, tatsɨari Weteri, meta memeweiyakai yunaitɨ, Kanani kwieyaritsie.
GEN 35:7 Mana mawari taiyame kaniutawewieni, meta Weteri katiniuterɨwa, mana matsiɨkɨme mayuyeitɨakɨ Kakaɨyari kepauka 'Etsahu hekɨ muyu'unarɨmekai.
GEN 35:8 Hikɨ 'ana Rewura kaniumɨni, Xeweka mɨ'ɨwiyakai, xiu manuwe hetɨa mekanikateuku Weteri 'aurie. 'Ayumieme Kakuwu mana 'Eruni-Wakuti katiniuterɨwa.
GEN 35:9 Kepauka Kakuwu Parani-'Arami heyeyaka munua, hutarieka Kakaɨyari matsiɨkɨme kanayuyeitɨani 'aixɨa kaniyurieni,
GEN 35:10 mɨpaɨ tikɨhɨawetɨ: «Kakuwu pepɨtitewa, hikɨri mɨpaɨ pepɨkatitewaka. 'Ena mɨtiyehane 'Ixaheri pepɨtitewaka pɨta». Mɨpaɨ katiniterɨwa.
GEN 35:11 Tawarita Kakaɨyari mɨpaɨ kaniutayɨni: «Ne Kakaɨyari Naimekɨmɨtɨrɨkaɨye nekanihɨkɨtɨni. Kenexiɨka kene'amɨiriyani. 'Ahetsie mepɨyekɨne yumɨiretɨ 'anuiwarima xeikɨa, manata te'aitamete mepɨtixuawere.
GEN 35:12 'Apɨrahami meta 'Itsahaki kwie nemɨwarumi 'ekɨ nepɨmatsiyetuirie meta 'anuiwarima».
GEN 35:13 Hikɨ Kakaɨyari Kakuwu hamatɨa tiutaxataka kaneyani.
GEN 35:14 Kakuwu mana tete kaniutakeni hakewa Kakaɨyari hamatɨa mɨretixa. Mɨkɨ tete kaxie winuyarikɨ kanika'ɨya meta huriwa hatseitiyari kanikawirieni,
GEN 35:15 hakewa Kakaɨyari Kakuwu metahɨawixɨ Weteri katiniuterɨwa.
GEN 35:16 Hikɨ 'arike Weteri mekaniyekɨne. 'Epɨrata 'akuxi 'ahetewakaku Xakeri kaniutiniweni, waɨriyarika nunutsi kanayexeiya.
GEN 35:17 Kwiyɨanekaku niwenetɨ, tiniweritsitɨwame mɨpaɨ katinitahɨawe: «Pepɨkamaka, tawarita xeime nunutsi 'uki pekanayexeiyarɨmeni».
GEN 35:18 Perutsɨ mɨkɨ mɨximetɨ, 'imatɨrieka yuniwe Wenuní katiniuterɨwa, peru paapaya Wenikamini pɨta katiniterɨwa.
GEN 35:19 Mɨpaɨ Xakeri katiniumɨni, 'Epɨrata huyeyari 'utɨa mekanikateuku, hikɨ Wereni mɨrakutewatsie.
GEN 35:20 Memekateukixɨtsie Kakuwu 'inɨari kaniutakeni, hikɨ 'akuxi peyuhekɨa hakewa Xakeri mekateukie.
GEN 35:21 'Ixaheri yuhuyeta kaneyani hikɨ Mirari-'Eraxi manunieretsie kaniutayerɨni.
GEN 35:22 Mɨkɨ kwieyaritsie mekutetɨ, Xuweni Wiriha hamatɨa kaniukahuni, yupaapa 'ɨyaya hamatɨa. Kepauka 'Ixaheri mɨretima waɨkawa kaniuyeha'ani. Kakuwu tamamata heimana yuhutame kaniwarutinuarieni:
GEN 35:23 Reya niwemama mepɨhɨkɨ: Xuweni, Kakuwu matɨarieya matɨa, Tsimehuni, Rewi, Kura, 'Itsakaxi meta Tsawuruni.
GEN 35:24 Xakeri niwemama mepɨhɨkɨ: Kutse meta Wenikamini.
GEN 35:25 Wiriha niwemama mepɨhɨkɨ Xakeri parewiwameya: Rani meta Nepɨtahari.
GEN 35:26 Tsiripa niwemama mepɨhɨkɨ Reya parewiwameya: Kahari meta 'Atsexi. 'Ikɨ mepɨhɨkɨ tɨɨri Kakuwu mɨwarayexei Parani-'Arami kwieyaritsiepai.
GEN 35:27 Kakuwu yupaapa kie kanakunuani Mamɨre, Kiriati-'Ariwa 'aurie, Hewuruni mɨrakutewatsiere, 'Apɨrahami meripaitɨ manuyeikakai meta 'Itsahaki.
GEN 35:28 'Itsahaki xeitsienituyari heimana nauka tewiyari wiyari kanexeiyakaitɨni kepauka mumɨ.
GEN 35:29 Waɨkawa 'ukiratsitɨtɨ kaniɨyɨni, niwemama 'Etsahu, Kakuwu 'ukiyarimama wahamatɨa mekanikateuku.
GEN 36:1 Merikɨtsɨ 'ikɨ mepɨhɨkɨ 'Etsahu nuiwarimama, meta 'Erumi mɨtitewakaita.
GEN 36:2 'Etsahu, 'ukari Kanani kiekatari pɨwarutiwitɨ: 'Ara kaniutiwitɨni 'Eruni niweya Heti tewiyari, 'Ahuriwama kaniutiwitɨni 'Ahana niweya Tsiwehuni teukarieya heweu tewiyari,
GEN 36:3 meta Watsemati kaniutiwitɨni 'Itsimaheri niweya Newayuti taruya.
GEN 36:4 'Ikɨ mepɨniwemama 'Etsahu: 'Ara hamatɨa kaneyexeiya 'Eripaxi. Watsemati hamatɨa kaneyexeiya Xehueri.
GEN 36:5 'Ahuriwama matɨa mekaniwarayexeiya Kehutsi, Karani meta Kure. 'Ikɨ tɨɨri 'Etsahu muwarayexei mekanihɨkɨtɨni Kanani kwieyaritsie 'uyeikatɨ.
GEN 36:6 Hikɨ 'arikeke 'Etsahu kaneyani yu'ɨitama yuniwema meta yunaime teɨteri memiparewiekai warawitɨtɨ, yutewama wara'arietɨ naime yupiinite Kanani kwieyaritsie mɨtiukaxeiyakai, xeime kwieyaritsie kaniuyupata Kakuwu hamatɨa mɨka'uyeikanikɨ.
GEN 36:7 Yuhutatɨ waɨkawa mepɨtehexeiyakai yupiinite 'ayumieme mepɨkayɨwawekai 'axeikɨa memukuteni, 'ɨxa pumawekai watewama wahetsiemieme.
GEN 36:8 Mɨpaɨ katininuani 'Etsahu, metatsiere 'Erumi mɨtitewakai, hɨritsie Tsehixi kwieyaritsie.
GEN 36:9 'Ikɨ mekanihɨkɨtɨni 'Etsahu nuiwarimama, 'erumitsixi wa'ukiyari, hɨritsie Tsehixi kwieyaritsie memɨtamarixɨ.
GEN 36:10 Waniwema mɨpaɨ mekatenitetewakaitɨni: 'Eripaxi 'Ara nu'aya, 'Etsahu 'ɨyaya, Xehueri Watsemati nu'aya, 'Etsahu 'ɨyaya.
GEN 36:11 'Eripaxi niwemama mekanakɨne: Temani, 'Umaxi, Tsepuhu, Katani meta Kenatsi.
GEN 36:12 'Eripaxi yutuxeri Timina hamatɨa xeime kanayexeiya nunutsi 'Amareki katiniterɨwa. Mɨkɨ yunaitɨ 'Ara teukarimama mekanakɨne, 'Etsahu 'ɨyaya.
GEN 36:13 Xehueri niwemama mekanakɨne: Nakati, Tsera, Tsama meta Mitsaha. 'Ikɨ Watsemati teukarimama mekanihɨkɨtɨni, 'Etsahu 'ɨyaya.
GEN 36:14 Hipatɨta 'Etsahu niwemama 'Ahuriwama hetsiemieme, 'Ahana niweya Tsiwehuni teukarieya, mekanihɨkɨtɨni: Kehutsi, Karani meta Kure.
GEN 36:15 'Ikɨ memanuyetei mekanakɨne 'Etsahu nuiwarimama wahetsie: 'Eripaxi 'Etsahu matɨarieya nuiwarimama memanuyetei mepakɨ: Temani, 'Umaxi, Tsepuhu, Kenatsi,
GEN 36:16 Kure, Katani meta 'Amareki. 'Ikɨ memanuyetei mekanakɨne 'Eripaxi nuiwarimama wahetsie 'Erumi kwieyaritsie, mɨkɨ yunaitɨ 'Ara teukarimama xeikɨa mepɨhɨkɨtɨkai.
GEN 36:17 'Etsahu nu'aya Xehueri niwemama, memanuyetei mekanakɨne Nakati, Tsera, Tsama meta Mitsaha. 'Ikɨ memanuyetei mekanakɨne Xehueri nuiwarimama wahetsie 'Erumi kwieyaritsie, yunaitɨ mɨkɨ Watsemati teukarimama mekanihɨkɨtɨkaitɨni, 'Etsahu 'ɨyaya mɨhɨkɨtɨkai.
GEN 36:18 'Ahuriwama niwemamata 'Ahana niweya, 'Etsahu 'ɨyaya, memanuyetei mekanakɨne Kehutsi, Karani meta Kure.
GEN 36:19 'Ikɨ 'Etsahu nuiwarimama mepakɨ, metatsiere 'Erumi mɨtitewakai, meta yuxexuitɨ nuiwarite wahetsie memanuyetekai.
GEN 36:20 'Ikɨ Tsehixi nuiwarimama mekanihɨkɨtɨni hureu tewiyari, mana memɨtamakai: Rutani, Tsuwari, Tsiwehuni, 'Ahana,
GEN 36:21 Ritsuni, 'Etsexi meta Ritsani. 'Ikɨ Tsehixi nuiwarimama wahetsie memanuyetei mekanakɨne hureutsixi wahetsie 'Erumi kwieyaritsie.
GEN 36:22 Rutani niwemama mekanakɨne: Huri, Humani matɨa. Rutani xeime yu'iwa 'uka kanexeiyakaitɨni Timina titewakame.
GEN 36:23 Tsuwari niwemama mepɨhɨkɨ: 'Ariwani, Manakati, 'Ewari, Tsepuhu meta 'Unami.
GEN 36:24 Tsiwehuni niwemama mepɨhɨkɨ: 'Ayaha meta 'Ahana. 'Ikɨ 'imatɨrieka mieme haa xɨkame mutaxei kanihɨkɨtɨni makumawetsie hetineikatɨkaime, yupaapa puxurimama wahɨnetɨ Tsiwehuni.
GEN 36:25 'Ahana niwemama mepɨhɨkɨ: Ritsuni meta 'Ahuriwama, 'Ahana niweya.
GEN 36:26 Ritsuni niwemama mepɨhɨkɨ: Hemɨrani, 'Etsiwani, 'Itɨrani meta Kerani.
GEN 36:27 'Etsexi niwemama mepɨhɨkɨ: Wirani, Tsawani meta 'Akani.
GEN 36:28 Ritsani niwemama mepɨhɨkɨ: 'Utsi meta 'Arahani.
GEN 36:29 Hureutsixi wa'ukiyarima mepakɨ Rutani, Tsuwari, Tsiwehuni, 'Ahana,
GEN 36:30 Ritsuni, 'Etsexi meta Ritsani. Mɨkɨ yuxexuitɨ yunuiwari hetsie memanuyetei mepakɨ Tsehixi kwieyaritsie.
GEN 36:31 'Ixaheritsixi te'aitamete mekawarexeiyakaku 'akuxi, 'ikɨ mepanuka'ui 'Erumi kwieyaritsie:
GEN 36:32 Wera Wehuxi nu'aya 'Erumi katiniuta'aita. Kiekarieya Rinawa katinitewakaitɨni.
GEN 36:33 Kepauka Wera mumɨ, hetsienamieme katiniuta'aita Kuwawi Tsera nu'aya, Wutsira meyeyakai.
GEN 36:34 Kepauka Kuwawi mumɨ, hetsienamieme katiniuta'aita Kutsani Temani kiekame.
GEN 36:35 Kepauka Kutsani mumɨ hetsienamieme katiniuta'aita Harari Werari nu'aya. Mɨkɨ mariyanitsixi mɨwara'iwaxɨ Muhawi kwieyaritsie. Kiekarieya 'Awiti pɨtitewakai.
GEN 36:36 Kepauka mumɨ Harari, hetsienamieme katiniuta'aita Tsamɨra, Matsireka kiekariyaritsie kiekame.
GEN 36:37 Kepauka mumɨ Tsamɨra, hetsienamieme katiniuta'aita Tsahuri, 'aki Xekuwuti manuyeka kiekame.
GEN 36:38 Kepauka mumɨ Tsahuri, hetsienamieme katiniuta'aita Wahari-Kanani 'Akuwuxi nu'aya.
GEN 36:39 Kepauka Wahari-Kanani mumɨ 'Akuwuxi nu'aya, hetsienamieme katiniuta'aita Hara. Kiekarieya katinitewakaitɨni Pahu. 'Ɨyaya katinitewakaitɨni Mehitaweri, Matereri kaninu'ayatɨni, Metsawi teukarieya.
GEN 36:40 Mɨpaɨ mepɨtetetewakai me'anuyetetɨmemakɨ 'Etsahu nuiwarimama, yuxexuitɨ yutɨɨriyama mewarexeiyatɨ meta yukwie: Timina, 'Ariwa, Keteti,
GEN 36:41 'Ahuriwama, 'Eraha, Pinuni,
GEN 36:42 Kenatsi, Temani, Miwitsaxi,
GEN 36:43 Makirieri meta 'Irami. 'Ikɨ mepɨhɨkɨ memanuyeyaxixɨ 'Erumi kwieyaritsie, kememɨte'ukutetɨkatei. 'Ikɨ 'Etsahu 'erumitsixi wa'ukiyari kanihɨkɨtɨni.
GEN 37:1 Merikɨtsɨ Kakuwu Kanani kwieyaritsie kaniukateitɨni, 'ukiyarimama memakutekaitsie, peru mana mepɨkakiekataritɨkai 'akuxi.
GEN 37:2 'Ikɨ pɨhɨkɨ 'ɨxatsi yuri maine, yaxeikɨata Kakuwu, tɨɨriyamama wahepaɨtsita kemɨtiuyɨ. Merikɨtsɨ kepauka Kutse tamamata heimana 'atahuta wiyari mɨhɨkai, yu'iwama kaniwaparewienekaitɨni, Wiriha Tsiripa watɨɨriyama, muxatsi wahɨiyarikɨ. Mɨkɨ Kutse yupaapa katinikuxaxatɨwakaitɨni 'iwamama 'axakememɨteyuriekai.
GEN 37:3 'Ixaheri matsi waɨkawa Kutse kaninaki'eriekaitɨni ke hipame 'iwamama, 'ukiratsitɨtɨ meyexeikɨ. 'Ayumieme kamixa 'atewime witsi'aneme pita'aitsiri.
GEN 37:4 Hikɨ 'iwamama me'ixeiyatɨ paapaya kemɨtinaki'eriekai, matsi waɨkawa mekani'uxiwe'eriekaitɨni ni tɨma 'aixɨa mepɨkate'ikuhɨawekai.
GEN 37:5 Merikɨtsɨ heiwa Kutse tiuheinɨka, yu'iwama katiniwarutaxatɨani. 'Ana matsi waɨkawa mekaniti'uxiwe'erietɨkɨne,
GEN 37:6 mɨpaɨ mɨtiwarutaxatɨakɨ: —Xekeneneu'eni nepɨtixetaxatɨani kenemɨreheinɨ.
GEN 37:7 Hikɨ tɨriku tenehɨatɨwekaitɨni mɨrati'uximayatsiwatsie. Yapauka ne nemenahɨa 'akaniutakeni, xemeta xemenahɨaxɨa 'auriena 'u'axɨaka hɨxiena kaniukahɨxima'uni.
GEN 37:8 'Iwamama mekanita'eiya: —Mɨpaɨ xɨari pepɨtiku'eriwa, 'ekɨ petatita'aitɨanike pepɨ'a'erie petatsitanɨ'anike. Hikɨ matsi waɨkawa mekaniuyeha'ani heinɨtsika hepaɨtsita mɨtiwarutaxatɨakɨ.
GEN 37:9 Merikɨtsɨ hutarieka katiniuheinɨni, tawarita katiniwarutaxatɨani. Mɨpaɨ katiniwarutahɨawe: —Tawarita mɨpaɨ nepɨreheinɨ. Tau, metseri, tamamata heimana xewi xurawetsixi nehɨxie mekaniukahɨxima'uni.
GEN 37:10 Kepauka mɨpaɨ mɨtiwarutahɨawixɨ, paapaya mɨpaɨ katinitatieni: —¿Kehepaɨtɨtɨri 'ekɨ pepɨreheinɨ? ¿Kamɨtsɨ ne, 'amaama, 'a'iwama tanaitɨ 'ahɨxie tetekahɨxima'uni?
GEN 37:11 'Iwamama waɨkawa mepihekakai, paapaya matsi pɨta puyu'iyaritɨakai naime mɨkɨ hepaɨtsita.
GEN 37:12 Merikɨtsɨ Kutse 'iwamama mekanekɨne, yupaapa muxatsimama metewareumiyuka Tsikeni paitɨ.
GEN 37:13 Hikɨ 'Ixaheri Kutse mɨpaɨ katiniutahɨawe: —'A'iwama keniwaxeiyamie, muxatsi memɨwarahɨtɨwetsie Tsikeni paitɨ mepekutei. Kutse mɨpaɨ katinita'eiya: —'Aixɨa pɨ'ane.
GEN 37:14 Tawarita katinitaxatɨani paapaya: —Naime pepɨnetitaxatɨani 'a'iwama kememɨteheu'erie, meta xɨka muxatsi mewarehɨtɨweni, mɨpaɨ nemɨretimanikɨ hekwamekɨ. Hikɨ kaneyani. Hewuruni 'uyeyaka Tsikeni neta'ani.
GEN 37:15 Xewitɨ tewi kanenukunake yeuta 'uyeikakaku kawataxeiyawekaku. Mɨkɨ mɨpaɨ katinita'iwawiya: —¿Tita petiwaune?
GEN 37:16 Kutse kanita'eiya: —Ne'iwama nepɨwawaune. ¿'Ekɨ pekatimate hakewa memɨtehehɨtɨwe?
GEN 37:17 Mɨkɨ tewi mɨpaɨ katinitaxatɨani: —Takai 'atupaitɨ mepekɨ, nepɨwaru'eni mɨpaɨ mepɨtekuxatakai kename Rutani kiekariyaritsie meyehukai. Hikɨ Kutse waruwauximetɨ kaneyani, Rutani 'aurie kaniwarutaxeiya.
GEN 37:18 Hikɨ 'iwamama mekanixeiya 'ateewa 'amiekaku kuxi. Mexi kata'awekai mekaniuyu'enieni kememɨte'imienikɨ.
GEN 37:19 Mɨpaɨ meteniyukuxaxatɨwakaitɨni yuxexuitɨ: —Mana pamie mɨtiheinɨwe.
GEN 37:20 Hikɨrixɨa tukarieya kanaye'ani. Tekanimiekuni xeime putsu muyewakita tekaneikahɨakuni, mɨpaɨ tekanetiyuakuni kename tiyukwa'ame 'itakwai. Mɨpaɨ tepɨtehetimani xɨka 'aku heinɨtsieya yuritɨni.
GEN 37:21 Hikɨ kepauka Xuweni mɨwaru'eni yu'iwama, yu'iwatsie tanuanike memɨka'ikumemiwanikɨ, mɨpaɨ katiniwarutahɨawe: —Matsi tepɨka'ikumemiwani.
GEN 37:22 Putsu muyewakita xeikɨa xekeneukahɨwa makumawetsie, xepɨka'ikumemiwani, xepɨkate'ikwinitɨaka. Xuweni mɨpaɨ pɨtiwarutahɨawixɨ 'arike Kutse watihanake 'iyetuanike paapaya hetsɨa.
GEN 37:23 Kepauka Kutse yu'iwama wahetsɨa muta'a, mekaniwiya kamixaya witsimɨ'ane 'amɨmamatetɨtɨ mekaniutatsana.
GEN 37:24 'Anari meheihanaka putsu muyewakita mekaneikahɨani.
GEN 37:25 Hikɨ mekateniukwani. Yareutewikaku mekaniwaruxeiya harerutsixi tenawemete 'itsimaheritsixi teɨteriyari, Karaha memayenexɨa. Kameyutsixi wahetsie mepɨte'a'ikatakai witsimu'ɨa waritsamu mixaxi meheituanike 'Ekipitu.
GEN 37:26 Merikɨtsɨ Kura mɨpaɨ katiniwarutahɨawe yu'iwama: —¿Tita teteha'iwa xɨka ta'iwa te'umieni 'atsiteka'utiyuani?
GEN 37:27 Matsi 'aixɨa katiyɨni 'itsimaheritsixi teɨteriyari xɨka tewarutuirieni muta'iwakɨ. 'Iwamama yamepɨte'utanaki'eri kemainekai,
GEN 37:28 'ayumieme kepauka wahetsɨa memu'axɨa harerutsixi mariyanitsixi, yu'iwa Kutse putsuta mekanewatihana 'itsimaheritsixi mekaniwarutuirieni xeitewiyari pɨrata tuminiyarikɨ. Mɨpaɨ tiunanaiyaka 'Ekipitu kanewitɨkieni Kutse.
GEN 37:29 Hikɨ Xuweni nuaka putsu muyewakita, yu'iwa kaniwatihanakekaitɨni. Meukanierixɨ Kutse puyemawekai. Hikɨ yukamixa neukatsana, mɨpaɨ mɨtimatsiɨkɨnikɨ kename yuhiwerie waɨkawa.
GEN 37:30 Hikɨ yu'iwama wahetsɨa kaneyani mɨpaɨ katiniwaretahɨawe: —Temaikɨ peuyemawe. Hikɨta, ¿keri nehaineni?
GEN 37:31 Hikɨ Kutse kamixaya me'utihurieka, tsipu me'umieka mekanitaxurimani.
GEN 37:32 Hikɨ hipame mekaniwarenɨ'ani kamixa me'ahuriekame yupaapa hetsɨa, mɨpaɨ memɨteheitahɨawekɨ: «'Ikɨ 'aniwe katikamixaya tekaneitaxeiya».
GEN 37:33 Kepauka Kakuwu kamixa metima mɨpaɨ kaniutayɨni: «Mɨkɨ pɨhɨkɨ neniwe kamixaya. Kauka tiyukwa'ame neitakwai».
GEN 37:34 Hikɨ Kakuwu hiwerikakɨ yukamixa kaneukatsana, mɨyuhiwerie hepaɨ katiniuyukemaritɨani, mɨixa pɨyuhiweriekai yuniwekɨ.
GEN 37:35 Hikɨ yunaitɨ niwemama mekanikɨnɨtɨwakaitɨni peru mɨkɨ pɨkayɨnɨtɨarinɨakai mɨpaɨ 'utaitɨ: «Hawaikɨ, ne nepɨkahetɨmaiya hetsɨana neheta'ameke mɨkite watsata». Mɨpaɨ 'utaitɨ pɨkatihayewakai yuhiwerietɨ Kutse ha'eriwatɨ.
GEN 37:36 Merikɨtsɨ harerutsixi mariyanitsixi Kutse mekaniutuani, 'Ekipitu paitɨ Putipaxi hetsɨa, Parahuni parewiwameya kaninaneni kuyaxi wa'ukiyari mɨtiwa'aitɨwametɨkai.
GEN 38:1 Merikɨtsɨ Kura yu'iwama waruku'eirieka kaneyani xaɨtsie paitɨ. Xeime kie kaniutayerɨni Hiraxi titewakame hetsɨa, 'Arurani kiekame hetsɨa.
GEN 38:2 Mana Kura 'uka kaniutiwitɨni Tsua titewakame niweya kananeu tewiyari. Kepauka hamatɨana mukahui
GEN 38:3 mɨkɨ kaniutihukata 'ukitɨme kaniutiniweni, 'Exi katiniterɨwa.
GEN 38:4 'Ariketa hutarieka kaniutihukata 'ukitɨmetsiere kaniutiniweni, 'Unani katiniterɨwa.
GEN 38:5 Tawarita 'arike xeime nunutsi mekanayexeiya 'ukitɨme, Ketsiwi kiekariyaritsie mutinuiwaxɨ, Tseraxi katiniterɨwa.
GEN 38:6 Hikɨ Kura 'uka kaniutawauni Tamaxi titewakame 'Exi, yuniwe 'amɨyumate hetsiemieme.
GEN 38:7 Matsi Yawé pɨka'inakixɨ Kura nu'aya kemɨtiyurienekai, kaninawairieni tukarieya.
GEN 38:8 Hikɨ Kura yuniwe 'Unani mɨpaɨ katiniutahɨawe: «'A'iwa wiuraya keneutiwitɨki, 'aitsika kemaine kwetsikatsiemieme kenaye'atɨa, mɨpaɨ 'amatsika niweya payeneni».
GEN 38:9 Perutsɨ 'Unani pɨtimaikai nu'aya mɨtinuiwakekai nu'aya pɨka'ayanikekai. 'Ayumieme kepauka mikumaɨwakai puyu'ɨwiyakai 'ɨyaya mɨkatihukatanikɨ. Mɨpaɨ pɨtiyurienekai matsikaya nu'aya mɨkatinuiwakɨ.
GEN 38:10 Hikɨ Yawé pɨka'inakixɨ mɨyamɨtiyurienekaikɨ, 'ayumieme yaxeikɨa kanimieni.
GEN 38:11 Merikɨte Kura yumu'e mɨpaɨ pɨtiutahɨawixɨ: «'Apaapa kie pewiuratɨtɨ kene'ahayewani, kepaukake neniwe Tseraxi 'amuyutamani». Peru Kura mɨpaɨ pɨtiku'eriwakai Tseraxi mɨnike pɨ'eriekai, yumatsikama wahepaɨ. Hikɨ Tamaxi kaneyani yupaapa kie mekanikɨ.
GEN 38:12 Hikɨ mɨixa tukari 'anuyeyaku Kura 'ɨyaya kaniumɨnita Tsua niweya. Hikɨ hiwerika hatɨmaiyaka, kaneyani Kura Timinati kiekariyaritsie yumuxatsi waretixinike. Hamikuya kaneiweiya Hiraxi mɨtitewa 'Arurani kiekame.
GEN 38:13 Kepauka Tamaxi mɨretima kename mu'eya Timinati heyakai yumuxatsima wareuximieka,
GEN 38:14 wiura kamixayari kananutihɨna, yɨhɨxie kaneuyukunani kapa xewitɨ heitimanikɨ, kiekari 'Enahini manuyeniere mɨranuyekɨkatɨretsie kanayerɨni, Timinati huyeyari manuyehane kiekari mukumatsie. Mɨpaɨ kaniuyɨni, mɨpaɨ mɨtimaikaikɨ Tseraxi 'amuyumaikaikɨri memɨka'iwitɨtɨawekaiku kɨnaya mayanikɨ.
GEN 38:15 Kepauka Kura heuyuku'eimame muxei, 'uka tuminikɨ muyumayɨinɨa kani'eriekaitɨni.
GEN 38:16 Yumu'e ka'erietɨ hepana kaneyani, mɨpaɨ katinitahɨawe: —'Ahamatɨa nepɨkahuni pekati'awaɨriya. 'Uka mɨpaɨ katinita'iwawiya: —¿Tita penetipitɨani, xɨka ne'unewaɨriya?
GEN 38:17 Kura mɨpaɨ katinita'eiya: —Xeime tsipu nunutsi nepɨmatsihanɨ'airieni nekuraruta mieme. 'Ukata mɨpaɨ katinitahɨawe: —'Aixɨa kani'aneni. Peru hikɨ mexixi tixaɨtɨ kenetineupitɨa yanemɨtimaikakɨ kename 'aku penetipitɨani.
GEN 38:18 Kura mɨpaɨ katinita'iwawiya: —¿Ketitakuta pereuyehɨwa nemɨreukapine? Tamaxi mɨpaɨ katinita'eiya: —Kena 'atseyu wiwierimakame meta 'a'itsɨ pemakwe'e. Kura katiniyetuirieni, hamatɨana kaniukahuni, mɨkɨ kanitihukatɨani.
GEN 38:19 Tamaxi kepauka manukuke kaneyani yapauka, yuhɨxie meuyukunakai kaneuyukuyepieni, wiura kamixayari kananakatɨni.
GEN 38:20 'Ariketa Kura tsipu kanenɨ'ani, yuhamiku 'Arurani kiekame kaniutanɨ'ani mɨrewayepinikɨ tita mɨreku'eiriekai, hikɨ hamikuya 'uka pɨkahetaxei.
GEN 38:21 Merikɨte teɨteri mana kiekatari kaniwaruta'iwawiya: —¿Hakewari 'uka tuminikɨ muyumayɨinɨa 'Enahini kiekame huye tetsita mutiyeixakai? Mɨkɨ mɨpaɨ mekatenita'eiya: —'Ena 'ukaratsi muyumayɨinɨa mɨtiwawa yukakaɨyarixi wahetsiemieme matsi pumawe.
GEN 38:22 Hamikuya kanakunuani hakewa Kura meyeikakai, mɨpaɨ katinitahɨawe: —Nepɨkaheitaxei. Teɨteri mana kiekatari mɨpaɨ mekanaitɨkani, kename mana 'umawe 'ukaratsi mɨpaɨ tiuka'iyaritɨ.
GEN 38:23 Kura mɨpaɨ kaniutayɨni: —Tsepa mɨrepi nepiinite, ne nepɨkatiu'ita. Heitseriemekɨ pɨtihekɨa teɨteri 'axamemɨkahaitɨkanikɨ nehepaɨtsita: Ne nepeinɨ'airi tsipu, 'ekɨta pepɨkaheitaxei.
GEN 38:24 Haika metseri 'anukayaku, Kura mɨpaɨ katiniutahɨawarieni: —'Amu'e Tamaxi tuminikɨ muyumayɨinɨa kanayuyeitɨani, mɨyayɨanetɨ kaniutihukata. Kura mɨpaɨ karima kaniutayɨni: —Xekenewayehani xekenetataiya.
GEN 38:25 Hikɨ kepauka mɨwayehaniwakai yumu'e hetsɨa xeime kanenɨ'ani mɨpaɨ haineme: «'Ikɨ piinite kutsiyari pɨnetsi'utihukatɨa. Heiwatɨ peheitimani kemɨ'ane 'ikɨ tseyu yuwiwierimakame mukutsiyarieya meta 'ikɨ 'itsɨ».
GEN 38:26 Kura retimaika mɨpaɨ kaniutayɨni: «Ne kenemɨtikamie, matsi mɨkɨ 'aixɨa katinikamieni, ne neniwe Tseraxi nemɨka'iwitɨtɨakɨ». Peru tawarita hamatɨana pɨka'ukahui.
GEN 38:27 Kepauka maye'a mɨtiniwekɨ Tamaxi, yuhutame kaniwarayexeiya.
GEN 38:28 Xewitɨ katinuiwawetɨ 'akuxi, mamaya meri kananeni, hikɨ 'ukaratsi tiniweritsitɨwame, wita xetame mamayatsie kaneitapirieni, mɨpaɨ kaniutayɨni: «'Ikɨ meri kaniutinuiwa».
GEN 38:29 Hikɨ nunutsi yumama kaneutahana, xewitɨ pɨta meri kaniutinuiwa 'iwaya. Hikɨ 'ukaratsi tiniweritsitɨwame mɨpaɨ kaniutayɨni: «Kehepaɨ peretɨa». 'Ayumieme Paretsi mepɨte'iterɨwaxɨ.
GEN 38:30 Mɨkɨ 'utɨaketa 'iwaya kaniutinuiwa, yumamatsie wita xetame meutapiekai, mɨkɨ Tsera mekateniterɨwa.
GEN 39:1 Merikɨtsɨ kepauka mewitɨkie Kutse 'Ekipitu, 'Itsimaheri nuiwarimama mekanituani Putipaxi hetsɨa, xeime 'ekipitutanaka Parahuni parewiwameya kuyaxi wa'ukiyari hetsɨa.
GEN 39:2 Hikɨ matsi Kutse 'aixɨa katini'uximayakaitɨni Yawé 'iparewiekaku. Kepauka 'ekipitutanaka ti'aitɨwameya hetsɨa mayekatei,
GEN 39:3 mɨkɨ mɨpaɨ pɨretima Yawé miparewiekaikɨ waɨkawa 'aixɨa mɨtiyurienenikɨ.
GEN 39:4 Hikɨ Putipaxi Kutse 'aixɨa katiniumani 'aixɨa mɨtiuka'iyarikaikɨ, 'ayumieme katinihɨritɨani naime yupiinite meta kiena mɨti'aitanikɨ kanipitɨani.
GEN 39:5 'Ekipitutanaka kepauka Kutse mɨtiɨhɨritɨa yukie timieme, Yawé 'aixɨa katiniyuriekaitɨni 'ekipitutanaka Putipaxi tita mɨrexeiyakai hetsiemieme takwana timieme meta kiita.
GEN 39:6 'Ayumieme Putipaxi matsi Kutse naime katiniuhɨritɨani, tixaɨtɨkɨ pɨkatiyu'iyaritɨakai pɨtiutikwa'akai xeikɨa. Kutse matsi witsipɨtiyuxexeiyakai pɨtemaikɨtɨkai.
GEN 39:7 Hikɨ 'arikeke ti'aitɨwameya 'ɨyaya kanitixeiyatɨyani 'ihiwe'erietɨ, mɨpaɨ katinitahɨawe: —Nehamatɨa keneukahu'i.
GEN 39:8 Kutse kayuwaɨriyatɨ, mɨpaɨ katinitahɨawe: —Neuxei 'ukaratsi: neti'aitɨwame netsinaki'erietɨ pɨnetiuhɨritɨa, yupiinite yukie timieme naime mɨkareukweriwayuriekakɨ.
GEN 39:9 'Ikɨ kiita xewitɨ pumawe 'aixɨa tiuka'iyaritɨ mɨhɨritɨariekakɨ nehepaɨ. Neti'aitɨwame tixaɨtɨ pɨkanetikweririe. 'Ekɨ pemɨ'ɨyaya, xɨka nematsi'ukumayɨani, 'axanepɨtiyurieni Kakaɨyari hɨxie.
GEN 39:10 Matsi mɨkɨ tukarikɨ nikuxeiyanekaitɨni yaxeikɨa tikɨhɨawetɨ. Peru Kutse kaniyuku'imawakaitɨni.
GEN 39:11 Merikɨtsɨ xeime tukaritsie, kiita Kutse kaneutahani yukuha'aritɨanike kemɨtihɨritɨariekai, mexi me'uyemawekai te'uximayatamete hipatɨ.
GEN 39:12 Hikɨ Putipaxi 'ɨyaya manayuku'eimatsie kanikawiere. Mɨpaɨ katinitahɨawe: «Nehamatɨarikɨ keneukahu'i». Perutsɨ Kutse manayuku'eimakai 'uku'eirieka takwa kananuyeyani.
GEN 39:13 'Ukaratsi 'ixuriki 'uxeiyaka Kutse miku'eiriekai,
GEN 39:14 kiita te'uximayatamete kaniwarutahiwieni, mɨpaɨ katiniwarutahɨawe: «Neuxei, nekɨna 'ikɨ hepɨrayu tewiyari mɨtatsi'atɨiri, mɨtatsinanaimanikɨ xeikɨa punua. Nekiita 'atahaka nehamatɨa puhuimɨkɨkai, peru ne karima neputahiwaxɨ.
GEN 39:15 Kepauka ne'utahiwakaku mɨnetsi'u'eni kaniuyuta'una, yu'ixuriki 'uku'eirieka ne'aurie».
GEN 39:16 Hikɨ 'ukaratsi Kutse 'ixurikieya kaniuti'uta, yukɨna mɨtitaxatɨanikɨ nuayuke.
GEN 39:17 Kepauka kɨnaya munua, yaxeikɨa kaniutayɨni: «Hepɨrayu tewiyari pemɨ'atɨa nehamatɨa puhuimɨkɨkai.
GEN 39:18 Peru ne kepauka karima nemutahiwaxɨ, kananuyenautsa yu'ixuriki 'uku'eirieka ne'aurie».
GEN 39:19 Hikɨ Putipaxi yu'ɨya 'u'enieka, waɨkawa kaniuyeha'ani.
GEN 39:20 'Anari katiniuta'aita Kutse manutahɨiyanikɨ katsariyanata, Parahuni pɨretsutsiximama memanutaxɨriwatsie. Matsi tsepa manutahɨiyakai
GEN 39:21 Yawé Kutse pɨka'uku'eiri 'aixɨa katiniparewiekaitɨni. Yakatiniuyurieni 'aixɨa mɨtixeiyakɨ katsariyanata mɨtihɨritɨarie,
GEN 39:22 hikɨ mɨkɨ Kutse kaniuhɨritɨani memanutaxɨriya muwaxeiyanikɨ meta mɨti'aitanikɨ muwa.
GEN 39:23 Yawé Kutse miparewiekaikɨ kemɨtiyurienekai naitɨ 'aixɨa pɨtikuyɨnekai, katsariyana hɨritɨariekame pɨkareukweriwayuriekairi, Kutse mɨtiuhɨritɨakaikɨ naime.
GEN 40:1 Merikɨtsɨ mɨixa tukari 'anukayaku, Parahuni tekɨxi memikuhanitɨwa winu 'uyemakame tiwa'aitɨwame, meta paa wewiwamete tiwa'aitɨwame, 'Ekipitu kwieyaritsie ti'aitame hetsiemieme memɨte'uximayakai 'axamekateniuyurieni.
GEN 40:2 Hikɨ kaniuyeha'ani ti'aitame Parahuni, mɨkɨ yuhutame wahetsiemieme hetsɨana te'uximayatamete, tekɨxi hanamete wa'ukiyari, meta paa wewiwamete wa'ukiyari.
GEN 40:3 'Ayumieme kaniwarenɨ'ani kuyaxi wa'ukiyari hetsɨa katsariyana mexeiyakaikɨ, mɨkɨ katsariyana Kutse muwayewekaitsie pɨhɨkɨtɨkai.
GEN 40:4 Muwa Kutse puhɨritɨariekai mɨwa'ɨwiyanikɨ, kuyaxi wa'ukiyari tawarita yuhutame pihɨritɨa. Mɨixa tukari me'aye'utɨ katsariyanata,
GEN 40:5 tɨkarikɨ mekateniuheinɨni, 'ikɨ yuhutatɨ te'uximayatamete, tekɨxi winu muyema 'uitɨwamete tiwa'aitɨwame, paa wewiwamete tiwa'aitɨwame, yuxexuitɨ mepɨte'uheinɨxɨa, yaxeikɨa ka'anuyɨtɨkaime.
GEN 40:6 'Ukatareku ximeri, kepauka Kutse mɨwarekuxei me'iyarixietɨkaime kaniwarutaxeiya.
GEN 40:7 'Ayumieme pɨwaruta'iwawiyaxɨ: —¿Titayari xetenututuixie?
GEN 40:8 Mɨkɨ mɨpaɨ mekatenitahɨawe: —Tame hikɨ tepɨte'uheinɨxɨa, pumawe mɨtatsitahekɨatɨani. Kutse mɨpaɨ katiniwarutahɨawe: —Kakaɨyari kaniyɨweni mitahekɨata. Tsiparatsɨ xekeneneutaxatɨa kexemɨte'uheinɨ.
GEN 40:9 Hikɨ tekɨxi 'uitɨwamete wa'ukiyari Kutse katiniutaxatɨani kemɨtiuheinɨkai, mɨpaɨ katinitsutɨani: —Mɨpaɨ nepɨtiuheinɨ, nehɨxie kaxie puwekai,
GEN 40:10 'anutahaikatɨ. Mɨkɨ kaxie kepauka mutayɨraxɨ kaniukaxutuni, yapauka 'ukayaxeka takari kaniutikwani.
GEN 40:11 Ne, nemamatsie nepehanakai Parahuni ti'aitame tekɨxieya. Hikɨ kaxie takari ne'aka'inɨka tekɨxita nepeikapɨnaxɨ, mɨkɨ tekɨxi Parahuni mamayatsie nepeke.
GEN 40:12 Kutse mɨpaɨ katinitahɨawe: —Kepemɨtiuheinɨ mɨpaɨ pɨtimatsiɨkɨ: Kaxie manuhaika, haika tukari pɨ'inɨariyari.
GEN 40:13 Haika tukari 'anukayayu, Parahuni ti'aitame tawarita peiti'erieni kepemɨreyuri, hekwamekɨ matsihepitɨani pemɨtita'uximayatakɨ hetsɨana meripai hepaɨ. Hikɨ Parahuni ti'aitame tekɨxieya kaxie takari hayari muyema hekwamekɨ mamayatsie penekemɨkɨ, meripai pemɨtiyurienekai hepaɨ.
GEN 40:14 Ne, nepɨmatsiwawirie waɨkawa pepɨkanetsihatɨtɨmaiyani, kepauka 'aixɨa mɨreyɨni kenemaine, Parahuni ti'aitame nehetsiemieme ketinetaxatɨa, 'uwa nemɨka'ayewenikɨ.
GEN 40:15 Hepɨrayutsixi takwieyaritsie paitɨ waɨriyarika nepeyehanie 'ena nepɨ'atɨarie, tixaɨtɨ 'atsinekareyurieka 'uwa nepayewe.
GEN 40:16 Paa wewiwamete wa'ukiyari 'u'enaka, 'iwaya 'aixɨa mɨti'ane hetsiemieme mɨtiutahekɨatɨariekɨ, mɨpaɨ Kutse katiniutahɨawe: —Neta mɨpaɨ nepɨtiuheinɨ. Nemu'utsie haika tsikɨiwitiyari paa nepanamanakai,
GEN 40:17 tsikɨiwiti mutinatɨtsie yutsata paa witsimɨ'anene pɨyemanekai, Parahuni ti'aitame hetsiemieme. Hikɨ maraikatsixi mepɨ'axekai me'itikwanike tsikɨiwititsie nemenamanakai.
GEN 40:18 Kutse kanita'eiya: —Kepemɨtiuheinɨ mɨpaɨ pɨti'inɨariyari: Haika tsikɨiwitiyari pɨ'inɨariyari haika tukari.
GEN 40:19 Haika tukari 'anukayayu, Parahuni ti'aitame pɨmatsita'aita, 'amu'u manutiwitekienikɨ, kɨyetsie pemɨkaxuiyanikɨ, 'ana maraikatsixi 'awaiyari mepɨtakwani.
GEN 40:20 Hikɨ haika tukari 'anukayaku, Parahuni ti'aitame yutukari kaniuwewieni yuhetsɨamiemete wahetsiemieme. Hikɨ mɨkɨ yunaime wahɨxie katiniuta'aita memanutaxɨriyakai memɨwayehapanienikɨ, tekɨxi 'uitɨwamete tiwa'aitɨwame, paa wewiwamete tiwa'aitɨwame.
GEN 40:21 Tekɨxi 'uitɨwamete tiwa'aitɨwame, hekwamekɨ kaniupitɨarieni mɨtita'uximayatakɨ hetsɨana, mɨpaɨ mɨkɨ katininuani Parahuni ti'aitame mamayatsie tekɨxieya mikuhanitɨwanikɨ meripai hepaɨ.
GEN 40:22 Paa wewiwameta kaniuta'aita kɨyetsie mɨmierienikɨ, Kutse kemɨtiwaruhekɨatɨakai mɨpaɨ katiniuyɨni.
GEN 40:23 'Ana tekɨxi kaxie hayari muyema 'uitɨwamete tiwa'aitɨwame, Kutse kemɨrehɨawekai pɨkaheye'eri, yuheyemekɨ katinatɨmaiya.
GEN 41:1 Merikɨtsɨ huta wiyari 'anukayaku, Parahuni mɨpaɨ katiniuheinɨni: Niru hatuxameyari tetsita kaniuwekaitɨni.
GEN 41:2 Yapauka hapa mekanatinexɨani, 'atahuta meyupaɨmetɨ wakaitsixi mewaiyatɨkaitɨ, mekatenikwatɨwekaitɨni makutsiɨraɨyetsie.
GEN 41:3 Hikɨ wa'utɨmata mekanatinexɨani, wahepaɨ meyupaɨmetɨ, mewawakitɨ 'axameteyuxexeiyatɨ, mana mekaniti'uni memɨwaiyatɨka wa'aurie Niru hatetsitayaritsie.
GEN 41:4 Wakaitsixi memɨwawaki mekaniwarutikwani memɨwaiyatɨka. 'Anari Parahuni kananutaniere.
GEN 41:5 Hutariekata kaneukuni. 'Ana tawarita pɨtiuheinɨ. Tɨriku xeikɨyeyaritsie 'uye'ukame puxei kɨkɨreme witsi'aneneme.
GEN 41:6 'Utɨmanata kanixeiya, hepaɨna paɨmeme wawakime 'eka mɨxɨkakɨ.
GEN 41:7 'Atahuta tɨriku mɨwawaki kanitikwani tɨriku mɨkɨkɨre witsimɨ'anene. 'Ana Parahuni kananutaniere, mɨpaɨ retimaika mɨheinɨtsikatɨkaikɨ.
GEN 41:8 Nutuixietɨ yu'iyaritɨatɨ ximeri kananukukeni. Katiniwarutanɨ'airieni 'awie temaiwawemete 'ekipitutari. Katiniwarutaxatɨani kemɨtiuheinɨ, peru nixewitɨ pɨka'itahekɨatɨa heinɨtsikaya.
GEN 41:9 Hikɨ tewi tekɨxi 'uitɨwamete mɨtiwa'aitɨa, mɨpaɨ Parahuni katiniutahɨawe: «Neuxei, nepaye'eri ke'axanemɨtiuyuri.
GEN 41:10 Kepauka Parahuni muyeha'a teyu'uximayatsiriwamete wahekɨ, kuyaxi mɨtiwa'aitɨa katananutaxɨrieni ne meta paa wewiwame.
GEN 41:11 Xeime tɨkaritsie taxexuitɨ tepɨte'uheinɨ, xexuitɨ peixeiyakai heinɨtsika kemɨti'ayumiemetɨkai.
GEN 41:12 Hikɨ xewitɨ tahamatɨa payekatei, temaikɨtɨtɨ Hepɨrayu tewiyari kuyaxi mɨtiwa'aitɨa mɨparewiekai. Tepitaxatɨa ketemɨte'uheinɨ. Mɨkɨ pɨtatsi'utahekɨatɨa xexuime.
GEN 41:13 Naitɨ yapɨraye'a mɨkɨ kemɨtatiutaxatɨa. Ne hutarieka nepuhɨritɨarie ne'uximayatsika, xewitɨta pumierie kɨyetsie».
GEN 41:14 Hikɨ ti'aitame Kutse katiniutanɨ'airieni. 'Ana kwitɨ kaniwayexɨnarieni katsariyanata. Kwitɨ 'uyutikemaritɨaka, kaninuani Parahuni hɨxie.
GEN 41:15 Ti'aitame mɨpaɨ katinitaxatɨani: —Ne nepɨtiuheinɨ, xewitɨ pɨka'ihekɨatawe. Peru xewitɨ pɨnetiutaxatɨa, kename 'ekɨ peyɨwe pemitahekɨata heinɨtsi.
GEN 41:16 Hikɨ Kutse kanita'eiya: —Ne nepɨkahɨkɨ. Kakaɨyari kanihɨkɨtɨni mitahekɨata.
GEN 41:17 Hikɨ ti'aitame Parahuni Kutse mɨpaɨ katiniutaxatɨani: —Neheinɨtsita, Niru hatuxameyari tetsita nepuwekai.
GEN 41:18 Hikɨ yapauka hapa mekanatinexɨani, 'atahuta meyɨpaɨmetɨ wakaitsixi mewaiyatɨkaitɨ, witsime'anenetɨ 'ɨxapa mekatenikwatɨwekaitɨni.
GEN 41:19 Yapaukata wa'utɨma mekanatinexɨani wahepaɨ meyupaɨmetɨ, mewawakitɨ 'axameteyuxexeiyatɨ. Hatsuaku kenemɨkatiwaxeiyawekai mɨpaɨ me'aneneme 'Ekipitutsie.
GEN 41:20 Kwitɨwata 'atahuta wakaitsixi memɨwawaki, mekaniwarutikwani memɨwaiyatɨka.
GEN 41:21 Tsepa memɨwarutikwakai, yaxeikɨa mepɨtewawakikai. 'Ana nepanutanierixɨ.
GEN 41:22 »Hutariekata nepɨtiuheinɨ, 'atahutame nepuxei tɨriku mɨayeyari kɨkɨreme witsi'aneneme, pɨwawerekai xeikɨyeyaritsie tiwiyatɨ.
GEN 41:23 'Utɨmanata nepixei, hepaɨna paɨmeme tɨriku wawakime 'eka mɨxɨkakɨ.
GEN 41:24 Tɨriku mɨwawaki 'aixɨa mɨ'anene kaniutikwani. 'Ikɨ naime nepɨwarutaxatɨa 'awie temaiwawemete peru nixewitɨ pɨkanetsi'utahekɨatɨa».
GEN 41:25 Hikɨ Kutse kanitahekɨatɨani naime kemɨtiuheinɨkai Parahuni. Mɨpaɨ kaniutayɨni: —Puyuxewitɨtɨ kepemɨtiuheinɨ. Kakaɨyari kanihɨkɨtɨni mɨmatiutahekɨatɨa kemɨtiyɨni.
GEN 41:26 Mɨkɨ matsi 'atahuta wakaitsixi memɨwaiyatɨka, yaxeikɨa tɨriku mɨkɨkɨre, mɨkɨ 'atahuta wiyari pɨ'inɨariyari. Mɨkɨ puyuxewi heinɨtsika.
GEN 41:27 Wakaitsixi 'atahuta memɨwawaki 'axamemɨ'anene, memɨwaiyatɨka wa'utɨa mematinexɨa, meta 'atahuta tɨriku 'etsimɨpepe mɨwawaki 'eka mɨxɨkakɨ, mɨkɨta pɨhɨkɨ 'atahuta wiyari. Mɨpaɨ paɨmexa haakaxa payani.
GEN 41:28 »Kenemɨmarahɨawe Parahuni, yurikɨ Kakaɨyari kemɨmatihekɨatɨa, pɨtihekɨata kemɨtiyurieni.
GEN 41:29 'Anari kanaye'amɨkɨ, 'atahuta wiyari waɨkawa mɨtitixuawere 'Ekipitu kwieyaritsie.
GEN 41:30 Hepaɨna paɨmetɨ mahu, haakaxa payani, 'anari pɨkatitixuawere, mepɨtehatɨmaiyani waɨkawa kememɨtehexeiyakai meripaitɨ mɨkɨ kwieyaritsie.
GEN 41:31 Yemekɨ waɨkawa haakaxa payani keyamɨkatiyɨwekai meripaitɨ.
GEN 41:32 'Ekɨ Parahuni hutame pemuheinɨ, Kakaɨyari puyumexɨitɨa kwitɨwa mɨpaɨ mɨtiyurienikɨ.
GEN 41:33 »'Ayumieme, hikɨ Parahuni xeime keneutiwawa waɨkawa yɨweme, timaiweme, pemihɨritɨanikɨ 'Ekipitu kwieyari hepaɨtsita.
GEN 41:34 'Ekɨ Parahuni mɨpaɨ ketineuyuri, keniwarutihɨawi nenieremete naitsarie 'Ekipitu, 'atahuta wiyari waɨkawa mɨtitixuawere 'itsanari 'auxɨwimexɨa tixeɨriekame, xeime xemɨti'utakɨ Parahuni hetsiemieme, naitsarie 'akwiepa.
GEN 41:35 'Ekɨ Parahuni peti'aitakaku, mɨkɨ nenieremete meke'ikuxeɨrieni 'ikwai 'aixɨa mɨtixuaweretsie mieme, meke'iti'uta naitsarie kiekaritetsie, 'ikwai xemexeiyanikɨ mɨtiumawenitsie.
GEN 41:36 Mɨkɨ 'ikwai mɨti'utsieni 'Ekipitutsie mieme payani, 'atahuta wiyari mɨhaakaxatɨnitsie, mɨpaɨ teɨteri mɨkɨ kwieyaritsie haakakɨ mepɨkakwini».
GEN 41:37 Hikɨ Parahuni 'iyarieya 'aixɨa kaniuyɨni Kutse kemɨtitahekɨatɨa, yaxeikɨata 'iparewiwametemama.
GEN 41:38 Hikɨ Parahuni mɨpaɨ katiniwaruta'iwawiya memiparewiekai: —Kamɨtsɨ hakewa tepeikaxeiya xeime 'ikɨ hepaɨ 'anekame, Kakaɨyari 'iyarieya hexeiyame.
GEN 41:39 Hikɨ ti'aitame Kutse mɨpaɨ katiniutahɨawe: —Mɨpaɨ nepɨretima Kakaɨyari pɨmatihekɨatɨa 'ikɨ naime, xewitɨ pumawe yɨwetɨ, timaiwetɨ, 'ahepaɨ.
GEN 41:40 'Ekɨ nepɨmatsihɨritɨani nemɨra'aitatsie, neteɨterima yamepɨtekakɨne 'ekɨ petiwa'aitɨakaku. Ne xeikɨa matsi nemɨmariwe nepɨhɨkɨtɨni, nemɨti'aitamekɨ.
GEN 41:41 Hikɨ Parahuni mɨpaɨ Kutse katiniutaxatɨani: —Hikɨ ne nepumatsihɨritɨa 'Ekipitu kwieyari naime.
GEN 41:42 'Ana kwitɨwa Parahuni yuhanira 'anutihɨnaka Kutse 'itɨwameyatsie kanekamanirieni, katiniuta'aita memenakatɨtɨanikɨ kamixa witsimɨ'ane meta huru kukayari mepetitɨtɨa kɨipitɨana.
GEN 41:43 Hikɨ yuparewiwame kaxetayatsie kanenutiyeni, teparewiwamete me'utihiwakaku ya'ane mewapitɨakaku yunaitɨ mekaniukatunuma'uwekaitɨni hɨxiena. Kanihɨritɨani 'Ekipitu kwieyaritsie naime.
GEN 41:44 Hikɨ Parahuni mɨpaɨ katinitahɨawe: —Ne ti'aitame Parahuni nepɨhɨkɨ, peru xewitɨ 'Ekipitutsie yapɨkatiyurieni 'ekɨ yapekahainekaku.
GEN 41:45 Hikɨ kanipata kemɨtitewakai, Tsapenati-Paneha katiniterɨwa. 'Uka kaniwitɨtɨani 'Atsenati titewakame, Putipera niweya mawari wewiwame 'Uni kiekame. Mɨpaɨ katinanukakeni Kutse 'Ekipitu ti'aitatɨ.
GEN 41:46 Xeitewiyari heimana tamamata kanihɨkaitɨni Kutse kepauka mɨtiukatsutɨa ti'uximayatɨ ti'aitame tsiemieme. Kutse Parahuni hɨxie kaniutateuta, kaneyani 'Ekipitu kwieyaritsie, kanikuniere.
GEN 41:47 Mɨkɨ 'atahuta wiyaritsie 'aixɨa mɨtiwiyekekaitsie, 'ana waɨkawa katiniutixuawere.
GEN 41:48 Hikɨ Kutse katiniuti'uta naime tikwaiwamete, mɨkɨ 'atahuta wiyaritsie mieme katiniuti'uta kiekaritsie.
GEN 41:49 Kutse tɨriku puti'utaxɨ xiekari muti'uta hepaɨ, pɨtiyuxexeiyakai mi'inɨatakai pɨtiuhayewaxɨ mɨkayu'inɨatsinɨakaikɨ.
GEN 41:50 Mexɨakame ka'anuyeyeiwekaku haakaxa wiyari, Kutse tɨɨri yuhutame mepɨwarayexei 'Atsenati matɨa, Putipera mawari wewiwame niweya 'Uni kiekame.
GEN 41:51 Yumatɨari Manatsexi katiniuterɨwa mɨpaɨ 'utayɨka: «Kakaɨyari pɨtiyuriene nemɨratɨmaiyakɨ naime 'uximatɨarikakɨ nekie hakewa nemetinuiwaxɨ».
GEN 41:52 Hutarieka mieme 'Epɨrahini pɨtiterɨwaxɨ mɨpaɨ 'utayɨka: «Kakaɨyari pɨnetsi'upitɨa nemɨxiɨkakɨ, 'ikɨ kwieyaritsie hakewa nemɨreka'eniwakai».
GEN 41:53 Hikɨ 'atahuta wiyari 'aixɨa mɨtiwiyekekaitsie kanaye'ani.
GEN 41:54 Kutse kemutayɨkai haakaxa kaniuyutsutɨani 'atahuta wiyari, haakaxa kanayani naitsarie kwie mumanetɨkateitsie. 'Ekipitu kwieyaritsie xeikɨa puxuawekai, Kutse mɨtiuta'aitakaikɨ mɨtiti'utsienikɨ.
GEN 41:55 Kepauka 'ekipitutari memuhaakakwi, teɨteri Parahuni hetsɨa mekaniye'axɨani 'ikwai mete'iwawirietɨ, hikɨ Parahuni mɨpaɨ katiniwarutahɨawe teɨteri 'ekipitutari: «Xekenehu Kutse hetsɨa yaxeketenekakɨni kemetayɨni».
GEN 41:56 Kepauka yuwaɨkawatɨ memɨyehaakakwitɨwekai, Kutse katineuyepieni tɨriku mɨwa'utɨkaitsie watuirienike 'ekipitutari.
GEN 41:57 Yaxeikɨata 'ateewa paitɨ meheyekɨkatɨ 'Ekipitu mekani'axekaitɨni, tɨriku mekunanetɨwetɨ Kutse hetsɨa, mɨhaakaxatɨkaikɨ kwinimieme naitsarie kwie kemɨyewa.
GEN 42:1 Merikɨtsɨ Kakuwu kepauka mɨtiutamari, kename tɨriku hexɨawe 'Ekipitu, mɨpaɨ yuniwema katiniwarutahɨawe: «¿Ketitayari mana xetekutei, kwi xeyuxexeiyatɨ xeikɨa?
GEN 42:2 Mɨpaɨ nekatinimarieka kename tɨriku hexɨawe. Mana xekenehu xekenenanaiyu tahetsimieme temɨkakwinikɨ hakakɨ».
GEN 42:3 Tamamata meyupaɨmetɨ mekaniyukuha'aritɨani Kutse 'iwamama 'Ekipitu meteheunanaiyuka.
GEN 42:4 Peru Kakuwu Wenikamini pɨka'upitɨa mɨyemiekɨ Kutse mutaya, mɨpaɨ tiku'eriwatɨ: Nɨkahɨrixɨa mɨwa hemierieni.
GEN 42:5 Hikɨ 'Ixaheri tɨɨriyamama kepauka memeta'axɨa metetaxɨawienike, matsi naitsarie waɨkawa kanihaakaxatɨkaitɨni, Kanani kwieyaritsie.
GEN 42:6 Kutse kuwexinaruri pɨhɨkɨtɨkai mɨkɨ kwieyaritsie. Tɨriku mepɨwatuiriekai, naitsarie kiekaritetsie teɨteri memɨ'axekai. Kepauka 'iwamama hetsɨana memu'axɨa, kwiepapai mekaniukahɨxima'uni.
GEN 42:7 Kutse waruxeiyaka yu'iwama, kaniwaretimani. Perutsɨ mɨkawamateni hepaɨ katiniwarutahɨawe: —Xemetsɨ, ¿hakewa xepeyekɨ? Mɨkɨ mɨpaɨ mekatenita'eiya: —Tame Kanani kwieyaritsie tepeyekɨ tɨriku tepɨkunanetɨwe.
GEN 42:8 Kutse pɨwaretimaikai, peru mɨkɨ 'iwamama mepɨka'imatekai.
GEN 42:9 Merikɨ 'ana Kutse kanaye'erieni, kemɨtiuheinɨkai wahetsiemieme. 'Ayumieme mɨpaɨ katiniwarutahɨawe: —Xemetsɨ 'awie nenieremete xepɨyɨa xetatsihupietɨwetɨ.
GEN 42:10 Mɨpaɨ mekatenita'eiya: —Hawaikɨ ti'aitame, matsiparewiwamete tepɨyɨa. Tɨriku tepɨkunanetɨwe xeikɨa.
GEN 42:11 Tame tepɨxeinuiwari tapaapa puyuxewi, heitseriemekɨ yatepɨtekahu, tepɨka'awienenieremete.
GEN 42:12 Kutse mɨpaɨ katiniwaruta'eiya: —Pɨkayuri, xeme kexemutiyuane. Xepɨkunieretɨwe xeikɨa kemɨtiu'ane.
GEN 42:13 Perutsɨ mɨkɨ tawarita mɨpaɨ mekatenita'eiya: —Tame, mate'uximayatsiriwamete, tamamata heimana huta tepɨyupaɨmekai, tanaitɨ tapaapa puyuxewi Kanani kwieyaritsie kanekani. Tamuta peyuhayewaxɨ yupaapa hetsɨa, xewitɨri pɨka'uyeika.
GEN 42:14 Merikɨtsɨ Kutse tawarita mɨpaɨ katiniwarutahɨawe: —Netsɨ kenemɨtixekɨhɨawe, 'awie nenieremete xekaniyɨaka.
GEN 42:15 Kamɨtsɨ xɨka yuri xe'utiyuaneni: Ti'aitame kemaine yaxeikɨa tepɨxe'anutaxɨrieni 'ena, yu'iwa xe'atɨayuke xepanuyekɨne.
GEN 42:16 Xeme, xewitɨ yu'iwa pɨwitɨmie, xekenanunɨ'a. Hipatɨta katsariyanata xepaye'uka. 'Anake mɨpaɨ tekatenetimaikuni xɨka 'aku yuri xe'utiyuaneni, mexɨka katixaɨtɨni, yurikɨ mɨpaɨ nekanaineni Parahuni hetsiemieme, hupamete xekaniyɨaka.
GEN 42:17 Hikɨ Kutse kaniwaranutaxɨrieni katsariyanata haika tukari.
GEN 42:18 Hikɨ hairieka tukaritsie mɨpaɨ katiniwarutahɨawe: —Ne tewi Kakaɨyari nemayemakaxe nepɨhɨkɨ, xemeta yaxeketeneuyuri kenemɨtixetahɨawe, xemɨyutawikweitsitɨanikɨ.
GEN 42:19 Xɨkatsɨ xeme heitseriemekɨ yaxetekahuni, 'uwa xewitɨ xeikɨa kaniyuhayewamɨkɨ. Hipatɨta xekaniyehuni, tɨriku xekanituayuni xeniwema memɨtehekwakakɨ.
GEN 42:20 Perutsɨ tsiere yumuta xekaneni'atɨiriekuni, neyuri nemɨtixeta'eririenikɨ xemɨkakwinikɨ 'ena. Mɨpaɨ mekaniutiyuani: —'Aixɨa pɨyɨni, mɨpaɨ tepɨteyurieni.
GEN 42:21 'Ana mɨpaɨ metenanuyutahɨawekaitɨni yunaitɨ: —Xɨari hikɨ tepɨte'uka'eniwa tamuta temɨte'ukwinitɨakɨ, tsepa mɨtatsiku'imaiyakai tepɨka'enu'eni, hikɨri xɨari 'ayumieme tekateniuka'eniwani.
GEN 42:22 Hikɨ Xuweni mɨpaɨ katiniwarutahɨawe: —Ne 'ayumieme mɨpaɨ nepɨtixekɨhɨawekai, tepɨkate'ikwinitɨaka tepɨka'ikumemiwani, xepɨkanetsi'u'eni. Hikɨri xɨari 'ayumieme tekatenayukatuayani mumawekɨ.
GEN 42:23 Kutse 'ekipitutari waniukikɨ mɨwakɨhɨawekaikɨ, 'iparewiwameya pɨwahekɨatɨakai waniukikɨ. Mɨkɨ mɨpaɨ mepɨkatemaikai wa'eniekame mepɨka'eriekai waniukikɨ.
GEN 42:24 'Anari Kutse 'anayeyaka yuxaɨta 'awie kaniutatsuani. Heyunɨtɨaka hutarieka nuaka, Tsimehuni kaniuta'aita, mɨhɨiyanikɨ yu'iwama wahɨxie.
GEN 42:25 Hikɨ Kutse katiniuta'aita memuka'ikatɨarienikɨ tɨriku hɨpɨneme, yaxeikɨata watumini mukamanariexɨanikɨ wa'ikata, meta memuka'inɨatɨarienikɨ huyeta mieme. Mɨpaɨ mekateniuyurieni.
GEN 42:26 Hikɨ yupuxuri mewaruti'ikatɨaka, mekanakunuaxɨani yu'utɨma.
GEN 42:27 Perutsɨ hakewa memekuhenikekai taikai, xewitɨ mana yupuxu titiminike, yukuxitari kananukɨxɨna, muwa yutumini kaniutaxeiya.
GEN 42:28 Hikɨ yu'iwama mɨpaɨ katiniwarutahɨawe: —Neuxei, kari netumini nepeukayetsiyarie. 'Uwa patika yaxeikɨa paɨmetɨ. Hikɨ 'iwamama waɨkawa mekaniutimamani. Mɨpaɨ mekaniutiyuanekaitɨni: —¿Kehepaɨtɨtɨri Kakaɨyari pɨtatsiyuriene?
GEN 42:29 Kepauka memuta'axɨa Kanani kwieyaritsie, yupaapa Kakuwu mekateniutaxatɨani, naime kememɨte'anuyekɨ:
GEN 42:30 —Kuwexinaruri 'Ekipitu kwieyaritsie ti'aitame, waɨkawa pɨtatsiheku'iwawiyakai. Mɨpaɨ pɨtarekuhɨawekai: “'Awienenieremete xekateyɨa”.
GEN 42:31 Tame mɨpaɨ tepɨteheitahɨawixɨ: “Tixaɨ tame heitseriemekɨ yatepɨtekahu tepɨka'awienenieremete.
GEN 42:32 Tame tepɨxeinuiwari tapaapa puyuxewi. Tamamata heimana huta tepɨyupaɨmekai, xewitɨri pumawe, tamuta xeikɨa peyuhayewaxɨ Kanani kwieyaritsie”.
GEN 42:33 »Hikɨ tewi mana mɨti'aita mɨpaɨ katatinetahɨawe: «'Ikɨkɨ mɨpaɨ nekatinimaikamɨkɨ xɨka 'aku heitseriemekɨ yaxetekahuni, xewitɨ 'ena kaniyuhayewamɨkɨ, hipatɨ xeikɨa xekaniyehuni xeniwema memɨkaheyehaakakwitɨwenikɨ.
GEN 42:34 Perutsɨ xekaneni'atɨiriekuni yumuta 'imatɨreme, yuri nemɨtixeta'eririenikɨ kename 'awie nenieremete xekayɨa. 'Anake xe'iwa nekanixeyetuiriemɨkɨ, yaxeikɨata heitseriemekɨ tepɨxemateni, 'ena xemu'uwanikɨ takwiepa kemɨtixenake».
GEN 42:35 Hikɨ kepauka yukuxitari memanukuxɨnaxɨa, mekanitaxeiya purutsa watumini muyetei. Mɨkɨkɨ yunaitɨ mekaniutimamani.
GEN 42:36 Hikɨ Kakuwu mɨpaɨ katiniwarutahɨawe: —Xemeri neniwema tixaɨtɨ xepɨkanetehayewieni. Kutse tahamatɨari 'apɨka'uyeika, Tsimehuni meta pumawe. Hikɨtari Wenikamini xepɨyewitɨxime. Waɨkawa xepɨnetsihiweritɨa xeikɨa.
GEN 42:37 Perutsɨ Xuweni, yupaapa mɨpaɨ katiniutahɨawe: —Ne Wenikamini nepanuwitɨni nepɨyɨhɨritɨani nemi'atɨanikɨ. Mexɨka neka'i'atɨani, pepɨyɨwe neniwema yuhutame pemɨwarukwini.
GEN 42:38 Kakuwu tawarita mɨpaɨ kaniutayɨni: —Neniwe pɨkayemie xe'utɨma. Kutseri pɨka'uyeika, mutaya xeikɨa puyuhayewane. Xɨka huyeta yɨkɨ reiyurieni, xemetsɨ pɨxehetsietɨni xɨka ne 'ukiratsi hiwerikakɨ ne'umɨni.
GEN 43:1 Naitsarie Kanani kwieyaritsie matsi waɨkawa mepɨyehaakakwitɨwekai.
GEN 43:2 Merikɨte kepauka tɨriku memuxɨ, memeikuxɨawiekai 'Ekipitu, mɨpaɨ katiniwarutahɨawe wapaapa: —Xekenehuta hutarieka tawarita xekenexɨawiyu tɨriku temeixeiyanikɨ ta'ikwai.
GEN 43:3 Matsi Kura mɨpaɨ katinitahɨawe: —'Iya tewi heitseriemekɨ mɨpaɨ pɨtaretahɨawixɨ kename tawariri tekaheuhunikekai, ta'iwa xeikɨa Wenikamini te'awitɨtɨ teyɨwawekai.
GEN 43:4 Xɨka 'ekɨ pe'itaunieka tamuta, tekatenixɨawiyuni.
GEN 43:5 Ya pɨtikatixaɨ, titayari teteheuhuni. Mɨkɨ tewi heitserie mɨpaɨ painekai kename tekahauhunikekai, tamuta xɨka tekahawitɨkɨni.
GEN 43:6 'Ixaheri mɨpaɨ katiniwarutahɨawe: —¿Titayari mɨpaɨ xeteheitahɨawixɨ mɨkɨ tewi, kename yu'iwa xeime xehexeiya? 'Uximatɨarika waɨkawa xepɨnetsiwiwirie.
GEN 43:7 Mɨkɨ mɨpaɨ mepɨte'ita'ei: —Mɨkɨ tewi pɨtatsiheku'iwawiyakai waɨkawa tahepaɨtsita: “¿Xepaapa 'akuxi reyeika? ¿Xemuta 'akuxi, xewitɨ reyeika?” 'Utaitɨ, ta'iwama tatɨɨriyama wahepaɨtsita. Tame tepɨkaheyɨwawekai yɨkɨ temetiyuanikekai. Ta'iwa tatsihetawawirienike tepɨkahe'eriekai.
GEN 43:8 Yuhetsiemieme Kura yupaapa 'Ixaheri mɨpaɨ katiniutahɨawe: —Wenikamini keheyani tahamatɨa. Keneneuhɨritɨa, kwitɨwa tekaniyehuni temɨwikwekakɨ tame meta taniwema.
GEN 43:9 Ne hetsiena mieme nekaninehɨritɨamɨkɨ. Xɨka nekamatsi'atɨirieni 'ena, ne hetsiena mieme nerapitɨ nekanayeimɨkɨ neheyemekɨ.
GEN 43:10 Xɨka niuki tekaxɨatɨakake waɨkawa, 'ari hutakɨa tepakunuaxɨanike.
GEN 43:11 Hikɨ 'Ixaheri wapaapa mɨpaɨ katiniwarutahɨawe: —Kamɨtsɨ mɨpaɨ xeketeneuyuri, yu'iwa xekenanuwitɨki. Takwiepa mɨtixuawe 'aixɨa mɨti'anene xeketeneuka'ikata yukuxitariteta. Xeketenanutɨkiri 'iya tewi, xekenemikwa waritsamu 'etsiwa, xiete, witsimu'ɨa, mixaxi, pitsitatsi, 'erimenitɨra nuetsi hepaɨ mɨ'anene.
GEN 43:12 Tawarita pɨrata hepaɨna paɨmeme xekenanu'ɨiri. Mɨkɨ xepeiyetuirieni mamayatsie yukuxitariteta xemeitaxei, tietɨtsɨ mɨpaɨ kara'eriwatɨ muwa mɨneikamanaxɨ.
GEN 43:13 Yumuta xekenanuwitɨki mɨkɨ tewi hetsɨa.
GEN 43:14 Kakaɨyari Naimekɨmɨtɨrɨkaɨye mɨkɨ tewi 'aixɨa mɨtixexeiyanikɨ ke'upitɨani, Wenikamini xeime meta 'iwaya, meke'akunuaxɨani xehamatɨa. Xɨkari ne neniwema newareuyehɨamɨkɨ, ¿ketsɨari ne'uyɨni? Tsepari.
GEN 43:15 'Ixaheri niwemama mekatenetɨni 'imikierite, tawarita pɨrata hepaɨna paɨmeme, Wenikamini me'awitɨtɨ, meyumexɨitɨatɨ mekanekɨne 'Ekipitu. Me'uta'axɨaka Kutse hɨxie mekaniti'uni.
GEN 43:16 Kepauka Kutse Wenikamini muxei yunaime wahamatɨa, yuparewiwame mɨpaɨ katiniutahɨawe: «Keniwaranuwitɨki 'ikɨ teɨteri nekie, kenemi'a tuuru muwaiya 'ikwai kenekawewi, tuka nehamatɨa mekatenekwaikuni».
GEN 43:17 Ti'uximayatame katinaye'atɨani kemɨtiu'aitɨarie. Kaniwarewitɨni Kutse kie.
GEN 43:18 Mɨkɨ metehetimaika Kutse kie memewitɨkiekaikɨ waɨkawa mekanimamakaitɨni. Mɨpaɨ mepɨte'u'eri: «'Ikɨ tewi pɨtatsi'atɨa yukie tapɨrata mɨkahe'ɨikɨ matɨari mieme. 'Ikɨ xɨari pɨtatsikwini 'uximayatsikakɨ waɨriyarika tati'aitɨatɨ meta tapuxurima».
GEN 43:19 'Ayumieme kiita meheutahaxɨanike 'ahurawa mekaniukɨne, Kutse kie ti'uximayatame mɨpaɨ mekateniutahɨawe:
GEN 43:20 —Neuxei ti'aitame, 'ekɨ pekatinimaika xeimiemeri tepeɨkɨkɨnixɨa, tɨriku tepekunanai.
GEN 43:21 Kepauka mana temeta'axɨa hakewa temekuhenikekai tɨkarikɨ, hikɨ takuxitarite temanukɨxɨnaxɨa. Muwa kanatimanekaitɨni pɨrata, kepaɨmemekɨ temɨteyutuakai. Hikɨ tekane'ɨka mɨkɨ pɨrata.
GEN 43:22 Hipameta pɨrata tekana'ɨka, tawarita tɨriku teminanenikɨ. 'Atsitepɨkatemate kemɨ'ane muwa meikamanaxɨ.
GEN 43:23 Ti'uximayatame mɨhɨritɨarie mɨpaɨ katiniwarutahɨawe: —Xepɨkayu'iyaritɨaka, ne nekanenɨ'ɨni mɨkɨ pɨrata kɨmana xemɨte'uyutua. Xekakaɨyari xepaapa kakaɨyarieya muwa xɨari peikamanaxɨa mɨkɨ 'imikieri. Ti'uximayatame Tsimehuni kaniwa'atɨirieni,
GEN 43:24 'ana kaniwarewitɨni memeutahaxɨanikɨ Kutse kiita. Haa meta kaniwaruhanitɨani yuketate memɨtihauxinikɨ, wapuxurimata katiniwarutimini.
GEN 43:25 Mɨkɨri mepɨtemaikai Kutse wahamatɨa mɨtikwanikekaikɨ tuka. Mekateniukuha'aritɨani 'imikieri kepauka munuanikekai.
GEN 43:26 Kepauka Kutse munua yukie, mɨkɨ mekaniukahɨxima'uni hɨxiena. Mekaniyetuirieni 'imikieri memeiyetɨkiriekai meta mekanitawaɨritɨani.
GEN 43:27 Kutse kaniwaruta'iwawiya kememɨteheu'eriekai. Mɨpaɨta katiniwaruta'iwawiya: —¿'Aixɨa reu'eriekai xepaapa, mɨkɨ 'ukiratsi xemɨnetsihaxaxatɨwakai? ¿Rayeyuri 'akuxi?
GEN 43:28 Mɨkɨ mekatenita'eiya: —Mɨkɨtsɨ tapaapa payeyuri, 'aixɨa katineu'erieka. 'Ana hutarieka hɨxiena mekaniukahɨxima'uni.
GEN 43:29 Kutse waranuxeiyatɨyaka, kepauka Wenikamini yu'iwa muxei paapaya warutsieya hetsiemieme, mɨpaɨ katiniwaruta'iwawiya: —¿'Ikɨ tihɨkɨ xe'iwa 'etsimɨyumate xemɨnetsihaxaxatɨwakai? Kakaɨyari kematsi'ɨwiyani neniwe —katinitahɨawe.
GEN 43:30 Kutse kaneyukaheiwerietɨyani yumuta xeiyatɨ 'inaki'erietɨ. Yapauka kanewayeyani, mɨwayehuputsie heutahaka, kaniutatsuani.
GEN 43:31 'Uyunɨtɨaka 'anaka'ɨtaimaka, kaniwayeyani. Mɨpaɨ kaniutayɨni: «'Ikwai xekenakatuaxɨa».
GEN 43:32 Kutse 'ikwaiya yuxaɨtame kanamaniyarieni, 'ekipitutari wa'ikwai yuxaɨtameta. Hepɨrayutsixi meta Kutse 'iwamama wa'ikwai yuxaɨta mepamaniyariexɨa, 'ekipitutari wahepaɨtsita 'axapɨ'anekai hipame wahamatɨa xɨka mete'ukwani.
GEN 43:33 Kutse 'iwamama hɨxiena mekanayaxe, kememɨte'ununuiwaxɨ, kwimeniyuxexeiyakaitɨni mehɨxiyatɨ.
GEN 43:34 Kepauka 'ikwai Kutse mamaniyarie mexayatsie, Wenikamini kanamaniyarieni 'auxɨwime xakɨyari Kutse mexayatsie miemetɨme, 'iwamamata xeixakɨyari xeikɨa mekanamaniyariexɨani yuxexuitɨ. Kaxie winuyari mekananu'ieni Kutse hamatɨa.
GEN 44:1 Merikɨtsɨ 'ana kwitɨ Kutse tiyu'uximayatsiriwame katiniuta'aitɨani kiiya hepaɨtsita mɨhɨritɨariekai: «Kenetihɨniya 'ikɨ teɨteri wakuxitarite tɨrikukɨ. Yuxexuime wa'ikata wapɨrata keneukayatsa.
GEN 44:2 Netekɨxi keneukaketsiri wamuta 'ikayata, pɨrata mame mɨtiuyutua». Ti'uximayatame naime katinaye'atɨani Kutse kemɨtita'aitɨakai.
GEN 44:3 Hikɨ 'amɨtiukatarixɨ, Kutse kaniwarupitɨani memɨyehukɨ yupuxurima mewaru'arietɨ.
GEN 44:4 Mehekɨneku yareutewikaku Kutse tiyu'uximayatsiriwame mɨpaɨ pɨtiutahɨawixɨ: «'Ikɨ teɨteri memekɨ, keniwaranukuweiya. Xɨka pewaranuku'axe mɨpaɨ ketiniwaretahɨawi: “¿Titayari 'axa'anemekɨ xenetehakapitɨa, titayari neti'aitɨwame tekɨxieya xetehenawa pɨrata tekɨxiyari?
GEN 44:5 Kexemɨte'uyuri 'aixɨa pɨka'ane, mɨkɨ tekɨxi kanihɨkɨtɨni neti'aitɨwame kɨmana manuye'e, kɨmana mɨretimamate kemɨtiyɨni 'arike”».
GEN 44:6 Kepauka ti'uximayatame mɨwaranuku'axixɨ yaxeikɨa katiniwarutahɨawe kemɨretahɨawarie.
GEN 44:7 Mɨkɨ mɨpaɨ mekatenita'eiya: —¿Ketitayari 'ekɨ mɨya petatikɨhɨawe? Hatsuaku tame mɨpaɨ tepɨkateheyurieka.
GEN 44:8 Perutsɨ tame tepeyekɨ takie Kanani kwieyaritsie, pɨrata teyetuanike temitaxei takuxitariteta. ¿Kehapaɨ matsi huru, pɨrata tete'unawani mati'aitɨwame kiita mieme?
GEN 44:9 Mɨkɨ pɨrata tekɨxiyari, kemɨ'ane kuxitarieyata pemitaxeiya, ke'umierieni. Tameta teyunaitɨ te'a'uximayatsiriwamete tepakɨne.
GEN 44:10 Ti'uximayatame mɨpaɨ katiniwarɨtahɨawe: —Kexemaitɨka 'aixɨa kani'aneni, mɨpaɨ nepɨtiyurieni. Perutsɨ kemɨ'ane tekɨxi muyekeka, mɨkɨ xeikɨa neti'uximayatsiriwame kanayeimɨkɨ, xeme yunaitɨ xepɨxɨxɨnini.
GEN 44:11 Yapauka yunaitɨ mɨkɨ mekaniuti'ikapiexɨani, yukuxitarite mekananukuxɨnaxɨani.
GEN 44:12 Hikɨ ti'uximayatame kanitiwauni yuxexuime wakuxitarita wamatsikatsie 'itsutɨaka. Kanitaxeiya tekɨxi wamuta Wenikamini kuxitarieyata.
GEN 44:13 Kepauka memixei, Kutse 'iwamama yukamixa mekaneukatsanaxɨani hiwerikakɨ. Hikɨ mewaruti'ikatɨaka yupuxurima, mekaniukunuaxɨani yu'utɨma kiekaritsie.
GEN 44:14 Kepauka Kura yu'iwama warawitɨtɨ memu'axɨa Kutse kie, yukiita payekatei 'akuxi. Hikɨ mekaniukahɨxima'uni kwiepa paitɨ hɨxiena,
GEN 44:15 hikɨ Kutse mɨpaɨ katiniwarutahɨawe: —¿Titayari mɨyaxenete'uyuri? ¿'Atsixekatemaikai kɨmana nemɨtimaiwe, kemɨtiyɨni 'arike?
GEN 44:16 Kura mɨpaɨ katinita'eiya: —¿Ketsɨ'aku te'utiyuani? 'Ekɨ tati'aitɨwame pepɨhɨkɨ. Tepɨkayɨwawe temuyutahekɨata 'atsitemɨkate'uyurikɨ. Kakaɨyari kanikaxeiya tahetsie tita 'axatemɨte'uyuri, 'ena tekaniti'uka. Te'a'uximayatsiriwamete tepɨhɨmetɨni waɨriyarika, meta kemɨ'ane 'atekɨxi muyekekai.
GEN 44:17 Kutse mɨpaɨ katinita'eiya: —Ne nepɨkayɨwe mɨpaɨ nemɨxe'uyurieni. Xewitɨ xeikɨa netsiparewiwame kanayeimɨkɨ, kemɨ'ane tekɨxi muyekekai. Hipatɨta xekaniyehuni xekayu'iyaritɨatɨ yupaapa hetsɨa.
GEN 44:18 Kura 'ahurawa kaniuyani Kutse hɨxie, mɨpaɨ katinitahɨawe: —Pepɨkaha'aka neti'aitɨwame, 'awie nepɨmatitaxatɨanikeyu. 'Ekɨtsɨ ti'aitame pepɨmariwe yaxeikɨa Parahuni hepaɨtɨtɨ.
GEN 44:19 'Ekɨ pepɨtatsiku'iwawiyakai xɨka tapaapa tehexeiyani, yata'iwa xeime tehexeiyani.
GEN 44:20 Tame tepɨmatsi'uta'ei, tapaapa 'ariri pɨ'ukiratsi. Yuniwema yuhutame pɨwarayexei, wamaama pɨyuxewikai. Xewitɨ kaniɨmɨni, xewitɨ xeikɨa kaneyeikani mutaya. Waɨkawa kaninaki'erieka tapaapa, 'ukiratsitɨtɨ meyexeikɨ.
GEN 44:21 Merikɨte 'ekɨ pepɨtatsi'utawawiri temewitɨnikɨ pemeitimanikɨ.
GEN 44:22 Tame mɨpaɨ teputiyua, temaikɨ pɨkaheyɨwe yupaapa meku'eirieni, yuxaɨtame xɨka heiku'eirieni hiwerikakɨ pemɨni.
GEN 44:23 Peru 'ekɨ pepɨtarahɨawekai xɨka ta'iwa tekahawitɨnike tepɨkamatsixeiyanikekai.
GEN 44:24 Kepauka takie temeta'axɨa tapaapa naime tepɨteheitaxatɨa kepemɨtatiutahɨawixɨ.
GEN 44:25 'Ariketa tapaapa mɨpaɨ katatinetahɨawe: “Xekenehu tawarita 'etsiwa tɨriku xekenenanaiyu”.
GEN 44:26 Peru tame mɨpaɨ tepɨteheitahɨawixɨ: “Tepɨkayɨwawe temeixeiyakɨ mɨkɨ ti'aitame, xɨka ta'iwa tamuta kaheyani tahamatɨa”.
GEN 44:27 Tapaapa mɨpaɨ pɨtaretahɨawixɨ: “Xeme xepɨtemate Xakeri matɨa yuhutame tepɨwarayexei.
GEN 44:28 Xewitɨri nu'aya pukumawerixɨ nehetsɨa, mana mɨtiyetɨa 'anatɨtɨri nepɨka'ixeiyawe. Mɨpaɨ nepɨtiku'eriwa, xɨari yeutanaka peitakwai.
GEN 44:29 Xɨkata 'ikɨ xehewitɨni, xɨka yɨkɨ reiyurieni, xemetsɨ pɨxehetsietɨni xɨka ne 'ukiratsi hiwerikakɨ ne'umɨni”.
GEN 44:30 »Xɨka nepaapa hetsɨa nehenuani, tamuta xɨka kahenuani tahamatɨa tapaapa matɨa xei'iyariyari memɨhɨkɨ,
GEN 44:31 tapaapa heitatɨmaiyame kanemɨmɨkɨ. Kamɨtsɨ tame tahetsie pɨrayani, xɨka tapaapa hemɨni hiwerikakɨ.
GEN 44:32 Ne nepenehɨritɨa 'ikɨ temaikɨ tapaapa hɨxie. Mɨpaɨ nepɨreitahɨawixɨ: “Nepaapa, xɨka nekamatsi'atɨirieni 'aniwe, nehetsie kerahɨiyani 'atsita kepauka nemɨmɨni”.
GEN 44:33 'Ayumieme ne nepɨmatsiwawirie, 'ekɨ pemɨnetsipitɨanikɨ ne pɨta nemɨnehayewakɨ matsiparewiwame nemayani hetsienamieme. Mɨkɨ temaikɨ keneupitɨa mɨyemiekɨ yumatsikama wahamatɨa.
GEN 44:34 Titayari nereumieni nepaapa hetsɨa xɨka temaikɨ nehamatɨa kaheyani, ne tixaɨ nepɨkaheixeiyamɨkɨ nepaapa yuhiweriekame».
GEN 45:1 Merikɨtsɨ Kutse pɨkayɨwekairi mɨtinewienikɨ yuparewiwamete wahɨxie. Mɨpaɨ katiniwarutahɨawe: «Yunaitɨ xekenanuyekɨni 'uwa xemayetei». Nixewitɨ pɨka'uyuhayewaxɨ hamatɨana. Kepauka muyutahekɨataxɨ kename wa'iwa,
GEN 45:2 mɨkɨ 'ana pitsutɨa yuhiwerietɨ 'utatsuatɨ karima. 'Ekipitutari mepu'enana, yaxeikɨata Parahuni pɨtiutamari.
GEN 45:3 Mɨpaɨ katiniwarutahɨawe yu'iwama: —Ne Kutse xe'iwa nekanihɨkɨtɨni. ¿Nepaapa 'akuxi rayeyuri? Mɨkɨ matsi mekaniutimamani mepɨkayɨwawekai memita'eiyakɨ.
GEN 45:4 Mɨkɨ mɨpaɨ katiniwarutahɨawe: —'Ahurawa xekenakɨni. Mɨkɨ 'ahurawa mekaniukɨne. Hikɨ mɨpaɨ katiniwarutahɨawe: —Ne Kutse nekanihɨkɨtɨni, xe'iwa 'ekipitutari xemɨwarutuiri.
GEN 45:5 Hikɨri yɨkɨ xepɨkateyɨkɨhɨaweni mɨya xemɨte'uyurikɨ. Kakaɨyari pɨta pɨtiuyuri, 'ena ne meri mɨnetsi'atɨa, para xemɨtawikwenikɨ.
GEN 45:6 Huta wiyari panuyemie, 'ena mepɨte'uka'eniwa haakakɨ. Peru 'akuxi peuyewetse 'auxɨwime wiyari mepɨka'uka'etsani mepɨka'uka'itsanani.
GEN 45:7 'Ayumieme Kakaɨyari pɨnetsiheyenɨ'a meripaitɨ, xetukari mɨtawikweitsitɨarienikɨ Kakaɨyari mariwemekɨ tiyurienekaku, xetɨɨriyama meta memɨkaheuyewenikɨ 'ena kwiepa.
GEN 45:8 Kakaɨyari pɨta pɨnetsiheyenɨ'a, xeme pɨkatixaɨ. Mɨkɨ 'ena pɨnetsi'upitɨa, yanemɨti'aitanikɨ Parahuni ti'aitame paratsiyuyata kemɨti'uximayatsieka, meta naitsarie 'Ekipitu kwieyaritsie.
GEN 45:9 'Ayumieme kwitɨ xekenakunuaxɨa yupaapa hetsɨa. Mɨpaɨ xeketenetaxatɨa: “'Aniwe Kutse mɨpaɨ paine: ‘Kakaɨyari pɨnetsi'upitɨa ti'aitame nemayanikɨ 'Ekipitu kwieyaritsie naitsarie. Kenamie kwitɨwa, pemɨnetsixeiyakɨ.
GEN 45:10 Kutseheni mɨrakutewatsie xepɨkuteni, 'ekɨ 'aniwema 'amu'e'ema watewama xepiini naitɨ. Mana hurawa pepukani.
GEN 45:11 'Auxɨwime wiyari pɨhaakaxatɨni 'akuxi, peru ne 'ena nepɨxeparewieka 'ikwai xemexeiyanikɨ. Mexɨka mana xeheyuhayewani Kanani kwieyaritsie, naime xepɨteheuyehɨani yupiinite’”.
GEN 45:12 Hikɨri xeme xepɨhɨme xemunenierixɨ kenemɨtixe'utahɨawixɨ hikɨ. Ne'iwata Wenikamini pɨnetsi'uxei, yapɨretima ne Kutse nemɨhɨkɨkɨ.
GEN 45:13 Naime xeketenetaxatɨa nepaapa tita xemɨte'uxei, kenemɨtimariwe 'ena 'Ekipitu kwieyaritsie. Peru xekeneyukumexɨitɨa 'ena xemi'atɨanikɨ.
GEN 45:14 Hikɨ Kutse yumuta Wenikamini kaniutapa, 'ana kaniutatsuani, 'iwayata yaxeikɨa.
GEN 45:15 'Ariketa yunaime pɨwaruti'itsi yu'iwama 'utatsuatɨ, 'anakeri mepitahɨawixɨ 'iwamama.
GEN 45:16 Kepauka niuki mu'eni ti'aitame Parahuni, kename Kutse 'iwamama me'u'axɨa, 'ana kaniyutemawiekaitɨni, yaxeikɨata teɨterimama.
GEN 45:17 Hikɨ Parahuni Kutse mɨpaɨ katiniutahɨawe: «Mɨpaɨ ketiniwarutahɨawi 'a'iwama: «Xekeniwaruti'ikatɨa yutewama, xekenakunuaxɨa Kanani kwieyaritsie.
GEN 45:18 Yupaapa xekenawitɨki, yutɨɨriyama yunaime. Nehetsɨa xekenahu. Ne nepɨwaxatɨani kwie yemekɨ 'aixɨa mɨraku'ane 'ena 'Ekipitu kwieyaritsie, meta mepɨtekwaka tita yemekɨ 'aixɨa mɨti'anene yu'ikwaite mepɨtehexeiyani.
GEN 45:19 Mɨpaɨta ketiniwarutahɨawi: Xekeniwaranuhapani kaxetate 'Ekipitutsie miemete para xemɨteha'ikatakɨ, yutɨɨriyama yu'ɨitama, meta yupaapa xematɨnikɨ.
GEN 45:20 Xepɨkahe'iyarixieka, yupiinitekɨ tita xemɨteheku'eirieni. 'Ikɨ kwieyaritsie tita mɨtixɨawe 'aixɨa ti'anenetɨ, xepiinite katinayeimɨkɨ».
GEN 45:21 Hikɨ mɨpaɨ mepɨte'uyuri, 'Ixaheri niwemama. Kutse kaxetate pɨwayetuiri, kemainekai Parahuni, 'ikwai pɨwarenɨ'airi huyeta mieme.
GEN 45:22 Meta yuxexuime 'imikieri pɨwayetuiri 'ixurikite mɨhehekwa. Wenikamini pɨrata pɨyetuiri haika kiruyari raheteme, 'ixuriki meta 'auxɨwime kemariyari witsi'aneneme.
GEN 45:23 Yaxeikɨata Kutse yupaapa pɨrenɨ'airi: tamamata 'ikayari puxuri wahetsie, tita matsi 'aixɨa mɨti'anenekai 'Ekipitu mɨtixuawe, puxuri 'ukari wahetsie tamamata 'ikayari tɨriku, meta tikwaiwame Kutse paapaya hetsiemieme huyeta mamietsiemieme.
GEN 45:24 Merikɨ Kutse wateutɨatɨ, mɨpaɨ katiniwarutahɨawe yu'iwama, «Huyeta xepɨkaheyukwitɨweni».
GEN 45:25 Hikɨ mɨkɨ 'iwamama mekanayekɨne 'Ekipitutsie. Kanani kwieyaritsie paitɨ mekaneta'axɨani hakewa wapaapa mekatei Kakuwu.
GEN 45:26 Meheta'axɨaka mɨpaɨ mekatenitahɨawe: «Kutse 'apuyeika 'akuxi. Kuwexinaruri kanehɨkɨtɨni, naitsarie 'Ekipitu kwieyaritsie pɨre'aita». Kakuwu matsi pɨhɨxiyakai, yuri pɨkatiwa'eririekai,
GEN 45:27 perutsɨ mɨkɨ yameputiyuanekai, naime Kutse kemɨtiwaretahɨawixɨ. Hikɨ kepauka Kakuwu kaxetatsixi muwaruxei Kutse mɨwareyenɨ'a memenutɨnikɨ, 'anake puyukatemawi.
GEN 45:28 Hikɨ mɨpaɨ kaniutayɨni: «'Aku yuri xeputiyuane. Neniwe Kutse payeniere. Nepɨyemie nepixeiyamie mexi nekamɨwe».
GEN 46:1 Merikɨtsɨ 'Ixaheri kanayeyani, yupiinite naime ratɨtɨ, tita memɨtehexeiyakai. Kepauka Weritsewa meta'a, mawari kaniuwewieni, kemɨ'ane paapaya 'Itsahaki mɨkakaɨyarieyatɨkai.
GEN 46:2 Mɨkɨ tɨkaritsie heinɨtsitana, Kakaɨyari 'Ixaheri mɨpaɨ katiniutaxatɨani: —Kakuwu. Kakuwu 'aku. —'Uwa nepayeka —tinita'eiya.
GEN 46:3 Kakaɨyari mɨpaɨ katinitahɨawe: —Ne Kakaɨyari nepɨhɨkɨ, 'apaapa Kakaɨyarieya. Pepɨkaheumaka 'Ekipitu pemɨyemiekɨ. Matsi ne yumɨireme nepɨxe'ayeitɨani, mana xehekutekaku.
GEN 46:4 Ne 'ahamatɨa nepuyeikani 'Ekipitu paitɨ. Yaxeikɨa nepɨmatsi'akunuitɨani hutarieka. Kepauka pemɨmɨximeni, Kutse pɨhɨkɨtɨni mɨmatsi'ɨwiyani, pemɨyu pɨmatsi'anuka'eima.
GEN 46:5 Hikɨ Kakuwu kanayeyani Weritsewa mɨrakutewatsie, hikɨ 'Ixaheri niwemama mekaniyukuha'aritɨani, Kakuwu yupaapa mekananutiyeni, meta yuniwema yɨ'ɨitama mekaniwaranutiyatsa kaxetatetsie Parahuni ti'aitame mɨwareyenɨ'atsie.
GEN 46:6 Meta mekateniware'arieni yutewama metatsiere tita memɨte'ukaxeiyakai Kanani kwieyaritsie. Mɨpaɨ Kakuwu meta nuiwarimama 'Ekipitu mekateniu'axɨani.
GEN 46:7 Mɨkɨ yunaime kanewarewitɨni yutɨɨriyama 'ukitsi 'ukari, meta yuteukarima 'ukitsi 'ukari, yunaime yunuiwari.
GEN 46:8 'Ikɨ mepɨhɨme 'ixaheritsixi teɨteriyari kememɨtetetewakai, Kakuwu niwemama memeyekɨ 'Ekipitu paitɨ: Xuweni, Kakuwu matɨarieya pɨhɨkɨtɨkai.
GEN 46:9 Xuweni niwemama mepɨtetetewakai: Kanuki, Paru, Ketsiruni meta Karimi.
GEN 46:10 Niwemamata Tsimehuni mepɨtetetewakai: Kemueri, Kamini, 'Uhari, Kakini, Tsukaxi, meta Tsahuri, maamaya kananeu tewiyari pɨhɨkɨtɨkai.
GEN 46:11 Rewi niwemama: Keritsuni, Kuhati, meta Merari.
GEN 46:12 Kura niwemama: 'Exi, 'Unani, Tseraxi, Paretsi, Tsera. (Peru 'Exi matɨa 'Unani, mepekwikairi Kanani kwieyaritsie paitɨ). Paretsi niwemama: Ketsiruni meta Kamuri.
GEN 46:13 'Itsakaxi niwemama: Tura, Puwa, Kuwi, meta Tsimiruni.
GEN 46:14 Tsawuruni niwemamata: Tsereri, 'Eruni, meta Yareri.
GEN 46:15 'Ikɨ mepɨhɨme Kakuwu Reya memɨwarayexei Parani-'Arami me'u'uwatɨ, meta waniwe Rina 'uka. Yunaitɨ mɨpaɨ mepɨyupaɨmekai, 'ukitsi 'ukari, xeitewiyari heimana tamamata heimana yuhaikatɨ.
GEN 46:16 Kahari niwemama, Tsepuni, Kaki, 'Etsiwuni, Tsuni, 'Eri, 'Aruri, meta 'Areri.
GEN 46:17 'Atsexi niwemama: 'Imɨna, 'Itsiwa, 'Itsiwi, Weriya, 'iwaya 'ukatɨtɨ Tsera mɨtitewakai. Weriya niwemamata mepɨtetetewakai: Hewexi meta Marikiheri.
GEN 46:18 Mɨkɨ mekanihɨkɨtɨni Tsiripa niwemama Kakuwu matɨa memɨwarayexei, mɨkɨ ti'uximayatame pɨhɨkɨtɨkai Rawani hetsiemieme, yuniwe Reya pɨyetɨiri hetsiena mieme mɨti'uximayakakɨ. Wanuiwari mepɨyupaɨmekai tamamata heimana 'ataxewi mekanihɨkɨtɨkaitɨni.
GEN 46:19 Xakeri niwemama Kakuwu 'ɨyaya: Kutse meta Wenikamini.
GEN 46:20 'Ekipitu Kutse yuniwema pɨwarayexei, 'Atsenati matɨa Putipera nu'aya mawari wewiwame pɨhɨkɨtɨkai 'Uni mieme: Manatsexi, meta 'Epɨrahini.
GEN 46:21 Wenikamini tɨɨriyamama: Wera, Wekexi, 'Atsiweri, Keraha, Nahamani, 'Ehi, Xutsi, Mupini, Kupini, meta 'Axi.
GEN 46:22 'Ikɨ mepɨhɨkɨkai Kakuwu nuiwarimama Xakeri matɨa memɨwarayexei, yunaitɨ tamamata heimana yunaukatɨ mepɨyupaɨmekai.
GEN 46:23 Rani nu'aya pɨtitewakai: Kutsini.
GEN 46:24 Nepɨtahari niwemama: Yatseri, Kuni, Ketsexi, meta Tsireni.
GEN 46:25 Mɨkɨ mekanihɨkɨtɨkaitɨni Wiriha niwemama Kakuwu matɨa memɨwarayexei, mɨkɨ ti'uximayatame pɨhɨkɨtɨkai Rawani hetsiemieme, yuniwe Xakeri pɨyetɨiri hetsiena mieme mɨti'uximayakakɨ. Wanuiwari mepɨyupaɨmekai 'atahuta mekanihɨkɨtɨkaitɨni.
GEN 46:26 Yunaitɨ Kakuwu tɨɨriyamama memu'axɨa 'Ekipitu, xeinuiwari mepɨhɨkɨtɨkai, haika tewiyari heimana 'ataxewi mepɨyupaɨmekai 'ukari meka'inɨaritɨ.
GEN 46:27 Kutse meta yuhutame pɨwarexeiyakai yuniwema memutinunuiwakai 'Ekipitu kwieyaritsie. Mɨkɨ yunaitɨ haika tewiyari heimana tamamata mepɨyupaɨmekai Kakuwu nuiwarimama mana memu'axɨa.
GEN 46:28 Kakuwu Kura kaniutanɨ'ani manuyehaitɨanikɨ Kutse mɨretaxatɨanikɨ, menunakekɨ Kutseheni paitɨ, kepauka mana memeta'axɨanikekai. Kepauka mana memu'axɨa,
GEN 46:29 Kutse pɨtiuta'aitaxɨ mukuha'aritɨarienikɨ kaxetaya, 'anari mɨkɨ petɨa Kutseheni paitɨ mitahɨawekɨ yupaapa 'Ixaheri. Kepauka mixei 'anakayaka 'utanautsaka kanitapa, mana 'epɨreuterixɨ 'utatsuatɨ tapana heukunieretɨ.
GEN 46:30 Hikɨ 'Ixaheri Kutse mɨpaɨ katiniutahɨawe: —Hikɨrixɨa nepɨmatsi'uxei nehɨxikɨ, neka'uximatɨarietɨri nepɨmɨni, 'akuxi 'apepuyeika pepayeniere.
GEN 46:31 Mɨpaɨ Kutse yu'iwama katiniwarutahɨawe: —Tsiparatsɨ, Parahuni nepɨretaxatɨani kename xe'u'axɨari nehetsɨa ne'iwama, nepaapa niwemama Kanani kwieyaritsie memetitekai.
GEN 46:32 Mɨpaɨ nepɨreitahɨawe kename tewaxi wahɨwemete xehɨkɨ, kename muxatsi wakaitsixi xetewa'atɨa, naime tita xemɨtehexeiyakai.
GEN 46:33 'Ayumieme kepauka Parahuni mɨxeta'iwawiya: “¿Ketitakɨ xete'uximayatamete?”,
GEN 46:34 mɨpaɨ xeketeneutahɨawi kename xeme xetehɨwemete yaxeikɨa yuteukarima wahepaɨ. Xɨka matsi mɨpaɨ xete'itahɨawe, mana xepɨyuhayewani Kutseheni mɨrakutewatsie. Mɨkɨ 'ekipitutari pɨkawanake 'ahurawa memɨtehɨrieka.
GEN 47:1 Hikɨ Kutse katineikuxatɨani Parahuni ti'aitame. Mɨpaɨ katineitahɨawe: —Nepaapa ne'iwama mepu'axɨari, Kanani kwieyaritsie meheyekɨneka yutewama yunaime tita memɨtehexeiyakai meteha'arietɨ. Kutseheni mɨrakutewatsie mekanetiteni.
GEN 47:2 Kutse kaniwarawitɨkɨkaitɨni yu'auxɨwime yu'iwama Parahuni xeitsitɨanike.
GEN 47:3 Parahuni mɨpaɨ katiniwaruta'iwawiya: —¿Ketitakɨ xeme xete'uximayatamete? Mɨkɨ mɨpaɨ mekatenita'eiya: —Tame te'a'uximayatsiriwamete, muxatsi wahɨwemete tepɨhɨkɨ, yaxeikɨa meripaitɨ tateukarima kememɨte'uximayakai.
GEN 47:4 Tame 'ena tepu'axɨa 'ikɨ kwieyaritsie, 'ɨxa memawekaikɨ Kanani kwieyaritsie, tatewama wehetsiemieme, waɨkawa pehaakaxari mɨkɨ kwieyaritsie. 'Ayumieme tepɨmatsiwawirie waɨkawamekɨ pemɨtatsipitɨanikɨ Kutseheni mɨrakutewatsie temɨtahayewakɨ.
GEN 47:5 Hikɨ Parahuni Kutse mɨpaɨ katiniutahɨawe: —'Apaapa 'a'iwama mepu'axɨa 'ahamatɨa memu'uwanikɨ.
GEN 47:6 'Ekipitu kwieyari katini'ahetsiemiemetɨni. 'Aixɨa mɨraku'anetsie keniwarexatɨa mana memekutenikɨ Kutseheni mɨrakutewatsie. Meta xɨka hipame pewamaika 'aixɨa meteheutahɨiwaweme keniwarehɨritɨa netewama.
GEN 47:7 Hikɨ Kutse yupaapa Kakuwu newitɨni, Parahuni kaniutahɨawitsitɨani. Kakuwu Parahuni 'aixɨa katiniutahɨawe,
GEN 47:8 'ana Parahuni mɨpaɨ katinita'iwawiya: —¿Kepaɨmeme wiyari pepexeiyari?
GEN 47:9 Kakuwu mɨpaɨ katinita'eiya: —Xeitsienituyari heimana xeitewiyari heimana tamamata wiyari nepexeiya nekuyeikatɨ. Netukari pɨkwaniwe neka'anutinewetɨ, ne'ukiyarima netutsima kememɨteheuterixɨa.
GEN 47:10 Hikɨ Kakuwu Parahuni kaniutateutɨani, tixaɨtɨ karayuyeitɨatɨ.
GEN 47:11 Hikɨ Kutse yupaapa yu'iwama kaniwayetuirieni kwie 'Ekipitu kwieyari 'aixɨa mɨraku'anetsie, Parahuni kemutayɨkai Kutseheni mɨrakutewatsie, 'arikeke Xamɨtsexi mɨtiuterɨwarie.
GEN 47:12 Kutse katiniwamikwakaitɨni yupaapa yu'iwama watɨɨriyama, yuxexuitɨ kememɨteheuyehɨakai.
GEN 47:13 Merikɨtsɨ haaka kaniwekaitɨni 'Ekipitu, yaxeikɨa Kanani. 'Ikwai katiniumawekaitɨni naitsarie, teɨteri mekanikwiximekaitɨni.
GEN 47:14 Naime pɨrata 'Ekipitu kiekatari meta Kanani kiekatari kɨmana yu'ikwai memunanekai, Kutse kaniwaye'ɨni Parahuni kiita neita'ɨna.
GEN 47:15 Kepauka 'Ekipitu kiekatari meta Kanani kiekatari pɨratakɨ memu'ixɨa, Kutse hetsɨa mekaniu'axɨani mɨpaɨ me'utiyuatɨ: —'Ikwai ketaneumikwa. Tepɨkwixime haakakɨ 'ahɨxie, pɨratari tepɨkahexeiya.
GEN 47:16 Kutse kaniwaruta'eiya: —Xɨka pɨrata xekahexeiyaniri, yutewama xekeniwarahapani, nepɨtixepatsirieni 'ikwaikɨ.
GEN 47:17 Hikɨ 'ekipitutari yutewama Kutse mekaniyetuirieni, wakaitsixi, kawayutsixi, muxatsi, puxuri, tsipuri, Kutse tɨrikukɨ katiniwapatsiriekaitɨni mɨkɨ wiyaritsie.
GEN 47:18 Hairieka wiyaritsie Kutse mɨpaɨ mekateniutahɨawe: —'Ekɨ pepɨti'aitame, temɨte'anukanaka pɨkayɨwe, pɨrata tepɨkahexeiyari, tatewama 'atewama mepɨhɨkɨri, tixaɨtɨri tepɨkatehexeiya. Tame xeikɨari meta kwie temexeiya.
GEN 47:19 'Ekɨ pepɨkatatsipitɨaka temɨkwinikɨ, takwie meta kapa reuyewenikɨ. Ketaneutinanai 'ekɨ takwie mame, petipatatɨ 'ikwaikɨ. Mɨpaɨ Parahuni te'uximayatametemama tepɨhɨkɨtɨni takwie teyunaitɨ. Mɨpaɨ teteyurieme 'ekɨ, 'imɨari pemɨtatsitɨkitɨani temayeyuyurinikɨ, 'akuxi takwie yuxaɨta mɨkayukuhayeikawanikɨ.
GEN 47:20 Hikɨ mɨpaɨ tiuyɨku, Kutse 'Ekipitu kwieyari kaniunaneni naime Parahuni hetsiemieme, 'ekipitutari meyehaakakwitɨwetɨ memituirikɨ naime yukwie. Mɨpaɨ tiuyɨku, naitɨ 'Ekipitu kwieyari Parahuni tipiinieya katinayani.
GEN 47:21 'Ana yunaitɨ 'ekipitutari waɨriyarika te'uximayatamete mekanakɨne.
GEN 47:22 Kutse mawari wewiwamete wakwie pɨka'unanai. Parahuni mɨtiwamikwakaikɨ, 'ayumieme yukwie mepɨka'utua.
GEN 47:23 Hikɨ Kutse teɨteri mɨpaɨ katiniwarutahɨawe: —Hikɨtɨtɨ xeme meta xekwie, Parahuni hetsɨa xekanimiemetetɨni ne nemɨxe'utinanaikɨ. Kamɨ 'imɨari xekeneuka'etsa.
GEN 47:24 Kepauka 'itsanaxa mayani, 'auxɨwimexɨa tixeɨriekame xepɨtiwewieni yaxeikɨa papaɨmeme, xeime Parahuni xekaniyetuiriekuni, xemerita naukame xemɨtekwakakɨ, meta xemɨka'enitsiemieme.
GEN 47:25 Teɨteri mɨpaɨ mekaniutiyuani: —'Ekɨ pepɨtatsi'utawikweitsitɨa, waɨkawa pepɨtatsi'uparewi. Parahuni te'uximayatsiriwamete tepɨhɨkɨtɨni.
GEN 47:26 Kutse mɨkɨ 'inɨari, 'aitsika kanayeitɨani naitsarie 'Ekipitu kwieyaritsie. Hikɨ 'akuxi kaneyuhekɨaka yapaɨmetɨ Parahuni tsiemieme kanayeikani. Perutsɨ mawari wewiwamete xeikɨa wakwie Parahuni tipiinieya pɨkaratɨa.
GEN 47:27 Hikɨ 'ixaheritsixi 'Ekipitu mekanitiyaxe Kutseheni mɨrakutewatsie. Mana waɨkawa metehexeiyatɨ mekanakɨne, waɨkawa mekaniutamɨire.
GEN 47:28 Kakuwu tamamata heimana 'atahuta wiyari 'Ekipitu kaniukateitɨni. Xeitsienituyari heimana huta tewiyari heimana 'atahuta wiyari kaniutihuni.
GEN 47:29 Kepauka 'Ixaheri mɨximetɨ, Kutse katiniutanɨ'airieni. Mɨpaɨ katinitahɨawe: —Xɨka 'aheyemekɨ penetsinaki'erieka, neteuritɨa keneutame'i 'inɨari mayanikɨ kename yapemɨtikayani, yakenetineutahɨawi yuri pe'utaitɨ, pemɨkanetsikateukunikɨ 'Ekipitu.
GEN 47:30 Kepauka nemɨmɨni, ne'ukiyarima wahetsɨa kenenetuamie, 'Ekipitu pepɨkanetsi'ukateukuni. Kutse mɨpaɨ katinita'eiya: —Kepemaine yanepɨtikayani.
GEN 47:31 Paapaya tawarita kanita'iwawiya: —Xɨka yapetikayeimɨkɨ yakenetineutahɨawi heitseriemekɨ Kakaɨyari matsi'eniekaku. Kutse yatinitahɨawe. Hikɨ 'Ixaheri yu'utatsie kakaitɨ 'utihɨximakeka kaniyutanenewieni.
GEN 48:1 Merikɨtsɨ 'arike Kutse katiniutamarieni kename paapaya rekuye. Hikɨ kaneyani yuniwema warawitɨtɨ Manatsexi 'Epɨrahini mame.
GEN 48:2 Kepauka Kakuwu mɨretima, waɨriyarika kananukuyerɨni yu'utatsie.
GEN 48:3 Kutse kaniutahɨawe mɨpaɨ 'utaitɨ: —Kakaɨyari Naimekɨmɨtɨrɨkaɨye kaneniutahɨawe Rutsi kiekaritsie, Kanani kwieyaritsie. 'Aixɨa kaneniuyurieni,
GEN 48:4 mɨpaɨ 'utaitɨ: «Ne yanepɨtiyurieni waɨkawa tɨɨri pemɨwarayexeiyakɨ, pemɨtamɨirekɨ, 'anuiwaritsie yuwaɨkawatɨ nuiwarite mepayenexɨani. 'Ikɨ kwie yuheyemekɨ puwakwietɨni».
GEN 48:5 Merikɨte 'aniwema memuyuhuta 'Ekipitu pemɨwarayexei nekamatsitahɨawiwekaku 'akuxi, mepɨneniwematɨni. 'Epɨrahini Manatsexi yuheyeme mepɨneniwematɨni yaxeikɨa Xuweni meta Tsimehuni kememɨneteniwema.
GEN 48:6 Mɨkɨ wa'utɨmake pemɨwarayexeiya mepɨ'aniwematɨni, kwie memɨyetuiriyarienitsie wamatsikama mɨkɨta mana mepɨwayetuirieni.
GEN 48:7 Parani-'Arami ne'akunuaku, Xakeri 'amaama kanemɨni 'Epɨrata 'aurie, hikɨ Wereni mɨrakutewa, mɨkɨ huyeyari'utɨa tekaneikateuku, Kanani kwieyaritsie.
GEN 48:8 Hikɨ 'Ixaheri Kutse niwemama waruxeiyaka, mɨpaɨ katiniuta'iwauni: —¿Mɨkɨ temari kemɨ'ane mepɨyɨa?
GEN 48:9 Kutse yupaapa mɨpaɨ katiniutahɨawe: —Mɨkɨ neniwema mepɨhɨkɨ Kakaɨyari mɨnetsiheyenɨ'airi 'ena memutinunuiwaxɨ. Hikɨ 'Ixaheri yuniwe mɨpaɨ katiniutahɨawe: —'Enahurawa keniwati'uitɨa nemɨyutanenewienikɨ wahetsiemieme.
GEN 48:10 'Ixaheri matsi kani'ukiratsitɨkaitɨniri, pɨkahaunierekairi. 'Ayumieme Kutse 'ahurawa kaniwati'uitɨani yuniwema. Paapaya kaniwaruti'itseni kaniwarutitapa.
GEN 48:11 Hikɨ Kutse mɨpaɨta katiniutahɨawe: —Neri tawarita nekamatsixeiyake nepɨne'eriekai. Matsi hikɨ Kakaɨyari pɨnetsi'upitɨa meta 'aniwemata nemɨwaxeiyakɨ.
GEN 48:12 Hikɨ Kutse yuniwema kaniwaranukuhapani yupaapa hɨxie, mɨkɨta kaniutihɨximakeni.
GEN 48:13 'Anukukeka yuniwe 'Epɨrahini yutseriekɨ kaniuwiya, yu'utakɨta Manatsexi. Hikɨ yupaapa hɨxie kaniwati'uitɨani, 'Epɨrahini 'etsimutewikaikɨ, yuteukari 'Ixaheri 'utata mutikenikɨ, Manatsexi mɨmatsikayatɨkaikɨ yuteukari tserieta mutikenikɨ.
GEN 48:14 Peru wateukari 'Ixaheri yutanenenewienike yumamate kaniupataxɨani, 'Epɨrahini hetsɨa yutseriekɨ heimana kaneutimeni tsepa 'etsimutewikai, Manatsexi hetsɨata yu'utata miemekɨ pɨtiunakixɨ tsepa mɨmatsikayatɨkai.
GEN 48:15 Kanitsutɨani mɨpaɨ 'utaitɨ: «Kakaɨyari 'aku, 'Apɨrahami 'Itsahaki 'ahamatɨa kememɨte'u'uwakai, pemɨnetsi'ɨwiya kepaukapai nemutinuiwaxɨ, mana mɨtiyetɨa meta hikɨ.
GEN 48:16 Niuki tuayame mɨnetsi'utawikweitsitɨa naime 'axamɨti'anetsie, 'aixɨa keniwayurieka 'ikɨ tɨɨri. 'Uxa'atɨni warie nepaxaxatsiwani, yaxeikɨata ne'ukiyarima 'Apɨrahami 'Itsahaki wahepaɨ. Xeke'utiwawere xeke'utaxiɨni 'ena kwiepa».
GEN 48:17 Hikɨ Kutse pɨka'inakixɨ yupaapa xeiyatɨ, 'Epɨrahini mutayatsie meutimekaikɨ yutseriekɨ. Yupaapa mamaya 'uwiyaka, kanipata Manatsexi hetsie pɨta,
GEN 48:18 mɨpaɨ rehɨawetɨ: —Nepaapa, tixaɨ mɨpaɨ neniwe 'amɨyumate, Manatsexi pɨhɨkɨ. 'Atserieta miemekɨ mana pɨta keneutime'i.
GEN 48:19 Perutsɨ paapaya yapɨkatiutanaki'eri. Mɨpaɨ katinitahɨawe yuniwe: —Ne nepɨtimate Manatsexi kiekarieya mariwetɨ kanayeimɨkɨ, matsi mutaya pɨta waɨkawa kanitaxiɨmɨkɨ, nuiwaritemama kiekari makate mekanakɨnikuni.
GEN 48:20 Mɨkɨ tukaritsie Kakuwu 'aixɨa kaniwaruyurieni mɨpaɨ 'utaitɨ: «Kepauka nenuiwarima xeime hepaɨtsita 'aixɨa memutiyuaneni, mɨpaɨ mepɨtekɨhɨawarɨwani: “Kakaɨyari kematsi'ɨwiyani. Kemɨtiwa'ɨwiyakai 'Epɨrahini meta Manatsexi”». Mɨpaɨ 'utayɨka, 'Ixaheri 'Epɨrahini mexɨakame kanayeitɨani 'arike Manatsexi.
GEN 48:21 Hikɨ 'imatɨrieka 'Ixaheri Kutse mɨpaɨ katiniutahɨawe: —Pehurari nemɨmɨnikɨ, perutsɨ Kakaɨyari xehamatɨa kaniuyeikamɨkɨ, kanixe'akunuitɨamɨkɨ xeteukarima wakwietsie.
GEN 48:22 'Ekɨ Kutse 'a'iwama wahetsiemieme heitserie pepexeiya waɨkawa, nepɨmatsixatɨa Tsikeni kwieyari, 'amuxeutsixi teɨteriyari nemɨwarunawairi newakwinetɨ.
GEN 49:1 Merikɨtsɨ Kakuwu yuniwema kaniwarutakwewieni, mɨpaɨ katiniwarutahɨawe: «Xekeneuyukuxeɨri nepɨtixetaxatɨani kemɨtiyɨni xehetsie.
GEN 49:2 »Neniwema: 'Ahurawa xekenakɨni, xekeneneu'eni kenemɨtixetahɨawe.
GEN 49:3 »'Ekɨ meri Xuweni pemɨnematɨari, 'akɨmana meri pɨmatsiɨkɨkai kenemɨtitɨrɨkaɨyekai tɨɨri nemɨwarexeiyanikɨ. 'Ekɨ matsi heitserie pepexeiya, 'Ekɨ matsi pepɨtɨrɨkaɨye.
GEN 49:4 Perutsɨ 'ekɨ mexɨakame pepɨkahɨkɨtɨniri: 'Axapemɨnetsi'uyurikɨ. Ne'ɨya matɨa pemukahuikɨ neti'uximayatsiriwame, 'ayumieme hamewari mɨkayunɨtɨarinɨa hepaɨ pepɨ'aneni.
GEN 49:5 »Tsimehuni matɨa Rewi yawixi memayu'eririya wahepaɨ mekani'aneneni, yu'ixiparakɨ mepɨteyumemiwa.
GEN 49:6 Ne wahetsɨa nepɨkaheu'ixɨaramɨkɨ. Kapa 'axatiyuruwame hepaɨ netiuxeiyarienikɨ. Yuhaxɨakɨ teɨteri mepɨwarukwi, mewaikatɨwetɨ tuurutsixi mepɨwarutixite wa'ɨkatetsie.
GEN 49:7 Wahaxɨa 'axake'itɨarieka kememɨteyumemiwa, yuhaxɨakɨ pɨwanake hiwerika memɨwapitɨakakɨ hipame. Ne nepɨwatanɨ'axɨani nekwiepa, nepɨwataxɨriexɨani 'Ixaheri kwieyaritsie.
GEN 49:8 »'Ekɨ Kura, 'a'iwama 'aixɨa meputiyuaneni 'ahetsiemieme. Memɨmatsi'aye'unie pepɨwara'iwani, 'ahɨxie mepɨtitunuma'uni 'a'iwamatɨtɨ.
GEN 49:9 Neniwe Kura, maye temaikɨ hepaɨ pepɨ'ane, maxa muwiyarie mɨkwa'a hepaɨ. Maye 'amɨpa hepaɨ, pe'itakwaka pehakunuaka pemanuhuputsie pekaniyuhayewa. Maye 'uka hepaɨ, xewitɨ pɨkayɨwe mɨmatsi'uximatɨanikɨ.
GEN 49:10 Kura xewitɨ pɨka'inawairieni ti'aitame 'itsɨya, nuiwarimama yuheyemekɨ mepɨteta'aita. Kepaukake munuani yurikɨ ti'aitame, 'aixɨa mɨtiuka'iyari meuyewetse hɨxiena yamemɨtekahunikɨ kwiepa memɨtama.
GEN 49:11 Kura kaxie waɨkawa pexeiya. 'Ayumieme yupuxu pakuwiwa kaxie kɨyeyaritsie, meta puxu nunutsi pikwa'a kaxie xawariyari. Yu'ixurikite pɨti'ekwa kaxie winuyaritsie, yɨ'ɨkarite kaxie takari hayariyaritsie piti'ekwa.
GEN 49:12 Kaxie winuyari waɨkawa pexeiya, 'ayumieme hɨxiteya pɨyɨyɨwi. Retsi kemɨtituxa, matsi waɨkawa putuxa tameteya.
GEN 49:13 »Tsawuruni haramara tetsita kiekame kanayeimɨkɨ, nawiyatsixi mɨwa'axe 'aixɨa mɨtiuye'ane kanayeimɨkɨ, Tsiruni paitɨ kwieya kaniye'atɨkaimɨkɨ.
GEN 49:14 »'Itsakaxi puxu hepaɨ pɨranuweri, peru naitsata heuti'ikatɨkaitɨ 'apuka.
GEN 49:15 Kepauka mixei yukuraru 'aixɨa tiuye'anekame, kwiepa 'aixɨa raku'anekame mɨka'uxipienikɨ, puyuwaɨri 'ika matɨkɨnikɨ, ti'uximayatame payuyeitɨa.
GEN 49:16 »Rani 'itsɨkame hepaɨ pɨtiyurieni yuteɨterima wahetsiemieme 'Ixaheri nuiwaritemama watsata.
GEN 49:17 Rani pɨtɨrɨkaɨyeni, kuu mɨtiyumemiwa hepaɨ huyeta mɨkaka, kepauka kawayu 'ɨkayatsie mɨtakeni, manaka yuwarima peukaweni.
GEN 49:18 »Yawé 'aku 'awikweitsitɨarika nepɨtakwewie.
GEN 49:19 »Kahari, tenawayamete memanitamiekuni, matsi mɨkɨ wawarita kanakuyeimɨkɨ kaniwakwimɨkɨ.
GEN 49:20 »'Ekɨta 'Atsexi, 'ikwai 'aixɨa ra'anekame pepɨtikwa'a, 'aixɨa ra'anekame petiukawewiwatɨ pepɨtiwamikwani kwiepa te'aitamete.
GEN 49:21 »Nepɨtahari, maxa 'uka yuxaɨta muyeikani hepaɨ pɨ'aneni, maxatsi tɨɨrixi witsimemɨ'anene yumaama wahepaɨ.
GEN 49:22 »Kutse, hatetsita 'iteɨritsiekame hepaɨ pɨ'ane, waɨkawa mɨyɨra, mamateya kurarutsie manutimake hepaɨ.
GEN 49:23 Kuyaxi tupi memu'ɨ mekanitamɨni, mekaheinenimayatɨ me'ihekatɨ.
GEN 49:24 Perutsɨ Kutse yutupi heitserie pakwe'e, mamateya pɨka'akatutuke. Pamɨpariyutsi Kakuwu kakaɨyarieya pemɨtɨrɨkaɨye, pemɨtatsi'ɨwiyame 'ixaheritsixi, tete mɨtse'i hepaɨ.
GEN 49:25 Neuxei Kutse: Pamɨpariyutsi 'apaapa Kakaɨyarieya mɨmatsiparewie. Pamɨpariyutsi Kakaɨyari Naimekɨmɨtɨrɨkaɨye, 'aixɨa mɨmatsiyurie. Ke 'aixɨa mɨmatsiyurie taheima miemekɨ wiyerikɨta, matsipitɨatɨ meta 'emeukatewatsie miemekɨ haixakɨ, niwekate tɨɨri kememɨtewarayexexeiya kememɨtewatsitsitɨa.
GEN 49:26 Matsi 'aixɨa pɨti'anene tita 'apaapa nehɨkɨtɨtɨ nematiyetuirie, hɨri ke 'aixɨa mɨtipitɨarie meripaitɨ mieme reutiyetana, matsi waɨkawa 'aixɨa peke'itɨarieka. Hikɨ 'aixɨa kenemɨmatsiyurie pɨ'ahetsiemieme Kutse, 'a'iwama watsata pepanayexeiyarie.
GEN 49:27 »Wenikamini, 'ɨrawe mayu'eriya hepaɨ pɨ'ane, ximeri tikwatɨ tita mɨtiumi, taikaita hipame pɨtiwamikwa tita mɨtiutatexi».
GEN 49:28 Mɨpaɨ katiniwarutahɨawe 'Ixaheri yuniwema, tamamata heimana huta nuiwariyari, yuxexuime 'aixɨa kaniwaruyurieni, yuhetsie memeixeiyanikɨ.
GEN 49:29 'Imatɨrieka Kakuwu mɨpaɨ katiniwarutahɨawe yuniwema: «'Ariri nekanimɨximeni, kepauka nemɨmɨni. Nepaapama memuyehetsie xekeneneutateka, terɨta 'Epuruni Heti tewiyari mɨkwieyatɨkaitsie.
GEN 49:30 Terɨ Makipera nekanixatani Mamɨre hɨxie mɨti'ane, Kanani kwieyaritsie 'Apɨrahami minanai, 'Epuruni Heti tewiyari kaniunanairieni, yunaitɨ tɨɨriyamama muwa memeutatuariwanikɨ.
GEN 49:31 Muwa mekanayeheni 'Apɨrahami, 'ɨyaya Tsara, 'Itsahaki, 'ɨyaya Xeweka, muwa tsiere Reya neneutateni.
GEN 49:32 Mɨkɨ kwie terɨ kaniunanaiyani, Heti teɨteriyari meri katiniwapiinitɨkaitɨni».
GEN 49:33 Kepauka mɨtiutahayewaxɨ Kakuwu yuniwema tiwakuxaxatɨwatɨ, 'ukahuka 'imatɨrieka kaniuka'ietɨyani kaniumɨni. Kaneyani yu'ukiyarima wahetsɨa.
GEN 50:1 Merikɨtsɨ Kutse yupaapa kaniutapa, 'utatsuatɨ kani'itseni.
GEN 50:2 Hikɨ katiniwaruta'aitɨani Kutse teyu'uayemawamete, memita'uayemanikɨ waritsamu witsimu'ɨakɨ paapaya kaxarieya, hikɨ mɨpaɨ mekateniuyurieni.
GEN 50:3 Mepeye'atɨa huta tewiyari tukari, mɨpaɨ mepɨtewaraye'atɨwakai memɨwati'uayemawanikɨ wakaxarite. 'Ekipitutari haika tewiyari heimana tamamata tukari mepɨyuhiweriekai.
GEN 50:4 Hiwerika 'anuyeyaku, Kutse kaniwarutahɨawe Parahuni parewiwametemama, mɨpaɨ katiniwarutahɨawe: —Ximɨxi Parahuni mɨpaɨ xeketenetahɨawi,
GEN 50:5 kepauka nepaapa mɨmɨximekai, mɨpaɨ pɨnetiuhɨritɨa, kename nekeheiteukimienike 'ukiyarimama memɨwayehetsie, Kanani kwieyaritsie paitɨ. Mɨpaɨ xeketenetawawiri Parahuni, nemiteukimiekɨ, kenameta ne'akunuani.
GEN 50:6 Parahuni mɨpaɨ katinita'eiya: ―Kenemie, 'apaapa keneuteukimie, kemɨmatiutahɨawixɨ.
GEN 50:7 Merikɨtsɨ Kutse kaneyani yupaapa mekateukukɨ. Yunaitɨ mekanekɨne 'iwamama, watɨɨriyama, yaxeikɨa 'ekipitutari 'ukirawetsixi memiteɨtakai Parahuni, 'ekipitutari wa'ukiyarima yunaitɨ.
GEN 50:8 Yunaitɨ Kutse kie kiekatari, meta 'iwamama, meta paapaya kie kiekatari. Mekanekɨne, yutɨɨriyama xeikɨa mepɨwareku'eiri Kutseheni kwieyaritsie, yumuxatsima meta yuwakaitsixi.
GEN 50:9 Mepanutiyaxixɨa kaxetatetsie, kawayutsixi wahetsie me'utetɨta, waɨkawa 'ame'atayeutɨ mekaniuhukaitɨni.
GEN 50:10 Mekaneta'axɨani hakewa Hatahari tɨriku matihenatsie, mana Kurutani hatuxameyaritsie pehurakai. Mana Kutse 'atahuta tukari pɨyuhiweriekai paapaya mumɨkɨ.
GEN 50:11 Kepauka kananeutsixi memɨwaruxei meyuxeɨriekame Hatahari maka'etsatsie me'utitsuaname, mɨpaɨ mekaniutiyuani: «'Ekipitutari hiwerika mepɨwewie yemekɨ waɨkawa patsiekamekɨ». 'Ayumieme mana, Kurutani meuhuratsie, mekateniuterɨwa 'Aweri-Mitsirahini.
GEN 50:12 Hikɨ mɨpaɨ mekateniuyurieni Kakuwu niwemama kemɨtiwarutahɨawekai meripaitɨ.
GEN 50:13 Mekaneikweni Kanani paitɨ, mana mekaneitateni terɨta Makipera kwieyaritsie, Mamɨre hɨxie, hikɨ Hewuruni mɨrakutewatsie, 'Apɨrahami meripaitɨ minanekai mɨkɨ terɨ 'Epuruni Heti tewiyari 'ituirieku, 'Apɨrahami tɨɨriyamama wateukiya mayanikɨ.
GEN 50:14 Hikɨ Kutse kanakunuani 'Ekipitupai yupaapa hekateukuka, yu'iwama wahamatɨa, meyunaitɨ memeiweiyakai wahamatɨa.
GEN 50:15 Kakuwu 'ukumawereku, Kutse 'iwamama mɨpaɨ mekateniyukuhɨawekaitɨni: «Xɨari pɨha'a tahepaɨtsita. Xɨari puyukɨhɨani 'axaketemiyuri».
GEN 50:16 'Ayumieme mɨpaɨ mekatenitanɨ'airieni mɨpaɨ mete'itahɨaweke: «'Apaapa kamɨwetɨ 'akuxi mɨpaɨ pɨtatiuhɨritɨa:
GEN 50:17 “Mɨpaɨ Kutse xeketeneutahɨawi, kexereuyehɨwirieka 'axakexemiyuri 'iwamama”. 'Ayumieme kwerietɨxɨa ketatineuyehɨwirieka, tame 'apaapa Kakaɨyarieya te'uximayatametemama tepɨhɨkɨ». Kepauka Kutse 'ikɨ niuki mu'eni, kaniutatsuani.
GEN 50:18 Hikɨ 'iwamama mekaniu'axɨani, mekaniutihɨxima'uni hɨxiena, mɨpaɨ mekatenitahɨawe: —'Ena pepɨtatsiti'uitɨa, waɨriyarika mate'uximayatsiriwamete tepɨhɨkɨ.
GEN 50:19 Kutse mɨpaɨ katiniwarutahɨawe: —Xepɨkamamaka. Ne Kakaɨyari nemaneyeitɨwani nepɨkayɨwe.
GEN 50:20 Yurikɨ xeme xepɨnetsi'unanaimakai, peru Kakaɨyari pipataxɨ 'aixɨa mɨti'anekɨ, yamɨtiyɨnikɨ hikɨ ketemɨteneniere: yɨmɨiretɨ teɨteri memɨkaheuyewenikɨ.
GEN 50:21 'Ayumieme, hikɨ xepɨkaheumamaka. Ne nepɨxeparewieka xeme meta xetɨɨriyama. Kutse mɨpaɨ katiniwarunɨtɨani, wanaki'erietɨ waɨkawa.
GEN 50:22 Kutse meta paapaya tɨɨriyamama 'Ekipitu kwieyaritsie mekaniuyuhayewa. Kutse xeitsienituyari heimana tamamata wiyari kaniutihuni,
GEN 50:23 kaniwaruxeiya 'Epɨrahini niwemama meta yututsima. Metatsiere Makixi niwemama yuniwema kaniwarayeitɨani Manatsexi teukarimama.
GEN 50:24 Hikɨ 'arikemɨkake, Kutse mɨpaɨ katiniwarutahɨawe yu'iwama: «'Etsiwa xeikɨari peuyewetse nemɨmɨnikɨ, peru Kakaɨyari kanixeparewiekamɨkɨ, kanixe'ayewitɨmɨkɨ 'ikɨ kwieyaritsie kanixe'anuwitɨmɨkɨ kwie 'Apɨrahami, 'Itsahaki meta Kakuwu mɨwaxatɨakaitsie».
GEN 50:25 Hikɨ Kutse mɨpaɨ katiniwaruhɨritɨani yuniwema: «Kaniyuritɨni Kakaɨyari kanixeparewimɨkɨ. Kepauka mɨpaɨ mɨtiyɨni 'ana ne'umeyarite xekananutɨkuni».
GEN 50:26 Kutse kaniumɨni xeitsienituyari heimana tamamata wiyari hexeiyatɨ, 'Ekipitu kwieyaritsie. Waiyarieya me'uta'uayemaka waritsamu witsimu'ɨakɨ, kakuni witsimɨ'anetsie mekanikateni.
EXO 1:1 'Ikɨ mekanihɨkɨtɨni 'Ixaheri niwemama, kepauka yuniwema mewaruwitɨtɨ memu'axɨa 'Ekipitu, Kakuwu yunaitɨ:
EXO 1:2 Xuweni, Tsimehuni, Rewi, Kura,
EXO 1:3 'Itsakaxi, Tsawuruni, Wenikamini,
EXO 1:4 Rani, Nepɨtahari, Kahari meta 'Atsexi.
EXO 1:5 Yunaitɨ Kakuwu nuiwarimama mepɨhɨkɨtɨkai, haika tewiyari heimana tamamata. 'Ekipitu paitɨri Kutse pukatei.
EXO 1:6 Hikɨ Kutse meta 'iwamama mekaniukwini meta mɨkɨ xiɨyarimama yunaitɨ.
EXO 1:7 Peru matsi 'ixaheritsixi, waɨkawa tɨɨri mekaniwarayexeiyakaitɨni, yumɨiretɨ mekanakɨne metɨrɨkaɨyetɨ, mɨkɨ kwieyaritsie mekanakɨnɨximekaitɨni. Kiekari 'ayeutɨ kanayeiximekaitɨni.
EXO 1:8 Hikɨ 'Ekipitu xewitɨ pɨta ti'aitame kananukakeni Kutse mɨkahetimaikai kemɨtiuyuri,
EXO 1:9 mɨpaɨ katiniwarutahɨawe yuteɨterima: «Xekeneyukweriwayurieka 'ixaheritsixi wahepaɨtsita, waɨkawa tɨrɨkariya mekanexeiyani, mekaniyɨmɨireniri mekatana'iwani.
EXO 1:10 Hikɨ tekateniwata'aitɨakuni waɨkawamekɨ tetemaiwawetɨ, xɨka mɨpaɨ tekate'uyurieni matsi waɨkawa mepɨtamɨire, xɨka kuyaxa hayani, memɨtatsi'aye'unieta pɨta mekanakɨnikuni, metatsi'a'iwame mekaniyehuni 'ikɨ kwieyaritsie».
EXO 1:11 Mɨpaɨ mekateniuyurieni 'ekipitutari, te'aitamete mekaniwarutihɨawe 'ixaheritsixi memɨtewata'aitɨanikɨ, 'uximayatsika mekaniwaruxatɨani waɨriyarika mewapitɨatɨ, Parahuni hetsiemieme kiekari 'ikwai mɨreuta'ɨnarɨwa Pituni mɨtitewa meta Xamɨtsexi.
EXO 1:12 Peru matsi mɨyamewaruyurieku, matsi waɨkawa mekanixiɨkaitɨni mepɨtamɨirirɨmekai, hikɨ 'ekipitutsixi waɨkawa mekaniwarutimakani.
EXO 1:13 'Ayumieme kwinimieme mekateniwa'uximayatsitɨakaitɨni, kemɨkareuyewetse hepaɨ mekateniwa'aitɨakaitɨni.
EXO 1:14 Watukari waɨkawa mekaninanaimakaitɨni, waɨriyarika metewa'aitɨatɨ, kwie memɨhawiyanikɨ, xɨnariya wewiyarikɨ, naime mɨrati'etsiwatsie, tita 'uximayatsika mɨraniere, naime 'uximayatsikatsie 'ixaheritsixi memɨteha'uximayakai 'ekipitutari mewarutate'atɨ mekateniwa'aitɨakaitɨni.
EXO 1:15 Mana mekanititekaitɨni yuhutatɨ 'ukarawetsixi hepɨrayutsixi teɨteriyari teniweritsitɨwamete, Tsipura meta Puwa metetetewatɨ, ti'aitame 'Ekipitu kiekame mɨpaɨ katiniwaruta'aitɨani:
EXO 1:16 —Kepauka 'ukarawetsixi hepɨrayutsixi xemɨwaparewie niweriyakɨ, xeyu'ɨwiyatɨ tita mɨtitinuiwa: xɨka 'ukitɨni xewatakukuyatɨ, xɨka 'ukatɨni xekenehayewa 'ayeniereme.
EXO 1:17 Peru 'ukarawetsixi teniweritsitɨwamete hepɨrayutsixi Kakaɨyari mekanayemakakaitɨni, 'ayumieme ti'aitame 'Ekipitu kiekame kemɨtiwarahɨawekai yamepɨkate'uyuri, 'ukitsi mekaniwaruhayewa me'ayeneniereme.
EXO 1:18 Hikɨ 'Ekipitu kwieyaritsie ti'aitame, mɨkɨ 'ukarawetsixi teniweritsitɨwamete kaniwarutakwewieni, mɨpaɨ katiniwaruta'iwawiya: —¿Titayari mɨya xeteheyurie? ¿Titayari tɨɨri 'ukitsi xekatewatakukuya?
EXO 1:19 Mɨkɨ mɨpaɨ mekaniutiyuani: —Neuxeitsɨ, 'ukari hepɨrayutsixi 'ukarawetsixi 'ekipitutari wahepaɨ mepɨka'anene, mɨkɨ waɨkawa mepɨtɨrɨkawi yuxaɨta mepɨtiniweya tame teka'aye'axɨaximekaku.
EXO 1:20 Mɨpaɨ tiuyɨku, matsi 'ixaheritsixi waɨkawa mekaniyutamɨiriya. Meta Kakaɨyari mɨkɨ teniweritsitɨwamete 'aixɨa katiniwaruxeiya,
EXO 1:21 Kakaɨyari memayemakakaikɨ, kaniwarupitɨani tɨɨri waɨkawa memɨwarayexeiyakɨ.
EXO 1:22 Hikɨ Parahuni mɨpaɨ katiniwaruta'aitɨani yuteɨterima: —Yunaime tɨɨri 'ukitsi hepɨrayutsixi hapa xekeniwareukaxɨri memɨtinunuiwa. 'Ukari xekeniwarehayewa.
EXO 2:1 Xewitɨ kaniuyeikakaitɨni Rewi nuiwarieya, kepauka mutineɨkixɨ mana tsiere mieme kanewitɨni.
EXO 2:2 Mɨkɨ kaniutihukata nunutsi kanayexeiya, 'ixeiyaka kwinimieme mɨtitemaikɨkaikɨ, kaniti'awieta haika metseri.
EXO 2:3 Kepaukari mɨkayɨwekai mi'awietanikɨ tsikɨiwiti kaniutawewieni, xɨrɨka kanitawirieni kwetsɨka mɨyɨwi nɨkame, mana nunutsi kanikateni hatetsita kaneikweni, hakatsata kanihɨani hapa mɨye'ukaitɨa, Niru hatetsitayaritsie.
EXO 2:4 Hikɨ nunutsi kurieya yateewa kaniuyuhayewa, niereke kemɨranuyeyanikekai.
EXO 2:5 Hikɨ mana kaniukateni 'uka Parahuni niweya ku'ɨwanetɨ, Niru hatuxameyaritsie. Te'i'uximayatsiriwamete hatetsita mekaniu'uwakaitɨni, yapauka Parahuni niweya tsikɨiwiti kaniuxeiya hakatsata kaniyewiekaitɨni, xeime ti'uximayatame kaniutanɨ'ani mituimiekɨ.
EXO 2:6 Kepauka Parahuni niweya tsikɨiwiti manutiyepi nunutsi kaniuxeiya 'utatsuakame, kanitinenimayata mɨpaɨ kaniutayɨni: ―Hepɨrayu nunutsi pɨhɨkɨ.
EXO 2:7 Hikɨ mɨkɨ nunutsi kurieya Parahuni niweya mɨpaɨ katiniutahɨawe: —Ya xeime 'ukaratsi nepɨti'inimie hepɨrayu tewiyari mitsitsitɨanikɨ, mitaweriyakɨ mɨkɨ nunutsi 'ahetsiemieme.
EXO 2:8 Mɨkɨ mɨpaɨ katinita'eiya: —Kenemie kenewitɨmie. Kurieya kaneyani, peru nunutsi maamaya kani'atɨani.
EXO 2:9 Parahuni niweya mɨpaɨ katinitahɨawe: —Kenanutu'i 'ikɨ nunutsi kenetsitsitɨaka keneneutaweriri, ne nepɨmatipitɨaka mɨpaɨ pemɨtiyurienikɨ. Mɨpaɨ tiɨyɨku mɨkɨ nunutsi maamaya kaneituni 'itsitsitɨatɨ kanitaweriya.
EXO 2:10 'Utawerekuri nunutsi, kaneiwitɨni Parahuni niweya hetsɨa, mɨkɨ kaniyutaniwetɨani, meta Muitsexi katiniterɨwa mɨpaɨ 'utaitɨ: «Ne hapa nepetitui».
EXO 2:11 Kepauka Muitsexi 'amuyutama, yu'iwama kaniwarekuxeiya, kaniuniere kememɨte'uximatɨariekai. Xeime kaniuxeiya 'ekipitutanaka hepɨrayu tewiyari tiwayakaku.
EXO 2:12 Hikɨ hanieretɨyaka nixewitɨ hawaikɨ mɨkareyeikakaikɨ mɨkɨ 'ekipitutanaka kaniumieni, kaniti'awieta xiekarita.
EXO 2:13 'Uxa'arieka hutarieka kanikuyani, hipameta kaniwaruxeiya meyukwitɨweme yu'iwamatɨ hepɨrayutsixi, mimainekai kaniuta'iwawiya: —¿Titayari 'a'iwa petimiene?
EXO 2:14 Mɨkɨ kanita'eiya: —¿Kemɨ'anekuta 'ekɨ matsi'utahɨawixɨ 'itsɨkamekɨ tahetsie pemɨti'aitanikɨ? ¿Netsɨta penenemieni 'ekipitutanaka hepaɨ? Mɨyamɨtiutahɨawariekɨ Muitsexi waɨkawa kaniutimani mɨpaɨ katiniu'erieni: «Xɨari nepahekɨarixɨ kenemɨtiuyuri».
EXO 2:15 Mɨyatiɨyɨku Parahuni katinetimani, Muitsexi kanimienikekaitɨni, peru Muitsexi kaniyuta'una Mariyani kwieyaritsie paitɨ kaneyani, putsu matiniere kaniuyuhayewa.
EXO 2:16 Mawari wewiwame Mariyani kiekame 'atahuta meyupaɨmeme 'ukari kaniwarexeiyakaitɨni, mɨkɨ mekaniuyehanɨtɨkɨkakaitɨni muxatsi mematiharewe memɨtihɨniyakɨ, yupaapa muxatsimama mewatiharitɨanike.
EXO 2:17 Peru muxatsi wahɨwemete 'ukitsi mana mekani'axekaitɨni mewataweiyake. Heiwa Muitsexi wahetsie kaniutanuani, 'ukitsi kaniwarutaweiya, 'ukari wamuxatsima kaniwarutiharitɨani.
EXO 2:18 Kepauka 'ukari memakunuaxɨa yupaapa kie Xehueri, mɨkɨ mɨpaɨ katiniwaruta'iwawiya: —¿Titayari hikɨ kwitɨwa xete'u'axɨa?
EXO 2:19 Mɨkɨ mɨpaɨ mekaniutiyuani: —Xewitɨ 'ekipitutanaka tahetsie kanetanuani, muxatsi wahɨwemete haa kememɨtekwerie, matsita haa watihanaka muxatsi kaniwaretiharitɨani.
EXO 2:20 Mɨkɨta mɨpaɨ katiniwarutahɨawe: —¿Hakewari mɨkɨ 'uki? ¿Titayari yuxaɨta xeteheiku'eiri? Xekeneta'ini mɨtikwanikɨ.
EXO 2:21 Muitsexi kaniuyuwaɨriya mɨkɨ hetsɨa mukanikɨ, mɨkɨ kaniwitɨtɨani yuniwe Tsepura.
EXO 2:22 Mɨkɨ nunutsi xeime kanayexeiya, Muitsexi Keritsuni katiniterɨwa, mɨpaɨ tiu'erieka: «'Ateewapai nepɨkiekame xaɨtsie nepuyeika».
EXO 2:23 Mɨixa wiyari 'anuyeyaku, ti'aitame 'Ekipitu kiekame kaniumɨni. 'Ixaheritsixi yaxeikɨa mekateniuka'eniwakaitɨni, waɨriyarika te'uximayatamete mehɨkɨtɨtɨ, mekaniutihiwakaitɨni parewiya meheuyehɨatɨ. Wahiwari Kakaɨyari kaniu'enieni mewaɨripiekaku.
EXO 2:24 Hikɨ 'u'enaka kememɨte'uximatɨariekai kanaye'erieni tɨratu kememɨte'uwewi 'Apɨrahami, 'Itsahaki meta Kakuwu hamatɨa.
EXO 2:25 Mɨpaɨ Kakaɨyari 'ixaheritsixi katiniwaraye'erieni, maye'akaikɨ yamemɨteyuriekakɨ.
EXO 3:1 Merikɨtsɨ Muitsexi muxatsi kaniwahɨnekaitɨni yumune tewamama Keturu, mawari wewiwame mɨhɨkɨtɨkai Mariyani kiekame, muxatsi kaniware'arieni makumawetsie 'anutaɨyepaitɨ, Huré mɨrakutewatsie kaniye'ani, hɨri Kakaɨyari manuyeika.
EXO 3:2 Mana 'uyeikakaku Yawé niuki tuayameya kaniuyuhekɨata taitsata 'ɨtsi takaku. Muitsexi mɨpaɨ katiniuniere 'ɨtsi kanitakaitɨni, peru pɨkayexɨximekai.
EXO 3:3 'Ayumieme mɨpaɨ katiniu'erieni: «Ketɨtɨri. Tsipara nemɨnierimie, titayari katiyetaixime 'ɨtsi».
EXO 3:4 Kepauka Yawé Muitsexi muxei 'ahurawa 'a'amiekame nierimɨtɨ, kanitahɨawe 'ɨtsi hetsie yewetɨ: —Muitsexi, Muitsexi. Mɨkɨta kanita'eiya: —'Ena nepuwe.
EXO 3:5 Kakaɨyari mɨpaɨ katinitahɨawe: —Tawarita 'enahurawa pepɨka'amieni, 'akakai kenanuyehɨnaxɨa, kwie mɨpatsie hetsie pekaniuweni.
EXO 3:6 Ne 'apaapa nekanikakaɨyarieyatɨni, 'Apɨrahami, 'Itsahaki meta Kakuwu. Mɨpaɨ tiu'enaka Muitsexi, kaneuyuku'eima yɨhɨxie, 'utimaka Kakaɨyari 'uxeiyaka.
EXO 3:7 Peru Yawé katinikuxatakaitɨni: —Yurikɨ nepɨniere kememɨte'uka'eniwa neteɨterima 'Ekipitu kwieyaritsie. Nepɨwa'enie kememɨte'uximatɨarie memɨtewa'aitɨa wahetsiemieme, nepɨtimate kememɨte'uka'eniwa.
EXO 3:8 Hikɨ newaxɨnake nepɨyɨane 'ekipitutari wahetsɨa, newarayewitɨnike mɨkɨ kwieyaritsie nemɨwaranuwitɨnikɨ, xeime kwie 'aixɨa mɨ'anetsie 'amakuyewatsie, retsi maxuawetsie meta xiete, nekanixatani kananeutsixi wakwieyaritsie meta hetitsixi, 'amuxeutsixi, peretseutsixi, heweutsixi meta kewutseutsixi.
EXO 3:9 'Ixaheritsixi wahiwari nepu'eni, meta nepɨniere 'ekipitutari kehepaɨ memɨtewananaima.
EXO 3:10 'Ayumieme kene'akuha'aritɨa. Nekamananunɨ'amɨkɨ Parahuni hetsɨa, pemɨwarayewitɨnikɨ 'ixaheritsixi memɨneteɨterima 'Ekipitu kwieyaritsie.
EXO 3:11 Peru Muitsexi Kakaɨyari mɨpaɨ katiniutahɨawe: —¿Ne tita netihɨkɨ Parahuni hɨxie nemɨtaniunikɨ meta 'ixaheritsixi nemɨwarayewitɨnikɨ?
EXO 3:12 Kakaɨyari mɨpaɨ katinitahɨawe: —Ne 'ahamatɨa nepuyeikani. Meta ne'inɨari nepɨmatsiwewirieni kename ne nehɨkɨ nemɨmatsihanunɨ'ani: Kepauka pemɨwarayewitɨni neteɨterima 'Ekipitu kwieyaritsie, yunaitɨ xeme xenetsi'ayexeiyatɨ xepakɨne 'ikɨ hɨritsie.
EXO 3:13 Muitsexi matsi mɨpaɨ kaniutayɨni: —Xɨka neheyani 'ixaheritsixi xɨka mɨpaɨ netiwaretahɨawe: “Xe'ukiyarima wakakaɨyari pɨnetsiheyenɨ'a xehetsɨa”. ¿Kenetiwaretahɨawe xɨka mɨpaɨ meneteheta'iwawiya: “¿Keri titewa?”
EXO 3:14 Kakaɨyari Muitsexi mɨpaɨ katiniutahɨawe: —Ne nepɨhɨkɨ kemɨ'ane nemɨhɨkɨ. Mɨpaɨ pekatiniwarekɨhɨawemɨkɨ 'ixaheritsixi: “Ne nepɨhɨkɨ, pɨnetsiheyenɨ'a xehetsɨa”.
EXO 3:15 Hikɨ Kakaɨyari Muitsexi mɨpaɨ katiniutahɨawe: —Mɨpaɨ ketiniwaretahɨawi 'ixaheritsixi: “Yawé xe'ukiyarima wakakaɨyari 'Apɨrahami, 'Itsahaki meta Kakuwu, pɨnetsiheyenɨ'a xehetsɨa. 'Ikɨ pɨhɨkɨ kenemɨtitewa yareuyuhanemekɨ, 'ikɨ pɨhɨkɨ kenemɨtitewa naitɨ nuiwarite manuyekɨne”.
EXO 3:16 'Ekɨ kenemie 'ukirawetsixi keniwarekuxeɨri 'ixaheritsixi, mɨpaɨ ketiniwaretahɨawi: “Yawé xe'ukiyarima wakakaɨyari 'Apɨrahami, 'Itsahaki, Kakuwu, peyuhekɨataxɨ nehɨxie mɨpaɨ pɨnerahɨawekai: ‘Ne nepɨxexeiya, nepɨniere kexemɨtenanaimarie mana 'Ekipitu kwieyaritsie.
EXO 3:17 'Ayumieme mɨpaɨ nepɨtiku'eriwa nepɨxe'ayewitɨni kexemɨte'uka'eniwatsie mana 'Ekipitu. Nemɨxe'anuwitɨnikɨ kananeutsixi wakwietsie, hetitsixi, 'amuxeutsixi, peretseutsixi, heweutsixi meta kewutseutsixi. Mɨkɨ kwietsie waɨkawa retsi kanexɨaweni meta xiete.’”
EXO 3:18 'Ukirawetsixi 'ixaheritsixi mepɨmatsi'anu'enieni, hikɨ mɨkɨ meta 'ekɨ ti'aitame hɨxie xepeti'uni mɨpaɨ xepetiyuani: “Yawé, hepɨrayutsixi takakaɨyari kanekuyeixɨani katatinekuxatɨani. Ketaneupitɨa temɨyehukɨ haika tukari te'uhutɨ mana Yawé takakaɨyari temɨteheitimawirienikɨ”.
EXO 3:19 Nepɨtimate ti'aitame 'Ekipitu kiekame pɨkaxehepitɨani, waɨriyarika ne'ipitɨayuke xekanayekɨnikuni.
EXO 3:20 'Ayumieme netɨrɨkariya nepɨhekɨata, nepɨtiwakwinitɨani 'ekipitutari 'inɨari kenemɨtiwewieni mariwemekɨ watsata. Naitɨ mɨkɨ ranuyeyayu Parahuni pɨxepitɨani xemɨyehukɨ.
EXO 3:21 Peru ne neteɨterima 'ekipitutari 'aixɨa memɨtewamanikɨ nepɨwayuitɨani, mɨpaɨ xeyumamawetɨ xemɨka 'ayekɨkanikɨ 'Ekipitu kwieyaritsie.
EXO 3:22 Yunaitɨ 'ukarawetsixi 'ixaheritsixi mepɨtetawauxɨani wa'aurie memeutitei wahetsɨa ya tsepa ke'ane hetsɨa, 'urukɨ mɨtiwewiyatɨka meta pɨratakɨ, 'ixurikite yuniwema xemɨwaretiketɨanikɨ 'ukitsi 'ukari. Mɨpaɨ 'ekipitutari xekateniwanawairiekuni.
EXO 4:1 Muitsexi tawarita kaniuta'iwauni: —¿Keneheyɨanenita xɨka yuri mekaneteheta'eririeni xɨka mekanetsihe'enieni? ¿Keneheyɨaneni xɨka mɨpaɨ menetehahɨaweni: “Yawé 'ahɨxie pɨkaheyuhekɨataxɨ”?
EXO 4:2 Yawé mɨpaɨ katinita'iwawiya: —¿Tita perakwe'e? Muitsexi mɨpaɨ kaniutayɨni: —Kɨye 'itsɨyari nepakwe'e.
EXO 4:3 Yawé mɨpaɨ katinitahɨawe: —Kwiepa mɨkawenikɨ keneutatua. Muitsexi kɨye 'itsɨyari kaniutatuani kwiepa mɨkawenikɨ, hikɨ mɨkɨ kɨye 'itsɨyari kuu kanayani. Muitsexi kanitanautsakekaitɨni 'imakatɨ,
EXO 4:4 peru Yawé kanita'aitɨani miwiyakɨ kwaxieyatsie. Kepauka Muitsexi kuu muwiyaxɨ kwaxieyatsie, mɨkɨ kɨye kanayani.
EXO 4:5 —'Ikɨ kanihɨkɨtɨni yuri memɨmateheta'eririeni kename ne Yawé xepaapama wakakaɨyari 'Apɨrahami, 'Itsahaki, Kakuwu ne'unehekɨataxɨ 'ahɨxie.
EXO 4:6 Tawarita mɨpaɨ Yawé katinitahɨawe: —Hikɨta 'akamixatɨa keneukume'i. Muitsexi yukamixatɨa kaneukumeni, kepauka mewakuha mamaya nawiyari tikuyetɨ kanayani kaniutature 'ɨwi hepaɨ.
EXO 4:7 Tawarita Kakaɨyari mɨpaɨ kaniutayɨni: —Tawarita 'akamixatɨa keneukume'i. Muitsexi tawarita yukamixatɨa kaneukumeni, kepauka mewakuha 'aixɨa kani'anekaitɨni naitɨ kemeu'anekai matɨari.
EXO 4:8 Yawé mɨpaɨ kaniutayɨni: —Xɨka 'inɨari mexɨakame miemekɨ yuri mekate'uta'erieni, xɨari hutarieka miemekɨ.
EXO 4:9 Peru xɨka 'ikɨ hutame 'inɨarikɨ yuri mekamete'uta'eririeni, haa keneuhanimie Niru mieme, kenetayeuri kwiepa, kepauka haa manutateni kwiepa xuriya kanayeimɨkɨ.
EXO 4:10 Muitsexi mɨpaɨ kaniutayɨni: —Yawé, ne hatsuaku 'aixɨa nepɨkarekuxatani, 'ikɨ pɨkati'ane takai mɨtiuyukatsutɨa 'atu mɨtiuyukatsutɨa yahikɨ penetikuhɨawekaku, heitseriemekɨ waɨriyarika nepɨtiutaxaxata.
EXO 4:11 Yawé mɨpaɨ kaniutayɨni: —Ne nepɨhɨkɨ 'ateni nemutawewi. Ne nepɨhɨkɨ Yawé mekaheu'enanakame mɨwarayeitɨwa, mekaniuwaweme, kemɨ'ane meheuneniereme mɨwarayeitɨwa yatɨni mekaheuneniereme.
EXO 4:12 Kenemie, keneuyukuha'aritɨa ne nepɨmatsiparewieni pemɨtaniunikɨ nematitaxatɨani kepemutaineni.
EXO 4:13 Hikɨ Muitsexi mɨpaɨ kaniutayɨni: —Yawé 'aku, waɨkawa nematsiwawirie xeime pɨta pemanunɨ'anikɨ.
EXO 4:14 Hikɨ Yawé waɨkawa kaniuyeha'ani Muitsexi hetsiemieme, mɨpaɨ katinitahɨawe: —'Aixɨa kati'ane 'a'iwa 'Aruni rewi tewiyari. Ne nepɨtimate mɨkɨ 'aixɨa pɨtiuxaxata. Hikɨri kanayeyani metsikunakenetɨ, kepauka mɨmetsihexeiya 'iyarieya 'aixɨa kaneyɨmɨkɨ.
EXO 4:15 'Ekɨ pepɨreitaxatɨani naime kenematiutixatɨa, ne nepɨxeparewieni xemɨtiniunikɨ 'ekɨ, mɨkɨ matɨa, nepɨtixeta'ɨkitɨani kehepaɨ xemɨteyurieka.
EXO 4:16 Mɨkɨ putaniukani teɨteri wahɨxie 'ahetsiemieme, 'ekɨtɨtɨ pemutaineni, 'ekɨta nehetsiemieme pepɨtikuxaxatɨwani ne nemɨtikuhɨaweni hepaɨ.
EXO 4:17 Peru mɨkɨ pepɨkakutɨtɨmaiyani kɨye 'itsɨyari, 'ekɨ mɨkɨkɨ 'inɨari pepewewieni mamariwaweme.
EXO 4:18 Muitsexi mana mɨyetɨa yumune Keturu hetsɨa kaninuani. Nuaka mɨpaɨ katinitahɨawe: —Ne nepɨyemie 'Ekipitu, ne'iwama memanu'uwa. Nepɨnierimie 'akuxi xɨka mehe'uwani. Keturu mɨpaɨ katinitahɨawe: —Kenemiekuta, 'aixɨa pekereuye'ani.
EXO 4:19 Mariyani paitɨri Yawé Muitsexi mɨpaɨ katinahɨawekaitɨni: «Kenemie 'Ekipitu, yunaitɨri mekaniukwini memɨmatsimiekukai».
EXO 4:20 Hikɨ Muitsexi kaniuyukuha'aritɨani yu'ɨya meta yuniwema waranutiyatsaka puxutsie 'Ekipitu kaneyani, yumamatsie Kakaɨyari 'itsɨya kanakwekaitɨni.
EXO 4:21 Yawé Muitsexi mɨpaɨ katinahɨawekaitɨni mɨkatikuhayeikawanikɨ: «Kepauka 'Ekipitu pemunuani pepɨkatikuhayeikawani tita nematiuta'ɨkitɨa, Parahuni hɨxie 'inɨari pemɨwewienikɨ mamariwaweme. Neta 'iyarieya nepɨtseiriya neteɨterima mɨkawapitɨanikɨ.
EXO 4:22 Hikɨ 'ekɨ mɨpaɨ pepɨreitahɨawe nehetsiemieme Parahuni: “'Ixaheri neniwe mexɨakame kanihɨkɨtɨni.
EXO 4:23 Mɨpaɨ nepɨmarahɨawe keneupitɨa neniwe mɨnetsi'ayexeiyanikɨ, peru 'ekɨ pepɨka'itaunie mɨyemiekɨ. 'Ayumieme, 'aniwe mexɨakame tukarieya nekaninawairiemɨkɨ”».
EXO 4:24 Huyeta, Yawé Muitsexi kananukunake, kutsukaku kanitaxeiya kanimienitɨma,
EXO 4:25 peru Tsepura tete nawaxayari 'utikweka yuniwe kaniuxiteni xieyameyatsie, hikɨ Muitsexi 'ɨkayatsie kaniuwirieni mɨpaɨ rehɨawetɨ: «Pɨkaheuyewetse nemɨ'iyɨrieka. 'Ayumieme yurikɨ 'ekɨ pepɨnekɨna 'ikɨ xuriya nemutayeurikɨ».
EXO 4:26 Mɨyatiɨyɨku Yawé Muitsexi kaniuhayewa, peru Tsepura yɨkɨna mɨpaɨ pɨtiuterɨwakai, «pepɨnekɨna 'ikɨ xuriya nemutayeurikɨ» xitekiya 'inɨariyarikɨ.
EXO 4:27 Yawé 'Aruni mɨpaɨ katiniutahɨawe: «Kenemie Muitsexi kenenakimie makumawetsie paitɨ». 'Aruni kaneyani Muitsexi netaxeiya hɨritsie paitɨ Kakaɨyari manuyeika, kani'itseni.
EXO 4:28 Hikɨ Muitsexi 'Aruni katiniutaxatɨani naime Yawé kemɨrehɨawekai, naime 'inɨari mamariwaweme kemɨti'ɨkitɨakai.
EXO 4:29 Hikɨ Muitsexi 'Aruni hamatɨa 'ixaheritsixi mekaniwarukuxeɨrieni.
EXO 4:30 'Aruni naime katiniwarutaxatɨakaitɨni Muitsexi Yawé kemɨrehɨawekai, yunaime wahɨxie 'inɨari kaniuwewieni,
EXO 4:31 mɨkɨkɨ teɨteri yuri mekateniuta'erieni. Mɨpaɨ mete'u'enanaka kename Yawé waxeiyakai kememɨte'uka'eniwakai waranuku'erienikekai, 'ixaheritsixi mekaniutihɨxima'uni meta Yawé mariweme mekanayeitɨani.
EXO 5:1 Mɨpaɨ metewarutahɨaweka Muitsexi 'Aruni Parahuni hɨxie mekaniti'uni mɨpaɨ mekatenitahɨawe: —Mɨpaɨ paine Yawé 'ixaheritsixi takakaɨyari: “Keniwarupitɨa neteɨterima makumawetsie paitɨ memɨyehukɨ 'ixɨarari memɨwewienikɨ nehetsiemieme kemɨnetinake”.
EXO 5:2 Parahuni mɨpaɨ kaniutayɨni: —¿Kemɨ'ane mɨkɨ Yawé pɨhɨkɨ, para ne nemenu'enienikɨ 'ixaheritsixi nemɨwapitɨanikɨ? Ne Yawé nepɨkamate, ne nepɨkawapitɨani 'ixaheritsixi memɨyehukɨ.
EXO 5:3 Mɨkɨta mɨpaɨ mekaniutiyuani: —Hepɨrayutsixi wakakaɨyari 'upɨtatsihanakirɨme, 'ayumieme tame haika tukari tepuhuni makumawetsiepai, Yawé temɨtehetimawirienikɨ takakaɨyari. Xɨka mɨpaɨ tekate'uyurieni waɨkawa pɨtatiukwinitɨawe, tixaɨtɨ 'upɨranɨ'ani kwiniya yatɨni pɨtatsi'ukwiwe yu'ixiparakɨ.
EXO 5:4 Ti'aitame 'Ekipitu kiekame mɨpaɨ kaniutayɨni: —Muitsexi, 'Aruni, teɨteri xepɨkawa'uximatɨaka memɨte'uximayakakɨ. Xekenakunuaxɨa xemɨteha'uximayatsie.
EXO 5:5 Xekeneutimaixɨa mepɨyuwaɨkawa teɨteri 'ena 'Ekipitu, xemeta xekatewapitɨa memɨte'uximayaka.
EXO 5:6 Mɨkɨ tukaritsie Parahuni mɨpaɨ katiniwaruta'aitɨani te'aitamete 'ekipitutari meta 'ixaheritsixi memɨtewa'aitɨa:
EXO 5:7 «Xɨnariya tata'ime memɨtiwewienikɨ 'ɨxa xepɨkawayetuiriwaniri, mɨkɨ mekeheiteɨxiyuni yɨkɨmana.
EXO 5:8 Peru xeme yaxeikɨa paɨmeme xekeniwawawirieka xɨnariya, xepɨkahenukahɨpani memɨyɨ'ɨraraxie mekanihɨkɨtɨni, 'ayumieme mɨpaɨ mekanetenikɨhɨaweni: “Ketaneupitɨa takakaɨyari temɨtemawirieyukɨ”.
EXO 5:9 Kwinimieme ti'uxiyakame xekeniwa'aitɨaka. Xeketeniwa'aitɨaka yamemɨte'uximayakakɨ. Mɨpaɨ 'itarika mepɨkahanu'enieni».
EXO 5:10 Te'aitamete 'ekipitutari mekanayekɨne 'ixaheritsixi memɨtewata'aitɨanikɨ, meta teɨteri memɨtewa'aitɨa mɨpaɨ mekateniwarutahɨawe: «Parahuni mɨpaɨ kanaineni: “'Ɨxari xepɨkayetuiriyarieniri.
EXO 5:11 Xemeri xekaniwauyuni tsepa hakewa xemeikaxeiya, perutsɨ yaxeikɨa paɨmeme xepɨtiwewiwani kexemɨte'aitɨarie”».
EXO 5:12 Mɨpaɨ tiuyɨku 'ixaheritsixi mekaneutayeixɨani 'Ekipitu kwieyaritsie meteheuteɨxɨtɨkaitɨ mɨraku'etsitɨretsie, 'ɨxa memɨyetuiriyarɨwakaitsiemieme.
EXO 5:13 Memɨtewa'aitɨa mekaniyeweiyakaitɨni mɨpaɨ metewakɨhɨawetɨ: «Xeketenaye'atɨwani kexemɨte'aitɨarie 'ɨxa xemɨyetuiriyaruwakai hepaɨ».
EXO 5:14 Matsita memɨte'aita Parahuni hetsɨa miemete 'ixaheritsixi memanuyetei mekaniwatiwayakaitɨni mɨpaɨ metewaku'iwawiyatɨ: «¿Titayari takai meta hikɨ xekate'aye'atɨa kepapaɨmeme xemɨ'aitɨarie, meripai xemitiwewiwakai hepaɨ?»
EXO 5:15 Memanuyetei 'ixaheritsixi mekanekɨne Parahuni hetsɨa, mɨpaɨ mekateneitahɨawe: —¿Titayari 'ekɨ mɨyapetiwayuriene te'a'uximayatamete?
EXO 5:16 'Ɨxari xemɨkatatsiyetuiriwa. Mɨyatɨtɨ yaxeikɨa papaɨmeme tetewawiyarie xɨnariya, 'etsimɨpaɨmeni hepaɨ tetetiweiwa. Ti'aitame 'ateɨterima 'aixɨa mepɨkateyurie.
EXO 5:17 Parahuni mɨpaɨ kaniutayɨni: —Xemɨyɨ'ɨraraxie, xemɨyɨ'ɨraraxie xekanihɨmetɨni. 'Ayumieme mɨpaɨ xekaniutiyuaneni: “Ketaneupitɨa Yawé takakaɨyari temɨtemawirieyukɨ”.
EXO 5:18 Hikɨ xekenehu xeketene'uximayaka. 'Ɨxa xepɨkayetuiriyarieniri, peru yaxeikɨa paɨmeme xepɨtiwewiwani xɨnariya.
EXO 5:19 Te'uximayatamete memanuyetei 'ixaheritsixi mɨpaɨ mekatenetimani mexɨima katinaniuwakaitɨni, kepauka mɨpaɨ mɨtiutaniukie kename yaxeikɨa papaɨmeme meyetuayanikekai.
EXO 5:20 Muitsexi hetsɨa meta 'Aruni hetsɨa me'u'axɨaka kitenie memuwakwewiekai,
EXO 5:21 mɨpaɨ mekateniwarutahɨawe: «Yawé kexeheutixeiyaxɨani kexehanutaxɨrieni. Xeme ya'ane xeheutiwiwiexɨaku 'axatepu'ɨatɨka Parahuni hɨxie yaxeikɨa memɨte'i'uximayatsirie wahɨxie, xeme xekateniuyurieni 'ixipara xemɨwarukweitɨa memɨtatsikwinikɨ».
EXO 5:22 Muitsexi Yawé mɨpaɨ katiniutahɨawe: —Neuxei, Yawé, ¿titayari 'ikɨ kiekari 'axapetiyuriene? ¿Mɨpaɨ mɨti'anenikɨ penereyenɨ'a?
EXO 5:23 Kepaukapai Parahuni hɨxie nemutaniu 'ahetsiemieme, tixaɨtɨ 'atsipɨkatiyuriwe matsi pɨta pɨwananaima 'ikɨ teɨteri memɨ'ateɨterima. 'Ekɨta 'atsipepɨkatiyuriwe pewaxɨnake.
EXO 6:1 Yawé mɨpaɨ katinita'eiya: —Patsɨ pekaninierimɨkɨ kenemɨtiyurieni Parahuni hetsɨa. Netɨrɨkariya xeikɨa kanixepitɨamɨkɨ xemɨyehukɨ, netɨrɨkariyakɨ xeikɨa mɨkɨ kwieyaritsie xekanayeweiyariekuni.
EXO 6:2 Hutarieka, Kakaɨyari Muitsexi hamatɨa katiniutaxata mɨpaɨ katinitahɨawe: «Ne Yawé nepɨhɨkɨ.
EXO 6:3 Ne nepɨnehekɨataxɨ 'Apɨrahami, 'Itsahaki, meta Kakuwu wahɨxie, ne Kakaɨyari Naimekɨmɨtɨrɨkaɨye, peru kenemɨtitewa yemekɨ nepɨkawarutaxatɨa, Yawé nemɨtitewa.
EXO 6:4 Metatsiere tɨratu tepuwewi kwie Kanani miemekɨ wahetsiemieme mayanikɨ, meripaitɨ memakutekaitsie 'ateewa kiekatari wahepaɨ me'anetɨ.
EXO 6:5 Meta nepɨwa'enie 'ixaheritsixi kememɨte'uka'eniwa, 'ekipitutari waɨriyarika te'uximayatamete memɨwarayeitɨakɨ, nepaye'eri tɨratu kenemɨtiuwewi.
EXO 6:6 'Ayumieme kenemie mɨpaɨ ketiniwaretahɨawi 'ixaheritsixi: “Ne Yawé nepɨhɨkɨ, ne nepɨxexɨna 'ekipitutari kememɨtexe'uximatɨa, ne nepɨxexɨna kexemɨte'uximayatamete, ne nepɨxexɨna waɨkawa 'inɨari newewietɨ meta mamariwawemekɨ 'aixɨa nepɨtiyurieni.
EXO 6:7 Ne, xeme nekiekari nepɨxe'ayeitɨani, neta xekakaɨyari. Mɨpaɨ 'ana mepɨtehetimani, kename ne Yawé nexekakaɨyari, nemɨxe'ɨxɨnaxɨ 'ekipitutari kememɨtexe'uximatɨakai.
EXO 6:8 Nekanixe'anuwitɨmɨkɨ kwietsie mɨpaɨ kenemɨtinehɨritɨa 'Apɨrahami, 'Itsahaki, Kakuwu, nemɨwayetuirienikekai, ne Yawé, nepɨxeyetuirieni mɨkɨ kwie mana xemɨtitenikɨ”».
EXO 6:9 Muitsexi, 'ikɨ naime tiniwarutaxatɨani 'ixaheritsixi peru memutiwaɨripiekaikɨri, mete'uka'eniwatɨ mete'aitɨarietɨ 'ayumieme mepɨka'i'eni.
EXO 6:10 Hikɨ Yawé mɨpaɨ Muitsexi katiniutahɨawe:
EXO 6:11 —Kenemie Parahuni hɨxie ti'aitame 'Ekipitu kwieyaritsie. Mɨpaɨ ketinetahɨawi, kewarupitɨani memɨyehukɨ 'ixaheritsixi mɨkɨ kwieyaritsie.
EXO 6:12 Peru Muitsexi Yawé mɨpaɨ katiniutahɨawe: —'Ixaheritsixi matsi mepɨkanetsiheu'enieri Parahuni kenetiu'enieni meta 'aixɨa nepɨkatiuxaxata.
EXO 6:13 Hutarieka Yawé Muitsexi 'Aruni mame kaniwarutahɨawe, 'ixaheritsixi wahetsiemieme meta Parahuni ti'aitame hetsiemieme katiniwarutaxatɨani, mɨpaɨta katiniwaruta'aitɨani 'ixaheritsixi 'Ekipitu memɨwarayewitɨnikɨ.
EXO 6:14 'Ikɨ mepakɨ 'ixaheritsixi wa'ukiyarima: Xuweni niwemama 'Ixaheri matɨarieya: Kanuki, Paru, Ketsiruni meta Karimi. Mɨkɨ mepɨhɨkɨ Xuweni nuiwarimama.
EXO 6:15 Tsimehuni niwemama: Kemueri, Kamini, 'Uhari, Kakini, Tsukaxi, meta Tsahuri maamaya kananeu tewiyari pɨhɨkɨtɨkai. Mɨkɨ mepɨhɨkɨ Tsimehuni nuiwarimama.
EXO 6:16 Kememɨteheuku'uxa mɨkɨ nuiwari memaka'utɨarietsie, 'ikɨ Rewi niwemama mepɨhɨkɨ: Keritsuni, Kuhati meta Merari. Xeitsienituyari heimana xeitewiyari heimana tamamata heimana 'atahuta wiyari puyuri.
EXO 6:17 Keritsuni niwemama wanuiwaritsie: Riwini meta Tsimi.
EXO 6:18 Kuhati niwemama: 'Amirani, 'Itsaxi, Hewuruni meta 'Utsiheri. Xeitsienituyari heimana xeitewiyari heimana tamamata heimana haika wiyari puyuri.
EXO 6:19 Merari niwemama: Makiri meta Mutsihí. 'Ikɨ Rewi nuiwarimama mepɨhɨkɨ kememɨteheku'uxa.
EXO 6:20 'Amirani, xeitsienituyari heimana xeitewiyari heimana tamamata heimana 'atahuta wiyari puyuri, yutetei kaniutiwitɨni Kukaweri titewakame, mɨkɨ yuhutame mekaniwarayexeiya tɨɨri: 'Aruni meta Muitsexi.
EXO 6:21 'Itsaxi niwemama: Kure, Nepeki meta Tsikɨri.
EXO 6:22 'Utsiheri niwemama: Mitsaheri, 'Eritsapani, meta Tsitiri.
EXO 6:23 'Aruni 'Eritsaweti kaniutiwitɨni, 'Aminarawi nu'aya Nahatsuni 'iwaya, mɨkɨ yunaukame mekaniwarayexeiya tɨɨri: Narawi, 'Awihu, 'Eriyatsaxi meta 'Itamaxi.
EXO 6:24 Kure niwemama: 'Atsixi, 'Erikana meta 'Awiyatsahapi. Mɨkɨ Kure nuiwarimama mekanihɨkɨtɨni.
EXO 6:25 'Eriyatsaxi 'Aruni nu'aya xeime kaniutiwitɨni Putiheri niweya, xeime nunutsi mekanayexeiya Pinexi mekateniterɨwa. 'Ikɨ Rewi nuiwarimama wa'ukiyarima mepakɨ, kememɨteheku'uxa memaka'utɨarietsie.
EXO 6:26 'Aruni meta Muitsexi, mɨkɨ mepɨhɨkɨtɨkai Yawé mɨwanɨ'akai 'ixaheritsixi memɨwarayewitɨnikɨ 'Ekipitu kwieyaritsie yayupapaɨmeme.
EXO 6:27 'Ikɨ mepɨhɨkɨ Parahuni hɨxie memutiniu, ti'aitame 'Ekipitu kiekame hetsɨa, memɨwarayewitɨnikɨ 'ixaheritsixi 'Ekipitu kwieyaritsie.
EXO 6:28 Kepauka Yawé Muitsexi hamatɨa mɨtiutaxa 'Ekipitu,
EXO 6:29 mɨpaɨ katinitahɨawe: —Ne Yawé nekanihɨkɨtɨni. Parahuni ti'aitame 'Ekipitu kiekame naime ketinetaxatɨa kenemɨmatitahɨawe.
EXO 6:30 Peru Muitsexi Yawé mɨpaɨ katiniutahɨawe: —¿Neranu'enienikuta Parahuni, ne 'aixɨa nepɨkatiuxaxata?
EXO 7:1 Yawé Muitsexi mɨpaɨ katiniutahɨawe: —Mɨpaɨ ketinemaika Kakaɨyari tewiyari pepayani Parahuni hɨxie. 'A'iwa 'Aruni 'aniukame payani.
EXO 7:2 'Ekɨ pɨ'ahɨritɨarika naime pemɨtikuxaxatɨwani kenematikuhɨaweni, 'a'iwata 'Aruni Parahuni pɨtawawirieni mɨwapitɨanikɨ memɨyehukɨ mɨkɨ kwieyaritsie.
EXO 7:3 Ne Parahuni 'iyarieya nepɨtseiriya tsepa 'inɨari mamariwaweme nemutiwewi 'Ekipitu.
EXO 7:4 Mɨkɨ pɨkaxe'enieni, hikɨ matsi ne naime netɨrɨkariya 'Ekipitu nepɨtiwewieni, mariwemekɨ netiyurienetɨ kemɨtiheitserie, nepɨwarayewitɨni kwinimieme memɨyupaɨme neteɨterima 'ixaheritsixi.
EXO 7:5 Kepauka ne mariweme nemɨtiyurieni 'Ekipitu kwieyaritsie, kepauka ne 'ixaheritsixi nemɨwarayewitɨni, 'ana 'ekipitutari mɨpaɨ mepɨtehetimani kename ne Yawé nehɨkɨ.
EXO 7:6 Muitsexi 'Aruni hamatɨa yamekatenikakɨne Yawé yemekɨ kemainekai.
EXO 7:7 Kepauka Parahuni hɨxie memutiniu, Muitsexi nauka tewiyari wiyari kanexeiyakaitɨni, meta 'Aruni nauka tewiyari heimana haika wiyari kanexeiyakaitɨni.
EXO 7:8 Yawé Muitsexi 'Aruni mame mɨpaɨ katiniwarutahɨawe:
EXO 7:9 «Kepauka Parahuni 'inɨari mɨxewawirieka, 'Aruni ketineutaxatɨa, kɨye 'itsɨyari ke'utikweni kwiepa ke'ikahɨani Parahuni hɨxie. Mɨpaɨ 'ana kɨye kuu kanayeimɨkɨ».
EXO 7:10 Muitsexi 'Aruni hamatɨa Parahuni hetsɨa mekanekɨne, mekatenaye'atɨani Yawé kemɨtiwarahɨawekai. 'Aruni yu'itsɨ nehɨani kwiepa Parahuni hɨxie meta memɨte'i'uximayatsirie wahɨxie, mɨkɨ kɨye kuu kanayani.
EXO 7:11 Peru Parahuni memɨtemaiwawe kaniwaruta'inienita meta memɨteyukewaiya, mɨkɨta 'awie memɨte'uyematekɨ mɨkɨ temaiwawemete yaxeikɨa mekateniuyurieni:
EXO 7:12 Yuxexuitɨ yu'itsɨ mekanexɨriexɨani, yaxeikɨa naitɨ kɨyexi kuuterixiyari mekanakɨne. Matsi 'Aruni kɨyeya mɨkɨ wakɨyexi yunaime kaniwarutikwani.
EXO 7:13 Mɨya tiuyɨku Yawé kemɨtiwarahɨawekai, Parahuni yu'iyari kaniutseiriya pɨkawaru'eni kememɨtekuxatakai.
EXO 7:14 Yawé Muitsexi mɨpaɨ katiniutahɨawe: «Parahuni yu'iyari pɨtse'iriya pɨkayuwaɨri neteɨterima mɨwatatuanikɨ.
EXO 7:15 Kenemie ximeri mɨ'ɨwamietsie kenekwewieka Niru hatetsitayaritsie, hikɨ pekananukukemɨkɨ pe'enukunakeke 'akɨye pe'akwetɨ kuu mayeika.
EXO 7:16 Mana mɨpaɨ ketinetahɨawi: “Yawé hepɨrayutsixi wakakaɨyari pɨnetsiheyenɨ'a mɨpaɨ nematitahɨawekɨ: ‘Keniwarupitɨa neteɨterima memayekɨnekɨ, memɨnetsihayexeiyanikɨ humapaitɨ makumawetsiepai.’ Hikɨ pemɨka'awaɨriyakɨ,
EXO 7:17 Yawé mɨpaɨ kanaineni: ‘Hikɨ pepɨretimani kename ne Yawé nehɨkɨ.’ 'Ikɨ kɨye nemekwe'ekɨ haa Niru mieme nekaniwamɨkɨ, hikɨ mɨkɨ haa naitɨ xuriya kanayeimɨkɨ.
EXO 7:18 Tsapari yunaitɨ mekanikwikuni, haa 'axa'u'ɨatɨ kanayeimɨkɨ, 'ekipitutari mana mepɨkatihareni”».
EXO 7:19 Yawé Muitsexi mɨpaɨta katiniutahɨawe: «'Aruni mɨpaɨ ketineutahɨawi, yu'itsɨ ke'utikweni hapa keheitatsera 'Ekipitu miemetsie, naitɨ 'akite, hamuyehapane, meta haa mukamarike mukumane xuriya mayanikɨ. Xuriya puxɨaweni naitɨ kemɨyewa 'Ekipitu kwieyaritsie, kɨyexi tsiepaitɨ, tetexi tsiepaitɨ naitɨ».
EXO 7:20 Muitsexi 'Aruni hamatɨa Yawé mekananu'enieni kemɨtiwa'aitɨakai. Parahuni yaxeikɨata memɨte'i'uximayatsirie wahɨxie 'Aruni yɨkɨye teikɨ netsera haa Niru mieme kaniuwani. Hikɨ naitɨ haa mana mieme xuriya kanayani.
EXO 7:21 Tsapari mekaniukwini Niru hetsie memɨye'uwakai, haa 'axakaniu'ɨakaitɨni 'ekipitutari mana memɨhareka mepɨkayɨwawekai. Naitsarie 'Ekipitu kwieyaritsie xuriya hayari kanixuawekaitɨni.
EXO 7:22 Yaxeikɨata temaiwawemete 'awie memɨte'uyematekɨ mɨkɨ 'ekipitutari yaxeikɨa mekateniuyurieni, mɨpaɨ Parahuni yu'iyari kaniutseiriya kemainekai Yawé kemɨtiwarahɨawekai, 'Aruni pɨka'anu'eni meta Muitsexi.
EXO 7:23 Wa'atɨtɨ tixaɨtɨ 'atsipɨkatiɨyɨ ta'aurie haweka yuparatsiyuta kaneyani.
EXO 7:24 Hikɨ 'ekipitutari putsu mekaniutiwewietɨkɨne Niru hatetsitayaritsie, haa 'aixɨa mɨ'ane mehauwautɨkaitɨ, memɨkayɨwawekaikɨri hatɨa mieme memɨtiharenikɨ.
EXO 7:25 'Atahuta tukari panukatɨa kepauka Yawé Niru hayari muwa.
EXO 8:1 Yawé Muitsexi mɨpaɨ katiniuta'aitɨani: «Kenemie Parahuni hetsɨa mɨpaɨ ketinetahɨawi, Yawé mɨpaɨ paine: “Keniwarupitɨa neteɨterima memɨyehukɨ memɨnetsi'ayexeiyanikɨ.
EXO 8:2 Xɨka pekawarupitɨani temutsi nepɨwanetɨani naitsarie 'akwie kemɨyewa.
EXO 8:3 Niru hatɨayari mukwakeni hepaɨ temutsi wahekɨ puyɨneni, 'aparatsiyuta mepeutahaxɨani, pemuyehuputsie paitɨ meta 'a'itaritsie, yaxeikɨata 'ahetsɨa te'uximayatamete wakiita paitɨ, 'ateɨterima wakiita, 'ahuxunuta meta titɨxɨmete.
EXO 8:4 'Ahetsie mepɨtimakixɨani, 'ateɨterima wahetsie meta 'ahetsɨa memɨte'uximaya”».
EXO 8:5 Hikɨ Yawé Muitsexi mɨpaɨ katiniutahɨawe: «'Aruni mɨpaɨ ketineutahɨawi yu'itsɨ haa manuyehapane keheutatsera, 'aki manuyehapane, harakuna mayemanetsie, naitsarie 'Ekipitu kwieyaritsie temutsi memɨtixuawerekɨ».
EXO 8:6 'Aruni yu'itsɨ kaneutatsera haa 'ekipitu miemetetsie, temutsi mekaniutixuawere naitsarie.
EXO 8:7 Hikɨ temaiwawemete 'awie kememɨte'uyemate yaxeikɨa mekateniuyurieni, mɨpaɨ mete'uyurieku temutsi mekaniutixuawere naitsarie 'Ekipitu.
EXO 8:8 Hikɨ Parahuni, Muitsexi 'Aruni mame kaniwarutakwewieni. Mɨpaɨ katiniwarutahɨawe: —Yawé xekeneutawawiri temutsi mɨwataweiyakɨ nehetsie meta neteɨterima wahetsie, neta nepɨxepitɨani xemɨyehukɨ xemɨteheitimawirienikɨ.
EXO 8:9 Muitsexi mɨpaɨ katinita'eiya: —Yanetineutahɨawi kepauka nepitawawirieni Yawé 'ahetsiemieme, 'ahetsɨa memɨte'uximaya meta 'ateɨterima wahetsiemieme. Temutsi Niru hatɨayaritsie mekaniyuhayewakuni xeikɨa, 'ahetsie meta 'akie mepɨkatixuawere.
EXO 8:10 Parahuni mɨpaɨ katinita'eiya: —'Uxa'a kwitɨwa. Muitsexi mɨpaɨ kaniutayɨni: —Mɨpaɨ kaniyɨmɨkɨ, pekatinetimaimɨkɨ xewitɨ kakaɨyari kaniumaweni Yawé takakaɨyari hepaɨ 'anetɨ.
EXO 8:11 Temutsi mekaniyehuni mekanikumawerikuni 'ahetsie 'akiita meta 'ahetsɨa memɨte'uximaya wahetsie metatsiere 'ateɨterima wahetsie, Niru hatɨayaritsie xeikɨa mekaniyuhayewakuni.
EXO 8:12 Yapauka mewayekɨneka Muitsexi 'Aruni matɨa Parahuni hamatɨa metehetaxataka, Muitsexi Yawé kaniutawawirieni temutsi mɨwakumaweriyakɨ Parahuni hetsɨa mɨwareyenɨ'akai.
EXO 8:13 Muitsexi Yawé kemɨtiutahɨawekai nenu'enieni, temutsi mekaniutayuani mekwi'itɨ, kiita, takwa meta yeuta.
EXO 8:14 Teɨteri mekaniwakuxexeɨriwakaitɨni wa'ɨakariyari naitɨ 'Ekipitu kanakɨnɨkaitɨni.
EXO 8:15 Hikɨ Parahuni 'aixɨa 'iyarieya kaniuyɨni, peru Yawé 'iyarieya kaniutseiriya, Yawé kemɨtiwarahɨawekai, Muitsexi 'Aruni mame pɨkawa'enimɨkɨkai.
EXO 8:16 Yawé Muitsexi mɨpaɨ katiniutahɨawe 'Aruni mɨpaɨ mɨtitahɨawekɨ: «'A'itsɨ keneutatsera kwiepa ketineukawaxɨa, naitɨ 'Ekipitu kwieyaritsie kwauni xaipɨtsi memayexɨrienikɨ».
EXO 8:17 Mɨpaɨ katiniuyurieni. Hikɨ 'Aruni yu'itsɨkɨ kwiepa katiniukawaxɨani, hikɨ kwaunitɨtɨ xaipɨtsi mekanayexɨrieni teɨteri mekaniwakukewekaitɨni meta tewaxi. Naitsarie 'Ekipitu kwieyaritsie kwauni xaipɨtsi mekanakɨne.
EXO 8:18 Temaiwawemete 'awie memɨte'uyemate mɨpaɨtsiere mekateniyurienikekaitɨni mekaniuyutatexieni. Matsi xaipɨtsi teɨteri meta watewama mekaniwakukewekaitɨni.
EXO 8:19 Mɨpaɨ mekaniutiyuani temaiwawemete Parahuni hɨxie: «Yemekɨ Kakaɨyari wahamatɨa puyeika». Peru yu'iyari kaniutseiriya pɨkawaru'eni, Yawé kemɨtiwarahɨawekai.
EXO 8:20 Yawé Muitsexi mɨpaɨ katiniutahɨawe: «'Uxa'a ximeri pekananukukemɨkɨ, Parahuni 'utɨa pekaniyemieni, hata mɨkatenitsie mɨpaɨ pekatinitahɨawimɨkɨ: “Mɨpaɨ paine Yawé: ‘Neteɨterima keniwarupitɨa memɨyehukɨ memɨnetsi'ayexeiyanikɨ.
EXO 8:21 Xɨka pekawarupitɨani, yɨmɨireme nakatarixi nepɨwaranunɨ'ani 'ahetsie, meta 'ahetsɨa memɨte'uximaya, 'ateɨterima wahetsie meta 'akie. Naitɨ 'ekipitutari wakiita meta kwiepa memanu'uwa mepɨtihɨne nakatarixi.
EXO 8:22 Kepauka mɨpaɨ mɨtiyɨni, Kutseheni xeikɨa mepɨkatixuawere, mana neteɨterima memɨtiteikɨ, 'ana mɨpaɨ pepɨretimani ne Yawé, 'ikɨ kwieyaritsie nepuyeika.
EXO 8:23 Yɨkɨmeteyuxexeiyame neteɨterima nepɨwarayeitɨani 'ateɨterima wahetsɨa, 'ikɨ 'inɨari mɨmariwe 'uxa'a paye'ani’”».
EXO 8:24 Mɨpaɨ katiniuyurieni Yawé. Haiwitɨri 'a'ayetsutsuitɨ nakatexɨani Parahuni paratsiyuyatsie meta hetsɨana memɨte'uximaya wakii hetsie meta naitsarie 'Ekipitu, nakatarixi xeikɨa mekanihɨkɨakaitɨni. Nakatarixi wahekɨ 'Ekipitu kiekariyaritsie 'axakatinayeyɨni.
EXO 8:25 Hikɨ Parahuni, Muitsexi 'Aruni mame kaniwarutakwewieni, mɨpaɨ katiniwarutahɨawe: —Xekenehu xeketeneutimawiri yukakaɨyari 'ena 'ikɨ kwieyaritsie.
EXO 8:26 Muitsexi mɨpaɨ kaniutayɨni: —Mɨpaɨ 'aixɨa pɨkayɨni, tame temɨtetimawa Yawé hetsiemieme 'ekipitutari wahepaɨtsita puxurikime, xɨka wahɨxie tete'utimawa wahepaɨtsita mɨkareuyewetse hepaɨ xɨari mepɨtatsitituaxa.
EXO 8:27 Tepɨyehukaku haika tukari te'uhutɨ makumawetsie paitɨ, mana temɨteheitimawirienikɨ Yawé takakaɨyari mɨpaɨ katatini'aitɨaka.
EXO 8:28 Parahuni mɨpaɨ katinita'eiya: —Nepɨxepitɨani xemɨte'imawirieyukɨ Yawé yukakaɨyari humapaitɨ. Peru 'ateewapai xekahekɨkatɨ, meta xepeitawawirieni nehetsiemieme.
EXO 8:29 Muitsexi Parahuni mɨpaɨ katiniutahɨawe: —Ne'anuyeyame 'uwa ne Yawé 'ahetsiemieme nepeitawawirieni, hikɨ 'uxa'a nakatarixi wahepaɨ memɨ'anene mepumaweni 'ahetsie, 'ahetsɨa memɨte'uximaya meta 'ateɨterima wahetsie. Perutsɨ pepɨkatatiku'itaiyani, pekatatsipitɨanike pekatiutaine temɨtemawayukɨ Yawé hetsiemieme.
EXO 8:30 Muitsexi hewayeyaka Yawé nenewieri kaniupitɨani Parahuni hetsiemieme.
EXO 8:31 Yawé kani'enieni Muitsexi Parahuni hetsiemieme kemɨtitawawiriekai, nakatarixi kaniwarukumaweriya Parahunitsie. Memɨte'uximaya, meta teɨterimama wahetsie nixewitɨ pɨkayuhayewaxɨ.
EXO 8:32 Matsi Parahuni tawarita yu'iyari kaniutse'iriya, pɨkawarupitɨa memɨyehukɨ.
EXO 9:1 Hikɨ Yawé Muitsexi kaniutanɨ'ani, Parahuni mɨpaɨ mɨtitaxatɨanikɨ: «Mɨpaɨ kanaineni Yawé hepɨrayutsixi teɨteriyari wakakaɨyari: “Keniwarupitɨa neteɨterima memayekɨnekɨ memɨnetsi'ayexeiyanikɨ”.
EXO 9:2 Xɨka pekawarupitɨani memɨyehukɨ, xɨka 'akuxi pewarukununuitɨwani,
EXO 9:3 Yawé yɨtɨrɨkariyakɨ kwiniya pɨnetɨani 'atewama wahetsie, kawayutsixi, puxuri, kameyutsixi, wakaitsixi meta 'amuxatsi.
EXO 9:4 Peru Yawé 'ixaheritsixi watewama meta 'ekipitutari watewama wahamatɨa yukɨmeteyuxexeiyame pɨwarayeitɨani, 'ayumieme 'ixaheritsixi watewama nixewitɨ pɨkamɨni».
EXO 9:5 Hikɨ Yawé tukari kaniutipini, mɨpaɨ kaniutayɨni: «'Uxa'a, ne Yawé mɨpaɨ nekatiniyurimɨkɨ 'ikɨ kwieyaritsie».
EXO 9:6 Mɨpaɨ katiniuyɨni, 'uxa'arieka mekaniukwini yunaitɨ 'ekipitutari watewama, peru 'ixaheritsixi watewama nixewitɨ pɨka'umɨ.
EXO 9:7 Hikɨ Parahuni hipame kaniwarenɨ'ani, memɨwaxeiyayukɨ 'ixaheritsixi watewama, mɨkɨ mekaniwaretaxeiya yaxeikɨa meyupaɨmeme, nixewitɨ pɨkahemɨkikai. Peru hikɨ Parahuni yu'iyari kaniutseiriya pɨkawarupitɨa memɨyehukɨ.
EXO 9:8 Merikɨtsɨ Yawé mɨpaɨ katiniwarutahɨawe Muitsexi 'Aruni mame: «Xekeniwayetuka naxi 'uxunuta mieme 'etsipeme, mɨkɨ Muitsexi teikɨ keheiwiwieni Parahuni hɨxie.
EXO 9:9 Mɨkɨ naxi tumuanari miyɨanitɨ kanayeimɨkɨ, kanikawiwimɨkɨ naitsarie 'Ekipitu kwieyaritsie, mekaniti'etsatakuni, teɨteri meta watewama yunaitɨ».
EXO 9:10 Muitsexi 'Aruni matɨa naxi mekanetuni 'uxunutamieme, Parahuni hɨxie meti'uka Muitsexi kaneiwiwieni 'ekatsie, 'anari mekaniuti'etsata, teɨteri yaxeikɨata watewama.
EXO 9:11 Temaiwawemete mepɨkayɨwawekai Muitsexi hepaɨ memɨteyurienikɨ, mɨkɨtsɨ yunaitɨ meta mana kiekatari mekaneu'etsatɨkateitɨni.
EXO 9:12 Peru Yawé Parahuni 'iyarieya kaniutseiriya, Yawé Muitsexi kemɨtiutahɨawekai, 'ayumieme Parahuni Muitsexi 'Aruni mame pɨkawa'enimɨkɨkai.
EXO 9:13 Merikɨtsɨ Yawé Muitsexi tawarita kanitanɨ'ani, 'uxa'arieka ximeri kaneyani Parahuni mɨtitaxatɨanikɨ: «Yawé mɨpaɨ kanaineni hepɨrayutsixi wakakaɨyari: “Keniwarupitɨa neteɨterima memɨnetsi'ayexeiyanikɨ.
EXO 9:14 Hikɨri 'imatɨrieka waɨkawa mariwemekɨ nepɨmatsi'anunɨ'airieni kwiniya 'ahetsiemieme, yaxeikɨata te'a'uximayatsiriwamete wahetsie, para mɨpaɨ pemɨretimanikɨ kename xewitɨ 'umawe 'ena kwiepa nehepaɨ tiyurienetɨ.
EXO 9:15 Xɨka hikɨ kwitɨwa mɨpaɨ netiuyurieni 'ahetsie, 'ateɨterima wahetsieta kwiniya kwi mayakamekɨ yunaitɨ xekanikwikuni.
EXO 9:16 Peru hikɨ nepɨmatsihayewa 'akuxi para pemɨretimanikɨ kenemɨtiyurieni, para nemukuxaxatsiwanikɨ naitsarie kwiepa.
EXO 9:17 'Ekɨ matsi yaxeikɨa pepɨtiyuriene, neteɨterima pekawapitɨatɨ mɨkɨ memayekɨnekɨ.
EXO 9:18 'Ayumieme 'uxa'a hikɨ hepaɨ 'upaukakaku, nekanenunɨ'amɨkɨ wiyeri teemakame mɨkatiyɨwekai hepaɨ hatsuaku 'Ekipitu mukamarixɨtsietɨtɨ.
EXO 9:19 Mexɨima ketineuta'aita 'atewama kiitɨa memɨwareuta'arienikɨ ketipaɨmeme pemɨrexeiya yeuta, yaxeikɨata teɨteri, kemɨ'ane takwa muyeikani tee hetsiena kanikaxɨrimɨkɨ kanimiemɨkɨ”».
EXO 9:20 Hipatɨ Parahuni te'uximayatsiriwamete mekaniutimamani Yawé niukieya me'u'enieka, meyumexɨitɨatɨ kiita mekaniwareuta'ɨna yuteɨterima meta yutewama,
EXO 9:21 hipatɨta mepɨkahenu'eni Yawé niukieya, mepɨwaruhayewaxɨ tehɨwemete yaxeikɨata yutewama.
EXO 9:22 Merikɨtsɨ Yawé mɨpaɨ Muitsexi katiniutahɨawe: «'Amamate teikɨ keneutitseraxɨa, para naitsarie mɨkaxɨrienikɨ tee wiyeriyari 'Ekipitu kwieyaritsie, teɨteri wahetsie yaxeikɨata wawaxata meta watewama wahetsie».
EXO 9:23 Muitsexi yu'itsɨ 'anukukweka muyuawitsie kaneititsera, Yawé yakatiniuyurieni tee mɨkaxɨrienikɨ naitsarie 'Ekipitu: tɨranari kaneyenɨ'ani, tee wiyerimatɨ mɨkaxɨrienikɨ meta merɨkariya.
EXO 9:24 'Anari kaniukawiye teematɨ, kanikaxɨrɨwekaitɨni taimatɨ. Naitsarie 'Ekipitu kwieyaritsie hatsuaku mɨkareyɨwekai hepaɨ katiniuyɨni.
EXO 9:25 Mɨkɨ tee wiyeriyari naime katiniwareuyehɨani mɨkɨ kwieyaritsie, teɨteri meta yeutari, yaxeikɨata mɨti'etsiekai meta kɨyexite.
EXO 9:26 Kutseheni mɨrakutewatsie xeikɨa tee wiyeriyari pɨka'ukaxɨri hakewa 'ixaheritsixi memetitekai.
EXO 9:27 Merikɨtsɨ Parahuni katiniwarutanɨ'airieni, Muitsexi 'Aruni mame mɨpaɨ katiniwarutahɨawe: —Ne hikɨ nepɨretima 'axakenemɨtiyuriene. Yawé 'aixɨa pɨtatsiyuriene, tame pɨta 'axatepɨteyurie neteɨterima teyunaitɨ.
EXO 9:28 Hawaikɨ tawariri nepɨkawakunuitɨani, nepɨwapitɨani memayekɨnekɨ, perutsɨ Yawé xekenetawawiri nehetsimieme, tɨranari meta tee wiyeriyari mɨkaxuawenikɨ.
EXO 9:29 Mɨpaɨ kaniutayɨni Muitsexi: —Kepauka nemayeyani 'ikɨ kiekaritsie, Yawé nenewieri nepɨpitɨani, 'anari kayuwatɨ tɨranari kanitamarimɨkɨ meta tee wiyerimatɨ, mɨpaɨ pepɨretimani kename kwie Yawé tipiinieya.
EXO 9:30 Matsi 'akuxi ne mɨpaɨ nepɨtimate, 'ekɨri meta te'uximayatamete, xepɨka'imakaxe Yawé Kakaɨyari 'akuxi.
EXO 9:31 Rinu 'iteɨriyari meta tsewara naitɨ putitsanixɨ, 'ariri tsewara pɨtihariximekai, meta rinu 'iteɨriyari puxutukairi.
EXO 9:32 Peru tɨriku xeikɨa pɨkaheuyewe, meta 'etsiperita tɨriku hepaɨ mɨ'anene, mɨkɨ pɨkamexɨa 'arike putixuxuawere.
EXO 9:33 Merikɨte Muitsexi 'anuyeyaka Parahuni mɨtiwa'aitatsie, nenewieri Yawé kaniupitɨani, 'anari kwitɨwa kaneunuani tɨranari meta tee wiyerimatɨ, kwiepa naitsarie.
EXO 9:34 Kepauka munierixɨ Parahuni kawiyekakuri tee meta tɨranari meta merɨkariya kayuwatɨ putamarixi. Mɨkɨ yaxeikɨata waɨkawa tiyurienetɨ patɨa, meta te'i'uximayatsiriwamete mepɨka'uyuwaɨri hepaɨna yu'iyaritsie.
EXO 9:35 Yaxeikɨa puyɨ Yawé Muitsexi kemɨrehɨawekai, ti'aitame Parahuni yu'iyaritsie pɨtse'ikai pɨkawarupitɨa 'ixaheritsixi memayekɨnekɨ.
EXO 10:1 Hikɨ Yawé Muitsexi mɨpaɨ katiniutahɨawe: «Kenemie Parahuni ketinetaxatɨa, netsɨ nepɨtiuyuri kayuwaɨriyame nemayeitɨa meta te'i'uximayatsiriwamete wa'iyari nemutseiriyaxɨa, yanemɨtiyurienikɨ wahɨxie 'inɨari mamariwawemekɨ.
EXO 10:2 'Ayumieme nepɨtiuyuri para pemɨtiwataxatɨanikɨ, 'aniwema 'ateukarima 'ekipitutari kenemɨtiwarukwinitɨa, 'inɨari kenemɨtiuwewi wahetsɨa. 'Ana mɨpaɨ mepɨtehetimani kename ne Yawé nehɨkɨ».
EXO 10:3 Muitsexi 'Aruni hamatɨa Parahuni hɨxie mekaniti'uni mɨpaɨ mekatenitahɨawe: «Yawé mɨpaɨ kanaineni, hepɨrayutsixi wakakaɨyari: “¿Kepaukake pepɨkatunumakeni nehetɨa? Keniwarupitɨa memayekɨnekɨ neteɨterima, para memɨnetsi'ayexeiyanikɨ.
EXO 10:4 Xɨka pekawarupitɨani memɨyehukɨ, 'uxa'a kwitɨwa 'utsikari mepɨtixuawere naitsarie 'akwietsie.
EXO 10:5 Yuwaɨkawatɨ mepɨtixuawere kwie pɨkayuhekɨaka, mepɨtekuxɨxɨani 'etsiwa mutiyuhayewaxɨ tee 'uxɨrieku, tinaime mepɨtekakɨme kɨyexite.
EXO 10:6 'Akiita mekanitahɨnikuni, te'uximayatamete wahetsɨa meta yaxeikɨa 'ekipitutari yunaime wakiita. Waɨkawa pɨtiyɨni kememɨkatenieriwawekai xepaapama kepauka kiekari memukamatsie hikɨ 'ena matimietsie 'akuxi”». Mɨpaɨ 'utayɨka Muitsexi ta'aurie kanaweni, kaniwayeyani Parahuni mɨtiwa'aitatsie.
EXO 10:7 Merikɨtsɨ Parahuni mɨtiwa'aitɨakai mɨpaɨ mekatenitahɨawe: —¿Kepaukake 'ikɨ pɨtihayewa tawiniyari hɨkɨtɨtɨ? Keniwarupitɨa memeuhunikɨ teɨterimama, para memeyexeiyanikɨ Yawé yukakaɨyari. 'Ekɨ xɨari 'atsipepɨkatimate mepɨte'uka'eniwa 'ekipitutari.
EXO 10:8 Parahuni katiniwarutanɨ'airieni, Muitsexi 'Aruni mame, mɨpaɨ katiniwarutahɨawe: —Xekenehu Yawé nenewieri xekenepitɨayu yukakaɨyari. Kemɨ'ane xemɨyehu yaxekeneteneutahɨawi.
EXO 10:9 Muitsexi mɨpaɨ kaniutayɨni: —Teyunaitɨ tekaniyehuni, temari meta 'ukirawetsixi tahetsɨamiemete yaxeikɨata mepɨtatsi'anuweiya 'ukitsi 'ukari taniwema, tatewamata muxatsi meta wakaitsixi, 'ixɨararitsɨ tekanewewikuni Yawé hetsiemieme.
EXO 10:10 Parahuni mɨpaɨ kaniutayɨni: —Yawé xehamatɨa keheyeikani, xɨka nexe'upitɨani xemɨyehukɨ xe'ɨitama yunaime meta xeniwema. Puyuhekɨa heitseriemekɨ xepɨka'utiyuane.
EXO 10:11 Kemɨtixenake mɨpaɨ pɨkatiyɨni. Xɨka xeniu Yawé xehetahɨawikuni 'ukitsi xeikɨa xekenehu. Muitsexi 'Aruni hamatɨa mekaniwayexɨriyani Parahuni mɨtiwa'aitatsie.
EXO 10:12 Merikɨte Yawé mɨpaɨ Muitsexi katiniutahɨawe: «'Amamá keneutatsera naitsarie 'Ekipitu, memɨ'axɨanikɨ 'utsikari naitsarie kwiepa mɨtixuawe memɨtekakɨmekɨ meta naime tee wiyeriyari mɨtiuhayewaxɨ».
EXO 10:13 Muitsexi yu'itsɨ kaniutatsera 'Ekipitu kwieyaritsie naime, Yawé mɨpaɨ katiniuyurieni mɨkɨ tukaritsie kaniu'ekakaitɨni meta tɨkarikɨ, mɨkɨ 'eka tau manatineikatsie patineikakai. Hutarieka mukatarixɨtsie 'eka kaniwa'atɨani 'utsikari,
EXO 10:14 naitsarie mekaniutixuawere mɨkɨ kwieyaritsie. Mekaniyumɨirekaitɨni hatsuaku mɨkareyuwekai hepaɨ, tawari mɨpaɨ pɨkatiyɨni.
EXO 10:15 Mepɨyumɨirekai tekɨmemete, kwiepa pɨka'akuhekɨakai mɨkɨ tinaime mekateniukuxɨxɨani, 'iteɨrite meta 'ikwaxite naime muhayewakai tee wiyeriyari, naitsarie 'Ekipitutsie tupiriyate tixaɨ mepɨkate'uhayewaxɨ.
EXO 10:16 Parahuni yumexɨitɨatɨ pɨtiwarutanɨ'airi Muitsexi 'Aruni mame, mɨpaɨ katiniwarutahɨawe: «'Axanepɨtiuyuri Yawé mɨxekakaɨyari hetsɨa, yaxeikɨata xehetsɨa.
EXO 10:17 Ne nepɨxewawirie xemɨneteheuyehɨwiriekakɨ ke'axanemɨtiuyuri tawarita, meta Yawé yukakaɨyari xekenetawawiri tsikere ne nekie makumawenikɨ 'etsiwa».
EXO 10:18 Hikɨ kepauka mɨwayetɨa Muitsexi Parahuni hɨxie, Yawé putawawiri Parahuni hetsiemieme.
EXO 10:19 Hikɨ Yawé 'eka kaniupata, meta karima puku'ekaxɨ tau makayuyuipiketsie 'atineka pɨwareuta'enitsitɨa 'utsikari, Haramara Mɨxeta hetsie pɨwareutaxɨri. Hikɨ naitsarie 'Ekipitu kwieyaritsie mepukumawerixɨ 'utsikari.
EXO 10:20 Peru yaxeikɨa Yawé Parahuni 'iyarieya putseiriyaxɨ, pɨkawarupitɨa memayekɨnekɨ 'ixaheritsixi teɨteriyari.
EXO 10:21 Yawé Muitsexi mɨpaɨ katiniutahɨawe: «'Aheima keneme'i muyuawitsie, naitsarie mɨkɨyɨrekɨ waɨkawa yemekɨ yumayɨinɨatɨ».
EXO 10:22 Muitsexi yumamatekɨ teikɨ kanemeni muyuawitsie, 'ana haika tukari kaniukuyɨre kwinimieme 'Ekipitu kwieyaritsie.
EXO 10:23 Mɨkɨ tukaritsie 'ekipitutari mepɨkayuxeiyakai, hawaikɨ meuyani pɨkayɨwekai. Matsi 'ixaheritsixi wakiita hekɨariya puxuawekai.
EXO 10:24 Hikɨ Parahuni Muitsexi katiniutanɨ'airieni, mɨpaɨ katinitahɨawe: —Xekeneuhuni Yawé xekenayexeiyani. Yuniwema xekeniwarawitɨtɨ, muxatsi meta wakaitsixi xekeniwaruku'eirieka.
EXO 10:25 Muitsexi mɨpaɨ katinitahɨawe: —Kamɨtsɨ 'ekɨ mawari temewewienikɨ petatiyetuirieni, Yawé takakaɨyari mawari temewewirienikɨ,
EXO 10:26 matsi tatewama tahamatɨa mekaniyehuni. Hawaikɨ xeikarutsayaritɨma pɨkayuhayewa. Tame mawari temewewienikɨ Yawé takakaɨyari hetsiemieme peuyewetse tatewama wahetsie temɨwaranayehapani, peru 'atsitepɨkatemate kemɨ'ane temɨwayurieni muwapaike teheta'axɨame.
EXO 10:27 Perutsɨ Yawé yaxeikɨa pɨtiuyuri Parahuni 'iyarieyatsie, mɨkɨ pɨkawarupitɨa memɨyehukɨ,
EXO 10:28 matsi karima Muitsexi mɨpaɨ pɨtiuhiwi: —Kenanuyeye'a. 'Amarima 'aixɨa tawarita 'uwa pepɨkahamieni nehetsɨa peye'anike. Kepauka tawarita nehetsɨa pemɨye'ani pekanimieriemɨkɨ.
EXO 10:29 Muitsexi mɨpaɨ katinita'eiya: —'Aixɨa pekanaineni. Hatsuakuri 'ahetsɨa nepɨkahayeneni.
EXO 11:1 Merikɨtsɨ Yawé Muitsexi mɨpaɨ katiniutahɨawe: «Tawarita nepenunɨ'airieni kwiniya Parahuni, yaxeikɨata 'ekipitutari wahetsiemieme, mɨpaɨ tiyɨyu pɨxepitɨani xemɨyehukɨ. Kepauka mɨpaɨ mɨtiyɨni, pɨxe'anuyeweiya yuheyemekɨ.
EXO 11:2 Mɨpaɨ ketiniwaretahɨawi 'ateɨterima yunaime, mɨkɨ 'ukitsi meta 'ukari meketewaretawawirieni, xe'aurie memekutetɨka huru meta pɨrata».
EXO 11:3 Yawé yakatiniuyurieni 'ekipitutari 'ixaheritsixi 'aixɨa memɨtewaxeiyakɨ, Muitsexi matsi naitsarie 'aixɨa pɨtimatiwakai, Parahuni te'uximayatametemama meta 'aixɨa mepɨte'ixeiyakai.
EXO 11:4 Muitsexi mɨpaɨ katiniwarutahɨawe: «Yawé mɨpaɨ kanaineni: “Tɨkari hixɨapa 'Ekipitu naime nepayekexiya,
EXO 11:5 yunaitɨ tɨɨri mexɨakate 'ekipitutari mekanikwikuni: Parahuni matɨarieya hikɨ 'uwenitsie mayerɨni hetsie metsutɨtɨ murinatsie ti'uximayatame nu'ayatsie paitɨ me'u'atɨ, yaxeikɨata watewama mexɨakate memutinunuiwaxɨ.
EXO 11:6 Naitsarie 'Ekipitu kwieyaritsie hiwerika putixuawere, kemɨkatiyɨwekai pɨtiyɨni.
EXO 11:7 Peru 'ixaheritsixi wahetsɨa tsɨkɨ pɨkahetaha'ani. Mexɨakate teɨteri meta watewama tɨma mepɨkatekwini. 'Anari mɨpaɨ xepɨtehetimani Yawé yɨkɨmeteyuxexeiyame pɨwarayeitɨani 'ixaheritsixi 'ekipitutari wahamatɨa.
EXO 11:8 Yunaitɨ mɨkɨ 'ahetsɨa te'uximayatamete mekanenanukuwaukuni, metitunuma'utɨ mɨpaɨ mepɨnetetatsuariwiya: ‘'Ari keneumieni, yunaime pewarawitɨtɨ keyupaɨmetɨ mematsi'aweiya.’ Kepauka mɨpaɨ mɨtiyɨni ne nekaniyemieni”». Hikɨ Mutsexi waɨkawa ha'atɨ kaniwayeyani Parahuni mɨtiwa'aitatsie, mɨpaɨ 'utaitɨ.
EXO 11:9 Yawé Muitsexi mɨpaɨ katiniutahɨawekaitɨni kename Parahuni kahenu'enienikekai, meta kename mɨpaɨ matsi reuyewekai, Yawé mariweme mɨtiyurienikɨ 'Ekipitu waɨkawamexɨa.
EXO 11:10 Muitsexi 'Aruni matɨa 'inɨari 'ikɨ mɨmamariwawe mepuwewi Parahuni hɨxie, peru Yawé 'iyarieya putseiriyaxɨ, mɨkɨ kwieyaritsie memayekɨne 'ixaheritsixi pɨkawarupitɨa.
EXO 12:1 Merikɨtsɨ 'Ekipitu kwieyatrisie Yawé katiniwarutaxatɨani Muitsexi 'Aruni mame. Mɨpaɨ katiniwarutahɨawe:
EXO 12:2 «'Ikɨ metseriyari xehetsiemieme mauyewetse yemekɨ pɨhɨkɨtɨni, 'ikɨ mexɨakame metseriyaritsie xeiwiyari 'aye'axekaku.
EXO 12:3 Yunaime 'ixaheritsixi wahamatɨa xeketenetixata, mɨpaɨ xeketeniwaretahɨawi 'ikɨ metseriyaritsie tamamata tukariyaritsie yunaitɨ xeinuiwari memukutetɨkatsie yuxexuime muxatsi mepɨwakwini.
EXO 12:4 Xɨka xeme hipatɨ xekayumɨireni xeime muxa xemitaxɨnikɨ xekayɨwaweniri, pɨyɨweni matsi mɨwarumini 'ahurawa kiekatari yu'iwama, me'itaxɨweme teɨteri kememɨyupaɨmeni yuxexuitɨ mekeheitatuixɨani me'itixɨwaweme.
EXO 12:5 Tewaxi xeiwiyari mepexeiyatɨkani, tsepa muxa ya tsipu 'aixɨa 'anekame.
EXO 12:6 Mɨkɨ mepɨwa'ɨwiyani, tamamata heimana nauka tukari 'ikɨ metseriyaritsie, mɨkɨ tukaritsie mepɨwatimawa 'ixaheritsixi taikai kuyɨreyu.
EXO 12:7 Meta xuriya xepɨkwewieni yapapaɨmeme, xemitiwirienikɨ kitenie kɨyeyaritsie meta manuyekatsie, kiita hakewa muxa xemetakwani.
EXO 12:8 Mɨkɨ tɨkaritsie kwitɨwa xepitikwani wai warɨkarietɨkaime, tupiriya matsiwi meta paa mɨkakuxanariyarietɨka matɨa.
EXO 12:9 Hawaikɨ yuime xepɨkakwaka meta 'etsariekame, matsi pɨta warɨkariekame tɨtsie, mu'uya naime 'ɨkateya mamateya meta kwinuriteya naime.
EXO 12:10 Tixaɨtɨ xepɨkatekuhayeikawani. Xɨka xe'itatexieni, 'uxa'arieka xekanitataiyakuni.
EXO 12:11 Mɨkɨ muxa mɨpaɨ xekatenikwaikuni: yukamixa xehanakatɨtɨkaitɨ hixɨapa xehayɨhɨatɨkaitɨ, yukakaitsie xe'u'utɨ, 'itsɨ xe'u'ɨtɨ meta mexɨima xekanitakwaikuni. 'Ikɨ Patsikwa Yawé hetsiemieme kanixatsiwani.
EXO 12:12 »Mɨkɨ tɨkariyaritsie 'Ekipitu kwieyaritsie nekaniye'amɨkɨ, yunaime tɨɨri mexɨakate nekaniwakwimɨkɨ, yaxeikɨata tewaxi meta nekaniwaranutaxɨrimɨkɨ kakaɨyarixi 'Ekipitu miemete, ne Yawé nekanihɨkɨtɨni.
EXO 12:13 Xuriya kani'inɨaritɨkamɨkɨ kemɨ'ane kiita xemayetetɨkani, kepauka nemixeiya 'ateewa nepuyeyani. Hikɨ kepauka nemɨwakwini 'ekipitutari, nixewitɨ kwiniya xehetsie pɨkaye'ani mɨtiyumemiwa.
EXO 12:14 »'Ikɨ tukari 'aitsikayarikɨ xekena'eriwani yuheyemekɨ: 'Ikɨ 'ixɨarari kanihɨkɨtɨni Yawé hetsiemieme, 'uxa'atɨniwarie xeniwema mɨpaɨ meketeyurieka.
EXO 12:15 'Atahuta tukari paa mɨkakuxanariyarie xekanikwakakuni, xeme mexɨakame tukaritsie tikuxanariyame yukiita xekaniwayewiwikuni. Kemɨ'ane mitikwani heiwa mɨkɨ 'atahuta tukaritsie mɨkɨ 'ixaheritsixi watsata kananuyehɨiyamɨkɨ.
EXO 12:16 Mexɨakame tukaritsie 'ixɨarari patsiekamekɨ xepuyukuxeɨrieni, meta tawari 'atahuta tukaritsie. Mɨkɨ tukaritsie tixaɨtɨkɨtɨma xepɨkate'uximayaka, xeikɨa pɨyɨweni yu'ikwai mɨtiukawewieni yuxexuitɨ ketipaɨmeme xemɨtekwa'a. Mɨkɨ xeikɨa xemɨtewewieka pɨyɨweni.
EXO 12:17 »Paa mɨkakuxanariyarietɨka 'ixɨarariyari xekaniwewiekuni, mɨkɨ tukaritsie nemɨxe'ayewitɨkɨ 'Ekipitu yaxeyupapaɨmeme. 'Inɨari niukiyari mɨpaɨ paineni, 'uxa'atɨniwarie xeniwema mɨpaɨ mepɨteyurieka mepetinenetɨwani mɨkɨ tukaritsie.
EXO 12:18 Paa mepɨtikwani mɨkakuxanariyarietɨka tamamata heimana nauka tukariyaritsie mexɨakame metseriyaritsie taikai me'itsutɨame xeitewiyari heimana xewi taikaiyaritsie 'utiniereme, mɨkɨ metseritsie.
EXO 12:19 'Atahuta tukari xepɨkaheixeiyani tikuxanariyame yukie. Kemɨ'ane tikuxanariyamekɨ mɨtiukwani, tsepa 'ateewapai kiekame yatɨni 'ixaheri tewiyari mɨhɨkɨ, mɨkɨ 'ixaheritsixi wahamatɨa pɨkayuhayewani.
EXO 12:20 Tixaɨtɨ tɨma xepɨkatekwaka tikuxanariyame mɨtinɨ'ɨ. Tsepa hakewa xeme'uwani, xepeitikwani paa kakuxanariyariekame».
EXO 12:21 Hikɨ Muitsexi kaniwaruta'inieni yunaime 'ixaheritsixi wa'ukiyarima mɨpaɨ katiniwarutahɨawe: «Yapauka yukuraruta xekenehu muxatsi xekeniwaranuyehapani yutɨɨriyama wahetsiemieme, xekeniwarukuya Patsikwa 'ixɨarariyari xemɨwewienikɨ.
EXO 12:22 Xeimanukuyarikɨ tupiriya xekeneutihawiyaka muxa xuriyayakɨ yukii kitenieyaritsie matiwetɨkatsie xekeneutiwiri meta manuyekatsie, 'ana xewitɨ pɨkahewayeyeikani 'uxa'ariekake ximeri.
EXO 12:23 Kepauka Yawé, mana muyeyani kiekaritsie mɨwakwinikɨ 'ekipitutari. Mɨkɨ pixeiya kitenie xuriyakɨ ra'utɨkaime 'ana yateewa puyeyani, 'ana pɨka'ipitɨani yunɨ'ari mɨtiyumemiwa, muwa pɨkaheutahani mɨxekwinikɨ.
EXO 12:24 »Yaxeketenekakɨni 'ikɨ kenemɨtixekɨhɨawe. 'Ikɨ 'inɨari niukiyari yuheyemekɨ pɨhɨkɨtɨni xehetsiemieme meta xeniwema wahetsiemieme.
EXO 12:25 Kepauka kwiepa xemeta'axɨani kwie Yawé mɨxexatɨatsie, xeme mɨpaɨ xepɨtehekahuni 'ikɨ yeiyaritsie.
EXO 12:26 Kepauka memɨxeku'iwawiyani xeniwema: “¿Ketita ti'inɨariyari xeme xehetsiemieme 'ikɨ yeiyari?”,
EXO 12:27 mɨpaɨ xepɨtewata'eiya: “'Ikɨ mawari Patsikwa 'ixɨarariyari Yawé hetsiemieme pɨhɨkɨ, kepauka 'Ekipitu 'ixaheritsixi wakii 'aurie puyetɨa yateewa. Pɨwarukwi mɨkɨ 'ekipitutari, peru tame taniwema pɨwarutawikweitsitɨa”». Mɨpaɨ mete'u'enanaka 'ixaheritsixi Yawé hɨxie mekaniukahɨxima'uni,
EXO 12:28 hikɨ yamekatenikakɨne Yawé Muitsexi meta 'Aruni kemɨtiwarahɨawekai.
EXO 12:29 Hikɨ tɨkari hixɨapa Yawé kaniwarukwini yunaime tɨɨri mexɨakate mana kiekatari, yunaitɨ yaxeikɨa katiniwaruyurieni meta Parahuni nu'aya meta pɨretsutsixi waniwema mexɨakate, meta tewaxi waniwema mexɨakate.
EXO 12:30 Yunaitɨ 'Ekipitu kiekatari mepanuku'ui mɨkɨ tɨkaritsie, yaxeikɨa Parahuni meta te'i'uximayatsiriwamete, waɨkawa putixuawerixɨ hiwerika mɨkɨ kiekaritsie. Hawaikɨ pɨkahekumawekai 'ekipitutari wakiita naitsarie mepuxuawekai mekwikwi'itɨ.
EXO 12:31 Hikɨ mɨkɨ tɨkaritsie kwitɨwa Parahuni pɨtiwarutanɨ'airi Muitsexi 'Aruni mame, mɨpaɨ pɨtiwarutahɨawixɨ: «Xekeneuhuni 'ateewapai. Xekenayekɨni nekiekaritsie xeme meta 'ixaheritsixi. Yawé xekenayexeiyani, xemɨnetekɨhɨawe hepaɨ.
EXO 12:32 Xeketeniwara'arietɨ yumuxatsi meta yuwakaitsixi xemutiyuane hepaɨ, peru 'ariri xeiya xekeneuhuni, xɨka mɨpaɨ xe'uyɨni ne 'aixɨa nekani'itɨariemɨkɨ».
EXO 12:33 'Ekipitutari, mepɨwamexɨitɨakai 'ixaheritsixi mɨkɨ kwieyaritsie memayekɨnekɨ. Mɨpaɨ meputiyuanekai: «Xɨka mekahekɨne tame tekanikwikuni».
EXO 12:34 Hikɨ 'ixaheritsixi, mepikuha'aritɨa yutɨxi 'akuxi kakuxanariyariekame, me'iti'eimaka yu'ixurikitekɨ, mekaneitɨni.
EXO 12:35 Meta, 'ekipitutari mepɨte'utawawiyarie Muitsexi kemɨtiwaruta'aitɨakai 'ixaheritsixi, hurukɨ meta pɨratakɨ mɨtiwewiyatɨka meta 'ixurikite 'aixɨa mɨti'anene mekateniwarutawawirieni.
EXO 12:36 Yawé 'ekipitutari yapɨtiwaru'iyaritɨa 'ixaheritsixi memɨwatinenimayatakɨ, mɨkɨ mepɨtewarumi ketita memɨte'utawau. Mɨpaɨ 'ixaheritsixi 'ekipitutari mepɨtewarunawairi tinaime.
EXO 12:37 'Ixaheritsixi Xamɨtsexi mekanayekɨne, Tsukuti hepa mekanekɨne. Meka'inɨaritɨ 'ukari meta tɨɨri, 'ataxewi tsienituyari miriyari (600.000) mekaniyupaɨmekaitɨni 'ukitsi yɨ'ɨkama memuhukai.
EXO 12:38 Mɨkɨ meta wahamatɨa mekanayekɨne yuwaɨkawatɨ hipatɨ teɨteri meta yumɨiretɨ tewaxi, muxatsi meta wakaitsixi.
EXO 12:39 'Ekipitu tɨxi memeiyetɨkai mɨkɨkɨ paa mɨkakuxanariyarietɨka mekaniutiwewieni, mɨkɨ tɨxi 'akuxi pɨkatsinakai. Memayeweiyariekɨ 'Ekipitu, 'ayumieme tukari mepɨkahehɨi, yu'ikwai memekawewienikɨ.
EXO 12:40 'Ixaheritsixi teɨteriyari 'Ekipitu mepɨtitekai, nauka tsienituyari heimana xeitewiyari heimana tamamata wiyari.
EXO 12:41 Merikɨte mɨpaɨ paɨmetɨ wiyari 'aye'aku Yawé kaniwarayewitɨni yuteɨterima 'Ekipitu.
EXO 12:42 Mɨkɨ tɨkaritsie Yawé pɨkakutsukai 'ixaheritsixi wa'ɨwiyatɨ 'Ekipitu mɨwarayewitɨnikɨ. 'Ayumieme xemeta nuiwarite xepɨkakutsuni temanutihutsie mɨpaɨ xeketeneyurieka, mɨkɨ tɨkariyaritsie xehe'eriwatɨ meripaitɨ kemɨtiuyuri Yawé xehetsiemieme.
EXO 12:43 Yawé mɨpaɨ katiniwarutahɨawe Muitsexi 'Aruni mame: «Mɨpaɨ xekatenikakɨnikuni Patsikwa 'ixɨarariyari hetsiemieme: »Nixewitɨ teewatanaka mana pɨkatikwaka.
EXO 12:44 »Mana memɨtekwaka mekaniyɨwaweni te'a'uximayatsiriwamete 'atuminikɨ pemɨwarutinanai, peru xɨka xitekiya 'inɨariyari pewaruwewirieni meripaitɨ.
EXO 12:45 »Nixewitɨ ti'uximayatame mɨtikwaka pɨkayɨwe yapaɨmexɨa mana muta'axe, meta ti'uximayatame tumini mɨ'iwane.
EXO 12:46 »Patsikwa 'ixɨarariyari kiita kanikwaiwani, meta pɨkayɨwe takwa wai 'etsipeme mɨwayetuni. Yaxeikɨata nixeime 'ume xepɨka'anumurani xemimawa 'umeyari.
EXO 12:47 »Yunaitɨ 'ixaheritsixi peuyewetse memiwewieni Patsikwa 'ixɨarariyari.
EXO 12:48 »Yunaitɨ teewanarixi xehamatɨa memutetɨka xɨka xewitɨ Patsikwa 'ixɨarariyari heuwewimɨkɨni Yawé hetsiemieme, kaniyɨweni meri yuniwema xitekiya 'inɨariyari mɨwawewirieni yunaime 'ukitsi, 'anake pɨyɨweni Patsikwa 'ixɨarariyaritsie mɨtiukwani xekwieyaritsie munuiwakametɨni hepaɨ. »Xɨka ka'inɨaritɨarieka xitekiyakɨ pɨkayɨwe mɨtikwaka.
EXO 12:49 »'Ikɨ 'inɨari niukiyari 'ena nuiwakate pɨwahetsiemiemetɨni meta teewanarixi xehamatɨa memɨtitei».
EXO 12:50 Yunaitɨ 'ixaheritsixi yamepɨtekakɨ Yawé Muitsexi 'Aruni mame kemɨtiwarahɨawekai.
EXO 12:51 Kwitɨwa mɨkɨ tukaritsie Yawé pɨwarayewitɨ 'ixaheritsixi 'Ekipitu kwieyaritsie, meyumɨireme.
EXO 13:1 Merikɨtsɨ Yawé Muitsexi mɨpaɨ katiniutahɨawe:
EXO 13:2 «Mepatsiekame keniwarayeitɨa matɨari memutinunuiwaxɨ. Nehetsɨa mekanimiemetetɨni yunaitɨ mexɨakate 'ixaheritsixi meta xetewama matɨari 'ukitsi memɨtinunuiwa».
EXO 13:3 Muitsexi mɨpaɨ katiniwarutahɨawe yunaime 'ixaheritsixi: «Xekena'eriwani 'ikɨ tukari kepauka xemayekɨ 'Ekipitu, hakewa xemɨtehe'uximayakai xekatehepitɨarietɨ meta hakewa Yawé mɨxehayewitɨ yutɨrɨkariyakɨ yatiyurienetɨ. Paa xepɨkakwaka kuxanariyariekame.
EXO 13:4 Xeme hikɨ xekanayekɨnikuni, 'ikɨ weiya metseriyaritsie.
EXO 13:5 Mɨkɨ metseriyaritsie meta xekaneiwewikuni 'ixɨarari, kepauka Yawé mɨxeheta'atɨani kwie xe'ukiyarima mɨwaruxatɨatsie kename wayetuirieni. Kanixatsiwani kananeutsixi wakwietsie, meta hetitsixi, 'amuxeutsixi, heweutsixi meta kewutseutsixi: kwiepa hakewa retsi waɨkawa meta xiete maxuawe.
EXO 13:6 'Atahuta tukari xekanitikwaikuni paa kakuxanariyarietɨkaime, 'atahutariekatsie tukari 'ixɨarari Yawé hetsiemieme xepɨwewieni.
EXO 13:7 Xemanu'uwa pɨtiumaweni tixaɨtɨ tikuxanariyame tinɨtɨ. Hawaikɨ yemekɨ tikuxanariyame xepɨkahexeiyani. Xekanitikwaikuni paa kakuxaxanime mɨkɨ 'atahuta tukari.
EXO 13:8 »Mɨkɨ tukaritsie yuniwema mɨpaɨ xepɨtewatahɨawe: “'Ikɨ mɨya temɨteyurie Yawé hetsiemieme tekateniyurieka, kemɨtiuyuri tahetsiemieme 'Ekipitu kepauka temayekɨtsie”.
EXO 13:9 'Ikɨ pɨ'inɨaritɨni xehetsiemieme xemamatsie ya xekanata pɨxehaye'eritɨwani kename, Yawé niukieya xeteta payekani mɨkɨ 'Ekipitu mɨxe'ayewitɨ, waɨkawa yutɨrɨkariyakɨ tiyurienetɨ.
EXO 13:10 Xeiwiyari 'anuyeyeikakaku, mɨkɨ tukaritsie 'ikɨ 'inɨari niukiyari xepaye'atɨwani.
EXO 13:11 »Kepauka Yawé mɨxeheutahatɨani kananeutsixi wakwietsie meta xɨka 'ari xeyetuirieni, kemɨtixe'utahɨawixɨ xeme meta xe'ukiyarima,
EXO 13:12 xekaniyetuiriekuni yunaime mexɨakate meta tewaxi waniwema matɨari miemete 'ukitsi, mɨkɨtsɨ Yawé hetsiemieme mekanihɨkɨtɨni.
EXO 13:13 Puxu niweya mexɨakame mitawikweitsitɨani pɨyɨwe xeime muxakɨ, xɨkate ka'utawikweitsitɨarieni, yukɨipitɨa pɨwamurarieni. Xemeta yaxeikɨa yunaitɨ yuniwema mexɨakate meta yunuiwarima xemɨwatawikweitsitɨani peuyewetse.
EXO 13:14 »'Uxa'atɨni warie, kepauka memɨxeteta'iwawiya xeniwema: “¿'Ikɨta tita ti'inɨariyari?”, mɨpaɨ xepɨtewatahɨawe: “Yawé waɨkawa mariweme tiyurienetɨ pɨtatsi'ayewitɨ 'Ekipitu kwieyaritsie hakewa waɨriyarika temɨtehe'aitɨariekai.
EXO 13:15 Kepauka Parahuni ti'aitame mɨkatatsihepitɨa temayekɨnekɨ, Yawé tɨɨri mexɨakate pɨwarekwi yunaime 'ekipitutari, yaxeikɨata watewama mexɨakate. 'Ayumieme Yawé tatewama mexɨakate 'ukitsi tepitimawiriwa, mɨpaɨ taniwema mexɨakate tepɨtewarutawikweitsitɨwa”.
EXO 13:16 Mɨkɨ pɨ'inɨaritɨni xemamatsie yatɨni xekanata, Yawé mɨxe'ayewitɨ 'Ekipitu yutɨrɨkariyakɨ tiyurienetɨ».
EXO 13:17 Kepauka Parahuni mɨwarupitɨa memɨyehukɨ 'ixaheritsixi, Kakaɨyari pɨkawarewitɨ piritsiteutsixi wakwietsie, mana matsi pehurakai, mɨpaɨ pɨtiu'eri: «Xɨka mehetakwi'iwa mepetimamani mepeyuti'iyaritɨani 'Ekipitu mepakunuaxɨani yu'utɨma».
EXO 13:18 'Ayumieme pɨwarewitɨ makumawetsie 'ateewapai watatunitsitɨanike, mekanekɨne Haramara Mɨxeta hepatsie. 'Ixaheritsixi mekanayekɨne 'Ekipitu memeuyukwiyuni hepaɨ meteheuku'utɨ.
EXO 13:19 Muitsexi Kutse 'umeyariteya kane'ɨni, kemɨtiwaruhɨritɨakai 'ixaheritsixi teɨteriyari. Kutse mɨpaɨ kaniutayɨkaitɨni: «Mɨpaɨ xeketenemaika Kakaɨyari kanayenemɨkɨ xeparewienike. Kepauka mɨpaɨ mɨtiyɨni, ne'umete xekenanu'ɨi».
EXO 13:20 'Ixaheritsixi mekanayekɨne Tsukuti mɨrakutewatsie, 'Etami mekaniu'axɨani, makumawe mɨyetsutɨtsie.
EXO 13:21 Tukarikɨ, Yawé kaniumiekatɨni wahɨxie haiwitɨritɨtɨ, 'a'uwetɨ waxeitsitɨatɨ huye kemɨreuyune, yɨwikɨtata pɨwahekɨariwiyakai tai 'a'uwetɨ panuyekatei xawatɨtɨ. 'Ayumieme mepɨyɨwawekai memuhunikɨ tukarikɨ meta tɨkarikɨ.
EXO 13:22 Hatsuaku pɨkatiuhayewaxɨ hai 'amuyekatei teɨteri waruwitɨximetɨ tukarikɨ meta tai 'amuwekai yɨwikɨta waruwitɨximetɨ.
EXO 14:1 Yawé Muitsexi mɨpaɨ katiniutahɨawe:
EXO 14:2 «'Ixaheritsixi mɨpaɨ ketiniwarutahɨawi meke'ukunuaxɨani Pi-'Akiruti hɨxie mekekuyaxe, Mikiruri meta haramara wahixɨapa. Haramara tetsita mekekuyaxe, Wahari-Tsepuni hɨxie.
EXO 14:3 Parahuni mɨpaɨ pɨti'erieni: “'Ixaheritsixi mekaneuyexɨrieni mɨkɨ kwieyaritsie. Makumawe kaniwakunaka”.
EXO 14:4 Ne, nepipitɨani 'iyarieya tse'ime Parahuni, mɨxe'anukuweiyakɨ. Peru ne mariweme nepaneyeitɨani Parahuni hɨxie meta kuyaximama wahɨxie. 'Ana 'ekipitutari mɨpaɨ mepɨtehetimani kename ne Yawé nehɨkɨ». Hikɨ mɨpaɨ mekaniuyɨni 'ixaheritsixi.
EXO 14:5 Kepauka 'Ekipitu ti'aitame mɨretima, kename teɨteri mehekɨnekai, hikɨ mɨkɨ meta te'i'uximayatametemama mepuyupataxɨ, mɨpaɨ meputiyua 'ixaheritsixi wahetsiemieme: «Neuxei ketete'uyuri. ¿Titayari tetewarupitɨa 'ixaheritsixi memɨyehukɨ meta yu'uximayatsika memuku'eirienikɨ?»
EXO 14:6 Merikɨte 'ana kwitɨwa Parahuni katiniuta'aita kaxetaya mukuha'aritsienikɨ meta kuyaximama memuyukuha'aritɨanikɨ,
EXO 14:7 kaniwaruta'inieni 'ataxewime tsienituyari kaxetate 'aixɨa mɨ'anene, meta hipame kaxetate 'Ekipitu mieme, xexuitɨ kaxetatetsie kuyaxi mekanati'utɨkateitɨni.
EXO 14:8 Yawé Parahuni 'iyarieya kaniutseiriya 'Ekipitu ti'aitame, para 'ixaheritsixi mɨwaranukuweiyakɨ, mɨkɨ mekaniuhukaitɨni mete'ayu'iwake meyu'erietɨ.
EXO 14:9 Yunaitɨ Parahuni kuyaximama mekaniwaranukuweiya, kawayutsixi wahetsie me'utetɨ, kaxetate kuyaxa miemete mewaruhapatɨ, hikɨ 'ixaheritsixi mekaniwaranuku'axe haramara tetsita paitɨ mekaniwarutaxeiya, hehurakaku Pi-'Akiruti meta Wahari-Tsepuni hɨxie.
EXO 14:10 Parahuni kanaye'aximekaitɨni. Kepauka 'ixaheritsixi memɨyu'ɨwiyaxɨ 'ekipitutari mepɨwaruxei 'ari hura me'ahukame, hikɨ waɨkawa mekaniutimamani, Yawé mekaniutahɨawe.
EXO 14:11 Hikɨ mɨpaɨ Muitsexi mekateniutatieni: —Kamɨtsɨ karexɨawekai 'Ekipitu kwie temekateukienikɨ, ¿titayari petareyewitɨ 'enapaitɨ makumawetsie temɨkwinikɨ? ¿Kehapaɨtɨtɨ pepɨtatsiyuriene?
EXO 14:12 Yatepaitɨkatei 'Ekipitu paitɨ: “Ketaneuhayewa. Pɨtatsinake 'ekipitutari temɨtewa'uximayatsirieka”. Matsi 'aixɨa pɨ'anekai temɨteware'uximayatsiriekakɨ, 'ena temɨkakwinikɨ makumawetsie.
EXO 14:13 Muitsexi mɨpaɨ kaniutayɨni: —Xepɨkaheumamaka. Xeme kayuwatɨ xeketeneteni, hikɨ kwitɨwa xemunenierixɨ xepɨhɨkɨtɨni, Yawé wikweitsitɨarika kemɨrexeiya xehetsiemieme. Hikɨ mɨkɨ 'ekipitutari xemɨwaxeiya hatsuakuri tawarita xepɨkawaxeiya.
EXO 14:14 Xeme kayuwatɨ xekeneumaka, Yawé pɨta puyutamieni xehetsiemieme.
EXO 14:15 Peru Yawé mɨpaɨ Muitsexi katiniutahɨawe: «¿Ketitayari ne penerahɨawe? 'Ixaheritsixi mɨpaɨ ketiniwarutahɨawi memayekɨnekɨ.
EXO 14:16 'Ekɨta 'a'itsɨ keneutatsera haramara heima, haa kananutayepierimɨkɨ mana memukɨnekɨ 'ixaheritsixi 'ayewakikaku.
EXO 14:17 Ne 'ekipitutari wa'iyari nepɨtseiriya para memɨxe'anukuweiyakɨ. Ne mariweme nepɨtiyurieni. Parahuni kuyaximama, kaxetate meta teɨterimama memutei nepɨwareuyehɨani.
EXO 14:18 Kepauka mɨpaɨ nemɨtiyurieni, 'ana 'ekipitutari mɨpaɨ mepɨtehetimani kename ne Yawé nehɨkɨ».
EXO 14:19 Hikɨ niuki tuayame Kakaɨyari hetsɨa mieme 'ixaheritsixi wahɨxie mumiekai, ta'aurie kanaweni wa'utɨma pɨta kaniyuhayewa. Yaxeikɨata kaniuyɨni hai 'amuwekai wa'utɨma pɨta kaniutakeni,
EXO 14:20 'ekipitutari wahɨxie tai puke 'ixaheritsixi wahekɨariwiyatɨ. Mɨkɨ tɨkaritsie mɨkɨ hai hipame wahetsiemieme pɨyɨriyatɨkai hipame wahetsiemiemeta pɨhekɨariyatɨkai, 'ayumieme mɨpaɨ ti'anekaku mepɨkayɨwawekai memuyuxeiyanikɨ.
EXO 14:21 Hikɨ Muitsexi yu'itsɨ kaneutatsera haramara heima, Yawé 'eka kaneyenɨ'ani mɨkɨ tɨkarikɨ tau manatineika mieme karima kaniu'ekakaitɨni 'anari haramara kananutayepiere, ya'atayeutɨ heutanetɨ kanayewani, kwie wakitɨ kanahekɨare. Haa haramara kananutayepiere,
EXO 14:22 'ixaheritsixi mana mekaniukɨne kwie wakimetsie me'uhutɨ. Haramara kaniti'ukaitɨni 'ixumeri hepaɨ watserieta meta wa'utata.
EXO 14:23 Hikɨ 'ekipitutari mekaniwaranukuweiya. Yunaitɨ memutekai kawayutsixi wahetsie meta kaxetatetsie, yunaitɨ Parahuni hetsɨamiemete mekanekɨneta wa'utɨma.
EXO 14:24 Merikɨte kepauka mɨkahekɨarirɨmekairi, Yawé kaniwaruxeiya kuyaxi 'ekipitutari, tai haikɨriyaritsie paitɨ meta haiwitɨritsie paitɨ, hikɨ 'ana mɨkɨ 'axapɨwaruyuri:
EXO 14:25 mɨpaɨ katiniuyurieni, wakaxetate pukahapawakai mɨpaɨ tiuyurieku 'uxi mepɨyɨakai mepɨka'ayekɨniwawekai. Hikɨ 'ayumieme mɨpaɨ 'ekipitutari mekateniutihiwatɨkɨne: «Tepɨwahayewa 'ixaheritsixi, Yawé puyumiene wahetsiemieme, pɨtatsikwine».
EXO 14:26 Hikɨ Yawé mɨpaɨ Muitsexi katiniutahɨawe: «'Amamá keneutatsera haramara heima, para haa mɨwareuyehɨanikɨ 'ekipitutari meta wakaxetate metatsierie teɨteri memutei».
EXO 14:27 Merikɨte Muitsexi yu'itsɨ kaneutatsera haa heima, 'ari katarirɨmekaku, hikɨ haramara 'aixɨa kaniuyɨni matɨari hepaɨ. 'Ekipitutari me'uyuta'unaku yu'utɨma haa puwaranukunakixɨ, mɨpaɨ Yawé pɨtiwareuyehɨa haramara tetɨata.
EXO 14:28 Haramara heitserie 'anuyemareku, kaniwarukayunitɨani kaxetate meta teɨteri memutei Parahuni hetsɨa miemete, meta yunaitɨ kemɨ'ane 'ixaheritsixi memɨwaranukuweiyakai. Mɨkɨ nixewitɨ pɨka'utawikwei.
EXO 14:29 Peru 'ixaheritsixi teɨteriyari mekananukɨne kwie wakimetsie haramaratsietɨtɨ, mɨkɨ wahetsiemieme haa 'ixumeriyari kanihɨkɨtɨkaitɨni watserieta meta wa'utata.
EXO 14:30 Mɨkɨ tukaritsie Yawé mɨpaɨ katiniwaruwikweitsitɨani 'ixaheritsixi 'ekipitutari mewakwikukaku. 'Ixaheritsixi 'ekipitutari wakaxarite mekaniuxeiya haramara tetsitapaitɨ metiheikame.
EXO 14:31 Mɨya mete'uneniereka 'ixaheritsixi, yutɨrɨkariyakɨ kemɨtiuyuri 'ekipitutari wahetsie, mɨkɨ mekaniutimamani Yawé yuri mekateniuta'eririeni, yaxeikɨata Muitsexi 'iparewiwameya.
EXO 15:1 Hikɨ Muitsexi meta 'ixaheritsixi xeime kwikari mekaniutakwika Yawé hetsiemieme, mɨpaɨ kananuyɨneni: Yawé nepɨtanɨawa, mariwemekɨ mɨrayu'iwaxɨkɨ haramaratsie pɨwareukaxɨri kawayutsixi meta teɨteri memutekai.
EXO 15:2 Yawé pɨnetɨrɨkariya meta pɨnekwikari, mɨkɨ pɨnetsiwikweitsitɨwame. Mɨkɨ pɨnekakaɨyari, nepinɨawani, mɨkɨ nepaapa Kakaɨyarieya pɨhɨkɨ, 'ayumieme 'aixɨa nepaineni hetsiena mieme.
EXO 15:3 Yawé kuya meuyutamiewe kanihɨkɨtɨni, Yawé katinitewaka.
EXO 15:4 Yawé haramaratsie kaniwareukaxɨrieni, Parahuni kaxetatemama meta kuyaximama. Te'uximayatamete 'ekipitutari 'aixɨa memɨtekahu paratsiyuta mekaniukayunixɨani Haramara Mɨxeta hetsie.
EXO 15:5 Haramara 'amatiyewatsie mekaniukayunixɨani, meukatewatsiepaitɨ tetexi hepaɨ mekaniukayunixɨani.
EXO 15:6 Yawé, 'atɨrɨkariya pepuhekɨataxɨ mariwemekɨ, Yawé, memɨtatsi'aye'uniekai pepɨwarutitsanaxɨa.
EXO 15:7 Mariwemekɨ pepɨtiuyuri pepɨwaruka'unaxɨ 'aneneɨkixiwima, waɨkawamekɨ pepuyeha'a, xatsi hepaɨ xeikɨa mepɨte'utai.
EXO 15:8 Xei 'iiyayarikɨ pepɨtiuyuri, haa manutayepierekɨ, hamewari kayuwatɨ pɨtiu'ui 'ixumeri hepaɨ pɨtiyuxexeiyakai, haa pɨkakuyuatɨkatei tetɨata paitɨ.
EXO 15:9 Taneɨkixiwima mɨpaɨ meputiyuanekai: «Hikɨmɨ tepɨwaruweiyani, nepɨwaranuku'axe. Tinaime tepɨtewarenawairieni wapiini, waɨkawa temɨtehexeyanikɨ. Ta'ixipara tepɨwatihapaxɨani tamamakɨ tepɨwarekwini».
EXO 15:10 Peru 'ekɨ xeimieme pewaruhɨtsieku haramara pɨwareukakwai, mepukayunixɨa tepɨa mahete hepaɨ.
EXO 15:11 Yawé, xewitɨ pumawe kakaɨyarixi watsata 'ahepaɨ 'anetɨ. Xewitɨ pumawe 'ahepaɨ timariwetɨ meta 'ahepaɨ tipatsietɨ. 'Ekɨ, mariweme pemɨtiyuriwe, 'ekɨ yemekɨ pepɨtatsihɨxiyatsitɨa 'atɨrɨkariyakɨ.
EXO 15:12 Kepauka 'ekɨ 'atserie pemutatseraxɨ, kwie pɨwareukakwai.
EXO 15:13 Waɨkawamekɨ pewanaki'erietɨ pepɨwaruwitɨxime 'ateɨterima pemɨwarutawikweitsitɨa, 'atɨrɨkariyakɨ pepɨwaruwitɨxime 'akiekari makupatsie.
EXO 15:14 Naitsarie kwiepa nuiwarite mepɨtimamani me'enaname, kepauka memɨtehetimani piritsiteutsixi mepetinututuixieni.
EXO 15:15 'Erumi kiekatari wa'ukiyarima waɨkawa mepɨtimamani, waɨkawa meputiyɨyɨakatɨkani 'itsɨkate Muhawi kiekatari. Meta Kanani kiekatari meputiweranaxɨa,
EXO 15:16 mɨkɨtsɨ wahetsie pɨtinakeni marika. Yawé, kepemɨtitɨrɨkaɨyekɨ, mekaniuwawetɨ mepakɨne tetexi wahepaɨ kepaukake 'ateɨterima memanuyekɨne, teɨteri 'ahetsiemieme pemɨwarutinanai.
EXO 15:17 'Ekɨ pepɨwareutawitɨni, pepɨwaka'iteɨta, 'iya hɨritsie kemɨ'ane 'ahetsɨamɨmieme, Yawé, 'ekɨ hakewa pemeyeika, hakewa 'ekɨ, Yawé, 'atuki pemeyutawewiri.
EXO 15:18 Yawé katini'aitakamɨkɨ yuheyeme, tukarikɨ.
EXO 15:19 Kepauka Parahuni kawayutsiximama meta kaxetamama teɨteri me'utetɨ haramaratsie memanukɨnekekai, Yawé yakatiniuyurieni haa waheima muyeurienikɨ. 'Ixaheritsixi mekayu'iyaritɨatɨ mepanukɨ kwie wakimetsie.
EXO 15:20 Merikɨtsɨ Miriyami Kakaɨyari niukameya, 'Aruni taruya, kaitsawiwame kaniuti'ɨni, hipatɨta 'ukari mekaniweiyakaitɨni yukaitsakɨ mete'ukayuitɨwatɨ meta mete'ukaye'atɨ.
EXO 15:21 Miriyami mɨpaɨ katiniukwikakaitɨni: Yawé xekenenɨawani, mɨkɨ mariwemekɨ mɨrayu'iwaxɨkɨ, kawayutsixi wahetsie memutei meta kawayutsixi haramaratsie pɨwareukaxɨri.
EXO 15:22 Merikɨtsɨ Muitsexi kaniwaruta'aitɨani 'ixaheritsixi Haramara Mɨxeta hetsie memayekɨnekɨ meta makumawetsie memɨtayunekɨ Tsuhuxi kwieyaritsie. 'Ixaheritsixi mana mekaniuhukaitɨni haika tukari makumawetsie haa mekataxeiyawawetɨ.
EXO 15:23 Hikɨ mekaniuta'axɨani Maraha mɨrakutewatsie, mana mɨpaɨ katinakutewakaitɨni mana haa hatsiwitɨ muxuawekaikɨ, mana mepɨkatenewiekairi meheuharikutɨ.
EXO 15:24 Merikɨte mɨkɨ mekaniutiniukixietɨkɨne Muitsexi hepaɨtsita, mɨpaɨ mete'iku'iwawiyatɨ: «¿Ketita tetetihareni?»
EXO 15:25 Muitsexi Yawé kaniutawawirieni, mɨkɨ pixeitsitɨa kɨye yatewime, mɨkɨ Muitsexi hapa kaneikahɨani, yapauka haa 'aixɨa ha'anetɨ kanayani. Mana Yawé kaniwaruta'inɨata, kaniwarupitɨani 'inɨari niukiyari kememɨtekahuni.
EXO 15:26 Mɨpaɨ katiniwarutahɨawe: «Netsɨ Yawé xekakaɨyari nekanihɨkɨtɨni. Xɨka neniuki xe'enietɨ yaxetekahuni heitseriemekɨ, xɨka 'inɨari niukiyaritsie yaxetekahuni kemɨreuyewetse meta ne'aitsikatsie, ne hatsuaku kwiniya nepɨkahanɨ'ani xehetsie, 'ekipitutsie kenemɨtiuyuri. Netsɨ Yawé nekanihɨkɨtɨni, hatsuaku kwiniya xehetsie pɨkatinake».
EXO 15:27 'Arikeke 'ixaheritsixi mekaneta'axɨani, 'Erimi mɨrakutewatsie, hakewa tamamata heimana huta haixayari mexuawekai meta haika tewiyari heimana tamamata takɨ mati'u, mana mekaniyuhayewa, haa mayema 'aurie.
EXO 16:1 Merikɨtsɨ yunaitɨ 'ixaheritsixi 'Erimi mekaniyekɨne, mekaneta'axɨani makumawetsie Tsini paitɨ, mɨkɨ 'Erimi meta Tsinahi wahixɨapa pɨti'anekai. 'Ikɨta pɨtiuyɨ xeimetseri 'anukamiekaku heimana tamamata heimana 'auxɨwi tukaritsie, 'inɨaritɨ kepauka memayekɨtsie 'Ekipitu.
EXO 16:2 Mana makumawetsie me'u'uwatɨ, 'ixaheritsixi mekaniwarutiniukimani Muitsexi 'Aruni mame.
EXO 16:3 Mɨpaɨ 'ixaheritsixi mekaniutiyuanekaitɨni: —Matsi 'aixɨa pɨ'anekai xɨka Yawé tatsihekwinike 'Ekipitu paitɨ. Mana 'aixɨa tepɨtehetikwa'akai wai 'itsarikɨ meta pakɨ yemekɨ tepetihuxarɨwekai. Xeme xepɨtatsiheyewitɨ, 'ena makumawetsie teyunaime xemɨtatsikwinikɨ haakakɨ.
EXO 16:4 Hikɨ Yawé mɨpaɨ Muitsexi katiniutahɨawe: «Yanepɨtiyurieni mɨkawiyekɨ paa muyuawitsie mieme. 'Ixaheritsixi yunaitɨ meke'ikuteɨxɨni xeitukaritsie mieme yuxexuitɨ, nekaniwata'inɨatamɨkɨ xɨka 'aku yametekakɨnikuni yatɨ pɨtikatixaɨ.
EXO 16:5 'Ataxewirieka tukaritsie mepikuteɨxɨ huta tukaritsie mieme, mɨpaɨ memɨteha'aritsiekakɨ».
EXO 16:6 Merikɨtsɨ Muitsexi 'Aruni matɨa 'ixaheritsixi mɨpaɨ mekateniwarutahɨawe: —'Ikɨ taikaiyaritsie xepɨtehetimani kename Yawé tiuyuri 'Ekipitu mɨxe'ayewitɨ,
EXO 16:7 meta 'uxa'a ximeri xepixeiya Yawé kemɨtimariwe. Mɨkɨri pɨtimate ke'axaxemutiyuane hetsiena mieme. Tame tixaɨ tepɨkatehɨkɨ ketitayari 'axaxetatekuhɨaweni.
EXO 16:8 Muitsexi mɨpaɨ katiniwarutahɨawe: —'Ikɨ taikaiyaritsie Yawé wai kanixemimɨkɨ, paa xetikwame xekanitihuxaikuni kanixe'u'enieni hepaɨtsitana 'axakexemutiyua. Tame tixaɨtɨ tepɨkatehɨkɨ. Xeme ke'axaxemutiyuane tahetsiemieme xepɨka'utiyuane, Yawé hetsiemieme pɨta xekaniutiyuaneni.
EXO 16:9 Hikɨ Muitsexi mɨpaɨ 'Aruni katiniutahɨawe: —'Ixaheritsixi yunaime mɨpaɨ ketiniwarutahɨawi, 'ahurawa meke'akɨne Yawé hetsɨa, mɨkɨ kaniwaru'enieni 'axakememutiyuanekai hetsiena mieme.
EXO 16:10 Mexi'akuxi tikuxatakai 'Aruni, yunaime 'ixaheritsixi wahamatɨa mana, mekanixeiya makumawetsie haiwitɨritsie Yawé kemɨtimariwe.
EXO 16:11 Yawé Muitsexi katiniutaxatɨani mɨpaɨ katinitahɨawe:
EXO 16:12 «Nekaniwaru'enieni 'ixaheritsixi kememɨteniukixie. Mɨpaɨ ketiniwarutahɨawi kakɨyɨriwekaku 'akuxi, wai xekanitikwaikuni, 'uxa'ata ximeri pakɨ xekanitihuxaikuni. 'Anari mɨpaɨ mekatenetimaikuni kename Yawé wakakaɨyari nehɨkɨ».
EXO 16:13 Mɨkɨ kwitɨwa taikaiyaritsie mematitekaitsie meputixuawerixɨ xɨ'aurixi, meta 'uxa'arieka mematiteitsie naitsarie pakutuxakai 'ɨwi hepaɨ.
EXO 16:14 Mɨkɨ 'ukumawereku makumawetsie puyuhayewaxɨ 'etsiwa witsi'anenetɨ, tee hepaɨ 'anenetɨ.
EXO 16:15 'Ixaheritsixi memɨkatemaikaikɨ ketitamɨtihɨkɨtɨkai, me'ixeiyatɨ mɨpaɨ mepɨteyuku'iwawiyakai: «¿Ketita tihɨkɨ 'ikɨ?» Muitsexi mɨpaɨ katiniwarutahɨawe: —Mɨkɨ paa kanihɨkɨtɨni Yawé mɨxemikwa xemitikwanikɨ.
EXO 16:16 'Ikɨ kanihɨkɨtɨni 'aitɨarika Yawé kemaine: “Xeme yuxexuitɨ xekeneukuteɨxi, kepaɨmeme xemeuyehɨwa para yunaime xetɨɨriyama wahetsiemieme, xete'inɨaritɨatɨ huta kakuniyari yuxexuime wahetsiemieme”.
EXO 16:17 Mɨpaɨ mekateniuyurieni 'ixaheritsixi. Hipatɨ waɨkawa mekanikuteɨxɨ, hipatɨta 'etsiwa xeikɨa.
EXO 16:18 Perutsɨ kepauka memiti'inɨataxɨ ti'inɨnɨatamekɨ, kemɨ'ane waɨkawa meikuteɨxixɨ pɨkayukuhayeikawakai, kemɨ'ane 'etsiwa mikuteɨxixɨ pɨkaheuyewekai, yuxexuitɨ mekanikuteɨxɨ yunakeme xeikɨa.
EXO 16:19 Hikɨ Muitsexi mɨpaɨ katiniwarutahɨawe: —Xewitɨ pɨka'iti'uta 'uxa'arieka mieme mayanikɨ.
EXO 16:20 Hipatɨ Muitsexi mepɨkahanu'eni, mekaniti'uta 'uxa'arieka mieme mayanikɨ, perutsɨ memiti'utaxɨ kaniutikwitsieni 'axa'u'ɨatɨkaitɨ kanayani. Hikɨ Muitsexi kaniuyeha'ani wahetsiemieme.
EXO 16:21 Yunaitɨ mekanikuteɨxɨkaitɨni ximeri yuxexuitɨ kememɨteheiyehɨakai, mɨkɨtsɨ tau xɨriyarikɨ pɨtipaparikekai.
EXO 16:22 Perutsɨ 'ataxewirieka tukaritsie mekanikuteɨxɨ hutakɨamieme kepaɨmeme memɨkema, tatsɨari nauka 'inɨariyari yuxexuitɨ, 'ayumieme mɨkɨ memanuyetei mepekɨ Muitsexi metehetaxatɨanike.
EXO 16:23 Mɨpaɨ katiniwaruta'eiya: —Mɨpaɨ katina'aitani Yawé. 'Uxa'a xawatikɨ 'uxipiya tukari pɨhɨkɨ mɨpatsie Yawe hetsiemieme. 'Ayumieme xeketeneutiwarɨka yatɨni xeketeneuka'etsa hikɨ tita xemɨteheuyehɨwa. Tita mɨtiyuhayewa, xeketeneuti'uta 'uxa'arieka mieme mɨrayanikɨ.
EXO 16:24 Mɨpaɨ mepɨte'uyuri 'ixaheritsixi kemɨtiwaruta'aitɨa Muitsexi, mepiti'utaxɨ 'uxa'arieka mieme muyuhayewaxɨ, mɨkɨ hawaikɨ pɨka'utipɨnixɨ meta pɨka'utikwitsi.
EXO 16:25 Muitsexi mɨpaɨ katiniwarutahɨawe: —Hikɨ xawatikɨ xekeneutikwa'i, hikɨ 'uxipiya tukari kanihɨkɨtɨni Yawé hetsiemieme. Hikɨri xepɨkaheitaxeiya xemetiteɨxɨkaitsie.
EXO 16:26 'Ataxewime tukari xeikɨa xepikuteɨxɨni, 'atahutarieka tukaritsie, tixaɨtɨ xepɨkatehetaxeiya.
EXO 16:27 Hipatɨ 'ixaheritsixi mekanekɨne meheiteɨxiyuka 'atahutarieka tukaritsie, peru tixaɨtɨ mepɨkatehetaxei,
EXO 16:28 hikɨ 'ayumieme Yawé Muitsexi mɨpaɨ katiniutahɨawe: «¿Kamɨtsɨ kepaukake menetsiheu'enietɨ mepakɨne, yameteyurietɨ naime 'aitɨarikatsie?
EXO 16:29 Mɨpaɨ xeketemaika, ne Yawé, 'uxipiya tukari nenixe'upitɨani xawati tukaritsie. 'Ayumieme 'ataxewirieka tukaritsie paa nekanixeyetuiriwani huta tukari mieme. 'Atahutarieka tukaritsie xewitɨ tɨma pɨkahayeyeikani. Yunaitɨ 'axeikɨa meke'ukutetɨkani».
EXO 16:30 Mɨpaɨ mekaniuyɨni 'ana 'ixaheritsixi mekaniuka'uxipieni 'atahutarieka tukaritsie.
EXO 16:31 Mɨkɨ paa mepɨte'iterɨwaxɨ «manana». Kanituxakaitɨni, tsiranituru hatsiyari hepaɨ 'anenetɨ, meta pakakatei paa mɨxietematɨka hepaɨ.
EXO 16:32 Muitsexi mɨpaɨ kaniutayɨni: —Yawé mɨpaɨ kanaineni: “Huta kakuniyari xekeneuti'uta manana payari, para xeniwema xemanutihutsie mieme, mɨkɨ memixeiyakɨ paa nemɨxe'umi makumawetsie, kepauka nemɨxe'ayewitɨ 'Ekipitu”.
EXO 16:33 Mɨpaɨ Muitsexi 'Aruni katiniutahɨawe: —Keneukutu'i manana xarita keneukayetsa huta kakuniyari. Hikɨ Yawé hɨxie keneukuwi, para temiti'utakɨ tanuiwarima memeitimanikɨ.
EXO 16:34 'Aruni muwa kanikuwieni tɨratu kakuniyari hɨxie, para mu'utɨnikɨ Yawé Muitsexi kemɨtiutahɨawixɨ.
EXO 16:35 'Ixaheritsixi mɨkɨ mekanikwakaitɨni manana huta tewiyari wiyari, kepaukake memeta'axɨa Kanani kwieyaritsie paitɨ, mɨkɨ wakwie wakiekari patɨa.
EXO 16:36 Huta kakuniyari 'inɨariyari «kumeri» mepɨte'iterɨwakai, meta «hepari» tamamata 'inɨariyari mepɨte'iterɨwakai.
EXO 17:1 Yunaitɨ 'ixaheritsixi mekanayekɨne makumawetsie Tsini mɨrakutewatsie me'u'uxipiximetɨ, Yawé kemɨtiwanɨ'akai. Mekaniu'axɨani Xepirini mɨrakutewatsie, peru mana haa pumawekai wahetsiemieme,
EXO 17:2 hikɨ Muitsexi mekaniutiniukimani mɨpaɨ me'utiyuatɨ. Mɨpaɨ mekatenitawawirieni: —Haa ketaneyetuiri temɨtiharenikɨ. Muitsexi mɨpaɨ katiniwarutahɨawe yuhetsie nuatɨ: —¿Titayari xenete'anutate'a? ¿Ketitayari Yawé xeteniukima?
EXO 17:3 Peru 'ixaheritsixi waɨkawa mepeuharikukai, Muitsexi hepaɨtsita mepɨniukixiekai. Mɨpaɨ mekatenikɨhɨawekaitɨni: —¿Ketitayari petarayewitɨ 'Ekipitu kwieyaritsie? Kauka xeikɨa petatsiheyewitɨ teyeharikwitɨwetɨ temɨkwinikɨ, taniwema meta tatewama.
EXO 17:4 Hikɨ Muitsexi Yawé kaniutahɨawe, mɨpaɨ katinita'iwawiya: —¿Kenetiyurieni 'ikɨ teɨteri wahetsiemieme? Peuyewetse 'etsiwa xeikɨa memɨnetsimienikɨ tetexikɨ.
EXO 17:5 Yawé mɨpaɨ katinita'aitɨani: —Keniwaranuwitɨki pe'anuyekaitɨ hipame 'ahamatɨa 'ixaheritsixi wa'ukiyarima, 'a'itsɨ kenakwetɨ kɨmana Niru hayari pemuwa. Kenemie,
EXO 17:6 ne nepɨmatsihetakwewieka tete manuka Huré mɨrakutewatsie paitɨ. Mana pepiwani tete xeimieme xeikɨa, mɨkɨtsie haa paneni yunaitɨ 'ixaheritsixi memɨtiharenikɨ. Muitsexi mɨpaɨ pɨtiuyuri, 'ixaheritsixi wa'ukiyarima wahɨxie.
EXO 17:7 Metatsiere mana, Matsaha mekateniuterɨwa meta Meriwa, mɨkɨ panuyɨne 'ixaheritsixi mepuniukixi, Yawé hepaɨtsita meputiniukixi, mɨpaɨ mete'uhiwatɨ: «¿Yawé tiuyeika 'aku tahamatɨa, nutsu pɨkatixaɨ?»
EXO 17:8 'Amarekitsixi mekaniu'axɨani Xepirini mehanexɨaka, 'ixaheritsixi mekaniwarutakwini.
EXO 17:9 Hikɨ Muitsexi Kutsuhexi mɨpaɨ katiniuta'aitɨani: «'Ekɨ keniwaranuyeteɨxi 'ukitsi hipame, xekenehu xekeniwakwiyu 'amarekitsixi. 'Uxa'a ne yemuritsie nepakakani Kakaɨyari 'itsɨya ne'akwetɨ».
EXO 17:10 Kutsuhexi mɨpaɨ pɨtiuyuri Muitsexi kemɨtita'aitɨa, mekaniwarutakwini 'amarekitsixi. Muitsexi, 'Aruni meta Kuxi yemuritsie 'emanutitewatsie mekaneutiyune.
EXO 17:11 Kepauka Muitsexi yumamate teikɨ metseratɨkani 'ixaheritsixi yuneukixiwima mepɨwara'iwakai, kepauka muti'uxikekai teikɨ hemetɨ 'ana mepɨtehayu'iwakai 'amarekitsixi.
EXO 17:12 Kepauka Muitsexi mamateya muti'uxixɨa teikɨ hemetɨ, tete me'akurupaka hetɨana menitayeni hetsiena mayerɨnikɨ, hikɨ 'Aruni meta Kuxi matɨa mekanenukutuikaxɨani mamateyatsie mekaniparewieni, xewitɨ 'utatanatsie xewitɨta tserietana, mɨpaɨke Muitsexi pɨyɨwekai yumamate tukarikɨ teikɨ metseratɨkani kepaukake tau makayunixɨ.
EXO 17:13 Mɨpaɨ Kutsuhexi pɨtiwara'iwaxɨ 'amarekitsixi 'ixiparakɨ.
EXO 17:14 Merikɨtsɨ Yawé Muitsexi mɨpaɨ katiniutahɨawe: «Ketinaka'utɨa 'ikɨ nawi kwikwiekametsie, naime kemɨtiuyɨ, xewitɨ mɨkaratɨtɨmaiyanikɨ, meta Kutsuhexi mɨpaɨ ketimaika: Ne yunaime nepɨwareuyehɨani muyuawi hetɨa, mɨkɨ 'amarekitsixi meta waniwema».
EXO 17:15 Mana Muitsexi mawari taiyame tenariyari kaniutawewieni, mɨpaɨta katiniterɨwa «Yawé nehetsie pununuwame».
EXO 17:16 Mɨpaɨta kaniutayɨni: «Nepitikweni Yawé kuyaximama wapatera. Yawé yuheyemekɨ 'amareki paye'unieka».
EXO 18:1 Kakaɨyari naime kemɨtiuyuri Muitsexi hetsiemieme meta Yawé yuteɨterima wahetsiemieme 'ixaheritsixi kemɨtiwarayewitɨ 'Ekipitu kwieyaritsie, Muitsexi munieya Keturu mawari wewiwame katiniutamarieni, Mariyani kwieyaritsie.
EXO 18:2 Kepauka Muitsexi Tsepura yu'ɨya menɨ'a Keturu hetsɨa, mɨkɨ kiena me'u'axɨaku yuniwe mamayatsie kanawiere,
EXO 18:3 meta niwemama meyuhutatɨ. Mɨkɨ xewitɨ nunutsi pɨtitewakai Keritsuni, mɨpaɨ mutayɨkɨ Muitsexi: «Teewa kiekame nepɨhɨkɨ xeime kwieyaritsie ne'uyeikatɨ neka'imatemetsie».
EXO 18:4 Xewitɨta 'Eriyetsexi pɨtitewakai. Muitsexi mɨpaɨ mutayɨkaikɨ: «Nepaapa Kakaɨyarieya pɨnetsi'uparewi, pɨnetsi'utawikweitsitɨa Parahuni netsimiemɨkɨkaku».
EXO 18:5 Hikɨ Keturu kaneyani makumawetsie Muitsexi metahɨawekɨ 'ɨyaya 'awitɨtɨ meta niwemama, mɨkɨ mana penuakairi Kakaɨyari hɨrieya hetɨa.
EXO 18:6 Keturu mɨpaɨ niuki katineinɨ'airiekaitɨniri: «Ne, 'amune Keturu, nekameneuxeiyamieni. 'A'ɨya meta 'aniwema meyuhutatɨ mepɨnetsihaweiya».
EXO 18:7 Muitsexi kanayeyani henukunakeke yumune, hikɨ hɨxiena kaniutihɨximakeni meta kani'itseni. Hikɨ 'ari me'uyutapaka mekaneutahaxɨani 'ixuriki kiiyarita.
EXO 18:8 Muwa Muitsexi naime katinitaxatɨani yumune, Yawé kemɨtiuyuri Parahuni 'Ekipitu kiekame hɨxie meta 'ixaheritsixi wahetsiemieme naime kwaniwemekɨ kememɨte'uhukai huyeta Yawé kemɨtiwaparewiekai.
EXO 18:9 Keturu kaniyutemawiekaitɨni tiutamarieka Yawé 'aixɨa mɨtiuka'iyarikaikɨ 'Ixaheri hetsiemieme, meta 'ekipitutari watsata mɨwarayehapakɨ.
EXO 18:10 Hikɨ mɨpaɨ kaniutayɨni: «'Aixɨa keraniuwani Yawé hetsiemieme, 'ekipitutari watsata mɨxehetawikweitsitɨa. 'Aixɨa keraniuwani kemɨ'ane 'ixaheritsixi mɨwaretawikweitsitɨa ti'aitame Parahuni tɨrɨkariyayatsie.
EXO 18:11 Hikɨri nepɨtimate Yawé matsi pɨmariwe keyuri hipatɨ kakaɨyarixi, 'ixaheritsixi mepɨnanaimariekai 'ekipitutari mariwemete mepayuyeitɨakai».
EXO 18:12 Mɨpaɨ 'utayɨka, Keturu mawari taiyariyari kaniuwewieni meta hipame mawari Kakaɨyari hetsiemieme, 'Aruni meta yunaitɨ 'ixaheritsixi wa'ukiyarima mekananukayaxe mekateniukwani Muitsexi munieya hamatɨa Kakaɨyari hɨxie.
EXO 18:13 'Uxa'arieka, Muitsexi 'akanayerɨni 'ixaheritsixi wa'enienike tita memɨtehayexeiyakai hamatɨana, 'itsɨkame kanihɨkɨtɨkaitɨni wahetsiemieme, 'ixaheritsixi hɨxiena mekaniti'uni ximeripaitɨ meta mana meti'ukaku tau kanakayune.
EXO 18:14 Keturu kepauka yumune Muitsexi muxei kemɨtiyurienekai teɨteri wahamatɨa, mɨpaɨ katinitahɨawe: —Ketɨtɨ teɨteri pepɨwayuriene. ¿Ketitayari tukarikɨ meta tɨkarikɨ mana meteku'u, 'ekɨta 'axaɨta 'aperaka?
EXO 18:15 Muitsexi mɨpaɨ katinita'eiya: —Teɨteri nehetsɨa mepɨ'axe Kakaɨyari memɨtahɨawekɨ.
EXO 18:16 Kepauka memɨyu'uximatɨa mepɨ'axe nehetsɨa mepɨnetekuxaxatɨwa, naime nepɨwahekɨatɨa rayehutame kemɨti'ane. Meta, nepɨwakuxaxatɨwa kemaine 'inɨari niukiyari meta 'ɨkitɨarika Kakaɨyari hetsɨa mieme.
EXO 18:17 Munieya mɨpaɨ katinitahɨawe: —'Aixɨa puka'ane mɨya pemɨyɨane,
EXO 18:18 peputi'uxike 'ekɨ meta teɨteri 'ahɨxie memɨti'u. 'Ikɨ 'uximayatsika kanikwaniweni, 'axaɨtame pepɨkayɨwe.
EXO 18:19 Keneu'eni 'ɨxatsi kemɨ'ane nemɨmatsitaxatɨani, meta Kakaɨyari kematsiparewieka. 'Ekɨ pemanuyeka pepɨhɨkɨtɨni Kakaɨyari hetsiemieme, meta 'ekɨ pepɨtiwahekɨatɨwametɨni ke'aneme 'uximatɨarika memexeiyani.
EXO 18:20 Kaneuyeweka mɨkɨ pemɨtiwati'ɨkitɨanikɨ 'inɨari niukiyaritsie meta 'ɨkitɨarika Kakaɨyari hetsiemieme, meta yapemɨtiwatahɨawekɨ kememɨte'u'uwani meta kememɨtehahɨawarɨwa memɨte'aye'atɨakakɨ.
EXO 18:21 'Ekɨ keniwaranayexeiya hipame 'ukitsi 'aixɨa memaitɨka Kakaɨyari hetsiemieme, yurikɨ yuri memɨte'erie Kakaɨyari memayemakaxe kwamanarika memɨkanaki'erie, xeime keneuhɨritɨa xeimiriyari wa'ukiyari mayanikɨ, xeimeta xeitsienituyari wa'ukiyari, xeimeta huta tewiyari heimana tamamata wa'ukiyari, xeimeta tamamata wa'ukiyari.
EXO 18:22 Mɨkɨ mepɨyɨaka 'itsɨkate wahepaɨ yamemɨte'uximayaka, mɨkɨ mepɨte'uximayaka nenika mɨti'anenetsie, xewitɨri xɨka kwinimieme rayexeiyani 'uximatɨarikatsie 'ahetsɨa meke'i'atɨani. Mɨpaɨ 'a'uximayatsika pa'exanaxɨani, mɨkɨ memɨmatsiparewienikɨ.
EXO 18:23 Xɨka mɨpaɨ petikamieni, Kakaɨyari kemɨmati'aitɨa, kwitɨwa 'aixɨa pɨtikuyɨneni meta teɨteri 'aixɨa 'anemekɨ meyutemamawietɨ mepekɨkani yukie.
EXO 18:24 Muitsexi yumune kaniu'enieni kemɨtitahɨawixɨ.
EXO 18:25 Niwaranuyexeiya hipame 'ixaheritsixi watsata meyɨwaweme, mɨkɨ memanuyetei kaniwarayeitɨani, xeime xeimiriyari wa'ukiyari kanayeitɨani, xeimeta xeitsienituyari wa'ukiyari, xeimeta huta tewiyari heimana tamamata wa'ukiyari, xeimeta tamamata wa'ukiyari.
EXO 18:26 Mɨkɨ 'itsɨkate wahepaɨ mepɨteyuriekai yamete'uximayatɨ, mɨkɨ nenika mɨti'anenekɨ 'aixɨa mepɨte'akayuruwakai, peru waɨkawa mukwaniwetɨka Muitsexi hetsɨa mepɨwarenɨ'awakai.
EXO 18:27 'Imatɨrieka Muitsexi yumune hamatɨa mekaniyutateutɨaxɨani, mɨkɨta yukie kaneyani.
EXO 19:1 'Ixaheritsixi mekaniu'axɨani makumawe Tsinahi mɨrakutewatsie, haika metseri 'anukamiekaku 'Ekipitu kepauka memɨyekɨ.
EXO 19:2 Kepauka Xepirini memɨyekɨ, mɨkɨ kwieyaritsie mepeutahaxɨa Tsinahi makumawetsie, mana mekanikuyaxe hɨri hɨxie,
EXO 19:3 mɨkɨ hɨritsie Muitsexi kanitiyune Kakaɨyari hamatɨa mɨretaxatakɨ. Mana Yawé, mɨpaɨ katinitahɨawe: «Mɨpaɨ ketiniwarutahɨawi Kakuwu tɨɨriyamama, yaxeikɨata 'Ixaheri nuiwarimama:
EXO 19:4 “Xeme xemunenierixɨ xepɨhɨkɨ kenemɨtiuyuri 'Ekipitu, meta nehetsɨa kenemɨtixe'atɨa werika 'anayatsie xe'atetɨ xemu'axɨani hepaɨ.
EXO 19:5 Xɨka hikɨ xeme naimekɨ yaxetekakɨne, netɨratu xɨka xehaye'atɨani, neteɨterima xepɨhɨkɨtɨni yunaime nuiwarite kwiepa memɨtama wahɨxie. Tsepa naitɨ kwie nehetsɨa mɨmieme,
EXO 19:6 xeme nehetsiemieme mawari wewiwamete nehetsɨa miemete xepɨhɨkɨtɨni, meta nuiwari xemɨpatsie”. »Naime 'ikɨ 'ixaheritsixi ketiniwarutaxatɨa».
EXO 19:7 Hikɨ Muitsexi 'ukateka kaniwarukuxeɨrieni wa'ukiyarima naime tiwataxatɨanike Yawé kemɨrehɨawekai,
EXO 19:8 meta mɨkɨ yunaitɨ mɨpaɨ mekaniutiyuani: «Yatepɨtekakɨne naimetsie Yawé kemɨtatita'aitɨani». Hikɨ Muitsexi kaneyani Yawé katinetaxatɨani kememutiyua teɨteri,
EXO 19:9 hikɨ Yawé mɨpaɨ katinitahɨawe: —Ne 'ahetsɨa nepɨnehekɨata haiwitɨritsie ka'anuyehekɨakametsie, nepɨmatsitahɨawe 'ixaheritsixi memɨnetsi'enienikɨ, yuri memɨmate'eririekakɨ yuheyemekɨ. Muitsexi Yawé yakatiniutahɨawe teɨteri kememaitɨkatei,
EXO 19:10 hikɨ Yawé mɨpaɨ katinitahɨawe: —Kenemie mepatsiekame keniwarayeitɨa 'ixaheritsixi hikɨ meta 'uxa'a. Mɨpaɨ ketiniwaretahɨawi mekeheyuti'ekwa,
EXO 19:11 hairieka tukaritsie mekeheha'aritsieka, 'ana mɨkɨ tukaritsie nepɨnehekɨata Tsinahi yemuriyaritsie nepɨkateni yunaitɨ teɨteri menetsixeiyakaku.
EXO 19:12 'Inɨari kuraruyari kenateka hɨri warie mana 'ixaheritsixi memɨka'utikɨkanikɨ. Mɨpaɨ ketiniwarutahɨawi xewitɨ pɨka'anɨtiyeikani hɨritsiepai meta yu'ɨka tapa miemekɨ mana pɨkaheutakekani, meta kemɨ'ane mimayɨani kanimɨmɨkɨ.
EXO 19:13 Tsepa mɨtewi yatsepa tewatsiekame mɨyɨane, kanimɨmɨkɨ. Kemɨ'ane mimayɨani, kanimieriemɨkɨ tetexikɨ yatɨni 'ɨrɨtekɨ. Kepaukake kuxineta metayuani karima 'anake mepɨyɨwaweni.
EXO 19:14 Hikɨ Muitsexi kaniukateni hɨritsie 'akaneka, mepatsiekame 'ixaheritsixi kaniwarayeitɨani, mɨkɨta mekaniyuti'ekwa.
EXO 19:15 Mɨpaɨta Muitsexi katiniwarutahɨawe: «Xekeneyukuha'aritɨa hairieka tukaritsie miemekɨ, yu'ɨitama xepɨkawakumaɨwani».
EXO 19:16 Hairieka tukaritsie ximeri tɨranari kaneyuani muyuawitsie meta merɨkariya, hikɨ mana hɨritsie panukate haiwitɨri ka'anuyehekɨakametsie. Meta kuxineta karima kanetayuani naitsarie 'ixaheritsixi memakutei putayuanekai.
EXO 19:17 Hikɨ Muitsexi 'ixaheritsixi kaniwarayewitɨni Kakaɨyari memanunakekɨ, mɨkɨ Tsinahi yemuriyaritɨa mekaniti'uni.
EXO 19:18 Hɨri pɨkahekɨakai kɨtsikɨ, Yawé mɨkɨtsie muyeikakaikɨ taitsie yewetɨ. Pɨwaɨkawakai kɨtsi hɨritsie metineikakai, teka hepaɨ pɨtiyuxexeiyakai, meta naitɨ hɨri karima putayuanekai,
EXO 19:19 meta kuxineta matsi karima peyuatɨyeikakai. Hikɨ Muitsexi kaniutaniuni, Kakaɨyari meta kanita'eiya tɨranarikɨ.
EXO 19:20 Yawé kananukateni Tsinahi hɨriyaritsie 'amanutitewitsie paitɨ, mana Muitsexi kaniutahɨawe manutiyanikɨ. Kepauka Muitsexi hɨritsie mana mutine,
EXO 19:21 Yawé mɨpaɨ katinitahɨawe: —Kenanukayaka 'ixaheritsixi keniwareta'imaiya kuraru 'inɨariyari manuyeka mepɨka'anayekɨkani menetsixeiyakutɨ, kapa yumɨiretɨ me'ukwinikɨ.
EXO 19:22 Yaxeikɨata mawari wewiwamete hurawa xɨka me'ukɨne mekepatsieka, xɨka mɨpaɨ meka'aneneni, ne nekaniwakwimɨkɨ.
EXO 19:23 Muitsexi Yawé mɨpaɨ katiniutahɨawe: —Teɨteri mepɨkayɨwawe memanutikɨnekɨ 'ikɨ hɨri Tsinahi hetsie paitɨ, 'ekɨtsɨ 'ari pekatanayehɨtɨani, mɨpaɨ pepɨnetiutahɨawixɨ: “Kuraru 'inɨariyari kenateka hɨriwarie, meta nehetsɨa mieme patsiekame kenayeitɨa”.
EXO 19:24 Yawé mɨpaɨ katinita'eiya: —Keneukayaka 'Aruni keneta'ini 'ahamatɨa matiyanikɨ. Peru pɨkayɨweni mawari wewiwamete meta teɨteri mematikɨnekɨ 'enapaitɨ nehetsɨa, xɨka mɨpaɨ me'uyɨni, mekanikwikuni.
EXO 19:25 Hikɨ Muitsexi 'uye'aka 'ixaheritsixi yaxeikɨata katiniwarutahɨawe.
EXO 20:1 Kakaɨyari 'aitsika kaniwayetuirieni, 'inɨari niukiyari memetimanikɨ:
EXO 20:2 «Netsɨ Yawé nekanihɨkɨtɨni 'akakaɨyari. Ne nepɨmatsi'ayewitɨ 'Ekipitu, hakewa waɨkawa pemɨre'uximayakai pekarepitɨarietɨ.
EXO 20:3 »Hipame tawarita kakaɨyarixi pepɨkawarayexeiyani ne xeikɨa.
EXO 20:4 »Tixaɨtɨ pepɨkatiwewieka taheima mieme hepaɨ ti'anekame, kwiepa memɨtexuawe hepaɨ ti'anekame, meta hapa memɨteye'uwa hepaɨ ti'anekame meta kwie hetɨa memɨtexuawe.
EXO 20:5 Mɨkɨ wahɨxie pepɨkatitunumakekani, pepɨkawarayexeiyani. Ne, Yawé 'akakaɨyari nemɨtiyukakwerie nekanihɨkɨtɨni. Kepauka wapaapama 'axamemɨte'u'iyari kepauka memɨnetsixani'erie, ne waniwema nepɨwa'uximatɨa, wateukarima, watutsima meta mɨkɨ waniwema.
EXO 20:6 Matsi kepauka, memɨnetsinaki'erie, kepauka yamemɨtekahu ne'aitsikatsie, ne nenaki'eriya wahetsiemieme matsiɨkɨme nekanayeitɨwani xeimiriyari nuiwariyaritsie.
EXO 20:7 »Ne Yawé kenemɨtitewa yakɨ xeikɨa pepɨkanetsikuxatani, ne nepɨka'itinenimayata kemɨ'ane kanetsi'enietɨ mɨnetsi'utaterɨwani.
EXO 20:8 »Kena'eriwani xawati tukari, patsiekame xemeyexeiyanikɨ.
EXO 20:9 'Ataxewime tukari xeikɨa pepɨti'uximayaka, tsepa naimekɨ kepemɨti'uximayaka pɨyɨweni,
EXO 20:10 peru 'atahutarieka tukaritsie pepɨka'uxipieni pemeyexeiyanikɨ Yawé 'akakaɨyari. Mɨkɨ tukaritsie pepɨkati'uximayaka meta 'aniwema 'ukitsi 'ukari, meta te'a'uximayatsiriwamete 'ukari 'ukitsi meta 'atewama meta teewanarixi 'akiekaritsie memɨtitei.
EXO 20:11 Kena'eriwani 'ataxewime tukari Yawé pɨtiutiwewi muyuawi, kwie, haramara, meta yunaime mana memɨteye'uwa, hikɨ 'atahutarieka kaniuka'uxipieni. 'Ayumieme Yawé mɨkɨ 'uxipiya tukari patsiekame kanayeitɨani.
EXO 20:12 »Keniwareu'enieka 'apaapa meta 'amaama, mɨpaɨ petiyurienetɨ 'apepɨreutere kwiepa Yawé 'akakaɨyari mɨmatsipitɨa.
EXO 20:13 »Pepɨkati'amemiwani.
EXO 20:14 »Xeime 'ɨyaya kɨnaya pepɨkakumaɨwani.
EXO 20:15 »Pepɨkatinawayani.
EXO 20:16 »Xeime 'a'iwatsie pepɨkatiuhɨpani 'itarikakɨ.
EXO 20:17 »'A'iwa kiiya pepɨkahiwe'erieka, meta 'ɨyaya, meta 'iparewiwameya 'uki 'uka, meta tuuruya, puxuya, naime tita mɨrexeiya pepɨkatihiwe'erieka».
EXO 20:18 Hikɨ 'ixaheritsixi kepauka memi'eniekai tɨranari meta kepauka merɨkariya memɨxeiyakai meta kɨtsi hɨritsie matineikakaikɨ kwinimieme mekatenimamakaitɨni 'ateewa mekaniti'ukaitɨni.
EXO 20:19 Hikɨ Muitsexi mɨpaɨ mekateniutahɨawe: —'Ekɨ ketatinekuxaxatɨwani, tepɨmatsi'enieka. Xɨka Kakaɨyari tatiutaxatɨani xɨari tepɨkwini.
EXO 20:20 Muitsexi mɨpaɨ katiniwarutahɨawe: —Xepɨkamamaka, Kakaɨyari kaninuani xeta'inɨatake, xe'eyemakatɨ, 'axaxemɨkateyuriekakɨ.
EXO 20:21 Hikɨ Muitsexi 'ahurawa kaniuyani haiwitɨri mɨka'anuyehekɨatsie Kakaɨyari hakewa mewekai, peru 'ixaheritsixi 'ateewa mekaniti'ukaitɨni.
EXO 20:22 Yawé Muitsexi mɨpaɨ katinita'aitɨani: «'Ixaheritsixi mɨpaɨ ketiniwarutahɨawi: “Xeme xekatenimaika muyuawitsiepai nekanixe'utahɨawe.
EXO 20:23 Xepɨkanetsi hiweritɨaka, kakaɨyarixi pɨratakɨ meta hurukɨ xepɨkawawewieka meta wahɨxie xepɨka'ukatunuma'uweni.
EXO 20:24 Mɨrayutimawatɨre tenariyari xekeneneutawewiri kwiepa, mana mawari taiyariyari xemɨnetsi'utiwewiriwanikɨ meta mana kename 'aixɨa meteyuxeiyani hepaɨtsita, muxatsi meta tuurutsixi xewamawatɨ. Ne nepunuani hakewa xemɨnetsihahɨaweni, hikɨ 'aixɨa nepɨxeyurieni.
EXO 20:25 Xɨka mawari wewiwame xenetsi'utawewirieni tetexikɨ, xepɨka'itiparekutɨwani tixaɨtɨkɨ tepɨakɨ, mɨkɨ tetexi kapatsiekame payeitɨwa.
EXO 20:26 'Imɨmɨi xepɨkaheukuwewiwani nemawari wewiwametsie, manutiyanitsie mɨka'anamamawerenikɨ”.
EXO 21:1 »'Ikɨ 'aitsika pekaniwayetuiriemɨkɨ:
EXO 21:2 »Xɨka xewitɨ hepɨrayu tewiyari 'unaneni waɨriyarika mɨti'uximayakakɨ, mɨkɨ 'ataxewime wiyari pɨtita'uximayatsirieni, matsi 'atahuta wiyaritsie pɨxɨne tixaɨtɨkɨ katiyutuame.
EXO 21:3 »Kepauka munanaiya waɨriyarika mɨti'uximayakakɨ xɨka yuxaɨta nuani, mɨpaɨta yuxaɨta kaniyemieni. »Xɨka nuani neɨketɨ, kaniyemienita 'ewitɨtɨ.
EXO 21:4 »Xɨka ti'aitɨwameya 'uka 'iwitɨtɨani, 'uka ti'aitɨwameya hetsɨa mɨmiemekɨ, xɨka tɨɨri mewarayexeiya, mɨkɨta ti'aitɨwameya hetsɨa mekaniyuhayewakuni tsepa memɨ'ukitsi ya'ukari. Hikɨ ti'uximayatame yuxaɨta kaniyemieni.
EXO 21:5 »Xɨka ti'uximayatame heitseriemekɨ mɨpaɨ 'utayɨni: “Tsepa ne nepɨkaxɨne, ne nepinaki'erie neti'aitɨwame, meta ne'ɨya metatsiere neniwema”,
EXO 21:6 'ana kutsiyarieya penuwitɨni 'itsɨkate wahetsɨa, muwa kitenie heutikerieme yunakatsie pe'inɨaritɨarieni. Mɨpaɨ 'itɨarieme yuheyeme yukutsiyari hetsɨa puyuhayewa.
EXO 21:7 »Xɨka xewitɨ yuniwe 'ukatɨme 'utuani ti'uximayatame mayanikɨ, mɨkɨ 'uka hatsuaku pɨkaxɨne ti'uximayatame 'uki hepaɨ.
EXO 21:8 »Xɨka kemɨ'ane minanai mɨkɨ 'uka ka'utiwitɨni, xeikɨa mɨka'inakekɨ, mɨkɨ pɨyɨweni marieya mɨrayukatuanikɨ hetsiena mieme. Mitixani'erikɨ mituanikɨ pɨkayɨweni teewapai kiekame hetsɨa, paapaya hamatɨa kememɨte'uxatakai mɨkaraye'atɨakɨ.
EXO 21:9 »Merikɨteta ti'aitɨwameya 'uka yuniwe pɨta xɨka 'uwitɨtɨani, kaneuyeweka yemekɨ yuniwe hepaɨ mɨtixeiyani.
EXO 21:10 »Xɨkata xeime pɨta 'ukaratsi 'utiwitɨni, pɨkayɨwe mɨtiwakweririeka yu'ɨitama, yaxeikɨata 'aixɨa ketiwaxeiyani, tiwamikwatɨ meta tiwaketɨatɨ meta yunaime wahamatɨa 'ukahuputɨ.
EXO 21:11 »Xɨka mɨkɨ haikamekɨ hetsiena mieme yakatikamiemi, pɨyɨwe 'ukaratsi meyani peru nitixaɨtɨkɨ hetsienamieme katiyutuiyatɨ.
EXO 21:12 »Kemɨ'ane xeime mɨtiukwinitɨani mimieni, mɨkɨta pɨmierieni.
EXO 21:13 »Xɨka mɨpaɨ kara'eriwatɨ tiuyurieni, Kakaɨyari pɨta yahainekaku tiɨyɨni, tiyumiekame pɨyɨwe muyuta'una hakewatsɨ ne nemetaxata.
EXO 21:14 »Xɨka 'imani mɨtiuyumi, mɨkɨ ke'umierieni tsepa muyu'awieta netukita mawari taiyametsie.
EXO 21:15 »Kemɨ'ane yupaapa meta yumaama mɨmieni, mɨkɨta ke'umierieni.
EXO 21:16 »Kemɨ'ane xeime tewi mɨnawani, meta xɨka 'ituani, xɨka hahekɨare 'akuxi ka'ituawetɨ, mɨkɨ ke'umierieni.
EXO 21:17 »Kemɨ'ane yupaapa yatɨni yumaama yuniukikɨ 'axa'aneme 'ipitɨani, mɨkɨ ke'umierieni.
EXO 21:18 »Xɨka meyukwitɨwetɨ yu'iwa xewitɨ tiukwinitɨani tetekɨ, yatɨni yumamakɨ, xɨka mɨkɨ 'utatsie kakaitɨ 'ayani kayuawetɨ,
EXO 21:19 mɨkɨ mɨtikwinitɨa katinayukatuamɨkɨ mu'uayemarienikɨ meta 'uximayatsiyakɨ kemɨreutere. Hikɨ kepaukake mɨtikuye kewetɨmayani yuxaɨta yatɨni 'itsɨ hakwetɨ, 'anake kanixɨnimɨkɨ, hetsiena pɨkarahɨiyani.
EXO 21:20 »Xɨka xewitɨ tiyu'uximayatame hekuwaxɨani kɨyekɨ 'ukitɨme yatɨni 'ukatɨme, xɨka mɨkɨ 'umɨni, kananutahɨiyamɨkɨ ti'aitɨwameya.
EXO 21:21 Peru xɨka xeitukari huta tukari 'anukayayu ti'uximayatame 'aixɨa reka'erieni, mikuwaxɨa pɨka'anutahɨiyani hetsɨana mɨmiemetɨkaikɨ ti'uximayatame.
EXO 21:22 »Xɨka hipatɨ meyukwitɨwetɨ xeime hukame me'uwani, xɨka mɨkɨ ka'umɨni peru xɨka 'umɨni nunutsi 'anuyeweni, pɨrayukatuani kemɨ'ane mɨtiuyuri, kɨnaya kemɨtitawauni peru kemɨtiheitserie.
EXO 21:23 »Xɨka 'ukaratsi kwinimieme 'uyɨni, mɨpaɨ katinika'inɨarini: xɨka 'umɨni mɨkɨta ke'umierieni,
EXO 21:24 xɨka xeime hɨxieya watituni mɨkɨta hɨxieya kewatitɨiyani, xɨka tameya 'anaye'una mɨkɨta tameya ke'anaye'unarieni, xɨka mamaya wayemura mɨkɨta mamaya yaxeikɨa, yatɨni 'ɨkaya xɨka wayemura mɨkɨta 'ɨkaya kewayemurarieni,
EXO 21:25 xɨka 'itaiya mɨkɨta ke'utaiyarieni, xɨka 'iwani mɨkɨta ke'uweiyani, xɨka 'ixuritɨani mɨkɨta ke'uxuritɨarieni.
EXO 21:26 »Xɨka xewitɨ 'iyehutsuni hɨxitana tiyu'uximayatame 'ukitɨme yatɨni 'ukatɨme, xɨka hɨxieya 'uyetuni, 'aixɨa pɨ'ane xɨka heinɨ'ani, mɨkɨkɨ pɨxɨne.
EXO 21:27 »Xɨka xewitɨ tiyu'uximayatame tameya 'anaye'una 'uki yatɨni 'uka, mɨrekapitɨanikɨ keheinɨ'ani mɨkɨkɨ pɨxɨne.
EXO 21:28 »Xɨka tuuru xeime 'utsikɨpa, xɨka tewi 'ɨmɨni tsepa 'uki yatɨni 'uka, mɨkɨ tuuru ke'umierieni tetexikɨ ke'utituaxiexɨani, peru waiyarieya pɨkatikwaiwani. Hikɨ tewakame hetsie pɨkarahɨiwanita.
EXO 21:29 »Xɨka tuuru tiyutsikɨpani, ke'umierieni tetexikɨ tituaxiexɨame xɨka tewi 'umieni 'ukaratsi yatɨni 'uki. Kutsiyarieya xɨka 'imaikaitɨni kename tuuruya tiyutsikɨpa, mɨyatɨtɨ xɨka ka'ekuwieni, mɨkɨta kutsiyarieya ke'umierieni.
EXO 21:30 »Xɨka mumierietsie mieme ra'iwauriwani, kerayukatuani pɨta.
EXO 21:31 »Yaxeikɨata 'ikɨ 'aitsika pɨ'ane xɨka tuuru xeime nunutsi hetsikɨpa yatɨni 'uka nunutsi.
EXO 21:32 »Xɨka tuuru xeime 'utsikɨpa ti'uximayatame 'uki yatɨni 'ukatɨme, turu kutsiyarieya pɨtiyutuani xeitewiyari heimana tamamata pɨrata tuminiyarikɨ ti'uximayatame kutsiyarieya pɨrakapitɨani. Mɨkɨta tuuru ke'umierieni tetexikɨ.
EXO 21:33 »Xɨka xewitɨ putsu 'utawewieka 'inɨkatɨtɨ 'ewatitenime 'uhayewa xɨka ka'enuyenani, xɨka tuuru muwa heukaweni yatɨni puxu,
EXO 21:34 putsu kutsiyarieya pɨrayukatuani tewakame pɨrakapitɨani kemɨraye'aka, peru wakaxi mɨmɨki putsu kutsiyari pɨhetsiemiemetɨni.
EXO 21:35 »Xɨka xewitɨ tuuru xeime tuuru 'utsikɨpa, mutsikɨparie xɨka 'umɨni, mayeniere ke'utuiyani, yuhutatɨ wakutsiyarima mɨkɨ tuminiyari hixɨata meke'ɨni, meta mumierie waiyarieya hixɨata mekekɨne.
EXO 21:36 »Tuuru xɨka mɨpaɨ ti'iyamakaitɨni, xɨka kutsiyarieya 'imaikaitɨni kename tuuruya tiyutsikɨpakai peru mɨyatɨtɨ kahekuwieni, kutsiyarieya xeime pɨyetuani wakaxi, peru mɨmɨki hetsiena pɨmiemetɨni.
EXO 22:1 »Xɨka xewitɨ tuuru 'unawani yatɨni muxa, xɨka 'imieni yatɨni xɨka 'ituani, kutsiyarieya pɨyetuirieni yu'auxɨwime tewaxi tuuru munawakɨ, muxa hetsiemiemeta yunaukame muxatsi.
EXO 22:2 »Xɨka xewitɨ tinawanetɨ 'uxeiyarieni, xɨka 'umierieni, mɨkɨ hepaɨtsita 'atsipɨkatitaniukieni.
EXO 22:3 »Xɨka mɨkɨ tinawayame 'umierieni hekɨta, mɨkɨ mími hetsie pɨrahɨiyani. »Tinawayame peuyewetse mɨtiyutuanikɨ tita mɨrenawa. Xɨka ka'iyemanani mɨtiyutuanikɨ, kanituiyamɨkɨ ti'uximayatamekɨ mɨpaɨ mɨtiyutuanikɨ.
EXO 22:4 »Xɨka tewá hetaxeiyarieni 'akuxi hetsɨana 'ayenieretɨ, mɨkɨ piyetuani 'akuxi xeime tawarita heutinɨkame, tsepa tuuru yatɨni puxu yatɨni muxa.
EXO 22:5 »Xɨka xewitɨ yutewama tiwaminekaku xeime haraweritana meheutahaxɨani, mɨkɨ kawa'ɨwiyakaku xeime haraweritana mete'ukwani, tewakame pɨrayukatuani 'itsanari 'aixɨa mɨ'anenekɨ.
EXO 22:6 »Xɨka xewitɨ 'ɨxapa 'uta'ukwani, tɨriku xɨka hayetani yatɨni 'etsari mukuxeɨrietɨkari yatɨni hipame wa'etsaripa, kemɨ'ane mɨtiuyuri kepaɨmetɨ mɨtiutitai mɨkɨkɨ katinayukatɨamɨkɨ.
EXO 22:7 »Xɨka xewitɨ tumini xeime 'uhɨritɨani yu'iwa mi'ɨwiyanikɨ yatɨni tixaɨtɨ piinitɨarika, xɨka tinawayame tiunawani, mɨkɨ tinawayame pɨrayukatuani kepaɨ mɨtiunawa tawari hepaɨna paɨmeme, xɨkatsɨ 'uwiyarieni.
EXO 22:8 »Xɨka tinawayame 'uyuta'una, mɨkɨ mɨtihɨritɨariekai pɨyemie 'itsɨkame hetsɨa, naime mɨtitaxatɨanikɨ mɨkɨ 'atsimɨkatiuyurikɨ.
EXO 22:9 »Xɨka xewitɨ tixaɨtɨ tiuyukapiinitɨwani, meta xewitɨ mɨkɨtsiere, mɨkɨ meyuhutatɨ mepuhu 'itsɨkate wahetsɨa. Kemɨ'ane yakɨ mutaineni, mɨkɨ tawarita xeime pɨyetuani tita mɨtiuyukapiinitɨwakai, tuuru, puxu, muxa, kamixa tsepa tita mɨreuyehɨaka xɨka 'iwauka kename tipiinieyatɨkai.
EXO 22:10 »Xɨka xewitɨ yuhamiku puxu, tuuru, muxa 'uhɨritɨani yatsepa tita tewatsiekame, xɨka tewaya 'umɨni, tiutakwine, yatɨni xɨka 'unawarieni xewitɨ ka'uniere,
EXO 22:11 tewakame hamikuya Yawé hɨxie puyutaxata kename yutewa ka'ayeitɨa. Kutsiyarieya yuri ketita'eririeni, meta hamikuya pɨkatiyutuani.
EXO 22:12 »Xɨka hamikuya 'unieretɨtɨ munawarietsie, mɨpaɨ hɨrixɨa pɨrayukatuani.
EXO 22:13 »Xɨka tewatsiekame 'ɨrawe 'itakwani, hamikuya pɨkarayukatuani xɨka 'umeteya 'ixeiyatsitɨani.
EXO 22:14 »Xewitɨ xɨka yuhamiku tewa 'utaniɨwirieni, xɨka mɨkɨ rekwine yatɨni xɨka hemɨni, kutsiyarieya kanierekaku, kemɨ'ane mitaniɨ katinayukatuamɨkɨ.
EXO 22:15 »Xɨka kutsiyarieya nierekaku tiɨyɨni, mitaniɨ pɨkatiyutuani. »Xɨka tuminikɨ 'itaniɨkaitɨni mɨkɨkɨ xeikɨa pɨrayukatuani.
EXO 22:16 »Xewitɨ 'uki xɨka 'ɨimari 'utixɨatɨatɨyani 'uki kamaikame, xɨka hamatɨana 'ukahuni, wapaapama katiniwapitɨamɨkɨ kemɨraye'axe, meta kanitiwitɨmɨkɨ.
EXO 22:17 'Ɨimari paapaya xɨka ka'itaunieka menuwitɨnikɨ, 'uki pɨrayukatuani 'ɨimari mɨkamayɨiya kemɨraye'axe.
EXO 22:18 »'Uka 'ikewarikɨ mɨtiyɨ'ɨkitɨa pepɨwatakukuyani.
EXO 22:19 »Yunaitɨ teɨteri tewaxi memɨwakumaɨwa mɨkɨ meketakwikwiwani.
EXO 22:20 »Kemɨ'ane mawari xeimepɨta kakaɨyari mɨwewirieni, Yawé pɨta 'uwewirienikeme, mɨkɨ ke'umierieni.
EXO 22:21 »'Axapepɨkatikuhɨaweni waɨriyarika pepɨkati'aitɨaka 'ateewa kiekame, kena'eriwani 'ekɨ meta 'ateɨterima teewatari xepɨhɨkɨtɨkai 'Ekipitu kwieyaritsie.
EXO 22:22 »Pepɨkatiwa'aitɨaka kwinimieme wiuraxi meta nutuite,
EXO 22:23 xɨka 'ekɨ mɨpaɨ petiyurieneni meta 'ateɨterima, mɨkɨ parewiya xɨka menetsi'utawawirieni, yurikɨ ne nekanaineni nekaniwaranu'enimɨkɨ xɨka meha'aiwatɨkani:
EXO 22:24 waɨkawa nehaxɨakɨ nepɨxekwini xeme 'ixiparakɨ. Xe'ɨitama yuxaɨta mepuyuhayewa, xeniwema nutuite mepɨyuhayewa.
EXO 22:25 »Xɨka xewitɨ xeme, nehetsɨamieme hawerimɨ'ane tumini 'uniɨtɨani, teyuniniɨtɨwamete wahepaɨ xepɨkatewakɨhɨaweni meta 'anamakame xepɨkawawiyani.
EXO 22:26 »Xɨka xewitɨ yu'iwa 'ɨkarieya 'akahurieni, piyetuirieni taikai kakɨyɨriwekaku.
EXO 22:27 Mɨkɨ yu'ɨkari xeime xeikɨa mexeiyakɨ tawarita pɨkaheixeiya xeime hetsiena mahuni. Xɨka netsi'utawawirieni parewiya, ne nepiparewieni kemaineni, ne Kakaɨyari nemɨtinekanenimaya nemɨhɨkɨkɨ.
EXO 22:28 »'Axapepɨka'utaineni Kakaɨyari hepaɨtsita, meta 'axapepɨkarenutahɨaweni teɨteri wahetsiemieme manuyeka.
EXO 22:29 »Pepɨkatihayewani peti'atɨwatɨ 'iku mawariyari meta winu mawariyari. »Xeniwema matɨari miemete nehetsɨa mekanimiemetetɨni.
EXO 22:30 »Meta tewaxi tuurutsixi meta muxatsi nehetsɨa mekanimiemetetɨni. 'Atahuta tukari yumaama matɨa puyeikani, 'atahairieka tukaritsie pepɨnetsiyetuirieni.
EXO 22:31 »Xeme neteɨterima xemɨpatsie xepɨhɨkɨtɨni. »Xepɨka'ikwa'ani wai 'ɨrawe 'ikwaixaya. Mɨkɨ tsɨikɨri xepɨwamikwani.
EXO 23:1 »'Itarikakɨ xepɨkatekuxatani. »'Axamɨtiuka'iyari pepɨkaparewieka, meta niukikɨ pepɨka'iparewieka 'itsɨkame hetsɨa.
EXO 23:2 »'Axamemɨte'u'iyari pepɨkawa'ɨkeni. »Tixanetsiekaku teɨteri yumɨiretɨ kememutiyuaneni mɨpaɨ pepɨka'utaineni. »Tita mɨtiheitserie pepɨka'uku'e'eiriwani, yumɨiretɨ 'axamemutiyuanekɨ xeikɨa.
EXO 23:3 »Pepɨkati'itaka xɨka haweri mɨ'ane tixanetani haweri mɨ'ane peparewimɨtɨ xeikɨa.
EXO 23:4 »Xɨka tuuru pehetaxeiya yatɨni puxu heuyewekame, keneyetua, tsepa mɨmatsi'aka'unie mɨtipiinieya.
EXO 23:5 »Puxu xɨka 'atiweximeni yu'ika kakematɨ, keneuparewi, tsepa mɨmatsi'aka'unie mɨtipiinieya.
EXO 23:6 »Tixaɨtɨ memɨkatehexeiya xɨka metexanetani, kemɨtiheitserie pepɨkatiuku'e'eiriwani wahetsiemieme.
EXO 23:7 »Xeime tewi pepɨkaxanetani 'itarikakɨ. »Pepɨkawatakukuyani teɨteri 'atsimemɨkateyurie yamemɨtekahu, ne kemɨ'ane hetsie mɨrahɨiwa 'atsikatiyuruwame nepɨkahayeitɨa.
EXO 23:8 »Tumini xɨka xewitɨ 'awie matsi'ɨitɨaka tixaɨtɨ kemɨkatiheitserie pemɨtiyurienikɨ, pepɨka'inaki'erieka, mɨpaɨ 'itsɨkate kemɨkatiheitserie mepɨteyuriwawe.
EXO 23:9 »Teewanarixi waɨriyarika xepɨkatewa'aitɨaka, xeme 'ari xepɨtemate yuhetsie: 'Ekipitu kwieyaritsie xeme teewanarixi xepɨhɨkɨtɨkai.
EXO 23:10 »'Ataxewime wiyari 'akwie pepuka'etsani pepuka'itsanani,
EXO 23:11 peru 'atahuta wiyaritsie pepɨka'ika'eni. Pepika'uxipitɨani, haweri memɨ'anene 'akie kiekatari mana memɨtetikwanikɨ meta yeutari memɨtetikwanikɨ tita memɨtehayewa teɨteri. »Yaxeikɨa pepɨtiyurieni kaxie haraweriyaritsie meta huriwu haraweriyaritsie.
EXO 23:12 »'Ataxewime tukari pepɨti'uximayaka, 'atahuta tukaritsie mepɨka'uxipieni 'atuurutsixi meta 'apuxuri, yunaitɨ te'uximayatamete mepɨka'uxipieni 'akie memutinunuiwaxɨ meta teewanarixi.
EXO 23:13 »Xeketenaye'atɨa naimekɨ kenemɨtixe'uta'aitɨa. »Hatsuaku hipame kakaɨyarixi xepɨkawarahɨaweni. Kememɨtetetewa hatsuaku xepɨkawaraxaxatani.
EXO 23:14 »Xeiwiyaritsie haikakɨa 'ixɨarari pepuwewiximeni nehetsiemieme.
EXO 23:15 »Paa mɨkakuxaxani 'ixɨarariyari xepiwewiximeni weiya metseriyaritsie, mɨkɨri mana pɨka'inɨarini. Xeme mɨkɨ metseriyaritsie xekanayekɨne 'Ekipitu. Kenemɨtixe'aitɨa, 'atahuta tukari xekanikwakakuni paa mɨkakuxanariyarietɨka. »'Aixɨa pɨka'ane xewitɨ nehɨxie mɨ'axeni tixaɨtɨ karapitɨ 'imikierite.
EXO 23:16 »'Itsanari 'ixɨarariyari pekaniwewimɨkɨ kepauka mexɨakame pemɨtikatɨni pemika'e. »Xepiwewienita 'ixɨarari naime kepauka xemɨteka'itsanatsie, mɨkɨ wiyari 'anayexɨximekaku.
EXO 23:17 »Yunaitɨ xeme yuxexuitɨ xeiwiyaritsie haikakɨa xepɨ'axeni, Yawé xekakaɨyari hetsɨa.
EXO 23:18 »Tikuxanariyame xuriya matɨa xepɨka'inɨitɨaka xemɨnetsitimawirieni. »Xepɨka'iti'utani wiya 'uxa'arieka mieme mayanikɨ 'ixɨararipa xemɨnetsixatɨa.
EXO 23:19 »Pepi'atɨani Yawé 'akakaɨyari tukita 'aixɨa mɨti'anene matɨari timieme mɨtitixuawere. »Tsipu nunutsi maamaya retsieyatsie xepɨka'i'etsani.
EXO 23:20 »Mɨpaɨ ketinemaika 'Ixaheri, ne nepenunɨ'ani 'ahɨxie niuki tuayame, mɨmatsihe'ɨwiyanikɨ huyeta, mɨmatsi'anuwitɨni hakewa 'ahetsiemieme nemɨrekuha'aritɨa.
EXO 23:21 Keneu'enieka yaketinekamieni. 'Axapepɨkareyurieneni hɨxiena, nehetsiemieme kaniyɨaneni, pɨkamereuyehɨwirieni xɨka mɨpaɨ pereyurieni.
EXO 23:22 Xɨka pehenu'enieni, xɨka yapetikayani naimekɨ kenemɨti'aita, memɨmatsi'aye'unie ne newaraye'unietɨ nepayani meta kemɨ'ane 'ahɨxie memu'uni wahɨxie nepukeni.
EXO 23:23 Neniuki tuayame pɨmatsi'anuwitɨni, mɨkɨ nemɨwaka'una wakwieyaritsie pɨmatsi'atɨani: 'amuxeutsixi wakwietsie, hetitsixi, peretseutsixi, kananeutsixi, heweutsixi meta kewutseutsixi.
EXO 23:24 »Mɨkɨ wakakaɨyarixima wahɨxie pepɨkahetihɨximakiekani. Nenewieri pepɨkawarepitɨaka kememɨtehehu, pepɨkaware'ɨkirieka. Matsi pɨta xekeniwareti'uniri wakakaɨyarixi meta watetexi mɨpatsietɨka xekenetitara.
EXO 23:25 »Nenewieri kenepitɨaka Yawé 'akakaɨyari, mɨkɨ 'aixɨa piyurieni 'a'ikwai meta 'ahaa. »Ne naime kwiniya xehetsie nepɨkapitɨani.
EXO 23:26 »'Akwieyaritsie xewitɨ 'uka pɨka'anuye'iwetsieni meta xewitɨ kaniwewetɨ pɨkahayani. Ne tukari 'atewime nepɨxepitɨani.
EXO 23:27 »Kepauka pemunuani xeime kwieyaritsie, yanepɨtiyurieni memɨmatsitimakanikɨ, memeuyuyexɨrienikɨ meta memɨyuta'unakɨ.
EXO 23:28 »'Ahɨxie nepɨwaranɨ'ani mɨrakatsixi, memuyuta'unaxuanikɨ heweutsixi, kananeutsixi meta hetitsixi.
EXO 23:29 Nepɨkawarayeweiya kwitɨwa xeiwiyaritsie kapa kwie yuxaɨta yuhayewayu me'uyutamɨiriya 'ɨrawetsixi, mexe'utikwani.
EXO 23:30 Nepɨwaka'una 'anɨari, kepaukake yuniwema waɨkawa xemɨwarexeiyani kwie naime xemukunanikɨ.
EXO 23:31 »'Akwie 'anepɨtayeuriya, 'atsita Haramara Mɨxeta hetsie paitɨ meta haramara Meritexaniyu paitɨ, makumawetsiepai 'atsita 'Eupɨrate hatuxameyaritsie paitɨ. 'Ekɨ pepɨtiwata'aitɨani yunaime mana memɨkiekatari, pepɨwarayeweiya.
EXO 23:32 »Mɨkɨ teɨteri wahamatɨa tɨratu xepɨkawewieka, metatsiere wakakaɨyarixima wahamatɨa.
EXO 23:33 »Xɨka xewarupitɨani xekwiepa memu'uwanikɨ, mɨkɨ mepɨxewiniya wakakaɨyarixi xewarayexeiyatɨ xemakɨnekɨ, mɨpaɨ 'axaxepɨteyurieni nehetsɨa».
EXO 24:1 Metatsiere Yawé Muitsexi mɨpaɨ katiniutahɨawe: «Hɨritsie kenatiye'a nehetsɨa, meta 'Aruni, Narawi, 'Awihu, metatsiere haika tewiyari heimana tamamata 'ukirawetsixi 'ixaheritsixi. Mɨkɨ mepɨkatunuma'uni yateewa,
EXO 24:2 peru 'ekɨ xeikɨa Muitsexi pepɨyɨwe 'ahurawa pemayani nehetsɨa. Yunaitɨ hipatɨ mepɨkayɨwawe 'ahurawa memakɨne meta memanatikɨne 'ahamatɨa».
EXO 24:3 Muitsexi 'anukayaka meta katiniwarutaxatɨani teɨteri naime Yawé kemetayɨ, mɨkɨta mɨpaɨ mekaniutiyuani yunaitɨ: «Yatepɨteyurieni naime Yawé kemetayɨ».
EXO 24:4 Hikɨ Muitsexi pɨraka'utɨa naime Yawé kemɨreitahɨawixɨ. 'Uxa'arieka ximeripaitɨ nanukukeni, tenari timawame kaniutawewieni hɨritɨa. Meta tamamata heimana huta 'Ixaheri nuiwarimama 'inɨariyari, tetexi tamamata heimana huta patsiekame kanayeitɨani.
EXO 24:5 'Ana hipame temari 'ixaheritsixi kaniwarenɨ'ani, Yawé hetsiemieme tsikerutsixi wamawari taiyariyari memɨwewiyukɨ meta kename 'aixɨa memɨteyuxeiyani mawariyari.
EXO 24:6 Muitsexi hixɨapa 'akame tuuru xuriyaya tekɨxita kaniukatuaxɨani, xeime hixɨapa 'akamekɨ mɨrayutimawatɨre kaniuta'ɨya.
EXO 24:7 Hikɨ 'arike tɨratu xapayari kaniutihurieni, kanekaterɨwa 'ixaheritsixi wahɨxie, mɨkɨ mɨpaɨ mekatenita'eiya: —Yawé naimekɨ kemutayɨ yatepɨtekakɨne.
EXO 24:8 Muitsexi xuriya 'utihanaka, mɨkɨkɨ teɨteri kaniwaru'ɨya, mɨpaɨ 'utaitɨ: —'Ikɨ xuriya tɨratu 'inɨariyari kanihɨkɨtɨni, Yawé yapɨtiuyuri meta xeme yaxemutiyuakɨ.
EXO 24:9 Muitsexi, 'Aruni, Narawi, 'Awihu, metatsiere haika tewiyari heimana tamamata 'ukirawetsixi 'ixaheritsixi mekananutikɨne hɨritsie,
EXO 24:10 hikɨ mekanixeiya 'Ixaheri Kakaɨyarieya. Hetɨana pukumakai tete witsimɨ'ane muyuawi mɨxawatɨ, witsiranuyehekɨatɨ muyuawi hepaɨ.
EXO 24:11 'Ukirawetsixi 'ixaheritsixi wa'ukiyarima me'ixeiyakatɨtɨ, mepɨka'ukwi, Kakaɨyari mɨkawarumayɨakɨ.
EXO 24:12 Yawé Muitsexi mɨpaɨ katiniutahɨawe: «Kenatiye'a hɨritsie nehetsɨa, mana keneuyuhayewa. Nepɨmatsiyetuirieni 'inɨari niukiyari, tete wewerimetsie mɨye'uxa meta ne'aitsika nemaka'utɨa para mɨpaɨ xemɨte'u'uwanikɨ».
EXO 24:13 Muitsexi Kakaɨyari hɨrieyatsie kaneyani yuparewiwame Kutsuhexi hamatɨa,
EXO 24:14 peru 'ukirawetsixi mɨpaɨ katiniwarutahɨawe: «'Ena xeketanetakwewieka kepaukake temɨ'axɨani. 'Aruni meta Kuxi matɨa mepuyuhayewa 'ena xehamatɨa, xɨka xewitɨ 'uximatɨarika hexeiyani mɨkɨ yaketiwarutahɨawe».
EXO 24:15 Kepauka Muitsexi manutitɨa haiwitɨri hɨritsie kananukateni.
EXO 24:16 Yawé tɨrɨkariyaya xawatɨtɨ kanakateni Tsinahi hɨriyaritsie, 'ataxewime tukari haiwitɨri hɨri panukanakai, 'atahutarieka tukaritsie haiwitɨritsata Yawé Muitsexi kaniutahɨawe.
EXO 24:17 Me'ixeiyakaku 'ixaheritsixi Yawé tɨrɨkariyaya xawatɨtɨ hɨritsie tai mɨtiyutaiya hepaɨ pɨtiyuxexeiyakai.
EXO 24:18 Muitsexi kaneutahani haitsata kananutiyani hɨritsie, mana pekatei huta tewiyari tukari meta huta tewiyari tɨkari.
EXO 25:1 Merikɨtsɨ Yawé Muitsexi katiniutaxatɨani, mɨpaɨ rehɨawetɨ:
EXO 25:2 «'Ixaheritsixi mɨpaɨ ketiniwaruta'aitɨa mawari mekenetsi'atɨirieni. Kaneuyewekani memi'atɨanikɨ yunaitɨ kemɨ'ane mɨpaɨ mɨtiwakuyuitɨwani.
EXO 25:3 Mawarite neminaki'erie pɨhɨkɨtɨni: huru tepɨayari, pɨrata, wurunitse,
EXO 25:4 muxa 'ixurikiyari mɨyɨtsikimaɨyekɨ mu'uarietɨka meta kwimɨxetakɨ metatsiere mɨxetakɨ, rinu 'ixurikiyari witsimɨ'anene, kapura huxarieya 'ɨkariyari,
EXO 25:5 muxa 'uki nawiyarieya xetamekɨ 'uarietɨkaime, nawi 'aixɨa mɨ'anene, 'akatsiya kɨyeyari,
EXO 25:6 huriwa hatseitiyari kɨxeme hetsiemieme, witsimɨtiu'ɨatɨka witsitiyu'ɨariyame hatseiti mɨtiyupata meta 'ɨkwa witsimu'ɨa,
EXO 25:7 'unitse teteyari, meta hipame tetexi witsimɨ'anene mawari wewiwame kamixaya 'etsimɨnena hetsie meuyaxe meta kuka mekatɨni hetsiemieme.
EXO 25:8 Meta tuki xepɨnetsitawewirieni, xehamatɨa nemuyeikanikɨ.
EXO 25:9 Tuki xemɨtawewieni naitɨ pɨtiyepika kenemɨmatixeitsitɨani mɨpaɨ ti'aneneme.
EXO 25:10 »Kakuni keneutawewi 'akatsiya kɨyeyarikɨ, xeimeturuyari heimana tamamata tsenitimeturuyari tewime, haika tewiyari heimana tamamata tsenitimeturuyari 'atayeume meta yaxeikɨata mɨpaɨ 'utewime.
EXO 25:11 Huru kenewakuwiri taɨtana meta herie, meta hurukɨ kenatatenitɨa.
EXO 25:12 Keneutiwewi naukame huru hanirayari 'ɨkateyatsie keneu'uitɨaxɨa, 'etsatana huhutatɨ kana'uixɨamɨkɨ.
EXO 25:13 Kurumawime 'akatsiya kɨyeyari keneutiwewi, huru keneutiwiri.
EXO 25:14 Kɨyexi mukurumawi haniratsie keneuye'uitɨaxɨa kakuni 'etsatana mukumanetsie, mukukweiyanenikɨ.
EXO 25:15 Mɨpaɨ reheikame keneuhayewa pepɨkahenuyehapanani,
EXO 25:16 mana pepikamana 'inɨari niukiyari nemɨmatsiyetuirieni.
EXO 25:17 »Hurukɨ xeikɨa wewiyakame keneutawewi kanamikiyari Kakaɨyari ma'axeni, xeimeturuyari heimana tamamata tsenitimeturuyari tewime meta haika tewiyari heimana tamamata tsenitimeturuyari 'atayeume,
EXO 25:18 Kakaɨyari teɨtamete yuhutame hurukɨ pepɨwatiwewieni, titsunamekɨ mewewiyatɨkaime, kanamikitsie Kakaɨyari ma'axeni 'etsimeuyeyeutsie mema'uni.
EXO 25:19 'Etsimeuyeyeutsie mepu'uni Kakaɨyari teɨtamete. Mewetɨkaime meyuxewime keniwarayeitɨa Kakaɨyari ma'axeni.
EXO 25:20 »Kakaɨyari teɨtamete Kakaɨyari ma'axe heimana mepuye'anatɨkani, kɨmana mepenukanaka. Mepanuyutaxeiyani Kakaɨyari ma'axe meheukanenieretɨ.
EXO 25:21 »Kanamiki kenanukamana kakunitsie, manata kenekamana 'inɨari niukiyari nemɨmatsiyetuirieni.
EXO 25:22 Ne mana nepɨ'axeni Kakaɨyari teɨtamete wahixɨapa kakuni heima. Mana ne yanepɨmatikɨhɨaweni naime 'ɨkitɨarika pemɨwakuxaxatɨwanikɨ 'ixaheritsixi.
EXO 25:23 »'Akatsiya kɨyeyarikɨ mexa keneutawewi, nauka tewiyari heimana tamamata tsenitimeturuyari tewime meta huta tewiyari heimana 'auxɨwi 'atayeume meta haika tewiyari heimana tamamata 'aweme.
EXO 25:24 Huru keneukawiri, hurukɨtsiere tenimeyaritsie kenata'utɨa.
EXO 25:25 Xeitewiyari tsenitimeturuyari 'atayeume kenata'utɨa meta tenimeyari kenatawewi 'auriena hurukɨ.
EXO 25:26 »Naukame huru hanirayari keneutiwewi mexatsiemieme, xexuime keneu'uitɨaxɨa tsikurieyatsie, ma'ɨkatɨkatsie.
EXO 25:27 Hanira, mexa tenimeyari 'aurie pukumaneni, mana kɨyexi muye'unikɨ mɨkɨtɨkienenikɨ.
EXO 25:28 »Mɨkɨ kɨyexi mukurumawi 'akatsiya kɨyexiyari pɨhɨkɨtɨni, huru wiriyarietɨkaitɨ.
EXO 25:29 Xakɨrɨte, 'itɨte, hurukɨ xeikɨa pɨwewiyatɨkani meta tekɨxite, xarite 'amɨnene winu mawariyari tu'ame.
EXO 25:30 Mexatsie paa yapepɨramanani, nehɨxie yamɨtixuawenikɨ.
EXO 25:31 »Kɨxeme 'uitɨwame hurukɨ keneutawewi, titsunamekɨ wewiyakame. Hetsiena maweni, 'ɨkayari, muwatixaxawa, tuturi yu'iwitsi hexeiyame, tuturiyari yuxewiriyatɨ xeikɨa payani.
EXO 25:32 'Ataxewime yumamate pexeiyani, tapa haikatɨ tapata haikatɨ.
EXO 25:33 Xexuime mamateyaritsie haikakɨa puwatixaxawani 'arimetɨra tuturiyari hepaɨ tiyuxexeiyatɨ, tuturi yu'iwitsiyari hexeiyakame meta xawariyari.
EXO 25:34 Kɨxeme 'uitɨwame peixeiyanita nauka tekɨxiyari 'arimetɨra tuturiyari hepaɨ 'aneneme, meta yuxawari hexeiyatɨkaime.
EXO 25:35 Xexuitɨ mamateyari peixeiyani xexuime tekɨxi hixɨata, 'ɨkayari mɨrawiyatɨkatsie.
EXO 25:36 Tekɨxite meta mamateyari puyuxewiriyani kɨxeme 'uitɨwame hamatɨa, huru xeikɨa pɨhɨkɨtɨni titsunamekɨ wewiyakame.
EXO 25:37 »Keneutiwewiri 'atahuta kɨxemeyari, muwa keneuka'uitɨa yuhɨxie heuyekɨxeme.
EXO 25:38 Tepɨa hiru xikame kɨxeme hetsiemieme meta tɨɨ yayatsame, huru xeikɨa pɨhɨkɨtɨni.
EXO 25:39 Mɨkɨ kɨxeme 'uitɨwame mɨtawewierekɨ meta tinaitɨ mɨreukapinire huru xeitewiyari heimana tamamata heimana haika kiruyari kaniyɨmɨkɨ.
EXO 25:40 »Kenematiuxeiyatsitɨa hɨritsie yemekɨ mɨpaɨ ti'aneneme ketineutiwewi.
EXO 26:1 »Tuki mɨpatsie keneutawewi tamamata rinu 'ixurikiyarikɨ 'ayeyeumekɨ, meta muxa hiruyari 'uariekame mɨyɨtsikimaɨye meta kwimɨxetakɨ metatsiere mɨxetakɨ, Kakaɨyari teɨtamete mehaxutɨkaime.
EXO 26:2 Naitɨ rinu 'ixurikiyari yaxeikɨa pɨyeyeuka, tamamata heimana huta meturuyari heimana 'imeriyu pɨtɨni meta xeimeturuyari heimana nauka tewiyari tsenitimeturuyari patayeyeuka.
EXO 26:3 »Keneutawipa 'ixuriki 'auxɨwime, yuwiwiyame keneuyuri, hipameta 'auxɨwime yaxeikɨa keneuyuri.
EXO 26:4 Matɨari pemitawipaxɨtsie 'imatɨrieka 'ixurikitsie, hakɨrɨi kenawɨtɨaxɨa muxa witayarikɨ mɨyɨtsikimaɨyekɨ, meta yaxeikɨa ketineuyuri hutarieka miemetsie.
EXO 26:5 Matɨari pemitawipaxɨtsie kenawɨtɨa huta tewiyari heimana tamamata hakɨrɨi, yaxeikɨata paɨmeme hutarieka miemetsie, naitɨ yaxeikɨa papaɨmeme mexeiyatɨkanikɨ.
EXO 26:6 Hikɨta huru kwatsituraiyari 'etsipepeme keneutiwewi, huta tewiyari heimana tamamata 'ixuriki 'amɨyeyeu muyuwiyakɨ, tuki hetsie yuxewiriyatɨ mayanikɨ.
EXO 26:7 »Tamamata heimana xewi tsipuri wahuxari 'ɨkariyari 'ayeyeume keneutiwewi, tuki manukanarekɨ 'ixuriki kiyari hepaɨ tiyuxexeiyatɨ.
EXO 26:8 Yaxeikɨa pɨyeyeuka naitɨ, tamamata heimana haika meturuyari heimana 'imeriyu tɨtɨkame meta xeimeturuyari heimana nauka tewiyari tsenitimeturuyari 'atayeyeume.
EXO 26:9 Keneutawipa 'auxɨwime 'ɨkariyari yuxewitɨ mayanikɨ, hipameta 'ataxewime yuxewiriyame, 'ataxewirieka mieme tuki hɨxie muwiere patitunire.
EXO 26:10 »Huta tewiyari heimana tamamata kenawɨtɨaxɨa hakɨrɨi matɨari pemitawipaxɨtsie 'imatɨrieka 'ɨkariyaritsie, tawarita hutarieka miemetsie yaxeikɨa paɨmeme.
EXO 26:11 Hikɨta wurunitse kwatsitɨraiyari keneutiwewi 'etsipepeme huta tewiyari heimana tamamata, hakɨrɨi mawɨtɨkatsie keneuyehatɨaxɨa tuki mayanikɨ, yuxewiriyatɨ naitɨ kanayeimɨkɨ.
EXO 26:12 Mɨkɨ 'ɨkari tamamata mɨhɨkɨ, xewitɨ mɨkɨ naitsata panukawereni 'anuyuhayewatɨ mɨkɨ tuki warita peukawiwieka.
EXO 26:13 Mɨkɨ 'ixurikitsie panayuhayeikawani huta tewiyari heimana tamamata tsenitimeturuyari tapa kɨtsimeyaritsie meta tapatatsiere, mɨkɨkɨ tukita pɨreunare.
EXO 26:14 »Heimana manukawerire keneutawewi tuki hetsiemieme, muxatsi wanawiyari xetamekɨ mɨ'uarietɨkakɨ, mɨkɨ heima 'imatɨrieka manukawerire ketsɨ nawiyarieya 'aixɨa mɨ'ane keneuyuri.
EXO 26:15 Tuki hetsiemiemeta 'akatsiya mexayari keneutixixi, ma'utɨyani.
EXO 26:16 Xexuitɨ mexa nauka meturuyari heimana 'imeriyu pɨtɨni meta haika tewiyari heimana tamamata tsenitimeturuyari 'atayeyeutɨ,
EXO 26:17 meta mɨkɨ mexa xeitapa hutakɨa panumɨtsɨni, mexa heitserie mɨti'uwenikɨ yuhepaɨtsita. Naime mexa 'ematayeyeu tukitsie mieme mɨpaɨ pepɨtiwewieni.
EXO 26:18 Xeitewiyari mexa pɨyɨni, 'ameuyewatsie tatsutɨa mɨyekatsie.
EXO 26:19 »Huta tewiyari keneutiwewita pɨrata tepɨayarikɨ mexa hetsiena ma'uni, xexuitɨ mexa huhutatame pexeiyatɨkani, huhutatametsie meuka'unikɨ.
EXO 26:20 Tayeta muyekatsie 'ameuyewatsie miemeta keneutiwewi xeitewiyari mexa 'ematayeyeu tukitsie mieme.
EXO 26:21 Huta tewiyari pɨrata tepɨayari keneutiwewita mexa xexuitɨ mɨti'unitsie hetɨana pekaniti'uitɨamɨkɨ.
EXO 26:22 'Etsimeuyewatsieta 'ataxewime mexa keneu'uitɨa, tau makayuyuipike hepatsie,
EXO 26:23 tawarita xexuime keneuka'uitɨaxɨa mutatsikuritɨkatsie.
EXO 26:24 Mɨkɨ mexa yu'aurie puti'uka, yuxexuitɨ mituikatɨka pexeiyani, wapaitɨ xeihanirayarikɨ puyutseiriyani. Hutakɨa yaxeikɨa ketineuyuri mutatsikuritɨkatsie,
EXO 26:25 'atahaika mexayari pɨyɨni meta tamamata heimana 'ataxewi mexatɨa mieme pɨrata tepɨayari, huhutatame xeimexayaritɨamieme.
EXO 26:26 »'Akatsiya kɨyeyari pepɨtixixieni manukuhini: meta 'auxɨwime mexate tuki 'etsata mieme,
EXO 26:27 'auxɨwime tapa mieme, 'auxɨwimeta 'etsimauyewatsie mieme tuki manutinieretsie.
EXO 26:28 Kɨyexi ma'utɨka wahixɨapa mukuhuni mexate heutanetɨkaitɨ kaniyɨmɨkɨ.
EXO 26:29 Mexa mɨpepetsawi huru keneutiwiri meta huru hanirayari keneutiwewi manukuhini mana mauye'uixɨanikɨ. Yaxeikɨa manukuhini huru keneutiwiri.
EXO 26:30 Tuki keneutawewi kenematiuxeitsitɨa hɨritsie yemekɨ mɨpaɨ 'anekame.
EXO 26:31 »'Ixuriki 'ayeume keneutawewi meuwiere mɨyɨtsikimaɨyekɨ, kwimɨxetakɨ meta mɨxetakɨ meta rinu witsimɨ'anekɨ, Kakaɨyari teɨtametemama mehaxutɨkaime hetsiena.
EXO 26:32 Keneuwi huru kwatsituraiyarikɨ, nauka 'akatsiya 'ikitsaraɨyaritsie huru muwiriyarietɨkatsie tiwiyakame. Naukame pɨrata tepɨayaritsie pepe'uitɨani.
EXO 26:33 'Ixuriki hixɨapa keneutawi kwaitsituraitekɨ, Muyepatsietsie meta Waɨkawa Muyepatsietsie mukunatɨkanikɨ, tɨratu kakuniyari 'ixuriki warita mayekanikɨ.
EXO 26:34 Tɨratu kakuniyari kenanukanama kanamikiyarikɨ Kakaɨyari ma'axetsie, Waɨkawa Muyepatsietsie paitɨ,
EXO 26:35 'ixuriki meuwie hɨxietsie Waɨkawa Muyepatsietsie, tuki 'etsata tayeta muyekatsie mexa keneutiketsa. Kɨxeme 'uitɨwameta mexa hɨxie keneutiketsa tatsutɨa muyekatsie.
EXO 26:36 »'Ixuriki keneutawewi tuki kitenie mieme mɨyɨtsikimaɨyekɨ, kwimɨxetakɨ meta mɨxetakɨ rinu witsimɨ'anetsie tixukame.
EXO 26:37 Mɨkɨ 'ixuriki hetsiemieme, 'auxɨwime 'akatsiya kɨyeyari 'ikitsaraɨyari keneutixixi meta huru keneutiwiri, huru kwatsituraiyari hexeiyatɨkaime, meta wurunitsekɨ keneutiwewiri 'auxɨwime hetsiena ma'uni.
EXO 27:1 »Mexa keneutawewi mawari wewiwame 'akatsiya kɨyeyarikɨ, 'utatsikuritɨkaime yaxeikɨa huta meturuyari heimana xeitewiyari heimana tamamata tsenitimeturuyari heutatetewame, meta xeimeturuyari heimana xeitewiyari heimana tamamata tsenitimeturuyari 'awekame.
EXO 27:2 Naitsata naukakɨa muta'itsikinatɨkatsie kenawewiexɨa 'awateya, mexa matɨa yunaitɨ puyuxewiriyani, meta wurunitsekɨ keneukawiri mexa mawari taiyariyari wewiwame.
EXO 27:3 Yaxeikɨata ketineutiwewi wurunitsekɨ naime tita mɨreuyewetse mawari matiwewiwa, naxi yetsame, 'itɨ 'amɨpa, tepɨa manuxɨte meta tɨɨ yayatsame.
EXO 27:4 Meta 'ayexaxawame keneutawewiri wurunitsekɨ, naukakɨa muta'itsikinatɨkatsie hanira kenamanaxɨa.
EXO 27:5 Mawari taiyariyari wewiwame hetɨa tenimeyari manuka'atɨkatsie kana'uimɨkɨ hanira, mexa hixɨapa kaniuyemarimɨkɨ.
EXO 27:6 Hutame keneutiwewi kɨyexi kurumawime 'akatsiya kɨyeyarikɨ, mexa mawari wewiwametsiemieme meta wurunitse keneukawiri.
EXO 27:7 Kɨyexi mɨkurumawi haniratsie peuyehaxɨani, 'a'anuyetɨtɨ mawari wewiwametsie, mɨkɨ kɨmana mukukweiyanenikɨ.
EXO 27:8 Mawari wewiwame pemɨtawewieni 'uxawame pepɨyurieni, mexakɨ wewiyakame, kenematiuxeitsitɨa hɨritsie mɨpaɨ 'anekame.
EXO 27:9 »Takwa tuki hetsiemieme pepɨtawewieni. Tahetɨa muyekatsie huta tewiyari heimana 'auxɨwi meturuyari pexeiyani, meta rinu 'ixurikiyari 'aixɨa mɨ'anene hawɨtɨkaitɨ,
EXO 27:10 xeitewiyari kɨyexi mɨka'uni pexeiyani, xeitewiyari wurunitse tepɨayari kɨyexi hetsiena ma'uni. Kɨyexi pexeiyatɨkani kɨmana naitɨ muyuwiyaxɨani pɨrata tepɨayari meta hanira metatsiere pɨrata karawatuyari.
EXO 27:11 Yaxeikɨata heutatewame tayetatsie huta tewiyari heimana 'auxɨwi meturuyari pexeiyani, 'ixuriki hawɨtɨkaime meta xeitewiyari kɨyexi mɨka'uni pɨyɨni meta yaxeikɨa paɨmeme hetsiena ma'uni wurunitse tepɨayari. Metatsiere kɨyexi hanira pexeiyatɨkani meta kɨmana muyuwiyaxɨani metatsiere kwatsiturai naitɨ pɨrata tepɨayari pɨtihɨkɨtɨni.
EXO 27:12 »'Etsimeuyewatsie tau makayuyuipike hepatsie, xeitewiyari heimana huta meturuyari heimana 'imeriyu peutatewani, 'ixuriki meuwɨre pexeiyani, tamamata kɨyexi mɨka'uixɨani meta hepaɨna paɨmetɨ hetsiena ma'uni wurunitse tepɨayari.
EXO 27:13 Yaxeikɨata tau manatineika hepatsie, xeitewiyari heimana huta meturuyari heimana 'imeriyu pexeiyani.
EXO 27:14 Mɨranutahakitɨretsie xeitapatsie 'atahuta meturuyari pexeiyani 'ixuriki meuwɨ, haikatɨ kɨyexi pɨyɨni muka'uni meta haikatɨ hetsiena ma'uni,
EXO 27:15 yaxeikɨata pɨti'aneni xeitapatsie.
EXO 27:16 »Kuraru kitenie 'ixuriki peuwiere 'atanauka meturuyari tewitɨ, pɨwewiyaka wita mɨyɨtsikimaɨyekɨ, kwimɨxetakɨ, mɨxetakɨ, rinu witsimɨ'ane hetsie raxuiyakame, meta naukame kɨyexi pexeiyani naukameta hetsiena ma'uni.
EXO 27:17 Naitɨ kɨyexi takwa mukunama, hanira pexeiyatɨkani, meta pɨrata kwatsituraiyari, metatsiere wurunitse tepɨayari mituikaxɨani.
EXO 27:18 Takwa huta tewiyari heimana 'auxɨwi meturuyari pɨtewini meta xeitewiyari heimana huta meturuyari heimana 'imeriyu patayeuka, rinu 'ixurikiyari 'aixɨa mɨ'anene hexeiyakame huta meturuyari heimana xeitewiyari heimana tamamata tsenitimeturuyari tɨtɨkame, meta mituikatɨka wurunitse pɨhɨkɨtɨni.
EXO 27:19 Naitɨ manuyemɨtsɨ mɨkatsunirixɨani meta tita tukita mutiyukumauwa wurunitsekɨ pɨtiyɨni, metatsiere kurarutsiemieme mɨkatsunirixɨani.
EXO 27:20 »Mɨpaɨ ketiniwaruta'aitɨa 'ixaheritsixi huriwa hatseitiyari hɨkɨame memɨmatsi'atɨirienikɨ, kɨxeme yuheyemekɨ mɨtatɨkanikɨ.
EXO 27:21 'Aruni meta niwemama tɨkarikɨ yamekatenitaiyakakuni Yawé hɨxie 'ixuriki tukiyarita, 'ixuriki meuwie hɨxie tɨratu kakuniyari muyekatsie. 'Ikɨ 'aitsika 'ixaheritsixi mepaye'atɨaka, yuheyemekɨ wanuiwarima yunaitɨ.
EXO 28:1 »Merikɨte 'a'iwa 'Aruni keneuta'ini meta niwemama Narawi, 'Awihu, 'Eriyatsaxi meta 'Itamaxi. 'Ixaheritsixi watsata mɨkɨ mawari wewiwamete mepɨhɨkɨtɨni.
EXO 28:2 'A'iwa 'Aruni kamixateya ketineutiwewi mɨpatsietɨka mɨmariwenikɨ 'aixɨa mɨtixeiyariekakɨ.
EXO 28:3 Ketinewarutaxatɨa temaiwawemete yanemɨtiwarupitɨa, 'Aruni kamixaya memɨtiwewienikɨ 'ixuriki mɨraye'atɨkakɨ, mɨpaɨ 'ana nemɨtipatakɨ nemawari wewiwame mayanikɨ.
EXO 28:4 »Kemarite pemɨtitiwewieni 'ikɨ pɨtihɨkɨ: kamixa 'etsimɨnena, kuka mekatɨni, kamixa 'emɨtewi, xeime kamixa 'atewime tixukame, hɨiyame meta xupureru. Mɨkɨ kamixate mɨtipatsietɨka 'Aruni pepɨtitiwewirieni meta niwemama nemawari wewiwamete memɨhɨkɨtɨnikɨ.
EXO 28:5 Mɨkɨ pemɨtitiwewienikɨ huru pepuyurieni, meta 'ixuriki mɨyɨtsikimaɨye, kwimɨxeta meta mɨxeta metatsiere rinu 'ixurikiyari.
EXO 28:6 »Kamixa 'etsimɨnena pɨtaxuire hurukɨ, hiru mɨyɨtsikimaɨyekɨ, kwimɨxetakɨ, mɨxeta meta rinu 'aixɨa mɨ'anekɨ.
EXO 28:7 Naiparieyatsie pawɨtɨkani ya'atayeyeutɨ, mɨkɨkɨ makuwiwierikenikɨ.
EXO 28:8 Hɨiyame tixukametsiere, kamixa manuhɨayani, hurukɨ, 'ixuriki mɨyɨtsikimaɨye, kwimɨxeta, mɨxeta, meta rinu 'ixurikiyari 'aixɨa mɨ'ane mɨkɨ naitɨ puyuxewiriyani.
EXO 28:9 »'Unitse teteyari keneutitɨki hutame, mɨkɨtsie keniwara'utɨa 'Ixaheri niwemama tamamata heimana huta memɨyupaɨme
EXO 28:10 kememɨteheukunuiwa, xeime tetetsie me'ataxewime keniwareu'utɨa, meta me'ataxewime xeimetsie.
EXO 28:11 Tetexi witsimɨ'anene mɨtixixiwa, katineu'utɨaxɨamɨkɨ tseyu kemɨtiwewiwa hepaɨ: hurutsie piwetsitɨaxɨani,
EXO 28:12 hikɨ kamixa 'etsimɨnena wiwierieyatsie kanekayatsaxɨamɨkɨ. Mɨpaɨ 'ana 'Aruni yunaiparitsie puwara'utɨatɨkani 'Ixaheri niwemama, Yawé mɨwara'eriwanikɨ.
EXO 28:13 Keneutiwewita huru 'etsipepeme 'anuyexaxawame mana pemeiyatsaxɨanikɨ,
EXO 28:14 meta hutame huru kaunariyari keneutiwewi, huru meukateitsie mawɨrixɨanikɨ.
EXO 28:15 »Tawitsie mieme kuka heitserie mɨtikuxata, pepitawewieni tixukame hurukɨ, hiru mɨyɨtsikimaɨyekɨ, kwimɨxetakɨ, mɨxetakɨ rinu 'aixɨa mɨ'anekɨ, yaxeikɨa rewewiyakame kamixa 'etsimɨnena hepaɨ.
EXO 28:16 'Ayehutame pepɨyurieni yaxeikɨa heutatetewame, xeitewiyari tsenitimeturuyari 'ayetewime meta xeitewiyari tsenitimeturuyari 'atayeukame.
EXO 28:17 Pepeiyatsaxɨani naukakɨa tetexi 'anukutetɨkaime witsimɨ'anene. Mexɨakame mukukatsie keneuyatsaxɨa xetamekɨ, taxaɨyemekɨ meta tsiɨraɨyemekɨ mutimerɨkatɨka,
EXO 28:18 hutariekata, yuawitɨ tsiɨraɨyemekɨ, yuawimekɨ mukutuxie meta tuxamekɨ mutimerɨka,
EXO 28:19 hairieka miemetsieta, merie xetatɨ taxaɨyemekɨ, tuxamekɨ kapemaɨyemekɨ meta mɨyɨtsikimaɨyekɨ,
EXO 28:20 naurieka mukukatsieta, taxaɨyetɨ, kwimɨyɨwi meta tsiɨraɨyemekɨ. Hurutsie hatetɨkaime pepeuyatsaxɨani.
EXO 28:21 Tamamata heimana huta pɨpaɨmeni tetexi, xexuitɨ nuiwaritsie puwa'inɨaritɨni. Xexuime tetetsie 'Ixaheri niwemama tamamata heimana huta memɨyupaɨme mepa'utɨkani tseyu hepaɨ.
EXO 28:22 »Hurukɨ kuka wiwieriyari keneutiwewi ya'atayeyeume, mukutapierikeni 'awɨtɨkaime.
EXO 28:23 Kukatsie hutame huru hanirayari kenamanaxɨa tapa mutatsikuritɨkatsie.
EXO 28:24 Kenawɨtɨaxɨa huru kaunariyari kuka hanirayaritsie.
EXO 28:25 Huru kaunariyari muhuta mayexaxawa kamixa 'etsimɨnena naiparieyatsie pepekuwiwitɨaxɨani makatɨrekɨ yɨhɨxie.
EXO 28:26 »Hutameta hanira keneutiwewi, kukatsie hetɨana paitɨ muta'itsikinatɨkatsie kenamanaxɨa kamixa 'etsimɨnenatsie mɨtinakenikɨ.
EXO 28:27 Yaxeikɨata hutame huru hanirayari keneutiwewi, kamixa 'etsimɨnenatsie kenamanaxɨa naipari hetɨatsie hɨiyame manukuka heima keneuwipaxɨa.
EXO 28:28 Hanira kuka hetsie mamane kamixa 'etsimɨnena hanirayari hamatɨa pɨhɨire 'ixuriki yuawimekɨ, hɨiyame puwatseiriyani kamixa kuka matɨa muyuwiyanikɨ.
EXO 28:29 Mɨpaɨ 'Aruni kepauka Muyepatsietsie meutahani yutawitsie pekatɨkɨni, kuka 'aixɨa mɨti'ane mɨtikuxatanikɨ, 'Ixaheri niwemama kememɨtetetewa pɨwara'utɨaka, Yawé muwara'eriwanikɨ.
EXO 28:30 Tawitsie mieme kuka heitserie mɨtikuxata, muwa pepeikayatsa 'urimi meta tumimi. Mɨpaɨ kepauka 'Aruni Yawé hɨxie meutahani peixeiyani yutawitsie 'ixaheritsixi wa'inɨari.
EXO 28:31 »'Ixuriki mɨyɨtsikimaɨye pepɨyurieni kamixa 'etsimɨtewi heima mieme,
EXO 28:32 hixɨapa hewatitenime mu'u rewatinakeme. Mewatitenitsie 'atatenime, kamixa 'etsimɨtewi kemɨrewewiya hepaɨ, mɨka'ukatsanikenikɨ.
EXO 28:33 'Ixuriki tenimeyaritsie putuni wita mɨyɨtsikimaɨyekɨ kwimɨxetakɨ, mɨxetakɨ wewiyatɨkaime, meta huru kapanayari 'anayewɨtɨkaime.
EXO 28:34 Naime 'ixuriki tenimeyaritsie kapana meta wita putuniyari kenatawɨtɨa.
EXO 28:35 Mɨkɨ 'ixuriki 'Aruni penakatɨkɨni kepauka mɨti'uximayaka, kapana mutitiraurɨkanikɨ kepauka Yawé hɨxie Muyepatsietsie mɨyeyeikani, mɨpaɨ mɨkɨ mɨkamɨnikɨ.
EXO 28:36 »Huru tepɨayari keneutawewi 'etsitsuikame 'etsiyeume, hetsiena ketina'utɨa tseyu hepaɨ re'ukame: “Mɨpatsie Yawé Hetsie Mieme”.
EXO 28:37 Keneuwipa mukuretsitsie 'ixuriki yɨtsikimaɨyemekɨ, mɨkɨ hɨxiena tikunanakeme.
EXO 28:38 Mɨkɨ tepɨa tseyuyari 'Aruni yukanata yakatinemakamɨkɨ, mɨkɨkɨ Yawé naime 'ixaheritsixi wamawari mɨnaki'eriekakɨ, mɨpaɨ 'Aruni 'axamɨti'ane yuhetsie pɨtikuhɨweni kepauka mawari memɨyetuayanitsie.
EXO 28:39 »Kamixa 'amɨtewi meta mukuretsi rinu 'ixurikiyari pepɨyurieni. Hɨiyame pɨ'itseni witsireukuwewiyatɨ.
EXO 28:40 'Aruni niwewema kamixa 'amɨtɨtɨ pekaniwatiwewiriemɨkɨ, kuxira meta mukuretsi, mɨkɨ naitɨ witsipɨti'aneneni 'aixɨa memɨtexeiyariekakɨ.
EXO 28:41 Xɨkari pe'itikemaritɨani 'a'iwa 'Aruni meta niwemama, pepɨwakawirieni hatseiti pemɨwahɨritɨani heitserie memexeiyanikɨ mepatsietɨ mete'aitatɨ nemawari wewiwamete memɨhɨkɨtɨnikɨ.
EXO 28:42 »Metatsiere weruxi keniwarutiwewiri 'etɨtɨme wateurite mɨnakakɨ meta memayɨhɨayatsie 'atɨkaime.
EXO 28:43 'Aruni meta niwemama kepauka memeutahaxɨani tukita mɨkɨta mepuyewetɨkani, yatɨni kepauka 'aurawa memɨkɨne 'ɨkwa mawariyari matitaiyarɨwatsie meteta'uximayatake Muyepatsietsie, xɨka mɨpaɨ mekate'uyurieni mekanikwikuni. 'Ikɨ 'aitsika kanihɨkɨtɨni 'Aruni hetsiemieme meta nuiwarimama hetsiena memɨyekɨne.
EXO 29:1 »Pemɨwapatakɨ nemawari wewiwamete memakɨnekɨ nehetsiemieme, mɨpaɨ pekatiniyurimɨkɨ: Xeime tsikeru pekanimiemɨkɨ xeiwiyari hɨkame meta yuhutame muxatsi 'ukitsi 'aixɨa me'anenekame,
EXO 29:2 tɨriku mɨtɨxiyarikɨ paa pepɨtiwewieni meta tsuira tikuxanariyame kanɨkame pɨwiyamatɨkani xeikɨa, yaxeikɨata kɨxau tikuxanariyame kanɨkame pepɨtiwewieni wiyamatɨkaime.
EXO 29:3 Tsikɨiwititsie paa kenekamana, tsuira meta kɨxau metatsiere meyuhutame muxatsi 'ukitsi keneneuxatɨa.
EXO 29:4 Hikɨ pepɨwaranuwitɨni 'Aruni meta niwemama 'ixuriki tukiyari manuwe hɨxie, mana pepɨwa'ɨya.
EXO 29:5 'Aruni kemarite ketinanakatɨtɨa kamixa 'amɨtewi meta heriemieme kamixa 'etsimɨnena hɨxiena mieme yunɨkame kukayari meta kamixa tixukame. Kuka tawitsie mieme pɨtapierixɨani hɨiyametsie
EXO 29:6 mukuretsi mu'uyatsie kenanukuwiri meta tseyu hamakama mɨpatsie.
EXO 29:7 Hatseiti mɨtiyupata keneukawiri mu'uyatsie.
EXO 29:8 Hikɨta niwemama keniwarawitɨka kamixa 'amɨtɨtɨ keniwaranakatɨtɨa,
EXO 29:9 meta mukuretsi hetsiemieme, hikɨta 'Aruni meta niwemama wahɨiyamekɨ pepɨwaranahɨaxɨani. Mɨpaɨ pepɨtiwahɨritɨani, meta mawari wewiwamete mɨkɨ nuiwari wahetsiemieme 'aitsika pɨhɨkɨtɨni yuheyemekɨ.
EXO 29:10 »Tsikeru kene'atɨa tuki hɨxie mana 'Aruni meta niwemama mu'uyatsie yumamakɨ memeutimenikɨ,
EXO 29:11 mana Yawé hɨxie pepitimawa tsikeru.
EXO 29:12 'A'itɨwamekɨ xuriyatsie keneme'i mawari taiyame 'awayatsie keneuxurima, muyuhayewata xuriya mawari taiyame hetɨa pepitiyeurieni.
EXO 29:13 Nema meta muume muhuta wiyayari mi'eimatɨka keneukaxiteki naime, keneutitaiya mawari taiyametsie,
EXO 29:14 peru tsikeru waiyari, nawiyari meta kwitaya pepititaiya 'ateewa xemakuteitsie, mɨkɨ mawari memɨ'itiyanikɨ pɨhɨkɨtɨni.
EXO 29:15 »Xeime muxa 'uki pepɨwahana 'Aruni meta niwemama mu'uyatsie memeutimenikɨ,
EXO 29:16 hikɨ pepitimawa, xuriyayakɨ mawari taiyame pepɨta'ɨya meta nauka 'etsatanayaritsie.
EXO 29:17 Muxa keneutixitexɨa, kwinuri petihauxime meta 'ɨkateya, 'etsimɨpepetsie perapime meta muxa mu'uya,
EXO 29:18 muxa naime pekanitataiyamɨkɨ mawari taiyametsie. Mɨkɨ mawari taiyariyari, 'imikieri taipa warɨkariekame kanihɨkɨtɨni, witsimu'ɨa Yawé minake.
EXO 29:19 »Xeime muxa tawari kene'atɨa, 'Aruni meta niwemama mu'uyatsie memeutimenikɨ,
EXO 29:20 hikɨ muxa pekanimiemɨkɨ, 'Aruni nakaya heima 'etsiwa tserietana mieme pekanixurimamɨkɨ yaxeikɨata niwemama, meta wa'itɨwame 'amupapa watserieta miemetsie meta wa'ɨkatsie 'amupapayari watserieta miemetsie. 'Ariketa mawari taiyame xuriyakɨ pekanita'ɨyamɨkɨ meta nauka 'etsatanayaritsie,
EXO 29:21 meta 'etsiwa xuriyakɨ metatsiere 'etsiwa hatseiti mɨtiyupatakɨ, 'Aruni niwemama yunaime keniwaruti'ɨya wakemaritetsie. Mɨpaɨ 'Aruni meta niwemama mepatsietɨ mepakɨne meta wakemarite tipatsietɨ pɨrayani.
EXO 29:22 »'Ikɨ muxa mawari wewiwamete mɨwapatakɨ mɨ'ayumiemekɨ, kwaxieya keneuti'uta, kwinurite wiyayari, nema, muume muhuta, meta teuri tserietana mieme.
EXO 29:23 Paa tsikɨiwititsie mɨyemane tikuxanariyame mɨkanɨitɨarie Yawé hɨxie mama, xeime paa pekananati'ɨimɨkɨ meta tsuira mɨwiyama xeimeta mɨkɨxauni,
EXO 29:24 naime 'Aruni meta niwemama ketiniwayetuiri teikɨ memeitserakɨ mawari Yawé hetsiemieme mɨhɨkɨkɨ.
EXO 29:25 Mɨkɨ kwitɨwa mepɨmatsiyetuirieni 'ekɨ Yawé hɨxie pemititaiyakɨ mawari taiyametsie mawari taiyariyari witsimu'ɨa yɨnɨkame, 'ikɨ 'imikieri taipa warɨkariekame kanihɨkɨtɨni Yawé hetsiemieme.
EXO 29:26 'Ariketa muxa tawieyatsie mieme wai pekananatituimɨkɨ, mɨ'inɨariyarikɨ 'Aruni kemɨranayexeiyarie nemawari wewiwame mayanikɨ, hikɨ mawari Yawé hɨxie pekaniyuitɨwamɨkɨ, 'ikɨ kani'ayumiemetɨni mawari muyuitɨariwa mɨhɨkɨkɨ. Mɨkɨ muyuhayewa 'ahetsiemieme payani.
EXO 29:27 »Keneuti'uta tsikeru waiyarieya tawitsie mieme mawari muyuitɨariwa mayeitɨarie 'Aruni meta niwemama heitserie memɨpitɨarienikɨ, yaxeikɨata teuri mawari mayeitɨarie, mɨkɨ pɨwahetsiemieme.
EXO 29:28 'Ipaɨ tipaɨmetɨ xehetsiemieme pɨrayeikani kepauka 'ixaheritsixi 'aixɨa memɨteyuxeiya mawariyari memɨwewie Yawé hetsiemieme, mɨkɨ mepɨteyetuiriyarɨwani 'Aruni meta niwemama.
EXO 29:29 »'Aruni kemarieya mɨpatsie 'uxa'atɨniwarie nuiwarimama wahetsiemieme payani, heitserie memexeiyanikɨ mepatsietɨ mete'aitatɨ mawari wewiwamete memɨhɨkɨtɨnikɨ.
EXO 29:30 Tsepa ke'anetɨ mawari wewiwame 'Aruni nuiwarieyatɨtɨ netukita munuani muyepatsietsie mɨtita'uximayatakɨ, mɨkɨ kamixate pɨranakatɨkɨni 'atahuta tukari.
EXO 29:31 »Mɨkɨ muxa kɨmana memupatsie, keneuka'etsa xaɨtsie muyepatsietsie.
EXO 29:32 'Ixuriki tukiyari manuwe mɨranutahakitɨretsie, 'Aruni meta niwemama muxa waiyarieya mepɨtikwani meta paa tsikɨiwititsie mɨyemane.
EXO 29:33 Mɨkɨ 'imikierikɨ mepɨ'itiyaka, mɨkɨkɨ heitserie memexeiyanikɨ mete'aitatɨ meta mepɨpatsie, mɨkɨ xeikɨa mepɨyɨwaweni memitikwani, xewitɨ tawarita pɨkayɨwe, mawari mɨpatsie mɨhɨkɨkɨ.
EXO 29:34 Xɨka 'uyuhayewa muxa waiyarieya meta paa, 'uxa'arieka keneutitaiya. Pɨkayɨweni mɨtikwaiyanikɨ, mɨkɨ mawari mɨpatsie mɨhɨkɨkɨ.
EXO 29:35 »Yaketineuyuri kenematiu'aitɨa 'Aruni hetsiemieme meta niwemama wahetsiemieme. 'Atahuta tukari pepuyurieni mɨkɨ hɨritɨarika pemɨwapitɨanikɨ.
EXO 29:36 Xexuime tukaritsie tsikeru xeime peputimawani kɨmana xemɨ'itiyakakɨ. Pɨ'itiyaka mawari taiyame mawari hetsiena mieme pepɨwewieni, hatseiti mɨtiyupatakɨ pepi'ɨya.
EXO 29:37 Mɨpaɨ pepɨtiyurieneni 'atahuta tukari. Mɨpaɨ mawari wewiwame meta tita mɨtiyuitɨani 'itiyatɨ payani.
EXO 29:38 »Xexuime tukaritsie pepɨwarutimawani yuhutame muxatsi xeiwiyari memɨhɨtɨka mawari taiyametsie.
EXO 29:39 Ximeri kahekɨareyu xeime pekanitimawamɨkɨ, xeimeta taikai.
EXO 29:40 Ximeri pemitimawa matɨa, huta kiruyari tɨriku mɨtɨxiyari pepɨtimawa meta huriwa hatseitiyari nɨkame, meta winu xeirituruyari.
EXO 29:41 Xeime taikai pemɨtimawa muxa, mɨkɨ mawari taiyariyari payani, witsimu'ɨa Yawé minake meta tinɨkame ximeri timieme hepaɨ.
EXO 29:42 »Xenuiwarima memɨtinunuiwa yaxeikɨa Yawé hetsiemieme mawari taiyariyari mepuwewieka. Netuki 'ixurikiyari manuwe hɨxie xepɨteyurieka, ne 'ahamatɨa mana nemɨrataxatatsie,
EXO 29:43 yaxeikɨa 'ixaheritsixi wahamatɨa nemanetixexeɨriwatsie. Netɨrɨkariya witsimɨ'ane mana katinakupatamɨkɨ.
EXO 29:44 »Patsiekame nekanayeitɨamɨkɨ mɨkɨ tuki 'ixurikiyari meta mawari wewiwame, meta 'Aruni meta niwemama mepatsiekame nekaniwarayeitɨamɨkɨ memɨte'uximayakakɨ nehetsiemieme mawari wewiwametekɨ.
EXO 29:45 'Ixaheritsixi wahamatɨa nekaniuyeikamɨkɨ, wakakaɨyari nepɨhɨkɨtɨni.
EXO 29:46 'Ana mɨpaɨ mepɨtehetimani kename ne Yawé nehɨkɨ wakakaɨyari. 'Ekipitu nemɨwarayewitɨ wahamatɨa nemuyeikanikɨ. Ne Yawé xekakaɨyari nekanihɨkɨtɨni.
EXO 30:1 »'Ɨkwa taiyame witsimu'ɨa mexayari keneutawewi 'akatsiya kɨyeyarikɨ.
EXO 30:2 Yaxeikɨa hatewatɨkaime, huta tewiyari heimana 'auxɨwi tsenitimeturuyari 'ayetewime meta yaxeikɨa mɨpaɨ 'atayeukame meta nauka tewiyari heimana tamamata tsenitimeturuyari 'aweme. 'Awateya naitɨ kaniyuxewiriyakamɨkɨ mɨkɨ mexa matɨa.
EXO 30:3 Herie keneukawiri huru hɨkɨame metatsiere naitsarie 'etsatana meta 'awateya, tenimeyaritsie hurukɨ kenata'utɨa.
EXO 30:4 Tenimeyari manukaniere hanira kenamanaxɨa naitsata 'etsatana mana kɨyexi meuye'unikɨ mɨkukweiyanenikɨ.
EXO 30:5 Kɨyexi 'akatsiya kɨyeyari keneuyuri, huru keneutiwiri.
EXO 30:6 'Ɨkwa witsimu'ɨa mexayari 'ixuriki meuwie hɨxie keneutaketsa kakuni meukunama, kakuni kanamikieya hɨxie, ne mana nepɨmatsikɨhɨaweni.
EXO 30:7 »Mukatatarenitsie 'Aruni, kepauka kɨxeme 'aixɨa mukuyuruwanitsie, 'ɨkwa witsimu'ɨa yakatinikutaiyamɨkɨ 'ɨkwa witsimu'ɨa mexayaritsie,
EXO 30:8 meta taikai kepauka mikutaiyanitsie. Xenuiwarima memɨtixuawere 'ɨkwa witsimu'ɨa yamekateniutitaiyakuni Yawé hetsiemieme.
EXO 30:9 Tawarita xeime 'ɨkwa yɨkɨ'aneme pepɨkataiyani mɨkɨ 'ɨkwa witsimu'ɨa mexayaritsie, meta mana mawari taiyariyari pepɨkakuwewiwani, meta hatsite mawarikayari meta mana winu pepɨkaheutitu'ani.
EXO 30:10 Xeiwiyari 'anukayeikakaku 'Aruni 'itiya mawariyari pukuwewiwani memɨtinunuiwa wahetsiemieme memɨ'itiyanikɨ. Mawari taiyame 'awateya kanitixurimamɨkɨ 'axamɨtiuyuri mɨ'itiyanikɨ. Mɨkɨ mawari taiyame yuheyemekɨ patsietɨ kanayeimɨkɨ Yawé hetsiemieme».
EXO 30:11 Yawé Muitsexi katiniutaxatɨani mɨpaɨ katinitahɨawe:
EXO 30:12 «Kepauka memaka'utɨarieni 'ixaheritsixi, yuxexuitɨ Yawé hetsɨa mekateniyutuakuni yutukaritsiemieme, memɨkatetikwikwinenikɨ kepauka memɨti'inɨatsieni.
EXO 30:13 Yuxexuitɨ memaka'utsie mekateniyutuakuni Yawé hetsiemieme 'ataxewime kɨramuyari pɨrata, tuki kemɨti'inɨata hixɨapa 'akame.
EXO 30:14 Yunaitɨ memaka'utsieni xeitewiyari wiyari memɨhɨtɨka mɨkɨ mawari mekaniyetuakuni Yawé hetsiemieme.
EXO 30:15 Yutukari memɨtawikweitsitɨanikɨ, yunaitɨ yaxeikɨa paɨpaɨmeme mekaniyetuaxɨakuni, waɨkawa mɨrexeiya meta mɨkarexeiya.
EXO 30:16 'Ekɨ mɨkɨ pɨrata pekananɨ'ɨimɨkɨ 'ixaheritsixi memiyetuani, pekaniyetuamɨkɨ 'ixuriki tukiyari hetsiemieme mayanikɨ. Mɨpaɨ xɨka xete'uyurieni Yawé 'ixaheritsixi kɨmana memɨte'uyutua kanixeiyakamɨkɨ memɨkakwinikɨ».
EXO 30:17 Yawé Muitsexi katiniutaxatɨani, mɨpaɨ katinitahɨawe:
EXO 30:18 «Katsu maimawame keneutawewi 'ayeume wurunitse tepɨayarikɨ, meta 'ɨkayari yaxeikɨa wurunitsekɨ wewiyakame, 'ixuriki tukiyari manuwe meta mawari taiyame wahixɨapa keneutaketsa. Haa kenakatu'a,
EXO 30:19 kɨmana 'Aruni meta niwemama mekaniukamaimawakuni meta yɨ'ɨkate mekanitihauxinakuni.
EXO 30:20 Kepauka memeutahaxɨani tukita, yatɨni kepauka mɨratimawatɨre hepa memukɨne taiyarika mawariyari Yawé hetsiemieme mewewienike, mana meheuyuhauxinatɨ
EXO 30:21 yumamatetsie meta yɨ'ɨkatetsie memɨkakukuwenikɨ. 'Ikɨ 'aitsika hawaikɨ pɨkahau'axe 'Aruni hetsiemieme meta nuiwarimama wahetsie».
EXO 30:22 Yawé Muitsexi katiniutaxatɨani, mɨpaɨ katinitahɨawe:
EXO 30:23 «Naime 'ikɨ ketineukuxeɨri witsimɨtiu'ɨatɨka 'aixɨa mɨti'anene: 'ataxewime kiruyari mixaxi mɨhaxiki, haika kiruyari witsimu'ɨa kanera, haika kiruyari 'uwá witsimu'ɨa,
EXO 30:24 'ataxewime kiruyari katsiya kararayari witsimu'ɨa, nauka rituruyari huriwa hatseitiyari, kemɨti'inɨarikai tukita 'ana.
EXO 30:25 Mɨpaɨ tipaɨmemekɨ hatseiti pekanikawewimɨkɨ, witsimɨtiu'ɨatɨka tiwewiwame hepaɨ. Mɨkɨ hatseiti mɨpatsie kanayeimɨkɨ.
EXO 30:26 Mɨkɨkɨ 'ixuriki tukiyari pekanikawirimɨkɨ meta tɨratu kakuniyari,
EXO 30:27 mexa meta naime mana mɨrapine, kɨxeme 'uitɨwame meta naime tita mɨreutinɨ'ɨ, 'ɨkwa witsimu'ɨa mexayari,
EXO 30:28 mawari taiyariyari wewiwame naime tita mɨreutinɨ'ɨ, meta maimawame yaxeikɨata 'ɨkaya hetsiena muyema.
EXO 30:29 Mɨpaɨ petiyurieme mɨkɨ yemekɨ tipatsietɨ katinayeimɨkɨ, xɨka mɨkɨ piinite tiukumayuani patsietɨta kanayeimɨkɨ.
EXO 30:30 »'Aruni meta niwemama keniwarukawiri, mepatsiekame keniwarayeitɨa nemawari wewiwamete memɨhɨkɨtɨnikɨ.
EXO 30:31 'Ixaheritsixi mɨpaɨ pekatiniwatahɨawimɨkɨ: “'Ena mɨreutiyune, 'ikɨ nehatseiti mɨpatsie kanihɨkɨtɨkamɨkɨ.
EXO 30:32 Hipameta teɨteri xepɨkawakawiriwani, meta hatseiti hepaɨna reukuwewiyakame xepɨkawewieka. Mɨkɨ hatseiti mɨpatsie kanihɨkɨtɨni, mɨpaɨ xeketenemaika.
EXO 30:33 Kemɨ'ane xeme hepaɨna 'aneme witsimu'ɨa mɨkawewieni, xeime kemɨ'ane mɨkamawari wewiwame mɨkawirieni, mɨkɨ yukiekaritsie kanayeweiyariemɨkɨ”».
EXO 30:34 Yawé Muitsexi mɨpaɨ katiniutahɨawe: «Yaxeikɨa tipapaɨmeme ketineukuxeɨri hipame kɨyexi tsuayari, meta 'amɨwaxi, kariwanu meta 'ɨkwa hɨkɨa,
EXO 30:35 mɨkɨ naime ketineunɨitɨa 'ɨkwa witsimuku'ɨare mayanikɨ, 'ɨkwa witsimu'ɨa wewiwamete wahepaɨ. 'Una kenanutiwiwi, 'ɨkwa hɨkɨa mɨpatsie mɨhɨkɨtɨnikɨ.
EXO 30:36 Yapaɨmeme keneutɨxi tumuanime kenayeitɨa, 'ixuriki tukiyarita kakuni hɨxie kenamana, hakewa ne 'ahamatɨa nemɨretixaxatani. Mɨkɨ xehetsiemieme 'ɨkwa witsimu'ɨa yemekɨ pɨpatsieka,
EXO 30:37 tawarita hepaɨna reukuwewiyatɨ pɨkayuwewieneni, mɨkɨ Yawé hetsiemieme kanihɨkɨtɨni. Xeme mɨpaɨ xeketenemaika patsiekame xekenayeitɨaka.
EXO 30:38 Kemɨ'ane mɨkɨ 'ɨkwa witsimu'ɨa mɨkawewieni 'i'ɨkwimɨtɨ, mɨkɨ yukiekaritsie kanayeweiyariemɨkɨ».
EXO 31:1 Yawé Muitsexi katiniutaxatɨani mɨpaɨ katinitahɨawe:
EXO 31:2 «Mɨpaɨ ketinemaika Wetsareri nepanayexei, 'Urihi nu'aya meta Kuxi teukarieya, Kura xiɨyarieya,
EXO 31:3 nekanihɨniyani Kakaɨyari 'Iyarieyakɨ, mɨtimaiwenikɨ, mɨtimatenikɨ, kemɨtiuyurieni kaniyɨweni,
EXO 31:4 waɨkawa mɨtiwewiwenikɨ hurukɨ, pɨratakɨ meta wurunitsekɨ,
EXO 31:5 tetexi witsimɨ'anene mɨxitewenikɨ, meta meitayatsawenikɨ, kɨyexi haruruanime mɨtiwewiwanikɨ, naime mɨtitiwewiwanikɨ tita mɨtimate.
EXO 31:6 »Meta xeime 'iparewiwame nepanayexei 'Ahurihawi mɨtitewa 'Akitsamaki nu'aya, Rani xiɨyarieya, meta nepɨwarupitɨa memɨtematenikɨ yunaime tewewiwamete yemekɨ yamemɨteyurienikɨ kenemɨmatiuta'aitɨa:
EXO 31:7 tuki 'ixurikiyari, tɨratu kakuniyari, meta kanamikiyari, meta tukita naitɨ piinite mɨtiyukumayuani,
EXO 31:8 mexa meta xakɨrɨte meta kɨxeme 'uitɨwame hurukɨ wewiyakame, meta 'ɨkwa witsimu'ɨa mexayari,
EXO 31:9 meta mawari taiyariyari matiwewiwa meta ketipaɨmetɨ muwa mɨtiyukumaɨwa, yaxeikɨa maimawame meta 'ɨkaya,
EXO 31:10 kemarite mɨ'itsarietɨka, meta 'Aruni kamixateya mɨtipatsietɨka metatsiere niwemama wakemarite,
EXO 31:11 meta hatseiti memɨwakawiriwa meta 'ɨkwa witsimu'ɨa Muyepatsietsie mieme. »Naime mepɨtetiwewieni ne kenematiuta'aitɨa».
EXO 31:12 Yawé Muitsexi mɨpaɨ katiniuta'aitɨani:
EXO 31:13 «Mɨpaɨ 'ixaheritsixi ketiniwarutahɨawi: “Xekena'eriwani xawati 'uxipiya tukaritsie. Nuiwarite memahu wahetsiemieme, xawati tukari 'inɨari pɨhɨkɨtɨni nehetsiemieme meta xehetsiemieme, mɨpaɨ xemɨtemaikakɨ ne Yawé nemenayexei mɨkɨ tukaritsie xemɨnetsihahɨawenikɨ.
EXO 31:14 »”Xawati tukariyari pɨpatsieka xehetsiemieme. Xekena'eriwani. »”Kemɨ'ane mɨkaha'eriwani ke'umierieni. »”Kemɨ'ane mɨti'uximayaka 'ana, tahamatɨa pɨka'uyeikani.
EXO 31:15 »”'Ataxewi tukari xepɨte'uximayaka, peru xawati 'uxipiya pɨhɨkɨtɨni pɨpatsieka Yawé hetsiemieme. »”Xewitɨ xɨka ti'uximayaka xawatikɨ ke'umierieni”.
EXO 31:16 »'Ixaheritsixi mekehe'eriwani xawati 'uxipiya tukari. Wanuiwarite wahetsiemieme tɨratu yuheyemekɨ kanayeimɨkɨ,
EXO 31:17 'inɨari yamɨreuyuhane pɨhɨkɨtɨni mɨkɨ meta ne. »Kaniyuritɨni, 'ataxewi tukari Yawé katiniutawewieni, muyuawi taheima mieme meta kwie, 'atahutarieka tukaritsie puka'uxipi».
EXO 31:18 Kepauka mɨtiutahayewaxɨ tikuxatatɨ Tsinahi hɨriyaritsie Muitsexi matɨa, hutame tetexi pi'ɨitɨa 'inɨari niukiyari maye'uxa pɨhɨkɨtɨkai Kakaɨyari mɨraka'utɨa mana yumamakɨ.
EXO 32:1 Merikɨtsɨ Muitsexi 'ekatineutewikaitɨni kanuawetɨ Tsinahi hɨriyaritsie heyeikatɨ, hikɨ 'Aruni hɨxie 'ixaheritsixi me'u'axɨaka mɨpaɨ mekatenitahɨawe: —Peuyewetse kakaɨyarixi pemɨtatsitiwewirieni memɨtatsi'uwitɨximenikɨ, Muitsexi 'Ekipitu mɨtatsi'ayewitɨ, 'atsitepɨkatemate kemeyɨ kemɨreyɨnixɨ.
EXO 32:2 'Aruni mɨpaɨ katiniwaruta'eiya: —Huru nakɨtsayari xekeniwarutawawiri yu'ɨitama, yuniwema 'ukitsi meta 'ukari, nehetsɨa xekene'atɨa.
EXO 32:3 Yunaitɨ 'ixaheritsixi huru nakɨtsayari memexeiyakai, menenuyexɨnaxɨani 'Aruni mekaniyetuirieni,
EXO 32:4 huru hanutɨkɨka kanitikwaniya, 'ipɨnaka kakaɨyari kaniutawewieni, tsikeru hepaɨ 'aneme. Hikɨ yunaitɨ teɨteri mɨpaɨ mekaniutiyuani: «'Ixaheri, 'ikɨ 'akakaɨyari kanihɨkɨtɨni 'Ekipitu mɨmatsi'ayewitɨ».
EXO 32:5 'Aruni 'ixeiyatɨ tuuru, mawari taiyame kaniutawewieni tsikeru hɨxie, hikɨ mɨpaɨ kaniutayɨni: —'Uxa'a 'ixɨarari tekaniwewikuni Yawé hetsiemieme.
EXO 32:6 'Uxa'arieka ximeripaitɨ 'ixaheritsixi mekananuku'uni mekateni'atɨani mawari taiyariyari meta kename 'aixɨa memɨteyuxeiyanikɨ mawariyari. Hikɨ yunaitɨ mekananukayaxe mekateniukwani mekaniuti'ieni, kemɨtiwanake mekaniyɨakaitɨni.
EXO 32:7 Merikɨtsɨ Yawé Muitsexi mɨpaɨ katiniutahɨawe: —Xeiya kenanukaye'a teɨteri 'Ekipitu pemɨwarayewitɨ 'axamepɨteyurie.
EXO 32:8 Yapauka mepeuyexɨri huye mepuku'eiri, kenemɨtiwaruhɨritɨa, huru me'ukwaniyaka yukakaɨyari xeikɨa mepɨka'utawewi tsikeru hepaɨ 'anekame, matsi hɨxienata mepukatunuma'ui, mawari mepiwewiri, meta mɨpaɨ meputiyua: “'Ixaheri, 'ena 'akakaɨyari 'Ekipitu mɨmatsi'ayewitɨ”.
EXO 32:9 Yawé tawarita Muitsexi mɨpaɨ katiniutahɨawe: —'Ari nepɨretima 'ikɨ teɨteri mepɨtsetse'i.
EXO 32:10 'Ekɨ wahetsie pepɨkanuaka. Nehaxɨa nepɨtatuani wahetsie, nepɨwakwini yunaime. Peru 'ahetsie nuiwari nepɨwatamɨiriya.
EXO 32:11 Muitsexi Yawé yukakaɨyari kaninɨtɨamɨkɨkaitɨni mɨpaɨ katinitawawirieni: —Neuxei Yawé, ¿'ateɨterima wahepaɨtsita pepɨkaha'aka, pemɨwarayewitɨ 'Ekipitu 'atɨrɨkariyakɨ waɨkawa petiyurienetɨ?
EXO 32:12 ¿Mɨpaɨ memɨka'utiyuanenikɨ 'ekipitutari, kari mɨkɨ pɨwarayewitɨ wakwimɨtɨ yeuta paitɨ, 'ena kwiepa memeuyewenikɨ? Pepɨkaha'aka ketineunewi. Keneuyɨnɨtɨa, 'ateɨterima wahetsiemieme 'axapepɨkatiyurieneni.
EXO 32:13 Keniwara'eriwani kepemɨtiwarutahɨawixɨ, 'Apɨrahami, 'Itsahaki, 'Ixaheri meta. 'Ekɨ mɨpaɨ peputayɨ kename wanuiwari pewatamɨiriyakekai, kememɨteyuxexeiya xurawetsixi muyuawitsie, 'ekɨ pepɨwaruxatɨa kwie wanuiwari wahetsiemieme mayanikɨ yuheyemekɨ.
EXO 32:14 Hikɨ Yawé kaniuhaxɨapieni, katiniuhayewa yuteɨterima kemɨwayurienikekai.
EXO 32:15 Merikɨtsɨ Muitsexi kaninuani hɨritsie 'akaneka. Kepauka munua tetexi kana'ɨkaitɨni hutame wewerime, mɨkɨtsie 'inɨari niukiyari kana'utɨkateitɨni naitsata.
EXO 32:16 Mɨkɨ tetexi meta mɨra'utɨkatei, Kakaɨyari wewiyaya kanihɨkɨtɨkaitɨni.
EXO 32:17 Kutsuhexi kepauka teɨteri wahiwari mu'eni, Muitsexi mɨpaɨ katiniutahɨawe: —Tematiteitsie hiwari waɨkawa pexuawe pɨreyukwine.
EXO 32:18 Peru Muitsexi mɨpaɨ katinitahɨawe: «Kepemɨti'ena memɨtehayu'iwarɨmekɨ mepɨkatehehiwa, meta meha'iwarietɨ mehetitsuatɨ mepɨkatehehiwa, matsi pɨta kwikari pekatiniu'enieni».
EXO 32:19 Kepauka Muitsexi hɨritsie 'akaneka munua mematiteitsie meta kepauka tsikeru muxei meta teye'amete, kaniuyeha'ani waɨkawa, mɨkɨ tetexi ma'ɨkai kaneixɨrieni, kaniutitare 'etsipepetɨ kaneutaxɨriexɨani hɨritɨa.
EXO 32:20 Hikɨ tsikeru memutawewiekai taipa kaneuhɨani, 'ariketa 'itataraka temɨxikiyari 'uhatuiyaka kaniwaruharitɨani 'ixaheritsixi teɨteriyari.
EXO 32:21 Meta 'Aruni mɨpaɨ katiniutahɨawe: —¿Kememate'utahɨawixɨ 'ikɨ teteɨteri? ¿Ketitayari teɨteri petiwarupitɨa 'axamemɨteyurienikɨ?
EXO 32:22 'Aruni mɨpaɨ katinita'eiya: —Neuxei ne'iwa, pepɨkaha'aka, 'ekɨ pekatinimaika 'ikɨ teɨteri 'axamepɨte'u'iyari xeikɨa.
EXO 32:23 Mɨkɨ mɨpaɨ mekaneteniutahɨawe: “Peuyewetse kakaɨyarixi pemɨtatsitiwewirieni memɨtatsi'uwitɨximenikɨ, Muitsexi 'Ekipitu mɨtatsi'ayewitɨ, 'atsitepɨkatemate kemeyɨ kemɨreyunixɨ”.
EXO 32:24 Ne mɨpaɨ nepɨtiwarutahɨawixɨ, yunaitɨ kemɨ'ane huru xemexeiya xekeneukuxeɨri. Mɨkɨ mekaneni'atɨirieni, neta taipa nekaneixɨrieni, hikɨ mɨkɨ tsikeru hepaɨ 'anetɨ kanayani.
EXO 32:25 Hikɨ Muitsexi 'ixaheritsixi teɨteriyari wamaitɨ ke'axamemɨteku'eriwakai pɨta, meta 'Aruni kemɨtiwarupitɨakai 'atsieriwamete memakɨnekɨ memɨwaraye'unie wahetsiemieme,
EXO 32:26 hikɨ memakutei kitenie 'utakeka mɨpaɨ kaniutayɨni: «Keyupaɨmetɨ xemɨyuwaɨriya Yawé hetsiemieme, nehetsɨa xekenakɨni». Yunaitɨ rewitsixi mekaniukɨne hetsɨana.
EXO 32:27 Merikɨtsɨ Muitsexi mɨpaɨ katiniwarutahɨawe: «Yawé, 'Ixaheri Kakaɨyarieya, mɨpaɨ katina'aitani: “Yuxexuitɨ yukutsira xekeneukuha'aritɨaka xekeneukakɨni naitsarie 'ena xematiteitsie, kemɨ'ane xemanukunake xewatakukuyatɨ tsepa mɨxe'iwa, mɨxehamiku, tsepa xe'aurie kiekame”».
EXO 32:28 Muitsexi kemɨtiwaruta'aitɨa mɨkɨ rewitsixi mɨpaɨ mekatenikakɨne, mɨkɨ tukaritsie haika miriyari 'ixaheritsixi mekaniwarukwini.
EXO 32:29 Hikɨ Muitsexi mɨpaɨ kaniutayɨni: «Hikɨ xeme tɨrɨkariya xekaniupitɨarieni Yawé hetsiemieme, 'ikɨ tukaritsie 'aixɨa xekaniu'itɨarieni xeme, yu'iwama meta yuniwema xemɨwarukwi».
EXO 32:30 'Uxa'arieka tukaritsie, Muitsexi mɨpaɨ katiniwarutahɨawe 'ixaheritsixi teɨteriyari: «Xemetsɨ kwinimieme 'axaxekateniuyurieni. Peru hikɨ hɨritsie nekanimieni Yawé nemetahɨawekɨ, heiwatɨ xereuyehɨwirieni Kakaɨyari ke'axaxemɨte'uyuri».
EXO 32:31 Hikɨ Muitsexi heyaka Yawé mɨpaɨ katinetahɨawe: —Waɨkawamekɨ 'axamepɨte'uyuri 'ikɨ teɨteri, huru kakaɨyarixiyari mewarutiwewieka.
EXO 32:32 Peru, nepɨmatsiwawirie wahetsiemieme pemɨtiwareuyehɨwirienikɨ 'axakememɨte'uyuri. Peru xɨka 'ekɨ pekatiwareuyehɨwirieni, neta kenenakayeitɨa 'axapatsie pemɨraka'utuatsie.
EXO 32:33 Yawé Muitsexi mɨpaɨ katiniuta'eiya: —Ne nekanekayeitɨamɨkɨ nexapatsie, kemɨ'ane xeikɨa 'axamɨtiuyuri.
EXO 32:34 'Ekɨ kenemie, keniwaranuwitɨki 'ikɨ teɨteri hakewa nematsihetaxatɨa. Niuki tuayame 'ahɨxie kaniumiemɨkɨ. Tukari kanaye'amɨkɨ kepauka nemɨwa'uximatɨani 'axamemɨte'uyurikɨ, 'ana mɨpaɨ pɨtiyɨni.
EXO 32:35 Mɨpaɨ katiniɨyɨni, tsikeru 'Aruni mutawewikɨ, Yawé kwiniya kaniwareyenɨ'airieni teɨteri 'ixaheritsixi wahetsie.
EXO 33:1 Merikɨtsɨ Yawé Muitsexi mɨpaɨ katiniutahɨawe: «Xekeneuhuni 'ekɨ meta teɨteri 'Ekipitu pemɨwareyewitɨ, mɨkɨ kwieyaritsie nemɨwaruhɨritɨa, 'Apɨrahami, 'Itsahaki, Kakuwu newaxatɨatɨ, yunuiwarima xemɨwayetuirienikɨ.
EXO 33:2 Niuki tuayame nepanunɨ'ani 'ahɨxie 'anuyekaitɨ mumienikɨ, nepɨwataweiya mɨkɨ kananeutsixi, 'amuxeutsixi, hetitsixi, peretseutsixi, heweutsixi meta kewutseutsixi.
EXO 33:3 Xekaniyehuni mɨkɨ kwieyaritsie mana waɨkawa kanexuaweni retsi meta xiete. Ne xehamatɨa nepɨkayemie, xɨka xehamatɨa neheyani, huyeta nekanixehekwiweni, xemɨkaheu'enanakɨ».
EXO 33:4 Hikɨ 'ixaheritsixi mɨkɨ niuki me'u'enieka mekaniutitsuani mekaniyukahiwerieni waɨkawa, yukuka mepɨka'atitɨxɨa 'anatɨtɨ,
EXO 33:5 Yawé mɨpaɨ Muitsexi mɨtiutahɨawekaikɨ: «Mɨpaɨ ketiniwaretahɨawi 'ixaheritsixi, teɨteri memɨkaheu'enana mepɨhɨkɨ. Xɨka 'etsiwa wahamatɨa neheyani, nekaniwarekwiweni. Mɨpaɨ ketiniwaretahɨawi yukuka meke'atixɨnaxɨani, 'arike yapɨtayɨni kexemiyurieni».
EXO 33:6 'Ayumieme, kepauka Huré 'ixaheritsixi memɨyekɨtsietɨtɨ yukukate mepɨkatehatitɨxɨa.
EXO 33:7 Merikɨtsɨ Muitsexi 'ixuriki kiiyari kaniutawewieni mematiteitsie yateewa. «'Ixuriki kiiyari Yawé hamatɨa tixaxatame» katiniterɨwa. Kepauka xewitɨ Yawé hamatɨa mɨreuxatamɨkɨni, mɨkɨ payeyeikakai mematiteitsie mɨkɨ xamaru manuwe pɨye'ani.
EXO 33:8 Kepauka Muitsexi xamaru hepa meyeikakai, yunaitɨ teɨteri yukitenie mekaniti'uwekaitɨni me'ixeiyake, kepaukake 'ixuriki kiiyarita meutahakekai mɨrewatixaxatatsie.
EXO 33:9 Kepauka Muitsexi meutahani, hai 'amuwe nakatetekekaitɨni kitenie katineunarɨmakaitɨni, kepauka Yawé Muitsexi hamatɨa mɨtikuxatani.
EXO 33:10 Kepauka 'ixaheritsixi haiwitɨri memɨxeiya xamaru tixaxatame kiiyari kitenie 'uweme, 'ana yunaitɨ mekaniukatunuma'uwekaitɨni yukitenie Yawé nenewieri me'ipitɨatɨ.
EXO 33:11 Yawé pɨtiutixaxatakai Muitsexi hamatɨa yuhɨxie me'utinenieretɨ, xewitɨ yuhamiku hamatɨa mɨtikuxatani hepaɨ. Metetixatameri Muitsexi kanewayeyeikakaitɨni, 'iwamama memakuteitsie kani'axekaitɨni, perutsɨ temaikɨ Kutsuhexi 'iparewiwameya 'ixuriki kiiyari tixaxatame muwa pɨkawayeyeikakai pɨka'iku'e'eiriwakai.
EXO 33:12 Muitsexi Yawé mɨpaɨ katiniutahɨawe: —'Ekɨ peyutemawietɨ pepɨnetikɨhɨawe kename newarayewitɨni 'ikɨ teɨteri, perutsɨ 'atsipepɨkanerahɨawe kemɨ'ane pepanunɨ'ani nehamatɨa. Mɨpaɨta peputaine kename ne 'ahamiku nehɨkɨ meta kename penetsiparewiwame.
EXO 33:13 Xɨka yurikɨ mɨpaɨ 'aneni, yakenetineutahɨawi kenemɨtiyurieni. Mɨpaɨ 'ana nepɨretimani kename penetsiparewiwame. Mɨpaɨ ketinemaika kename 'ixaheritsixi me'ateɨterima.
EXO 33:14 Yawé mɨpaɨ kaniutayɨni: —Ne 'ahamatɨa nepɨyemie meta nepɨmatsika'uxipitɨani.
EXO 33:15 Muitsexi mɨpaɨ katinitahɨawe: —Xɨka teyunaime tahamatɨa pekayemieni, ¿titayari tsɨkamɨ petarenɨ'awani?
EXO 33:16 Xɨka tahamatɨa pekaheyani, ¿'ateɨterima meta ne kemetehetimani, kename petatsiparewie? ¿Ketitakɨ tetepatsieka hipame teɨteri kwiepa memɨtama watsata?
EXO 33:17 Yawé mɨpaɨ Muitsexi katiniutahɨawe: —'Aixɨa pɨ'ane mɨpaɨ nepɨtiyurieni kepemaine, 'ekɨ pepɨnetsiparewiwame meta pepɨnehamiku.
EXO 33:18 Muitsexi tawarita mɨpaɨ katinitahɨawe: —Keneneuxeiyatsitɨa kepemɨtixawatɨ.
EXO 33:19 Yawé mɨpaɨ katinita'eiya: —Ne 'aixɨa nepɨtiuka'iyari nepɨnewaɨriya nepɨmatsixeitsitɨani meta kenemɨtitewa pepeitimani. 'Aixɨa nepɨtiuka'iyari kemɨ'ane hamatɨa nemɨnewaɨriya, nepinenimaya kemɨ'ane nemeunenimayatamɨkɨ.
EXO 33:20 Perutsɨ mɨpaɨ nepɨmatitahɨawe pepɨkanetsixeiya kenemɨraka'erie, xewitɨ pɨkayɨwe mɨnetsixeiya, xɨka netsi'uxeiya kaniumɨmɨkɨ.
EXO 33:21 Yawé mɨpaɨ katinitahɨawe: —Yateewa tete pɨkaka wayexawatɨ mɨkɨta pepayekani.
EXO 33:22 Kepauka 'a'aurie nemuyeyani waɨkawa nexawatɨtɨ, muwa terɨtɨa pe'ayekaime nemamakɨ nepɨmatsiheutinaka, kepaukake nemanuyeyani.
EXO 33:23 'Anake nepɨmatsiheukuyepieni pemɨnetsi'anaxeiyakɨ xeikɨa 'etsiwa, peru nehɨxie pepɨkanetsixeiya.
EXO 34:1 Merikɨtsɨ Yawé Muitsexi mɨpaɨ katiniutahɨawe: «Hutame tetexi wewerime keneutixixi matɨari kemɨ'anenekai pemititaraxɨ. Mana nepɨraka'utɨani meripaitɨ kemɨre'ukai.
EXO 34:2 Ximeripaitɨ pepɨ'akuha'aritɨani pemɨyemiekɨ hɨritsiepai Tsinahi, manutitewatsiepai mana nehɨxie kenenua.
EXO 34:3 Xewitɨ 'ahamatɨa pɨkaheyeikani, yaxeikɨata hɨritsie mepɨka'u'uwani. Meta muxatsi mepɨkatewaremitɨweni meta wakaitsixi mɨkɨ hɨri hɨxie 'ahurawa».
EXO 34:4 Hikɨ Muitsexi hutame tetexi 'utiwewieka 'etsitsutsuime meripaimieme kemɨ'anenekai hepaɨ, kwi ximeripaitɨ kaneyani hɨritsiepai Tsinahi, Yawé kemɨtitahɨawixɨ.
EXO 34:5 Hikɨ Yawé haiwitɨritsie kananukateni Muitsexi 'aurie kaniyuhayewa. Kemɨtitewa katinitaxatɨani:
EXO 34:6 hɨxiena 'uyemietɨ mɨpaɨ kaniutayɨni: —Yawé, Yawé, Kakaɨyari 'aixɨa mɨtiuka'iyari, nepɨkayumexɨitɨa nemɨyeha'anikɨ, pɨmariwe nenaki'eriya, ne'iyarikɨ 'aixɨa nepɨtiuka'iyari,
EXO 34:7 nepɨtiuyukanaki'erie 'atsita xeimiriyari nuiwariyaritsiepai 'arike, nepɨyɨweta xeime nemɨreuyehɨwirienikɨ xɨka 'axatiuyurieni, xɨka kahau'enani, meta xɨka xurikime hexeiyani, peru nepɨkayɨwe nemihayewa kemɨ'ane mɨrapine nemɨkatikwinitɨanikɨ, matsi paapaya, nu'aya, teukarieya, meta tutsieya nuiwariyaya pɨwa'uximatɨwa.
EXO 34:8 Hikɨ 'ana kwitɨwa Muitsexi kaniukahɨximakeni yutanenewienike,
EXO 34:9 mɨpaɨ katiniuyunenewieni: —Ti'aitame, xɨka yemekɨ penetsiparewiwametɨni tahamatɨa keneuyuhayewa. Nepɨtimate 'ikɨ teɨteri yu'iyaritsie mepɨtsetse'i, hikɨ ketatineuyehɨwiri 'axatemɨte'uyurikɨ, 'ahetsɨa miemete ketanayeitɨa.
EXO 34:10 Yawé mɨpaɨ katinita'eiya: —Tsiparatsɨ tɨratu xeyunaime xehamatɨa nepɨwewieni, 'ixaheritsixi wahɨxie mariweme nepɨtiyurieni, hatsuaku hawaikɨ mɨkareyɨwe hepaɨ. Teɨteri mepɨneniere wahamatɨa pemuyeika 'ahetsie mariweme ne Yawé yanemɨtiyurieni.
EXO 34:11 Xɨka xeme yaxetekahuni kenemɨtixe'utahɨawixɨ, xɨka yaxetekakɨne. Nepɨwataweiya 'ahɨxie 'amuxeutsixi, kananeutsixi, hetitsixi, peretseutsixi, heweutsixi meta kewutseutsixi.
EXO 34:12 Xeme hakewa kwie nemɨxeyetuirieni mana tɨratu xepɨkawewietɨweni hipame teɨteri mana kiekatari wahamatɨa xematiyaxetsie, mexɨka mɨpaɨ xete'uyurieni xewiniyari ke'ayani xehetsiemieme.
EXO 34:13 Hakewa mawari mematiwewiwatɨkatsie xekeneuti'unaxɨa, 'Atserá kakaɨyarixiyari xekeniwarutitara meta tetexi mɨpatsietɨka memɨwarayexeiya.
EXO 34:14 Hipame kakaɨyarixi pepɨkawarayexeiyani, ne Yawé nekani'ɨtetsaka. Kakaɨyari mɨ'ɨtetsa katinitewaka.
EXO 34:15 »Tɨratu xepɨkawewieka mana kiekatari wahamatɨa, mɨkɨ 'axamekateniyurieka yukakaɨyarixi mewarayexeiyatɨ, kepauka memɨtetimawa yukakaɨyarixi wahetsiemieme, mɨkɨ mekanixeti'inietɨkɨnikuni yuhetsɨa.
EXO 34:16 Xɨka xeniwema mewarutiwitɨni mɨkɨ 'ukari, kepauka mɨkɨ 'axamɨtiyurieni yukakaɨyarixi waruweiyatɨ, xeniwema mepɨta'inierieni wahepaɨ memɨyɨakakɨ.
EXO 34:17 »Tepɨa kakaɨyariyari pepɨka'awewirieka.
EXO 34:18 »Paa mɨkakuxanariyarie 'ixɨarariyari xekeneutiwewiwani, mɨkɨ xekeneutikwa'ani 'atahuta tukaritsie, kenematiuta'aitɨa. Mɨkɨ 'ixɨarari keneuwewiximeni weiya metseriyaritsie, mɨkɨ metseritsie 'Ekipitu xemayekɨkɨ.
EXO 34:19 »Tɨɨri mexɨakate memɨtinunuiwa nehetsɨa mepɨmiemetetɨni, wakaitsixi meta muxatsi wamexɨakate.
EXO 34:20 Tɨɨri mexɨakate wahetsie pemɨtanuani pɨyɨweni. Puxu mexɨakame hetsie pepɨtanuani muxa mawariyarikɨ, xɨka mɨpaɨ pekatiuyurieni kɨipieya pekaniwakutaramɨkɨ. »Nixewitɨ nehetsɨa pɨkahamieni tixaɨtɨ karapitɨ.
EXO 34:21 »'Ataxewime tukaritsie xeikɨa pepɨti'uximayaka, 'atahutariekatsie pekani'uxipiekamɨkɨ. Tsepa xemukwietsanatɨwe tsepa xemɨ'itsanatɨwe, peuyewetse mɨkɨ tukaritsie yemekɨ xemɨkate'uximayaka.
EXO 34:22 »Tsemana 'ixɨarariyari xekeneutiwewiwani matɨari mɨtiutixuxuawere, meta 'itsanaxa 'ixɨarariyari xekeneutiwewiwani xeiwiyari 'anayexɨruwekaku.
EXO 34:23 »Yunaitɨ 'ukitsi meputa'axeni, haikakɨa xeiwiyaritsie nehɨxie, ne Yawé 'Ixaheri Kakaɨyarieya hetsɨa.
EXO 34:24 Hikɨ 'ana nuiwarite 'ahɨxie nekaniwarayeweiyaxɨamɨkɨ, 'akwie nepɨ'ɨwiyani xewitɨ 'axapɨka'iyurieni.
EXO 34:25 »Kepauka tewa mawariyari xemɨnetsiwewirieni, xuriyayatsie tikuxanariyame xepɨka'enutinɨitɨwani. »Muxa Patsikwa 'ixɨararipa mieme pɨkayukuhayeikawani 'uxa'arieka mieme mayanikɨ.
EXO 34:26 »'Ikwaxi matɨari mieme 'aixɨa mɨ'anene Yawé kiita pepɨyetuani 'akakaɨyari hetsɨa. »Tsipu nunutsi maamaya retsieyatsie xepɨka'i'etsani».
EXO 34:27 Yawé Muitsexi mɨpaɨ katiniutahɨawe: —'Ikɨ niukiyari kenaka'utɨa mɨkɨ tɨratu nepɨwewie 'ahetsiemieme meta 'ixaheritsixi wahetsiemieme.
EXO 34:28 Hɨritsie Muitsexi puyuhayewaxɨ, Yawé hamatɨa, huta tewiyari tukari huta tewiyari tɨkari, katikwatɨ kaharetɨ. Mana tete wewerimetsie katinaka'utɨani tɨratu kememɨte'uwewi, tatsɨari tamamata 'aitsikayari.
EXO 34:29 Hikɨ Muitsexi kepauka Tsinahi hɨriyaritsie makane hutame tetexi 'a'ɨtɨ 'inɨari niukiyari maye'utɨka. Yawé hamatɨa mɨtiutaxatakaikɨ kanayexawatɨkaitɨni peru mɨkɨ 'atsipɨkatimaikai.
EXO 34:30 Kepauka 'Aruni meta 'ixaheritsixi Muitsexi memuxei 'ayexawatɨme, meputimama 'ahurawa mepɨkakɨnikukai.
EXO 34:31 Matsi Muitsexi 'Aruni kaniuta'inieni meta memanuyetei, mɨkɨ hetsɨana mekaniu'axɨani memɨtetixatakɨ.
EXO 34:32 'Ixaheritsixi 'ahurawa mekaniukɨne, Muitsexi mɨpaɨ katiniwaruta'aitɨani memɨ'enananikɨ Yawé kemɨrehɨawekai Tsinahi hɨriyaritsie.
EXO 34:33 Hikɨ kepauka mɨtiutahayewaxɨ Muitsexi tikuxatatɨ, yuhɨxie kaneuyukunani 'ixurikikɨ.
EXO 34:34 Kepauka meutahakekai Yawé hamatɨa retixatake kaneuyukuyepiwakaitɨni mexi kawayeyeiweni. Wayeyame katiniwarutixaxatɨwakaitɨni 'ixaheritsixi Yawé kemɨtita'aitɨani kemɨtiwatahɨawe.
EXO 34:35 'Ixaheritsixi memixeiyakaikɨ 'ayexawatɨme, Muitsexi tawarita kaneuyuku'eimakaitɨni kepauka Yawé hamatɨa mɨtitixata.
EXO 35:1 Merikɨtsɨ Muitsexi kaniwarukuxeɨrieni yunaime 'ixaheritsixi, mɨpaɨ katiniwarutahɨawe: «'Ikɨ Yawé kani'aitsikayatɨni mɨpaɨ temɨtekakɨnekɨ:
EXO 35:2 'Ataxewime tukari xeikɨa xekateni'uximayakakuni. 'Atahutarieka tukaritsie, xawatikɨ, mɨkɨ tukaritsie xepɨkate'uximayaka Yawé hetsiemieme kanipatsieka. Kemɨ'ane mɨti'uximayaka mɨkɨ tukaritsie kanimieriemɨkɨ.
EXO 35:3 Xawatikɨ nixewitɨ pɨka'atinanaiyani yukie».
EXO 35:4 Muitsexi mɨpaɨ katiniwarutahɨawe 'ixaheritsixi yunaime: «Yawé mɨpaɨ katatini'aitɨaka:
EXO 35:5 Xekateniyetuakuni tita xemɨtehexeiya Yawé hetsɨa timieme mɨrayanikɨ huru, pɨrata, wurunitse,
EXO 35:6 muxa huxarieya 'uarietɨkaime mɨyɨtsikimaɨyekɨ, kwimɨxetakɨ meta mɨxetakɨ, rinu 'ixurikiyari 'aixɨa mɨ'ane, kapura huxarieya,
EXO 35:7 muxatsi 'amemɨpapa wanawiyari mɨxeta, ketsɨ 'amɨpa nawiyarieya, 'akatsiya kɨyeyari,
EXO 35:8 huriwa hatseitiyari kɨxemetamieme, witsimu'ɨatɨka hatseiti memɨwakawiriwa hetsiemieme meta 'ɨkwa witsimu'ɨa hetsiemieme,
EXO 35:9 'unitse teteyari meta hipame witsimɨ'anene kamixa 'etsimɨnena hetsiemieme mayanikɨ meta kuka mekatɨni hetsiemieme.
EXO 35:10 »Yunaitɨ naimekɨ memɨteheutawewiwawe mana memɨxuawe mekanahuni 'ena mɨkɨ mepɨyɨwaweni memɨtetiwewieni Yawé kemɨti'aita:
EXO 35:11 tuki, heimana manuka'eimire, meta 'ixuriki 'amɨyeyeu, yukwatsiturai hexeiyatɨkaime, mexa 'amatayeyeu, manuyehini, meta mɨka'uni meta hetsiena ma'uni,
EXO 35:12 kakuni meta kɨyexi manukuhini hexeiyame, kanamikieya, meta 'ixuriki kakuni meukunakakɨ,
EXO 35:13 mexatsie meta kɨyexi manukuhini hexeiyakame, mana mɨrapinire, paa mana mamare.
EXO 35:14 Kɨxeme 'uitɨwame mɨkɨxenikɨ meta tita mɨrakapine, kɨxemete, hatseitiyari,
EXO 35:15 'ɨkwa witsimu'ɨa mexayari kɨyexi hexeiyame manukuhini, hatseiti memɨkawiriyarɨwa, 'ɨkwa witsimu'ɨa, 'ixuriki kitenie meuwiere.
EXO 35:16 Tuurutsixi mematitaiyarɨwa mayexaxawa hexeiyakame wurunitsekɨ wewiyakame, kɨyexi manukuhini meta naitɨ mana mɨreuyewetse, maimawame wurunitsekɨ wewiyakame meta hetsiena muyemare hexeiyame.
EXO 35:17 Takwa 'ixuriki mawɨretɨyani, kɨyexi meuka'uixɨani, 'ixuriki takwa kitenietsiemieme,
EXO 35:18 xamaru makɨwɨrixɨani kɨyexi mukatsunirixɨani, meta kurarutsie mieme, meta kaunariyarite.
EXO 35:19 Mawari wewiwamete wakamixate 'atɨtɨme wipetɨkaime me'enakatɨtɨ memɨteta'uximayatakɨ tukita, kamixateta mɨpatsietɨka 'Aruni hetsiemieme meta niwemama wahetsiemieme».
EXO 35:20 Hikɨ 'ixaheritsixi yunaitɨ meneutayeixɨani Muitsexi hɨxie,
EXO 35:21 hikɨ yuxexuitɨ kememɨte'uyuitɨarie meyuwaɨriyatɨ yamekateniuyurieni Yawé 'imikieri mekaniyetuirieni tuki 'ixurikiyari mɨtawewiyanikɨ, meta naime tita mɨtiyɨnikekai, meta kemarite mɨtiwewiyanikɨ mɨpatsietɨka.
EXO 35:22 Yaxeikɨata, yunaitɨ kememɨte'uyuitɨarie meyuwaɨriyatɨ yu'iyaritsie, 'ukitsi 'ukari, hurute mekateniyetuani mawari mayanikɨ: tupunite, kuka, hanira, meta hipatɨ yɨkɨ mɨreukuwewiyatɨka hurukɨ mɨtiwewiyatɨka. Yunaitɨ mɨkɨ huru mawariyari mekaniyetuaxɨani Yawé hetsiemieme teikɨ hetserarietɨ muyuitɨariwa mayanikɨ,
EXO 35:23 yaxeikɨata tita memɨteheuxeiyakai mekatenepini: muxa huxarieya mɨyɨtsikimawi, kwimɨxeta meta mɨxeta, rinu 'ixurikiyari 'aixɨa mɨ'ane, kapura huxarieya, muxatsi wanawi mɨxeta mɨraye'atɨka meta ketsɨte 'amemɨpapa wanawiyari.
EXO 35:24 Pɨrata memexeiyakai meta wurunitse Yawé mekaniyetuirieni wamawari mayanikɨ, yaxeikɨata 'akatsiya kɨyeyari memexeiyakai mekaniyetuani, mɨpaɨ mekateniyetuani 'etsiwa mɨtitiwewiyanikɨ.
EXO 35:25 'Ukari waɨkawa memɨtematekai mekateniyetuaxɨani, hiru mɨyɨtsikimawi, kwimɨxeta meta mɨxeta, mɨkɨ memeitikaunakai meta rinu 'ixurikiyari.
EXO 35:26 Hipatɨta waɨkawa memɨtematekai, mɨkɨta mekaniuyuitɨarieni para memiyetuanikɨ, mɨkɨ tsipuri wahuxariyari kakaunime.
EXO 35:27 Memanuyetei 'ixaheritsixi wa'ukiyarima 'unitse teteyari mekani'atɨani meta hipame tetexi witsimɨ'anene, para mawari wewiwame kamixayatsie mieme meta kukaya mɨtawewiyanikɨ mekatɨkɨnikɨ.
EXO 35:28 Yaxeikɨata witsimu'ɨatɨka mekaniyetuani meta huriwa hatseitiyari mekanehapani kɨxeme hetsiemieme, meta memɨkawiriyarɨwani, yaxeikɨata 'ɨkwa witsimu'ɨa.
EXO 35:29 Yunaitɨ 'ixaheritsixi kememɨtekuyuitɨariwakai mawari mekaniyetuani Yawé hetsiemieme 'ukitsi meta 'ukari, Yawé hetsiemieme mɨtita'uximayatsienikɨ, Muitsexi yatiwakɨhɨawekaku kememɨteyurienikekai.
EXO 35:30 Muitsexi mɨpaɨ katiniwarutahɨawe 'ixaheritsixi: «Mɨpaɨ xeketenemaika Yawé Wetsareri kanenayexeiya 'Urihi nu'aya Kuxi teukarieya, Kura nuiwarieyatsie mieme,
EXO 35:31 Kakaɨyari 'Iyarikɨ kanihɨniyani, mɨtimaiwenikɨ, mɨtimatenikɨ, kemɨtiuyurieni kaniyɨweni,
EXO 35:32 katiniwewiweni hurukɨ, pɨratakɨ meta wurunitsekɨ,
EXO 35:33 tetexi witsimɨ'anene kanixiteweni meta mitayatsakɨ, kɨyexi haruruanime kaniwewiweni, meta naime mɨtitiwewiwanikɨ tita mɨtimate.
EXO 35:34 Mɨkɨ Kakaɨyari kanipitɨani meta 'Ahurihawi 'Akitsamaki nu'aya, Rani nuiwarieyatsie mieme, hipame memɨtewa'ɨkitɨawawenikɨ.
EXO 35:35 Pɨwarupitɨa waɨkawa memɨtemaiwawenikɨ memɨtetiwewiwanikɨ tinaime, muxa huxarieyakɨ memɨteheutawewiwawenikɨ, mɨyɨtsikimaɨyekɨ, kwimɨxetakɨ, meta mɨxetakɨ, metatsiere rinu 'ixurikiyarikɨ. Mepɨteheutatsaiwawe yemekɨ mepɨtemate tsepa tita mɨtiutawewi.
EXO 36:1 »Hikɨ, Wetsareri meta 'Ahurihawi hamatɨa yametenikakɨnikuni tinaime 'uximayatsikatsie tuki hetsiemieme, yemekɨ Yawé kemɨtiuta'ai, yunaitɨ yaxeikɨa meteku'eriwatɨ kememɨtepitɨarie, meta kemɨ'ane Yawé metemaiweme meta meteheutawewiwaweme mɨwarupitɨa witsiti'anenekame memɨtetiwewiwanikɨ tukita timieme».
EXO 36:2 Muitsexi kaniwarutahɨawe Wetsareri meta 'Ahurihawi, meta yunaime kemɨ'ane yaxeikɨa memɨtepitɨariekai, meta kemɨ'ane Yawé metemaiwaweme meta meteheutawewiwame mɨwarupitɨa, yuxexuitɨ kememɨte'uyuitɨarie meyuwaɨriyatɨ mekaniu'axɨani memɨteta'uximayatakɨ,
EXO 36:3 mɨkɨ katiniwayetuirieni mawari 'ixaheritsixi memɨteyetuakai tuki mɨtawewiyanikɨ. Peru 'ixaheritsixi mekatehayewakaku meteyetuayatɨ 'imikierite,
EXO 36:4 yunaitɨ memɨtewewiekai tuki hetsiemieme memɨtemate, mekateniuhayewa,
EXO 36:5 mɨpaɨ Muitsexi memɨtehɨawiyukɨ: «Teɨteri kwinimiemeri tipaɨmeme mepɨtekuxeɨrixime, 'ari mɨpaɨ tipaɨmeme xeikɨa, Yawé kemaine pɨtinake».
EXO 36:6 Hikɨ Muitsexi mɨpaɨ katiniuta'aita memɨteyukaxatɨanikɨ naitsarie memakuteitsie: «'Ari 'imikieri xepɨkayetuayani tuki hetsiemieme, 'ukitsi meta 'ukari xepɨkatehe'uximayakari». 'Anake 'ixaheritsixi mekateniuhayewa meteyetuayatɨ,
EXO 36:7 memɨte'atɨakai pɨtiwaɨkawakai mɨkɨkɨri pɨtitinɨrekekai naitɨ 'uximayatsika.
EXO 36:8 Yunaitɨ tewewiwamete xei'iyariyari mehexeiyaɨ tuki mekaniutawewieni, tamamata rinu 'ixurikiyarikɨ 'aixɨa mɨ'anenekɨ, muxa huxarieya mɨyɨtsikimaɨyekɨ 'uariekame, kwimɨxetakɨ, meta mɨxetakɨ, Kakaɨyari teɨtametemama mehaxutɨkaime.
EXO 36:9 Naitɨ 'ixuriki yaxeikɨa patayeyeukai, tamamata heimana huta meturuyari heimana 'imeriyu tɨtɨme meta xeimeturuyari heimana nauka tewiyari tsenitimeturuyari patayeyeuka.
EXO 36:10 'auxɨwime 'ixuriki mekaniutawipa yuwiyakame, hipameta 'auxɨwime yaxeikɨa mekaniuyurieni.
EXO 36:11 Mexɨakame mɨwipetsie 'ixuriki, hakɨrɨi mekanawɨtɨaxɨani muxa huxarieyakɨ mɨyɨtsikimawikɨ 'uariekame, yaxeikɨata mekateniuyurieni hutarieka miemetsie.
EXO 36:12 Mexɨakame mɨwipetsie mekanawɨtɨani huta tewiyari heimana tamamata hakɨrɨi, hutarieka miemetsieta yaxeikɨa, naitɨ yaxeikɨa papaɨmeme pexeiyatɨkatei 'anuyutaxeiyatɨkaitɨ.
EXO 36:13 'Ariketa huru kwatsituraiyari mekaniutiwewieni huta tewiyari heimana tamamata 'ixuriki muyutawiyakɨ, tuki muyuxewiriyanikɨ.
EXO 36:14 Tamamata heimana xewi tsipuri wahuxari 'ɨkariyari mekaniutiwewieni, tuki manukananikɨ 'ixuriki kiyari hepaɨ rekuweretɨ.
EXO 36:15 Yaxeikɨa pɨyeyeukai naitɨ tamamata heimana xewi 'ixuriki mauwɨre, tamamata heimana haika meturuyari heimana 'imeriyu meta xeimeturuyari heimana nauka tewiyari tsenitimeturuyari 'atayeyeume.
EXO 36:16 Hutame mekaniutiwipa 'ɨkari, xeime 'auxɨwime, xeimeta 'ataxewime.
EXO 36:17 Huta tewiyari heimana tamamata mekaniutiwewieni hakɨrɨi matɨari memitawipaxɨtsie 'imatɨrieka 'ɨkari manunieretsie mekanewɨtɨaxɨani, meta hutarieka miemetsie yaxeikɨa paɨmeme.
EXO 36:18 Wurunitse kwatsitɨraiyari mekaniutiwewieni huta tewiyari heimana tamamata, tuki yuxewiriyatɨ mayanikɨ.
EXO 36:19 Nawi mekaniutawipa tukitsiemieme muxatsi wanawiyari xetamekɨ 'uarietɨkaime, mɨkɨ heimana manukawerire mekaniutawewieni ketsɨte wanawiyari 'aixɨa mɨ'anenekɨ.
EXO 36:20 Tuki hetsiemieme 'akatsiya mexayari mekaniutixixieni pepetsawime, mekanika'uitɨani.
EXO 36:21 Xexuitɨ mexa nauka meturuyari heimana 'imeriyu pɨtɨkai meta haika tewiyari heimana tamamata tsenitimeturuyari 'atayeyeutɨ,
EXO 36:22 hutakɨa 'ukakukunitɨkaime. Naime mɨkɨ mexate tuki hetsiemieme mɨpaɨ mekateniuwewieni:
EXO 36:23 Xeitewiyari mexate putiwewi, 'ameuyewatsie tatsutɨa muyekatsie mieme,
EXO 36:24 huta tewiyari kaniuyɨni pɨrata tepɨayari mexa mutuikaxɨani, xexuime mexatɨa huhutatame,
EXO 36:25 tayeta miemeta xeitewiyari mexate 'ematayeyeu tuki hetsiemieme,
EXO 36:26 huta tewiyari pɨrata tepɨayari wahetɨa meutayaxe, mexa xexuime hetɨa huhutatatɨ,
EXO 36:27 'etsimeuyewatsieta 'ataxewitɨ mexate kaniuyɨni, tau makayuyuipike hepatsie,
EXO 36:28 mutatsikuritɨkatsie huhutatatɨ kaniuka'uni 'etsimeuyewatsie.
EXO 36:29 Mɨkɨ mexate yu'aurie kaniuti'utɨkateitɨni 'axeikɨa 'ati'utɨ, wapaitɨ xeihanirayaritsie heuyehatɨkaitɨ. Yaxeikɨa puyɨxɨa naitsata 'etsikinatsie,
EXO 36:30 'atahaika mexate kaniuyɨni, meta tamamata heimana 'ataxewi mexatɨa mieme pɨrata tepɨayari, huhutatatɨ xexuime mexatɨa.
EXO 36:31 'Akatsiya kɨyeyari mekaniutixixieni manuyehini: 'auxɨwime mexate tuki 'etsata mieme,
EXO 36:32 'auxɨwimeta tapa mieme, 'auxɨwime mexate 'etsimauyewatsie tuki manutinieretsiemieme.
EXO 36:33 Kɨyexi ma'utɨka wahixɨapa mukuhuni kɨye heutanetɨkaime mepuyuri.
EXO 36:34 Mexate mɨti'utɨka huru mekanitiwirieni, meta huru hanirayari mekanawewiexɨani manukuhini mana meuyehaxɨanikɨ. Meta manukuhini hurukɨ mekanitiwirieni.
EXO 36:35 'Ixuriki mekaniutawewieni muxa huxarieya mɨyɨtsikimawikɨ, kwimɨxetakɨ meta mɨxetakɨ rinu 'aixɨa mɨ'anekɨ, Kakaɨyari teɨtametemama mehaxutɨkaime hetsiena.
EXO 36:36 Naukame 'akatsiya kɨyeyari mɨka'uni mekaniutixixieni huru mekanitiwirieni, huru kwatsituraiyari mekana'uitɨaxɨani, naukame pɨrata tepɨayari mekaniutiwewieni kɨyexi mɨka'uni hetsiena ma'uni.
EXO 36:37 'Ixuriki mekaniutawewieni tuki kitenie mieme muxa huxarieya 'uarietɨkaime mɨyɨtsikimawikɨ, kwimɨxetakɨ meta mɨxetakɨ rinu 'aixɨa mɨ'anekɨ, 'itsariekame meta tixukame,
EXO 36:38 'auxɨwime kɨyexi mekaniutixixieni kwatsiturai hexeiyatɨkaime, meta wurunitse tepɨayari 'auxɨwime kɨyexi muka'uni 'amɨpapa hetɨamieme, meta huru herie mekanikawirieni.
EXO 37:1 Wetsareri kakuni kaniutawewieni 'akatsiya kɨyeyarikɨ, xeimeturuyari heimana tamamata tsenitimeturuyari tewime, haika tewiyari heimana tamamata tsenitimeturuyari 'atayeume meta yaxeikɨata mɨpaɨ heutitewame.
EXO 37:2 Huru taɨtana kanewakuwirieni meta herie, meta hurukɨ kanetatenitɨani.
EXO 37:3 Naukame huru hanirayari kaniutiwewieni kakunitsie mieme, 'ɨkateyatsie ne'uitɨani, tapa 'etsatana hutatɨ na'uni tapata hutatɨ.
EXO 37:4 Meta kurumawime 'akatsiya kɨyeyari kaniutiwewieni, huru kanitiwirieni,
EXO 37:5 haniratsie kaneiye'uitɨaxɨani kakuni 'etsata mukumanetsie, mukukweiyanenikɨ.
EXO 37:6 Hurukɨ xeikɨa kanamikiyari kaniutawewieni Kakaɨyari ma'axe, xeimeturuyari heimana tamamata tsenitimeturuyari tewime meta haika tewiyari heimana tamamata tsenitimeturuyari 'atayeume.
EXO 37:7 Kakaɨyari teɨtametemama pɨwarutiwewi hurukɨ, titsunamekɨ mewewiyatɨkaime, kanamiki Kakaɨyari ma'axe 'etsimeuyeyeutsie mema'unikɨ yuxexuitɨ.
EXO 37:8 Xewitɨ 'etsimeuyewatsie kanakeni, xewitɨta tapa, Kakaɨyari teɨtametemama memɨyuhuta, meyuxewiriyame kaniwarayeitɨani Kakaɨyari ma'axeni mame.
EXO 37:9 Kakaɨyari teɨtamete Kakaɨyari ma'axe heima mepuye'anatɨkatei, kɨmana mepenukanakai. Mepanuyutaxeiyakai Kakaɨyari ma'axe meheukanenieretɨ.
EXO 37:10 Wetsareri mexa kaniutawewieni 'akatsiya kɨyeyarikɨ, nauka tewiyari heimana tamamata tsenitimeturuyari tewime meta huta tewiyari heimana 'auxɨwi tsenitimeturuyari 'atayeume, meta haika tewiyari heimana tamamata tsenitimeturuyari 'aweme.
EXO 37:11 Huru kanikawirieni, hurukɨtsiere kaneta'utɨani.
EXO 37:12 Metatsiere xeitewiyari tsenitimeturuyari 'atayeume kanatawewieni tenimeyari, mɨkɨta hurukɨ kaneta'utɨani.
EXO 37:13 Naukame huru hanirayari kaniutiwewieni 'ɨkateyatsie kane'uitɨaxɨani, 'etsatana huhutatatɨ kana'uixɨani 'ɨkateya ma'utɨkatsie.
EXO 37:14 Hanira, mexa tenimeyari hetɨa neimana, mana kɨyexi muye'unikɨ mukukweiyanenikɨ.
EXO 37:15 Mɨkɨ 'akatsiya kɨyexiyari pɨhɨkɨtɨkai huru wiriyarietɨkaitɨ.
EXO 37:16 Naime hurukɨ xeikɨa pɨtiutiwewi tita mana mɨrapinirekekai xakɨrɨte, 'itɨte, tekɨxite, ye'ɨrɨte 'amɨnene winu memutimawakai hetana.
EXO 37:17 Wetsareri kɨxeme 'uitɨwame kaniutawewieni hurukɨ xeikɨa, titsunamekɨ wewiyakame. Hetsiena maweni meta 'ɨkayari, muwatixaxawa, tekɨxiyari meta tuturiyari naitɨ puyuxewiriyakai.
EXO 37:18 Kɨxeme 'ataxewime yumamate pexeiyakai, tapa haikatɨ tapata haikatɨ.
EXO 37:19 Xexuime mamateyaritsie haikakɨa hewatixaxawame 'arimetɨra tuturiyari hepaɨ tiyuxexeiyatɨkaime, tuturi yu'iwitsi hexeiyakame meta xawariyari.
EXO 37:20 Kɨxeme 'uitɨwame peixeiyakaita naukame tekɨxiyari 'arimetɨra tuturiyari hepaɨ tiyuxexeiyame, yu'iwitsi meta yuxawari hexeiyame.
EXO 37:21 Mexɨakame mamateya paritsiyari hetɨatsie peixeiyakai xeime yutekɨxi, hutarieka paritsiyari hetɨatsie peixeiyakai hutarieka tekɨxi, meta hairieka paritsiyari hetɨatsie peixeiyakai hairieka mieme tekɨxi.
EXO 37:22 Tekɨxite meta mamateyari puyuxewiriyakai kɨxeme 'uitɨwame matɨa, hurukɨ xeikɨa titsunamekɨ wewiyakame.
EXO 37:23 'Atahuta kɨxeme hurukɨ xeikɨa kaniutiwewieni, meta kɨmana mɨtaire meta naxiyari makawiwieni.
EXO 37:24 Mɨkɨ kɨxeme 'uitɨwame mɨtawewierekɨ meta tinaitɨ mɨreukapine xeitewiyari heimana tamamata heimana haika kiruyari huru kaniuyɨni.
EXO 37:25 Wetsareri 'ɨkwa witsimu'ɨa taiyame mexayari kaniutawewieni 'akatsiya kɨyeyarikɨ. Yaxeikɨa huta tewiyari heimana 'auxɨwi tsenitimeturuyari tewime meta huta tewiyari heimana 'auxɨwi tsenitimeturuyari 'atayeume, meta nauka tewiyari heimana tamamata tsenitimeturuyari 'aweme. 'Awateya naitɨ kaniyuxewiriyakaitɨni mɨkɨ mexa matɨa.
EXO 37:26 Herie kanikawirieni huru metatsiere naitsarie 'etsatana meta 'awateyatsie, hurukɨ xeikɨa tenimeyaritsie kanetawirieni.
EXO 37:27 Tenimeyari manukaniere hanira kanamanaxɨani mana kɨyexi meuye'unikɨ mukukweiyanenikɨ.
EXO 37:28 Kɨyexi 'akatsiya kɨyeyari kanihɨkɨtɨkaitɨni, huru wiriyarietɨkaitɨ.
EXO 37:29 Wetsareri hatseiti mɨpatsie kaniukawewieni meta 'ɨkwa witsimu'ɨa, witsimɨtiu'ɨatɨka wewiwamete wahepaɨ katiniwewieni.
EXO 38:1 Merikɨtsɨ Wetsareri 'akatsiya kɨyeyarikɨ mawari taiyariyari wewiwame kaniutawewieni. Yaxeikɨa kaneutatetewakaitɨni, huta meturuyari heimana xeitewiyari heimana tamamata tsenitimeturuyari tewime meta mɨpaɨ 'atayeume, meta xeimeturuyari heimana xeitewiyari heimana tamamata tsenitimeturuyari 'aweme.
EXO 38:2 Naitsata 'awate kanawewiexɨani muta'itsikinatɨkatsie, mɨkɨ naitɨ puyuxewiriyakai mexa mawari taiyariyari wewiwame matɨa, meta wurunitsekɨ mexa kaniukawirieni naime herie.
EXO 38:3 Katiniutiwewienita wurunitsekɨ tita mɨreuyewekai: naxi yetsame, 'itɨ 'amɨpa, tepɨa manuxɨte, tepɨa 'amɨpa manuxutetɨka, meta tɨɨ yayatsame.
EXO 38:4 Mawari matitaiyarɨwa hetɨa mieme kaniutawewieni 'ayexaxawame wurunitsekɨ wewiyakame, tenimeyari hetɨa kaniyemani, kemawekai hixɨapa 'uyemakame.
EXO 38:5 Wurunitse hanirayari naukame kaniutiwewieni, memanaxɨanikɨ naitsata mayexaxawa 'etsikinayaritsie, kɨyexi mana muye'unikɨ,
EXO 38:6 kɨyexi xexeurawime kaniutiwewieni 'akatsiya kɨyeyarikɨ, wurunitse kanitiwirieni herie
EXO 38:7 manuyexaxawatsie kaneiyehatɨaxɨani, naitsata heitituatɨkaitɨ kanayani mɨkɨkɨ mukukweiyanenikɨ. Mawari taiyame yutaɨta puxawakai mexakɨ pɨwewiyakai.
EXO 38:8 'Ukarawetsixi 'ixuriki tukiyari kitenie memɨte'uximayakai wurunitse xikɨriyari mekani'atɨirieni, mɨkɨkɨ kanitawewieni maimawame meta 'ɨkaya hetsiena muyemare.
EXO 38:9 'Ariketa takwa 'amakuyewa mekaniutawewieni. Tatsutɨa hepatsie huta tewiyari heimana 'auxɨwi meturuyari pɨtewikai, rinu 'ixurikiyari 'aixɨa mɨ'anene pawɨtɨkatei,
EXO 38:10 kɨyexi muka'utɨka xeitewiyari pexeiyakai, meta xeitewiyari wurunitse tepɨayari hetɨana mieme, pɨrata kwatsituraiyari hexeiyatɨkaime kɨyexi meta hanira.
EXO 38:11 Tapata tayeta hepatsie huta tewiyari heimana 'auxɨwi meturuyari pɨtewikai, xeitewiyari muka'utɨka kɨyexi pexeiyakai, xeitewiyarita wurunitse tepɨayari hetɨana mieme, pɨrata kwatsituraiyari hexeiyatɨkaime kɨyexi meta hanira.
EXO 38:12 'Etsimeuyewatsie tau makayuyuipike hepatsie xeitewiyari heimana huta meturuyari heimana 'imeriyu patayeukai, meta 'ixuriki peuwɨkai meta tamamata kɨyexi muka'uixɨani meta tamamata hetsiena ma'utɨkatei, kɨyexi pɨrata kwatsituraiyari pexeiyatɨkatei.
EXO 38:13 Tau manatineika hepatsieta, xeitewiyari heimana huta meturuyari heimana 'imeriyu patayeukai.
EXO 38:14 Mɨranutakɨkatɨretsieta tapa 'ixuriki peuwɨkai 'atahuta meturuyari 'ayetɨtɨ, haikatɨ kɨyexi muka'utɨka, meta haikatɨ hetsiena ma'uni,
EXO 38:15 meta tapatsieta 'ixuriki peuwɨkai 'atahuta meturuyari 'ayetɨtɨ, haikatɨ kɨyexi muka'utɨka, meta haikatɨ hetsiena ma'uni.
EXO 38:16 'Ixuriki naitɨ maweretɨkatei takwa, mɨkɨ rinu 'ixurikiyari 'aixɨa mɨ'anene kanihɨkɨtɨkaitɨni.
EXO 38:17 Kɨyexi mutuikatɨka wurunitsekɨ pɨwewiyatɨkatei, kwatsiturai meta hanira kɨyexi hetsie mawetɨkatei pɨratakɨ pɨwewiyatɨkatei, meta mu'uteyatsie pɨratakɨ kaniwiriyarietɨkateitɨni. Naitɨ kɨyexi mukawetɨkatei pɨrata hanirayari pexeiyatɨkatei.
EXO 38:18 'Ixuriki mɨranutakɨkatɨretsie meuwiekai mɨyɨtsikimaɨyekɨ pɨ'uariekai, kwimɨxetakɨ meta mɨxetakɨ, rinu 'ixurikiyari 'aixɨa mɨ'ane, witsireuku'itsetɨ. 'Atanauka meturuyari pɨtewikai meta huta meturuyari heimana xeitewiyari heimana tamamata tsenitimeturuyari 'atayeutɨ, mɨyatɨniketɨ mɨpaɨ heutitewatɨ, mɨkɨ 'ixuriki takwa mieme hepaɨ,
EXO 38:19 naukame pexeiyakai kɨyexi muka'uni meta naukame pexeiyakai wurunitse tepɨayari hetɨana mieme. Kwatsituraiyari meta hanirayari pɨratakɨ pɨwewiyatɨkatei, meta mu'uyatsie pɨrata pɨkawiriyarietɨkatei.
EXO 38:20 Naitɨ mukatsunetɨkatei 'ixuriki manukawere makuwɨrekɨ, meta mana takwa kuraru makatsie mieme wurunitse tepɨayari pɨhɨkɨtɨkatei.
EXO 38:21 'Ikɨ katinihɨkɨtɨni ketipaɨmemekɨ mɨtiutiwewiya, para tuki muyepatsie tɨratutsie mieme mɨtawewiyanikɨ. Rewitsixi mɨpaɨ mekatenaka'utɨani, Muitsexi mɨpaɨ mɨtiwaru'aitɨakɨ meta 'Itamaxi 'Aruni mawari wewiwame nu'aya yatiwakɨhɨawekaku.
EXO 38:22 Wetsareri, 'Urihi nu'aya Kuhuxi teukarieya, Kura nuiwarieyatsiemieme, Yawé Muitsexi kemɨtiuta'aitɨakai mɨpaɨ katiniuyurieni naime.
EXO 38:23 Yaxeikɨata piparewiekai 'Ahurihawi, 'Akitsamaki nu'aya, Rani nuiwarieyatsie mieme, mɨkɨ naime pɨtitiwewiwakai, pɨtitiwipakai muxa huxarieya mɨ'uarietɨkakɨ mɨyɨtsikimawikɨ, kwimɨxetakɨ meta mɨxetakɨ, meta rinu 'ixurikiyarikɨ.
EXO 38:24 Kepaɨmetɨ muyɨ huru mɨyetuiya, kepauka tuki mutawewiyatsie xeimiriyari kiruyari kaniuyɨni, kemɨti'inɨatakai 'ana tuki.
EXO 38:25 Pɨrata kememɨteyetua yuxexuitɨ 'ixaheritsixi mekanaka'utsieni, haika miriyari heimana 'auxɨwime tsienituyari (3.500) kiruyari kanayani kemɨti'inɨatakai tuki 'ana.
EXO 38:26 Yunaitɨ xeitewiyari wiyari memɨhɨtɨkatei mekanaka'utɨarieni, mɨkɨ yunaitɨ mepakɨ 'ataxewime tsienituyari heimana haika miriyari heimana 'auxɨwime tsienituyari heimana huta tewiyari heimana tamamata (603.550), mɨkɨ mɨpaɨ meyupaɨmetɨ mekaniyetuaxɨani yuxexuitɨ, 'ataxewime kɨramuyari pɨrata, tuki 'ana kemɨti'inɨatakai.
EXO 38:27 Haika miriyari heimana haika tsienituyari kiruyari pɨrata kaniuyɨni, xeitsienituyari kɨyexi mukawetɨka hetɨa mieme mutiwewiya, mɨkɨ xexuitɨ pɨreuhapanakai xeitewiyari heimana tamamata heimana haika kiruyari.
EXO 38:28 Pɨrata muyuhayewaxɨ putiwewiya kwatsiturai meta hanira kɨyexi muka'uni hetsiemieme, meta mu'uyatsie manutineniere mekaniutiwirieni.
EXO 38:29 Naitɨ wurunitse kaniyetuiyani huta miriyari heimana haika tsienituyari heimana huta tewiyari kiruyari,
EXO 38:30 'ixuriki tukiyari kitenie kɨyexi hetsiena ma'uni kaniutiwewiyani, meta mawari taiyariyari wewiwame, mayexaxawa meta naitɨ tita mɨreuyehɨwa,
EXO 38:31 takwa kuraru makatsie kɨyexi hetsiena ma'uni kaniutiwewiyani meta mukatsunirixɨa tuki hetsiemieme meta kuraru makatsiemieme.
EXO 39:1 Kemarite mɨti'itsetɨka tukita te'uximayatamete wahetsiemieme, kaniutiwewiyani muxa huxarieya mɨyɨtsikimaɨyekɨ, kwimɨxetakɨ meta mɨxetakɨ mu'uarietɨkakɨ. 'Aruni meta kemariteya kaniutiwewiyani mɨpatsietɨka hetsiena mieme, Yawé Muitsexi kemɨtiuta'aitɨakai.
EXO 39:2 Wetsareri 'Aruni kamixaya 'etsimɨnena kaniutawewieni hurukɨ, muxa huxarieya 'uariekame mɨyɨtsikimaɨyekɨ, kwimɨxetakɨ meta mɨxetakɨ, metatsierie rinu 'ixurikiyari 'aixɨa mɨ'anekɨ.
EXO 39:3 Huru mekaniutitsuna wewerime mekanayeitɨani, 'etsi'atayeyeume mekaniutixiteni kamixatsie kɨmana memɨtewipakɨ muxa huxarieya yunɨkame mɨyɨtsikimaɨyekɨ, kwimɨxetakɨ meta mɨxetakɨ meta rinukɨ.
EXO 39:4 Naiparieyatsie mieme wiwieri meputiwewi kamixa hetsiemieme naitsata kanakayaxixɨani.
EXO 39:5 Mɨkɨ hɨiyameya yaxeikɨa 'anemekɨ kaniwewiyakaitɨni, mɨkɨ naitɨ puyuxewiriyakai kamixa matɨa, hurukɨ kaniwewiyakaitɨni meta muxa huxarieya mɨyɨtsikimaɨyekɨ, kwimɨxetakɨ meta mɨxetakɨ, metatsiere rinu 'ixurikiyari 'aixɨa mɨ'anekɨ, mɨpaɨ katiniuyurieni Muitsexi Yawé kemɨtita'aitɨa.
EXO 39:6 'Unitse teteyari mekaneuyatsaxɨani huru hetsie, mɨkɨtsie meha'utɨkaime 'Ixaheri niwemama, tseyu kemɨtiwewiwa hepaɨ.
EXO 39:7 Hikɨ kamixa 'etsimɨnena wiwierieyatsie mekanekayatsaxɨani, para 'Ixaheri tɨɨriyamama mema'eriwanikɨ, Yawé Muitsexi kemɨtita'aitɨa.
EXO 39:8 Wetsareri kuka kaniutawewieni tawitsie mieme, pɨ'itsekai kamixa 'etsimɨnena hepaɨ, huru hiruyarikɨ xuiyakame, muxa huxarieya mɨyɨtsikimaɨyekɨ, kwimɨxetakɨ meta mɨxetakɨ metatsiere rinu 'ixurikiyari 'aixɨa mɨ'anekɨ pɨwewiyakai,
EXO 39:9 payehutakai, yaxeikɨa heutatetewatɨ, xeitewiyari tsenitimeturuyari heutatetewatɨ.
EXO 39:10 Mana peuyatsarie tetexi witsimɨ'anene naukakɨa panukutetɨkatei. Matɨari miemetsie mana patekai tetexi witsi'anenetɨ xetamekɨ, taxaɨyemekɨ, meta tsiɨraɨyemekɨ 'utimerɨkatɨkaitɨ.
EXO 39:11 Hutarieka manukukatsie, yuawitɨ tsiɨrauyemekɨ, yuawimekɨ mukutuxie meta tuxamekɨ mutimerɨka.
EXO 39:12 Hairieka miemetsieta, merie xetatɨ taxaɨyetɨ, tuxamekɨ kapemaɨyemekɨ meta yɨtsikimaɨyetɨ.
EXO 39:13 Naurieka mukukatsieta, taxaɨyetɨ, kwimɨyɨwi, meta tsiɨraɨyetɨ. Mɨkɨ hurutsie witsimɨ'anene pamanekai,
EXO 39:14 tamamata heimana huta teteyari pɨhɨkɨtɨkai, mɨkɨ xexuitɨ 'Ixaheri niwemama pɨwa'inɨaritɨkai, tamamata heimana huta nuiwarite mepa'utɨkatei tseyu hepaɨ.
EXO 39:15 Hurukɨ kuka wiwieriyari kaniutiwewiyani, tsarietɨkaitɨ yatɨtɨ.
EXO 39:16 Hutatɨ hanira hurukɨ kaniutiwewiyani meta witsi'anenetɨ hetsiena meumarixɨanikɨ, kuka mutatsikuritɨkatsie,
EXO 39:17 hikɨ mana kanewɨtɨaxɨani huru kaunariyari, haniratsie kaneuyehaxɨani kuka hetsie mamanetɨkatsie,
EXO 39:18 mɨkɨ huru kaunariyari hutame mayexaxawatsie kenewiyatsitɨaxɨa kamixa 'etsimɨnenatsie hɨxiena mɨkatɨre.
EXO 39:19 Tawarita hutatɨ hanira hurukɨ kaniutiwewiyani, kanewɨtɨaxɨani kuka taɨta miemetsie kamixa 'etsimɨnena hetsie.
EXO 39:20 Tawarita hutame hanira kaniutiwewieni hurukɨ, naiparie mukaneniere kanawɨtɨariexɨani kamixa mɨpatsie hɨiyameyari manakuka 'aurie.
EXO 39:21 Muxa huxarieya witayarikɨ mɨyɨtsikimaɨyekɨ mɨkɨ hanira mekaniutiwiwitɨani, kamixa mɨpatsie hanirayari meta kuka hanirayari mekaniuhɨaxɨani, kuka hɨiyameyari manukuka muyuhayewanikɨ, mɨkakuyuanenikɨ kamixa mɨpatsietsie, Yawé Muitsexi kemɨtita'aitɨakai.
EXO 39:22 Wetsareri 'ixuriki mɨyɨtsikimaɨyekɨ kamixa 'etsimɨnena mɨpatsie kaniutawewieni 'itsariekamekɨ, kamixa 'etsimɨnena heima mieme.
EXO 39:23 Hixɨapa hewatitenime kaniuyurieni, mu'u rewatinakeme, muwatixawatsie 'atatenime mɨkayetsanikenikɨ.
EXO 39:24 'Ixuriki tenimeyaritsie petayatsaxɨ putuni, yɨtsikimawime, kwimɨxetakɨ, mɨxetakɨ, meta rinu 'ixurikiyarikɨ 'aixɨa mɨ'ane.
EXO 39:25 Meta kapana 'etsipepeme hurukɨ xeikɨa wewiyatɨkaime, tenimeyaritsie kanatawɨre, putunite matawɨrixɨa tsata.
EXO 39:26 Kapana 'etsimupepe meta putunite kanatawɨre 'anayeyaxiketɨ, mɨkɨ 'ixuriki tenimeyaritsie, ti'uximayatame menakatɨni hetsiemieme, Yawé Muitsexi kemɨrahɨawekai.
EXO 39:27 'Aruni hetsiemieme meta niwemama wahetsiemieme, kamixa kaniutiwewiyani 'amɨtɨtɨ rinukɨ 'itsarietɨkaitɨ.
EXO 39:28 Kamixa meta mukuretsi rinu 'ixurikiyari pepɨyurieni, hɨiyame 'itsarietɨ pɨyuwiyani naitɨ.
EXO 39:29 Hɨiyame rinu 'ixurikiyari kanihɨkɨtɨkaitɨni 'aixɨa mɨ'anekɨ 'itsarietɨ mɨyɨtsikimaɨyekɨ, kwimɨxetakɨ meta mɨxetakɨ, Yawé Muitsexi kemɨtiuta'aitɨa.
EXO 39:30 Huru tepɨayari mɨpatsie 'etsiyeume tseyu hepaɨ 'anekame kaniutawewieni, mana katineu'utsieni, «Mɨpatsie Yawé hetsiemieme».
EXO 39:31 Hikɨ muxa witayarikɨ yɨtsikimaɨyemekɨ kaniuwiwitɨarieni mukuretsitsie makuwierekɨ, Yawé Muitsexi kemɨtiuta'aitɨa.
EXO 39:32 Naitɨ tuki kaniunɨrieni, 'ixaheritsixi yamekateniwewieni Yawé kehepaɨ 'anekame Muitsexi muta'aitɨakai,
EXO 39:33 Muitsexi kaniuxeitsitɨarieni tuki, heimana manuka'eimire, 'ixuriki 'amɨyeyeu meta muwa mɨtiyepine, kwatsiturai, mexate 'amatayeyeu, manukuhini, muka'uni meta hetsiena ma'uni,
EXO 39:34 muxatsi wanawiyari 'ɨkariyari mɨxeta, ketsɨte 'amemɨpapa wanawiyari 'ɨkariyari meta 'ixuriki kakuni meukunakai,
EXO 39:35 kakuni meta kɨyexi hetsiena manukuhe meta kanamikieya,
EXO 39:36 mexa mana rapitɨ tita mana mɨtimieme meta paa yamɨramane,
EXO 39:37 kɨxeme 'uitɨwame hurukɨ xeikɨa mɨwewiya meta kɨxeme manuye'u metatsiere tita mana mɨtimieme, meta hatseiti kɨxeme hetsiemieme.
EXO 39:38 Mawari taiyame hurukɨ xeikɨa mɨwewiya, 'ɨkwa witsimu'ɨa, hatseiti mu'utsie mieme mɨpatsie meta 'ixuriki tuki kitenie mieme,
EXO 39:39 mawari taiyariyari wewiwame wurunitsekɨ mɨwewiya meta mayexaxawa hexeiyame, kɨyexieya meta naitɨ tita mɨkɨ mɨreuyehɨwa, maimawame meta hetsiena muyema,
EXO 39:40 takwa kuraru makatsie mieme 'ixuriki mawɨtɨka, kɨyexi muka'utɨka meta hetsiena mawetɨka, 'ixuriki kuraru kitenie meuwie, kaunarite, kɨyexi mukatsutsune kuraru heima mɨranukawerire hetsiemieme, naitɨ tita mɨtiyɨnikekai tuki muyepatsie hetsiemieme 'ixuriki tukiyari,
EXO 39:41 meta kamixate mɨ'itsarietɨka tukita memɨteta'uximayata wahetsiemieme, meta mawari wewiwame 'Aruni kamixateya mɨpatsietɨka meta niwemama mawari wewiwamete wakamixate.
EXO 39:42 'Ixaheritsixi yamekateniutiwewieni Yawé kehepaɨ'anekame Muitsexi muta'aitɨakai.
EXO 39:43 Muitsexi, katiniutixeiya tita mɨtiutiwewiyakai, tiuxeiyaka Yawé kehapaɨ ti'aneneme mɨtita'aitɨakai, 'aixɨa katinixeiya.
EXO 40:1 Yawé Muitsexi mɨpaɨ katiniutahɨawe:
EXO 40:2 «Mexɨakame metseriyaritsie meta mexɨakame tukaritsie, tuki muyepatsie keneutawewi, 'ixuriki tukiyari.
EXO 40:3 Muwa kiita kakuni tɨratuyari keneutateka, 'ixurikikɨ keneukunama.
EXO 40:4 Meta mexa muwa keneutaketsa 'aixɨa ketineuketsa. Meta tukita keneutaketsa kɨxeme 'uitɨwame, kɨxeme keneutaiyaxɨa.
EXO 40:5 'Ɨkwa taiyame kakuni hɨxie keneutaketsa, meta 'ixuriki keneuwi tuki kitenietsie.
EXO 40:6 »Mawari taiyame tuki hɨxie keneutaketsa, 'ixuriki tukiyari hɨxie,
EXO 40:7 meta maimawame mana keneutaketsa, mawari taiyame meta 'ixuriki tukiyari wahixɨapa, haa meta kenakatu'a hetsiena.
EXO 40:8 Kuraru kenateka waritanatsie, 'ixuriki meta keneuwi kuraru kitenietsie.
EXO 40:9 »Hatseiti mɨtiyupatakɨ ketineu'ɨya, tuki keneukawiri meta naime ketineti'ɨya ketita muwa mɨreyepine, para naitɨ tipatsietɨ mɨrayanikɨ piinite.
EXO 40:10 Hatseiti keneuwirita mawari taiyame meta naime mana mɨtiyepine, tinaitɨ tipatsietɨ mɨrayanikɨ.
EXO 40:11 Yaxeikɨata maimawame keneuyuri, patsiekame kenayeitɨa meta 'ɨkayari hetsiena muyemare.
EXO 40:12 »Hikɨ 'Aruni kenanuwitɨkita meta niwemama 'ixuriki tukiyari kitenie, mana meke'uti'ɨwa,
EXO 40:13 meta 'Aruni kamixate mɨpatsietɨkakɨ keneutikemaritɨa. Hatseiti keneukawiri mɨtiyupata, mɨtita'uximayatakɨ nemawari wewiwame mayanikɨ.
EXO 40:14 Hikɨta niwemama kamixa 'amɨtɨtɨ keniwaranakatɨtɨa,
EXO 40:15 mɨkɨta keniwarukawiri hatseiti mɨtiyupatakɨ wapaapa hepaɨ, mɨkɨ memɨteta'uximayatakɨ nemawari wewiwametekɨ. Kememɨte'ukawiriyarie mɨkɨ pɨ'inɨaritɨni yuheyemekɨ wanuiwari 'umemahu nemawari wewiwamete mepɨhɨkɨtɨni».
EXO 40:16 Muitsexi yapɨtiuyuri naime Yawé kemɨtita'aitɨa.
EXO 40:17 Mɨpaɨ pauka tuki kaniunɨrieni mexɨakame metseritsie mexɨakame tukaritsie meta hutarieka wiyari 'aye'aku.
EXO 40:18 Kepauka tuki Muitsexi mukatsutɨa, kɨyexi hetsiena ma'uni kaniuka'uitɨani, mexa 'amatayeyeu na'uitɨatɨyani meta manukuhini, tuki hɨxie kɨyexi kaniuka'uitɨani,
EXO 40:19 hikɨ 'ixuriki tukitsie kananukawera, heimana tawarita 'a'ayetsuime kananukawera nawi, Yawé kemɨtita'aitɨakai.
EXO 40:20 Hikɨ Muitsexi, tɨratu maye'uxa xapayari 'utihurieka kakunitsie kanikayeni, meta kɨyexi kananuye'uitɨani, metatsiere kanamikieya kananukamani.
EXO 40:21 Kakuni tukita kaneutateni, 'ixurikikɨta kaneikunani. Mɨkɨ mɨpaɨ katinikweriwayuriekaitɨni kakuni tɨratuyari, Yawé kemɨtita'aitɨakai.
EXO 40:22 Muitsexi mexa 'ixuriki tukiyarita 'etsatanatsie kanitikeni tayeta hepatsie, 'ixuriki warita,
EXO 40:23 Yawé hɨxieta paa kanamana pareku rekumaneme, Yawé kemɨtita'aitɨakai hepaɨ.
EXO 40:24 Kɨxeme 'uitɨwameta tukita kaneutakeni, mexa hɨxie, tuki 'etsatatsie tatsutɨa muyekatsie,
EXO 40:25 'anari kɨxeme kaniutaiyaxɨani Yawé hɨxie, Yawé meripaitɨ kemɨtita'aitɨakai.
EXO 40:26 Meta 'ixuriki tukiyarita mɨratimawatɨre hurukɨ xeikɨa mɨwewiya, 'upaitɨ 'ixuriki meuwie hɨxie kaniutakeni,
EXO 40:27 mɨkɨtsie 'ɨkwa witsimu'ɨa kaniutaiya, Yawé kemɨtita'aitɨakai.
EXO 40:28 'Ariketa yatiuyurieka 'ixuriki kaneuwieni tuki kitenie.
EXO 40:29 Muitsexi meta mawari taiyame 'akaniutakeni 'ixuriki tukiyari kitenietsie, mana mɨkɨtsie mawarika kaniutitaiya meta hatsi mawariyari, Yawé kemɨtita'aitɨakai.
EXO 40:30 Meta maimawame 'akaniutakeni, 'ixuriki tukiyarita meta mawari taiyame wahixɨapa kanitakeni, haa mɨkɨtsie kanikatuani maimawame,
EXO 40:31 hikɨ mana Muitsexi 'Aruni meta yunaitɨ niwemama yumamate yu'ɨkate mekaniutihauxini.
EXO 40:32 Kepauka memeutahakekai 'ixuriki tukiyari kitenie yatɨni kepauka mawari taiyame hetsie 'ahurawa memɨkɨkakai mepɨtimaimawakai, Yawé kemɨtiwa'aitɨakai.
EXO 40:33 'Ariketa Muitsexi takwa kaniutawewieni tuki warie kematewatɨka meta mawari taiyame, meta kuraru kitenie 'ixuriki kaneuwieni. Muitsexi 'uximayatsika mɨpaɨ katiniutinɨni.
EXO 40:34 Merikɨtsɨ 'ana kwitɨwa haiwitɨri 'ixuriki tukiyari kananukanani, tukita Yawé xawatɨriyaya kaniuyeyerɨni.
EXO 40:35 Muitsexi pɨkayɨwekai 'ixuriki tukiyarita meutahani haiwitɨri menukanakaikɨ, meta Yawé xawatɨriyaya tukita mɨhɨnekaikɨ.
EXO 40:36 Kepauka tuki hetsie haiwitɨri manuku'ekekai, 'ana 'ixaheritsixi mepuyukuha'aritɨwakai mepekɨkakai.
EXO 40:37 Kepauka haiwitɨri mɨka'anuku'ekekai, mepɨkayɨwawekai memɨyekɨne yukiita kayuwatɨ mepɨtetekai.
EXO 40:38 Kepauka 'ixaheritsixi memuhukai, Yawé haiwitɨrieya tuki heima kanakatetekekaitɨni tukarikɨ, tɨkarikɨta tai hepaɨ 'anetɨ payeikakai, yunaime 'ixaheritsixi wahɨxie.
LEV 1:1 Yawé Muitsexi kaniuta'inieni, 'ixuriki tukiyarita 'ayekaitɨ. Mɨpaɨ katinitahɨawe,
LEV 1:2 yunaime 'ixaheritsixi mɨpaɨ mɨtiwatahɨawekɨ: «Kepauka xeme xewitɨ 'imikieri mawariyari mɨyetuani Yawé hetsiemieme, wakaxi yatɨni muxa pɨhɨkɨtɨni.
LEV 1:3 »Mawari taiyariyari xemɨwewienikɨ xɨka tewa hɨkɨtɨni mɨkɨ pu'ukitɨni 'aixɨa mɨ'ane pɨhɨkɨtɨni, 'ixuriki tukiyari kitenie hɨxie xekene'atɨa mawari taiyariyari mayanikɨ. Yawé muwa kanitanaki'erimɨkɨ.
LEV 1:4 'Ana tita mɨtitimawa hetsie yumamakɨ mu'uyatsie peutimeni, mɨtanaki'eriwakɨ hetsiena mieme meta mɨxɨnarieni mawariyari mayanikɨ.
LEV 1:5 'Anake Yawé hɨxie tsikeru mekaniwaxitekuni, mawari wewiwamete 'Aruni niwemama xuriya mekwewieme mawari taiyame 'aurie mepeyeurietɨkɨne, 'ixuriki tukiyari kitenie hɨxie muwetsie.
LEV 1:6 Meta wakaxi mi'atɨa kanitakwipiemɨkɨ meta tinaime pɨtiwayewitexɨani.
LEV 1:7 'Aruni niwemama, mawari wewiwamete, mawari taiyametsie kɨyexikɨ mepakanaini,
LEV 1:8 hikɨ wai muwitekietɨka 'aixɨa mepɨteyatsa tai mɨta'a heima mawari taiyametsie, mu'u nɨkame meta wiyayari,
LEV 1:9 kwinurieya meta 'ɨkateya hakɨ pɨtitihauxinire, mɨkɨ mawari wewiwame mawari taiyametsie naime pɨtitaiya. Mɨkɨ mawari naitɨ taiyariyariekame kanihɨkɨtɨni, 'imikieri taipa kwaxiyariekame witsimu'ɨa Yawé minake.
LEV 1:10 »Xɨka xewitɨ mawari taiyariyari 'ixatɨani tuuru, yatɨni muxa 'uki, yatɨni tsipu 'uki pɨhɨkɨtɨni 'aixɨa mɨ'ane.
LEV 1:11 Yawé hɨxie mekaniwaxitekuni mawari taiyame tayeta hepatsie, 'Aruni niwemama mawari wewiwamete xuriya mekwewieme mawari taiyame 'aurie mekaneyeurietɨkɨnikuni.
LEV 1:12 Hikɨ puwayewitexɨani, hikɨ mawari wewiwame 'aixɨa katiniyatsamɨkɨ kɨyexi mɨtatɨkatsie heima mawari taiyametsie, mu'u nɨkame meta wiyayari.
LEV 1:13 Yaxeikɨata kwinurieya meta 'ɨkateya hakɨ pɨtihauxinire, hikɨ mawari wewiwame naime tikuxeɨrieme mawari taiyametsie pɨtititaiya. Mɨkɨ mawari naitɨ taiyariekame kanihɨkɨtɨni, Yawé mawari mɨyetuiriyarɨwa taipa mieme witsimu'ɨa kanihɨkɨtɨni.
LEV 1:14 »Xɨka xewitɨ memɨte'awɨwawe Yawé yetuirieni mawari taiyariyari mayanikɨ, xeime kukuru yatɨni xeime haɨmɨ pixatɨani.
LEV 1:15 Mawari wewiwame kukuru panutuni mawari taiyametsie mana mu'uya panutiteke, meta mawari taiyametsie pitataiya. Hikɨ xuriyaya mawari taiyame 'aurie kanayepɨnamɨkɨ,
LEV 1:16 yaxeikɨata 'inɨaya kanayehanimɨkɨ meta kwinurieya, mawari taiyame 'etsatana tau manatineika hepatsie naxi meukawiwiwatsie paitɨ kaneiwiwimɨkɨ.
LEV 1:17 Hikɨ 'anateyatsie tiwietɨ tawieya kananutaxitemɨkɨ 'anateya kawayetsanatɨ. Hikɨ mawari wewiwame mawari taiyametsie kanitataiyamɨkɨ, tai heima. Mɨkɨ mawari naitɨ taiyariekame kanihɨkɨtɨni, Yawé mawari mɨyetuiriyarɨwa taipa mieme witsimu'ɨa.
LEV 2:1 »Xɨka xewitɨ tɨriku mawariyari Yawé hetsiemieme yetuamɨkɨ, mɨkɨ tɨriku mɨtɨxiyari 'aixɨa mɨ'ane pɨhɨkɨtɨni, hetsiena huriwa hatseitiyari peutituani meta 'ɨkwa witsimu'ɨa.
LEV 2:2 Hikɨ 'Aruni niwemama mawari wewiwamete wahetsɨa kaniyetuamɨkɨ, mana xeimamayari panatituni harina witsimɨ'ane hatseiti mɨnɨ'ɨ meta 'ɨkwa witsimu'ɨa nɨkame, hikɨ mawari wewiwame 'imikieri ma'eriwa mawariyari mawari taiyametsie kanitataiyamɨkɨ. Mɨkɨ mawari Yawé mɨyetuiriyarɨwa taipa mieme witsimu'ɨa kanihɨkɨtɨni.
LEV 2:3 Tɨriku mɨtɨxiyari mawariyari muyuhayewa, 'Aruni meta niwemama wahetsiemieme katinayeimɨkɨ. Mɨkɨ 'imikieri taipa warɨkariekame Yawé hetsɨa mɨyetuiya, 'ikɨ pɨhɨkɨ waɨkawa mɨpatsie.
LEV 2:4 »Kepauka xewitɨ tɨriku mɨtɨxiyari mawariyari mukwaxiyarie mɨyetuani huxunuta mieme, mɨkɨ paa 'aixɨa mɨ'anene pɨhɨkɨtɨni tikuxanariyame mɨkanɨ'ɨ, huriwa hatseitiyarikɨ xeɨkɨa pɨhawiyarieka meta paa huriwa hatseitiyari pɨwiriyarietɨkani.
LEV 2:5 »Xɨka tɨriku mɨtɨxiyari mawariyari xakɨtsie mukwaxiyarie xeyetuani, mɨkɨ 'imikieri tɨriku mɨtɨxiyari 'aixɨa mɨ'ane pɨhɨkɨtɨni tikuxanariyame kanɨkame, hatseitikɨ xeikɨa hawiyariekame.
LEV 2:6 Yayeyeume xepɨtitaraxɨani meta hatseiti xepanutituani. Mɨkɨ tɨriku 'imikieri mawariyari mɨhɨkɨkɨ.
LEV 2:7 »Xɨka tɨriku mɨtɨxiyari mawariyari xarita kwaxiyariekame pe'ixatɨani, mɨkɨ 'imikieri harina mɨtɨxiyari 'aixɨa mɨ'ane pɨhɨkɨtɨni hatseitikɨ xeikɨa pɨhawiyarieka.
LEV 2:8 Tɨriku 'imikieriyari mɨpaɨ reukuwewiyakame xepɨ'atɨani Yawé hetsɨa, hikɨ mawari wewiwame pepɨyetuirieni, mɨkɨ pɨyɨaneni mawari taiyametsie miyetuani.
LEV 2:9 Mawari wewiwame mɨkɨ 'imikieri yapaɨmeme 'anatitume mawari ma'eriwa mɨhɨkɨtɨnikɨ, mawari taiyametsie pitataiya. Mɨkɨ 'imikieri Yawé mɨyetuiriyarɨwa taipa mieme witsimu'ɨa kanihɨkɨtɨni.
LEV 2:10 Tɨriku mɨtɨxiyari mawariyari muyuhayewa, 'Aruni meta niwemama wahetsiemieme kanayeimɨkɨ. Mɨkɨ 'imikieri taipa warɨkariekame Yawé hetsɨa mɨyetuiya, mɨkɨ pɨhɨkɨ waɨkawa mɨpatsie.
LEV 2:11 »Xeme 'imikieri Yawé xemɨyetuirieni tikuxanariyame pɨkanɨka, xiete meta tikuxanariyame pɨkatitaiyarɨwani mɨkɨ 'imikieri Yawé mɨyetuiriyarie taipa mieme mɨhɨkɨkɨ.
LEV 2:12 Xiete meta tikuxanariyame Yawé xepɨte'anutɨkirieni mawari matɨari mieme mayanikɨ, peru mɨkɨ mawari taiyametsie xepɨkatehapineni witsimu'ɨa hepaɨ.
LEV 2:13 Naime 'imikieritetsie xemiyetuirieni pɨti'unamatɨkani, hatsuaku xekakaɨyari tɨratuyatsie 'una heuyewetɨ pɨkahayeikani. Naime mɨkɨ 'imikierite pɨti'unamatɨkani.
LEV 2:14 »Xɨka Yawé 'imikieri matɨari tɨriku mɨtikaxuawere xexatɨakuni, mɨkɨ tɨriku mɨhehekwa pɨhɨkɨtɨni, meta pɨtɨxieka yaxeikɨata xatɨtsie pɨxarikietɨkani. Mɨkɨ mexɨakame 'imikieriyari mɨhɨkɨkɨ.
LEV 2:15 Mɨkɨ 'imikieritetsie huriwa hatseitiyari meta 'ɨkwa witsimu'ɨa pepanutituani.
LEV 2:16 Mawari wewiwame tɨriku mɨhehekwa meta mɨtɨxiyari yapaɨmeme pɨtitaiya mawari ma'eriwa mɨhɨkɨtɨnikɨ, huriwa hatseitiyari meta 'ɨkwa witsimu'ɨa naime yɨnɨkame. Mɨkɨ 'imikieri taipa mieme Yawé muxatɨarie kanihɨkɨtɨni.
LEV 3:1 »Xɨka xewitɨ Yawé tuuru yetuirieni 'aixɨa memɨteyuxeiyanikɨ mawariyari, kanixatɨamɨkɨ 'aixɨa 'aneme tsepa mɨtituuru yatɨni tsepa mɨtiwakaxi.
LEV 3:2 Kemɨ'ane 'imikieri mɨyetuani mɨkɨ wakaxi muwaxitekieni mu'uyatsie peutimeni, mɨranutahakitɨretsie 'ixuriki tukiyari manuwe hɨxie. Hikɨ 'Aruni niwemama mawari wewiwamete, xuriya mekwewieme mawari taiyame 'aurie mepeyeurietɨkɨne.
LEV 3:3 Kemɨ'ane miyetuani Yawé hetsɨa, 'imikieri taipa kuaxiyariekame, 'ikɨ 'imikieri 'aixɨa memɨteyuxeiyanikɨ mawari pɨhɨkɨ: wiya meta kwinuri naime mɨ'eimatɨka piyetuirieni,
LEV 3:4 mumé muhuta wiyayari mi'eimatɨka, meta wiya katutsitɨana mieme, meta wiya nemaya heimana mɨkawere, mɨkɨ pɨrayehapanieni mumé muhuta yɨnɨkame.
LEV 3:5 Hɨkɨ 'Aruni niwemama naime 'ikɨ mawari taiyametsie mekatenititaiyakuni, mawari taiyariyari heima matita'a muyekatsie. Mɨkɨ mawari Yawé mɨyetuiriyarɨwa taipa mieme witsimu'ɨa kanihɨkɨtɨni.
LEV 3:6 »Xɨka mawari 'aixɨa memɨteyuxeiyanikɨ mɨyetuani tuuru hɨkɨtɨni, kemɨ'ane miyetuani Yawé kaniyetuiriemɨkɨ 'aixɨa 'aneme, tsepa mɨtiwakaxi yatɨni mɨtituuru.
LEV 3:7 Xɨka 'imikieri muxa hɨkɨtɨni, Yawé hɨxie xepiyetuani,
LEV 3:8 mu'uyatsie putimeni 'anake pimieni 'ixuriki tukiyari manuwe hɨxie. Hikɨ 'Aruni niwemama xuriyaya mawari taiyame 'aurie mepayeurietɨkɨne.
LEV 3:9 Kemɨ'ane mɨtiyetuani Yawé hetsɨa 'imikieri taipa kwaxiyariekame, 'ikɨ mawaritsie mieme yamɨtipaɨme pɨtihɨkɨtɨni: wiya meta kwaxieya naimime, (tsutɨanapaitɨ kanexitemɨkɨ), wiya meta kwinuri naime mɨ'eimatɨka piyetuirieni,
LEV 3:10 mumé muhuta wiyayari mi'eimatɨka, meta wiya katutsitɨana mieme, meta wiya nemaya heimana mɨkawere, mɨkɨ pɨrayehapanieni mumé muhuta yɨnɨkame.
LEV 3:11 Hikɨ mawari wewiwame mɨkɨ naime mawari taiyametsie katinititaiyamɨkɨ. Mɨkɨ 'ikwai kanihɨkɨtɨni, mawari taipa warɨkarietɨ Yawé hetsɨa mɨyetuiwa kanihɨkɨtɨni.
LEV 3:12 »Xɨka tsipu 'uka hɨkɨtɨni mawari 'imikieri mayanikɨ Yawé hɨxie piyetuani.
LEV 3:13 Mu'uyatsie putimeni, 'anake 'ixuriki tukiyari manuwe memanutakɨka hɨxie penutixiteni. Hikɨ 'Aruni niwemama xuriyaya mawari taiyame 'aurie mepayeurietɨkɨne.
LEV 3:14 Kemɨ'ane mɨtiyetuani Yawé hetsɨa 'imikieri taiyariyari, mɨkɨ pɨtihɨkɨtɨni: wiya meta kwinuri naime mɨ'eimatɨka piyetuirieni,
LEV 3:15 mumé muhuta wiyayari mi'eimatɨka, meta wiya katutsitɨana mieme, meta wiya nemaya heimana mɨkawere, mɨkɨ pɨrayehapanieni mumé muhuta yɨnɨkame.
LEV 3:16 Hikɨ mawari wewiwame naime mɨkɨ mawari taiyametsie katinititaiyamɨkɨ. Mɨkɨ 'imikieri taiyariyari Yawé minake witsimu'ɨa kanihɨkɨtɨni, mɨkɨ naitɨ wiya Yawé hetsɨa kanimiemetɨni.
LEV 3:17 »'Ikɨ kanihɨkɨtɨkamɨkɨ 'aitsika xexiɨyarima wahetsie mieme yamemɨtekahunikɨ, tsepa hakewa xemetiteni. Xuriya xepɨkakwa'ani meta wiya».
LEV 4:1 Yawé Muitsexi mɨpaɨ katiniuta'aitɨani
LEV 4:2 'ixaheritsixi mɨpaɨ mɨtiwatahɨawekɨ: «Kepauka xewitɨ 'atsikatimaitɨ Yawé 'aitsikayatsie 'axamɨtiyurieni, tixaɨtɨkɨ kemɨkareuyewetse xɨka tiuyurieni, mɨkɨ 'ipaɨ pɨta katiniyurimɨkɨ:
LEV 4:3 »Xɨka xewitɨ mawari wewiwame Kakaɨyari menayexei 'axatiuyurieni, yunaitɨ teɨteri wahetsie katinahɨiyamɨkɨ, mɨkɨ mawari Yawé kaniwewiriemɨkɨ tsikeru 'aixɨa 'aneme kanitimawamɨkɨ mɨ'itiyanikɨ.
LEV 4:4 Yawé hɨxie tsikeru kananuhanimɨkɨ, 'ixuriki tukiyari manuwe mɨrayutixexeɨritɨre pi'atɨani mɨranutakɨkatɨretsie, 'ana tsikeru mu'uyatsie 'utimetɨ Yawé hɨxie puwaxiteni.
LEV 4:5 Mawari wewiwame manayexeiyarie tsikeru xuriyaya yapaɨmeme kwewieme 'ixuriki tukiyari manuweta paitɨ penuhana.
LEV 4:6 Yu'itɨwamekɨ xuriyata peukameni, 'anari 'atahutamexɨa pei'ɨyaxɨani 'ixuriki meuwie hepatsie Yawé hɨxie.
LEV 4:7 Hikɨ mawari wewiwame mawari taiyame 'awateya naukametsie xuriya panuwiriexɨani 'ɨkwa witsimu'ɨa Yawé hɨxie muwe, 'ixuriki tukiyarita mɨrewayutixexeɨritɨre. Hikɨ tsikeru xuriyaya muyuhayewa mawari taiyame 'ɨkateyatɨa pitiyeurieni, 'ixuriki tukiyari manuwe hɨxie mɨranutakɨkatɨretsie muwe.
LEV 4:8 Hikɨ, tsikeru mumierie 'itiya mawariyari hetsiemieme, naime wiyaya kwinuriteya mɨ'eimatɨka mepɨtehayepini,
LEV 4:9 mumé muhuta wiyayari mi'eimatɨka, meta wiya katutsitɨana mieme, meta wiya nemaya heimana mɨkawere, mɨkɨ pɨrayehapanieni mumé muhuta yɨnɨkame.
LEV 4:10 Mɨpaɨ xekateniyurikuni tuuru hetsie 'aixɨa memɨteyuxeiyanikɨ mawariyari wiyaya kexemɨte'ayepine hepaɨ. Hikɨ mawari wewiwame naime mɨkɨ mawari taiyametsie katinititaiyamɨkɨ,
LEV 4:11 peru naitɨ mɨtiyuhayewa nawiyari, waiyari, mu'uya, 'ɨkateya, kwinurite meta kwitaya,
LEV 4:12 Mɨkɨ naitɨ mutiuyuhayewaxɨ tsikeru hetsie timieme, yateewa paitɨ xepenuyetuni maku'itiyarietsie, mɨkɨ naxi matiwiwiwatsie taipa mɨratitaiyarɨwatsie xepitiwiwieni naitɨ mɨtaxɨnikɨ. Naxi matiwiwiwatsie kanitaxɨmɨkɨ.
LEV 4:13 »Xɨka yunaitɨ 'ixaheritsixi 'atsimekatemaitɨ 'axamete'uyurieni, 'ana yunaitɨ memɨyukuxexeɨriwa wahetsie pɨrahɨiyaka Yawé 'aitsikaya kemɨra'imawa memɨka'anu'enikɨ.
LEV 4:14 Xɨka kwitɨwa mɨkɨ yameteheyutimani kename 'atsimekatemaitɨ 'axamete'uyuri, 'ana tsikeru 'aixɨa mɨ'ane mekanitimawakuni memɨ'itiyanikɨ, 'ixuriki tukiyari manuwe hɨxie mekanenuhanikuni,
LEV 4:15 hikɨ kiekatari 'ukirawetsixi, mana tsikeru mu'uyatsie mekaniutimeikuni, 'ana mekaniwaxitekuni Yawé hɨxie.
LEV 4:16 Hikɨ mawari wewiwame Kakaɨyari menayexei, tsikeru xuriyaya yapaɨmeme kwewieme 'ixuriki tukiyarita paitɨ penuhana,
LEV 4:17 yu'itɨwamekɨ xuriyata peukameni, 'anari 'atahutamexɨa pei'ɨyaxɨani 'ixuriki meuwie hepatsie Yawé hɨxie.
LEV 4:18 'Arikeketa mawari taiyame 'awateyatsie xuriya 'etsiwa panuwiriexɨani, 'ɨkwa witsimu'ɨa Yawé hɨxie muwe, 'ixuriki kiiyarita. Xuriya muyuhayewa mawari taiyame hetɨa kanitiyeurimɨkɨ, 'ixuriki kiiyari manuwe hɨxie mɨranutahakitɨretsie muwe.
LEV 4:19 Yaxeikɨata mawari wewiwame naime wakaxi wiyayari payetuni, 'ana mawari taiyametsie pitataiya,
LEV 4:20 Yaxeikɨa tsikeru hetsie mɨrayepine xepɨte'anatipini 'itiya mawariyari xemɨte'uwewi hepaɨ. Mɨpaɨ mawari wewiwame mɨkɨ memɨ'itiyanikɨ pɨtiwewieni wahetsiemieme, mɨkɨ mepɨteheuyehɨwiyarieni.
LEV 4:21 Hikɨ tsikerutsie timieme mɨtiyuhayewaxɨ naime pɨranuyepini yateewa memakuteitsie taipa pihayewa mɨtixɨnikɨ, xewitɨ tsikeru kemɨrayepiniyarie hepaɨ. 'Ikɨ kanihɨkɨtɨni 'itiya mawariyari yunaitɨ memuyutixexeɨriwa wahetsiemieme.
LEV 4:22 »Xɨka xewitɨ kiekari mɨhɨritɨarie 'axatiuyurieni 'atsikatimaitɨ Yawé xekakaɨyari 'aitsikayatsie kemɨra'imawa, hetsiena pɨrahɨiyaka.
LEV 4:23 Kepauka yamɨreyutimani kename 'axatiuyuri, 'ana penuhana xeime tsipu 'ukitɨme 'aixɨa 'anekame mawari mayanikɨ.
LEV 4:24 'Ana mu'uyatsie 'utimeme Yawé hɨxie kaniwaxitemɨkɨ, hakewa memanutixitewa mawari taiyariyari mayanikɨ. Mɨkɨ memɨ'itiyani mawariyari pɨ'ayumieme.
LEV 4:25 Hikɨ mawari wewiwame 'itiya mawariyari xuriyayatsie yu'itɨwame heuketsatɨ mawari taiyame 'awateyatsie penuwiriexɨani, kwitɨta xuriya muyuhayewaxɨ mawari taiyame 'ɨkateya hetɨa pitiyeurieni.
LEV 4:26 Kwitɨta mawari taiyametsie naime tsipu wiyayari pɨtataiya, mawari memuyuxewinikɨ mawariyari mɨtiuwewiwa hepaɨ. Mɨpaɨ mawari wewiwame 'itiya pɨtiwewieni kiekari mɨhɨritɨarie 'axamɨtiuyurikɨ pɨreuyehɨwiyarieni.
LEV 4:27 »Xɨka tewi mana kiekametɨtɨ 'axatiuyurieni 'atsikatimaitɨ, Yawé 'aitsikaya kemɨra'imawakɨ, hetsiena pɨrahɨiwani.
LEV 4:28 Kepauka yamɨreyutimani kename 'axatiuyuri, kaneuyeweka miyetuani tsipu 'ukatɨme 'aixɨa mɨ'ane 'axamɨtiuyurikɨ kɨmana mɨreuyehiwiyarienikɨ.
LEV 4:29 Hikɨ tsipu mu'uyatsie putimeni, kaniwaxitemɨkɨ hakewa memanutixitewa mawari taiyariyari mayanikɨ.
LEV 4:30 Hikɨ mawari wewiwame xuriyatsie yu'itɨwame heuketsatɨ 'etsiwa mawari taiyame naitsata 'awateyatsie pawiriexɨani, hikɨ xuriya muyuhayewa mawari taiyame hetɨa pitiyeurieni.
LEV 4:31 Hikɨ tsipu wiyayari naime mepayetuni 'aixɨa memɨteyuxeiyanikɨ mawariyari kememɨteheyetu'iriwa hepaɨ, hikɨ mawari wewiwame naime mawari taiyametsie kanitataiyamɨkɨ, witsimu'ɨa Yawé minake mɨhɨkɨ. Mɨpaɨ mawari wewiwame 'itiya hetsiena mieme pɨtiwewieni, mɨkɨ ke'axamɨtiuyurikɨ pɨreuyehɨwiyarieni.
LEV 4:32 »Xɨka tewi muxa yetuani mɨ'itiyani mawariyari mayanikɨ, mɨkɨ muxa 'uka 'aixɨa mɨ'ane pɨhɨkɨtɨni.
LEV 4:33 Muxa mu'uyatsie 'utimetɨ kaniwaxitemɨkɨ 'itiya mawariyari mayanikɨ, hakewa memanutixitewa mawari taiyariyari mayanikɨ.
LEV 4:34 Hikɨ mawari wewiwame 'itiyari mawariyari xuriyayatsie yu'itɨwame heuketsatɨ mawari taiyame 'awateyatsie panuwiriexɨani, kwitɨta xuriya muyuhayewaxɨ mawari taiyame 'ɨkateya hetɨa naime pɨtiyeurieni.
LEV 4:35 Kwitɨta tsipu wiyayari naime mepayetuni, muxa wiyayari 'aixɨa memɨteyuxeiyanikɨ mawariyari memɨte'ayetu'iri hepaɨ, mawari wewiwame mawari taiyametsie pitataiya 'imikieri mawari taipa warɨkarietɨ Yawé hetsiemieme mɨyetuiya heima. Mɨpaɨ mawari wewiwame mɨkɨ tewi hetsiemieme 'itiya pɨtiwewieni, ke'axamɨtiuyuriekaikɨ pɨreuyehɨwiyarieni.
LEV 5:1 »Xɨka xewitɨ xeme 'anayexeiyarieni heitserie mɨtitaxatakɨ tita mɨtiuxei meta tita mutiu'eni hepaɨtsita, xɨka yuku'imawani katixatamɨtɨ pɨtika'eniexɨani 'axamɨtiuyurikɨ.
LEV 5:2 »Yaxeikɨa xewitɨ xɨka 'atsikatimaitɨ mɨtimɨki tiumayɨani, tewatsiekame yatɨni yeutanaka meta yutawima mukuyeika, mɨkɨ ka'itiyatɨ kanayuyeitɨamɨkɨ hetsiena katinahɨiyamɨkɨ tsepa 'atsimɨkaretima.
LEV 5:3 »Xɨka xewitɨ 'atsikatimaitɨ tewi mɨka'itiya 'umayɨani waiyarieyatsie, tsepatitakɨ mɨkɨ mɨkati'itiya, mɨkɨta ka'itiyatɨ payuyeitɨani. Xɨka 'arike mɨpaɨ retimani hetsiena pɨtiuhɨiwani.
LEV 5:4 »Xɨka xewitɨ 'atsikatimaitɨ 'uyutakeni 'ipaɨ tiyɨhɨritɨatɨ, mexɨa niuki wewietɨ 'aixɨa mɨtiyurienikɨ, yatɨni 'axamɨtiyurienikɨ, matsi xɨkaratɨmaiya, hetsiena katinahɨiyamɨkɨ kepauka mɨkɨ meye'erienitsie.
LEV 5:5 »Kemɨ'ane hetsiena mɨrahɨiwa 'ikɨ naime hepaɨtsita, kaneuyeweka muyutahekɨatakɨ ke'axamɨtiuyurikɨ,
LEV 5:6 meta peuyewetse Yawé mawari mɨwewirienikɨ hetsiena mɨtiuhɨiwa mawariyari xeime muxa 'ukatɨme yatɨni kapɨra 'axakemɨtiuyurikɨ. Mɨpaɨ mawari wewiwame 'itiya pɨtiwewieni 'axamɨtiuyurikɨ.
LEV 5:7 »Xɨka xewitɨ muxa mɨnanenikɨ ka'i'axeni, Yawé pɨta panutɨkirieni yuhutame weuraixi yatɨni haɨmɨxi mɨrayukatuani mawariyari ke'axamɨtiuyurikɨ. Xewitɨ mɨkɨ mɨ'itiyanikɨ mawariyari payani, xewitɨta mawari taiyariyari payani.
LEV 5:8 Mawari wewiwame hetsɨa pɨwa'atɨani, mɨkɨ waurai meri pɨyetuiyani mɨ'itiyanikɨ mawariyari mayanikɨ. Hikɨ kɨipieya puwakuhirumina mu'uya ka'anutiteketɨ.
LEV 5:9 Kwitɨwata 'itiya mawariyari xuriyayakɨ 'etsiwa xeitapatsie mawari taiyame peuta'ɨya, meta xuriya muyuhayewa mawari taiyame hetɨa pɨta'ipakieni. Mɨkɨ 'itiya mawariyari pɨhɨkɨ.
LEV 5:10 'Utɨmana miemeta mawari wewiwame kanitataiyamɨkɨ 'aitsika kemaine. Mɨpaɨ mawari wewiwame 'itiya pɨtiwewieni, 'ana ke'axamɨtiuyurikɨ pɨreuyehɨwiyarieni.
LEV 5:11 »Yatɨni matsi yuhutame weuraixi meta haɨmɨxi pɨkatiwa'axe, huta kiruyari tɨriku mɨtixiyari 'aixɨa mɨ'ane pɨta pɨ'atɨani 'itiya mawariyari mayanikɨ. Huriwa hatseitiyari pɨka'inɨituani meta 'ɨkwa witsimu'ɨa, mɨkɨ 'itiya mawariyari kanihɨkɨtɨni.
LEV 5:12 Mawari wewiwame hetsɨa pi'atɨani, mɨkɨta yumamakɨ yapaɨmeme 'anatitume ma'eriwanikɨ mawariyari, 'ana mawari taiyametsie naime yɨnɨkame pɨtitaiya Yawé hɨxie. Mɨkɨ 'itiya mawariyari pɨhɨkɨ.
LEV 5:13 Mɨpaɨ mawari wewiwame 'itiya pɨtiwewieni ke'axamɨtiuyuritsie mieme mɨpaɨ mɨkɨ pɨreuyehɨwiyarieni. Mawari muyuhayewa mawari wewiwame hetsiemieme payani, yaxeikɨa tɨriku hatsiyari mawariyari hepaɨ».
LEV 5:14 Merikɨtsɨ Yawé Muitsexi mɨpaɨ katiniutahɨawe:
LEV 5:15 «Xɨka xewitɨ tewi 'atsikatimaitɨ 'axatiuyurieni Yawé tipiinieya mɨtipatsietɨka hepaɨtsita, kaneuyeweka muxa 'uki Yawé manuhanirienikɨ 'aixɨa 'aneme 'imikieri mɨrayukatuani mawariyari mayanikɨ. Pɨrata tukita keraye'akamekɨ memɨteyukutuaya hepaɨ, 'ikɨ mawari mɨrayukatuani mawariyari pɨhɨkɨ.
LEV 5:16 Mɨyatiyurieme, mɨkɨ tewi pɨrayukatuani ke'axamɨtiuyurikɨ Kakaɨyari tipiinieya mɨtipatsietɨkatsie timiemekɨ, 'auxɨwimeyaritsie mieme xei'inɨariyari mawari wewiwame kaniyetuiriemɨkɨ. Mɨpaɨ mawari wewiwame 'itiya pɨtiwewieni tewi hetsiemieme muxa 'ukikɨ mɨrayukatuani mawariyari mayanikɨ, 'ana pɨreuyehɨwiyarieni ke'axamɨtiuyurikɨ.
LEV 5:17 »Xɨka xewitɨ 'atsikatimaitɨ 'axatiuyurieni Yawé 'aitsikaya kemɨkahainetsie, tsepa 'atsikatiuyurieme muyu'erie tiuka'eniwatɨ payani 'axamɨtiuyurikɨ.
LEV 5:18 Mɨkɨ muxa 'uki 'aixɨa mɨ'ane panuhana mawari wewiwame hetsɨa, mɨkɨ mɨrayukatuani mawariyari kemɨtika'inɨari kaniyetuamɨkɨ. Mɨpaɨ mawari wewiwame 'itiya pɨtiwewieni hetsiena mieme mɨkɨ 'axakemɨtiuyurikɨ 'atsikatimaitɨ, 'ana mɨkɨ pɨreuyehɨwiyarieni.
LEV 5:19 'Ikɨ mɨrayukatuani mawariyari kanihɨkɨtɨni, kemɨ'ane yurikɨ hetsiena mɨtiuhɨiya 'axamɨtiuyurikɨ Yawé hepaɨtsita».
LEV 6:1 Yawé Muitsexi mɨpaɨ katiniutahɨawe:
LEV 6:2 «Xɨka xewitɨ hetsie rahɨiyani 'axakatiniyurimɨkɨ Yawé hepaɨtsita, 'aixɨa katiɨ'ɨwiyaka kepauka hepaɨna tewi tixaɨtɨ tihɨritɨaku, yatɨni tinawatsirieni, yatɨni waɨriyarika tinawairieni tita mɨkɨ mɨtipiinieya,
LEV 6:3 yatɨni xɨka tixaɨtɨ retaxeiyame reuyehɨiyaku kename kaheixeiya 'utayɨni yakɨ'utaitɨ yɨhɨritɨani yamɨti'iyamatekɨ xeikɨa,
LEV 6:4 kemɨ'ane 'ikɨ mɨyapaɨmeme hepaɨtsita yuhepaɨ tewi mukwamanaxɨ mɨkɨ hetsiena pɨrahɨiyani. Mɨkɨ tewi piiniteya mɨtinawatsiri tihɨritɨaku katiniyetuiriemɨkɨ. Meta tita waɨriyarika mɨtinawairi, yatɨni tita reuyehɨiyaku mɨtiutaxei mɨka'itaxa, yatɨni tixaɨtɨ tiutaxeiyaka kename kaheixeiya 'utaitɨ,
LEV 6:5 yanutsu tsepa titakɨ yuhɨritɨatɨ tiu'itani. 'Ayumieme pɨtiyetuani heitseriemekɨ meta 'auxɨwimeyaritsie mieme xei'inɨariyari kaniyetuamɨkɨ tita mɨrexeiyani. Naime 'ikɨ kutsiyarieya katiniyetuiriemɨkɨ kepauka mɨrayukatuani mawariyari muwewienitsie.
LEV 6:6 Yawé panuhanirieni muxa 'uki 'aixɨa mɨ'ane, mɨrayukatuani mawariyari kemɨtika'inɨari kaniyetuamɨkɨ. 'Ana mawari wewiwame pɨyetuirieni,
LEV 6:7 mɨkɨ 'itiya mɨwewienikɨ Yawé hɨxie tewi hetsiemieme, tsepa titakɨ hetsiena mɨrahɨiwa pɨreuyehɨwiyarieni».
LEV 6:8 Yawé Muitsexi mɨpaɨ katiniutahɨawe
LEV 6:9 'Aruni meta niwemama mɨpaɨ mɨtiwatahɨawekɨ: «'Ikɨ 'inɨari niukiyari kanihɨkɨtɨni mawari taiyariyaritsie mieme: Mawari taiyariyari pɨtaka mawari taiyametsie tɨkarikɨ kepaukake mɨkataretsie.
LEV 6:10 Mawari wewiwame rinu kamixayari panakatɨni meta weruxiyari yukamixa hetɨa, hikɨ mawari taiyariyari naxiyari kanikuxeɨrimɨkɨ, mawari taiyame 'aurie pitiyeni.
LEV 6:11 Hɨkɨ kamixate mawari hetsiemieme mɨranakatɨkɨkai kananutihɨnaxɨamɨkɨ, hipameta kamixate ranakatɨme mematiteitsie naxi panuyetuni, hakewa maku'itiyarietsie penutuni.
LEV 6:12 Mawari taiyametsie tai yapɨtitaka mepɨka'ikutɨtsani. Mawari wewiwame matsi kɨyexi panutixɨrɨwani ximeri meta mawari taiyame heima mawari taiyariyari 'aixɨa pɨtiteni heimana 'aixɨa memɨteyuxeiyanikɨ mawariyari wiyayari mɨtataiyakɨ.
LEV 6:13 Tai mawari taiyametsie mieme hatsuaku tɨma pɨkahanukatɨtɨtseni, yuheyemekɨ yapɨtitaka.
LEV 6:14 »'Ikɨ 'inɨari niukiyari kanihɨkɨtɨni tɨriku mawariyaritsie mieme: 'Aruni niwemama Yawé hɨxie, mawari taiyametsie mekaniyetuiriekuni.
LEV 6:15 Mawari wewiwame xeimamayari 'imikieri mawariyari panatituni tɨriku mɨtixiyari 'aixɨa mɨ'ane hatseiti nɨkame, meta 'ɨkwa witsimu'ɨa hatsi mawariyari heima maka. Naime 'ikɨ mawari taiyametsie xekanititaiyakuni, mawari ma'eriwa 'imikieri witsimu'ɨa Yawé minake mayanikɨ.
LEV 6:16 'Aruni meta niwemama 'imikieri mawariyari manayuhayewa mekanitikwaikuni, hakewa mekupatsietsie tikuxanariyame kanɨkame, 'ixuriki tukiyari manuwe takwayaritsie pɨyɨweni memitikwanikɨ.
LEV 6:17 Tikuxanariyame kanɨtɨ puka'etsarɨwani, mɨkɨ kanihɨkɨtɨni mawari wewiwamete nemɨxeyetuirie nemawari xemɨnetsiwewirie taipa. 'Ikɨ pɨhɨkɨ waɨkawa mɨpatsie kepapaɨmetɨ wahetsɨa mumieme, mɨkɨ mɨ'itiyani meta mɨrayukatuani mawariyari pɨhɨkɨ.
LEV 6:18 Yunaitɨ 'Aruni niwemamata 'ukitsi mepɨyɨwaweni memitikwanikɨ. Mɨkɨ 'aitsika kanihɨkɨtɨni yuheyemekɨ xetɨɨriyama wahetsiemieme, mawari taipa kemɨti'atɨariwa Yawé hetsiemieme. Tsepa ketita piinitetsie mawari mɨreutawerixɨ mɨkɨ patsietɨ payani».
LEV 6:19 Yawé Muitsexi mɨpaɨ katiniutahɨawe:
LEV 6:20 «'Ikɨ kanihɨkɨtɨni 'Aruni meta niwemama Yawé hɨxie mawari memiyetuani kepauka mawari wewiwametekɨ memanayexeiyarienitsie. Huta kiruyari tɨriku mɨtɨxiyari 'aixɨa mɨ'ane wamawari pɨhɨkɨtɨni, ximeri hixɨata 'arɨkame taikaita hixɨata 'arɨkame.
LEV 6:21 Katsuweratsie pikawewiwani hatseitikɨ pɨnariekame, 'imikieri 'etsipepekame penu'ɨni Yawé hɨxie witsimu'ɨa minake mayanikɨ.
LEV 6:22 'Aruni nu'aya pikuha'aritɨwani kemɨ'ane mawari wewiwamekɨ manayexeiyarieni. 'Ikɨ 'aitsika yuheyemekɨ Yawé hetsɨa kanimiemetɨni: Mɨkɨ mawari naitɨ kanititaiyarɨwamɨkɨ.
LEV 6:23 Naitɨ tɨriku mawariyari mawari wewiwamete memiyetuani pɨkatikwaiwani, naitɨ pɨtitaiyarɨwani».
LEV 6:24 Yawé Muitsexi mɨpaɨ katiniuta'aitɨani
LEV 6:25 'Aruni meta niwemama mɨpaɨ mɨtiwatahɨawekɨ: «'Ikɨ 'inɨari niukiyari kanihɨkɨtɨni kemɨtiu'itiyani mawariyari hepaɨtsita: Tita mɨtimawarie Yawé hɨxie kaniwaxitekiemɨkɨ. Hakewa memewaxitewa mawari taiyariyari mayanikɨ. 'Ikɨ kanihɨkɨtɨni mawari yemekɨ waɨkawa mɨpatsie.
LEV 6:26 Mawari wewiwame kemɨ'ane 'itiya mawariyari mɨwewieni mɨkɨ kanitikwaimɨkɨ. Hakewa makupatsietsie, pɨyɨweni 'ixuriki tukiyari manuwe takwayaritsie mitikwanikɨ.
LEV 6:27 Tsepa kemɨtitita xɨka wai mawaritsiemieme heutawere patsietɨ payani. Xɨka xuriya 'ixurikieyatsie hawere kaneuyeweka makupatsietsie mita'ekwakɨ.
LEV 6:28 Yaxeikɨata, peuyewetse haxu xariyari mɨtatararienikɨ mɨkɨta mawari muka'etsariekɨ, mawari xɨka wurunitse xariyarita 'uka'etsarieni tepɨakɨ naime pɨwakukarauxieni meta hakɨ pɨwakuhauxini.
LEV 6:29 Yunaitɨ 'ukitsi mawari wewiwamete wahamatɨa mekaniyɨwaweni mawari memɨtikwanikɨ. 'Ikɨ kanihɨkɨtɨni mawari yemekɨ waɨkawa mɨpatsie.
LEV 6:30 Matsi 'itiya mawariyari mɨtikwayanikɨ pɨkayɨweni mɨkɨ xuriyaya tuki muyepatsieta me'ɨiwakɨ mɨxɨnarieni mawariyari muwewiyanikɨ, 'ayumieme mɨkɨ mawari taikɨ kanitixɨtsitɨariemɨkɨ.
LEV 7:1 »'Ikɨ 'inɨari niukiyari kanihɨkɨtɨni mɨrayukatuani mawariyari hepaɨtsita, mɨkɨ waɨkawa mɨpatsie kanihɨkɨtɨni:
LEV 7:2 'Ikɨ mawari Yawé hɨxie kaniwaxitekiemɨkɨ, hakewa memetikwikwiwatsie mawari taiyariyari mayanikɨ, meta xuriyaya mawari taiyame 'aurie pɨtiyeuriyani.
LEV 7:3 Hikɨ naitɨ wiyayari pɨxatɨarieni: kwaxieya, wiyaya kwinurieya mɨ'eimatɨka,
LEV 7:4 mumé muhuta meta wiyayari mi'eimatɨka, meta wiya katutsitɨana mieme, meta wiya nemaya heimana mɨkawere, mɨkɨ pɨrayehapanieni mumé muhuta yɨnɨkame.
LEV 7:5 Mawari wewiwame naime mɨkɨ mawari taiyametsie pɨtititaiya, mawari taipa warɨkarietɨ Yawé hetsɨa mɨyetuiwa kanihɨkɨtɨni. Mɨkɨ mɨrayukatuani mawariyari pɨhɨkɨ.
LEV 7:6 Yunaitɨ 'ukitsi mawari wewiwamete wahamatɨa mekaniyɨwaweni mawari memɨtikwanikɨ. Pɨyɨweni makupatsietsie memitikwanikɨ. 'Ikɨ kanihɨkɨtɨni mawari yemekɨ waɨkawa mɨpatsie.
LEV 7:7 »'Ikɨ 'inɨari niukiyari yaxeikɨa paine, mɨ'itiyani mawariyari hepaɨtsita meta mɨrayukatuani mawariyari hepaɨtsita: Muxa mawari wewiwame hetsie pɨmiemetɨni mɨxɨnarieni mawariyari muwewikɨ.
LEV 7:8 Yaxeikɨata nawiyarieya, mawari wewiwame hetsiemieme pɨhɨkɨtɨni mawari taiyariyari muwewikɨ.
LEV 7:9 Yaxeikɨa naitɨ hatsite mawariyari huxunuta xarikietɨkaitɨ yatɨni xarita, meta katsuweratsie, mɨkɨ mawari wewiwame kemɨ'ane miyetuani hetsiemieme pɨtihɨkɨtɨni.
LEV 7:10 Naitɨ tɨriku mawariyari, xarikiyari yatɨni hatseitikɨ mɨhawiyarie, 'Aruni niwemama wahetsiemieme payani, mepitikwani yunaitɨ yaxeikɨa papaɨmeme.
LEV 7:11 »'Ikɨ 'inɨari niukiyari kanihɨkɨtɨni 'aixɨa memɨteyuxeiya mawariyari Yawé mɨyetuiriyarɨwa:
LEV 7:12 Xɨka pamɨpariyutsi xemipitɨanikɨ hɨkɨtɨni, pɨyɨwenita paa tikuxanariyame kanɨtɨ hatseitikɨ xeikɨa hawiyariekame, yatɨni paa kɨxauyari tikuxanariyame kanɨtɨ hatseiti nɨkame xeikɨa, yatɨni paa tɨriku mɨtɨxiyari 'aixɨa mɨ'ane hatseitikɨ xeikɨa hawiyariekame.
LEV 7:13 'Aixɨa memɨteyuxeiyanikɨ mawariyari meta pamɨpariyutsi xemipitɨakɨ, pɨyɨweni meta paa tikuxanariyame nɨkame xemiyetuirienikɨ.
LEV 7:14 Xexuitɨ mawaritetsie mieme yapapaɨmetɨ Yawé 'imikierieya 'aixɨa mɨ'ane pɨrayani mɨkɨ mawari teikɨ petserarieni 'uyuitɨariwatɨ. Mɨkɨ mawari wewiwame hetsiemieme pɨrayani kemɨ'ane xuriya mɨtayeurieni 'aixɨa memɨteyuxeiyanikɨ mawariyari hetsiemieme.
LEV 7:15 'Ikɨ wai mawariyari pɨyɨweni mɨtikwaiyanikɨ xeikɨa kepauka mɨyetuiyani tukariyaritsie, xepɨka'ikuhayeikawani 'uxa'arieka mieme mayanikɨ.
LEV 7:16 »Xɨka mawari kepemutayɨ mawariyari hɨkɨtɨni, yatɨni kepemɨti'awaɨriya mawariyaritɨni, mɨkɨ wai mawariyari pɨtikwaiyani mɨkɨ tukaritsie, mexɨka yuhayewa pɨyɨweni 'uxa'arieka mitikwanikɨ.
LEV 7:17 Peru naitɨ wai muyuhayewa hairieka tukaritsie mieme taipa kanititaiyariemɨkɨ.
LEV 7:18 »Xɨka xewitɨ wai 'utikwani 'aixɨa memɨteyuxeiyanikɨ mawariyaritsie mieme hairieka tukariyaritsie 'aye'ayu, mɨkɨri mawari pɨkatanaki'eriwa meta tixaɨtɨ katiyunaki'erietɨ payani, karikɨ wai kanipɨniniri. Kemɨ'ane mitikwani tiuka'eniwatɨ payani.
LEV 7:19 »Xɨka wai mawariyari tixaɨtɨ mɨkati'itiyatsie rautawere pɨkatikwaiyani, matsi pɨta taipa kanitataiyariemɨkɨ. Matsita xewitɨ wai mɨ'itiya, yunaitɨ teɨteri memɨ'itiyatɨka mepɨyɨwaweni memitikwani.
LEV 7:20 »Xɨka xewitɨ tewi ka'itiyatɨ 'aixɨa memɨteyuxeiya mawariyari waiyarieya 'utikwani Yawé hetsiemieme mɨyetuiya, mɨkɨ yuteɨterima watsata payeweiyarieni.
LEV 7:21 »Xɨka xewitɨ tewi ka'itiyakame 'umayɨani yatɨni yeuta mɨtiuyeika yatɨni tixaɨtɨ timɨkime yatɨni tixɨatɨ mɨtixani'eriwa, xɨka wai 'aixɨa memɨteyuxeiyanikɨ mawariyari Yawé muxatɨarie 'utikuani, mɨkɨ yuteɨterima watsata payeweiyarieni».
LEV 7:22 Yawé Muitsexi mɨpaɨ katiniuta'aitɨani
LEV 7:23 'ixaheritsixi mɨpaɨ mɨtiwatahɨawekɨ: «Xeme tuuru, muxa meta tsipu wawiyayari xepɨkakwa'ani.
LEV 7:24 Yeuta memɨte'u'uwa wawiyayari mɨkime yatɨni 'ɨrawe 'itexierieya, tixaɨtɨtsie timiemekɨ mɨrayani pɨyɨweni, peru xemitikwanikɨ pɨkayɨweni.
LEV 7:25 Kemɨ'ane tewaxi Yawé hetsɨa memɨyetuiya mawari taipa warɨkariyari wawiyayari mɨtikwani, mɨkɨ payeweiyarieni yuteɨterima watsata.
LEV 7:26 Tsepa xeme hakewa xemetiteni, tsepa wikixi meta tewaxi wawiyayari meta waxuriya xepɨkahekwa'ani.
LEV 7:27 Kemɨ'ane tsepa tita xuriyaya mɨtitikwani, mɨkɨ payeweiyarieni yuteɨterima watsata».
LEV 7:28 Yawé Muitsexi mɨpaɨ katiniuta'aitɨani
LEV 7:29 'ixaheritsixi mɨpaɨ mɨtiwatahɨawekɨ: «Kemɨ'ane Yawé 'aixɨa memɨteyuxeiyanikɨ mawariyari mɨwewirieni, mɨkɨ yapaɨmeme kaniyetuamɨkɨ Yawé hɨxie mawari hetsiena mieme mayanikɨ,
LEV 7:30 meta mawari taipa warɨkariekame xepɨyetuani. Taimɨxieya meta wiyayari yɨkɨmana piyetuirieni mawari 'imikieri taipa waɨrɨkariyari teikɨ kanetseramɨkɨ 'iyuitɨwatɨ Yawé hetsiemieme mayanikɨ.
LEV 7:31 Mawari wewiwame mawari taiyametsie wiya pɨtataiya, peru taimɨxieya 'Aruni meta niwemama wahetsiemieme payani.
LEV 7:32 Kepauka 'aixɨa memɨteyuxeiyanikɨ mawariyari xemɨwewieka, teuri tserietana mieme mawari wewiwame xepɨyetuirieni, mɨkɨ mawari 'imikieri teikɨ metserarɨwa kanihɨkɨtɨni.
LEV 7:33 Mɨkɨ teuri tserietana mieme mawari wewiwame hetsɨa pɨmieme kemɨ'ane xuriya meta wiya mawariyari muwewieni.
LEV 7:34 Mɨkɨ 'aixɨa memɨteyuxeiyanikɨ mawariyari 'ixaheritsixi memɨnetsixatɨa, ne taimɨxi meta teuri neputanaki'eri nemuxatɨarie, 'Aruni meta niwemama nemɨwayetuirienikɨ, mawari wewiwamete ne'imikieri 'aixɨa mɨ'ane mayanikɨ. 'Ikɨ kanihɨkɨtɨni 'aitsika yuheyemekɨ 'aixɨa mɨ'ane, 'Ixaheritsixi wahetsiemieme».
LEV 7:35 Yawé muxatɨarie 'imikieri taipa warɨkarietɨ mɨyetuiwa, mɨkɨ 'imikieriyari mɨpatsie 'Aruni meta niwemama wahetsiemieme pɨhɨkɨ, kepauka memitsutɨa Muitsexi mɨwayetua Yawé hetsɨa, mawari wewiwamete memakɨnekɨ.
LEV 7:36 Kepauka memanayexeiyarie, Yawé 'ixaheritsixi mɨpaɨ pɨtiwarɨhɨritɨa memɨwayetuiriwanikɨ yuheyemekɨ tita wahetsie mɨtinakenikekai. 'Ikɨ kanihɨkɨtɨni 'aitsika 'aixɨa mɨ'ane yuheyemekɨ xenuiwari wahetsiemieme.
LEV 7:37 'Ikɨ naitɨ 'aitsikate kanihɨkɨtɨni mawari taiyariyari hetsiemieme, tɨriku mawariyari, mɨ'itiyani mawariyari, meta mɨrayukatuani mawariyari, meta kememɨte'anayexeiyarie mawariyari, meta 'aixɨa memɨteyuxeiyanikɨ mawariyari.
LEV 7:38 Yawé Muitsexi Tsinahi yemuriyaritsie katiniyetuirieni, kepauka 'ixaheritsixi mɨtiwaruta'aitɨa mawari memixatɨanikɨ makumawetsie.
LEV 8:1 Hikɨ Yawé Muitsexi mɨpaɨ katiniutahɨawe:
LEV 8:2 «'Aruni meta niwemama keniwaranuwitɨki, meta wakemarite meta hatseiti mɨtiyupata memɨkawiriyarieni, meta tsikeru 'itiya mawariyari mayanikɨ, yuhutame muxatsi 'ukitsi meta tsikɨiwiti paa mɨkakuxanariyarietɨka mayemane,
LEV 8:3 yunaime keniwarukuxeɨri kiekatari 'ixuriki tukiyari manuwe kitenieyaritsie».
LEV 8:4 Muitsexi yakatinikayani Yawé kemɨtita'aitɨa, kaniwarukuxeɨrieni yunaime kiekatari 'ixuriki tukiyari manuwe kitenieyaritsie.
LEV 8:5 Muitsexi mana 'ipaɨ katiniwarutahɨawe: «'Ikɨ kanihɨkɨtɨni Yawé kemɨtati'aitɨa yatemɨteyurienikɨ».
LEV 8:6 Hikɨ Muitsexi 'Aruni meta niwemama warutakwewieka 'ahurawa hakɨ puwarukahauxi.
LEV 8:7 'Ana 'Aruni kamixa tixukame panakatɨtɨa, hɨiyamekɨ kanenakɨhɨani meta kanenaku'eima herie kamixa 'amɨtewikɨ, yaxeikɨa kamixa 'etsimɨnena wiwieriyaritekɨ 'axɨa katinihɨaxɨani.
LEV 8:8 Kwitɨta kuka tawitsie mieme kanekatɨtɨani, taɨtana tetexi 'urimi meta tumimi kaneukayatsa.
LEV 8:9 'Imatɨrieka 'ixuriki xupureruyari mu'uyatsie kanenutiketsirieni, hɨxiena huru tepɨayari kanenuyeketsirieni 'inɨari mɨhɨkɨtɨnikɨ kename patsie Yawé hetsiemieme, Yawé Muitsexi kemɨtiuta'aitɨa.
LEV 8:10 Hikɨ Muitsexi hatseiti mɨtiyupata watihanaka, tuki kaniutawirieni meta tinaime muwa mɨrayepikai tipatsietɨ mɨrayanikɨ kakaɨyaritsie mieme.
LEV 8:11 Mawari taiyametsie 'atahutamexɨa hatseitikɨ katiniɨ'ɨyaxɨani mɨtipatsiekakɨ, mɨkɨ haa mayema mawari taiyametsie meta kɨmana mɨwetɨka meta naime wapaitɨ mɨratipine.
LEV 8:12 Hikɨ Muitsexi 'Aruni mu'uyatsie kaniukawirieni hatseiti mɨtiyupata manayexeiyarietsie mieme, kɨmana mɨpatsiekakɨ.
LEV 8:13 Kuitɨwata Muitsexi 'Aruni niwemama 'ahurawa kaniwarutakwewieni, kamixa 'amɨtɨtɨkɨ, 'ana kaniwarutikemaritɨani wahɨiyamekɨ kaniwaranahɨaxɨani, meta mukuretsi kaniwarana'uitɨirieni mawari wewiwamete memɨhɨritɨarie memakɨnekɨ. Yaxeikɨa Yawé kemɨtita'aitɨakai.
LEV 8:14 Hikɨ Muitsexi katiniuta'aita tsikeru mɨ'atɨarienikɨ 'itiya mawariyari mayanikɨ, 'Aruni meta niwemama yumamakɨ tsikeru mu'uyatsie mekaniutimeni.
LEV 8:15 Hikɨ Muitsexi tsikeru kanewaxiteni, 'etsiwa xuriyatsie yu'itɨwame kakeka, mawari taiyame 'awateyatsie naitsata kanawiriexɨani mɨ'itiyanikɨ Kakaɨyaritsie mieme. Xuriya muyuhayewaxɨta mawari taiyame hetɨa putiyeuri, mɨpaɨ patsiekame pɨrayeitɨa hetsiena mieme meta memɨxɨnarienikɨ mawariyari.
LEV 8:16 Hikɨ Muitsexi naime wiya kwinuri mɨ'eimatɨka kaneukuxiteni, wiya nemaya heimana mɨkawere meta mumé muhuta mɨ'eima mɨkɨ naime 'ukuxeɨrieka mawari taiyametsie kanititaiya.
LEV 8:17 Mɨkɨ naitɨ tsikerutsie mɨtiuyuhayewaxɨ nawiyari, waiyari meta kwitaya, Muitsexi taipa kanititaiya yateewa memakuteitsie, Yawé kemɨtita'aitɨakai.
LEV 8:18 Muitsexi pɨtiuta'ai muxa 'uki mɨ'atɨarienikɨ mawari taiyariyari mayanikɨ, hikɨ 'Aruni meta niwemama muxa 'uki mu'uyatsie mekaniutimeni.
LEV 8:19 'Ana Muitsexi kanewaxiteni, xuriya mawari taiyame 'aurie kaniutayeurieni.
LEV 8:20 Hikɨ muxa 'uki kaniwayexitexɨani, yaxeikɨata mu'uya meta wiyayari meta 'etsipepeme mɨtiutixitekai naime katiniutitaiya.
LEV 8:21 Kwinurieyata hakɨ kaniutihauxini meta 'ɨkateya, hikɨta mawari taiyametsie muxa 'uki naime kaniutataiya mawari taiyariyari mayanikɨ Yawé minake witsimu'ɨa, mawari taipa warɨkariekame Yawé hetsɨa mɨyetuiwa kanihɨkɨtɨni. 'Ikɨ 'imikieri taiyariyari, Yawé Muitsexi kemɨtiuta'aitɨakai.
LEV 8:22 'Ariketa Muitsexi tawari xeime muxa 'uki memɨ'atɨanikɨ katiniuta'aita, 'ikɨ kememɨte'anayexeiyarie mawariyari mayanikɨ, hikɨ 'Aruni meta niwemama muxa 'uki mu'uyatsie mekaniutimeni.
LEV 8:23 Hikɨ Muitsexi kaniwaxiteni 'etsiwa xuriya 'anati'ɨka 'Aruni nakaya heima tserietana mieme 'etsiwa kaniuwirieni meta 'itɨwameya 'amɨpayaritsie tserietana mieme meta 'ɨkayatsie mieme 'amɨpayari tserietana mieme.
LEV 8:24 Yaxeikɨata 'Aruni meta niwemama 'ahurawa memakɨnekɨ kaniwaruta'inieni. 'Anari wanaka heima kaniwarutixurimani watserieta meta wa'itɨwame 'amɨpayayaritsie watserieta mieme meta wa'ɨkatetsie 'amupapayari watserieta miemeyaritsie, hikɨ xuriya muyuhayewaxɨ mawari taiyame 'aurie kaniutayeurieni naitsata.
LEV 8:25 Wiya meta kwaxieya naitɨ mana mɨrayepikai kwinurite mɨti'eimatɨka, meta wiya nemaya heimana mɨkawere, meta mumé muhuta wiyayari yunɨtɨ meta teuri tserietana mieme.
LEV 8:26 Tsikɨiwiti Yawé hɨxie mamakaitsie paa tikuxanariyame mɨkanɨtɨka mayemane xeime mɨkakuxanariyarie hanati'ɨka, meta mɨkɨxauni meta xeime paa tsuirayari hatseitikɨ xeikɨa mɨhawiyarie, mɨkɨ naime wiya heima katinapini meta teuri tserietana mieme.
LEV 8:27 'Ikɨ tinaime Muitsexi 'Aruni meta niwemama katiniwayetuirieni, hikɨ 'Aruni mawari Yawé kaniuxatɨani hɨxiena teikɨ heititserietɨ 'iyuitɨwatɨ 'imikieri mawariyari minake.
LEV 8:28 'Ariketa Muitsexi kaniyetuiriyarieni, mɨkɨ mawari taiyametsie kanititaiya, mawari taiyariyari yɨnɨkame, kememɨte'anayexeiyarie mawariyari witsimu'ɨa mayanikɨ, meta 'imikieri taipa warɨkariekame Yawé mɨyetuiriyarie.
LEV 8:29 Hikɨ mɨkɨ mawari yapaɨmeme wahetsie mumieme, taimɨxieya 'anukutuka Muitsexi Yawé hɨxie kaneititsera 'iyuitɨwatɨ, Yawé Muitsexi kemɨtita'aitɨakai.
LEV 8:30 Hikɨ Muitsexi hatseiti mɨtiyupata memɨwakawiriwa 'etsiwa 'anahanɨka meta xuriya mawari taiyametsie mieme, 'Aruni meta niwemama kaniwaru'ɨyaxɨani meta wakemarite. Muitsexi mɨpaɨ metepatsiekame 'Aruni meta niwemama pɨwarayeitɨa metatsiere wakemarite.
LEV 8:31 Hikɨ 'Aruni meta niwemama Muitsexi mɨpaɨ katiniwarutahɨawe: «Xemayutixexeɨriwa Kakaɨyari hamatɨa 'ixuriki kiyari manuwe xemeutahaketsie, mana wai xekeneuka'etsa meta xekeneukwa'i paa kememɨte'anayexeiyarie mawariyari nɨkame, mɨpaɨ kenemɨtixe'uta'aitɨa kepauka 'ipaɨ nemutayɨtsie: “'Aruni meta niwemama mepitikwani”.
LEV 8:32 Naitɨ wai meta paa mɨtiuyuhayewaxɨ xepɨtitaiya.
LEV 8:33 'Ixuriki tukiyari kitenie xemayutixexeɨriwa mɨranutahakitɨretsie, mana 'atahuta tukari xekenekuteni, kepaukake xemanayexeiyarie maye'ani, 'atahuta tukari katineuterimɨkɨ.
LEV 8:34 Yawé katiniuta'aita mɨxɨnarieni mawariyari muwewiyanikɨ xehetsiemieme, yaxeikɨa hikɨ hepaɨ.
LEV 8:35 Merikɨte 'ixuriki tukiyari mɨranutahakitɨretsie mana xekanikutekuni 'atahuta tukari meta tɨkarikɨ, Yawé kemɨxetiuta'aitɨa xemeye'atɨakakɨ, xemɨkakukukuwenikɨ. Yawé mɨpaɨ kanetiniuta'aitɨani».
LEV 8:36 Hikɨ Yawé Muitsexi kemɨtiuta'aitɨa, 'Aruni meta niwemama yamekatenikakɨne naimetsie.
LEV 9:1 Merikɨte 'atahairieka tukaritsie, Muitsexi 'Aruni kaniutahɨawe meta niwemama, metatsiere 'ukirawetsixi 'ixaheritsixi wa'ukiyarima.
LEV 9:2 Hikɨ 'Aruni mɨpaɨ katiniutahɨawe: «Tsikeru xeime kene'atɨa mɨ'itiyani mawariyari mayanikɨ, meta xeime muxa 'uki mawari taiyariyari mayanikɨ, mɨkɨ 'aixɨa mepɨ'aneneni Yawé pekanixatɨamɨkɨ.
LEV 9:3 Kwitɨwata 'ixaheritsixi mɨpaɨ ketiniwarutahɨawi: “Xekene'atɨa xeime tsipu 'ukitɨme 'itiya mawariyari mayanikɨ, xeimeta tsikeru meta muxa mawari taiyariyari mayanikɨ, 'aixɨa me'anenekame xeiwiyari mehɨtɨkaime.
LEV 9:4 Yaxeikɨatatsiere tuuru xeime xekene'atɨa xeimeta muxa 'uki Yawé temɨtimawirienikɨ 'aixɨa memɨteyuxeiyani mawariyari mayanikɨ, meta tɨriku mawariyari hatseitikɨ hawiyariekame. Yawé hikɨ kaniyuhekɨatamɨkɨ xehɨxie”».
LEV 9:5 Hikɨ 'ixaheritsixi mekatenetɨni 'ixuriki tukiyari manuwetsie paitɨ Muitsexi kemɨtiwaruta'aitɨakai, yunaitɨ mana kiekatari mekaniu'axɨani Yawé hɨxie mekaniti'uni.
LEV 9:6 Muitsexi mɨpaɨ katiniwarutahɨawe: «'Ikɨ kanihɨkɨtɨni ti'aitame mɨtixe'aitɨa yaxemɨteyuriekakɨ, Yawé witsi'anetɨ kemɨtimatsiɨkɨni xehɨxie».
LEV 9:7 Hikɨta Muitsexi 'Aruni mɨpaɨ katiniutahɨawe: «Mawari taiyametsie 'ahurawa keneuye'a, 'itiya mawariyari meta mawari taiyariyari keneuwewi 'ahetsiemieme. Meta mɨxɨnarieni mawariyarita keneuwewi 'ahetsiemieme meta teɨteri wahetsiemieme. Mawari keneuxatɨa teɨteri wahetsiemieme meta mɨxɨnarieni keneuwewi wahetsiemieme, Yawé kemɨtiuta'aitaxɨ».
LEV 9:8 Hikɨ 'Aruni mawari taiyametsie 'ahurawa 'uyaka, tsikeru kaniwaxiteni 'itiya mawariyari hetsiena mieme mayanikɨ.
LEV 9:9 'Aruni niwemamata xuriya mekanei'ɨirieni, mɨkɨ yu'itɨwame xuriya 'utawirieka mawari taiyame 'awateyatsie kaniuwiriexɨani, meta xuriya kaniutiyeurieni mawari taiyame hetɨa.
LEV 9:10 Hikɨ wiyayari mawari taiyametsie kaniutitaiya, muhuta mumé meta wiya nemaya heimana mɨkawere mɨtimawarietsie mieme, mɨpaɨ Yawé Muitsexi mɨtiu'aitɨakaikɨ.
LEV 9:11 Nawiyari meta waiyarieya memakuteitsie yateewa paitɨ kaniutitaiya.
LEV 9:12 'Ariketa 'Aruni mawari taiyariyari mayani kaniwaxiteni. Niwemama xuriya makanei'ɨirieni, mɨkɨ kanitayeurieni mawari taiyame waritana naitsarie.
LEV 9:13 Yaxeikɨata tuurutsie mɨtiwayexitekiexɨa meta mu'uya yunɨkame mekateneitituirieni, 'ana mɨkɨ mawari taiyametsie katiniutitaiya.
LEV 9:14 Kwinurite meta 'ɨkate kaniutihauxini, hikɨ naime mawari taiyametsie katiniutitaiya mawari taiyariyari yɨnɨkame.
LEV 9:15 Hikɨ 'Aruni teɨteri wahetsiemieme mawari kaniyetuani, tatsɨari tsipu 'ukitɨme 'itiya mawariyari mayanikɨ. 'Iwiyaka kaniwaxiteni 'itiya mawariyari kanixatɨani, matɨari miemetsie hepaɨ.
LEV 9:16 Hɨkɨ mɨkɨ tita mawari taiyariyari mɨrayanikekai kanixatɨani, kememɨte'u'aitɨariekai mɨpaɨ pɨtiuyuri.
LEV 9:17 Yaxeikɨata tɨriku mawariyari kanixatɨani, meta xeimamayari 'anatituka mawari taiyametsie kanititaiya, yaxeikɨata mawari taiyariyari ximeri mieme yɨnɨkame.
LEV 9:18 'Ariketa tuuru kaniwaxiteni meta muxa 'uki 'aixɨa memɨteyuxeiyani mawariyari teɨteri yunaime wahetsiemieme mayanikɨ. 'Aruni niwemama xuriya mepei'ɨiri, mɨkɨ mawari taiyame 'aurie pitayeuri naitsarie.
LEV 9:19 Hikɨ tuuru wiyayari 'utituka meta muxa 'uki, tatsɨari, kwaxieya meta wiyayari kwinuriteya mɨ'eimatɨka, meta mumé muhuta yaxeikɨa wiya nemaya heimana mɨkawere,
LEV 9:20 mɨkɨ tinaime watawitsie katinapixɨamɨkɨ, mawari taiyametsieketa mɨtititaiyakɨ.
LEV 9:21 'Aruni Yawé tawi meta teuri tserieta miemete tita memɨtemawarietsie timieme kanixatɨani hɨxiena kaneititsera 'iyuitɨwatɨ. Mawari teikɨ hetserarietɨ 'uyuitɨariwatɨ patɨa, Muitsexi kehepaɨ mɨtiuta'aitakai.
LEV 9:22 Hikɨ 'Aruni teɨteri wahepa teikɨ yumamate kanetseraxɨani, 'ana teɨteri 'aixɨa kaniwaruyurieni. Hikɨ kepauka mɨtiutahayewaxɨ 'itiya mawariyari wewietɨ, meta mawari taiyariyari, meta 'aixɨa memɨteyuxeiyanikɨ mawariyari 'uwewieka, mawari taiyametsie kanewakayani.
LEV 9:23 Muitsexi meta 'Aruni 'ixuriki tukiyarita mekaneutahaxɨani. Kepauka memuwayekɨtsie teɨteri 'aixɨa mekaniwaruyurieni, 'ana Yawé witsikemɨ'ane matsiɨkɨtɨ kanayuyeitɨani yunaime teɨteri wahɨxie.
LEV 9:24 Hikɨ Yawé hetsɨa tai kanakaneni, 'ana mɨkɨ naime mawari taiyariyari meta wiyayari mawari taiyame heima mɨrapikai kaniutixɨtsitɨani. Mɨpaɨ mete'uneniereka, yunaitɨ teɨteri mekaniutihiwa meyutemamawietɨ, meta kwiepa mekaniukahɨxima'uni.
LEV 10:1 Hikɨ Narawi meta 'Awihu 'Aruni niwemama, yuxexuitɨ yupɨtsiwiwame me'utihapaxɨaka, me'akanaixɨaka 'ɨkwa witsimu'ɨa me'akawiwiexɨaka, Yawé mekaniuxatɨani, matsi mɨkɨ tai kaheuyewekakaku mepixatɨa, mɨkɨ mɨkawaruta'aitɨakaikɨ.
LEV 10:2 Hikɨ Yawé hetsɨa tai kanayeneni kaniwarutixɨtsitɨani, hɨxiena mekaniukwini.
LEV 10:3 Muitsexi 'Aruni mɨpaɨ katiniutahɨawe: «'Ikɨ hepaɨtsita painekai Yawé kepauka mɨpaɨ mutayɨ: »“Kemɨ'ane nehetsɨa 'ahurawa memakɨka wahetsɨa, kenemɨtipatsiekɨ nematsiɨkɨme nepaneyeitɨaka, Meta yunaime teɨterima wahɨxie witsikenemɨ'anekɨ nepɨnehekɨata”». 'Ana 'Aruni kayuwatɨ pɨtiuke.
LEV 10:4 Muitsexi Mitsaheri meta 'Eritsapani katiniwarutanɨ'airieni memɨwitɨkieyukɨ, 'Utsiheri niwemama 'Aruni tatatsieya, mɨpaɨ katiniwarutahɨawe: «Xekenakɨni 'ena 'ahurawa meta yu'iwama tukita xekeniwaranuye'ɨi. Tematiteitsie 'ateewa paitɨ xekeniwatuayu».
LEV 10:5 Mɨkɨ 'ahurawa me'ɨkɨneka, wakamixatetsie metiwɨtɨkaitɨ memakutekaitsie 'ateewa mekaniwaranuye'ɨni, Muitsexi kemɨtiwaruta'aitɨakai.
LEV 10:6 Hikɨ Muitsexi 'Aruni meta niwemama 'Eriyatsaxi meta 'Itamaxi mɨpaɨ katiniwarutahɨawe: «Xeme xekamu'utsikietɨkaitɨ xepɨka'u'uwani meta yukamixa xepɨkaheukatsanani. Mɨpaɨ xeme xepɨkakwini meta Yawé pɨkayeha'ani teɨteri yunaime wahetsiemieme. Xe'iwama 'ixaheritsixi hiwerika mekaniwewikuni Yawé tai mutaiyaxɨkɨ.
LEV 10:7 Xemeri 'ixuriki tukiyarita xepɨkawayekɨkani kapa xe'ukwinikɨ, xemanayexeiyarie Yawé hatseiti mɨtiyupata mɨxe'ukawiri xehetsie mɨtiunakixɨkɨ peuyewetse xemeye'atɨanikɨ kexemɨte'u'aitɨarie». Muitsexi kemɨtiwarutahɨawixɨ mɨpaɨ mekateniuyurieni.
LEV 10:8 Yawé 'Aruni mɨpaɨ katiniutahɨawe:
LEV 10:9 «'Ekɨ meta 'aniwema kaxie winuyari xepɨka'ieka 'ixuriki tukiyarita kepauka xemautahaxɨani kapa xe'ukwinikɨ. 'Ikɨ 'aitsika yuheyemekɨ kanihɨkɨtɨkamɨkɨ xexiɨyarima wahetsie mieme yamemɨtekahunikɨ.
LEV 10:10 Memɨyɨwawenikɨta yamemɨtemaikakɨ ketita mɨtipatsie meta mɨkatipatsie, yaxeikɨa ketita mɨti'itiya meta mɨkati'itiya.
LEV 10:11 Xepɨyɨwawenita 'ixaheritsixi xemɨtewata'ɨkitɨanikɨ naime 'aitsika Yawé mɨxeyetuirikɨ xemimaikakɨ Muitsexi ya'utainekaku».
LEV 10:12 Muitsexi 'Aruni mɨpaɨ katiniutahɨawe meta niwemama 'Eriyatsaxi meta 'Itamaxi mɨkɨ niwemama memuyuhayewatɨwekai: «Tɨriku mawariyari muyuhayewaxɨ Yawé 'imikierieya xekeneukutɨkɨka xekeneutikwa'i tikuxanariyame kanɨitɨariekame, mawari taiyame 'aurie, mɨkɨ yemekɨ kanipatsieka Yawé hetsiemieme.
LEV 10:13 Xekeneutikwa'i hakewa makupatsietsie, mɨpaɨ nemɨti'aitɨariekɨ. Mɨkɨ 'aitsika kanihɨkɨtɨni 'ahetsiemieme meta 'aniwema, mɨkɨ mawari taipa warɨkarietɨ yapaɨmeme Yawé muxatɨarie mɨhɨkɨkɨ.
LEV 10:14 »'Ekɨ meta 'aniwema 'ukitsi meta 'ukari xepɨyɨwaweta xemitikwanikɨ hakewa maku'itiyarietsie, taimɨxi tatsɨari mawari teiki hetserarietɨ 'uyuitɨariwatɨ mɨyetuiya meta teuri mɨkɨ mawari pɨhɨkɨ 'ahetsiemieme 'imikieri 'aixɨa mɨ'ane mayanikɨ, mɨkɨ tihutatɨ 'aixɨa memɨteyuxeiyanikɨ mawariyari kanihɨkɨtɨni 'ixaheritsixi wahetsiemieme, 'ekɨ meta 'aniwema xekaniyetuiriyarieni 'aitsika mɨhɨkɨtɨnikɨ.
LEV 10:15 Mɨkɨ teuri meta taimɨxi pɨxatɨarieni wiya yunɨkame, Yawé memɨyetuirieni teikɨ hetserarietɨ 'uyuitɨariwatɨ mawariyari mɨhɨkɨkɨ. 'Ikɨ 'aitsika pɨhɨkɨtɨni yuheyemekɨ 'ahetsiemieme meta 'aniwema, Yawé kemɨtiu'aitakai hepaɨ».
LEV 10:16 Hikɨ Muitsexi tsipu kaniuta'iwauni 'itiya mawariyari hepaɨtsita mutimawarie, matsi mɨkɨri taipa putataiyariekai. Kepauka yamɨretima kename mawari taiyametsie 'utataiyariekai, mɨkɨ 'Eriyatsaxi meta 'Itamaxi wahepaɨtsita kaniuyeha'ani, 'Aruni niwemama memɨyuhayewatɨwekai, 'ipaɨ katiniwaruta'iwawiya:
LEV 10:17 —¿Ketitayari tuki muyepatsieta xekate'itikwai 'itiya mawariyari? Mɨkɨ waɨkawa mɨpatsie kanihɨkɨtɨni, mɨkɨ mawari Yawé hɨxie xekaniyetuiriyarieni xemɨxɨnarieni mawariyari mayanikɨ yunaitɨ xehetsie mɨrahɨiwakɨ.
LEV 10:18 Tsipu xuriyaya xɨka xekahei'ɨni hakewa makupatsietsie, 'ayumieme peuyewekai xeme muxa waiyarieya xemɨtakwanikɨ tuki muyepatsieta ne kenemɨtixe'u'aitɨa.
LEV 10:19 Hikɨ 'Aruni Muitsexi mɨpaɨ katiniuta'eiya: —Neniwema hikɨ mepixatɨa 'itiya mawariyari meta yumawari taiyariyari Yawé hɨxie. Tsepa yumawari memɨyetua, matsi 'ikɨ mɨyamɨtiuyɨkɨ pɨnetiuka'enitsitɨa. Xɨari 'aixɨa pɨka'anenikeyu Yawé hetsiemieme xɨka ne mɨkɨ 'itiyari mawaritsie timieme netiutikwanike.
LEV 10:20 Hikɨ Muitsexi 'u'enaka 'Aruni kemutayɨ 'iyarieya 'aixɨa kaniuyɨni.
LEV 11:1 Yawé Muitsexi meta 'Aruni mɨpaɨ katiniwaruta'aitɨani
LEV 11:2 'ixaheritsixi mɨpaɨ memɨtewataxatɨanikɨ: «Yunaime yeutari kwiepa memɨtexɨawe, 'ikɨ mekanihɨkɨtɨni xepɨyɨwaweni xemɨwakwa'anikɨ:
LEV 11:3 Wakarutsa manutahuhuta meta hutarieka memɨte'iyawa.
LEV 11:4 Matsita mekanixɨaweni hipatɨ mete'iyawatɨ wakarutsa ka'anutahuhutatɨ. Xemɨkawakwa'ani 'ikɨ mepɨhɨkɨ: »Kameyu pɨti'iyawa matsi karutsaya pɨka'anutahuhuta, mɨkɨ pɨka'itiya xehetsiemieme.
LEV 11:5 »Tatsiu pɨti'iyawa matsi karutsaya pɨka'anutahuta, mɨkɨta pɨka'itiya xehetsiemieme.
LEV 11:6 »Yaxeikɨata tatsiu hepaɨ mɨ'ane mɨkɨta pɨti'iyawa matsi karutsaya pɨkahanutahuhuta, mɨkɨ xepɨkakwa'ani mɨka'itiyakɨ xehetsiemieme.
LEV 11:7 »Tuixu meta karutsaya panutahuhuta matsi pɨkati'iyawa, mɨkɨ pɨka'itiya xehetsiemieme.
LEV 11:8 »Waiyarieya xepɨkakwa'ani meta mekwikwi'ime xepɨkawakumaɨwani. Mɨkɨ xehetsiemieme mepɨka'itiya.
LEV 11:9 »Hapa memɨteye'uwa, haramaratetsie meta muyehapanetsie 'ikɨ mekanihɨkɨtɨni xeikɨa xeme xemɨwakwa'ani: Memeukakararayatɨka yuhauweme memexeiya naitsata.
LEV 11:10 Yuhauweme meta yukararayari memɨkahexeiya, tsepa haramaratsie meta hatuxametsie memɨye'uwa, mɨkɨ xeme xepɨwaxani'erieka.
LEV 11:11 Waiyarieya xepɨkakwa'ani mɨkime xepɨxani'erieka, mɨkɨ pɨka'itiya xehetsiemieme.
LEV 11:12 Yunaitɨ hapa memɨteye'uwa yuhauweme memɨkahexeiya meta memɨkaheukararayatɨka mɨkɨ xepɨwaxani'erieka meta mepɨka'itiya xehetsiemieme.
LEV 11:13 »'Ikɨ mekanihɨkɨtɨni memɨte'awɨwawe xeme xemɨwaxani'erieka meta xemɨkawakwa'ani: Werika, 'umete mumura, kwixɨ meta maraika,
LEV 11:14 yunaitɨ hukurixi meta wahepaɨ memɨ'anene hipatɨ,
LEV 11:15 meta yunaime kwatsari xepɨkawakwa'ani,
LEV 11:16 meta 'aru 'amɨnena, nɨpe, meta yunaitɨ yɨkɨ memɨ'anene paturi wahepaɨ memɨ'anene,
LEV 11:17 mikɨri, kwaxu meutsinaɨye, patu,
LEV 11:18 tɨkaipu, patu hepaɨ mɨ'ane 'amanuyepa, wirɨkɨ.
LEV 11:19 Kwaxu 'amɨnena, meta yunaitɨ yɨkɨ memɨ'anene kwaxuri, tsurakai meta 'atsixi.
LEV 11:20 »Yunaitɨ memɨte'awɨwawe menauka 'ɨkatɨkaitɨ mɨkɨ xepɨwamaika memɨka'itiyakɨ,
LEV 11:21 Hipatɨta memuxɨawe naukamekɨ meheu'uwatɨ meta me'awɨwawetɨ, mɨkɨ xemɨwatikwani xepɨyɨwawe, mɨkɨta wakarutsa peukakukuni meta mepɨyɨwawe memɨtitsunaxɨani,
LEV 11:22 meta yunaitɨ 'utsikari wahepaɨ memɨte'anene 'ɨtsita memeutsunatɨka meta xuxuitsi.
LEV 11:23 Peru hipatɨ naukamekɨ memu'uwe meta mema'anatɨka, xeme xepɨkawakwa'ani mɨkɨ mepɨka'itiyatɨka.
LEV 11:24 »Xeme 'ikɨ wakɨmana xeka'itiyatɨ xepuyuhayewa: »Kemɨ'ane xeme mɨkɨ mekwikwi'ime mɨwamayɨani mɨkɨ ka'itiyatɨ puyuhayewa kepaukake mɨkɨyɨretsie.
LEV 11:25 »Kemɨ'ane mɨkime manukukweni, mɨkɨ kaneuyeweka yu'ixurikite mɨti'ekwa, mɨkɨ ka'itiyatɨ puyuhayewa kepaukake mɨkɨyɨretsie.
LEV 11:26 »Xemeri xepɨwaxeiyani yeutari memɨka'itiyatɨka meta yunaime kemɨ'ane mɨka'anutahuhuta wakarutsate meta mɨkareka'iyawame. Tsepa kemɨ'ane mimayɨani ka'itiyatɨ kanayeimɨkɨ.
LEV 11:27 »Meta memɨtexɨawe naukamekɨ me'u'uwetɨ memeu'uwa, mɨkɨta memɨka'itiya xepɨtewamaika yukɨtsimekɨ me'u'uwetɨ memɨteku'uwa, kemɨ'ane mɨkime mɨmayɨani ka'itiyatɨ kanayeimɨkɨ kepauka mɨkɨyɨretsieke,
LEV 11:28 yunaitɨ kemɨ'ane menukuhana kaneuyeweka yu'ixɨriki memɨti'ekwa, meta meka'itiyatɨ mepakɨne kepauka mɨkɨyuretsieke. Mɨkɨ yeutari xeme memɨka'itiya xepɨtewamaika.
LEV 11:29 »Yunaitɨ memɨtexɨawe yutawima memɨteku'uwa, mɨkɨ memɨka'itiyatɨka mepɨhɨkɨtɨni: kɨrupuxi, naikatsi meta katsaxi hipatɨ yukɨmemɨ'anene,
LEV 11:30 mataika, ketse, tekaxi, kuu 'iwipame,
LEV 11:31 'ikɨ mekanihɨkɨtɨni yeutari xeme meka'itiyakame xemɨwarayeitɨaka yutawima memɨteku'uwa watsata. Kemɨ'ane mɨkime mɨmayɨani mɨkɨ ka'itiyatɨ kaniyuhayewamɨkɨ kepauka mɨkɨyɨretsieke.
LEV 11:32 »Kepauka yeutanaka waiyarieya mɨkitɨ ka'itiyatɨ tixaɨtɨ kɨyetsie mɨtikaweni, yatɨni 'ixurikitsie, yatɨni nawitsie, yatɨni kamixa 'amayetsuye yamɨranakatɨkietsie, mɨkɨ ka'itiyatɨ kanayeimɨkɨ. Kaneuyeweka hakɨ mɨtahauxinirekɨ, meta ka'itiyatɨ kaniyuhayewamɨkɨ kepaukake mukɨyɨretsie. Hikɨ 'ana 'itiyatɨ kanayeimɨkɨ.
LEV 11:33 »Xɨka xewitɨ 'ikɨ yeutari waiyarieya mɨkitɨ haxu xariyarita heukaweni, mɨkɨ xari meta tita muwa mɨtiyepika kati'itiyatɨ kanayeimɨkɨ, kaneuyeweka xari mitatararienikɨ.
LEV 11:34 Naitɨ 'ikwaitsie haa xarita mieme xɨka 'ukayeurieni ka'itiyatɨ kanayeimɨkɨ, yaxeikɨata tita mɨti'iwa mɨkɨ xariyarita timieme ka'itiyatɨ payani.
LEV 11:35 Xɨka kaxari yapaɨmetɨ tixaɨtɨtsie tiukaweni mɨkɨ ka'itiyatɨ payani, kaneuyeweka mita'unakɨ huxunu meta huxiniyu hetsiena mukawekɨ. Mɨkɨ kaxari pɨka'itiya mɨpaɨ xepute'ixeiyani.
LEV 11:36 Peru xeikɨa haixa muhanetsiemieme meta putsuta hakewa haa matihawa pɨ'itiyaka xeikɨa, matsi kemɨ'ane yeutanaka kaxarieya mɨkime mɨmayɨani tsepa kemɨtitita ka'itiyatɨ kaniyuhayewamɨkɨ.
LEV 11:37 »Xɨka xewitɨ mɨkɨ yeutari mɨkitɨ ra'imɨarita heukaweni, mɨkɨ hatsi 'itiyatɨ puyuhayewani.
LEV 11:38 Peru xɨka 'imɨari hapa 'utihawiya, xɨka tixɨatɨ timɨkitɨ mana tikaweni, ka'itiyakame xekanayeitɨakakuni.
LEV 11:39 »Xɨka tewa mupitɨariekai mitakwanikekaikɨ hekuwiekaku 'umɨni, kemɨ'ane mɨkime mimayɨani, mɨkɨta ka'itiyatɨ puyuhayewa kepauka mɨkɨyɨretsieke.
LEV 11:40 Kemɨ'ane mɨkɨ waiyaririeya mitakwani, mɨkɨ yukemari pɨti'ekwa ka'itiyatɨ puyuhayewa kepauka mɨkɨyɨretsieke. Kemɨ'ane menukweni mɨkɨta yu'ixurikite pɨti'ekwa ka'itiyatɨ pɨyuhayewa kepauka mɨkɨyɨretsieke.
LEV 11:41 »Yutawima memuyukuhapatɨwe xepɨkawakwa'ani, mɨkɨ xepɨwaxani'erieka.
LEV 11:42 Xepɨkatewakwa'ani yutawima mukuyeika, yanɨtsɨtɨni yukɨtsimekɨ memu'uwe, yatɨni waɨkawa 'ɨkate memexeiyatɨka. Xeimetɨma xepɨkakwaka yutawima memɨteku'uwa mɨkɨ memɨka'itiyakɨ,
LEV 11:43 xepɨka'ipitɨaka mɨkɨkɨ xeka'itiyatɨ xemakɨnekɨ, mɨkɨ memɨka'itiyakɨ.
LEV 11:44 Ne Yawé xekakaɨyari nepɨhɨkɨ, xekeneyupatani xepatsietɨ xekeneyuhayewani, ne nemupatsiekɨ. 'Ayumieme xeka'itiyatɨ xepɨkayuhayewani kwiepa yutawima memɨteku'uwa wahekɨ.
LEV 11:45 Ne Yawé nekanihɨkɨtɨni, nemɨxe'ayewitɨ 'Ekipitu kwieyaritsie, xekakaɨyari nemayanikɨ. Xemeta xekenepatsieka ne nemɨpatsiekɨ.
LEV 11:46 »'Ikɨ 'inɨari niukiyari kanihɨkɨtɨni: memɨte'awɨwawe wahetsiemieme, yunaime meta hapa memɨteye'uwa, meta yunaime yutawima memɨteku'uwa,
LEV 11:47 mɨpaɨ xemɨyɨwawenikɨ xemɨwamatenikɨ kemɨ'ane mɨ'itiya meta mɨka'itiya, meta kemɨ'ane memɨtakwani meta kemɨ'ane memɨkatakwa'anikɨ».
LEV 12:1 Yawé Muitsexi mɨpaɨ katiniuta'aitɨani
LEV 12:2 'ixaheritsixi mɨpaɨ mɨtiwatahɨawekɨ: «Kepauka 'uka mɨtihukata meta nunutsi 'ukitɨme mɨtiniweni 'atahutamexɨa tukari ka'itiyatɨ puyuhayewani, kepauka xuriya miku'axiya hepaɨ.
LEV 12:3 'Atahaika tukari 'aye'ayu 'uki nunutsi xitekiya 'inɨariyarikɨ pɨ'inɨaritɨarieni.
LEV 12:4 Maamaya puyu'itieka xeitewiyari heimana tamamata heimana haika tukari yuxuriya muhanitsitɨakaikɨ. Tixaɨtɨ mɨtipatsie pɨkatikumaɨwani, meta tukita pɨkaheutahakeni, kepaukake 'itiya tukari maye'anitsieke.
LEV 12:5 »Xɨka 'ukatɨme 'utiniweni maamaya ka'itiyatɨ puyuhayewa huta tsemanayari, kepauka xuriya miku'axiyatsie hepaɨ, meta haika tewiyari heimana 'ataxewime tukari puyurieni yu'itietɨ xuriyaya mutaxɨrikɨ.
LEV 12:6 »Kepaukari maye'ani mɨ'itiyanikɨ tukariyari, tsepa nunutsi 'ukitɨme mutiniwexɨ yatɨni xɨka 'ukatɨme 'utiniweni, mɨkɨ xeime muxa panuhana xeiwiyari hɨkame mawari taiyariyari mayanikɨ, meta xeime haɨmɨ, xeimeta weurai 'itiyari mawariyari mayanikɨ, mawari wewiwame hetsɨa pɨranupini, 'ixuriki tukiyarita mɨranutahakitɨretsie,
LEV 12:7 mɨkɨ Yawé hɨxie kanixatɨamɨkɨ. Mawari wewiwame mɨxɨnarieni mawariyari mɨpaɨ pɨtiwewieni 'uka hetsiemieme, mɨkɨ pɨ'itiyani xuriyaya mutayeurikɨ. »'Ikɨ 'aitsika kanihɨtɨni 'ukaratsitsie mieme kepauka 'ukitɨme ya'ukatɨme mɨtiniwenitsie.
LEV 12:8 Xɨka muxa mɨnanenikɨ ka'i'axeni, yuhutame weuraixi pɨwaranutɨkɨ yatɨni yuhutame haɨmɨxi, xewitɨ mawari taiyariyari payani xewitɨta 'itiya mawariyari. Mawari wewiwame mɨxɨnarieni mawariyari mɨpaɨ pɨtiwewieni 'uka hetsiemieme, mɨkɨ pɨ'itiyani».
LEV 13:1 Yawé Muitsexi meta 'Aruni mɨpaɨ katiniwarutahɨawe:
LEV 13:2 «Xɨka xewitɨ xeme yunawiyaritsie heuhaka xetatɨ kumariketɨ yatɨni tuxatɨ heukumanetɨ 'anutiteketɨ haiya kwiniyayari 'ayanike, mɨkɨ 'Aruni mawari wewiwame mepɨ'atɨirieni, yatɨni mawari wewiwamete 'iparewiwamete.
LEV 13:3 Mɨkɨ mawari wewiwame wahaiya pɨtixeiyaxɨani. Xɨka haiyatsie meuka'u huxariteya tuxani yatɨni maukumane waɨkawa heukukunini waiyarieyatsie, mɨkɨ haiya kwiniyayari pɨhɨkɨ. Mɨkɨ tewi kwiniyaya tixeiyaxɨame, 'anari mawari wewiwame pɨtitaxatɨani kename ka'itiyatɨ 'ayani.
LEV 13:4 »Tuxatɨ meukumane xɨka kaheukukunini waiyarieyatsie meta huxariteya katuxani, mawari wewiwame mɨtikuye yuxaɨtame pupata 'atahuta tukari,
LEV 13:5 'atahuta tukari 'aye'ayu hekwamekɨta pixeiya, xɨka yaxeikɨa reu'atɨkani kayemieni nawiyarieyatsie tawarita 'atahuta tukari puyurieni tikwikame.
LEV 13:6 'Atahuta tukari 'aye'atɨarieyu mawari wewiwame tawarita pixeiya hutarieka, xɨkari kwiniya kayemieni waiyarieyatsie yatɨni yeyuximeni, 'anari yapɨtayɨni mɨ'itiyakɨ. Mɨkɨ haiya xetatɨ mukumarike xeikɨa pɨhɨkɨtɨkai, 'anari tewi kani'itiyamɨkɨ mɨtikuye meta yu'ixuriki kaniti'ekwamɨkɨ.
LEV 13:7 »Xɨka yaxeikɨa heu'aneni haiyaya yemieni nawiyarieyatsie, mawari wewiwame 'ixeiyakutɨtɨ para mɨ'itiyanikɨ, tikwikame tawarita mawari wewiwame hetsɨa pumie mixeiyakɨ.
LEV 13:8 Mawari wewiwame kanixeiyamɨkɨ mɨkɨ xɨka haiyaya yemieni waiyarieyatsie, mɨkɨ tewi mɨpaɨ pɨtitahɨawarieni haiya kwiniyayari mɨhɨkɨkɨ.
LEV 13:9 »Kepauka tewi haiya mexeiya yunawiyaritsie, mɨkɨ kaneuyeweka manuwitɨkienikɨ mawari wewiwame hɨxie,
LEV 13:10 tawarita pixeiya. Xɨka haiyaya meta huxariteya tuxani, meta meukuhatɨkatsie waiyarieya xɨka 'ayeniereni yuhekɨaka,
LEV 13:11 mɨkɨri haiya meripaitɨ mɨmieme pɨhɨkɨ. Mawari wewiwame mɨkɨ tewi pɨtahekɨata mɨka'itiya mayanikɨ. Matsi mɨkɨ tewi pɨkaheuyewetse hutarieka mɨpatsienikɨ yeuta, mɨmatsiɨkɨkɨri mɨka'itiyakɨ.
LEV 13:12 »Xɨka haiya yemietɨ tikwikame waiyarieyatsie heinɨka, hakewa xeikɨa mawari wewiwame mɨyɨwe mixeiyakɨ,
LEV 13:13 merikɨte mawari wewiwame pixeiya. Xɨkari naitɨ waiyarieyatsie 'inɨka, mɨkɨ yapɨtayɨni kenameri 'itiya. Mɨkɨ tewi pɨ'itiya naitɨri yuwaiyaritsie mutaturixɨkɨ.
LEV 13:14 Mɨkɨtsɨ matsi ka'itiyatɨ kanayeimɨkɨ xɨka yapauka 'ukayaxe haiya 'amɨnene.
LEV 13:15 Kepauka mawari wewiwame mita'ixɨarieni waiyarieyatsie mɨkɨ pitahekɨata kename ka'itiya. Waiyarieya mɨka'itiyakɨ, haiya kwiniyayari kanihɨkɨtɨni.
LEV 13:16 Xɨka haiyaya 'amɨnene tuxatɨ 'ayani, mɨkɨ tewi mɨtikuye kaniyemieni mawari wewiwame hetsɨa.
LEV 13:17 Mɨkɨ pixeiya xɨka haiya kayaxikeni tuxatɨ, mawari wewiwame mɨkɨ tewi pɨtahekɨata mɨ'itiya pɨhɨkɨtɨni, mɨpaɨ pɨ'aneni.
LEV 13:18 »Xɨka xewitɨ haiya heukayatsani yuwaiyaritsie 'anutitekeme yatɨni kwitɨwa 'anayeweni,
LEV 13:19 xɨka heimana heukateni haiya 'etsiwa tuxatɨ, haiya heukumanetɨ xetatɨ mɨkɨ mawari wewiwame hetsɨa puyutaxata.
LEV 13:20 Mɨkɨ mixeiyakɨ. Xɨka haiyaya tetɨatapaitɨ yemieni waiyarieyatsie meta huxariteya 'utiture, mawari wewiwame pitahekɨata mɨka'itiyakɨ. Haiya kwiniyayari kanihɨkɨtɨni meukutekixɨakɨ 'axeikɨa heukatetɨ.
LEV 13:21 Matsi kepauka mawari wewiwame tikwikame mɨta'ixɨarienitsie, xɨka huxariteya katitureme 'uxeiya meta haiyaya manutiteke tetɨata kaheuneikatɨ waiyarieyatsie heukateni, meta xɨka yeyuximeni, mɨkɨ 'ateewa pɨpatsieni yuxaɨtame 'atahuta tukari.
LEV 13:22 Xɨkari haiyaya manutiteke yeyaxikeni waiyarieyatsie paitɨ tikwikame pɨtahekɨata mɨka'itiyakɨ, haiya kwiniyayari mɨhɨkɨkɨ.
LEV 13:23 Xɨkari mɨkɨ haiyaya manutiteke kayeyaxikeni meta kakutureni, xɨka xeikɨa huyeriyari yuhekɨaka, tikwikame pɨtahekɨata kename 'itiya.
LEV 13:24 »Xɨka xewitɨ 'ukwaxe, hakewa metakwaxixɨtsie xɨka tuxatɨ yatɨni xetatɨ haneni,
LEV 13:25 mɨkɨ mawari wewiwame pixeiya, xɨka mamarixɨtsie huxariteya tuxani, xɨka waiyarieyatsie waɨkawa heukukunini, mɨkɨ haiya kwiniyayari kanihɨkɨtɨni haiya mukwaxixɨtsie mane. Mawari wewiwame tikwikame pɨtahekɨata mɨka'itiyakɨ, haiya kwiniyayari mɨhɨkɨkɨ.
LEV 13:26 »Matsi xɨka mawari wewiwame mukwaxixɨ xeiyayu xɨka 'ikaxeiya huxariteya katuxame meukumanetsie meta waɨkawa xɨka waiyarieyatsie paitɨ kaheukukunini, meta xɨka hanukanuaximeni, 'ana mɨkɨ tikwikame 'atahuta tukari yuxaɨtame putuiyamie yateewa paitɨ.
LEV 13:27 'Atahuta tukari 'aye'ayu mawari wewiwame tawarita pixeiya, xɨka naitsarie 'inɨka waiyarieyatsie mɨkɨ yapɨtayɨni kename ka'itiya, haiya kwiniyayari kanihɨkɨtɨni.
LEV 13:28 Matsi mɨkɨ mukuture nawiyarieyatsie xɨka kayemieni, tatsɨari mɨkɨ mutataikɨ xeikɨa hatɨ. 'Ana mawari wewiwame yapɨtitahekɨata mɨ'itiyakɨ, mɨkɨ xeikɨa mutataikɨ 'inɨariyari mɨhɨkɨkɨ.
LEV 13:29 »Xɨka xewitɨ 'uki yatɨni 'ukaratsi haiya mu'uyatsie haneni yatɨni mɨxiyayatsie,
LEV 13:30 mawari wewiwame haiya kanixeiyamɨkɨ. Xɨka waiyarieyatsiepai waɨkawa heukukunini, meta kɨpaya tataxawini 'etsipepetɨ, mɨkɨ tikwikame pɨtahekɨata kename ka'itiya. Mɨkɨ haiya xetatɨ mukumarike kanihɨkɨtɨni haiya mu'utsie yatɨni 'ayekwaitsie mieme.
LEV 13:31 Xɨka mawari wewiwame 'etsa xeiyayu, waɨkawa waiyarieyatsie kaheunetɨkani meta kɨpateya kayɨyɨwini, mɨkɨ mɨtikuye haiya xetatɨ mukumarike mexeiya 'ateewa paitɨ pupatsieni yuxaɨtame 'atahuta tukari.
LEV 13:32 Hikɨ 'atahuta tukari 'aye'ayu mawari wewiwame tawarita tikwikame kanixeiyamɨkɨ, xɨka haiya xetatɨ mukumarike kayemieni meta kɨpateya katataxawini, meta waɨkawa kaheukukunini waiyarieyatsie.
LEV 13:33 Hikɨ 'anari tikwikame panuyuyexini, mahatsie 'ihayewatɨ, hikɨ mawari wewiwame tawari xaɨtsie pipata yuxaɨtame 'atahuta tukari.
LEV 13:34 Tawarita 'atahuta tukari 'aye'ayu mawari wewiwame tikwikame kanixeiyamɨkɨ. Xɨkari haiya xetatɨ mukumarike 'anukanuaximeni waiyarieyatsie meta waɨkawa kaheukukunini, yapɨtitahekɨata kenameri 'itiya. Hikɨ tikwikame yu'ixurikite kaniti'ekwamɨkɨ 'anari 'itiyatɨ kanayeimɨkɨ.
LEV 13:35 »Xɨkari haiya xetatɨ mukumarikekɨ 'u'itiyakaitɨni hutariekata 'i'axiyani naitɨri waiyarieya nɨka,
LEV 13:36 mawari wewiwame pixeiya. Xɨka haiya xetatɨ mukumarike yemieni naitɨ waiyarieyatsie paitɨ, pɨkaheuyewetseri mawari wewiwame kɨpa mɨtataxawi mɨwaunenikɨ, mɨkɨ tikwikameri pɨka'itiya.
LEV 13:37 Matsi xɨka mɨkɨ haiya xetatɨ mukumarike kayemieni metatsiere kɨpateya yɨyɨwitɨ kayɨyɨrani, tatsɨari mɨtikuyekai 'anayeweka. Pɨ'itiyari, mawari wewiwame mɨpaɨ katinitahekɨatamɨkɨ.
LEV 13:38 »Xɨka 'uki meta 'ukaratsi tuxatɨ kumariketɨ kuneikani waiyaritsie,
LEV 13:39 mɨkɨ mawari wewiwame pixeiya. Xɨka maukumane kutuxareni, mɨkɨ waiyarieyatsie manutinexɨa xeikɨa kanihɨkɨtɨni, mɨkɨ tewi pɨ'itiya.
LEV 13:40 »Xɨka xewitɨ yukatutsitɨa hahune, hametsetɨ yuhayewa, mɨkɨ pɨ'itiya.
LEV 13:41 Mexɨka yukanatsie 'akahune kanametsetɨ yuhayewa yaxeikɨatatsiere mɨkɨ pɨ'itiya.
LEV 13:42 Matsi xɨka yukatutsitɨa meta yukanatsie mametsetsie haiya xetatɨ haneni, mɨkɨ haiya mametsetsie mane pɨhɨkɨ.
LEV 13:43 Mawari wewiwame pixeiya. Xɨka haiyaya xetani, yuwaiyaritsie meuhaka hepaɨ 'aneneni,
LEV 13:44 kamɨtsɨ mɨkɨ tewi haiya kwiniyayarikɨ pɨtikuye pɨka'itiya. Mawari wewiwame pitahekɨata kename ka'itiya yumu'utsie haiya mayetsakɨ.
LEV 13:45 »Xɨka xewitɨ tewi haiya hexeiyani, mɨkɨ tsanimekɨ pɨyukemaritɨaka, pɨkayukatsikeni yuhɨxie panuyuka'eimani. Pɨyemie 'utahiwatɨ mɨpaɨ 'utaitɨ: “Nepɨka'itiya, nepɨka'itiya”,
LEV 13:46 mɨkɨ kemɨreutere tikuyetɨ pɨka'itiyaka. Mɨkɨ mematiteitsie yuxaɨtame 'ateewa pukani.
LEV 13:47 »Kepauka kwiemuxa 'ixurikiyari yatɨni rinu 'ixurikiyaritsie waɨkawa mɨtimutuxaxɨani,
LEV 13:48 rinu 'ixurikiyari yatɨni tsepa muxa kamixayaritsie yatɨni nawitsie yatɨni mɨkɨ maye'itsetsie xɨka yuhekɨare,
LEV 13:49 xɨka 'etsiwa tsiuraɨyeni yatɨni xetani mɨkɨ mutuxariyari muwerixɨ kanihɨkɨtɨni, peuyewetse mawari wewiwame mɨxeitsitɨanikɨ,
LEV 13:50 mɨkɨ meukuwetɨka kanixeiyamɨkɨ meta 'atahuta tukari 'ateewa putuiyamie titatsie mɨtiwena.
LEV 13:51 'Atahuta tukari 'aye'ayu mawari wewiwame mawena kanixeiyamɨkɨ, xɨka mɨkɨ yemieni kamixatsie yatɨni maye'itsetsie, yatɨni nawitsie, tsepa kemɨtitita mɨkɨ mutuxariya mutiyuwiriwe kanihɨkɨtɨni. Mɨkɨ mɨya mɨ'ane pɨka'itiya.
LEV 13:52 Mɨkɨ 'iwi yatɨni maye'itse, kwiemuxa, rinu tsepa kemɨtititatsie nawitsie mɨrawena, mɨkɨ mutuxariya 'axamɨ'ane mɨhɨkɨkɨ pɨtataiyarieni.
LEV 13:53 »Matsi kepauka mawari wewiwame 'iwi mɨxeiya mutuxariya kayemieme, meta maye'itsetsie meta mi'itatɨkateitsie, meta muxa 'itariyari meta rinu tsawanayari meta tsepa kemɨtitita nawiyari,
LEV 13:54 hikɨ mɨkɨ pɨtita'aita mahauxinarienikɨ mapɨnitsie, meta tawarita 'akuxi 'atahuta tukari pɨyekani.
LEV 13:55 Xeimieme tahauxinarieyu meukupɨpɨnitsie mawari wewiwame pita'ixɨarieni. Xɨka yaxeikɨa 'aneni mukumarike kayupatani, mɨkɨ mɨpaɨ pɨtayɨni 'ixuriki ka'itiyatɨ puyuhayewa tsepa mɨka'eyewiriewe naime. Naitɨ 'ixuriki pɨtataiyarieni taɨtana meta herie.
LEV 13:56 »'Arike ti'ekwarieyu, mawari wewiwame mixeiyatsie xɨka 'ixeiya heukuwetɨkaime 'etsiwa, mɨkɨ 'ixuriki peukutsanaxɨani 'iwitsie meukuwetɨka, meta nawitsie, meta maye'itsetsie.
LEV 13:57 Xɨka hekwamekɨ heukunexɨani kemaritsie yatɨni maye'itsetsie yatɨni tsepa kemɨtitita nawitsie, tatsɨari tawari hanutineka. Mɨyama'anetsie pataiyarieni,
LEV 13:58 peru naitɨ kemarite, maye'itsetsie meta nawitsie kepauka mɨta'ekwarienitsie meukuwetɨkateitsie xɨka hayeixɨani, tawarita pɨta'ekwarieni, 'ana mɨkɨ 'itiyatɨ payani».
LEV 13:59 'Ikɨ 'inɨari niukiyari kanihɨkɨtɨni mutuxariyatsie mieme kemaritsie muweriwe, kwiemuxatsie, rinutsie, maye'itsetsie, yatɨni tsepa tita nawitsie, yamɨtitahekɨatsieninikɨ kemuti'itiya yatɨni kemɨkati'itiya.
LEV 14:1 Yawé Muitsexi mɨpaɨ katiniutahɨawe:
LEV 14:2 «'Ikɨ 'inɨari niukiyari kanihɨkɨtɨni tewi kemɨ'ane meu'etsa mɨ'itiyanikɨ, mɨkɨ mawari wewiwame hɨxie panuwitɨkieni,
LEV 14:3 mɨkɨ yateewa paitɨ mematiteitsie pixeiya. Xɨka mawari wewiwame ya'utayɨni kenameri tewi meu'etsakai 'aixɨa reu'erietɨ 'atɨa,
LEV 14:4 mɨkɨ tewi pɨtita'aitɨani mɨ'itiyanikɨ yuhutame wikixi me'ayeneniereme me'itiyatɨkaime mɨwa'atɨanikɨ, meta xeime 'etsi'atayeukame kariuxa kɨyeyari, meta xeime tuwaxa xetame, xeimeta hitsupu yaranukaime.
LEV 14:5 Hikɨ mawari wewiwame pɨtita'aita wiki xewitɨ meri muwaxitekienikɨ, haa haixata mieme haxu xariyarita hɨnetɨ muyemata heima.
LEV 14:6 Xeimeta wiki mayeniere kanitituimɨkɨ, kariuxa mexayari, tuwaxa mɨtaɨraɨye meta hitsupu xawariyari, mɨkɨ pitahawiya naime yunɨkame wiki muwaxitekie xuriyaya haa mɨnɨ'ɨ haixata miemekɨ.
LEV 14:7 Mɨkɨkɨ 'atahutamexɨa pɨ'ɨya kemɨ'ane mɨtikuye mɨ'itiyanikɨ, 'anari 'itiyakame payeitɨani. Hikɨ wiki pɨtatuani mayeniere yeuta mɨyemiekɨ.
LEV 14:8 »Kemɨ'ane mɨyu'itie mɨkɨ yu'ixuriki pɨti'ekwa, yukɨpa naime pɨkaxini meta pɨti'ɨwa. Mɨpaɨke 'itiyatɨ payani. Mɨpaɨ tiyuriemeke pɨyɨweni memakuteitsie meutahanikɨ, matsi 'akuxi yukiita pɨkaheutahani, matsi 'akuxi 'atahuta tukari takwa paitɨ puhupuni.
LEV 14:9 'Atahutarieka tukaritsie naime puyukaxini, meta yumɨxiya naime pataxini meta yukarimuxi, yu'ixurikite pɨti'ekwa meta pɨti'ɨwa. 'Anake 'itiyatɨ payani.
LEV 14:10 »'Atahairieka tukaritsie 'aye'ayu, kemɨ'ane mɨ'itiyani mɨkɨ yuhutame muxatsi 'ukitsi pɨwa'atɨani xeimeta 'ukatɨme xeiwiyari hɨkame 'aixɨa me'anenekame, tɨriku mawariyari 'imikieriyari, 'ataxewime kiruyari kani'atɨamɨkɨ tɨriku mɨtɨxiyari 'aixɨa mɨ'ane hatseitikɨ pɨnariekame meta hatseiti xeiwatsuyari yunɨkame.
LEV 14:11 Mawari wewiwame kemɨ'ane mɨ'itiyani muwewieni Yawé hɨxie piyetuani, 'ixuriki tukiyari kitenie, kemɨ'ane muyu'itieni meta mawarieya.
LEV 14:12 'Arike mawari wewiwame xeime muxa panuhana meta hatseiti yunɨkame, mawari pixatɨani mɨrayukatuani mawariyari mayanikɨ. 'Iyuitɨwatɨ Yawé hɨxie, mɨkɨ 'imikieri teikɨ heitseratɨ 'uyuitɨariwatɨ mɨhɨkɨkɨ.
LEV 14:13 Manata hakewa makupatsietsie muxa puwaxiteni, hakewa tita mɨtimawarie mematikwikwiwatsie tatsɨari 'itiya mawariyari meta mawari taiyariyari matiwewiwatsie, mɨrayukatuani mawariyari meta 'itiya mawariyari, mawari wewiwame hetsie kanimiemetɨni. Mɨkɨ waɨkawa kanipatsieka.
LEV 14:14 Hɨkɨ mawari wewiwame xuriya yapaɨmeme ti'ɨme mɨrayukatuani mawariyaritsie mieme, kemɨ'ane mɨ'itiyani nakaya heima tserietana mieme puwirieni, meta mamaya 'itɨwameteya 'amupayaritsie tserietana mieme, metatsiere 'ɨkaya 'amɨpayaritsie tserietana mieme.
LEV 14:15 Mawari wewiwame hatseiti yapaɨmeme 'anatuame yumamá meuweweritsie yu'utatamiemetsie.
LEV 14:16 Yu'itɨwame yutserieta mieme pɨtahawiya hatseitikɨ yumamá meuweweritsie yutserieta miemetsie menatuakaikɨ, hatseiti kani'ɨyamɨkɨ Yawé hɨxie 'atahutamexɨa.
LEV 14:17 Meta hatseiti 'akuxi mawari wewiwame mamayatsie muyuhayewa, kemɨ'ane muyu'itieni 'etsiwa nakaya tserietanatsie pɨwirieni, meta mamaya 'itɨwameteya 'amupayaritsie tserietana mieme, metatsiere 'ɨkaya 'amɨpayaritsie tserietana mieme, xuriya mɨrayukatuani mawariyari heima.
LEV 14:18 Hatseiti mawari wewiwame mamayatsie muyuhayewa kemɨ'ane muyu'iti mu'uyatsie peitituani. Mɨpaɨ pɨtiyurieni mɨkɨ mɨxɨnarienikɨ Yawé hɨxie.
LEV 14:19 Hikɨ mawari wewiwame 'itiya mawariyari puwewieni, yatiyurienetɨ mɨxɨnarieni mawariyarikɨ kemɨ'ane mɨyu'itie tita mɨkati'itiyakɨ. Mɨpaɨ tiyurieme tita mɨtimawa puwaxiteni mawari taiyariyaritsie mieme,
LEV 14:20 mawari taiyametsie mawari taiyariyari pautiteni tɨriku mawariyari yɨnɨkame piyetuirieni. Mɨpaɨ mɨxɨnarieni mawariyari pɨtiwewieni hetsiena mieme, 'itiyatɨ kanayeimɨkɨ.
LEV 14:21 »Kemɨ'ane mɨ'itiyani xɨka tixaɨtɨ karexeiyani meta minanenikɨ tita mɨra'iwauriwa ka'i'axeni, mɨkɨ xeime muxa panuhana mawari mɨrayukatuani mawariyari mayanikɨ, mɨkɨ teikɨ petserarieni 'uyuitɨariwatɨ mɨkɨ mɨxɨnarienikɨ. Meta hatsite 'imikieriyari panutɨni, huta kiruyari tɨriku mɨtɨxiyari 'aixɨa mɨ'ane hatseitikɨ pɨnariekame meta hatseiti xeiwatsuyari,
LEV 14:22 yuhutame weuraixi yatɨni haɨmɨxi, kemɨtiyɨweni titakɨ mɨtiyutuani xewitɨ 'itiya mawariyari mayanikɨ xewitɨta mawari taiyariyari.
LEV 14:23 'Atahuta tukari 'aye'ayu, tukita pɨwaranuhapani, mawari wewiwame hɨxie, para Yawé hɨxie mɨ'itiyanikɨ.
LEV 14:24 Mawari wewiwame muxa panuhana meta hatseiti nɨkame pixatɨani, Yawé hɨxie teikɨ heitseratɨ 'iyuitɨwatɨ pixatɨani, mɨkɨ 'imikieri teikɨ heitseratɨ 'uyuitɨariwatɨ mɨhɨkɨkɨ.
LEV 14:25 'Arike muxa pɨwaxiteni 'imikieri mɨrayukatuani mawariyari mɨhɨkɨ, 'etsiwa xuriya kwewieme nakaya tserietana miemetsie piwirieni, meta 'itɨwameya 'amupayaritsie, meta 'ɨkayatsie mieme 'amɨpayari tserietana mieme kemɨ'ane muyu'itieni hetsie,
LEV 14:26 mawari wewiwame hatseiti yumamá yu'utata meuweweritsie peutituani,
LEV 14:27 meta yu'itɨwame yutserieta miemekɨ 'atahutamexɨa pi'ɨya, Yawé hɨxie.
LEV 14:28 Meta kemɨ'ane muyu'itieni mawari wewiwame hatseiti mamayatsie muyuhayawaxɨkɨ 'etsiwa piwirieni. Nakaya heima tserietana miemetsie meta 'itɨwameya 'amɨpayari tserietana miemetsie meta 'ɨkayatsie mieme 'amɨpayari tserietana mieme, hakewa xuriya mɨrayukatuani mawariyari meyutawiritsie.
LEV 14:29 Hatseiti muyuhayewa mawari wewiwame mamayatsie kemɨ'ane muyu'itieni mu'uyatsie pɨkawirieni, Mɨpaɨ mɨkɨ mɨxɨnarieni mawariyari pɨtiwewieni Yawé hɨxie.
LEV 14:30 Hikɨta wauraixi pɨwayetuani yatɨni haɨmɨxi, mɨkɨ kemɨtiyɨweni mɨtiyutuanikɨ,
LEV 14:31 xewitɨ 'itiya mawariyari payani, xewitɨta mawari taiyariyari, hatsite yunɨkame mɨtataiyarienikɨ. Mɨpaɨ mawari wewiwame mɨxɨnarieni mawariyari pɨtiwewieni hetsiena mieme, Yawé hɨxie kemɨ'ane mɨyu'itieni».
LEV 14:32 'Ikɨ 'inɨari niukiyari pɨwewiyarieni xɨka tewi yuwaiyaritsie heuhatɨ nuani, xɨka kaheixeiyani mɨtiyutuanikɨ 'imikieri 'aixɨa 'anekame kɨmana mɨ'itiyanikɨ.
LEV 14:33 Hikɨ Yawé Muitsexi meta 'Aruni mɨpaɨ katiniwarutahɨawe:
LEV 14:34 «Xeme kepauka xemeutahaxɨanitsie Kanani kwieyaritsie, nemɨxeyetuirie xehetsiemieme mayanikɨ, ne hipame xekitetsie mutuxariya mɨtiyuwiriwe nepawetsitɨaxɨani,
LEV 14:35 kii kutsiyari mawari wewiwame mɨpaɨ pɨtitahɨawe: “Nekiita mutuxariya kanawetɨkani”.
LEV 14:36 Hikɨ mawari wewiwame kaheutahawetɨ 'akuxi mɨreukuwetɨka xeiyake pɨwata'aitɨani yukiita memɨtewayepinikɨ, kapa yutiwirienikɨ tita muwa mɨrayepine. Mɨpaɨ tiyurieme mawari wewiwame peutahani mixeiyakɨ.
LEV 14:37 Meukuwetɨka 'ixumeritsie 'etsiwa tsitsiɨrawitɨ, xetatɨri 'ixumeritsie heuyunixɨaximeni,
LEV 14:38 mawari wewiwame kiita pɨwayeyani, pureunani 'atahuta tukari xewitɨ muwa pɨkaheutahakeni.
LEV 14:39 'Atahutarieka tukarietsie punuani pixeiya. Xɨka 'akuxi 'ixumeritsie yemieni matsi waɨkawa,
LEV 14:40 pɨtita'aita tetexi mamutuxietɨka manayetɨkiexɨanikɨ meta kiekari manuniere yateewa mɨtixɨriyanikɨ hakewa mɨkahaku'itiyarietsie.
LEV 14:41 Yaxeikɨata pɨtita'aita kii taɨta meta mukaherɨkarie kiekarie manuniere yateewa pɨtixɨriyani, hakewa mɨkahaku'itiyatsie.
LEV 14:42 'Ariketa tetexi memeukɨtɨkixɨatsie hehekwame mepɨkayatsa, 'anari 'aixɨa kii 'anetɨ payani mutahekwariyariekɨ haxu 'ukawiriyarieka.
LEV 14:43 »Xɨka 'arike tetexi mewakutɨkɨyu mɨreukuwetɨkatei meta kiitata 'aixɨa mewakuyurieyu, tawarita mutuxariya 'uhekɨare meta naitɨ kiita 'uwakuwere,
LEV 14:44 mawari wewiwame pɨmie mixeiyakɨ. Xɨka mutuxariya naitsarie kiita wakuneni, mɨkɨ mutuxariya mɨtiyuka'unawe pɨhɨkɨ. Mɨkɨri kii pɨka'itiya.
LEV 14:45 Mɨkɨ kaneuyeweka titɨxieme mewiwiyanikɨ, hakewa mɨkahaku'itiyarietsie kiekari tetsitapai, meta 'ixumeriyari meta tetexi mexate naitɨ pexɨriyani.
LEV 14:46 »Xɨka xewitɨ kiita heutahani mexi 'akuxi reunameni, mɨkɨ ka'itiyatɨ puyuhayewa kepauka mɨkɨyɨretsieke,
LEV 14:47 meta kemɨ'ane muwa kiita meukuni yatɨni muwa mɨtikwani yu'ixɨrikite kaniti'ekwamɨkɨ.
LEV 14:48 »'Arike kii 'aixɨa 'itɨarieyu, mawari wewiwame mutuxariya pɨxeiya xɨka kayemieni, mɨkɨ kenameri 'itiya pɨtitahekɨatsieni, meukuwetɨkateiri meukuyunixɨakɨ.
LEV 14:49 »Mawari wewiwame kii mɨ'itienikɨ yuhutame wikixi kaniwaranutɨkimɨkɨ, kariuxa mexayari 'etsihatayeukame meta hitsupu xawariyari, yaxeikɨata tuwaxa mɨxeta.
LEV 14:50 Xeime wiki pɨwaxiteni haxu xariyarita haa muyemata haixata mieme muwa xuriyaya kaneukatuamɨkɨ,
LEV 14:51 kariuxa kɨyeyari panukweni, meta hitsupu xawariyari meta tuwaxa mɨxeta, xeimeta wiki mayeniere, 'ikɨ naime mekatenitiwirikuni wiki muwaxitekie xuriyayakɨ meta haa haixata miemekɨ.
LEV 14:52 Hikɨta mɨkɨkɨ kii 'atahutamexɨa pɨ'ɨya, pi'itieni wiki xuriyayakɨ meta haa haixata miemekɨ, wiki mayenierekɨ, kariuxa kɨyeyari, hitsupu xawariyari meta tuwaxa mɨxetakɨ.
LEV 14:53 Hikɨ wiki pɨtatuani mayeniere yeuta paitɨ. Mɨpaɨ kii mɨxɨnarienikɨ mawariyari pɨtiwewieni, 'anari 'itiyatɨ puyuhayewa.
LEV 14:54 »'Ikɨ 'inɨari niukiyari pɨhɨkɨ mɨreuyehɨwiyarienikɨ, tsepa kemɨtitita haiya xetatɨ mukumarike waiyarieyatsie,
LEV 14:55 yatɨni mutuxariyakɨ, 'ixurikitetsie yatɨni kiita 'ixumeritsie heukuwetɨkani,
LEV 14:56 yatɨni xɨka 'utahani, yatɨni haiya, yatɨni tuxatɨ heukunexɨani,
LEV 14:57 mɨyɨwenikɨ mɨti'ɨkitanikɨ naitsarie kepauka tita mɨti'itiya yatɨni mɨkati'itiyakɨ. 'Ikɨ 'inɨari niukiyari kanihɨkɨtɨni kwiniya mɨtiyuwiriwe hetsiemieme».
LEV 15:1 Yawé Muitsexi meta 'Aruni 'ipaɨ katiniwaruta'aitɨani,
LEV 15:2 'ixaheritsixi mɨpaɨ memɨtewatahɨawekɨ: «Xɨka xewitɨ 'ukitɨtɨ tiuhanitsitɨaka, tita mɨtiuhanitsitɨa mɨkɨ paka'itiya,
LEV 15:3 yaxeikɨata 'uki, xɨka tiwatiyeuriwani yatɨni hawaikɨ. »Mɨkɨ mɨtiuhanitsitɨakɨ kati'itiyakame pɨrayeitɨani 'ikɨ hetsie:
LEV 15:4 »Ka'itiyatɨ pɨrayani naitɨ mɨtiuhanitsitɨa hakewa mekahupunitsie, yaxeikɨatatsiere naitɨ titatsie mɨrayeixani.
LEV 15:5 »Kemɨ'ane 'itarieya meta mukahuputsie mɨtitimayɨani mɨkɨ yu'ixuriki kaniti'ekwamɨkɨ meta kaniti'ɨwamɨkɨ, mɨkɨ ka'itiyatɨ kaniyuhayewamɨkɨ kepauka mɨkɨyɨretsieke.
LEV 15:6 »Kemɨ'ane mana mayerɨni hakewa mɨtiuhanitsitɨa mayatsie, mɨkɨ yu'ixuriki kaniti'ekwamɨkɨ meta kaniti'ɨwamɨkɨ, ka'itiyatɨ kaniyuhayewamɨkɨ kepauka mɨkuyɨretsieke.
LEV 15:7 »Kemɨ'ane mɨtiuhanitsitɨa memɨmayɨani, mɨkɨta yaxeikɨa kaniyuti'ekwamɨkɨ meta hakɨ kaniti'ɨwamɨkɨ, 'ana ka'itiyatɨ kaniyuhayewamɨkɨ kepauka mɨkɨyɨretsieke.
LEV 15:8 »Xɨka mɨtikuye tiuhanitsitɨatɨ xeime mɨ'itiya 'u'aɨtsikawiya, mɨkɨ yu'ixurikite pɨti'ekwa meta pɨti'ɨwa, 'ana ka'itiyatɨ puyuhayewa kepauka mɨkuyɨretsieke.
LEV 15:9 »Mɨkɨ tewi mɨtikuye tiuhanitsitɨatɨ xɨka puxu xirayatsie 'anutiyerɨni, mɨkɨta ka'itiyatɨ kaniyuhayewamɨkɨ.
LEV 15:10 »Kemɨ'ane tsepa kemɨtitita mɨtimayɨani tikwikame mɨtiuhanitsitɨa hetɨa mɨrayepikai mɨti'itakai ka'itiyatɨ kaniyuhayewamɨkɨ kepauka mɨkɨyɨretsieke. Kemɨ'ane mɨkɨ piinite mɨranupini peuyewetse yu'ixurikite mɨti'ekwakɨ meta mɨti'ɨwakɨ, meta 'ana ka'itiyatɨ puyuhayewa kepauka mɨkɨyɨretsieke.
LEV 15:11 »Mɨtiuhanitsitɨa xɨka xeime 'umayɨani hakɨ kakamaimawetɨ, kemɨ'ane mumayɨiya mɨkɨ yu'ixuriki pɨti'ekwa meta puti'ɨwa 'ana ka'itiyatɨ puyuhayewa kepauka mɨkɨyɨretsieke.
LEV 15:12 »Xɨka mɨtiuhanitsitɨa haxukɨ mɨtiwewiya tiumayɨani, tita mɨtiumayɨiya kanitatarariemɨkɨ, meta kɨye mexayari xɨka 'umayɨani mɨkɨ hakɨ kanitahauxinariemɨkɨ.
LEV 15:13 »Xɨka tikwikame mihanitsitɨakai heunuani, 'atahutamexɨa tukari kanikwewimɨkɨ mɨkɨ mɨ'itiyanikɨ. 'Anari yu'ixurikite kaniti'ekwamɨkɨ meta kaniti'ɨwamɨkɨ haa haixata miemekɨ, 'anari 'itiyatɨ kanayeimɨkɨ.
LEV 15:14 'Atahairieka tukaritsie yuhutame wauraixi yatɨni yuhutame haɨmɨxi puwaranɨtɨkɨ, Yawé hɨxie kaniyuhekɨatamɨkɨ, 'ixuriki tukiyarita mɨreutahakitɨretsie. Muwa memawɨwawe kaniwayetuamɨkɨ mawari wewiwame hetsɨa,
LEV 15:15 mɨkɨri xeime pɨyetuani mɨ'itiyani mawariyari mayanikɨ, xeimeta mawari taiyariyari mayanikɨ. Mawari wewiwame mɨpaɨ pɨtiyurieni Yawé hɨxie, mɨtikuye mɨxɨnarienikɨ mawariyari mɨtiuhanitsitɨakaikɨ.
LEV 15:16 »Kepauka 'uki mɨtiwatituani, mɨkɨ peuyewetse yuwaiyaritsie naitɨ mɨti'ɨwa, 'ana ka'itiyatɨ pɨyuhayewa kepauka mɨkuyɨretsieke.
LEV 15:17 Xɨka 'ixurikitsie 'ukatsune yatɨni waiyarieyatsie, mɨkɨ pahauxinarieni, 'ana ka'itiyatɨ puyuhayewa kepauka mɨkɨyɨretsieke.
LEV 15:18 »Kepauka 'uki 'uka hamatɨa memɨyukumayɨanitsie xɨka tiwatituani, mɨkɨ yuhutatɨ mepɨti'ɨwa 'ana meka'itiyatɨ 'akuxi mepuyuhayewa kepauka mɨkuyɨretsieke.
LEV 15:19 »Kepauka 'ukaratsi xuriya mita'axiyatsie maye'ani, 'atahuta tukari ka'itiyatɨ puyuhayewa. »Kemɨ'ane mikumayɨani mɨkɨ ka'itiyatɨ puyuhayewa kepauka mɨkuyɨretsieke.
LEV 15:20 »Tsepa ketititatsie mɨkɨ mɨrahuni xuriya 'i'axiyakaku 'akuxi ka'itiyatɨ puyuhayewa. »Tsepa ketititatsie mɨkɨ mɨrayeixani xuriya 'i'axiyakaku 'akuxi ka'itiyatɨ puyuhayewa.
LEV 15:21 »Mɨkɨ 'uka 'utaya kemɨ'ane mɨmayɨani yu'ixurikite pɨti'ekwa meta pɨti'ɨwa, 'ana ka'itiyatɨ puyuhayewa kepauka mɨkɨyɨretsieke.
LEV 15:22 »Kemɨ'ane mɨkɨ tita hetsie marakatei mɨtimayɨani, mɨkɨ yu'ixuriki kaniti'ekwamɨkɨ meta kaniti'uwamɨkɨ 'ana ka'itiyatɨ puyuhayewa kepauka mɨkɨyɨretsieke.
LEV 15:23 »Xɨka xewitɨ tiukumayɨani tixaɨtɨ 'utayatsie mɨrapikai yatɨni hakewa mɨkɨ mayatsie, mɨkɨ ka'itiyatɨ kaniyuhayewamɨkɨ kepauka mɨkuyɨretsieke.
LEV 15:24 »Xɨka xewitɨ 'uki mɨkɨ 'uka 'ukumayɨani, mɨkɨ kati'itiyakame mɨrexeiya hetsiena puyuhayewa, 'anari ka'itiyatɨ payani 'atahuta tukari. Yaxeikɨata tsepa mɨkɨ hakewa 'utatsie mekahuni ka'itiyatɨ puhuhayewa.
LEV 15:25 »Xɨka 'uka xuriya 'uhanitsitɨaka tukarieya ka'aye'awekaku meti'axiyatsie, xɨkari mɨixa tukari mɨpaɨ 'aneni, ka'itiyatɨ kaniyuhayewamɨkɨ 'atsita kemɨreutereke, xuriya meti'axiya hepaɨ.
LEV 15:26 »Ke'aneme 'utatsie mɨkahuni mexi 'akuxi kwiniyaya kaheunuaweni ka'itiyatɨ kaniyuhayewamɨkɨ, xuriya mi'axiyani hepaɨ. »Tsepa titatsie mɨrayerɨni mɨkɨ ka'itiyatɨ kaniyuhayewamɨkɨ, xuriya mi'axiyani hepaɨ.
LEV 15:27 »Kemɨ'ane mɨkɨ naime tipiinieya mɨtikumayɨani mɨkɨ ka'itiyatɨ payani. 'Ayumieme kaneuyeweka yu'ixurikite mɨti'ekwakɨ meta mɨti'ɨwakɨ, 'ana ka'itiyatɨ puyuhayewa kepauka mɨkɨyɨretsieke.
LEV 15:28 »Kepaukake mɨtiuhanitsitɨakai maunuani, mɨkɨ 'atahuta tukari pikwewieni mɨ'itiyanikɨ.
LEV 15:29 'Atahairieka tukaritsie yuhutame wauraixi yatɨni yuhutame haɨmɨxi, pɨwaranutɨkɨ 'ixuriki tukiyarita mɨranutahakitɨretsie, muwa mawari wewiwame pɨyetuirieni,
LEV 15:30 mɨkɨri xeime pɨyetuani 'itiya mawariyari mayanikɨ, xeimeta mawari taiyariyari mayanikɨ. Mawari wewiwame mɨpaɨ pɨtiyurieni Yawé hɨxie mɨtiuhanitsitɨakai mɨxɨnarienikɨ.
LEV 15:31 »Xeme mɨpaɨ xeteyurietɨ xekaniwapatakakuni 'ixaheritsixi meka'itiyatɨ memɨkayuhayewanikɨ. Mɨpaɨ xeteyurieyu mɨkɨ mepɨkakwini netuki muyepatsie wahixɨata muwe metsewiximayu.
LEV 15:32 »'Ikɨ 'inɨari niukiyari kemɨ'ane ka'itiyatɨ muyuhayewa kaniwewiyariemɨkɨ tiwatiyeurieme,
LEV 15:33 kemɨ'ane xuriya mita'axiya, tsepa 'uki meta tsepa 'ukaratsi xɨka tiuhanitsitɨaka, kemɨ'ane memuyukumayɨani, metatsiere kemɨ'ane 'ukaratsi ka'itiyakame mukumayɨani».
LEV 16:1 Yawé Muitsexi mɨpaɨ katiniutahɨawe. 'Aruni niwemama yuhutatɨ me'ukwikuri, meheutahaxɨaka memukwi Yawé hɨxie 'atsimekatemaitɨ.
LEV 16:2 Yawé Muitsexi mɨpaɨ katiniutahɨawe: «'A'iwa 'Aruni mɨpaɨ ketineutahɨawi hau'erietɨ pɨkaheutahakeni tsepakepauka, muwa muyepatsietsie 'ixuriki meuwɨtsie warita, tatsɨari Kakaɨyari ma'axetsie kakunitsie maka hɨxie, kapa 'umɨnikɨ kepauka haiwitɨritsie ne mana heimana nemunuanitsie.
LEV 16:3 »Matsi 'Aruni muyepatsieta kaneutahamɨkɨ tsikeru temaikɨ 'ahanatɨ 'itiya mawariyari mayani meta xeime muxa 'uki mawari taiyariyari mayanikɨ.
LEV 16:4 Rinu kamixayari mɨ'itiya panakatɨni meta tetɨata mieme. Rinu kamixayaritsie heimana panayuhɨani kuxirakɨ meta rinu mukuretsiyari panakeni. 'Ikɨ kemari mɨpatsie kanihɨkɨtɨni, 'arike ti'ɨwame katinanakatɨmɨkɨ.
LEV 16:5 »'Ixaheritsixi wakiekaritsie, 'Aruni tsipuri 'ukitsi yuhutame pɨwarayehapani mɨxɨnarieni mawariyari memakɨnekɨ, meta xeime muxa 'uki mawari taiyariyari mayanikɨ.
LEV 16:6 'Arikekeri 'Aruni 'ixatɨame tsikeru 'itiya mawariyari yuhetsiemieme mɨxɨnarieni mawariyari mayanikɨ meta yuniwema wahetsiemieme,
LEV 16:7 yuhutame tsipuri 'ukitsi pɨwaranuhapani Yawé hɨxie pɨwa'atɨani, 'ixuriki tukiyari mɨranutahakitɨretsie.
LEV 16:8 Hikɨ 'Aruni yuhutame tsipuri 'ukitsi wahetsie 'inɨari kanitawewimɨkɨ kemɨ'ane hetsie mɨtinakenikekai, xeime Yawé hetsiemieme mayanikɨ xeimeta yeuta makumawetsie mɨtatuanikɨ.
LEV 16:9 Tsipu Yawé hetsie mɨtiunakixi 'Aruni pixatɨani 'itiya mawariyari mayanikɨ,
LEV 16:10 matsi Yawé hɨxie 'ayeniereme xeime kaniyetuamɨkɨ, mɨxɨnarieni mawariyari mayanikɨ, mɨkɨ tsipu 'uki mɨtatuani makumawetsie, Hatsatseri hetsɨa penunɨ'ani.
LEV 16:11 »'Aruni mana pixatɨani tsikeru temaikɨ 'itiya mawariyari yuhetsiemieme mayanikɨ, yapɨtiyurieni yuhetsiemieme mɨxɨnarieni mawariyari meta yuniwema wahetsiemieme. 'Anari tsikeru 'itiya mawariyari yuhetsiemieme kaniwaxitemɨkɨ,
LEV 16:12 hikɨ pɨtsiwiwame tɨɨ hɨneme kanitihanimɨkɨ mawari taiyametsie 'eyehaname Yawé hɨxie makatsie, huta tuiyari hɨpɨnetɨ 'ɨkwa witsimu'ɨa mɨmiyɨani yɨnɨkame, 'ixuriki meuwie warita paitɨ pɨranupini,
LEV 16:13 hɨkɨ mana Yawé hɨxie 'ɨkwa witsimu'ɨa taipa pauwiwieni, kɨtsiyari witsimu'ɨa Kakaɨyari ma'axetsie manukananikɨ kakuni hakewa tɨratu 'inɨariyari meyeka hetsie maka. Mɨpaɨ tikayame 'Aruni pɨkamɨni.
LEV 16:14 Mɨpaɨta tiyurieme 'etsiwa tsikeru xuriyaya tihaname, 'etsatana tau manatineikatsie yu'itɨwamekɨ pi'ɨya Kakaɨyari ma'axe manukaname taɨta, hɨxienata 'atahutamexɨa pi'ɨya.
LEV 16:15 »Hikɨ 'anata kwitɨwa tsipu 'uki puwaxiteni 'itiya mawariyari mayani teɨteri memɨteheuyehɨwiyarienikɨ. Xuriyaya panɨ'ɨni 'ixuriki meuwie warita, mɨkɨkɨ yaxeikɨa pɨtiyurieni tsikeru xuriyayakɨ mɨtiuyuri hepaɨ, Kakaɨyari ma'axe pɨ'ɨya heimana meta hɨxienatsie.
LEV 16:16 Mɨpaɨ pɨtiyurieni tuki mɨxɨnarienikɨ meta tita mɨkati'itiyakɨ 'ixaheritsixi teɨteriyari 'inɨari memutitsanaxɨakɨ, mɨpaɨ mepɨteheuyehɨwiyarieni tsepa titakɨ 'axamemɨte'uyuri. Yaxeikɨata katiniyurimɨkɨ 'ixuriki tukiyari hetsiemieme, wahixɨata muwe tita mɨkati'itiyakɨ wahetsiemieme.
LEV 16:17 Xewitɨ 'ixuriki tukiyarita pɨka'ayekani kepauka 'Aruni meutahani mɨxɨnarieni mawariyari wewienike muwayepatsietsie kepauka mɨwayeyanike, mexixi mɨxɨnarieni mawariyari yuhetsiemieme wewiene meta yuniwema, yaxeikɨata yunaime 'Ixaheritsixi wahetsiemieme.
LEV 16:18 »'Aruni wayeyame kwitɨwa memɨxɨnarieni mawari puwewieni mawari taiyame Yawé hɨxie muwetsie. Tsikeru xuriyaya pɨti'ɨni meta tsipu 'uki xuriyaya, mawari taiyame xexuime 'awateya pɨtiwirieni,
LEV 16:19 yu'itɨwamekɨ mawari taiyame pɨtiwirieni 'atahutamexɨa xuriyakɨ. Mɨpaɨ mepatsietɨ mepakɨne me'itiyatɨ 'ixaheritsixi titakɨ memɨkate'itiyakai.
LEV 16:20 »Kepauka 'Aruni mɨtitahayewa memɨxɨnarieni mawariyari wewietɨ tukita muyepatsieta, 'ixuriki kiiyarita meta mawari taiyametsie, manata tsipu 'uki 'ayeniereme kaniyetuamɨkɨ,
LEV 16:21 hikɨ 'Aruni mu'uyatsie putimeni. 'Ixaheritsixi tita 'axamemɨte'uyurikɨ meta 'inɨari memutitsanaxɨakɨ pɨtitahekɨata, tsepa ketititakɨ 'axamɨtiuyurikɨ. Mɨkɨ tsipu naime pɨtititɨni, mepenunɨ'ani 'ɨtsita paitɨ makumawetsie tewi kemɨ'ane hetsiena mɨtiunakixɨ mɨpaɨ mɨtiyurienikɨ.
LEV 16:22 Mɨkɨ tewi tsipu pɨtatuani makumawetsiepai, mɨkɨ naime 'axamɨti'ane pɨranutɨni teɨteri memɨkahakuteitsie paitɨ.
LEV 16:23 »Hikɨ 'Aruni 'Ixuriki tukiyarita heutahame, rinu kemariyari panutihɨna muyepatsietsie heutahanike menakatɨ, muwa piku'eirieni.
LEV 16:24 Mɨkɨ muwa muyepatsietsie hakɨ kaniti'ɨwamɨkɨ meta tawari puyutikemaritɨani. 'Anaketa wayeyame pixatɨani mawari taiyariyari yuhetsiemieme meta teɨteri wahetsiemieme. Mɨxɨnarieni mawariyari mɨpaɨ katiniwewiemɨkɨ yuhetsiemieme meta teɨteri wahetsiemieme.
LEV 16:25 Matsi 'itiya mawariyari wiyayari mawari taiyametsie pɨtitaiya.
LEV 16:26 »Kemɨ'ane mɨhɨritɨarie tsipu yeutapai makumawetsie metatuanikɨ, mɨkɨ yu'ixurikite puti'ekwa meta puti'ɨwa. Mɨpaɨ tiyuriemeke mematiteitsie kaninuamɨkɨ.
LEV 16:27 »Tsikeru temaikɨ 'itiya mawariyari mayeitɨarie meta tsipu 'uki 'itiya mawariyari mayeitɨarie, mɨkɨ xuriya me'ɨiya muyepatsietsie mɨxɨnarieni mawariyari mayanikɨ, mɨkɨ pɨwayetɨkieni teikwariepai, nawiyari waiyari kwitaya pɨtitaiyarieni.
LEV 16:28 Kemɨ'ane mititaiya mɨkɨ yu'ixuriki pɨti'ekwa meta pɨti'ɨwa. Mɨpaɨ tiyurieme 'anake punuani mematiteitsie.
LEV 16:29 »'Ikɨ 'aitsika yuheyemekɨ 'aixɨa mɨ'ane xehetsiemieme payani yaxemɨtekahunikɨ, yunaime xehetsiemieme meta 'ateewa kiekatari: Tamamata tukaritsie 'atahutarieka metseritsie xepɨyuhakieni tixaɨtɨ 'uximayatsika xepɨkatehexeiyani.
LEV 16:30 Mɨkɨ tukaritsie xemɨxɨnarieni mawariyari puyetuiyani xemɨ'itiyanikɨ, Yawé hɨxie xekani'itiyakuni naimekɨ ke'axaxemɨte'uyurikɨ.
LEV 16:31 Xeme xehetsiemieme xeitukari pu'uxipiyatɨni 'ana xepɨyuhakieni. 'Ikɨ 'aitsika yuheyemekɨ 'aixɨa mɨ'ane kanihɨkɨtɨni.
LEV 16:32 »Mawari wewiwame kemɨ'ane manayexeiyarie meta yamɨtiuta'aitɨarie yupaapa 'utɨma mieme mayanikɨ mɨkɨ mɨxɨnarieni mawariyari puwewieni. Mɨkɨ rinu 'ixurikiyari mɨpatsie kananakatɨmɨkɨ,
LEV 16:33 mɨxɨnarieni mawariyari pɨwewieni Waɨkawa Muyepatsietsie mieme meta 'ixuriki Tukiyarita mieme meta mawari taiyame hetsiemieme. Yaxeikɨa meta pɨtiyurieni mawari wewiwamete wahetsiemieme meta kiekatari memɨyutixexeɨriwa wahetsiemieme memɨxɨnarienikɨ.
LEV 16:34 »'Ikɨ 'aitsika yuheyemekɨ 'aixɨa mɨ'ane kanihɨkɨtɨkamɨkɨ yatemɨtekahunikɨ: Xeiwiyari 'aye'axekaku xeimieme mɨxɨnarieni mawariyari xepukuwewiwani yunaitɨ 'ixaheritsixi wahetsiemieme naimekɨ yunaitɨ 'axamemɨteyuriekɨ». Mɨpaɨ katinaye'atɨarieni Yawé Muitsexi kemɨtiuta'aitɨakai.
LEV 17:1 Yawé Muitsexi katiniuta'aitɨani,
LEV 17:2 'Aruni meta niwemama meta 'ixaheritsixi yunaime mɨpaɨ mɨtiwatahɨawekɨ: «'Ikɨ kanihɨkɨtɨni Yawé mɨtati'aitɨa:
LEV 17:3 »Kepauka xewitɨ 'ixaheri tewiyari wakaxi yatɨni muxa meta tsipu, mɨtimawa mematiteitsie yatɨni 'ateewa paitɨ.
LEV 17:4 Mɨkɨ hetsiena pɨrahɨiyani xuriya metayeurikɨ meta mɨkaheihakɨ 'ixuriki tukiyari mɨranutahakitɨretsie mumierienikɨ, muwa mixatɨanikɨ mawari Yawé hetsiemieme mayanikɨ tukieya hɨxie. 'Ayumieme mɨkɨ payeweiyarieni yuteɨterima watsata.
LEV 17:5 'Ikɨ 'aitsika kanihɨkɨtɨni 'ixaheritsixi Yawé memɨ'atɨiriwanikɨ mawari yeuta memɨtiwewiwa. Mawari wewiwame hetsɨa mepi'atɨwani 'ixuriki tukiyari mɨranutahakitɨretsie, Yawé memɨyetuirienikɨ 'aixɨa memɨteyuxeiyani mawariyari mayanikɨ.
LEV 17:6 Mawari wewiwame xuriya pɨtayeurieni mawari taiyame Yawé tipiinieyatsie, 'ixuriki tukiyarita mɨranutahakitɨretsie, meta wiyayari kanititaiyamɨkɨ witsimu'ɨa Yawé minake mɨhɨkɨkɨ.
LEV 17:7 Hatsuakuri mawari mepɨkawaxatɨani yukakaɨyarixi memɨwarexeiya, tsipuri 'ukitsi wahepaɨ me'aneneme memɨwarutiwewi. 'Ikɨ 'aitsika yuheyamekɨ 'aixɨa mɨ'ane kanihɨkɨtɨni mɨkɨ wahetsimieme meta watɨɨriyama.
LEV 17:8 »Kepauka xewitɨ 'Ixaheri tewiyari yatɨni 'ateewa kiekame xehamatɨa muka mawari taiyariyari mɨyetuani yatɨni mawari,
LEV 17:9 xɨka kaheihana 'ixuriki tukiyarita mɨranutahakitɨritsie Yawé mɨxatɨanikɨ, mɨkɨ payeweiyarieni yuteɨterima watsata.
LEV 17:10 »Kepauka xewitɨ 'ixaheritsixi yatɨni 'ateewa kiekame xehamatɨa muka xɨka naime tsepa tita mɨtixuriyaya tikwaka, ne nepɨyeha'ani hepaɨtsitana meta teɨterimama wahetsɨa nekaneyeweiyamɨkɨ.
LEV 17:11 Yunaitɨ memɨte'ayeneniere xuriyakɨ mekanayeneniereni. Ne nekɨmana nepɨxeyetuirie mawari taiyametsie, xemɨxɨnarienikɨ yuxexuitɨ, mɨkɨ xuriyakɨ katiniyɨmɨkɨ xemɨxɨnarienikɨ.
LEV 17:12 'Ayumieme mɨpaɨ nepɨtixekɨhɨawe: Xewitɨ xeme xuriya pɨkakwa'ani, meta 'ateewa kiekame pɨka'itikwani xehetsɨa 'ukaitɨ.
LEV 17:13 »Xewitɨ 'ixaheritsixi yatɨni 'ateewa kiekame xehetsɨa 'ukaitɨ xɨka tixaɨtɨ remieni yeutanaka yatɨni weurai memitikwanikɨ memupitɨarie, mɨkɨ xuriyaya 'ayekuname kwiepa mɨtayeurieni penuteuku,
LEV 17:14 yunaitɨ memɨte'ayeneniere xuriyakɨ mekanayeneniereni. 'Ayumieme yanepɨtixekuhɨawe: Memɨtexɨawe waxuriya xepɨkakwa'ani, yunaitɨ memɨte'ayaneniere xuriyakɨ mekanayeneniereni, kemɨ'ane mitikwani mɨkɨ payeweiyarieni yuteɨterima watsata.
LEV 17:15 »Yunaitɨ 'ixaheritsixi yatɨni 'ateewa kiekame xɨka xewitɨ wai 'utikwani 'ɨrawe 'imieyu yanɨtsɨtɨni heititsanaxɨaku, mɨkɨ yu'ixuriki pɨti'ekwa meta hakɨ pɨti'ɨwa, ka'itiyatɨ puyuhayewa kepauka mɨkɨyɨretsieke 'anakeri 'itiyatɨ payani.
LEV 17:16 Xɨkari yu'ixuriki ka'uti'ekwa meta xɨka ka'uti'ɨwa, mɨkɨ 'axamɨtiuyurikɨ tiuka'eniwatɨ payani».
LEV 18:1 Yawé Muitsexi mɨpaɨ katiniuta'aitɨani,
LEV 18:2 'ixaheritsixi mɨpaɨ mɨtiwatahɨawekɨ: «Ne Yawé xekakaɨyari nekanihɨkɨtɨni.
LEV 18:3 'Ekipitutari yuyeiyari kememɨtehexeiyakai wahepaɨ xepɨkateyurieka, meripaitɨ xematitekaitsie, meta Kanani kiekatari wahepaɨ, ne hakewa hikɨ nemɨxehewitɨtsie. Wa'aitsika xepɨka'anukuweweiyani,
LEV 18:4 matsi ne'aitsikatsie yaxekateneyurikuni meta ne'inɨari niukiyaritsie yaxekatenekahukuni. Ne Yawé xekakaɨyari nekanihɨkɨtɨni.
LEV 18:5 Ne'inɨari niukiyaritsie yaxeketenekahuni meta ne'aitsikatsie, kemɨ'ane memeye'atɨani mɨkɨ tukari mekanipitɨariekuni. Ne Yawé nekanihɨkɨtɨni.
LEV 18:6 »Nixewitɨ 'ahurawa yu'iwa hetsɨa pɨka'aye'axeni hamatɨana mɨkahunikɨ 'ikumayɨanike 'uka yatɨni 'uki. Netsɨ Yawé nekanihɨkɨtɨni.
LEV 18:7 »'Apaapa pepɨkatewiyatsitɨaka, 'amaama hamatɨa pepɨka'ukahupuni pe'ikumayɨanike. Mɨpaɨ pepɨkayɨaneni mɨkɨ kani'amaamatɨni.
LEV 18:8 »'Apaapa 'ɨyaya hamatɨa pepɨka'ukahupuni pe'ikumayɨanike, 'apaapa pepɨkatewiyatsitɨaka.
LEV 18:9 »'Ataru hamatɨa pepɨka'ukahupuni pe'ikumayɨanike, 'apaapa meta 'amaama memeyexei, 'axeikɨa xe'utinunuiwame yatsepa xaɨtsie metinuiwaxɨ.
LEV 18:10 »'Aniwe 'uki nu'aya 'uka hamatɨa pepɨka'ukahupuni pe'ikumayɨanike, meta 'aniwe 'uka nu'aya hamatɨa, 'ekɨ 'akɨmana pemɨ'ananaimaka hepaɨ kani'aneni.
LEV 18:11 »'Apaapa nu'aya yu'ɨyatsie meyexei hamatɨa pepɨka'ukahupuni pe'ikumayɨanike. Pepɨka'itewiyatsitɨaka mɨkɨ pɨ'a'iwa.
LEV 18:12 »'Apaapa taruya hamatɨa pepɨka'ukahupuni pe'ikumayɨanike, 'apaapa pepɨkatewiyatsitɨaka.
LEV 18:13 »'Amaama 'iwaya hamatɨa pepɨka'ukahupuni pe'ikumayɨanike, 'amaama pepɨkatewiyatsitɨaka.
LEV 18:14 »'Apaapa 'iwaya 'uki pepɨkatewiyatsitɨaka, 'ɨyaya hamatɨa pepɨka'ukahupuni pe'ikumayɨanike, karikɨ mɨkɨ kani'ateteitɨni.
LEV 18:15 »Yaxeikɨa 'amu'e hamatɨa pepɨka'ukahupuni pe'ikumayɨanike. 'Aniwe pepɨkatewiyatsitɨaka.
LEV 18:16 »'A'iwa 'ɨyaya hamatɨa pepɨka'ukahupuni pe'ikumayɨanike, 'akɨmana pekani'atewiyatsitɨakamɨkɨ.
LEV 18:17 »Yuhutame 'ukari wahamatɨa pepɨka'ukahupuni pemɨwakumayɨanikɨ maamaya meta niweya meta mama'ɨmama, tatsɨari niweya 'uki nu'aya, yatɨni nu'aya 'uka nu'aya. Mɨkɨ 'ahurawa mekani'iwamarixitɨni, 'ayumieme xɨka 'ikumayɨani waɨkawa 'axakatiniyurimɨkɨ.
LEV 18:18 »Pepɨka'itiwitɨkɨni 'akwe, meta hamatɨana pepɨka'ukahupuni pe'ikumayɨanike mexi 'akuxi 'a'ɨya 'ayeniere, kapa meyuyehekaxɨanikɨ.
LEV 18:19 »Xeime 'ukaratsi hamatɨa pepɨka'ukahupuni pe'ikumayɨanike, mexixi 'akuxi xuriya 'i'axiya.
LEV 18:20 »'Ahepaɨ tewi 'ɨyaya hamatɨa pepɨka'ukahupuni pe'ikumayɨanike, kapa mɨkɨkɨ peka'itiyatɨ pe'uyuhayewakɨ.
LEV 18:21 »Kemɨtitewakɨ 'akakaɨyari kapatsiekame pepɨka'ayeitɨaka, 'aniwe peyetuatɨ Muruki kakaɨyariyari hetsɨa, mawari mɨtataiyarieni mayanikɨ. Ne Yawé nekanihɨkɨtɨni.
LEV 18:22 »'Uki hamatɨa pepɨka'ukahupuni 'uka hamatɨa pemukahupuni hepaɨ. Mɨkɨri mɨxani'eriwa kanihɨkɨtɨni.
LEV 18:23 »Tewatsiekate memɨtexɨawe pepɨkawakumaɨwani. Mɨkɨkɨ peka'itiyatɨ pepɨkahayuyeitɨaka. »Meta yaxeikɨa tewatsiekame 'uka pɨkakumaɨwani. Mɨpaɨri yɨanetɨ 'axapɨ'itɨarieka.
LEV 18:24 »Mɨpaɨ xeteyurietɨ xeka'itiyatɨ xepɨkahayuyeitɨaka, mɨpaɨ mete'uyurieku nuiwarite hikɨ nekaniwarayeweiyamɨkɨ xeme nemɨxenaki'eriekɨ,
LEV 18:25 mɨkɨkɨ kwie yukɨmana 'axapuyuyuri. 'Ayumieme nepuwaru'uximatɨa 'axamemɨte'uyurikɨ, mɨkɨ kwie yuteɨterima kaniwaruhayani.
LEV 18:26 Xeme yaxeketenekahuni ne'inɨari niukiyaritsie meta kenemɨti'aita. Tsepa xeme meta 'ateewa kiekatari xehamatɨa memɨtitei mɨkɨ mɨxani'eriwakɨ mɨpaɨ xepɨkateyurieka,
LEV 18:27 matsi mɨkɨ mɨyamɨti'ane yamekateniyuriekaitɨni 'ikɨ kwieyaritsie memɨtitekai xeme 'ena 'akuxi xeka'axɨawawekaku, kwie 'axa'anetɨ kanayani.
LEV 18:28 Xɨkata xeme kwie ka'itiyakame xe'ayeitɨani, mɨkɨta pɨxehayani nuiwarite kemɨtiwaruhaya hepaɨ hetsiena memukutekai xeme 'akuxi 'ena xeka'axɨawawekaku.
LEV 18:29 »Kemɨ'ane 'ikɨ mɨtixani'eriwakɨ yamɨtiyurieni mɨkɨ kanayeweiyariemɨkɨ yuteɨterima watsata.
LEV 18:30 Xeme yaxeketenekahuni kenemɨti'aita, xeketenehayewani tita mɨtixani'eriwakɨ yeiyari kememɨteyuriekai 'ena kwiepa xeme 'akuxi xeka'axɨawawekaku. Xeka'itiyatɨ xepɨkahayuyeitɨaka mɨkɨkɨ. Netsɨ Yawé xekakaɨyari nekanihɨkɨtɨni».
LEV 19:1 Yawé Muitsexi katiniuta'aitɨani,
LEV 19:2 'ixaheritsixi memuyutixexeɨriwa mɨtiwataxatɨanikɨ 'ipaɨ mɨtiwatahɨawekɨ: «Xekenepatsieka, ne Yawé xekakaɨyari nemɨpatsiekɨ.
LEV 19:3 »Xeme yunaitɨ yumaamama meta yupaapama xeketeniwareuyehɨwirieka. 'Uxipiya tukari xekena'eriwani ne Yawé xekakaɨyari nekanihɨkɨtɨni.
LEV 19:4 »Kakaɨyarixi tixaɨtɨ memɨkatehɨkɨ wahetsɨa xepɨkahekɨkani, kakaɨyarixi tepɨakɨ memuwewiyatɨka xepɨkawawewieka. Ne Yawé xekakaɨyari nekanihɨkɨtɨni.
LEV 19:5 »Kepauka Yawé mawari 'aixɨa memɨteyuxeiyanikɨ mawariyari xemɨteyetuirieni, kemɨreuyewetsekɨ xeketeneuyuri mɨkɨ Yawé 'aixɨa 'anemekɨ mitanaki'erienikɨ.
LEV 19:6 Xekeneutikwa'i kepauka xemiwewienitsie yatɨnita 'uxa'arieka. Hairieka tukaritsie mieme muyuhayewa xekanitataiyakuni.
LEV 19:7 Xɨka xewitɨ hairieka tukaritsie 'itikwani, mɨkɨ mawari pɨkatanaki'eriwa, mɨxani'eriwa pɨhɨkɨtɨniri.
LEV 19:8 Xɨka xewitɨ hairieka tukaritsie 'itikwani, katinika'eniexɨamɨkɨ 'axamɨtiuyurikɨ tita mɨtipatsie Yawé hetsiemieme kapatsiekame mayeitɨakɨ. Mɨkɨ yuteɨterima watsata payeweiyarieni.
LEV 19:9 »Kepauka 'itsanaxa maye'anitsie, naime xepɨkaka'itsanani yuwatsiyata timieme meta mɨayeyari naime xepɨkakapineni mana xekeneuhayewa.
LEV 19:10 »Tawari 'akuxi kaxie xatsimuyaritsie 'imatɨrieka mieme xepɨkawautɨweni takari meta mɨkaxɨrɨwe pepɨkakuteɨxɨni. Tixaɨtɨ memɨkatehexeiya keniwaruhayewi meta 'ateewa kiekatari. Ne Yawé xekakaɨyari nekanihɨkɨtɨni.
LEV 19:11 »Pepɨkatinawayani. »Xepɨkateyu'itaiyani. »'Ahepaɨ tewi pepɨkati'irɨwiyani.
LEV 19:12 »Yakɨ xeikɨa pepɨka'ahɨritɨaka kenemɨtitewakɨ, meta kenemɨtitewakɨ 'akakaɨyari kapatsiekame pepɨka'ayeitɨaka. Ne Yawé nekanihɨkɨtɨni.
LEV 19:13 »'Ahepaɨ tewi pepɨkananaimaka, meta waɨriyarika pepɨkatikunawairiwani tita mɨrexeiya. »Ti'uximayatame tuminieya pe'a'ɨtɨ 'uxa'ariekake pepɨka'iku'ɨitɨwani.
LEV 19:14 »Mɨkaheu'ena 'axapepɨkatikuhɨaweni, mɨkaheuniere hɨxie pepɨkatiuyetsani pemeikahɨanikɨ, matsi 'akakaɨyari kenayemakaka. Ne Yawé nekanihɨkɨtɨni.
LEV 19:15 »'Ekɨ heitseriemekɨ yaketinekuxatani, xeime xeikɨa pepɨkaparewimɨkɨni tixaɨtɨ memɨkatehexeiya meta xikutsixi wahetsie, matsi kemɨtiheitseriekɨ ketineyurieneni yunaime wahetsie.
LEV 19:16 »'Ateɨterima watsata 'axaniuki pepɨkawewieka, meta 'ahepaɨ tewi pe'itatɨ pepɨkahekɨatani. Ne Yawé nekanihɨkɨtɨni.
LEV 19:17 »'A'iwa 'a'iyaritsie pepɨka'uxiwe'erieka, matsi 'ahepaɨ tewi keneutati'a hahekɨakamekɨ kapa petiuka'eniexɨanikɨ mɨkɨ ke'axamɨtiuyurikɨ.
LEV 19:18 »'Ahepaɨ tewi pepɨkatikɨhɨwiriwani kemumatsi'uyurikɨ, meta haxɨa pepɨka'utani hetsiena mieme. 'Ahepaɨ tewi kenenaki'erieka 'ekɨ kepemɨti'anaki'erie hepaɨ. Ne Yawé nekanihɨkɨtɨni.
LEV 19:19 »Yaxeketenekahuni ne'aitsikatsie: »Tewaxi hipame yɨkɨ memɨ'anene wahamatɨa xepɨkawaweiyatsitɨatɨweni. »Yuwatsiyata huta 'imɨariyari yɨkɨ'anenekamekɨ xepɨka'etɨweni. »'Ixuriki hiru hutame yɨkɨ 'anenemekɨ wewiyakame xepɨka'anakatɨkɨni.
LEV 19:20 »Xɨka xewitɨ 'uki, 'uka waɨriyarika ti'uximayatame hamatɨa 'ukahuni xeime hamatɨa memuyutiwitɨnikekaikɨ yametekuxatakaku, matsi xɨka 'akuxi kareyukatuiyawekaitɨni kaxɨnariewekaitɨni, mɨkɨ yuhutatɨ yamepɨtepitɨarieni kemɨreuyewetse xeikɨa memɨteka'eniexɨanikɨ, matsi mepɨkakwi'iwa mɨkɨ 'uka mɨkatatuiyawekaikɨ 'akuxi.
LEV 19:21 Mɨkɨ 'uki kaneuyeweka Yawé muxa 'uki mawariyari mɨyetuirienikɨ hetsiena mɨrahɨiyakɨ. 'Ixuriki tukiyarita mɨranutahakitɨretsie kanenuhanimɨkɨ,
LEV 19:22 muwa mawari wewiwame 'itiya mawariyari kaniwewimɨkɨ Yawé hɨxie 'axamɨti'ane hepaɨtsita, Mɨpaɨ mɨkɨ ke'axamɨtiuyurikɨ pɨreuyehɨwiyarieni.
LEV 19:23 »Kepauka xeme mɨkɨ kwieyaritsie xemɨ'axɨani xɨka kɨyexi 'ikwaxi mɨkwaiwa mukaxuawitɨwa xete'uka'iteɨrita, haika wiyari 'ikwaxiyari xepɨkatikwani matsi ka'itiyakame xekanayeitɨakakuni.
LEV 19:24 Nauka wiyaritsieke naitɨ 'ikwaxi Yawé pɨxatɨarieni mawari mayanikɨ Yawé pamɨpariyutsi me'ipitɨatɨ,
LEV 19:25 'auxɨwirieka wiyarike 'ikwaxiyari xemɨtikwanikɨ xepɨyɨwaweni. Mɨpaɨ xeteyurieyu waɨkawa pɨtiukaxuxuawereni. Ne Yawé xekakaɨyari nekanihɨkɨtɨni.
LEV 19:26 »Tixaɨtɨ rayexureme xepɨkatekwaka. »Kakaɨyarixi memɨwaruta'iwawiya kemɨtiyɨnikɨ mɨpaɨ xepɨkateyurieka meta xemɨteyukewaiyanikɨ.
LEV 19:27 »'Akɨpa pepɨkahaxitɨyeikani xikɨraɨye manuyemarekɨ meta 'amɨxiya 'a'ayekwaitsiemieme kɨtsiena pepɨkahanuyexikani.
LEV 19:28 »'Awaiyaritsie pepɨka'atixitekeni mɨkite wahetsiemiemekɨ, meta pepɨkareu'utɨarieka 'anawiyaritsie. Ne Yawé nekanihɨkɨtɨni.
LEV 19:29 »Yuniwema waɨriyarika xepɨkawapitɨaka tuminikɨ memukumayɨiwanikɨ, kapa yunaitɨ teɨteri hipame kakaɨyarixi mewarayexeiyatɨ me'akɨnekɨ meta kwiepa 'axamɨti'anekɨ 'akunɨni.
LEV 19:30 »'Uxipiya tukari xekena'eriwani, netuki xekenayexeiyani. Ne Yawé nekanihɨkɨtɨni.
LEV 19:31 »Mɨkite wahamatɨa memɨtekuxata wahetsɨa xepɨkakɨnetɨweni, hipame 'iyarite memuwakɨhɨawe xepɨkawakuwautɨweni matsi xeka'itiyatɨ xepakɨne mɨkɨ wahekɨ. Ne Yawé xekakaɨyari nekanihɨkɨtɨni.
LEV 19:32 »'Amɨyumate pexeiyame keneutakexi. »'Ukirawetsixi 'aixɨa ketinewaxeiyani. »'Akakaɨyari kenayemakaxeni. Ne Yawé nekanihɨkɨtɨni.
LEV 19:33 »Xɨka xewitɨ 'ateewa kiekame kiekaritsie xematiteitsie nuame mana hetayerɨni, xepɨkahei'uximatɨaka.
LEV 19:34 Matsi 'aixɨa xeketenexeiyani xewitɨ xehetsɨa mɨmiemetɨni hepaɨ. Xekenenaki'erika xeme kexemɨteyunaki'erie, mɨpaɨ xetemaitɨ xemeta kɨkamete 'Ekipitutsie xemɨhɨkɨtɨkaikɨ. Ne Yawé 'ixaheritsixi wakakaɨyari nekanihɨkɨtɨni.
LEV 19:35 »Ti'inɨnɨatame tiyukwamanamekɨ pepɨkati'inɨatani, kemautatewakɨ, meta kemɨrahete meta kepaɨmetɨ mɨrakanakekɨ.
LEV 19:36 Mɨranuyewɨwɨtɨwa kenexeiyani kemɨrahete 'aixɨa reku'inɨaritɨkaime. Ne Yawé xekakaɨyari nekanihɨkɨtɨni, 'Ekipitu nemɨxe'ayewitɨ.
LEV 19:37 »Matsi naime ne'aitsikatsie yaxeketenekahuni. Yaxeketeneyurieka naime tita nemɨti'aita. Ne Yawé nekanihɨkɨtɨni».
LEV 20:1 Yawé Muitsexi mɨpaɨ katiniuta'aitɨani
LEV 20:2 'ixaheritsixi mɨpaɨ mɨtiwatahɨawekɨ: «Yunaitɨ 'ixaheritsixi meta 'ateewa kiekatari 'Ixaheri kwieyaritsie memɨtiteni xɨka xewitɨ yuniwe mɨtataiyarienikɨ yetuani, Muruki kakaɨyariyari mawarieya mayanikɨ. Mɨkɨ kanimieriemɨkɨ. Kiekatari memɨyutixexeɨriwa mepimieni tetexikɨ me'itituaxatɨ.
LEV 20:3 Ne mɨkɨ hepaɨtsita nepɨyeha'ani meta teɨterimama watsata nepeyeweiya, xeime yuniwe mɨyetuakɨ mɨtataiyarienikɨ Muruki kakaɨyariyari mawarieya mayanikɨ, ka'itiyakame mayeitɨakɨ netuki muyepatsieta meta kenemɨtitewakɨ nekapatsiekame mɨnetsi 'ayeitɨakɨ.
LEV 20:4 »Xɨka kiekatari memuyutixexeɨriwa 'atsimekate'uyurieni mɨkɨ tewi hepaɨtsita yuniwe xeime mɨyetuakɨ Muruki hetsɨa, meta xɨka meka'imieni,
LEV 20:5 ne mɨkɨ nepaye'unieka meta tɨɨriyamama, meta nepeyeweiya teɨterimama watsata meta yunaime teɨteri Muruki hamatɨana memukahini hepaɨ memɨyɨ me'eyexeiyatɨ.
LEV 20:6 »Yaxeikɨata tsiere nepɨwaraye'unieka kemɨ'ane mɨkite wahamatɨa memɨtekuxata meta hipame 'iyarite memɨwakɨhɨawe wahetsɨa memɨkɨnetɨwe wahepaɨtsita meta mewaranukuweiyame 'iyarite wahamatɨa memukahini hepaɨ mekaniyɨakakuni. Teɨterimama watsata nekaniwarayeweiyamɨkɨ.
LEV 20:7 »Nehetsɨa xekeyeyu'itieka, meta xekenepatsieka, netsɨ Yawé xekakaɨyari nekanihɨkɨtɨni.
LEV 20:8 »Yaxeketenekahuni ne'aitsikatsie xekenaye'atɨaka. Ne Yawé, nemɨxepata nekanihɨkɨtɨni.
LEV 20:9 »Xɨka xewitɨ yupaapa 'axatiutahɨawe meta yumaama, mɨkɨ ke'umierieni: yupaapa yumaama hepaɨtsita 'axamutayɨkɨ, mɨkɨ mɨmierienikɨ hetsiena pɨtinakeni.
LEV 20:10 »Xɨka xewitɨ yuhepaɨ tewi 'ɨyaya 'ukumayɨani, mɨkɨri yuhutatɨ mekanikwi'iwakuni 'uki meta 'uka.
LEV 20:11 »Xɨka xewitɨ yupaapa 'ɨyaya hamatɨa 'ukahuni, yupaapa kanitewiyatsitɨaka. 'Uki meta 'uka mepɨkwi'iwa, mɨyamemɨte'uyurikɨ wahetsie pɨtinakeni memɨkwi'iwakɨ.
LEV 20:12 »Xɨka xewitɨ yumu'e hamatɨa 'ukahuni, 'uki meta 'uka mekanikwi'iwakuni. Waɨkawamekɨ 'axamemɨte'uyurikɨ, mɨyamemɨte'uyurikɨ wahetsie pɨtinakeni memukwi'iwakɨ.
LEV 20:13 »Xɨka xewitɨ 'uki hamatɨa 'ukahuni, 'uka hamatɨa mukahuni hepaɨ, mɨkɨri mɨxani'eriwakɨ memɨte'uyuri yuhutatɨ mekanikwi'iwakuni, wahetsie pɨtinakeni memɨkwi'iwakɨ.
LEV 20:14 »Xɨka xewitɨ maamaya meta niweya mame warukumayɨani, mɨkɨri waɨkawa 'axamepɨte'uyuri. Mɨkɨ yuhaikatɨ mekanititaiyariekuni, tawarita xetsata 'ikɨ 'axamɨti'ane mɨkatixuawenikɨ.
LEV 20:15 »Xɨka xewitɨ 'ukitɨtɨ titewatsiekame 'ukumayɨani, mɨkɨ ke'umierieni meta yaxeikɨa tewatsiekame kanimieriemɨkɨ.
LEV 20:16 »Xɨka xewitɨ 'ukatɨtɨ tewatsiekame 'ikumayɨani, mɨkɨ yuhutatɨ mepɨkwi'iwa wahetsie pɨtinakeni memɨkwi'iwakɨ.
LEV 20:17 »Xɨka xewitɨ 'ahurawa yu'iwa 'ukumayɨani, mɨkɨri tewiyɨkɨmekɨ katiniyurimɨkɨ yuhutatɨ mɨirikɨa mekananuhapaniekuni. Yu'iwa kaniutewiyatsitɨani, mɨyamutiuyurikɨ katinika'eniexɨamɨkɨ ke'axamɨtiuyurikɨ.
LEV 20:18 »Xɨka xewitɨ xeime 'uka xuriya 'i'axiyakaku hamatɨa 'ukahuni 'ikumayɨani, mɨkɨ mɨtiuhanitsitɨa matsiɨkɨme kanayeitɨani, yaxeikɨata mɨkɨ 'uka kaniyuhekɨata yuxuriya muhanitsitɨakɨ. Mɨkɨ yuhutatɨ yuteɨterima watsata mepayeweiyarieni.
LEV 20:19 »'Atetei 'apaapa meta 'amaama 'iwaya hamatɨa pepɨka'ukahupuni, mɨkɨri 'ahurawa 'a'iwa pekanitewiyatsitɨaka, mɨkɨ yuhutatɨ mekatenika'eniexɨakuni ke'axamemɨte'uyurikɨ.
LEV 20:20 »Xɨka xewitɨ yutetei hamatɨa 'ukahuni, yutatatsi kanitewiyatsitɨaka, mɨkɨ yuhutatɨ mekatenika'eniexɨakuni ke'axamemɨte'uyurikɨ: nuiwari mekawaraxeiyame mekanikwikuni.
LEV 20:21 »Xɨka xewitɨ yumatsika 'ɨyaya waɨriyarika 'ipitɨatɨ 'ikumayɨani, mɨkɨri ka'itiyakame pɨrayeitɨa yumatsika hepaɨtsita: yu'iwa kaniutewiyatsitɨani mɨkɨri yuhutatɨ yunuiwarima mewarexeiyatɨ mepɨka'akɨne.
LEV 20:22 »Naime ne'aitsikate xekenaye'atɨaka meta ne'inɨari niukiyarite. Yaxeketenekahuni, kapa kwie nemɨxeyetuirieni mana xemetitenikɨ xe'uhayanikɨ.
LEV 20:23 Mɨkɨ nuiwarite kememɨteyurie xewa'ɨketɨ xepɨka'u'uwani xeme nexenaki'erietɨ nemuwarayeweiya. Mɨkɨ naime mɨpaɨ mekateniuyurieni, ne mɨkɨ nekaniwarutixani'erieni.
LEV 20:24 Matsi xeme nekatinixekɨhɨaweni: “Ne mɨkɨ kwie nuiwarite mematitekaitsie nepɨxeyetuirieni, kwie retsi meta xiete waɨkawa maxɨawetsie. Ne nekɨmana nepɨxeyetuirieni xehetsie mɨtinakenikɨ”. »Ne Yawé xekakaɨyari nekanihɨkɨtɨni, hipame nuiwaritetsie wahetsɨa yɨkɨ xe'aneneme nemɨxe'ayeitɨakɨ.
LEV 20:25 'Ayumieme, xemeta yukɨ me'aneneme xekeniwarayeitɨaka yeutari memɨtexɨawe memɨ'itiyatɨka meta memɨka'itiyatɨka, meta memɨte'awɨwawe watsata memɨ'itiyatɨka meta memɨka'itiyatɨka. Xemɨxani'eriwa xepɨka'ayuyeitɨaka mɨkɨ memɨtexuawe yeutari wahekɨ, memɨte'awɨwawe meta tsepa ketita yutawima mɨtikuyeikakɨ, ne memɨka'itiyakɨ mɨkɨ nepɨxe'u'inɨaritɨa.
LEV 20:26 Xeme xekenepatsieka, ne Yawé nemɨpatsiekɨ, ne yukɨpɨta xe'aneneme nekaxenayeitɨani hipame nuiwarite watsata, nehetsɨa miemete xemɨhɨkɨtɨnikɨ.
LEV 20:27 »Xɨka xewitɨ 'uki yatɨni 'uka mɨkite wahamatɨa tikuxatani meta hipame 'iyarite muwakɨhɨawe, mɨkɨ kanimieriemɨkɨ. Tetexikɨ tituaxiexɨame kanimɨmɨkɨ, hetsiena mɨtinakekaikɨ mumierienikɨ».
LEV 21:1 Yawé Muitsexi katiniuta'aitɨani mawari wewiwamete mɨpaɨ mɨtiwatahɨawekɨ, 'Aruni niwemama: «Xeka'itiyatɨ xepɨkahayuyeitɨaka mɨkite yukiekaritsie xewakumaɨwatɨ,
LEV 21:2 matsi mɨkɨ xeikɨa mepɨyɨwaweni 'iwaya 'aurawatanaka, maamaya, paapaya, nu'aya 'uki, niweya 'uka, xɨka xewitɨ 'umɨni 'ahurawa 'iwaya
LEV 21:3 yatɨni 'iwaya 'uka kawikietɨ hetsɨana muka.
LEV 21:4 Mɨkɨ memanuyetei memɨhɨkɨkɨ yukiekaritsie, meka'itiyatɨ mepɨkahayuyeitɨaka meta mepɨkayutsewiximaka.
LEV 21:5 »Mawari wewiwamete yumu'utsie mepɨkayukaxikani, yumɨxiya kɨtsie yu'ayekwaitsie mieme mepɨkahataxikani meta yuwaiyaritsie mepɨkayutixitekeni.
LEV 21:6 Kaneuyeweka memɨpatsiekakɨ yukakaɨyari hetsiemieme, meta mɨkɨ kemɨtitewa kapatsiekame mepɨkahayeitɨwani. Mɨkɨ mekanihɨkɨtɨni 'imikieri taipa warɨkariekame Yawé memɨteyetuiriwa, paa yukakaɨyari hetsiemieme hepaɨ mekani'aneneni. 'Ayumieme mekanipatsiekakuni.
LEV 21:7 »Xewitɨ tɨma mawari wewiwame xeime tuminikɨ mukumayɨiwa pɨkatiwitɨkɨni, yatɨni 'eiriwakame, meta xeime 'uka mayɨiyakame, yukakaɨyari hetsiemieme mɨpatsiekɨ.
LEV 21:8 Patsiekame kenayeitɨaka, mɨkɨ 'akakaɨyari paa mɨyetuiriwakɨ. 'Ahetsiemieme kanipatsiekamɨkɨ, ne Yawé nemɨpatsiekɨ, xeme xepatsiekame nepɨxe'ayeitɨa.
LEV 21:9 »Mawari wewiwame niweyatɨtɨ tuminikɨ mukumayɨiwa xɨka 'ayuyeitɨani mɨkɨ yɨkɨmana kapatsietɨ payuyeitɨani yaxeikɨatatsiere yupaapa kapatsiekame kanayeitɨamɨkɨ. Kaneuyeweka 'ayenieretɨ mɨtataiyarienikɨ.
LEV 21:10 »Kemɨ'ane manayexeiyarieni yu'iwama watsata mawari wewiwamete tiwa'aitɨwame mayanikɨ, mu'uyatsie hatseiti mɨtiyupata mukawiriyarie, meta kemɨ'ane mawari wewiwamete wakemari manakatɨnikɨ mɨyetuiriyarie, 'aixɨa reyutsiketɨ puyeikani meta yukamixa pɨkaheukatsanani.
LEV 21:11 »Kaxari muyekatsie tɨma pɨkaheutahakeni. »Ka'itiyatɨ pɨkahayuyeitɨaka, yupaapakɨ meta yumaamakɨ.
LEV 21:12 »Tukita pɨkawayeyeikani kapa kapatsiekame yukakaɨyari tukieya 'ayeitɨanikɨ, mɨkɨ mɨpatsienikɨ hatseiti mɨtiyupata 'ukawiriyarieka manayexeiyariekɨ yukakaɨyaritsie mieme. Ne Yawé nekanihɨkɨtɨni.
LEV 21:13 »'Uka mɨtiwitɨni 'ɨyaya mayanikɨ pɨkamayɨiyaka.
LEV 21:14 Meta wiura pɨkatiwitɨkɨni metatsiere 'eiriwakame, yaxeikɨata tuminikɨ mukumayɨiwa. Matsi memakuteitsie kiekame mɨkamayɨiya kanitiwitɨmɨkɨ,
LEV 21:15 kapa mekapatsiekame yunuiwari warayeitɨanikɨ yuteɨterima watsata. Ne Yawé nekanihɨkɨtɨni nemɨxepata».
LEV 21:16 Yawé Muitsexi mɨpaɨ katiniuta'aitɨani
LEV 21:17 'Aruni mɨpaɨ mɨtitahɨawekɨ: «Xewitɨ 'anuiwaritsiemiemete xɨka yuwaiyaritsie 'aixɨa ka'aneni mɨkɨ pɨkayɨweni 'ahurawa muyanikɨ yukakaɨyari hetsɨa paa mawariyari mɨyetuanikɨ.
LEV 21:18 Tikuyetɨ yuwaiyaritsie pɨkayɨweni 'ahurawa muyanikɨ mɨpaɨ 'anetɨ: kaheunieretɨ, 'uti'ɨtsaiwatɨ, yɨhɨxie kanɨrietɨ, meta waiyarieyatsie reuyewetɨkaikaku,
LEV 21:19 'ɨkateya meta mamateya 'akamumurikaku,
LEV 21:20 'anatutsitɨ meta 'etsi'utewitɨ, meta heunerɨitsietɨ yatɨni haiya xetatɨ mukumarike hexeiyatɨ, hɨxitana tiukuturekaku, yatɨni 'ataripiyatɨ.
LEV 21:21 Mawari wewiwame 'Aruni nuiwarieya xɨka xewitɨ mɨkɨ kwiniya mɨpaɨ 'aneme hexeiyani pɨkayɨweni 'ahurawa muyanikɨ Yawé 'imikieri taipa warɨkariekame mɨwewirienikɨ. Meta pɨkayɨweni paa mawariyari yukakaɨyari mɨyetuirienikɨ.
LEV 21:22 Kaniyuwemɨkɨ xeikɨa paa mawariyari meta 'ikwai mɨpatsie meta waɨkawa mɨpatsietɨka mɨtikwanikɨ,
LEV 21:23 mɨkɨ kwiniya mexeiyakɨ 'ixuriki meuwieta paitɨ pɨkaheutahani meta mawari taiyametsie 'ahurawa pɨka'uyani, kapa netuki kapatsiekame 'ayeitɨakakɨ. Ne Yawé nekanihɨkɨtɨni mawari wewiwamete nemɨwapata».
LEV 21:24 Muitsexi 'ikɨ naime 'Aruni meta niwemama yaxeikɨata yunaime 'ixaheritsixi katiniwarutaxatɨani.
LEV 22:1 Yawé Muitsexi mɨpaɨ katiniuta'aitɨani
LEV 22:2 'Aruni meta niwemama mɨpaɨ mɨtiwatahɨawekɨ: «'Aixɨa 'anemekɨ meketeyurieka waɨkawamekɨ me'eyexeiyatɨ 'ixaheritsixi mawari mɨpatsie memɨnetsiwewirie, kapa kenemɨtitewakɨ nekapatsiekame menetsi'ayeitɨanikɨ. Ne Yawé nekanihɨkɨtɨni».
LEV 22:3 Yaxeikɨata mɨpaɨ katinita'aitɨani mɨpaɨ mɨtiwatahɨawekɨ: «Xɨka xewitɨ 'Aruni nuiwarieya ka'itiyatɨ mawari 'aurie 'ahurawa 'uyani 'ixaheritsixi Yawé memɨyetuiriwatsie, mɨkɨ nehɨxie payeweiyarieni. Ne Yawé nekanihɨkɨtɨni.
LEV 22:4 »Xɨka xewitɨ 'Aruni nuiwarieya tixaɨtɨ mɨtiyuwiriwekɨ yuwaiyaritsie tikuyeni, yatɨni tiuhanitsitɨaka mɨkɨ pɨtihayewa mawarite mɨtipatsietɨka tikwatɨ, kepauka muyu'itienitsieke. Xɨka xewitɨ tixaɨtɨ kati'itiyatɨ timɨkitɨ hetsiena reutawereyu tixaɨtɨ tiumayɨani yatɨni tiuhanitsitɨakame,
LEV 22:5 yatɨni yeuta memɨtexuawe, yatɨni tewi ka'itikayame, tsepa titakɨ memɨkate'itiyatɨka,
LEV 22:6 mɨkɨ ka'itiyatɨ kaniyuhayewamɨkɨ kepauka mɨkɨyɨretsieke. 'Ayumieme, mawari mɨpatsie pɨkatikwani. Hakɨ kaniti'ɨwamɨkɨ,
LEV 22:7 tau makayunetsieke 'itiyatɨ puyuhayewa. 'Anakeri kaniyɨwemɨkɨ mawari mɨpatsie mɨtikwanikɨ, mɨkɨ mɨ'ikwaiyakɨ.
LEV 22:8 Tixaɨtɨ timɨkitɨ titaxeiyarieyu pɨkatikwaka yatɨni tiyukwa'ame 'itexierieya, kapa ka'itiyatɨ 'ayanikɨ. Ne Yawé nekanihɨkɨtɨni.
LEV 22:9 »Mawari wewiwamete yameketekahuni ne'aitsikatsie, mɨpaɨ 'axamepukateyurieni meta mepɨkakwini kapatsiekame nemawari me'ayeitɨame. Ne Yawé nekanihɨkɨtɨni, mawari wewiwamete nemɨwapata.
LEV 22:10 »Xewitɨtɨma mawari wewiwamete watɨɨriyama wahetsie kamiemetɨtɨ mawari mɨpatsie mɨtikwani pɨkayɨweni, meta xewitɨ mawari wewiwame kiita 'ayekaitɨ, metatsiere ti'uximayatsiriwame.
LEV 22:11 Matsi xeikɨa waɨriyarika ti'uximayatame mawari wewiwame minanai pɨyɨweni mitikwanikɨ, metatsiere waɨriyarika ti'uximayatame kiena mutinuiwaxɨ.
LEV 22:12 Xɨka mawari wewiwame niweya 'uka xeime mawari wewiwame kahɨkɨtɨme 'utiwitɨni, pɨkayɨweni mawari memɨyetuiriyarɨwa 'imikieri 'aixɨa mɨ'anene mɨtikwanikɨ.
LEV 22:13 Matsi xɨka kɨnaya 'umɨni yatɨni 'uku'eiriwa nunutsi meka'ayexeiyawawetɨ, mɨkɨ punuani yupaapa hetsɨa yaxeikɨa muyuxewini hepaɨ, 'ana pɨyɨweni paapaya tita mɨtikwa'a mitikwanikɨ. Matsi kemɨ'ane mɨkanuiwarieya pɨkapitɨarie mitikwanikɨ.
LEV 22:14 »Xɨka xewitɨ 'atsikatimaitɨ mawari mɨpatsie 'utikwani, mɨkɨta mawari pɨyetuani 'auxɨwimeyaritsie mieme tawari xei'inɨariyari kaniyetuamɨkɨ.
LEV 22:15 »Mawari wewiwamete mawari mɨpatsie kapatsiekame mepɨka'ayeitɨaka 'ixaheritsixi Yawé memɨyetuiriwa,
LEV 22:16 'ayumieme xɨka memitikwanikɨ hipame mewarupitɨani yuhetsie 'axamɨti'ane mepɨte'ahɨani peuyeweka mɨrayukatuani mawariyari memɨyetuanikɨ. Ne Yawé nekanihɨkɨtɨni nemɨxepata».
LEV 22:17 Yawé Muitsexi mɨpaɨ katiniuta'aitɨani
LEV 22:18 'Aruni mɨpaɨ mɨtiwatahɨawekɨ meta niwemama meta yunaime 'ixaheritsixi: «Xɨka xewitɨ xeme 'ixaheritsixi yatɨni 'ateewa kiekame 'Ixaheri kwieyaritsie 'ukaitɨ, Yawé mawari taiyariyari yetuirieni kemutayɨ raye'atɨanike yatɨni kemɨtiyuwaɨriya mawariyari,
LEV 22:19 mɨkɨ mɨtanaki'eriwakɨ tewa 'ukitɨme 'aixɨa 'aneme kaniyetuiriemɨkɨ, tuuru, muxa, yatɨni tsipu.
LEV 22:20 Xeime tewa 'axa'aneme xepɨka'ixatɨaka, mɨpaɨ 'anekame xepɨkatanaki'eriyarieni.
LEV 22:21 »Xɨka xewitɨ, kemutayɨ mɨraye'atɨanikɨ yatɨni kemɨtiyuwaɨriya mawariyari Yawé yetuirieni tuuru yatɨni muxa 'aixɨa memɨteyuxeiya mawariyari mayanikɨ, mɨkɨ 'aixɨa pɨ'aneni mɨtanaki'eriwakɨ.
LEV 22:22 Tewaxi yawe mepɨkayetuiriwani mawari taipa warɨkariekame mayanikɨ mekaheuneniereme, me'uti'ɨtsaiwame, me'ɨkamɨmɨrime, meheu'etsatɨkaime, meheunerɨitsietɨkaime, meta haiya xetatɨ kumarikeme wanawiyaritsie mehexeiyame. Mɨpaɨ me'anenekame mawari taiyametsie xepɨkawayetuayani.
LEV 22:23 Kemɨtiyuwaɨriya mawariyari mayanikɨ xeikɨa xepɨyɨwaweni xemiyetuanikɨ xeime tuuru yatɨni muxa tsepa 'etsihawekame, peru kepemutayɨ pemɨraye'atɨanikɨ mɨpaɨ 'anetɨ mawari pɨkatanaki'eriwa.
LEV 22:24 »Yawé xeime xepɨkayetuiriwani memɨtexuawe 'ipuriteya tiukwinitɨarieyu, pɨratsietɨkaikaku, haxitekietɨkaime yatɨni hatsatsanime. Yukwietsie mɨpaɨ xepɨkateyurieka.
LEV 22:25 'Ateewa kiekatari xɨka mɨpaɨ me'aneneme mewayetuayani xepɨkawanaki'eririeka, 'iyetuanike xekakaɨyari 'ikwaiya mayanikɨ. Mɨkɨ 'axamemɨ'anenekɨ xepɨkatanaki'eriyarieni».
LEV 22:26 Yawé Muitsexi mɨpaɨ katiniutahɨawe:
LEV 22:27 «Kepauka tsikeru mɨtinuiwa, yatɨni muxa yatɨni tsipu nunutsi, mɨkɨ pɨyuhayewa yumaama hamatɨa 'atahuta tukari. 'Atahaika tukari meutiyune Yawé pitanaki'erieni mawari taipa warɨkariekame mɨyetuiyani mayanikɨ.
LEV 22:28 »Xeitukariyaritsie mieme xeime wakaxi meta xeime muxa meyuniwematɨkaime xepɨkawaranutixitekeni.
LEV 22:29 »Kepauka Yawé xeime mawari xemɨyetuirieni pamɨpariyutsi xemipitɨakɨ, 'aixɨa 'anemekɨ xeketeneuyuri xemɨtanaki'eriyarienikɨ.
LEV 22:30 Mɨkɨ tukaritsie xeikɨa xekanitikwaikuni, xepɨka'ikuhayeikawani 'uxa'arieka mieme mayanikɨ. Ne Yawé nekanihɨkɨtɨni.
LEV 22:31 »Yaxeketenekahuni ne'aitsikatsie mɨpaɨ xeketeneyurieka. Ne Yawé nepɨhɨkɨ.
LEV 22:32 »Kenemɨtitewakɨ nekapatsiekame xepɨkanetsi'ayeitɨwani matsi xekenenetimati nemɨpatsiekɨ 'ixaheritsixi watsata. Ne Yawé nekanihɨkɨtɨni nemɨxepata.
LEV 22:33 Ne 'Ekipitu nekaxenayehapani xekakaɨyari nemayanikɨ. Ne Yawé nekanihɨkɨtɨni».
LEV 23:1 Yawé Muitsexi katiniuta'aitɨani
LEV 23:2 'ixaheritsixi mɨpaɨ mɨtiwatahɨawekɨ: «'Ikɨ 'ixɨararite pɨhɨkɨ ne nemɨxe'utawewiri, xeme xemɨwakuxaxatɨwanikɨ patsiekamekɨ memuyukuxexeɨriwanikɨ nehetsiemieme. Ne Yawé 'ikɨ nemɨxe'utiwewirikɨ.
LEV 23:3 »'Ataxewime tukari xeikɨa xepɨte'uximayaka, matsi 'atahutarieka tukariyaritsie 'uxipiya tukari kanihɨkɨtɨkamɨkɨ, mɨkɨ tukaritsie 'ixɨarari patsiekamekɨ memuyukuxexeɨriwa nehetsiemieme pɨhɨkɨtɨni, 'ana tixaɨtɨkɨtɨma xepɨkate'uximayaka. Tsepa xeme hakewa xemetiteni, xawati kanipatsiekamɨkɨ Yawé hetsiemieme.
LEV 23:4 »'Ikɨ 'ixɨararite kanihɨkɨtsixitɨni Yawé mɨxe'utawewiri, patsiekamekɨ memuyukuxexeɨriwa hetsiemieme xeme xepikuxatani xexuitɨ tukari mɨka'inɨaritɨkatsie:
LEV 23:5 »Patsikwa Yawé hetsiemieme tamamata heimana naurieka tukayaritsie putsutɨ mexɨakame metseriyaritsie tau makayunetsieke.
LEV 23:6 Tamamata heimana 'auxɨwirieka tukari 'aye'ayu mɨkɨ metseriyaritsie paa mɨkakuxanariyarietɨka 'ixɨarariyari kanitsutɨni Yawé hetsiemieme. 'Atahuta tukari paa mɨkakuxanariyarietɨka xepɨkwaka.
LEV 23:7 Mexɨakame tukaritsie mepiwewieni 'ixɨarari patsiekamekɨ memuyukuxexeɨriwa hetsiena mieme, mɨkɨ tukaritsie tixaɨtɨkɨtɨma xepɨkate'uximayaka.
LEV 23:8 'Atahuta tukari Yawé 'imikieri taipa warɨkariekame xekaniwewiriekakuni, 'atahutarieka tukaritsie 'ixɨarari patsiekamekɨ memuyukuxexeɨriwa hetsiena mieme xekaniwewikuni, mɨkɨ tukaritsie tixaɨtɨkɨtɨma xepɨkate'uximayaka».
LEV 23:9 Yawé Muitsexi mɨpaɨ katiniuta'aitɨani,
LEV 23:10 'ixaheritsixi mɨpaɨ mɨtiwatahɨawekɨ: «Kepauka xeme xemeutahaxɨani kwie nemɨxeyetuirienitsie, meta tɨriku xemɨka'itsanatsie, mawari wewiwame hetsɨa xeimanukuyari xekananukweikuni matɨari mɨtiharieni mika'itsanatsie mieme.
LEV 23:11 Mawari wewiwame tɨriku 'anahɨakame 'imikieriyari teikɨ kanetseramɨkɨ 'iyuitɨwatɨ Yawé hɨxie mɨtanaki'eriyarienikɨ. Xawatikɨ 'anutiyayu 'uxa'arieka ximeri miyetuanikɨ.
LEV 23:12 'Ana kwitɨ mɨkɨ tukariyaritsie xeime muxa xekanitimawakuni xeiwiyari hɨkame, 'aixɨa 'aneme, mawari taiyariyari Yawé hetsiemieme mayanikɨ.
LEV 23:13 Meta xepiyetuirieni nauka kiruyari tɨriku mɨtɨxiyari 'aixɨa mɨ'ane hatseiti wiriyariekame, tɨriku mawariyari mayanikɨ, 'imikieri taipa warɨkariekame witsimu'ɨa Yawé minake, meta xeirituruyari kaxie winuyari yetuame kanitiyeurimɨkɨ.
LEV 23:14 Paa xepɨkatikwani meta 'uriyari xarikiyari meta mɨhehekwa kepauka mɨkɨ 'imikieri yukakaɨyari xemɨ'atɨirienitsieke. 'Ikɨ 'aitsika pɨhɨkɨtɨni yamemɨtekahunikɨ yunaitɨ 'anuiwaritsie miemete, tsepa hakewa memekuteni.
LEV 23:15 »Mɨkɨ xawati tukariyari 'aye'ayu 'uxa'arieka, tatsɨari kepauka tɨriku 'imikieri manukuyari xemɨ'atɨanitsie, 'atahuta tsemanayari 'aye'arɨkame xekani'inɨatakuni.
LEV 23:16 Xewitɨta niuki pɨ'inɨarini, huta tewiyari heimana tamamata tukari xekani'inɨatakuni 'atahuta xawatiyaritsie 'uxa'arieka ximeriyari xe'inɨatatɨta, 'ana Yawé xekaniyetuiriekuni 'imɨari mɨhehekwa mawariyari.
LEV 23:17 Paa yukie mieme Yawé xekani'atɨiriekuni, teikɨ hetserarietɨ 'uyuitɨariwatɨ mawariyari mayanikɨ matɨari mɨtiukaxuawerixɨ, paa hutame nauka kiruyari tɨriku mɨtɨxiyari 'aixɨa mɨ'anekɨ wewiyatɨkaime, tikuxanariyamekɨ kwaxiyariekame.
LEV 23:18 Meta 'atahutame muxatsi 'ukitsi xepɨwayetuani paa nɨkame xeiwiyari mehɨtɨkaime 'aixɨa me'aneneme, xeime tsikeru meta yuhutame muxatsi 'ukitsi. Tɨriku mawariteyari meta kaxie winuyari mɨtiyeuriyani mawariyari yɨnɨkame, xeime mawari taiyariyari Yawé hetsiemieme, witsimu'ɨa Yawé minake.
LEV 23:19 Hikɨ tsipu 'uki xekanitimawakuni 'axaxemɨte'uyuri mawariyari mayanikɨ, meta yuhutame muxatsi xeiwiyari mehɨtɨkaime kememɨteyuxewi mawariyari mayanikɨ.
LEV 23:20 Mawari wewiwame muxatsi memuyuhuta teikɨ kaniwaretseramɨkɨ 'iyuitɨwatɨ, meta paa matɨari mieme heutinɨkame. Mɨkɨ mawari 'uyuitɨariwatɨ Yawé hɨxie mɨyetuiwakɨ, mawari mɨpatsie Yawé hetsiemieme meta mawari wewiwame hetsiemieme pɨrayani.
LEV 23:21 'Ana kwitɨ mɨkɨ tukaritsie, xeme xekaniyukuxeɨrikuni 'ixɨarari patsiekame Yawé hetsiemieme xewewienike, mɨkɨ tukaritsie tixaɨtɨkɨ xepɨkate'uximayaka. 'Ikɨ kanihɨkɨtɨkamɨkɨ 'aitsika yuheyemekɨ yamemɨteyuriekakɨ yunaitɨ 'anuiwarima, tsepa hakewa memetiteni.
LEV 23:22 »Kepauka 'itsanaxa tukari maye'ani, naime tetsitanapai xepɨka'itsanatɨweni meta muyukuhayeikawa naime xepɨkayeteɨxirɨmeni. Xekenekuhayeikawani tixaɨtɨ memɨkatehexeiya meta 'ateewa kiekatari wahetsiemieme mɨrayanikɨ. Ne Yawé xekakaɨyari nekanihɨkɨtɨni».
LEV 23:23 Yawé Muitsexi katiniuta'aitɨani
LEV 23:24 'ixaheritsixi mɨpaɨ mɨtiwatahɨawekɨ: «Mexɨakame tukaritsie 'atahuta metseriyaritsie 'ana xeme 'uxipiya xepexeiyani, xeme xeme'eriwanikɨ mɨkɨ tukaritsie kuxineta pukayuaneni, 'ixɨarari patsiekamekɨ memuyukuxexeɨriwa Yawé hetsiemieme.
LEV 23:25 Mɨkɨ tukaritsie tixaɨtɨkɨ xepɨkate'uximayaka, matsi pɨta Yawé 'imikieri taipa warɨkariekame xekateniyetuiriekakuni».
LEV 23:26 Yawé Muitsexi mɨpaɨ katiniutahɨawe:
LEV 23:27 «Tamamata tukaritsie 'atahuta metseriyaritsie 'ana xemɨteheuyehɨwiyarɨwa tukariyari pɨhɨkɨtɨni. 'Ixɨarari patsiekamekɨ memuyukuxexeɨriwa Yawé hetsiemieme xekaniwewiekuni, meta xekaniyuhakiekuni meta 'imikieri taipa warɨkariekame xekaniyetuakuni.
LEV 23:28 Mɨkɨ tukaritsie tixaɨtɨkɨ xepɨkate'uximayaka mɨreuyehɨwiyarieni tukariyari mɨhɨkɨkɨ, kepauka Yawé xekakaɨyari hɨxie 'itiya mawariyari mukuwewiwakɨ xehetsiemieme.
LEV 23:29 Xɨka xewitɨ kayuhakieni mɨkɨ yuteɨterima watsata payeweiyarieni.
LEV 23:30 Xɨka xewitɨ tiuta'uximayata mɨkɨ tukaritsie, ne nekɨmana kiekarieyatsie nekanenuyehɨamɨkɨ.
LEV 23:31 'Ayumieme, xeme tixaɨtɨkɨ xepɨkate'uximayaka. 'Ikɨ 'aitsika yuheyemekɨ kanihɨkɨtɨkamɨkɨ yaxemɨtekahunikɨ yunaime xenuiwaritsie kanimiemetɨni, tsepa hakewa xemetiteni.
LEV 23:32 Mɨkɨ 'uxipiya tukari xehetsiemieme payani xemeyexeiyanikɨ, meta xekaniyuhakiekakuni. Mɨkɨ xawati 'atanauka tukariyari taikaiyaritsie xepitsutɨani mɨkɨ metseriyaritsie 'uxa'arieka taikaiyaritsie paitɨ».
LEV 23:33 Yawé Muitsexi mɨpaɨ katiniuta'aitɨani
LEV 23:34 'ixaheritsixi mɨpaɨ mɨtiwatahɨawekɨ: «Tamamata heimana 'auxɨwirieka tukaritsie 'atahuta metseriyaritsie, xekanitsutɨakuni Xamaru 'ixɨarariyari Yawé hetsiemieme, mɨkɨ 'atahuta tukari xekaniyurikɨni.
LEV 23:35 Mexɨakame tukaritsie 'ixɨarari patsiekamekɨ memuyukuxexeɨriwa Yawé hetsiemieme xekaniwewikuni. Mɨkɨ tukaritsie tixaɨtɨkɨ xepɨkate'uximayaka.
LEV 23:36 'Atahutamexɨa tukari Yawé 'imikieri taipa kwaxiyariekame xekaniyetuiriekakuni. 'Atahairieka tukari 'ixɨarari patsiekamekɨ memuyukuxexeɨriwa xekaniwewikuni Yawé hetsiemieme meta tawari mawari 'imikieri taipa warɨkariekame xekaniyetuiriekuni. 'Ixɨarari patsiekamekɨ memuyukuxexeɨriwa kanihɨkɨtɨni. Mɨkɨ tukaritsie tixaɨtɨkɨ xepɨkate'uximayaka.
LEV 23:37 »'Ikɨ 'ixɨararite kanihɨkɨtɨni Yawé mɨxe'utawewiri, xeme xemikuxatanikɨ patsiekamekɨ memuyukuxexeɨriwa Yawé hetsiemieme, xemiyetuirienikɨ mawari 'imikieri taipa warɨkariekame, mawari taiyariyari, tɨriku mawariyari, meta mawarite meta kaxie winuyari mɨtiyeuriwa mawariyari, kemɨreku'ukaikɨ maye'atɨarienikɨ xexuime tukaritsie.
LEV 23:38 'Ikɨ naitɨ 'ixɨararite xawati tukariyaritsie kanixeitaparitɨni Yawé tukari 'uxipiyayatsie ketemɨte'umikiwa, kepemɨti'ahɨritɨa mawariyari, yanutsu kepemɨti'awaɨriya mawariyari xeme xemiyetuirie.
LEV 23:39 »Tamamata heimana 'auxɨwirieka tukariyaritsie 'atahuta metseriyaritsie, kwiepa 'ikwaxite mɨtiutixuawerixɨ xetekuxeɨriemeri, 'atahutamexɨa tukari Yawé hetsiemieme xekaniwewikuni. Mexɨakame tukaritsie meta 'atahairieka tukariyaritsie 'uxipiya tukari kanihɨkɨtɨni.
LEV 23:40 Mexɨakame tukariyaritsie, katinitipimɨkɨ 'iteɨrite 'aixɨa mɨ'anenetsie timieme, takɨ xawariyari, meta 'iteɨri xawariyari mɨ'etɨriwiwe, meta hapuri 'aki 'utɨa muxuawe, 'atahuta tukari xekaniyutemamawiekakuni Yawé xekakaɨyari hɨxie.
LEV 23:41 Xeiwiyari 'aye'axekaku, 'atahutamexɨa tukari xekanitiwewiwakuni 'ikɨ 'ixɨarari Yawé hetsiemieme. 'Atahutarieka metseriyaritsie xekanitiwewiwakuni. 'Ikɨ 'aitsika kanihɨkɨtɨkamɨkɨ yuheyemekɨ mumieme 'aixɨa mɨ'ane nuiwarite 'umemahu wahetsiemieme.
LEV 23:42 'Atahuta tukari mekaniyuriekuni xamaru kiiyarita me'ayetetɨ. Yunaitɨ 'ixaheritsixi mana memutinunuiwaxɨ xamarutɨa mekanayetekuni,
LEV 23:43 wanuiwarite yamemɨtehetimanikɨ kename ne xamaru mɨpaɨ 'anenemeta newareutayatsaxɨ 'ixaheritsixi kepauka 'Ekipitu nemɨwarayewitɨtsie. Ne Yawé xekakaɨyari nekanihɨkɨtɨni».
LEV 23:44 Mɨpaɨ Muitsexi 'ixaheritsixi katiniwarutahekɨatɨani Yawé 'ixɨararite kemɨtiutawewiekaikɨ.
LEV 24:1 Yawé Muitsexi mɨpaɨ katiniutahɨawe:
LEV 24:2 «'Ixaheritsixi mɨpaɨ ketiniwaruta'aitɨa huriwa hatseitiyari hɨkɨamekɨ pɨnariekame memɨmatsi'atɨirienikɨ, tukita muyehekɨakakɨ. Mɨpaɨ kɨxeme yuheyemekɨ pɨtatɨkani.
LEV 24:3 'Aruni 'ixuriki tukiyarita kɨxemete kanikuha'aritamɨkɨ, 'ixuriki meuwie hɨxie Kakaɨyari tɨratuya mɨwayekatsie, tɨkarikɨ mɨtakakɨ Yawé hɨxie. 'Ikɨ 'aitsika yuheyemekɨ payani xenuiwarite 'umemahu wahetsiemieme.
LEV 24:4 Kɨxemete, kɨxeme 'uitɨwameta hurukɨ mɨwewiyatɨkata 'uyewetɨkaitɨ yuheyemekɨ pɨtatɨkani Yawé hɨxie.
LEV 24:5 »Tɨriku mɨtɨxiyari 'aixɨa mɨ'ane kenewatituka keneutikwaxiya huxunuta tamamata heimana huta tsuirayari. Xexuitɨ mɨkɨ nauka kiruyari pɨraheteni.
LEV 24:6 Yawé hɨxie kenamana mexa hurukɨ xeikɨa mɨwewiyatsie, hutakɨa 'ataxewime payari xexuimetsie 'anuyemanetɨkaime.
LEV 24:7 Xexuime xurukuyaritsie 'ɨkwa witsimu'ɨa hɨkɨakame pepeutamanatɨyani. Mɨpaɨ paa ma'eriwa mawariyari Yawé muxatɨarie taipa warɨkariekame kanihɨkɨtɨkamɨkɨ.
LEV 24:8 'Ikɨ paa Yawé kaniyetuiriyarɨwamɨkɨ yuheyemekɨ xawatikɨ. 'Ikɨ kanihɨkɨtɨni 'aitsika 'aixɨa mɨ'ane 'ixaheritsixi kaniwahetsiemiemetɨni.
LEV 24:9 Mɨkɨ paa 'Aruni hetsiemieme pɨhɨkɨ meta niwemama, mɨkɨ muyepatsietsie mepitikwani. Mawarika yamɨpaɨme waɨkawa mɨpatsie mɨhɨkɨkɨ Yawé muxatɨarie mawari taipa warɨkariekame. Mɨkɨ 'aitsika yuheyemekɨ 'aixɨa mɨ'ane kanihɨkɨtɨni yaxemɨtekahunikɨ».
LEV 24:10 'Ixaheritsixi watsata xewitɨ tewi puyeikakai maamaya 'Ixaheri tewiyari pɨhɨkɨtɨkai, paapayata 'ekipitutanaka tihɨkɨtɨkai. Hikɨ heiwa mɨkɨ tewi 'ixaheri tewiyari hamatɨa mematiteitsie 'imieri mekaniutsutɨani.
LEV 24:11 Matsi 'ukaratsi 'ixaheri tewiyari nu'aya, 'axatayɨnike, Yawé 'utaterɨwatɨ hepaɨtsitana 'axakaniutayɨni, hikɨ Muitsexi hetsɨa mekaneihana. (Maamaya Tserumiti katinitewakaitɨni Riwɨri niweya, Rani nuiwarieyatɨtɨ).
LEV 24:12 Hikɨ kananutahɨiyani kepaukake Yawé yamɨtiwatahɨawekekai kememiyurienikekaikɨ.
LEV 24:13 Hikɨ Yawé Muitsexi mɨpaɨ katiniutahɨawe:
LEV 24:14 «'Axatiniukame xematiteitsie xekenayenɨ'a. Kemɨ'ane memi'eni mɨkɨ yumamakɨ mu'uyatsie mekeheutimeni meta memuyuxeɨrie yunaitɨ mekanitituaxixɨakuni.
LEV 24:15 Mɨpaɨ 'ixaheritsixi ketiniwaretahɨawi: “Kemɨ'ane 'axamɨtayɨni yukakaɨyari hepaɨtsita, katinika'eniexɨmɨkɨ 'axakememɨtiuyurikɨ”.
LEV 24:16 Yaxeikɨata, kemɨ'ane Yawé kemɨtitewakɨ mɨtaterɨwa yuhepaɨ tewi 'axatitahɨaweke kanimieriemɨkɨ. Memuyutixexeɨriwa yunaitɨ mekanitituaxixɨakuni. Tsepanetɨ 'ateewa mɨkiekame yatɨni mana munuiwame, xɨka Yawé 'utaterɨwa yuhepaɨ tewi hepaɨtsita 'axatayɨnike. Mɨkɨ kanimieriemɨkɨ.
LEV 24:17 »Kemɨ'ane xeime tewi mɨmieni, mɨkɨta kanimieriemɨkɨ.
LEV 24:18 »Xɨka xewitɨ xeime tewatsiekame 'umieni, xeime tewa kanikɨhɨamɨkɨ.
LEV 24:19 »Kemɨ'ane yuhepaɨ tewi mɨtikwinitɨani, yaxeikɨata mɨkɨ kanitikwinitɨariemɨkɨ titakɨ mɨtikwinitɨa:
LEV 24:20 Xɨka xeime 'umeya 'akamura mɨkɨta 'umeya ke'akamuriyarieni, Xɨka xeime hɨxieya watituni mɨkɨta hɨxieya kewatituiyani, xɨka tameya 'anaye'una mɨkɨta tameya ke'anaye'uniyarieni, pɨtiuka'eniwani yuwaiyaritsie ketitakɨ mɨyamɨtiuyurikɨ.
LEV 24:21 »Kemɨ'ane tewatsiekame mumieni xeime kaniyetuamɨkɨ mimikɨ, matsi kemɨ'ane tewi mumieni mɨkɨta kanimieriemɨkɨ.
LEV 24:22 Yuxewitɨ 'inɨari niukiyari katinita'aitamɨkɨ, 'ena nuiwakame meta 'ateewa kiekame wahetsie. Ne Yawé xekakaɨyari nekanihɨkɨtɨni».
LEV 24:23 Muitsexi 'ikɨ naime 'ixaheritsixi katiniwarutaxatɨani, 'axatiniukame memakuteitsie mekanayenɨ'ani, mana mekaneitituaxixɨani. Yawé Muitsexi kemɨtiuta'aitɨakai 'ixaheritsixi mɨpaɨ mekateniuyurieni.
LEV 25:1 Hikɨ Tsinahi yemuriyaritsie Yawé Muitsexi katiniuta'aitɨani,
LEV 25:2 'ixaheritsixi mɨpaɨ mɨtiwatahɨawekɨ: «Kepauka xeme xemeutahaxɨani kwie nemɨxeyetuirienitsie, mɨkɨ kwie kanika'uxipimɨkɨ xeiwiyari, Yawé hetsiemieme.
LEV 25:3 'Ataxewime wiyari xemaku'etsatsie xepɨka'eni, meta yukaxie xepanuwitexɨani 'ikwaxiyari xekanika'itsanakuni,
LEV 25:4 matsi 'atahuta wiyari 'aye'ayu, kwie xeiwiyari kanika'uxipimɨkɨ meta kaniyutemawiekamɨkɨ Yawé hetsiemieme. Xemaka'etsatsie xepɨkaka'eni meta yukaxie xepɨkahanuwitekeni,
LEV 25:5 yukɨmana watiyɨraxɨaka mɨtixuawerixɨ xepɨkaka'itsanani meta 'akaxie pemɨka'ika'e pepɨka'anuwitekeni. Kwie xeiwiyari 'aye'arɨkamekɨ kani'uxipiekamɨkɨ kaniyutemawiekamɨkɨ.
LEV 25:6 Matsi, naime tita kwie mɨtitixuawitɨani mɨka'uxipieni wiyaritsie, xekanitikwaikuni matsi 'axaɨtame hawaikɨ yunaitɨ mekatenikwakakuni te'uximayatamete meta te'iwamete meta 'ateewa kiekatari xehetsɨa memɨtitei.
LEV 25:7 Meta 'atewama yunaitɨ mekatenikwakakuni meta yunaitɨ xekiekaritsie memɨtexuawe. Naitɨ kwiepa mɨtiutixuxuawereni, mɨkɨ wiyaritsie naitɨ katiniwa'ikwaitɨkamɨkɨ.
LEV 25:8 »'Atahutamexɨa 'atahutame wiyari pekani'inɨatamɨkɨ xawatikɨ, mɨkɨ huta tewiyari heimana 'atanauka wiyari kanayeimɨkɨ,
LEV 25:9 tamamata tukariyaritsie 'atahuta metseriyaritsie, tatsɨari memɨteheuyehɨwiyarɨwa tukariyaritsie, 'ana kanitahɨtsieriemɨkɨ kuxineta naitsarie kiekaritsie.
LEV 25:10 Huta tewiyari heimana tamamata wiyari 'aye'ayu kanipatsiekamɨkɨ, 'ana mematixɨnarɨwatsie kanihɨkɨtɨkamɨkɨ yunaitɨ mana memɨtitei. Xehetsiemieme mematatuiwa wiyari maye'axe pɨhɨkɨtɨni, yuxexuitɨ mekanitayeixɨakuni yunuiwarite wahetsɨa meta yukwie mekaniyetuiriyariekuni.
LEV 25:11 Huta tewiyari heimana tamamata wiyari 'aye'axekaku xeputatuiwani: mɨkɨ wiyaritsie xepɨka'uka'etsani meta xepɨka'uka'itsanani, yɨkɨmana mɨtitixɨawere meta kaxie pemɨka'ika'e pepɨka'anuwitekeni.
LEV 25:12 Mɨkɨ wiyari mematatuiwa kanihɨkɨtɨni xehetsiemieme kanipatsiekamɨkɨ. Mɨraka'etsitɨretsie xeikɨa yɨkɨmana tita mɨtiutixuxuawere xekatenikwakakuni.
LEV 25:13 »Mematatuiwa wiyaritsie yuxexuitɨ yunuiwarite wahetsɨa mekanitayeixɨakuni.
LEV 25:14 »Xɨka xeme xewitɨ xeime tiutuirieni yupiini yatɨni xeime tiunanairieni tixaɨtɨ tipiinieya, yuxexuitɨ xepɨkayukwamanani.
LEV 25:15 'Ekɨ 'ahepaɨ tewi pekaninanairiemɨkɨ kepaɨmetɨ wiyari meuyewetse paɨmemekɨ mematatuiwa wiyari maye'anikɨ, mɨkɨta metsituirieni kepaɨmetɨ wiyari meuyewetse mɨka'itsanakɨ mɨpaɨ raye'arɨkamekɨ.
LEV 25:16 Xɨka 'akuxi waɨkawa wiyari heuyeweka mematatuiwa maye'anikɨ, mɨkɨ waɨkawa pɨraye'aka, peru xɨka 'etsipaɨmetɨ wiyari heuyewekani, mɨkɨ 'etsiwa kanika'ɨrikamɨkɨ kemɨraye'akai kepaɨmexɨa pemɨka'itsanakɨ mɨkɨ mɨpaɨ kametinituiriemɨkɨ.
LEV 25:17 Yuxexuitɨ xepɨkayukwamanani matsi yukakaɨyari xekenayemakaxeni. Ne Yawé xekakaɨyari nekanihɨkɨtɨni.
LEV 25:18 »Ne'aitsikatsie yaxeketenekahutɨ ne'inɨari niukiyari xekenaye'atɨaka, kwiepa 'aixɨa 'anemekɨ xekaniu'uwakuni.
LEV 25:19 Kwie pɨtiutixɨawitɨwani, meta xeme xepɨkayehakakwitɨweni, mana 'aixɨa 'anemekɨ xekanititekuni.
LEV 25:20 »Xɨka xeyuku'iwawiyanike mɨpaɨ xe'utiyuatɨ: “¿Tita tetetikwani 'atahutarieka wiyaritsie, xɨka teka'uka'eni xɨka ta'iku teka'uka'itsana?”,
LEV 25:21 mɨpaɨ nepɨtixetahɨawe 'ataxewirieka wiyaritsie nepɨxehanɨ'airieni waɨkawa 'aixɨa xemɨ'itɨarienikɨ kwiepa pɨtitixɨawere haika wiyaritsie mieme.
LEV 25:22 Kepauka xeme xemɨka'eni 'atahairieka wiyaritsie, 'ana 'akuxi yu'ikwai xekatenexeiyakakuni meripaitɨ mieme xemika'itsanaxɨ, meta 'akuxi 'aikɨ mieme xekwatɨ yurikatsie timieme xepɨka'itsana.
LEV 25:23 »Kwie yuheyemekɨ mukuma xepɨkatuaka, mɨkɨ kwie nepiini kanihɨkɨtɨni, xeme matsi ku'uwamete xekanihɨkɨtɨni xemɨniɨtɨarie xeikɨa mana xemɨtitenikɨ.
LEV 25:24 'Ayumieme, kwie xematiteitsie pɨyɨweni tawari kwie kemɨ'ane mutuiri minanairienikɨ.
LEV 25:25 »Xɨka xewitɨ 'ahurawa 'a'iwa tixaɨtɨ karexeiyatɨ 'ayani, xɨka yutɨɨriyama tiwahetsiemieme mɨrexeiya tituamɨkɨ, mɨkɨ 'iwaya 'ahurawa kaninanairiemɨkɨ para heitserie mexeiyanikɨ tita mɨtituirieni.
LEV 25:26 Xɨka mɨkɨ 'uki xeime 'ahurawa yu'iwa kaheixeiyani para hetsienamieme mɨtiyutuanikɨ, matsi xɨka mɨkɨ yukɨmana waɨkawa rexeiyatɨ hayuyeitɨani para yukwie mɨnanenikɨ,
LEV 25:27 mɨkɨ kaniti'inɨatamɨkɨ kepaɨmexɨa wiyari manuyetɨa mituatsie meta kanixeɨrimɨkɨ kemɨraye'axe kemɨ'ane minanairi hetsiemieme. Mɨpaɨ tawari katininuamɨkɨ yukwietsie.
LEV 25:28 Matsi xɨka mɨtiyutuanikɨ kara'atɨatɨyani, kwie minanairi hetsɨa puyuhayewa kepaukake mematatuiwa wiyari maye'anitsieke, kepaukake kemɨ'ane mitua hetsɨana manuani, 'anake hetsiena mieme meta tɨɨriyamama wapiini pɨrayani.
LEV 25:29 »Xɨka xewitɨ kii 'utuani kiekari mukurarutɨarietsie yeweme, xeiwiyari ka'aye'awekaku mutiyutuanikɨ heitserie kanexeiyakamɨkɨ, kepauka mituatsie tsutɨtɨ. Mɨpaɨ xeikɨa katineuterimɨkɨ para mɨtiyutuanikɨ.
LEV 25:30 Xɨka kiikɨ katiyutuawekaku xeiwiyari 'aye'ani, mematatuiwa maye'anitsie pɨkayetuiriyarieni matsi kemɨ'ane minanai piinieya yuheyemekɨ kanayeimɨkɨ meta xiɨyarimama.
LEV 25:31 »Kiite kiekarite 'etsimɨyeyeutsie mɨti'utɨka kakurarutɨarietɨkaitɨ mɨkɨ kwie mɨyetuiwa hepaɨ pɨ'aneni, mɨrayukatuiyanikɨ pɨyɨweni memɨyetuiriyarienikɨ mematatuiwatsie.
LEV 25:32 »Rewitsixi heitserie mepexeiyani tsepa kepauka yukiite memɨtinanenikɨ hakewa memetiteitsie mɨti'u.
LEV 25:33 Xɨka xewitɨ rewitɨtɨ xeime yukii 'utuirieni, kii mutua yukiekaritsie 'uweme mematatuiwa wiyaritsie kaniyetuiriyariemɨkɨ, mɨkɨ kiite rewitsixi wakiekaritsie mɨti'u watɨɨriyama wahetsie kanimiemetɨni 'ixaheritsixi watsata.
LEV 25:34 Matsi mɨraka'etsitɨre wakiekari warita mamanetɨka pɨkatuiyani, mɨkɨ mɨtiwapiinikɨ xewitɨ mɨkayɨwe mɨwanawarienikɨ.
LEV 25:35 »Xɨka xewitɨ 'a'iwa tixaɨtɨ karexeiyatɨ hayani titakɨ mɨtiyuparewieka, keneuparewi 'ateewa kiekame yatɨni kuyeikame kepemɨtiparewieka hepaɨ: mɨpaɨ xetewaparewiekaku xehetsɨa mekanikutekuni.
LEV 25:36 Hena'iwakamekɨ pepɨka'iwiyani kepauka tumini peminiutɨani yatɨni tikwaiwame, matsi 'akakaɨyari kenayemakaxeni, mɨpaɨ 'a'iwa xetsata pukani.
LEV 25:37 Metatsiere tumini rana'iwamekɨ pepɨka'iniɨtuaka meta tita mɨtikwaiwa pemɨtikwetatɨa pepɨkarana'iwani.
LEV 25:38 Ne Yawé xekakaɨyari nekanihɨkɨtɨni, 'Ekipitu kwieyaritsie nemɨxe'ayewitɨ, Kanani kwieyari nemɨxeyetuirienikɨ meta xekakaɨyari nemayanikɨ.
LEV 25:39 »Xɨka xewitɨ 'a'iwatɨtɨ tixaɨtɨ karexeiyatɨ hayani xɨka yutuamɨkɨni 'ahetsɨa, waɨriyarika ti'uximayatame hepaɨ pepɨkati'uximayatsitɨaka.
LEV 25:40 'Aixɨa ketinexeiyani ti'iwame yatɨni 'ateewa kiekame xetsata muka hepaɨ. 'Ahetsiemieme pɨti'uximayaka mematatuiwa wiyari maye'anitsieke.
LEV 25:41 Hikɨ 'ana yuniwema wahamatɨa mɨyemiekɨ pepipitɨani, meta 'anake mepɨyɨwaweni yu'iwama wahetsɨa memɨyehukɨ meta watewarima kwie memuwaruku'eiriritsie mepɨ'axɨani.
LEV 25:42 Yunaitɨ 'ixaheritsixi nete'uximayatsiriwamete mekanihɨtɨtɨni. Ne 'Ekipitu kwieyaritsie nekaniwarayewitɨni, 'ayumieme mepɨkatuiyani waɨriyarika te'uximayatamete wahepaɨ.
LEV 25:43 Hahetemekɨ pepɨkatiwa'aitɨaka, matsi 'akakaɨyari kenayemakaxeni.
LEV 25:44 »Waɨriyarika texe'uximayatsiriwamete 'ukitsi meta 'ukarawetsixi nuiwarite xe'aurie mamanetɨkatsie mepɨkiekataritɨni, mana xepɨwatinaneni.
LEV 25:45 Yaxeikɨatatsiere pepɨyɨweni waɨriyarika te'uximayatamete xekwietsie memutinunuiwaxɨ pemɨwatinanenikɨ, mɨkɨ 'ateewa kiekatari mepɨwaniwematɨni xetsata memɨtitei. Mɨkɨ xehetsie mekanimiemetetɨkakuni,
LEV 25:46 meta yutɨɨriyama xemɨwakuhayewienikɨ xepɨyɨwaweni xepiini mɨkɨ wahetsie mɨtinakenikɨ para yuheyemekɨ memɨtewa'uximayatsirieka kememɨteheutereke. Xeme matsi xeyu'iwamatɨ hahetemekɨ xepɨkateyu'aitɨaka.
LEV 25:47 »Xɨka xewitɨ 'ateewa kiekame yatɨni kuyeikame xetsata waɨkawa rexeiyatɨ hayani, matsi xɨka xewitɨ xe'iwa reuyehɨatɨ tixaɨtɨ karexeiyatɨ hayani meta 'uyutuani 'ateewa kiekame hetsɨa yatɨni watɨɨriyama wahetsɨa,
LEV 25:48 heitserie kemɨrexeiya pɨkaheiyehɨani mɨtiyutuiyanikɨ hetsiena mieme 'arikekeri 'uyutuayu. Pɨyɨweni tsepa 'iwaya xewitɨ mɨtiyutuanikɨ:
LEV 25:49 xewitɨ tatatsieya yatɨni 'iwaya tsepa kemɨpaikɨ 'iwayatɨtɨ xeikɨa. Xɨka matsi yukɨmana waɨkawa rexeiyatɨ hayuyeitɨani pɨtiyutuani yuhetsiemieme.
LEV 25:50 Muyutua meta kutsiyarieya mepiti'inɨata tukari kepaɨmexɨa manuyetɨa, ke'aneme wiyariyaritsie muyutua mematatuiwa wiyaritsie maye'anitsieke. Mɨxɨnarienikɨ ti'uximayatame kepaɨmeme ma'iwaxɨ mɨyareutereka hepaɨ katineyukatuamɨkɨ.
LEV 25:51 Xɨka 'akuxi waɨkawa wiyari heuyeweka, mɨxɨnarienikɨ pɨtiyutuani yapaɨmeme hanutimaname kepauka muyutuatsie miemekɨ mɨ'ɨitɨariekaikɨ.
LEV 25:52 Xɨka 'etsipaɨmetɨ wiyari xeikɨa heuyeweka mematatuiwa wiyari maye'anikɨ, kaniti'inɨatamɨkɨ katiniyutuamɨkɨ mɨxɨnarienikɨ kepaɨmetɨ wiyari meuyewetse miemekɨ.
LEV 25:53 Xeme xekanixeiyakakuni kutsiyarieya xeiwiyari memɨte'uta'uximayata wahepaɨ mɨtixeiyanikɨ, meta waɨkawa hahetemekɨ pɨkati'aitɨaka.
LEV 25:54 »Xɨka 'a'iwa hetsiemieme karayukatuiyani 'ikɨ kemɨraxaxatsiwakɨ, mɨkɨ meta niwemama mepɨxɨnarieni mematatuiwatsie wiyari 'aye'ayu.
LEV 25:55 »'Ixaheritsixi nete'uximayatsiriwamete mekanihɨkɨtɨni. Ne 'Ekipitu kwieyaritsie nekaniwarayewitɨni. Ne Yawé xekakaɨyari nekanihɨkɨtɨni.
LEV 26:1 »Kakaɨyarixi xepɨkawawewieka, meta tetexi patsietɨkaime meta tixaɨtɨmexi wa'ɨkiya xepɨkati'uitɨwani. Yukwiepa xepɨkawati'uitɨwani tetexikɨ metewewiyatɨkaime meta wahetɨa xepɨkatihɨxima'uweni. Ne Yawé xekakaɨyari nekanihɨkɨtɨni.
LEV 26:2 »Xekeneuka'uxipiweni xawati tukariyaritsie, netuki xekenayexeiyani. Ne Yawé nekanihɨkɨtɨni.
LEV 26:3 »Xɨka yaxete'u'uwani kenemɨtixe'u'aitɨa meta ne'aitsikatsie yaxetekahuni 'aixɨa 'anemekɨ,
LEV 26:4 ne wiyeri tukarieyatsie nepɨxehanɨ'airieni, kwie meta 'iteɨri 'ikwaxi pɨtitixɨaweriya,
LEV 26:5 tɨriku 'urietɨkaitɨ 'apɨreutere kepauka mɨtika'inɨiyanitsiekeri, mɨtika'inɨiyanita kepauka mɨtika'etsitɨtsiepai pɨreutere. Xepɨkayehakakwitɨweni mana kwiepa 'aixɨa 'anemekɨ xepu'uwani.
LEV 26:6 »Ne 'akwietsie 'aixɨa 'iyari nekaniwapitɨamɨkɨ, xeme 'aixɨa 'anemekɨ xekanitikukutsukuni xekaheumamatɨ. Kwiepa memɨtexɨawe memamariwawetɨ nekaniwapatamɨkɨ memɨteyukwa'a memɨteyukewe meta kuyaxa 'akwietsie pɨkaxɨaweni.
LEV 26:7 Memɨxe'aye'unie xekaniwaranukuweiyakuni, xehɨxie mekanikaxɨrikuni 'ixiparatekɨ xewakwiyu.
LEV 26:8 Xeme yu'auxɨwitɨ xeitsienituyari xekaniwaranukuweiyakuni, xemeta xeitsienituyari tamamata miriyari xekaniwaranukuweiyakuni, xehɨxie mekanikaxɨrikuni 'ixiparakɨ xewakwiyu.
LEV 26:9 »Ne nekanixexeitsitɨamɨkɨ 'aixɨa kenemɨtiuka'iyari. Ne xeyuxiɨtɨakame nepɨxe'ayeitɨani. Nekanixetimɨiriyamɨkɨ meta netɨratu xehetsɨa nekaniwewimɨkɨ.
LEV 26:10 'Akuxi 'aikɨpai mieme xemika'itsanaxɨ xekanikwakakuni kepauka meripai mieme xemɨwaye'ɨni para mɨhehekwa pɨta xemeuta'utakɨ.
LEV 26:11 Xetsata nekii nekanitawewimɨkɨ muwa nemayekanikɨ, meta hatsuaku nepɨkaxetixani'erieni.
LEV 26:12 Xehamatɨa nekaniumiemɨkɨ. Ne xekakaɨyari nepɨhɨkɨtɨni, xeme nekiekari xepɨhɨkɨtɨni.
LEV 26:13 Ne Yawé xekakaɨyari nekanihɨkɨtɨni, 'Ekipitu kwieyaritsie nemɨxe'ayewitɨ waɨriyarika xete'uximayatɨ xemɨtehayewakɨ. Ne xeyuku kaunariyari nekananuteke xemenuyetekakaikɨ waɨkawa xete'aitɨarietɨ, meta heitserie xehanukuneniereme nepɨxe'ayeitɨa.
LEV 26:14 »Xɨka xeme kenemɨtixe'u'aitɨa mɨpaɨ xekatekakɨne 'ikɨ naime 'aitsikate hetsie,
LEV 26:15 xɨka ne'aitsika xe'uxieka meta ne'inɨari niukiyari xexani'erieka, meta yaxekate'uyurieni naime ne'aitsikatetsie, netɨratu xetitsanatɨ,
LEV 26:16 hikɨ ne nekɨmana nepɨxe'uximatɨani waɨkawa haxɨa kwiniya nekaxenanɨ'airiemɨkɨ, hɨiya mɨkɨ kanixetiweranariyamɨkɨ, xekaheuneniereme kanixe'ayeitɨamɨkɨ meta kanixekwimɨkɨ. Yakɨ xeikɨa yu'imɨari xekanika'ekuni, memɨxe'aye'unie pɨta memitikwanikɨ.
LEV 26:17 Neri nepɨkaxeparewieni xehetsɨa nekaninepatamɨkɨ, memɨxe'uweiya mekaxena'iwakuni. Memɨxe'aye'unie mekaxetenita'aitɨakuni, xeme pɨta xekaniyuta'unaxɨakuni tsepa xewitɨ mɨkaxe'uweiya.
LEV 26:18 »Xɨkari 'ikɨ naitɨ ranuyeyayu 'akuxi xekanetsiheu'enieka, 'atahutamexɨa nekanixe'uximatɨamɨkɨ 'axakexemɨteyuriekɨ.
LEV 26:19 Kexemɨteyuti'ɨre ne nekanika'unamɨkɨ meta xemɨkaheu'enanakɨ. Muyuawi tse'ime nepayeitɨani tepɨa hepaɨ, kwie wurunitse hepaɨ 'aneme nepayeitɨanita,
LEV 26:20 yakɨxeikɨa yutɨrɨkariya mepɨtixɨtɨani, tixaɨtɨ kwiepa pɨkatitixɨawere meta 'iteɨrite 'ikwaxi pɨkawatixɨawitɨirieni.
LEV 26:21 »Xɨka matsi 'akuxi menetsi'aye'unieka, meta mekanetsi'enieka, matsi tawari 'akuxi 'atahutamexɨa nepɨwa'uximatɨani ke'axamemɨte'uyurikɨ.
LEV 26:22 'Ɨrawetsixi teyukwa'amete yeutari xehetsɨa nepɨwaranɨnɨ'ani, xeniwema mepɨxetihapanirieni meta xetewama mepuwareuyehɨani. Mɨpaɨ mepɨteyurieni yakɨxeyupaɨmeme memɨxe'ayeitɨanikɨ meta xehuye yuxaɨtame muyuhayewakɨ.
LEV 26:23 »Tsepanetɨ 'ikɨ naitɨ mɨyamɨtiɨyɨ, xɨka matsi 'akuxi kenemɨtiwa'ɨkitɨa newa'uximatɨatɨ meka'i'enieni, matsi xɨka 'akuxi menetsi'aye'unietɨ meyewekani,
LEV 26:24 neta nexe'aye'unietɨ nepɨnehayewani. Ne nekɨmana nepɨxetikwinitɨani 'atahutamexɨa 'axaxemɨte'uyurikɨ.
LEV 26:25 Ne nekaniwapitɨamɨkɨ memɨxe'aye'unie memɨxekwinikɨ 'ixiparatekɨ, netɨratu kemɨreku'uxakɨ yaxemɨkatekakɨkɨ. Kepauka yukiekaritsie xemɨyehu xeyuta'unake, ne nepɨxe'anunɨ'airieni kwiniya mɨmɨya, meta memɨxe'aye'unie wahetsɨa nepɨxeyetuani.
LEV 26:26 Kepauka xe'ikwai naime nemɨtikumaweriyatsie tamamata 'ukari paa mepɨkwaxiyani xeihuxunuta xehetsiemieme. Meta mepuwatamini yapapaɨmeme, kepauka xemitikwani mɨkɨkɨ xepɨkatihuxani.
LEV 26:27 »Xɨka mɨyatɨtɨ mete'uka'eniwatɨ matsi 'akuxi mekanetsiheu'enieka, matsi xɨka 'akuxi menetsi'aye'unietɨ meyuhayewani,
LEV 26:28 kamɨtsɨ neta nepɨxe'aye'unieka. 'Atahutamexɨa nepɨxe'uximatɨani 'axaxemɨte'uyurikɨ,
LEV 26:29 meta yuniwema 'ukitsi 'ukari wawaiyari xekanitikwaikuni.
LEV 26:30 Xetukite 'etsimɨpepe kakaɨyarixi xemɨtewaranutimawiriwa nepɨka'unaxɨani, meta mawari taiyame 'ɨkwa witsimu'ɨa xematitaiyatsie nepɨka'unaxɨani, meta xekaxarite 'aneme nepɨkeni xekakaɨyarixi memɨka'ayeneniere wa'ɨkiyari waheima, nehaxɨa xehetsɨa punuani.
LEV 26:31 Xekiekarite nepakumaweriyari, watukite nepatixɨriexɨani. Xemawari witsimu'ɨatɨkatei mɨnetsinakekaikɨri nepɨkayukatemawieni.
LEV 26:32 Yaxeikɨatatsiere kwiepa xematiteitsie hakumaweme nepayeitɨani, memɨxe'aye'unie mepɨhɨxiyani kepauka memɨ'axɨani mana memɨtiyaxekɨ.
LEV 26:33 Hipame nuiwarite watsata nekanixetaxɨriexɨamɨkɨ: 'ixipara newatihaname nepɨwaranukuweiya wakwie yuxaɨtame nepɨhayewa, wakiekari nepɨka'unaxɨani.
LEV 26:34 Hikɨ kwie pu'uxipieka naime tukariyaritsie kepaɨmexɨa wiyari yuxaɨtame muyuhayewa, mexixi xeme memɨxe'aye'unie wakwietsie xetiteni, mɨpaɨ kwie pɨtika'uxipieni xawatikɨ yutemawietɨ.
LEV 26:35 Mexixi kwie 'akumawetɨ yuhayewa, mɨkɨ 'uxipiya kanexeiyakamɨkɨ kepauka xawatikɨ wiyari maye'axekaitsie kemɨkareixeiyakaikɨ kepauka mana xemɨtiyaxixɨtsie paitɨ.
LEV 26:36 »Keyupaɨmetɨ memuyukuhayewa, memɨwaraye'unie wakwietsie me'u'uwatɨ waɨkawa mekanimamakakuni, xatsi 'ekakɨ kuyuitɨariwakaku me'enietɨ mepuyuta'unani. Xewitɨ 'ixipara 'akwetɨ muwaruweiyani hepaɨ mekateniunanautsakuni, mekanekaxɨrikuni tsepanetɨ xewitɨ kawaruweiya.
LEV 26:37 'Ixipara memumakarɨme hepaɨ, yu'iwama wahetsie mekaniuyexɨruwekuni xewitɨ kawaruweiyakaku, mepɨkayɨwaweni yuneukixiwima memɨwatakwinikɨ.
LEV 26:38 Hipame nuiwarite watsata xekaneuyewekuni, memɨxe'aye'unie wakwie kaxenitikwaimɨkɨ.
LEV 26:39 Xeme hipatɨ xemɨyuhayewa memɨxe'aye'unie mematiteitsie xekanikaxɨrikuni, ke'axaxemɨte'uyurikɨ xepaapama xepanutinɨitɨiriyarieni.
LEV 26:40 »Matsi xɨka xe'itahekɨata 'axakexemɨte'uyurikɨ meta xepaapama 'axakememɨte'uyurikɨ, memɨnetsi'uku'eirikɨ, meta menetsi'aye'unietɨ memakɨkɨ,
LEV 26:41 mɨkɨkɨ waɨriyarika mepɨnetsi'upitɨa nemɨwaranɨnɨ'anikɨ memɨwaraye'unie wakwietsie, xɨka wa'iyari kemɨtiyumate tixaɨtɨ mekateheyeitɨatɨ meta meheyutimaixɨame 'axakememɨte'uyurikɨ,
LEV 26:42 hikɨ nepeye'erieni netɨratu kenemɨtiutawewi, Kakuwu, 'Itsahaki meta 'Apɨrahami wahamatɨa, yaxeikɨatatsiere kwie nepaye'erieni.
LEV 26:43 Mɨkɨ kwie meku'eirieyu, kaniyutemawiekamɨkɨ xawati tukari maye'axenitsie mexixi mana katikuteitɨni. Matsi ke'axamemɨte'uyurikɨ yamekateneyutimaikuni, ne'aitsika memɨka'utanaki'erikɨ meta ne'inɨari niukiyari memuti'uxiwe'erikɨ.
LEV 26:44 »Mɨyatɨtɨ, tsepa memɨwaraye'unie wakwietsie memɨtiteni, ne nepɨkawarayexɨrieni meta nepɨkawatixani'erieni meta nepɨkawarakumaweriya, netɨratɨ wahetsɨa nepɨkatitsanaxɨani. Ne Yawé xekakaɨyari nekanihɨkɨtɨni.
LEV 26:45 Matsi watutsima wahetsiemieme tɨratu kenemɨtiutawewi nekanaye'erimɨkɨ, kepauka hipame nuiwarite wahɨxie 'Ekipitu kwieyaritsie nemɨwarayewitɨ wakakaɨyari nemayanikɨ. Ne Yawé nekanihɨkɨtɨni».
LEV 26:46 'Ikɨ 'aitsikate kanihɨkɨtɨni yaxemɨtekahunikɨ ne'inɨari niukiyari kemaine, 'ikɨ 'aitsika kanixeyetuirieni Muitsexi Yawé yatitahɨaweku kaxeniutawewirieni, Tsinahi yemuriyaritsie mɨkɨ hamatɨa meta 'ixaheritsixi.
LEV 27:1 Yawé Muitsexi mɨpaɨ katiniuta'aitɨani
LEV 27:2 'ixaheritsixi mɨpaɨ mɨtiwatahɨawekɨ: «Xɨka xewitɨ kemutayɨkɨ 'imikieriyari Yawé yetuiriemɨkɨ tewi kemɨraye'axekɨ,
LEV 27:3 yakatiniyutuamɨkɨ kepaɨmemekɨ mu'inɨaritsie: »'Ukitsi xeitewiyari wiyari memexeiyatɨkatsie tsutɨtɨ haika tewiyari wiyari memexeiyatɨkatsie meye'atɨkaitɨ, mɨkɨ pɨtiyutuiyaka huta tewiyari heimana tamamata pɨrata tuminiyari, tukita keraye'akamekɨ memɨteyukutuaya hepaɨ.
LEV 27:4 »'Ukarawetsixi wahekɨ xeitewiyari heimana tamamata pɨrata tuminiyarikɨ.
LEV 27:5 »'Ukitsita 'auxɨwime wiyari memexeiyatɨkatsie tsutɨtɨ xeitewiyari wiyari memexeiyatɨkatsie meye'atɨkaitɨ, xeitewiyari tuminiyarikɨ mekateniyutuakakuni, yaxeikɨata tamamata tuminiyarikɨ pɨtiyutuiyaka 'ukarawetsixi mɨpaɨ paɨmeme wiyari memexeiyatɨka wahetsiemieme.
LEV 27:6 »'Ukitsi tɨɨrixi xeimetseri memexeiyatɨkatsie tsutɨtɨ 'auxɨwime wiyari memexeiyatɨkatsie meye'atɨkaitɨ, 'auxɨwime 'inɨariyarikɨ pɨtiyutuiyaka, meta haika 'inɨariyarikɨ katiniyutuiyakamɨkɨ 'ukari tɨɨrixi wahetsiemieme mɨpaɨ paɨmeme wiyari memexeiyatɨka.
LEV 27:7 »'Ukitsi 'ukirawetsixi haika tewiyari wiyari memɨhɨtɨka mautiyune tamamata heimana 'auxɨwime 'inɨariyarikɨ pɨtiyutuiyaka, meta tamamata 'inɨariyarikɨ 'ukarawetsixi mɨpaɨ paɨmeme wiyari memexeiyatɨka wahetsiemieme.
LEV 27:8 »Matsi kemɨ'ane kemutayɨkɨ 'imikieriyari mɨyetuani xɨka ka'i'axeni mɨtiyutuanikɨ kemɨraye'axe, mɨkɨ kaniyemieni mawari wewiwame hetsɨa mɨkɨ kananukahɨwiyariemɨkɨ, pɨtiyutuani xeikɨa kepaɨ mɨ'axeni.
LEV 27:9 »Matsi xɨka Yawé mawari mɨyetuiriyarieni tewa hɨkɨtɨni, mɨkɨ patsietɨ kaniyuhayewamɨkɨ Yawé mɨyetuiriyariekɨ.
LEV 27:10 Pɨkayɨweni mipatakɨ xeime 'aixɨa 'anemekɨ xeime 'axa'anemekɨ, meta 'axamɨ'anekɨ xeime 'aixɨa 'anemekɨ. Xɨka xe'ipata xeimekɨ, mɨkɨ yuhutatɨ mepatsietɨ mekaniyuhayewakuni.
LEV 27:11 »Matsi xɨka Yawé mawari mɨyetuiriyarieni tewa hɨkɨtɨni mɨka'itiya, mɨkɨ mawari wewiwame hetsɨa kananuhaniemɨkɨ,
LEV 27:12 mɨkɨ yapɨtayɨni kemɨraye'akani. Kemɨtika'inɨatsieni mawari wewiwame kemutiu'inɨaritaxɨ kanitanaki'eriwamɨkɨ, tsepa kemɨ'aneni.
LEV 27:13 Xɨka kutsiyarieya tiyutuamɨkɨ hutarieka minanenikɨ yutewa, mɨkɨ katiniyutuamɨkɨ 'auxɨwimeyaritsie mieme tawari xei'inɨariyari kaniyetuamɨkɨ tuminiyari mawari wewiwame kemɨtika'inɨatsirieni.
LEV 27:14 »Xɨka xewitɨ yukii Yawé yetuirieni, mawari wewiwame yakanitayɨmɨkɨ kemɨraye'aka. Mawari wewiwame kemɨtayɨni yapɨtika'inɨaritɨkani, tsepa kemɨtitita.
LEV 27:15 »Yukii Yawé mɨyetuiri mipatakɨ xɨka yukiikɨ tiyutuamɨkɨni, mɨkɨ 'auxɨwimeyaritsie mieme xei'inɨariyari tawari kaniyetuamɨkɨ mawari wewiwame kemɨti'inɨaritɨatsie, mɨkɨ kii 'ana piinieya kanayeimɨkɨ.
LEV 27:16 »Xɨka xewitɨ yukwie yetuani Yawé hetsiemieme, yakatini'inɨaritɨariemɨkɨ kepaɨmetɨ 'imɨariyari mɨtinakeni mana hetsiena mɨka'etsienikɨ, huta tewiyari heimana tamamata tuminiyari katinaye'akamɨkɨ, huta tsienituyari heimana xeitewiyari rituruyari tsewara 'imɨariyari tinaketɨ mɨka'etsieni xexuimetsie.
LEV 27:17 Xɨka yukwie yetuani mematatuiwa wiyariyaritsie 'aye'ayu, kemɨtika'inɨari mɨpaɨ pɨraye'aka.
LEV 27:18 Matsi xɨka 'arike 'iyetuirieni mematatuiwa wiyari 'anutiyayu, mawari wewiwame yakatinika'inɨaritamɨkɨ kepaɨmetɨ wiyari meuyewekani tawari mematatuiwa wiyari maye'anikɨ, mɨpaɨ paɨmemekɨ kananukaxɨriyariemɨkɨ.
LEV 27:19 »Kemɨ'ane yukwie mɨyetua Yawé hetsiemieme, xɨka yemekɨ 'inanaimɨkɨ hutarieka, 'auxɨwimeyaritsie mieme xei'inɨariyari tawari kaniyetuamɨkɨ mawari wewiwame kepaɨmeme mitaxatɨatsie, 'ana mɨkɨ tipiinieya kanayeimɨkɨ.
LEV 27:20 Matsi xɨkari ka'inaneni yatɨni xeime 'utuirieni pɨkayɨweniri tawari hetsiena mieme mayanikɨ.
LEV 27:21 Kepauka mematatuiwatsie mɨkɨ kwie mɨyetuiyanikekaitsie, mɨkɨ patsietɨ puyuhayewa Yawé hetsiemieme, mɨkɨ mawari wewiwame hetsiemieme payani.
LEV 27:22 »Xɨka xewitɨ kwie 'unaneni 'ahurawa 'iwaya kakwieyatɨkaku, meta Yawé hetsiemieme mayanikɨ 'iyetuani,
LEV 27:23 mawari wewiwame 'iti'inɨatame yakanitayɨmɨkɨ yamɨraye'akakɨ kepaɨmetɨ meuyewetse mematatuiwa wiyari maye'anikɨ. 'Ana kwitɨ yukwie mɨyetua kemɨraye'akani katiniyutuamɨkɨ, mɨkɨ Yawé hetsiemieme kanipatsieka.
LEV 27:24 Mematatuiwatsie wiyari, kwie meripaitɨ memɨkutsiyarimamatɨkai hekwamekɨta kutsiyarimama mepakɨne.
LEV 27:25 »Naitɨ pɨti'inɨatsieni pɨrata tukita keraye'akamekɨ memɨteyukutuaya, tamamata kɨramuyari xeituminiyari rahetetɨ.
LEV 27:26 »Matsi, xewitɨ tɨma pɨkayɨweni matɨari mieme yutewa mɨyetuanikɨ, yuwakaxi yatɨni yumuxa, matɨari miemetexi Yawé hetsɨa memumiemetekɨ.
LEV 27:27 Xɨka tewatsiekate memɨka'itiya mehɨkɨtɨni, pɨyɨweni mɨnanaiyanikɨ mawari wewiwame kemɨtiu'inɨaritaxɨ mɨpaɨ paɨmeme yetuame, matsi tawari 'auxɨwimeyaritsie mieme xei'inɨariyari kaniyetuamɨkɨ. Xɨka ka'inaneni mawari wewiwame kemɨti'inɨarita mɨpaɨ katinituiyamɨkɨ.
LEV 27:28 »Xewitɨ tɨma pɨkayɨweni yupiinitɨkai mɨtituanikɨ meta minanenikɨ, tsepa mɨtitewi, tewaxi yatɨni maku'etsakaitsie, xɨka pe'iyetuani Yawé hetsiemieme mɨrayanikɨ yuheyemekɨ. Naitɨ Yawé mɨtiyetuiriyarɨwa waɨkawa kanipatsieka Yawé hetsiemieme.
LEV 27:29 Xewitɨ tewi mɨyetuiya pɨkayɨweni mɨnanaiyanikɨ, matsi mɨkɨ kanimieriemɨkɨ.
LEV 27:30 »Tamamatatsie mieme xeime naitɨ kwiepa mɨtiutixuawerixɨ, tsepa tita memɨte'uka'e 'uriyari ya'ikwaxi kɨyetsiemieme, Yawé hetsɨa katinimiemetɨni, mɨkɨ katiniyetuiriyarieka.
LEV 27:31 Xɨka xewitɨ tamamatatsie mieme xeime yetuame 'inanaimɨkɨni, kemɨraye'aka kaninanaimɨkɨ matsi tawarita 'auxɨwimeyaritsie mieme xei'inɨariyari kaniyetuamɨkɨ.
LEV 27:32 Tamamatatsie mieme xeime wakaxi meta muxa, tamamatatsie xewitɨ 'inɨaritɨ mɨkɨ kanipatsieka Yawé hetsiemieme.
LEV 27:33 Tewaxi wahɨweme yɨkɨ pɨkatiwaxeiyani 'aixɨa memɨ'anene meta 'axamemɨ'anene, meta xeimekɨ pɨka'ipatani. Matsi xɨka xeimekɨ 'ipata yuhutatɨ mepatsietɨ mekanakɨnikuni meta pɨkayɨweniri minanenikɨ».
LEV 27:34 'Ikɨ 'aitsikate kanihɨkɨtɨni Yawé Muitsexi mɨyetuiri 'ixaheritsixi wahetsiemieme, Tsinahi yemuriyaritsie.
NUM 1:1 Merikɨtsɨ Yawé Muitsexi kaniutahɨawe, 'ixuriki tukiyari manuwe, Tsinahi mɨrakutewa makumawetsie, mexɨakame tukaritsie hutarieka metseriyaritsie, kepauka 'ixaheritsixi 'Ekipitu memayewitɨkie huta wiyari 'anuyemiekakuri. Mɨpaɨ katinitahɨawe:
NUM 1:2 «Yunaime keniwaraka'utɨa mana kiekatari, 'Ixaheri xiɨyarimama meta nuiwarimama yuxexuitɨ kememɨyɨpapaɨme, yunaime 'ukitsi kememɨtetetewa xewaraka'utɨwatɨ yuxexuime.
NUM 1:3 'Ekɨ, 'Aruni hamatɨa xekaniwaraka'utɨakuni 'ixaheritsixi waniwema yunaime 'ukitsi kuyakɨ 'aixɨa memɨ'anene, xeitewiyari wiyari memɨhɨtɨka.
NUM 1:4 'Ikɨ xemɨwati'inɨatakɨ xeime xekanita'inikuni wa'ukiyari mɨkɨ yuxexuime wanuiwaritsie mieme manuyeka.
NUM 1:5 »'Ikɨ mekanihɨkɨtɨni kemɨ'ane memɨxeparewieni: Xuweni xiɨyarimama hetsiemiemete, 'Eritsuxi Tserehuxi nu'aya,
NUM 1:6 Tsimehuni xiɨyarimama, Tserumieri Tsuritsarahi nu'aya,
NUM 1:7 Kura xiɨyarimama, Nahatsuni 'Aminarawi nu'aya,
NUM 1:8 'Itsakaxi xiɨyarimama, Natanaheri Tsuhaxi nu'aya,
NUM 1:9 Tsawuruni xiɨyarimama, 'Eriyawi Heruni nu'aya,
NUM 1:10 Kutse nu'aya xiɨyarimama hetsiemiemete: 'Eritsama 'Amihuri nu'aya, 'Epɨrahini xiɨyarimama hetsiemiemete meta Manatsexi xiɨyarimama Kamarieri Peratsuxi nu'aya,
NUM 1:11 Wenikamini xiɨyarimama hetsiemiemete, 'Awirani Kerehuni nu'aya,
NUM 1:12 Rani xiɨyarimama, 'Akihetsexi 'Amitsarahi nu'aya,
NUM 1:13 'Atsexi xiɨyarimama, Pakieri 'Ukɨrani nu'aya,
NUM 1:14 Kahari xiɨyarimama hetsiemiemete, 'Eriyatsati Rehuheri nu'aya,
NUM 1:15 Nepɨtahari xiɨyarimama hetsiemiemete, 'Akira 'Enahani nu'aya».
NUM 1:16 'Ikɨ mekanihɨkɨtɨni kiekatari memanuyeyaxe, memaka'utɨarie nuiwarite kememɨtehɨkɨ meta kuyaxi 'Ixaheritsixi tewa'aitɨwamete.
NUM 1:17 Hikɨ Muitsexi, 'Aruni hamatɨa 'ukitsi mekaniwarukuxeɨrieni memɨwaraka'utɨanikɨ kememɨtetetewatɨka memanayexeiyarie wahetsie,
NUM 1:18 hutarieka metseriyaritsie 'itsutɨakaku yunaime kiekatari mekaniwarukuxeɨrieni. Yuxexuitɨ mekanaka'utsieni hakewa memeyenunuiwaxɨ kemɨ'ane memɨtehaxiɨyari. 'Ana mekanaka'utuarieni yunaitɨ 'ukitsi xeitewiyari wiyari memexeiyatɨka,
NUM 1:19 Muitsexi yakatinikayani, Yawé kemɨtita'aitɨakai. 'Ikɨ Muitsexi kaniwaraka'utɨani Tsinahi 'uyeikatɨ makumawatsie.
NUM 1:20 Xuweni xiɨyarimama, 'Ixaheri matɨarieya, mekanaka'utsieni kemɨ'ane memutehaniwema meta memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨka mekanaka'utɨarieni kuyaxikɨ 'aixɨa memɨ'anenekai memɨyɨwawe.
NUM 1:21 Xuweni xiɨyarimama huta tewiyari heimana 'ataxewi miriyari heimana 'auxɨwi tsienituyari (46.500) 'ukitsi mekanakɨne.
NUM 1:22 Tsimehuni xiɨyarimamata mekanaka'utsieni kemɨ'ane memutehaniwema meta kemɨ'ane memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨka mekanaka'utɨarieni kuyakɨ 'aixɨa memɨ'anene.
NUM 1:23 Tsimehuni xiɨyarimama huta tewiyari heimana tamamata heimana 'atanauka miriyari heimana haika tsienituyari (59.300) 'ukitsi mekanakɨne.
NUM 1:24 Kahari xiɨyarimama mekanaka'utsieni kemɨ'ane memɨtehaniwema meta memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨka mekanaka'utsieni kuyaxikɨ 'aixɨa memɨ'anenekai.
NUM 1:25 Kahari xiɨyarimama huta tewiyari heimana 'auxɨwi miriyari heimana 'ataxewime tsienituyari heimana huta tewiyari heimana tamamata (45.650) 'ukitsi mekanakɨne.
NUM 1:26 Kura xiɨyarimama mekanaka'utsieni kemɨ'ane memɨtehaniwema meta memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨkatei mekanaka'utsieni kuyakɨ 'aixɨa memɨ'anene.
NUM 1:27 Kura xiɨyarimama haika tewiyari heimana tamamata heimana nauka miriyari heimana 'ataxewime tsienituyari (74.600) 'ukitsi mekanakɨne.
NUM 1:28 'Itsakaxi xiɨyarimama mekanaka'utsieni kemɨ'ane memɨtehaniwema meta kemɨ'ane memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨkatei mekanaka'utsieni kuyakɨ 'aixɨa memɨ'anene.
NUM 1:29 'Itsakaxi xiɨyarimama huta tewiyari heimana tamamata heimana nauka miriyari heimana nauka tsienituyari (54.400) 'ukitsi mekanakɨne.
NUM 1:30 Tsawuruni xiɨyarimama mekanaka'utsieni kemɨ'ane memɨtehaniwema meta kemɨ'ane memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨka mekanaka'utsieni kuyakɨ 'aixɨa memɨ'anene.
NUM 1:31 Tsawuruni xiɨyarimama huta tewiyari heimana tamamata heimana 'atahuta miriyari heimana nauka tsienituyari (57.400) 'ukitsi mekanakɨne.
NUM 1:32 Kutse xiɨyarimama: 'Epɨrahini xiɨyarimama mekana'utsieni kemɨ'ane memutehaniwema meta kemɨ'ane memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨkatei mekanaka'utsieni kuyakɨ 'aixɨa memɨ'anene.
NUM 1:33 'Epɨrahini xiɨyarimama huta tewiyari miriyari heimana 'auxɨwime tsienituyari (40.500) 'ukitsi mekanakɨne.
NUM 1:34 Manatsexi xiɨyarimamata mekanaka'utsieni kemɨ'ane memɨtehaniwema meta memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨkatei mekanaka'utsieni kuyakɨ 'aixɨa memɨ'anene.
NUM 1:35 Manatsexi xiɨyarimama xeitewiyari heimana tamamata heimana huta miriyari heimana huta tsienituyari (32.200) 'ukitsi mekanakɨne.
NUM 1:36 Wenikamini xiɨyarimama mekanaka'utsieni kemɨ'ane memɨtehaniwema meta memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨkatei mekanaka'utsieni kuyakɨ 'aixɨa memɨ'anene.
NUM 1:37 Wenikamini xiɨyarimama xeitewiyari heimana tamamata heimana 'auxɨwi miriyari heimana nauka tsienituyari (35.400) 'ukitsi mekanakɨne.
NUM 1:38 Rani xiɨyarimama mekanaka'utsieni kemɨ'ane memɨtehaniwema meta memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨka mekanaka'utsieni kuyakɨ 'aixɨa memɨ'anene.
NUM 1:39 Rani xiɨyarimama haika tewiyari heimana huta miriyari heimana 'atahuta tsienituyari (62.700) 'ukitsi mekanakɨne.
NUM 1:40 'Atsexi xiɨyarimamata mekanaka'utsieni kemɨ'ane memɨtehaniwema meta memɨtehaxiɨyarima, kehepaɨ memɨte'ununuiwaxɨ. Yunaitɨ 'ukitsi xeitewiyari wiyari memɨhɨtɨkatei mekanaka'utsieni kuyakɨ 'aixɨa memɨ'anene memɨkamama.
NUM 1:41 'Atsexi xiɨyarimama huta tewiyari heimana xewi miriyari heimana 'auxɨwime tsienituyari (41.500) 'ukitsi mekanakɨne.
NUM 1:42 Nepɨtahari xiɨyarimama mekanaka'utsieni kemɨ'ane memutehaniwema meta memɨtehaxiɨyarima, kehepaɨ memɨte'ununuiwaxɨa. Yunaitɨ 'ukitsi xeitewiyari wiyari memɨhɨtɨka mekanaka'utsieni kuyakɨ 'aixɨa memɨ'anene.
NUM 1:43 Nepɨtahari xiɨyarimama huta tewiyari heimana tamamata heimana haika miriyari heimana nauka tsienituyari (53.400) 'ukitsi mekanakɨne.
NUM 1:44 Merikɨte 'ipaɨ yupaɨmetɨ mekanakɨne kepauka Muitsexi 'Aruni hamatɨa memɨwaraka'utɨatsie, mewaparewiekaku 'Ixaheri xiɨyarimama tamamata heimana huta meyupaɨmetɨ, mɨkɨ yuxexuitɨ yunuiwari hetsiemieme mekaniyɨakaitɨni.
NUM 1:45 Yunaitɨ 'ixaheritsixi xeitewiyari wiyari memɨhɨtɨkatei, kuyakɨ 'aixɨa memɨ'anene mekanaka'utsieni, kememɨyupaɨmekai nuiwarite.
NUM 1:46 Yunaitɨ 'ixaheritsixi memaka'utsie, 'ataxewime tsienituyari heimana haika miriyari heimana 'auxɨwime tsienituyari heimana huta tewiyari heimana tamamata (603.550) meyupaɨmetɨ mekanakɨne.
NUM 1:47 Rewitsixi teɨteriyari mepɨkahaka'utɨarie hipame wahamatɨa,
NUM 1:48 matsi Yawé Muitsexi mɨpaɨ mɨtiutahɨawekaikɨ:
NUM 1:49 «Rewi xiɨyarimama pepɨkawaraka'utɨani, 'Ixaheri niwemama wahamatɨa memɨkayutinɨnɨwenikɨ.
NUM 1:50 'Aixɨa kaniyɨmɨkɨ, 'ekɨ pemɨwahɨritɨanikɨ tɨratu tukita mayeka hepaɨtsita meta naime hepaɨtsita ketipaɨmetɨ muwa mɨtiyepine kemɨtiyukumaɨwa. Rewitsixi Kakaɨyari tukieya mepɨ'ɨwiyani naime muwa mɨtiyepine. Yaxeikɨa yuheyemekɨ muyepatsietsie mekatene'uximayakakuni 'ahurawa memakuteitsie meheitayeme.
NUM 1:51 Kepauka tukieya xemanukwenitsie rewitsixi xeikɨa mekanitaxɨnakuni, kepauka memeitawewienitsie mɨkɨ xeikɨa mekaneyɨakakuni. Kemɨ'ane 'ahurawa mauyani tukieya manuka kamawari wewiwametɨtɨ kanemɨmɨkɨ.
NUM 1:52 Yunaitɨ 'ixaheri teɨteriyari yateewa mekanikuyaxixɨakuni yuxexuitɨ me'ukutetɨkaitɨ yupatera mehexeiyatɨkaitɨ kememɨteyunuiwari.
NUM 1:53 Hikɨ rewitsixi tɨratu tukita manuka 'aurie mekanikuyaxikuni, 'Ixaheri kwieyaritsie xemɨnuakakɨ kepauka Kakaɨyari ha'atɨ wahetsie munuani. Merikɨ rewitsixi xeikɨa mekanihɨkɨtɨkakuni tɨratu tukita hepaɨtsita tehɨwemete».
NUM 1:54 Hikɨ naimekɨ 'ixaheritsixi yamekatenikakɨne Yawé Muitsexi kemɨtiuta'aitɨa.
NUM 2:1 Merikɨtsɨ Yawé Muitsexi 'Aruni mame mɨpaɨ katiniwarutahɨawe:
NUM 2:2 «'Ixaheritsixi 'ixuriki tukiyari manuwe memayutixexeɨriwa 'aurie mekanayaxetɨkɨnikuni yupatera mehexeiyatɨ meta yu'inɨari, hepana meheutanenieretɨ, yuxexuitɨ kememɨyupapaɨme nuiwarite.
NUM 2:3 »Tau manatineika 'aurie, mana mekanitiyaxikuni kemɨ'ane Kura memaweiya, kememɨyupapaɨme. Nahatsuni wa'ukiyari kanihɨkɨtɨni 'Aminarawi nu'aya.
NUM 2:4 Yunaitɨ haika tewiyari heimana tamamata heimana nauka miriyari heimana 'ataxewime tsienituyari (74.600) 'ukitsi mekaniyupaɨmeni.
NUM 2:5 »Kura memakutei wa'aurie 'Itsakaxi xiɨyarimama mekanitiyaxikuni. Natanaheri wa'ukiyari kanihɨkɨtɨni Tsuhaxi nu'aya.
NUM 2:6 Yunaitɨ huta tewiyari heimana tamamata heimana nauka miriyari heimana nauka tsienituyari (54.400) 'ukitsi mekaniyupaɨmeni.
NUM 2:7 »Tapa pɨtata Tsawuruni xiɨyarimama mekanikuyaxikuni. 'Eriyáwi wa'ukiyari kanihɨkɨtɨni Heruni nu'aya.
NUM 2:8 Yunaitɨ huta tewiyari heimana tamamata heimana 'atahuta miriyari heimana nauka tsienituyari (57.400) 'ukitsi mekaniyupaɨmeni.
NUM 2:9 »Yunaitɨ Kura xiɨyarimama mekaniyupaɨmeni, xeitsienituyari heimana nauka tewiyari heimana 'ataxewi miriyari heimana nauka tsienituyari (186.400), mɨkɨ mekananuyeyaxikuni.
NUM 2:10 »Tatsutɨata Xuweni memaweiya yunaitɨ kememuyupaɨme yupatera hetɨa mana mekanitiyaxikuni, 'ikɨ yameyupaɨmetɨ. 'Eritsuxi wa'ukiyari kanihɨkɨtɨni Tserehuxi nu'aya.
NUM 2:11 Yunaitɨ kuyaximama huta tewiyari heimana 'ataxewi miriyari heimana 'auxɨwime tsienituyari (46.500) 'ukitsi mekaniyupaɨmeni.
NUM 2:12 »Xuweni wa'aurie Tsimehuni xiɨyarimama mekanitiyaxikuni. Tserumieri wa'ukiyari katinitewaka Tsuritsarahi nu'aya.
NUM 2:13 Yunaitɨ huta tewiyari heimana tamamata heimana 'atanauka miriyari heimana haika tsienituyari (59.300) 'ukitsi mekaniyupaɨmeni.
NUM 2:14 »Wa'aurieta mekanitiyaxikuni Kahari xiɨyarimama. 'Eriyatsati wa'ukiyari kanihɨkɨtɨni Xehueri nu'aya.
NUM 2:15 Yunaitɨ huta tewiyari heimana 'auxɨwi miriyari heimana 'ataxewi tsienituyari heimana huta tewiyari heimana tamamata (45.650) 'ukitsi mekaniyupaɨmeni.
NUM 2:16 »Yunaitɨ Xuweni xiɨyarimama memakutei, me'inɨaritɨ kememuyupaɨme wanuiwarite, xeitsienituyari heimana huta tewiyari heimana tamamata heimana xewi miriyari heimana nauka tsienituyari heimana huta tewiyari heimana tamamata (151.450) 'ukitsi memuyupaɨme, mɨkɨ hutariekatsie memɨyehu.
NUM 2:17 »Merikɨte 'ixuriki tukiyari me'akwetɨ rewitsixi mekaniyekɨkakaɨtɨni yunaime wahixɨapa memukutei. Yaxeikɨa mekateniyaxikuni kehepaɨ memɨteheukutekai yuxexuitɨ yuhuyeripa meta yupatera me'akwetɨ.
NUM 2:18 »Tau makayuyuipiketsie yupatera hetɨa mekanitiyaxikuni 'Epɨrahini xiɨyarimama, kehepaɨ memɨteheukununuiwa. 'Eritsama wa'ukiyari kanihɨkɨtɨni 'Amihuri nu'aya.
NUM 2:19 Kuyaximama nauka tewiyari miriyari heimana 'auxɨwime tsienituyari (40.500) 'ukitsi memuyupaɨme.
NUM 2:20 »'Epɨrahini 'aurieta mekanitiyaxikuni Manatsexi xiɨyarimama. Kamarieri wa'ukiyari kanihɨkɨtɨni Peratsuxi nu'aya.
NUM 2:21 Kuyaximama xeitewiyari heimana tamamata heimana huta miriyari heimana huta tsienituyari (32.200) 'ukitsi mekaniyupaɨmeni.
NUM 2:22 »Xaɨtsieta mekanitiyaxikuni Wenikamini xiɨyarimama. 'Awirani wa'ukiyari mɨhɨkɨ Kerehuni nu'aya.
NUM 2:23 Yunaitɨ xeitewiyari heimana tamamata heimana 'auxɨwi miriyari heimama nauka tsienituyari (35.400) 'ukitsi mekaniyupaɨmeni.
NUM 2:24 »Yunaitɨ kuyakɨ memɨyɨwawe 'Epɨrahini 'aurie memukutei, yunaitɨ me'inɨaritɨ yameyupapaɨmetɨ, xeitsienituyari heimana 'atahaika miriyari heimana xeitsienituyari (108.100) 'ukitsi, mɨkɨ mekaniyehuni hairiekatsie.
NUM 2:25 »Tayeta mekanitiyaxikuni Rani xiɨyarimama, kememɨyupaɨme. 'Akihetsexi wa'ukiyari kanihɨkɨtɨni 'Amitsarahi nu'aya.
NUM 2:26 Mekaniyupaɨmeni yunaitɨ haika tewiyari heimana huta miriyari heimana 'atahuta tsienituyari (62.700) 'ukitsi.
NUM 2:27 »Rani 'aurieta 'Atsexi xiɨyarimama mekanitiyaxikuni. Pakieri wa'ukiyari mɨhɨkɨ 'Ukɨrani nu'aya.
NUM 2:28 Yunaitɨ huta tewiyari heimana xewi miriyari heimana 'auxɨwi tsienituyari (41.500) 'ukitsi memɨhɨkɨ.
NUM 2:29 »Wa'auriepaita mekanikuyaxikuni Nepɨtahari xiɨyarimama. Wa'ukiyari pɨhɨkɨ 'Akira 'Enahani nu'aya.
NUM 2:30 Yunaitɨ mekaniyupaɨmeni huta tewiyari heimana tamamata heimana haika miriyari heimana nauka tsienituyari (53.400) 'ukitsi.
NUM 2:31 »Yunaitɨ memuta'inierie kuyaxi Rani 'aurie mekanikuyaxe, yunaitɨ xeitsienituyari heimana huta tewiyari heimana tamamata heimana 'atahuta miriyari heimana 'ataxewime tsienituyari (157.600) 'ukitsi mekaniyutipaɨmere, mɨkɨ wa'utɨmake mekanayekɨnikuni yupatera me'akwetɨ».
NUM 2:32 Merikɨte 'ikɨ mekanihɨkɨtɨni 'ixaheritsixi waniwema memaka'utɨarie kuyaxikɨ memɨyɨwawe kememɨyupapaɨmekai. Yunaitɨ Kuyaxi memuta'inierie yuxexuitɨ 'ataxewi tsienituyari heimana haika miriyari heimana 'auxɨwi tsienituyari heimana huta tewiyari heimana tamamata (603.550) 'ukitsi mekaniyutipaɨmere.
NUM 2:33 Peru Rewitsixi hipame 'ixaheritsixi wamahatɨa mepɨka'utinɨitɨarie, Yawé Muitsexi kemutiuta'aitɨakai yapɨtiuyɨ.
NUM 2:34 Hikɨ 'ixaheritsixi Yawé Muitsexi mɨpaɨ kemɨtiutahɨawekai yamekatenikakɨne: kememɨyupapaɨmekai 'axeikɨa mekanikuyaxikekaitɨni yupatera mehexeiyatɨkaitɨ meta memayekɨkakaitsie kememɨte'ununuiwaxɨ mɨpaɨ mekatenayekɨkakaitɨni 'iwamarixi xeinuiwaritetsie miemete.
NUM 3:1 Merikɨte 'Aruni niwemama mɨpaɨ mekatenaka'utɨarieni Muitsexi hamatɨa, kepauka Yawé Muitsexi hamatɨa mɨtiutixa Tsinahi hɨriyaritsie.
NUM 3:2 Mɨpaɨ mekatenaka'utɨarieni kememɨtetetewakai 'Aruni niwemama: Narawi matɨarimieme, 'Awihu, 'Eriyatsaxi meta 'Itamaxi 'imatɨreme.
NUM 3:3 Mɨkɨ 'Aruni tɨɨriyamama memanayexeiyarie memɨpatsie mekanihɨkɨtɨni, mawari wewiwamete te'uximayatamete memakɨnekɨ.
NUM 3:4 Narawi 'Awihu matɨari mekaniukwini Yawé hɨxie, kepauka makumawetsie Tsinahi mɨrakutewa memu'uwakai, mawari taiyariyari mekaniwaruwewirieni yakɨxeikɨa mɨhɨkɨ. Matsi Narawi 'Awihu hamatɨa tɨɨri memɨkawarayexeikɨ, 'Eriyatsaxi 'Itamaxi hamatɨa xeikɨa mekanimawari wewiwametetɨkaitɨni yupaapa tukarieya hepaɨtsita, 'Aruni hetsiemieme.
NUM 3:5 Yawé Muitsexi mɨpaɨ katiniutahaɨwe:
NUM 3:6 «Rewi xiɨyarimama keniwawitɨmie 'Aruni hɨxie keniwati'uitɨa. Rewitsixi mekaniparewikuni mɨra'uximayatsie.
NUM 3:7 'Aruni kemɨtiyurienekai yamekateniyuriekakuni hetsiena mieme meta yunaitɨ mana kiekatari, mewahɨritɨatɨ memɨte'uximayakakɨ mɨkɨ 'ixuriki tukiyarita.
NUM 3:8 Naime muwa mɨtiyepine 'ixuriki tukiyarita mekateni'ɨwiyakakuni, muwa mete'uximayatɨ 'ixaheritsixi, yamemɨteyuriekakɨ memɨte'uximayakakɨ meyɨhɨritatɨ 'ixuriki tukiyarita.
NUM 3:9 'Aruni, rewitsixi pekaniwahɨritɨamɨkɨ mɨtiwata'aitɨanikɨ meta waniwema. Mɨkɨ xeikɨa mekanihɨkɨtɨkakuni nehetsiemieme memɨte'uximayaka 'ixaheritsixi watsata.
NUM 3:10 'Aruni niwemama mawari wewiwametekɨ xeikɨa mekaniwaranayexeiyakuni. Kemɨ'ane kamawari wewiwametɨtɨ 'ixuriki tukiyarita mɨye'ani mɨkɨ kanimieriemɨkɨ kareuyehɨwiyarietɨ».
NUM 3:11 Yawé Muitsexi mɨpaɨ katiniutahɨawe:
NUM 3:12 «Ne 'Ixaheritsixi wanuiwaritsie rewitsixi nekaniwaranuyexeiya, matɨari nunuiwakate wahepaɨ. Rewitsixi nehetsɨa miemete mekanihɨkɨtɨni,
NUM 3:13 matsi matɨari nunuiwakate nehetsɨa miemete memɨhɨkɨkɨ. Kepauka 'Ekipitu matɨari nunuiwakate nemɨwarutayuniyaxɨtsie, 'ana nekaniwarupata nehetsɨa memɨmiemetetɨnikɨ matɨari nunuiwakate 'ixaheritsixi teɨteriyari, teɨteri meta tewaxi. 'Ayumieme hikɨ nehetsɨa mekanimiemetetɨni. Ne Yawé nekanihɨkɨtɨni».
NUM 3:14 Merikɨtsɨ Yawé Muitsexi mɨpaɨ katiniutahɨawe Tsinahi makumawetsie paitɨ:
NUM 3:15 «Rewi xiɨyarimama meta nuiwarimama kememɨyupapaɨme keniwaraka'utɨa, yunaime 'ukitsi xeimetseri memexeiyatɨka mana meutiyune».
NUM 3:16 Hikɨ Muitsexi kanitsutɨani waraka'utɨwatɨ, Yawé kemɨrehɨawekai yakatinikayani.
NUM 3:17 Rewi niwemama mepɨhɨkɨ: Keritsuni, Kuhati meta Merari.
NUM 3:18 Keritsuni nuiwarimama memakɨ: Riwini hamatɨa Tsimi.
NUM 3:19 Kuhatitsixi memɨhɨkɨtɨkai: 'Amirani, 'Itsaxi, Hewuruni meta 'Utsiheri.
NUM 3:20 Merari nuiwarimama: Makiri meta Mutsihí. 'Ikɨ mekanihɨkɨtɨni rewitsixi wanuiwarima, memaka'utsie kememɨte'ununuiwaxɨ.
NUM 3:21 Keritsuni hetsie memɨyenunuiwakai Riwini mekanihɨkɨtɨni Tsimi hamatɨa. 'Ikɨ kerutsunitsixi memɨwaraweiyakai mekanihɨkɨtɨni.
NUM 3:22 Yunaime 'ukitsi xeimetseri memexeiyatɨka mana meutiyune, 'atahuta miriyari heimana 'auxɨwi tsienituyari (7.500) 'ukitsi meyupaɨmetɨ mekanakɨne.
NUM 3:23 Keritsuni nuiwarimama memɨhɨkɨ tau manukayuyuipike 'aurie mekanikutekaitɨni tuki manuwe hetɨa.
NUM 3:24 Keritsuni nuiwarimama wa'ukiyari 'Eriyatsati kanihɨkɨtɨkaitɨni Raheri nu'aya.
NUM 3:25 'Ixurikite tukiyari hetsiemieme, Keritsuni nuiwarimama mekanihɨritɨariekaitɨni tuki manukanakaikɨ mɨreutahakitɨretsie, nawi manukawere 'ixurikite heima,
NUM 3:26 'ixuriki kuraruyari takwa maka meta 'ixuriki meuwu kuraru kiteniyaritsie meta mawari taiyame warita makatei, yaxeikɨata tinaime kɨmana mɨrakuwɨwɨre memɨtekumaɨwakai.
NUM 3:27 Kuhati hetsie mepɨyekɨ 'Amirani nuiwarimama, 'Itsaxi nuiwarimama, Hewuruni nuiwarimama meta 'Utsiheri nuiwarimama. 'Ikɨ Kuhati nuiwarimama mepɨhɨkɨtɨkai,
NUM 3:28 memɨte'uximayakai tukita. Yunaime 'ukitsi xeimetseri memexeiyatɨka mana meutiyune, 'atahaika miriyari heimana 'ataxewi tsienituyari (8.600) mekaniyupaɨmekaitɨni 'ukitsi.
NUM 3:29 Kuhati memaweiyakai tuki manuwe tserieta mekanititekaitɨni.
NUM 3:30 Kuhatitsixi kememɨyupaɨmekai 'Eritsapani wa'ukiyari kanihɨkɨtɨkaitɨni 'Utsiheri nu'aya.
NUM 3:31 Mɨkɨ mekanihɨritɨariekaitɨni tukita kakuni, mexa, kɨxeme, mawari taiyameta, tukita mɨrayepine xakɨrɨte, watsute, 'itɨte mɨkɨ mepɨtekumaɨwa meta 'ixuriki waɨkawa muyepatsieta meuwɨkai, yaxeikɨa naime tita mɨreuyewekai memɨte'uximayakakɨ.
NUM 3:32 Rewitsixi wa'ukiyari yemekɨ 'Eriyatsaxi kanihɨkɨtɨkaitɨni 'Aruni nu'aya mawari wewiwame, mɨkɨ mɨhɨritɨariekaikɨ tuki muyepatsieta mɨtiwa'aitɨakakɨ mɨwa'ukiyaritɨkaikɨ.
NUM 3:33 Merari hetsɨa miemete Makiri hamatɨa Mutsihí mekanihɨkɨtɨni. 'Ikɨ mekanihɨkɨtɨni Meraritsixi nuiwarimama.
NUM 3:34 Yunaime 'ukitsi xeimetseri memexeiyatɨka mana meutiyune, 'ataxewime miriyari heimana huta tsienituyari (6.200) meyupaɨmetɨ mekanakɨne 'ukitsi.
NUM 3:35 Meraritsixi wa'ukiyari Tsurieri kanihɨkɨtɨkaitɨni 'Awikahiri nu'aya. Merari nuiwarimama tuki manuwe 'utata mekanikutekaitɨni.
NUM 3:36 Mɨkɨ mekanihɨritɨariekaitɨni memɨtetimɨwanikɨ, tatsɨari tukitsie mɨranuyehipite, mexa hetsiena ma'uni, meta muka'utɨka meta tinaitɨ muwa mɨtiyepine mɨtiyukumaɨwa.
NUM 3:37 Yaxeikɨa kɨyexi muka'utɨka mekani'ɨwiyakaitɨni meta tekɨapai maheitɨkatei naime makuwutɨkatei kaunariyari.
NUM 3:38 Muitsexi 'Aruni hamatɨa meta waniwema yunaitɨ 'ixuriki tukiyari hɨxie mekanititekaitɨni, tatsɨari tau manatineika 'aurie, 'ixuriki tukiyari memɨhɨritɨariekaikɨ 'ixaheritsixi wahetsiemieme memɨwayetuayanikɨ. Peru kemɨ'ane kamawari wewiwametɨtɨ mana 'ahurawa mɨye'ani, mɨkɨ mekanitakwikwiwakaitɨni.
NUM 3:39 Muitsexi 'Aruni hamatɨa rewitsixi mekaniwaruka'utɨani Yawé kemɨtiwaruta'aitɨakai tiwarutaxatɨaka. Yunaitɨ rewitsixi xeimetseri memexeiyatɨka huteikɨ mautiyune mekanaka'utsieni, kememɨyupapaɨmekai mekaniuti'ani xeitewiyari heimana huta miriyari (22.000) meyupaɨmetɨ mekanakɨne 'ukitsi.
NUM 3:40 Merikɨtsɨ Yawé Muitsexi mɨpaɨ katiniutahɨawe: «Keniwaruka'utɨa yunaime 'ixaheritsixi matɨari miemete 'ukitsi xeimetseri memexeiyatɨka mana meutiyune kememɨtetetewa pewaraka'utɨwatɨ.
NUM 3:41 Yunaitɨ rewitsixi nehetsiemieme mepakɨne 'ixaheritsixi matɨari miemete wahetsiemieme, metatsiere rewitsixi watewama, 'ixaheritsixi watewama matɨari miemete wahetsiemieme. Ne Yawé nekanihɨkɨtɨni».
NUM 3:42 Muitsexi 'ixaheritsixi kaniwaruka'utɨani matɨari miemete, Yawé kemɨtita'aitɨakai.
NUM 3:43 Yunaitɨ me'inɨaritɨ 'ukitsi xeimetseri memexeiyatɨka mana meutiyune, mexɨakate memaka'utsiwakai kememɨtetetewa xeitewiyari heimana huta miriyari heimana huta tsienituyari heimana haika tewiyari heimana tamamata heimana haika (22.273) mekaniuyutipaɨmere 'ukitsi.
NUM 3:44 Hikɨ Yawé Muitsexi mɨpaɨ katiniutahɨawe:
NUM 3:45 «Yunaitɨ rewitsixi nehetsiemieme mepakɨne 'ixaheritsixi matɨari miemete wahetsiemieme, metatsiere rewitsixi watewama, 'ixaheritsixi watewama matɨari miemete wahetsiemieme. Rewitsixi nehetsiemieme mepakɨne. Ne Yawé nekanihɨkɨtɨni.
NUM 3:46 »Para pemɨwatawikweitsitɨanikɨ huta tsienituyari heimana haika tewiyari heimana tamamata heimana haika (273) mexɨakate 'ixaheritsixi, rewitsixi memɨkayuwaɨkawakɨ,
NUM 3:47 pekaniyetuamɨkɨ 'auxɨwime tumini pɨrata raheteme yuxexuime wahetsiemieme, tukita mieme tumini kemɨrahete, tamamata heimana xewi kɨramuyari pɨrahete.
NUM 3:48 Mɨkɨ tumini yunaime pekaniwayetuiriemɨkɨ 'Aruni meta niwemama, 'ixaheritsixi kepemɨtiwarutawikweitsitɨa memuti'inɨatsietsie memɨyumɨirekaikɨ».
NUM 3:49 Hikɨ Muitsexi mɨkɨ tumini kananu'ɨni 'ixaheritsixi wahetsiemieme, rewitsixi memɨkayuwaɨkawakaikɨ.
NUM 3:50 Kaniuku'ɨni, xeimiriyari heimana haika tsienituyari heimana haika tewiyari heimana 'auxɨwi (1.365) tumini pɨratayari, kemɨti'inɨatakai tumini tukita mieme.
NUM 3:51 Hikɨ kaniyetuani mɨkɨ tumini 'Aruni hetsɨa meta niwemama wahetsɨa, yemekɨ Yawé kemɨtita'aitɨa.
NUM 4:1 Merikɨte Yawé Muitsexi 'Aruni mame mɨpaɨ katiniwarutahɨawe:
NUM 4:2 «Rewitsixi xekeniwaraka'utɨa, Kuhati nuiwarimama meta hetsiena memɨyekɨ.
NUM 4:3 Yunaime xekeniwaraka'utɨa xeitewiyari heimana tamamata wiyari huteikɨ meheutiyuneme, huta tewiyari heimana tamamata wiyari me'uti'akame 'ukitsi 'aixɨa memɨ'anene 'ixuriki tukiyarita memɨte'uximayakakɨ.
NUM 4:4 »Kuhatitsixi tehɨwemete mekanihɨtɨkakuni 'ixuriki tukita mɨtiyepine kwinimieme mɨtimaiwetɨka hepaɨtsita piinitɨarika.
NUM 4:5 Kepauka 'ixaheritsixi memayekɨnetsie, 'Aruni yuniwematɨ 'ixuriki tukita mekaneutahaxɨakuni mekaneixɨnakuni 'ixuriki meuwie memeikunanikɨ kakuni tɨratuyari maukunakakɨ.
NUM 4:6 'Ariketa ketsɨ 'amɨpa nawiyarieya mekaneikunakuni meta tuwaxakɨ mɨyɨtsikimaɨye, kɨyexita mekananukutuakuni kɨmana memikukwetɨwenikɨ.
NUM 4:7 »Yawé hɨxie mexa muwe 'ixuriki mɨyɨtsikimaɨye mekananakawerakuni, mana mekatenapikuni xakɨrɨte, pateyute yakɨmɨpepe, tekɨxite, ye'ɨrɨte 'amɨnene kaxie winuyari mɨtiyeuriwa mawariyari yunɨkame. Yaxeikɨata paa mana kanamakamɨkɨ yuheyemekɨ mɨmawarie.
NUM 4:8 Naime 'ikɨ wahetsie xekanenukawerakuni 'ixuriki mɨxetakɨ. Yaxeikɨa mexa ketsɨ 'amɨpa nawiyarieya xekanenukanakuni meta kɨyexita mekananukutuakuni kɨmana memikukwetɨwenikɨ.
NUM 4:9 »Xeime 'ixuriki mɨyɨtsikimaɨyekɨ kɨxeme 'uitɨwame meta kɨxemete, titɨkɨme, naxi yetsame meta naime tita mɨtiyukumaɨwa hatseitikɨ xekatenanukanakuni.
NUM 4:10 Hikɨ xekanenukanakunita kɨxeme 'uitɨwame meta naime mana timieme ketsɨ 'amɨpa nawiyarieya, kaxetatsie xekaneikayekuni.
NUM 4:11 »Meta 'ixuriki mɨyɨtsikimaɨye, mɨratimawatɨre hurukɨ xeikɨa mɨwewiya xekanenukaweriekuni metatsiere ketsɨ 'amɨpa nawiyarieyakɨ, kɨyexita xekananukutuakuni kɨmana mukukweiyanenikɨ.
NUM 4:12 »Xekanita'eimakuni 'ixuriki mɨyɨtsikimaɨyekɨ naime tita mɨtiyukumaɨwa 'ixuriki tukita, heimana ketsɨ 'amɨpa nawiyarieyakɨ xekanikanakuni meta kɨyexitsie xekaniyehɨakuni manɨtɨkienikɨ.
NUM 4:13 »Mɨtiwatitaiyarɨwatsie naxi xekanewayewiwikuni, 'ana 'ixurikikɨ kwimɨxetakɨ xenita'eimakuni.
NUM 4:14 Hetsiena xekatenikapikuni naime tita mana mɨtiyukumaɨwakai, tɨ muiname, tepɨa manɨxɨte, 'itɨ 'amɨpa, tekɨxite ye'ɨrɨte 'amɨnene, meta naime tita mana mɨtiyukumaɨwa. Hikɨ heimana ketsɨ 'amɨpa nawiyarieyakɨ xekanenuka'eimakuni meta kɨyexi xekananuye'uitɨakuni para mɨkutɨkienenikɨ.
NUM 4:15 »Kepauka 'Aruni yuniwema wahamatɨa memɨtinɨni mete'anukanarɨmatɨ naime, hikɨ 'anake 'ixaheritsixi mekaniyehuni. 'Ana kuhatitsixi mekanenɨtɨkuni tuki, perutsɨ meka'ikumaɨwatɨ nɨkahɨrixie me'ukwinikɨ. Yaxeikɨata muwa 'ixuriki tukita mɨrayepine mekatenanutɨkuni.
NUM 4:16 »Hikɨ, 'Eriyatsaxi 'Aruni nu'aya, kanihɨritɨariekamɨkɨ hatseiti kɨxeme hetsiemieme 'ɨkwa witsimu'ɨa meta tɨriku mawariyari hetsiemieme meta hatseiti mɨtiyupata. Metatsiere 'ixuriki tukita ti'ɨwiyame kanihɨkɨtɨkamɨkɨ meta naitɨ muwa mɨtiyepine».
NUM 4:17 Yawé Muitsexi 'Aruni mame mɨpaɨ katiniwarutahɨawe:
NUM 4:18 «Kuhati hetsie memɨyekɨ xekeniwa'ɨwiyani para Rewi nuiwarimama memɨkaheuyewautsenikɨ.
NUM 4:19 Kepauka 'ahurawa memɨkɨkanitsie mɨtimaiwetɨka hetsie, memɨkakukukuwenikɨ mɨpaɨ xekateniyuriekakuni: 'Aruni yuniwema wahamatɨa mekaniwaranayexeiyakuni, yuxexuime kememɨteyurieka meta memɨte'anɨtɨnikɨ.
NUM 4:20 Peru kuhatitsixi mepɨkatetixexeiyani piinite mɨtimaiwetɨka 'etsiwa tɨma, kapa me'ukwinikɨ».
NUM 4:21 Merikɨte Yawé Muitsexi 'Aruni mame mɨpaɨ katiniwarutahɨawe:
NUM 4:22 «Xekeniwaraka'utɨata Keritsuni nuiwarimama, wanuiwarima yunaime xewa'inɨatatɨ kememɨyupapaɨme.
NUM 4:23 Yunaime xekeniwaraka'utɨa xeitewiyari heimana tamamata wiyari huteikɨ meheutiyuneme, huta tewiyari heimana tamamata wiyari me'uti'akame 'ukitsi 'aixɨa memɨ'anene 'ixuriki tukiyarita memɨte'uximayakakɨ.
NUM 4:24 »Keritsuni nuiwarimama tetɨkɨmete mehɨritɨarietɨ mekateni'uximayakakuni.
NUM 4:25 'Ixuriki tukiyaritsie timieme xepɨte'anutɨni, memayutixexeɨriwa heima manukawerire, ketsɨ 'amɨpa nawiyarieya manukawerire heimana meta 'ixuriki mɨrewatixaxatsiwa memanutakɨkatsie meuwie.
NUM 4:26 'Ixuriki kuraruyari takwa maka meta 'ixuriki meuwɨ kuraru kitenieyaritsie mepɨte'anutɨni meta takwa mieme maka, yaxeikɨata tinaime muwa mɨtiyukumaɨwa kɨmana mɨrakuwɨwɨre memɨtekumaɨwakai.
NUM 4:27 'Ikɨ naitɨ 'uximayatsika memɨte'anɨtɨnikɨ mɨtiyukumaɨwa, yatɨni 'ixuriki tukita xɨka meteta'uximayatakuni, 'Aruni meta niwemama wahetsɨa xeikɨa xekaniyɨwawekuni. Mɨkɨ xeikɨa yamehaitɨkaikaku pɨyɨweni mɨranutɨkieni.
NUM 4:28 Kepauka memɨte'uximayaka Keritsuni nuiwarimama 'ixuriki tukiyari memayutixexeɨriwatsie, 'Itamaxi 'Aruni nu'aya mawari wewiwame kaniwataxeiyakamɨkɨ.
NUM 4:29 »Xekeniwaraka'utɨa Merari xiuyarimama, wanuiwarima yunaime xewa'inɨatatɨ kememɨyupapaɨme.
NUM 4:30 Yunaime keniwaraka'utɨa xeitewiyari heimana tamamata wiyari memexeiyatɨka huteikɨ meutiyune meta huta tewiyari heimana tamamata wiyari me'uti'akame, 'ukitsi memɨyɨwawe 'ixuriki tukiyarita memɨte'uximayakakɨ.
NUM 4:31 Mɨkɨ mekanihɨritɨariekaitɨni memɨtetimɨwanikɨ, tatsɨari tukitsie mɨranuyehipite, mexa hetsiena ma'uni, meta muka'utɨka meta tinaime muwa mɨtiyepine mɨtiyukumaɨwa,
NUM 4:32 yaxeikɨata takwa warita ma'utɨyeika, muka'uwe, manukuhipite meta kɨmana mahɨaretɨyeika naime tita mɨtiyɨkɨmaɨwa waɨkawa mɨreuyewetse. 'Ekɨ yapetiwakɨhɨawekaku kehepaɨ memɨteyurieka yuxexuitɨ tita memɨte'anutɨxɨani.
NUM 4:33 Merari nuiwarimama memɨte'uximayakatsie 'ixuriki tukita memayutixexeɨriwatsie, 'Itamaxi waxexeiyame pɨhɨkɨtɨni mawari wewiwame 'Aruni nu'aya».
NUM 4:34 Muitsexi 'Aruni hamatɨa meta 'ukirawetsixi memanuyetei, Kuhati nuiwarimama mekaniwaruti'inɨata kememɨyupapaɨme.
NUM 4:35 Mekanaka'utsieni yunaitɨ xeitewiyari heimana tamamata wiyari meutiyune meta huta tewiyari heimana tamamata wiyari me'uti'atɨ, 'aixɨa memɨ'anene 'ixuriki tukiyarita memɨte'uximayakakɨ.
NUM 4:36 Yunaitɨ me'inɨaritɨ mɨkɨ nuiwari mekanakɨne huta miriyari heimana 'atahuta tsienituyari heimana huta tewiyari heimana tamamata (2.750) 'ukitsi.
NUM 4:37 Mɨpaɨ meyupaɨmetɨ mekanakɨne Kuhati nuiwarimama memɨte'uximayakakɨ 'ixuriki tukita, memɨwaruti'inɨataxɨ Muitsexi meta 'Aruni, Yawé kemɨtiwaruta'aitɨakai.
NUM 4:38 Mekanaka'utsieni Keritsuni maremama kememɨyupapaɨmekai nuiwari.
NUM 4:39 Mekanaka'utsieni yunaitɨ xeitewiyari heima tamamata wiyari meheutiyunetɨ meta huta tewiyari heimana tamamata wiyari me'uti'atɨ 'aixɨa memɨ'anene 'ixuriki tukiyarita memɨte'uximayakakɨ.
NUM 4:40 Yunaitɨ me'inɨaritɨ mɨkɨ nuiwari mekanakɨne huta miriyari heimana 'ataxewime tsienituyari heimana xeitewiyari heimana tamamata (2.630) 'ukitsi.
NUM 4:41 Mɨpaɨ yupaɨmetɨ mekanakɨne Keritsuni maremama 'ixuriki tukita memɨteta'uximayata, Muitsexi kememɨtewaruti'inɨataxɨ 'Aruni hamatɨa, Yawé kemɨtiwaruta'aitɨa.
NUM 4:42 Merari xiɨyarimama mekanaka'utsieni kememɨyupapaɨmekai nuiwarite.
NUM 4:43 Yunaitɨ mekanaka'utsieni 'ukitsi xeitewiyari heimana tamamata wiyari meutiyune meta huta tewiyari heimana tamamata wiyari me'uti'atɨ, 'aixɨa memɨ'anene 'ixuriki tukiyarita memɨte'uximayakakɨ.
NUM 4:44 Yunaitɨ me'inɨaritɨ mekanakɨne haika miriyari heimana huta tsienituyari (3.200) 'ukitsi.
NUM 4:45 Mɨpaɨ meyupaɨmetɨ mekanakɨne memaka'utsie Merari nuiwarimama, Muitsexi meta 'Aruni kememɨtewaraka'utɨa, Yawé kemɨtiwaru'aitɨakai.
NUM 4:46 Muitsexi meta 'Aruni hamatɨa, meta memanuyetei 'ixaheritsixi mekaniwaruti'inɨata rewitsixi kehepaɨ memɨte'ununuiwaxɨ kemɨ'ane memɨtehanuiwari.
NUM 4:47 Yunaitɨri me'inɨaritɨ 'ukitsi xeitewiyari heimana tamamata mehautiyunetɨ meta huta tewiyari heimana tamamata me'uti'atɨ 'aixɨa memɨ'anene 'ixuriki tukiyarita memɨte'uximayakakɨ meta memɨte'anutɨnikɨ,
NUM 4:48 mekanakɨne 'atahaika miriyari heimana 'auxɨwime tsienituyari heimana nauka (8.580) tewiyari.
NUM 4:49 Yawé, Muitsexi kemɨtiutahɨawixɨ, yuxexuitɨ yamekateniuta'aitɨarieni kememɨteyuriekakekai meta tita memɨte'utitɨkɨnikekai. Mɨpaɨ mekatenaka'utsieni Yawé Muitsexi kemɨtiuta'aitɨakai.
NUM 5:1 Hikɨ Yawé Muitsexi mɨpaɨ katiniutahɨawe:
NUM 5:2 «'Ixaheritsixi mɨpaɨ ketiniwaruta'aitɨa kemɨ'ane kati'itiyakame mɨtimayɨani haiya yunawiyaritsie memexeiyatɨka yuhetsɨa memɨwarayenɨ'anikɨ, yatɨni timɨkime mɨtiumayɨani, yatɨni mikumayɨa xeime pɨniya 'uhanitsitɨakame.
NUM 5:3 Tsepanetɨ 'ukitsi meta memɨ'ukari, xemakuteitsie pekaniwarayenɨ'amɨkɨ, para memɨkaxewiriekakɨ mana xemakuteitsie xeme neteɨterima».
NUM 5:4 Hikɨ mɨpaɨ mekateniuyurieni 'ixaheritsixi memakuteitsie mekaniwarayenɨ'ani, Yawé Muitsexi kemɨrehɨawekai ti'aitɨatɨ.
NUM 5:5 Yawé Muitsexi mɨpaɨ katiniuta'aitɨani
NUM 5:6 'ixaheritsixi mɨpaɨ mɨtiwatahɨawekɨ: «Kemɨ'ane 'uki yatɨni 'uka, yu'iwa 'axamuyuri yatɨni mɨtinawatsiri, ne Yawé nehɨxie 'axakatiniuyurieni 'ayumieme yukɨmana katinayukatuamɨkɨ.
NUM 5:7 Kaniyutahekɨatamɨkɨ ke'axamɨtiuyuri, meta katinekapitɨamɨkɨ kemɨ'ane 'axamuyuri 'auxɨwimexɨa 'anamanekame kaniyetuiriemɨkɨ.
NUM 5:8 Peru xɨka mɨyamɨranuyetɨa 'iwamama me'umaweni, mɨtiyetuiyani Yawé hetsiemieme katinayeimɨkɨ mawari wewiwame katiniyetuiriyariemɨkɨ, muxa 'uki heutinɨkame mɨtimawarienikɨ 'axamɨtiuyurikɨ.
NUM 5:9 Naitɨ mawari 'ixaheritsixi memiyetuaya mawari wewiwame hetsɨa mɨkɨ hetsiena mieme katinihɨkɨtɨni.
NUM 5:10 Kemɨ'ane yɨkɨmana mɨtiupata mɨkɨ katinihetsienamiemeyaritɨni, peru mawari wewiwame tita mutiyetuiriyarɨwa katinipiinieyatɨni».
NUM 5:11 Yawé Muitsexi mɨpaɨ katiniuta'aitɨani
NUM 5:12 'ixaheritsixi mɨpaɨ mɨtiwatahɨawekɨ: «'Inɨarikɨ tetekuxatatɨ, xewitɨ 'uka 'aixɨa tiwikietɨtɨ xaɨtsie kaneukuyune yɨkɨna 'aixɨa 'iyari kapawitɨkɨkai
NUM 5:13 xeime hamatɨa hunetɨ, 'inɨarikɨ tetekuxatatɨ kename kahahekɨa mɨyamɨyɨane, mɨkɨ 'awie mukahuikɨ, meta xewitɨ mɨkarakumatekɨ memɨka'uxeiyariekɨ mɨpaɨmeyɨatɨ.
NUM 5:14 Xɨka kɨnaya 'ɨtetsarikaya hetsiena ye'ani mɨpaɨ retimani kename 'ɨyaya mayɨiya, tsepa mɨka'ukumayɨiya,
NUM 5:15 hikɨ nenuwitɨmɨkɨ mawari wewiwame hetsɨa, harina tsewarayari huta kiruyari kanitimawamɨkɨ hetsienamieme. Mawarika hetsie hatseiti pɨkaheutitu'ani meta 'ɨkwa witsimu'ɨa, 'ɨtetsarika hetsiemieme mɨtiyɨanekɨ, hatsi mawarikayari 'axamɨti'ane mɨtihekɨarekɨ.
NUM 5:16 »Mawari wewiwame Yawé hɨxie 'ukaratsi kananuwitɨmɨkɨ,
NUM 5:17 haa mɨpatsie tekɨxita kaniukatuamɨkɨ, 'etsiwata kwie kaniukawiwimɨkɨ tukita mieme.
NUM 5:18 Hikɨ Yawé hɨxie kanenuwitɨmɨkɨ, kɨpaya kanikuxɨnamɨkɨ, 'iyaritɨarika mawariyari katinipitɨamɨkɨ, mawari wewiwame mexi tekɨxi 'ahana 'axamɨ'ane matsiwi muyema.
NUM 5:19 Hikɨ mawari wewiwame 'uka yurikɨ mɨpaɨ katinitahɨawimɨkɨ: “Xɨka 'akɨna matsi'awitɨkɨkaku xeime hamatɨa pekakahuiweni, xɨka 'axamɨ'ane peka'anukuweiyaweni, 'ikɨ haa matsiwi 'axamɨ'itɨarie 'atsipɨkamatsiyurieni.
NUM 5:20 Peru xɨka 'akɨna pehexeiyatɨtɨ pe'iku'eirieni, 'axapekani'ayurieni 'akɨmana xeime pɨta hamatɨa 'uki pehuimɨtɨ
NUM 5:21 —'ena mawari wewiwame 'ukaratsi yurikɨ yakatinitahɨawimɨkɨ—, Yawé, 'ahetsie 'axamɨti'ane ke'ukawiwieni kemaine 'ahetsiemieme, pekaniweweme kematsi'ayeitɨani, 'aniweyame ke'utahani.
NUM 5:22 Kepauka 'ikɨ haa pemanuhareni, 'ahuka ke'utahairiya, pekaniweweme kematsi'ayeitɨani”. 'Ukaratsi mɨpaɨ ke'utayɨni: “'Aixɨa pɨ'ane. Mɨpaɨ ketiɨyɨni kemɨtinake”.
NUM 5:23 »Mawari wewiwame 'ikɨ 'axamɨ'ane xapatsie kaneka'utɨamɨkɨ, haa matsiwi 'ukaratsi menuhareni 'aixɨa katiniyurimɨkɨ.
NUM 5:24 Hikɨ 'ukaratsi haa matsiwi kana'itɨamɨkɨ hetsiena mɨkayunekɨ waɨkawa mɨtikwinitɨanikɨ.
NUM 5:25 »Mawari wewiwame mawarika katinanupimɨkɨ 'ɨtetsarika hetsiemieme. Katinitimawamɨkɨ Yawé hɨxie mawari matitaiyarɨwatsie,
NUM 5:26 xeimamayari kananatitɨkimɨkɨ hatsi mititaiyakɨ mawari taiyametsie Yawé me'eriwanikɨ. 'Anakeri 'ukaratsi haa kananu'itɨamɨkɨ.
NUM 5:27 Kepauka mɨkɨ haa manuhareni 'axamɨ'itɨarie, xɨka yukɨna 'aixɨa 'iyari kahawitɨkɨkaitɨni, hukaya kanitahaimɨkɨ kaniwewetɨ kanayeimɨkɨ. Mɨpaɨ mɨkɨ katinikwinitɨariemɨkɨ hipame wahɨxie.
NUM 5:28 Xɨkata hawaikɨ mɨpaɨ ka'utiyɨni, xɨka 'aixɨa tiuyeikakaitɨni, 'ana mɨkɨ 'atsipɨkayɨni, tiniweyatɨ kanayeimɨkɨ.
NUM 5:29 »'Ikɨ 'inɨari kanihɨkɨtɨni 'ɨtetsarika hetsiemieme, kepauka 'ukaratsi yukɨna mɨnanaimani, 'axakaniyuyurimɨkɨ yɨkɨmana xeime hamatɨa pɨta mɨkahuikɨ,
NUM 5:30 kepauka kɨnaya 'ɨtetsarika hexeiyatɨ mayani meta yu'ɨya mɨtixeɨmani. Mawari wewiwame 'ukaratsi Yawé hɨxie 'enuwitɨme 'ikɨ 'inɨari kaniwewiriemɨkɨ kemɨre'uxa.
NUM 5:31 Kɨnaya tixaɨtɨ hetsiena pɨkarahɨiyani, 'ukaratsi hɨrixɨa tiuka'eniwatɨ kanayeimɨkɨ mɨya mɨtiuyurikɨ».
NUM 6:1 Yawé Muitsexi katiniuta'aitɨani
NUM 6:2 'ixaheritsixi mɨpaɨ mɨtiwatahɨawekɨ: «Xɨka xewitɨ 'uki yatɨni 'ukaratsi natsareyukɨ yɨhɨritɨamɨkɨni, Yawé hɨxie yake'utayɨni,
NUM 6:3 mɨkɨ kaxie winuyari pɨkaye'eni matsiwi meta kwinimieme mɨratsiwi. Meta hipame winu, kaxie hayari, kaxie takariyari mɨpatsarutsietɨka pɨkakwa'ani.
NUM 6:4 Mexi kexemɨte'uxa 'areutewini natsareyu hepaɨ, kaxie takariyari xepɨkakwa'ani meta kararayari hatsiyari nitɨma.
NUM 6:5 »Mexi 'areutewini Yawé hetsiemieme patsietɨ, tatsɨari natsareyu hepaɨ pɨtimatsiɨkɨni, yaxeikɨata pɨka'ikaxikani yukɨpa matsi kanihayewakamɨkɨ mɨtiwawerekɨ meta puyukweriwayurieka 'itiyatɨ.
NUM 6:6 »Kepauka mɨpaɨ 'anetɨ muyeikani Yawé hɨxie, mɨki manukatsie 'ahurawa pɨka'uyeikani,
NUM 6:7 tsepa paapaya, maamaya, mutaya, kurieya memukwi. Mɨkɨ wahekɨ ka'iyatɨ pɨkahayuyeitɨwani, matsi mɨpaɨ pɨkayɨaneni Yawé 'inɨarieya mexeiyakɨ yumu'utsie.
NUM 6:8 Kepauka patsietɨ 'amuyeikani Yawé hetsiemieme, yu'itietɨ kaniuyeikamɨkɨ patsietɨ.
NUM 6:9 »Xɨka 'atsikara'eriwakaku xewitɨ 'auriena 'umɨni, yumu'utsie kemɨtipatsiekai mɨpaɨ ka'anetɨ kanayeimɨkɨ, 'atahuta tukari heutineyu, kepauka mɨ'itiyanitsie, 'ana naime yumu'utsie kaniyukaximɨkɨ.
NUM 6:10 'Atahaika tukari heutineyu yuhutame kukuruxi kaniwaranɨtɨkimɨkɨ yatɨni haɨmɨxi, mawari wewiwame kaniyetuiriemɨkɨ 'ixuriki tukiyari mɨranutahakitɨretsie muka memayutixexeɨriwatsie.
NUM 6:11 Mɨkɨ xeime mawari wewiwame kanitimawamɨkɨ 'itiya mawariyari meta hipame mawari taiyariyari mɨhɨkɨtɨnikɨ. 'Ana mawari wewiwame natsareyu patsiekame kaneyeitɨamɨkɨ, 'ikɨ 'axamɨtiuyurikɨ mɨki 'umayɨaka. 'Ana mɨkɨ tukaritsie natsareyu pɨ'itiyani yumu'utsie,
NUM 6:12 'axakemɨtiyurienekai natsareyu Yawé hɨxie 'aixɨa pɨyɨyuriekai muxatsi warehapanatɨ xeiwiyari mehɨtɨkaime mawariwewietɨ mɨkɨkɨ mɨreuyehɨwiyariekakɨ. 'Ayumieme pɨkanaki'eriwani meripai mieme matsi puhayewariekairi 'aixɨa mɨka'uyuyurikɨ mana pɨtiuyu'a.
NUM 6:13 »'Ikɨ 'inɨari natsareyu hetsiemieme kanihɨkɨtɨni kepauka manutinetɨarieni patsietɨ. Nanuwitɨkiemɨkɨ tuki kitenieyaritsie,
NUM 6:14 mana katinitimawamɨkɨ kanitataiyamɨkɨ muxa Yawé hetsiemieme xeiwiyari hɨkame katikuyeme, meta xeime muxa 'ukitɨme 'itiya mawariyari mayanikɨ, meta 'aixɨa memɨteyuxeiyanikɨ mawariyari.
NUM 6:15 Meta kanitimawamɨkɨ xeitsikɨiwitiyari paa mɨkakuxanariyarietɨka, meta tɨriku mɨtɨxiyari 'aixɨa mɨ'ane pɨhɨkɨtɨni wiyamatɨkaitɨ, tsuiraxi kakuxanariyarietɨkaime wiyamatɨkaime xeikɨa meta hatsite mawariyari, metatsiere kaxie winuyari mɨtiyeuriwa yɨnɨkame.
NUM 6:16 »Hikɨ mawari wewiwame Yawé hɨxie kanitimawamɨkɨ, mawarika mɨreuyehɨwiyarienikɨ, mawarika taiyariyari natsareyu hetsiemieme.
NUM 6:17 Muxa 'uki kanitimawamɨkɨ Yawé hetsiemieme 'aixɨa memɨteyuxeiyanikɨ mawariyari mayanikɨ, paa xeitsikɨiwitiyari hamatɨa. Meta hatsite kanitimawamɨkɨ metatsiere kaxie winuyari mɨtiyeuriwa yɨnɨkame.
NUM 6:18 »Hikɨ tuki kitenie memayutixexeɨriwatsie natsareyu kaniyukaximɨkɨ yumu'utsie. Yukɨpa mupatsietɨka, taipa kaneuwiwimɨkɨ 'aixɨa memɨteyuxeiyanikɨ mawariyari mataiyarietsie.
NUM 6:19 »'Ariri natsareyu yukaxiyu, mawari wewiwame paa kananatituimɨkɨ tsikɨiwititsie mɨkakuxanariyarie meta muxa 'uki naiparieya, mɨkɨ naime natsareyu katinipitɨamɨkɨ,
NUM 6:20 'anaketa naime Yawé hɨxie pekaniyuitɨwamɨkɨ mawarika hepaɨ. Naitɨ katinipatsieka mawari wewiwame hetsiemieme katinihɨkɨtɨni, naitɨ tawitsiemieme, teurite kɨmana mɨrayukatuiya. Mɨpaɨ tiyurieme naime natsareyu winu manu'ieni kaniyɨweni.
NUM 6:21 »'Ikɨ 'inɨari kani'ayumiemetɨni kemɨ'ane natsareyukɨ mɨyɨhɨritɨani. 'Ikɨ naime mawarika katiniwewimɨkɨ Yawé hetsiemieme natsareyu hetsiemieme meta kaniyɨweni tita mɨtiyetuani ketita mɨrexeiyani. 'Inɨari kemaine natsareyu hetsiemieme, xɨka natsareyu yuyeitɨamɨkɨni kaneye'atɨamɨkɨ kemaine».
NUM 6:22 Yawé Muitsexi mɨpaɨ katiniuta'aitɨani:
NUM 6:23 «Mɨpaɨ ketiniwarutahɨawi 'Aruni meta niwemama, 'ixaheritsixi 'aixɨa memɨwayuriekakɨ 'ikɨ niukikɨ:
NUM 6:24 »“Yawé kematsi'ɨwiyani 'ahamatɨa ke'uyeikani,
NUM 6:25 Yawé 'aixɨa kematixeiyani yunaki'eriya kematsipitɨaka,
NUM 6:26 Yawé kematsiparewieka kayuwatɨ kematsipitɨaka”.
NUM 6:27 »Mɨpaɨ xeputiyuaneni kenemɨtitewa 'ixaheritsixi watsata, yurikɨ ne neheyemekɨ nemɨxe'ɨwiyanikɨ».
NUM 7:1 Muitsexi kepauka tuki munɨ, 'aixɨa kaniyurieni naime katiniuti'ɨya hatseitikɨ muwa mɨtiyepine. Metatsiere mawari taiyame 'aixɨa kaniuyurieni meta naime muwa mɨrakapine.
NUM 7:2 Hikɨ 'Ixaheri nuiwarimamatsie yuxexuime memanuyetei, memɨwaruka'utɨakai, kememɨteyɨwawe mekateniyetuani wanuiwarima yunaitɨ mɨkɨ 'imikierite.
NUM 7:3 Tukita paitɨ mekatenetɨni Yawé hɨxie memɨteheyetuanikɨ. Yuhuhutakatɨ memanuyetei xeikaxetayaritsie mekatenetɨni, yuxexuitɨta tuurutsixi mekaniwayetuaxɨani, yunaitɨ 'ataxewi kaxetate 'anukanatɨkaitɨ meta tamamata heimana huta tuurutsixi mekanakɨne.
NUM 7:4 Yawé Muitsexi mɨpaɨ katiniutahɨawe:
NUM 7:5 «'Ikɨ mawarite 'ahetsie katinimiemetɨni memɨmeteyetuiriwa 'ahetsie ketinehɨka, mɨtikumayɨiyanikɨ mɨtiwakumayɨiwatsie 'ixuriki tukiyari hetsiemieme. 'Ekɨ rewitsixi pekaniwayetuiriemɨkɨ, yuxexuitɨ kememɨte'uximaya 'uximayatsika hepaɨtsita».
NUM 7:6 Hikɨ Muitsexi kaxetate meta tuurutsixi katiniyetuiriyarieni, mɨkɨta rewitsixi kaniwayetuirieni.
NUM 7:7 Keritsuni nuiwarimama hutame kaxetate mekaniuhapatɨarieni meta yunaukame tuurutsixi, memɨtehauyehɨakaikɨ yu'uximayatsika hepaɨtsita.
NUM 7:8 Meraritsixi yunaukame kaxetate mekaniuhapatɨarieni meta tuurutsixi 'atahaikame, mɨreuyewekaikɨ wa'uximayatsikatsie. 'Aruni mawari wewiwame nu'aya 'Itamaxi yunaime mɨkɨ katiniwa'aitɨakaitɨni.
NUM 7:9 Kuhatitsixi tixaɨtɨ mepɨkateyetuiriyarie, mɨkɨ memɨhɨritɨariekaikɨ memɨteheutɨtɨkanikɨ yuwaritsie piinite naime mɨti'itiyatɨka.
NUM 7:10 Kepauka mawari taiyame 'aixɨa mu'itɨarie, 'ixaheritsixi wa'ukiyarima mawari muwa mekaniyetuani,
NUM 7:11 Yawé Muitsexi mɨpaɨ mɨtikɨhɨawekaikɨ: «Mawari memɨyetuayanikɨ mawari taiyame hetsiemieme, yuxexuitɨ wa'ukiyarima xexuime tukaritsie mekateniyuriekakuni».
NUM 7:12 Mexɨakame tukaritsie mɨtitimawakɨ Nahatsuni kananayexeiyarieni 'Aminarawi nu'aya, Kura xiɨyarieya.
NUM 7:13 'Ikɨ hatsite 'imikieriyari, pɨrata xakɨyari 'amatikuni katiniyetuani meta xeime pɨrata pateyuyari, mɨkɨtsie tɨriku mɨtɨxiyari 'aixɨa mɨ'ane pɨhɨpɨnekai hatseitikɨ pɨnariekame. Kemɨti'inɨatakai tuki xakɨ 'amatikuni xeikiruyari heimana 'imeriyu katinahetekaitɨni meta pateyu 'atahaika tsienituyari kɨramuyari rahetetɨ.
NUM 7:14 Meta xeime pateyu yakɨmɨpe hurukɨ mɨwewiya kaniyetuani, xeitsienituyari heimana tamamata kɨramuyari katinahetekaitɨni, 'ɨkwa witsimu'ɨa hɨneme.
NUM 7:15 Mawari taiyariyari hetsiemieme, tsikeru xeiwiyari hɨkame kaniyetuani, xeime muxa 'uki meta xeime muxa xeiwiyari hɨkame.
NUM 7:16 Mɨreuyehɨwiyarienikɨ, xeime tsipu 'ukitɨme kaniyetuani mawari mayanikɨ.
NUM 7:17 'Aixɨa memɨteyuxeiyanikɨ mawariyari, yuhutame tuurutsixi kaniwayetuani, yu'aɨxɨwimeta muxatsi 'ukitsi, meyu'aɨxɨwime tsipuri 'ukitsi meta meyu'aɨxɨwime muxatsi xeiwiyari memɨhɨtɨka. Nahatsuni 'Aminarawi nu'aya 'ikɨ mawarikaya kanihɨkɨtɨni.
NUM 7:18 Hutarieka tukaritsie Natanaheri Tsuhaxi nu'aya mawari mɨwewienikɨ kananayexeiyarieni, 'Itsakaxi xiɨyarieya wa'ukiyari.
NUM 7:19 Hatsite mɨtitimawarienikɨ, katiniyetuani pɨrata xakɨ 'amatikuni meta pɨrata pateyuyari hɨpɨneme tɨriku mɨtɨxiyari 'aixɨa mɨ'ane pɨnarietɨ hatseitikɨ. Kemɨti'inɨatakai tuki, xakɨ 'amatikuni xeikiruyari heimana 'imeriyu katinahetekaitɨni, meta pateyu 'atahaika tsienituyari kɨramuyari katinahetekaitɨni.
NUM 7:20 Metatsiere xeime pateyu yakɨmɨpe hurukɨ mɨwewiya kaniyetuani xeitsienituyari heimana tamamata kɨramuyari raheteme, 'ɨkwa witsimu'ɨa hɨneme.
NUM 7:21 Mawari taiyariyari hetsiemieme, tsikeru xeime kaniyetuani, xeimeta muxa 'uki meta muxa xeiwiyari hɨkame.
NUM 7:22 'Itiya mawariyari hetsiemieme, xeime tsipu 'ukitɨme kaniyetuani.
NUM 7:23 'Aixɨa memɨteyuxeiyanikɨ mawariyari, yuhutame tuurutsixi kaniwayetuani, meta yu'aɨxɨwime muxatsi 'ukitsi kaniwayetuani, yu'auxɨwimeta tsipuri 'ukitsi meta yu'aɨxɨwime muxatsi xeiwiyari memɨhɨtɨka kaniwayetuani. 'Ikɨ Natanaheri mawarieya kanayani Tsuhaxi nu'aya.
NUM 7:24 Hairieka tukaritsie 'Eriyáwi Heruni nu'aya kananayexeiyarieni mɨtitimawakɨ, Tsawuruni xiɨyarimama wa'ukiyari.
NUM 7:25 Hatsite mɨtitimawakɨ, katiniyetuani pɨrata xakɨyari 'amatikuni meta xeime pɨrata pateyuyari, hɨneme tɨriku mɨtɨxiyari 'aixɨa mɨ'ane hatseitikɨ pɨnariekame. Kemɨti'inɨatakai tuki xakɨ 'amatikuni xeikiruyari heimana 'imeriyu katinahetekaitɨni, meta pateyu 'atahaika tsienituyari kɨramuyari katinahetekaitɨni.
NUM 7:26 Metatsiere xeime pateyu yakɨmɨpe hurukɨ mɨwewiya kaniyetuani, xeitsienituyari heimana tamamata kɨramuyari katinahetekaitɨni, 'ɨkwa witsimu'ɨa hɨneme.
NUM 7:27 Mawari taiyariyari hetsiemieme, xeime tsikeru kaniyetuani, xeimeta muxa 'ukitɨme meta xeime muxa xeiwiyari hɨkame.
NUM 7:28 'Itiya mawariyari hetsiemieme, xeime tsipu 'uki kaniyetuani.
NUM 7:29 'Aixɨa memɨteyuxeiyanikɨ mawariyari, yuhutame tuurutsixi kaniwayetuani, yu'aɨxɨwime muxatsi 'ukitsi, yu'auxɨwimeta tsipuri 'ukitsi meta meyu'auxɨwime muxatsi xeiwiyari mehɨtɨkaime kaniwayetuani. 'Ikɨ 'Eriyáwi mawarikaya kanihɨkɨtɨni Heruni nu'aya.
NUM 7:30 Naurieka tukaritsie 'Eritsuxi kananayexeiyarieni mutitimawakɨ Tserehuxi nu'aya, Xuweni xiɨyarimama wa'ukiyari.
NUM 7:31 Hatsite mawariyari, pɨrata xakɨyari 'amatikuni kaniyetuani meta xeime pɨrata pateyuyari, hɨpɨneme tɨriku mɨtɨxiyari hatseitikɨ pɨnariekame. Kemɨti'inɨatakai tuki, xakɨ 'amatikuni xeikiruyari heimana 'imeriyu katinahetekaitɨni, meta pateyu 'atahaika tsienituyari kɨramuyari katinahetekaitɨni.
NUM 7:32 Meta xeime pateyu yakɨmɨpe hurukɨ mɨwewiya kaniyetuani, xeitsienituyari heimana tamamata kɨramuyari raheteme, 'ɨkwa witsimu'ɨa hɨneme.
NUM 7:33 Mawari taiyariyari hetsiemieme, tsikeru xeime kaniyetuani, xeimeta muxa 'uki meta xeime muxa xeiwiyari hɨkame.
NUM 7:34 'Itiya mawariyari hetsiemieme, xeime tsipu 'ukitɨme kaniyetuani.
NUM 7:35 'Aixɨa memɨteyuxeiyanikɨ mawariyari hetsiemieme, yuhutame tuurutsixi kaniwayetuani, meta yu'aɨxɨwime muxatsi 'ukitsi meta yu'aɨxɨwime tsipuri 'ukitsi meta meyu'aɨxɨwime muxatsi xeiwiyari mehɨtɨkaime kaniwayetuani. 'Eritsuxi Tserehuxi nu'aya 'ikɨ mawarieya kanihɨkɨtɨni.
NUM 7:36 'Auxɨwirieka tukariyaritsie kananayexeiyarieni Tserumieri Tsuritsarahi nu'aya mɨtitimawakɨ, Tsimehuni xiɨyarimama wa'ukiyari.
NUM 7:37 Hatsite mawariyari, xeime pɨrata xakɨyari 'amanukuyewa kaniyetuani meta xeime pɨrata pateyuyari, hɨpɨneme tɨriku mɨtɨxiyari hatseitikɨ pɨnariekame. Kemɨti'inɨatakai tuki, xakɨ 'amatikuni xeikiruyari heimana 'imeriyu katinahetekaitɨni, meta pateyu 'atahaika tsienituyari kɨramuyari katinahetekaitɨni.
NUM 7:38 Meta xeime pateyu yakɨmɨpe hurukɨ wewiyakame kaniyetuani, xeitsienituyari heimana tamamata kɨramuyari katinahetekaitɨni, 'ɨkwa witsimu'ɨa hɨneme.
NUM 7:39 Mawari taiyariyari hetsiemieme, tsikeru xeime kaniyetuani, xeime muxa 'uki meta xeime muxa xeiwiyari hɨkame.
NUM 7:40 'Itiya mawariyari hetsiemieme, xeime tsipu 'ukitɨme kaniyetuani.
NUM 7:41 'Aixɨa memɨteyuxeiyanikɨ mawariyari hetsiemieme, yuhutame tuurutsixi kaniwayetuani, yu'aɨxɨwimeta muxatsi 'ukitsi, meta yu'aɨxɨwime tsipuri 'ukitsi meta muxatsi meyu'aɨxɨwime xeiwiyari mehɨtɨkaime. 'Ikɨ kanihɨkɨtɨtɨni Tserumieri mawarikaya Tsuritsarahi nu'aya.
NUM 7:42 'Ataxewirieka tukaritsie kananayexeiyarieni 'Eriyatsati Rehuheri nu'aya mɨtitimawakɨ, Kahari xiɨyarimama wa'ukiyari.
NUM 7:43 Hatsite mawariyarikɨ, pɨrata xakɨyari 'amanukuyewa meta xeime pɨrata pateyuyari kaniyetuani, hɨpɨneme tɨriku mɨtɨxiyari 'aixɨa mɨ'ane hatseitikɨ pɨnariekame katiniyetuani. Kemɨti'inɨatakai tuki, xakɨ 'amatikuni xeikiruyari heimana 'imeriyu katinahetekaitɨni, pateyuta 'atahaika tsienituyari kɨramuyari katinahetekaitɨni.
NUM 7:44 Meta xeime pateyu yakɨmɨpe hurukɨ wewiyakame kaniyetuani, xeitsienituyari heimana tamamata kɨramuyari raheteme, 'ɨkwa witsimu'ɨa hɨneme.
NUM 7:45 Mawari taiyariyari hetsiemieme, tsikeru xeime kaniyetuani, meta muxa 'uki meta xeime muxa xeiwiyari hɨkame kaniyetuani.
NUM 7:46 'Itiya mawariyari hetsiemieme, xeime tsipu 'ukitɨme kaniyetuani.
NUM 7:47 'Aixɨa memɨteyuxeiyanikɨ mawariyari hetsiemieme, yuhutame tuurutsixi, yu'aɨxɨwimeta muxatsi 'ukitsi, meta meyu'aɨxɨwime tsipuri 'ukitsi meta meyu'aɨxɨwime muxatsi xeiwiyari memɨhɨtɨka. 'Ikɨ kanihɨkɨtɨni 'Eriyatsati mawarikaya Rehuheri nu'aya.
NUM 7:48 'Atahutarieka tukaritsie kananayexeiyarieni 'Eritsama mɨtitimawakɨ 'Amihuri nu'aya, 'Epɨrahini nuiwarimama wa'ukiyari.
NUM 7:49 Hatsite mawariyarikɨ, xeime pɨrata xakɨyari 'amakuni meta xeime pɨrata pateyuyari katiniyetuani, hɨpɨneme tɨriku mɨtɨxiyari 'aixɨa mɨ'ane hatseitikɨ pɨnarietɨ. Kemɨti'inɨatakai tuki, pateyu xeikiruyari heimana 'imeriyu katinahetekaitɨni, meta xakɨ 'amakuni 'atahaika tsienituyari kɨramuyari pɨrahetekai meta pateyu 'atahaika tsienituyari kɨramuyari raheteme.
NUM 7:50 Meta xeime pateyu yakɨmɨpe hurukɨ wewiyakame kaniyetuani, xeitsienituyari heimana tamamata kɨramuyari katinahetekaitɨni, 'ɨkwa witsimu'ɨa hɨneme.
NUM 7:51 Mawari taiyariyari hetsiemieme, tsikeru xeime kaniyetuani, xeime muxa 'uki meta xeime muxa xeiwiyari hɨkame kaniyetuani.
NUM 7:52 'Itiya mawariyari hetsiemieme, xeime tsipu 'uki kaniyetuani.
NUM 7:53 'Aixɨa memɨteyuxeiyanikɨ mawariyari hetsiemieme, yuhutame tuurutsixi, meta yu'aɨxɨwime muxatsi 'ukitsi, meyu'aɨxɨwime tsipuri 'ukitsi meta meyu'aɨxɨwime muxatsi xeiwiyari mehɨtɨkaime kaniwayetuani. 'Ikɨ kanihɨkɨtɨni 'Eritsama mawarikaya 'Amihuri nu'aya.
NUM 7:54 'Atahairieka tukaritsie kananayexeiyarieni Kamarieri mɨtitimawakɨ Peratsuxi nu'aya, Manatsexi nuiwarimama wa'ukiyari.
NUM 7:55 Hatsite mawariyari, xeime pɨrata xakɨyari 'amakuni meta xeime pɨrata pateyuyari katiniyetuani, hɨpɨneme tɨriku mɨtɨxiyari 'aixɨa mɨ'ane hatseitikɨ pɨnariekame. Kemɨti'inɨatakai tuki, xakɨ 'amakuni xeikiruyari heimana 'imeriyu katinahetekaitɨni, pateyuta 'atahaika tsienituyari kɨramuyari katinahetekaitɨni.
NUM 7:56 Meta xeime pateyu yakɨmɨpe hurukɨ wewiyakame kaniyetuani, xeitsienituyari heimana tamamata kɨramuyari katinahetekaitɨni, 'ɨkwa witsimu'ɨa hɨneme.
NUM 7:57 Mawari taiyariyari hetsiemieme, tsikeru xeime, xeime muxa 'uki meta xeime muxa xeiwiyari hɨkame.
NUM 7:58 'Itiya mawariyari hetsiemieme, xeime tsipu 'uki kaniyetuani.
NUM 7:59 'Aixɨa memɨteyuxeiyanikɨ mawariyari hetsiemieme, yuhutame tuurutsixi kaniwayetuani, yu'aɨxɨwime muxatsi 'ukitsi, meyu'aɨxɨwimeta tsipuri 'ukitsi meta meyu'aɨxɨwime muxatsi xeiwiyari mehɨtɨkaime kaniwayetuani. 'Ikɨ kanihɨkɨtɨni Kamarieri mawarikaya Peratsuxi nu'aya.
NUM 7:60 'Atanaurieka tukarietsie kananayexeiyarieni 'Awirani mɨtitimawakɨ Kereuni nu'aya, Wenikamini nuiwarimama wa'ukiyari.
NUM 7:61 Hatsite mawariyari, xeime pɨrata xakɨyari 'amakuni meta xeime pɨrata pateyuyari katiniyetuani, hɨpɨneme tɨriku mɨtɨxiyari 'aixɨa mɨ'ane hatseitikɨ pɨnariekame. Kemɨti'inɨatakai tuki, xakɨ 'amakuni xeikiruyari heimana 'imeriyu katinahetekaitɨni, meta pateyu 'atahaika tsienituyari kɨramuyari raheteme.
NUM 7:62 Meta xeime pateyu yakɨmɨpe hurukɨ wewiyakame kaniyetuani, xeitsienituyari heimana tamamata kɨramuyari raheteme, 'ɨkwa witsimu'ɨa hɨneme.
NUM 7:63 Mawari taiyariyari hetsiemieme, tsikeru xeime, xeime muxa 'uki xeimeta muxa xeiwiyari hɨkame kaniwayetuani.
NUM 7:64 'Itiya mawariyari hetsiemieme, xeime tsipu 'uki kaniyetuani.
NUM 7:65 'Aixɨa memɨteyuxeiyanikɨ mawariyari hetsiemieme, tuurutsixi yuhutame kaniwayetuani, yu'aɨxɨwime muxatsi 'ukitsi, meyu'aɨxɨwime tsipuri 'ukitsi meta meyu'aɨxɨwime muxatsi xeiwiyari mehɨtɨkaime kaniwayetuani. 'Ikɨ kanihɨkɨtɨni 'Awirani mawarikaya, Kereuni nu'aya.
NUM 7:66 Tamamata tukaritsie kananayexeiyarieni 'Akihetsexi mɨtitimawakɨ 'Amitsarahi nu'aya, Rani nuiwarimama wa'ukiyari.
NUM 7:67 Hatsite mawariyari, xeime pɨrata xakɨyari 'amatikuni meta xeime pɨrata pateyuyari, hɨpɨneme tɨriku mɨtɨxiyari 'aixɨa mɨ'ane hatseitikɨ pɨnariekame. Kemɨti'inɨatakai tuki, xakɨ 'amatikuni xeikiruyari heimana 'imeriyu raheteme, meta pateyu 'atahaika tsienituyari kɨramuyari raheteme.
NUM 7:68 Meta xeime pateyu yakɨmɨpe hurukɨ wewiyakame kaniyetuani, xeitsienituyari heimana tamamata kɨramuyari raheteme, 'ɨkwa witsimu'ɨa hɨneme.
NUM 7:69 Mawari taiyariyari hetsiemieme, xeime tsikeru, xeime muxa 'uki meta xeime muxa xeiwiyari hɨkame kaniwayetuani.
NUM 7:70 'Itiya mawariyari hetsiemieme, xeime tsipu 'uki kaniyetuani.
NUM 7:71 'Aixɨa memɨteyuxeiyanikɨ mawariyari hetsiemieme, yuhutame tuurutsixi, yu'aɨxɨwime muxatsi 'ukitsi, meyu'aɨxɨwimeta tsipuri 'ukitsi meta meyu'aɨxɨwime muxatsi xeiwiyari mehɨtɨkaime. 'Ikɨ kanihɨkɨtɨni 'Akihetsexi mawarikaya 'Amitsarahi nu'aya.
NUM 7:72 Tamamata heimana xewi tukariyaritsie kananayexeiyarieni Pakieri mɨtitimawakɨ 'Ukɨrani nu'aya, 'Atsexi nuiwarimama wa'ukiyari.
NUM 7:73 Hatsite mawariyari, xeime pɨrata xakɨyari 'amakuni meta xeime pɨrata pateyuyari katiniyetuani, hɨpɨneme tɨriku mɨtɨxiyari 'aixɨa mɨ'ane hatseitikɨ pɨnariekame. Tuki kemɨti'inɨatakai, xakɨ 'amakuni xeikiruyari heimana 'imeriyu katinahetekaitɨni, meta pateyu 'atahaika tsienituyari kɨramuyari raheteme.
NUM 7:74 Meta xeime pateyu yakɨmɨpe hurukɨ wewiyakame kaniyetuani, xeitsienituyari heimana tamamata kɨramuyari raheteme, 'ɨkwa witsimu'ɨa hɨneme.
NUM 7:75 Mawari taiyariyari hetsiemieme, tsikeru xeime, xeimeta muxa 'uki, meta xeime muxa xeiwiyari mehɨtɨkaime kaniwayetuani.
NUM 7:76 'Itiya mawariyari hetsiemieme xeime tsipu 'uki kaniyetuani.
NUM 7:77 'Aixɨa memɨteyuxeiyanikɨ mawariyari hetsiemieme, yuhutame tuurutsixi kaniwayetuani, yu'aɨxɨwime muxatsi 'ukitsi, meyu'aɨxɨwimeta tsipuri 'ukitsi meta meyu'aɨxɨwime muxatsi xeiwiyari memɨhɨtɨka. 'Ikɨ Pakieri 'Ukɨrani nu'aya mawarikaya kanihɨkɨtɨni.
NUM 7:78 Tamamata heimana huta tukaritsie kananayexeiyarieni, 'Akira mɨtitimawakɨ 'Enahani nu'aya, Nepɨtahari nuiwarimama wa'ukiyari.
NUM 7:79 Hatsite mawariyari, xeime pɨrata xakɨyari 'amakuni meta xeime pɨrata pateyuyari katiniyetuani, hɨpɨneme tɨriku mɨtɨxiyari 'aixɨa mɨ'ane hatseitikɨ pɨnariekame. Tuki kemɨti'inɨatakai, xakɨ 'amakuni xeikiruyari heimana 'imeriyu raheteme, meta pateyu 'atahaika tsienituyari kɨramuyari raheteme.
NUM 7:80 Meta xeime pateyu yakɨmɨpe hurukɨ wewiyakame kaniyetuani, xeitsienituyari heimana tamamata kɨramuyari raheteme, 'ɨkwa witsimu'ɨa hɨneme.
NUM 7:81 Mawari taiyariyari hetsiemieme, xeime tsikeru, xeimeta muxa 'ukitɨme meta xeime muxa xeiwiyari hɨkame kaniwayetuani.
NUM 7:82 'Itiya mawariyari hetsiemieme, xeime tsipu 'uki kaniyetuani.
NUM 7:83 'Aixɨa memɨteyuxeiyanikɨ mawariyari hetsiemieme, yuhutame tuurutsixi kaniwayetuani, yu'aɨxɨwimeta muxatsi 'ukitsi, meyu'aɨxɨwimeta tsipuri 'ukitsi meta meyu'aɨxɨwime muxatsi xeiwiyari mehɨtɨkaime. 'Ikɨ 'Akira 'Enahani nu'aya mawarikaya kanihɨkɨtɨni.
NUM 7:84 Mawarika mɨtiyetuiya 'ixaheritsixi wa'ukiyarima memuwewi kepauka mawari taiyame 'aixɨa mu'itɨarie, 'ikɨ katiniyetuiyani: Tamamata heimana huta pɨrata xakɨyari 'amɨpapa, tamamata heimana huta pɨrata pateyuyari meta tamamata heimana huta pateyu yakɨmɨpepe hurukɨ mɨwewiyatɨka.
NUM 7:85 Pɨrata xakɨyari 'amɨpapa xeikiruyari heimana 'imeriyu pɨrahetekai, meta pateyute 'atahaika tsienituyari kɨramuyari pɨrahetekai. Naitɨ pɨratakɨ mɨtiwewiyatɨka xeitewiyari heimana 'atahuta kiruyari katinahetekaitɨni, tuki kemɨti'inɨatakai.
NUM 7:86 Tamamata heimana huta pateyute yakɨmɨpepe hurukɨ mɨwewiyatɨka, 'ɨkwa witsimu'ɨa hɨpɨneme xeitsienituyari heimana tamamata kɨramuyari katinahetekaitɨni, tuki kemɨti'inɨatakai. Naitɨ pateyute yakɨmɨpepe hurukɨ muwewiyatɨka xeikiruyari heimana nauka tsienituyari kɨramuyari katinahetekaitɨni.
NUM 7:87 Tewaxi mawari taiyariyari hetsiemieme tamamata heimana huta tsikerutsixi, tamamata heimana huta muxatsi 'ukitsi, tamamata heimana huta muxatsi xeiwiyari memɨhɨtɨka, meta tamamata heimana huta tsipuri 'ukitsi mekanakɨne 'itiya mawariyari hetsiemieme, meta hatsite mawariyari.
NUM 7:88 Tewaxi 'aixɨa memɨteyuxeiyanikɨ mawariyari hetsiemieme xeitewiyari heimana nauka tuurutsixi mepakɨ, meta haika tewiyari muxatsi 'ukitsi meta tsipuri 'ukitsi haika tewiyari, meta haika tewiyari muxatsi xeiwiyari memɨhɨtɨka. 'Ikɨ mawarika kanayani kepauka mawari taiyame 'aixɨa memuyuritsie.
NUM 7:89 Muitsexi kepauka 'ixuriki tukiyarita meutaha, Yawé hamatɨa mɨtitaxatakɨ, mana tɨratu kakuniyari heima Kakaɨyari teɨtametemama memana'utsie kanitahɨawe.
NUM 8:1 Yawé Muitsexi mɨpaɨ katiniutahɨawe:
NUM 8:2 «'Aruni mɨpaɨ ketineutahɨawi: “Kepauka 'atahutame kɨxemete tatɨkaime pemanu'uitɨani, mɨkɨ kɨxeme 'uitɨwame hɨxie kanihekɨariwiekamɨkɨ”».
NUM 8:3 'Aruni mɨpaɨ katiniuyurieni. Kɨxeme tatɨkaime 'atahutame kananu'uitɨani kɨxeme 'uitɨwame hɨxie maukakɨxenikɨ, Yawé Muitsexi kemɨtita'aitɨa.
NUM 8:4 Kɨxeme 'uitɨwame tsutɨmeyaritɨa meta tuturiyari titsunamekɨ pɨwewiyakai naitɨ mɨkɨ huru xeikɨa pɨhɨkɨtɨkai, matsi Yawé Muitsexi mɨpaɨ mɨtiutahekɨatɨakɨ.
NUM 8:5 Merikɨte Yawé Muitsexi mɨpaɨ katiniutahɨawe:
NUM 8:6 «Rewitsixi keniwaruta'inieka 'ixaheritsixi watsata, keniwaru'iti.
NUM 8:7 Memɨ'itiyanikɨ, haa mɨ'itiyakɨ keniwaruhatuiya, mɨpaɨ ketiniwarutahɨawi naime memɨyukaxinikɨ meta yukamixate memɨteti'ekwakɨ. Mɨpaɨ 'aixɨa me'itɨarietɨ mekanakɨnikuni.
NUM 8:8 Hikɨ xeime tsikeru meta tɨriku mɨtɨxiyari 'aixɨa mɨ'ane hatseitikɨ pɨnariekame xekateniyetuakuni mawari mayanikɨ. 'Ekɨta xeime 'ahetsiemieme pekaniyetuamɨkɨ 'itiya mawariyari mayanikɨ.
NUM 8:9 Rewitsixi 'ixuriki tukiyari manuwetsie paitɨ pekaniwaranuwitɨmɨkɨ meta yunaime 'ixaheritsixi pekaniwakuxeɨrimɨkɨ.
NUM 8:10 Yawé hɨxie rewitsixi pekaniwataxatamɨkɨ meta 'ixaheritsixi wahetsie mekaniutimeikuni.
NUM 8:11 Hikɨ 'Aruni Yawé hɨxie rewitsixi kaniwayetuamɨkɨ, 'ixaheritsixi wahetsiemieme mawari teikɨ hetserarietɨ 'uyuitɨariwatɨ mayanikɨ. Mɨpaɨ me'itɨarieme Yawé hetsiemieme te'uximayatamete mekanakɨnikɨni.
NUM 8:12 »Rewitsixi yumamakɨ tsikerutsixi wahetsie mekaneutimeikuni, 'ekɨta pemɨwaxɨnakɨ wahetsiemieme xeime keneutimawa memɨ'itiyanikɨ, xeimeta Yawé hetsiemieme pekanitataiyamɨkɨ.
NUM 8:13 Hikɨ rewitsixi 'Aruni hɨxie mekaniti'uikuni meta niwemama wahɨxie, Yawé hetsɨa pekaniwayetuamɨkɨ mawari teikɨ hetserarietɨ muyuitɨariwa mayanikɨ.
NUM 8:14 Mɨpaɨ pekatiniwapatamɨkɨ 'ixaheritsixi watsata, rewitsixi nehetsiemiemete memakɨnekɨ.
NUM 8:15 »Hikɨ rewitsixi pewa'itieyu, mawari muyuitɨariwa hepaɨ, mɨkɨ tukita mekatenita'uximayatakuni.
NUM 8:16 'Ixaheritsixi watsata xewitɨ pumawe, mɨkɨ xeikɨa nehetsiemiemete mekanihɨkɨtɨkakuni, mɨkɨ xeikɨa nepɨwaranuyexei. Matɨarixi 'ixaheritsixi waniwema, nekaniwarupata nehetsiemieme.
NUM 8:17 Nehetsiemiemete memɨhɨkɨkɨ matɨari nunuiwakate 'ixaheritsixi waniwema, tsepa tewi mɨtihɨkɨ yatɨni tewa mɨtihɨkɨ. Nehetsiemieme nekaniwarayeitɨani kepauka 'ekipitutari waniwema matɨari miemete nemɨtiwarukwinitɨatsie.
NUM 8:18 Hikɨ rewitsixi nekaniwaranayexeiya 'ixaheritsixi waniwema matɨari miemete wahetsiemieme,
NUM 8:19 'Aruni meta niwemama, nekaniwayetuirieni 'imikieri hepaɨ. Rewitsixi pɨta mekateni'uximayakakuni 'ixuriki tukiyarita, 'ixaheritsixi wahetsiemieme memɨwaxɨnakɨ, memɨkatekwinitɨariekakɨ 'axame'itɨarietɨ tuki 'aurie meye'axetɨ».
NUM 8:20 'Aruni Muitsexi hamatɨa meta yunaitɨ 'Ixaheri kiekatari mɨpaɨ mekateniuyurieni. 'Ixaheritsixi mɨpaɨ naime mekateniuyurieni Yawé Muitsexi kemɨtiuta'aitɨakai rewitsixi wahetsiemieme,
NUM 8:21 mɨkɨ yu'ixurikite mekaniuti'ekwa mekaniuyu'itieni. 'Aruni kaniwayetuani Yawé hɨxie mawari 'aixɨa mɨ'ane hepaɨ, wahetsiemieme kaniutaniuni 'aixɨa memɨ'itɨarienikɨ.
NUM 8:22 Mɨpaɨ me'uyɨkake rewitsixi tukita mekanekɨne memayutixexeɨriwatsie, muwa memɨteheta'uximayatakɨ 'Aruni meta niwemama meteware'aitɨakaku, hikɨ naitɨ kanaye'atɨarieni Yawé Muitsexi kemɨrahɨawekai rewitsixi wahetsiemieme.
NUM 8:23 Yawé Muitsexi mɨpaɨ katiniutahɨawe:
NUM 8:24 «'Ikɨ 'inɨari rewitsixi wahetsiemieme kanihɨkɨtɨni: Tuki memɨyutixexeɨriwatsie memɨteta'uximayatakɨ mewaraka'utɨwatɨ xeitewiyari heimana 'auxɨwi wiyari memexeiyatɨka meta muwa memautiyune,
NUM 8:25 kepaukari huta tewiyari heimana tamamata wiyari maye'atɨarieni mekateniutahayeikawakuni,
NUM 8:26 'anari xeikɨa mekateniparewiekakuni tukita kememɨteyurieka wa'iwama, 'uximayatsikari mepɨkahɨritɨarieka. 'Ikɨ rewitsixi pɨwa'uximayatsikatɨni kememɨtehɨritɨarie».
NUM 9:1 Yawé Muitsexi kaniutahɨawe makumawetsie metitekaku Tsinahi mɨrakutewatsie, mexɨakame metseriyaritsie hutarieka wiyari 'anuyemiekaku kepauka 'Ekipitu memayekɨtsie. Mɨpaɨ katinitahɨawe:
NUM 9:2 «'Ixaheritsixi Patsikwa 'ixɨarariyari mekaniuwewiximekuni kemɨ'ane tukaritsie yanepɨtayɨni.
NUM 9:3 Taikai xekaniwewiximekuni tamamata heimana naurieka tukari 'umiekaku mexɨakame metseritsie, mana kanika'inɨarikamɨkɨ. Xekaniwewikuni 'inɨari niukiyari xemaye'atɨanikɨ».
NUM 9:4 Muitsexi katiniuta'aita Patsikwa 'ixɨarariyari 'ixaheritsixi memɨwewienikɨ,
NUM 9:5 mɨkɨta mekaniwewieni Tsinahi mɨrakutewatsie makumawetsie, taikai tamamata heimana naurieka tukari 'umiekaku mexɨakame metseriyaritsie. Yawé Muitsexi kemɨtiuta'aitɨakai 'ixaheritsixi naimekɨ yamekateniuyurieni kemainekai.
NUM 9:6 Peru matsi hipatɨ Patsikwa 'ixɨarariyari memɨwewieni mepɨka'upitɨarie, memɨka'itiyakaikɨ timɨkime memɨte'umayɨakaikɨ. Mɨkɨ tukaritsie Muitsexi meta 'Aruni wahetsɨa mekananukɨne,
NUM 9:7 mɨpaɨ mekateniwarutahɨawe: —Timɨkime tepɨtehemayɨa, 'ayumiemexɨari 'aixɨa tepɨka'anene. Hikɨ tepimaiku xɨka teyɨwaweni Yawé hetsiemieme temɨtetimawakɨ mɨkɨ tukaritsie hipame 'ixaheritsixi wahepaɨ.
NUM 9:8 Muitsexi mɨpaɨ katiniwarutahɨawe: —Yaxeketeneutewini Yawé kemɨnetitahɨawe kemɨtiyurimɨkɨ xehetsiemieme.
NUM 9:9 Hikɨ Yawé Muitsexi mɨpaɨ katiniutahɨawe
NUM 9:10 'ixaheritsixi mɨpaɨ mɨtiwatahɨawekɨ: «Kepauka xewitɨ xe'iwa 'aixɨa mɨka'aneni xeime timɨkime mɨremayɨa yatsepa xewitɨ yukwiepa mɨka'uyeika, mɨpaɨtsiere 'anetɨ miwewieni pɨyɨwe Patsikwa Yawé hetsiemieme.
NUM 9:11 Hɨrixɨatsɨ xɨka mɨpaɨ 'aneni, kaniwewimɨkɨ taikai tamamata heimana naurieka tukariyaritsie hutarieka metseriyaritsie 'umiekaku. Muxa kanitakwaimɨkɨ paa mɨkakuxanariyarietɨkakɨ meta tupiriya matsiwi,
NUM 9:12 muxa waiyarieya 'uxa'arieka mieme mayanikɨ xepɨkakuhayeikawani meta 'umeyarieya xepɨka'anumurani. Kepauka Patsikwa 'ixɨarariyari mɨwewieni kehepaɨ mɨrayuwewiwa mɨpaɨ katiniyurimɨkɨ.
NUM 9:13 »Xɨka xewitɨ Patsikwa 'ixɨarariyari ka'uwewieni 'aixɨa 'anetɨtɨ meta 'ateewa kaheyeikatɨ, manuyeikatsie kanayeweiyariemɨkɨ Yawé mɨkatiutimawirikɨ mɨkɨ tukaritsie. 'Ana katinikwinitɨariemɨkɨ 'axamɨtiuyurikɨ.
NUM 9:14 »Xɨka 'ateewa kiekame xehamatɨa muka Patsikwa 'ixɨarariyari wewimɨkɨni Yawé hetsiemieme, kaniyɨweni 'inɨari kemaine mɨpaɨ 'anetɨ. Mɨkɨ Patsikwa 'inɨarieya kemaine yunaime wahetsiemieme pɨhɨkɨ, mana nunuiwakate meta 'ateewatari».
NUM 9:15 Kepauka tuki 'ixurikiyari munɨrie Kakaɨyari tɨratuya muyeka, tukarikɨ tuki hai kanenukanakaitɨni, meta tɨkarikɨ tai hepaɨ 'anetɨ kanayani.
NUM 9:16 Mɨpaɨ kaniuyɨnekaitɨni: Tukarikɨ hai tuki kananukanarɨmakaitɨni, tɨkarikɨta tai kanayeikakaitɨni.
NUM 9:17 Kepauka hai manuku'ekekai tuki heima, 'ixaheritsixi 'ana mekanayekɨkakaitɨni, hakewata hai meyuhayewa manata mekanitiyaxikekaitɨni.
NUM 9:18 Yawé kemɨtiwakɨhɨawekai 'ixaheritsixi mɨpaɨ mekateniyekɨkakaitɨni yatɨni mɨpaɨ mekatenikuyaxikekaitɨni, kemɨreuteterekai hai tuki heima 'uyekaitɨ mana mekaniyukuhayeikawakaitɨni.
NUM 9:19 Tsepa mɨixa tukari tuki heima muyeya, 'ixaheritsixi Yawé mekaneu'eniekaitɨni kemɨtiwa'aitɨakai mepɨka'ayekɨkakai.
NUM 9:20 Yaxeikɨata kepauka yakɨ mɨreuteterekai tuki heima: Kepauka Yawé mɨpaɨ mɨtiku'inɨaritakai, 'ixaheritsixi 'amenitiyaxikekaitɨni yatɨni mekanekɨkakaitɨni.
NUM 9:21 Heiwa hai xeitɨkari xeikɨa kanikuyuruwakaitɨni, tsepa tɨkarikɨ tsepa tukarikɨ, kepauka meyeikakai 'ana 'ixaheritsixi mekananuku'uwekaitɨni.
NUM 9:22 Tsepa huta tukari yatɨni xeimetseri yatɨni mɨixa tukari, 'ixaheritsixi mana mekaniyukuhayeikawakaitɨni mekapekɨkakai, kepaukata meyeikakai hai mekanekɨkakaitɨni 'utɨmana.
NUM 9:23 Kepauka Yawé yamɨtiwaku'inɨaritɨwakai, 'ixaheritsixi mana mekanikuyaxikekaitɨni yatɨni mepekɨkakai. Yawé mɨpaɨ mekateneu'eniekaitɨni yaxeikɨata Muitsexi Yawé yatikɨhɨawekaku.
NUM 10:1 Yawé Muitsexi mɨpaɨ katiniutahɨawe:
NUM 10:2 «Hutame kuxineta titsunamekɨ keneutiwewi pɨratakɨ wewiyatɨkaime, mana memukutei pemɨwakuxexeɨriwanitsie keneutahɨtsiwani meta kepauka memayekɨnetsie.
NUM 10:3 Kepauka hutatɨ mɨtiyuani, yunaitɨ teɨteri 'ahamatɨa mekaniyukuxeɨrikuni 'ixuriki tukiyari mɨranutahakitɨretsie.
NUM 10:4 Kepauka xewitɨ xeikɨa mɨtayuani, 'ahamatɨa mekaniyukuxeɨrikuni xeikɨa memanuyetei 'Ixaheri nuiwarimama.
NUM 10:5 Kuxineta haikakɨa hetayuayu memɨyehutsiemieme, mekananuyeyaxikuni tau makayuyuipiketsie memɨtitei,
NUM 10:6 hutariekata tatsutɨa memɨtitei. 'Ana kanitayuamɨkɨ kuxineta memɨyehutsie 'amemayekɨnekɨ.
NUM 10:7 Kepauka memɨyuxeɨrikuni mematiteitsie kuxineta kanitayuamɨkɨ yɨkɨ pɨta tiuyuatɨ.
NUM 10:8 »Kuxineta memɨtihɨtsieni mawari wewiwamete 'Aruni niwemama mekateniyurikuni. 'Ikɨ 'aitsika kanihɨkɨtɨkamɨkɨ xehetsiemieme meta xenuiwarima.
NUM 10:9 »Kepaukari yukwietsie xemeta'axɨani xemayekɨne xekaneyɨwawekuni xeheyutakwinike memɨxe'aye'unie wahetsɨa, mɨkɨ kuxineta kanitiyuamɨkɨ kepauka xemeyutakwini. Hikɨ 'ana xeme Yawé kanixehaye'erimɨkɨ kanixetawikweitsitɨamɨkɨ memɨxe'aye'unie watsata.
NUM 10:10 »Kepauka 'ixɨarari waɨkawa meuyewetse xemutiwewiwani, meta metseri mɨhekwa tukariyari 'anatsiere xekateniutihɨtsiwakuni mawari taiyariyari memewewienikɨ meta 'aixɨa memɨteyuxeiyani mawariyari hetsiemieme. 'Ana Kakaɨyari xeme pɨxehaye'erieni. Ne Yawé 'akakaɨyari nekanihɨkɨtɨni».
NUM 10:11 Xeitewiyari tukari 'umiekaku hutarieka metseriyaritsie, hutarieka wiyaritsie, hai kananuku'ene tuki heima.
NUM 10:12 Hikɨ 'ixaheritsixi Tsinahi mekaniyekɨne memakutekaitsie makumawetsie paitɨ mekaniu'axɨani, Parani mɨrakutewatsie hai hakewa meuyeya.
NUM 10:13 Yawé Muitsexi kemɨtiuta'aitɨa, 'ana 'ixaheritsixi mekaniyekɨne matɨari.
NUM 10:14 Matɨari memanuyeyaxixɨ Kura teɨterimama mekaniyɨakaitɨni yupatera me'akwetɨ. Kaniwara'iniekaitɨni Nahatsuni titewatɨ 'Aminarawi nu'aya.
NUM 10:15 Natanaheri Tsuhaxi nu'aya kaniwara'iniekaitɨni 'Itsakaxi nuiwarimama.
NUM 10:16 'Eriyáwi Heruni nu'aya kaniwara'iniekaitɨni Tsawuruni nuiwarimama.
NUM 10:17 Hikɨ tuki 'utaxɨnarieka, Keritsuni nuiwarimama meta meraritsixi mete'utɨtɨ mekanekɨne.
NUM 10:18 Wa'utɨmata memayekɨ Xuweni teɨterimama mekaniyɨakaitɨni yupatera me'akwetɨ. Kaniwarawitɨkɨkaitɨni 'Eritsuxi Tserehuxi nu'aya.
NUM 10:19 Tserumieri Tsuritsarahi nu'aya Tsimehuni nuiwarimama kaniwarawitɨkɨkaitɨni,
NUM 10:20 'Eriyatsati Rehuheri nu'aya Kahari nuiwarimama kaniwarawitɨkɨkaitɨni.
NUM 10:21 Hikɨta mɨkɨ wa'utɨa mekanekɨne Kuhatitsixi mɨtipatsietɨka tetɨkɨmete. 'Ixuriki tukiyari kaniutawewierikekaitɨni mexi meka'uye'axɨawaweni hakewa memetiyaxe.
NUM 10:22 Mɨkɨta wa'utɨma mekanekɨne 'Epɨrahini teɨterimama yupatera me'akwetɨ. Mɨkɨ 'Eritsama 'Amihuri nu'aya kaniwarawitɨkɨkaitɨni.
NUM 10:23 Kamarieri Peratsuxi nu'aya Manatsexi nuiwarimama kaniwarawitɨkɨkaitɨni,
NUM 10:24 'Awirani Kereuni nu'aya Wenikamini nuiwarimama kaniwarawitɨkɨkaitɨni.
NUM 10:25 'Imatɨrieka yunaime wahɨwemete mekanayekɨne Rani teɨterimama yupatera me'akwetɨ. 'Akihetsexi 'Amitsarahi nu'aya kaniwarawitɨkɨkaitɨni.
NUM 10:26 Pakieri 'Ukɨrani nu'aya, 'Atsexi nuiwarimama kaniwarawitɨkɨkaitɨni,
NUM 10:27 'Akira 'Enahani nu'aya, Nepɨtahari nuiwarimama kaniwarawitɨkɨkaitɨni.
NUM 10:28 Mɨpaɨ mekateneuku'ukaitɨni 'ixaheritsixi kepauka memayekɨkakai.
NUM 10:29 Hikɨ Muitsexi Huwawi Xehueri mariyani tewiyari nu'aya mɨpaɨ katiniutahɨawe: —Tame tepayekɨnirɨme Yawé kwie mɨtatsi'axatɨatsie. Hikɨmɨ tanaitɨ tekaniyehuni 'aixɨa temɨteheyuxeiyanikɨ, Yawé 'ixaheritsixi wahetsiemieme 'aixɨa mɨtiuka'iyarikɨ.
NUM 10:30 Huwawi mɨpaɨ kaniutayɨni: —Ne hawaikɨ, ne nepɨkayemie, ne nekwiepa pɨta nekaniyemieni nemarema wahetsɨa.
NUM 10:31 Muitsexi mɨpaɨ katinitahɨawe: —Neuxeitsɨ, pepɨkatatsi'uku'e'eiriwani, 'Ekɨ pepukumate makumawetsie hakewa temeka'uxipiweni. 'Ekɨ pemɨtatsi'anuwitɨni pepɨhɨkɨtɨni.
NUM 10:32 Xɨka petatsi heweiya, tame tematsi heyetuirieni 'aixɨa mɨti'ane Yawé mɨtareyetuirieni.
NUM 10:33 'Ixaheritsixi mekanayekɨne Yawé hɨrieya manukatsie, haika tukari mekaniuhukaitɨni Yawé tɨratuya mayeka me'akwetɨ, wahɨxie kaniumiekaitɨni 'ikuwaunetɨ hakewa memeka'uxipienikekai.
NUM 10:34 Kepauka memayekɨkakai, Yawé haiwitɨrieya waheima tukarikɨ puyeyeixakai.
NUM 10:35 Kepauka kakuni manukukweiwakai, Muitsexi mɨpaɨ kaniutainekaitɨni: «Yawé, kenanukukexi. Mekeheutaxɨriexɨani memɨmatsi 'aye'unie, Mekeheuyuta'unaxɨani memɨmatsiheka».
NUM 10:36 Kepaukata kakuni muwakekakai, Muitsexi mɨpaɨ kaniutainekaitɨni: «Yawé, kenenua, 'ateɨterima 'ixaheritsixi wahetsɨa memɨkayu'inɨatsinɨa memɨhɨkɨ».
NUM 11:1 Tawera metitetɨ 'ixaheritsixi 'axamekaniutiyuanekaitɨni Yawé hepaɨtsita mete'uka'eniwatɨ. Mɨkɨ waru'enieka waɨkawa kaniuyeha'ani, taikɨ wawarita mematiteitsie katinaxɨtsitɨatɨyani.
NUM 11:2 Hikɨ 'ixaheritsixi Muitsexi waɨkawa mekaniwawiriekaitɨni, kaniuyutanenewieni Yawé mɨtiwareuyehɨwirienikɨ, 'ana tai kaniutɨni.
NUM 11:3 'Ayumieme mana mɨya mɨtiɨyɨkɨ Tawera katiniuterɨwarieni, Yawé taikɨ mɨwarutitaiyaxɨkɨ.
NUM 11:4 Hipatɨ teɨteri kɨkamete memaye'ukai waɨkawa meteheukwaikɨtɨ mekanakɨne. Hikɨ 'ixaheritsixi mekaniutitsuani meta mɨpaɨ me'utiyuatɨ: «Kemɨ'ane wai pɨtatsimini.
NUM 11:5 Titayari tsapari 'Ekipitutsie temɨwaretikwa'akai tekateyutuatɨ tetewareku'eiri. Yaxeikɨata pepinu meta meruni temetikwa'akai metatsiere wexu, 'uyuri meta 'axuxi.
NUM 11:6 Hikɨ neuxei tekananatiwawakini, manana xeikɨa tekanixeiyani».
NUM 11:7 Manana tsiranituru hatsiyari hepaɨ katiniyuxexeiyakaitɨni, witsuanari mutimerɨka hepaɨ.
NUM 11:8 'Ixaheritsixi mekanikuteɨxɨkaitɨni tetexi hutamekɨ mekanititɨxɨkaitɨni, yatɨni mekanititsunakaitɨni xɨka me'ika'etsakuni meta paa kɨmana mekaniwewiekaitɨni. Paa mɨwiyamarie hepaɨ kana'anekaitɨni.
NUM 11:9 Tɨkarikɨ kepauka haɨtsi mɨkaxɨrɨwekai memakuteitsie, manatsiere manana kanikaxɨrɨwekaitɨni.
NUM 11:10 Hikɨ Muitsexi kaniu'ena 'ixaheritsixi meta watɨɨriyama kememɨte'utsuanakai, yuxexuitɨ yuxamaru kitenie, Yawé mekanihaxɨatɨakaitɨni. Hikɨ yu'uximatɨatɨ,
NUM 11:11 Muitsexi Yawé kaniutahɨawe nenewierikɨ: —Xɨka ne neti'a'uximayatsiriwametɨni, ¿titayari peneti'uximatɨa? ¿titayari pekanetiparewie, teɨteri yunaitɨ nehetsie memɨte'uhɨpanikɨ penetihɨritɨa?
NUM 11:12 ¿Netsɨ neniwema menehɨkɨ, neniwarutiniwexɨ, pemɨnetsi'aitɨakɨ kename newa'ɨwiyani, 'atɨɨriyama waweriyame hepaɨ, newarakatɨtɨ nemɨwareta'atɨanikɨ hakewa paitɨ kwie wa'ukiyarima pemɨwarexatɨatsie?
NUM 11:13 'Ikɨ yunaitɨ teɨteri wai mekaneniwawirieka me'utitsuatɨ. ¿Ne hakewa nepeikaxeiya?
NUM 11:14 Ne nexaɨtame nepɨkayɨwe 'ikɨ teɨteri wahetsiemieme. Waɨkawa 'uximayatsika pɨhɨkɨ nehetsiemieme.
NUM 11:15 Xɨka mɨpaɨ petiyurienemɨkɨ, ne nepɨmatsiwawirie netukari pemɨnetsi nawairienikɨ. Mɨpaɨ nepɨratɨmaiya hikɨ kenemɨtiuka'eniwa.
NUM 11:16 Yawé Muitsexi mɨpaɨ katiniuta'eiya: —'Ukirawetsixi 'ixaheritsixi haika tewiyari heimana tamamata kenene'atɨiri, mɨpaɨ ketinemaika yuteɨterima memɨwakuyuitɨwa xeikɨa mekaniyɨakakɨni. 'Ixuriki tukiyari manuwe keniwaranuwitɨki, mana 'etsiwa 'ahamatɨa yameketeheutewini.
NUM 11:17 Ne 'ahamatɨa nemɨtitaxatakɨ nekananukatemɨkɨ, mɨkɨ wahetsieta yanekatiniyurimɨkɨ 'iyari pemexeiya memexeiyanikɨ, memɨmatsiparewiekakɨ 'ikɨ teɨteri mɨmatsihɨritɨa wahekɨ. Mɨpaɨ 'ekɨ 'axaɨtame xeikɨa pemɨkayɨanenikɨ.
NUM 11:18 »Teɨteri xeikɨa mɨpaɨ pekatiniwatahɨawimɨkɨ: “Xekeneuyu'iti 'uxa'a miemekɨ, 'uxa'a wai xekanitikwaikuni. Xeme xekaniutitsuani Yawé hɨxie, mɨpaɨ xe'utiyuatɨ: ‘Wai ketatsi'umini. 'Ekipitutsie naime tepɨtehetikwa'akai.’ Mɨkɨta hikɨ wai kanixemimɨkɨ, xekanitikwaikuni.
NUM 11:19 Xeitukari, nihuta tukari ni'aɨxɨwime tukari, tamamata tukari, meta nixeitewiyari tukari xepɨka'itikwa'ani,
NUM 11:20 matsi xeimetseri, kepaukake xetsurita makanexɨani, kepaukake xemitixani'erieni. Yawé xemu'uximatɨakɨ, xehamatɨa muyeika, xemutitsuakɨ mɨpaɨ xe'utiyuatɨ: ‘¿Titayari 'Ekipitutsie tetehayekɨ?’”»
NUM 11:21 Muitsexi mɨpaɨta kaniutayɨni: —Ne kuyaxi 'ataxewime tsienituyari miriyari wahamatɨa nekaniuyeikani, ¿'ekɨta wai xeimetseritsie xeikɨa petiwamini peraine?
NUM 11:22 Tsepanetɨ xeikuraruyari tsipuru mɨwarukwi'iri mepɨkatenake, tsepanetɨ haramaratsie tsapari memuye'uwa yunaime mɨwarukwi'iri yunaitɨ mepɨkatenake.
NUM 11:23 Yawé Muitsexi mɨpaɨ katiniuta'eiya: —¿Kamɨtsɨ Yawé tɨrɨkariyaya reu'atɨka? Hikɨtsɨ pekaninierimɨkɨ, xɨka neniuki nehaye'atɨamɨkɨ yatɨ pɨtikatixaɨ.
NUM 11:24 Hikɨ Muitsexi 'ixaheritsixi yakatiniwarutahɨawe Yawé kemɨtitahɨawekai. Mɨkɨ kaniwarukuxeɨrieni haika tewiyari heimana tamamata 'ukirawetsixi, wa'aurie kaniyuhayewa ta'ikwewatɨ 'ixuriki tukiyari 'aurie.
NUM 11:25 Yawé haitsie 'uyekaitɨ Muitsexi hamatɨa katiniutaxata, meta haika tewiyari heimana tamamata 'ukirawetsixi 'iyari kaniwarupitɨani Muitsexi meixeiyakai. Kepauka 'iyari wahetsie mɨyuhayewaxɨ, metekuxatatɨwetɨ mekanakɨne. Tawarita mɨpaɨ pɨkatiɨyɨ.
NUM 11:26 Yuhutatɨ 'ukirawetsixi yukie memuyuhayewakai. Xewitɨ 'Erirari titewatɨ, xewitɨta Merari. Tsepa memanayexeiyariekai tuki manuwe mepɨkahekɨ. Yatɨtɨ, 'iyari wahetsie pɨtiunakixɨ, mɨkɨta metekuxatatɨwetɨ mekanakɨne mematiteitsie.
NUM 11:27 Hikɨ xewitɨ temaikɨtɨtɨ kaniutanautsa Muitsexi mɨkɨkɨ retaxatɨanike, mɨpaɨ kaniutayɨni: —'Erirari, Merari hamatɨa mekatenekuxatatɨweni temakuteitsie.
NUM 11:28 Kutsuhexi Nuni nu'aya, ti'uximayatame manayexeiyarie Muitsexi parewiwameyakɨ temaikɨyari paitɨ, mɨpaɨ kaniutayɨni: —Muitsexi, neti'aitɨwame, keniwaruta'imaiya.
NUM 11:29 Muitsexi mɨpaɨta kaniutayɨni: —¿Nekɨmana peti'ɨtetsa? Mɨpaɨ nepɨtiku'eriwakaku yunaitɨ 'ikɨ Yawé teɨterimama 'iyari mepexeiyanikeku memɨtekuxatanikɨ.
NUM 11:30 Hikɨ Muitsexi meta 'ukirawetsixi mekaniu'axɨani mematitekaitsie.
NUM 11:31 Yawé 'eka kaniuyuitɨani xɨ'aurixi haramaratsie miemete waratɨkɨme, mematiteitsie kaniwarukaxɨrieni. Memakuteitsie wa'aurie xɨ'aurixi mekanakunɨkaitɨni, xeitukari 'umietɨ ranuyenakeme me'atayeutɨ, xeimeturuyari metsuitɨ kwiepa.
NUM 11:32 'Ixaheritsixi mekaniwarukuteɨxɨ xɨ'aurixi mɨkɨ tukaritsie meta naime mɨkɨ tɨkaritsie meta 'uxa'arieka. Yunaitɨ tamamata 'ikayari mekaniukuxeɨrieni. Memakuteitsie takwa yateewa mekaniwarutiwatsiɨxa.
NUM 11:33 Hikɨ kepauka memeitakwaixɨa yuteta meka'itikeiwawekaku 'akuxi, Yawé kaniuyeha'ani 'ixaheritsixi wahetsiemieme, 'ana yuwaɨkawatɨ mekaniukwini.
NUM 11:34 'Ayumieme mana mekateniuterɨwa Kiwuruti-Hatawa, mana memukateukiekɨ 'ikwaitsie xeikɨa memɨyukɨhɨawekaikɨ.
NUM 11:35 Mana Kiwuruti-Hatawa memɨyekɨ 'ixaheritsixi, mekanekɨne pɨta Katseruti mana mekaniuyuhayewa.
NUM 12:1 Muitsexi xeime 'uka 'ekipitutanaka kaniutiwitɨni, hikɨ Miriyami 'Aruni hamatɨa mekanitiniukimatɨkɨne mɨkɨkɨ.
NUM 12:2 Mɨpaɨ mekaniutiyuanekaitɨni: «¿Kamɨtsɨ Yawé Muitsexi xeikɨa tikuhɨawe? ¿Tamɨ tameta katatikɨhɨawe?» Hikɨ Yawé kaniwaru'enieni.
NUM 12:3 Matsi Muitsexi tixaɨtɨ karayuyeitɨatɨ 'amuyeika kanihɨkɨtɨkaitɨni, nixewitɨ tawarita hepaɨna 'anetɨ kwiepa pumawekai.
NUM 12:4 Yapauka Yawé Muitsexi, 'Aruni meta Miriyami mɨpaɨ katiniwarutahɨawe: «Xekenehu 'ixuriki tukiyari manuwe xeme xeyuhaikatɨ». Mɨkɨ mekanekɨne.
NUM 12:5 Hikɨ Yawé kanakateni hai 'a'uwekametsie, 'ixuriki tukiyari hɨxie kaniuyuhayewa. 'Aruni meta Miriyami mame kaniwaruta'inieni, kepauka yuhutatɨ memɨwakɨ,
NUM 12:6 Yawé mɨpaɨ katiniwarutahɨawe: «Xekeneneu'eni kenemɨtixetahɨawe: »Kepauka Yawé niukameya xetsata 'amuyeika, ne nekanikɨhɨaweni heinɨtsika hepaɨ 'anemetsie meta nematsiɨkɨtɨ nekanayuyeitɨwani heinɨtsikatana.
NUM 12:7 Peru 'ikɨ mɨpaɨ pɨka'ane Muitsexi neti'uximayatsiriwame hamatɨa, yunaitɨ nete'uximayatsiriwamete watsata mɨkɨ matsi yamɨtikamie kanihɨkɨtɨni.
NUM 12:8 Ne nekatinikuxaxatɨwani hɨxiena ne'utinieretɨ, hekɨakamekɨ nekarenukanamirietɨ. Ne Yawé kenemɨ'ane kanenikuxexeiyani. ¿Ketitayari mɨya xete'utiyuane neti'uximayatsiriwame Muitsexi hepaɨtsita?»
NUM 12:9 Yawé waɨkawa kaniuyeha'ani wahepaɨtsita hikɨ kaneyani.
NUM 12:10 Yapauka hai 'anuku'eneku tuki heima, Miriyami nawiyarieya tuxatɨ kanayani 'ɨwi hepaɨ. Kepauka 'Aruni hepana mutɨa, kanixeiya yuwaiyaritsie kwiniya hexeiyakame.
NUM 12:11 Hikɨ 'Aruni 'ana Muitsexi mɨpaɨ katiniutahɨawe: «Waɨkawa nepɨmatsiwawirie, neti'aitɨwame, ke'axatemɨte'uyuri pepɨkahe'eriwani 'atsitekatemaitɨ temutiyuakɨ.
NUM 12:12 Miriyami yuwaiyaritsie kanepɨnini, nunutsi yumaama hetsie manuyemɨ nawiyarieya hepaɨ. Ximɨxi kwerietɨ mɨpaɨ pɨka'aneni ketineuyehɨwirieka».
NUM 12:13 Muitsexi Yawé mɨpaɨ katiniutawawirieni: «Kakaɨyari, waɨkawa nepɨmatsiwawirie pemenayehɨanikɨ».
NUM 12:14 Yawé Muitsexi kaniuta'eiya: «Xɨka paapaya hɨxienatsie 'ita'aɨtsikawiyake ¿katiyɨwe 'atahuta tukari muyuhiwerieka? Keheyani 'atahuta tukari kiepa pɨka'ukani, mɨkɨ tukari 'aye'ayuke kanipitɨariemɨkɨ».
NUM 12:15 Mɨpaɨ Miriyami 'atahuta tukari yeuta kaniukateitɨni. 'Ixaheritsixi mepɨkahekɨ kepaukake mɨkɨ wahetsɨa munua.
NUM 12:16 'Anake 'ixaheritsixi mekanayekɨne Katseruti, Parani makumawetsie mekaniu'axɨani.
NUM 13:1 Yawé Muitsexi mɨpaɨ katiniutahɨawe:
NUM 13:2 «Mɨpaɨ nepaine keniwaranunɨ'a hipame kwie memɨxeiyayukɨ 'ixaheritsixi nemɨwayetuirieni. Yuxexuime nuiwaritetsie memanuyetei mekaniwaranunɨ'akuni».
NUM 13:3 Yawé kemainekai, Muitsexi kaniwarenɨ'ani Parani makumawetsie mekaniyekɨne. Yunaitɨ mɨkɨ 'ixaheritsixi memanuyetei mekanihɨkɨtɨkaitɨni.
NUM 13:4 Mɨpaɨ mekatenitetewakaitɨni: Tsamuha, Tsakuxi nu'aya, Xuweni nuiwarimama wahetsiemieme,
NUM 13:5 Tsapati, Huri nu'aya, Tsimehuni nuiwarimama,
NUM 13:6 Karewi, Kepune nu'aya, Kura nuiwarimama,
NUM 13:7 'Ikari, Kutse nu'aya, 'Itsakaxi nuiwarimama memɨhɨkɨ,
NUM 13:8 'Utseyaxi, Nuni nu'aya, 'Epɨrahini nuiwarimama memɨhɨkɨ,
NUM 13:9 Pariti, Xapuhu nu'aya, Wenikamini nuiwarimama,
NUM 13:10 Kariheri, Tsuhuri nu'aya, Tsawuruni nuiwarimama wahetsiemieme,
NUM 13:11 Kari, Tsutsi nu'aya, Manatsexi nuiwarimama (Kutse nu'aya xewitɨ mɨhɨkɨ),
NUM 13:12 'Amiheri, Kemari nu'aya, Rani nuiwarimama memɨhɨkɨ,
NUM 13:13 Tsetuxi, Mikaheri nu'aya, 'Atsexi nuiwarimama wahetsiemieme,
NUM 13:14 Nakiwi, Watsi nu'aya, Nepɨtahari nuiwarimama wahetsiemieme,
NUM 13:15 Kehueri, Maki nu'aya, Kahari nuiwarimama wahetsiemieme.
NUM 13:16 Mɨpaɨ mekatenitetewakaitɨni memanuyetei Muitsexi mɨwarenɨ'a kwie memɨxeiyayukɨ. ('Utseyaxi mɨtitewakai Nuni nu'aya, Muitsexi kanipata Kutsuhexi pɨta katiniterɨwa).
NUM 13:17 Kepauka Muitsexi mɨwarenɨ'a Kanani kwieyari memɨxeiyayukɨ, mɨpaɨ katiniwarutahɨawe: «Nekexi xekaneutiyunikuni, hɨritsie paitɨ xekaniye'axɨakuni.
NUM 13:18 Kwie naime xekenexeiya, xekeneyɨ'ɨwiya teɨteri kememe'anene, xɨka mehetɨrɨkawini yatɨ mepɨkatehetɨrɨkawi, xɨka meheyuwaɨkawani yatɨ 'etsi mepɨteheyupaɨme.
NUM 13:19 Xekenexeiya kwie keme'ane, xɨka 'aixɨa he'aneni yatɨ 'axapɨre'ane, xɨka waki hekurarutsietɨkani yatɨ pɨtikatixaɨ.
NUM 13:20 Kwie xekenexeiya xɨka 'aixɨa rexuaweriyani yatɨ hawaikɨ, xɨka kɨyexi hexuaweni yatɨ pɨremawe. Hikɨ xekenehu xekamamatɨ. Tixaɨtɨ 'ikwaxi xekateni'atuakuni muwa timieme». Mɨkɨ tukaritsie kaxie takari matɨari mieme matikwakwaxetsie mekaniyɨakaitɨni.
NUM 13:21 Mekanekɨne tamamata heimama huta meyupaɨmetɨ 'ukitsi kwie meheuxeiyayuka, makumawetsie Tsini Xekuwi ye'atɨkaime, Rewu Kamati heuhurakaku.
NUM 13:22 Nekexi mekaneutiyune, Hewuruni mekaniye'axɨani, 'Akimani, Tsetsahi meta Tarimahi memanu'uwakai 'Anaki nuiwarimama mematitekai. ('Epuruni kiekariyari meri kaniukamarieni 'ariketa 'atahuta wiyari 'anuyemiekaku Tsuhani kiekariyari kaniukamarieni 'Ekipitu mieme).
NUM 13:23 Kepauka memu'axɨa mayeweritsie 'akitsie 'Etsikuri, xeixatsimuyari mekanaka'inɨni kaxie takari, yuhutatɨ meneitɨni kɨyetsie me'iyewietɨ. Metatsiere hipame 'ikwaxite kɨranaraxi meta xapa takariyari mekanaka'inɨni.
NUM 13:24 'Ikɨ kaxie takari memaka'inɨikɨ 'ixaheritsixi, mana mekateniuterɨwa 'Etsikuri mayeweri.
NUM 13:25 Huta tewiyari tukari 'anukayaku mekaniu'axɨani tamamata heimana huta 'ukitsi kwie mehekuxeiyaka.
NUM 13:26 Karetsi mekaniu'axɨani makumawetsie Parani Muitsexi manukatei, 'Aruni meta yunaitɨ 'ixaheritsixi, mekateniwarutaxatɨani kemɨre'anekai meta 'ikwaxite mekateniwaruxeitsitɨani mana mɨrexuawekai.
NUM 13:27 Mɨpaɨ mekateniwaruxatɨani: —Hakewa pemɨtatsihetanɨ'a mɨkɨ kwieyaritsie tepanɨkɨ, puyuri mana waɨkawa pexuawe retsi meta xiete. 'Ena xeketeneuxeiya 'ikwaxi mana mɨrexuawe.
NUM 13:28 Perutsɨ mana teɨteri memexuawe waɨkawa mepetɨrɨkawi, wakiekarite 'apɨremamariwawe, 'aixɨa rekukurarutsietɨkaitɨ. Matsita mana tekaniwarexeiya 'Anaki xiɨyarimama 'amemutɨtɨ.
NUM 13:29 'Amarekitsixi Nekexitsie mekaniu'uwani, hɨritsieta hetitsixi, kewutseutsixi meta 'amuxeutsixi hɨritsie mekane'uwani metatsiere kananeutsixi haramara tetsita mekaniu'uwani Kurutani tetsita.
NUM 13:30 Karewi kaiwatɨ katiniwaruyatsa 'ixaheritsixi Muitsexi hɨxie, mɨpaɨ kaniutayɨni: —Hikɨmɨtɨka tekanihuni mɨkɨ kwie tema'iwakɨ. Ne mɨpaɨ nepɨtiku'eriwa tepɨyɨwawe.
NUM 13:31 Hamatɨana memanɨkɨnekai mɨpaɨ mekaniutiyuani: —Tepɨkayɨwawe mɨkɨ teɨteri wahamatɨa temuyutakwini. Mɨkɨ mepɨtɨrɨkawi waɨkawa. Tame tepɨkatɨrɨkawi.
NUM 13:32 Hikɨ 'itarikakɨ mekateniutixatatɨkɨne 'ixaheritsixi watsata kwie memekuxei hepaɨtsita. Mɨpaɨ mekaniutiyuanekaitɨni: —Kwie temekuxei yuteɨterima kaniwarekwaka, teɨteri mana meme'uwa 'amekaniutɨni.
NUM 13:33 Matsi manata tekaniwarexeiya 'Anaki xiɨyarimama 'amemutɨtɨ. Temeyuku'inunɨatakai 'utsikari wahepaɨ tepepepekai, mɨpaɨ mɨkɨ mekatatenexeiyakaitɨni.
NUM 14:1 Mɨkɨ tɨkaritsie 'ixaheritsixi mekaniutayuani me'utihiwatɨ meta me'utitsuatɨ.
NUM 14:2 Meyu'uximatɨatɨ Muitsexi hetsiemieme meta 'Aruni, yunaitɨ mɨpaɨ mekaniutiyuanekaitɨni: «Matsi temɨnekwikaitɨni 'Ekipitu paitɨ. 'Ena 'aixɨa pɨyɨni makumawetsie xɨka te'ukwini.
NUM 14:3 ¿Titayari Yawé 'ikɨ kwieyaritsie tareyewitɨ? ¿'Ixiparakɨtsɨ temɨkwi'iwakɨ, ta'ɨitama taniwema memɨwaranuwitɨnikɨ? ¿'Aixɨa kati'ane xɨka tehakunuaxɨani 'Ekipitu?»
NUM 14:4 Mɨpaɨ mekateniyɨkɨhɨawekaitɨni hipatɨ: «Xeime manuyeyerɨni tepanuyexeiya mɨtatsi'anuwitɨnikɨ 'Ekipitu paitɨ».
NUM 14:5 Hikɨ Muitsexi, 'Aruni hamatɨa kwiepa mekaniukaxɨrieni yɨhɨxima 'ixaheritsixi wahɨxie.
NUM 14:6 Mana mekaniti'ukaitɨni Kutsuhexi Nuni nu'aya meta Karewi Kepune nu'aya yukamixa mekaneukatsanaxɨani hiwerika 'ɨnɨariyari mewewietɨ. Mɨkɨ memekɨkɨnixɨakai kepauka kwie memekuxeitsie,
NUM 14:7 hikɨ mɨpaɨ mekateniwarutahɨawe yunaime 'ixaheritsixi: —Kwie temekuxei matsi 'aixɨa kane'aneni temɨkateheyeneniere hepaɨ.
NUM 14:8 Xɨka Yawé tatsiparewiekamɨkɨ mana kataniye'atɨamɨkɨ. Kataniyetuiriemɨkɨ kwie hakewa waɨkawa mexuawe retsi meta xiete.
NUM 14:9 'Ayumieme Yawé hɨxie 'axaxepɨkateyu'eniwani meta mana teɨteri memetama xepɨkawareumakaxeni. Tixaɨtɨri mepɨkatehɨkɨ, yuhetsie nunuwame mepɨkahexeiya, tame Yawé kataniparewimɨkɨ. 'Ayumieme xepɨkawareumakaka.
NUM 14:10 Peru yunaitɨ 'ixaheritsixi mɨpaɨ memɨte'uxatakaikɨ memɨwatituaxakɨ, Yawé xawatɨriyaya tuki hɨxie kaniuyuhekɨata 'ixaheritsixi yunaime wahɨxie.
NUM 14:11 Hikɨ Yawé Muitsexi mɨpaɨ katiniutahɨawe: —¿Kepaukake mepɨtehayewa 'axamenetekumamateketɨ 'ikɨ teɨteri? ¿Kepaukake yuri mepɨteta'erieni nehetsie, mamariwaweme tɨtɨtsɨ watsata nemɨtiyuriene?
NUM 14:12 Kwiniya nekananunɨ'amɨkɨ wahetsiemieme mɨwakwinikɨ, 'ahetsie xeikɨa kiekari kanayenemɨkɨ mariwetɨ tɨrɨkaɨyetɨ keyamemutiyuane.
NUM 14:13 Muitsexi Yawé mɨpaɨ katiniutahɨawe: —Kenaye'eri kepauka 'ekɨ 'atɨrɨkariyakɨ 'Ekipitu pemɨwarayewitɨ 'ikɨ teɨteri. Kepauka 'ekipitutari memɨtehetimani kepemɨtiuyuri,
NUM 14:14 mɨpaɨ mekateniwataxatɨakuni 'ikɨ kwieyaritsie kiekatari, mɨpaɨ memɨtemate kename 'ekɨ Yawé 'ahɨxie tematsixeiya, 'ahai 'ateɨterima waheima muyeyeixa, kename 'ekɨ pehɨkɨ pemɨwaruwituxime, tukarikɨ hai 'a'uwemekɨ, tɨkarikɨta taikɨ.
NUM 14:15 Xɨka pewarukwini yunaime 'ikɨ teɨteri, yunaitɨ nuiwarite mumanetɨka memu'enana hepaɨtsita mɨpaɨ mekanitiyuakuni:
NUM 14:16 “Yawé pɨka'uyɨwekaxɨa 'ikɨ teɨteri mɨwaranuwitɨnikɨ hakewa kwie mɨwarexatɨakai, kaniwarutixɨtɨani makumawetsie wakwitɨ”.
NUM 14:17 »Neuxei hikɨ Yawé, 'atɨrɨkariya kenehekɨatani. 'Ekɨ mɨpaɨ pemainekɨ
NUM 14:18 Yawé kename pekahayu'eriya matsi waɨkawa peti'akanaki'erie meta xeniu pereuyehɨwirieni 'axamɨti'ane meta kemɨ'ane matsi'uku'eiri, peru matsi kemɨ'ane 'axamɨtiuyuri pepɨtikwinitɨani meta niwemamatsie, teukarimamatsie, tutsimamatsie, meta mɨkɨ waniwema wahetsiepaitɨ.
NUM 14:19 Waɨkawa pemɨti'akanaki'eriekɨ nepɨmatsiwawirie pemɨtiwareuyehɨwirienikɨ 'ikɨ teɨteri 'axakememɨte'uyuri, 'Ekipitu memayekɨtsietɨtɨ kepemɨtiwareuyehɨwiriekai hikɨta yaxeikɨa».
NUM 14:20 Yawé mɨpaɨ katinita'eiya: —Penetiwawirie nemɨtiwareuyehɨwirienikɨ, nekatiniwareuyehɨwiriemɨkɨ.
NUM 14:21 Yurikɨ nehetsiemieme mɨpaɨ nekanaineni, meta nexawatɨriya kwiepa naitsarie mɨhɨnekɨ,
NUM 14:22 tsepanetɨ nexawatɨriya memuxei meta mamariwawemekɨ kenemɨtiuyuri 'Ekipitu meta makumawetsie, 'iya kemɨ'ane yuri memɨkaneteheta'eriri, mɨixamexɨa memɨnetsiheta'inɨataxɨ
NUM 14:23 pɨka'ixeiya kwie wa'ukiyarima yuri nehaitɨ nemɨwayetuirienikekai. Nixewitɨtɨma mɨnetsi'utaniukima pɨka'ixeiya.
NUM 14:24 Neti'uximayatsiriwame Karewi, yɨkɨ'anekame 'iyari kanexeiyani, 'aixɨa katinikamieni, nekanixatɨamɨkɨ kwie ke'anekame mexei meta nuiwarimama wahetsiemieme kanayeimɨkɨ.
NUM 14:25 'Uxa'a Haramara Mɨxeta hepa xekenehu, 'amarekitsixi meta kananeutsixi mayeweritsie memekiekɨ.
NUM 14:26 Yawé Muitsexi 'Aruni mame mɨpaɨ katiniwarutahɨawe:
NUM 14:27 —¿Kepaukake mepɨtehayewa 'ikɨ teɨteri 'axame'utiyuatɨ menetsiniukimatɨ? Nekaniwa'enieka kehepaɨ memɨteniukixie 'ixaheritsixi nehetsiemieme.
NUM 14:28 Hikɨ mɨpaɨ ketiniwarutahɨawi nehetsiemieme: “Yurikɨ nehetsiemieme mɨpaɨ nepaine, ketita xemɨteheuyehɨwa yanekatiniyurimɨkɨ.
NUM 14:29 Yunaitɨ xeme xekanikwikuni makumawetsie xekaxari 'ena puyuhayewa. Nixewitɨ memaka'utsie xeitewiyari wiyari mehexeiyatɨkaitɨ 'axamemutiyua nehetsiemieme,
NUM 14:30 kwie pɨkayetuiriyarieni nemɨxexatɨa. Mana xeikɨa mekaneutahaxɨakuni Karewi Kepune nu'aya meta Kutsuhexi Nuni nu'aya.
NUM 14:31 Tɨɨri xeikɨa kwiepa mekaneutahaxɨakuni xeme mɨpaɨ xemutiyuakɨ kename kuyaxi mewaranuwitɨni wahetsiemieme memakɨnekɨ. Mɨkɨ mekaniyɨakakuni mɨkɨ kwietsie memu'uwani xeme xemitixani'eritsie.
NUM 14:32 Xeme xe'umete 'ena makumawetsie kaniyuhayewamɨkɨ.
NUM 14:33 Huta tewiyari wiyari xeniwema 'ena makumawetsie mekaniu'uwakuni. 'Ikɨ mekatenanutɨkuni kexemɨkateheu'enana, yunaitɨ xe'akuxɨyuke.
NUM 14:34 Kwie xemekuxeitsie huta tewiyari tukari xepeyuri, hikɨta xeitukari pɨ'inɨarini xeiwiyari. Huta tewiyari wiyari xekaniyurikuni xete'uka'eniwatɨ 'axaxemɨte'uyurikɨ, mɨpaɨ xekatenetimaikuni kenemɨtixe'aye'unie”.
NUM 14:35 Ne Yawé nekanihɨkɨtɨni, nekatinaye'atɨamɨkɨ kemɨre'uxa kenemutayɨ 'ikɨ teɨteri 'axamemɨte'u'iyari wahetsiemieme, mekaniyukuxeɨrieni menetsi'aye'unietɨ. 'Ena makumawetsie mekanikumawerikuni. 'Enatɨtɨ mekanikwikuni.
NUM 14:36 'Iya 'ukitsi Muitsexi mɨwarutanɨ'akai kwie memɨxeiyayukɨ mɨkɨ mekaniɨyɨni, mehakunuaxɨaka yɨkɨpɨta memɨte'uxa kename kwie 'axahe'anekai. Mɨpaɨ me'utiyuaku yunaitɨ teɨteri mekaniuyu'uximatɨani.
NUM 14:37 'Ayumieme 'ikɨ 'itarikakɨ niuki memutsutɨa kwie hepaɨtsita miemeyari, Yawé hɨxie mekaniukwini kwiniyakɨ.
NUM 14:38 Yunaitɨ kwie memekuxeiyakai, Kutsuhexi xeikɨa kaniuyuhayewa Nuni nu'aya meta Karewi Kepune nu'aya.
NUM 14:39 Kepauka Muitsexi mɨtiutahayewaxɨ mɨpaɨ tiwakɨhɨawetɨ yunaitɨ 'ixaheritsixi mekaniutitsuanakaitɨni karima meyuhiwerietɨ.
NUM 14:40 'Uxa'arieka ximeri paitɨ mekananutikɨne hɨritsie 'amanutitewatsie 'ixaheritsixi mɨpaɨ me'utiyuatɨ: —Tekanihuni kwie Yawé mɨtatsi haxatɨatsie, mɨpaɨ temɨtematekɨ kename 'axatete'uyuri.
NUM 14:41 Peru Muitsexi mɨpaɨ katiniwarutahɨawe: —¿Titayari tawarita Yawé niukieya xekate'enieni? Hikɨ kexemɨteku'eriwa yapɨkatiyunake.
NUM 14:42 Xɨka xeheukɨne xekana'iwariekuni, Yawé xehamatɨa mɨka'uyeikakɨri.
NUM 14:43 'Amarekitsixi meta kananeutsixi wahamatɨa xekaneyutakwikuni, mɨkɨ mekanixekwikuni 'ixiparakɨ. Xeme Yawé xemuku'eiri, mɨkɨ pɨkaxeparewieni.
NUM 14:44 Mɨkɨ meka'enanatɨ matsi mekanekɨne mɨhɨriyatsie paitɨ, Muitsexi meta Yawé kakunieya tɨratu mayeka wahamatɨa mekahayekɨneku mematiteitsie.
NUM 14:45 Hikɨ 'amarekitsixi meta kananeutsixi mana memɨkiekataritɨkai mekaniwarutakwini mekaniwara'iwa, mewaruweiyatɨ Kuxima mɨrayetewatsie paitɨ mekaniwaye'atɨani.
NUM 15:1 Yawé Muitsexi mɨpaɨ katiniutahɨawe
NUM 15:2 'ixaheritsixi mɨpaɨ mɨtiwatahɨawekɨ: «Kepauka xemeutahaxɨani kwietsie hakewa nemɨxehexatɨa mana xemutitenikɨ,
NUM 15:3 xɨka xewitɨ Yawé reumawiriemɨkɨni, xeime wakaxi, xeime muxa, meta mawari taipa warɨkariekame, mawari taiyariyari meta mɨyɨhɨritɨani mawariyari, yatɨni kemɨtiyuwaɨriya mawariyari, yatɨni 'ixɨarari patsiekamekɨ memɨyukuxexeɨriwa. Mɨkɨ mawarika witsimu'ɨa Yawé minake,
NUM 15:4 kemɨ'ane yumawari mɨyetuani kanenayatsamɨkɨ hatsite mawariyari, huta kiruyari tɨriku mɨtɨxiyari 'aixɨa mɨ'ane hatseiti xeirituruyarikɨ pɨnariekame.
NUM 15:5 Yawé xɨka muxa nunutsi 'utimawirieni mawari taiyariyari mayanikɨ, yaxeikɨata heutinɨkame xeirituruyari kaxie winuyari mɨtayeuriwa.
NUM 15:6 »Muxa 'uki xɨka hɨkɨtɨni, hamatɨana hatsite mawariyari kaniyetuamɨkɨ nauka kiruyari tɨriku mɨtɨxiyari 'aixɨa mɨ'ane, hatseiti xeirituruyari heimana 'imeriyukɨ pɨnariekame.
NUM 15:7 Mɨta'ɨyarienikɨ winu xeirituruyari heimana 'imeriyu. Mɨpaɨ 'anetɨ 'aixɨa 'u'ɨatɨ kanayeimɨkɨ Yawé hetsiemieme.
NUM 15:8 »Xɨka tsikeru xeime peyetuamɨkɨ mawari taiyariyari mayanikɨ, yatɨni kemɨtiyɨhɨritɨa meye'atɨanikɨ, yatɨni 'aixɨa memɨteyuxeiyanikɨ mawariyari Yawé hetsiemieme,
NUM 15:9 tsikeru hamatɨa pekanitimawamɨkɨ hatsite mawariyari, 'ataxewime kiruyari tɨriku mɨtɨxiyari 'aixɨa mɨ'ane huta rituruyari hatseitikɨ pɨnariekame.
NUM 15:10 Yaxeikɨata kaxie winuyari mɨtiyeuriwa huta rituruyari heutinɨkame. Taipa warɨkariekame mawariyari mayanikɨ, mɨkɨ mawarika witsimu'ɨa Yawé minake.
NUM 15:11 Yuxexuitɨ wamawarikayari tsikeru, muxa 'uki, muxa temaikɨ, meta tsipu, yapɨtikuwewiwani kemɨre'inɨari.
NUM 15:12 Mɨpaɨ pekatiniyurienemɨkɨ yuxexuime wahetsiemieme, tsepa kememɨyupaɨme tewaxi pemɨwayetua.
NUM 15:13 »Kemɨ'ane 'Ixaheri tewiyari mɨtitimawa taipa miemeyaritsie, Yawé 'aixɨa mɨti'ɨkwekɨ, 'ikɨ 'aitsika kehaye'atɨani.
NUM 15:14 Yatɨni ku'uwamete xehamatɨa muka yaxeikɨa katiniyurimɨkɨ taipa mawariyari meta 'aixɨa mu'ɨa Yawé hetsiemieme wewimɨkɨni 'ikɨ 'aitsika kehaye'atɨani,
NUM 15:15 xekiekaritsie xewitɨ 'aitsika xeikɨa kaniuyeikamɨkɨ 'ahetsiemieme meta 'ateewa kiekame hetsie 'akiekaritsie muka. 'Ikɨ 'aitsika 'anuiwarima wahetsiemieme kanihɨkɨtɨni. 'Ekɨ meta 'ateewa kiekame yaxeikɨa xekani'aneneni Yawé hɨxie.
NUM 15:16 'Ayumieme mɨkɨ 'aitsika xeyunaime xehetsie katini'aitani 'ahetsie meta kuyeikame hetsie 'ahamatɨa muka».
NUM 15:17 Yawé Muitsexi mɨpaɨ katiniutahɨawe
NUM 15:18 'ixaheritsixi mɨpaɨ mɨtiwatahɨawekɨ: «Kepauka kwietsie xemeutahaxɨani hakewa nemɨxehewitɨ,
NUM 15:19 mana mɨretixuxuawere xɨka xetehetikwani, Yawé hetsie timieme xekateneyetuakuni.
NUM 15:20 Kepauka matɨari paa peme'imanitsie, mɨtiyetuiwatsie timieme pekaniyetuamɨkɨ, harina 'aixɨa mɨ'ane papayari.
NUM 15:21 Yunaitɨ 'anuiwarima mekateniyetuayakuni yemekɨ Yawé hetsiemieme matɨari memɨte'imanitsie timieme.
NUM 15:22 »Mɨpaɨta pɨtiɨyɨwe mɨpaɨ xekateha'eriwatɨ 'axaxepɨte'uyuriwawe, 'inɨari niukiyaritsie Yawé miyetua Muitsexi hetsɨa,
NUM 15:23 naime 'inɨari Yawé mɨxeyetuirie Muitsexi hetsɨa, kepauka mɨpaɨ mutayɨ kename xenuiwari wahetsiemiemetɨni.
NUM 15:24 Xɨka 'axamete'uyurieni yunaitɨ kiekatari mɨpaɨ mekateha'eriwatɨ, hikɨ mɨkɨ xeime tsikeru xeiwiyari hɨkame mekanitataiyakuni witsi'u'ɨakame Yawé minake, kaxie winuyari mɨtayeuriwa heutinɨkame, hatsite mawariyari, xeime tsipu 'uki 'itiya mawariyari mayanikɨ, kemɨre'uxa.
NUM 15:25 Hikɨ mawari wewiwame yunaime 'ixaheritsixi kaniwaxɨnamɨkɨ, mekateneuyehɨwiyariekuni memɨka'imakɨ, meta Yawé hetsiemieme mawarika taiyariyari memuwewikɨ meta 'itiya mawariyari memuwewikɨ meta 'axamemɨte'uyuri meka'imaitɨwetɨ.
NUM 15:26 Yunaitɨ teɨteri 'ixaheritsixi mekateneuyehɨwiyariekuni, meta 'ateewa kiekatari, yunaitɨ 'axamemɨte'uyurikɨ meka'imaitɨwetɨ yuhetsie.
NUM 15:27 »Xɨka yuxaɨta 'axatiuyurieni ka'imainetɨ, xeime tsipu 'ukaratsi kaniyetuamɨkɨ xeiwiyari hɨkame 'itiya mawariyari mayanikɨ.
NUM 15:28 Mawari wewiwame kanixɨnamɨkɨ Yawé hɨxie 'axamɨtiuyuri ka'imainetɨ. Mawari wewiwame yakatiniyurimɨkɨ, hikɨ tewi 'axamɨtiuyuri katineuyehɨwiyariemɨkɨ.
NUM 15:29 'Ikɨ yuxewitɨ xeikɨa 'inɨari yunaitɨ wahetsie kanimiemetɨni kemɨ'ane 'axamɨtiuyuri ka'imainetɨ, 'ixaheri tewiyari hetsiemieme meta 'ateewa kiekame wahamatɨa muka hetsiemieme.
NUM 15:30 »Peru kemɨ'ane 'axamɨtiuyuri mima, tsepa mana munuiwakame yatɨni 'ateewa mɨkiekame, Yawé hɨxie 'axakatiniuyurieni. Mɨkɨ yuteɨterima watsata payeweiyarieni.
NUM 15:31 Yuhetsie kanihɨimɨkɨ Yawé niukieya mutananaimakɨ, 'inɨari niukiyaritsie yamɨkatikatɨakɨ».
NUM 15:32 Heiwamieme 'uxipiya tukaritsie, 'ixaheritsixi me'uxipiekaku makumawetsie, xewitɨ 'ixaheri kaniuxeiyarieni kɨyexi naiwame 'ɨnetɨ.
NUM 15:33 Hikɨ kemɨ'ane memixei meneiwitɨni Muitsexi meta 'Aruni wahetsɨa yunaime 'ixaheritsixi wahɨxie.
NUM 15:34 Matɨari kananutahɨiyakatɨni xeikɨa, mɨkahahekɨakaikɨ kememiyurienikekai.
NUM 15:35 Hikɨ Yawé Muitsexi mɨpaɨ katiniutahɨawe: «Mɨkɨ tewi ke'umierieni. Yunaitɨ 'ixaheritsixi mekeheitituaxixɨani 'ateewa paitɨ».
NUM 15:36 Hikɨ 'ixaheritsixi mematiteitsie 'aheteewakaku mekaneihana, mekaneitituaxixɨani mekanimieni, Yawé Muitsexi kemɨrahɨawekai.
NUM 15:37 Yawé Muitsexi mɨpaɨ katiniuta'aitɨani
NUM 15:38 'ixaheritsixi mɨpaɨ mɨtiwatahɨawekɨ: «Xeme xeyunaitɨ xenuiwarima yukamixa 'amɨtɨtɨtsie matawɨre xekanawipaxɨakuni hiru mɨyɨtsikimaɨyekɨ.
NUM 15:39 Mɨkɨ matawɨ xekamixatetsie kanixeparewiemɨkɨ xemaye'eriwanikɨ, naime 'inɨari niukiyari Yawé hetsiemieme xemɨkayuwaɨriyanikɨ xe'iyari kemɨtixekuyuitɨwa meta xehɨxite ketita mɨreuhiwe'erie.
NUM 15:40 Naime ne'aitsika xekanexeiyakakuni, xekaneye'atɨakakuni. Mɨpaɨ xe'anetɨ neteɨterima memɨpatsie xekanihɨkɨtɨkakuni
NUM 15:41 Ne Yawé xekakaɨyari nekanihɨkɨtɨni, nemɨxe'ayewitɨ 'Ekipitu xekakaɨyari nemayanikɨ. Ne Yawé nepɨhɨkɨ».
NUM 16:1 Merikɨte Kure 'Itsaxi munu'ayatɨkai, Kuhati mɨteukarieyatɨkai meta Rewi mɨtutsieyatɨkai. Meta xuwenitsixi Ratani meta 'Awirani 'Eriyáwi niwemama meta 'Uni Pereti niweya,
NUM 16:2 mɨkɨ Muitsexi hepaɨtsita mekateniutixatatɨkɨne mewaparewiekaku huta tsienituyari heimana huta tewiyari heimana tamamata 'ixaheritsixi. Yunaitɨ mɨkɨ mekani'uitɨariekaitɨni, memanuyetei 'ixaheritsixi memɨwaranuka'uitɨakai.
NUM 16:3 Mekaniuyukuxeɨrieni Muitsexi meta 'Aruni wahepaɨtsita memeuniunikɨ, mɨpaɨ mekateniwarutahɨawe: —Xemeri yemekɨ mamariwawemete xepayuyeitɨa. Xɨka 'ikɨ kiekari patsieka meta kiekatari, ¿titayari xeme Yawé kiekarieya kutsiyarima xetehayuyeitɨwa?
NUM 16:4 Kepauka Muitsexi mu'enaxɨ kememutiyuanekai, kaniukatunumakeni
NUM 16:5 mɨpaɨta Kure katiniutahɨawe meta yunaime: —'Uxa'a Yawé yapɨtayɨni kemɨ'ane hetsienamieme mɨpatsie. Mɨkɨ menayexei kanihɨkɨtɨni, mɨkɨ kanita'inimɨkɨ.
NUM 16:6 Merikɨte Kure, mɨpaɨ xekateniyurikuni 'uxa'a 'ateɨterima yunaitɨ: 'ɨkwa taiyame xekaniti'ɨikuni,
NUM 16:7 tɨɨ xekanakayatsakuni 'ɨkwa witsimu'ɨa xekenakawiwiexɨa Yawé hɨxie. Kemɨ'ane manayexeiya mɨkɨ kanihɨkɨtɨkamɨkɨ. Xemetɨtɨ Rewi niwemama xepɨhɨkɨ kwinimieme memɨtehanutihu.
NUM 16:8 Muitsexi Kure mɨpaɨ katiniutahɨawe: —Hikɨta xekeneneu'eni rewitsixi.
NUM 16:9 ¿Kamɨtsɨ tixaɨtɨ xekatehayeitɨa Yawé mɨxe'anayexei 'ixaheritsixi watsata 'ahurawa 'auriena xemu'uwanikɨ, Yawé tukita xemɨte'uximayakakɨ, hipatɨ memɨka'ane wahepaɨ xemɨte'uximayakakɨ?
NUM 16:10 Kakaɨyaritɨtɨ yu'aurie kanixeti'uitɨaka, 'ekɨ meta rewitsixi yunaitɨ, ¿hikɨta mawari wewiwamete xetekɨniku?
NUM 16:11 'Ekɨ, 'ateɨterima yunaitɨ xekaniuyukuxeɨrieni Yawé hepaɨtsita 'axaxe'utiyuatɨ, tixaɨtɨ 'Aruni pɨkatihɨkɨ xeminiukima.
NUM 16:12 Muitsexi Ratani meta 'Awirani, 'Eriyáwi niwemama katiniwarutanɨ'airieni, peru mɨkɨ mɨpaɨ mekaniutiyuani: —Tame tepɨkahu.
NUM 16:13 ¿Kamɨtsɨ tixaɨtɨ pekarayeitɨa pemɨtatsi'ayewitɨ hakewa retsi meta xiete waɨkawa mexuawe, pemɨtatsikwiximenikɨ 'ena makumawetsie ti'aitame pemayuyeitɨanikɨ tahetsie?
NUM 16:14 Kaniyuritɨni 'ekɨ pepɨkatatsi 'atɨawe 'akuxi hakewa xeniu retsi meta xiete waɨkawa mexuawe meta kwiepa mɨraka'etsitɨre meta kaxie haraweriyari pepɨkatatsiyetuiriewe. Xɨari tekaheuneniereme pekatani'erieka para temɨmatsi'uweiyanikɨ. Tame matsi tepɨkayehu.
NUM 16:15 Hikɨ Muitsexi waɨkawamekɨ ha'atɨ, Yawé mɨpaɨ katiniutahɨawe: —Wamawari pepɨkanaki'erieka tita memɨtehapini, ne xeime nixeime wapiinite nepɨkatiwanawairiewe meta watewama nepɨkatiwakwinitɨa.
NUM 16:16 Muitsexi Kure mɨpaɨ katiniutahɨawe: —'Ekɨ meta 'ateɨterima meta 'Aruni 'uxa'a 'ena Yawé hɨxie xekaniti'uikuni.
NUM 16:17 Yuxexuitɨ xeme Yawé hɨxie 'ahurawa xekaniɨkɨnikuni 'ɨkwa taiyametsie 'ɨkwa witsimu'ɨa hɨpɨneme xe'u'ɨtɨ, huta tsienituyari heimana huta tewiyari heimana tamamata 'ɨkwa taiyame xe'u'ɨtɨ 'ahurawa xekaniɨkɨnikuni. Meta 'ekɨ 'Aruni hamatɨa yuputsiwiwame xekananu'ɨikuni.
NUM 16:18 Hikɨ yuxexuitɨ 'ɨkwa taiyame me'u'ɨtɨ 'ixuriki tukiyari hɨxie mekaniti'uni, Muitsexi meta 'Aruni wahamatɨa.
NUM 16:19 Kepauka Kure yunaime yuteɨterima muwarukuxeɨri Muitsexi meta 'Aruni wahepaɨtsita 'axamemɨtiyuanekai 'ixuriki tukiyari hɨxie Yawé yuxawatɨriya kaniuhekɨata mɨkɨ wahɨxie.
NUM 16:20 Hikɨ Yawé Muitsexi meta 'Aruni mɨpaɨ katiniwarutahɨawe:
NUM 16:21 ―Xekeneutayeixɨa mɨkɨ teɨteri wahamatɨa xepɨkati'uka, ne nekaniwakwimɨkɨ hikɨ.
NUM 16:22 Hikɨ Muitsexi 'Aruni hamatɨa kwiepa mekaniukahɨxima'uni, mɨpaɨ mekateniuhiwa: —Yawé, yunaime teɨteri wahetsiemieme pemɨkakaɨyari: xewitɨ xeikɨa tewi 'axapɨtiuyuri, ¿'ekɨta petiyeha'ani yunaime 'ikɨ wahetsiemieme?
NUM 16:23 Hikɨ Yawé Muitsexi mɨpaɨ katiniutahɨawe:
NUM 16:24 —Yunaime 'ixaheritsixi mɨpaɨ ketiniwarutahɨawi Kure, Ratani meta 'Awirani waxamaru mati'u mepɨka'ukɨkani.
NUM 16:25 Hikɨ Muitsexi meta 'ukirawetsixi 'ixaheritsixi wahetsiemiemete mekanekɨne hakewa memetitekai Ratani meta 'Awirani.
NUM 16:26 Hikɨ Muitsexi 'ixaheritsixi mɨpaɨ katiniwarutahɨawe: —'Ikɨ 'axamemɨte'u'iyari waxamaru 'aurie xepɨka'u'uwani. Tixaɨtɨ wapiini xepɨkatekumaɨwani, xemeta kapa xete'ukwinitɨarienikɨ mɨkɨ 'axamemɨte'uyurikɨ.
NUM 16:27 Hikɨ teɨteri mekaneutayeixɨani, Kure, Ratani meta 'Awirani waxamaru 'aurie. Ratani meta 'Awirahami 'amemɨtewayekɨ yuxamaru kitenie, mana mekaniti'ukaitɨni yu'ɨitama meta yuniwema mewarawitɨtɨ.
NUM 16:28 Muitsexi tawarita mɨpaɨ kaniutayɨni: —Hikɨ xekatenetimaikuni xɨka Yawé netsinɨ'aka yatɨ kenemɨtinekɨhɨawe xeikɨa nepɨtiyuriene.
NUM 16:29 Xɨka 'ikɨ teɨteri kwiniyakɨ me'ukwini, 'ana mɨpaɨ katinimatsiɨkɨni kename ne Yawé kanetsiheyenɨ'a.
NUM 16:30 Xɨkata Yawé hekwamekɨ yɨkɨ tiuyurieni kwie 'anutayepieni, xɨka wareukakwani meta naime wapiinite, xɨka me'ayenenieretɨ meheukateukieni, hikɨ 'ana mɨpaɨ xekatenetimaikuni kename mɨkɨ Yawé tixaɨtɨ katihɨkɨtɨme me'ayeitɨa.
NUM 16:31 Kepauka Muitsexi 'amɨtiutahayewaxɨ, kwie wahetɨa kaneukapene,
NUM 16:32 kaneukaxaware kaniwareukakwani, mɨkɨ meta watɨɨriyama, meta hipatɨ teɨteri Kure tipiinieya naitɨ.
NUM 16:33 Me'ayenenieretɨ kwieta mekaneukayune, meta naitɨ tita memɨtehexeyakai, kwie waheimata nanunare. Mɨpaɨ mɨkɨ mekateniukumaweriyarieni 'ixaheritsixi watsata.
NUM 16:34 Yunaitɨ 'ixaheritsixi mekaniyuta'unaxɨani mewa'enietɨ mɨpaɨ mete'uhiwatɨ: —Tepɨtinautsa, tameta kwie tatsi'anukakwani.
NUM 16:35 Meta mɨkɨ 'ukitsi huta tsienituyari heimana huta tewiyari heimana tamamata 'ɨkwa taiyame memu'ɨkai Yawé taikɨ kaniwarukwini.
NUM 16:36 Yawé Muitsexi mɨpaɨ katiniutahɨawe:
NUM 16:37 «'Eriyatsaxi mawari wewiwame mɨpaɨ ketineuta'aitɨa 'Aruni nu'aya, 'ɨkwa taiyamete mɨpatsietɨka mɨ'ɨimiekɨ, mana tɨɨxariyari muyuhayewaxɨ kehewiwieni 'ateewa paitɨ.
NUM 16:38 'Ɨkwa taiyamete keneuti'ɨi 'iya 'axameteyurietɨ memukwi tiwapiini, kɨmana mawari taiyame pekanikawiriemɨkɨ. Mɨkɨtsɨ kanipatsietɨkani, Yawé mɨyetuiriyariekɨ, mɨkɨ 'inɨari 'ixaheritsixi wahetsiemieme mɨhɨkɨtɨnikɨ».
NUM 16:39 Hikɨ mawari wewiwame 'Eriyatsaxi mɨkɨ 'ɨkwa taiyamete kaniuku'ɨni, mɨkɨkɨ tepɨa weweritɨ mɨtiwewiyanikɨ katiniuta'aita mawari taiyame heima mɨkawerarienikɨ.
NUM 16:40 Mɨkɨ tepɨa muwa kaniuyuhayewa 'ixaheritsixi memimakaxenikɨ, xewitɨ 'Aruni kaxiɨyarieyatɨtɨ meta mɨpaɨ kati'aitɨarietɨ mɨpaɨ mɨkatiyurienenikɨ Yawé 'ɨkwa witsimu'ɨa mɨkatairiekakɨ, xɨka mɨpaɨ tiuyurieni Kure meta niwemama wahepaɨ mekatenikwikuni, mɨpaɨ katiniuyɨni Yawé Muitsexi kemɨtiuta'aitɨakai.
NUM 16:41 'Uxa'ariekata, yunaitɨ 'ixaheritsixi Muitsexi meta 'Aruni mekaniwarutiniukimatɨkɨne mɨpaɨ me'utiyuatɨ: —Xeme Yawé teɨterimama xekaniwarukwini.
NUM 16:42 Teɨteri 'axamemutiyuanekaikɨ Muitsexi meta 'Aruni wahepaɨtsita mɨkɨ mekanekɨne 'ixuriki tukiyarita. Hikɨ yapauka hai tuki kananukanani, Yawé xawatɨriyaya kaniuyuhekɨare.
NUM 16:43 Hikɨ Muitsexi 'Aruni hamatɨa mekanewa'uni tuki hɨxie,
NUM 16:44 Yawé Muitsexi mɨpaɨ katiniutahɨawe:
NUM 16:45 —'Ikɨ teɨteri pepɨkawanɨka, ne hikɨ nepɨwatixɨtsitɨani yunaime. Hikɨ mɨkɨ mekaniutihɨxima'uni kwiepa,
NUM 16:46 hikɨ Muitsexi 'Aruni mɨpaɨ katiniutahɨawe: —'A'ukwa taiyame keneuti'ɨka mana tɨɨ kenekayatsaka mawari taiyametsie mieme, muwa 'ɨkwa witsimu'ɨa mana kenekawiwi, kenemie mexɨima hakewa memeyuxeɨrie watsata, mana pemɨwarexɨnakɨ, Yawé haxɨaya kaninuani wahetsie meta 'iwaɨyɨ wahetsie katiniunake.
NUM 16:47 'Aruni yakatinikayani Muitsexi kemɨrehɨawekai, kaniutanautsa teɨteri wahixɨapa mɨtakenikɨ. 'Iwaɨyɨ wahetsie katiniunakekaitɨniri, hikɨ 'Aruni 'ɨkwa witsimu'ɨa kaniutaiya teɨteri kɨmana memɨxɨnarienikɨ.
NUM 16:48 Mana memayeneniere meta memɨkwikwi'i watsata kaniutakeni, 'ana kwiniya katiniuhayewa.
NUM 16:49 'Ana tamamata heimana nauka miriyari heimana 'atahuta tsienituyari teɨteri mekaniukwini, meka'inɨaritɨ Kure hamatɨa memukwi.
NUM 16:50 Hikɨ kememɨtekwi'ikai heunuaku, 'Aruni kaninuani tuki hɨxie hakewa Muitsexi mekatei.
NUM 17:1 Yawé Muitsexi mɨpaɨ katiniutahɨawe:
NUM 17:2 «'Ixaheritsixi mɨpaɨ ketiniwarutahɨawi tamamata heimana huta 'itsɨ mepa'ɨni xeinuiwariyaritsie miemete xexuime. Wa'itsɨtsie mepa'utɨkani kemɨtitewaka nuiwari.
NUM 17:3 Rewi 'itsɨyatsie 'Aruni pɨta pekaneu'utɨamɨkɨ, yuxexuitɨ memanuyetei yu'itsɨ mekanexeiyakakuni.
NUM 17:4 Tɨratu kakuniyari manuka hɨxie keneuti'uitɨa hakewa xehamatɨa nemɨretixaxata.
NUM 17:5 Kemɨ'ane 'itsɨya mɨtayɨra mɨkɨ nemenayexeiya kanayeimɨkɨ. Mɨpaɨ 'ixaheritsixi mekatenihayewakuni menetsi'uximatɨatɨ ke'axamemutiyuane xehepaɨtsita».
NUM 17:6 Hikɨ Muitsexi 'ixaheritsixi mɨpaɨ katiniwarutahɨawe, memanuyetei tamamata heimana huta 'itsɨ mekaniyetuaxɨani, xexuime nuiwaritetsie miemete. 'Aruni 'itsɨya wahamatɨa kanayewekaitɨni.
NUM 17:7 Muitsexi 'aixɨa katini'uitɨani tukita paitɨ Yawé hɨxie meta tɨratu kakuniyari muyeka hɨxie.
NUM 17:8 'Uxa'arieka ximeri Muitsexi heutahaku tɨratu kakuniyari muyeka, kepauka 'Aruni 'itsɨya muxei Rewi nuiwariyaritsiemieme kaniyɨrakaitɨni 'arimetɨra, 'etsipepetɨ heukatetɨ meta tuturiyari yutakariyari hexeiyatɨ.
NUM 17:9 Hikɨ Yawé hɨxie naime 'itsɨte kanewaye'ɨni, 'ixaheritsixi wahɨxie kaniti'uitɨani, memixeiyakɨ kemɨtiuyɨkai, hikɨ yuxexuitɨ yu'itsɨ mekaniuti'ɨni memanuyetei.
NUM 17:10 Yawé Muitsexi mɨpaɨ katiniutahɨawe: «Hutarieka 'Aruni 'itsɨya tɨratu kakuniyari hɨxie keneutiketsa, mana mekanixeiyakuni 'axamemutiyuane. Mɨpaɨ mekatenihayewakuni 'axame'utiyuatɨ nehetsiemieme meta 'ixaheritsixi memɨkakwi'inikɨ».
NUM 17:11 Muitsexi yakatiniuyurieni Yawé kemɨtita'aitɨakai.
NUM 17:12 Hikɨ 'ixaheritsixi Muitsexi mɨpaɨ mekateniutahɨawe: «Tame tekanitatɨmaiyariekuni, yemekɨ tekaneuyewekuni. Tekanikwikuni.
NUM 17:13 Yunaitɨ kemɨ'ane Yawé tukieya manuwe memɨye'axe mekanitakukuweni, 'ayumieme tame teyunaitɨ tekanikwikuniri».
NUM 18:1 Yawé 'Aruni mɨpaɨ katiniutahɨawe: «Yunaitɨ Rewi xiɨyarimama muwa mɨtipatsietɨka mɨrayepine 'aurie mepɨka'ukɨkani, 'ekɨ meta 'aniwema xehetsie xeikɨa katinahɨiyamɨkɨ, xeme xɨka 'axaxete'uyurieni kemɨkatixe'uximayatsika xemɨmawari wewiwametekɨ.
NUM 18:2 Kepauka 'ekɨ meta 'aniwema xemɨte'uximayaka 'ixuriki tukiyarita kakuni tɨratuyari muyeka, xe'iwama Rewi nuiwarimama mekanixeparewiekakuni.
NUM 18:3 Mɨkɨ mekameniparewiekakuni kepemɨtiyurieneni, mɨkɨ mekani'ɨwikakuni 'ixuriki tukiyari, 'ahurawa xeikɨa mepɨka'ukɨkani piinite mɨtipatsietɨka 'aurie meta mawari taiyametsie, xemɨkatakukuwenikɨ.
NUM 18:4 Mɨkɨ 'aparewiwamete mekanihɨkɨtɨkakuni, tuki mekanixeiyakakuni meta naitɨ muwa kemɨtikumayɨiwa. Merikɨte kepauka xeme xemɨte'uximaya xewitɨ pɨkaxeparewieka mɨpaɨ mɨkaranayexeiyarie.
NUM 18:5 »Xeme xeikɨa xekatenikumaɨwakuni mɨtipatsietɨka meta mawari taiyame hetsie mɨrakapine, nehaxɨa tawarita 'ixaheritsixi nemɨkawakupitɨwanikɨ.
NUM 18:6 Mɨpaɨ ketinemaika ne nekatiniuyurieni nemɨwaranayexei, 'ixaheritsixi watsata, 'a'iwama Rewitsixi nemɨmatsiyetuirienikɨ 'imikieri hepaɨ. Mɨkɨ Yawé hetsiemiemeteri mekanihɨkɨtɨni 'ixuriki tukiyarita memɨte'uximayakakɨ.
NUM 18:7 'Ekɨ xeikɨa meta 'aniwema nekanixepitɨaka xemɨmawari wewiwametetɨnikɨ, xemɨtekumaɨwanikɨ mawari taiyametsie timieme meta 'ixuriki meuwie warita timieme. Xeme nekanixepitɨaka xemɨmawari wewiwametetɨnikɨ, kemɨ'ane tawarita 'ahurawa mayani mɨtimaiwetɨkatsie mɨpaɨ katipitɨarietɨ kanimɨmɨkɨ».
NUM 18:8 Yawé 'Aruni mɨpaɨ katiniutahɨawe: «Ne nekamatinihɨritɨaka naime mɨtimaiwetɨka 'ixaheritsixi memɨteyetuaya. 'Ekɨ meta 'aniwema nekatinixeyetuirieka xehetsiemieme 'aixɨa mɨti'ane, 'inɨari 'aitsikayari hepaɨ.
NUM 18:9 'Ahetsiemieme katinayeikamɨkɨ piinite kwinimieme mɨtimaiwetɨka mɨkatititaiyarɨwa. 'Ahetsiemieme katinihɨkɨtɨkamɨkɨ 'ixaheritsixi memitimawani hatsite hamatɨa, 'itiya mawariyari meta wahetsie mɨrahɨiwa mawariyari. 'Ikɨ naime memɨnete'atɨirieni waɨkawa mɨtipatsie katinihɨkɨtɨkamɨkɨ 'ahetsiemieme meta 'aniwema.
NUM 18:10 Pekatinikwakamɨkɨ waɨkawa mɨtipatsietɨka, mɨpaɨ pekatinimaikamɨkɨ. Yunaitɨ 'ukitsi mekanitikwa'akuni.
NUM 18:11 »Metatsiere mɨtiyetuiwa 'ahetsiemieme katinayeimɨkɨ mawari teikɨ hetserarietɨ 'uyuitɨariwatɨ 'ixaheritsixi memɨteyetuaya. 'Ekɨ meta 'aniwema 'ukitsi 'ukari 'aitsika nekaniwayetuirieni yuheyemekɨ 'amɨtiteriwe.
NUM 18:12 »Matɨari timiemete memɨte'atɨwa Yawé hetsiemieme, nekamaniyetuirieka hatseiti 'aixɨa mɨ'ane, winu mɨhekwa meta hatsite.
NUM 18:13 Mɨkɨ kwie matɨari mɨtiutixuaweriyatsiemieme mɨkɨ mekateni'atɨakuni, neta nekameniyetuiriemɨkɨ. Kemɨ'ane tewi mɨ'itiya mitikwani kaniyɨweni.
NUM 18:14 »Naitɨ 'ixaheritsixi Yawé naimekɨ memɨteyetuiriwa 'apiinite katinayeimɨkɨ.
NUM 18:15 Yunaitɨ matɨari nuiwakate Yawé hetsiemieme memɨyetuiwa 'ahetsiemieme katinayeimɨkɨ, tsepa tewi yatɨni tewaxi. Peru pekanitawikweitsitɨamɨkɨ matɨari nuiwakame tewi yatɨni tewa 'axɨa mɨka'ane.
NUM 18:16 Pekanitawikwetsitɨamɨkɨ kepauka matɨari mieme xeimetseri mexeiyani. Mɨtawikweitsitɨarienikɨ katinaye'akamɨkɨ 'aɨxɨwime pɨrata tuminiyari, kemɨti'inɨata tuki, tamamata heimana xewi kɨramuyari raheteme.
NUM 18:17 »Peru pepɨka'itawikweitsitɨani matɨari mieme tuuru, muxa nu'aya, tsipu nu'aya, mɨkɨ 'aixɨa memɨpatsiekɨ. Xuriyaya mawari taiyametsie pekanitayeurimɨkɨ, wiyarieya pekanitataiyamɨkɨ, 'aixɨa mu'ɨa Yawé hetsiemieme mayanikɨ.
NUM 18:18 Waiyarieya 'ahetsiemieme kanayeimɨkɨ, yaxeikɨata tawieya mawariyari teikɨ hetserarietɨ muyuitɨariwa meta teurieya tserietana mieme.
NUM 18:19 Ne Yawé nekametiniyetuirieka naime mɨtipatsietɨka 'ixaheritsixi memɨneteyetuirie. Katini'ahetsiemiemetɨni meta 'aniwema 'ukitsi 'ukari, 'aitsika hepaɨ. 'Ikɨ tɨratu 'aixɨa mɨ'ane kanihɨkɨtɨni, mutseyumarie nehɨxie 'unakɨ. Tɨratu nekaniwewieka 'ahamatɨa meta 'anuiwarima wahamatɨa».
NUM 18:20 Yawé 'Aruni mɨpaɨ katiniutahɨawe: «'Ekɨ kwietsie tixaɨtɨ pepɨkatipitɨarieni, kwie pepɨkaxatɨarieni 'ixaheritsixi watsata, ne nemɨ'ahetsiemiemekɨ, ne tita pemɨtimikieni nekanihɨkɨtɨni.
NUM 18:21 »Rewitsixi nekaniwayetuirieka 'ixuriki tukiyarita memɨte'uximayakɨ, 'ixaheritsixi memɨteyetuaya tamamatatsie mieme xeime.
NUM 18:22 'Ixaheritsixi xɨka 'axamete'uyurieni 'ixuriki tukiyari hɨxie 'ahurawa me'ɨkɨneme mekanikwikuni.
NUM 18:23 'Ayumieme rewitsixi xeikɨa 'ixuriki tukiyarita te'uximayatamete mekanihɨkɨtɨkakuni 'ixaheritsixi wahetsiemieme. Hutarieka 'ikɨ 'aitsika kanihɨkɨtɨni 'umemahu wahetsiemieme: Rewitsixi tixaɨtɨ mekapɨteyetuiriyarieni,
NUM 18:24 ne nemɨtiwayetuirikɨ tamamatatsie mieme 'ixaheritsixi memɨteyetuaya Yawé hetsiemieme xeime. 'Ayumieme mɨpaɨ nekanaineni tixaɨtɨ memɨkateyetuiriyarienikɨ 'ixaheritsixi memɨteyetuiriyarienitsie».
NUM 18:25 Yawé Muitsexi mɨpaɨ katiniuta'aitɨani
NUM 18:26 Mɨpaɨ mɨtiwatahɨawekɨ Rewitsixi: «Kepauka xemɨte'anupineni tamamatatsie mieme xeime 'ixaheritsixi memɨteyetuaya, manata xepɨte'anakapini tamamatatsie timieme xeime xemɨneteyetuirienikɨ.
NUM 18:27 Xeme xemɨneteyetuirieni tɨriku meripaitɨ mieme hepaɨ nekatinimaimɨkɨ, yatɨni kaxie winuyari witsi'anetɨ mayeika.
NUM 18:28 Mɨpaɨ xekateniyuriekakuni nehetsiemieme xekatenanakapinekuni, xemɨteyetuayanikɨ yuhetsiemieme, 'ixaheritsixi memiyetuaya tamamatatsie timieme, mɨkɨ 'Aruni mawari wewiwame xekateniyetuiriwakuni.
NUM 18:29 Titakɨ xemɨte'anayexeiyarieni, nehetsiemieme xekateniti'utakuni xemiyetuayanikɨ. 'Aixɨa ti'aneneme tipatsiekame xekaneteniyetuiriwakuni.
NUM 18:30 »Kepauka 'aixɨa ti'aneme xemɨnetexatɨani, mɨkɨ mɨpaɨ pɨtimatsiɨkɨni winu hepaɨ yatɨni 'imɨari hepaɨ.
NUM 18:31 Tita mɨtiyuhayewa, mɨkɨ xeme meta xeniwema yunaitɨ tsepa naitsarie xemitikwai pɨyɨweni. Mɨpaɨ xekatenipitɨariekakuni 'ixuriki tukiyari muyepatsieta xemɨte'uximayakɨ.
NUM 18:32 Xenetsiyetuiriemeri tamamatatsie mɨranukapiwa, mɨtiyuhayewari pɨkatimaiweni tsepa xemɨtekwa'a. »Xepɨkatetsewiximaka mɨtipatsietɨka 'ixaheritsixi wamawari, xɨka mɨpaɨ xeteyurieka xekanikwikuni».
NUM 19:1 Yawé Muitsexi, 'Aruni mame mɨpaɨ katiniwarutahɨawe:
NUM 19:2 «'Ikɨta 'aitɨarika 'inɨari niukiyaritsie kanimiemetɨni ne Yawé nemiyetua: 'Ixaheritsixi wakaxi mekani'atɨakuni heuxetame, 'aixɨa 'aneme katikuyeme, katakwietsanaweme xekaniyetuiriekuni.
NUM 19:3 Mawari wewiwame 'Eriyatsaxi xekaniyetuiriekuni, mɨkɨ katinita'aitamɨkɨ mematitei takwayaritsie wakaxi manuyehanienikɨ, hɨxiena kananutixitekiemɨkɨ.
NUM 19:4 Hikɨ mawari wewiwame xuriyatsie kameme, 'atahutamexɨa 'ixuriki tukiyaritsie katineu'ɨyamɨkɨ.
NUM 19:5 Metatsiere wakaxi hɨxiena mɨtataiyarienikɨ katinita'aitamɨkɨ. Nawiyarieya meta waiyarieya, xuriyaya metatsiere kwitaya kanititaiyariemɨkɨ.
NUM 19:6 Hikɨ mawari wewiwame kariuxa xawari kanitihurimɨkɨ meta 'itsupu xawari, metatsiere tuwaxa mɨxetakɨ, mɨkɨ taipa katineuwiwimɨkɨ hakewa wakaxi metaiyarie.
NUM 19:7 'Imatɨrieka mawari wewiwame yupiinite katiniti'ekwamɨkɨ meta kaniti'ɨwamɨkɨ. 'Anake kaninuamɨkɨ mematiteitsie, peru 'akuxi ka'itiyatɨ kaniyuhayewamɨkɨ kepaukake mɨkɨyɨretsie.
NUM 19:8 Metatsiere kemɨ'ane wakaxi mutataiyaxɨ kaniyuti'ekwamɨkɨ kaniti'ɨwamɨkɨ, ka'itiyatɨ 'akuxi kaniyuhayewakamɨkɨ kepaukake mɨkɨyɨretsieke.
NUM 19:9 »Xewitɨ tewi 'itiyatɨ wakaxi naxiyari kanikutuimɨkɨ, 'ateewa paitɨ kanenutuimɨkɨ. Muwa kaneikayemɨkɨ naxi 'ixaheritsixi 'itiya mawariyari mematiwewiwatsie meta haa 'aixɨa mɨ'ane mekaninɨitɨakuni.
NUM 19:10 Kemɨ'ane wakaxi naxiyari mukutuni, mɨkɨta kaniyuti'ekwamɨkɨ ka'itiyatɨ 'akuxi kaniyuhayewamɨkɨ kepauka mɨkɨyɨretsieke 'itiyatɨ kanayeimɨkɨ. 'Ikɨ 'aitsika yuheyemekɨ pɨhɨkɨtɨnɨ 'ixaheritsixi wahetsiemieme meta 'ateewatari wahamatɨa memɨtitei.
NUM 19:11 »Kemɨ'ane xeime tewi mɨkime mɨmayɨani, mɨkɨ ka'itiyatɨ kanayeimɨkɨ 'atahuta tukari.
NUM 19:12 'Aixɨa puyuyurieni, hairieka tukari 'anukamiekaku meta 'atahutarieka tukaritsie haa 'aixɨa mɨ'anekɨ kaniyu'itimɨkɨ, mɨpaɨ 'itiyatɨ kanayeimɨkɨ xɨka mɨpaɨ katiuyurieni pɨka'itiyani.
NUM 19:13 »Kemɨ'ane mɨki 'umayɨame 'aixɨa mɨkayuyurieni, Yawé tukieya kaninanaimaka. Mɨkɨ tewi kanikumaweriyariemɨkɨ 'ixaheritsixi watsata 'axa'anetɨ muyuhayewaxɨkɨ 'aixɨa mɨkayuyurikɨ haa 'aixɨa mɨtiyuyuruwakɨ.
NUM 19:14 »'Ikɨ 'aitsika kanihɨkɨtɨni kepauka kemɨ'ane 'ixuriki xamaruyaritɨa mɨmɨni: Yunaitɨ kemɨ'ane muwa memeutahaxɨani, yunaitɨ kemɨ'ane muwa memayeteni, 'axamekani'itɨariekakuni 'atahuta tukari.
NUM 19:15 Xɨka xarite 'aixɨa kareukunatɨkani naitɨ mɨkɨtsiere ka'itiyatɨ kaniyuhayewamɨkɨ.
NUM 19:16 »Kemɨ'ane mɨki memayɨani yeuta 'uyeikatɨ 'umierieku, yatɨni yɨkɨmana 'umɨku, yatɨni 'umeyari 'umayɨani, yatɨni mɨki teukiya, 'atahuta tukari ka'itiyatɨ kanayeimɨkɨ.
NUM 19:17 »Xeime tewi 'aixɨa muyurienikɨ 'axamɨ'itɨarie, xarita naxi kaniukawiwiemɨkɨ 'itiya mawariyari hetsie, meta haa haixatamieme kaniukatuariemɨkɨ.
NUM 19:18 'Anatari xewitɨ 'aixɨa 'anetɨ 'itsupu kanitihawiyamɨkɨ, xamaruya kanita'ɨyamɨkɨ naime piiniteya meta hamatɨana memɨtitei. Metatsiere kanita'ɨyariemɨkɨ kemɨ'ane 'umete mekumayɨa, yatɨni mɨki teukiya, yatɨni xewitɨ hemierieku, yatɨni yɨkɨmana 'umɨku.
NUM 19:19 Tewi mɨ'itiya kaniti'ɨyamɨkɨ hairieka tukaritsie meta 'atahutarieka tukaritsie. 'Atahutarieka tukaritsie tewi mɨka'itiya 'itiyakame kanayeitɨamɨkɨ, mɨkɨ kaniyuti'ekwamɨkɨ kaniti'ɨwamɨkɨ. Mɨpaɨ mɨkɨyɨretsie 'aixɨa 'anetɨ kanayeimɨkɨ.
NUM 19:20 Xɨka tewi mɨka'itiya ka'uyu'itieni, kanakumaweriyariemɨkɨ 'ixaheritsixi watsata Yawé tukieya ka'itiyakame mayeitɨakɨ. Mɨkɨ tewi pɨka'itiyaka haa 'aixɨa mɨtiyuyuruwakɨ mɨka'uyu'itikɨ.
NUM 19:21 'Ikɨ 'aitsika yuheyemekɨ pɨhɨkɨtɨni 'ixaheritsixi wahetsiemieme. »Kemɨ'ane haa mɨmayɨani mɨkɨta kaniyuti'ekwamɨkɨ, kemɨ'aneta haa mumayuani 'aixɨa tiyuyuruwame mɨkɨta 'axakani'itɨariemɨkɨ kepaukake mɨkɨyɨre 'anake 'aixɨa kaniyɨmɨkɨ.
NUM 19:22 Tewi mɨka'itiya tita mɨtimayɨani mɨkɨta kati'itiyatɨ katinayeimɨkɨ, kemɨ'aneta mɨkɨ mɨmayɨani ka'itiyatɨ kanayeimɨkɨ».
NUM 20:1 Yunaitɨ 'ixaheritsixi makumawetsie Tsini mekaniu'axɨani mexɨakame metseriyaritsie, Karetsi rakutewakaku mekanitiyaxe. Mana Miriyami mamɨtsie meta mana kaniukateukieni.
NUM 20:2 Mana haa waɨkawa mumawekaikɨ, 'ixaheritsixi mekaniutiniukixietɨkɨne Muitsexi hepaɨtsita meta 'Aruni,
NUM 20:3 Muitsexi mɨpaɨ mekateniutatieni: «Yawé kuta ta'iwama wahamatɨa temekwinikɨ mɨtanepitɨakaitɨni.
NUM 20:4 ¿Tamɨ tame Yawé tekateteɨterimama? ¿Titayari 'ena makumawetsie petareyewitɨ temɨkwinikɨ tatewama wahamatɨa?
NUM 20:5 ¿Titayari 'Ekipitu petarayewitɨ 'ena 'axa'anekɨa petati'atɨa? 'Ena kaniumaweni 'imɨari, piní, kaxie, 'ikwaxi mayehatsiyatɨka, matsi 'akuxi haa tiumawe».
NUM 20:6 Muitsexi meta 'Aruni mewaruhayewaka mekanekɨne 'ixuriki tukiyari hɨxie, mana mekaniutihɨxima'uni. Hikɨ Yawé xawatɨriyaya kaniyuhekɨata wahɨxie,
NUM 20:7 Yawé Muitsexi mɨpaɨ katiniutahɨawe:
NUM 20:8 «'A'itsɨ keneutikwe'i teɨteri keniwarukuxeɨrieka. Mɨkɨ wahɨxie 'ekɨ meta 'Aruni, 'ai mɨpaɨ xekatenitahɨawikuni haa kehanetɨani. Mɨpaɨ xeteyurieyu haa kananemɨkɨ teɨteri meta tewaxi xekaniwatiharitɨakuni».
NUM 20:9 Yawé kemainekai mɨpaɨ Muitsexi katiniuyurieni, 'itsɨ kaniutikweni Yawé hɨxie mutiwekai.
NUM 20:10 Hikɨ Muitsexi, 'Aruni hamatɨa teɨteri mekaniwarukuxeɨrieni 'ai hɨxie, Muitsexi mɨpaɨ kaniutayɨni: «Xekeneu'enana, 'axaxemɨte'u'iyari. ¿Kamɨtsɨ teteyɨwawe 'ikɨ 'aitsie haa temanetɨani?»
NUM 20:11 Mɨpaɨ 'utayɨka yu'itsɨkɨ 'ai hutakɨa kaniuwani, hikɨ haa kananeni waɨkawa, mana teɨteri meta watewama mekaniutihareni.
NUM 20:12 Yawé, Muitsexi 'Aruni mame mɨpaɨ katiniwarutahɨawe: «Nehetsie yuri xemɨkate'eriekɨ, kenemɨtipatsie xemɨka'imatekɨ 'ixaheritsixi wahɨxie, xeme xepɨkahɨkɨtɨni xemɨwaranuwitɨni hakewa kwie nemɨxehexatɨa».
NUM 20:13 Mɨkɨ haa mɨpaɨ katinimatiwani, haa manakaxɨrɨwe Meriwa, mana 'ixaheritsixi Yawé memutatikɨ, mana kemɨtipatsie muyuhekɨataxɨkɨ.
NUM 20:14 Karetsi 'ukaitɨ Muitsexi kaniwarenɨ'ani texaxatamete ti'aitame 'Erumi kiekame hetsɨa, mɨpaɨ tiwarahɨawetɨ: «Mɨpaɨ 'a'iwa 'Ixaheri kanaineni: “'Ekɨ pepɨtimate kehepaɨ temɨte'uka'eniwa.
NUM 20:15 Pepɨrakumate tatutsima 'Ekipitu memekɨ, hakewa mɨixa wiyari teme'uwakai, metatsiere pepɨtimate 'Ekipitu kiekatari kememɨtate'u'uximatɨakai tame meta tapaapama.
NUM 20:16 Metatsiere pepɨtimate Yawé ketemɨte'utawawiri tatsi'u'enieka, yuniuki tuayame kataneyenɨ'airieni 'Ekipitu mɨtatsi'ayewitɨ. »”'Enari tekaniuhuni Karetsi, hakewa 'akwie meka'atɨka.
NUM 20:17 Mɨpaɨ tematewawirie pemɨtatsipitɨanikɨ 'akwietsie temuyekɨnekɨ. Yurikɨ mɨpaɨ nepaine nixeime 'a'etsaripa mana tepɨkaheuyekɨne meta xeime putsuta tepɨkahetihareni. Huyeta xeikɨa tepɨyehu 'amatayewa 'utɨma, hawaikɨ tekaheukuyuyuipiketɨ kepaukake temanuyekɨne”».
NUM 20:18 Hikɨ ti'aitame 'Erumi kiekame mɨpaɨ katineinɨ'airieni: «Hakewa nemɨre'aita 'etsiwatɨma mana xepɨka'uyekɨkani, xɨka mɨpaɨ xeheyɨni, ne nekanayeyeimɨkɨ nekuyaxima newarawitɨtɨ muwa tekanixehetaxeiyakuni».
NUM 20:19 'Ixaheritsixi tawarita mɨpaɨ mekaniutiyuani: «Huye 'amatayewa 'utɨma xeikɨa tepɨyehu, xɨka tatewama yatɨni tame hawaikɨ 'aputsuta tehetihareni tepɨte'ayukatuani. Tame tematsiwawirie xeikɨa mana temuyekɨnekɨ».
NUM 20:20 'Erumi kwieyaritsie ti'aitame haxɨama mɨpaɨ kaniutayɨni: «'Ena xeme xepɨka'uyekɨne». Hikɨ kanayeyani kuyaxi waɨkawa memɨyɨwawe warawɨtɨtɨ,
NUM 20:21 kawapitɨanike kwieyatsie memuyekɨnekɨ. Hikɨ 'ixaheritsixi xaɨtsie pɨta mekaneukanɨ'arieni yamekateha'eriwatɨ.
NUM 20:22 Hikɨ yunaitɨ 'ixaheritsixi Karetsi mekanayekɨne Huxi hɨriyaritsie mekaniu'axɨani,
NUM 20:23 'Erumi kwieya mata'atɨkatsie. Mana Yawé Muitsexi meta 'Aruni mame mɨpaɨ katiniwarutahɨawe:
NUM 20:24 «'Aruni 'apɨka'uyeikani 'ena kwiepa 'ari kanimɨmɨkɨ, kwie hakewa 'ixaheritsixi nemɨwarexatɨa mana pɨkaheutahani, xeme xeyuhutatɨ xemɨkanetsi'anu'enikɨ kenemɨxerahɨawekai haa Meriwa maneikakaitsie.
NUM 20:25 Hikɨ 'Aruni meta nu'aya 'Eriyatsaxi keniwaranuwitɨki Huxi hɨriyaritsie.
NUM 20:26 Mana 'Aruni pekanetikemaripiemɨkɨ mawari wewiwame kamixateya mɨranakatɨkɨ, nu'aya 'Eriyatsaxi pekatinanakatɨtɨamɨkɨ, manari 'Aruni kanimɨmɨkɨ».
NUM 20:27 Muitsexi yakatiniuyurieni Yawé kemɨrehɨawekai. Yunaime teɨteri wahɨxie, yuhaikatɨ Huxi hɨriyaritsie mekanitiyune.
NUM 20:28 Hikɨ Muitsexi, 'Aruni mawari wewiwame kamixateyari kanenutihɨnirieni, 'Eriyatsaxi pɨta kananakatɨtɨani. Mana hɨritsie 'Aruni kaniɨmɨni. Hikɨ Muitsexi 'Eriyatsaxi hamatɨa hɨritsie mekananakakɨne.
NUM 20:29 Kepauka yunaitɨ memɨtehetima kename 'Aruni hemɨkai, xeitewiyari heimana tamamata tukari mekanitsuariwiyatɨwekaitɨni.
NUM 21:1 Kepauka kananeu tewiyari mɨti'aitametɨkai 'Arari kiekariyaritsie, Nekexi 'ukaitɨ, katinetimani kename 'ixaheritsixi Hatarimi huyeyari 'utɨa mehahu, kaniwarutakwini hipameta kaniwarutiwiya.
NUM 21:2 Hikɨ 'ixaheritsixi mɨpaɨ mekaniutiyuani Yawé hetsiemieme: «Xɨka 'ekɨ teme'iwa yapehaineni mɨtatsi'aye'unie, naime wakiekari tekanika'unakuni».
NUM 21:3 Yawé kaniwaru'enieni 'ixaheritsixi kememɨte'iwawiriekai, kaniwarupitɨani kananeutsixi memɨwara'iwakɨ, yunaime teɨteri mekaniwarukwini meta wakiekarite mekaniuka'una. 'Ayumieme mana Kuxima katiniuterɨwarieni.
NUM 21:4 'Ixaheritsixi mekanayekɨne Huxi hɨriyaritsie Haramara Mɨxeta hepatsie me'eerietɨ, 'Erumi kwieyari warita me'ahutɨ. Huyeta me'uhutɨ mepɨkate'unenewi
NUM 21:5 mekaniutiniukixietɨkɨne Kakaɨyari hepaɨtsita meta Muitsexi: —¿Titayari kuta 'Ekipitu xetatehayewitɨ makumawetsie temɨkwinikɨ? 'Ena 'ikwai haa kaniumaweni. 'Ariri ta'iyaritsie katineuyemieni 'ikɨ 'ikwai kwaiyarikɨ.
NUM 21:6 'Ayumieme Yawé kuuterixi memɨmɨya kaniwareyenɨ'airieni memɨwatikenikɨ, 'ana yumɨiretɨ 'ixaheritsixi mekaniukwini.
NUM 21:7 'Ixaheritsixi Muitsexi 'aurie me'ukɨneka mɨpaɨ mekatenitahɨawe: —Yawé hepaɨtsita te'uniukixieka 'axatepɨte'uyuri meta 'ahepaɨtsita. Yawé keneutawawiri kuuterixi mɨwakumaweriyakɨ. Muitsexi wahetsie 'utanuaku,
NUM 21:8 Yawé mɨpaɨ katinitahɨawe: —Kuu 'ɨkiyari keneutawewieka, kɨyetsie 'ateewa keneuyeteka. Kemɨ'ane mekukeiwatɨ kwimemixeiya mekanitawikweikuni.
NUM 21:9 Muitsexi kuu 'ɨkiyari purunitsekɨ 'utawewieka kɨyetsie 'ateewa kaniyeteni. Kemɨ'ane me'utikeiyaka kuu kwi memukuxexeiyakai meputawikweitsitɨariwakai.
NUM 21:10 Hikɨ 'ixaheritsixi mekaniyekɨne 'Uwuti rakutewakaku mekanitiyaxe.
NUM 21:11 Manata 'Uwuti memɨyekɨ 'Iye-'Awarini rakutewakaku mekanitiyaxe makumawetsie, Muhawi 'aurie tau makayuyuipike hepatsie.
NUM 21:12 Manata memɨyekɨ mayeweritsie Tsereri mekanitiyaxe.
NUM 21:13 Manata memɨyekɨ haa 'Axinuni 'anutaɨye mekanitiyaxe, makumawetsie 'amuxeutsixi wakwietsie muyehane. Haa 'Axinuni manuyehane kani'inɨaritɨni muhawitsixi wakwie meta 'amuxeutsixi kwieyari manuye'atɨkatsie.
NUM 21:14 'Ayumieme puyuterɨwanɨa Yawé kemɨtiyutami xapayaritsie: «Haramara Mɨxeta hepatsie, mayeweweritsie meta haa 'Axinuni.
NUM 21:15 Mayeweweri mukɨatsie 'akaniyeuka 'Axi meta Muhawi kwieyari manuye'atɨkatsie».
NUM 21:16 Manata memɨyekɨ Wehexi paitɨ, putsu matinieretsie Yawé hakewa Muitsexi mɨpaɨ mɨtiutahɨawixɨ: «Yunaime teɨteri keniwarukuxeɨri ne nekaniwaharitɨamɨkɨ».
NUM 21:17 'Ana yameteyurietɨ 'ixaheritsixi mɨpaɨ mekateniukwika: «Haa kehewatineni. Putsu ke'utakwika.
NUM 21:18 Mɨkɨ putsu, te'aitamete yu'itsɨkɨ mepɨwati'inixɨ mariwemekɨ memɨteyurie yu'itsɨkɨ memeiyepikɨ». Makumawetsie memɨyekɨ Matana mekanekɨne,
NUM 21:19 Manata memɨyekɨ Nakarieri mekaniu'axɨani, Nakarieri memɨyekɨ Wamuti mekaniu'axɨani,
NUM 21:20 Wamuti memɨyekɨ Muhawi kwieyaritsie mayeweri mekaniu'axɨani, Pitsikaha hɨriyari manukatsie, Ketsimuni mautahekɨatsie makumawe.
NUM 21:21 'Ixaheritsixi mekaniwarenɨ'ani texaxatamete Tsikuni hetsɨa, 'amuxeutsixi tiwa'aitɨwame, mɨpaɨ metehehɨawetɨ:
NUM 21:22 «Tepɨmatsiwawirie pemɨra'aitatsie temuyekɨnekɨ. Yurikɨ mɨpaɨ tepaitɨka hawaikɨ mɨra'etsietsie tepɨkaheuyekɨne meta putsuta tepɨkahetihareni. Huye 'amatayewa 'utɨa xeikɨa tepuyekɨne, kepaukake temanuyekɨne 'akwieyaritsie».
NUM 21:23 Peru Tsikuni pɨkawarupitɨa hakewa mɨra'aita 'ixaheritsixi memuyekɨnekekai. Matsi pɨta yukuyaxima kaniwarukuxeɨrieni watakwinike makumawetsie. Kepauka Yahatsa mɨye'a mekaniwarutiwiya.
NUM 21:24 Matsi 'ixaheritsixi mekaniwara'iwa wakwie mekaniwarunawairieni, haa 'Axinuni manuyekatsie ye'atɨkaime haa Kawuki manuye'axetsie ye'atɨkaime, 'amunitsixi wakwie mananiere, kwie 'aixɨa mɨrekukurarutɨiyarietsie paitɨ.
NUM 21:25 'Ixaheritsixi 'amuxeutsixi wakiekaritetsie mekaniye'axɨani, mana wakiekaritsie mekaniyukuhayeikawakaitɨni, metatsiere kiekari Hetsiwuni meta kiekarite 'auriena mamanetɨkateitsie.
NUM 21:26 Kiekari Hetsiwuni, Tsikuni kiekarieya 'amɨyewa kanihɨkɨtɨkaitɨni, 'amuxeutsixi tiwa'aitɨwame, meripaitɨ ti'aitame Muhawi kiekame mutamiekai, kwieya minawairiekai haa 'Axinuni manuyekatsie paitɨ ye'atɨkaime.
NUM 21:27 'Ayumieme niuki wewiwamete mɨpaɨ mekaniutiyuaneni: «Ketsuwuni kiekariyaritsie xekenahu, Tsikuni kiekarieyatsie. 'Aixɨa xekeneuyuri. 'Aixɨa xekeneukuyuriexɨa.
NUM 21:28 Hetsiwuni kiekariyaritsie tai kanatineni, Tsikuni kiekarieyatsie nerɨkwari kanatinexɨani. Muhawi kiekariteya naime kaniutixɨtsitɨani 'Axinuni hatɨayari hɨriyari manuye'atɨka.
NUM 21:29 Muhawi 'ahetsiemieme xɨa'ui nepaine. Pekani'uniniri, Kemuxi kiekarieya. 'Akakaɨyari 'aniwema kaniwareutaweiyaxɨani 'aniwema 'ukari Tsikuni paitɨ mɨwaranuhapanikɨ, 'amuxeutsixi tiwa'aitɨwame wahetsɨa.
NUM 21:30 »Yunaime tekanixe'uka'una, Hetsiwuni ye'atɨkaime meta Riwuni paitɨ ye'akame. Yunaime Nupa paitɨ tekanixe'uxɨrietɨkɨne, tekanixe'uka'una Merewa paitɨ xeye'atɨkaime».
NUM 21:31 Mɨpaɨ mekateniuyaxe 'ixaheritsixi 'amuxeutsixi wakwieyaritsie.
NUM 21:32 Muitsexi katiniuta'aita kwie Katsexi memuxeiyayukɨ, 'ixaheritsixi kiekari mamanetɨka mekaniwarutakwini, 'amuxeutsixi mekaniwarutaweiya mana memɨkiekai.
NUM 21:33 Me'akunuaxɨaka, Watsani huyeyari mekaniuwiya. Mana ti'aitame 'Uhuki, Watsani kiekame kaniwaranukunake yukuyaxima warawitɨtɨ watakwinike 'Erurehi mɨrakutewatsie.
NUM 21:34 Hikɨ Yawé Muitsexi mɨpaɨ katiniutahɨawe: «Pepɨkawamakaka, 'Uhuki nekanixeyetuiriemɨkɨ kuyaximama, meta kwieya naime. Tsikuni kepemeyuri 'amuxeutsixi tiwa'aitɨwame Hetsiwuni kiekame mɨpaɨta pekatiniyurimɨkɨ».
NUM 21:35 Mɨpaɨ mekatenimieni 'ixaheritsixi 'Uhuki ti'aitame meta niwemama, kuyaximama, nixeime mepɨka'uhayewaxɨ 'ayeniereme, mɨpaɨ kwie mekatena'iwa.
NUM 22:1 'Ixaheritsixi tawarita mekaniyekɨne, mayeweritsie Muhawi mekaniuyuhayewa, Kurutani 'anutaɨye, Keriku hɨxie.
NUM 22:2 Kepauka Waraki Tsipuxi nu'aya mɨretima 'ixaheritsixi 'amuxeutsixi kememɨwaruyuriekai,
NUM 22:3 muhawitsixi 'ixaheritsixi mekaniwarutimakani. Kwinie yemekɨ mekatenimamakaitɨni kwinimieme memɨyupaɨmekaikɨ.
NUM 22:4 Hikɨ muhawitsixi 'ukirawetsixi Mariyani kiekatari mɨpaɨ mekateniwarutahɨawe: «'Ikɨ mɨya memɨyupaɨme ta'aurie mɨrahane naime mekatenixɨkuni, wakaxi 'ɨxa kemɨrakumaweriya hepaɨ». 'Ana mana Waraki tsipuxi nu'aya katini'aitametɨkaitɨni Muhawi kwieyaritsie,
NUM 22:5 'ayumieme Warami katiniutanɨ'airieni Wehuxi nu'aya, Petuxi paitɨ mukatei, 'Eupɨrata hatetsitayaritsie, 'amawitsixi wakwieyaritsie. Waraki mɨpaɨ mekateneinɨ'airieni: «Hipatɨ teɨteri mepu'axɨa 'Ekipitu mehanexɨaka, hikɨ naime kwie mepukunama, hikɨta ne'aurie mekaniu'axɨani.
NUM 22:6 Waɨkawa nemetsiwawirie pemamiekɨ 'ikɨ 'axapemɨwayurienikɨ nehetsiemieme, waɨkawa pemɨtɨrɨkaɨyekɨ. Mɨpaɨke newara'iwake nepɨne'erie 'ateewapai newaranunɨ'ame. Ne mɨpaɨ nepɨtimate kemɨ'ane 'aixɨa pemuyurieni 'aixɨa'itɨarietɨ payeika, kemɨ'aneta 'axapemuyurieni 'axa'itɨarietɨ payeika».
NUM 22:7 Hikɨ 'ukirawetsixi Muhawi meta Mariyani kiekatari Warami mekatenekuxatɨani Waraki kemainekai, mekaniu'axɨani tumini me'a'ɨtɨ mete'ipitɨanike xɨka ya'utayɨnike 'ixaheritsixi 'axamɨwayurienikɨ.
NUM 22:8 Warami kaniwaruta'inieni mana memɨtihenikɨ, mɨpaɨ tiwarahɨawetɨ kename 'uxa'ariekake tiwataxatɨanikekai Yawé kemɨtitahɨawekekai. Hikɨ 'itsɨkate mana mekanitiheteitɨni.
NUM 22:9 Kakaɨyari Warami hetsɨa kaniuyuhekɨata mɨpaɨ katinitahɨawe: —¿Kemɨ'ane mepɨyɨa mɨkɨ teɨteri 'akie memɨtihe?
NUM 22:10 Warami mɨpaɨ kaniutayɨni: —Texaxatamete mekaniyɨaka Waraki Tsipuxi nu'aya mɨwareyenɨ'a, ti'aitame Muhawi kwieyaritsie. Kaniwareyenɨ'ani memɨnetetaxatɨanikɨ:
NUM 22:11 “Teɨteri 'Ekipitu kiekatari kwie hikɨ 'ena naime mekanikunaka. Kenamieka 'axakeniwaruyuri nehetsiemieme. Mɨpaɨke xɨari nepɨyɨwe newakwinetɨ nemɨwarutaweiya nekwietsie”.
NUM 22:12 Kakaɨyari Warami mɨpaɨ katiniutahɨawe: —Pepɨkayemie wahamatɨa meta pepɨkawakewaiyaneni 'ixaheritsixi, kiekari 'aixɨa memu'itɨarie mekanihɨkɨtɨni.
NUM 22:13 'Uxa'arieka Warami 'anukukeka 'itsɨkate mɨpaɨ katiniwarutahɨawe Waraki mɨwareyenɨ'a: «Xekenakunuaxɨa yukie, Yawé pɨka'inake xehamatɨa nemeumienikɨ».
NUM 22:14 Memanuyetei muhawitsixi mekanakunuaxɨani hakewa Waraki mekatei, mɨpaɨ mekatenitahɨawe: «Warami pɨkaheyuwaɨri tahamatɨa mamiekɨ».
NUM 22:15 Waraki tawarita kaniwarenɨ'ani 'itsɨkate matsi meyuwaɨkawame, waɨkawa memauka'u,
NUM 22:16 meheta'axɨaka mɨpaɨ Warami mekateniutahɨawe: —Waraki Tsipuxi nu'aya mɨpaɨ kanetaineni: “Yemekɨ tixaɨtɨkɨ pepɨkarekununuwani pemɨnetsi haxeiyamiekɨ,
NUM 22:17 ne nekamatinipitɨamɨkɨ waɨkawa perexeiyatɨ pemayanikɨ, tsepa tita pemɨnetiutawawiri ne yanekatinikayeimɨkɨ. Waɨkawa nekamaniwawirieka pemamiekɨ 'ikɨ teɨteri 'axapemɨwayurienikɨ nehetsiemieme”.
NUM 22:18 Warami mɨpaɨ kaniutayɨni: —Tsepa Waraki yuparatsiyu mɨnetiyetuiri hurute meta pɨratate tihɨneme, ne 'atsinepɨkatiyurieni 'etsitipeme yatɨni timariweme, matsi Yawé nekakaɨyari kemɨti'aita yanepɨtiyurieneni.
NUM 22:19 Xemeta hikɨ tɨkarikɨ 'ena xekenetiheni, ne Yawé 'akuxi nepɨta'iwawiya kemɨnetitahɨawe.
NUM 22:20 Mɨkɨ tɨkarikɨ Kakaɨyari kaniyuhekɨata Warami hetsɨa: «Metsɨ 'ikɨ teɨteri mekameniku'inietɨweni, kenemietsɨ wahamatɨa, xeikɨatsɨ ne kenemerekɨhɨaweni yapekatinekamiemɨkɨ».
NUM 22:21 'Uxa'arieka ximeri Warami kananukukeni, yupuxu kaniutixiratɨani, hikɨ kaneyani 'itsɨkate muhawi kiekatari wahamatɨa.
NUM 22:22 Hikɨ wahamatɨa 'umiekaku Kakaɨyari kaniuyeha'ani, huyetana kaniutakeni Yawé niuki tuayameya, ka'ipitɨanike mana muyeyanikɨ. Warami 'anakaitɨ kaniumiekaitɨni yupuxutsie meta hamatɨana yuhutatɨ mekaniuhukaitɨni 'iparewiwamete.
NUM 22:23 Kepauka puxu Yawé niuki tuayameya muxei 'ixipara 'akwekame, huye kaniuku'eirieni xaɨtsie kaneukuyune. Hikɨ Warami kanikuwaxɨani huyeta mɨyemiekɨ.
NUM 22:24 Yawé niuki tuayameya hetsimanuyewatsie kaniukeni, kaxie haraweriyari makumanetsie, mɨkɨ tetexikɨ kanikurarutɨariekaitɨni naitsarie.
NUM 22:25 Kepauka puxu Yawé niuki tuayameya muxei, kwi hurawa tetsariyatsie kaniukuyani Warami yu'ɨkatsie katiniukwine. Hikɨ tawarita Warami kaniwani.
NUM 22:26 Yawé niuki tuayameya kananuyeyerɨni xaɨtsie paitɨ kaniukeni kwi manuyewatsie, hakewa mɨkaheyɨwe xaɨtsie meukuyune.
NUM 22:27 Kepauka puxu Yawé niuki tuayameya muxei, kaniukahuni Warami 'anakaiku. Hikɨ Warami kaniuyeha'ani kɨyekɨ yupuxu kaniukuwaxɨani.
NUM 22:28 Hikɨ Yawé puxu kaniupitɨani mɨtaniunikɨ, hikɨ mɨkɨ mɨpaɨ Warami katiniutahɨawe: —¿Kekuta ne nematsi'uyuri, titayari haikakɨa penetiukuwaxɨa?
NUM 22:29 Warami mɨpaɨ katinitahɨawe: —Penetsinanaimatɨ pepumie. Xɨka 'ixipara nehakwekake, nekameniumienikeri.
NUM 22:30 Puxu Warami mɨpaɨ katiniutahɨawe: —¿Netsɨ 'apuxu nepɨhɨkɨ nehetsie pemɨkuyerɨne, hɨkɨa mɨreukayunetsie? ¿Kepauka mɨpaɨ nematsiheyuri? Warami mɨpaɨ kaniutayɨni: —Nekatixaɨtsietɨ.
NUM 22:31 'Ana Yawé yuniuki tuayame kaniuhekɨata 'ixipara hakwekame Warami mixeiyakɨ. Warami kwiepa paitɨ kaniutihɨximakeni.
NUM 22:32 Yawé niuki tuayameya kanita'iwawiya: —¿Titayari haikakɨa 'apuxu petiukuwaxɨa? ¿Pekatimate ne nematsikunuitɨanike 'ena nemunuakɨ, nemixeiyakɨ kepemɨtimie 'aixɨa mɨka'anekɨ?
NUM 22:33 Kepauka puxu mɨnetsihexei, haikakɨa hukaniuyune. Xɨka mɨkɨ mɨpaɨ kaheyɨnike, 'ekɨri pekanimɨkinike, mɨkɨta rayenierenike.
NUM 22:34 Warami Yawé niuki tuayameya mɨpaɨ katiniutahɨawe: —'Axanepɨtiuyuri. Mɨpaɨ nepɨkaretima kename nehuye pe'anunarɨmakai. Kamɨtsɨ xɨka 'aixɨa kane'ane, nekanikunuamɨkɨ.
NUM 22:35 Niuki tuayame Yawé hetsɨa mieme mɨpaɨ katinitahɨawe: —Kenemie wahamatɨa, keni'akweriwayurieka, ne kenemarekuhɨaweni mɨpaɨ xeikɨa pekanetainemɨkɨ. Hikɨ Warami kaneyani Waraki mɨwareyenɨ'a wa'ukiyarima wahamatɨa.
NUM 22:36 Kepauka Waraki mɨretima kename Warami 'uhamiekai, kanayeyani 'enukunakeke xeime muhawi kiekariyaritsie kwie manu'axetsie haa manuyekatsie 'Axinuni.
NUM 22:37 Waraki Warami mɨpaɨ katiniutahɨawe: —¿Tamɨ ne nekamatiutanɨ'airi? ¿Titayari nehetsɨa pekatinua? ¿Nekamarakapitɨaweme peti'erie?
NUM 22:38 Warami mɨpaɨ Waraki katiniuta'eiya: —'Ari, 'ena nekaniuyeikani. Kepauka Kakaɨyari xeikɨa mɨpaɨ mɨnetikuhɨaweni yaneputaineni.
NUM 22:39 Mana memɨyekɨ Warami meta Waraki mekanekɨne, Kiriati-Kutsuti hepatsie.
NUM 22:40 Waraki wakaitsixi kaniwarutimawa meta muxatsi, mekaniwarutikwani Warami hamatɨa meta 'itsɨkate wahamatɨa memu'uwakai.
NUM 22:41 'Uxa'arieka Waraki Warami kanewitɨni Wamuti-Wahari hɨriyari 'amanutitewatsie, hakewa 'ixaheritsixi memetitekai 'etsiwa mɨwaxeiyakɨ.
NUM 23:1 Warami, Waraki mɨpaɨ katiniutahɨawe: «'Atahutame mawarite taiyame keneutiwewi meta 'atahutame tsikerutsixi meta 'atahutame muxatsi 'ukitsi».
NUM 23:2 Waraki yakatiniuyurieni Warami kemɨrehɨawekai, yunaitɨ mekanitimawa xeime tsikeru meta xeime muxa 'ukitɨme mawari taiyame xexuimetsie.
NUM 23:3 Hikɨ Warami, Waraki mɨpaɨ katiniutahɨawe: «'Ena keneuyuhayewa, 'amawari taiyariyari 'aurie, 'akuxi ne Yawé nepeta'iwawiya kemaineni. Yareutewitɨta nekametinitaxatɨamɨkɨ kemɨneretahɨawe». Hikɨ yemuri metsekametsie kaneutimiekaitɨni.
NUM 23:4 Kakaɨyari kanenukunake, Warami mɨpaɨ katiniutahɨawe: —'Atahutame mawari taiyame nekaniutiwewieni xexuimetsie xeime tsikeru xeime muxa 'uki nekaniutimawa.
NUM 23:5 Hikɨ Yawé Warami katiniutaxatɨani, mɨpaɨ katinitahɨawe: —Kenakunua Waraki hetsɨa kenemɨtayɨni mɨpaɨ ketinetahɨawi.
NUM 23:6 Warami kanakunuani Waraki kaniutaxeiya 'a'uweme yumawari taiyariyari 'aurie muhawitsixi tewa'aitɨwamete wahamatɨa.
NUM 23:7 Warami mɨpaɨ katinikuxatakaitɨni: «'Arami paitɨ, tau manatineika hɨri hepatsie, Waraki kaneneyewitɨni, ti'aitame Muhawi kiekame hetsɨa. Mɨpaɨ kanetiniutahɨawe: “Kenamieka, Kakuwu 'axakeneuyuri nehetsiemieme. Kenamieka, 'Ixaheri 'axakeneuyuri”.
NUM 23:8 ¿Titayari 'axanetiwayurieneni kemɨ'ane Kakaɨyari 'axamɨkawayurie? ¿Keneyɨme 'axanepɨwayurieni Yawé mɨpaɨ mɨkatiwara'eriya?
NUM 23:9 'Ai 'amanutitewitsie paitɨ nepuwataxeiya, hɨri 'ametitɨtɨtsie paitɨ nepɨwaxeiya: teɨteri memanayexeiyarie mepɨhɨkɨ, mepɨka'inɨatsie 'ena kwiepa miemete wahamatɨa.
NUM 23:10 ¿Kemɨ'ane pɨyɨwe Kakuwu nuiwarimama mɨwaruti'inɨata, tumuanari hepaɨ memuyupaɨme, yatɨni tsikere yayupaɨmeme mɨwaruti'inɨata 'Ixaheri nuiwarimama? 'Aixɨa mɨtiuka'iyari hepaɨ ne'anetɨ neke'umɨni. Wahepaɨ netiyurienetɨ neke'ukumawere».
NUM 23:11 Hikɨ Waraki, Warami mɨpaɨ katiniutahɨawe: —¿Kepenetsi'uyuri? Nekamani'atɨani 'axapemɨwayurienikɨ memɨnetsi'aye'unie wahetsiemieme, matsi pɨta 'aixɨa petiwayurie.
NUM 23:12 Hikɨ Warami mɨpaɨ katinita'eiya: —¿Kamɨtsɨ nekatiyɨwe Yawé kemɨnerahɨawe mɨpaɨ nemutayɨni?
NUM 23:13 Hikɨ Waraki mɨpaɨ katinitahɨawe: —Neuxei, hikɨmɨ xaɨtsie pɨta. Manata xeitapari xeikɨa pekaniwarexeiyamɨkɨ, yunaime hawaikɨ, mana hɨrixɨa 'axapekaniwareyurimɨkɨ.
NUM 23:14 Hikɨ mekanekɨne Tsupini hɨriyaritsie Pitsikaha mɨtitewatsie. Mana mawari taiyame 'atahutame kaniutiwewieni, xexuimetsie xeime tsikeru xeime muxa 'uki mekaniutimawa.
NUM 23:15 Mana Warami Waraki mɨpaɨ katiniutahɨawe: «'Ena keneuyuhayewa 'amawari taiyariyari 'aurie, 'akuxi ne Kakaɨyari hamatɨa nepɨretaxata».
NUM 23:16 Yawé Warami 'anukunakeka yuniuki kaniyetuirieni mɨpaɨ katinitahɨawe: «Waraki hetsɨa kenakunua, kenemɨtayɨni mɨpaɨ ketinetahɨawi».
NUM 23:17 Warami kaneyani hakewa Waraki mekatei, kanitaxeiya 'a'uwekame yumawari taiyariyari 'aurie meta muhawitsixi 'ukirawetsixi wahamatɨa. Waraki mɨpaɨ katinita'iwawiya: —¿Yawé kehetayɨ?
NUM 23:18 Hikɨ Warami katiniutaxata: «Kenanukukexi, Waraki, keneu'ena, Tsipuxi nu'aya, keneneu'eni.
NUM 23:19 Kakaɨyari mɨmɨwe pɨkahɨkɨ mɨkati'itawa meta mɨka'ikupata. Katinaye'atɨwani kemɨtayɨni yakatinikamieni.
NUM 23:20 Mɨpaɨ kanetinahɨaweni 'aixɨa nemɨwayurienenikɨ, xɨka Kakaɨyari mɨpaɨ tinakeni, ketsɨkuta tawarita netiyurieneni.
NUM 23:21 »Kakaɨyari Kakuwu pɨkaxeiya 'axatiyurieneme 'Ixaheri pɨkatiuyukananaima. Yawé wakakaɨyari wahamatɨa puyeika, wahamatɨa ti'aitame puyuxata.
NUM 23:22 Kakaɨyari 'Ekipitu kaniwarayewitɨni tuuru kemɨtitɨrɨkaɨye hepaɨ.
NUM 23:23 Kakuwu hetsɨa 'ikewari pumawe, meta 'Ixaheri hetsɨa 'awie memɨte'uyemate mepɨkaxuawe. Kakuwu meta 'Ixaheri wahepaɨtsita mɨpaɨ katinitaniukiemɨkɨ: “Xeketeneuxeiya Kakaɨyari 'aixɨa kemɨtiuyuri”.
NUM 23:24 'Ikɨ teɨteri, xeimieme mekanixatani maye 'uka hepaɨ, mɨkɨ maye 'uki mɨtikuwaɨne hepaɨ. Pɨkaka'uxipieni tita mɨtikuweiyane 'i'axemeke mɨwakwini waxuriya ha'iemeke».
NUM 23:25 Hikɨ Waraki, Warami mɨpaɨ katiniutahɨawe: —Xɨka 'axapekawayurimɨkɨ, kamɨtsɨ tsikere 'aixɨa pepɨkawayurieka.
NUM 23:26 Warami mɨpaɨ kaniutayɨni: —¿Ne tamɨ mɨpaɨ nekamerahɨawekai, kename ne Yawé kemɨnetitahɨawekekai yanetiyurienikekai?
NUM 23:27 Hikɨ Waraki, Warami mɨpaɨ katiniutahɨawe: —Hikɨmɨ neuxei, xaɨtsie pɨta nepɨmatsi'anuwitɨni. Heiwatɨ mana Kakaɨyari 'inakeni 'axapemɨwayurienikɨ.
NUM 23:28 Hikɨ Warami kanewitɨni Pehuxi hɨriyaritsie paitɨ, makumawetsie Ketsimuni mahekɨatsie.
NUM 23:29 Mana Warami mɨpaɨ katinitahɨawe: —'Ena keneneutiwewiri 'atahutame mawari taiyame meta keniwarukuha'aritɨa 'atahutame tsikerutsixi meta muxatsi 'ukitsi.
NUM 23:30 Waraki yakatiniuyurieni Warami kemɨrehɨawekai, mana kaniwarutimawa 'atahutame tsikerutsixi meta muxatsi 'ukitsi.
NUM 24:1 Hikɨ kepaukua Warami mɨpaɨ mɨretima Yawé minakekai 'Ixaheri 'aixɨa muyuriekakɨ, hikɨ pɨkawarukewaiyaxɨ, meripaitɨ hepaɨ, matsi tawarita makumawetsie kaneutaniere.
NUM 24:2 Kepauka Warami meutanierixɨ 'ixaheritsixi kaniwaruxeiya kememɨteheunuiwari mɨpaɨ meteheukuteme, hikɨ Yawé 'iyarieya hetsiena kaninuani,
NUM 24:3 hikɨ mɨpaɨ kaniutayɨni: «Warami niukieya Wehuxi nu'aya, tewi niukieya 'aixɨa mɨti'ane mɨtixeiya.
NUM 24:4 Niukieya mɨ'enie Kakaɨyari kaniniukieyatɨni, Naimekɨmɨtɨrɨkaɨye mɨtixeiya, mukakukutsutsie hepaɨ mɨtikuxaxatɨariwa.
NUM 24:5 »Kakuwu, 'axamarute witsipɨ'anene. 'Ixaheri, witsipɨtiyuxexeiya pemanukatsie.
NUM 24:6 'Aki muyehapane hepaɨ pɨtiyuxexeiya manuyunanake, tuturi hatetsita mɨ'iteɨritsie hepaɨ pɨtiyuxexeiya, 'aruhe 'iteɨriyari Yawé mika'iteɨtaxɨ hepaɨ, kariuxa hatetsita mɨti'u hepaɨ pɨ'anene.
NUM 24:7 Xariteya haa panakayeuriwe, 'imɨarieya puyutemawie haa waɨkawa mexeiyakɨ. Ti'aitame pɨmariwe 'Akaki reuyeta, mariwetɨ 'aitsikaya payuyeitɨwa.
NUM 24:8 »Kakaɨyari 'Ekipitu kaniwarayewitɨni tuuru tsimaruni mɨtitɨrɨkaɨye hepaɨ. 'Ixaheri nuiwarite memeye'unie kaniwatikwa'ani, wa'umete kanititarani, yu'ɨrɨkɨ kaniwatimɨmɨni.
NUM 24:9 Maye 'uki hepaɨ kanakatutsitani, maye 'ukaratsi hepaɨ 'akaniuhupuni: ¿kemɨ'ane ka'ukamatɨ piyehaxɨatɨawe? 'Aixɨa meke'itɨarieka 'aixɨa memɨmatsiyurie. 'Axameke'itɨarieka 'axamemɨmatsiyurie».
NUM 24:10 Hikɨ Waraki kaniuyeha'ani Warami hepaɨtsita, yumamatetsie heuyɨtɨminatɨ mɨpaɨ katinitahɨawe: —Nekametiniutanɨ'airieni 'axapemɨwayurienikɨ nemɨwaraye'unie, hikɨri hairieka matsi 'aixɨa petiwayurie pɨta.
NUM 24:11 Tsepa hikɨ kenemie 'akie. Ne mɨpaɨ nepɨmarahɨawekai kename nematipitɨanikekai, peru mɨkɨ Yawé pɨkamatiutanaki'eriri.
NUM 24:12 Warami mɨpaɨ katinitahɨawe: —Ne mɨpaɨ nepɨtiwarahɨawekai netsi'iniwamete pemɨwarenɨ'a:
NUM 24:13 “Tsepa Waraki yuparatsiyu hurukɨ meta pɨratakɨ hɨneme mɨnetiuxatɨa, ne 'aixɨa nepɨkatiuyuriwe meta 'axanepɨkatiuyuriwe, matsi Yawé nekakaɨyari xeikɨa 'aitsikaya kemaine mɨpaɨ nepɨ'aneni. Yawé xeikɨa kemɨneti'aitɨa mɨpaɨ nepɨtiyurieneni”.
NUM 24:14 Hikɨ mexi neka'akunuawe nekie, nepɨmatitaxatɨani 'ikɨ kiekari 'ateɨterima kemɨwayurieni 'uxa'atɨni warie haye'ayu.
NUM 24:15 Hikɨ Warami mɨpaɨ kaniutayɨni: «Warami niukieya Wehuxi nu'aya, tewi 'aixɨa mɨti'ane mɨtixeiya niukieya.
NUM 24:16 Niukieya mɨ'enie Kakaɨyari kaniniukieyatɨni. 'Amutewi kemɨtiku'eriwa mɨmate, Naimekɨmɨtɨrɨkaɨye mɨtixeiya, mukakukutsutsie hepaɨ mɨtikuxaxatɨariwa:
NUM 24:17 »Nekanixeiyani, peru hikɨ 'akuxi hawaikɨ, nekanixeiyani, peru 'ahurawa hawaikɨ. Kakuwu xuraweya kananatinemɨkɨ, xewitɨ ti'aitame 'Ixaheri hetsie kananukukemɨkɨ. Muhawi mu'uya kanitapɨnamɨkɨ meta Tseti niwemama wamu'ute.
NUM 24:18 'Erumi kana'iwariemɨkɨ, Tsehixi meye'unie, tipiinieya katinayeimɨkɨ, mexi 'Ixaheri yukuha'aritɨwani, mariwemekɨ mɨtiyurienikɨ.
NUM 24:19 Kakuwu nuiwarieyatsie xewitɨ rayu'iwatɨ kanitinemɨkɨ, 'Ahixi kiekatari memuyuhayewaxɨ kaniwatayuniyamɨkɨ».
NUM 24:20 Warami 'Amareki 'uxeiyaka mɨpaɨ kaniutayɨni: «'Amareki mexɨakame nuiwari kanihɨkɨtɨni, peru 'imatɨrieka naitɨ kanika'unariemɨkɨ».
NUM 24:21 Hikɨ Warami kenitsixi waruxeiyaka mɨpaɨ kaniutayɨni: «Tsepa kuraru 'aixɨa 'aneme pemateka meta tsepa 'a'itua 'aitsie paitɨ makama,
NUM 24:22 'ekɨri Kahini, taipa pekaneyani, meta 'Atsiriya kamenanuhanimɨkɨ».
NUM 24:23 Hikɨ Warami mɨpaɨ kaniutayɨni: «Xɨa'ui, ¿kemɨ'anetsɨ kuta pɨtawikweni kepauka Kakaɨyari mɨpaɨ mɨtiyurieni?
NUM 24:24 Kanuwate 'amɨpapa kani'axɨakuni Tsipɨre manexɨani, 'Atsiriya meta 'Ewexi memɨtewakwinitɨanike, mɨkɨ yaxeikɨa mekanika'unariekuni».
NUM 24:25 Mɨpaɨ titaxatɨaka Warami kaneyani yukwiepa paitɨ, yaxeikɨata Waraki yuhuyeta kaneyani.
NUM 25:1 Kepauka 'ixaheritsixi Tsitini memɨtitekai, 'ukari muhawitsixi wahamatɨa mekaniutihitɨkɨne,
NUM 25:2 mɨkɨ mekaniwa'iniekaitɨni wakakaɨyarixi mawari memɨwawewiriekakɨ. 'Ixaheritsixi mɨkɨ kakaɨyarixi wahɨxie mekateniutikwa'akaitɨni meta wahɨxie mekaniutitunuma'uwekaitɨni.
NUM 25:3 Wahari-Pehuxi mehayexeiyatɨ mekanayuyeitɨwakaitɨni. 'Ayumieme Yawé kaniuyeha'ani.
NUM 25:4 Hikɨ Yawé Muitsexi mɨpaɨ katiniutahɨawe: «Yunaime 'ixaheritsixi wa'ukiyarima keniwarukawɨtɨa 'utukakaku, nemɨhaxɨapienikɨ 'ixaheritsixi nemɨkatiwakwinitɨanikɨ».
NUM 25:5 Muitsexi mɨpaɨ katiniwarutahɨawe 'ixaheritsixi wa'itsɨkate: «Xekeniwarukuya kemɨ'ane Wahari-Pehuxi me'ayexeiyatɨ memakɨ».
NUM 25:6 'Ixaheritsixi me'utitsuanakaku 'ixuriki tukiyari mɨranutahakitɨretsie, 'ixaheri tewiyari xeime 'uka mariyani tewiyari kani'atɨani, Muitsexi nierekaku meta yunaitɨ teɨteri 'ixaheritsixi, yu'iwama kaniwarutahɨawitsitɨani.
NUM 25:7 Hikɨ 'uniereka mawari wewiwame Pinexi 'Eriyatsaxi nu'aya 'Aruni teukarieya. Teɨteri waruku'eirieka pitsika 'amɨtewi 'akwetɨ kaneyani,
NUM 25:8 mɨkɨ tewi kananukuweiya, xamarutana kaneutahani kaniwarutimɨni 'uki 'ixaheri meta 'uka. Mɨpaɨ tiuyɨku 'ixaheritsixi kememɨtekwi'ikai katineuyunuani.
NUM 25:9 'Ana mɨkɨ kwiniyakɨ xeitewiyari heimana nauka miriyari (24.000) mekaniukwini.
NUM 25:10 Yawé Muitsexi mɨpaɨ katiniutahɨawe:
NUM 25:11 «Pinexi, 'Eriyatsaxi nu'aya meta 'Aruni teukarieya, mɨkɨ katiniuyurieni nehaxɨa manukanuitɨa, ne newakwerietɨ kenemɨrehɨawekai mɨpaɨ katiniuyurieni. 'Ayumieme ne'ɨtetsarikakɨ 'ixaheritsixi nepɨkawaruka'unaxɨ.
NUM 25:12 Pinexi mɨpaɨ ketineutahɨawi tɨratu temɨwewienikɨ ne nemikuhɨawenikɨ,
NUM 25:13 yukɨmana mɨkɨ meta nuiwarimama mawari wewiwamete yuheyemekɨ mepɨhɨkɨtɨni, nehetsie mutanuakɨ 'ɨtetsatɨ, meta 'ixaheritsixi wahetsie 'itiya mawariyari muwewikɨ».
NUM 25:14 Tewi mumierie 'uka mariyani tewiyari hamatɨa, Tsimɨri katinitewakaitɨni Tsaru nu'aya, manuyeka kanihɨkɨtɨkaitɨni Tsimehuni xeime nuiwarieyatsie mieme.
NUM 25:15 'Uka mariyani tewiyari Kutsiwi katinitewakaitɨni, Tsuxi kaninu'ayatɨkaitɨni, manuyeka Mariyani xeime nuiwaritsie mieme.
NUM 25:16 Yawé Muitsexi mɨpaɨ katiniutahɨawe:
NUM 25:17 «Mariyanitsixi xekeniwaretakuya keniwarekuya,
NUM 25:18 mɨkɨ memɨxe'utakwikɨ mexete'irɨwiyatɨ, Wahari-Pehuxi hetsɨa memɨxeye'atɨakɨ, kemuyɨ Kutsiwi manuyeka Mariyani niweya mumɨ, kepauka memɨkwi'ikaitsie Wahari Pehuxi hekɨ».
NUM 26:1 Merikɨte 'ixaheritsixi mɨyamete'ukwiku reutiyetana, Yawé Muitsexi mɨpaɨ katiniutahɨawe meta mawari wewiwame 'Eriyatsaxi 'Aruni nu'aya:
NUM 26:2 «Xekeniwaruka'utɨa 'ixaheritsixi yunaime waniwema kemɨ'ane memɨwa'ukiyarima. Xekeniwaraka'utɨa xeitewiyari wiyari memɨhɨtɨka huteikɨ meutiyune, kuyakɨ 'aixɨa memɨ'anene 'ixaheritsixi wahetsiemiemekɨ».
NUM 26:3 Muitsexi meta 'Eriyatsaxi hamatɨa, yunaime teɨteri wahamatɨa mekateniutaxata mayeweri Muhawi kwieyaritsie, haa Kurutani manuyeka 'aurie, Keriku hɨxie, mɨpaɨ mekateniwaruta'aitɨani
NUM 26:4 memɨwaraka'utɨanikɨ 'ukitsi xeitewiyari wiyari meutiyune memexeiyatɨka, Yawé Muitsexi kemɨrahɨawekai. 'Ixaheritsixi 'Ekipitu memɨyekɨ 'ikɨ mekanihɨkɨtɨkaitɨni:
NUM 26:5 Xuweni niwemama 'Ixaheri matɨarieya: 'Enuki, Paru, Ketsiruni meta Karimi, mɨkɨ wanuiwari mekanihɨkɨtɨni: 'enukitsixi, parutsixi, ketsirunitsixi meta Karimitsixi.
NUM 26:7 Mɨkɨ mekanihɨkɨtɨni Xuweni nuiwarimama. Yunaitɨ mekanihɨkɨtɨkaitɨni huta tewiyari heimana haika miriyari, heimana 'atahuta tsienituyari, heimana xeitewiyari heimana tamamata (43.730) teɨteri.
NUM 26:8 Paru nu'aya 'Eriyawi yuxewitɨ xeikɨa kanayani.
NUM 26:9 'Eriyawi niwemamata mekanakɨne: Nemuheri, Ratani meta 'Awirani, me'anayexeiyariekatɨtɨ teɨteri wahetsiemiemekɨ, Muitsexi meta 'Aruni mekaniutiniukimani kepauka Kure mɨwa'iniekai kepauka 'axamɨtiuyuri Yawé hɨxie.
NUM 26:10 Kepauka kwie mɨwareukakwai Kure yunaime, meta kemɨ'ane memeweiyakai. Tai kaniwarutitaiya huta tsienituyari, heimana huta tewiyari heimana tamamata teɨteri, mɨpaɨ tawari memɨkayɨakakɨ katiniuyɨni.
NUM 26:11 Matsi Kure niwemama mepɨka'ukwi.
NUM 26:12 Nemuheri nuiwarimama, Kamini, Tsera meta Tsahuri, Tsimehuni niwemama, Wanuiwari mekanihɨkɨtɨni: nemuheritsixi, kaminitsixi, tseratsixi meta tsahuritsixi.
NUM 26:14 'Ikɨ mekanihɨkɨtɨni Tsimehuni nuiwarimama. Yunaitɨ mekanakɨne xeitewiyari heimana huta miriyari heimana huta tsienituyari (22.200) teɨteri.
NUM 26:15 Tsepuni, Kaki, Tsuni, 'Utsini, 'Eri, 'Aruri meta 'Areri, 'ikɨ Kahari niwemama mekanihɨkɨtɨni, 'ikɨta wanuiwarima: tsepunitsixi, kawuhitsixi, tsunitsixi, 'utsinitsixi, 'eritsixi, 'aruritsixi meta 'areritsixi.
NUM 26:18 'Ikɨ Kahari nuiwarimama mekanihɨkɨtɨni. Yunaitɨ mekanakɨne huta tewiyari miriyari heimana 'auxɨwi tsienituyari (40.500) teɨteri.
NUM 26:19 'Exi meta 'Unani Kura mepɨniwemama, Kanani mɨkɨ mekaniukwini. Tseraxi, Paretsi meta Tseratsi wanuiwari mekanihɨkɨtɨni: tseraxitsixi, paretsixi meta tserahitsixi.
NUM 26:21 Paretsi niwemama, Ketsiruni meta Kamuri, wanuiwari mekanihɨkɨtɨni ketsirunitsixi meta kamuritsixi.
NUM 26:22 Mɨkɨ Kura mekaninuiwarieyatɨni. Yunaitɨ mekanakɨne haika tewiyari heimana tamamata heimana 'ataxewime miriyari heimana 'auxɨwi tsienituyari (76.500) teɨteri.
NUM 26:23 'Itsakaxi niwemama, Tura, Puwa, Yatsuwi meta Tsimiruni, wanuiwari mekanihɨkɨtɨni: turahitsixi, puwitsixi, yatsuwitsixi meta tsimirunitsixi.
NUM 26:25 Mɨkɨ 'Itsakaxi nuiwarimama mekanihɨkɨtɨni. Yunaitɨ mekanakɨne haika tewiyari heimana nauka miriyari heimana haika tsienituyari (64.300) teɨteri.
NUM 26:26 Tsawuruni niwemama, Tsereri, 'Eruni meta Yareri, wanuiwari mekanihɨkɨtɨni: tserenitsixi, 'erunitsixi meta yareritsixi.
NUM 26:27 'Ikɨ Tsawuruni nuiwarimama mekanihɨkɨtɨni. Yunaitɨ mekanakɨne haika tewiyari miriyari heimana 'auxɨwi tsienituyari (60.500) teɨteri.
NUM 26:28 Kutse niwemama, Manatsexi meta 'Epɨrahini, wanuiwari mekanihɨkɨtɨni:
NUM 26:29 Manatsexi niwemama, Makixi meta Karaha, Makixi nuiwarimama mekanihɨkɨtɨni, makiritsixi meta Karaha nuiwarimama.
NUM 26:30 Karaha niwemama, Ketsexi, Kere, 'Atsirieri, Tsikeni, Tsemira meta Hepexi, wanuiwari mekanihɨkɨtɨni: ketseritsixi, kerekitsixi, 'atsiriheritsixi, tsikenitsixi, tsemirahitsixi meta heperitsixi.
NUM 26:33 Tserupekari Hepexi nu'aya 'ukitsi pɨkawarutinuari 'ukari xeikɨa, mekatenitetewakaitɨni, Makira, Nuha, Kukɨra, Mirika meta Tiritsa.
NUM 26:34 'Ikɨ Manatsexi wanuiwari mekanihɨkɨtɨni. Yunaitɨ mekanakɨne huta tewiyari heimana tamamata heimana huta miriyari heimana 'atahuta tsienituyari (52.700) teɨteri.
NUM 26:35 'Epɨrahini niwemama, Tsutera, Wekexi meta Takani, wanuiwari mekanakɨne, tsuterahitsixi, wekeritsixi meta takanitsixi.
NUM 26:36 Tsutera nu'aya 'Erami, nuiwarieya mekanihɨkɨtɨni, 'eramitsixi.
NUM 26:37 'Ikɨ mekanihɨkɨtɨni 'Epɨrahini nuiwarimama. Yunaitɨ xeitewiyari heimana tamamata heimama huta miriyari heimana 'auxɨwi tsienituyari (32.500) teɨteri mekanakɨne. 'Ikɨ yunaitɨ nuiwarite Kutse hetsie mekaniyekɨne.
NUM 26:38 Wenikamini niwemama, Wera, 'Atsiweri, 'Akirani, Tsupani meta Kupani, mekaniwanuiwaritɨni: werahitsixi, 'atsiweritsixi, 'akiranitsixi, tsupanitsixi meta kupanitsixi.
NUM 26:40 Wera niwemama 'Axi meta Nahamani, wanuiwari mepɨhɨkɨ 'aritsixi meta namanitsixi.
NUM 26:41 'Ikɨ Wenikamini wanuiwari mekanihɨkɨtɨni. Yunaitɨ mekanakɨne huta tewiyari heimana 'auxɨwi miriyari heimana 'ataxewime tsienituyari (45.600) teɨteri.
NUM 26:42 Rani nu'aya Tsukani nuiwarieya tsukanitsixi mepɨhɨkɨ, mɨkɨ xeikɨa mekanihɨkɨtɨkaitɨni Rani nuiwarieya.
NUM 26:43 Haika tewiyari heimana nauka miriyari heimana nauka tsienituyari (64.400) teɨteri mepɨhɨkɨtɨkai.
NUM 26:44 'Atsexi niwemama 'Imɨna, 'Itsiwi meta Weriya, wanuiwarima mepɨhɨkɨ: 'imɨnatsixi, 'itsiwitsixi meta weriahitsixi.
NUM 26:45 Weriya niwemama Hewexi meta Marikiheri wanuiwari mepɨhɨkɨ: heweritsixi meta marikieritsixi.
NUM 26:46 'Atsexi xeimeta 'uka kanayexeiya Tsera titewakame.
NUM 26:47 'Ikɨ 'Atsexi wanuiwari mekanihɨkɨtɨni. Yunaitɨ mekanakɨne huta tewiyari heimana tamamata heimana haika miriyari heimana nauka tsienituyari (53.400) teɨteri.
NUM 26:48 Nepɨtahari niwemama Yatseri, Kuni, Ketsexi meta Tsireni, wanuiwari mekanihɨkɨtɨni: yatseritsixi, kunitsixi, ketsexitsixi meta tsirenitsixi.
NUM 26:50 'Ikɨ mekanihɨkɨtɨni Nepɨtahari nuiwarimama. Yunaitɨ mekanakɨne huta tewiyari heimana 'auxɨwime miriyari, heimana nauka tsienituyari (45.400) teɨteri.
NUM 26:51 Yunaitɨ teɨteri 'ixaheritsixi 'ataxewime tsienituyari heimana xeimiriyari, heimana 'atahuta tsienituyari heimana xeitewiyari heimana tamamata (601.730) mekaniyupaɨmekaitɨni.
NUM 26:52 Yawé Muitsexi mɨpaɨ katiniutahɨawe:
NUM 26:53 «Kwie keniwayetuiri 'inɨaritɨkaime 'ikɨ nuiwarite wahetsiemieme mɨhɨkɨtɨnikɨ. Keyupaɨmetɨ memaka'utɨarie mɨpaɨ meyupaɨmeme keniwaruxatɨa.
NUM 26:54 Kemɨ'ane nuiwari memɨyumɨire 'ayeukame pekaniwayetuiriemɨkɨ, kemɨ'ane nuiwari 'etsimemɨyupaɨmeni, 'etsiyeukame pekaniwaxatɨamɨkɨ. Yuxexuitɨ nuiwari yamekatenimikiekuni keyupaɨmetɨ memaye'uka.
NUM 26:55 Kwie 'inɨarikɨ mekanita'iwakuni nuiwari wa'ukiyarima kememɨtetetewakai.
NUM 26:56 Mekaniyuta'iwakuni yunaitɨ nuiwarite wahetsie, 'etsimemɨyupaɨme meta 'amemɨyupapaɨme wahamatɨa».
NUM 26:57 Rewitsixi Keritsuni, Kuhati meta Merari, wanuiwari mepɨhɨkɨtɨkai keritsunitsixi, kuhatitsixi meta meraritsixi.
NUM 26:58 Rewitsixi wanuiwaritsie memɨyekɨ mepɨhɨkɨta: Riwinitsixi nuiwariyari, hewurunitsixi nuiwariyari, Makiri nuiwarimama, Muhutsi nuiwarimama meta Kure nuiwarimama. Kuhati 'ukiyarieya 'Amirani pɨhɨkɨtɨkai.
NUM 26:59 'Amirani 'ɨyaya Kukaweri pɨtitewakai 'ukiyarieya Rewi pɨhɨkɨtɨkai, 'Ekipitu putinuiwakai. Tɨɨri mepɨwarayexei 'Amirahami hamatɨa mekanihɨkɨtɨni 'Aruni, Muitsexi meta wa'iwa 'uka Miriyami.
NUM 26:60 'Aruni Narawi puwapaapatɨkai, 'Awihu, 'Eriyatsaxi meta 'Itamaxi.
NUM 26:61 Narawi 'Awihu hamatɨa mekaniukwini Yawé hɨxie taipa 'axa'aneme memɨte'itimawirikɨ.
NUM 26:62 Rewitsixi xeimetseri memexeiyatɨka mana meutiyune yunaitɨ xeitewiyari heimana haika miriyari (23.000) mekanakɨne. Hipatɨ 'ixaheritsixi wahamatɨa mepɨka'u'inɨatsie, wahepaɨ memɨkateyetuiriyarienikekaikɨ.
NUM 26:63 'Ikɨ mekanihɨkɨtɨni 'ixaheritsixi Muitsexi mɨwaruti'inɨataxɨ meta 'Eriyatsaxi hamatɨa, mayeweri Muhawi kwieyaritsie, haa Kurutani manuyehane 'aurie, Keriku hɨxie.
NUM 26:64 Meripaitɨ makumawetsie Tsinahi Muitsexi 'Aruni hamatɨa memɨwaraka'utuakai, xewitɨ pɨka'ayemiekai hekwamekɨ memaka'utsietsie,
NUM 26:65 Yawé mɨpaɨ mutayɨkaikɨ kename yunaitɨ mekwinikekai. Mekaniyuhayewaxeikɨa Karewi, Kepune nu'aya, meta Kutsuhexi Nuni nu'aya, tawarita xewitɨ pɨka'utawikwei.
NUM 27:1 Makira, Nuha, Kukɨra, Mirika meta Tiritsa Manatsexi nuiwarimama hetsie menimiemetetɨkaitɨni Kutse nu'aya, 'ukari Tserupekari niwemama mekanihɨkɨtɨkaitɨni Hepexi nu'aya, Karaha nu'aya, Makixi nu'aya meta Manatsexi nu'aya. Hikɨ mɨkɨ meyu'auxɨwitɨ mekanekɨne
NUM 27:2 'ixuriki tukiyari manuwetsie, Muitsexi meta mawari wewiwame 'Eriyatsaxi wahamatɨa metetaxatake meta memanuyetei wahamatɨa. Hikɨ mɨpaɨ mekateniwarutahɨawe:
NUM 27:3 «Tapaapa kanemɨni 'ukitsi kawatinuariwetɨ, Kure mɨnɨkaikɨ pɨka'uyɨ Yawé hepaɨtsita mauniukakaikɨ. Kaniumɨni makumawetsie yukɨmana 'axakemɨtiyurienekaikɨ.
NUM 27:4 ¿Kamɨtsɨ metehayeyeitɨarieni nuiwarimama tapaapa kemɨtitewa 'ukitsi mɨkawarutinuarikɨ? Tame tekaniniwemamatɨni. Ketaneyetuiri kwie tapaapa 'iwamama wahamatɨa».
NUM 27:5 Muitsexi Yawé kaniuta'iwawiya kememɨtehehɨawekai,
NUM 27:6 Yawé mɨpaɨ katinita'eiya:
NUM 27:7 «Kememaitɨka Tserupekari niwemama 'aixɨa kani'aneni, 'ayumieme keniwayetuiri wahetsiemieme wapaapa 'iwamama wahepaɨ. Wapaapa mɨhetsiemiemetɨkai mɨkɨ keniwaruxatɨa.
NUM 27:8 »Metatsiere 'ixaheritsixi mɨpaɨ ketiniwarutahɨawi: “Kepauka xewitɨ tewi mɨmɨni 'uki katinuariwetɨ, 'uka pɨta katinanupimɨkɨ.
NUM 27:9 Xɨkata mɨkɨ 'uka ka'utinuarieni, 'iwamama pɨta mekatenanupikuni.
NUM 27:10 Xɨka 'uki ka'uti'iwatakaitɨni, paapaya 'iwamama mekatenanupikuni.
NUM 27:11 Xɨka paapaya kareka'iwaka, Xewitɨ 'ahurawa 'iwaya katinanupimɨkɨ hetsiena mieme mɨrayanikɨ. Mɨpaɨ 'ixaheritsixi mekatenikahukuni 'aitsika mɨheitserie kanihɨkɨtɨkamɨkɨ, ne Muitsexi kenemɨtiuta'aitɨa”».
NUM 27:12 Yawé Muitsexi mɨpaɨ katiniutahɨawe: —'Awarini hɨriyaritsie paitɨ kenemie, mana keneuxeiya kwie 'ixaheritsixi nemɨwayetuirieni.
NUM 27:13 Hikɨ 'ari pe'ixeiyame, pekanimɨmɨkɨ pekaniyemieni 'apaapama wahetsɨa 'a'iwa 'Aruni hepaɨ.
NUM 27:14 Makumawe Tsini mɨrakutewatsie, kepauka teɨteri 'axamemutiyuanekai, xeme xeyuhutatɨ xepɨkanetsi'anu'eni, kepauka haa tetetsie xemanetɨa, teɨteri wahɨxie mɨpaɨ xepɨkatehetima kenemɨtipatsie. Mɨkɨ haa Meriwa mɨtitewa Karetsi paitɨ katine'aneni, Tsini makumawetsie.
NUM 27:15 Muitsexi Yawé mɨpaɨ katiniuta'eiya:
NUM 27:16 ―Yawé, yunaime teɨteri wakakaɨyari, xeime keneutahɨawi manuyekanikɨ 'ikɨ teɨteri wahetsiemieme,
NUM 27:17 mɨwaruwitɨximenikɨ hakewa memetiyaxe, mɨwaranuwitɨnikɨ memuyukwiyutsie meta mɨwarakunuitɨanikɨ wakie. Mɨpaɨ Yawé 'ateɨterima muxatsi memɨka'ukutsiyari hepaɨ mepɨkateyuxexeiyani.
NUM 27:18 Yawé Muitsexi mɨpaɨ katiniutahɨawe: —Kutsuhexi Nuni nu'aya xekenayeitɨa, mɨkɨ yu'iyarikɨ 'aixɨa katiniyɨkɨhɨaweni. Hetsiena keneutime'i,
NUM 27:19 mawari wewiwame 'Eriyatsaxi hɨxie kene'atɨa meta yunaime teɨteri wahɨxie. Hikɨ yunaime wahɨxie mɨti'aitanikɨ pekaniyetuiriemɨkɨ.
NUM 27:20 Pekatinihɨritɨamɨkɨ 'ekɨ kepemɨti'aitakai, mɨpaɨ yunaitɨ 'ixaheritsixi memei'eniekakɨ.
NUM 27:21 Hikɨ mawari wewiwame 'Eriyatsaxi hetsɨa kaniye'amɨkɨ, yamɨtayɨnikɨ 'inɨari wewietɨ 'urimi meta tumimi hekɨ Yawé kanitahɨawimɨkɨ. Kepauka Kutsuhexi mɨta'inieni memuyukwiyukɨ, yunaitɨ teɨteri mekaniyehuni hamatɨana, meta kepauka mɨta'inieni memakunuaxɨanikɨ, mɨkɨta mekanakununuwakuni.
NUM 27:22 Muitsexi yakatiniuyurieni Yawé kemɨtita'aitɨa. Kutsuhexi 'uta'inieka mawari wewiwame 'Eriyatsaxi hɨxie kanei'inieni meta yunaime teɨteri wahɨxie.
NUM 27:23 Hikɨ heimana kaneutimeni hɨritɨarika kaniyetuirieni, mɨpaɨ katiniuyurieni Yawé kemɨtita'aitɨakai.
NUM 28:1 Yawé Muitsexi mɨpaɨ katiniutahɨawe:
NUM 28:2 «Mɨpaɨ ketiniwarutahɨawi 'ixaheritsixi memɨkatehatɨtɨmaiyanikɨ kemɨ'ane tukaritsie memɨnete'utimawiriwanikɨ. Mɨkɨ mawari taiyarikayari witsimu'ɨa mɨkɨ ne'ikwai kanihɨkɨtɨni.
NUM 28:3 »Mɨpaɨta ketiniwarutahɨawi 'ixaheritsixi, mawari taiyarika hetsiemieme, yamepɨnete'atɨiriwani xexuime tukaritsie mawari taiyariyari yareuyuhanemekɨ yuhutame muxatsi xeiwiyari mehɨtɨkaime 'aixɨa me'anenekame.
NUM 28:4 Xeime ximeri pekanitimawamɨkɨ, xeimeta taikai,
NUM 28:5 meta wahamatɨa huta kiruyari tɨriku mɨtɨxiyari 'aixɨa mɨ'ane hatseitikɨ pɨnariekame pekanitimawamɨkɨ.
NUM 28:6 'Ikɨ mawari taiyariyari yamɨreuyuhane kanihɨkɨtɨni, kenemɨtixekɨhɨawekai Tsinahi hɨriyaritsie taiyarika mawarikayaritsie, witsimu'ɨa Yawé minake.
NUM 28:7 Yuxexuime muxatsi wahetsie xeirituruyari kaxie winuyari mɨtiyeuriyani mawariyari heutinɨkame kaniyetuamɨkɨ, tukita Yawé minake hetsiemieme kanitiyeuriyamɨkɨ.
NUM 28:8 Hutarieka mieme muxa taikai pekanitimawamɨkɨ, hatsite mawarikayari hamatɨa meta winu hatuiyariyari ximeri pemitimawaxɨ hepaɨ. Taiyarika mawarikayari kanihɨkɨtɨni, Yawé minake 'ɨakariyari.
NUM 28:9 »Xawatikɨ pekaniwarutimawamɨkɨ yuhutame muxatsi xeiwiyari memɨhɨtɨka, 'aixɨa me'aneneme mekatekukuyeme, meta kaxie winuyari manutituarike heutinɨkame, metatsiere nauka kiruyari 'imeriyu tɨriku mɨtɨxiyari 'aixɨa mɨ'ane hatseitikɨ wiyamakame.
NUM 28:10 'Ikɨ mawari taiyariyari kanihɨkɨtɨni xawatikɨ mieme, hutariekamieme 'ikɨ taiyarika kanihɨkɨtɨni kaxie winuyari mɨtiyeuriwa heutinɨkame.
NUM 28:11 »Metseri maye'axenitsie mexɨakame tukaritsie mawari taiyariyari pekaniutiwewiwamɨkɨ Yawé hetsiemieme, yuhutame tsikerutsixi, xeime muxa 'ukitɨme, meta 'atahutame muxatsi xeiwiyari mehɨtɨkaime 'aixɨa memɨ'anene memɨkatekukuye.
NUM 28:12 Yuxexuime tsikerutsixi wahamatɨa pekaninɨitɨamɨkɨ tɨriku mɨtɨxiyari 'aixɨa mɨ'ane 'ataxewime kiruyari 'imeriyu hatseitikɨ wiyamakame, muxa 'uki hamatɨata nauka kiruyari 'imeruyu tɨriku mɨtɨxiyari 'aixɨa mɨ'ane wiyamakame hatseitikɨ,
NUM 28:13 meta yuxexuime muxatsi wahamatɨa, huta kiruyari tɨriku mɨtɨxiyari 'aixɨa mɨ'ane hatseitikɨ wiyamakame. 'Ikɨ mawari taiyariyari kanayeimɨkɨ, 'imikieri taipa kwaxiyariekame, witsimu'ɨa Yawé minake hetsiemieme.
NUM 28:14 Menutinɨni 'ikɨ kaniyɨmɨkɨ: Yuxexuime tsikerutsixi wahetsie huta rituruyari winu, muxa 'uki hetsiemieme xeirituruyari heimana hixɨapa 'akame winu, yuxexuime muxatsi wahetsieta xeirituruyari winu. 'Ikɨ taiyarika mawarikayari pekaniuwewiximemɨkɨ, naime wiyaritsie, xexuime metseriyaritsie 'aye'axekaku metseri 'anatiwautsekaku.
NUM 28:15 Mɨpaɨta kani'aneni mawarika taiyariyari yapemɨtiutiwewiwanitsie meta hetsiena mautituarieni, yaxeikɨata pekanitimawamɨkɨ Yawé hetsiemieme, mɨ'itiyani mawariyari, xeime tsipu 'ukitɨmekɨ.
NUM 28:16 »Patsikwa 'ixɨarariyari Yawé hetsiemieme xekaniuwewiximekuni mexɨakame metseriyaritsie tamamata heimana nauka tukariyaritsie 'umiekaku.
NUM 28:17 Tamamata heimana 'auxɨwi tukariyaritsie 'ixɨarari pekaniwewiemɨkɨ meta 'atahuta tukari paa mɨkakuxanariyarie pekanikwakamɨkɨ.
NUM 28:18 Mexɨakame tukaritsie 'ixɨarari patsiekamekɨ memuyukuxexeɨriwa pekaniwewiemɨkɨ, xewitɨ tixaɨtɨkɨtɨma pɨkati'uximayaka.
NUM 28:19 Yawé pekanitimawiriemɨkɨ taikɨ, yuhutame tsikerutsixi pekaniwatitaiyamɨkɨ, xeime muxa 'uki meta 'atahuta muxatsi xeiwiyari memɨhɨtɨka. 'Aixɨa memɨ'anene memɨkatekukuye.
NUM 28:20 Yuxexuime tsikerutsixi wahetsie pekaninɨitɨamɨkɨ 'ataxewime kiruyari tɨriku mɨtɨxiyari 'aixɨa mɨ'ane hatseitikɨ wiyamakame, meta muxa 'uki hetsie nauka kiruyari heimana 'imeriyu,
NUM 28:21 yuxexuime muxatsi xeiwiyari memɨhɨtɨka wahetsieta huta kiruyari.
NUM 28:22 Meta xeime tsipu pekaniyetuamɨkɨ mɨ'itiyani mawariyari mayanikɨ mɨxɨnarienikɨ, 'ahetsiemieme.
NUM 28:23 'Ikɨ pekatinitimawamɨkɨ metatsiere mawari taiyariyari yamɨtiutimawarɨwa pekahayewatɨ.
NUM 28:24 Meta yapekatinimawanemɨkɨ 'atahuta tukari, 'ikɨ 'ikwai kanihɨkɨtɨni witsimu'ɨa tai hetsie mɨwewiya, Yawé minake witsikemu'ɨa. 'Ikɨ mɨpaɨ pekatiniyurienemɨkɨ mawari taiyariyari yamɨtiutimawarɨwa pekahayewatɨ meta manutituarike.
NUM 28:25 'Atahutarieka tukariyaritsie 'ixɨarari patsiekamekɨ memuyukuxexeɨriwa pekaniwewiemɨkɨ, xewitɨtɨma tixaɨtɨkɨ pɨkati'uximayaka.
NUM 28:26 »Tsemana 'ixɨarari muwewierirɨmetsie, Yawé pekatinitimawiriemɨkɨ 'imɨari hehekwame matɨari mɨtiukaxɨawerixɨ, meta 'ixɨarari patsiekamekɨ memuyukuxexeɨriwa pekaniwewiemɨkɨ. Mɨkɨ tukaritsie xewitɨ tixaɨtɨkɨ pɨkati'uximayaka.
NUM 28:27 Yuhutame tsikerutsixi pekaniwatimawamɨkɨ, xeime muxa 'uki meta 'atahuta tsipuri 'ukitsi xeiwiyari mehɨtɨkaime, mɨkɨ mawari taiyariyari witsimu'ɨa Yawé minake mayanikɨ.
NUM 28:28 Yuxexuime tsikerutsixi wahamatɨa 'ataxewi kiruyari heimana 'imeriyu tɨriku mɨtɨxiyari 'aixɨa mɨ'ane pekanitimawamɨkɨ hatseitikɨ pɨnariekame, muxa 'uki hamatɨata tɨriku mɨtɨxiyari 'aixɨa mɨ'ane nauka kiruyari 'imeriyu,
NUM 28:29 yuxexuime muxatsi wahamatɨa huta kiruyari.
NUM 28:30 Xeimeta tsipu pekanitimawamɨkɨ 'ekɨ pemɨxɨnarienikɨ.
NUM 28:31 'Ikɨ naime pekatinitimawamɨkɨ pemenutitu'a heuyutinɨkame meta mawari taiyariyari yamɨtiutimawarɨwa pekahayewatɨ meta manutituariwa. Mɨkɨ tewaxi 'aixɨa memɨ'anene memɨkatekukuye mepɨhɨkɨtɨni.
NUM 29:1 »Mexɨakame tukaritsie 'atahutarieka metseritsie pekaniwewimɨkɨ 'ixɨarari patsiekamekɨ memuyukuxexeɨriwa, 'ana nixewitɨ pɨkati'uximayaka. Mɨkɨ tukaritsie kuxineta kanitihɨtsieriemɨkɨ.
NUM 29:2 Mawari taiyarika pemɨwewienikɨ witsimu'ɨa Yawé minake, pekaniwatimawamɨkɨ xeime tsikeru, xeime muxa 'uki meta 'atahuta muxatsi xeiwiyari memɨhɨtɨka 'aixɨa memɨ'anene memɨkatekukuye.
NUM 29:3 Tsikeru hamatɨa pekanitimawamɨkɨ tɨriku mɨtɨxiyari 'aixɨa mɨ'ane hatseitikɨ pɨnariekame 'ataxewi kiruyari 'imeriyu, meta muxa 'uki hetsie nauka kiruyari heimana 'imeriyu,
NUM 29:4 meta 'atahuta muxatsi yuxexuime wahetsie, huta kiruyari heuyutinɨkame.
NUM 29:5 Yaxeikɨata xeime tsipu heutinɨkame mɨ'itiyani mawariyari mayanikɨ, kɨmana mɨxɨnarieni mɨ'ayumieme.
NUM 29:6 'Ikɨ pekatinitimawamɨkɨ, pekatihayewatɨ hatsite mawariyari meta kaxie winuyari mɨtiyeuriyani, taiyarika mawarikayari metseri maye'axetsie mieme, taiyarika mawariyari yamɨtiwewiya. Naime kenemɨti'aita, 'ikɨ naime taiyarika witsimu'ɨa Yawé minake pekaniyurimɨkɨ.
NUM 29:7 »Tamamata tukaritsie 'atahutarieka metseriyaritsie 'ixɨarari patsiekamekɨ memuyukuxexeɨriwa pekaniwewiemɨkɨ. Mɨkɨ tukaritsie mekaniyuhakiekuni, meta nixewitɨ pɨkati'uximayaka.
NUM 29:8 Mawari taiyariyari witsimu'ɨa Yawé minake pemɨwewienikɨ xeime tsikeru pekanitimawamɨkɨ, xeime muxa 'uki meta 'atahuta muxatsi xeiwiyari memɨhɨtɨka. Mɨkɨ tewaxi 'aixɨa mepɨ'aneneni mepɨkatekukuyeni.
NUM 29:9 Tsikeru hamatɨa tɨriku mɨtɨxiyari 'aixɨa mɨ'ane pekanitimawamɨkɨ hatseitikɨ pɨnariekame 'ataxewime kiruyari 'imeriyu, muxa 'uki hetsieta tɨriku mɨtɨxiyari 'aixɨa mɨ'ane nauka kiruyari 'imeriyu,
NUM 29:10 meta 'atahuta muxatsi yuxexuime wahetsie, huta kiruyari.
NUM 29:11 Metatsiere tsipu 'uki mɨ'itiyanikɨ mawariyari heutinɨkame, meta mɨxɨnarienikɨ mawariyari meta mawari taiyariyari yamɨtiutiwewiwa meta hatsite mawariyari yaxeikɨata kaxie winuyari mɨtiyeuriyani.
NUM 29:12 »Tamamata heimana 'auxɨwi tukaritsie 'atahuta metseriyari 'umiekaku 'ixɨarari patsiekamekɨ memuyukuxexeɨriwa pekaniwewimɨkɨ, 'ana xewitɨ pɨkati'uximayaka. 'Atahuta tukari 'ixɨarari patsiekamekɨ memukuxexeɨriwa pekaniwewiemɨkɨ Yawé minake.
NUM 29:13 Mawari taiyariyari pemɨwewieni Yawé hetsiemieme witsimu'ɨa, tamamata heimana haika tsikerutsixi pekaniwatimawamɨkɨ, meta yuhutame muxatsi 'ukitsi meta tamamata heimana nauka muxatsi xeiwiyari memɨhɨtɨka, 'aixɨa memɨ'anene memɨkatekukuye.
NUM 29:14 Yuxexuime tsikerutsixi wahamatɨa pekanitimawamɨkɨ tɨriku mɨtɨxiyari 'aixɨa mɨ'ane hatseitikɨ pɨnariekame 'ataxewi 'imeriyu kiruyari, muxatsi 'ukitsi wahamatɨata tɨriku mɨtɨxiyari 'aixɨa mɨ'ane nauka kiruyari 'imeriyu,
NUM 29:15 yuxexuime tamamata heimana nauka muxatsi memɨhɨkɨtsie, huta kiruyari xeikɨa.
NUM 29:16 Metatsiere xeime tsipu mɨ'itiyanikɨ mawariyari heuyutinɨkame, meta taiyarika mawariyari yamɨtiutiwewiwa hatsi meutinɨ'ɨ meta kaxie winuyari mɨtiyeuriyani.
NUM 29:17 »Hutarieka tukariyaritsie, tamamata heimana huta tsikerutsixi pekaniwayurimɨkɨ, yuhutame muxatsi 'ukitsi meta tamamata heimana nauka muxatsi xeiwiyari memɨhɨtɨka 'aixɨa memɨ'anene memɨkatekukuye.
NUM 29:18 Tsikerutsixi wahamatɨa meta muxatsi 'ukitsi, muxatsi xeiwiyari memɨhɨtɨka wahamatɨa meta hatsite mawariyari meta kaxie winuyari mɨtiyeuriyani heutinɨkame, yuxexuitɨ kememɨteheiyehɨwa.
NUM 29:19 Meta xeime tsipu mɨ'itiyanikɨ mawariyari heutinɨkame, mawarika taiyariyari yamɨtiutiwewiwa meta hatsite mawariyari meta kaxie winuyari mɨtiyeuriyani.
NUM 29:20 »Hairieka tukaritsie tamamata heimana xewi tsikerutsixi pekaniwayurimɨkɨ, yuhutame muxatsi 'ukitsi meta tamamata heimana nauka muxatsi xeiwiyari memɨhɨtɨka 'aixɨa memɨ'anene memɨkatekukuye.
NUM 29:21 Tsikerutsixi wahamatɨa meta muxatsi 'ukitsi wahamatɨa, muxatsi xeiwiyari memɨhɨtɨka wahamatɨa meta hatsite mawariyari meta kaxie winuyari mɨtiyeuriyani heutinɨkame, yuxexuitɨ kememɨteheiyehɨwa.
NUM 29:22 Metatsiere xeime tsipu mɨ'itiyanikɨ mawariyari heutinɨkame, mawari taiyariyari yamɨtiutiwewiwa meta hatsite mawariyari meta kaxie winuyari mɨtiyeuriyani.
NUM 29:23 »Naurieka tukaritsie tamamata tsikerutsixi pekaniwayurimɨkɨ, yuhutame muxatsi 'ukitsi meta tamamata heimana nauka muxatsi xeiwiyari memɨhɨtɨka 'aixɨa memɨ'anene memɨkatekukuye.
NUM 29:24 Tsikerutsixi wahamatɨa meta muxatsi 'ukitsi wahamatɨa, muxatsi xeiwiyari memɨhɨtɨka wahamatɨa meta hatsite mawariyari meta kaxie winuyari mɨtiyeuriyani, yuxexuitɨ kememɨteheiyehɨwa.
NUM 29:25 Metatsiere xeime tsipu mɨ'itiyanikɨ mawariyari, mawarika taiyariyari yamɨtiutiwewiwa meta hatsite mawariyari meta kaxie winuyari mɨtiyeuriyani heutinɨkame.
NUM 29:26 »'Auxɨwirieka tukariyaritsie 'atanauka tsikerutsixi pekaniwayurimɨkɨ, yuhutame muxatsi 'ukitsi meta tamamata heimana nauka muxatsi xeiwiyari memɨhɨtɨka 'aixɨa memɨ'anene memɨkatekukuye.
NUM 29:27 Tsikerutsixi wahamatɨa meta muxatsi 'ukitsi wahamatɨa, muxatsi xeiwiyari memɨhɨtɨka wahamatɨa pekanitimawamɨkɨ hatsite meta kaxie winuyari mɨtiyeuriyani, yuxexuitɨ kememɨteheiyehɨwa.
NUM 29:28 Metatsiere xeime tsipu pekanitimawamɨkɨ mɨ'itiyanikɨ mawariyari, mawarika taiyariyari yamɨtiutiwewiwa meta hatsite mawariyari meta kaxie winuyari mɨtiyeuriyani.
NUM 29:29 »'Ataxewirieka tukari 'atahaika tsikerutsixi pekaniwayurimɨkɨ, yuhutame muxatsi 'ukitsi meta tamamata heimana nauka muxatsi xeiwiyari memɨhɨtɨka 'aixɨa memɨ'anene memɨkatekukuye.
NUM 29:30 Tsikerutsixi wahamatɨa meta muxatsi 'ukitsi wahamatɨa, muxatsi xeiwiyari memɨhɨtɨka wahamatɨa pekanitimawamɨkɨ meta hatsite mawariyari meta kaxie winuyari mɨtiyeuriwa, yuxexuitɨ kememɨteheiyehɨwa.
NUM 29:31 Metatsiere xeime tsipu mɨ'itiyanikɨ mawariyari heutinɨkame, mawarika taiyariyari yamɨtiutiwewiwa meta hatsite mawariyari meta kaxie winuyari mɨtiyeuriyani heutinɨkame.
NUM 29:32 »'Atahutarieka tukaritsie 'atahuta tsikerutsixi pekaniwayurimɨkɨ, yuhutame muxatsi 'ukitsi meta tamamata heimana nauka muxatsi xeiwiyari memɨhɨtɨka 'aixɨa memɨ'anene memɨkatekukuye.
NUM 29:33 Tsikerutsixi wahamatɨa meta muxatsi 'ukitsi wahamatɨa, muxatsi xeiwiyari memɨhɨtɨka wahamatɨa pekanitimawamɨkɨ meta hatsite mawariyari meta kaxie winuyari mɨtiyeuriyani yuxexuitɨ kememɨteheiyehɨwa.
NUM 29:34 Metatsiere xeime tsipu pekanitimawamɨkɨ mɨ'itiyanikɨ mawariyari, mawarika taiyariyari yamɨtiutiwewiwa meta hatsite mawariyari meta kaxie winuyari mɨtiyeuriyani heutinɨkame.
NUM 29:35 »'Atahairieka tukari 'ixɨarari patsiekamekɨ memuyukuxexeɨriwatsie, 'ana xewitɨ pɨkati'uximayaka.
NUM 29:36 Mawari taiyariyari pemɨwewienikɨ Yawé witsimu'ɨa minake, xeime tsikeru pekaniyurimɨkɨ meta xeime muxa 'uki metatsiere 'atahuta muxatsi xeiwiyari memɨhɨtɨka 'aixɨa memɨ'anene memɨkatekukuye.
NUM 29:37 Tsikeru hamatɨa meta muxa 'uki metatsiere muxatsi xeiwiyari memɨhɨtɨka wahamatɨa pekanitimawamɨkɨ hatsite meta manutinɨire kememɨteheiyehɨwa.
NUM 29:38 Metatsiere xeime tsipu pekanitimawamɨkɨ mɨ'itiyanikɨ mawariyari pekatihayewatɨ mawarika yapemɨtitiwewiwa tukarikɨ, hatsite mawarikayari meta kaxie winuyari mɨtiyeuriyani.
NUM 29:39 »'Ikɨ mawarika kanihɨkɨtɨni Yawé hetsiemieme pemutiwewiwani kemɨ'ane tukaritsie mɨka'inɨaritɨka, hipatɨta tsepa kememɨteyɨhɨritɨa memiwewirie, kememɨteyuwaɨriya wamawarika, mawari taiyariyari, hatsite mawarikayari, kaxie winuyari mɨtiyeuriyani meta 'aixɨa memɨteyuxeiyanikɨ mawariyari».
NUM 29:40 Hikɨ Muitsexi Yawé kemɨtita'aitɨakai naime 'ixaheritsixi yakatiniwarutahɨawe.
NUM 30:1 Muitsexi mɨpaɨ katiniwarutahɨawe 'Ixaheri nuiwarieyatsie memanuyetei: «Yawé mɨpaɨ kanaineni kename
NUM 30:2 kepauka 'uki Yawé hetsiemieme muyuhɨritɨa tixaɨtɨ mɨtiyetuanikɨ, yarehɨawetɨ kename yatikayani, mɨkɨ pɨkatiku'itawani matsi keheye'atɨani kemutayɨ.
NUM 30:3 »Kepauka 'uka 'ɨimari, yupaapa kie 'ukaitɨ 'akuxi Yawé hetsɨa muyuhɨritɨa yamɨtikayanikɨ,
NUM 30:4 xɨka paapaya retimaime 'atsikatitahɨawe, mɨkɨ kemɨtiyuhɨritɨakai naime katinaye'atɨamɨkɨ.
NUM 30:5 Peru xɨka paapaya retimaimetɨtɨ yakatiutanaki'erieni kemɨtiyuhɨritɨakai yamɨtikayanikɨ, naimekɨ kemutayɨkai tixaɨtɨ pɨkarayani, Yawé katineiyehɨwiriemɨkɨ paapaya yamɨkatiutanaki'erikɨ.
NUM 30:6 »Xɨka 'uka 'utiwikieni yuhɨritɨame yamɨtikayanikɨ, xɨka kahayuye'erieni,
NUM 30:7 xɨka kɨnaya retimani peru xɨka 'atsikatitahɨawe ka'itatieni, mɨkɨ kaneye'atɨamɨkɨ kemɨtiyuhɨritɨa.
NUM 30:8 Peru xɨka kɨnaya retimaime yakatiutanaki'erieni, mɨkɨ kemɨtiuyuhɨritɨakai tixaɨtɨ pɨkarayani Yawé katineiyehɨwiriemɨkɨ.
NUM 30:9 »Wiura yatɨni 'eiriyakame kemɨtiuyuhɨritɨa kaneye'atɨamɨkɨ.
NUM 30:10 »Kepauka 'ukaratsi wikiekame tixaɨtɨkɨ mɨtiuyuhɨritɨa yamɨtikayanikɨ,
NUM 30:11 xɨka kɨnaya retimaime 'atsikatitahɨawe ka'itatieni, mɨkɨ kaneye'atɨamɨkɨ naime kemɨtiuyuhɨritɨa.
NUM 30:12 Peru xɨka kɨnaya retimaime 'ita'imaiya, hikɨ mɨkɨ pɨkayɨwe meye'atɨanikɨ xeimetɨma kemɨtiuyuhɨritɨa, kɨnaya yamɨkatiutanaki'erikɨ. Yawé katineiyehɨwiriemɨkɨ.
NUM 30:13 »Kɨnaya heitserie kaneixeiyani yamɨtayɨnikɨ yatɨni yamɨkatitanaki'erienikɨ titakɨ mɨtiyuhɨritɨakai Yawé hetsɨa.
NUM 30:14 Xɨkata kɨnaya retimaimetɨtɨ kayuwatɨ 'uyeikani, 'atsimɨkahainekɨ kani'inɨaritɨni kename yara'eriwa kemɨtiuyuhɨritɨa. Kunaya yara'eriwatɨ kaniyɨanemɨkɨ 'atsimɨka'utayɨkɨ kepauka mɨretima.
NUM 30:15 Xɨkata retimaimetɨtɨ 'arikeketa 'uta'imani, mɨkɨ hetsiena katinahuimɨkɨ yɨ'ɨya hetsiemieme».
NUM 30:16 'Ikɨ 'aitsika Yawé Muitsexi kaniyetuirieni, kememɨ'anenikekai yɨkɨnamatɨ yɨ'ɨitatɨ kememɨ'anenikekai meta 'uki 'uka munuarie kememɨ'anenikekai mexi hetsɨana 'ukani.
NUM 31:1 Yawé Muitsexi mɨpaɨ katiniutahɨawe:
NUM 31:2 «Mexi pekamɨwe, 'apaapama wahetsɨa pekaheyeiwe, mariyanitsixi pekaniwatakwimɨkɨ pekatiniwakuhɨwieriemɨkɨ 'ateɨterima wahetsiemieme».
NUM 31:3 Muitsexi 'ixaheritsixi mɨpaɨ katiniwarutahɨawe: «Xekeneuyukuha'aritɨa hipatɨ temuhukɨ mariyanitsixi temuwatakwinikɨ. Mɨkɨ wahetsie Yawé katinayukatuamɨkɨ.
NUM 31:4 Yuxexuitɨ 'Ixaheri nuiwarimama xeimiriyari yuteɨterima mekewarenɨ'axɨani».
NUM 31:5 'Ixaheri nuiwarimama yuxexuitɨ mekaniwarenɨ'axɨani xeimiriyari yuteɨterima, yunaitɨ mekanakɨne tamamata heimana huta miriyari (12.000) 'ukitsi memuyukwiyukɨ.
NUM 31:6 Muitsexi kaniwarenɨ'ani tamamata heimana huta miriyari 'ukitsi. Wahamatɨa kaneyani Pinexi mawari wewiwame nu'aya 'Eriyatsaxi, mɨhɨritɨariekai piinite tukita timieme metatsiere kuxineta mutahɨtsiwanikɨ kepauka memuyutakwini hetsiemieme.
NUM 31:7 Yawé Muitsexi kemɨtiuta'aitɨakai, 'ixaheritsixi mekaniuyutakwini, mekaniwarukwini yunaime 'ukitsi mariyanitsixi.
NUM 31:8 'Ewi, Xekeni, Tsuxi, Kuxi meta Xewa mariyani kwieyaritsie yu'aɨxɨwitɨ memɨte'aitamete 'ixiparakɨ mekaniukwi'iwa, metatsiere Warami Wehuxi nu'aya mekaniumieni.
NUM 31:9 'Ukarawetsixi mekaniwarutiwiya meta tɨɨri mariyanitsixi waniwema, wa'iwarika mayanikɨ wawakaitsixi mekaniwarehapani, wamuxatsi meta wapiinite.
NUM 31:10 Mariyanitsixi wakiekari meta memukutetɨkateitsie naime mekateniutitaiya,
NUM 31:11 yunaime teɨteri mekaniwarehapani meta tewaxi. Naime tita memɨte'u'axixɨ meta tita mɨtiwapiinitɨkai
NUM 31:12 Muitsexi meta mawari wewiwame 'Eriyatsaxi mekateniyetuirieni meta yunaime 'ixaheritsixi. Yunaime memɨwarehapa meta tita memɨte'u'axixɨ mekatenepini memakuteitsie Muhawi makuweritsie, haa manuyehane Kurutani 'aurie, metatsiere Keriku hɨxie.
NUM 31:13 Muitsexi, mawari wewiwame 'Eriyatsaxi hamatɨa meta yunaitɨ 'ixaheri kiekariyaritsie memanuyetei mekanayekɨne mewareunakiyuka 'ateewa mematiteitsie.
NUM 31:14 Muitsexi waɨkawa kaniha'akaitɨni xeimiriyari wa'ukiyari wahetsɨa xeitsienituyari xeikɨa memanuaxɨakɨ.
NUM 31:15 Mɨpaɨ katiniwaruta'iwawiya: «¿Titayarikuta 'ukarawetsixi xekatewarekwi?
NUM 31:16 Mɨkɨ 'ukarawetsixi Warami kemɨtiwakuxaxatɨwakai 'axawayurietɨ, 'ayumieme 'ixaheritsixi Yawé mepuku'eirie Wahari-Pehuxi pɨta memayexeiyanikɨ. 'Ayumieme Yawé teɨterimama mekaniukwini kwiniyakɨ.
NUM 31:17 Yunaime tɨɨri xekeniwarukuya meta yunaime 'ukarawetsixi memɨmayɨiyatɨka,
NUM 31:18 kaniyɨweni hɨrixɨa 'ukari memɨkamayɨiyatɨka xemɨwarewitɨni.
NUM 31:19 »Yunaitɨ kemɨ'ane hipame memɨwarekwi, yatɨni kemɨ'ane mɨkite memɨwaremayɨa, 'ateewa meniyuhayewakuni xematiteitsie 'atahuta tukari. Hairieka tukari 'anukamiekaku meta 'atahuta tukari 'anukamiekaku, xekaniyu'itiekuni meta kemɨ'ane xemɨwaretiwi.
NUM 31:20 Metatsiere yukemarite mekaniti'ekwakuni, meta nawikɨ mɨtiwewiyatɨka, tsipuri wahuxari 'ɨkariyari, yatɨni kɨyekɨ mɨtiwewiyatɨka».
NUM 31:21 'Eriyatsaxi mawari wewiwame mɨpaɨ katiniwarutahɨawe kuyaxi kemɨ'ane memeyukukwikai: «Mɨpaɨ kanaineni 'inɨari niukiyari Yawé Muitsexi miyetuiri:
NUM 31:22 Huru tepɨayari, pɨrata, purunitse, tepɨa, 'Etsitaniyu, purumu,
NUM 31:23 naitɨ tita tai mɨtinewiwe, taipa katineuxɨriyamɨkɨ mɨti'itiyanikɨ, perutsiere haa mɨtiyu'itiwakɨ kanitihauxinariemɨkɨ. Tita tai mɨkatinewie mɨkɨ hakɨkɨ xeikɨa 'aixɨa kaniti'itɨariemɨkɨ.
NUM 31:24 'Atahutarieka tukaritsie, 'ana xeme yukamixate xekateniti'ekwakuni 'ana xe'itiyatɨ xekaniyuhayewakuni. 'Anake yunaitɨ mematitei xekani'axɨakuni».
NUM 31:25 Yawé Muitsexi mɨpaɨ katiniutahɨawe:
NUM 31:26 «'Ekɨ meta mawari wewime 'Eriyatsaxi meta 'ukirawetsixi 'ixaheritsixi xekaniwati'inɨatakuni teɨteri memutiwiyarie meta tewaxi.
NUM 31:27 Xekateniwatapitɨakuni kuyaxi memɨteha'iwaxɨ kemɨ'ane memeyukukwi meta yunaitɨ kiekatari yaxeikɨa tipapaɨmeme.
NUM 31:28 Kemɨ'ane memeyukukwi mɨpaɨ pekatiniwatahɨawimɨkɨ memɨte'a'iwaxɨ hetsie Yawé hetsiemieme memenaka'ɨnikɨ. Teɨteri yunaime tewaxi puxuri, wakaitsixi, muxatsi, xeime pekananakahanimɨkɨ 'auxɨwime tsienituyaritsie.
NUM 31:29 Ketipaɨmeme memɨte'uta'axixɨtsie kuyaxi mana pekaniwaranakahapaniriexɨamɨkɨ, mawari wewiwame 'Eriyatsaxi pekatiniyetuiriemɨkɨ 'imikieri mayanikɨ Yawé hetsiemieme.
NUM 31:30 'Ixaheritsixi ketipaɨmetɨ wahetsie mɨtikunanake, yuxexuime pekatiniwareukuhapaniriemɨkɨ huta tewiyari heimana tamamatatsie, 'ɨimarixi yaxeikɨata wapuxuri, wakaitsixi, muxatsi tsepa tita tewayari, mɨkɨ rewitsixi pekatiniwayetuiriemɨkɨ, mɨkɨ netuki memɨ'ɨwiya memɨhɨkɨkɨ».
NUM 31:31 Muitsexi meta mawari wewiwame 'Eriyatsaxi yamekateniuyurieni Yawé Muitsexi kemɨtiuta'aitɨa.
NUM 31:32 Kuyaxi tita memɨtehepikairi kati'inɨaritɨ, tita memɨte'a'iwaxɨ katinihɨkɨtɨkaitɨni 'ataxewime tsienituyari heimana haika tewiyari heimana tamamata heimana 'auxɨwime miriyari (675.000) muxatsi,
NUM 31:33 haika tewiyari heimana tamamata heimana huta miriyari (72.000) wakaitsixi,
NUM 31:34 haika tewiyari heimana tamamata heimana xewi miriyari (71.000) puxuri
NUM 31:35 metatsiere xeitewiyari heimana tamamata heimana huta miriyari (32.000) 'ukari 'ukitsi wahamatɨa memɨkakahiwawe.
NUM 31:36 Kemɨ'ane memeyukukwi mɨpaɨ tipaɨmeme mekatenepini: Haika tsienituyari heimana xeitewiyari heimana tamamata heimana 'atahuta miriyari, heimana 'auxɨwi tsienituyari (337.500) muxatsi,
NUM 31:37 Yawé hetsiemieme mekaniyetuiyani 'ataxewime tsienituyari heimana haika tewiyari heimana tamamata heimana 'auxɨwi (675).
NUM 31:38 Xeitewiyari heimana tamamata heimana 'ataxewime miriyari (36.000) wakaitsixi, meta Yawé hetsiemieme mekaniyetuiyani haika tewiyari heimana tamamata heimana huta.
NUM 31:39 Huta tewiyari heimana tamamata miriyari heimana 'auxɨwime tsienituyari (30.500) puxuri, mekaniyetuiyani Yawé hetsiemieme haika tewiyari heimana xewi.
NUM 31:40 Tamamata heimana 'ataxewime miriyari (16.000) 'ukari, Yawé hetsiemiemeta mekaniyetuiyani xeitewiyari heimana tamamata heimana huta.
NUM 31:41 Yawé hetsie mɨtimiemetɨkai, Muitsexi mawari wewiwame 'Eriyatsaxi katiniyetuirieni Yawé kemɨtiwaruta'aitɨakai.
NUM 31:42 Kuyaxi memɨteha'iwaxɨ memɨte'atɨa, Muitsexi hixɨata ti'akame 'ixaheritsixi katiniwayetuirieni,
NUM 31:43 'ayumieme 'ixaheritsixi wahetsiemieme katinayani haika tsienituyari heimana xeitewiyari heimana tamamata heimana 'atahuta miriyari heimana 'auxɨwime tsienituyari (337.500) muxatsi,
NUM 31:44 xeitewiyari heimana tamamata heimana 'ataxewi miriyari (36.000) wakaitsixi,
NUM 31:45 xeitewiyari heimana tamamata miriyari heimana 'auxɨwi tsienituyari (30.500) puxuri
NUM 31:46 metatsiere tamamata heimana 'ataxewi miriyari (16.000) 'ukari.
NUM 31:47 'Ixaheritsixi wahetsiemieme mɨratɨa, Muitsexi huta tewiyari heimana tamamata teɨteriyaritsie yuxexuime kaniwareukuhapanirieni meta huta tewiyari heimana tamamatatsie yuxexuime tewaxi, yemekɨ Yawé kemɨtita'aitɨakai, hikɨ mɨkɨ tinaime mepɨteyetuiriyarie rewitsixi, Yawé tukieya memɨhɨritɨariekai.
NUM 31:48 Hikɨ teɨteri kuyaxi memɨhɨritɨarietɨka, tatsɨari xeimiriyari memɨhɨritɨarietɨka meta xeitsienituyari memɨhɨritɨarietɨka, Muitsexi hepa me'ukɨneka
NUM 31:49 mɨpaɨ mekatenitahɨawe: «'Anɨ'arima yukuyaxima mekaniwaruti'inɨata, nixewitɨ pɨkaheuyewetse keyupaɨmeme temuhɨritɨarie.
NUM 31:50 'Ayumieme Yawé hetsiemieme mawari tepɨwewie, ketita temɨteyetuaxɨa hurute taxexuitɨ: mamatsiemieme, tepɨa kukari huru matsɨwayari, kuka menawutɨa meta kukate. 'Ikɨ naime tepɨte'atɨwa temɨxɨnarienikɨ mawariyari Yawé hɨxie».
NUM 31:51 Muitsexi meta mawari wewiwame 'Eriyatsaxi mekatenanupini tiwaɨkawame hurukɨ mɨtiwewiyatɨka.
NUM 31:52 Huru yunaitɨ memiyetɨa xeimiriyari memɨwaruwitɨkɨ meta xeitsienituyari mawari Yawé hetsiemieme mayanikɨ kanayani xeitsienituyari heimana nauka tewiyari heimana tamamata kiruyari.
NUM 31:53 Yuxaxaɨtatatɨ kuyaxi yu'iwarika mekani'atɨaxɨakaitɨni.
NUM 31:54 Muitsexi meta mawari wewiwame 'Eriyatsaxi naime mɨkɨ huru mekatenanupini kuyaxi tewa'aitɨwamete memɨtewayetuiri, hikɨ mekaneitɨni 'ixuriki tukiyarita muwa Yawé 'ixaheritsixi yamɨtiwara'eriwanikɨ.
NUM 32:1 Xuweni nuiwarieya meta Kahari tewaxi mepuwarexeiyakai yemekɨ waɨkawa, mekaniuneniere Katsexi kwieyaritsie meta Karaha, mana 'aixɨa mɨraku'anekaikɨ tewaxi wahetsiemieme.
NUM 32:2 'Ayumieme Muitsexi mɨpaɨ mekateniutahɨawe meta mawari wewiwame 'Eriyatsaxi meta yunaime 'ukirawetsixi 'ixaheritsixi:
NUM 32:3 —'Ataruti kwieyari meta Riwuni, Katsexi, Nimira, Hetsiwuni, 'Eraré, Tsewani, Newu metatsiere Wehuni,
NUM 32:4 Yawé tatsiparewiekaku mana tepɨtehayu'iwaxɨ 'ixaheritsixi wahetsiemieme mayanikɨ, 'ayumieme 'aixɨa pɨ'ane 'ikɨ 'ateɨterima watewama wahetsiemieme.
NUM 32:5 Xɨka yapera'eriwani ketaneupitɨa mɨkɨ takwie temayeitɨanikɨ. Tame pepɨkatatsi 'anuwitɨkɨni hapa Kurutani hatuxameyaritsie 'anutaɨye paitɨ.
NUM 32:6 Hikɨ Muitsexi mɨpaɨ katiniwarutahɨawe Xuweni nuiwarimama meta Kahari: —¿Kamɨtsɨ 'aixɨa ti'ane xe'iwama xeikɨa memuyukwitɨweni xemeta 'ena xetetiteni xeikɨa?
NUM 32:7 'Ixaheritsixi mɨpaɨ meputiyuane kwie Yawé mɨwayetuiritsie mepɨye'axɨani, xɨka mɨpaɨ xe'uyɨni mɨkɨ xekayuwaɨriyatɨ xepakɨne.
NUM 32:8 Mɨpaɨ mekaniɨyɨnitsiere xe'ukiyarima kepauka ne nemɨwarenɨ'a kwie memɨxeiyayukɨ Karetsi-Waxineya.
NUM 32:9 Mekanekɨne kwie mekanexeiya mayeweri 'Etsikuri, kepauka memu'axɨa, mekaniwarutiweranariya 'ixaheritsixi, Yawé kwie hakewa mɨwareyetuiri mana memɨkaye'axɨanikɨ.
NUM 32:10 Mɨkɨ tukaritsie Yawé waɨkawa kaniuyeha'ani yurikɨ mɨpaɨ kaniutayɨni:
NUM 32:11 “Yu'iyarikɨ xemɨkanetsi'u'enikɨ, nixewitɨtɨma xeitewiyari wiyari heimana mexeiya 'Ekipitu memɨyekɨ kwie kapɨxeiya 'Apɨrahami, 'Itsahaki meta Kakuwu nemɨwaruxatɨa.
NUM 32:12 Mekanixeiyakuni xeikɨa Karewi Kepune nu'aya Keni tewiyari, mɨkɨri Kutsuhexi Nuni nu'aya, mɨkɨ xeikɨa yu'iyarikɨ mekaneni'eniekaitɨni, hipatɨri hawaikɨ mekapixeiya”.
NUM 32:13 Yawé kaniuyeha'ani waɨkawa 'ixaheritsixi wahepaɨtsita, makumawetsie mekaniu'uwakaitɨni huta tewiyari wiyari, kepaukake memukwi mɨkɨ yunaitɨ 'axamemɨte'uyuriekai.
NUM 32:14 »Xemeta hikɨ 'axateyuruwamete, yaxeikɨa xekateniyurikuni xepaapama wahepaɨ Yawé haxɨaya tawarita xekaninɨitɨakuni 'ixaheritsixi wahetsiemieme.
NUM 32:15 Xɨka xeme xeka'uyuwaɨriya Yawé kemaine, mɨkɨta yaxeikɨa makumawetsie 'ikɨ teɨteri kaniwatixɨrimɨkɨ, xemetsɨ teɨteri xekaniwaka'unakuni».
NUM 32:16 Hutarieka mɨkɨ Muitsexi mɨpaɨ mekateniutahɨawe: —Kuraru tepɨtiwewieni tatewama wahetsiemieme, meta kiekari tepɨtiwewieni taniwema wahetsiemieme.
NUM 32:17 Hikɨ ta'ɨrɨ teti'ɨme tepanuyeyaxe 'ixaheritsixi wahɨxie muwapaitɨ tepɨwareye'atɨani hakewa paitɨ memeyuhayewa. Taniwema peru 'aixɨa kiekaritsie meteheukutekaku wahetsie munuakakɨ mana kiekatari mewarukwinikɨ.
NUM 32:18 Takie kwitɨwa tepɨka'akunuaxɨani kepaukake 'ixaheritsixi yunaitɨ yukwie meme'axe.
NUM 32:19 Tame mɨkɨ wahamatɨa tixaɨtɨ tapiini tepɨkatehayeitɨani haa manuyehane Kurutani 'anutaɨye timieme, tame tahetsie timieme 'ena pɨta pɨtikupine haa manuyehane tau manatineika hepatsie.
NUM 32:20 Muitsexi mɨpaɨ katiniwarutahɨawe: —Xɨka xeyuwaɨriyani mɨpaɨ xemuyɨni, yu'ɨrɨ xeketeneutipika hikɨmɨtɨka tekaniyukwiyuni.
NUM 32:21 Xekenanukɨni Kurutanitsie yu'ɨrɨ xete'upitɨ, Yawé xeparewiekaku xekeneuyutakuya kepaukake yunaime xemɨwara'iwa.
NUM 32:22 Kepauka Yawé kwie mɨtatsiyetuirienitsie, hikɨ 'ana xekanakunuaxɨakuni yukie, mɨpaɨ xeyɨme xekatenaye'atɨakuni Yawé hetsiemieme metatsiere 'ixaheritsixi wahetsiemieme. Yawé mɨxehetimakɨ 'ikɨ kwie xehetsiemieme payani.
NUM 32:23 »Peru xɨkata xeyuti'imani, mɨpaɨ xeketenemaika 'axaxekateniyurieka Yawé hetsiemieme. Peru xepɨkateheuyehɨwiyarieni 'axaxemɨte'uyurikɨ.
NUM 32:24 Xekeneutiwewi kiekari xeniwema wahetsiemieme, meta kuraru xetewama wahetsiemieme, meta xekatenaye'atɨakuni kexemutiyua».
NUM 32:25 Kahari nuiwarimama meta Xuweni nuiwarimama mɨpaɨ Muitsexi mekateniutahɨawe: —Tame 'anɨ'arima yatekateniyurikuni Yawé kemɨti'aita.
NUM 32:26 'Ena Karaha kiekariyaritsie mekaniyuhayewakuni taniwema, tawakaitsixi meta tamuxatsi,
NUM 32:27 peru tame 'anɨ'arima tekananɨkɨnikuni Kurutanitsie ta'ɨrɨ te'u'ɨtɨ tekaniwatakwikuni Yawé memaye'unie, mɨkɨ kemɨti'aita.
NUM 32:28 Hikɨ Muitsexi mawari wewiwame 'Eriyatsaxi mɨpaɨ katiniutahɨawe, meta Kutsuhexi Nuni nu'aya metatsiere 'ixaheritsixi 'ukirawetsixi:
NUM 32:29 —Xɨka Kahari meta Xuweni wanuiwarima Kurutanitsie yu'ɨrɨ me'u'ɨtɨ me'anukɨne memuyukwiyukɨ kwie xemɨ'axekɨ, Yawé kemaine, xeme xekaniwayetuiriekuni 'ikɨ kwie Karaha kwieyari.
NUM 32:30 Xɨkata meka'anukɨne, mɨkɨ kwie mekani'axikuni xehamatɨa Kanani paitɨ.
NUM 32:31 Kahari meta Xuweni wanuiwarima mɨpaɨ mekaniutiyuani: —Tame 'anɨ'arima yatepɨtekakɨne Yawé kemaine.
NUM 32:32 Mɨkɨ kemaime, tekananɨkɨnikuni ta'ɨrɨ te'u'ɨtɨ Kanani kwieyaritsie. Tapiini mɨrayani peru 'uwapɨta katinikupika Kurutani 'anataɨye.
NUM 32:33 Hikɨ Muitsexi kaniwayetuirieni Kahari meta Xuweni nuiwarimama, metatsiere Manatsexi Kutse nu'aya nuiwarimama hixɨapa memɨ'axe, ti'aitame Tsikuni kwieya 'amuxeutsixi tiwa'aitɨwame, ti'aitame 'Uhuki kwieya Watsani kiekariyaritsie ti'aitame. Niwayetuirieni kwie kemɨyeukai naime kiekari mana mukumanekai, tatsɨari kiekari naime mɨkɨ kwieyaritsie mɨmiemetɨkai.
NUM 32:34 Kahari nuiwarimama kiekari mekaniutiwewieni Riwuni, 'Ataruti, 'Aruhexi,
NUM 32:35 'Ataruti-Tsupani, Katsexi, Yukiweya,
NUM 32:36 Weti-Nimɨra metatsiere Weti-'Arani. Kiekari 'aixɨa mɨ'anene hepaɨ mekateniwewieni metatsiere kuraru mekaniutiwewieni muxatsi wahetsiemieme.
NUM 32:37 Metatsiere mekanitiwewieni kiekari Hetsiwuni, 'Eraré, Kiriyatahini,
NUM 32:38 Newu, Wahari-Mekuni metatsiere Tsiwima, mekanipataxɨani kemɨtitetewakai.
NUM 32:39 Makixi nuiwarimama Manatsexi nu'aya Karaha mekananɨkɨne mekane'iwa, mana memɨtitekai 'amuxeutsixi mekaniwarukwini.
NUM 32:40 Hikɨ 'ayumieme Muitsexi Makixi Kutse nu'aya Manatsexi nuiwarimama mɨkɨ Karaha kwieyari kaniwayetuirieni, mɨkɨ mana mekaniyuhayewa.
NUM 32:41 Meta Yahixi Manatsexi nu'aya hipame kiekari kaniwara'iwa, mɨkɨ Kawuti-Yahixi katiniuterɨwa.
NUM 32:42 Nuwa Kenati kana'iwa meta nuiwarimama 'auriena mamanetɨka, mɨkɨ kwieyari yuhepaɨ katiniuterɨwa.
NUM 33:1 Kepauka 'ixaheritsixi 'Ekipitu memayekɨ Muitsexi meta 'Aruni mewaruwitɨximekaku, mekaniuhukaitɨni yunaitɨ kuyaxi wahepaɨ.
NUM 33:2 Yawé Muitsexi ti'aitɨakaku katinaka'utɨwakaitɨni hakewa memeye'axekai hakewa memekɨkakai. Mɨpaɨ mekateniɨkɨne:
NUM 33:3 Mexɨakame metseritsie tamamata heimana 'auxɨwi 'umiekaku, xeitukari 'anukamiekaku Patsikwa 'ixɨarariyari me'uwewieka, mekanayekɨne 'ixaheritsixi Xamɨtsexi mɨrakutewatsie. Mete'ayu'iwaka 'ekipitutari wahɨxie mekanayekɨne,
NUM 33:4 mɨkɨ mexixi yuniwema matɨari miemete mewateukutɨwekai, Yawé mɨwarukwikai kwiniyakɨ. Yaxeikɨata yaputayɨkai kakaɨyarixi 'ekipitutari wahepaɨtsita.
NUM 33:5 'Ixaheritsixi Xamɨtsexi mekaniyekɨne, Tsukuti mekaniu'axɨani.
NUM 33:6 Manata memɨyekɨ Tsukuti, 'Etami mekaniu'axɨani, makumawe kwieyari manuye'atɨka.
NUM 33:7 Manata memɨyekɨ 'Etami, mekanakunuaxɨani Pi-'Akiruti, Wahari-Tsepuni tau manatineika hepatsie, Mikiruri hɨxie mekaniu'axɨani.
NUM 33:8 Manata memɨyekɨ Pi-'Akiruti mekananukɨne haramaratsie makumawetsie mekaniu'axɨani. Mana me'u'uwatɨ makumawetsie haika tukari 'Etami mɨrakutewatsie Maraha mekanitiyaxe.
NUM 33:9 Manata Maraha memɨyekɨ 'Erimi hepa mekanekɨne, mana kanitinenierekaitɨni tamamata heimana huta haixateyari meta haika tewiyari heimana tamamata takɨ 'amɨpapa mati'u, hikɨ mana mekanitiyaxe.
NUM 33:10 'Erimi memɨyekɨ Haramara Mɨxeta 'aurie mekaniu'axɨani.
NUM 33:11 Haramara Mɨxeta 'aurie memɨyekɨ Tsini makumawetsie mekaniu'axɨani.
NUM 33:12 Makumawetsie Tsini memɨyekɨ Ruka mekaniu'axɨani.
NUM 33:13 Ruka memɨyekɨ, 'Arutsi mekaniu'axɨani.
NUM 33:14 'Arutsi memɨyekɨ, Xepirini mekaniu'axɨani, hakewa 'ixaheritsixi haa memanuharenikɨ memɨkahexeiyakai.
NUM 33:15 Xepirini memɨyekɨ, Tsinahi makumawetsie mekaniu'axɨani.
NUM 33:16 Makumawetsie Tsinahi memɨyekɨ, Kiwuruti-Hatawa mekaniu'axɨani.
NUM 33:17 Kiwuruti-Hatawa memɨyekɨ, Katseruti mekaniu'axɨani.
NUM 33:18 Katseruti memɨyekɨ, Xima mekaniu'axɨani.
NUM 33:19 Xima memɨyekɨ, Ximuni-Peretsi mekaniu'axɨani.
NUM 33:20 Ximuni-Peretsi memɨyekɨ, Riwina mekaniu'axɨani.
NUM 33:21 Riwina memɨyekɨ, Xitsa mekaniu'axɨani.
NUM 33:22 Xitsa memɨyekɨ, Tserata rakutewakaku mekaniu'axɨani.
NUM 33:23 Tserata memɨyekɨ, Tsepexi hɨriyaritsie mekaniu'axɨani.
NUM 33:24 Tsepexi hɨriyaritsie memɨyekɨ, Karara rakutewakaku mekaniu'axɨani.
NUM 33:25 Karara memɨyekɨ, Makeruti rakutewakaku mekaniu'axɨani.
NUM 33:26 Makeruti memɨyekɨ, Takati rakutewakaku mekaniu'axɨani.
NUM 33:27 Takati memɨyekɨ, Teraki rakutewakaku mekaniu'axɨani.
NUM 33:28 Teraki memɨyekɨ, Mitika rakutewakaku mekaniu'axɨani.
NUM 33:29 Mitika memɨyekɨ, Katsimuna rakutewakaku mekaniu'axɨani.
NUM 33:30 Katsimuna memɨyekɨ, Mutseruti rakutewakaku mekaniu'axɨani.
NUM 33:31 Mutseruti memɨyekɨ, Wene-Yakani rakutewakaku mekaniu'axɨani.
NUM 33:32 Wene-Yakani memɨyekɨ, Kikahari hɨriyaritsie mekaniu'axɨani.
NUM 33:33 Kikahari hɨriyaritsie memɨyekɨ, Kutiwata rakutewakaku mekaniu'axɨani.
NUM 33:34 Kutiwata memɨyekɨ, 'Awuruna rakutewakaku mekaniu'axɨani.
NUM 33:35 'Awuruna memɨyekɨ, 'Etsihuni-Kewexi rakutewakaku mekaniu'axɨni.
NUM 33:36 'Etsihuni-Kewexi memɨyekɨ, Karetsi mekaniu'axɨani Tsini makumawetsie.
NUM 33:37 Karetsi memɨyekɨ, Huxi hɨriyaritsie mekaniu'axɨani 'Erumi kwieyari manuye'atɨka.
NUM 33:38 Yawé yahainekaku 'Aruni Huxi hɨriyaritsie nanutiyani, mana kaniumɨni mexɨakame tukaritsie 'auxɨwirieka metseritsie, huta tewiyari wiyari 'anuyemiekaku kepauka 'ixaheritsixi memayekɨ 'Ekipitu.
NUM 33:39 'Aruni kaniumɨni Huxi hɨriyaritsie xeitsienituyari heimana xeitewiyari heimana haika (123) wiyari hɨtɨ.
NUM 33:40 Ti'aitame kananeu tewiyari 'Arari mɨti'aitakai, Nekexi kiekame Kanani kwieyaritsie meta 'Ara, katinetimani kename 'ixaheritsixi 'ahurawa me'uhukai.
NUM 33:41 Huxi hɨriyaritsie memɨyekɨ, Tsarimuna rakutewakaku mekaniu'axɨani.
NUM 33:42 Tsarimuna memɨyekɨ, Pununi rakutewakaku mekaniu'axɨani.
NUM 33:43 Pununi memɨyekɨ, 'Uwuti rakutewakaku mekaniu'axɨani.
NUM 33:44 'Uwuti memɨyekɨ, 'Iye-'Awarini rakutewakaku mekaniu'axɨani, Muhawi kwieyari manuye'atɨka.
NUM 33:45 'Iye-'Awarini memɨyekɨ, Riwuni Kahari rakutewakaku mekaniu'axɨani.
NUM 33:46 Riwuni Kahari memɨyekɨ hikɨ 'Arimuni-Riwuratahini rakutewakaku mekaniu'axɨani.
NUM 33:47 'Arimuni-Riwuratahini memɨyekɨ hikɨ 'Awarini hɨriyaritsie mekanitiyaxe, Newu mɨrakutewa 'aurie.
NUM 33:48 'Awarini hɨriyaritsie memɨyekɨ, Muhawi makuweritsie mekaniu'axɨani, Kurutani 'aurie, Keriku hɨxie.
NUM 33:49 Kurutani 'utɨma mekanikuyaxe Weti-Yetsimuti meye'atɨkaitɨ 'Aweri-Tsitini me'unieretɨ, Muhawi kwieyari makuweritsie.
NUM 33:50 Muhawi makuweritsie, Kurutani 'aurie, metatsiere Keriku 'aurie, Yawé Muitsexi mɨpaɨ katiniutahɨawe:
NUM 33:51 «'Ixaheritsixi mɨpaɨ ketiniwarutahɨawi, kepauka Kurutanitsie memanɨkɨne kepauka Kanani memɨye'axɨani,
NUM 33:52 yunaime mana kiekatari mekaniwarayeweiyakuni yunaime wakakaɨyarixima memɨxixiyatɨka meta tepɨakɨ memɨwewiyatɨka mekaniwaka'unakuni. Metatsiere keniwaruta'aitɨa watukite memɨti'unakɨ,
NUM 33:53 xɨka xetehayu'iwa mana xepɨtiyaxe mɨkɨ kwieyaritsie nemɨxeyetuiri.
NUM 33:54 Mɨkɨ kwie pekaniwatawiyatsitɨamɨkɨ 'inɨarikɨ, 'iwamarixi hɨkɨa meke'ukuyaxixɨani. Kemɨ'ane nuiwari kwinimieme memɨyɨpaɨmeni mɨkɨ matsi kwie 'ayeukame mekani'axikuni, metatsiere kemɨ'ane yakɨ memɨyupaɨmeni mɨkɨ 'etsiyeume mekani'axikuni. Kemɨ'ane 'inɨarikɨ memi'axe mɨkɨ tiwapiini katinayeimɨkɨ, yunaitɨ nuiwari kememɨyupaɨmeni mɨpaɨ yeyeukame mekani'axikuni.
NUM 33:55 »Xɨkata xekawarayeweiya mana kiekatari hakewa xemetiyaxe, xɨka pɨta mana xewaruhayewa, mɨkɨ teɨteri 'uxa'awarie mekanixe'uximatɨakuni, xehɨxita mɨreuwiwieni hepaɨ yatɨni xuya xe'akita maweni hepaɨ.
NUM 33:56 Hikɨ ne 'anapɨta kexemɨwayurienikekai xemepɨta mɨpaɨ nekanixeyurimɨkɨ».
NUM 34:1 Yawé Muitsexi mɨpaɨ katiniutahɨawe:
NUM 34:2 «'Ixaheritsixi memɨtemaikakɨ mɨpaɨ ketiniwarutahɨawi Kanani kwieyari hakewa meuye'atɨka, kwie xehetsiemieme mayani, mana kaniuye'atɨkani:
NUM 34:3 »Tahetɨa manuye'atɨkatsie kanitsutɨkamɨkɨ Tsini makumawetsie, 'Erumi kwieya mata'atɨkatsie. Tau manatineikatsieta, Haramara Mɨmɨki mayema manuyeniere tahetɨa manuye'axe mana katinawiyakamɨkɨ.
NUM 34:4 Manata mɨyeyani xekwie manuye'atɨkani, tau makayuyuipike hepatsie, Terɨkaxi mematihetsie wahepa, makumawe Tsini kaniuyeyeimɨkɨ Karetsi-Waxineya paitɨ, Katsaxi-'araxi meta 'Atsimuni kaniye'atɨkaimɨkɨ.
NUM 34:5 Manata 'Ekipitu 'akiyaritsie kaneukayunimɨkɨ haramara Meritexaniyu mata'atɨka mɨye'anikɨ.
NUM 34:6 »Kwie manuye'atɨkani tau makayuyuipike hepatsie mieme haramara mata'atɨka tetsita kaniuye'atɨkaimɨkɨ.
NUM 34:7 »Kwie manuye'atɨkani tayeta manuye'atɨkatsie haramaratsie heukawetɨ hɨri 'Uxi mɨtitewatsie,
NUM 34:8 manata 'Uxi mɨyeyani Rewu Kamati paitɨ. Manata mɨyeyani Tserari kaniye'amɨkɨ,
NUM 34:9 manata mɨyeyani Tsipuruni paitɨ, Katsaxi-'Enahani mɨrakutewatsie kaniuye'amɨkɨ. Xekwie manuye'atɨka mɨkɨ kanayeimɨkɨ tayeta muyekatsie.
NUM 34:10 »Xekwie manuye'atɨkani tau manatineika hepatsie mieme, Katsaxi-'Enahani kanitsutɨamɨkɨ, Tsepani mɨrakutewatsie kaniukayeimɨkɨ.
NUM 34:11 Tsepani mɨyeyani Xiwɨra kaneukayunimɨkɨ, 'Ahini tserieta mukuma, mana mɨyeyani tau manatineika kaneutayunimɨkɨ harakuna Kinereti tetsitayaritsie ye'anike,
NUM 34:12 manata Kurutani hatuxameyari 'utɨma kaneukayunimɨkɨ, Haramara Mɨmɨki mɨtitewatsie kaniye'amɨkɨ. »Mɨkɨ naukatɨ xekwieyari manuye'atɨka kanayeimɨkɨ».
NUM 34:13 Muitsexi 'ixaheritsixi mɨpaɨ katiniwaruta'aitɨani: «'Ikɨ kwie kanihɨkɨtɨni xeyu'iwatɨwetɨ xemitawiya. Yawé mɨpaɨ kanaineni 'atanauka heimana 'imeriyu nuiwari xeikɨa mekanitawiyakuni,
NUM 34:14 Xuweni meta Kahari, metatsiere Manatsexi nuiwarimama hixɨata me'atɨ yukwie memu'axixɨkɨri.
NUM 34:15 'Ikɨ huta nuiwariyari heimana 'imeriyu yukwie mekanexeiyakaitɨni tau manatineika hepatsie, haa Kurutani manuyehane 'aurie, Keriku 'anutauye, tau manatineika hepa».
NUM 34:16 Yawé Muitsexi mɨpaɨ katiniutahɨawe:
NUM 34:17 «'Ikɨ teɨteri kwie memɨyetuani mekanihɨkɨtɨni wakwie mayanikɨ: mawari wewiwame 'Eriyatsaxi meta Kutsuhexi Nuni nu'aya.
NUM 34:18 Xemeta, xeime xekanitahɨawikuni yunuiwaritsie, mɨxeparewienikɨ kwie mɨxeyetuirienikɨ».
NUM 34:19 Kememɨtetetewakai memanuyetekai nuiwaritsie: Karewi Kepune nu'aya, Kura nuiwarimama wahetsiemieme,
NUM 34:20 Tsamuheri 'Amihuri nu'aya, Tsimehuni nuiwarimamatsie.
NUM 34:21 'Erirari Kitsiruni nu'aya, Wenikamini nuiwarimamatsie,
NUM 34:22 Wukihi Kukiri nu'aya, Rani nuiwarimamatsie,
NUM 34:23 Kaniheri 'Epuri nu'aya, hixɨapa memɨ'axe Manatsexi Kutse nu'aya nuiwarimama wahetsiemieme.
NUM 34:24 Kemuheri Tsipitani nu'aya, manuyeka 'Epɨrahini Kutse nu'aya nuiwarimama wahetsie,
NUM 34:25 'Eritsapani Parinaki nu'aya, manuyeka Tsawuruni nuiwarimama wahetsie,
NUM 34:26 Paritiheri 'Atsani nu'aya, manuyeka 'Itsakaxi nuiwarimama wahetsiemieme,
NUM 34:27 'Akihuri Tserumi nu'aya, manuyeka 'Atsexi nuiwarimama wahetsiemieme,
NUM 34:28 Peraheri 'Amihuri nu'aya, manuyeka Nepɨtahari nuiwarimama wahetsiemieme.
NUM 34:29 Yawé 'ikɨ kaniwaruhɨritɨani kwie 'ixaheritsixi memɨwayetuirienikɨ, Kanani kwieyaritsie.
NUM 35:1 Muhawi makuweritsie, haa manuyeka Kurutani 'aurie, Keriku 'anutaɨye, Yawé Muitsexi mɨpaɨ katiniutahɨawe:
NUM 35:2 «Mɨpaɨ ketiniwaruta'aitɨa 'ixaheritsixi kepauka memɨteyetuiriyarieni, rewitsixi kiekari mekaniwayetuiriekuni mana memɨtitenikɨ, naime kwie 'auriena mahane.
NUM 35:3 Mɨpaɨ 'ana rewitsixi mekaneixeiyakakuni yukiekari mana memɨtiteni meta kwie mekanexeiyakakuni wamuxatsima meta yutewama wahetsie mieme.
NUM 35:4 »Kwie xemɨwayetuirieni rewitsixi mana memɨtetihɨwenikɨ kiekari 'aurie kanahanekamɨkɨ, kiekari kuraruyaritsie 'auxɨwime tsienituyari heutatewakametsie.
NUM 35:5 Kiekari hakewa meye'atɨka, mana xekani'inɨatakuni xeimiriyari meturuyari tau manatineika hepatsie, hɨkɨapɨtata xeimiriyari meturuyari, tau makayuyuipike hepata xeimiriyari meturuyari metatsiere kiekari yeta meutiyunetsie xeimiriyari meturuyari. 'Ikɨ kwie kanayeimɨkɨ mana memɨtetihɨwenikɨ yukiekari 'aurie.
NUM 35:6 »Kiekari rewitsixi memɨyetuiriyarieni, 'ataxewitɨ kiekari yu'awiwietame kanakɨnimɨkɨ. Mana xewitɨ muyuti'awieta kaniyɨwemɨkɨ tiuyumieme. 'Ikɨ kiekari mɨ'ataxewi, tawarita 'akuxi xekaniwayetuiriekuni huta tewiyari heimana huta.
NUM 35:7 Naitɨ kanayeikani huta tewiyari heimana 'atahaika kiekari yukwie memɨtehatihɨweni heuyutinɨkame mɨpaɨ xekateniwayetuiriekuni.
NUM 35:8 Kiekari kepaɨmeme 'ixaheritsixi rewitsixi memɨwayetuirieni yukwie memumikietsietɨtɨ mieme yuxexuitɨ nuiwarite, kememɨyupapaɨmeni mɨpaɨ katini'inɨatsiemɨkɨ. Tatsɨari kemɨ'ane kwinie memɨyupaɨmeni waɨkawa kiekari mekaniyetuakuni, kemɨ'aneta nuiwari yakɨmemɨyupaɨmeni yakɨpaɨmeme kiekari mekaniyetuakuni».
NUM 35:9 Yawé Muitsexi mɨpaɨ katiniutahɨawe
NUM 35:10 'ixaheritsixi mɨpaɨ mɨtiwatahɨawekɨ: «Kepauka Kurutani hatuxameyaritsie xemanukɨne, Kanani xemɨ'axɨani,
NUM 35:11 kiekari meke'utiwauni yu'awiwietame, mɨyɨweni muwa memɨyu'awietanikɨ kemɨ'ane ka'imaime xeime mɨmieni.
NUM 35:12 Mɨkɨ tewi kaniyɨwemɨkɨ muwa muyu'awietanikɨ tikɨhɨwiyarienikɨ. Mɨpaɨ pɨkamierieni mɨtiuyumi teɨteri mekataxanetsitɨariewekaku.
NUM 35:13 »Kiekari 'ataxewitɨ kanayeimɨkɨ xemenuyewaunikɨ kiekari yu'awiwietame mɨhɨkɨtɨnikɨ.
NUM 35:14 Haikatɨ kaniti'ukamɨkɨ Kurutani hatuxameyari manuyeka tau manatineika hepatsie, haikatɨta Kanani kwieyaritsie.
NUM 35:15 'Ikɨ kiekari 'ataxewitɨ yu'awiwietame kanayeimɨkɨ 'ixaheritsixi wahetsiemieme meta 'ateewa kiekatari, mana kiekatari yatɨni tsepa mana memɨkakiekatari. Kemɨ'ane mɨtiuyumi ka'imaime, mɨkɨ kiekaritsie muyuta'una kaniyɨwemɨkɨ.
NUM 35:16 »Xɨka xewitɨ tepɨakɨ tiuyuwani, xɨka mɨkɨ tewi muweiya 'umɨni, mɨtiuyuwa katiniyumiekametɨni, mɨkɨta ke'umierieni.
NUM 35:17 »Xɨka xewitɨ tetekɨ xeime 'utuaxa, xɨka mɨkɨ mutuaxie 'umɨni, mɨtiuyutuaxixɨ katiniyumiekametɨni, mɨkɨta ke'umierieni.
NUM 35:18 »Xɨka xewitɨ kɨyekɨ tiuyuwani, xɨka mɨkɨ mukuweiyaxɨa 'umɨni, mutiuyuwa katiniyumiekametɨni, mɨkɨta ke'umierieni.
NUM 35:19 Mumierie 'iwaya tiyumiekame pukuwaune. Kepauka mikaxeiya kanimiemɨkɨ.
NUM 35:20 »Xɨka xewitɨ xeime 'utamieyu 'umɨni yɨkɨ ti'anemekɨ, yatɨni tixaɨtɨ mɨreitahɨwirikɨ yɨkɨ tiku'eriwatɨ,
NUM 35:21 yatɨni mihutsukɨ 'eye'unietɨ, kemɨ'ane mimi katiniyumiekametɨni mɨkɨta ke'umierieni. Mumierie 'iwaya tiyumiekame pukuwaune. Kepauka mikaxeiya kanimiemɨkɨ.
NUM 35:22 »Heiwa yakatiniuyɨweni xewitɨ 'atsikara'eriwatɨ xeime kanetaimamɨkɨ, yatɨni xeime kaniutuaximɨkɨ,
NUM 35:23 yatɨni ka'imaime tete xeimetsie kaniukahɨamɨkɨ, xɨkata mɨkɨ tewi 'umɨni. Mɨkɨ memɨka'ayuye'uniekai, mɨka'ima mɨtikwinitɨanikɨ,
NUM 35:24 hikɨ mɨkɨ teɨteri mekateniyurikuni, 'ikɨ 'aitsika kemaine mexeiyatɨ, 'aixɨa mekateniyurikuni mɨxanetsie hetsiemieme meta mixaneta hetsiemieme,
NUM 35:25 teɨteri hetsiena mɨrahɨiwa hetsie mekanitanuakuni, mekanitatuakuni kiekari muwayu'awieta tawarita munuanikɨ, muwa keyuhayewani, mawari wewiwamete tiwa'aitɨwame hatseiti mɨpatsie mukawiriyarie mɨyuke kaniwayeyeimɨkɨ.
NUM 35:26 »Xɨkata mukuweiyariene wayeyani kiekari hakewa meyu'awieta kwieya maye'atɨka 'anayeyani,
NUM 35:27 meye'unie mimieni kaniyɨwemɨkɨ, hetsiena pɨkarahɨiyani xɨka mɨpaɨ tiuyurieni 'ateewa paitɨ 'uyeikakaku.
NUM 35:28 'Ayumieme mukuweiyariene mɨkɨ kiekaritsie keyuhayewani mayu'awietatsie kepaukake mɨmɨni mawari wewiwamete tiwa'aitɨwame. 'Anake kaniyɨwemɨkɨ munuanikɨ yukwietsie.
NUM 35:29 »'Ikɨ 'aitsika ke'aye'atɨariwani yunaime 'anuiwari wahetsiemieme, tsepa hakewa xeme'uwa.
NUM 35:30 »Yuwaɨkawatɨ xeikɨa yamehaitɨkaikaku pɨyɨweni xewitɨ mumierieni mɨtiuyumi. Xewitɨ xeikɨa yahainekaku pɨkayɨweni xewitɨ mɨmierieni.
NUM 35:31 »Yapepɨkatinaki'erieka mɨtawikweitsitɨarienikɨ kemɨ'ane mɨmierienikɨ hetsiena mɨtiunakixɨ. Mɨkɨ ke'umierieni.
NUM 35:32 »Metatsiere yapepɨkatinaki'erieka mɨrayukatuayani muyu'awieta yukwietsie munuanikɨ mawari wewiwamete tiwa'aitɨwame kamɨwekaku.
NUM 35:33 »Kwie xemanu'uwatsie xepɨkatsewiximaka. Xuriya kepauka mɨtayeuriyani kwie ka'itiyatɨ kanayeimɨkɨ, kemɨ'ane xuriya mutayeuri mɨkɨ xuriyayakɨ xeikɨa kwie kani'itiyamɨkɨ.
NUM 35:34 »Kwie ka'itiyakame pepɨka'ayeitɨaka hakewa pemeyeikatsie, neta mana nekaniuyeikani, karikɨ ne Yawé nekanihɨkɨtɨni 'ixaheritsixi watsata nemuyeika».
NUM 36:1 Karaha nuiwarimama wa'ukiyarima Muitsexi hetsɨa mekananukɨne meta hipame 'ixaheritsixi memanuyetei wahetsɨa. Karaha Makixi kaninu'ayatɨkaitɨni, Manatsexi teukarieya, mɨkɨ nuiwari Kutse hetsie mekaniyekɨne.
NUM 36:2 Mɨpaɨ mekateniwarutahɨawe: —Kepauka Yawé mɨmatsi'uta'aitɨa kwie 'ixaheritsixi pemɨwayetuirienikɨ, metatsiere pɨmatsi'uta'aitɨa ta'iwa Tserupekari kwieya niwemama 'ukari pemɨwayetuirienikɨ.
NUM 36:3 Neuxei, xɨkata mɨkɨ 'ukitsi mewarutiwitɨni xeime nuiwaritsie miemete, wakwie meta tanuiwaritsie miemetɨkai mɨkɨ kemɨ'ane nuiwaritsie miemete memɨwarutiwitɨ mɨkɨ wakwie pɨtari kanayeimɨkɨ. Hikɨtari tame takwie tekaneuyehɨpani yayeume pemɨtatsiyetuiri.
NUM 36:4 Kepauka maye'ani mematatuiwa wiyariyari, mɨkɨ kwie kemɨ'ane nuiwaritsiemiemete memɨwaruwitɨkɨ mɨkɨ wahetsiemieme kanayeimɨkɨ, tametari takwie tekaneuyehɨpani taniwema wahetsiemieme.
NUM 36:5 Hikɨ Yawé yahainekaku, Muitsexi 'ikɨ 'aitsika 'ixaheritsixi kaniwayetuirieni: —Kutse nuiwarimama heitseriekamekɨ mekaniutiyuaneni.
NUM 36:6 Tserupekari niwemama 'ukari, wahetsiemieme Yawé mɨpaɨ katina'aitani: Mɨkɨ mepɨyɨwawe tsepa kemɨ'ane memɨwarutiwitɨ, perutsɨ Kutse nuiwarieya hetsie xeikɨa.
NUM 36:7 'Ixaheri kwieyaritsie mɨpaɨ pɨkatiyɨaneni kwie xeinuiwaritsie mieme tawarita xeime nuiwaritsiemieme pɨka'ayeikani, yuxexuitɨtsɨ 'ixaheritsixi mekaneixeiyani yuhɨritɨarika memi'ɨwiyanikɨ yukwie watutsima memɨwayetuiri.
NUM 36:8 Yunaitɨ 'ukari tsepa kemɨ'ane nuiwariyari, kwie xɨka 'umikieni, 'uki ke'utiwitɨni yunuiwaritsie mieme. Mɨpaɨ xɨka xe'aneni xeyunaitɨ 'ixaheritsixi xekaneixeiyakakuni yukwie xepaapama memɨxe'umi.
NUM 36:9 Xewitɨ kwie xeime nuiwaritsie pɨka'uyuyuipikeni, yuxexuitɨ nuiwari 'Ixaheri hetsiemiemete meke'i'ɨwiyani yukwie memumikie.
NUM 36:10 Hikɨ Tserupekari niwemama yamekatenikakɨne Yawé Muitsexi kemɨtiuta'atɨakai.
NUM 36:11 Mɨpaɨ mekatenitetewakaitɨni 'ukari: Makira, Tiritsa, Kukɨra, Mirika meta Nuha. Mɨkɨ yu'iwama yateewa mekaniwarutiwitɨni,
NUM 36:12 Manatsexi Kutse nu'aya nuiwarimama wahetsiemiemete, mɨpaɨ 'ana wakwie wahetsiemieme kaniuyuhayewa meta mɨkɨ nuiwari hetsiemieme.
NUM 36:13 'Ikɨ 'aitsika meta 'inɨari niukiyari kanihɨkɨtɨni Yawé 'ixaheritsixi mɨwayetuiri, Muitsexi yatikɨhɨawekaku, Muhawi makuweritsie haa manuyehane Kurutani 'aurie, Keriku hɨxie.
DEU 1:1 'Ikɨ niuki kanihɨkɨtɨni Muitsexi muwarutaxatɨa 'ixaheritsixi yunaime, makumawetsie 'uyeikatɨ Kurutani 'akiyaritsie tau manatineika hepatsie, tatsɨari, 'Arawa mayeweritsie Tsupi hɨxie, Parani meta Tuperi watsata Rawani Katseruti meta Ritsahawi.
DEU 1:2 Huré hɨriyaritsie yeyame Karetsi-Waxineya paitɨ mɨye'ani tamamata heimana xeitukariyari petewakai Tsehixi hɨriyaritsie meutiyune huyeyari 'utɨa 'umietɨ.
DEU 1:3 Merikɨtsɨ huta tewiyari wiyari 'aye'aku kepauka 'ixaheritsixi 'Ekipitu memayekɨtsie mexɨakame tukaritsie tamamata heimana xeimetseriyaritsie, Muitsexi 'ixaheritsixi pɨwarutahɨawixɨ Yawé kemɨtiwaruta'aitɨakai hepaɨtsita memeye'atɨanikɨ.
DEU 1:4 Meta te'aitamete yuhutame puwara'iwakairi 'amuxeutsixi 'ikɨ memɨhɨkɨtɨkai: Tsikuni ti'aitame Hetsiwuni kwieyaritsie mieme, 'Uhuki ti'aitame Watsani kwieyaritsie mieme 'Atsitaruti kiekame meta 'Erurehi kwieyaritsie.
DEU 1:5 Muitsexi pɨwarutaxatɨa 'inɨari niukiyari kepauka 'akuxi Muhawi kwieyaritsie Kurutani 'akiyaritsie taumanatineika hepatsie memɨtitekai 'ixaheritsixi mɨpaɨ katiniwarutahɨawe:
DEU 1:6 «Kepauka 'akuxi Huré hɨriyaritsie temɨtitekai, Yawé Takakaɨyari mɨpaɨ pɨtatiuta'aitɨa: “Xeme mɨixa xekaniyurieka 'ikɨ hɨritsie xe'u'uwatɨ,
DEU 1:7 Xekeneyukuha'aritɨaka xekenehu muhɨriyatsie 'amuxeutsixi mematiteitsie, meta kiekari 'auriena mamanetɨkatsie 'Arawa, mɨhɨriyatsie, muyemuriyatsie tau makayuyuipike hepatsie, Nekexi meta haramara tetsita kananeutsixi wakwieyaritsie Riwanu meta 'Eupɨrate hatɨayari 'amɨpatsie paitɨ xemɨye'axɨani.
DEU 1:8 Ne nekanixeyetuirieka 'ikɨ kwie xekena'iwa xeyukwitɨwetɨ”. Yawé mɨpaɨ pɨtiwarutahɨawekai xetutsima kename wayetuirienikekai tatsɨari 'Apɨrahami, 'Itsahaki, Kakuwu meta nuiwarimama.
DEU 1:9 »'Iya tukaritsie mɨpaɨ nepɨtiwarutahɨawixɨ: “Ne neyuxaɨtame yunaime nepɨkaxekema.
DEU 1:10 Yawé xekakaɨyari kanixe'utimɨiriya, 'ayumieme hikɨ xekaniyuwaɨkawani xurawetsixi muyuawitsie miemete wahepaɨ.
DEU 1:11 Matsi Yawé, tapaapama wakakaɨyari, kexe'utimɨiriya hikɨ kexemɨyupaɨme xeimiriyarimexɨa tawarita, meta 'aixɨa yemekɨ kexeyurieka mɨkɨ kemutayɨ.
DEU 1:12 ¿Kehepaɨri ne netiyɨwenikeyu naime hepaɨtsita yanetiyurienetɨ ketita 'axaxemɨteyurie, xe'ikakɨ meta xeme kexemɨteyukwitɨwekɨ?
DEU 1:13 'Ayumieme yuxexuitɨ yunuiwaritetsie xekeniwarutihɨawi hipame 'ukitsi waɨkawa memɨtemaiwawe, waɨkawa memɨtemate memɨyɨwawe, mɨkɨ memanuyetei memakɨnekɨ”.
DEU 1:14 »Xeme mɨpaɨ xepɨnete'uta'ei: “Kepemaine kepemɨtiku'eriwa 'aixɨa pɨ'ane yemekɨ”.
DEU 1:15 'Ayumieme ne nekaniwaruhɨritɨani xenuiwaritsie miemete 'ukitsi memɨtemaiwawe meta memɨtemate, nekaniwaruhɨritɨani heitserie memexeiyanikɨ xehetsiemieme 'itsɨkate wahepaɨ me'anetɨ. Yuxexuime hipame nekaniwaruhɨritɨani xeimiriyari, hipameta xeitsienituyari, hipameta huta tewiyari heimana tamamata, hipameta tamamata, meta hipame yunuiwaritsie teparewiwamete memɨhɨkɨtɨnikɨ.
DEU 1:16 Meta 'ana, xe'itsɨkate mɨpaɨ nekanitiniwaruhɨritɨani: “Naime tita 'uximatɨarika memɨtehexeiyani heitseriekamekɨ 'aixɨa xeketeneyurieka yu'iwama watsata, yemekɨ xekeniwanɨtɨaka xepɨkatekuhayeikawani, 'ixaheritsixi wahetsie meta teewatari wahetsie.
DEU 1:17 Yunaime yaxeikɨa xeketeniwaparewieka, memɨkatɨrɨkawi meta memɨtɨrɨkawi. Xeime xepɨkamakaka, matsi Kakaɨyari pɨta 'aixɨa tiyuruwame kanihɨkɨtɨni. Xɨka kwinimieme ti'aneni xeme xemɨka'ikema hɨkɨtɨni, nehetsɨa xekeniwa'atɨa ne 'aixɨa nemɨtiyurienikɨ”.
DEU 1:18 »'Ana, ne naime nekatinixe'utaxatɨani kehepaɨ xeme xemɨtekahunikekai.
DEU 1:19 »Yatepɨtekakɨ Yawé kemainekai takakaɨyari, tekanayekɨne Huré hɨriyari manuka muhɨriyatsie 'amuxeutsixi wakwiepa te'erietɨ. Mana tekaniukɨne makumawe 'amakuyewatsie makumariwetsie xeme mana xekaniuneniere, mana te'akɨneka Karetsi-Waxineya tekaniu'axɨani.
DEU 1:20 Hikɨ ne mana mɨpaɨ nepɨtixehetahɨawixɨ: “'Ari tekaniuta'axɨani mɨhɨriyatsie 'amuxeutsixi wakwieyaritsie, kwie Yawé takakaɨyari mɨtatsiyetuirietsie.
DEU 1:21 Xekeneuxeiya, Yawé xekakaɨyari kwie kanixeyetuirieniri. Xekenehu yukwie xekenayeitɨa Yawé kemɨtixehahɨawekai, xetutsima wakakaɨyari. Xepɨkamamaka meta xepɨka'utiweranareni”.
DEU 1:22 »Matsi xeme xeyunaitɨ mɨpaɨ xepɨnete'utahɨawixɨ: “Tepɨwaranunɨ'ani hipame ta'iwama meri mɨkɨ kwie memɨxeiyayukɨ, meta memɨtatetaxatɨanikɨ kehepaɨ temɨtekɨne meta kemɨ'ane kiekaritetsie temeye'axɨani”.
DEU 1:23 »Kexemutiyua 'aixɨa puyɨ, 'ayumieme tamamata heimana yuhutame nekaniwaranayexeiya xe'iwama, yuxexuime xeinuiwaritsie miemete.
DEU 1:24 Tamamata heimana yuhutatɨ mekanekɨne mɨhɨriyatsie, mayeweritsie 'Etsikuri mekaniye'axɨani mana kwie mekaniuxeiya.
DEU 1:25 Mana timieme hipame 'ikwaxi mekateniukatɨni, mekatateni'atɨirieni meta mekatateniutaxatɨani kwietsie ke'aixɨa mɨre'anekai Yawé takakaɨyari mɨtatsixatɨa.
DEU 1:26 »Matsi, xeme xepɨka'uyuwaɨriyaxɨ mana xemeutiyunekɨ Yawé xekakaɨyari kemɨtixe'u'aitɨakai xepɨka'anu'eni.
DEU 1:27 Xekaniutiniukixieni yuxamaruta, mɨpaɨ xekaniutiyuani: “Yawé pɨtatsi'uxiwe'erie, mɨkɨ pɨtatsi'ayewitɨ 'Ekipitu kwieyaritsie, 'amuxeutsixi wahetsɨa mɨtatsiyetuanikɨ xeikɨa mɨkɨ memɨtatsihakumaweriyakɨ.
DEU 1:28 ¿Hakewari tepeyehu? Ta'iwama kwinimieme mekatatenimariutani, mɨkɨ mɨpaɨ mekaniutiyuaneni kename mana kiekatari waɨkawa mehetɨrɨkawi meta kwinimieme mehetɨtɨ, kename wakiekari hemamariwawe meta kename wakuraru muyuawitsie paitɨ heye'atɨka. Matsi 'imatɨrieka, mɨpaɨ mekaniutiyuaneni kename mana 'anakitsixi mewarexei”.
DEU 1:29 »Hikɨ 'ana mɨpaɨ nepɨtixe'uta'ei: “Hawaikɨ xepɨkaheumamaka meta mɨkɨ xepɨkawareumakaxeni.
DEU 1:30 Yawé xekakaɨyari xehɨxie paitɨ 'anuyekaitɨ kaniumieni, mɨkɨ xehetsiemieme kaniyutamiemɨkɨ, 'Ekipitu kexemɨtehenenierixɨ kemɨreyuri hepaɨ
DEU 1:31 meta makumawetsie. Meta huyeta xemuhukaitsie, meta kemɨtixe'atɨa 'ena paitɨ, xeme xekatenimaika Yawé takakaɨyari kemɨtixe'utɨxime, tewi yuniwe muyurie hepaɨ”.
DEU 1:32 »Mɨyatɨtɨ, xeme nixewitɨ hetsiena pɨkatiuwi Yawé takakaɨyari hetsie,
DEU 1:33 mɨkɨ panuyekatei xehɨxie xekuwawirienike hakewa xemetiyaxe. Tɨkarikɨ tai hepaɨ 'anetɨ pumiekai xehamatɨa, huye xemɨxeiyanikɨ kexemɨtehu, tukarikɨ hai hepaɨ 'anetɨ pumiekai xehamatɨa.
DEU 1:34 »Kepauka Yawé xeme xeniukixiekame mɨxe'u'eni, 'ana kaniuyeha'ani, hikɨ mɨpaɨ kaniutayɨni:
DEU 1:35 “Nixewitɨ tewi 'ikɨ nuiwari 'axamemɨte'u'iyaritsie mieme mɨkɨ kwie 'aixɨa mɨ'ane pɨkaxeiya watutsima nemɨwayetuirienikekai nemainekai.
DEU 1:36 Karewi xeikɨa kanixeiyamɨkɨ Kepune nu'aya. Mɨkɨ meta nuiwarimama nekaniwayetuiriemɨkɨ kwie ke'aneme hetsie make, Yawé hetsie tiwiyatɨ muyuhayewakaikɨ”.
DEU 1:37 »Xeme xete'uyurieku Yawé neta kaneniuyeheka, mɨpaɨ kanetiniutahɨawe: “'Ekɨta yaxeikɨa mɨkɨ kwietsie pepɨkaheutahani.
DEU 1:38 Kutsuhexi Nuni nu'aya matsiparewiwame xeikɨa kaneutahamɨkɨ. Keneuparewi waɨkawa muyuwaɨriyanikɨ, mɨkɨ katiniyurimɨkɨ 'ixaheritsixi mɨkɨ kwieyaritsie mɨwaye'atɨani.
DEU 1:39 Meta xeniwema 'etsimemɨtɨtɨ, 'akuxi 'atsimemɨkatemate tita 'aixɨa mɨti'ane meta 'axamɨti'ane, mɨkɨ menawarienike xemɨwa'eriekai, mɨkɨ hɨrixɨa mepeutahaxɨani mɨkɨ kwieyaritsie meta yukwie mepayeitɨani, ne nekaniwayetuirieniri.
DEU 1:40 Xeme matsi hikɨ, xekenakunuaxɨa makumawetsie. Xekeneuhuni Haramara Mɨxeta hepatsie”.
DEU 1:41 »Xeme mɨpaɨ xekaniutiyuani: “Tame 'axatepɨte'uyuri Yawé hepaɨtsita. Peru tekanihuni tekaniwakwiyuni Yawé takakaɨyari kemɨtatiuta'aitɨa”. Hikɨ 'ana yuxexuitɨ xeme xekaniyukuha'aritɨani xemɨyukwiyukɨ, mɨpaɨ xeteku'eriwatɨ kename kakwaniwe hɨritsie xemɨtiyunekɨ.
DEU 1:42 »Matsi Yawé mɨpaɨ kanetiniutahɨawe: “Mɨpaɨ ketiniwarutahɨawi mepɨkahekɨkani mepɨkayukwitɨweni, ne wahamatɨa nepɨka'uyeikani. Xɨka meka'ukunuaxɨani, mepɨwarekwini memɨwaraye'unie”.
DEU 1:43 »Ne mɨpaɨ nepɨtixe'utaxatɨa, peru xeme xepɨka'anu'enana. Yawé kemainekai xepɨka'enu'eni, xeme matsi xekaheu'enanatɨ xekananutikɨne hɨritsie.
DEU 1:44 Mana 'amuxeutsixi memɨtamakai mekanayekɨne mexe'anukunakeke, mekaxenanukuweiya xietexi wahepaɨ, mekanixeha'iwa Tsehixi memɨyekɨ Kuxima paitɨ mekaniye'axɨani.
DEU 1:45 Hikɨ xeme xe'u'axɨaka, xekaniutitsuani Yawé hɨxie, matsi mɨkɨ pɨkaxe'u'eni kexemɨteyuhiweriekai.
DEU 1:46 'Ayumieme xeme, Karetsi mɨrakutewatsie mɨixa wiyari xekanititekaitɨni.
DEU 2:1 »Hikɨ 'ana tekanekɨne makumawetsie Haramara Mɨxeta mayema hepatsie, Yawé kemɨnerahɨawekai. Mɨixa tepuyuri Tsehixi hɨriyari warita te'anakukɨneke.
DEU 2:2 Hikɨ Yawé mɨpaɨ kanetiniutahɨawe:
DEU 2:3 “Xeketeneuhayewari 'ikɨ hɨritsie xe'u'uwatɨ, tayeta hepa pɨta xekenehu.
DEU 2:4 Mɨpaɨ ketiniwarutahɨawi teɨteri: ‘Kwitɨwari yu'iwama wakwietsie xekaniuyekɨnikuni, 'Etsahu xiɨyarimama wakwietsie, Tsehixi memɨtitei. Tsepanetɨ mɨkɨ memɨxemakaxe, yumarima xekeneuhuni,
DEU 2:5 mɨkɨ xepɨkawakwitɨweni, mɨkɨ wakwie 'etsiwa tɨma ne nepɨkaxeyetuirieni, keyeume xemeuketsinatɨma. 'Etsahu xiɨyarimama nekaniwayetuirieni mɨkɨ kwie Tsehixi kwieyari.
DEU 2:6 Xeketeniwarupitɨa 'ikwai mana timieme xemɨtekwa'akɨ meta haa kepaɨmeme xemɨhare’”.
DEU 2:7 »Yamepɨtemate kename Yawé xekakaɨyari xeparewie naimekɨ kexemɨteyurie, meta xe'ɨwiya makumawetsie xe'u'uwakaku. 'Ikɨ huta tewiyari wiyari, Yawé xekakaɨyari xehamatɨa kaniuyeikani meta nitixaɨtɨ pɨkatixeheuyehɨwa.
DEU 2:8 »Hikɨ mana ta'iwama wakwietsie tekaniuyekɨne, mɨkɨ 'Etsahu xiɨyarimama Tsehixi kwieyaritsie memɨtama. Tekaniweiyakaitɨni 'Arawa huyeyari 'Erati matinena meta 'Etsihuni-Kewexi. 'Ariketa mana te'ukunuaxɨaka hikɨ tekanekɨne makumawetsie Muhawi kwieyaritsie.
DEU 2:9 »Yawé mɨpaɨta kanetiniutahɨawe: “Muhawitsixi xepɨkawarekwitɨweni, xepɨkawarehaxɨatɨaka, ne mɨkɨ wakwie 'etsiwatɨma nepɨkaxeyetuirieni. Ne mɨkɨ Ruti xiɨyarimama nekaniwayetuirieni 'Axi kwieyari”».
DEU 2:10 Meripaitɨ teɨteri mana mekanititekaitɨni yumɨiretɨ waɨkawa meyɨwawetɨ, mɨkɨ 'emitsixi mepɨhɨkɨtɨkai, kwinimieme meputɨtɨkai 'anakitsixi wahepaɨ.
DEU 2:11 Mɨkɨ meta 'anakitsixi teɨteri kwinimieme memutɨtɨ mepɨte'uterɨwarɨwakai, matsi muhawitsixi 'emitsixi mepɨtewaruterɨwakai.
DEU 2:12 Meripaitɨta hureutsixi Tsehixi mɨrakutewatsie mekanititekaitɨni, peru 'Etsahu nuiwarimama mekaniwarutaweiya mekaniwarutakwini, hikɨ wahuyeripa mekaniyuhayewa, kememɨteheyurieni hepaɨ 'ixaheritsixi Yawé hakewa kwie mɨwareyetuirienitsie.
DEU 2:13 «Yawé mɨpaɨ katatineta'aitɨani: “Xekeneuhuni. Xekenanukɨni Tsereri 'akiyaritsie”. Hikɨ mɨpaɨ tekateniukɨne.
DEU 2:14 'Anari xeitewiyari heimana tamamata heimana 'atahaika wiyari kananuyemiekaitɨni kepauka temayekɨtsie Karetsi-Waxineya meta temanukɨtsie Tsereri 'akiyaritsie 'inɨaritɨ. Merikɨte 'ana mepanuyekwikairi yunaitɨ meripaitɨ memɨyukukuyametetɨkai, Yawé kemutayɨkai.
DEU 2:15 Yawé kaniwaruta'axiya wakwitɨ, kaniwaranuyekwini yunaime.
DEU 2:16 »Kepaukari nixewitɨ mɨkayuhayewanekai meripaitɨ kuyaxi memɨhɨkɨtɨkai,
DEU 2:17 Yawé mɨpaɨ kanetiniutahɨawe:
DEU 2:18 “Hikɨri xekananukɨnikuni Muhawi kwieyaritsie 'Axi kiekariyaritsie.
DEU 2:19 Kepauka xemeta'axɨani 'amunitsixi wakwietsie Ruti nuiwarimama wahetsɨa, xepɨkawarekwitɨweni meta xepɨkawarehaxɨatɨaka, mɨkɨ wakwie 'etsiwatɨma nepɨkaxeyetuirieni. Mɨkɨ kwie Ruti nuiwarimama nekaniwayetuirieni”.
DEU 2:20 Mɨixa wiyari kananuyemieni, mɨkɨ kwieyari teɨteri 'amemutɨtɨ wakwie kanayeitɨariwakaitɨni, meripaitɨ mɨkɨ mana memɨtitekaikɨ. 'Amunitsixi mekateniwaruterɨwakaitɨni tsamitsumitsixi.
DEU 2:21 Mɨkɨ mekaniyumɨirekaitɨni waɨkawa mekanitɨrɨkawikaitɨni, yemekɨ 'amekaniutɨkaitɨni 'anakitsixi wahepaɨ, matsi Yawé 'amunitsixi waparewiekaku mekaniwaruka'una, hikɨ mewarayeweiyaka mana mekanikuyaxe.
DEU 2:22 Yawé yaxeikɨa katiniuyurieni 'Etsahu nuiwarimama wahetsiemieme, Tsehixi kwieyaritsie memɨtamakai, mɨkɨta waparewiekaku hureutsixi mekaniwaruka'una. Mɨkɨ mana kaniwarayeweiya 'Etsahu nuiwarimama mana memɨyuhayewakɨ, hikɨ 'akuxi mana mekanetiteni mɨpaɨ tiuyɨku.
DEU 2:23 Meta yaxeikɨa 'aweutsixi kiekari 'etsimɨyeyeutsie Kahatsa 'aurie memeutitekai, meta katuritsixi Kɨreta memeyekɨ mekaniwarukwini, 'anari mana metitetɨ mekanakɨne wahuyeripa.
DEU 2:24 »'Ariketa Yawé mɨpaɨ katatiniutahɨawe: “Hikɨtari hekwamekɨ xekeneyukuha'aritɨa. 'Axinuni 'akiyaritsie xekeneukɨni. Ne nekanixeyetuiriemɨkɨ Tsikuni 'amuxeu tewiyari meta naime kwieya, Hetsiwuni kiekariyaritsie mɨti'aita. 'Ari xekenaye'axɨa wakwie xemɨwanawairienikɨ. Mɨpaɨ xeketeniwarutahɨawi kename xewatakwini.
DEU 2:25 Hikɨri kwitɨwa nekanitsutɨamɨkɨ yanekatiniyurimɨkɨ memɨxemakaxenikɨ yunaitɨ nuiwarite 'ena kwiepa memɨtama. Kepauka nuiwarite memɨxetamarieni, mekanitimamakuni mekaneuyuyexɨrikuni marikakɨ mekanitiyɨyɨakakuni”.
DEU 2:26 »Makumawetsie paitɨ Karemuti mɨrakutewatsie tekutetɨ tupiritsixi nekaniwarenɨ'ani Tsikuni hetsɨa, Hetsiwuni kiekariyaritsie mɨti'aitame hetsɨa, 'ikɨ niuki kayuwatɨ tiyupitɨwamekɨ:
DEU 2:27 “Ketaneupitɨa 'akwietsie temuyekɨnekɨ, huye mɨheitserie 'utɨa xeikɨa tepɨyehu, xaɨtsie tepɨka'uyune ta'utata nitatserietatsie.
DEU 2:28 Tame tepɨteyutuani tita temɨtetikwani meta haa kepaɨmeme temanuhareni. Ketaneupitɨa xeikɨa mana temuyekɨnekɨ,
DEU 2:29 kememɨyɨ 'Etsahu nuiwarimama wahepaɨ, mana Tsehixi memɨtitei, meta muhawitsixi 'Axi memetitekai. Tame Kurutani hatuxameyaritsie tepukɨnekeyu kwie Yawé takakaɨyari mɨtatsixatɨatsie temɨye'axɨanikɨ”.
DEU 2:30 »Peru Tsikuni, Hetsiwuni kiekariyaritsie ti'aitame, yapɨkatiutanaki'eri mana temuyekɨnekɨ, Yawé takakaɨyari 'iyarieyatsie tse'ime mayeitɨakɨ, tame pɨta temɨte'ita'aitɨanikɨ, hikɨ ketemɨte'i'aitɨa.
DEU 2:31 Hikɨ Yawé mɨpaɨ kanetiniutahɨawe: “Hikɨ kwitɨwa nekanixeyetuiriemɨkɨ Tsikuni meta kwieya. Xekenayekɨni kwieya xema'iwakɨ, mɨkɨ yukwie xekenayeitɨa”.
DEU 2:32 »Kepauka Tsikuni mayetɨa yukuyaxima yunaime warawitɨtɨ, tatsitakwinike Yahatsa mɨrayetewatsie,
DEU 2:33 Yawé takakaɨyari kataniyetuirieni tekaniwara'iwa, yunaime niwemama meta yunaime kuyaximama.
DEU 2:34 'Ana naime kiekaritetsie tekaniye'axɨani, naime tekaniuka'una, yunaime tekaniwarukwini 'ukitsi 'ukarawetsixi meta tɨɨri. Nixewitɨ pɨka'uyuhayewaxɨ 'ayenieretɨ.
DEU 2:35 Tame xeikɨa tekateniwarehapani tewaxi meta tekatenepini kiekaritetsie temɨte'ukaxei mɨraye'atɨka.
DEU 2:36 'Aruhexi temikatsutɨa, kiekari 'Axinuni 'akiyari tetsita mukuma, meta Karaha paitɨ, nixewitɨ kiekari pɨkatatsi'a'iwaxɨ, Yawé takakaɨyari xexuime kiekarite pɨtatsiyetuiri.
DEU 2:37 Matsi Yawé takakaɨyari kemɨtatiuta'aitɨakai, tame 'amunitsixi wakwietsie tepɨkaye'axɨa, tatsɨari Kawuki 'akiyaritsie 'anutaɨye mukuma meta mɨkɨ hɨriyaritsie kiekari mukumanekaitsie.
DEU 3:1 »Kepauka temekɨ Watsani hepatsie, ti'aitame 'Uhuki mana mɨti'aitametɨkai, kanayeyani 'Erurehi mɨrakutewatsie kataninakekaitɨni. Kaniwarawitɨkɨkaitɨni yunaime yukuyaxima, 'ari metatsitakwinike.
DEU 3:2 Matsi Yawé mɨpaɨ kanetiniutahɨawe: “Hawaikɨ xepɨkaheumamaka, ne 'ari nekaniwayetuani xehetsɨa, yunaime kuyaximama meta naime kwieya kemɨyewa. Yaxeikɨa xekeneuyuri Tsikuni kexemeyuri, 'amuxeutsixi tiwa'aitɨwame, Hetsiwuni kiekame”.
DEU 3:3 »Mɨpaɨ katiniuyɨni. Yawé takakaɨyari kataniyetuirieni mɨkɨ ti'aitame Watsani kiekame meta yunaime kuyaximama. Tekaniwara'iwa, nixewitɨ pɨka'uyuhayewaxɨ.
DEU 3:4 'Ana naime kiekarite mana mieme tepuka'unaxɨ. Tahetsiemieme tepayeitɨa haika tewiyari kiekarite 'Axikuwi kwieyaritsie mukumanekai, 'Uhuki mɨra'aitakaitsie Watsani kwieyaritsie.
DEU 3:5 Naitɨ mɨkɨ kiekarite 'aixɨa kani'anenekaitɨni kuraruyari 'akanatitɨkaitɨni, 'itupari hexeiyatɨkaitɨ yukitenie meta kɨyexi pituikatɨkatei 'apapatɨ, meka'inɨaritɨ hipatɨ kiekarite 'etsimɨyeyeu kuraru mɨkahexeiyatɨkatei.
DEU 3:6 Yaxeikɨa ketemɨteheyuri Tsikuni hetsɨa, ti'aitame Hetsiwuni kiekame, naime kiekarite tekaniuka'una, 'ukitsi, 'ukarawetsixi meta tɨɨri tewakwitɨ,
DEU 3:7 matsi watewama tapiinite tepɨtehayeitɨa meta kiekaritsie temɨte'ukaxei mɨraye'atɨka.
DEU 3:8 »Mɨpaɨ katiniuyɨni 'iya tukaritsie tahetsiemieme mɨkɨ kwie tekanayeitɨani yuhutame te'aitamete 'amuxeutsixi wahetsɨa mumiemetɨkai, tatsɨari naime taumanatineika hepatsie mɨtiuyehane Kurutani hatuxameyaritsie, 'Axinuni 'akiyari manuyehanetsie Heximuni hɨriyaritsie paitɨ,
DEU 3:9 tsiruniyutsixi mɨpaɨ mepɨte'uterɨwakai Tsirihuni, 'amuxeutsixita Tsenixi.
DEU 3:10 Yaxeikɨata tapiini tepayeitɨa naitɨ kiekarite makuweweritsie, naitɨ Karaha meta naitɨ Watsani kwieyaritsie paitɨ, Tsarikaha meta 'Erurehi paitɨ, 'Uhuki mɨra'aitakai kiekariyaritetsie Watsahani mɨhɨkɨtɨkai.
DEU 3:11 Yurikɨ mɨkɨ, 'Uhuki Watsani kwieyaritsie ti'aitame mɨkɨ 'imatɨreme kanihɨkɨtɨkaitɨni 'amutewikai. Mɨkɨ hupumeya tepɨa kanihɨkɨtɨkaitɨni, nauka meturuyari heimana merie meturuyari kanitewikaitɨni 'aiwaritatsieta huta meturuyari pexeiyakai. Hikɨ 'akuxi kanehekɨaka mɨkɨ Xawaha 'amunitsixi wakiekaritsie.
DEU 3:12 »Kepauka mɨkɨ kwie tahetsiemieme temayeitɨa, Xuweni meta Kahari wanuiwarima nepɨwayetuiri 'Aruhexi yeta mukuma meta 'aki 'Axinuni manuyeka 'aurie mukuma, meta hixɨapa 'akame mɨhɨriya Karaha kwieyari yukiekari hexeiyakame.
DEU 3:13 Muyuhayewaxɨ Karaha kwieyari meta naime 'Uhuki mɨra'aitakaitsie, tatsɨari Watsani kwieyari, nepɨwayetuiri hixɨata me'arɨkame Manatsexi nuiwarimama. »Mɨpaɨ kani'aneni, naitɨ 'Axikuwi kwieyari Watsani kwieyaritsie mukuma katinimatiwani, 'amemutɨtɨ wakwie.
DEU 3:14 Xewitɨ Manatsexi nuiwarieya Yahixi titewatɨ, naime mɨkɨ 'Axikuwi kwieyari yuhetsiemieme kanayeitɨani ketsureutsixi wakwie maye'atɨkatsie paitɨ ye'atɨkaime meta makateutsixi wakwie maye'atɨkatsie, mɨkɨ Watsani kwieyari yuhepaɨ pɨta katiniterɨwa, Kawuti-Yahixi katiniterɨwa. Hikɨ 'akuxi yaxeikɨa katinakutewaka.
DEU 3:15 Karaha kwieyari Makixi nekaniyetuirieni,
DEU 3:16 Xuweni meta Kahari wanuiwarima nekaniwayetuirieni Karaha yetsutɨme 'aki 'Axinuni manuyeka 'uniereme, metatsiere Kawuki hatuxameyari manuyeka paitɨ, mɨkɨ 'amunitsixi wakwie maka'atɨka mɨwa'inɨariyari.
DEU 3:17 Wakwie maka'atɨka tau makayuyuipiketsie kanihɨkɨtɨkaitɨni Kurutani hatuxameyari, harakuna mayema Kinereti ye'atɨkaitɨ meta harakuna 'Arawa mayema paitɨ ye'atɨkaitɨ, mɨkɨ Haramara Mɨmɨki mɨtitewa, hɨri Pitsikaha mɨtitewa manuka paitɨ.
DEU 3:18 »'Ana ne mɨpaɨ nekatiniwaruta'aitɨani: “Yawé takakaɨyari kanixeyetuirieni 'ikɨ kwie yukwie xemayeitɨanikɨ. Xeme 'ukitsi xemɨtɨrɨkawi meta xemukuyaxi, 'anutaɨye xekenanukɨni xe'anuyetetɨ yu'iwama 'ixaheritsixi wahɨxie.
DEU 3:19 Kiekarite nemɨxeyetuiritsie xeikɨa mepɨtiteni xe'ɨitama, xeniwema meta xetewama ne nemɨtimate waɨkawa xemɨwarexeiya.
DEU 3:20 Xepɨkahahuni kwitɨwa kwie nemɨxeyetuiritsie, kepaukake Yawé xe'iwama mɨwaka'uxipitɨani xeme kemɨtixeyetuiri, kepaukake mɨkɨ kwie memɨ'axe Yawé takakaɨyari mɨwayetuirieni Kurutani 'anutaɨye mukuma”.
DEU 3:21 »Merikɨte 'iya tukaritsie 'ana Kutsuhexi mɨpaɨ nekatiniuhɨritɨani: “'Ekɨ Pekatiniuxeiya naime Yawé takakaɨyari kemɨwaruyuri mɨkɨ yuhutame te'aitamete. Yaxeikɨata kaniwayurimɨkɨ yunaime te'aitamete kemɨ'ane wahetsɨa pemɨye'ani.
DEU 3:22 Xepɨkawamakaxeni, Yawé 'akakaɨyari yurikɨ kaniyumieneni xehetsiemieme”.
DEU 3:23 »'Ana ne Yawé waɨkawamekɨ mɨpaɨ nekatiniutawawirieni:
DEU 3:24 “Yawé Kakaɨyari, 'ekɨ pekanitsutɨani ne mati'uximayatsiriwame penetixeitsitɨatɨ kepemɨtimariwe kepemɨtitɨrɨkaɨye, xewitɨ kakaɨyari pumawe muyuawitsie meta kwiepa mɨpaɨ tiyurienetɨ kepemɨtiyuriene meta mariweme kepemɨtiyuriwe.
DEU 3:25 Keneneupitɨa nemanuyanikɨ, meta nemixeiyakɨ kwie 'aixɨa mɨ'ane Kurutani 'anutaɨye mukuma, mɨkɨ witsimɨtiu'ane mɨhɨriya kwieyari, meta Riwanu mɨrakutewatsie”.
DEU 3:26 Peru xehetsiemiemekɨ Yawé kaneniuyeheka, pɨkanetsi'anu'eni, matsi 'ipaɨ pɨta kanetiniutahɨawe: “'Ari ketineuhayewa. Tawariri mɨkɨ hepaɨtsita pepɨkanetikuxaxatɨwani.
DEU 3:27 Kenanutiye'a pɨta Pitsikaha hɨriyaritsie, hikɨ mana keneutanierixɨa 'ayeta meta 'atsutɨatsie, 'atserietatsie meta 'a'utatatsie. Kwie keneuxeiya yemekɨ 'ahɨxitekɨ, mɨpaɨ nekanaineni 'ekɨ pekapanuyani Kurutani hatuxameyaritsie.
DEU 3:28 Kutsuhexi ketineutaxatɨa naime tita mɨreuyewetse, keneutuika waɨkawa muyuwaɨriyanikɨ, mɨkɨ pɨta kananuyeyerɨmɨkɨ 'ikɨ teɨteri mɨwaranuwitɨnikɨ meta mɨkɨ kaniwayetuiriemɨkɨ kwie pemɨxeiya”.
DEU 3:29 »Hikɨ 'ana mana tekaniyuhayewakaitɨni mayeweritsie, Weti-Pehuxi 'anutaɨyetsie.
DEU 4:1 »'Ixaheritsixi, 'ikɨ xekeneu'eni 'aitsika 'inɨari niukiyari kenemɨtixe'u'ɨkitɨa, kemaine yaxemɨtekahunikɨ. 'Ana mɨpaɨ xeteyurietɨ xekaneutahaxɨakuni 'iya kwieyaritsie Yawé tatutsima wakakaɨyari mɨxeyetuirietsie xekwie mayanikɨ.
DEU 4:2 'Ikɨ 'aitsika nemɨxeyetuiri xepɨkahenutiyayatsani xeiniukiyari meta xepɨkahenakaxɨrɨwani. Matsi pɨta Yawé takakaɨyari 'aitsikaya xekenaye'atɨwani.
DEU 4:3 »Xemeri xekaniuneniere Yawé kemɨtiuyuri Wahari-Pehuxi meta Yawé xekakaɨyari kemɨtiwaruka'unaxɨ tatsata ta'iwama kemɨ'ane kakaɨyari mana kiekame me'ayexeiyatɨ memakɨ.
DEU 4:4 Peru xeme, yunaitɨ kemɨ'ane heitseriemekɨ yaxemɨtekahukai Yawé takakaɨyari hetsie xetewiyatɨ, hikɨ 'akuxi xekanayeneniereni.
DEU 4:5 »Neuxei, neri nepɨtixe'uta'ɨkitɨa 'inɨari niukiyari meta 'aitsika Yawé nekakaɨyari kemɨnetiuta'aitɨa, xemeri mɨpaɨ xemɨtekakɨnekɨ mɨkɨ kwieyaritsie xe'axɨame xekwie mayanitsie.
DEU 4:6 Xekenaye'atɨaka meta yaxeketeneu'uwani, mɨpaɨ 'ana xepɨtematsiɨkɨre kename xete'uyemate xetemaiwawe hipame nuiwarite wahɨxie. Mɨkɨ mepitamarieni naime 'ikɨ 'inɨari niukiyari, hikɨ 'ana mɨpaɨ mepɨtiyuani: “Yurikɨ, 'ikɨ teɨteri mepɨte'akumate meta mepɨtemaiwawe, 'ikɨ nuiwari memɨmariwe mepɨhɨkɨ”.
DEU 4:7 Pumawe xewitɨ nuiwari tahepaɨ timariwetɨ. Pumawe nuiwari kakaɨyari mehexeiyatɨ 'ahurawa tahepaɨ Yawé takakaɨyari 'ahurawa temexeiya temehɨawe.
DEU 4:8 Tawarita xewitɨ nuiwari pumawe mariwetɨ 'inɨari niukiyari meta 'aitsika 'aixɨa 'anuyɨtɨkaime hexeiyatɨ, 'ikɨ naitɨ 'aitsika nemɨxekuxaxatɨwa hepaɨ 'anuyɨtɨkaime.
DEU 4:9 »Peru xeyukweriwayurietɨ xekeneu'enana, xepɨkatehatɨtɨmaiyani kexemɨte'unenierixɨ, mexi xe'ayeneniere yu'iyarikɨ xepɨkahetɨtɨmaiyani. Mɨkɨ xekeniwarutaxatɨa yuniwema meta yuteukarima.
DEU 4:10 Kepauka xeme Yawé Kakaɨyari hamatɨa xemu'uwakaitsie Huré, 'ana mɨpaɨ kanetinetahɨawe: “Keniwarukuxeɨri teɨteri nehɨxie memɨti'unikɨ meta neniuki memɨ'enienikɨ, memɨnetsimakaxenikɨ kwiepa kepaɨmexɨa memu'uwani, meta kenemɨtiwatahɨawe mɨpaɨta memɨtewata'ɨkitɨanikɨ yuniwema”.
DEU 4:11 Xeme 'ana xekaniyukuxeɨrieni mɨkɨ hɨritɨa, mana xekaniti'ukaitɨni, mexi mɨkɨ hɨri takai tai muyuawitsiepai kaniye'axekaitɨni, hai yɨyɨwitɨ mana kana'ukaitɨni meta mana kaniuyɨwikaitɨni.
DEU 4:12 Hikɨ 'ana Yawé kanixe'utahɨawe taitsiepaitɨ, xeme xekanei'enieni niukieya kemainekai, peru tixaɨtɨ xepɨkatehexei, niuki yuariyaya xeikɨa xepe'eniekai.
DEU 4:13 Yawé 'ana pɨxehetaxatɨa yutɨratu, tamamata 'aitsikayari, mɨkɨ meka'utɨa hutame tetexi wewerimetsie 'etsitsutsuimetsie, hikɨ 'ana pɨxeheta'aitɨa mɨpaɨ xemɨtekahunikɨ.
DEU 4:14 Meta 'ana Yawé pɨnetsiheta'aitɨa nemɨxeti'ɨkitɨanikɨ 'inɨari niukiyari meta 'aitsika xeme mɨpaɨ xemɨtekakɨnekɨ 'iya kwieyaritsie xekwie mayanitsie kepauka Kurutani hatuxameyaritsie xemanukɨne.
DEU 4:15 »Kepauka Yawé mɨxehetahɨawixɨ Huré yemuriyaritɨa, tai hepaɨ 'anekametsie, xeme tixaɨtɨ xepɨkatehexei. 'Ayumieme, xekeneyu'ɨwiyani waɨkawa
DEU 4:16 xepɨkayutsewiximaka kakaɨyarixi xewawewietɨ 'uki hepaɨ tiyuxexeiyame yatɨni 'ukaratsi hepaɨ tiyuxexeiyame,
DEU 4:17 yatɨni tewaxi meta yeutari yatɨni memɨte'awɨwawe,
DEU 4:18 Yatɨni yeutari kwiepa memɨtekumaketɨwe, yatɨni tsapari hapa memɨye'uwa kwie hetɨa paitɨ wahepaɨ mete'aneneme.
DEU 4:19 Matsi kepauka teikɨ xeheneniereme mana xemɨtexeiya naitɨ tita hetsiena mɨtixuawe muyuawitsie miemete xemɨwaxeiya —tatsɨari tau, metseri meta xurawetsixi— xɨka xekuyuitɨariwani xemɨwarayexeiyanikɨ, mɨkɨ xepɨkawarayexeiyani. Mɨkɨ muyuawitsie memeukatei Yawé takakaɨyari kaniwaranayexeiya, nuiwarite kwiepa memɨtama wakakaɨyarixima memɨhɨkɨtɨnikɨ
DEU 4:20 Peru xeme Yawé kanixe'ayewitɨni 'Ekipitutsie, mɨkɨ putsuta hakewa tepɨa mekwaxiyarie, xeme teɨterimama xemɨhɨkɨtɨnikɨ hetsɨana miemete, hikɨ kexemɨ'ane.
DEU 4:21 »Matsi, xehetsiemieme Yawé kaneniuyeheka, mɨpaɨ kanetiniutahɨawe kename ne 'anutaɨye neka'anuyanikekai Kurutani hatuxameyaritsie meta kename kwie 'aixɨa mɨ'anetsie nekaye'anikekai, Yawé takakaɨyari mɨxeyetuirietsie.
DEU 4:22 Neri 'ikɨ kwieyaritsie nekanimɨmɨkɨ neka'anuyeiwetɨ Kurutanitsie, xeme hɨrixɨa xekananɨkɨnikuni, mɨkɨ kwie 'aixɨa mɨ'anetsie xekanitiyaxikuni xekwie mayanitsie.
DEU 4:23 Kamɨtsɨ yumarima 'aixɨa, xepɨkahetɨtɨmaiyani Yawé xekakaɨyari tɨratu kemɨtiuwewi xehamatɨa. Hipame kakaɨyarixi xepɨkawawewieka yɨkɨ me'aneneme Yawé xekakaɨyari kemɨtixeku'imaiyakai,
DEU 4:24 karikɨ Yawé xekakaɨyari tai hepaɨ kani'aneni mɨtiyuxɨxɨtsitɨwa meta Kakaɨyari mɨ'ɨtetsa kanihɨkɨtɨni.
DEU 4:25 »Xɨka 'arike yuniwema xewarayexeiyame meta yuteukarima, meta xɨka manari mɨixa wiyari xetitetɨ, 'arike xɨka 'axaxete'uyurieni, xɨka xewarutiwewieni kakaɨyarixi tixaɨtɨmexi xetewa'ɨketɨ, mɨpaɨ 'axamɨti'ane xeteyurietɨ Yawé yukakaɨyari hɨxie xepiyehaxɨatɨani,
DEU 4:26 Hikɨ ne yanekanitayɨmɨkɨ muyuawi meta kwie memunenierixɨ mekanihɨkɨtɨkakuni xehetsiemieme, 'ikɨ Kurutanitsie xe'anɨkɨneme mɨkɨ xekwie mayanitsie kwitɨwa xekanakumawerikuni. Mana mɨixa wiyari xepɨkatihini, xekanakumaweriyariekuni yunaitɨ.
DEU 4:27 Yawé yayupaɨmeme xeikɨa kaniwahayewamɨkɨ, hipame nuiwarite watsata kaniwataxɨriexɨamɨkɨ.
DEU 4:28 Mana paitɨ xeme xepɨwarayexeiyani kɨyexi kakaɨyarixiyari meta tetexi, teɨteri wawewiya mepehɨkɨtɨni: kakaɨyarixi memɨkaheuneniere meta memɨkaheu'enana, memɨkatekwa'a meta memɨkateheu'ɨkwe.
DEU 4:29 »Mexɨka mana paitɨ pe'uyeikatɨ Yawé 'akakaɨyari pe'utiwauni yemekɨ 'a'iyarikɨ meta kepemɨti'amatekɨ pekanikaxeiyamɨkɨ.
DEU 4:30 Hikɨ 'uximatɨarikatsata pe'uyeikatɨ meta petiuka'eniwatɨ, mɨkɨ peheutiparitɨame pehakunuani Yawé 'akakaɨyari hetsɨa hikɨ pepi'enieni niukieya.
DEU 4:31 Karikɨ Yawé 'akakaɨyari mɨtiyukanenimaya kanihɨkɨtɨni, mɨkɨ pɨkamatsiku'eirieni meta pɨkamatsika'una, mɨkɨ pɨkahetɨmaiya tɨratu 'atutsima yatiwarahɨawetɨ mitawewi.
DEU 4:32 »Xekeneuyuta'iwawiya mɨme meripai kiekatari wahepaɨtsita kememɨte'uyurikɨ, 'iya tukaritsie kepauka Kakaɨyari tewi mutawewitsie 'ena kwiepa, meta naitsarie kwiepa mɨpaɨ ketineuta'iwau xɨka heiwa mieme mɨpaɨ tiuyɨni yatɨni mɨpaɨ tiumatsiɨkɨre mariwemekɨ hikɨ kemɨti'ane.
DEU 4:33 Hipatɨ teɨteri mepumawe Kakaɨyari me'u'enieka taipa warutahɨaweku, kehepaɨ 'ekɨ pemɨtiu'enaxɨ, meta 'ayenieretɨ 'uyeikatɨ yamɨtitaxatakɨ.
DEU 4:34 Xewitɨ tawari kakaɨyaritɨtɨ meutahanikɨ xeime nuiwaritsie pumawe, muwarayewitɨnikɨ yuhetsiemieme wata'inɨatame, 'inɨarite tiwewietɨ, kwinimieme yemekɨ mamariwawemekɨ, kuyaxa wewietɨ, yumamá tɨrɨkaɨyemekɨ tatseratɨ, waɨkawamekɨ makaxiwame, Yawé xekakaɨyari xehetsiemieme mɨtiuyuri hepaɨ 'Ekipitu, xeme xenenierekaku.
DEU 4:35 »Mɨpaɨ pɨtiɨyɨ mɨkɨ naitɨ 'ahɨxie 'ekɨ mɨpaɨ pemɨtimaikakɨ kename Yawé Kakaɨyari xeikɨa hɨkɨ, meta kename tawarita xewitɨ ka'uyeika.
DEU 4:36 Muyuawitsiepai yuniuki kaxeniu'enitsitɨiya, mɨpaɨ mɨmatita'ɨkitɨanikɨ. Meta kwiepa kameniuxeitsitɨani yutai kemɨtimariwe, mɨkɨtsie mɨmatsi'utahɨawixɨ.
DEU 4:37 Yawé waɨkawamekɨ pɨwanaki'eriekai 'atutsima, hikɨ wanuiwari kaniwaranayexeiya, 'ayumieme 'Ekipitu kameniyewitɨni yukɨmana mariwemekɨ tiyurienetɨ,
DEU 4:38 'ahɨxie kaniwaruka'una nuiwarite memɨmamariwawe memɨtɨrɨkawi 'ekɨ kepemɨkatitɨrɨkaɨye, mɨkɨ kwieyaritsie mɨmatsi'atɨanikɨ, mɨmatsiyetuirienikɨ, hikɨ kemɨtimatsiɨkɨ.
DEU 4:39 »Mɨpaɨ ketinetimati meta yurikɨ Yawé Kakaɨyari kenayeitɨwani taheima muyuawitsie meta 'ena kwiepa, meta kename tawarita xewitɨ ka'uyeika.
DEU 4:40 Yaketinekamieni 'inɨari niukiyaritsie meta naime 'aitsikayatsie hikɨ kenemɨmatiuta'aitɨa. Mɨpaɨ 'ekɨ meta 'anuiwarima 'aixɨa 'iyari mepu'uwani, meta mɨixa wiyari xekaniyurikuni mɨkɨ kwieyaritsie Yawé 'akakaɨyari mɨxeyetuirietsie yuheyemekɨ».
DEU 4:41 Hikɨ Muitsexi kiekarite haikame kananayexeiya Kurutani 'anutaɨye tau manatineika hepatsie,
DEU 4:42 mɨyɨwenikɨ mɨkɨ kiekaritetsie muyuti'awieta, xɨka xewitɨ yu'iwa 'umiieni kaheye'unietɨ ka'imaime. Mɨpaɨ 'ana mɨkɨ pɨyɨweni mana muyuta'unakɨ muyutawikweitsitɨanikɨ.
DEU 4:43 Xuweni nuiwarimama wahetsiemieme kananayexeiya Wetsexi makumawetsie mukuma makuweritsie, meta Kahari nuiwarimama wahetsiemieme Xamuti kiekariyari Karaha kwieyaritsie, meta Manatsexi nuiwarimama wahetsiemieme Kurani kiekariyari Watsani kwieyaritsie mukuma.
DEU 4:44 'Ikɨ 'aitsika kanihɨkɨtɨni Muitsexi 'ixaheritsixi teɨteriyari mɨwarutaxatɨa.
DEU 4:45 'Ikɨ kanihɨkɨtɨni 'aitsikate, mɨwakuxaxatɨwakai Muitsexi kepauka 'Ekipitu memeyekɨtsie,
DEU 4:46 kepauka 'akuxi Kurutani hepatsie memu'uwakai, mana makuweritsie 'ehurakaku Weti-Pehuxi mɨrakutewatsie. Mɨkɨ Tsikuni kanikwieyatɨkaitɨni, 'amuxeutsixi mɨtiwa'aitɨwametɨkai, mɨkɨ Hetsiwuni kiekariyaritsie mukatei, mana Muitsexi kaniwara'iwa meta 'ixaheritsixi kepauka 'Ekipitu memayekɨtsie.
DEU 4:47 'Ixaheritsixi mana yupiini mekanayeitɨani meta 'Uhuki mɨkwieyatɨkai Watsani kwieyaritsie ti'aitame, tatsɨari mɨme yuhutame te'aitamete 'amuxeutsixi, mɨkɨ mekanititekaitɨni Kurutani hepaɨtsitatsie.
DEU 4:48 Mɨkɨ kwie 'Aruhexi kanitsutɨkaitɨni, 'Axinuni hatɨayaritsie manuye'atɨkatsie paitɨ, meta Tsirihuni hɨriyaritsie paitɨ, tatsɨari Heximuni hɨriyaritsie.
DEU 4:49 Mɨkɨ naitɨ kanihɨkɨtɨni 'Arawa meta Kurutani kwieyari tau manatineika hepatsie mieme, 'Arawani haramarayaritsie paitɨ, Pitsikaha hɨriyari hetɨa.
DEU 5:1 Muitsexi yunaime 'ixaheritsixi kaniwarukuxeɨrieni, mɨpaɨ katiniwarutahɨawe: «'Ixaheritsixi, xekeneu'eni 'inɨari niukiyari meta 'aitsikate waɨkawa hikɨ ne nemɨxetaxatɨani. Xekenetimati mɨkɨ meta mɨpaɨ xeketeneu'uwani.
DEU 5:2 Yawé takakaɨyari tɨratu kaniuwewieni tahamatɨa Huré hɨriyaritsie.
DEU 5:3 Yawé mɨkɨ tɨratu muwewi tatutsima wahamatɨa pɨkatiuyuri, matsi tahamatɨa pɨtiuyuri, ketapaɨmetɨ hikɨ 'ena temu'uwa.
DEU 5:4 Yawé tai hetsie pɨxe'utahɨawixɨ xe'anutaxeiyatɨ mɨkɨ hɨritsie.
DEU 5:5 'Ana ne tihekɨatame nepatɨa Yawé kemɨtixekɨhɨawekai, nemɨtixekuxaxatɨwanikɨ yemekɨ Yawé kemutainekai, xeme xemimakakaikɨ tai, xepɨka'anutikɨ hɨritsiepai. Yawé mɨpaɨ kaniutayɨni:
DEU 5:6 »Ne Yawé 'akakaɨyari nekanihɨkɨtɨni. Ne 'Ekipitu nekameniyewitɨni, mɨkɨ kwieyaritsie waɨriyarika peti'uximayakaku.
DEU 5:7 »Tawarita hipame kakaɨyarixi pepɨkawarayexeiyani nehɨxie.
DEU 5:8 »Nixeime kakaɨyari hepaɨ 'aneme pepɨkawewieka muyuawitsie miemetexi wahepaɨ meta kwiepa memɨte 'u'uwa wahepaɨ me'anenekame, meta kwie hetɨa haramaratsie miemetexi wahepaɨ.
DEU 5:9 Mɨkɨ wahetɨa pepɨka'utitunumakiekani meta pepɨkawarayexeiyani. Ne, Yawé 'akakaɨyari nemɨ'ɨtetsa nekanihɨkɨtɨni. Kepauka hipatɨ 'axamemɨte'u'iyari, kepauka memɨnetsixani'erie, ne waniwema, wateukarima meta watutsima paitɨ 'uximatɨarika nekaniwakupitɨwani.
DEU 5:10 Matsi, kepauka xemɨnetsinaki'erie meta kepauka ne'aitsika xemaye'atɨa, 'ana nenaki'eriya matsiɨkɨme nepayeitɨwa xeimiriyari xeniwema nuiwariyari wahetsie.
DEU 5:11 »Yakɨ xeikɨa Yawé xepɨka'utaterɨwani mɨxekakaɨyari. Ne Yawé nepɨkareiyehɨwirieni kemɨ'ane mɨnetsi'utaterɨwa yakɨ xeikɨa 'utaitɨ.
DEU 5:12 »Kena'eriwani xawati tukariyari, mɨkɨ tukari mɨpatsie Yawé 'akakaɨyari hetsiemieme kenayeitɨaka, mɨkɨ kemɨmatiuta'aitɨa.
DEU 5:13 'Ataxewime tukari xeikɨa ketine'uximayaka, mɨpaɨ paɨmeme tukariyaritsie naime kepemɨtiyurienikɨ ketine'uximayaka,
DEU 5:14 matsi 'atahutarieka tukari kena'eriwani 'uxipiya tukari mɨhɨkɨ 'ana pemeyexeiyanikɨ Yawé 'akakaɨyari. 'Ana 'etsiwatɨma pepɨkatikumaɨwani, 'aniwema 'ukitsi meta 'ukari, meta pemɨtiwa'aitɨa 'ukitsi 'ukari te'uximayatamete, meta 'atuurutsixi kwietsanamete, 'apuxuri, nixewitɨ tɨma 'atewama, meta 'ateewa kiekame 'akiekaritsie muka. 'Ana mɨpaɨ mepɨteka'uxipieni 'ukitsi 'ukari waɨriyarika te'uximayatamete, 'ahepaɨ yaxeikɨa.
DEU 5:15 Kena'eriwani waɨriyarika ti'uximayatame pematɨa 'Ekipitu, meta kena'eriwani Yawé 'akakaɨyari mana mɨmatsiyewitɨ waɨkawa mariweme tiyurienetɨ. 'Ayumieme Yawé 'akakaɨyari pɨmatsi'aitɨa peme'eriwanikɨ xawati tukariyari.
DEU 5:16 »Yaketinekamieni 'apaapa 'amaama kememaitɨka, yaxeikɨa Yawé 'akakaɨyari kemɨmati'aitɨa, mɨpaɨ petiyurienetɨ 'apepɨreutere 'ena kwiepa Yawé 'akakaɨyari mɨmatsiyetuirie.
DEU 5:17 »Pepɨkati'amemiwani.
DEU 5:18 Xeime 'ɨyaya yatɨni kɨnaya pepɨkakumaɨwani.
DEU 5:19 Pepɨkatinawayani.
DEU 5:20 'Itarikakɨ pepɨkatikuxatani 'ahepaɨ tewi hepaɨtsita.
DEU 5:21 Xeime 'ahepaɨ tewi 'ɨyaya pepɨkahiwe'erieka, meta kiiya pepɨkahiwe'erieka, meta kwieya, meta ti'uximayatsiriwame 'uki meta 'uka, meta tuuru kwietsanameya, meta puxuya, naime tita mɨtipiinieya.
DEU 5:22 »'Ikɨ Yawé kaniniukieyatɨni karima tai hetsie mitaxa, meta haiwitɨritsie metatsiere kwi 'uyɨwikaku, kepauka xeme hɨritɨa xemɨti'ukaitsie. Mɨpaɨ xeikɨa kaniutayɨni. Hikɨ kaneka'utɨani tetexi hutame wewerimetsie, 'ana kaneniyetuirieni.
DEU 5:23 »Kepauka xeme xemi'eni xewitɨ 'utaniukame yɨwikɨta, hɨri mɨtaka hepaɨ tiyuxexeiyakaku, yunaitɨ 'ana 'ukirawetsixi memanuyetei nuiwaritetsie, nehetsɨa mekaniu'axɨani
DEU 5:24 mɨpaɨ mekaneteniutahɨawe: “Yawé takakaɨyari matsiɨkɨme payeitɨa tahɨxie witsikemɨ'ane meta kemɨtimariwe, tepi'eni niukieya taitsie 'ayeneikame. Hikɨ mɨpaɨ tekatenetimani kename tukari hexeiyanitsiere tewi mɨmɨwe tsepa Kakaɨyari hamatɨana mɨtiutaxa.
DEU 5:25 Peru neuxei, nɨkahɨrixɨa te'ukwini. 'Ikɨ tai mɨmariwe pɨtatsi'ukwiwe xɨka 'akuxi te'iyeweiyani te'i'enietɨ Yawé takakaɨyari niukieya.
DEU 5:26 Xewitɨ tewitɨtɨ pɨka'uyeikanikeyu Kakaɨyari mayeniere 'u'enieka tai hetsie paitɨ, tame hikɨ ketemɨte'i'eni hepaɨ.
DEU 5:27 'Ekɨ 'ahurawa keneuye'a Yawé takakaɨyari hɨxie, naime ketine'eni kemɨmaretahɨawe. Hikɨ kemetayɨni 'arike tame yaxeikɨa ketatineuxatɨa, tame te'enaname yatepɨtekakɨne”.
DEU 5:28 »Yawé kaniu'ena xeme kepauka xemɨnetekuxaxatɨwakai, hikɨ mɨpaɨ kanetiniutahɨawe: “Nekaniu'ena 'ikɨ teɨteri kememate'utahɨawixɨ. Kememutiyua 'aixɨa kani'aneni.
DEU 5:29 Heiwatɨ wa'iyari yemekɨ yuwaɨririyani memɨnetsi'ayemakaxenikɨ meta memeye'atɨakakɨ naime ne'aitsika, mɨpaɨ mɨkɨ meta waniwema yuheyemekɨ 'aixɨa 'iyari memu'uwanikɨ.
DEU 5:30 »”Kenemie wahetsɨa mɨpaɨ ketiniwaretahɨawi mekehakunuaxɨani yuxamaruta.
DEU 5:31 'Ekɨ 'ena keneuyuhayewa 'akuxi nehamatɨa, naime nekamaniyetuiriemɨkɨ 'inɨari niukiyari, 'aitsikate waɨkawa 'ekɨ pemɨwati'ɨkitɨani, mɨpaɨ memɨtehe'uwanikɨ kwie nemɨwayetuirienitsie”.
DEU 5:32 »Kamɨtsɨ yumarima, yaxeketeneu'uwani Yawé xekakaɨyari kemɨtixe'uta'aitɨa, xaɨtsie xepɨkaheukuyuyuipikeni yutserieta niyu'utata.
DEU 5:33 Huye 'utɨa xekeneuhuni Yawé xekakaɨyari mɨxe'uta'utɨiri, xemayenenierenikɨ, 'aixɨa ti'aneme xemɨte'ukaxexeiyanikɨ meta mɨixa xemu'uwanikɨ kemɨ'ane kwieyaritsie xemɨ'axɨani.
DEU 6:1 »'Ikɨ kanihɨkɨtɨni 'inɨari niukiyari meta 'aitsika waɨkawa Yawé 'akakaɨyari mɨnetsi'uta'aitɨa ne nemɨmatsita'ɨkitɨanikɨ, mɨpaɨ xemɨtehe'uwanikɨ xema'axɨanitsie yukwie xemayeitɨanikɨ,
DEU 6:2 kepemɨreutere pe'uyeikatɨ 'ekɨ 'aniwema meta 'ateukarima pepeyexeiyani Yawé 'akakaɨyari naime 'inɨari niukiyaritsie yaxetekahutɨ meta 'aitsika waɨkawa nemɨmatsiyetuirie, mɨixa wiyari 'apemuyeikanikɨ.
DEU 6:3 'Ixaheritsixi, xekeneu'enana meta xekeneuyuwaɨriya yaxemɨtekahunikɨ. Mɨpaɨ 'aixɨa 'iyari xepu'uwani, teɨteri memɨyumɨire xepɨhɨkɨtɨni mɨkɨ kwieyaritsie hakewa waɨkawa retsi mexuawe meta xiete, kemɨxerahɨawekai Yawé, xetutsima wakakaɨyari.
DEU 6:4 »'Ixaheritsixi, xekeneu'enana: Yawé takakaɨyari puyuxewi xeikɨa.
DEU 6:5 Kenenaki'erieka Yawé 'akakaɨyari yeme 'a'iyarikɨ, naime kepemɨti'amate meta naime 'atɨrɨkariyakɨ.
DEU 6:6 'A'iyaritsie kena'eriwani 'ikɨ niuki hikɨ nemɨmatsi'aitɨa.
DEU 6:7 Yaketiniwakuxaxatɨwani 'aniwema. Keniwakuxaxatɨwani kepauka 'akie pemuka, meta kepauka huyeta pemumie, kepauka pemɨkakuximenitsie meta kepauka pemanukukenitsie.
DEU 6:8 'Amamatsie keneutapieka ha'ukame 'inɨari hepaɨ mɨmatsiɨkɨnikɨ, meta 'ahɨxie pemɨ'inɨaritɨariekakɨ 'ahetsiemieme peme'eriwanikɨ,
DEU 6:9 'akii kitsaraɨyaritsie kena'utɨaxɨa meta 'akiekari 'itupariyaritsie.
DEU 6:10 »Yawé 'akakaɨyari kamanipitɨamɨkɨ pemeutahanikɨ kwie mɨwarutaxatɨakaitsie 'atutsima 'Apɨrahami, 'Itsahaki meta Kakuwu. Mɨkɨ kwieyari kiekarite kanexeiyani kwinimieme timamariwaweme meta rexeiyatɨkaime 'ekɨ pemɨka'itiwewi,
DEU 6:11 kiite waɨkawa piinite tiuyepitɨkaime 'ekɨ pemɨkatiuxeɨri, meta putsu pexeiyatɨkani xemɨkawati'inixɨa, meta kaxie huriwu haraweriyari pexeiyatɨkani pemɨka'ika'e. Kepauka mɨkɨ pemɨtikwanitsie petahuxame,
DEU 6:12 keneyukweriwayurieka Yawé pemɨkahatɨtɨmaiyanikɨ, 'Ekipitu mɨmatsiyewitɨ, mɨkɨ kwieyaritsie waɨriyarika pemɨti'uximayatsitɨariekaitsie.
DEU 6:13 »Yawé 'akakaɨyari kenayemakaxeni, mɨkɨ xeikɨa kenayexeiyani, yaketineyuhɨritɨa mɨkɨ kemɨtitewakɨ.
DEU 6:14 Mɨkɨ teɨteri hipatɨ xe'aurie memahane wakakaɨyarixi xepɨkawarayexeiyani,
DEU 6:15 Yawé 'akakaɨyari 'ahamatɨa kaniuyeikani, Kakaɨyari mɨ'ɨtetsa kanihɨkɨtɨni, kapa waɨkawa 'uyeha'anikɨ 'ahepaɨtsita, nɨka 'ena kwiepa metsi'akuyeitɨani.
DEU 6:16 »Yawé 'akakaɨyari pepɨka'inɨataneni, Matsaha reyetewakaku xemɨte'uyuri hepaɨ.
DEU 6:17 'Amarima xeikɨa kenaye'atɨwani Yawé 'akakaɨyari 'aitsikaya, meta naime 'inɨari niukiyari mɨmatsiyetuiri.
DEU 6:18 Tita mɨtiheitserie tita 'aixɨa mɨti'ane yaketineyurieneni Yawé hɨxie, 'aixɨa 'iyari pemuyeikanikɨ meta mɨkɨ 'akwie pemayeitɨanikɨ 'aixɨa mɨ'ane Yawé 'atutsima mɨwaruxatɨakaitsie.
DEU 6:19 Yawé yunaime kaniwarayeweiyamɨkɨ memɨxe'aye'unie kepauka xemɨwaranukunanakeni, mɨkɨ kemɨtixe'utahɨawixɨ.
DEU 6:20 »'Uxa'atɨni warie, kepauka 'aniwe mɨmatsita'iwawiya: “¿Ketita ti'inɨariyari niuki meta 'aitsikate naitɨ Yawé takakaɨyari mɨxe'uta'aitɨa?”,
DEU 6:21 mɨpaɨ pekatinita'eiyamɨkɨ: “Tame 'Ekipitu Parahuni ti'aitame waɨriyarika tepɨte'i'uximayatsiriekai, peru Yawé mana kataniyewitɨni kwinimieme mariwemekɨ tiyurienetɨ tɨrɨkaɨyemekɨ.
DEU 6:22 Tahɨxie, Yawé mamariwawemekɨ 'inɨarite puwewi, meta kwinimieme 'aneneme 'uximatɨarika 'ekipitutari wahetsiemieme, Parahuni meta yunaime tɨɨriyamama wahetsiemieme.
DEU 6:23 Hikɨ mana kataniyewitɨni mɨtatsi'anuwitɨnikɨ 'iya kwieyaritsie tatutsima kemɨ'ane muwarutaxatɨakai kename tatsiyetuirienikekai.
DEU 6:24 Yawé takakaɨyari pɨtatsi'uta'aitɨa kename teke'eyemakaxeni meta temeye'atɨakaku 'aitsikaya, 'aixɨa 'anemekɨ temu'uwanikɨ, te'ayenenieretɨ. Hikɨ temɨte'u'uwa hepaɨ.
DEU 6:25 Xɨka yatetekahuni ta'iyarikɨ naime 'aitsikatsie Yawé takakaɨyari hɨxie, naimekɨ kemaine, merikɨte 'ana heitseriekamekɨ temu'uwa tekanihɨkɨtɨkakuni”.
DEU 7:1 »Yawé xekakaɨyari 'iya kwieyaritsie kanixe'atɨamɨkɨ mana yukwie xemayeitɨanikɨ, mana 'atahuta nuiwarite kaniwaka'unamɨkɨ 'ahɨxie waɨkawa memɨtɨrɨkawi kepemɨkatitɨrɨkaɨye 'ekɨ, mekanihɨkɨtɨni hetitsixi, keriketseutsixi, 'amuxeutsixi, kananeutsixi, peretseutsixi, heweutsixi meta kewutseutsixi.
DEU 7:2 Kepauka Yawé xekakaɨyari mɨxeyetuirieni meta kepauka xeme xemɨwara'iwa, 'ana kaneuyeweka yunaime xemɨwaka'unakɨ. Nixeime hamatɨa tɨratu xepɨkawewieka, meta xepɨkawanenimayaka.
DEU 7:3 Meta mɨkɨ nuiwarite wahetsɨa xepɨkaneɨketɨweni, yuniwema 'ukari mɨkɨ waniwema 'ukitsi xepɨkawatawitɨtɨwani, meta mana 'ukari xepɨkawaku'iwawani yuniwema wahetsiemieme,
DEU 7:4 Karikɨ mɨkɨ 'ukari mekateniyurikuni 'uxa'atɨni warie Ti'aitame hetsɨa humemuwaruyunitɨani meta mɨkɨ mekateniyurikuni hipame pɨta kakaɨyarixi mewarayexeiyame memuwarayeitɨani. Hikɨ 'ana Yawé waɨkawa kaniyeha'amɨkɨ xehetsiemieme, 'anari yapauka kamanika'unamɨkɨ.
DEU 7:5 »Mɨpaɨ xekaniwayurikuni mɨkɨ nuiwarite: Hakewa memɨtehetimawa xekaniti'unakuni, watetexi memɨwarayexeiya xekanititarakuni, 'uka 'Atserá kakaɨyariyari 'ɨkiyari xekanititarakuni meta hipame wakakaɨyarixi memɨwewiyatɨka xekaniwatitaiyakuni.
DEU 7:6 Karikɨ Yawé xekakaɨyari hetsiemieme xeme teɨteri xemɨpatsie xekanihɨkɨtɨni, mɨkɨ kanixe'anayexeiya yunaime nuiwarite watsata, teɨterimama hetsɨana miemete xemɨhɨkɨtɨnikɨ.
DEU 7:7 »Yawé kanixe'utihiwe'erieni hikɨ kanixe'anayexeiya, tsepa xemɨkayumɨirekai meta tsepa nitixaɨtɨkɨ xemɨkateyunaki'erikai.
DEU 7:8 Matsinaki'erietɨ katiniuyurieni, meta raye'atɨanike kemɨtiwarutahɨawixɨ xetutsima, 'ayumieme Parahuni hetsɨa kanixe'utawikweitsitɨani, 'Ekipitu ti'aitame, tixe'aitɨakaku, waɨriyarika xete'aitɨariekaku pɨxe'ayewitɨ mariwemekɨ tiyurienetɨ tɨrɨkariyakɨ.
DEU 7:9 »'Ayumieme, Yawé xekakaɨyari xekenetimati yuri Kakaɨyari mɨhɨkɨkɨ, Kakaɨyari heitserie yamɨtikamie, yutɨratu hepaɨtsita yamɨtikamie meye'atɨa tsepa nuiwarite waɨkawa memanuyekɨka, meta yunaki'eriya matsiɨkɨme payeitɨa kemɨ'ane meminaki'erie wahetsɨa meta 'aitsikayatsie yamemɨtekahu,
DEU 7:10 matsi kemɨ'ane memixani'erie puwaka'una 'apɨkareutere mɨtiwarakapitɨanikɨ.
DEU 7:11 'Ayumieme 'inɨari niukiyaritsie yaketinekamieni, 'aitsika mɨwaɨkawa hikɨ nemɨxe'aitɨa xemeye'atɨanikɨ.
DEU 7:12 »Xɨka xe'i'enieni kemaine 'ikɨ 'aitsika, xɨka yaxetekakɨne, hikɨ 'ana Yawé xekakaɨyari peye'atɨani xetutsima kemɨtiwarutahɨawixɨ, 'ana yunaki'eriya 'aixɨa mɨ'ane matsiɨkɨme payeitɨani xehetsie.
DEU 7:13 Waɨkawa xenaki'erietɨ pɨxetimɨiriya meta 'aixɨa pɨwayurieka tɨɨri hukatsie memɨyetei, meta 'ikwaxi 'iya kwietsie timieme 'atutsima mɨwaruxatɨatsie. 'Ikɨ katinixatani, tɨriku 'aixɨa puyurieka, meta kaxie winuyari meta hatseiti, metatsiere 'atewama waniwema meta muxatsi.
DEU 7:14 Waɨkawa matsi xeme 'aixɨa xepɨ'itɨarieka, keyuri hipatɨ teɨteri, mana pumaweni 'uki kanuariwetɨ meta 'uka kaniwewetɨ, meta xewitɨ tewa mana pɨka'uweni kaniwewetɨ.
DEU 7:15 Yawé pɨxe'ɨwiyani xepɨkatekukuyeni, kwiniya kwinimieme mɨmayatɨka xehetsie pɨkaye'axeni 'Ekipitu xemeitima, matsi mɨkɨ memɨxe'aye'unie wahetsiemieme pɨhɨkɨtɨni.
DEU 7:16 Keniwaruka'unani kemɨ'ane Yawé mɨxeyetuirieni. Xepɨkawanenimayaka meta wakakaɨyarixi xepɨkawarayexeiyani, mɨkɨ kapa xewiniyari mumɨya 'ayanikɨ.
DEU 7:17 »Xɨari mɨpaɨ xekateniyuku'iwawiyani: “¿Kehepaɨ tetewarayeweiya 'ikɨ nuiwarite, matsi memɨyuwaɨkawa keyuri tame?”
DEU 7:18 Peru xepɨkawareumakaxeni, xekena'eriwani Yawé xekakaɨyari Parahuni teɨterimama 'Ekipitu kemɨwaruyuri.
DEU 7:19 Xepunenierixɨ waɨkawa waruta'inɨataka 'inɨarite mamariwawemekɨ kemɨtiuyuri, waɨkawa yutɨrɨkariyakɨ Yawé xekakaɨyari xehayewitɨnike 'Ekipitu kwieyaritsie, hikɨta yaxeikɨa katiniyurimɨkɨ yunaime teɨteri wahetsie kemɨ'ane pemɨwamakaxe.
DEU 7:20 Meta, Yawé xekakaɨyari kaniwaranunɨ'amɨkɨ wahetsɨa mɨrakatsixi, mɨkɨ mepɨkawahayewa yunaime mepɨwakwini meta kemɨ'ane mexemakatɨ memɨyu'awietatɨweni.
DEU 7:21 Xepɨkawamakaxeni mɨkɨ, matsi Yawé xekakaɨyari, mɨmariwe mumakaxiwa xehamatɨa kaniuyeikamɨkɨ.
DEU 7:22 Yawé xekakaɨyari kaniwarayeweiyamɨkɨ nuiwarite kemɨ'ane memɨxetakwini, peru yapauka pɨkatiyurieni. Kwitɨwa yunaime xepɨkawakwini, nɨkahɨrixɨa 'ɨrawetsixi yeutari me'utixuawere xekwiepa me'akunɨni.
DEU 7:23 Yawé xekakaɨyari mɨkɨ nuiwarite pɨxeyetuirieni xemɨwara'iwakɨ, mɨkɨ pɨwatimariuta mɨpaɨ pɨtiwakwini.
DEU 7:24 Te'aitamete kanixeyetuiriemɨkɨ, xemeta yunaime xekaniwaka'unakuni kememɨtetetewakai mekaha'eriwame xekaniwarayeitɨakuni. Nixewitɨ nuiwari pɨkaxeha'iwa, xeme matsi yunaime xekaniwakwikuni.
DEU 7:25 Kenemaine xeme wakakaɨyarixi memɨwarutiwewi xekeniwaretitaiya. Pɨratakɨ meta hurukɨ mɨtiwewiyatɨka xepɨkatehehiwe'erieka, nɨkahɨrixɨa winiyaritsie xeyukaxɨrieni, mɨkɨ Yawé xekakaɨyari katinixani'erieka.
DEU 7:26 Tixaɨtɨ yukiita xepɨkate'uti'utani tita mɨtixani'eriwa. Kaneuyeweka mɨkɨ naitɨ mɨreuyehɨiyanikɨ. Xepɨkatenaki'erieka xeketenexani'erieka yemekɨ, nɨkahɨrixɨa xemeta xe'uka'unarienikɨ.
DEU 8:1 »Naime 'inɨari niukiyari xekenaye'atɨaka hikɨ nemɨxe'aitɨa, 'axemu'uwanikɨ matsi, meta xemuyumɨiriyanikɨ metatsiere yukwie xemayeitɨanikɨ 'iya kwieyari Yawé 'atutsima mɨwarutaxatɨatsie.
DEU 8:2 Xekena'eriwani huta tewiyari wiyari Yawé xekakaɨyari mɨxe'uwitɨximekai huyeta tukarikɨ meta tɨkarikɨ makumawetsie, puxetiuka'enitsitɨa mana waɨkawa pɨxe'uta'inɨataxɨ yamɨretimanikɨ tita yu'iyaritsie xemɨtehexeiya, meta yamɨretimanikɨ xɨka 'aitsikaya xe'eye'atɨaka yatɨ hawaikɨ.
DEU 8:3 Waɨkawa pɨxe'uta'inɨataxɨ meta xeyehaakakwitɨweme pɨxe'ayeitɨa, peru 'arike manana pɨxemikwakai, mɨkɨ 'ikwai xeme xemɨka'imatekai meta xetutsima mepɨkaheitima, mɨpaɨ pɨxetiuta'ɨkitɨa kename tewi pakɨ xeikɨa ka'ayeniereni, matsita naitɨ Yawé niukieya peuyewetse.
DEU 8:4 'Ana huta tewiyari wiyari xe'uhukaku xekamixate pɨka'utitsanixɨ, meta xe'ɨkate pɨka'utihai.
DEU 8:5 Yu'iyaritsie xekeneu'eni, tewi yuniwe mɨheitseritɨa hepaɨ, Yawé 'akakaɨyari mɨpaɨta kametiniheitseritɨaka.
DEU 8:6 Xekenaye'atɨaka naime Yawé 'akakaɨyari 'aitsikaya kemaine, xe'eyemakatɨ huyeya xekeneuweiyani.
DEU 8:7 Karikɨ Yawé xekakaɨyari kwie 'aixɨa mɨ'anetsie kanixe'erikatsitɨaka, kwie 'aki hexeiyatɨkaimetsie meta haixate, haa muhapane mayeweweritsie meta hɨritsie,
DEU 8:8 kwie tɨriku tsewara, kaxie meta xapa 'ikwaxiyari, hipatɨ 'ikwaxi, hatseiti meta xiete maxuawetsie,
DEU 8:9 mɨkɨ kwieyaritsie xe'ikwai yapɨrexuaweni meta tixaɨtɨ xepɨkateheuyehɨaka, mɨkɨ kwieyaritsie tetexi tepɨa pehɨkɨ meta hɨritetsie kuwɨre xekanikaxeiyakuni.
DEU 8:10 »Kepauka xemɨtehetikwani, kepauka xemetihuxani, Yawé 'akakaɨyari 'aixɨa xekatenahɨawekuni mɨkɨ kwie mɨxeyetuirikɨ 'aixɨa 'anekame.
DEU 8:11 Yumarima 'aixɨa Yawé 'akakaɨyari xepɨkahatɨtɨmaiyani. Xepɨkatehayewani 'inɨari niukiyari xehaye'atɨatɨ meta 'aitsikaya ne hikɨ nemɨxe'aitɨa.
DEU 8:12 Kepauka xemɨtehetikwani meta kepauka xemetihuxani, kepauka kii xemeyutiwewirieni 'aixɨa 'aneneme meta kepauka 'ari muwa xemayeteni,
DEU 8:13 kepauka xetewama memeyutimɨire, meta xemuxatsima, kepauka 'ari huru pɨrata waɨkawa xemexeiyani, metatsiere piinitɨarika waɨkawa,
DEU 8:14 'ana waɨkawa mamariwawemete xepɨkahayuyeitɨwani meta Yawé yukakaɨyari xepɨkahatɨtɨmaiyani, mɨkɨ 'Ekipitu kwieyaritsie mɨxe'ayewitɨ, mana waɨriyarika xetehe'uximayakaku.
DEU 8:15 Yawé pɨxe'uwitɨximekai makumawe 'e'akuyeukametsie yemekɨ 'axatiu'anekaku, kwie muuwakitsie, kuuterixi memɨteyumemiwa watsata meta terɨkaxi, tete mɨtse'itsie mieme haa pɨxe'uharitɨa,
DEU 8:16 makumawetsie manana payari pɨxemikwakai, mɨkɨ 'ikwai hatsuaku xetutsima memɨkaheitima. Mɨpaɨ pɨxetiuka'enitsitɨa meta pɨxe'uta'inɨataxɨ, 'arike 'imatɨrieka 'aixɨa mɨxetiyuriekakɨ:
DEU 8:17 Hatsuaku mɨpaɨ xepɨkateku'eriwani. “'Ikɨ piinitɨarika nemɨrexeiya nekɨmana nemamakɨ nepɨtiukaxei”.
DEU 8:18 Yawé 'akakaɨyari kena'eriwani, mɨkɨ kametinipitɨaka piinitɨarika pemɨrexeiya, mɨpaɨ katineye'atɨaka mɨkɨ hikɨ yutɨratu meripaitɨ xetutsima kemɨtiwarutahɨawixɨ.
DEU 8:19 »'Uxa'atɨni warie xɨka Yawé yukakaɨyari xehatɨmaiya, xɨka hipame kakaɨyarixi xewarayexeiyatɨ xehakɨne meta wahɨxie xɨka xe'ukahɨxima'uweni, mɨpaɨ ne nekanaineni hikɨ xehetsiemieme yurikɨ xekanika'unariekuni.
DEU 8:20 Xɨka Yawé yukakaɨyari xekahanu'enieni, mɨpaɨta xeme kanixeyurimɨkɨ Yawé kemɨwayurieni hikɨ hipame nuiwarite waka'unatɨ xehɨxie.
DEU 9:1 »'Ixaheri keneneu'eni, hikɨri Kurutani hatuxameyaritsie pekaniuyeimɨkɨ pemeutahanikɨ meta pemɨwarayeweiyakɨ nuiwarite waɨkawa memɨtɨrɨkawi memɨmamariwawe 'ekɨ kepemɨkatitɨrɨkaɨye, mɨkɨ wakiekari kuraruyari 'amatitɨtɨ muyuawitsiepai kaneye'atɨkani.
DEU 9:2 Mɨkɨ teɨteri yemekɨ mekanimamariwaweni meta kwinimieme me'utɨtɨ, 'anakitsixi memɨtetetewa mekanihɨkɨtɨni. 'Ekɨri pekaniwamateni meta mɨpaɨ manɨyɨne waniukiyari pekanimaika. “¿Kemɨ'ane pɨyɨwe 'Anaki nuiwarimama mɨwaraye'unieka?”
DEU 9:3 Peru 'ekɨ matsi yaketinemaika hikɨ, Yawé 'akakaɨyari 'ahɨxie 'anuyekaitɨ 'apumieni, pɨwaka'una tai hepaɨ pɨwatixɨtsitɨani meta tɨrɨkariya pɨmatsipitɨani. 'Ekɨ pekaniwarayeweiyamɨkɨ kwitɨwa pekaniwarakumaweriyamɨkɨ, Yawé kemɨmerahɨawekai.
DEU 9:4 »Yawé kepauka mɨwarayenɨ'axɨani 'ateewa paitɨ 'ahɨxie, mɨpaɨ pepɨkati'akɨhɨaweni “Yawé pɨnetsiyetuiri 'ikɨ kwie nekwie nemayeitɨanikɨ heitseriemekɨ yanemɨtikamiekɨ”. Matsi Yawé kepauka mɨwakwini mɨkɨ nuiwarite mɨkɨ 'axamemɨteyuriekɨ katiniyurimɨkɨ.
DEU 9:5 Mɨpaɨ kani'aneni, 'ekɨ heitserie pemexeiyakɨ pɨkatiyɨni meta heitserie pemuyeikakɨ, mɨpaɨ 'ayumieme kwie pepɨkayetuiriyarieni. Hawaikɨ. Matsi mɨkɨ nuiwarite 'axamemɨte'uyurikɨ Yawé 'akakaɨyari 'ateewa paitɨ kaniwarayeweiyamɨkɨ. 'Ana mɨpaɨ mɨreye'atɨanikɨ 'atutsima meripaitɨ kemɨtiwarutahɨawixɨ, 'Apɨrahami, 'Itsahaki meta Kakuwu.
DEU 9:6 Mɨpaɨ xeketenemaika teɨteri xemɨtsetse'i xemɨhɨkɨ, 'ayumieme heitserie xemɨ'uwakɨ xepɨkate'anuyehu Yawé xekakaɨyari kwie mɨxeyetuirieni 'aixɨa mɨ'ane.
DEU 9:7 »'Ikɨ xekena'eriwani, meta xepɨkatehatɨtɨmaiyani makumawetsie Yawé kexemɨte'iyehaxɨatɨa, kepauka 'Ekipitu xemayekɨtsie paitɨ 'ena xemɨye'axɨatsie Yawé xepɨkaheu'enie.
DEU 9:8 Waɨkawa xekaniyehaxɨatɨani Huré yemuriyaritɨa, 'ari yunaime pɨxekwinikekai.
DEU 9:9 Kepauka mana hɨritsie nemanutitɨa tetexi mɨweweri nemɨyetuiriyarienikɨ, tɨratu maye'uxa Yawé mitawewi xehamatɨa, mana hɨritsie huta tewiyari tukari meta tɨkari nekaniuyurieni, nekatikwatɨ meta nekaharetɨ.
DEU 9:10 Mana Yawé kaneniyetuirieni hutame tetexi wewerime, mɨkɨ yɨkɨmana ra'utɨaka kemutayɨ hɨritsie 'utaniutɨ xehɨxie, taitsie, kepauka yunaitɨ xemuyuxeɨriekaitsie.
DEU 9:11 »Huta tewiyari tukari meta tɨkari 'aye'aku, Yawé 'ana kaneniyetuirieni hutame tetexi muweweri, tatsɨari tɨratu kanihɨkɨtɨkaitɨni,
DEU 9:12 hikɨ mɨpaɨ kanetiniutahɨawe: “Yapauka kenanukaye'a, karikɨ 'ateɨterima 'Ekipitu pemɨwayewitɨ, yapaukari 'axamekateniuyurieni. Kwitɨwa nehuye mekaniuku'eirieni nemɨwaruxeiyatsitɨakai memiweiyanikɨ, xeime kakaɨyari huru taiyariyarikɨ mekaniutawewieni”.
DEU 9:13 »Tawarita Yawé mɨpaɨ kanetiniutahɨawe: “Nepɨwamate 'ikɨ teɨteri, yemekɨ memɨtsetse'i mepɨhɨkɨ.
DEU 9:14 Keneneupitɨa nemuwaka'unakɨ meta nemuwarakuyeitɨanikɨ kememɨtetetewakai. Matsi 'ahetsie, nuiwari metɨrɨkaɨyeme nepumatsi'ayeitɨani meta xeyumɨireme keyuri mɨkɨ”.
DEU 9:15 »'Anari ta'aurie nekanaweni, hikɨ hɨritsie nekananakayani, mɨkɨ mɨtakaitsie. Hutame tetexi wewerime nekana'ɨkaitɨni tɨratu mɨhɨkɨtɨkai.
DEU 9:16 Hikɨ nekanixe'uxeiya Yawé yukakaɨyari hepaɨtsita 'axaxekateniuyuriekaitɨni, xeime kakaɨyari huru taiyariekamekɨ xekaniutawewieni, tsikeru hepaɨ 'anekame kwitɨwa xekanipata Yawé huye mɨxe'uxeiyatsitɨakai.
DEU 9:17 Hikɨ hutame tetexi wewerime nemamatsie nema'ɨkai kwiepa nekaneixɨrieni, xehɨxie nekanititara.
DEU 9:18 »Tawarita hutarieka Yawé hɨxie nekaniukatunumakeni mana nekaniyuhayewa huta tewiyari tukari meta tɨkari, nekatikwatɨ meta nekaharetɨ. Waɨkawa 'axaxemɨte'uyuriekaikɨ Yawé hɨxie xe'iyehaxɨatɨaku.
DEU 9:19 Yurikɨ 'ana nekaniutimani Yawé muyeha'akɨ, waɨkawa xe'iyehaxɨatɨaku pɨxeheuyehɨanikekai, matsi Yawé tawarita pɨnetsi'u'eni.
DEU 9:20 Metatsiere kwinimieme Yawé katiniha'akaitɨni 'Aruni hepaɨtsita kanimienikekaitɨni, mɨkɨ hetsieta nekaniutaniuni mihayewakɨ.
DEU 9:21 Hikɨ xeme tsikeru kakaɨyariyari xemeitawewiekai, mɨkɨ kakaɨyari muwewiya 'axaxeteyuriekame mɨxe'ayeitɨakai, ne nehenakahanaka taipa nekaneitataiya, 'etsipepeme nekanayeitɨani meta tumuanari nekaneyeitɨani, hikɨ mɨkɨ mɨtɨxiyari 'aki hɨritsie makanena 'utɨa nekaneikawiwieni.
DEU 9:22 »Tawera mɨrakutewatsie, Matsaha meta Kiwuruti-Hatawa, manata yaxeikɨa Yawé xekaniuyehaxɨatɨani,
DEU 9:23 yaxeikɨata kepauka Yawé mɨxehenɨ'atsie Karetsi-Waxineya xe'u'uwakaku mɨpaɨ xerahɨawetɨ: “Xekenehu yukwie xekenayeitɨa nemɨxeyetuirie”. Matsi xeme xeputiniukixi Yawé xekakaɨyari 'aitsikaya hepaɨtsita, 'ana yaxepɨkatekakɨ mɨkɨ kemainekai xepɨkahenu'eni.
DEU 9:24 Kepauka paitɨ nemɨxehetima Yawé xepɨka'enie.
DEU 9:25 »Yawé mɨpaɨ mutayɨkaikɨ kename xeka'unakekai, ne matsi nekaniutihɨximakeni hɨxiena, huta tewiyari tukari meta tɨkari.
DEU 9:26 Yawé nekaniutawawirieni, mɨpaɨ nekatinitahɨawe: “Yawé Kakaɨyari pepɨkawaka'unani mɨkɨ 'a'iwewarima mekanihɨkɨtɨni, pemɨwarutawikweitsitɨa 'ateɨterima mɨiremekɨ pekaniwaranuyexeiya 'Ekipitu pekaniwarayewitɨni, waɨkawa kwaniwemekɨ petiyurienetɨ wahetsiemieme,
DEU 9:27 Keniwara'eriwani matsiparewiwamete 'Apɨrahami, 'Itsahaki meta Kakuwu, 'atsipepɨkati'akɨhɨaweni 'ikɨ teɨteri wahepaɨtsita memɨtsetse'ikɨ meta kwinimieme 'axakememɨteyuriekɨ,
DEU 9:28 hakewa pemɨtatsi hayewitɨ, kapa mana mɨpaɨ mehetiyuanikɨ: ‘Yawé pɨka'uyɨwekaxɨa mɨwaraye'atɨanikɨ hakewa kwie mɨwarexatɨakaitsie. Muwa'uxiwe'eriekaikɨ puwarayewitɨ makumawetsiepai memɨkwinikɨ.’
DEU 9:29 'Imatɨrieka yunaitɨ 'ateɨterima mekanihɨkɨni pemɨwaranayexei, mɨkɨ waɨriyarika pemɨwarayewitɨ mekanihɨkɨtɨni, 'inɨarite mamariwaweme petiyurienekaku 'atɨrɨkariyakɨ”.
DEU 10:1 »Merikɨtsɨ 'ana Yawé mɨpaɨ kanetiniutahɨawe: “Hutame tetexi wewerime keneutiwewi matɨari mieme hepaɨ 'anenekame, meta kɨye kakuniyari pepɨtawewieni, hikɨ 'ana, hɨritsie pekananutiyeimɨkɨ nehetsɨa.
DEU 10:2 Ne mana nepɨra'utɨaxɨani yaxeikɨa kemɨre'ukai meripaitɨ hipame pemititaraxɨtsie, hikɨ 'anari kakunitsie pekanika'utamɨkɨ”.
DEU 10:3 »Hikɨ, kakuni nekaniutawewieni 'akatsiya kɨyeyarikɨ, meta hutame tetexi nekaniutixixieni meripaitɨ mieme hepaɨ 'anenekame, hikɨ 'ana nekaneyani hɨritsie mɨkɨ tetexi muweweri hutame ne'a'ɨtɨ.
DEU 10:4 Mɨkɨtsieta Yawé katinaka'utɨani yaxeikɨa meripaitɨ mieme hepaɨ, hikɨ kaneneyetuirieni, tatsɨari tamamata 'aitsikayari mɨxe'utaxatɨa kepauka teyunaitɨ temuyuxeɨriekaitsie, kepauka hɨritsie mɨxe'utahɨawixɨ taitsie.
DEU 10:5 Hikɨ hɨritsie nekananakayani, tetexi mɨweweri nekaniuti'uta kakuni nemutawewitsie. Mana kaniyemaneni, Yawé kemɨnetiuta'aitɨa».
DEU 10:6 Hikɨ 'arike 'ixaheritsixi mekananuku'uni Weruti-Wene-Yakani (waputsu matinenieretsie) mɨrakutewatsie, Mutseraha mekaniu'axɨani. 'Aruni mana kaniumɨni mana kaniukateukieni, nu'aya 'Eriyatsaxi kanitsutɨani hetsiena mieme ti'uximayatɨ mawari wewiwamekɨ.
DEU 10:7 Manata memɨyekɨ Kurikura mekanekɨne, manata memɨyekɨ Kutiwata mekaniu'axɨani, haa waɨkawa maxuawekaitsie.
DEU 10:8 'Ana Yawé mɨpaɨ katiniwaranayexeiya, Rewi nuiwarimama tɨratu kakuniyari memukweiximenikɨ meta Yawé hɨxie memɨti'uwenikɨ mete'i'uximayatsirietɨ, mɨkɨ kemɨtitewakɨ hetsienamieme teɨteri 'aixɨa memuwayuriekakɨ, hikɨ kememɨteyurie.
DEU 10:9 'Ayumieme Rewi nuiwarimama kwie mepɨkayetuiriyarieni yu'iwama wahepaɨ, Yawé wahetsiemieme wa'imikieri kanihɨkɨtɨni, mɨkɨ yɨkɨmana kemutayɨ.
DEU 10:10 «Ne hɨritsie nepɨnehayewaxɨ huta tewiyari tukari meta tɨkari, matɨari kenemɨreuterixɨ hepaɨ, hikɨ 'anata Yawé kaneniu'enieni. Mɨkɨ mɨpaɨ pɨkatiku'eriwakai mɨxekwinikɨ,
DEU 10:11 Yawé mɨpaɨ kanetiniutahɨawe: “Kenemie mɨkɨ teɨteri wahuyeta keniwaruwitɨximeni, yukwie memayeitɨanikɨ watutsima kenemɨtiwarutahɨawixɨ kename newayetuirienikekai”.
DEU 10:12 »'Ixaheritsixi teɨteriyari, hikɨta, ¿tita tixewawirie Yawé xekakaɨyari? Xekenayemakaxeni xeikɨa, meta huyetana xekeneuhuni, xekenenaki'erieka naime 'a'iyarikɨ meta kepemɨti'amatekɨ,
DEU 10:13 meta xeikɨa naime 'inɨari niukiyari xekenaye'atɨaka meta hipame 'aitsika hikɨ mɨxe'aitɨa xemeye'atɨakakɨ, 'ana 'aixɨa 'iyarikɨ 'uxa'atɨni warie xemu'uwanikɨ.
DEU 10:14 »Yawé xekakaɨyari muyuawi katinipinieyatɨni, meta waɨkawa 'emɨreutitewa, kwie meta ketita hetsiena mɨtixuawe.
DEU 10:15 Yawé matsi meripaitɨ kiekatari xetutsima kaniwanaki'eriekaitɨni, hikɨta xeme waxiɨyaritsiemieme xemɨhɨkɨ, 'ayumieme kaxenanayexeiya yunaime teɨteri watsata, hikɨ ketemɨteneniere hepaɨ.
DEU 10:16 'Ayumieme, 'a'iyaritsie pepɨkaratɨtɨmaiyani, matsi yu'iyaritsie memɨtsetse'i wahepaɨ pepɨka'aneni.
DEU 10:17 Yawé 'akakaɨyari matsi kakaɨyarixi kaniwakakaɨyaritɨni, meta yunaime te'aitamete katiniwa'aitɨwametɨni, kwi tɨrɨkaɨyetɨ 'ayemakaxiwatɨ, yɨkɨ katiwaxeiyatɨ teɨteri tixaɨtɨkɨ katipatatɨ.
DEU 10:18 Mɨkɨri nutuite meta wiuraxi wahetsie nunuwame kanihɨkɨtɨni, ku'uwamete kaniwanaki'eriekata kemarite meta 'ikwaitɨarika tiwayetuiriwatɨ.
DEU 10:19 'Ekɨta ku'uwamete mɨpaɨ pekatiniwanaki'eriekamɨkɨ, yaxeikɨata 'ekɨ 'Ekipitutsie yeikame pekanayani.
DEU 10:20 Yawé mɨ'akakaɨyari pe'ayemakaxetɨ kenayexeiyani. Mɨkɨtsie xeikɨa ketinewiyani meta kepemɨtayɨni mɨkɨ kemɨtitewakɨ yakeneutaineni.
DEU 10:21 Mɨkɨ 'atemawierika kanihɨkɨtɨni, mɨkɨ kani'akakaɨyaritɨni, mɨkɨri 'ahetsiemieme mariwemekɨ katiniyurienekaitɨni.
DEU 10:22 Mɨkɨ haika tewiyari heimana tamamata mekaniyupaɨmekaitɨni xetutsima kepauka 'Ekipitutsie memekɨ, hikɨri Yawé mɨ'akakaɨyari kwinimieme 'ateɨterima meyupaɨmeme kaniwarayeitɨani, xurawetsixi muyuawitsie memɨkayu'inɨatsinɨa wahepaɨ.
DEU 11:1 »Yawé xekenenaki'erieka xekakaɨyari meta yaxeketenekahuni yuheyemekɨ 'aitsikateyatsie, meta naime 'inɨari niukiyaritsie.
DEU 11:2 Xekenaye'eri hikɨ, xeme xekaniyɨakaitɨni, xeniwema mepɨkayɨakai, tita xemɨtehetima Yawé xekakaɨyari xeheitseritɨakaku. Xeme xepixei tɨrɨkariyaya mɨmariwe,
DEU 11:3 meta kemɨtiuyuri, 'inɨari kemɨtiuwewi 'Ekipitu hetsiemieme, Parahuni meta teɨterimama meyunaime wahetsiemieme.
DEU 11:4 Xeme xepunenierixɨ kuyaxi 'ekipitutari kemɨwaruyuri, Haramara-Mɨxeta waheima kemɨtiuyeuri wakawayutsixi meta wakaxetate yunaime waheima, kepauka mɨkɨ memɨxe'uweiyakaitsie. Yawé kaniwareuyehɨani yuheyemekɨ.
DEU 11:5 »Yaxeikɨata xekena'eriwani kemɨtiuyuri xehetsiemieme makumawetsie, meta kemɨtixe'uye'atɨa 'enapaitɨ.
DEU 11:6 Metatsiere, xekaneneniere kemɨwareyuri Ratani 'Awirani mame, 'Eriyáwi niwemama Xuweni nuiwarieya, yunaime xeme xehɨxie kwie kananutayepieni mɨkɨ mɨwareukakwanikɨ meta yunaime waniwema, waxamaru meta naime ketita memɨtehexeiyakai.
DEU 11:7 Yurikɨ xemeri xekaniuneniere tinaime mariwemekɨ Yawé kemɨtiuyuri.
DEU 11:8 »'Ayumieme hikɨ naimetsie xeketenaye'atɨaka 'aitsikatsie hikɨ kenemɨxerahɨawe, para xemeta xemɨtɨrɨkawinikɨ xemɨyɨwawenikɨ xemanɨkɨnekɨ Kuratani hatuxameyaritsie, kwie xepiini mayanikɨ,
DEU 11:9 Para mana xemu'uwanikɨ mɨixa wiyari mɨkɨ kwieyaritsie, Yawé kemɨtiwarutahɨawixɨ xetutsima kename wayetuirienikekai, meta xenuiwaritsie miemete, kwiepa hakewa waɨkawa retsi mexuawe meta xiete.
DEU 11:10 Mɨkɨ kwie xeme xepiini mayani, mɨkɨ 'Ekipitu mieme hepaɨ pɨka'ane xeme xemayekɨtsie, mana xeme xepɨteheka'etsakai yu'imɨarite meta xepɨtehehatuiyakai, haraweri mɨtiuhatuiyarɨwa hepaɨ.
DEU 11:11 Peru xeme yukwie xemayeitɨanitsie, mana kwiepa kanakuhɨriyaka meta 'akuweritɨ, haa taheima miemekɨ kaniukahatuiyarɨwani.
DEU 11:12 Yawé xekakaɨyari kanihɨkɨtɨni mi'ɨwiya yuheyemekɨ, meta kanixeiyakamɨkɨ kemɨreutere.
DEU 11:13 »Xɨka naime xehaye'atɨaka 'aitsika hikɨ ne nemɨxeyetuiri, xɨka Yawé yukakaɨyari xenaki'erietɨ yemekɨ yu'iyarikɨ yaxetekahuni, naimekɨ kexemɨteyumate,
DEU 11:14 merikɨte 'anari wiyeri xekwietsie kanixehanɨ'airiemɨkɨ kepauka maye'axenitsie, taxarita meta witarita kanayeikamɨkɨ, tɨriku, winu, meta hatseiti xemɨte'ukaxexeiyanikɨ.
DEU 11:15 Meta yaxeikɨa hɨritsie tupiriya kanitiwaweriyamɨkɨ, xetewama wahetsiemieme, xemeta yaxeikɨa xetekwatɨ xekanihuxakakuni.
DEU 11:16 »Yumarima 'aixɨa. Xepɨkayuwaɨriyani xemɨte'irɨwiyarienikɨ. Xaɨtsie xepɨka'uyuyuipikeni, meta hipame kakaɨyarixi xepɨkawarayexeiyani, wahetɨa xepɨkatihɨxima'uweni,
DEU 11:17 mexɨka mɨpaɨ xe'uyɨni Yawé kanixeyehekamɨkɨ, muyuawitsie katineunamɨkɨ mɨkakawiyekɨ, kwie 'ikwaxi pɨkatitixuawitɨani, 'ana yapauka xeme xepakumawere Yawé kwie 'aixɨa mɨ'ane mɨxeyetuiri hetsie.
DEU 11:18 Yu'iyaritsie xekenaka'ɨki 'ikɨ niuki meta yu'eriewametsie, yumamatsie xekeneutapietɨkani ha'utɨkaime 'inɨari hepaɨ mumatsiɨkɨnikɨ, meta tepɨa 'inɨariyari hepaɨ yukanata xekenamanani.
DEU 11:19 Yuniwema xekeniwaruti'ɨkitɨa, yaxeketeniwakuxaxatɨwani yukie xemɨtitenitsie, kepauka huyeta xemuhunitsie, kepauka xemɨkahinitsie meta kepauka xemanuku'unitsie,
DEU 11:20 'akitenie muka'utɨkatsie kena'utɨaxɨa meta yukiekari 'itupariyaritsie.
DEU 11:21 Mɨpaɨ, mexi 'akuxi muyuawi kwie mana kuma, xeme meta xenuiwarima mepayeneniereni mɨkɨ kwieyaritsie me'u'uwatɨ, Yawé mɨxeyetuirietsie xetutsima kemɨtiwarahɨawekai kename xeyetuirienikekai.
DEU 11:22 »Xɨka yaxetekakɨne xeyukweriwayurietɨ naime 'ikɨ 'aitsikatsie hikɨ nemɨxeyetuirie, Yawé yukakaɨyari xɨka xenaki'erieka, xɨka huyetana xe'uhuni heitseriekamekɨ hetsiena xetewiyatɨ.
DEU 11:23 Hikɨ Yawé kaniwarayeweiyamɨkɨ xekwietsie mɨkɨ yunaime nuiwarite. 'Anake xeme xekaniyɨwawekuni xemɨwara'iwa, tsepanetɨ waɨkawa memɨmamariwawe meta tsepa waɨkawa memɨtɨrɨkawi keyuri xeme.
DEU 11:24 Naitsarie mɨkɨ kwieyaritsie hakewa xemeye'axɨa mɨkɨ xehetsiemieme payeikani, xekwie 'akaniyeukamɨkɨ makumawetsie tsutɨarietɨ 'atsita Riwanu hɨriyaritsie paitɨ ye'atɨkaitɨ, meta 'Eupɨrate 'akiyarietsie tsutɨarietɨ 'atsita haramara Meritexaniyu paitɨ ye'atɨkaitɨ.
DEU 11:25 Nixewitɨ pɨkaxeha'iwani. Tsepa hakewa xemeukɨ Yawé xekakaɨyari yapɨtiyurieni yunaitɨ kwiepa memɨtama memɨxemakaxenikɨ yemekɨ, mɨkɨ kemɨtixehahɨawekai.
DEU 11:26 »Ne hikɨ hutame nekanixeyetuirieka kemɨ'ane xemanayexeiya, 'aixɨa xemɨ'itɨariekakɨ meta 'axaxemɨ'itɨariekakɨ,
DEU 11:27 “'aixɨa xepɨ'itɨarieka”, Yawé xekakaɨyari 'aitsikayatsie xɨka yaxetekakɨne, hikɨ nemɨxe'aitɨatsie xemeye'atɨanikɨ,
DEU 11:28 “'axaxepɨ'itɨarieka”, xɨka Yawé xekakaɨyari 'aitsikayatsie yaxekatekakɨne, xɨka huye xe'uku'eirieni hikɨ nemɨxe'uxeitsitɨa xemiweiyanikɨ, meta hipame kakaɨyarixi xemɨkawamate xewarayexeiyatɨ xe'akɨne.
DEU 11:29 Kepauka Yawé xekakaɨyari mɨxe'aye'atɨani xekwie mayanitsie, xeme Keritsini hɨriyari 'aixɨa xepuyurieni, peru 'Ewari hɨriyari 'axaxepuyurieni.
DEU 11:30 Mɨkɨ hɨrite Kurutani 'anutaɨye kanikuteni, tau makayuyuipike hepatsie, kananeutsixi wakwieyaritsie 'Arawa kiekatari, Kirikari 'aurie, Mure xiuyari maku'utsie.
DEU 11:31 »'Ari Kurutani hatuxameyaritsieri xe'anukɨneke xekaniyɨaka, xeheutahaxɨanike yukwie xemayeitɨanikɨ Yawé xekakaɨyari mɨxeyetuirietsie. Kepaukari yupiini xemayeitɨani meta manari xemetiteni,
DEU 11:32 xeyukweriwayurietɨ yaxeketeyekahuni naime 'inɨari niukiyaritsie meta 'aitsikateyatsie hikɨ nemɨxeyetuirie.
DEU 12:1 »'Ikɨ 'aitsika meta 'inɨari niukiyari kanihɨkɨtɨni xeyukweriwayurietɨ mɨpaɨ xemɨte'u'uwanikɨ, mexi 'akuxi kwie Yawé xetutsima wakakaɨyari mɨxeyetuirietsie xe'u'uwani yukwie xemayeitɨanitsie:
DEU 12:2 Mɨkɨ nuiwarite xemɨwarayeweiya hakewa yukakaɨyarixi memɨwarayexeiya naime xekatenika'unakuni, tatsɨari hɨri 'amanutitɨtɨtsie meta yemuritetsie meta kɨyexi 'amupapa hetɨa.
DEU 12:3 »Memɨtehatimawatsie xekaneka'unakuni, watetexi memɨwarayexeiya xekanetitarakuni, 'uka 'Atserá kakaɨyariyari 'ɨkiyari xekanititaiyakuni, wakakaɨyarixi xekaniwatitarakuni meta kakaɨyarixite xekaniwakumaweriyakuni kememɨtetewakai.
DEU 12:4 »Mɨkɨ yukakaɨyarixi kememɨtewarayexeiyakai hepaɨ Yawé yukakaɨyari mɨpaɨ xepɨkatehayexeiyani,
DEU 12:5 xenuiwaritsie Yawé kanenayexeiyamɨkɨ hakewa memeyexeiyanikɨ kemɨtitewakɨ, mana xeme xehume xekaneyɨwawekakuni xeikɨa xemeyexeiyanikɨ.
DEU 12:6 Mana xeme yumawari taiyariyari xepeuwewiyu, meta hipame mawarite, tamamatatsie mieme xeime, tita mɨtiyetuiwatsie mieme, kexemɨteyɨhɨritɨa, kexemɨteyuwaɨriya mawariyari metatsiere xetuurutsixi matɨari miemete yaxeikɨa muxatsi meta tsipuri.
DEU 12:7 Mana Yawé xekakaɨyari hɨxie, xeme meta xetɨɨriyama xekatenikwakakuni xekaniyutemamawiekakuni mete'uximayatɨ memɨte'ukaxexeiyakɨ, Yawé xekakaɨyari 'aixɨa mɨtiuyurikɨ.
DEU 12:8 »Muwari xeme yaxeikɨa xepɨkateheyurieka hikɨ 'ena ketemɨteyurie, hikɨ 'ena yatepɨteyurie kemɨtatinake taxexuitɨ,
DEU 12:9 'akuxi xemɨkaheutahaxɨawawekɨ 'uxipiya maxuawetsie meta Yawé xekakaɨyari kwie mɨxeyetuirienitsie.
DEU 12:10 Peru xeme xekananukɨnikuni Kurutani hatuxameyaritsie, 'iya kwieyaritsie xekaniu'uwakuni Yawé xekakaɨyari mɨxeyetuirienitsie, mɨkɨ memɨxe'aye'unie xe'aurie mematetɨka wahetsɨa kanixetixɨnamɨkɨ, hikɨ xeme 'aixɨa 'iyari xekaniu'uwakuni xe'ɨwiyarietɨ.
DEU 12:11 Hakewa Yawé menayexei xemeyexeiyanikɨ tinaime xekatenanupikuni kenemɨtixe'uta'aitɨa: Mawari taiyariyari, mawarite, tamamatatsie mieme xeime, ketita mɨtiyetuiwa mawariyari, tita memɨteyetuaya meta Yawé minaki'erie mawari kemɨtiyuhɨritɨani hetsiemieme.
DEU 12:12 Mana 'ixɨarari xekaniutiwewiwakuni Yawé yukakaɨyari hɨxie, mɨkɨ yuniwema 'ukitsi 'ukari wahamatɨa, meta waɨriyarika te'uximayatemete 'ukitsi 'ukari, meta rewitsixi xehamatɨa mana memɨtiteni xekiekaritsie, mɨkɨri mepɨkaheixeiyani kwie yuhetsiemieme.
DEU 12:13 »Kepauka mawari pemɨwewieka, kene'a'ɨwiyatɨ mɨpaɨ ketineyurieneni hakewa matsihenake xeikɨa 'ekɨ pɨkatixaɨ.
DEU 12:14 Mɨpaɨ matsi pekatiniyurienemɨkɨ Yawé hakewa menayexeiyatsie xeikɨa, mana mɨpaɨ pekatiniyurienemɨkɨ ne hakewa nemereta'aitɨani.
DEU 12:15 Mɨpaɨta kani'aneni, kepauka yapemɨra'eriwani pekaniyɨweni tewaxi pemɨwakwika wawaiyari pemɨkwaka tsepa kemɨ'ane 'akiekaritsie, xɨka Yawé 'akakaɨyari 'aixɨa matsiyurieka. Pemikwaka pepɨyɨweni tsepa pemɨ'itiya yatɨni tsepa pemɨka'itiya, yeutari tsipuri wahepaɨ memɨ'anene wawaiyari pemɨyurieneni hepaɨ.
DEU 12:16 Peru xuriya pepɨkakwa'ani, matsi pɨta pekanitayeuriwamɨkɨ kwiepa haa hepaɨ.
DEU 12:17 »'Imikieri tamamatatsie mieme xeime pepɨkakwaka 'akiekaritsie 'atɨriku hetsiemieme, winu meta hatseiti, meta 'atewama tuurutsixi meta 'amuxatsi meta tsipuri mexɨakate, meta yape'utayɨka pemɨtiwayetua, meta temawierika mawariyari 'ahetsiemieme kepemɨtikuxeɨri.
DEU 12:18 Matsi pɨta pekatinikwakamɨkɨ ketita Yawé 'akakaɨyari hetsɨa mɨtimieme, mɨkɨ hakewa metsihepitɨani, yaxeikɨata mepɨteyurieka xeniwema 'ukitsi, 'ukari, meta texe'uximayatsiriwamete, meta rewitsixi xekiekaritsie memɨtitei, yaxeikɨata Yawé 'akakaɨyari hɨxie pepɨ'atemawieka peti'uximayatɨ kepemɨtiuyuri.
DEU 12:19 Kene'a'ɨwiyatɨ xeikɨa rewitsixi pepɨkawaruku'e'eiriwani mexi 'akuxi kwiepa pe'uyeikani.
DEU 12:20 »Kepauka Yawé 'akakaɨyari 'akwieyari 'amɨtayeuriya, kemɨmatiutahɨawixɨ, kepauka mɨpaɨ pemɨtayɨni: “Wai nepaukwaimɨkɨ”, pepɨyɨwe wai xɨka peheukwaimɨkɨni tsepa kepaɨmeme.
DEU 12:21 Xɨka 'ahetewani hakewa meyuhayewa Yawé 'akakaɨyari, pepɨyɨweni tewaxi pemɨwarutimawa tsikerutsixi yatɨni muxatsi, netsɨ kenemɨtiu'aitaxɨ, pepɨyɨwe pemɨtikwaka 'akiekaritsie tsepa ketipaɨmeme.
DEU 12:22 Wawaiyari kenekwaka yeutari tsipuri wahepaɨ memɨ'anene wawaiyari pemɨyurieneni hepaɨ. Tsepa pemɨ'itiya yatsepa pemɨka'itiya pepɨyɨwe pemikwaka.
DEU 12:23 Peru keneyɨ'ɨwiyani xuriya kapa pekwaka. Xuriya karikɨ tukari kanihɨkɨtɨni. Tukari pepɨkakwaka wai mame.
DEU 12:24 Pe'ikwanike matsi pɨta keneyeuri kwiepa haa hepaɨ.
DEU 12:25 Xuriya pepɨkakwa'ani, 'aixɨa 'iyari pemuyeikanikɨ meta 'anuiwarima, heitserie yapemɨtikamiekɨ Yawé hɨxie.
DEU 12:26 »Piinite tita tipatsiekame pemɨrayeitɨa, meta mawari kepaɨmeme pemixatɨa, ketineukuha'aritaka ketinanupini Yawé kemaine hakewa pemɨretimawa.
DEU 12:27 Mawari taiyariyari waiyarieya meta xuriyaya Yawé 'akakaɨyari hetsiemieme mawari taiyame pekaniyetuamɨkɨ. Xuriya mawari taiyame hetsie pekanitayeurimɨkɨ, meta waiyari pemɨtikwani pekaniyɨwemɨkɨ.
DEU 12:28 »'Amarima 'aixɨa yaketinekamieni naime 'ikɨ 'aitsikatetsie hikɨ ne nemɨmatsiyetuirie, yuheyemekɨ 'aixɨa 'iyari pemuyeikanikɨ meta yaxeikɨa 'anuiwarima. Mɨpaɨ xɨka petiyurieneni 'aixɨa pekaniyɨanemɨkɨ Yawé 'akakaɨyari hɨxie.
DEU 12:29 »'Ahɨxie Yawé 'akakaɨyari kaniwaka'unamɨkɨ nuiwarite 'ekɨ pemɨwarayeweiya. Kepaukari pemɨwarayeweiya, kepauka wakwietsie pemukaniri,
DEU 12:30 'arike pewarayeweiyameri keneyu'ɨwiyani yaxeikɨa pepɨkatiyurieneni kememɨteyuriekai, kapa wawiniyaritsie pe'ukaweni wakakaɨyarixi pewarutihiwe'erieme. Mɨpaɨ pepɨkatiku'iwawani: “¿Kehepaɨ metewarayexeiyakai 'ikɨ nuiwarite yukakaɨyarixi, neta yaxeikɨa nemɨtiyurienenikɨ?”
DEU 12:31 Yawé mɨ'akakaɨyari matsi mɨpaɨ xepɨkatehayexeiyani, Yawé mɨkɨ yemekɨ pɨtixani'erie mɨkɨ tinaime kememɨtewarayexeiya yukakaɨyarixi. Metsɨ yuniwema 'ukitsi 'ukari mekaniwatitaiyakaitɨni yukakaɨyarixi mewatimawirienike.
DEU 12:32 »Neuxei 'amarima 'aixɨa naimetsie yaketinekaye'a kenemɨmati'aitɨa hikɨ, tawarita peka'enutiyayatsatɨ meta peka'enakaxɨrɨwatɨ.
DEU 13:1 »Kepauka xehetsɨa munuani tewi Kakaɨyari niukameya yatɨni heinɨtsi hepaɨ 'aneme tikuxatatɨ, meta kemɨtiyɨni hepaɨtsita tikuxatani meta 'inɨarite mamariwaweme hepaɨtsita,
DEU 13:2 xɨka mɨkɨ 'inɨari 'aye'atɨarieni, xɨkata mɨpaɨ haineni: “Hikɨmɨtɨka hipame pɨta kakaɨyarixi tepɨwarayexeiyani”, kakaɨyarixi pemɨkawamate xɨka waxatani,
DEU 13:3 mɨkɨ Kakaɨyari niukameya kwi pepɨka'enieka yatɨni xɨka heinɨtsi hepaɨ 'aneme mɨtikuxata xɨka yɨaneni. Yawé 'akakaɨyari kameni'inɨatanemɨkɨ xɨka 'aku yurikɨ yemekɨ 'a'iyarikɨ pe'inaki'erieka meta kepemɨti'amatekɨ.
DEU 13:4 Yawé 'akakaɨyari xeikɨa pepayexeiyani meta mɨkɨ xeikɨa pepayemakaka. 'Aitsikateyatsie yaketinekamieni, keneu'enieka meta ketine'uximayatsirieka meta hetsiena ketinewiyani.
DEU 13:5 Peru mɨkɨ Kakaɨyari niukameya hetsie pepɨrahɨani mɨmierienikɨ yatɨni xɨka heinɨtsi hepaɨ ti'aneme mɨtikuxata yɨaneni mɨpaɨ mɨmatiutahɨawixɨkɨ kename Yawé 'akakaɨyari peke'uku'eirienike, 'Ekipitu mɨxehayewitɨ mɨxe'ɨxɨnaxɨ waɨriyarika xete'uximayakaku, mɨpaɨ xepɨtehenayehɨani tita 'axamɨti'ane xetsata, mɨkɨ tixaxatame mɨmatsipatakɨ Yawé 'akakaɨyari huyeya xemuku'eirienikɨ mɨmatsi 'uta'aitɨakai xemiweiyanikɨ.
DEU 13:6 »Xɨka 'a'iwatɨtɨ, yatɨni 'aniwe 'uki 'uka, yatɨni 'a'ɨya kwinimieme pemɨtinaki'erie, yatɨni 'ahamiku peminaki'erie yemekɨ, xɨka metsi'anayewitɨmɨkɨni 'awie mɨpaɨ metikɨhɨaweni: “Hikɨmɨ hipame kakaɨyarixi tepɨwarayexeiyani”, xɨka kakaɨyarixi pemɨkawamate waxatani meta xepaapama memɨkawaretima,
DEU 13:7 'ahurawa xe'aurie kiekari mukumane wakakaɨyarixi yatɨni teewatari naitsarie kwiepa memuxuawe,
DEU 13:8 meti'irɨwiyanikɨ pepɨkayutaunieka pepɨkawareu'enieka. Meta mɨkɨ pepɨkawareunenimayaka. Wahetsie pepɨkanuaka meta pepɨka'enukanaka,
DEU 13:9 meta pepɨkayu'iyaritɨaka pemimienikɨ. Matsi 'ekɨ meri keneutatuaxi pemimienikɨ, meta yaxeikɨa 'akie kiekatari meketeyurieka.
DEU 13:10 Kenetituaxatɨ keneumi'a, Yawé 'akakaɨyari hetsɨa mɨmatsi'anayewitɨkɨ tɨma, 'Ekipitu mɨmatsi'ayewitɨ, waɨriyarika pere'uximayakaku.
DEU 13:11 Hikɨ yunaitɨ 'ixaheritsixi mekatenitamarikuni meta mekanitimamakuni waɨkawa, 'ana tawariri xewitɨ 'axamɨti'ane pɨkatitixuaweritɨani.
DEU 13:12 »Xɨka xeime kiekaritsie Yawé 'akakaɨyari mɨmatsiyetuiritsie mana kiekame pemayanikɨ xɨka mana mɨpaɨ petiumarieni
DEU 13:13 kename hipatɨ teɨteri mehetinexɨa 'axamete'u'iyaritɨ teɨteri mɨpaɨ metewa'inietɨ: “Hikɨmɨ tepɨwarayexeiyani hipame kakaɨyarixi”, xɨka kakaɨyarixi xemɨkawamate mexatsiwani,
DEU 13:14 hikɨ 'ana peuyewetse kayuwatɨ xemuti'iwauni yumarima. Xɨka 'aku yuritɨni mɨpaɨ tiyɨaneni xetsata,
DEU 13:15 mɨkɨ xekaniwakwikuni yunaime mana kiekatari kemɨ'ane kiekaritsie mɨtiuyɨ. Tinaime xeketeneuka'una mana mɨtixuaweni meta tewaxi yunaime.
DEU 13:16 Tinaime piinite mɨraye'atɨka xeketeneukuxeɨri teɨteri memayukuxexeɨriwatsie, hikɨ kiekari xekeneutataiya meta mɨkɨ piinite mɨraye'atɨka. Mɨkɨ mawari kanayeimɨkɨ taiyariekame Yawé 'akakaɨyari hetsiemieme. Mɨkɨ kiekari yuheyeme kaniyuhayewamɨkɨ 'unitɨ, tawariri pɨka'anukuketɨarieni.
DEU 13:17 'Ahetsiemieme tixaɨtɨ piini pepɨkarayeitɨwani tinaitɨ mɨkɨ katiniyetuiyani mɨreuyehɨiyanikɨ. Hikɨ 'ana Yawé yuhaxɨa 'ahetsie pɨkapitɨani, matsi pɨta 'aixɨa matixeiyatɨ matsinenimayatɨ, meta yapɨtiyurieni 'anuiwarima yumɨiretɨ memakɨnekɨ, kemɨtiwarutahɨawixɨ meripaitɨ 'atutsima.
DEU 13:18 Mɨpaɨ katiniyɨmɨkɨ, kepauka naime 'ikɨ 'aitsikate xemaye'atɨani hikɨ nemɨxeyetuirie, meta kepauka heitserie yapemɨtiyurieneni Yawé 'akakaɨyari hɨxie.
DEU 14:1 »Yawé Kakaɨyari xeme xekaniniwemamatɨni. Yuwaiyari xepɨkatixitekeni meta yumu'utsie xepɨkayukametseriyani, xewitɨ mumɨ hetsiemieme,
DEU 14:2 xeme karikɨ teɨteri xemɨpatsie xekanihɨkɨtɨni Yawé xekakaɨyari hetsiemieme. Mɨkɨ kanixe'anayexeiya yunaime hipame kwiepa memɨtama watsata, xeme yemekɨ hetsɨana miemete xemɨhɨkɨtɨnikɨ.
DEU 14:3 »Tixaɨtɨmexi yeutari xepɨkatewakwaka memɨtexani'eriwa.
DEU 14:4 'Ikɨ xeikɨa xemɨtewakwaka kaniyɨwemɨkɨ: 'atuuru kwietsaname, muxa, kapɨra,
DEU 14:5 muxa tuuru hepaɨ mɨ'ane, yeutanaka maxa hepaɨ mɨ'ane, maxa, kapɨra yeutanaka.
DEU 14:6 Xekaniyɨwaweni xemɨwakwaka yeutari memɨte'iyawa wakarutsa manutahuhuta,
DEU 14:7 peru kameyu xepɨkakwa'ani, tatsiu, haitsɨ meta tsimuaka, mɨkɨtɨtɨ mepɨte'iyawa, peru wakarutsa pɨka'anutahuhuta. Mɨkɨ tewaxi yeutari pepɨtiwamaiwe'erieka memɨka'itiyakɨ.
DEU 14:8 »Metatsiere tuixu pɨka'itiya, tsepanetɨ karutsaya manutahuhuta, peru pɨkati'iyawa. Waiyarieya xepɨkakwa'ani meta mɨkime xepɨkakumaɨwani.
DEU 14:9 »Yunaime hapa memɨteye'uwa xepɨtewakwa'ani kemɨ'ane yuwekiɨ memexeiya meta yukarara,
DEU 14:10 peru xepɨkawakwa'ani kemɨ'ane yuwekiɨ memɨkahexeiya meta yukarara, mɨkɨ matsi meka'itiyakame xepɨwarayeitɨaka.
DEU 14:11 »Kaniyɨwemɨkɨ xemɨwakwaka tsepa kememɨte'anene memɨte'awɨwawe perutsɨ memɨ'itiyatɨka,
DEU 14:12 peru kwixɨ xeikɨa xepɨkakwa'ani, werika 'amɨnena 'umete naime mɨtimura, maraika,
DEU 14:13 meta 'aru hepaɨ 'amɨnena, meta kwixi hepaɨ mɨ'ane,
DEU 14:14 meta yaxeikɨa yunaime memɨte'awɨwawe kwatsari yutsata,
DEU 14:15 meta 'aru 'amɨnena, meta kwixɨ meuyɨwi, meta hukurixi,
DEU 14:16 meta nɨpe, kwaxu, patu,
DEU 14:17 patu hepaɨ mɨ'ane 'amanuyepa, maraika, meta kwatsa haramari hapa mɨyeyeika hepaɨ mɨ'ane,
DEU 14:18 kwaxu hepaɨ mɨ'ane, meta yunaitɨ kwaxuri wahepaɨ memɨteyuxexeiya, tsurakai meta 'atsixi.
DEU 14:19 »'Utsikari yunaitɨ memawɨwawe memɨka'itiya xepɨwarayeitɨaka, 'ayumieme xepɨkawakwa'ani.
DEU 14:20 Peru kaniyɨweni xemɨwakwa'ani mematsunawawe xeikɨa yatsepa memɨte'awɨwawe peru memɨ'itiyatɨka.
DEU 14:21 »Tixaɨtɨ timɨkime xetekaxeiyame xepɨkatekwa'ani. Mɨkɨ pɨyɨweni 'ateewa kiekame xemɨminikɨ 'akiekaritsie memɨtitei, mɨkɨ pɨyɨwe mitikwani, yatɨni yeikame pemutuirieni. Peru xeme teɨteri xemɨpatsie xekanihɨkɨtɨni Yawé Kakaɨyari hetsiemieme. »Tsipu nunutsi xepɨka'etsani maamaya retsieyakɨ.
DEU 14:22 »Xexuime wiyaritsie, xekatehatɨtɨmaiyatɨ, ketipaɨmeme xemɨtekaxeiya kwiepa yu'etsarita, tamamatatsie mieme xeime.
DEU 14:23 Yawé xekakaɨyari hɨxie xekanikwaikuni mɨkɨ tamamatatsie mieme xeime xemɨteyetua, tɨriku, winu, hatseiti, meta xemɨwayetua tewatsiekate mexɨakate, mɨkɨ hakewa meyuhayewa mana xekateneyurikuni. Mɨpaɨ xeteyurietɨ xepimakaxeni yuheyemekɨ Yawé yukakaɨyari.
DEU 14:24 Peru xɨka Yawé xekakaɨyari waɨkawa 'aixɨa reyurieka xehetsiemieme, meta mɨkɨ hakewa meyuhayewaxɨ 'ahetewani, xɨka xekayɨwaweni xemenutɨnikɨ xemɨteyetuanikɨ manapaitɨ.
DEU 14:25 'Ana pɨyɨweni mɨkɨ mɨtiutuani mɨkɨ tuminiyari 'a'ɨtɨ mana kenuani Yawé xekakaɨyari hakewa mexatatsie.
DEU 14:26 Mɨkɨ tuminiyarikɨ xemɨte'utinaneni kaniyɨweni ketita xemɨteheuyehɨaka tita mɨtixenakeni matsi: wakaxi, muxa, winu yatɨni winu matsina, mana Yawé Kakaɨyari hɨxie, 'ekɨ meta 'atɨɨriyama xekatenikwaikuni xekaniyutitemawiekuni.
DEU 14:27 Peru rewitsixi keniwara'eriwatɨ 'akiekaritsie memɨtitei. Kena'eriwani mɨkɨ 'ahepaɨ mepɨkayetuiriyarie yukwie memexeiyanikɨ.
DEU 14:28 »Haika wiyari 'anuyeyeikakaku xepikuxexeɨriwani ('imikieri tamamatatsie mieme xeime) yukiekaritsie pɨta xepiyetuani, mɨkɨ wiyaritsie xemɨte'ukaxei hetsie timieme.
DEU 14:29 Mɨpaɨ mɨkɨ mepɨkayehakakwitɨweni rewitsixi yukwieri memɨkahexeiya, 'ateewa kiekatari, nutuite meta wiuraxi 'akiekaritsie memɨtitei, mɨkɨ mepɨtetikwani mepɨtihuxani. Hikɨ 'ana Yawé xekakaɨyari xe'uximayatsika 'aixɨa pɨyurieni pɨxeparewieni.
DEU 15:1 »'Atahuta wiyari 'anuyeyeikakaku kemɨ'ane memɨxete'apinirietɨka tinaime hepaɨtsita 'ana xepɨtewareuyehɨwiriwani.
DEU 15:2 Mɨpaɨ xekateniyurikɨni: Yuxexuitɨ xemɨte'apiniyarietɨka xepɨtewareuyehɨwirieni yuhepaɨ teɨteri kepaɨmeme memɨxete'apinirietɨka. Yu'iwamari memɨte'apine xepɨkawawawirieka memɨxete'akapitɨanikɨ, mutaxatsiekɨri xemɨteheuyuyehɨwiriwanikɨ wiyari memɨte'apitɨka wahetsiemieme Yawé minakekɨ.
DEU 15:3 Xepɨyɨwawe mana mɨkakiekame mɨxerapinirie xemɨtawawirienikɨ, peru yu'iwama xepɨtewareuyehɨwirieni tsepa titakɨ memɨxete'apinirietɨka.
DEU 15:4 Xetsata mepumaweni tixaɨtɨ memɨkatehexeiya, karikɨ Yawé xekakaɨyari waɨkawa kanixeparewiekamɨkɨ mɨkɨ kwieyari mɨxeyetuirietsie yukwie xemayeitɨanikɨ.
DEU 15:5 Mɨpaɨ pɨtiyɨni yuheyemekɨ kepauka yaxemɨtekahuni Yawé xekakaɨyari hetsiemieme meta kepauka naime xemaye'atɨaka 'ikɨ 'aitsikate hikɨ nemɨxe'aitɨa.
DEU 15:6 Yawé xekakaɨyari waɨkawa pɨxeparewieni, mɨkɨ kemɨtixe'utahɨawixɨ, xeme yumɨireme hipame nuiwarite xepɨtewataniɨtɨani, peru xeme nixeime xepɨkatetaniɨwirieni. Yumɨireme nuiwarite xepɨtewata'aitɨani, peru nixewitɨ xeme pɨkatixeta'aitɨani.
DEU 15:7 »Kepauka xeme xeime yu'iwa hepɨrayu xemexeiya tixaɨtɨ karexeiyakame xeime kiekariyaritsie, kwie Yawé xekakaɨyari mɨxeyetuirieni kwieyaritsie, yu'iyaritsie xepɨkahetsetse'ini xepɨkateheikweririeka.
DEU 15:8 Matsi pɨta, xekeneparewieka, xeketeneyetuiri tita mɨreuyehɨaka.
DEU 15:9 Hawaikɨ yu'iyaritsie 'axa'aneme xepɨkapitɨaka, maye'aximekɨ 'atahuta wiyari, 'ana xemɨtewareuyehɨwiriwa memɨte'apitɨka wiyariyari, mɨpaɨ petiku'eriwatɨ 'a'iwa hepɨrayu tixaɨtɨ mɨkarexeiya pepɨkananaimaka. Nɨkatsɨ mɨkɨ, xe'utaxaneta Yawé hetsɨa, xeme xekatenayukatuakuni 'axaxemɨte'uyurikɨ.
DEU 15:10 Xepɨkatekwerieka, matsi waɨkawa pɨta xeketenewarini, 'ana mɨpaɨ Yawé kanixeparewiekamɨkɨ xe'uximayatsikatsie meta tsepa tita xemɨteyurie.
DEU 15:11 Teɨteri tixaɨtɨ memɨkatehexeiya 'ena kwiepa tsiere mekanixuawekakuni, 'ayumieme mɨpaɨ nekatinixe'aitɨaka 'aixɨa xeketeneu'iyarini yu'iwama wahamatɨa hepɨrayutsixi meta tixaɨtɨ memɨkateheuxeiya memɨyehakakwitɨwe wahamatɨa 'akwiepa memu'uwa.
DEU 15:12 »Xɨka 'a'iwa hepɨrayu 'uki yatɨni 'uka, xɨka 'uyutuani 'ahetsɨa, xɨka matiuta'uximayatsirieni 'ataxewime wiyari, 'atahutarieka wiyaritsie pekanitatuamɨkɨri.
DEU 15:13 Kepauka pemitatuani, pepɨkaheinɨ'awani yumaweme.
DEU 15:14 Matsi waɨkawa ketineupitɨa 'imikieri 'amuxatsi, 'a'itsanari meta kaxie winuyari pemukaxei. Yaketineyetuiri Yawé 'akakaɨyari ke'aixɨa mɨtiuyuri 'ahetsiemiemekɨ.
DEU 15:15 Kenaye'eri waɨriyarika ti'uximayatame kepemɨratɨa 'Ekipitu, meta Yawé 'akakaɨyari kemɨmatiuxɨnaxɨ. 'Ayumieme hikɨ 'ikɨ 'aitsika nekanixeyetuirieka.
DEU 15:16 »Peru mɨkɨ mati'uximayatsiriwame, xɨka mɨpaɨ haineni: “Neri nepɨkayuwaɨriya nematsi'uku'eirieni”, xɨka matsinaki'eriekɨ haineni meta 'atɨɨriyama meta 'aixɨa mumatimatekɨ,
DEU 15:17 hikɨ tepɨa petikweme, 'ituparitsie nakaya peheutawetsitɨame pekani'inɨarituamɨkɨ. 'Ana mɨpaɨ yuheyeme mati'uximayatsiriwame pekaneyeitɨamɨkɨ. Yaxeikɨata pekatiniyurimɨkɨ 'ukaratsi waɨriyarika ti'uximayatame hetsiemieme.
DEU 15:18 Pepɨkaha'aka pemitatuanikɨ mati'uximayatsiriwame, karikɨ yakɨ pekatinipitɨani mɨkɨ 'ataxewime wiyari tiuta'uximayataku hixɨata 'akamekɨ xeikɨa, yuri ti'uximayatame waɨkawa matsi kani'iwani. Matsi mɨpaɨ petiyurieyu Yawé 'akakaɨyari matsi waɨkawa pɨmatsiparewieni tsepa tita pemɨti'uximaya.
DEU 15:19 »Yawé 'akakaɨyari hetsiemieme pekaniwayetuayamɨkɨ tewaxi matɨari nunuiwakate 'ukitsi tsikerutsixi meta muxatsi. Tuuru matɨari mutinuiwaxɨ mɨkɨ pepɨkati'uximayatsitɨaka, meta yaxeikɨa muxa 'uki matɨari mieme pepɨkakaxikani.
DEU 15:20 Xeiwiyari 'aye'axekaku, 'ekɨ meta 'atɨɨriyama xekaniwarutikwa'akuni Yawé 'akakaɨyari hɨxie, mɨkɨ hakewa mexatani.
DEU 15:21 Xɨka mɨkɨ tewatsiekame xewitɨ ka'uyeiweni yatɨni kaheuniereni, yatɨni xɨka tikuyeni kwinimieme 'aneni, mɨkɨ Yawé 'akakaɨyari pepɨkatimawiriwani.
DEU 15:22 Xɨka mɨpaɨ 'aneni, 'aixɨa kani'aneni tsepa pemitakwai 'akiekaritsie, yeutanaka mɨhɨkɨtɨni hepaɨ tsipuri wahepaɨ memɨ'anene, tsepa pemɨ'itiya yatɨni tsepa pemɨka'itiya.
DEU 15:23 Xuriyaya xeikɨa pepɨkakwa'ani, matsi pɨta kwiepa keneutayeuri haa mɨhɨkɨtɨni hepaɨ.
DEU 16:1 »'Awiwi metseriyari xekenanayexeiya 'ana Patsikwa 'ixɨarariyari Yawé xekakaɨyari hetsiemieme xemutiwewiwanikɨ, karikɨ mɨkɨ tɨkariyaritsie katiniuyɨni 'Awiwi metseriyaritsie kepauka Yawé xekakaɨyari mɨxe'ayewitɨ 'Ekipitu kwieyaritsie.
DEU 16:2 Patsikwa 'ixɨarariyari Yawé xekakaɨyari hetsiemieme kepauka xemɨwewieka, 'ana 'awakaitsixi pepɨwatimawa meta 'amuxatsima, hakewa Yawé meyuhayewa mana pekatineyurimɨkɨ.
DEU 16:3 Paa mukuxanariyarietɨka Patsikwa tukariyaritsie pepɨkakwaka, matsike 'atahuta tukaritsie mɨkakuxanariyarietɨka pekanitikwaimɨkɨ, 'uximatɨarika payari kanihɨkɨtɨkamɨkɨ, 'Ekipitu xeme xeyumexɨitɨatɨ xemayekɨkɨ. Mɨkɨ tukaritsie mɨpaɨ xekatenikuwewiwakuni yunaitɨ xeme'eriwanikɨ yuheyemekɨ kepauka xemayekɨ 'Ekipitu kwieyaritsie.
DEU 16:4 'Ana 'atahuta tukari paa kuxanariyame pɨkaxuaweni naitsarie xekwieyaritsie. Wai xemitimawa taikai mexɨakame tukaritsie, 'uxa'arieka ximeri mieme mayanikɨ wai xepɨkakuhayeikawani.
DEU 16:5 »Patsikwa mawariyari xepɨkahewewieka xaɨtsie xeime kiekariyaritsie Yawé xekakaɨyari mɨxeyetuirienitsie.
DEU 16:6 Hakewa Yawé meyuhayewa mana xeikɨa xekaneitiwewiwakuni. Mana Patsikwa mawariyari pekanewewimɨkɨ taikai 'ari tau 'akayuneyu, 'ana mɨpaɨ pauka xekanayekɨne 'Ekipitu kwieyaritsie.
DEU 16:7 Patsikwa mawariyari kwaxime xekanitakwaikuni hakewa Yawé xekakaɨyari meyuhayewa, 'uxa'arieka ximeri xekanakunuaxɨakuni yukie.
DEU 16:8 'Ataxewime tukari paa kakuxanariyarietɨkaime xekanikwakakuni, 'atahutarieka tukaritsie 'ixɨarari patsiekamekɨ memuyukuxexeɨriwa xekaniwewikuni Yawé xekakaɨyari hetsiemieme. Mɨkɨ tukaritsie xepɨkate'uximayaka.
DEU 16:9 »'Atahuta tsemanayari xepɨ'inɨata kepauka muyukatsutɨanitsie tɨriku 'itsanariyari.
DEU 16:10 Hikɨ 'ana patsiekamekɨ xemuyukuxexeɨriwa xepɨwewieni Yawé xekakayari hetsiemieme Tsemana 'ixɨarariyari, 'ana xekaniyetuaxɨakuni mawari kexemɨteyuwaɨriya Yawé xekakaɨyari kehepaɨ mɨtixe'uparewi.
DEU 16:11 'Ana xekaniyutitemawikuni Yawé xekakaɨyari hɨxie hakewa mɨkɨ meyuhayewa, xeniwema yunaitɨ 'ukitsi meta 'ukari wahamatɨa, meta xete'uximayatsiriwamete 'ukitsi meta 'ukari, rewitsixi 'akie kiekatari, 'ateewa kiekatari, nutuite meta wiuraxi mana xekie kiekatari.
DEU 16:12 'Ekipitu waɨriyarika te'uximayatamete xemakɨ xekena'eriwani, 'ayumieme yaxeketenekahuni 'ikɨ naime 'aitsikatsie yemekɨ.
DEU 16:13 »Kepaukari xemɨkunɨxɨani tɨriku xe'itsanatɨwetɨ, 'ana 'atahuta tukariyari Xamaru 'ixɨarariyari xekaniwewikuni.
DEU 16:14 'Ana xekaniyutitemamawikuni, xeniwema yunaitɨ 'ukitsi meta 'ukari meta xete'uximayatsiriwamete 'ukitsi meta 'ukari, rewitsixi 'akie kiekatari, 'ateewa kiekatari, nutuite meta wiuraxi mana xekie kiekatari.
DEU 16:15 'Atahuta tukari 'ikɨ 'ixɨarari xekaniwewiekakuni Yawé xekakaɨyari hetsiemieme, hakewa mɨkɨ menayexeiya, Yawé xekakaɨyari 'aixɨa katiniyuriekamɨkɨ xe'itsanari meta naime xe'uximayatsika. Meta xetemawierika panayuhayewani.
DEU 16:16 »Xeiwiyaritsie haikakɨa yunaitɨ 'ukitsi xehetsɨa miemete Yawé xekakaɨyari hɨxie mepɨti'uweni, hakewa mɨkɨ meyuhayewa, mana xemiwewienikɨ Patsikwa 'ixɨarariyari, Tsemana 'ixɨarariyari meta Xamaru 'ixɨarariyari, peru yumawetɨ meuyani pɨkayɨwe Yawé hɨxie.
DEU 16:17 Mɨkɨ yuxexuitɨ mepɨteyetuaxɨani mawari Yawé xekakaɨyari kemɨtiwaparewie.
DEU 16:18 »'Itsɨkate xekaniwatihɨawikuni 'aixɨa memɨte'akayuruwanikɨ heitseriemekɨ yu'iwama watsata, xexuime kiekaritsie Yawé xekakaɨyari 'anuiwarite mɨwayetuirienitsie.
DEU 16:19 'Axaxepɨkateyurieka heitseriemekɨ yaxekatekahutɨ meta hixɨata ti'atɨkaimekɨ xepɨkatekuxatani. 'Axapemɨtayɨnikɨ xɨka xewitɨ tumini matsi'ɨitɨaka mɨkɨ pepɨkatinaki'erieka, mɨkɨ mɨyamɨti'ane mɨtimaiwe kaheuniereme kanayeitɨaka, meta heitseriemekɨ 'amuyeika niukieya kanititunani.
DEU 16:20 Mɨtiheitserie xeikɨa keneuweiyani mɨkɨ xeikɨa xekeneuweiyani, 'iya kwieyaritsie xemuyuhayewakɨ xekwie mayanikɨ Yawé xekakaɨyari mɨxeyetuirienitsie.
DEU 16:21 »Hakewa mawari taiyame xemetawewieni Yawé xekakaɨyari hetsiemieme, mɨkɨ 'aurie 'uka 'Atserá kakaɨyariyari 'ɨkiyari xepɨka'utaketsani,
DEU 16:22 metatsiere yaxeikɨa tetexi kakaɨyarixi xepɨkawarayeitɨwani, karikɨ Yawé xekakaɨyari mɨkɨ katinixani'erieka.
DEU 17:1 »Yawé yukakaɨyari xepɨkatemawirieka xeime muxa meta tuuru 'axa'anekame, mɨkɨri Yawé xekakaɨyari pɨxani'erie.
DEU 17:2 »Xewitɨ 'uki yatɨni 'ukaratsi xe'iwatɨtɨ, xekiekaritsie kiekame Yawé xekakaɨyari mɨxeyetuirienitsie, xɨka 'uxeiyarieni 'axatiyurienetɨ Kakaɨyari hɨxie. Mɨkɨ tewi tɨratu 'axakaniuyurieni,
DEU 17:3 meta kenemɨtixe'aitɨa yamɨkatikamie kaniyɨaneni, hipame kakaɨyarixi mɨwarayexeiyakɨ, wahɨxie mukatunumakekakɨ yatɨni tau mayexeiyakɨ, metseri meta xurawetsixi muyuawitsie miemete.
DEU 17:4 Yapauka mɨpaɨ xemɨtemarienitsie, xekaniti'iwaukuni yemekɨ xemɨtehetimanikɨ. Xɨka yuritɨni mɨpaɨ 'axatiuyɨni 'Ixaheri kwieyaritsie,
DEU 17:5 mɨya mɨtiuyuri xekananuhanikuni kiekari kitenie 'ahetewakaku, tsepa 'uki yatɨ pɨti'uka, mana kaneuyeweka tetexikɨ mɨmierienikɨ.
DEU 17:6 Xɨka yuhutatɨ yatɨni yuhaikatɨ memunenierixɨ yamehaitɨkani, pɨyɨwe mɨkɨ tewi mɨmierienikɨ, peru pɨkayɨweni yuxewitɨ munierixɨ yahainekaku.
DEU 17:7 Kemɨ'ane meri memɨtekatsutɨani memɨte'ikwinitɨanikɨ memunenierixɨ mekaniyɨkuni, hikɨ 'arike yunaitɨ teɨteri mepitituaxixɨani. Mɨpaɨ xepɨte'ekumaweriya 'axamɨti'ane xetsata muxuawe.
DEU 17:8 »Xɨka yemekɨ waɨkawa tixuaweni xemɨkatekema 'aixɨa xemɨteyurienikɨ, xɨka tiuyukwitɨ, yatɨni hipatɨ waɨkawa meyuniukimaka, 'axameteyurieka hipatɨ, yatɨni waɨkawa xɨka kiekaritsie tixuaweni, xekanihuni Yawé xekakaɨyari hakewa menayexeiya
DEU 17:9 yaxekateniwaretahɨawikuni mawari wewiwamete rewitsixi meta 'itsɨkame hɨxie. Xekaniwareta'iwawiyakuni mɨkɨ yamekanetiyuakuni kemɨtiheitserie.
DEU 17:10 Yaxekateneyurikuni mɨkɨ kememetiyuani ketitakɨ mɨranutahɨiyanikekai hakewa Yawé menayexeiyatsie, mɨpaɨ xekateneyurikuni naime mɨkɨ kememɨxetehetahɨawe.
DEU 17:11 Xemeri mɨpaɨ xekatenikakɨnikuni kexemɨtetahɨawarieni, kehepaɨ 'aixɨa mɨ'ane kememɨtiyuani, yaxekatenikakɨnikuni kemɨreuku'uxa kehepaɨ mɨkɨ memetiyua.
DEU 17:12 Xɨka xewitɨ waɨkawa timaikame yu'erietɨ 'itsɨkame kahanu'enieni yatɨni mawari wewiwame mɨkɨ Yawé parewiwameya mɨhɨkɨ, mɨkɨ ke'umierieni. Mɨpaɨ xepɨte'ekumaweriya 'axamɨti'ane 'Ixaheri kwieyaritsie.
DEU 17:13 'Ana yunaitɨ teɨteri mekatenetimaikuni, mekanitimamakuni meta mekatenihayewakuni meyuti'ɨretɨ.
DEU 17:14 »Kepauka kwietsieri xemɨ'axɨani Yawé xekakaɨyari mɨxeyetuirietsie, manari xɨka xe'u'uwani, xɨka reumietɨ mɨpaɨ xe'utiyuani: “Tame ti'aitame tepeuyehɨwa tahetsɨa mɨti'aitanikɨ, hipatɨ nuiwarite ta'aurie mematetɨka kememɨ'ane wahepaɨ”,
DEU 17:15 'ana yemekɨ xekeneyu'ɨwiya xeime xemanukakenikɨ yu'iwa xetsata mieme xemuyurienikɨ, xeime kemɨ'ane Yawé xekakaɨyari manayexeiya. Xepɨka'ipitɨaka xeime yeikame yatɨni 'ateewa kiekame.
DEU 17:16 »Mɨkɨ ti'aitame yumɨireme kawayutsixi mɨwananeka pɨkayɨweni, meta teɨteri pɨkawapitɨaka 'Ekipitu memeuhunikɨ waɨkawa kawayutsixi mewarexeiyatɨ memakɨnekɨ, karikɨ Yawé mɨpaɨ katinixe'utahɨawe: “Tawariri mɨkɨ huyeta xepɨkaheuhuni”.
DEU 17:17 Ti'aitame yumɨireme pɨkawarexeiyani 'ukari yuhetsiemieme, kapa 'uxa'atɨniwarie 'iyarieya heuyewenikɨ, yaxeikɨata waɨkawa huru meta pɨrata pɨkaxeɨrieka.
DEU 17:18 »Kepauka ti'aitame ti'aitatɨ mayanitsie, yapɨtita'aita 'inɨari niukiyari maye'ɨkienikɨ, rewitsixi mawari wewiwamete memi'ɨwiya.
DEU 17:19 Mɨkɨ 'ɨkiyari pexeiyani yu'aurie yuheyemekɨ, yakatiniterɨwakamɨkɨ kemɨreutere 'uyeikatɨ. Mɨpaɨ tiyurienetɨ Yawé yukakaɨyari payemakaxeni, yapɨtikamieni yu'iyarikɨ meta naime 'aitsikate hetsie,
DEU 17:20 mɨkɨ mariweme pɨka'ayuyeitɨwani yu'iwama watsata meta 'inɨari niukiyari pɨkahehɨpani 'etsiwatɨma, mɨkɨ meta nuiwarimama mɨixa wiyari mekatenita'aitakuni 'Ixaheri kwieyaritsie.
DEU 18:1 »Rewi nuiwarieya, mɨkɨ mekanihɨkɨtɨni rewitsixi mawari wewiwamete, mɨkɨ yukwie mepɨkahexeiyani 'Ixaheri kwieyaritsie. Mawari 'imikieri taipa warɨkarietɨ mɨyetuiwa mepɨkwaka, meta Yawé hetsie tita mɨtimieme.
DEU 18:2 Rewitsixi tixaɨtɨ mepɨkateyetuiriyarieni yu'iwama watsata, Yawé pɨhɨkɨtɨni wa'imikieri, meripaitɨ mɨkɨ kemɨtiwarutahɨawixɨ.
DEU 18:3 »Kepauka xewitɨ tuuru yatɨni muxa mɨtimawa, heitserie mepexeiya mawari wewiwamete waiyarieya 'ɨrɨya memɨtikwanikɨ, meta 'auritana mieme metatsiere kwinuriteya.
DEU 18:4 Meta xepɨwayetuiriwani tɨriku mexɨakame, winu, meta hatseiti, yaxeikɨata muxatsi wahuxari matɨari xemɨwakaxini.
DEU 18:5 Karikɨ Yawé xekakaɨyari mɨkɨ kaniwaranayexeiya meta wanuiwarima, hipame xeme nuiwarite xehayewatɨ, memɨte'uximayakakɨ yuheyemekɨ hɨxiena hetsiena mieme.
DEU 18:6 »Xɨka xewitɨ rewi tewiyari xeime kiekariyaritsie 'uyeikatɨ 'Ixaheri kwieyaritsie, mɨpaɨ tiuyɨhɨawe Yawé hakewa meyuhayewa mana reu'uximayatamɨkɨni, xɨka mana nuani xepɨkahe'imaiyani,
DEU 18:7 pɨyɨwe mɨti'uximayaka Yawé hetsiemieme yukakaɨyari, kememɨteyurie hipatɨ rewitsixi wahepaɨ, Yawé hɨxie.
DEU 18:8 Yaxeikɨata mɨkɨ pɨti'iwani yu'ikwai mɨrexeiyanikɨ hipame wahepaɨ, meta yupaapa piiniteya xɨkatiutuani.
DEU 18:9 »Kepauka xemɨ'axɨani Yawé xekakaɨyari kwie muxeyetuirietsie, xepɨkawa'ɨkeni mɨkɨ ke'axamemɨte'uhu muwayeiyarikɨ xeikɨa mɨkɨ nuiwarite.
DEU 18:10 Xeme nixewitɨ pɨkawamawaneni yuniwema 'ukitsi meta 'ukari taipa, meta mɨretimamatekenikɨ pepɨkahe'ayeitɨwani, mɨtiyukewaiyanikɨ yatɨni 'awie mɨtiuyemate,
DEU 18:11 me'utikwitɨ memɨtewamaxiutawawe xepɨkahɨkɨtɨni, 'iyarite memɨwakɨhɨawe hipame wahetsiemieme xepɨkahayuyeitɨwani meta mɨkite xepɨkawakɨhɨaweni.
DEU 18:12 Kemɨ'ane 'ikɨ yeiyaritsie yamɨtiyuriene Yawé hɨxie mɨxani'eriwa kanayuyeitɨamɨkɨ, mɨyamemɨteyuriekɨ Yawé 'akakaɨyari mɨkɨ nuiwarite kaniwarayenɨ'amɨkɨ xehɨxie.
DEU 18:13 Yawé xekakaɨyari hɨxie 'aixɨa xeketeneu'iyarini.
DEU 18:14 »Kwie xema'axɨanitsie mana teɨteri memu'uwa mɨkɨ memɨteyukewaiya meta memɨtehetimamateke mepɨwaku'iwawiya kemɨtiyɨnikɨ, peru xeme Yawé xekakaɨyari pɨkaxepitɨa mɨpaɨ xemɨteyuriekakɨ.
DEU 18:15 Yawé xekakaɨyari xeime panayexeiya xe'iwatɨme niukameya mayanikɨ nehepaɨ. Mɨkɨ hɨrixɨa xepɨ'enieka.
DEU 18:16 Mɨkɨ kanihɨkɨtɨni xeme Yawé yukakaɨyari xemɨte'itawawiri Huré hɨriyaritsie, xemayuxeɨriekai tukariyaritsie, kepauka mɨpaɨ xemutiyua: “Neri Yawé nekakaɨyari niukieya ne'enietɨ nepɨka'umieni, meta Yawé taiya nepɨkaheuxeiyamɨkɨ, nɨkahɨrixɨa ne'umɨni”.
DEU 18:17 »Hikɨ mɨpaɨ Yawé kanetiniutahɨawe: “'Aixɨa kani'aneni mɨkɨ kememaitɨka.
DEU 18:18 'Ayumieme watsata xeime nepanayexeiya neniukame mayanikɨ 'ahepaɨ, ne neniuki nepipitɨani tetana, mɨkɨ yapɨtiwataxatɨani ne kenemɨtita'aitɨani.
DEU 18:19 Xɨka xewitɨ ka'i'enieni kemutaineni neniukame nehetsiemieme tikuxatakaku, mɨkɨ ne kanetinakapitɨamɨkɨ.
DEU 18:20 Peru xewitɨ xɨka ka'ukamatɨ tikuxatani neniukame yuxatatɨ, xɨka tikuxatani tixaɨtɨ ne yanekatita'aitɨaku, mɨkɨ kanimɨmɨkɨ. Yaxeikɨata kaniyɨmɨkɨ xewitɨ niukame yuxatatɨ hipame kakaɨyarixi wahetsiemieme xɨka tikuxatani”.
DEU 18:21 »'Uxa'atɨni warie xɨka mɨpaɨ petiyuta'iwawiya: “¿Kehepaɨ neretimani xɨka Yawé niukieyatɨni yatɨ hawaikɨ?”
DEU 18:22 Xɨka Yawé niukameya Yawé hetsiemieme tikuxatani peru kemɨtikuxata mɨpaɨ katiuyɨni, xeme mɨpaɨ xekatenetimaikuni kename Yawé hetsɨa kamieme. Mɨkɨ tixaxatame kemɨtinake yakatipitɨarietɨ mɨtiutaxakɨ, xeme mɨkɨ xepɨkaheumakaxeni.
DEU 19:1 »Kepauka Yawé xekakaɨyari yunaime mɨwaka'una nuiwarite wakwie mɨxeyetuirieni, meta kepauka xemeri xemɨwarayeweiya, 'ari wakwietsieri kepauka xemɨtiteni meta wakiiteta,
DEU 19:2 kiekarite yu'awiwietame haikame xekananayexeiyakuni kwie Yawé mɨxeyetuirienitsie hixɨapa yukwie xemayeitɨanitsie.
DEU 19:3 Kwie, Yawé xekakaɨyari mɨxeyetuirieni xepiini mayanikɨ, 'ayehaikame xepayeitɨani, meta huye xepɨtiwewieni kemɨ'ane mɨtiyumieni mɨyɨwenikɨ mɨkɨtsie muyuti'awietakɨ.
DEU 19:4 »Xewitɨ tiyumiekame xɨka muwa ye'ani yuti'awietake, pɨyɨweni xeikɨa muyuti'awieta kemɨ'ane yu'iwa mumieni mɨpaɨ kara'eriwatɨ meta ka'ihekatɨ.
DEU 19:5 'Inɨarikɨ nehaitɨ, xɨka mɨpaɨ timieni: xɨka xewitɨ yu'iwa hamatɨa heyani 'ɨtsita memetikɨ'enikɨ, peru xɨka tiwitenekaku hatsaya hanutihɨne 'iwayatsie 'ukaweni xɨka 'imieni, mɨkɨ pɨyɨweni xeime mɨkɨ kiekaritsie muyuti'awietakɨ meta muyutawikweitsitɨanikɨ.
DEU 19:6 Pɨkaheuyewetse 'ateewa meyani mɨpaɨ tiuyurieme, mɨkɨ mɨha'a penuku'axiwe pimiewe, 'aixɨa pɨka'ane 'iya tewi mɨmierienikɨ yu'iwa mumikɨ mɨpaɨ kare'eriyatɨ.
DEU 19:7 'Ayumieme nepɨxe'aitɨa haika kiekariyari xemukunakakɨ.
DEU 19:8 »Xɨka Yawé xekakaɨyari xekwie matsi 'a'utayeuriya, xetutsima kemɨtiwarutahɨawixɨ, meta naime kwie xeme xeyetuirieni mɨkɨ kemutayɨkɨ,
DEU 19:9 xɨka xeme yaxetekakɨne 'ikɨ naime 'aitsikatetsie hikɨ nemɨxe'aitɨa, meta xɨka Yawé xekakaɨyari xenaki'erieka, meta huyetana yuheyemekɨ xe'uhuni, hikɨ 'ana tawarita haikame kiekari xepukunani.
DEU 19:10 Mɨpaɨ xeteyurieyu 'atsimɨkatiuyuri xuriyaya pɨkatayeuriyani mɨkɨ kwieyaritsie, Yawé xekakaɨyari mɨxeyetuirienitsie xehetsiemieme mayanikɨ, xemeta yaxeikɨa xehetsie pɨkarahɨiwani mɨkɨ mumieriekɨ.
DEU 19:11 »Peru xɨka xewitɨ tewi yu'iwa 'uxiwe'erietɨ, xɨka 'ihupieme, heitiwaxɨame tinawairieme meta 'imieme, hikɨ xɨka mɨkɨ xeime kiekari 'utiwaume mana heyani yuti'awietake,
DEU 19:12 'ukirawetsixi kiekarieyatsie kiekatari mekete'utanɨ'ani mewiyarienikɨ, 'imienike mikuwaune hetsɨa keyetuiyani mɨkɨ mimienikɨ.
DEU 19:13 Mɨkɨ memɨteyumemiwa xepɨkawanenimayaka, mɨpaɨ xeteyuriekaku 'Ixaheri kwieyaritsie pɨkarahɨiwani kename 'atsimemɨkateyurie waxuriya tayeuriwa, xemeta 'aixɨa 'iyari xepu'uwani.
DEU 19:14 »Kepauka 'iya kwieyaritsie xemɨ'axɨani Yawé xekakaɨyari mɨxeyetuirienitsie xekwie mayanikɨ, yu'iwa kwieya xepɨkahenawairietɨweni, meripaitɨ mɨkɨ mu'inɨatsiyarie.
DEU 19:15 »Xewitɨ xeikɨa ya'utainekaku munierixɨ pɨkayɨweni tewi mumierienikɨ xanetsietɨ kename 'axatiuyuri. Tsepa titakɨ mɨti'ayumieme 'aixɨa pɨtiyɨni yamehaitɨkaikaku yuhutatɨ yatɨni yuhaikatɨ memunenierixɨ.
DEU 19:16 »Xɨka xewitɨ tihekɨatame xeime xanetani 'itarikakɨ kename mɨkɨ tiuyuri 'utaitɨ,
DEU 19:17 mɨkɨ meyuhutatɨ mɨya memɨteyukumamateke Yawé hɨxie mepɨti'uni, mawari wewiwamete wahɨxie meta 'itsɨkate kemɨ'ane 'ana memɨte'uximayaka.
DEU 19:18 'Itsɨkate yemekɨ mepɨtetiwauni mepɨti'iwauni, xɨka yametehetimani kename mɨtihekɨata tiku'itawa meta kename yakɨ yu'iwatsie rahɨpa xeikɨa,
DEU 19:19 hikɨ mɨkɨ pɨta mɨpaɨ katinanuyeyeimɨkɨ yu'iwa hetsiemieme kemɨtiyurimɨkɨkai. Mɨpaɨ xepɨtehekuyeitɨaka 'axamɨti'ane xekwieyaritsie xɨka xuaweni.
DEU 19:20 Kepauka hipatɨ 'ikɨ memɨtetamarieni, mepɨtimamani tawarita mɨpaɨ ti'anetɨ pɨkatitixuawere xekwieyaritsie.
DEU 19:21 Xeime tɨma xepɨkanenimayaka. Mɨpaɨ xekeniwaruyuri xɨka xeime 'umieni mɨkɨta ke'umierieni, xɨka xeime hɨxieya watitɨni mɨkɨta hɨxieya kewatitɨiyani, xɨka tameya 'anaye'una mɨkɨta tameya ke'anaye'unarieni, xɨka mamaya wayemura mɨkɨta mamaya kewayemurarieni, yatɨni 'ɨkaya xɨka wayemura mɨkɨta 'ɨkaya kewayemurarieni.
DEU 20:1 »Kepauka xemayekɨne xemɨwaraye'unie xemɨwatakwinikɨ, meta kepauka xemɨwaxeiya kuyaxi memɨxe'aye'unie meyumɨireme keyuri xeme, waɨkawa kaxetate mewarahapaname meta kawayutsixi, xepɨkawamakaka, matsi Yawé xekakaɨyari 'Ekipitu mɨxe'ayewitɨ, pɨxeparewieni.
DEU 20:2 Kepauka 'ari xemuyutakwiximeni mawari wewiwame xehɨxie kanitakemɨkɨ kuyaxi kaniwataheitseritɨamɨkɨ
DEU 20:3 Mɨpaɨ katiniwatahɨawimɨkɨ: “Xekeneu'enana 'ixaheritsixi. Hikɨ 'ari xekaneutahaxɨakuni memɨxe'aye'unie xemuwatakwinikɨ. Xepɨka'ukununuwani xepɨkawamakaxeni, xepɨkayu'eirieka meta wahɨxie xepɨka'utimamaweni,
DEU 20:4 karikɨ Yawé xekakaɨyari xehamatɨa kaniuyeikani, mɨkɨ xehetsiemieme puyutamieni, meta mɨkɨ pɨxeparewieni xeme xemɨtehayu'iwakɨ”.
DEU 20:5 »Meta kuyaxi tewa'aitɨwamete wa'ukiyarima kuyaxi mɨpaɨ mepɨtewatahɨawe: “Xɨka xewitɨ yukii hekwame hetawewieni xɨka muwa 'akuxi kahayeyerɨwekaitɨni, mɨkɨ keheyani yukie, kapa 'umierieni 'ena, hikɨtari xewitɨ pɨta kiitana hayeyerɨni.
DEU 20:6 Xɨka xewitɨ kaxie heka'iteɨtakaitɨni, xɨka 'akuxi takari kaha'inɨatawekaitɨni, hikɨ yuharawerita keheyani, kapa 'ena 'umierienikɨ, xewitɨ pɨta rekakwanikɨ.
DEU 20:7 Xɨka xewitɨ 'ukaratsi hamatɨa 'ari retixatakaitɨni memɨyutiwitɨnikɨ, 'akuxi xɨka mekayutiwitɨweni, mɨkɨ keheyani yukiekaritsie, nɨka 'ena 'umierienikɨ, xewitɨ pɨta mɨkɨ 'uka hetiwitɨnikɨ”.
DEU 20:8 'Imatɨrieka kuyaxi tewa'aitɨwamete wa'ukiyarima mɨpaɨ mepɨtiyuani: “Xɨka xewitɨ kwinimieme timaka yatɨni muyutamienikɨ kayuwaɨriyani, keheyani yukie, nɨka yu'iwama mekayuwaɨriyame warayeitɨanikɨ”.
DEU 20:9 Kepauka memɨtetahayewa kuyaxi tewa'aitɨwamete wa'ukiyarima metekuxatatɨ, hikɨ kuyaxi memanuyetei mekaniwatihɨawikuni mɨkɨ memanuyeyaxikenikɨ.
DEU 20:10 »Kepauka kiekari 'aurie xemɨ'axɨani xewatakwinike, yaxeketeniwarutaxatɨa meri kayuwatɨ xɨka meheuyehɨaka.
DEU 20:11 Xɨka yamete'utanaki'erieni meta xɨka yukiekaritsie meteheuyepieni, hikɨ 'ana yunaime mɨkɨ kiekaritsie kiekatari xekateniwata'aitɨakuni meta waɨriyarika te'uximayatamete xehetsiemieme mekanakɨnikuni.
DEU 20:12 Peru xɨka mana kiekatari meka'uyuwaɨriya matsi pɨta xɨka mexekwikuni, hikɨ 'ana kiekari warita xepayaxetɨkɨne,
DEU 20:13 hikɨ kepauka Yawé xekakaɨyari mɨxeyetuirieni, yunaime 'ixiparakɨ xekaniwakwikuni 'ukitsi mana kiekatari.
DEU 20:14 Mɨkɨta xehetsiemieme xemɨtehayeitɨani, kaniyɨweni 'ukarawetsixi meta tɨɨri yuhetsiemieme xemɨwarayeitɨani, meta watewama meta tita mɨtixuaweni kiekaritsie. Yaxeikɨata xekaniyɨwaweni mɨkɨ xemɨtekwaka memɨxe'aye'uniekai mɨtiwapiinitɨkai, Yawé xekakaɨyari mɨtixeyetuirie.
DEU 20:15 Mɨpaɨ pekaniwayurimɨkɨ yunaime kiekarite 'ateewa mumanetɨka, nuiwarite xe'aurie mumanetɨkatsie memɨkatehawiya.
DEU 20:16 »Matsi, kiekarite Yawé xekakaɨyari mɨxeyetuirietsie xepiini mayanikɨ, xeime tɨma 'ayeniereme xepɨkahayewani.
DEU 20:17 Yunaime xekaniwakwikuni hetitsixi, 'amuxeutsixi, kananeutsixi, peretseutsixi, heweutsixi meta kewutseutsixi, kemɨtixe'uta'aitɨa Yawé xekakaɨyari.
DEU 20:18 Xɨka xekawarukwini, mɨkɨ mɨtixani'eriwa mepɨxeteti'ɨkitɨani kemeteyurietɨ yukakaɨyarixi memɨwarayexeiya, hikɨ 'ana Yawé yukakaɨyari hetsiemieme 'axaxepɨteyurieni.
DEU 20:19 »Xɨka kepauka xeime kiekari xekatamiewawetɨ xɨka xe'itahɨni pɨta waritana xehayaxetɨkɨne mɨixa tukari, mana mɨtixuawe kɨyexi 'ikwaxi mɨtikayaxike xepɨkatewitekeni hatsakɨ, mɨkɨ karikɨ peheiyehɨatɨ pekanayeimɨkɨ pekanitikwaimɨkɨ. Pepɨka'ixɨrieka xeikɨa, mɨkɨ teɨteri wahepaɨ memɨyɨkɨhɨani mepɨkayɨwawe matsi kɨyexi yeutamieme xeikɨa kanihɨkɨtɨni.
DEU 20:20 Matsi kaniyɨwemɨkɨ pemiwiteneni kɨyexi 'ikwaxi mɨkaxuaweriyawe meta kɨmana tsepa pemɨtiwewie kɨmana kiekaritsie pemanukatsunakɨ, mana pekatihayewatɨ kepaukake pemɨwara'iwa.
DEU 21:1 »Xɨka xaɨtsie Yawé xekakaɨyari mɨxeyetuirieni kwieyaritsie xekwie mayanikɨ xewitɨ mɨkitɨ hetaxeiyarieni, xɨka 'atsixekatehetimani kemɨ'ane miimi,
DEU 21:2 'ukirawetsixi meta 'itsɨkate mepuhu mepiti'inɨata mɨki manuka kemetetewa kiekarite 'ahurawa mamanetɨkatsie.
DEU 21:3 Hikɨ 'ukirawetsixi kemɨ'ane kiekari 'ahurawa mɨki manuka mukumatsie kiekatari xeime tsikeru mekaniwiyakuni, hatsuaku mɨkatita'uximayatawe mɨkatakwietsanawe.
DEU 21:4 Mepenuhana xaɨtsie mayeweritsie hatsuaku kwietsanarita mɨka'ayeiwetsie meta mɨkatiwaka 'iteɨtsiewetsie, meta haa yarexuawekaku, muwapaitɨ kɨipieya mepuwamura.
DEU 21:5 'Ana mawari wewiwamete rewitsixi mana mepɨneniereni yu'uximayatsika memaye'atɨanikɨ, Yawé xekakaɨyari mɨwaranayexei mɨkɨ kemɨtitewakɨ hetsienamieme teɨteri 'aixɨa memuwayuriekakɨ, meta yamemɨte'uximayakakɨ mɨkɨ memɨte'akanɨtsanikɨ kepauka 'imieri muxuawe meta 'inawari.
DEU 21:6 Hikɨ yunaitɨ 'ukirawetsixi kiekari 'ahurawa mukumatsie kiekatari mɨki manukatsie, mɨkɨ mepɨtimaimani wakaxi kɨipieya muwamurarie hetsie,
DEU 21:7 hikɨ 'ana mɨpaɨ heitseriemekɨ mepɨtiyuani: “Tame 'ikɨ xuriya tepɨka'utayeuri, meta tepɨka'unenierixɨ 'ikɨ mɨyamɨtiuyɨ.
DEU 21:8 Yawé, ketiniwareuyehɨwirieka 'ixaheritsixi 'ateɨterima, mɨkɨ pemɨwaruxɨnaxɨ, meta mɨkɨ wahetsie pepɨkarahɨpani 'atsikatiyuruwame xuriyaya mutayeuriyakɨ”.
DEU 21:9 Mɨpaɨ 'ekɨ 'atsikatiyuruwame xuriyaya mutayeuriya 'ahetsie mɨrahɨiwa 'akwieyaritsie pepɨrakumaweriya, mɨpaɨ xɨka petiuyurieni 'aixɨa pepɨtiyurieni Yawé hɨxie.
DEU 21:10 »Kepauka xemayekɨne xeheuyukwiyuka memɨxe'aye'unie wahetsɨa, xɨka Yawé xekakaɨyari wayetuani xemɨwara'iwakɨ, hikɨ xɨka pɨretsutsixi xewarayeitɨani yayupaɨmeme,
DEU 21:11 xɨka xewitɨ xeime 'uka mupɨretsu 'inakeni, mitiwitɨni pɨyɨweni 'ɨyaya mayanikɨ.
DEU 21:12 Penuwitɨni yukie, yapɨtita'aitɨani muyukaxinikɨ, yuxɨtete manutixitexɨanikɨ,
DEU 21:13 meta pɨretsu kemariyari ke'anutihɨna. 'Arike 'akie mɨixa 'ukaiku, meta tihayewayuri yuhiwerietɨ yupaapa yumaama wahekɨ 'ari xeimetseri reutewikaku, 'anake pemitiwitɨni pɨyɨweni, 'ekɨ kɨnaya pepɨhɨkɨtɨni mɨkɨta 'a'ɨya.
DEU 21:14 Peru xɨka 'arike kamatsi'unake, pepipitɨani mɨkɨ tsepa hakewa metɨa. Pɨkayɨweni pemituani meta ti'a'uximayatsiriwame hepaɨ pemiyurieneni, mɨkɨtsɨ pemitixani'eri kanayani.
DEU 21:15 »Nepɨxetaxatɨani xewitɨ 'uki yuhutame yu'ɨitama mɨwarexeiya, xeime xeikɨa waɨkawa mɨnaki'erie, xeimeta pɨkanaki'erie, yuhutame wahetsie tɨɨri pɨwarayexei, matsi 'uka mɨkanaki'erietsie meri nunutsi mexɨakame kaniutinuiwa.
DEU 21:16 Kepauka 'ikɨ tewi yuniwema mɨtiwatapitɨani yupiinite, pɨkayɨweni 'uka mɨnaki'erietsie mieme pɨta mɨtikupitɨwani tita mexɨakame hetsie mɨtimiemetɨkai, meta yuniwe mexɨakame yatipaɨmeme xeikɨa pɨkatikupitɨwani, tatsɨari, yu'ɨya waɨkawa mɨkanaki'erietsie mieme.
DEU 21:17 Matsi pɨta mɨkɨ mexɨakame kehayeitɨwani heitserie kemɨrexeiya mexɨakametɨtɨ, hikɨ 'ikɨ mexɨakame pɨtipitɨani 'anatekame matsi tawari hepaɨna paɨmeme ketita hetsiena mɨtimieme. Mɨkɨ wamatsika kanihɨkɨtɨni matɨari meyexei, mɨkɨ heitserie kanexeiyani mexɨakame mɨhɨkɨtɨnikɨ meta tita hetsiena mɨtimieme pɨtipiinieya.
DEU 21:18 »Xɨka xewitɨ yuniwe hexeiyani 'axatiuka'iyarime katiyu'aitɨarinɨakame, yupaapa meta yumaama, xɨka kawareu'enieka kepauka memiheitseritɨa,
DEU 21:19 paapaya meta maamaya kiekari kitenie mepenuwitɨni, 'ukirawetsixi wahetsɨa mepitaxata.
DEU 21:20 Hikɨ paapamama 'ukirawetsixi mɨpaɨ mepɨtewatahɨawe: “'Ikɨ taniwe pɨkaheu'ena 'axapɨtiuka'iyari, kemɨtinake xeikɨa pɨtiyuriene meta pɨtawekame. Pɨkatatsi heu'enie”.
DEU 21:21 Hikɨ 'ana yunaitɨ 'ukitsi mana kiekaritsie kiekatari me'itituaxatɨ tetexikɨ mekanimiekuni. Mɨpaɨ xepɨtehekumaweriya 'axamɨti'ane 'Ixaheri kwieyaritsie. Hikɨ yunaitɨ 'ixaheritsixi mepɨtetamarieni meta mepɨtimamani.
DEU 21:22 »Xɨka xewitɨ hetsiena rahɨiyayu 'axatiuyurieka 'ukawiyani,
DEU 21:23 kaxarieya kɨyetsie 'uyewiekame xepɨka'uku'e'eiriwani tɨkarikɨ, matsi mɨkɨ tukaritsie xekeneukateuki. Karikɨ xewitɨ kepauka kɨyetsie muyewiyani mɨkɨ tewi Kakaɨyari 'axakaniyurieka. Ka'itiyakame kwie xepɨka'ayeitɨaka Yawé xekakaɨyari mɨxeyetuirie xekwie mayanikɨ.
DEU 22:1 »Xɨka xewitɨ yu'iwa tewaya 'utaxeiya heuyeweyu tuuru yatɨni muxa, 'atsimɨkatimate hepaɨ pɨkayɨaneni matsi kwitɨwa kehehanieni kutsiyarie hetsɨa.
DEU 22:2 Xɨka kutsiyarieya 'ahurawa kakiekametɨni yatɨni xɨka peka'imateni, kehei'arieni yukie kehei'ɨwiyani kepaukake kutsiyarieya mitawawirieni, hikɨ 'anake piyetuirieni.
DEU 22:3 Yaxeikɨa pɨtiyurieni xɨka puxu 'ukaxeiya, yatɨni 'ixuriki, yatsepa kemɨtitita 'iwaya mɨreuyehɨa. Kepemɨtihɨritɨarie pepɨka'uku'e'eiriwani.
DEU 22:4 »Xɨka xewitɨ huyeta puxu yatɨni tuuru hetaxeiya hetakurupeyu yu'iwa tewaya, 'atsimɨkatimate hepaɨ pɨkaheyɨaneni: keheiparewieni yu'iwa memenukuhanakɨ.
DEU 22:5 »'Ukarawetsixi 'ukitsi wahepaɨ mepɨkateyukukamixatɨwani, 'ukitsi meta 'ukari wahepaɨ mepɨkateyukukemaritɨwani, karikɨ Yawé xekakaɨyari mɨkɨ mɨyamemɨte'u'iyari kaniwaxani'erieka.
DEU 22:6 »Xɨka xewitɨ huyeta wiki 'ituaya hetaxeiya kɨyetsie yatɨni kwiepa, meta wamaama mana hatikani yuniwema 'etsimemɨpepe wahetsie yatɨni tawári hetsie, wamaama pepɨkahetutuweni meta 'etsimemɨpepe.
DEU 22:7 'Etsimemɨpepe pemɨwaretɨkɨ pepɨyɨwe, peru wamaama pepɨtatuani. Mɨpaɨ 'aixɨa metiyurieka meta waɨkawa tukari pepɨpitɨarieni pemɨ'atemawiekakɨ.
DEU 22:8 »Kepauka kii hekwame pemeyutawewirieni, kii heima ya'atitewame pepawewietɨyani, kapa xewitɨ mana hakaweme 'umɨyɨ 'atɨɨriyama wahetsie rahɨiyanikɨ.
DEU 22:9 »Kepauka kaxie haraweriyata pemɨreka'eni, 'imɨari yɨkɨ mɨ'anene pepɨkaheinɨitɨaka, xɨka mɨpaɨ petiuyurieni, Kakaɨyari pepɨyetuirieni kaxie hepaɨ, tita muwa pemɨtika'eni 'ikwaxiyari meta kaxie 'ikwaxiyari.
DEU 22:10 »Tuuru puxu hamatɨa xeime hararuyaritsie mehauyutinɨkame xepɨkawakwietsanatsitɨatɨweni.
DEU 22:11 »Kemarite xemɨte'anakatɨtɨkani muxa huxarieya hamatɨa rinu hiruyarikɨ pɨka'aye'itseni.
DEU 22:12 »Mata 'ixurikiyari kɨmana xemuyuti'eimani naitsata 'etsikinatsie pawɨtɨkani witsi'anenetɨ, kaunari hepaɨ 'anenetɨ 'etsitɨtɨ.
DEU 22:13 »Xɨka xewitɨ 'uki 'utineuke, 'ariketa 'ukahume hamatɨana xɨka 'axatikɨhɨaweni 'i'eirimɨkɨni,
DEU 22:14 'itarikakɨ xɨka 'axatikuxatatɨ meta 'ixanetani, mɨpaɨ 'utaitɨ: “Ne 'ikɨ 'ukaratsi neputiwitɨ peru kepauka hamatɨana nemukahui mɨpaɨ nepɨretima mɨkɨ pɨmayɨiyakairi”,
DEU 22:15 hikɨ 'uka paapaya meta maamaya kiekari kitenie mekanihuni, hikɨ mana 'ukirawetsixi mepɨtewaxeitsitɨani yame'utiyuatɨ kename matsi mɨkɨ ka'ukumayɨiyakai.
DEU 22:16 'Uka paapaya 'ukirawetsixi mɨpaɨ pɨtiwatahɨawe: “'Ikɨ 'uki neniwe 'uka nepiwitɨtɨa 'ɨyaya mayanikɨ, hikɨta pi'eirimɨkɨ.
DEU 22:17 Hikɨ mɨkɨ 'axapɨtikuxata, mɨpaɨ putaine kename 'ukumayɨiyakai. Peru 'ena hikɨ tepɨte'atɨa tetexexeiyatsitɨanike mana mɨmatsiɨkɨ kename kamayɨiyakai”. Hikɨ 'ana paapamama tsawana mekanitawenakuni memuyutiwitɨtsie matɨari tɨkaritsie mieme 'ukirawetsixi mana kiekatari wahɨxie,
DEU 22:18 Hikɨ 'ana mɨkɨ 'uki mepɨwiya mepɨte'ika'enitsitɨani,
DEU 22:19 meta xeitsienituyari pɨrata tuminiyari pɨyetuani, 'uka 'ɨimari 'Ixaheri nuiwarieya 'axamɨtiutamakɨ, mɨkɨ tumini paapamama mepɨyetuiriyarieni. Matsi mɨkɨ 'ɨyaya pɨhɨkɨtɨni mexi 'uyeikani, hatsuaku miku'eirieni pɨkayɨweni.
DEU 22:20 »Peru xɨka yurikɨ tikuhɨawarɨwani xɨka kahekɨaka kename yuxewikai mɨkɨ 'uka,
DEU 22:21 kehehanieni paapaya kiiya kitenie paitɨ, hikɨ mana 'ukitsi kiekaritsie kiekatari meke'imieni tetexikɨ me'ititɨaxatɨ. Mɨpaɨ keranuyeyani 'axamɨtiuyurikɨ 'Ixaheri kwieyaritsie meta yupaapa kiiya mutewiyatsitɨakɨ 'axa'anemekɨ 'uyeikatɨ mɨyamɨtiuyurikɨ. Mɨpaɨ xepɨtehayewani 'axamɨti'ane xetsata mɨtixuawe.
DEU 22:22 »Xɨka xewitɨ 'uki hetaxeiyarieni xeime 'ɨyaya hamatɨa 'ukaitɨ, mɨkɨ yuhutatɨ meke'ukwi'iwa, 'uki hamatɨana mukahui meta 'ukaratsi. Mɨpaɨ xepɨtehayewani 'axamɨti'ane 'Ixaheri kwieyaritsie.
DEU 22:23 »Xɨka xewitɨ 'uki kiekaritsie 'uka 'ɨimari hekaxeiya, 'ari xeime hamatɨa tɨratu hexeiyakame memɨyutiwitɨnikɨ, xɨka waɨriyarika heipitɨani hamatɨana mekahunikɨ,
DEU 22:24 mɨkɨ yuhutatɨ mekehehapanieni kiekari kitenie, mana meke'ukwi'iwa tetexikɨ mekeheutituaxiexɨani: 'uka pɨmierieni mɨka'utahiwaxɨkɨ parewiya ha'iwawatɨ mana kiekaritsie, meta 'uki pumierieni hepaɨna tewi mitiwitɨnikekai mutewiyatsitɨakɨ. Mɨpaɨ xepɨtehayewani 'axamɨti'ane xetsata mɨtixuawe.
DEU 22:25 »Peru xɨka 'uki yeuta 'itaxeiya 'uka 'ɨimari tiwikieximeme, yaxeikɨa xɨka mɨkɨ waɨriyarika 'ipitɨani mɨkahunikɨ hamatɨana, 'ana 'uki xeikɨa ke'umierieni 'uka waɨriyarika mupitɨakɨ.
DEU 22:26 Mɨkɨ 'uka xepɨhayewa, mɨkɨ 'axapɨkatiuyuri pɨkaheuyewetse mumierienikɨ. 'Uki kemɨtiuyuri xeime mumieni hepaɨ pɨtimatsiukɨ:
DEU 22:27 'uki yeuta 'uka pukaxei, tsepa 'uka karima mutahiwake, mana pumawekai xewitɨ hetsiena mɨtanuanikɨ.
DEU 22:28 »Xɨka xewitɨ 'uki 'uka 'ɨimari 'ukaxeiya xeime hamatɨa 'akuxi mɨkatikuxata memuyutiwitɨnikɨ, xɨka 'uki waɨriyarika 'ipitɨani hamatɨana mɨkahunikɨ, xɨka me'utaxeiyarieni,
DEU 22:29 'uki 'uka 'ukiyarieya pɨrakapitɨani huta tewiyari heimana tamamata pɨrata tuminiyarikɨ, meta 'uka pɨtiwitɨni mikumayɨakɨri. Mɨkɨ hatsuaku pɨkayɨweni miku'eirieni.
DEU 22:30 »Nixewitɨ tewi yupaapa 'ɨyaya pɨkakumaɨwani, mɨkɨ waɨkawa 'axapɨtiyurieneni yupaapa mariweme mɨkahayeitɨwakɨ.
DEU 23:1 »Pɨkayɨweni 'iya 'uki meutahanikɨ Yawé teɨterimama memayutixexeɨriwatsie, xɨka 'ipuriteya pɨratsietɨkani yatɨni xɨka xieyameya haxitekieka.
DEU 23:2 »'Awienuari pɨkayɨweni meutahani Yawé teɨterimama memayutixexeɨriwatsie, meta nuiwarieya pɨkayɨweni, tamamatarieka nuiwariyaritsieke mepɨyɨwekaxɨani.
DEU 23:3 »Pɨkayɨweni memeutahaxɨani Yawé teɨterimama memayutixexeɨriwatsie 'amunitsixi meta muhawitsixi, meta nixewitɨ wanuiwarima, tamamata nuiwariyari me'uhukakuke.
DEU 23:4 Kepauka wakwietsie xemayekɨ paa meta haa memɨkaxe'umikɨ, kepauka 'Ekipitu xe'ayekɨneka mana xemayekɨtsie. Matsi Warami meputa'ini Wehuxi nu'aya, Petuxi paitɨ kiekame Metsuputamiya kwieyaritsie, mɨxekewaiyakɨ.
DEU 23:5 Peru Yawé xekakaɨyari xenaki'erietɨ Warami pɨkahanu'eni, hikɨ pipataxɨ 'axakemɨxeyurienikekai 'aixɨa pɨta pɨxe'uyuri.
DEU 23:6 'Ayumieme, 'ena xe'u'uwatɨ kexemɨteheutere, hatsuaku mɨkɨ wahamatɨa xepɨkaheyuxewiriyani meta xepɨkawareparewieka.
DEU 23:7 »Xepɨkawaxani'erieka 'Erumi xiɨyarimama, mɨkɨ karikɨ xe'iwama mekanihɨkɨtɨni. Meta 'ekipitutari xepɨkawaxani'erieka, wakwiepa xemu'axɨakɨ teewatari wahepaɨ xe'anetɨ.
DEU 23:8 Mɨkɨ wanuiwari, mepɨyɨwawe memeutahaxɨani Yawé tukita hairieka nuiwariyaritsie miemete.
DEU 23:9 »Kepauka xemayekɨne xeheyukwiyuka yateewa xemetiyaxetsie memɨxe'aye'unie xewatakwinike, kene'akweriwayurieka mɨkati'itiya hepaɨtsita.
DEU 23:10 Xɨka xewitɨ xehetsɨa mieme tɨkarikɨ 'axatiheinɨtɨ ka'itiyatɨ hayuhɨtɨani, mɨkɨ xematiteitsie pɨkayuhayewani 'ateewa kanitayerɨmɨkɨ,
DEU 23:11 peru taikai pɨti'ɨwa, tau hakayuneyu punuani xematiteitsie.
DEU 23:12 »Xematiteitsie 'ehetewakaku xepitiwauni hakewa xemetikwitani.
DEU 23:13 Yuxexuitɨ xepeixeiyani kɨyexi 'anuyemɨtsɨme 'etsitɨtɨme, mɨkɨkɨ xepɨwati'ineni, muwa xemeukakwitanikɨ, hikɨ yukwita xepanuteukuni.
DEU 23:14 Karikɨ Yawé xekakaɨyari xemakutei kaniuyeikani xe'ɨwiyatɨ meta mɨxeyetuirienikɨ memɨxe'aye'unie. 'Ayumieme xemakutei pakupatsieka, xɨka mana xemakutei Kakaɨyari tiuxeiya mɨkatinake, pɨxeku'eirieni.
DEU 23:15 »Xewitɨ xɨka waɨriyarika mɨti'aitɨarie yukutsiyari hetsɨa heyuta'uname, xɨka 'akie henuani yuti'awietake, ti'aitɨwameya hetsɨa pepɨka'iyetɨayani,
DEU 23:16 matsi keneuhayewa xehamatɨa muyuhayewanikɨ xekiekaritsie hakewa menuani meta hakewa 'aixɨa mɨreyumaika. 'Ekɨta waɨriyarika pepɨkati'aitɨaka.
DEU 23:17 »Xewitɨtɨma 'uki yatɨni 'uka 'Ixaheri kwieyaritsie kiekame tuminikɨ muyumayɨina pɨkahayuyeitɨwani tumini ma'iwakɨ yukakaɨyari mɨyetuirienikɨ.
DEU 23:18 »Yawé 'akakaɨyari tukieyata pepɨkahei'ɨweni tumini mɨpaɨ peyɨanetɨ pehe'iwame, meta mɨkɨkɨ pepɨkare'akatuayani kepemutayɨ mawariyari mayanikɨ, mɨkɨ tihutame Yawé 'akakaɨyari katinixani'erieka.
DEU 23:19 »'A'iwa pepɨkawawirieka tumini rana'iwakamekɨ, 'ikwaitekɨ meta hipatɨ piinitekɨ rana'i'iwakame.
DEU 23:20 Pɨyɨwe 'ateewa kiekame pemɨtawawirieni hanamakamekɨ, peru pɨkayɨweni 'a'iwa 'ixaheri tewiyari hetsiemieme. Mɨpaɨ xeteyuriekaku Yawé xekakaɨyari 'aixɨa pɨtiyurieka xe'uximayatsika 'iya kwieyari xemɨyetuiriyarienitsie.
DEU 23:21 »Xɨka tixaɨtɨkɨ yapetiu'ahɨritɨani Yawé 'akakaɨyari hetsiemieme, pepɨkareutewini pemɨraye'atɨanikɨ, xɨka pekaraye'atɨani mɨkɨ yakamatinita'aitɨamɨkɨ pemɨraye'atɨanikɨ, xɨka pekaraye'atɨani, 'axapekatiniyurimɨkɨ.
DEU 23:22 'Ahetsie pɨkarahɨiwani xɨka tixaɨtɨ pekatiu'ahɨritɨaka.
DEU 23:23 Peru xɨka 'a'iyarikɨ yemekɨ petiu'ahɨritɨani tixaɨtɨ Yawé xekakaɨyari hetsiemieme, heitseriemekɨ yaketineuyuri kepemutayɨ.
DEU 23:24 »Xɨka xewitɨ yu'iwa kaxie haraweriyari mayematsie heutahani, pɨyɨwe mitikwani 'ikwaxiyari kemɨreikwaimɨkɨni, peru meitɨni pɨkayɨwe.
DEU 23:25 »Xɨka xewitɨ yu'iwa tɨrikuya mayema heutahani, pɨyɨweni tɨriku takari mɨwatihunaxɨani yumamakɨ, peru pɨkayɨweni huxakɨ mitixiteni.
DEU 24:1 »Xɨka xewitɨ 'uki 'uka 'utiwitɨni, peru 'ariketa xɨka ka'inaki'erietɨ 'ayani kɨnaya kemɨtinake hepaɨ mɨkatiyurienekɨ, kaniyɨwemɨkɨ miku'eirieni xɨka 'eiriya xapayari 'iyetuirieni.
DEU 24:2 Kepauka mɨkɨ 'uki kie mayeyaniri, pɨyɨweni tawarita mɨtiwikienikɨ xeime hamatɨa.
DEU 24:3 »Xɨka yaxeikɨa mɨkɨ hutarieka kɨnaya 'itixani'erieni, mɨkɨta xɨka 'itawewirieni 'eiriya xapayari, wayenɨ'ani yukiita, xɨka yatɨni hutarieka mieme kɨnaya 'umɨni,
DEU 24:4 hikɨ matɨari mitiwitɨ tawarita mitiwitɨni pɨkayɨweni, mɨkɨri 'uka ka'itiyatɨ kaniyuhayewa. Mɨkɨri mɨxani'eriwa Yawé hɨxie kanihɨkɨtɨni. »Kwie Yawé xekakaɨyari mɨxeyetuirieni, 'axaxepɨkayurieka 'axamɨti'ane mana xepɨkawiwieka.
DEU 24:5 »Mɨhekwaneɨke xepɨkahenɨ'awani muyumiemiekɨ hipame wahamatɨa, meta nitixaɨtɨ pɨkatihɨritɨarieka 'uximayatsika. Matsi 'atsipɨkatiyurieneni xeiwiyari yukie pukani, yu'ɨya pɨtemawieritɨaka.
DEU 24:6 »Xɨka xewitɨ 'ahetsɨa rapitɨ 'ayani, kamatiupitɨanikɨ murinaya pepɨkahetutuweni meta mataya pepɨkahekwekweweni, xɨka mɨpaɨ petiuyurieni titakɨ mɨtiyumikwakai pemɨtinawairieni hepaɨ kani'aneni.
DEU 24:7 »Xɨka xewitɨ 'ukaxeiyarieni yu'iwa 'ixaheri tewiyari yukiita heyenatɨ, meta xɨka waɨriyarika rei'aitɨaka, yatɨni xɨka 'ituani, mɨkɨ mɨyamɨtiuyuri ke'umierieni. Mɨpaɨ xepɨtehekuyeitɨani 'axamɨti'ane xetsata mutixuawerixɨ.
DEU 24:8 »Kepauka xewitɨ yunawiyaritsie meuhaka, yukweriwayurietɨ rewitsixi mawari wewiwamete kememutiyuaneni kewa'enieka. Niuki kena'eriwani keneuweiyani naime kenematiu'aitɨa.
DEU 24:9 Kena'eriwani Yawé 'akakaɨyari Miriyami hetsie kemɨtiuyuri, kepauka 'Ekipitu xemayekɨtsie.
DEU 24:10 »Kepauka xewitɨ yu'iwa mɨtitaniɨtɨani, kiitana pɨkaheutahakeni meta yukɨmana pɨkarewayepineni tita mɨtiyexata mɨrapinekɨ.
DEU 24:11 Matsi takwa ke'uyuhayewa ke'ipitɨani yɨkɨmana mɨkɨ mɨtiyetuirienikɨ tita mɨtiyexata mɨrapinekɨ.
DEU 24:12 Xɨka tixaɨtɨ karexeiyani mɨrapine, xɨka mɨrapinekɨ yu'ɨkari metsiyetuirieni, tɨkarikɨ pepɨkahehuririeka.
DEU 24:13 Ke'ihuritɨani tau ka'akayuniwekaku 'akuxi, mɨkɨ tɨkarikɨ meyuta'eimakɨ. Mɨpaɨ mɨkɨ 'aixɨa paineni 'ahepaɨtsita, 'ekɨta heitseriekamekɨ pepɨtiyurieneni Yawé xekakaɨyari hɨxie.
DEU 24:14 »Xepɨkawananaimaka xehetsɨa te'uximayatamete tixaɨtɨ memɨkatehexeiya meta memɨteheuyehɨwa, tsepanetɨ 'ixaheri tewiyari mɨhɨkɨtɨni yatsepa 'ateewa kiekame.
DEU 24:15 Tukarikɨ yaxepɨtewakupitɨwani kepauka memɨte'uximayaka, tau ka'akayuniwekaku 'akuxi, tixaɨtɨ memɨkatehexeiyakɨ, mɨkɨ tumini meuyehɨwakɨ. Mexɨka mɨpaɨ xekate'uyurieni, mɨkɨ Yawé mekanitahɨawikuni xehetsiemieme hikɨ xeme 'axaxepɨ'itɨarieni.
DEU 24:16 »Tɨɨri 'axameteyurieyu wapaapama mepɨkakwi'iwa, meta wapaapama 'axameteyurieyu waniwema mepɨkakwi'iwa. Matsi yuxexuitɨ ke'axamemɨte'uyurikɨ 'ayumieme mepɨkwini.
DEU 24:17 »Heitserie kemɨrexeiya 'ateewa kiekame meta nutui, meta wiura 'ɨkarieya yupiini xepɨkatehayeitɨwani.
DEU 24:18 Xekena'eriwani 'Ekipitu waɨriyarika te'uximayatamete kexemɨtehɨkɨtɨkai, meta Yawé xekakaɨyari mana kemɨtixehayewitɨ. 'Ayumieme nepɨxe'aitɨa heitseriemekɨ yaxemɨteyuriekakɨ.
DEU 24:19 »Kepauka xemɨka'itsana yu'etsita xɨka xewitɨ xeimanukuyari hetɨmaiya, pɨkaheumieni tawarita yu'ɨtɨma heikweimieka. Xekeneuhayewa 'ateewa kiekame, nutui meta wiura hetsiemieme mayanikɨ. Mɨpaɨ xɨka xeteyurieka Yawé xekakaɨyari waɨkawa pɨxeparewieni xe'uximayatsikatsie.
DEU 24:20 »Meta kepauka huriwu xemɨtikatsetsie, muyuhayewa kemɨ'ane mɨkakaxɨrieni xepɨka'ika'inɨweni, xekeneuhayewa 'ateewa kiekame, nutui meta wiura hetsiemieme mayanikɨ.
DEU 24:21 »Kepauka yukaxie takariyari xemɨka'inɨni, tawarita yu'ɨtɨa xepɨka'iye'inɨtɨkɨkani, muyuhayewa keneuhayewa, 'ateewa kiekame, nutui meta wiura hetsiemieme.
DEU 24:22 »'Ekipitu waɨriyarika te'uximayatamete kexemɨtehɨkɨtɨkai xekena'eriwani. 'Ayumieme nepɨxe'aitɨa heitseriemekɨ yaxemɨteyuriekakɨ.
DEU 25:1 »Kepauka yuhutatɨ 'ukitsi memɨyuniukimaka 'itsɨkate wahetsɨa mekanihuni, 'itsɨkate 'aixɨa mepɨteyurieni, 'atsimɨkatiuyuri hetsie mepɨkate'ahɨani peru 'axamɨtiuyuri mepɨteka'enitsitɨani.
DEU 25:2 Hetsiena mɨrahɨiya xɨka heuyeweka mukuweiyaxɨanikɨ, 'itsɨkame kanita'aitɨamɨkɨ kwiepa mɨkahunikɨ, mana meta yakatiniyurimɨkɨ kepaɨmexɨa mɨkɨ mukuweiyaxɨanikɨ keraye'akamekɨ mɨyamɨtiuyuri.
DEU 25:3 Huta tewiyarikɨ xeikɨa pukuweiyaxɨani, ka'anutiyeikamekɨ, xɨka waɨkawamexɨa xe'ikuwaxɨani yu'iwa, mɨkɨri nanaimarika payeika 'a'iwa hetsiemieme.
DEU 25:4 »Tuuru kwietsaname xepɨkatsurihɨaka kepauka tɨriku mu'utsipiene.
DEU 25:5 »Xɨka yuhutatɨ 'ukitsi yu'iwamatɨ 'axeikɨa mekuteni, xɨka xewitɨ 'umɨni tɨɨri kawarayexeiyawetɨ, wiuraya pɨkayɨwe mɨtiwikieni xaɨtsie paitɨ. Kɨnayatɨkai 'iwaya pitiwitɨni 'ɨyaya mayanikɨ, meye'atɨanikɨ 'aitsika kwetsika hetsiemieme kemaine.
DEU 25:6 Nunutsi matɨari memeyexeiya, 'iwaya mumɨ hepaɨ pɨtiterɨwa, kemɨtitewakai mɨkahatɨtɨmaiyarɨwanikɨ 'ixaheritsixi watsata.
DEU 25:7 »Xɨka mɨkɨ 'uki ka'iwitɨmɨkɨni yu'iwa wiuraya, 'uka 'ukirawetsixi wahetsɨa kanimieni, kiekari kitenie, mɨpaɨ pɨtiwatahɨawe: “Nekwe pɨkayuwaɨriya 'iwaya kemɨtitewakai 'ixaheritsixi watsata 'akuxi ma'eriwanikɨ. Pɨkayuwaɨriya yamɨtikayani nehamatɨa kemaine 'aitsika kwetsika hetsiemieme”.
DEU 25:8 Hikɨ 'ukirawetsixi mepitakwewieni, meta mepɨte'itixatɨani. Xɨka mɨkɨ kayuwaɨriyani mɨpaɨ 'utaitɨ: “Ne nepɨkanewaɨriya nemitiwitɨnikɨ”,
DEU 25:9 hikɨ kweya 'ahurawa puyani 'auriena, 'ukirawetsixi wahɨxie, kakaiya xeime panuyehɨna, pi'aɨtsikawiya hɨxienatsie, mɨpaɨ pɨtitahɨawe: “Mɨpaɨ kani'itɨariwani kemɨ'ane mɨkayuwaɨriya yu'iwa nuiwarimama mɨwarexeiyanikɨ”.
DEU 25:10 Hikɨ mɨkɨ tewi yuheyemekɨ pɨmatiwani 'Ixaheri kwieyaritsie meta tɨɨriyamama, “wakakai manuyehɨnariexɨa” mepɨtematiwani.
DEU 25:11 »Kepauka yuhutatɨ 'ukitsi meyukwitɨwekaku, xɨka xewitɨ 'ɨyaya nuani yɨkɨnatsie tanuanike, xɨka 'uka kɨnaya mumiene karapatana heuyememe 'uki xieyameyatsie tiukwinitɨani,
DEU 25:12 'uka mamaya kehawitekieni. Xepɨkaheinenimayaka.
DEU 25:13 »Ti'inɨnɨatame hutame 'akɨtsiɨrita pepɨka'uyeyatsani, xeime haheteme xeimeta ha'exanime.
DEU 25:14 Yaxeikɨata 'akie ti'inɨnɨatame hutame pepɨkahexeiyani (kakuni), xeime 'apame xeimeta yakɨpeme.
DEU 25:15 Matsi pɨta, ti'inɨnɨatamete 'aixɨa 'aneneme xepexeiyani tikirutame meta kakuni kemɨtiheitserie, mɨixa wiyari xemuyurienikɨ Yawé xekakaɨyari kwie mɨxeyetuirienitsie,
DEU 25:16 mɨkɨtsɨ kaniwaxani'erieka heitseriemekɨ yamemɨkateyurie.
DEU 25:17 »Xekena'eriwani 'amarekitsixi teɨteriyari kememɨxe'uyuri kepauka 'Ekipitu kwieyaritsie xe'ayekɨneku:
DEU 25:18 Kepauka xemu'u'uxekai meta xemɨkayɨwawekaitsie, mekaxenanukunake ta'ɨtɨma pɨta me'unexɨaka mekataniutakwini ta'utɨa memuhukai mekaniwarukwini memɨkatɨrɨkawikaikɨ waɨkawa. Kakaɨyari mepɨka'utimaka.
DEU 25:19 'Ayumieme kepauka Yawé xekakaɨyari mɨxeyetuirieni kwie meta kepauka mɨxeparewieni yunaime mana memɨtama nuiwarite xemɨwaka'unakɨ, 'ana yuheyemekɨ xekaniwarakuyeitɨakuni memɨkaha'eriwanikɨ 'Amareki nuiwarimama. Xepɨkatehatɨtɨmaiyani.
DEU 26:1 »Kepauka xemeutahaxɨani kwie Yawé xekakaɨyari mɨxeyetuirienitsie xekwie mayanikɨ, meta kepeukari mana xemu'uwani,
DEU 26:2 xekatenika'inɨikuni matɨari mɨtikaxuawere 'ikwaxi xekwie Yawé xekakaɨyari mɨxeyetuirienitsie timieme, hikɨ mɨkɨ tsikɨiwititetsie xekatenikapikuni. Hikɨ xekanihuni Yawé xekakaɨyari hakewa meyuhayewa,
DEU 26:3 mawari wewiwame kemɨ'ane mɨti'uximayaka mɨpaɨ xepɨtetahɨawe: “Hikɨ yurikɨ mɨpaɨ nepaine Yawé 'akakaɨyari hɨxie, nepeutaha 'iya kwieyaritsie mɨkɨ mɨtatsiyetuiritsie, yurikɨ tatutsima kemɨtiwarutahɨawixɨ”.
DEU 26:4 »Mawari wewiwame xetsikɨiwiti panuhapani, hikɨ Yawé 'akakaɨyari mawarieya matiwewiwa hɨxie pi'atɨani.
DEU 26:5 Hikɨ mɨpaɨ xekanitiyuakuni Yawé yukakaɨyari hɨxie: “Nepaapa 'arameu tewiyari pɨhɨkɨtɨkai meta kuyeikame, kepauka 'Ekipitu munua 'etsimepuyupaɨmekai teɨterimama. Mana mekutetɨ mepuyutamɨiriyaxɨ nuiwari metɨrɨkaɨyetɨ mepakɨ.
DEU 26:6 Peru 'ekipitutari waɨkawa mepɨtatsi'unanaima, mepɨtate'uta'uximayatsitɨa waɨriyarika metatsipitɨatɨ.
DEU 26:7 Tame matsi Yawé teputahɨawixɨ, tatutsima wakakaɨyari, mɨkɨ pɨtatsi'u'eni ketemɨte'itawawiri, pɨtatsi'uxei ketemɨte'uka'eniwakai, ketemɨte'uximayakai meta ketemɨtenanaimariekai.
DEU 26:8 'Ayumieme Yawé pɨtatsi'ayewitɨ 'Ekipitutsie 'inɨari waɨkawamekɨ mamariwawemekɨ tiyurienetɨ, mɨkɨkɨ waɨkawa teɨteri mepɨmamakai.
DEU 26:9 Mɨkɨ 'ena pɨtatsi'atɨa, 'ikɨ kwie pɨtatsiyetuiri, waɨkawa retsi meta xiete maxɨawetsie.
DEU 26:10 'Ayumieme hikɨ nepɨti'atɨiri tita matɨari 'ikwaxi mɨtiutixuawerixɨ kwie Yawé Kakaɨyari mɨnetsiyetuiritsie”. »'Ana kwitɨwata, yutsikɨiwiti Yawé yukakaɨyari hɨxie xepɨti'uitɨwani, meta hɨxiena xepanakatutsitani.
DEU 26:11 Mana 'ixɨarari xepɨwewieni Yawé xekakaɨyari 'aixɨa ti'aneme mɨxetiyetuirikɨ xeyutemamawietɨ 'ekɨ meta 'atɨɨriyama, meta pepɨwata'inieni rewitsixi meta 'ateewa kiekatari.
DEU 26:12 »Haika wiyari 'anuyeyeikakaku tamamatatsie mieme xeime kepemɨtiyetuaya, 'ana pepikuxeɨrieni yaxeikɨa peru xepɨka'iyetuani Yawé hetsɨa, xepiyetuani pɨta yukiekaritsie rewitsixi, 'ateewa kiekatari, nutuite meta wiuraxi wahetsiemieme, 'akiekaritsie mɨkɨ memɨtetikwanikɨ meta memɨtihuxanikɨ.
DEU 26:13 Hikɨ 'ana Yawé yukakaɨyari mɨpaɨ xepɨtetahɨawe: “Neri 'ari nepɨtiyetua naime tita 'ahetsiemieme mɨtipatsietɨkatei, nepɨwayetuiri rewitsixi, 'ateewa kiekatari, nutuite meta wiuraxi, kehepaɨ 'ekɨ pemɨnetiu'aitɨa. Nepɨkatihayewawe 'ekɨ kepemɨnetiu'aitɨakɨ meta nepɨkaratɨtɨmaiya.
DEU 26:14 Kepauka nemuyuhiweriekaitsie nepɨka'itikwai 'ikɨ 'ahetsie mɨtimieme mɨtipatsiekɨ, kepauka nemɨka'itiyakai, 'ana mana timieme nepɨkatiutikwai meta mana timieme mɨkite nepɨkatiwaruxatɨa. Yawé nekakaɨyari, ne yanepɨtikatɨa naime kepemɨnetiuta'aitɨa.
DEU 26:15 Neuxei muyuawitsiepaitɨ, hakewa 'ekɨ pemeyeika makupatsietsie, kepemɨtiwarutahɨawixɨ tatutsima, 'aixɨa keniwayurieka 'ateɨterima 'ixaheritsixi meta kwie pemɨtatsiyetuiri, waɨkawa retsi meta xiete maxuawetsie”.
DEU 26:16 »Hikɨ Yawé xekakaɨyari pɨxe'aitɨa yaxemɨteyuriekakɨ 'ikɨ 'aitsikatetsie kemaitɨka. Xemeta yɨkɨmana xekeneyuwaɨriya yu'iyarikɨ yaxemɨtekakɨnekɨ.
DEU 26:17 Hikɨ xepɨyuhekɨata kename Yawé xekakaɨyari hɨkɨ, kename huyeya xe'uweiyani, kename niukieya xe'enietɨ xe'u'uwani meta kename naime 'aitsikateya xe'aye'atɨaxɨani.
DEU 26:18 Hikɨta yɨkɨmana Yawé mɨpaɨ paine kename xeme xeteɨterimama, hetsɨana miemete kename xehɨkɨ, yemekɨ kemɨtixe'utahɨawixɨ. Kamɨtsɨ, yaxeketenekahuni naime 'aitsikayatsie.
DEU 26:19 Yawé xekakaɨyari mɨpaɨ paine kename nuiwarite muwarunetɨa wayeta xeka'uitɨani, 'aixɨa xemɨtehahɨawarɨwanikɨ, xemɨmariwanikɨ meta xemɨmakaxiwanikɨ, nuiwari memɨpatsie Yawé hetsiemieme xepɨhɨkɨtɨni».
DEU 27:1 Muitsexi meta 'ukirawetsixi 'ixaheritsixi yunaime teɨteri mɨpaɨ mekateniwarutahɨawe: «Xekenaye'atɨa naime 'ikɨ 'aitsikate hikɨ temɨxeyetɨirie.
DEU 27:2 Kepauka Kurutani hatuxameyaritsie xemanukɨne, meta 'ari xeheutahaxɨaximetɨ kwie Yawé xekakaɨyari mɨxeyetuirietsie, mana tetexi xepanɨkɨtɨkɨ 'anenekame, naxi xepitiwirieni,
DEU 27:3 mɨkɨtsie naime 'aitsikate xepa'utɨaxɨani. Mɨpaɨ xepɨteheyurieni kepauka xemanukɨne Kurutanitsie, kepauka xemɨ'axɨani kwie Yawé xekakaɨyari mɨxeyetuirietsie, hakewa waɨkawa retsi meta xiete mexuawetsie, Yawé xekakaɨyari xetutsima kemɨtiwarutahɨawekai.
DEU 27:4 Kepauka xemanukɨne Kurutanitsie, mɨkɨ tetexi 'Ewari hɨriyaritsie paitɨ xekanitiyatsakuni, naxi xekanitiwiriekuni, yemekɨ hikɨ kenemɨtixe'aitɨa.
DEU 27:5 Manata xepitawewieni tetexikɨ mawari wewiwame Yawé xekakaɨyari hetsiemieme, tetexi tepɨakɨ xixiyatɨkaime xepukayurieni, matsi tetexi nanaimimekɨ pɨta,
DEU 27:6 mɨkɨtsɨ mawari taiyame Yawé hetsiemieme tetexi yeuta miemekɨ kaniyutawewiwamɨkɨ. Mana hetsiena mawari xepɨtataiya Yawé xekakaɨyari hetsiemieme,
DEU 27:7 mana 'aixɨa memɨteyuxeiyanikɨ mawariyari xepɨwewieni, meta xeyutemamawietɨ xepɨtekwani Yawé xekakaɨyari hɨxie.
DEU 27:8 Mawari wewiwame tetexiyaritsie naime 'aitsikate waɨkawa yuhekɨkɨakamekɨ xepa'utɨaxɨani».
DEU 27:9 Hikɨ Muitsexi meta rewitsixi mawari wewiwamete yunaime teɨteri mɨpaɨ mekateniwarutahɨawe: «'Ixaheritsixi, kayuwatɨ xekeneumaka, xekeneu'enana. Hikɨri Yawé xekakaɨyari teɨterimama xekanakɨne.
DEU 27:10 Kemaine Yawé xekakaɨyari xekeneu'enieka, yaxeketenekahuni 'aitsikateya kemaitɨka, hikɨ ne kenemɨtixe'aitɨa».
DEU 27:11 Muitsexi 'ana kwitɨwa tukaritsie teɨteri mɨpaɨ katiniwaruta'aitɨani:
DEU 27:12 «Kepauka xemanukɨne Kurutanitsie, 'ikɨ yayupaɨmetɨ nuiwarite Keritsini hɨriyaritsie mepɨyuhayewa mana 'ixaheritsixi 'aixɨa memɨwayurienikɨ: Tsimehuni, Rewi, Kura, 'Itsakaxi, Kutse meta Wenikamini.
DEU 27:13 »'Ikɨta hipatɨ 'Ewari yemuriyaritsie mepukuyaxe, 'axamemɨ'itɨarienikɨ memɨtaxata: Xuweni, Kahari, 'Atsexi, Tsawuruni, Rani meta Nepɨtahari.
DEU 27:14 »Rewitsixi yamepɨtiyuani, karima me'utiniutɨ, 'ixaheritsixi yunaime mɨpaɨ mepɨtewatahɨawe:
DEU 27:15 “'Axake'u'itɨarieni kemɨ'ane kɨye kakaɨyariyari mɨtawewieni, yatɨni kɨye xixiyakame yatɨni tepɨakɨ wewiyakame, meta xɨka 'awie hawaikɨ heitakeni. Mɨkɨ tewi pɨtiwewiyaya, 'ayumieme Yawé mɨtixani'erie pɨtihɨkɨ”.
DEU 27:16 “'Axake'u'itɨarieni kemɨ'ane yupaapa yatɨni yumaama mɨkawa'enieni”.
DEU 27:17 “'Axake'u'itɨarieni kemɨ'ane yu'iwa kwieyatsie manuyeyeikani”.
DEU 27:18 “'Axake'u'itɨarieni kemɨ'ane mɨkaheuniere huyetana mɨti'itaiya”.
DEU 27:19 “'Axake'u'itɨarieni kemɨ'ane timaitɨtɨtɨ heitserie kememɨtehexeiya mɨwananaimaka 'ateewa kiekatari, nutuite meta wiuraxi”.
DEU 27:20 “'Axake'u'itɨarieni kemɨ'ane yupaapa 'ɨyaya hamatɨa mɨkahuni, mɨkɨtsɨ mɨyamɨtiuyuri yupaapa 'utaya 'axakaniuyurieni”.
DEU 27:21 “'Axake'u'itɨarieni kemɨ'ane tewatsiekame mukumayɨani”.
DEU 27:22 “'Axake'u'itɨarieni kemɨ'ane yutaru hamatɨa mukahuni, yupaapa yatɨni yumaama niweya hamatɨa”.
DEU 27:23 “'Axake'u'itɨarieni kemɨ'ane yuwarɨkaɨ hamatɨa mɨkahuni”.
DEU 27:24 “'Axake'u'itɨarieni kemɨ'ane yuhepaɨ tewi mumieni 'awie”.
DEU 27:25 “'Axake'u'itɨarieni kemɨ'ane ti'iwatɨ xeime mɨmieni 'atsikatiyurienekame”.
DEU 27:26 “'Axake'u'itɨarieni kemɨ'ane yamɨkatikayani heitseriemekɨ 'ikɨ 'inɨari niukiyaritsie”.
DEU 28:1 »Xɨka yemekɨ yurikɨ Yawé yukakaɨyari xe'enieka, meta naime 'aitsikateya xe'aye'atɨaka hikɨ nemɨxekuxaxatɨwa Yawé xekakaɨyari mɨkɨ nuiwarite kwiepa memɨtama yunaime wayeta kanixeka'uitɨamɨkɨ.
DEU 28:2 Xɨka Yawé yukakaɨyari xeheu'enieka, 'ikɨ naitɨ 'aixɨa mɨtiyuyuriwe xehetsie pɨtinakeni 'aixɨa xe'itɨarietɨ xepakɨne:
DEU 28:3 »'Aixɨa pepɨ'itɨarieka 'akiekaritsie pe'uyeikatɨ, meta 'a'etsaripa 'aixɨa pepɨ'itɨarieka.
DEU 28:4 »Tɨɨri hukatsie memɨyetei 'aixɨa mepɨ'itɨarieka, meta xe'itsanari, meta xetewama waniwema, xewakaitsixi 'etsimemɨpepe meta xemuxatsima waniwema.
DEU 28:5 »Xetsikɨiwiti 'aixɨa pɨ'itɨarieka mana pɨkareuyeweka meta 'amexa 'atɨxi pɨname.
DEU 28:6 »'Aixɨa peke'itɨarieka hakewa pemekani meta 'aixɨa xepɨ'itɨarieka yuhuyeta.
DEU 28:7 »Yawé pɨxepitɨani xemɨwara'iwanikɨ memɨxe'aye'unie. Tsepa 'ahepa 'amemahu 'aixɨa meteheku'utɨ, peru 'arike mepuyuta'unani yuxexuitɨ.
DEU 28:8 »Yawé 'a'itsanari 'utame 'aixɨa puyurieka, meta naime 'a'uximayatsika. »Yawé xekakaɨyari 'aixɨa pɨxeyurieka mɨkɨ kwie mɨxeyetuiritsie.
DEU 28:9 »Yawé pɨxekayatsa teɨterimama xemɨpatsie xemɨhɨkɨtɨnikɨ mɨkɨ kemutayɨ, xɨka heitseriemekɨ yaxetekahuni 'aitsikayatsie meta xɨka huyeya 'utɨa xe'uhuni.
DEU 28:10 Yunaitɨ nuiwarite kwiepa memɨtama mepɨxe'ayemakaka kepauka memɨxehetimani kename Yawé teɨrimama xehɨkɨ.
DEU 28:11 »Yawé waɨkawa piinitɨarika pɨxetipitɨani xemɨtehexeiyanikɨ: Xeniwema puwamɨiriyani, xetewama meta waɨkawa xepɨte'ukaxexeiyani mɨkɨ kwieyaritsie xetutsima kemɨtiwarutahɨawixɨ kename xeyetuirienikekai.
DEU 28:12 »Yawé muyuawitsie pɨreuyepieni, mana 'aixɨa mɨti'anene mɨtiyepine, mikaxɨrienikɨ wiyeri kwiepa kepauka yemekɨ meuyewetse, meta 'aixɨa mɨtiyurienikɨ naime xe'uximayatsika xemɨtekumaɨwa. Xeme matsi xepɨtewaniɨtɨaka yumɨireme nuiwarite, xemeta nixeime xepɨkateniɨwirieka.
DEU 28:13 Yawé xekakaɨyari mu'u pɨxe'ayeitɨani, hatsuaku kwaxi pɨkaxe'ayeitɨani, yuheyemekɨ 'ateewa xepaka'u, hatsuaku 'upaitɨ xepɨkahati'uka, xɨkatsɨ xeheye'atɨaka Yawé xekakaɨyari 'aitsikateya hikɨ nemɨxe'aitɨa, meta xɨka yaxetekahuni xeyukweriwayurietɨ.
DEU 28:14 Hatsuaku nixeimetɨma 'ikɨ niuki xepɨkahatɨtɨmaiyani hikɨ nemɨxe'aitɨa, hipame kakaɨyarixi xewarayexeiyatɨ xemɨka'akɨkanikɨ.
DEU 28:15 »Mɨpaɨta xeketenemaika, xɨka xekaheye'atɨani yu'iyarikɨ Yawé xekakaɨyari 'aitsikaya naime, hikɨ nemɨxe'aitɨa, 'ikɨ 'ahetsie pɨtinake 'axape'itɨarietɨ pepayani:
DEU 28:16 »Yukiekaritsie 'axaxepɨ'itɨarieka, meta xe'etsari 'axapɨ'itɨarieka.
DEU 28:17 »'Axapɨ'itɨarieka xetsikɨiwiti meta xemexa xetɨxi pɨname.
DEU 28:18 »'Axamepɨ'itɨarieka xeniwema hukatsie memɨyetei, meta xe'itsanari, meta xewakaitsixi waniwema 'etsimemɨpepe metatsiere xemuxatsima waniwema 'etsimemɨpepe.
DEU 28:19 »'Axaxepɨ'itɨarieka xematiteitsie, meta yuhuyeta 'axaxepɨ'itɨarieka.
DEU 28:20 »Yawé pɨxeyetuirieni 'axamɨti'ane, xepɨkayumaiwaweni, yakɨ xeikɨa xepɨteyu'uxitɨaka xetekumaɨwatɨ, hikɨ yapauka xeikɨpiyaritsie haweri xe'anenetɨ xepakɨne meta xepakumaweriyarieni 'axaxemɨte'uyurikɨ meta Yawé xemuku'eirikɨ.
DEU 28:21 »Yawé tekɨmemete pɨwanetɨani, kwie mana xemɨyetuiriyarienitsie naime mepɨtekuxɨxɨani.
DEU 28:22 Yawé kwiniya mɨmɨyakɨ pɨxetikwinitɨani, hɨiya kwinie mɨtiyuyuruwakɨ meta haiyakɨ, kwinimieme pɨtiɨxɨkani meta pɨka'ukawiwiyeni, meta xe'etsarite pɨtikakwaiyaxɨani. Waɨkawa pɨxetikwinitɨani kepaukake xeme xemakumawere.
DEU 28:23 Muyuawi 'amu'utsie wurunitse pɨhɨkɨtɨni, 'a'ɨkate hetɨa kwie tepɨa pɨhɨkɨtɨni.
DEU 28:24 'Ana Yawé wiyeri hetsiemieme 'a'etsaritsie tumuanari pɨta meta xiekari panɨ'ani, naxi pɨkawiye, kepaukake xeme xemakumawere.
DEU 28:25 »Yawé pɨxeyetuani memɨxe'a'iwakɨ memɨxe'aye'unie. Tsepa xemekɨ 'aixɨa xeteheuku'utɨ, peru 'arike xepuyuta'unaxɨani yuxexuitɨ. Yunaitɨ kwiepa memɨtama te'aitamete mexenanaimatɨ mepakɨne.
DEU 28:26 Xewaiyari wirɨkɨxi wa'ikwai pɨrayani meta yeutari kwiepa memu'uwa, xewitɨ 'apɨka'uyeikani mɨwatamariutakɨ.
DEU 28:27 »Yawé pɨxeheiweritɨani kwiniyakɨ waiyaritsie 'u'urawitɨ mukuyaxike 'anenetɨ meta haiya mukuyaxike 'anutiteketɨ, 'Ekipitu metixuawerixu hepaɨ, meta nerɨitsitekɨ, meta tsikwakiriyakɨ, mɨkɨkɨ xepɨka'anayexɨrɨweni.
DEU 28:28 »Yawé waɨkawa pɨxe'uximatɨani xekayumaiwawetɨ xepakɨne, hipatɨ mekaheunenieretɨri mepakɨne, mekaheta'eriwawetɨ.
DEU 28:29 Hekɨtatɨtɨ xeheumetɨwetɨ xepeu'uwani, yɨwikɨta mɨkaheuniere hepaɨ. Naime kexemɨteyurieka xepɨteheuyehɨpani, tukarikɨ yuheyemekɨ xepɨnanaimarieka, yupiini xepɨtenawatsiyarieni, pumaweni xewitɨ xehetsie mɨtanuani.
DEU 28:30 Xewitɨ xɨka tineɨkirɨmeni peru xewitɨ pɨta nuame mitiwitɨxime pɨtsewiximani. Kii xewitɨ puyutawewirieni peru muwa pɨkahayeyerɨni. Xewitɨ kaxie pɨkayeni peru takariyari pɨkaha'inɨata.
DEU 28:31 'Ahɨxie 'atuuru pɨmierieni peru waiyarieya pepɨkaha'inɨata. 'Apuxu waɨriyarika pepɨnawaiyarieni, hatsuakuri pepɨkahanitɨarieni. Xemuxatsima memɨxe'aye'unie wapiini pɨrayani, xewitɨ pɨkamatsiparewieni pemɨwanawairienikɨ.
DEU 28:32 Xeniwema 'ukitsi meta 'ukari xaɨtsie hipame nuiwarite watsata mepɨyetuiyani, xɨka xewarutiwauni xepɨti'uxe, hatsuaku xepɨkawataxeiya.
DEU 28:33 Hipatɨ teɨteri xemɨkawamate xe'iteɨrite mepɨtekakwani, meta naime yu'uximayatsikakɨ xemɨte'ukaxei, xeme yuhetsiemieme xeikɨa xepeixeyani nanaimarika, waɨriyarika xepɨte'uximayatsitɨarieka tukarikɨ.
DEU 28:34 Yɨkɨ xepɨtenieritɨarieka mɨkɨkɨ matsi xepɨkayumaiwaweni.
DEU 28:35 »Yawé pɨxetikwinitɨani xetunutetsie meta naime xeteuritetsie, meta haiya 'axamɨ'anene meta mɨkayu'uayemarinɨa naitsarie xehetsie pɨkaneni, xeketatsiete meta xemu'utsie paitɨ 'uti'atɨ.
DEU 28:36 »Yawé yapɨtiyurieni 'ekɨ meta kemɨ'ane mati'aitɨwame mɨhɨkɨtɨnikɨ pemenukake, mɨkɨ xeyunaitɨ xeime kwieyaritsie xepanuhapanieni 'ekɨ meta 'atutsima memɨkawaretima wahetsɨa. Mana xepɨwarayexeiyani kakaɨyarixi, kɨyexikɨ meta tetexikɨ memɨwewiyatɨka.
DEU 28:37 Waɨkawa xepexani'eriwani meta xepɨ'atsierieka xeyuriyarietɨ, xepɨnanaimarieka naitsarie kwiepa tsepa hakewa Yawé mɨxehetanɨ'ani.
DEU 28:38 »Waɨkawa 'akwie pepuka'etsani, peru 'etsiwa xeikɨa pepuka'itsanani, tekɨmemete naime 'a'etsari mepɨtikɨmeni.
DEU 28:39 Kaxie pepuka'etsani waɨkawa, peru pepɨkatika'inɨweni meta winuyari pepɨkahanu'ieni, kwitsiteri takari memɨtikɨmenikɨ.
DEU 28:40 Huriwa xepexeiyani yukwiepa naitsarie, peru hatseitiyari xepɨkayukawirieni, mɨkɨ takariyari naitɨ kanikaxurimɨkɨ.
DEU 28:41 Yuniwema xepɨwarexeiyani 'ukitsi 'ukari peru xepɨkayɨwekaxɨani xemɨwarukunuitɨani, mɨkɨtsɨ mekananuhapaniekuni xaɨtsie paitɨ.
DEU 28:42 Tekɨmemete mepɨ'axɨani meyumɨiretɨ kɨyexite naime mepɨtekametseriya meta naime 'a'etsari 'akwiepa timieme.
DEU 28:43 »'Ateewa kiekatari xehamatɨa memɨtitei, tukari 'anukayeikakaku matsi waɨkawa tɨrɨkariya mehexeiyatɨ mepakɨnirɨmeni xehetsie, mexi xeme matsi xekayɨwaweni.
DEU 28:44 Mɨkɨ xemɨtewarapinirie mepɨhɨkɨtɨni, xemeta xemɨte'apine. Mɨkɨ xemu'ute mepakɨne, xemeta tixaɨtɨ xepɨkatehɨkɨtɨni.
DEU 28:45 »'Ikɨ naitɨ 'axamu'itɨarienikɨ mɨ'ayumieme xehetsie pɨtinake. Xehanukuweiyarieme xepanuku'axieni xepɨka'unarieni, Yawé yukakaɨyari xemɨkahanu'enikɨ xemɨkaheye'atɨakɨ naime 'aitsikateya.
DEU 28:46 Mɨkɨ 'inɨari yuheyemekɨ pɨhɨkɨtɨni meta mɨpaɨ xemɨteku'eriwanikɨ xehetsiemieme meta 'anuiwarima,
DEU 28:47 kepaukatsɨ waɨkawa xemɨtehexeiyakaitsie xeyutemamawietɨ Yawé yukakaɨyari xemɨkahayexeiyakaikɨ.
DEU 28:48 'Ayumieme haakakɨ hariyakɨ xepɨte'uka'eniwani, meta xepɨmamaweni yemekɨ tixaɨtɨ xepɨkatehexeiyani, meta memɨxe'aye'unie tewa'uximayatsiriwamete xepakɨne, Yawé xekakaɨyari mɨwaranɨ'ani xehetsɨa. Mɨkɨ tepɨa yukuyari xekatutsitɨa mepɨxe'atekirieni, hikɨ mɨpaɨ mepɨxeteka'una.
DEU 28:49 »Yawé xeime 'ateewa paitɨ kiekame pukuha'aritɨani, waniukitsie xekawa'eniekame, kwie manu'axe paitɨ paneni, mɨkɨ kwinimieme 'ayɨwetɨ kwixɨ hepaɨ.
DEU 28:50 Mɨkɨ nuiwari waɨkawa payu'eriyani, 'ukirawetsixi meta temari pɨkawanenimayaka.
DEU 28:51 Mepɨwatikwani 'atewama waniwema, 'apiini naime pemɨtiukaxeiyakai 'akwiepa, hikɨ mɨpaɨ mexeyurietɨ mepɨxekwini. 'Etsiwa tɨma mepɨkatehayewa, tɨriku, kaxie hayari, hatseiti, tsikerutsixi meta muxatsi kuraruta mepɨkawahayewa. Yemekɨ tixaɨtɨ mepɨkaxetehayewieni.
DEU 28:52 Naitsarie xekwieyaritsie kiekari mukumanetsie mepɨye'axɨani mepɨxekurarutɨiyaxɨani, mepaketɨkɨne kepaukake memika'unaxɨani kuraru 'aixɨa mɨ'anene hetsiena xemuyɨtɨrɨkariyakai. Hikɨ xekiekaritsie mepɨye'axɨani naitsarie xekwiepa Yawé xekakaɨyari mɨxeyetuiritsie.
DEU 28:53 »Mɨpaɨ yemekɨ xepɨte'uka'eniwani kepauka mɨkɨ mexi kiekari warita mehatetɨka, yuniwema xepɨwatikwani, yuniwema 'ukitsi 'ukari wawaiyari Yawé xekakaɨyari mɨxeyetuiri mɨkɨ tɨɨri.
DEU 28:54 Xewitɨ xetsata muyeika tsepa 'aixɨa mɨtiuka'iyari, 'ana yu'iwa pɨkaheunenimayaka, yu'ɨya meta yuniwema memɨyuhayewatɨweni 'akuxi,
DEU 28:55 'ana pɨkayɨweni mɨkɨ mɨwarumini yuniwema wawaiyari mikwaka, tixaɨtɨri tawarita mɨkarexeiyanikɨ. »Mɨpaɨ xepɨte'uka'eniwani xeyuhiwerietɨ kepauka memɨxe'aye'unie xekiekaritsie memeutahaxɨaximeni,
DEU 28:56 'ukaratsi hikɨ 'aixɨa mɨtiuka'iyari, kwinimieme mɨtiyu'ɨwiya mɨka'inake heumamawetɨ kwiepa muyeikani, 'ana yɨkɨna pɨkanenimayaka minaki'erie hikɨ, meta yuniwema 'ukitsi meta 'ukari.
DEU 28:57 'Ana pɨkayuwaɨriyani yuniwe xike mitiniwexɨ hipame wahamatɨa mitakwanikɨ, meta yukeiyari, matsi yuti'awietame naime yuxaɨtame pɨtitikwani, mɨkɨ xeikɨa mɨtihɨkɨtɨnikɨ mɨrexeiyani. Mɨpaɨ xepɨte'uka'eniwani kepauka memɨxe'aye'unie xekiekaritsie memɨtahaxɨaximeni.
DEU 28:58 »Xɨka xekayuwaɨriyani yaxemɨteyuriekakɨ 'ikɨ naime 'aitsikatetsie, kemɨre'uxa 'ikɨ xapatsie, Yawé xekakaɨyari xɨka xeka'ayemakaka, kemɨtitewa yemekɨ mɨmariwe mɨtɨrɨkaɨye,
DEU 28:59 Yawé xehetsie meta xenuiwarima wahetsie pɨranɨ'ani, waɨkawa 'uximatɨarika, meta kwiniya kayu'uayemarinɨakame.
DEU 28:60 'Ekipitu naitɨ tita kwiniyayari mɨrexuawe, waɨkawa xemeitixani'eri, mɨkɨ xehetsie pɨtixuawere 'anari 'aixɨa xeteheu'erietɨ xepɨka'akɨne.
DEU 28:61 »Yawé meta xehetsie waɨkawa kwiniya panɨ'ani, kepaukake mɨxehakumaweriya, meta ke'axamɨtiyɨni 'ena 'ikɨ 'aitsika xapayaritsie mɨka'aye'uxa 'akuxi.
DEU 28:62 Xemeta tsepa xemɨyɨmɨirekai muyuawitsie xurawetsixi wahepaɨ, 'etsixeyupaɨmetɨ xepayeitɨarieni Yawé yukakaɨyari xemɨka'anu'enikɨ.
DEU 28:63 Yawé ketiyutemawietɨ mɨxe'utimɨiriyaxɨ meta waɨkawa xetehexeiyakame kemɨtixe'ayeitɨa, yaxeikɨata yutemawietɨ pɨxeka'una meta pɨxeheuyehɨani. 'Anari yunanaritsie xepahunarieni mɨkɨ kwieyaritsie hakewa hikɨ yukwie xemayeitɨanitsie.
DEU 28:64 »Yawé pɨxetaxɨriexɨani naitsarie xexuime kiekaritsie kwiepa kemakuyewa. Mana hipame kɨyexi meta tetexi kakaɨyarixiyari xepɨwarayexeiyani, xeme meta xetutsima memɨkawaretima.
DEU 28:65 Mɨkɨ kiekaritetsie 'uxipiya xepɨkahekaxeiya meta kayuwatɨ pɨkahemaka. Yawé xe'iyari pe'uximatɨaka, xehɨxite peti'uxe tixeiyamɨtɨ, xe'iyari petiwaɨripieni ta'ikwewatɨ.
DEU 28:66 Tukarikɨ meta tɨkarikɨ xeheumamatɨ xepe'uwani, waɨkawa xemariutsietɨ hawaikɨ tɨma 'aixɨa 'iyari xepɨkahe'uwani.
DEU 28:67 Waɨkawa xenenieretɨ heinɨtsikɨ, marika xehetsie punuani, ximeri mɨpaɨ xepaitɨkani: “'Arikutari mɨniɨkɨyɨreke”, tɨkarikɨta mɨpaɨ xepaitɨkani: “'Ariri mɨniukuhekɨareke”.
DEU 28:68 Tsepa Yawé mɨpaɨ mɨtixe'utahɨawixi kename hatsuaku xekahakunuaxɨanikekai 'Ekipitu huyeyari 'utɨa, mɨkɨ pɨxe'akunuitɨani kanuwatsie. Mana xepeyuyexatani waɨriyarika ti'uximayatamekɨ, peru xewitɨ 'apɨkaheyeikani mɨxehetinanenikɨ».
DEU 29:1 Muitsexi 'ixaheritsixi Muhawi kwieyaritsie mɨpaɨ katiniwarutahɨawe, 'imatɨrieka tɨratu hepaɨtsita Yawé yati'aitɨakaku, metatsiere meripaitɨri tɨratu muwewiekai Huré mɨrakutewatsie.
DEU 29:2 Muitsexi 'ixaheritsixi yunaime kaniwarukuxeɨrieni, hikɨ mɨpaɨ katiniwarutahɨawe: «Xeme xekaniuneniere Yawé kemɨtiuyuri 'Ekipitu Parahuni meta 'iparewiwamete wahɨxie meta naitsarie mɨkɨ kwieyaritsie kemɨtiuyuri.
DEU 29:3 Xekaniuneniere waɨkawamekɨ kemɨxetiuta'inɨataxɨ, 'inɨarite mamariwaweme kemɨtiuwewi.
DEU 29:4 Peru 'anapaitɨtɨ meta hikɨ Yawé xemeuta'iyaritawawenikɨ pɨkaxepitɨawe xemeti'enatɨkɨkanikɨ, meta hɨxite xemeunenierenikɨ, meta nakate xemeu'enanakakɨ.
DEU 29:5 Huta tewiyari wiyari tsepa nemɨxe'uwitɨximekai makuwakitsie, xe'ixuriki xekakai pɨka'utitsanixɨ.
DEU 29:6 Paa xepɨka'utikwai meta kaxie winuyari xepɨkahanu'i meta nitixaɨtɨ kwaniyariekame. 'Ikɨ mɨpaɨ nepɨtiuyuri mɨpaɨ xemɨtemaikakɨ kename ne Yawé xekakaɨyari nehɨkɨ.
DEU 29:7 »Kepauka 'ena temu'axɨa, Tsikuni ti'aitame payetɨa, Hetsiwuni kwieyaritsie kiekame meta 'Uhuki mɨtitewakai, Watsani kwieyaritsie ti'aitame, mana mepɨtatsi'utakwi, peru tame tepɨwara'iwaxɨ.
DEU 29:8 Naime wakwie tepɨwarunawairi tepɨwayetuiri Xuweni meta Kahari wanuiwarima meta hixɨata me'akame Manatsexi nuiwarimama, mɨkɨ wapiini mɨrayanikɨ.
DEU 29:9 »Hikɨta, yaxeketenekakɨni 'ikɨ tɨratu kemaine xeyukweriwayurietɨ, 'uxa'atɨniwarie 'aixɨa xemɨ'itɨariekakɨ tsepa kexemɨteyurie.
DEU 29:10 Hikɨ Yawé xekakaɨyari hɨxie xepɨku'u xeme xeyunaitɨ, xehɨxie memanuyetei, 'ukirawetsixi meta yunaitɨ 'ukitsi 'ixaheritsixi,
DEU 29:11 meta xeniwema meyunaitɨ xe'ɨitama meta 'ateewa kiekatari xekie memukutei, meta kɨ'ewemete meta hanɨwemete.
DEU 29:12 'Ena xepɨyuxeɨrie xeme xeyunaitɨ hikɨ tɨratu xemɨwewienikɨ Yawé xekakaɨyari hamatɨa, hikɨ miwewie xehamatɨa, meta mitseyuma yuhɨritɨatɨ yamɨtikayanikɨ.
DEU 29:13 'Ayumieme mɨkɨkɨ mɨpaɨ paine kename xeme xeteɨterimama, mɨkɨta kename xekakaɨyari hɨkɨ, xetutsima 'Apɨrahami, 'Itsahaki meta Kakuwu kemɨtiwarutahɨawixi.
DEU 29:14 Yawé takakaɨyari mɨpaɨ paine yurikɨ, kename tahamatɨa xeikɨa ka'iwewie yutɨratu meta kemɨtiyuhɨritɨa, 'ena hikɨ hɨxiena temuku'u,
DEU 29:15 matsi kemɨ'ane hikɨ tahamatɨa memɨka'u'uwa wahamatɨata kaniwewieka.
DEU 29:16 »Xeme xekatenakumaika 'Ekipitu ketemɨte'u'uwakai, meta huyeta ketemɨte'uhukai hipame nuiwarite watsata, mɨya tete'uhutɨ 'ena temu'axɨa.
DEU 29:17 Xeme xekaniwaruxeiya mɨkɨ watsata kakaɨyarixi memɨxani'eriwa kɨyexikɨ memɨwewiyatɨka, tetexikɨ, pɨratakɨ meta hurukɨ.
DEU 29:18 Xekeneyu'ɨwiya hikɨ xewitɨ kapa 'uki meta 'uka, meta xeinuiwari, meta xeixiɨyaritsixi hikɨ xe'iyari Yawé takakaɨyari 'uku'eirienikɨ, kapa hipame pɨta kakaɨyarixi mɨkɨ nuiwarite memuwarayexeiya warayexeiyatɨ 'ayanikɨ. Xekeneyukweriwayurieka kapa xewitɨ xeme naana mɨmɨya meta matsiwi hepaɨ 'ɨyɨnikɨ.
DEU 29:19 »Xɨka xewitɨ xeme, timaitɨtɨtɨ 'ikɨ niuki kemaine, xɨka 'aixɨa tiuyeikame yu'erieka, mɨpaɨ tiku'eriwani: “'Atsinepɨkayɨni, tsepa ne yanemɨtiyuriene kemɨnetinake”, mɨkɨ tiyurieyu yunaitɨ xepɨka'une.
DEU 29:20 Mɨkɨ Yawé pɨkareiyehɨwirieni. Kakaɨyari haxɨaya meta 'ɨtetsarikaya hetsiena kaniye'amɨkɨ. Naitɨ 'axamɨti'ane 'ikɨ xapatsie maye'uxa hetsiena katininakimɨkɨ, Yawé yapɨtiyurieni memɨkumawerekɨ yunaitɨ nuiwarimama.
DEU 29:21 Yawé penayehɨani 'Ixaheri nuiwarimama watsata, hetsiena pɨtinake naitɨ 'ikɨ kemɨre'uxa 'axakemɨ'itɨarienikɨ hepaɨtsita, tɨratu kemɨreku'uxa 'inɨari niukiyari xapayaritsie.
DEU 29:22 »Xeniwema meta xenuiwarima 'arike miemete, meta 'ateewa kiekatari memɨ'axɨani, mɨkɨ mepɨneniere kememɨtekwine meta kwiniya wahetsie kemɨtinake Yawé mɨwapitɨani 'ena kwiepa.
DEU 29:23 Mɨkɨ naitɨ pɨreuyeweni 'una pɨhɨkɨtɨni wakwie hatsiwitɨ 'u'ekatɨ, mana muyeikani pɨkayɨweni, mana mɨtiuka'eni pɨkayɨweni, mana mɨtitiwere pɨkayɨweni, meta tupiriya tɨma pɨkatineni. Kemɨtiɨyɨ kepauka Yawé mɨwaruka'unaxɨ Tsuruma kiekariyari meta Kumuxa, 'Arimaha meta Tsewuhini.
DEU 29:24 Yunaitɨ nuiwarite kwiepa memɨtama mɨpaɨ mepɨteta'iwauni: “¿Titayari Yawé 'ikɨ kwie mɨyatiuyuri? ¿Titayari yuhaxɨa waɨkawa mana tiukawiwi?”
DEU 29:25 'Ana mɨpaɨ mepɨtetahɨawarieni: “'Ikɨ teɨteri memiku'eirikɨ tɨratu Yawé miwewiekai wahamatɨa kepauka 'Ekipitu mɨwarayewitɨtsie.
DEU 29:26 Mekanekɨne, hipame pɨta kakaɨyarixi mewarayexeiyatɨ mekanakɨne, hipame kakaɨyarixi memɨkawamatekai wahɨxie mepukahɨxima'ui, mɨkaheuyewekai mɨkɨ kakaɨyarixi nenewieri memɨwapitɨakakɨ.
DEU 29:27 'Ayumieme Yawé waɨkawa kaniuyeha'ani 'ikɨ kwieyaritsie mieme, hikɨ mana kanikaxɨrieni naime kemɨre'uxa 'ikɨ xapayaritsie ke'axamu'itɨarienikɨ.
DEU 29:28 Merikɨte hikɨ ketemɨteneniere, Yawé waɨkawa ha'atɨ wakwiepa wananari naime kanahuna, xaɨtsie kaniwarexɨrieni xeime kwieyaritsie”.
DEU 29:29 »Tita mɨti'awietsie Yawé takakaɨyari hetsie katinimiemetɨni, matsi tita mɨtiutahekɨatsie tame pɨtahetsiemieme meta taniwema yuheyemekɨ, yatemɨtekahunikɨ 'ikɨ naime 'aitsika niukiyaritsie.
DEU 30:1 »Kepauka 'ikɨ naimekɨ 'aixɨa xemɨ'itɨarieni yatɨni kepauka 'ikɨ naimekɨ 'axaxemɨ'itɨarieni hikɨ nemɨxekuxaxatɨwa, meta kepauka xemaye'erieni hipame wakwietsie xe'u'uwatɨ hakewa Yawé xekakaɨyari mɨxehetaxɨriexɨanitsie,
DEU 30:2 meta kepauka 'ekɨ meta 'aniwema Yawé yukakaɨyari hetsɨa xemɨ'axɨani, meta kepauka xemei'enieka yu'iyarikɨ meta kexemɨteyumatekɨ, hikɨ kenemɨtixe'aitɨa hepaɨ,
DEU 30:3 hikɨ 'ana Yawé xekakaɨyari 'aixɨa pɨtiyurieni xehetsiemieme, pɨxetinenimayata. Yunaime pɨxekuxeɨrieni hipame nuiwarite watsata kemɨtixeheutaxɨriexɨakai.
DEU 30:4 Tsepa 'ateewa paitɨ xeime kwieyaritsie xeme'uwa, mana paitɨ Yawé 'akakaɨyari kamaniwitɨmieni matsi'akunuitɨanike, tawarita kanixekuxeɨrimɨkɨ.
DEU 30:5 Pɨxe'atɨani xetutsima wakwie mɨhɨkɨtɨkaitsie, manata xeme xekani'axɨakuni yukwie xemayeitɨanikɨ. Mɨkɨ yapɨtiyurieni mana waɨkawa xemɨte'ukaxexeiyanikɨ, meta xeme matsi waɨkawa xepɨtamɨire xetutsima kememɨkayupaɨmekai wahepaɨ.
DEU 30:6 Yawé xekakaɨyari pɨxeparewieni yu'iyaritsie xemɨtehatɨmaiyakɨ 'axamɨti'ane kwiepa timieme meta 'anuiwarima wahetsie, mɨkɨ xeikɨa xemɨnaki'eriekakɨ naime yu'iyarikɨ meta kexemɨteyumatekɨ, mɨpaɨ 'ana tukari xemexeiyanikɨ.
DEU 30:7 Meta Yawé xekakaɨyari yapɨtiyurieni 'ikɨ kemɨre'uxa memɨxe'aye'unie 'axamemɨ'itɨarienikɨ, memɨxexani'erie meta memɨxe'uweiya.
DEU 30:8 Hikɨ xeme Yawé hetsiemieme yaxetekahutɨ xepakɨne, kemaine naime 'aitsikateya xete'aye'atɨatɨ xepakɨne, hikɨ nemɨtixe'aitɨa hepaɨ.
DEU 30:9 Hikɨ 'ana Yawé xekakaɨyari 'aixɨa pɨtiyurieka kexemɨtekumaɨwa yu'uximayatsikakɨ meta 'aixɨa 'anemekɨ tɨɨri xemɨwarayexexeiyanikɨ, xetewama memɨxiɨkakɨ meta tita xemɨte'uka'itasana. Yawé tawari puyukatemawieni 'aixɨa 'anemekɨ xe'u'uwakaku, meripaitɨ kemɨtiyutemawiekai xetutsima waparewietɨ memɨte'ukaxexeiyanikɨ,
DEU 30:10 xemetsɨ Yawé yukakaɨyari xeheu'eniekaku meta 'aitsikateyatsie yaxetekahukaku, 'ikɨ 'inɨari niukiyari xapayaritsie kemɨre'uxa, meta xɨka Yawé 'akakaɨyari hetsɨa penuani naime 'a'iyarikɨ meta naimekɨ kepemɨti'amatekɨ.
DEU 30:11 »'Ikɨ 'aitsika hikɨ nemɨxe'aitɨa mɨpaɨ xemɨtekahunikɨ, pɨkatɨrɨkaɨye xeme kexemɨtetɨrɨkawi hepaɨ meta xemɨka'i'axe pɨkati'ane.
DEU 30:12 Taheima muyuawitsie 'ikɨ niuki pɨkahetika, titayari mɨpaɨ xeteku'iwawani: “¿Kemɨ'ane muyuawitsie pɨmie tahetsiemieme, mɨkɨ 'aitsika mɨtatsi'atɨirienikɨ, mɨpaɨ 'ana temi'enienikɨ meta mɨpaɨ temɨtekakɨnekɨ?”
DEU 30:13 Meta haramara 'anutaɨye pɨkahetika, titayari mɨpaɨ xeteku'iwawani: “¿Kemɨ'ane panuhauni tahetsiemieme haramara 'anutaɨye, mɨkɨ 'aitsika mɨtatsi'atɨirienikɨ, mɨpaɨ 'ana temi'enienikɨ meta mɨpaɨ temɨtekakɨnekɨ?”
DEU 30:14 Hawaikɨ matsi. Niuki 'aitsika 'ahurawa xepexeiya, yuteta meta yu'iyaritsie xepeixeiya, mɨpaɨ xemɨtekahunikɨ.
DEU 30:15 »Hikɨ nepɨxepitɨa xemenayexeiyakɨ, tukari yatɨni mɨɨya, 'aixɨa mɨti'ane yatɨni 'axamɨti'ane.
DEU 30:16 Hikɨ nepɨxe'aitɨa Yawé yukakaɨyari xekenenaki'erieka, huyetana xekeneuhuni, meta xekenaye'atɨaka naime 'aitsikateya meta naime 'inɨari niukiyari. Mɨpaɨ 'ana 'axepu'uwani meta xepɨtamɨire, Yawé xekakaɨyari 'aixɨa pɨxeyurieka 'ena kwiepa xekwie mayanitsie.
DEU 30:17 »Peru xɨka yu'iyaritsie xekaheu'enanaka xɨka yaxekatekahuni, matsi pɨta xɨka xaɨtsie xeheukuyune hipame pɨta kakaɨyarixi xemɨwarayexeiyanikɨ,
DEU 30:18 ne hikɨ mɨpaɨ nekatinixehayemari'itɨwani, xekanika'unariekuni xepɨkatinenimayatsieni. Mɨixa tukari xepɨkatihini mɨkɨ kwieyaritsie xekwie mayanitsie Kurutanitsie xe'anukɨneme.
DEU 30:19 »Hikɨ muyuawi taheima muyema meta kwie memunenierixɨ nepɨwarayeitɨani xehetsiemieme, kenemɨtixe'utahɨawixɨ xemenayexeiyakɨ tukari yatɨni mɨɨya, 'aixɨa xemɨ'itɨarienikɨ yatɨni 'axaxemɨ'ituarienikɨ. Matsi, tukari, xekenanayexeiya, 'ekɨ meta 'anuiwarima 'axemu'uwanikɨ.
DEU 30:20 Yawé yukakaɨyari xekenenaki'erieka, yaxeketenekahuni kemaine, hetsiena xeketenewiyani, mɨkɨ hetsie katiniwiyani 'atukari, meta mɨkɨ hetsie xeikɨa petiwiyatɨ mɨixa pepuyurieni mɨkɨ kwieyaritsie xetutsima 'Apɨrahami, 'Itsahaki meta Kakuwu mɨwaruxatɨatsie».
DEU 31:1 Muitsexi tawarita yunaime 'ixaheritsixi kaniwarutakwewieni, mɨpaɨ katiniwarutahɨawe:
DEU 31:2 «'Ari xeitsienituyari heimana xeitewiyari wiyari nekanexeiyani, nepɨkayɨweri nemɨxeyewitɨni. Meta Yawé mɨpaɨ pɨnetiutahɨawixɨri kename Kurutani hatuxameyaritsie nekahanuyani,
DEU 31:3 meta mɨpaɨ pɨra'aita kename Kutsuhexi yɨaneni manuyehaitɨani Kurutani xemukɨnetsie. Yawé xekakaɨyari pumieni 'anuyekaitɨ xehɨxie yunaime nuiwarite mɨwaka'unakɨ kemɨ'ane xehɨxie memu'uweni, xemeta wakwie xepiini pɨrayeikani.
DEU 31:4 Yawé pɨwaka'una kemɨwaruyuri Tsikuni meta 'Uhuki, 'amuxeutsixi tewa'aitɨwamete meta yunaime wakiekari.
DEU 31:5 Kepauka Yawé mɨxeyetuirieni xemɨwara'iwakɨ, xeme yaxepɨwayurieni ne kenemɨtixe'uta'aitɨa.
DEU 31:6 Xekenetɨrɨkawini meta xepɨkamamaka. Mɨkɨ nuiwarite wahɨxie xepɨka'utimamaweni xepɨkawamakarɨka, mɨkɨtsɨ Yawé xekakaɨyari xehamatɨa yuheyemekɨ kaniuyeikani, hatsuaku yuxaɨtame pɨkaxehayewa meta pɨkaxeku'eirieni».
DEU 31:7 Hikɨ Muitsexi Kutsuhexi kaniuta'inieni, yunaime 'ixaheritsixi wahɨxie mɨpaɨ katinitahɨawe: «Kenetɨrɨkaɨyeni meta pepɨkamaka, 'ekɨ pekaniyɨmɨkɨ pemeutahani 'ikɨ teɨteri pewarawitɨtɨ kwie Yawé xetutsima mɨwaruxatɨakaitsie. 'Ekɨ yapekatiniyurimɨkɨ mɨkɨ yukwie memayeitɨanikɨ tita mɨtiwahetsiemiemetɨkai.
DEU 31:8 Yawé matsi panuyehaitɨaka 'ahɨxie meta 'ahamatɨa puyeikani, hatsuaku pɨkamatsiku'eirieni 'axaɨtame meta pɨkamatsinutuita. Pepɨkamaka meta pepɨka'utaweranareni».
DEU 31:9 'Ikɨ 'aitsika Muitsexi kaneka'utɨani meta mawari wewiwamete rewitsixi kaniwayetuirieni, mɨkɨ memikukwetɨwekai tɨratu kakuniyari Yawé hetsiemieme, meta yunaime 'ukirawetsixi 'ixaheritsixi.
DEU 31:10 Hikɨ mɨpaɨ katiniwarutahɨawe: «'Atahuta wiyari 'aye'axekaku, memɨte'apitɨka memɨteheuyehɨwiyarɨwatsie, Xamaru 'ixɨarariyari matineikatsie,
DEU 31:11 kepauka xeme 'ixaheritsixi xemɨ'axɨani Yawé xekakaɨyari hɨxie hakewa mɨkɨ meyuhayewa, 'ana 'ikɨ 'aitsika xepakaterɨwa karima yunaime 'ixaheritsixi wahɨxie.
DEU 31:12 Yunaime 'ukitsi, 'ukarawetsixi, tɨɨri, meta 'ateewa kiekatari xekiekaritsie memɨkutei xepɨwakuxeɨrieni, mɨkɨta memɨ'enananikɨ, Yawé xekakaɨyari memɨmakaxenikɨ, meta kemaine 'ikɨ 'aitsikatsie yu'iyarikɨ yamemɨtekahunikɨ.
DEU 31:13 Meta mɨkɨ wanuiwarima pɨwahetsiemieme, 'ikɨ 'aitsika kemɨ'ane memɨka'imate, mɨkɨ mepi'enieni meta Yawé xekakaɨyari me'ayemakatɨ mepakɨne, mexi kwiepa me'u'uwani xeme yukwie xemayeitɨanitsie Kurutani 'anutaɨye».
DEU 31:14 Yawé Muitsexi mɨpaɨ katiniutahɨawe: «'Atukari kanaye'aximeniri kepauka pemɨmɨni. Kutsuhexi keneuta'ini, kenawitɨtɨ kenemie 'ixuriki tukiyarita nemɨreita'aitɨanikɨ». Hikɨ mɨpaɨ mekaniuyɨni muwa mekanekɨne Muitsexi Kutsuhexi hamatɨa.
DEU 31:15 Hikɨ Yawé tuki hɨxie haiwitɨri 'a'uwemetsie kaniuyuhekɨata,
DEU 31:16 Muitsexi mɨpaɨ katiniutahɨawe: «'Ekɨri 'apaapama wahamatɨa pekanika'uxipimɨkɨ, hikɨ kwitɨwa 'ikɨ teɨteri nehetsie mekatewiyatɨ mekanakɨnikuni hipame kakaɨyarixi mewarayexeiyatɨ mepakɨne mema'axɨani kwieyaritsie memuxuawe. Mekaneniku'eirikuni, tɨratu wahamatɨa nemuwewi mekanititsanaxɨakuni.
DEU 31:17 Kepauka mɨpaɨ mɨtiyɨni waɨkawa nepɨwayeheka meta nepɨwaku'eirieni nepɨneti'awieta, 'aixɨa mepɨtekwaiyani. Hikɨ waɨkawa 'uximatɨarika wahetsie pɨtixɨawere meta kenemutayɨkai, hikɨ mɨpaɨ meputiyuaneni: “Neuxei 'ikɨ naitɨ 'uximatɨarika tahetsie pɨtinua Kakaɨyari 'ari tahamatɨa mɨka'uyeikakɨ”.
DEU 31:18 'Ana matsi ne waɨkawa nepuyuti'awieta, 'axamemɨte'uyurikɨ hipame kakaɨyarixi memɨwareweikɨ.
DEU 31:19 »'Ikɨ kwikari xekenaka'utɨa, xekeniwaruti'ɨkitɨa yunaime 'ixaheritsixi memitakwikanikɨ, mɨkɨ mɨwaraye'eritɨwanikɨ.
DEU 31:20 »Kepauka nemɨwaranuwitɨni 'ixaheritsixi kwie ke'aneme watutsima nemɨwaruxatɨatsie, waɨkawa retsi xiete maxuawetsie, mana meputihuxarɨweni meta mepɨtiwaiyata, hikɨ 'ana hipame kakaɨyarixi mewarayexeiyatɨ mepakɨne, ne menetsihehɨame meta netɨratu metitsanaxɨame.
DEU 31:21 Kepauka waɨkawa memu'uximatɨarieka meta memɨte'uka'eniwani, 'ikɨ kwikari pɨwaraye'eritɨwani, mɨkɨ wanuiwarima mehe'eriwatɨ mepitakwikani. Ne nekatinimaika neteɨterima kememɨteku'eriwa kememɨteyuriku, 'akuxi 'iya kwieyari nemɨwaxatɨatsie nekawaye'atɨawekaku».
DEU 31:22 Hikɨ Muitsexi mɨkɨ 'ana kwikari kanaka'utɨani, 'ixaheritsixi kaniwaruta'ɨkitɨani.
DEU 31:23 Meta Kutsuhexi Nuni nu'aya Yawé mɨpaɨ katinita'aitɨani: «Keneyɨtɨrɨkariyani meta pepɨkamaka, 'ekɨtsɨ pekaniyɨmɨkɨ pemɨwaranuwitɨni 'ixaheritsixi 'iya kwieyaritsie nemuwaruxatɨakai nemɨwayetuirienikekaitsie, neta 'ahamatɨa nekaniuyeikamɨkɨ».
DEU 31:24 Kepauka Muitsexi xeixapayari 'utɨatɨ 'ikɨ 'aitsikate naime munɨ.
DEU 31:25 Mɨpaɨ rewitsixi katiniwaruta'aitɨani, memɨhɨritɨarie tɨratu kakuniyari memutikwekwewe Yawé hetsiemieme:
DEU 31:26 «Xekenanuhuri 'ikɨ 'aitsikate xapayari maye'uxa, tɨratu kakuniyari Yawé xekakaɨyari hetsiemieme 'aurie xekenayetsa. Mana puyuhayewani 'inɨari pɨhɨkɨtɨni 'ixaheritsixi xehetsiemieme,
DEU 31:27 nekatinimaikatsɨ kexemɨtetsetse'i kexemɨkateyuka'enie. Xehamatɨa ne'uyeikakakutɨtɨ yaxepɨkatekahukai Yawé hetsiemieme, matsi kwinimieme xe'anetɨ xekanakɨnikuni kepauka nemumɨnitsie.
DEU 31:28 Yunaime nehɨxie memanuyetei meta 'ukirawetsixi xekeniwarukuxeɨri, ne nemɨxetaxatɨanikɨ 'ikɨ niuki meta xemi'enienikɨ heitseriemekɨ. Taheima muyuawi muyema meta kwie memunenierixɨ mekanihɨkɨtɨkakuni xehetsiemieme,
DEU 31:29 ne nepɨtimate 'arike nemɨyu newarita mɨtiyehane, 'axamɨti'ane xepɨtetixuawitɨani meta huye nemɨxe'uxeitsitɨa xepuku'eirieni. Tukari 'umamietsie waɨkawa 'axamɨti'ane pɨtinuani xehetsie xepɨte'uka'eniwani, Yawé hɨxie 'axaxemɨteyurienikɨ meta tita mɨtixani'eriekɨ yaxemɨte'uyurikɨ xepiyehaxɨatɨani».
DEU 31:30 'Ikɨ kanihɨkɨtɨni kwikari Muitsexi mitaxataxɨ naime kemɨpaɨme, yunaime 'ixaheritsixi wahɨxie:
DEU 32:1 «Muyuawi keneu'ena kenemɨtayɨni, kwie keneu'ena netetamiemekɨ kenemɨtayɨni.
DEU 32:2 Wiyeri hepaɨ ke'ukaxɨrieni ne'ɨkitɨarika 'aixɨa manuyɨne, neniukikɨ ke'ukuhawire haɨtsi ximeri mieme hepaɨ, 'ɨxa mɨhehekwa waɨkawa kemɨtihatuiyarɨwa, wiyeri waɨkawa kemɨtikaxɨrɨwe hepaɨ tupiriya mɨyɨyɨritsie.
DEU 32:3 Yawé hetsiemieme nepɨtaniuni nepitahɨawe. 'Aixɨa xekeneutiyuaneni Kakaɨyari mɨmariwekɨ.
DEU 32:4 Mɨkɨ tete kanikɨtɨni, 'uximayatsikaya pɨheitserie, naitɨ huyeya 'aixɨa pɨ'anene. Kakaɨyari yapɨtikamie, 'axapɨkatiyuriene. Mɨkɨ heitserie pexeiya meta 'aixɨa pɨtiuka'iyari.
DEU 32:5 Kemɨxetinake xepɨte'uyuri hetsiena mieme, xemɨyutewiwiyanikɨ, xemeri xepɨkaniwemama, nuiwari xemeutuni xepɨhɨkɨ 'axaxemɨte'u'iyari.
DEU 32:6 »¿'Ikɨkɨ Yawé xete'akapitɨwa, teɨteri xemɨka'u'iyari? Mɨkɨ kani'apaapatɨni, kameniunetɨani, mɨkɨ pɨmatsi'utawewi, mɨmatsi'ukaye kanihɨkɨtɨni.
DEU 32:7 Meripaitɨ mieme tukari xekena'eriwani, meripaitɨ kexemuyɨ xekena'eriwani. 'Apaapa keneuta'iwawiya yamɨmatitahɨawekɨ, meta 'ukirawetsixi mekemate'utaxatɨani.
DEU 32:8 Kepauka 'Amutewi nuiwarite wapiini mɨtiwayetuiri, kepauka teɨteri kwiepa memɨtama mɨwareutanɨ'axɨa yuxexuime, mɨkɨ teɨteri yukwie mehexeiyame pɨwarayeitɨa, kememɨyupapaɨmekai yemekɨ 'Ixaheri niwemama.
DEU 32:9 Xemetsɨ Yawé kanixe'anayexeiya teɨterimama xemɨhɨkɨtɨnikɨ, Kakuwu hetsiena mieme kanihɨkɨtɨni.
DEU 32:10 Xeme pɨxe'ukaxei kwie makumawetsie, yuxaɨtame xepu'uwakai. Pɨxe'utinenimayataxɨ pɨxe'uta'ɨwiyaxɨ, pɨxe'ɨwikai yuhɨxite hepaɨ,
DEU 32:11 kwixɨ kaikame hepaɨ kemɨtiwakweriwayurie yuniwema yu'ituatsie, wakuxexeɨriwatɨ, yu'anatekɨ waranukanatɨ, yu'anatsie warayatsatɨ kemɨtikuyeika.
DEU 32:12 »Yawé xeikɨa pɨxe'uwitɨximekai, xewitɨ tawarita kakaɨyari yukɨ'anetɨ hamatɨana pɨka'umiekai.
DEU 32:13 Hɨritsie pɨxe'uwitɨximekai meta pɨxemikwakai 'ikwaxi yeuta mɨtixɨawekɨ. Xiete pɨwamikwakai meta hatseiti, tete mɨtse'itsie henetɨaka,
DEU 32:14 wakaitsixi wakuneriyari kaniwaru'itɨani meta kapɨratsixi waretsi mepanu'i, tsipuri meta muxatsi memɨwaiyatɨka, tuurutsixi memɨwaiyatɨka wawaiyari Watsani miemete, tɨriku takari mɨkɨkɨre, kaxie winuyari mɨxure mepanu'i.
DEU 32:15 »Ketsuruni putawaiyataxɨ meta pɨtiuyeketsi, 'ikwaikɨ xeikɨa putahuxai. Putawaiyataxɨ putatɨrɨkaxɨa. Kakaɨyari puku'eiri tukari mipitɨa, tete putixani'eri mitawikweitsitɨa,
DEU 32:16 Pɨwaruyehekaxɨ kakaɨyarixi hipame memɨwarayexeiyakaikɨ, mepiyehaxɨatɨa yukakaɨyarixi memɨxani'eriwa wahekɨ.
DEU 32:17 Kakaɨyarixi 'axamemɨ'anene mepɨtewarutimawiri, Kakaɨyari memɨkahɨkɨ, kakaɨyarixi memɨkawamatekai, kakaɨyarixi 'arikeke memune, kakaɨyarixi wa'ukiyarima memɨkawarayexeiyakai.
DEU 32:18 Tete mɨtse'i mepuku'eiri mɨwarutawewi. Kakaɨyari mepatɨmai tukari mɨwarupitɨa.
DEU 32:19 »Mɨpaɨ tinieretɨ, Yawé pɨwarexɨri niwemama 'ukitsi 'ukari memiyehaxɨatɨakɨ.
DEU 32:20 Hikɨ mɨpaɨ kaniutayɨni: “Nepɨwawarixiwiya, tsipara kemeteheutere, teɨteri 'axamemɨte'u'iyari mepɨhɨkɨ, tɨɨri yamemɨkatekahu mepɨhɨkɨ.
DEU 32:21 Mepɨnetsi'uyehaxɨatɨa kemɨ'ane yuri mɨkakakaɨyarikɨ, nepuyeha'a hipame kakaɨyarixi memɨwarayexeiyakaikɨ. Neta yaxeikɨa nepɨwayurieni nepɨwayehaxɨatɨani kemɨ'ane memɨkaneteɨterima wahekɨ, nepɨwayehaxɨatɨani teɨteri 'axamemɨte'u'iyari wahekɨ.
DEU 32:22 Nehaxɨa tai hepaɨ kaniutani, naime mɨtititaiya mɨki teukiyapa. Kwie pɨtaxɨtɨani meta naime mana mɨti'etsie, meta hɨri nanari naime pɨtitaiya.
DEU 32:23 »”Waɨkawa 'uximatɨarika nepɨtixuawitɨani wahetsie, ne'ɨrɨ wahetsie nepɨtixɨtɨani.
DEU 32:24 Haaka nepanunɨ'ani muwatixɨtɨanikɨ, kwiniya waɨkawa nepɨnetɨani mɨɨyakame. Yeutari 'ɨrawetsixi, meta kuterixi 'uaye memexeiya yutawikɨ memɨteku'uwa kwiepa.
DEU 32:25 'Ixiparakɨ mepɨkwi'iwa 'aniwema huye manuyehapanetsie, yukie xekutetɨ xepɨmamaka. Temari 'ɨimarixi mepɨkwini, memɨtsitsewe meta'ukirawetsixi.
DEU 32:26 Mɨpaɨ nepɨtiunehɨawixi: ‘Yunaime nepɨwataxɨriexɨani, kwiepa nepɨwarakuyeitɨani memɨkaha'eriwanikɨ’.
DEU 32:27 Peru neputima 'axakemɨtiyurimɨkɨkaikɨ mɨnetsi'aye'unie, neputima neneɨkixiwi kaheti'enatɨyanikɨ meta mɨpaɨ tiu'erienikɨ: ‘Tame tekatenayu'iwa, Yawé tixaɨtɨ 'atsipɨkatiuyuri.’ ”
DEU 32:28 »Xeme nuiwari 'ixaheritsixi 'atsixemɨkatemate xepɨhɨkɨ, xepɨkaheitimaitɨkɨka.
DEU 32:29 Xɨka xeme xemɨtemaiwawe xehɨkɨtɨnike hikɨ 'ipaɨ xeteyuhɨaweke, xɨka mɨpaɨ xetehetimanike kexemɨ'itɨarienikɨ.
DEU 32:30 Tewi pɨkayɨwe yuxaɨta xeimiriyari mɨwara'iwa xɨka teteya ka'ituanike. Yuhutatɨ tamamata miriyari memɨwataweiyakɨ mepɨkayɨwawe xɨka Yawé kawayetuanike.
DEU 32:31 Watete tatete hepaɨ pɨka'ane. Memɨtatsi'aye'unie mɨpaɨ mepɨtemate.
DEU 32:32 Wakaxie Tsuruma yɨrariyari kanihɨkɨtɨni, Kumuxa kwieyaritsie mɨti'u. Wakaxie takari 'uaye mɨmɨyakɨ pɨhɨpɨne, takari 'amɨranukate, tsiwiriya pɨhɨkɨ.
DEU 32:33 Wawinu kuuterixi 'uaye memexeiya hepaɨ pɨ'ane, pɨtiyuhairiya kuu rakeyu mɨmɨya hepaɨ.
DEU 32:34 »“Yakatinaye'amɨkɨ ne nekatinimaika yanekatiniyurimɨkɨ 'aixɨa nekatini'uta ne hakewa nemɨre'utatsie.
DEU 32:35 Neta yaxeikɨa 'anemekɨ nepɨtiwarakapitɨani. Kepauka tukari yamɨraye'ani, mepekaxɨrieni. Tukari pehurari mexɨiwa paye'axime kememɨtekwine”.
DEU 32:36 »Yawé yuteɨterima wahetsie pɨtanuani kepauka mɨwaxeiya mekatɨrɨkawime, memɨte'i'uximayatsirie pɨwatinenimayata, kepaukari waɨriyarika te'uximayatamete meta memɨxɨxɨni memumawenitsie.
DEU 32:37 Mɨpaɨ pɨtiwatahɨawe: “¿Hakewatamɨ xekakaɨyarixi, tete kɨmana xemuyuti'awietaxɨ?
DEU 32:38 ¿Hakewatamɨri xekakaɨyarixi mawari yaxemɨtewawewiriekai waiyariyari xemutikwai wawinu meta wahatseiti xemanu'i? Mɨkɨ xehetsie meke'utanuani. Mekexe'uparewieni.
DEU 32:39 »”Hikɨ xekeneunenieri ne xeikɨa nepɨhɨkɨ Kakaɨyari nemɨyuxewi, xewitɨ tawarita 'apɨka'uyeika kakaɨyaritɨtɨ, ne mɨɨya nepɨrapitɨani meta tukari nepɨrayetuirieni, nepɨrakwinituani meta 'aixɨa nepɨrayurieni xewitɨ pɨkayɨwe mɨnetsitanewienikɨ netɨrɨkariyatsie.
DEU 32:40 Nemamate nepanukuhapana muyuawitsie nepeititsera mɨpaɨ nepɨtayɨni: Ne 'anemuyeika nemɨhɨkɨ yuheyemekɨ,
DEU 32:41 kepauka ne'ixipara mɨxawatɨ nematamɨa tukari 'aye'aku nepenukukwei, nemɨtiwarakapitɨanikɨ memɨnetsi'aye'unie meta memɨnetsiheka wahepaɨtsita kemɨtiheitserie.
DEU 32:42 Ne'ɨrɨ pɨtitarɨweni xuriyakɨ, ne'ixipara pɨtiwaɨripieni wai kwatɨ: memɨte'ukwinitɨarie memanutaxɨriya waxuriya, kuyaxi memɨtewa'aitɨa memɨnetsi'aye'unie wamɨ'ute”.
DEU 32:43 »Nuiwarite xekeneyutemamawieka Kakaɨyari teɨterimama wahamatɨa, mɨkɨ yaxeikɨa pɨtiwarakapitɨani te'uximatamete waxuriya memutayeurikɨ. Hikɨ Kakaɨyari yaxeikɨa pɨtiwarakapitɨani memɨxe'aye'unie wahekɨ pɨwa'itieni naime wakiekari meta wakwie».
DEU 32:44 Kutsuhexi Nuni nu'aya, Muitsexi hamatɨa teɨteri wahɨxie kwikari niukiyari putaterɨwaxɨ.
DEU 32:45 Kepauka menunɨ yunaime 'ixaheritsixi mɨpaɨ pɨtiwarutahɨawixɨ:
DEU 32:46 «Xekena'eriwani yemekɨ 'ikɨ tukaritsie kenemɨtixe'utahɨawixi, yuniwema mɨpaɨ xeketeniwarutaxatɨa 'ikɨ 'aitsika niukiyaritsie heitseriemekɨ yamemɨtekahunikɨ.
DEU 32:47 'Ikɨ niuki yapɨkayɨneme xehetsiemieme mɨkɨtsie xetewiyatɨ tukari xepexeiya, mɨkɨtsie xetewiyatɨ mɨixa xepɨyurieni kwiepa xekwie mayanitsie Kurutani 'anutaɨye».
DEU 32:48 Mɨkɨ tukaritsie Yawé Muitsexi mɨpaɨ katiniutahɨawe:
DEU 32:49 «'Awarini hɨriyaritsie kenemie, mana Newu hɨriyari pekaneixeiyamɨkɨ, Muhawi kwieyaritsie, Keriku 'aurie mukuma, meta Kanani kwieyaritsie, mɨkɨ 'ixaheritsixi nekaniwayetuiriemɨkɨ.
DEU 32:50 Mɨkɨ hɨri pemanutiyanitsie pekanimɨmɨkɨ, 'ateɨterima wahetsɨa pekaniyemieni, yaxeikɨa 'a'iwa 'Aruni kemɨtiumɨ meta mɨkɨ kemɨretɨa yuteɨterima wahetsɨa Huxi hɨriyatsie.
DEU 32:51 'Ikɨ mɨpaɨ katinaye'amɨkɨ yunaime 'ixaheritsixi wahɨxie, xeme yuhutatɨ 'axaxemɨte'uyurikɨ Meriwa Kare haa mayematsie, Tsini makuwakitsie nepatsiekame xepɨkanetsi'ayeitɨa.
DEU 32:52 'Ayumieme pepɨkata'ani kwiepa 'ixaheritsixi nemɨwayetuirienitsie, 'ateewa paitɨ xeikɨa pekanixeiyamɨkɨ».
DEU 33:1 Muitsexi 'akuxi kamɨwetɨ, Kakaɨyari ti'uximayatsiriwame, 'ixaheritsixi 'aixɨa kaniwaruyurieni:
DEU 33:2 «Yawé Tsinahi heyeyaka kaninuani: Yuteɨterima wahetsie punua, tau 'ɨrɨya hepaɨ 'anetɨ Tsehixi kwieyaritsie, puhekɨarixɨ Parani hɨriyaritsie paitɨ, meta kaninuani Meriwa-Karetsi yutserie tau 'ɨrɨya hexeiyatɨ.
DEU 33:3 'Ekɨ pepɨhɨkɨ 'ateɨterima pemɨwanaki'erie, yunaitɨ memɨpatsietɨka 'amamatsie mepɨte'ane. 'Ayumieme mekameniuweiyani, 'ɨxatsi 'ahetsɨa mieme mekaniukaxexeiyani.
DEU 33:4 'Aitsika Muitsexi mɨtatsi'uhɨritɨa kanihɨkɨtɨni, Kakuwu teɨterimama tiwapiini.
DEU 33:5 Yawé ti'aitame Ketsuruni wahetsie pɨhɨkɨtɨkai, kepauka teɨteri memanuyetei memuyukuxeɨri, meta yunaitɨ nuiwarite 'ixaheritsixi.
DEU 33:6 »Xuweni ke'ayeniereni, ke'uyeikani, teɨterimama mepɨkayu'inɨatsinɨaka».
DEU 33:7 Mɨpaɨta Kura hetsiemieme kaniutayɨni: «Yawé, Kura hiwarieya keneu'eni, 'ateɨterima keniwa'atɨa. Kura puyumiene yutɨrɨkariyakɨ. Keneuparewi memeye'unie wahepaɨtsita».
DEU 33:8 Rewi hetsiemiemeta mɨpaɨ putayɨ: «'Urimi meta tumimi, 'apiini mɨtihɨkɨ, pepiyetuiri tewi kemɨ'ane 'ahetsie mɨtiwiya. Matsaha mɨrakutewatsie pepita'inɨataxɨ, Meriwa hayaritsie mɨkɨ hamatɨa pemuyutami.
DEU 33:9 Mɨpaɨ putayɨ yupaapa meta yumaama wahetsiemieme: “Tixaɨtɨ pɨkatiwarayeitɨaka”. Yu'iwama pɨkawaretima, meta yaxeikɨa yuniwema pɨkawaretima, peru 'aniuki pu'eni 'atɨratutsie yapɨtikatɨa.
DEU 33:10 'A'aitsika Kakuwu puta'ɨkitɨa, meta 'a'inɨari niukiyari 'ixaheri. Mawari taiyametsie pumatiyetuiri, 'ɨkwa witsimu'ɨa meta mawari mɨtaiyarietɨka.
DEU 33:11 Yawé, 'aixɨa keniwayurieka kememɨteyurie ketiniwanaki'eririeka tiwamayɨitari. Memɨwaraye'unie watɨrɨkariya keneuka'una, tawariri memɨkawakwitɨwenikɨ memɨwaraye'unie».
DEU 33:12 Mɨpaɨta Wenikamini hetsiemieme putayɨ: «Yawé mɨnaki'erie, hamatɨana 'aixɨa 'anemekɨ ke'uyeikani, mɨkɨ mi'ɨwiyakɨ tukarikɨ meta kayuwatɨ hetsiena pu'uxipie».
DEU 33:13 Kutse hetsiemieme mɨpaɨta putayɨ: «Yawé 'akwie 'aixɨa keyurieka haɨtsi muyuawitsie makaneikakɨ meta haa kwieta matineikatɨkakɨ,
DEU 33:14 'aixɨa ti'aneneme ketiuka'itsanani mukawiwiyetsie, meta 'aixɨa ti'aneneme 'ikwaxi xeimetseritsie timieme,
DEU 33:15 'aixɨa ti'aneneme hɨritsie timieme meta hɨri 'amanutitɨtɨtsie miemekɨ yuheyemekɨ 'aixɨa ke'itɨarieka,
DEU 33:16 'aixɨa mɨti'anene kwiepa mɨtixuawekɨ, meta ke'iparewieka 'ɨtsi mɨta'a hetsie mɨkiekame. 'Ikɨ naitɨ Kutse hetsie ketiunake, yu'iwama watsata manayexeiyarie 'aixɨa mɨtiyurienikɨ.
DEU 33:17 Kutse pɨmariwe tuuru mexɨakame hepaɨ, pɨtɨrɨkaɨye tuuru yeutanaka hepaɨ. Yu'awatekɨ pɨwatakwini nuiwarite hipame, pɨwakuxeɨrieni kwie manunieretsie paitɨ. Mɨpaɨ mepɨtetɨrɨkawi Manatsexi kuyaximama, meta 'Epɨrahini kuyaximama memuyuwaɨkawa».
DEU 33:18 Tsawuruni hetsiemieme mɨpaɨta kaniutayɨni: «'Ekɨ, Tsawuruni, pepɨ'atemawie pekuyeikatɨ xeikɨa, 'ekɨta, 'Itsakaxi, 'a'ixuriki kiiyarita xeikɨa pepayeka.
DEU 33:19 Hipame teɨteri mepɨwata'inieni hɨritsie memuhukɨ, mana mawari memewewienikɨ 'aixɨa memɨteyuriekɨ. Mepɨyutemamawieka haramaratsie tita waɨkawa mɨtixuawekɨ meta mɨraye'axe xiekarita mɨti'awietsiekɨ».
DEU 33:20 Kahari hetsiemiemeta mɨpaɨ kaniutayɨni: «'Aixɨa ke'itɨarieka kemɨ'ane Kahari kwieya 'amɨtayeuriya. Kahari mana puyeika maye hepaɨ, mamate wayetsanatɨ meta mu'ute.
DEU 33:21 Kwie 'aixɨa mɨ'ane panayexei yuhetsiemieme, puyuti'utsiri mɨkɨ kwie manuyehaitɨa mɨhɨkɨtɨkaikɨ, Kepauka teɨteri memanuyetei memɨyukuxeɨri, mɨkɨ yapɨtikatɨa Yawé kemɨtinake, yaxeikɨa kemɨtiwarutahɨawekai yuteɨterima».
DEU 33:22 Rani hetsiemiemeta mɨpaɨ kaniutayɨni: «Rani maye nunutsi puhɨkɨ, Watsani paitɨ mutsunane».
DEU 33:23 Nepɨtahari hetsiemiemeta mɨpaɨ kaniutayɨni: «Nepɨtahari Yawé kemɨtiparewie panayuhayewa Yawé 'aixɨa miyuriekɨ, 'aixɨa pɨ'itɨarie waɨkawa, mɨra'aita pɨwere haramaratsie 'uye'atɨkaitɨ meta makuwakitsie paitɨ».
DEU 33:24 'Atsexi hetsiemiemeta mɨpaɨ kaniutayɨni: «'Atsexi matsi waɨkawa 'aixɨa pɨ'itɨarie yu'iwama watsata, 'iwamama yunaitɨ meke'inaki'erieka, meta yu'ɨkatetsie huriwa hatseitiyarikɨ waɨkawa kewiriyarietɨkani.
DEU 33:25 'A'ituparite warita mauku'uwe tepɨa meta wurunitse tepɨayari pɨhɨkɨtɨni, 'apekereutere 'ape'uyeikatɨ petɨrɨkaɨyetɨ.
DEU 33:26 »Xewitɨ pumawe Ketsuruni Kakaɨyarieya hepaɨ 'aixɨa tiuka'iyaritɨ, xeparewienike muyuawitsie pakaneika, haitsata, waɨkawa mariwetɨ.
DEU 33:27 Kakaɨyari yuheyemekɨ 'amuyeika 'ahetsie pununuwame, yuheyemekɨ pɨmatsi'atu'u. Memɨmatsi'aye'unie 'ahɨxie pɨwataweiya. Pɨmatsita'aitɨani pemɨwareuyehɨanikɨ.
DEU 33:28 'Ixaheri, tixaɨtɨkɨ pepɨkareuyukweriwayurieka, 'Axekeneu'uwani hipatɨ mekaxe'aye'uniekakɨ, Kakuwu nuiwarimama. Xekwie waɨkawa tɨriku pexeiya meta kaxie winuyari, muyuawi xeheima muyema haa puxuawitɨa.
DEU 33:29 'Ixaheritsixi, xekeneyutemamawieka yutukarikɨ. ¿Tawari kemɨ'ane 'aku xehepaɨ, mepɨwikweitsitɨarie Yawé hetsie? Mɨkɨ 'ahetsie nunuwame pɨhɨkɨ meta metsiparewiwame, mɨkɨ xe'ixipara pɨhɨkɨ kɨmana xemɨtehayu'iwa. Memɨxekwitɨwe xehɨxie mepɨtitunuma'uni, wawari, hetsiena xema'uwe pakɨne».
DEU 34:1 Hikɨ Muitsexi Muhawi makuweritsie kanayeyani, Newu hɨriyaritsie kanitiyune, hɨri kwinimieme manutitewitsie paitɨ kanitiyune Pitsikaha mɨtitewatsie, Keriku 'anutaɨye. Mana Yawé kwie kanixeitsitɨani naime mana kemakuyewa Karaha meta Rani paitɨ 'uyeniereme,
DEU 34:2 naime Nepɨtahari meta 'Epɨrahini wakwie, Manatsexi meta Kura wakwie, haramara Meritexaniyu manuye'atɨkatsie paitɨ kanixeitsitɨani.
DEU 34:3 Meta Nekexi kwieyari kanixeitsitɨani, meta mayeweri Keriku, meta Makutakɨya kiekariyari, meta Tsuhaxi paitɨ 'uyeniereme kanixeitsitɨani.
DEU 34:4 Hikɨ Yawé mɨpaɨ katinitahɨawe: «'Ikɨ kwie kanihɨtɨni, 'Apɨrahami, 'Itsahaki meta Kakuwu kenemɨtiwarutahɨawixi, kename newayetuirienikekai mɨkɨ wanuiwari. Hikɨ nepɨmatsipitɨa pemixeiyakɨ xeikɨa, peru 'ekɨ manari pepɨkaye'ani».
DEU 34:5 Muitsexi Muhawi kwieyaritsie mana kaniumɨni, Yawé ti'uximatsiriwame, Yawé kemɨtitahɨawekai.
DEU 34:6 Meta mana kaniukateukieni Muhawi kwieyaritsie, Weti-Pehuxi mayeweri 'anutaɨyetsie, peru hikɨ xewitɨ 'atsipɨkatimate hakewa mekateukie.
DEU 34:7 Kepauka Muitsexi mumɨ xeitsienituyari heimana xeitewiyari wiyari pexeiyakai. Peru pɨtɨrɨkaɨyekai meta 'aixɨa pɨreunierekai 'akuxi.
DEU 34:8 Xeitewiyari heimana tamamata tukari mepuyuri me'utitsuatɨ 'Ixaheritsixi, Muitsexi hetsiemieme Muhawi makuweritsie, mɨpaɨ paɨmexɨa tukari mepeyuhiweriekai mɨkɨ kememɨte'uhukai.
DEU 34:9 Hikɨ Kutsuhexi Nuni nu'aya 'iyari timaiwemekɨ kaniutahɨne, Muitsexi meripaitɨ heimana mutimeikɨ. Hikɨta 'ixaheritsixi Kutsuhexi pɨta meheu'enietɨ mepakɨ meta Yawé Muitsexi kemɨtiuta'aitɨakai mɨpaɨ mepɨtekakɨ.
DEU 34:10 'Anatɨtɨ mɨtiyehane 'Ixaheri kwieyaritsie xewitɨ tawarita 'a'uyeikatɨ pɨkahatɨa, Kakaɨyari niukameyatɨtɨ Muitsexi hepaɨ 'anetɨ, Yawé hamatɨana mɨtikuxatakai mehanuyutaxeiyatɨ.
DEU 34:11 Muitsexi xeikɨa waɨkawa 'inɨari putiwewi mamariwaweme, Yawé ti'aitɨakaku 'Ekipitu kwieyaritsie Parahuni hɨxie meta 'iparewiwametemama meta yunaime wahɨxie mɨkɨ kwieyaritsie kiekatari.
DEU 34:12 Xewitɨ tawarita mɨpaɨ pɨkatiyuriwe tɨrɨkariya kename hexeiya mariweme, meta waɨkawa 'inɨari memuwewieni hipatɨ mepɨkayɨwawe Muitsexi kemɨtiuyuri yunaime 'ixaheritsixi wahɨxie.
JOS 1:1 'Arike Muitsexi 'umɨku Yawé ti'uximayatsiriwame, Kakaɨyari Kutsuhexi mɨpaɨ katiniutahɨawe Nuni nu'aya, Muitsexi mɨparewiekai:
JOS 1:2 «Nemɨti'aitɨakai Muitsexi kaniumɨni. 'Ayumieme 'ekɨ meta yunaitɨ 'ikɨ teɨteri mekaniyukuha'aritɨakuni memanukɨnekɨ haa Kurutanitsie, meta xemeutahaxɨanikɨ nemɨxeyetuirienitsie kwie xeme 'ixaheritsixi.
JOS 1:3 Yaxeikɨa kenemɨrehɨawekai Muitsexi, ne nepɨxeyetuirieni naime kemɨ'ane mana xemu'uwanikɨ.
JOS 1:4 Xekwie 'apɨtayeure, makumawetsie Riwanu paitɨ ye'atɨkaitɨ, meta haa manuyehanetsie paitɨ 'Eupɨrate, hetitsixi wakwietsie, tau makayuyuipike hepatsie haramara Meritexaniyu paitɨ ye'atukaitɨ kanayeimɨkɨ.
JOS 1:5 Kepaɨmexɨa tukari pemuyeikani xewitɨ pɨkayɨweni matsi'a'iwanikɨ. Mɨpaɨ kenemɨtiuyeikakai Muitsexi hamatɨa yaxeikɨata 'ahamatɨa nepɨtiuyeikani, nepɨkamatsinutuita nepɨkamatsiku'eirieni.
JOS 1:6 »Kenetɨrɨkaɨyeni meta pepɨkamaka, 'ekɨtsɨ pekatiniyurimɨkɨ 'ikɨ teɨteri wakwie mayani nemɨwaxatɨakai watutsima.
JOS 1:7 Xeikɨa nepɨmatsiwawirie waɨkawa kene'awaɨriyani kenetseɨyeni 'inɨari niukiyari naime pemaye'atɨanikɨ Muitsexi mɨmatsi'uta'utɨiri. Mɨkɨ pepɨka'iku'e'eiriwani ni'etsiwatɨma, mɨpaɨ xeikɨa pepɨyɨweni tsepa hakewa pemetɨa.
JOS 1:8 Keneutiterɨwani yuheyemekɨ tsepa kepauka 'inɨari niukiyari maye'uxa, tukarikɨ tɨkarikɨ kɨmana kene'a'iyaritɨaka, naime kenaye'atɨa pe'akweriwayurietɨ kemɨre'uxa, mɨpaɨ tsepa kepemɨti'uximaya yapɨtiyɨni.
JOS 1:9 Mɨpaɨ nekamatini'aitɨaka: Kenetɨrɨkaɨyeni ketinayu'iwani. Pepɨkamaka kene'awaɨriyani. Yawé 'akakaɨyari pɨmatsiteɨtani tsepa hakewa pemetɨa».
JOS 1:10 Hikɨ Kutsuhexi mɨpaɨ katiniwaru'aitɨani 'ukirawetsixi teɨteri memɨhɨritɨarie:
JOS 1:11 «Mɨpaɨ xeketeniwarukahɨawi yunaime 'ena memukutei meke'uyuka'inɨatɨaxɨani, haika tukari 'anukayayu Kurutanitsie tekaniukɨnikuni, kwietsie temɨ'axɨanikɨ Kakaɨyari Yawé mɨtatsiyetuirie tapiini mɨrayanikɨ».
JOS 1:12 Xuweni nuiwarimama, Kahari xiɨyarimama meta Manatsexi xiɨyarimama hixɨata me'atɨ, Kutsuhexi mɨpaɨ katiniwarutahɨawe:
JOS 1:13 ―Xekenaye'eri kemainekai Muitsexi, Yawé ti'uximayatsiriwame: “Xekakaɨyari Yawé kanixe'uka'uxipitɨani kanixeyetuirieni 'ikɨ kwie”.
JOS 1:14 Xe'ɨitama xeniwema xetewama mana mekaniu'uwakuni Muitsexi mɨxeyetuiritsie Kurutani 'aurie. Peru xeme kuyaxi 'ukitsi xekananukɨnikuni xe'anuyetetɨ yu'iwama wahɨxie. Xekaniwaparewikuni
JOS 1:15 kepaukake Yawé mɨwaka'uxipitɨani xeme kemɨtixe'uka'uxipitɨa, kepaukake mɨkɨ kwie memɨ'axe Yawé takakaɨyari mɨwayetuiri. 'Anake xeme xepakunuaxɨani yukwietsie mana xemɨtitenikɨ. Mɨkɨ kwie kanihɨkɨtɨni Muitsexi Yawé ti'uximayatsiriwame mɨxeyetuirie hatuxame Kurutani 'anutaɨye mukuma tau manatineika hepatsie.
JOS 1:16 Mɨkɨ mɨpaɨ Kutsuhexi mekateniuta'eiya: ―Tame yatepɨtekakɨne naimekɨ kepemaine, tame tepɨyehu tsepa hakewa pemɨtatsihetanɨ'a.
JOS 1:17 Naimekɨ yatepɨtekakɨne, Muitsexi ketemɨteheu'eniekai. Tepiwawa xeikɨa Yawé 'ahamatɨa ke'uyeikani Muitsexi hamatɨa kemɨtiuyeikakai.
JOS 1:18 Kemɨ'ane 'aniuki mɨka'anu'enieni, kemɨ'ane yamɨkatikayani kepemɨtita'aita kanimieriemɨkɨ. Peru 'ekɨ kenetɨrɨkaɨyeni pepɨkamaka.
JOS 2:1 Hikɨ Kutsuhexi Nuni nu'aya 'awie kaniwarenɨ'ani yuhutame 'awie nenieremete, Tsitini metitetɨ mɨpaɨ katiniwarutahɨawe: «Xekenehu kwie xekenexeiyayu, Keriku mɨrakutewatsie». Kepauka Keriku memuta'axɨa 'awie nenieremete, 'ukaratsi tuminikɨ muyumayɨinɨa hetsɨa mekaniu'axɨani mana mekanitiheteitɨni, Xahawi titewakame hetsɨa.
JOS 2:2 Hikɨ Kerikutsie ti'aitame katinetimani kename yuhutatɨ 'ixaheritsixi 'awienenieremete mɨkɨ tɨkaritsie kiekaritsie me'u'axɨakai mekunieretɨwetɨ.
JOS 2:3 Hikɨ niuki kanenɨ'ani Xahawi hetsɨa: «Keniwaranuyenɨ'a mɨkɨ teɨteri 'akie memu'axɨa, mɨkɨ 'awie takwie xexeiyamete mekaniyɨaka».
JOS 2:4 Hikɨ 'ukaratsi 'awie nenieremete mɨwaruti'awietakai, ti'aitame mɨpaɨ katiniutahɨawe: «Puyuri nekie yuhutatɨ mepu'axɨakai, peru 'atsinepɨkatimate kemɨ'ane memɨyɨakai, hakewa memeyekɨnekai.
JOS 2:5 Mepekɨ kuyɨrirɨmekaku kiekari kitenie reunarirɨmekaku 'atsinepɨkaretima hakewa memekɨ. Xekeniwaranukuweiya heiwatɨ xewaranuku'axe».
JOS 2:6 (Peru 'ukaratsi mɨkɨ 'ukitsi yukii heima kaniwareutinɨ'akaitɨni, rinu manukuyari hetɨa kaniwaruti'awietakaitɨni, mana mitiwatsiɨxakaitɨa).
JOS 2:7 Ti'aitame nɨ'arimama mekanekɨne 'awie nenieremete wa'utɨma me'eerietɨ. Kepauka memuwayekɨ Keriku kitenie katineunare, Kurutani tsimatiyeyeu huyeyari 'utɨa mekanekɨne.
JOS 2:8 Xahawi kananutiyani yukii heima, 'awie nenieremete mekaheukutsiwawekaku 'akuxi.
JOS 2:9 Mɨpaɨ katiniwarutahɨawe: ―Ne mɨpaɨ nepɨtimate Yawé 'ikɨ kwie pɨxeyetuiri, 'ayumieme tame tepɨxemakaxe, teyunaitɨ 'ena kiekatari marikakɨ tepɨkwiximeri 'atepɨka'u'uwanikeyu xehɨxie.
JOS 2:10 Tepɨtemarie Yawé Haramara Mɨxeta hixɨapa kemɨranuhuyetaxɨ xeme mana hayewakimetsie xemukɨnekɨ, 'Ekipitu xeheyekɨneka. Yaxeikɨatsiere tepɨtemarie te'aitamete kexemɨtewara'iwaxɨ 'amuxeutsixi Tsikuni meta 'Uhuki, Kurutani 'anutaɨye tau manatineika hepatsie.
JOS 2:11 'Ayumieme tame waɨkawa tepɨxemakaxe, nixewitɨ pɨkayuwaɨriya mɨxetakwini. Ne mɨpaɨ nepɨtimate Yawé yuri Kakaɨyari pɨhɨkɨ, kakaɨyarixi mɨwara'iwa, muyuawitsie meta kwiepa mɨti'aita.
JOS 2:12 'Ayumieme nepɨxewawirie hikɨ yaxekeneteneutahɨawi Yawé hɨxie, kename tame xetatsitinenimayata ne hikɨ kememɨtixe'utinenimayataxɨ. 'Inɨari xekeneneuwewiri mɨpaɨ nemɨtimaikakɨ
JOS 2:13 kename ne'paapama xekawakwini meta ne'iwama yunaime wahamatɨa memu'uwa. Yaxekeneutiyua kename xetatsitawikweitsitɨani temɨkakwinikɨ.
JOS 2:14 Mɨkɨ mɨpaɨ mekaniutiyuani: ―Tame yatepaitɨka Yawé hɨxie tatukari teyetuatɨ kename 'atsixekate'anuyekɨne, xɨkatsɨ pekatatsi'utaxaneta tame 'aixɨa tepɨteyurieni 'ahetsiemieme, tepɨtehaye'atɨani ketemaitɨka kepauka Yawé mɨtatsiyetuirieni 'ikɨ kwie.
JOS 2:15 Hikɨ Xahawi yukii hixɨapa kaniwaratuani kaunarikɨ, Xahawi kiiya kiekari kuraruyaritsie katiniwekaitɨni.
JOS 2:16 Meripaitɨri mɨpaɨ pɨtiwarahɨawekai: «Xekeneuyuta'una hɨritsie memɨxe'uweiya memɨkaxetaxeiyakɨ. Mana xekeneyuti'awieta haika tukari, memɨxe'uweiya me'akunuaxɨayuke. 'Anake xekaneyɨwaweni xemeyehukɨ».
JOS 2:17 'Ukitsi Xahawi mɨpaɨ mekateniutahɨawe: ―Tepɨtixɨne ketemaitɨka
JOS 2:18 xɨka, kepauka 'ena temɨ'axɨani xɨka teka'ixeiya 'ikɨ wiwieri mɨxeta 'uwa hawiekame hakewa pemɨtatsiheukatua. Metatsiere 'apaapama 'a'iwama yunaitɨ 'amarema, 'ana 'akiita mekanayetekuni.
JOS 2:19 Kemɨ'ane muwayeyani mɨkɨ tukaritsie kanimieriemɨkɨ, tame tahetsie pɨkarahɨiyani, tame tepɨwahɨka 'akiita memayeteni xɨka xewitɨ wakwimɨkɨni.
JOS 2:20 Xɨka petatsi'utaxaneta, tame tepɨxɨne hikɨ ketemutiyua 'ekɨ yapetarahɨawekaku.
JOS 2:21 Xahawi mɨpaɨ kaniutayɨni: ―Mɨpaɨ kani'anemɨkɨ xeme kexemaitɨka. Hikɨ kaniwarutateutɨani, mɨkɨ mekanekɨne, mɨkɨta wiwieri mɨxeta yukii hixɨapa kanetapieni.
JOS 2:22 Mɨkɨ 'ukitsi hɨritsie mekanekɨne mana mekanititekaitɨni haika tukari, kepaukake memɨwaruweiya memakunuaxɨa yukiekaritsie. Naitsarie mekaniwarutiwauni, peru mepɨkawarutaxei.
JOS 2:23 Hikɨ memuyuhuta mekanakunuaxɨani, hɨritsie mekananakakɨne hapa me'ukɨneka mekaniu'axɨani Kutsuhexi manukatei Nuni nu'aya. Mana mekatenitaxatɨani naime kemɨreyɨ:
JOS 2:24 «Yawé pɨtatsiyetuiriri mɨkɨ kwie naime. Yunaitɨ teɨteri mekanimamaka metatsixeiyatɨ».
JOS 3:1 Merikɨtsɨ kwi ximeri paitɨ mekanekɨne Tsitini kwieyaritsie meyekɨneka Kutsuhexi meta 'ixaheritsixi Kurutani hatɨayari manuyehanetsie me'eerietɨ, 'akuxi meka'anukɨniwawetɨ mana hatetsita mekaniyuhayewa.
JOS 3:2 Hairieka tukaritsie 'ukirawetsixi mekaniukakɨne naitsarie memakutekaitsie,
JOS 3:3 mɨpaɨ me'utiyuatɨ: «Kepauka tɨratu kakuniyari xemɨxeiya Yawé takakaɨyari kemutayɨ meta rewitsixi memitɨxime, 'ana xekenanuku'uti hakewa xemetitei 'utɨana xekeneuhuni.
JOS 3:4 'Ana mɨpaɨ xepɨtehetimani kexemɨteheuyune, hatsuaku xemɨka'anuyekɨniwawetsie kaniuyeyeimɨkɨ, xeikirumeturuyari heutewakaku 'utɨmana xepuhuni, kwi hurawa xepɨka'ukɨkani».
JOS 3:5 Kutsuhexi mɨpaɨ katiniwaruta'aitɨani teɨteri: «Xekeneuyu'iti, 'uxa'a Yawé mariwemekɨ katiniyurimɨkɨ xehɨxie».
JOS 3:6 Meta mawari wewiwamete mɨpaɨ katiniwarutahɨawe: «Xekeneutikwe'i tɨratu kakuniyari teɨteri wahɨxie xekenanuyeyaxi». Mawari wewiwamete yamekatenikakɨne mekananuyeyaxe.
JOS 3:7 Hikɨ Yawé Kutsuhexi mɨpaɨ katiniutahɨawe: «Hikɨ mɨtiyehane mariweme nepɨmatsi'ayeitɨani 'ixaheritsixi wahɨxie. Mɨpaɨ memɨtehetimanikɨ kename 'ahamatɨa ne'uyeika Muitsexi hamatɨa kenemɨtiuyeikakai hepaɨ.
JOS 3:8 Tawarita mɨpaɨ katiniwaruta'aitɨani mawari wewiwamete tɨratu kakuniyari mematɨkɨ: “Kepauka Kurutani tetsita xemɨkatexɨani, xekaniwa'uikuni”».
JOS 3:9 Hikɨ Kutsuhexi 'ixaheritsixi mɨpaɨ katiniwarutahɨawe: «Hurawa xekenakɨni nepɨtixetaxatɨani Yawé Kakaɨyari kemaine».
JOS 3:10 Kutsuhexi tawarita mɨpaɨ katiniwarutahɨawe: «Hikɨ mɨpaɨ xepɨtehetimani kename Kakaɨyari mayeniere xehamatɨa 'uyeika, kename yurikɨ wataweiyaxɨani kananeutsixi, hetitsixi, heweutsixi, peretseutsixi, keriketseutsixi, 'amuxeutsixi meta kewutseutsixi.
JOS 3:11 Naitsarie kwiepa mɨti'aita tɨratuya kakunieya xekanixeiyakuni, Kurutani hatɨayaritsie kananuyeimɨkɨ xehɨxie.
JOS 3:12 Hikɨ tamamata heimana huta xekeniwaranuyexeiya yuxexuime 'Ixaheri wanuiwaritsie
JOS 3:13 Kepauka memaka'uni hapa Kurutani hetsie mawari wewiwamete Yawé naitsarie kwiepa mɨti'aita kakunieya memukweixime, haa mana puyuhayewaxɨani ka'uhanetɨ manutanaka hepaɨ».
JOS 3:14 Kepauka memanuku'ui teɨteri Kurutanitsie me'anukɨneke mawari wewiwamete mekananuyeyaxe tɨratu kakuniyari me'akwetɨ.
JOS 3:15 Haa Kurutani 'amupaparetsie 'itsanaxa, 'ana 'amemɨte'aka'ui mawari wewiwamete tɨratu kakuniyari memukweixime,
JOS 3:16 hikɨ haa 'uhanetɨ katiniuhayewa, 'ai hepaɨ 'anetɨ kanayani 'ateewa yuhekɨatɨ, 'Arani kiekariyaritsie kaniuti'ani meta Tsaretani kuraruyari 'amatitewa hepaɨtsita, yaxeikɨata katiniuhayewa 'uhanetɨ Harawa meukayune Haramara Mɨmɨkitsie, mɨpaɨ mekateniukɨne teɨteri 'ixaheritsixi mekaniuyuhayewa Keriku hɨxie.
JOS 3:17 Hikɨ mawari wewiwamete tɨratu kakuniyari Yawé hetsiemieme memukweiximekai Kurutani hixɨapa mekaniwa'uni, mexi me'anukɨkakai 'ixaheritsixi 'ayewakikakɨ.
JOS 4:1 Kepauka yunaitɨ memanukɨ Kurutani hatɨayaritsie Yawé Kutsuhexi mɨpaɨ katiniutahɨawe:
JOS 4:2 «Tamamata heimana huta nuiwaritsie yuxexuime xekeniwaranuyexeiya,
JOS 4:3 mɨpaɨ ketiniwaruta'aitɨa, memititɨkɨkɨ ha'ute tamamata heimana huta haa hixɨapa mieme, hakewa yemekɨ memeti'ukai mawari wewiwamete. Mɨpaɨ xeketeniwarutahɨawi hakewa memetiheni mana mepitiyatsa».
JOS 4:4 Hikɨ Kutsuhexi kaniwarukuxeɨrieni tamamata heimana huta nuiwaritsie memanayexeiyarie,
JOS 4:5 Mɨpaɨ katiniwarutahɨawe: «Xekenehu haa hixɨapa Yawé kakunieya mayekatsie yuxexuitɨ tetexi xekenatɨki. Tamamata heimana huta kanayeimɨkɨ, xexuime 'Ixaheri nuiwarimama kememɨyupaɨme.
JOS 4:6 Pɨ'inɨaritɨni xehetsiemieme. 'Uxa'atɨniwarie xeniwema mepɨxeta'iwawiya: “¿Titayari 'ena 'ikɨ tetexi tititei?”,
JOS 4:7 xeme mɨpaɨ xepɨtewatahɨawe: “Kepauka Kurutanitsie makweiyatɨya tɨratu kakuniyari Yawé hetsiemieme. Haa kananutayepiere hixɨapa, 'ikɨ tetexi mɨyamɨretei tame 'ixaheritsixi pɨta'inɨari mɨya mɨtiuyɨtsie mieme”».
JOS 4:8 'Ixaheritsixi yamekateniuyurieni Kutsuhexi kemɨtiwarutahɨawixɨ Yawé kemainekai. Tetexi mekaniutitɨkɨ Kurutani hixɨapa mieme, kememɨyupaɨmekai nuiwarite, mematihenitsie mekaneitɨkɨ mana mekanitiyatsa.
JOS 4:9 Meta Kutsuhexi hakewa mawari wewiwamete memeti'ukai, Kurutani hatɨayari hixɨapa tɨratu kakuniyari memukweiximekai manata tetexi kanitiyatsa tawarita tamamata heimana hutame. Hikɨ 'akuxi mana kanehekɨaka tetexi.
JOS 4:10 Mawari wewiwamete haa hixɨapa mekaniye'ukaitɨni kakuni memakwekai naime 'aixɨa mete'uyuriekake Yawé Kutsuhexi kemɨrahɨawekai. Mɨpaɨ katiniɨyɨni Muitsexi Kutsuhexi kemɨrahɨawekai. Teɨteri meyumexɨitɨatɨ mekananukɨne.
JOS 4:11 Yunaitɨ yamete'uyurieku, Yawé kakunieya meta mawari wewiwamete mekananukɨne teɨteri wahɨxie.
JOS 4:12 Mɨkɨ 'ixaheritsixi wahamatɨa mekanaye'ukaitɨni kuyaxi Xuweni nuiwarimama, Kahari nuiwarimama, Manatsexi nuiwarimama hixɨata me'atɨ, Muitsexi kemɨtiu'aitakai.
JOS 4:13 Huta tewiyari miriyari (40.000) kuyaxi mekaniuyuka'uitɨani Yawé hɨxie, makuweritsie me'eerietɨ Keriku hepatsie meyutakwinike.
JOS 4:14 Mɨkɨ tukaritsie Yawé Kutsuhexi mariweme kanayeitɨani 'ixaheritsixi wahɨxie. Teɨteri Kutsuhexi 'aixɨa mekatenixeiyakaitɨni kemɨreuterixɨ 'uyeikatɨ, Muitsexi kememɨtexeiyakai hepaɨ.
JOS 4:15 Hikɨ Yawé Kutsuhexi mɨpaɨ katiniutahɨawe:
JOS 4:16 «Mɨpaɨ ketiniwaruta'aitɨa tɨratu kakuniyari tɨkɨmete meke'anatikɨne Kurutanitsie».
JOS 4:17 Kutsuhexi mɨpaɨ katiniwarutahɨawe mawari wewiwamete memanatikɨnekɨ,
JOS 4:18 mɨkɨ mekananatikɨne tɨratu kakuniyari me'akwetɨ. Kepauka wakikɨa memɨti'ui, haa kananuyeyeurieni, 'uhanetɨ kanayani hutarieka.
JOS 4:19 Mexɨakame metseritsie tamamata tukaritsie, 'ixaheritsixi mekananukɨne Kurutanitsie Kirikari rakutewakaku mekanikuyaxe, Keriku tau manatineikatsie 'aurie.
JOS 4:20 Hikɨ mana Kutsuhexi katiniwaruta'aitɨani mana tetexi memɨtiyatsakɨ Kurutani haa hixɨapa mematitɨkixɨ 'ayewakikaku,
JOS 4:21 'ixaheritsixi mɨpaɨ katiniwarutahɨawe: «'Uxa'atɨni warie, xɨka xeniwema mexe'uta'iwawiya: “¿Titayari 'ikɨ tetexi 'ena tititei?”,
JOS 4:22 xeme mɨpaɨ xepɨtewatahɨawe: “Kepauka 'ixaheritsixi memanakɨ Kurutanitsie wakikɨa mepakɨ”.
JOS 4:23 Yawé xekakaɨyari, yaxeikɨa pɨtiuyuri Haramara Mɨxeta hetsie kemɨtiuyuri wakikɨa pɨwarawitɨtɨya.
JOS 4:24 'Ikɨ mɨyapɨtiuyɨ yunaitɨ nuiwarite memɨtehetimanikɨ Yawé mɨmariwe, xeme xemitsutɨanikɨ xeheyemakatɨ yuheyemekɨ xemeyexeiyanikɨ».
JOS 5:1 Merikɨtsɨ, te'aitamete waɨkawa mekaniutimamani 'amuxeutsixi Kurutani 'anataɨye tau makayuyuipike hepatsie memɨtamakai, meta kananeutsixi haramara Meritexaniyu tetsita memɨtamakai, kepauka memɨtehetima kename Yawé Kurutani hekawatsiɨxaxɨ mana memukɨnekɨ 'ixaheritsixi. Mepɨkayuwaɨriyakai memɨwatakwinikɨ.
JOS 5:2 'Ana tukaritsie, Yawé Kutsuhexi mɨpaɨ katiniutahɨawe: «Tete nawaxayari keneutiwewi, xitekiya 'inɨariyari tawarita keneutsutɨa 'ixaheritsixi wahetsie».
JOS 5:3 Hikɨ Kutsuhexi tete nawaxayari kaniutiwewieni, 'ixaheritsixi xitekiya 'inɨariyari kaniwaruwewirieni 'Araruti yemuriyaritsie.
JOS 5:4 'Inɨari xitekiyari pɨwaruwewiri 'ixaheritsixi 'Ekipitu memeyekɨnekai kuyakɨ me'aye'atɨarietɨkaitɨ makumawetsie me'uhutɨ memukwikaikɨri.
JOS 5:5 Mɨkɨ yunaitɨ xitekiya mepexeiyakai, peru me'ayekɨneka 'Ekipitu makumawetsie me'uhukaku memutinunuiwaxɨ mɨkɨ xitekiya mepɨkahexeiyakai.
JOS 5:6 Kakaɨyari mɨpaɨ pɨtiwarahɨawekai watutsima kwie pɨwayetuirienikekai retsi meta xiete maxuawe. Peru 'ixaheritsixi 'Ekipitu memɨyekɨ Yawé mepɨka'anu'eni, 'ayumieme puyuhɨritɨa mɨkawapitɨanikɨ memixeiyakɨ mɨkɨ kwie. 'Ayumieme makumawetsie mepu'uwakai huta tewiyari wiyari, me'ukwikuke yunaitɨ 'ukitsi kuyakɨ memaye'atɨarietɨkatei.
JOS 5:7 Mɨkɨ waniwema, Kakaɨyari mɨwarupitɨa wahetsiemieme, Kutsuhexi xitekiya 'inɨariyari kaniwaruwewirieni, 'inɨari memɨka'uwewiyariekɨ me'uhutɨ.
JOS 5:8 Yunaitɨ 'inɨari me'uwewiyarieka memakutekaitsie mekaniyuhayewakaitɨni 'aixɨa memɨteka'erienikɨ.
JOS 5:9 Hikɨ Yawé Kutsuhexi mɨpaɨ katiniutahɨawe: «'Ari nepɨxe'uxɨnaxɨ kexemɨteyutetewiyakai waɨriyarika te'uximayatamete xehɨkɨtɨtɨ 'Ekipitu». 'Ayumieme mana Kirikari mepɨte'uterɨwaxɨ, hikɨ 'akuxi mɨpaɨ pɨrakutewa.
JOS 5:10 Mexɨakame metseritsie tamamata heimana nauka taikaiyaritsie, makuweritsie metitetɨ Keriku 'aurie, 'ixaheritsixi Patsikwa 'ixɨarariyari mekaniuwewieni.
JOS 5:11 'Uxa'arieka heutipareku 'ixɨarari, teɨteri mekateniutikwani naime kwiepa timieme, paa mɨkakuxanariyarietɨka meta tɨriku xarikiyari.
JOS 5:12 Mana mɨtiyetɨa manana kawiwiwetɨ katiniuhayewa, mɨkɨ wiyaritsie 'ixaheritsixi 'ikwaxi mekatenikwakaitɨni kwiepa timieme.
JOS 5:13 Merikɨtsɨ Kutsuhexi Keriku 'aurie kaniukateitɨni, kepauka manukunierixɨ xeime tewi kaniuxeiya hɨxiena 'uweme, 'ixipara heukwekame. Kutsuhexi 'ahurawa kaniuyani kanita'iwawiya: ―¿'Ekɨ petihɨkɨ tahetsɨamieme, nutsutɨ pemɨtatsi'aye'unie pepɨyɨane?
JOS 5:14 Mɨkɨ mɨpaɨ katinitahɨawe: ―Nixeime hetsɨa nepɨkamieme. Nepɨnehekɨata 'ahɨxie kuyaxi tiwa'aitɨwame nehɨkɨtɨtɨ Yawé hetsɨamieme. Hikɨ Kutsuhexi kaniukahɨximakeni kwiepa mɨpaɨta katinita'iwawiya: ―¿Tita penetiku'aitɨane neti'aitɨwame? Mati'uximayatsiriwame nepɨhɨkɨ.
JOS 5:15 Kuyaxi tiwa'aitɨwame Yawé hetsɨamieme mɨpaɨ katinitahɨawe: ―'Akakai kenanuyehɨnaxɨa, pemanuwetsie kanakupatsieka. Kutsuhexi mɨpaɨ katinikayani.
JOS 6:1 Hikɨ Keriku 'aixɨa katinenakaitɨni memanutakɨkatsie kitenie mewamakatɨ 'ixaheritsixi, xewitɨ mɨwayeyani pɨkayɨwekai meta meutahani.
JOS 6:2 Yawé Kutsuhexi mɨpaɨ katiniutahɨawe: «Keriku nepɨmatsiyetuiri meta mana ti'aitame metatsiere kuyaximama pemɨwakwinikɨ.
JOS 6:3 'Ekɨ, meta 'akuyaxima kiekari warita xekenakɨni xeimieme, mɨpaɨ xepɨteyurieka 'ataxewime tukaritsie.
JOS 6:4 Me'atahutatɨ mawari wewiwamete kuxineta mepɨtihɨtsieni, muxatsi wa'awate pɨhɨkɨtɨni, mepuhuni tɨratu kakuniyari hɨxie. 'Atahuta tukaritsie 'atahutamexɨa xekananakukɨnikuni kiekari warita, mexi mawari wewiwamete mete'utahɨtsiwani.
JOS 6:5 Kepauka yunaitɨ hɨtsierika memɨ'enieni kuyaxa mieme, 'ana teɨteri karima mepɨtihiwa, 'ana kiekari kuraruyari pɨka'une, hikɨ 'ana yuxexuitɨ mepeutahaxɨani hayekɨa».
JOS 6:6 Kutsuhexi Nuni nu'aya mawari wewiwamete kaniwaruta'inieni mɨpaɨ katiniwaruta'aitɨani: «Tɨratu kakuniyari Yawé hetsiemieme xekeneutikwe'i, me'atahutatɨta xe'iwama 'awate me'u'ɨtɨ tɨratu kakuniyari hɨxie me'anuyetetɨ».
JOS 6:7 Hikɨ teɨteri mɨpaɨ katiniwarutahɨawe: «Xeiya kiekari warita xekenanakukɨni, peru kuyaxi xe'anuyetetɨ Yawé tɨratuya kakuniyari hɨxie xe'uhutɨ».
JOS 6:8 Kepauka Kutsuhexi yamutayɨ teɨteri yatiwakɨhɨawetɨ, me'atahutatɨ mawari wewiwamete tɨratu kakuniyari Yawé hetsiemieme hɨxie mekanika'uni, mete'utahɨtsiwatɨ tɨratu kakuniyari wa'utɨa kaniukweiyaximekaitɨni.
JOS 6:9 'Ukitsi mepanuyetekai yutupi me'u'ɨtɨ, mawari wewiwamete kuxineta me'uhɨtsiximetɨ wahɨxie meta tɨratu kakuniyari 'utɨa kuyaxi hutarieka miemete mepuhukai. Mɨkɨ kememɨteheuterixɨ 'awate kuxinetayari hɨtsiwamete mepɨkatehayewakai mexi me'anakukɨkakai.
JOS 6:10 Kuyaxi yunaime Kutsuhexi mɨpaɨ katiniwaruta'aitɨani, kayuwatɨ memuhunikɨ meka'utiniutɨ meka'utihiwatɨ kepaukake mɨpaɨ memɨtetahɨawarienikekai karima memɨtihiwakɨ.
JOS 6:11 Kutsuhexi tɨratu kakuniyari keriku warie mekanakwetɨkɨne heiwamie, hikɨ 'ana teɨteri mekanakunuaxɨani memakuteitsie mana memanukutsukɨ.
JOS 6:12 'Uxa'arieka ximeripaitɨ Kutsuhexi kananukukeni, mawari wewiwameteta kakuni Yawé tɨratuya mekaniutikweni Yawé hetsɨa mieme.
JOS 6:13 Me'atahutatɨ mawari wewiwamete 'awate kuxinetayari memu'ɨkai mekananuyeyaxe tɨratu kakuniyari Yawé hetsiemieme hɨxie, 'awate kuxinetayari memuhɨtsixime, 'ukitsi kuyaxi mekananuyetekaitɨni meta tɨratu kakuniyari 'utɨa mekaniuhukaitɨni kuyaxi hutarieka miemete, pɨkatiuhayewaxɨa 'awate kuxinetayari tukarikɨ hayuatɨkaitɨ.
JOS 6:14 Metatsiere hutarieka tukaritsie xeimie xeikɨa mepakɨ Keriku warita, hikɨ mekaniu'axɨani mematitekaitsie. Mɨpaɨ mepɨte'uyuri 'ataxewime tukaritsie.
JOS 6:15 'Atahutarieka tukari, tau 'anatinekaku mekananuku'uni, yaxeikɨa kiekari warita mekanakɨne matɨari hepaɨ kememɨyɨakai, peru 'ana 'atahutamexɨa mekananakukɨne.
JOS 6:16 'Atahutarieka me'anakukɨneke mawari wewiwamete 'awate kuxinetayari mekaniutihɨtsieni, Kutsuhexi kuyaxi mɨpaɨ katiniwaruta'aitɨani: «Hikɨrixɨa xekeneutihiwa. Yawé kiekari kanixeyetuirieni.
JOS 6:17 Keriku, naime tita mɨrexeiya naitɨ katineuyehɨiyamɨkɨ, mawari taiyariyari hepaɨ Yawé hetsiemieme. Kanitawikweimɨkɨ xeikɨa 'ukaratsi tuminikɨ muyumayɨinɨa Xahawi meta kemɨ'ane hamatɨana memayeteni kiitana, mɨkɨ 'awie nenieremete tahetsɨa miemete mɨwaruti'awietaxɨkɨ.
JOS 6:18 Tixaɨtɨ xepɨkatekumaɨwani peuyewetse naime temɨtetitaiyakɨ, kapa tame xeme meta temakutei 'ixaheritsixi 'axamɨti'ane temɨniupitɨarie temɨneuyehɨiya.
JOS 6:19 Hurukɨ pɨratakɨ meta wurunitsekɨ mɨtiwewiyatɨka meta tepɨakɨ, mɨkɨ Yawé hetsɨa pɨtimieme hipame piiniteya mɨrayepinetsie xeketenekapini».
JOS 6:20 Hikɨ mawari wewiwamete 'awate kuxinetayari mekaniutihɨtsieni, yaxeikɨata teɨteri mekaniutihiwa kwi karima, 'ana kwitɨwa wahɨxie Keriku kuraruyari kaniuka'une, kuyaxi 'ixaheritsixi mekaneutahaxɨani naitɨ ti'u'unikaku.
JOS 6:21 Yunaime mekateniwarukwini 'ixiparakɨ 'ukitsi, 'ukarawetsixi, temari meta 'ukirawetsixi, yaxeikɨata mekaniwarukwini wakaitsixi, muxatsi meta puxuri, yunaime memɨte'ayenenierekai naitɨ kiekari kaniuka'unarieni.
JOS 6:22 Hikɨ Kutsuhexi 'awie nenieremete memuyuhuta mɨpaɨ katiniwarutahɨawekaitɨni: «'Ukaratsi tuminikɨ muyumayɨinɨa hetsɨa xekenehu xekenawitɨki meta 'iwamama yunaime, kexemɨteheyuhɨritɨakai».
JOS 6:23 Hikɨ temari 'awie nenieremete mekaneutahaxɨani kiitana, mekaniwarayewitɨni Xahawi meta paapamama metatsiere 'iwamama meta naime tiwapiinite, yateewa paitɨ mekaniwarewitɨni 'ahetewakaku 'ixaheritsixi memakuteitsie.
JOS 6:24 Mɨpaɨ mete'uyurieka mekanitataiya kiekari naime tita mɨrexeiyakai. Pɨratakɨ xeikɨa mɨtiwewiyatɨka hurukɨ wurunitsekɨ meta tepɨakɨ Yawé tukita timieme mekatenayeitɨani.
JOS 6:25 Mɨpaɨ Kutsuhexi Xahawi katiniutawikweitsitɨani meta yunaime 'iwamama tinaime tiwapiinite, mɨwaruti'awietaxɨkɨ 'awie nenieremete mɨkɨ warenɨ'aku Keriku kiekariyaritsie. Mana mɨtiyehane Xahawi meta 'iwamama 'ixaheritsixi wahamatɨa me'u'uwatɨ mekanakɨne.
JOS 6:26 Mɨkɨ tukaritsie Kutsuhexi mɨpaɨ katiniuyuhɨritɨani: «'Axake'itɨarieka Yawé hɨxie kemɨ'ane 'ikɨ kiekari manukuketɨani. Tenari mɨkatsutɨani yuniwe 'amuyumate tukarieyakɨ. 'Itupari meuwɨtɨaxɨani yuniwe 'etsimɨyumate tukarieyakɨ».
JOS 6:27 Yawé Kutsuhexi hamatɨa kaniuyeikakaitɨni, hikɨ naitsarie kanikɨxaxatsiwakaitɨni mɨkɨ kwieyaritsie.
JOS 7:1 Peru, 'ixaheritsixi Yawé mepɨka'anu'eni memɨte'uti'utaxɨkɨ tita memɨtetitaiyakekai, 'Akani Karimi nu'aya Tsawiri teukarieya Tsera tutsieya, mɨkɨ yatipaɨmeme katiniuti'awieta yuhetsiemieme Kakaɨyari tita mɨti'aitakai memɨtetitaiyakɨ. Mɨkɨ tewi Kura nuiwarieyatsie mieme mɨyatiuyurieku Yawé kaniuyeha'ani 'ixaheritsixi wahekɨ.
JOS 7:2 Kutsuhexi Keriku 'ukaitɨ kaniwarenɨ'ani 'awie nenieremete 'Ahi reyetewakaku 'ehurakaku Weti-'Aweni, Weteri hɨxie meta mɨpaɨ katiniwarutahɨawe: «Kwie xekenexeiyayu». 'Ana mekaneikuxeiya 'Ahi kiekariyari.
JOS 7:3 'Ariketa mekanakunuaxɨani mɨpaɨ Kutsuhexi mekateniutahɨawe: «Pɨkaheuyewetse teyunaitɨ temɨtakwiyukɨ. Huta miriyari yatɨni haika miriyari kuyaxi mepɨyɨni xeikɨa 'Ahi tema'iwakɨ. Mɨkɨ kiekari 'etsiyupaɨmeme xeikɨa teɨteri pɨwarexeiya yunaime ta'iwama temɨtewa'uxitɨaka pɨkaheuyewetse».
JOS 7:4 'Ayumieme kuyaxi mekanekɨne haika miriyari xeikɨa, peru matsi 'Ahi kiekatari mepɨtehayu'iwaxɨ.
JOS 7:5 Kuyaxi 'ixaheritsixi mepekwi'iwaxɨ xeitewiyari heimana tamamata heimana 'ataxewi, mepanukuweiyarie kiekari kitenie memɨyekɨ mekaniye'axɨani tetexi matixitewatsiepaitɨ mana 'axa'anekɨa mepa'iwarie. Mɨyatiuyɨku yunaitɨ mekaniutimamani.
JOS 7:6 'Ayumieme, Kutsuhexi yukamixa kaneukatsana kaniutihɨximakeni Yawé tɨratu kakuniyari hɨxie. Mekaneweiyakaitɨni 'ixaheritsixi wa'ukiyarima, yaxeikɨa me'anenetɨ meyuheiwerietɨkaitɨ mekaniutihɨxima'uni, taikaike mekananuku'uni.
JOS 7:7 Kutsuhexi Kakaɨyari mɨpaɨ katiniutahɨawe: ―Yawé Kakaɨyari, ¿Titayari 'ikɨ teɨteri petiwaranawitɨ Kurutanitsie, meta petiwayetua 'amuxeutsixi wahetsɨa memɨkwinikɨ? Matsi kuta haa manuyeka 'anutaɨye temɨneyuhayewakaitɨni.
JOS 7:8 Yakenetineutahɨawi, neti'aitɨwame, ¿kenetayɨni hikɨ 'ixaheritsixi memuyuta'unaxɨ yuneɨkixiwima wahɨxie?
JOS 7:9 Kananeutsixi mepɨtetamarieni kiekari 'ahurawa mumanetɨkatsie mepɨtehetamarieni, hikɨ tahetsɨa mepɨye'axɨani mepɨtatsikwini. Hikɨtari keraniuwani 'ahepaɨtsita.
JOS 7:10 Yawé mɨpaɨ katinita'eiya: ―Kenanukukexi. ¿Kepetiyuriene mana petihɨximawetɨ?
JOS 7:11 'Ixaheritsixi 'axamekateniuyurieni kenemutayɨkai yamepɨkatekakɨ. Memɨwaraye'unie tiwapiini mekatenepini xemɨtetitaiyakekai mekateniuti'awieta yupiinitetsata.
JOS 7:12 'Ayumieme 'ixaheritsixi mepɨkayɨwaweni memɨwaraye'unie wahɨxie matsi mekaniutinanautsakuni. Yɨkɨmana mekanitiwauni kememɨtekwini. Xɨka mɨkɨ piinite mana mɨtikupine xekate'utitaiya, ne xehamatɨa nepɨka'uyeikani.
JOS 7:13 Kenanukukexi. Meke'uyu'itieni teɨteri. Mɨpaɨ ketiniwarutahɨawi 'aixɨa meke'uyuyurieni 'uxa'a nehɨxie memɨti'unikɨ, ne, Yawé, 'ixaheritsixi wakakaɨyari mɨpaɨ nepaine: “'Ixaheritsixi kexemɨteka'unariexime xetsata pɨti'ane. Pepɨkayɨwekaxɨani pemɨwara'iwakɨ pemɨwaraye'unie kepaukake 'aixɨa pemɨtiyurieni 'ateɨterima watsata”.
JOS 7:14 'Uxa'a ximeri nuiwarite yunaitɨ mepuyukuxeɨrieni. Ne kemɨ'ane nuiwari hetsie 'inɨari nemɨkahɨani yuniwema pɨwakuxeɨrieni, manata Yawé kemɨ'ane wahetsie 'inɨari mɨkahɨani yutɨɨriyama pɨwakuxeurieni, manata Yawé kemɨ'ane wahetsie 'inɨari mɨkahɨani, 'ukitsi puwakuxeɨrieni.
JOS 7:15 Kemɨ'ane mɨtitaxeiriyarieni piinite memɨyukwitɨwe tiwapiini mɨtititaiyarienikekai kanitataiyariemɨkɨ meta yunaitɨ tɨɨriyamama meta naitɨ tiwapiinite, 'axamɨtiuyurikɨ Yawé kemɨkahainekai 'ixaheritsixi wahetsie 'axati'aneme mɨ'atɨakɨ.
JOS 7:16 'Uxa'arieka, ximeripaitɨ, Kutsuhexi kaniwara'iniexɨani, yuxexuime, 'Ixaheri nuiwaritemama, 'ana Kura hetsie katiniunake 'inɨari.
JOS 7:17 Yunaitɨ Kura niwemama mekaniwakɨne, 'inɨari katiniunake Tsera hetsie. Tsera niwemama hetsieta katiniunake Tsawiri mɨtitewa hetsie.
JOS 7:18 Hikɨ Kutsuhexi mɨkɨ niwemama kaniwaruti'inɨata, 'inɨari katiniunake 'Akani mɨtitewa hetsie, Karimi nu'aya, Tsawiri teukarieya, Tsera tutsieya.
JOS 7:19 Hikɨ Kutsuhexi mɨpaɨ katinita'iwawiya: ―Neuxei neniwe, heitseriemekɨ 'aixɨa keneutayɨki Yawé hɨxie 'ixaheritsixi takakaɨyari. Kenetineutaxatɨa kepemɨtiuyuri. Tixaɨtɨ pepɨkaneranukanamirieka.
JOS 7:20 'Akani mɨpaɨ katinitahɨawe: ―Kaniyuritɨni ne 'axakenemɨtiuyuri Yawé hɨxie 'ixaheritsixi takakaɨyari. Mɨpaɨ nekatiniuyurieni:
JOS 7:21 Mɨkɨ mana titixeɨriekaku nekatiniuxeiya tuwaxa 'amɨtewi witsi'aneme Wawiruniya mieme, meta pɨrata tuminiyari huta tsienituyari meta huru meriu kiruyari. Witsimɨti'anenekai nepiinite nepɨrayeitɨa. Hikɨ nepiti'awietaxɨ ne'uti'ineka nexamaru hixɨapa. Pɨrata tsiere muwa patimane, yunaime wahetɨa.
JOS 7:22 Hikɨ kwitɨwata Kutsuhexi kaniwarenɨ'ani hipame, mɨkɨ mekanekɨne 'Akani kie me'unautsaxɨaximetɨ. Muwa mekateniutaxeiya tinaime 'Akani mɨtiuti'awietakai,
JOS 7:23 mekateniwatipini Kutsuhexi hetsɨa mekatenepini meta 'ixaheritsixi, mɨkɨ Yawé hɨxie mekatenitipini.
JOS 7:24 Kutsuhexi meta 'ixaheritsixi 'Akani mekanewitɨni, Tsera tutsieya, 'Akuhuxi reyetewakaku mekaneiwitɨni, pɨrata 'ixuriki tuwaxayari 'amɨtewi huru meta niwemama 'ukitsi 'ukari, tewamama, 'ixuriki kiyari naime tipiinieya. Kepauka mayeweritsie 'Akuhuxi memu'axɨa,
JOS 7:25 Kutsuhexi mɨpaɨ katinitahɨawe: ―¿Titayari 'axapetatiuyuri? Yawé 'ekɨ pɨta 'axapɨmatsiyurieni. Hikɨ yunaitɨ 'ixaheritsixi 'Akani meta niwemama mekaniwarutituaxa tetexikɨ meta mekaniwarutitaiya.
JOS 7:26 Hikɨ wahetsie tetexi 'anekame mekananukeni hikɨ 'akuxi kaneyuhekɨaka. 'Ayumieme mana pɨrayetewa 'Akuhuxi, 'uximatɨarika 'akiyari manuyɨne. Mɨpaɨ Yawé katiniuyunɨtɨani.
JOS 8:1 Yawé Kutsuhexi mɨpaɨ katinayehɨtɨani: «Pepɨkamaka kene'awaɨriyani. Yunaime keniwaranuwitɨki kuyaxi, 'Ahi xekeneutami'a. Ne nepɨxeparewieni ti'aitame xema'iwakɨ meta kuyaximama. Wakiekari xepiinite katinayeimɨkɨ meta naitɨ kwieyari memanu'uwa.
JOS 8:2 Keriku kepemuyuri yaxeikɨata pekatiniyurimɨkɨ mɨkɨ kiekaritsie meta mana ti'aitametsie. Hikɨrixɨa kuyaxi memɨxe'aye'unie tiwapiinite xekatenanupikuni meta watewama. Xekeniwaruhupi kiekari mananieretsie».
JOS 8:3 Hikɨ mekanekɨne Kutsuhexi yukuyaxima warawitɨtɨ kiekari 'Ahi mehetamienike. Kutsuhexi kaniwaranuyewauni xeitewiyari heimana tamamata miriyari (30.000) kaniwarenɨ'ani tɨkarikɨ
JOS 8:4 mɨpaɨ tiwahɨritɨatɨ: «Xeme xepeyuti'awieta kiekari waritatsie. 'Eteewa paitɨ xepɨkahekɨkani, xepɨkahekuyuatɨkani xematitenitsie.
JOS 8:5 Ne nekanaye'amɨkɨ nekuyaxima newarawitɨtɨ, kepauka memɨtatsi'aye'unie memɨwayekɨne metatsitakwinike, tekaniyuta'unakuni matɨari hepaɨ.
JOS 8:6 Mɨkɨta mepɨtatsi'anukuweiya, tawarita teyuta'uname me'erietɨ, mɨpaɨ teyɨyɨ mepayekɨne yukiekaritsie.
JOS 8:7 Hikɨ xeme xekaniwatikɨnikuni xemuyu'awietatɨka 'Ahi kiekariyari xekanika'unakuni. Yawé kanixeparewimɨkɨ xemɨte'ayu'iwakɨ.
JOS 8:8 Kepauka kiekaritsie xemɨye'axɨani, xekenetataiya Yawé yaxeikɨa kemɨtarahɨawekai. Mɨpaɨ nekatinixe'aitɨaka».
JOS 8:9 Mɨpaɨ 'utayɨka Kutsuhexi, kaniwarenɨ'ani kuyaxi memehupanikɨ, Weteri meta 'Ahi wahixɨapa mekaneyuhayewa, kiekari kemɨremakai tau manukayuyuipike hepatsie, Kutsuhexi tɨkarikɨ mana mekanitiheteitɨni yukuyaxima warawitɨtɨ.
JOS 8:10 Kwi 'uximerikaku Kutsuhexi kananukukeni, yukuyaxima kaniwarukuha'aritɨani, 'ixaheritsixi wa'ukiyarima yunaitɨ mekanekɨne 'Ahi mɨreyetewatsie.
JOS 8:11 'Ahi heuhurakaku Kutsuhexi kuyaximama mana mekaniuyuhayewa, kiekari yeta. Kiekari makumakaitsie meta mematitekaitsie wahixɨapa xeikɨa kanayewerikaitɨni.
JOS 8:12 Kutsuhexi kaniwarenɨ'ani 'auxɨwime miriyari (5.000) para memɨwatihupienikɨ, mɨkɨ mekaniuyuti'awieta Weteri 'Ahi wahixɨapa kiekari tserieta tau manukayuyuipike hepatsie.
JOS 8:13 Mɨpaɨ mekaniuyɨni hipatɨ kiekari yeta mekaniuyuhayewa, hipatɨta wa'utata. 'Ana tɨkariyaritsie Kutsuhexi kaniyeyani mayeweri hixɨapa.
JOS 8:14 Kepauka ti'aitame 'Ahi kiekame mɨretima kemɨtiyɨanekai, kaniuyukumexɨitɨani wayeyanike yukuyaxima warawitɨtɨ memɨwatakwinikɨ 'ixaheritsixi, kiekari hɨxie 'etsimanuyewatsie mayeweritsie, 'atsimekatemaitɨ kememɨtehupieriekai kiekari 'aurie.
JOS 8:15 Kutsuhexi yukuyaxima 'ixaheritsixi warawitɨtɨ mekaniutinautsa me'imaitɨwetɨ huyeta makumawetsie haneme'utɨa.
JOS 8:16 Mɨpaɨ mekateniuyumani kiekaritsie memɨtitekai 'ukitsi kename mewaranukuweiyakekai 'ixaheritsixi, mɨpaɨ 'Ahi kiekariyari mekateniuku'eirieni.
JOS 8:17 Nixewitɨ pɨka'uyuhayewaxɨ kiekari 'Ahi meta Weteri mɨrakutewakaitsie yunaitɨ mepɨwaranukuwei 'ixaheritsixi, 'ayumieme kiekari yuxaɨta kaniuyuhayewa.
JOS 8:18 Mɨpaɨ Yawé Kutsuhexi katiniuta'aitɨani: «'Ɨrɨ 'amɨtewi pemakwe'e 'Ahi hepa keneukatsera, kiekari 'ahetsɨa nekaniyetuamɨkɨ». Kutsuhexi mɨpaɨ katiniuyurieni.
JOS 8:19 Me'uneneniereka kemɨtiyɨanekai memuyu'awietakai mekaniwatikɨne kiekari makumatsie mekaneutahaxɨani mekanitataiya.
JOS 8:20 Kepauka 'Ahi kiekatari 'ukitsi yɨ'utɨa memanakunenierixɨa, kɨtsi mekaniuxeiya kiekaritsie hatineikame. Mɨpaɨ mekatenetimani kename memɨyuta'unakekai mekayɨwawekai nihawaikɨtɨma, meta meripaitɨ memuyuta'unakai Kutsuhexi teɨterimama, hikɨta pɨta mekaniwakwitɨwekaitɨni memɨwaraye'unie.
JOS 8:21 Kutsuhexi meta yunaitɨ 'ixaheritsixi mekaniuneniere, memuyuti'awietakai kiekari kememɨte'uka'unakairi kememɨte'itataiyakai, 'ana mekaniukunuaxɨani 'Ahi kiekatari mekaniwarutakwini.
JOS 8:22 Kiekari memutataiyaxɨ mekaniwayekɨne kiekaritsie 'Ahi kiekatari mekaniwaranukuweiya, mɨkɨ mɨpaɨ hixɨapa mekanikunakaitɨni. 'Ixaheritsixi mekaniwarutakwini memɨwaraye'unie xeimetɨma mekahayewatɨ 'ayeniereme.
JOS 8:23 Ti'aitame 'Ahi kiekame mekaniuwiya mekanihayewa 'ayeniereme Kutsuhexi mekaniyetuirieni.
JOS 8:24 'Arike 'ixaheritsixi mewarukwika yeuta meta makumawetsie, yunaime memɨwaranukuweiyakai 'Ahi kiekatari, mekanakunuaxɨani kiekaritsie mana keyupaumetɨ memuyuhayewatɨwekai yunaime mekaniwarukwini.
JOS 8:25 Mɨkɨ tukaritsie 'Ahi kiekatari yunaitɨ mekaniukwini, tamamata heimana huta miriyari (12.000) 'ukitsi meta 'ukari.
JOS 8:26 Kutsuhexi yumamá pɨka'anukatetɨwakai 'ɨrɨ 'amɨtewi makwekaikɨ, kepaukake 'ixaheritsixi yunaime memɨwarukwi 'Ahi kiekatari.
JOS 8:27 Yawé kemɨtiu'aitakai, 'ixaheritsixi mekatenepini memɨwarukwi tiwapiinite meta tewaxi yunaime yuhetsie meteniɨhɨni.
JOS 8:28 Hikɨ Kutsuhexi kiekari kaniutataiya 'unitɨ xeikɨa kaniuyuhayewa, hikɨ 'akuxi kaneyuhekɨaka.
JOS 8:29 Meta 'Ahi kiekariyaritsie ti'aitame kaniuta'aita mɨkawiyanikɨ kɨyetsie, meta mɨpaɨ kaniutayɨni mana muyewiekakɨ kepaukake tau makayunekekai. Hikɨ 'akayuneku, Kutsuhexi katiniuta'aita ti'aitame kaxarieya makahanienikɨ kiekari kitenie memeiyehɨanikɨ. Yaxeikɨata katiniuta'aita tetexi mukuxeɨriyanikɨ hetsiena. Mɨkɨ tetexi mukuxeɨriya hikɨ 'akuxi kaneyuhekɨaka.
JOS 8:30 Hikɨ Kutsuhexi 'Ewari yemuriyaritsie tetexi kaniukuxeɨrieni mawari wewiwame kaniutawewieni Yawé hetsiemieme 'ixaheritsixi wakakaɨyari,
JOS 8:31 Muitsexi Yawé nɨ'arieya, kemɨtiwaru'aitɨakai 'ixaheritsixi. Kanitawewieni 'inɨari niukiyari xapayaritsie kemɨre'uxakai Muitsexi meka'utɨa: tetexikɨ wewiyakame mawari wewiwame, tetexi kaxixiyatɨkaime nitixaɨtɨkɨ. Mana mawari taiyariyari mekaniuwewieni meta 'aixɨa memɨteyuxeiyanikɨ mawariyari Yawé hetsiemieme.
JOS 8:32 Mana 'ixaheritsixi wahɨxie Kutsuhexi tetexi wewerime hetsie, 'inɨari niukiyari kaniuti'utɨani hekwamekɨ Muitsexi meka'utɨakai.
JOS 8:33 Yunaitɨ 'ixaheritsixi 'ukirawetsixi mewaruwitɨtɨ meta te'aitamete tewa'aitɨwamete 'itsɨkate, mekaniti'uni tɨratu kakuniyari 'aurie naitsata mawari wewiwamete rewitsixi wahɨxie memikweiximekai. Merikɨte 'ixaheritsixi meta mana memɨkakiekataritɨkai 'aixɨa mekateniu'uni, hixɨapa me'atɨ mɨkɨ Keritsini yemuriyarietsie meheutayunetɨ, hipatɨta 'Ewari yemuriyaritsie meheutayunetɨ, kemɨtiu'aitakai Muitsexi Yawé ti'uximayatsiriwame, kepauka matɨari mitawawiri Kakaɨyari 'aixɨa mɨwayurienikɨ mɨkɨ 'ixaheritsixi teɨteriyari.
JOS 8:34 Hikɨ Kutsuhexi kanekaterɨwa naime 'inɨari niukiyari ke'aixɨa mɨtiyuyuruwa meta titakɨ 'axatemɨte'itɨarieni kemɨre'uxa 'inɨari niukiyari xapayaritsie.
JOS 8:35 Hikɨ kemɨtiuteruwaxɨ Kutsuhexi yunaime 'ixaheritsixi wahɨxie, meyuxewitɨ 'ukarawetsixi, tɨɨri, meta 'ateewa kiekatari xeime niukiyari pɨkahatɨmai, Muitsexi kemɨtiu'aitakai.
JOS 9:1 Merikɨtsɨ te'aitamete mekanixuawekaitɨni Kurutani 'anataɨye tau makayuyuipike hepatsie, muhɨriyatsie, muweritsie meta naitsarie haramara Meritexaniyu hatetsitayaritsie, metatsiere Riwanu paitɨ: hetitsixi, 'amuxeutsixi, kananeutsixi, peretseutsixi, heweutsixi meta kewutseutsixi memakuteitsie. Kepauka tewa'aitɨwamete memu'enana 'ixaheritsixi kememɨteyuriekai,
JOS 9:2 mekaniuyuparewieni yunaitɨ yamekateniuxata Kutsuhexi memɨtamienikɨ meta 'ixaheritsixi.
JOS 9:3 Kawahuni kiekatari mete'utamarieka Kutsuhexi Keriku 'Ahi kemɨtiwaruka'unakai,
JOS 9:4 mekateniutaxata kememɨtewa'irɨwiya. Tupiritsixi mekaniwarenɨ'ani, wapuxurima kuxitariteta yeye'imeta mete'utɨkɨme meta nawi kɨxauriyari winu mukatuarike hatsatsanime hamanetsikitɨkaimeta.
JOS 9:5 Yu'ixurikite mepɨte'anakatɨtɨkatei meripai timieme, yukakai xutɨkaimetsie mepeu'ukai hatapietɨkaimetsie, paa mepu'ɨkai kɨraraunime temɨxikiyari pɨhɨkɨtɨkai.
JOS 9:6 Mekanekɨne Kirikari 'aurie Kutsuhexi mematiteitsie mɨkɨ mɨpaɨ mekaniutiyuani, Kutsuhexi hɨxie meta 'ixaheritsixi wahɨxie: ―Tame 'ateewa paitɨ tepanexɨa xeime kwieyaritsie, tɨratu tepukuwewietɨwe xehamatɨa.
JOS 9:7 'Ixaheritsixi mɨpaɨ mekaniutiyuani: ―Matsi xeme xɨari 'ahurawa xepɨkiekatari, 'ayumieme tame tɨratu temuwewieni tepɨkayɨwawe xehamatɨa.
JOS 9:8 Mɨkɨ, mɨpaɨ Kutsuhexi mekateniutahɨawe: ―Tame tepɨtawaɨriya temɨtexe'uximayatsiriekakɨ. Kutsuhexi mɨpaɨ katiniwaruta'iwawiya: ―¿Kehate xeme xepɨyua hakewa xepeyekɨ?
JOS 9:9 Mɨkɨ mɨpaɨ mekaniutiyuani: ―Tame 'ateɨterima tepɨyɨa, tame kwie 'ateewa mukumatsie tepeyekɨ, hakewa 'ikɨ Kakaɨyari Yawé memariwatsiepaitɨ. Tepɨtehetamari naime 'Ekipitu kemɨtiuyuri,
JOS 9:10 meta te'aitamete yuhutame kemɨwaruyuri 'amuxeutsixi Kurutani 'aurie memɨtamakai: 'ikɨ mepɨhɨkɨtɨkai Tsikuni ti'aitame Hetsiwuni kwieyaritsie mieme, 'Uhuki ti'aitame Watsani kwieyaritsie mieme 'Atsitaruti kiekame.
JOS 9:11 'Ayumieme takie kiekatari meta memɨtatsi'uwitɨxime mɨpaɨ mepaitɨkatei kename tekeheyukuha'aritɨani 'ateewa temuhukɨ mɨpaɨ temɨtexetahɨawekɨ: “Tame tepɨtawaɨriya xeteɨterima temɨhɨkɨtɨnikɨ tɨratu temɨwewienikɨ”.
JOS 9:12 Kepauka temeyekɨ 'upɨta paa peyumemenikai xɨxɨkatɨ, peru hikɨ xekeneuxeiya kanikɨraraunini kanitemɨxikiyaka.
JOS 9:13 'Ikɨta nawi kɨxaɨriyari kaxie winuyari mukatuarike pehehekwakai hɨpɨnetɨ kaxie winuyari, hikɨ xeketeneuxeiya naitɨ katinitsatsanini ta'ixurikite meta takakai pɨxɨtɨka yeiyakɨ.
JOS 9:14 Teɨteri 'ixaheritsixi 'etsiwa kawahunitari wa'ikwai mekateniukwani, peru Yawé mepɨka'uta'iwawiyaxɨ.
JOS 9:15 Hikɨ Kutsuhexi tɨratu kaniuwewieni waparewienike naimekɨ, yaxeikɨata yakaniutayɨni mɨkawareuyehɨanikɨ. 'Ixaheritsixi wa'ukiyarima yamekaniutiyuani mɨkɨ tɨratu hepaɨtsita.
JOS 9:16 Haika tukari heutineku tɨratu memuwewitsie kawahunitari wahamatɨa, 'ixaheritsixi mekateniutamarieni kename 'ahurawa kiekatari meyɨakai.
JOS 9:17 'Ayumieme mekanekɨne haika tukari mekaneuye'axɨani mɨkɨ kiekaritetsie: Kawahuni, Kapira, Weruti meta Kiriati-Yeharini.
JOS 9:18 Peru 'ixaheritsixi mepɨka warutakwi, wa'ukiyarima wahamatɨa tɨratu memuwewiekaikɨ, mɨpaɨ meputiyua Yawé hɨxie 'ixaheritsixi wakakaɨyari kename mekawakwini. Mɨkɨ 'ixaheritsixi yunaitɨ mekaniuyeha'ani 'ukirawetsixi wahepaɨtsita.
JOS 9:19 'Ukirawetsixi mɨpaɨ mekaniutiyuani: ―Tame tɨratu tepuwewi Yawé 'Ixaheri Kakaɨyarieya hetsiemieme, temɨwarukwini tepɨkayɨwawe.
JOS 9:20 'Ipaɨ pɨta tekaniwayurikuni: tepɨkawakwini 'uximatɨarika te'upitɨarienikɨ, tɨratu te'uwewieka temɨte'itanikɨ.
JOS 9:21 Hikɨ hutarieka mɨpaɨ mekateniuxata. ―Mekaniu'uwakuni perutsɨ kɨ'ewemete meta hanɨwemete mekanihɨkɨtɨkakuni takiekaritsie. Mɨpaɨ mete'uxataka mekatenaye'atɨani tɨratu kememɨte'uwewi.
JOS 9:22 Hikɨ Kutsuhexi kawahunitari mɨpaɨ katiniwarutatieni: ―¿Titayari xetate'u'itaiyaxɨ kename 'ateewa xekiekatari xe'utiyuatɨ, 'ahurawa xekiekataritɨtɨ?
JOS 9:23 'Ena mɨtiyehane mɨpaɨ 'axaxepɨtepitɨarieni: Te'uximayatamete xepakɨne, Kakaɨyari tukieyata miemete. Kɨ'ewemete xepɨhɨkɨtɨni meta hanɨwemete.
JOS 9:24 Kawahunitari mɨpaɨ mekaniutiyuani: ―Tame texe'uximayatsiriwamete, tepɨte'utaxatɨarie kename Yawé xekakaɨyari mɨpaɨ tiuta'aitaxɨ Muitsexi ti'a'uximayatsiriwame, mɨxeyetuirienikɨ 'ikɨ kwie naime, xewakwitɨ teɨteri mana kiekatari, teputimama waɨkawa tekaheukwikutɨ 'ayumieme mɨyatepɨte'uyuri.
JOS 9:25 Tame xehetsiemieme tepɨhɨkɨ, yaxeketeneuyuri takɨmana kehepaɨ mɨtiheitserie kehepaɨ 'aixɨa mɨ'ane.
JOS 9:26 Mɨpaɨ Kutsuhexi katiniwarutawikweitsitɨani kawahunitari, 'ixaheritsixi mewakwikukaku.
JOS 9:27 'Ana mɨtiyetɨa Kutsuhexi kɨ'ewemete kaniwarayeitɨani meta hanɨwemete 'ixaheritsixi wahetsiemieme kepauka memuyuxeɨriekatsie, matsi yemekɨ mawari taiyame Yawé hetsiemieme mepɨte'uximayakai hakewa mɨkɨ Yawé menayexei. Hikɨ 'akuxi yaxeikɨa mɨpaɨ mepɨtehe'uximaya.
JOS 10:1 'Arunitsereki ti'aitame Kerutsareme kiekame katiniutamarieni kename Kutsuhexi 'Ahi ha'iwakai 'ika'unakai naime, Kutsuhexi Keriku kemuyuriekai meta mana ti'aitame yaxeikɨa pɨtiuyuriekai 'Ahi meta ti'aitameya. Metatsiere Harunitsereti katiniutamariekaitɨni kename Kawahuni kiekatari 'ixaheritsixi wahamatɨa tɨratu me'uwewiekai wahamatɨa me'u'uwakai.
JOS 10:2 Hikɨ waɨkawa mepɨmamakai 'Arunitsereki meta teɨterimama mɨpaɨ memɨtemaikaikɨ Kawahuni kiekariyari matsi pɨmariwekai kwinimieme kaniyeukaitɨni wamu'uyari hepaɨ, kuyaxi metehayu'iwame kaniwarexeiyakaitɨni, 'Ahi matsi 'etsipɨyeukai 'akuxi.
JOS 10:3 'Ayumieme 'Arunitsereki xapa kaneutanɨ'axɨani 'ikɨ te'aitamete wahetsɨa: Huhani Hewuruni kiekame, Pirani Karimuti kiekame, Kapiha Rakixi kiekame meta Rewixi 'Ekuruni kiekame.
JOS 10:4 Mɨpaɨ hayetaineme: «Xekeneneuparewi Kawahuni kiekariyari tepɨtamieni titayari mɨyatiuyɨ Kutsuhexi tiutinɨi meta 'ixaheritsixi».
JOS 10:5 Hikɨ meyu'aɨxɨwitɨ te'aitamete 'amuxeutsixi Kerutsareme kiekatari, Hewuruni, Karimuti, Rakixi meta 'Ekuruni mekaniuyunɨni mekanekɨne yukuyaxima mewaruwitɨtɨ Kawahuni hɨxie mekanikuyaxe mewatakwinike.
JOS 10:6 Hikɨ 'ukitsi Kawahuni kiekatari Kutsuhexi niuki mekanenɨ'airieni Kirikari 'ukaiku mɨpaɨ haineme: «Pepɨkatatsi'uku'e'eiriwani tame 'ateɨterima. Xeiya kenamie taheima keneutanua yunaitɨ te'aitamete 'amuxeutsixi hɨritsie kiekatari mekaniyunɨka metatsi'unietɨ».
JOS 10:7 Kutsuhexi Kirikari kanayeyani yunaime yukuyaxima warawitɨtɨ, yemekɨ memɨ'ayumiemetetɨkai.
JOS 10:8 'Ana Yawé Kutsuhexi mɨpaɨ katiniutahɨawe: «Pepɨkamaka wahɨxie, ne nekameniyetuiriemɨkɨ. Nixewitɨ mɨkɨ mepɨkamatsiha'iwa».
JOS 10:9 Tɨkarikɨ meheyekɨneka Kirikari paitɨ, Kutsuhexi kaniwarutakwini 'atsimekateha'eriwakaku.
JOS 10:10 Mɨpaɨ Yawé 'amuxeutsixi katiniwarutimariuta kuyaxi 'ixaheritsixi wahɨxie, mɨpaɨ mɨkɨ mekatena'iwarieni mana Kawahuni mɨrakutewatsie. Memuyuta'unaxɨ mekaniwaranukuweiya huye'utɨa Weti-Kuruni haneme, yunaime mɨkɨ mekaniwarukwini mɨkɨ huyeta 'Atseka meta Makera haneme 'utɨa.
JOS 10:11 Kepauka 'amuxeutsixi memuyuta'unaxɨ 'ixaheritsixi mewakwitɨwekaku, Weti-Kuruni meta 'Atseka wahixɨapa meyukwitɨwetɨ, Yawé muyuawitsie tee 'anenekame kaneyenɨ'ani yuwaɨkawa teɨteri kaniwarukwini, 'ixaheritsixi tsiyupaɨmeme mekaniwarukwini 'ixiparakɨ.
JOS 10:12 Mɨkɨ tukaritsie kepauka Yawé mɨwarupitɨa 'ixaheritsixi 'amuxeutsixi memɨwara'iwanikɨ, 'ana Kutsuhexi mɨpaɨ katiniuyutanenewieni yunaime 'ixaheritsixi wahɨxie: «Tau, kenewakexi Kawahuni heima, metseri, kenewakexi 'Ayaruni heima».
JOS 10:13 Tau kaniwakeni 'utukakaku meta metseri yaxeikɨa, kepaukake 'ixaheritsixi memɨtehayu'iwaxɨ. 'Ikɨ mɨpaɨ pɨre'uxa Katsexi xapayaritsie. Mɨpaɨ katiniuyɨni, tau kaniwakeni 'utukakaku pɨka'ukuyua xeitukari kaniuyurieni.
JOS 10:14 Nihawaikɨ meripaitɨ nitawari mɨpaɨ pɨkatiyɨwe, 'ana tukaritsie Yawé tewi 'aitsikaya panu'eni. Mɨpaɨ pɨtimatsiɨkɨ 'ana Yawé puyumienekai 'ixaheritsixi waparewietɨ.
JOS 10:15 Yunaime mewarukwikari, Kutsuhexi kanakunuani Kirikari mɨrakutewatsie yunaime yukuyaxima warawitɨtɨ.
JOS 10:16 Meyu'auxɨwitɨ te'aitamete mekaniuyuta'unakaitɨni terɨta paitɨ Makera kiekariyari 'aurie.
JOS 10:17 Kepauka Kutsuhexi mɨretima kename mehetaxeiyariekairi memɨyu'auxɨwi te'aitamete terɨta,
JOS 10:18 'ana mɨpaɨ katiniu'aita: «Terɨ kitenie xekeneutetsa manata hipame xetewaretixɨrieni memɨtehetahɨkakɨ.
JOS 10:19 Xewitɨ pɨkaheyukuhayeikawani. Kuyaxi teparewiwamete mekewaranukuweiya memɨyuta'unaxɨa. Mepɨkawarepitɨaka yukiekaritetsie memeye'axeni. Yawé xekakaɨyari kanixeyetuirieniri».
JOS 10:20 Kutsuhexi meta kuyaxi 'ixaheritsixi mekaniwarukwini memɨwaraye'uniekai, 'etsiyupaɨmetɨ xeikɨa mekaniyuta'una kiekaritetsie kuraru 'amatitetewa maheitɨkatsie.
JOS 10:21 'Imatɨrieka, yunaitɨ 'ixaheritsixi mekaniuyukuxeɨrieni Makera kiekariyaritsie 'aixɨa meteheu'erietɨ nixewitɨ pɨkatiukwinitɨarie. Mana naitsarie yunaitɨ memɨtamakai nixewitɨ 'atsipɨkatiwarahɨawekai 'ixaheritsixi.
JOS 10:22 Hikɨ Kutsuhexi katiniutanɨ'ani terɨta mɨreuyepiyanikɨ meta memɨwayehapanienikɨ te'aitamete 'amuxeutsixi memuyu'auxɨwi.
JOS 10:23 Yapauka te'aitamete memɨyu'auxɨwi mekaniwayehapanieni terɨta: Kerutsareme, Hewuruni, Karimuti, Rakixi meta 'Ekuruni.
JOS 10:24 Kepauka memɨ'atɨarie, Kutsuhexi kaniwaruta'inieni yunaime kuyaxi 'ixaheritsixi mɨpaɨ katiniwarutahɨawe kuyaxi wa'ukiyarima memikuweiyatɨwekai: «'Ahurawa xekenakɨni te'aitamete wakɨipitsie xekena'uti». Kuyaxi tewa'aitɨwamete yamekatenikakɨne kwitɨ.
JOS 10:25 Hikɨ Kutsuhexi mɨpaɨ kaniutayɨni: «Xepɨkamamaka yu'utɨa xepɨka'uyekɨkani, matsi pɨta xekenetɨrɨkawini xepɨkamamaka. Mɨpaɨ kaniwayuriemɨkɨ Yawé kemɨ'ane xemɨwatakwini».
JOS 10:26 Mɨpaɨ 'utayɨka Kutsuhexi, kaniwarukwini te'aitamete, 'auxɨwime kɨyexitsie kaniwaruyewɨtɨani, mana kaniwaruku'eirieni tukarikɨ.
JOS 10:27 Tau 'akayunirɨmekakuke Kutsuhexi katiniuta'aita wakaxari makahapanienikɨ, terɨta memayu'awietakaitsie memeutaxɨriyanikɨ. Hikɨ mekateneunani terɨta tetexi 'anenekame mekaneuyatsa, hikɨ 'akuxi kanehekɨaka.
JOS 10:28 Mɨkɨ tukaritsie Kutsuhexi Makera kiekariyaritsie kaniye'ani, yu'ixiparakɨ mana ti'aitame kaniumieni meta mana kiekatari yunaime mekaniwarukwini. Ti'aitame Makera kiekame Keriku mɨti'aitametɨkai hepaɨ katiniumierieni.
JOS 10:29 Kutsuhexi meta yunaitɨ 'ixaheritsixi Makera mɨrakutewatsie memɨyekɨ, mekanekɨne Riwina kiekariyaritsie meta mɨkɨ mekaniwarutakwini.
JOS 10:30 Yawé kaniwaruparewieni 'ixaheritsixi 'ana yunaime mekaniwara'iwa meta ti'aitame teɨterimama. Kutsuhexi katiniuta'aita 'ixiparakɨ memɨkwi'iwakɨ. Nixewitɨ pɨka'uyuhayewaxɨ 'ayenieretɨ. Keriku mɨti'aitametɨkai kemɨtiumierie yaxeikɨa Riwinatsie ti'aitame hepaɨna katiniumierieni.
JOS 10:31 Kutsuhexi meta yunaitɨ 'ixaheritsixi, Riwina memɨyekɨ mekanekɨne Rakixi. Mana me'u'axɨaka kiekari warita mekanayaxetɨkɨne hikɨ mekaniwarutakwini.
JOS 10:32 Yawé kaniwaruparewieni 'ixaheritsixi, hutarieka tukaritsie mekaniwara'iwa. Yunaitɨ Rakixi kiekatari mekaniukwini, Riwina kiekatari kememɨte'anuyekɨ wahepaɨ.
JOS 10:33 Hikɨta, Hurani ti'aitame Ketsehexi kiekame, kanayeyani Rakixi hetsie tanuanike, 'ana mɨkɨ yunaitɨ kuyaximama mekaniukwi'iwa. Nixewitɨ pɨka'utawikwei Kutsuhexi kuyaximama wa'ixiparate hetsie.
JOS 10:34 Kutsuhexi meta yunaitɨ 'ixaheritsixi Rakixi memɨyekɨ 'Ekuruni mekaniye'axɨani. Kiekari warita mekanayaxetɨkɨne mekaniwarutakwini.
JOS 10:35 Xeitukaritsie yunaime mekaniwarukwini 'ixiparakɨ mekaniwara'iwa, yaxeikɨa Rakixi kiekatari kememɨtewarukwikai.
JOS 10:36 Kutsuhexi meta yunaitɨ 'ixaheritsixi 'Ekuruni memɨyekɨ mekanekɨne Hewuruni, meta mana kiekatari mekaniwarutakwini.
JOS 10:37 'Ixaheritsixi kuyaxiyari mɨkɨ kiekaritsie yunaime mekaniwarukwini 'ixiparakɨ, nixewitɨ pɨka'utawikwei, meta mana ti'aitame kaniumierieni yaxeikɨata kiekari mamanetɨkatsie kiekatari. 'Ekuruni kemɨtiuyɨ, Hepurunita mɨpaɨ katiniuka'unarieni.
JOS 10:38 Kutsuhexi meta 'ixaheritsixi Hepuruni memɨyekɨ mekanekɨne Rewixi mekaniutamieni.
JOS 10:39 Kiekari mekaniutanenixeiya meta mana mɨti'aitametɨkai meta 'auriena mamanetɨkatei kiekari, yunaime mana kiekatari mekaniwarukwini mawari hepaɨ. Nixewitɨ pɨka'uyuhayewaxɨ 'ayenieretɨ. Rewixi yaxeikɨa katinanuyeyani kemɨranuyeyakai Riwina meta Hewuruni meta mana te'aitamete.
JOS 10:40 Mɨpaɨ Kutsuhexi katiniuyurieni mɨkɨ kwieyaritsie: hɨritsie, Nekexi mɨreyetewatsie, muweritsie, mukɨatsie. Yunaime te'aitamete kaniwarukwini xeime kahayewatɨ. Yunaitɨ memɨte'ayeneniere mekateniukwi'iwa. 'Ikɨ mɨpaɨ katiniuyurieni Yawé mɨti'aitɨakaikɨ, 'ixaheritsixi wakakaɨyari.
JOS 10:41 Kutsuhexi yunaime kiekarite kaniwara'iwa Karetsi-Waxineya paitɨ meta Kahatsa, meta Kutseheni, Kawahuni paitɨ.
JOS 10:42 Mɨkɨ yunaime te'aitamete meta wakwieyaritetsie Kutsuhexi katinayu'iwa, matsi Yawé 'ixaheritsixi wakakaɨyari mɨwaparewiekaikɨ.
JOS 10:43 Mɨyatiuyuriekake kanakunuani Kutsuhexi Kirikari 'aurie memakutekaitsie, yunaime yukuyaxima 'ixaheritsixi warawitɨtɨ.
JOS 11:1 Kepauka Kawini, Katsuxi kwieyaritsie ti'aitame mɨtiutamari naitɨ kemɨreyɨkai, Kuwawi kaniuta'inieni, Maruni kwieyaritsie ti'aitame, meta te'aitamete Tsimiruni kiekatari meta 'Akitsahapi kiekatari.
JOS 11:2 Meta kaniwaruta'inieni te'aitamete hɨritsie tayeta kiekatari, meta harakuna mayematsie Kinereti tsutɨayaritsie, tau manatineika hepaɨtsita mayeweritsie, meta Naputi-Ruxi kiekatari, tau makayuyuipike hepatsie.
JOS 11:3 Yaxeikɨata kaniwaruta'inieni kananeutsixi tau manatineika makayuyuipike hepatsie kiekatari, 'amuxeutsixi, hetitsixi, peretseutsixi, kewutseutsixi hɨritsie kiekatari meta heweutsixi kɨatsata memɨkatei Heximuni Mitsipa hɨriyaritsie.
JOS 11:4 Mɨkɨ meyunaitɨ mekanayeixɨani yukuyaxima mewaruwitɨtɨ meta kawayutsixi kaxetatsixi memɨyutakwinikɨ. Mekaniyumɨirekaitɨni xiekari hepaɨ mekateniyuxexeiyakaitɨni.
JOS 11:5 Yunaitɨ mekaniuyutaxewire, Merumi haixayari matineniere 'aurie mekanitiyaxe 'ixaheritsixi mewatakwinike.
JOS 11:6 Merikɨte Yawé Kutsuhexi mɨpaɨ katiniutahɨawe: «Pepɨkawamakaka, matsi 'uxa'a ximeri 'epauka, 'ixaheritsixi nekaniwayetuiriemɨkɨ mekwikwi'ime yunaime kuyaxi. Xemeta wakawayutsixi xepɨwatiwiteni wa'ɨkate tatayaritsie, wakaxetate xepɨtitaiya kɨmana memɨyukwitɨwekai».
JOS 11:7 Mɨpaɨ katineyani Kutsuhexi warawitɨtɨ yukuyaxima mekaniwarutaxeiya 'atsimekateha'eriwame Merumi haixayari makaneniere 'aurie.
JOS 11:8 Yawé kaniwayetuani 'ixaheritsixi memɨwara'iwakɨ, mɨkɨ mekaniwaranukuweiya kiekari 'amɨyewatsie paitɨ Tsiruni, meta Mitsireputi-Mahini meta mayeweritsie Mitsipa tau makayuyuipike hepatsie, nixewitɨ pɨka'uyuhayewaxɨ 'ayenenieretɨ.
JOS 11:9 Kutsuhexi katinaye'atɨani Yawé kemɨrehɨawekai: Memɨwaraye'unie wakawayutsixi wa'ɨkate tatayaritsie kaniwarutiwiteni meta wakaxetate kaniutitaiya kɨmana memɨyukwitɨwekai.
JOS 11:10 Me'akunuaxɨaka Kutsuhexi Katsuxi kaniutamieni meta tiwa'aitɨwame yu'ixiparakɨ kaniumieni, Katsuxi manuyeka pɨhɨkɨtɨkai yɨmɨireme te'aitamete tiwa'aitɨwame.
JOS 11:11 'Ixaheritsixi yunaime mepɨtewarukwi memɨte'ayeneniere, kiekari mekaniuka'una mekanitataiya mawari hepaɨ.
JOS 11:12 Kutsuhexi yumɨireme te'aitamete wahetsɨa kaniye'ani wakwinetɨ kiekaritetsie, 'ikɨ kaniwarukwini yu'ixiparakɨ wakwitɨ mawari hepaɨ. Mɨpaɨ tiyurienetɨ mɨkɨ yakatinikayani Kutsuhexi Muitsexi, Yawé ti'uximayatsiriwame, kemɨtita'aitɨakai.
JOS 11:13 Kiekari yemuritsie mɨkamane 'ixaheritsixi mepɨka'ititaiyaxɨ, Katsuxi xeikɨa mekaniutataiya.
JOS 11:14 'Ixaheritsixi yuhetsiemieme mekatenayeitɨani tinaime wapiinite meta watewama, yunaime mekaniwarukwini 'ukitsi nixewitɨ pɨka'uyuhayewaxɨ.
JOS 11:15 Mɨpaɨ Yawé Muitsexi tiyu'uximayatsiriwame kemɨtiuta'aitɨakai hepaɨ. Yaxeikɨata Muitsexi Kutsuhexi mɨpaɨ katiniuta'aitɨani. Mɨkɨ yakatinikayani kemɨraka'utɨariekai, Yawé Muitsexi kemɨtiuta'aitɨakai.
JOS 11:16 Kutsuhexi naime mɨkɨ kwieyaritsie memɨtamakai kaniwara'iwa: naitsarie muhɨriyatsie, Nekexi, Kutseheni kwieyaritsie, naitɨ mayeweritsie, 'Arawa, 'Ixaheri kwieyari muhɨriyatsie meta mayeweritsie.
JOS 11:17 Metatsiere kwie 'ayeyeume memeuxeiya wahetsɨa kaniye'ani, Karaki hɨriyaritsie Tsehixi kwieyari maye'atɨka, meta Wahari-Kahari mayeweritsie Riwanu paitɨ, hɨri Heximuni warita. Kutsuhexi te'aitamete kaniwarutiwiya yunaime mɨkɨ kwieyaritsie kiekatari kaniwarukwini,
JOS 11:18 mɨixa wiyari mewakwitɨwetɨ.
JOS 11:19 Nixewitɨ kiekari tɨratu pɨka'uta'iwau 'ixaheritsixi wahamatɨa memɨwaparewienikɨ, heweutsixi xeikɨa Kawahuni kiekatari. Naime mɨkɨ kiekarite Kutsuhexi puka'unaxɨ,
JOS 11:20 matsi Yawé wa'iyari kaniutseiriyaxɨani memɨwaraye'unie kaniwaruyuitɨani memɨwatakwinikɨ 'ixaheritsixi, mɨpaɨ katiniuyurieni Kananitari memɨka'unarienikɨ mawari hepaɨ, 'ixaheritsixi mekawanenimayatɨ, Yawé Muitsexi kemɨtiuta'aitɨakai.
JOS 11:21 'Ana Kutsuhexi kaniwaruka'una 'anakitsixi hɨritsie Hewuruni kiekatari, Rewixi, 'Anawi, meta muhɨriyatsie Kura kwieyaritsie yunaime 'Ixaheri. Teɨteri meta kiekarite Kutsuhexi kaniwaruka'una.
JOS 11:22 Nixewitɨ pɨka'uyuhayewaxɨ 'ayenieretɨ 'anaki tewiyari, 'ixaheritsixi mema'axɨatsie. Kiekarite Kahatsa, Kahati meta 'Atsiruri mana xeikɨa yayupaɨmetɨ mepuyuhayewaxɨ.
JOS 11:23 Kutsuhexi mɨpaɨ katiniwara'iwa mɨkɨ kwieyarite naime, Yawé Muitsexi kemɨtiuta'aitɨa, Kutsuhexi kaniwayetuirieni mɨyetuiriyarie yuxexuime nuiwarite 'ixaheritsixi mekateniyetuiriyarieni. 'Anari mekaniuka'uxipieni meyukwitɨwetɨ hɨritsie.
JOS 12:1 Meripaitɨ 'ixaheritsixi yuhutame te'aitamete mepɨwara'iwaxɨ wakwie Kurutani 'anutaɨye tau manatineika hepatsie mukuma, 'aki manuyekatsie 'Axinuni ye'atɨkaitɨ Heximuni hɨriyaritsie pɨye'atɨkatei, yaxeikɨa 'Arawa tau manatineika hepatsie mukuma.
JOS 12:2 Xewitɨ pɨtitewakai Tsikuni 'amuxeutsixi tiwa'aitɨwame, 'uwenieya Hetsiwuni kiekariyaritsie kaniuwekaitɨni. 'Ikɨ pɨti'aitakai 'Aruhexi ye'atɨkaime, mɨkɨ kiekari 'Axinuni 'aki tetsita pɨyemakai, meta 'aki Kawuki manuyekatsie pɨye'atɨkatei 'amunitsixi wakwie manuye'atɨka. Tsikuni kwieya pɨhɨkɨtɨkai mayeweri meta hixɨapa 'atɨ Karaha kwieyari.
JOS 12:3 'Arawa tau manatineika hepatsie pɨye'atɨkatei meta Kinereti harakuna mayematsie paitɨ, manata Haramara Mɨmɨki mayematsie paitɨ, Weti-Yetsimuti kiekariyari huyeyari 'utɨa, matsi 'akuxi hetɨana paitɨ, Pitsikaha yemuriyaritsie mukɨatsie paitɨ.
JOS 12:4 Xewitɨta ti'aitame 'Uhuki pɨtitewakai, Watsani kiekariyaritsie ti'aitame, xepahitsixi tewiyari 'imatɨrieka mieme pɨhɨkɨtɨkai 'Atsitaruti meta 'Erurehi mukatei.
JOS 12:5 'Ikɨ ti'aitame pɨti'aitakai Heximuni hɨriyaritsie meta Tsarikaha mɨrayetewatsie, meta naitsarie Watsani kwieyaritsie, Ketsuxi meta Mahaka wakwie manuye'atɨkatsiepai pɨye'atɨkatei, meta Karaha hixɨapa 'arɨkame, meta Tsikuni kwieya manuye'atɨkatsiepaitɨ ti'aitame Hetsiwuni kiekame.
JOS 12:6 'Ixaheritsixi Muitsexi tiwa'aitɨakaku Yawé ti'uximayatsiriwame, mɨkɨ te'aitamete mekaniwara'iwa. 'Ana Muitsexi Yawé ti'uximayatsiriwame, mɨkɨ kwie kaniwaruti'inɨatsirieni Xuweni, Kahari waxiɨyarima meta Manatsexi xiɨyarimama hixɨata me'arɨkame.
JOS 12:7 'Ena mepɨhekɨa te'aitamete 'ixaheritsixi memɨwara'iwaxɨ Kutsuhexi tiwa'aitɨakaku waxapayari. Wakwie kanikumanekaitɨni Kurutani tau manukayeika hepatsie, 'akaniyeukaitɨni Wahari-Kahari paitɨ kaniye'atɨkateitɨni, Riwanu mayeweritsie, meta Karaki hɨriyaritsie paitɨ, Tsehixi kwieyari maye'atɨka. Kutsuhexi kaniyetuani 'ikɨ te'aitamete wakwie 'Ixaheri nuiwarimama mɨtiwapiinitɨnikɨ.
JOS 12:8 Mɨkɨ kwie hipatɨ muhɨriyatsie katini'anekaitɨni, mayeweweritsie tau manukayeika hepatsie muyeka, 'Arawa, mukɨatsarietsie, makumawetsie meta Nekexi kwieyaritsie. Mɨkɨ kwie hetitsixi wakwie kanihɨkɨtɨkaitɨni meta 'amuxeutsixi, kananeutsixi, peretseutsixi, heweutsixi metatsiere kewutseutsixi. 'Ikɨ kanihɨkɨtɨni te'aitamete waxapayari:
JOS 12:9 ti'aitame Keriku mieme, ti'aitame 'Ahi kiekame, kiekari Weteri mehurawa,
JOS 12:10 ti'aitame Kerutsareme kiekame, ti'aitame Hewuruni kiekame,
JOS 12:11 ti'aitame Karimuti kiekame, ti'aitame Rakixi kiekame,
JOS 12:12 ti'aitame 'Ekuruni kiekame, ti'aitame Ketsehexi kiekame,
JOS 12:13 ti'aitame Rewixi kiekame, ti'aitame Kerexi kiekame,
JOS 12:14 ti'aitame Kuxima kiekame, ti'aitame 'Arari kiekame,
JOS 12:15 ti'aitame Riwina kiekame, ti'aitame 'Arurani kiekame,
JOS 12:16 ti'aitame Makera kiekame, ti'aitame Weteri kiekame,
JOS 12:17 ti'aitame Tapuhaki kiekame, ti'aitame Hepexi kiekame,
JOS 12:18 ti'aitame 'Apeki kiekame, ti'aitame Tsaruni kiekame,
JOS 12:19 ti'aitame Marumi kiekame, ti'aitame Katsuxi kiekame,
JOS 12:20 ti'aitame Tsimiruni-Merumi kiekame, ti'aitame 'Akitsahapi kiekame,
JOS 12:21 ti'aitame Tanaki kiekame, ti'aitame Mekiru kiekame,
JOS 12:22 ti'aitame Tseretsi kiekame, ti'aitame Kunehani kiekame, Kaximeru hɨriyaritsie mɨti'ane,
JOS 12:23 ti'aitame Ruxi kiekame, Naputi-Ruxi mɨreyetewatsie mɨti'ane, ti'aitame Kuhimi kiekame, Kirikari 'aurie mɨti'ane
JOS 12:24 meta ti'aitame Tiritsa kiekame. Yunaitɨ te'aitamete xeitewiyari heimana tamamata heimana xewi mekaniyupaɨmekaitɨni.
JOS 13:1 Kepaukari Kutsuhexi waɨkawa mu'ukiratsitɨkai Yawé mɨpaɨ katinitahɨawe: «Waɨkawa pekani'ukiratsitɨniri, teɨteri 'akuxi waɨkawa mekaniyuhayewatɨweni pemɨwara'iwakɨ.
JOS 13:2 Piritsiteutsixi, ketsureutsixi wakwie nekanixatani,
JOS 13:3 Tsikuxi 'akiyaritsie mɨye'atɨka 'Ekipitu kwieyari maka'atɨka, 'Ekuruni kwieyari maka'atɨkatsie paitɨ kaniye'atɨkani. Mɨkɨ mɨpaɨ katinimatiwani kananeutsixi wakwie, mɨkɨ kwieyaritsie yu'auxɨwitɨ te'aitamete mekanititeni piritsiteutsixi: Kahatsa kiekame, 'Atsiruri kiekame, 'Atsikaruni kiekame, Kahati kiekame meta 'Ekuruni kiekame. Yaxeikɨata 'aweutsixi wakwietsie xemɨye'axɨani kaneuyeweka.
JOS 13:4 Mɨkɨ wahetɨa Kananeutsixi wakwie kaniyuhayewaneni, 'Araki tsiruniyutsixi wakwieyaritsie ye'atɨkaitɨ, 'Apeki paitɨ, Tsiruni ye'atɨkaitɨ, 'amuxeutsixi wakwie manuye'atɨkatsie.
JOS 13:5 Yaxeikɨatsiere kaniyuhayewaneni Kewari kiekatari wakwie, Riwanu kwieyari yemuri wariepaitɨ metatsiere Wahari-Kahari, hɨritɨa Heximuni mɨtitewa, metatsiere Rewu-Kamati mɨrakutewatsie paitɨ.
JOS 13:6 Netɨtɨ nepuwataweiya 'ixaheritsixi wahɨxie yunaime Tsiruni kiekatari meta keyupaɨmetɨ hɨritsie memu'uwa, Riwanu paitɨ meta Mitsireputi-Mahini paitɨ. »'Ekɨri Kutsuhexi, yayeyeume pekaniwayetuiriemɨkɨ 'ikɨ kwie 'ixaheritsixi mɨtiwapiinitɨnikɨ kenematiuta'aitɨa wahetsiemieme.
JOS 13:7 Kanaye'aniri pemɨwayetuirienitsie kwie 'atanauka nuiwari wahetsiemieme memuyuhayewatɨwe meta hixɨapa me'atɨ Manatsexi xiɨyarimama».
JOS 13:8 Hipatɨ Manatsexi nuiwarimama hixɨata me'atɨ, Xuweni meta Kahari wanuiwarima, kwie mekaniyetuiriyariekaitɨniri Muitsexi Yawé ti'uximayatsiriwame, kaniwaruxatɨakaitɨniri meripaitɨ.
JOS 13:9 'Aruhexi paitɨ kaniye'atɨkani wakwie, 'Axinuni 'akiyaritsie 'Aruhexi kiekari pɨyemakai meta kiekari mayeweritsie hixɨapa pɨyemakai. Metatsiere kaniwakwietɨkaitɨni hɨri manaweri Merewa mɨtitewa metatsiere Riwuni,
JOS 13:10 naitɨ Tsikuni kiekariteya ―'amuxeutsixi mɨtiwa'aitɨwametɨkai mɨti'aitakai Hetsiwuni paitɨ 'ukaitɨ―, 'amunitsixi wakwie manuye'atɨkapaitɨ.
JOS 13:11 Karaha kaniye'atɨkateitɨni, teɨteri Ketsuxi kiekatari meta Mahaka kiekariyaritsie, naitɨ Heximuni hɨriyari meta Watsani meta Tsarikaha kwieyaritsie paitɨ.
JOS 13:12 Mɨkɨ kwie 'Uhuki katinipiinieyatɨkaitɨni, ti'aitame Watsani kwieyaritsie, 'Atsitaruti meta 'Erurehi kiekariyaritsie pɨtiuta'aitaxɨ, 'imatɨriekari mieme xepahitsixi tewiyari pɨhɨkɨtɨkai, Muitsexi muwaruka'unaxɨ meta mɨwarayewei mɨkɨ kwieyaritsie.
JOS 13:13 Peru 'ixaheritsixi Ketsuxi meta Mahaka kiekatari mepɨkawarayewei, hikɨ 'akuxi wakwietsie mekaniu'uwani.
JOS 13:14 Peru Muitsexi Rewi xiɨyarimama kwie pɨkawayetuiri, Yawé teɨterimama 'imikieri memɨyetuayakaikɨ mawari wewiwamete mɨtiwa hetsiemiemetɨkai, 'ixaheri Kakaɨyarieya, mɨkɨ kemɨtiwarutahɨawekai.
JOS 13:15 'Ikɨ kwie kanihɨkɨtɨni Muitsexi yuxexuime Xuweni nuiwarimama mɨwayetuiri:
JOS 13:16 'Aruhexi tsutɨtɨ kaniye'atɨkateitɨni, 'Axinuni 'akiyari manuyeka 'anutaɨye mukumakai, kiekari mexeiyakai mayeweritsie. 'Ikɨta hɨri manaweri Merewa kanihɨkɨtɨni
JOS 13:17 Hetsiwuni paitɨ meta naitɨ kiekarite manaweritsie mieme: Riwuni, Wamuti-Wahari, Weti-Wahari-Mekuni,
JOS 13:18 Yahatsa, Karemuti, Mepati,
JOS 13:19 Kiriyatahini, Tsiwima, Tsareti-Tsakaxi yemuri mayeweri mukatsie mukuma,
JOS 13:20 Weti-Pehuxi, Weti-Yetsimuti meta kɨatsata Pitsikaha yemuriyaritsie,
JOS 13:21 tatsɨari kiekarite meta 'etsimɨyeyeu manaweritsie mieme, meta naitɨ hakewa Tsikuni mɨre'aitakai ti'aitame 'amuxeu tewiyari Hetsiwuni mɨti'aitakai. Muitsexi 'ikɨ ti'aitame kana'iwa meta memanuyetei mariyanitsixi, 'Ewi, Xekeni, Tsuxi, Kuxi meta Xewa, yunaitɨ mɨkɨ Tsikuni memɨnɨkai mana memɨkiekataritɨkai.
JOS 13:22 'Ikɨ 'ixaheritsixi yuwaɨkawa mekaniwarukwini yu'ixiparakɨ kepauka memuyukwitɨwekai, metatsiere tiyukewaiyame Warami Wehuxi nu'aya mekaniumieni.
JOS 13:23 Kurutani hatɨayari Xuweni xiɨyarimama wa'inɨari kanayani wakwie manuye'atɨka. Mɨkɨ kiekari meta 'etsimɨyeyeu Xuweni xiɨyarimama wahetsiemieme kanayani kememɨyupaɨmekai.
JOS 13:24 Muitsexi kaniwayetuirienita 'ikɨ kwie Kahari xiɨyarimama kememuyupaɨmekai:
JOS 13:25 Katsexi kwieyari, naitɨ kiekari Karaha kwieyaritsie mukumane meta 'amunitsixi teɨteriyari wakwie hixɨapa'atɨ, meta 'Aruhexi paitɨ Xawaha kiekariyari hɨxie mukuma,
JOS 13:26 meta kwie yu'aurie mukumane Hetsiwuni, Xamati-Mitsipe meta Wetunini, Makanahini kwieyari meta Rewixi kwieyari manuye'atɨka.
JOS 13:27 Mayeweri mekaniyetuiriyarieni Weti-'Arami, Weti-Nimɨra, Tsukuti meta Tsapuni, Tsikuni mɨtiwa'aitɨakai mame, Hetsiwuni kiekariyaritsie mɨti'aitakai. Mɨpaɨ wakwie kaniyeukaitɨni Kurutani 'anutaɨye meta harakuna Kinereti hetɨa paitɨ.
JOS 13:28 'Ikɨ kiekarite mekaniyetuiriyarieni Kahari xiɨyarimama wapiini katinayani, kememɨyupaɨmekai.
JOS 13:29 'Ikɨ kwie kanihɨkɨtɨni Muitsexi Manatsexi xiɨyarimama hixɨata me'akame mɨwayetuiri kememɨyupaɨmekai:
JOS 13:30 wakwie Makanahini meta naitɨ Watsani kwieyari, tatsɨari 'Uhuki mɨra'aitakai naitɨ mɨkɨ kwieyari, yunɨtɨ Yahixi kiekariteya haika tewiyari mɨhɨkɨtɨkai.
JOS 13:31 Meta hixɨata'atɨ Karaha kwieyari, 'Atsitaruti meta 'Erurehi kwieyari, 'Uhuki mɨra'aitakai mɨkɨ Manatsexi nu'aya Makixi xiɨyarimama hixɨata me'atɨ wapiini katinayani, kememɨyupaɨmekai nuiwari.
JOS 13:32 'Ikɨ mepɨhɨkɨ Muitsexi kwie kemɨtiwayetuiri Muhawi makuweri 'ukaitɨ Kurutani hatɨayari 'anutaɨye, Keriku 'anutaɨye tau manatineika hepatsie.
JOS 13:33 Peru Rewi xiɨyarimama Muitsexi kwie pɨkawayetuiri, Yawé, 'Ixaheri Kakaɨyarieya wahetsie mɨmiemetɨkaikɨ, yaxeikɨa mɨkɨ kemɨtiwarahɨawekai.
JOS 14:1 'Ikɨ kwie Kanani mieme kanihɨkɨtɨni mawari wewiwame 'Eriyatsaxi, Kutsuhexi Nuni nu'aya meta 'Ixaheri nuiwaritemama wa'ukiyarima 'ixaheritsixi memɨwayetuiri.
JOS 14:2 Mɨkɨ kwie mekaniyetuiriyarieni Kakaɨyari 'inɨarieya mewewietɨ, 'atanauka heimana hixɨata memɨ'axe nuiwarite, mɨpaɨ mekateniuyurieni Yawé Muitsexi kemɨtiuta'aitɨa.
JOS 14:3 Mɨkɨri pɨwayetuiriekai kwie Kurutani 'anutaɨye tau manatineika hepatsie mukuma huta nuiwariyari heimana hixɨata me'arɨkame, Kutse xiɨyarimama huta nuiwariyari mepɨhɨkɨtɨkai, Manatsexi meta 'Epɨrahini. Peru rewitsixi mepɨkayetuiriyarie kwie, 'etsiwa xeikɨa kiekari kwie heutinɨkame mana memɨte'utihɨwenikɨ meta memuka'etsanikɨ.
JOS 14:5 Mɨpaɨ 'ixaheritsixi kwie mekateniuti'inɨatsiyarieni Yawé kemainekai Muitsexi kemɨtiuta'aitɨa.
JOS 14:6 Kura nuiwarimamata Kutsuhexi hetsɨa mekaniu'axɨani Kirikari mɨrakutewatsie. 'Ikɨ Keni tewiyari Karewi Kepune nu'aya Kutsuhexi mɨpaɨ katiniutahɨawe: «'Ekɨ kenaye'eri Yawé Muitsexi kemɨrahɨawekai, Kakaɨyari tewiyari, 'ahetsiemieme meta kemainekai nehetsiemieme Karetsi-Waxineya paitɨ.
JOS 14:7 Ne huta tewiyari wiyari nepexeiyakai kepauka Muitsexi Yawé mɨti'uximayatsiriwame Karetsi-Waxineya mɨrakutewatsie 'ukaitɨ mɨnetsihenɨ'a nemɨnierimiekɨ 'ikɨ kwie nemɨxeiyamiekɨ, yurikɨ ne nepɨreitaxatɨa ketita nemɨrexei.
JOS 14:8 Ta'iwama teyunaitɨ temekɨnekai, matsi hipatɨ xeikɨa mepɨwarutiwaɨripitɨa mewamariutatɨ wa'iyaritsie yu'iwama. Peru ne heitserie yanepɨtikamiekai Yawé nekakaɨyari hɨxie.
JOS 14:9 Mɨkɨ tukaritsie Muitsexi mɨpaɨ kanetiniutahɨawe: “Kemɨ'ane kwieyaritsie pemekuyeixɨa mɨkɨ 'akwie kanayeimɨkɨ yuheyemekɨ meta 'axiɨyarima, matsi Yawé 'akakaɨyari pemanu'enikɨ”.
JOS 14:10 »Huta tewiyari heimana 'auxɨwi wiyari kananuyemieniri kepauka Yawé yurikɨ mɨpaɨ mutayɨ Muitsexi ya'utainekaku, 'ixaheritsixi makumawetsie te'u'uwakaku, hikɨ 'ena nepuwe nauka tewiyari heimana 'auxɨwi wiyari nehexeiyatɨ: Yawé 'ena 'akuxi pɨnetsi'uwitɨtɨyeika.
JOS 14:11 Yaxeikɨa nekatineu'erieka 'ana tukaritsie Muitsexi mɨnetsihenɨ'atsie hepaɨ. Yaxeikɨa nepɨtitɨrɨkaɨye mɨrayukwitɨnetsie 'ana hepaɨ.
JOS 14:12 'Ayumieme keneneyetuiri mɨkɨ kwie muhɨriya, Yawé kemɨnerahɨawekai 'ana. 'Anatɨtɨ mana mɨtiyehane 'ekɨ pekatinimaika kename 'anakitsixi mana mekutei, meta pekatinimaika wakiekari mɨmamariwawe 'aixɨa mɨreukunatɨka, peru matsi Yawé netsiparewiekaku nepɨyɨwe nemɨwara'iwakɨ, mɨkɨ kemɨnerahɨawekai».
JOS 14:13 Hikɨ Kutsuhexi Kakaɨyari kaniutawawirieni Karewi 'aixɨa muyurienikɨ, Hewuruni kwieyari kaniyetuirieni.
JOS 14:14 Mana mɨtiyehane Hewuruni kwieyari Keni tewiyari Karewi kwieya kanayani Kepune nu'aya, Karewi Yawé manu'enikɨ, 'Ixaheri Kakaɨyarieya.
JOS 14:15 Meripaitɨ Hewuruni katinitewakaitɨni Kiriati-'Ariwa, 'Ariwa titewatɨ mariwetɨ matɨakɨ 'anakitsixi teɨteriyari wa'ukiyari meripaitɨ. Mɨpaɨ tiuyɨkuri, naitsarie mɨkɨ kwieyaritsie kayuwatɨ 'umatɨ kanayani.
JOS 15:1 Kwie Kura xiɨyarimama memɨyetuiriyarie kaniye'atɨkateitɨni 'Erumi kwieyari manuye'atɨkatei paitɨ, yunɨtɨ makumawetsie Tsini tatsutɨa meukayunetsie.
JOS 15:2 Tatsutɨa muyekatsie kanitsutɨkaitɨni Haramara Mɨmɨki paitɨ,
JOS 15:3 kaniuyehanekaitɨni wahetɨa Terɨkaxi Memakuhe, makumawetsie Tsini kaniuyehanekaitɨni meta Karetsi-Waxineya wahetɨapaitɨ. Manata Ketsiruni, teikɨmana 'Araxi, nekutunikaitɨni Karika hepaɨtsita.
JOS 15:4 Manata 'Atsimuni meta 'Ekipitu 'akiyaritsie kanayenekaitɨni, haramara Meritexaniyutsie kaniye'akaitɨni. Mɨkɨ kanihɨkɨtɨni wahetɨa wakwie hakewa meuye'atɨkatei.
JOS 15:5 Wakwie manuye'atɨkatei tau manatineika hepaɨtsita Haramara Mɨmɨki manuye'atɨka kanihɨkɨtɨkaitɨni, Kurutani hatuxameyari manuyeniere ye'atɨkaitɨ. Wakwie manuye'atɨka wayeta mieme kanitsutɨkaitɨni, Kurutani 'akiyari manuyeniere harakuna mɨmɨki mayematsie,
JOS 15:6 teikɨmana kaneutiyunekaitɨni Weti-Kukura manata teikɨmana Weti-'Arawa meta Wuhani Xuweni nu'aya 'aiyaritsie.
JOS 15:7 Manata Rewixi hepa, mayeweritsie 'Akuhuxi, kanekutunikaitɨni teikɨmana Kirikari hepatsie, 'Arumini hɨxie teikɨmana, mayeweritsie hetɨa. 'Enitsemetsi 'akiyari 'utɨa kaneutayunekaitɨni mana kaniye'akaitɨni 'Enixukeri paitɨ.
JOS 15:8 Manata mayeweri Weni-Hinuni hepaɨtsita kewutseutsixi wakiekari hetɨa tatsɨari Kerutsareme. Hɨritsie kaneutiyunekaitɨni mayeweri Hinuni 'utata, mayeweri Xepahini heima.
JOS 15:9 Mana hɨritsie wakwie kaneutayunekaitɨni haixa Netuhaki matiniere, manata kiekari mukumanetsie 'Epuruni hɨriyaritsie Wará paitɨ kaniye'atɨkateitɨni Kiriati-Yeharini titewakametsie.
JOS 15:10 Manata nekutunikaitɨni Wará hetɨa, Tsehixi hɨriyaritsie hepa kaneutayunekaitɨni, teikɨmana kaneutiyunekaitɨni Yeharini hɨriyari 'etsata kaniye'atɨkateitɨni, mɨtitewakai meta Ketsaruni, manata Weti-Tsemetsi hepatsie, Timinaha 'uyehanetɨ.
JOS 15:11 Manata 'Ekuruni heima, Wará hɨriyari warita kani'inɨaritɨkaitɨni, Tsikuruni paitɨ kaneutayunekaitɨni, Kawineri kaniye'atɨkateitɨni. Wakwie manuye'atɨka haramaratsie kaneukawekaitɨni.
JOS 15:12 Wakwie manuye'atɨka tau manukayeika muyeka kani'inɨariyaritɨkaitɨni haramara Meritexaniyu. 'Ikɨ kanihɨkɨtɨni Kura xiɨyarimama wakwie kemɨreu'atɨkatei.
JOS 15:13 Yawé kemainekai, Kutsuhexi Karewi Kepune nu'aya kwie yayeume kaniyetuirieni Kura kwieyaritsie mieme. Mɨkɨ kwie kanihɨkɨtɨni Kiriati-'Ariwa, Hewuruni tɨtɨ ('Ariwa 'anakitsixi teɨteriyari wa'ukiyari kanayani).
JOS 15:14 Karewi yuhaikame kaniwara'iwa 'Epuruni kiekariyaritsie 'Anaki xiɨyarimama: Tsetsahi titewakame, 'Akimani meta Tarimahi.
JOS 15:15 Mana mɨyetɨa kananutiyani Rewixi kiekatari watakwinike, mɨkɨ kiekari meripaitɨ katinitewakaitɨni Kiriati-Tsepexi.
JOS 15:16 Mɨpaɨ kaniutayɨni: «Kemɨ'ane 'uki kiekari Kiriati-Tsepexi mɨtamieni, neniwe nekaniwitɨtɨamɨkɨ 'Akatsa mɨtitewa».
JOS 15:17 Hikɨ 'Utunieri titewatɨ Kenatsi nu'aya Karewi matsuya Kiriati-Tsepexi kana'iwa 'ana 'Akatsa kaniutiwitɨni.
JOS 15:18 Kepauka 'Akatsa munua, 'Utunieri mɨpaɨ katinitaxatɨani yupaapa kwie mɨtawawirienikɨ. 'Anakayaku yupuxutsie 'Akatsa, Karewi kanita'iwawiya: ―¿Ketita perayexeiya?
JOS 15:19 Mɨkɨ mɨpaɨ rehɨawe: ―Neuxei tawarita neheima keneukaye'a, 'ariri Nekexi kwieyari pemɨnetsi'uxatɨa, hikɨta haixa 'ɨarime keneneuxatɨa. Mɨpaɨ Karewi yuniwe haixa katiniyetuirieni kanixatɨani hɨri 'amanutitewatsie meta muweritsie.
JOS 15:20 'Ikɨ pɨhɨkɨ kwie xapayari memɨyetuiriyarie Kura xiɨyarimama:
JOS 15:21 Kiekarite watsutɨa miemete Kura nuiwariyari hetsiemieme, Nekexi kwieyaritsie miemete, 'Erumi kwieyari maka'atɨka: Kawɨtseri, 'Eraxi, Kakuxi,
JOS 15:22 Kinaha, Rimuna, 'Arara,
JOS 15:23 Tseretsi, Katsuxi, 'Itinatsi,
JOS 15:24 Tsipi, Tereni, Weharuti,
JOS 15:25 Katsuxi-Karata, Keriuti, Ketsiruni (mɨmatiwatsiere Katsuxi),
JOS 15:26 'Amani, Tsema, Murara,
JOS 15:27 Katsaxi-Kara, Hetsimuni, Weti-Pereti,
JOS 15:28 Katsaxi-Tsuhari, Weritsewa, kiekari 'auriena mamanetɨka,
JOS 15:29 Wará, 'Ihini, 'Etseni,
JOS 15:30 'Eriturari, Ketsixi, Kuxima,
JOS 15:31 Tsikɨraki, Marimana, Tsanitsana,
JOS 15:32 Rewa'uti, Tsirikini, 'Ahini meta Ximuni, kanihɨkɨtɨkaitɨni, xeitewiyari heimana 'atanauka kiekarite yu'aurie heixeiyatɨkaime 'etsiyeyeume.
JOS 15:33 Muweritsie: 'Etsitahuri, Tsura, 'Atsena,
JOS 15:34 Tsanuha, 'Enikanini, Tapuhaki, 'Enami,
JOS 15:35 Karimuti, 'Arurani, Tsuku, 'Atseka,
JOS 15:36 Tsakarahini, 'Aritahini, Kerera meta Kererutahini, tamamata heimana nauka kiekarite yu'aurie heixeiyatɨkaime 'etsiyeyeume.
JOS 15:37 Tsenahani, Karatsa, Mirari-Kahari,
JOS 15:38 Rirehani, Mitsipa, Kuteri,
JOS 15:39 Rakixi, Wutsikati, 'Ekuruni,
JOS 15:40 Kawuni, Rakimatsi, Kitɨrixi,
JOS 15:41 Kereruti, Weti-Rakuni, Nuhama meta Makera, tatsɨari, tamamata heimana 'ataxewi kiekarite yu'aurie hexeiyatɨkaime 'etsiyeyeume.
JOS 15:42 Riwina, 'Etexi, 'Atsani,
JOS 15:43 Kihita, 'Atsena, Netsiwi,
JOS 15:44 Kehira, 'Akitsiwi meta Maretsa, tatsuari, 'atanauka kiekarite yu'aurie hexeiyatɨkaime 'etsiyeyeume.
JOS 15:45 'Ekuruni, meta kiekari 'auriena mamanetɨka,
JOS 15:46 mana haramara manuyekapaitɨ ye'atɨkaitɨ 'Atsiruri, meta kiekari 'etsimɨyeyeu,
JOS 15:47 'Atsiruri kiekari 'auriena mamanetɨka 'etsimɨyeyeu meta Kahatsa kiekari 'auriena mamanetɨka 'etsimɨyeyeu, 'Ekipitu 'akiyaritsie paitɨ meta mukuweritsie paitɨ haramara Meritexaniyu.
JOS 15:48 Muhɨriyatsie: Tsamixi, Katixi, Tsuku,
JOS 15:49 Rana, Kiriati-Tsana (mɨtimatiwatatsiere Rewixi),
JOS 15:50 'Anawi, 'Etsitemuha, 'Anini,
JOS 15:51 Kutseheni, Huruni meta Kiru, naitɨri tamamata heimana xewi kiekariyari heixeiyatɨkaime 'etsiyeyeume kiekari yu'aurie.
JOS 15:52 'Arawi, Ruma, 'Etsani,
JOS 15:53 Yanuni, Weti-Tapuhaki, 'Apeka,
JOS 15:54 Humɨta, Kiriati-'Ariwa (mɨtitewatsiere Hewuruni) meta Tsihuxi, naitɨ 'atanauka kiekariyari 'etsiyeyeume hexeiyatɨkaime.
JOS 15:55 Mahuni, Kaximeri, Tsipi, Yuta,
JOS 15:56 Ketsireri, Kurehani, Tsanuha,
JOS 15:57 Kahini, Kiweya meta Timinaha, naitɨri tamamata kiekariyari 'etsiyeyeume hexeiyakame yu'aurie.
JOS 15:58 Karikuri, Wetsuxi, Keruxi,
JOS 15:59 Maharati, Weti-'Anuti meta 'Eritekuni, naitɨri 'ataxewitɨ kiekari yu'aurie heixeiyakame 'etsiyeyeume.
JOS 15:60 Kiriati-Wahari (titewatɨtatsiere Kiriati-Yeharini) meta Xawaha, 'etsiyeyeume hexeiyakame kiekari.
JOS 15:61 Makumawetsie: Weti-'Arawa, Mirini, Tsekaka,
JOS 15:62 Niwitsani, Kiekari 'una maxuawe meta 'Enikari, naitɨri 'ataxewi paɨmetɨ kiekari, hexeiyatɨ kiekari 'etsiyeyeume yu'aurie.
JOS 15:63 Kura xiɨyarimama mepɨka'uyɨwekaxɨa memɨwarayeweiyakɨ kewutseutsixi Kerutsareme kiekariyaritsie, hikɨ mɨkɨ mana mekanititeni Kura xiɨyarimama wahamatɨa.
JOS 16:1 Kwie Kutse nuiwarimama wahetsiemieme kanitsutɨkaitɨni hatuxame Kurutanitsie, Keriku mieme haixa matinenieretsie 'aurie tau manatineika hepatsie, manata muhɨriyatsie Weteri kaneutiyunekaitɨni, meta makumawetsie.
JOS 16:2 Manata Weteri, manuyɨne Rutsi, 'arikitsixi wakwie makuma kaneutayunekaitɨni 'Atsitaruti paitɨ,
JOS 16:3 manata kapiretitsixi wakwie makuma hepatsie kaneutayunekaitɨni meta Weti-Kuruni hetɨa mieme kwieyaritsie metatsiere Ketsehexi, kaniye'akaitɨni haramaratsie Meritexaniyu.
JOS 16:4 Mɨpaɨ Manatsexi meta 'Epɨrahini wanuiwarima mekateniyetuiriyarieni mɨkɨ kwie, Kutse nuiwarimama.
JOS 16:5 'Ikɨ kwie kanihɨkɨtɨni 'Epɨrahini xiɨyarimama memɨyetuiriyarie yuxexuitɨ: Tau manatineika hepatsie 'Ataruti-'Araxi tsutɨtɨ Weti-Kuruni yeta paitɨ ye'atɨkaime,
JOS 16:6 kaniye'atɨkateitɨni haramaratsie paitɨ Meritexaniyu. Mana Mikimetati, yeta mukuma, hekutunitɨ tau manatineika hepatsie kiekari Tanati-Tsiru makuma, Kanuha mɨtiyetewatsie kaniye'atɨkateitɨni.
JOS 16:7 Manata kanatinekaitɨni Kanuha 'Atsitaruti meta Nara paitɨ, Keriku 'uyekaitɨ hatuxame Kurutani ye'atɨkaime.
JOS 16:8 Meta Tapuhaki kaniuyehanekaitɨni tau makayuyuipike 'aki Kanaha manuyekatsie, haramara Meritexaniyutsie kaniye'atɨkateitɨni. Mɨkɨ kwie kanihɨkɨtɨni memɨyetuiriyarie 'Epɨrahini xiɨyarimama.
JOS 16:9 Mɨkɨ kwie tsiere neutinɨkaitɨni kiekari meta 'auriena mamanetɨka Manatsexi kwieyatsie mieme.
JOS 16:10 Mɨkɨ 'Epɨrahini xiɨyarimama Kananeutsixi mepɨkawarayewei Ketsehexi memukutekai, wahamatɨa memu'uwanikɨ mekaniwarupitɨani, hikɨ tukaritsie kemɨtiyɨane hepaɨ, meteniwaruta'uximayatsitɨani waɨriyarika mewapitɨatɨ.
JOS 17:1 Metatsiere Manatsexi kaniuxatɨarieni kwie yuxaɨta meixeiyanikɨ, Kutse mɨmatɨarieyatɨkaikɨ. Makixi, Manatsexi matɨarieya Karaharitsixi pɨwatutsitɨkai, kaniuxatɨarieni Karaha meta Watsani mukuyatɨkaikɨ.
JOS 17:2 Hipatɨta Manatsexi xiɨyarimama yaxeikɨa mekaniuxatɨarieni yukwie: 'Awihetsexi, Kere, 'Atsirieri, Tsikeni, Hepexi meta Tsemira. Mɨkɨ Manatsexi mekanixiɨyarimamatɨkaitɨni Kutse nu'aya.
JOS 17:3 Mɨpaɨ katiniɨyɨni Tserupekari Hepexi niweya, Karaha teukarieya, Manatsexi tutsieya, 'ukari xeikɨa kaniwarayexeiya, mɨpaɨ mekatenitetewakaitɨni: Makira, Nuha, Kukɨra, Mirika meta Tiritsa.
JOS 17:4 Mɨkɨ mawari wewiwame 'Eriyatsaxi hɨxie mekaniti'uni, meta Kutsuhexi hɨxie Nuni nu'aya meta 'ixaheritsixi wa'ukiyarima wahɨxie, mɨpaɨ mekateniwarutahɨawe: «Yawé mɨpaɨ Muitsexi katiniuta'aitɨani kename kwie xetatsiyetuirienikekai tahetsiemieme mayanikɨ». Hikɨ Kutsuhexi mɨpaɨ katiniuyurieni Yawé kemutayɨkai.
JOS 17:5 Manatsexi xiɨyarimama mekaniuxatɨarieni tamamata wahetsiemieme, Karaha meta Watsani teka'inɨatatɨ, Kurutani 'anutaɨye tau manatineika hepatsie mɨti'ane.
JOS 17:6 Mɨkɨtɨtɨ mɨpaɨ pɨtiuyɨ Manatsexi niwemama 'ukarawetsixi mepɨyetuiriyarie, 'ukitsi tekawa'inɨatatɨ memuxatɨarie. Hipatɨta Manatsexi xiɨyarimama Karaha kwieyari mekaniuxatɨarieni.
JOS 17:7 Manatsexi kwieyari mɨpaɨ kaniyeukaitɨni tsutɨtɨ 'Atsexi, Mikimetati ye'atɨkaitɨ, mɨkɨ pukumakai Tsikeni 'aurie tau manatineika hepatsie. Manata ye'atɨkaitɨ tatsutɨa neukayunekaitɨni, Yatsuwi kwieyaritsie paitɨ Tapuhaki mɨrakutewatsie.
JOS 17:8 Manatsexi Tapuhaki kwieyari katinipiinieyatɨkaitɨni, mɨkɨta Tapuhaki kiekariyari 'Epɨrahini xiɨyarimama pɨta katiniwapiinitɨkaitɨni, Manatsexi kwieyari maka'atɨkatsie mukumakaikɨ.
JOS 17:9 Mana ye'atɨkaitɨ kaniumiekaitɨ watsutɨa, wayetata 'aki manuyeka Kanaha heukayunetɨ haramara Meritexaniyu. Muwa mɨtiuyehane waɨkawa kiekari 'Epɨrahini hetsɨa miemete mekaniuyutinɨni kiekari Manatsexi hetsɨa miemete wahamatɨa.
JOS 17:10 Watsutɨa mieme kwie 'Epɨrahini tinipiinieyatɨkaitɨni, Manatsexi meta wayeta mieme kwie. Manatsexi kwieya niye'atɨkateitɨni haramara Meritexaniyutsie 'Atsexi kwieya maye'atɨka kaniye'atɨkateitɨni, meta tau manatineika hepatsie 'Itsakaxi kwieya maka'atɨkatsie.
JOS 17:11 'Itsakaxi kwieya maka'atɨka meta 'Atsexi mɨkɨ wahixɨapa, Manatsexi xiɨyarimama kiekari mekanexeiyakaitɨni yu'aurie heixeiyakame 'etsiyeyeume: Wetsehani, 'Iwurehami, Ruxi, 'Eniruxi, Tanaki meta Mekiru. Xapatsie mɨka'uxa hairiekatsie kanihɨkɨtɨkaitɨni Naputi.
JOS 17:12 Manatsexi xiɨyarimama 'ikɨ kiekaritsie mepɨkatiyaxixɨ, kananeutsixi memɨka'itauniekaikɨ mɨkɨ kiekarite.
JOS 17:13 Kepauka 'ixaheritsixi waukawa memakɨ, mekateniwaruta'aitɨani mɨkɨ kananeutsixi, peru mepɨka'uyɨwekaxɨa memɨwarayenɨ'anikɨ yuheyemekɨ.
JOS 17:14 Kutse nuiwarimama Kutsuhexi mɨpaɨ mekateniutahɨawe: ―¿Titayari kwie 'etsiyeume xeikɨa xetate'uxatɨa? tame tepɨtamɨire, Yawé waɨkawa 'aixɨa pɨtatsiyurie.
JOS 17:15 Hikɨ Kutsuhexi mɨpaɨ katiniwarutahɨawe: ―Metsɨ xeniu xekaniyuwaɨkawani 'etsitiyewata 'Epɨrahini hɨriyari, xekenehu kɨyexi 'amupapameyatsie peretseutsixi meta xepahitsixi wakwieyaritsie, mana xewatatɨwetɨ xekenetiteni.
JOS 17:16 Kutse xiɨyarimamata mɨpaɨ mekaniutiyuani: ―Mɨkɨ kwie muhɨriya 'etsipɨyewa, manata kananeutsixi memɨtitei kaxetate tepɨakɨ memɨwewiyatɨka mepɨwarexeiya, Wetsahani kiekatari tsiere kiekari 'auriena mamanetɨka tatsɨari mayeweri Ketsireri.
JOS 17:17 Hikɨ Kutsuhexi 'Epɨrahini meta Manatsexi nuiwarimama waɨkawa kaniwarutuika, Kutse nuiwarimama: ―Xeme xekaniyumɨireni waɨkawa tɨrɨkariya xekanexeiyani. Mɨkɨ kwie xeikɨa xehexeiyatɨ xepɨka'akɨne,
JOS 17:18 matsi hɨritsie muhukuyatsie xehetsiemieme kanayeimɨkɨ. Xekenetawata mana xekenetiyaxi mɨkɨ kwieyari hakewa meuka'atɨka. Tsepanetɨ kananeutsixi kaxetate tepɨakɨ memɨwewiyatɨka memɨwarexeiya, xeme xekaniwarayeweiyakuni.
JOS 18:1 Kepauka mɨkɨ kwieyaritsie 'ixaheritsixi memɨte'uta'aitaxɨ, yunaitɨ mekaniuyukuxeɨrieni Tsiru mɨrakutewatsie, 'ixuriki tukiyari manuwekai.
JOS 18:2 'Ana tukaritsie 'akuxi mekaniyuhayewatɨwekaitɨni me'atahutatɨ wa'iwama mekaheixeiyatɨ yukwie.
JOS 18:3 Hikɨ Kutsuhexi mɨpaɨ 'ixaheritsixi katiniwarutahɨawe: «¿Kepaukake xeme yukwietsie xepɨyehu Yawé mɨxexatɨa xe'ukiyarima wakakaɨyari?
JOS 18:4 Yuhahaikakame xekeniwarutihɨawixɨa nemɨwaranɨnɨ'anikɨ memɨnieriyukɨ xapatsie memɨte'aka'utɨanikɨ. Me'axɨame,
JOS 18:5 mekaniti'inɨatakuni kwie 'atahuta paɨmeme. Kura xehetɨa kanikunakamɨkɨ yukwie, Kutse xiɨyarimamata wayeta.
JOS 18:6 Kepauka xemeinɨni xe'i'utɨatɨ xekeneneyetuiri, nekanixeyetuiriemɨkɨ 'inɨarikɨ kemɨ'anetsie mɨtinake Yawé hɨxie takakaɨyari.
JOS 18:7 Xekatenimaikari, rewitsixi kwie mepɨkayetuiriyarieni nixewitɨ tɨma, mɨkɨ pɨta 'uximayatsika memɨyetuiriyariekɨ mawari wewiwamete memɨhɨkɨtɨnikɨ Yawé hetsiemieme. Meta Kahari, Xuweni meta hixɨapa memɨ'axe Manatsexi wanuiwarima 'ari mekaniyetuiriyarieni yukwie Kurutani 'anutaɨye tau manatineika hepatsie. Muitsexi Yawé ti'uximayatsiriwame kaniwayetuirieni wapiini mɨrayanikɨ».
JOS 18:8 Kepauka 'ukitsi memuyuha'aritɨakai menieriyuka mɨkɨ kwieyaritsie, Kutsuhexi mɨpaɨ katiniwarutahɨawe: «Naime kwie xekenexeiya ya'ane xepɨnetsi 'atɨirieni xapatsie raye'ukame. Kepauka xemɨ'axɨani 'ena Tsiru, ne 'inɨarikɨ kwie nepɨxeta'iwitsitɨani Yawé hɨxie».
JOS 18:9 Mɨkɨ yametenikakɨne Kutsuhexi kemainekai, mekanakunuaxɨani Tsirutsie xapa mehahurietɨ raye'ukame, kiekari kemɨreumanetɨkatei meta 'atahuta tapari kwie 'inɨariyari.
JOS 18:10 Kutsuhexi mana kaniwaruta'iwitsitɨani Yawé hɨxie, kaniwaruxatɨani kwie mɨkɨ 'ixaheritsixi, kememuyukupapaɨmekai nuiwarite.
JOS 18:11 Wenikamini xiɨyarimama mekaniuxatɨarieni kememuyupaɨmekai niwemama. Mɨkɨ kwieyari kanikumakaitɨni Kura kwieyari makuma meta Kutse xiɨyarimama wakwie makuma wahixɨapa.
JOS 18:12 Wakwie manuye'atɨka katini'anekaitɨni haa manuyeka Kurutani, meta Keriku heima kaniye'atɨkateitɨni, hɨritsie kaneutiyunekaitɨni, makumawetsie Weti-'Aweni ye'atɨkaitɨ.
JOS 18:13 Rutsi mɨrakutewa kaneuyeyunekaitɨni, meta Weteri mɨrakutewa, 'Ataruti-'Araxi mɨrakutewapai heutayunetɨ, Weti-Kuruni tsutɨa mukuma hɨriyaritsie heutayunetɨ.
JOS 18:14 Manata hɨkɨa pɨta kaneukayunekaitɨni, tau manukayuyuipiketsie, ye'atɨkaitɨ Kiriati-Wahari, mɨtitewatsiere Kiriati-Yeharini, mɨkɨ Kiekari Kura mɨrawiya pɨhɨkɨtɨkai. 'Ikɨ pɨhɨkɨ tau makayuyuipike muyeka.
JOS 18:15 Tsutɨa muyekatsie nitsutɨkaitɨni Kiriati-Yeharini, tau makayuyuipiketsie, manata haixa matiniere Netuhaki ye'atɨ.
JOS 18:16 Weni-Hinuni hɨriyaritsie kaniukuhanekaitɨni, Xepahini mɨrayetewa heima. Hinuni mayeweritsie kaniuyehanekaitɨni, Kewutseutsixi wakiekari 'aurie mukɨatsarietsie, 'Enixukeri haixayari matiniere paitɨ kaniye'akaitɨni.
JOS 18:17 Manata kanititunekaitɨni teikɨmana hautiyunetɨ, 'Enitsemetsi kiekari makuma hepa, Keriruti kaniuyehanekaitɨni, 'Arumini hɨxie kaniuyehanekaitɨni, Wuhani Xuweni nu'aya 'aiyaritsie kaneukayunekaitɨni.
JOS 18:18 Manata kaneutayunekaitɨni hɨri matitei yeta, Weti-'Arawa mɨrayetewatsie hɨxie, manata 'Arawa mayeweritsie kaneukayunekaitɨni.
JOS 18:19 Manata Weti-Kukura yeta, manata mukuweritsie yeta Haramara Mɨmɨki hatetsitayaritsie, tatsɨari hatuxame Kurutani manuyenieretsie. Mɨkɨ kanihɨkɨtɨni kwie kemɨreu'atɨka wahetɨatsie.
JOS 18:20 Kurutani hatuxameyari kani'inɨaritɨkaitɨni kemɨreukatei, kwie kemɨreu'atɨkatei tau manatineika hepatsie. 'Ikɨ kanihɨkɨtɨkaitɨni Wenikamini xiɨyarimama wakwie kemɨreu'atɨkatei.
JOS 18:21 Wenikamini xiɨyarimama 'ikɨ kiekaritsie mekaniuyuhayewa: Keriku, Weti-Kukura, 'Emeki-Katsitsi,
JOS 18:22 Weti-'Arawa, Tsemarahini, Weteri,
JOS 18:23 'Awini, Paraha, 'Upɨra,
JOS 18:24 Kepaxi-'Amuni, 'Uhuni meta Kehewa, naitɨri tamamata heimana huta kiekariyari yu'aurie heixeiyatɨ 'etsiyeyeume.
JOS 18:25 Meta Kawahuni, Xama, Weruti,
JOS 18:26 Mitsipa, Kapira, Mutsa,
JOS 18:27 Xekeni, 'Ixiperi, Tarara,
JOS 18:28 Tsera, 'Erepa, Kewutsi, mɨtitewatsiere Kerutsareme, Kiweya, meta Kiriati, naitɨ tamamata heimana nauka kiekariyari yu'aurie heixeiyakame 'etsiyeyeume. 'Ikɨ memɨteyetuiriyarie Wenikamini xiɨyarimama yuxexuitɨ mepɨhɨkɨ.
JOS 19:1 Tsimehuni xiɨyarimama hutarieka miemete kwie memɨyetuiriyarie mekanakɨne, mɨkɨ wakwie Kura kwieyari taɨta kaniyemakaitɨni.
JOS 19:2 'Ikɨ kiekari hetsiena mieme kanihɨkɨtɨkaitɨni: Weritsewa, (Tsawa tsiere manɨyɨne), Murara,
JOS 19:3 Katsaxi-Tsuhari, Wara, 'Etseni,
JOS 19:4 'Eriturari, Weturi, Kuxima,
JOS 19:5 Tsikɨraki, Weti-Marikawuti, Katsaxi-Tsutsa,
JOS 19:6 Weti-Rewahuti, meta Tsarukeni, naitɨ kanihɨkɨtɨkaitɨni tamamata heimana haika kiekariyari 'auriena hamanetɨkaitɨ,
JOS 19:7 meta 'Ahini, Ximuni, 'Etexi, meta 'Atsani, naitɨ nauka kiekariyari yu'aurie heixeiyakame.
JOS 19:8 Metatsiere kiekarite mumanetɨkatei Waratiwexi kiekariyari makuma paitɨ memu'axe, Xamati mɨrakutewatatsiere Nekexi kwieyaritsie. Mɨkɨ kanihɨkɨtɨkaitɨni kwie Tsimehuni xiɨyarimama mɨwahetsiemiemetɨkai.
JOS 19:9 Kura kwieyari 'akaniyeukaitɨni matsi kememɨyupaɨmekai xiɨyarimama, 'ayumieme Tsimehuni xiɨyarimama 'etsiyeume mekaniuxatɨarieni Kura kwieyaritsie mieme.
JOS 19:10 Tsawuruni xiɨyarimama hairieka miemete mekanakɨne kwie memɨyetuiriyarietsie. Wakwie manu'axe Tsari katinakutewakaitɨni.
JOS 19:11 Tau makayuyuipike hepatsie kaneutayunekaitɨni Mararaha mɨrakutewatsie, kaniye'akaitɨni Rawetseti, 'aki manuyeka paitɨ Kunehani hɨxie.
JOS 19:12 Manata Tsari mɨrakutewatsie kaneutayunekaitɨni, tau manatineika hepatsie, 'atsita Kitsiruti-Tawuxi kwieyaritsie paitɨ, manata Tawerati paitɨ, manata teikɨmana kaneutiyunekaitɨni Kapiha paitɨ.
JOS 19:13 Manata kaniuye'atɨkateitɨni Kati-Kepexi heutayunetɨ metatsiere 'Itakatsini, Ximuni paitɨ ye'atɨ Neka mɨrakutewatsie yetunitɨ.
JOS 19:14 Manatatsiere nekutunekaitɨni teikɨmana Kanatuni ye'atɨ, Keteri kaniunɨkaitɨni mayeweritsie.
JOS 19:15 Mɨkɨ kwieyaritsie tamamata heimana huta kiekariyari kanikumanekaitɨni, mɨkɨ wahamatɨa Katati, Narari, Tsimiruni, 'Irara meta Wereni.
JOS 19:16 'Ikɨ kwie kanihɨkɨtɨni Tsawuruni xiɨyarimama wahetsiemieme memɨyetuiriyarie, kiekarite heutinɨkame meta 'etsimɨyeyeukai.
JOS 19:17 'Itsakaxi xiɨyarimama naurieka mekanakɨne yukwie memɨyetuiriyarietsie, kememɨyupaɨmekai.
JOS 19:18 Mɨkɨ kwieyaritsie kiekari mukumanekai kanihɨkɨtɨkaitɨni: Ketsireri, Ketsuruti, Tsuneni,
JOS 19:19 Kaparahini, Tsikuni, 'Anakarati,
JOS 19:20 Xawiti, Tsitsuni, 'Awetsi,
JOS 19:21 Xemeti, 'Enikanini, 'Enara meta Weti-Patsetsi.
JOS 19:22 Wakwie kaniye'atɨkateitɨni Tawuxi paitɨ, Tsakatsima meta Weti-Tsemetsi, haa manuyeka heukayunetɨ Kurutani. Naitɨ, tamamata heimana 'ataxewi kiekariyari
JOS 19:23 'Itsakaxi xiɨyarimama kaniwahetsiemiemetɨkaitɨni.
JOS 19:24 'Atsexi xiɨyarimama 'auxɨwirieka kwie memɨyetuiriyarie mekanakɨne.
JOS 19:25 Mɨkɨ kwieyaritsie kiekari kanikumanekaitɨni Kerikati, Kari, Weteni, 'Akitsahapi,
JOS 19:26 'Aramereki, 'Amari meta Mitsehari. Wakwie kaniye'atɨkateitɨni, tau makayuyuipike hepatsie, Kaximeru hɨriyaritsie meta Tsikuxi-Riwinati.
JOS 19:27 Manata nekutunikaitɨni tau manatineika hepatsie Weti-Rakuni hepatsie meta kaniye'akaitɨni Tsawuruni, Keteri mayeweritsie. Manata teikɨmana Weti-'Emeki meta Neyeheri, kaniutihanekaitɨni Kawuri mɨrakutewatsie 'aurie.
JOS 19:28 Manata 'Awuruni hepatsie, Xekuwi, Hamuni meta Kanaha, meta kiekari mɨmariwe Tsiruni paitɨ mukuma.
JOS 19:29 Manata nekutunikaitɨni Xama hepaɨtsita, manata kiekari Tiru mɨtɨrɨkaɨye. Manata nekutunikaitɨni Kutsa mɨrayetewatsie manata haramaratsie Meritexaniyu.
JOS 19:30 Naitɨ kanayeikakaitɨni xeitewiyari heimana huta, naitɨ 'inɨaritɨ Makarewi, 'Akitsiwi, 'Uma, 'Apeki meta Xekuwi.
JOS 19:31 'Ikɨ kwie 'Atsexi xiɨyarimama memɨyetuiriyarie kanihɨkɨni, kiekarite heutinɨkame meta 'etsimɨyeyeu.
JOS 19:32 'Ataxewirieka mekanakɨne Nepɨtahari xiɨyarimama kwie memɨyetuiriyarietsie.
JOS 19:33 Wakwie kaniye'atɨkateitɨni Kerepi tsutɨtɨ meta kɨye 'amupa Tsananini manuwe, 'Araminekewi hepatsie kaneutayunekaitɨni meta Kawineri hepatsie, manata Rakuni hepatsie 'atsita haa Kurutani manuyeka.
JOS 19:34 Wakwie manuye'atɨkatei tau makayuyuipike hepatsie, kaniuyehanekaitɨni 'Atsinuti-Tawuxi, meta kaniuyehanekaitɨni Hukuki. Tsawuruni kwieyari 'aurie kaniuyehanekaitɨni tatsutɨa hepatsie, meta 'Atsexi kwieyari maka'atɨkatsie kaniuyehanekaitɨni tau makayuyuipike hepatsie, metatsiere hatuxame Kurutani manutika kaniuti'atɨkateitɨni tau manatineika hepatsie.
JOS 19:35 Kiekari mɨkɨ kwieyaritsie mukumanekai mɨtɨrɨkawi kanihɨkɨtɨkaitɨni: Tsirini, Tsexi, Kamati, Xakati, Kinereti,
JOS 19:36 'Aramaha, Xama, Katsuxi,
JOS 19:37 Tseretsi, 'Erurehi, 'Enikatsuxi,
JOS 19:38 'Iruni, Mirari-'Eri, Kureni, Weti-'Anati meta Weti-Tsemetsi. Naitɨ tamamata heimana 'atanauka kanayeikani yu'aurie heixeiyakame 'etsiyeyeume.
JOS 19:39 'Ikɨ kwie Nepɨtahari xiɨyarimama memɨyetuiriyarie kanihɨkɨtɨni naitɨ kiekarite meta 'etsimɨyeyeu yɨnɨkame.
JOS 19:40 'Atahutarieka kanayani Rani xiɨyarimama kepauka kwie memɨyetuiriyarie.
JOS 19:41 Niyunɨkaitɨni Tsura kwieyari, 'Etsitahuri, 'Ixi-Tsemetsi,
JOS 19:42 Tsakariwini, 'Ayaruni, Ketura,
JOS 19:43 'Eruni, Timinati, 'Ekuruni,
JOS 19:44 'Eriteke, Kiwetuni, Warati,
JOS 19:45 Kehu, Wene-Weraki, Kahati-Ximuni,
JOS 19:46 Mekarikuni meta Xakuni, kwie Kupe hɨxie mukumakai.
JOS 19:47 Rani xiɨyarimama mekate'unakeka kwie keyeume memuxatɨariekai, Retseni kiekariyaritsie mekanekɨne. Kepauka mana memu'axɨa yunaime mekaniwarukwini mana kiekatari. Hikɨ mana Rani xiɨyarimama mekanitiyaxe Rani mekateniterɨwa kiekari, yututsi mema'eriwanikɨ.
JOS 19:48 Mɨpaɨ katiniumare Rani xiɨyarimama wakwie, naitɨ kiekarite meta 'etsimɨyeyeu.
JOS 19:49 Kepauka mɨtiutahayewaxɨ kwie wayetuiriwatɨ kemɨ'ane mɨwahetsiemiemetɨkai, teɨteri 'ixaheritsixi Kutsuhexi Nuni nu'aya kwie mekaniyetuirieni hetsiena mɨmiemetɨnikɨ.
JOS 19:50 Mɨpaɨ mekatenaye'atɨani Yawé kemainekai. Kutsuhexi kaniyetuiriyarieni kiekari Timinati-Tsera, 'Epɨrahini muhɨriyatsie mɨkamakai. Mɨkɨ kanita'iwaukaitɨni, 'aixɨa kaniyurieni mana 'ukaitɨ kanayani.
JOS 19:51 Mɨpaɨ mekateniutahayewa kwie mewayetuiriwatɨ mɨkɨ mawari wewiwame 'Eriyatsaxi, Kutsuhexi meta 'ukirawetsixi 'ixaheritsixi. Mɨkɨ 'inɨarikɨ memɨteyuriekai Tsiru mɨrakutewatsie mekateniyuriekaitɨni, Yawé hɨxie, 'Ixuriki Tukiyari mɨranutakɨkatɨretsie.
JOS 20:1 Yawé Kutsuhexi mɨpaɨ katiniutahɨawe:
JOS 20:2 «'Ixaheritsixi mɨpaɨ ketiniwarutahɨawi kiekarite hipame memɨtixatakɨ muwa memɨyuti'awiwietanikɨ, kenemutayɨ Muitsexi 'uyeikakaku 'akuxi.
JOS 20:3 Mɨpaɨ xɨka kemɨ'ane mɨtiyumieni ka'imaime mɨkɨ 'ana muwa muyuti'awieta pɨyɨweni mɨkɨ kiekaritetsie 'iya yaxeikɨa 'iyurienike mumierie 'iwaya 'iweiyakaku.
JOS 20:4 »Kemɨ'ane muyuta'una mɨkɨ xeime kiekaritsie, mana kitenie kaniyutaxatamɨkɨ kemɨtiuyuri naime 'ukirawetsixi mana kiekatari wahɨxie. Mɨkɨ 'ukirawetsixi mekanitanaki'erikuni mana kiekaritsie mekanixatɨakuni kii wahamatɨa muyeikanikɨ.
JOS 20:5 Xɨka 'enukuweiya xewitɨ 'imienike mɨrapinekɨ, xɨka mɨkɨ kiekaritsie ye'ani 'ukirawetsixi mepɨka'iyetuirieni, mɨkɨ 'ari memitanaki'eriekaikɨ mɨtiuyumi ka'imaika nitixaɨtɨ karayexeiyatɨ hamatɨana.
JOS 20:6 Mɨkɨ hetsiena mɨrahɨiwa mana kaniyuhayewakamɨkɨ kiekaritsie kepaukake yunaime teɨteri wahɨxie muyutaxata yamemɨtehetimanikɨ hetsiena mieme 'aixɨa mɨtiyɨnikɨ meta kepaukake mɨkɨ mawari wewiwamete tiwa'aitɨwame mɨmɨni. 'Anake heitserie pexeiyani hetsiena mɨrahɨiwa munuanikɨ yukie meta yukiekaritsie hakewa meyuta'unakai meripaitɨ».
JOS 20:7 Kutsuhexi kemɨtiu'aitakai mekatenaye'atɨani, 'ixaheritsixi kiekari mekaniutixata Tseretsi Karereya mɨrawiya Nepɨtahari kwieyaritsie muhɨriyatsie, Tsikeni 'Epɨrahini kwieyaritsie muhɨriyatsie, meta Kiriati-'Ariwa mɨpaɨ pɨtimatiwata Hewuruni Kura kwieyaritsie muhɨriyatsie.
JOS 20:8 Kurutani 'anutaɨye, haika kiekariteyari mekaniutixata: Wetsexi, makumawetsie meta makuweritsie mukuma Xuweni kwieyaritsie, Xamuti Karaha kwieyaritsie, Kahari xiɨyarimama wakwietsie, meta Kurani Watsani kwieyaritsie Manatsexi kwieyaritsie.
JOS 20:9 Yunaitɨ 'ixaheritsixi yatɨni 'ateewa kiekatari kemɨ'ane mɨtiyumieni ka'imaime muyuta'una pɨyɨweni mɨkɨ kiekaritetsie, mɨka'imienikɨ kemɨ'ane mikuwaune 'imienike, meka'itaxanetawekaku 'akuxi teɨteri memayuxeɨrietsie.
JOS 21:1 Rewitsixi wa'ukiyarima 'ahurawa mekaniukɨne 'Eriyatsaxi hetsɨa meta Kutsuhexi Nuni nu'aya hetsɨa meta memanuyetei 'ixaheritsixi waxiɨyarima wahetsɨa,
JOS 21:2 Tsirutsie memɨyuxeɨriekai yunaitɨ, Kanani kwieyaritsie mɨpaɨ mekateniwarutahɨawe: «Yawé mɨpaɨ pɨtiu'aitaxɨ Muitsexi mɨpaɨ pɨtiutahɨawixɨ, kename xeme xetatsixatɨanikekai kiekarite mana temɨtitenikɨ, meta tatewama wakwie mana memu'uwanikɨ».
JOS 21:3 Hikɨ 'ixaheritsixi, Yawé kemainekai mekateniwayetuirieni yupiini, 'ikɨ kiekarite meta kwie hakewa memɨtehetahɨni mɨkɨ rewitsixi:
JOS 21:4 Matɨari memɨyetuiriyarie yukiekari, mekaniyuta'iwa mɨkɨ rewitsixi Kuhati xiɨyarimama mekanakɨne. 'Ikɨ mawari wewiwame 'Aruni xiɨyarimama mekaniyetuiriyarieni tamamata heimana haikame, Kura, Tsimehuni meta Wenikamini kwieyaritsie miemete.
JOS 21:5 Hipatɨta memɨyuhayewaxɨ Kuhati xiɨyarimama mekaniyetuiriyarieni tamamata kiekarite 'Epɨrahini, Rani kwieyaritetsie meta hixɨapa memɨ'axe Manatsexi xiɨyarimama wakwietsie.
JOS 21:6 Keritsuni xiɨyarimama mekaniyetuiriyarieni, 'inɨarikɨ, tamamata heimana haika kiekariyari 'Itsakaxi, 'Atsexi meta Nepɨtahari wakwieyaritsie metatsiere Manatsexi xiɨyarimama hixɨapa memɨ'axe wakwieyaritsie Watsani mɨrakutewatsie.
JOS 21:7 Merari xiɨyarimama tamamata heimana huta kiekariyari mekaniyetuiriyarieni, Xuweni, Kahari metatsiere Tsawuruni xiɨyarimama wakwieyaritsie.
JOS 21:8 Mɨpaɨ mekateniuyurieni 'ixaheritsixi mekaniwaruxatɨani kiekarite meta kwie hakewa memɨtehetahɨnikekai mɨkɨ rewitsixi, Yawé Muitsexi kemɨrahɨawekai.
JOS 21:9 Yaxeikɨa katiniɨyɨni Kura xiɨyarimama wakwietsie meta Tsimehuni.
JOS 21:10 Kiekarite kemɨ'ane mutaxatsie 'Aruni nuiwarieya Kuhati xiɨyarimama wahetsie katiniunake, mɨkɨ wahetsie meri mɨtiunakixɨkɨ 'inɨari.
JOS 21:11 Mɨkɨ mekaniuxatɨarieni Kiriati-'Ariwa, tatsɨari Hewuruni, heuyutinɨkame kwie hakewa tewaxi memɨwaretahɨnikɨ, hɨritsie Kura kwieyaritsie ('Ariwa 'anakitsixi watutsi patɨa).
JOS 21:12 'Epuruni 'aurie kiekari mamanetɨkatei meta kwie, mepɨka'uxatɨarie rewitsixi, meripaitɨri kaniuxatɨariekaitɨni Karewi Kepune nu'aya.
JOS 21:13 Mɨkɨta Hewuruni (kiekari wahetsie mɨrahɨiwa memuyename), 'Aruni xiɨyarimama mekaniuxatɨarieni mɨkɨ kiekari heuyutinɨkame kwie mɨratihɨriwa: Riwina,
JOS 21:14 Katixi, 'Etsitemuha,
JOS 21:15 Huruni, Rewixi,
JOS 21:16 'Ahini, Yutahu meta Weti-Tsemetsi, 'atanauka kiekarite naitɨ kanihɨkɨtɨni.
JOS 21:17 Wenikamini kwieyaritsie mekaniuxatɨarieni kiekarite kwie heuyutinɨkame: Kawahuni, Kehewa,
JOS 21:18 'Anatuti meta 'Arimuni, nauka kiekariyaritsie.
JOS 21:19 Naitɨ kanakɨne tamamata heimana haika kiekariyari kwie mɨratihɨriwa heuyutinɨkame mawari wewiwamete memɨyetuiriyarie 'Aruni nuiwarimama.
JOS 21:20 Memuyuhayewaxɨ rewitsixi Kuhati nuiwarimama mekaniuxatɨarieni kiekari 'Epɨrahini kwieyaritsie.
JOS 21:21 'Epɨrahini hɨriyaritsie mekaniuxatɨarieni kiekari Tsikeni, kiekarite memayuti'awiwieta teɨteri teyukwikate. Yaxeikɨatsiere mekaniuxatɨarieni Ketsehexi,
JOS 21:22 meta Kiwɨtsahini metatsiere Weti-Kuruni, nauka kiekariyari kanayani kwie hexeiyakame hakewa memɨtehetihɨweni.
JOS 21:23 Rani kwieyaritsieta mekaniuxatɨarieni 'Eriteke, Kiwetuni,
JOS 21:24 'Ayaruni, meta Kahati-Ximuni, nauka kiekariyari kwie heutinɨkame mɨratihɨriwani.
JOS 21:25 Manatsexi xiɨyarimama hixɨapa memɨ'axe wakwietsie mekaniuxatɨarieni, Tanaki meta Kahati-Ximuni, huta kiekariyari kwie heutinɨkame mɨratihɨriwani.
JOS 21:26 Naitɨ kanayani tamamata kiekariyari kwie heuyutinɨkame mɨratihɨriwani, mekaniuxatɨarieni Kuhati xiɨyarimama memɨyuhayewakai.
JOS 21:27 Rewitsixi Keritsuni nuiwarimama mekaniuxatɨarieni huta kiekariyari kwie heutinɨkame mɨratihɨriwani, Manatsexi xiɨyarimama hixɨapa memɨ'axe wakwietsie: Kurani Watsani kwieyaritsie (kiekari memayuti'awiwieta teyukwikate memuyenametsie) meta Wetsitera.
JOS 21:28 'Itsakaxi xiɨyarimama wakwietsie mekaniuxatɨarie Tsitsuni, Tawerati,
JOS 21:29 Karimuti meta 'Enikanini, mɨyatɨtɨ nauka kiekariyari kwie heutinɨkame mɨratihɨriwani.
JOS 21:30 'Atsexi xiɨyarimama wakwietsie, rewitsixi mekaniuxatɨarieni Mitsehari, 'Awuruni,
JOS 21:31 Kerikati meta Xekuwi, naitɨ nauka kiekariyari kanayani kwie heutinɨkame mɨratihɨriwani.
JOS 21:32 Nepɨtahari xiɨyarimama wakwieyaritsie mekaniuxatɨarieni haika kiekariyari kwie heutinɨkame mɨratihɨriwani: Tseretsi (kiekari memayuti'awiwieta Karereya kwieyaritsie), meta kiekarite Kamuti-Ruxi meta Kaxitani.
JOS 21:33 Naitɨ kanayani tamamata heimana haika kiekariyari kwie heuyutinɨkame mɨratihɨriwani memuxatɨarie rewitsixi Keritsuni xiɨyarimama.
JOS 21:34 Mɨkɨ Merari xiɨyarieya, rewitsixi nuiwariyari wa'iwama, Tsawuruni xiɨyarimama wahetsɨa mekaniuxatɨarieni nauka kiekariyari, kwie heutinɨkame mɨratihɨriwani: Kunehani, Kaxita,
JOS 21:35 Rimina, meta Narari.
JOS 21:36 Xuweni xiɨyarimama wakwieyaritsie mekaniuxatɨarieni nauka kiekariyari kwie mɨratihɨriwani heutinɨkame: Wetsexi, Yahatsa,
JOS 21:37 Karemuti, meta Mepati.
JOS 21:38 Kahari xiɨyarimama wakwieyaritsie mekaniuxatɨarieni nauka kiekariyari kwie mɨratihɨriwani heuyutinɨkame: Xamuti-Karaha (kiekari memayuti'awiwieta memuyenametsie), Makanahini,
JOS 21:39 Hetsiwuni, metatsiere Katsexi.
JOS 21:40 Mɨpaɨ mekaniɨyɨni rewitsixi Merari xiɨyarimama, 'imaturieka nuiwari kiekari memɨyetuiriyarie, naitɨ tamamata heimana huta mekaniyetuiriyarieni.
JOS 21:41 Mɨkɨ rewitsixi naimekɨ mekaniyetuiriyarieni huta tewiyari heimana 'atahaika kiekari kwie mɨratihɨriwani heutinɨtɨkaime 'ixaheritsixi wakwieyaritsie.
JOS 21:42 Naitɨ kiekarite kaneixeiyatɨkateitɨni kwie mɨratihɨriwani heuyutinɨtɨkaime yu'aurie.
JOS 21:43 Mɨpaɨ katiniuyurieni Yawé kaniwayetuirieni kwie 'ixaheritsixi naime keyeukame muwaruxatɨakai watutsima, 'Ixaheri xiɨyarimama mana mekutetɨ mekanakɨne.
JOS 21:44 Yawé kaniwarupitɨani memɨka'uximatɨariekakɨ, mɨpaɨ pɨreye'atɨa watutsima meripaitɨ kemɨtiwarutahɨawixɨ, nixewitɨ memɨwaraye'unie pɨkawara'iwaxɨ, Yawé muwarupitɨakɨ memɨwara'iwakɨ yunaime 'axamemɨwayurikukai.
JOS 21:45 Yawé kemɨtiwarutahɨawixɨ 'ixaheritsixi naime kanaye'atɨani nixeime tɨma pɨka'anayetɨmai, matsi peye'atɨa xexuime kemɨre'utɨkatei.
JOS 22:1 Merikɨtsɨ Kutsuhexi Xuweni nuiwarimama, Kahari meta Manatsexi nuiwarimama hixɨapa memɨ'axe kaniwaruta'inieni,
JOS 22:2 hikɨ mɨpaɨ katiniwarutahɨawe: «Xeme naime 'aitsika xepaye'atɨa Muitsexi mɨxeyetuiri, Yawé ti'uximayatsiriwame. Yaxeikɨa, 'aitsika kenemɨtixeyetuiri xepeye'atɨa naime.
JOS 22:3 Ketemɨteheutewi hikɨ 'akuxi, xepɨkawaku'eiriwawe yu'iwama 'ixaheritsixi. Matsi xepeye'atɨa naime Yawé 'aitsikaya.
JOS 22:4 Hikɨta Yawé Kakaɨyari peye'atɨa kemɨtixe'utahɨawixɨ kwie puwayetuiri xe'iwama, hikɨta xekenakunuaxɨa yukie meta yukwietsie Muitsexi mɨxeyetuiri Yawé ti'uximayatsiriwame Kurutani 'anutaɨye tau manatineika hepatsie.
JOS 22:5 Meta xekeneyutɨrɨkariyani xemeye'atɨanikɨ 'aitsika 'inɨari niukiyari, Muitsexi kemɨraka'utɨa Yawé ti'uximayatsiriwame: Yawé yukakaɨyari xekenenaki'erieka, xekeneu'uwani kemɨtinake xekenaye'atɨaka 'aitsikaya, hamatɨana xekeneuhuni heitserie yu'iyarikɨ xeketene'uximayatsirieka meta naimekɨ yu'iyarikɨ 'aixɨa xeketeneyurieka».
JOS 22:6 Mɨpaɨ 'utayɨka Kutsuhexi Kakaɨyari kaniutawawirieni 'aixɨa memɨ'itɨariekakɨ, kaniwareutanɨ'axɨani yukie.
JOS 22:7 Hixɨapa me'atɨ Manatsexi nuiwarimama, Muitsexi kaniwayetuiriekaitɨniri Watsani kwieyari, hipameta mɨkɨ xiɨyari Kutsuhexi kaniwayetuirieni 'anataɨye Kurutani tau makayuyuipike hepatsie, mana matsi mekanikuyaxe yuwaɨkawatɨ 'ixaheritsixi. Matɨari 'anutaɨyetari, Kutsuhexi kaniwarenɨ'ani yukie, Xuweni xiɨyarimama meta Kahari xiɨyarimama wahamatɨa 'aixɨa kaniwaruyurieni Kakaɨyari wawirietɨ,
JOS 22:8 mɨpaɨ 'utaitɨ: «Xekenakunuaxɨa yukie 'aixɨa mɨti'ane xetehexeiyatɨ: huru, pɨrata, wurunitse, tepɨate, waɨkawa yukemarite meta waɨkawa tewaxi. Yunaitɨ xeketeneyumikwani 'iwamarixi tita xemɨtewarenawairi temɨwaraye'unie».
JOS 22:9 Hikɨ Xuweni meta Kahari waxiɨyarima meta hixɨapa me'atɨ manatsexi xiɨyarimama Tsiru mekanayekɨne Kanani kwieyaritsie, hakewa memeyuxeɨriekai yunaitɨ 'ixaheritsixi, mekanakunuaxɨani Karaha, kwie memɨyetuiriyariekaitsie 'aitsika kemainekai Yawé Muitsexi kemɨrahɨawekai.
JOS 22:10 Kepauka memu'axɨa, Kurutani hatuxame tetsita 'akuxi Kanani kwieyaritsie, huta nuiwariyari hixɨata memɨ'axe 'imeriyu mawari taiyame mekaniutawewieni.
JOS 22:11 Hipatɨ 'ixaheritsixi mekatenetimani kename Xuweni nuiwarimama, meta Kahari nuiwarimama metatsiere hixɨapa me'atɨ Manatsexi nuiwarimama mawari taiyame me'utawewiekai, Kurutani hatetsita, 'ixaheritsixi wakwietsie.
JOS 22:12 Hikɨ yunaitɨ mekaniuyukuxeɨrieni Tsiru mewatakwinike huta 'imeriyu nuiwari.
JOS 22:13 Mɨpaɨ mete'uxataka, 'ixaheritsixi Pinexi mekanenɨ'ani mawari wewiwamete wa'ukiyari 'Eriyatsaxi nu'aya Karaha kwieyaritsie mɨtixatamiekɨ.
JOS 22:14 Mɨkɨ hamatɨa mekaniuhukaitɨni tamamata yunaitɨ nuiwaritetsie memanuyetei 'Ixaheri xiɨyarimama memanuyetei.
JOS 22:15 Karaha me'u'axɨaka mɨpaɨ mekateniwarutahɨawe huta 'imeriyu xiɨyariyari:
JOS 22:16 ―Yunaitɨ Yawé hetsɨa memuyukuxexeɨriwa mepɨtemaiku, ¿titayari xete'iku'eiri 'ixaheritsixi takakaɨyari, titayari Yawé xekate'enie xete'iku'eiri, mawari taiyame titayari xete'utawewi?
JOS 22:17 ¿Kamɨtsɨ tixaɨtɨ tekatehetimaiwawe 'axaketemɨte'uyuri Pehuxi mɨreyetewatsie, 'akuxi 'aixɨa temɨkayuyuriwawe mɨkɨkɨ? ¿Kamɨtsɨ tekatemama ta'iwama yɨmɨiretɨ me'ukwikutɨtɨ?
JOS 22:18 ¿Titayari yaxeikɨa Yawé xekateheu'enie? Hikɨ xɨka xe'iku'eirieni mɨkɨ, 'uxa'a haxɨaya teyunaime 'ixaheritsixi tahetsie punuani.
JOS 22:19 Xɨka kwie xemanu'uwa kapatsieka 'ena pɨta xekeneu'axɨa Yawé kwieyatsie, meta mana tukieya manuwe. Xekeneu'axɨa 'ena tahamatɨa xemɨtitenikɨ, neuxei 'axaxepɨkateyurieka takakaɨyari hepaɨtsita meta tame tahepaɨtsita, xepitawewi mawari taiyame peru 'ari tepeixeiya mawari taiyame Yawé hetsiemieme.
JOS 22:20 Puyuri kepauka 'Akani Tsera nu'aya 'axamɨtiuyuri kepauka mɨtiunawa 'iya naime temɨtehauyehɨanikekai, Kakaɨyari haxɨaya tanaime tahetsie 'ixaheritsixi katiniunake. Yaxeketenemaika 'Akani xeikɨa pɨka'umɨ 'axamɨtiuyurikɨ.
JOS 22:21 Xuweni xiɨyarimama meta Kahari xiɨyarimama metatsiere hixɨapa me'atɨ Manatsexi xiɨyarimama mɨpaɨ mekateniwarutahɨawe 'iya 'ixaheritsixi wa'ukiyarima:
JOS 22:22 ―Yawé, Kakaɨyari mɨmariwe kakaɨyarixi wahɨxie, yurikɨ, Yawé, Kakaɨyari mɨmariwe kakaɨyarixi wahɨxie, mɨpaɨ pɨtimate kename 'axatekate'uyuri kename te'i'eirikutɨ tekayɨa. Xemetsiere 'ixaheritsixi yunaitɨ mɨpaɨ xeketenemaika. Mexɨka mɨpaɨ ka'aneni, 'aixɨa pɨ'ane xemɨtatsikwini.
JOS 22:23 Yawé tɨtɨ yaketatiutahɨawe xɨka tame tahetsiemieme te'itawewieni mawari taiyame temiku'eirienikɨ, yatɨ mana mawari temiwewiriekakɨ Muitsexi kemɨtiu'aitaxɨ.
JOS 22:24 Matsi tepitawewi 'uxa'atɨniwarie mieme. Tepeumama 'uxa'atɨniwarie xexiɨyarima tanuiwarima mɨpaɨ metewarutahɨawekɨ: “Yawé 'ixaheritsixi takakaɨyari xehetsie pɨkamieme,
JOS 22:25 xeme Xuweni meta Kahari nuiwarimama. Tame meta xeme teyuhamatɨa Yawé tahixɨapa hatuxame Kurutani puyete mana temɨka'anutakɨkanikɨ. Xeme heitserie xepɨkahexeiya Yawé xemahɨawenikɨ”. Xɨka mɨpaɨ tiɨyɨnike xeme xeniwema wahetsie pɨtinake xɨka taniwema mete'uhayewa Yawé me'ayexeiyatɨ.
JOS 22:26 »'Ayumieme 'ikɨ teputawewi mawari taiyame, peru mawari taiyariyari wewiwame pɨkahɨkɨ meta hipame mawari wewiwame,
JOS 22:27 matsi pɨta mɨ'inɨaritɨnikɨ xehetsiemieme meta tahetsiemieme 'uxa'a warietɨni tukari mɨyehane, tameta yaxeikɨa tepɨyɨwawe Yawé temayexeiyanikɨ tukitana. Mɨpaɨ 'ayumieme xeniwema mepɨkayɨwawe mɨpaɨ memɨtewatahɨawekɨ tame xenuiwarima: “Xeme heitserie xepɨkahexeiya Yawé xemayexeiyanikɨ”.
JOS 22:28 'Ayumieme, mɨpaɨ 'aixɨa pɨ'ane xɨka 'uxa'a warietɨni mɨpaɨ xetate'utahɨawe yatɨni taniwema, tame mɨpaɨ tepɨtexe'eiya: “Xekeneuxeiya 'iya mawari taiyame Yawé hetsiemieme ta'ukiyarima memitawewi, mana temɨtetimawanikɨ pɨka'ayumieme, matsi mɨ'inɨaritɨnikɨ tahetsiemieme meta xehetsiemieme”.
JOS 22:29 Mɨyatɨtɨ mɨpaɨ pɨtimatsiɨkɨ tame Yawé tepɨkaku'eirieni, meta tepɨka'iku'eirieni mawari taiyame tetawewieme xeime pɨta, mawari taiyariyari wewiwame, hatsi mawariyari meta hipame mawari wewiwame, 'Ixuriki Tukiyari hɨxie 'uwekakutɨtɨ».
JOS 22:30 Kepauka memu'enana xuwenitsixi meta karahitatsixi meta hixɨapa memɨ'axe Manatsexi xiɨyarimama, Pinexi mawari wewiwame meta wa'ukiyarima memanuyetei 'ixaheritsixi kememutiyua, mana kiekatari 'aixɨa mekateneka'erietɨkɨne.
JOS 22:31 Hikɨ Pinexi 'Eriyatsaxi nu'aya mɨpaɨ katiniwarutahɨawe mɨkɨ nuiwarite: ―Hikɨ mɨpaɨ tepɨtemate Yawé tahamatɨa puyeika, xemetsɨ Yawé xepɨka'eirikukai, 'ayumieme xepɨtatsi'utawikweitsitɨa ketemɨtekwinitɨarienikekai.
JOS 22:32 Hikɨ Pinexi mawari wewiwame 'Eriyatsaxi nu'aya meta memanuyetei 'ixaheritsixi wahetsie, mekaniwarutateutɨani karahitatsixi meta xuwenitsixi, mekanayekɨne Karaha mekaniuku'eirieni memakunuaxɨanikɨ Kanani kwieyaritsie memɨtewataxatɨanikɨ 'ixaheritsixi hipameta.
JOS 22:33 Mɨkɨ 'ixaheritsixi mekaniu'enanani 'aixɨa 'anemekɨ, 'aixɨa mekaniutiyuani yukakaɨyari hetsiemieme, mekateniuhayewa mewatakwinike yu'iwama mɨkɨ nuiwarite tau manatineika hepatsie memɨtama.
JOS 22:34 Mɨkɨ xuwenitsixi meta karahitatsixi mɨkɨ mawari taiyame mekateniterɨwa: «'Inɨari», mɨpaɨ memutiyuakɨ: «Tahetsiemieme 'inɨari payani Yawé yuri Kakaɨyari mɨhɨkɨkɨ».
JOS 23:1 Muixa wiyari 'anuyeyaku Yawé 'ixaheritsixi kayuwatɨ kaniwarupitɨani kananeutsixi wahamatɨa, Kutsuhexi 'ukiratsitɨtɨri 'uxetɨ,
JOS 23:2 yunaime 'ixaheritsixi kaniwaruta'inieni, yunaime wa'ukiyarima, memanuyetei memɨtemaiwawe, 'itsɨkate meta waparewiwamete naime kiekaritetsie kiekatari, mɨpaɨ katiniwarutahɨawe: «Neri waɨkawa nekani'ukiratsitɨni, waɨkawa wiyari nekanexeiyani.
JOS 23:3 Xeme xekaniuneniere Yawé takakaɨyari kemɨtiuyuri hipame nuiwarite wahepaɨtsita xehetsiemieme, mɨkɨ kaniuyutamieni kepauka mɨtiyukwinekai xehetsiemieme.
JOS 23:4 Ne nekaniwayetuirieni 'inɨarikɨ mɨwahetsiemiemetɨnikɨ yuxexuime nuiwarite, tsepa meuyewetse hipame xemɨwara'iwakɨ 'akuxi meta haa manuyeka Kurutani haramara Meritexaniyu teme'iwaxɨ.
JOS 23:5 Yawé takakaɨyari kaniyɨweni xemɨwara'iwakɨ mɨkɨ kwieyaritsie, xeme xekwie kanayeimɨkɨ, mɨkɨ kemutayɨ.
JOS 23:6 »'Ayumieme, xekenetɨrɨkawini xemeye'atɨanikɨ 'inɨari niukiyari Muitsexi kemɨraka'utɨa. Mɨkɨ 'inɨari niukiyari hawaikɨtɨma xepɨka'uku'e'eiriwani.
JOS 23:7 Xepɨka yuxewiriyani 'ena nuiwarite memuxuawe wahamatɨa. Wakakaɨyarixi xepɨkawarayexeiyani wahetsie xepɨkatewiyani meta wahetsiemieme xepɨkateyuhɨritɨaka.
JOS 23:8 Heitseriemekɨ xekeneu'uwani pɨta Yawé Kakaɨyari hɨxie, hikɨ kexemɨte'u'uwa hepaɨ.
JOS 23:9 Yawé kaniwarayeweiya 'iya nuiwarite memɨmamariwawekai memɨxe'aye'uniekai, hikɨ 'akuxi xewitɨ pɨkahe'iwawe.
JOS 23:10 Yuxewitɨtɨ xehetsɨa mieme xeimiriyari kaniwarutaweweiyani memɨxe'aye'unie, Yawé muyumienekɨ xehetsiemieme, mɨkɨ yukɨmana kemutayɨ.
JOS 23:11 Yaxeketeneuyuri kexemɨte'aitɨarie xeminaki'eriekakɨ Yawé yukakaɨyari.
JOS 23:12 Peru xɨka Kakaɨyari xe'uku'eirieni, xɨka hipame nuiwarite xewarutinɨni memu'uwa 'akuxi xetsata meta wahamatɨa xeyutinɨni xɨka xewarutiwitɨni,
JOS 23:13 mɨpaɨ matsi kexetenemaika Yawé Kakaɨyari pɨkawarayeweiya xetsata mɨkɨ nuiwarite. Matsi 'apɨta xewiniyari mepakɨne, meta 'iwaɨyɨ xehetsiemieme, xuya xehɨxita mieme, mepɨkaxehayewa kepaukake xeme xemakumawere 'ikɨ kwie 'aixɨa mɨ'ane Yawé mɨxeyetuiritsie.
JOS 23:14 »Netsɨari, nekaniyemieximeniri kwitɨwa yunaitɨ teɨteri memɨtakukuwe memeukakɨkatsie. Xeme xekatenimaika naitɨ Yawé niukieya kanaye'axeni kemutayɨ yemekɨ. Naitɨ matsiɨkɨtɨ kanayeikani, mɨkɨ naimetsie yamɨtikamiekɨ.
JOS 23:15 Mɨpaɨtsiere keyamɨtikamie Yawé takakaɨyari kemutaine, mɨpaɨtsiere xehetsie 'uximatɨarika naime kanixe'upitɨaweni, kepaukake xemakumaweriyarieni 'ena kwiepa mɨxeyetuiritsie.
JOS 23:16 Xɨka xekaheye'atɨani Yawé yukakaɨyari tɨratuya kemɨtixeyetuiri, xɨka hipame pɨta kakaɨyarixi xewarayexeiyatɨ xehakɨne, mɨpaɨ yurikɨ xeketenemaika, Yawé haxɨaya xehetsie kaninuamɨkɨ, xekanakumaweriyariekuni kwie 'aixɨa mɨ'ane Yawé mɨxeyetuiritsie».
JOS 24:1 Merikɨte Kutsuhexi yunaime 'Ixaheri nuiwarimama kaniwarukuxeɨrieni Tsikeni mɨrakutewatsie. Kaniwaruta'inieni yunaime wa'ukiyarima, memanuyetei memɨtemaiwawe, 'itsɨkate meta waparewiwamete naime kiekaritetsie kiekatari. Yunaitɨ mekaniuyukuxeɨrieni Kakaɨyari hɨxie.
JOS 24:2 Kutsuhexi yunaime mɨpaɨ katiniwarutahɨawe mɨpaɨ katiniwaraye'eritɨani: ―Yawé mɨpaɨ kanaineni, 'ixaheritsixi takakaɨyari: Mɨixa wiyari panuyemie, xe'ukiyarima, Teraki niwemama 'Apɨrahami meta Nakuxi, 'Eupɨrate hatuxameyari 'anutaɨye mekaniu'uwakaitɨni, kakaɨyarixi hipame mekaniwarayexeiyakaitɨni.
JOS 24:3 Peru ne mana paitɨ 'Apɨrahami nepanayexei xetutsi hayeikame, Kanani nekaniyewitɨtɨyani, nuiwarimama memɨyumɨirenikɨ nekanipitɨani. Matɨari nekaniyetuirieni nu'aya xeime, 'Itsahaki,
JOS 24:4 meta 'Itsahaki nepiyetuiri yuhutame tɨɨri, Kakuwu meta 'Etsahu. Mɨkɨ 'Etsahu nekaniyetuirieni kwie hɨritsie Tsehixi mɨtitewa, Kakuwu meta niwemama 'Ekipitu mekanekɨne.
JOS 24:5 »”Mɨixa wiyari 'anuyeyaku, nepɨwarenɨ'a Muitsexi meta 'Aruni, waɨkawa nepɨwaru'uximatɨa 'Ekipitu kiekatari, kepaukake xeme nemɨxehayewitɨni mana.
JOS 24:6 Kepauka nemɨwarayewitɨ xetutsima, xekaniu'axɨani Haramara Mɨxeta manuyeka, 'ekipitutari mekanixe'uweiyakaitɨni yukaxetate kuyaxa miemetetsie meta yukawayutsixi wahetsie me'utetɨ.
JOS 24:7 Xetutsima Yawé mekaniutahɨawe karima, mɨkɨ yɨriya punetɨa wahɨxie memɨkaxexeiyanikɨ, mɨkɨ haramara waheima kaniuyeurieni kaniwaranukanani. Xeme xemunenierixɨ xekanihɨkɨtɨni 'ekipitutari kenemɨwaruyuri. Mɨya tiɨyɨku xetutsima muixa wiyari mana mekaniu'uwakaitɨni makumawetsie.
JOS 24:8 Xeme nekanixe'atɨani 'amuxeutsixi wakwietsie, Kurutani 'anutaɨye tau manatineika hepatsie memɨtamakai. Kepauka memɨxe'utakwi nekaniwayetuani xehetsɨa, xeme xekaniuneniere kenemɨtiwaruka'unaxɨ, wakwie xekwie mayanikɨ.
JOS 24:9 Meta kepauka Waraki Tsipuxi nu'aya ti'aitame Muhawi kiekame mɨxetakwinikekai, mɨkɨ Warami puta'ini Wehuxi nu'aya, ne mɨnetsitawawirienikɨ xeme 'axanemɨxeyurienikɨ.
JOS 24:10 Peru ne Warami nepɨka'enimɨkɨkai, matsi 'aixɨa nepɨxe'uyuri pɨta mɨixamexɨa, mɨpaɨ ne nekatinixe'utawikweitsitɨani tɨrɨkariya kemɨrexeiyakai.
JOS 24:11 'Imatɨrieka, haa Kurutanitsie xekananukɨne Keriku xekaniye'axɨani, mɨkɨta mekanixe'utakwini. Yaxeikɨa mekaniuyɨni 'amuxeutsixi, peretseutsixi, kananeutsixi, 'etitsixi, keriketseutsixi, heweutsixi, meta kewutseutsixi. Peru ne nekaniwayetuani xehetsɨa xemɨwara'iwakɨ.
JOS 24:12 Xeme xepɨkate'uyuri, yu'ixiparakɨ meta yutupikɨ xemɨwara'iwaxɨ yuhutame te'aitamete 'amuxeutsixi, nepɨta nekatiniuyurieni nakatarixi nekaniwarenɨ'ani xehetsiemieme memɨwarayeweiyakɨ memɨxe'aye'unie.
JOS 24:13 Xemeta nekanixeyetuirieni kwie hetsiena xemɨkate'uximayakai meta kiekari xemɨka'itiwewi. Mɨkɨta xe'ayetetɨ xekanakɨne, kaxie takari xekwatɨ xepakɨ meta huriwu takari tsepa xemɨka'ika'ekai”.
JOS 24:14 »'Ayumiemeta hikɨ, xeme xekeneyuyetua Yawé hetsɨa, xeketene'uximayatsirieka hetsiena xetewiyatɨ. Xekeniwaruku'eiri kakaɨyarixi xetutsima memɨwarayexeiyakai 'Eupɨrate 'anutaɨye paitɨ meta 'Ekipitu, Yawé xeikɨa xekenayexeiyani.
JOS 24:15 Peru xɨka xehetsiemieme 'axa'aneni Yawé mɨti'uximayatsirieka, xekeniwaranayexeiya kemɨ'ane xemɨwarayexeiyani, xetutsima memɨwarayexeiyakai 'Eupɨrate 'anutaɨye, yatɨni kakaɨyarixi 'amuxeutsixi memɨwarayexeiya, hikɨ 'ena wakwietsie xemanu'uwa. Tametsɨ, netɨɨriyama meta ne Yawé tepayexeiyani».
JOS 24:16 Teɨteri mɨpaɨ mekaniutiyuani: ―Mɨpaɨ tame hatsuaku tepɨkayɨni. Tame Yawé tepɨkaku'eirieni, hipame kakaɨyarixi tewarayexeiyatɨ tepɨka'akɨne.
JOS 24:17 Yawé takakaɨyari tame meta tatutsima mɨtatsi'ayewitɨ kanihɨkɨtɨni 'Ekipitu kwieyaritsie, waɨriyarika temɨteha'uximayakaitsie. Mɨkɨ kanihɨkɨtɨni 'inɨari waɨkawa mamariwame muwewi tehenenierekaku. Katani'ɨwiyakaitɨni kepauka makumawetsie temu'uwakai meta kepauka yumɨireme nuiwarite wakwietsie temuyekɨkakaitsie.
JOS 24:18 Yawé kanihɨkɨtɨni muwarayewei yunaime 'ena memɨtitekai meta 'amuxeutsixi. 'Ayumieme tameta Yawé tepɨteta'uximayatsirieni, mɨkɨ takakaɨyari mɨhɨkɨkɨ.
JOS 24:19 Hikɨ Kutsuhexi mɨpaɨ katiniwarutahɨawe: ―Xeme xepɨkayɨwawe Yawé xemɨte'uximayatsirieka, mɨkɨ Kakaɨyari kanihɨkɨtɨni mɨpatsie meta Kakaɨyari mɨ'ɨtetsa. Pɨkatixeheuyehɨwirieni kepauka xe'eye'unietɨ xemakɨne meta kepauka 'axaxemɨteyurieni.
JOS 24:20 Xɨka xeme Yawé xe'uku'eirieni hipame pɨta kakaɨyarixi xetewa'uximayatsirieka, mɨkɨ kanixe'uximatɨamɨkɨ, kanixeta'unamɨkɨ yuheyemekɨ, tsepa 'aixɨa mutiuyuri xehetsiemieme.
JOS 24:21 Peru teɨteri mɨpaɨ mekaniutiyuani tawarita: ―Tame hatsuaku mɨpaɨ tepɨkayɨni. Tame Yawé xeikɨa tepayexeiyani.
JOS 24:22 Kutsuhexi tawarita mɨpaɨ katiniwarutahɨawe: ―Xemetɨtɨ xekanihɨkɨtɨni xemunenierixɨ kexemaitɨka kename Yawé xeikɨa xehayexeiyani. Mɨkɨ mɨpaɨ mekaniutiyuani: ―Huu, tame tepɨhɨme.
JOS 24:23 Kutsuhexi mɨpaɨ kaniutayɨni: ―Xekeniwaruku'eiri kakaɨyarixi 'akuxi xemɨwarexeiya. Yu'iyarikɨ xekeneyuyetua Yawé hetsɨa, 'ixaheritsixi takakaɨyari.
JOS 24:24 Tawarita teɨteri mɨpaɨ mekaniutiyuani: ―Yawé takakaɨyari xeikɨa tepayexeiyani, meta mɨkɨ xeikɨa tepeu'enieka.
JOS 24:25 Mɨkɨ tukaritsie Kutsuhexi tɨratu kaniuhekwariya teɨteri 'ixaheritsixi wahetsiemieme. Mana tsiere Tsikeni kiekariyaritsie 'inɨari niukiyari kaniwarupitɨani yamemɨteyuriekakɨ, Kakaɨyari niukieyatɨme,
JOS 24:26 meta kaneka'utɨani, 'inɨari niukiyari Kakaɨyari hetsɨa mieme xapayaritsie. Hikɨ tete 'anekame kaniutituni xeime xiu hetɨa kaneikayeni, 'ixuriki tukiyari Yawé hetsiemieme manuwe hehurakaku.
JOS 24:27 Hikɨ 'ana mɨpaɨ kaniutayɨni: ―'Ikɨ tete 'inɨari pɨhɨkɨtɨni xehetsiemieme. Mɨkɨ yapɨretima naime niuki hepaɨtsita kepaɨmeme mɨtatsi'utaxatɨa Yawé hikɨ. Mɨkɨ xehetsiemieme pɨ'inɨaritɨni xɨka xeme yukakaɨyari xetehe'itaiyani.
JOS 24:28 Mɨpaɨ tiuyurieka Kutsuhexi 'arike kaniwarenɨ'ani yukie yunaime teɨteri kememɨte'ukutetɨkatei.
JOS 24:29 Merikɨtsɨ yapaɨmexɨa tukari 'anukayaku Kutsuhexi kaniumɨni Nuni nu'aya, Yawé ti'uximayatsiriwame, xeitsienituyari heimana tamamata wiyari hexeiyatɨ.
JOS 24:30 Kaniukateukieni kwie mɨyetuiriyarietsie, Timinati-Tsera reyetewakaku, 'Epɨrahini hɨriyaritsie, Kahatsi hɨriyari yeta.
JOS 24:31 Kutsuhexi 'amuyeikakaitsie 'ixaheritsixi Yawé mekanayexeiyakaitɨni, mɨpaɨ tsiere katiniuyɨni kepauka 'amemu'uwakai Kutsuhexi memuparewi, memuhɨritɨrie mɨkɨ memunenierixɨ Yawé kemɨtiwaruparewi yuteɨterima.
JOS 24:32 Kutse 'umeyarieya, 'ixaheritsixi 'Ekipitu paitɨ meheiyekweka, mekanikateuku Tsikeni paitɨ, kwie Kakuwu minanaitsie xeitsienituyari pɨrata tuminiyarikɨ Kamuxi niwemama wahetsɨa, Tsikeni mɨpaapayatɨkai. Mɨkɨ kwie 'ariketa Kutse nuiwarimama tiwapiini kanayani.
JOS 24:33 'Imatɨrieka, 'Eriyatsaxi 'Aruni nu'aya kaniumɨni Kiweha paitɨ kaniukateukieni, yuniwe Pinexi kwieyatsie, 'Epɨrahini muhɨriyatsie.
JDG 1:1 'Ixaheritsixi Yawé mekaniuta'iwawiya, Kutsuhexi 'ukumawereku reutiyetana: ―¿Kemɨ'aneta hikɨ panuyeyerɨni mɨwatakwinikɨ Kananeutsixi?
JDG 1:2 Yawé mɨpaɨ kaniutayɨni: ―Kura manuyehaitɨani kanayeimɨkɨ, nekaniyetuirieniri 'ikɨ kwie naime.
JDG 1:3 Hikɨ Kura xiɨyarimama mɨpaɨ mekateniwarutahɨawe yu'iwama, Tsimehuni xiɨyarimama: «Hikɨmɨtɨka teyunaitɨ kwie temɨyetuiriyarietsie, Kananeutsixi tepɨwaretakwini, 'ariketa tame xehamatɨa tepuhu kwie xemɨyetuiriyarietsie». Hikɨ Tsimiyuni xiɨyarimama mekaniwareweiya.
JDG 1:4 Kepauka Kura kananeutsixi meta peretseutsixi mɨwarutakwi, Yawé kaniparewieni. Tamamata miriyari mekaniwarukwini Wetseki mɨrakutewatsie.
JDG 1:5 Mana mekaniuyukaxeiya 'Aruni-Wetseki matɨa, mɨkɨ mekaniwarutakwini, mekaniwara'iwa kananeutsixi meta peretseutsixi.
JDG 1:6 'Aruni-Wetseki kaniuyuta'unakaitɨni peru mekanenukuweiya mehenuku'axeka, mekanenuwitekiriexɨani 'itɨwameya 'amɨpapa meta ketateyatsiemieme.
JDG 1:7 Hikɨ 'Aruni-Wetseki mɨpaɨ kaniutayɨni: «Haika tewiyari heimana tamamata te'aitamete yu'itɨwame 'amɨpapa mewatiwitekiyarietɨkaitɨ meta yuketatetsie, nemexatɨa mɨranakaxɨrɨwe mekatenekukwa'akaitɨni. Kakaɨyari yaxeikɨa hikɨ pɨnetsi'uyuri». 'Ana Kerutsareme mekaneihana, manari kanemɨni.
JDG 1:8 Kura xiɨyarimamatsiere Kerutsaremetari mekaniwarutakwini, 'ixiparakɨ yunaime mekaniwarukwini, meta naime kiekari mekaniutataiya.
JDG 1:9 'Ariketa Kura xiɨyarimama mekanekɨne hɨritsie kananeutsixi mewatakwinike, Nekexi mɨrakutewatsie meta Tsepera.
JDG 1:10 Kananeutsixi Hewuruni kiekatari wahetsɨa paitɨ mekaniye'axɨani, Kiriati-'Ariwa mɨtitewakai meripaitɨ, te'aitamete Tsetsahi, 'Akimani, meta Tarimahi mekaniwarukwini.
JDG 1:11 Mana memɨyekɨ Rewixi kiekariyaritsie meye'axɨaka mekaniwarutakwini, meripaitɨ Kiriati-Tsepexi mɨtitewakai.
JDG 1:12 Hikɨ Karewi mɨpaɨ kaniutayɨni: «Kemɨ'ane Kiriati-Tsepexi mɨtamieni maye'ani, ne neniwe nekaniwitɨtɨamɨkɨ 'Akatsa».
JDG 1:13 'Utunieri katiniuyurieni Kenatsi nu'aya, Karewi taruya, hikɨ Kare yuniwe kaniwitɨtɨani 'Akatsa.
JDG 1:14 Kepauka mɨkɨ hetsɨana munua, 'Utunieri kanitawawirieni yupapa kwie mɨtawawirienikɨ. 'Akatsa 'anakayaku puxutsie Karewi kanita'iwawiya: ―¿Kekuta pe'ane?
JDG 1:15 Mɨkɨ mɨpaɨ kaniutayɨni: ―Waɨkawa kwerietɨ nepɨmatsiwawirie. Kwie pemɨnetsi'umi Nekexi mieme, haixateta keneneuxatɨa nepiini mayanikɨ. Mɨpaɨ Karewi yuniwe katiniyetuirieni haixate, hɨritsie muxuawekai meta muweritsie.
JDG 1:16 'Uwaxi nuiwarimama Keni tewiyari, Muitsexi munieya, Kura xiɨyarimama mekaniwareweiya, Makutakɨya memɨyekɨ 'atsita makumawetsie Kura kwieyaritsie, Nekexi mukuma 'Arari kwieyari 'aurie. Mana mekaniuyuhayewa mana kiekatari wahamatɨa.
JDG 1:17 'Ariketa Kura xiɨyarimama mekaniwareweiya yu'iwama, Tsimehuni xiɨyarimama, mekaniwarutakwini kananeutsixi Tsepati kiekatari, mekanika'una naime kiekari. 'Arike Tsepati, Kuxima katiniuterɨwarieni.
JDG 1:18 Kura xiɨyarimamata Kahatsa kiekariyaritsie mekanitahaxɨani meta 'Atsikaruni 'Ekuruni, mɨkɨ yuxexuitɨ yukwie meheuxeiyatɨ mekanakɨne mewara'iwaka.
JDG 1:19 Kura xiɨyarimama wahamatɨa Yawé kaniuyeikakaitɨni. Mɨkɨ hɨriyaritetsie mekaniukuyaxixɨani mewara'iwaka, peru muweritsie kiekatari mepɨkawarukemakaxɨa, tepɨa kaxetayari memɨwareuxeiyakaikɨ.
JDG 1:20 Muitsexi kemutayɨkai, Karewi Hewuruni tipiinieya kanayani, mana kiekaritsie yuhaikame 'Anaki niwemama kaniwarayeweiya.
JDG 1:21 Wenikamini xiɨyarimamata kewutseutsixi mewarayeweiyake mepɨka'uyɨwekaxɨa, Kerutsareme memɨtitekai. 'Ayumieme hikɨ 'akuxi kewutseutsixi Wenikamini xiɨyarimama wahamatɨa mekaniu'uwani.
JDG 1:22 Kutse xiɨyarimamata Weteri mekaniye'axɨani, Yawé kaniwaparewiekaitɨni.
JDG 1:23 Nenieremete meri Weteri mekaniwarenɨ'ani, kiekari meripaitɨ 'Arimetɨra makuma mɨrakutewakai,
JDG 1:24 xewitɨ kiekame 'ayeyaku mɨkɨ mɨpaɨ mekatenitahɨawe: «Ketatineutaxatɨa ketemɨtehaxɨani kiekaritsie, 'ekɨ 'ana 'aixɨa tepɨmatexeiyani».
JDG 1:25 Mɨkɨ tewi kaniwaruxeitsitɨani kememɨteheutahaxɨanikekai, hikɨ mɨkɨta mekaniwarukwini 'ixiparakɨ, peru mɨkɨ tewi tɨɨriyamama yunaime mepɨkawarukwi.
JDG 1:26 Mɨkɨ tewi kaneyani hetitsixi wakwietsie, mana yukiekari kaniukamani katiniterɨwa 'Arimetɨra, hikɨ 'akuxi mɨpaɨ katinakutewaka.
JDG 1:27 Manatsexi xiɨyarimama mepɨkawarukemakaxɨa Wetsehani kiekatari meta Tanaki kiekari 'auriena mamanetɨka, meta Ruxi kiekariyaritsie, 'Iwurehami meta Mekiru kiekatari mepɨkawarukemakaxɨa meta kiekarite 'auriena mamanetɨka kananeutsixi, memɨkayuwaɨriyakaikɨ memanuku'uni.
JDG 1:28 Kepauka 'ixaheritsixi metɨrɨkawitɨ memakɨ mepuyɨwekaxɨa waɨriyarika mepɨtewaruta'uximayatsitɨa kananeutsixi, tsepa hatsuaku memɨka'uyɨwekaxɨa memɨwarayeweiya yunaime.
JDG 1:29 'Epɨrahini xiɨyarimama tsiere mepɨka'uyɨwekaxɨa memɨwarayeweiyakɨ Ketsehexi kiekatari, mɨpaɨ kananeutsixi watsata mekateniuyuhayewa.
JDG 1:30 Tsawuruni xiɨyarimama yaxeikɨa mepɨka'uyɨwekaxɨa memɨwarayeweiyakɨ kananeutsixi, Kituruni kiekatari meta Naruri kiekatari, mɨkɨ wahamatɨa mekaniuyuhayewa mete'aitɨarietɨ waɨriyarika.
JDG 1:31 'Atsexi xiɨyarimamatatsiere mepɨka'uyɨwekaxɨa memɨwarayeweiyakɨ 'Akuhu kiekatari, Tsiruni, 'Akirawi, 'Akitsiwi, Keriwa, 'Apeki meta Xekuwi.
JDG 1:32 Memɨka'uyɨwekaxɨakɨri 'Atsexi xiɨyarimama kananeutsixi watsata mekaniuyuhayewa mɨkɨ kwieyaritsie memu'uwakai.
JDG 1:33 Nepɨtahari xiɨyarimamatatsiere mepɨka'uyɨwekaxɨa memɨwarayeweiya Weti-Tsemetsi kiekatari meta Weti-'Anati, mɨpaɨ kananeutsixi wahamatɨa mekaniuyuhayewa mɨkɨ kwieyaritsie. Tsikeretsɨ waɨriyarika mekateniwaruta'aitɨani teɨteri Weti-Tsemetsi meta Weti-'Anati kiekatari.
JDG 1:34 'Amuxeutsixi Rani xiɨyarimama waɨriyarika mekaniwarupitɨani muhɨriyatsie memɨyuhayewanikɨ, mukuweritsie memɨwakakɨnekɨ mepɨkawapitɨakai.
JDG 1:35 'Amuxeutsixi mepɨyuwaɨriyakai Heretsi hɨriyaritsie memɨtitenikɨ, meta 'Ayaruni, Tsariwini. Peru kepauka Kutse xiɨyarimama meyumɨiretɨ memakɨ, 'amuxeutsixi mekateniuta'aitɨarieni waɨriyarika memɨte'uximayakakɨ.
JDG 1:36 'Amuxeutsixi wakwie kaniye'atɨkateitɨni tsutɨtɨ, Terɨkaxi mematihe mɨrakutewatsie 'ukuhanetɨ Tsera paitɨ ye'atɨkaitɨ matsi'akuxi heimana paitɨ.
JDG 2:1 Niuki tuayame Yawé hetsɨa mieme Kirikari kaniyeyani kaneta'ani Wukini paitɨ, mana mɨpaɨ katiniwaretahɨawe 'ixaheritsixi: «Ne 'Ekipitu kwieyaritsie nepɨxe'ayewitɨ, nepɨxe'atɨa kwie xetutsima nemɨwayetuirienikekaitsie. Mɨpaɨ neputayɨ: “Hatsuaku nepɨkatihayewa kenemɨtixe'utahɨawixɨ,
JDG 2:2 xemeta tɨratu xepɨkawewieka mɨkɨ teɨteri wahamatɨa, matsi pɨta hakewa mawarika memeyetuaya mɨkɨ xepika'una”. Peru yaxepɨkatekakɨ. ¿Titayari mɨyaxete'uyɨ?
JDG 2:3 'Ayumieme hikɨ mɨpaɨ xeketenemaika kename nekawarayeweiya mɨkɨ teɨteri, xemanu'uwanitsie mɨkɨ waɨkawa mepɨxe'uximatɨaka, meta wakakaɨyarixi mepɨtexe'irɨwiyani».
JDG 2:4 Kepauka niuki tuayame Yawé hetsɨa mieme mɨpaɨ mɨtiwarutahɨawixɨ yunaime 'ixaheritsixi, mɨkɨ teɨteri mekaniutitsuani karima.
JDG 2:5 'Ayumieme mana Wukini mekateniuterɨwa, mana mawarika mekaniuwewieni Yawé hetsiemieme.
JDG 2:6 Kepauka Kutsuhexi mɨwarutateutɨa teɨteri, 'ixaheritsixi kwiepa mekaneutayeixɨani, yukwie mekunaxɨanike yuxexuitɨ.
JDG 2:7 Teɨteri Yawé mekanayexeiyakaitɨni 'akuxi kepaɨmexɨa memu'uwakai wahamatɨa, Kutsuhexi meta memiparewiekai te'aitamete, Yawé mariweme naimekɨ kemɨtiyurienekai memɨtexeiyakaikɨ 'ixaheritsixi wahetsiemieme.
JDG 2:8 Kutsuhexi, Nuni nu'aya, Yawé ti'uximayatsiriwame, kaniumɨni xeitsienituyari heimana tamamata wiyari hexeiyatɨ,
JDG 2:9 kaniukateukieni mɨrakutewatsie Timinati-Keretsi, kwie mɨyetuiriyarietsie, 'Epɨrahini kwieyaritsie muhɨriyatsie, Kahatsi hɨriyari manuka yeta.
JDG 2:10 Meta mɨkɨ 'ana mana memu'uwakai yunaitɨ mekaniukwini, hipatɨ pɨta mekaniuneni Yawé memɨkamaikai meta 'atsimemɨkatemaikai kemɨtiuyuriekai 'ixaheritsixi wahetsiemieme.
JDG 2:11 Mɨkɨ 'ixaheritsixi Yawé kemɨkatinake mekateniuyurieni, kakaɨyarixi mekaniwarayexeiyakaitɨni Wahari hetsɨa miemete.
JDG 2:12 Yawé mekaniuku'eirieni yu'ukiyarima wakakaɨyari, 'Ekipitu mɨwarayewitɨ, hipame kakaɨyarixi pɨta mewarayexeiyatɨ mekanakɨne, mana kiekatari wakakaɨyarixi nenewieri mepɨwapitɨakai, Yawé mɨpaɨ mekateniuyehaxɨatɨani.
JDG 2:13 Yawé me'uku'eirieka, kakaɨyarixi mekaniwarayexeiyakaitɨni Wahari hetsɨa miemete meta 'Atsitaruti 'ɨkiyarite.
JDG 2:14 Hikɨ Yawé kaniuyeha'ani 'ixaheritsixi wahekɨ, kaniwarupitɨani memɨwaraye'unie wapiinite memɨtewanawatsirietɨwenikɨ. Niwayetuani waneɨkixiwima wahetsɨa wa'aurie memutetɨkatei meripaitɨ memɨkawara'iwaxɨ.
JDG 2:15 Kepauka 'ixaheritsixi memayekɨkakai meyutakwinike, Yawé pɨkawaparewiekairi mɨkɨ ke'axamemɨte'uyuriekaikɨ, Yawé meripaitɨ kemɨtiwarahɨawekai. Mɨpaɨ 'ayumieme waɨkawa mekateniuka'eniwakaitɨni.
JDG 2:16 Hikɨ Yawé 'itsɨkate kaniwarunetɨani, mɨkɨ mekaniwaruxɨna memɨtenawatsiyarietɨwekaikɨ.
JDG 2:17 Yaxeikɨatsiere 'ixaheritsixi mɨkɨ mepɨkawaru'eni, 'axamekateniuyurieni pɨta kakaɨyarixi mewarayexeiyatɨ wahɨxie me'ukatunuma'uwetɨ. Yapauka huye mekaniuku'eirieni watutsima memiweiyakai, huye 'aixɨa mɨ'ane Yawé kemɨti'aita huyeyari.
JDG 2:18 Kepauka Yawé mɨkɨ 'itsɨkate mɨwaranuka'uitɨwakai. Mexi kamɨweni 'itsɨkame ti'aitatɨ kaniwaparewiekaitɨni memɨwaraye'unie wahepaɨtsita, Yawé kaniwanenimayakaitɨni wa'enietɨ mɨkɨ memutitsuanakaikɨ 'aixɨa mekatexeiyarietɨ memɨte'uka'eniwakaikɨ.
JDG 2:19 Peru kepauka mɨkɨ mɨtiwa'aitɨa mumɨni, mɨkɨ tawarita matsi 'axameteyurietɨ mekanakɨkakaitɨni watutsima ke'axamemɨkate'uyuri, hipame kakaɨyarixi mekaniwarayexeiyakaitɨni wahɨxie mekanikatunuma'uwekaitɨni. Mɨpaɨ meyɨatɨ mepɨkayuwaɨriyakai memɨtehayewa 'axamɨti'ane memɨte'uweiyakai meta ke'axamemɨte'u'iyarikai.
JDG 2:20 'Ayumieme Yawé niuyeha'ani 'ixaheritsixi wahekɨ mɨpaɨ kaniutayɨni: «Metsɨ 'ikɨ nuiwari mekapi'enie tɨratu kenemɨtiuwewi watutsima wahamatɨa, mepɨkanetsiheu'enie,
JDG 2:21 netatsiere nepɨkawarayeweiya hipatɨ nuiwari Kutsuhexi mumɨtsie mɨwaruku'eiri.
JDG 2:22 Hipame nuiwari nepɨwayuitɨani 'ixaheritsixi nemɨwata'inɨatakɨ mɨpaɨ nemɨretimanikɨ xɨka'aku nehuye me'uweiyani, yututsima wahepaɨ».
JDG 2:23 'Ayumieme Yawé pɨwaruhayewaxɨ mɨkɨ nuiwarite, pɨkawaranuyewei Kutsuhexi hetsɨa pɨkawayetua.
JDG 3:1 Mɨkɨ nuiwarite mekanihɨkɨtɨni Yawé mɨwaruhayewaxɨ 'ixaheritsixi memɨwata'inɨatakɨ, memɨkayutakwiwawekai nihatsuaku Kanani kwieyaritsie.
JDG 3:2 Mɨpaɨ katiniuyurieni para 'ixaheritsixi wanuiwarima memɨkayutakwiwawekai nihatsuaku, memuyuta'inɨatakɨ memɨtehetimanikɨ.
JDG 3:3 Mekaniuyuhayewa yu'auxɨwitɨ piritsiteutsixi tewa'aitɨwamete, yunaitɨ Kananeutsixi, yunaitɨ tsiruniyutsixi meta heweutsixi Riwanu hɨriyaritsie memɨtitekai, Wahari-Heximuni hɨriyaritsie metsutɨtɨ, meye'atɨkaitɨ Rewu-Kamati.
JDG 3:4 Mana Yawé kaniwarutixɨrieni 'ixaheritsixi memɨwata'inɨatakɨ, xɨka'aku 'inɨari niukiyari mehaye'atɨaka, mɨkɨ mɨwayetuiri Muitsexi tixaxatameyatɨkaku.
JDG 3:5 'Ixaheritsixi kananeutsixi wahamatɨa mekaniu'uwakaitɨni meta hetitsixi, 'amuxeutsixi, peretseutsixi, heweutsixi, meta kewutseutsixi.
JDG 3:6 Mɨkɨ teɨteri waniwema mekaniwarutiwitɨni, manata yuniwema mekaniwaruyewikitɨani meta wakakaɨyarixima mewarayexeiyatɨ mekanakɨne.
JDG 3:7 'Ixaheritsixi Yawé wakakaɨyari kemɨkatinake mekateniuyurieni, kakaɨyarixi Wahari hetsɨa miemete wahɨxie mekanikatunuma'uwekaitɨni meta 'Atserá hetsɨa miemete.
JDG 3:8 Yawé waɨkawa kaniuyeha'ani 'ixaheritsixi wahekɨ, kaniwayetuani ti'aitame Kutsani-Xitsatahini hetsɨa, Metsuputamiya mɨti'aitakai, 'atahaika wiyari mekateniuta'uximayatsitɨarieni.
JDG 3:9 Peru Yawé me'utitsuatɨ mekaniutahiwieni meyunenewietɨ, mɨkɨ xeime wawikweitsitɨwame kaniutinetɨani, 'Utunieri Kenatsi nu'aya, Karewi taruya. 'Utunieri 'ixaheritsixi kaniwaruxɨna.
JDG 3:10 Yawé 'iyarieya 'Utunieri hetsie kaninuani, mɨpaɨ 'ayumieme 'ixaheritsixi wa'itsɨkame kanayani, kanayeyani Kutsani-Xitsatahini hetamienike 'Arami mɨti'aitametɨkai, hikɨ Yawé 'Utunieri kaniupitɨani me'iwakɨ.
JDG 3:11 'Ana 'ixaheritsixi meka'uximatɨarietɨ mekanakɨne huta tewiyari wiyari, 'Utunieri Kenatsi nu'aya 'ukumawerekuke.
JDG 3:12 Tawarita 'ixaheritsixi Yawé kemɨkatinake mekateniuyurieni, 'axakememɨte'uyuriekaikɨ 'Ekuruni tɨrɨkariya kaniupitɨani, Muhawi ti'aitame mɨtiwata'aitɨanikɨ.
JDG 3:13 Me'uyunɨka 'amunitsixi, 'amarekitsixi, hikɨ 'Ekuruni kaneyani 'ixaheritsixi kaniwarutakwini, Makutakɨya kiekariyari naitɨ tipiinieya katinayani.
JDG 3:14 'Ixaheritsixi 'Ekuruni katiniwa'uximayatsitɨakaitɨni, ti'aitame Muhawi kiekame, tamamata heimana 'atahaika wiyari.
JDG 3:15 'Ixaheritsixi hutarieka Yawé me'utitsuatɨ mekaniutahiwieni, xeime wahetsie nunuwame kaniutakeni, 'Ahuri Kera nu'aya, mɨkɨ mu'utakai Wenikamini xiɨyarieyatɨtɨ. 'Ixaheritsixi mɨkɨ mekanenɨ'ani memɨteyukutuaya me'i'ɨitɨaka ti'aitame 'Ekuruni hetsɨa, Muhawi ti'aitame.
JDG 3:16 'Ahuri kaniuyutawewiriekaitɨni nawaxa naitsata heutixikakaunime xeitsikuriyari tewime, yuteuri tserieta 'utɨa kaniteni yu'ixuriki hetɨa.
JDG 3:17 'Ekuruni ti'aitame Muhawi kiekame, kaniyetuirieni tumini, mɨkɨ waɨkawa pɨwaiyakai.
JDG 3:18 Kepauka 'Ahuni mɨtiyetua, kaniwarutateutɨani yunaime tumini 'ɨwemete muwa memayetekai.
JDG 3:19 Peru hutarieka kaninuani tetexi kakaɨyarixiyari memati'u yenuaka Kirikari 'aurie, mɨpaɨ kaniutayɨni: ―Ti'aitame, xapa nepahurie 'ahetsiemieme 'awiekamekɨ. Ti'aitame mɨpaɨ kaniutayɨni: ―Kayuwatɨ xekeneumaka. Yunaitɨ hetsɨana memɨte'uximaya mekaniwayekɨne.
JDG 3:20 Hikɨ 'Ahuri 'ahurawa kaniuyani ti'aitame hɨxie, yuxaɨta kiita kanayekateitɨni muxɨkanitsiemiemeta ki'amutewita paratsiyu heima manuti'ekatsie, mɨpaɨ katinitahɨawe: ―Kakaɨyari pɨnetsiheyenɨ'a nemɨmatitaxatɨanikɨ. Kepauka ti'aitame manukuke yu'uwenitsie,
JDG 3:21 'Ahuri yunawaxa kaniwatihana yuteuritsie mikakekai ti'aitame hukayatsie kaniutatseni.
JDG 3:22 Nawaxa 'utɨa mamaya naitɨ kaneuhani, 'ana kwinuriteya kanawiwieni. 'Ahuri pɨkaheha yunawaxa mɨkɨ hukayatsie paitɨ kaniyuhayewa waiyarieya kaneinakaitɨni.
JDG 3:23 Kitenie reunaxɨaka reutuikaxɨaka mɨkɨ kii 'amutewita, 'Ahuri 'etsimayewatsie kanatsuna.
JDG 3:24 Kepauka 'Ahuri meyakairi, ti'aitame parewiwamete mekaniu'axɨani, metehetimaika kename reunatɨkatei kii 'amutewita mɨpaɨ mekaniutiyuani: «Xɨari kanekwitaneni kiita 'etsimuyeyewata».
JDG 3:25 Kwinie meteneutere me'ikwewietɨ mekaniuti'uxe. Ti'aitame kareuyepiwekaku kiita, yawikɨ mekateneuyepieni. Muwa mekanitaxeiya kwiepa 'ukaime mɨkime ti'aitame.
JDG 3:26 Mexi me'ikwewiekai 'Ahuri kaniuyuta'una. Tetexi kakaɨyarixiyari memati'u kaniuyeyani Tsehirati kaneyani.
JDG 3:27 Kepauka mana munua 'awa kaniutahɨtsieni 'Epɨrahini hɨriyaritsie, 'ixaheritsixi memuyukuxeɨrienikɨ, hamatɨana mekanekɨne, 'Ahuri 'anuyehaitɨatɨ.
JDG 3:28 Mɨpaɨ katiniwarutahɨawe: «Kɨmɨtɨka, Yawé kanixeyetuirieni muhawitsixi». Hikɨ hamatɨana mekanekɨ Kurutani mayekunitsie manuyeyɨkɨtsie mekaniuyuhayewa, Muhawitsixi mana memakɨkani mepɨkawapitɨakai.
JDG 3:29 'Ana mekaniwarukwini tamamata miriyari muhawitsixi, tsepa memɨtɨrɨkawikai memeuyutakwiwawekai. Nixewitɨ pɨka'utawikwei.
JDG 3:30 Mɨkɨ tukaritsie 'ixaheritsixi muhawitsixi mekaniwara'iwa, mana mɨtiyehane kayuwatɨ mekanexeiyakaitɨni nauka tewiyari wiyari.
JDG 3:31 Hutarieka Tsamɨkaxi manuyeka kanayani 'Anati nu'aya, mɨkɨ 'ataxewi tsienituyari kaniwarukwini piritsiteutsixi xeime kɨyekɨ tuurutsixi wa'arɨwamekɨ. Mɨkɨtatsiere kaniwaruxɨna 'ixaheritsixi.
JDG 4:1 'Arike 'Ahuri 'umɨku, 'ixaheritsixi 'axamekateniuyurieni, Yawé kemɨkatinake.
JDG 4:2 Hikɨ Yawé kaniwayetuani Kawini hetsɨa, Kanani kwieyaritsie ti'aitame hetsɨa, Katsuxi 'ukaitɨ pɨti'aitakai. Kuyaximama wa'ukiyari kanihɨkɨtɨkaitɨni Tsitsara, Karutseti-Kuhimi mukatei.
JDG 4:3 'Ixaheritsixi Yawé mekaniutahiwieni me'utitsuatɨ Yawini tepɨa kaxetayari 'atanauka tsienituyari mɨwarexeiyakaikɨ, xeitewiyari wiyari waɨkawa 'ixaheritsixi mekaniwa'uximatɨakaitɨni.
JDG 4:4 Mɨkɨ tukaritsie katiniwa'aitɨakaitɨni 'ixaheritsixi tixaxatame 'ukatɨtɨ Rewura titewatɨ, Rapiruti kani'ɨyayatɨkaitɨni.
JDG 4:5 Rewura Takɨya hetɨa putayeixakai mana pɨtitixanetɨariwakai, Xama mɨrakutewatsie meta Weteri wahixɨapa, 'Epɨrahini muhɨriyatsie, mana mekaneta'axekaitɨni 'ixaheritsixi 'aixɨa meteyurienike tita memɨte'ayuyexeirietɨkatei.
JDG 4:6 Rewura Waraki katiniutanɨ'airieni, 'Awinuhani nu'aya, Tseretsi mukatei Nepɨtahari kwieyaritsie, mɨpaɨ katinitahɨawe: ―Yawé, 'ixaheritsixi takakaɨyari mɨpaɨ pɨmati'aitɨa: “Kenemie Tawuxi hɨriyaritsie mana keniwarekuxeɨri tamamata miriyari teɨteri, Nepɨtahari xiɨyarimama meta Tsawuruni xiɨyarimama.
JDG 4:7 Ne Tsitsara nepɨta'inieni Kawini kuyaximama wa'ukiyari, yumɨireme meta kaxetate mewaruhapatɨ, 'akitsie Kitsuni paitɨ. Mana nekaniwayetuamɨkɨ xemɨwara'iwakɨ”.
JDG 4:8 Waraki mɨpaɨ katinitahɨawe: ―Xɨkatsɨ 'ekɨ penetsi'anuweiyamɨkɨ nekanimieni, yapɨtikatixaɨ nekatimie.
JDG 4:9 Rewura mɨpaɨ kaniutayɨni: ―'Aixɨa kani'aneni nekamenanuweiyamɨkɨ, peru waɨriyarika pemɨyɨanekɨ, 'ekɨ 'aixɨa petikuxaxatsiwatɨ pepɨka'ayani, Yawé Tsitsara kaniyetuamɨkɨ 'ukaratsitɨme hetsɨa pɨta. Rewura kaneyani Waraki hamatɨa Tseretsi paitɨ,
JDG 4:10 mana kaniwaruta'inieni Tsawuruni nuiwarimama meta Nepɨtahari nuiwarimama. Tamamata miriyari 'ukitsi mekaniuyuwaɨriya kemɨtiwarahɨawekai, meta Rewura kaneiweiya.
JDG 4:11 Hewexi Keni tewiyari yuxaɨta kananayeyakaitɨni hipame kenitsixi wahamatɨa, Huwawi memɨxiɨyarieyatɨkai Muitsexi munieya, Tseretsi 'aurie Tsanahini kaninuani, xiu manuwe kaniuyutaxamarutɨani.
JDG 4:12 Kepauka Tsitsara mɨtiutaxatɨarie kename Waraki 'Awinuhani niweya Tawuxi hɨriyaritsie heutimiekai,
JDG 4:13 Tsitsara kaniwaruta'inieni 'atanauka tsienituyari tepɨa kaxetayari, meta yunaime yukuyaxima, Karutseti-Kuhimi 'aki manuyekatsie Kitsuni paitɨ.
JDG 4:14 Hikɨ Rewura Waraki mɨpaɨ katiniutahɨawe. ―Kenewatɨkari, 'ikɨ tukaritsie Yawé Tsitsara 'ahetsɨa kaniyetuamɨkɨ. Kaniyuritɨni Yawé 'akuyaxima wahɨxie kaniumiemɨkɨ. Waraki kananakayani Tawuxi hɨriyaritsie, tamamata miriyari teɨteri warawitɨtɨ.
JDG 4:15 Waraki kemɨtiyemiekai yumienetɨ, Yawé kaniparewiekaitɨni, kaxetate kaniutimure kuyaxi mekana'iwariekaitɨni, hikɨ Tsitsara kananakatsuna yukaxetatsie kaniyuta'una kaniutanautsa.
JDG 4:16 Waraki kaxetatetsie mekaniwaranukuweiya meta kuyaximama Karutseti-Kuhimi paitɨ. Yunaitɨ Tsitsara kuyaximama mekaniukwi'iwa, nixewitɨ 'ayenieretɨ pɨka'uyuhayewaxɨ.
JDG 4:17 Tsitsara kaniuyuta'unakaitɨni yu'ɨkama Kaheri xamaruya manuwekai paitɨ, Hewexi Keni tewiyari 'ɨyaya. Mɨkɨ 'aixɨa mekateniyuxeiyakaitɨni ti'aitame Kawini Katsuxi mɨti'aitakai, Hewexi Keni tewiyari xiɨyarimama wahamatɨa.
JDG 4:18 Kaheri kanayeyani Tsitsara heunakimieka, mɨpaɨ katinitahɨawe: ―Xeiya ti'aitame, muwa keneutahaki. Pepɨkamaka. Tsitsara xamaruta kaneutahani, mɨkɨ 'ukaratsi mata 'ixurikiyarikɨ kanenukanani.
JDG 4:19 Mɨkɨ mɨpaɨ kaniutayɨni: ―Ne nepeuharimɨkɨ, ha'etsiwa pemɨnetsi'umini katiyɨwe. 'Ukaratsi retsi kananutiyepieni nawita mɨyema kani'itɨani, hutarieka kanenukanani.
JDG 4:20 Mɨkɨ mɨpaɨ kaniutayɨni: ―Kitenie keneuweni, xɨka xewitɨ muwa hamieni xɨka ha'iwawani: “¿Kemɨ'ane muwa payeka?”, hawaikɨ pepaineni.
JDG 4:21 Kepauka mukutsukai Tsitsara 'uxiyakɨ, Kaheri Hewexi 'ɨyaya kɨye manuyemɨtsɨ xamarutsiemieme 'akwetɨ meta titsuname kayuwatɨ hepana kaniuyani. Hikɨ mu'uyatsie kaneitsuna kɨye kananuyeneni kwiepapaitɨ kaneukeni. Mɨpaɨ Tsitsara katiniumɨni.
JDG 4:22 Waraki mana kaniuyeyani Tsitsara 'uweiyatɨ, Kaheri 'ixeiyaka hepana kaniutanautsa. Mɨpaɨ katinitahɨawe: «Neuxei kenaye'a, nematsixeitsitɨani tewi pemuweiya». Waraki hamatɨana kaneutahani xamaruta, muwa kaniukateitɨni Tsitsara mɨkitɨ kɨye haketɨ yumu'utsie.
JDG 4:23 Mɨpaɨ Kakaɨyari, ti'aitame Kawini Kanani kiekame tixaɨtɨ pɨkarayeitɨa 'ixaheritsixi wahɨxie.
JDG 4:24 'Ixaheritsixi matsi waɨkawa mekanitɨrɨkariyariekaitɨni Kawini memɨmietɨwekaitsie, mɨya me'iyurietɨ mekanika'una.
JDG 5:1 Mɨkɨ tukaritsie Rewura meta Waraki 'Awinuhani nu'aya mɨpaɨ mekateniukwika:
JDG 5:2 «Kepauka te'aitamete 'ixaheritsixi memɨte'aita, kepauka teɨteri yɨkɨmana memɨyuwaɨriya, Yawé 'aixɨa ke'itɨarieka.
JDG 5:3 »Xekeneu'enana, te'aitamete. Xekene'enanaka xemɨte'aita. Ne nepɨtakwika, Yawé nepɨtanɨawa, nepɨtikayuitɨani Yawé hetsiemieme, 'ixaheritsixi wakakaɨyari.
JDG 5:4 »Yawé, kepauka Tsehixi hetsie pemɨyetɨa, kepauka 'Erumi kwieyaritsie pemuyemiekai, kwie putayua, muyuawitsie mepɨwatayua, haiwitɨri haa putayeuri.
JDG 5:5 Hɨrite putiyɨyɨakaxɨ Yawé mexeiyatɨ, Kakaɨyari Tsinahi kiekame, Yawé mexeiyatɨ, 'ixaheritsixi wakakaɨyari.
JDG 5:6 »Kepauka Tsamɨkaxi muyeikakaitsie 'Anati nu'aya, kepauka Kaheri muyeikakaitsie, kɨkamete huye mekaniuku'eirieni 'axamɨtiu'anetsie mekaneukuyune.
JDG 5:7 Memeuyutakwiwawekai 'Ixaheri hetsɨa miemete mekaniukumaware, mepumawekai, kepaukake ne nemanukuke, Ne, Rewura, nepanukuke 'ixaheritsixi wamaama hepaɨ.
JDG 5:8 Kepauka kakaɨyarixi hipame memɨwaranayexei, kuyaxa ninuani kiekari kitenie, huta tewiyari miriyari (40.000) 'ixaheritsixi nepɨwaruxei pitsika mepɨkahexeiyakai meta kɨmana memɨyukunarɨma tepɨa.
JDG 5:9 'Ixaheritsixi memanuyetei wahamatɨa ne'iyari puyeika, memɨyuwaɨriya wahamatɨa. Yawé 'aixɨa ke'itɨarieka.
JDG 5:10 »Xeme puxuri memeutuxatsie xemanutiyaxike 'ixuriki xe'anayeweratɨ xemayaxike, xemeta, huyeta xemuhu, mɨpaɨ xeketeku'eriwani.
JDG 5:11 Kwikari mayuane tewaxi mematiharewetsie, Yawé heitserie kemɨtiuyuri pɨtikuxata, kuyaximama 'ixaheritsixi ke'aixɨa memɨteyurie. Hikɨ Yawé kuyaximama mekaniu'axɨani kiekari kitenie.
JDG 5:12 »Rewura, kenanutanieri, kenanutanieri. Kenanutanieri, kenanutanieri, kwikari keneutakwika. Kenanukukexi, Waraki 'Awinuhani nu'aya, 'apɨretsutsixi keniwaranuhapani.
JDG 5:13 »Memutawikwei wa'ukiyarima te'aitamete wahetsɨa mekanekɨne, Yawé kuyaximama nehetsɨa mepu'axɨa kwinimieme memɨteyɨwawe.
JDG 5:14 Hipatɨ 'Epɨrahini hetsie mekanayenexɨani meta 'Amareki nuiwarieyatsie, Wenikamini xiɨyarimama mepɨwanɨkai 'iya memɨxe'uweiyakai. Makixi memakanexɨa kuyaxi memanuyetei, Tsawuruni memayenexɨa, 'itsɨ ti'aitame memu'ɨ.
JDG 5:15 Rewura hamatɨa matɨari te'aitamete mepuhukai 'Itsakaxi xiɨyarimama. 'Itsakaxi Waraki hamatɨa kaniuyeikakaitɨni, mɨkɨ 'utɨa kaneyani mayeweritsie paitɨ. Xuweni kuyaximama mariwemekɨ mete'utaxataka yamepɨkatekakɨ.
JDG 5:16 Matsi pɨta yukie mekanitiyaxe me'atinaitɨ muxatsi wahɨwemete wahiwari wawikɨari meta'enietɨ. Xuweni nuiwarimama niuki mekanixɨatɨakaitɨni.
JDG 5:17 Karaha Kurutani manuyeka matsi humapaitɨ kaniukateitɨni. Rani, ¿titayari nawiyatsixi wahamatɨa tiuyuhayewaxɨ? 'Atsexi, haramara tetsita kaniuyuhayewa, haramara meutawetɨkatsie kaniuyuhayewa.
JDG 5:18 Tsawuruni teɨterimama yutukari mepɨyetua kepauka memukwi, Nepɨtahari kemuyɨ hɨritsie meheyukukwika.
JDG 5:19 »Te'aitamete me'u'axɨaka mekaniuyutakwini haa mayema Mekiru 'aurie, Te'aitamete Kanani miemete Tanaki mekaniuyutakwini, peru pɨrata mepɨkahetɨ meta kakuni kwinieraye'atɨ mɨrayepine.
JDG 5:20 Muyuawitsie xurawetsixi mekaniuyutakwini, memanuyeteitsie paitɨ me'uyetetɨ Tsitsara mekaniutamieni.
JDG 5:21 Haa kwinimieme mɨtitɨrɨkaɨye Kitsuni kaniwarehautsitɨani, haa xeiya muhane meripaimieme, Kitsuni kwinimieme mɨtitɨrɨkaɨye. Keneumieni, ne'iyari, 'atɨrɨkarima.
JDG 5:22 Muratsixi wakeya payuane, muwa mepanautsaxɨaxime, muwa mepanautsaxɨaxime kawayutsixi memɨtɨrɨkawi.
JDG 5:23 Yawé niuki tuayameya mɨpaɨ kaniutayɨni: “Merutsi 'axakeneuyuri 'iya. 'Axakeniwaruyuri teuterimama waɨkawamekɨ, Yawé memɨkahekuparewikɨ, Yawé memɨka'uparewikɨ meta hetsɨana miemete memɨkawaruparewikɨ”.
JDG 5:24 »Kaheri kehɨkɨtɨni, Hewexi Keni tewiyari 'ɨyaya, waɨkawa 'aixɨa mɨ'itɨarie, waɨkawa 'aixɨa mɨ'itɨarie xamaruta memeutei.
JDG 5:25 Tsitsara haa 'uta'iwauku, Kaheri retsi kani'itɨani, 'aixɨa memɨte'u'iyari wawatsuta retsi kwamariekame kani'itɨani.
JDG 5:26 Yu'utakɨ kɨye kaniutikweni, yu'aixɨakɨ tepɨa titsuname tiutikwei. Tsitsara mu'uyatsie kaneitsuna, kanatana kananeni.
JDG 5:27 'Ɨkatɨana kaniukaweni, mana 'ukaweka mana kaniuhuni. Manuwekai kaniukaweni, mana kaniukaweni mɨkitɨ.
JDG 5:28 »Tsitsara maamaya kii 'etsimayewatsie kananiere, waɨkawa 'iyarixietɨ mɨpaɨ katiniuhiwa: “¿Titayari kaxetaya hawaikɨ karamie? ¿Titayari kaxetate wayuariya kara'eniɨriɨkɨ?”
JDG 5:29 'Ukarawetsixi kwinimieme memɨtemaiwawe mɨpaɨ mekaniutiyuani, mɨkɨta yaxeikɨa kanaineni:
JDG 5:30 “Mekateneyutapitɨwani piinite, tita memɨtewarenawairi: yuxexuime yatɨ yuhuhutame 'ukari yuxexuitɨ kuyaxi, 'ixuriki witsimɨ'anene Tsitsara hetsiemieme, xeime 'ixuriki, yatɨ hutame, witsimɨ'anene muxutɨka nekɨipitɨamieme. Naitɨ 'ikɨ 'iya tiwapiinite”.
JDG 5:31 »Mɨpaɨ mekete'ukwini yunaitɨ Yawé, memɨmatsi'aye'unie. Peru kemɨ'ane mɨmatsinaki'erie, tau hepaɨ ke'aneni kepauka maneika xawatɨtɨ». Hikɨ 'ixaheritsixi kayuwatɨ mekanexeiyakaitɨni huta tewiyari wiyari.
JDG 6:1 'Ixaheritsixi 'axamekateniuyurieni Yawé kemɨkatinake, mɨkɨ kaniwayetuani mariyanitsixi wahetsɨa 'atahuta wiyari.
JDG 6:2 Kwinimieme mariyanitsixi 'ixaheritsixi mepɨtewananaimakai, 'ayumieme mekaniyuti'awieta hɨritsie terɨta naitsarie hakewa memɨkawaretaxeiyakekai.
JDG 6:3 Kepauka 'ixaheritsixi memuka'etsakai, mekani'axekaitɨni mariyanitsixi, 'amarekitsixi, meta hipatɨ tau manatineika kiekatari mekaniwarutakukuyakaitɨni.
JDG 6:4 Mana me'axetɨ waxata mekanitahakekaitɨni, naitsarie wakwietsie Kahatsa paitɨ mekaniye'axekaitɨni. Nitixaɨtɨ mepɨkatekuhayeikawakai 'Ixaheri kwieyaritsie rayeniereme: muxatsi, tuurutsixi, meta puxuri.
JDG 6:5 Mekani'axekaitɨni yutewama metewaru'arietɨ, meta 'ixuriki kiyari mete'utɨtɨ 'utsikari wahepaɨ mekateniyuxexeiyakaitɨni. Teɨteri meta kameyutsixi yunaitɨ mepɨkayu'inɨatsinɨakai mɨkɨ kwieyaritsie mekanitahakekaitɨni metehakuxɨtɨanike.
JDG 6:6 Kwinimieme nitixaɨtɨri mepɨkatehexeiyakai 'ixaheritsixi mariyanitsixi mɨyameteyuriekaku, Yawé mekaniutahɨawe me'utitsuatɨ.
JDG 6:7 Mariyanitsixi mɨyamewayuriekaku kepauka 'ixaheritsixi Yawé memutahɨawixɨ,
JDG 6:8 Yawé xeime Kakaɨyari niukameya kaniwareyenɨ'airieni, mɨpaɨ kaniutayɨni: «Mɨpaɨ kanaineni Yawé, 'ixaheritsixi wakakaɨyari: “Ne nepɨxe'ayewitɨ 'Ekipitu kwieyaritsie, hakewa xemɨtehe'uximayakai,
JDG 6:9 kememɨtexe'aitɨakai nepɨxe'uxɨnaxɨ. Yaxeikɨatsiere nepɨxe'uxɨnaxɨ 'iya memɨxe'aye'uniekai wahetsɨa, xehɨxie nepɨwarayewei wakwie nemɨxeyetuirienikɨ”.
JDG 6:10 Mɨpaɨta nekatinixe'utahɨawe: “Ne Yawé nekanihɨkɨtɨni xekakaɨyari, 'amuxeutsixi wakakaɨyarixi xepɨkawarayexeiyani, xekwietsie memu'uwa”. Peru xeme xepɨkanetsi'anu'eni».
JDG 6:11 Niuki tuayame Yawé hetsɨa mieme kaninuani, xiu hetɨa kaniutayerɨni 'Upɨra muwekaitɨa, Kuhatsi kwieyatsie, 'Awietsexi xiɨyarieya. Kuhatsi nu'aya Kerehuni tɨriku kanikatsenekaitɨni kaxie matiketsinarɨwatsie yu'awietatɨ, 'iti'utake mariyanitsixi me'ikuxɨnikɨ.
JDG 6:12 Kepauka niuki tuayame Yawé hetsɨa mieme, Kerehuni hɨxie muyuhekɨataxɨ mɨpaɨ katinitahɨawe: ―Yawé 'ahamatɨa kaniuyeikani, tewi pemɨtɨrɨkaɨye pemeuyutamiewe.
JDG 6:13 Kerehuni mɨpaɨ kaniutayɨni: ―Xɨka tati'aitɨwame, tahamatɨa 'uyeikani, ¿titayari kuta mɨyatatiyuriene? ¿Hakewatamɨ tapaapama kememɨtatekuxaxatɨwakai mariwemekɨ kemɨtiuyuri: “'Ekipitu Yawé katanayewitɨni”? Yawé katanexɨrieni, kataniyetuani mariyanitsixi wahetsɨa.
JDG 6:14 Yawé matsi mɨpaɨ katinitahɨawe: ―Kenemie kepemɨtitɨrɨkaɨye, 'ixaheritsixi pekaniwatawikweitsitɨamɨkɨ mariyanitsixi kememɨwayurie. Ne nepɨhɨkɨ nemɨmatsihanunɨ'ani.
JDG 6:15 Kerehuni mɨpaɨta kaniutayɨni: ―Perutsɨ neti'aitɨwame, ¿'ixaheritsixi kenetiwawikweitsitɨani? Taxiɨyari mɨkatɨrɨkaɨye pɨhɨkɨ Manatsexi hetsiemieme, meta 'iwamarixi ketemɨtapaɨme ne nemɨkaxeiyarie nepɨhɨkɨ.
JDG 6:16 Yawé mɨpaɨ katinitahɨawe: ―'Ekɨ pepɨwara'iwa mariyanitsixi xewitɨ tewi mɨyɨaneni hepaɨ, netsɨ 'ahamatɨa nekaniuyeikamɨkɨ.
JDG 6:17 Kerehuni mɨpaɨ kaniutayɨni: ―Xɨka 'aixɨa penetimaika, 'inɨari mariweme ketineuyuri kename 'aku 'ekɨ peyɨane nehamatɨa pemɨtikuxata.
JDG 6:18 Waɨkawa nepɨmatsiwawirie pepɨkaheyeikani nenuayuke, mawarika neti'atɨayu 'ahɨxie netitipiyuke. Yawé mɨpaɨ kaniutayɨni: ―Nepɨmatsikwewieni kepaukake pemunuani.
JDG 6:19 Kerehuni kaneyani muxa nunutsi 'itsariyari mekawewienikɨ, yapaɨmemekɨ 'arinakɨ paa mɨkakuxanariyarietɨka kaniutiwewieni. Hikɨ wai tsikɨiwititsie kanikayatsa, xaritata hayari, katinepini niuki tuayame katiniuxatɨani xiu hetɨa.
JDG 6:20 Niuki tuayame Kakaɨyari hetsɨamieme mɨpaɨ kaniutayɨni: ―Wai kenanatitu'i meta paa mɨkakuxanariyarie, 'ikɨ tetetsie ketinapini manata hayari keneutiyeuri. Kerehuni mɨpaɨ katiniuyurieni.
JDG 6:21 Hikɨ yu'itsɨ makwekaikɨ, niuki tuayame Yawé hetsɨamieme wai kaniutseni meta paa mɨkakuxanariyarie, hikɨ tetetsie tai kananeni naime kaniutitaiya wai meta paa, hikɨ niuki tuayame hɨxiena kaniukumawere.
JDG 6:22 Kepauka Kerehuni mɨpaɨ mɨretima, mɨpaɨ kaniutayɨni: ―Xɨari ne nepɨmɨni, niuki tuayame Yawé hetsɨamieme nepuxei nehɨxikɨ.
JDG 6:23 Peru Yawé mɨpaɨ katinitahɨawe: ―Kayuwatɨ mana keneuyeikani, pepɨkamaka. Pepɨkamɨni.
JDG 6:24 Hikɨ mana Kerehuni mawari taiyame kaniutawewieni Yawé hetsiemieme, mɨpaɨ katiniterɨwa «Yawé kayuwatɨ mɨtiyupitɨwa», hikɨ mɨkɨ 'akuxi kaneyuhekɨaka 'Upɨra 'Awietsexi kwieyaritsie.
JDG 6:25 Mɨkɨ tɨkaritsie Yawé mɨpaɨ katinitahɨawe: «Xeime tuuru kenanayehani 'apaapa tewamamatsie, hutariekamieme 'atahuta wiyari hexeiyame. Mawari taiyame keneuta'una 'apaapa mitawewi Wahari hetsiemieme, meta kɨye mana muwe kakaɨyari mana mukuka, 'Atserá 'auriena muwe kenawiteki.
JDG 6:26 Hikɨ, hɨri heima memuwayuti'awiwietatsie, mawari taiyame keneutawewi Yawé hetsiemieme 'akakaɨyari. Kɨye 'Atserá mana muwekai kɨyexiyari pemitiwitekɨ, keneutataiya mɨkɨ hetsie hutarieka mieme tuuru mawarika taiyariyari hepaɨ».
JDG 6:27 Kerehuni yakatiniuyurieni Yawé kemɨrehɨawekai tamamata warawitɨtɨ hetsɨana memɨte'uximayakai. Hekɨta kayuwaɨriyatɨ yɨwikɨtake yakatiniuyurieni, yu'iwama wamakatɨ meta teɨteri kiekaritsie memɨtitekai.
JDG 6:28 Kepauka kiekaritsie kiekatari ximeri memanuku'ui, mekanixeiya mawari taiyame Wahari hetsɨa mieme kani'unikaitɨni, kɨye 'amuwekai kakaɨyari 'Atserá manukukatei nawitekiekaitɨni, mana hutarieka mieme tuuru kanita'ikaitɨni mɨratimawatɨre hekwamekɨ wewiyakametsie.
JDG 6:29 Mɨpaɨ yunaitɨ mekateniyukɨhɨawekaitɨni: «¿Kemɨ'ane 'ikɨ mɨya pɨtiuyuri?» 'Arike 'anɨkai me'uti'iwauka, mɨpaɨ mekatenetimani: «Kerehuni Kuhatsi nu'aya katiniuyurieni».
JDG 6:30 Hikɨ teɨteri kiekaritsie kiekatari, Kuhatsi mɨpaɨ mekateniutahɨawe: ―'Aniwe kenewayehani, pɨmɨni, mawari taiyame Wahari hetsɨamieme muta'unaxɨkɨ meta 'Atserá 'ɨkiyari mutataraxɨkɨ.
JDG 6:31 Peru Kuhatsi mɨpaɨ katiniwarutahɨawe memitate'akai: ―¿Xeme Wahari hetsie xetenua? ¿Xete'itawikweitsitɨanikuta, mɨpaɨ xeteku'eriwa? Kemɨ'ane Wahari mɨwikweitsitɨamɨkɨ, ke'umɨni kakatariwekaku. Xɨka Wahari 'aku kakaɨyaritɨni, mɨyɨkɨhɨani pɨyɨwenikeyu kemɨ'ane mita'una mawari taiyame piinieya.
JDG 6:32 'Ayumieme mɨkɨ tukaritsie Kerehuni «Yeruwahari» mekateniuterɨwa, mɨpaɨ me'utiyuatɨ: «Wahari keyukɨhɨani 'iya hetsiemieme», mɨkɨ mita'unaxɨkɨ.
JDG 6:33 Yunaitɨ mariyanitsixi meta 'amarekitsixi meta hipatɨ teɨteri tau manatineika kiekatari, mekaniuyunɨni Kurutani hatuxameyaritsie mekanakɨne, Ketsireri mayeweritsie mekanitiyaxe.
JDG 6:34 Hikɨ Kerehuni 'Iyarikɨ hɨnetɨ Yawé hetsɨamieme, kuxineta kaniutahɨtsieni, yunaitɨ 'Awihetsexi niwemama mekaniuta'inierieni memenuweiyakɨ.
JDG 6:35 Niukamete kaniwarenɨ'ani Manatsexi xiɨyarimama wahetsɨa, memɨwareta'inienikɨ memenukuweiyakɨ, yaxeikɨata katinenɨ'ani 'Atsexi xiɨyarimama, Tsawuruni, Nepɨtahari xiɨyarimama wahetsɨa meminɨnikɨ, mɨkɨta mekaniparewieni.
JDG 6:36 Kerehuni Kakaɨyari mɨpaɨ katiniutahɨawe: «Xɨka 'ixaheritsixi pewatawikweitsitɨamɨkɨ ne 'aixɨa nemɨtiuka'iyarikɨ, kepemɨnerahɨawekai,
JDG 6:37 neuxei ne muxa huxarieya 'ena nepɨtiwiwieni kwiepa. Xɨka haɨtsi mɨkɨtsie xeikɨa 'ukaxɨrieni xɨka 'auriena kwiepa hawakitɨkani, 'ana mɨpaɨ nepɨretimani kename 'ixaheritsixi pewatawikweitsitɨani nekɨmana, kepemɨnerahɨawekai».
JDG 6:38 Mɨpaɨ katiniuyɨni. 'Uxa'arieka ximeri kananukukeni Kerehuni, mɨkɨ muxa huxarieya kaniutahirumina, xeiwatsuyari haa kanayani.
JDG 6:39 Hikɨ Kerehuni Kakaɨyari mɨpaɨ katiniutahɨawe: «Pepɨkaha'aka nehamatɨa. Keneneupitɨa tawarita nemetitawawirienikeyu. Tawarita 'inɨari keneuwewi 'ikɨ muxa huxarieyakɨ. Hikɨta 'ikɨ muxa huxarieya kewakini, 'aurienata kwiepa kehakuyunani haɨtsikɨ».
JDG 6:40 Mɨpaɨ katiniuyurieni Kakaɨyari mɨkɨ tɨkaritsie. Mɨkɨ muxa huxarieya kaniwakikaitɨni, peru 'auriena naitɨ kwiepa kanakuhaɨtsiyakaitɨni.
JDG 7:1 Yeruwahari ―tatsɨari Kerehuni― meta yunaitɨ teɨteri ximeripaitɨ me'anuku'uka mekanekɨne, haixa Karuri mɨtitewa matiniere mekanitiyaxe. Mariyanitsixi memakutekai wayeta katini'anekaitɨni, mayeweritsie hɨri Mure hetɨa.
JDG 7:2 Hikɨ Yawé Kerehuni, mɨpaɨ katiniutahɨawe: «Yuwaɨkawame teɨteri pepɨwarawitɨkɨ nemɨwayetɨanikeyu mariyanitsixi xehetsɨa. Tietɨ 'ixaheritsixi mɨpaɨ memɨteniu'eri kename yukɨmana mete'uyuri,
JDG 7:3 mɨpaɨ ketiniwarutahɨawi hikɨ: “Kemɨ'ane muyɨyɨakani marikakɨ, ke'ukunuani hɨri Karaha tematitei yukie keheyani”». 'Ana yu'utɨma mekanekɨne xeitewiyari heimana huta miriyari, tamamata miriyari mekaniyuhayewa.
JDG 7:4 Peru Yawé Kerehuni mɨpaɨ katiniutahɨawe: «'Akuxi teɨteri mekaniyuwaɨkawani. Hapa keniwarukatetɨa, mana nepɨwaranuyehapani 'ahetsiemieme. Xɨka mɨpaɨ nehaineni: “'Ikɨ 'a'utɨa kanimieni”, mɨkɨ kanimieni, peru xɨka mɨpaɨ nehaineni: “'Ikɨ 'a'utɨa pɨkamie”, mɨkɨ pɨkamie».
JDG 7:5 Kerehuni hapa teɨteri kaniwarukatetɨani. Mana Yawé mɨpaɨ katinitahɨawe: «Kemɨ'ane yunenikɨ memɨtihareni tsɨikɨri wahepaɨ keniwarupata, 'iyata metitunuma'utɨ memɨtihareni xaɨtsie».
JDG 7:6 Haika tsienituyari teɨteri mekaniutihareni yumamakɨ me'enatihanɨwetɨ yuteta meheitatu'atɨ. Hipatɨ yunaitɨ metitunuma'utɨ mekaniutihareni.
JDG 7:7 Yawé Kerehuni mɨpaɨ katiniutahɨawe: «Haika tsienituyarikɨ teɨteri memutihari yunenikɨ, ne nepɨxetawikweitsitɨani, mariyanitsixi ne nepɨmatsiyetuirieni. Hipatɨta memuyuhayewaxɨ yukie mekehekɨne».
JDG 7:8 Hikɨ Kerehuni hipame 'ixaheritsixi kaniwarenɨ'ani yukie, haika tsienituyari xeikɨa kaniwarukunuitɨani, 'ikwaite mekateniukunuitɨani meta 'awate hɨtsieriwame. Mariyanitsixi mematitekai mayeweritsie pɨti'anekai, wayeta paitɨ Kerehuni mepɨtitekai.
JDG 7:9 Mɨkɨ tɨkaritsie Yawé Kerehuni mɨpaɨ katiniutahɨawe: «Xekenanuku'uti mematiteitsie xekeneukakɨni, nekaniwayetuamɨkɨ Mariyanitsixi.
JDG 7:10 Xɨka peheumaka pemɨwatakwinikɨ, kenaye'axi meri matsiparewiwame, Pura hamatɨa,
JDG 7:11 mana ketinetamari kemɨretaine. 'Anake pepɨyɨwekaxɨani pemɨwatakwini mematiteitsie». Hikɨ Pura hamatɨa 'iparewiwameya mekaneukakɨne tehɨwemete memati'upaitɨ, mematitei manuye'atɨkatsie.
JDG 7:12 Mariyanitsixi, 'amarekitsixi, meta hipatɨ teɨteri tau manatineika hepatsie kiekatari mana mekanititekaitɨni mayeweritsie, mekaniyumɨirekaitɨni 'utsikari wehepaɨ mekateniyuxexeiyakaitɨni. Wakameyutsixi mepɨkayu'inɨatsinɨakai, xiekari haramara tetsita mɨtika hepaɨ.
JDG 7:13 Kerehuni mana kaninuani yemekɨ xewitɨ yuheinɨtsi yuhamiku kuxaxatɨwakaku. Mɨpaɨ katinikuxatakaitɨni: ―Mɨpaɨ nepɨtiuheinɨ, tsewara payari tematitei mariyanitsixi kaninuani 'uxikɨriwarumetɨ, kepauka 'ixuriki kiyaritsie mukawautsekai mɨkɨ kanatixɨrɨwekaitɨni.
JDG 7:14 Hamikuya mɨpaɨ katinitahɨawe: ―Mɨkɨ tixaɨtɨ pɨti'inɨariyari, 'ixaheri tewiyari 'ixiparaya kanihɨkɨtɨni Kerehuni Kuhatsi nu'aya. Kakaɨyari kaniyetuirieni mariyanitsixi meta tinaime 'ena mɨtikupine.
JDG 7:15 Kepauka Kerehuni heinɨtsika mu'eni meta kemɨtiuhekɨatsie, kaniutihɨximakeni. Hikɨ mekanakunuaxɨani 'ixaheritsixi mematiteitsie mɨpaɨ kaniutayɨni: «Xekenanuku'uti. Yawé mariyanitsixi kanixeyetuirieni».
JDG 7:16 Kerehuni me'ayehaikame kaniwarayeitɨani, xeitsienituyaritsixi meyupapaɨmeme 'awa kaniwaruta'ɨitɨani meta tai mepu'ɨkai xarikɨ 'anukanatɨkaime.
JDG 7:17 Mɨpaɨ katiniwarutahɨawe: ―Xekenene'ɨkeni kenemɨtiyurieneni. Kepauka mematitei temaye'axɨaximeni yaxeikɨa xeketeneyurieka kenemɨtiyurieneni ne.
JDG 7:18 Kepauka ne meta memɨnetsi'aweiya 'awate temɨtihɨtsieni, xemeta xemeitihɨtsieni mematitei wawaritatsie, mɨpaɨ xemetiyuani: “Yawé hetsiemieme meta Kerehuni hetsiemieme”».
JDG 7:19 Kerehuni meta teɨteri xeitsienituyari hamatɨana memuhukai, mematitekaitsie manuyeniere mekaniu'axɨani tɨkari hixɨapa tehɨwemete memayutipatatsie, kepauka hutarieka tehɨwemete memanutahaxɨanikekaitsie. 'Awate mekaniutihɨtsieni meta xarite mekaniutitara kwiepa.
JDG 7:20 Me'ayuyehaikatɨ 'awate mekaniutihɨtsieni meta xarite mekaniutitara. Tai mekaniuti'ɨni yu'utakɨ, yutseriekɨ 'awa me'u'ɨtɨ memitihɨtsienikekai, mɨpaɨ mekateniuhiwa: «Yu'ixipara xekenewatihapani, Yawé hetsiemieme meta Kerehuni hetsiemieme».
JDG 7:21 Yuxexuitɨ 'ixaheritsixi mekana'utɨkɨne mematiteitsie, hikɨ yunaitɨ mariyanitsixi mekaniutinautsa me'utitsuatɨ.
JDG 7:22 Kepauka haika tsienituyari 'awate mutiyua, Yawé yakatiniuyurieni mɨkɨ teɨteri mana memukutekai yukɨmana mekaniuyutakwini yu'ixiparakɨ. Mɨkɨ mekaniuyuta'una Weti-Tsita paitɨ, Tserera hepatsie, 'Aweri-Mekura kiekariyari manuye'atɨka paitɨ, Tawati kiekariyaritsie heuhurakaku.
JDG 7:23 Hikɨ 'ixaheritsixi mekaniuta'inierieni, Nepɨtahari xiɨyarimama, 'Atsexi xiɨyarimama meta yunaitɨ Manatsexi xiɨyarimama, mɨkɨ mariyanitsixi mekaniwaranukuweiya.
JDG 7:24 Naitsarie hɨritsie 'Epɨrahini kwieyaritsie Kerehuni texaxatamete kaniwarutanɨ'ani mɨpaɨ me'utiyuaneme: «Xekeniwaruhupiexɨa yeuta meta hamuxapa mariyanitsixi, Kurutani hatuxameyaritsie manuyeyɨkɨtɨkatsie xekenanu'uixɨa, Weti-Wara paitɨ ye'atɨkaimetsie mexi mɨkɨ meka'anukɨniwawe». 'Epɨrahini nuiwarimama yunaitɨ mɨpaɨ mekatenikakɨne kememɨte'utahɨawarie.
JDG 7:25 'Ana 'Urewi mekaniuwiya meta Tsewi, yuhutame mariyanitsixi wa'ukiyarima. 'Urewi mekaniumieni 'aitsie hikɨ mɨkɨ 'ai 'Urewi mekateniuterɨwa, Tsewi mekaniumieni kaxie takari matipɨnarɨwatsie hikɨ mana Tsewi mekateniuterɨwa. Mepɨkatehayewakai mewaruweiyatɨ mariyanitsixi, 'Urewi mu'uya meta Tsewi mu'uya Kerehuni mekanetɨkirieni, Kurutani hatuxameyari 'anutaɨye muyuhayewakai.
JDG 8:1 'Epɨrahini xiɨyarimama Kerehuni mɨpaɨ mekateniutahɨawe: ―¿Titayari mɨya petatiyuriene? ¿Titayari pekatatiuta'ini kepauka pemetɨa mariyanitsixi pewaretakwinike? Mekanitatieni yu'iyarikɨ.
JDG 8:2 Mɨkɨ mɨpaɨ kaniutayɨni: ―¿Kenetiuyuri ne, xemeta kexete'uyuri? ¿'Atsixekatemate xeme matsi waɨkawa xemɨte'uyuri keyuri ne? Xeme 'etsiwa kexemɨte'uyuri, matsi waɨkawa pɨraye'axe, keyuri tame waɨkawa temɨte'uyuri.
JDG 8:3 Kakaɨyari puwayetua xehetsɨa 'Urewi meta Tsewi, mariyanitsixi tewa'aitɨwamete. Xɨka teheitixeiyaxɨani xeme kexemɨte'uyuri, neta kenemɨtiuyuri tixaɨtɨ pɨkatihɨkɨ. Kerehuni kemutayɨ me'i'enieka mekateniuhayewa meha'atɨ hepaɨtsitana.
JDG 8:4 Kerehuni meta teɨterimama haika tsienituyari Kurutani hatuxameyaritsie mekananukɨne tsepanetɨ memɨ'u'uxekai, peru mɨyatɨtɨ 'akuxi hipame mepɨwaruweiyakai memɨwaraye'uniekai.
JDG 8:5 Mana Kerehuni Tsukuti kiekatari mɨpaɨ katiniwarutahɨawe: ―Paa xekeniwarumikwa nekuyaxima, mepu'u'uxe 'akuxi Tsewa meta Tsarimuna nepɨwaruweiya Mariyani kiekariyaritsie te'aitamete.
JDG 8:6 Tsukuti kiekatari memanuyetei mɨpaɨ mekaniutiyuani: ―¿Kamɨtsɨri Tsewa meta Tsarimuna petiwara'iwaxɨ? ¿Titayari paa tetewamini 'akuyaxima?
JDG 8:7 Kerehuni mɨpaɨ kaniutayɨni: ―'Aixɨa kani'aneni, kepauka Yawé mɨnetsiyetuirieni Tsewa meta Tsarimuna, xuyakɨ ne nenixetiherɨkamɨkɨ xewaiyaritsie meta 'ɨtsi makumawetsie miemekɨ.
JDG 8:8 Mana mɨyetɨa kaneyani Peniheri manata yaxeikɨa kaniutayɨni. Peru Peniheri kiekatari yaxeikɨa mekateni'eiya Tsukuti kiekatari wahepaɨ.
JDG 8:9 'Ayumieme mɨpaɨ katiniwarutahɨawe Peniheri kiekatari: «Kepauka nemakunuani nerane'iwame 'ikɨ tuxiyu nekanatihɨamɨkɨ».
JDG 8:10 Tsewa hamatɨa Tsarimuna, Karikuxi mekanititekaitɨni kuyaxi tamamata heimana 'auxɨwime miriyari mewarawitɨtɨ, mɨkɨ xeikɨari mekanihɨkɨtɨkaitɨni tau manatineika hepatsie kiekatari, mekaniukwi'iwakaitɨniri meyukwitɨwetɨ xeitsienituyari heimana xeitewiyari miriyari kuyaxi.
JDG 8:11 Kerehuni ku'uwamete mematiteitsie kaneutiyune, Nuwa tserieta meta Yukiweya, mana kaniwarutakwini kepauka kuyaxi 'atsimemɨkateha'eriwakai.
JDG 8:12 Te'aitamete memuyuhuta Mariyani kiekatari, Tsewa meta Tsarimuna mekaniuyuta'una, peru mɨkɨ kaniwaranukuweiya kaniwarutiwiya, wamariutatɨ yunaime kuyaxi.
JDG 8:13 Kepauka Kerehuni Kuhatsi nu'aya makunua heyukumieka, Keretsi kaniuyeyani,
JDG 8:14 mana xeime kaniuwiya temaikɨ kaniti'iwawiya. Hikɨ temaikɨ kaniwaraka'utɨani haika tewiyari heimana tamamata memanuyetei 'ukirawetsixi Tsukuti kiekatari.
JDG 8:15 Hikɨ Kerehuni kaneyani mɨpaɨ katiniwarutahɨawe Tsukuti kiekatari: «Kamɨ 'ena Tsewa meta Tsarimuna mɨkɨkɨ xemɨniukixiekai mɨpaɨ xe'utiyuatɨ: “¿Kamɨtsɨ petiwara'iwaxɨri Tsewa meta Tsarimuna? ¿Titayari paa tetewamini 'akuyaxima memu'u'uxe?”»
JDG 8:16 Mɨkɨ kaniwarutiwiya 'ukirawetsixi te'aitamete mana kiekatari, xuya kanikuwauni meta 'ɨtsi makumawetsie mieme, mɨkɨkɨ katiniwarukwinitɨani Tsukuti kiekatari.
JDG 8:17 Peniheri tuxiyuyari meta kaniuka'una meta teɨteri kaniwarukwini mana kiekatari.
JDG 8:18 Hikɨ kaniwaruta'iwawiya Tsewa meta Tsarimuna: ―¿Keme'anenekai teɨteri xemɨwarukwi Tawuxi? Mɨkɨ mɨpaɨ mekaniutiyuani: ―'Ahepaɨ mepɨteyuxexeiyakai, hutarieka te'aitamete wahepaɨ mepɨteyuxexeiyakai.
JDG 8:19 Kerehuni mɨpaɨ kaniutayɨni: ―Ne'iwama mekanihɨkɨtɨkaitɨni, nemaama niwemama, Yawé kemɨrayeniere xɨka xetewareuyehɨwirienike, ne nepɨkaxekwinikeyu.
JDG 8:20 Yuniwe Ketexi hepa 'uyaka 'amɨyumate mɨpaɨ katinitahɨawe: ―Xeiya keniwarukuya. Peru Ketexi yu'ixipara pɨkahewatiha mɨtemaikɨtɨkaikɨ pɨmakai.
JDG 8:21 Tsewa hamatɨa Tsarimuna mɨpaɨ mekaniutiyuani: ―Xeiya, 'ekɨtɨ ketaneukuya. “'Uki kanimatsiɨkɨni kemɨtiyɨwe”. Kerehuni kananukukeni Tsewa meta Tsarimuna kaniwarukwini meta wakameyutsixi kuka mematitɨtɨkatei metseri hepaɨ 'aneneme kaniwaratixɨniriexɨani.
JDG 8:22 Hikɨ 'ixaheritsixi Kerehuni mɨpaɨ mekateniutahɨawe: ―Ketatineuta'aitɨa tame, 'a'utɨata 'aniwe, mɨkɨ 'utɨata 'ateukari, pemɨtatsi'uxɨnaxɨkɨ mariyanitsixi wahetsɨa.
JDG 8:23 Peru Kerehuni mɨpaɨ katiniwarutahɨawe: ―Ne nepɨkatixeta'aitɨani, meta neniwe. Yawé xeikɨa pɨtixeta'aitɨani.
JDG 8:24 Mɨpaɨta kaniutayɨni: ―Mɨpaɨ nepɨtixetahɨawe, yuxexuitɨ xeme xekenetsiyetuirieni hanira, meripai temɨwarutakwi tiwapiini. 'Itsimaheritsixi huru hanirayari yamekateneumanakaitɨni.
JDG 8:25 Mɨkɨ mɨpaɨ mekaniutiyuani: ―Tekameniyetuiriekuni. Mana mata 'ixurikiyari mekanikuwera, yuxexuitɨ mana yuhanira mekanamaxɨani.
JDG 8:26 Naitɨ kanayani tamamata heimana 'atanauka kiruyari huru hanirayari, ka'inɨaritɨ mɨrakatɨriketɨka, mɨtixikɨrawi, 'ixurikite mɨxeta te'aitamete wakamixa Mariyani kiekatari, meta kuka kameyutsixi memekatɨtɨkatei.
JDG 8:27 Mɨkɨ hurukɨ Kerehuni mawari wewiwamete memenakatɨkɨ kaniutawewieni, yukiekaritsie 'Upɨra mɨrakutewatsie kanihɨani. Yunaitɨ 'ixaheritsixi 'axamekateniuyurieni mɨkɨ hɨxie metitunuma'uwetɨ, Kerehuni meta niwemama wawiniyari kanayani.
JDG 8:28 'Ixaheritsixi mariyanitsixi mekateniwaruta'uximayatsitɨani. Huta tewiyari wiyari kepauka Kerehuni muyeikakai 'akuxi tawariri metehayu'iwatɨ mepɨkahakɨ kayuwatɨ mehexeiyatɨ mekanakɨne 'ixaheritsixi.
JDG 8:29 Yeruwahari Kuhatsi nu'aya kanakunuani yukie mukanikɨ.
JDG 8:30 Haika tewiyari heimana tamamata yuniwema kaniwarayexeiya, 'ɨitamama memɨyuwaɨkawakaikɨ.
JDG 8:31 'Ukaratsi mɨti'uximayatsiriekai, Tsikeni mukatei hetsiemieme xeimeta kanayexeiya, Kerehuni 'Awimereki katiniterɨwa
JDG 8:32 Kerehuni kaniumɨni Kuhatsi nu'aya, kaniukateukieni Kuhatsi makateukietsie 'Upɨra kiekariyaritsie, 'Awietsexi xiɨyarimama mematitekaitsie.
JDG 8:33 Kepauka mumɨ Kerehuni, 'ixaheritsixi tawarita 'axamekateniuyurieni kakaɨyarixi Wahari hetsɨa miemete mewarayexeiyatɨ mekanakɨne. Wahari-Weriti mekananayexeiya mɨwakakaɨyaritɨnikɨ.
JDG 8:34 'Ixaheritsixi Yawé mekanatɨmaiya yukakaɨyari, mɨwaruparewi kepauka hipatɨ memɨwa'uximatɨakaitsie.
JDG 8:35 Metatsiere Yeruwahari Kerehunitɨtɨ niwemama mekapɨwanaki'eriekai, tsepa 'aixɨa mɨtiuyuriekai 'Ixaheri hetsiemieme.
JDG 9:1 'Awimereki Yeruwahari nu'aya kaneyani, Tsikeni wareuxeiyamieka yu'iwama yumaamatsiemieme, mɨpaɨ katiniwarutahɨawe yunaime yumaama niwemama:
JDG 9:2 «Xekeniwaruta'iwawiya yunaime teɨteri Tsikeni kiekatari: “¿Kehepaɨ tixenake matsi: memɨtexeta'aitɨani haika tewiyari heimana tamamata Yeruwahari niwemama, nutsɨ xewitɨ xeikɨa pɨtixe'aitɨaka?” Xekenaye'eri ne matsi nekanixe'iwatɨni».
JDG 9:3 Kepauka maamaya 'iwamama yunaime teɨteri Tsikeni kiekatari mɨpaɨ memɨtewarutahɨawixɨ, mɨkɨ mepuyuwaɨri 'Awimereki memɨparewienikɨ mɨpaɨ me'utiyuatɨ: «Mɨkɨ pɨta'iwa».
JDG 9:4 Mekani'ɨitɨani pɨrata tuminiyari haika tewiyari heimana tamamata Wahari-Weriti kiita mieme, mɨkɨkɨ 'Awimereki hipame 'axamemɨte'u'iyari kaniwaruta'inieni memiparewienikɨ.
JDG 9:5 Kaneyani 'Upɨra kiekariyaritsie, yupaapakie, xeiteteyarikɨ mana haika tewiyari heimana tamamata yu'iwama kaniwarukwini, Yeruwahari niwemama, Yeruwahari nu'aya Kutani 'etsimɨyumate yuti'awietaka mɨpaɨ katiniuyuta'una.
JDG 9:6 Yunaitɨ Tsikeni kiekatari meta Weti-Miru kiekatari mekaniuyukuxeurieni, xiu manuwe tete manuka mɨpatsie Tsikeni, 'Awimereki memanakurunatɨanikɨ mɨti'aitametɨnikɨ.
JDG 9:7 Kepauka Kutani mɨretima, kananutiyani yemuritsie Keritsini mɨtitewatsie, mɨpaɨ karima katiniwareukahiwieni: «Xekeneneu'eni, teɨteri Tsikeni kiekatari, Kakaɨyari xemeta kexe'u'enieni.
JDG 9:8 »Merikɨtsɨ kɨyexi 'iteɨriyari xeime mekananayexeiya mɨtiwata'aitɨanikɨ. Hikɨ huriwu mɨpaɨ mekateniutahɨawe: “Ketatineuta'aitɨa 'ekɨ”.
JDG 9:9 Peru huriwu mɨpaɨ katiniwarutahɨawe: “¿Kamɨtsɨ netihayewa hatseiti nexuawitɨatɨ? mɨkɨkɨ 'aixɨa memɨ'itɨarie kakaɨyarixi meta teɨteri, para xeheima xeikɨa nemuyuanenikɨ”.
JDG 9:10 »Hikɨta 'iteɨrite xapa 'iteɨriyari mɨpaɨ mekateniutahɨawe: “Ketatineuta'aitɨa 'ekɨ”.
JDG 9:11 Peru xapa 'iteɨriyari mɨpaɨ katiniwarutahɨawe: “¿Kamɨtsɨ netihayewa xapa 'ikwaxiyari witsimɨrakaka nexuawitɨatɨ? Para xeheima xeikɨa nemuyuanenikɨ”.
JDG 9:12 »Hikɨta 'iteɨrite kaxie 'iteɨriyari mɨpaɨ mekateniutahɨawe: “'Ekɨ ketatineuta'aitɨa”.
JDG 9:13 Kaxie mɨpaɨ katiniwaruta'eiya: “¿Kamɨtsɨ netihayewa winu newewietɨ, mɨkɨ kakaɨyarixi mɨwatemawieritɨa meta teɨteri? Para xeheima xeikɨa nemuyuanenikɨ”.
JDG 9:14 »'Imatɨrieka yunaitɨ 'iteɨrite xuya 'etsimutewi mɨpaɨ mekateniutahɨawe: “'Ekɨ ketatineuta'aitɨa”.
JDG 9:15 Xuya mɨpaɨ 'iteɨrite katiniwaruta'eiya: “Xɨka yurikɨ xenetsi'anayexeiya nemɨtixe'aitɨakakɨ, 'axekenakɨni xekeneyu'awietani ne'etɨriyatɨa, xɨka mɨpaɨ xeka'uyɨni, xuyatsie tai keyenuiwa, naime ke'utixɨtsitɨani kariuxa Riwanu mieme”.
JDG 9:16 »¿Kamɨtsɨ 'aixɨa xete'uyuri 'Awimereki xemanakurunatɨa yuri xete'i'eririetɨ? 'Aixɨa xetewaku'eriya Yeruwahari niwemama, keyeme mɨreuyewetse wahepaɨtsita.
JDG 9:17 Nepaapa puyutami xehetsiemieme yutatuatɨ pɨxe'utawikweitsitɨa mariyanitsixi kememɨtexe'uximatɨakai.
JDG 9:18 Peru hikɨ 'axaxepɨte'uyuri, nepaapa niwemama xepɨwarukwi haika tewiyari heimana tamamata xeiteteyaritsie, 'Awimereki meta ti'aitame xete'ayeitɨa, Tsikenitari mɨtiwa'aitɨakakɨ, nepaapa mɨti'uximayatsiriekai nu'aya mɨxe'iwakɨ xeikɨa.
JDG 9:19 Xɨka hikɨ 'aixɨa xetewaku'eriyani Yeruwahari niwemama, xekeneyutemamawieka 'Awimereki hamatɨa, mɨkɨta xehamatɨa keyutemawieka.
JDG 9:20 Xɨka mɨpaɨ ka'aneni, Tsikeni kiekatari meta Weti-Miru kiekatari, 'Awimereki hetsie tai ke'ayeneni mekexe'utixɨtsitɨani, xehetsieta tai ke'ayeneni 'Awimereki ke'utaxɨtsitɨani».
JDG 9:21 Mɨya'utayɨka Kutani kaniuyuta'una, kaneyani Wehexi kiekariyaritsie paitɨ. Mana 'ukaitɨ kanayani yu'iwa 'Awimereki mɨmakakaikɨ.
JDG 9:22 'Awimereki katiniwaruta'aitɨakaitɨniri 'ixaheritsixi haika wiyari,
JDG 9:23 kepauka Kakaɨyari 'iyari 'axamɨ'ane meyenɨ'a 'Awimereki hetsie meta Tsikeni kiekatari wahetsie, 'ana mekaniku'eirieni.
JDG 9:24 Mɨpaɨ katiniuyɨni 'axamemɨwaruyurikɨ Yeruwahari niwemama haika tewiyari heimama tamamata, waxuriya memutayeurikɨ, wa'iwa hetsie mɨtinakekɨ 'Awimereki mɨwarukwikai, meta teɨteri Tsikeni kiekatari memiparewiekai.
JDG 9:25 'Ukitsi Tsikeni kiekatari tɨrikɨa hɨritsie mekanitihupakaitɨni, mana mekateniwanawairietɨwekaitɨni kemɨ'ane mana memuyekɨkakai. 'Awimereki katinetimani mɨkɨ hepaɨtsita.
JDG 9:26 Hikɨ mana kaninuani Kahari 'Eweri nu'aya Tsikeni, 'iwamarixi yunaitɨ, mana kiekatari hetsiena mekateniuwiya.
JDG 9:27 Yuwaxata me'anukɨneka meta kaxie takari me'utiketsika, 'ixɨarari mekanatinetɨani yukakaɨyari tukita. Kepauka memɨtekwakai meta memɨ'iekai 'Awimereki 'axamekateniutamani.
JDG 9:28 Kahari 'Eweri nu'aya mɨpaɨ kaniutayɨni: «¿Ketita tiyu'erie 'Awimereki, ketitata Tsikeni tihɨkɨ para mɨti'uximayatsiriekakɨ? Yeruwahari nu'aya tamɨkatihɨkɨ, Tsewuri meta ti'uximayatsiriwame katihɨkɨ. Kamuxi niwemama Tsikeni paapaya ketiwa'aitɨaka. ¿Titayari 'Awimereki tete'uximayatsirieka?
JDG 9:29 Xɨka 'ikɨ teɨteri ne netiwa'aitɨakake, ne 'Awimereki nepanakahɨanikeyu, mɨpaɨ nepɨtitahɨawiwe: Keniwarukuxeɨri yunaime 'akuyaxima hikɨmɨ tepɨtatakwini”».
JDG 9:30 Tsewuri, kiekari mɨhɨritɨariekai, kaniuyeha'ani waɨkawa kepauka mu'enaxɨ kemutainekai Kahari 'Eweri nu'aya.
JDG 9:31 Hikɨ 'awie kaniwarenɨ'ani texaxatamete 'Awimereki hetsɨa, mɨpaɨ tiwarahɨawetɨ: «Kahari 'Eweri nu'aya meta 'iwamama Tsikeni mepu'axɨa yunaime 'axamepɨtewakɨhɨawe 'ahepaɨtsita.
JDG 9:32 Xekenanuku'uti 'ateɨterima xeyunaitɨ tɨkarikɨ yeuta xekeniwaruhupi.
JDG 9:33 Ximeri tau haneyu, kiekaritsie pekaniye'amɨkɨ. Kepauka Kahari mayeyani metsitamienike, 'ekɨtsɨ kemɨmatinake yaketineuyuri».
JDG 9:34 Hikɨ 'Awimereki kananukukeni meta kuyaximama tɨkarikɨ, mekaniuyuti'awieta yeuta Tsikeni heuhurakaku, me'ayenaukatɨ kuyaxiyari mekanakɨne.
JDG 9:35 Kahari 'Eweri nu'aya kiekari kitenie kaniuwekaitɨni, kepauka 'Awimereki memɨwatikɨ mewahupietɨ.
JDG 9:36 Kepauka Kahari mɨwaruxei mɨpaɨ Tsewuri katiniutahɨawe: ―Neuxei, teɨteri tɨrikɨa mepakahu. Tsewuri mɨpaɨ katinitahɨawe: ―Hɨri 'etɨrieya pekatinixeiyani.
JDG 9:37 Peru tawarita Kahari mɨpaɨ kaniutayɨni: ―Neuxei, hipatɨta xeime Yemuri hixɨapa mukatsie mepakahu, hipatɨta Xiu manuwe memɨtemaiwawe wahuyeyari'utɨa.
JDG 9:38 Hikɨ Tsewuri mɨpaɨ katinitahɨawe: ―Hikɨta para mɨpaɨ keneutayɨki, kepemutainekai: “¿Tita tihɨkɨ 'Awimereki temɨte'i'uximayatsiriekakɨ?” ¿Mɨkɨ teɨteri mekatehɨkɨ pemɨwaniukima? Ketsɨari keniwarutakuya.
JDG 9:39 Kahari Tsikeni kiekatari wara'inietɨ 'Awimereki kaniutamieni.
JDG 9:40 Peru 'Awimereki pɨwaranukuwei, meyu'unarɨmetɨ yumɨiretɨ mekaniukaxɨrieni huyeta kiekari kitenie paitɨ.
JDG 9:41 'Awimereki 'Aruma kaniuyuhayewa, Tsewuri Tsikeni kiekariyaritsie Kahari meta 'iwamama kaniwarayeweiya.
JDG 9:42 'Uxa'arieka teɨteri Tsikenitsixi mekanayekɨne yu'etsarita, mɨpaɨta katiniutahɨawarieni 'Awimereki.
JDG 9:43 Hikɨ 'Awimereki yuteɨterima kaniwarukuxeɨrieni haika kuyaxiyari kaniwarayeitɨani, mekaniuyuti'awieta 'etsarita. Kepauka memɨwaruxei kiekaritsie mewayekɨkame, mekananuku'uni mewatakwinike.
JDG 9:44 'Awimereki meta hamatɨana memuhukai mekaniutinautsa kitenie memu'unikɨ. Huta kuyaxiyari, yu'etsarita memu'uwakai mekaniwarukwini.
JDG 9:45 'Awimereki kaniyumienekaitɨni mɨkɨ tukarikɨ, yunaime teɨteri warukwika meta kiekari naime 'uka'unaka naitsarie kwiepa 'una kaniutawiwiweni mɨkatitixuawerekɨ.
JDG 9:46 Mɨpaɨ metehetimaika teɨteri Tuxiyu Tsikeni mieme hetsie memakatekai, hikɨ mekaniyuti'awieta kakaɨyari Weriti tukita 'aixɨa mɨrekunameta.
JDG 9:47 'Awimereki retimaika kename muwa mehayetekai,
JDG 9:48 mɨkɨ meta teɨterimama mekanekɨne Tsarimuni hɨriyaritsie. Hatsa 'utituka kɨyexi kaniutiwiteni yunaiparie kaneitixɨrieni. Yuteɨterima mɨpaɨ katiniwarutahɨawe: «Yaxeikɨata xeketeneuyuri kexemɨnete'uxei. Xeiya».
JDG 9:49 Yunaitɨ teɨterimama kɨyexi mekanawitexɨani 'Awimereki mekananukuweiya teɨteri memɨwayetei paitɨ, mana mekanikuxeɨrieni kɨyexi mekanitataiya. Mɨpaɨ mekateniukwini teɨteri Tuxiyu Tsikeni mieme taɨta memayetekai, xeimiriyari mekanihɨkɨtɨkaitɨni 'ukitsi 'ukari.
JDG 9:50 'Ariketa 'Awimereki Tewetsi kaneyani, manata kanitahani kaniwarutiwiya.
JDG 9:51 Mɨkɨ kiekaritsie tuxiyu kaniuwekaitɨni, mɨkɨta mekaniuyuta'unakaitɨni, 'ukitsi 'ukari. Mekaneuyunani mɨkɨ tuxiyuta wapaitɨ mekananutikɨne.
JDG 9:52 'Awimereki tuxiyu manuwe kaniye'ani kaniwarutakwini. Peru kepauka 'ahurawa mumiekai 'itaiyake,
JDG 9:53 'ukaratsitɨtɨ kaneikatuaxa tete titɨxɨmekɨ 'Awimereki mu'uyatsie kaniukaweni, mu'uya kaniutatare.
JDG 9:54 Yapauka 'Awimereki yɨhɨweme kaniuta'inieni mɨpaɨ katinitahɨawe: «'A'ixipara kenewatihani keneneumi'a, mɨpaɨ nemɨkaraxaxatsiwanikɨ: “'Ukaratsi kanimieni”». Hikɨ 'ihɨweme yu'ixiparakɨ kanitseni, mɨpaɨ katiniumɨni.
JDG 9:55 Kepauka 'ixaheritsixi 'Awimereki memuxei mɨkime, yukie mekanakunuaxɨani.
JDG 9:56 Mɨpaɨ Kakaɨyari 'Awimereki katinakapitɨani, yupaapa hepaɨtsita 'axamɨtiuyuriekaikɨ yu'iwama mɨwarukwikaikɨ, haika tewiyari heimana tamamata.
JDG 9:57 Metatsiere, teɨteri Tsikeni kiekatari 'axamemɨte'uyurikɨ memɨte'ayukatuanikɨ, Kakaɨyari katiniuyurieni. Mɨpaɨ katinaye'ani Kutani ke'axamɨwaruyurikɨ Yeruwahari nu'aya.
JDG 10:1 'Awimereki 'utɨa xewitɨta 'aniutakeni, 'ixaheritsixi mɨwatawikweitsitɨanikɨ 'Itsakaxi xiɨyarieyatɨtɨ. Turaxi katinitewakaitɨni, Puwa nu'aya, Ruru teukarieya. Tsamixi kiekariyaritsie kaniukateitɨni 'Epɨrahini hɨriyaritsie,
JDG 10:2 'ixaheritsixi katiniwaruta'aitɨani xeitewiyari heimana haika wiyari, hikɨ kaniumɨni, Tsamixi kiekariyaritsie kaniukateukieni.
JDG 10:3 Turaxi 'umɨku 'arike Yahixi 'itsɨkame kanayani Karaha kiekame, katiniuta'aita xeitewiyari heimana huta wiyari.
JDG 10:4 Xeitewiyari heimana tamamata kaniwarutinuarieni, yuxexuitɨ mɨkɨ yupuxuritsie mekananutiyaxikekaitɨni, meta yuxexuitɨ mekateni'aitakaitɨni xeikiekariyaritetsie Karaha kwieyaritsie. Hikɨ 'akuxi mɨkɨ kiekarite mɨpaɨ katinematiwani «Yahixi kiekariteya».
JDG 10:5 Kepauka mumɨ Yahixi, kaniukateukieni Kamuni kiekariyaritsie.
JDG 10:6 Tawarita 'ixaheritsixi Yawé kemɨkatinake mekateniuyurieni, Wahari kakaɨyarixiyari meta 'Atsitaruti 'ɨkiyarite, 'Arami, Tsiruni, Muhawi, 'amunitsixi meta piritsiteutsixi wakakaɨyarixi pɨta mewarayexeiyatɨ mekanakɨne. Mɨpaɨ 'ixaheritsixi Yawé mekateniuku'eirieni,
JDG 10:7 hikɨ Yawé kaniwaruyeheka 'ixaheritsixi, kaniwayetuani piritsiteutsixi wahetsɨa meta 'amunitsixi wahetsɨa,
JDG 10:8 mana mɨtiyehane tamamata heimana 'atahaika wiyari, 'ixaheritsixi teɨteriyari mekateniuka'eniwakaitɨni Karaha memɨtamakai, 'amuxeutsixi wakwieyaritsie, Kurutani 'anutaɨye.
JDG 10:9 'Amunitsixi tsiere mekananukɨne Kurutanitsie, Kura xiɨyarimama meta Wenikamini 'Epɨrahini mewatakwinike, mɨkɨkɨ 'ixaheritsixi waɨkawa mekatenikwinekaitɨni.
JDG 10:10 Hikɨ 'ixaheritsixi Yawé hetsɨa parewiya mekaniutawauni: ―Kemɨkamatinake tepɨte'uyuri, tematsi'uku'eiri takakaɨyari, Wahari hetsɨa miemete pɨta kakaɨyarixi tewarayexeiyatɨ tepakɨ.
JDG 10:11 Yawé mɨpaɨ kaniutayɨni: ―Kepauka 'ekipitutari, 'amuxeutsixi, 'amunitsixi, piritsiteutsixi,
JDG 10:12 tsiruniyutsixi, 'amarekitsixi meta mariyanitsixi, memɨxe'uximatɨakai xemeta parewiya xeputawau nehetsɨa nemɨxeparewienikɨ, kamɨtsɨ nekatixe'uxɨnaxɨ.
JDG 10:13 Peru xeme xepɨnetsi'uku'eiri, hipame pɨta kakaɨyarixi wahɨxie xepukatunuma'uwe, 'ayumiemeri nepɨkaxetawikweitsitɨani.
JDG 10:14 Xekenehu xekenewaretawawiri kakaɨyarixi xemɨwarayexeiya. Mɨkɨ mekexehetawikweitsitɨani kexemɨtehe'uximatɨarie.
JDG 10:15 Peru 'ixaheritsixi Yawé mɨpaɨ mekateniutahɨawe: ―'Axatepɨte'uyuri. Yaketineuyuri tahetsie kematinake, peru tepɨmatsiwawirie pemɨtatsitawikweitsitɨanikɨ 'ikɨ tukaritsie.
JDG 10:16 Hikɨ kakaɨyarixi mekaniwaruku'eirieni memɨwarayexeiyakai, Yawé me'ayexeiyatɨ pɨta mekanakɨne, meta Yawé pɨkayɨwekairi mɨtinewieka, 'ixaheritsixi kememɨte'uka'eniwakai.
JDG 10:17 Kepauka 'amunitsixi memuta'inierie Karaha mekanikuyaxe, 'ixaheritsixi mekaniyukuxeɨrieni, Mitsipa mekanitiyaxe meyukuha'aritɨanike.
JDG 10:18 Memanuyetei meta yunaitɨ teɨteri mɨpaɨ mekateniyukɨhɨawekaitɨni: «Kemɨ'anemeri mitsutɨani 'amunitsixi temɨwatakwinitsie mɨkɨ ti'aitame kanayeimɨkɨ Karaha kiekariyaritsie».
JDG 11:1 Ketexi Karaha kiekame kwinimieme katineuyutamiewekaitɨni, Karaha nu'aya meta 'ukaratsi tuminikɨ muyuwitɨnɨa nu'aya.
JDG 11:2 Karaha yuniwema kaniwarayexeiya yu'ɨyatsie, mɨkɨ kepauka memutiwawerixɨ Ketexi mekaniutaweiya. Mɨpaɨ mekatenitahɨawe: «'Ekɨ 'ahetsie pɨkatinake tita tapaapa mɨtatiku'eiririeni, xewitɨ pɨta mɨ'amaamakɨ».
JDG 11:3 Hikɨ Ketexi kaniuyuta'una 'iwamama mɨyame'utiyuaku, kaneyani Tuwi kwieyaritsie, mana hipatɨ mekanitinɨni 'axamete'u'iyaritɨ, mekaniku'uwakaitɨni 'axametekuyurietɨ.
JDG 11:4 'Arikeke kepauka 'amunitsixi 'ixaheritsixi memɨwarutakwi,
JDG 11:5 'ukirawetsixi Karaha kiekatari Ketexi mekanekuwitɨni Tuwi kwieyaritsie paitɨ.
JDG 11:6 Mɨpaɨ mekatenitahɨawe: ―Hikɨmɨ, pemanuyehaitɨani pepayani, 'amunitsixi temɨwatakwinikɨ.
JDG 11:7 Ketexi mɨpaɨ kaniutayɨni: ―Xeme xekateyɨa xemɨnetsi 'utixani'eri nepaapa kie xemɨnetsi'utawei. ¿Titayari hikɨ xenetekuwautɨwe, xeyumexɨitɨatɨ?
JDG 11:8 'Ukirawetsixi Karaha kiekatari mɨpaɨ mekatenitahɨawe: ―'Ayumieme hikɨ tematsikuwautɨwe. Kɨmɨ 'amunitsixi tepɨwaretakwini, meta Karaha kiekatari tiwa'aitɨwame pepayani.
JDG 11:9 Ketexi mɨpaɨ kaniutayɨni: ―Xɨka xenetsihewitɨni 'amunitsixi temɨwaretakwinikɨ xɨka Yawé netsiheyetuirieni, hikɨ yurikɨ xehetsiemieme ti'aitame nekanayeimɨkɨ.
JDG 11:10 'Ukirawetsixi yurikɨ mehaitɨkaitɨ mɨpaɨ mekatenitahɨawe: ―Yawé tahetsiemieme pɨtimate: Yatepɨteyurieni kepemaineni 'ekɨ.
JDG 11:11 Ketexi kaneyani 'ukirawetsixi Karaha kiekatari wahamatɨa, teɨteri mekanenukakeni mɨtiwa'aitɨakakɨ. Mitsipa katiniutaxata naime Yawé hɨxie.
JDG 11:12 Hikɨ Ketexi tupiritsixi kaniwarenɨ'ani 'amunitsixi tiwa'aitɨwame wahetsɨa, memeita'iwawiyakɨ: ―Ketita perayexeiya nehetsɨa, titayari 'uperamie neteɨterima pewatakwinike.
JDG 11:13 'Amunitsixi tiwa'aitɨwame Ketexi tupiritsiximama mɨpaɨ katiniwaruta'eiya: ―Kepauka 'ixaheritsixi memayekɨ 'Ekipitu, nekwie mepɨnetsi'unawairi 'Axinuni 'akiyari meta Kawuki 'akiyaritsie paitɨ ye'atɨkaime, meta Kurutani hatuxameyari paitɨ. Hikɨ keneneyetuiri 'aixɨa 'iyari.
JDG 11:14 Ketexi tawarita tupiritsixi kaniwarenɨ'ani, 'amunitsixi tiwa'aitɨwame hetsɨa,
JDG 11:15 mɨpaɨ tiwaruxatɨaka: «Ketexi mɨpaɨ kanaineni: “'Ixaheritsixi, 'amunitsixi wakwie mepɨkawarunawairi meta muhawitsixi.
JDG 11:16 Kepauka 'ixaheritsixi memayekɨ 'Ekipitu, makumawetsie mepuyekɨ Haramara Mɨxetatsie paitɨ mepu'axɨa, manata Karetsi paitɨ.
JDG 11:17 Hikɨ tupiritsixi mepɨwarenɨ'a 'Erumi ti'aitame hetsɨa, mɨpaɨ metewarahɨawetɨ: ‘Ketaneupitɨa 'akwietsie temuyekɨnekɨ’. Peru 'Erumi ti'aitame pɨkawarupitɨa. Yaxeikɨata Muhawi ti'aitame mekatenenɨ'airieni yaxeikɨa mehaitɨkaitɨ, mɨkɨta yapɨkatiutanaki'eri. 'Ana 'ixaheritsixi Karetsi mekaniuyuhayewa.
JDG 11:18 »”'Arikeke mekaniuhukaitɨni makumawetsie, 'Erumi kwieyari warita meta Muhawi, muhawitsixi wakwieyari 'aurie mekaniuyekɨne tau manatineika hepatsie, 'Axinuni hatɨayari manuyeka 'anataɨye mekaniyuhayewa. Peru muhawitsixi wakwietsie mepɨkaheutahaxɨa, 'Arinuni kwieyari manuye'atɨka mɨhɨkɨtɨkaikɨ.
JDG 11:19 »”Hikɨ 'ixaheritsixi tupiritsixi mekaniwarenɨ'ani Tsikuni hetsɨa, 'amuxeutsixi tiwa'aitɨwame, Hetsiwuni mɨti'aitakai, mɨpaɨ mekatenitahɨawe: ‘Ketaneupitɨa 'akwietsie temuyekɨnekɨ takwietsie temeta'axɨanikɨ.’
JDG 11:20 Peru Tsikuni yuri pɨkatiwaruta'eriri, pɨkawarupitɨa kwieyatsie memuyekɨnekɨ 'ixaheritsixi, yukuyaxima pɨta kaniwarukuxeɨrieni Yahatsa mekanitiyaxe 'ixaheritsixi mekaniwarutakwini.
JDG 11:21 »”Yawé, 'ixaheritsixi wakakaɨyari, Tsikuni kaniyetuani meta kuyaximama 'ixaheritsixi memɨwara'iwakɨ. Mɨpaɨ tiuyɨku 'ixaheritsixi wakwie kanayani 'amuxeutsixi wakwie mɨkɨ kwieyaritsie memu'uwakai,
JDG 11:22 naime mekunatɨ 'Axinuni hatɨayari meta Kawuki hatɨayaritsie ye'atɨkaime, makumawe meta Kurutani hatuxameyaritsie ye'akame.
JDG 11:23 »”Yawé, 'ixaheritsixi wakakaɨyari, 'amuxeutsixi kaniwarunawairieni yuteɨterima mɨwayetuirienikɨ, ¿kamɨtsɨ 'ekɨta petatinawairieni?
JDG 11:24 ¿Kamɨtsɨ 'ekɨ 'apiinite pekarayeitɨwa 'akakaɨyari Kemuxi mɨmetiyetuiriwa? Tameta yaxeikɨa tapiinite tepɨtehayeitɨwa Yawé takakaɨyari mɨtatiyetuiri.
JDG 11:25 ¿Kamɨtsɨ 'ekɨ Tsipuxi nu'aya Waraki Muhawi ti'aitame reuyeta petiyɨweme peti'a'erie? Mɨkɨ hatsuaku pɨkatatsi'uyehekaxɨ pɨkatatsi'utakwi tame 'ixaheritsixi.
JDG 11:26 Haika tsienituyari wiyari kananuyemieniri 'ixaheritsixi Hetsiwuni meta 'Aruhexi wapiinite hamatɨa, naitɨ kiekari 'etsimɨyeyeu 'amɨyeyeu 'Axinuni tetsita mukumanekai. ¿Titayari 'anapaitɨ mɨpaɨ xekate'utiyua?
JDG 11:27 Ne 'axanepɨkamatitahɨawiwe. 'Ekɨ pɨta 'axapepɨtiyuriene nehamatɨa pepɨ'amiemɨkɨ. Yawé, mɨmariwe 'itsɨkame, yake'utayɨni ketemaku'ane 'ixaheritsixi meta 'amunitsixi”».
JDG 11:28 Matsi, 'amunitsixi tiwa'aitɨwame Ketexi tupiritsiximama pɨkawaru'eni.
JDG 11:29 Hikɨ Ketexi, Yawé 'iyari 'ipitɨaku, Karaha kaniuyeyani meta Manatsexi, Mitsipa kaniuyeyani Karaha, manari 'amunitsixi wahetsɨa kaniye'ani.
JDG 11:30 Ketexi Yawé yakatiniutahɨawe mariwemekɨ: «Xɨka yurikɨ penetsiyetuirieni 'amunitsixi,
JDG 11:31 kemɨ'ane meri mɨwayeyani nekiita netsihanakimieka, nehakunuayu 'amunitsixi newara'iwame, Yawé hetsɨa mieme kanayeimɨkɨ, hetsienamieme nekanitataiyamɨkɨ».
JDG 11:32 Ketexi hapa kananuyani 'amunitsixi watakwinike, Yawé kaniyetuirieni.
JDG 11:33 Xeitewiyari kiekari kaniuka'una, 'Aruhexi ye'atɨkaime Miniti paitɨ, 'Aweri-Keramini paitɨ. Waɨkawa mekateniuyurieni. 'Amunitsixi mɨpaɨ 'ixaheritsixi mekateniwaruta'aitɨani.
JDG 11:34 Kepauka Ketexi yukie munua Mitsipa, niweya kanayeyani 'enunakeke, tiuyuitɨaximetɨ tiuneiximetɨ. Ketexi niweya 'uka puyuxewikai meta 'ukitɨme yuniwe pɨkahexeiyakai.
JDG 11:35 Kepauka Ketexi mixei yukamixa kaneukatsana, mɨpaɨ kaniutayɨni: ―'Ai, neniwe, yemekɨ 'aixɨa pepɨkanetsi'uyuri. 'Ekɨ peyɨyu 'aixɨa nepɨkayɨni. Ne Yawé yɨkɨ nepɨtiutahɨawixɨ, nemɨti'itani nepɨkayɨwe.
JDG 11:36 Mɨkɨ mɨpaɨ kaniutayɨni: ―Nepaapa, Yawé kepemɨtiutahɨawixɨ kenaye'atɨa nehetsie, mɨkɨ pɨmatsi'uparewi 'amunitsixi pemɨwara'iwakɨ.
JDG 11:37 Mɨpaɨ xeikɨa nepɨmatitahɨawe, hatsuaku nepɨkatiwikieni, huta metseri keneneukwewi hɨritsie nemɨyemiekɨ muwa nemetitsuanikɨ 'ukari nemɨwanaki'erie wahamatɨa.
JDG 11:38 Mɨkɨ mɨpaɨ katinitahɨawe: ―'Aixɨa pɨ'ane kenemie. Nipitɨani mɨyemiekɨ huta metseri. Mɨkɨ 'ukari muwanaki'erie meyunaitɨ menekɨne hɨritsie, mana kaniutitsuani hatsuaku mɨkatiwikienikekaikɨ.
JDG 11:39 Huta metseri haye'aku yupaapa hetsɨa kaninuani, mɨkɨ yakatiniuyurieni kemutayɨkai. 'Uka pɨkatiwikiwekai. Mana mɨtiyehane 'ixaheritsixi me'iku'eriwatɨ mekanakɨne
JDG 11:40 mɨpaɨ meteyurietɨ, xeiwiyari 'anuyeyeikaku 'ukari 'ixaheritsixi nauka tukari hiwerika 'ixɨarariyari mekaniutiwewiwakaitɨni, kepauka mumɨ Ketexi niweya 'uka Karaha kiekame hetsiemieme.
JDG 12:1 Teɨteri 'Epɨrahini kiekatari mekaniuyukuha'aritɨani, hapa me'anukɨneka Tsapuni paitɨ Ketexi mɨpaɨ mekateniutahɨawe: ―¿Titayari 'amunitsixi petiwarutakwi pekatatsi'u'enieka 'ahamatɨa temuhukai? Hikɨ 'akii, tekanitataiyakuni, muwa paitɨ pe'ayekaime.
JDG 12:2 Ketexi mɨpaɨ kaniutayɨni: ―Ne meta neteɨterima, 'amunitsixi wahamatɨa tepayuye'uniekai kepauka tewatakwinike temɨxe'iniekai, xeme xepɨkayutawaɨri xemɨtatsiparewienikɨ.
JDG 12:3 Kepauka nemunierixɨ kename xekanetsiparewieni, ne nepunetatua, nepetɨa 'amunitsixi newatakwinike, hikɨ Yawé pɨnetsi'uparewi pɨnetsiyetuiri. ¿Titayari kuta xeme hikɨ xenetemieku?
JDG 12:4 Hikɨ Ketexi Karaha kiekatari kaniwarukuxeɨrieni mekaniwarutakwini, 'Epɨrahini xiɨyarimama. Karaha kiekatari mekaniwara'iwa 'Epɨrahini kiekatari mɨpaɨ memɨtewarutahɨawixɨkɨ: «Xeme Karaha kiekatari 'ena xeikɨa xekaniyu'awietani 'Epɨrahini xiɨyarimama meta Manatsexi».
JDG 12:5 Karaha kiekatari Kurutani hatuxameyaritsie mekaniu'uixɨani 'etsimatiyeyeutsie 'Epɨrahini huyeyari manuhapane, kepauka 'Epɨrahini kiekame memuyuhayewaxɨ mɨpaɨ memutiyuanekai: «Xekeneneupitɨa mana nemuyanikɨ», teɨteri Karaha kiekatari mɨpaɨ mekateniwaku'iwawiyakaitɨni: «¿'Epɨrahini nuiwarieya petihɨkɨ?» Xɨka mɨkɨ mɨpaɨ 'utayɨni: «Hawaikɨ»,
JDG 12:6 mɨkɨ mɨpaɨ mekaniutiyuanekaitɨni: «'Aixɨa kani'aneni, tsipara “Tsiwure” keneutayɨki». Xɨka «Tsipure» 'utayɨni, 'ana mekaniwatawiwiyakaitɨni mekaniwaranutiwitekekaitɨni mana Kurutani hapa memanukɨkatsie waniukikɨ mɨkɨ mepɨkaniuwawekai. Mɨpaɨ mete'uyurieku mekaniukwini huta tewiyari heimana huta miriyari 'Epɨrahini xiɨyarimama.
JDG 12:7 Ketexi katiniuta'aita 'ixaheritsixi wahetsie 'ataxewime wiyari. Kepauka mumɨ Ketexi Karaha kiekame, kaniukateukieni yukiekaritsie Karaha.
JDG 12:8 Ketexi 'utɨa 'Iwitsahani 'ixaheritsixi wahetsiemieme manuyeka kanayani Wereni kiekame.
JDG 12:9 Xeitewiyari heimana tamamata 'ukitsi kaniwarutinuarieni meta xeitewiyari heimana tamamata 'ukari. 'Ukari kaniwarutiwikitɨani kayu'iwama wahetsɨa, 'ukitsi wahetsiemiemeta kaniwa'atɨani xeitewiyari heimana tamamata hipame kayunuiwari hetsiemiemete. 'Iwitsahani 'ixaheritsixi wahetsiemieme manuyeka kanayani 'atahuta wiyari.
JDG 12:10 'Iwitsahani Kepauka mumɨ kaniukateukieni Wereni kiekariyaritsie.
JDG 12:11 'Utɨmana 'Eruni 'ixaheritsixi wahetsiemieme manuyeka kanayani, Tsawuruni nuiwarieya hetsiemieme tamamata wiyari.
JDG 12:12 Kepauka mumɨ 'Eruni Tsawuruni nuiwarieya hetsiemieme, 'Ayaruni kiekariyaritsie kaniukateukieni Tsawuruni kwieyaritsie.
JDG 12:13 'Eruni 'utɨa 'Awuruni 'ixaheritsixi wahetsiemieme manuyeka kanayani Hireri nu'aya, Piratuni kiekame.
JDG 12:14 Huta tewiyari kaniwarutinuarieni, meta teukarimama xeitewiyari heimana tamamata mekanihɨkɨtɨkaitɨni, mɨkɨ yuxexuitɨ yupuxuritsie mekananutiyaxikekaitɨni. 'Ixaheritsixi wahetsiemieme manuyeka kanayani 'atahaika wiyari.
JDG 12:15 Kepauka mumɨ 'Awuruni Hireri nu'aya, kaniukateukieni Piratuni kiekariyaritsie, 'Epɨrahini kwieyaritsie, hɨritsie 'amarekitsixi wakwietsie.
JDG 13:1 Merikɨtsɨ tawarita 'ixaheritsixi 'axamekateniuyurieni, Yawé kemɨkatinake. 'Ayumieme kaniwayetuani piritsiteutsixi wahetsɨa huta tewiyari wiyari memɨ'uximatɨarienikɨ.
JDG 13:2 Xewitɨ tewi Tsura kiekame, Manuhani titewatɨ, Rani xiɨyarieyatɨtɨ, yu'ɨya kanexeiyakaitɨni kaniweweme.
JDG 13:3 Peru niuki tuayame Yawé hetsɨa mieme matsiɨkɨme kanayuyeitɨani hɨxiena mɨpaɨ katinitahɨawe: «'Ekɨ pemɨkaniwewe, tɨɨri pemɨwarayexeiya pemɨkayɨwe, peru pepɨtihukata 'ukitɨme pepɨtiniweni.
JDG 13:4 Kene'a'ɨwiyani kaxie winuyari pepɨka'ieka meta tɨriku nawayari, meta tita naitɨ mɨtimaiwe pepɨkatikwaka,
JDG 13:5 pekanitihukatamɨkɨ 'ukitɨme pekanitiniwemɨkɨ. Pɨkakaxirieni yumu'utsie nawaxakɨ, mɨkɨ nunutsi natsareyu kanayeimɨkɨ, Kakaɨyari hetsiemieme pɨpatsieka katinuiwawetɨ 'akuxi. Mɨkɨ kaniwaxɨnamɨkɨ 'ixaheritsixi piritsiteutsixi wahetsɨa».
JDG 13:6 'Ukaratsi kaneyani yukɨna hetsɨa mɨpaɨ katinitahɨawe: «Xewitɨ 'uki Kakaɨyari hetsɨa mieme nehetsɨa pekuyeixɨa. Yɨkɨ tiyuxexeiyatɨ, niuki tuayame Kakaɨyari hetsɨa mieme hepaɨ tiyuxexeiyatɨ. Ne nepɨkaheita'iwawiyaxɨ hakewa meyetɨa, mɨkɨta pɨkanetsihetaxatɨa kemɨretewakai.
JDG 13:7 Peru mɨpaɨ pɨnerahɨawekai: “Pekanitihukatamɨkɨ 'ukitɨme pekanitiniwemɨkɨ. Hikɨ keneyu'ɨwiyani kaxie winuyari pepɨka'ieka meta tɨriku nawayari, meta tita mɨtimaiwe pepɨkatikwaka, nunutsi natsareyu kanayeimɨkɨ, patsietɨ Kakaɨyari hetsɨa miemekɨ katinuiwawetɨ 'akuxi, kepaukake mumɨni”».
JDG 13:8 Hikɨ Manuhani Yawé kaniutahɨawe: «Yawé 'aku, yemekɨ nematsiwawirie pemeipitɨanikɨ tawarita munuanikɨ tewi Kakaɨyari hetsɨa mieme pemɨtatsiheyenɨ'airi, mɨtatita'ɨkitɨanikɨ ketemɨte'iweriya nunutsi mɨtinuiwa».
JDG 13:9 Kakaɨyari Manuhani kaniu'enieni, niuki tuayame kaninuani 'ukaratsi hɨxie kaniuyuhekɨata yeuta 'uyeikakaku, Manuhani hamatɨana pɨka'uyeikakai.
JDG 13:10 'Ukaratsi yapauka kaniutanautsa yukɨna retaxatɨanike: «'Ena puyeika. Tewi muyuhekɨataxɨ takai'atu».
JDG 13:11 Manuhani 'anukukeka yu'ɨya kaneweiya. Kepauka munua hakewa tewi mewekai, mɨpaɨ katinitahɨawe: ―¿'Ekɨ petiyɨanekai ne'ɨya pemɨtiutaxatɨa? Mɨkɨ mɨpaɨ kaniutayɨni: ―Huu, ne nepɨhɨkɨ.
JDG 13:12 Hikɨ Manuhani kanita'iwawiya: ―Kepauka yamɨraye'ani kepemutayɨ, nunutsi ketete'iweriya. Ketikamieni.
JDG 13:13 Niuki tuayame Yawé hetsɨa mieme mɨpaɨ kaniutayɨni: ―'A'ɨya yaketikayani naime kenemɨtitahɨawixɨ.
JDG 13:14 Kaxie hetsie timieme pɨkati'ieka, meta kaxie winuyari pɨka'ieka meta tɨriku nawayari, meta tita mɨtimaiwe pɨkatikwaka. Yemekɨ, yaketikayani kenemɨrehɨawe.
JDG 13:15 Manuhani niuki tuayame Yawé hetsɨamieme mɨpaɨ katiniutahɨawe: ―Mana 'akuxi yaketineutewini, tsipu 'itsariyari tepɨmetsihekawewirieni pemɨtikwanikɨ.
JDG 13:16 Peru niuki tuayame Yawé hetsɨamieme mɨpaɨ katinita'eiya. ―Tsepa xemɨnetsi'ukunuitɨa, tixaɨtɨ nepɨkara'inɨata xe'ikwai. Peru xɨka pe'itataiya, Yawé keneuxatɨa. Manuhani mɨkɨ niuki tuayame Yawé hetsɨamieme pɨka'eriekai.
JDG 13:17 Hikɨ mɨpaɨ katinita'iwawiya: ―Kepetitewa, para 'aixɨa 'anemekɨ tematsihahɨawenikɨ kepauka yamɨtiyɨni kepemutayɨ.
JDG 13:18 Mɨkɨ mɨpaɨ kaniutayɨni: ¿Titayari penera'iwawiya kenemɨtitewa? Tewi pɨkayɨwe kenemɨtimariwe yamɨretimanikɨ.
JDG 13:19 Hikɨ Manuhani tsipu kanewayehana, hikɨ hatsite mawariyari mame tiutinɨitɨaka, tetetsie kanimieni kaniyetuani Yawé hetsiemieme. Metanenierekaku Manuhani meta 'ɨyaya, Yawé mariwemekɨ katiniuyurieni wahɨxie:
JDG 13:20 Kepauka tai muyuawitsie meuti'ekekai tetexitsata hatineikatɨ, niuki tuayame Yawé hetsɨa mieme nerɨkwari tsata kanitimiekaitɨni. Mɨya mete'uneniereka Manuhani yu'ɨitatɨ kwiepa mekaniukahɨxima'uni.
JDG 13:21 Mɨkɨ niuki tuayame Yawé hetsɨamieme tawarita pɨka'uyuhekɨataxɨ Manuhani meta 'ɨyaya wahɨxie. Hikɨ 'ana Manuhani mɨpaɨ pɨretima kename niuki tuayame Yawé hetsɨa mieme yɨanekai.
JDG 13:22 Hikɨ yu'ɨya mɨpaɨ katiniutahɨawe: Tame tepɨkwini, Kakaɨyari tepuxei.
JDG 13:23 Peru 'ɨyaya mɨpaɨ kaniutayɨni: ―Xɨka Yawé tatsikwimɨkɨnike, tamawari pɨkatitanaki'erienikekai meta hatsite temiyetuiri meta mɨpaɨ pɨkatatihekɨatsitɨiyakekai nipɨkatatitaxatɨanikekai.
JDG 13:24 'Ukaratsi 'ukitɨme kaniutiniweni, Tsanitsuni katiniterɨwa. Nunutsi kaniutawere Yawé 'aixɨa kaniyuriekaitɨni.
JDG 13:25 Yawé 'iyarieya hetsiena kanitsutɨani 'ikuyuitɨwatɨ kemɨtiyurienenikekai, kepauka Makane-Rani muyeikakai, Tsura 'Etsitahuri wahixɨapa.
JDG 14:1 Hikɨ Tsanitsuni kaneyani Timinati kiekariyaritsie, mana 'uka kaniuxeiya piritsiteutsixi waniwe kanitihiwe'erieni.
JDG 14:2 Kepauka makunua yupaapama mɨpaɨ katiniwarutahɨawe: ―Timinati mɨrakutewatsie 'uka nepexei netsinakeme piritsiteutsixi waniwe, xekeneutawawa nemitiwitɨnikɨ.
JDG 14:3 Peru paapamama mɨpaɨ mekatenitahɨawe: ―Kamɨtsɨ xewitɨ tiumawe ta'iwatɨtɨ matsinaketɨ naitsarie 'ena mɨtiuyehane titayari piritsiteutsixi watsata petiwauneni xitekiya 'inɨariyari memɨkahexeiya wahetsɨa. Tsanitsuni yupaapa mɨpaɨ katiniuta'eiya: ―Mɨkɨ xekeneneutawawiri, waɨkawa ne pɨnetsinake.
JDG 14:4 Paapamama 'atsimepɨkatemaikai Yawé tiyurieneme mepɨka'eriekai, miwaunekai piritsiteutsixi mɨwayehaxɨatɨanikɨ, 'ana piritsiteutsixi 'ixaheritsixi mepɨtewa'aitɨakai.
JDG 14:5 Hikɨ Tsanitsuni Timinatitsie kaneyani yupaapama wahamatɨa. Kaxie ma'iteɨritsie me'aye'axɨaku Timinati miemetsie, yapauka maye temaikɨ ha'atɨ Tsanitsuni kananukunake.
JDG 14:6 Peru Yawé 'iyarieya yutɨrɨkarima Tsanitsunitsie kaninuani, mɨkɨ yumamakɨ kanimieni xewitɨ muxa nunutsi mumieni hepaɨ. Mɨkɨ pɨkatiwarutaxatɨa yupaapa yumaama kemɨranayetɨa.
JDG 14:7 Hikɨ kaneyani 'uka hamatɨa katinetixata minakekai.
JDG 14:8 Mɨixa tukari 'anukayaku, kepauka makunua 'itiwitɨnike, huniuyune huyeta 'ixeiyake maye mɨmɨki, hetsiena xietexi kaniwaruxeiya meta mehayemakame.
JDG 14:9 Yumamakɨ xiete yapaɨmeme wayetuka 'ikwaiximetɨ kaniumiekaitɨni. Kepauka yupaapama mɨwaranuku'axixɨ kaniwarumini, mɨkɨta mekanitikwani, katiwaraxaxatɨwatɨ kename maye kaxarita heyetukai,
JDG 14:10 Hikɨ paapaya 'uka hetsɨa kananuyani. Mana Tsanitsuni 'ixɨarari kaniuwewieni, temari kememɨte'uhukai.
JDG 14:11 Kepauka piritsiteutsixi memixei, xeitewiyari heimana tamamata temari mekaniyetuirieni memiteɨtanikɨ.
JDG 14:12 Tsanitsuni mɨpaɨ katiniwarutahɨawe: ―Tsipara xekapɨtehetimani titatihɨkɨ. Xɨka xetehetimani, 'atahuta tukari kemɨreutetere 'ikɨ 'ixɨarari, ne nepɨxeyetuirieni xeitewiyari heimana tamamata rinu kamixayari meta xeitewiyari heimana tamamata kamixate 'ixɨararipa mieme.
JDG 14:13 Peru xɨka xekaheitimani, xeme pɨta xepɨnetsiyetuirieni xeitewiyari heimana tamamata rinu kamixayari meta xeitewiyari heimana tamamata kamixate 'ixɨararipa mieme. Mɨkɨ mɨpaɨ mekatenita'eiya: ―Ketaneutaxatɨa, tame tekanita'enanakakuni.
JDG 14:14 Hikɨ mɨpaɨ katiniwarutahɨawe: «Mɨtiyukwa'atsie 'ikwai pɨrane, mɨtɨrɨkaɨyetsie rakakatɨ pɨrane». Haika tukari kananukayani, mepɨkaheitima ketɨtɨ manuyɨnekai.
JDG 14:15 Naurieka tukaritsie 'ɨyaya mɨpaɨ mekateniutahɨawe: «'Akɨna keneuti'iwawiya mɨmatitaxatɨanikɨ 'ekɨta pemɨtatitaxatɨanikɨ, yamɨpaɨ pepɨkatiuyuri, tame temenitataiyakuni meta 'apaapa niwemama yunaime. Xeme xetate'inie xeikɨa xetatenawairiekutɨ».
JDG 14:16 Hikɨ Tsanitsuni 'ɨyaya 'utatsuatɨ hetsiena kaniuweni, mɨpaɨ katinitahɨawe: ―Pepɨnetsixani'erie. Yurikɨ pepɨkanetsinaki'erie. Niuki pemɨwarutaxatɨa nekie kiekatari memeitimanikɨ, peru ne pepɨkanetsitaxatɨawe kehepaɨtɨtɨ manuyɨne. Mɨkɨ mɨpaɨ kaniutayɨni: ―Nepaapamatɨtɨ mɨpaɨ nepɨkatiwarahɨawe, titayari 'ekɨ nemaraxaxatɨwani.
JDG 14:17 Peru mɨkɨ kaniutitsuani 'atahuta tukari kemɨreuterixɨ 'ixɨarari, 'imatɨrieka tukari, Tsanitsuni yakatinitahɨawe, mɨkɨ waɨriyarika yamɨtikɨhɨawekaikɨ. Peru mɨkɨ muyɨ yukie kiekatari katiniwarutaxatɨani kehepaɨ manuyɨnekai.
JDG 14:18 Tau kahakayuniwekaku 'imatɨrieka tukari mana kiekatari mɨpaɨ mekatenitahɨawe: «¿Tita matsi waɨkawa rakaka xiete kemɨrakaka? ¿Tita matsi waɨkawa titɨrɨkaɨye kemɨtitɨrɨkaɨye maye?» Tsanitsuni mɨpaɨ katiniwarutahɨawe: «Xɨka newakaxi 'ɨimari xeka'utikwietsanatsitɨiyake, xepɨkaheitimanikekai kenemɨtixe'uxatɨa».
JDG 14:19 Hikɨ Yawé 'iyarieya mɨtɨrɨkaɨye Tsanitsuni hetsie kaninuani, hikɨ mɨkɨ kaneyani 'Atsikaruni mana xeitewiyari heimana tamamata wateɨterima kaniwarukwini, katiniwarunawairieni wapiinite, wakamixate katiniwarupitɨani memɨtehetima. Hikɨ, ha'atɨ, kaninuani yupaapa kie.
JDG 14:20 Hikɨ Tsanitsuni 'ɨyaya kaniyetuiyani xeime hetsɨa, kepauka 'ixɨarari mɨwewiekai hamatɨana muyeikakai hetsɨa.
JDG 15:1 Mɨixa tukari 'anukayaku, tɨriku 'itsanarienekaku, Tsanitsuni tsipu nunutsi 'uwiyaka yu'ɨya hetsɨa kaneyani. Heta'aka mɨkɨ mɨpaɨ kaniutayɨni: ―Ne'ɨya kiita nepeutɨa. Peru 'uka paapaya pɨka'ipitɨa meutahanikɨ,
JDG 15:2 mɨpaɨ katinitahɨawe: ―Ne mɨpaɨ nepɨtimaikai, kename pe'ixani'eriekai, 'ahamiku nepuwitɨtɨa. ¿Matsi waɨkawa taruya kametinake? Kenanuwitɨki, kurieyatsie mieme.
JDG 15:3 Tsanitsuni mɨpaɨ kaniutayɨni: ―Hikɨrixɨa heitserie nepexeiya tsepa piritsiteutsixi kenemɨwaruyuri.
JDG 15:4 Hikɨ kaneyani yeuta kaniwaretiwiya haika tsienituyari kauxaitsi, kaniwarakatapiexɨani wakwaxitsie yuhuhutatame, hikɨta 'utsi tatɨkaime kaniwaranawɨtɨiriexɨani,
JDG 15:5 hikɨ 'utsi kaniutaiyaxɨani kauxaitsi kaniwarutatuani piritsiteutsixi wa'etsita. Tɨriku naitsarie kanayetaixɨani mukuha'aritsiekairi meta 'akuxi 'amɨti'ukai, naitɨ kaxie meta huriwa.
JDG 15:6 Kepauka piritsiteutsixi memuti'iwautɨkɨ: «¿Kemɨ'ane pɨtiuyuri?», mɨkɨ mɨpaɨ mekateniutahɨawarieni: «Tsanitsuni katiniuyurieni, Timinati kiekame munieya, 'ɨyaya minawairikɨ hamikuya pɨta muwitɨtɨakɨ». 'Ayumieme piritsiteutsixi 'ɨyayatɨkai mekaniutataiya meta paapaya.
JDG 15:7 Peru Tsanitsuni mɨpaɨ katiniwarutahɨawe: «Mɨya xemɨte'uyurikɨ, nepɨkaka'uxipieni xete'ayukatuayuke».
JDG 15:8 Hikɨ kwinimieme tiha'atɨ kaniwarutakwini, yuwaɨkawame kaniwareuyehɨani. Mɨyatiuyurieka kaneyani terɨta 'Etami 'aiyaritsie.
JDG 15:9 Piritsiteutsixi mekanekɨne Kura kwieyaritsie mekanitiyaxe, Rehi 'aurie.
JDG 15:10 Teɨteri Kura kwieyaritsie kiekatari mɨpaɨ meteniwaruta'iwawiya: ―¿Titayari xetatekwiku tame? Mɨkɨ mɨpaɨ mekaniutiyuani: ―Tame Tsanitsuni tepukuwautɨwe temenutahɨanikɨ, yaxeikɨa temiyurienikɨ kemɨtatsiheyuri mɨkɨ tame.
JDG 15:11 Hikɨ Kura kwieyaritsie kiekatari haika miriyari teɨteri mekanekɨne terɨta 'Etami 'aiyaritsie mɨpaɨ Tsanitsuni mekateniutahɨawe: ―¿Pekatimate piritsiteutsixi memɨtate'aitɨa? ¿Titayari mɨya petiyuriene? Mɨkɨ mɨpaɨ kaniutayɨni: ―Matsi ne kememɨnetsiheyuri mɨpaɨ xeikɨata ne nepɨwareyuri.
JDG 15:12 Mɨkɨta mɨpaɨ mekaniutiyuani: ―Tame tematsihɨanike tepeyekɨ, tematsiyetuanike piritsiteutsixi wahetsɨa. Tsanitsuni mɨpaɨ kaniutayɨni: ―Yaxekeneutiyuakatsɨ xɨka xeme xekanetsihemiekuni.
JDG 15:13 Mɨkɨ mɨpaɨ mekaniutiyuani: ―Kamɨtsɨ mɨpaɨ pɨ'aneni, tematsihɨani xeikɨa, wahetsɨa tematsiheyetuani. Tepɨkamatsihemieni. Hikɨ mekanihɨani kaunari hutamekɨ hehekwamekɨ, terɨta mekanewayehana.
JDG 15:14 Rehi 'aye'aximekaku, piritsiteutsixi mekanayekɨne me'enukunakeke memɨte'ayu'iwani hepaɨ mete'uhiwatɨ. 'Ana Yawé 'iyarieya hetsiena kaninuani tɨrɨkaɨyetɨ, kaunarikɨ mɨhɨakai mamayatsie rinu mɨtata'ini hepaɨ kaniutiyɨni, yumamatsie mɨhɨakai kaniuxɨne.
JDG 15:15 Puxu 'ayekwaiya hekwame 'utaxeiyaka mɨkɨkɨ kaniwarukwini xeimiriyari.
JDG 15:16 Hikɨ Tsanitsuni mɨpaɨ kaniutayɨni: «Puxu 'ayekwaiyakɨ kaxarite kwinieneme nepɨwaruke. Puxu 'ayekwaiyakɨ xeimiriyari teɨteri nepɨwarukwi».
JDG 15:17 Kepauka mɨtiutahayewaxɨ mɨpaɨ tikuxatatɨ 'ayekwai nehɨani mana katiniuterɨwa Xamati-Rehi.
JDG 15:18 Waɨkawa meuharimɨkɨkaikɨ, Yawé kaniutahɨawe karima: «'Ekɨ pepɨtiuyuri 'ikɨ mati'uximayatsiriwame mɨrayu'iwakɨ. ¿Kamɨtsɨta hikɨ hariyakɨ netimɨni, 'ikɨ xitekiya 'inɨariyari memɨkahexeiya wapɨretsu nerayani?»
JDG 15:19 Hikɨ Kakaɨyari kwiepa haa kanetinetɨani Rehi kemɨti'ane, muwa haa kanitinetɨani watixawakaku. Kepauka Tsanitsuni mutihari, kaniutatɨrɨkaxɨani 'aixɨa katineka'erietɨyani. 'Ayumieme mɨkɨ haixa hikɨ mana 'akuxi Rehi mɨtinena, «Kemɨ'ane mutahiwaxɨ haixaya» katiniuterɨwarieni.
JDG 15:20 Tsanitsuni manuyehaitɨa kanihɨkɨtɨkaitɨni xeitewiyari wiyari 'ixaheritsixi wahetsie, kepauka piritsiteutsixi 'ixaheritsixi memɨtewa'aitɨakai.
JDG 16:1 Heiwa xeitukaritsie Tsanitsuni Kahatsa kiekariyaritsie kananuyani, mana 'ukaratsi tuminikɨ muyumayɨinɨa kaniuxeiya. Hikɨ kiitana kaneutahani hamatɨana manuhunikɨ.
JDG 16:2 Kahatsa kiekatari mɨpaɨ mekateniutahɨawarieni: «Tsanitsuni 'ena puyeika». 'Ayumieme mekanaketɨkɨne, tɨkarikɨ mekanihupiekaitɨni kiekari kitenie. Kayuwatɨ mekaniumakaitɨni mɨpaɨ me'utiyuatɨ: «Kahekɨareyu tekanimiekuni».
JDG 16:3 Peru Tsanitsuni muwa kanayekateitɨni tɨkari hixɨapa xeikɨa, 'ana kananukukeni, kiekari 'itupariyari kaneu'una, naime kɨyexi hutatu mɨkawetɨkatei 'ɨarime meta meukukerɨwa naime. Yunaiparie heitimaka nei'ɨni hɨritsie paitɨ Hewuruni kiekariyari hɨxie mukatsie paitɨ.
JDG 16:4 Mɨixa tukari 'anukayaku, Tsanitsuni xeime 'ukaratsi kaniutihiwe'erieni, mayeweritsie Tsureki kiekame, Rarira titewakame.
JDG 16:5 Piritsiteutsixi wa'ukiyarima hetsɨana mekananukɨne mɨpaɨ mekatenitahɨawe: «Witsiketineutixatɨa, mɨmatitaxatɨanikɨ titayari kwinimieme titɨrɨkaɨye kehepaɨ tetehe'iwa, tepihɨanikeyu tepɨte'ita'aitɨanikeyu. Tame teyuxexuitɨ tematsiku'ɨitɨaxɨani xeimiriyari heimana xeitsienituyari pɨrata tuminiyari».
JDG 16:6 Rarira Tsanitsuni mɨpaɨ katiniutahɨawe: ―Kenetineutaxatɨa titayari kwinimieme petitɨrɨkaɨye, kehepaɨ matsi'uyurieyu pɨmatsi'uhɨani pɨmatiuta'aitɨani.
JDG 16:7 Tsanitsuni mɨpaɨ kaniutayɨni: ―Xɨka netsi'uhɨani 'atahuta tupi kaunariyari hehekwamekɨ, 'ana nekanitaweranaxɨamɨkɨ xeime tewi hepaɨ nekaniyɨmɨkɨ mɨkatɨrɨkaɨye.
JDG 16:8 Piritsiteutsixi wa'ukiyarima mekani'atɨirieni 'atahuta tupi kaunariyari hehekwame, Rarira kanihɨani kɨmana.
JDG 16:9 Hipatɨ me'ita'awie'ixɨariekaku kiita, mɨkɨ mɨpaɨ katinihiwieni: ―Tsanitsuni, mana piritsiteutsixi. 'Ana mɨkɨ kaunari mɨhehekwa kanakatekixɨani, xewitɨ kaunari tsipɨanime makateke hepaɨ. Mɨpaɨ 'akuxi pɨka'uhekɨarixɨ titayari kwinimieme mɨtitɨrɨkaɨyekai.
JDG 16:10 Rarira Tsanitsuni mɨpaɨ katiniutahɨawe: ―Pepɨnetiu'itai. Yakɨ peputayɨ. Xeiya, kenetineutaxatɨa kematiuhɨani.
JDG 16:11 Mɨkɨ mɨpaɨ kaniutayɨni: ―Maixa kaunariyari hehekwamekɨ xɨka netsi'uhɨani, nepɨtaweranaxɨani xeime tewi mɨkatɨrɨkaɨye hepaɨ nepɨyɨni.
JDG 16:12 Hipatɨ piritsiteutsixi 'awie me'ixeiyakaku kiita, Rarira maixa kaunariyari hehekwame 'utihurieka kanihɨani, hikɨ mɨpaɨ katinihiwieni: ―Tsanitsuni, mana piritsiteutsixi. Peru mɨkɨ maixa kaunariyari kanakatekixɨani mihɨakai mamateyatsie, xeime hiru makateke hepaɨ.
JDG 16:13 Hikɨ Rarira Tsanitsuni mɨpaɨ katiniutahɨawe: ―Hikɨtatsiere pepɨnetiu'itai, yakɨ peputayɨ. Kenetineutaxatɨa kematiuhɨani. Mɨkɨ mɨpaɨ kaniutayɨni: ―Xɨka 'atahutame nekɨpate pe'utitsani 'ixuriki mɨharuani nɨtɨkaimekɨ, mɨkɨ mɨtsatɨkatsie 'iyehatɨame xɨka netsi'akuwieni, mɨpaɨ nepɨtaweranaxɨani tewi mɨkatɨrɨkaɨye hepaɨ nepɨyɨni. Hikɨ kepauka Tsanitsuni mukutsukai, Rarira 'atahuta kɨpateya tsaiyatɨkaime kaniutiwewieni 'ixuriki nutɨkaime kaniutitsani
JDG 16:14 titse'imekɨ kanekuwieni kɨyetsie. Tawarita mɨkɨ kanitahiwieni: «Tsanitsuni, mana piritsiteutsixi 'ahetsie». Tsanitsuni kepauka manutanierixɨ hetsiena makuwiekai naitɨ 'ixurikimatɨ kanewatihune kɨyetsie.
JDG 16:15 Hikɨ mɨkɨ mɨpaɨ katinitahɨawe: «Pepɨkanetsinaki'erie, yurikɨ pepɨkanetixatɨamɨkɨ. Hairiekari pepɨnetiu'itai, pepɨkanetitaxatɨawe titayari kwinimieme pemɨtitɨrɨkaɨye».
JDG 16:16 Yaxeikɨa tikɨhɨawetɨ mɨixa tukari puyuri, yuniukikɨ kwinimieme katinihiweritɨakaitɨni kaneumɨmɨkɨkaitɨniri.
JDG 16:17 'Imatɨrieka tinaime katinitaxatɨani. Mɨpaɨ katinitahɨawe: «Ne nepɨkakaxiriewe, natsareyu nekanihɨkɨtɨni, nemupatsie Kakaɨyari hetsiemieme nekatinuiwawetɨ. Xɨka netsi'ukaxini, nekatɨrɨkaɨyetɨ nekanayeimɨkɨ, xeime tewi hepaɨ ne'anetɨ nekanayeimɨkɨ».
JDG 16:18 Rarira retimaika kename yuri titaxatɨa, piritsiteutsixi wa'ukiyarima kaniwarutakwewieni, mɨpaɨ katiniwarutahɨawe: «Tawarita xekenahu, mɨkɨ naime kanetiniutaxatɨani». Hikɨ piritsiteutsixi wa'ukiyarima mekaniu'axɨani hetsɨana, pɨrata me'a'ɨtɨ memixatɨakai.
JDG 16:19 Yutunutsie 'itimu'utsitɨakaku kaneukuni, 'anari xeime tewi kaniuta'inieni 'atahuta kɨpaya mɨtsarietɨka maxixɨanikɨ. Mɨpaɨ katina'iwarieni. Tɨrɨkariyaya kaneyani.
JDG 16:20 Hikɨ kanitahiwieni: «Tsanitsuni mana piritsiteutsixi». Tsanitsuni 'anutaniereka mɨpaɨ katiniu'erieni: «Nepɨneta'unata hikɨ, nepɨwatawikweiya». 'Atsipɨkatimaikai kename Yawé 'iku'eiriekai.
JDG 16:21 Hikɨ piritsiteutsixi mekaniwiya, hɨxiteya mekanayetɨkɨ mekaneihana Kahatsa paitɨ. Mekaniwiwitɨani wurunitse kaunariyarikɨ, katsariyanata mekanitɨxitsitɨakaitɨni.
JDG 16:22 Peru kepauka 'amemɨte'ikaxi kɨpateya, yapauka hutarieka kaniwawerekaitɨni.
JDG 16:23 Piritsiteutsixi wa'ukiyarima mekaniuyukuxeɨrieni 'ixɨarari mewewienike meta mawari me'iwewirienike yukakaɨyari Rakuni, mɨpaɨ me'utiyuatɨ: «Takakaɨyari pɨtatsiyetuiri Tsanitsuni mɨtatsi'aye'uniekai».
JDG 16:24 Kepauka yunaitɨ teɨteri memixei yukakaɨyari mekaniutanɨawa, mɨpaɨ me'utiyuatɨ: «Takakaɨyari pɨtatsiyetuiri taneɨkixiwi, takwiepa mɨtatsinanaimakai meta ta'iwama mɨwakwikai».
JDG 16:25 Kepaukari waɨkawa memuyutemamawiekai, mɨpaɨ mekateniuhiwa: «Tsanitsuni xekenewayehani 'etsiwa mɨtatsitinanaitɨanikɨ». Hikɨ Tsanitsuni katsariyanata mekaniwayehana, waɨkawa mekaninanaimakaitɨni. Kepauka tuki mutuikatɨka 'aurie memitake,
JDG 16:26 Tsanitsuni temaikɨ mihaximekai mɨpaɨ katiniutahɨawe: «Kenenanuhani tuki mutuikatɨka mati'utsie mana nemɨrawiyanikɨ».
JDG 16:27 'Ana mekanihɨnekaitɨni 'ukitsi meta 'ukarawetsixi tukita, yunaitɨ piritsiteutsixi wa'ukiyarima muwa mekanayetekaitɨni, 'amautitewatsie mekanayetekaitɨni haika miriyari 'ukitsi 'ukari temawierika mewewietɨ Tsanitsuni 'aurie.
JDG 16:28 Hikɨ Tsanitsuni Yawé kaniutahɨawe karima: «Kenenaye'eri Kakaɨyari, waɨkawa nepɨmatsiwawirie, tawarita 'aixɨa keneneyurieka, xeimieme xeikɨa, tawarita xeimieme xeikɨa keneneupitɨa nemɨtiwakuhɨwirienikɨ piritsiteutsixi nehɨxite memayetɨkixɨkɨ».
JDG 16:29 Hikɨ Tsanitsuni tuki mutuikatɨka hutame kaniuwiyaxɨani mana katinawiyakaitɨni, yutseriekɨ xeime yu'utakɨta xeime.
JDG 16:30 Hikɨ mɨpaɨ katiniuhiwa: «Neke'umɨni piritsiteutsixi wahamatɨa». 'Ana kaneitaimaxɨani naime kemɨtitɨrɨkaɨye, tuki kananuka'une piritsiteutsixi wa'ukiyarima waheima meta yunaime wahetsie muwa memayetekai. Yuwaɨkawame matsi 'ana kaniwarukwini Tsanitsuni mɨximetɨ, keyuri meripaitɨ mɨwarukwikai 'uyeikatɨ.
JDG 16:31 'Iwamama meta maremama mekanekɨne meheikweiyuka. Meheikweka mekaneikateuku Tsura meta 'Etsitahuri reuhixɨapatsie, paapaya Manuhani manukateitsie. Tsanitsuni 'ixaheritsixi katiniwaruta'aitɨakaitɨni xeitewiyari wiyari.
JDG 17:1 Muhɨriyatsie 'Epɨrahini kwieyaritsie xewitɨ kaniuyeikakaitɨni, Mikahiyaxi titewatɨ,
JDG 17:2 mɨkɨ yumaama mɨpaɨ katiniutahɨawe: ―Xeimiriyari heimana xeitsienituyari (1.100) pɨrata tuminiyari pemunawatsiyarie meta mɨkɨ tuminikɨ 'axa'aneme pemɨyetua niuki, ne mɨkɨ pɨrata nepexeiya, ne nematsi'unawatsiri. Maamaya mɨpaɨ katinitahɨawe: ―Yawé 'aixɨa kematsiyurieka, neniwe.
JDG 17:3 Kepauka Mikahiyaxi yumaama tumini mu'ɨitɨa xeimiriyari heimana xeitsienituyari pɨrata tuminiyari, maamaya mɨpaɨ katinitahɨawe: ―Yemekɨ waɨkawa patsiekame nepayeitɨani nepɨrata Yawé hetsie, neniwe xeime kakaɨyari mɨtawewienikɨ xixiyakame pɨratakɨ wetsitɨariekame. Hikɨ 'ayumieme nepɨmatsi'ɨitɨani.
JDG 17:4 Kepauka mɨkɨ yumaama mu'ɨitɨa, mɨkɨta huta tsienituyari pɨrata tuminiyari nanaka'ɨni, xeime kaniu'ɨitɨani pɨrata tsuname, mɨkɨ kɨmana kakaɨyari xixiyakame kaniutawewieni pɨratakɨ meta kwaxiyariekame, mɨkɨ Mikahiyaxi kiita kaneutakerieni.
JDG 17:5 Mɨkɨ Mikahiyaxi yutuki kanexeiyakaitɨni. Mɨkɨ mawari wewiwame kamixaya 'etsimɨnena heriemieme kaniutawewieni meta hipame kakaɨyarixi, xeime yuniwe patsiekame kanayeitɨani mawari wewiwame mɨhɨkɨtɨnikɨ.
JDG 17:6 'Ana 'ixaheritsixi ti'aitame mepɨkahexeiyakai, yuxexuitɨ kemɨtiwanake xeikɨa mekateniyuriekaitɨni.
JDG 17:7 Xewitɨ temaikɨ rewi tewiyari Wereni Kura kwieyaritsie kiekame, Kura xiɨyarimama watsata kaniuyeikakaitɨni,
JDG 17:8 Wereni kiekaritsie kaniyeyani 'ikuwaunetɨ hekwamekɨ hakewa mekanikɨ. Huyeta 'umietɨ Mikahiyaxi kie kaniye'ani hɨritsie 'Epɨrahini kwieyaritsie.
JDG 17:9 Mikahiyaxi mɨpaɨ katinita'iwawiya: ―Hakewa pepeyetɨa. Mɨkɨ mɨpaɨ kaniutayɨni: ―Ne rewi tewiyari nekanihɨkɨtɨni, Wereni kiekame, Kura kwieyaritsie, 'uximayatsika nepukuwaune hawaikɨ nemekanikɨ.
JDG 17:10 Mikahiyaxi mɨpaɨ katinitahɨawe: ―Nekie keneukani, nepaapa kenehɨkɨtɨni nemawari wewiwame kenehɨkɨtɨni, ne nematsikɨ'ɨitɨwani tamamata pɨrata tuminiyari xeiwiyaritsie meta 'akemari 'a'ikwai.
JDG 17:11 Temaikɨ rewi tewiyari kaniuyuwaɨriya kiena mukanikɨ, Mikahiyaxi yuniwe hepaɨ katinimaikaitɨni.
JDG 17:12 Hikɨ Mikahiyaxi, rewi tewiyari kaniutikemaritɨani, mɨpaɨ mɨkɨ mawari wewiwameya kanayani, kiena 'ukaitɨ.
JDG 17:13 Mikahiyaxi mɨpaɨ kaniutayɨni: «Hikɨ mɨpaɨ nepɨtimate Yawé waɨkawa pɨnetsiparewieni, rewi tewiyari nemawari wewiwame nemayeitɨakɨ».
JDG 18:1 Hikɨ 'iyatukaritsie 'ixaheritsixi ti'aitame mepɨkahexeiyakai, Rani xiɨyarimama kwie mekaniwautɨwekaitɨni yuhetsiemieme hakewa memekuyaxekɨ, mɨkɨ 'akuxi mepɨkayetuiriyariewekai yukwie, hipatɨ kememɨteyetuiriyarie 'Ixaheri niwemama.
JDG 18:2 Rani xiɨyarimama Tsura meta 'Etsitahuri metitetɨ, yu'auxɨwime kwinimieme memɨteheuyutakwiwawe mekaniwaranayexeiya kwie memɨxeiyayukɨ 'awie. Mɨpaɨ mekateniwarutahɨawe: «Xekenehu, kwie xekenexeiyayu». Mɨkɨ hɨritsie mekaniye'axɨani 'Epɨrahini kwieyaritsie, Mikahiyaxi kie mekaniye'axɨani, mana mekanitiheteitɨni.
JDG 18:3 Kepauka mana memu'axɨa Mikahiyaxi kie, rewi tewiyari niukieya mekaniu'enieni mekaneitimani, 'ayumieme mɨpaɨ mekatenita'iwawiya: ―¿Kemɨ'ane 'uwa pɨmatsi'atɨa? ¿Kepetiyuriene? ¿Tita petikuwaune 'uwa?
JDG 18:4 Temaikɨ katiniwarutaxatɨani Mikahiyaxi kemɨtiparewi, mɨpaɨ kaniutayɨni: ―Pɨnetsi'uta'ini nepɨmawari wewiwameya pɨneti'iwitsitɨa.
JDG 18:5 Mɨkɨ mɨpaɨ mekatenitahɨawe: ―Tematsiwawirie Kakaɨyari pemɨtahɨawekɨ mɨpaɨ temɨtehetimanikɨ xɨka 'aixɨa tetehakunuaxɨakuni.
JDG 18:6 Mawari wewiwame mɨpaɨ katiniwarutahɨawe: ―Xekenehu kayuwatɨ xehexeiyatɨ. Yawé kexemɨte'akunuaxɨani pɨtimate 'aixɨa pɨtixehakunuitɨani xehuyeta.
JDG 18:7 Memuyu'auxɨwi mekanekɨne, Rahitsi mekaniye'axɨani, mana mekaniuneniere teɨteri mekaniwaruxeiya 'aixɨa meteheukutekame, kayuwatɨ meta yu'iyarikɨ, kememɨte'u'uwakai tsiruniyutsixi. Tixaɨtɨ pɨkatiwareuyehɨakai naime mekateniukaxexeiyakaitɨni. 'Ateewa paitɨ mekatenitekaitɨni tsiruniyutsixi mematitekaitsie, hipame wahamatɨa mepɨkayuxewiriyakai.
JDG 18:8 Kepauka memakunuaxɨa Tsura meta 'Etsitahuri kiekariyaritsie, wa'iwama mɨpaɨ mekateniwaruta'iwawiya: ―¿Ke'aku xetehakunuaxɨa?
JDG 18:9 Mɨkɨ mɨpaɨ mekaniutiyuani: ―Hikɨmɨtɨka, tekaniwaretakwikuni. Kwie 'aixɨa 'anekame tekanexeiya. Xeme mɨpaɨ xeteheukuteni 'atsixekateyurietɨ. Xepɨkayu'iyaritɨaka xeimieme tepɨteheyurieni.
JDG 18:10 Kepauka mana xemɨ'axɨani, kiekari xekanetaxeiyakuni 'aixɨa raku'anekame meta kwie 'ahakuyeukame Kakaɨyari mɨxeyetuirie. Yemekɨ mɨkɨ kwieyaritsie tixaɨtɨ pɨkareuyewetse.
JDG 18:11 Hikɨ Tsura meta 'Etsitahuri mekaniyekɨne 'ataxewime tsienituyari Rani xiɨyarimama yutupi me'u'ɨtɨ meheuyukwiyuka.
JDG 18:12 Mekanekɨne Kiriati-Yeharini mekanikuyaxe Kura kwieyaritsie. 'Ayumieme hikɨ Kiriati-Yeharini 'utatanatsie “Rani kiekatari memaka'uxipi” katinakutewaka.
JDG 18:13 Manata memɨyekɨ mekanekɨne muhɨriyatsie 'Epɨrahini kwieyaritsie, Mikahiyaxi kie mekaniye'axɨani.
JDG 18:14 Hikɨ yu'auxɨwitɨ kwie memekuxei Rahitsi kwieyari, yu'iwama mɨpaɨ mekateniwarutahɨawe: ―Mɨpaɨ xetemate 'ikɨ kii 'ena muku'uta mawari wewiwame kamixaya 'etsimɨnena heriemieme kanexeiyani meta hipame kakaɨyarixi, xeime xixiyakame pɨratakɨ wetsitɨariekame. ¿Hikɨ xeme kexehaitɨkani?
JDG 18:15 Mɨkɨ 'ahurawa me'ukɨneka, Rewi tewiyari kiita mekaneutahaxɨani, Mikahiyaxi kiiya mɨhɨkɨtɨkai, mekanitahɨawe 'aixɨa 'anemekɨ.
JDG 18:16 'Ataxewime tsienituyari Rani xiɨyarimama kitenie mekaniti'ukaitɨni yutupi me'u'ɨtɨ memeuyukwiyu metetahɨtɨ kitenie.
JDG 18:17 Meyu'auxɨwitɨ kwie memekuxeiyakai mekaneutahaxɨani kakaɨyari mɨxixiya pɨratakɨ mɨwetsitɨarie mekanewayekweni, meta mawari wewiwame kamixaya 'etsimɨnena meta hipame kakaɨyarixi. Mexi kuyaxi 'ataxewime tsienituyari yutupi me'u'ɨtɨ memeuyukwiyu kitenie mawari wewiwame hamatɨa meti'ukai.
JDG 18:18 Kepauka memeutahaxɨa Mikahiyaxi kiita memuyu'auxɨwi, kakaɨyari mɨxixiya pɨratakɨ mɨwetsitɨarie memɨwayekwei meta mawari wewiwame kamixaya 'etsimɨnena meta hipame kakaɨyarixi, mawari wewiwame mɨpaɨ katiniwaruta'iwawiya: ―¿Kexeteyurie?
JDG 18:19 Mɨkɨ mɨpaɨ mekaniutiyuani: ―Kayuwatɨ. 'Atsipepɨkahaineni. Kɨmɨ ketananuweiya, ta'ukiyari tamawari wewiwame pepayani. Matsi 'aixɨa pɨyɨni xeinuiwari 'Ixaheri hetsiemiemete wamawari wewiwame pemɨhɨkɨtɨni, keyuri xeime tɨɨriyamama wahetsiemieme xeikɨa.
JDG 18:20 Mawari wewiwame kaniuyukatemawieni. Katinepini mawari wewiwame kamixaya 'etsimɨnena meta hipame kakaɨyarixi meta mɨxixiya pɨratakɨ mɨwetsitɨarie, hikɨ wahamatɨa kaneyani.
JDG 18:21 Mɨkɨ yuniwema yutewama yupiinite metewara'arietɨ mekanekɨne mewaranuhaitɨiyatɨ.
JDG 18:22 'Ateewa paitɨri me'uhukaku Mikahiyaxi kie meyekɨneka, Mikahiyaxi 'aurie memɨtitekai mekaniuyukuxeɨrieni Rani xiɨyarimama mekaniwaranukuweiya.
JDG 18:23 Wa'utɨa meheuhiwaxɨaximekaku, Rani xiɨyarimama yu'utɨa mekananakuneniere Mikahiyaxi mɨpaɨ mekateniuta'iwawiya: ―¿Kekuta titayari 'ateɨterima petiwara'inie?
JDG 18:24 Mikahiyaxi mɨpaɨ kaniutayɨni: ―Xeme nekakaɨyarixi xepɨwarenawa, ne nemɨwarutiwewi, meta nemawari wewiwame xepewitɨ mɨya xeteheyurieka xepeyekɨ. Tixaɨtɨ xepɨkanete'uhayewi. 'Akuxi xeneteha'iwawiya panatsi xekatemate.
JDG 18:25 Rani xiɨyarimama mɨpaɨ mekaniutiyuani: ―Kwinimieme pepɨkatatiuhiwiwani, tietɨtsɨ hipatɨ memɨniuyeha'a ta'iwama memɨxeniutakwi, 'ekɨ meta 'atɨɨriyama memɨniwarukwi.
JDG 18:26 Mɨpaɨ me'utiyuaka Rani xiɨyarimama mekanekɨne. Mikahiyaxi waxeiyatɨ kwinimieme memɨtetɨrɨkawikaikɨ mana kaniyenuani yukie kaneyani.
JDG 18:27 Mɨpaɨ mekateniuyupinitɨani Rani xiɨyarimama Mikahiyaxi mɨtiutiwewiekai meta mawari wewiwameya, mekanekɨne Rahitsi, kiekari kayuwatɨ hexeiyakame mekayukweriwayurietɨ, mana kiekatari 'ixiparakɨ mekaniwarukwini, wakiekari mekaniutataiya.
JDG 18:28 Nixewitɨ pɨkawaruparewi, Tsiruni 'ateewa paitɨ pɨti'anekai, mɨkɨ xeime hamatɨa mepɨkayuxewiriyakai. Mɨkɨ kiekari hayewerikaku pɨyemakai, Weti-Xekuwi kiekariyaritsie mepɨte'awiyakai. 'Arike mɨkɨ Rani xiɨyarimama kiekari 'aixɨa mekaniukuyurieni mana mekanitiyaxe.
JDG 18:29 Rani meteniterɨwa yututsi mema'eriwanikɨ kemɨtitewakai, 'Ixaheri nu'aya mɨhɨkɨtɨkai, tsepa meripaitɨ mɨkɨ kiekari Rahitsi mɨtitewakai.
JDG 18:30 Mana mekanitakeni kakaɨyari mɨxixiya pɨratakɨ mɨwetsitɨarie memeyexeiyanikɨ, mɨkɨ Kunatani, Keritsuni nu'aya Muitsexi teukarieya meta niwemama mawari wewiwamete mekanakɨne Rani xiɨyarimama wahetsiemieme kepaukake memehapanie.
JDG 18:31 Rani xiɨyarimama Mikahiyaxi kakaɨyarieya mɨxixiya pɨratakɨ mɨwetsitɨarie mekanayexeiyakaitɨni yuheyemekɨ, Kakaɨyari tukieya Tsiru mɨrakutewatsie 'uwekakutɨtɨ.
JDG 19:1 Kepauka 'ixaheritsixi ti'aitame memɨkahexeiyakaitsie, xewitɨ rewi tewiyari hɨritsie 'Epɨrahini kwieyaritsie kiekame, xeime kaniutiwitɨni 'ukaratsi hutarieka 'ɨyaya mayanikɨ Wereni kiekame Kura kwieyaritsie.
JDG 19:2 Peru mɨkɨ 'uka kaniku'eirieni, kaninuani yupaapa kie Wereni Kura kwieyaritsie. Mana nauka metseri kaniyuriekaitɨni.
JDG 19:3 Hikɨ 'uki yu'ɨya hetsɨa kaneyani witsireitixatɨame mewitɨnikɨ, xeime kanewitɨni ti'uximayatame meta yuhutame puxuri kaniware'arieni. 'Ukaratsi yupaapa kiita kaneita'inieni, paapaya 'ixeiyaka waɨkawa kaniyukatemawieni.
JDG 19:4 Munieya waɨriyarika 'ipitɨatɨ kanikunuitɨani, mɨkɨ kaniukunuani haika tukari, metekwatɨ, me'ietɨwetɨ, muwa me'ayehipitetɨ.
JDG 19:5 Naurieka tukaritsie ximeri paitɨ mekananuku'uni me'ayekɨneke, peru 'uka paapaya yumune mɨpaɨ katiniutahɨawe: «Ketineukwa'i pemɨtatɨrɨkaxɨanikɨ, 'anake pekaniyemieni».
JDG 19:6 Hikɨ mekananukayaxe mɨkɨ yuhutatɨ memɨtekwanikɨ memɨte'anu'ienikɨ. 'Arike 'ukaratsi paapaya mɨpaɨ katinitahɨawe: «Neuxei, keneukunua 'ikɨ tɨkarikɨ temuyutemamawiekakɨ».
JDG 19:7 Kepauka Rewi tewiyari manukuke mɨyemiekɨ, munieya kanikunuitɨani waɨriyarika 'ipitɨatɨ, mɨkɨta kaniukunuani mɨkɨ tɨkaritsie.
JDG 19:8 'Auxɨwirieka tukaritsie ximeri kananukukeni, peru 'ukaratsi paapaya mɨpaɨ katinitahɨawe: «Pepɨtatɨrɨkaxɨani 'akuxi. Keneukunua taikaike pepɨyemie». Hikɨ yuhutatɨ mekateniukwani.
JDG 19:9 Kepauka 'uki manukuke mɨyemiekɨ yu'ɨya hutarieka mieme hawitɨtɨ meta tiyu'uximayatsiriwame, 'ukaratsi paapaya, mɨpaɨ katinitahɨawe: «Neuxei, pɨkɨyɨrirɨme, putaikairi. 'Ena keneukani, keneukunua tɨkarikɨ temuyutitemawienikɨ. 'Uxa'a ximerike 'akie pekaniyemieni».
JDG 19:10 Tawarita kanuamɨtɨ xeitɨkari, mɨkɨ kanayeyani Kewutsi hepatsie kaneyani, 'arike Kerutsareme mɨtiuterɨwarie, puxuri yuhutame me'u'ikame warahapatɨ meta hutarieka mieme yu'ɨya 'awitɨtɨ.
JDG 19:11 Kepauka Kewutsi meuhurakai, kuyɨrirɨmekakuri, ti'uximayatame mɨti'aitɨa mɨpaɨ katiniutahɨawe: ―Hikɨmɨ 'ena tepaukayune kewutseutsixi wakiekaritsie mana tepetiheni.
JDG 19:12 Peru mɨti'aitɨa mɨpaɨ kaniutayɨni: ―Hawaikɨ. Mana tepɨkaheukayune 'ateewa paitɨ kiekatari mepɨhɨkɨ, mepɨka 'ixaheritsixi. Tepuhuni Kiweya kiekariyaritsie paitɨ temeta'axɨanikɨ.
JDG 19:13 Mɨpaɨtatsiere kaniutayɨni: ―Hikɨmɨ, Kiweya tekaniye'axɨakuni yatsepa Xama kiekariyaritsie, mana tepekuheni tsepa kemɨ'ane kiekariyaritsie.
JDG 19:14 'Ayumieme mana mepɨkakuhetei. Hikɨ tau 'akayuneku Kiweya hɨxie mekaniuyehukaitɨni, Wenikamini kiekariyaritsie.
JDG 19:15 Hikɨ mana mekaniye'axɨani mana memɨtihenikɨ Kiweya. 'Uki kaneyani teɨteri memayukuxexeɨriwatsie, mana nixewitɨ pɨka'ita'ini kiena mukanikɨ tɨkarikɨ.
JDG 19:16 Mɨkɨ taikaiyaritsie xewitɨ 'ukiratsi nakunuakaitɨni yuwaxata reku'uximayataka, hɨritsie kiekame 'Epɨrahini kwieyaritsie, Kiweya kaniukateitɨni 'ateewa kiekame hepaɨ. Mana kiekatari Wenikamini xiɨyarimama mekanihɨkɨtɨkaitɨni.
JDG 19:17 Kepauka 'ukiratsi 'ateewa yeikame muxei teɨteri memaye'axetsie, mɨpaɨ katinitahɨawe: ―¿Hakewa pepeutɨa? ¿Hakewa pepeyetɨa?
JDG 19:18 Yeikame mɨpaɨ katinitahɨawe: ―Yatetehutɨ tepɨyɨa. Wereni tepeyekɨ Kura kwieyaritsie, hɨritsie 'ateewa tepeukɨ, 'Epɨrahini kwieyaritsie nekie. Wereni nepekatei yapaɨmexɨa tukari, hikɨta nepetɨa Yawé tukieya manuwe, peru nixewitɨ pɨkanetsi'inie kiena nemekanikɨ.
JDG 19:19 Tapuxurima wamɨaxa tepexeiya, paa winu nehetsiemieme meta ne'ɨya, temaikɨtsiere nehamatɨa mumie. Tixaɨtɨ pɨkatareuyehɨwa.
JDG 19:20 'Ukiratsi mɨpaɨ katinitahɨawe: ―Nekie 'aixɨa pepɨrekani, tsepa tita pemɨreuyehɨaka ne nepɨmarekupinirieni. Peru 'ena pepɨkayukuhayeikawani tɨkarikɨ.
JDG 19:21 Hikɨ kaneiwitɨni yukie puxurimama katiniwaretimini, yu'ɨkate me'utihauxika mekateniukwani mekateniu'ieni.
JDG 19:22 Mexi yu'iyarikɨ metekwakai, hipatɨ teɨteri mɨkɨ kiekaritsie kiekatari kiwarie mekana'utɨkɨne. 'Ituparitsie meteheuhutsunatɨ, mɨpaɨ 'ukiratsi mete'uhiwiwatɨ kii kutsiyari. ―'Uki kenewayewitɨki 'akie munua. Hamatɨana tepɨkahini.
JDG 19:23 Kii kutsiyari kanewayeyani mɨpaɨ katiniwarutahɨawe: ―Hawaikɨ ne'iwama, 'axaxepɨkate'u'iyarini, 'ikɨ tewi pɨne'iwatame. Mɨkɨ xepɨka'itewiyatsitɨaka 'axamɨti'anekɨ.
JDG 19:24 Neuxei, neniwe 'ena puka kamayɨiyatɨ, meta 'ikɨ tewi hutarieka 'ɨyaya. Nekaniwaranuyenɨ'amɨkɨ, kexemɨwayurieka mɨkɨ. Peru 'ikɨ 'uki xepɨkatewiyatsitɨaka 'axamɨti'anekɨ.
JDG 19:25 'Axateyuruwamete 'ukiratsi mepɨka'u'eni, hikɨ Rewi tewiyari yu'ɨya kananuyenɨ'ani. 'Ana 'ukitsi hamatɨana mekaniukahini waɨriyarika me'ipitɨatɨ mete'ikwinitɨatɨ tɨkarikɨ kepaukake kahekɨarirɨmekaku, mekanitatuani.
JDG 19:26 Nikahekɨarirɨmekaitɨni kepauka 'ukaratsi munua, kitenie kaniukaweni hakewa kɨnaya mayekatei. Mana kaniuyuhayewa kepaukake mukahekɨarixɨ.
JDG 19:27 Kepauka kɨnaya ximeri manukuke kitenie mɨreuyepi yemieka, yu'ɨya kaniuxeiya takwa 'ukaikame kitenie heutametɨ.
JDG 19:28 Mɨpaɨ katinitahɨawe: «Kenanukukeka, kɨmɨri», peru mɨkɨ pɨka'i'ta'ei. Hikɨ mɨkɨ yupuxutsie henuti'ikataka yukie kaneyani.
JDG 19:29 Kepauka munua yukie, nawaxakɨ kanitixitexɨani yu'ɨya tamamata heimana huta paɨmeme kanayeitɨani, hikɨ mɨkɨ naitsarie kwie mukumanetsie 'Ixaheri kwieyaritsie kanitanɨ'axɨani.
JDG 19:30 Yunaitɨ me'ixeiyaka mɨpaɨ mekaniutiyuanekaitɨni: «Hawaikɨ mɨpaɨ tepɨkatehenenieriwawe, kepauka paitɨtɨ 'ixaheritsixi 'Ekipitu memeyekɨ. Kexeteku'eriwa 'ikɨkɨ, xekeneutimaixɨaka yaxeketateneutahɨawi ketemɨteyurieni».
JDG 20:1 Yunaitɨ 'ixaheritsixi Rani meye'atɨkaitɨ 'atsita Weritsewa Karaha kwieyaritsie meye'atɨkaitɨ, meyutaxewireka Mitsipa mekaniuyukuxeɨrieni Yawé hɨxie.
JDG 20:2 Memanuyetei te'aitamete yunaime wahetsiemieme, meta 'ixaheritsixi wanuiwarite memɨtewa'aitɨa, mekananukayaxe Kakaɨyari teɨterimama memayuxeɨrietsie. Mekanihɨkɨtɨkaitɨni nauka tsienituyari miriyari (400.000) kuyaxi yu'ixipara me'u'ɨtɨ.
JDG 20:3 'Ana mekatenetimani Wenikamini xiɨyarimama kename 'ixaheritsixi Mitsipa me'anutikɨnekai. Hikɨ 'ixaheritsixi Rewi tewiyari mɨpaɨ mekateniuta'iwawiya: ―Ketatineutaxatɨa ke'axapemɨranuyetɨa.
JDG 20:4 Rewi tewiyari, mɨpaɨ kaniutayɨni 'ukaratsi mumierie kɨnaya: ―Ne'ɨya hamatɨa Kiweya tepɨye'axɨa Wenikamini kwieyaritsie mana temɨtihenikɨ.
JDG 20:5 Tɨkarikɨ teɨteri Kiweya kiekatari kiwarie mepaketɨkɨ, menetsimienike. 'Ana ne'ɨya hamatɨa mekanekahini waɨriyarika meheipitɨaka 'atsita kepaukake memɨ.
JDG 20:6 Hikɨ neheitikweka, nekaneitixitexɨani kememɨyupaɨme 'Ixaheri nuiwarimama wahetsɨa nekaneitanɨ'axɨani, mɨkɨ 'axati'anekame memɨteheutiwiwiexɨakɨ 'Ixaheri kwieyaritsie.
JDG 20:7 Xeme hikɨ yunaitɨ 'ixaheritsixi, xekeneutimaixɨa, yaxekeneutiyua ketemɨteyurieni hikɨ kwitɨwa.
JDG 20:8 Yunaitɨ teɨteri mekaniuyunɨni mekananuku'uni yaxeikɨa meteku'eriwatɨ, mɨpaɨ mekaniutiyuani: ―Nixewitɨ yuxamaruta pɨka'axeni meta yukiita.
JDG 20:9 Mɨpaɨ tekateniyurikuni Kiweya kiekatari wahepaɨtsita: 'Inɨarikɨ tepuyuta'iwa kemɨ'ane memitamieni.
JDG 20:10 Yunaime nuiwaritetsie xeitsienituyaritsie tamamata teɨteri tekaniwaranuyehapakuni, xeimiriyaritsie xeitsienituyari teɨteri, tamamata miriyaritsieta xeimiriyari, 'ikwai memɨtekuwaunikɨ kuyaxi wahetsiemieme. Kepauka kuyaxi Kiweya Wenikamini kwieyaritsie memɨye'axɨani yameniwayurikuni 'axamemɨte'uyurikɨ 'Ixaheri kwieyaritsie.
JDG 20:11 Hikɨ yunaitɨ 'ixaheritsixi me'uyutinɨka me'utaxewireka, mɨkɨ kiekari memɨtamienikɨ.
JDG 20:12 Yunaitɨ 'ixaheri nuiwarimama texaxatamete mekaniwarenɨ'ani Wenikamini xiɨyarimama wahetsɨa, mɨpaɨ metewarahɨawetɨ: «¿Kexeteku'eriwa ke'axamɨtiuyɨ xehetsɨa?
JDG 20:13 Xekeniwayetua 'axamemɨte'uyuri mɨkɨ Kiweya kiekatari, temɨwakwinikɨ mɨpaɨ 'axamɨti'ane temɨte'akumaweriyakɨ 'Ixaheri kwieyaritsie». Peru Wenikamini xiɨyarimama mepɨkawaru'eni yu'iwama 'ixaheritsixi.
JDG 20:14 'Apɨta, yunaitɨ mɨkɨ kwieyaritsie kiekatari mekaniuyukuxeɨrieni Kiweya kiekariyaritsie memɨwatakwinikɨ 'ixaheritsixi.
JDG 20:15 Mɨkɨ tukaritsie Wenikamini kwieyaritsie kiekatari mekaniwarukuyuitɨani yunaime yukiekaritetsie xeitewiyari heimana 'ataxewi miriyari (26.000) kuyaxi yu'ixipara me'u'ɨtɨ, 'akuxi 'atahuta tsienituyari teɨteri memanuyexatsie Kiweya kiekatari.
JDG 20:16 Yunaime watsata mekaniu'uwakaitɨni 'atahuta tsienituyari kuyaxi memɨ'utatɨka memanuyexatsie, yunaitɨ mɨkɨ yu'utama texupamekɨ memɨteheutatuaxiwawe meta kwinimieme meteheu'inɨaritɨatɨ.
JDG 20:17 'Ixaheri, Wenikamini meka'inɨatatɨ, kaniwarukuha'aritɨani nauka tsienituyari miriyari (400.000) kuyaxi yu'ixipara me'u'ɨkame, yunaitɨ mɨkɨ kwiniemieme memɨteheuyutakwiwawe.
JDG 20:18 'Ixaheritsixi Weteri mekaniye'axɨani Kakaɨyari mekaniutahɨawe. Mɨpaɨ mekatenita'iwawiya: ―¿Kemɨ'anemeri pɨyɨni Wenikamini nuiwarieya mɨtamieni? Yawé mɨpaɨ kaniutayɨni: ―Kura nuiwarieya meri mepɨyɨaka.
JDG 20:19 'Ixaheritsixi ximeri paitɨ mekananuku'uni Kiweya hɨxie mekaniuyuhayewa,
JDG 20:20 Wenikamini xiɨyarimama mekaniwarutakwini, Kiweya hɨxie 'aixɨa mekateniuyu'uituani kehepaɨ memɨtewakwinikekai.
JDG 20:21 Peru Wenikamini nuiwarimama Kiweya mekanayekɨneta 'ixaheritsixi mekaniwarutakwini, mekaniwarukwini xeitewiyari heimana huta miriyari (22.000) mewakwitɨwetɨ.
JDG 20:22 'Ixaheritsixi mekaniuyukuwaɨriya hutariekata memɨwakwiyukɨ hakewa matɨari memɨwaretakwi,
JDG 20:23 Yawé hɨxie 'ixaheritsixi mekaniutitsuakaitɨni me'anutikɨneka taikai paitɨ meta tɨkarikɨ, mekanita'iwawiyakaitɨni: ―¿Tawarita tetewatakwini Wenikamini xiɨyarimama, ta'iwama? Yawé mɨpaɨ katiniwarutahɨawekaitɨni: ―Xekenehu.
JDG 20:24 Mɨpaɨ hutarieka tukari 'ixaheritsixi mekanaye'axɨani Wenikamini xiɨyarimama wahetsɨa.
JDG 20:25 Wenikamini kwieyaritsie kiekatari mekanayekɨne Kiweya mewatakwinike, tawarita mekaniwara'iwa tamamata heimana 'atahaika miriyari (18.000) 'ixaheritsixi, yunaitɨ mɨkɨ yu'ixipara me'u'ɨkame.
JDG 20:26 Hikɨ yunaitɨ 'ixaheritsixi, mekananutikɨne Weteri, mana mekanitiyaxe mekaniutitsuani Yawé hɨxie. Mɨkɨ tukaritsie mekaniyuhakieni kepaukake mukuyɨrixɨ, 'ana Yawé mawari taiyariyari mekaniuwewirieni meta memɨyuxewinikɨ mawariyari.
JDG 20:27 'Ariketa Yawé mekaniutahɨawe, 'ana mɨkɨ tukaritsie mana kaniukateitɨni kakuni tɨratuyari Kakaɨyari hetsiemieme.
JDG 20:28 Pinexi, 'Eriyatsaxi nu'aya 'Aruni teukarieya, hɨxiena katini'uximayakaitɨni. Mɨpaɨ mekateniuta'iwauni: ―¿Tawarita tetehu tetewatakwini ta'iwama Wenikamini nuiwarimama, nutsu tepuwahayewa? Yawé mɨpaɨ kaniutayɨni: ―Xekenehu, 'uxa'a nekanixeyetuiriemɨkɨ.
JDG 20:29 'Ixaheritsixi mekaniwaruhupieni Kiweya warita.
JDG 20:30 Hairieka tukaritsie 'ixaheritsixi mekaniwarutakwini Wenikamini nuiwarimama 'aixɨa mekateniuyu'uitɨani Kiweya kiekariyari memɨtamienikɨ, meripai hepaɨ.
JDG 20:31 Wenikamini nuiwarimama mekanayekɨne wahetsɨa, mekaniuyuitɨarieni yukiekari memuku'eirienikɨ. Hikɨ mekaniutayuani 'ixaheritsixi mewara'iwatɨ, meripai hepaɨ, mekaniwarukwini xeitewiyari heimana tamamata mɨtahekɨatsie, Weteri huyeyari 'utɨa, meta Kiweya huyeyari 'utɨa.
JDG 20:32 Wenikamini nuiwarimama mɨpaɨ mekaniutiyuanekaitɨni: «Tepɨwara'iwarɨme meripai hepaɨ», peru 'ixaheritsixi mɨpaɨ mekaniutiyuanekaitɨni: «Tepɨtata'una huyeta paitɨ yukiekari memɨku'eirienikɨ».
JDG 20:33 Yapauka, 'ixaheritsixi mekaniuyupata, mekaniuyutakwini Wahari-Tamaxi kiekariyaritsie, 'ixaheritsixi memɨyu'awietakai mekaniwatikɨne Kiweya tau makayuyuipiketsie hepaɨtsita mekaniuyutakwini.
JDG 20:34 Tamamata miriyari (10.000) kuyaxi 'ixaheritsixi waɨkawa memeuyutakwiwawe Kiweya mekaniye'axɨani mana 'imieri waɨkawa mayetse'ikaikɨ, Wenikamini nuiwarimama 'atsimepɨkatemaikai kename meha'iwarienikekai.
JDG 20:35 Yawé Wenikamini nuiwarimama kaniwaruka'una 'ixaheritsixi wahɨxie, mɨkɨ tukaritsie 'ixaheritsixi mekaniwarukwini xeitewiyari heimana 'auxɨwime miriyari heimana xeitsienituyari (25.100) Wenikamini xiɨyarimama, yunaitɨ mɨkɨ yu'ixipara me'u'ɨkame.
JDG 20:36 Mana Wenikamini nuiwarimama mɨpaɨ mekatenetimani kename meha'iwariekai. 'Ixaheritsixi mekaniuyuta'una Wenikamini nuiwarimama wahɨxie, memɨyu'awietakai Kiweya kiekariyari 'aurie wahetsie meheuwaɨretɨ.
JDG 20:37 Yapauka memuyu'awietakai Kiweya kiekariyaritsie mekanitahaxɨani, kememɨyupaɨme mana mekaniu'axɨani, yunaime mekaniwarukwini mɨkɨ kiekaritsie kiekatari.
JDG 20:38 'Ixaheritsixi mɨpaɨ mekateniuxatakaitɨni kename kepauka kɨtsi memexeiya kiekari heima,
JDG 20:39 'ixaheritsixi tawarita meyutakwinikekai. Kepauka Wenikamini nuiwarimama 'ixaheritsixi memɨwarukwikai, xeitewiyari heimana tamamata mewarukwika, mɨpaɨ mekaniutiyuanekaitɨni: «Tepɨwara'iwarɨme matɨari hepaɨ».
JDG 20:40 Peru kepauka kɨtsi kwiniepatɨ matike kiekari makuma, Wenikamini nuiwarimama ta'aurie mekanaxɨrieni mekanixeiya kiekari kɨtsiyari muyuawitsie heutiyuneme.
JDG 20:41 'Ana 'ixaheritsixi mekaniwarutakwini, Wenikamini nuiwarimama mekaniutimamani mɨpaɨ mete'u'erieka kename meha'iwarie.
JDG 20:42 Hikɨ 'ixaheritsixi mewamakatɨ mekaniuyuta'una huye makumawetsie mieme 'utɨa, peru mepɨka'uyɨwekaxɨa memɨyuti'awietakekai mana mepɨwarutakwi.
JDG 20:43 Wenikamini nuiwarimama wawarita mekanaketɨkɨne, mekaniwaranukuweiya mekaniwakwitɨwekaitɨni Kiweya, tau manatineika hepaɨtsitatsie.
JDG 20:44 Tamamata heimana 'atahaika miriyari (18.000) mekaniukwini Wenikamini nuiwarimama, yunaitɨ mɨkɨ kwinimieme meteheuyutakwiwawetɨ.
JDG 20:45 Kepauka memekɨ 'ai Ximuni hetɨa, 'ixaheritsixi mekaniwarukwini 'auxɨwime miriyari huyeta. Mekaniwaranukuweiya Kiruni kiekariyaritsie paitɨ, mekaniwarukwini tawarita huta miriyari.
JDG 20:46 Mɨkɨ tukaritsie mekaniukwi'iwa Wenikamini nuiwarimama xeitewiyari heimana 'auxɨwime miriyari (25.000) yu'ixipara me'u'ɨtɨ, kwinie memɨteheuyutakwiwawekai.
JDG 20:47 Mekaniuyuta'una 'ataxewime tsienituyari makumawetsie 'atsita 'ai Ximuni hetɨa, muwa mekanayetekaitɨni nauka metseri.
JDG 20:48 'Ixaheritsixi tawarita mekaniwarutakwini, Wenikamini nuiwarimama mekaniwarukwini 'ixiparakɨ naime kiekaritetsie meta tewaxi naime mekateniuka'una tita memɨte'ukaxei. Meta kiekarite naime mekaniutitaiya.
JDG 21:1 Mitsipa 'ixaheritsixi mɨpaɨ mekaniutiyuakaitɨni: «Nixewitɨ yuniwe Wenikamini xiɨyarieya pɨkakuwitɨtɨwani».
JDG 21:2 Yunaitɨ mekanekɨne Weteri, mana mekaniukutaikairiyarieni, meyunenewietɨ me'utitsuatɨ waɨkawamekɨ Yawé hɨxie.
JDG 21:3 Mɨpaɨ mekateniwawiriekaitɨni: «Neuxei Yawé, 'Ixaheri Kakaɨyarieya, titayari yaranuyemie 'Ixaheri. Hikɨ xeinuiwari kaneukuyani».
JDG 21:4 'Uxa'arieka ximeri mehanuku'uka, tenutsari mawari wewiwame mekaniutawewieni, mana mawari taiyariyari mekaniuwewieni meta memuyuxewinikɨ mawariyari.
JDG 21:5 Hikɨ mɨpaɨ mekateniuyuta'iwawiya 'ixaheritsixi: «¿Kemɨ'ane hikɨ xewitɨ nuiwari pɨkahekuyeixɨa Yawé hetsɨa miemete memayutixexeɨriwa Mitsipa?» Mɨpaɨ mepɨteyɨhɨritɨakai Yawé hɨxie kemɨ'ane mɨkaheuyani: «Kanimieriemɨkɨ».
JDG 21:6 'Ixaheritsixi mekaniuyukahiwerieni yu'iwama Wenikamini nuiwarimama wahekɨ. Mɨkɨ mɨpaɨ mekaniutiyuani: «Hikɨ xewitɨ tahetsɨa mieme nuiwari kanewatihunarieni.
JDG 21:7 ¿Ketetewaneɨkitɨani memuyuhayewatɨwe tameri Yawé mɨpaɨ temɨte'utahɨawixɨ kename taniwema tekawawitɨtɨani?»
JDG 21:8 Hikɨ mekaniuta'iwauni: «¿Kemɨ'ane 'Ixaheri nuiwarieyatɨtɨ Yawé hɨxie Mitsipa mepɨka'u'axɨa?» Mɨpaɨ mekatenetimani nixewitɨ mɨkahayewekaikɨ Kawetsi-Karaha kiekame memayuxeɨrietsie,
JDG 21:9 kepauka memanuyenierixɨ mekatenetimani kename Kawetsi-Karaha kiekame nixewitɨ kahayewekai.
JDG 21:10 Hikɨ memuyuxeɨrie mekaniwarenɨ'ani tamamata heimana huta miriyari (12.000) kuyaxi mɨpaɨ metewarutahɨaweka: «Xekenehu 'ixiparakɨ xekenewarekuya Kawetsi-Karaha kiekatari. Wa'ɨitama meta tɨɨri xekeniwarekuya.
JDG 21:11 Mɨpaɨ xekateneyurikuni: Yunaime 'ukitsi xekanewarekwikuni meta 'ukarawetsixi memɨwikie».
JDG 21:12 Hikɨ Kawetsi-Karaha kiekariyaritsie mekaniwarutaxeiya 'ukari 'ɨimarixi nauka tsienituyari, mekaniwarewitɨni kuyaxi wahetsɨa Tsiru memetitekai Kanani kwieyaritsie.
JDG 21:13 Hikɨ yunaitɨ 'ixaheritsixi niuki mekaniwarenɨ'airieni Wenikamini nuiwarimama 'ai Ximuni hetɨa memayetekai, 'ari memɨteheuyuyehɨwiriekakɨ.
JDG 21:14 'Ana mekaniu'axɨani Wenikamini nuiwarimama, 'ixaheritsixi 'ukari mekaniwarutawitɨtɨani Kawetsi-Karaha kiekatari. Peru yunaitɨ mepɨkate'unakixɨ.
JDG 21:15 'Ixaheritsixi 'akuxi mekaninututuixiekaitɨni Wenikamini hepaɨtsita, Yawé mikumaweriyaxɨkɨ 'Ixaheri nuiwarieyatsie.
JDG 21:16 'Ukirawetsixi memɨyuxeɨrie mɨpaɨ mekaniutiyuani: «¿Ketetewaneɨkitɨani 'ukitsi memuyuhayewaxɨ, 'ukari Wenikamini nuiwarimama memeuyewekɨ?»
JDG 21:17 Mɨpaɨ mekateniuhiwakaitɨni: «Memutawikwei Wenikamini nuiwarimama mepɨtinuarienikeyu, xewitɨ 'Ixaheri nuiwarieya mɨkaheuyewautsenikɨ.
JDG 21:18 Peru tame tepɨkayɨwawe temɨwaruwitɨtɨani taniwema, mɨpaɨ temɨteyɨhɨritɨakɨ: “'Axake'itɨarieka kemɨ'ane yuniwe xeime Wenikamini nuiwarieya mɨwitɨtɨani”.
JDG 21:19 Peru neuxei, Yawé 'ixɨararieya paye'axime mutiwewiwa Tsiru Weteri heima, Weteri huyeyari 'utɨa Tsikeni meutayune meta Rewuna hetɨa».
JDG 21:20 Hikɨ mɨpaɨ mekateniwarutahɨawe Wenikamini nuiwarimama: «Xekenehu, xekeneyuti'awieta kaxie haraweriyari makumanetsie
JDG 21:21 kayuwatɨ xeketeneteni. Kepauka 'ɨimarixi Tsiru kiekatari meme'axɨani metekuneitɨwetɨ, kaxie makumanetsie xekenewayekɨni yuxexuime xekenewarenawa 'ukari xe'ɨitama memakɨnekɨ, 'anari xekenehu Wenikamini kwieyaritsie.
JDG 21:22 Xɨka wapaapama wa'iwama metatsihatieyuni, mɨpaɨ tepɨtewatahɨawe: “Yɨkɨ xepɨkatewarahɨaweni, wa'ɨitama memakɨnekɨ tepɨkawarukaxei temɨtakwitɨwekaitsie. Yatɨni xeme xehetsie pɨkarahɨiwani, xeme xepɨkawaruwitɨtɨa yuniwema”».
JDG 21:23 Mɨpaɨ mekateniuyurieni Wenikamini nuiwarimama. Kepauka 'ukari memɨteneitɨwekaitsie, yuxexuitɨ yuxexuime mekaniwarutanawani mekaniwarewitɨni. Mekaniu'axɨani yukwietsie, kiekari mekaniukamani mana mekaniuyuhayewa.
JDG 21:24 Mɨpaɨ tiuyɨkuke 'ixaheritsixi mekaneutayeixɨani mematitekaitsie yunuiwarima meta yuxiɨyarima wahetsɨa yukwieyaritsie mekaniu'axɨani.
JDG 21:25 Mɨkɨ tukaritsie ti'aitame 'Ixaheri kwieyaritsie pumawekai, yuxexuitɨ kemɨtiwanake xeikɨa mepɨteyuriekai.
RUT 1:1 Merikɨtsɨ, meripaitɨ 'itsɨkate mete'aitakaku mɨkɨ kwieyaritsie, haakaxa kaniutaweni. Xewitɨ tewi Wereni kiekame Kura kwieyaritsie heyeyaka Muhawi kwieyaritsie peta'a, yɨ'ɨya meta yuniwema yuhutame warawitɨtɨ.
RUT 1:2 Mɨkɨ 'uki 'Erimereki pɨtitewakai, 'ɨyayata Nuhemi pɨtitewakai, niwemamata Makiruni meta Kirihuni. Mɨkɨ yunaitɨ 'Epɨrata kiekatari mepɨhɨkɨtɨkai, Wereni kiekatari Kura kwieyaritsie. Kepauka Muhawi kwieyaritsie memeta'axɨa, mana mepɨyuhayewaxɨ.
RUT 1:3 Matsi 'Erimereki kaniumɨni Nuhemi kɨnaya. Hikɨ mɨkɨ yuxaɨta kaniuyuhayewa yuniwema yuhutame wahamatɨa.
RUT 1:4 Mɨkɨ yuhutatɨ mekaniutineneɨke 'ukarawetsixi muhawitsixi mekaniwarutiwitɨni. Xewitɨ 'Uripa pɨtitewakai, xewitɨta Xuti. Tamamata wiyari mana metitetɨ,
RUT 1:5 hikɨ mɨkɨta mekaniukwini Makiruni meta Kirihuni. Nuhemi wiuratɨtɨ yuxaɨta puyuhayewaxɨ niwemama me'ukwiku.
RUT 1:6 Hikɨ Yawé yuteɨterima hekwamekɨ kaniwaparewiekaitɨni tixuaweriyatɨ 'ikwaite. Hikɨ Nuhemi mɨpaɨ retimaika kaniyukuha'aritɨani yumu'e'ema waranuwitɨnike Muhawi yeyanike.
RUT 1:7 Hikɨ kaneyani yumu'e'ema yuhutame warawitɨtɨ hakewa meripaitɨ mekienatɨkai. Yunaitɨ mekanekɨne huyeta, Kura kwieyaritsie haneme 'utɨa.
RUT 1:8 Hikɨ Nuhemi mɨpaɨ katiniwarutahɨawe yumu'e'ema: ―Neuxei, yuxexuitɨ yukie xekeneutayeixɨa yumaamama wahetsɨa. Yawé 'aixɨa ketixexeiyani kexemɨtewanaki'eriekai memukwi, wahetsie kexemɨtewiyakai, yaxeikɨata kexemɨnetenaki'eriekai ne.
RUT 1:9 Yawé waɨkawa kexeheparewieka hekwamekɨ 'aixɨa 'anemekɨ xemɨtiwikienikɨ. Hikɨ kaniwaruti'itseni. Perutsɨ mu'e'emama kwinimieme meyuhiwerietɨ meputitsuanakai
RUT 1:10 mɨpaɨ me'utiyuatɨ: ―Hawaikɨ. Tame tepɨyehu 'ahamatɨa 'akiekaritsie.
RUT 1:11 Nuhemi mɨpaɨ katiniwaruta'eiya: ―Neuxei neniwema, yukie xekenehu. ¿Titayarikuta nehamatɨa xetekɨniku? Tawariri nepɨkatiniweni memɨxetiwitɨnikɨ.
RUT 1:12 Xekenehu yukie, neniwema. Xekeneuhuni. Neri nepɨ'ukaratsi nepɨtseɨye, tawariri nepɨkayɨwe nemɨtiwikienikɨ. Xɨka neyɨwenike, 'ikɨ tɨkaritsie nepɨtiwikienikeyu nemɨtiniwenikɨ,
RUT 1:13 ¿xemeta xeteyɨwawe xemɨwakwewienikɨ mewawerekaku? ¿Xeteyuwaɨriya xekawikietɨ xemɨyuhayewanikɨ wakɨmana? Hawaikɨ, neniwema. Waɨkawa matsi ne nepɨtiuka'eniwa kexeme. Yawé waɨkawa pɨnetsi'anayewaya.
RUT 1:14 Tawarita matsi karima mekaniutihiwakaitɨni, kwi meyuheiwerietɨ. Hikɨ 'Uripa yumu'e kaniutateutɨani 'i'itseka. Peru Xuti hamatɨana puyuhayewaxɨ.
RUT 1:15 Nuhemi mɨpaɨ kaniutayɨni: ―Neuxei, nemu'e. 'Awixi yukie petɨa, yukakaɨyarixi wahetsɨa. 'Ekɨta hepaɨna kenemie.
RUT 1:16 Xuti mɨpaɨ katinita'eiya: ―Pepɨkanetsinɨ'aka nemɨyemiekɨ, 'axaɨta nemɨmatsiku'eirienikɨ. »Ne 'ahamatɨa nepɨyemie, hakewa pemetɨa. Hakewa pemekani, neta mana nepekani. 'Ateɨterima, neteɨterima mepɨhɨkɨtɨni. 'Akakaɨyari pɨnekakaɨyaritɨni.
RUT 1:17 Hakewa pememɨni, manata ne nepemɨni, Mana nepekateukieni. Yawé kenetsihe'uximatɨani xɨka nemetsiheku'eirieni xɨka tixaɨtɨ kataretaxɨriexɨani, kamɨyatɨtɨ».
RUT 1:18 Nuhemi 'uyɨ'ɨwiyaka yuheyemekɨ mɨyuwaɨriyakaikɨ Xuti 'enuweiyake, tawariri pɨka'ita'imaiyaxɨ.
RUT 1:19 Hikɨ, yuhutatɨ 'ukarawetsixi mekanekɨne huyeta meheta'axɨanike Wereni paitɨ. Me'u'axɨaku, waɨkawa niuki kaniutixuawere wahepaɨtsita, naitsarie kiekaritsie. 'Ukarawetsixi mɨpaɨ mekateniyuku'iwawiyakaitɨni: ―¿'Ikɨ Nuhemi katihɨkɨ?
RUT 1:20 Nuhemi mɨpaɨ katiniwarutahɨawe: ―Nuhemi xepɨkanete'uterɨwani. Marara pɨtari xekeneteneuterɨwani. Naimekɨmɨtɨrɨkaɨye nehatsiwime pɨnetsi'ayeitɨa.
RUT 1:21 »Kepauka nemetɨa yemekɨ nepɨhɨnekai nepɨyɨwekai, matsi Yawé pɨnetsihakunuitɨa nexaɨtame, naime netiunawairieka. Titayari Nuhemi xenete'uterɨwani Yawé 'uximatɨarika netsi'upitɨaka, temawierika pɨnetsi'unawairi Naimekɨmɨtɨrɨkaɨye».
RUT 1:22 Mɨpaɨ Nuhemi katininuani yukiekaritsie, Muhawi kwieyaritsie heyeyaka, yumu'e hawitɨtɨ Xuti Muhawi tewiyari. Kepauka memu'axɨa Wereni, tsewara 'itsanariyari putsutɨariekai.
RUT 2:1 Nuhemi kɨnaya 'iwaya yatewa 'apuyeikakai, Wuhutsi titewatɨ, 'Erimereki 'iwayatɨtɨ. Mɨkɨ waɨkawa pɨrexeiyakai, teɨteri mepi'eniekai.
RUT 2:2 Hikɨ Xuti Muhawi tewiyari Nuhemi mɨpaɨ katiniutahɨawe: ―Keneneupitɨa nemɨtipepenamiekɨ mɨra'itsanatɨnetsie, meyukuhayeikawa xeime 'aixɨa tiuka'iyarime hetsɨa. Hikɨ mu'eya mɨpaɨ katinita'eiya: ―Kenemie, neniwe.
RUT 2:3 Hikɨ Xuti kaneyani tsewara 'imɨariyari hekuteɨxɨke mɨra'itsanatɨnetsie, 'itsanamete wa'utɨma. 'Atsikatimaitɨ kemɨ'ane 'itsanaripa meuyenenikekai, Wuhutsi 'itsanaripa kaneuyeneni, 'Erimereki 'iwaya hetsɨa.
RUT 2:4 Hikɨ 'itsanamete mete'uximayakaku, kaninuani Wuhutsi Wereni heyeyaka, te'uximayatamete kaniwarutawaɨritɨani: ―Yawé xehamatɨa ke'uyeikani. Mɨkɨ mɨpaɨ mekatenita'eiya: ―'Ekɨta, 'ahamatɨa ke'uyeikani.
RUT 2:5 Te'uximayatamete tiwa'aitɨwame Wuhutsi mɨpaɨ katiniuta'iwawiya: ―¿Mɨkɨ 'ukaratsi kepaikɨ pɨra'ɨya?
RUT 2:6 Mɨkɨ mɨpaɨ katinita'eiya: ―'Ikɨ 'ukaratsi, Muhawi tewiyari pɨhɨkɨ, Nuhemi hamatɨa meyetɨa.
RUT 2:7 Mɨkɨ puyutawau kename neke'ipitɨani mɨtikuteɨxɨnikɨ xuruku 'utɨa, 'itsanamete memikuhayeikawa. Ximeripaitɨtɨ pɨkatitahayewawe 'amɨtinuatsie 'ena. Hikɨke kani'uxipieka 'etsiwa 'etɨpiwaritɨa.
RUT 2:8 Hikɨ Wuhutsi, Xuti mɨpaɨ katiniutahɨawe: ―Neniwe keneneu'eni. Hipame wa'itsanaripa pepɨkatiteɨxɨneni. 'Ateewa paitɨ pepɨkaheyeikani. 'Ahepaɨ 'ukarawetsixi memɨnetsiparewie wahamatɨa keneyuhayewani.
RUT 2:9 Kene'a'ɨwiya hakewa teme'uwa tema'itsanatɨwetsie, keniwakuweiyaneni 'a'iwama. 'Itsanamete 'ukitsi mɨpaɨ nepɨtiwarahɨawe memɨkamatsi'uximatɨakakɨ. Kepauka pemeuharimɨkɨni, hakewa haa meti'u, keneharimie, te'uximayatamete wahetsɨa.
RUT 2:10 Hikɨ Xuti 'utihɨximakeka kwiepa, mɨpaɨ kaniutayɨni: ―Karitsɨ 'aixɨa pepɨnetimate penetsi'uxeiyaka, ne 'ateewa paitɨ nekiekametɨme.
RUT 2:11 Wuhutsi kanita'eiya: ―Mɨpaɨ nepɨtimarie, naime kepemɨtiuyuri 'amu'e hetsiemieme kepauka 'akɨna mumɨ, kepemɨtiwaruku'eiri 'apaapama, mɨkɨ kwieyaritsie hakewa pemetinuiwaxɨ, hikɨ mɨkɨ kiekariyaritsie peheyeyaka 'ena pepunua pekahemarietɨ.
RUT 2:12 Yawé kematiyetuirieka kepemɨtiuyurikɨ. Yawé, 'ixaheritsixi wakakaɨyari, hetsɨa pekaninuani mɨmatsi'ɨwiyanikɨ, waɨkawa kematsiparewieka.
RUT 2:13 Mɨpaɨ kaniutayɨni: ―Xɨkatsɨ tiyɨwenike nematsinaki'atsitɨaka, neti'aitɨwame. 'Ekɨ pepɨnetsinɨtɨa, 'aixɨa penetixeiyatɨ pepɨnetsikɨhɨawe, tsepa nekamati'a'uximayatsiriwame.
RUT 2:14 Hikɨ Wuhutsi mɨpaɨ katinitahɨawe kepauka mɨtikwanikekai: ―'Enapai kenayaka, kenayuka'ikwaitɨaka tumati 'ɨpɨnariyarikɨ 'apa kenekwaka. Kepauka Xuti te'uximayatamete wahamatɨa 'amutaya, Wuhutsi pitaxatɨa tsewara xarikiyari. Hikɨ mɨkɨ katiniukwani, kaniutahuxani 'akuxita kaniuyuhayewa.
RUT 2:15 Kepauka mɨkɨ manukuke reuteɨximieka, mɨkɨ te'i'uximayatsiriwamete mɨpaɨ katiniwaruta'aitɨani: ―Kepauka 'ikɨ xuruku 'utɨa mɨtiteɨxɨneni, xepɨka'itewiyatsitɨaka.
RUT 2:16 Matsi manahɨatɨka xexuime xekenekuhayeikiriwani, para mɨkɨ mikuteɨxɨkɨ, xepɨka'itate'ani.
RUT 2:17 Merikɨ Xuti tikuteɨxɨtɨ kaniukutaikaiyarieni. Hikɨta tsewara mikuteɨxixɨ kaniutikatse. Xeitewiyari kiruyari paɨmeme payexɨri.
RUT 2:18 Hikɨ hetɨtɨ kaneyani kiekaritsie. Mu'eya kanixeiya kepaɨmeme matɨkɨkai. Xuti yumu'e katiniyetuirieni mɨtiuyuhayewakai mɨtiukwaitsie mieme 'utahuxaku.
RUT 2:19 Hikɨ mu'eya mɨpaɨ katinita'iwawiya: ―Hakewa hikɨ tsewara pepekuteɨxixɨ, hakewa pepɨreta'uximayataxɨ, 'aixɨa ke'itɨarieka tewi 'aixɨa mɨmarexei. Hikɨ Xuti yumu'e katiniutaxatɨani kemɨ'ane hetsɨa mɨreta'uximayataxɨ. Mɨpaɨ katinitahɨawe: ―Tewi hetsɨa hikɨ nemɨreta'uximayataxɨ, Wuhutsi katinitewaka.
RUT 2:20 Nuhemi yumu'e mɨpaɨ katiniutahɨawe: ―Yawé 'aixɨa keheiyurieka. Yawé pɨkatihayewa tahetsie tiwiyatɨ yunaki'eriya tatsipitɨatɨ, memayeneniere wahetsiemieme meta memukwi. Mɨkɨ tewi pɨta'iwa hurawa. Mɨkɨ pɨhɨritɨarie mɨtatsiparewienikɨ.
RUT 2:21 Xuti Muhawi tewiyari mɨpaɨ kaniutayɨni: ―Mɨpaɨta pɨnerahɨawekai, 'ena keneu'ahayewa nete'uximayatsiriwamete wahamatɨa, kepaukake 'itsanari naime temɨkɨnɨni.
RUT 2:22 Nuhemi mɨpaɨ katinitahɨawe: ―Neniwe, matikunanake wahamatɨa pemuyeikanikɨ, para hipame xaɨtsie pemɨkatiware'uximayatsiriekakɨ.
RUT 2:23 'Ayumieme Xuti mana kaniuyuhayewa Wuhutsi te'uximayatsiriwametemama 'ukari wahetsɨa, mikuteɨxɨnikɨ kepaukake memikɨnɨ me'itsanatɨwetɨ tsewara meta tɨriku. Mexikuxi, yumu'e hetsɨa 'ukatei.
RUT 3:1 Merikɨtsɨ mu'eya Nuhemi mɨpaɨ katinitahɨawe: ―Neuxei neniwe. Xɨari peuyewetse nemɨmatsikuwawirienikɨ hakewa pemekani 'aixɨa 'anemekɨ tixaɨtɨ pekareuyehɨatɨ.
RUT 3:2 Matsitɨ Wuhutsi te'uximayatsiriwamete wahetsɨa pepeta'axe, mɨkɨ pɨta'iwa. Mɨkɨ, 'ikɨ tɨkariyaritsie mana penuani tsewara matikatsiwatsie.
RUT 3:3 Keneti'ɨwa, witsimu'ɨa keneu'atawirieka meta 'akemari 'aixɨa mɨ'anene kenanakatɨxɨaka. Kenemie tsewara matikatsiwatsie. Pepɨkaheyuhekɨatani kapa mɨpaɨ retimanikɨ, kepaukake mɨretahayewa rekwatɨ meta re'ietɨ 'anake.
RUT 3:4 Kepaukari meyemie hekahunike, kene'a'ɨwiya hakewa mekahuni. 'Anake pepeyemie, 'ɨkayatsie pe'enuku'ɨkaripieme, mana pepekahuni. Hikɨ mɨkɨ yapetayɨni kepemɨtiyurieni.
RUT 3:5 Xuti mɨpaɨ katinita'eiya: ―Yanepɨtiyurieni naime kepemɨnerahɨawe.
RUT 3:6 Heyaka mɨrati'uximayatsiwatsie yapɨtikatɨa mu'eya kemɨtita'aitɨakai.
RUT 3:7 Wuhutsi tiukwaka meta tiu'ieka, puyutemawiekai. Hikɨ kaneyani hekahunike tsewara matixeɨrie warita. Hikɨ Xuti 'arikeke 'anɨari 'umietɨ kanaye'ani hetsɨana, 'ɨkayatɨa 'enuku'ɨkaripieka mana kaniukahuni.
RUT 3:8 Hikɨ Wuhutsi tɨkari hixɨapa kananutaniere, ta'aurie hawenike, 'ana 'ukaratsi puxei manuka'ɨkatsie 'ukaikame.
RUT 3:9 Mɨpaɨ katinita'iwawiya: ―¿Kepaikɨ pepɨyɨane? ―Ne Xuti nepɨyɨane, mati'uximayatsiriwame. 'A'ɨkari kɨtsimeyari keneneukaketɨa, 'ekɨ hɨritɨarika pepexeiya pemɨnetsitiwitɨnikɨ, tatɨɨriyama 'anuiwaritsie miemete memakɨnekɨ temɨ'iwamarixikɨ.
RUT 3:10 ―Neniwe Yawé kematsi'ɨwiyani. Hikɨ hekwamekɨ kepemɨtiuyuri, pepɨ'ahekɨata kepemɨtiwiya 'amu'e hetsie, yaxeikɨata 'akɨnatɨkaitsie temari pemɨkawakuwaunekɨ, memɨkatehexeiya yatɨni memɨtehexeiya.
RUT 3:11 Hikɨ neniwe pepɨkaheumaka. Tita pemɨreuyehɨwa naime yanepɨtiyurieni. Yunaitɨ neteɨterima yamepɨtemate 'ekɨ 'ukaratsi 'inɨari kepemɨtihɨkɨ yapemɨtikamiekɨ.
RUT 3:12 'Aixɨatsɨ kani'aneni temɨ'iwamarixikɨ perutsɨ matsi 'akuxi xewitɨ 'apuyeika kemɨ'ane mɨhɨritɨarie para mɨmatsiparewienikɨ.
RUT 3:13 Hikɨ tɨkaritsie 'ena keneu'ahayewa ximerike pepɨyemie. Xɨka mɨkɨ yara'eriwani, 'aixɨa kani'aneni yaketiuyurieni. Peru xɨka yakara'eriwani yamɨtiyurienikɨ, kaniyuritɨni Yawé mayenierekɨ, yurikɨ ne nepɨyɨhɨritɨa nepɨmatsiparewieni. Keneukaniri mana ximerikeri pekaniyemieni.
RUT 3:14 Hikɨ manuka'ɨkatsie 'ukaitɨ kaniukatariyarieni, tuxakɨta 'anukukeka kaneyani, mɨpaɨ mɨrehɨawekaikɨ: «Xewitɨ mɨkaretimanikɨ kename 'ukaratsi 'ena hekuyeixɨa mɨrati'uritɨretsie».
RUT 3:15 Hikɨta Wuhutsi mɨpaɨ katinitahɨawe: ―'Axikuri keneutawera, 'aixɨa ketinewiyani. Xuti mɨpaɨ katiniuyurieni, kanitawera yuxikuri. Mana kanikayatsirieni tsewara xeitewiyari kiruyari. 'Ititɨtɨaku kiekaritsie kaneyani.
RUT 3:16 Hikɨ kepauka Xuti meta'a yumu'e hetsɨa, kanita'iwawiya: ―Keperepariyarie, neniwe Xuti naime pɨtitaxatɨa, tewi hetsiena mieme kemɨreyuri,
RUT 3:17 mɨpaɨta kaniutayɨni: ―'Ikɨ tsewara pɨnetsihetɨtɨa xeitewiyari kiruyari, mɨpaɨ nerahɨawetɨ: “'Aixɨa pɨka'ane pe'amawetɨ pemeumieni 'amu'e hetsɨa”.
RUT 3:18 Hikɨ Nuhemi mɨpaɨ katinitahɨawe: ―Neuxei neniwe, 'akuxi keneta'ikwewani ketiyɨni. Mɨkɨ tewi yumexɨitɨatɨ pɨkatihayewa, 'aixɨa tiyurienike hikɨ tukariyaritsie.
RUT 4:1 Hikɨ Wuhutsi heyaka, kiekari kitenie kanayerɨni. Mana puyetɨa 'iwaya mɨhɨritɨariekai hetsiena mieme mɨraxaxatakai. Wuhutsi mɨpaɨ katinitahɨawe: ―Kenaye'a ne'iwa, 'ena kenayexi. Mɨkɨ tewi mana 'uyaka mana kanayerɨni.
RUT 4:2 Hikɨ Wuhutsi 'ukirawetsixi tamamata kaniwaruta'inieni kiekaritsie, mɨpaɨta katiniwarutahɨawe: ―'Ena xekenayaxi. Mɨkɨ mana mekanayaxe.
RUT 4:3 Wuhutsi yu'iwa mɨhɨritɨarie mɨpaɨ katinitahɨawe: ―Nuhemi, Muhawi kwieyaritsie heyeyaka, kwie ta'iwa miku'eiri 'Erimereki kanituamɨkɨni.
RUT 4:4 Mɨpaɨ netimaitɨ kename heuyewetse, nematitaxatɨanikɨ 'ikɨ hepaɨtsita, nemetsi'aitɨatɨ peminanenikɨ, 'ikɨ yunaime wahɨxie 'ukirawetsixi kiekatari, meta hipame wahɨxie. Xɨka 'ikɨ kwie penanaimɨkɨ, yaketineuyuri. Mexɨka 'ekɨ yapekatikayeimɨkɨ 'ikɨ kwie hepaɨtsita, yakeneutayɨki, mɨpaɨ ne nemɨtimaikakɨ. Xewitɨ tawariri pumawe heitserie mexeiya piinieya mayanikɨ, 'ekɨ xeikɨa. Neta 'a'utɨma heitserie nepexeiya. Mɨkɨ kanita'eiya: ―Ne nepɨyɨaneni nemɨrayukatuani.
RUT 4:5 Matsi Wuhutsi naime katinitahekɨatɨani: ―Kepauka Nuhemi kwieya 'apiini pemayeitɨani, 'anata Xuti pepɨtanaki'erieni Muhawi tewiyari, wiura ta'iwa miku'eiri mɨkwieyatɨkai, para temɨkahetɨtɨmaiyanikɨ kename ta'iwa tipinieyatɨkai mɨkɨ kwie.
RUT 4:6 'Iwaya mɨpaɨ kaniutayɨni: ―Kamɨtsɨ nepɨkayɨwe mɨpaɨ nemɨtiyurienikɨ. Xɨka mɨpaɨ netiuyurieni, nepiinite naime nepɨreuyehɨani tita nemɨrexeiya neniwema wahetsiemieme. 'Ekɨtsɨari katini'ahetsietɨni, ne mɨpaɨ nemɨtiuyurieni. Nepɨkayɨwe.
RUT 4:7 Hikɨ 'ana tukaritsie 'ixaheritsixi mɨpaɨ mekateniuhukaitɨni, kepauka yupiini yukwie 'uku'eirieme tawarita minanenikɨ, yatɨni hekwamekɨ minanenikɨ, 'ana tinaweme yukakai xeitapamieme mepɨyukukweitɨwakai, mɨpaɨ mɨtimatsiɨkɨnikɨ kename 'ana 'inanai.
RUT 4:8 'Ayumieme 'iwaya mɨhɨritɨariekai kwie hepaɨtsita mɨpaɨ yu'iwa Wuhutsi katiniutahɨawe: ―'Ekɨ keneunanai. Yukakai panuyehɨnaxɨ.
RUT 4:9 Hikɨ Wuhutsi mɨpaɨ kaniutayɨni 'ukirawetsixi yunaime kiekatari wahɨxie, mɨpaɨ 'utaitɨ: ―'Ikɨ tukaritsie xeme xepɨhɨkɨ xemunenierixɨ, kename Nuhemi netiunanairi naime 'Erimereki tita mɨtipinieyatɨkai, Kirihuni meta Makiruni,
RUT 4:10 hikɨri mɨpaɨ xepɨtemaika kename ne'itiwitɨ Xuti Muhawi tewiyari Makiruni mɨ'ɨyayatɨkai, mɨkaheuyewautsenikɨ Makiruni ta'iwa kemɨtihɨkɨtɨkai, yaxeikɨata piiniteya, xemɨkahetɨtɨmaiyanikɨ yunaitɨ 'iwamama, yaxeikɨata kiekaritsie mɨkaheuyewautsenikɨ kemɨtitewakai. Xemeri hikɨ xemunenierixɨ xepɨhɨkɨ.
RUT 4:11 'Ukirawetsixi meta yunaitɨ mana kiekari kitenie memukutekai, mɨpaɨ mekaniutiyuani: ―Tame temunenierixɨ tepɨhɨkɨ. »Yawé yaxeikɨa yaketiuyurieni mɨkɨ 'ukaratsi pemɨtiwitɨni hetsiemieme, kemɨtiwaruparewi Xakeri meta Reya nuiwari memukama wahepaɨ, 'ixaheritsixi teɨteriyari kememɨte'akɨ. »'Ekɨta pematsiɨkɨtɨ peke'ayani 'Epɨrata mɨtiyetewatsie, meta waɨkawa pemariwatɨ peke'ayani Wereni kiekariyaritsie.
RUT 4:12 »Yawé 'ikɨ 'uka hetsie kematsiyetuirieni 'anuiwarima Paretsi nuiwarimama hepaɨ me'anekame, Tamaxi nu'aya Kura hetsiemieme meyexei».
RUT 4:13 Hikɨ Wuhutsi Xuti kaniutiwitɨni. Kepauka memuyutiwitɨ, Yawé pɨwarupitɨa nunutsi memayexeiyakɨ, hikɨ 'utihukataka 'ukitɨme kaniutiniweni.
RUT 4:14 'Ukarawetsixi Nuhemi mɨpaɨ mekatenikɨhɨawekaitɨni: «Yawé 'aixɨa ketikuxaxatsiwani, 'axaɨtame mɨkamatsi'uku'eirikɨ, xeime matsiparewiwame pemexeiyakɨ. Xeime mayexeiyakɨ 'Ixaheri manukuhanakɨ.
RUT 4:15 'Ikɨ nunutsikɨ 'aixɨa pepɨ'itɨarieka waɨkawa, hetsiena petiwiyatɨ, 'amu'e mutiniwexɨkɨ. 'Amu'e waɨkawa mɨmatsinaki'erie, matsi ke'aniwema me'atahutatɨ».
RUT 4:16 Nuhemi nunutsi kananutuni, kaneikukweni, kaniyɨhɨritɨani mitaweriyakɨ.
RUT 4:17 'Ahurawatari mɨpaɨ mekaniutiyuanekaitɨni: «Nuhemi nunutsi kanexeiyani». 'Uweri mekateniterɨwa. 'Ikɨ 'Itsahi paapaya kanayani, Rawiri paapaya.
RUT 4:18 'Ikɨ Paretsi pɨnuiwarieya: Paretsi, Ketsiruni pɨpaapayatɨkai.
RUT 4:19 Ketsiruni, Xamɨ pɨpaapayatɨkai. Xamɨ, 'Aminarawi pɨpaapayatɨkai.
RUT 4:20 'Aminarawi, Nahatsuni pɨpaapayatɨkai. Nahatsuni, Tsarimuni pɨpaapayatɨkai.
RUT 4:21 Tsarimuni, Wuhutsi pɨpaapayatɨkai. Wuhutsi, 'Uweri pɨpaapayatɨkai.
RUT 4:22 'Uweri, 'Itsahi pɨpaapayatɨkai. 'Itsahi, Rawiri pɨpaapayatɨkai.
1SA 1:1 Merikɨtsɨ 'Epɨrahini kwieyaritsie hɨritsie mana xewitɨ tewi pukatei, Tsupi nuiwarieya Xamatahini kiekame. 'Erikana pɨtitewakai Keruhani nu'ayatɨtɨ, mɨkɨta 'Erihú punu'ayatɨkai, mɨkɨta Tuhu punu'ayatɨkai, mɨkɨta Tsupi punu'ayatɨkai mɨkɨ 'Epɨrahini nuiwarieya hetsie pɨmiemetɨkai.
1SA 1:2 'Erikana yuhutame yu'ɨitama pɨwarexeiyakai. Xewitɨ Hana pɨtitewakai, xewitɨta Penina. Mɨkɨ tɨɨri pɨwarexeiyakai, peru Hana pɨkaniwekai.
1SA 1:3 Xeiwiyari 'aye'axekaku 'Erikana yukiekaritsie payeyeikakai Yawé Naimekɨmɨtɨrɨkaɨye nenewieri hepitɨanike, meta mawari heiwewirienike Tsiru mɨrakutewatsie paitɨ, mana 'Eri niwemama yuhutatɨ mepɨte'uximayakai 'Uni meta Pinexi mawari wewiwamete Yawé hetsiemiemekɨ.
1SA 1:4 Kepauka memɨte'utimawakai, 'ana 'Erikana yu'ɨya Penina yapaɨmeme wai niyetuiriwakaitɨni, yaxeikɨata yuniwema 'ukitsi, 'ukari kepaɨmeme mɨtiwahetsiemiemetɨkai.
1SA 1:5 Hana matsi 'aixɨa mɨ'anene wai kaniyetuiriwakaitɨni, waɨkawa minaki'eriekaikɨ tsepanetɨ Yawé kaniweweme meyeitɨakai.
1SA 1:6 Wixieya Penina waɨkawa kani'uximatɨakaitɨni, para ha'atɨ muyeikanikɨ xeikɨa, Yawé kaniweweme meyeitɨakaikɨ.
1SA 1:7 Xeiwiyari 'aye'axekaku kepauka memeta'axekai Yawé tukita: Hana yaxeikɨa pɨtikuhɨawaruwakai. Waɨkawa kaniutatsuakakaitɨni meta pɨkatikwaimɨkɨkai.
1SA 1:8 Merikɨtsɨ 'Erikana kɨnaya mɨhɨkɨ mɨpaɨ katinitahɨawe: «Hana, ¿ketitayari petiutatsuaka? ¿Titayari pekatikwaimɨkɨ? ¿Titayari peti'a'iyaritɨa? ¿Tamɨ ne 'ahamatɨa nemuyeika 'a'iyari 'aixɨa kati'ane keyuri tamamata tɨɨri?»
1SA 1:9 Heiwa Tsiru me'u'uwatɨ Hana kananukukeni tiukwaiyaku, tukita kaneyani heyutanenewienike, 'Eri mawari wewiwame mɨhɨritɨariekai kanixeiyakaitɨni, mana Yawé tukieya kitenie yu'ɨparitsie pakatei,
1SA 1:10 hikɨ waɨkawa yuhiwerietɨ kanitsutɨani yunenewietɨ Yawé hetsiemieme, 'utatsuatɨ katihayewatɨ.
1SA 1:11 Hikɨ yuhɨritɨatɨ mɨpaɨ kaniutayɨni: «Yawé Naimekɨmɨtɨrɨkaɨye, xɨka ti'uximayatame 'ahetsɨa mɨmieme pexeiyanike haweri mɨyɨane yaketinemaika kenemɨtiuka'eniwa pepɨkanetsihatɨtɨmaiyani, xɨka penetsiyetuirieni nunutsi 'ukitɨme ne matsi nemaniyetuiriemɨkɨ tukarieya naime hepaɨtsita kɨpateya hatsuaku nepɨkakaxini».
1SA 1:12 Matsi Hana yunenewietɨ kwinimieme katineutere Yawé hahɨawetɨ, 'Eri pixeiyakai tenieyatsie.
1SA 1:13 Tenieya puyuatɨkatei xeikɨa, Hana yu'axɨkai puyunenewiekai, pɨkayu'eniɨriɨkɨkai kemutainekai, tawetɨ yɨaneme pɨ'eriekai 'Eri.
1SA 1:14 'Ayumieme mɨpaɨ pɨtitahɨawixɨ: —¿Kepaukake pepɨtihayewa pe'ienetɨ? Winuri keneuhayewa.
1SA 1:15 Hana kanita'eiya: —Neti'aitɨwame, netawekame pepɨka'erieka, ne matsi winu meta nawa nepɨka'anu'iwe, ne matsi 'ukaratsi nemɨhiweritɨarie nepɨhɨkɨ, 'uwa nepeyetɨa ne'ukiyari Yawé hɨxie mɨnetsinɨtɨanikɨ.
1SA 1:16 'Ukaratsi 'axanemɨtiuka'iyari pepɨkanetsi 'erieka 'ekɨ. Mɨya nepɨreuterixɨ neyunenewietɨ kenemɨtiuka'eniwakɨ kenemɨtiyu'iyaritɨakɨ.
1SA 1:17 'Eri mɨpaɨ katinitahɨawe: —Kenemie kayuwatɨ pehexeiyatɨ, 'Ixaheri Kakaɨyarieya kametiniyetuiriemɨkɨ tita pemɨtitawawiri.
1SA 1:18 Hana mɨpaɨ kaniutayɨni: —Pamɨpariyutsi 'ekɨ pemɨtimate ne kenemɨtiku'eriwa. Hana mɨpaɨ tiutateutaka kaneyani, hikɨ katinekwani yapauka 'ana kwitɨwa katiniyupata kemɨtiyɨkɨhɨawekai.
1SA 1:19 'Uxa'arieka ximeri Yawé nenewieri me'upitɨaka menekɨne yukie Xama kiekariyaritsie. 'Erikana yɨ'ɨya matɨa Hana kaniukahuni, Yawé Hana kanaye'erieni.
1SA 1:20 Hana kaniutihukata, xeiwiyari hanuyeyaku xeime nunutsi 'ukitɨme kanayexeiya, Tsamuheri katiniterɨwa, mɨpaɨ 'utayɨka: «Yawé nemutawawirikɨ».
1SA 1:21 Merikɨtsɨ xeiwiyari 'aye'akuta 'Erikana kaneyani yutɨɨriyama yunaime warawitɨtɨ Yawé tukita mawari mɨwewimiekɨ Tsiru paitɨ meta mɨraye'atɨanikɨ kemutayɨkai.
1SA 1:22 Matsi Hana wahamatɨa pɨkahetɨa, mɨpaɨ pɨtitahɨawixɨ yɨkɨna: —Hawaikɨ nepɨkayemie, kepaukake mɨtikwaiweni nunutsi, 'anake nepenuwitɨni Yawé nepeyetuirieni, muwa meyuhayewakɨ yuheyemekɨ tukari kepaɨmeme mipitɨani.
1SA 1:23 Kɨnayata 'Erikana mɨpaɨ katinitahɨawe: —'Aixɨa pɨ'ane yaketineuyuri kemɨmatinake, keneukunua kepaukake nunutsi yuxaɨta mɨtikwaiweni, Yawé yuniuki kehaye'atɨani. 'Ayumieme Hana yukie puyuhayewaxɨ nunutsi weriyatɨ kepaukake yuxaɨta tikwaiwetɨ matɨa.
1SA 1:24 Kepauka mihayewaxɨ 'itsitsitɨwatɨ nunutsi, kaneyani Yawé tukita Tsiru paitɨ. Tsikeru haika wiyari hɨkame kanehana meta xeitewiyari kiruyari harina meta winu nawita 'uyemakame.
1SA 1:25 Hikɨ tsikeru me'utimawakari, nunutsi 'Eri mekaniyetuirieni.
1SA 1:26 Hana mɨpaɨ kaniutayɨni: «Neti'aitɨwame, yurikɨ nepɨtayɨni, ne 'ukaratsi nepɨhɨkɨ 'a'aurie nemutikatei 'uwa Yawé nenewieri nepitɨatɨ.
1SA 1:27 'Ikɨ nunutsi pɨhɨkɨ ne nemitawawiri Yawé, mɨkɨ pɨnetsiyetuiri.
1SA 1:28 Ne hikɨ 'ayumieme nepiyetuirieni Yawé. 'Ikɨ nunutsi kemɨreutere 'uyeikatɨ hetsiena mieme pɨhɨkɨtɨni». Hikɨ 'Eri kaniutihɨximakeni Yawé hɨxie.
1SA 2:1 Hana kemɨtiukwikaxɨ: «Ne'iyari Yawé hetsie tiwiyatɨ puyutemawie, netɨrɨkariya mana pɨtiwiya. Nepɨnetemawie Kakaɨyari mɨnetsi'utawikweitsitɨakɨ nepɨyɨwe memɨnetsi'aye'unie nemɨwara'iwa.
1SA 2:2 »Nixewitɨ tɨma 'apɨka'uyeika Yawé hepaɨ patsietɨ, nixewitɨ pumawe tahetsie nunuwame takakaɨyari hepaɨ, xewitɨ hepaɨna 'anetɨ pumawe.
1SA 2:3 »Xeketeneuhayewa mariwemekɨ xetekuxatatɨ, xetemaiwaweme xeyuxatatɨ. Matsi Yawé Kakaɨyari tanaime pɨtatsimate. Pɨtimate kepauka 'aixɨa temɨteyurie, meta kepauka 'axatemɨteyurie.
1SA 2:4 »Memɨtɨrɨkawi watupi pɨtimura matsi memɨwerarani tɨrɨkariya pɨwapitɨa.
1SA 2:5 Meripaitɨ 'ikwai 'anayuhayewame memexeiyakai, hikɨri paa 'etsipemekɨ mepuyutua. Meripaitɨ memɨte'uka'eniwakai haakakɨ hikɨri waɨkawa 'ikwai mehexeiyatɨ mekaniu'uwani. 'Uka mɨkaniwewekai 'atahutamexɨa kaniutiniweni, matsi yumɨireme yuniwema mɨwarexeiyakai kawarexeiyatɨ kanayani.
1SA 2:6 »Yawé tukari pɨtatsipitɨa meta mɨɨya, mɨkɨ yapɨtiyuriene temɨkateukienikɨ peru meta pɨtatsi 'anuku'uitɨwa.
1SA 2:7 Yawé pɨtatiyetuirie temɨtehexeiyanikɨ meta pɨtatsipitɨa tixaɨ temɨkatehexeiyanikɨ, tixaɨ pɨkatarayeitɨwa 'ariketa mariweme pɨtatsi'ayeitɨwa.
1SA 2:8 Mɨkɨ tumuanaritsata haweri mɨ'ane kananukuketɨwani, tixaɨ mɨkarexeiya xatsipa kanayehana, 'aixɨa mɨtiyenikɨ te'aitamete watsata meta miyetuirienikɨ 'uweni mariweme witsi'anekame. »Yawé kwie tsutɨmeyari katinipiinieyatɨni. Mɨkɨ hetsie kwie kaniukamani.
1SA 2:9 Hetsiena yuri memɨte'erie yamemɨtekahu kaniwa'ɨwiyani, peru 'axateyuruwamete mekaneuyexɨrikuni makuyɨwitsie. Nixewitɨ pɨkarayu'iwa kemɨtinake yutɨrɨkariyakɨ.
1SA 2:10 »Yawé memeye'unie kaniwaka'unamɨkɨ, muyuawitsiepaitɨ mimierɨkari kananakanɨ'amɨkɨ wahetsie. Yawé yunaime kwiepa memɨtama pɨwa'itsɨkame, mɨkɨ ti'aitamekɨ manukakeni waɨkawa tɨrɨkaɨyeme payeitɨani meta mɨkɨ menayexei tɨrɨkariya pupitɨa».
1SA 2:11 'Erikana Xama kiekariyaritsie kaneyani yukie, peru nunutsi kaniukunuani Yawé hetsiemieme mɨtita'uximayatakɨ, 'Eri mawari wewiwame pi'ɨwiyakai.
1SA 2:12 'Eri niwemama 'axamepɨte'u'iyarikai, Yawé mepɨka'eniekai.
1SA 2:13 Mɨkɨ mawari wewiwamete 'ipaɨ mepɨtekahukai: Kepauka xewitɨ mawari mɨwewienenitsie, mawari wewiwame parewiwameya tepɨa 'amupa manuxɨtetɨka hakwetɨ mana kani'axekaitɨni, hikɨ kepauka wai mɨ'etsarieka,
1SA 2:14 xarita tepɨa manuxɨtetɨka neukahatɨwakaitɨni, yatɨni xakɨ 'amɨpatsie, yatɨni katsuweratsie, mawari wewiwame tipiinieya naitɨ pɨrayeikakai, kepaɨmeme mɨtiku'axikekai tepɨa manɨxɨte. Mɨpaɨ mekaniwayuriekaitɨni 'ixaheritsixi Tsiru memeta'axekai.
1SA 2:15 Metatsiere kepauka xewitɨ mawari taiyariyari mɨwewiekatsie, mawari wewiwame parewiwameya kani'axekaitɨni, 'akuxi wiyari kahaukuniwekaku mɨpaɨ mɨtitahɨawekɨ mawari mɨwewie: «Keneneyetuiri wai mɨtiwarɨkarienikɨ mawari wewiwame hetsiemieme, warikimeri pɨkatanaki'erieni, yuikame xeikɨa».
1SA 2:16 Xɨka mɨtimawa mɨpaɨ tita'eiya: «Kenekwewieka 'akuxi wiya 'anuyekuneyuke kemɨreuyewetse, 'anake pekanenutuimɨkɨ kemɨmatinake», matsi ti'uximayatame mɨpaɨ pɨtikɨhɨawekai: «Hawaikɨ keneneyetuiri hikɨ yapauka, yapepɨkanetiutuitɨa ne nepɨmatsinawairieni».
1SA 2:17 Mɨpaɨ 'ayumieme mɨkɨ temari waɨkawa 'axamepɨteyuriekai Yawé hɨxie, mawari hetsiemieme heitserie 'aixɨa memɨkateyuriekaikɨ.
1SA 2:18 Matsi Tsamuheri nunutsitɨtɨ, yuhetsiemieme mawari wewiwame rinu kamixayari 'anakatɨtɨ katini'uximayakaitɨni Yawé hɨxie.
1SA 2:19 Xeiwiyari 'aye'axekaku warutsieya kamixaya 'amɨtɨtɨ kanitiwewiriwakaitɨni, kepauka maye'axekai mawari memuyewewietɨkɨkakaitsie yukɨna hamatɨa 'ana kaneihuririwakaitɨni.
1SA 2:20 Hikɨ heiwa 'ana 'Eri kaniwarutanenewiya 'Erikana Hana mame Kakaɨyari 'aixɨa mɨwayurienikɨ mɨpaɨ 'utaitɨ: «Yawé kexe'upitɨani waɨkawa tɨɨri xemɨwarayexeiyakɨ, 'ikɨ 'uka nunutsi 'uta'iwauka Yawé mɨyetuirikɨ». Hikɨ 'ana yukie mekanakunuaxɨani.
1SA 2:21 Yawé Hana 'aixɨa puyuri, tɨɨri yuhaikame 'ukitsi kaniwarayexeiya, meta yuhutame 'ukari. Mɨkɨ tukaritsie matsi Tsamuheri kaniwerekaitɨni Yawé hɨxie.
1SA 2:22 'Eri pu'ukiratsitɨkairi, yapɨretima naime niwemama 'ixaheritsixi kememɨwayuriekai meta yapɨretima 'ukarawetsixi tuki kitenie memɨte'uximayakai wahamatɨa memukahipitekai.
1SA 2:23 Hikɨ mɨpaɨ katiniwarutahɨawe: «¿Ketitayari mɨyaxeteyurie? Yunaitɨ teɨteri yamepɨnetekuhɨawe ke'axaxemɨteyurie.
1SA 2:24 Hawaikɨ, neniwema nemɨxenaki'erie, mɨkɨ 'aixɨa pɨka'ane kexemɨtekuxaxatsiwa Yawé teɨterimama watsata.
1SA 2:25 Xɨka xewitɨ 'axatiuyurieni yu'iwa hepaɨtsita, Kakaɨyari kanihɨkɨtɨni kemɨ'ane heitserie mexeiya yamɨtayɨnikɨ, peru xɨka Yawé hetsɨa 'axatiuyurieni, ¿kemɨ'ane rahetsie pɨratanuani?» Matsi niwemama mepɨkahenu'eni wapaapa kemɨtiwarayemari'itɨwakai, Yawé pinakekai watukari mɨwanawairienikɨ xeikɨari.
1SA 2:26 Peru, nunutsi Tsamuheri matsi pɨwerekai, Yawé 'aixɨa pɨtixeiyakai meta teɨteri.
1SA 2:27 Xewitɨ tewi Kakaɨyari mayexeiya 'Eri kaneku'iwata mɨpaɨ katinitahɨawe: «Yawé mɨpaɨ kanaineni: “'Atewarima wahɨxie nepɨnehekɨataxɨ 'Ekipitu paitɨ ti'aitame Parahuni tiwa'aitɨakaku.
1SA 2:28 Yunaime 'ixaheritsixi waxiɨyarima watsata 'Aruni nepanayexei para nemawari wewiwame mayanikɨ, para nehɨxie nemawari taiyametsie mɨti'uximayakakɨ, meta 'ɨkwa mutitaiyanikɨ meta mawari wewiwame kamixaya manakatɨkɨnikɨ. Matsi niwemama nepɨwayetuiri mawari memɨtitaiyakɨ 'ixaheritsixi memiyetuaya nehetsiemieme.
1SA 2:29 ¿Ketitayari xeme 'axaxeteyurie mawari meta 'imikieri, ne nemɨti'aita mɨkɨ memɨnete'atɨiriwanikɨ? ¿Ketitayari 'aniwema waɨkawa petiwanaki'erie ne pekanetsinaki'erietɨ, pekaniwawaiyatɨaka xeikɨa nemawari 'aixɨa mɨ'anenekɨ 'ixaheritsixi memɨteyetuaya nehetsiemieme?”
1SA 2:30 »Mɨya pemɨtiuyurikɨ, hipame 'a'iwama nepɨkawapitɨani, tsepa kenemutayɨkai meripaitɨ 'atewarima kename yunaitɨ 'a'iwama 'apaapama yaxeikɨa 'aniwema menetsiparewiekakekai yuheyemekɨ. Ne Yawé 'Ixaheri Kakaɨyarieya yanekaniutayɨni. Nekaniwa'enieka memɨnetsi'enie, tixaɨtɨ nepɨkatiwarayeitɨa memɨnetsi'uxie.
1SA 2:31 Pehurari 'atukari mɨtixɨnitsie, xete'uximayatɨ xepɨka'akɨneri, yaxeikɨa 'atɨɨriyama, nixewitɨ 'anuiwaritsiemieme 'ukiratsi pɨka'ayani.
1SA 2:32 Pe'uxiwa'atɨ pepɨniereni, 'ixaheritsixi ke'aixɨa memɨ'itɨarieka, nixewitɨ 'anuiwaritsie mieme 'ukiratsi pɨka'ayani.
1SA 2:33 Xɨka xeime ne'upitɨani mɨti'uximayakakɨ mawari taiyame, mɨkɨ heiwerika xeikɨa nemɨmatsipitɨanikɨ 'a'iyaritsie nepɨtiyurieni, yunaitɨ 'anuiwarima mekanikwikuni metemaritɨtɨ.
1SA 2:34 'Ikɨ 'inɨari nepɨmatsiyetuirie: yuhutatɨ 'aniwema mekanikwikuni xeitukaritsie, 'Uni, Pinexi matɨa.
1SA 2:35 »Peru matsi ne xeime nepanukakeni mawari wewiwame yatikamieme, yamɨtiyurieni kemɨnetinake. Hatsuaku nuiwarieya mepɨkaheuyeweni, matsi mɨixa wiyari puyeikani kemɨ'ane nemanayexei ti'aitame hɨxie.
1SA 2:36 'Atɨɨriyama memuyuhayewatɨweni mekani'axɨakuni metitunuma'utɨ pɨrata tuminiyari yatɨni paa 'etsipeme mɨwaminikɨ mekanitawawiriekuni, meta mɨpaɨ mekatenitawawiriekuni: “Ketaneupitɨa 'uximayatsika mawari wewiwamete temakɨnekɨ mɨpaɨ temɨteyumikwanikɨ”».
1SA 3:1 Tsamuheri 'akuxi yakɨ puyumaikai, kepauka Yawé mɨti'uximayatsiriekai 'Eri 'i'ɨwiyakaku, 'ana 'akuxi Yawé niukieya pɨkaheye'enieriwakai meta 'ana yuwaɨkawatɨ mɨpaɨ mepɨkatenenierekai.
1SA 3:2 'Eri kaheunieretɨ kanayeiximekaitɨni. Xeitukaritsie heiwa kaniuka'uxipiwekaitɨni mɨwayehupukaitsie yukiita,
1SA 3:3 Tsamuheri kanikutsukaitɨni tukita, tɨratu kakuniyari muyekatsie Yawé hetsiemieme, Kakaɨyari kɨxemeya 'akuxi pɨtatɨkatei.
1SA 3:4 Yawé Tsamuheri kaniutahɨawe, mɨkɨta mɨpaɨ katinita'eiya: —'Uwa nepɨyeka.
1SA 3:5 Mɨkɨ 'unautsarɨmetɨ kaneyani 'Eri muwayekateitsie, mɨpaɨ katinitahɨawe: —'Ena nepuwe, ¿titayari penerahiwiwa 'ekɨ? 'Eri mɨpaɨ katinita'eiya: —Nematsi nepɨkamatsihahiwiwa, keneumieni kenekani. Hikɨ Tsamuheri kaneyani yu'itaritsie.
1SA 3:6 Peru hutarieka Yawé kanitahɨawe: —Tsamuheri. Hikɨ mɨkɨ 'anukukeka kaneyani 'Eri muwayekateitsie mɨpaɨ katinitahɨawe: —'Ena nepuwe, ¿titayari penerahɨawe 'ekɨ? 'Eri mɨpaɨ katinitahɨawe: —Neuxei neniwe, ne nepɨkamatsihahɨawe. Kenemie kenekani.
1SA 3:7 Tsamuheri 'ana 'akuxi Yawé pɨka'eniewekai, hatsuaku yuniukikɨ pɨkatitahekɨatɨawekai.
1SA 3:8 Yawé hairieka Tsamuheri kaniutahɨawe, mɨkɨ 'anukukeka kaneyani 'Eri mɨwayekateitsie. Mɨpaɨ katinitahɨawe: —'Ena nepuwe. ¿Ketitakɨ penereuyehɨatɨ penerahɨawe 'ekɨ? Merikɨte 'Eri mɨpaɨ katinetimani, kename Yawé temaikɨ kɨhɨawekai.
1SA 3:9 'Eri mɨpaɨ katinitahɨawe: —Kenemie kenekani, xɨka xewitɨ tawarita matsihahɨaweni mɨpaɨ ketinetahɨawi: “Yawé yakenetineutahɨawi, mati'uximayatsiriwame pɨmatsi'enie”. Tsamuheri heyaka nekahuni yu'itaritsie.
1SA 3:10 Hikɨ Yawé tawarita 'ahurawa kanitahɨawe hekwamekɨ: —Tsamuheri. Tsamuheri. Tsamuheri mɨpaɨ katinita'eiya: —Keneutaniu, mati'uximayatsiriwame pɨmatsi'enie.
1SA 3:11 Yawé mɨpaɨ katinitahɨawe: —Neuxei, paye'axime 'Ixaheri kwieyaritsie kwinimieme tiraunarikɨ nemɨwatimariuta.
1SA 3:12 Mɨkɨ tukariyaritsie yanetiniyurimɨkɨ naime kenemutayɨ 'Eri yaxeikɨa tɨɨriyamama wahepaɨtsita.
1SA 3:13 Yanepɨtitahɨawixɨ niwemama 'axamemɨteyuriekaikɨ, wahetsie nepɨrahɨa yuheyemekɨ, mɨkɨ pɨtimaikai ke'axamemutiyuanekai nehepaɨtsita, mɨkɨ matsi 'aixɨa pɨkawaruyuri timaitɨ.
1SA 3:14 'Ayumieme mɨpaɨ nekanaineni nuiwarimama wahepaɨtsita: Nixeime mawarikɨ ni'imikierikɨ nepɨkatiwareuyehɨwirieni ke'axamemɨte'uyuri 'Eri niwemama.
1SA 3:15 Tsamuheri kaniukahuni, 'uxa'arieka ximeri 'itupari kaneuyepiexɨani Yawé tukita, pɨkayuwaɨriyakai 'Eri mɨtitaxatɨanikɨ kemɨtiunierekai.
1SA 3:16 'Ayumieme 'Eri kanita'inieni: —Tsamuheri neniwe nemɨmatsinaki'erie. Tsamuheri mɨpaɨ katinita'eiya: —'Ena nepuwe.
1SA 3:17 'Eri mɨpaɨ katinita'iwawiya: —¿Yawé kemeretahɨawixɨ 'aku? Nepɨmatsiwawirie pepɨkaneti'awitsirieka. Kakaɨyari 'axakematsi'uyurieni kematiukwinitɨani, xɨka xeiniukiyari pekanetsi'utaxatɨani naime kemɨmatiutahɨawixɨ.
1SA 3:18 Tsamuheri katinitaxatɨani naime, tixaɨ karanukanatɨ, 'ana 'Eri mɨpaɨ kaniutayɨni: —Yawé mɨkɨ kanihɨkɨtɨni, yaketiɨyɨni kemɨtinake.
1SA 3:19 Tsamuheri mexi werekai Yawé hamatɨana puyeikakai, yatiniuyurieni naime kemɨrehɨawekai.
1SA 3:20 Naitsarie 'Ixaheri kwieyaritsie Rani mɨrakutewatsie meta Weritsewa paitɨ yamepɨtehetima Yawé yamɨtiuyurikɨ Tsamuheri niukame yuhetsiemieme mayeitɨakɨ.
1SA 3:21 Yawé yaxeikɨa Tsamuheri pɨtikuxaxatɨwakai Tsiru mɨrakutewatsie, mana Tsamuheri hetsɨa puyuhekɨatakai meta yuniuki pikuxaxatɨwakai.
1SA 4:1 Tsamuheri niukieya yunaitɨ 'ixaheritsixi mepɨmaikai. 'Ana 'ixaheritsixi mekanayekɨne mewatakwinike piritsiteutsixi, 'Ewenetsexi 'ehurakaku mekanikuyaxe. Meta piritsiteutsixi 'Apeki mɨrakutewatsie memɨkutekai,
1SA 4:2 yukuyaxima mekaniwarayewitɨni 'ixaheritsixi memɨwatakwinikɨ. Hikɨ mekanitsutɨani piritsiteutsixi 'ixaheritsixi wahamatɨa meyukwitɨwetɨ, 'ixaheritsixi mekana'iwarieni, mɨkɨ mekaniukwi'iwa nauka miriyari meyupaɨmetɨ.
1SA 4:3 Kepauka mematitekaitsie kuyaxi memu'axɨa, 'ukirawetsixi 'ixaheritsixi mɨpaɨ mekaniutiyuani: «¿Titayari Yawé tara'iwaxɨ, piritsiteutsixi pɨta titayari tiwaruparewi? Hikɨmɨ Yawé tɨratuya kakuniyari tepɨkweiyu Tsiru meka, para tahamatɨa muyeikanikɨ mɨtatsitawikweitsitɨanikɨ, memɨtatsi'aye'unie memɨkatatsi'a'iwakɨ».
1SA 4:4 'Ana yayupaɨmeme mekaniwarenɨ'ani Tsiru paitɨ tɨratu kakuniyari memɨkweiyukɨ, Yawé Naimekɨmɨtɨrɨkaɨye tipiinieya mɨti'aita yuteɨtamete watsata. 'Eri niwemama yuhutatɨ 'Uni Pinexi matɨa mekanihɨritɨariekaitɨni Kakaɨyari tɨratuya kakuniyari.
1SA 4:5 Kepauka mɨkɨ mɨ'atɨarie memakuteitsie, mekanitsutɨani 'ixaheritsixi karima me'utihiwatɨ kwie naitɨ kaniutayuanekaitɨni.
1SA 4:6 Piritsiteutsixi hiwari me'u'enieka mɨpaɨ mekateniyuku'iwawiyakaitɨni: «¿Ketitayari kwinimieme metehehiwa hepɨrayutsixi mematiteitsie?» Matsi mekateniutamarieni kename Yawé tɨratuya kakuniyari he'atɨariekai mematiteitsie,
1SA 4:7 hikɨ piritsiteutsixi mekaniutimamani mɨpaɨ mekaniutiyuani: «Kakaɨyari memakuteitsie kaninuani. Tameri keteyɨaka, hatsuakuri mɨpaɨ pɨkatareyuriwekai.
1SA 4:8 Neuxei tameri keteyɨaka. ¿Kemɨ'ane pɨtatsiparewieni kakaɨyarixi memɨtɨrɨkawi wahetsɨa, makumawetsie memɨwaruka'unaxɨ 'ekipitutari yunaime waɨkawa kwiniyakɨ?
1SA 4:9 Hikɨmɨtɨka piritsiteutsixi. Xɨka xekayuwaɨriyani waɨriyarika xemɨte'aitɨariekakɨ hepɨrayutsixi wahetsɨa, tame mɨkɨ kememɨte'uximaya tahetsɨa, xepɨka'utimamaweni tepeyutakwini 'ukitsi wahepaɨ».
1SA 4:10 Hikɨ piritsiteutsixi mekaniwarutakwini 'ixaheritsixi, mekana'iwarieni 'ixaheritsixi mekaniyuta'unaxɨani, kwinie meyupaɨmetɨ mepukwi'iwaxɨ kuyaxi 'ixaheritsixi, xeitewiyari heimana tamamata miriyari.
1SA 4:11 Meta mekaniunawaiyarieni Kakaɨyari tɨratuya kakuniyari, metatsiere mekaniukwi'iwa 'Eri niwemama yuhutatɨ, 'Uni Pinexi matɨa.
1SA 4:12 Merikɨtsɨ xewitɨ kuya Wenikamini xiɨyarieya, tiyukwitɨnekaku kaniyuta'una, kwitɨwa mɨkɨ tukaritsie kaneta'ani Tsiru paitɨ, naitɨ heutsanitɨ meta mu'ukwiematɨ tumuanarikɨ.
1SA 4:13 'Eri mana pukatei, yu'ɨparitsie 'akaitɨ huye'utɨa heutanieretɨ, yu'iyaritɨatɨ waɨkawa peumakai Kakaɨyari tɨratuya kakuniyari hepaɨtsita. Kepauka kiekaritsie kuya mɨye'a katiniwarutaxatɨani kemɨreyɨkai, 'ana yunaitɨ mekanitsutɨani me'utihiwatɨ.
1SA 4:14 'Eri mɨpaɨ katiniuta'iwauni hiwari 'enietɨ: —¿Titayari kwinimieme hiwari re'ane? Mɨkɨ tewi yapauka hetsɨana kaneyani mɨtitaxatɨanikɨ.
1SA 4:15 ('Ana 'Eri nauka tewiyari heimana tamamata heimana 'atahaika wiyari pexeiyakai, pɨkaheunierekairi).
1SA 4:16 Tewi 'Eri mɨpaɨ katiniutahɨawe: —Mɨrayukwitɨnetsie nepeyetɨa, nepeneta'unaxɨ teheyukwitɨwetɨ. 'Eri mɨpaɨ katinita'iwawiya: —¿Neniwe, kereyɨane?
1SA 4:17 'Iya mɨpaɨ katinita'eiya: —'Ixaheritsixi teɨteriyari mekaneyuta'unaxɨani piritsiteutsixi mewamakatɨ, tekana'iwarieni yemekɨ. Meta 'aniwema yuhutatɨ 'Uni Pinexi matɨa menekwi'iwa, metatsiere Kakaɨyari tɨratuya kakuniyari tekanenawaiyarieni.
1SA 4:18 Kepauka mɨpaɨ mɨtiu'enaxɨ kename Kakaɨyari tɨratuya kakuniyari hekweiya, 'ana 'Eri yukutama kaniuweni yu'ɨparitsie 'akaitɨ kitenie kaniukaweni. Mɨ'ukiratsitɨkaikɨri meta kwinie mɨrahetekaikɨ, 'ayumieme katutsieya kaneutare kaniumɨni. Huta tewiyari wiyari 'Ixaheri kiekariyaritsie pɨti'aitametɨkai.
1SA 4:19 Pinexi 'ɨyaya, nayehukakaitɨni 'arikeke kanitiniwenikekaitɨni. Kepauka mɨpaɨ mɨretima kename Kakaɨyari tɨratuya hekweiyakai meta yaxeikɨa mu'eya meta kɨnaya kename me'ukwikai, 'ana 'ayumieme kwitɨwa kwinimieme titakwineka kaniutiniweni waɨriyarika.
1SA 4:20 Teniweritɨwamete me'ixeiyaka mɨximekaku mɨpaɨ mekatenitahɨawe: «Kene'awaɨriyani, 'ukitɨme pekanayexeiya». Peru mɨkɨ pɨkawaruta'ei, pɨkawaranu'eni.
1SA 4:21 Peru Kakaɨyari tɨratuya mekweiyakɨ meta mu'eya kɨnaya meta memukwikɨ, 'Ikawuri katiniterɨwa yuniwe, mɨpaɨ mɨtimatsiɨkɨnikɨ kename 'ixaheritsixi Yawé xawatɨriyaya waruku'eiriekai.
1SA 4:22 Mɨpaɨ kaniutayɨni: «'Ixaheritsixi watɨrɨkariya petɨa. Kanetɨkieni Kakaɨyari tɨratuya».
1SA 5:1 Hikɨ kepauka piritsiteutsixi Kakaɨyari tɨratuya memekwei, 'Ewenetsexi meniyekweni 'Atsiruri mɨrakutewatsie mekani'atɨani,
1SA 5:2 kakaɨyari muwewiya Rakuhuni hetɨa mekaniteni memeyexeiyanikɨ mɨkɨ tukita.
1SA 5:3 'Uxa'arieka ximeri, 'Atsiruri kiekatari memanuku'ui, Rakuni kwiepa kaniukateitɨni titawimawetɨ, Yawé tɨratuya hɨxie. Hikɨ me'enukuhanaka muwakawekaitsie mekanekakeni.
1SA 5:4 Tawarita 'uxa'arieka ximeri, kepauka memanuku'ui mekanitaxeiya yaxeikɨa rekaikame, hutarieka hetiwaritɨ katinikateitɨni, Yawé tɨratuya hɨxie 'ukaikame. Tuki kitenie paitɨ mu'uya kaniukateitɨni, mamateyata pamumurikai 'ateewa pukuhetei.
1SA 5:5 'Ayumieme hikɨ, 'ikɨ tukariyaritsie Rakuhuni tukieyata memeutahake 'Atsiruri kiekariyaritsie, kitenie mepɨkaha'uwe mepimaiwe'erie nitɨma mawari wewiwamete.
1SA 5:6 Yawé 'Atsiruri memɨtamakai meta yateewa wa'aurie memɨtamakai, haiya 'amɨnene pɨwareyenɨ'airi memɨte'uka'eniwanikɨ.
1SA 5:7 'Atsiruri memɨtamakai teɨteri yamepɨtehetima, ketitayari mɨya mɨtiyɨanekai mɨpaɨ meputiyua: «'Ixaheritsixi wakakaɨyari kakunieya 'ena pɨkayuhayewani takiekaritsie, mɨkɨ kakaɨyari yuhaxɨa tahetsie peyenɨ'a meta takakaɨyari Rakuhuni hetsie».
1SA 5:8 Hikɨ yunaime piritsiteutsixi 'ukirawetsixi mekaniwarukuxeɨrieni mɨpaɨ mekateniwaruta'iwawiya: —¿Kete'iyurieni 'ikɨ 'ixaheritsixi wakakaɨyari kakunieya? Mɨpaɨ mekateniwaruta'eiya wa'ukitsiema: —Kahati kiekariyaritsie xekenetuayu. Hikɨ mɨpaɨ mepɨte'uyuri.
1SA 5:9 Merikɨte meheikutuaku mɨkɨ kiekaritsie, Yawé 'uximatɨarika kaneyenɨ'ani mɨkɨ kiekaritsie, haiya 'amɨnenekɨ mepɨte'uka'eniwakai mana kiekatari, tɨɨri meta 'ukirawetsixi. Mɨkɨ waɨkawa mepɨmamakai.
1SA 5:10 Hikɨ Kakaɨyari kakunieya mekanenɨ'ani 'Ekuruni paitɨ, yapauka kakuni mana heta'aku mɨkɨ kiekaritsie, mana kiekatari mekanitsutɨani mɨpaɨ mete'uhiwatɨ: «'Ixaheritsixi wakakaɨyari kakunieya kani'atɨarieni, mɨtatsikwinikɨ tame teyunaime».
1SA 5:11 Hikɨ 'ukirawetsixi piritsiteutsixi mekaniwarukuxeɨrieni, mɨpaɨ mekateniwarutahɨawe: «Xekenanukwe'i 'Ixaheri Kakaɨyarieya kakunieya. Xekenetuayu hakewa memieme, mɨkatatsikwinikɨ tame yaxeikɨa ta'iwama». Mana waɨkawa memɨmamakaikɨ mekakwikutɨ, Kakaɨyari waɨkawa kwiniya mutatuakɨ wahetsiemieme.
1SA 5:12 Memɨka'ukwi haiya 'amɨnene xeikɨa mekaniupitɨarieni, mɨpaɨ 'ayumieme meputihiwakai wahiwari muyuawitsiepai pɨye'axekai.
1SA 6:1 Yawé tɨratuya kakuniyari piritsiteutsixi wakwieyaritsie 'atahuta metseri kaniukateitɨni,
1SA 6:2 piritsiteutsixi mara'akate mekaniwarukuxeɨrieni meta temaiwawemete mɨpaɨ memɨtewata'iwawiyakɨ: —¿Kete'iyurieni Yawé tɨratuya kakuniyari? Yaxeketateneutahɨawi kehepaɨ tetehenɨnɨ'ani hakewa mekatei.
1SA 6:3 Mɨkɨ mɨpaɨ mekateniwaruta'eiya: —Xɨka mɨpaɨ xeteku'eriwani xe'iyetuakuni 'Ixaheri Kakaɨyarieya tɨratuya kakunieya, yuxaɨtame xepɨkaheinɨ'awani, kaneuyeweka 'imikieri xemɨte'iyetuirieni Kakaɨyari. Hikɨ 'aixɨa xeteheu'erietɨ xekanakɨnikuni meta mɨpaɨ xekatenetimaikuni ketitayari Kakaɨyari mɨxetikwinitɨakai.
1SA 6:4 Hikɨ piritsiteutsixi tawarita mɨpaɨ mekateniwaruta'iwawiya: —¿Ketita tete'iyetuirieni? Mɨkɨ mɨpaɨ mekaniutiyuani: —'Auxɨwime xepɨtiwewieni hurukɨ haiya 'etsa hepaɨ 'aneneme, yu'auxɨwimeta naikatsi hurukɨ mewewiyatɨkaime, piritsiteutsixi te'aitamete kememɨyupaɨme kaniwa'inɨaritɨni, mɨkɨ kwiniya yunaime pɨxe'axiya.
1SA 6:5 Hikɨ 'ayumieme haiya 'amɨnene hepaɨ 'aneneme xekeneutiwewi meta naikatsi wahepaɨ me'aneneme, memɨtekɨxɨrɨwa 'ikɨ kwieyaritsie meta mɨpaɨ xeketenetimati 'ixaheritsixi wakakaɨyari pɨmariwe. Heiwatɨ tiuhayewa tixekwinitɨatɨ meta xekakaɨyarixi yaxeikɨa xekwietsie.
1SA 6:6 Parahuni ti'aitakaku 'ekipitutari kememɨkate'anu'enana mɨpaɨ xepɨkayɨaka. ¿Tamɨ xekatemate Kakaɨyari mɨtiwarekwinitɨa 'ixaheritsixi memɨwaretatuanikɨ?
1SA 6:7 »Hikɨ kaxeta xekeneuta'aita hekwatɨ mɨtawewiyanikɨ. Xekeniwarayehapani yuhutame wakaitsixi memɨniwetɨka, yuku hatsuaku memɨkahanuyetewawe. Wakaitsixi kaxeta xekeniwaranawiri, tsikerutsixita kuraruta xekeniwareuta'ɨna.
1SA 6:8 Hikɨ Yawé kakunieya xekeneutikweka kaxetatsie xekeneukateka. Xeimeta kakuni 'auriena xekeneutiteka hurukɨ xemɨtewarutiwewi haiya meta naikatsi wa'ɨkiyarite, Kakaɨyari xemɨteyetuirienikɨ. Kaxeta xekanihayewakuni yuxaɨta mɨyemiekɨ,
1SA 6:9 xekenetaxeiyani. Xɨka Weti-Tsemetsi heye'ani yukwieyaritsie paitɨ, mɨpaɨ tepɨtehetimani kename Yawé tiyuriene mɨyamɨtatikwinitɨa. Peru xɨka kaxeta xaɨtsie heukuyune, mɨpaɨ tepɨtehetimani kename mɨkɨ katatsi'uyuri, kename takɨmana tete'utikwikwinixɨ».
1SA 6:10 Mɨpaɨ mekateniuyurieni yuhutame wakaitsixi meniwetɨkaime kaxeta mekaniwaranawirieni meta tsikerutsixi kuraruta mekaniwareɨ'ɨna.
1SA 6:11 Hikɨ Yawé kakunieya kaxetatsie mekanikateni meta kakuni naikatsi wa'ɨkiyari hurukɨ memɨwewiyatɨkatei, yaxeikɨa 'etsa hepaɨ mɨ'anene mɨrayepine mana mekanikateni.
1SA 6:12 Hikɨ wakaitsixi me'utitsuatɨ huyeta mekanekɨne, Weti-Tsemetsi mɨrakutewatsie huyeyari 'utɨma, xaɨtsie tɨma mepɨkaheukuyunixɨ. Piritsiteutsixi wa'ukiyarima kaxeta'utɨa mekanekɨne, Weti-Tsemetsi kwieyaritsie mekaniye'axɨani.
1SA 6:13 Weti-Tsemetsi kiekatari mana tɨriku mekanihɨatɨwekaitɨni mayeweritsie, kepauka kakuni memuxei meniyukatemamawieni waɨkawa.
1SA 6:14 Kutsuhexi Weti-Tsemetsi kiekame mati'etsakaitsie paitɨ kaninuani kaxeta mana puyuhayewaxɨ tete manukatei 'anetɨ. Hikɨ mana kiekatari kaxeta kɨyeyarikɨ mekaniutinaini, wakaitsixi meta mawari taiyariyari mekaniwarayeitɨani Yawé hetsiemieme.
1SA 6:15 Rewitsixi kaxeta memuti'ikapiekai, Yawé tɨratuya tete 'amɨnenatsie paitɨ mekaneteni meta kakuni hurukɨ mɨtiwewiyatɨka mɨrayepine. Mɨkɨ tukaritsie Weti-Tsemetsi kiekatari Yawé mawari taiyariyari minake mekaniuwewirieni.
1SA 6:16 Hikɨ piritsiteutsixi memɨyu'auxɨwi wa'ukiyarima mekaniuneniere naitɨ kemɨtiuyɨ, 'ana mekanakunuaxɨani 'Ekuruni paitɨ.
1SA 6:17 Haiya hepaɨ mɨ'anene hurukɨ mɨwewiyatɨka piritsiteutsixi Yawé memɨyetuiri, mɨkɨ pɨ'ayumiemetɨkai xexuitɨ 'ikɨ kiekaritetsie: 'Atsiruri, Kahatsa, 'Atsikaruni, Kahati meta 'Ekuruni.
1SA 6:18 Yaxeikɨa naikatsi hurukɨ memɨwewiyatɨka mɨkɨ pɨwa'inɨariyaritɨkai piritsiteutsixi wa'ukiyarima yukiekari kememɨtehexeiyakai kiekari 'aixɨa mɨ'anene meta kuraru mɨkahaheitɨka. Tete 'amɨnena Yawé tɨratuya manatekietsie, hikɨ 'akuxi kanehekɨaka, 'inɨari kanehɨkɨtɨni, Kutsuhexi kwieya makumatsie Weti-Tsemetsi kiekame.
1SA 6:19 Teɨteri mana kiekatari hipatɨ mepuyuwaɨri Yawé tɨratuya kakuniyaritsie memakanenierekɨ, peru mɨkɨ Kakaɨyari pɨwarukwi, haika tewiyari heimana tamamata meyupaɨmetɨ mepukwi. Mana kiekatari mekaniyuhiweriekaitɨni memɨte'uka'eniwakaikɨ, Yawé katiniwarukwinitɨani waɨkawa 'axamemɨte'uyurikɨ.
1SA 6:20 Weti-Tsemetsi memɨtamakai mɨpaɨ mekaniutiyuani: «Kakaɨyari Yawé kanihɨkɨtɨni mɨpatsie. ¿Kemɨ'ane hɨxiena putakewe? ¿Hakewa tepenunɨ'ani kakunieya tahetsɨa mɨkayuhayewanikɨ?»
1SA 6:21 Hikɨ mɨpaɨ mekateniwarenɨ'airieni Kiriati-Yeharini kiekatari: «Piritsiteutsixi mekani'atɨani Yawé kakunieya, xekenahu xekenakweiyu».
1SA 7:1 Merikɨtsɨ Kiriati-Yeharini kiekatari, Weti-Tsemetsi paitɨ menekɨne Yawé kakunieya mekanekukweni, 'Awinarawi kie mekanihɨani 'ateewa hɨritsie kanikakateitɨni. Manata nu'aya 'Eriyatsaxi hetsie meputimei mɨpatsiekakɨ me'ihɨritɨatɨ mi'ɨwiyanikɨ.
1SA 7:2 Kiriati-Yeharini kiekariyaritsie mɨixa wiyari puyuri Yawé tɨratuya. Xeitewiyari wiyari Yawé mepɨwautɨwekai yunaitɨ 'ixaheritsixi me'utitsuatɨ meyuhɨawetɨ.
1SA 7:3 'Ayumieme Tsamuheri yunaime 'ixaheritsixi mɨpaɨ katiniwarutahɨawe: «Xɨka xeme xeyuwaɨriyani Yawé hetsɨa xemɨ'axɨanikɨ yu'iyarikɨ, xekeniwarexɨri kakaɨyarixi xemɨkawamate meta 'Atsitaruti 'ɨkiyarite. Yawé yuxaɨtame xeikɨa xekenayexeiyani mɨkɨ kanixetawikweitsitɨamɨkɨ piritsiteutsixi kememɨtexenanaima».
1SA 7:4 Hikɨ 'ana 'ixaheritsixi kakaɨyarixi Wahari hetsɨa miemete meta 'Atsitaruti 'ɨkiyarite naime mekateniwarexɨrieni, Yawé xeikɨa mehayexeiyatɨ mekanakɨne.
1SA 7:5 Hikɨ Tsamuheri mɨpaɨ katiniuta'aita: «Xekeniwarukuxeɨri yunaime 'ixaheritsixi Mitsipa kiekariyaritsie, ne Yawé nemɨtawawirienikɨ xehetsiemieme».
1SA 7:6 Kepauka memuyukuxeɨri Mitsipa 'ixaheritsixi haa meniwatihapani Yawé hɨxie mekanitayeurieni. Meta mekaniuyuhakieni mɨkɨ tukaritsie, hikɨ mɨpaɨ mepɨteyuhekɨatakai yunaime wahɨxie: «Yawé hɨxie 'axatepɨte'uyuri». Tsamuheri matɨari kanitsutɨani 'ixaheritsixi tiwa'aitɨatɨ Mitsipa kiekariyaritsie.
1SA 7:7 Piritsiteutsixi kepauka mɨpaɨ memɨtehetima kename 'ixaheritsixi meheyuxeɨriekai Mitsipa, piritsiteutsixi wa'ukiyarima mekanekɨne 'ixaheritsixi wahetsɨa mewatakwinike. Mɨpaɨ metehetimaika 'ixaheritsixi mekaniutimamani piritsiteutsixi wahepaɨtsita,
1SA 7:8 hikɨ mɨpaɨ Tsamuheri mekateniutahɨawe: «Pepɨkatihayewani Yawé pehahɨawetɨ tahetsiemieme mɨtatsitawikweitsitɨanikɨ piritsiteutsixi memɨkatatsiha'iwanikɨ».
1SA 7:9 'Ayumieme Tsamuheri muxa nunutsi kaniuwiya, mawari taiyariyari kaneyeitɨani Yawé hetsiemieme. Hikɨ 'ana Yawé kaniutahɨawe 'ixaheritsixi wahetsiemieme, Yawé kanita'eiya.
1SA 7:10 Mexi 'akuxi Tsamuheri mawari wewiekai piritsiteutsixi mekanaye'axɨani 'ixaheritsixi mekaniwarutakwini, peru 'ana Yawé tɨranariya waɨkawa kanenɨ'ani piritsiteutsixi wahetsɨa, 'ana mɨkɨ mekaneuyuyexɨrieni mekana'iwarieni 'ixaheritsixi mekaniwara'iwa.
1SA 7:11 Hikɨ 'ixaheritsixi mekaniwaranukuweiya piritsiteutsixi, Mitsipa mekaniwayeweiya Weti-Kaxi paitɨ mekaniwarukwini, huyeta mewarukwiximetɨ mekaniuhukaitɨni.
1SA 7:12 Merikɨte Tsamuheri tete 'utituka mana kanitayeni Mitsipa Tseni wahixɨapa 'Ewenetsexi katiniterɨwa, «Yawé tatsiparewietɨ pɨkatihayewawe».
1SA 7:13 Tsamuheri kepaɨmexɨa tukari 'amuyeikakai, Yawé yɨtɨrɨkariya puhekɨataxɨ piritsiteutsixi wahetsie. Tawariri 'ixaheritsixi mepɨkawara'iwaxɨ mepɨkayɨwawekairi wakwie memɨwanawairienikɨ.
1SA 7:14 Mɨpaɨ mete'uyurieka 'ixaheritsixi yukiekari mehexeiyatɨ mekanakɨne meripaitɨ piritsiteutsixi memɨwarunawairiekai, 'Ekuruni meta Kahati paitɨ ye'atɨkaime, mɨkɨ kwieyari piritsiteutsixi mekaniwarunawairiekaitɨni. 'Ana meta 'ixaheritsixi 'amuxeutsixi wahamatɨa 'aixɨa meteyuxeiyatɨ mekanakɨne.
1SA 7:15 Tsamuheri 'ixaheritsixi wa'itsɨkame kanihɨkɨtɨkaitɨni kepaɨmexɨa wiyari 'amuyeikakai.
1SA 7:16 Xeiwiyari 'anuyeyeikakaku kiekaritetsie pukayeikakai Weteri, Kirikari meta Mitsipa kwieyaritsie, wa'enietɨ 'ixaheritsixi 'aixɨa tiyurienetɨ kememɨteyu'uximatɨakai.
1SA 7:17 'Arike pɨ'axekai Xama kiekariyaritsie manukateitsie, mana 'ukaitɨ kani'itsɨkametɨkaitɨni 'Ixaheri kwieyaritsie. Manata mawari taiyame kaniutawewieni Yawé hetsiemieme meyexeiyanikɨ.
1SA 8:1 Merikɨtsɨ kepauka Tsamuheri mu'ukiratsitɨkairi yuniwema pɨta kaniwaruhɨritɨani, 'Ixaheri kwieyaritsie memɨte'aitanikɨ,
1SA 8:2 Weritsewa kiekariyaritsie metitetɨ. Matɨarieya pɨtitewakai Kuheri, hutarieka mieme 'Awiyaxi.
1SA 8:3 Perutsɨ mɨkɨ yuhutatɨ nixewitɨ yupaapa hepaɨ tiyurienetɨ pɨka'atɨa, kemɨtiwanake xeikɨa 'axameteyurietɨ mekanakɨne, yuhetsiemieme xeikɨa tumini menaki'erietɨ, ti'itatɨ tumini 'awie mɨnaki'erie, meta hipame 'aixɨa memɨwayurienikɨ yamɨkatiyuriene.
1SA 8:4 'Ayumieme 'ukirawetsixi 'ixaheritsixi mekaniyukuxeɨrieni, Xama kiekariyaritsie mekanekɨne Tsamuheri metehetaxatɨanike.
1SA 8:5 Mɨpaɨ mekatenitahɨawe: «'Ekɨri 'ari pepu'ukiratsi, peru 'aniwema 'ahepaɨ mepɨkateyurie. 'Aixɨa pɨyɨni xeime ti'aitame ketaneyetuiri mɨtatita'aitɨanikɨ, naitsarie nuiwarite kwiepa memɨtama wahepaɨ».
1SA 8:6 Kepauka mɨpaɨ memɨte'itahɨawixɨ kename ti'aitame meheuyehɨwa, 'ana Tsamuheri pɨka'inakixɨ. Hikɨ Yawé nenewieri kaniupitɨani,
1SA 8:7 matsi Yawé mɨpaɨ pɨtitahɨawixɨ: «Heitseriemekɨ keniwa'enieka 'ixaheritsixi kememaitɨka. 'Ekɨ matsi mepɨkamatsixani'erie, nepɨta mepɨkanetsinaki'erie, mepɨkayuwaɨriya nemɨtiwa'aitɨakakɨ.
1SA 8:8 Kepauka 'Ekipitu nemɨwarayewitɨ kememɨnetsiyuriekai hikɨ mɨpaɨ mekameniyurieka. Mepɨnetsi'uku'eiri hipame kakaɨyarixi mewarayexeiyatɨ mepakɨ.
1SA 8:9 Merikɨte keniwaranu'eni kememaitɨka, peru keniwarayemari'itɨa hahekɨakamekɨ kemɨtiyurieni mɨkɨ ti'aitame wahetsie tɨrɨkaɨyemekɨ».
1SA 8:10 Hikɨ Tsamuheri teɨteri ti'aitame memuku'iwawakai katiniwarutaxatɨani Yawé kemɨtitahɨawixɨ.
1SA 8:11 Mɨpaɨ katiniwarutaxatɨani: —'Ipaɨ katiniyurimɨkɨ ti'aitame, tɨrɨkaɨyemekɨ katinita'aitamɨkɨ xehetsie: Yuniwema xekaninawaiyariekuni para kaxetate memɨwahɨtɨkanikɨ meta kawayutsixi kuyaxi watewama, meta ti'aitame kaxetaya manuyeyeikatsie memɨte'anuyepiwanikɨ.
1SA 8:12 Kuyaxi tewa'aitɨwamete mekanayeitɨariekuni meta kwietsanamete, 'itsanamete, kuyaxi wa'ixiparate wewiwamete, yaxeikɨa tita naime memɨtekumaɨwa kuyaxi.
1SA 8:13 Xeniwema 'ukari xeninawaiyariekunita para witsimɨtiu'ɨatɨka memɨtetiwewienikɨ meta 'ikwai wewiwametekɨ, meta paa wewiwametekɨ.
1SA 8:14 Xekwie 'aixɨa mɨ'anene mekanixenawairiekuni meta xekaxie haraweriyarite 'aixɨa mɨ'anene, huriwa haraweriyari kaniwayetuiriemɨkɨ memiparewie.
1SA 8:15 Xe'itsanari meta kepaɨmeme xemɨka'inɨni kaxie, xepɨtawawiyarieni tamamatatsiemieme xeime, ti'aitame parewiwametemama memɨyetuiriyarienikɨ.
1SA 8:16 Metatsiere te'uximayatamete xehetsɨa miemete 'ukitsi meta 'ukari, meta xetuurutsixi kwietsanamete 'aixɨa memɨ'anene, meta xepuxuri xepɨtenawaiyarieni ti'aitame hetsiemieme pɨta memɨteta'uximayatakɨ.
1SA 8:17 Xekanitawawiyariekuni yutewama tamamatatsiemieme xeime, meta xeme xekaniyɨkuni waɨriyarika xemɨte'ita'uximayatsirieni.
1SA 8:18 Kepauka mɨkɨ tukari maye'ani xekaniyutihɨawikuni xe'utitsuatɨ ti'aitame hepaɨtsita xe'itahɨawekatɨtɨ, 'anari Yawé pɨkaxe'enieka.
1SA 8:19 Matsi teɨteri Tsamuheri mepɨka'u'eni yuri mepɨkate'ita'eriri, mɨpaɨ pɨta mekaniutiyuani: —Tsepatsɨ kepemaine, peru tame tati'aitɨwame tepeuyehɨwa mɨtatita'aitɨanikɨ.
1SA 8:20 Mɨpaɨ matsi hipame nuiwarite wahepaɨ te'anenetɨ tekanakɨnikuni, mɨtati'aitɨakakɨ meta kepauka temɨtakwiyutsie 'anuyekaitɨ meyeikanikɨ.
1SA 8:21 Merikɨte waru'enieka teɨteri tita memɨteheuyehɨakai, Tsamuheri Yawé yakatiniutaxatɨani.
1SA 8:22 Yawé mɨpaɨ katinita'eiya: —Keniwaranu'eni, ti'aitame xeime keniwayetuiri. 'Ayumieme 'ixaheritsixi Tsamuheri mɨpaɨ katiniwarutahɨawe: —Yukiekaritsie xekeneutayeixɨa.
1SA 9:1 Merikɨtsɨ xewitɨ tewi kaniuyeikakaitɨni Wenikamini nuiwarieya hetsiemieme, 'aixɨa pɨtixeiyariekai, Kihitsi pɨtitewakai 'Awiheri nu'aya, mɨkɨta Tseruxi nu'ya, mɨkɨta Wekurati nu'aya, mɨkɨta 'Apiha nu'ayatɨtɨ, mɨkɨ Wenikamini pɨxiɨyarieyatɨkai.
1SA 9:2 Kihitsi yuniwe pexeiyakai Tsahuri titewakame, mɨkɨ temaikɨ witsipɨtiyuxexeiyakai, 'ixaheri tewiyari nixewitɨ mɨpaɨ pɨka'anekai, kwinimieme putewikai hipatɨ xeikɨa naiparieyatsie mepuku'axekai.
1SA 9:3 Heiwa mekaneuyexɨrieni Kihitsi puxurimama, yuniwe Tsahuri mɨpaɨ katiniutahɨawe: «Xeime ti'uximayatame kenawitɨtɨ puxuri keniwawaumie».
1SA 9:4 Tsahuri ti'uximayatame matɨa mekanekɨne, 'Epɨrahini hɨriyaritsie mekaniuyekɨne, meta Tsaritsa kwieyaritsie paitɨ mekaniuyekɨne, peru mepɨkawarutaxei. Tsarini kwieyaritsieta mekaniuyekɨne meta 'arike Wenikamini kwieyaritsie mekaniuti'iwauni, manata yaxeikɨa mepɨkawarutaxei.
1SA 9:5 Kepauka Tsupi kwieyaritsie memɨye'axɨa, Tsahuri ti'uximayatame mɨpaɨ katiniutahɨawe: —Hikɨmɨri. Tepakunuaxɨani, nepaapa matsi heyu'iyaritɨaka tahetsiemieme keyuri puxuri wahetsiemieme.
1SA 9:6 Ti'uximayatame mɨpaɨ katinita'eiya: —'Ena kiekaritsie xewitɨ puka tewi Kakaɨyari mayexeiya yunaitɨ 'aixɨa memɨte'imate. Mɨkɨ kemɨtayɨni mɨpaɨ katinaye'axeni. ¿Ketitayari matsi muwa tekateheukɨ? Matsi mɨkɨ huye kataretaxatɨani kemɨ'ane temanukuweiya.
1SA 9:7 Tsahuri mɨpaɨ katinita'iwawiya: —Xɨka teheukɨne, ¿ketita teteheimini? Tixaɨtɨri tepɨkate'atɨkɨ takɨtsiurita tikwaiwame, meta 'imikieri tepɨkatehexeiya temɨteheiyetuirienikɨ.
1SA 9:8 Ti'uximayatame mɨpaɨ kaniutayɨni: —Matsi ne nepeixeiya haika kɨramuyari pɨrata, mɨkɨ tepeiyetuirieni tewi Kakaɨyari mayexeiya mɨtaretaxatɨanikɨ ketemɨteheuyune.
1SA 9:9 (Meripaitɨ kiekatari 'ixaheritsixi kepauka Kakaɨyari memɨta'iwawiya, mɨpaɨ meputiyuanekai: «Tewi mɨtixeiya kemɨtiyɨni hetsɨa tepuhu», mɨpaɨ mepɨtewaruterɨwakai 'anamiemete, hikɨta Kakaɨyari niukametemama mepɨtetetewa).
1SA 9:10 Tsahuri mɨpaɨ kaniutayɨni: —'Aixɨa kani'aneni tekanihuni. Mɨpaɨ mete'uxataka mɨkɨ kiekaritsie mekanekɨne tewi Kakaɨyari mayexeiya manukateitsie.
1SA 9:11 Mana kiekaritsie meheutahaxɨaximekaku 'ɨimarixi mekaniwaranukunake mekuhanɨtɨweme. Mɨpaɨ mekateniwaruta'iwawiya: —¿'Ena tiuka tewi mɨtixeiya kemɨtiyɨni?
1SA 9:12 Mɨpaɨ mekateniwaruta'eiya: —Huu, peru huma paitɨ 'etsiwa peka. Xeiya xekeneuhuni kiekaritsie kaneye'akake, kiekatari mawari mepewewieni hɨritsie memɨte'atimawatsie.
1SA 9:13 Kepauka kiekaritsie xemeuye'axɨani xekaneitaxeiyakuni, xɨka xehe'axɨani kahanutiyeiwekaku hɨritsie mɨratimawatɨretsie. Teɨteri mepɨtehekwani mɨkɨ henuayuke, mɨkɨ meri mawari 'aixɨa heyurieyu, 'anake memuta'inierie metenekwaikuni. 'Ayumieme xeiya xekeneuhuni, hikɨ kwitɨwa xekaneitaxeiyakuni.
1SA 9:14 Hikɨ Tsahuri yuparewiwame matɨa kiekaritsie menekɨne. Meheutahaxɨaximekaku Tsamuheri kaniwaranukunake, tuki manuwe hɨritsie huyeyari 'utɨa.
1SA 9:15 Meripaitɨ Tsahuri kanuawekaku 'akuxi, Yawé Tsamuheri 'ipaɨ katiniutahekɨatɨakaitɨni:
1SA 9:16 «'Uxa'a, 'ipaɨ pauka xeime tewi nemenanunɨ'airiemɨkɨ Wenikamini kwieyaritsie kiekame. Pepikawirieni hatseiti para ti'aitame mayanikɨ 'ixaheritsixi mɨtiwata'aitɨanikɨ, mɨwatawikweitsitɨanikɨ piritsiteutsixi memɨwananaimakɨ. Neteɨterima nepɨwarutinenimayataxɨ, wahiwari wa'aiwari nehetsɨapai mɨye'axekɨ».
1SA 9:17 Kepauka Tsamuheri Tsahuri muxei, Yawé mɨpaɨ pɨtitahɨawixɨ: «Mana tewi mamie kanihɨkɨtɨni nemɨmatsihaxaxatɨwakai, mɨkɨ neteɨterima katiniwata'aitɨamɨkɨ».
1SA 9:18 Kiekari kitenie mehaye'axɨaximetɨ, Tsahuri 'ahurawa kaniuyani Tsamuheri 'aurie, mɨpaɨ katinita'iwawiya: —¿Ketatineutaxatɨa hakewa tewi mɨtixeiya kemɨtiyɨni kiiya pewe?
1SA 9:19 Tsamuheri mɨpaɨ katiniwaruta'eiya: —Ne tewi mɨtixeiya kemɨtiyɨni nepɨhɨkɨ. Xekenenanuweiya hɨritsie paitɨ tuki manuwe, mana xepɨtehekwani nehamatɨa. 'Uxa'ake kepauka nemɨmatsipitɨani pemɨyemiekɨ, 'anake yanepɨmatitahɨawe ketita pemɨrayexeiya.
1SA 9:20 Mɨkɨta puxuri memeuyexɨri haika tukari manukamie, pepɨka'a'iyaritɨakari mepetaxeiyarie. Tawarita mɨpaɨ katinitaxatɨani: —Matsi 'ixaheritsixi waɨkawa mepɨmatsiheuyehɨwa, meta yunaitɨ 'a'iwama.
1SA 9:21 Tsahuri mɨpaɨ katinitahɨawe: —¿Titayari mɨya penetikɨhɨawe? Ne nekanihɨkɨtɨni Wenikamini xiɨyarieyatsie mieme, 'etsi mɨyumate 'Ixaheri nu'aya. Meta Wenikamini xiɨyarieyatsie miemete ne'ukiyarima tixaɨtɨ mepɨkatehɨkɨ.
1SA 9:22 Matsi, Tsamuheri, Tsahuri meta ti'uximayatame mame kaniwarewitɨni tukita mɨrewatikwaiwatsie, yuxaɨtame kaniwarayatsa, memuta'inierie xeitewiyari heimana tamamata meyupaɨmeme wahamatɨa.
1SA 9:23 Hikɨ Tsamuheri 'ikwai wewiwame mɨpaɨ katiniutahɨawe: —Wai nematsi'uta'aitɨa pemiti'utakekai kenayekwe'i.
1SA 9:24 'Ikwai wewiwame naimime teuri kaniwayekweni, Tsahuri kaniumini. Hikɨ Tsamuheri mɨpaɨ kaniutayɨni: —Kamɨ 'ahetsiemieme nemɨtiuti'utakai ketineukwaka, nekawata'iniwetɨ 'akuxi hipame, 'a'ikwai puti'utsiekairi 'ikɨ tukariyaritsie miemekɨ. Mɨpaɨ tiuyɨku mɨkɨ tukaritsie Tsahuri pɨtiukwai Tsamuheri hamatɨa.
1SA 9:25 Hikɨ menanakakɨne mɨratimawatɨretsie kiekaritsie meniu'axɨani, Tsamuheri Tsahuri hamatɨa katiniutixata yukii heima.
1SA 9:26 Ximeri 'ukatareku memanuku'uwetsie, Tsamuheri Tsahuri katiniutaxatɨani mana 'utakeka, mɨpaɨ katinitahɨawe: —Kenanukukexiri, pekaniyemieniri. Tsahuri kananukukeni, yunaitɨ kiita mekaniwayekɨne.
1SA 9:27 Kepauka memanayenexɨaximekai kiekaritsie, Tsamuheri Tsahuri mɨpaɨ katiniutahɨawe: —Mɨpaɨ ketineutahɨawi mati'uximayatsiriwame panuyehaitɨani, peru 'ekɨ 'etsiwa yaketineuteri nehamatɨa, niuki nepɨmatsiyetuirieni Kakaɨyari hetsɨa mieme. Hikɨ kananuyeyerɨni ti'uximayatame.
1SA 10:1 Hikɨ Tsamuheri puteyu hatseiti witsimu'ɨa mayema watihanaka Tsahuri mu'uyatsie kanikawirieni. Meta kani'itseni mɨpaɨ katinitahɨawe: —Yawé kaniyɨaneni mɨmatiukawiri teɨterimama tiwa'aitɨwame pemayanikɨ.
1SA 10:2 Hikɨ kwitɨwa pemɨyemietsie Tseritsa peneye'amɨkɨ, Wenikamini kwieyari mata'atɨkatsie, Xakeri makateukie 'aurie, mana teɨteri yuhutame peniwarexeiyamɨkɨ. Mɨkɨ mɨpaɨ mematenetahɨawikuni: “Puxuri mepetaxeiyarie pemɨwawaunekai. Peru 'apaapa puxuri wahekɨ pɨkaheyuhɨawe, hikɨ pɨta xehetsiemieme peyu'iyaritɨa: ‘¿Mɨpaɨ pɨreku'eriwa kenetiyurieneni para neniwe nemɨtaxeiyakɨ?’”
1SA 10:3 »Matsi hukaiwa paitɨ, kepauka Tawuxi xiu manuwe pemeye'ani, peniwaranukunakimɨkɨ yuhaikame teɨteri Weteri meheukɨneka, Kakaɨyari nenewieri meheupitɨayuka. Mɨkɨ xewitɨ yuhaikame tsipuri puwarahapanani, xewitɨta paa haikame pa'ɨka, xewitɨta winu nawita 'uyemakame 'ahanatɨ.
1SA 10:4 Mematsihetawaɨritɨame, hutame paa mekamene'ɨitɨakuni. Keniwaretanaki'eriri.
1SA 10:5 »Mana pemɨyeyani Kiweya Kakaɨyari hetsɨa peneye'amɨkɨ, kuyaxi piritsiteutsixi mematiteitsie. Mana kiekaritsie peheutahaximetɨ Kakaɨyari niukametemama peniwaranukunakimɨkɨ tuki manuwe hɨritsie me'akaneikame. Metekuxatatɨ Kakaɨyari yatiwapitɨakaku mekaniyɨakakuni meta mete'ukayuitɨwatɨ mekaniyɨakakuni hipatɨ, kɨrautakɨ, kaitsakɨ, haripa 'amɨpapakɨ meta 'etsimɨpepekɨ.
1SA 10:6 Hikɨ Yawé 'Iyarieya 'ahetsie kaninuamɨkɨ tɨrɨkaɨyetɨ, 'ekɨta mɨkɨ wahamatɨa pekatinitaxatamɨkɨ yɨkɨ pe'anetɨ pekanayeimɨkɨ,
1SA 10:7 Kepauka maye'ani 'ikɨ 'inɨari kenemerahɨawe, mɨpaɨ ketineyurieneni kemɨreuyewetse 'ahetsiemieme, Kakaɨyari kamaniparewiekamɨkɨ.
1SA 10:8 »Kenemie Kirikari 'ekɨ meri. Mana 'ahamatɨa mawari taiyariyari meta 'aixɨa temɨteyuxeiyanikɨ mawariyari nekanewewimɨkɨ, kepauka nemenuani, yanepɨmaretahɨawe kepemɨtiyurieneni. Perutsɨ 'atahuta tukari kenenetakwewieka».
1SA 10:9 Merikɨte kepauka Tsahuri metɨa Tsamuheri mana 'uku'eirieka, Kakaɨyari 'iyarieya kaniupata, 'ana mɨkɨ tukaritsie naitɨ 'inɨari kanaye'ani.
1SA 10:10 Kepauka Kiweya memeta'axɨa, Tsahuri tiyu'uximayatame matɨa, mana Kakaɨyari niukametemama yuwaɨkawatɨ mekanayenexɨani mewaranunakeke. Hikɨ Kakaɨyari 'iyarieya Tsahuri hetsie kaninuani tɨrɨkaɨyetɨ wahepaɨ tiyukɨhɨawetɨ kanayani, tikuxatatɨ wahamatɨa kaniyuhayewa.
1SA 10:11 Meripaitɨ memimatekai, me'ixeiyatɨ tikuxatame Kakaɨyari niukametemama wahamatɨa meniyuku'iwawiyakaitɨni: —¿Kekuta'uyɨ Tsahuri Kihitsi nu'aya? ¿Kamɨtsɨta mɨkɨ Kakaɨyari niukameya xewitɨ tihɨkɨ?
1SA 10:12 Xewitɨ mana kiekametɨtɨ mɨpaɨ katiniwaruta'eiya: —¿Kamɨtsɨ kemɨ'ane pɨtiwa'aitɨa mɨkɨ? Manari hipatɨ mɨpaɨ mekaniutiyuanekaitɨni: «¿Kamɨtsɨta Tsahuri Kakaɨyari niukameya tihɨkɨ?»
1SA 10:13 Kepauka mɨtiutahayewaxɨ Tsahuri tikuxatatɨ, 'anari yemuritsie kanitiyune tuki manuwe.
1SA 10:14 Hikɨ tatatsieya warukaxeiyaka mana kaniwaruta'iwawiya ti'uximayatameya mame: —¿Xeme hakewa xepe'uwakai? Tsahuri mɨpaɨ katinita'eiya: —Tame puxuri tepɨwarewautɨwekai, peru tekawaretaxeiyawawetɨ, Tsamuheri hetsɨa tekanekukɨnixɨani.
1SA 10:15 Tsahuri tatatsieya tawarita kanita'iwawiya: —Tsamuheri kexeretahɨawixɨ kenetineutaxatɨa.
1SA 10:16 —Heitseriemekɨ pɨtaretaxatɨa kenameri puxuri mewaretaxeiyakai. Matsi Tsahuri yutatatsi pɨkatiutaxatɨa Tsamuheri kemɨtitahɨawixɨ mɨtita'aitakɨ hepaɨtsita.
1SA 10:17 Mɨpaɨ tiuyɨku 'arike, Tsamuheri 'ixaheritsixi kaniwaruta'inieni, Yawé hɨxie memɨyukuxeɨrienikɨ Mitsipa mɨrakutewatsie.
1SA 10:18 Mana 'ixaheritsixi mɨpaɨ katiniwarutahɨawe: «Mɨpaɨ kanaineni Yawé, 'Ixaheri Kakaɨyarieya: “Ne nepɨxe'ayewitɨ 'Ekipitu kwieyaritsie, 'ekipitutari waɨriyarika metexe'aitɨakaku nepɨxe'uxɨnaxɨ, meta hipatɨ te'aitamete mexenanaimakaku”.
1SA 10:19 Hikɨ matsi xeme yukakaɨyari xepɨkanaki'erie, kemɨ'ane 'aixɨa mɨxe'uyuri naime kexemɨte'uka'eniwakai hepaɨtsita, mɨpaɨ xeikɨa xeputiyɨane: “Hawaikɨ. Ketaneyetuiri tati'aitɨwame, para mɨtati'aitɨakakɨ”. Xekeneyukuxeɨri, Yawé hɨxie keyupaɨmetɨ xemɨnuiwarite meta xemɨxiɨyarimama».
1SA 10:20 Hikɨ katiniuta'aita Tsamuheri 'ahurawa memakɨnekɨ 'Ixaheri nuiwarimama memɨyuta'iwakɨ, Wenikamini nuiwariyaritsie katiniunake.
1SA 10:21 Hikɨ katiniuta'aita memawitɨkienikɨ Wenikamini nuiwarieyatsie miemete 'ahura memakɨnekɨ, Matɨri xiɨyarimama hetsie katiniunake, 'imatɨarieka Tsahuri hetsie katiniunake Kihitsi nu'aya. Hikɨ Tsahuri mekaniutiwauni, peru mepɨkaheitaxei.
1SA 10:22 Hikɨ tawarita Yawé mekaniuta'iwawiya: ¿Kamɨtsɨ mɨkɨ tewi hikɨ 'ena tahamatɨa tiuyeika? Yawé mɨpaɨ kaniutayɨni: —Huu, xepiinite mɨratipinetsie kaniyu'awietani.
1SA 10:23 Hikɨ menekɨne me'unautsaxɨaximetɨ muwa meneyehana. Kepauka Tsahuri teɨteri wahixɨapa mutake, kwinie kaniutewikaitɨni nixewitɨ tɨma naipariena pɨka'uti'axekai.
1SA 10:24 Tsamuheri kiekatari yunaime mɨpaɨ katiniwarutahɨawe: —Xekeneuxeiya tewi Yawé menayexei. Pumawe xewitɨ hepaɨna 'anetɨ yunaime teɨteri watsata. Yunaitɨ mɨpaɨ mekaniutiyuanekaitɨni: —Ke'ayeniereni ti'aitame yuheyemekɨ.
1SA 10:25 Merikɨte Tsamuheri kaniwarutaxatɨani teɨteri, Kakaɨyari 'aitsikaya ti'aitame hepaɨtsita mieme, xapatsie tiwaruta'utɨirieka niti'uta Yawé hɨxie. Meta mɨpaɨ katiniuta'aita memɨtayeixɨanikɨ yunaitɨ yukiekaritetsie.
1SA 10:26 Tsahuri meta yaxeikɨa kaneyani yukie Kiweya paitɨ, mekaneweiyakaitɨni teɨteri yayupaɨmetɨ yamemɨtekahu, kehate meta Yawé wa'iyari muyuitɨaxɨa.
1SA 10:27 Peru hipatɨ 'axamemɨte'u'iyari mɨpaɨ mekaniutiyuanekaitɨni: «¿'Ikɨri mɨtatsitawikweitsitɨani tihɨkɨ?» Tsahuri mepu'uxiwe'eriekai, tixaɨtɨ 'imikieri mepɨkate'imi. Tsahuri matsi pɨkayu'iyaritɨakai mɨkɨkɨ, 'atsipɨkatiwarutahɨawixɨ tsepa kememutiyuanekai pɨkawaranu'eni.
1SA 11:1 Merikɨtsɨ 'amunitsixi tiwa'aitɨwame Nakaxi Kawetsi kiekariyaritsie kaniye'ani Karaha kwieyaritsie, yukuyaxima waritana kaniwara'uitɨatɨyani. Mana kiekatari mɨpaɨ mekatenitahɨawe: —Tahamatɨa tɨratu keneuwewi, matsiparewiwamete tepakɨne.
1SA 11:2 Nakaxi mɨpaɨ katiniwaruta'eiya 'amunitanaka: —Tɨratu nepɨwewieni xehamatɨa, xɨkatsɨ xeyuwaɨriyani nemɨxewatitɨkiriexɨani xehɨxite xetserie mieme. Mɨpaɨ netiyurieme 'ixaheritsixi yunaime nepɨwananaimani.
1SA 11:3 Hikɨ 'ukirawetsixi Kawetsi kiekatari mɨpaɨ mekatenita'eiya: —'Atahuta tukari ketaneupitɨa temɨtewatanɨ'airiexɨanikɨ 'Ixaheri kwieyaritsie naitsarie, xɨkari xewitɨ kayɨweni mɨtatsitawikweitsitɨanikɨ, 'ahetsɨari tepɨtayetuani.
1SA 11:4 Hikɨ kepauka memutanɨ'arie Kiweya memeta'axɨa, Tsahuri kiekariena mɨhɨkɨtɨkai, mɨpaɨ mekateniwarutaxatɨani kememɨte'utahɨawarie, 'ana yunaitɨ mekaniutitsuani.
1SA 11:5 'Ana kwitɨ Tsahuri hɨritsie kanakaneni tuurutsixi yukwietsanamete wara'arietɨ, hikɨ mɨpaɨ katiniwaruta'iwawiya: «¿Kexetehanuyekɨ? ¿Titayari xete'utitsuana?» Hikɨ metenitaxatɨani Kawetsi kiekatari kememɨtewarutahɨawixɨ.
1SA 11:6 Hikɨ kepauka Tsahuri mɨkɨ niuki mu'eni, Kakaɨyari 'iyarieya hetsiena kaninuani tɨrɨkaɨyetɨ. Ha'atɨ,
1SA 11:7 yuhutame tuurutsixi kaniwarukwini kaniwarutixiteni 'etsipepeme, tupiritsixi naitsarie 'Ixaheri kwieyaritsie kaniwareutanɨ'axɨani wai me'utɨkɨme, mɨpaɨ 'ane niuki warupitɨaka: «Mɨpaɨ mekani'itɨariekuni yunaitɨ túurutsiximama kemɨ'ane Tsahuri meta Tsamuheri mɨkawaparewieni memɨyukwiyutsie». Hikɨ Yawé kaniwarupitɨani teɨteri memɨtimamanikɨ mɨkɨ niuki hepaɨtsita, 'ayumieme yunaitɨ teɨteri mekanayekɨne meyuxewitɨ meheuyukwiyuka.
1SA 11:8 Tsahuri Wetseki kaniwarukuxeɨrieni muwati'inɨatakɨ, 'Ixaheri kwieyaritsie miemete haika tsienituyari miriyari mepɨyupaɨmekai, Kura kwieyaritsie miemete xeitewiyari heimana tamamata miriyari mepɨyupaɨmekai.
1SA 11:9 Hikɨ mɨpaɨ katiniwarutahɨawe niuki memɨ'atɨa: «Xekenehu mɨpaɨ xeketeniwaretahɨawi Kawetsi Karaha kiekatari: “'Uxa'a tuka waɨkawa muxɨkanitsie xekanitawikweitsitɨariekuni”». Niuki memɨ'atɨa mekateniwaretaxatɨani mana kiekatari. Mɨkɨ mete'utamarieka mekaniyukatemamawieni waɨkawa.
1SA 11:10 'Ayumieme 'amunitsixi mɨpaɨ mekateniwarutahɨawe: «'Uxa'ari xehetsɨa tepɨtayetuani, xemeri kexemɨtatsiyurieka kemɨtixenake».
1SA 11:11 'Uxa'arieka ximeri kakahekɨariwekaku, Tsahuri niwarukuha'aritɨani kuyaxi me'ayehaikame. 'Amunitsixi mematiteitsie meniye'axɨani meniwarutakwini, mewakwitɨwetɨ tuka 'uxɨkakakuke mekateniutahayewa. Memutawikwei yuxexuitɨ mekaniyuta'unaxɨani, hipatɨri yunaitɨ mekaniukwi'iwa.
1SA 11:12 Merikɨtsɨ Tsamuheri kiekatari mɨpaɨ katiniwarutahɨawe: —¿Kemɨ'ane mepɨhɨkɨ Tsahuri memɨkanaki'eriekai tati'aitɨwame mayanikɨ? Xekeniwarahapani temɨwakwinikɨ.
1SA 11:13 Tsahuri mɨpaɨ kaniutayɨni: —Xewitɨ pɨkamierieni hikɨ. 'Ikɨ tukaritsie Yawé 'Ixaheri puxɨnaxɨ.
1SA 11:14 Tsamuheri mɨpaɨ katiniwarutahɨawe teɨteri: —Hikɨmɨtɨka. Kirikari tepɨyehu, 'aixɨa temeiyurienikɨ Tsahuri ti'aitame mayanikɨ.
1SA 11:15 Merikɨte yunaitɨ Kirikari mekanekɨne, mana yunaitɨ Yawé hɨxie Tsahuri ti'aitame mekanayeitɨani. Metatsiere mana, Yawé hɨxie 'aixɨa memɨteyuxeiyanikɨ mawariyari mekaniuwewieni, Tsahuri 'ixaheritsixi yunaitɨ temawierika mekaniuwewieni.
1SA 12:1 Merikɨtsɨ Tsamuheri 'ixaheritsixi yunaime mɨpaɨ katiniwarutahɨawe: —Xekeneneu'eni, ne naimekɨ nepɨxeheu'eniekai kexemɨnetekɨhɨawekai, tixe'aitɨwame nepɨxe'anukaketsiri mɨtixe'aitɨakakɨ.
1SA 12:2 Mɨkɨri kanihɨkɨtɨni mɨxeyewitɨni. Neri nepu'ukiratsi meta nepɨmutuxari meta neniwema kiekatari mekanihɨkɨtɨni. Ne nepɨxeparewie temaikɨyaripai hikɨ tukaritsie 'akuxi.
1SA 12:3 'Ena xepɨnetsi'uketsa. Yawé hɨxie kexemɨnete'utahɨawe xepɨyɨwawe meta menayexei hɨxie. ¿Kemɨ'ane tuuruya, puxuya nepunawa? ¿Kemɨ'ane nepukwamanaxɨ? ¿Kemɨ'ane nepuhiweritɨa? ¿Kemɨ'ane nepɨkarakapitɨa? Xekeneneutaxaneta nepɨrayukatuani kexemɨnetetawawirieni.
1SA 12:4 Mɨkɨ mɨpaɨ mekatenita'eiya: —Hatsuaku pepɨkatatsihekwamanaxɨ, pepɨkatatsi'uhiweritɨa, nixeimetɨma pepɨkatiunawatsiri.
1SA 12:5 Tawarita Tsamuheri mɨpaɨ katiniwarutahɨawe: —Yawé meta mɨkɨ menayexei hamatɨa memunenierixɨ mepɨhɨme, tixaɨtɨ xemɨkate'ukaxeikɨ 'axamɨti'ane nehetsie. Teɨteri mɨpaɨ mekatenita'eiya: —'Aixɨa pɨ'ane, mɨkɨ mekehɨkɨtɨni.
1SA 12:6 Metatsiere Tsamuheri mɨpaɨ katiniwarutahɨawe: —Yawé munierixɨ pɨhɨkɨ, Muitsexi 'Aruni mɨwaranayexei memɨwarayewitɨnikɨ xetutsima 'Ekipitutsie.
1SA 12:7 Hikɨ xekeneneu'eni. Yawé waɨkawa 'aixɨa pɨxeyurie hikɨ yaxeikɨa xetutsima wahepaɨ, ne peru tixaɨtɨ nepɨrexeiya xehetsiemieme nemɨxetaxanetakɨ.
1SA 12:8 »Kakuwu kepauka 'Ekipitu munua 'arikeke, nuiwarimama Yawé mekanahɨawekaitɨni muwatawikweitsitɨanikɨ. Hikɨ Yawé Muitsexi meta 'Aruni kaniwarenɨ'ani 'Ekipitu, memɨwarayewitɨnikɨ 'ena memɨwa'atɨanikɨ.
1SA 12:9 Peru Yawé yukakaɨyari mekanatɨmaiya, 'ayumieme mɨkɨ kaniwayetuani Tsitsara kuyaxi tiwa'aitɨwame hetsɨa Katsuxi kiekame, meta piritsiteutsixi wahetsɨa meta Muhawi ti'aitame hetsɨa, mɨkɨ mekaniwarutakwini.
1SA 12:10 'Ayumieme xeme Yawé xeputahɨawixɨ mɨxeparewienikɨ: “Tame 'axatepɨte'uyuri Yawé temuku'eirikɨ meta kakaɨyarixi Wahari hetsɨa miemete meta 'Atsitaruti 'ɨkiyarite tehayexeiyatɨ temakɨkɨ. Peru xɨka hikɨ petatsi'uparewieni memɨtatsi'aye'unie temɨwara'iwakɨ, 'ekɨ xeikɨari tepɨmatsi'ayexeiyani”.
1SA 12:11 Hikɨ 'ayumieme, Yawé Yeruwahari kaneyenɨ'ani meta Waraki, Ketexi meta Tsamuheri, mɨkɨ wareyenɨ'aka kanixe'utawikweitsitɨani memɨxe'aye'uniekai watsata, kayuwatɨ xemu'uwanikɨ yu'iyarikɨ.
1SA 12:12 »Neuxei xeme kepauka Nakaxi 'amunitsixi tiwa'aitɨwame xemutamari xe'uniekame, xeme matsi mɨpaɨ xepɨnetekɨhɨawekai: “Pɨkatixaɨtsietɨ. Tame tepeiyehɨwa tati'aitɨwame”. Yawé matsi xekakaɨyari, tixe'aitɨwame hɨkɨtɨkaku.
1SA 12:13 'Aixɨa kani'aneni, tixe'aitɨwame 'ena kaniuweni xemita'iwau xemenayexei. Peru mɨpaɨ xeketenemaika, Yawé kanihɨkɨtɨni mɨkɨ xeti'aitɨwame mɨxeyetuiri.
1SA 12:14 Xɨka xeme meta xeti'aitɨwame, Yawé yukakaɨyari xe'eyemakatɨ xe'akɨne, xete'i'uximayatsirieka, xɨka xehei'enieka, yaxetekahutɨ 'aitsikayatsie meta xɨka 'aixɨa xete'u'uwani. Yemekɨ 'aixɨa pɨ'ane.
1SA 12:15 Peru, xɨka Yawé 'aitsikateya xekahanu'enieni, xɨka xeka'i'enieni, mɨkɨ kaniyeha'amɨkɨ 'axakanixeyurimɨkɨ xetutsima meripaitɨ kemɨwaruyuri hepaɨ.
1SA 12:16 »Hikɨta xekeneneu'eni, xekeneunenieri yeme hikɨ Yawé mariwemekɨ kemɨtiyurieni.
1SA 12:17 Hikɨ witarita pɨkahɨkɨ, matsi 'itsanaxa pɨhɨkɨ, peru ne Yawé nenitahɨawimɨkɨ, mɨkɨ menɨ'anikɨ wiyeri meta tɨranari, mɨpaɨ 'ana yaxepɨtehetimani kename Yawé hɨxie 'axaxete'uyuri xemitawawirikɨ xeime ti'aitame».
1SA 12:18 Tsamuheri Yawé kaniutahɨawe, hikɨ mɨkɨ tukaritsie Yawé wiyeri tɨranari kaneyenɨ'ani, hikɨ yunaitɨ teɨteri mekaniutimamani Yawé hɨxie meta Tsamuheri hɨxie.
1SA 12:19 'Ayumieme Tsamuheri mɨpaɨ mekateniutahɨawe: —Yawé 'akakaɨyari nenewieri keneupitɨa tahetsiemieme mate'uximayatsiriwamete mɨkatatsikwinikɨ. Tame teyunaitɨ 'axatepɨte'uyuri 'akuxi matsi ti'aitame temuta'iwaukɨ yemekɨ 'axatepɨte'uyuri.
1SA 12:20 Tsamuheri mɨpaɨ katiniwaruta'eiya: —Xepɨkaheumamaka. Tsepanetɨ waɨkawamekɨ 'axaxemɨte'uyuri, Yawé xepɨka'uku'e'eiriwani, matsi pɨta naime yu'iyarikɨ xeketene'uximayatsirieka.
1SA 12:21 Kakaɨyarixi tixaɨtɨ memɨkateyunaki'erie xepɨkawarayexeiyani, mɨkɨ mepɨkayɨwawe memɨxe'uparewieni memɨxe'utawikweitsitɨani, tixaɨtɨ memɨkatehɨkɨkɨ.
1SA 12:22 Yawé pinake memeitimanikɨ teɨteri yemekɨ, 'ayumieme yuteɨterima pɨkawarexɨrieni, matsi pɨta yuteɨterima pɨxe'ayeitɨa xeme 'aixɨa 'iyarikɨ.
1SA 12:23 Peru neta Yawé kenetsiparewieka nemɨkatihayewakɨ xehetsiemieme neyunenewietɨ, xɨka ne netiuhayewa Kakaɨyari hetsiemieme 'axanepɨtiyurieni. Meta huye mɨheitserie 'aixɨa mɨ'ane nepɨxe'ɨkitɨaka 'akuxi.
1SA 12:24 Waɨkawamekɨ nepɨxehayehɨtɨwa Yawé xemayemakaxenikɨ, naime yu'iyarikɨ xekenayexeiyani, xehe'eriwatɨ mariwemekɨ kemɨtiuyuri xehetsiemieme.
1SA 12:25 Xɨka xekate'uhayewa 'axaxeteyurietɨ, xeti'aitɨwame meta xeme xekanika'unariekuni.
1SA 13:1 Merikɨtsɨ Tsahuri xeitewiyari heimana tamamata wiyari kanexeiyakaitɨni kepauka 'Ixaheri kwieyaritsie mitsutɨa ti'aitatɨ, huta tewiyari heimana huta wiyari katiniuta'aita.
1SA 13:2 Tsahuri 'ixaheritsixi haika miriyari kuyaxi kaniwaranayexeiya, hamatɨana mepu'uwakai huta miriyari Mikimatsi mɨrakutewatsie meta Weteri hɨriyaritsie, Kunatani hetsɨata xeimiriyari mepu'uwakai Kiweya Wenikamini kwieyaritsie. Kuyaxi memɨyuhayewaxɨ Tsahuri mɨkɨ wakie kaniwarenɨ'ani.
1SA 13:3 Kunatani piritsiteutsixi wahetsɨa mekaniye'axɨani mekaniwarutakwini, Kehewa mɨrakutewatsie, peru piritsiteutsixi matsi mekatenetimani. Hikɨ katiniuta'aita Tsahuri 'awa mɨtahɨtsierienikɨ naitsarie 'Ixaheri kwieyaritsie mɨpaɨ haitɨ: «Hepɨrayutsixi yunaime tepɨxeheuyehɨwa».
1SA 13:4 'Ixaheritsixi yamepɨtehetima 'ikɨ niuki hepaɨtsita kemɨtiuyɨ: «Tsahuri kuyaximama piritsiteutsixi mekaniwaretakwini, 'ayumieme matsi waɨkawa piritsiteutsixi metatsixani'erietɨ mekanakɨne». 'Ayumieme Tsahuri teɨteri mepi'eni mepuyukuxeɨri Kirikari mɨrakutewatsie.
1SA 13:5 Meta piritsiteutsixi mekaniyukuha'aritɨani 'ixaheritsixi mewatakwinike. Haika miriyari kaxetate kuyaxa miemete mepuwarahapakai, meta 'ataxewi miriyari kuyaxi kawayutsixi wahetsie me'utetɨ, kuyaxi yu'ɨkama memuhu mepɨyumɨirekai mepɨkayu'inɨatsinɨakai xiekari hepaɨ. Mikimatsi mɨrakutewatsie mekaniye'axɨani, Weti-'Aweni mɨrakutewa 'aurie tau manatineika hepa, mana mekaniyuhayewa.
1SA 13:6 'Ixaheritsixi 'ahurawa memɨti'uitɨariekaikɨ mekanimamakaitɨni, kuyaxi yunaitɨ mɨpaɨ mepɨteku'eriwakai kename piritsiteutsixi mewara'iwakekai. 'Ayumieme mepɨyuti'awietaxɨa terɨta, 'ɨtsita, tetexi warie, kwieta meutaxaxawata, meta putsu muyewawakita.
1SA 13:7 Metatsiere hepɨrayutsixi hipatɨ menanukɨne Kurutani hatuxameyaritsie 'anutaɨye memɨyuta'unakɨ, Kahari Karaha kwieyaritsie. Peru Tsahuri puyuhayewaxɨ Kirikari, yunaitɨ kuyaximama memiteɨtakai waɨkawa mekanimamakaitɨni.
1SA 13:8 Tsamuheri 'atahuta tukari kemɨtitukaritɨakai, Tsahuri mana kanita'ikwewakaitɨni, matsi mɨkɨ pɨkanuawekai, kuyaxi memitsutɨakaikɨ metakɨkatɨ,
1SA 13:9 Tsahuri mɨpaɨ katiniuta'aita: «Mawari taiyariyari mayani xekenene'atɨiri meta 'aixɨa temɨteyuxeiyanikɨ mawariyari», hikɨ mɨkɨ yukɨmana mawari kaniuwewieni.
1SA 13:10 Kepauka Tsamuheri munua, Tsahuri katinitahayewarɨmekaitɨni mawari wewietɨ. Tsahuri kanayeyani heinakimieka, hikɨ kanitahɨawe.
1SA 13:11 Tsamuheri matsi mɨpaɨ pɨtitati: —¿Kepetiuyuri 'ekɨ? Tsahuri mɨpaɨ katinita'eiya: —Nekuyaxima mepuyuta'unakai, 'ekɨta pekatinuawekai kepemɨtiutukaritakai, piritsiteutsixi Mikimatsi mɨrakutewatsie mekaniyuxeɨrieka.
1SA 13:12 Mɨpaɨ nepɨtiu'eri: “Piritsiteutsixi mepɨyuha'aritɨa Kirikari meye'axɨanike metatsitakwinike, peru ne Yawé mɨnetsiparewienikɨ nepɨka'itawawiriewe 'akuxi”. 'Ayumieme nepɨnewaɨri mawari nemɨwewienikɨ.
1SA 13:13 Tsamuheri mɨpaɨ katinitahɨawe: —Neuxei pepɨka'uka'iyari. Yawé 'akakaɨyari 'aitsikaya pepɨkahaye'atɨawe kemɨmatiuta'aitɨa. Yawé matsipitɨanikekai ti'aitame pemayanikɨ yuheyemekɨ 'ixaheritsixi wahetsiemieme.
1SA 13:14 Hikɨ peru mɨpaɨ nepɨmarahɨawe, pepɨkareutere peti'aitatɨ. Yawé xeime pɨta tewi pukuwaune minaki'atsitɨani, 'ekɨ 'aitsikaya pemɨkahaye'atɨakɨ.
1SA 13:15 Tsamuheri mɨpaɨ 'utayɨka Kirikari kaniyeyani, Kiweya Wenikamini kwieyaritsie kaneyani. Tsahuri yukuyaxi kaniwaruti'inɨata hamatɨana memu'uwakai, 'ataxewime tsienituyari mepɨyupaɨmekai.
1SA 13:16 Kehewa Wenikamini kwieyaritsie mekaniyuhayewa Tsahuri yuniwematɨ Kunatani meta wakuyaxima, mexi'akuxi piritsiteutsixi Mikimatsi metitekai.
1SA 13:17 Piritsiteutsixi mematitekaitsie mekanayekɨne kuyaxi, me'ayehaikatɨ menayuyeitɨani: Mɨkɨ hipatɨ mekanekɨne 'Upɨra huyeyari 'utɨma, Tsuhari kwieyari hepatsie,
1SA 13:18 hipatɨta Weti-Kuruni mɨrakutewatsie meneutayune, hairieka Tsewuhini 'akiyari manuye'atɨkatsie, makumawe hepatsie.
1SA 13:19 'Ixaheri kwieyaritsie naitsarie, tepɨate tiwewiwame pumawekai nixewitɨ pɨkatiwewiekai, piritsiteutsixi mepɨkawapitɨakai hepɨrayutsixi memɨtewewiekakɨ 'ixiparate tepɨa pitsikayari.
1SA 13:20 'Ayumieme 'ixaheritsixi yunaitɨ piritsiteutsixi wahetsɨa mekateni'aitakaitɨni mɨratamɨariexɨanikɨ tepɨa kwietsanamete, hatsarunite, hatsate meta huxate 'ɨxa xikamete.
1SA 13:21 'Atahaika pɨrata kɨramuyari mepɨwiyariekai xeime kwietsanamekɨ yatɨni xeime hatsarunikɨ, nauka kɨramuyarita xeime hatsakɨ meta yaxeikɨa huxa 'ɨxa xikame matamɨarienikɨ.
1SA 13:22 'Ayumieme kuyaxi 'ixaheritsixi nixewitɨ 'ixipara pɨkahakwekai meta tepɨa pitsikayari mepɨkahexeiyatɨkatei, Tsahuri Kunatani matɨa xeikɨa mepi'ɨkai.
1SA 13:23 Hipatɨ kuyaxi piritsiteutsixi Mikimatsi huyeyari manukayune mekanitiyaxe.
1SA 14:1 Merikɨtsɨ xeitukaritsie, Kunatani Tsahuri nu'aya, yupaapa katiutaxatɨaka, yuparewiwame xeikɨa mɨpaɨ katiniutahɨawe: «Kenaye'a. 'Anutaɨye hikɨmɨ tekananukɨnikuni piritsiteutsixi mematiteitsie».
1SA 14:2 Matsi Tsahuri Kiweya mɨrakutewatsie tetsita pukatei, Mikuruni mɨrakutewatsie, xeime kɨranaru kɨyeyari hetɨa, 'ataxewime tsienituyari kuyaxi hamatɨana meniu'uwakaitɨni.
1SA 14:3 Mawari wewiwame kamixaya 'etsimɨyewa 'Ahiyaxi panakatɨkɨkai 'Akituwi nu'aya, 'Ikawuri 'iwaya kanihɨkɨtɨkaitɨni, Pinexi nu'aya 'Eri teukarieya, Tsiru mɨrakutewatsie mawari wewiwame kanihɨkɨtɨkaitɨni Yawé hetsiemieme. Peru Kunatani kename hayeyakai nixewitɨ pɨkatimaikai.
1SA 14:4 Para mɨta'anikɨ piritsiteutsixi wahetsɨa, Kunatani huta 'aiyaritsie hixɨatatsie kaniuyeyani, Wutsexi, Tsene 'aiyaritsie mɨtitetewatsie.
1SA 14:5 Mexɨakame tayeta Mikimatsi hɨxie pɨti'anekai, xewitɨta tatsutɨa hepatsie Kehewa hɨxie pɨti'anekai.
1SA 14:6 Hikɨ Kunatani yuparewiwame mɨpaɨ katiniutahɨawe: —Hikɨmɨ teɨteri Kakaɨyari memɨkamate wahɨxie tekaniuyekɨnikuni, Yawé ketatsiparewieka, mɨkɨ mɨtatsitawikweitsitɨanikɨ pɨkakwaniwe, tsepanetɨ memɨyuwaɨkawa ya'etsimemɨyupaɨme wahepaɨtsita.
1SA 14:7 'Iparewiwame mɨpaɨ katinita'eiya: —'Aixɨa pɨyɨni, naime 'ekɨ yaketineuyuri kepemɨtiku'eriwa, neta nepɨnewaɨriya nemɨmatsiparewienikɨ.
1SA 14:8 Kunatani mɨpaɨ kaniutayɨni: —'Aixɨa kani'aneni. Para memɨtatsihexeiyakɨ hakewa mematiteitsie mana tekananukɨnikuni.
1SA 14:9 Xɨka mɨpaɨ metatehetahɨawe: “Temɨxehanuku'axekɨ xeketaneukwewi”, mana tekanitahayewakuni tepɨka'uhuni.
1SA 14:10 Perutsɨ xɨka mɨpaɨ metatehetahɨawe: “'Ena xekenatikɨni”, matsi tekaniuhukuni, mɨkɨ 'inɨari kanayeimɨkɨ Yawé kemɨtatiparewieni temɨtehayu'iwakɨ.
1SA 14:11 Hikɨ mɨkɨ yuhutatɨ mekaniyu'eirieni piritsiteutsixi memɨwaxeiyakɨ. Hikɨ piritsiteutsixi mɨpaɨ mekateniuhiwa: —Neuxei hepɨrayutsixi kememɨteheyu'awietatɨkatei terɨta mekanitsutɨakari mewayekɨkatɨ.
1SA 14:12 Merikɨte kuyaxi tehɨwemete Kunatani mekaniutahiwieni meta 'iparewiwameya: —'Ena xekenatikɨni, tepɨtehayexeiya tepɨtexetaxatɨani. Kunatani yuparewiwame mɨpaɨ katiniutahɨawe: —Ne'utɨma keneumieni, Yawé 'ixaheritsixi temɨtehayu'iwakɨ kataniupitɨani.
1SA 14:13 Kunatani 'aitsie pukuwieretɨya meta 'iparewiwameya kaniweiyakaitɨni. Kunatani piritsiteutsixi mɨwaratixɨrɨwakai 'iparewiwameya pɨwatakukuyakairi.
1SA 14:14 Kunatani yuparewiwame hamatɨa xeitewiyari piritsiteutsixi mekaniwarukwini 'etsimakuyewatsie, matɨari me'uyutakwika mɨya mekateniuyurieni.
1SA 14:15 Hikɨ Kakaɨyari kwie kaniutayuitɨani. Kuyaxi piritsiteutsixi mekanimamakaitɨni yunaitɨ kememɨyupaɨmekai mana memɨkutekai. Mɨkɨ yunaitɨ mekaniutimamani tehɨwemete meta kuyaxi yukukuyamete.
1SA 14:16 Kiweya paitɨ Wenikamini kwieyaritsie Tsahuri kuyaximama memɨtaneniere tehɨwemete mekaniwaruxeiya kuyaxi piritsiteutsixi memakuteitsie, memamatɨ mekaniyuta'unakaitɨni yuxexuitɨ.
1SA 14:17 Hikɨ 'ayumieme Tsahuri yukuyaxima mɨpaɨ katiniwarutahɨawe: «Xekeniwaruti'inɨata tame kemɨ'ane mepeuyewetse». Mɨpaɨ mekateniuyurieni, Kunatani meta parewiwameya meheuyewetɨ mekanakɨne.
1SA 14:18 Hikɨ Tsahuri 'Ahiyaxi kaniuta'aitɨani Kakaɨyari kakunieya memakwenikɨ. ('Ana tɨratu kakuniyari 'ixaheritsixi wahetsɨa kaniukateitɨni).
1SA 14:19 Mexi 'akuxi tikuxatakai piritsiteutsixi mematiteitsie waɨkawa matsi kwinimieme katiniuyɨni, 'ayumieme Tsahuri mawari wewiwame mɨpaɨ katiniutahɨawe: «Tsepari matsi keneuhayewa».
1SA 14:20 Hikɨ Tsahuri yukuyaxima kaniwarukuxeɨrieni yunaitɨ mekanayekɨne meyutakwinike. Piritsiteutsixi mepɨkayumaiwawekai matsi yɨkɨmana mekaniuyutikwitɨkɨne.
1SA 14:21 Merikɨtsɨ meripaitɨ hipatɨ hepɨrayutsixi piritsiteutsixi memɨwarutinɨkai, 'ana wahamatɨa memɨtitekai piritsiteutsixi memayuxeurietsie, 'ana Tsahuri meta Kunatani wahetsɨa pɨta mekanekɨne 'ixaheritsixi mekaniwarutinɨni.
1SA 14:22 'Epɨrahini hɨriyaritsie memɨyuti'awietakai hipatɨ 'ixaheritsixi, kepauka memɨte'utamari kename piritsiteutsixi meheyuta'unakai, me'uyukuxeɨrieka mekanekɨne mewareparewienike mekaniwarutinɨni.
1SA 14:23 'Ana tukaritsie Yawé 'ixaheritsixi mɨpaɨ katiniwarutawikweitsitɨani, Weti-'Aweni paitɨ mekaniye'axɨani meyukwitɨwetɨ.
1SA 14:24 Merikɨtsɨ kuyaxi 'ixaheritsixi waɨkawa mekaneuhakakwikukaitɨni, Tsahuri mɨpaɨ mutayɨkaikɨ Kakaɨyari hɨxie kuyaxi wahetsiemieme: «Kakuyɨriwekaku 'akuxi kemɨ'ane mɨtikwani mɨkɨ Yawé 'axake'iyurieni, memɨnetsi'aye'unie nekawara'iwawekaku 'akuxi». 'Ayumieme xewitɨ tɨma 'ana tukaritsie kuya pɨkatikwakai.
1SA 14:25 Yeuta me'uye'axɨaka, mɨpaɨ metenetimani kename kwiepa xiete xuawekai.
1SA 14:26 Kepauka makukɨyexiyatsie hipatɨ memu'axɨa, mɨpaɨ meteniuneniere xiete waɨkawa kanixuawekaitɨni, peru nixewitɨ pɨkayuwaɨri meme'inɨatakɨ mɨyamutayɨkaikɨ Tsahuri memamatɨ.
1SA 14:27 Merikɨte Kunatani yupaapa pɨka'u'eniekai kemutayɨkai yukuyaxi wahetsiemieme, kɨye makwekai 'utatseraka xiete mayema 'utseka kanekwani. 'Ana yapauka yuhɨxie hayexawatɨtɨ kanayani.
1SA 14:28 Hikɨ kuya xewitɨ mɨpaɨ katinitahɨawe: —'Apaapa mɨpaɨ kaniutayɨni Kakaɨyari hɨxie kuyaxi tahetsiemieme: “'Axake'u'itɨarieni kemɨ'ane 'ikɨ tukaritsie tixaɨtɨ mɨtitakwani”. 'Ayumieme kuyaxi mekaniyehakakwitɨweni.
1SA 14:29 Kunatani mɨpaɨ kaniutayɨni: —Nepaapa mɨkɨ niukikɨ waɨkawa 'axapɨtatsi'uyuri, neuxei kepauka xiete 'etsiwa nema'inɨataxɨtsie nehayexawatɨtɨ nekanayani nehɨxie.
1SA 14:30 Matsitsɨ kuyaxi kemeyɨnikekai xɨka memɨtatsi'aye'unie wa'ikwai me'utikwanike, matsi piritsiteutsixi waɨkawa tepɨwakwinikekai.
1SA 14:31 'Ixaheritsixi mɨkɨ tukaritsie piritsiteutsixi mekaniwarukwini Mikimatsi me'iyetsutɨaka 'Ayaruni paitɨ mekaniye'axɨani, kuyaxi mepɨkayɨwawekairi hakakɨ.
1SA 14:32 'Ayumieme piritsiteutsixi watewama mekaniwarutiwiya. Muxatsi, wakaitsixi, tsikerutsixi, mewaratixɨrieka mekaniwaranutixitexɨani, wai mekaniutikwani 'ayexuxureme memɨyumexɨitɨakaikɨ.
1SA 14:33 Merikɨte hipatɨ Tsahuri mekateniutaxatɨani: —Yawé hepaɨtsita 'akuyaxi 'axamepɨteheyurie, wai mekanekwaka 'ayexuxureme. Tsahuri mɨpaɨ kaniutayɨni: —'Axateyuruwamete xekanihɨkɨtɨni. Hikɨ kwitɨwa tete xekenakurupa 'amɨnena 'ena xekenene'atɨiri.
1SA 14:34 Mɨpaɨta katiniwarutahɨawe: —Xekenehu yunaime kuyaxi mɨpaɨ xeketenewaretahɨawi yuxexuitɨ tuurutsixi, yumuxatsi mekaniwa'atɨaxɨakuni para temɨwakwinikɨ 'ena tekaniwatikwaikuni, meta 'ari wai xuxureme mepɨkahekwakari, Yawé hɨxie 'axamepɨkateheyuriekari. 'Ana tɨkariyaritsie kwitɨwa yutuurutsixi yuxexuitɨ mekaniwa'atɨaxɨani, mana mekaniwarukwini.
1SA 14:35 Hikɨ Tsahuri mana mawari taiyame Yawé hetsiemieme kaniutawewieni. 'Ikɨ mawari taiyame mexɨakame mieme kanayani mitawewi.
1SA 14:36 Mɨpaɨta katiniwarutahɨawe yukuyaxima: —Piritsiteutsixi wa'utɨma hikɨ yɨwikɨta tekaniyehuni. Kakahekɨariwekaku 'akuxi, naime tita memɨtehexeiya tekateniwarenawairiekuni, meta nixeime tepɨkahehayewa 'ayeniereme. Kuyaximama mɨpaɨ mekatenita'eiya: —Kehapaɨ matsi 'aixɨa mɨyɨni yaketineuyuri. Mawari wewiwame mɨpaɨ kaniutayɨni: —Kakaɨyari meri matsi teta'iwawiyame.
1SA 14:37 Merikɨte 'ayumieme Tsahuri Kakaɨyari kaniuta'iwawiya: «¿Piritsiteutsixi netiwaranukuweiya? ¿'Ixaheritsixi wahetsɨa petiwayetuani?» Perutsɨ 'ana Kakaɨyari pɨka'ita'ei.
1SA 14:38 'Ayumieme Tsahuri mɨpaɨ kaniutayɨni: —Xeme yunaitɨ kuyaxi tewa'aitɨwamete 'ahurawa xekenakɨni, xeme hikɨ xekeneutinieri kemɨ'ane 'axapɨtiuyuri.
1SA 14:39 Yawé meta 'ixaheritsixi mɨtatsiwikweitsitɨwame munierixɨ kanihɨkɨtɨni tsepa xɨka Kunatani neniwe hetsie tiunake, pɨkatinenimayatsieni kanimɨmɨkɨ. 'Ana nixewitɨ pɨkayuwaɨriyaxɨ yamɨtayɨnikɨ.
1SA 14:40 'Ayumieme 'ixaheritsixi yunaime mɨpaɨ katiniwarutahɨawe: —Xeme huma xekeneti'uti, tameta 'ena pɨta tekaniti'uikuni neniwe Kunatani hamatɨa. Mɨkɨ mɨpaɨ mekatenita'eiya: —'Ekɨtsɨ kehepaɨ 'aixɨa mɨyɨni yaketineuyuri.
1SA 14:41 Hikɨ Tsahuri Yawé kaniutawawirieni 'Ixaheri Kakaɨyarieya, kemɨ'ane wahetsie pɨtinakekai. Kememɨteyuta'iwaxɨ Tsahuri Kunatani wahetsie katiniunake, 'iya matsi mexɨxɨnitɨ meniyuhayewa.
1SA 14:42 Hikɨ Tsahuri mɨpaɨ kaniutayɨni: —Hikɨta neniwe Kunatani matɨa teniyuta'iwakɨni. Matsi Kunatani hetsie katiniunake.
1SA 14:43 'Ayumieme Tsahuri mɨpaɨ katinitahɨawe: —Kepetiuyuri kenetineutaxatɨa. Kunatani mɨpaɨ kaniutayɨni: —Puyuri xiete nepa'inɨataxɨ 'etsiwa nekɨye kɨtsie 'ukaime. ¿'Ayumiemeri mɨkɨkɨ netimɨni?
1SA 14:44 Tsahuri mɨpaɨ katinitahɨawe: —Xɨka 'ekɨ Kunatani peka'ɨmɨni, Kakaɨyari kenetiukwinitɨani kanetsinenimayatɨ.
1SA 14:45 Hikɨ kuyaxi Tsahuri mɨpaɨ mekateniutahɨawe: —Kehapaɨtɨtɨ Kunatani pumɨni, mɨkɨ tiuyurieku matsi 'ixaheritsixi tepɨtehayu'iwaxɨ, tepɨtemate Yawé kemɨrayeniere, meta yaxeikɨa tepɨtemate nixewitɨ tɨma kɨpaya kwiepa pɨkakawiwieni, Kakaɨyari 'iparewiekaku ke'aixɨa mɨtiuyuri. Merikɨte Kunatani kemɨtimɨnikekai menitawikweitsitɨani.
1SA 14:46 Tsahuri piritsiteutsixi waranukuweiyake katiniuhayewa, 'ayumieme hipatɨ yukwieyaritsie mepakunuaxɨa piritsiteutsixi.
1SA 14:47 Kepauka Tsahuri 'aixɨa muyuyuri mɨti'aitanikɨ 'ixaheritsixi wahetsie, Tsahuri memaye'unie yunaime kaniwarutikwitɨyani 'ahurawa memɨtitekai, muhawitsixi, 'amunitsixi, 'erumitsixi, Tsuwa kwieyaritsie te'aitamete meta piritsiteutsixi, mɨkɨ yunaime pɨwara'iwakai,
1SA 14:48 waɨkawa tɨrɨkariya mepexeiyakai. Metatsiere 'amarekitsixi kaniwara'iwa, meta hipame 'ixaheritsixi kaniwarutawikweitsitɨani kepauka metenawatsiyarietɨwekaku.
1SA 14:49 Merikɨtsɨ Tsahuri yuhaikame yuniwema 'ukitsi kaniwarayexeiya: Kunatani, 'Itsiwi meta Marikitsuha. Yuhutame meta 'ukari kaniwarayexeiya: Merawi 'amɨyumate pɨtitewakai, Mikari 'etsimɨyumate.
1SA 14:50 'Akinuhani 'ɨyaya pɨhɨkɨtɨkai 'Akimatsi nu'aya. Kuyaxi mutiwa'aitɨakai 'Awinexi pɨhɨkɨtɨkai Nexi nu'aya, Tsahuri tatatsieya.
1SA 14:51 Kihitsi, Tsahuri paapaya meta Nexi, 'Awinexi 'ukiyarieya, mɨkɨ yuhutatɨ 'Awiheri mepɨniwemamatɨkai.
1SA 14:52 Kepauka Tsahuri mɨti'aitakai puyumienekai piritsiteutsixi wahamatɨa kwinimieme. 'Ayumieme kepauka Tsahuri xeime mɨxeiya tɨrɨkaɨyeme, mɨkɨ kaniwaruta'iniwakaitɨni kuya hetsiena mieme mayanikɨ.
1SA 15:1 Merikɨtsɨ Tsamuheri xeitukaritsie Tsahuri mɨpaɨ katiniutahɨawe: «Yawé kaneniutanɨ'ani hatseiti nemɨmatsikawirienikɨ ti'aitame pemayanikɨ 'Ixaheri kwieyaritsie. 'Ayumieme hikɨta keneu'eni 'ikɨ Yawé niukieya.
1SA 15:2 Mɨpaɨ kanaineni Yawé Naimekɨmɨtɨrɨkaɨye: “Nepɨwarupitɨa 'amarekitsixi nemɨtiwakwinitɨanikɨ 'ixaheritsixi 'axamemɨwaruyurikɨ, kepauka 'Ekipitu memayekɨtsie memɨkawarupitɨakɨ wakwietsie memuyekɨnekɨ.
1SA 15:3 Merikɨte xekenehu hikɨ kwitɨwa 'amarekitsixi xekenewaretakuya. Naime tita memɨtehexeiya xeketenewareka'uniri, xepɨkawarenenimayaka. Yunaime xekenewarekuya, 'ukitsi, 'ukarawetsixi, tɨɨri meta 'unetsitsixi, watuurutsixi, muxatsi, kameyutsixi meta wapuxurima”».
1SA 15:4 Merikɨtsɨ Tsahuri yukuyaxima Terahini kaniwarukuxeɨrieni: kaniwaruti'inɨata huta tsienituyari miriyari mekaniyupaɨmekaitɨni memeuyutakwiwawekai, meta tamamata miriyari mepɨyupaɨmekai Kura kwieyaritsie kiekatari.
1SA 15:5 'Amareki kiekariyaritsie mekanekɨne mana mekaniyuti'awieta 'akitsie.
1SA 15:6 Kenitsixi 'amarekitsixi mepɨwaruku'eiri Tsahuri mɨpaɨ mɨtiwarutahɨawixɨkɨ: «'Amarekitsixi teɨteriyari wahamatɨa xepɨka'u'uwani xekenehu 'ateewa paitɨ. Kepauka tateɨterima 'ixaheritsixi 'Ekipitu memayekɨ, xeme 'aixɨa xepɨtatexeiyakai, 'ayumieme xeme mɨkɨ wahamatɨa xemɨka'unarienikɨ yanepɨkara'eriwa».
1SA 15:7 Hikɨ Tsahuri 'amarekitsixi kaniwarutakwini, Kawira mepitsutɨa 'atsita Tsuhuxi paitɨ mepɨye'axɨa, 'Ekipitu kwieyari maka'atɨkatsie yateewa.
1SA 15:8 'Akaki 'amarekitsixi teɨteriyari tiwa'aitɨwame mekaniuwiya 'ayeniereme mekaniuhayewa. Hipame yunaime teɨterimama 'ixiparakɨ mekaniwarukwini.
1SA 15:9 'Akaki meka'umieka, Tsahuri yukuyaxima wahamatɨa mekaniwaruhayewata muxatsi 'aixɨa memɨ'anene meta wakaitsixi, tsikerutsixi memɨwaiyatɨarietɨka, meta hipame piinite mɨraye'atɨka xeikɨa. 'Ikɨ naime memɨteheuyehɨani mepɨkayuwaɨri, mɨkatiyunaki'erie 'axamɨti'anene xeikɨa mekateneuyehɨani.
1SA 15:10 Merikɨte Yawé Tsamuheri mɨpaɨ katiniutahɨawe:
1SA 15:11 «Hikɨke nepɨne'iyaritɨa titayari Tsahuri ti'aitame nerayeitɨa, pɨkanetsi'enie kenemɨrehɨawe yapɨkatikamie». Tsamuheri waɨkawamekɨ puyutihɨawixɨ, tɨkarikɨ kaniukatariyarieni Yawé hahɨawetɨ mɨreiyehɨwirienikɨ.
1SA 15:12 Hikɨ meripai ximeri 'anukukeka kaneyani Tsahuri hetsɨa, peru muwa mɨpaɨ pɨretahɨawarie: «Tsahuri Kaximeri kaneyani, mana tete hetakenike mɨpaɨ tiku'eriwatɨ 'inɨari mayanikɨ, manata mɨyetɨa Kirikari kaneyani».
1SA 15:13 Hikɨ kepauka Tsamuheri munua, Tsahuri mɨpaɨ katinitahɨawe: —Yawé 'aixɨa kematsiyurieka. 'Ari nepɨraye'atɨa Yawé kemɨnetiuta'aitɨa.
1SA 15:14 Tsamuheri mɨpaɨ katinitahɨawe: —Merikɨte xɨka yuritɨni peraye'atɨani, ¿Tita mɨkɨ metehamuxatsima nemɨwa'enie? ¿Tita mɨkɨ metehawakaitsixi watsuari nemɨ'enie?
1SA 15:15 Tsahuri mɨpaɨ katinita'eiya: —'Amareki kwieyaritsie meteneyepini kuyaxi. 'Aixɨa memɨ'anene xeikɨa muxatsi mekaniwarehayewa wakaitsixi meta, Yawé 'akakaɨyari mawari pemɨwewirienikɨ, peru hipame yunaime tekateniwareuyehɨani.
1SA 15:16 Tsamuheri mɨpaɨ katinitahɨawe 'akuxi tikuxatakaku: —'Ari ketineuhayewa. Yawé tɨkarikɨ kemɨneretahɨawixɨ nekamatinitaxatɨamɨkɨ. Tsahuri mɨpaɨ kaniutayɨni: —Nepɨmatsi'enieni.
1SA 15:17 Hikɨ Tsamuheri mɨpaɨ katinitahɨawe: —Kaniyuritɨni tsepanetɨ 'ekɨ tixaɨtɨ pemɨkati'a'eriekai, 'ekɨ hikɨ 'ixaheritsixi tiwa'aitɨwame pekanihɨkɨtɨni. Yawé katiniuyurieni mɨmatsi'anayexei 'Ixaheri kwieyaritsie ti'aitame pemayanikɨ.
1SA 15:18 Meta mɨkɨ Yawé kametiutanɨ'a 'aitsikaya pemaye'atɨanikɨ. Mɨkɨ mɨpaɨ pɨmatiuta'aitɨa: “Kenemie mɨkɨ 'axateyuruwamete 'amarekitsixi keniwareka'una, keniwarekuya yunaime”.
1SA 15:19 ¿Titayaritsɨkamɨ Yawé pekaranu'eni? ¿Titayari piinite yuhetsiemieme xetehayeitɨa, titayari Yawé kemɨkatinake petiuyuri?
1SA 15:20 Tsahuri mɨpaɨ katinita'eiya: —Ne Yawé nepanu'eni. Kemɨnetiuta'aitɨa 'aitsikaya nepaye'atɨa. 'Akaki tepewiyaxɨ tepenutahɨa 'amarekitsixi tiwa'aitɨwame, peru 'amarekitsixi yunaime tepɨwarekwi.
1SA 15:21 Nekuyaxima memɨtatsi'aye'unie wamuxatsima, wawakaitsixima mekateniwareyehapani, Kirikari Yawé 'akakaɨyari hetsiemieme mawari pemɨwewirienikɨ.
1SA 15:22 Tsamuheri mɨpaɨ katinita'eiya: «¿Tita matsi Yawé tinake: mawari taiyariyari meta hipame 'imikierite, nutsu 'aitsikaya kemaine yatepɨtekahuni? Matsi peuyewetse temi'enieka, keyuri mawari, yatemɨteyurieka peuyewetse, wai wiya matɨa pɨkaheuyewetse.
1SA 15:23 Yemekɨ 'aixɨa pɨka'ane xɨka yakatikamieni, memɨtehetimamateke wahepaɨ pɨ'aneni, meta muyuta'ɨre, kakaɨyarixi mɨwarayexeiyani hepaɨ pɨtiyurieneni. 'Ekɨ Yawé niukieya pemuku'eirikɨ, mɨkɨta pumatsi'uku'eiri pemɨkati'aitametɨnikɨ».
1SA 15:24 Tsahuri mɨpaɨ kaniutayɨni: —Yurikɨ pepaine 'axanepɨtiuyuri. Yawé 'aitsikaya nepɨkahaye'atɨa meta 'ekɨ kepemɨnetiuta'aitɨa. Ne kuyaxi nepɨwaretimaka 'ayumieme nepɨwaranu'eni.
1SA 15:25 Peru waɨkawamekɨ nepɨmatsiwawirie ke'axanemɨtiuyuri, kenetineuyehɨwiri xɨa, Yawé tepɨtahɨawe tanaitɨ keneukunua.
1SA 15:26 Tsamuheri mɨpaɨ katinita'eiya: —Ne 'ahamatɨa nepɨkamie, Yawé niukieya 'ekɨ pepɨka'anu'eni, mɨkɨta 'ari pɨkamatsinaki'erie, 'ixaheritsixi wahetsie pemɨti'aitanikɨ.
1SA 15:27 Hikɨ Tsamuheri 'ari heyaka ta'aurie kanaweni, Tsahuri 'ixurikieya kɨtsimeyaritsie kanitiwiere kanetsanirieni.
1SA 15:28 Merikɨte 'ayumieme Tsamuheri mɨpaɨ katinitahɨawe: —Yawé hikɨ kwitɨwa mɨpaɨ pɨmatiutsaniri 'Ixaheri kwieyari pemɨra'aitatsie, 'aixɨa tiuka'iyarime pɨyetuiri pɨta.
1SA 15:29 Yurikɨ Kakaɨyari 'Ixaheri rayu'iwame mayeitɨwa, pɨkati'itawa, pɨkayukupata, tewi kemɨtiuxaxata mɨpaɨ pɨka'ane.
1SA 15:30 Merikɨte Tsahuri mɨpaɨ katinita'eiya: —'Axanepɨtiuyuri. Peru hikɨ nepɨmatsiwawirie 'ukirawetsixi neteɨterima wahɨxie meta 'ixaheritsixi meketemaika kenemɨti'aitame. Meta Yawé 'akakaɨyari temɨtahɨawekɨ tanaitɨ keneukunua.
1SA 15:31 Hikɨ Tsamuheri kaniyuwaɨriya mɨkunuanikɨ hamatɨana, Tsahuri 'ana Yawé kaniutahɨawe.
1SA 15:32 Hikɨ mana Tsamuheri mɨpaɨ kaniutayɨni: —'Akaki 'amarekitsixi tiwa'aitɨwame xekenene'atɨiri. Kepauka Tsamuheri hepa muhanieximekai, 'Akaki mɨpaɨ pɨtiku'eriwakai ka'imienike pɨ'eriekai mɨixa tukari manukamiekaikɨri.
1SA 15:33 Tsamuheri mɨpaɨ katinitahɨawe: —'A'ixipara hipame 'ukarawetsixi mekaniwetɨkaime pɨwaruhayewaxɨ, 'ekɨta 'amaama kaniwetɨ kaniyuhayewamɨkɨ. Kirikari mɨrakutewatsie mana Yawé hɨxie, Tsamuheri 'Akaki kaneutixitexɨani.
1SA 15:34 Tsamuheri Xama mɨrakutewatsie kaneyani, Tsahuri meta Kiweya kaneyani yukie.
1SA 15:35 Yawé ti'aitame Tsahuri hayeitɨaka 'Ixaheri kwieyaritsie 'arike pɨka'inakixɨ, 'ayumieme hatsuaku Tsamuheri Tsahuri pɨka'uxei, matsi mɨixa puyuhiweriekai hetsiena mieme.
1SA 16:1 Merikɨtsɨ Yawé Tsamuheri mɨpaɨ katiniutahɨawe: —¿Kepaɨmexɨari pepuyurieka Tsahuri hetsiemieme pe'utatsuatɨ xɨkari ne 'Ixaheri kwieyaritsie mɨti'aitametɨnikɨ neka'inaki'erieka? Matsi hatseiti 'a'awata keneutahɨniyaka kenemie. Wereni huyeyari 'utɨma nekamanitanɨ'amɨkɨ 'Itsahi kie, ne mɨkɨ nu'aya xeime nepanayexei ti'aitame mayanikɨ.
1SA 16:2 Tsamuheri mɨpaɨ katinita'eiya: —¿Kehapaɨ netiyani? Xɨka Tsahuri mɨpaɨ retimani kanenimiemɨkɨ. Yawé mɨpaɨ katinitahɨawe: —Tsikeru kenahanatɨ, mɨpaɨ ketiniwarutahɨawi kename mawari peheuwewimie nehetsiemieme.
1SA 16:3 'Itsahi keneta'ini mawari pemewewienitsie, hikɨ kepemɨtiyurieni ne nekametinitaxatɨamɨkɨ, kemɨ'ane pemɨtikawirieni nehetsiemieme mɨtita'uximayatakɨ yanekamatinitahɨawimɨkɨ.
1SA 16:4 Merikɨte Tsamuheri Yawé kemɨtita'aitɨa yakatiniuyurieni. Kepauka Wereni munua, mana kiekatari 'ukirawetsixi me'eyemakatɨ mekanitahɨawe. Mɨpaɨ mekatenita'iwawiya: —¿'Aixɨa 'anemekɨ petikɨyɨane?
1SA 16:5 —Huu mɨpaɨ pɨ'ane. Ne Yawé mawari newewirienike nepeyetɨa. Xekeneuyu'itieka xekenakɨni nehamatɨa teyunaitɨ yapaɨmeme temɨtikwanikɨ. 'Ayumieme Tsamuheri 'Itsahi meta niwemama kaniwaru'itieni, manata mawari mawewienitsie kaniwaruta'inieni.
1SA 16:6 Hikɨ kepauka memu'axɨa, Tsamuheri 'Eriyawi 'uxeiyaka mɨpaɨ katiniu'erieni: «'Ikɨ xɨari kanihɨkɨtɨni Yawé menayexei yuhetsiemieme».
1SA 16:7 Peru Yawé Tsamuheri mɨpaɨ katiniutahɨawe: —Pepɨka'aku'ɨwiyani kememutɨtɨ yatɨni kememɨteyuxexeiya herie miemekɨ, ne matsi mɨkɨ nepɨkanaki'erie. Kememɨteyuxexeiyakɨ xeikɨa teɨteri mekaniyukɨ'ɨwiyani, ne matsi 'iyaritsie pɨta nekaniyɨkɨ'ɨwiyani.
1SA 16:8 Hikɨ 'Itsahi 'Awinarawi kaniutahɨawe Tsamuheri hɨxie 'itakenike, peru Tsamuheri mɨpaɨ kaniutayɨni: —Yawé matsi 'ikɨ pɨka'anayexei.
1SA 16:9 Tsama titewakameta mana kaniutakeni, yaxeikɨa Tsamuheri kaniutayɨni: —'Ikɨta yaxeikɨa Yawé pɨka'enayexei.
1SA 16:10 'Itsahi 'atahutame yuniwema mana kaniwati'uitɨani hɨxiena, peru Tsamuheri mɨpaɨ katinitahɨawe: —Yawé xeime tɨma pɨka'anayexei.
1SA 16:11 ¿'Ikɨri 'aniwema yunaitɨ metehɨkɨ? 'Itsahi mɨpaɨ kaniutayɨni: —'Etsimuyumate peuyewetse, mɨkɨ muxatsi pɨwarehɨne. Tsamuheri mɨpaɨ katinitahɨawe: —Muwawiemiekɨ ketineutanɨ'a mɨkɨ nuayuke tepɨyɨwawe temiyeweiyani.
1SA 16:12 Merikɨte 'Itsahi katiniuta'aita mɨwitɨkiemiekɨ, hikɨ kani'atɨarieni. 'Aixɨa pɨti'uximayakai, temaikɨ 'aixɨa katiniyuxexeiyakaitɨni witsirehɨxitɨ. Yawé Tsamuheri mɨpaɨ katiniutahɨawe: —'Ikɨ kanihɨkɨtɨni, kenanukukeka keneukawiri hatseiti witsimu'ɨa.
1SA 16:13 Hikɨ Tsamuheri 'awa hatseiti muyema newatihana, 'iwamama wahɨxie temaikɨ kaniukawirieni. Hikɨ Yawé 'iyarieya tɨrɨkaɨyetɨ Rawiri hetsie kaninuani, mana mɨtiyehane hamatɨana 'uyeikatɨ kanayani. Mɨpaɨ tiuyurieka Tsamuheri Xama kanakunuani yukie.
1SA 16:14 Merikɨtsɨ Yawé 'iyarieya Tsahuri kaniuku'eirieni, mɨkɨ hetsiemieme Yawé kaneiyenɨ'airieni 'iyari 'axamɨ'ane mɨtiuka'eniwanikɨ mi'uximatɨakakɨ.
1SA 16:15 Te'i'uximayatsiriwamete mɨpaɨ mekatenitahɨawe: —Keperetimani 'ekɨ, Kakaɨyari hetsiemieme 'iyari 'axamɨtiuka'iyari mɨmatsi'uximatɨa.
1SA 16:16 'Ayumieme 'ekɨ te'a'uximayatsiriwamete ketiniwaruta'aitɨa xeime memɨtiwaunikɨ 'aripakɨ reutayuitɨaweme. Merikɨte kepauka 'iyari 'axamɨ'ane Kakaɨyari hetsɨa mieme matsikuwiwiyanitsie mɨkɨ katiniukayuitɨwamɨkɨ, 'ekɨ matsi 'aixɨa pekatineka'erietɨyeikamɨkɨ.
1SA 16:17 Tsahuri mɨpaɨ katiniwaruta'eiya: —'Aixɨa kaniyɨmɨkɨ, 'aixɨa tiuyuitɨwame xekenenekuwawiri xekenene'atɨiri.
1SA 16:18 Xewitɨ ti'uximayatame mɨpaɨ kaniutayɨni: —Ne xeime temaikɨ nepɨmate 'aripakɨ reutayuitɨaweme. Peuyutamiewe pɨkama, kwinimieme rakunieretɨ, heitseriemekɨ pɨtikuxata meta xeimieme pɨrayeitɨwa. Yawé hamatɨana puyeika piparewie. Paapaya 'Itsahi pɨtitewa, Wereni kiekame.
1SA 16:19 Hikɨ Tsahuri niuki kanenɨ'ani 'Itsahi mɨpaɨ mɨretahɨawarienikɨ: «Rawiri 'aniwe kenenanɨ'airi, muxatsi mɨwarehɨne».
1SA 16:20 Merikɨte 'Itsahi puxu kaniuwiya Tsahuri ranunɨ'airienike, 'ikwaite, nawi kɨxauriyaritsie kaxie winuyari hɨneme, xeimeta muxa nunutsi, Tsahuri katinenɨ'airieni yuniwe Rawiri 'utɨma.
1SA 16:21 Rawiri kepauka munua, Tsahuri parewietɨ kanayani meta matsi waɨkawa kaninaki'eriekaitɨni para 'iparewiwameya mayanikɨ kepauka memuyutakwinitsie.
1SA 16:22 Hikɨ Tsahuri 'Itsahi niuki kanenɨ'airieni: «Rawiri keneupitɨa neti'uximayatsirietɨ muyuhayewakɨ, ne 'aixɨa nepɨtimate».
1SA 16:23 Kepauka Kakaɨyari meiyenɨ'a 'iyari 'axamɨ'ane Tsahuri mukuwiwiyakai tikwinitɨanike, Rawiri yu'aripa 'utikwekwewetɨ katiniukayuitɨwakaitɨni. Tsahuri yuitɨarikayakɨ 'aixɨa katineka'erietɨyeikakaitɨni, hetsiena kanayeyeikakaitɨni 'iyari 'axamɨ'ane.
1SA 17:1 Merikɨtsɨ piritsiteutsixi yukuyaxima mekaniwarukuxeɨrieni memɨyukwiyukɨ, mekaniyukuxeɨrieni Tsuku mɨrakutewatsie 'aurie, mɨkɨ kiekari Kura kwieyaritsie pɨmieme. 'Epetsiramini mɨrakutewatsie mekanitiyaxe, mɨkɨ Tsuku meta 'Atseka wahixɨapa katini'anekaitɨni.
1SA 17:2 Yaxeikɨata Tsahuri kaniwarukuxeɨrieni 'ixaheritsixi, mayeweritsie 'Era mɨrayetewatsie mekaniu'axɨani, 'aixɨa mekateniuyu'uitɨani piritsiteutsixi mewatakwinike.
1SA 17:3 Piritsiteutsixi xeime hɨritsie mepɨkatekai, xeime hɨritsieta 'ixaheritsixi, wahixɨapa kanayewerikaitɨni 'aki hexeiyatɨ.
1SA 17:4 Merikɨte xewitɨ kuya yumemiwame piritsiteu tewiyari Kahati kiekame piritsiteutsixi mematiteitsie kanayeneni. Kuriyati pɨtitewakai, meta 'etsiwatɨkaku haika meturuyari putewikai.
1SA 17:5 Yumu'utsie wurunitse tepɨayari panakekai, kamixaya wurunitse tepɨayari peukamanekai, huta tewiyari heimana tamamata heimana 'auxɨwi kiruyari pɨrahetekai,
1SA 17:6 yu'ɨkatetsie neikamanakaitɨni wurunitse tepɨayari meta pitsika 'amɨtewi matɨkɨkai wurunitse tepɨayari pɨhɨkɨtɨkai.
1SA 17:7 'Ɨrɨ 'amɨtɨtɨ yumemiwame makwekai 'ɨkayari 'apupakai, kɨtsimeyaritsie tepɨa manuwekai 'atahuta kiruyari pɨrahetekai. Mɨkɨ hɨxie 'iparewiwame kaniumiekaitɨni tepɨa 'amɨyewa 'a'ɨtɨ hetsiena nunuwame.
1SA 17:8 Hikɨ Kuriyati kuyaxi 'ixaheritsixi wahɨxie 'utakeka, mɨpaɨ katiniwarutahiwieni wananaimatɨ: «¿Titayari 'aixɨa xeteyuku'uitɨwa xetatsitakwinike? Ne piritsiteu tewiyari nepɨhɨkɨ, xeme Tsahuri te'uximayatsiriwamete xepɨhɨkɨ. Xeime xekenanayexeiya mɨnetsitamienikɨ.
1SA 17:9 Xɨka heyutamieweni netsi'umieni, tame xehetsɨa tetenita'uximayatakuni, peru xɨka ne ne'imieni xeme xepɨtateta'uximayatsirieni waɨriyarika».
1SA 17:10 Piritsiteu tewiyari 'imatɨrieka mɨpaɨ kaniutayɨni: «Ne hikɨ kuyaxi 'ixaheritsixi nepɨxeta'iwa, xeime xekenanayexeiya nehamatɨa mɨyutamienikɨ».
1SA 17:11 Hikɨ Tsahuri yaxeikɨa 'ixaheritsixi, piritsiteu tewiyari me'u'enieka mepɨkayuwaɨri yamemɨtiyuanikɨ matsi waɨkawa mekaniutimamani.
1SA 17:12 Rawiri 'Itsahi kaninu'ayatɨkaitɨni, 'Epɨrata kiekame Wereni kiekame Kura kwieyaritsie. Tsahuri 'amuyeikakaitsie, 'Itsahi 'akaniyumaikaitɨniri, 'atahaikame yuniwema kaniwarexeiyakaitɨni.
1SA 17:13 Niwemama meyuhaikatɨ 'amepɨyumatekai mekanekɨnekaitɨni Tsahuri hamatɨa meheuyukwiyuka. 'Eriyáwi mexɨakame katinitewakaitɨni, hutarieka mieme, 'Awinarawi meta Tsama hairieka mieme pɨtitewakai.
1SA 17:14 Tsahuri 'ikɨ yuhaikatɨ mekaneweiya 'amemɨyumatekaikɨ. Matsi Rawiri 'etsimuyumaikai,
1SA 17:15 Tsahuri manuyeikakai kaneta'axekaitɨni, peru Wereni kani'axekaitɨni yupaapa muxatsimama mɨwahɨnekaikɨ.
1SA 17:16 Piritsiteu tewiyari Kuriyati, ximeri meta taikai kani'axekaitɨni 'ixaheritsixi wahɨxie yaxeikɨa tiwakuhɨawetɨ wananaimatɨ, huta tewiyari tukari mɨpaɨ kaniyɨanekaitɨni.
1SA 17:17 Merikɨte heiwa, 'Itsahi yuniwe Rawiri mɨpaɨ katiniutahɨawe: «'Ikɨ kɨtsiɨri tɨriku xarikiyari muyetei kenanuhani meta 'ikɨ tamamata paa, 'a'iwama mematiteitsie xeiya kenemie 'ikɨ pemɨwareyetɨirienikɨ.
1SA 17:18 'Ikɨta haikame kexiu kenanu'ɨiri kuyaxi tiwa'aitɨwame. Kenenierimie kememɨtehaka'iyuniwa 'a'iwama, xɨka 'aixɨa meteheu'erieka ya'ane pekaneni'atɨiriemɨkɨ.
1SA 17:19 'Era 'akiyari mayeweritsie pekaniwaretaxeiyamɨkɨ, Tsahuri kuyaximama 'ixaheritsixi wahamatɨa piritsiteutsixi memɨwarekwitɨwe».
1SA 17:20 Hikɨ Rawiri 'Itsahi kemɨtita'aitɨa katinaye'atɨani. Ximeri paitɨ kananukukeni, mana yumuxatsi xeime tihɨweme 'uhɨritɨaka kaneyani huyeta naime ratɨtɨ 'ikwaite. Kuyaxi mematiteitsie kaninuani yemekɨ, meyukuha'aritɨwakaku me'utihiwatɨ 'aixɨa meteku'uwekaku.
1SA 17:21 Piritsiteutsixi meta 'ixaheritsixi me'anuyutaxeiyatɨ mekateniu'uni.
1SA 17:22 Hikɨ Rawiri yu'ika tiuku'eirieka 'ikwaite tihɨweme hetsɨa, kaniutanautsa 'iwamama memati'utsie watahɨaweke.
1SA 17:23 Mexi tikuxatakai yu'iwama wahamatɨa, Kuriyati, piritsiteu tewiyari kuya Kahati kiekame kanayeyani piritsiteutsixi memati'utsie yaxeikɨata tawarita tiwatahɨaweke 'ixaheritsixi, hikɨ Rawiri kani'enieni.
1SA 17:24 Kepauka 'ixaheritsixi Kuriyati memuxei, waɨkawa mekaniutimamani mekaniyuta'una.
1SA 17:25 Mɨpaɨ mekaniutiyuanekaitɨni hipatɨ: «¿Mɨkɨ tewi xetexeiya 'ixaheritsixi tatsimariutatɨ tatsi'iwamɨtɨ mayeyeika? Kemɨ'ane mimieni me'iwa, ti'aitame waɨkawa katinipitɨamɨkɨ. Meta yuniwe kaniwitɨtɨamɨkɨ waniu meta 'iwamama mepɨkateyutuaka 'ikɨ kwieyaritsie».
1SA 17:26 Hikɨ Rawiri kaniwaruta'iwawiya hamatɨana memɨti'ukai: —¿Keme'utiyuane xɨka 'ikɨ piritsiteu tewiyari 'umieni tita tiyetuiriyarieni meta 'ixaheritsixi kemɨtatinanaima mɨtihayewakɨ? ¿Ketita 'ikɨ tiyu'erie piritsiteu tewiyari Kakaɨyari mɨkamate, Kakaɨyari mayeniere kuyaximama mɨwananaima wakwimɨtɨ?
1SA 17:27 Mɨkɨ mɨpaɨ mekatenitahɨawe: —Kemɨ'ane mimieni, tita mɨtiutaxatsie 'imikieri katiniyetuiriyariemɨkɨ.
1SA 17:28 'Eriyáwi Rawiri matsikaya teɨteri wahamatɨa tikuxatame kaniu'enieni, waɨkawa kaniuyeha'ani mɨkɨ hetsiemieme. Mɨpaɨ katinitatieni: —¿Kepetikuyuriene 'ekɨ 'ena paitɨ? ¿Kepaikɨ rahetsɨa muxatsi 'etsimemuyupaɨme makumawetsie pepɨwarehɨritaxɨ? Ne nekamanimaika. 'Ekɨtsɨ 'axapekatiniuka'iyarini, 'ekɨ xeikɨa pekaneyeyani penierimɨtɨ mɨrayukwitɨnetsie.
1SA 17:29 Rawiri mɨpaɨ katinita'eiya: —¿Kenetiuyuri kuta? Hikɨketɨ nepaniuka.
1SA 17:30 Hikɨ yu'iwa 'uku'eirieka kaneyani hipameta pɨta yaxeikɨa katiniwaruta'iwawiya, yaxeikɨata mɨkɨ mekatenitahɨawe.
1SA 17:31 Hipatɨ Rawiri memu'eni kemutainekai, Tsahuri mekateniutaxatɨani, hikɨ mɨwitɨkiemiekɨ katiniuta'aita.
1SA 17:32 Merikɨte Rawiri Tsahuri mɨpaɨ katiniutahɨawe: —Pɨkaheuyewetse xemɨmamaka 'ikɨ Piritsiteu tewiyari hepaɨtsita. Ne nekanitamiemɨkɨ.
1SA 17:33 Hikɨ Tsahuri mɨpaɨ katinita'eiya: —Pepɨkayɨwe pemitamieni 'ekɨ 'axaɨta 'ikɨ piritsiteu tewiyari. Mɨkɨ yumienetɨ kepauka mɨreitsutɨa, 'ekɨ matsi pekaninunutsitɨni 'akuxi.
1SA 17:34 Hikɨ Rawiri mɨpaɨ kaniutayɨni: —Ne nepaapa muxatsimama nekaniwahɨka. Merikɨte kepauka maye yanutsutɨni hutse muxa xeime 'uwiyame xɨka heihana,
1SA 17:35 nematsi nekanenukuweiyamɨkɨ ne'ikuwayatɨ kepaukake mitatuani. Kepauka ne 'ɨrawe netsikwaimɨtɨ mɨnetsi'anukuweiya, nepitiwaxɨani kepaukake nemimieni.
1SA 17:36 Xɨka ne mati'uximayatsiriwame nehɨkɨtɨtɨ mayetsi hutseri newatakukuyani, 'ikɨta yaxeikɨa piritsiteu tewiyari nepɨyurieni, Kakaɨyari mɨkamate hikɨ Kakaɨyari mayeniere kuyaximama mɨwananaima.
1SA 17:37 Kepauka maye meta hutse mɨnetsikuwiwiyakaitsie Yawé kemɨnetiutawikweitsitɨa, hikɨta yaxeikɨa 'ikɨ piritsiteu tewiyari hepaɨtsita kaneniparewimɨkɨ. Tsahuri mɨpaɨ katinitahɨawe: —Kenemietsɨ Yawé kematsihe'ɨwiyani.
1SA 17:38 Hikɨ Tsahuri Rawiri kaniutikemaritɨani kuya kamixaya kanenakatɨtɨani. Mu'uyatsie miemeta wurunitse tepɨayari kanenaketsirieni meta kɨmana meuyukunama yutawitsie.
1SA 17:39 Hikɨ Rawiri yu'ixipara kananatatɨni, yeyanike matsi pɨka'uyɨwekaxɨa mɨka'iyamakaikɨ. Tsahuri mɨpaɨ katiniutahɨawe: —Nepɨkayɨwe 'ikɨ naime neratɨtɨ nemɨyeyani, matsi mɨpaɨ nepɨkati'iyamate. Hikɨ mɨkɨ naime katinanutihɨnaxɨani.
1SA 17:40 Yu'itsɨ 'utikweka, hatɨa kaneyani 'auxɨwime ha'ute teteyari 'utiteɨxɨka yukɨtsiurita kaneikayatsa, yutexɨpame 'ahurietɨ piritsiteu tewiyari hɨxie 'ahurawa kaniuyani.
1SA 17:41 Yaxeikɨata Kuriyati 'ahurawa kanayani Rawiri hɨxie, yuparewiwame 'utɨa.
1SA 17:42 Rawiri kwi kaniuxeiya, mɨtemaikɨtɨkaikɨ kanitanenixeiya, 'aixɨa katiniyuxexeiyakaitɨni witsiraka'erietɨ yuhɨxie.
1SA 17:43 Mɨpaɨ katinitahɨawe 'inanaimatɨ: —¿Nekuta netitsɨkɨ titayari kɨye pe'akwetɨ mana peramie? Rawiri 'axakatinikɨhɨawekaitɨni, yukakaɨyarixima pɨwawawiriekai 'axamemiyurienikɨ.
1SA 17:44 Mɨpaɨta katinitahɨawe: —Kenaye'a nekamanimiemɨkɨ, wirɨkɨxi meta yeutari 'awaiyari nekaniwatimimɨkɨ.
1SA 17:45 Hikɨ Rawiri mɨpaɨ katinita'eiya: —'Ekɨ mana pekanamieni 'ixipara pe'akwetɨ, pitsika 'amɨtewi meta 'ɨrɨ, ne matsi mana nekaniumieni 'ahepa Yawé Naimekɨmɨtɨrɨkaɨye ne'ayexeiyatɨ, 'Ixaheri kuyaxiyari wakakaɨyari pemɨwananaima pewakwimɨtɨ.
1SA 17:46 Yawé hikɨ kwitɨwa kamaniyetuamɨkɨ, nemɨmatsimienikɨ 'amu'u nekananutixitemɨkɨ. Hikɨ kwitɨwa kuyaxi piritsiteutsixi wawaiyari nekaniwatimimɨkɨ wirɨkɨxi meta yeutari, 'ana mɨpaɨ mekatenetimaikuni naitsarie kwiepa memɨtama kename 'Ixaheri kwieyaritsie yuri Kakaɨyari 'uyeika.
1SA 17:47 Mɨpaɨ mekatenetimaikuni yunaitɨ hikɨ 'ena memɨ'uwa, Yawé 'ixipara meta pitsika pɨkaheuyehɨwa mɨtatsitawikweitsitɨanikɨ. Matsi Yawé pɨyumiene, mɨkɨ kanixeyetuamɨkɨ temɨxeha'iwakɨ.
1SA 17:48 Kepauka piritsiteu mayetɨa Rawiri mienike, mɨkɨta payetɨa yapauka 'unautsarɨmetɨ hepana hɨxiena mɨtakenikɨ.
1SA 17:49 Hikɨ yukɨtsiurita kaneukameni tete kaniwatituni, yutexupametsie 'ikayeka piritsiteu tewiyari kaniutatuaxa, kanatana tete kaneuyerɨni. Yuhɨximakɨ kwiepa kaneweni piritsiteu tewiyari.
1SA 17:50 Rawiri mɨpaɨ katine'iwa piritsiteu tewiyari: Kanimieni tete texɨpametsie yekaimekɨ, 'ixipara kahauyehɨatɨ.
1SA 17:51 Piritsiteu tewiyari manukateitsie kaniutanautsa, 'ixiparaya watihanaka kaniheyetsitɨani mu'uya kananutiwiteni. Kepauka piritsiteutsixi yu'ukiyari waɨkawa mauyutamiewe mɨkime memuxei mekaniutinautsa mekaniyuta'unaxɨani.
1SA 17:52 Hikɨ 'ixaheritsixi kuyaxi yaxeikɨa Kura hetsɨa miemete, mekanitsutɨani mewakwitɨwetɨ me'utihiwatɨ, Kahati mɨrakutewatsie paitɨ mekaniye'axɨani mewakwitɨwetɨ metatsiere 'Ekuruni kitenieyaritsie paitɨ. Tsakarahini huyeyari 'utɨma Kahati mautayune meta 'Ekuruni, naitɨ mɨkɨ 'utɨma piritsiteutsixi mekwikwi'itɨ mekaneutiheteitɨni.
1SA 17:53 Kepauka 'ixaheritsixi memɨte'uhayewaxɨ piritsiteutsixi mewaruweiyatɨ, mekanakunuaxɨani memakutekaitsie wapiinite metehanupinike.
1SA 17:54 Hikɨ Kerutsareme paitɨ Rawiri Kuriyati mu'uya kanetuni, peru 'ixiparateya yu'ixuriki kiiyarita katiniuti'uta.
1SA 17:55 Kepauka Rawiri muyumienekai piritsiteu tewiyari hamatɨa, Tsahuri 'ixeiyatɨ, 'Awinexi kuyaxi tiwa'aitɨwame mɨpaɨ katiniuta'iwawiya: —'Awinexi 'aku, ¿Kemɨ'ane mɨkɨ temaikɨ pupaapaya? —Neuxei ti'aitame, ne 'atsinepɨkatimate.
1SA 17:56 Ti'aitame mɨpaɨ katinita'aitɨani: —Kepaikɨ pɨhɨkɨ keneuti'iwau.
1SA 17:57 Hikɨ Rawiri kepauka munua, Kuriyati hemiekari 'akuxi piritsiteu mu'uya 'atutɨ, 'Awinexi Tsahuri hɨxie kaneiwitɨni.
1SA 17:58 Tsahuri mɨpaɨ katinita'iwawiya. —¿'Ekɨ temaikɨ, kemɨ'ane pepɨraniwe? Rawiri mɨpaɨ katinita'eiya: —'Itsahi Wereni kiekame nepunu'aya, katini'a'uximayatsiriwametɨni.
1SA 18:1 Merikɨtsɨ Rawiri Tsahuri yuhamatɨa metekuxatatɨ mete'utahayewakari, 'anatɨtɨ Tsahuri Rawiri pɨka'upitɨa para yukie mɨyemiekɨ yupaapa hetsɨa, 'ahura xeikɨa muyeikanikɨ ti'uximayatsirietɨ. Meta Kunatani Rawiri waɨkawa naki'erietɨ kanayani meta yɨkɨmana kemɨtiyunaki'erie hepaɨ katininaki'eriekitɨni.
1SA 18:3 Waɨkawa minaki'eriekaikɨ, tɨratu hamatɨana kaniuwewieni:
1SA 18:4 Yu'ixuriki menakuwiekai 'enakuhurieka Rawiri kaniuhuritɨani, yukamixa kanihuritɨani meta 'ixipara, yuhɨiyame yutupi naime katiniyetuirieni.
1SA 18:5 Tsepa hakewa Tsahuri Rawiri mutanɨ'awakai, yapɨraye'atɨwakai 'aixɨa 'anemekɨ, 'ayumieme Tsahuri yukuyaxima tiwa'aitɨwamekɨ kaneyeitɨani, kuyaxi waɨkawa mekaniyutemamawiekaitɨni hepaɨtsitana, meta Tsahuri kuyaximama tewa'aitɨwamete.
1SA 18:6 Merikɨte kepauka memakunuaxɨa kuyaxi, Rawiri piritsiteu tewiyari hemiekuri, 'ixaheritsixi yunaitɨ 'ukarawetsixi mekaniwayeyeixɨani ti'aitame Tsahuri me'anunakeke, mete'uyuitɨaximetɨ, mete'ukaye'atɨ, me'utikwitɨ,
1SA 18:7 waɨkawa meyutemamawietɨ mɨpaɨ mekaniutiyuanekaitɨni: «Tsahuri xeikuyaxiyari kaniwarekwini, matsi Rawiri tamamata kuyaxiyari kaniwarekwini».
1SA 18:8 Tsahuri 'u'eneka kememutiyuanekai hepaɨtsitana kaniuyeha'ani, mɨpaɨ kaniutayɨni: «Rawiri tamamata kuyaxiyari kaniyetuiriyarɨwani, ne matsi xeihɨkɨa xeikɨa. Kaneuyeweka xeikɨari 'ikɨ kwieyaritsie mɨtita'aitakɨ».
1SA 18:9 Hikɨ mana mɨtiyetɨa Tsahuri Rawiri 'aixɨa katixeiyatɨ kanayani.
1SA 18:10 Hikɨ 'uxa'arieka, Rawiri mexi 'aripakɨ tiyuitɨakai kemutiumiekai, 'iyari 'axamɨ'ane Kakaɨyari meiyenɨ'a Tsahuri hetsie kaninuani tikwinitɨanike, hikɨ Tsahuri yukiita kaniyeyeikakaitɨni mɨtaweka hepaɨ yɨanetɨ, pitsika yakɨ mɨtewi 'akwetɨ,
1SA 18:11 hutakɨa Rawiri kaniutamɨni, peru mɨkɨ kanikunaukwiwekaitɨni. Tsahuri mɨpaɨ putiku'eriwakai: «'Ikɨ 'ixumeritsie nepikuwieni».
1SA 18:12 Tsahuri mɨpaɨ katinimaikaitɨni kename Yawé 'iku'eiri, Rawiri hamatɨa pɨta 'uyeikakai. 'Ayumieme Rawiri 'ayemakatɨ kanayani.
1SA 18:13 'Ayumieme hɨxiena mɨka'uyeikanikɨ 'ateewa kaneinɨ'ani, xeimiriyari kuyaxi tiwa'aitɨwamekɨ 'eyeitɨaka, muwa mɨtiware'aitɨakakɨ.
1SA 18:14 Rawiri yakatinayu'iwakaitɨni tsepa hakewa memeyutakwi, Yawé hamatɨana 'uyeikatɨ miparewiekaikɨ.
1SA 18:15 Tsahuri 'ixeiyatɨ Rawiri kemɨrayu'i'iwakai, waɨkawa kanimakaxekaitɨni.
1SA 18:16 Hikɨ 'Ixaheri kwieyaritsie meta Kura kwieyaritsie kiekatari waɨkawa Rawiri mekaninaki'eriekaitɨni, mɨkɨ manuyeka mɨhɨkɨtɨkaikɨ.
1SA 18:17 Merikɨtsɨ heiwa Tsahuri Rawiri mɨpaɨ katiniutahɨawe: —Neniwe 'amɨyumate Merawi 'ena kaniukani, nekamaniyetuirieka pemitiwitɨnikɨ, peru pekamatɨ pekaniyumienemɨkɨ Yawé hetsiemieme, Mɨpaɨ Tsahuri katiniku'eriwakaitɨni: «'Aixɨa pɨyɨni nemamatsie mɨkamɨnikɨ, piritsiteutsixi matsi wahetsɨa mɨmɨnikɨ pɨta».
1SA 18:18 Hikɨ mɨpaɨ katinita'eiya Rawiri: —¿Ne tita netihɨkɨ? ¿'Ixaheritsie ne'iwama kemɨ'ane mepɨhɨme, yatɨni nepaapa 'iwamama, para ti'aitame munieya ne nemayeikanikɨ?
1SA 18:19 Hikɨ kepauka maye'a tukari yuniwe Merawi Rawiri mɨwitɨtɨanitsie, Tsahuri 'Ariheri Mekura kiekame kaniyetuirieni 'ɨyaya mayanikɨ.
1SA 18:20 Xewitɨta Tsahuri niweya, Mikari Rawiri kaniutihiwe'erieni. Tsahuri kepauka yamɨtiutaxatɨarie waɨkawa kaniuyukatemawieni,
1SA 18:21 mɨpaɨ katiniu'erieni: «Neniwe nepiwitɨtɨani mɨpaɨ nemɨtiwiniyakɨ, piritsiteutsixi memimienikɨ wakwinekaku». Hikɨ Tsahuri Rawiri tawarita mɨpaɨ katiniutahɨawe: —Hikɨri nemune pekanayeimɨkɨ.
1SA 18:22 Merikɨtsɨ Tsahuri te'i'uximayatsiriwamete mɨpaɨ katiniwaruta'aitɨani: —Rawiri yuxautame mɨpaɨ xeketenetaxatɨa: “Neuxei ti'aitame pɨmatsinenimaya, te'i'uximayatsiriwameteta yunaitɨ mepɨmatsinaki'erie. Yaketineutanaki'eri munieya pemayanikɨ”.
1SA 18:23 Mɨkɨ mɨpaɨ Rawiri mekateniutahɨawe, peru mɨkɨ mɨpaɨ katiniwaruta'eiya: —¿Ti'aitame munieya xɨka 'ayani 'aixɨa ti'aneme xete'erie? Nematsi nepɨkarexeiya tixaɨ nepɨkatinenaki'erie.
1SA 18:24 Tsahuri parewiwametemama mɨpaɨ mekatenitaxatɨani, Rawiri kemɨtiku'eriwakai,
1SA 18:25 matsi Tsahuri mɨpaɨ katiniwarutahɨawe: —Rawiri mɨpaɨ xeketenetahɨawi: “Ne neniwekɨ tixaɨtɨ nepɨkareuyehɨwa mɨnetiyetuirienikɨ hetsiena mieme. Ne 'inɨari pɨta neneuyehɨaka piritsiteutsixi waxieyame mɨnetsi'atɨirienikɨ, xeitsienituyari kename warekwi. Mɨkɨ nepɨtiwarakapitɨani kememɨnetsi'uyuri”. Matsi Tsahuri pinakekai yuheyemekɨ Rawiri piritsiteutsixi memimienikɨ.
1SA 18:26 Hikɨ Tsahuri 'iparewiwamete kepauka Rawiri memɨte'utaxatɨa, mɨkɨ matsi yɨkɨ pɨkatiu'eri ti'aitame munieya mayanikɨ, kemɨtiwawiriekai hepaɨtsita meta 'akuxi pɨka'aye'awekai kepauka mitipiniriekai.
1SA 18:27 Hikɨ Rawiri kaneyani yukuyaxima warawitɨtɨ 'anari huta tsienituyari piritsiteutsixi kaniwarekwini, Tsahuri 'inɨari kaniyetuirieni miwawiriekaikɨ. Hikɨ Tsahuri yuniwe Mikari kaniwitɨtɨani.
1SA 18:28 Tsahuri mɨpaɨ katinetimani, Yawé Rawiri hamatɨa muyeikakaikɨ meta niweya Mikari minaki'eriekaikɨ.
1SA 18:29 'Ayumieme Tsahuri Rawiri matsi waɨkawa 'ayemakatɨ kanayani, kemɨreuterixɨ tukarieya hepaɨtsita kaneye'uniekaitɨni.
1SA 18:30 Hikɨ kepauka piritsiteutsixi wa'ukiyarima memayekɨkakai meheuyukwiyuka 'ixaheritsixi mewatakwinike, Rawiri matsi kaniwara'iwakaitɨni, keyuri Tsahuri kuyaximama memanuyetei. 'Ayumieme 'aixɨa katinikuxaxatsiwakaitɨni hetsiena mieme.
1SA 19:1 Merikɨtsɨ Tsahuri yuniwe Kunatani katiniutaxatɨani meta te'i'uximayatsiriwamete yunaime Rawiri kememɨtemieni. Peru Kunatani waɨkawa Rawiri mɨnaki'eriekaikɨ,
1SA 19:2 mɨpaɨ Rawiri katiniutahɨawe: «Keni'akweriwayurieka nepaapa Tsahuri katinikuwauneni kehapaɨ mɨmatimieni. 'Ɨtsita muwa keneyuti'awieta 'uxa'a ximeri.
1SA 19:3 Ne nepaapa hamatɨa nepayeyani hakewa pemeyu'awietatsie, 'ahepaɨtsita nepɨreitaxatɨani. Kemetayɨni nekamatinitaxatɨamɨkɨ».
1SA 19:4 Kunatani yupaapa Tsahuri Rawiri hetsiemieme mɨpaɨ katiniutahɨawe: —'Ekɨ ti'aitame matsi mati'uximayatsiriwame Rawiri pepɨkatikwinitɨaka. Mɨkɨ matsi 'axapɨkatiyuriene, matsi 'aixɨa pɨtiyuriene 'ekɨ 'ahetsiemieme.
1SA 19:5 Kena'eriwani yutukari kemɨtiyetua piritsiteu tewiyari mɨmienikɨ, Yawé 'ixaheritsixi kaniwarupitɨani memɨtehayu'iwakɨ. 'Ekɨ matsi peniyutemawiekaitɨni pe'ixeiyatɨ. ¿Titayari Rawiri petimiemɨkɨni 'axapɨkatiyuriene?
1SA 19:6 Tsahuri kepauka Kunatani mu'eni, mɨpaɨ katinita'eiya: —Kaniyuritɨni Yawé kanayeniereni, kenemaine hikɨri Rawiri pɨkamɨni 'aixɨa nepɨtixeiyani.
1SA 19:7 Merikɨte Kunatani Rawiri 'utahɨaweka naime katinitaxatɨani Tsahuri kemutayɨ meta kaneiwitɨni Tsahuri ti'aitame hetsɨa, meripai kemɨti'uximayakai mɨpaɨ ti'uximayatɨ kanayani.
1SA 19:8 Hikɨ tawarita mekanayekɨne piritsiteutsixi mewatakwinike, Rawiri wahamatɨata kaneyani. Yaxeikɨata mɨkɨ mekaniwarukwini memuyuta'unaxɨakai marikakɨ.
1SA 19:9 Merikɨtsɨ Tsahuri yuparatsiyu kanayekateitɨni, tepɨa pitsikayari 'akwetɨ. Rawiri mexi tiyuitɨakai 'aripakɨ, yapauka 'iyari 'axamɨ'ane Yawé hetsɨa mieme Tsahuri hetsie kaninuani,
1SA 19:10 Tsahuri kanitamɨni pitsikakɨ 'ixumeritsie heixunike, peru Rawiri kaniunaukwieni, matsi xeikɨa 'ixumeritsie tepɨa kaneukeni. Mɨkɨ tɨkariyaritsie Rawiri kaniyuta'una.
1SA 19:11 Hikɨ Tsahuri Rawiri kie teɨteri kaniwarenɨ'ani, tɨkarikɨ memitahɨnikɨ 'uxa'ariekake memimienikɨ. Peru Mikari Rawiri 'ɨyaya mɨpaɨ katinitahɨawe: «Xɨka 'ikɨ tɨkariyaritsie peka'ata'una, 'uxa'a pekanimieriemɨkɨ».
1SA 19:12 Hikɨ yukii hixɨapa manenieretsie muwa Rawiri kanatuani, mɨkɨ mɨpaɨ katiniyuta'una.
1SA 19:13 Hikɨ Mikari kɨye kakaɨyariyari hepaɨ 'anekame 'utikweka, tsipu huxarieya mu'uyatsie 'ukawetsitɨaka, Rawiri muwakahupukaitsie kanikateni 'ixurikikɨ kanenuka'eima.
1SA 19:14 Kepauka Tsahuri teɨteri mɨwarenɨ'a Rawiri memɨwiyakɨ, Mikari mɨpaɨ katiniwarutahɨawe: «Katinikuyeni».
1SA 19:15 Peru Tsahuri tawarita kaniwarenɨ'ani Rawiri memanuhanakɨ: «Yu'itaritsie tsepanetɨ mɨrekaka, nemimienikɨ xekenene'atɨiri».
1SA 19:16 Kiita meheutahaxɨaka, 'itaritsie makatei teɨteri memixei kɨye kakaɨyariyari pɨhɨkɨtɨkai, yumu'utsie tsipu huxarieya kaniuwetsitɨakaitɨni.
1SA 19:17 Merikɨte Tsahuri Mikari mɨpaɨ katiniutatieni: —¿Titayari penetiu'itai? ¿Titayari nemi'unie muyuta'unakɨ petiupitɨa? Mɨkɨ mɨpaɨ katiniwaruta'eiya: —Xɨka neka'ipitɨanike waniu pɨnetsimienikekai.
1SA 19:18 Merikɨte 'utawikweka yuta'unakari, Rawiri kaneyani Xama mɨrakutewatsie Tsamuheri hetsɨa naime reitaxatɨanike Tsahuri kemiyurienekai. 'Ayumieme mɨkɨ yuhutatɨ Nayuti mɨrakutewatsie menekɨne mana mehetiyaxeke.
1SA 19:19 Kepauka Tsahuri mɨpaɨ mɨretima kename Rawiri Nayuti Xama heyeikakai,
1SA 19:20 yuteɨterima kaniwarenɨ'ani memeiwiyakɨ. Matsi pɨta Kakaɨyari niukametemama mekaniwaretaxeiya, Tsamuheri tiwarekuxaxatɨwame. Hikɨ Kakaɨyari 'iyarieya tɨrɨkaɨyetɨ Tsahuri teɨterimama wahetsie kaninuani, mɨkɨta wahamatɨa Kakaɨyari niukieya mekaniutaxata.
1SA 19:21 Tsahuri niuki 'u'enieka, hipameta teɨteri kaniwarenɨ'ani, yaxeikɨata mɨkɨ kaniwaruwiya mana meniyuhayewa. Tawarita hairieka kaniwarenɨ'ani, mɨkɨta yaxeikɨa mekaniuyɨni.
1SA 19:22 Tsahuri 'imatɨrieka yukɨmana kaneyani Xama hetsie, Tseku mɨrakutewatsie putsu matiniere kaniye'ani. Mɨpaɨ katiniuta'iwauni: —¿Tsamuheri meta Rawiri hakewa mepetitei? Xewitɨ mɨpaɨ katinita'eiya: —Nayuti Xamatsie mekanetiteni.
1SA 19:23 'Ayumieme Tsahuri muwaxeikɨa kaneyani, matsi Kakaɨyari 'iyarieya tɨrɨkaɨyetɨ hetsiena kaninuani, 'iyarita Tsahuri kaniwiya huye'utɨa naime tikuxatatɨ kaniuyeyani Nayuti Xama hetsie kaniuye'ani.
1SA 19:24 Hikɨ yu'ixɨriki kananutihɨna, kwiepa 'ukaitɨ mawetɨ, tɨkarikɨ tukarikɨ 'iyari kaniwiyakaitɨni Tsamuheri hɨxie. Xatsika mana kanayeneni: «¿Kamɨtsɨta Tsahuri Kakaɨyari niukameya tihɨkɨ?»
1SA 20:1 Merikɨtsɨ Rawiri Nayuti Xama mɨrakutewatsie kanayeyani, Kunatani manukatsie kaneyani. Mɨpaɨ katinita'iwawiya: —¿Ne kenetiuyuri? ¿Titakɨ 'axanetiuyuri yanutsɨtɨni nekapɨtiuyumi 'apaapa titayari netimiemɨkɨni?
1SA 20:2 Kunatani mɨpaɨ katinita'eiya: —¿Titayarikuta petimierieni? Pɨkatixaɨ matsi, nepaapa naime kemɨtiyuriene kanetinikuxaxatiwani, tsepanetɨ kwinimieme mɨkati'ane. Pɨkaneti'awitsirie, 'aixɨa pɨka'ane kepemaine.
1SA 20:3 Hikɨ Rawiri yurikɨ mɨpaɨ katinitahɨawe: —'Ekɨ pemɨnetsinaki'erie 'apaapa yakatinimaika, 'ayumieme xɨari mɨpaɨ pɨtiu'eri: “Yapɨkaretimani matsi Kunatani, mɨkanutuixiekakɨ”. Peru Yawé mayeniere hɨxie meta 'ekɨ 'ahɨxie mɨpaɨ nekanaineni, kanehuraniri nemɨmɨnikɨ.
1SA 20:4 Kunatani mɨpaɨ katinitahɨawe: —Kenetiyurieni yakenetineutahɨawi, yanekatiniyuriemɨkɨ.
1SA 20:5 Hikɨ Rawiri mɨpaɨ katinitahɨawe: —Pepɨtimate metseri mɨhekwa 'ixɨarariyari 'uxa'a mayani, nepɨrekwanikekai 'apaapa hamatɨa mexatsie. 'Aixɨa kaniyɨmɨkɨ nemɨneti'awietakɨ 'ɨtsita keneneupitɨa warie taikaike nemɨnuanikɨ.
1SA 20:6 Xɨka netsiheku'iwawani 'apaapa, Wereni nemɨmiekɨ kename ne'uyutawau 'ahetsɨa mɨpaɨ ketinetahɨawi, nekiekari meta ne'iwama muwa meheyuxeɨrie mawari mehewewienike metseri mɨhekwa hetsiemieme.
1SA 20:7 Xɨka mɨkɨ mɨpaɨ hetayɨni 'aixɨa kename 'ane, merikɨte 'ana kanimatsiɨkɨrimɨkɨ kename kanetsimiemɨkɨ. Xɨkata matsi heyeha'ani, mɨpaɨ mɨkɨ petinetimaimɨkɨ kenameri netsimiemɨkɨ.
1SA 20:8 Metsɨ Yawé hɨxie tɨratu pekaniuwewieni nehamatɨa, kename ti'a'uximayatsiriwame nehɨkɨ, 'ayumieme waɨkawa nepɨmatsiwawirie yurikɨ pemɨnetikuxaxatɨwanikɨ. Xɨka ne 'axanetiuyurieni mɨpaɨ peretimani, 'apaapa hetsɨa pepɨkanetsiyetuayani, 'ekɨ matsi keneneumi'a.
1SA 20:9 Kunatani mɨpaɨ katinitahɨawe: —Mɨpaɨ pepɨka'utaineni, ne mɨpaɨ nepɨkatiyurieni. Matsi xɨka neretimani nepaapa kename matsimiemɨkɨ, kwitɨwa mɨpaɨ nekamatinitaxatɨamɨkɨ.
1SA 20:10 Rawiri mɨpaɨ katinita'iwawiya: —Xɨka 'apaapa 'aixɨa kamatiu'eiya, ¿kemɨ'ane pɨnetitaxatɨani?
1SA 20:11 Hikɨ 'aixɨa mete'uxataka naimekɨ, Kunatani Rawiri kaniuta'inieni hɨritsie memakukɨnekɨ. Hikɨ mana me'u'uwatɨ,
1SA 20:12 Kunatani mɨpaɨ katinitahɨawe: —Rawiri 'aku Yawé 'ixaheritsixi wakakaɨyari hɨxie yurikɨ yanepɨmarahɨawe, warie yanepɨretimani 'ipaɨ 'upaukakaku nepaapa kemɨreku'eriwa kemɨmatsiyurimɨkɨ. Xɨka kamatsimiemɨkɨni yanepɨmatitaxatɨani.
1SA 20:13 Peru nepaapa xɨka matsimiemɨkɨni, neta pemɨ'ata'unakɨ xɨka nekamatiutaxatɨani, Yawé 'axakenetsi'uyurieni waɨkawa, 'ekɨta 'ahamatɨa ke'uyeikani nepaapa hamatɨa kemɨtiuyeikakai.
1SA 20:14 Kepauka Yawé mɨmatsiparewieni xɨka 'akuxi ne'uyeikani, keneneutinenimayata, nehetsie keneutanua nemɨkamierienikɨ.
1SA 20:15 Hatsuaku pepɨkatihayewani ne'iwama 'aixɨa petiwaxeiyatɨ, Yawé kepauka mɨwaka'una yunaime memɨmatsi'aye'unie.
1SA 20:16 Yawé ketiwarukwinitɨani memɨmatsi'aye'unie. Hikɨ mɨpaɨ Kunatani tɨratu katiniuwewieni Rawiri meta 'iwamama wahamatɨa,
1SA 20:17 kemɨtiyunaki'eriekai yukɨmana Rawiri mɨpaɨ mɨtinaki'eriekaikɨ. Mɨya mɨtinaki'eriekaikɨ, Rawiri kaniutawawirieni mɨkɨ tɨratu hepaɨtsita yamɨtayɨnikɨ.
1SA 20:18 Mɨpaɨta katinitahɨawe: —Metsa mɨhekwa 'ixɨarariyari 'uxa'a kanihɨkɨtɨni. Hikɨ mematsihetɨmaiyatɨ 'a'ɨpari xeikɨa mehexeiyatɨ mekameneta'iwaukuni.
1SA 20:19 Kahauyewekamekɨ, warie kenemie meripaitɨ hakewa pemeyuti'awietaxɨtsie, tete 'Etseheri mɨtitewa manuka 'aurie keneyuhayewani.
1SA 20:20 Yuri nemɨyɨaneni hepaɨ haikakɨa nekatinitamɨimɨkɨ 'ɨrɨkɨ.
1SA 20:21 Hikɨ xeime netsiparewiwame nekanitanɨ'amɨkɨ miwaumiekɨ. Mɨpaɨ xɨka nerehɨaweni: “Neuxei 'ɨrɨ kene'ɨimie 'ena hurawa pukaxɨri”. Mɨkɨ mɨpaɨ pɨti'inɨaritɨni kename 'ahepaɨtsita 'atsikati'ane pekaniyɨwemɨkɨ pemɨnuani. Yawé hɨxie yurikɨ nepaineni.
1SA 20:22 Peru xɨka 'ipaɨ nerehɨaweni: “Neuxei humapaitɨ 'ɨrɨ pekahu”, 'ana Yawé yapɨra'eriwani pemɨ'ata'unakɨ.
1SA 20:23 Merikɨte Yawé xeikɨa pɨhɨkɨ munierixɨ 'ekɨ matɨa ne ketemɨte'uxa.
1SA 20:24 Hikɨ Rawiri 'ɨtsita kaniyuti'awieta. Kepauka maye'a metsa mɨhekwa 'ixɨarariyari, ti'aitame tikwanike mexatsie kaniutiyerɨni,
1SA 20:25 'ixumeri 'aurie muwatiyeixatsie. Kunatani meta hɨxiena kanayerɨni, peru 'Awinexi Tsahuri 'aurie kaniutiyerɨni. Rawiri 'uparieya yuxaɨta kaniyuhayewa.
1SA 20:26 Hikɨ Tsahuri 'ana tukariyaritsie 'atsipɨka'utayɨ, matsi mɨpaɨ pɨtiu'eri: «Rawiri xɨari yɨkɨ katineiyurieni, 'ayumieme ka'itiyatɨ peyuhayewaxɨ, xɨari pɨkaheyɨwekaxɨa 'aixɨa meyuyurienikɨ».
1SA 20:27 Hikɨ 'uxa'arieka, hutarieka tukaritsie metseri mɨhekwa 'ixɨarariyari mekaniuwewieni, Rawiri yɨ'ɨparitsie pɨka'ayeixakai, hikɨ Tsahuri Kunatani mɨpaɨ katiniuta'iwawiya: —¿Keri titayari 'Itsahi nu'aya takai meta hikɨ kareukuyeixɨa mɨtikwanikɨ?
1SA 20:28 Kunatani mɨpaɨ katinita'eiya: —Rawiri nehetsɨa kaniyutawauni Wereni mɨmiekɨ.
1SA 20:29 Mɨpaɨ pɨnerahɨawekai: “Keneneupitɨa ximɨxi nemɨmiekɨ. Ne'iwama mawari mepewewieni wiyari mɨhekwa hetsiemieme nekiekaritsie, nemɨmiekɨ ne'iwa mɨpaɨ pɨnerahɨawekai. Ximɨxi keneneupitɨa nemɨkahayewenikɨ, ne'iwama pɨta nemɨwaxeiyamiekɨ”. Merikɨte 'ayumieme Rawiri pɨkahekuyeixɨawe 'ahamatɨa mɨtikwanikɨ.
1SA 20:30 Hikɨ Tsahuri waɨkawa ha'atɨ, Kunatani mɨpaɨ katiniutatieni: —'Ukaratsi 'axamɨtiuka'iyari pepɨnu'aya. Ne nekatimaikame peti'erie, 'Itsahi nu'aya matɨa kwinimieme xemɨteyunaki'erie, nepɨxeheutewiya 'ekɨ meta 'amaama pɨka'uka'iyari.
1SA 20:31 'Ayumieme mexi 'Itsahi nu'aya 'ena 'uyeikani, heitserie pepɨkahexeiya ti'aitame pemayanikɨ. 'Ayumieme mɨwawiemiekɨ ketineutanɨ'a, ke'atɨarieni kaneuyeweka mɨkɨ mɨmierienikɨ.
1SA 20:32 Kunatani mɨpaɨ katinita'eiya: —¿Titayari timierieni? ¿Kekuta tiuyuri?
1SA 20:33 Hikɨ Tsahuri ka'ita'eiyawetɨ tepɨa pitsikayari kaneihɨwirieni 'imienike. Hikɨ Kunatani mɨpaɨ katinetimani paapaya Rawiri kemɨtimiemɨkɨkai.
1SA 20:34 Kunatani 'uyeha'aka kananukukeni mexatsie 'utikaitɨ, 'ikwai hutarieka tukaritsie mieme pɨkatiukwai. Waɨkawa pɨyuheiweriekai paapaya 'axamutayɨkɨ Rawiri hepaɨtsita.
1SA 20:35 Kunatani 'uxa'arieka ximeri kaneyani yeuta Rawiri hamatɨa memeyukaxeiyakɨ. Xewitɨ 'iparewiwameya temaikɨtɨtɨ kaneweiyakaitɨni.
1SA 20:36 Mɨpaɨ Kunatani katinitahɨawe: «Nekatinitamɨimɨkɨ 'ɨrɨ pekaniwaumieni pe'unautsarɨmetɨ». Temaikɨ kaniutanautsa, hikɨ Kunatani 'ɨrɨkɨ katiniutamɨni teewa kaniukaweni.
1SA 20:37 Hikɨ kepauka 'ɨrɨ makawetsie maye'a temaikɨ, Kunatani kanitahiwieni: «Humapaitɨ pekamie 'ɨrɨ. Humapaitɨ.
1SA 20:38 Xeiya keneumietɨ, pepɨka'ukukiekani». Kunatani mɨpaɨ tiuhiwatɨ pɨkatihayewakai. Hikɨ temaikɨ heiku'ɨka hetsɨana kaninuani minɨ'a hetsɨa.
1SA 20:39 Ketɨtɨ mɨtiuyuriekai temaikɨ 'atsipɨkaretima, Kunatani Rawiri hamatɨa xeikɨa mepɨtemaikai ketɨtɨ memɨteyuriekai.
1SA 20:40 Hikɨ Kunatani yuparewiwame yu'ɨrɨte katiniyetuirieni, mɨpaɨ katinitahɨawe: «Kenemie kiekaritsie 'a'utɨma ketinakunuitɨa».
1SA 20:41 Hikɨ 'iparewiwameya heyaku, Rawiri mɨwayu'awietakaitsie kaniwayeyani, haikakɨa 'akatutsitaka kwiepa kaniukahɨximakeni. Hikɨ 'ana mekaniyutapa mekaniyutawaɨritɨani 'itsiyakɨ me'utitsuatɨ, kepaukake Rawiri muyunɨtɨa.
1SA 20:42 Hikɨ Kunatani Rawiri mɨpaɨ katiniutahɨawe: «'Atsipekati'akɨhɨawetɨ kenemie Yawé hɨxie tɨratu temuwewikɨ tame teyuhutatɨ, te'iwawirietɨ 'aixɨa mɨtiyurienikɨ nehetsie meta 'ahetsie metatsiere 'anuiwarima wahetsie meta nenuiwarima wahetsie». Hikɨ 'ana Rawiri kaneyani meta Kunatani kiekaritsie kanakunuani.
1SA 21:1 Hikɨ Rawiri Nuwi mɨrakutewatsie kaneyani mawari wewiwame 'Akimereki heu'iwatamieka, hikɨ Rawiri 'uxeiyaka kaniutimani. Mɨpaɨ katinita'iwawiya: —¿Titayari 'axaɨta pereyetɨa? ¿Kehapaɨtɨtɨri xewitɨtɨma pɨkamatsi'aweiya?
1SA 21:2 Mɨpaɨ katinita'eiya Rawiri: —Ti'aitame netsihetanɨ'aku nepeyetɨa, titakɨ mɨnereyenɨ'a nixewitɨ tɨma mɨpaɨ pɨkatimaika. Neteɨterima 'ari yanepɨtiwaretahɨawixɨ hakewa temetakaxeiya.
1SA 21:3 ¿Tita tikwaiwame perexeiya? Paa 'auxɨwime keneneumikwa, yatsepa tita tawarita pemɨrexeiyani.
1SA 21:4 Mawari wewiwame mɨpaɨ kaniutayɨni: —Paa kwaiwame nepɨkahexeiya. Paa tukita mieme mɨpatsie xeikɨa nekameniumiweni, xɨka xeikɨa 'ateɨterima 'ukarawetsixi mekawarekumaɨwani meta 'ekɨ.
1SA 21:5 Rawiri mɨpaɨ katinita'eiya: —Tame matsi kepauka temayekɨka hurawa tekaniyukahɨweni ta'ɨitama tepɨkawakumaɨwa. Matsi hikɨ teewa temetanɨ'arie tekanitahɨkatɨtɨri.
1SA 21:6 Hikɨ mawari wewiwame Rawiri paa mɨpatsie kaniyetuirieni, hipatɨ mumawekaikɨ. Mɨkɨ paa pɨhɨkɨtɨkai Yawé hɨxie memɨwakatɨkɨkai, hipame pɨta hehekwame xɨxɨkame meneutiyatsakaitɨniri tukaritsie mieme.
1SA 21:7 Hikɨ mɨkɨ tukaritsie xewitɨ muwa kaniyeyeikakaitɨni Tsahuri hetsɨa ti'uximayatame Yawé tukita kani'iwatakaitɨni. Mɨkɨ 'erumi tewiyari kanihɨkɨtɨkaitɨni Ruheki pɨtitewakai, muxatsi wahɨwemete Tsahuri hetsɨa miemete tiwa'aitɨwame pɨhɨkɨtɨkai.
1SA 21:8 'Arikeketa Rawiri 'Akimereki kaniuta'iwawiya: —¿Tepɨa pitsikayari pekarexeiya yatɨni 'ixipara? Ti'aitame mexɨima kanenetanɨ'ani, ne'ixipara nemakwenikekai nepɨkaheyɨwekaxɨa yaxeikɨa tihipame.
1SA 21:9 Mawari wewiwame mɨpaɨ katinita'eiya: —Kuriyati piritsiteu tewiyari 'ixiparaya xeikɨa nepexeiya, 'Era mayeweritsie pemími. Mana kanakani 'ixurikikɨ kani'eimeni, mawari wewiwame kamixaya warie kanakukani. Xɨka pe'awaɨriyani pemeikweni kaniyɨweni, 'ixiparate hipame nepɨkahexeiya. Rawiri mɨpaɨ kaniutayɨni: —Keneneukweitɨa, mɨkɨ 'aixɨa kaniyɨmɨkɨ.
1SA 21:10 Hikɨ Rawiri 'ana tukariyaritsie, Tsahuri hepaɨtsita 'akuxi kaniyu'unarɨmekaitɨni, Kahati kiekariyaritsie kaneyani, mana ti'aitame 'Akihitsi hetsɨa kanekuyeixɨani.
1SA 21:11 'Akihitsi mɨpaɨ mekateniutahɨawe 'iparewiwametemama: —¿'Ikɨ Rawiri katihɨkɨ naitsarie kwiepa ti'aitame? ¿Mɨkɨ katihɨkɨ kɨmanaya memɨte'utinei, mɨpaɨ mete'ukwitɨ: «Tsahuri kuyaxi xeimiriyari xeikɨa kaniwaruka'una, matsi Rawiri tamamata miriyari kaniwarukwini»?
1SA 21:12 Hikɨ Rawiri mɨkɨ tiu'enieka, kaniutimani waɨkawa 'Akihitsi hepaɨtsita, Kahati kiekariyaritsie ti'aitame.
1SA 21:13 Hikɨ 'ayumieme kepauka memiwiyarɨmekai, meuyuyehɨani hepaɨ kaniuyɨni, kanitsutɨani yɨmɨireme wahɨxie 'axayɨanetɨ tawekame hepaɨ 'itupari kanitixutsinakaitɨni 'aɨrikayatɨ.
1SA 21:14 Hikɨ 'ayumieme 'Akihitsi yuparewiwamete mɨtiwa'aitɨa mɨpaɨ katiniwarutahɨawe: —¿Neuxei perutsɨ xekateyuku'ɨwiya? Pɨtawe mɨkɨ tewi. ¿Titayari xenete'atɨiri?
1SA 21:15 ¿'Akuxi meteheuyewetse memɨtarɨwe, merikɨte titayari xete'i'atɨa nehɨxie 'axamɨtiyɨnikɨ? Neuxei neparatsiyuta xekenanuyehɨwa.
1SA 22:1 Merikɨtsɨ Rawiri Kahati mɨrakutewatsie kaniyeyani, kaniyuta'una terɨta 'Arurani mɨrakutewatsie 'aurie. 'Ukiyarimama meta hipatɨ maremama kepauka mɨpaɨ memɨtehetima, mekanekɨne muwa paitɨ meheixeiyayuka.
1SA 22:2 Hikɨ 'ana yumɨiretɨ mekanitinɨni memɨneniyɨakai, memɨtehapitɨkatei meta memɨte'uka'eniwakai. 'Ana mekanitinɨni nauka tsienituyari, Rawiri tiwa'aitɨwame hɨkɨtɨtɨ kaniyuhayewa.
1SA 22:3 Mana kaniyeyani Mitsipa mɨrakutewatsie Muhawi kwieyaritsie, mana ti'aitame mɨpaɨ katiniutawawirieni: «Nepaapama memɨ'axɨanikɨ 'ena xehamatɨa nepɨmatsiwawirie, kepauka yanemɨretimani Kakaɨyari kemɨtiyurimɨkɨ nehetsiemieme 'anake nekaniwarawitɨmieni».
1SA 22:4 Hikɨ mɨpaɨ katiniwaruhɨrita yupaapama Muhawi kwieyaritsie ti'aitame hetsɨa, mana mekanititekaitɨni kepauka Rawiri muyu'awietakai xeikɨa.
1SA 22:5 Merikɨtsɨ Kakaɨyari niukameya Kahari Rawiri mɨpaɨ katiniutahɨawe: «Matsi pɨkaheuyewetse pemɨ'a'awietaneni. 'Aixɨa matsi pɨyɨni xɨka penuani Kura kwieyaritsie». Hikɨ 'ayumieme Rawiri mana mɨyetɨa kaneyani Kareti hɨriyaritsie makɨkɨyexiya kaneutiyune.
1SA 22:6 Merikɨtsɨ Kiweya hɨriyaritsie Tsahuri 'etɨpiwari hetɨa kaniukateitɨni, mana pɨtiutamari Rawiri yaxeikɨa teɨterimama wahepaɨtsita. Tsahuri pitsika 'amɨtewi kanakwekaitɨni, 'iparewiwamete 'auriena mekana'utɨkateitɨni yunaitɨ,
1SA 22:7 mɨkɨ mɨpaɨ katiniwarutahɨawe: —Xekeneu'enana, Wenikamini nuiwarimama, ¿xemeta yuri xete'erie 'Itsahi nu'aya kename kwie xeyetuiriexɨani yaxeikɨa kaxie haraweriyari meta kuyaxi xeimiriyaritsie miemete meta xeitsienituyaritsie miemete wa'ukiyarima xehayeitɨanike xete'erie?
1SA 22:8 Hikɨke mɨpaɨ nepɨretima yunaitɨ titayari xemɨnete'uku'eiri, titayari nixewitɨ mɨkaneraxaxatɨwa neniwe meta 'Itsahi nu'aya hamatɨa tɨratu kememɨte'uwewi. Xeme nixewitɨ tɨma pɨkaneraxaxatɨwa neniwetɨtɨ Rawiri kemɨtiuparewi netsi'aye'unietɨ mayanikɨ, hikɨ kememɨ'ane.
1SA 22:9 Hikɨ Ruheki 'erumi tewiyari, mana Tsahuri parewiwamete wahamatɨa muyeikakai, mɨpaɨ katinitahɨawe: —Merikɨte ne Nuwi kiekariyaritsie 'Itsahi nu'aya nekanexeiya 'Akimereki 'Akituwi nu'aya hamatɨa katinekuxatakaitɨni.
1SA 22:10 Meta 'Akimereki Yawé kanetahɨawe Rawiri hetsiemieme meta 'ikwaite katineimini metatsiere Kuriyati 'ixiparaya kaneiyetuirieni.
1SA 22:11 Hikɨ mawari wewiwame 'Akimereki 'Akituwi nu'aya mɨwitɨkiemiekɨ ti'aitame katiniutanɨ'ani, yaxeikɨa yunaitɨ 'iwamama, Nuwi kiekariyaritsie mawari memɨwewiwametetɨkai. Kepauka memu'axɨa,
1SA 22:12 Tsahuri mɨpaɨ 'Akimereki katiniutahɨawe: —'Akituwi nu'aya, keneu'ena. 'Akimereki mɨpaɨ katinita'eiya. —Neti'aitɨwame, yakeneutayɨki nepɨmatsi'enieni.
1SA 22:13 Hikɨ Tsahuri mɨpaɨ katinitahɨawe: —¿Titayari 'ekɨ 'Itsahi nu'aya matɨa xenete'ayeheka? 'Ikwai pepɨtiyetuiri meta xeime 'ixipara pepikweitɨa. Yaxeikɨata Kakaɨyari peputahɨawixɨ hetsiena mieme, miparewienikɨ netsi'aye'unietɨ mayanikɨ, hikɨ kememɨ'ane.
1SA 22:14 Hikɨ 'Akimereki Tsahuri mɨpaɨ katiniuta'eiya: —Ti'aitame, ¿kemɨ'ane yunaitɨ te'a'uximayatsiriwamete 'aixɨa pɨtiuyeika, Rawiri 'amune hepaɨ, kuyaxi tiwa'aitɨwame meta paratsiyuta 'aixɨa mɨtixeiyarie?
1SA 22:15 ¿Hikɨke kuta netiuyuri Kakaɨyari nemutahɨawixɨ hetsiena mieme? Pɨkatixaɨtsietɨ. Pɨkaheuyewetse matsi neti'aitɨwame nehetsie pemɨrahɨpani, yaxeikɨata netɨɨriyama wahetsie matsi ne ti'a'uximayatsiriwame 'atsinepɨkatimate ketɨtɨxemɨyɨa.
1SA 22:16 Hikɨ ti'aitame mɨpaɨ katinitahɨawe: —'Akimereki, 'atukariri kanaye'ani, 'ekɨ xeikɨa pɨkatixaɨ 'atɨɨriyamata.
1SA 22:17 Merikɨte yapauka ti'aitame 'iparewiwamete memeweiyakai mɨpaɨ katiniwaruta'aitɨani: —Mawari wewiwamete Yawé hetsɨa miemete xekeniwarukuya, mɨkɨta Rawiri meputinɨi. Kemɨtiyu'unarɨmekai mepɨtemaikai, peru mɨpaɨ mepɨkanete'utahɨawixɨ. Peru ti'aitame parewiwamete mepɨka'uyuwaɨri mawari wewiwamete memɨwakwinikɨ.
1SA 22:18 'Ayumieme ti'aitame, Ruheki mɨpaɨ katiniuta'aitɨani: —Kamɨtsɨ 'ekɨ keniwarukuya. Hikɨ Ruheki 'erumi tewiyari kaniyuwaɨriya mɨwakwinikɨ. 'Ana tukariyaritsie nauka tewiyari heimana 'auxɨwi meyupaɨmeme kaniwarukwini mawari wewiwamete.
1SA 22:19 Hikɨ meta Nuwi kiekariyaritsie kaneyani, mawari wewiwamete wakie, 'ixiparakɨ kaniwarekwini 'ukitsi, 'ukarawetsixi, tɨɨri meta memutinunuiwaxɨke, tuurutsixi, puxuri meta muxatsi.
1SA 22:20 Peru xewitɨ 'Akimereki nu'aya, 'Awiyataxi titewatɨ kaniuyuta'una, kaneyani Rawiri hetsɨa.
1SA 22:21 Hikɨ 'Awiyataxi kepauka Rawiri mɨtiutaxatɨa kename mawari wewiwamete Yawé hetsɨa miemete Tsahuri warekwi,
1SA 22:22 hikɨ Rawiri 'Awiyataxi mɨpaɨ katiniutahɨawe: —'Ana paitɨ Ruheki 'Erumi tewiyari kepauka nemexeitsie Nuwi kiekariyaritsie, mɨpaɨ nekatinetimani Tsahuri katinitaxatɨanikekaitɨni. Netsɨ ya'aneme neheutiwiwiexɨaku 'a'iwama yunaitɨ mekaniukwi'iwa.
1SA 22:23 Peru pepɨkaheumaka. Nehamatɨa keneyuhayewani, ne nepɨmatsi'ɨwiyani. Kemɨ'ane mɨmatsimiemɨkɨni, nepɨta matsi kenetsi'umieni.
1SA 23:1 Merikɨtsɨ piritsiteutsixi Kehira kiekatari mekaniwarutakwini, watɨriku meta tinaime wapiini mekateniwarunawatsirieni. Kepauka Rawiri mɨtiutamari kemɨtiuyɨkai,
1SA 23:2 Yawé kaniuta'iwawiya: —¿Reuyewetse piritsiteutsixi nemɨwakwimiekɨ? Yawé mɨpaɨ katinita'eiya: —Kenemie, piritsiteutsixi keniwaretakuya, Kehira kiekariyari kenetawikweitsitɨa.
1SA 23:3 Matsi kuyaxi Rawiri mɨpaɨ mekateniutahɨawe: —'Ena Kura takwieyaritsie te'u'uwatɨtɨ tekanimamaka, matsi Kehira kiekariyaritsie xɨka tehekɨne kuyaxi piritsiteutsixi temɨwaretakwinikɨ.
1SA 23:4 Hikɨ Rawiri tawarita Yawé kaniutahɨawe, Kakaɨyari mɨpaɨ katinita'eiya: —Kenemie Kehira kiekariyaritsie, piritsiteutsixi nepɨmatsiyetuirieni pemɨwara'iwakɨ.
1SA 23:5 'Ayumieme Rawiri yuteɨterima wahamatɨa mana mekanekɨne, piritsiteutsixi mekaniwaretakwini. Mewara'iwaka Rawiri piritsiteutsixi watewama mekaniwarehapani. Mɨkɨ kiekaritsie kiekatari kaniwarutawikweitsitɨani.
1SA 23:6 Hikɨ kepauka 'Awiyataxi Kehira paitɨ metɨa 'Akimereki nu'aya Rawiri hetsɨa hetsiena munuakakɨ 'ana mawari wewiwame kamixaya kanehuriekaitɨni.
1SA 23:7 Merikɨtsɨ kepauka Tsahuri mɨtiutaxatɨarie kename Rawiri Kehira kwieyaritsie heyakai mɨpaɨ katiniuhiwa: «Kakaɨyari kaneniyetuirieni. Rawiri kiekaritsie kaneutahani 'aixɨa reukunakameta, muyuta'una pɨkayɨwe muwa».
1SA 23:8 Hikɨ yukuyaxima yunaime kaniwarukuxeɨrieni Rawiri memɨmieyukɨ meta teɨterimama, Kehira kiekariyari warie meha'utɨkɨneme.
1SA 23:9 Kepauka Rawiri mɨpaɨ mɨretima kename Tsahuri 'imiemɨtɨ 'uhamiekai. Hikɨ 'Awiyataxi kaniuta'inieni mawari wewiwame kamixaya mihuritɨanikɨ.
1SA 23:10 Rawiri kaniyutanenewieni: —Yawé 'ixaheritsixi wakakaɨyari, ne ti'a'uximayatsiriwame, nekatinimaika neya'aneme newiwiekaku, Tsahuri 'unamieni Kehira kiekariyari ka'unake.
1SA 23:11 ¿'Ena kiekatari meneteyetuani Tsahuri hetsɨa? ¿Mɨpaɨ memɨnetekuhɨawe, tiyuri kename Tsahuri 'uhamie? Yawé ne nemaniwawirieka, 'Ixaheri Kakaɨyarieya, nemɨtimaikakɨ kenetineutaxatɨa. Yawé mɨpaɨ katinita'eiya: —Huu, kaninuamɨkɨ.
1SA 23:12 Rawiri tawarita kanitahɨawe: —¿Kehira memɨtama metateyetuani Tsahuri hetsɨa? Yawé mɨpaɨ katinita'eiya: —Huu, mekanixeyetuakuni.
1SA 23:13 Hikɨ 'ayumieme Rawiri yuteɨterima wahamatɨa 'ataxewi tsienituyari meyupaɨmeme warawitɨtɨ Kehira mekanayekɨne, mekaniyu'unarumekaitɨni xaɨtsie meta xaɨtsie mehau'uwatɨ. Kepauka Tsahuri mɨtiutamari Rawiri kename Kehira hayeyakairi, kaniuta'imani memɨkayutakwinikɨ.
1SA 23:14 Merikɨte Rawiri kaniyu'awietakaitɨni makumawetsie, muwakitsie Tsipi hɨriyaritetsie. Tsahuri tukarikɨ tɨkarikɨ kaniwaunekaitɨni, matsi Kakaɨyari pɨka'iyetua hetsɨana.
1SA 23:15 Hikɨ Rawiri Huretsi 'uyeikatɨ, makumawetsie Tsipi kwieyaritsie, mɨpaɨ katinetimani kename Tsahuri 'ayeyakai 'ikuwaunetɨ 'imienike.
1SA 23:16 Kunatani Tsahuri nu'aya, Rawiri kanekɨhɨawe Huretsi mɨrakutewatsie, katinitaxatɨani mɨkatihayewanikɨ Kakaɨyaritsie tiwiyatɨ.
1SA 23:17 Mɨpaɨ katinitahɨawe: «Pepɨkaheumaka, nepaapa pɨkayɨwekaxɨani mɨmatsimieni. 'Ekɨ 'Ixaheri kwieyaritsie ti'aitame pepayani, neta 'a'aurie mutikeni nepayani. 'Ikɨ hepaɨtsita nepaapa katinimaikari».
1SA 23:18 Merikɨte 'ayumieme yuhutatɨ tɨratu me'uwewieka Yawé hɨxie, Kunatani yukie kaneyani, Rawiri meta Huretsi kaniyuhayewa.
1SA 23:19 Hikɨta Tsipi kiekatari Kiweya mekanekɨne, Tsahuri mɨpaɨ mekateniutahɨawe: —'Ekɨ pekatimate takwieyaritsie Rawiri kaniyu'awietani. Kakira hɨriyaritsie kaniuyeikani, terɨta Huretsi mɨrakutewatsie kaniyu'awietani makumawe tserietana.
1SA 23:20 'Ekɨ ti'aitame kepauka pemɨmie, Rawiri tekamaniyetuiriekuni.
1SA 23:21 Tsahuri mɨpaɨ katiniwarutahɨawe: —Yawé 'aixɨa kexeyurieka waɨkawamekɨ xemɨnete'utaxatɨakɨ.
1SA 23:22 Xekenehu, kemɨrekuyeika xekenetaxeiyani, yaxeikɨa xekeneku'iwawani kemɨ'ane meixeiya mɨpaɨ nekatinimarieka kename kwinimieme mɨkɨ reuyuta'awietawe.
1SA 23:23 'Aixɨa xeketeneti'iwau naitsarie hakewa meyu'awietane, hikɨ xepɨnetehaxatɨayuta yemekɨ hakewa meyu'awietani. Hikɨ 'ana ne xehamatɨa nekaniyemieni xɨka 'aku Rawiri muwa heyeikani, nekaneitiwaumɨkɨ yunaime Kura nuiwarimama watsata.
1SA 23:24 Merikɨte Tsipi kiekatari Tsahuri mekaniutateutɨani, yukwieyaritsie mekanekɨne. Rawiri meta teɨterimama Mahuni makumawetsie mekaniu'uwakaitɨni, 'Arawa mɨrakutewatsie makumawe tserieta.
1SA 23:25 Kepauka Rawiri mɨtiutaxatɨarie kename Tsahuri yuteɨterima warawitɨtɨ 'iwaunekai, Mahuni makumawe 'aiyaritɨa kanikayune. Mɨpaɨ retimaikata Tsahuri kaneyani kaniwaranukuweiya wa'utɨma.
1SA 23:26 Hikɨ Tsahuri hɨri warie mekaniutihukaitɨni, warienata pɨta Rawiri mekaniutihukaitɨni, memɨyuta'unakɨ meyumexɨitɨatɨ. Peru Tsahuri yuteɨterima wahamatɨa wahɨxie mepu'ukairi naitsarie. Kepauka 'ari memɨwa'axirɨmekai,
1SA 23:27 xewitɨ tixaxatame kaninuani, Tsahuri mɨpaɨ katiniutahɨawe: «Mexɨima ti'aitame piritsiteutsixi takwieyaritsie mepeye'axɨa mepɨtatsihekwitɨwe».
1SA 23:28 Hikɨ 'ayumieme Tsahuri katiniuhayewa Rawiri 'uweiyatɨ, kaniukunuani piritsiteutsixi pɨta mɨwaretakwinikɨ. Tsera-'Amarekuti mana 'ayumieme katinakutewaka.
1SA 23:29 Rawiri mana mɨyetɨa kaneyani 'Enikari mɨrakutewatsie muwa terɨta mayekanikɨ.
1SA 24:1 Merikɨtsɨ kepauka Tsahuri Piritsiteutsixi wakwinetɨ munua, katiniutaxatɨarieni kename Rawiri 'Enikari mɨrakutewatsie heyeika makumawetsie.
1SA 24:2 'Ayumieme Tsahuri kuyaxi me'ayehaikame kaniwarukuha'aritɨani, kuyakɨ 'aixɨa memɨ'anene 'Ixaheri kiekatari, mekanekɨne Kapura hɨriyaritsie meta mematihɨriwatsie Rawiri kuwaunetɨ meta kuyaximama.
1SA 24:3 Hikɨ muwa huyeta, muxatsi wakuraru makumane mekaneye'axɨani, mana 'ahurawa kaniterɨtatɨkaitɨni, muwa kaneutahani takwitake. Peru Rawiri 'upaitɨ kaneyu'awietakaitɨni terɨta, yukuyaxima wahamatɨa,
1SA 24:4 hikɨ mɨkɨ mɨpaɨ mekatenitahɨawe: —Hikɨrixɨa kanaye'ani, Yawé kepauka mɨpaɨ mɨmatiutahɨawixɨ: “Ne memɨmatsi'aye'unie nekamaniyetɨiriemɨkɨ, kemɨmatinake yapemɨtiyurienikɨ wahetsie”. Hikɨ Rawiri kananukukeni 'inɨkai 'umietɨ kaneyani Tsahuri manukateitsie, 'ana kamixaya kɨtsimeyari kaneukuxiteni.
1SA 24:5 Hikɨ kaniyuhɨawekaitɨni mɨya mɨtiuyuri hepaɨtsita,
1SA 24:6 'ayumieme yukuyaxima mɨpaɨ katiniwarutahɨawe: —Yawé 'aixɨa kenetsiyurieka para ti'aitame 'axanemɨkayurienikɨ xeme kemɨxetinake, ne hetsiena 'axanepɨkatiyurieni, mɨkɨ Yawé menayexei kanihɨkɨtɨni.
1SA 24:7 'Ayumieme Rawiri yukuyaxima kaniwaruta'imaiya, pɨkawarupitɨa Tsahuri memɨwiyakɨ. Hikɨ terɨta wayeyaka kaneyani huyeta.
1SA 24:8 Peru Rawiri pitaxeiyakai huyeta 'uyeneyuke mitahiwienikɨ, mɨpaɨ katinitahɨawe 'ehiwiwatɨ: —Neti'aitɨwame, Neti'aitɨwame. Tsahuri yu'utɨma kananakuniere, 'ana Rawiri kwiepa kaniukahɨximakeni titunumawetɨ,
1SA 24:9 Tsahuri mɨpaɨ katiniutahɨawe: —¿Titayari yuri petiwa'eririe 'ekɨ mɨpaɨ memɨmatekuhɨawe, kename nematsi'unie?
1SA 24:10 'Ekɨtsɨ pekatinetimani meta pekaniuniere hikɨ kemɨtiuyuri Yawé 'uwa terɨta. Ne neteɨterima mepɨnetsi'iniekai temɨmatsimienikɨ, peru ne nepɨkanewaɨri nemɨmatsimienikɨ, mɨpaɨ pɨta nepainekai: “Ne nepɨkanewaɨriya ti'aitame 'axanemɨyurienikɨ, mɨkɨ Yawé menayexei kanihɨkɨtɨni”.
1SA 24:11 Neuxei nepaapa, keneuxeiya 'a'ixuriki kɨtsimeyari nepahurie. Ne 'ikɨ 'etsiyeume nekaneukɨxiteni nepɨkamatsi'umi. Mɨpaɨ ketinemaika nehetsie tixaɨ 'axati'anetɨ pɨkatixuawe. 'Ekɨ matsi pekanenikuwauneni penetsimiemɨtɨ, tsepa ne 'axanekamatsi'uyuri.
1SA 24:12 Yawé tame teyuhutame tahetsie kerahɨani. Yawé katinimaika kemɨ'ane mɨtikɨhɨwirieni, peru ne hatsuaku nepɨkamatikwinitɨani.
1SA 24:13 Xatsika meripai mieme maine hepaɨ: “'Axamɨti'ane 'axamemɨte'u'iyari pɨwahetsiemieme”, 'ayumieme ne hatsuaku 'ekɨ 'axanepɨkamatsiyurieni.
1SA 24:14 »¿Kemɨ'ane pepukumiene 'ixaheritsixi tiwa'aitɨwame? ¿Kemɨ'ane pepukuhupiene? Mɨkamatsi'aye'unie pepɨkuweiyane, tsɨkɨ mɨmɨki nekanihɨkɨtɨni yatɨni tepɨ.
1SA 24:15 Yawé kehɨkɨtɨni tame teyuhutame tahetsie kerahɨani, yaxeikɨa ke'uniere kemɨ'ane 'axamɨtiyuriene, ne kenemɨtiyuriene ke'utiniere, 'aixɨa kenetsi'uyurieni meta 'ahepaɨtsita kenetsi'utawikweitsitɨani».
1SA 24:16 Hikɨ Rawiri kepauka tikuxatatɨ mɨtiuhayewaxɨ, Tsahuri mɨpaɨ katinita'iwawiya: —Rawiri neniwe, 'ekɨ pepetaine pemɨnetikuxaxatɨwa. Mɨpaɨ 'utayɨka kaniutatsuani karima.
1SA 24:17 Hikɨ Tsahuri Rawiri mɨpaɨ katinikuhɨawekaitɨni: —'Ekɨ matsi 'aixɨa pepɨtiuyeika keyuri ne, 'axamɨti'anekɨ 'aixɨa pepɨnetsi'uyuri.
1SA 24:18 'Ayumieme hikɨ pepɨnetsixeitsitɨa nehetsie ke'aixɨa pemɨtiuyuri, Yawé 'ahetsɨa pɨnetsiyetuakai peru 'ekɨ pepɨkanetsi'umi.
1SA 24:19 Xɨka matsi'aye'unie xewitɨ miemɨkɨni, mɨkɨ kaniyɨwenikeyu mimienikɨ. Yawé waɨkawa 'aixɨa kematsiyurieka pemɨnereuyehɨwirikɨ.
1SA 24:20 'Ayumieme hikɨ mɨpaɨ nepɨretima, 'ekɨ ti'aitame pekanayeimɨkɨ, 'Ixaheri kiekatari 'aixɨa mete'u'uwatɨ mekanakɨnikuni 'ahamatɨa.
1SA 24:21 Yurikɨ Yawé hɨxie yakenetineutahɨawi, nenuiwarima memɨkakwi'iwanikɨ meta kememɨtetetewa memɨkahatɨmaiyarienikɨ.
1SA 24:22 Hikɨ Rawiri yuri katinita'eririeni kemɨtitahɨawixɨ. Tsahuri 'anari yuparatsiyuta kaneyani, Rawiri meta kaneyani yukuyaxima wahamatɨa memɨwayu'awietakaitsie.
1SA 25:1 Merikɨtsɨ Tsamuheri kaniumɨni, Xamatsie kaniukateukieni matawerixɨtsie. 'Ixaheritsixi yunaitɨ mekaniyukuxeɨrieni meyuhiwerietɨ hetsiena mieme. Mɨyatiuyɨku Rawiri Mahuni makumawetsie kanakayune.
1SA 25:2 Merikɨte Mahuni mɨrakutewatsie mana tewi xewitɨ kaniukateitɨni waɨkawa rexeiyatɨ, xeimiriyari kapuratsixi meta haika miriyari muxatsi, Kaximeri mɨrakutewatsie wahuxari kanikaxikakaitɨni, yukwie mana mexeiyakaikɨ.
1SA 25:3 Nawari katinitewakaitɨni, Karewi kaninuiwarieyatɨkaitɨni. 'Awikahiri 'ɨyaya katinitewakaitɨni, mɨkɨ witsikatini'ɨimarikaitɨni timaiwetɨ, matsi Nawari pɨkayukɨhɨawekai 'axakatiniuka'iyarikaitɨni.
1SA 25:4 Hikɨ Rawiri makumawetsie 'uyeikatɨ, mɨpaɨ katinetimani kename Nawari yumuxatsi wahuxari hexinekai.
1SA 25:5 Merikɨte 'ayumieme temari tamamata kaniwarenɨ'ani mɨpaɨ tiwakuhɨawetɨ: «Kaximeri xekenehu, Nawari waɨritsika nehetsiemieme xekeneyetuiri.
1SA 25:6 Mɨpaɨ xeketenetahɨawi: “'Aixɨa xeketeu'erieka kayuwatɨ xehexeiyatɨ, yaxeikɨata 'atɨɨriyama meta 'ahetsɨa miemete te'uximayatamete.
1SA 25:7 Mɨpaɨ nepɨtiu'enaxɨ kename 'amuxatsima pewarexine. Meta pekatinimaika kepauka 'amuxatsi wahɨwemete tahamatɨa memu'uwakai, tepɨkawaru'uximatɨa hatsuaku. Kaximeritsie kepauka memɨtehɨtɨwekai, tixaɨtɨ tepɨkatewarunawatsiri.
1SA 25:8 Merikɨte te'a'uximayatsiriwamete keniwaruta'iwawiya, mɨkɨ mematenitaxatɨakuni. 'Aixɨa nepaineni 'ahepaɨtsita, xɨka 'aixɨa 'anemekɨ neteɨterima pewaranunake, 'ikɨ tukariyaritsie temawierika tekewewieka. Ximɨxi neuxei ketiniwayetuiri te'a'uximayatsiriwamete meta 'aniwe Rawiri tita pemɨrexeiyani”».
1SA 25:9 Hikɨ kepauka Rawiri kuyaximama memu'axɨa, Nawari mɨpaɨ mekateniutaxatɨani Rawiri kemainekai, hikɨ mana mekaniti'uni meta'ikwewatɨ.
1SA 25:10 Merikɨte Nawari mɨpaɨ katiniwaruta'eiya: —¿Kemɨ'aneri mɨkɨ Rawiri pɨhɨkɨ? ¿Kemɨ'ane 'Itsahi punu'aya? 'Ikɨ tukaritsie yumɨiretɨ te'uximayatamete mekaniwaruku'e'eiriwani yukutsiyarima.
1SA 25:11 ¿Titayari nepaa, nehaa, newai neteɨterima wahetsiemieme nemɨrexeiya, titayari netiwamikwani teɨteri nekawamateme hakewa memeyekɨ?
1SA 25:12 Hikɨ Rawiri nɨ'arimama yu'utɨma mekanekɨne. Kepauka memuta'axɨa naime mekatenitaxatɨani Nawari kemɨtiwarutahɨawixɨ.
1SA 25:13 Hikɨ Rawiri mɨpaɨ katiniwaruta'aitɨani: «Naime 'ixiparate xeketeneukuha'arita». Hikɨ yunaitɨ mekaniyukuha'aritɨani meta Rawiri. Kuyaxi nauka tsienituyari Rawiri mekaneweiya, huta tsienituyari mekaniyuhayewa tita memɨtehexeiyakai memɨte'ɨwiyanikɨ.
1SA 25:14 Hikɨ xewitɨ ti'uximayatame 'Awikahiri katiniutaxatɨani, Nawari 'ɨyaya: «Rawiri yuteɨterima makumawetsie heyeikatɨ kaniwareyenɨ'ani tati'aitɨwame memɨtawaɨritɨanikɨ, peru mɨkɨ 'axakatiniwaru'eiya.
1SA 25:15 Mɨkɨ teɨteri 'aixɨa mepɨtatexeiyakai. Kepaɨmexɨa tukari temu'uwakai wahamatɨa yeuta, hatsuaku mepɨkatatsi'u'uximatɨa, nitixaɨ mepɨkatate'unawatsiri.
1SA 25:16 Mɨkɨ tukarikɨ tɨkarikɨ mepɨtatsi'ɨwiyakai, mexi muxatsi tewahɨtɨwekai mana wa'aurie.
1SA 25:17 Hikɨ 'ekɨ 'aixɨa kepemɨtiyurieni keneutimaixɨa, karikɨtsɨ tati'aitɨwame hetsie 'axamɨti'ane katinamieni meta kiena kiekatari tahetsie. Mɨkɨ tewi 'axamɨtiuka'iyari pɨhɨkɨ, xewitɨ hamatɨana mɨtikuxatani pɨkayɨwe».
1SA 25:18 Hikɨ yapauka 'Awikahiri paa huta tsienituyari kaniukuxeɨrieni, winu hutame nawi kɨxauriyaritsie yemaneme, muxatsi yu'aɨxɨwime mewawarikime, tɨriku xarikiyari xeitewiyari heimana tamamata heimana 'auxɨwi kiruyari, kaxie takari patsaruyari tsuirayari mekaniutiwewieni xeitsienituyari meta huta tsienituyari xapa makaka patsaruyari tsuirayari mekaniutiwewieni. Hikɨ mɨkɨ naime tiuti'ikataka puxuri wahetsie,
1SA 25:19 mɨtiwa'aitɨa mɨpaɨ katiniwarutahɨawe: «Xeme meri xekeneuhuni neta xe'utɨma nepɨyemie». Peru yukɨna Nawari 'ikɨ hepaɨtsita pɨkatitaxatɨa.
1SA 25:20 'Awikahiri puxutsie 'anakaitɨ hɨritsie 'ukamietɨ Rawiri kaniuxeiya meta kuyaximama hepana me'ahukame, hikɨ mekananuyukunake.
1SA 25:21 Merikɨte Rawiri mɨpaɨ kaniutayɨkaitɨni: «Yakɨ xeikɨa pɨratɨa mɨkɨ tewi ketemɨte'ita'ɨwiri tewamama makumawetsie, para tixaɨ mɨkareuyehɨanikɨ. Hikɨ matsi pɨta 'axanetinakapitɨani 'aixɨa kenemɨtiparewi hepaɨtsita.
1SA 25:22 Hikɨ matsi Kakaɨyari 'axakenerakapitɨani kanetsinenimayatɨ xɨka yunaime Nawari teɨterimama nekawarukwini mexi kakahekɨariweni».
1SA 25:23 'Ayumieme kepauka 'Awikahiri Rawiri muxei, mexɨima yupuxutsie 'anakayaka hɨxiena kaniutihɨximakeni kwiepa paitɨ.
1SA 25:24 Hetɨana 'ukaweka mɨpaɨ katinitahɨawe: —Neti'aitɨwame, neuxei hikɨ keneneupitɨa nemɨmatitaxatɨanikɨ, pemɨnetsi'enienikɨ nekamaniwawirieka, ne nekaneyɨni nehetsie kerahɨiyani.
1SA 25:25 'Ekɨ matsi Nawari yuri pepɨkati'eririeka, kemɨtitewa yurikɨ yapɨtiuka'iyari. Mɨkɨ mɨpaɨ panuyɨne, “mɨka'uka'iyari” mɨpaɨ katinimariwani naitsarie. Ne matsi neti'aitɨwame 'anɨ'arima pemɨwarenɨ'a nepɨkawarexei.
1SA 25:26 »Peru hikɨ Yawé pɨkamatsipitɨa xuriya pemɨtayeurienikɨ 'ekɨ 'akɨmana yapetiwarakapitɨanike. Kaniyuritɨni Yawé kanayeyurini meta 'ekɨ. 'Ayumieme nepiwawirie kemɨ'ane memɨmatsi'aye'unie meta yunaitɨ memɨmatsimieku, Nawari hepaɨ mekatenikwinitɨariekuni.
1SA 25:27 Keneutanaki'eri 'ikɨ 'imikieri mati'uximayatsiriwame matsi'atɨiri, ketiniwarutamikwa 'ateɨterima.
1SA 25:28 Ne nepɨmatsiwawirie ti'a'uximayatsiriwame xɨka 'axanetiuyurieni kenetineuyehɨwirieka. Yurikɨ Yawé kamaniyetuiriemɨkɨ 'anuiwarima memɨkaheuyeweni mete'aitatɨ, nixewitɨ matsi 'ekɨ 'axapɨkamatsiyurieni, 'ekɨtsɨ Yawé hetsiemieme pekani'amieneni.
1SA 25:29 Kepauka xewitɨ mɨmatsi'uweiyani matsimiemɨtɨ, Yawé 'akakaɨyari 'atukari pɨ'ɨwiyani, peru matsi memɨmatsi'aye'unie 'ateewa mepexɨriyani memeuyewenikɨ.
1SA 25:30 'Ayumieme kepauka Yawé 'ixaheritsixi tiwa'aitɨwame mɨmatsi'ayeitɨa kemɨmatiutahɨawixɨ, meta 'Ixaheri kwieyaritsie kepauka mexɨakame mɨmatsi'ayeitɨa.
1SA 25:31 Merikɨte kepauka mɨpaɨ mɨtiyɨni, 'ekɨ 'ahetsie pepɨkarahɨpani, 'ahaxɨakɨ teɨteri pemɨwarukwikɨ 'atsimekateyuriekame. Mati'uximayatsiriwame matsi 'ekɨ kenena'eriwani kepauka Yawé 'aixɨa mɨtiyurieni 'ahetsiemieme».
1SA 25:32 Merikɨte 'ayumieme Rawiri 'Awikahiri mɨpaɨ katiniutahɨawe: —Yawé 'aixɨa kerahɨawaruwani 'Ixaheri Kakaɨyarieya, hikɨ mɨmatsiheyenɨ'akɨ temanuyukunakekɨ.
1SA 25:33 'Aixɨa peke'itɨarieka 'ekɨ 'aixɨa pemɨnetiutahɨawixɨkɨ, xuriya kenemɨtitayeurienikekai nekɨmana.
1SA 25:34 Yawé 'ixaheritsixi takakaɨyari, pɨkanetsi'upitɨa nemɨmatikwinitɨanikɨ kenemɨtiyuriemɨkɨkai. Hikɨ matsi yanematinahɨaweni, xɨka xeiya pekaheyeyanike temanuyukunakekɨ, 'uxa'a Nawari meta teɨterimama nixewitɨ pɨkahayenierenikekai. Yurikɨ Yawé kanayeyurini.
1SA 25:35 Merikɨte Rawiri mɨpaɨ titahɨaweka, tita mɨkɨ mɨti'atɨiriekai katinanupiini. Mɨpaɨta katinitahɨawe: —'Akie kenemie peka'a'iyaritɨatɨ, pekatinimaikari nekamananu'enieni. Kepemɨnetiutahɨawixɨ yanepɨtikayani.
1SA 25:36 Hikɨ kepauka 'Awikahiri yukie munua, Nawari 'ixɨarari kaniwewiekaitɨni yutemawietɨ waɨkawa kanitawekaitɨ, 'ayumieme mɨkɨ 'atsipɨkatitahɨawixɨ 'uxa'ariekake.
1SA 25:37 Merikɨte 'uxa'ariekake kepauka Nawari mukatawaipiekai 'anake katinitaxatɨani kemɨtiuyɨkai. Nawari matsi 'u'enaka yu'iyaritsie katiniutakwine hikɨ kaniuhurieni naitɨ.
1SA 25:38 Hikɨ tamamata tukari 'anukayaku, Yawé Nawari katiniukwinitɨani hikɨ kaniumɨni.
1SA 25:39 Kepauka Rawiri mɨpaɨ mɨretima kename Nawari hemɨkai, mɨpaɨ kaniutayɨni: «Yawé 'aixɨa ketikuxaxatsiwani kemɨtiuyuri, Nawari hepaɨtsita kenemɨtiyurienikekai, Yawé 'aixɨa pɨtiuyuri mati'uximayatsiriwame 'axamɨkatiyurienikɨ, matsi yapɨtiuyuri Nawari yamɨyɨnikɨ ke'axamɨtiuyuri hepaɨtsita». Hikɨ 'ayumieme Rawiri 'Awikahiri hetsɨa niuki kanenɨ'ani, 'iwawirietɨ mitiwitɨnikɨ 'ɨyaya mayanikɨ.
1SA 25:40 Kepauka nɨ'ariekate Kaximeri memu'axɨa, 'Awikahiri hamatɨa meteniutaxata mɨpaɨta metenitahɨawe: —Rawiri kataneyenɨ'ani kamaniwawirieka matsitiwitɨnikɨ.
1SA 25:41 Hikɨ mɨkɨ 'ukatunumakeka kwiepa tihɨximawetɨ mɨpaɨ kaniutayɨni: —Ne Rawiri ti'uximayatsiriwame nekanihɨkɨtɨni, kemaineni yanetiniyurimɨkɨ. Yanetina'eriwani te'i'uximayatsiriwamete wa'ɨkate nemɨtihauxinanikɨ.
1SA 25:42 Merikɨte yapauka 'Awikahiri kaniyukuha'aritɨani mɨyemiekɨ puxutsie nanutiyerɨni, te'i'uximayatsiriwamete 'ukarawetsixi 'iparewiwametemama yu'auxɨwitɨ mekaneiweiya, hikɨ Rawiri teɨterimama wa'utɨa mekanekɨne. 'Anari mɨkɨ kanitiwitɨni.
1SA 25:43 Meta Rawiri 'Akinuhani Ketsireri kiekame kanawitɨkɨkaitɨni, merikɨte mɨkɨ yuhutatɨ mepɨ'ɨitamamatɨkai.
1SA 25:44 Tsahuri yuniwe Mikari Rawiri muwitɨtɨakai Paritiheri Rahitsi nu'aya kaniuwitɨtɨakaitɨni, Karini nuiwame pɨhɨkɨtɨkai.
1SA 26:1 Merikɨtsɨ Tsipi kiekatari Kiweya mekanekɨne Tsahuri mɨpaɨ metetaxatɨanike: —¿Ti'aitame petimate, Rawiri Kakira yemuriyaritsie makumawe 'aurie meyu'awieta?
1SA 26:2 Hikɨ 'ayumieme Tsahuri kuyaxi kaniwarukuha'aritɨani haika miriyari 'ixaheritsixi mɨwaranayexei, Tsipi makumawetsie kanakayune Rawiri kuwaunetɨ.
1SA 26:3 Kakira yemuriyaritsie mekaniyuhayewa, makumawe hɨxie huye 'aurie. Hikɨ Rawiri makumawe 'uyeikatɨ, mɨpaɨ katinetimani kename Tsahuri 'iweiyakai,
1SA 26:4 'awie nenieremete kaniwarenɨ'ani hakewa meyeikakai timaimɨtɨ.
1SA 26:5 Hikɨ Tsahuri manuyeika kaneyani meta hakewa mehupukai katinetimani, yaxeikɨata 'Awinexi Nexi nu'aya kuyaxi tiwa'aitɨwame. Tsahuri hupaitɨ kanayekateitɨni, waritana naitsarie kuyaxi mekana'utɨkateitɨni.
1SA 26:6 Hikɨ 'ayumieme Rawiri 'Akimereki heti tewiyari meta 'Awitsahi Tsariwiya nu'aya Kuhawi 'iwaya kaniwaruta'iwawiya: —¿Kemɨ'ane nehamatɨa puyuwaɨriya Tsahuri manuka temuhukɨ? 'Awitsahi mɨpaɨ kaniutayɨni: —Ne 'ahamatɨa nekanimieni.
1SA 26:7 Merikɨte Rawiri 'Awitsahi hamatɨa 'ana tɨkariyaritsie mana mekaniye'axɨani, Tsahuri mekaniuxeiya mana mematiteitsie wahixɨapa kutsume, manutimu'utsie yupitsika 'uketɨ. 'Awinexi kuyaxi tiwa'aitɨwame 'auriena kaniukateitɨni kuyaxita wawarita mekanaheitɨkateitɨni.
1SA 26:8 'Awitsahi Rawiri mɨpaɨ katiniutahɨawe: —Hikɨ Kakaɨyari matsiyetuirie mɨmatsi'aye'unie. Nemimienikɨ keneneupitɨa. Pitsikayakɨ nekanenukatseixɨamɨkɨ, xeimieme nekatiniyuriemɨkɨ, pɨkaheuyeweka tawarita.
1SA 26:9 Hikɨ Rawiri 'Awitsahi mɨpaɨ katiniutahɨawe: —Pepɨka'ikumemiwani, Yawé pɨka'ihayewa matsi pi'uximatɨani kemɨ'ane menayexei mɨmieni.
1SA 26:10 Tawarita mɨpaɨ kaniutayɨni: —Kaniyuritɨni Yawé kemɨrayeyuri, mɨkɨtɨtɨ kanimiemɨkɨ. Yatɨni yɨkɨmana kanimɨmɨkɨ, yayumienetɨ kanemieriemɨkɨ.
1SA 26:11 Merikɨte Yawé ne kenetsiparewieka, para menayexei hetsie 'axanemɨkatiyurienikɨ, pitsikaya xeikɨa keneutikwe'i meta tekɨxieya haa muyema manutimu'utsie muwe keneutihani, kɨmɨ tekaniyehuni.
1SA 26:12 Hikɨ Rawiri yukɨmana pitsika kaniutikweni meta tekɨxi haa muyema, Tsahuri manutimu'utsie muwekai hikɨ mekanekɨne. Nixewitɨ matsi pɨkawaruxei nixewitɨ 'atsipɨkaretima yunaitɨ mekanikutsukaitɨni. Yawé waɨkawa mɨwareukutsitɨakɨ.
1SA 26:13 Hikɨ Rawiri 'anutaɨye kananuyani yemuritsiepai kaneutiyani, manari 'apautatewakai Tsahuri mematiheteitsie.
1SA 26:14 'Ayumieme kuyaxi kaniwarutahiwieni meta 'Awinexi Nexi nu'aya: —'Awinexi. ¿Penere'enie? 'Awinexi kanita'eiya: —¿Kemɨ'ane pepetaine ti'aitame pemehiwie?
1SA 26:15 Merikɨte Rawiri kanita'eiya: —'Awinexi, heiwa xeniu 'ekɨ kuya 'aixɨa pemɨ'ane petihɨkɨtɨni 'Ixaheri kwieyaritsie pemɨmariwa. ¿Titayari hikɨ mati'aitɨwame pekati'ɨwiyakai? Matsi nematinitaxatɨamɨkɨ xewitɨ kuya mana 'ahetsɨa kanitahani ti'aitame miemɨtɨ.
1SA 26:16 Kepemɨtiuyuri 'aixɨa pɨka'ane, kaniyuritɨni Yawé kemɨrayeyuri. 'Ekɨ matsi peuyewetse pemumɨnikɨ meta 'akuyaxima tixe'aitɨwame xemɨka'uta'ɨwiyaxɨkɨ Yawé menayexei. Tsiparatsɨ ¿hakewa ti'aitame pitsikaya pewe, meta haa muyema tekɨxi manutimu'ukai muwekai?
1SA 26:17 Merikɨte Tsahuri Rawiri niukieya hetimaika, mɨpaɨ kaniutayɨni: —Rawiri neniwe, 'ekɨ peretaine. Rawiri mɨpaɨ katinita'eiya: ―Huu neti'aitɨwame ne nekaniutaineni.
1SA 26:18 ¿Titayari neti'aitɨwame mati'uximayatsiriwame penetiuweiya? ¿Kekuta netiuyuri? ¿Ketitakɨkuta 'axanetiuyuri?
1SA 26:19 Hikɨ 'ekɨ ti'aitame nemaniwawirieka pemɨnetsi'enienikɨ. Xɨka Yawé tiyurieneni, 'ekɨ ti'aitame pemɨnetsi'aye'uniekakɨ, kenereuyehɨwirieka Yawé meta nemawarika kenaki'erieka. Mexɨka teɨteri meteyurieka, Yawé 'axakewaruyurieni, mekanenayeweweiyani 'ena kwie Yawé mɨnetsi'uxatɨatsie mɨpaɨ menetekɨhɨawetɨ, hipame pɨta kakaɨyarixi tiwa'uximayatsiriwame mekanenayeitɨwani.
1SA 26:20 Hikɨ matsi 'ekɨ 'aixɨa pɨkayɨni, pemɨnetsi'uweiya penetsimiemɨtɨ. ¿Titayari 'Ixaheri kwieyaritsie ti'aitame penetiwaune tepɨ nemɨhɨkɨtɨni hepaɨ, yanutsutɨni xɨ'au 'ɨtsita kiekame hepaɨ? Ne nemaniwawirieka 'ekɨ 'ateewa pemɨkanetsikumemiwanikɨ Yawé kanierekaku.
1SA 26:21 Hikɨ Tsahuri mɨpaɨ kaniutayɨni: —Ne 'axanepɨtiuyuri, Rawiri neniwe nehetsɨa kenenua. Nepɨkamatikwinitɨaniri. 'Ekɨ matsi pepɨkanetsi'umi pepɨnereuyehɨwiri, ne matsi nemɨka'uka'iyarini hepaɨ nepɨyɨane.
1SA 26:22 Hikɨ Rawiri mɨpaɨ katinita'eiya: —'Ekɨ ti'aitame, 'apitsika 'ena puwe, xeime kenetanɨ'a mati'uximayatsiriwame mekweimiekɨ.
1SA 26:23 Merikɨte Yawé tame taxexuime ketarakapitɨani heitseriemekɨ kemɨtiyupitɨwa, yurikɨ kemaine. Yawé hikɨ pɨnetsi'atɨakai hakewa nemɨyɨwekai nemɨmatsimienikɨ, ne matsi nepɨkanewaɨri 'ekɨ Yawé matsi'anayexei pemɨhɨkɨkɨ.
1SA 26:24 Hikɨ mɨpaɨ nepɨretima 'atukari waɨkawa pɨraye'akai, Yawé hikɨtane netukari raye'akame kehayeitɨaka meta kenetsiwikweitsitɨaka naimekɨ kenemɨtiuka'eniwa.
1SA 26:25 Tsahuri mɨpaɨ katinita'eiya: —Merikɨte Rawiri 'aixɨa peke'itɨarieka. Mariwemekɨ 'ekɨ pekatiniyurimɨkɨ, pekatinayu'iwakamɨkɨ naimekɨ. Hikɨ Rawiri kaneyani meta Tsahuri yuparatsiyuta kaneyani.
1SA 27:1 Merikɨtsɨ Rawiri mɨpaɨ katiniyukɨhɨawekaitɨni: «Tsieretsɨ hatsuaku Tsahuri pɨnetsimieni. 'Aixɨa kaniyɨmɨkɨ piritsiteutsixi wakwietsie nemɨneta'unakɨ mana nemekanikɨ. Mɨpaɨ Tsahuri netsiwaunetɨ 'Ixaheri kwieyaritsie kaniti'uximɨkɨ».
1SA 27:2 Rawiri meta kuyaximama 'ataxewi tsienituyari me'eweiyatɨ mekanekɨne Kahati kwieyaritsie mekaniye'axɨani, 'Akihitsi Mahuki nu'aya mɨra'aitakaitsie.
1SA 27:3 Hikɨ Rawiri meta kuyaximama mana mekaniyuhayewa, 'Akihitsi mana kaniwaruta'ɨwiya. Kuyaxi yuxexuitɨ yu'ɨitama meta yuniwema mekaniwaruwitɨkɨkaitɨni. Meta Rawiri yuhutame yu'ɨitama kaniwarawitɨkɨkaitɨni, 'Akinuhani Ketsireri kiekame meta 'Awikahiri Kaximeri kiekame, Nawari 'ɨyayatɨkai.
1SA 27:4 Kepauka Tsahuri mɨpaɨ mɨretima kename Rawiri Kahati kwieyaritsie 'uyuta'unakai, 'iweiyatɨri katiniuhayewa.
1SA 27:5 Merikɨte Rawiri 'Akihitsi mɨpaɨ katiniutahɨawe: «Xɨka yuritɨni 'ekɨ ti'aitame 'aixɨa penetiuxeiya, nekamaniwawirieka kiekari xaɨtsie pemɨnetsiyetuirienikɨ mana nekaniuyeikamɨkɨ, pɨkaheuyewetse 'ena 'ahurawa temukutenikɨ».
1SA 27:6 Hikɨ 'Akihitsi 'ana tukariyaritsie kwitɨwa Tsikɨraki kwieyari kaniyetuirieni, 'ayumieme hikɨ Tsikɨraki Kura kwieyaritsie te'aitamete katiniwapiinitɨni.
1SA 27:7 Merikɨte Rawiri piritsiteutsixi wakwietsie xeiwiyari heimana nauka metseri kaniuyurieni mana 'uyeikatɨ.
1SA 27:8 Rawiri kaneyeikakaitɨni yukuyaxima wahamatɨa metewanawatsirietɨwetɨ ketsureutsixi, kiritsitsixi meta 'amarekitsixi wahetsɨa, mɨkɨ mɨixa mekaniyuriekaitɨni mana mekutetɨ, Tsuhuxi kwieyaritsie 'Ekipitu kwieyaritsie paitɨ.
1SA 27:9 Merikɨte kepauka Rawiri wahetsɨa mɨye'axekai yunaime kaniwatakukuyakaitɨni 'ukitsi meta 'ukarawetsixi xeime tɨma 'ayeniereme pɨkakuhayeikawakai. Meta katiniware'arɨwakaitɨni muxatsi, wakaitsixi, puxuri, kameyutsixi meta wakemarite. Hikɨ 'Akihitsi hetsɨa kani'axeikaitɨni.
1SA 27:10 Hikɨ xɨka 'Akihitsi mɨpaɨ re'iwawiyani: «¿Kemɨ'ane kwieyaritsie pepɨrenawa?», Rawiri mɨpaɨ katiniku'eiyakaitɨni: «Kura kwieyari hetɨa meukayunetsie», yatɨni: «Kerameri nuiwarimama», yatɨni «Tatsutɨa hepatsie, kenitsixi memanu'uwatsie».
1SA 27:11 Rawiri xeime 'uki ya 'ukaratsitɨme pɨkawakuhayeikawakai 'ayeniereme, mɨpaɨ tiku'eriwatɨ xɨka Kahati kwieyaritsie xeime 'atɨani, mekanitaxanetakekaitɨni kemɨtiyurienekai hepaɨtsita. 'Ikɨ mɨya tiyurienetɨ xeikɨa piritsiteutsixi wakwietsie kaniuyeikakaitɨni, kepaɨmexɨa tukari muyuri mana 'uyeikatɨ.
1SA 27:12 Hikɨ 'Akihitsi Rawiri yuri katini'eririekaitɨni, mɨpaɨ katiniku'eriwakaitɨni: «Merikɨte Rawiri 'ixaheritsixi wa'uxiwe'erietɨ kaniyuhayewani yuteɨterima tɨme, xɨari yuheyeme pɨnetita'uximayatsirieni».
1SA 28:1 Merikɨtsɨ 'iya tukariyaritsie, piritsiteutsixi yukuyaxima mekaniwarukuxeɨriexɨani 'ixaheritsixi memɨwakwiyukɨ. 'Ayumieme 'Akihitsi Rawiri mɨpaɨ katiniutahɨawe: —Mɨpaɨ ketinemaika 'ekɨ meta 'akuyaxima nehamatɨa tekanitakwiyuni tanaitɨ.
1SA 28:2 Hikɨ Rawiri mɨpaɨ katinita'eiya: —'Aixɨa kaniyɨmɨkɨ, yapekatinetimaimɨkɨ 'ekɨ neti'aitɨwame, ne mati'uximayatsiriwame kenemɨtiyɨwe. 'Akihitsi mɨpaɨ kaniutayɨni: —Xɨka mɨpaɨ 'aneni, 'ena mɨtiyehane netsihɨweme pekanayeimɨkɨ.
1SA 28:3 Merikɨte kepauka Tsamuheri mumɨ, 'ixaheritsixi yunaitɨ mepɨyuheiwerietɨkatei hetsiena mieme, Xamatsie menikateuku mana mɨkiekarieyatɨkaikɨ. Tsahuri mɨkɨ kwieyaritsie, memɨtemaikai mɨkite wahamatɨa memɨtekuxata meta memɨteyukewaiya kaniwarayeweiyaxɨakaitɨni.
1SA 28:4 Hikɨ piritsiteutsixi me'uyukuxeurieka Tsuneni mɨrakutewatsie mekanikuyaxe. Meta Tsahuri 'ixaheritsixi warukuxeɨrieka mekanekɨne, Kiriwuha paitɨ mekanitiyaxe.
1SA 28:5 Peru kepauka Tsahuri piritsiteutsixi mɨwaruxei, kaniutimani waɨkawa yu'iyaritsie kaneuyuyehɨani.
1SA 28:6 'Ayumieme Yawé kaniutahɨawe, peru mɨkɨ pɨka'ita'ei, niheinɨtsitana ni'inɨari mupatsie Yawé hetsiemieme meta Kakaɨyari niukametemama waniuki.
1SA 28:7 Merikɨte 'ayumieme Tsahuri kuyaxi tewa'aitɨwamete, mɨpaɨ katiniwaruta'aitɨani: —Mɨtimaiwe xekenenekuwawiri mɨkite wahamatɨa mɨtikuxata, para nemumiekɨ nemeita'iwawiyakɨ. Mɨpaɨ mekatenita'eiya: —Xewitɨ 'Eniruxi kiekariyaritsie kanekani.
1SA 28:8 Hikɨ Tsahuri kemarite yukɨ 'anenekame 'anakatɨxɨaka, teɨteri yuhutatɨ mekaneiweiya 'uyɨwikaku 'ukaratsi hetsɨa. Tsahuri mɨpaɨ katinitahɨawe: —'Iyari kene'atɨa mɨyuhekɨatakɨ nemixeiyakɨ. Mɨpaɨ ketineuyuri kemɨ'ane nemɨmatsitaxatɨani.
1SA 28:9 Merikɨte 'ukaratsi mɨpaɨ kaniutayɨni: —¿Xɨari 'atsipepɨkatimate Tsahuri kemɨtiuyuri? 'Ikɨ kwieyaritsie mɨkite wahamatɨa memɨtekuxata meta memɨteyukewaiya kaniwarayeweiyaxɨani. 'Ekɨ penetsiwiniyamɨtɨ xeikɨa pekaniutaineni nemɨmierienikɨ.
1SA 28:10 Merikɨte Tsahuri mɨpaɨ katinita'eiya: —Kaniyuritɨni Yawé kemɨrayeniere, yurikɨ ne nematinikuhɨaweni nixewitɨ matsi pɨkamatikwinitɨani 'ikɨ hepaɨtsita.
1SA 28:11 'Ukaratsi mɨpaɨ kaniutayɨni: —¿Kemɨ'anekuta pepɨxeiyamɨkɨ? Tsahuri mɨpaɨ katinita'eiya: —Tsamuheri nekanixatani.
1SA 28:12 Hikɨ 'ukaratsi Tsamuheri 'uxeiyaka kaniutahiwa marikakɨ. Mɨpaɨ katinitahɨawe: —Kari 'ekɨ Tsahuri pepɨyɨane. ¿Titayari peneti'itaiyane?
1SA 28:13 Hikɨ ti'aitame mɨpaɨ katinitahɨawe: —Hawaikɨ pepɨkaheumaka. Tita pemɨtiuxei kenetineutaxatɨa. Mɨkɨ mɨpaɨ katinita'eiya: —'Iyari kwieta maukatewatsie 'atimieme nepɨxeiya.
1SA 28:14 Tsahuri mɨpaɨ katinita'iwawiya: —¿Kehapaɨ tiyuxexeiya? Mɨkɨ mɨpaɨ katinitahɨawe: —Kani'ukiratsitɨni matakɨ kaniyu'eimani kwieta maukatewatsie kanatimieni. Tsahuri mɨpaɨ retimaika Tsamuheri mɨyɨanekaikɨ, kaniutihɨximakeni titunumawetɨ kwiepa.
1SA 28:15 Hikɨ Tsamuheri Tsahuri mɨpaɨ katiniutahɨawe: —¿Titayari peneti'uximatɨa tawarita nemɨnuanikɨ? Tsahuri mɨpaɨ katinita'eiya: —Waɨkawa matsi nekanine'iyaritɨaka piritsiteutsixi mekanenimietɨweni meta Kakaɨyari kaneniuku'eirieni. Pɨkanetsiku'eiya nineheinɨtsikatsie meta Kakaɨyari niukametemama wahetsie. 'Ayumieme nemɨmatsitahɨawekɨ nekaninewaɨriya, kenemɨtiyurieni yapemɨnetitahɨawekɨ.
1SA 28:16 Hikɨ Tsamuheri mɨpaɨ katinita'eiya: —Kamɨtsɨ xɨka Yawé matsi'uku'eirieni matsi'aye'unietɨ pɨta xɨka yuhayewa, ¿Titayari ne penera'iwawiya?
1SA 28:17 Matsi Yawé yakatinaye'atɨani kemutayɨkai meripaitɨ: Mɨkɨ matsi kamaniunawairieni kepemɨti'aitametɨkai, Rawiri pɨta kaniyetuirieni.
1SA 28:18 'Ekɨ Yawé pemɨka'anu'enikɨ, 'amarekitsixi kemɨtiwahekakai pepɨkawarukwi, 'ayumieme hikɨ mɨkɨ mɨyakamatinikwinitɨaka.
1SA 28:19 Merikɨte Yawé piritsiteutsixi wahetsɨa kamaniyetuamɨkɨ meta 'ixaheritsixi. 'Ekɨ meta 'aniwema 'uxa'a nehamatɨa 'uwa xekaniyuhayewakakuni meta 'ixaheritsixi mekana'iwariekuni.
1SA 28:20 Hikɨ Tsahuri Tsamuheri 'u'enieka yapauka marikakɨ kanatiweni. Waɨkawa kaniutimani Tsamuheri mɨpaɨ mɨtitahɨawixɨkɨ meta haakakɨ kanimɨximekaitɨni, tɨkarikɨ tukarikɨ tixaɨ pɨkatitakwaiwekai.
1SA 28:21 Merikɨte 'ukaratsi Tsahuri 'uxeiyaka, mana 'ukaikame, mɨpaɨ katinitahɨawe: —Ne ti'a'uximayatsiriwame yanepɨtikatɨa kepemɨnetiu'aitɨa kepemɨnetiutahɨawixɨ, netukari neyetuatɨ.
1SA 28:22 Hikɨta 'ekɨ kenenanu'eni pekatinikwaimɨkɨ 'ikwai nepɨkawewieni, mɨpaɨ peyukamaime 'ahuyeta pekaniyemieni.
1SA 28:23 Hikɨ Tsahuri kaniyuku'imawakaitɨni. Yaxeikɨata 'iparewiwamete mekatenikɨhɨawekaitɨni 'ukaratsi kemɨtikɨhɨawekai, 'imatɨrieka kaniyuwaɨriya. Kwiepa 'anukukeka 'utatsie kanayerɨni.
1SA 28:24 Merikɨte 'ukaratsi yukie tsikeru kaniweriyakaitɨni, mɨkɨ kaniumieni meta tɨriku tɨxiyari kaniupɨna, tsuirayari kaniutiwewieni kanitikwaxiya.
1SA 28:25 Hikɨ Tsahuri katiniukwani meta 'iparewiwamete. 'Ana tɨkariyaritsie mete'ukwaka mekanayekɨne.
1SA 29:1 Merikɨtsɨ piritsiteutsixi wa'ukiyarima yukuyaxima yunaime 'Apeki kiekariyaritsie mekaniwarukuxeɨrieni. Meta 'ixaheritsixi haixa mawietsie 'aurie Ketsireri mɨrakutewatsie mekaniyuhayewa.
1SA 29:2 Hikɨ kuyaxi wa'ukiyarima piritsiteutsixi mekaniwaruti'inɨata, hipatɨ wa'ukiyarima xeitsienituyari mekaniwaruwitɨkɨkaitɨni, hipatɨta xeimiriyari. 'Akihitsi meta Rawiri yukuyaxima warawitɨtɨ wa'utɨa mekaniuhukaitɨni.
1SA 29:3 Hikɨ kuyaxi piritsiteutsixi wa'ukiyarima 'Akihitsi mɨpaɨ mekateniuta'iwawiya: —'Ikɨ hepɨrayutsixi teɨteriyari, ¿'ena kemeteyurie? 'Akihitsi mɨpaɨ katiniwaruta'eiya: —Neuxei 'ikɨ Rawiri kanihɨkɨtɨni meripaitɨ Tsahuri mɨti'uximayatsiriekai 'Ixaheritsie ti'aitame. Matsi hikɨri xeiwiyari heimana nehamatɨa kaniuyeikani, kepaukapai temuyutaxewirixɨtsie, tixaɨ hetsiena nepɨkatikaxeiyawe para yuri nemɨkati'eririekakɨ.
1SA 29:4 Hikɨ kuyaxi piritsiteutsixi wa'ukiriyama, 'Akihitsi hepaɨtsita meha'atɨ mɨpaɨ mekatenita'aitɨani: —Keniwaranɨnɨ'a memɨyehukɨ hakewa kwie pemɨwarexatɨa. Temɨtakwiyutsie memɨtatsi'anuweiyakɨ pepɨkawapitɨaka, nɨkahɨrixɨa tame pɨta metatsihetakwini. 'Aixɨa kaniuyuyuriweni tiyu'aitɨwame hetsɨa mɨreiyehɨwirienikɨ takuyaxima watayuniyame.
1SA 29:5 'Ikɨ Rawiri kanihɨkɨtɨni 'ixaheritsixi meminɨawa mete'ukaye'atɨ mɨpaɨ mete'ukwitɨ: «Tsahuri xeimiriyari kaniwarukwini, peru Rawiri tamamata miriyari».
1SA 29:6 Hikɨ mɨpaɨ tikuhɨawaruwatɨ 'Akihitsi Rawiri kaniuta'inieni, mɨpaɨ katinitahɨawe: —Kaniyuritɨni Yawé kemɨrayeniere, 'ekɨ tewi 'aixɨa pemɨtiuka'iyari pekanihɨkɨtɨni, ne yanepɨra'eriwakaku temɨtakwiyutsie pemɨnetsi'anuweiyakɨ. Kepauka pemɨnua nehetsɨa tixaɨ nepɨkatikaxeiyawe 'ahetsie 'axamɨti'ane, para yuri nemɨkamati'eririekakɨ. Peru piritsiteutsixi wa'ukiyarima yemekɨ 'aixɨa mepɨkamatexeiya.
1SA 29:7 'Ayumieme ne mɨpaɨ nepɨra'eriwa, 'akie kenemie 'aixɨa 'iyari pekawahaxɨatɨatɨ.
1SA 29:8 Hikɨ Rawiri mɨpaɨ 'Akihitsi katiniutahɨawe: —¿Ketita petiukaxei 'axamɨti'ane? ¿'Ekɨ neti'aitɨwame tita petiukaxei mati'uximayatsiriwame hetsie, kepauka nemɨnetaxewirixɨtsie paitɨ 'atsita hikɨ? ¿Titayari mekanetepitɨa neti'aitɨwame meta ti'aitame memaye'unie wahamatɨa nemɨnetamienikɨ?
1SA 29:9 'Akihitsi mɨpaɨ katinita'eiya: —Ne nekatinimaika nehetsie 'ekɨ Kakaɨyari niuki tuayameya hepaɨ pekani'aneni. Peru piritsiteutsixi tewa'aitɨwamete mɨpaɨ mekaniutiyuani pemɨkamiekɨ 'ekɨ tahamatɨa temɨtakwiyutsie.
1SA 29:10 Hikɨ 'uxa'a ximeripai 'ekɨ meta mati'aitɨwame te'uximayatsiriwamete 'ahamatɨa memeyekɨ, 'amɨtikahekɨare xekaniyehuni.
1SA 29:11 Hikɨ 'uxa'arieka Rawiri meta kuyaximama ximeripai mekananuku'uni, piritsiteutsixi wakwieyaritsie mekanekɨne. Peru piritsiteutsixi Ketsireri hepa mekanekɨne.
1SA 30:1 Merikɨtsɨ Rawiri kuyaximama, hairieka tukaritsie Tsikɨraki mekaniu'axɨani, mana 'amarekitsixi Nekexi kwieyaritsie mekanitahaxɨakaitɨni meta Tsikɨraki kiekariyari mekaniutataiya.
1SA 30:2 'Ukarawetsixi mekaniwarehapani, mana yunaime memɨte'u'uwakai 'amemɨyumate meta 'etsimemɨyumate. Peru 'ayɨwekatɨka nixeime mepɨka'umi.
1SA 30:3 Hikɨ kepauka Rawiri yukuyaxima wahamatɨa memu'axɨa, wakiekari kaniutataiyariekaitɨni, wa'ɨitama meta waniwema mekanehapaniekaitɨni.
1SA 30:4 Merikɨte Rawiri, hamatɨana memu'uwakai mekaniutitsuani me'utihiwatɨ kepaukake memuti'uxixɨ mepɨte'uhayewaxɨ.
1SA 30:5 Rawiri 'ɨitamama yuhutatɨ mekananutaxɨriyakaitɨni, 'Akinuhani Ketsireri kiekame meta 'Awikahiri Nawari Kaximeri kiekame 'ɨyayatɨkai.
1SA 30:6 Hikɨ Rawiri kaneumakaitɨni, karikɨ kuyaximama me'itituaxixɨanike pɨ'eriekai mɨpaɨ memɨtekuxatakaikɨ, memɨte'uka'eniwakaikɨ yuniwema yunaime memɨwarutatɨmaikɨ. Matsi Rawiri kaniutɨrɨkariyarieni, Yawé yukakaɨyari hetsie yuri ti'erietɨ.
1SA 30:7 'Ayumieme mawari wewiwame 'Awiyataxi 'Akimereki nu'aya mɨpaɨ katiniutahɨawe: —Mawari wewiwame kamixaya 'etsimɨnena kenehurimie. 'Awiyataxi yapauka kani'atɨirieni,
1SA 30:8 Rawiri Yawé kaniutahɨawe: —¿'Ikɨ tenawayamete netiwaranukuweiya? ¿Netiwaranuku'axiwe? Yawé mɨpaɨ katinita'eiya: —Keniwaranukuweiya. Pekaniwaranuku'aximɨkɨ memehapanie pekaniwaretawikweitsitɨamɨkɨ.
1SA 30:9 Hikɨ Rawiri 'ataxewi tsienituyari yukuyaxima wahamatɨa kaneyani, Wetsuxi 'akiyaritsie meheye'axɨanike. Mana mekaniyuhayewa
1SA 30:10 huta tsienituyari kuyaxi, 'akitsie memanukɨnekɨ mepɨka'uyɨwekaxɨa memu'u'uxekaikɨ. Hikɨ Rawiri nauka tsienituyari yukuyaxima xeikɨa warawitɨtɨ kaneyani.
1SA 30:11 Hikɨ Rawiri teɨterimama xeime 'ekipitutanaka makumawetsie mekaniutaxeiya, Rawiri hetsɨa mekani'atɨani. Hikɨ mekatenimini meta mete'enuharitɨa,
1SA 30:12 xapa takari makaka tsuirayari xeime mekanimini meta hutame kaxie patsaruyari tsuirayari, matsi haika tukari haika tɨkari tixaɨ pɨkatikwakai. 'Ekipitu kiekame tiukwaka 'aixɨa katineka'erietɨyani.
1SA 30:13 Hikɨ Rawiri mɨpaɨ katinita'iwawiya: —¿Kemɨ'ane rahetsɨa pepɨti'uximaya? ¿Hakewa pepeyetɨa? Mɨkɨ mɨpaɨ katinita'eiya: —'Ekipitutanaka nepɨhɨkɨ, waɨriyarika ti'uximayatame xeime 'amareki tewiyari hetsiemieme. Haika tukari nanukamieni nemɨtikuyekai, neti'aitɨwame kaneniuku'eirieni.
1SA 30:14 Kereteutsixi tau manatineika tserieta memɨtamakai tekateniwarekunawatsirieni, Kura kwieyaritsie meta Karewi kwieyaritsie meta Tsikɨraki kiekariyari tetehetataiyaxɨ.
1SA 30:15 Hikɨ Rawiri mɨpaɨ katinita'iwawiya: —¿Mɨkɨ tenawayamete hakewa mepe'uwa wahetsɨa ketananuwitɨki? 'Ekipitu kiekame mɨpaɨ katinita'eiya: —Kakaɨyari hɨxie 'ekɨ yakenetineutahɨawi, kename pekanetsimieni meta neti'aitɨwame hetsɨa pekanetsiyetuani. Mɨpaɨ netimaitɨ nekaxenanuwitɨmɨkɨ hakewa memekutei tenawayamete.
1SA 30:16 Merikɨte 'Ekipitu kiekame 'amarekitsixi wahetsɨa kaniwarewitɨni, mɨkɨ mana memakutekaitsie mepakɨnɨkai mekaniyutemamawiekaitɨni, metekwatɨ meta me'ietɨwetɨ, piritsiteutsixi wapiini memɨtewarunawatsiriekaikɨ meta Kura kiekatari.
1SA 30:17 Hikɨ Rawiri 'ukahekɨareku kanitsutɨani wakwinetɨ, 'uxa'arieka taikaike katiniutahayewa. Nauka tsienituyari xeikɨa temari mekaniyuta'una yukameyutsixi wahetsie.
1SA 30:18 Merikɨte Rawiri naime katiniukaxeiya yupiinite tita 'amarekitsixi memɨte'inawairiekai meta yu'ɨitama yuhutame kaniwarutawikweitsitɨani.
1SA 30:19 Tixaɨtɨ reuyewetɨ pɨkaratɨa memɨwaraye'unie tita memɨtewarunawatsiriekai, ni waniwema 'amemɨyumate meta 'etsimemɨyumate 'ukitsi 'ukari, tixaɨtɨ wapiinite reuyewetɨ pɨkaratɨa.
1SA 30:20 Hikɨ Rawiri muxatsi tewaxi yunaime katiniware'arieni, metewaru'ariximetɨ kuyaximama mɨpaɨ mekateniuhiwakaitɨni: «'Ikɨ Rawiri katinipiinieyatɨni».
1SA 30:21 Merikɨte Rawiri Wetsuxi 'akiyaritsie kanakunuani, huta tsienituyari kuyaxi memayuhayewaxɨtsie memɨ'u'uxekaikɨ memɨkaheiwei. Mɨkɨ mekanayekɨne kuyaximama mewaranunakeke, Rawiri meta 'ahurawa kaniuyani watahɨaweke.
1SA 30:22 Hikɨ Rawiri memaweiyakai hipatɨ kuyaxi 'axamepɨteniniukikai meta 'axamete'u'iyaritɨ mɨpaɨ mekaniutiyuani: —'Ikɨ matsi tahamatɨa mepɨka'anukɨ, 'ayumieme xɨari pɨkaheuyewetse tita temɨtehekaxei mɨkɨta temɨwayetuiriwanikɨ. Mekehekɨne yu'ɨitama mewarawitɨtɨ meta yuniwema.
1SA 30:23 Merikɨte Rawiri mɨpaɨ katiniwarutahɨawe: —Neuxei ne'iwama mɨpaɨ xepɨkateyurieka. Yawé xeikɨa kanihɨkɨtɨni mɨkɨ naime mɨtatiyetuiri mɨtatsi'uta'ɨwiyaxɨ, tenawayamete tahetsɨa mɨwayetua memɨtatsi'utakwi.
1SA 30:24 ¿Kemɨ'anekuta yuri pɨtixeta'eririeni kexemɨteku'eriwa? Tita temɨtewarunawairi piinite teyunaitɨ katinitahetsiemiemetɨni, 'ayumieme yaxeikɨa tipapaɨmeme tekatenitapixɨakuni memuyutakwi meta memɨtehɨkai.
1SA 30:25 Hikɨ Rawiri 'ana tukaritsie mɨkɨ 'aitsika kaniutsutɨani 'ixaheritsixi wahetsiemieme, hikɨ 'akuxi 'ikɨ tukaritsie mɨkɨ 'aitsika mekanaye'atɨaka.
1SA 30:26 Merikɨte manata Tsikɨraki me'u'axɨaka, Rawiri yuhamikuma 'ukirawetsixi Kura kiekatari katiniwarenɨ'airieni piinite memɨtehekaxeiyakai, mɨpaɨ tiwakɨhɨawetɨ: «'Ikɨ 'imikieri 'ena katinitipika Yawé memaye'unie wapiini temɨtehekuwikweitsitɨa».
1SA 30:27 Hikɨ mɨkɨ 'ukirawetsixi Weteri kiekatari 'imikierite mekatenanupini, Xamuti Nekexi, Katixi,
1SA 30:28 'Aruhexi, Tsipimuti, 'Etsitemuha,
1SA 30:29 Xakari, Kerameri nuiwarimama wakiekarite meta kenitsixi wakiekarite,
1SA 30:30 Kuxima kiekatari, Kuratsani, 'Ataki,
1SA 30:31 meta Hewuruni memɨtamakai, yaxeikɨa yunaitɨ 'ukirawetsixi hakewa Rawiri meta kuyaximama meme'axekai meripaitɨ mekateneutapixɨani.
1SA 31:1 Merikɨtsɨ piritsiteutsixi 'ixaheritsixi mekaniwarutakwini, peru mewaruxeiyaka mekaniuyuta'una 'ixaheritsixi. Kiriwuha yemuriyaritsie mɨkɨ yumɨiretɨ mekaniukwi'iwa.
1SA 31:2 Hikɨ piritsiteutsixi Tsahuri mekananukuweiya meta niwemama. Mekaniwarekwini meri Kunatani, 'Awinarawi meta Marikitsuha.
1SA 31:3 Kuyaxi matsi waɨkawa Tsahuri hepaɨtsita mekaniuyeha'ani, mekanenukuweiya 'ɨrɨkɨ me'imɨiximetɨ. Matsi piritsiteutsixi mehe'iwakakuri waɨkawa tiuka'eniwatɨ,
1SA 31:4 Tsahuri yɨhɨweme mɨpaɨ katiniutahɨawe: «'A'ixipara kenewatihanaka keneneumi'a, yaketineuyuri mexi 'iya xitekiya 'inɨariyari memɨkahexeiya meka'axɨawawe, mɨkɨ xeikɨa mekanenitinanaimakuni». Merikɨte mi'ɨwiyakai waɨkawa kanimakaitɨni, mɨkɨ mɨpaɨ mɨtiuyurieni pɨkayuwaɨriyakai, 'ayumieme Tsahuri yukɨmana yu'ixipara watihanaka kaniuyumieni.
1SA 31:5 Kepauka 'i'ɨwiyame Tsahuri muxei mɨkime, mɨkɨta yu'ixiparakɨ kaniuyumieni yukɨmana.
1SA 31:6 Xei tukaritsie Tsahuri, niwemama yuhaikatɨ, 'i'ɨwiyame meta kuyaximama yunaitɨ mɨpaɨ mekateniukwini.
1SA 31:7 Kepauka 'ixaheritsixi muweritsie 'anutaɨye memɨtamakai meta Kurutani 'anutaɨye memɨtamakai memɨte'utamari kename kuyaxi 'ixaheritsixi meyuta'unakai, meta kename Tsahuri niwemama mehekwi'iwakai, mɨkɨta yukiekarite mekaniuku'eiriexɨani mekanekɨne. Hikɨ piritsiteutsixi 'ixaheritsixi wakiekaritsie mekaniyuhayewa.
1SA 31:8 Hikɨ 'uxa'arieka piritsiteutsixi mana me'u'axɨaka mɨkite wapiini mete'anupinike, Kiriwuha yemuriyaritsie Tsahuri meta niwemama mekaniwarutaxeiya mekwikwi'ime.
1SA 31:9 Hikɨ mu'uya mekananutixiteni, piiniteya pitsikaya, 'ixiparaya meta menakekai mekateninawairieni. Naitsarie piritsiteutsixi wakwieyaritsie texaxatamete mekaniwareutanɨ'axɨani yutukiteta kakaɨyarixi memɨwayewetɨkatsie meta yunaime yuteɨterima wahɨxie.
1SA 31:10 Merikɨte Tsahuri 'ixiparaya, pitsikaya meta menakekai 'Atsitaruti kakaɨyariyari hetɨa mekatenetipini meta kaxarieya Wetitsani kuraruyari 'ematitewatsie mana mekanikuwieni.
1SA 31:11 Hikɨ Kawetsi kiekatari Karaha kwieyaritsie mɨpaɨ mekatenetimani, piritsiteutsixi Tsahuri kememuyuriekai,
1SA 31:12 mɨkɨ hipatɨ mekamamatɨ metɨrɨkawitɨ tɨkarikɨ Wetitsani kiekariyaritsie mekanekɨne, Tsahuri meta niwemama wakaxarite meheu'ɨiyuka mana kurarutsie memukuwɨkai, hikɨ mewarakahapaka Kawetsi kiekariyaritsie mekanakunuaxɨani. Mana mekaniwarutitaiya,
1SA 31:13 hikɨ wa'umeyarite me'uti'ɨka xiutɨa mekanikateuku Kawetsi mɨrakutewatsie. Manata 'atahuta tukari mekaniyukahakieni.
2SA 1:1 Merikɨtsɨ Tsahuri hemieriekuri, Rawiri Tsikɨraki mɨrakutewatsie huta tukari kaniuyurieni meta 'amarekitsixi wara'iwakari.
2SA 1:2 Hairieka tukaritsie xewitɨ tewi heyuta'unaka Tsikɨraki kaninuani, Tsahuri kuyaximama mematitekai heyeyaka. Kamixaya peukatsanikai meta mu'unaximatɨ kemɨtiyuhiweriekai mɨkɨ pɨ'inɨariyaritɨkai, mana Rawiri hɨxie nuaka kaniukatunumakeni kwiepa.
2SA 1:3 Rawiri mɨpaɨ katinita'iwawiya: —¿Hakewapai pepeyetɨa? Kuya mɨpaɨ katinita'eiya: —Nepeyuta'unaxɨ 'ixaheritsixi memakuteitsie.
2SA 1:4 Rawiri mɨpaɨ katinita'iwawiya: —Kenetineutaxatɨa naime kemɨreyɨ. Mɨkɨ tewi mɨpaɨ katinita'eiya: —Matsi 'ipaɨ pɨreyɨ takuyaxima mepeyuta'unaxɨa mɨrayukwitɨnetsie meta yuwaɨkawatɨ mekanekwi'iwa. Mɨkɨ Tsahuri meta nu'aya Kunatani mepekwi'iwaxɨ.
2SA 1:5 Hikɨ Rawiri niuki mi'atɨiri mɨpaɨ katiniuta'iwawiya: —¿Kehapaɨtɨtɨri 'ekɨ yapepɨtimate kename Tsahuri meta nu'aya Kunatani mehekwi?
2SA 1:6 Mɨpaɨ katinita'eiya niuki mi'atɨiri: —Ne 'atsinekatimaitɨ Kiriwuha yemuriyaritsie nekaneyeikakaitɨni. Ne nekaneixeiya kepauka Tsahuri yupitsikatsie meyukaxui, hikɨ kuyaxi kaxetatetsie me'utetɨ memeye'unie mekanehuraweiyakaitɨni meta kawayutsixi wahetsie me'utetɨ.
2SA 1:7 Tsahuri kananakuniere kanenexeiya. Hikɨ kanenetahɨawe, kemɨnereta'aitɨa yanekatinekayani.
2SA 1:8 Hikɨ kaneneta'iwawiya, kemɨ'ane nemɨhɨkɨtɨkai, ne mɨpaɨ nekatineita'eiya: “'Amareki tewiyari nepɨhɨkɨ”.
2SA 1:9 Hikɨ kanenetawawirieni 'ahurawa nemuyanikɨ, mɨpaɨ kanetineta'aitɨani: “Ximɨxi keneneumi'a, nepɨtiuka'eniwa xeikɨa nepɨkamɨwe”.
2SA 1:10 Ne 'ahurawa ne'uyaka nekaneimieni, mɨpaɨ neretimaika mɨkatawikwenikekaikɨri. Hikɨ kuruna menakekai nekanenutihanirieni meta matsɨwaya mɨraye'axe, para 'ekɨ pɨta neti'aitɨwame nemɨmatsiyetuirienikɨ.
2SA 1:11 Hikɨ Rawiri meta hamatɨana memɨti'ukai me'u'enanaka, yukamixa mekaneukatsanaxɨani hiwerikakɨ.
2SA 1:12 Meyuhiwerietɨ meta meyuhakietɨ mekaniukutaikaiyarieni, Tsahuri meta nu'aya Kunatani 'ixiparakɨ memekwi'iwakaikɨ, yaxeikɨata Yawé kuyaximama wahekɨ meta 'Ixaheri nuiwariyari wahetsiemieme.
2SA 1:13 Merikɨtsɨ Rawiri temaikɨ kaniuta'iwawiya niuki mi'atɨiri: —¿Hakewa pepekiekame? Mɨpaɨ katinita'eiya: —Teewatanaka nekanihɨkɨtɨni 'amareki tewiyari.
2SA 1:14 Rawiri mɨpaɨ katinitatieni: —¿Kari 'ekɨ mɨya pepɨreyuri Yawé menayexei pepemi?
2SA 1:15 Hikɨ tewi xeime yuhetsɨa mieme 'uta'inieka mɨpaɨ katinita'aitɨani: —Kenanuhanaka kenemi'a. Kemɨtiuta'aitɨariekai 'iya kaneye'atɨani kanimieni.
2SA 1:16 Rawiri mɨpaɨ kaniutayɨni: —'Akɨmana 'ahetsie pekatinahɨani pekaniuyumieni peyutahekɨataka Yawé menayexei pememikɨ.
2SA 1:17 Merikɨtsɨ Rawiri 'ikɨ hiwerika kwikariyari kaniutakwika Tsahuri meta nu'aya Kunatani wahepaɨtsita mieme.
2SA 1:18 «Tuupi kwikariyari» katiniterɨwa. Meta katiniuta'aita mɨkɨ kwikari Kura kiekatari memɨta'ɨkitɨarienikɨ. Mɨpaɨ katine'uka Katsexi xapayatsie:
2SA 1:19 «Xɨa'ui 'Ixaheri. Wakɨmana pemɨ'ata'ɨrekai mekwikwi'itɨ yemuritsie mekanekuheni. Yuwaɨkawatɨ kuyaxi memɨtɨrɨkawi hikɨ mekanekwi'iwa.
2SA 1:20 »Kahati kiekariyaritsie xepɨkaheikuxatani meta 'Atsikaruni kayeyari 'utɨa mɨpaɨ xepɨkatehehiwani, 'ukari piritsiteutsixi memɨkaheyutemamawiekakɨ 'ixɨarari memɨkahewewiekakɨ mɨkɨ xitekiya 'inɨariyari memɨkahexeiya waniwema.
2SA 1:21 »Xɨa'ui, Kiriwuha hɨriyarite, xeme xehetsɨa pɨka'ukawiwiyeni meta pɨka'ukuhaɨtsiyatani. Tɨriku pɨka'utixuxuawereni mawari mayanikɨ. Tsahuri mana mukahɨiyakɨ kɨmana muyukunarɨma 'a'ɨtɨ: memɨte'ayu'iwa kɨmana memɨyukunarɨma mana mepeihɨa.
2SA 1:22 Kunatani 'ɨrɨya yapɨtixuxurekai, yaxeikɨa Tsahuri 'ixiparaya yapɨtixurekai memɨwaraye'unie waxuriyakɨ.
2SA 1:23 »Tsahuri Kunatani matɨa. 'Aixɨa mepɨte'u'iyarikai. Mɨkɨ 'aixɨa mepɨtenaki'eriwakai, 'axeikɨa yunaitɨ mekaniukwini. Mɨkɨ kwinimieme mekatenanautsawawekaitɨni keyuri kwixɨ, meta waɨkawa mekanitɨrɨkawikaitɨni keyuri mayetsi.
2SA 1:24 »Xɨa'ui, 'ukarawetsixi 'Ixaheri kwieyaritsie kiekatari. Xekeneutitsuanani Tsahuri hetsiemieme, mɨxekemaritɨakai 'ixuriki witsimɨ'anekɨ kwimɨxetakɨ, meta witsimɨxekuyuruwakai huru kukateyarikɨ.
2SA 1:25 »Xɨa'ui kuyaxi memɨtɨrɨkawi hikɨ mekanekwi'iwa Kunatani yemuri 'amanutitewatsie kanekani mɨkitɨ.
2SA 1:26 Kunatani, 'ahetsiemieme waɨkawa nepɨneheiwerie, ne'iwa hepaɨ nepɨmatinaki'eriekai. Matsi waɨkawamekɨ nepɨmatsinaki'erikai keyuri 'ukarawetsixi ketemɨtewanaki'erie.
2SA 1:27 »Yuwaɨkawatɨ kuyaxi memɨtɨrɨkawi hikɨ mekanekwi'iwa Yu'ixipara me'utinawaiyarieka mana mekanekuheni mekwikwi'itɨ».
2SA 2:1 Merikɨtsɨ yapaɨmexɨa tukari 'anukayaku, Rawiri Yawé mɨpaɨ katiniuta'iwawiya: —¿Netiyɨwe hipame kiekaritetsie nemɨmiekɨ Kura kwieyaritsie? Yawé mɨpaɨ katinita'eiya: —Huu, pekaniyɨweni pemɨmiekɨ. Tawarita Rawiri mɨpaɨ katinita'iwawiya: —¿Kepehaine kemɨ'ane kiekariyaritsie nepɨmie? Yawé mɨpaɨ katinita'eiya: —Hewuruni kiekariyaritsie.
2SA 2:2 Hikɨ Rawiri mana kaneyani yu'ɨitama yuhutame warawitɨtɨ, 'Akinuhani Ketsireri kiekame meta 'Awikahiri, Nawari 'ɨyayatɨkai Kaximeri kiekame.
2SA 2:3 Meta yukuyaxima kaniwarewitɨni, mɨkɨ yuxexɨitɨ yutɨɨriyama mewaruwitɨkɨme, yunaitɨ mana mekaniyuhayewa Hewuruni 'aurie kiekarite 'etsimɨyeyeutsie.
2SA 2:4 Merikɨte Kura kwieyaritsie kiekatari Hewuruni kiekariyaritsie mekanekɨne, mana Rawiri mu'uyatsie hatseiti mekanikawirieni, mɨpaɨ mekatenenukakeni ti'aitame mayanikɨ Kura nuiwariyari hetsiemieme. Meta mekatenitaxatɨani kename Kawetsi Karaha kwieyaritsie memɨtama Tsahuri me'ukateukixɨ.
2SA 2:5 Hikɨ Rawiri Kawetsi kiekatari niuki kaniwarenɨ'airieni mɨpaɨ tiwarahɨawetɨ: «Yawé 'aixɨa kexeyurieka tixe'aitɨwame Tsahuri hetsie xemɨtewiyakaikɨ meta xemeikateukixɨkɨ.
2SA 2:6 Hikɨta, Yawé kexenaki'erieka meta 'aixɨa ketiuka'iyarini xehetsiemieme, neta 'imikieri nepɨtixeyetuirienikeyu mɨkɨ hepaɨtsita ke'aixɨa xemɨte'uyurikɨ.
2SA 2:7 'Ayumieme xekeneyuwaɨriyani meta xepɨkamamaka, tsepanetɨ Tsahuri tixe'aitɨwame mumɨ, Kura nuiwarimama nemu'utsie hatseiti mekaneniukawirieni tiwa'aitɨwame nemɨhɨkɨtɨnikɨ».
2SA 2:8 Merikɨtsɨ 'Awinexi Nexi nu'aya Tsahuri kuyaximama tiwa'aitɨwame, 'Itsiwutseti Tsahuri nu'aya kanewitɨni Makanahini kiekariyaritsie,
2SA 2:9 mana kanenukakeni ti'aitame mayanikɨ Karaha kiekariyari hetsie, meta Ketsuri, meta Ketsireri, 'Epɨrahini hetsiemieme, Wenikamini meta naitsarie 'Ixaheri kwieyari hetsie.
2SA 2:10 'Itsiwutseti Tsahuri nu'aya huta tewiyari wiyari pexeiyakai kepauka 'Ixaheri kwieyaritsie ti'aitame mayeitɨarie, huta wiyari katini'aitakaitɨni. Matsi Kura nuiwarimama xeikɨa Rawiri ti'aitame mekanayeitɨwakaitɨni,
2SA 2:11 mɨkɨ Hewuruni 'ukaitɨ katiniuta'aita Kura nuiwarimama wahetsie 'atahuta wiyari heimana 'ataxewi metseri kaniuyurieni.
2SA 2:12 'Awinexi Nexi nu'aya Makanahini kiekariyaritsie kanayeyani 'Itsiwutseti Tsahuri nu'aya kuyaximama warawitɨtɨ, Kawahuni kiekariyaritsie kaninuani.
2SA 2:13 Tsariwiya Rawiri kurieya Kuhawi pɨmamayatɨkai, mɨkɨ Kuhawi Rawiri kuyaximama wahɨxie 'anuyekaitɨ kanayeyani. Mɨkɨ kuyaxi mekananuyukunake haa muyema Kawahuni kiekariyaritsie mieme mana 'aixɨa mekateniu'uni meyutakwinike.
2SA 2:14 Hikɨ 'Awinexi Kuhawi mɨpaɨ katiniutahɨawe: —Ne mɨpaɨ nekanaineni yayupaɨmetɨ temari mekeyutakwini kemɨ'ane memɨte'ayu'iwa. Kuhawi mɨpaɨ katinita'eiya: —'Aixɨa kaniyɨmɨkɨ.
2SA 2:15 Hikɨ mana mekaniukɨne tamamata heimana yuhutatɨ temari wenikamini nuiwarimama 'Itsiwutseti Tsahuri nu'aya hetsɨa miemete, meta tamamata heimana yuhutatɨ Rawiri kuyaximama.
2SA 2:16 Yuxexuitɨ kuyaxi memɨwaraye'unie yumu'utsie mekanikawɨrixɨani hikɨ wa'etsata mekaniwareutsexɨani, hikɨ mɨpaɨ mekateniuyukwini yupareku, 'ayumieme mana mɨpaɨ tiuyɨku, Kawahuni kiekariyari 'aurie, Kerikati Hatsurini katiniuterɨwarɨwani.
2SA 2:17 Mɨkɨ tukaritsie waɨkawamekɨ mekaniuyutakwini yemekɨ, Rawiri kuyaximama 'Awinexi mekana'iwa meta 'ixaheritsixi kuyaxiyari mekaniwara'iwa.
2SA 2:18 Mana mekaniu'uwakaitɨni Tsariwiya niwemama: Kuhawi, 'Awitsahi meta 'Atsaheri. 'Atsaheri kwinimieme pɨranautsawekai, maxa kemɨranautsawe hepaɨ 'amakuyewatsie,
2SA 2:19 hikɨ 'Awinexi kananukuweiya ka'ihayewatɨ.
2SA 2:20 Yu'utɨma hanakuniereka, 'Awinexi mɨpaɨ kaniutayɨni: —¿'Ekɨtsɨ 'Atsaheri pekatiyɨane? Mɨkɨ mɨpaɨ katinita'eiya: —Huu ne nepɨyɨane.
2SA 2:21 Hikɨ 'Awinexi mɨpaɨ katinitahɨawe: —Neuxei keneneuhayewa. Matsi 'aixɨa pɨyɨni xeime pɨta pemɨwiyakɨ, tepɨateya 'ahetsiemieme mɨrayanikɨ. Peru 'Atsaheri pɨka'enu'eni,
2SA 2:22 hikɨ 'Awinexi tawarita mɨpaɨ katinitahɨawe: —'Ari penetsi'uweiyatɨ ketineuhayewa, nɨkatɨ nematsi'umieni. ¿Kehapaɨta 'a'iwa Kuhawi nerahɨaweni?
2SA 2:23 'Atsaheri matsi ka'ihayewakaku 'iweiyatɨ, 'Awinexi yupitsika 'ɨkayarikɨ kanenakutseni, yuriepana kanitatseni. Pitsika warieyatsiepai kananeni, mana 'Atsaheri kaniukaweni. Mana yunaitɨ memuyekɨkakai 'Atsaheri kaxarieya manukatei mekaniwa'uwekaitɨni me'ixeiyakutɨ,
2SA 2:24 peru Kuhawi 'Awitsahi matɨa 'Awinexi mekananukuweiya. Tau kanakayunirɨmekaitɨniri kepauka 'Ahama yemɨriyaritsie memɨye'axɨa, Kihaki 'aurie Kawahuni makumawe huyeyari manuyehane.
2SA 2:25 Mana kuyaxi Wenikamini nuiwarimama mekaniyukuxeɨrieni 'Awinexi meparewienike, mekanayekɨne memɨwatakwinikɨ hɨri 'amanutitewatsie.
2SA 2:26 Hikɨ 'Awinexi Kuhawi mɨpaɨ katiniutahiwieni: —'Ari tepɨtehayewa tetakwitɨwetɨ. 'Akuyaxima mɨpaɨ ketiniwarutahɨawi memɨtatsihayewakɨ. Tamɨ mɨpaɨ pekatimate tsepa xemɨte'ayu'iwaxɨ, hiwerikata xehexeiyatɨ xemakɨne.
2SA 2:27 Kuhawi mɨpaɨ katinita'eiya: —Yurikɨ Kakaɨyari hɨxie mɨpaɨ nekanaineni xɨka 'atsipeka'utayɨnike, matsi nekuyaxima mepɨkatariyarienikekai 'ekɨ meta 'akuyaxima texe'uweiyatɨ.
2SA 2:28 Hikɨ 'ana Kuhawi 'awa kaniutahɨtsieni, yunaitɨ kuyaxi 'ixaheritsixi mewaruweiyatɨ mekateniuhayewa, manari mekaniyuhayewa matsi tawariri mepɨkawaranukuwei.
2SA 2:29 Hikɨ mɨkɨ tɨkariyaritsie 'Awinexi meta kuyaximama 'Arawa kwieyaritsie mekaniuyekɨne. Manata Kurutani hatuxameyaritsie me'anukɨneka, Wituruni kwieyaritsie mekaniuyekɨne, Makanahini paitɨ mekaniye'axɨani.
2SA 2:30 Kepaukari Kuhawi 'Awinexi 'uweiyatɨ mɨtiuhayewaxɨ, nuaka yukuyaxima yunaime kaniwaruti'inɨata. Tamamata heimana 'atanauka Rawiri kuyaximama meheuyewetɨ mekanakɨne meta 'Atsaheri.
2SA 2:31 Matsi Rawiri kuyaximama haika tsienituyari heimana haika tewiyari mepɨwarukwi 'Awinexi kuyaximama Wenikamini nuiwarimama.
2SA 2:32 Hikɨ 'arike 'Atsaheri kaxarieya mekanekweni Wereni paitɨ mekaneikateuku, paapaya makateukietsie. Mɨkɨ tɨkariyaritsie Kuhawi meta teɨterimama mekanekɨne, hikɨ Hewuruni paitɨ ximeri mekaneta'axɨani.
2SA 3:1 Tsahuri nuiwarimama mɨixa wiyari mepuyuri Rawiri nuiwarimama mewakwitɨwetɨ. Rawiri matsi waɨkawa tɨrɨkariya hexeiyatɨ kanayeiximekaitɨni ti'aitatɨ, peru Tsahuri hetsɨa mieme matsi kanitaweranaxɨaximekaitɨni.
2SA 3:2 Merikɨtsɨ Rawiri mexi Hewuruni kiekariyaritsie 'ukatei, tɨɨri kaniwarayexeiya: Mexɨakame 'Aminuni pɨhɨkɨtɨkai 'Akinuhani Ketsireri kiekame nu'aya,
2SA 3:3 hutarieka mieme Kirehawi 'Awikahiri nu'aya, Nawari Kaximeri kiekame mɨ'ɨyayatɨkai, hairieka mieme, 'Awitsaruni Mahaka nu'aya, ti'aitame Tarimahi nu'aya Ketsuxi kiekame,
2SA 3:4 naurieka mieme, 'Aruniyaxi Kakiti nu'aya, 'auxɨwirieka mieme, Tsepatiyaxi 'Awitari nu'aya,
2SA 3:5 'ataxewirieka mieme, 'Itɨrehani 'Ekɨra nu'aya, xewitɨta Rawiri 'ɨyaya. 'Ikɨ Rawiri niwemama mekanihɨkɨtɨni mɨwarayexei Hewuruni kiekariyaritsie kepauka mukatei.
2SA 3:6 Merikɨtsɨ kepauka Tsahuri nuiwarimama memɨyukwitɨwekai Rawiri nuiwarimama wahamatɨa, 'Awinexi waɨkawa tɨrɨkariya hexeiyatɨ kanayeiximekaitɨni Tsahuri tɨɨriyamama wahetsie,
2SA 3:7 Tsahuri xeime pexeiyakai yutuxeri Xitsipa titewakame 'Ayaha niweya, mɨkɨ hamatɨa 'Awinexi kaniukahuni. 'Ayumieme 'Itsiwutseti mɨpaɨ katinitatieni: —¿Titayari nepaapa tuxerieya hamatɨa petiukahui?
2SA 3:8 Hikɨ 'Awinexi waɨkawamekɨ 'uyeha'aka mɨya mɨtitahɨawixɨkɨ, mɨpaɨ katinita'eiya: —¿Ne tsɨkɨ netihɨkɨ Kura kiekame? Ne heitseriemekɨ Tsahuri tɨɨriyamama nepɨtiwa'uximayatsiriekai, yaxeikɨata 'iwamama, hamikumama, meta nepɨkamatsiyetuawe Rawiri hetsɨa. ¿Titayari hikɨ penerate'a kename 'ukaratsi hamatɨa ne'ukahui?
2SA 3:9 Ne, Yawé 'axakenetsi'uyurieni kanetsinenimayatɨ, xɨka Rawiri hetsɨa yanekatiuyurieni xɨka neka'iparewieni yamɨraye'anikɨ Yawé mɨpaɨ kemɨtitahɨawixɨ:
2SA 3:10 Tsahuri niwemama 'uweni nepɨwanawairieni, Rawiri pɨta nekaniyetuiriemɨkɨ 'Ixaheri kwieyaritsie mɨtita'aitakɨ meta Kura kwieyaritsie, Rani kwieyaritsie katsutɨme Weritsewa paitɨ ye'atɨkaime.
2SA 3:11 'Itsiwutseti pɨkayuwaɨri 'Awinexi mɨta'eiyakɨ xeiniukiyaritɨma kanimakaxekaitɨni.
2SA 3:12 Hikɨ 'Awinexi 'ikɨ niuki kanenɨ'ani Rawiri hetsɨa: «'Ikɨ kwie xewitɨ pɨkarapiini, matsi 'ekɨ pɨ'ahetsiemieme. Tɨratu nehamatɨa keneuwewi, hikɨ 'ana ne nekamaniparewimɨkɨ yunaitɨ 'ixaheritsixi 'ahetsie memɨtewiyakɨ».
2SA 3:13 Hikɨ Rawiri mɨpaɨ katinita'eiya: «'Aixɨa kani'aneni. Ne tɨratu nepɨwewieni 'ahamatɨa, perutsɨ xɨka penetsi'atɨirieni Mikari Tsahuri niweya. Mexɨka pekanetsi'atɨirieni, kanikatixaɨtɨni».
2SA 3:14 Metatsiere, Rawiri hipame yuhetsɨa miemete kaniwarenɨ'ani 'Itsiwutseti Tsahuri nu'aya hetsɨa, mɨpaɨ memɨteheitaxatɨanikɨ: «Ne'ɨya Mikari keneneyetuiri, xeitsienituyari piritsiteutsixi newarukwika neme'iwaxɨ».
2SA 3:15 Mikahari kanewitɨkɨkaitɨni Paritiheri Rahitsi nu'aya, hikɨ 'Itsiwutseti katiniuta'aita mɨnawaiyarienikɨ,
2SA 3:16 peru Paritiheri 'utɨmana kaneyani 'utsuaximetɨ Wakurini mɨrayetewatsie paitɨ kaniye'ani. Mana 'Awinexi kanitanɨ'ani mukunuanikɨ, hikɨ Paritiheri kanenu'enieni.
2SA 3:17 Hikɨ 'Awinexi 'ukirawetsixi 'Ixaheri kwieyaritsie kiekatari wahamatɨa katiniutaxata, mɨpaɨ katiniwarutahɨawe: «Mɨixa panuyemie xeme Rawiri ti'aitame xemɨyeitɨaku.
2SA 3:18 Peuyewetse 'ari mɨpaɨ xemɨteyurieni, karikɨ Yawé mɨpaɨ kaniutayɨni: “Ne Rawiri nepanayexei neteɨterima 'ixaheritsixi muwatawikweitsitɨanikɨ piritsiteutsixi wahepaɨtsita meta hipame memɨwaraye'unie wahetsɨa”».
2SA 3:19 Metatsiere 'Awinexi wenikaminitsixi wahamatɨa katiniutaxata, hikɨ 'arike Hewuruni kaneyani Rawiri retaxatɨanike yunaitɨ 'ixaheritsixi meta Wenikamini nuiwarimama kememɨteyurikukai hepaɨtsitana.
2SA 3:20 Kepauka 'Awinexi Hewuruni munua, Rawiri 'ikwai 'ixɨarariyari kaniuwewieni hetsiena mieme meta memeweiyakai xeitewiyari memuyupaɨmekai wahetsiemieme.
2SA 3:21 Hikɨ mana 'Awinexi Rawiri mɨpaɨ katiniutahɨawe: «Ti'aitame, keneneupitɨa yunaime 'ixaheritsixi nemɨwata'inienikɨ 'ahamatɨa tɨratu memɨwewienikɨ, mɨpaɨ 'ana 'ayeumetsie pepɨti'aitani kemɨmatinake». Hikɨ Rawiri 'Awinexi kaniutateutɨani, mɨkɨta 'aixɨa 'iyari kaneyani.
2SA 3:22 Merikɨtsɨ Rawiri kuyaximama mekaniu'axɨani Kuhawi warawitɨtɨ hipame mewarekukwika waɨkawa mete'atɨtɨ memɨwara'iwaxɨ wapiinite. 'Awinexi Hewuruni pɨka'uyeikakairi Rawiri hetsɨa, Rawiri kaneinɨ'akaitɨniri, mɨkɨta kaneyakaitɨni 'aixɨa 'iyari.
2SA 3:23 Kepauka Kuhawi munua yunaime kuyaxi warawitɨtɨ, mɨpaɨ katiniutaxatɨarieni kename 'Awinexi Nexi nu'aya ti'aitame heku'iwatakai meta kename ti'aitame heinɨ'akai 'aixɨa 'iyari.
2SA 3:24 Hikɨ 'ayumieme Kuhawi ti'aitame hetsɨa kaniye'ani mɨpaɨ katinitahɨawe: «Kaukatsɨ 'Awinexi metsiheku'iwataxɨ. ¿Ketitayari kuta petipitɨa mɨyemiekɨ?
2SA 3:25 Ti'aitame 'ekɨ 'Awinexi pekanimaika. Mɨkɨ kanekuyeixɨani meti'itaiyatɨ tikumainetɨ kepemɨtiku'eriwa meta naime timaimɨtɨ 'ekɨ kepemɨtiyuriene hepaɨtsita».
2SA 3:26 Kepauka Kuhawi Rawiri hamatɨa tiutixataka muwayetɨa hipame teɨteri kaniwarenɨ'ani 'Awinexi 'utɨa, mɨkɨ Tsira putsuya matiniere menikunuitɨani. Peru Kuhawi 'ikɨ hepaɨtsita Rawiri pɨkaraxaxatɨwakai.
2SA 3:27 Kepauka 'Awinexi Hewuruni munua, Kuhawi xaɨtsie kaneiwitɨni kiekari kitenie, 'awie mɨreitaxatɨani hepaɨ yuxaɨtame. Muwa hukayatsie kaneitatseni hikɨ 'Awinexi kaniumɨni. Mɨpaɨ Kuhawi katinekapitɨani mutaya 'Atsaheri mumiekaikɨ.
2SA 3:28 Kepauka Rawiri mɨretima, 'ikɨ hepaɨtsita mɨpaɨ kaniutayɨni: «Ne mɨpaɨ nekanaineni Yawé hɨxie, ne meta hakewa nemɨre'aita 'atsitepɨkateyuruwamete 'Awinexi Nexi nu'aya kemɨtiumierie hepaɨtsita.
2SA 3:29 Kemɨ'ane memimi mekanihɨkɨtɨni Kuhawi meta tɨɨriyamama. Hatsuaku tɨma Kuhawi tɨɨriyamama wahetsɨa mepɨkaheuyeweka meheukuhatɨkaitɨ, nawi kwiniyayari mehexeiyatɨ, yatɨni mehurietɨkaitɨ, yatɨni metakwikwiwatɨ, meta meyehaakakwitɨwetɨ».
2SA 3:30 Kuhawi 'Awitsahi matɨa 'Awinexi mekaniumieni wa'iwa 'Atsaheri mumiekaikɨ Kawahuni kiekariyari 'aurie memayutakwitsie.
2SA 3:31 Hikɨ Rawiri Kuhawi mɨpaɨ katiniutahɨawe meta yunaime hamatɨana memu'uwakai: «Yukamixa xekeneukatsanaxɨa, hiwerika kamixayari xekenanakatɨxɨa, 'Awinexi hetsiemieme xekeneutitsuanani». Mekweiyatsie ti'aitame Rawiri 'utɨmana kaniumiekaitɨni,
2SA 3:32 Hewuruni kiekariyaritsie 'Awinexi kaniukateukieni. Teukiyapa 'aurie ti'aitame karima kaniutatsuakakaitɨni meta teɨteri yunaitɨ hamatɨana mekaniutitsuanakaitɨni.
2SA 3:33 Hikɨ ti'aitame 'ikɨ hiwerika kwikariyari kaniutawewieni 'Awinexi hetsiemieme: «¿Titayari 'Awinexi mɨyatiumɨ mɨka'uka'iyarini hepaɨ?
2SA 3:34 'Amamatetsie pepɨkahɨakai meta 'a'ɨkatetsie tepɨakɨ pepɨkahɨakai. Teyumemiwamete memɨmatsi'umieni hepaɨ, mɨpaɨ pekatiniumɨni». Teɨteri matsi waɨkawa mekaniutitsuanakaitɨni.
2SA 3:35 Rawiri hetsɨa yunaitɨ teɨteri 'ahura mekaniukɨne me'i'inietɨ 'etsiwa mɨtikwanikɨ mexi tau ka'akayuniwekai, peru mɨkɨ mɨpaɨ kaniutayɨni: «Kakaɨyari kenetiukwinitɨani kanetsinenimayatɨ xɨka paa neha'inɨata yatixaɨtɨ 'ikwai 'akuxi tau ka'anukayuniwekaku».
2SA 3:36 Yunaitɨ teɨteri mɨkɨ mekaneitimaitɨkɨne, meta kaniwarunakire. Naime kemɨtiyurienekai ti'aitame teɨteri kaniwanakekaitɨni.
2SA 3:37 Mɨkɨ tukaritsie teɨteri yunaitɨ meta 'ixaheritsixi mɨpaɨ mekatenetimani kename ti'aitame katiuyuri 'Awinexi Nexi nu'aya kemɨtiumierie.
2SA 3:38 Hikɨ ti'aitame yuteɨterima mɨpaɨ katiniwarutahɨawe: «¿Mɨpaɨ xekatemate hikɨ tewi mariwetɨ mumɨ 'Ixaheri kwieyaritsie?
2SA 3:39 Hikɨ ne, tsepanetɨ ti'aitamekɨ nemanayexeiyarie, 'akuxi ne nekaniweranini, Tsariwiya niwemama yɨkɨ nemɨwaruyurieni nepɨkayɨwe. Yawé 'axakerekapitɨani mɨkɨ kemɨ'ane 'axamɨtiuyuri».
2SA 4:1 Merikɨtsɨ kepauka 'Itsiwutseti Tsahuri nu'aya mɨpaɨ mɨretima kename 'Awinexi Hewuruni paitɨ hemieriekai, 'ana kaniutimani meta 'ixaheritsixi yunaitɨ.
2SA 4:2 'Itsiwutseti teɨteri yuhutame kaniwarexeiyakaitɨni, kuyaxi tewa'aitɨwamete mekanihɨkɨtɨkaitɨni. Xewitɨ Wanaha katinitewakaitɨni, xewitɨta Xekawi, mɨkɨ meyuhutatɨ Ximuni niwemama mepɨhɨkɨtɨkai Weruti kiekame, mɨkɨ Wenikamini mepɨnuiwarimamatɨkai. Weruti Wenikamini kwieyaritsie pɨrawiyakai.
2SA 4:3 Weruti kiekatari meripaitɨ Kitahini mepuyuta'unaxɨ, hikɨ 'akuxi mana mekanetiteni.
2SA 4:4 Kunatani Tsahuri nu'aya xeime yuniwe kanexeiyakaitɨni 'auxɨwime wiyari hexeiyakame Mepiwutseti titewakame muti'ɨtsaiwakai. Kepauka Ketsireri tewi heyeyaka mɨtiwarutaxatɨa kename Tsahuri meta Kunatani mehekwi'iwakai, mi'ɨwiyakai kaniyuta'unakaitɨni 'etutɨ, peru yumexɨitɨarikakɨ kanixuawa, 'ayumieme hurietɨ kanayani.
2SA 4:5 Hikɨ Xekawi meta Wanaha Ximuni Weruti kiekame niwemama, 'Itsiwutseti kie mekanekɨne, hikɨ tuka 'amɨtiɨxɨkatsie mekaniu'axɨani, mɨkɨ kepauka mutikukutsutsie.
2SA 4:6 'Ukaratsi kitenie tihɨweme kaneukuni tɨriku henatɨ, hikɨ mana mɨpaɨ mekatenanutakɨne Xekawi Wanaha matɨa 'awie kiita paitɨ.
2SA 4:7 Kepauka 'upaitɨ memeutahaxɨa 'Itsiwutseti kanikutsukaitɨni yu'utatsie. Muwa mekaneititseixɨani mekanimieni, hikɨ mu'uya mehanutixiteka mekaneituni. Mɨkɨ tɨkaritsie 'Arawa makumawetsie mekaniuyekɨne,
2SA 4:8 hikɨ Hewuruni meye'axɨaka Rawiri 'Itsiwutseti mu'uya mekaniyetuirieni mɨpaɨ me'utiyuatɨ: —Neuxei 'ekɨ ti'aitame: 'Ena 'Itsiwutseti mu'uya tekamaniye'atɨirieka, Tsahuri mɨmatsi'aye'uniekai nu'aya muyutatexi matsi miemɨtɨ. Yawé hikɨ katinikɨhɨwirieni 'ekɨ ti'aitame 'ahetsiemieme, Tsahuri meta nuiwarimama kememɨmatsiyurikukai hepaɨtsita.
2SA 4:9 Hikɨ Rawiri mɨpaɨ katiniwaruta'eiya Xekawi meta Wanaha Ximuni niwemama Weruti kiekame: —Yurikɨ Yawé hɨxie mɨpaɨ nekanaineni, 'aixɨa mɨnetsi'uyuri ne'uximatɨarikatsie,
2SA 4:10 meripaitɨ xewitɨ pɨnetiutaxatɨa kename Tsahuri hemɨkai, 'aixɨa ti'aneme netiutaxatɨame puyu'eriekai, peru ne tixaɨtɨ nepɨkatipitɨa, matsi nekanita'aita mɨhɨiyanikɨ meta mɨmierienikɨ mana Tsikɨraki kiekariyaritsie.
2SA 4:11 Matsi yemekɨ kareuyewetse xeme nemɨxekwini teyukwikate 'atsikatiyurieneme xemumikɨ mexi kutsukai yu'utatsie. 'Ayumieme xekatenayukatuakuni xemimikɨ. Nekanixekumaweriyamɨkɨ 'ena kwiepa.
2SA 4:12 Hikɨ Rawiri yukuyaxima katiniwaruta'aitɨani memɨwakwinikɨ meta wamamate wa'ɨkate memanuxitexɨanikɨ, hikɨ Hewuruni kiekariyaritsie haa mayemarike 'aurie wakaxari mekaniuyewɨtɨani. Matsi 'Itsiwutseti mu'uya Hewuruni mekanikateuku 'Awinexi makateukietsie.
2SA 5:1 Merikɨtsɨ yunaitɨ 'ixaheritsixi Hewuruni kiekariyaritsie mekanekɨne Rawiri hetsɨa meteheitaxatɨanike. Mɨpaɨ mekatenitahɨawe: «'Ekɨ ti'aitame meta tame 'iwamarixi tekanihɨkɨtɨni.
2SA 5:2 Meripaitɨri kepauka Tsahuri mɨtati'aitɨwametɨkaitsie, 'ekɨ 'ixaheritsixi pepɨwakuwitɨnekai temɨyukwitɨwekaitsie. 'Ekɨ Yawé mɨpaɨ kamatiniutahɨawe: “'Ekɨ neteɨterima 'ixaheritsixi pekaniwayewitɨmɨkɨ meta pekatiniwata'aitɨamɨkɨ”».
2SA 5:3 Mɨpaɨ katiniuyɨni, 'ixaheritsixi 'ukirawetsixi Hewuruni kiekariyaritsie mekaniuyukuxeɨrieni ti'aitame Rawiri hamatɨa memɨtetixatakɨ, mana wahamatɨa Rawiri tɨratu kaniuwewieni Yawé hɨxie. Hikɨ 'ana hatseiti Rawiri mekaniukawirieni mu'uyatsie 'Ixaheri kwieyaritsie ti'aitame mayanikɨ.
2SA 5:4 Rawiri ti'aitatɨ kepauka mitsutɨa xeitewiyari heimana tamamata wiyari pexeiyakai, huta tewiyari wiyari katiniuta'aita.
2SA 5:5 'Atahuta wiyari heimana 'ataxewime metseri katiniuta'aita Kura kwieyaritsie Hewuruni kiekariyaritsie, 'arike Kerutsareme 'ukaitɨ naime 'Ixaheri kwieyaritsie meta Kura kwieyaritsie katiniuta'aita xeitewiyari heimana tamamata heimana haika wiyari.
2SA 5:6 Merikɨtsɨ ti'aitame Rawiri yukuyaxima warawitɨtɨ Kerutsareme mekanekɨne, kewutseutsixi mana memɨtitekai mewaretakwinike. Kewutseutsixi Rawiri mana kiekaritsie kahatahaweme me'erietɨ, Rawiri mɨpaɨ mekateniutahɨawe: «'Ena pepɨkahatahani, memɨkaheuneniere meta memɨka'ɨkɨniwawetɨtɨ, mepɨteyurieni memɨmatsitaweiya».
2SA 5:7 Peru Rawiri pɨyɨwekaxɨa kiekari Tsiyuni kuraruya 'amatitewatsie meutahani, hikɨ 'ayumieme Rawiri kiekariena katinitewaka.
2SA 5:8 Rawiri mɨkɨ tukaritsie mɨpaɨ kaniutayɨni: «Kemɨ'ane mɨyuwaɨriya kewutseutsixi mɨwakwimiekɨ, tetɨata haa memuwayekwewietsie keheukahani, memɨka'ɨkɨniwawe meta memɨkaheuneniere mɨwarekwinikɨ. Ne mɨkɨ nekaniwaxani'erieka». Mana niuki mɨpaɨ manɨyɨne kanayeneni: «Memɨkaheuneniere meta memɨka'ɨkɨniwawe ti'aitame paratsiyuyata mepɨkaheutahaxɨani».
2SA 5:9 Rawiri kiekari 'aixɨa mɨreukunametsie yukie kanayeitɨani meta Rawiri kiekariena katiniterɨwa. Meta waritana kuraru 'a'atitewame kanawewietɨyani, kwie mutahɨniyarietsie 'itsutɨaka paratsiyu manuwe paitɨ ye'akame,
2SA 5:10 matsi waɨkawa tɨrɨkariya hexeiyatɨ kanayeiximekaitɨni, Yawé Kakaɨyari Naimekɨmɨtɨrɨkaɨye hamatɨana muyeikakaikɨ.
2SA 5:11 Hirami Tiru kwieyaritsie ti'aitame, Rawiri kanenɨ'airieni yuniuki tuayamete, meta kariuxa kɨyeyari kanenɨ'ani, kɨyekɨ memɨte'uximayatawawe meta tetexikɨ te'uximayatamete, ti'aitame paratsiyuya memɨtawewienikɨ.
2SA 5:12 'Ana Rawiri mɨpaɨ katinetimani, Yawé yuteɨterima wanaki'erietɨ, ti'aitame meyeitɨa 'ixaheritsixi wahetsie meta 'ayeumetsie mɨtita'aitakɨ mipitɨakai.
2SA 5:13 Kepauka Rawiri Hewuruni kiekariyaritsie mayetɨa Kerutsaremetsie pɨta munua, tawarita hipame kaniwarutiwitɨni 'ukari tuxexerimama memakɨ meta 'ɨitamama, mɨkɨ wahetsie tawari niwemama mekanayenexɨani 'ukitsi meta 'ukari.
2SA 5:14 Mana yuniwema mɨwarayexei mɨpaɨ mekatenitetewaka: Tsamuha, Tsuwawi, Natani, Tsarumuni,
2SA 5:15 'Iwikaxi, 'Eritsuha, Nepeki, Kapiha,
2SA 5:16 'Eritsama, 'Erihara meta 'Eripereti.
2SA 5:17 Hikɨ piritsiteutsixi yametehetimaika kename Rawiri hatseiti 'ukawiriyariekai 'Ixaheri kwieyaritsie ti'aitame mayanikɨ, hikɨ 'ayumieme yunaitɨ mepayekɨ me'itamienike, peru Rawiri retimaika kaneyani yukiekari 'aixɨa mɨreukunametsie.
2SA 5:18 Piritsiteutsixi mekaniu'axɨani, mayeweritsie Xepahini mɨrayetewatsie mekaniukuyaxixɨani naitsarie.
2SA 5:19 Hikɨ Rawiri Yawé mɨpaɨ katiniuta'iwawiya: —¿Piritsiteutsixi netiwatakwini? ¿Tɨrɨkariya penetipitɨani nemɨwara'iwakɨ? Yawé mɨpaɨ katinita'eiya: —Keniwarutakuya, nekamenipitɨamɨkɨ pemɨwara'iwakɨ.
2SA 5:20 Hikɨ Rawiri kaneyani mana kaniwaretakwini kaniwara'iwa. 'Ayumieme mana Rawiri Wahari-Peratsini katiniuterɨwa, mɨpaɨ 'utayɨka: «Yawé kaneutahani memɨtatsi'aye'unie watsata, haa waɨkawa mɨtɨrɨkaɨye hepaɨ».
2SA 5:21 Piritsiteutsixi mana yukakaɨyarixi mekaniwaruku'eirieni, hikɨ Rawiri meta kuyaximama mekaniware'ɨni.
2SA 5:22 Merikɨte piritsiteutsixi tawarita mekaniu'axɨani Rawiri metamienike, mayeweri Xepahini mɨrayetewatsie mekaniukuyaxixɨani naitsarie.
2SA 5:23 Hikɨ tawarita Rawiri Yawé kaniuta'iwawiya. Yawé mɨpaɨ katinita'eiya: —'Akuxi pepɨkawarutakukuyani, wawarita xekenekɨkɨni waritsamu kɨyexiyari maku'u xekeneu'axɨa, hikɨ mana wawarita pɨta xekenayenexɨaka xekeniwarutakuya.
2SA 5:24 Kepauka yuarika pemɨ'enieni kuyaxi muwa memeuhuni hepaɨ wapaitɨ kɨyexi kɨtsita, 'ana xekanayekɨnikuni xemɨwatakwinikɨ, mɨkɨ pɨ'inɨari ne Yawé ne'anuyekaitɨ 'ahɨxie nepumieni kuyaxi piritsiteutsixi nemɨwakwinikɨ.
2SA 5:25 Rawiri mɨpaɨ katiniuyurieni Yawé yemekɨ kemɨtita'aitɨakai, hikɨ piritsiteutsixi kaniwara'iwa mekaniwarukwini Kawahuni mewayeweiyaka Ketsehexi paitɨ mekaniwaye'atɨani.
2SA 6:1 Merikɨtsɨ tawarita, Rawiri yukuyaxima kaniwarukuxeɨrieni 'aixɨa memɨ'anene memeuyutakwiwawe 'Ixaheri kwieyaritsie kiekatari, xeitewiyari heimana tamamata miriyari mekaniyupaɨmekaitɨni,
2SA 6:2 hikɨ yunaime yukuyaxima warawitɨtɨ kaneyani Wará paitɨ Kura kwieyaritsie, mana Kakaɨyari tɨratuya kakuniyari memanukwenikɨ, tɨratu kakuniyari hetsiena memehɨawe mɨkɨ kemɨtitewakɨ, Yawé Naimekɨmɨtɨrɨkaɨye yuteɨtamete wahixɨata mɨti'aita.
2SA 6:3 Merikɨte Kakaɨyari kakunieya kaxeta hekwametsie mekananutiteni, hikɨ mekaneitɨni 'Awinarawi kie mekaniyekweni, mɨkɨ yemuritsie kaniukateitɨni. 'Awinarawi niwemama 'Utsa meta 'Akihu kaxeta mɨhekwa mekanehana
2SA 6:4 Kakaɨyari kakunieya matɨkɨkai. 'Akihu kakuni hɨxie 'anuyekaitɨ kaniumiekaitɨni,
2SA 6:5 meta Rawiri meyunaitɨ teɨteri 'ixaheritsixi Yawé hɨxie mekateniukaketsinakaitɨni waɨkawamekɨ meyutemamawietɨ meta me'utikwitɨ haripa 'etsimupe meta 'amupa hayuanekaku, tepu 'etsimɨyeyeu, kaitsate meta tepɨa mutitiraurɨka.
2SA 6:6 Hikɨ kepauka Nakuni tɨriku matikatse meye'axɨaka, tuurutsixi mekanetiketamɨrixɨani, hikɨ 'Utsa yumamakɨ Kakaɨyari kakunieya kaniutuika.
2SA 6:7 Hikɨ 'ayumieme, Yawé kaniuyeha'ani 'Utsa hepaɨtsita mimayɨakɨ, 'ana mana kwitɨwa katinikwinitɨani, 'Utsa 'akaniukaweni Kakaɨyari kakunieya 'aurie mɨkitɨ.
2SA 6:8 Rawiri kaniuyeha'ani Yawé 'Utsa mumiekaikɨ, 'ayumieme mana Peretsi-'Utsa katiniuterɨwa, hikɨ 'akuxi mana mɨpaɨ katinakutewaka.
2SA 6:9 'Ana Rawiri Yawé waɨkawa 'ayemakatɨ kanayani, mɨpaɨ kaniutayɨni: «'Aixɨa pɨyɨni matsi Yawé kakunieya xɨka nekahekweni».
2SA 6:10 Mɨkayuwaɨriyakaikɨri Yawé kakunieya manukwenikɨ yukiekaritsie, katiniuta'aita pɨta 'Uweri-'Erumi kie mɨhɨiyanikɨ, Kahati kiekame hetsɨa.
2SA 6:11 Mɨpaɨ tiɨyɨku Yawé kakunieya haika metseri kaniuyurieni 'Uweri-'Erumi Kahati kiekame kie 'ukaitɨ, hikɨ Yawé 'ana mɨkɨ 'aixɨa kaniyuriekaitɨni meta yunaime tɨɨriyamama.
2SA 6:12 Kepauka ti'aitame Rawiri mɨpaɨ mɨtiuxatɨarie kename Yawé kakunieya 'Uweri-'Erumi kie mukateikɨ 'aixɨa wayuriekai tɨɨriyamama meta naime tita mɨrexeiyakai, hikɨ Rawiri kaneyani 'Uweri-'Erumi kie, Kakaɨyari kakunieya kanayekweni Rawiri kiekariena paitɨ kani'atɨani waɨkawa temawierikatsata.
2SA 6:13 Kepauka Kakaɨyari kakunieya memakwekai 'ataxewi keyari memɨye'uwekaitsie, Rawiri turu xeime kanikumemiwakaitɨni meta xeime tsikeru muwaiya, mawari memakɨnekɨ Yawé hetsiemieme.
2SA 6:14 Rawiri xeime xeikɨa 'anakatɨtɨ mawari wewiwame kamixaya 'etsimɨnena rinu 'ixurikiyarikɨ mɨwewiya, katiniutineitɨyani Yawé hɨxie waɨkawamekɨ yutemawietɨ.
2SA 6:15 Mɨpaɨ mekatenikweiximekaitɨni Yawé kakunieya yunaitɨ 'ixaheritsixi meta Rawiri, hiwaritsata metatsiere muxatsi wa'awate me'ɨhɨtsieximetɨ.
2SA 6:16 Hikɨ kepauka Yawé kakunieya Rawiri kiekarieyatsie meutahaximekai, Mikari Tsahuri niweya yukiitsie wapaitɨ kananiere, hikɨ kepauka Rawiri muxei 'utitsukwakame meta tineineme Yawé hɨxie, waɨkawa kanitixani'erieni.
2SA 6:17 Yawé kakunieya Rawiri 'ixuriki kiiyari kanitawewiriekaitɨni, muwa kaneitateni. Hikɨ muwata Rawiri mawari taiyariyari kaniyetuirieni meta 'aixɨa memɨteyuxeiyakɨ mawariyari.
2SA 6:18 'Arike mawari taiyariyari 'uwewiekari meta 'aixɨa memɨteyuxeiyanikɨ mawariyari, Rawiri Yawé Naimekɨmɨtɨrɨkaɨye kaniutawawirieni teɨteri yunaime 'aixɨa mɨwayurienikɨ,
2SA 6:19 meta 'ixaheritsixi yuxexuime mana memɨyuxeɨriekai memɨyumɨirekai 'ukitsi meta 'ukarawetsixi, paa kaniwarutamini, takɨ 'ikwaxiyari patsaruyari tsuirayari, meta kaxie patsaruyari papayari. 'Arike mɨpaɨ tiɨyɨku, yukie yunaitɨ mekaneutayeixɨani.
2SA 6:20 Kepauka Rawiri munua yukie 'aixɨa wayurienike yutɨɨriyama, Mikari Tsahuri niweya kaneikunake, mɨpaɨ katinitatieni: —Neuxei hikɨ 'aixɨa pepɨka'ɨyɨ. 'Ixaheri kwieyaritsie ti'aitame kemɨtiuka'iyari hepaɨ pepɨka'ɨyɨ. Pemutitsukwakakaitsie 'ukari te'uximayatamete 'awarita mepɨmatsixeiyakai. Tewi tixaɨtɨ mɨkatihɨkɨ hepaɨ pepɨyɨanekai.
2SA 6:21 Hikɨ Rawiri mɨpaɨ katinita'eiya: —Ne yurikɨ Yawé hɨxie nekaniyɨanekaitɨni, kemɨ'ane mɨnetsi'anayexei 'apaapa hetsiemieme meta 'a'iwama, 'ixaheritsixi nemɨtiwata'aitɨanikɨ, Yawé teɨterimama. 'Ayumieme Yawé hɨxie nepɨtiukaye'ani.
2SA 6:22 Peru matsi tawarita 'akuxi tixaɨtɨ nepɨkarayuyeitɨani, 'ekɨ kepemɨkatiku'eriwa, peru hikɨ mɨkɨ te'uximayatamete 'ukarawetsixi pemɨwaraxaxata mariweme mepɨnetsi'ayeitɨaka.
2SA 6:23 Hikɨ Mikari Tsahuri niweya tɨɨri kawarayexeiyaka kaniumɨni.
2SA 7:1 Hikɨ ti'aitame Rawiri kepauka yuparatsiyuta 'ayekaitɨ matɨa, Yawé 'uxipiya kanipitɨani yunaitɨ memeye'unie memɨka'i'uximatɨakakɨ.
2SA 7:2 Hikɨ Rawiri Natani Kakaɨyari niukameya mɨpaɨ katiniutahɨawe: —Neɨxei, 'aixɨa pɨka'ane ne paratsiyuta nemayeka kariuxa kɨyeyari kiiyarita, Kakaɨyari tɨratuya kakuniyari, 'ixuriki kiiyarita 'ayekaikaku.
2SA 7:3 Natani mɨpaɨ katinita'eiya: —'Aixɨa kani'aneni. 'Ekɨ ti'aitame yaketineuyuri kepemɨti'akuhɨawe, Yawé matsi 'ahamatɨa kaniuyeikani.
2SA 7:4 Hikɨ mɨkɨ tɨkariyaritsie Yawé niukieya Natani hetsɨa kaninuani mɨpaɨ katinitahɨawe:
2SA 7:5 «Kenemie mɨpaɨ ketinetahɨawi Rawiri neti'uximayatsiriwame Yawé mɨpaɨ kanaineni: “'Ekɨ pepɨkahɨkɨ kii pemɨnetsitawewirieni muwa nemayekanikɨ.
2SA 7:6 Kepauka 'ixaheritsixi 'Ekipitu nemɨwarayewitɨtsie paitɨtɨ hatsuaku kiita nepɨka'ayeyerɨwe, matsi xeikɨa nepukuyeika, 'ixuriki tukiyarita ne'ayekaitɨ.
2SA 7:7 Kepaɨmexɨa tukari 'ixaheritsixi wahamatɨa nemuyeikakai, kepauka 'itsɨkate nemɨwarutanɨ'a neteɨterima 'ixaheritsixi memɨwata'ɨwiyakɨ, hatsuaku mɨkɨ xeime nepɨka'utati mɨkanetsi'utawewirikɨ kariuxa kiiyari”.
2SA 7:8 »Kamɨtsɨ, Rawiri neti'uximayatsiriwame mɨpaɨ ketineutahɨawi, mɨpaɨ kanaineni Yawé Naimekɨmɨtɨrɨkaɨye: “Ne muxatsi pewahɨnekaku nekamananayexeiya, matsi pɨta neteɨterima 'ixaheritsixi pemɨtiwata'aitɨanikɨ.
2SA 7:9 Ne 'ahamatɨa nepuyeikakai tsepa kepemɨtikuyeikakai, 'ahetsiemieme memɨmatsi'aye'unie yunaime nekaniwarakuxɨtɨani. Hikɨ waɨkawa pemariweme nekamanayeitɨamɨkɨ 'ena kwiepa memɨmamariwawe wahepaɨ.
2SA 7:10 Meta neteɨterima 'ixaheritsixi nekaniwayetuiriemɨkɨ kwie, mana yuheyemekɨ memɨtitenikɨ 'aixɨa 'iyari mekamariutsietɨ. Mana memɨwaraye'unie mepɨkawa'uximatɨakari meripaitɨ kememɨwayuriekai,
2SA 7:11 kepauka 'itsɨkate nemɨwaranuka'uitɨwakaitsie neteɨterima 'ixaheritsixi wahetsie. Meta 'ekɨ nekamanipitɨamɨkɨ kayuwatɨ pemuyeikanikɨ yunaime memɨmatsi'aye'unie watsata. »”Peru hikɨ Yawé mɨpaɨ kamatinahɨaweni yapemɨtimaikakɨ mɨkɨ kamanipitɨamɨkɨ 'anuiwari kii manukuketɨanikɨ.
2SA 7:12 Kepaukari pemɨmɨni meta kepauka 'apaapama wahamatɨa pemɨkateukieni, 'anuiwaritsie xeime nepanayexeiya mɨtita'aitakɨ, meta yamɨtiyurienikɨ.
2SA 7:13 Mɨkɨ pɨhɨkɨtɨni kii nehetsiemieme mɨtawewieni muwa 'aixɨa nemɨtimariwanikɨ meta heitserie nepipitɨani yuheyemekɨ mɨti'aitanikɨ.
2SA 7:14 Ne paapaya nepɨhɨkɨtɨni, mɨkɨta neniwe pɨhɨkɨtɨni. 'Ayumieme kepauka 'axamɨtiyurieni, nekaneyemari'itɨamɨkɨ ne'iwaɨyɨkɨ, rapaapa mɨtiuka'iyari hepaɨ.
2SA 7:15 Peru ne'inaki'erietɨ nepɨka'ihayewa, Tsahuri kenemɨtiuhayewaxɨ hepaɨ, 'ekɨ pɨta hetsiena mieme heitserie nemɨmatsipitɨanikɨ.
2SA 7:16 'Anuiwarima yuheyemekɨ 'aixɨa 'anemekɨ mepu'uwani nehɨxie, 'a'uweni yuheyemekɨ 'apuweni”».
2SA 7:17 Hikɨ Natani Kakaɨyari niukameya Rawiri 'ikɨ naime katiniutaxatɨani, kemɨtiutahekɨatɨarie heinɨtsi hepaɨ 'anemekɨ.
2SA 7:18 Hikɨ Rawiri ti'aitame kaneyani Yawé tɨratuya kakuniyari hɨxie 'utayerɨka mɨpaɨ katinitahɨawe: «Yawé meta Kakaɨyari, ¿kepaikɨ ne nepɨhɨkɨ meta netɨɨriyama, titayari mariweme penerayeitɨwani?
2SA 7:19 Yawé Kakaɨyari, waɨkawari pepɨnetiupitɨa, kamɨtsɨ hikɨ mɨkɨ 'etsiwa xeikɨa tihɨkɨ 'ahepaɨtsita. Ne mati'uximayatsiriwame nekanihɨkɨtɨni, waɨkawa pepɨnetiutaxatɨa ke'aixɨa pemɨtiyurieni 'arike nenuiwari wahetsiemieme. Yawé Kakaɨyari teɨteri wahetsiemieme mariweme pepɨtiyuriene.
2SA 7:20 »¿Kehepaɨ tawarita mati'uximayatsiriwame Rawiri matitahɨawe yapekatinimaikari, 'ekɨ Yawé nekakaɨyari?
2SA 7:21 Mariwemekɨ 'ikɨ pekatiniuyurieni 'aniuki pehaye'atɨatɨ, kemɨmatinake hikɨ ne mati'uximayatsiriwame pemɨnetiutahekɨatɨa.
2SA 7:22 »Pepɨmariwe 'ekɨ, Yawé naimekɨmɨyɨwe. Tame mɨpaɨ tekatenetimani xewitɨ kaniumaweni 'ahepaɨ tɨrɨkaɨyetɨ meta tawarita yuri kakaɨyari pumawe.
2SA 7:23 Hakewatsɨ nuiwari 'ateɨterima 'ixaheritsixi wahepaɨ me'anetɨ mepe'uwa. 'Ikɨ nuiwari xeikɨa pekaniuxɨna 'ena kwiepa, 'ateɨterima pewarayeitɨanike meta wahetsie pemetimatiwakɨ kepemɨtimariwe. Mariwemekɨ pekatiniuyurieni kepauka 'ateɨterima wahɨxie, 'Ekipitu kwieyaritsie kepemɨtatiutawikweitsitɨa, nuiwarite kananitari kepemɨtiwarayeweiyaxɨa meta wakakaɨyarixi.
2SA 7:24 'Ixaheri kwieyaritsie pekatiniuwiya 'ateɨterima yuheyemekɨ memɨhɨkɨtɨnikɨ meta 'ekɨ Yawé wakakaɨyari pemɨhɨkɨtɨnikɨ.
2SA 7:25 »Hikɨ Yawé meta Kakaɨyari heitseriemekɨ yaketineuyuri ne mati'uximayatsiriwame kepemɨnetiutahɨawixɨ meta nenuiwarima wahetsiemieme. 'Aniuki kenaye'atɨa
2SA 7:26 teɨteri memɨmatsimaikakɨ yuheyemekɨ kemɨ'ane pemɨhɨkɨ, meta yunaitɨ 'aixɨa memutiyuanenikɨ 'ahepaɨtsita mɨpaɨ me'utiyuatɨ: “Yawé Naimekɨmɨtɨrɨkaɨye 'ixaheritsixi kaniwakakaɨyaritɨni”. Hikɨ ne Rawiri mati'uximayatsiriwame nehɨkɨtɨtɨ nenuiwari yuheyemekɨ 'ahɨxie kaniyuhayewakamɨkɨ.
2SA 7:27 »Yawé Naimekɨmɨtɨrɨkaɨye 'ixaheritsixi wakakaɨyari, 'ekɨ mati'uximayatsiriwame meripaitɨ pepɨnetiutahekɨatɨa nenuiwaritsie kepemɨtiyurieni, 'ayumieme ne mati'uximayatsiriwame mɨyanematinikɨhɨaweni.
2SA 7:28 Yawé nekakaɨyari, ne mati'uximayatsiriwame waɨkawamekɨ kepemɨnetiutaxatɨa 'aixɨa mɨti'anekɨ, 'ekɨ pekanikakaɨyaritɨni meta kepemutayɨ kaniyuritɨni.
2SA 7:29 Neuxeitsɨ ne mati'uximayatsiriwame neniwema 'aixɨa keniwaruyuri, mɨpaɨ 'ekɨ pewa'ɨwiyakaku yuheyemekɨ mekaniu'uwakakuni nenuiwarima, 'ekɨtsɨ Yawé naimekɨmɨyɨwe yapekaniutayɨni. Xɨka nenuiwari 'aixɨa pewaruyurieni yuheyemekɨ 'aixɨa me'itɨarietɨ mepuyuhayewani».
2SA 8:1 Hikɨ yapaɨmexɨa 'anukayaku, Rawiri piritsiteutsixi kaniwarutakwini kaniwara'iwa, hikɨ mɨkɨ tiwa'aitɨatɨ kanayani meta kaniwarunawairieni Meteki-'Ama kiekariyari.
2SA 8:2 Yaxeikɨata muhawitsixi kaniwara'iwa, waɨriyarika kaniwarupitɨani kwiepa memɨtihinikɨ meta kaunari ti'inɨnɨatamekɨ kaniwaruti'inɨata, mɨkɨ kemɨ'ane huta 'inɨariyaritsie memɨtekunanakekai kaniwakukuyakaitɨni, matsi hairieka 'inɨariyaritsie memɨtekunanakekai me'ayeneniereme kaniwaruhayewa. Mɨpaɨ tiuyɨku muhawitsixi Rawiri mete'uximayatsirietɨ mekanakɨne meteyukutuayatɨ hetsɨana.
2SA 8:3 Hikɨ Rawiri Harari-'Etsexi kana'iwa, ti'aitame Xekuwi nu'aya Tsuwa kiekame, Harari-'Etsexi kepauka metɨa hatuxame 'Eupɨrate manuyeka kwieyaritsie 'aurie mana tiwiyake.
2SA 8:4 Rawiri xeimiriyari kaxetatsixi kaniwarunawairieni, 'atahuta miriyari kawayutsixi wahetsie memutei, meta xeitewiyari miriyari kuyaxi yɨ'ɨkama memuhukai meta kawayutsixi mekaniwarutiwiteni wateuritetsie naitsata matsi xeitsienituyari kaxetatsixi wahetsiemieme kaniwaruhayewa.
2SA 8:5 Kepauka tsiriyutsixi Ramatsiku kiekatari Harari-'Etsexi hetsɨa memu'axɨa me'iparewienike Tsuwa mɨti'aitametɨkai, Rawiri mɨkɨ xeitewiyari heimana huta miriyari kaniwarukwini.
2SA 8:6 Yaxeikɨata Ramatsiku kiekariyaritsie kuyaxi tehɨwemete kaniwaru'uitɨani, hikɨ tsiriyutsixi Rawiri mete'uximayatsirietɨ mekaniyuhayewa meteyukutuayatɨ hetsɨana. Naitsarie kemɨtiyumienekai Rawiri katinayu'iwakaitɨni Yawé 'iparewiekaku.
2SA 8:7 Hikɨ kɨmana memɨyukunarɨma hurukɨ mɨwewiyatɨka Harari-'Etsexi parewiwamete memi'ɨkai Rawiri yuhetsiemieme katinayeitɨani Kerutsareme paitɨ katinepini.
2SA 8:8 Metatsiere tiwaɨkawa wurunitse tepɨayarikɨ mɨtiwewiyatɨka katinetɨni Tewaki mexuawekai meta Werutahi, Harari-'Etsexi kiekariena.
2SA 8:9 Tuhu, Kamati kiekariyaritsie ti'aitame mɨpaɨ pɨretima kename Rawiri yunaime Harari-'Etsexi kuyaximama wara'iwakai.
2SA 8:10 Mɨkɨta Tuhu Harari-'Etsexi kanaye'uniekaitɨni, 'ayumieme yuniwe Kurani kanenɨ'ani Rawiri ti'aitame hetsɨa 'aixɨa mɨreitahɨawekɨ, Harari-'Etsexi ma'iwaxɨkɨ. Kurani katinepini pɨratakɨ mɨtiwewiyatɨka, hurukɨ meta wurunitsekɨ.
2SA 8:11 Hikɨ ti'aitame Rawiri mɨkɨ Yawé katiniyetuirieni, hetsienamieme mɨrayanikɨ yaxeikɨa kemɨtiuyuri hipame nuiwarite tiwa'aitɨatɨ matɨa wapɨratakɨ meta wahurukɨ:
2SA 8:12 'Erumi, Muhawi, 'amunitsixi, piritsiteutsixi meta 'amarekitsixi. Meta Yawé katiniyetuirieni Harari-'Etsexi tiwapiini mɨtiwarenawairi, ti'aitame Xekuwi nu'aya Tsuwa kiekame.
2SA 8:13 Rawiri matsi waɨkawa kaniutamariwa kepauka makunua mayeweritsie Maye'unaya heyukumieka, muwa tamamata heimana 'atahaika miriyari 'erumitsixi kaniwarekwini.
2SA 8:14 Yaxeikɨata 'Erumi kwieyaritsie kuyaxi tehɨwemete kaniwaru'uitɨani, naitsarie mɨkɨ kwieyaritsie Rawiri tiwa'aitɨatɨ kanayani, hikɨ mɨkɨ 'erumitsixi Rawiri hetsɨa meteyukutuayatɨ mekanakɨne. Naitsarie kemɨtiyumienekai Rawiri katinayu'iwakaitɨni Yawé 'iparewiekaku.
2SA 8:15 Rawiri 'Ixaheri kwieyaritsie naitsarie katini'aitakaitɨni, yunaime teɨteri pɨtiwa'aitɨakai 'aixɨa 'anemekɨ yɨkɨ katiwaxeiyatɨ hipame meta heitseriemekɨ yatiyurienetɨ wahetsiemieme.
2SA 8:16 Kuhawi Tsariwiya nu'aya, kuyaxi tiwa'aitɨwame pɨhɨkɨtɨkai, Kutsapati 'Akiruri nu'aya, ti'utɨwame pɨhɨkɨtɨkai ti'aitame hetsiemieme,
2SA 8:17 Tsaruki 'Akituwi nu'aya meta 'Akimereki 'Awiyataxi nu'aya, mawari wewimete mepɨhɨkɨtɨkai, Tserahiyaxi kemɨtiuyɨ mɨraka'utɨwa pɨhɨkɨtɨkai,
2SA 8:18 Wenahiyaxi Kuyara nu'aya, mɨkɨ kuyaxi Rawiri hɨwemete kereteutsixi meta pereteutsixi pɨtiwa'aitɨwametɨkai. Mɨkɨta Rawiri niwemama 'ahurawa 'iparewiwamete mexɨakate mepɨhɨkɨtɨkai.
2SA 9:1 Merikɨtsɨ ti'aitame Rawiri kaniuti'iwauni xɨka 'akuxi xewitɨ Tsahuri nuiwarieya 'uyeikakaitɨni para 'aixɨa miyurienikɨ Kunatani ha'eriwatɨ.
2SA 9:2 Hikɨ Tsahuri tɨriyamama xeime mekanexeiyakaitɨni memɨte'ihɨritɨakai yupiinite mɨkɨ Tsiwaha pɨtitewakai, mɨkɨ mɨwitɨkiemiekɨ mekateniutanɨ'ani. Kepauka Tsiwaha Rawiri hɨxie munua, mɨpaɨ katinita'iwawiya: —¿Tsiwaha 'ekɨ petihɨkɨ? Mɨkɨ mɨpaɨ katinita'eiya: —Huu, nenepɨhɨkɨ mati'uximayatsiriwame.
2SA 9:3 Ti'aitame tawarita kanita'iwawiya: —¿Xewitɨ 'akuxi katiyuhayewane Tsahuri nuiwarieya? Kakaɨyari pɨnetsi'uyuitɨa waɨkawa nemiparewienikɨ. Tsiwaha mɨpaɨ katinita'eiya: —Huu, ti'aitame. Kunatani 'akuxi niweya xewitɨ puyuhayewane muhurie yu'ɨkatetsie.
2SA 9:4 Ti'aitame mɨpaɨ kaniutayɨni: —¿Hakewa peka? Tsiwaha mɨpaɨ katinita'eiya: —Ru-Rewaxi paitɨ. Makixi 'Amiheri nu'aya kie kanekani.
2SA 9:5 Hikɨ ti'aitame Rawiri katiniutanɨ'ani mɨwawiemiekɨ Makixi 'Amiheri nu'aya kie, Ru-Rewaxi paitɨ.
2SA 9:6 Kepauka Mepiwutseti Kunatani nu'aya meta Tsahuri teukarieya Rawiri hɨxie munua, kaniutihɨximakeni kwiepapai. Rawiri mɨpaɨ katinita'iwawiya: —¿'Ekɨ Mepiwutseti petihɨkɨ? Mɨkɨ mɨpaɨ katinita'eiya: —Huu, nenepɨhɨkɨ mati'uximayatsiriwame.
2SA 9:7 Hikɨ Rawiri mɨpaɨ katinitahɨawe: —Pepɨkamaka, matsi 'apaapa Kunatani neha'eriwatɨ, nepɨnewaɨriya 'aixɨa nemɨmatsiyurienikɨ. Naime nemaniyetuiriemɨkɨ kwie 'ateukari Tsahuri manuyeikakaitsie meta hikɨri 'ena mautiyune nepɨmatimikwani nemexatsie timieme.
2SA 9:8 Mepiwutseti mɨpaɨ katinitahɨawe 'utihɨximakeka: —Ne ti'a'uximayatsiriwame tixaɨtɨ matsi nepɨkatihɨkɨ, tsɨkɨ mɨmɨki hepaɨ xeikɨa nekani'aneni.
2SA 9:9 Hikɨ Rawiri Tsiwaha mɨpaɨ katiniutahɨawe, Tsahuri parewiwameya: —Naitɨ ketipaɨmetɨ Tsahuri mati'aitɨwame mɨtipiinieyatɨkai meta tɨɨriyamama, teukarieya Mepiwutseti nekatiniyetuirieka.
2SA 9:10 Mɨpaɨ nekamatini'aitɨaka kwieya keneka'etsani hetsiena mieme, mɨtiutixuxuawere pepɨtiuti'utani kiena kiekatari memɨtekwakakɨ. 'Aniwema tamamata heimana 'auxɨwi memɨyupaume mekematsi'uparewieni meta xeitewiyari te'a'uximayatsiriwamete. Matsi mati'aitɨwametɨkai teukarieya, nemexatsie katiniutikwa'amɨkɨ yuheyemekɨ.
2SA 9:11 Tsiwaha mɨpaɨ katinita'eiya: —Ti'aitame ne nepɨnewaɨriya nemɨmatita'uximayatsirienikɨ. Naimekɨ yanekatiniyurimɨkɨ kepemɨnetita'aitɨani. 'Ana mɨtiyetɨa Mepiwutseti Rawiri mexayatsie titikwa'atɨ kanayani, ti'aitame munu'ayatɨni hepaɨ.
2SA 9:12 Yunaitɨ Tsiwaha tɨɨriyamama Mepiwutseti mekateni'uximayatsiriekaitɨni. Mepiwutseti yuniwe xeime kanexeiyakaitɨni Mikahiyaxi titewakame.
2SA 9:13 Mepiwutseti Kerutsareme kaniukateitɨni, yu'ɨkatetsie muhuriekaikɨ, mana ti'aitame mexayatsie katiniutikwa'akaitɨni.
2SA 10:1 Hikɨ yapaɨmexɨa 'anukayaku 'amunitsixi tiwa'aitɨwame kaniumɨni, nu'ayata Kanuni kanitsutɨani ti'aitatɨ.
2SA 10:2 Merikɨte Rawiri mɨpaɨ katiniu'erieni: «Peuyewetse 'aixɨa nemɨtixeiyanikɨ Kanuni Nakaxi nu'aya, nehamatɨa paapaya ketemɨteyuxewikai hepaɨ». Hikɨ niuki tuayamete kaniwarenɨ'ani, memeinɨtɨanikɨ paapaya mumɨkaikɨ. Kepauka Rawiri nɨ'arimama, memeta'axɨa 'amunitsixi wakwieyaritsie,
2SA 10:3 mana kiekatari ti'aitame Kanuni parewiwamete mɨpaɨ mekateniutahɨawe: «¿'Ekɨri yuri petiwa'eririe 'ikɨ niuki tuayamete Rawiri muwareyenɨ'a, memɨmatsinɨtɨanikɨ 'apaapa hepaɨtsita? Matsi kaniwareyenɨ'ani 'akiekari memɨxeiyakɨ memɨyɨ'ɨwiyakɨ 'arike memika'unakɨ».
2SA 10:4 Hikɨ 'ayumieme Kanuni katiniuta'aita Rawiri hetsɨamiemete memanutaxɨriyanikɨ meta wamɨxiya mataxiriexɨanikɨ hixɨata 'atɨkaime yaxeikɨata wa'ixuriki hixɨapa memɨtsanaxɨanikɨ wakɨtsapapai 'uku'atɨkaime. Hikɨ 'anake kaniwarayenɨ'ani.
2SA 10:5 Rawiri teɨterimama waɨkawamekɨ mepɨyutetewiyakai. Hikɨ Rawiri kepauka yamɨretima kememɨte'anuyekɨnekai, yuniuki tuayamete kaniwarenɨ'ani memɨwanakiyukɨ, meta 'ikɨ niuki memɨwareyetuirienikɨ hetsienamieme: «Keriku xekeneyuhayewani, kwitɨwa 'uxepɨkahahuni kepaukake xemɨxiya metiwawere».
2SA 10:6 Yametehetimaika 'amunitsixi Rawiri hepaɨtsita ke'axamemɨte'uyuriekai, mɨkɨ tɨratu mekaniutiwewieni te'aitamete wahetsɨa kuyaxi memɨwaranɨ'airienikɨ pɨratakɨ: tsiriyutsixi Weti-Xekuwi kiekatari meta Tsuwaha kiekatari, xeitewiyari miriyari kuyaxi mekaniyupaɨmekaitɨni yɨ'ɨkama memuhu, Mahaka ti'aitame kuyaximama xeimiriyari meta Tuwi kuyaximama tamamata heimana huta miriyari mepɨyupaɨmekai.
2SA 10:7 Rawiri kepauka yamɨretima, Kuhawi kaniutanɨ'ani meta yunaime kuyaximama.
2SA 10:8 Hikɨ 'amunitsixi yukiekari kitenie mekaniuyukuxeɨrieni meta mekaniyukuha'aritɨani memɨyukwiyukɨ, tsiriyutsixi Tsuwaha kiekatari meta Xekuwi kiekatari yateewa mekaniyuhayewakaitɨni 'amakuyewatsie, Tuwi meta Mahaka wateɨterima wahamatɨa mekaniyuhayewa.
2SA 10:9 Hikɨ Kuhawi kepauka mɨpaɨ mɨretima kename me'ayehutakai memɨwaraye'unie, 'ayumieme kuyaxi 'ixaheritsixi memeuyutakwiwawe kaniwaranayexeiya tsiriyutsixi memɨwatakwinikɨ,
2SA 10:10 mɨkɨ kuyaxi memɨyuhayewaxɨ yu'iwa 'Awitsahi kaniuhɨritɨani mɨtiwata'aitɨanikɨ, 'amunitsixi memɨwatakwinikɨ.
2SA 10:11 'Awitsahi mɨpaɨ katiniutahɨawe: «Xɨka tsiriyutsixi metatsiha'iwarɨmeni, xeme xekanahuni xemɨtatsiparewienikɨ, xɨkata 'amunitsixi mexeha'iwarɨmeni tameta tekanixeparewikuni.
2SA 10:12 Xepɨkamamaka. Tekaniyutakwikuni tetawaɨriyatɨ tateɨterima wahetsiemieme meta takakaɨyari kiekariteya hetsiemieme. Yawé yaketiuyurieni kemɨtinake».
2SA 10:13 Hikɨ 'ana kwitɨwa Kuhawi meta kuyaximama mekanekɨne tsiriyutsixi mewatakwinike, mɨkɨ mekaniyuta'unaxɨani mewaruxeiyaka.
2SA 10:14 Tsiriyutsixi kememɨteyuta'unakai mewaruxeiyaka, yaxeikɨata 'amunitsixi 'Awitsahi memakatɨ mekaniyuta'unaxɨani yukiekaritsie mekaniyuti'awietaxɨani. Hikɨ 'ayumieme Kuhawi katiniuhayewa 'amunitsixi watakwinike, Kerutsareme kanakunuani.
2SA 10:15 Hikɨ tsiriyutsixi mɨpaɨ metehetimaika kememɨteha'iwariekai 'ixaheritsixi wahepaɨtsita, tawarita mekaniuyukuxeɨrieni.
2SA 10:16 Metatsiere Harari-'Etsexi katiniwarutanɨ'airieni tsiriyutsixi memeyukuha'aritɨanikɨ 'Eupɨrate hatuxameyari 'anutaɨye memɨtitekai, mɨkɨ matsi Kerani paitɨ mekanekɨne Tsuwaki yatiuta'aitaku, kuyaxi tiwa'aitɨwame Harari-'Etsexi hetsiemieme.
2SA 10:17 Kepauka Rawiri yamɨretima 'ikɨ hepaɨtsita, 'ixaheritsixi yunaime kaniwarukuxeɨrieni, Kurutanitsie me'ukɨneka Kerani paitɨ mekanekɨne. Tsiriyutsixi 'aixɨa mekateniuyu'uitɨani Rawiri hepaɨtsita, 'ixaheritsixi mekaniwarutakwini,
2SA 10:18 peru mekaniyuta'unaxɨani 'ixaheritsixi mewamakatɨ. Rawiri 'atahuta tsienituyari kuyaxi kawayatsixi wahetsie memutekai kaniwarukwini meta huta tewiyari miriyari yɨ'ɨkama memuhukai. Meta Tsuwaki kuyaxi tsiriyutsixi tiwa'aitɨwame kaniumieni.
2SA 10:19 Mɨpaɨ metehetimaika tsiriyutsixi 'ixaheritsixi kememɨtewara'iwakai, te'aitamete Harari-'Etsexi memɨparewiekai, 'ixaheritsixi wahamatɨa tɨratu mekaniuwewieni kayuwatɨ memexeiyanikɨ meta mekaniyuyetuani wahetsiemieme memɨte'uximayakakɨ. Hikɨ hatsuakuri tsiriyutsixi 'amunitsixi memɨwaparewienikɨ mepɨkahekɨ.
2SA 11:1 Merikɨtsɨ kepauka taxarita maye'a te'aitamete memayekɨkakai meheuyukwiyuka, Rawiri Kuhawi kaniutanɨ'ani kuyaxi wa'ukiyari, yunaime kuyaxi 'ixaheritsixi wahetsɨa miemete 'amunitsixi memɨwatakwinikɨ meta Xawaha kiekariyari warie memayaxetɨkɨnekɨ. Peru Rawiri Kerutsareme kiekariyaritsie kaneyuhayewa.
2SA 11:2 Hikɨ heiwa 'utaikaikaku Rawiri yu'itaritsie 'anukukeka, yuparatsiyu heima kaniuyeikakaitɨni, manapaitɨ 'uyeikatɨ 'ukaratsi kaniuxeiya 'ɨwaneme. 'Ukaratsi kwinimieme katini'ɨimarikaitɨni.
2SA 11:3 Rawiri katiniutanɨ'ani kemɨ'ane mɨhɨkɨtɨkai timaimɨtɨ, hikɨ mɨpaɨ katiniutaxatɨarieni: «Wetitsawe kanihɨkɨtɨni, 'Eriyani niweya meta 'Uriyaxi 'ɨyaya heti tewiyari».
2SA 11:4 Hikɨ Rawiri katiniuta'aita hetsɨana mɨ'atɨarienikɨ, kepauka Wetitsawe mɨ'atɨarie mɨkɨ hamatɨana kaniukahuni. 'Ariketa yukie kaneyani. Wetitsawe pɨkareutewikai 'akuxi xuriya mita'axiyakaitsie 'uyu'itieka,
2SA 11:5 hikɨ 'ayumieme kaniutihukata meta Rawiri katiniutaxatɨani mɨpaɨ mɨtimaikakɨ.
2SA 11:6 Hikɨ Rawiri Kuhawi 'ikɨ niuki kanenɨ'airieni: «'Uriyaxi heti tewiyari kenenanɨ'airi». Kuhawi mɨpaɨ katiniuyurieni.
2SA 11:7 Kepauka 'Uriyaxi munua, Rawiri kanita'iwawiya Kuhawi kemɨreyurienekai meta kuyaxi kememɨtehe'uximayakai meheyukwitɨwetɨ.
2SA 11:8 Hikɨ mɨpaɨta katinitahɨawe: «'Akie kenemie 'a'ɨya hamatɨa kenekahu'i». Kepauka mɨwayetɨa paratsiyuta, 'Uriyaxi 'imikieri katiniyetuiriyarieni ti'aitame yatiuta'aitaku.
2SA 11:9 Peru 'Uriyaxi yukie pɨkahetɨa matsi paratsiyu kitenie, kuyaxi ti'aitame hɨwemete wahamatɨa pukaatei.
2SA 11:10 Hikɨ Rawiri yakatinetimani 'Uriyaxi yukie mɨkahetɨakɨ, mɨpaɨ katinita'iwawiya: —'Ateewa pepeyetɨa. ¿Ketitayari 'akie pekaretɨa?
2SA 11:11 'Uriyaxi mɨpaɨ katinita'eiya: —Kakaɨyari tɨratuya kakuniyari meta yunaitɨ kuyaxi 'ixaheritsixi meta Kura kiekatari 'ixuriki xamaruyaritɨa yeuta mekanekuteni, meta neti'aitɨwame Kuhawi metatsiere 'iparewiwametemama, 'aixɨa pɨka'ane ne nekiita nemɨye'ani witsinemɨtiukwa'ani meta ne'ɨya hamatɨa ne'ukahuputɨ. Yurikɨ Ti'aitame hɨxie ne mɨpaɨ nekanaineni nepɨkayɨwe mɨpaɨ nemɨyɨaneni.
2SA 11:12 Rawiri mɨpaɨ katinitahɨawe: —'Aixɨa kani'aneni, hikɨ 'ena keneuyuhayewa, 'uxa'ake nepɨmatsi'anunɨ'ani 'a'utɨma. 'Uriyaxi mɨkɨ tukaritsie Kerutsareme kaniyuhayewa. Hikɨ 'uxa'arieka,
2SA 11:13 Rawiri 'ikwai 'ixɨarariyaripa kanita'inieni hikɨ mana kanititawaitɨani. Peru mɨyatɨtɨ yaxeikɨa 'Uriyaxi yukie pɨkahetɨa matsi yaxeikɨa kuyaxi tehɨwemete mematihipitetsie 'ukaitɨ kaniukatariyarieni.
2SA 11:14 Hikɨ 'uxa'arieka ximeri Rawiri Kuhawi xapa kaniuta'utɨirieni, 'Uriyaxi 'utɨma kaneinɨ'ani.
2SA 11:15 Xapa mɨpaɨ payetainekai: «'Uriyaxi kenanuyeyetsa, hakewa matsi waɨkawa memeyukwitɨwetsie. Hikɨ yuxaɨtame xekenehayewa metsekienikɨ meta memierienikɨ».
2SA 11:16 'Ayumieme kepauka Kuhawi kiekari warie memaketɨkɨ, Kuhawi timaitɨ hakewa memayenexɨanikekai waɨkawa memeuyutakwiwawe, 'Uriyaxi mana kaniutikeni.
2SA 11:17 Hikɨ kepauka mana kiekatari memayekɨ Kuhawi metamienike, hipatɨ Rawiri parewiwamete mekaniukwi'iwa, yaxeikɨata 'Uriyaxi heti tewiyari kaniumierieni.
2SA 11:18 Hikɨ Kuhawi Rawiri niuki kanenɨ'airieni naime hepaɨtsita rexaxatɨwatɨ kememɨteyutakwikai.
2SA 11:19 Mɨpaɨ katinihɨritɨani yuniuki tuayame: «Kepauka naime pemɨreitaxatɨani ti'aitame ketemɨteyutakwi hepaɨtsita,
2SA 11:20 xɨka mɨkɨ heyeha'ame mɨpaɨ meretahɨawe: “¿Titayari kwinimieme 'ahurawa xetehakɨ kiekari warita xewaretakwinike? ¿Xekatemaikai tamɨ kiekari kuraruyaritsie me'aka'utɨ memɨxetimɨnikekai?
2SA 11:21 ¿Kemɨ'ane 'Awimereki pumi Yeruwetseti nu'aya? 'Ukaratsi katiniuyurieni wapaitɨ 'akawetɨ Tewetsi kuraruyari 'amatitewatsie teté titɨxɨme mahetekɨ mana kaneikatuaxa kɨmana kanimieni. ¿Ketitayari 'ahurawa xete'ukɨ 'ixumeri 'amatitewa hetɨa?” Xɨka mɨpaɨ mareta'iwawiya, mɨpaɨ ketinetahɨawita: “Metatsiere 'Uriyaxi heti tewiyari kanemierieni, 'ekɨ ti'aitame mati'uximayatsiriwame”».
2SA 11:22 Hikɨ Kuhawi niuki tuayameya kaneyani. 'Uta'aka yapauka Rawiri naime katiniutaxatɨani Kuhawi kemɨreitaxatɨakai.
2SA 11:23 Tewi niuki tuayame mɨpaɨ kaniutayɨni: —Kuyaxi memɨtatsi'aye'unie mekatana'iwarɨmekaitɨni, peru kepauka 'amakuyewatsie temu'axɨa tekaniwaranukuweiya kiekari kiteniepai tekaniwaye'atɨani.
2SA 11:24 Hikɨ temɨmɨmete wapaitɨ kurarutsie memaka'ukai 'akuyaxima mekaniwaretamɨni, hikɨ 'ana ta'iwama yayupaɨmetɨ mekanekwi'iwa. Yaxeikɨata 'Uriyaxi heti tewiyari kanemierieni, 'ekɨ ti'aitame mati'uximayatsiriwame.
2SA 11:25 Merikɨte Rawiri yuniuki tuayame mɨpaɨ katiniutahɨawe: —Kuhawi mɨpaɨ ketinetahɨawi nehetsiemieme waɨkawa 'axapɨkareyɨkɨhɨaweni kemɨreyɨ hepaɨtsita, 'ixipara matsi pɨtiyumemiwa tsepa kemɨ'ane. Mɨpaɨ ketinetahɨawi tawarita hekwamekɨ kewaretakwini mana kiekatari, kepaukake mɨkɨ kiekari naime meka'una.
2SA 11:26 Kepauka Wetitsawe mɨtiutamari kename kɨnaya 'Uriyaxi hemieriekai, 'ana yuhiwerietɨ kanayani hetsiena mieme.
2SA 11:27 'Arike yuhiwerietɨ tiuhayewaku, Rawiri katiniutanɨ'ani paratsiyuta mɨ'atɨarienikɨ hikɨ kanitiwitɨni meta nunutsi kanayexeiya hetsiena mieme. Rawiri kemɨtiuyuri matsi Yawé pika'inakixɨ.
2SA 12:1 Merikɨte Yawé Natani kanenɨ'ani Rawiri hetsɨa mɨtitaxatɨanikɨ. Kepauka mɨkɨ Kakaɨyari niukameya Rawiri hɨxie munua, mɨpaɨ katinitahɨawe: —Teɨteri yuhutatɨ xeime kiekaritsie mekanititekaitɨni. Xewitɨ waɨkawa pɨrexeiyakai, xewitɨta tixaɨtɨ pɨkarexeiyakai.
2SA 12:2 Xiku waɨkawa muxatsi pɨwarexeiyakai meta wakaitsixi,
2SA 12:3 peru tixaɨtɨ mɨkarexeiya muxa xeime xeikɨa pexeiyakai 'inaneka meta mitaweriyakai. Mɨkɨ muxa hamatɨana putawerekai meta niwemama wahamatɨa. Xakɨyatsie pɨtitikwa'akai, watsutana pɨtiharewekai meta heikukwekaku kaneukukutsukaitɨni. Mɨkɨ tewi yuniwe hepaɨ pɨtimaikai yumuxa.
2SA 12:4 Peru 'arike mɨpaɨ katiniuyɨni, xewitɨ 'iwatame xiku hetsɨa kaninuani, hikɨ mɨrexeiya xeime yumuxa kamiemɨtɨ meta yuwakaxi 'iwawatame mɨtiminikɨ, tewi muxa xeime xeikɨa mexeiyakai kaniunawairieni.
2SA 12:5 Hikɨ 'u'enaka Rawiri waɨkawa kaniuyeha'ani mɨkɨ xiku hepaɨtsita, 'ayumieme Natani mɨpaɨ katiniutahɨawe: —Yurikɨ Yawé hɨxie mɨpaɨ nekanaineni, mɨkɨ tewi mɨya mɨreyuri kaneuyeweka mɨmierienikɨ.
2SA 12:6 Meta katinayukatuamɨkɨ naukakɨa muxa kemɨraye'akai, mɨya mɨtiuyurikɨ meta mɨka'itinenimayataxɨkɨ.
2SA 12:7 Merikɨte Natani Rawiri mɨpaɨ katiniutahɨawe: —'Ekɨtsɨ mɨkɨ tewi pekanihɨkɨtɨni. Yawé mɨpaɨ kanaineni, 'ixaheritsixi wakakaɨyari: “Ne ti'aitame nekamanayeitɨani 'Ixaheri kwieyaritsie pemɨtita'aitakɨ meta nekamaniutawikweitsitɨani Tsahuri matsimiemɨkɨkaku.
2SA 12:8 Mati'aitɨwame paratsiyuya nekamaniyetuirieni meta 'ɨitamama nekamaniyetuirieni. Yaxeikɨata 'Ixaheri kwieyaritsie meta Kura kwieyaritsie nekamaniupitɨani pemɨtita'aitakɨ. Xɨka 'ikɨ matsi 'etsitipaɨmekaitɨni, matsi tawarita nekamatiniyetuirienikekaitɨni.
2SA 12:9 ¿Merikɨte titayari Yawé niukieya petiutixani'eri, yapetiyurienetɨ tita mɨkanetinake? 'Uriyaxi heti tewiyari pekaniumieni 'ɨyaya pewitɨmɨtɨ. 'Amunitsixi wa'ixiparakɨ pekanimieni.
2SA 12:10 'Ayumieme hipatɨ 'anuiwarima 'uxa'atɨniwarie mepɨtakwikwiwani 'ixiparakɨ, pemɨnetsi'utatawe'erikɨ meta 'Uriyaxi heti tewiyari 'ɨyaya 'a'ɨya pemayeitɨakɨ”.
2SA 12:11 »Yawé mɨpaɨ kanaineni: “Ne yanekatiniyurimɨkɨ 'anuiwarimatɨtɨ mepɨhɨkɨtɨni memɨmatsi'uximatɨani, penierekaku 'a'ɨitama neniwayetuamɨkɨ xeime hetsɨa, mɨkɨ matsi tukarikɨ wahamatɨa kanikahuimɨkɨ.
2SA 12:12 'Ekɨ 'awie kepemɨtiuyuri, ne yanekatiniyurimɨkɨ hekɨta 'ixaheritsixi yunaime wahɨxie”».
2SA 12:13 Rawiri Natani 'u'enieka mɨpaɨ katinetimani, 'ayumieme mɨpaɨ kaniutayɨni: —Yawé hɨxie 'axanekatiniuyurieni. Hikɨ Natani mɨpaɨ katinita'eiya: —Ke'axapemɨtiuyuri Yawé kamatineuyehɨwirieniri, mɨkɨkɨ pepɨkamɨni.
2SA 12:14 Peru 'aniwe xeikɨa kanimɨmɨkɨ, yapetimaitɨ Yawé pemutatawe'erikɨ.
2SA 12:15 Mɨpaɨ 'utayɨka, Natani yukie kaneyani. Hikɨ Yawé kwiniya nunutsi kaniupitɨani 'Uriyaxi 'ɨyaya meyexei Rawiri hetsiemieme, nunutsi waɨkawa katiniutakwine.
2SA 12:16 Rawiri Kakaɨyari kaniwawiriekaitɨni hetsienamieme yuhakietɨ, tɨkarikɨ kwiepa 'ukaitɨ tihɨximawetɨ kaniukatariyarɨwakaitɨni.
2SA 12:17 'Ukirawetsixi 'iparewiwamete mekanixeiyatɨwekaitɨni me'i'inietɨ manukukenikɨ, matsi mɨkɨ pɨkawaku'eniwakai meta wahamatɨa mɨtikwanikɨ kaniyuku'imawakaitɨni.
2SA 12:18 'Atahuta tukari 'anukayaku, nunutsi kaniumɨni. Rawiri parewiwamete mekanimamakaitɨni memɨte'itaxatɨanikɨ, matsi mɨpaɨ mekaniutiyuanekaitɨni: «Kepauka nunutsi mayenierekaitsie ti'aitame temɨkɨhɨawekaitsie mɨkatatsiku'eniwakai, ¿hikɨ matsi mɨpaɨ xɨka tete'itahɨawe kenameri nunutsi hemɨ yɨkɨ katiyurieni?»
2SA 12:19 Rawiri matsi yuparewiwamete waruxeiyaka 'axɨkai memɨtekuxatakaikɨ, katinetimani kemɨtiuyɨkai mɨpaɨ katiniwaruta'iwawiya: —¿Nunutsi remɨri? Mɨpaɨ mekatenita'eiya: —Huu, kanemɨniri.
2SA 12:20 Hikɨ Rawiri kwiepa 'anukukeka kwitɨwa kaniuti'ɨwa witsimu'ɨa kaniuyutawirieni, hikɨ yutikemaritɨaka Yawé tukita kaneyani nenewieri 'ipitɨanike. 'Anake paratsiyuta nuaka, katiniuta'aita 'ikwai memɨtehekatu'irienikɨ, hikɨ katiniukwani.
2SA 12:21 'Iparewiwamete mɨpaɨ mekatenita'iwawiya: —¿Kehepaɨtɨtɨri mɨya pepɨyɨane? Kepauka nunutsi mayenierekaitsie 'ekɨ matsi pekaniyuhakiekaitɨni meta petiutatsuakakai, hikɨta matsi kutana 'ekɨ pe'anukukeka petikwa'a.
2SA 12:22 Rawiri mɨpaɨ katiniwaruta'eiya: —Kaniyuritɨni kepauka nunutsi mayenierekaitsie nekaniyuhakiekaitɨni neyuheiwerietɨ, mɨpaɨ netiku'eriwatɨ: “Xewitɨ pɨkatimate. Heiwatɨ Yawé netsi'utinenimayata nunutsi 'upitɨani mɨtanierekɨ”.
2SA 12:23 Hikɨ matsi mumɨ, ¿titayari netinehakieka? ¿Netiyɨwekuta tukari ne nemipitɨanikɨ? Mɨkɨ nehetsɨa munuani pɨkayɨweri. Nepɨta 'uxa'atɨni nekaniyemieni hakewa mɨkɨ metɨa.
2SA 12:24 Hikɨ Rawiri yu'ɨya Wetitsawe kanekunɨtɨani meta hamatɨana kaniukahuni. 'Ariketa nunutsi mekanayexeiya xeime, Rawiri Tsarumuni katiniterɨwa. Yawé nunutsi waɨkawa naki'erietɨ kanayani,
2SA 12:25 hikɨ yuniukame Natani kaniutanɨ'ani Keririyaxi memɨteheiterɨwakɨ.
2SA 12:26 Merikɨte 'akuxi Kuhawi 'amunitsixi wakiekari Xawaha kanimienekaitɨni peru ti'aitame muwayekateitsieri kana'iwakaitɨni.
2SA 12:27 Hikɨ yuniuki tuayamete kaniwarenɨ'ani Rawiri mɨpaɨ memɨtehetahɨawekɨ: «Xawaha kiekariyari nekaniutamieni, nekanikunaka wahaputsu memɨwatihanɨwetsie,
2SA 12:28 hikɨ 'ayumieme 'ekɨ ti'aitame nekamaniwawirieka kuyaxi memeyuhayewaxɨ yunaime pemɨwarawitɨnikɨ kiekari pemɨka'unakɨ. Mexɨka katixaɨtɨni ne yanetiniyurimɨkɨ meta kenemɨtitewa yakatinitaterɨwariemɨkɨ».
2SA 12:29 'Ayumieme Rawiri kuyaxi yunaime warukuha'aritɨaka Xawaha kiekariyaritsie kaneyani, kanitamieni meta kane'iwa.
2SA 12:30 'Amunitsixi tiwa'aitɨwame kuruna manamakai hurukɨ muwewiya kaninawairieni, mɨkɨ xeitewiyari heimana tamamata heimana haika kiruyari katineuhanakaitɨni meta tetexi witsimɨ'anene kaneukatekaitɨni. Hikɨ Rawiri pɨta mekananutiketsirieni. Meta Rawiri mɨkɨ kiekaritsie mekanitahaxɨani piinite waɨkawa mekatenepini.
2SA 12:31 Hikɨ mana kiekatari kaniwarayeweiyaxɨani xaɨtsie pɨta, katiniwaruta'uximayatsitɨani kɨyexi xiteyarikɨ, tepɨa manuyemɨtsɨkɨ memɨte'uximayakakɨ meta hatsakɨ, yaxeikɨata waɨriyarika kaniwarupitɨani xɨnariya matitaiyarɨwa memɨte'uximayakakɨ. Naitsarie mɨpaɨ katiniuyurieni 'amunitsixi wahetsɨa, hikɨ mɨpaɨ tiu'aitaka Kerutsareme kanakunuani yunaime yukuyaxima wahamatɨa.
2SA 13:1 Hikɨ yapaɨmexɨa 'anuyeyaku mɨpaɨ katiniuyɨni. 'Awitsaruni Rawiri nu'aya yu'iwa 'uka kanexeiyakaitɨni witsiti'ɨimarikame Tamaxi titewakame. Xewitɨta Rawiri nu'aya 'Aminuni kanitihiwe'erieni.
2SA 13:2 Matsi Tamaxi mɨ'ɨimaritɨkaikɨ, 'Aminuni katiniutakwine yuhɨawetɨ mɨpaɨ tiku'eriwatɨ mɨkwaniwekaikɨ yamɨtiyurienikɨ kemɨtiku'eriwakai hetsiena mieme.
2SA 13:3 Peru 'Aminuni yuhamiku kwinie timaiweme kanexeiyakaitɨni Kunarawi titewakame, Tsimaha kaninu'ayatɨkaitɨni meta Rawiri kanimatsuyatɨkaitɨni. Kunarawi
2SA 13:4 'Aminuni mɨpaɨ katiniuta'iwawiya: —¿Titayari 'ekɨ ti'aitame penu'ayatɨtɨ kwinimieme petiyɨxime petikuye? ¿Titayari pekaneraxaxatɨwa kepemɨti'akuhɨawe? Hikɨ 'Aminuni mɨpaɨ katinita'eiya: —Nerikɨ Tamaxi nepɨhiwe'erie, ne'iwa 'Awitsaruni 'iwaya.
2SA 13:5 Kunarawi mɨpaɨ katinita'ɨkitɨani: —Keneu'akwinima pemɨtikuyeni hepaɨ ketinekani 'a'utatsie. Kepauka 'apaapa mɨmatsixeiyamie mɨpaɨ ketineutahɨawi: “Ximɨxi ne'iwa Tamaxi pamie mɨneramimiekɨ. Ne nekaneixeiyamɨkɨni 'uwa 'ikwai netiwewiriekame meta pɨnerapiniriwani”.
2SA 13:6 Hikɨ 'Aminuni kaniukahuni yukwinimatɨ. Kepauka ti'aitame meikuxei, mɨpaɨ katinitahɨawe: —Ximɨxi ne'iwa Tamaxi pamie hutame tɨriku tsuirayari mɨnetsitiwewirienikɨ meta mɨkɨ mɨnetiminikɨ.
2SA 13:7 Hikɨ Rawiri yuniuki tuayame kanenɨ'ani Tamaxi kie mɨreitaxatɨanikɨ, mɨpaɨ mɨreitahɨawekɨ: «'A'iwa 'Aminuni kie kenemie meta 'ikwai ketinekawewiri».
2SA 13:8 Tamaxi yu'iwa 'Aminuni kie kaneyani yu'utatsie hekakaikame kanetaxeiya. Yapauka tɨriku mɨtɨxiyari kaniuhawiya hutame tsuiraxi kanitiwewirieni meta kanitikwaxiya.
2SA 13:9 Hikɨ xakɨtsie 'ikamanaka kanei'ɨirieni, peru 'Aminuni matsi kaniyuta'imani katikwaimɨtɨ mɨpaɨ pɨta katiniuta'aita: —Yunaitɨ takwa xekenanuyekɨni, xeime tɨma nepɨkaheuxeiyamɨkɨ. Yunaitɨ mewayekɨnekuke,
2SA 13:10 'Aminuni Tamaxi mɨpaɨ katiniutahɨawe: —'Uwapaitɨ nemuyekukutsutsiepai kenenata'ɨiri, meta 'ekɨ kenetineumikwa. Mɨkɨ tsuira mutiwewiekai henaka'ɨka, yu'iwa 'Aminuni kane'ɨirieni kiitana paitɨ,
2SA 13:11 peru kepauka 'ahurawa mutɨa timinike, mɨkɨ karima kaniwiya mɨpaɨ katinitahɨawe: —Ne'iwa hikɨmɨ, nehamatɨa keneukahu'i.
2SA 13:12 Mɨkɨ mɨpaɨ katinitahɨawe: —Ne'iwa, ketineuhayewa pepɨkanetsinanaimaka, 'ixaheritsixi mɨpaɨ tepɨkateyurie. 'Axapepɨkatiyurieneni.
2SA 13:13 Xɨka mɨpaɨ penetsi'uyurieni ne 'anepuyeikani neyutewiyatɨ. ¿'Ekɨta kepe'aneni? 'Ekɨ 'Ixaheri kwieyaritsie 'axatiyuruwame hepaɨ xeikɨa pepɨtixeiyarieka. Ne nepɨmatsiwawirie ti'aitame hamatɨa pemɨtitaxatakɨ, yurikɨ mɨpaɨ nepaine mɨkɨ pɨkata'imani 'a'ɨya nemayanikɨ.
2SA 13:14 'Aminuni matsi pɨka'i'eni, karima 'iwiyaka mɨkatɨrɨkaɨyekaikɨ hepaɨna, waɨriyarika 'ipitɨaka hamatɨana kaniukahuni.
2SA 13:15 Peru 'arike 'Aminuni 'ikumayɨakake kanitixani'erieni, meripaitɨ waɨkawa kemɨtihiwe'eriekai, hikɨtapɨta waɨkawa matsi kanitixani'erietɨyani. 'Ayumieme mɨpaɨ katinitahɨawe: —Kenanukukekari keneumieni.
2SA 13:16 Tamaxi mɨpaɨ katinita'eiya: —Pepɨkanetsi'anuyehɨpani. Mɨya pemɨnetsi'uyuri, hikɨta 'akuxi xɨka penetsi'anuyehɨani matsi waɨkawamekɨ 'axapekatiniyurimɨkɨ. Peru mɨkɨ pɨka'enu'eni,
2SA 13:17 matsi pɨta tiyu'uximayatsiriwame 'uta'inieka mɨpaɨ katinita'aitɨani: —'Ikɨ 'ukaratsi kenanuyehɨwa, xɨkari pe'enuyehɨani kitenie ketineukuketsa.
2SA 13:18 Hikɨ ti'uximayatame takwa kanenuyehɨani, kitenie katineunani. Tamaxi kamixa 'amɨtewi 'amɨmamatetɨtɨ kananakatɨkɨkaitɨni, mɨpaɨ mana ti'aitame niwemama 'ɨimarixi mekateniu'iwikaitɨni.
2SA 13:19 Hikɨ naxi yumu'utsie heutiwiwieka meta yukamixa heukatsanaka, yumu'utsie heutimetɨ huyeta kaneyani 'utatsuatɨ karima.
2SA 13:20 Hikɨ 'iwaya 'Awitsaruni mɨpaɨ katinitahɨawe 'inɨtɨatɨ: —¿'A'iwa 'Aminuni 'ahamatɨa rekahui? Merikɨte kayuwatɨ keneuyeikani netaru, keneyunɨtɨaka meta 'atsipepɨkahaineni, kani'a'iwatɨni 'atsitemɨte'uyurieni tepɨkayɨwawe. Yuhiwerietɨ xeikɨa Tamaxi 'Awitsaruni kie kaniyuhayewa.
2SA 13:21 Kepauka Rawiri ti'aitame mɨtiutamari naime kemɨtiuyɨkai hepaɨtsita, waɨkawa kaniuyeha'ani.
2SA 13:22 'Ana mɨtiyehane 'Awitsaruni 'Aminuni pɨkakuhɨawekai, matsi kanixani'eriekaitɨni 'iwaya Tamaxi hamatɨa mukahuikɨ.
2SA 13:23 Merikɨtsɨ huta wiyari 'anuyeyaku, 'Awitsaruni kaniwaruta'inieni yunaime ti'aitame niwemama 'ixɨararipa, Wahari-Katsuxi paitɨ, 'Epɨrahini kwieyari manuka'atɨka heuhurakaku, mana teɨterimama muxatsi mekaniwarexitɨwekaitɨni.
2SA 13:24 Meta 'Awitsaruni ti'aitame hetsɨa kaniye'ani mɨpaɨ katinitahɨawe: —'Ekɨ ti'aitame, ne ti'a'uximayatame nehɨkɨtɨtɨ nete'uximayatamete nekaniwarexeiyani texikamete. Ne nekamaniwawirieka memɨtehaxitɨwetsie pemɨmiekɨ meta 'aparewiwamete.
2SA 13:25 Ti'aitame mɨpaɨ katinita'eiya: —Tixaɨ neniwe Tanaitɨ temaukɨne tepɨkayɨwawe matsi pekaneti'uxiweni petaremitɨ. 'Awitsaruni waɨriyarika kanipitɨakaitɨni, ti'aitame matsi pɨkayuwaɨri mɨyemiekɨ, mɨpaɨ xeikɨa katinitahɨawe Kakaɨyari kexehe'ɨwiyani.
2SA 13:26 Hikɨ 'Awitsaruni mɨpaɨ katinitahɨawe: —'Ekɨri ti'aitame pemɨkamiekɨ, ¿'aixɨa katiyɨnikeyu ne'iwa 'Aminuni xɨka heuyanike mɨtatsiheteɨtakɨ? Ti'aitame mɨpaɨ katinita'iwawiya: —¿Titayarikuta 'ahamatɨa mɨmiekɨ pereiyehɨwa?
2SA 13:27 Peru 'Awitsaruni ti'aitame waɨriyarika kaniupitɨani, 'ayumieme ti'aitame kaniwarupitɨani 'Aminuni meta hipatɨ niwemama 'Awitsaruni 'utɨa memɨyehukɨ.
2SA 13:28 'Ikɨ 'Awitsaruni yuhetsɨa te'uximayatamete mɨpaɨ katiniwaruta'aitɨani: «'Aminuni xekenexeiyani xepɨkaheiyehɨpani. Kepaukari waɨkawa mɨtawekatsie ne yanekanitayɨmɨkɨ kepauka xemenukuweiya hikɨ xeme xekaneimiekuni. Xepɨkaheumamaka ne matsi nekanihɨkɨtɨni mɨpaɨ nemɨxeti'aitɨa. Xekeneyuwaɨriyani xekenetɨrɨkawini».
2SA 13:29 Te'uximayatamete yamekateniuyurieni 'Aminuni hepaɨtsita 'Awitsaruni kemɨtiwaruta'aitɨa. Hikɨ hipatɨ ti'aitame niwemama mekananuku'uni, yuxexuitɨ yumuratsixi wahetsie me'anutiyaxixɨaka mekanekɨne meyuta'unake.
2SA 13:30 Hikɨ 'akuxi huyeta yateewa mekaniuhukaitɨni Rawiri kepauka niuki mu'eni: «'Awitsaruni ti'aitame niwemama yunaime kaniwarekwini. Mɨkɨ nixewitɨ 'ayenieretɨ pɨkayuhayewaxɨ».
2SA 13:31 'Ana ti'aitame 'anukukeka, yukamixa kaneukatsana hiwerika 'inɨariyari kanayeitɨani, meta kwiepa kaniuhuni. Yaxeikɨata 'iparewiwamete yunaitɨ hamatɨana memu'uwakai yukamixa mekaneukatsanaxɨani.
2SA 13:32 Kunarawi Tsimaha nu'aya Rawiri matsuya, mɨpaɨ katinitahɨawe: —'Ekɨ ti'aitame yunaitɨ 'aniwema mehekwi'iwame pepɨka'erieka, matsi 'Aminuni xeikɨa kane'itɨarieni. 'Awitsaruni yakatinimaikaitɨniri kepaukapai 'Aminuni Tamaxi mukumayɨatsie taruya.
2SA 13:33 'Ekɨ ti'aitame niukitsie yuri pepɨkati'erieka kename 'aniwema yunaitɨ mehekwi'iwaxɨ, matsi 'Aminuni xeikɨa kanemierieni.
2SA 13:34 Neniereme kiekari mɨta'ɨwiya, mana kaneutaniere huyeta meta tau manukayuyuipiketsie neutaniere muhɨriyatsie, mana mekanakahukaitɨni yumɨiretɨ. Hikɨ ti'aitame mɨpaɨ katinekɨhɨawe: «Kurunahini huyeyaritsie teɨteri mekanakahuni muhɨriyatsie». Mexi 'Awitsaruni yuta'unakai.
2SA 13:35 Hikɨ Kunarawi ti'aitame yakatiniutahɨawe: —Kamɨ 'ekɨ ti'aitame, 'ena 'aniwema mekaniuti'axeni kenemɨmarahɨawekai.
2SA 13:36 Hikɨ mɨpaɨ metekuxatatɨ mete'anunɨku ti'aitame niwemama mana mekanatanexɨani karima me'utitsuatɨ, hikɨ ti'aitame meta 'iparewiwametemama mekanitsutɨani me'utitsuatɨ mekayunɨtɨarinɨatɨ.
2SA 13:37 'Awitsaruni kepauka muyuta'unaxɨ, Tarimahi hetsɨa kaneyani heyuti'awietake 'Amihuri nu'ayatsɨa, Ketsuxi kwieyaritsie ti'aitame mɨhɨkɨtɨkai. Haika wiyari mana kaniuyuhayewa. Rawiri matsi yuniwe 'Aminuni hetsiemieme kaniutitsuakakaitɨni tukarikɨ,
2SA 13:39 kepaukata 'Aminuni kemɨtiumɨ hepaɨtsita muyunɨtɨa, kanitsutɨani 'Awitsaruni hauxeiyamɨtɨ waɨkawamekɨ.
2SA 14:1 Merikɨtsɨ Kuhawi Tsariwiya nu'aya yakatinetimani ti'aitame Rawiri 'Awitsaruni waɨkawamekɨ muku'eriwakaikɨ.
2SA 14:2 'Ayumieme katiniutanɨ'ani 'uka mɨwitɨkiemiekɨ waɨkawa mɨtimaiwe, mɨkɨ Tekuha mɨrakutewatsie kaniukateitɨni, mɨpaɨ katinitahɨawe: —Yuheiweriekame hepaɨ ketineu'akemaritɨa, witsimu'ɨa pepɨka'akawiriwani, matsi yuheiweriekame hepaɨ kene'aneni, 'aniwe mumɨni hepaɨ.
2SA 14:3 Hikɨ Kuhawi mɨpaɨ katinita'aitɨani ti'aitame hetsɨa mɨmiekɨ, tita'ɨkitɨaka kemɨreitahɨawe.
2SA 14:4 Kepauka mɨkɨ 'ukaratsi Tekuha kiekame munua ti'aitame hɨxie, kananakatutsire kwiepapai kaniutihɨximakeni. Mɨpaɨ katinitahɨawe: —'Ekɨ ti'aitame, keneneuparewi.
2SA 14:5 Ti'aitame mɨpaɨ katinita'iwawiya: —¿Kekuta tita perayexeiya? Mɨkɨ mɨpaɨ katinita'eiya: —Tixaɨtɨ nepɨkarexeiya, nepɨnexaɨta, nekɨna kaniumɨni.
2SA 14:6 'Ekɨ ti'aitame ne ti'a'uximayatsiriwame yuhutame neniwema nekaniwarexeiyakaitɨni, mɨkɨ mepuyutakwi yeuta me'u'uwatɨ, matsi xewitɨ mumawekaikɨ mɨwata'imaiyakɨ, mɨkɨ xewitɨ yu'iwa kaniumieni.
2SA 14:7 'Ayumieme ne'iwama yunaitɨ mekanenaye'unieka, ti'aitame ne ti'a'uximayatsiriwame. Mekaneniwawirieka nemiyetuanikɨ memimienikɨ mɨtiuyumikɨ, mɨpaɨ mɨrayukatuanikɨ yu'iwa kemɨtiumi, xɨka mɨpaɨ mete'uyurieni nexaɨtame mekanenihayewakuni. Yurikɨ mɨpaɨ nekanaineni xɨka mɨpaɨ mete'uyurieni nekɨna nuiwarieya kaneuyewemɨkɨ kemɨtitewakai 'ena kwiepa.
2SA 14:8 Ti'aitame mɨpaɨ katinita'eiya: —'Akie kenemie, ne'aixɨa nekatiniyurimɨkɨ mɨkɨ hepaɨtsita.
2SA 14:9 Hikɨ 'ukaratsi Tekuha kiekame, mɨpaɨ katinita'eiya: —'Ekɨ ti'aitame, mɨkɨ naitɨ nehetsie kerahɨiyani meta netɨɨriyama wahetsie, ti'aitame 'ahetsie pɨkatixaɨ meta pemɨra'aitatsie.
2SA 14:10 Ti'aitame mɨpaɨ katinitahɨawe: —Xɨka xewitɨ matsihe'uximatɨaka keneneutaxatɨa, tawariri pɨkamatsihe'uximatɨaka.
2SA 14:11 Hikɨ 'ukaratsi mɨpaɨ katinitahɨawe: —'Ekɨ ti'aitame nekamaniwawirieka Yawé takakaɨyari keneutawawiri, neniwe xewitɨ mukakumemiwanikɨ. Ti'aitame mɨpaɨ katinita'eiya: —Yurikɨ Yawé hɨxie mɨpaɨ nekanaineni, 'aniwe 'atsipɨka'itɨarieni.
2SA 14:12 Matsi 'ukaratsi katihayewatɨ mɨpaɨ katinikɨhɨawekaitɨni: —'Ekɨ ti'aitame ne ti'a'uximayatsirime 'ahetsɨa nemɨmieme keneneupitɨa ximɨxi matsi tawarita nemɨmatitaxatɨanikɨ. Ti'aitame mɨpaɨ katinitahɨawe: —Ketineutaxata.
2SA 14:13 'Ukaratsi mɨpaɨ kaniutayɨni: —'Ekɨ ti'aitame Kakaɨyari teɨterimama 'axapepɨkawayurieka. 'Ekɨ 'aniukikɨ 'ahetsie pepɨrahɨpa, 'aniwe 'ateewa metɨa pemɨkapitɨakɨ munuanikɨ yukie.
2SA 14:14 Haa xɨka 'utayeuriyani kwiepa pɨkayɨwe tawarita mikuhanɨni, mɨpaɨ yaxeikɨata tanaitɨ tekanikwikuni. Peru matsi Kakaɨyari tatukari pɨkatatsikunawairiwa, matsi pɨta katinikuwauneni 'ateewa muyeika yuheyemekɨ 'ateewa mɨka'uyeikanikɨ.
2SA 14:15 »'Ekɨ ti'aitame 'ahamatɨa netitaxatake ne nekaneyeyani, teɨteri waɨkawa mepɨtekuxata menetsimariutatɨ. Mɨpaɨ nepɨre'eri: “Ti'aitame hamatɨa nepɨretaxata, heiwatɨ netsihe'enieni ketita nemɨreitawawirieni,
2SA 14:16 'aixɨa tatsiyurietɨ ne meta neniwe memɨtatsikwiku wahepaɨtsita, tahetsie mɨtiyuhayewakɨ Kakaɨyari ketita mɨtatiyetuiri”.
2SA 14:17 »Metatsiere mɨpaɨ nepɨre'eri, niukieya xɨari 'aixɨa netiku'eriwame pɨnetsi'ayeitɨani, 'ekɨtsɨ ti'aitame niuki tuayame Kakaɨyari hetsɨa mieme hepaɨ pekani'aneni, pemɨtimaiwe tita 'aixɨa mɨti'ane meta 'axamɨti'ane hepaɨtsita. Yawé 'akakaɨyari 'aixɨa kematsiyurieka.»
2SA 14:18 Hikɨ mɨpaɨ tiuxataku, ti'aitame mɨpaɨ katinitahɨawe: —Nepɨmatsita'iwawiya, peru nekamaniwawirieka yurikɨ yapepɨnetitahɨawe. 'Ukaratsi mɨpaɨ katinitahɨawe: —'Ekɨ yakenetineutahɨawi.
2SA 14:19 Ti'aitame mɨpaɨ katinita'iwawiya: —¿Wa'atɨ Kuhawi mɨpaɨ merahɨawekaku pemutaine? 'Ukaratsi mɨpaɨ katinita'eiya: —Mɨpaɨ kani'aneni, ti'aitame, Kuhawi mati'uximayatsiriwame 'ikɨ naime kanetineta'ɨkitɨani kenemɨtayɨnikekai.
2SA 14:20 Mɨkɨ mɨpaɨ pɨtiuyuri para 'aixɨa pemɨtiyurienikɨ. Peru 'ekɨ ti'aitame waɨkawa pekatinimaiweni niuki tuayame Kakaɨyari hetsɨa mieme hepaɨ, naime pekatinakumaika 'ikɨ kwieyaritsie kemɨtiyɨane.
2SA 14:21 Hikɨ ti'aitame Kuhawi 'uta'inieka mɨpaɨ katinitahɨawe: —Merikɨte yanekatina'eriwani. Kenemie yaketineyuri 'Awitsaruni neniwe munuanikɨ.
2SA 14:22 Kuhawi kwiepa kaniutihɨximakeni ti'aitame hɨxie, Kakaɨyari kaniutawawirieni 'aixɨa miyurienikɨ, mɨpaɨ tikɨhɨawetɨ: —Pamɨpariyutsi nepɨmatsipitɨa neti'aitɨwame tita nemɨmatiutawawiri yapemɨtiuyurikɨ.
2SA 14:23 Mɨpaɨ 'utayɨka, Kuhawi Ketsuxi kwieyaritsie kaneyani, meta Kerutsareme kanakunuani 'Awitsaruni hamatɨa.
2SA 14:24 Ti'aitame matsi mɨpaɨ katiniuta'aita: «Yukie keheyani meta hatsuaku pɨkahamieni netsiku'iwatanetɨ». 'Ayumieme 'Awitsaruni yukie kaneyani ti'aitame hetsɨa kaye'aka.
2SA 14:25 Naitsarie 'Ixaheri kwieyaritsie tewi pumawekai 'aixɨa tiyuxexeiyatɨ 'Awitsaruni kemɨtiyuxexeiyakai hepaɨ, 'aixɨa pɨ'anekai naitɨ kemutewikai.
2SA 14:26 Kɨpaya kwinimieme pɨrahetekai, xeiwiyaritsie heiwamieme pikaxikakai kwinie mɨraheterekaikɨ kɨpateya, kepauka kɨpateya mɨkaxirie memiku'inɨnɨatakai huta kiruyari pɨraheterekai.
2SA 14:27 Metatsiere, 'Awitsaruni yuhaikame yuniwema 'ukitsi kaniwarexeiyakaitɨni meta xeime 'uka. 'Uka Tamaxi pɨtitewakai, kepauka 'ɨimari matɨa mɨkɨta witsiti'ɨimaritɨ patɨa.
2SA 14:28 'Awitsaruni Kerutsareme 'ukaitɨ huta wiyari kaniuyurieni ti'aitame hɨxie kaheta'axetɨ.
2SA 14:29 Hikɨ 'Awitsaruni heiwa Kuhawikɨ katiniutanɨ'ani ti'aitame hetsɨa mɨmiekɨ, matsi Kuhawi pɨkayutawaɨri mɨmiekɨ. Tawarita kanitanɨ'ani, Kuhawi matsi kaniyuta'imani kayuwaɨriyatɨ.
2SA 14:30 Hikɨ 'Awitsaruni yuhetsɨa miemete mɨpaɨ katiniwaruta'aitɨani: «Neuxei, Kuhawi tsewara kaniuka'eni nemati'etsatsie yateewa. Xekenehu xekenetataiya». Hikɨ te'i'uximayatsiriwamete mehekɨneka Kuhawi 'etsarieya mekanetataiya.
2SA 14:31 Hikɨ Kuhawi kaneyani kwitɨwa 'Awitsaruni kie, mɨpaɨ katinitahɨawe: —¿Ketitayari 'ahetsɨa miemete, ne'etsiya metehetataiyaxɨ?
2SA 14:32 Hikɨ 'Awitsaruni mɨpaɨ katinita'eiya: —Ne nepɨmatsi'utanɨ'a nepɨmatsiwawiriekai ti'aitame hetsɨa pemumiekɨ meta pemeita'iwawiyakɨ ketitayari Ketsuxi kiekariyaritsie nemeyeikakai nereyetɨa. Matsi 'aixɨa pɨyɨnikekai xɨka mana neheyuhayewake. Ti'aitame hɨxie nekanimieni, xɨka nehetsie tixuaweni, kenetsi'umieni.
2SA 14:33 Kuhawi kaneyani ti'aitame katinetaxatɨani, hikɨ ti'aitame 'Awitsaruni mɨwitɨkiemiekɨ katiniuta'aita, mɨkɨta ti'aitame hɨxie kaninuani, kwiepa 'utihɨximakeka waɨkawamekɨ reiyehɨwirietɨ. Matsi ti'aitame 'Awitsaruni kaniutanake 'itsiyakɨ kanitawaɨritɨani.
2SA 15:1 Merikɨtsɨ yapaɨmexɨa tukari 'anukayaku, 'Awitsaruni kaxetate kuyaxa mieme kanikuwauni, yayupaɨmemeta kawayutsixi, yaxeikɨata 'ihɨwemete kuyaxi huta tewiyari heimana tamamata meyupaɨmeme kaniwarukuxeɨrieni.
2SA 15:2 Ximeri meripaitɨ heyeikatɨ huye tetsita kaniutakekakaitɨni, kiekari kitenie yateewa. Kepauka xewitɨ mana mutaneni ti'aitame hetsɨa hauyaka para 'aixɨa meiyurienikɨ 'uximatɨarika kemɨrexeiya hepaɨtsita, 'Awitsaruni kanita'iniwakaitɨni 'iku'iwawiyatɨ ke'aneme kiekaritsie meyeyakai. Mɨkɨ xɨka yutahekɨata kemɨ'ane 'Ixaheri nuiwaritsie mɨmieme,
2SA 15:3 'Awitsaruni mɨpaɨ katiniwakuhɨawekaitɨni: «Ketita pemɨrayexeiya 'aixɨa kani'aneni, peru matsi ti'aitame 'aixɨa mɨrakayuruwa pɨkahexeiya».
2SA 15:4 Mɨpaɨtatsiere 'Awitsaruni putainekai: «Xɨka tiyɨwenike 'ikɨ kwieyaritsie 'itsɨkamekɨ ne'anukakerienike. Yunaitɨ kemɨ'ane 'uximatɨarika mexeiyani yanutsutɨni 'iwaɨrika, nehetsɨa mepɨye'axenikeyu neta 'aixɨa nepɨrakayuruwanikeyu».
2SA 15:5 Metatsiere, xɨka xewitɨ 'itahɨawe hɨxiena 'utihɨximakeni, matsi 'Awitsaruni kaniwaranukuhapanakaitɨni kaniwakutapakaitɨni waɨkawa wanaki'erietɨ meta 'itsiyakɨ kaniwawaɨritɨakaitɨni.
2SA 15:6 'Awitsaruni mɨpaɨ kaniwayurienekaitɨni 'ixaheritsixi yunaime ti'aitame hetsɨa memɨ'axekai para 'aixɨa mɨwayurienikɨ ketita memɨtehayexeiyakai, mɨpaɨ teɨteri katiniwara'iwa wanaki'aritɨatɨ.
2SA 15:7 Nauka wiyari 'anuyeyaku, 'Awitsaruni ti'aitame mɨpaɨ katiniutahɨawe: —Ti'aitame keneneupitɨa Hewuruni kiekariyaritsie nemɨmiekɨ, Yawé kenemɨtiutahɨawixɨ nemɨraye'atɨanikɨ.
2SA 15:8 Kepauka Ketsuxi 'Arami nemuyeikakaitsie, mɨpaɨ nekaniutayɨni: “Yawé xɨka netsi'upitɨani Kerutsareme nemakunuanikɨ, mawari nekaneiwewiriemɨkɨ”.
2SA 15:9 Ti'aitame mɨpaɨ katinita'eiya: —Kenemie peka'a'uximatɨatɨ. 'Awitsaruni kaneyani Hewuruni kwieyaritsie paitɨ,
2SA 15:10 peru 'ana kwitɨwa tupiritsixi kaniwareutanɨ'axɨani yunaime 'Ixaheri nuiwarimama wahetsɨa, mɨpaɨ tiwarahɨawetɨ: «Kwitɨwa kepauka kuxineta yuariyaya xeme'enieni, mɨpaɨ xeketenehiwa: “'Awitsaruni Hewuruni kiekariyaritsie katini'aitametɨni”».
2SA 15:11 Metatsiere 'Awitsaruni huta tsienituyari Kerutsareme kaniwayewitɨni teɨteri, mɨkɨ 'atsimepɨkatemaikai kehapaɨ mɨtiyurimɨkɨkai.
2SA 15:12 Hikɨ mexi'akuxi mawari 'ixɨarariyari wewiekai, 'Awitsaruni ti'aitame 'ɨxatsitɨwame kaniuta'inieni yupaapa Rawiri hetsɨa mieme, mɨkɨ 'Akituperi katinitewakaitɨni meta Kiru kiekame kanihɨkɨtɨkaitɨni. Mɨpaɨ Rawiri memaye'uniekai metɨrɨkaɨyetɨ mekanakɨnirɨmekaitɨni, 'Awitsaruni memaweiyakai matsi waɨkawa mekanakɨnirɨmekaitɨni.
2SA 15:13 Xewitɨ tewi niuki tuayame Rawiri mɨpaɨ katinekuxatɨani: «'Ixaheritsixi yunaitɨ 'Awitsaruni mekaniutinɨni».
2SA 15:14 Hikɨ Rawiri yunaime memiparewiekai mɨpaɨ katiniwarutahɨawe Kerutsareme hamatɨana memɨtitekai: —Hikɨmɨtɨka tekaniyehuni. Tekaniyuta'unakuni, tawarita yɨkɨ temɨyɨni tepɨkayɨwawe 'Awitsaruni hepaɨtsita temɨtata'unakɨ. Mexɨima xeiya, teka'ayekɨniwawekaku nuani. Xɨka tatsi'anuku'axe, haweri 'anekɨa pɨtatsitixɨrieni meta tateɨterima yunaime 'ixiparakɨ kaniwakwimɨkɨ.
2SA 15:15 'Iparewiwamete mɨpaɨ mekaniutiyuani: —'Ekɨtsɨ ti'aitame kepemaineni, tame xeikɨa yatekatenikakɨnikuni.
2SA 15:16 Hikɨ yapauka ti'aitame nayeyani yunaime yuparewiwamete warawitɨtɨ, peru kaniwaruku'eirieni tamamata meyupaɨmeme yutuxexerima paratsiyu memɨ'ɨwiyanikɨ.
2SA 15:17 Kepauka paratsiyuta mayetɨa yunaime yuteɨterima warawitɨtɨ, kaniwakeni kiekari manunieretsiepaitɨ.
2SA 15:18 Yunaitɨ 'iparewiwamete mekanitinɨni. Hikɨ kereteutsixi, pereteutsixi meta 'ataxewi tsienituyari Kahati kiekatari Kahati paitɨ memeiyeweiyakai ti'aitame hɨxie mekanika'uni.
2SA 15:19 Ti'aitame 'Itahi Kahati kiekame mɨpaɨ katiniutahɨawe: —¿'Ekɨ ketitayari tahamatɨa pereyetɨa? Keneukunua 'Awitsaruni ti'aitame hetsɨa kenemie, 'ekɨ 'ateewa kiekame pekanihɨkɨtɨni meta 'akiekaritsie pekanayenɨ'arieni.
2SA 15:20 Nepɨkamatsipitɨa tahamatɨa pemɨyemiekɨ, 'ekɨ pekaniye'akake, ne 'atsinepɨkatimate ketemɨteheuyune. 'Ayumieme keneukunua 'ateɨterima keniwarawitɨtɨ. Kakaɨyari 'ahamatɨa ke'uyeikani matsinaki'erietɨ 'aixɨa tiuka'iyaritɨ.
2SA 15:21 Matsi 'Itahi ti'aitame mɨpaɨ katiniuta'eiya: —Yurikɨ mɨpaɨ nekanaineni Yawé hɨxie meta 'ekɨ ti'aitame, tsepa temekwi'iwaxɨ yatsepa temɨkahekwi'iwaxɨ, ne nepɨyemie hakewa tsepa 'ekɨ pemetɨa.
2SA 15:22 Ti'aitame mɨpaɨ kaniutayɨni: —'Aixɨa kani'aneni, kamɨtsɨ tahamatɨa kenemie. Mɨpaɨ 'Itahi Kahati kiekame tewiyari Rawiri teɨterimama wahamatɨa katineyani meta tɨɨriyamama memeweiyakai wahamatɨa.
2SA 15:23 Hikɨ yunaitɨ teɨteri mekaniutitsuanakaitɨni karima kepauka Rawiri mana muyemiekai yuteɨterima wahamatɨa, kepauka ti'aitame Kiruni 'akiyaritsie manutɨa, teɨteri yunaitɨ mekanitsutɨani makumawetsie me'erietɨ.
2SA 15:24 Wahamatɨata kaniumiekaitɨni Tsaruki, rewitsixi warawitɨtɨ tɨratu kakuniyari memakwekai Kakaɨyari hetsɨa mieme. Hikɨ mɨkɨ mana kakuni mekaniuka'uxipitɨani kwiepa, hikɨ 'Awiyataxi mana mawari kaniuwewieni yunaitɨ teɨteri kiekaritsie me'ayekɨnekuke katiniuhayewa.
2SA 15:25 'Arike ti'aitame mawari wewiwame Tsaruki mɨpaɨ katiniutahɨawe: —Keneukunuitɨa kakuni Kakaɨyari hetsɨa mieme kiekaritsie. Xɨka Yawé ne netsiparewieka, mɨkɨ yapɨtiyurieni ne nemunuanikɨ tawarita nemixeiyakɨ kakuni meta hakewa meka hikɨ.
2SA 15:26 Peru xɨka Yawé netsi'uku'eirieni, 'aixɨa kani'aneni tsepa, kemɨtinake nehetsie yaketiuyurieni kehapaɨ matsi 'aixɨa mɨ'ane hepaɨtsitana.
2SA 15:27 Meta mɨpaɨ katinitahɨawe: —'Ekɨ matsi mɨtixeiya pepɨhɨkɨ, pepɨyɨwe pemukunuani kiekaritsie peka'a'uximatɨatɨ 'Awiyataxi hamatɨa, meta 'aniwe 'Akimatsi pe'awitɨtɨ meta Kunatani 'Awiyataxi nu'aya.
2SA 15:28 Ne makumawetsie makuweritsie nepɨnehayewa kepaukake xeme niuki xemɨnetsihanunɨ'airieni kemɨreyɨaneni hepaɨtsita.
2SA 15:29 'Ayumieme Tsaruki meta 'Awiyataxi Kerutsareme mekaniukunuaxɨani kakuni Kakaɨyari hetsɨa mieme matɨa, mana mekaniyuhayewa.
2SA 15:30 Rawiri matsi, Huriwu hɨriyaritsie kaneutiyune 'utatsuatɨ, yumu'utsie 'anuyukanatɨ meta heumamawetɨ. Yaxeikɨata yunaitɨ keyupaɨmetɨ memeweiyakai yumu'utsie mekananuyukanaxɨani meta me'utitsuatɨ mekananutikɨne.
2SA 15:31 Merikɨte 'ana Rawiri katiniutaxatɨarieni kename 'Akituperi 'Awitsaruni Rawiri maye'unie hetinɨkai. Hikɨ Rawiri mɨpaɨ katiniuyunenewieni: «Yawé, yaketineuyuri yamɨkatiyɨnikɨ 'Akituperi kemɨtiku'eriwa».
2SA 15:32 Kepauka Rawiri hɨritsie manune, mɨrayutinenewitɨretsie Kakaɨyari hetsiemieme, mana Hutsahi panukunakixɨ 'araki tewiyari, mɨkɨ kemɨtiyuheiweriekai 'inɨari pexeiyakai kamixa menakatɨkɨkai kanitsanikaitɨni meta yumu'utsie kanimu'unaximakaitɨni.
2SA 15:33 Rawiri mɨpaɨ katinitahɨawe: —Xɨka nehamatɨa peheyani, nehetsie xeikɨa katinayeimɨkɨ.
2SA 15:34 Matsi 'aixɨa pɨyɨni xɨka Kerutsareme peheyani, 'Awitsaruni mɨpaɨ ketinetahɨawi: “Ti'aitame, ne nepɨmati'uximayatsiriwametɨni. Meripaitɨ 'apaapa ti'uximayatsiriwame nepatɨa, matsi hikɨta 'ahetsɨa mieme nepɨhɨkɨtɨni”. Mɨpaɨ xɨka pe'ɨyɨni pepɨnetsiparewieni 'Akituperi kemɨtiku'eriwa pemɨkaheipitɨakakɨ.
2SA 15:35 Mana mawari wewiwamete mepɨmatsiheparewieka Tsaruki meta 'Awiyataxi, merikɨte ketita pemɨre'enieni paratsiyuta pekatiniwarekuxaxatɨwamɨkɨ.
2SA 15:36 Metatsiere mepɨmatsiheparewieka 'Akimatsi Tsaruki nu'aya meta Kunatani 'Awiyataxi nu'aya, mɨkɨ xekeniwarenɨ'aka memɨnetekuxaxatɨwanikɨ tsepa tita 'umɨraniereni.
2SA 15:37 Hutsahi, Rawiri mɨhamikuyatɨkai, Kerutsareme kaninuani kepauka 'Awitsaruni kiekaritsie meutahaximekai.
2SA 16:1 Hikɨ hɨritsie me'anunexɨaka 'etsiwa 'ari yame'ahutɨ, Rawiri Tsiwaha kananukunake, Mepiwutseti ti'uximayatsiriwame, yuhutame puxuri puwarahapakai me'u'ikame, paa huta tsienituyari, kaxie patsaruyari tsuirayari xeitsienituyari, xapa 'ikwaxiyari tsuirayari xeitsienituyari meta xeime nawi kuxaɨriyaritsie kaxie winuyari.
2SA 16:2 Ti'aitame mɨpaɨ katinita'iwawiya: —¿Keri petiyurieni 'ikɨ naime? Tsiwaha mɨpaɨ katinita'eiya: —Puxuri mepɨ'ayumiemete 'atɨɨriyama memanutiyaxekɨ, paa yaxeikɨata 'ikwaxi 'akuyaxima memitikwanikɨ pɨ'ayumieme meta kaxie winuyari kemɨ'ane memuti'uxikeni makumawetsie pɨwahetsiemieme.
2SA 16:3 Hikɨ ti'aitame mɨpaɨ katinita'iwawiya: —¿Hakewari mati'aitɨwame teukarieya? Tsiwaha mɨpaɨ katinita'eiya: —Kerutsareme peyuhayewaxɨ. Mɨkɨ mɨpaɨ hikɨ katiniku'eriwani kename 'ixaheritsixi ti'aitamekɨ me'itahɨawe teukarieya mɨti'aitakaikɨ.
2SA 16:4 Ti'aitame mɨpaɨ katinitahɨawe: —Merikɨte, Mepiwutseti meripaitɨ naitɨ tita mɨtipiinieyatɨkai hikɨri 'ekɨ katini'apiinitɨni. Tsiwaha mɨpaɨ kaniutayɨni: —Ne netini'a'uximayatsiriwametɨni neti'aitɨwame. 'Aixɨa pekenetsiyurieka 'ayehemekɨ ti'aitame.
2SA 16:5 Hikɨ kepauka Rawiri ti'aitame Wakurini munua, mana xewitɨ tewi kanayeneni Tsahuri nuiwarieyatɨtɨ, Tsimi titewatɨ Kera nu'aya. Mɨkɨ 'axatikɨhɨawetɨ kanitsutɨani,
2SA 16:6 tetexikɨ Rawiri kanitituaxakaitɨni meta yunaime 'iparewiwamete meta tsepa kuyaximama ti'aitame 'aurie memawetɨkatei.
2SA 16:7 'Itate'atɨ, Tsimi ti'aitame mɨpaɨ katinikɨhɨawekaitɨni: —Keneumieni. Tiyumemiwame, pemɨkayukatewiya.
2SA 16:8 'Aixɨa kani'aneni Yawé 'uximatɨarika mɨmatsipitɨa Tsahuri tɨɨriyamama pemɨwarukwikɨ. 'Ayumieme Yawé 'aniwe 'Awitsaruni pɨta ti'aitame kanayeitɨani. 'Axa'anemetsie pekaniyukahɨani. 'Ekɨta yaxeikɨa pepɨ'itɨarieni kepemɨtiuyuri pemɨti'amiekamekɨ.
2SA 16:9 'Awitsahi Tsariwiya nu'aya ti'aitame mɨpaɨ katiniutahɨawe: —¿Kehapaɨtɨtɨ 'ikɨ tsɨkɨ mɨmɨki puyuwaɨriya 'axamɨmatikɨhɨawe neti'aitɨwame? Keneneupitɨa nemɨmiekɨ mu'uya nemanutixitenikɨ.
2SA 16:10 Ti'aitame matsi mɨpaɨ katinita'eiya: —Nehetsiemieme pepɨka'anuyehakeni Tsariwiya nu'aya. Matsi xɨari Yawé yapɨreipitɨa 'axamɨnetitahɨawekɨ. Mɨpaɨ xɨka 'aneni, xewitɨ pɨkayɨwe mita'imaiya.
2SA 16:11 'Awitsahi tikɨhɨawetɨ meta yunaime 'iparewiwamete, Rawiri mɨpaɨ kaniutayɨni: —Metsɨ neniwetɨtɨ kanenimiemɨkɨni, matsi 'ikɨ wenikamini tewiyari tsepa mɨnetiumi. Xekenehayewani 'axamɨnetikɨhɨawenikɨ, Yawé matsi mɨpaɨ katinita'aitɨani.
2SA 16:12 Yawé xɨari yapɨtimate kenemɨtiuka'eniwa, 'aixɨa mɨti'anekɨ pɨta netinakapitɨwani 'axamɨti'anekɨ nehetsie kemɨrahɨiwa.
2SA 16:13 Rawiri meta teɨterimama mekanitsutɨani me'uhutɨ. Tsimi matsi 'aiwarita 'akuxi kaniwaruweiyakaitɨni Rawiri 'axatikɨhɨawetɨ, tetexikɨ 'ituaxirɨmetɨ meta tumuanari teikɨ 'utiwiwiwatɨ.
2SA 16:14 Hikɨ ti'aitame meta kemɨ'ane memeweiyakai 'uxiyakɨ mekwiximetɨ mekaniu'axɨani Kurutani hatuxameyaritsie, manake mekaniuka'uxipieni.
2SA 16:15 Merikɨteta, 'Awitsaruni meta 'ixaheritsixi yunaitɨ memeweiyakai Kerutsareme mekaneutahaxɨakaitɨni, 'Akituperi yaxeikɨata kaneweiyakaitɨni.
2SA 16:16 Hikɨ Hutsahi 'araki tewiyari Rawiri hamikuya, 'Awitsaruni hɨxie kaniutakeni hikɨ mɨpaɨ katiniuhiwa: —Ti'aitame ke'ayeniereni. Ti'aitame ke'ayeniereni.
2SA 16:17 Hikɨ 'Awitsaruni mɨpaɨ katinita'iwawiya: —¿'Ahamiku mɨpaɨ petinaki'erie? ¿Kehapaɨtɨtɨ tamɨ 'ekɨ titayari hamatɨana pekaretɨa?
2SA 16:18 Hutsahi mɨpaɨ 'Awitsaruni katiniutahɨawe: —Hawaikɨ nekɨmana. Matsi ne Yawé menayexei hamikuya nekanihɨkɨtɨni meta 'ikɨ kiekaritsie kiekatari memenayexei meta 'ixaheritsixi yunaitɨ. 'Ayumieme ne 'ahetsɨa nekaniyuhayewamɨkɨ.
2SA 16:19 Matsi ¿kemɨ'ane kuta tawarita nepɨtita'uximayatsirieni? Nu'aya nekatinita'uximayatsiriemɨkɨ meripaitɨ 'ukiyarieya kenemɨtiuta'uximayatsiri hepaɨ.
2SA 16:20 Mɨpaɨta 'Awitsaruni 'Akituperi katiniutahɨawe: —Xekenetimamatekeni kehapaɨ temɨteyurieni.
2SA 16:21 'Akituperi mɨpaɨ 'Awitsaruni katiniuta'eiya: —'Ekɨ keneukahu'i 'apaapa tuxexerimama wahamatɨa, paratsiyu memɨhɨkakɨ mɨwaruku'eiri. 'Ana 'ixaheritsixi yunaitɨ mɨpaɨ mekatenetimaikɨni kename 'ekɨ ti'aitame 'apaapa pe'aye'uxiwe'erie, mɨpaɨ memɨmatsiparewie mekanitɨrɨkariyariekuni.
2SA 16:22 Hikɨ 'ixuriki kiiyari mekaniutawewieni wapaitɨ kii heima 'Awitsaruni yupaapa tuxexerimama wahamatɨa mɨkahunikɨ 'ixaheritsixi yunaitɨ me'ixeiyakaku.
2SA 16:23 'Ana 'Akituperi 'ɨxatsieya Kakaɨyari 'ɨxatsieya hepaɨ kani'anekaitɨni, Rawiri mɨpaɨ katinei'eniekaitɨni meta 'Awitsaruni yaxeikɨa.
2SA 17:1 Metatsiere 'Akituperi 'Awitsaruni mɨpaɨ katiniutahɨawe: —Ne tamamata heimana huta miriyari kuyaxi nekaniwaranayexeiyaweni, 'ikɨ tɨkariyaritsie kwitɨwa nekanayeyeiweni Rawiri nemɨwaumiekɨ.
2SA 17:2 Mɨkɨ kane'uxekamɨkɨ pɨkahetɨrɨkaɨyeni, ne nepeitamiewe, waɨkawa nepeitimariutawe meta teɨterimama nepuwaretaweiyawe hamatɨana meme'uwa. Meta ti'aitame xeikɨa nekanemieweni,
2SA 17:3 hipameta 'ekɨ ti'aitame nekamani'atɨirieweni. 'Ekɨ xeime tewi xeikɨa pepukuwaune mɨmɨnikɨ xɨka mɨpaɨ tiɨyɨni 'ana hipatɨ mepɨ'axɨani, hikɨ 'ana yunaitɨ teɨteri kayuwatɨ mehexeiyatɨ mepakɨne.
2SA 17:4 'Akituperi kemɨtiuxa 'Awitsaruni kaninakire meta yunaitɨ 'ukirawetsixi 'ixaheritsixi,
2SA 17:5 Peru 'Awitsaruni mɨpaɨ kaniutayɨni: —Hutsahi 'araki tewiyari tekanitahɨawikunita, tsipara mɨkɨta ketiku'eriwa.
2SA 17:6 Hutsahi kepauka munua, 'Awitsaruni mɨpaɨ katinita'iwawiya: —¿'Akituperi kemɨtiuxataxɨ mɨpaɨ teteyurieni? Xɨka katixaɨtɨni, ¿'ekɨta kepehaine?
2SA 17:7 Hutsahi mɨpaɨ 'Awitsaruni katiniuta'eiya: —Hikɨ 'Akituperi kemaine 'aixɨa pɨka'ane.
2SA 17:8 'Ekɨ 'apaapa Rawiri pekanimaika yaxeikɨata kuyaximama: waɨkawa mekaniyɨwaweni hikɨ matsi mekaneha'aka hutse yeutanaka yuniwema munawaiyarieni hepaɨ. Metatsiere 'apaapa waɨkawa katinakumaika yumemiwame hepaɨ, xɨari tɨkarikɨ yukuyaxima wahamatɨa pɨkaheyuhayewani.
2SA 17:9 'Ariri hikɨ terɨta kaneyu'awietani yatɨni muwa xaɨtsie. Xɨka mɨkɨ meri 'aye'ani waretakwini, kemɨ'ane mɨpaɨ mɨretimani mɨpaɨ pɨtayɨni: “'Awitsaruni kuyaximama mekanekwi'iwa”.
2SA 17:10 Xɨka mɨpaɨ reyɨni kuyaxi waɨkawa memɨyɨwawe memayu'eririya maye 'uki hepaɨ mekanitimamakuni, metsɨ yunaitɨ 'ixaheritsixi mekatenimaika 'apaapa Rawiri kuya kwinimieme mɨreuyutamiewe kanihɨkɨtɨni meta teɨterimama memɨyɨwawe mekanihɨkɨtɨni.
2SA 17:11 »Neta mɨpaɨ pɨta nepɨtiku'eriwa: 'Ekɨ ti'aitame yunaime 'ixaheritsixi kememɨyupaɨme keniwaruta'ini, Rani kiekatari 'atsita Weritsewa meye'atɨkaime. Mekaniyumɨireni xiekari haramara tetsita mɨtika hepaɨ, meta 'ekɨ ti'aitame pekaniwaranuwitɨmɨkɨ memɨyukwiyutsie.
2SA 17:12 Rawiri tekanetamiekuni, tsepa hakewa meyeikani, hetsiena tekanekaxɨrikuni haɨtsi kwiepa mɨtikaxɨrɨwe hepaɨ. Xewitɨ 'ayenieretɨ pɨkayuhayewa mɨkɨ meta nixewitɨ kuyaximama.
2SA 17:13 Xɨka heyuti'awieta kiekaritsie, tanaitɨ 'ixaheritsixi kaunari mana tekananuhurikuni, teyunɨtɨ tinaime mana timieme 'akitsie paitɨ teteneukaxɨrikuni, tinaime tetenakumaweriyakuni tete xewitɨ pɨkayuhayewa mana».
2SA 17:14 'Awitsaruni meta 'ixaheritsixi yunaitɨ mɨpaɨ mekaniutiyuani: —Hutsahi 'araki tewiyari kemɨtiku'eriwa 'aixɨa kani'aneni keyuri 'Akituperi niukieya. Mɨpaɨ pɨtiɨyɨ Yawé yamainekaikɨri 'Akituperi kemɨtiku'eriwakai yamɨkatiyunikɨ, tsepanetɨ mɨkɨ matsi waɨkawa mɨtimaiwekai, mɨpaɨ 'Awitsaruni 'axamuyurienikɨ.
2SA 17:15 Hikɨ Hutsahi mawari wewiwamete Tsaruki meta 'Awiyataxi mɨpaɨ katiniwarutahɨawe: —'Akituperi 'Awitsaruni 'ipaɨ katiniwaruxatɨani meta 'ukirawetsixi 'ixaheritsixi, neta matsi 'ipaɨ pɨta nepɨtiwarexatɨa.
2SA 17:16 Xeiya mexɨima Rawiri 'ikɨ niuki xekenanunɨ'airi: “Ti'aitame 'ikɨ tɨkaritsie makumawetsie makuweritsie pepɨka'ahayewani, matsi 'aixɨa pɨyɨni, yapauka 'anutaɨyepai xemanukune, nɨka xe'ukwi'iwa mana 'ekɨ ti'aitame meta memɨmatsi'aweiya”.
2SA 17:17 Kunatani 'Akimatsi matɨa 'Enixukeri mekaniyuhayewakaitɨni. Mɨkɨ mepɨyukweriwayuriekai xewitɨ waruxeiyakɨ kiekaritsie meheutahaxɨaximekaku, 'ayumieme xewitɨ ti'uximayatame 'ukaratsi pɨhɨritɨariekai niuki mutuanenikɨ wahetsɨa para mɨkɨtari Rawiri memɨyetuiriwanikɨ.
2SA 17:18 Peru xewitɨ temaikɨ kaniwaruxeiya 'Awitsaruni mɨpaɨ katiniutaxatɨani, hikɨ 'ayumieme mɨkɨ mekaniyuta'una. Kepauka xeime tewi kie memu'axɨa Wakurini mɨrakutewatsie, putsuyata mekaneukahaxɨani mɨkɨ yutakwa meixeiyakaita.
2SA 17:19 Hikɨ mɨkɨ tewi 'ɨyaya putsu kananukanani, hetsienata tɨriku kanaxeɨrieni. Mɨkɨ hepaɨtsita nixewitɨ 'atsipɨkaretima.
2SA 17:20 Kepauka muwa memeutahaxɨa 'Awitsaruni kuyaximama, 'ukaratsi mɨpaɨ mekateniuta'iwawiya: —¿Hakewari Kunatani meta 'Akimatsi? 'Ukaratsi mɨpaɨ katiniwaruta'eiya: —Hapa 'anutaɨye mekananukɨne. Hikɨ Kuyaxi mekanayekɨne mewaruwauximetɨ, peru memɨkawarukaxeikɨ Kerutsareme mekanakunuaxɨani.
2SA 17:21 Kepauka kuyaxi memekɨ, Kunatani meta 'Akimatsi putsuta meniwatikɨne mekanekɨne Rawiri manuyeikakaitsie meteheitaxatɨanike. Mɨpaɨ mekateneitahɨawe: —Hatuxametsie xekenanukɨni mexɨima, 'Akituperi mɨpaɨ kanetayɨni kename xeke'utakwi'iwa.
2SA 17:22 'Ayumieme Rawiri meta kemɨ'ane memeweiyakai mekanekɨne meta Kurutani hatuxameyaritsie mekananukɨne kakahekɨariwekaku 'akuxi. Yunaitɨ mekananukɨne keyupaɨmetɨ memuhukai.
2SA 17:23 'Akituperi matsi 'Awitsaruni mɨkahenu'enikɨ kemɨtiuxatakai, puxu 'ukuha'aritɨaka yukiekaritsie kaneyani. Kepauka yukie munua, 'aixɨa tiuyurieka yutɨɨriyama wahetsiemieme, heyaka xaɨtsie kaneyukawieni. Mɨpaɨ katiniumɨni, kaniukateukieni yupaapa teɨkipa.
2SA 17:24 Rawiri Makanahini hepa kaneyani, meta 'Awitsaruni kanenukuweiya, Kurutanitsie kananuyani 'ixaheritsixi yunaime warawitɨtɨ.
2SA 17:25 'Awitsaruni Kuhawi hetsiemieme xeime kuyaxi tiwa'aitɨwame putahɨawekai 'Amatsaha titewakame, xewitɨ tewi 'Itɨra titewakame munu'ayatɨkai, mɨkɨ 'Itsimaheri xiɨyarieya pɨhɨkɨtɨkai mɨkɨ 'Awikahiri putiwitɨkai, Nakaxi niweya Tsariwiya 'iwaya Kuhawi warutsieya.
2SA 17:26 'Ixaheritsixi 'Awitsaruni hamatɨa memuhukai Karaha kwieyaritsie mekanitiyaxe.
2SA 17:27 Rawiri kepauka Makanahini munua, mana mepɨtitekai Tsuwi Nakaxi nu'aya Xawaha kiekame, mɨkɨ kiekari 'amunitsixi puwakiekari, Makixi 'Amiheri nu'aya Ru-Rewaxi kiekame, meta Waxitsirahi Karaha kiekame Xukerini kiekariyaritsie.
2SA 17:28 Mɨkɨ matsi 'utá mepetɨkai, tekɨxite meta xarite, metatsiere tɨriku, tsewara, harina, xaki, 'imuari 'etsimɨpepe, mume 'etsimɨpepe,
2SA 17:29 xiete, kunere, kexiu meta muxatsi wakexiuyari. Rawiri 'ikɨ 'ikwaite mekateniyetuirieni meta teɨterimama para memɨtetikwanikɨ, mɨpaɨ meteku'eriwatɨ xɨari 'ikɨ teɨteri mepehaakakwi meta mepeharikwi makumawetsie me'u'uwatɨ, meta mepu'u'uxe.
2SA 18:1 Hikɨ Rawiri yukuyaxima kaniwaruti'inɨata meta 'aixɨa katiniwaru'uitɨani, kaniwarutihɨawe xeimiriyari kuyaxi tewa'aitɨwamete meta xeitsienituyari tewa'aitɨwamete.
2SA 18:2 Yunaime me'ayehaikame kaniwarayeitɨani, mexɨakate Kuhawi kaniwarawitɨkɨkaitɨni, hutarieka miemete 'Awitsahi kaniwarawitɨkɨkaitɨni Tsariwiya nu'ya, Kuhawi 'iwaya meta hairieka miemete 'Itahi Kahati kiekame kaniwarawitɨkɨkaitɨni. Hikɨ kaniwarenɨ'ani memɨyukwiyukɨ. Ti'aitame mɨpaɨ kaniutayɨni: —Neta xehamatɨa nekanimieni.
2SA 18:3 Kuyaximama peru mɨpaɨ mekatenita'eiya: —Tixaɨ, 'ekɨ ti'aitame pɨkaheuyewetse pemɨtatsi'anuweiyakɨ. Tame xɨka teheyuta'una, mɨtatsi'aye'unie pɨkatatsihanuku'erieni. Xɨkata tame hixɨata te'atɨ tehekwi'iwa, yaxeikɨa tixaɨtɨ pɨkarayani. Perɨtsɨ 'ekɨ ti'aitame kuyaxi tamamata miriyari pekatinaye'aka. 'Ayumieme matsi 'aixɨa kaniyɨmɨkɨ pemɨkunuanikɨ, pemɨtatsiparewiekakɨ kiekaritsiepai pe'ukaitɨ.
2SA 18:4 Ti'aitame mɨpaɨ kaniutayɨni: —'Aixɨa kani'aneni, xehepaɨtsita kehepaɨ 'aixɨa mɨ'ane mɨpaɨ ne nekatinikayeimɨkɨ. Mɨpaɨ 'utayɨka, kiekari kitenie 'aurie kaniutikeni, mexi kuyaximama me'anuyekɨkakai xeitsienituyaritsixi meta xeimiriyaritsixi.
2SA 18:5 Metatsiere, ti'aitame mɨpaɨ katiniwarutahɨawe Kuhawi, 'Awitsahi meta 'Itahi: —Nekanixehɨritɨaka temaikɨ 'Awitsaruni xemɨkaheinanaimakakɨ. Yunaitɨ kuyaxi mekaniu'enanani, ti'aitame kuyaxi tewa'aitɨwamete kemɨtiwaruhɨritɨa 'Awitsaruni hepaɨtsita.
2SA 18:6 Hikɨ kuyaxi mekanekɨne 'ixaheritsixi mewaretakwinike, mekaniuyukaxeiya 'Epɨrahini kwieyaritsie makuxiuyatsie mekaniuyutakwini.
2SA 18:7 Mɨkɨ tukaritsie kwinimieme katiniuyutikwitɨ: 'ana xeitewiyari miriyari kuyaxi mepukwi'iwaxɨ. Matsi, Rawiri kuyaximama 'Awitsaruni kuyaximama mekaniwara'iwa.
2SA 18:8 Meyukwitɨwetɨ mɨkɨ kwieyaritsie mekaneuyutaweiyaxɨani naitsarie, 'ayumieme mɨkɨ makuxiuyatsie yeuta matsi yuwaɨkawatɨ mekaniukwini yukɨmana, keyuri 'ixiparakɨ memukwi'iwaxɨ.
2SA 18:9 'Awitsaruni, 'uyu'unarɨmetɨ muratsie Rawiri kuyaximama kaniwaranukunake. Hikɨ mura xiu 'atimariweme hetɨa kaneuyehani, muwa 'Awitsaruni mu'uya kɨyexitsie kaniutseni. Mura munautsarɨmekaikɨ 'Awitsaruni wapaitɨ kaniuyewiere kɨyexitsie.
2SA 18:10 Kuya xewitɨ munierixɨ kemɨyɨ, Kuhawi mɨpaɨ katiniutahɨawe: —'Awitsaruni nekanexeiya xiu kɨyexiyaritsie heuyewiekame.
2SA 18:11 Kuhawi mɨpaɨ kaniutayɨni: —Kaukari pemeixei ketitayari mana pekareimi, tamamata pɨrata tuminiyari nekamani'ɨitɨanikekaitɨni meta hɨiyame xeime.
2SA 18:12 Peru kuya mɨpaɨ katinita'eiya: —Tsepanetɨ xeimiriyari tumini pɨrata nemanu'ɨi, xɨari yaxeikɨa nenepɨkanewaɨriya para ti'aitame nu'aya nemumienikɨ, tanaitɨ tepe'enana kepauka xemehɨritɨarie 'ekɨ, 'Awitsahi meta 'Itahi ti'aitame nu'aya temaikɨ 'Awitsaruni xemɨkahenanaimakakɨ.
2SA 18:13 Xɨka ne neheimienike neyutatuatɨ, nekanahekɨarekekaitɨni, ti'aitame hɨxie matsi xewitɨ mɨyuta'una pɨkayɨwe, 'ekɨta yaxeikɨa pepɨkanetsiparewienikekai.
2SA 18:14 Kuhawi mɨpaɨ kaniutayɨni: —Yakɨ xeikɨa 'ahamatɨa kwinimieme nepɨreutewi. Hikɨ yapauka, haikame pitsika 'uti'ɨka kaneyani 'Awitsaruni tawieyatsie kanei'uitɨani, mana mitaxeitsie 'akuxi kanayenierekaitɨni xiu kɨyexiyaritsie 'uyewietɨ.
2SA 18:15 Meta, tamamata meyupaɨmetɨ Kuhawi hɨwemete, 'Awitsaruni 'aurie meha'utɨkɨneka hutariekake mekanimieni.
2SA 18:16 Hikɨ Kuhawi katiniuta'aita kuxineta mɨtahɨtsierienikɨ memɨtehayewakɨ kuyaxi memɨyukwitɨwe, 'ana mekateniuhayewa 'ixaheritsixi mewaruweiyatɨ.
2SA 18:17 Kwitɨwata 'Awitsaruni kaxarieya me'utikweka, hewatixawakaku mekaneikahɨani makuxiuyatsie tetexikɨ mekanenukanani. 'Ixaheritsixi meta mekaneuyuta'unaxɨani yukie.
2SA 18:18 'Awitsaruni mayeyurikaitsie 'akuxi, tete kaniuta'aita 'amɨtakerienikɨ, mayeweritsie Ti'aitame mɨrayetewatsie, mɨpaɨ tiku'eriwatɨ: «Nixeimetɨma neniwe nepɨkahexeiya hetsiena mieme nemaxaxatsiwanikɨ». 'Ayumieme mɨkɨ tete 'amitake yuhepaɨ katiniterɨwa, 'ayumieme hikɨ 'akuxi mɨpaɨ katinimatiwani «'Awitsaruni 'inɨarieya tete 'amitake».
2SA 18:19 'Akimatsi Tsaruki nu'aya mɨpaɨ Kuhawi katiniutahɨawe: —Keneneupitɨa ne'unautsarɨmetɨ nemɨyemiekɨ ti'aitame nemɨretaxatɨanikɨ kename Yawé 'itawikweitsitɨa memeye'unie wahepaɨtsita.
2SA 18:20 Kuhawi mɨpaɨ katinita'eiya: —Hawaikɨ hikɨ 'ekɨ 'ikɨ pepɨkatixatɨamie. Hawaikɨkeri pekatineixatɨamieni, hikɨ hawaikɨ, karikɨ ti'aitame nu'aya kaniumɨni.
2SA 18:21 Hikɨ Kuhawi kuya xeime 'etiupe tewiyari hepa 'uyaka mɨpaɨ katinitanɨ'ani: —'Ekɨ kenemie, ti'aitame ketinetaxatɨa kepemɨtiunierixɨ. Tsurani tewiyari Kuhawi hɨxie 'utihɨximakeka 'unautsarɨmetɨ kaneyani.
2SA 18:22 'Akimatsi Tsaruki nu'aya tawarita mɨpaɨ katinitahɨawe: —Tsepatsɨ kenemɨranuyetɨa, keneneupitɨa nemɨyemiekɨ ne'unautsarɨmetɨ 'etiupe tewiyari hamatɨa. Kuhawi mɨpaɨ katinita'eiya: —Neuxeitsɨ temaikɨ, ¿ketitayarikuta petiyeimɨkɨ? Perepitɨarienike pepɨka'a'erieka pemɨretaxatakɨ.
2SA 18:23 'Akimatsi tawarita mɨpaɨ kaniutayɨni: —Tsepa keneme'itɨarie, nepɨmiekaku. Kuhawi kanipitɨani: —Kenemiekuta. 'Akimatsi kanayeyani 'unautsarɨmetɨ muweritsie, 'etiupe tewiyari hɨxie kaniyani.
2SA 18:24 Rawiri kiekari kitenie putikatei mɨranutakɨkatɨretsie. Hikɨ mɨtaniere wapaitɨ panutiyakai kitenie heima paitɨ 'ixumeritsie, xeime tewi kaniuxeiya mana 'anautsarɨmeme yuxaɨta.
2SA 18:25 Kepauka mɨtaniere ti'aitame mɨpaɨ mɨtiutahɨawixɨ, mɨkɨ mɨpaɨ kaniutayɨni: —Xɨka yuxaɨta heyɨaneni, xɨari niuki 'aixɨa 'anuyɨneme kanikutuaneni. Mexi 'akuxi tewi mana'amiekai 'unautsarɨmetɨ,
2SA 18:26 mɨtaniere mɨpaɨ katinetimani xewitɨta tewi 'utɨmana kananautsarɨmekaitɨni, 'ayumieme kitenie tihɨweme mɨpaɨ katiniutahɨawe: —Xewitɨta tewi yuxaɨta mana kananautsarɨmeni. Ti'aitame mɨpaɨta kaniutayɨni: —Mɨkɨta yaxeikɨa niuki 'aixɨa 'anuyɨneme pukutuane xɨari.
2SA 18:27 Mɨtaniere mɨpaɨta kaniutayɨni: —Mexɨakame 'Akimatsi Tsaruki nu'aya hepaɨ pɨtiunanautsa. Ti'aitame mɨpaɨ katinita'eiya: —Mɨkɨ tewi 'aixɨa pɨtiuka'iyari, xɨari niuki 'aixɨa 'anuyɨneme pukutuane.
2SA 18:28 'Akimatsi kaninuani, ti'aitame kaniutahɨawe kwiepa 'utihɨximakeka, hikɨ mɨpaɨ katinitahɨawe: —Yawé 'aixɨa ke'itɨarieka, ti'aitame 'akakaɨyari, karikɨ kataniyetuirieni kemɨ'ane memɨmatsi'aye'uniekai.
2SA 18:29 Ti'aitame mɨpaɨ katiniuta'iwauni: —¿Neniwe 'Awitsaruni 'aixɨa kwerietɨ reu'erie? 'Akimatsi mɨpaɨ katinita'eiya: —Kepauka mati'uximayatsiriwame Kuhawi mɨnetsihenɨ'akai, yuwaɨkawatɨ kwinimieme mepetayɨxɨa, 'atsinepɨkaretimari ne kemɨreyɨ.
2SA 18:30 Ti'aitame mɨpaɨ katinitahɨawe: —Keniwataye'a 'ena paitɨ keneuweni. 'Akimatsi kaneutayani yateewa kaniutakeni.
2SA 18:31 Hikɨ 'etiupe tewiyari kaninuani, mɨpaɨ kaniutayɨni: —Ti'aitame niuki 'aixɨa 'anuyɨneme nekamenikutuirieneni. Yawé kamaniutawikweitsitɨani yunaime wahetsiemieme memɨmatsi'aye'uniekai.
2SA 18:32 Hikɨ ti'aitame mɨpaɨ katinita'iwawiya: —¿Neniwe 'Awitsaruni 'aixɨa kwerietɨ reu'erie? 'Etiupe tewiyari mɨpaɨ katinita'eiya: —Mɨkɨ temaikɨ hepaɨ mekete'ukwine yunaitɨ memɨmatsi'aye'unie 'ekɨ ti'aitame, meta yunaitɨ kemɨ'ane 'axamemɨmatsiyuriku.
2SA 18:33 'Ikɨ tiu'enieka, ti'aitame waɨkawa kaniuyukahiwerieni, kitenie heima kii makawetsie, kananutiyani mɨpaɨ tiutsuatɨ: «Xɨa'ɨi 'Awitsaruni, neniwe. Neniwe, 'Awitsaruni, neniwe. Ne pɨta nemɨniumɨkaitɨni 'ahetsiemieme. Xɨa'ɨi 'Awitsaruni, neniwe, neniwe».
2SA 19:1 Hikɨ Kuhawi mekatenekuxatɨani kename ti'aitame waɨkawa yuheiweriekai 'Awitsaruni hetsiemieme.
2SA 19:2 Kepauka kuyaxi yunaitɨ memɨte'utamari, kename ti'aitame waɨkawa yuniwe hetsiemieme heyuheiweriekai, mɨkɨ tukaritsie tsepanetɨ memɨte'ayu'iwakai heiwerika tukariyari pɨta mekanayeitɨani yunaitɨ kuyaxi.
2SA 19:3 'Ayumieme kuyaxi kiekaritsie mekaneutahaxɨani 'awie, memuyutetewiyani hepaɨ me'anenetɨ.
2SA 19:4 Matsi ti'aitame, yɨhɨxie heuyukunatɨ pɨkatihayewakai karima mɨpaɨ tiuhiwatɨ: «Xɨa'ɨi, 'Awitsaruni, neniwe. Xɨa'ɨi 'Awitsaruni, neniwe, neniwe».
2SA 19:5 Hikɨ Kuhawi kaneyani hakewa ti'aitame muwayekateitsie, mɨpaɨ katinitahɨawe: «Hikɨ 'ekɨ ti'aitame yunaime te'a'uximayatsiriwamete pepɨtatsitewiyatsitɨa temɨmatsi'utawikweitsitɨa, meta 'aniwema 'ukitsi 'ukari, meta 'a'ɨitama meta 'atuxexerima.
2SA 19:6 'Ekɨ memɨmatsi'aye'unie pepɨwanaki'erie, petiwaraye'uxieta kemɨ'ane memɨmatsinaki'erie. Hikɨ mɨpaɨ pekatinimatsiɨkɨni 'akuyaxima tewa'aitɨwamete pepɨkawareuyehɨwa meta 'akuyaxima. Hikɨ mɨpaɨ nekatinetimani 'ekɨ yapekatina'eriwakaitɨni pɨta tame teyunaitɨ temɨkwi'iwakekaikɨ, 'Awitsaruni pɨtata 'atiuyeikanikeyu.
2SA 19:7 Neuxei hikɨmɨ. Kenanuyeye'a 'akuyaxima keniwaretawaɨritɨa. Xɨka mɨpaɨ pekatiuyurieni, Yawé hɨxie yanekanaineni hikɨ tɨkariyaritsie nixewitɨ tɨma kuya 'ahetsɨa pɨkayuhayewa. 'Ana matsi waɨkawa peyuhiwerietɨ penayeimɨkɨ ti'aitame, kepemɨkati'akahiweriwekai meripaitɨ hikɨ 'akuxi».
2SA 19:8 Hikɨ mɨpaɨ tiutahɨawarieka, ti'aitame kananukukeni kiekari kitenie kanayerɨni. Kepauka kuyaximama memɨte'utamari, yunaitɨ hɨxiena mekaniku'uni. Hikɨ 'ixaheritsixi mekaniyuta'unakaitɨni yuxexuitɨ yukie,
2SA 19:9 meta naitsarie 'Ixaheri kwieyaritsie mekatenikuxatakaitɨni kemɨtiuyɨ. Mɨpaɨ meputiyuanekai: «Ti'aitame pɨtatsi'utawikweitsitɨa memɨtatsi'aye'unie wahepaɨtsita, tahetsie putanua piritsiteutsixi metate'aitɨakaku. 'Awitsaruni yɨanekaku, xeime kwieyaritsie puyuta'unaxɨ.
2SA 19:10 Hikɨri 'Awitsaruni, ti'aitame temeyeitɨakai, mɨrayukwitɨnetsie kanemierieni. Ti'aitame tepɨta'inieni makunuanikɨ, hikɨri pumawe xewitɨ mɨtatsita'imaiya».
2SA 19:11 Hikɨ 'ayumieme Rawiri ti'aitame mawari wewiwamete Tsaruki meta 'Awiyataxi niuki mɨpaɨ katiniwarenɨ'airieni: «Kura kwieyaritsie kiekatari 'ukirawetsixi wahamatɨa xeketenetixata, mɨpaɨ xeketeniwaretahɨawi: “Ti'aitame katinetimani naitsarie 'Ixaheri kwieyaritsie kemɨtikuxaxatsiwa. ¿Titayari xeme 'atsixekatehaitɨka nemakunuanikɨ ne ti'aitame neparatsiyuta?
2SA 19:12 Ne'iwama xeme xekanihɨkɨtɨni, tekanixeinuiwaritɨni. Pɨkaheuyewetse 'amemɨteheutewini mekanetsita'iniewawetɨ”.
2SA 19:13 Meta 'Amatsaha mɨpaɨ xeketenetahɨawi: “'Ekɨ yemekɨ ne'iwa pekanihɨkɨtɨni. 'Ekɨ pɨta nekuyaxima tiwa'aitɨwame pekanayeimɨkɨ 'aheyemekɨ, Kuhawi pɨkatixaɨri. Kakaɨyari 'axa'aneme kenetsi'upitɨani kanetsinenimayatɨ xɨka nekaraye'atɨani”».
2SA 19:14 Mɨpaɨ ti'aitame tiwarutahɨaweku Kura kwieyaritsie kiekatari 'aixɨa mekatenixeiya, hikɨ me'uyɨnɨka mekanita'inieni yunaitɨ munuanikɨ yunaime yukuyaxima warawitɨtɨ.
2SA 19:15 'Ayumieme ti'aitame matsi kaniyukuha'aritɨani mayeyanikɨ, Kurutani hatuxameyaritsie paitɨ kaninuani. Merikɨte Kura kwieyaritsie kiekatari Kirikari mekanekɨne ti'aitame memanukunakekɨ meta hapa memanakɨnetsie memɨwaranatuanikɨ.
2SA 19:16 Matsi Wenikamini nuiwarieya Tsimi Kera nu'aya, Wakurini kiekame, kaniyukumexɨitɨani Kura kwieyaritsie kiekatari wahamatɨa, ti'aitame Rawiri 'anunakeke.
2SA 19:17 Hamatɨana mekaniuhukaitɨni xeimiriyari Wenikamini nuiwarimama metatsiere Tsiwaha, Tsahuri kie mɨti'aitametɨkai, tamamata heimana meyu'auxɨwime yuniwema warawitɨtɨ meta xeitewiyari te'i'uximayatsiriwamete. 'Ikɨ meri Kurutani hatuxameyaritsie mekaniu'axɨani ti'aitame 'akuxi kanuawekaku mana,
2SA 19:18 hikɨ hatɨxametsie mekananukɨne ti'aitame meparewienike meta niwemama memɨwaranatuanikɨ Kurutanitsie. Kepauka ti'aitame manayanikekai, Tsimi Kera nu'aya hɨxiena kaniutihɨximakeni,
2SA 19:19 mɨpaɨ katinitahɨawe: —Ne nepɨmatsiwawirie nekutsiyari ti'aitame ne ke'axanemɨtiuyuri pepɨkahe'eriwani, ne ti'a'uximayatsiriwame ke'axanemɨmatsi'uyuri kepauka 'ekɨ ti'aitame Kerutsareme pemayetɨa. 'Ekɨ ti'aitame nekamaniwawirieka mɨkɨ pemɨratɨmaiyanikɨ.
2SA 19:20 Ne mɨpaɨ nepɨretima 'axanepɨtiuyuri, hikɨ 'ayumieme, Kutse nuiwarimama yunaitɨ meka'axɨawawekaku 'akuxi, ne meri nekanayeyani nematsi'anunakeke nekutsiyari ti'aitame.
2SA 19:21 Peru 'Awitsahi Tsariwiya nu'aya mɨpaɨ kaniutayɨni: —Tsimi, kemɨ'ane Yawé manayexei hepaɨtsita 'axakaniutayɨni, 'ayumieme peuyewetse mɨkɨ mɨmierienikɨ.
2SA 19:22 Rawiri mɨpaɨ katinita'eiya: —Tsariwiya niwemama, xeme xepɨka'anuyehakeni, nepɨta kenemɨtiyurieneni. Xemɨnetsi'aye'unieka hepaɨ xeputiyuane. Hikɨri yunaitɨ 'ixaheritsixi mepɨnetsihetima kename ne ti'aitame nehɨkɨ, 'ayumieme xewitɨ pɨkamɨni.
2SA 19:23 Hikɨ ti'aitame Tsimi mɨpaɨ katiniutahɨawe: —Hawaikɨ pepɨkamɨni.
2SA 19:24 Metatsiere Mepiwutseti Tsahuri teukarieya kanayeyani ti'aitame 'anunakeke. Yu'ɨkate pɨkatihauxiwekai meta yu'ixurikite meta yumɨxiya pɨka'ataxiwekai kepauka ti'aitame mayetɨatsietɨtɨ, kepaukakeri 'aixɨa reu'erietɨ munua Rawiri.
2SA 19:25 Kepauka Kerutsareme yeyaka munua ti'aitame 'anunakeke, mɨkɨ mɨpaɨ katinita'iwawiya: —Mepiwutseti 'aku, ¿Ketitayari nehamatɨa pekaretɨa?
2SA 19:26 Mepiwutseti mɨpaɨ kaniutayɨni: —Neti'aitɨwame 'aku, pepɨtimate ne mati'uximayatsiriwame nepɨka'uyeiwe, ne mɨpaɨ nepɨra'eriwakai puxu xewitɨ panutixiratɨanikekai mɨpaɨ 'ana 'a'utɨa nemɨyemiekɨ. Matsi neti'uximayatsiriwame Tsiwaha kaneniukwamana,
2SA 19:27 meta ti'aitame 'ahɨxie 'axakanetinikuxatani xeikɨa kenemɨka'utayɨ. Matsi 'ekɨ ti'aitame niuki tuayame Kakaɨyari hetsɨa mieme hepaɨ pekani'aneni pekaniyɨweni yapemɨtiuyurieni nehetsie kemɨmatinake.
2SA 19:28 Ne'iwama teyunaitɨ nepaapa hetsiemiemete peuyewetse temɨkwi'iwakɨ 'ahɨxie neti'aitɨwame. Mɨyatɨtɨ, ti'aitame ne ti'a'uximayatsiriwame 'amexatsie pemɨratikwa'a pepɨnetsi'upitɨa nemɨtikwanikɨ. Tawarita xɨari heitserie nepɨkahexeiya nematitawawirienikɨ ti'aitame.
2SA 19:29 Ti'aitame mɨpaɨ katinitahɨawe: —Waɨkawari matsi pemɨnetikuxaxatɨwani pɨkaheuyewetse. Ne 'ari yanekaniutayɨni 'ekɨ Tsiwaha matɨa kwie xekeneuyutaxiteki.
2SA 19:30 Mepiwutseti mɨpaɨ katinita'eiya: —Mɨkɨ pɨyɨwe nekwie naime yuhetsiemieme mayeitɨani, ne ne'iyari 'aixɨa pɨ'ane 'ekɨ neti'aitɨwame xɨka 'aixɨa pereu'erietɨ 'aparatsiyuta penuani.
2SA 19:31 Metatsiere Waxitsirahi Karaha kiekame Kurutani hatuxameyaritsie kaninuani. Xukerini mɨrayetewatsie paitɨ kaneyeyakaitɨni, ti'aitame kepauka hatuxametsie manuyanikekai hamatɨana memanukɨnekɨ memiparewienikɨ.
2SA 19:32 Waxitsirahi, 'ari kani'ukiratsitɨkaitɨni nauka tewiyari wiyari kanexeiyakaitɨni, mɨkɨ ti'aitame katinikupiniriekaitɨni tita mɨreuyehɨakai kepauka Makanahini kiekariyaritsie mukatei, mɨkɨ waɨkawa katinexeiyakaitɨni.
2SA 19:33 Ti'aitame mɨpaɨ katinitahɨawe: —Kenenanuweiya. Kerutsareme nehamatɨa kenekani, ne ketita pemɨreuyehɨaka nepɨmarekupinirieka.
2SA 19:34 Waxitsirahi mɨpaɨ katinita'eiya: —Neuxei, ¿kepaɨmeme wiyari 'akuxi kuta nepuyeikani? Titayari nereumieni 'ahamatɨa Kerutsareme paitɨ.
2SA 19:35 Nauka tewiyari wiyari nekanexeiyaniri, waɨriyarika nekatinetimamateni tita 'aixɨa mɨti'ane meta 'axamɨti'ane, meta nepɨkareu'inɨatari neteta tita nemɨtikwa'a meta tita nemɨti'ie, meta nepɨkawa'enieri kwikamete 'ukitsi 'ukari. Pɨkaheuyewetse xɨari nemɨmatsihe'uximatɨaka.
2SA 19:36 ¿Ketitayari kuta ti'aitame mɨpaɨ penerakapitɨanikeyu? Matsi hapa xeikɨa nekamananuteɨtamɨkɨ Kurutani hatuxameyaritsie.
2SA 19:37 Keneneupitɨa ne'iwama wahetsɨa nemakunuanikɨ, mana nememɨnikɨ meta nepaapama wateukiyapa nemekateukienikɨ. 'Ena nepɨmatsihɨwirieni Kimani, mɨkɨ 'ekɨ ti'aitame mɨmareta'uximayatsirienikɨ meta 'ahamatɨa manuyanikɨ hapa. Nehetsiemieme kepemɨreyurienikekai, mɨkɨ hetsiemieme mɨpaɨ ketineyuri.
2SA 19:38 Ti'aitame mɨpaɨ katinita'eiya: —'Aixɨa kani'aneni, Kimani nehamatɨa kaniyemieni, kepemaine hetsiena mieme mɨpaɨ nekatinekayeimɨkɨ. 'Ekɨta tita tsepa pemɨreuyehɨwa nekamatiniyetuiriemɨkɨ.
2SA 19:39 Hikɨ teɨteri meta ti'aitame Kurutani hatuxameyaritsie mekananukɨne. Meta ti'aitame Waxitsirahi kaniu'itseni metatsiere Kakaɨyari kaniutawawirieni 'aixɨa miyurienikɨ, hikɨ Waxitsirahi yukie kanakunuani.
2SA 19:40 Ti'aitame Kimani 'eweiyakaku meta kuyaxi Kura kwieyaritsie kiekatari metatsiere kuyaxi 'Ixaheri kwieyaritsie kiekatari hixɨapa me'atɨ me'eweiyakaku Kirikari kaneutiyune.
2SA 19:41 'Ayumieme hipatɨ 'ixaheritsixi ti'aitame hetsɨa mekaniye'axɨani mɨpaɨ mekatenitahɨawe: —¿Titayari ta'iwama Kura kwieyaritsie kiekatari, ti'aitame yeme yuhetsɨa mieme metehayeitɨa Kurutanitsie 'anayaku, titayari mɨkɨ xeikɨa mete'iwitɨxime meta tɨɨriyamama metatsiere kuyaximama yunaime?
2SA 19:42 Kura kwieyaritsie kiekatari mɨpaɨ mekaniutiyuani: —¿Titayari kuta xeteha'a? Ti'aitame 'ahurawa ta'iwa mɨhɨkɨkɨ. Ti'aitame 'ikwai mɨtatsiminikɨ tepɨkayɨa meta 'imikieri mɨtatsiyetuirienikɨ.
2SA 19:43 Matsi 'ixaheritsixi tawarita mɨpaɨ mekaniutiyuani: —¿Ketitayari kuta waɨkawa xetatsixani'erietɨ xeteyɨa? Tame matsi tamamata mexɨa heitserie tepexeiya Rawiri ti'aitame hetsiemieme keyuri xeme. Meta, tame meri tete'ita'ini munuanikɨ. Hikɨ matsi Kura kwieyaritsie kiekatarita waɨkawa meha'atɨ mekaniwaruta'eiya.
2SA 20:1 Merikɨtsɨ xewitɨ mana puyeikakai 'axatiuka'iyaritɨ Tsawa titewatɨ Wikɨri nu'aya, Wenikamini nuiwarieya hetsiemieme. Kuxineta kaniutahɨtsieni meta mɨpaɨ katiniuhiwa: «'Ixaheritsixi, takie teyunaitɨ tepɨtayeixɨani, Rawiri hetsɨa tixaɨtɨ tepɨkatehayexeiya, meta 'etsiwatɨma mɨtatiyetuirienikɨ 'Itsahi nu'aya».
2SA 20:2 Hikɨ 'ayumieme 'ixaheritsixi yunaitɨ Rawiri mekaniuku'eirieni, Tsawa Wikɨri nu'aya pɨta mekananukuweiya. Matsi, Kura kwieyaritsie kiekatari ti'aitame mepɨka'uku'eiri, hamatɨana mekanekɨne Kurutani meyekɨneka Kerutsareme paitɨ mekaniye'axɨani.
2SA 20:3 Kepauka ti'aitame Rawiri yuparatsiyuta munua Kerutsareme, yutuxexerima kaniwarayenɨ'ani tamamata memɨyupaɨmekai yuparatsiyu muwaruhɨritɨakai, xaɨtsie pɨtari me'ɨwiyariekame kaniwarayeitɨani. 'Akuxi pɨtiwamikwakai, peru tawariri wahamatɨa pɨka'ukahui. Kiita mepeunakai yuheyemekɨ, wiuraxi wahepaɨ mepɨ'anekai, mɨpaɨ me'anenetɨ mepɨyuhayewaxɨ kepaukake memukwi.
2SA 20:4 Hikɨ ti'aitame 'Amatsaha mɨpaɨ katiniuta'aitɨani: «Kuyaxi Kura kwieyaritsie miemete keniwarukuxeɨri meta 'ena pepɨnuani wahamatɨa haika tukari 'aye'ayu».
2SA 20:5 Kanayeyani 'Amatsaha kuyaxi mɨwakuxeɨrienikɨ, matsi kepauka mutipiniyarie pɨkaraye'atɨa.
2SA 20:6 'Ayumieme Rawiri 'Awitsahi mɨpaɨ katiniutahɨawe: «Hikɨta Tsawa Wikɨri nu'aya waɨkawa matsi 'axakataniyuriemɨkɨ keyuri 'Awitsaruni. 'Ayumieme kuyaxi 'aixɨa memɨ'anene keniwaruta'inieka kenanukuweiya, nɨka xeime kiekari 'aixɨa mɨ'anetsie heyuti'awieta, tatsi'utawikweiya».
2SA 20:7 Hikɨ Kuhawi kuyaximama, kereteutsixi meyɨnɨtɨ meta pereteutsixi meta kuyaxi yemekɨ waɨkawa memɨyɨwawe, 'Awitsahi warawitɨkɨkaku Kerutsareme mekanayekɨne Tsawa Wikɨri nu'aya memanukuweiyakɨ.
2SA 20:8 Kawahuni mɨrakutewatsie me'u'axɨaku tete 'amɨnena manukatsie, 'Amatsaha kaniwaranukunake. Kuhawi kuya kamixayari kananakatɨkɨkaitɨni hɨiyamekɨ 'anayɨhɨatɨ meta yuteuritsie nawaxa 'amɨpa pakakekai. Peru 'umiekaku, nawaxaya kanewatiweni.
2SA 20:9 Kuhawi yutseriekɨ 'Amatsaha mɨxiyayatsie kanikawiere 'i'itsenike, mɨpaɨ tiku'iwawiyatɨ: «¿Ne'iwa, keperaka'iyuniwa?»
2SA 20:10 'Amatsaha Kuhawi 'atsipɨkaretixei tapakɨ nawaxa 'amɨpa makwekai, hikɨ Kuhawi huriepana kaneitseni, 'Amatsaha kwinuriteya kwiepa kaniukawiwieni. 'Amatsaha xeimieme 'utsekieka kaniumɨni, hikɨ 'anatari Kuhawi meta 'iwaya 'Awitsahi mekanekɨne Tsawa Wikɨri nu'aya memuweiyakaikɨ.
2SA 20:11 Kuya xewitɨ Kuhawi hetsɨa mieme, 'Amatsaha kaxarieya 'aurie 'utakeka, mɨpaɨ katiniuhiwa: «Kemɨ'ane Kuhawi hetsie xemɨtewiya meta Rawiri hetsie, Kuhawi xekenanuweiya».
2SA 20:12 Hikɨ 'Amatsaha kaxarieya xuriyakɨ heu'ɨwatɨ huye hixɨapa kaniukateitɨni, kuyaxi yunaitɨ mana memuyekɨkakai mekaniwa'uwekaitɨni me'ixeiyakutɨ. Kepauka mɨkɨ kuya mɨpaɨ mɨretima, 'ɨtsita paitɨ kaxarieya kanekutuani meta 'ixurikikɨ kanenukanani.
2SA 20:13 Hikɨ 'Amatsaha huyeta 'utikweiyaku, kuyaxi yunaitɨ Kuhawi matɨa mekanekɨne, Tsawa Wikɨri nu'aya me'anukuweiyake.
2SA 20:14 Tsawa 'ixaheritsixi wanuiwarima wahetsɨa naitsarie kanakukexiya, 'Aweri-Wetimaka paitɨ kaniye'ani meta mana Wikɨri nuiwarimama yunaitɨ mekanitinɨni.
2SA 20:15 Kuhawi kuyaximama 'Aweri-Wetimaká kiekariyaritsie mekaniu'axuani meta menayaxetɨkɨne kiekari warie. Hetsiena memɨtikɨne mekaniutawewieni kiekari kuraruyaritsie heutiyuneme memika'unakɨ, kuyaxi kepauka kiekari tetsariyayari meka'unatɨ memitsutɨa,
2SA 20:16 hikɨ 'uka kwinie timaiwetɨ mɨkɨ kiekariyaritsie kiekame mɨpaɨ katiniuhiwa: —Xekeneneu'eni. Xekeneneu'eni. Kuhawi mɨpaɨ xeketenetahɨawi 'ena nehetsɨa kehayani ne hamatɨana nemɨtitaxatakɨ.
2SA 20:17 Hikɨ Kuhawi mana 'ahurawa kaniutiyani. 'Ukaratsi mɨpaɨ katinita'iwawiya: —¿Kuhawi 'ekɨ petihɨkɨ? Kuhawi mɨpaɨ katinita'eiya: —Netsɨ nekanihɨkɨtɨni. Hikɨ 'ukaratsi mɨpaɨ katinitahɨawe: —Keneneu'eni ne ti'uximayatame 'ahetsɨa mieme kenemɨmatitaxatɨani. Kuhawi mɨpaɨ katinita'eiya: —Nepɨmatsi'enieni.
2SA 20:18 'Uka mɨpaɨ kaniutayɨni: —Meripaitɨ, kepauka 'uximatɨarika muxuawekai, teɨteri 'aixɨa mepɨtekuyuruwakai 'ena, 'ayumieme 'ikɨ niuki mɨpaɨ manɨyɨne 'apuyeika: “Xekenehu 'aixɨa xeketeneyuri 'Aweri kiekariyaritsie”.
2SA 20:19 'Ikɨ kiekaritsie kiekatari matsi kayuwatɨ 'amepu'uwa meta yamepɨtekahu, 'Ixaheri kwieyaritsie matsi tame waɨkawamekɨ tepeuyewetse. ¿Ketitayari xeme xete'ika'unaku Yawé tipiinieya?
2SA 20:20 Kuhawi mɨpaɨ kaniutayɨni: —Hawaikɨ. Kakaɨyari kenetsiparewieka mɨpaɨ nemɨkatiyurienikɨ, nemɨka'ika'unakɨ.
2SA 20:21 Ne mɨpaɨ 'ayumieme nepɨkanua, nematsi pɨta tewi xeime newiyake nepunua Tsawa titewakame Wikɨri nu'aya. Mɨkɨ 'Epɨrahini hɨriyaritsie pɨkiekame meta Rawiri ti'aitame 'aye'unietɨ payuyeitɨa. Xɨka mɨkɨ tewi xenetsiyetuirieni, tame tekaniyehuni. 'Ukaratsi mɨpaɨ katinita'eiya: —'Aixɨa kani'aneni. Tetsariya warie mu'uya tekaneukahɨakuni.
2SA 20:22 'Ukaratsi waɨkawa timaiwetɨ yunaime mana kiekatari katiniwarutixatɨani. Hikɨ Tsawa Wikɨri nu'aya mu'uya mekananutixiteni meta Kuhawi hetsɨa mekaneikahɨani. 'Ana Kuhawi kuxineta kaniutahɨtsieni, kuyaxi yunaitɨ yukie mekaneutayeixɨani. Kuhawi Kerutsareme kanakunuani ti'aitame hetsɨa.
2SA 20:23 Kuhawi 'ixaheritsixi kuyaxiyari wa'ukiyari pɨhɨkɨtɨkai, Wenahiyaxi Kuyara nu'aya kereteutsixi meta pereteutsixi ti'aitame hɨwemete wa'ukiyari pɨhɨkɨtɨkai.
2SA 20:24 'Arunirani waɨriyarika te'uximayatamete pɨhɨritɨariekai, meta Kutsapati 'Akiruri nu'aya ti'utɨwame pɨhɨkɨtɨkai,
2SA 20:25 Tsewa kemɨtiɨyɨ ti'utɨwame pɨhɨkɨtɨkai, Tsaruki meta 'Awiyataxi mawari wewiwamete mekanihɨkɨtɨkaitɨni,
2SA 20:26 'Ira Yahixi kiekame ti'aitame Rawiri hetsiemieme mawari wewiwame pɨhɨkɨtɨkai.
2SA 21:1 Merikɨtsɨ Rawiri ti'aitakaku haaka kaniutaweni haika wiyari. Rawiri Yawé kaniutahɨawe miparewienikɨ, mɨpaɨ Yawé katinita'eiya: «Tsahuri meta nuiwarimama puwanakekai hipame waxuriya memɨtayeurienikɨ, mɨkɨ kawahunitari mepɨwarukwi, 'ayumieme haka kanixuaweni».
2SA 21:2 Kawahunitari 'ixaheritsixi mepɨkahɨkɨtɨkai, 'amuxeutsixi memuyuhayewaxɨ wanuiwari pɨta mepɨhɨkɨtɨkai. Tɨratu 'ixaheritsixi mɨkɨ wahamatɨa mekaniuwewiekaitɨni yunaitɨ kayuwatɨ memu'uwanikɨ, matsi Tsahuri yemekɨ pɨka'inakekai yunaime pɨwakumaweriyakekai. Yuteɨterima waparewimɨtɨ xeikɨa 'ixaheritsixi meta Kura kwieyaritsie kiekatari. Hikɨ Rawiri kawahunitari kaniwarutakwewieni yuhetsɨa,
2SA 21:3 hikɨ mɨpaɨ katiniwaruta'iwawiya: —¿Xehetsiemieme kenetiyurieni kexeteha'eriwa? ¿Kehepaɨ netiyurieme 'aixɨa nepɨtiyurieni xehetsiemieme, xewitɨ ke'axamɨxe'uyuri, mɨpaɨ 'ana xeme xemitawawirienikɨ Kakaɨyari 'aixɨa mɨtatsiyurienikɨ Yawé temɨteɨterimama?
2SA 21:4 Kawahunitari mɨpaɨ mekatenita'eiya: —Tsahuri tuminieya tame tepɨkaheuyehɨwa meta tɨɨriyamama watumini, meta tame heitserie tepɨkahexeiya xeime 'ixaheri tewiyari temumieni. 'Ayumieme tawarita ti'aitame mɨpaɨ katiniwaruta'iwawiya: —Kamɨtsɨ, ¿kexehaitɨkani kenetiyurieni xehetsiemieme?
2SA 21:5 Mɨkɨ mɨpaɨ mekatenita'eiya: —Tsahuri pɨtatsika'unamɨkɨkai, matsi katanakɨxɨtɨanikekaitɨni meta 'Ixaheri wakwieyaritsie katanayeweiya.
2SA 21:6 'Ayumieme hikɨ 'atahutame Yawé menayexei Tsahuri nuiwarimama tepɨmatsiwawirie pemɨtatsiyetuirienikɨ, temɨwakawɨtɨanikɨ Yawé hɨxie Tsahuri manukatei Kiweya mɨrakutewatsie. Ti'aitame mɨpaɨ katiniwarutahɨawe: —Nekanixeyetuiriemɨkɨ.
2SA 21:7 Matsi Rawiri Kunatani hamatɨa tɨratu memuwewiekaikɨ Yawé hɨxie, 'ayumieme ti'aitame Mepiwutseti kaniutinenimayata, Kunatani nu'aya meta Tsahuri teukarieya.
2SA 21:8 Matsi 'Aximuni meta xeime Mepiwutseti memɨtiwiyarienikɨ katiniuta'aita, mɨkɨ yuhutatɨ Xitsipa niwemama 'Ayaha niweya Tsahuri hamatɨa mɨwarayexeiyakai, meta Merawi Tsahuri niweya, niwemama yu'auxɨwitɨ 'Ariheri Waxitsirahi nu'aya hamatɨa mɨwarayexeiyakai Mekura kiekame.
2SA 21:9 Rawiri kawahunitsixi kaniwayetuirieni, mɨkɨ yemuri 'etsimupetsie mekaniwarukawɨtɨani Yawé hɨxie. Me'atahutatɨ 'axeikɨa mekaniukwini, tatsutɨariekaku tsewara 'itsanariyari.
2SA 21:10 Hikɨ Xitsipa 'Ayaha niweya kuxitari 'utihurieka mana nuaka kaniyuka'itɨani 'ayeparitsie mana hunike, mana kaniyuhayewa 'itsanaxa mukatsutɨarietsietɨtɨ meta kepaukake mukawiyexɨ. Wirɨkɨxi tukarikɨ pɨkawapitɨakai meta tɨkarikɨ yeutari pɨkawapitɨakai wakaxari memɨkwaka.
2SA 21:11 Kepauka Rawiri mɨtiutaxatɨarie Xitsipa 'Ayaha niweya kemɨtiuyuriekai Tsahuri tuxerieya,
2SA 21:12 hikɨ Rawiri Tsahuri meta nu'aya Kunatani wa'umeteyari kanekɨ'ɨni, Kawetsi Karaha paitɨ metihetei. Piritsiteutsixi Wetitsani kiekariyaritsie teɨteri wahɨxie mekaniwarukawɨtɨakaitɨni, kepauka Tsahuri mema'iwaxɨtsie Kiriwuha yemuriyaritsie, peru Kawetsi kiekatari mɨkɨ kiekariyaritsie mekaniwarunawani.
2SA 21:13 Merikɨte Rawiri katiniuta'aita wa'umeteyari manu'ɨiyanikɨ Kerutsareme paitɨ. Meta yaxeikɨa 'atahuta 'ukitsi memukawɨtɨariekai.
2SA 21:14 Mɨpaɨ katiniukateukieni Tsahuri meta Kunatani wa'umeteyari, Kihitsi teukiyapa Tsahuri mɨpaapayatɨkai, Tsera mɨrakutewatsie Wenikamini kwieyaritsie. Naitɨ mɨpaɨ katiniɨyɨni ti'aitame yatiu'aitaku, hikɨ 'anake Kakaɨyari mɨkɨ kwieyaritsie kiekatari kaniwarutinenimayata.
2SA 21:15 Merikɨtsɨ piritsiteutsixi tawarita mekanikumaixɨani memɨwatakwinikɨ 'ixaheritsixi. 'Ayumieme Rawiri kanayeyani yukuyaxima wahamatɨa memɨwatakwinikɨ. Hikɨ Rawiri kaniuti'uxe yumienetɨ,
2SA 21:16 'ayumieme xewitɨ kwinimieme 'utewitɨ pimieximekai 'Itsiwiwenu titewatɨ, mɨkɨ 'ixipara hekwame kanakwekaitɨni meta wurunitse pitsikayari haika kiruyari heimana 'etsiwa matsi katinahetekaitɨni.
2SA 21:17 Hikɨ 'Awitsahi Tsariwiya nu'aya kaneyani Rawiri parewienike, hikɨ piritsiteu katiniukwinitɨani kanimieni. 'Ana Rawiri kuyaximama mɨpaɨ mekatenitahɨawe: «Hatsuakuri 'ekɨ ti'aitame pepɨka'ayeyaniri tahamatɨa pemɨ'amienenikɨ, xewitɨ matsi'umienikɨ meta 'ixaheritsixi takɨxeme kapa 'utɨnikɨ».
2SA 21:18 'Ariketa yapaɨmexɨa 'anuyeyaku Kuhuwi mɨrakutewatsie tawarita piritsiteutsixi mekaniwarutakwini, 'ana tukaritsie Tsiwekahi Kutsa kiekame, Tsapahi kaniumieni kwinimieme mutewikai.
2SA 21:19 Hairieka tawarita mekaniyutakwini manatsiere Kuhuwi mɨrakutewatsie kaniutawikweni, mɨkɨta 'Erikanani Yare-'Urekini nu'aya Wereni kiekame, Kuriyati titewakameta kaniumieni Kahati kiekame, mɨkɨ pitsikaya 'ɨkari wewiwame kɨyeyarieya hepaɨ kanipakaitɨni.
2SA 21:20 Tawarita Kahati kiekariyaritsie mekaniuyutakwini. Manata xewitɨ 'a'utewitɨ kaniuyeikakaitɨni, tewi kwinimieme timariwetɨ xeitewiyari heimana nauka yu'itɨwamete kanexeiyakaitɨni, yumamatetsie meta yu'ɨkatetsie 'ataxewime 'itɨwamete kanexeiyatɨkateitɨni.
2SA 21:21 Mɨkɨ 'ixaheritsixi kaniwa'iwamɨkɨkaitɨni memɨtimamanikɨ, peru Kunatani Tsimaha nu'aya, Rawiri matsikaya kanimieni.
2SA 21:22 Mɨkɨ yunaukatɨ teɨteri 'amemutɨtɨ Xapaha Kahati kiekame memɨnuiwarimamatɨkai, Rawiri meta kuyaximama mekaniwarukwini.
2SA 22:1 Rawiri 'ikɨ kwikari Yawé hetsiemieme kaniutawewieni kepauka Yawé Tsahuri hepaɨtsita kayuwatɨ mipitɨa meta yunaime memeye'unie wahepaɨtsita kepauka mitawikweitsitɨa.
2SA 22:2 Mɨpaɨ kaniutayɨni: «'Ekɨ Yawé ne'ai pekanihɨkɨtɨni, netsi'awiwietame pepɨhɨkɨ, meta netsiwikweitsitɨwame pepɨhɨkɨ,
2SA 22:3 nekakaɨyari, tete kanihɨkɨtɨni mɨwa nemuyuti'awiwieta. Nehetsie nunuwame pɨhɨkɨ, tɨrɨkariya nehetsie nunuwame, nemɨwayuti'awiwieta meutitewa pepɨhɨkɨ. Mɨkɨ neheima munua kanihɨkɨtɨni meta netsiwikweitsitɨwame. 'Ekɨ pepɨnetsi'utawikweitsitɨa hipatɨ menetsimietɨwekaku.
2SA 22:4 Yawé nekanahɨaweni, mɨkɨ 'aixɨa pɨ'ane hetsiena mieme 'aixɨa maineni, hikɨ 'ana memɨnetsi'aye'unie watsata nepɨtawikweitsitɨarieni.
2SA 22:5 »Ne nepɨmɨximekai, hamewari hepaɨ ti'anetɨ neheima pɨyeuriwekai, haa puwayene pɨnetsihehautsitɨa.
2SA 22:6 Mɨɨya kaunarieya teɨkiyata pɨnetsiheukahanakai, mɨɨya winiyarieyatsie nepɨnehɨa.
2SA 22:7 Waɨkawa ne'uximatɨarietɨ Yawé nekaniutahiwieni, nekakaɨyari neputahɨawixɨ mɨnetsiparewienikɨ, mɨkɨ yutukita paitɨ kaneniu'enieni, nehiwari nakatana paitɨ kaneye'ani.
2SA 22:8 »Hikɨ kwie kaniutayuani, kaniuyuanekaitɨni, meta muyuawi mutuikatɨka kaniwatayuaxɨani, mekaniwatayuani Kakaɨyari haxɨayakɨ.
2SA 22:9 Yutsurita kɨtsi pakanenetɨwakai, meta yuteta tai mɨtiyuxɨxɨtsitɨwa puwayenenetɨwakai, tɨ tatɨkaitɨ kanitaxɨrɨwekaitɨni.
2SA 22:10 »Muyuawi 'anutayepieka, kaniwakayani, haiwitɨri mɨyɨyɨwitsie 'awetɨ.
2SA 22:11 Yuteɨtametsie 'anutiyerɨka, muyuawitsie kanayeyani, 'anayatsie 'ayerɨka 'ekatsie kaneyani
2SA 22:12 Yɨriyakɨ meta haiwitɨri wiyeri 'ayemanemekɨ kaneuyukunani, 'ixuriki kiiyari hepaɨ 'aneme yuheima kaniutawewieni.
2SA 22:13 Hɨxiena tɨrɨkaɨyemekɨ waɨkawa 'akuxawatɨkaku tɨ tatɨkaitɨ kanitakɨkakaitɨni.
2SA 22:14 »Muyuawitsie Yawé tɨranarieya kaniuyu'eniɨriɨkɨre, yemekɨ Kakaɨyari 'Amutewi niukieya kanewayuku'eiya.
2SA 22:15 Kaniwarutamɨni yu'ɨrɨkɨ meta merɨkariyakɨ, kaniwareutaxɨriexɨani meta kaniwarutaweiya.
2SA 22:16 Yawé kaniwarutatieni meta ha'atɨ muta'iwekaikɨ, haramara hetɨa mieme kwie pahekɨarixɨ, meta kwie tsutɨmeyari hekɨa kaniyuhayewa.
2SA 22:17 »'Amautitewatsie 'amamá pepakatseraxɨ, nemamatsie pepɨkawierixɨ meta haramara 'ameukatewatsie pekanenatihana.
2SA 22:18 Memɨnetsi'aye'unie memɨmamariwawe watsata pɨnetsi'utawikweitsitɨa, 'iya memɨnetsixani'eriekai meta memɨtɨrɨkawikai kenemɨkatitɨrɨkaɨyekai ne.
2SA 22:19 Kepauka nemɨkayɨwekaitsie, 'ana mekanenanukunake menetsimienike, peru Yawé matsi pɨnetsi'uparewi.
2SA 22:20 Pɨnetsi'utawikweitsitɨa. 'Aixɨa pɨnetsi'uyuri yutemawietɨ netsinaki'erietɨ.
2SA 22:21 »Yawé pɨnerakapitɨa heitseriemekɨ yanemɨtiyurienekaikɨ, ne'iwarika pɨnetiyetuiri tixaɨtɨ 'axanemɨkatiuyurikɨ,
2SA 22:22 Yawé 'aitsikateya ne'enietɨ nemumiekɨ, ne hatsuaku 'axanepɨkatiyuriwe, meta nekakaɨyari nepɨkaku'eiriwetɨma.
2SA 22:23 Ne naime nepa'eriwa kemɨti'aita, ne nepɨka'iku'eiriwe 'aitsikateya.
2SA 22:24 Hɨxiena ne'uyeikatɨ nepɨka'ikwamanawe, meta nepɨkanewaɨriyari 'axanemɨtiyurienikɨ.
2SA 22:25 Yawé pɨnerakapitɨa heitseriemekɨ yanemɨtiyurienekaikɨ, ne'iwarika pɨnetiyetuiri 'aixɨa 'anemekɨ nemuyeikakaikɨ hɨxiena.
2SA 22:26 »'Ekɨ yapekatinikamieni kemɨ'ane yamɨtikamie hetsiemieme, heitserie yapepɨtiyuriene heitserie 'aixɨa memɨteyurie wahetsie,
2SA 22:27 yuri pepɨtiwa'eririe kemɨ'ane yuri memɨmate'eririe, 'ekɨ matsi pepɨtimate mɨtiyukananaima hetsiemieme.
2SA 22:28 Tixaɨtɨ memɨkatehayuyeitɨa memɨtehayu'iwani pepɨwapitɨa, kepauka kwi pemɨwaxeiya memɨyuti'ɨre tixaɨtɨ pepɨkatiwarayeitɨwa.
2SA 22:29 Yawé, 'ekɨ nekɨxeme pekanihɨkɨtɨni, Yawé, 'ekɨ neyɨriya hekɨariya pepayeitɨwa.
2SA 22:30 Penetsitɨrɨkariyakaku nekaniyɨweni memɨnetsi'aye'unie nemɨwatakwini, nekakaɨyari nehamatɨa pe'uyeikakaku kuraru 'amanutitewatsie nekaneukamakiweni.
2SA 22:31 »Kakaɨyari huyeya matsi yemekɨ 'aixɨa kani'aneni, Yawé niukieya tixaɨtɨ pɨkareuyewetse. Kakaɨyari rahetsie tinunuwame pɨhɨkɨ kemɨ'ane hetsɨana memuyu'awieta.
2SA 22:32 ¿Kamɨtsɨ kemɨ'ane Kakaɨyari pɨhɨkɨ? Yawé xeikɨa kanihɨkɨtɨni. ¿Kemɨ'ane 'ai hepaɨ pɨ'ane? Takakaɨyari xeikɨa mɨpaɨ kani'aneni.
2SA 22:33 Mɨkɨ kanihɨkɨtɨni kemɨ'ane tɨrɨkariya mɨnetsipitɨa, meta nehuye mɨheitseriya,
2SA 22:34 mɨkɨ pɨnetsipitɨa maxa hepaɨ nemɨranautsawenikɨ, meta hɨri 'amutitɨtɨtsie kanenipitɨaka nemɨkahekawautsenikɨ,
2SA 22:35 nemamatetsie kanetini'ɨkitɨaka nemauyutamiewenikɨ, meta pepɨneti'ɨkitɨa wurunitse tupiyari nemɨkemakakɨ.
2SA 22:36 'Ekɨ pepɨnetsiheukunarɨma penetsiwikweitsitɨatɨ, 'aixɨa petiuka'iyarikaku nehetsiemieme 'aixɨa 'anemekɨ nepɨyeyani.
2SA 22:37 Nehuye 'ari 'aixɨa pepɨyuri, ne'ɨkate pekaniutitseiriya.
2SA 22:38 »Memɨnetsi'aye'unie nekaniwaranukuweiya meta nekaniwarukwini, nepɨkawarehayewaxɨ kepaukake yunaime nemɨwarekwi.
2SA 22:39 Yunaimeri nepuwarekwi. Tawariri mepɨka'anuku'uni. Nehɨxie mekaniukaxɨrieni.
2SA 22:40 'Ekɨ tɨrɨkariya pekaneniupitɨani kepauka nemuyutamitsie, memɨnetsi'aye'unie pekaniwarupitɨani nehetɨa memɨkaxɨrienikɨ.
2SA 22:41 Memɨnetsi'aye'unie yu'ɨtɨa memɨyehukɨ pekaniwarupitɨani, mɨpaɨ 'ayumieme memɨkanetsinaki'eriekai nekatiniwara'iwa.
2SA 22:42 Parewiya mekaniwaukaitɨni, peru nixewitɨ wahetsie pɨka'utanua. Yawé mekanihiwiekaitɨnita, matsi mɨkɨ pɨkawaruta'ei.
2SA 22:43 'Etsimepepeme nepɨwarayeitɨa. Kwie tumuanariyari hepaɨ mepɨteyuxexeiyakai. Haxu huyeta mɨtika hepaɨ nepɨwarutiketsi.
2SA 22:44 »Pepɨnetsi'uparewi teɨteri memɨnetsi'aye'uniekai wahetsɨa, hipame nuiwarite tiwa'aitɨwame pepɨnetsi'ayeitɨa, teɨteri nemɨkawamatekai menete'uximayatsirietɨ mepakɨ.
2SA 22:45 Teewa mepɨkiekatari, peru ne mariweme mepɨnetsi'ayeitɨwa, kepauka nemɨtiwa'aitɨa yamekatenikahuni.
2SA 22:46 Mɨkɨ 'ateewa kiekatari menetsixeiyatɨ mekanenimakaxeni, meta memamatɨ memuwayu'awietatsie mekaniwayekɨkani.
2SA 22:47 Yawé kanayeyurini. Ne'ai hepaɨtsita 'aixɨa keraniuwani. Kakaɨyari netsiwikweitsitɨwame 'aixɨa ketikuxaxatsiwani.
2SA 22:48 Mɨkɨ Kakaɨyari pɨtiwarakapitɨwa 'axakememɨnetsi'uyuri, mɨkɨ teɨteri nehetɨa puwa'atɨwa nemɨtiwa'aitɨakakɨ.
2SA 22:49 'Ekɨ neheima pepunua memɨnetsi'aye'unie wahepaɨtsita, 'ekɨ 'aixɨa pepɨnetipitɨa memɨnetsi'aye'unie wahepaɨtsita, pekaneniwikweitsitɨaka teɨteri memɨnetsihaukuwaxɨa wahepaɨtsita.
2SA 22:50 Yawé, 'ayumieme ne 'aixɨa nepaine 'ahepaɨtsita nuiwarite watsata, meta nɨawari 'ahetsiemieme neputikwika kepemɨtitewakɨ.
2SA 22:51 »Yawé, ti'aitamekɨ pemɨnetsi'anayexei pepɨnetsi'upitɨa waɨkawamekɨ nemɨrayu'iwanikɨ, ne Rawiri pemɨnetsi'anayexei meta nenuiwarima keniwaruxeitsitɨa waɨkawamekɨ kepemɨtiwanaki'erie yuheyemekɨ».
2SA 23:1 'Ikɨ Rawiri 'imatɨrieka mieme niukieya kanihɨkɨtɨni: «Rawiri 'Itsahi nu'aya kemɨtiwarutaxatɨa yuteɨterima, witsi'anɨyɨtɨkaime nɨawari mutiwewi 'ixaheritsixi wahetsiemieme, tewi, Mɨmariwe hepaɨtsitana 'aixɨa mutayɨ meta Kakuwu Kakaɨyarieya menayexei.
2SA 23:2 »Yawé 'Iyarieya niuki kaneniupitɨani, hetsienamieme nemɨtaniunikɨ.
2SA 23:3 'Ixaheritsixi wakakaɨyari mɨpaɨ kaniutayɨni, 'Ixaheritsixi wa'ai mɨpaɨ kanetiniutahɨawe: “Kemɨ'ane mɨtiwa'aitɨa teɨteri kemɨtiheitserie, kemɨ'ane Kakaɨyari 'ayemakaxetɨ mɨti'aita,
2SA 23:4 mɨkɨ hekɨariya ximeri mieme hepaɨ kani'anemɨkɨ, kahauhaiyakaku manatineika hepaɨ, wiyeri 'utɨa manatineika hekɨariwietɨ tupiriya kwiepa mɨtinenikɨ”.
2SA 23:5 »Kakaɨyari yuheyemekɨ nenuiwarima kaneniupitɨani, tɨratu yuheyemekɨ nehamatɨa kaniuwewieni, naime 'aixɨa hauti'aneme, mɨkayɨwe mɨpatsieni. Kakaɨyari yakatiniyuriemɨkɨ nemɨrayu'iwanikɨ, meta yamɨraye'anikɨ naitɨ tita nemɨreuyehɨwa.
2SA 23:6 Matsi 'axamemɨteyurie xuya mewiwiwa hepaɨ mekani'aneneni, yumamakɨ nixewitɨ pɨkawakumaɨwa.
2SA 23:7 Tepɨa matsikɨiyarikɨ kanikuxexeɨriwani meta pitsika kɨyeyarikɨ, hikɨ mana tai kanitixɨxɨtsitɨwani».
2SA 23:8 'Ikɨ Rawiri kuyaximama kwinimieme memɨtehayu'iwakai mekanihɨkɨtɨni: Kutsewi-Watsewati Hakumuni kiekame, mɨkɨ matsi panuyekatei memuyuhaika wahetsiemieme, heiwamieme meheyukukwika yupitsikakɨ 'atahaika tsienituyari teɨteri kaniwarekwini.
2SA 23:9 'Utɨmana mieme 'Eriyatsaxi Ruruhu 'Akuki nuiwarieya nu'aya pɨhɨkɨtɨkai, mɨkɨta xewitɨ memɨyuhaika pɨhɨkɨtɨkai kwinimieme mɨreyutamiewe. Rawiri hamatɨa kaniuyeikakaitɨni kepauka yuhutatɨ memɨwaruyehaxɨatɨa piritsiteutsixi Patsiramini mɨrakutewatsie meyuxeɨriekaku mewatakwinike. 'Ana 'ixaheritsixi mekaneutayeixɨani,
2SA 23:10 matsi 'Eriyatsaxi pɨka'utima, hikɨ yumɨireme piritsiteutsixi kaniwarukwini, 'uxiyakɨ mamayatsie 'ixiparaya kaniuwere. Mɨkɨ tukariyaritsie Yawé kaniwaruparewieni memɨtehayu'iwakɨ. Kuyaxi 'Eriyatsaxi manuyeika mekaniu'axɨani, matsi piritsiteutsixi wapiinite xeikɨa mete'anupinike.
2SA 23:11 Hairieka mieme kwinimie mɨreuyutamiewe Tsamaha kanihɨkɨtɨkaitɨni 'Akehe 'Arari kiekame nu'aya. Heiwa kuyaxi piritsiteutsixi mume 'etsimɨpepe maku'etsietsie mekaniuyukuxeɨrieni. Hikɨ kuyaxi 'ixaheritsixi mɨkɨ wahɨxie mekaniuyuta'una,
2SA 23:12 matsi Tsamaha pɨkayuta'unaxɨ, pukunua 'ixaheritsixi wahetsie putanua, 'ana piritsiteutsixi kaniwara'iwa. 'Anata Yawé memɨtehayu'iwakɨ kaniwarupitɨani.
2SA 23:13 Yapaɨmexɨa 'anukayakuta, xeitewiyari heimana tamamata watsata yuhaikatɨ kwinimieme memɨtetɨrɨkawi 'Arurani terɨyarita mekanekɨne, Rawiri mayu'awietatsie. 'Itsanari kanitsutɨarieximekaitɨni, matsita kuyaxi piritsiteutsixi Xepahini kwieyaritsie mayeweritsie mekaniyuxeɨriekaitɨni.
2SA 23:14 Matsi Rawiri pɨyu'awietakai 'aitsata, 'ana mɨtiyehanetsie kuyaxi piritsiteutsixi Wereni kwieyaritsie mekatenitahɨkaitɨni.
2SA 23:15 Rawiri waɨkawa hauharimɨtɨ mɨpaɨ kaniutayɨni: «Xɨkatɨ tiyɨwenike xewitɨ mɨneniuharitɨani Wereni kitenie haa mɨtiniere».
2SA 23:16 Hikɨ memuyuhaika memauyutakwiwawe piritsiteutsixi mematiteitsie mekanitahaxɨani, Wereni putsu mɨtiniereta haa mewatihanaka Rawiri mekanehanirieni. Peru mɨkɨ pɨkahenuhari, matsi Yawé yetuirietɨ pɨta kanitayeurieni.
2SA 23:17 Mɨpaɨ kaniutayɨni yemekɨ mariwemekɨ: «Yawé keneneparewieka nemɨkahenuharenikɨ. Mɨkɨ teɨteri waxuriya nemanuhareni hepaɨ nekaniyumɨkɨ yutukari memɨyetua». Pɨkayuwaɨri menuharenikɨ. Mɨkɨ yuhaikatɨ memauyutakwiwawe mariwemekɨ mekateniuyurieni.
2SA 23:18 'Awitsahi, Kuhawi pɨ'iwaya Tsariwiya nu'aya, mɨkɨ yuhaikame kaniwanɨ'akaitɨni, mɨkɨ matsi 'aixɨa katinikuxaxatsiwakaitɨni. Heiwa pitsika xeikɨa 'akwetɨ kaniuyutamieni, kaniwarukwini haika tsienituyari kuyaxi.
2SA 23:19 Mɨkɨ matsi waɨkawa 'aixɨa tikuxaxatsiwatɨ kanayani keyuri memɨyuhaika, mɨkɨ tiwa'aitɨwame kanayeitɨarieni, peru mɨkɨ wahamatɨa pɨka'inɨarikai.
2SA 23:20 Wenahiyaxi Kuyara nu'aya Kawɨtseri kiekame, mɨkɨ yumemiwame pɨhɨkɨtɨkai, waɨkawa mariweme katiniuyurieni kuyakɨ. Yuhutame teɨteri memauyutakwiwawekai Muhawi kiekatari kaniwara'iwa, xeimiemeta kepauka 'ɨwi 'ukawiwieku putsu muyewakita kaneukahani maye muwa kaniumieni.
2SA 23:21 Yaxeikɨata 'Ekipitu kiekame kwinimieme 'utewime kana'iwa. 'Ekipitutanaka tepɨa kanakwekaitɨni, matsi Wenahiyaxi kɨye xeikɨa kanakwekaitɨni, hikɨ tepɨaya 'inawairieka mɨkɨkɨ kanimieni.
2SA 23:22 Wenahiyaxi Kuyara nu'aya waɨkamexɨa mɨpaɨ katiniyumienekaitɨni rayu'iwatɨ, mɨkɨta yaxeikɨa 'aixɨa pɨtikuxaxatsiwakai memɨyuhaika memauyutakwiwawe wahepaɨ,
2SA 23:23 matsi mɨkɨ wahamatɨa pɨka'inɨatsiekai, tsepanetɨ waɨkawa mɨtiuyuri xeitewiyari heimana tamamata memauyutakwiwawe wahamatɨa. Meta matsi Rawiri 'ihɨwemete tiwa'aitɨwame kanayeitɨani.
2SA 23:24 Xeitewiyari heimana tamamata memauyutakwiwawe wahamatɨa memaye'ukai 'ikɨ mekanihɨkɨtɨni: 'Atsaheri Kuhawi 'iwaya, 'Erikanani Ruruhu nu'aya Wereni kiekame.
2SA 23:25 Tsama Karuri kiekame, 'Erikaha Karuri kiekame,
2SA 23:26 Heretsi Pereti kiekame, 'Ira 'Iketsi nu'aya Tekuha kiekame,
2SA 23:27 'Awihetsexi 'Anatuti kiekame, Mewunahi Kutsa kiekame,
2SA 23:28 Tsarimuni 'Akuki nuiwarieya, Marahi netupatanaka,
2SA 23:29 Kereri Wanaha nu'aya netupatanaka, 'Itahi Xiwahi nu'aya, Kiriweya kiekame Wenikamini kwieyaritsie,
2SA 23:30 Wenahiyaxi Piratuni kiekame, Hirahi Kahatsi 'akiyaritsie kiekame,
2SA 23:31 'Awi-'Ariwuni Weti-'Arawa kiekame, 'Atsimaweti Warahumi kiekame,
2SA 23:32 'Erihawa Tsariwini kiekame, Yatseni niwemama, Kunatani
2SA 23:33 Tsama nu'aya 'Arari kiekame, 'Ahiyani Tsaraxi nu'aya Harari kiekame,
2SA 23:34 'Eripereti 'Akatsiwahi nu'aya Mahaka tewiyari, 'Eriyani 'Akituperi nu'aya Kiru kiekame,
2SA 23:35 Ketsiru Kaximeri kiekame, Parahi 'Arawi kiekame,
2SA 23:36 'Ikari Natani nu'aya, Tsuwa kiekame, Wanihi Kahari kiekame,
2SA 23:37 Tsereki 'amuni tewiyari, Nakarahi Weruti kiekame, Kuhawi Tsariwiya nu'aya hetsie nunuwame patɨa,
2SA 23:38 'Ira 'itɨrita tewiyari, Karewi 'itɨrita tewiyari,
2SA 23:39 'Uriyaxi heti tewiyari. Yunaitɨ xeitewiyari heimana tamamata heimana 'atahuta mekaniyupaɨmekaitɨni.
2SA 24:1 Merikɨtsɨ Yawé 'ixaheritsixi wahetsiemieme tawarita kaniuyeha'ani, Rawiri mɨpaɨ katiniu'eritɨani teɨteri wahetsiemieme mɨpaɨ mɨtayɨnikɨ: «'Ixaheri kwieyaritsie kiekatari meta Kura kwieyaritsie kiekatari kuyaxi xekeniwaruti'inɨata».
2SA 24:2 Hikɨ Rawiri ti'aitame, Kuhawi kuyaxi tiwa'aitɨwame mɨpaɨ katiniutahɨawe: —'Ixaheri kwieyaritsie naitsarie xekenehu, Rani mɨtiyetewatsie xekaneikatsutɨakuni Weritsewa paitɨ 'uye'atɨkaime, kuyaxi xekeniwaraka'utɨa, ne yanemɨretimanikɨ keyupaɨmetɨ memakɨne memɨyutakwini.
2SA 24:3 Kuhawi mɨpaɨ katinita'eiya: —Yawé 'akakaɨyari xeitsienituyari paɨmexɨa kewarutimɨiriya 'ekɨ 'akuyaxima, meta kematsi'upitɨani pemɨwaxeiyakɨ. Matsi ¿'ekɨ ti'aitame ketitayarikuta mɨyapetiutaine?
2SA 24:4 Matsi ti'aitame kemainekai yakatiniuyɨni, Kuhawi meta kuyaxi tewa'aitɨwamete kememaitɨkatei yapɨkatiuyɨ, hikɨ mekanayekɨne 'ixaheritsixi kuyaxiyari mewaraka'utɨanike.
2SA 24:5 Kurutani hatuxameyaritsie me'ukɨneka 'Aruhexi mɨrakutewa hetɨa mekanikuyaxe mayeweri, mana memɨyekɨta Kahari meta Katsexi kwieyaritetsie mekaniu'axɨani.
2SA 24:6 Karaha mekanekɨne meta Takitini Kuhutsi kwieyaritsie, Rani Kahani meye'axɨanike meta Tsiruni 'aurie mamanetɨkatsie.
2SA 24:7 Kiekari Tiru mɨtɨrɨkaɨyetsie mekanekɨne, naitsarie heweutsixi meta kananeutsixi wakiekaritetsie mekaniye'axɨani. 'Imatɨrieka, Weritsewa makumawetsie Kura kwieyaritsie mekaniye'axɨani.
2SA 24:8 'Atanauka metseri heimana xeitewiyari tukari metehauyetereka mekanakunuaxɨani Kerutsareme, naitsarie me'akukexiyaka 'Ixaheri kwieyaritsie.
2SA 24:9 Kuhawi kuyaxi keyupaɨmeme memɨwaraka'utɨakai ti'aitame kaniyetuirieni: 'Ixaheri kwieyaritsie 'atahaika tsienituyari miriyari kuyaxi mekanakɨne 'ixiparakɨ memauyutakwiwawe meta Kura kwieyaritsie kiekatari 'auxɨwime tsienituyari miriyari mekaniyupaɨmekaitɨni.
2SA 24:10 Hikɨ Rawiri 'anake katinetimani ke'axamɨtiuyuri kuyaxi mɨwaruti'inɨataxɨkɨ, hikɨ Yawé mɨpaɨ katiniutahɨawe: «Waɨkawa yemekɨ 'axanepɨtiuyuri. 'Atsimɨkatimate hepaɨ nepɨtiuyuri. Yawé, ne waɨkawa nepɨmatsiwawirie, kenetineuyehɨwiri kwerietɨ».
2SA 24:11 Hikɨ kwiximeri paitɨ, Rawiri ka'anukukewekaku 'akuxi, Yawé niukieya Kakaɨyari niukameya Kahari hetsɨa kaninuani, Rawiri hetsiemieme mɨtixeiya:
2SA 24:12 «Rawiri hetsɨa kenemie mɨpaɨ ketinetahɨawi: “Yawé mɨpaɨ kanaineni: ‘Nepɨmatsipitɨa 'ikɨ haikame 'uximatɨarikatsie xeime pemanayexeiyakɨ, yakenetineutahɨawi ke'aneme nepɨmatsipitɨani.’”»
2SA 24:13 Hikɨ Kahari Rawiri hetsɨa nuaka mɨpaɨ katinita'iwawiya: —¿Kemɨ'ane pepeuyehɨwa: haika wiyari haakaxa takwiepa titaweni, nutsu memɨmatsi'aye'unie haika metseri mepɨmatsimietɨweni 'ekɨta pemɨ'aku'unanenikɨ, nutsu haika tukari kwiniya pɨtaweni takwieyaritsie? Keneutimaixɨa meta yakenetineutahɨawi yanemɨreitahɨawekɨ mɨnetsiheyenɨ'a.
2SA 24:14 Rawiri Kahari mɨpaɨ katiniuta'eiya: —Yemekɨ nepɨtsaipɨne yanemutayɨni nepɨkayɨwe. Matsi 'aixɨa pɨ'ane Yawé mɨtatsi'uximatɨani, matsi naki'eriyaya mɨmariwekɨ, 'aixɨa pɨka'ane teɨteri xɨka menetsi'u'uximatɨani.
2SA 24:15 Yawé, 'ayumieme 'Ixaheri kwieyaritsie kwiniya kaneyenɨ'ani, mɨkɨ ximeriyaritsie kanitsutɨani kemɨreku'inɨarikai mɨpaɨ katineutere, naitsarie kwiepa haika tewiyari heimana tamamata miriyari teɨteri mekaniukwini Rani meta Weritsewa paitɨ meye'atɨkaitɨ.
2SA 24:16 Hikɨ niuki tuayame Yawé hetsɨa mieme kaniyukuha'aritɨani Kerutsareme mɨka'unakɨ. Peru Yawé 'anatɨtɨ pɨwarutinenimayataxɨ kwiniya hepaɨtsita muwarenɨ'airiekai. Mɨpaɨ niuki tuayame katiniutahɨawe: «'Ariri ketineuhayewa». Mɨpaɨ pɨtiuyɨ 'Arahuna kewutseu tewiyari tɨriku matihena 'aurie, hakewa niuki tuayame mewekai.
2SA 24:17 Hikɨ Rawiri kepauka niuki tuayame muxei kemɨtiwakwikai, Yawé nenewieri mɨpaɨ katiniupitɨani: «'Ikɨ teɨteri 'axamepɨkate'uyuri muxatsi wahepaɨ mepɨ'ane. Ne pɨta nekanihɨkɨtɨni 'axati'aneme nemɨreutiwiwiexɨa meta 'axanemɨtiuyuri. Nepɨta 'axamɨti'ane nehetsie ketiunake meta netɨɨriyama wahetsie».
2SA 24:18 Hikɨ 'ana tukariyaritsie, Kahari Rawiri hetsɨa kaneyani meta mɨpaɨ katineitahɨawe: «Kenanutiyaka, mawari taiyame Yawé hetsiemieme keneutawewi, 'Arahuna kewutseu tewiyari kwieyatsie tɨriku matihenakai».
2SA 24:19 Hikɨ Yawé Kahari mɨpaɨ tiutahɨaweku, Rawiri hetsɨa kaneyani.
2SA 24:20 Kepauka 'Arahuna mɨwaruxei ti'aitame meta te'i'uximayatsiriwamete 'ame'atihume, kanayeyani hɨxiena kaniutihɨximakeni.
2SA 24:21 'Arahuna mɨpaɨ kaniutayɨni: —'Ekɨ ti'aitame, ¿ketitakɨ petinua nehetsɨa? Rawiri mɨpaɨ katinita'eiya: —'Akwie tɨriku pematihenatsie nepɨmatsikunanairiene, mana mawari taiyame Yawé hetsiemieme nemɨtawewienikɨ, kwiniya teɨteri wa'uximatɨatɨ mɨtihayewakɨ.
2SA 24:22 Hikɨ 'Arahuna ti'aitame mɨpaɨ katiniuta'eiya: —Tita mɨmatinake ketineutimawa. 'Ena mekanixuaweni tuurutsixi mawari memayanikɨ, kɨyexi meta tɨriku 'uwame mahete meta yukute.
2SA 24:23 'Ikɨ naime 'ekɨ nekamatiniyetuirieka. Yawé 'akakaɨyari 'aixɨa 'anemekɨ mɨmatsixeiyanikɨ.
2SA 24:24 Hikɨ Rawiri 'Arahuna mɨpaɨ katiniuta'eiya: —Mɨpaɨ 'aixɨa pɨkayɨni. Yawé nekakaɨyari mawari taiyariyari nemɨwewirieka tixaɨtɨkɨ nekareuyuyehɨame. Naime nekamatinitinanairiemɨkɨ kemɨraye'atɨka. Mɨpaɨ katiniuyɨni Rawiri kwie kaniunaneni meta túurutsixi, huta tewiyari heimana tamamata pɨrata rahetemekɨ katiniuyutuani.
2SA 24:25 Mana mawari taiyame kaniutawewieni Yawé hetsiemieme, hikɨ mana mawari taiyariyari kaniuwewieni meta 'aixɨa memɨteyuxeiyanikɨ mawariyari. 'Anake Yawé teɨteri kaniwarutinenimayata, hikɨ kwiniya katiniuhayewa 'ixaheritsixi wakwitɨ.
1KI 1:1 Merikɨtsɨ Rawiri ti'aitame waɨkawa kani'ukiratsitɨkaitɨniri, pɨkaheuxɨkakai tsepa waɨkawa memika'ɨkaritɨwakai yaxeikɨa katineuhaɨtɨkaitɨni.
1KI 1:2 'Ayumieme 'iparewiwamete mɨpaɨ mekatenitahɨawe: «Xeime 'uka 'ɨimari yuxewime tepɨkuwauni para matsi'ɨwiyanikɨ, meta 'a'aurie mutihupunikɨ mɨmatsi'utixɨriyanikɨ».
1KI 1:3 Hikɨ mɨkɨ mekaniukakɨne naitsarie 'ixaheritsixi wahetsɨa 'uka mekuwautɨwetɨ witsimɨ'ane, mekanitaxeiya 'Awitsahaki Tsunemi kiekariyaritsie kiekame, mɨkɨ ti'aitame mekani'atɨirieni.
1KI 1:4 Mɨkɨ 'uka yemekɨ witsipɨtiyuxexeiyakai, ti'aitame pɨ'ɨwiyakai meta 'apɨrepiniriwakai tita mɨreuyehɨakai, peru ti'aitame mɨkɨ hatsuaku pɨka'ikumayɨa.
1KI 1:5 Merikɨtsɨ 'Aruniyaxi Rawiri nu'aya Kakiti matɨa memeyexei, kaniuyukuha'aritɨani mɨpaɨ 'utaitɨ: «Ti'aitame nepayani». 'Ayumieme yuwaɨkawame kaniwarukuxeɨrieni kuyaxi. Kaxetate kuyaxa miemete meta kawayutsixi kaniwarukuxeɨrieni meta huta tewiyari heimana tamamata kuyaxi 'ihɨwemete.
1KI 1:6 'Aruniyaxi pɨtemaikɨtɨkai 'aixɨa pɨtiyuxexeiyakai yakɨ puyumaikai 'Awitsaruni 'utɨa mieme pɨhɨkɨtɨkai. Paapaya Rawiri hatsuaku pɨka'ita'imaiyaxɨ kemɨtiyurienekai 'Aruniyaxi.
1KI 1:7 'Ayumieme 'Aruniyaxi Kuhawi Tsariwiya nu'aya matɨa mekatenikuxatakaitɨni 'awie meta mawari wewiwame hamatɨa 'Awiyataxi, mɨkɨta mekaniparewieni.
1KI 1:8 'Ikɨta 'Aruniyaxi memɨka'uparewi mepɨhɨkɨtɨkai mawari wewiwame Tsaruki meta Wenahiyaxi Kuyara nu'aya, Natani Kakaɨyari niukameya, Tsimi meta Xeki meta Rawiri kuyaximama memɨkamama.
1KI 1:9 Hikɨ 'Aruniyaxi 'Enixukeri haixayari 'aurie katiniutimawa, Tsukereti 'aiyari manukatsie, mana tsikerutsixi memɨwaiyatɨka, tuurutsixi meta muxatsi mekaniwarutimawa. Yu'iwama kaniwaruta'inieni ti'aitame niwemama memɨ'iwamamatɨkaikɨ meta yunaime paratsiyuta te'uximayatamete, Kura kwieyaritsie miemete,
1KI 1:10 peru Natani Kakaɨyari niukameya pɨka'uta'ini, Wenahiyaxi meta ti'aitame kuyaximama memɨkamama, meta yu'iwa Tsarumuni pɨka'uta'ini.
1KI 1:11 'Ayumieme Natani Tsarumuni maamaya Wetitsawe, mɨpaɨ katiniuta'iwawiya: «¿Mɨpaɨ petimateri, 'Aruniyaxi Kakiti nu'aya ti'aitame mayuyeitɨaxime, tati'aitɨwame Rawiri 'atsikatimaikaku?
1KI 1:12 Xɨka pehauyuwikweitsitɨamɨkɨni meta 'aniwe Tsarumuni pehauwikweitsitɨamɨkɨni, keneneupitɨa mɨpaɨ nemɨmatitaxatɨanikɨ:
1KI 1:13 Kenemie ti'aitame Rawiri hetsɨa, mɨpaɨ ketinetahɨawi: “¿Tamɨ ne mati'uximayatsiriwame mɨpaɨ pepɨnetiuhɨritɨa, kename neniwe Tsarumuni ti'aitame 'ayanikekai 'a'utɨma? ¿Kepautɨtɨ hikɨ 'Aruniyaxi ti'aitame pɨhɨkɨ?”
1KI 1:14 Mexi 'ekɨ perekuxatani Rawiri hamatɨa neta nepautahani para neta yaxeikɨa nemɨreitahɨawekɨ».
1KI 1:15 Merikɨte Wetitsawe kaneutahani ti'aitame muyehupu. Mɨkɨri waɨkawa mɨ'ukiratsitɨkaikɨ 'Awitsahaki pi'ɨwiyakai Tsunemi kiekame.
1KI 1:16 Wetitsawe kepauka muwa munua kaniukatunumakeni hɨxiena. Hikɨ ti'aitame mɨpaɨ katinita'iwawiya: —¿Ketitakɨ nematiparewieni?
1KI 1:17 Hikɨ Wetitsawe mɨpaɨ katinita'eiya: —Neti'aitɨwame yapepɨnetiutahɨawixɨ ne mati'uximayatsiriwame, Yawé mɨ'akakaɨyari matsi'eniekaku kename neniwe Tsarumuni ti'aitame 'ayanikekai 'a'utɨma.
1KI 1:18 Peru hikɨ matsi 'Aruniyaxi pɨta ti'aitame payuyeitɨaxime, 'ekɨ 'atsipekatimaikaku yuri ti'aitame pemɨhɨkɨ.
1KI 1:19 Mɨkɨri mawari kanewewieni turutsixi, tsikerutsixi meta muxatsi kaniwarekwini yumɨireme. Hikɨ kaniwaruta'inieni yunaime ti'aitame 'aniwema, mawari wewiwame 'Awiyataxi meta Kuhawi kuyaxi tiwa'aitɨwame. Peru Tsarumuni pɨka'uta'ini 'aixɨa mɨmati'uximayatsirie.
1KI 1:20 Hikɨ neti'aitɨwame meta ti'aitame, yunaitɨ 'ixaheritsixi mekanita'ikwewani yapemɨtayɨnikɨ, kemɨ'ane mɨtita'aita 'a'utɨma 'a'uwenitsie mayerɨni.
1KI 1:21 Mexɨka 'ekɨ yapekatayɨwetɨ pe'umɨni, matsi kwitɨwa 'Aruniyaxi pɨtatsikwini ne meta neniwe Tsarumuni matɨa 'axateyuruwamete wahepaɨ.
1KI 1:22 Mexi 'akuxi Wetitsawe tikuxatakai ti'aitame hamatɨa, Natani Kakaɨyari niukameya kaninuani.
1KI 1:23 Ti'aitame katinetimani kepauka munua. Hikɨ Natani hɨxiena 'utihɨximakeka,
1KI 1:24 mɨpaɨ Rawiri katiniutahɨawe: —Neti'aitɨwame. ¿'Ekɨ mɨpaɨ petiuta'ai kename 'Aruniyaxi 'anukakeni 'a'utɨma?
1KI 1:25 Mɨpaɨ nekamatina'iwawiyani yanetimaitɨ mɨkɨ mawari mewewikɨ yumɨireme, turutsixi, muxatsi meta tsikerutsixi memɨwaiyatɨka. Meta yunaime 'aniwema kaniwaruta'inieni, kuyaxi tewa'aitɨwamete, meta mawari wewiwamete 'Awiyataxi mana mɨkɨ yunaitɨ mekatenekwaka mekane'ieka, mɨpaɨ mete'uhiwatɨ hɨxiena: “Ti'aitame 'Aruniyaxi yuheyemekɨ keti'aitani”.
1KI 1:26 Peru ne pɨkanetsi'uta'ini 'ahetsiemieme nemɨti'uximaya, yaxeikɨa mawari wewiwame Tsaruki meta Wenahiyaxi Kuyara nu'aya meta Tsarumuni pɨka'uta'ini 'aixɨa mɨmati'uximayatsirie.
1KI 1:27 ¿Kamɨtsɨ 'ekɨ mɨpaɨ petiuta'ai, tame mate'uximayatsiriwamete yapekatarahɨawetɨ, kemɨ'ane 'a'utɨma 'a'uwenitsie mayerɨnikekai?
1KI 1:28 Merikɨtsɨ mɨpaɨ tiu'enaka, ti'aitame Rawiri mɨpaɨ katiniuta'aita: —Xekenewata'ini Wetitsawe. Mɨkɨ kaneutayani ti'aitame hɨxie kaniutakeni.
1KI 1:29 Hikɨ ti'aitame mɨpaɨ katinitahɨawe: —Yurikɨ Yawé hɨxie mɨpaɨ nekanaineni, mɨnetsi'uxɨnaxɨ naime 'uximatɨarika hepaɨtsita,
1KI 1:30 hikɨ nekaneye'atɨamɨkɨ kenemɨmatiutahɨawixɨ Yawé 'ixaheritsixi takakaɨyari hɨxie. Hikɨ yanepɨtiyurieni ne kenemɨmatiutahɨawixɨ, 'aniwe Tsarumuni ti'aitame payani ne'utɨma, nehetsiemieme pɨtita'aita.
1KI 1:31 Hikɨ Wetitsawe ti'aitame hɨxie 'utihɨximakeka, mɨpaɨ kaniutayɨni: —Neti'aitɨwame meta ti'aitame Rawiri 'aheyemekɨ peke'ayeyurini.
1KI 1:32 'Ana Rawiri mɨpaɨ katiniuta'aita: —Xekenewata'ini mawari wewiwame Tsaruki, meta Natani Kakaɨyari niukameya metatsiere Wenahiyaxi Kuyara nu'aya. Hikɨ kepauka mɨkɨ yuhaikatɨ memu'axɨa ti'aitame hɨxie,
1KI 1:33 ti'aitame mɨpaɨ katiniwarutahɨawe: —Xekeniwara'inietɨ paratsiyuta memɨte'uximaya, neniwe Tsarumuni xekenanutiyetsa nemuratsie, hikɨ xekenanuwitɨki Kikuni haixayari matiniere paitɨ,
1KI 1:34 muwa mawari wewiwame Tsaruki meta Natani Kakaɨyari niukameya hatseiti witsimu'ɨa memeikawirienikɨ, 'Ixaheri kwieyaritsie ti'aitame mayanikɨ. Hikɨ 'ana 'awa kuxinetayari xekenetahɨtsi meta xekenetihiwani mɨpaɨ xe'utiyuatɨ: “Ti'aitame Tsarumuni yuheyemekɨ keti'aitani”.
1KI 1:35 Hikɨ mɨpaɨ xeteheyurieme, xekenakunuitɨa Tsarumuni ne'uwenitsie mayerɨnikɨ nehetsiemieme mɨtita'aitakɨ. Karikɨ ne nekanenayexeiya mɨkɨ mɨhɨkɨtɨnikɨ 'Ixaheri kwieyaritsie mɨtita'aita meta Kura kwieyaritsie.
1KI 1:36 Wenahiyaxi Kuyara nu'aya mɨpaɨ katinita'eiya: —Mɨpaɨ ketiɨyɨni. Mɨpaɨta Yawé kehaineni ti'aitame kakaɨyarieya hɨkɨtɨtɨ.
1KI 1:37 Ti'aitame Yawé 'ahamatɨa kemɨtiuyeikakai, mɨpaɨta Tsarumuni hamatɨa ketiuyeikani, ketimariwemekɨ pemɨti'aitakai Rawiri ti'aitame, matsi waɨkawa Tsarumuni mariwemekɨ ketiuta'aita.
1KI 1:38 Tsaruki mawari wewiwame, Natani Kakaɨyari niukameya meta Wenahiyaxi Kuyara nu'aya, meta kereteutsixi, pereteutsixi, Tsarumuni mekananutiyeni Rawiri ti'aitame murayatsie, meta me'ihɨtɨ 'auriena mekaneutiwetɨkateitɨni kepauka Kikuni haixayari hepa kɨatsata memukahukai.
1KI 1:39 Meheta'axɨaka mawari wewiwame Tsaruki hatseiti 'awata mɨyema kanewatihana 'ixuriki tukiyarita Kakaɨyari hetsiemieme muyepatsieta meiyehanakai, hikɨ Tsarumuni kaniukawirieni mu'uyatsie. Meta 'awa mekaniutahɨtsieni, hikɨ yunaitɨ teɨteri mɨpaɨ mekateniuhiwa: «Ti'aitame Tsarumuni yuheyemekɨ keti'aitani».
1KI 1:40 Mɨpaɨ tiuyɨku, yunaitɨ mekanekɨne 'utɨmana, pirikɨxakɨ mete'ukayuitɨwatɨ meta me'utihiwatɨ karima temawierikakɨ. Kwinimieme yemekɨ pɨtiyu'eniɨriɨkɨkai wahiwari, kwie 'ɨaritɨ puwatayuanekai.
1KI 1:41 Hikɨ 'Aruniyaxi meta yu'inierima yunaitɨ metekwatɨ mekatenitahayewarɨmekaitɨniri kepauka yuariya memu'eni. Kuhawi 'awa yuariyaya 'u'enieka, mɨpaɨ kaniutayɨni: —¿Ketitayari kuta kwinimieme metehehiwa kiekaritsie?
1KI 1:42 Kuhawi 'akuxi tikuxatakaku Kunatani kaninuani, mawari wewiwame 'Awiyataxi nu'aya. 'Aruniyaxi mɨpaɨ katinitahɨawe: —Keniwataye'a. 'Ekɨ tewi 'aixɨa pemɨtiuka'iyari pepɨhɨkɨ, peuyewetse pemɨ'enierieka, xɨari niuki 'aixɨa 'anuyɨneme pepukutuane.
1KI 1:43 Hikɨ Kunatani mɨpaɨ 'Aruniyaxi katiniutahɨawe: —Neuxei mɨpaɨ pɨka'ane. Rawiri tati'aitɨwame, Tsarumuni kananukakeni mɨti'aitametɨnikɨ.
1KI 1:44 Metatsiere kaniwaruta'aitɨani Tsaruki mawari wewiwame, Natani Kakaɨyari niukameya meta Wenahiyaxi Kuyara nu'aya metatsiere kereteutsixi, pereteutsixi, Tsarumuni memanutiyenikɨ ti'aitame murayatsie.
1KI 1:45 Tsaruki Natani matɨa ti'aitame mayanikɨ hatseiti witsimu'ɨa mekaneikawirieni Kikuni paitɨ. Muwa paitɨ mekaneitsutɨani teɨteri me'utihiwatɨ temawierikakɨ meta kiekaritsie yaxeikɨa mepeyuxeɨrie. 'Ayumieme mɨkɨ hiwari kana'eniɨriɨkɨni.
1KI 1:46 Metatsiere 'ari Tsarumuni ti'aitame 'uwenieyatsie kanayerɨni,
1KI 1:47 meta paratsiyuta te'uximayatamete tati'aitɨwame Rawiri mekaneiwaɨritɨatɨwekaitɨni mɨyamɨtiuyurikɨ. Mɨpaɨ paitɨ matsi mekateneikɨhɨawekaitɨni Kakaɨyari Tsarumuni matsi waɨkawa mariweme kehayeitɨani keyuri Rawiri, meta matsi mariwemekɨ ketiuta'aita keyuri Rawiri. Hikɨ ti'aitame Rawiri mɨpaɨ rahɨawarɨwatɨ yu'utatsie 'akaitɨ kananakatutsire
1KI 1:48 hikɨ mɨpaɨ kanetayɨni: “'Aixɨa kerahɨawarɨwani Yawé 'ixaheritsixi takakaɨyari, hikɨ mɨnetsi'upitɨa nemixeiyakɨ ne'utɨma mɨtita'aita, ne'uwenitsie 'akaime”.
1KI 1:49 Hikɨ mɨpaɨ mete'u'enanaka, yunaitɨ 'Aruniyaxi 'inierimama me'anuku'uka mekaneutayeixɨani waɨkawa memamatɨ.
1KI 1:50 'Aruniyaxi, waɨkawa Tsarumuni makatɨ, 'ixuriki tukiyari manuwe kaneuyuta'una, mawari wewiwame 'awateyatsie katinawiyakaitɨni.
1KI 1:51 Hikɨ yapauka ti'aitame Tsarumuni mɨpaɨ pɨtiutaxatɨarie: —Ti'aitame, 'Aruniyaxi kamenimakaka, 'ixuriki tukiyari manuwe mawari wewiwame 'awateyatsie katinawiyani. Mɨpaɨ 'utaitɨ: “Hikɨ kwitɨwa mɨpaɨ kehetayɨni ti'aitame Tsarumuni kename ne kanetsimieni ti'uximayatsiriwame”.
1KI 1:52 Hikɨ Tsarumuni mɨpaɨ kaniutayɨni: —Xɨka yuhemekɨ heitserie 'a'uyeikani, ni'atsipɨkaranuyeyani, peru xɨka tixaɨtɨ tiuyurieni 'uxa'atɨni, kanimieriemɨkɨ.
1KI 1:53 Hikɨ ti'aitame Tsarumuni katiniutanɨ'ani mɨwitɨkiemiekɨ. Kepauka 'Aruniyaxi munua, kaniutihɨximakeni ti'aitame Tsarumuni hɨxie, hikɨ mɨkɨ kanitanɨ'ani yukie mɨyemiekɨ.
1KI 2:1 Hikɨ Rawiri kanimɨximekaitɨni, 'ayumieme yuniwe Tsarumuni mɨpaɨ katiniuhɨritɨani:
1KI 2:2 «Teyunaitɨ yaxeikɨa mɨɨya pɨtatsiheutakwewie, neri 'etsiwa xeikɨa peuyewetse nemɨmɨnikɨ. Kene'atɨrɨkariyani, pepɨkaheumaka 'uki muka'iyari kenehɨkɨtɨni.
1KI 2:3 Yawé 'akakaɨyari 'aitsikayatsie yaketinekamieni huyeya keneuweiyani meta Muitsexi naime 'inɨari niukiyaritsie kemɨraka'utɨa. Mɨpaɨ 'ana tsepa kepemɨtiyuriene 'aixɨa pepɨtiukaxexeiyani meta tsepa hakewa pemetɨa,
1KI 2:4 Yawé, kaneye'atɨamɨkɨ 'ipaɨ kemɨnetiutahɨawixɨ: “Xɨka 'anuiwarima 'aixɨa mete'u'uwani, xɨka yu'iyarikɨ yametekahuni, mɨpaɨ 'anuiwarima xeikɨa mepanuti'uweni 'ixaheritsixi metewa'aitɨatɨ”.
1KI 2:5 »'Ekɨ pepɨtimate, kemɨtiuyuri Kuhawi Tsariwiya nu'aya, mɨkɨ kuyaxa mɨyɨaneni hepaɨ pɨtiuyuri kayuwatɨ 'umakakutɨtɨ, 'Awinexi Nexi nu'aya meta 'Amatsaha Ketexi nu'aya, mɨkɨ yuhutame puwarukwi kuyaxi tewa'aitɨwamete 'ixaheritsixi, mɨpaɨ mɨkɨ yuhetsie pɨrahɨa.
1KI 2:6 'Ayumieme, ketinemaiweni, 'apɨkareutewini 'ena 'uyeikatɨ, pepɨka'ihayewani kayuwatɨ hexeiyatɨ mumɨnikɨ.
1KI 2:7 Matsi 'aixɨa ketiniwaxeiyani Waxitsirahi niwemama Karaha kiekame, mɨkɨ 'amexatsie keniwapitɨaka 'ahamatɨa memɨtekwanikɨ, mɨkɨtsɨ neheima mekaniutanuani kepauka 'a'iwa mɨnetsi'uweiyakai 'Awitsaruni.
1KI 2:8 »Yaxeikɨata nepɨmatsiyetuirie Tsimi Kera nu'aya, Wenikamini xiɨyarieya Wakurini kiekame, waɨkawa 'axapɨnetiutihɨawixɨ Makanahini ne'umiekaku. Kaniyuritɨnita kepauka Kurutani hatuxameyaritsie mɨnetsihekunakixɨ, ne Yawé hɨxie mɨpaɨ nekatineitahɨawe kename neka'imienikekai.
1KI 2:9 'Ayumiemeri 'ekɨ pepɨkareiyehɨwirieka. 'Ekɨ matsi waɨkawa pepɨtimaiwe, 'ekɨri kepemiyurieneni, tsepa mɨ'ukiratsiri keneuta'aita mɨmierienikɨ».
1KI 2:10 Hikɨ Rawiri kaniumɨni, kaniukateukieni yukiekaritsie hepaɨna mɨtitewatsie yu'ukiyarima wahamatɨa.
1KI 2:11 Hewuruni kiekariyaritsie pɨti'aitametɨkai 'atahuta wiyari, Kerutsareme hetsieta xeitewiyari heimana tamamata heimana haika wiyari, naimekɨri pɨtiuta'aitaxɨ huta tewiyari wiyari, 'Ixaheri kwieyaritsie.
1KI 2:12 'Utɨmana mɨtiuta'aitaxɨ nu'aya kanayani Tsarumuni, hikɨ mɨkɨ tɨrɨkaɨyemekɨ katiniuta'aita.
1KI 2:13 Hikɨ 'Aruniyaxi Kakiti nu'aya petɨa Wetitsawe Tsarumuni maamaya hetsɨa, Wetitsawe mɨpaɨ katinita'iwawiya: —¿Petinua pekanetsi'aye'unietɨ? 'Aruniyaxi mɨpaɨ katinita'eiya: —Huu,
1KI 2:14 tixaɨtɨ nepɨrayexeiya nepɨmatitaxatɨani. Wetitsawe mɨpaɨ katinitahɨawe: —Kenetineutaxatɨa.
1KI 2:15 'Aruniyaxi mɨpaɨ kaniutayɨni: —Kamɨtsɨ 'ekɨ pekatinimaika, nepɨta ti'aitame nekanayanikekaitɨni, yunaitɨ 'ixaheritsixi mɨpaɨ mekateniku'eriwakaitɨni. Peru hikɨri nemuta pɨta katiniunakitsitɨani, Yawé kemɨtinake katiniuyɨni.
1KI 2:16 'Aixɨatsɨ kani'aneni, peru tixaɨtɨ nepɨmatitawawirieni, perutsɨ pekatinaye'atɨamɨkɨ. Wetitsawe mɨpaɨ katinitahɨawe: —¿Kekuta petayɨni?
1KI 2:17 'Aruniyaxi mɨpaɨ katinitahɨawe: —Ximɨxi, 'ekɨ mɨpaɨ ketinetahɨawi ti'aitame Tsarumuni, kenetsi'uwitɨtɨani 'Awitsahaki Tsunemi kiekame, 'ekɨ yapereitahɨaweyu pɨmatsi'anu'enieni.
1KI 2:18 Wetitsawe mɨpaɨ katinita'eiya: —'Aixɨa kani'aneni, nepɨreitaxatɨani ti'aitame kepemaine.
1KI 2:19 Hikɨ Wetitsawe kaneyani ti'aitame Tsarumuni hetsɨa, mɨpaɨ mɨtitaxatɨanikɨ 'Aruniyaxi hetsiemieme. Ti'aitame kananukukeni mitahɨawekɨ yuwarutsi hɨxie kananakatutsire, hikɨ 'itahɨaweka kanayerɨni yu'uwenitsie, kanita'aitata tawari xeime 'uweni mana mayerɨnikɨ maamaya, hikɨ tserietana kaniutiyerɨni.
1KI 2:20 Wetitsawe mɨpaɨ katinitahɨawe: —Ximɨxi 'etsiwa nepɨmatitawawirienikeyu, peru yemekɨ yaketinekaye'a. Tsarumuni mɨpaɨ yumaama katiniuta'eiya: —Yakeneutayɨki tita pemɨtixata, nemaama 'aku, 'ekɨ tixaɨtɨkɨ nepɨkamatita'imaiya.
1KI 2:21 Maamaya mɨpaɨ kaniutayɨni: —Keneupitɨa 'a'iwa 'Aruniyaxi 'Awitsahaki Tsunemi kiekame mɨtiwitɨnikɨ.
1KI 2:22 Hikɨ ti'aitame yumaama mɨpaɨ katiniutahɨawe: —Peru neuxei ¿titayari penetiwawirie 'Awitsahaki 'Aruniyaxi nemɨwitɨtɨanikɨ? Mɨkɨ kaninematsikatɨni, mɨkɨ wa'atɨ mawari wewiwame 'Awiyataxi tiparewie meta Kuhawi Tsariwiya nu'aya. Mɨkɨ 'uweni nemihanitɨanikɨ pekanetinikɨhɨaweni.
1KI 2:23 Mɨpaɨ 'utayɨka, ti'aitame Tsarumuni mɨpaɨ kaniutayɨni Yawé hɨxie: «Kakaɨyari kenetsi'u'uximatɨani kanetsinenimayatɨ, xɨka 'Aruniyaxi neka'umieni mɨya mutayɨkɨ.
1KI 2:24 Yawé pɨnetsi'upitɨa tɨrɨkaɨyemekɨ nepaapa 'uwenieyatsie nemayerɨnikɨ, kemainekai yapɨtiuyuri, nenuiwarimata te'aitamete mepakɨne. 'Ayumieme yurikɨ Kakaɨyari mayenierekɨ mɨpaɨ nepaine hikɨ kwitɨwa 'Aruniyaxi pɨmɨni».
1KI 2:25 Hikɨ kwitɨwa, ti'aitame Tsarumuni Wenahiyaxi Kuyara nu'aya kaniuta'aitɨani 'Aruniyaxi mɨmienikɨ.
1KI 2:26 Meta mawari wewiwame 'Awiyataxi, ti'aitame mɨpaɨ katinitahɨawe: «Kenemie 'akwiepa paitɨ 'Anatuti. Pemɨmierieni 'aixɨa kani'aneni, peru hikɨ pɨkatixaɨ nepɨkamatsimieni, 'ekɨ nepaapa Rawiri matɨa pepukatei kepauka mɨtiuka'eniwakaitsie, meta hɨxiena tɨratu kakuniyari peputikwei Yawé naimekɨmɨyɨwe tipiinieya».
1KI 2:27 Tsarumuni 'Awiyataxi 'uta'imaiyaku Yawé hetsiemieme mawari wewiwame mɨkahɨkɨtɨnikɨ, 'ana mɨpaɨ pɨraye'a Yawé kemutayɨ Tsiru kiekariyaritsie 'Eri nuiwarimama wahepaɨtsita.
1KI 2:28 Kuhawi 'Aruniyaxi pɨparewiekai, tsepa 'Awitsaruni ka'uparewi, mɨkɨ mɨpaɨ tiu'enaka kename 'Aruniyaxi hemɨkairi mɨkɨ kaneyani, 'ixuriki tukiyari Yawé hetsiemieme manuwe peyuta'unaxɨ, mawari wewiwame 'awateyatsie kanikawiekaitɨni.
1KI 2:29 Kepauka mɨpaɨ mɨtiutamari Tsarumuni kename Kuhawi 'uyuta'unakai 'ixuriki tukiyari manuwe, meta kename mawari wewiwame 'aurie heutiwekai, ti'aitame Wenahiyaxi Kuyara nu'aya kaniuta'aitɨani, Kuhawi mɨmienikɨ.
1KI 2:30 Wenahiyaxi kaneyani Yawé tukieya manuwe, Kuhawi mɨpaɨ katiniutahɨawe: —Keniwayeye'a ti'aitame mɨpaɨ paine. Kuhawi mɨpaɨ katinita'eiya: —Hawaikɨ. Matsi 'uwa nepɨmɨni. Hikɨ Wenahiyaxi heyaka ti'aitame katiniutaxatɨani kemutayɨ Kuhawi.
1KI 2:31 Hikɨ ti'aitame mɨpaɨ kaniutayɨni: —Kamɨtsɨ ketinaye'atɨa kemaine, kenemi'a meta kenekateuki. Mɨpaɨ petiyurieyu nepaapa meta nehetsiemieme meta netɨɨriyama wahetsie pepɨranuyeitɨani Kuhawi 'atsimekateyuriekame kemɨtiwarukwi meripaitɨ.
1KI 2:32 Yawé Kuhawi 'apɨrakapitɨani mɨɨyakɨ 'atsimekate'u'iyarime mɨwarukwikɨ, nepaapa 'atsikatimaikaku, mɨkɨ Kuhawi 'Awinexi kaniumieni Nexi nu'aya, kuyaxi tiwa'aitɨwametɨkaku 'Ixaheri kwieyaritsie, yaxeikɨata 'Amatsaha Ketexi nu'aya kaniumieni, kuyaxi tiwa'aitɨwametɨkaku Kura kwieyaritsie. Mɨpaɨ yuhutame katiniwarukwini 'ixiparakɨ teɨteri 'aixɨa memɨte'u'iyarikai heitseriemekɨ yamemɨtekahukai keyuri Kuhawi.
1KI 2:33 Kuhawi hetsie kerahɨiyani mɨkɨ memukwi'iwaxɨkɨ metatsiere nuiwarimama wahetsie. 'Apɨta Yawé kayuwatɨ kewapitɨaka Rawiri meta nuiwarimama meta wa'uweni.
1KI 2:34 Hikɨ Wenahiyaxi Kuyara nu'aya heyaka Kuhawi kanemieni meta katiniuta'aita mɨkateukienikɨ kiiya mati'utsie paitɨ makumawetsie.
1KI 2:35 Hikɨ Tsarumuni Wenahiyaxi Kuyara nu'aya kuyaxi tiwa'aitɨwame kanayeitɨani Kuhawi hetsiemieme. Meta mawari wewiwamete wa'ukiyari Tsaruki kanayeitɨani 'Awiyataxi hetsiemieme.
1KI 2:36 Merikɨte Tsimi tiutanɨ'airieka, mɨpaɨ katinitahɨawe: —Kii keneu'atawewiri Kerutsareme muwa kenayekani. Xaɨtsie pepɨkaheyeikani,
1KI 2:37 kepauka pemayeyani meta kepauka Kiruni 'akiyaritsie pemuyani, pekanimieriemɨkɨ. Peru tame tahetsie pɨkarahɨiyani.
1KI 2:38 Tsimi mɨpaɨ ti'aitame katiniutahɨawe: —Kamɨtsɨ mɨpaɨ nekatiniyurimɨkɨ, ne nemumati'uximayaitsiriekakɨ 'anekaniuyeikani ti'aitame, mɨpaɨ nekatinikayeimɨkɨ kepemɨnera'aitɨwa. Tsimi Kerutsareme kiekariyaritsie kaniukateitɨni muixa.
1KI 2:39 Matsi haika wiyari 'anuyeyaku, yuhutatɨ te'i'uximayatsiriwamete mekaniyuta'una Kahati kiekariyaritsie paitɨ, 'Akihitsi mɨra'aitakaitsie Mahaka nu'aya. Kepauka Tsimi mɨtiutamari kename Kahati paitɨ mehe'uwa te'i'uximayatsiriwamete,
1KI 2:40 'ana yupuxu 'anutixiratɨaka kaneyani wareuwaumieka meta tawari mɨwa'atɨanikɨ.
1KI 2:41 Kepauka Tsarumuni mɨtiutamari kename Tsimi Kerutsareme yeyaka Kahati paitɨ heyakai meta kename 'akunuakai,
1KI 2:42 hikɨ titanɨ'airieka mɨpaɨ katinitahɨawe: —Ne yanepɨmatiutahɨawixɨ yapemɨtayɨnikɨ Yawé hɨxie, ne mɨpaɨ nepɨmarayehɨtɨa: “Kepauka pemayeyani tsepa hakewa, pekanimieriemɨkɨ”. 'Ekɨta yapeputayɨ kename yapetikayanikekai yapera'eriwakai.
1KI 2:43 ¿Kamɨtsɨ ketitayari yapekatikatɨa yape'utayɨka Yawé hetsiemieme, meta titayari yapekatikatɨa kenemainekai?
1KI 2:44 Metatsiere ti'aitame mɨpaɨ Tsimi katiniutahɨawe: —'Ekɨ pepɨrakumate kepemɨtikwinitɨa nepaapa Rawiri, hikɨri Yawé hetsiena pɨtanuani ke'axapemɨtiuyurikɨ.
1KI 2:45 Matsi ne 'aixɨa nepɨ'itɨarieka, meta Rawiri 'uwenieya yuheyemekɨ 'apuweni nuiwarimama wahetsiemieme meta 'aixɨa pɨtiumieni Yawé hɨxie.
1KI 2:46 Hikɨ yapauka ti'aitame, Wenahiyaxi Kuyara nu'aya mimienikɨ kanita'aitɨani. 'Ana Wenahiyaxi Tsimi kaniumieni. Mɨpaɨ tiuyɨku Tsarumuni xeikɨa ti'aitatɨ kanayani.
1KI 3:1 Merikɨtsɨ Tsarumuni, 'ekipitutanaka ti'aitame Parahuni matɨa tɨratu mekaniuwewieni memɨyuparewiekakɨ nu'aya 'utiwitɨka, hikɨ Tsarumuni 'uka Rawiri kiekariena paitɨ kani'atɨani, 'ana 'akuxi yuparatsiyu puwewienekai, meta Yawé tukieya metatsiere Kerutsareme kuraruyari 'amatayewa.
1KI 3:2 Mana 'akuxi mɨkatawewiyawekaikɨ tuki Yawé hetsiemieme, teɨteri xeikɨa mepɨtemawatɨwekai tukite 'etsipepemeta.
1KI 3:3 Tsarumuni Yawé kaninaki'eriekaitɨni, metatsiere kemɨti'aitɨakai paapaya Rawiri yakatinikamiekaitɨni. Peru mɨkɨta yaxeikɨa kaneta'axekaitɨni hakewa memɨtehetimawakai tukite 'etsipepemeta, mɨtitimawakɨ meta 'ɨkwa putitaiyakai.
1KI 3:4 Tuki 'etsimupe waɨkawa mɨmatiwakai Kawahuni rakutewakaku kaniuwekaitɨni, mana kaneta'axekaitɨni Tsarumuni timawamɨtɨ. Heiwa mana xeimiriyari mawari taiyariyari kaniuwewieni,
1KI 3:5 hikɨ mana kutsukaku Yawé heinɨtsitana kaniuyuhekɨata mɨpaɨ katinitaxatɨani: —Kenetineutawawiri tita mɨmatinake nemɨmatiminikɨ.
1KI 3:6 Hikɨ Tsarumuni mɨpaɨ katinita'eiya: —'Ekɨtsɨ waɨkawa pekaninaki'eriekaitɨni mati'uximayatsiriwame Rawiri, nepaapa, mɨkɨ 'aniuyeikakaitɨni yatikamietɨ naimetsie kepemɨtihɨritɨa 'aixɨa 'anemekɨ 'ahetsie tiwiyatɨ, 'iyarieya niheitseriekaitɨni. Hikɨta yaxeikɨa tepɨneniere kepemɨtinaki'erie Rawiri nu'ayatɨme pemanayexeikɨ 'uwenieyatsie mayerɨnikɨ.
1KI 3:7 »Yawé nekakaɨyari, hikɨ 'ekɨ ti'aitame pepɨnetsi'ayeitɨa nepaapa Rawiri hetsiemieme. Peru ne matsi 'akuxi nepɨtemaikɨ, 'atsinepɨkatimate kenemɨtiyurieneni.
1KI 3:8 Peru 'ena pekaneniuhɨani ne ti'a'uximayatsiriwame teɨteri memɨyumɨire wahɨxie pemɨwaranayexei, teɨteri memɨkayu'inɨatsinɨa.
1KI 3:9 Ne nepɨmatsiwawirie mati'uximayatsiriwame nehɨkɨtɨtɨ nemɨtimaiwenikɨ nemɨyɨwenikɨ nemɨtiwata'aitɨanikɨ 'ateɨterima, para nemɨtimaikakɨ ketita 'aixɨa mɨti'ane meta tita 'axamɨti'ane. Mexɨka katixaɨtɨni pekanetsi'uparewieni, xewitɨ pɨkayɨwe mɨtiwaruta'aitɨani 'ikɨ teɨteri memɨyumɨire».
1KI 3:10 Yawé pinakixɨ Tsarumuni mɨkɨ mɨtitawawirikɨ.
1KI 3:11 'Ayumieme mɨpaɨ Yawé katinitahɨawe: —Mɨkɨ pemɨnetiutawawirikɨ, pemɨtimaiwenikɨ heitserie pemɨti'aitanikɨ, matsi pɨta tukari mɨireme pemɨka'utawau, xikutɨriya 'ahetsiemieme pemɨka'utawau, yatɨni memɨkwinikɨ memɨmatsi'aye'unie pemɨka'utawau,
1KI 3:12 nekametiniyetuiriemɨkɨ pemɨnetiutawawiri, 'iyari timaiweme nekamenimimɨkɨ, meta pekatinimaikamɨkɨ tita 'aixɨa mɨti'ane meta tita 'axamɨti'ane. Xewitɨ mɨpaɨ 'anetɨ pɨkatinuiwawe meta xewitɨ mɨpaɨ pɨkayɨni 'arike.
1KI 3:13 Metatsiere tsepa pemɨkanetiutawawiri nepɨmatiyetuirieni, waɨkawa pemɨrexeiyanikɨ, pemɨmariwenikɨ xewitɨ ti'aitame 'ahepaɨ pɨka'aneni pe'uyeikakaku.
1KI 3:14 Xɨka yapetikamieni naime ne'aitsikatetsie, 'apaapa mɨtikamiekai hepaɨ Rawiri, tukari waɨkawa nepɨmatsipitɨani.
1KI 3:15 Merikɨte kepauka Tsarumuni manutanierixɨ yakatinetimani kehapaɨ mɨtiuheinɨ, hikɨ kanakunuani Kerutsareme. Mana nuaka tɨratu kakuniyari manuka kaneyani hikɨ mawari taiyariyari kaniuwewieni meta kename meyuxewi mawariyari. Metatsiere 'ixɨarari kaniuwewieni yunaime 'iparewiwamete wahetsiemieme.
1KI 3:16 Merikɨtsɨ yapaɨmexɨa tukari 'anukayaku, yuhutatɨ 'ukari tuminikɨ memɨyumayɨinɨa mekaniu'axɨani ti'aitame hetsɨa.
1KI 3:17 Xewitɨ mɨkɨ mɨpaɨ katinitahɨawe: —Neuxei ti'aitame, 'ikɨ 'ukaratsi teyunaitɨ 'uxeikɨa tepayetei xeikiyarita, mɨkɨ nehamatɨa 'ayekaiku ne nepetiniwexɨ,
1KI 3:18 hikɨ haika tukari 'anukayaku mɨkɨta petiniwexɨ. Xewitɨ muwa pɨka'ayekatei, matsi tame xeikɨa teyuhutatɨ.
1KI 3:19 Merikɨte xeitɨkaritsie 'ikɨ nu'aya kanemɨni hetsiena mahuikɨ warutsieya.
1KI 3:20 Peru mɨkɨ tɨkari hixɨapa kananukukeni, mexi nekutsukai neniwe 'utikweka, yuhamatɨa kanikateni, yuniweta mɨmɨki ne'aurie kanititeni.
1KI 3:21 Kepauka nemanukuke ne'itsitsitɨanike neniwe, nemixei pɨmɨkikai, 'arike 'ukahekɨareku kwi nemune'ɨwiyaxɨ mɨkɨ neniwe pɨkahɨkɨtɨkai, ke'aneme nemutiniwekai.
1KI 3:22 Hikɨ xewitɨta mɨpaɨ kaniutayɨni: —Hawaikɨ pɨkayuri. Nunutsi kemɨ'ane mayeniere kanineniwetɨni, kemɨ'ane mɨmɨki kani'aniwetɨni. 'Ukaratsi matɨari mɨtiutaxataxɨ mɨpaɨ katinitahɨawe: —Pekatiniku'itawani. Nunutsi mɨmɨki 'ekɨ kani'aniwetɨni, kemɨ'ane mayeniere kanineniwetɨni. Mɨkɨ mɨpaɨ mekateniyukɨhɨawekaitɨni ti'aitame hɨxie.
1KI 3:23 Hikɨ ti'aitame mɨpaɨ katiniwarutahɨawe: —Xewitɨ mɨpaɨ mutaine: “Nunutsi kemɨ'ane mayeniere kanineniwetɨni, kemɨ'ane mɨmɨki kani'aniwetɨni”. Xewitɨta mɨpaɨ tiutaine: “Pɨkayuri. Nunutsi mɨmɨki kani'aniwetɨni, mayeniere kanineniwetɨni”».
1KI 3:24 Hikɨ mɨpaɨ katiniuta'aita: —'Ixipara xekenenakwe'iri. Kepauka memi'atɨiri,
1KI 3:25 mɨpaɨ kaniutayɨni: —Hixɨapa xekeniwawitekiri nunutsi mayeniere, xekeneyetuiri hixɨapa 'akame 'ikɨ, 'iyata xeime.
1KI 3:26 Yuri mɨmaamaya waɨkawa yuhiwerietɨ yuniwekɨ mɨpaɨ ti'aitame katiniutahɨawe: —Neuxei waɨkawa nepɨmatsiwawirie, ti'aitame. Pepɨka'ikumemiwani, mɨkɨ keneyetuiri nunutsi mayeniere. Peru xewitɨta mɨpaɨ kaniutayɨni: —Hixɨapa ke'uwitekieni, nehetsiemieme mɨkahɨkɨtɨnikɨ meta 'ahetsiemieme.
1KI 3:27 Hikɨ ti'aitame mɨpaɨ katiniuta'aita: —Hawaikɨ xepɨka'ikumemiwani. Xekeneyetuiri nunutsi matɨari mutaniu, mɨkɨ yemekɨ kanimaamayatɨni.
1KI 3:28 Yunaitɨ mekatenetimani 'ixaheritsixi teɨteriyari, kemɨtiwarunɨtsiri mɨkɨ 'ukari, mariweme menayeitɨakaitɨni, metemaitɨ Kakaɨyari mɨtimaiwenikɨ mipitɨakaikɨ heitserie hipame muwapitɨakakɨ.
1KI 4:1 Tsarumuni ti'aitame kanayani naitsarie 'Ixaheri kwieyaritsie.
1KI 4:2 'Ikɨ mepɨhɨkɨtɨkai memiparewiekai: Mawari wewiwame mexɨakame: 'Atsariyaxi Tsaruki nu'aya.
1KI 4:3 Memɨte'aka'utɨwa te'inɨnɨatamete ti'aitametsie mieme mepɨhɨkɨtɨkai: 'Erikurepi meta 'Ahiyaxi, mɨkɨ Tsitsa mepɨniwemamatɨkai. Kemɨtiuyɨ ti'utɨwame: Kutsapati 'Akiruri nu'aya pɨhɨkɨtɨkai.
1KI 4:4 Kuyaxi wa'ukiyari: Wenahiyaxi Kuyara nu'aya. Mawari wewiwamete: Tsaruki meta 'Awiyataxi.
1KI 4:5 Kuwexinaruritsixi wa'ukiyari: 'Atsariyaxi Natani nu'aya. Tsarumuni 'ɨxatsitɨwame meta mawari wewiwame: Tsawuri pɨhɨkɨtɨkai Natani nu'aya.
1KI 4:6 Paratsiyu mɨhɨritɨariekai: 'Akitsaxi. Waɨriyarika memɨte'uximaya wahepaɨtsita mɨhɨritɨariekai: 'Arunirani 'Awura nu'aya.
1KI 4:7 Tsarumuni pɨwarexeiyakai kuwexinaruritsixi tamamata heimana yuhutame naitsarie 'Ixaheri kwieyaritsie. Yuxexuitɨ xeiwiyaritsie mɨkɨ xeimetseri ti'aitame meta 'iparewiwamete mekateniwarutamikwakaitɨni.
1KI 4:8 'Ikɨ mepɨhɨkɨ kememɨtetetewakai: Kuxi nu'aya pɨhɨritɨariekai 'Epɨrahini kwieyaritsie muhɨriyatsie.
1KI 4:9 Rekaxi nu'aya pɨhɨritɨariekai Makatsi hetsie, Tsariwini hetsie, Weti-Tsemetsi hetsie meta 'Eruni-Weti-Kanani hetsie.
1KI 4:10 Ketseri nu'aya pɨhɨritɨariekai 'Aruwuti (meta Tsuku kiekariyari meta naitɨ Hepexi kiekatari wakwie).
1KI 4:11 'Awinarawi nu'aya pɨhɨritɨariekai Ruxi hɨriyari, ('Awinarawi nu'aya 'ɨyaya Tapati Tsarumuni nu'aya pɨhɨkɨtɨkai).
1KI 4:12 Wanaha 'Akiruri nu'aya pɨhɨritɨariekai Tanaki hetsie meta Mekirutsie, metatsiere naitsarie Wetsehani, (meta kiekari Tsaretani 'aurie, Ketsireri hetɨa, Wetsehani ye'atɨ 'atsita 'Aweri-Mekura paitɨ, 'akuxi matsi Kumehani paitɨ).
1KI 4:13 Kewexi nu'aya, Xamuti Karaha kwieyaritsie, (Yahixi kiekariteya Manatsexi nu'aya Karaha kwieyaritsie miemete, pɨhɨritɨariekai metatsiere 'Axikuwi Watsani kwieyaritsie, meta haika tewiyari kiekari 'amɨyeyeu yukuraru hexeiyame wurunitsekɨ reunatɨkaime).
1KI 4:14 'Akinarawi 'Iru nu'aya pɨhɨritɨariekai Makanahini kiekariyari.
1KI 4:15 'Akimatsi pɨhɨritɨariekai Nepɨtahari kwieyari ('Akimatsi Watsemati pawitɨkɨkai, Tsarumuni niweya).
1KI 4:16 Wanaha Hutsahi nu'aya pɨhɨritɨariekai 'Atsexi kwieyari meta 'Aruti kiekariyari.
1KI 4:17 Kutsapati Paruhaki nu'aya pɨhɨritɨariekai 'Itsakaxi kwieyari.
1KI 4:18 Tsimi 'Eraha nu'aya pɨhɨritɨariekai Wenikamini kwieyaritsie miemekɨ.
1KI 4:19 Kewexi 'Urihi nu'aya pɨhɨritɨariekai Karaha kwieyaritsie (mɨkɨ Tsikuni pukwieyatɨkai, 'Amuxeutsixi tiwa'aitɨwame, metatsiere 'Uhuki, Watsani kwieyaritsie ti'aitame). Kura kwieyaritsie pɨkuwexinaruritɨkai yuxewitɨ xeikɨa.
1KI 4:20 Kura kwieyaritsie meta 'Ixaheri kwieyaritsie memɨtamakai yemekɨ kwinimieme mekaniyupaɨmekaitɨni, haramara tetsita xiekari mieme hepaɨ, mana waɨkawa 'ikwai nixuawekaitɨni meta mɨti'iwa metatsiere temawierika.
1KI 4:21 Tsarumuni pɨti'aitakai yunaime hipatɨ te'aitamete wahetsie 'Eupɨrate hatuxameyari manuyeka memɨtama meta piritsiteutsixi wakwietsie paitɨ, yaxeikɨa 'Ekipitu kwieyari manuye'atɨka paitɨ. Kepauka Tsarumuni 'amuyeikakai mɨkɨ nuiwarite yunaitɨ mepɨte'iyetuiriwakai kemɨtiwawawiriekai.
1KI 4:22 Keyamemɨteheuyehɨakai 'ikwaite xeitukaritsie timieme Tsarumuni, 'ataxewi miriyari heimana 'ataxewi tsienituyari (6.600) kiruyari harina 'aixɨa mɨ'ane, meta tamamata heimana haika miriyari heimana huta tsienituyari (13.200) kiruyari harina yakɨ mɨ'ane.
1KI 4:23 Tamamata tuurutsixi memɨwaiyatɨarietɨka, meta xeitewiyari yeuta memɨtekwatɨwe, meta xeitsienituyari muxatsi, yaxeikɨa maxatsi, meta hipatɨ maxatsi yɨkɨ memɨ'anene meta wakanari memɨwaiyatɨarietɨka.
1KI 4:24 Tsarumuni naitsarie te'aitamete pɨtiwa'aitɨwametɨkai 'Eupɨrate hatuxameyari manuyeka 'anataɨye tau makayuyuipike hepatsie memɨtamakai Tipitsa 'itsutɨatɨ 'atsita Kahatsa paitɨ, yu'iyarikɨ kayuwatɨ mepu'uwakai naitɨ kwieya manuye'atɨkatsie.
1KI 4:25 Kepauka Tsarumuni mɨti'aitametɨkai, yunaitɨ Kura kwieyaritsie kiekatari yaxeikɨa 'Ixaheri kwieyaritsie kiekatari, Rani meta Weritsewa paitɨ meye'atɨkaitɨ, 'aixɨa 'anemekɨ mepu'uwakai yu'etɨpiwaritɨa meta yu'iteɨritsata.
1KI 4:26 Tsarumuni puwarexeiyakai tamamata heimana huta miriyari kawayutsixi, meta nauka miriyari kuraru memuyenatɨka kawayutsixi kaxetate memutihapana kuyaxa mieme.
1KI 4:27 Kuwexinaruritsixi yuxexuitɨ xeimetseritsie ti'aitame Tsarumuni meta 'iparewiwametemama mepɨtewa'atɨiriwakai 'ikwaite, mɨkɨ menihɨritɨariekaitɨni memɨtewamikwanikɨ tixaɨtɨ mɨkareuyewekakɨ wahetsiemieme.
1KI 4:28 Metatsiere tsewara mepɨ'atɨwakai meta mɨaxa Tsamuruni kawayutsiximama kuyaxa miemete meta te'ikatɨariwamete wahetsiemieme.
1KI 4:29 Kakaɨyari Tsarumuni kaniupitɨani 'aixɨa mɨti'ane meta 'axamɨti'ane mɨtimaikakɨ meta mɨtimaiwenikɨ yemekɨ 'anutiyakamekɨ, kemɨtiuyemaikai pɨmɨirekai xiekari haramara tetsita mieme hepaɨ.
1KI 4:30 Mɨkɨ matsi pɨwara'iwaxɨ timaiwetɨ yunaime temaiwawemete tau manatineika hepa kiekatari meta 'Ekipitu kiekatari.
1KI 4:31 Mɨpaɨ pɨtiɨyɨ, kwinimieme timaiwetɨ patɨa xewitɨ mɨkayɨwe hepaɨ: kemɨkatimaiwekai 'Etani 'etsirahi tewiyari, kemɨkatimaiwekai Hemani, meta Karikuri metatsiere Raxira, Makuri niwemama memɨhɨkɨtɨkai. 'Ayumieme Tsarumuni putamariwaxɨ naitsarie wa'aurie nuiwarite mamanetɨkateitsie.
1KI 4:32 Mɨkɨ peka'utɨa haika miriyari temaiwawemete waniukiyari meta kwikari xeimiriyari heimana 'auxɨwime nɨawariyari.
1KI 4:33 Mɨkɨ kɨyexi hepaɨtsita pɨtiutahekɨataxɨ, kariuxa Riwanu miemetsie 'itsutɨatɨ nana kurarutsie mɨwiwieretsie paitɨ 'akame. Yaxeikɨata yeutari wahetsie pɨtiuta'ɨkitaxɨ, meta memɨteheuwɨtɨka wahetsie, meta kwiepa yuhukama memɨteku'uwatsie, yaxeikɨata tsapari wahepaɨtsita.
1KI 4:34 Yunaitɨ te'aitamete kwiepa memɨtama memɨtehetima Tsarumuni kemɨtimaiwekai, yunɨ'arima mepɨwarenɨ'awakai memi'enienikɨ kemɨtikuxatakai.
1KI 5:1 Merikɨtsɨ Hirami mɨti'aitametɨkai Tiru kwieyaritsie mɨkɨ 'aixɨa mepɨteyuxeiyakai Rawiri matɨa, hikɨ kepauka mɨretima kename nu'aya Tsarumuni 'anayexeiyariekai 'ɨtɨmana ti'aitame 'ayeitɨarie, 'ayumieme yuparewiwamete peinɨ'airi memeitawaɨritɨanikɨ.
1KI 5:2 Hikɨ Tsarumuni kaneinɨ'airienita niuki, mɨpaɨ rehɨawetɨ:
1KI 5:3 «'Ekɨ pepɨrakumate nepaapa Rawiri pɨka'uyɨwekaxɨa mitawewienikɨ yukakaɨyari Yawé tukieya, muwa temeyexeiyanikɨ, waɨkawa kuyaxa mɨwewienekaikɨ kepaukake Yawé miparewi mɨwara'iwaxɨ memeye'uniekai.
1KI 5:4 Hikɨri Yawé nekakaɨyari pɨnetsi'upitɨa kayuwatɨ nemexeiyanikɨ naitsarie mɨtiuyehanetsie, hikɨ nepɨkawarexeiya memɨnetsi'aye'unie meta 'uximatɨarika pumawe.
1KI 5:5 'Ayumieme nepitawewieni tuki Yawé nekakaɨyari hetsiemieme, nepaapa Rawiri mɨpaɨ mɨrahɨawekaikɨ: “'Aniwe kemɨ'ane 'a'utɨma ti'aitame nemayeitɨani, kanitawewimɨkɨ tuki nehetsiemieme”.
1KI 5:6 »Hikɨ 'ayumieme ketineta'aita kariuxa metixitekienikɨ Riwanu hɨriyaritsie mieme. Te'uximayatamete nehetsɨa miemete 'ahetsɨa miemete wahamatɨa mepɨteta'uximayata, ne nepɨmatipitɨani 'ahetsɨa miemete kememɨteta'iwa kepemɨtayɨni. 'Ekɨ pepɨtimate xewitɨ 'ena pumawe kɨyexi heutaxitewetɨ Tsiruniyutsixi kememɨteheitaxitewawe».
1KI 5:7 Kepauka Hirami Tsarumuni niukieya mu'eni, waɨkawa puyutemawiekai, mɨpaɨ kaniutayɨni: «'Aixɨa kerahɨawarɨwani hikɨ Yawé, Rawiri mupitɨakɨ xeime yuniwe mayexeiyakɨ waɨkawa timaiweme mɨtiwata'aitɨanikɨ mɨkɨ nuiwari mumariwe».
1KI 5:8 Hikɨ Hirami Tsarumuni kanenɨ'airieni 'ikɨ niuki: «'Aniuki nepu'eni ketita pemɨnerawawiriwa. Ne nepɨmatsiyetuirieni kariuxa meta huku kepaɨmeme pemeuyehɨwa.
1KI 5:9 Te'uximayatamete nehetsɨa miemete mepitituani Riwanu hɨriyaritsie mepekatɨni haramara tetsita mepikatetɨani, muwa mɨkɨ mepitihɨani wewerime mepɨtiwewieni, mepenuhautsitɨani hakewa paitɨ 'ekɨ pemeiyehɨwa, muwa mepitixɨna xeme xemiti'ɨnikɨ. 'Ekɨta 'ikwaikɨ xeikɨa pepɨnetsiparewieni netsiparewiwamete wahetsiemieme».
1KI 5:10 Hikɨ Hirami pituirienekai kepaɨmeme Tsarumuni kariuxa meta huku meuyehɨakai,
1KI 5:11 meta Tsarumuni xeiwiyari 'anuyeyeikakaku Hirami 'ikwai pɨtiyetuiriwakai, hamatɨana memɨte'uximaya wahetsiemieme, 'ipaɨ tipaɨmeme: xeitewiyari miriyari 'ikayari tɨriku puxuri wahetsie, meta xeitewiyari miriyari merirayari huriwa hatseitiyari.
1KI 5:12 Yawé yuniuki paye'atɨa Tsarumuni mɨtimaiwenikɨ kaniupitɨani. Hirami Tsarumuni matɨa tɨratu mepuwewi, yunaitɨ kayuwatɨ meniyuxeiyakaitɨni.
1KI 5:13 Tsarumuni waɨriyarika memɨte'uximaya katiniwaruta'aitɨani xeitewiyari heimana tamamata miriyari naitsarie 'Ixaheri kwieyaritsie.
1KI 5:14 Mɨkɨ puwarenɨ'awakai Riwanu paitɨ, peru tamamata miriyari xeikɨa pɨwarenɨ'awakai, huta metseri yukie mepuka'uxipiwekai. Waɨriyarika memɨte'uximaya pɨhɨritɨariekai 'Arunirani.
1KI 5:15 Tsarumuni puwarexeiyakai hɨritsiepai haika tewiyari heimana tamamata miriyari teɨteri tetexi tɨkɨmete, meta nauka tewiyari miriyari tetexi tsunamete.
1KI 5:16 Meta mana mepu'uwakai haika miriyari heimana haika tsienituyari meyupaɨmetɨ te'uximayatamete tewa'aitɨwamete.
1KI 5:17 Tuki tenariyari mayanikɨ, ti'aitame pɨtiuta'ai tetexi 'anenetɨ mɨtixixiyanikɨ 'aixɨa mɨ'anene.
1KI 5:18 Te'uximayatamete Tsarumuni hetsɨa miemete meta Hirami hetsɨa miemete metatsiere Kewari kiekatari, mɨkɨ yunaitɨ mexa mekaniutiharuanita meta tetexi mekaniutixixieni tuki mɨtawewiyanikɨ.
1KI 6:1 Merikɨtsɨ Tsarumuni Yawé tukieya kaniutsutɨani, naurieka wiyaritsie ti'aitatɨ 'Ixaheri kwieyaritsie, hutarieka metseritsie, Tsiwi mɨtitewakai. Nauka tsienituyari heimana nauka tewiyari wiyari panuyemiekairi kepauka 'Ekipitu kwieyaritsie memayekɨ.
1KI 6:2 Tuki Tsarumuni mitawewi Yawé hetsiemieme xeitewiyari heimana 'atahuta meturuyari pɨtewikai, 'atanauka meturuyari 'atayeutɨ, tamamata heimana haika meturuyari heutitewatɨ.
1KI 6:3 Tuki hɨxie kii meukumɨakai kitenietsie 'atanauka meturuyari pɨtewikai tuki hɨxie 'ukukaitɨ, nauka meturuyari heimana 'imeriyu 'atayeutɨ.
1KI 6:4 Meta Tsarumuni katiniuta'aita tukitsie wapaitɨ maxawariyariexɨanikɨ herie 'ahayeyeume taɨtanata 'etsihayeyeume.
1KI 6:5 Kii 'ixumeriyari warita kanewewietɨyani kii yuheima 'a'ukame.
1KI 6:6 Kii mukananatɨ huta meturuyaritsie 'etsiwa 'anutiyatɨ patayeukai, hixɨapa miemeta huta meturuyari 'imeriyutsie 'etsiwa 'anutiyatɨ patayeukai, waheima miemeteta haika meturuyaritsie 'etsiwa 'anutiyatɨ patayeukai. Tsarumuni tuki waritatsie 'ixumeriyari ya'ayutixɨrietɨkaime puta'aitakai kii mawewieretɨyani kɨyexiyari 'ixumeritsie paitɨ kaheu'uweme.
1KI 6:7 Kepauka tuki mutawewiyatsie tetexi xixiyatɨkaimekɨ xeikɨa kaniutawewiyani, 'ayumieme kepauka mutawewiya tixaɨtɨ pɨkatiu'enierie tsunarika yuariyari, nitixaɨtɨ tɨma.
1KI 6:8 Kii tuki warita mawewieretɨya kitenieyari tuki tserieta hixɨapa kii mukanatɨtsie pawewiyakai, 'imɨmɨi pexeiyakai wakututunime hixɨapa paitɨ manutiyeyɨkɨnikɨ meta hairiekatsie paitɨ.
1KI 6:9 Tsarumuni tuki kaniunɨni, kanenuyekitɨani pikaxi 'anuyetuaka meta mexa 'e'atayeyeume kariuxa kɨyeyari.
1KI 6:10 Tuki kemɨtewikai naitsarie kaneitiwewiexɨani kii yuheima 'a'ukame, xexuitɨ kii huta meturuyari heimana xeitewiyari heimana 'auxɨwi tsenitimeturuyari peutitetewakai, pikaxiyarite tuki 'ixumeriyaritsie peutaxɨrietɨkatei kariuxa kɨyexiyari pɨhɨkɨtɨkai.
1KI 6:11 Hikɨ Yawé Tsarumuni mɨpaɨ katiniutahɨawe:
1KI 6:12 «Hikɨri tuki pemɨwewienekɨ mɨpaɨ nepɨmarahɨawe, xɨka naime 'inɨari niukiyaritsie yapetikamieni, naime 'aitsika xɨka pehaye'atɨaka, ne nepeye'atɨani kenemutayɨ nepɨmatsiparewieni 'apaapa Rawiri kenemɨtiutahɨawixɨ.
1KI 6:13 Ne 'ana 'ixaheritsixi wahamatɨa nepukani meta hatsuaku nepɨkawaku'eirieni neteɨrima 'ixaheritsixi».
1KI 6:14 Kepauka Tsarumuni tuki 'ixumeriyari munɨ,
1KI 6:15 taɨtanata kanewakumana kariuxa kɨyeyari mexayari, kwiepa tsutɨme witsikatiniwewieni pikaxi manuyehetsie 'uti'atɨkaime, meta huku kɨyeyari mexayari kaniuyemana kwiepa.
1KI 6:16 Tukita 'upaitɨ, mutanieretsie paitɨ, Waɨkawa Muyepatsie mayanitsie 'aixɨa kaniwakuyurieni, 'atanauka meturuyari kaniuyeyeukaitɨni kariuxa mexayari kaniwakumana kwiepa tsutɨme pikaxi manuyehetsie 'uti'atɨkaime.
1KI 6:17 Tukita 'amuyeyeukai, Waɨkawa Muyepatsie hɨxie pɨti'anekai, mɨkɨ tamamata heimama 'atahaika meturuyari pɨtewikai.
1KI 6:18 Tuki taɨta kaniwakumana kariuxa mexayari reuku'utɨkaime, kɨxauri 'ɨkiyari meta tuturi 'anutayepietɨkaitɨ ha'utɨkaime. Pɨkahahekɨkɨakai tetexi 'etsiwa tɨma, naitɨ kariuxa kɨyeyari muwakɨnɨkaikɨ.
1KI 6:19 Tsarumuni Waɨkawa Muyepatsie 'aixɨa kaniukuyurieni muwa meutatekienikɨ tɨratu kakuniyari Yawé hetsɨa mieme.
1KI 6:20 Waɨkawa muyepatsie, mɨkɨ tuki mutanieretsie katini'anekaitɨni, puyeyeukai 'atanauka meturuyari heutatewatɨ meta 'atanauka meturuyari 'atayeutɨ meta 'atanauka meturuyari heutitewatɨ, huru mɨhɨkɨakɨ puwakuwiri, meta mawari taiyame kariuxakɨ mɨwewiyakai huru pikawiri.
1KI 6:21 Metatsiere, Tsarumuni tuki taɨta naime huru mɨhɨkɨa puwakuwiri, meta Waɨkawa Muyepatsietsie huru puwakuwiri, mɨkɨ hɨxieta huru karenayari putawɨtɨa.
1KI 6:22 Mɨyatɨtɨtsɨari, tuki taɨta naime huru puwakuwiri, meta mawari taiyame putawiri waɨkawa muyepatsie hɨxie muwekai.
1KI 6:23 Tsarumuni kaniwaruta'aita memɨtiwewiyanikɨ yuhutatɨ Kakaɨyari teɨtametemama huriwu kɨyeyarikɨ waɨkawa muyepatsieta memaye'unikɨ, mɨkɨ yuxexuitɨ nauka meturuyari heimana 'imeriyu meputɨkai.
1KI 6:24 Yuxewitɨ yu'anate tatseratɨkaitɨ nauka meturuyari heimana 'imeriyu pɨyeukai, xexuitɨ 'anate huta meturuyari heimana xeitewiyari heimana 'auxɨwi tsenitimeturuyari pɨyeyeukai mɨyatɨtɨ.
1KI 6:25 Hutarieka mieme Kakaɨyari teɨtame yaxeikɨa pɨyeukai nauka meturuyari heimana 'imeriyu, yunaitɨ yuhutatɨ yaxeikɨa mepɨnenekai yaxeikɨa me'anenetɨ.
1KI 6:26 Yuxexuitɨ Kakaɨyari teɨtametemama nauka meturuyari heimana 'imeriyu meputɨkai.
1KI 6:27 Tsarumuni Kakaɨyari teɨtametemama Waɨkawa Muyepatsietsie kaniwareuta'uitɨani hixɨapatsie yu'anate metatseratɨkaime. Yuxexuitɨ xeime 'anayarikɨ tuki 'ixumeriyaritsie mepeuta'a'axekai, tapakɨta mepuyuwiyakai tuki hixɨapa.
1KI 6:28 Hikɨ meta Tsarumuni huru kaniwarukawirieni Kakaɨyari teɨtametemama.
1KI 6:29 Tuki taɨta mewakunekame, mutanieretsie meta 'enahura, kaniwaraku'utɨani Kakaɨyari teɨtametemama meta takɨ hepaɨ 'aneneme metatsiere tuturi 'anutayepietɨkaime.
1KI 6:30 Meta, huru puyewiri tukita muyeweritsie, mutanieretsie meta manayenieretsie.
1KI 6:31 Waɨkawa Muyepatsietsie kitenieyaritsie, Tsarumuni 'itupari hutame putiwewi huriwu kɨyeyarikɨ, kitenie manuyeka meta kɨyexi muka'u 'auxɨwime 'etsikinayari pexeiyakai.
1KI 6:32 Mɨkɨ huta 'itupariyaritsie huriwu kɨyeyari mɨhɨkɨtɨkai, mana Kakaɨyari teɨtamete puwara'utɨaxɨa meta takɨ 'ɨkiyari metatsiere tuturi 'anutayepietɨkaime, meta mɨkɨ naime huru kanikawirieni.
1KI 6:33 Metatsiere tukita meutahanitsie mieme kitenie nauka 'etsikinayari pexeiyakai, kɨyexi muka'u huriwu kɨyeyari pɨhɨkɨtɨkai.
1KI 6:34 Meta hutame 'itupari putiwewi huku kɨyeyarikɨ, xexuitɨ 'itupari puhuhutakai 'uyutatunatɨ.
1KI 6:35 Mɨkɨ hetsieta pɨwara'utɨaxɨa Kakaɨyari teɨtametemama meta takɨ 'ɨkiyari metatsiere tuturi 'anutayepietɨkaime, meta mɨkɨtsiere huru kanitiwirieni.
1KI 6:36 Tuki hɨxie kwitɨwa takwa mukumakai kuraruyari hetsiemieme kaniutawewieni haikatɨ tetexi yuheima 'ayaxikekaku manata kariuxa kɨyeyari kananuyetuarikekaitɨni heimana.
1KI 6:37 Kepauka Yawé tukieya mutsutɨarie nauka wiyari pɨti'aitakai Tsarumuni, hutarieka metseriyaritsie.
1KI 6:38 Mɨkɨ tuki pɨnɨrie, tamamata heimana xewi wiyari ti'aitakaku, 'atahaika metseriyari 'umiekaku, yemekɨ kehapaɨ memɨte'iwewienikekai mɨpaɨ mete'uximayatɨ. Mɨyatɨtɨ Tsarumuni tuki 'atahuta wiyari pɨnɨ.
1KI 7:1 Metatsiere Tsarumuni yuparatsiyu kaniutawewieni, mɨkɨ tamamata heimana haika wiyari kaninɨni.
1KI 7:2 Pitawewi meta paratsiyu «Riwanu Makukariuxaya» mɨtitewa, huta tewiyari heimana 'auxɨwi meturuyari payetewikai, xeitewiyari heimana huta meturuyari heimana 'imeriyu 'atayeutɨ meta tamamata heimana haika meturuyari heimana 'imeriyu heutitewatɨ. Nauka xurukuyari kariuxa kɨyeyari 'ukawetɨkaitɨ 'apapatɨ pituikakai pikaxite manuyehetei, mɨkɨta pɨkariuxatɨkai.
1KI 7:3 Panukakitsiekai kariuxa kɨyeyarikɨ huta tewiyari heimana 'auxɨwi mukawetɨka hetsie manakawɨtsie.
1KI 7:4 Nenieremete putiwewiya, haika xurukuyari hahaikakatɨ yuxexuitɨ mepanuyutaxeiyatɨkatei.
1KI 7:5 Naitsarie kitenie mɨreutahakitɨretsie tenimeyari pexeiyatɨkatei 'uta'itsikinatɨkaime yaxeikɨa heutatetewame, hahaikatɨ peuwɨkai yuxexuitɨ mepanuyutaxeiyatɨkatei.
1KI 7:6 Tsarumuni meta kii kaniutawewieni 'etɨpiweme, mɨkɨ mɨpaɨ pɨtewikai xeitewiyari heimana huta meturuyari heimana 'imeriyu meta tamamata heimana haika meturuyari heimana 'imeriyu 'atayeutɨ. Hɨxienata puwekai hepaɨna 'anetɨ, 'anukakitɨarietɨ.
1KI 7:7 Xeimeta kii putawewi 'uwenieya muwayekenitsie, mɨtiwatixanetɨariwanitsie mieme. Mɨkɨ kiita kaniwakumana kariuxa mexayarikɨ, naitsarie memuye'uwanitsie meta heimana.
1KI 7:8 Tsarumuni kiiya yuxaɨta 'akaniuwekaitɨni xeime kuraruyarita hepaɨna tiyuxexeiyatɨ. Parahuni niweya mutiwitɨ hetsiemieme, Tsarumuni kanita'aitsirieni paratsiyuya hepaɨna tiyuxexeiyame.
1KI 7:9 Tenaritsie tsutɨtɨ meta heimana paitɨ tetexi matatei, tuki warie tsutɨtɨ meta takwa 'amakuyewatsie paitɨ 'uyenieretɨ, tetexi 'aixɨa mɨ'anenekɨ pɨtiutiwewiya tsatsaiyatɨkaitɨ naitsata hautixitekietɨkaitɨ 'inɨaritɨkaitɨ.
1KI 7:10 Tsutɨmeyari tetexi 'anenetɨ pu'itɨarie yemekɨ 'aixɨa mɨ'anene, hipatɨ nauka meturuyari reuyeta punenekai hipatɨta haika meturuyari reuyeta punenekai.
1KI 7:11 Heimanata mieme yaxeikɨa tetexi pu'itɨarie 'aixɨa mɨ'anene, xitekietɨkaitɨ tinanaketɨ, yaxeikɨa kariuxa pikaxiyari.
1KI 7:12 Takwa 'amakuyewa kuraruyari pɨwewiyakai haikatɨ tetexi yuheima 'ayaxiketɨkaitɨ manata kariuxa kɨyeyari kananuyetuarikekaitɨni heimana meta yaxeikɨa pɨ'anekai Yawé tukieya kitenie kii meukumɨakai hɨxie takwa mukumakai kuraruyari.
1KI 7:13 Hikɨ ti'aitame Tsarumuni katiniutanɨ'ani Hirami mɨwitɨkiemiekɨ Tiru kiekariyaritsie paitɨ,
1KI 7:14 mɨkɨ wiura punu'ayatɨkai Nepɨtahari xiɨyarieya, 'ukiyarieya Tiru pɨkiekametɨkai mɨkɨ pɨti'uximayatawekai wurunitsekɨ. Hirami yemekɨ pɨrakumaikai wurunitsekɨ, 'ayumieme mɨkɨ ti'aitame Tsarumuni hetsɨa kaninuani, hikɨ tita mɨtiuta'aitɨarie naime katiniutiwewieni.
1KI 7:15 Hirami hutame tuxiyu kaniutiwewieni xexeurawime wurunitse tepɨayarikɨ, 'atahaika meturuyari pɨtɨtɨkai meta 'aiwaritatsie 'auxɨwi meturuyari heimana 'imeriyu pupapakai.
1KI 7:16 Meta hutame tuxiyu mu'uteya kaniutiwewieni witsitiyuxexeiyame mɨkɨ wurunitsekɨ pɨwewiyatɨkatei, huta meturuyari heimana xeitewiyari heimana 'auxɨwi tsenitimeturuyari putɨtɨkai.
1KI 7:17 Herie pɨkawerekai karena wipiyari hepaɨ 'anetɨ, hikɨ xexuitɨ 'atahuta wipiyari pexeiyatɨkatei.
1KI 7:18 Xexuime tuxiyu mu'uteyatsie penukuyatsaxɨa huta xurukuyari kɨranara manitsana hepaɨ mɨ'anene, yuwiyakame wipi matɨa.
1KI 7:19 Tuxiyu mu'uteyatsie 'atsutsena tuturiyari hepaɨ 'aneneme panuyatsakai xeimeturuyari heimana nauka tewiyari tsenitimeturuyari pɨnenekai.
1KI 7:20 Yaxeikɨa peixeiyatɨkatei tuturi 'amanakupatsie kɨranara manitsana hepaɨ mɨ'anene, huta tsienituyari paɨmeme karena wipiyari hetɨa 'anakutetɨkaime.
1KI 7:21 Kepauka Hirami mutinɨ tuki kitenie kanika'uitɨani, hikɨ kanititerɨwa tuki tserieta mutiwekai Kakini katiniterɨwa meta 'utatana mutiwekai Wuhatsi katiniterɨwa.
1KI 7:22 Mɨkɨ tuxiyu putinɨrie kepauka mu'uteya tuturi hepaɨ mɨ'anene manuyatsarie.
1KI 7:23 Meta katsu haa makatuare kaniutawewieni tepɨa kwaxiyariekamekɨ 'eyeukame xikɨraɨyeme, nauka meturuyari heimana 'imeriyu 'anutatewame, huta meturuyari heimana xeitewiyari heimana 'auxɨwi tsenitimeturuyari hautitewame. Meta tamamata heimana haika meturuyari heimana 'imeriyu yeukame.
1KI 7:24 Tenimeyaritɨa petayatsaxɨ huta xurukuyari kɨxauri 'ɨkiyari, huta tewiyari heimana tamamata tsenitimeturuyaritsie tamamata pakayaxikekai, mɨkɨ naitɨ katsu kɨxaurite puyuxewiriyakai.
1KI 7:25 Katsu 'emɨyewa tamamata heimana huta tuurutsixi wurunitsekɨ memɨwewiyatɨka wahetsie puyemakai hetɨana mepeutakɨkɨtsakai, yuhaikatɨ tuurutsixi tayeta mepeutinenierekai, yuhaikatɨta tau makayuyuipike hepatsie, yuhaikatɨta tatsutɨa hepatsie, meta yuhaikatɨta tau manatineika hepatsie.
1KI 7:26 Katsu haa makamare 'atahaika tsenitimeturuyari pɨtsuikai, meta tenimeyari ye'ɨ tenimeyari hepaɨ kani'anekaitɨni meta tuturi mɨtaxutuixime hepaɨ pɨtiyuxexeiyakai. Mɨkɨtsie huta tewiyari heimana nauka miriyari rituruyari pɨrakanakekai.
1KI 7:27 Metatsiere Hirami tamamata kaxetate 'etsipepeme kaniutiwewieni wurunitse tepɨayarikɨ, xeimeturuyari heimana nauka tewiyari tsenitimeturuyari pɨtɨkai, meta mɨpaɨta yaxeikɨa 'atayeyeutɨ, meta xeimeturuyari heimana xeitewiyari heimana tamamata heimana 'auxɨwi tsenitimeturuyari 'utɨtɨkame.
1KI 7:28 'Etsatana naitsata wurunitse tepɨayari 'etsitsutsuitɨ kaneutimanekaitɨni.
1KI 7:29 Mɨkɨtsie mepawewiyatɨkatei mayetsi, tuurutsixi meta Kakaɨyari teɨtametemama, meta mɨkɨ wayeta meta wahetɨa tenimeyaritsie pata'utɨkatei xawari.
1KI 7:30 Xexuitɨ kaxeta xikɨrawime naukame panuyemanakai wurunitse tepɨayari, meta hetsiena muyemane manuyehe wurunitse tepɨayari pɨhɨkɨtɨkai, maimawame yuhetɨa peixeiyakai tepɨa kwaxiyarietɨkaime naukame mituikatɨka.
1KI 7:31 Katsu tsimɨyewa manuyemaretsie puwatixawakai, hetɨanata huta tewiyari heimana 'auxɨwi tsenitimeturuyari heukatewakaku xikɨraɨyetɨ mana puyemakai haika tewiyari heimana 'atahuta tsenitimeturuyari 'anutatewatɨ, mɨkɨ hetɨari muwakaxawa pɨhɨkɨtɨkai mautimane hetɨa mɨti'utɨka, muta'itsikinatɨka pɨkaxikɨrawikai.
1KI 7:32 Mɨxikɨrawi kɨmana mukuyeikani meutimane hetɨa puyemanekai, mɨxikɨrawi hetsiena muyemane puyuxewiriyakai naitɨ kaxeta matɨa, naitɨ 'ɨkateya mɨxikɨrawi haika tewiyari heimana 'atahuta tsenitimeturuyari pɨyeyeukai,
1KI 7:33 mɨkɨ naitɨ wurunitse kwaniyariekamekɨ pɨwewiyakai. Kaxeta 'ɨkateya hepaɨ pɨ'anenekai, manuyehe, mɨxikɨrawi, mɨxikɨrawitsie mɨye'u meta hixɨapa meutetɨka.
1KI 7:34 Xexuitɨ muta'itsikinatɨkatsie peixeiyatɨkatei wiwiereme para mikuyuitɨanikɨ, mɨkɨ wiwiereme kaxeta matɨa pɨyuxewiriyakai.
1KI 7:35 Kaxeta kemayetewi yutenimeyari pexeiyakai wapaitɨ xeitewiyari heimana huta tsenitimeturuyari 'atayeume. Tepɨa 'itsikina mukaheitɨka meta meutimane 'etsimɨtsutsui pɨyuxewiriyakai wapaitɨ mɨtiuyepine matɨa.
1KI 7:36 Hirami 'etsikina tepɨa mukaheitɨkatsie meta mautimanetɨkatsie pɨwara'utɨaxɨa Kakaɨyari teɨtametemama, mayetsi, takɨ meta wa'aurie tuturi meta xawari hakewa mɨreukunanakekai.
1KI 7:37 Mɨpaɨta katinitiwewieni naime tamamata kaxetayari, naitɨ mɨkɨ 'auxeikɨa katiniutiwewiyani yaxeikɨa pɨ'anenekai yaxeikɨa pɨpapakai.
1KI 7:38 Hirami yaxeikɨata katsu 'itsimɨyeyeu kaniutiwewieni, xexuime kaxeta hetsiemieme. Xexuitɨ katsu xeimeturuyari heimana nauka tewiyari tsenitimeturuyari pɨyeyeukai, 'atahaika tsienituyari heimana nauka tewiyari rituruyari pɨrakanakekai haa.
1KI 7:39 'Auxɨwime tuki tserieta kaniti'uitɨani meta 'utatanatsie yaxeikɨa paɨmeme puti'uitɨa. Katsu 'emɨyewa haa mayema tuki 'itsikinayaritsie tserietana hurawa kaniutakeni.
1KI 7:40 Yaxeikɨata katiniutiwewieni, xarite, tepɨa 'amɨtɨtɨ manuxɨte, meta xakɨrɨte xuriya kwekwewiwame. Hikɨ Hirami naime mɨpaɨ katiniutinɨni, Yawé tukieyata timieme mɨrayanikɨ Tsarumuni kemɨtita'aitɨakai, tatsɨari:
1KI 7:41 hutame wurunitse tuxiyuyari, hutame tuxiyu mu'uteya tuturi hepaɨ tiyuxexeiyame, meta wurunitse wipiyari muhuta tuxiyu mu'uteya hetsiemieme,
1KI 7:42 nauka tsienituyari kɨranara xikɨti hepaɨ mɨ'anene 'ɨkiyari, huta xurukuyari manukutetɨkatei xexuime wipitsie,
1KI 7:43 tamamata kaxetate meta tamamata katsu yakɨ mɨyeyeu maimawame kaxetate hetsiemieme,
1KI 7:44 katsu 'emɨyewa haa makamare meta tuurutsixi tamamata heimana huta memituika,
1KI 7:45 xarite, tepɨa 'amɨtɨtɨ manuxɨte meta xakɨrɨte xuriya kwekwewiwame. Hirami 'ikɨ mɨyamɨtipaɨme Tsarumuni mɨtiutiwewiri Yawé tukieya hetsie timieme mɨrayanikɨ naitɨ wurunitse tepɨayarikɨ mɨxawatɨkɨ pɨtiwewiyatɨkatei.
1KI 7:46 Ti'aitame katiniuta'aita Kurutani mayeweritsie mɨtitiwewiyanikɨ kwieta 'inɨarita mɨtitixeriyarienikɨ, Tsukuti mɨrakutewatsie meta Tsaretani wahixɨapa.
1KI 7:47 Piinite wurunitsekɨ mɨtiutiwewiya pɨtimɨirekai 'ayumieme Tsarumuni pɨka'iti'inɨataxɨ kemɨrahetekai, 'ayumieme naitɨ wurunitse kemɨrahetekai pɨka'uyɨwekaxɨa mi'inɨatakɨ.
1KI 7:48 Metatsiere Tsarumuni katiniuta'aita hipameta piinite Yawé tukieyata timieme: 'ɨkwa matitaiyarɨwa hurukɨ mɨwewiya, meta mexa hurukɨ mɨwewiya paa manamarike Yawé hetsiemieme,
1KI 7:49 kɨxeme 'uitɨwamete huru mɨhɨkɨakɨ muwewiyatɨka Waɨkawa Muyepatsie hɨxie pɨti'ukai, 'auxɨwitɨ tserietana pɨti'ukai, 'auxɨwitɨta 'utatana, tuturi hurukɨ mɨwewiyatɨka, kɨxemete, meta kɨmeme titɨkɨme, mɨkɨta naitɨ huru mɨhɨkɨakɨ pɨtiwewiyatɨkatei,
1KI 7:50 tekɨxite, tixikamete, xakɨrɨte xuriya kwekwewiwame, xari 'emɨnena meta 'ɨkwa taiyame 'etsimɨpepe, meta huru tepɨayari 'itupari mɨwiyatɨka Waɨkawa Muyepatsietsie 'itupariyari, meta Muyepatsietsie 'itupariyari hetsiemieme.
1KI 7:51 Hikɨ kepauka mɨtiutinɨrie naitɨ ti'aitame Tsarumuni mɨtiuta'aitakai Yawé tukieya hetsie timieme, 'ana Tsarumuni pɨtiuta'aitaxɨ mɨti'atɨarienikɨ huru, pɨrata, meta piinite paapaya Rawiri Yawé mɨtiyetuiriekai, hikɨ katiniuti'uta Yawé tukita waɨkawa mɨraye'atɨka mɨtiuyepinetsie.
1KI 8:1 Hikɨ ti'aitame Tsarumuni katiniwarutanɨ'airieni 'ukirawetsixi 'ixaheritsixi meta yunaime nuiwarite wa'ukiyarima, meta 'ixaheritsixi wapaapama, hɨxiena memɨyukuxeɨrienikɨ Kerutsareme, kakuni tɨratu 'inɨariyari Yawé hetsiemieme memanukwenikɨ, Rawiri kiekariena memiyekwenikɨ, Tsiyuni mɨrakutewatɨtɨ, tukita memeitatenikɨ.
1KI 8:2 Hikɨ 'etanimi metseriyaritsie, 'atahutarieka metseriyari 'ixɨarariyaritsie, 'ana yunaitɨ 'ixaheritsixi mekaniuyukuxeɨrieni ti'aitame Tsarumuni hɨxie.
1KI 8:3 Kepauka memu'axɨa yunaitɨ 'ukirawetsixi 'ixaheritsixi, hikɨ mawari wewiwamete kakuni tɨratu 'inɨariyari mekaniutikweni.
1KI 8:4 Rewitsixi mewaparewiekaku, kakuni tɨratu 'inɨariyari Yawé hetsiemieme mekanekweni, meta tinaime 'ixuriki tukiyarita mɨtiyepikai mɨtipatsietɨka mekatenetɨni.
1KI 8:5 Ti'aitame Tsarumuni meta hamatɨana memu'uwakai 'ixaheritsixi memɨyuxeɨriekai mana tɨratu kakuniyari hɨxie mekaniwarutimawa muxatsi meta tuurutsixi meyumɨireme mɨwaruti'inɨata pɨkayɨwekai.
1KI 8:6 Hikɨ mawari wewiwamete mekaneikweni kakuni tɨratu 'inɨariyari Yawé tukita mutanieretsie, Waɨkawa Muyepatsietsie, muwa Kakaɨyari teɨtametemama wa'ana hetɨa mekaniteni.
1KI 8:7 Mɨkɨ Kakaɨyari teɨtametemama yu'anate metaweratɨkaitɨ mutanieretsie, kakuni mepanukanakai meta kɨyexi kɨmana mɨkukweiyane.
1KI 8:8 Kɨyexi 'ikwekweweme 'apɨtɨkai kɨtsimeyarite Muyepatsie paitɨ puyuhekɨakai Waɨkawa Muyepatsie hɨxie, takwa paitɨ pɨkayuhekɨakai, hikɨ 'akuxi yaxeikɨa pɨre'ane.
1KI 8:9 Mɨkɨ kakunitsie tetexi hutatɨ pɨyemanekai Muitsexi mana meikamanaxɨ Huré mɨrakutewatsie, Yawé tɨratu muwewitsie 'ixaheritsixi wahamatɨa 'Ekipitu me'ayekɨneku.
1KI 8:10 Kepauka mawari wewiwamete memɨwayekɨ Muyepatsietsie, muwa haiwitɨri kaniutahɨne Yawé tukieyata.
1KI 8:11 Mɨkɨ hai mutahɨnixɨkɨ, mawari wewiwamete mepɨka'ɨyɨwekaxɨa tawari memɨteta'uximayatakɨ, Yawé xawatɨriyaya mumariwe muwa mɨhɨnekaikɨ.
1KI 8:12 Hikɨ Tsarumuni mɨpaɨ kaniutayɨni: «Yawé, 'ekɨ mɨpaɨ peputayɨ kename haiwitɨritsie pe'uyeikani muyɨwitsie,
1KI 8:13 ne matsi tuki yemekɨ mɨmariwe nepɨmatsi'utawewiri, muwa pemayekanikɨ 'aheyemekɨ».
1KI 8:14 Hikɨ Tsarumuni 'akaniutakeni Kakaɨyari tawawirienike 'aixɨa mɨwayurienikɨ yunaime 'ixaheritsixi mana memɨti'ukai,
1KI 8:15 mɨpaɨ kaniutayɨni: «'Aixɨa ke'itɨarieka Yawé 'ixaheritsixi takakaɨyari, mɨkɨ hikɨ yutɨrɨkariyakɨ pɨraye'atɨa nepaapa Rawiri kemɨtiutahɨawixi mɨpaɨ 'utaitɨ:
1KI 8:16 “Kepauka paitɨtɨ 'Ekipitu nemɨwarayewitɨ neteɨterima 'ixaheritsixi, ne xeime kiekari nepɨka'anayexei 'Ixaheri nuiwarimama watsata mana nemɨtawewiyarienikɨ tuki hakewa nemayekanikɨ, matsi Rawiri pɨta nepanayexei neteɨterima 'ixaheritsixi mɨtiwata'aitɨanikɨ”.
1KI 8:17 »Merikɨte, nepaapa Rawiri waɨkawa pɨyuwaɨriyakai mitawewienikɨ tuki Yawé hetsiemieme, 'ixaheritsixi takakaɨyari,
1KI 8:18 peru Yawé mɨpaɨ pɨtitahɨawixɨ: “Nehepaɨtsita 'aixɨa pɨ'ane pemɨ'awaɨriyakɨ tuki nehetsiemieme pemɨwewimɨkɨkɨ.
1KI 8:19 Peru, 'ekɨ pepɨkahɨkɨtɨni pemɨnetsitawewirieni, 'aniwe pɨta 'ahetsie mɨyeyani pɨtiyurieni, mɨkɨ tuki pɨtawewieni nehetsiemieme”.
1KI 8:20 »Hikɨri Yawé katinaye'atɨani kemutayɨ: Yemekɨ kemutayɨkai, hikɨ ne nekananukakeni nepaapa Rawiri 'utɨma nemɨtita'aitakɨ 'Ixaheri kwieyaritsie meta tuki nekaniutawewieni Yawé hetsiemieme, 'ixaheritsixi takakaɨyari.
1KI 8:21 Muwa kakuni hakewa meutahuni nepukuha'aritɨa, tɨratu 'inɨariyari mexeiya Yawé meripaitɨ ta'ukiyarima wahamatɨa miwewi kepauka 'Ekipitu mɨwarayewitɨ».
1KI 8:22 Hikɨ meta, Tsarumuni mawari taiyame Yawé hetsiemieme hɨxie kaniutakeni, hikɨ yunaime 'ixaheritsixi memɨyuxeɨriekai wahɨxie, yumamate teikɨ kanetseraxɨani muyuawitsie,
1KI 8:23 mɨpaɨ 'utaitɨ: «Yawé, 'ixaheritsixi takakaɨyari, xewitɨta Kakaɨyari 'apɨka'uyeika 'ahepaɨ 'anetɨ taheima muyuawitsie meta 'ena kwiepa, 'ekɨtsɨ 'atɨratu pekanaye'atɨwani meta pekaniwanenimayaka yuheyemekɨ kemɨ'ane memɨmate'uximayatsirie meta yu'iyarikɨ memɨmatsi'uweiya.
1KI 8:24 Yapepɨtiuyuri 'ari nepaapa Rawiri matsiparewiwame kepemɨtiutahɨawixɨ, 'ikɨ tukaritsie 'atɨrɨkariyakɨ pepɨraye'atɨa kepemɨtitahɨawixɨ 'aniukikɨ.
1KI 8:25 »Hikɨta, Yawé, 'ixaheritsixi takakaɨyari, yaxeikɨata kenaye'atɨa kepemɨtitahɨawixɨ nepaapa Rawiri, kepauka 'ipaɨ pemɨtitahɨawixɨ: “Xɨka 'aniwema 'aixɨa metekahuni meta xɨka menetsi'uweiyani 'ahepaɨ, yuheyemekɨ mepɨhɨkɨtɨni 'anuiwari hetsiemiemete te'aitamete 'Ixaheri kwieyaritsie nehɨxie me'u'uwatɨ”.
1KI 8:26 'Ixaheritsixi takakaɨyari, hikɨ kenaye'atɨa mɨkɨ kepemɨtitahɨawixɨ nepaapa Rawiri mati'uximayatsiriwame.
1KI 8:27 »Perutsɨ ¿tiyɨwekuta, nekakaɨyari, 'ekɨ kwiepa pemukani? Matsi muyuawitɨtɨ, tsepa kemeutitewa, mana pepɨkatinake, matsi 'ikɨ tuki nemutawewi 'etsipupe.
1KI 8:28 Peru, Yawé nekakaɨyari, nenenewieri keneu'eni meta waɨkawa kenemɨmatiwawirie ne matsiparewiwame. Keneu'eni nehiwari meta nenenewieri hikɨ nemiyetua 'ahɨxie.
1KI 8:29 Kenexeiyani tukarikɨ tɨkarikɨ 'ikɨ tuki, hakewa mɨmatsihenakixɨ muwa pemayekanikɨ, pemi'eniekakɨ ne ti'a'uximayatsiriwame nenenewieri 'ena nemiyetuaya.
1KI 8:30 Keneneu'eni waɨkawa kenemɨmatiwawirie ne ti'a'uximayatsiriwame meta 'ateɨterima 'ixaheritsixi kepauka memɨyunenewie 'uwa. Ketane'enieka muyuawitsie paitɨ, hakewa 'ekɨ pemeyeika, ketaneu'eni meta ketatineuyehɨwiri.
1KI 8:31 »Xɨka xewitɨ 'axatiuyurieni yu'iwa hepaɨtsita, xɨka 'utanɨ'arieni 'ena 'atuki manuwe mawari taiyame hɨxie yamɨtayɨnikɨ,
1KI 8:32 'ekɨ keneu'eni muyuawitsie paitɨ meta kemɨtiheitserie ketineuyuri te'a'uximayatsiriwamete wahetsie. 'Uximatɨarika keneupitɨa kemɨ'ane 'axamɨtiuyuri yemekɨ kemɨreuyewetse hetsiena mieme, kemɨ'aneta 'axamɨkatiuyuri keneuxɨna heitserie 'amuyeikakɨ.
1KI 8:33 »Kepauka 'ateɨterima 'ixaheritsixi memɨwaraye'unie memɨwara'iwa 'ahepaɨtsita 'axamemɨte'uyurikɨ, xɨka kwitɨwata mehanuaxɨani 'ahetsɨa mariweme mematsi'ayeitɨani, xɨka meyutanenewieni waɨkawamekɨ 'ena tuki manuwe,
1KI 8:34 'ekɨ keniwaru'eni taheima muyuawitsie paitɨ meta ketiniwareuyehɨwiri 'ateɨterima 'ixaheritsixi ke'axamemɨte'uyuri meta keniwarakunuitɨa 'ikɨ kwieyaritsie wa'ukiyarima pemɨwayetuiritsie.
1KI 8:35 »Kepauka 'ateɨterima 'axamemɨteyurieni 'ahepaɨtsita, xɨkata 'ekɨ pewaruhiweritɨani xɨka muyuawitsie pereunani mɨkakawiyekɨ, xɨkata mɨkɨ kwitɨwa meyutanenewieni 'ena meta mariweme mematsi'ayeitɨani meta ke'axamemɨte'uyuri mete'uhayewa,
1KI 8:36 'ekɨ keniwaru'eni muyuawitsie paitɨ meta ketiniwareuyehɨwiri ke'axamemɨte'uyuri mate'uximayatsiriwamete, 'ateɨrima 'ixaheritsixi. Keniwaruwitɨximeni huye 'aixɨa mɨ'ane memuweiyanikɨ meta wiyeri kenanɨ'a 'ikɨ kwieyaritsie, mɨti'apiini, 'ekɨtsɨ pekaniwayetuirieni 'ateɨterima mɨtiwahetsiemiemetɨnikɨ.
1KI 8:37 »Kepauka 'ikɨ kwieyaritsie mɨhaakaxatɨni, kwiniya muxuaweni, mɨka'ukawiwiyeni, yatɨni kepauka waxa kwiniyayari mɨtaweni, yatɨni 'utsikari xɨka me'utixuawere, yatɨni memɨtatsi'aye'unie xeime takiekari warie xɨka mehatetɨkani, meta tsepa tita 'uximatɨarika mɨtinua yatɨni kwiniya,
1KI 8:38 xɨka kwitɨwata yuxexuitɨ 'ixaheritsixi, yametehetimame yɨkɨmana ke'axamemɨte'uyuri, xɨka yumamate 'ikɨ tuki hepa mehatatseraxɨani, meyunenewietɨ meta waɨkawamekɨ mematsiwawirietɨ,
1KI 8:39 'ekɨ keniwaru'eni muyuawitsie paitɨ, hakewa pemeyeika, meta ketiniwareuyehɨwiri. Yakeniwaruyuri yuxexuitɨ kememɨte'u'uwakai, 'ekɨtsɨ pekatinimaika, 'ekɨ xeikɨa tewi 'iyarieya pekanimaika.
1KI 8:40 Mɨpaɨ mɨkɨ yunaitɨ 'ekɨ mepɨmatsimakaxeni mexi 'ena kwiepa me'u'uwani meripaitɨ ta'ukiyarima pemɨwayetuiritsie.
1KI 8:41 »Yaxeikɨata 'ateewa kiekame 'ateɨterima 'ixaheritsixi wahetsɨa mɨkamieme, peru metsihemarietɨ kepemɨtiyuriene meyetɨa 'ateewa paitɨ xeime kwieyaritsie.
1KI 8:42 (Mɨpaɨ pɨtiyɨni, teɨteri mepɨtetamarieni kepemɨtitewa meta 'atɨrɨkariya kepemɨranakanɨ'awa meta kepemɨtitɨrɨkaɨye). Kepauka mɨkɨ 'ateewa kiekame munuani meta muyutanenewieni 'ena 'ikɨ tuki manuwe,
1KI 8:43 'ekɨ keneu'eni muyuawitsie paitɨ, hakewa pemeyeika, yaketineupitɨa ketita mɨmatitawawirieni. Mɨpaɨ yunaitɨ teɨteri kwiepa memɨtama mepɨmatsihetimani meta 'ateɨterima 'ixaheritsixi wahepaɨ, 'ekɨ mepɨmatsimakaxeni meta mɨpaɨ mepɨtehetimani kename 'ikɨ tuki nemitawewita 'ekɨ pehahɨawarɨwa.
1KI 8:44 »Yawé, kepauka pemɨwarayewitɨni 'ateɨterima memɨwaraye'unie memɨwakwiyukɨ, tsepa hakewa, xɨka nenewieri mematsipitɨaka meta xɨka kiekari pemenayexei hepa mehataneniereni, tuki nemitawewi 'ahetsiemieme hepa,
1KI 8:45 'ekɨ keneu'eni muyuawitsie paitɨ wanenewieri meta waɨkawamekɨ kememɨmatewawirie, hikɨ kememɨte'anuyehu wahetsie keneutanua.
1KI 8:46 »Merikɨte xewitɨ tewi 'amɨka'uyeikakɨ 'axamɨti'ane hetsiena mɨtiumawe, xɨka 'ateɨterima 'axamete'uyurieni 'ahepaɨtsita, xɨka 'ekɨ pewaruyeheka pewayetuani mɨwaraye'unie hetsɨa mɨwaranuhapanikɨ xeime kwieyaritsie, heteewakaku yatɨni hehurakaku,
1KI 8:47 xɨka xeime kwieyaritsie mehehapanieme, memɨwara'iwaxɨ wakwieyaritsie, xɨka mete'uhayewa ke'axamemɨte'uyuri, meta xɨka 'ahetsɨa me'u'axɨani, xɨka 'ipaɨ mete'uyunenewieni: “Tame 'axatepɨte'uyuri, mɨpaɨ tepɨtehetima kwinimieme 'axatepɨte'uyuri”,
1KI 8:48 meta mana memɨwaraye'unie memɨwarehapa wakwieyaritsie paitɨ xɨka 'ahetsɨa yu'iyarikɨ meyuyetuani meta kememɨteyumatekɨ, xɨka nenewieri memetsiheyetuirieni meta kwie wa'ukiyarima pemɨwayetuiri hepa xɨka mehataneniereni meta kiekari pemenayexei hepa meta tuki 'ahetsiemieme nemitawewi hepa,
1KI 8:49 'ekɨ wanenewieri meta waɨkawamekɨ kememɨmetewawirieka keneu'eni muyuawitsie paitɨ, hakewa pemeyeika, hikɨ kememɨte'anuyehu wahetsie keneutanua.
1KI 8:50 Ketiniwareuyehɨwiri 'ateɨterima, 'axamemɨte'uyuri 'ahepaɨtsita, ketiniwareuyehɨwiri naime titakɨ memɨmatehiweritɨakai. Yaketineuyuri memɨwaraye'unie memɨwatinenimayatakɨ,
1KI 8:51 'ateɨterimatsɨ mekanihɨkɨtɨni 'ixaheritsixi, 'ahetsɨa mekanimiemetetɨni, 'ekɨ 'Ekipitu pemɨwarayewitɨ kwinimieme mete'uximatɨariekaku huxunuta memayeteni hepaɨ meteyumaikaku.
1KI 8:52 »Keneu'eni nenenewieri waɨkawa kenemɨmatiwawirie meta 'ateɨterima 'ixaheritsixi keniwa'enieka. Tsepa kepauka memɨmatsihahɨaweni keniwa'enieka.
1KI 8:53 'Ekɨ pepɨwaranayexei yunaime kwiepa memɨtama watsata, 'ahetsɨa miemete memɨhɨkɨtɨnikɨ. Mɨpaɨ pepɨtitaxatɨa matsiparewiwame Muitsexi teɨteri mɨpaɨ mɨtiwataxatɨanikɨ, kepauka 'ekɨ, Yawé Kakaɨyari, 'Ekipitu ta'ukiyarima pemɨwarayewitɨ».
1KI 8:54 Tsarumuni mawari taiyame Yawé hetsiemieme hɨxie pɨtitunumawekai teikɨ hemetɨ. Kepauka mɨtiutahayewaxɨ yunenewietɨ waɨkawamekɨ mɨpaɨ Yawé tiwawirietɨ, kananukukeni,
1KI 8:55 hikɨ 'a'utakeka, Kakaɨyari kaniutawawirieni 'ixaheritsixi memɨyuxeɨriekai 'aixɨa mɨwayurienikɨ, mɨpaɨ 'utaitɨ karima:
1KI 8:56 «'Aixɨa kerahɨawarɨwani Yawé, yemekɨ kemutayɨ pɨtatsi'uka'uxipitɨa yuteɨterima 'ixaheritsixi. Nixeime pɨkahayewa witsikemutayɨ heye'atɨwatɨ Muitsexi kemɨtiutahɨawixɨ mɨkɨta yamɨtatiutahɨawixɨ.
1KI 8:57 Yawé takakaɨyari tahamatɨa ke'uyeikani meripaitɨ ta'ukiyarima wahepaɨ, hatsuaku pɨkatatsiku'eirieni pɨkatatsinutuitani.
1KI 8:58 Yaketatiu'iyaritɨani hetsiena mieme xeikɨa yatemɨtekahunikɨ, temiweiyanikɨ huyeya, yatemɨtekahunikɨ 'aitsikayatsie meripaitɨ ta'ukiyarima mɨwayetuiritsie.
1KI 8:59 Tukarikɨ tɨkarikɨ Yawé yakere'eriwani naime kenemɨtitawawiri, nehetsie munuakakɨ 'iparewiwameya nemɨhɨkɨkɨ meta xeme teɨterimama 'ixaheritsixi, xexuime tukaritsie kemɨreuyeweka.
1KI 8:60 'Ana mɨpaɨ yunaitɨ teɨteri kwiepa memɨtama mepɨtemaika kename Yawé Kakaɨyari hɨkɨ, kename tawari xewitɨ 'umawe.
1KI 8:61 Hikɨri xekenayexeiyani yuxewime Yawé takakaɨyari xeyunaitɨ, yaxeketenekahuni naime 'aitsikateyatsie yaxeketeneu'uwani hikɨ kexemɨteyurie yaxeikɨa».
1KI 8:62 Hikɨ ti'aitame, yunaime 'ixaheritsixi wahamatɨa, mawarite kaniuwewieni Yawé hɨxie.
1KI 8:63 Tsarumuni kayuwatɨ memexeiyanikɨ mawariyari kaniuwewieni, xeitewiyari heimana huta miriyari tuurutsixi meta xeitsienituyari heimana xeitewiyari miriyari muxatsi kaniwarutimawa Yawé hetsiemieme. Mɨpaɨ ti'aitame meta yunaitɨ 'ixaheritsixi tuki Yawé hetsiemieme 'ixɨarariyari mekateniuwewieni.
1KI 8:64 Mɨkɨ tukaritsieta ti'aitame takwa hixɨapatsie mieme patsiekame kanayeitɨani, Yawé tukieya hɨxie mukuma, meta mana mawari taiyariyari kaniuwewieni meta hatsite mawariyari meta wiiya kayuwatɨ memexeiyanikɨ mawariyari hetsiemieme, mawari taiyame wurunitsekɨ mɨwewiya Yawé hɨxie muwekai 'etsipupekai, 'ikɨ mawarite pɨmɨirekai mana pɨkatinakekai.
1KI 8:65 Hikɨ mɨpaɨ, Yawé hɨxie, Tsarumuni meta yunaitɨ 'ixaheritsixi 'ixɨarari mekateniuwewieni 'atahuta tukari, meta tawarita 'atahuta tukari 'akuxi mekaniuyurieni: naitɨri tamamata heimana nauka tukari 'ixɨarari patɨa. Mɨkɨ 'ixɨararitsie naitsarie teɨteri mepayeixɨa, Rewu-Kamati mɨrakutewatsie meye'atɨkaitɨ 'atsita 'Ekipitu hatuxameyaritsie meye'atɨkaitɨ, yemekɨ meyumɨiretɨ mepuyukuxeɨri.
1KI 8:66 'Imatɨrieka, Tsarumuni kaniwarutateutɨani teɨteri, mɨkɨta Kakaɨyari mekaniutawawirieni ti'aitame 'aixɨa mɨyurienikɨ hikɨ mekanakunuaxɨani yukiekaritetsie, meyutemamawietɨ waɨkawa yemekɨ Yawé naime hepaɨtsita 'aixɨa mɨtiuyurikɨ tiyu'uximayatsiriwame Rawiri hetsiemieme meta yuteɨterima 'ixaheritsixi.
1KI 9:1 Kepauka Tsarumuni minɨ 'iwewienetɨ tuki Yawé hetsiemieme meta paratsiyu 'amupa, mɨpaɨ pɨreye'atɨa kemɨtiku'eriwakai meta kemɨtiyɨkɨhɨawekai,
1KI 9:2 Yawé hutarieka kaniuyuhekɨata hɨxiena kemɨtiuyuhekɨataxɨ Kawahuni mɨrakutewatsie,
1KI 9:3 mɨpaɨ katinitahɨawe Yawé: «'Anenewieri nepu'eni meta waɨkawamekɨ kepemɨnetiutawawiri. Patsiekame nepayeitɨani mɨkɨ tuki pemitawewi muwa nemayekanikɨ yuheyemekɨ. Nepixeiyani meta ne'iyarikɨ nepinaki'erieka yuheyemekɨ.
1KI 9:4 »'Ekɨta, xɨka 'ape'uyeikani nehɨxie 'aixɨa 'anemekɨ, 'a'iyari heitseriekaku, mɨtikamiekai hepaɨ 'apaapa Rawiri, xɨka yapetikayani naimetsie kenemɨmatita'aitɨani meta xɨka pe'eye'atɨani ne'aitsikate meta ne'inɨari niukiyari,
1KI 9:5 'ana ne yanepɨtiyurieni yuheyemekɨ 'a'uweni 'amuwenikɨ xemɨte'aitanikɨ 'Ixaheri kwieyaritisie, 'apaapa Rawiri kenemɨtiutahɨawixɨ, mɨpaɨ nerehɨawetɨ: “Hatsuaku pɨkaheuyeweka 'anuiwaritsie miemetɨtɨ mɨti'aitani 'Ixaheri kwieyaritsie”.
1KI 9:6 »Peru xɨka xeme yatɨni xeniwema mete'uhayewa mekaheye'atɨani ne'inɨari niukiyari meta ne'aitsikate nemɨxeyetuiri, xɨka menetsi'uku'eirieni hipame pɨta kakaɨyarixi memɨtewa'uximayatsiriekakɨ meta memɨwarayexeiyanikɨ,
1KI 9:7 ne 'ixaheritsixi nepɨwarakumaweriya kwie nemɨwayetuiritsie meta tuki nepɨtixani'erieni patsiekame nemayeitɨa nehetsiemieme. Hikɨ 'ana 'Ixaheri 'atsieriwame payani yunaime teɨteri wahetsiemieme.
1KI 9:8 Tsepa hikɨ 'ikɨ tuki mɨmariwe, paye'ani tukari kepauka yunaitɨ kemɨ'ane hɨxiena muyeyani pɨtimani, meta nanaimarikakɨ mɨpaɨ katinita'iwaumɨkɨ: “¿Titayari Yawé mɨya tiwaruyuri 'ikɨ teɨteri meta 'ikɨ tuki?”
1KI 9:9 Mɨpaɨ pɨtita'eiyarieni: “Yawé memuku'eirikɨ yukakaɨyari, 'Ekipitu mɨwarayewitɨ wa'ukiyarima meripaitɨ 'ixaheritsixi, hipame pɨta kakaɨyarixi mepɨwaranukuwei, mepɨwarayexeiyakai meta mepɨtewa'uximayatsiriekai. 'Ayumieme Yawé 'uximatɨarika pupitɨa waɨkawa wahetsie”».
1KI 9:10 Ti'aitame Tsarumuni xeitewiyari wiyari kaniuyurieni kii hutame wewienetɨ 'amɨpapa, tatsɨari, Yawé tukieya meta paratsiyu 'amupa,
1KI 9:11 'arikeke Tsarumuni Hirami Tiru kwieyaritsie ti'aitame katiniyetuirieni, xeitewiyari kiekarite Karereya kwieyaritsie miemete, Hirami miparewikɨ kariuxa kɨyeyarikɨ meta huku kɨyeyarikɨ metatsiere huru kepaɨmeme meuyehɨakai.
1KI 9:12 Peru kepauka Hirami mayetɨa Tiru kwieyaritsie, heixeiyamieka kiekarite Tsarumuni miyetuiriekai, mɨkɨ pɨka'inakixɨa.
1KI 9:13 Hirami mɨpaɨ kaniutayɨni: «Neuxei ne'iwa, 'ikɨ kiekarite pemɨnetsiyetuiri tixaɨtɨ pɨkatiyunaki'erie». 'Ayumieme mana Kawuri katiniuterɨwa, hikɨ 'akuxi yaxeikɨa katinakutewaka.
1KI 9:14 Matsi Hirami peinɨ'akai huru Tsarumuni hetsɨa haika miriyari heimana 'atanauka tsienituyari heimana haika tewiyari (3.960) kiruyari.
1KI 9:15 'Uximayatsika waɨkawa mahete hetsiemieme, ti'aitame Tsarumuni kaniwarukuxeɨrieni te'uximayatamete para tuki memɨtawewienikɨ Yawé hetsiemieme, meta paratsiyuya, meta kwiekɨ tehɨniyamete, meta Kerutsareme kuraruyari hetsiemiemete, meta kiekari Katsuxi 'aixɨa memɨyurieni, Mekiru meta Ketsehexi kiekariyari.
1KI 9:16 Parahuni ti'aitame 'Ekipitu kiekame, Ketsehexi kiekariyaritsie nuaka puwarutakwi pe'iwaxɨ, hikɨ pitataiyaxɨ meta puwarukwi kiekatari kananeutsixi. Hikɨ mɨkɨ kiekari, 'imikieri neɨkiyapa mieme kanayeitɨani, yuniwe kaniumini 'utiwikieku, Tsarumuni mitiwitɨ.
1KI 9:17 'Ayumieme Tsarumuni 'aixɨa kanitiyurieni kiekarite Ketsehexi mieme, Weti-Kuruni watipaitɨ mukuma,
1KI 9:18 Warati kiekariyari meta Tamuxi, makumawetsie mukumanekai mɨkɨ kwieyaritsie,
1KI 9:19 metatsiere naime hakewa memɨteheuta'utanikekai, meta kaxetate kuyaxa miemete hakewa meti'utani meta kawayutsiximama wahetsiemieme, meta tita mɨreuwewimɨkɨkai Kerutsareme pɨtiutiwewi, meta Riwanu mɨrakutewatsie meta naitsarie keyeumetsie mɨti'aitakai.
1KI 9:20 Nuiwarite teɨteri memɨka'ixaheritsixi (tatsɨari, 'amuxeutsixi, hetitsixi, peretseutsixi, heweutsixi meta kewutseutsixi, mɨkɨ teɨteri memuyuhayewaxɨ mɨkɨ kwieyaritsie 'ixaheritsixi memɨkawarukwi), Tsarumuni waɨriyarika wapitɨatɨ katiniwaruta'aitɨani 'uximayatsika mahetekɨ, hikɨ 'akuxi yaxeikɨa mekateniyurieka.
1KI 9:22 Peru Tsarumuni 'ixaheritsixi waɨriyarika te'uximayatamete pɨkawarayeitɨa, matsi kuyaximama mepɨhɨkɨtɨkai, hurawa 'iparewiwamete, kuyaxi tewa'aitɨwamete, kaxetate kuyaxa mieme nɨ'awamete meta hipatɨ kuyaxi kawayutsixi wahetsie memutei mepɨhɨritɨariekai.
1KI 9:23 Metatsiere Tsarumuni puwarexeiyakai 'auxɨwime tsienituyari heimana huta tewiyari heimana tamamata (550) mɨra'uximayatsietsie te'aitamete, te'uximayatamete mepɨwaxeiyakai.
1KI 9:24 Kwie mutihɨniyarie Kerutsareme putiwewiya 'arike kepauka ti'aitame Parahuni niweya 'uka mayetɨa Rawiri kiekariena, paratsiyu Tsarumuni mitawewirita meutayatsie pɨta.
1KI 9:25 Xeiwiyaritsie Tsarumuni haikakɨa mawari taiyariyari putiwewiwakai meta kayuwatɨ memexeiyanikɨ mawariyari mawari taiyametsie mitawewiekaitsie Yawé hetsiemieme, metatsiere 'ana 'ɨkwa putitaiyakai hɨxiena. Mɨpaɨ tiyurienetɨ pɨraye'atɨwakai kemɨreuyewekai tukita.
1KI 9:26 Ti'aitame Tsarumuni pitawewita xeime kanuwa 'amupa 'Etsihuni-Kewexi mɨtiukutewatsie, 'Erati 'aurie 'Erumi kwieyaritsie, Haramara Mɨxeta hatetsitayaritsie.
1KI 9:27 Ti'aitame Hirami hipame kaniwarenɨ'ani yuteɨterima, yemekɨ haramara hepaɨtsita temaikate mepɨhɨkɨtɨkai, memɨwaparewienikɨ Tsarumuni teɨterimama kanuwatsie,
1KI 9:28 hikɨ mɨkɨ haramaratsie menekɨne 'Upixi reyetewakaku meneye'axɨani, muwa menenetɨani huru tamamata heima nauka miriyari (14.000) kiruyari, ti'aitame Tsarumuni mekaniyetuirieni.
1KI 10:1 Merikɨtsɨ ti'aitame 'uka Tsawa kiekame Tsarumuni kaniutamarieni kemɨtikuxaxatsiwakai, mɨkɨkɨ Tsarumuni Yawé hepaɨtsita 'aixɨa kanainekaitɨni, hikɨ ti'aitame 'uka kaneyani para mita'inɨatakɨ mɨkwaniwetɨkakɨ miti'iwawiyakɨ.
1KI 10:2 Kaninuani Kerutsareme paitɨ yumɨireme yuteɨterima warawitɨtɨ. Kameyutsiximama witsimɨtiu'ɨatɨka mepɨte'ɨtɨkɨkai meta huru waɨkawame metatsiere tetexi witsimɨ'anene. Kepauka Tsarumuni hetsɨa mɨye'a, mɨkɨ naimekɨ katiniti'iwawiya kemɨtiku'eriwakai,
1KI 10:3 mɨkɨta katinitaxatɨani naime ketitakɨ mɨtiti'iwawiyaxɨ. Nitixaɨtɨkɨ pɨkatiu'iyɨri ti'aitame, tsepa kemɨtikwaniwetɨkatei.
1KI 10:4 Ti'aitame 'uka Tsawa kiekame kanihɨxiyakaitɨni 'ixeiyatɨ kemɨtimaiwekai Tsarumuni meta paratsiyuya mitawewi xeiyatɨ, mexayatsie mɨrapinirikekai, hetsɨana memɨte'uximaya 'iparewiwamete wa'ɨpari, kemɨti'uximayatsiyariekai meta paratsiyuta te'uximayatamete wakemarite, winu 'uitɨwamete, meta mawari taiyariyari Yawé tukita mitiwewiwakai xeiyatɨ.
1KI 10:6 Hikɨ mɨpaɨ ti'aitame katiniutahɨawe: «Tita nemɨretamari nekwieyaritsie paitɨ 'ahepaɨtsita meta kepemɨtimaiwe kaniyuritɨni.
1KI 10:7 Ne yuri nepɨkare'eriekai 'ikɨ 'atsita nepeyetɨa, hikɨri nehɨxikɨ nepunierixɨ. Matsi xɨari 'etsiwa xeikɨa nepɨremariekai. Kwinimieme pepɨtimaiwe kwinie pepɨtixiku, waɨkawa matsi pepɨrexeiya keyuri tita nemɨre'eni.
1KI 10:8 'Aixɨa meke'itɨarieka 'ateɨterima. 'Aixɨa meke'itɨarieka memɨmete'uximayatsirie 'ahamatɨa yamemɨte'u'uwa me'i'enietɨ kepemɨtimaiwe.
1KI 10:9 Meta 'aixɨa kerahɨawarɨwani Yawé 'akakaɨyari, muyutemawie 'ahetsiemieme meta ti'aitame mɨmetsi'ayeitɨa 'Ixaheri kwieyaritsie. Yuheyemekɨ 'Ixaheri naki'erietɨ, Yawé ti'aitame kamanayeitɨani pemɨtita'aitakɨ kehapaɨ 'aixɨa mɨ'ane meta kemɨtiheitserie».
1KI 10:10 Hikɨ ti'aitame 'uka, Tsarumuni katiniyetuirieni 'imikieri haika miriyari heimana 'atanauka tsienituyari heimana haika tewiyari (3.960) kiruyari huru, tetexi witsimɨ'anene, meta waɨkawa witsimɨtiu'ɨatɨka. Hatsuaku waɨkawa pɨka'atɨarie 'Ixaheritsie witsimu'ɨatɨka ti'aitame 'uka Tsawa kiekame Tsarumuni mumi hepaɨ paɨmetɨ.
1KI 10:11 Hirami kanuwateya 'amupapa katini'atɨani 'Upixi 'aneka, huru meta waɨkawa tsanitaru kɨyeyari meta tetexi witsimɨ'anene.
1KI 10:12 Mɨkɨ kɨyeyarikɨ, ti'aitame kanitiwewieni Yawé tukieyata mieme 'imɨmɨi 'amatayeyeu mana memutikɨkanikɨ, meta paratsiyuta mieme, metatsiere 'aripa kaniutiwewieni meta xawerite teyuitɨwamete wahetsiemieme. 'Anatɨtɨ, tawari hatsuaku pɨka'atɨariewe meta pɨkaxeiyariewe, waɨkawa tsanitaru kɨyeyari 'ana hepaɨ.
1KI 10:13 Mɨkɨta ti'aitame Tsarumuni, katinimini naime tita ti'aitame 'uka Tsawa kiekame mɨtiutihiwe'eri mɨtitawawiri, tsepa meripaitɨri mɨtimikairi yɨkɨmana. Hikɨ 'arike, kanakunuani ti'aitame 'uka yukwieyaritsiepai yunaime memiparewie wahamatɨa.
1KI 10:14 Tsarumuni xeiwiyari 'anuyeyeikakaku xeitewiyari heimana huta miriyari kiruyari huru pɨ'atɨiriyarɨwakai,
1KI 10:15 tetuayamete memɨteyukutuaya ka'inɨaritɨ, meta yunaitɨ 'arawetsixi te'aitamete metatsiere kuwexinaruritsixi 'Ixaheri kwieyaritsie memu'uitɨariekai.
1KI 10:16 Hikɨ ti'aitame Tsarumuni kaniutiwewieni huta tsienituyari yuheima nunuwame 'apapame hurukɨ wewiyatɨkaime tsunarietɨkaime, xexuitɨ 'etsiwatɨkaku 'atahuta kiruyari huru kaniuyɨni.
1KI 10:17 Metatsiere kanitiwewieni haika tsienituyari yuheima nunuwame yakɨ yeyeume, yaxeikɨa hurukɨ wewiyatɨkaime tsunarietɨkaime, xexuitɨ 'etsiwatɨkaku huta kiruyari huru kaniuyɨni. Mɨkɨ yuheima nunuwame ti'aitame yuparatsiyuta piti'utaxɨ «Riwanu Makukariuxaya» mɨtitewata.
1KI 10:18 Metatsiere ti'aitame xeime 'uweni 'apame kaniutawewieni 'erepanite 'awateyakɨ, herie huru 'aixɨa mɨ'ane pɨkawiriyariekai.
1KI 10:19 'Uweni yuhetɨa peixeiyakai 'imɨmɨi 'amatayewa 'ataxewimexɨa panukuhetei mana mutiyeikanikɨ, 'ɨpari warieya xikɨraɨyetɨ peumakai, hutakɨa pamamatɨkatei, xexuime mamateya 'aurie mayetsi meputi'utɨkatei yuxexuitɨ,
1KI 10:20 meta 'imɨmɨitsie 'ataxewimexɨa manukuhetsie mepa'utɨkatei mayetsi tamamata heimana huta meyupaɨmetɨ me'anuyutaxeiyatɨkaitɨ. Tawari xeime kwieyaritsie hepaɨna ti'anetɨ pɨkatitawewiyawekai.
1KI 10:21 Naitɨ Tsarumuni tekɨxiteya meta naitɨ xakɨrɨteya paratsiyutana mɨtiyepikai, «Riwanu Makukariuxaya» mɨtitewata, mɨkɨ naitɨ huru 'aixɨa mɨ'anekɨ pɨtiwewiyatɨkatei. Xewitɨ tɨma pɨratakɨ pɨkatiwewiyakai, 'ana Tsarumuni muyeikakaitsie pɨrata raye'akame pɨka'eriwakai.
1KI 10:22 Haika wiyari 'anuyeyeikakaku, ti'aitame Tsarumuni kanuwaya 'amupa meixeiyakai haramaratsie meta Hirami kanuwaya 'amupa matɨa, mɨkɨ Taritsi kananeikakaitɨni huru 'atɨtɨ, pɨrata meta maripixi tatsɨari 'erepanite 'awateya, hutseri meta 'aruxi witsimemɨ'anene.
1KI 10:23 Ti'aitame Tsarumuni waɨkawa matsi pɨtimaiwekai meta waɨkawa matsi pɨxikutɨkai keyuri hipatɨ te'aitamete kwiepa memɨtamakai.
1KI 10:24 Teɨteri naitsarie kiekatari mekani'iwatatɨwekaitɨni me'i'eniekutɨ kemɨtimaiwekai Kakaɨyari 'ipitɨaku,
1KI 10:25 xeiwiyari 'anuyeyeikakaku mekateni'atɨiriwakaitɨni 'imikieri: piinite hurukɨ mɨtiwewiyatɨka meta pɨratakɨ, kemarite, 'ixiparate meta witsimɨtiu'ɨatɨka, kawayutsixi meta muratsixi.
1KI 10:26 Kaxetate kuyaxa miemete Tsarumuni waɨkawa warexeiyatɨ patɨa meta kawayutsixi: xeimiriyari heimana nauka tsienituyari (1.400) paɨmeme kaxetate kuyaxa mieme pɨwarexeiyakai meta kawayutsixi tamamata heimana huta miriyari (12.000) mepɨyupaɨmekai, mɨkɨ pɨtiwamikwakai kuraruta waye'ɨnatɨ metatsiere Kerutsareme paitɨ yuparatsiyu 'aurie.
1KI 10:27 Kerutsareme kiekariyaritsie ti'aitame pɨrata waɨkawa pexeiyakai tetexi yamɨti'ane hepaɨ, meta kariuxa kɨyeyari waɨkawa pexeiyakai piní makuweri mieme hepaɨ.
1KI 10:28 Tsarumuni kawayutsiximama 'Ekipitu kwieyaritsie mepɨnanaiyakatetɨkai meta Kuha, mana paitɨ ti'aitame tetuayametemama mepɨwatinawekai.
1KI 10:29 'Ekipitu kwieyaritsie kaxeta kuyaxa mieme mepɨtinawekai 'ataxewime tsienituyari pɨrata tuminiyarikɨ, meta kawayutsixi mepɨwananekai xeitsienituyari heimana huta tewiyari heimana tamamata pɨrata tuminiyarikɨ, 'ariketa te'aitamete hetitsixi meta tsiriyutsixi mepɨwatuiriekai.
1KI 11:1 Merikɨte Tsarumuni yɨmɨireme 'ukari waruxeiyaka kaniwarutihiwe'erieni. Parahuni niweya 'utiwitɨkatɨtɨ, yuwaɨkawa hipame kaniwarutiwitɨnita, muhawitsixi, 'amunitsixi, 'erumitsixi, Tsiruniyu kiekatari meta hetitsixi teɨteriyari, mɨkɨ 'ukari yunaitɨ 'ateewa kiekatari mepɨhɨkɨtɨkai,
1KI 11:2 hipame nuiwarite waniwema mepɨhɨkɨtɨkai Yawé wahetsiemieme mɨpaɨ putayɨkai, mɨpaɨ tiwarahɨawetɨ 'ixaheritsixi: «Xepɨkawawitɨtɨweni meta mɨkɨ mepɨkaxewitɨtɨweni, ne yurikɨ mɨpaɨ nekanaineni xɨka xewarutiwitɨni mɨkɨ mepɨxeheuyexɨrieni xe'iyaritsie para xemɨwarayexeiyanikɨ hipame pɨta kakaɨyarixi». Mɨkɨ 'ukari Tsarumuni kaniwarutiwitɨni meta kaniwarutihiwe'erieni.
1KI 11:3 'Atahuta tsienituyari mepɨyupaɨmekai 'ɨitamama mɨkɨ te'aitamete waniwema mepɨhɨkɨtɨkai, haika tsienituyari mepɨtuxexerimamatɨkai, mɨkɨ 'ukari yunaitɨ 'axamekaniyurieni 'iyarieyatsie.
1KI 11:4 Mɨpaɨ katiniɨyɨni, kepauka Tsarumuni 'ukiratsi matɨa, 'ɨitamama 'iyarieya mekaneuyehɨani, hipame kakaɨyarixi pɨta warayexeiyatɨ kanayani, Yawé yukakaɨyari hetsɨa yapɨkatikatɨa yuheyemekɨ paapaya Rawiri kemɨtikatɨa.
1KI 11:5 Matsi pɨta, Tsarumuni 'Atsitaruti titewakame kanayexeiyakaitɨni tsiruniyutsixi wakakaɨyaritɨme meta Muruki titewakame 'axamɨ'ane 'amunitsixi wakakaɨyari.
1KI 11:6 Mɨyatɨtɨri Tsarumuni Yawé kemɨkatinake katiniuyurieni, heitseriemekɨ yapɨkatikamiekai hetsiena mieme, paapaya Rawiri kemɨtikatɨa.
1KI 11:7 Mɨkɨ tukaritsie pɨtiyurienekai Tsarumuni kepauka, Kerutsareme tau manatineika hepatsie xeime yemuritsie mitawewi tuki muhawitsixi wakakaɨyari 'axamɨ'ane Kemuxi hetsiemieme, xeimeta tsiere kaniutawewieni 'amunitsixi wakakaɨyari 'axamɨ'ane Muruki hetsiemieme.
1KI 11:8 Yaxeikɨata katiniuyurieni yu'ɨitama 'ateewa memɨkiekataritɨkai wahetsiemieme, mɨkɨ 'ɨkwa memɨwatairietɨwenikɨ meta memɨtewamawirietɨwenikɨ yukakaɨyarixi.
1KI 11:9 Hikɨ Yawé, 'Ixaheri Kakaɨyarieya, kaniuyeha'ani Tsarumuni hepaɨtsita 'iyarieya hetsiena mieme mɨkayukɨhɨawekaikɨri, tsepanetɨ hutakɨa Tsarumuni hɨxie muyuhekɨatakai,
1KI 11:10 'iku'imaiyatɨ hipame kakaɨyarixi mɨkawaranukuweweiyanikɨ. Tsarumuni mɨkɨ Yawé 'aitsikaya mɨkahaye'atɨakɨ,
1KI 11:11 Yawé mɨpaɨ katinitahɨawe: «Mɨya pemɨtikamiekɨ, netɨratu meta ne'aitsikate pemɨkahaye'atɨakɨ nemɨmatsiyetuiri, mɨpaɨ ketinemaika nepɨmatsinawairieni hakewa pemɨre'aita, xeime pɨta nepɨyetuirieni meti'uximayatsiriwame.
1KI 11:12 Peru, 'apaapa nemɨnaki'eriekɨ Rawiri, mɨpaɨ nepɨkatiyurieni pe'ayeyurikaku, matsi 'aniwe ti'aitakakuke nepinawairieni.
1KI 11:13 Meta mɨkɨ, tsiere 'a'ukiyari Rawiri nemɨnaki'eriekɨ meta Kerutsareme, naime nepɨka'inawairieni, matsi xeinuiwari nepihayewirieni, hikɨri 'ari nekanenayexeiya».
1KI 11:14 Hikɨ 'ayumieme, Yawé xeime kaniuyuitɨani Harari titewakame 'erumi tewiyari, 'Erumi kwieyaritisie te'aitamete waniwe, Tsarumuni 'aye'uniekame kanayeitɨani.
1KI 11:15 Hikɨ, meripaitɨ Rawiri 'erumitsixi muwakwinekaitsie, kuyaxi tiwa'aitɨwame Kuhawi, kaneyakaitɨni warekateukuke 'ixaheritsixi memekwi'iwakai meheyukwitɨwetɨ, hikɨ mexi mana me'u'uwakai mepɨwarukwi yunaime 'ukitsi 'Erumi kiekatari.
1KI 11:16 Kuhawi meta kuyaxi 'ixaheritsixi hamatɨana memu'uwakai mana mekaniyuhayewa 'ataxewi metseriyari, kepaukake memɨwarukwi yunaime 'ukitsi 'Erumi kiekatari.
1KI 11:17 Peru Harari, 'ana 'akuxi temaikɨ hɨkɨtɨtɨ, kaniutayuni 'Ekipitu paitɨ hipame paratsiyuta te'uximayatamete 'erumitsixi warawitɨtɨ paapaya memɨparewiekai.
1KI 11:18 Mɨkɨ Mariyani mekaniyekɨne hikɨ Parani paitɨ mekaniu'axɨani, mana hipatɨ teɨteri mekaniwarutinɨni mana kiekatari. Mana memɨyekɨ mekanekɨne 'Ekipitu paitɨ, hikɨ mana Parahuni hetsɨa mekaniyutaxata, mɨkɨ kwieyaritsie ti'aitame hetsɨa, mɨkɨ kii Harari kaniumini meta puyuhɨritɨa mɨtiwamikwanikɨ metatsiere kwie kaniwaruxatɨani.
1KI 11:19 Parahuni Harari 'aixɨa katiniuxeiya, hikɨ 'ɨyaya mayanikɨ kaniwitɨtɨani yukwe, yɨ'ɨya Tapenetsi 'iwaya.
1KI 11:20 Tapenetsi 'iwaya xeime nunutsi kanayexeiya, mɨkɨ Kenuwati katiniterɨwa, hikɨ Tapenetsi paratsiyuta katiniti'ɨkitɨani. Mɨyatɨtɨri Kenuwati Parahuni niwemama wahamatɨa kaniutawere.
1KI 11:21 Harari 'Ekipitu 'uyeikatɨ katiniutamarieni kename hemɨkairi Rawiri meta Kuhawi, kuyaxi mɨtiwa'aitɨwametɨkai. Hikɨ Harari Parahuni mɨpaɨ katiniutahɨawe: —Keneneupitɨa nemakunuanikɨ nekwieyaritsie.
1KI 11:22 Parahuni mɨpaɨ katinita'iwawiya: —¿Ketitayarikuta 'akwieyaritsie perakunuanikeyu? ¿'Ena kuta tixaɨtɨ mereuyehɨwa? Harari mɨpaɨta katinita'eiya: —Hawaikɨ, peru keneneupitɨa nemɨyemiekɨ.
1KI 11:23 Yaxeikɨa Kakaɨyari, Xetsuni 'Erihara nu'aya kaniupitɨani Tsarumuni maye'unie mayanikɨ. Xetsuni, puyuta'unakai Harari-'Etsexi Tsuwa kwieyaritsie ti'aitame ti'uximayatsirietɨ,
1KI 11:24 mɨkɨ kaniwarukuxeɨrieni 'axamete'u'iyarime, mɨkɨta wa'ukiyari kanayuyeitɨani. Kepauka Rawiri tsiriyutsixi mɨwara'iwaxɨ, mɨkɨ 'axamemɨte'u'iyari mekanekɨne Ramatsiku paitɨ, mana mɨkɨ mete'aitatɨ mekanakɨne.
1KI 11:25 Mɨpaɨ 'uyɨka Xetsuni ti'aitame kanayani Tsiriya kwieyaritsie. Kepauka Tsarumuni 'amuyeikakai, Xetsuni 'Ixaheri naye'uxiwe'eriekaitɨni mɨkɨ meye'unie kanayani, mɨpaɨ meteyurietɨ kwinimieme mekatenikwinitɨani Harari yunaitɨ.
1KI 11:26 Metatsiere Keruwuhani Nawati nu'aya, ti'aitame Tsarumuni 'aye'unietɨ kanayani ti'uximayatsirietɨtɨ. Mɨkɨ Keruwuhani 'Epɨrahini nuiwarieya hetsie pumiemetɨkai, Tserera kiekariyaritsie kiekame, maamaya pɨtitewakai Tseruha meta pɨwiuratɨkai.
1KI 11:27 Kepauka Keruwuhani Tsarumuni 'aye'unietɨ matɨa pɨtiuyɨ Tsarumuni Rawiri kiekariena ti'uximayakaku kwie heukawiwiwatɨ hakuweriritakaku, paapaya Rawiri kiekariena kuraruyatsie mɨranunanikɨ.
1KI 11:28 Keruwuhani yunaitɨ 'aixɨa metenixeiyakaitɨni, merikɨte kepauka Tsarumuni mixei 'aixɨa ti'uximayakame kanihɨritɨani raheteme memɨte'uximaya mɨwaxeiyanikɨ mɨpaɨ mekateni'uximayakaitɨni Kutse nuiwarimama.
1KI 11:29 Heiwa Keruwuhani Kerutsareme kiekariyaritsie 'ayeyaku, huyeta Kakaɨyari niukameya 'Ahiyaxi Tsiru kiekame kanenukunake, mɨkɨ mata hekwame newawiekaitɨni. Yuxaɨta yuhutatɨ yeuta meniyɨakaitɨni.
1KI 11:30 Hikɨ 'Ahiyaxi mata mewawiekai 'enutihurieka, kanititsanaxɨani tamamata heimana hutame kanayexɨrieni,
1KI 11:31 mɨpaɨ Keruwuhani katiniutahɨawe: «'Ekɨ kenanuhuri 'ahetsiemieme tamamata paɨmeme, mɨpaɨtsɨ Yawé 'Ixaheri Kakakaɨyarieya kanaineni: “Hikɨri Tsarumuni nekaninawairiemɨkɨ mɨra'aitatsie, 'ekɨ pɨta nekamenipitɨamɨkɨ tamamata nuiwariyari.
1KI 11:32 Mɨkɨ xeinuiwari xeikɨa nepihayewirieni, neti'uximayatsiriwame Rawiri nemɨnaki'eriekɨ meta Kerutsareme, mɨkɨ kiekari pɨhɨkɨ nemenayexei yunaime 'Ixaheri nuiwarimama watsata.
1KI 11:33 Mɨpaɨ nepɨtiyurieni mɨkɨ mɨnetsi'uku'eirikɨ, 'Atsitaruti mayexeiyakɨ tsiruniyutsixi wakakaɨyari meta Kemuxi muhawitsixi wakakaɨyari, metatsiere Muruki 'amunitsixi wakakaɨyari. Tsarumuni nehuyeta pɨka'umie, yapɨkatiyuriwe kemɨnetinake, pɨkaraye'atɨa ne'aitsikatsie ne'inɨari niukiyaritsie, yupaapa Rawiri hepaɨ pɨkatikatɨa.
1KI 11:34 »”Peru, naime nepɨka'inawairieni mɨra'aitatsie Tsarumuni, matsi nepihayewa mɨtita'aitakɨ 'ayeyuritɨ kemɨreutere, neti'uximayatsiriwame Rawiri nemɨnaki'eriekɨ, nemenayexei meta yamɨtikatɨakɨ ne'inɨari niukiyaritsie meta ne'aitsikatetsie.
1KI 11:35 Nu'aya pɨta nepɨnawairieni, 'ekɨta nepɨmatsiyetuirieni tamamata nuiwarite.
1KI 11:36 Peru nu'aya xeime hɨkɨame nepɨyetuirieni xeikɨa, Rawiri nuiwarimama memiyeweiyanikɨ mete'aitatɨ, kɨxeme hepaɨ memɨhekɨariwiekakɨ Kerutsaremetsie, kiekari nemenayexeitsie mana nemukanikɨ.
1KI 11:37 'Ekɨta, ti'aitame nepɨmatsihayeitɨani 'Ixaheri kwieyaritsie, kemɨmatinake mana pemɨtita'aitakɨ naitsarie.
1KI 11:38 Xɨka naimetsie yapetikamieni kenemati'aitɨa meta xɨka nehuyeta pe'umieni, yapetiyurienetɨ kemɨnetinake meta peraye'atɨwatɨ ne'aitsikatsie meta ne'inɨari niukiyaritsie, netsiparewiwame Rawiri mɨreye'atɨa hepaɨ, ne 'ana 'ahamatɨa nekaniuyeikamɨkɨ. Ne nepɨmatsipitɨani 'anuiwari yuheyemekɨ te'aitamete memɨhɨkɨtɨnikɨ Rawiri kenemɨtiupitɨa, 'Ixaheri kwieyari nepɨmatsiyetuirieni.
1KI 11:39 Ne nepɨwa'uximatɨani Rawiri nuiwarimama, peru yuheyemekɨ pɨkatixaɨ”».
1KI 11:40 Hikɨ Tsarumuni, mɨpaɨ 'ayumieme Keruwuhani pɨmiemɨkɨkai, peru mɨkɨ kaniyuta'una 'Ekipitu paitɨ hikɨ mana kaniyuhayewa, ti'aitame Tsitsaki 'iparewiekaku, mana puyuhayewaxɨ kepaukake Tsarumuni mumɨ.
1KI 11:41 Hipatɨta kemɨtiɨyɨ Tsarumuni ti'aitakaku, meta kemɨtimaiwekai metatsiere naime kemɨtiuyuri, mɨkɨ katinaka'utɨarieni kemɨtiuyɨ xapayaritsie Tsarumuni xapayatsie,
1KI 11:42 mɨkɨ huta tewiyari wiyari Kerutsareme 'ukaitɨ katiniuta'aita naitsarie 'Ixaheri kwieyaritsie.
1KI 11:43 Kepauka mumɨ, kaniukateukieni Rawiri kiekariena, mɨpaapayatɨkai, hikɨ nu'aya Xuwuhani kanitsutɨani ti'aitatɨ 'utɨmana.
1KI 12:1 Hikɨ Xuwuhani kaneyani Tsikeni paitɨ, mana yunaitɨ 'ixaheritsixi memeyuxeɨriekaikɨ ti'aitame memeyeitɨanikɨ.
1KI 12:2 Hikɨ mɨkɨ hepaɨtsita Keruwuhani Nawati nu'aya katiniutamarieni, meripaitɨ ti'aitame Tsarumuni 'ayemakatɨ 'Ekipitu meyakai meta mana 'akuxi pukatei.
1KI 12:3 Kepauka 'ixaheritsixi kɨmana memɨte'utanɨ'a mɨ'atɨarie, hikɨ mɨkɨ meta yunaitɨ memɨyuxeɨriekai 'ixaheritsixi mekanekɨne Xuwuhani hetsɨa mɨpaɨ mekateneitahɨawe:
1KI 12:4 —'Apaapa kwinimieme raheteme yuku pɨtatsi'utitɨtɨa teka'ikemakame. Hikɨri 'ekɨ ha'exanime ketaneutitɨtɨa te'ikemakame, keyuri 'apaapa mɨtatsi'utitɨtɨa, hikɨ 'ana tepɨmateta'uximayatsirieni.
1KI 12:5 Xuwuhani mɨpaɨ katiniwarutahɨawe: —Xekeneuhuni hikɨ, peru xekenayenexɨa haika tukari 'anukayayu. Hikɨ kepauka teɨteri memekɨ,
1KI 12:6 ti'aitame Xuwuhani kaniwaruta'iwawiya 'ukirawetsixi paapaya Tsarumuni mayeyurikaitsie memɨparewiekai. Mɨpaɨ katiniwaruta'iwawiya: —¿Kexehaitɨka xeme, kenetiwata'eiya 'ikɨ teɨteri?
1KI 12:7 Mɨkɨ mɨpaɨ mekaniutiyuani: —Xɨka 'ekɨ ti'aitame hikɨ 'ikɨ teɨteri tiwa'uximayatsiriwame pe'ayani, xɨka kemɨtiwanake pewaru'enieni, xɨka pewaruta'eiya pewanaki'erietɨ, mɨkɨ mepɨmateta'uximayatsirieni yuheyemekɨ.
1KI 12:8 Peru Xuwuhani 'ukirawetsixi wa'ɨxatsi pɨka'anu'eni kememɨte'itahɨawixɨ, matsi temari pɨtata kaniwaruta'iwawiya hamatɨana memutiwawerixɨ meta 'anari memiparewiekai.
1KI 12:9 Mɨpaɨ katiniwaruta'iwawiya: —¿Kexehaitɨka xeme, kenetiwata'eiya 'ikɨ teɨteri mɨpaɨ memɨnetekɨhɨawe: “Ha'exanime kenayeitɨa 'apaapa kwinimieme raheteme yuku mɨtatsi'utitɨtɨa teka'ikemakame”?
1KI 12:10 Mɨkɨ temari, hamatɨana memutiwawerixɨ, mɨpaɨ mekatenita'eiya: —'Ikɨ teɨteri 'ipaɨ memɨmetehahɨawe ti'aitame: “'Apaapa kwinimieme raheteme yuku pɨtatsi'utitɨtɨa, 'ekɨri ha'exanime kenayeitɨa”. Neuxei, 'ipaɨ ketiniwaruta'eiya: “Xɨka nepaapa waɨkawa tixe'uta'uximayatsitɨani, ne matsi tawari waɨkawa nepɨtixeta'uximayatsitɨani.
1KI 12:11 Xɨka mɨkɨ yuku haheteme xe'utitɨtɨani, neta matsi waɨkawa nepɨxeti'ikatɨani. Xɨka mɨkɨ xetiwayakaitɨni kɨyekɨ, ne kawayutsixi wawayamekɨ tepɨa manuyatsatɨkakɨ nepɨxetiwani”.
1KI 12:12 Merikɨte hairieka tukari 'aye'aku, kemutayɨkai ti'aitame Xuwuhani, hɨxiena Keruwuhani kaninuani yunaime teɨteri wahamatɨa.
1KI 12:13 Peru ti'aitame kaniwaruta'eiya tiyukananaimakamekɨ: 'ukirawetsixi 'ɨxatsi memipitɨakai pɨka'anu'eni,
1KI 12:14 matsi temari wa'ɨxatsi pɨta kaniu'enieni. Mɨpaɨ katiniwarutahɨawe: «Xɨka nepaapa yuku haheteme xe'utitɨtɨani, neta matsi waɨkawa nepɨxeti'ikatɨani. Xɨka mɨkɨ xetiwayakaitɨni kɨyekɨ, ne kawayutsixi wawayamekɨ tepɨa manuyatsatɨkakɨ nepɨxetiwani».
1KI 12:15 Hikɨ ti'aitame teɨteri pɨkawaru'eni. Mɨpaɨ pɨtiɨyɨ Yawé yahainekaku, maye'atɨarienikɨ 'ari Keruwuhani Nawati nu'aya kemɨtiutahɨawekai, Kakaɨyari niukameya 'Ahiyaxi Tsiru kiekame Keruwuhani yapɨtiutahɨawekairi.
1KI 12:16 Kepauka memɨtehetima kename ti'aitame 'ari kawaru'eni, yunaitɨ 'ixaheritsixi mɨpaɨ mekateniuhiwakaitɨni meyuxewitɨ: «'Ixaheritsixi teɨteriyari, yunaitɨ yukie xekeneutayeixɨa. 'Ekɨta, Rawiri, 'ahetsɨa miemete xeikɨa keniwarayexeiyani. Tameri Rawiri hetsɨa tixaɨtɨ tepɨkatehayexeiya. Tixaɨtɨkuta pɨkatatiyetuirieni 'Itsahi nu'aya». Hikɨ mekaneutayeixɨani, yuxexuitɨ yukie.
1KI 12:17 Peru mɨyatɨtɨ, Xuwuhani piyeweiyakai ti'aitatɨ 'ixaheritsixi wahetsie Kura kiekariteyaritsie memutetɨkatei.
1KI 12:18 Hikɨ 'arikeke, ti'aitame Xuwuhani 'Arunirani kanenɨ'ani waɨriyarika memɨte'uximaya mɨhɨritɨariekai mɨnierimiekɨ, peru yunaitɨ 'ixaheritsixi tetexikɨ mekaneitituaxixɨani mekanimieni. Hikɨ mexɨiwa ti'aitame 'anutiyerɨka yukaxetatsie kaniyuta'una Kerutsareme paitɨ.
1KI 12:19 Hikɨ mɨpaɨ tiɨyɨku 'anatɨtɨ 'ixaheritsixi Rawiri nuiwarimama mepɨwaruku'eiri, hikɨ yaxeikɨa mepɨ'ane.
1KI 12:20 'Ixaheritsixi kepauka memɨte'utamari kename Keruwuhani hakunuakai, mɨkɨ mekanitakwewieni yunaitɨ 'ixaheritsixi, hikɨ mekanenukakeni ti'aitame mayanikɨ naime 'Ixaheri kwieyaritsie miemekɨ. Nixewitɨ Rawiri niwemama wanaki'erietɨ pɨkahatɨa, Kura nuiwarimama xeikɨa.
1KI 12:21 Xuwuhani Tsarumuni nu'aya Kerutsareme nuaka kaniwarukuxeɨrieni yunaime Kura nuiwarimama meta Wenikamini nuiwarimama, xeitsienituyari heimana nauka tewiyari miriyari (180.000) kuyaxi mekanakɨne yunaitɨ, mɨwatakwinikɨ 'ixaheritsixi hikɨ mɨpaɨ tiyurieme yunaime wahetsie mɨtita'aitakɨ.
1KI 12:22 Peru Kakaɨyari niukieya kaninuani Tsemahiyaxi hetsɨa, mɨkɨ tewi Kakaɨyari payexeiyakai, mɨpaɨ 'aneme niuki kaniupitɨarieni:
1KI 12:23 «Mɨpaɨ ketineutahɨawi Xuwuhani Tsarumuni nu'aya mɨti'aitame Kura kwieyaritsie, yunaime Kura tɨɨriyamama meta Wenikamini nuiwarimama metatsiere yunaime teɨteri,
1KI 12:24 mɨpaɨ kanaineni Yawé: “Hawaikɨ xepɨkawakwitɨweni yu'iwama 'ixaheritsixi. Yuxexuitɨ yukie xekeneutayeixɨa, karikɨ ne yanehainekaku mɨya pɨtiɨyɨ”». Hikɨ mɨkɨ mekanenu'enieni Yawé niukieya, mekaniukunuaxɨani, Yawé kemutayɨkai.
1KI 12:25 Keruwuhani Tsikeni kiekariyari 'aixɨa kaniuyurieni 'Epɨrahini hɨriyaritsie mukumakai, hikɨ mana kaniuyuhayewa. 'Arike Tsikeni 'uku'eirieka, Peniheri kiekariyari 'aixɨa kaniuyurieni.
1KI 12:26 Hikɨ mɨpaɨta pɨtiyuti'iyaritɨa: «Nɨkahɨrixɨata Rawiri niwemama mete'aitatɨ mehakɨne naimetsie.
1KI 12:27 Xɨka teɨteri Kerutsareme meheta'axeni memɨtehetimawakɨ Yawé tukita, mɨpaɨ meyɨatɨ mepanuaxɨani ti'aitame Xuwuhani hetsɨa Kura kwieyaritsie mɨti'aita. Hikɨ 'ana mepɨnetsimieni, 'imatɨrieka mɨkɨ pɨta mepɨtinɨni».
1KI 12:28 Hikɨ 'uti'iwauka kemɨtiyurieni, ti'aitame yuhutame tsikerutsixi kaniwarutiwewieni hurukɨ, hikɨ mɨpaɨ katiniwarutahɨawe teɨteri: «'Ixaheritsixi, pɨkaheuyewetse xemeta'axeni 'akuxi Kerutsareme. 'Ena mekaniti'uka xekakaɨyarixima, 'Ekipitu memɨxe'ayewitɨ».
1KI 12:29 Hikɨ yuxeime tsikeru Weteri kiekariyaritsie kaniutakeni, xeimeta Rani kiekariyaritsie.
1KI 12:30 Merikɨte mɨkɨkɨ kwinimieme 'axamekateniuyurieni 'ixaheritsixi, hipatɨ 'atsita Rani kiekariyaritsie paitɨ mekaneta'axekaitɨni memɨte'itimawirienikɨ tsikeru mana mɨyewekai.
1KI 12:31 Keruwuhani kanitiwewienita kakaɨyarixi watuki hɨritetsie, meta kaniwarutihɨawe mawari wewiwamete muwa memɨte'uximayakakɨ hipame teɨteri, tsepa Rewi xiɨyarieya mɨkahɨkɨ kaniwaranuka'uitɨani.
1KI 12:32 'Aitsika kaniunetɨani 'ixɨarari hepaɨtsita mieme 'atahaika metseriyaritsie tamamata heimana 'auxɨwi tukariyaritsie memetinenetɨwanikɨ, 'ixɨarari Kura kwieyaritsie matineikakai hepaɨ 'aneme. Weteri kiekariyaritsie mawari taiyametsie tsikerutsixi katiniwarutimawirieni mɨwarutiwewi, meta mawari wewiwamete kaniwarutihɨawe kakaɨyarixi watuki mana mutiwewiekaita memɨte'uximayakakɨ.
1KI 12:33 Merikɨte 'aye'aku, tamamata heimana 'auxɨwi tukaritsie 'atahaika metseritsie, Keruwuhani mɨratimawatɨre kaneyani mitawewitsie Weteri kiekariyaritsie, mana 'ɨkwa taiyariyari kaniuwewiweni. Mɨkɨ tukaritsie mepuhɨritɨarie meme'eriwanikɨ yuheyemekɨ 'ixɨarari tukariyari mɨhɨkɨtɨnikɨ 'ixaheritsixi wahetsiemieme.
1KI 13:1 Merikɨtsɨ xewitɨ tewi Kakaɨyari hetsɨa mieme Kura kwieyaritsie yeyaka peta'a Weteri paitɨ Yawé mɨpaɨ mɨrehɨawekaikɨ. Kepauka mana mawari taiyame Keruwuhani 'ɨkwa taiyakaku,
1KI 13:2 tewi Kakaɨyari hetsɨa mieme, Yawé yarehɨawekaku, mɨpaɨ katiniuhiwa karima: «Mawari taiyame, mɨratimawatɨre 'aku. Yawé mɨpaɨ kanaineni: “Rawiri nuiwarieyatsie kanitinuiwamɨkɨ xewitɨ Kutsiyaxi titewatɨ, mɨkɨ 'ahetsie kaniwatimawamɨkɨ 'ikɨ mawari wewiwamete kakaɨyarixi watukita memɨte'uximaya 'ena 'ɨkwa memutitaiya. 'Ahetsie teɨteri wa'umete pɨtitaiyarieni”».
1KI 13:3 Mɨkɨ tukaritsie kwitɨwa mɨkɨ tewi Kakaɨyari hetsɨa mieme 'inɨari kaniutaxata: «'Ikɨ 'inɨari kanihɨkɨtɨni Yawé mɨxeyetuirie: Mawari taiyame kanika'unimɨkɨ, meta naxiyari kanita'enixɨamɨkɨ».
1KI 13:4 Ti'aitame Keruwuhani 'u'enaka kemɨtikuxatakai mɨratimawatɨre Weteri muwekai hepaɨtsita tewi Kakaɨyari hetsɨa mieme, mawari taiyametsie 'akawetɨ yumama heutatseraka, mɨpaɨ kaniutayɨni: «Xekeneuwiya». Peru mamaya kɨmana tewi mu'itɨiyakai kaniu'auni, kayuawetɨ kanayani.
1KI 13:5 'Anari kwitɨwa mɨratimawatɨre kaniuka'une, naxiyari kaneuta'enixɨani, 'inɨari kemainekai paye'atɨarie, tewi Kakaɨyari hetsɨa mieme kemutayɨkai, Yawé yarehɨawekaku.
1KI 13:6 Hikɨ ti'aitame tewi Kakaɨyari hetsɨa mieme mɨpaɨ katiniutahɨawe: —Yawé 'akakaɨyari keneutahɨawi. Nehetsiemieme keneutawawiri, 'aixɨa mɨyɨnikɨ nemama. Hikɨ tewi Kakaɨyari hetsɨa mieme Yawé kaniutawawirieni, hikɨ ti'aitame mamaya 'axɨa kaniuyɨni, meripaitɨ kemɨ'anekai.
1KI 13:7 Kwitɨwata ti'aitame mɨpaɨ tewi Kakaɨyari hetsɨa mieme katiniutahɨawe: —Hikɨmɨ nekie tepuhu, pepɨrekwani meta tixaɨtɨ nepɨmereyetuirieni 'imikieri.
1KI 13:8 Peru tewi Kakaɨyari hetsɨa mieme, mɨpaɨ ti'aitame katiniuta'eiya: —Tsepa 'apiinite hixɨata ti'akame pemɨnetiyetuiri, nepɨkaheuyeiwe 'akie. Ne 'ena paa nepɨkatakwani meta nepɨka'anuhareni,
1KI 13:9 Yawé mɨpaɨ mɨneretahɨawixɨkɨ: “Paa pepɨkahekwaka meta pepɨkahehareka, metatsiere kemɨ'ane huye'utɨa pemetɨa mɨkɨ 'utɨa pepɨka'akununuwani”.
1KI 13:10 Hikɨ xeime pɨta huye'utɨa kaneyani, kemɨ'ane 'utɨa 'umietɨ mɨkanua Weteri.
1KI 13:11 'Anatsie xewitɨ mana Weteri pukatei Kakaɨyari niukameyatɨtɨ 'ukiratsitɨtɨri. Niwemama mekatenitaxatɨani naime mɨkɨ tewi Kakaɨyari hetsɨa mieme kemɨtiuyuriekai mɨkɨ tukaritsie, meta ti'aitame kemɨtiutahɨawekai.
1KI 13:12 Wapaapa mɨpaɨ katiniwaruta'iwawiya: —¿Kereumiekai? Niwemama mekatenitaxatɨani tewi kemɨreumiekai Kura yeyaka mana munuakai,
1KI 13:13 hikɨ wapaapa mɨpaɨ katiniwaruta'aitɨani: —Puxu xekenenetixiratɨiri, nemanuyerɨnikɨ. Kepauka puxu manutixiratɨarie, Kakaɨyari niukameya 'ukiratsi kananutiyerɨni,
1KI 13:14 hikɨ kaneyani tewi Kakaɨyari hetsɨa mieme 'utɨa. Kaneitaxeiya xiu hetɨa hetikaime, hikɨ mɨpaɨ katinita'iwawiya: —¿'Ekɨ petihɨkɨ tewi Kakaɨyari hetsɨa mieme, Kura kwieyaritsie pemeyetɨa? Mɨkɨ mɨpaɨ kaniutayɨni: —Huu, ne nepɨhɨkɨ.
1KI 13:15 Hikɨ Kakaɨyari niukameya 'ukiratsi mɨpaɨ katinitahɨawe: —Hikɨmɨ nekie tepɨtehekwani.
1KI 13:16 Tewi Kakaɨyari hetsɨa mieme mɨpaɨ katinitahɨawe: —Hawaikɨ nepɨkayɨwe nemakunuani 'a'utɨma, meta nepɨkayɨwe paa nemetakwani meta haa nemanuhareni 'ena 'ahamatɨa,
1KI 13:17 Yawé mɨpaɨ pɨnerahɨawekai: “Paa pepɨkahekwaka meta mana pepɨkahehareka, meta kemɨ'ane huyeta pemɨyemie mɨkɨ 'utɨa pepɨkahakununuwani”.
1KI 13:18 'Ukiratsi tawari mɨpaɨ katinitahɨawe: —Netatsiere Kakaɨyari niukameya nekanihɨkɨtɨni 'ahepaɨ. Neuxei xewitɨ niuki tuayame Yawé heiyenɨ'aku, mɨpaɨ pɨneretahɨawixɨ: “'Akie kenanuwitɨki mɨrekwanikɨ meta manuharenikɨ”. Mɨpaɨ pɨti'itai,
1KI 13:19 tewi Kakaɨyari hetsɨa mieme kaniukunuani hamatɨana kaneyani, kiena katiniukwani meta kananuhareni.
1KI 13:20 Mana 'akuxi me'utitekaku mexatsie, Yawé niukieya kaninuani Kakaɨyari niukameya 'ukiratsi hetsie mikunuitɨatsie.
1KI 13:21 Hikɨ Kakaɨyari niukameya tewi Kakaɨyari hetsɨa mieme katiniutaxatɨani Kura kwieyaritsie meyeyakai: —Yawé mɨpaɨ kanaineni: “Yawé niukieya pepɨka'anu'eni, pepɨkaraye'atɨa Yawé 'akakaɨyari kemɨmatiutahɨawixɨ.
1KI 13:22 Pekaniukunuani pemɨtikwanikɨ pemanutiharenikɨ hakewa mɨkɨ matsihemaiwe'erikatsitɨa. 'Ayumieme, pɨkakateukieni 'akaxari, 'a'ukiyarima memuyehetsie”.
1KI 13:23 Kepauka tewi Kakaɨyari hetsɨa mieme mɨtiutahayewaxɨ tikwatɨ 'anuhareka, 'ukiratsi Kakaɨyari niukameya puxu kanitixiratɨirieni,
1KI 13:24 hikɨ kaneyani tewi Kakaɨyari hetsɨa mieme huyeta. Perutsɨ maye kanenukunake kanimieni huyeta kanihɨani. Matsi puxuya meta maye 'auriena mekaniyuhayewa kaxarieya 'aurie.
1KI 13:25 Mana kaxarieya me'uxeiyaka meta maye 'ihɨkame, mana memuyekɨkakai kiekaritsie mekateniutaxata 'ukiratsi Kakaɨyari niukameya manukatei.
1KI 13:26 Kepauka Kakaɨyari niukameya mɨtiutamari mikunuitɨa huyeta, mɨpaɨ kaniutayɨni: «Mɨkɨ tewi Kakaɨyari hetsɨa mieme Yawé niukieya mɨka'anu'eni kanihɨkɨtɨni, 'ayumieme Yawé kaniyetuani maye mitaxutsinikɨ meta mimienikɨ, mɨpaɨ katinaye'ani Yawé kemɨtitahɨawixɨ».
1KI 13:27 Hikɨ Kakaɨyari niukameya mɨpaɨ katiniwarutahɨawe yuniwema: «Nepuxu xekenetixiratɨa». Kepauka memikuha'aritɨa,
1KI 13:28 Kakaɨyari niukameya kaneyani, hikɨ kaneitaxeiya kaxari huyeta hekaikame, puxuya 'auriena meta maye 'auriena. Maye pɨka'itakwaiwekai kaxari meta puxu 'atsipɨka'uyuri.
1KI 13:29 Hikɨ 'ukiratsi Kakaɨyari niukameya, tewi Kakaɨyari hetsɨa mieme kaxarieya kananukukweni, puxutsie heitihɨaka kanei'ikata tawari kiekaritsie paitɨ, manapaitɨ hiwerika memɨwewienikɨ hetsiena mieme meta memikateukukɨ.
1KI 13:30 Hikɨ 'arike kanika'awieta yuteukiyapa, meta hiwerika mepuwewi hetsiena mieme, mɨpaɨ mete'uhiwatɨ: «Xɨa'ui, ta'iwatɨkai».
1KI 13:31 'Arikeke me'ikateukuka, Kakaɨyari niukameya yuniwema mɨpaɨ katiniwarutahɨawe: «Neta kepauka nemukumawere, hakewa temeikate tewi Kakaɨyari hetsɨa mieme muwatsiere xepɨnetsiheukateni, ne'umeyari muwatsiere xepeukatuani hamatɨana.
1KI 13:32 Karikɨ yurikɨ kanaye'atɨariemɨkɨ niukieya, Yawé niukieya 'enietɨ kemutayɨ, mɨratimawatɨre Weteri mieme hepaɨtsita meta yaxeikɨa naitsarie kakaɨyarixi watukite muwetɨka hɨritsie Tsamariya kiekariteyaritsie wahetsiemieme».
1KI 13:33 Mɨyatiuyɨkutɨtɨ, Keruwuhani pɨkatiuhayewaxɨ 'axatiyurienetɨ, matsi pɨta tawari mawari wewiwamete kaniwaranuka'uitɨani tsepa kemɨ'ane tewi kakaɨyarixi memɨte'atimawiyarɨwa miemete memakɨnekɨ. Kemɨ'ane mawari wewiwame meuyeimɨkɨkai mɨkɨ tukiteta, mɨkɨ pɨwaranuka'uitɨwakai.
1KI 13:34 Mɨkɨ Keruwuhani mɨyatiyurienekaku yunaitɨ tɨɨriyamama 'axameteyurietɨ mepakɨ, meta mɨkɨ tiuyurieku yunaitɨ mekaniukwini, nixewitɨ pɨka'uyuhayewaxɨ 'ena kwiepa.
1KI 14:1 Merikɨtsɨ 'ana mɨtiyehanetsie 'Awiyaxi katiniutakwine Keruwuhani nu'aya,
1KI 14:2 hikɨ yɨ'ɨya mɨpaɨ katiniutahɨawe: «Yɨkɨ ketineuyuketɨaka nixewitɨ mɨkametsihetimanikɨ kename ne'ɨya peyɨane. Hikɨ kenemie Tsiru, hakewa 'Ahiyaxi meka, mɨkɨ Kakaɨyari niukameya kaneniutahekɨatɨani ti'aitame kename nehayanikekai 'ikɨ teɨteri wahetsie.
1KI 14:3 Tamamata paa kena'ɨtɨ meta yapaɨmeme tsuira metatsiere xeikɨxauriyari xiete. Kepauka pemeta'ani mɨkɨ yakamatinetahɨawimɨkɨ kemɨyɨni taniwe».
1KI 14:4 Hikɨ Keruwuhani 'ɨyaya kaneyani Tsiru paitɨ, 'Ahiyaxi kie kaniye'ani. 'Ahiyaxi waɨkawa wiyari mexeiyakaikɨri pɨkaheunierekairi.
1KI 14:5 Peru Yawé mɨpaɨ 'Ahiyaxi pɨtiutahɨawekairi: «Keruwuhani 'ɨyaya xewitɨ pɨta 'ayuyeitɨwatɨ, punuani matsita'iwawiyake yuniwe hepaɨtsita, hikɨ mɨrekuye. Hikɨ kenemɨmerahɨawe mɨpaɨ pekatinitaxatɨamɨkɨ».
1KI 14:6 Hikɨ kepauka 'Ahiyaxi hurawa 'amiekaku mi'eni, kitenie kaneuyeniere mɨpaɨ kaniutayɨni: «Keruwuhani 'ɨyaya, ¿ketitayari xewitɨ pera'ayeitɨwa? Keniwataye'a ne 'ahetsiemieme niuki nepexeiya mɨkamatsinakire.
1KI 14:7 Kenakunua Keruwuhani hetsɨa, mɨpaɨ ketinetaxatɨa kename Yawé 'ixaheritsixi takakaɨyari mɨpaɨ haine: “Ne nekamenanayexeiya neteɨterima 'ixaheritsixi watsata, meta tiwa'aitɨwame nekamanayeitɨani.
1KI 14:8 Nekaniwarunawairieni Rawiri tɨɨriyamama hakewa memɨtehe'aitakai 'ekɨ pɨta nekamaniyetuirieni. Peru 'ekɨ Rawiri netsiparewiwame hepaɨ pepɨka'ane, mɨkɨ yapɨtikatɨa ne'aitsikatsie, naimekɨ yuwaɨriyatɨ yu'iyarikɨ, yapɨtiyurienekai kemɨnetinake.
1KI 14:9 Matsi 'ekɨ kwinimieme 'axapepɨtiuyuri, keyuri meripai memu'uwakai, 'ekɨ hipame pepɨwarutiwewi kakaɨyarixi tepɨakɨ, mɨkɨ pɨnetsihaxɨatɨa, pepɨnetsi'uku'eiri.
1KI 14:10 »”'Ayumieme nepenunɨ'ani 'uximatɨarika Keruwuhani tɨɨriyamama wahetsie. Nuiwarimama 'ukitsi 'Ixaheri kwieyaritsie yunaime nekaniwarakuxɨtɨamɨkɨ, nixeime nepɨkahayewa. Yunaime Keruwuhani nuiwarimama xatsi hepaɨ nekaneku'itimɨkɨ kepaukake tixaɨtɨ mɨkatiyuhayewa.
1KI 14:11 Kemɨ'ane kiekaritsie memɨkwini tsɨikɨri mepɨwatikwani, kemɨ'aneta yeuta hɨritsie memɨkwini wirɨkɨxi mepɨwatikwani. Yawé mɨpaɨ kaniutayɨni”.
1KI 14:12 »'Ekɨta, kenakunua 'akie, kepauka kiekaritsie pemeutahani, kanemɨmɨkɨ nunutsi.
1KI 14:13 Hikɨ yunaitɨ 'ixaheritsixi hiwerika mepɨwewieni hetsiena mieme meta mepikateuku. Keruwuhani niwemamatsie mɨkɨ xeikɨa pɨkateukieni, mɨkɨ xeikɨa Yawé, 'ixaheritsixi takakaɨyari, hetsiemieme 'aixɨa mɨtikamiekaikɨ.
1KI 14:14 »Yawé xeime ti'aitame panukakeni 'Ixaheri kwieyaritsie, Keruwuhani nuiwarimama mɨwareuyehɨani. Hikɨri mɨtiyehane.
1KI 14:15 Yawé kaniwatihurɨkamɨkɨ 'ixaheritsixi, haa tɨrɨkaɨyetɨ tupiriya mɨtitihurɨka hepaɨ. 'Ikɨ kwie 'aixɨa mɨ'anetsie pɨwataweiya meripaitɨ wa'ukiyarima memɨyetuiriyarietsie, 'Eupɨrate hatuxameyari 'anutauyepai puwatixɨrieni, 'Atserá kakaɨyarixiyari memɨyutiwewirikɨ, mɨpaɨ 'ayumieme Yawé mekaniuyehaxɨatɨani.
1KI 14:16 Yawé 'ixaheritsixi kaniwaku'eirimɨkɨ Keruwuhani ke'axamɨtiuyurikɨ meta 'ixaheritsixi 'axameteyuriekame muwarayeitɨakɨ».
1KI 14:17 Hikɨ Keruwuhani 'ɨyaya kaneyani yu'ɨtɨma kanakunuani Tiritsa paitɨ. Kepauka yukitenie meutahatsie, nunutsi kaniumɨni.
1KI 14:18 Hikɨ mekanikateuku, meta yunaitɨ 'ixaheritsixi hiwerika mekaniuwewieni hetsiena mieme, kanaye'atɨarieni Yawé niukieya niukameya 'Ahiyaxi kemɨtitahekɨataxɨ.
1KI 14:19 Hipatɨta kemɨtiuyɨ Keruwuhani ti'aitakaku, kemɨrayu'iwaxɨ yumienetɨ meta kemɨtiuta'aitaxɨ, mɨkɨ naitɨ katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
1KI 14:20 Keruwuhani katini'aitametɨkaitɨni huta tewiyari heimana huta wiyari. Kepauka mumɨ, nu'aya Narawi 'utɨmana ti'aitame kanayani.
1KI 14:21 Tsarumuni nu'aya Xuwuhani ti'aitame kanayani Kura kwieyaritsie. Huta tewiyari heimana xewi wiyari pɨhɨkai kepauka manukake, tamamata heimana 'atahuta wiyari katiniuta'aita Kerutsareme kiekariyaritsie, 'Ixaheri nuiwarimama watsata, mɨkɨ kiekari panayexeiyakai Yawé mana mɨkiekakɨ. Xuwuhani maamaya 'amuni tewiyari pɨhɨkɨtɨkai, Nuhama pɨtitewakai.
1KI 14:22 Kura kwieyaritsie kiekatari 'axamekateniuyurieni Yawé hɨxie, hikɨ 'axamemɨte'uyurikɨ Yawé mekaniuyehaxɨatɨani matsi waɨkawa wa'ukiyarima kememɨkate'uyuri.
1KI 14:23 Naitsarie hɨritetsie meta kɨyexi 'amɨpapa mɨ'e'etɨ hetɨa kakaɨyarixi memɨte'atimawiyarɨwa mekaniutiwewieni, tetexi 'amekaniti'uitɨani, meta kakaɨyari 'uka 'Atserá 'ɨkiyari.
1KI 14:24 Meta mɨkɨ kwieyaritsie mepuxuawekai kakaɨyarixi mewarayexeiyatɨ yuhamatɨa memukahipitekai tuminikɨ. 'Ixaheritsixi naime yamepɨteyuriekai hipatɨ nuiwarite ke'axamemɨte'uhukai Yawé muwarayeweiyakai 'ixaheritsixi wakwieyaritsie.
1KI 14:25 Ti'aitame Tsitsaki 'ekipitutanaka, Kerutsareme kaniutamieni kaneutahani 'auxɨwirieka wiyari ti'aitakaku Xuwuhani,
1KI 14:26 hikɨ katiniwayetɨni piinite mɨraye'atɨka Yawé tukieyata timieme meta paratsiyu 'amɨpata timieme. Naime katinetɨni, metatsiere yuheima nunuwame hurukɨ mɨwewiyatɨkatei Tsarumuni miti'aitakai.
1KI 14:27 Hikɨ mɨkɨ hetsiemieme Xuwuhani kaniti'aita hepaɨna 'aneneme peru wurunitse tepɨayarikɨ wewiyatɨkaime, hikɨ kaniwaruhɨritɨani kuyaxi wa'ukiyarima paratsiyu 'amɨpa kitenieyaritsie memɨtehɨkai.
1KI 14:28 Kepauka ti'aitame meta'axekai Yawé tukita, kuyaximama mekaniti'ɨwekaitɨni yuheima nunuwame, kepaukata memakununuwakai, tawarita kitenie tehɨwemete wakiita mepiti'utakai.
1KI 14:29 Hipatɨta kemɨtiuyɨ ti'aitame Xuwuhani ti'aitakaku, meta kemɨtiuyuri naitɨ, katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie.
1KI 14:30 Kepauka mɨti'aitametɨkai mɨkɨ, Keruwuhani matɨa yamepɨteyukwitɨwekai.
1KI 14:31 Kepauka mumɨ Xuwuhani, maamaya Nuhama mɨtitewakai 'Amuni tewiyari, kaniukateukieni Rawiri kiekariena 'ukiyarimama memakuhetsie, hikɨ nu'aya 'Awiyaxi kanitsutɨani 'utɨmana ti'aitatɨ.
1KI 15:1 Merikɨtsɨ tamamata heimana 'atahaika wiyari ti'aitakaku Keruwuhani Nawati nu'aya, 'Awiyaxi ti'aitame kanayani Kura kwieyaritsie,
1KI 15:2 hikɨ Kerutsareme 'ukaitɨ katiniuta'aita haika wiyari. Maamaya Mahaka pɨtitewakai 'Awitsaruni niweyatɨtɨ.
1KI 15:3 'Awiyaxi yaxeikɨa 'axakatiniuyurieni, yupaapa hepaɨ, yuheyemekɨ Yawé yukakaɨyari 'ayexeiyatɨ pɨka'atɨa, wapaapa Rawiri mɨtikatɨa hepaɨ.
1KI 15:4 Matsi, waɨkawa Rawiri naki'erietɨ, Yawé Kakaɨyari, puwarupitɨa Rawiri nuiwarimama memɨte'aitanikɨ Kerutsareme kiekariyaritsie, kɨxeme hepaɨ mɨhekɨariwiekakɨ 'akuxi mana, 'Awiyaxi kaniupitɨani nunutsi mayexeiyakɨ mɨkɨ mɨtita'aitakɨ 'utɨmana, para Kerutsareme mɨpaɨ mɨtitatɨrɨkariyakɨ.
1KI 15:5 Rawiri Yawé kemɨtinake mɨtikatɨakɨ, kepauka muyeikakaitsie hatsuaku Yawé 'aitsikaya pɨka'uhayewaxɨ, xeimieme xeikɨa 'axakatiniuyurieni mɨtiuta'aitaxɨkɨ mɨmierienikɨ 'Uriyaxi heti tewiyari.
1KI 15:6 Kepauka muyeikakai 'Awiyaxi, mepɨyukwitɨwekai Xuwuhani matɨa Keruwuhani.
1KI 15:7 Tawarita kemɨtiuyɨ 'Awiyaxi ti'aitame hɨkɨtɨkaku, meta naime kemɨtiuyuri, katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie. Metatsiere mekaniyukwitɨwekaitɨni 'Awiyaxi Keruwuhani matɨa.
1KI 15:8 'Awiyaxi kaniumɨni, hikɨ kaniukateukieni Rawiri kiekariena. Hikɨ nu'aya 'Atsá kanitsutɨani yu'ukiyari 'utɨma ti'aitatɨ.
1KI 15:9 Merikɨtsɨ Keruwuhani xeitewiyari wiyari ti'aitakaku 'Ixaheri kwieyaritsie, 'Atsá ti'aitame kanayani Kura kwieyaritsie,
1KI 15:10 hikɨ huta tewiyari heimana xeiwiyari katiniuta'aita Kerutsareme kiekariyaritsie. Kutsieya Mahaka pɨhɨkɨtɨkai 'Awitsaruni nu'aya.
1KI 15:11 'Atsá yapɨtiuyuri Yawé kemɨtinake, meripaitɨ tutsieya Rawiri kemɨtikatɨa hepaɨ.
1KI 15:12 Kaniwarutaweiya mɨkɨ kwieyaritsie kakaɨyarixi mewarayexeiyatɨ yuhamatɨa memukahipitekai tuminikɨ, meta meripaitɨ 'ukiyarimama memɨwarutiwewiekai kakaɨyarixi kaniwarukumaweriya.
1KI 15:13 Meta paitɨ yukutsi Mahaka 'ukaratsitɨtɨ kemɨti'aitametɨkai kanita'imaiya, mɨkɨ 'Atserá kakaɨyariyari yuhetsiemieme mutawewiekaikɨ 'axa'aneme. 'Atsá mɨkɨ kakaɨyari kaniutatara meta kanitataiya Kiruni 'akiyaritsie paitɨ.
1KI 15:14 Tsepa 'Atsá kakaɨyarixi memɨte'atimawiyarɨwa mɨka'uti'unaxɨ, 'Atsá Yawé kemɨtinake yuheyemekɨ pɨtiuyeikakai.
1KI 15:15 Metatsiere, Yawé tukita huru meta pɨrata kani'atɨani metatsiere piinite yupaapa matɨa Kakaɨyari memɨteyetuiriekai.
1KI 15:16 Kepauka mɨti'aitametɨkai 'Atsá Kura kwieyaritsie meta Watsaha 'Ixaheri kwieyaritsie, mɨkɨ mekaniyutikwini.
1KI 15:17 Watsaha, 'Ixaheri kwieyaritsie ti'aitame, Kura kiekatari kaniwarutakwini, hikɨ kiekari Xama kuraruyari 'akanatitewarita, mana 'Atsá Kuratsie ti'aitame mɨka'utayeikanikɨ.
1KI 15:18 Hikɨ 'Atsá naime kaniwayetɨni huru meta pɨrata muyuhayewanekai Yawé tukieyata meta yuparatsiyuta mieme, kaniwarutɨtɨani kemɨ'ane hurawa memiparewiekai Weni-'Arari memanutɨkirienikɨ, Tawurimuni nu'aya meta Hetsihuni teukarieya Tsiriya kwieyaritsie ti'aitame, 'ana Ramatsiku mɨkatei. Meta 'ipaɨ 'aneme niuki kaneinɨ'airieni:
1KI 15:19 «Ne 'ekɨ matɨa tɨratu tepɨwewieni, meripaitɨ 'apaapa meta nepaapa wahepaɨ. Ne nepɨmatsihenɨ'airiwa 'imikieri huru meta pɨrata. Tɨratu kepemɨrexeiya Watsaha 'Ixaheri kwieyaritsie ti'aitame hamatɨa ketineuhayewa, 'ena mɨnetsihayewakɨ netsimienetɨ».
1KI 15:20 Weni-'Arari yapɨtiutanaki'eri 'Atsá kemainekai, hikɨ kaniwarenɨ'ani yukuyaxima wa'ukiyarima 'Ixaheri kiekariteyaritsie memɨtahaxɨanikɨ memɨwatakwinikɨ. 'Ana mɨpaɨ katiniwara'iwa 'Iyuni kiekariyari, Rani, 'Aweri-Wetimaká meta naime Kinereti kiekariteyari metatsiere Nepɨtahari kiekariteyari.
1KI 15:21 Kepauka Watsaha mɨpaɨ mɨretima, Xama kiekariyari kuraruyari 'amatitewa wewienetɨ kanihayewa, kaneyani Tiritsa paitɨ.
1KI 15:22 Hikɨ ti'aitame 'Atsá yunaime kaniwaruta'inieni Kura kwieyaritsie kiekatari, nihipame kawahayewatɨ, hikɨ naime mekatenetɨni Xama mɨtitipikai, tetexite meta kɨyexite Watsaha kɨmana kiekari kuraruyari 'amatitewaritakai. Mɨkɨkɨta ti'aitame 'Atsá Kehewa kiekariyari Wenikamini kwieyaritsie mieme kuraruyari 'akanatitewarita, meta Mitsipa kiekariyari.
1KI 15:23 Tawarita kemɨtiuyɨ 'Atsá ti'aitametɨkaku, meta naime kemɨtixikutɨkai meta naime kemɨtiuyuri metatsiere kiekarite kemɨ'ane mutiwewi, mɨkɨ pɨraka'utɨarie kemɨtiuyɨ xapayaritsie Kura kwieyaritsie te'aitamete waxapatsie. Peru, kepauka 'ukiratsi matɨa katiniutakwine yu'ɨkatetsie.
1KI 15:24 Hikɨ 'Atsá kaniumɨni, kaniukateukieni yu'ukiyarima wahamatɨa Rawiri kiekariena. Hikɨ nu'aya Kutsapati kanitsutɨani 'utɨmana ti'aitatɨ.
1KI 15:25 Huta wiyari 'Atsá ti'aitakaku Kura kwieyaritsie, Keruwuhani nu'aya Narawi kananukakeni 'Ixaheri kwieyaritsie, mɨkɨ huta wiyari mana katiniuta'aita.
1KI 15:26 Narawi Yawé kemɨkatinake katiniuyurieni, yaxeikɨa paapaya kemɨtiuyuri mɨpaɨ katinikayani, paapaya 'ixaheritsixi ke'axameteyuriekame mɨwarayeitɨa hepaɨ.
1KI 15:27 Watsaha 'Ahiyaxi nu'aya, 'Itsakaxi nuiwarieya, Narawi kaniumieni kepauka Kiwetuni piritsiteutsixi wakiekari yunaitɨ memukunakai meta yunaitɨ 'ixaheritsixi.
1KI 15:28 Hairieka wiyari ti'aitakaku 'Atsá Kura kwieyaritsie, Watsaha Narawi kaniumieni, hikɨ mɨkɨ pɨta hetsiena mieme katiniuta'aita.
1KI 15:29 Yapauka 'amɨranukake ti'aitatɨ, Watsaha yunaime kaniwarukwini Keruwuhani tɨɨriyamama. Nixeimetɨma pɨka'uhayewaxɨ, yunaime kaniwarakuxɨtɨani, mɨkɨ paye'atɨarie Yawé kemɨtitahɨawixɨ yuparewiwame 'Ahiyaxi Tsiru kiekame.
1KI 15:30 Mɨya katiniuyɨni meripaitɨ 'axamɨtiuyuriekaikɨ Keruwuhani meta 'ixaheritsixi 'axameteyuriekame mɨwarayeitɨakɨ, mɨkɨkɨ Yawé kaniuyehaxɨatɨani, 'Ixaheri Kakaɨyarieya.
1KI 15:31 Hipatɨta kemɨtiuyɨ Narawi ti'aitakaku meta kemɨtiuyuri naitɨ katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
1KI 15:32 Kepauka memɨte'aitakai 'Atsá Kura kwieyaritsie meta Watsaha 'Ixaheri kwieyaritsie, mɨkɨta yuhutatɨ mepuyutikwi.
1KI 15:33 Haika wiyari 'Atsá ti'aitakaku Kura kwieyaritsie, 'Ahiyaxi nu'aya Watsaha ti'aitame kanayani, xeitewiyari heimana nauka wiyari Tiritsa 'ukaitɨ naime 'Ixaheri kwieyaritsie katiniuta'aita.
1KI 15:34 Watsaha Yawé kemɨkatinake pɨtiuyuri, Keruwuhani kananukuweiya, yaxeikɨa katiniuyurieni mɨkɨ 'ixaheritsixi ke'axameteyuriekame mɨwarayeitɨa hepaɨ.
1KI 16:1 Merikɨtsɨ Yawé niukieya kaninuani Kehu Kananihi nu'aya hetsɨa, mɨpaɨ katinitahɨawe Watsaha hepaɨtsita mieme:
1KI 16:2 «Haweri pe'aneme nepɨmatsi'anayexei, hikɨ ti'aitame nekamanayeitɨani neteɨterima wahetsie 'ixaheritsixi, peru 'ekɨ yaxeikɨa petiyurienetɨ pekanayani Keruwuhani hepaɨ, 'ixaheritsixi 'axamemɨteyurienikɨ yapepɨtiuyuri, hikɨ mɨpaɨ pepɨnetiuyehaxɨatɨa.
1KI 16:3 'Ayumieme hikɨ ne nepɨmatsimieni meta 'atɨɨriyama yunaime nepuwakwini yaxeikɨa nepuwayurieni Keruwuhani Nawati nu'aya tɨɨriyamama kenemɨwaruyuri.
1KI 16:4 Kemɨ'ane kiekaritsie memɨkwini tsɨikɨri mepɨwatikwani, kemɨ'aneta yeuta memɨkwini wirɨkɨxi mepɨwatikwani».
1KI 16:5 Hipatɨta kemɨtiuyɨ Watsaha ti'aitame hɨkɨtɨkaku meta tita mɨtiuta'aitaxɨ, mɨkɨ naitɨ katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
1KI 16:6 Watsaha kaniumɨni, kaniukateukieni Tiritsa paitɨ. Nu'aya 'Eraha kanitsutɨani ti'aitatɨ 'utɨmana.
1KI 16:7 Meta, Kakaɨyari niukameya Kehu Kananihi nu'aya hetsɨa Yawé niukieya kaninuani, Watsaha meta tɨɨriyamama wahepaɨtsita mieme, mɨkɨ Yawé hɨxie 'axamɨtiyurienekaikɨ, hikɨ mɨpaɨ katiniyehaxɨatɨani. Tsepa muwarukwikai Keruwuhani niwemama, mɨkɨta hepaɨna tiyurienetɨ kanayani.
1KI 16:8 'Atsá kepauka mɨti'aitakai Kura kwieyaritsie xeitewiyari heimana 'ataxewi wiyari, 'Eraha kanitsutɨani ti'aitatɨ 'Ixaheri kwieyaritsie yu'ukiyari Watsaha 'utɨma, huta wiyari katiniuta'aita Tiritsa kiekariyaritsie.
1KI 16:9 Peru Tsimɨri titewatɨ ti'uximayatsiriwametɨtɨ 'eye'unietɨ kanayani, kaxetate kuyaxa miemete mɨhɨritɨariekai hixɨapa me'akame 'Eraha tipiinieya. Tiritsa kiekariyaritsie 'Eraha kaniuyeikakaitɨni xeime 'Aritsa titewakame kiita kani'ienekaitɨni, paratsiyuyata mɨti'aita hetsɨa.
1KI 16:10 Hikɨ 'ana kaneutahani Tsimɨri kanimieni, 'anata mɨkɨ kanitsutɨani ti'aitatɨ hetsiena mieme. Xeitewiyari heimana 'atahuta wiyari ti'aitakaku Kura kwieyaritsie 'Atsá katiniuyɨni.
1KI 16:11 Mɨkɨ Tsimɨri 'amɨranukake kwitɨwa yapauka kaniwarukwini yunaime Watsaha tɨɨriyamama. Yemekɨ 'atsita 'imatɨrieka mieme 'uki kaniumieni, meta maremama yatɨni hamikumama.
1KI 16:12 Mɨpaɨ katiniwarukwini Watsaha tɨɨriyamama, kanaye'atɨarieni Yawé niukieya Watsaha hetsiemieme kemutayɨkai niukameya Kehu ya'utainekaku.
1KI 16:13 'Ikɨ naitɨ mɨya katiniuyɨni Watsaha 'axamɨtiuyurikɨ meta nu'aya 'Eraha, meta 'axameteyuriekame 'ixaheritsixi memɨwarayeitɨakɨ, meta yukakaɨyarixikɨ Yawé mekaniuyehaxɨatɨani, 'Ixaheri Kakaɨyarieya.
1KI 16:14 Hipatɨta 'Eraha ti'aitakaku kemɨtiuyɨ meta naime kemɨtiuyuri, katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
1KI 16:15 Xeitewiyari heimana 'atahuta wiyari ti'aitakaku 'Atsá Kura kwieyaritsie. Mexi kuyaxi 'ixaheritsixi piritsiteu kiekariyari Kiwetuni mekunakai, Tsimɨri Tiritsa kiekariyaritsie 'atahuta tukari katiniuta'aita.
1KI 16:16 Kepauka kuyaxi memɨte'utamari kename Tsimɨri ti'aitame 'aye'unietɨ hayaka heimiekai, mɨkɨ tukaritsie kwitɨwa mematiteitsie kuyaxi 'ixaheritsixi yunaitɨ 'Umiri ti'aitame mekanayeitɨani, kuyaxi wa'ukiyari mɨhɨkɨtɨkai.
1KI 16:17 Hikɨ 'Umiri meta yunaitɨ 'ixaheritsixi hamatɨana memu'uwakai mekanekɨne Kiwetuni me'uku'eirieka, Tiritsa kiekariyari pɨta mekaniukunani memɨyutakwinikɨ.
1KI 16:18 Hikɨ kepauka Tsimɨri mɨretima kename kiekari ka'unarieximekai, hikɨ tuxiyu 'amutewita kaneutihani paratsiyuta, kanitataiya. Mɨpaɨ katiniumɨni
1KI 16:19 'axamɨtiuyurikɨ, Yawé kemɨkatinake katiniyurienekaitɨni, Keruwuhani puweiyakai ke'axamɨtiuyuri, 'ixaheritsixi 'axameteyuriekame muwarayeitɨa.
1KI 16:20 Tawarita hipatɨ kemɨtiuyɨ Tsimɨri ti'aitame hɨkɨtɨkaku, meta ti'aitame 'aye'unietɨ kemɨratɨa, kanaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
1KI 16:21 Hikɨ 'ana 'ixaheritsixi teɨteriyari, me'ayehutatɨ mekanakɨne: hixɨata me'atɨ Tiwini Kinati nu'aya mepɨparewiekai ti'aitame mayanikɨ, hipatɨta 'Umiri mepɨparewiekai.
1KI 16:22 Perutsɨ 'Umiri hetsɨa miemete mekaniwara'iwa Tiwini teɨterimama, mɨkɨ 'ana kaniumierieni meyukwitɨwetɨ. Hikɨ mɨpaɨ 'Umiri ti'aitame katinayani.
1KI 16:23 'Atsá ti'aitakaku xeitewiyari heimana tamamata heimana xewi wiyari Kura kwieyaritsie, 'ana 'Umiri ti'aitame kanayani 'Ixaheri kwieyaritsie, katiniuta'aita tamamata heimana huta wiyari, yunɨtɨ 'ataxewi wiyari muyuriekai ti'aitatɨ Tiritsa kiekariyaritsie.
1KI 16:24 Merikɨtsɨ 'Umiri, xeime Tsemexi titewakame Tsamariya hɨriyari kaniunanairieni, haika tewiyari heimana 'ataxewi kiruyarikɨ pɨrata, hikɨ mana kiekari kaniutawewieni. Tsemexi hetsiemieme meripaitɨ mɨkɨ hɨri mɨtipiinieyatɨkaikɨ Tsamariya katiniterɨwa.
1KI 16:25 Peru 'Umiri Yawé kemɨkatinake katiniuyurieni, kwinimieme matsi 'axakatiniuyurieni keyuri meripaitɨ memanuka'ui te'aitamete.
1KI 16:26 Keruwuhani Nawati nu'aya hepaɨ katiniuyurieni, yaxeikɨa tiyurienetɨ mɨkɨ 'ixaheritsixi kemɨtiwareuyexɨri, yukakaɨyarixikɨ Yawé mekaniuyehaxɨatɨani, 'Ixaheri Kakaɨyarieya.
1KI 16:27 Tinaitɨ kemɨtiɨyɨ meta kemɨtiuyuri ti'aitame 'Umiri, katinaka'utɨarieni kemɨtiɨyɨ xapayaritsie 'Ixaheri kwieyaritsie te'aitamete waxapatsie.
1KI 16:28 'Umiri kaniumɨni, kaniukateukieni Tsamariya kiekariyaritsie. Nu'aya 'Akawi kanitsutɨani ti'aitatɨ 'ɨtɨmana.
1KI 16:29 Xeitewiyari heimana tamamata heimana 'atahaika wiyari 'Atsá ti'aitakaku Kura kwieyaritsie, 'Akawi 'Umiri nu'aya kanitsutɨani ti'aitatɨ, 'Ixaheri kwieyaritsie Tsamariya kiekariyaritsie katiniuta'aita xeitewiyari heimana huta wiyari.
1KI 16:30 'Akawi 'Umiri nu'aya, mɨkɨta yaxeikɨa katiniuyurieni Yawé kemɨkatinake, matsi te'aitamete meripai kiekatari wareuyeta katiniuyurieni.
1KI 16:31 Kwinimieme matsi 'axapɨtiuyuri Keruwuhani Nawati nu'aya kemɨkatiuyuri, Ketsaweri kaniutiwitɨni 'Eti-Wahari nu'aya tsiruniyutsixi tiwa'aitɨwame, hikɨ kanitsutɨani Wahari ti'uximayatsirietɨ meta 'eyexeiyatɨ.
1KI 16:32 Tsamariya kiekariyaritsie tuki kanitawewirieni meta mawari taiyame hetsiena mieme,
1KI 16:33 metatsiere 'Akawi xeime 'Atserá 'uka kakaɨyariyari kaniutawewieni. Hikɨ matsi mɨkɨkɨ Yawé waɨkawa kaniuyehaxɨatɨani, 'Ixaheri Kakaɨyarieya, kememɨkate'uyuri te'aitamete meripai miemete.
1KI 16:34 Kepauka 'Akawi ti'aitame hɨkɨtɨkaku, Kiheri Weteri kiekametɨtɨ, Keriku kiekariyari muka'unariekai kananukuketɨani. Kepauka tenariyari mutsutɨa kaniumɨni nu'aya mexɨakame 'Awirani titewatɨ, kepauka 'itupari meuwɨtɨaxɨa kaniumɨni nu'aya 'imatɨrieka mieme Tsekuwi titewatɨ, Yawé Kutsuhexi Nuni nu'aya kemɨtiutahɨawekai paye'atɨarie.
1KI 17:1 Merikɨtsɨta 'Eriyaxi, Titsiwe kiekame Karaha kwieyaritsie, kanekuyeixɨani 'Akawi hetsɨa, mɨpaɨ katinitahɨawe: «Yurikɨ mɨpaɨ nekanaineni Yawé hɨxie, 'ixaheritsixi takakaɨyari, ne nemeyexeiya, mɨpaɨ nepɨmerahɨawe tawari pɨkakuhaɨtsiyata meta pɨkakawiye yapaɨmexɨa wiyari 'ena makahutsie, kepaukake ne yanemɨtayɨni».
1KI 17:2 Hikɨ Yawé 'Eriyaxi mɨpaɨ katiniutahɨawe:
1KI 17:3 «Kenemie tau manatineika hepatsie, Keriti 'akiyaritsie keneyuti'awieta, Kurutani 'anutaɨye tau manatineika hepatsie.
1KI 17:4 Mɨkɨ 'akitsie pepehareka, ne kwatsari nepɨwata'aitɨani memɨmetehemikwanikɨ muwa».
1KI 17:5 Hikɨ 'Eriyaxi kaneyani Keriti 'akiyaritsie paitɨ, Kurutani 'anutaɨye, muwa kaniuyuhayewa, Yawé kemɨtitahɨawixɨ.
1KI 17:6 Mɨkɨ kwatsari ximeri taikai mekateni'atɨiriwakaitɨni paa meta wai, meta mɨkɨ 'akitsie kaniharekaitɨni.
1KI 17:7 Peru mɨixa tukari 'anukayaku, mɨkɨ 'akiyaritsie haa kaniukawani, mɨixari mɨkakawiyewekaikɨ mɨkɨ kwieyaritsie.
1KI 17:8 Hikɨ Yawé 'Eriyaxi mɨpaɨ katiniutahɨawe:
1KI 17:9 «Hikɨta kenemie Tsareta paitɨ Tsiruni kwieyaritsie mana kenekani. Mana xeime wiura nepɨtiuta'aitɨa mɨmetimikwanikɨ».
1KI 17:10 'Ayumieme 'Eriyaxi kaneyani Tsareta paitɨ. Kepauka mana mɨye'a, kiekari kitenie xeime wiura kaniutaxeiya kɨyexi teɨxɨneme. 'Itahɨaweka mɨpaɨ katinitahɨawe: —Ximɨxi, tekɨxita 'etsiwa haa kenehanimie nemanuharenikɨ.
1KI 17:11 Hikɨ 'ari 'ayeyaku haa heuhanimiekaku, tawarita mɨpaɨ katinitahɨawe: —Meta ximɨxi, paa 'etsiyeume kenena'ɨiri.
1KI 17:12 Peru wiura mɨpaɨ katinita'eiya: —Yurikɨ mɨpaɨ nekanaineni Yawé hɨxie 'akakaɨyari, paa 'etsiyeume tɨma nepɨkahexeiya, 'etsiwa xeikɨa xarita harina nepexeiya meta 'etsiwa hatseiti peyema. 'Ayumieme kɨyexi nepɨteɨxɨnekai nemenu'ɨnikɨ nekie, 'ikwai nemekawewienikɨ neniwe hetsiemieme meta nehetsiemieme. Mɨkɨri 'imatɨrieka mieme ta'ikwai payani, 'anari tekanikwikuni haakakɨ.
1KI 17:13 Hikɨ 'Eriyaxi mɨpaɨ katinitahɨawe: —Pepɨkaheumaka. Kenemie 'akita mɨpaɨ ketineyuri kepemɨti'akuhɨawekai. Peru nemeri kenenetawewiri xeime paa harina pemeixeiyakɨ, meta kenenatuiriemie, 'ariketa kenetawewi 'ahetsiemieme meta 'aniwe hetsiemieme.
1KI 17:14 Mɨpaɨtsɨ kanaineni Yawé 'ixaheritsixi takakaɨyari: “Mɨkɨ harina hawaikɨ pɨka'uyexɨni xarita mɨyeka, meta hatseiti xaritsie mɨyema, kepaukake Yawé wiyeri manɨ'ani 'ena kwiepa”.
1KI 17:15 Mɨkɨ heyaka mɨpaɨ katinikayani, 'Eriyaxi kemɨrehɨawekai, hikɨ kanixuawekaitɨni 'ikwai wiura hetsiemieme meta niweya hetsiemieme metatsiere 'Eriyaxi hetsiemieme.
1KI 17:16 Yemekɨ Yawé niukieya kemainekai 'Eriyaxi niukameyatɨkaku, harina pɨka'uyexɨ xari 'amɨnenata meta hatseiti xaritsie mɨyemakai.
1KI 17:17 Merikɨtsɨ 'arikeke katiniutakwine wiura nu'aya, kwinie kaniuyɨni hikɨ kaniumɨni.
1KI 17:18 Hikɨ mɨkɨ 'ukaratsi 'Eriyaxi kaniutatieni: —¿Ketita perayexeiya nehetsɨa, tewi Kakaɨyari hetsɨa mieme? Pepunua 'axakenemɨtiuyuri penetsihaye'eritɨanike, 'anari neniwe mɨmɨnikɨ.
1KI 17:19 'Eriyaxi mɨpaɨ katinita'eiya: —Kena 'aniwe. Hikɨ 'inawairieka mamayatsie, kanenutikweni wapaitɨ muyehupukaitsie, muwa yu'utatsie kanikateni.
1KI 17:20 Hikɨ mɨpaɨ kaniutayɨni: «Yawé pemɨnekakaɨyari, ¿yaxeikɨata 'ikɨ wiura, hetsɨana nemunua, 'ekɨ tiuka'eniwame perayeitɨani nu'aya pe'imi'irieka?»
1KI 17:21 Hikɨ haikakɨa heimana kanahuni temaikɨ hetsie, meta mɨpaɨ katiniuhiwa: «Yawé pemɨnekakaɨyari, 'ikɨ temaikɨ tukarieya kenanuitɨiri».
1KI 17:22 Yawé 'Eriyaxi hiwarieya kaniu'enieni, hikɨ temaikɨ kananutaniere.
1KI 17:23 'Eriyaxi 'enukukweka muwayekatsie kaniwayekweni, kanenukakweni. Maamaya kaniyetuirieni mɨpaɨ katinitahɨawe: —'Aniwe kanayeyurini. Kamɨ kenanukwekari.
1KI 17:24 Hikɨ mɨkɨ 'ukaratsi, 'Eriyaxi mɨpaɨ katiniutahɨawe: —Hikɨ matsi mɨpaɨ nepɨtimate, 'ekɨ tewi Kakaɨyari hetsɨa mieme pepɨhɨkɨ, ketita pemɨtikuxata yurikɨ Yawé kaniniukieyatɨni.
1KI 18:1 Merikɨtsɨ mɨixa tukari 'anukayaku, hairieka wiyaritsie Yawé 'Eriyaxi mɨpaɨ katiniutahɨawe: «Kenemie 'Akawi hetsɨa, 'ari wiyeri nekananunɨ'amɨkɨ kwiepa».
1KI 18:2 Hikɨ 'Eriyaxi kanayeyani 'Akawi hetsɨa heyaka. Mana Tsamariya kiekariyaritsie waɨkawa kanihaakaxatɨkaitɨni.
1KI 18:3 Mɨkɨ tukaritsie, 'Akawi xeime yuparewiwame mexeiyakai 'Awiriyaxi titewakame, kɨmana katiniutanɨ'ani, mɨkɨ paratsiyuyata pɨti'aitakai, metatsiere Yawé hetsiemieme yapɨtikamiekai mɨkɨ.
1KI 18:4 Ketsaweri Yawé niukametemama muwakwikaikɨ, 'Awiriyaxi xeitsienituyari pɨwaruti'awietakai huta terɨyarita, huta tewiyari heimana tamamata xeime terɨta, yaxeikɨa meyupaɨmemeta xeimeta, mɨkɨ pɨtiwamikwakai pɨwaharitɨakai meta.
1KI 18:5 'Akawi mɨpaɨ katinitahɨawe 'Awiriyaxi: «Naitsarie 'ikɨ kwieyaritsie kenekunieri haixa pekuwaunetɨ meta 'aki haa 'uhapaneme. Heiwatɨ muwa xaɨtsie 'ɨxa tehekaxeiya kawayutsixi muratsixi memayeyuyurinikɨ, mɨpaɨ memɨkakwinikɨ tatewama».
1KI 18:6 Hikɨ kwie hixɨata mekaniyu'inɨatsirieni mɨkɨtsie yuxexuitɨ memukunierekɨ. 'Akawi xeitapari kaneyani, 'Awiriyaxi meta xeitapari.
1KI 18:7 Hikɨ 'Awiriyaxi huyeta 'umietɨ 'Eriyaxi kananukunake. 'Awiriyaxi heitimaika, 'anakatutsireka kwiepa, mɨpaɨ katinita'iwawiya: —'Eriyaxi neti'aitɨwame, ¿yurikɨ 'ekɨ petiyɨane?
1KI 18:8 'Eriyaxi mɨpaɨ katinita'eiya: —Huu, ne nepɨhɨkɨ. Kenemie 'akutsiyari ketinetaxatɨa, kename 'ena ne'uyeika.
1KI 18:9 'Awiriyaxi mɨpaɨ katinita'iwawiya: —¿Ke'axa kuta netiuyuri ne titayari penetiyetuani 'Akawi hetsɨa, mɨkɨ mɨnetsimienikɨ?
1KI 18:10 Yurikɨ mɨpaɨ nekanaineni Yawé hɨxie 'akakaɨyari, naitsarie nuiwarite watsata meta yunaime te'aitamete wahetsɨa neti'aitɨwame katiniutanɨ'ani 'ahekɨ. Hikɨ kemɨ'ane memɨkametsi'utaxei, yurikɨ puwaku'iwawiyakai yamemɨtiyuanikɨ kename mekametsi'ukaxei.
1KI 18:11 ¿Hikɨta 'ekɨ pemɨnetsinɨ'a kename nekereitaxatɨani neti'aitɨwame kename 'ekɨ 'ena pe'uyeika?
1KI 18:12 Ne kenetimate hakewa mɨmatsi'anuwitɨni Yawé 'iyarieya, xɨka mɨpaɨ nereitahɨawe 'Akawi kename 'ekɨ 'ena pe'uyeika, xɨkata mɨkɨ kamatsi'utaxeiya pɨnetsimieni. 'Ekɨ matsi mɨpaɨ ketinemaika ne nunutsiyari paitɨtɨ yanepɨtikamie Yawé hetsiemieme.
1KI 18:13 'Ekɨ xɨari mɨpaɨ pepɨkatitaxatɨariewe neti'aitɨwame, mɨpaɨ nepɨtiuyuri kepauka Ketsaweri mɨwakwinekai Yawé niukametemama, ne xeitsienituyari nepɨwaruti'awietaxɨ Yawé niukametemama, huta terɨyarita nepuwareuta'ɨnaxɨ, huta tewiyari heimana tamamata xeimeta, yaxeikɨata meyupaɨmeme xeimeta, ne nepɨtiwamikwa paa meta nepuwaharitɨa.
1KI 18:14 Hikɨta 'ekɨ pemɨnetsinɨ'a nemɨreitaxatɨanikɨ mɨkɨ nekutsiyari kename 'ekɨ 'ena pe'uyeika. Mɨkɨ matsi kanenemiemɨkɨ.
1KI 18:15 'Eriyaxi mɨpaɨ kaniutayɨni: —Yurikɨ mɨpaɨ nekanaineni Yawé Naimekɨmɨtɨrɨkaɨye hɨxie, kemɨ'ane nemɨti'uximayatsirie, mɨpaɨ nekametinahɨaweni hikɨ ne 'Akawi hetsɨa nekanimieni.
1KI 18:16 Hikɨ 'Awiriyaxi 'Akawi kanikuwauni, katinitaxatɨani 'Eriyaxi hepaɨtsita, hikɨ mɨkɨta kaneyani 'Eriyaxi kanikuwauni
1KI 18:17 hikɨ 'Akawi kepauka 'Eriyaxi muxei, mɨpaɨ katinitahɨawe: —¿'Ekɨ petihɨkɨ pemɨwa'uximatɨa 'Ixaheri kwieyaritsie kiekatari?
1KI 18:18 'Eriyaxi mɨpaɨ katinita'eiya: —Ne hawaikɨ nepɨkahɨkɨ 'Ixaheri kwieyaritsie kiekatari 'uximatɨarika nemɨwawiwirie. Kemɨ'ane 'uximatɨarika memɨwawiwirie 'ekɨ pekanihɨkɨtɨni meta 'a'iwama, Yawé 'aitsikaya xemuku'eirikɨ, Wahari kakaɨyarixiyari xemɨwarayexeiyakɨ pɨtari.
1KI 18:19 Hikɨ ketiniwarutaxatɨa teɨteri naitsarie 'Ixaheri kwieyaritsie kiekatari, memeyukuxeɨrienikɨ nehamatɨa Kaximeru hɨriyaritsie paitɨ nauka tsienituyari heimana huta tewiyari heimana tamamata Wahari niukametemama wahamatɨa, meta nauka tsienituyari 'Atserá niukametemama Ketsaweri mexayatsie memutiyaxike.
1KI 18:20 Hikɨ 'Akawi yunaime kaniwarutakwewieni 'ixaheritsixi meta kakaɨyarixi waniukametema Kaximeru hɨriyaritsie paitɨ.
1KI 18:21 'Eriyaxi mɨkɨ teɨteri wahɨxie kaninuani, mɨpaɨ katiniwarutahɨawe: —¿Kepaukari 'aixɨa xepɨtiyuani xeime hɨkɨame xepanukuweiya? Xɨka Yawé yurikɨ Kakaɨyari hɨkɨtɨni, kaneuyeweka mɨkɨ xemayexeiyani, xɨkata Wahari yuri kakaɨyari hɨkɨtɨni mɨkɨ xekeneuweiyani. 'Ana teɨteri nixeiniuki 'atsimepɨka'utiyua.
1KI 18:22 Hikɨ 'ayumieme 'Eriyaxi tawarita mɨpaɨ kaniutayɨni: —Ne xeikɨari nekaniyuhayewaneni Yawé niukameya, peru matsi, Wahari kaniwarexeiyani nauka tsienituyari heimana huta tewiyari heimana tamamata niukamete.
1KI 18:23 Yuhutame tuurutsixi xekeniwarahapani. Mɨkɨ xeime meke'anayexeiya, meke'itaxiteni kɨyexitsie mekeheyatsa waiyarieya peru meka'enutataiyatɨ. Neta xeime tuuru nepukuha'aritɨani neta kɨyexitsie nekaneyatsamɨkɨ waiyarieya, peru nepɨka'enuta'ɨriya.
1KI 18:24 Hikɨ mɨkɨ yukakaɨyari mekanitahɨawikuni, neta Yawé nekanitahɨawimɨkɨ. Kemɨ'ane tai makanɨ'ani mɨkɨ yuri Kakaɨyari kanihɨkɨtɨni. Yunaitɨ teɨteri yamekateniutanaki'erieni mɨpaɨ mɨtiyɨnikɨ.
1KI 18:25 Hikɨ mɨpaɨ katiniwarutahɨawe 'Eriyaxi Wahari niukametemama: —Xeme xemɨyuwaɨkawakɨ, xeime tuuru xekenanayehanaka xeme meri xekeneutaxiteki. Hikɨ yukakaɨyari xekeneutahɨawi tai manɨ'anikɨ, peru xeme xepɨka'enutataiyani.
1KI 18:26 Wahari niukametemama xeime tuuru mekananayehana memɨ'atɨiriyarie mekanitixitexɨani, hikɨ yukakaɨyari mekanahɨawekaitɨni ximeri memutayua tuka kanayani mɨyame'utiyuanekaku. Mawari taiyame memutawewi warita mehatsunatɨkɨkatɨ, mɨpaɨ meniutiyuanekaitɨni: —Wahari 'aku, ketaneuta'eiya. Peru nitixaɨtɨ pɨkatiu'enierie, nitixaɨtɨ pɨkatiwaruta'ei.
1KI 18:27 Tuka 'aye'aku 'Eriyaxi kaniwananaimakaitɨni, mɨpaɨ katiniwakɨhɨawekaitɨni: —Karima matsi xekeneutihiwani, yurikɨ xɨari kanikakaɨyaritɨni, peru xɨari kaneyu'iyaritɨaka, yatɨni pɨre'uximayatane, yatɨni 'ateewa paitɨ kaneyeikani. Xɨari matsi pekutsu, xekenanutahɨtɨa.
1KI 18:28 Hikɨ matsi waɨkawa mekaniutihiwatɨkɨne, kememɨte'uhukai, nawaxakɨ mepɨyutixitekekai naitɨ mepeuxuxurekai xeikɨa.
1KI 18:29 Tuka kananukayani, mɨkɨ yaxeikɨa meniyɨakaitɨni memɨka'u'iyarini wahepaɨ, hikɨ kanaye'ani mawari taikai mieme hurayari. Peru nitixaɨtɨ pɨkatiu'enierie, nixewitɨ mɨkawaru'enikɨ nixewitɨ pɨkawaruta'ei.
1KI 18:30 Hikɨ 'Eriyaxi yunaime teɨteri mɨpaɨ katiniwarutahɨawe: —'Ahurawa xekenakɨni. Mɨkɨ 'ahurawa mekaniukɨne. Mawari taiyame Yawé hetsiemieme mu'unikaikɨ 'Eriyaxi 'aixɨa kaniyurieni.
1KI 18:31 Mɨkɨ tetexi kaniukuteɨxɨ tamamata heimana hutame, yuxexuime nuiwarite wahetsiemieme Kakuwu niwemama, mɨkɨ Yawé 'Ixaheri mɨtiterɨwaxɨ.
1KI 18:32 Mɨkɨ tetexikɨ mawari wewiwame kaniutawewieni Yawé hetsiemieme, waritanata kana'inetɨyani, tamamata heimana 'auxɨwime rituruyari reukanakeme hatsite.
1KI 18:33 Kɨyexi 'aixɨa katiniutuani, tuuru kaniutixitexɨani, waiyari kananuyatsatɨyani,
1KI 18:34 hikɨ mɨpaɨ kaniutayɨni: —Xekeneutihɨniya naukame xarite hakɨ, xekeneutiyeuriexɨa mawari taiyariyari heima meta kɨyexitsie. Hutariekata mɨpaɨ kaniutayɨni: —Tawarita mɨpaɨ xeketeneuyuri. Hikɨ mɨpaɨ mekateniuyurieni. Hairieka mɨpaɨ katiniwaruta'aitɨani: —Tawarita mɨpaɨ xeketeneuyuri. Hairieka xarite mana mekaniutiyeuriexɨani.
1KI 18:35 Haa kaniuhapanekaitɨni mawari taiyame waritatsie, meta ma'inetɨyakaitsie kaniutahɨne.
1KI 18:36 Kepauka maye'a mawari taikai mieme hurayari, Kakaɨyari niukameya 'Eriyaxi xeikeyari yekeka mɨpaɨ katiniuyunenewieni: «Yawé, 'Apɨrahami Kakaɨyarieya meta 'Itsahaki metatsiere 'Ixaheri, hikɨ 'ena yunaitɨ mɨpaɨ meketehetimani 'ekɨ Kakaɨyari pemɨhɨkɨ 'Ixaheri kwieyaritsie, meta kename ne neti'a'uximayatsiriwame nehɨkɨ, meta meketehetimani 'ikɨ mɨya nemɨtiyuriene yapeneti'aitɨakaku xeikɨa netiyuriene.
1KI 18:37 Yawé keneneuta'eiya, 'ikɨ teɨteri yamemɨtehetimanikɨ, kename Yawé, Kakaɨyari pehɨkɨ, meta pemɨwa'inie 'ahetsie yuri memɨte'eriekakɨ».
1KI 18:38 'Ana kwitɨwa Yawé tai muyuawitsie mieme kaneyenɨ'ani, mɨkɨ wai mawari taiyariyari hetsiemieme kaniutitaiya, kɨyexi naime, tetexi, meta kwie, 'atsita haa kanakuwatsiɨxa ma'inierietɨkata mɨyemakai.
1KI 18:39 Kepauka teɨteri yunaitɨ mɨpaɨ memɨte'unenierixɨ, mekaniukatunuma'uni, mɨpaɨ mekaniutiyuani: «Yawé Kakaɨyari kanihɨkɨtɨni, yemekɨ yuri Kakaɨyari».
1KI 18:40 Hikɨ 'ana 'Eriyaxi mɨpaɨ katiniuta'aita: —Xekeniwaretiwiya Wahari niukametemama, nixewitɨ pɨkaheyuta'unani. Kepauka memɨwarutiwi, 'Eriyaxi katiniuta'aita Kitsuni 'akiyaritsie memanuhapanienikɨ, muwa kaniwarukwini.
1KI 18:41 Hikɨ 'Eriyaxi 'Akawi mɨpaɨ katiniutahɨawe: —Keneumieni, ketinekwaka, kene'ieka, 'ari wiyeri muwa kanayuaximeni tɨrɨkaɨyetɨ waɨkawa.
1KI 18:42 'Akawi kaneyani mɨrekwakakɨ me'iekakɨ, peru 'Eriyaxi Kaximeru hɨriyaritsie kaneutiyune, mana kananakatutsire kwiepa, yuhɨxie 'utitunutɨ katiniuyerɨni.
1KI 18:43 Hikɨ tiyu'uximayatame mɨpaɨ katiniutahɨawe: —Kenemie haramaratsie keneukanieri. 'Iparewiwameya heyaka heukaniereka mɨpaɨ kaniutayɨni: —Nitixaɨtɨ nepɨkatixeiya. 'Eriyaxi mɨkɨ 'atahutamexɨa kaniutanɨ'ani mana meukanenierenikɨ,
1KI 18:44 'atahutarieka ti'uximayatameya mɨpaɨ katinitaxatɨani: —Haramaratsie 'atineka hai mana kanatimieni. 'Etsikanipeni mamá hepaɨ. Hikɨ 'ayumieme 'Eriyaxi mɨpaɨ katinitahɨawe: —Kenemie 'Akawi mɨpaɨ ketinetahɨawi: “Kaxeta keneukuha'aritɨaka kenanutiyerɨka kenemieri, wiyeri nɨka metsi'ukunuitɨani”.
1KI 18:45 Haiwitɨrikɨ muyuawitsie kaniukɨyɨre, hikɨ waɨkawa kaniuku'eka, kaniukawiye tɨrɨkaɨyetɨ. Peru 'Akawi kaneyani kaxetatsie Ketsireri 'erietɨ.
1KI 18:46 Hikɨ Yawé tɨrukariyaya kaninuani 'Eriyaxi hetsie, yuhɨiyamekɨ 'anayuhɨaka kaniutanautsa, Ketsireri paitɨ kaniuta'ani 'Akawi 'akuxi kata'awekaku.
1KI 19:1 Hikɨ 'Akawi 'uka Ketsaweri katiniutaxatɨani naime 'Eriyaxi kemɨreyuri, kemɨtiwarukwikai yunaime Wahari niukametemama 'ixiparakɨ.
1KI 19:2 Hikɨ Ketsaweri xeime kanenɨ'ani 'Eriyaxi hetsɨa, mɨpaɨ mɨtitahɨawekɨ: «Kakaɨyarixi mekenetsi'u'uximatɨani mekanetsinenimayatɨ xɨka 'uxa'a 'epauka 'akuxi nekametsimieweni kepemɨtiwarukwi 'iya».
1KI 19:3 'Ana 'Eriyaxi kaniutimani kaniuyuta'una mɨkamierienikɨ. Kepauka Weritsewa meta'a Kura kwieyaritsie, mana yuparewiwame kaniuku'eirieni,
1KI 19:4 hikɨ kaneyani makumawetsie xeitukari kaniumiekaitɨni. Kepauka 'umietɨ 'ɨtsi hetɨa kaninuani, mɨkɨ 'etɨriyayatɨa kaniutayerɨni 'ari heumɨmɨtɨ, mana mɨpaɨ kaniutayɨni: «Yawé 'aku, 'ari nepu'uxeri. Netukari keneneunawairi, ne'ukiyarima ke'aixɨa memɨte'u'iyarikai mɨpaɨkuta nepɨkatiuka'iyari».
1KI 19:5 Hikɨ 'ɨtsitɨa kaniukahuni 'ana kaneukuni. Yapaukata, niuki tuayame kanimayɨani mɨpaɨ katinitahɨawe: «Kenanukukexi, ketineukwa'i».
1KI 19:6 'Eriyaxi 'anukukeka kananieretɨyani, hikɨ manutimu'utsie paa kaniuxeiya xikeke kwaxiyariekame tɨtsie meta haa xeitekɨxiyari. Katiniukwani meta kananuhareni, hikɨ tawarita kaniukahuni.
1KI 19:7 Hutarieka niuki tuayame Yawé hetsɨa mieme kaninuani, 'ikuyuitɨwatɨ, mɨpaɨ katinitahɨawe: «Kenanukukexi, ketineukwa'i, tewa pekaniyemieni».
1KI 19:8 'Eriyaxi kananukukeni, katiniukwani meta kananuhareni. Mɨkɨ 'ikwaikɨ 'utatɨrɨkaxɨaka, huta tewiyari tukari huta tewiyari tɨkari kaniumiekaitɨni 'anake kaneta'ani Huré paitɨ, hɨri Kakaɨyari hetsɨa mɨmieme hetsie paitɨ.
1KI 19:9 Mana 'ana tɨkarikɨ terɨta kanayekateitɨni. 'Arikeke, Yawé kanitahɨawe, mɨpaɨ katinita'iwawiya: —¿'Eriyaxi, kepetiyuriene 'ena?
1KI 19:10 Mɨpaɨ katinitahɨawe 'Eriyaxi: —Ne nepɨmatsinaki'erie waɨkawa yemekɨ, Yawé Kakaɨyari Naimekɨmɨtɨrɨkaɨye pemɨhɨkɨ. 'Ixaheritsixi mekaniku'eirieni 'atɨratu, mawari taiyame 'ahetsɨa mieme mekaniuti'una, meta 'ahetsɨa miemete 'aniukamete mekaniwarukwini 'ixiparakɨ. Ne xeikɨari nekaniuyeikani nexaɨtame, hikɨta ne mekaneniwautɨweni menetsimienike.
1KI 19:11 Yawé mɨpaɨ katinitahɨawe: —Keniwayeye'a kenemie yemuritsie mana nehɨxie keneweni, 'ari kanaye'aximeni mana nemuyeyanikɨ. Hikɨ Yawé nɨ'arieya hepaɨ 'anuyekaitɨ meri kananuyeyani 'eka kwi tɨrɨkaɨyetɨ, naitɨ hɨri kaniutayuanekaitɨni, 'ai kaneukutarikekaitɨni, peru Yawé 'ekatsie pɨka'uyeikakai 'akuxi. Hikɨ 'eka 'anuyeyaku kwie kaniutayuani, peru mɨkɨtsieta Yawé pɨka'uyeikakai.
1KI 19:12 Kwie 'utayuaku mɨkɨ 'utɨmata kananuyeyani tai, peru yaxeikɨata mɨkɨ tai hetsie Yawé pɨkayewekai. Tawarita mɨkɨ tai 'utɨma kaninuani 'etsiwa yuariya kayuwatɨ 'umakakaku.
1KI 19:13 Kepauka 'Eriyaxi mi'eni, kaneuyukunani yuhɨxie yumatakɨ, wayeyaka terɨ hɨxie kaniutakeni. Hikɨ niuki kaniu'enieni mɨpaɨ rehɨaweme: —¿Kepetiyuriene 'Eriyaxi 'ena paitɨ?
1KI 19:14 Mɨpaɨ katinita'eiya 'Eriyaxi: —Ne nepɨmatsinaki'erie waɨkawa yemekɨ, Yawé Kakaɨyari Naimekɨmɨtɨrɨkaɨye pemɨhɨkɨ. 'Ixaheritsixi mekaniuku'eirieni 'atɨratu, mawari taiyame 'ahetsɨa mieme mekaniuti'una, meta 'ahetsɨa miemete 'aniukamete mekaniwarukwini 'ixiparakɨ. Ne xeikɨari nekaniuyeikani nexaɨtame, hikɨta ne mekaneniwautɨweni menetsimienike.
1KI 19:15 Yawé mɨpaɨ katinitahɨawe: —Kenakunua 'a'utɨma 'ahuyeta kepemɨrane, kenemie Ramatsiku makumawetsie. Kepauka pemeta'ani mana, Katsaheri pepanayexeiya ti'aitame mayanikɨ Tsiriya kwieyaritsie,
1KI 19:16 meta Kehú Nimitsi nu'aya, ti'aitame mayanikɨ 'Ixaheri kwieyaritsie, metatsiere 'Eritseu Tsapati nu'aya, 'Aweri-Mekura kiekame kenanayexeiya 'a'utɨa 'ahetsiemieme neniukame mayanikɨ.
1KI 19:17 Kehú kaniwakwimɨkɨ kemɨ'ane muyuta'una Katsaheri hetsɨa, 'Eritseu kaniwakwimɨkɨ kemɨ'ane muyuta'una Kehú hetsɨa.
1KI 19:18 Matsi, ne nepɨwa'ɨwiyani 'atahuta miriyari 'ixaheritsixi memɨkakatunuma'uiwawe Wahari hɨxie meta memɨka'i'itsiwawe.
1KI 19:19 'Eriyaxi mana kaniyeyani, hikɨ 'Eritseu kaniukaxeiya Tsapati nu'aya, kanikwietsananekaitɨni. Mana menikwietsanatɨwekaitɨni tamamata heimana huta paritsiyari tuurutsixi, mɨkɨ wa'utɨa miemete pahanakai. 'Eriyaxi 'auriena 'uyeyaka yumata 'amɨyewa kaneitawiwirieni hetsiena.
1KI 19:20 Hikɨ 'Eritseu waruku'eirieka yutuurutsixi 'Eriyaxi 'utɨma kaniutanautsa. Mɨpaɨ katinitahɨawe: —Keneneupitɨa 'ekɨ, nepaapa nemaama nemɨwatateutɨanikɨ 'itsiyakɨ, hikɨ 'anake nepɨmatsi'anuweiya. 'Eriyaxi mɨpaɨ katinita'eiya: —Kenemiekakuta. Ne nepɨkamatsita'imaiya.
1KI 19:21 'Eritseu mana kaniku'eirieni peru kaninuanita. Yutuurutsixi memuyuhuta kwietsanamete kaniwarukwini mawari kaniwarayeitɨani. Yuku kɨye kwietsaname 'utataiyaka, wai kaniutiwarɨka hikɨ teɨteri kaniwarumini, mɨkɨta mekateniukwani. Hikɨ 'ana kaneyani 'Eriyaxi mukuweiyanenikɨ 'iparewiwameya kanayani.
1KI 20:1 Hikɨ Weni-'Arari Tsiriya kwieyaritsie ti'aitame, yunaime yukuyaxi kaniwarukuxeɨrieni, kanayeyani Tsamariya tamienike hikɨ kiekari warie menayaxetɨkɨne meta mepeweiyakai hipatɨ te'aitamete xeitewiyari heimana tamamata heimana huta meyupaɨmetɨ, kawayutsixi mepɨwaruhapakai meta kaxetate kuyaxa miemete.
1KI 20:2 Tsamariya kiekariyaritsie hipame kaniwarutanɨ'ani niuki tuayamete mɨpaɨ memɨteheitahɨawekɨ 'Akawi mɨti'aitame 'Ixaheri kwieyaritsie: «Mɨpaɨ kanaineni Weni-'Arari:
1KI 20:3 “'Ahuru meta 'apɨrata katininepinitɨni, meta yaxeikɨa 'a'ɨitama metatsiere 'aniwema temari”».
1KI 20:4 'Ixaheri kwieyaritsie ti'aitame niuki mɨpaɨ 'aneme kanenɨ'ani: «Kepemaine, nekutsiyari meta neti'aitɨwame, ne 'ahetsɨa nekanimiemetɨni, meta naime tita nemɨrexeiya».
1KI 20:5 Tawarita niuki tuayamete mekaniu'axɨani 'Akawi hetsɨa, mɨpaɨ mekatenitahɨawe: «Mɨpaɨ kanaineni Weni-'Arari: “Mɨpaɨ nepɨrenɨ'a pekenetsiyetuirieni 'ahuru 'apɨrata, 'a'ɨitama meta 'aniwema.
1KI 20:6 'Ayumieme, 'uxa'a 'epauka nepɨwaranunɨ'ani nete'uximayatsiriwamete 'aparatsiyuta memeutahaxɨanikɨ meta te'a'uximayatsiriwamete wakiita, mɨkɨ naime mepɨtewayetɨni tita waɨkawa mɨraye'atɨka, mɨkɨ mepɨte'anutɨni”».
1KI 20:7 'Ixaheri kwieyaritsie ti'aitame yunaime katiniwarutanɨ'airieni 'ukirawetsixi, mɨpaɨ katiniwarutahɨawe: —Neuxei 'ikɨ waɨkawa 'uximatɨarika pɨwiwiene temɨyeha'anikɨ. Kepauka mɨkɨ mɨreyenɨ'a, kename neke'iyetuirieni, ne'ɨitama meta neniwema nepɨrata meta nehuru, nepɨmatiyetuirieni nepɨrehɨawekai.
1KI 20:8 'Ukirawetsixi meta yunaitɨ kiekatari mɨpaɨ mekaniutiyuani: —Ti'aitame. Hawaikɨ pepɨka'i'enieka meta pepɨkatikupitɨwani tita mɨmatiwawirie.
1KI 20:9 'Ayumieme 'Akawi mɨpaɨ katiniwarutahɨawe Weni-'Arari nɨ'arimama: —Mɨpaɨ xeketenetahɨawi neti'aitɨwame: “Ne, mati'uximayatsiriwame nemɨhɨkɨ, tinaime nepɨmatiyetuirieni ketita pemɨtiutawau matɨari paitɨ, peru hikɨri hekwamekɨ pemɨnetiwawirie nepɨkayɨwe nemɨmatiyetuirieni”. Mɨkɨ mekanakunuaxɨani Weni-'Arari hetsɨa mɨpaɨ mete'utahɨawarieka.
1KI 20:10 Hikɨ Weni-'Arari tawari niuki 'Akawi kanenɨ'airieni: «Mekenetsi'u'uximatɨani kakaɨyarixi, xɨka Tsamariyatsie 'etsiwa tumuanari 'uyuhayewa, xɨka nekuyaxima meyɨwaweni xeituiyari memanutunikɨ».
1KI 20:11 Peru 'Ixaheri kwieyaritsie ti'aitame mɨpaɨ katiniuta'ani: «Mɨpaɨ xeketenetahɨawi mɨpaɨ pɨkarekwikani 'akuxi karayu'iwawetɨ».
1KI 20:12 Kepauka Weni-'Arari, 'ikɨ niuki mɨ'atɨiriyarie, kani'iekaitɨni hipame te'aitamete wahamatɨa mematitekaitsie. Yapauka mɨkɨ mɨpaɨ katiniwaruta'aitɨani yukuyaxima: «Xekeneuyukuha'aritɨa». Hikɨ mɨkɨ mekaniyukuha'aritɨani mɨkɨ kiekari memɨtamienikɨ.
1KI 20:13 Merikɨte 'ipaɨ katiniuyɨni, 'Ixaheri kwieyaritsie ti'aitame 'Akawi hɨxie kaninuani xewitɨ tewi Kakaɨyari niukameya, mɨpaɨ katinitahɨawe: —Yawé mɨpaɨ kanaineni: “¿Petiwaxeiya mɨkɨ kuyaxi memɨyumɨire? Hikɨ nekaniwayetuamɨkɨ 'ahetsɨa pemɨwara'iwakɨ, hikɨ 'ana mɨpaɨ pepɨretimani kename ne Yawé nehɨkɨ”.
1KI 20:14 'Akawi mɨpaɨ katiniuta'iwauni: —¿Kemɨ'ane wahekɨ pɨtiyurieni? Mɨpaɨ kaniutayɨni Kakaɨyari niukameya: —Mɨpaɨ kanaineni Yawé: “Mɨpaɨ nepɨtiyurieni kuyaxi temari wahekɨ, mɨkɨ me'anuyetekaku”. 'Akawi tawari mɨpaɨ katiniuta'iwauni: —¿Kemɨ'ane meri pɨtikatsutɨani? Kakaɨyari niukameya mɨpaɨ kaniutayɨni: —'Ekɨtɨtɨ.
1KI 20:15 Hikɨ 'Akawi kaniwarukuha'aritɨani kuyaxi temari, mɨkɨ huta tsienituyari heimana xeitewiyari heimana tamamata heimana huta (232) mekaniyupaɨmekaitɨni. Meta hipame kuyaxi 'ixaheritsixi kaniwarukuha'aritɨani: mɨkɨ yunaitɨ mekaniyupaɨmekaitɨni 'atahuta miriyari (7.000).
1KI 20:16 Hikɨ tuka 'ayaku mekanayekɨne, mexi Weni-'Arari meta xeitewiyari heimana tamamata heimana huta te'aitamete mɨwara'iniekai yunaitɨ mehetarɨwekai mematiteitsie.
1KI 20:17 Kuyaxi temari mekananuyetekaitɨni. Kepauka nenieremete Weni-'Arari muwanɨ'akai mɨpaɨ memɨte'itaxatɨa kename hipatɨ kuyaxi 'ahurawa mehahukai Tsamariya mehayenexɨaka,
1KI 20:18 mɨpaɨ katiniuta'aita Weni-'Arari: «Xekeniwaretiwiya xepɨkawarekukukuyani, tsepa 'aixɨa 'iyari memɨkɨyɨa yatsepa memɨtatsikukwitɨwe».
1KI 20:19 Kuyaxi temari kiekaritsie mekanayekɨne kuyaxi wahɨxie me'anuyetetɨ.
1KI 20:20 Kuyaxi yuxexuitɨ yuxexuime mekaniwarukwini memɨwaraye'unie, hikɨ 'ana tsiriyatari mekaniyuta'una. 'Ixaheritsixi mekaniwaranukuweiya, matsi Weni-'Arari Tsiriya kwieyaritsie ti'aitame kaniuyuta'una hipame kawayutsixi wahetsie memutekai wahamatɨa.
1KI 20:21 'Ixaheri kwieyaritsie ti'aitame kaniyemiekaitɨni wakwinetɨ, kawayutsixi wahetsie memutekai kaniwarukwini, meta kaxetate yuhetsiemieme kanayeitɨani, yemekɨ waɨkawa tsiriyutsixi mekaneuyehɨiyani.
1KI 20:22 'Arikeketa, kaninuani Kakaɨyari niukameya 'Ixaheri kwieyaritsie ti'aitame hetsɨa, mɨpaɨ katinitahɨawe: «Kayuwatɨ xeikɨa pepɨkatikani pemɨrayu'iwaxɨkɨ, keneyu'iyaritɨaka matsi kehepaɨ pemɨtiyurieni, karikɨ yurikata kaninuamɨkɨ ti'aitame Tsiriya kiekame».
1KI 20:23 Merikɨtsɨ, Tsiriya kwieyaritsie ti'aitame parewiwamete mɨpaɨ mepɨte'eyemari'itɨa: «'Ixaheritsixi wakakaɨyarixi hɨritsie miemete mekanihɨkɨtɨni. 'Ayumieme waɨkawa mekanitɨrɨkawini tahetsiemieme. Xɨka tewarutakwini makuweritsie mana hɨrixɨa tekaniwara'iwawaweni.
1KI 20:24 'Ekɨ 'ipaɨ ketineuyuri: Yunaime te'aitamete keniwarutipata hipame pɨta keniwaranuka'uitɨa 'ahetsɨa memɨte'uximaya.
1KI 20:25 Meta keniwarukuha'aritɨa kuyaxi meripaitɨ pemɨwarexeiyakai hepaɨ meyupaɨmeme, kawayutsixi meta kaxetate kuyaxa miemete yaxeikɨa paɨmeme, temɨwatakwinikɨ 'ixaheritsixi makuweritsie. Kanahekɨaka tekaniwara'iwakuni». Ti'aitame Weni-'Arari yakatiniutanaki'erieni, mɨpaɨ katiniuyurieni.
1KI 20:26 Xeiwiyari 'anuyeyaku, yukuyaxima kaniwarukuha'aritɨani, mekanekɨne 'Apeki mɨrakutewatsie mana memɨwatakwinikɨ 'ixaheritsixi.
1KI 20:27 Meta ti'aitame 'Akawi yaxeikɨa yukuyaxima kaniwarukuha'aritɨani meta 'ikwai katiniwayetuirieni kepaɨmeme memɨteheuyehɨakai. Hikɨ mɨkɨta mekanayekɨne wahepa memɨwatakwinikɨ tsiriyutsixi, yatewa mekanikuyaxe wahɨxie. 'Ixaheritsixi 'etsimepɨyupaɨmekai, tsipuri xeitewayari 'etsimemɨyupaɨme wahepaɨ mepɨteyuxexeiyakai, peru tsiriyutsixi mepakutsekai makuweritsie.
1KI 20:28 Tewi Kakaɨyari hetsɨa mieme kaninuani 'ixaheritsixi tiwa'aitɨwame hetsɨa mɨpaɨ katinitahɨawe: «Yawé mɨpaɨ kanaineni: “Tsiriyutsixi mɨpaɨ memɨteku'eriwakɨ kename Yawé kakaɨyari hɨritsie mieme hɨkɨ peru makuweritsie katixaɨ. Ne nepɨwayetuani mɨkɨ memɨyumɨire kuyaxi 'ahetsɨa, mɨpaɨ pemɨretimanikɨ kename ne Yawé nehɨkɨ”».
1KI 20:29 'Atahuta tukari mekaniuyurieni yuhɨxie metitetɨ, 'ana 'atahutarieka tukaritsie mekanitsutɨani meyukwitɨwetɨ. Xeimieme 'ixaheritsixi xeitukaritsie mekaniwarukwini xeitsienituyari miriyari kuyaxi tsiriyutsixi yu'ɨkama memu'uwakai.
1KI 20:30 Hipatɨ kuyaxi mekaniyuta'unaxɨani 'Apeki kiekariyaritsie, peru mana kiekari kuraruyari wahetsie kaniu'une kaniwarukwini xeitewiyari heimana 'atahuta miriyari. Weni-'Arari meta muyuta'unakai, mana kaniyu'awietanekaitɨni xeikɨa kiekaritsie.
1KI 20:31 Hikɨ 'iparewiwamete mɨpaɨ mekatenitahɨawe: «Mɨpaɨ tepɨtemarie kename te'aitamete 'ixaheritsixi meteyukanenimaya. Hikɨmɨ 'Ixaheri kwieyaritsie ti'aitame hetsɨa tepɨtayetuani, tepeitawawirieni mɨtareuyehɨwirienikɨ. Heiwatɨ tiɨyɨme mereuyehɨwirieni kametsi'umieni».
1KI 20:32 Hikɨ 'Ixaheri kwieyaritsie ti'aitame hɨxie mekaniyuyetuani, mɨpaɨ mekatenitawawirieni: —Weni-'Arari matsiparewiwame mɨpaɨ paine: “Neuxei kwerietɨ nepɨmatsiwawirie, pepɨkanetsikumemiwani”. Ti'aitame mɨpaɨ kaniutayɨni: —¿'Akuxi rayeniere? Karikɨ mɨkɨ kanine'iwatɨni.
1KI 20:33 Hikɨ mɨkɨ teɨteri ti'aitame niukieya me'u'enieka 'aixɨa mainekaikɨ, mɨpaɨ mekaniutiyuani: —Huu tsɨkarikɨte, Weni-'Arari kani'a'iwatɨni. Ti'aitame mɨpaɨ katiniwarutahɨawe: —Xekenewitɨyu mɨkɨ. Kepauka Weni-'Arari munua 'Akawi hetsɨa, mɨkɨ kanenutiyeni yukaxetatsie kuyaxa miemetsie. Hikɨ Weni-'Arari mɨpaɨ katinixatɨani:
1KI 20:34 —Ne nepɨmatsiyetuirieni kiekarite nepaapa 'apaapa munawairiekai. Meta 'ekɨ pepɨyɨwe Ramatsiku kiekariyaritsie pemika'uitɨani hakewa mɨretuiyaka 'ahetsiemieme, nepaapa kemɨtiyurienekai Tsamariya kiekariyaritsie. 'Akawi mɨpaɨ katinitahɨawe: —Neta hikɨ mɨya pemainekɨ, nekamenitatuamɨkɨ pemɨyemiekɨ. Mɨpaɨ tɨratu katiniuwewieni hamatɨana, hikɨ 'ana kanitatuani kanipitɨani mɨyemiekɨ.
1KI 20:35 Xewitɨ tewi Kakaɨyari niukametemama wanuiwaritsie miemetɨtɨ, Yawé yarehɨawekaku, xeime yu'iwa mɨpaɨ katiniutahɨawe: —Keneneutiwaxɨa. Peru 'iwaya pɨka'uyuwaɨriyaxɨ kemɨrehɨawekai.
1KI 20:36 Hikɨ 'ayumieme Kakaɨyari niukameya mɨpaɨ katinitahɨawe: —Yawé niukieya pemɨkahanu'enikɨ, hikɨ kwitɨwa pemɨyemietsie maye kamenetakwaimɨkɨ. Hikɨ mɨpaɨ katiniɨyɨni, yapauka mɨkɨ Kakaɨyari niukameya metɨatsie, muwa maye hayeneka kanitakwani.
1KI 20:37 Hikɨ 'arike mɨkɨ tewi Kakaɨyari niukameya xeime pɨtata hanukunakeka tewi mɨpaɨ katinitahɨawe: «Keneneutiwaxɨa» Yapauka mɨkɨ tewi kaneitiwaxɨani katinikwinitɨani.
1KI 20:38 Hikɨ 'ana mɨkɨ Kakaɨyari niukameya kaneyani huyeta mana ti'aitame hekwewienike, kaneuyukunakaitɨni yuhɨxie 'ixurikikɨ.
1KI 20:39 Kepauka ti'aitame mana muyemiekai, Kakaɨyari niukameya mɨpaɨ katiniuhiwa hɨxiena: —Ti'aitame. Ne kuyaxa maxuawe yemekɨ nepeyeikakai. Mana xewitɨ nehetsɨa kanenuani xeime tewi 'ahanatɨ memɨtatsikwitɨwe, hikɨ mɨpaɨ kanetinetahɨawe: “'Ikɨ tewi kene'ɨwiyani. Xɨka metsi'utawikweiya hetsiena mieme 'ekɨ nekamenimiemɨkɨ, mexɨkatɨni haika miriyari pɨrata tuminiyari pekaniyetuamɨkɨ”.
1KI 20:40 Neuxei ti'aitame, ne mexi 'akuxi xaɨtsie neheyeikakai, mɨkɨ tewi kanetayuni. 'Ixaheri kwieyaritsie Ti'aitame mɨpaɨ katinitahɨawe: —Mɨkɨtsɨri 'ahetsie katinahɨiyamɨkɨ kepemaine.
1KI 20:41 Hikɨ 'ana, Kakaɨyari niukameya meuyukuhɨakai kaneuyukɨxɨna, 'anake 'Ixaheri kwieyaritsie ti'aitame Kakaɨyari niukameya kanetimani.
1KI 20:42 Hikɨ ti'aitame mɨpaɨ katiniutahɨawe: —Yawé mɨpaɨ kanaineni: “Xeime tewi pekaniutatuani ne nemita'aitakai mumierienikɨ. Hikɨri 'ayumieme, 'ekɨ pɨtari pekanimieriemɨkɨ hetsiena mieme, meta 'ateɨterima mɨkɨ teɨterimama wahetsiemieme”.
1KI 20:43 Hikɨ 'Ixaheri kwieyaritsie ti'aitame, nutuixietɨ meta ha'atɨ kanakunuani Tsamariya paitɨ yuparatsiyuta.
1KI 21:1 Merikɨtsɨ yapaɨmexɨa tukari 'anukayaku mɨpaɨ katiniuyɨni: Nawuhuti titewatɨ Ketsireri kiekame, yukaxie haraweriyari kanexeiyakaitɨni mɨkɨ kiekariyaritsie, ti'aitame 'Akawi paratsiyuya 'aurie, Tsamariya mɨti'aitametɨkai.
1KI 21:2 Hikɨ 'Akawi mɨkɨ Nawuhuti mɨpaɨ katiniutahɨawe: —'Akaxie haraweriyari keneneutuiri muwa ne nemɨtineka'etsirienikɨ, puhurawa neparatsiyu manuwe 'ayumieme nepaine. Nepɨmatsipatsirieni xeime 'aixɨa 'anekamekɨ matsi, yatɨni nematinanairieni kemɨraye'axe.
1KI 21:3 Peru Nawuhuti mɨpaɨ katinita'eiya: —Neti'aitɨwame, Yawé yapɨkatinaki'erie nemɨmatsituirieni, tita ne'ukiyarima memɨneteyetuiri.
1KI 21:4 Hikɨ 'Akawi kaneyani yukie nutuixietɨ meta ha'atɨ Nawuhuti Ketsireri kiekame mɨpaɨ mɨtitahɨawixɨkɨ: «Nepɨkayɨwe nemɨmatiyetuirieni neti'aitɨwame, tita ne'ukiyarima memɨnete'uku'eiriri». 'Ayumieme mɨkɨkɨ yukiita kaniukahuni 'ixumeritsie heunieretɨ, meta katikwaimɨtɨ kanayani.
1KI 21:5 'Ɨyaya Ketsaweri kiitana heutahaka mɨpaɨ katinita'iwawiya: —¿Ketitayari kwinimieme peti'ahiwerie yemekɨ pekatikwaimɨkɨ?
1KI 21:6 —Nawuhuti mɨpaɨ nepɨrahɨawekai Ketsireri kiekame yuharaweri kenetsi'utuirienike, xɨkata ka'inakenike, nepɨtipatsirienikekai xeimekɨ pɨta, peru mɨkɨ yapɨkatiutanaki'eri.
1KI 21:7 Mɨkɨ hepaɨtsita 'ɨyaya Ketsaweri mɨpaɨ katinitahɨawe: —¿Tamɨ 'ekɨ pekatihɨkɨ 'Ixaheri kwieyaritsie pemɨti'aita? Neuxei, kenanukukexi ketineukwa'i, 'aixɨa pekatineka'erietɨyeimɨkɨ. Ne nekamenikuniukiriemɨkɨ mɨkɨ xeniu Nawuhuti harawerieya.
1KI 21:8 Mɨkɨ yapauka xapa puti'utɨa kename 'Akawi niukieya, mana ti'aitame tseyuya kaneumanaxɨani, hikɨ kanitanɨ'axɨani 'ukirawetsixi wahetsɨa meta kiekari hetsiemieme memanuyetei wahetsɨa Nawuhuti kie kiekatari.
1KI 21:9 Mɨkɨ xapatsie mɨpaɨ katine'ukaitɨni: «Mɨpaɨ xeketeneta'aita teɨteri meke'uyuhakieni xeitukari, hikɨ teɨteri xekeniwarukuxeɨri, mɨkɨ yunaime wahɨxie Nawuhuti xekenayetsa.
1KI 21:10 Mɨkɨ hetsiemiemeta yuhutame 'auriena xekeniwarutiyatsa kemɨ'ane memɨka'uyukatetewiya, mɨpaɨ memɨtiyuanikɨ kename mɨkɨ Kakaɨyari hepaɨtsita 'axa'utaine meta ti'aitame hepaɨtsita. 'Anari xekaniwayehanikuni tetexikɨ xekanitituaxixɨakuni xekanimiekuni».
1KI 21:11 'Ukirawetsixi meta kiekari hetsiemieme memanuyetei yamepɨtekakɨ Ketsaweri kemɨraka'utɨa xapatsie.
1KI 21:12 Yamepɨte'uta'aitaxɨ xeitukari teɨteri memuyuhakienikɨ meta Nawuhuti mekaniutakwewieni yunaime teɨteri wahɨxie mekaneyeni.
1KI 21:13 Hikɨ mekaniu'axɨani memuyuhuta memɨka'uyukatetewiya, hɨxiena me'ayaxeka hetsiena mekatenahɨani teɨteri wahɨxie, mɨpaɨ mekaniutiyuani: «'Ikɨ Nawuhuti Kakaɨyari hepaɨtsita 'axakaniutaineni meta ti'aitame hepaɨtsita». Hikɨ 'ayumieme, teɨteri mekaneihana kiekari warita paitɨ, mana tetexikɨ me'itituaxatɨ mekanimieni.
1KI 21:14 Hikɨ Ketsaweri mɨpaɨ katiniutahɨawarieni: «Nawuhuti 'ariri kanetituaxiexɨani kanemɨni».
1KI 21:15 Kepauka Ketsaweri mɨpaɨ mɨtiumari kename Nawuhuti hemɨ hetituaxiexɨaka, mɨpaɨ 'Akawi katiniutahɨawe: «Hikɨrixɨari. 'Apiini kenayeitɨa Nawuhuti Ketsireri kiekame harawerieya mɨkamatsituiriemɨkɨkai. Hikɨri 'apɨka'uyeika, kaniumɨniri».
1KI 21:16 Kepauka 'Akawi mɨpaɨ mɨretima kename Nawuhuti 'ari 'umɨkai, mɨkɨ haraweri yupiini kanayeitɨani.
1KI 21:17 Merikɨtsɨ Yawé 'Eriyaxi Titsiwe kiekame mɨpaɨ katiniutahɨawe:
1KI 21:18 «Kenemie 'Akawi hetsɨa, 'Ixaheri kwieyaritsie mɨti'aitame, Tsamariya mɨti'aita. Mɨkɨ hikɨ Nawuhuti harawerita kaniyeyeikani, hikɨri mɨkɨ yupiini kanayeitɨwani.
1KI 21:19 Mɨpaɨ ketinetahɨawi: “Mɨpaɨ kanaineni Yawé: Pekanimɨmɨkɨ, Nawuhuti pemumikɨ meta harawerieya 'apiini pemayeitɨakɨ”. Tawarita mɨpaɨ ketinetahɨawi: “Yawé mɨpaɨ kanaineni: Hakewa Nawuhuti xuriyaya tsɨikɨri memekutsenaxɨ, manatatsiere 'axuriya mepukutsena”».
1KI 21:20 'Akawi mɨpaɨ 'Eriyaxi katiniuta'eiya: —Nemɨmatsi'aye'unie. ¿Kamɨtsɨ penetiukaxei? 'Eriyaxi mɨpaɨ katinita'eiya: —Huu, nekameniukaxeiya pemuyuyetuakɨ 'axapemɨtiyurienikɨ Yawé kemɨkatinake,
1KI 21:21 hikɨ mɨkɨ mɨpaɨ kamatinahɨaweni: “'Uximatɨarika nekamenanunɨ'airiemɨkɨ. Nekamenikumaweriyamɨkɨ, meta 'anuiwarima 'Ixaheri kwieyaritsie meta mate'uximayatsiriwamete.
1KI 21:22 Yaxeikɨa nekatiniyurimɨkɨ 'atɨɨriyama wahetsie, Keruwuhani Nawati nu'aya tɨɨriyamama wahetsie nemɨtiuyuri hepaɨ, meta Watsaha 'Ahiyaxi nu'aya tɨɨriyamama wahetsie, pemɨnetsi'uyehaxɨatɨakɨ meta yapemɨtiuyurikɨ 'ixaheritsixi 'axamemɨteyurienikɨ”.
1KI 21:23 Ketsaweri hetsiemiemeta Yawé mɨpaɨ kanaineni: “Tsɨikɨri mekanitakwaikuni mana Ketsireri kuraruyari hetɨa”.
1KI 21:24 Yaxeikɨata 'Akawi tɨɨriyamama, mɨkɨ memɨkwini kiekaritsie mekaniwatikwaikuni tsɨikɨri, kemɨ'aneta yeuta memɨkwini mekaniwatikwaikuni wirɨkɨxi.
1KI 21:25 Xewitɨ tawari mɨpaɨ pɨka'ɨyɨ 'Akawi hepaɨ, 'ɨyaya Ketsaweri 'imatɨakaku ti'ɨkitɨakaku, 'axakatiniyurienekaitɨni Yawé kemɨkatinake.
1KI 21:26 Kemɨtiuyeikakai yemekɨ kwinimieme 'axapɨtiuyuri, hipame kakaɨyarixi puwarayexeiyakai, 'amuxeutsixi kememɨteyuriekai, Yawé muwarayewei 'ixaheritsixi wahɨxie.
1KI 21:27 Kepauka 'Akawi 'ikɨ niuki mu'eni, mɨkɨ yukamixa kaneukatsana, hiwerika kamixayari kananakatɨni meta kaniyuhakieni. Mɨpaɨ rekamixatɨ kaniukahupukaitɨni meta nutuixietɨ kanikuyeikakaitɨni.
1KI 21:28 Hikɨ Yawé 'Eriyaxi Titsiwe kiekame mɨpaɨ katiniutahɨawe:
1KI 21:29 «¿'Akawi petixeiya kehapaɨ mɨtiuhayewaxɨ 'axatiyurienetɨ? Tixaɨtɨ mɨkarayuyeitɨakɨ nehɨxie, 'ayumieme mɨpaɨ nepɨkatiyurieni nepɨka'i'uximatɨani, 'atsitake kepauka nu'aya ti'aitame mayanitsie 'ana mɨpaɨ nepɨtiyurieni».
1KI 22:1 Haika wiyari panuyetɨa tsiriyutsixi mekayukwitɨwetɨ 'ixaheritsixi wahamatɨa.
1KI 22:2 Peru haika wiyari 'anuyeyaku Kutsapati, Kura kwieyaritsie ti'aitame, kaneyani 'Ixaheri kwieyaritsie ti'aitame hetsɨa.
1KI 22:3 'Ixaheri kwieyaritsie ti'aitame mɨpaɨ katiniwarutahɨawe memiparewie: «¿Xeme xetematetɨtɨ Xamuti Karaha kwieyaritsie mukuma tahetsɨa mumieme? Tame 'atsitepɨkateyuriwawe Tsiriya kwieyaritsie ti'aitame mɨtatsiyetuirienikɨ waɨriyarika».
1KI 22:4 Hikɨ mɨpaɨ Kutsapati katiniuta'iwawiya: —¿Nehamatɨa pereuyeiwe, temɨwatakwinikɨ Xamuti Karaha kwieyaritsie kiekatari? Kutsapati mɨpaɨ 'Ixaheri kwieyaritsie ti'aitame katiniuta'eiya: —'Ekɨtsɨ kepemɨtayɨni ne yanepɨtikayani, yaxeikɨa neteɨterima meta nekawayutsixi.
1KI 22:5 Peru mɨpaɨta kaniutayɨni: —Peru mexi 'atsitekateyuriwawe, Yawé tepɨta'iwawiya.
1KI 22:6 Hikɨ 'Ixaheri kwieyaritsie ti'aitame kaniwarukuxeɨrieni Kakaɨyari niukametemama, nauka tsienituyari 'etsiwatɨkaku mekaniyupaɨmekaitɨni, mɨkɨ mɨpaɨ katiniwaruta'iwawiya: —¿Netiyɨwe nemɨwatakwini Xamuti Karaha kwieyaritsie kiekatari, nutsutɨ hawaikɨ? Mɨkɨ mɨpaɨ mekaniutiyuani: —Ti'aitame kenemie, Yawé kameniparewimɨkɨ pekaniwara'iwamɨkɨ.
1KI 22:7 Peru Kutsapati mɨpaɨ kaniutayɨni: —¿Xewitɨ 'ena katiuyeika Yawé niukameyatɨtɨ, mɨkɨ 'akuxi temɨniuta'iwawiya?
1KI 22:8 'Ixaheri kwieyaritsie ti'aitame mɨpaɨ katinita'eiya: —Xewitɨ 'akuxi 'apuyeika mɨyɨwe mɨkɨ Yawé mɨta'iwawiya tahetsiemieme, Mikahiyaxi katinitewaka 'Imɨra nu'aya. Peru mɨkɨ ne nekani'uxiwe'erieka, hatsuaku 'aixɨa ti'aneme nehetsiemieme pɨkanetixaxatɨwa, ke'axamɨtiyɨni xeikɨa pɨtixaxata. Kutsapati mɨpaɨ katinitahɨawe: —Mɨpaɨ pepɨka'utaineni.
1KI 22:9 Hikɨ 'Ixaheri kwieyaritsie ti'aitame xeime kaniuta'inieni yuparewiwame, mɨpaɨ katinita'aitɨani: —Yapauka xekenene'atɨiri Mikahiyaxi 'Imɨra nu'aya.
1KI 22:10 'Ixaheri kwieyaritsie ti'aitame, meta Kutsapati Kura kwieyaritsie ti'aitame, te'aitamete wakamixate me'anakatɨtɨkaitɨ meta yu'uwenitetsie menatekaitɨni, teɨteri memayukuxexeɨriwatsie Tsamariya kiekariyari kitenieyaritsie, meta yunaitɨ Kakaɨyari niukametemama memɨyuxatakai wahɨxie memɨtekuxatakai.
1KI 22:11 Tserekiyaxi Kenana nu'aya, mɨkɨ tepɨa 'awayari 'uyutiwewirieka, mɨpaɨ putayɨ: «Yawé mɨpaɨ kanaineni: “'Ikɨ 'awatekɨ pekaniwatakwimɨkɨ tsiriyutsixi pepɨkawahayewa kepaukake pemɨwakwini”».
1KI 22:12 Hipatɨta Kakaɨyari niukametemama meniparewiekaitɨni yaxeikɨa me'utiyuatɨ, mɨpaɨ mete'ikɨhɨawetɨ 'Akawi, «Ti'aitame, keniwarutakuya Xamuti Karaha kwieyaritsie kiekatari, pekaniwara'iwamɨkɨ Yawé kameniparewimɨkɨ».
1KI 22:13 Hikɨ, Mikahiyaxi 'iniwame mɨpaɨ katinitahɨawe: —Neuxei, yunaitɨ Kakaɨyari niukametemama mɨpaɨ meputiyuane, kename ti'aitame rayu'iwa. 'Ekɨta hetsiena mieme 'aixɨa ketinexata, 'aniuki meta mɨkɨ waniuki meyutaxewirekɨ.
1KI 22:14 Peru Mikahiyaxi mɨpaɨ kaniutayɨni: —Yurikɨ mɨpaɨ nekanaineni Yawé hɨxie, mɨpaɨ ketina'eriwani ne ti'aitame yanepɨretaxatɨani Yawé kemɨnerahɨaweni.
1KI 22:15 Kepauka munua ti'aitame hɨxie, mɨpaɨ katinita'iwawiya: —Mikahiyaxi, ¿teteyɨwawe temɨwatakwini Xamuti Karaha kwieyaritsie kiekatari, nutsutɨ hawaikɨ? Mikahiyaxi mɨpaɨ katinita'eiya: —Ti'aitame, keniwarutakuya pekatinayu'iwamɨkɨ, karikɨ Yawé kameniparewimɨkɨ.
1KI 22:16 Hikɨ ti'aitame mɨpaɨ katinitahɨawe: —¿Kepaɨmexɨa waɨriyarika nepɨmatsipitɨaka, para yurikɨ xeikɨa pemɨnetitaxatɨanikɨ, Yawé hetsiemieme?
1KI 22:17 Hikɨ Mikahiyaxi mɨpaɨ kaniutayɨni: —Yunaime 'ixaheritsixi nekaniwaruxeiya metaxɨrietɨkaime hɨritsie, muxatsi memɨkatehekakutsiyari wahepaɨ. Hikɨ Yawé mɨpaɨ kaniutayɨni: “'Ikɨ teɨteri yukutsiyari mepɨkahexeiya. Yuxexuitɨ mekeheutayeixɨani, yukie kayuwatɨ mehexeiyatɨ”.
1KI 22:18 'Ixaheri kwieyaritsie ti'aitame mɨpaɨ Kutsapati katiniutahɨawe: —Kamɨ kenemainekai, 'ikɨ hatsuaku 'aixɨa ti'aneme pɨkaneraxaxatɨwani, ke'axamɨtiyɨni xeikɨa pɨnetixaxatɨwa.
1KI 22:19 Tawarita Mikahiyaxi mɨpaɨ kaniutayɨni: —Keneu'eni 'ekɨ Yawé niukieya: Yawé nepuxei yu'uwenitsie 'akaime 'auriena yunaitɨ kuyaxi muyuawitsie miemete mepɨti'ukai, tserietana meta 'utatana.
1KI 22:20 Hikɨ Yawé mɨpaɨ kaniutayɨni: “¿Kemɨ'ane 'Akawi pɨkemakaxɨani, Xamuti Karaha kwieyaritsie mieme kiekari mɨtamienikɨ mana mɨmɨnikɨ?” Yuxexuitɨ yɨkɨ metenikuxatakaitɨni kehapaɨ memɨteku'eriwakai.
1KI 22:21 'Arike 'imatɨrieka, xewitɨ 'iyari kaninuani, Yawé hɨxie kaniutakeni, mɨpaɨ kaniutayɨni: “Ne nepikemakaxɨani”.
1KI 22:22 Yawé mɨpaɨ katinitahɨawe: “¿Kehapaɨ petiyurieni?”. 'Iyari mɨpaɨ kaniutayɨni: “Nepɨyemie hikɨ 'iyari mɨti'itawa nepayani yunaime 'aniukametema 'Akawi hetsɨa memɨmiemete wahetsie”. Hikɨ Yawé mɨpaɨ katinitanɨ'ani: “Kenemie mɨpaɨ ketinekaye'a, pepeyɨwekaxɨani pepeikemakaxɨani”.
1KI 22:23 Kenemaine, Yawé kaniwarupitɨani 'iyari mɨti'itawa yunaime 'ikɨ Kakaɨyari niukametemama 'ahetsɨa miemete, Yawé 'ari yakaniutayɨni ke'axamɨmatsiyurieni.
1KI 22:24 Tserekiyaxi Kenana nu'aya mɨpaɨ tiu'enaka kananukukeni hikɨ Mikahiyaxi 'auritapa kaneutiwani. Meta mɨpaɨ katinita'iwawiya: —¿Titayari kename 'iyari Yawé hetsɨa mieme netsi'uku'eiri peraine, kename 'ekɨ pɨta meretaxatɨa?
1KI 22:25 Mikahiyaxi mɨpaɨ katinita'eiya: —Yapekatinetimaimɨkɨ kepauka peyu'awietanetɨ xeikɨa 'apemuyeikani.
1KI 22:26 Hikɨ 'Ixaheri kwieyaritsie ti'aitame mɨpaɨ katiniuta'aita: —Mikahiyaxi xekeneuwiyaka xekenanuhani 'Amuni kuwexinaruri 'ena mieme hetsɨa meta Kuhatsi neniwe hetsɨa.
1KI 22:27 Mɨpaɨ xeketeniwaretahɨawi kename mɨpaɨ nehaine meke'enutahɨani mɨkɨ tewi, nitixaɨtɨ mepɨkateheimikwani paa xeikɨa meta haa, kepaukake ne nemakunuani 'aixɨa nereu'erietɨ.
1KI 22:28 Peru Mikahiyaxi mɨpaɨ kaniutayɨni: —Xɨka 'ekɨ pehakunuani 'aixɨa pereu'erietɨ, mɨpaɨ pɨtimatsiɨkɨni kename Yawé kanetiutaxatɨa. Xeme xeyunaitɨ xepɨkatehatɨtɨmaiyani tinaime kenemutayɨ.
1KI 22:29 'Ixaheri kwieyaritsie ti'aitame meta Kutsapati Kura kwieyaritsie ti'aitame, mekanekɨne yunaitɨ Xamuti Karaha kwieyaritsie kiekatari mewaretakwinike.
1KI 22:30 Mana 'Ixaheri kwieyaritsie ti'aitame mɨpaɨ Kutsapati katiniutahɨawe: «Ne nekaniyutamiemɨkɨ yɨkɨ nerekemaritɨ, peru 'ekɨ ti'aitame kamixateya ketinanakapitɨ». Hikɨ 'Ixaheritsie ti'aitame yɨkɨ tiyukemaritɨaka kaniyutamieni.
1KI 22:31 Peru Tsiriya kwieyaritsie ti'aitame mɨpaɨ katiniwaruta'aitɨakaitɨni xeitewiyari heimana tamamata heimana huta meyupaɨmeme kaxetate kuyaxa miemete nɨ'awamete tewa'aitɨwamete: «'Ixaheri kwieyaritsie ti'aitame xeikɨa xekenetami'a, nixeime tawari xepɨkahemietɨweni».
1KI 22:32 Kepauka kuyaxi kaxeta memuhapana tewa'aitɨwamete Kutsapati memuxei, mɨpaɨ mekateniu'erieni: «'Ikɨ xɨari 'Ixaheri kwieyaritsie ti'aitame pɨyɨane». Hikɨ mekanenukuweiya me'itamienike, peru Kutsapati kaniutahiwa.
1KI 22:33 Hikɨ kaxeta memuhapana tewa'aitɨwamete mɨpaɨ metenetimani kename 'Ixaheri kwieyaritsie ti'aitame kayɨanekai, hikɨ 'ana mekanihayewa me'iweiyatɨ.
1KI 22:34 Matsi, xewitɨ katiniutamɨni yutupikɨ hau'erietɨ hikɨ 'Ixaheri kwieyaritsie ti'aitame kaniu'axe katinikwinitɨani, tepɨa kamixayari manakatɨkɨkaita kaneukakeni. Hikɨ ti'aitame kaxetaya mahanakai mɨpaɨ katiniutahɨawe: «Keneukunuitɨa, kenenetuamie hakewa mɨkarayukwinetsie, 'ariri nepu'axie».
1KI 22:35 Tukarikɨ waɨkawamekɨ mekaniyukwitɨwekaitɨni, ti'aitame kaxetaya kayuwatɨ katinikeriekaitɨni, tsiriyutsixi wahɨxie. Peru xuriyaya pɨkatihayewakai matamɨiyatsie mieme puhanekai kaxetatsie, hikɨ mɨkɨ taikaiyaritsie 'Akawi kaniumɨni.
1KI 22:36 'Ari 'akayunirɨmekaku tau, yunaitɨ kuyaxi mɨpaɨ mekateniutahɨawarieni: «Yuxexuitɨ xekeneutayeixɨa yukie. Yunaitɨ yukwiepa xekenakunuaxɨa».
1KI 22:37 Hikɨ ti'aitame kaniumɨni, kanetɨkieni Tsamariya paitɨ, mana kanekateukieni.
1KI 22:38 Kaxetaya mekaniutahauxini putsu matinieretsie Tsamariya kiekariyaritsie, hakewa 'ukari tuminikɨ memɨyuwitɨnɨa memati'ɨwakaitsie, hikɨ tsɨikɨri xuriyaya mekaniukutsena, Yawé kemainekai 'ana kanaye'ani.
1KI 22:39 Hipatɨta kemɨtiɨyɨ 'Akawi ti'aitakaku, meta naime kemɨtiuyuri, paratsiyu kemɨtiutawewi 'erepanite 'awateyakɨ meta kiekarite kemɨ'ane 'aixɨa mutiyuri, kanaye'uka kemɨtiuyɨ xapayaritsie 'Ixaheri kwieyaritsie te'aitamete waxapatsie.
1KI 22:40 'Akawi kaniumɨni, nu'aya kanitsutɨani 'Ukutsiyaxi titewatɨ 'utɨmana ti'aitatɨ.
1KI 22:41 Merikɨtsɨ Kutsapati 'Atsá nu'aya kanitsutɨani Kura kwieyaritsie ti'aitatɨ nauka wiyari ti'aitakakuri 'Akawi, 'Ixaheri kwieyaritsie ti'aitame.
1KI 22:42 Kutsapati xeitewiyari heimana tamamata heimana 'auxɨwi wiyari kanexeiyakaitɨni kepauka mitsutɨa ti'aitatɨ, Kerutsareme kiekariyaritsie pɨtiuta'aitaxɨ xeitewiyari heimana 'auxɨwi wiyari. Maamaya pɨtitewakai 'Atsuwa Tsiriki nu'aya.
1KI 22:43 Yuheyemekɨ mɨkɨ piweiyakai yupaapa 'Atsá ke'aixɨa mɨtiuyuri, hatsuaku pɨkatiuhayewaxɨ, matsi Yawé kemɨtinake pɨtiyurienekai. Peru pɨka'iti'unaxɨ kakaɨyarixi memɨte'atimawiyarɨwa, 'ayumieme teɨteri mepiyeweiyakai mana metemawatɨwetɨ meta 'ɨkwa metaiyatɨwetɨ.
1KI 22:44 Kutsapati meta kayuwatɨ kanexeiyakaitɨni 'Ixaheri kwieyaritsie ti'aitame hamatɨa.
1KI 22:45 Hipatɨta kemɨtiuyɨ Kutsapati ti'aitakaku, kemɨtiuyuri meta kuyaximama kememɨte'ayu'iwaxɨ, katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie.
1KI 22:46 Kaniwarayeweiya mɨkɨ kwieyaritsie kakaɨyarixi mewarayexeiyatɨ yuhamatɨa memukahipitekai tuminikɨ, mɨkɨ mana mekaniyuhayewatɨwekaitɨni kepauka paapaya mɨti'aitakai 'Atsá.
1KI 22:47 'Ana 'akuxi 'Erumi kwieyaritsie ti'aitame kaniumawekaitɨni, xewitɨ kuwexinaruri pɨta mana pukatei.
1KI 22:48 Mɨkɨ tukaritsie Kutsapati kanuwate 'amupapa kaniutiwewieni tituayamete makɨnekɨ, 'Upixi reyetewakaku paitɨ memuhukɨ huru memɨtɨyukɨ, peru hatsuaku mepɨkaheuye'axɨa, mekaniukayunixɨani 'Etsihuni-Kewexi reyetewakaku.
1KI 22:49 Hikɨ 'Ukutsiyaxi 'Akawi nu'aya Kutsapati mɨpaɨ katiniutahɨawe: «Keniwarupitɨa neteɨterima 'ateɨterima wahamatɨa nawiyatsixi memɨwanɨ'atɨwenikɨ». Peru Kutsapati yapɨkatiutanaki'eri.
1KI 22:50 Kutsapati kaniumɨni kaniukateukieni yu'ukiyarima wahamatɨa Rawiri kiekariena, 'ukiyarieya. 'Utɨmanata nu'aya Kurani titewatɨ kanitsutɨani ti'aitatɨ.
1KI 22:51 Merikɨtsɨ 'Ukutsiyaxi 'Akawi nu'aya kanitsutɨani 'Ixaheri kwieyaritsie ti'aitatɨ Tsamariya kiekariyaritsie, tamamata heimana 'atahuta wiyari ti'aitametɨkaku Kutsapati Kura kwieyaritsie, 'Ukutsiyaxi huta wiyari katiniuta'aita 'ixaheri kwieyaritsie.
1KI 22:52 Peru mɨkɨ Yawé kemɨkatinake katiniuyurieni, paapaya kemɨtiuyuri mɨpaɨ katiniyurienekaitɨni meta yumaama hepaɨ, meta Keruwuhani Nawati nu'aya kemɨtiuyuri hepaɨ, 'ixaheritsixi 'axameteyuriekame muwarayeitɨa.
1KI 22:53 Wahari kakaɨyariyari katini'uximayatsiriekaitɨni meta kaneyexeiyakaitɨni, hikɨ mɨpaɨ Yawé katiniuyehaxɨatɨani, 'Ixaheri Kakaɨyarieya, yemekɨ paapaya kemɨtiuyuri.
2KI 1:1 Merikɨte 'arike 'Akawi 'umɨku, Muhawitsixi 'Ixaheritsixi mewaraye'unietɨ mekanakɨne.
2KI 1:2 'Ukutsiyaxi katiniuka'eniwakaitɨni, yuparatsiyutsie wapaitɨ neniereme 'etsimayewatsie hakaweka Tsamariya muwetsie, hikɨ hipame kaniwarutanɨ'ani yunɨ'arima mɨpaɨ katiniwarutahɨawe: «Xekenehu xekene'iwawiyayu Wahari-Tsewu, kakaɨyari 'Ekuruni kiekariyaritsie mewe, xɨka ne'anayewemɨkɨtɨtɨ kenemɨtiuka'eniwa yanemɨretimanikɨ».
2KI 1:3 Peru Yawé niuki tuayameya, 'Eriyaxi mɨpaɨ katiniutahɨawe Titsiwe kiekame: «Kenemie keniwaranukunaki ti'aitame Tsamariya kiekame nɨ'arimama mɨpaɨ ketiniwaretahɨawi: “Neuxei xeme, ¿ketitayari kakaɨyari 'Ekuruni mewe Wahari-Tsewu xeteheu'iwawiyayu? ¿Tiumawe kuta Kakaɨyari 'Ixaheri kwieyaritsie?”
2KI 1:4 Neuxei, Yawé mɨpaɨ kanaineni: “Pepɨka'anukukeniri 'a'itaritsie petikuyetɨ, matsi pekanimɨmɨkɨ xeikɨari”». Hikɨ 'Eriyaxi mɨpaɨ katinikayani,
2KI 1:5 kepauka ti'aitame nɨ'arimama memakunuaxɨa, ti'aitame mɨpaɨ katiniwaruta'iwawiya: —Kehepaɨtɨtɨri. ¿Yapauka xetehakunuaxɨa?
2KI 1:6 Mɨkɨ mɨpaɨ mekatenita'eiya: —Neuxei tewi pɨtatsi'anukunakixɨ mɨpaɨ pɨtarahɨawekai, ti'aitame hetsɨa tekehakunuaxɨanike mɨtatsi'utanɨ'a hetsɨa mɨpaɨ tekemete'utahɨaweke: “Yawé mɨpaɨ paine: ‘¿Ketitayari petiutanɨ'a mɨta'iwawiyarienikɨ Wahari-Tsewu kakaɨyari 'Ekuruni kiekariyaritsie mewe? ¿Tiumawe kuta Kakaɨyari 'Ixaheri kwieyaritsie? Neuxei, pepɨka'anukukeniri 'a'itaritsie petikuyetɨ, matsi pekanimɨmɨkɨ xeikɨari’”.
2KI 1:7 Ti'aitame mɨpaɨ katiniwaruta'iwawiya: —¿Mɨkɨ tewi mɨxe'anukunakixɨ kehe'anekai mɨya mɨxerahɨawekai?
2KI 1:8 Mɨkɨ mɨpaɨ mekatenita'eiya: —Yeutari wahuxari kamixayari panakatɨkɨkai, meta nawi hɨiyameyarikɨ payuhɨakai. Hikɨ mɨpaɨ ti'aitame kaniutayɨni: —Mɨkɨtsɨ 'Eriyaxi kaneyɨanekaitɨni Titsiwe kiekame.
2KI 1:9 Merikɨte 'ana xeime kaniutanɨ'ani kuyaxi tiwa'aitɨwame warawitɨkɨme huta tewiyari heimana tamamata kuyaxi memikuwaunikɨ. Kuyaxi wa'ukiyari 'Eriyaxi kanikuwauni, hikɨ yemɨritsie kanitaxeiya mana 'akaime. Mɨpaɨ katinitahɨawe: —Tewi Kakaɨyari hetsɨa pemɨmieme, ti'aitame mɨpaɨ kanaineni kenakaye'a.
2KI 1:10 'Eriyaxi mɨpaɨ katinita'eiya: —Xɨka ne tewi Kakaɨyari hetsɨa nemiemetɨni, tai ke'ukaxɨrieni muyuawitsie mieme, hikɨ 'ekɨ meta yunaime 'akuyaxima huta tewiyari heimana tamamata memɨyupaɨme kexe'utixɨtsitɨani. Hikɨ yapauka tai muyuawitsie mieme niukaxɨrieni, kuyaxi tiwa'aitɨwame kaniutaxɨtsitɨarieni meta kuyaximama.
2KI 1:11 Hikɨ ti'aitame hutarieka xeime kuyaxi tiwa'aitɨwame kanenɨ'ani, hepaɨna meyupaɨmeme kuyaxi warawitɨkɨme 'Eriyaxi mɨwaumiekɨ. Hikɨ mɨpaɨ katinitahɨawe: —Tewi Kakaɨyari hetsɨa pemɨmieme, ti'aitame mɨpaɨ kanaineni xeiya kenakaye'a.
2KI 1:12 'Eriyaxi mɨpaɨ katini'eiya: —Xɨka ne tewi Kakaɨyari hetsɨa nemiemetɨni, tai muyuawitsie mieme ke'ukaxɨrieni, kematsi'utaxɨtsitɨani meta 'akuyaxima huta tewiyari heimana tamamata memɨyupaɨme. Hikɨ tawarita, tai Kakaɨyari hetsɨa mieme kaniukaxɨrieni muyuawitsie kanakaneni hikɨ kuyaxi tiwa'aitɨwame kaniutataiya meta kuyaximama.
2KI 1:13 Hairieka ti'aitame xeime kuyaxi tiwa'aitɨwame kanenɨ'ani yaxeikɨa huta tewiyari heimana tamamata kuyaxi warawitɨkɨme. Kepauka 'ikɨ kuyaxi tiwa'aitɨwame munua hakewa 'Eriyaxi mekatei, hɨxiena kaniukatunumakeni meta mɨpaɨ katinitawawirieni: —Tewi Kakaɨyari hetsɨa pemɨmieme, neuxei kwerietɨ nepɨmatsiwawirie netukari hetsiemieme meta 'ikɨ huta tewiyari heimana tamamata mate'uximayatsiriwamete wahetsiemieme, pepɨkatatsikukukuyani.
2KI 1:14 Mɨpaɨ nepɨtimate tai muyuawitsie mieme pukaxɨri meta puwarutixɨtsitɨa mɨkɨ yuhutame kuyaxi tewa'aitɨwamete meta wakuyaxima. 'Ayumieme hikɨ nepɨmatsiwawirie netukari pemɨreuyehɨwirienikɨ.
2KI 1:15 Niuki tuayame Yawé hetsɨa mieme 'Eriyaxi mɨpaɨ katiniutahɨawe: «Mɨkɨ hamatɨa kenemie, hawaikɨ pepɨka'imakaka». 'Ayumieme 'Eriyaxi kananukukeni, hikɨ kuyaxi wa'ukiyari hamatɨa kaneyani ti'aitame hetsɨa mɨye'anikɨ,
2KI 1:16 'ipaɨ katinitahɨawe: —Yawé mɨpaɨ kanaineni: “'Anɨ'arima pepɨwarenɨ'a Wahari-Tsewu memeta'iwawiyakɨ kepemɨyɨni, kakaɨyari 'Ekuruni kiekariyaritsie mewe hetsɨa. ¿Kamɨtsɨ Kakaɨyari tiumawe 'Ixaheri kwieyaritsie mɨkɨ pemɨta'iwawiyakɨ? 'Ayumieme mɨya pemɨtiuyurikɨ, 'a'utatsie pepɨka'anukukeniri petikuyetɨ matsi pekanimɨmɨkɨ xeikɨari”.
2KI 1:17 Mɨpaɨ ti'aitame katiniumɨni, Yawé niukieya kemainekai 'Eriyaxi yarahɨawekaku. 'Ukutsiyaxi tɨɨri mɨkawarayexeikɨ, 'iwaya Kurami kanitsutɨani hetsiena mieme ti'aitatɨ. Mɨkɨ katiniuyɨni hutarieka wiyari Kurani Kutsapati nu'aya Kura kwieyaritsie ti'aitakaku.
2KI 1:18 Tawarita kemɨtiuyɨ 'Ukutsiyaxi ti'aitakaku, naitɨ katinaka'utɨarieni, kemɨtiuyɨ xapayaritsie 'Ixaheri kwieyaritsie te'aitamete waxapatsie.
2KI 2:1 Kepauka tukari maye'aximekai Yawé 'Eriyaxi manutiwitɨnikekai muyuawitsie haikɨri mɨtɨrɨkaɨyekɨ, 'Eriyaxi meta 'Eritseu Kirikari mekanayekɨne.
2KI 2:2 Hikɨ 'Eriyaxi 'Eritseu mɨpaɨ katiniutahɨawe: —'Ena keneuyuhayewa, Yawé kanenenɨ'ani Weteri paitɨ. Peru 'Eritseu mɨpaɨ katinita'eiya: —Yurikɨ mɨpaɨ nekanaineni Yawé mayeyurikɨ meta 'ekɨ, hatsuaku 'axaɨtame nepɨkamatsihayewa. Hikɨ yunaitɨ mekanekɨne Weteri paitɨ.
2KI 2:3 Mana Weteri memukutekai Kakaɨyari niukametemama wahepa mekanakɨne memɨwaranunakekɨ, hikɨ mɨpaɨ 'Eritseu mekateniuta'iwawiya: —¿Petimateri hikɨ Yawé mɨmatsinawairieni mati'ɨkitɨwame, meta 'axaɨtame mɨmatsihayewa? —Huu 'ari nepɨtimate, kayuwatɨ.
2KI 2:4 'Eriyaxi tawarita 'Eritseu mɨpaɨ katiniutahɨawe: —'Eritseu, 'ena keneuyuhayewa, Yawé kanenenɨ'ani Keriku paitɨ. Peru 'Eritseu tawarita mɨpaɨ katinitahɨawe: —Yurikɨ mɨpaɨ nekanaineni Yawé mayeyurikɨ meta 'ekɨ, hatsuaku 'axaɨtame nepɨkamatsihayewa. Hikɨ yunaitɨ mekanekɨne Keriku paitɨ.
2KI 2:5 Manata memukutekai Kakaɨyari niukametemama 'ahurawa me'akɨneka mɨpaɨ 'Eritseu mekateniuta'iwawiya: —¿Petimateri hikɨ Yawé mɨmatsinawairieni mati'ɨkitɨwame, meta 'axaɨtame mɨmatsihayewa? —Huu 'ari nepɨtimate, kayuwatɨ.
2KI 2:6 Tawarita 'Eriyaxi mɨpaɨ katinitahɨawe: —'Ena keneuyuhayewa, Yawé kanenenɨ'ani Kurutani paitɨ. Peru tawarita 'Eritseu yaxeikɨa kaniutayɨni: —Yurikɨ mɨpaɨ nekanaineni Yawé mayeyurikɨ meta 'ekɨ, hatsuaku 'axaɨtame nepɨkamatsihayewa. Hikɨ yunaitɨ yuhutatɨ mekanekɨne,
2KI 2:7 hikɨ Kurutani hatuxameyari tetsita mekanewa'uni. Huta tewiyari heimana tamamata meyupaɨmetɨ teɨteri Kakaɨyari niukametemama wahetsɨa miemete mana paitɨ tsiere mekanekɨne, peru yatewa paitɨ mekaniyuhayewa, mewaxeiyatɨ.
2KI 2:8 'Eriyaxi yu'ɨkari kananakuhurieni, hikɨ 'itakwikwieka, haa kaniuwani kɨmana. 'Ana haa kananutayepiere 'anutaɨye heutanetɨ, hikɨ mana mekaniukɨne yuhutatɨ wakikɨa.
2KI 2:9 Me'anukɨneka, 'Eriyaxi 'Eritseu mɨpaɨ katiniuta'iwawiya: —¿Tita matinake kenetiyurieni 'ahetsiemieme, mexi nekahehaniewe 'ahamatɨa ne'uyeikatɨ? 'Eritseu mɨpaɨ katinita'eiya: —Nepɨmatsiwawirie 'a'iyari nehetsiemieme mayanikɨ matsi waɨkawa neke'upitɨarieni.
2KI 2:10 'Eriyaxi mɨpaɨ katinitahɨawe: —Kwinimieme tikwaniwekame pepɨtiwawa, peru xɨka penetsi'uxeiya kepauka nemanuwitɨkieni, 'ana mɨpaɨ pekatinipitɨariemɨkɨ, mexɨka pekanetsi'uxeiya mɨpaɨ pepɨkatipitɨarieni.
2KI 2:11 Hikɨ me'uhukaku metekuxatatɨ, yapauka, niwareutaxɨriexɨani tai kaxetayari meta tai kawayutsixiyari, 'Eriyaxi kananutiyani muyuawitsie haikɨri mɨtɨrɨkaɨyetsie.
2KI 2:12 Hikɨ 'Eritseu nieretɨ kemɨtiyɨanekai mɨpaɨ katiniuhiwakaitɨni: «Nepaapa, nepaapa, kaxetate kuyaxa miemete meta wanɨ'awamete 'Ixaheritsie miemete nepɨwaxeiya». 'Ana yatiuyɨku tawari pɨka'ixei. Hikɨ 'ana mɨkɨ yukamixa hixɨata kanitsana.
2KI 2:13 Hikɨta 'Eriyaxi 'ɨkarieya mukawiwiekai 'utihurieka, Kurutani hatuxameyari tetsita nuaka,
2KI 2:14 haa kaniuwani mɨkɨ 'ɨkarikɨ meta mɨpaɨ kaniutayɨni: «¿Hakewari Yawé, 'Eriyaxi Kakaɨyarieya?» Yapauka haa muwatsie, haa kananutayepiere hautanetɨ, hikɨ 'Eritseu kananuyani 'anutaɨye paitɨ.
2KI 2:15 Kakaɨyari niukametemama Keriku kiekatari, me'ixeiyaka, mɨpaɨ mekaniutiyuani: «'Iyari 'Eriyaxi meixeiyakai 'Eritseu hetsie pɨtari kaniuyuhayewa». Hikɨ mehekɨneka hepana hɨxiena mekaniukatunuma'uni, yuhɨxima kwiepa paitɨ.
2KI 2:16 Mɨpaɨ mekatenitahɨawe: —Neuxei, 'ena tahamatɨa, mekanixuaweni matsiparewiwamete, huta tewiyari heimana tamamata yemekɨ memɨyɨwawe, mati'ɨkitɨwame memɨtiwauni mɨkɨ mepɨyɨwawe. Xɨari Yawé 'Iyarieya kanitihana meta hawaikɨ paitɨ kaneihɨani hɨritsie yatɨni xaɨtsie mayeweritsie. 'Eritseu mɨpaɨ katiniwaruta'eiya: —Hawaikɨ, xepɨkawarenɨ'awani.
2KI 2:17 Peru mɨkɨ yaxeikɨa mekatenikɨhɨawekaitɨni mekanitiwaɨripitɨani, 'imatɨrieka mɨpaɨ katiniwarutahɨawe: —'Aixɨa pɨ'ane kuta, xekeniwaranunɨ'a. Hikɨ mekaniwarenɨ'ani huta tewiyari heimana tamamata teɨteri, mɨkɨ haika tukari 'Eriyaxi mekaniwautɨwekaitɨni, peru mepɨka'itaxei.
2KI 2:18 Kepauka Keriku memakunuaxɨa, 'Eritseu mayuhayewakaitsie, mɨkɨ mɨpaɨ katiniwarutahɨawe: —Ne yanepainekai xemɨkaheiwautɨwenikɨ.
2KI 2:19 Hikɨta, mɨkɨ kiekariyaritsie kiekatari 'Eritseu mɨpaɨ mekateniutahɨawe: —Tati'aitɨwame, 'ekɨ pekaniniereni, 'ikɨ takiekari 'aixɨa pɨreukuma, peru haa 'axakani'aneni, 'ayumieme kwie pɨkatixuaweriyawe.
2KI 2:20 'Eritseu mɨpaɨ katiniwaruta'aitɨani: —Xari hekwame xekenene'atɨiri meta 'una xekeneukayetsa. Kepauka memiyetuiri,
2KI 2:21 'Eritseu kaneyani haixa matinieretsie, muwa 'una heukawiwieka, mɨpaɨ kaniutayɨni: —Yawé mɨpaɨ kanaineni: “Ne 'ikɨ haa 'aixɨa nekaniyurimɨkɨ, para hatsuakuri kɨmana memɨkatakukuwenikɨ meta kwie katixuaweriyaweme mɨkahayeitɨakakɨri”.
2KI 2:22 'Anatɨtɨ mɨtiyehane, hikɨ meta 'akuxi, haa 'aixɨa 'anetɨ kanayani, 'Eritseu kemutayɨ.
2KI 2:23 Hikɨ Keriku yeyaka 'Eritseu Weteri paitɨ kaneyani. Huyeta 'utimiekaku muwa kiekaritsie mekanayenexɨani temari, hikɨ mekanitsutɨani 'axamete'ikɨhɨawetɨ, mɨpaɨ mete'ihiwiwatɨ: «Keneumieni 'ukiratsi pemɨmu'umetse. Keneumieni 'ukiratsi pemɨmu'umetse».
2KI 2:24 'Eritseu 'anakuniereka hikɨ, kwi waxeiyatɨ, 'axamemɨ'itɨarienikɨ Yawé kaniutawawirieni. Yapauka yuhutatɨ hutseri 'ɨtsita mekanayenexɨani, mɨkɨ temari mekaniwarutitsana huta tewiyari heimana huta meyupaɨmeme.
2KI 2:25 Mana 'Eritseu mɨyetɨa Kaximeru hɨriyaritsie kaneyani, manata mɨyetɨa kanakunuani Tsamariya kiekariyaritsie.
2KI 3:1 Merikɨtsɨ tamamata heimana 'atahaika wiyari, Kutsapati katini'aitametɨkaitɨni Kura kwieyaritsie. 'Ana Kurami 'Akawi nu'aya kanitsutɨani ti'aitatɨ 'Ixaheri kwieyaritsie Tsamariya kiekariyaritsie, katiniuta'aita tamamata heimana huta wiyari.
2KI 3:2 Kurami Yawé kemɨkatinake katiniuyurieni, peru matsi yemekɨ paapaya meta warutsieya 'axamepɨte'uyuri, Kurami katiniuta'aita tete mɨwayehɨiyanikɨ, paapaya 'amitakekai Wahari hetsiemieme.
2KI 3:3 Matsi Kurami 'axakatiniyurienekaitɨni Keruwuhani hepaɨ Nawati nu'aya, mɨkɨ ke'axameteyuriekame muwarayeitɨa 'ixaheritsixi teɨteriyari, mɨkɨ Kurami 'axamɨti'ane pɨkatiuhayewaxɨ ke'axamɨtiyurienekai.
2KI 3:4 Hikɨ Metsaha ti'aitame Muhawi kwieyaritsie muxatsi kaniwamɨiriyakaitɨni, mɨkɨ xeiwiyari 'aye'axekaku katiniyetuayakaitɨni 'Ixaheri kwieyaritsie ti'aitame hetsɨa, mɨpaɨ mɨtikwetatɨakaikɨ, xeitsienituyari miriyari muxatsi, meta xeitsienituyari miriyari muxatsi temari wahuxariyari.
2KI 3:5 Peru kepauka 'Akawi mumɨ, Muhawi kwieyaritsie ti'aitame yapɨkatikatɨa, 'ixaheritsixi teɨteriyari kaniwarutakwini.
2KI 3:6 Merikɨte Kurami ti'aitame Tsamariya kiekariyaritsie kanayeyani, meta kuyaxi 'ixaheritsixi kaniwarukuxeɨrieni.
2KI 3:7 Kurami Kutsapati niuki kanenɨ'airieni, Kura kwieyaritsie ti'aitame mɨpaɨ katinitahɨawe: —Muhawi kwieyaritsie ti'aitame pɨkayuwaɨriyari nemɨti'aitɨakakɨ. 'Ayumieme, ¿peti'awaɨriya pemɨnetsiparewienikɨ temɨwatakwinikɨ Muhawi kiekatari? Kutsapati mɨpaɨ katinita'eiya: —Huu, nepɨnewaɨriya. Kepemɨtiku'eriwa neta mɨpaɨ nepɨtinekɨhɨawe, yaxeikɨata nekuyaxima, nekawayutsixi tepɨmatsiparewiwamete.
2KI 3:8 ¿Keteteheuyune xeikɨa? Mɨpaɨ katinita'eiya Kurami: —Kauka makumawetsie 'Erumi kwieyaritsie.
2KI 3:9 Hikɨ te'aitamete 'Ixaheri hetsiemieme, Kura hetsiemieme meta 'Erumi hetsiemieme yunaitɨ mekanekɨne. Mɨkɨ 'atahuta tukari mekaniuhukaitɨni makumawetsie. 'Anari kuyaxi meta kawayutsixi yuhaa mepuxɨ.
2KI 3:10 Hikɨ 'Ixaheri kwieyaritsie ti'aitame mɨpaɨ kaniutayɨni: —Xɨa'ui, Yawé kataniukuxeɨrieni teyuhaikame te'aitamete, mɨtatsiyetuanikɨ muhawitsixi wahetsɨa.
2KI 3:11 Peru Kutsapati mɨpaɨ katiniuta'iwauni: —¿Xewitɨ 'ena katiuyeika Yawé niukameyatɨtɨ, mɨkɨ Yawé mɨta'iwawiyakɨ tahetsiemieme kemɨtiyɨni? Xewitɨ 'Ixaheri kwieyaritsie ti'aitame parewiwameya mɨpaɨ kaniutayɨni: —'Ena hurawa kaniuyeikani, 'Eritseu titewatɨ, Tsapati nu'aya, 'Eriyaxi mɨparewiwameyatɨkai.
2KI 3:12 Mɨpaɨ kaniutayɨni Kutsapati: —Mɨkɨ xɨari pɨtatitaxatɨani Yawé niukieyakɨ. Hikɨ 'Ixaheri kwieyaritsie ti'aitame 'Eritseu hetsɨa kaneyani heita'iwawiyake, warawitɨtɨ ti'aitame Kutsapati meta 'Erumi kwieyaritsie ti'aitame.
2KI 3:13 Peru 'Eritseu 'Ixaheritsie ti'aitame mɨpaɨ katiniutahɨawe: —¿Ne tixaɨtɨ nepɨkarayexeiya 'ahepaɨtsita? Kenemie keniwareta'iwawiya 'apaapa meta 'amaama wakakaɨyarixi waniukamete. Mɨpaɨ katinita'eiya 'Ixaheri kwieyaritsie ti'aitame: —Hawaikɨ, Yawé pɨtatsi'ukwamanaxɨ, kataniukuxeɨrieni teyuhaikame para mɨtatsiyetuanikɨ muhawitsixi wahetsɨa.
2KI 3:14 'Eritseu mɨpaɨ kaniutayɨni: —Yurikɨ mɨpaɨ nekanaineni, Yawé mayeyurikɨ Naimekɨmɨtɨrɨkaɨye ne nemeyexeiya, xɨka Kutsapati Kura kwieyaritsie ti'aitame kahayewenike, nitɨma 'ahɨxie nepɨka'utinierekekai.
2KI 3:15 Kamɨtsɨ kanareru xekenene'atɨiri. Mexi kanareru kanariwiekai, Yawé tɨrɨkariyaya kaninuani 'Eritsehu hetsie,
2KI 3:16 hikɨ mɨpaɨ kaniutayɨni: —Yawé mɨpaɨ kanaineni: “'Akite xekenanuye'inixɨa 'ikɨ mayeweritsie”.
2KI 3:17 Yawé mɨpaɨ kanaineni: “Tsepanetɨ wiyeri xemɨkaxeiyani meta 'eka, naitsarie haa kanitihɨnimɨkɨ mayeweritsie, xeme xekaniyɨwawekuni mana xemɨtiharenikɨ meta xetewama”.
2KI 3:18 Peru 'ikɨ Yawé hepaɨtsita tixaɨtɨ pɨkatihɨkɨ, matsi 'akuxi kaniwayetuamɨkɨ muhawitsixi xeme xemɨwaka'unakɨ.
2KI 3:19 Xeme naime kiekarite yukuraru 'amatitetewa memexeiya xekaniwaka'unakuni meta kiekarite haitɨakate memɨhɨkɨ. Kɨyexi 'aixɨa mɨ'anene xekanitiwitekuni, haixate naime xekananukanaxɨakuni, meta memaka'etsatsie tetexi xekanayeitɨakuni.
2KI 3:20 'Uxa'arieka ximeri kepauka maye'a mawari matiwewiwatsie, naitsarie haa kaniutahɨne, 'Erumi kwieyaritsie hakaneikakaku.
2KI 3:21 Hikɨ kepauka muhawitsixi mɨpaɨ memɨtehetima kename te'aitamete meyuhaikatɨ mehayekɨnekai wahepa mewatakwinike, mɨkɨta mekaniwarukuha'aritɨani yunaime teɨteri kuyakɨ memɨyɨwawekai, hikɨ wakwie manuye'atɨkatsie mekanikuyaxe.
2KI 3:22 Kepauka mɨkɨ ximeri memanuku'ui, tau hapa kanikakɨxekaitɨni, muhawitsixi mɨpaɨ mekateniuneniere haa kanixetakaitɨni xuriya hepaɨ.
2KI 3:23 Muhawitari mɨpaɨ mekaniutiyuani: «Kamɨ xuriya kanihɨkɨtɨni. Mɨkɨ te'aitamete xɨari mepuyutakwi, mepuyukwi yuxaɨta. Muhawitsixi, hikɨmɨtɨka tepɨtetɨyu wapiini».
2KI 3:24 Kepauka muhawitsixi memuta'axɨa 'ixaheritsixi mematiteitsie, 'ixaheritsixi mepɨwarutakwi hikɨ mekaniwara'iwa. Hipatɨ mekaniyuta'unakaitɨni peru 'ixaheritsixi mekaniwaranukuweiya mekaniwarekwini,
2KI 3:25 meta wakiekarite mekaniuka'unaxɨani. Yuxexuitɨ 'ixaheritsixi xexuime tetexi mekaniutituani kwie 'aixɨa mɨ'anetsie mekanitihɨniya, meta haixate mekananuteukixɨani meta kɨyexi mekanakuwiteni 'aixɨa mɨ'anenekai. Kiekari Kixi-Karetseti xeikɨa kaniyuhayewakaitɨni, peru texupamekɨ tetuaxamete mekanaketɨkɨne, hikɨ mekanikemakaxɨani mekanika'una.
2KI 3:26 Muhawi kwieyaritsie ti'aitame 'uniereka kemɨra'iwarieximekai, kuyaxi kaniwaruta'inieni 'atahuta tsienituyari 'Erumi kwieyaritsie ti'aitame hetsɨa paitɨ mɨye'anikɨ, peru puyutatexi.
2KI 3:27 Hikɨ 'ayumieme yuniwe mexɨakame kaniumieni, mɨkɨ nu'aya ti'aitame mayanikekai 'utɨmana, hikɨ kuraru 'amatitewatsie kɨmana mawari taiyariyari kaniuwewieni. Mɨpaɨ tiuyɨku 'Ixaheritsixi wahetsiemieme waɨkawa mekaniuyeha'ani, 'anari mɨkɨ yukiekaritsie mekanekɨne.
2KI 4:1 Merikɨtsɨ xewitɨ Kakaɨyari niukameya wiuraya 'Eritseu mɨpaɨ katiniutahɨawe: —Nekɨna mati'uximayatsiriwame kaniumɨni, 'ekɨ pekatinimaika mɨkɨ Yawé hetsiemieme 'aixɨa katiniyurienekaitɨni. Peru hikɨri xewitɨ tewi temɨte'epinirie kaninuamɨkɨ neniwema yuhutame waranuwitɨnike waɨriyarika te'uximayatamete mɨwarayeitɨanikɨ.
2KI 4:2 'Eritseu mɨpaɨ katinita'iwawiya: —¿Keri ne nematiparewieni? Yakenetineutahɨawi, ¿'akie ketita perexeiya? Wiura mɨpaɨ katinita'eiya: —Ne mati'uximayatsiriwame tixaɨtɨ nepɨkarexeiya nekita, 'etsiwa xeikɨa huriwa hatseitiyari nepexeiya puteyu 'etsipemetsie.
2KI 4:3 Merikɨte 'Eritseu mɨpaɨ katinita'aitɨani: —Kenemieka hikɨ 'akie hurawatari keniwarekawawiri xarite mekematsihetaniɨtɨani, kepaɨmeme tsepa pemekaxeiya.
2KI 4:4 Hikɨ 'ana yukiita xekeneutahaxɨa 'aniwema yunaitɨ meta xeketeneunama kitenie. Hatseiti 'etsimupetsie mieme xariteta keneukatuaxɨa naimeta, kemɨ'aneri mɨtihɨpɨrikeni xaɨtsie pe'itiyayatsatɨ.
2KI 4:5 Hikɨ wiura 'Eritseu 'utateutɨaka, yukie kaneyani. Merikɨte yuniwema wahamatɨa heuyunaka kanitsutɨani xarite tihɨniyatɨ niwemamata meni'atɨiriwakaitɨni.
2KI 4:6 Kepaukari naitɨ mɨhɨpɨnekai, mɨkɨ yuniwe tawari kaniutawawirieni xeime xari, mɨkɨ mɨpaɨ kaniutayɨni: «Matsi pumaweri». Hikɨ 'ana hatseiti kaniuyewani 'etsimupetsie.
2KI 4:7 Hikɨ 'uka kaneyani tewi Kakaɨyari hetsɨa mieme hetsɨa, katinitaxatɨani kemɨtiuyɨkai. Hikɨ mɨkɨ mɨpaɨta katinita'aitɨani: «Hikɨ kenemieri hatseiti kenetua, kɨmana ketineyutua pemɨrapine. Hikɨ kepaɨmetɨ meyuhayewa 'ekɨ meta 'aniwema kɨmana xetenanetɨ 'axepu'uwani».
2KI 4:8 Merikɨte 'Eritseu, Tsuneni kiekariyaritsie 'uyemiekaku mana xewitɨ 'ukaratsi waɨkawa rexeiyatɨ waɨriyarika yukie kanita'inieni mɨrekwanikɨ. 'Anatɨtɨ kepauka mana muyeyeikakai mana katinitikwa'akaitɨni.
2KI 4:9 'Uka yukɨna mɨpaɨ katiniutahɨawe: «Neuxei, ne yanepɨtimate 'ikɨ tewi takie muta'axe, xɨari tewi Kakaɨyari hetsɨa mieme mɨpatsie pɨhɨkɨ.
2KI 4:10 Xeime kiiya tepɨtawewieni takii heima, muwa mayehupunikɨ 'utaya tepɨkawewieni meta mexaya 'ɨparieya hauyutinɨkame meta kɨxemeya. Kepauka mɨtatsiha'iwatamie meixeiyanikɨ hakewa mayehupuni».
2KI 4:11 Mɨpaɨ mete'uyurieku 'Eritseu kaninuani, muwa heutiyaka kaniukahuni.
2KI 4:12 Hikɨ yuparewiwame Kihetsi mɨpaɨ katiniutahɨawe: —'Ukaratsi keneta'ini. Ti'uximayatsiriwame mɨpaɨ katinitahɨawe, hikɨ 'ana mɨkɨ kaninuani.
2KI 4:13 Hikɨ 'Eritseu Kihetsi mɨpaɨ katiniutahɨawe: —'Ukaratsi mɨpaɨ ketinetahɨawi: “Waɨkawa pepɨ'a'uximatɨa tahetsiemieme. ¿Kenetiyurieni 'ahetsiemieme? ¿Matinake xɨka ti'aitame yatɨni kuyaxi tiwa'aitɨwame 'ahetsiemieme ne'utahɨawe?” Peru 'ukaratsi mɨpaɨ kaniutayɨni: —Ne 'aixɨa 'iyari nepuyeika neteɨterima watsata.
2KI 4:14 Hikɨ 'Eritseu Kihetsi mɨpaɨ katiniuta'iwawiya: —¿Kenetiyurieni hetsiena mieme? Ti'uximayatame mɨpaɨ kaniutayɨni: —Mɨkɨ tɨɨri pɨkawarexeiya meta kɨnaya 'ari kani'ukiratsitɨni.
2KI 4:15 'Eritseu mɨpaɨ kaniutayɨni: —Keneta'ini. Kihetsi kaneita'inieni, mɨkɨ 'ana kitenie kaniutakeni.
2KI 4:16 Hikɨ 'Eritseu mɨpaɨ katinitaxatɨani: —Yurika 'epauka nunutsi pekanexeiyakamɨkɨ. 'Ukaratsi mɨpaɨ katinita'eiya: —Hawaikɨ, neti'aitɨwame, 'ekɨ tewi Kakaɨyari hetsɨa pemumieme. Hawaikɨ ne matsiparewiwame pepɨkaneti'itaiyaneni.
2KI 4:17 Mɨpaɨ katiniuyɨni, mɨkɨ 'ukaratsi kaniutihukata. Kemɨrahɨawarɨwakai yurikatsiena mɨkɨ tukaritsie kaniutiniweni, 'Eritseu kemɨrehɨawekai.
2KI 4:18 Nunutsi kaniutawere, heiwa yupaapa hetsɨa kanekuyeixɨani, mɨra'uximayatsiekaitsie meyeikakai.
2KI 4:19 Hikɨ yapauka mɨpaɨ yupaapa katiniutahiwieni: —'Ai nemu'u. Nemu'u pɨnetsi'ukukuine. Paapaya xeime tiyu'uximayatsiriwame mɨpaɨ katiniuta'aitɨani: —Maamaya hetsɨa kenetuamie.
2KI 4:20 Ti'uximayatame kaneitɨni maamaya hetsɨa paitɨ, hikɨ yutunutsie heikukwekaku tuka kanaye'ani, 'ana nunutsi kaniumɨni.
2KI 4:21 Hikɨ maamaya kananutiyani yukii heima tewi Kakaɨyari hetsɨa mieme 'utayatsie yuniwe kanateni, kitenie reunaka kaniwayeyani.
2KI 4:22 Hikɨ yukɨna kaniutahiwieni mɨpaɨ katinitahɨawe: —Xeime ti'uximayatame keneneuniɨtɨa meta puxu 'ukaratsi, tewi Kakaɨyari hetsɨa mieme kie nekanimieni, kwitɨwata nekaninuamɨkɨ.
2KI 4:23 Kɨnaya mɨpaɨ katinita'iwawiya: —¿Titayarikuta hikɨ kwitɨwa hetsɨana petimie? Metseri hekwame 'ixɨarariyari pɨkahɨkɨ meta 'uxipiya tukari. Mɨkɨ mɨpaɨ katiniuta'ani: —Tsepatsɨ.
2KI 4:24 Hikɨ 'ana puxu kaniutixiratɨani meta ti'uximayatame mɨpaɨ katiniutahɨawe: —Hikɨmɨ xeiya tepɨyehu teka'uxipietɨ, kepaukake yanemetayɨni.
2KI 4:25 Merikɨte 'ukaratsi kanayeyani, Kaximeru hɨriyaritsie paitɨ kaniye'ani, 'Eritseu manukateitsie paitɨ, tewi Kakaɨyari hetsɨa mieme. Hikɨ mɨkɨ kanixeiya 'ateewa hamiekame. 'Ana yuparewiwame Kihetsi mɨtitewa mɨpaɨ katiniutahɨawe: —Neuxei. Huma pamie 'ukaratsi Tsunemi kiekame.
2KI 4:26 Xeiya kenenakimie, keneta'iwawiya mɨkɨ 'aixɨa kapɨreu'erie, nu'aya meta kɨnaya 'aixɨa mekapɨtehaka'iyuniwa. Ti'uximayatame kaneikunake, 'ukaratsi kename yunaitɨ 'aixɨa meteheu'erie kaniutayɨni.
2KI 4:27 Kepauka hɨritsie paitɨ munua tewi Kakaɨyari hetsɨa mieme manukateitsie, 'ɨkateyatsie kanikawiere. Kihetsi hurawa 'uyaka kaneikuhanakekaitɨni, peru tewi Kakaɨyari hetsɨa mieme mɨpaɨ katinita'imaiya: —Kenehayewani. Waɨkawa puyuhiwerie meta Yawé kanetinanukanamirieka kemɨreyɨ, 'akuxi 'atsipɨkanetitahɨawiwe.
2KI 4:28 Hikɨ 'ukaratsi mɨpaɨ kaniutayɨni: —Neti'aitɨwame, ¿nekuta 'ekɨ nunutsi nemetiutawawiri? ¿Tamɨ mɨpaɨ nekarainekai kename pekaneti'itaiyanenikekai?
2KI 4:29 'Eritseu Kihetsi mɨpaɨ katiniutahɨawe: —Keni'akuha'aritɨaka, ne'itsɨ kenakwetɨ kenemie huyeta. Xɨka xeime pehanukunake, pepɨkaheiwaɨritɨaka, xɨka xewitɨ matsihahɨaweni, pepɨkaheiku'eiyani. Kepauka pemeta'ani, mɨkɨ 'itsɨ nunutsi nierikayatsie kenateka.
2KI 4:30 Peru nunutsi maamaya mɨpaɨ kaniutayɨni: —Ne yurikɨ mɨpaɨ nekanaineni Yawé mayeyurikɨ meta 'ekɨ, ne nekie nepɨkahakunuani xɨka pekanetsiheweiya. Hikɨ 'ana 'Eritseu kananukukeni kaneyani hamatɨana.
2KI 4:31 Kihetsi meri manuyehaitɨakai nuaka nunutsi nierikayatsie 'itsɨ kaniutiteni, peru 'ikɨ pɨka'utaniu meta pɨka'ukuyuaxɨa tixaɨtɨ 'inɨari pɨkatiuyuri. 'Ayumieme, Kihetsi 'Eritseu kaniwarekunake mɨpaɨ katinitahɨawe: —Nunutsi pɨkahekuyuane pɨkahanutaneniere.
2KI 4:32 Kepauka 'Eritseu wakie munua, nunutsi mɨkime kaniutaxeiya, 'utatsie 'akakaikame.
2KI 4:33 Kiita hautahaka, nunutsi muyekatei, kitenie reunaka Yawé kaniutahɨawe.
2KI 4:34 Hikɨ 'utatsie hautiyaka nunutsi hetsie kanahuni tetana keneikahɨtsieni, meta mamateyatsie kawɨtɨ, kepaukake nunutsi mutaxɨrixɨ.
2KI 4:35 Hikɨ 'Eritseu 'anukukeka kaniutiyatɨyani kiita yeyeikatɨ, kwitɨta nunutsi hetsie kaneutihuni, 'anakeri 'atahutamexɨa nunutsi kaniutakuku meta yɨhɨxite kanutayepiexɨani.
2KI 4:36 Hikɨ 'Eritseu Kihetsi mɨpaɨ katiniutahɨawe: —Maamaya kene'inimie. Kihetsi katineikuxatɨani, kepauka 'ukaratsi munua, 'Eritseu mɨpaɨ katinitahɨawe: —'Ari 'aniwe kenawitɨtɨri.
2KI 4:37 Mɨkɨ hautahaka, 'Eritseu 'ɨkayatɨa kaniukahɨximakeni pamɨpariyutsi 'ipitɨanike. Hikɨ 'anake yuniwe 'awitɨtɨ kaneyani.
2KI 4:38 Merikɨtsɨ 'Eritseu Kirikari kaninuani 'ana mana kanihaakaxatɨkaitɨni mɨkɨ kwieyaritsie. Mana kiekatari Kakaɨyari niukametemama wahamatɨa kaniuyuhayewa, hikɨ 'Eritseu tiyu'uximayatsiriwame mɨpaɨ katiniuta'aitɨani: «Xari 'amɨnena mana taipa keneuyeyeka 'itsari keneukawewi Kakaɨyari niukametemama memɨtekwanikɨ».
2KI 4:39 'Ana, xewitɨ wa'iwa kanayeyani yeuta tupiriya heupimieka, muwa 'iteɨri yeuta mieme kanetaxeiya hikɨ waɨkawa 'ikwaxiyari kaneka'inɨni kaneitahɨniya yukamixatsie. 'Akunuaka kanitixiteni yapepeme mɨkɨ 'itsarita kaneikaxɨrieni 'atsikatimaitɨ tita mɨtihɨkɨtɨkai.
2KI 4:40 Kepauka 'ikwai makatuariexɨa, kepauka teɨteri memekwaixɨa, mɨpaɨ mekateniuhiwa: —Neuxei, tewi Kakaɨyari hetsɨa pemumieme, 'ikɨ 'ikwai pu'uayema. 'Ana mɨkɨ mepɨka'uyɨwekaxɨa memikwanikɨ.
2KI 4:41 Hikɨ 'Eritseu mɨpaɨ kaniutayɨni: —Tɨriku harinayari xekenatu'i. Hikɨ harina 'itsarita heukawiwiekari, mɨpaɨ kaniutayɨni: —Teɨteri xekeniwarakatu'iriexɨari memɨtekwanikɨ. 'Anari 'aixɨa 'iyari mepɨte'ukwai, tawari mepɨkate'utikwikwinixɨ.
2KI 4:42 Xewitɨ Wahari-Tsaritsa heyeyaka kaninuani paa ha'ɨtɨ, tewi Kakaɨyari hetsɨa mieme tikutuirienetɨ 'ikwaxi mexɨakame timieme: xeitewiyari tsewara payari meta tɨriku takariyari hehekwame. 'Eritseu yuparewiwame mɨpaɨ katiniutahɨawe: —Ketiniwarumikwa teɨteri.
2KI 4:43 Ti'uximayatsiriwame mɨpaɨ kaniutayɨni: —¿Kenetiwamini teɨteri xeitsienituyari memɨhɨkɨ? Peru 'Eritseu mɨpaɨ katinitahɨawe: —Teɨteri ketiniwarumikwa, Yawé mɨpaɨ kanaineni: “Mekatenikwaikuni meta waɨkawa katiniyuhayewamɨkɨ”.
2KI 4:44 Hikɨ ti'uximayatame paa kaniwarumini, Yawé kemainekai, teɨteri mekateniukwani meta waɨkawa katiniuyuhayewa.
2KI 5:1 Merikɨtsɨ Nahamani, Tsiriya kwieyaritsie ti'aitame kuyaximama wa'ukiyari kanihɨkɨtɨkaitɨni, mɨkɨ tewi waɨkawa mɨtiyunaki'erie, ti'aitame waɨkawa pinaki'eriekai, mɨkɨ 'iparewiekaku Yawé mipitɨakaikɨ mɨrayu'iwakɨ yumienetɨ. Mɨkɨ kuya mɨkama kanihɨkɨtɨkaitɨni, peru nawi kwiniyayari kanexeiyakaitɨni.
2KI 5:2 Merikɨtsɨ heiwa kuyaxi tsiriyutsixi mekanayekɨkakaitɨni meku'uwatɨ metekunawatɨwetɨ, 'ana 'uka 'ɨimari 'Ixaheri kiekame mekaniunawani, mɨkɨ Nahamani 'ɨyaya ti'uximayatsiriwame mekanayeitɨani.
2KI 5:3 Heiwa mɨkɨ 'uka mɨti'aitɨa mɨpaɨ katiniutahɨawe: «'Aixɨa pɨyɨnikeyu neti'aitɨwame Kakaɨyari niukameya Tsamariya kiekariyaritsie meka hetsɨa xɨka heuyani, mɨkɨ 'aixɨa kaniyuriweni kemɨtikuye yunawiyaritsie».
2KI 5:4 Hikɨ Nahamani 'uka 'Ixaheri kiekame kemainekai ti'aitame mɨpaɨ katiniutahɨawe.
2KI 5:5 Tsiriya kwieyaritsie ti'aitame mɨpaɨ katinita'eiya: —'Aixɨa kani'aneni kenemie, neta 'Ixaheri kwieyaritsie ti'aitame xapa nekananunɨ'airiemɨkɨ. Hikɨ 'ana Nahamani kaneyani, haika tsienituyari heimana huta tewiyari kiruyari raheteme pɨrata ha'ikatatɨ meta haika tewiyari heimana 'atahaika kiruyari raheteme huru meta tamamata kemarite.
2KI 5:6 Xapa 'Ixaheri kwieyaritsie ti'aitame mehuriyarie mɨpaɨ katine'ukaitɨni: «Kepauka xapa 'ahetsɨa meye'ani, kemɨ'ane mɨmatsihe'atɨiri Nahamani kanehɨkɨtɨni, mɨkɨ nekuyaxima wa'ukiyari kanihɨkɨtɨni. Nekamanenɨ'airieni nawi kwiniyayari kemɨrexeiya 'aixɨa 'aneme pemayeitɨanikɨ».
2KI 5:7 Xapa hakaterɨwaka, 'Ixaheri kwieyaritsie ti'aitame yukamixa kaneukatsana meta mɨpaɨ kaniutayɨni: «¿Nekuta Kakaɨyari netihɨkɨ? Ne nepɨkayɨwe xewitɨ mɨmɨnikɨ mexɨkatɨni manutanierekɨ nemipitɨani. ¿Titayari mɨkɨ netiwawirie nawi kwiniyayari mexeiya 'aixɨa 'aneme pemayeitɨanikɨ? Kaukatɨ mɨkɨ haxɨa mekuwautɨwe xeikɨa tahamatɨa».
2KI 5:8 'Eritseu, tewi Kakaɨyari hetsɨa mieme, kepauka mɨtiutamari kename 'ixaheritsixi tiwa'aitɨwame yukamixa haukatsanakai, niuki kaneinɨ'airieni mɨpaɨ haineme: «¿Ketitayari waɨkawa peti'a'uximatɨa? 'Ekɨ mɨkɨ tewi kenenanɨ'airi, yamɨretimanikɨ kename Kakaɨyari niukameya 'a'uyeika 'Ixaheri kwieyaritsie».
2KI 5:9 Hikɨ Nahamani kaneyani 'Eritseu kie yuteɨterima warawitɨtɨ yukawayutsixi meta yukaxetate mewarahapatɨ, hikɨ kiiya kiteniena hɨxie mekaniu'axɨani.
2KI 5:10 Hikɨ 'Eritseu ti'uximayatame yuhetsɨa mieme kanenɨ'ani mɨpaɨ mɨreitahɨawekɨ: «Kenemie 'atahutamexɨa kenekahaki Kurutani hatuxameyaritsie, 'ana 'anawiyaritsie 'aixɨa pe'anetɨ pekanayeimɨkɨ meta pe'itiyatɨ pekanayeimɨkɨ».
2KI 5:11 Hikɨ Nahamani ha'atɨ kaneyani mɨpaɨ 'utaitɨ: «Ne mɨpaɨ nepɨtiku'eriwakai tewi Kakaɨyari niukameya wayeyanike nepɨ'eriekai netsi'anunakeke, Kakaɨyari Yawé tawawirienike, meta nehetsɨa hatametɨ newaiyari 'anayehɨanike nepɨ'eriekai.
2KI 5:12 ¿Matsi Ramatsiku hayari 'Awaná meta Paripaxi hatuxameyarite kari 'aixɨa pɨka'anene keyuri haa 'Ixaheri kwieyaritsie mieme? ¿Kari mana nemeyukahauxini pɨkaheyɨwe hikɨ 'aixɨa nemɨyɨnikɨ?» Hikɨ ha'atɨ kaneyani yu'ɨtɨma.
2KI 5:13 Merikɨte 'iparewiwamete hurawa mekanewakɨne mɨpaɨ mete'itaxatɨanike: «Tati'aitɨwame, xɨka Kakaɨyari niukameya kwaniwemekɨ mereta'aitɨanike. ¿Tamɨ yapekatikayeiwe? Matsi 'aixɨa kani'aneni hikɨ xɨka xeikɨa pekahamɨkɨ hapa, 'ana mɨpaɨ pe'itiyatɨ pekanayeimɨkɨ».
2KI 5:14 Hikɨ Nahamani Kurutani hatuxameyaritsie kaneyani, mana 'atahuta mexɨa kaniukahani, tewi Kakaɨyari hetsɨa mieme kemɨtitahɨawekai. 'Anake nawiyarieya 'aixɨa kaniuyɨni nunutsi nawiyarieya hepaɨ, 'ana 'itiyatɨ kanayani.
2KI 5:15 'Aixɨa 'anetɨ Namahani, kaninuani yunaime memeweiya warawitɨtɨ, tewi Kakaɨyari hetsɨa mieme hɨxie 'uwetɨ, mɨpaɨ kaniutayɨni: —Hikɨ mɨpaɨ nepɨretima pumawe Kakaɨyari naitsarie kwiepa, 'Ixaheri kwieyaritsie xeikɨa payexeiyarie yuri Kakaɨyari. Merikɨ yemekɨ keneutanaki'eri 'ekɨta ne'imikieri.
2KI 5:16 Hikɨ 'Eritseu mɨpaɨ kaniutayɨni: —Yurikɨ mɨpaɨ nekanaineni Yawé mayeyuri hɨxie 'anemuyeikakɨ, kemɨ'ane nemɨti'uximayatsirie, ne tixaɨtɨ nepɨkaranupini. Tsepa waɨriyarika mɨtiyexatɨakai Nahamani, 'Eritseu pɨkatitanaki'eriri.
2KI 5:17 Hikɨ Nahamani mɨpaɨ kaniutayɨni: —Kamɨtsɨ, 'ekɨ keneneupitɨa huta 'ikayari kwie nemanu'ikatakɨ 'ena mieme, hikɨri 'enamɨtiyehane ne ti'a'uximayatsiriwame tawari kakaɨyarixi mawari taiyariyari meta hipame mawari nepɨkawawewirieni, matsi Yawé hetsiemieme xeikɨa.
2KI 5:18 Kepauka mana neti'aitɨwame, Ximuni tukieyata yukakaɨyari meuhɨawimie nemamatsie 'ana kaniyukɨtɨrɨkariyani, ne mɨpaɨ nepɨtimaika waɨriyarika pɨnetsipitɨaka nemakatutsirekɨ, 'ayumieme Yawé mɨpaɨ nepɨrahɨawe kenereuyehɨwirieka mɨkɨ tukita nemɨtitunumakenikɨ.
2KI 5:19 'Eritseu mɨpaɨ katinitahɨawe: —Kenemie 'atsipekati'akɨhɨawetɨ. Hikɨ 'ana Nahamani kaneyani, 'ariri yateewa peumiekai,
2KI 5:20 kepauka 'Eritseu tewi Kakaɨyari hetsɨa mieme parewiwameya Kihetsi mɨpaɨ pɨtiu'eri: «'Eritseu neti'aitɨwame waɨkawa 'aixɨa pɨtiuka'iyari, 'ikɨ Tsiriya kiekame Nahamani nitixaɨtɨ pɨkatitanaki'eriri ketita mɨtixatɨakai. Peru ne mɨkɨ nepenukuweiya, heiwatɨ tixaɨtɨ neremini. Yurikɨ mɨpaɨ nepaine Yawé 'amuyeikakɨ mayeyuri».
2KI 5:21 Hikɨ Kihetsi kaneyani Nahamani 'anuku'axeke. Kepauka mɨkɨ mixei 'utɨmana 'unautsarɨmekaku, yukaxetatsie kananakayani 'itahɨaweke, mɨpaɨ katinita'iwawiya: —¿Kereyɨ?
2KI 5:22 Kihetsi mɨpaɨ katinita'eiya: —Hawaikɨ 'atsipɨkareyɨ. 'Eritsehu neti'aitɨwame kaneneyenɨ'ani mɨpaɨ nemɨmatitahɨawekɨ: “Yuhutatɨ temari mekaniu'axɨani Kakaɨyari niukametemama 'Epɨrahini hɨriyaritsie mehakanexɨaka. Nepɨmatsiwawirie mɨkɨ wahetsiemieme, haika miriyayari pɨrata tuminiyari meta hutame kemariteyari”.
2KI 5:23 Nahamani mɨpaɨ kaniutayɨni yuwaɨriyatɨ mitanaki'erienikɨ: —Neuxei, 'ataxewi miriyari pɨrata tuminiyari kenatɨtɨ. Hikɨ huta kuxitariyarita kanikayatsirieni pɨrata meta hutame kemariyarite, 'ikɨ tinaime yuhutame te'uximayatamete katiniwarutɨtɨani Kihetsi memɨtehanutɨkirienikɨ.
2KI 5:24 Kepauka memuta'axɨa yemuri mematitekaitsie, Kihetsi mɨkɨ huta kuxitariyari kaniuti'awieta yukiita, hikɨ 'ana kaniwarutateutɨani mɨkɨ teɨteri tsiriyutsixi Nahamani hetsɨa mekanekɨne.
2KI 5:25 Merikɨte Kihetsi 'Eritseu hetsɨa kaninuani. 'Eritseu mɨpaɨ katinita'iwawiya: —¿Kihetsi hakewa pepanutɨa? Kihetsi mɨpaɨ katinita'eiya: —Matsi hawaikɨ nepɨkahanumie ne mati'uximayatsiriwame.
2KI 5:26 Peru 'Eritseu mɨpaɨ katinitahɨawe: —Ne mana ne'iyari kaniuyeikakaitɨni, kepauka 'iya manakatɨatsie yukaxetatsie, mɨmatsitahɨawekɨ. 'Ikɨ tukaritsie pɨkaheuyewetse temɨtehanupinenikɨ, pɨrata, kemarite, harawerite, muxatsi, tuurutsixi kwietsanamete, meta teɨteri te'uximayatamete 'ukitsi 'ukari.
2KI 5:27 Hikɨ Nahamani nawi kwiniyayari mexeiyakai pehexeiyatɨ pekanayeimɨkɨ meta yunaitɨ 'anuiwarite wahetsie katininakimɨkɨ yuheyemekɨ. Hikɨ Kihetsi 'amɨranuyetɨa 'Eritseu hɨxie, peixeiyakai nawi kwiniyayari 'ɨwi mutuxa hepaɨ peu'anekai.
2KI 6:1 Merikɨtsɨ Kakaɨyari niukametemama 'Eritseu mɨpaɨ mekateniutahɨawe: —'Ekɨ pekaniniereni, hikɨ 'ena temakuteitsie 'etsikanakuyeuka tahetsiemieme.
2KI 6:2 'Aixɨa pɨ'ane xɨka tehekɨne Kurutani paitɨ. Mana kɨyexi pexɨawe, kii tepetawewieni muwa temayetenikɨ. 'Eritseu mɨpaɨ katiniuta'ani: —'Aixɨa pɨ'ane, xekenehu.
2KI 6:3 Peru xewitɨ mɨkɨ wa'iwa mɨpaɨ 'Eritseu katiniutahɨawe: —Ketananuteɨta, tame mate'uximayatsiriwamete. 'Eritseu mɨpaɨ kaniutayɨni: —Nekanimieni.
2KI 6:4 Hikɨ wahamatɨa kaneyani, kepauka Kurutani memuta'axɨa 'ana kɨyexi mekaniutiwiteni.
2KI 6:5 Hikɨ xewitɨ Kakaɨyari niukameya xeime kɨye hawitekekaku hatsa kananutihɨne hatuxametsie kaneukaweni. Hikɨ mɨpaɨ katiniuhiwa: —Neuxei neti'aitɨwame, mɨkɨ hatsa pɨkanepinitɨkai.
2KI 6:6 Tewi Kakaɨyari hetsɨa mieme mɨpaɨ katinita'iwawiya: —¿Hakewa peukawe? Kepauka mitaxatɨa hakewa meukamiekai hatsa, hikɨ 'Eritseu kɨye mamayari kanawiteni, muwa kaneikahɨani 'ana hatsa kananuyewiere haa heima.
2KI 6:7 'Eritseu mɨpaɨ kaniutayɨni: —Kenanatitu'i. Hikɨ yumama 'utatseraka kanenatituni.
2KI 6:8 Merikɨtsɨ Tsiriya kwieyaritsie ti'aitame 'Ixaheri kwieyaritsie ti'aitame hamatɨa kaniyumienekaitɨni, hikɨ 'iparewiwamete wahamatɨa tiutixataka, mɨpaɨ katiniwarutahɨawe: «Hikɨmɨ mana tekanekuyaxikuni».
2KI 6:9 Peru tewi Kakaɨyari hetsɨa mieme 'ikɨ niuki 'Ixaheri kwieyaritsie ti'aitame kanenɨ'airieni: «Keneyukweriwayurieka mana pepɨka'ayeyeikani, mana tsiriyutsixi mekamanihupieka».
2KI 6:10 Merikɨte 'Ixaheri kwieyaritsie ti'aitame yukuyaxima mana kaniwarenɨ'ani memɨtehetimanikɨ tewi Kakaɨyari hetsɨa mieme hakewa mexatakai. Mɨixamexɨa tawari 'Eritseu 'Ixaheritsie ti'aitame mɨpaɨ katinayehɨtɨani, hikɨ mɨkɨ mɨpaɨ katiniyukweriwayuriekaitɨni.
2KI 6:11 Tsiriya kwieyaritsie ti'aitame, ha'atɨ mɨyamɨtiyɨanekaikɨ, kuyaximama tewa'aitɨwamete waruta'inieka mɨpaɨ katiniwarutatieni: —Yaxekeneteneutahɨawi, ¿kemɨ'ane tahetsɨa miemetɨtɨ 'Ixaheri kwieyaritsie ti'aitame yapɨtikuxaxatɨwa?
2KI 6:12 Mɨkɨ wa'iwa xewitɨ mɨpaɨ kaniutayuni: —Neti'aitɨwame, nixewitɨ. 'Eritseu kanihɨkɨtɨni Kakaɨyari niukameya 'Ixaheritsie meyeika. Mɨkɨ naime 'Ixaheri kwieyaritsie ti'aitame yakatinikuxaxatɨwani, metatsiere naime 'ekɨ ti'aitame kepemutaine 'awie pemuyehuputsie.
2KI 6:13 Hikɨ ti'aitame mɨpaɨ katiniuta'aita: —Kamɨtsɨ xekeneuti'iwau hakewa meyeika, mana nemɨtitanɨ'anikɨ mɨwiyarienikɨ. Kepauka mɨtiutaxatɨarie kename Rutani 'Eritseu heyeikakai,
2KI 6:14 hikɨ ti'aitame mana kaniwarutanɨ'ani yuwaɨkawa kuyaxi kawayutsixi wahetsie me'utekame meta kaxetate kuyaxa miemete. Kiekari warita mekana'utɨkɨne yɨwikɨta mehaye'axɨaka.
2KI 6:15 'Uxa'arieka ximeri tewi Kakaɨyari hetsɨa mieme ti'uximayatsiriwameya kananukukeni, hikɨ kuyaxi kawayutsixi wahetsie me'utekame meta kaxetate kuyaxa miemete kiekari warita kaniwaruxeiya. Ti'uximayatame mɨpaɨ kaniutayɨni: —Neuxei neti'aitɨwame, ¿keri teyɨaka?
2KI 6:16 'Eritseu mɨpaɨ katinita'eiya: —Hawaikɨ pepɨkamaka. Memɨtatsinɨ'ɨ matsi mekaniyuwaɨkawani mɨkɨ 'etsimekaniyupaɨmeni.
2KI 6:17 Hikɨ 'Eritseu mɨpaɨ katiniuyutanenewieni: «Yawé, Kihetsi kenanutanieritɨa ti'uximayatame mɨnierekɨ». Yawé mɨpaɨ katiniuyurieni, hikɨ ti'uximayatame kaniwaruxeiya yemuri 'etsimupetsie kawayutsixi tai hepaɨ meteyuxexeiyame meta kaxetate yaxeikɨa meteyuxexeiyame mehakutsekame 'Eritseu wawarita.
2KI 6:18 Kepaukari 'ahurawa memahukai tsiriyutsixi, 'Eritseu kanitsutɨani yunenewietɨ: «Yawé 'aku, 'ikɨ teɨteri keniwarakɨpiriyaxɨa». Yawé yakatiniuyurieni 'Eritseu kemɨtitawawiri.
2KI 6:19 Hikɨ 'Eritseu mɨpaɨ katiniwarutahɨawe: «'Ikɨ kiekari pɨkahɨkɨ hakewa xemeukɨnekai, xeime huyeyari pɨta xekananukuweiya. Hikɨmɨ xekenenanuweiya ne nekanixe'anuwitɨmɨkɨ hakewa tewi xemikuwautɨwe meyeika». Peru mɨkɨ Tsamariya pɨta kaniwarewitɨni.
2KI 6:20 'Ari kiekaritsie mehautahaxɨaku, 'Eritseu mɨpaɨ kaniutayɨni: «Yawé, keniwaranutanieritɨa meheunenieretɨ memakɨnekɨ». Yawé mɨpaɨ katiniuyurieni, mɨkɨ memauyutamaixɨa Tsamariyatsie paitɨ mekaniyɨakaitɨni.
2KI 6:21 Kepauka 'Ixaheri kwieyaritsie ti'aitame mɨwaruxei, 'Eritseu mɨpaɨ katiniuta'iwawiya: —Neti'aitɨwame, ¿netiwakwini? ¿Netiwakwini?
2KI 6:22 'Eritseu mɨpaɨ katinita'eiya: —Hawaikɨ, pepɨkawakukukuyani. ¿'Ekɨ kuta 'a'ixiparakɨ meta 'a'ɨrɨkɨ petiwarutiwi, titayari petiwakwimɨkɨ? 'Aixɨa pɨyɨni matsi 'ikwai meta haa ketiniwakupiniri memɨtekwanikɨ meta memanuharenikɨ, meta keniwarupitɨata memakunuaxɨanikɨ hakewa tiwa'aitɨwame meka.
2KI 6:23 Hikɨ 'ixaheritsie ti'aitame waɨkawa 'ikwai katiniwaruta'aitsirieni. Kepauka memɨte'utahayewaxɨ metekwatɨ, kaniwarutateutɨani 'ana mɨkɨ tiyu'aitɨwame hetsɨa mekanekɨne. Mana mɨtiyehane tsiriyutsixi tawari 'Ixaheri kwieyaritsie mepɨkaheutahaxɨa yɨkɨmana metekunawatɨwetɨ.
2KI 6:24 Yapaɨmexɨa wiyari 'anukayaku, Weni-'Arari Tsiriya kwieyaritsie ti'aitame, yukuyaxima yunaime kaniwarukuyuitɨani Tsamariya kiekariyari warita memayaxetɨkɨnekɨ. Xewitɨ meutahani meta muwayeyani pɨkayɨwekai, hikɨ 'ikwai mekateniuxɨni.
2KI 6:25 Mɨixa tukari memukunamiekaikɨ waɨkawa haakaxa kaniutixuawere, 'ayumieme mana puxu mu'uya kaninanaiyakaitɨni xeikiruyari pɨrata tepɨayarikɨ meta kukuruxi wamiri xeiwatsuyari haika tewiyari kɨramuyari.
2KI 6:26 Heiwa, ti'aitame kiekari kuraruyari 'amatayewatsie 'uyeikakaku, 'ukaratsi xewitɨ mɨpaɨ katinitahiwieni: —Neti'aitɨwame, ketaneutawikweitsitɨa.
2KI 6:27 Ti'aitame mɨpaɨ katiniuta'ani: —Xɨka Yawé kamatsiwikweitsitɨamɨkɨni, ¿ne matsi kenetiyɨwe? tɨriku nepɨkahexeiya meta winu ne nemɨmatsiminikɨ.
2KI 6:28 ¿Titakɨ kuta nemetiparewienikeyu? 'Ukaratsi mɨpaɨ katinita'eiya: —'Ikɨ 'ukaratsi mɨpaɨ kanetiniutahɨawe kename neniwe nekeyetuanike temitakwanikɨ hikɨ, meta 'uxa'arieka 'ikɨ niweya temɨtakwanikɨ.
2KI 6:29 Merikɨte neniwe teniuka'etsa tekanitakwani, peru 'uxa'ariekatsie kepauka nemitawawiri nu'aya miyetuanikɨ temitakwanikɨ, peru mɨkɨ yuniwe puti'awietakairi.
2KI 6:30 Hikɨ 'u'enaka 'ukaratsi kemɨtiuyuriekai, ti'aitame yukamixa kaneukatsana hiwerikakɨ. Hikɨ tawari kuraru 'amatayewatsie heima kanikuyani, 'ana teɨteri mekanixeiya kuxitari 'ixurikiyari 'anakatɨkɨme, hiwerika kamixayari.
2KI 6:31 Hikɨ ti'aitame ha'atɨ mɨpaɨ kaniutayɨni: «Yawé pɨkanereuyehɨwirieka yuheyemekɨ xɨka hikɨ 'Eritseu mu'uya neka'anutiwiteni Tsapati nu'aya».
2KI 6:32 Mexi 'Eritseu yukiita hayekatei 'ixaheritsixi wa'ukiyarima wahamatɨa, ti'aitame tewi xeime kanenɨ'ani meimienikɨ. Mexi kanuawekai, 'Eritseu 'ukirawetsixi mɨpaɨ katiniwarutahɨawe: —Hikɨ xekaninenierikuni tiyumiekame xeime kemɨtiutanɨ'a nemu'u manutiwitenikɨ, kepauka mɨkɨ nɨ'ariekame munuani, kitenie 'itupariyari 'aixɨa xeketeneunama para mɨkawatahakenikɨ. 'Ari tekani'enieka ti'aitame yuariyaya 'ukanamieni tiyumiekame 'utɨma.
2KI 6:33 'Eritseu 'akuxi tikuxatakaku kaninuani nɨ'ariekame mɨpaɨ kaniutayɨni: —'Ikɨ 'uximatɨarika Yawé hetsɨa kanimiemetɨni. 'Ari tatsitawikweitsitɨanike tawari nepɨka'erie.
2KI 7:1 'Eritseu mɨpaɨ katiniuta'ani: —Yawé niukieya xekeneu'enie, mɨpaɨ kanaineni: “'Uxa'a 'ipaɨpauka Tsamariya kitenieyaritsie xekaniyɨwawekuni xeikakuniyari xeminanenikɨ tɨriku harinayari 'aixɨa mɨ'ane xeipɨratayarikɨ meta huta kakuniyari tsewara yaxeikɨa xeipɨratayarikɨ”.
2KI 7:2 Ti'aitame parewiwameya mɨpaɨ kaniutayɨni: —Mɨpaɨ pepɨkahaineni. Xɨka Yawé naime muyuawitsie reuyepiexɨanike, yaxeikɨa 'atsipɨkatiyɨni. 'Eritseu mɨpaɨ katinitahɨawe: —'Ekɨ pekaninierimɨkɨ 'ahɨxitekɨ, peru mɨkɨ 'ekɨ pepɨkatitikwani.
2KI 7:3 Hikɨ mɨkɨ tukaritsie mana yunaukatɨ teɨteri nawi kwiniyayari mehexeiyatɨ kiekari kitenie mekaniutitekaitɨni. Hikɨ mɨkɨ mɨpaɨ mekateniuyuxatɨani: —¿Keteteyurie 'uwa te'utitetɨ, teta'ikwewatɨ xeikɨa temɨkwinikɨ?
2KI 7:4 Xɨka kiekaritsie teheutahaxɨani yakɨxeikɨa tepɨyɨni. Mana tekanekwikuni haakakɨ hipame wahamatɨa, xɨkata 'uwa teyuhayewani, yaxeikɨa tepɨkwini. 'Aixɨa pɨyɨni tepuhu tsiriyutsixi mematitei, temetayetuanikɨ. Xɨka mekatatsihekwini, 'atepu'uwani, mexɨka metatsihekwini, yaxeikɨata tetekwinikekai hakakɨ.
2KI 7:5 Hikɨ 'ukuyɨreku mekanekɨne, peru kepauka memeta'axɨa tsiriyutsixi memakuteitsie, manari teɨteri hawaikɨ mepɨkatehetitekai.
2KI 7:6 Mɨpaɨ pɨtiɨyɨkai, Yawé puwarutimariutakai tsiriyutsixi puwaru'enitsitɨakai kaxetate kuyaxa miemete meta kawayutsixi wayuariya, wa'atɨ yumɨiretɨ kuyaxi 'umepɨtehahu hepaɨ mekateniu'enanani. Hikɨ mɨkɨ mɨpaɨ mekateniuyukaxatɨani: «Yurikɨ xɨari 'Ixaheri kwieyaritsie ti'aitame, te'aitamete hetitsixi meta 'ekipitutari pɨtiwarupitɨa pɨratakɨ mɨkɨ memɨtatsitakwinikɨ».
2KI 7:7 'Ayumieme, 'ukuyɨreku mekaniyuta'una tsiriyutsixi mete'uku'eirieka yu'ixuriki kiyarite meta yukawayutsixi metatsiere yupuxuri. Mana memakutekai mekateniuku'eirieni yaxeikɨa reukupikame, mekaniyuta'una memɨkakwi'iwakɨ.
2KI 7:8 Kepauka nawi kwiniyayari memexeiya memɨta'axɨa tsiriyutsixi memakutekai, xeime 'ixuriki kiiyarita mekaneutahaxɨani. 'Ari mete'ukwaka mete'u'ieka, muwa mekatenewayetɨni pɨrata, huru meta kemarite, hikɨ mɨkɨ tinaime mekateniuti'awieta. Hutariekata me'u'axɨaka xeimetata mekaneutahaxɨani, muwata yaxeikɨa waɨkawa mekateniutaxeiya piinite meta mɨkɨ mekateniuti'awieta.
2KI 7:9 Hikɨ mɨpaɨ mekateniuyuxatɨani yunaitɨ: —Neuxei 'aixɨa tepɨkateyurie. Pauyewetse matsi 'ikɨ 'aixɨa mɨti'ane temɨtetaxatakɨ, peru wa'atɨ tepɨte'anukanama. Xɨka kahekɨareyuke yate'utiyuani, tahetsie pɨrahɨiyani. Hikɨmɨ hikɨ kwitɨwa tekanihuni ti'aitame kiiya manuwe, yatemɨtehetaxatakɨ.
2KI 7:10 Hikɨ mekanekɨne kiekaritsie mana mekateniwaretaxatɨani kitenie tehɨwemete. Mɨpaɨ mekateniwarutahɨawe: «Tame tsiriyutsixi memakuteitsie tekanekukɨnixɨani, peru teɨteri mepemawe waniuki tepɨkahe'eni. Kawayutsixi xeikɨa meta puxuri mana mepewɨtɨkatei. Meta 'ixuriki kiyarite yaxeikɨa pɨrekuwetɨka hakewa metiwewiyaxɨa».
2KI 7:11 Hikɨ kiekari kitenie tehɨwemete, kememɨte'uxatɨariekai karima mɨpaɨ mete'uhiwatɨ, ti'aitame kiita paitɨ mekaniye'axɨani.
2KI 7:12 Tsepanetɨ muyɨwikai, ti'aitame mana kiekame 'anukukeka mɨpaɨ katiniwarutahɨawe yuparewiwamete: —Xekeneneu'eni nepɨtixetaxatɨani, mɨkɨ tsiriyutsixi kememɨteyuriku tahepaɨtsita. Mɨpaɨ memɨtematekɨ, tame temɨyehaakakwitɨwekɨ, 'ayumieme mekananuku'uni memakuteitsie yupiinite mete'uku'eirieka, peru mɨkɨ mekaneyu'awietani yeuta paitɨ. Mɨpaɨ mepɨte'uyuri temɨwayekɨnekɨ mɨpaɨ memɨtatetiwiyakɨ meta memeutahaxɨanikɨ takiekaritsie.
2KI 7:13 Xewitɨ kuyaxi tiwa'aitɨwame mɨpaɨ katinitahɨawe: —Hipatɨ teɨteri meke'anuyekɨne, meyu'auxɨwime kawayutsixi mewarahapatɨ 'akuxi 'uwa memuyuhayewatɨwe. Xɨka mehekwi'iwa 'ikɨ, yaxeikɨata tameta tanaitɨ 'ixaheritsixi tekanikwi'iwakuni. Tsiparatsɨ tepɨwaranunɨ'ani yatemɨtehetimanikɨ.
2KI 7:14 Hikɨ 'ana yapauka teɨteri hutame kaxeta mekaniwarukuha'aritɨani me'enawɨtɨakame kawayutsixi, hikɨ ti'aitame tsiriyutsixi memakutekaitsie kaniwarenɨ'ani, yamemɨtehetimanikɨ memetinierekɨ.
2KI 7:15 Mɨkɨ Kurutani paitɨ mewaruyeikirɨmetɨ mekaniyenuaxɨani, 'ana mɨkɨ mekateniukaxeiya naime huye 'utɨa kemarite meta naime tita mɨrahete mexɨitɨarikakɨ tsiriyutsixi memɨte'ukaxɨri. Hikɨ nɨ'ariekate mehakunuaxɨaka ti'aitame yamekateniutaxatɨani,
2KI 7:16 hikɨ 'ana tsamariyatari mekanayekɨne tsiriyutsixi wapiinite metetipinike. Yawé niukieya kemainekai, mɨpaɨ mekateniutinaneni, xeikakuniyari tɨriku harinayari 'aixɨa mɨ'ane mekaninanekaitɨni xeipɨratayarikɨ, meta huta kakuniyari tsewara yaxeikɨa xeipɨratayarikɨ.
2KI 7:17 Ti'aitame mɨpaɨ yuparewiwame katiniuta'aitɨakaitɨni kiekari kitenieyaritsie mɨtitahɨkakɨ, peru mana teɨteri mekanitimu'utara memɨyumɨirekaikɨ, 'anari mɨkɨ kaniutatɨmaiyarieni, mɨpaɨ katinaye'atɨarieni tewi Kakaɨyari hetsɨa mieme kemainekai kepauka ti'aitame meikuxeitsie.
2KI 7:18 Mɨpaɨ katiniɨyɨni, tewi Kakaɨyari hetsɨa mieme ti'aitame mɨpaɨ katiniutahɨawekaitɨni: «'Uxa'a ximeri 'ipaɨ 'upaukakaku Tsamariya kitenieyaritsie, pɨyɨweni mɨnanaiyani xeikakuniyari tɨriku harinayari 'aixɨa mɨ'ane xeipɨratayarikɨ, meta huta kakuniyari tsewara yaxeikɨa xeipɨratayarikɨ»,
2KI 7:19 'ana ti'aitame ti'uximayatsiriwame mɨpaɨ kaniutayɨkaitɨni: «Mɨpaɨ pepɨkahaineni. Xɨka Yawé naime muyuawitsie reuyepiexɨanike, yaxeikɨa 'atsipɨkatiyɨni». Tewi Kakaɨyari hetsɨa mieme mɨpaɨ katinitahɨawekaitɨni: «'Ekɨ peninierimɨkɨ 'ahɨxitekɨ, peru mɨkɨ 'ekɨ pepɨkatitikwani».
2KI 7:20 Hikɨ mɨpaɨ katinaye'atɨarieni: teɨteri meyumɨiretɨ mekanitapɨna kiekari kitenie, hikɨ mana kaniumɨni.
2KI 8:1 Merikɨtsɨ, 'Eritseu 'ukaratsi mɨpaɨ katiniutahɨawekaitɨni nunutsi xeime menutanieritɨiriekai: «Kenemie, 'aniwe meta 'akɨna xeyunaitɨ tsepa hakewa, Yawé mɨpaɨ kanaineni haakaxa waɨkawa kanayeimɨkɨ 'ikɨ kwieyaritsie 'atahuta wiyari kaniyurimɨkɨ».
2KI 8:2 Hikɨ 'ana 'ukaratsi kaneyani tewi Kakaɨyari hetsɨa mieme kemɨtitahɨawekai, mekanekɨne yuniwe meta yɨkɨna meyunaitɨ piritsiteutsixi wakwieyaritsie paitɨ, mana 'atahuta wiyari mekaneyurieni.
2KI 8:3 'Atahuta wiyari 'anuyeyaku, kepauka piritsiteutsixi wakwieyaritsie heyeyaka munua, 'ukaratsi ti'aitame hetsɨa kaninuani, 'itawawirienike yukwie meta yukii miyetuirienikɨ.
2KI 8:4 'Anatsieta ti'aitame katinikuxatakaitɨni Kihetsi matɨa, tewi Kakaɨyari hetsɨa mieme ti'uximayatsiriwame hamatɨa, mɨpaɨ katiniku'iwawiyakaitɨni: «Kenetineutaxatɨa naime 'Eritseu mamariwawemekɨ kemɨtiyuriene».
2KI 8:5 Hikɨ kepauka Kihetsi ti'aitame mɨtikuxaxatɨwakai 'Eritseu nunutsi kemɨranutanieritɨa mumɨkai hepaɨtsita, 'ana kwitɨ 'ukaratsi kaninuani ti'aitame hetsɨa mɨpaɨ titawawirienike para mɨtiyetuirienikɨ kwieya meta kiya. Hikɨ 'ana Kihetsi mɨpaɨ kaniutayɨni: —Neuxei neti'aitɨwame, 'ikɨ 'ukaratsi pɨhɨkɨ meta 'ikɨ pɨnu'aya 'Eritsehu menutanieritɨa.
2KI 8:6 Hikɨ ti'aitame 'ukaratsi kaniuta'iwawiya, mɨkɨta naime katinitaxatɨani. Merikɨte ti'aitame xeime tiyu'uximayatsiriwame puhɨritɨa miparewienikɨ, mɨpaɨ katinita'aitɨani: —Naime tita mɨtipinieyatɨkai ketineyetuiri, meta kwieyatsie mɨtiutixuawerixɨ, naime 'atahuta wiyaritsie timieme.
2KI 8:7 Merikɨtsɨ 'Eritseu Ramatsiku kaneyani. Weni-'Arari Tsiriya kwieyaritsie ti'aitame, katinikuyekaitɨni, kepauka tewi Kakaɨyari hetsɨa mieme mutamari kename nuakai,
2KI 8:8 hikɨ Katsaheri mɨpaɨ katiniutahɨawe: «'Imikieri ketinepitɨa tewi Kakaɨyari hetsɨa mieme. Kepauka hetsɨana pemeye'ani, 'Eritseu keneta'aitɨa Yawé meta'iwawiyakɨ nehetsiemieme yanemɨretimanikɨ xɨka 'aixɨa netika'erimɨkɨ mexɨka katixaɨtɨni».
2KI 8:9 Hikɨ Katsaheri 'Eritseu hetsɨa kaneyani, 'imikieri re'ikatsirietɨ 'aixɨa mɨti'anene Ramatsiku timieme, huta tewiyari kameyutsixi wahetsie re'ikatsirietɨ. Kepauka munua hetsɨana mɨpaɨ katinitahɨawe: —Weni-'Arari, mati'uximayatsiriwame Tsiriya kwieyaritsie ti'aitame, kaneneyenɨ'ani nemɨmatsita'iwawiyakɨ xɨka waniu 'aixɨa tika'erimɨkɨ.
2KI 8:10 Hikɨ 'Eritseu mɨpaɨ katinita'eiya: —Kenemie mɨpaɨ ketinetaxatɨa 'aixɨa pɨtika'erieni, peru Yawé mɨpaɨ kanetinahɨaweni yaxeikɨata tsiere kanimɨmɨkɨ.
2KI 8:11 Hikɨ 'Eritseu kwi Katsaheri xeiyatɨ katiniukeni, hikɨ Katsaheri kaniuyutitewiya. 'Ana tewi Kakaɨyari hetsɨa mieme kaniutatsuani.
2KI 8:12 Katsaheri mɨpaɨ katinita'iwawiya: —¿Ketitayari petiutatsuaka neti'aitɨwame? Mɨpaɨ katiniuta'ani: —Ne yanekatinimaika waɨkawa 'ixaheritsixi kepemɨtiwakwinitɨani. Wakiekarite pekanititaiyamɨkɨ, waniwema temari pekaniwakwimɨkɨ 'ixiparakɨ, tɨɨri pekaniwatixitemɨkɨ meta 'ukarawetsixi memayehukatɨka wahukatsie pekaniwatixitemɨkɨ waniwema memɨkwinikɨ.
2KI 8:13 Katsaheri mɨpaɨ kaniutayɨni: —Ne matsi tixaɨtɨ nepɨkatihɨkɨ, ne mati'uximayatsiriwame, tsɨkɨ haweri mɨ'ane nepɨhɨkɨ. ¿Titayari mɨpaɨ petiku'eriwa nehepaɨtsita, kename 'axamɨ'anekɨ neyɨwe? 'Eritseu mɨpaɨ katinita'eiya: —Yawé mɨpaɨ kanetiniutahɨawe kename Tsiriya kwieyaritsie ti'aitame pe'ayani.
2KI 8:14 Katsaheri 'Eritseu 'utateutɨaka kaneyani ti'aitame hetsɨa. Kepauka Weni-'Arari mita'iwawiyaxɨ 'Eritseu kemɨreitahɨawekai, Katsaheri mɨpaɨ katiniuta'ani: Mɨpaɨ pɨnerahɨawekai kename 'ekɨ 'aixɨa petika'erieni.
2KI 8:15 Peru 'uxa'arieka ximeri 'ixuriki 'utihurieka 'itahawiyaka, ti'aitame kananukaweririeni hɨxiena, 'ana ti'aitame kaniumɨni. 'Arike mɨpaɨ tiuyɨku Katsaheri ti'aitame kanayani 'utɨmana.
2KI 8:16 Merikɨtsɨ Kurami 'Akawi nu'aya 'auxɨwime wiyari ti'aitakaku 'Ixaheri kwieyaritsie, Kurani Kutsapati nu'aya Kura kwieyaritsie kanitsutɨani ti'aitatɨ. Kurani pitsutɨa ti'aitatɨ 'Ixaheritsie kepauka mɨti'aitakai Kutsapati Kura kwieyaritsie.
2KI 8:17 Xeitewiyari heimana tamamata heimana huta wiyari pexeiyakai kepauka mitsutɨa ti'aitatɨ, hikɨ katiniuta'aita Kerutsareme kiekariyaritsie 'atahaika wiyari.
2KI 8:18 Kurani Yawé kemɨkatinake katiniuyurieni, 'Ixaheri kwieyaritsie te'aitamete ke'axamemɨte'uyuri mɨpaɨ pɨtikatɨa, 'Akawi niwemama ke'axamemɨte'uyuri wahepaɨ, metatsiere 'Akawi nu'aya 'uka kaniutiwitɨni paitɨ.
2KI 8:19 Peru Yawé pɨka'uyuwaɨri mika'una Kura kwieyari ti'uximayatsiriwame Rawiri ma'eriwakaikɨ, mɨpaɨ mɨtitahɨawekaikɨ kename kɨxeme yuheyemekɨ takakekai hetsiena mieme meta nuiwarimama wahetsiemieme.
2KI 8:20 Kepauka Kurani mɨti'aitakai, 'erumitsixi mekanayutsana Kura hetsie metewiyatɨ, yuxaɨta ti'aitame mekananukakeni yuhetsiemieme.
2KI 8:21 'Ayumieme, Kurani kaneyani Tsahixi hepa yunaime kaxetate kuyaxa miemete warahapatɨ. Hikɨ 'erumitsixi Kurani warita mekanayaxetɨkɨne meta kaxetate kuyaxa miemete wanɨ'awamete tewa'aitɨwamete wawarita, peru tɨkarikɨ Kurani kanitaxeiya hakewa meuyehani, peru kuyaximama yuxexuitɨ mekaneutayeixɨani.
2KI 8:22 'Anatɨtɨ mɨtiyehane 'Erumi kwieyari Kura kwieyaritsie pɨkatiwiya, metatsiere yaxeikɨa Riwina kiekariyari kanayutsana mɨkɨ mɨya memɨyɨ wahepaɨtsita.
2KI 8:23 Kurani ti'aitakaku kemɨtiuyɨ, meta naime kemɨtiuyuri, naitɨ katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie.
2KI 8:24 Kepauka Kurani mumɨ, kaniukateukieni yu'ukiyarima wahamatɨa Rawiri kiekariena. Hikɨ nu'aya 'Ukutsiyaxi kanitsutɨani ti'aitatɨ 'utɨmana.
2KI 8:25 Merikɨtsɨ 'Ukutsiyaxi Kurani nu'aya kanitsutɨani ti'aitatɨ Kura kwieyaritsie, kepauka Kurami 'Akawi nu'aya tamamata heimana huta wiyari mɨti'aitakai 'Ixaheri kwieyaritsie.
2KI 8:26 'Ukutsiyaxi xeitewiyari heimana huta wiyari kanexeiyakaitɨni kepauka ti'aitatɨ mitsutɨa, hikɨ Kerutsareme xeiwiyari katiniuta'aita. Warutsieya 'Atahariya pɨhɨkɨtɨkai 'Umiri teukarieya, 'Ixaheri kwieyaritsie mɨti'aitametɨkai.
2KI 8:27 'Ukutsiyaxi Yawé kemɨkatinake katiniuyurieni, 'Akawi niwemama ke'axamemɨte'uyuri wahepaɨ katiniuyurieni, mɨkɨ mɨwa'iwatɨkaikɨ.
2KI 8:28 'Ukutsiyaxi, Kurami 'Akawi nu'aya matɨa, kaneyani Xamuti Karaha kwieyaritsie Katsaheri memetamienikɨ Tsiriyatsie ti'aitame, peru kepauka memɨwakwitɨwekai tsiriyutsixi Kurami mekateniukwinitɨani.
2KI 8:29 'Ayumieme ti'aitame Kurami kanakunuani Ketsireri paitɨ, mana meyuyutɨanikɨ Xamuti kiekariyaritsie tsiriyutsixi memɨteheikwinitɨakɨ, kepauka meyutami Katsaheri hamatɨa, Tsiriyatsie ti'aitame. Hikɨ Kurami 'Akawi nu'aya mɨtiuka'eniwakaikɨ Ketsireri 'ukaitɨ, 'Ukutsiyaxi Kurani nu'aya, Kura kwieyaritsie ti'aitame, kaneiku'iwata.
2KI 9:1 Merikɨtsɨ heiwa Kakaɨyari niukameya 'Eritseu xeime Kakaɨyari niukameya kaniuta'inieni, mɨpaɨ katinitahɨawe: «'Aixɨa keni'akuyuri yatewa pemɨmiekɨ. Ka'i 'ikɨ puteyu huriwa hatseitiyari mayema, kenemie Xamuti Karaha kwieyaritsie.
2KI 9:2 Kepauka mana pemeta'ani, Kehú mɨtitewa kenetiwawa Kutsapati nu'aya Nimitsi teukarieya. Hetsɨana keneye'axi tsepa hakewa mekani, kenanaye'ini xɨka hipame wahamatɨa hekani, kenanuwitɨki kiita paitɨ.
2KI 9:3 Hikɨ muwa huriwa hatseitiyari pehewatihaname kɨmana mu'uyatsie kenekawiri meta mɨpaɨ ketinetahɨawi: “Yawé mɨpaɨ kanaineni: ‘Hikɨ nekamenanayexeiya 'Ixaheri kwieyaritsie ti'aitame pemayanikɨ’”. Hikɨ 'ana kwitɨwa kitenie pereuyepieme kene'ata'una, kenamie pekahewakekatɨ».
2KI 9:4 Hikɨ kanayeyani temaikɨ Kakaɨyari niukameya kaneyani Xamuti Karaha kwieyaritsie paitɨ.
2KI 9:5 Kepauka munua mana, kaniwarutaxeiya meyuxeɨriekame kuyaxi wa'ukiyarima, mɨpaɨ katiniwarutahɨawe: —Ne kuyaxi wa'ukiyari nepɨtikuxatɨane. Kehú mɨpaɨ katinita'iwawiya: —¿Kemɨ'ane yemekɨ pepɨtikuxatɨane tame? Kakaɨyari niukameya mɨpaɨ kaniutayɨni: —'Ekɨ yemekɨ, kuyaxi wa'ukiyari.
2KI 9:6 Kehu 'anukukeka kaneyani yukiita paitɨ. Hikɨ Kakaɨyari niukameya muwapaitɨ hatseitikɨ kaneika'ɨya, meta mɨpaɨ kaniutayɨni: «Yawé mɨpaɨ kanaineni, 'Ixaheri Kakaɨyarieya: “Hikɨ temeniuka'ɨya 'Ixaheri kiekariyaritsie pemɨtita'aitakɨ.
2KI 9:7 'Ekɨ pekaniwaka'unamɨkɨ 'Akawi tɨɨriyamama, mɨpaɨ mekatenayukatuakuni Kakaɨyari niukametemama wahetsiemieme. Ketsaweri xetekwinitɨatɨ, nete'uximayatsiriwamete wahetsiemieme.
2KI 9:8 Yunaitɨ 'Akawi tɨɨriyamama mekanakumawerikuni yunaime 'Ixaheri nuiwarimama manuniere memɨtama nekaniwareuyehɨamɨkɨ, waɨriyarika ti'uximayatame meta memɨxɨxɨni.
2KI 9:9 Yaxeikɨa nekaniwayurimɨkɨ, hipame nemɨwaruyuri hepaɨ Keruwuhani niwemama Nawati nu'aya, yaxeikɨa Watsaha niwemama 'Ahiyaxi nu'aya.
2KI 9:10 Ketsaweri hetsiemiemeta, tsɨikɨri mekanitakwaikuni Ketsireri maku'etsatsie meta xewitɨ mɨkɨ pɨka'ikateuku”». Hikɨ reuyepieka kitenie Kakaɨyari niukameya kaniyuta'una.
2KI 9:11 Kepauka Kehú mɨwayetɨa yu'iwama kuyaxi wa'ukiyarima wahetsɨa nuanike, xewitɨ mɨkɨ mɨpaɨ katinita'iwawiya: —¿Kereyɨ? ¿Ketita rayexeiyakai mɨkɨ ruku? Kehú mɨpaɨ kaniutayɨni: —Xemeri 'ari xepimate meta xekanimaikari kemɨtiuxaxata.
2KI 9:12 'Iwamama mɨpaɨ mekatenitahɨawe: —Pepɨtiku'itawa. Yurikɨ ketatineutaxatɨa. Kehú mɨpaɨ katiniwarutaxatɨani: —Mɨkɨ mɨpaɨtsɨ kanetinetaxatɨani: “Yawé mɨpaɨ kanaineni: ‘Hikɨ ne nekamenanayexeiya 'ixaheritsixi tiwa'aitɨwame pemayanikɨ’”.
2KI 9:13 Hikɨ yapauka, yunaitɨ mekaniyukumexɨitɨani yu'ɨkari manutiyanitsie mekanikaweraxɨani Kehú hetɨa. Hikɨ meta kuxineta me'utahɨtsieka mɨpaɨ mekateniuhiwa: «Kehú ti'aitame kanihɨkɨtɨni».
2KI 9:14 Hikɨ Kehú Kutsapati nu'aya Nimitsi teukarieya, tiyu'aitɨwame Kurami 'aye'unietɨ kanayani. Ti'aitame Kurami yunaime yukuyaxima 'ixaheritsixi wahamatɨa Xamuti Karaha kwieriyatsie nuatɨ kaniyumienekaitɨni Katsaheri Tsiriyatsie ti'aitame kanimienekaitɨni,
2KI 9:15 peru kaneyakaitɨni Ketsireri paitɨ mana meyuyutɨanikɨ tsiriyutsixi memɨte'ikwinitɨakaikɨ mewakwitɨwekaku. Hikɨ Kehú kemɨ'ane hetsiena memɨtewiyakai mɨpaɨ katiniwarutahɨawe: «Xɨka xeme yaxeteha'eriwani ne ti'aitame nemayanikɨ, nixeime xepɨkapitɨaka manuyeyeikani kiekaritsie, kapa reuxatamienikɨ Ketsireri».
2KI 9:16 Hikɨ Kehú kananutiyerɨni yukaxeta kuyaxa miemetsie kaneyani Ketsireri, mana mekateikɨ Kurami tikuyetɨ. Metatsiere 'Ukutsiyaxi Kura kwieyaritsie ti'aitame mana pekatei, mana peyakai Kurami ku'iwatanetɨ.
2KI 9:17 Kepauka kiekari hɨweme Ketsireri tuxiyuyaritsie paitɨ 'akawetɨ muwaruxei Kehú kuyaximama 'ame'ahukame, mɨpaɨ katiniuhiwa: —Hipatɨ Kuyaxi tahepa mekanahuni. Hikɨ Kurami mɨpaɨ katiniuta'aita: —Xeime keneta'inieka kenetanɨ'a 'anutiyerɨme kawayutsie mɨwaranukunakekɨ kuyaxi muwareta'iwawiyakɨ xɨka 'aixɨa 'iyari mekɨyɨaka.
2KI 9:18 Hikɨ xewitɨ kuya 'anutiyerɨka kaneyani Kehú kananukunake, mɨpaɨ katinita'iwawiya: —Ti'aitame pɨremaimɨkɨ xɨka 'aixɨa 'iyari xekɨyɨaka. Kehú mɨpaɨ katinita'eiya: —'Ekɨ pepɨkatatsiha'iwawiyani xɨka 'aixɨa 'iyari tekɨyɨaka. Ta'utɨma keneukexi. Hikɨ kiekari hɨweme mɨpaɨ kaniutayɨni: —Temitanɨ'a kaniuye'anitɨtɨ wahetsɨa, peru nepɨka'ixeiya 'apɨta hamiekame.
2KI 9:19 'Ayumieme, ti'aitame tawari xeime kanenɨ'ani kawayutsie 'anakaime, mɨkɨta kaniwaranukunake, yaxeikɨa mɨpaɨ katiniwarutahɨawe: —Ti'aitame pɨremaimɨkɨ xɨka 'aixɨa 'iyari xekɨyɨaka. Kehú mɨpaɨ katinita'eiya: —'Ekɨta pepɨkatatsiha'iwawiyani xɨka 'aixɨa 'iyari tekɨyɨaka. Ta'utɨma keneukexi.
2KI 9:20 Tawarita kiekari hɨweme mɨpaɨ kaniutayɨni: —Temitanɨ'a kaniuye'anitɨtɨ wahetsɨa paitɨ, peru yaxeikɨata mɨkɨ nepɨka'ixeiya 'apɨta hamiekame. Meta kaxeta mana manɨ'axime Kehú Nimitsi nu'aya hepaɨ pɨtimatsiɨkɨ, ruku hepaɨ kaniwayɨximeni tahepa.
2KI 9:21 Hikɨ Kurami mɨpaɨ kaniutayɨni: —Nekaxeta kuyaxa mieme xekenekuha'arita. Hikɨ kaniukuha'aritɨiyarieni. Yapauka Kurami, 'Ixaheritsie ti'aitame, meta 'Ukutsiyaxi, Kura kwieyaritsie ti'aitame, yuxexuitɨ yukaxetate mewaruhapatɨ, mekanayekɨne hikɨ Kehú mekananukunake Nawuhuti Ketsireri kiekame kwieya makumatsie.
2KI 9:22 Kepauka Kurami Kehú muxei, mɨpaɨ katinita'iwawiya: —Kehú 'aku, ¿'aixɨa 'iyari petikɨyɨane? Mɨkɨta kanita'eiya: —¿Tiyɨwekuta mɨpaɨ mete'anekaku kakaɨyarixi, 'aixɨa 'anekamekɨ pemɨnuani, 'amaama katiniyukewaiyani Ketsaweri?
2KI 9:23 Kurami ta'aurie kanaweni yuta'unake, mɨpaɨ tiuhiwatɨ: —'Ukutsiyaxi, 'ikɨ tatsi'uku'eirieka pɨyɨane.
2KI 9:24 Peru Kehú yutupi karima kanahapani Kurami kaniutamɨni kani'axe warieyatsie, 'ɨrɨ 'iyarieyatsie kaniuyekeni. Kurami kanatiweni mɨkitɨ yukaxetatsie,
2KI 9:25 hikɨ Kehú yuparewiwame Wirikaxi mɨpaɨ katiniutahɨawe: —Kenanukukweka kenehɨwa, Nawuhuti kwieyatsie Ketsireri kiekame. Kenaye'eri kepauka 'ekɨ meta ne te'utetɨ temuhukai 'Akawi Kurani paapaya 'utɨa, Yawé mɨpaɨ kaniutayɨni mɨkɨ hepaɨtsita 'ikɨ xatatɨ:
2KI 9:26 “Takai 'ena nepixei, Nawuhuti xuriyaya meta niwemama. 'Ayumieme hikɨ mɨkɨkɨ pekatinayukatuamɨkɨ, 'ena 'axeikɨa. Ne, Yawé mɨpaɨ nekanaineni”. Kenanukukweka kaxarieya, mana kenehɨwa mɨkɨ kwieyaritsie, mɨpaɨ Yawé niukieya kemainekai.
2KI 9:27 Kepauka 'Ukutsiyaxi Kura kwieyaritsie ti'aitame, munierixɨ kemɨtiyɨanekai, heitserie kaniyuta'una Weti Hakani paitɨ. Peru Kehú kanenukuweiya, mɨpaɨ katiniuta'aita: —Mɨkɨtsiere xekenemi'a. Hikɨ kaniumɨiyani yukaxetatsie 'atiwetɨ Kuxi me'ukahutɨ hehurakaku 'Iwurehami, peru mɨkɨ ya'anetɨ 'akuxi kaneta'ani, Mekiru paitɨ mana kaniumɨni.
2KI 9:28 Mɨkɨri 'iparewiwamete memeweiyakai, kaxarieya mekanekweni Kerutsareme paitɨ, Rawiri kiekarieyatsie, mana mekaneikateuku 'ukiyarimama wahamatɨa.
2KI 9:29 'Ukutsiyaxi pitsutɨakai ti'aitatɨ kepauka tamamata heimana xewi wiyari mɨti'aitakairi Kurami 'Akawi nu'aya.
2KI 9:30 Kepauka Ketsaweri mɨtiutamari kename Kehú 'uhamiekai Ketsireri kiekariyaritsie, mɨkɨ yuhɨxita katina'utɨaxɨani, kaniuyukatsike hikɨ kitsie wapaitɨ kananierekaitɨni mahekɨatsie.
2KI 9:31 Kehú kepauka meutaha kiekari kitenieyaritsie, Ketsaweri mɨpaɨ katinita'iwawiya: —¿Keperaka'iyuniwa Tsimɨri, mati'aitɨwame pemumi?
2KI 9:32 Kehú kii heima 'etsimayewatsie heutiniereka, mɨpaɨ katiniuhiwa: —¿Kemɨ'ane pɨnetsiparewie? ¿Kemɨ'ane? Hikɨ mana mekaniukɨne kuyaxi yuhutatɨ yuhaikatɨ,
2KI 9:33 hikɨ Kehú mɨpaɨ katiniwaruta'aitɨani: —Mana xekenakahɨwa. Hikɨ mɨpaɨ mekateniuyurieni, xuriyaya 'ixumeritsie paitɨ kaniukaxɨrieni meta kawayutsixi memitaketsi wa'ɨkate kaniutiwiriere.
2KI 9:34 Hikɨ Kehú mɨkɨ kiekaritsie kaneutahani katiniukwani meta katiniu'ieni, 'ana mɨpaɨ katiniuta'aita: —Xekenehu 'ukaratsi 'axatiyuruwame kaxarieya xekenexeiyayu, xekenekateuki, ti'aitame nu'aya kanihɨkɨtɨkaitɨni.
2KI 9:35 Peru kepauka meheikateukuke memekɨ, mu'uya 'umeyarieya xeikɨa mekanetaxeiya, 'ɨkateya meta mamateya.
2KI 9:36 Hikɨ mekanakunuaxɨani Kehú metetaxatɨanike, hikɨ mɨkɨ mɨpaɨ kaniutayɨni. —Yakatinaye'ani Yawé kemutayɨ ti'uximayatsiriwame 'Eriyaxi Titsiwe kiekame kemɨtitahekɨataxɨ, mɨpaɨ kaniutayɨni: “Ketsireri kwieyaritsie tsɨikɨri Ketsaweri kaxarieya mekanitakwaikuni”.
2KI 9:37 Mɨpaɨ katiniɨyɨni, Ketsaweri 'umeteya heyakɨa kaniuyuhayewa tewaxi wakwitarai hepaɨ yeuta Ketsireri kwieyaritsie, xewitu pɨkayɨwekai mɨpaɨ mɨtayɨni: “'Ikɨ pɨhɨkɨ Ketsaweri”.
2KI 10:1 Merikɨtsɨ 'Akawi yuniwema, kaniwarexeiyakaitɨni haika tewiyari heimana tamamata Tsamariya memɨtitekai. 'Ayumieme Kehú xapa kaniwarenɨ'airieni, mɨkɨ kiekaritsie memɨte'aitamatetɨkai, 'itsɨkate wahetsɨa, 'ukirawetsixi te'ɨkitamete 'Akawi niwemama. Xapatsie mɨpaɨ re'ukame:
2KI 10:2 «Xeme 'Akawi niwemama xekaniwarexeiyani, wakawayutsixi meta kaxetate kuyaxa miemete meta piinite kuyaxa timieme xepɨtehexeiya, meta kiekari 'aixɨa pɨ'ane. Merikɨte kepauka 'ikɨ xapatsie xemɨtehetamarieni,
2KI 10:3 xeime xekenanayexeiya, matsi waɨkawa yɨweme, 'Akawi nu'aya mana keyuhahewani yupaapa 'uwenieyatsie. Perutsɨ xekeneyukuha'aritɨwani para temɨwatakwinikɨ mati'aitɨwame tɨɨriyamama».
2KI 10:4 Peru mɨkɨ waɨkawa mekaniutimamani mɨpaɨ mekaniutiyuani: «Yuhutatɨ te'aitamete mepɨkahe'iwaxɨ, tameta matsi, yaxeikɨa teme'iwa tepɨkayɨwekaxɨani».
2KI 10:5 'Ayumieme, paratsiyuta mɨhɨritɨariekai meta kuwexinaruri mɨkɨ kiekariyaritsie mieme, 'ukirawetsixi meta 'Akawi niwemama wahɨwemete yunaitɨ me'uyu'enieka, 'ikɨ niuki Kehú mekanenɨ'airieni: «Tame mate'uximayatsiriwamete tepɨhɨkɨ, tame yatepɨtekakɨne 'ekɨ kepemɨtayɨni. Tame xeime ti'aitame tepɨka'anukakeni. 'Ekɨ kemɨmatinake yaketineuyuri».
2KI 10:6 Hikɨ Kehú hutarieka xapa kaniwarenɨ'airieni, mana mɨpaɨ katiniwarahɨawekaituni: «Xɨka xeme xenetsiparewieka meta yemekɨ yurikɨ xeyuwaɨriyani yaxemɨtekakɨne kenemɨtayɨni, 'uxa'a xekenahu Ketsireri kiekariyaritsie 'ipaɨ 'upaukakaku meta 'Akawi niwemama wamu'ute xekenene'atɨiri». Ti'aitame niwemama haika tewiyari heimana tamamata memuyupaɨmekai, kiekaritari memanuyetei wahamatɨa mepɨtitekai, mɨkɨ mepuwawaweriyakai.
2KI 10:7 Kepauka mɨkɨ xapa memɨ'atɨiriyarie, yunaime ti'aitame niwemama mekaniwarutiwiya, mekaniwaranutiwitexɨani. Hikɨ mu'ute kiriwatetsie mekayatsaka Kehú mekanenɨ'airieni Ketsireri mekatei.
2KI 10:8 Xewitɨ nɨ'ariekame kaninuani Kehú hetsɨa katinitaxatɨani kename 'ari 'Akawi niwemama wamu'ute he'atɨariekai. Hikɨ Kehú katiniuta'aita hutakɨa mɨtixeɨriyanikɨ mu'ute kiekari kitenieyaritsie meta mana keyuhayewanike 'uxa'ariekakeri.
2KI 10:9 'Uxa'arieka ximeri kaniwayeyani Kehú, yunaime kiekatari wahɨxie kaniutakeni, mɨpaɨ kaniutayɨni: «Xeme 'atsixepɨkateyuruwamete. Nepɨta neti'aitɨwame nepuku'eiri, ne nepimi. Peru ¿kemɨ'aneta puwarukwi 'ikɨ yunaime?
2KI 10:10 Matsi mɨpaɨ xeketenemaika, Yawé kemutayɨ 'Akawi tɨɨriyamama wahetsiemieme, mɨkɨ naitɨ paye'atɨarieni, meta Yawé yapɨtiuyuri tiyu'uximayatsiriwame 'Eriyaxi kemɨtiutahɨawekai».
2KI 10:11 Mɨpaɨ 'utayɨka Kehú yunaime kaniwarukwini, memɨyuhayewatɨwekai 'Akawi niwemama Ketsireri kiekariyaritsie, meta yunaime teɨterimama memɨmamariwawekai meta memɨhamikumamatɨkai metatsiere mawari memiwewirietɨwekai. Mɨkɨ yunaime xeime 'ayeniereme tɨma pɨka'uhayewaxɨ.
2KI 10:12 'Ariketa Tsamariya kaneyani, hikɨ huyeta 'umietɨ Weti-'Ekeri muxatsi wahɨwemete memati'uxipiwe kaniye'ani,
2KI 10:13 mana kaniwarukaxeiya 'Ukutsiyaxi Kura kwieyaritsie ti'aitame 'iwamama. Kehú mɨpaɨ katiniwaruta'iwawiya: —¿Xeme kemɨ'ane xepɨyɨa? Mɨkɨ mɨpaɨ mekaniutiyuani: —Tame 'Ukutsiyaxi 'iwamama tepɨhɨkɨ, tame tepeyekɨ ti'aitame meta Ketsaweri waniwema tewata'iwatake.
2KI 10:14 Hikɨ Kehú mɨpaɨ katiniuta'aita: —Me'ayeneniereme xekeniwarutiwiya. Hikɨ mewarutiwiyaka mekaniwaranutixitexɨani putsu Weti-'Ekeri 'aurie. Mɨkɨ huta tewiyari heimana huta mekaniyupaɨmekaitɨni, mɨkɨ yunaime Kehú kaniwarukwini nixeimetɨma kapuhayewaxɨ.
2KI 10:15 Kepauka Kehú mana mɨyetɨa, Kunarawi Xekawi nu'aya kananukunake huyeta, hetsɨana heuyaka kaniyɨanekaitɨni. Kehú kanitahɨawe meta mɨpaɨ katinita'iwawiya: —¿'Aixɨa 'iyari penetixeiya, ne kenemɨmatixeiya hepaɨ? Kunarawi mɨpaɨ katinita'eiya: —Ne 'aixɨa 'iyari nepɨmatsixeiya. Kehú 'ana mɨpaɨ katinitahɨawe: —Xɨka mɨpaɨ 'aneni, kena 'amamá. Kunarawi yumama kaneutatsera, hikɨ Kehú yukaxetatsie 'enutiyeka,
2KI 10:16 mɨpaɨ katinitahɨawe: —Hikɨmɨ nehamatɨa kenemie, pemɨretimanikɨ Yawé waɨkawa kenemɨtinaki'erie. Hikɨ 'ana kaneitɨni yukaxetatsie.
2KI 10:17 Yapauka Kehú Tsamariyatsie nuaka, yunaime kaniwarukwini 'Akawi niwemama, meyunaime keyupaɨmetɨ memɨyuhayewatɨwekai, Yawé kemutayɨkai 'Eriyaxi kemɨrahɨawekai.
2KI 10:18 Merikɨtsɨ Kehú yunaime teɨteri kaniwarukuxeɨrieni mɨpaɨ katiniwarutahɨawe: «'Akawi 'etsiwaxeikɨa Wahari kakaɨyariyari payexeiyakai, matsi Kehú waɨkawa heyexeiyatɨ payani.
2KI 10:19 'Ayumieme, yunaime Wahari niukametemama xekeniwaruta'ini, yunaime kemɨ'ane memeyexeiya meta kemɨ'ane mawari memiwewiriwamete. Yunaitɨ mɨkɨ xewitɨ pɨkahauyeweka, karikɨ Wahari nekatinitimawiriemɨkɨ yemekɨ mariwemekɨ. Kemɨ'ane meheuyewetɨ memakɨne mekanikwikuni». Matsi yakɨ putainekai Kehú, pɨta Wahari kemɨ'ane memayexeiyakai yunaime wakwinike putainekai.
2KI 10:20 Metatsiere mɨpaɨ katiniuta'aita: «Xeime tukari xekenanayexeiya temuyukuxeɨrienikɨ Wahari hetsiemieme». Hikɨ mɨpaɨ katiniuyɨni.
2KI 10:21 Kehú naitsarie 'Ixaheri kwieyaritsie yunɨ'arima mɨwareutanɨ'axɨakɨ, yunaitɨ Wahari memayexeiyakai mekaniu'axɨani, nixewitɨ kapauyewekai. Mepɨyumɨirekai memayeixɨa, Wahari tukita mepɨhɨnekai kemuyeyeukai.
2KI 10:22 Kehú kemarite ti'utame katiniuta'aitɨani muwayehurienikɨ kemarite witsimɨ'anene Wahari memayexeiya wahetsiemieme, hikɨ mɨkɨ mɨpaɨ katiniuyurieni.
2KI 10:23 Kepauka Kehú meta Kunarawi Xekawi nu'aya matɨa memeutahaxɨa Wahari tukieyata, Kehú mɨpaɨ katiniwarutahɨawe muwa memɨyuxeɨriekai: «Xekeneuyu'ɨwiya 'uwa xetsata pumaweni Yawé memayexeiya, Wahari xeikɨa xemayexeiya xepayeteni».
2KI 10:24 Hikɨ mɨkɨ kepauka memeutahaxɨa mawari mehewewiexɨanike meta mawari taiyariyari. Kehú kitenie kaniwaru'uitɨani yukuyaxima nauka tewiyari, mɨpaɨ tiwarahɨawetɨ: «Xeme 'ikɨ teɨteri wahetsiemieme xekatenayukatuakuni, xɨka xeme xewitɨ mɨkɨ xeime 'utayutsitɨani, kanimieriemɨkɨ».
2KI 10:25 'Arike mɨkɨ kepauka memɨte'utahayewaxɨ mawari taiyariyari mewewietɨ, Kehú mɨpaɨ katiniwaruta'aitɨani kitenie tehɨwemete meta kuyaxi wa'ukiyarima: «Xeneutahaxɨa xekeniwarekuya. Xeime xepɨkahetayuyutsitɨwani». Hikɨ mekaniwarukwini 'ixiparatekɨ meta takwa mekaniwarayexɨrieni, metatsiere kuyaxi Wahari tukita paitɨ mekaneutahaxɨani,
2KI 10:26 tete memeyexeiyakai mekaniwayetuni muwa mayekatei mekanitataiya.
2KI 10:27 Tete mewayehɨaka metatsiere Wahari tukieya mekaniuka'una, hikɨ mana kwitame pɨta mekanayeitɨani, hikɨ 'akuxi yaxeikɨa kane'aneni 'anapaitɨtɨ.
2KI 10:28 Kehú mɨpaɨ tiuyurieka katinakumaweriya 'Ixaheri kwieyaritsie tita Wahari hetsiemieme mɨtihɨkɨtɨkai.
2KI 10:29 Mɨyatɨtɨ, Keruwuhani Nawati nu'aya ke'axamɨtiuyuri mɨpaɨ tiyurienetɨ patɨa, 'ixaheritsixi ke'axameteyuriekame muwarayeitɨa, tatsɨari, turutsixi hurukɨ memɨwewiyatɨka mewarayexeiyatɨ memakɨkɨ Weteri kiekariyaritsie meta Rani kiekariyaritsie.
2KI 10:30 Hikɨ Yawé Kehú mɨpaɨ katiniutahɨawe: «'Aixɨa pekatiniuyurieni. Kemɨnetinake mɨpaɨ pekatiniuyurieni, yapekatiniuyurieni kenemɨtiku'eriwakai 'Akawi tɨɨriyamama wahepaɨtsita. 'Ayumieme, 'atɨɨriyama nauka nuiwariyari 'Ixaheri kwieyaritsie mepɨteta'aita».
2KI 10:31 Matsi, Kehú yu'iyarikɨ yapɨkatikatɨa Yawé 'aitsikayatsie 'Ixaheri Kakaɨyarieya, pɨkatiuhayewaxɨ Keruwuhani ke'axamɨtiuyuri 'ixaheritsixi ke'axameteyuriekame muwarayeitɨa.
2KI 10:32 Merikɨte 'ana, Yawé kanitsutɨani 'Ixaheri kwieyari 'etsitayeuriyarɨmetɨ. Katsaheri kaniwarutikwitɨyani 'ixaheritsixi naitsarie 'Ixaheri kwieyari maye'atɨkatsie:
2KI 10:33 Kurutani manuyekatsie tau manatineika hepatsie, naime Karaha kwieyari, kwie hetsiena mematekai Kahari nuiwarimama meta Xuweni metatsiere Manatsexi, meta 'Aruhexi kiekariyari makuma 'aki 'Axinuni 'aurie ye'atɨkaitɨ, 'atsita Karaha meta Watsani kwieyaritetsie.
2KI 10:34 Hipatɨta kemɨtiuyɨ kepauka Kehú mɨti'aitametɨkai, meta naime kemɨtiuyuri ketitɨrɨkaɨyetɨ matɨa, naitɨ katinaka'utɨarieni, kemɨtiuyɨ xapayaritsie 'Ixaheri kwieyaritsie te'aitamete waxapatsie.
2KI 10:35 Kehú kaniumɨni Tsamariya kiekariyaritsie kaniukateukieni. Nu'aya Kuhakatsi titewatɨ kanitsutɨani hetsiena mieme ti'aitatɨ.
2KI 10:36 Kehú katiniuta'aita xeitewiyari heimana 'atahaika wiyari Tsamariya 'ukaitɨ 'Ixaheri kwieyaritsie.
2KI 11:1 Kepauka 'Atahariya, 'Ukutsiyaxi maamaya, mɨpaɨ mɨretima kename nu'aya hemɨkai, 'ana kanitsutɨani yunaime ti'aitame niwemama wakwitɨ.
2KI 11:2 Peru 'uka Kutsawa, ti'aitame Kurani nu'aya meta 'Ukutsiyaxi 'iwaya, Kuhatsi kaniuti'awieta 'Ukutsiyaxi nu'aya kepauka ti'aitame niwemama 'ari memɨkwi'iwarɨmekai. Kaniti'awieta kiita kukutsumeta 'ukaratsi miweriyakai hamatɨa, 'Atahariya pɨka'itaxei, 'ayumieme pɨka'umierie.
2KI 11:3 'Ataxewi wiyari Kuhatsi kani'awietɨkaitɨni 'ukaratsi miweriyakai matɨa Yawé tukita, mexixi 'Atahariya ti'aitakai mɨkɨ kwieyaritsie.
2KI 11:4 Hikɨ 'atahuta wiyaritsie, mawari wewiwame Kuyara kaniwarutakwewieni kuyaxi wa'ukiyarima, meta kereteutsixi, metatsiere paratsiyuta te'ɨwiyamete, hɨxiena memɨti'unikɨ Yawé tukita. Muwa tukita tɨratu kaniuwewieni wahamatɨa meta mɨkɨta yurikɨ yamekaniutiyuani hɨxiena. Hikɨ 'ariketa ti'aitame nu'aya kaniwaruxeitsitɨani,
2KI 11:5 hikɨ mɨpaɨ katiniwaruta'aitɨani: «'Ipaɨ xekateniyurikuni: Kemɨ'ane xemɨte'uximaya xawatikɨ mɨkɨ xeiteritsiyari xeyupaɨmetɨ paratsiyu xekanitahɨikuni,
2KI 11:6 hipatɨta xeiteritsiyari meyupaɨmetɨ, kitenie Tsuxi mɨtitewa mekanitahɨikuni, meta hipatɨta xeiteritsiyari memɨyupaɨme kuyaxi waki warie makitenietsie mepɨtetahɨni. Tuki xepɨtahɨni xeyutixɨrɨwatɨ.
2KI 11:7 Huta 'ekipuyari xemɨhɨkɨ kemɨ'ane xawatikɨ xemɨkate'uximaya ti'aitame xekanitahɨikuni Yawé tukieya manuwe.
2KI 11:8 'Ixipara xe'u'ɨtɨ, ti'aitame warita naitsarie xekenawetɨkani, xɨka xewitɨ xemati'utsie xetsata heuyehakeni xekeneumi'a. Ti'aitame yuxaɨtame xepɨkakuhayeikawani, tsepa kemɨtikuyeikani».
2KI 11:9 Kuyaxi tewa'aitɨwamete yamekatenikakɨne naimetsie mawari wewiwame Kuyara kemɨtiwaruta'aitɨa. Yuxexuitɨ yuteɨterima mekaniwarukuxeɨriexɨani, memɨte'uximayakai xawatikɨ meta memɨkate'uximakai yunaitɨ, hikɨ Kuyara hɨxie mekaniti'uni.
2KI 11:10 Hikɨ Kuyara kuyaxi tewa'aitɨwamete katiniwarutapitɨani pitsikate meta tepɨa yuhetsie nunuwame Rawiri mɨtipinieyatɨkai, mɨkɨ kani'utsiekaitɨni Yawé tukita.
2KI 11:11 Hikɨ yupitsika me'u'ɨtɨ, kuyaxi ti'aitame warita mekanaketɨkɨne, mawari taiyame 'aurie, meta tuki hɨxie tserietana mekaniuka'uni 'utatana meheutiyunetɨ.
2KI 11:12 Hikɨ Kuyara ti'aitame nu'aya kaniwayewitɨni, kuruna kanenutimanirieni meta xapa tɨratu 'aye'ukame kaniyetuirieni. Kwitɨta hatseiti mekanikawirieni, hikɨ yunaitɨ yumamakɨ mekateniutapini, mɨpaɨ mete'uhiwatɨ: «Ti'aitame».
2KI 11:13 Kepauka 'Atahariya kuyaxi meta teɨteri wahiwari mu'eni, kaneyani Yawé tukieya manuwe, hakewa teɨteri meme'uwakai.
2KI 11:14 Kepauka munierixɨ tuki hɨxie wurunitse 'ikitsaraɨyari 'aurie ti'aitame mutiwekai, kememɨte'uhukai hepaɨ, meta kuyaxi wa'ukiyarima meta teyuitɨwamete 'auriena meti'ukame, metatsiere yunaitɨ teɨteri meyutemamawietɨ kuxineta me'utihɨtsiwame, 'ana 'Atahariya yukamixa kaneukatsana meta mɨpaɨ katiniuhiwa: «Xepɨnetsi'uku'eiri, xepɨnetsi'uku'eiri».
2KI 11:15 Hikɨ mawari wewiwame Kuyara, yakatinaki'erietɨ Yawé tukita mɨmierienikɨ, kuyaxi tewa'aitɨwamete mɨpaɨ katiniwaruta'aitɨani kuyaxi memɨhɨritɨariekai: «Xekenanuyehani xemati'utsie, meta xɨka xewitɨ heimana henuaka, xekenemi'a 'ixiparakɨ».
2KI 11:16 Hikɨ mekaniwiya meta paratsiyu manuwe mekaneihana kawayutsixi memanutakɨkatsie, mana mekanimieni.
2KI 11:17 Hikɨ Kuyara tɨratu kaniuwewieni Yawé matɨa, ti'aitame meta teɨteri Yawé teɨterimama memɨhɨkɨtɨnikɨ, meta tɨratu kaniuwewieni ti'aitame matɨa teɨteri wahetsiemieme.
2KI 11:18 Hikɨ yunaitɨ teɨteri mekanekɨne tuki Wahari hetsiemieme manuwe, hikɨ mekanika'una. Mawari matitaiyarɨwa mekaniuti'una meta kakaɨyarixi memɨwewiyatɨka, meta mawari taiyamete hɨxie Matani mekananutixiteni mawari wewiwame Wahari hetsiemieme. Mawari wewiwame Kuyara kuyaxi tehɨwemete kaniwaru'uitɨani Yawé tukita,
2KI 11:19 meta kuyaxi tewa'aitɨwamete warawitɨtɨ meta kereteutsixi, kuyaxi tehɨwemete meta yunaitɨ teɨteri wahamatɨa, ti'aitame kanewitɨni paratsiyu manuwe paitɨ Yawé tukieya manuwe miyewitɨ. Mekaneutahaxɨani yunaitɨ kitenie kuyaxi memanu'utsie, hikɨ Kuhatsi ti'aitame 'uwenieyatsie kanayerɨni.
2KI 11:20 Yunaitɨ teɨteri mekaniyutemamawiekaitɨni, meta kiekaritsie kayuwatɨ kaniumakaitɨni, 'ari 'Atahariya mumieriekaikɨri 'ixiparakɨ paratsiyu manuwe.
2KI 11:21 Kuhatsi 'atahuta wiyari pexeiyakai kepauka mitsutɨa ti'aitatɨ.
2KI 12:1 'Atahuta wiyari ti'aitakaku Kehú, Kuhatsi kanitsutɨani ti'aitatɨ, Kerutsaremetsie katiniuta'aita huta tewiyari wiyari. Warutsieya Tsiwiya pɨtitewakai Weritsewa pɨkiekametɨkai.
2KI 12:2 Kuhatsi Yawé kemɨtinake katiniyurienekaitɨni kepauka 'amuyeikakai, mawari wewiwame Kuyara kemɨti'ɨkitɨakai mɨpaɨ mɨtikatɨakɨ.
2KI 12:3 Peru mɨyatɨtɨ, pɨka'iti'unaxɨ mawari matitaiyarɨwakai kakaɨyarixi wahetsiemieme, matsi teɨteri mepiyeweiyakai mana metemawatɨwetɨ meta 'ɨkwa mana metaiyatɨwetɨ.
2KI 12:4 Heiwa Kuhatsi mawari wewiwamete mɨpaɨ katiniwaruta'aitɨani: «Xekeneuku'ɨi naime tumini yuxexuitɨ teɨteri memei'atɨaxɨanikɨ Yawé tukieyata 'imikieri mɨpatsie, hauyutinɨtɨ kememɨteka'inɨatsiyarie, kememɨteyɨhɨritɨa yuxexuitɨ memekamanaxɨa tumini meta naime 'imikierite yukɨmana memiyetuaxɨa.
2KI 12:5 Yuxexuitɨ mawari wewiwamete xekenanu'ɨi tumini xemɨhɨritɨarie, para tuki mɨkɨkɨ 'aixɨa mɨta'itɨarienikɨ 'axameuku'anenetsie».
2KI 12:6 Hikɨ xeitewiyari heimana haika wiyari ti'aitakaku Kuhatsi, mawari wewiwamete 'atsimekateyuriwawekaku tuki hetsiemieme,
2KI 12:7 ti'aitame Kuhatsi mawari wewiwame Kuyara kaniutakwewieni meta hipame mawari wewiwamete, mɨpaɨ katiniwarutahɨawe: «¿Ketitayari xekate'itsutɨawawe tuki 'aixɨa xeyurietɨwetɨ? Hikɨri tawariri tumini xepɨka'ɨitɨarieni, matsi pɨta xekaniyetuakuni kepaɨmeme xemuyemana para tuki 'aixɨa mɨ'itɨarienikɨ».
2KI 12:8 Merikɨte mawari wewiwamete yamekateniutanaki'erieni para tawari tumini memɨkahanu'ɨnikɨ kiekaritsie mieme, yaxeikɨa tuki 'aixɨa mɨta'itɨarienikɨ 'axameuku'anenetsie mekateniuhayewa.
2KI 12:9 'Ayumieme, Kuyara mawari wewiwame kakuni kaniutawewieni hixɨapa haxawame, 'ana mawari taiyame 'aurie kanitayeni tserietana, Yawé tukita mɨranutahakitɨretsie. Mawari wewiwamete mana memɨte'ɨwiyametetɨkai kitenietsie, mekanitsutɨani mana meheikamanatɨ kakunitsie, teɨteri memi'atɨwakai para Yawé hetsiemieme.
2KI 12:10 Kepauka memunenierixɨ kakuniri mɨhɨnekai, ti'utɨwame kaneta'axekaitɨni mawari wewiwamete tiwa'aitɨwame hetsɨa memenati'ɨnikɨ meta memiti'inɨatakɨ Yawé tukita kepaɨmetɨ mɨyemanekai.
2KI 12:11 Kepauka memiti'inɨnɨatakai kemɨpaɨmekai, tumini mekaniyetuayakaitɨni tukita memɨte'uximaya waxexeiyamete wahetsɨa. Mɨkɨta tukita memɨte'uximayakai mekateniwakupitɨwakaitɨni: Texitekemete, kii wewiwamete,
2KI 12:12 'ixumawamete meta tete xitekemete. Yaxeikɨa kɨyexi 'amatayeyeu mepɨtinawekai, tetexi mɨtatari meta naimekɨ mekateniyukutuayakaitɨni ketita memɨteheuyahɨakai Yawé tukieya hetsiemieme mɨnɨrekɨ.
2KI 12:13 Mɨkɨ tumini Yawé tukita mɨyetuiwakai, mɨkɨkɨ tekɨxi mɨtiwewiyanikɨ pɨka'aitsiekai meta kɨmeme kɨxeme wiwieri xitekeme, watsu 'amɨnene, kuxineta meta hipame pɨratakɨ meta hurukɨ mɨtiwewiyatɨka,
2KI 12:14 matsi mɨkɨ tumini mepɨyetuiriyarɨwakai te'uximayatamete, mɨkɨta Yawé tukieya 'aixɨa memɨyurienikɨ mepeiyehɨakai.
2KI 12:15 Kemɨ'ane memɨhɨritɨariekai memɨtewakupitɨwanikɨ te'uximayatamete mɨkɨ mepɨkaku'iwawiyarɨwakai kepaɨmeme memɨtixɨxɨtɨwakai tumini, mɨkɨ 'aixɨa 'anemekɨ memɨte'uximayakaikɨ.
2KI 12:16 Tumini mɨyetuiwa 'itiya mawariyari, meta mɨrayukatuani mawariyari, mɨkɨ Yawé tukieya hetsiemieme pɨkahɨhɨtɨkai matsi mawari wewiwamete wahetsiemieme pɨta pɨhɨkɨtɨkai.
2KI 12:17 Merikɨtsɨ mɨkɨ tukaritsie, Katsaheri Tsiriyatsie ti'aitame, Kahati kiekariyari kaniutamieni hikɨ kaniwara'iwa, meta yakaniutayɨni Kerutsareme mɨtamienikɨ.
2KI 12:18 'Ayumieme Kuhatsi Kura kwieyaritsie ti'aitame, tinaime piinite katiniukuxeɨrieni meripaitɨ 'ukiyarimama memɨteyetuakai tuki hetsiemieme mɨrayanikɨ, Kutsapati, Kurani meta 'Ukutsiyaxi, Kura kwieyaritsie memɨte'uta'aitaxɨ, meta mɨkɨtsiere mɨtiyetuakai, meta naime huru kepaɨmeme mukaxei Yawé tukita meta paratsiyuta. Mɨkɨ tinaime Katsaheri katinenɨ'airieni Tsiriyatsie ti'aitame, hikɨ 'ayumieme 'Ixaheri kwieyaritsie kanayeyani.
2KI 12:19 Mɨkɨ naitɨ Kuhatsi kemɨtiu'aitaxɨ katinaka'utɨarieni, kemɨtiɨyɨ xapayaritsie meta 'Ixaheri kwieyaritsie te'aitamete waxapatsie kanaka'utɨarieni.
2KI 12:20 'Iparewiwamete memanuyetei mekanikwamana hikɨ mɨkɨ mekanimieni, Weti-Miru paitɨ, Tsira huyeyari manuyehane 'utɨa.
2KI 12:21 Kemɨ'ane memimi 'ikɨ mekanihɨkɨtɨni Kutsakaxi Tsimati nu'aya meta Kutsawari Tsemexi nu'aya. Kuhatsi mɨpaɨ katiniumɨni mɨkɨ yu'ukiyarima wahamatɨa kaniukateukieni Rawiri kiekariyaritsie. Nu'aya pɨta 'Amatsiyaxi kanitsutɨani ti'aitatɨ 'uwenieyatsie.
2KI 13:1 Kuhatsi 'Ukutsiyaxi nu'aya, xeitewiyari heimana haika wiyari ti'aitakaku Kura kwieyaritsie, Kuhakatsi Kehú nu'aya kanitsutɨani 'Ixaheri kwieyaritsie ti'aitatɨ, hikɨ Tsamariya kiekariyaritsie katiniuta'aita tamamata heimana 'atahuta wiyari.
2KI 13:2 Kuhakatsi Yawé kemɨkatinake katiniuyurieni, karikɨ Keruwuhani Nawati nu'aya kemɨtiuyuri hepaɨ katiniuyurieni, pɨkatiuhayewaxɨ 'axamɨti'ane 'ixaheritsixi kɨmana memekaxɨri.
2KI 13:3 'Ayumieme Yawé kaniuyeha'ani 'ixaheritsixi wahepaɨtsita, 'ayumieme mɨixa wiyari muwakwinenikɨ Katsaheri Tsiriyatsie ti'aitame kaniupitɨani, meta nu'aya Weni-'Arari mɨtitewa kaniupitɨani.
2KI 13:4 Hikɨ Kuhakatsi Yawé kaniutahɨawe, mɨkɨta kani'enieni, munierixɨkɨ 'ixaheritsixi kwinimieme Tsiriyatsie ti'aitame mɨtiwananaimakaikɨ.
2KI 13:5 Hikɨ Yawé xeime kananayexeiya wawikweitsitɨwame mayanikɨ, 'ixaheritsixi mekaniuyɨwekaxɨani tsiriyutsixi mekawakwitɨwetɨ mekanakɨne 'aixɨa 'iyari me'u'uwatɨ mekanakɨne meripaitɨ hepaɨ.
2KI 13:6 Mɨyatɨtɨ, 'ixaheritsixi mepɨkate'uhayewaxɨ yaxeikɨa 'axameteyurietɨ, Keruwuhani tɨɨriyamama ke'axamemɨte'uyuri wahepaɨ mepɨteyuriekai, 'uka 'Atserá kakaɨyariyari 'amekaniutakeni paitɨ Tsamariya kiekariyaritsie.
2KI 13:7 Kuhakatsi kuyaximama meputixɨtɨarie, huta tewiyari heimana tamamata kawayutsixi wahetsie memutei xeikɨa, tamamata kaxetate kuyaxa miemete meta tamamata miriyari kuyaxi yu'ɨkama memuhu, Tsiriyatsie ti'aitame kaniwarutixɨtɨakaitɨni, yunaime kaniwarukwini hipame.
2KI 13:8 Hipatɨta Kuhakatsi ti'aitakaku kemɨtiuyɨ meta naime kemɨtiuyuri meta kemɨtitɨrɨkaɨyekai, katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
2KI 13:9 Kuhakatsi kaniumɨni, Tsamariya kiekariyaritsie kaniukateukieni. Nu'aya Kuhatsi kanitsutɨani hetsiena mieme ti'aitatɨ 'uwenieyatsie.
2KI 13:10 Xeitewiyari heimana tamamata heimana 'atahuta wiyari ti'aitakaku Kuhatsi Kura kwieyaritsie, 'Ixaheri kwieyaritsieta Kuhatsi Kuhakatsi nu'aya kanitsutɨani ti'aitatɨ, Tsamariya kiekariyaritsie 'ukaitɨ katiniuta'aita tamamata heimana 'ataxewi wiyari.
2KI 13:11 Kuhatsi Yawé kemɨkatinake katiniuyurieni, Keruwuhani Nawati nu'aya ke'axamɨtiuyuri hepaɨ katiniuyurieni, ke'axamɨtiyurienekai nixeimetɨma pɨka'uhayewaxɨ, mɨpaɨ tiyurienetɨ 'ixaheritsixi ke'axameteyuriekame muwarayeitɨa.
2KI 13:12 Hipatɨta kemɨtiuyɨ Kuhatsi ti'aitakaku meta kemɨtiuyuri metatsiere kemɨtitɨrɨkaɨyekai, meta 'Amatsiyaxi Kura kwieyaritsie ti'aitame kemɨtiutami, mɨkɨ naitɨ katinaka'utɨarieni kemɨtiuyɨ xapayaritsie 'Ixaheri kwieyaritsie memɨte'uta'aitaxɨ waxapayaritsie.
2KI 13:13 Kuhatsi kaniumɨni, Tsamariya kiekariyaritsie kaniukateukieni 'Ixaheri kwieyaritsie te'aitamete memakɨ wahamatɨa. Hikɨ Keruwuhani hetsiena mieme katiniuta'aita 'uwenieyatsie.
2KI 13:14 Kepauka 'Eritseu kwiniyakɨ kwinimieme mɨ'anekai, Kuhatsi 'Ixaheri kwieyaritsie ti'aitame kaneikuxeiya. Hikɨ hɨxiena nuaka, 'utatsuatɨ mɨpaɨ kaniutayɨni: —Nepaapa, nepaapa, kaxeta kuyaxa mieme pemɨhɨkɨ 'Ixaheritsie mieme pemɨtɨrɨkaɨye.
2KI 13:15 'Eritseu mɨpaɨ katinitahɨawe: —Xeime tupi kenekuwawa meta 'ɨrɨte waɨkawame. Kuhatsi mɨpaɨ katinikayani.
2KI 13:16 Hikɨ 'Eritseu mɨpaɨ katinitahɨawe: —Tupi 'ari 'aixɨa ketineukwe'i. Kepauka ti'aitame tupi mutikwei, 'Eritseu ti'aitame mamateya kaniuwiyaxɨani,
2KI 13:17 hikɨ mɨpaɨ katinitahɨawe: —'Itupari 'etsimɨyewa keneuyepi tau manatineika hepa mauwietsie. Kuhatsi katineuyepieni, hikɨ 'Eritseu mɨpaɨ katinitahɨawe: —Ketineutamɨ'i. Hikɨ katiniutamɨni. Hikɨ 'Eritseu heitseriemekɨ mɨpaɨ kaniutayɨni: —Mɨkɨ 'ɨrɨ Yawé 'inɨarieya kanihɨkɨtɨni. Kameniparewimɨkɨ tsiriyutsixi pemuwara'iwakɨ. Pekaniwatakwimɨkɨ 'Apeki kiekariyaritsie yunaime pekaniwakwimɨkɨ.
2KI 13:18 Tawarita mɨpaɨ katinitahɨawe: —Hikɨ 'ɨrɨte keneuti'ɨi. Hikɨ 'Ixaheri kwieyaritsie ti'aitame kaniti'ɨni, meta 'Eritseu mɨpaɨ katinitahɨawe: —Kwiepa ketinekawa kɨmana. Kuhatsi haikakɨa kwiepa rekawaka hikɨ 'ana katiniuhayewa.
2KI 13:19 Mɨya xeikɨa mɨtiuwakɨ, tewi Kakaɨyari hetsɨa mieme kaniuyeha'ani mɨpaɨ katinitahɨawe: —'Auxɨwimexɨa yatɨni 'ataxewimexɨa kwiepa pemɨtiniukawaxɨakaitɨni, hikɨ 'ana pekaniwara'iwakekaitɨni tsiriyutsixi meta yemekɨ pekaniwakwinikekaitɨni yunaime. Peru hikɨ haikakɨa xeikɨari pekaniwara'iwamɨkɨ.
2KI 13:20 Mɨpaɨ 'utayɨka 'Eritseu kaniumɨni, meta kaniukateukieni. Xeiwiyari 'anuyeyeikakaku muhawitsixi mekaniuta'axekaitɨni mewakwitɨwetɨ 'Ixaheri kwieyaritsie kiekatari.
2KI 13:21 Heiwa, 'ixaheritsixi xeime kaxarieya meka'awietakeyu, yapauka mekaniwaruxeiya 'ame'ahukame memɨwaraye'unie, hikɨ mɨkɨ kaxari 'Eritseu makateukietsie mekaneukahɨani. Kepauka mɨkɨ kaxari 'Eritseu 'umeyariteyatsie manutate, tewi tukari hexeiyatɨ kanayani kananukukeni.
2KI 13:22 Kepauka Kuhakatsi mɨti'aitametɨkai, Katsaheri Tsiriyatsie ti'aitame waɨkawa 'ixaheritsixi kaniwaruhiweritɨani.
2KI 13:23 Peru matsi Yawé kaniwarutinenimayata. Meripaitɨ tɨratu muwewiekaikɨ 'Apɨrahami, 'Itsahaki meta Kakuwu wahamatɨa, 'ayumieme 'ixaheritsixi kaniwarutinenimayata wahetsie putanua, hikɨ 'akuxi yaxeikɨa pɨkawataunie memɨkaka'unarɨwanikɨ meta memɨka'ayeweiyarienikɨ hɨxiena.
2KI 13:24 Kepauka Katsaheri mumɨ Tsiriyatsie ti'aitame, nu'aya Weni-'Arari hetsiena mieme ti'aitame kanayani.
2KI 13:25 Hikɨ 'ana Kuhatsi Kuhakatsi nu'aya, kaniuyɨwekaxɨani kiekarite minawairienikɨ Weni-'Arari Kuhakatsi munawairiekai. Haikakɨa Kuhatsi kane'iwa, 'ana kiekarite kemɨ'ane 'Ixaheri kwieyaritsie mɨmiemetetɨkai kaniu'axe.
2KI 14:1 Huta wiyari ti'aitakaku 'Ixaheri kwieyaritsie Kuhatsi Kuhakatsi nu'aya, 'Amatsiyaxi Kuhatsi nu'aya kanitsutɨani ti'aitatɨ Kura kwieyaritsie.
2KI 14:2 Xeitewiyari heimana 'auxɨwi wiyari kanexeiyakaitɨni kepauka mitsutɨa ti'aitatɨ, Kerutsaremetsie xeitewiyari heimana 'atanauka wiyari katiniuta'aita. Mamaya Kuharani pɨtitewakai, Kerutsareme pɨkiekametɨkai.
2KI 14:3 'Amatsiyaxi Yawé kemɨtinake katiniuyurieni, tsepanetɨ yemekɨ yututsi Rawiri hepaɨ katiuyuri. Tinaimetsie yupaapa Kuhatsi hepaɨ pɨtikatɨa,
2KI 14:4 peru mawari matitayarɨwakai kakaɨyarixi wahetsiemieme pɨka'uti'unaxɨ, teɨteri mepiyeweiyakai mana mawari mewewietɨwetɨ meta 'ɨkwa metaiyatɨwetɨ.
2KI 14:5 Hikɨ kepauka 'Amatsiyaxi 'aixɨa ti'aitatɨ matɨa, kaniwarukwini paratsiyuta te'uximayatamete paapaya ti'aitame memumi.
2KI 14:6 Matsi, Yawé kemɨtiuta'aitaxɨ, teyumiekate waniwema pɨkawarukwi, mɨpaɨtsɨ katine'uka Muitsexi 'inɨari niukiyari kemɨraka'utɨatsie: «Wapaapama mepɨkakwi'iwa waniwema 'axamemɨte'uyurikɨ, meta waniwema mepɨkakwi'iwa wapaapama 'axamemɨte'uyurikɨ, matsi yuxexuitɨ mekanikwi'iwakuni yuxexuitɨ ke'axamemɨte'uyurikɨ».
2KI 14:7 'Amatsiyaxi tamamata miriyari kaniwarukwini 'erumitsixi mayeweritsie Maye'unaya mɨrayetewatsie, meta Tsera kiekatari kaniwara'iwa, mɨkɨ kiekari Kuteri katiniterɨwa, hikɨ 'akuxi mɨpaɨ katinimatiwani.
2KI 14:8 Merikɨtsɨ mɨkɨ tukari mɨtiyehanetsie, 'Amatsiyaxi niuki kanenɨ'ani Kuhatsi hetsɨa, Kuhakatsi nu'aya meta Kehú teukarieya, 'Ixaheri kwieyaritsie ti'aitame, mɨpaɨ katinehɨawekaitɨni: «Kenayeye'a temɨyutakwinikɨ».
2KI 14:9 Peru Kuhatsi, 'Ixaheri kwieyaritsie ti'aitame, 'Amatsiyaxi Kura kwieyaritsie ti'aitame, mɨpaɨ katiniuta'eiya: «Tupiriya xuya Riwanu kiekame kariuxa 'amutewi mɨpaɨ katiniutahɨawe: “'Aniwe 'uka keneyetua neniwe 'ɨyaya mayanikɨ”. Peru kwitɨwata mana mekaniuyekɨne 'ɨrawetsixi yeutari Riwanu kiekatari, hikɨ mɨkɨ xuya mekaniutaketsini.
2KI 14:10 Metsɨ mɨpaɨ kani'aneni, 'Erumi pekana'iwa, hikɨ 'ayumieme kwinimieme pekatini'atemawieka. 'Aixɨa kani'aneni, kene'ata'ɨreni kuta, peru 'akie keneukani. Pepɨka'iwauneni 'ekɨ pemɨmierienikɨ meta Kura mɨka'unarienikɨ».
2KI 14:11 'Amatsiyaxi pɨka'enu'eni. Hikɨ 'ayumieme Kuhatsi, 'Ixaheri kwieyaritsie ti'aitame, kaneyani Weti-Tsemetsi paitɨ, Kura kwieyaritsie, hamatɨana mɨyutamienikɨ.
2KI 14:12 'Ixaheritsixi mekaniwara'iwa Kura kwieyaritsie kiekatari, hikɨ mɨkɨ mekaniyuta'unaxɨani yukie.
2KI 14:13 Weti-Tsemetsi mɨrakutewatsie, Kuhatsi, 'Ixaheri kwieyaritsie ti'aitame, 'Amatsiyaxi kaniuwiya, Kura kwieyaritsie ti'aitame, Kuhatsi nu'aya meta 'Ukutsiyaxi teukarieya. Hikɨ kaneyanita Kerutsareme mana kuraru 'amatayewa kaniuka'una xeitsienituyari heimana nauka tewiyari meturuyari tewime, 'Epɨrahini kitenieyari 'itsutɨaka 'atsita kitenie 'Itsikina mɨtitewatsie kani'atɨani.
2KI 14:14 Metatsiere, naime huru kanetɨni, pɨrata meta piinite Yawé tukita mɨrayepikai meta waɨkawa mɨraye'atɨka paratsiyuta mɨrayepikai. Metatsiere hipame kaniwarehapani, Tsamariya paitɨ kanakunuani.
2KI 14:15 Hipatɨta kemɨtiɨyɨ Kuhatsi ti'aitakaku, meta kemɨtiuyuri meta kemɨtitɨrɨkaɨyekai meta kememɨteyukwitɨwekai 'Amatsiyaxi Kura kwieyaritsie ti'aitame matɨa, katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
2KI 14:16 Hikɨ Kuhatsi kaniɨmɨni mɨkɨ kaniukateukieni Tsamariya paitɨ 'ixaheritsixi memɨte'aitametetɨkai wahamatɨa. Keruwuhani nu'aya pɨta kanitsutɨani 'uwenieyatsie ti'aitatɨ.
2KI 14:17 'Amatsiyaxi Kuhatsi nu'aya, Kura kwieyaritsie ti'aitame, tamamata heimana 'auxɨwi wiyari kaniutihuni 'akuxi Kuhatsi Kuhakatsi nu'aya 'umɨkuri, 'Ixaheri kwieyaritsie ti'aitame.
2KI 14:18 Hipatɨta kemɨtiuyɨ 'Amatsiyaxi ti'aitametɨkaku mɨkɨ katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie.
2KI 14:19 Hipatɨ meheye'unietɨ mehakɨneku Kerutsareme kiekariyaritsie, 'Amatsiyaxi kaniyuta'una Rakixi paitɨ, peru mekanenukuweiya, mana paitɨ mekanimieni.
2KI 14:20 Hikɨta mekaneitɨni kawayutsie Kerutsareme paitɨ, Rawiri kiekariena paitɨ, mana kaniukateukieni yu'ukiyarima wahamatɨa.
2KI 14:21 Hikɨ teɨteri Kura kiekatari 'Atsariyaxi mekananayexeiya, tamamata heimana 'ataxewi wiyari mexeiyakai, mɨkɨ mekananukakeni ti'aitame mayanikɨ yupaapa 'Amatsiyaxi hetsiemieme.
2KI 14:22 Mɨkɨ 'Atsariyaxi katiniuyurieni, 'arike 'Amatsiyaxi ti'aitame 'umɨku, kiekari 'aixɨa muyuri 'Erati mɨtitewa meta Kura kwieyaritsie mieme kaneyeitɨani.
2KI 14:23 'Amatsiyaxi Kuhatsi nu'aya tamamata heimana 'auxɨwime wiyari, Kura kwieyaritsie katini'aitakaituniri, kepauka Keruwuhani Kuhatsi nu'aya 'ixaheritsie ti'aitametɨkai mitsutɨa Tsamariyatsie ti'aitatɨ, huta tewiyari heimana xewi wiyari katiniuta'aita.
2KI 14:24 Keruwuhani Yawé kemɨkatinake katiniuyurieni, pɨka'uyupataxɨ katihayewatɨ 'axatiyurienetɨ, Keruwuhani Nawati nu'aya hepaɨ, mɨkɨ 'ixaheritsixi 'axakaniwaruyurieni.
2KI 14:25 Mɨkɨ katiniuyurieni wakwie mɨwayetuiri 'Ixaheri manuye'atɨka, Rewu-Kamati paitɨ ye'atɨkaime 'Arawa haramarayari manuye'atɨkatsie paitɨ, Yawé kemainekai 'Ixaheri wakakaɨyari, Kunatsi 'Amitahi nu'aya mɨti'uximayatsiriwametɨkai kemɨtiutahɨawekai Kati-Kepexi tixaxatame.
2KI 14:26 Merikɨ Yawé punierekairi yunaime 'ixaheritsixi mematitei wahetsiemieme, waɨriyarika te'uximayatamete yatɨni memɨxɨnarie waɨkawa meteniuka'eniwakaitɨni, 'ana xewitɨ kaniumawekaitɨni mɨwaparewienikɨ.
2KI 14:27 Peru Yawé kaniwarutawikweitsitɨani, Keruwuhani Kuhatsi nu'aya 'anayexeiyaka, mɨkɨ mɨpaɨ mutayɨkaikɨ kename yunaime kwiepa kawareuyehɨanikekai 'Ixaheri kemɨtitewa.
2KI 14:28 Hipatɨta kemɨtiuyɨ Keruwuhani ti'aitametɨkaku, meta naime kemɨtiuyuri, kemɨtiuyutami tawari Ramatsiku kiekariyari meta Kamati kiekariyari 'Ixaheri hetsiemieme kemɨrayeitɨa, katinaka'utɨarieni kemɨtiuyɨ xapayaritsie 'Ixaheritsie te'aitamete waxapatsie.
2KI 14:29 Hikɨ Keruwuhani kaniumɨni, mɨkɨ yu'ukiyarima wahamatɨa kaniukateukieni, 'Ixaheri kwieyaritsie te'aitametetɨkai wahamatɨa. Nu'aya pɨta Tsakariyaxi kanitsutɨani 'uwenieyatsie ti'aitatɨ.
2KI 15:1 Xeitewiyari heimana 'atahuta wiyari ti'aitakaku Keruwuhani 'Ixaheri kwieyaritsie, 'Atsariyaxi 'Amatsiyaxi nu'aya Kura kwieyaritsie ti'aitatɨ kanitsutɨani.
2KI 15:2 Kepauka mitsutɨa ti'aitatɨ tamamata heimana 'ataxewi wiyari pexeiyakai, hikɨ pɨtiuta'aitaxɨ Kerutsareme 'ukaitɨ huta tewiyari heimana tamamata heimana huta wiyari. Maamaya Kekuriyaxi pɨtitewakai, Kerutsareme kiekame.
2KI 15:3 'Atsariyaxi Yawé kemɨtinake katiniuyurieni, mɨkɨ naimetsie paapaya 'Amatsiyaxi ke'aixɨa mɨtikatɨa kanenukuweiya,
2KI 15:4 peru mawari matitaiyarɨwa kakaɨyarixi wahetsiemieme pɨka'uka'unaxɨ, yaxeikɨa mana teɨteri mawari mepɨwewietɨwekai meta pɨtsi mana mepɨtaiyatɨwekai.
2KI 15:5 Mɨyatɨtɨ, Yawé ti'aitame kaniu'uximatɨani nawi kwiniyayarikɨ, hatsuaku pɨka'anayewe mɨya'anetɨ kaniumɨni. Ti'aitame 'Atsariyaxi yuxaɨta xeikɨa kiita mayekateikɨ, nu'aya Kutani paratsiyu kaniuhɨritɨarieni meta mɨkɨ kwieyaritsie mɨti'aitanikɨ.
2KI 15:6 Hipatɨta kemɨtiuyɨ 'Atsariyaxi ti'aitametɨkaku, meta naime kemɨtiuyuri, katinaka'utɨarieni kemɨtiuyɨ xapayaritsie 'Ixaheritsie te'aitamete waxapatsie.
2KI 15:7 'Atsariyaxi kaniumɨni, hikɨ yu'ukiyarima wahamatɨa kaniukateukieni Rawiri kiekariena. Hikɨ nu'aya Kutani 'utɨmana kanitsutɨani ti'aitatɨ.
2KI 15:8 Xeitewiyari heimana tamamata heimana 'atahaika wiyari ti'aitakaku 'Atsariyaxi, Kura kwieyaritsie, Tsakariyaxi Keruwuhani nu'aya kanitsutɨani ti'aitatɨ 'Ixaheri kwieyaritsie, Tsamariya kiekariyaritsie katiniuta'aita 'ataxewime metseri.
2KI 15:9 Tsakariyaxi Yawé kemɨkatinake katiniuyurieni, kememɨte'uyuri 'ukiyarimama, Keruwuhani Nawati nu'aya ke'axameteyuriekame muwarayeitɨa 'ixaheritsixi mɨkɨ pɨkatiuhayewaxɨ.
2KI 15:10 Tsaruni Kawetsi nu'aya Tsakariyaxi 'aye'unietɨ kanayani. 'Iwurehami kiekariyaritsie kaneimieni, hikɨ mɨpaɨ katininawairieni 'uweni.
2KI 15:11 Tawari kemɨtiuyɨ Tsakariyaxi ti'aitakaku katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
2KI 15:12 Mɨpaɨ katinaye'ani Yawé niukieya Kehú kemɨtiutahɨawekai: «'Atɨɨriyama nauka nuiwariyari 'Ixaheri kwieyaritsie mepɨteta'aita».
2KI 15:13 Tsaruni Kawetsi nu'aya ti'aitame kanayani 'Utsiyaxi Kura kwieyaritsie ti'aitame xeitewiyari heimana tamamata heimana 'atanauka wiyari ti'aitakaku, Tsaruni Tsamariya kiekariyaritsie katiniuta'aita xeimetseri.
2KI 15:14 Peru Menakemi Kari nu'aya Tiritsa heyeyaka Tsamariya kaninuani, mana Tsaruni Kawetsi nu'aya kaniutamieni hikɨ kanimieni, mɨpaɨ katininawairieni 'uweni.
2KI 15:15 Tawarita kemɨtiuyɨ Tsaruni ti'aitakaku, meta hipame waraye'unietɨ kemɨratɨa, mɨkɨ naitɨ katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
2KI 15:16 'Ana tukaritsie, Menakemi Tipitsa kiekariyari kaniutamieni. Mana kiekatari kitenie memɨkateheuyepikɨ, yunaime kaniwarukwini meta 'auriena kiekari mamanetɨkatsie kiekatari, Tiritsa me'itsutɨaka, meta yunaime 'ukarawetsixi memayehukatɨka kaniwarutixiteni wahukatsie.
2KI 15:17 Xeitewiyari heimana tamamata heimana 'atanauka wiyari 'Atsariyaxi Kura kwieyaritsie ti'aitakaku, Menakemi Kari nu'aya kanitsutɨani 'Ixaheri kwieyaritsie ti'aitatɨ, Tsamariya kiekariyaritsie tamamata wiyari katiniuta'aita.
2KI 15:18 Peru Yawé kemɨkatinake katiniuyurieni, kepaɨmexɨa tukari 'amuyeikakai hatsuaku pɨkatiuhayewaxɨ Keruwuhani Nawati nu'aya hepaɨ 'axatiyurienetɨ, 'ixaheritsixi ke'axameteyuriekame muwarayeitɨa hepaɨ.
2KI 15:19 Tikarati-Piretsexi, 'Atsiriya kwieyaritsie ti'aitame mɨkɨ kiekariyaritsie kaneutahani watakwinike, matsi Menakemi xeitewiyari heimana tamamata heimana haika kiruyari raheteme pɨrata kaniyetuirieni mihayewakɨ meta mɨti'aitanikɨ 'akuxi.
2KI 15:20 Hikɨ Menakemi mɨpaɨ 'ixaheritsixi katiniwarutawawirieni tumini: yunaitɨ xikutsixi 'Atsiriyatsie ti'aitame mekatenipitɨanikekaitɨni meriu kiruyarikɨ pɨrata kemɨrahete. 'Ana 'Atsiriyatsie ti'aitame kanayeyani kiekari manuyeikakaitsie 'uku'eirieka.
2KI 15:21 Tawarita kemɨtiuyɨ Menakemi ti'aitakaku meta naime kemɨtiuyuri, katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
2KI 15:22 Menakemi kepauka mumɨ, nu'aya Pekakiyaxi 'utɨmana kanitsutɨani ti'aitatɨ.
2KI 15:23 Huta tewiyari heimana tamamata wiyari ti'aitakaku 'Atsariyaxi Kura kwieyaritsie, Pekakiyaxi Menakemi nu'aya kanitsutɨani ti'aitatɨ 'Ixaheri kwieyaritsie, Tsamariya kiekariyaritsie huta wiyari katiniuta'aita.
2KI 15:24 Peru Yawé kemɨkatinake katiniuyurieni, mɨkɨta yaxeikɨa pɨkatiuhayewaxɨ ke'axamɨtiuyuri Keruwuhani Nawati nu'aya, ke'axameteyuriekame muwarayeitɨa 'ixaheritsixi.
2KI 15:25 Xewitɨ mɨkɨ 'iparewiwametɨtɨ Pekaki titewatɨ Xemariyaxi nu'aya, heye'unietɨ kanayani. Huta tewiyari heimana tamamata Kahari nuiwarimama me'iparewiekaku Pekakiyaxi kaniutamieni, meta 'Axikuwi titewakame kaniumieni meta 'Arihe titewakame, paratsiyu tuxiyuyata paitɨ Tsamariya kiekariyaritsie. Mɨpaɨ katinimieni hikɨ mɨpaɨ katininawairieni 'uwenieya.
2KI 15:26 Tawarita kemɨtiuyu Pekakiyaxi ti'aitakaku, meta naime kemɨtiuyuri, katinaka'utɨarieni kemɨtiuyɨ xapayaritsie 'Ixaheri kwieyaritsie te'aitamete waxapatsie.
2KI 15:27 'Atsariyaxi Kura kwieyaritsie ti'aitame, huta tewiyari heimana tamamata heimana huta wiyari ti'aitakaku, Pekaki Xemariyaxi nu'aya kanitsutɨani 'Ixaheri kwieyaritsie ti'aitatɨ, Tsamariya kiekariyaritsie xeitewiyari wiyari katiniuta'aita.
2KI 15:28 Peru Yawé kemɨkatinake katiniuyurieni, pɨkatiuhayewaxɨ 'axamɨti'ane Keruwuhani Nawati nu'aya kemɨtiuyuri 'ixaheritsixi ke'axameteyuriekame muwarayeitɨa.
2KI 15:29 Kepauka Pekaki 'Ixaheritsie mɨti'aitakai, Tikɨrati-Piretsexi 'Atsiriyatsie ti'aitame 'Ixaheri kwieyaritsie kaninuani hikɨ 'Iyuni kiekariyari kana'iwa, 'Aweri-Wetimaká kiekariyari, Kanuha, Tseretsi, Katsuxi, Karaha, meta Karereya kiekariyari, metatsiere Nepɨtahari kwieyari naime, meta hipame teɨteri 'Atsiriya paitɨ kaniwarehapani.
2KI 15:30 Hikɨ 'Utseyaxi 'Eraha nu'aya Pekaki Xemariyaxi nu'aya 'aye'unietɨ kanayani meta kanimieni. Xeitewiyari wiyari yuriekaku Kutani 'Utsiyaxi nu'aya, mɨpaɨ katiniuyɨni kanimieni mɨpaɨ katininawairieni 'uwenieya.
2KI 15:31 Mɨkɨ naitɨ Pekaki manukawekaitsie kemɨti'aitakai meta kemɨtiuyuri, katinaka'utɨarieni kemɨtiɨyɨ xapayaritsie 'Ixaheritsie te'aitamete waxapatsie.
2KI 15:32 Hutarieka wiyari ti'aitakaku Pekaki Xemariyaxi nu'aya 'Ixaheri kwieyaritsie, Kutani 'Utsiyaxi nu'aya kanitsutɨani Kura kwieyaritsie ti'aitatɨ.
2KI 15:33 Kepauka mitsutɨa ti'aitatɨ xeitewiyari heimana 'auxɨwime wiyari pɨhɨkai, hikɨ Kerutsareme 'ukaitɨ katiniuta'aita tamamata heimana 'ataxewi wiyari. Maamaya Kerutsa pɨtitewakai Tsaruki nu'aya.
2KI 15:34 Kutani yakatiniuyurieni Yawé kemɨtinake, naimetsie paapaya 'Utsiyaxi ke'aixɨa mɨtikatɨa kanenukuweiya.
2KI 15:35 Kutani katiniuyurieni Yawé tukieya 'ituparieya 'amɨyewa 'aixɨa muyuri, peru mawari matitaiyarɨwa kakaɨyarixi wahetsiemieme pɨka'uti'unaxɨ, matsi teɨteri mepiyeweiyakai metemawatɨwetɨ meta mana 'ɨkwa metaiyatɨwetɨ.
2KI 15:36 Hipatɨta kemɨtiuyɨ Kutani ti'aitametɨkaku katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie.
2KI 15:37 Kepauka mɨkɨ mɨti'aitakai, kanitsutɨani Yawé warenɨ'awatɨ Kura kwieyaritsie Xetsini, Tsiriyatsie ti'aitame, meta Pekaki Xemariyaxi nu'aya.
2KI 15:38 Kutani kaniumɨni, hikɨ kaniukateukieni yu'ukiyarima wahamatɨa Rawiri kiekariena, tutsieya. Hikɨ nu'aya 'Akatsi kanitsutɨani 'utɨmana ti'aitatɨ.
2KI 16:1 Pekaki Xemariyaxi nu'aya tamamata heimana 'atahuta wiyari ti'aitakaku, 'Akatsi Kutani nu'ayata ti'aitame kanayani, Kura kwieyaritsie.
2KI 16:2 Kepauka mitsutɨa ti'aitatɨ xeitewiyari wiyari pexeiyakai, Kerutsareme kiekariyaritsie 'ukaitɨ pɨtiuta'aitaxɨ tamamata heimana 'ataxewi wiyari. Peru yututsi Rawiri hepaɨ pɨka'anekai, 'Akatsi yapɨkatiuyuri Yawé Kakaɨyari kemɨtinakekai.
2KI 16:3 Matsi, 'Ixaheritsie te'aitamete ke'axamemɨte'uyuri wahepaɨ katiniuyurieni, metsɨ paitɨ yuniwe kaniutataiya taipa mawari mayanikɨ, nuiwarite mana memɨtamakai Yawé mɨwarayeweiyakai 'ixaheritsixi wahɨxie ke'axamemɨte'uhukai wahepaɨ.
2KI 16:4 Metatsiere mawari pɨwewienekai meta 'ɨkwa putitaiyakai kakaɨyarixi wamawari taiyame hetsie, meta hɨri 'amanutitɨtɨtsie meta naime kɨyexi waɨkawa mɨ'e'etɨ hetɨa.
2KI 16:5 Heiwa, Xetsini Tsiriyatsie ti'aitame meta Pekaki Xemariyaxi nu'aya, 'Ixaheri kwieyaritsie ti'aitame, meyunɨtɨ, Kerutsareme mekanekɨne 'Akatsi memetamienikɨ, kiekari warita mekanaketɨkɨne, peru mepɨka'uyɨwekaxɨa memeutahaxɨani.
2KI 16:6 'Ana tukaritsie, Xetsini Tsiriyatsie ti'aitame, tawari 'Erati kiekariyari pa'iwakai, Kura kwieyaritsie kiekatari mana memɨtitekai puwarayewei. Hikɨri mana 'erumitsixi 'Erati kiekariyaritsie mekanikuyaxe, hikɨ 'akuxi mana mekanikuteni.
2KI 16:7 Hikɨ 'Akatsi niuki kanenɨ'ani Tikɨrati-Piretsexi hetsɨa, 'Atsiriyatsie ti'aitame, niuki mɨpaɨ haineme: «Ne xeniu nemɨmati'uximayatsiriwame meta 'ahetsɨa nemɨtiyukutuaya nemɨhɨkɨ, kenamie keneneutawikweitsitɨa, Tsiriyatsie ti'aitame meta 'Ixaheri kwieyaritsie ti'aitame mepɨnetsi'aye'unie».
2KI 16:8 Meta 'Akatsi pɨrata kaniukuxeɨrieni meta huru Yawé tukita mieme meta paratsiyuta mɨraye'atɨka mɨtiuyepinetsie mieme, hikɨ mɨkɨ naime 'Atsiriyatsie ti'aitame kanenɨ'airieni kanimini.
2KI 16:9 'Atsiriyatsie ti'aitame, wahetsiemieme 'itimaixɨaka 'ana Ramatsiku kiekatari kaniwarutakwini yunaime kaniwara'iwa. Hikɨ mana memɨtitekai Kixi kaniwarehapani, Xetsini xeikɨa mekaniumieni.
2KI 16:10 Hikɨ ti'aitame 'Akatsi Ramatsiku paitɨ kaneyani Tikɨrati-Piretsexi 'Atsiriyatsie ti'aitame hetsɨa. Kepauka mawari taiyame muxei, ti'aitame 'Akatsi mawari wewiwame 'Uriyaxi kanenɨ'airieni mawari taiyame 'ɨkiyari, kemɨtiwewienikekai naime.
2KI 16:11 Hikɨ 'Uriyaxi mawari taiyame kaniutawewieni, 'Akatsi ti'aitame ke'aneme meinɨ'airiekai Ramatsiku paitɨ, 'ana kwitɨwa kaninɨni mexi ti'aitame kanuawekai.
2KI 16:12 Kepauka 'ikɨ munua Ramatsiku heyeyaka, mana mawari taiyame kaniuxeiya, mana 'uyaka katiniutimawa.
2KI 16:13 Tɨriku mawariyari kaniyetuani meta mawari taiyariyari kaniuwewieni, winu mana kaniutayeurieni meta 'aixɨa memɨteyuxeiyanikɨ mawariyari xuriyayakɨ mawari taiyame kaniu'ɨya.
2KI 16:14 Mawari taiyame wurunitsekɨ muwewiya Yawé tukieya hɨxie muwekai, kani'ɨra mana mɨka'uwenikɨ, mawari taiyame mɨhekwa 'utata kaniutakeni, hikɨri Yawé tukieya manuwe meta mawari taiyame mɨhekwa wahixɨapayaritsie kaniuyuhayewa.
2KI 16:15 'Ipaɨ mawari wewiwame 'Uriyaxi katiniuta'aitɨarieni: «'Ikɨ mawari taiyame mumariwe hetsie ketineyetua mawari ximeri mieme meta 'imikieri mɨtɨxiyari taikai mieme, yaxeikɨa mawari taiyariyari, 'imikieri mɨtɨxiyari ti'aitame hetsiemieme, yaxeikɨata mawari taiyariyari meta 'imikieri mɨtɨxiyari teɨteri wahetsiemieme meta winu mɨtiyeuriwa yunaitɨ teɨteri wahetsiemieme. 'Ikɨ mawari taiyame mutawewiya hetsie 'imikierite meta mawari taiyariyarite yunaime waxuriyakɨ xekeneu'ɨya. Peru mawari taiyame wurunitsekɨ muwewiya ne nepeiyehɨwa».
2KI 16:16 'Uriyaxi mawari wewiwame naimekɨ yatinikamiekaitɨni 'Akatsi ti'aitame kemɨti'aitɨakai.
2KI 16:17 Ti'aitame 'Akatsi naime 'etsitsutsuitɨ meutimanekai kɨmana muyuwetɨkateitsie kaneuti'ɨni meta maimawame kaneukɨ'ɨni, meta katsu haa makamarike tuurutsixi wurunitsekɨ memuwewiyatɨkatei waheima mamakai tete kwiepa 'umakametsie kanemani.
2KI 16:18 Mɨpaɨ katiniuyurieni 'Atsiriya ti'aitame hetsiemieme, Yawé tukitana timieme katiniwayetɨni xamaru muwa mutawewiyakai 'uxipiya tukaritsie mieme, meta kitenie warita meuwiekai ti'aitame manutahakekaitsie mekaneuxɨna.
2KI 16:19 Hipatɨta kemɨtiuyɨ 'Akatsi ti'aitametɨkaku katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie.
2KI 16:20 'Akatsi kaniumɨni, hikɨ kaniukateukieni yu'ukiyarima wahamatɨa Rawiri kiekariena. 'Anari nu'aya 'Etsekiyaxi kanitsutɨani ti'aitatɨ 'utɨmana.
2KI 17:1 Merikɨtsɨ tamamata heimana huta wiyari ti'aitakaku 'Akatsi Kura kwieyaritsie ti'aitame, 'Utseyaxi 'Eraha nu'aya kanitsutɨani 'Ixaheri kwieyaritsie ti'aitatɨ, Tsamariya kiekariyaritsie katiniuta'aita 'atanauka wiyari.
2KI 17:2 Hikɨ Yawé kemɨkatinake katiniuyurieni, peru kwinimieme 'axapɨkatiuyuri hipame wahepaɨ 'Ixaheri kwieyaritsie memɨte'uta'aitaxɨ.
2KI 17:3 Tsarimanatsaxi 'Atsiriyatsie ti'aitame, 'Utseyaxi kaniutamieni, hikɨ tiyu'uximayatsiriwame kaneyeitɨani meta katinita'aitɨani mɨrayukatuayanikɨ hetsɨana.
2KI 17:4 'Arikemɨkaketa, 'Atsiriyatsie ti'aitame yakatinetimani 'Utseyaxi kemɨtikwamananekai, 'ikɨtsɨ yutupiritsixi kaniwarenɨ'ani Tsu 'Ekipitutsie ti'aitame hetsɨa, meta katiniuhayewakaitɨni tiyukutuayatɨ xeiwiyari hetsiemieme. 'Ayumieme 'Atsiriyatsie ti'aitame katiniuta'aita mɨwiyarienikɨ hikɨ kanenutahɨani.
2KI 17:5 'Arike naime mɨkɨ kwieyaritsie kanitahani, Tsamariya kiekariyari makuma nuaka hikɨ waritana mekanatetɨkateitɨni haika wiyari.
2KI 17:6 'Atanaukarieka wiyari 'Utseyaxi ti'aitakaku, 'Atsiriyatsie ti'aitame Tsamariya kiekariyari 'uka'unakari kaniwarehapani 'ixaheritsixi 'Atsiriya kwieyaritsie, kaniwa'atɨani Karaki mɨrakutewatsie, Kutsani mɨrakutewatsie (Kawuxi hatuxameyari manuyehanetsie 'aurie mɨre'ane) meta merutsixi teɨteriyari wakiekaritetsie.
2KI 17:7 'Ikɨ naitɨ mɨyakatiniuyɨni 'ixaheritsixi 'axamemɨte'uyurikɨ Yawé yukakaɨyari hepaɨtsita, mɨwarayewitɨkai 'Ekipitu kwieyaritsie, Parahuni, 'Ekipitu kwieyaritsie ti'aitame, waɨriyarika tiwa'aitɨakaku. Hipame kakaɨyarixi mewarayexeiyatɨ mekanakɨne
2KI 17:8 meta hipame nuiwarite Yawé muwarayeweiyaxɨa wahɨxie wayeiyari me'uweiyatɨ mekanakɨne, metatsiere hipame yeiyari 'Ixaheritsie te'aitamete memɨte'upitɨa.
2KI 17:9 Meta 'ixaheritsixi Yawé yukakaɨyari hepaɨtsita 'axameputiyua, metatsiere naitsarie hakewa memetitekai mawari matitaiyarɨwa kakaɨyarixi wahetsiemieme mekanitiwewiwakaitɨni. Tuxiyu neniereme hetsie paitɨ kaniutiwewiyani meta kiekarite yukuraru 'amatitetewa mexeiyatɨka hetsie paitɨ,
2KI 17:10 meta naitsarie yemuritetsie, kɨyexi 'amupapa 'etɨriyari hetɨa, tetexi 'amekaniti'uitɨaxɨani patsietɨkaime me'eyeitɨwatɨ, meta 'uka 'Atserá kakaɨyariyari 'ɨkiyari mekaniukuyatsaxɨani,
2KI 17:11 naitsarie mawari matitaiyarɨwa kakaɨyarixi wahetsiemieme 'ɨkwa mekanititaiyakaitɨni, mewa'ɨketɨ nuiwarite Yawé mɨwarayeweiyakai wahɨxie. Waɨkawamekɨ yemekɨ 'axamekateniuyurieni, 'ayumieme Yawé mekaniuyehaxɨatɨani.
2KI 17:12 Nenewieri mekaniwapitɨakaitɨni kakaɨyarixi, Yawé waruta'imaiyakutɨtɨ yemekɨ.
2KI 17:13 'Ayumieme Yawé 'Ixaheri kwieyaritsie kiekatari meta Kura kwieyaritsie kiekatari mɨpaɨ katiniwarayehɨtɨani yuniukamete meta memɨtaneniere Kakaɨyari hetsie timiemekɨ: «Xeketeneuhayewa 'axaxeteyurietɨ. Ne'aitsikate xekenaye'atɨaka meta kenemutayɨ, metatsiere naime ne'inɨari niukiyaritsie yaxeketenekahuni kenemɨtiwaruta'aitɨa xe'ukiyarima, meta xeme nemɨxeyetuiri neniukamete yametexekɨhɨawekaku».
2KI 17:14 Tsepa mɨpaɨ memɨte'utahɨawarie, mɨkɨ yamepɨkatekakɨ, matsi kwinimieme meka'enanakutɨ mepakɨ yu'ukiyarima wahepaɨ, mɨkɨ Yawé yukakaɨyari hetsie memɨkate'uwi.
2KI 17:15 Mepɨka'itanaki'eri 'aitsikate meta Yawé kemɨtiwarayehɨtɨwakai, meta tɨratu kemɨtiuwewiekai wa'ukiyarima wahamatɨa mekaniku'eirieni. Kakaɨyarixi memɨwewiyatɨka tixaɨtɨ memɨkatehɨkɨ mewarayexeiyatɨ mepakɨ, yaxeikɨata mɨkɨ tixaɨtɨ mekatehɨmetɨtɨ mepakɨ, nuiwarite wa'aurie memɨtitekai wayeiyari mepanukuwei.
2KI 17:16 Yawé yukakaɨyari 'aitsikaya naime mepuku'eiri, meta yuhutame kakaɨyarixi mekaniwarutiwewieni tepɨakɨ tsikeru hepaɨ meteyuxexeiyame, xeimeta 'uka 'Atserá kakaɨyariyari 'ɨkiyari. Mekaniukahɨxima'uni tau, metseri meta xurawetsixi wahɨxie meta Wahari mekanayexeiyakaitɨni,
2KI 17:17 yuniwema mekaniwamawakaitɨni taipa mewareuxɨrɨwatɨ 'ukitsi meta 'ukari, memɨtemaiwawenikɨ mepɨteyu'ɨkitɨakai meta memɨteyukewaiyanikɨ, mɨyameyɨatɨ Yawé kemɨkatinake meteyurietɨ mekanakɨne, hikɨ mɨpaɨ mekateniyehaxɨatɨani.
2KI 17:18 'Ayumieme Yawé waɨkawa kaniuyeha'ani 'ixaheritsixi wahetsiemieme, hikɨ hɨxiena memɨka'u'uwanikɨ kaniwarayeweiya. Kura nuiwariyari xeikɨa mekaniuyuhayewa.
2KI 17:19 Peru yaxeikɨa Kura kiekatari Yawé yukakaɨyari 'aitsikayatsie yametekahutɨ mekateniuhayewa, 'ixaheritsixi yeiyari ke'aneme memɨ'atɨakai mɨkɨ mekananukuweiya.
2KI 17:20 'Ayumieme Yawé yunaime 'ixaheritsixi kaniwarayeweiya: kaniwaruhiweritɨani meta kaniwayetuani memɨwaraye'unie wahetsɨa, mɨpaɨ katiniwarakumaweriya yɨhɨxie.
2KI 17:21 Metsɨ kepauka Yawé 'ixaheritsixi muwarupataxɨ Rawiri nuiwarimama wahetsɨa, mɨkɨ Keruwuhani ti'aitame mekanayeitɨani Nawati nu'aya. Matsi Keruwuhani kaniwareuyexɨrieni Yawé huyeya hepaɨtsita, hikɨ waɨkawa 'axamemɨteyurienikɨ yakatiniuyurieni.
2KI 17:22 Mɨyatɨtɨri, 'ixaheritsixi mekanenukuweiya Keruwuhani naime ke'axamɨtiuyuri, nihatsuaku mepɨkate'uhayewaxɨ 'axamɨti'anekɨ.
2KI 17:23 Hikɨ 'imatɨrieka Yawé yɨhɨxie kaniwarayeweiya 'ixaheritsixi, yemekɨ kemutayɨkai niukametemama yametekuxatakaku. Hikɨ 'ana, mekanehapanieni 'Atsiriyatsie paitɨ, 'anatɨtɨ hikɨ mana mekane'uwani.
2KI 17:24 Hikɨ 'ixaheritsixi memakutekaitsie Tsamariya mɨrakutewatsie, 'Atsiriyatsie ti'aitame teɨteri kaniwa'atɨani Wawiruniya kiekatari, Kuta, 'Awa, Kamati meta Tsepariwahini. Mɨkɨ Tsamariya kiekariyari yukiekari mekanayeitɨani meta kiekarite 'auriena mumanetɨkatei.
2KI 17:25 Kepauka memu'axɨatsie matɨari, Yawé mepɨkahayexeiyakai, 'ayumieme Yawé mayetsi kaniwareyenɨ'ani mekaniwarutikwani hipame mɨkɨ kiekaritsie.
2KI 17:26 'Ayumieme 'Atsiriyatsie ti'aitame mɨpaɨ mekateniutaxatɨani: «Ti'aitame teɨteri pemɨwarekutua Tsamariya kiekariteyaritsie 'atsimepɨkatehemate kakaɨyari mɨkɨ kwieyaritsie mieme kemɨrayexeiyani. 'Ayumieme mɨkɨ mayetsi puwareyenɨ'a memɨwarekwinikɨ».
2KI 17:27 Hikɨ 'Atsiriyatsie ti'aitame mɨpaɨ katiniuta'aita: «Xeime mawari wewiwame mana xemɨwareyehapa, Tsamariya xekenanuwitɨki mana mekanikɨ meta mana memetitei mɨtiwareti'ɨkitɨanikɨ kehepaɨ mɨtinake kakaɨyari mɨkɨ kwieyaritsie kiekame».
2KI 17:28 Hikɨ xewitɨ mawari wewiwame Tsamariyatsie mɨyehaniekai kaneyani Weteri mɨrakutewa kaniutayerɨni hikɨ mana kanitsutɨani tiwa'ɨkitɨatɨ kehapaɨ Yawé mɨrayexeiyani.
2KI 17:29 Peru mɨyatɨtɨ yuxexuitɨ kiekarite mekaniwarutiwewiexɨani yukakaɨyarixima yuhetsiemieme, meta mawari matitaiyarɨwa kakaɨyarixi wahetsiemieme memitiwewiekaitsie 'ixaheritsixi Tsamariyatari mana mekaniwati'uitɨani.
2KI 17:30 Wawiruniya kiekatari kakaɨyari Tsukuti-Wenuti mekaniutawewieni, Kuta kiekatari Nexikari mekaniutawewieni, Kamati kiekatari 'Atsimaha mekaniutawewieni,
2KI 17:31 meta 'Awa kiekatari Niwikatsi mekaniutawewieni meta Taritaki. Meta Tsepariwahini kiekatari yuniwema mekaniwatitaiyakaitɨni mawari memayanikɨ kakaɨyarixi 'Aruramereki meta 'Anamereki wahetsiemieme, Tsepariwahinitari wakakaɨyarima,
2KI 17:32 metatsiere Yawé mekanayexeiyakaitɨni, peru mɨkɨ yuxaɨta mekaniwaranuka'uitɨani mawari wewiwamete tsepa kemɨ'ane tewiyari memɨteta'uximayatakɨ mawari matitaiyarɨwa kakaɨyarixi wahetsiemieme.
2KI 17:33 Tsepa Yawé memayexeiyakai, mekaniwarayexeiyakaitɨnita yukakaɨyarixi, wayeiyari keme'anekai hakewa memeyekɨnekai.
2KI 17:34 'Akuxi hikɨ yaxeikɨa yuyeiyari meripai mieme mekanayexeiyani. Hawaikɨ Yawé mepɨkahayexeiya meta 'inɨari niukiyaritsie yamepɨkatekahu kemɨreuyewetse, Yawé kemɨtiuta'aitaxɨ, Kakuwu nuiwarimama kemɨtiwaru'aitɨatsie, mɨkɨ kemɨ'ane 'Ixaheri mɨtiterɨwaxɨ.
2KI 17:35 Kepauka Yawé tɨratu muwewi 'ixaheritsixi wahamatɨa, mɨpaɨ katiniwarutahɨawe: «Hipame kakaɨyarixi xepɨkawarayexeiyani meta wahetɨa xepɨkatitunuma'uweni, xepɨkawarayexeiyani nimawari xepɨkawawewirieka.
2KI 17:36 Yawé yuxewime xeikɨa xekenayexeiyani, kemɨ'ane mɨxe'ayewitɨ 'Ekipitu kwieyaritsie xeparewietɨ tɨrɨkaɨyemekɨ mariwemekɨ tiyurienetɨ. Mɨkɨ pɨta xeikɨa xekenayexeiyani meta mawari xeketenexatɨaka.
2KI 17:37 Yumarima 'aixɨa xekenaye'atɨaka 'aitsikaya meta 'inɨari niukiyari naime mɨxeyetuiri 'aka'ukame. Tawari hipame kakaɨyarixi xepɨkawarayexeiyani.
2KI 17:38 Xepɨkahetɨtɨmaiyani tɨratu kemɨtiuwewi xehamatɨa. 'Ayumieme hipame kakaɨyarixi xepɨkawarayexeiyani,
2KI 17:39 matsi Yawé yukakaɨyari yuxaɨtame xeikɨa. Mɨkɨ kanixetawikweitsitɨamɨkɨ hipatɨ mexe'aye'uniekaku».
2KI 17:40 Peru mɨkɨ yamepɨkatekakɨ, yaxeikɨa meteyurietɨ mekanakɨne meripaitɨ kememɨteyuriekai hepaɨ.
2KI 17:41 Mɨkɨ teɨteri Yawé mekanayexeiyakaitɨni, peru mekaniwarayexeiyakaitɨnita yukakaɨyarixi. Hikɨtɨtɨ 'akuxi yaxeikɨa mekane'aneni waniwema wanuiwari hetsiemiemete, wa'ukiyarima kememɨteyuriekai meripaitɨ wahepaɨ mekateniyurieka.
2KI 18:1 Merikɨtsɨ haika wiyari 'Ixaheri kwieyaritsie ti'aitakaku 'Utseyaxi 'Eraha nu'aya. 'Etsekiyaxi 'Akatsi nu'aya Kura kwieyari hetsiemieme ti'aitame kanayani.
2KI 18:2 Mɨkɨ xeitewiyari heimana 'auxɨwime wiyari kanexeiyakaitɨni kepauka mitsutɨa ti'aitatɨ, Kerutsareme 'ukaitɨ katiniuta'aita xeitewiyari heimana 'atanauka wiyari. Maamaya 'Awihi pɨtitewakai Tsakariyaxi nu'aya.
2KI 18:3 'Etsekiyaxi Yawé kemɨtinake katiniuyurieni, tutsieya Rawiri kemɨtikatɨa naimetsie mɨpaɨ katinikayani.
2KI 18:4 Kaniti'una mawari matitaiyarɨwakai kakaɨyarixi memɨte'atimawiyarɨwa, tetexi mɨpatsietɨka kaniutitara meta 'uka 'Atserá kakaɨyariyari 'ɨkiyari kaniutimura. Metatsiere, kuu wurunitsekɨ muwewiya Muitsexi mitawewiekai kaniukumaweriya, mɨkɨ 'akuxi 'ixaheritsixi 'ɨkwa mekanititairiwakaitɨni meta Nekutsitani mekateniterɨwakaitɨni.
2KI 18:5 'Etsekiyaxi yemekɨ Yawé 'Ixaheri Kakaɨyarieya hetsie katiniwiyakaitɨni. Nixewitɨ tawari hepaɨna pukatiuyuri yunaitɨ Kura kwieyaritsie meripaitɨ meta 'arike memɨte'uta'aitaxɨ.
2KI 18:6 Mɨkɨ heitseriemekɨ kaneyexeiyakaitɨni Yawé, hatsuaku pɨka'iku'eiri, matsi naime 'inɨari niukiyari paye'atɨa Yawé Muitsexi muyetuiri.
2KI 18:7 Yawé 'Etsekiyaxi kaniparewiekaitɨni, 'ayumieme naime kemɨtiyu'uximayatsiriekai naitɨ 'aixɨa pɨtikɨyɨnekai. Matsi ti'aitame 'Atsiriya kiekame 'aye'unietɨ patɨa, pɨkayuwaɨri mɨti'uximayatsiriekakɨ.
2KI 18:8 Meta piritsiteutsixi kaniwara'iwa meta tuxiyu neniereme hetsie paitɨ meta kiekari yukuraru 'amatitetewa memexeiyatɨkatei, 'atsita Kahatsa kiekatari meta 'auriena mamanetɨka.
2KI 18:9 Naurieka wiyari ti'aitakaku 'Etsekiyaxi, tatsɨari, 'atahuta wiyari ti'aitakaku 'Utseyaxi 'Eraha nu'aya, 'Ixaheri kwieyaritsie ti'aitame, Tsarimanatsaxi 'Atsiriya kwieyaritsie ti'aitame, Tsamariya kiekariyari makuma nuaka hikɨ waritana mekanayaxetɨkɨne.
2KI 18:10 Hikɨ haika wiyari 'aye'akuke kiekari kana'iwa kaneutahani kiekaritsie. 'Etsekiyaxi 'ataxewirieka wiyari ti'aitakaku, tatsɨari, 'atanauka wiyari ti'aitakaku 'Utseyaxi 'Ixaheri kwieyaritsie.
2KI 18:11 'Atsiriya kwieyaritsie ti'aitame 'ixaheritsixi kaniwarehapani 'Atsiriyatsie paitɨ, Karaki mɨrakutewatsie paitɨ kaniwa'atɨani, Kutsani kwieyaritsie (mɨkɨ Kawuxi hatuxameyari manuyeka 'aurie pɨti'anekai) metatsiere merutsixi wakiekaritetsie mepɨ'atɨarie.
2KI 18:12 'Ikɨ mɨya katiniuyɨni Yawé yukakaɨyari memɨka'anu'enikɨ, matsi tɨratu kememɨte'uwewiekai mɨpaɨ mepɨkatekakɨ. Mepɨkaheye'atɨa meta mɨpaɨ mepɨkate'uyuri Muitsexi, Yawé ti'uximayatsiriwame, kemɨtiwaruta'aitɨakai.
2KI 18:13 Tamamata heimana nauka wiyari ti'aitakaku 'Etsekiyaxi, Tsenakeriwi 'Atsiriya kwieyaritsie ti'aitame kaninuani, naime Kura kwieyaritsie mieme kiekarite kuraruyari 'ematitetewa kaniwarutakwini hikɨ kaniwara'iwa.
2KI 18:14 Hikɨ 'Etsekiyaxi 'Atsiriya kwieyaritsie ti'aitame hetsɨa niuki kanenɨ'ani Rakixi mekatei, mɨpaɨ haineme: «'Axanepɨtiuyuri 'ahepaɨtsita. Xɨka peheyani, ne nepɨrayukatuani kepaɨmeme pemɨnetitawawirieni». 'Atsiriya kwieyaritsie ti'aitame, 'Etsekiyaxi Kura kwieyaritsie ti'aitame katiniutawawirieni, 'atanauka miriyari heimana 'atanauka tsienituyari (9.900) kiruyari pɨrata meta 'atanauka tsienituyari heimana nauka tewiyari heimana tamamata (990) kiruyari huru.
2KI 18:15 Hikɨ 'Etsekiyaxi 'ana Tsenakeriwi kaniyetuirieni naime pɨrata Yawé tukita miemetɨkai meta paratsiyuta miemetɨkai.
2KI 18:16 'Ana katiniuyurieni 'Etsekiyaxi Kura kwieyaritsie ti'aitame, Yawé tukieya 'itupariyaritsie huru mukaxɨnaxɨ meta kitenie tenimeyaritsie mieme, mɨkɨtɨtɨ mɨtiuta'aitakai mɨkɨ mɨkawiriyarienikɨ, hikɨ kaniyetuani 'Atsiriya kwieyaritsie ti'aitame hetsɨa.
2KI 18:17 Hikɨ Rakixi mɨrakutewatsie 'ukaitɨ 'Atsiriyatsie ti'aitame yuparewiwame kanenɨ'ani yu'ɨtɨa mieme ti'aitame, meta xeime yuparewiwame mexɨakame mieme, meta xeime kuyaxi tiwa'aitɨwame, kuyaxi meyumɨireme mewarawitɨkɨme, 'Etsekiyaxi hamatɨa memɨtehetixatakɨ Kerutsareme paitɨ. Hikɨ mekanekɨne Kerutsareme, me'uye'axɨaka, haa wapaitɨ meukatuarike manuhuyeritɨarie hetɨa mekaniwa'uni, 'Ekwame Kwieya makuma huyeyari 'utɨa.
2KI 18:18 Hikɨ ti'aitame mɨwitɨkiemiekɨ mekateniutanɨ'ani, hikɨ kaninuani 'Eriyakini Kirikiyaxi nu'aya, paratsiyuta mɨtiwa'aitɨakai, meta kemɨtiuyɨ ti'utɨwame Tsewina meta ti'utɨwame Kuha 'Atsahapi nu'aya.
2KI 18:19 Kuyaxi tiwa'aitɨwame mɨpaɨ katiniwarutahɨawe: —Mɨpaɨ xeketenetaxatɨa 'Etsekiyaxi kename mɨpaɨ haine mumariwe ti'aitame, 'Atsiriya kwieyaritsie ti'aitame: “¿Ketitatsie petiwiyatɨ peti'ane ni'atsipemɨkara'eriwa?
2KI 18:20 'Ekɨ mɨpaɨ pekaniutaineni kename petimaiwe meta kename kuyaxi meyumɨireme pewarexeiya, peru matsi mɨkɨ niuki xeikɨa kanihɨkɨtɨni. ¿Kemɨ'anetsie pepɨtiwiya, titayari penetsi'aye'unietɨ pera'ayeitɨwa?
2KI 18:21 'Aixɨa kani'aneni, 'ekɨ metsɨ 'Ekipitu hetsie pekatiniwiyani, mɨkɨ 'itsɨ manumuri kanihɨkɨtɨni, kemɨ'ane hetsiena mɨrawiya pitseni mamayatsie. Mɨpaɨ kani'aneni Parahuni, 'Ekipitu kwieyaritsie ti'aitame, kemɨ'ane hetsiena memɨtewiya wahetsiemieme.
2KI 18:22 Xɨka xeme mɨpaɨ xenete'utahɨawe: ‘Tame Yawé takakaɨyari hetsie tepɨtewiya’, ¿'iya xekatexata mɨkɨ Kakaɨyari mawarieya matitaiyarɨwa, 'ekɨ 'Etsekiyaxi, pemiti'unaxɨ meta tukiteya, mɨpaɨ petiwakɨhɨawetɨ Kura kwieyaritsie kiekatari meta Kerutsaremetari: ‘Xepɨte'utimawani xeikɨa 'ikɨ mawari taiyame hɨxie Kerutsareme kiekariyaritsie’?”
2KI 18:23 »Neuxei, 'Etsekiyaxi, 'ikɨ tɨratu keneuwewi neti'aitɨwame, 'Atsiriya kwieyaritsie ti'aitame, matɨa: Ne kawayutsixi nepɨmatsiyetuirieni huta miriyari, 'ekɨta xɨka pewakuwauni memanutiyaxe wahetsie.
2KI 18:24 Pepɨkayɨwe peme'iwa nitɨma kuyaxi 'etsimemɨyupaɨme tiwa'aitɨwame neti'aitɨwame hetsɨa mieme, tsepa 'Ekipitu hetsie pemɨtiwiya, kaxetate kuyaxa mieme memexeiyakɨ meta kawayutsixi memɨwarexeiyakɨ.
2KI 18:25 ¿Kamɨtsɨ Yawé kanetsiparewiekame peti'erie nemunua 'ikɨ kiekari neka'unake? Huu mɨkɨ matsi mɨpaɨ kanetineta'aitɨani: “Kenenua 'ikɨ kwieyaritsie meta keneuka'una”».
2KI 18:26 Hikɨ 'Eriyakini Kirikiyaxi nu'aya, Tsewina meta Kuha mɨpaɨ kuyaxi tiwa'aitɨwame mekateniutahɨawe: —Ximɨxi, ketaneutahɨawi 'arameu niukiyarikɨ tame mate'uximayatsiriwamete, tepi'enie. Pepɨkatatsikuhɨaweni hepɨrayukɨ, teɨteri kuraru heima memaka'u mepɨtatsita'enie.
2KI 18:27 Peru kuyaxi tiwa'aitɨwame mɨpaɨ katiniwarutahɨawe: —Matsi neti'aitɨwame pɨkanetsiheyenɨ'a 'ekɨ meta mati'aitɨwame mame xeikɨa nemɨtixetaxatɨanikɨ 'ikɨ, matsi kurarutsieta memakatei yunaime. Metsɨ yunaitɨ yaxeikɨa mɨkɨ meta xeme xekanitikwaikuni yukwita meta yuxixi xekanitiharikuni.
2KI 18:28 Mɨpaɨ 'utayɨka, kuyaxi tiwa'aitɨwame 'akaniutakeni hikɨ karima 'utaniutɨ hepɨrayukɨ mɨpaɨ kaniutayɨni: —Xekeneu'eni ti'aitame mɨmariwe niukieya, 'Atsiriya kwieyaritsie ti'aitame.
2KI 18:29 Mɨpaɨ kanaineni ti'aitame: “'Etsekiyaxi pɨtixeku'itaiya. Mɨkɨ pɨkayɨwe mɨxe'utawikweitsitɨani nehetsɨa.
2KI 18:30 Xepɨka'ipitɨaka 'Etsekiyaxi mɨxekemakaxɨani Yawé hetsie xemɨtewiyanikɨ, mɨpaɨ tixekɨhɨawetɨ: ‘Yurikɨ Yawé katanitawikweitsitɨamɨkɨ, 'ikɨ kiekari 'Atsiriya kwieyaritsie ti'aitame pɨka'ika'una’”.
2KI 18:31 »'Etsekiyaxi xepɨkaheu'enieka. Mɨpaɨ kanaineni 'Atsiriya kwieyaritsie ti'aitame: “Kayuwatɨ xemexeiyanikɨ yaxekeneutiyua nehetsɨa, meta xekeneyuyetua. 'Ana yukaxie xepukakwa'ani meta yuxapa, metatsiere haa yuputsuta mieme xepɨhareka,
2KI 18:32 'arike nepunuani nepɨxehanuwitɨni, xeime kwieyaritsie paitɨ, xekwieyari hepaɨ 'anemetsie, hakewa 'imɨari meta winu mɨhekwa mexuawe, paa meta kaxie haraweriyari, huriwa hatseitiyari meta xiete. Mɨpaɨ 'axepu'uwani xepɨkakwini”. »'Etsekiyaxi xepɨka'enieka, mɨkɨ pɨtixeku'itaiya kepauka mɨpaɨ mutaine: “Yawé pɨtatsixɨna”.
2KI 18:33 ¿Kamɨtsɨ nuiwarite xewitɨ wakakaɨyari yukwieyaritsie tiutanua, 'Atsiriya kwieyaritsie ti'aitame 'ika'unakeyu?
2KI 18:34 Hawaikɨ mepɨkatehenakixɨ Kamati meta 'Axipari wakakaɨyarixima, meta Tsepariwahini, Henaha meta 'Iwaha wakakaɨyarixima. ¿Kamɨtsɨ xewitɨ kakaɨyari Tsamariya tiuxɨnaxɨ nehetsɨa?
2KI 18:35 Mɨkɨ kakaɨyarixi mɨkɨ kwieyaritetsie miemete nixewitɨ yukwieyari pɨka'utawikweitsitɨa nehetsɨa. ¿Merikɨte Yawé ketiyɨwe Kerutsareme mɨtawikweitsitɨani nehetsɨa?»
2KI 18:36 Peru teɨteri kayuwatɨ mekaniumakaitɨni meta nixeiniukiyarikɨ tɨma mepɨka'ita'ei, ti'aitame mɨpaɨ mɨtiwaruta'aitɨakaikɨ: «Hawaikɨ xepɨka'iku'eiyani».
2KI 18:37 Hikɨ 'Eriyakini Kirikiyaxi nu'aya paratsiyuta mɨtiwa'aitɨakai, Tsewina kemɨtiuyɨ ti'utɨwame mɨhɨkɨ, meta ti'utɨwame Kuha 'Atsahapi nu'aya, yukamixa meheukatsanaxɨaka hiwerika 'inɨariyari me'uyuwewirieka, mekanekɨne 'Etsekiyaxi hetsɨa, hikɨ mekatenitaxatɨani kemutayɨkai kuyaxi tiwa'aitɨwame 'atsiriyatanaka.
2KI 19:1 Merikɨtsɨ kepauka ti'aitame 'Etsekiyaxi mɨtiutamari, yukamixa witsimɨ'ane kaneukatsana, hiwerika kamixayari kananakatɨni meta kaneyani Yawé tukita.
2KI 19:2 Metatsiere, kaniwarutanɨ'ani 'Eriyakini paratsiyuta mɨtihɨritɨarie, meta kemɨtiuyɨ ti'utɨwame Tsewina, metatsiere mawari wewiwamete waɨkawa memɨ'ukirawetsixi, yunaitɨ mɨkɨ hiwerika kamixayari mepanakatɨtɨkatei, kaniwarutanɨ'ani memɨtehetixatakɨ Kakaɨyari niukameya Kitsariyaxi 'Amuxi nu'aya matɨa.
2KI 19:3 Mɨpaɨ mekatenitahɨawe: «Mɨpaɨ kanaineni 'Etsekiyaxi: “Hikɨ hiwerika tukariyari pɨhɨkɨ meta 'uximatɨarika meta nanaimarika, kepauka tɨɨri memɨtinunuiwarɨme hepaɨ meta wamama muti'uxixɨ mɨkayɨwe hepaɨ.
2KI 19:4 Heiwatɨ Yawé 'akakaɨyari 'i'enieni naime kuyaxi tiwa'aitɨwame kemutayɨ, mɨkɨ ti'aitɨwameya, 'Atsiriyatsie ti'aitame meiyenɨ'a, Kakaɨyari mayeyuri 'axamɨtitahɨawekɨ. Yawé 'akakaɨyari 'uximatɨarika ke'ipitɨani mi'enikɨ kemutayɨ. Kamɨtsɨ, nenewieri keneupitɨa tahetsiemieme teɨteri 'akuxi temɨtahayewatɨwe”».
2KI 19:5 Kepauka ti'aitame 'Etsekiyaxi parewiwametemama Kitsariyaxi hetsɨa memanukɨ,
2KI 19:6 mɨkɨ mɨpaɨ katiniwarutahɨawe: «Tixe'aitɨwame mɨpaɨ xeketenetahɨawi kename mɨpaɨ haine Yawé: “Pepɨkaheumaka 'axaniuki pemu'enikɨ, meta nehepaɨtsita miemekɨ kememutiyua 'Atsiriyatsie ti'aitame parewiwametemama.
2KI 19:7 Neuxei. Ne xeime 'iyari hetsiena nepɨkayeni, hikɨ mɨkɨ yɨkɨ timarieme kaniyemieni yukwieyaritsie paitɨ. Mana paitɨ yanepɨtiyurieni mɨmierienikɨ 'ixiparakɨ”».
2KI 19:8 Kepauka kuyaxi tiwa'aitɨwame mɨpaɨ mɨretima kename 'Atsiriyatsie ti'aitame hayeyakai Rakixi mɨrakutewatsie, Hikɨ kaneyani kaneitaxeiya Riwina kiekatari warekwineme.
2KI 19:9 Hikɨta Tsenakeriwi tiniutaxatɨarieni kename Tiraka, Kutsi kwieyaritsie ti'aitame, hayeyakai 'itamienike, hikɨ 'ayumieme tawarita niuki kanenɨ'ani 'Etsekiyaxi hetsɨa,
2KI 19:10 mɨpaɨ mɨtitahɨawarienikɨ: «'Ekɨ, 'Etsekiyaxi, Kura kwieyaritsie ti'aitame: Hawaikɨ pepɨka'ipitɨaka 'akakaɨyari, hetsiena pemɨtiwiya, matiku'itaiyani mɨpaɨ 'utaitɨ: “Hawaikɨ, 'Atsiriya kwieyaritsie ti'aitame, Kerutsareme kiekariyaritsie pɨkaheutahani”.
2KI 19:11 'Ekɨri pekatinimaika kememɨte'uyuri 'Atsiriyatsie te'aitamete naitsarie kwieyaritetsie, mepɨwaruka'unaxɨ naime. ¿Kamɨtsɨ 'ekɨ mɨpaɨ petiku'eriwa kename petawikweni?
2KI 19:12 ¿Kamɨtsɨ ne'ukiyarima memɨwaruka'unaxɨ kiekarite: Kutsani, Karani, Xetsepi meta teɨteri 'Ereni kiekatari Teratsaxi memɨtamakai, wakakaɨyarixi wahetsie mete'utanua?
2KI 19:13 Hawaikɨ mepɨkatehenakixɨ Kamati kwieyaritsie ti'aitame meta 'Axipari kwieyaritsie ti'aitame, Tsepariwahini kiekariyaritsie ti'aitame meta Henaha yatɨni 'Iwaha».
2KI 19:14 'Etsekiyaxi xapa kananuhurieni nɨ'ariekate wamamatsie, hikɨ kanekaterɨwa. Kwitɨta kaneyani Yawé tukita, muwa xapa kaniutawera Yawé hɨxie,
2KI 19:15 hikɨ hɨxiena mɨpaɨ katiniuyunenewieni: «Yawé, 'Ixaheri Kakaɨyarieya, matsiteɨtamete memu'ana wahixɨata 'a'uwenitsie pemaka: 'ekɨ xeikɨa naitsarie kwiepa te'aitamete wakakaɨyari pekanihɨkɨtɨni. 'Ekɨ pekaninetɨani muyuawi meta kwie.
2KI 19:16 Yawé, kenakatutsiri meta keneu'ena, kenanutanieri, Yawé, meta keneutanierixɨa, keneu'eni niuki Tsenakeriwi meiyenɨ'a, 'axamɨmatitahɨawekɨ Kakaɨyari pemayeyuri.
2KI 19:17 »Yawé, kaniyuritɨni te'aitamete 'atsiriyutsixi 'ikɨ nuiwarite yunaime mekaniwarakumaweriya meta wakwie.
2KI 19:18 Wakakaɨyarixi taipa mekaniwareuxɨrieni, mekaniwareuyehɨani, mɨkɨ kakaɨyarixi memɨkahɨkɨtɨkaikɨ matsi kɨyexi meta tetexi memɨhɨkɨtɨkaikɨ, tewi mamaya wewiyaya xeikɨa.
2KI 19:19 Yawé takakaɨyari, hikɨri ximɨxi, ketaneutawikweitsitɨa mɨkatatsika'unakɨ, hikɨ yunaitɨ te'aitamete kwiepa memɨtama mɨpaɨ memɨtehetimanikɨ kename 'ekɨ xeikɨa, Yawé, Kakaɨyari pehɨkɨ».
2KI 19:20 Hikɨ Kitsariyaxi 'Amuxi nu'aya 'ikɨ niuki 'Etsekiyaxi kanenɨ'airieni: «Mɨpaɨ kanaineni Yawé, 'Ixaheri Kakaɨyarieya: “Waɨkawa kepemɨnetiutawawiri Tsenakeriwi, 'Atsiriyatsie ti'aitame hepaɨtsita, nekamaniu'enieni.
2KI 19:21 'Ikɨ niuki kanihɨkɨtɨni ne, Yawé, kenemutayɨ hepaɨtsitana: »”Tsiyuni kiekariyari, 'uka 'ɨimari hepaɨ, pumatsi'atse matsinanaimatɨ, Tsenakeriwi 'aku. Kerutsareme yumu'u puyuitɨwa matsixeiyatɨ pemɨ'ata'unaxɨkɨ.
2KI 19:22 ¿Kemɨ'ane peputati? ¿Kemɨ'ane hepaɨtsita 'axapeputayɨ? ¿Kemɨ'ane pepanutahiwiexɨa, meta kemɨ'ane peyuta'ɨretɨ kwi pepanutixei? 'Iya Mɨpatsie 'ixaheritsixi wahetsiemieme pekaniuyurieni.
2KI 19:23 'Ekɨ pekaniwareyenɨ'ani 'anɨ'arima Yawé 'axamemɨtetahɨawekɨ, mɨpaɨ me'utiyuatɨ: ‘Nekaxetate kuyaxa miemete memɨyumɨirekɨ hɨri 'amanutitɨtɨtsie paitɨ nekananutiyani, Riwanu hɨriyaritsie paitɨ. Kariuxa 'amutɨtɨ mana mieme nekaniuxɨrieni, meta huku yemekɨ 'aixɨa mɨ'anene. Teewa paitɨ nepuyene mɨka'uyeiyaxietsie, meta hakewa 'ɨtsi mewawemetɨkai.
2KI 19:24 Haputsu neputiwewi hipame wakwieyaritsie, hikɨ mɨkɨ haa ne'anuhareka nekaheuharimɨtɨ nepatɨa. Neketatekɨ naime haa 'Ekipitu mieme nepukawatsiɨxaxɨa’.
2KI 19:25 »”¿Kari 'atsipepɨkatimate? Mɨixa wiyari kananuyemieni mɨkɨ nemɨtiukuha'aritɨa. Meripaitɨtɨ ne mɨpaɨ nekaniutayɨni, hikɨri 'ayumieme nekaneye'atɨani. 'Ayumieme 'ekɨ pekaniwaruka'una mɨkɨ kiekarite yukuraru memexeiyatɨkatei 'a'atitetewame.
2KI 19:26 'Ayumieme kiekatari mekatɨrɨkawitɨ mekanakɨkani, me'iyɨrietɨ meta meyutetewiyatɨ. Tupiriyate yeuta mieme hepaɨ mekani'aneneni, 'ɨxa mɨyɨyɨri hepaɨ, tupiriya kii heima mɨtineika hepaɨ mɨtiwauke katiwaweriwawetɨ.
2KI 19:27 »”Ne nepɨtimate kepauka pemanukayeixa, kepauka pemɨwayeyeika, kepauka pemeutahake, meta kepauka pemuyeha'arɨwe nehepaɨtsita.
2KI 19:28 Pemuyeha'akɨ nehepaɨtsita, meta 'axakepemutayɨ nemɨmatsi'u'enikɨ, ne kwatsiturai 'atsuritsie nekaniuyekemɨkɨ meta nekameniutapirenutɨamɨkɨ, meta kemɨ'ane huye 'utɨa pemunua, yanepɨtiyurieni mɨkɨ 'utɨata pemakunuanikɨ.
2KI 19:29 »”'Ikɨ 'inɨari kanihɨkɨtɨni 'ekɨ, 'Etsekiyaxi, 'ahetsiemieme: »”'Ikɨ wiyaritsie yukɨmana mɨtitixuawere xekatenitikwaikuni, hutarieka wiyaritsieta mana mɨtitineni xepɨtetikwani. Peru hairieka wiyaritsie xepɨka'eni meta xepɨka'itsana, kaxie xepɨka'eni meta takariyari mepɨtikwani.
2KI 19:30 Tawari Kura nuiwarimama memɨyuhayewaxɨ memɨka'ukwi tetɨata mepɨtekawiyaxɨani meta wapaitɨ 'ikwaxi mepɨtixuaweriya.
2KI 19:31 Karikɨ hipatɨ Kerutsareme kiekatari menitawikweikuni, Tsiyuni yemuriyari hetsie kiekatari yunaitɨ mepɨkakwini hakakɨ. Mɨpaɨ pɨtiyɨni waɨkawa nemɨwanaki'eriekɨ, ne Yawé Naimekɨnemɨtɨrɨkaɨye.
2KI 19:32 »”Ne, Yawé, yurikɨ mɨpaɨ nekanaineni 'Atsiriyatsie ti'aitame hetsiemieme: »”Hawaikɨ 'ikɨ kiekariyaritsie pɨkahatahani, meta nixeime 'ɨrɨkɨ pɨkatamɨnitɨma. Pɨka'itamieni 'ikɨ kiekari meta memuyukunarɨma 'a'ɨtɨ pɨkawayani, pɨkatatetsatɨma kiekari kuraruyari heima makatsunakɨ.
2KI 19:33 Matsi yu'utɨma kanakunuamɨkɨ kemɨ'ane huyeyari 'utɨa munua. Peru 'ikɨ kiekariyaritsie pɨkahatahani. Ne, Yawé, mɨpaɨ nekanaineni.
2KI 19:34 Nehetsiemieme, meta neti'uximayatsiriwame Rawiri nemɨnaki'eriekɨ, 'ikɨ kiekari hetsie nekanitanuamɨkɨ meta nekanitawikweitsitɨamɨkɨ”».
2KI 19:35 Kwitɨwa mɨkɨ tɨkaritsie Yawé niukieya tuayameya kanayeyani, hikɨ kaniwarukwini xeitsienituyari heimana nauka tewiyari heimana 'auxɨwi miriyari (185.000) kuyaxi 'atsiriyutsixi. 'Uxa'arieka ximeri kepauka wa'iwama memanuku'ui, mana yunaitɨ mɨkɨ mekwikwi'itɨ mekanitiheteitɨni.
2KI 19:36 Hikɨ 'ana Tsenakeriwi 'Atsiriyatsie ti'aitame, hakewa memetitekai kananukukeni meta kaneyani. Hikɨ Niniwe yukiekaritsie kaninuani, mana kaniyuhayewa.
2KI 19:37 Peru xeime tukaritsie, mexi yunenewiekai titunumawetɨ yukakaɨyari Nitsiruki tukita, 'ana niwemama 'Aruramereki meta Tsaretsexi matɨa mekanimieni 'ixiparakɨ, hikɨ me'imieka mekaniyuta'una 'Ararati kwieyaritsie paitɨ. Hikɨ hetsiena mieme nu'ayatɨtɨta 'Etsaxikaruni titewatɨ kanitsutɨani ti'aitatɨ.
2KI 20:1 Merikɨtsɨ 'anatɨtɨ mɨtiyehane 'Etsekiyaxi katiniutakwine waɨkawamekɨ kaniumɨnitɨma. Kakaɨyari niukameya Kitsariyaxi 'Amuxi nu'aya hetsɨana kaninuani mɨpaɨ katinitahɨawe: «Yawé mɨpaɨ kanaineni: “'Atɨɨriyama wahepaɨtsita 'ari 'aixɨa ketineuyuri, karikɨ pekanimɨmɨkɨ, hawaikɨ 'aixɨa pepɨkatika'erieni”».
2KI 20:2 'Etsekiyaxi ta'aurie 'aweka 'ixumeri hepa heutanieretɨ, Yawé mɨpaɨ katiniutawawirieni:
2KI 20:3 «Yawé, kenena'eriwani ne yanepɨtikamiekai 'aixɨa 'anemekɨ 'ahepaɨtsita, meta ne'iyarikɨ 'aixɨa netiyukɨhɨawetɨ, meta yanepɨtiuyuri kemɨmatinake». Hikɨ 'ana 'Etsekiyaxi kaniutitsuani waɨkawa yuhiwerietɨ.
2KI 20:4 Hikɨ Kitsariyaxi 'iku'eirieka paratsiyu takwayaritsie ka'uyenewekaku, Yawé niukieya kanitaxeiya:
2KI 20:5 «Keneukunuaka 'Etsekiyaxi mɨpaɨ ketinetahɨawi, neteɨterima mɨtiwa'aitɨwame, ne Yawé kenemaine, 'ukiyarieya Rawiri Kakaɨyarieya: “Nepi'eni 'anenewieri meta nepixei 'a'ukai. 'Aixɨa pereu'eriekame nepɨmatsi'ayeitɨani kepemɨtikuye, hikɨ haika tukari 'aye'ayu pepɨyɨweni Kakaɨyari tukieyata pemɨmiekɨ.
2KI 20:6 'Akuxi tamamata heimana 'auxɨwime wiyari nekamanipitɨamɨkɨ. 'Ekɨri meta 'ikɨ kiekari nekanixetawikweitsitɨamɨkɨ 'Atsiriyutsie ti'aitame mɨkaxeka'unakɨ. Ne 'ikɨ kiekari hetsie nekanitanuamɨkɨ nehetsiemieme, meta Rawiri neti'uximayatsiriwame hetsiemieme neminaki'eriekɨ”».
2KI 20:7 Hikɨ Kitsariyaxi mɨpaɨ kaniutayɨni: «Xapa 'ikwaxiyari mɨtɨxiyari xekeneuhawiya». Mɨpaɨ mekateniuyurieni, hikɨ 'ana ti'aitame haiyayatsie mekaneiwirieni, 'ana 'aixɨa katiniuka'erieni.
2KI 20:8 'Etsekiyaxi mɨpaɨ Kakaɨyari niukameya katiniutahɨawekaitɨni: —¿Ketita 'inɨari netixeiya mɨpaɨ nemɨretimanikɨ kename Yawé 'aixɨa netsiyurieni, meta kename neyɨweni haika tukari 'anukayayu tukita nemɨmiekɨ?
2KI 20:9 Kitsariyaxi mɨpaɨ katinita'eiya: —'Ikɨ kanihɨkɨtɨni 'inɨari Yawé mɨmatsiyetuirie, yapemɨretimanikɨ kename yuri 'utaine: ¿Tau 'etɨriyaya hura 'inɨnɨatame tamamata mexɨa tiyeyani, nutsu kepera'eriwa puwakayani pɨta tamamata mexɨa?
2KI 20:10 'Etsekiyaxi mɨpaɨ katinitahɨawe: —Pɨkakwaniwe xɨka 'etɨri yeyani, peru pukwaniwe yu'utɨma muwakayani.
2KI 20:11 Merikɨte Kakaɨyari niukameya Kitsariyaxi Yawé kaniutahɨawe, hikɨ Yawé yakatiniuyurieni tamamata mexɨa kaniwakayani tau 'etɨriyari 'Akatsi tau hurayari 'inɨnɨatameyatsie.
2KI 20:12 Mɨkɨ tukaritsie Meruraki-Wararani Wararani nu'aya, ti'aitame Wawiruniya kwieyaritsie, 'Etsekiyaxi xapa kanenɨ'airieni meta 'imikierite, mɨretimaikaikɨ kename rekuyekai.
2KI 20:13 'Etsekiyaxi waɨkawa niyutemawiekaitɨni mɨkɨ 'imikierite ranupika, hikɨ mɨkɨ nɨ'ariekate tinaime katiniwaruxeitsitɨani tita mɨrexeiyakai mɨraye'atɨka: Pɨrata, huru meta witsimɨtiu'ɨatɨka, hatseiti 'aixɨa mɨ'ane, meta naime piinite kuyaxa timieme. Tinaime katiniwaruxeitsitɨani paratsiyuta timieme, nitixaɨtɨ pɨkatiuhayewaxɨ.
2KI 20:14 Hikɨ Kitsariyaxi Kakaɨyari niukameya kaneyani ti'aitame 'Etsekiyaxi hetsɨa, mɨpaɨ katinita'iwawiya: —¿Ketita meteheuyehɨakai mɨkɨ teɨteri? ¿Hakewa mepeyekɨ? Mɨpaɨ katinita'eiya 'Etsekiyaxi: —'Ateewa paitɨ mepeyekɨ, Wawiruniya paitɨ mepeyekɨ mepɨnetsikuxeiyatɨwekai.
2KI 20:15 Kakaɨyari niukameya mɨpaɨ katinita'iwawiya: —¿Ketita 'aparatsiyuta mete'uxei? 'Etsekiyaxi mɨpaɨ katinita'eiya: —Naime nekatiniwaruxeitsitɨani ketipaɨmetɨ muwa mɨtiyepine. Tixaɨtɨ pɨkatiyuhayewaxɨ nepiinite mɨraye'atɨka nemɨkatiwaruxeitsitɨa naitɨ katiniuxeiyarieni.
2KI 20:16 Hikɨ Kitsariyaxi mɨpaɨ katinitahɨawe: —Keneu'eni Yawé niukieya:
2KI 20:17 'Uxa'atɨni warie tukari kanaye'amɨkɨ mɨkɨ naitɨ 'aparatsiyuta timieme mɨranɨtɨkieni, meta naitɨ ketita meripaitɨ 'a'ukiyarima memɨte'uti'utakai, naitɨ mɨkɨ katinanɨtɨkiemɨkɨ Wawiruniya paitɨ. Nitixaɨtɨ pɨkatiyuhayewa, Yawé mɨpaɨ kanaineni.
2KI 20:18 Hipatɨ 'aniwema meta 'anuiwarima mekananuhapaniekuni memɨteheta'uximayatakɨ Wawiruniya kwieyaritsie ti'aitame paratsiyuyata mɨkɨ mepɨkahepitɨarieni tɨɨri memuwarayexexeiyanikɨ.
2KI 20:19 'Etsekiyaxi mɨpaɨ katinita'eiya: —Yawé niukieya 'ekɨ pemɨnetsi'atɨiri 'aixɨa kananuyɨneni. Mɨpaɨ putayɨ mɨpaɨ tiku'eriwatɨ: «Mexi ne ne'uyeika, 'aixɨa 'iyari tepu'uwani teka'uximatɨarietɨ».
2KI 20:20 Hipatɨta kemɨtiuyɨ 'Etsekiyaxi ti'aitakaku, meta kemɨtitɨrɨkaɨyekai metatsiere kemɨtitawewi haa mukamarike 'amupa meta haa huyeyari kiekaritsie meutayune kemɨtiutawewi, mɨkɨ naitɨ katinaka'uka kemɨtiuyɨ xapayaritsie Kura kwieyaritsie te'aitamete waxapatsie.
2KI 20:21 'Etsekiyaxi kaniumɨni, nu'aya Manatsexi titewatɨ kanitsutɨani ti'aitatɨ hetsiena mieme.
2KI 21:1 Manatsexi tamamata heimana huta wiyari kanexeiyakaitɨni kepauka ti'aitame matɨa, Kerutsareme 'ukaitɨ ti'aitatɨ kaniuyurieni huta tewiyari heimana tamamata heimana 'auxɨwi wiyari. Maamaya katinitewakaitɨni Hetsiwa.
2KI 21:2 Manatsexi Yawé kemɨkatinake katiniuyurieni, mɨkɨ teɨteri mana memɨtamakai Yawé muwarayeweiyakai 'ixaheritsixi wahɨxie wayeiyari kaniuweiyakaitɨni.
2KI 21:3 Hekwamekɨ kanitiwewieni mawari matitaiyarɨwa kakaɨyarixi wahetsiemieme paapaya 'Etsekiyaxi miti'unakai, meta tawari hipame mawari matitaiyarɨwa kaniutiwewieni Wahari hetsiemieme meta 'uka 'Atserá kakaɨyariyari 'ɨkiyari xeime kaniutawewieni, 'Akawi kemɨtiuyuri hepaɨ 'Ixaheri kwieyaritsie ti'aitame. Yunaime xurawetsixi muyuawitsie miemete puwarayexeiyakai wahɨxie pukatunumakekakai.
2KI 21:4 Yawé tukita mawari matitaiyarɨwa kaniutiwewieni, tsepa mɨkɨ tuki hepaɨtsita Yawé mɨpaɨ mutayɨkai: «Kerutsareme kiekariyari kanihɨkɨtɨkamɨkɨ ne hakewa nemekani».
2KI 21:5 Yawé tukieya manuwe huta takwayaritsie mawari matitaiyarɨwa kaniutiwewieni yunaime xurawetsixi wahetsiemieme.
2KI 21:6 Meta yuniwetɨme kaniutataiya mawari mayanikɨ, timaiweme kanayuyeitɨani meta tiyukewaiyatɨ, metatsiere kaniwarayexeiyakaitɨni teyukewaiyamete meta mɨkite memɨwakɨhɨawe. Waɨkawa 'axakatiniyurienekaitɨni Yawé kemɨkatinake, mɨpaɨ tihaxɨatɨatɨ.
2KI 21:7 'Uka 'Atserá kakaɨyariyari 'ɨkiyaya mitawewi, katiniuta'aita Yawé tukita kaneutakerieni, meripaitɨ mɨkɨ tuki hepaɨtsita Yawé mɨpaɨ Rawiri pɨtiutahɨawekai meta nu'aya Tsarumuni: «'Ikɨ tukita 'ena Kerutsareme, kiekari nemenayexei yunaime 'Ixaheri nuiwarimama watsata, nepenayexei neheyemekɨ mana nemukanikɨ.
2KI 21:8 Tawari hatsuaku nepɨkatipitɨani 'ixaheritsixi tawariri mepɨkaheuyexɨrieni, kwie nemɨwayetuiri wa'ukiyarima mepɨkaku'eirieni, xɨkatsɨ metehaye'atɨaka naimekɨ kenemɨtiwaru'aitɨa, tatsɨari naime 'inɨari niukiyari Muitsexi neti'uximayatsiriwame mɨwayetuiri».
2KI 21:9 Peru yamepɨkatekakɨ, Manatsexi pɨwareuyexɨri, matsi kwinimieme mekateniuyurieni keyuri nuiwarite mana memɨtamakai Yawé muwarayewei.
2KI 21:10 'Ayumieme, Yawé mɨpaɨ kaniutayɨni yuniukamete yakatiniwarutahɨawe mɨkɨta mɨpaɨ meputiyua:
2KI 21:11 «Manatsexi Kura kwieyaritsie ti'aitame, 'ixɨarari mɨka'itiyatɨka mutiwewikɨ, meta kwinimieme 'iyarieya mɨreuyewekɨ keyuri te'aitamete 'amuxeutsixi meripaitɨ kememɨteyuriekai, mɨpaɨ tiyurienetɨ 'ixaheritsixi 'axameteyuriekame kaniwarayeitɨani kakaɨyarixi mɨwarutiwewi mewarayexeiyatɨ mekanakɨne,
2KI 21:12 mɨpaɨ kanaineni Yawé 'ixaheritsixi wakakaɨyari: “Ne nekanenunɨ'amɨkɨ 'uximatɨarika Kerutsareme hetsie meta Kura kwieyaritsie, kemɨ'ane tiraunariyari mɨ'enieni nakayata kaniwatikwinimɨkɨ.
2KI 21:13 Tsamariya kenemɨtiu'uximatɨa Kerutsareme mɨpaɨta nepɨtipitɨani meta 'Akawi kenemɨtiu'uximatɨa. Mɨkɨ kiekaritsie nitixaɨtɨ pɨkatiyuhayewa, xakɨ 'utahauxinarieka mutihɨximakerie hepaɨ katinanuyeyeimɨkɨ Kerutsareme.
2KI 21:14 Xɨka hipatɨ 'akuxi me'utawikweni, nekaniwayetuamɨkɨ memɨwaraye'unie wahetsɨa, mekanitakwi'iwakuni tinaime mekateninawatsiyariekuni.
2KI 21:15 'Ixaheritsixi tita mɨkanetinake memɨte'uyurikɨ, metatsiere kepaukapaitɨtɨ memayekɨ wa'ukiyarima 'Ekipitu kwieyaritsie hikɨ 'akuxi yaxeikɨa mekateniyurieka mekanenihaxɨatɨaka”».
2KI 21:16 Ke'axameteyuriekame muwarayeitɨa Kura kwieyaritsie kiekatari Yawé kemɨkatinake, metatsiere Manatsexi waɨkawa teɨteri kaniwarukwini 'atsimekateyuriekame, Kerutsareme kiekariyaritsie mɨkite waxuriya kaniutahɨniya.
2KI 21:17 Hipatɨta kemɨtiuyɨ Manatsexi ti'aitakaku meta kemɨtiuyuri naitɨ ke'axamɨtiuyuri, kanaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie.
2KI 21:18 Manatsexi kaniumɨni, kaniukateukieni yuparatsiyuta, 'Utsa harawerita witsimɨtiuye'anetsie. Nu'aya 'Amuni titewatɨ kanitsutɨani hetsiena mieme ti'aitatɨ.
2KI 21:19 'Amuni xeitewiyari heimana huta wiyari kanihɨkaitɨni kepauka mɨtiutsutɨa ti'aitatɨ, hikɨ Kerutsareme 'ukaitɨ huta wiyari katiniuta'aita. Metsuremeti mamaya katinitewakaitɨni, Karutsi nu'aya, Kutiwa kiekame.
2KI 21:20 'Amuni Yawé kemɨkatinake katiniuyurieni, paapaya Manatsexi kemɨtiuyuri mɨkɨta hepaɨna.
2KI 21:21 Naimetsie yupaapa huyeya kananukuweiya 'axatiyurienetɨ, kakaɨyarixi wahetɨa kaniukahɨximakekakaitɨni, 'ukiyarieya muwarayexeiyakai.
2KI 21:22 'Amuni Yawé kaniuku'eirieni, yu'ukiyarima wakakaɨyari, Yawé kemɨtinake mɨpaɨ pɨkatiuyeikakai.
2KI 21:23 'Amuni ti'aitame 'iparewiwametemama me'eye'unietɨ mekanakɨne, mɨkɨ mekanimieni paratsiyutana.
2KI 21:24 Hikɨ 'ana teɨteri yunaime mekaniwarukwini kemɨ'ane ti'aitame 'Amuni me'aye'unietɨ memakɨ, hetsiena mieme nu'aya Kutsiyaxi ti'aitame mekanayeitɨani.
2KI 21:25 Hipatɨta kemɨtiuyɨ 'Amuni ti'aitakaku katinaka'uka kemɨtiuyɨ xapayaritsie Kura kwieyaritsie te'aitamete waxapatsie.
2KI 21:26 'Amuni kaniukateukieni yumɨkiteukiyata, 'Utsa harawerita witsimɨtiuye'anetsie. Nu'aya Kutsiyaxi hetsiena mieme katiniuta'aita.
2KI 22:1 Merikɨtsɨ Kutsiyaxi kepauka mitsutɨa ti'aitatɨ 'atahaika wiyari kanihɨkaitɨni, Kerutsareme 'ukaitɨ katiniuta'aita xeitewiyari heimana tamamata heimana xewi wiyari. Mɨkɨ maamaya Kerira pɨtitewakai 'Arahiyaxi nu'aya, Wutsikati kiekame.
2KI 22:2 Kutsiyaxi Yawé kemɨtinake katiniuyurieni, naimetsie yakatinikamiekaitɨni, meripaitɨ 'ukiyarieya Rawiri kemɨtikatɨa, nihatsuakɨ pɨka'iku'eiri ni'etsiwatɨma.
2KI 22:3 Merikɨtsɨ tamamata heimana 'atahaika wiyari ti'aitatɨ, ti'aitame Kutsiyaxi xeime kaniutanɨ'ani kemɨtiuyɨ ti'utɨwame Tsapani titewakame 'Atsariyaxi nu'aya Metsurani teukarieya, mumiekɨ Yawé tukita, mɨpaɨ katinitahɨawe:
2KI 22:4 «Kenemie mawari wewiwamete tiwa'aitɨwame hetsɨa Kirikiyaxi, mɨpaɨ ketinehɨritɨa tumini puwaye'ɨni teɨteri memiyetuaya Yawé tukita meta kitenie tehɨwemete memɨwaku'ɨitɨwa.
2KI 22:5 Mɨpaɨ ketineta'aita mɨkɨ tumini memɨhɨritɨarie memɨyetuiriyarienikɨ Yawé tukieya 'aixɨa memɨtewewienikɨ, mɨkɨ memɨtewapitɨanikɨ te'uximayatamete tuki 'aixɨa memuyurieni.
2KI 22:6 Meketewarepitɨani kɨyexikɨ memɨteheuta'uximayatawawe, te'ɨkitamete mɨkɨ 'uximayatsika hepaɨtsita miemekɨ meta 'ixumawamete, metatsiere kɨyexi mekehetinaneni meta tetexi mɨxixiyatɨka tuki 'aixɨa mɨ'itɨarienikɨ.
2KI 22:7 Peru kemɨ'ane memɨhɨritɨarie mɨkɨ memɨtewapitɨanikɨ xepɨkatewawawirieka, karikɨ mɨkɨ mekateni'uximayaka heitseriemekɨ».
2KI 22:8 Metatsiere Kirikiyaxi mawari wewiwamete tiwa'aitɨwame, kemɨtiuyɨ ti'utɨwame Tsapani mɨpaɨ katiniutahɨawe: «Xapa nekaniutaxeiya 'inɨari niukiyari maye'uxa Yawé tukita». Hikɨ Tsapani kaniyetuirieni, hikɨ mɨkɨ 'ekaterɨwaka,
2KI 22:9 kaneyani ti'aitame hetsɨa katinitaxatɨani: —'Ahetsɨa miemete te'uximayatamete tumini mekaniwaye'ɨni Yawé tukita, meta mekaniyetuiriyarieniri te'uximayatamete memɨhɨritɨarie tuki 'aixɨa memukuyuruwakai.
2KI 22:10 Meta kemɨtiuyɨ ti'utɨwame Tsapani, ti'aitame katiniutaxatɨani kename mawari wewiwamete tiwa'aitɨwame Kirikiyaxi xapa 'iyetuiriekai, hikɨ 'ana kanekaterɨwa hɨxiena.
2KI 22:11 Hikɨ ti'aitame kepauka mi'eni 'inɨari niukiyari, 'ana yukamixa kaneukatsana,
2KI 22:12 meta mɨpaɨ mawari wewiwame Kirikiyaxi katiniuta'aitɨani, meta 'Akikani Tsapani nu'aya, meta 'Akuwuxi Mikahiyaxi nu'aya, meta Tsapani kemɨtiuyɨ ti'utɨwame, metatsiere 'Atsahiyaxi 'ahurawa ti'uximayatsiriwame, mɨpaɨ katiniwarutahɨawe:
2KI 22:13 —Xekenehu Yawé xekeneta'iwawiya nehetsiemieme meta teɨteri wahetsiemieme, metatsiere naime Kura kwieyari hetsiemieme, 'ikɨ xapa mutaxeiyarie mɨyamɨre'uxakɨ. Yurikɨ Yawé kaniha'akari tahepaɨtsita, ta'ukiyarima memɨka'enu'enikɨ 'ikɨ xapa kemɨre'uxa meta mɨpaɨ memɨkate'uyurikɨ kemɨre'ukai meripaitɨ tahetsiemieme.
2KI 22:14 Hikɨ Kirikiyaxi mawari wewiwame meta 'Akikani, 'Akuwuxi, Tsapani meta 'Atsahiyaxi, mɨkɨ mekanekɨne 'uka Kakaɨyari niukameya Hurira hetsɨa, Kerutsareme 'aurie kiekari hekwamekɨ mukumakaitsie kaniukateitɨni. Hurira Tsaruni kani'ɨyayatɨkaitɨni, ti'aitame kemariteya ti'ɨwiyame, Tikiwa nu'aya meta Karikatsi teukarieyatɨtɨ.
2KI 22:15 Hurira mɨpaɨ katiniwaruta'eiya: «Yawé mɨpaɨ kanaineni, 'ixaheritsixi wakakaɨyari: “Mɨpaɨ xeketenetahɨawi kemɨ'ane mɨxehetanɨ'a,
2KI 22:16 kename ne Yawé mɨpaɨ nehaine: ‘Nekanenunɨ'amɨkɨ 'uximatɨarika 'ikɨ kiekaritsie meta mana kiekatari wahetsie, naime kemaine mɨkɨ xapa nekaneye'atɨamɨkɨ Kura kwieyaritsie ti'aitame mekaterɨwaxɨ.
2KI 22:17 Mɨkɨ mekaneniuku'eirieni, hipame pɨta kakaɨyarixi 'ɨkwa mekaniwarutitairieni, mɨkɨkɨ mekaneniuyehaxɨatɨani yunaime yukakaɨyarixikɨ, 'ayumieme nekaniha'aka 'ikɨ kiekari hetsiemieme, hatsuaku nepɨkatihayewa.’
2KI 22:18 Peru Kura kwieyaritsie ti'aitame, mɨxeheyenɨ'a xemɨnetsita'iwawiyakɨ, mɨkɨ mɨpaɨ xeketenetahɨawi, kename ne Yawé 'Ixaheri Kakaɨyarieya mɨpaɨ nehaine:
2KI 22:19 ‘Waɨkawa pemunutuixiekaikɨ meta nitixaɨtɨ pemɨkarayuyeitɨakɨ Yawé hɨxie pe'i'enieka kenemiyurieni 'ikɨ kiekari meta teɨterimama, kememɨte'akumaweriyarieni meta ke'axame'itɨarietɨ memakɨne. Meta 'akamixa pemeukatsanaxɨkɨ meta nehɨxie pemutatsuakɨ, ne nekamaniu'enieni. Ne Yawé mɨpaɨ nekanaineni.
2KI 22:20 'Ayumieme, 'a'ukiyarima memakuhe nepɨmatsi'atɨani 'aixɨa 'iyari. 'Ekɨ pepɨkaniere 'uximatɨarika kenemɨti'atɨani 'ikɨ kiekaritsie’”». Hikɨ 'ana mɨkɨ mekanakunuaxɨani ti'aitame mɨpaɨ memɨtehetaxatɨanikɨ.
2KI 23:1 Hikɨ ti'aitame katiniwarutanɨ'airieni yunaime 'ukirawetsixi Kura kwieyaritsie kiekatari meta Kerutsareme.
2KI 23:2 Hikɨ ti'aitame kaneyani Yawé tukieya manuwe, yunaitɨ teɨteri Kura kwieyaritsie kiekatari mekaneweiyakaitɨni, meta Kerutsareme kiekatari, mawari wewiwamete, Kakaɨyari niukametemama, yemekɨ yunaitɨ naitsarie mɨkɨ kwieyaritsie kiekatari, yunaitɨ 'etsimemutɨtɨ meta 'amemɨyumate. Hikɨ mɨkɨ wahɨxie kanekaterɨwa naime mɨraye'uxa tɨratu xapayaritsie mutaxeiyariekai Yawé tukita.
2KI 23:3 'Arike 'aniutakeni 'ikitsaraɨ 'aurie, hikɨ Yawé hɨxie kanihekwariya tɨratu. Kaniyuyetuani yu'iyarikɨ kename Yawé 'ayexeiyani, meta kename heye'atɨani, naime yu'iyarikɨ, naime Kakaɨyari 'aitsikateya meta yakaniutayɨni kename 'eye'atɨanikekai 'aixɨa 'anemekɨ tɨratu xapayari kemɨreuku'uxakai. Yunaitɨ teɨteri yaxeikɨa mekaniutiyuani kename yametekakɨne.
2KI 23:4 Hikɨ ti'aitame mawari wewiwame Kirikiyaxi katiniuta'aitɨani, meta mawari wewiwamete hutarieka miemetexi, meta kitenie tehɨwemete, mɨpaɨ katiniwarutahɨawe Yawé tukita meketehewayepinike naime piinite mɨtiyetuiyakai Wahari hetsiemieme, 'uka 'Atserá kakaɨyariyari meta yunaime xurawetsixi wahetsiemieme mɨtiyetuiyakai. Meta katiniuta'aita mɨtititaiyarienikɨ Kiruni kwieyaritsie Kerutsareme warie paitɨ, meta katiniutanɨ'ani mɨkɨ naxiyari Weteri paitɨ mutuiyamiekɨ.
2KI 23:5 Yaxeikɨata kaniwarutaweiya mawari wewiwamete kakaɨyarixi memɨwarayexeiyakai Kura kwieyaritsie te'aitamete memɨwaru'uitɨakai 'ɨkwa memutitaiyanikɨ kakaɨyarixi mawari mematitairiyarɨwakaitsie, Kura kiekariteyaritsie meta Kerutsareme kiekariyaritsie, mɨkɨ 'ɨkwa Wahari mekaniutitairiwakaitɨni, tau, metseri, meta yunaime xurawetsixi meta tsimanixi.
2KI 23:6 Meta ti'aitame katiniuta'aita Yawé tukieyata muwayehɨiyanikɨ 'uka 'Atserá kakaɨyari 'ɨkiyari, manukweiyanikɨ Kiruni 'akiyaritsie paitɨ Kerutsareme warie paitɨ, mana mɨtataiyarienikɨ naxi xeikɨa mayanikɨ, mɨkɨ naxiyari mekaniukateuku xeime mɨki teukiyata.
2KI 23:7 Metatsiere kii kaniuye'una, Yawé tukieya kuraruyarita mɨye'ukai kakaɨyarixi mewarayexeiyatɨ yuhamatɨa memukahipitekai tuminikɨ waki, meta muwa 'ukarawetsixi 'ɨkari mepɨ'itsakai 'uka 'Atserá kakaɨyariyari hetsiemieme.
2KI 23:8 Kutsiyaxi Kerutsareme kaniwa'atɨani yunaime mawari wewiwamete Kura kwieyaritsie kiekatari, meta Kehewa 'itsutɨaka 'atsita Weritsewa paitɨ me'uye'atɨkaime kaniti'una naime kakaɨyarixi watuki hakewa mɨkɨ 'ɨkwa memetitaiyakai. Metatsiere kanika'una kakaɨyarixi mawari mematitairiyarɨwakaitsie kuwexinaruri Kutsuhexi kiteniena 'aurie mɨti'ukai, kiekari kitenie 'utata meutahanitsie 'aurie mɨti'anekai.
2KI 23:9 Mawari wewiwamete kakaɨyarixi mawari mematitairiyarɨwakaitsie memɨte'uximayakai mepɨkayɨwawekai Kerutsareme memɨte'uximayaka mawari taiyame Yawé hetsiemieme, peru mepɨyɨwawekai 'ikwai mɨpatsie memɨkwakakɨ hipame mawari wewiwamete wahamatɨa.
2KI 23:10 Ti'aitame tuki kaniuka'una Tupeti mɨtitewakai mayeweritsie Weni-Hinuni mɨrayetewatsie mɨyewekai, para mana mawari xewitɨ yuniwe mɨka'ayeitɨwanikɨ, 'ukitɨme ya 'ukatɨme kakaɨyari Muruki hetsiemieme.
2KI 23:11 Meta kawayutsixi puwarukumaweriyaxɨ, meripaitɨ Kura kwieyaritsie memɨte'uta'aitaxɨ memɨwayetuakai tau kakaɨyariyari hetsiemieme, Yawé tukieya kitenieyaritsie mema'uitɨariekai, Natani-Mereki kiiya 'aurie, ti'uximayatame mɨtihɨritɨariekai paratsiyuta. Kutsiyaxi yaxeikɨata kaniwarutitaiya kaxetate memɨyetuiyakai tau kakaɨyari hetsiemieme.
2KI 23:12 Yaxeikɨata, kaniti'una mawari matitaiyarɨwa Kura kwieyaritsie te'aitamete 'Akatsi kiiya heima memitiwewiekai meta Manatsexi mitiwewiekai Yawé tukieya takwayari hutametsie. Mɨkɨ kaniti'una, 'unimeyari Kiruni 'akiyaritsie kaneukaxɨrieni.
2KI 23:13 Meta kaniti'una mawari matitaiyarɨwa kakaɨyarixi wahetsiemieme Kerutsareme warie tau manatineika hepatsie mutiwewiyakai, mɨkɨ Tsarumuni 'Ixaheri kwieyaritsie ti'aitame kanitiwewiekaitɨni, 'uka 'Atsitaruti kakaɨyariyari hetsiemieme tsiruniyutsixi wakakaɨyari 'axamɨ'ane, meta Kemuxi muhawitsixi wakakaɨyari 'axamɨ'ane, meta Muruki 'amunitsixi wakakaɨyari 'axamɨ'ane.
2KI 23:14 Kutsiyaxi tetexi kakaɨyarixiyari kaniutitara meta kakaɨyari 'uka 'Atserá kakaɨyariyari 'ɨkiyarite, meta muwa teɨteri wa'umeyari kanitituani mɨkɨ kememɨte'ukutetɨkatei.
2KI 23:15 Metatsiere kanika'una mawari taiyame Weteri muwekai, meta kakaɨyarixi watuki Keruwuhani mitawewiekai Nawati nu'aya, mɨkɨ 'ixaheritsixi 'axameteyuriekame muwarayeitɨa. Meta kanitataiya tuki naxi xeikɨa kanayani, meta 'uka 'Atserá kakaɨyariyari 'ɨkiyari kaniutataiya.
2KI 23:16 Hakunuakari, kanixeiya teukiyate yemuritsie, hikɨ Kutsiyaxi katiniuta'aita mana mieme 'umete memɨkuxeɨrienikɨ memititaiyakɨ mawari taiyame hetsie 'axamɨ'itɨarienikɨ, mɨpaɨ mete'uyurieka Yawé niukieya mekanaye'atɨani, tewi Kakaɨyari hetsɨa mieme kemutayɨkai.
2KI 23:17 Hikɨ ti'aitame mɨpaɨ katiniuta'iwauni: —¿Kemɨ'aneta 'iya pɨrateukiya? Mɨkɨ kiekaritsie kiekatari mɨpaɨ mekatenita'eiya: —Mɨkɨ kanihɨkɨtɨni tewi Kakaɨyari hetsɨa mieme Kura kwieyaritsie meyetɨa teukiyaya, mɨkɨ katiniutaxa 'ikɨ mawari taiyame Weteri mieme hepaɨtsita 'ekɨ hikɨ kepemɨtiuyuri.
2KI 23:18 Mɨpaɨ kaniutayɨni ti'aitame: —Kamɨtsɨ mɨkɨ xekeneuhayewa, xewitɨ 'umeyarieya pɨkakuyuitɨwani. Mɨpaɨ 'ana katiniuta'ɨwiyarieni mɨkɨ 'umeteya meta xewitɨ Kakaɨyari niukameyatɨkai 'umeteya hamatɨa Tsamariya meyeyakai.
2KI 23:19 Yemekɨ Weteri mɨrakutewa kemɨtiuyuri, Kutsiyaxi naime kakaɨyarixi watukite kaniuti'una 'Ixaheri kwieyaritsie te'aitamete memitiwewiekai Tsamariya kiekariyaritsie, mɨkɨkɨ Yawé memuyehaxɨatɨa.
2KI 23:20 'Imatɨrieka, mawari wewiwamete mɨkɨ tukiteta memɨte'uximayakai kaniwarukwini mɨkɨ mawari matitaiyarɨwa hetsie, meta mɨkɨ hetsie teɨteri wa'umeyarite kaniutitaiya. Hikɨ 'ana Kerutsareme kanakunuani.
2KI 23:21 Hikɨ meta ti'aitame teɨteri mɨpaɨ katiniwaruta'aitɨani: —Patsikwa 'ixɨarariyari Yawé hetsiemieme xekeneuwewi takakaɨyari, kemɨre'uxa 'ikɨ tɨratu xapayaritsie.
2KI 23:22 'Itsɨkate memɨte'aitakaitsie paitɨtɨ 'Ixaheri kwieyaritsie, meta te'aitamete 'Ixaheri kwieyaritsie meta Kura kwieyaritsie memɨte'uta'aitaxɨtsie, Patsikwa pɨkawewiyawekai 'ikɨ hepaɨ 'anetɨ.
2KI 23:23 Peru ti'aitame Kutsiyaxi tamamata heimana 'atahaika wiyari ti'aitakaku, 'ikɨ Patsikwa 'ixɨarariyari kaniuwewiyani Kerutsareme kiekariyaritsie Yawé hetsiemieme.
2KI 23:24 Metatsiere, Kutsiyaxi kaniwarayeweiya memɨtemaiwawe meta memɨteyukewaiya, meta yunaime tsaturi kaniwaruka'una meta kakaɨyarixi 'axamemɨ'anene Kura kiekariyaritsie meta Kerutsaremetsie memuxuawekai. Mɨpaɨ katiniuyurieni meye'atɨanikɨ kemainekai 'inɨari niukiyari, kemɨre'ukai xapatsie mawari wewiwame Kirikiyaxi mitaxeitsie Yawé tukita.
2KI 23:25 Nixewitɨ ti'aitame tawari Kutsiyaxi hepaɨ pɨka'ɨyɨ, nimeripaitɨ ni'arike, yemekɨ yuwaɨriyatɨ yu'iyarikɨ puyuyetua Yawé hetsɨa meta naimetsie yatikamietɨ 'inɨari niukiyaritsie Muitsexi meka'utɨa.
2KI 23:26 Tsepa Kutsiyaxi mɨya mɨtiuyuriekai, Yawé yaxeikɨa pɨkatiuhayewaxɨ ha'atɨ Kura kwieyari hepaɨtsita, kwinimieme 'axamɨtiuyurikɨ Manatsexi mɨkɨkɨ kaniyehaxɨatɨakaitɨni.
2KI 23:27 'Ayumieme Yawé mɨpaɨ kaniutayɨni: «Ne nepuwarayeweiya Kura kwieyaritsie kiekatari, 'Ixaheri kwieyaritsie kiekatari kenemɨwaruyuri, Kerutsareme kiekariyari nepuku'eirieni tsepa nemenayexeiyakai meta 'ikɨ tuki, tsepa hepaɨtsitana mɨpaɨ nemutayɨ: “Muwa pɨhɨkɨtɨni hakewa nemayekani”».
2KI 23:28 Hipatɨta kemɨtiuyɨ Kutsiyaxi ti'aitakaku meta kemɨtiuyuri, mɨkɨ naitɨ katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie.
2KI 23:29 'Anatɨtɨ mɨtiyehanetsie Parahuni Nekahu mɨtitewakai 'Ekipitutsie mɨti'aitametɨkai, kanayeyakaitɨni 'Atsiriyatsie ti'aitame manukunakekɨ 'Eupɨrate hatuxameyari huyeyari'utɨa paitɨ. Hikɨ ti'aitame Kutsiyaxi kanayeyani hɨxiena kaniukeni Mekiru mɨrakutewatsie 'itamienike, peru Nekahu kepauka Kutsiyaxi muxei kanimieni.
2KI 23:30 Hikɨ Kutsiyaxi parewiwametemama kaxarieya mekanetɨni xeime kaxetatsie, Mekiru me'iyetɨka Kerutsareme paitɨ mekani'atɨani, hikɨ mana mekanikateuku teukiyatana. Hikɨ teɨteri kiekatari Kutsiyaxi nu'aya Kuhakatsi titewakame mekananukakeni ti'aitame mayanikɨ yupaapa hetsiemieme.
2KI 23:31 Kuhakatsi xeitewiyari heimana haika wiyari kanexeiyakaitɨni kepauka mɨtiukatsutɨatsie ti'aitatɨ, hikɨ Kerutsaremetsie ti'aitatɨ haika metseri kaniuyurieni. Maamaya Kamutari pɨtitewakai Keremiyaxi nu'aya, mɨkɨ Riwina mɨreyetewatsie pɨkiekametɨkai.
2KI 23:32 Kuhakatsi Yawé kemɨkatinake katiniuyurieni, meripaitɨ 'ukiyarimama kememɨte'uyuri hepaɨ.
2KI 23:33 Hikɨ Kuhakatsi Kerutsareme mɨkati'aitanikɨ, Parahuni Nekahu kanenutahɨani katsariyanata Xiwɨra kiekariyaritsie, Kamati kwieyaritsie, meta Kuratsie kiekatari katiniwarutawawirieni memɨteyutuanikɨ, haika miriyari heimana haika tsienituyari (3.300) kiruyari pɨrata meta xeitewiyari heimana tamamata heimana haika kiruyari huru tepɨayari.
2KI 23:34 Hikɨ meta 'Eriyakini Kutsiyaxi nu'aya pɨta ti'aitame kanayeitɨani paapaya hetsiemieme, meta Kuhatsimi pɨta katiniterɨwa. Peru Kuhakatsi kanehana 'Ekipitu paitɨ, mana kanemɨni.
2KI 23:35 Hikɨ Kuhatsimi katiniuyutuani Parahuni Nekahu hetsɨa pɨrata meta huru kepaɨmeme ma'iwawakai, perutsɨ yunaime mɨkɨ kwieyaritsie kiekaritari puwaruwi: pɨtiwarutawawiri yuxexuime teɨteri kepaɨmeme yuxexuitɨ pɨrata meta huru memɨyetuaxɨanikekai, mɨkɨ mɨyetuiyanikɨ mɨrayukatuanikɨ Parahuni Nekahu hetsɨa.
2KI 23:36 Kuhatsimi xeitewiyari heimana 'auxɨwi wiyari kanihɨkaitɨni kepauka ti'aitatɨ mitsutɨa, Kerutsaremetsie tamamata heimana xewi wiyari ti'aitatɨ kaniuyurieni. Maamaya Tsewura pɨtitewakai Perahiyaxi nu'aya Xuma kiekame.
2KI 23:37 'Ikɨta ti'aitame yaxeikɨa Yawé kemɨkatinake katiniuyurieni, kememɨte'uyuri meripaitɨ 'ukiyarimama.
2KI 24:1 Hikɨ Kuhatsimi ti'aitakaku, Nawukurunutsuxi Wawiruniya kwieyaritsie ti'aitame kaninuani kanitamieni, hikɨ waɨriyarika katini'uximayatsiriekaitɨni haika wiyari, hikɨ 'arike 'eye'unietɨ kanayani.
2KI 24:2 Hikɨ 'ayumieme Yawé kaniwarenɨ'ani Kuhatsimi hetsɨa kuyaxi tenawayamete wawiruniyutsixi, tsiriyutsixi, muhawitsixi, 'amunitsixi. Kaniwarenɨ'ani Kura kwieyaritsie mana naime memɨte'akuxɨtɨanikɨ, Kakaɨyari niukametemama kememutiyua Yawé yahainekaku.
2KI 24:3 Mɨpaɨ mekateniu'uximatɨarieni Kura kwieyaritsie kiekatari Yawé yatiuta'aitaku, mɨpaɨ mɨtiwarayeweiyakɨ teɨteri hɨxiena memɨka'u'uwanikɨ Manatsexi ke'axamɨtiuyuri naimekɨ,
2KI 24:4 meta yumɨireme muwarukwikɨ teɨteri 'atsimekateyuriekame Kerutsareme kiekariyari xuriyakɨ mutahɨniyaxɨkɨ. 'Ayumieme Yawé pɨkatiwareuyehɨwiri.
2KI 24:5 Hipatɨta kemɨtiuyɨ Kuhatsimi ti'aitakaku meta naime kemɨtiuyuri, katinaka'utɨarieni kemɨtiuyɨ xapayaritsie Kura kwieyaritsie te'aitamete waxapatsie.
2KI 24:6 Kuhatsimi kaniumɨni, hetsiena mieme nu'aya Kuhakini kanitsutɨani ti'aitatɨ.
2KI 24:7 'Ekipitu kwieyaritsie ti'aitame tawariri pɨkahayetɨa xeime kwieyaritsie yukuyaxima wahamatɨa, Wawiruniya kwieyaritsie ti'aitame naitɨri mɨtipinieyatɨkaikɨ, 'Ekipitu 'akiyaritsie tsutɨtɨ 'atsita 'Eupɨrate hatuxameyaritsie paitɨ ye'atɨkaitɨ.
2KI 24:8 Kuhakini tamamata heimana 'atahaika wiyari kanexeiyakaitɨni kepauka mitsutɨatsie ti'aitatɨ, Kerutsaremetsie haika metseri kaniuyurieni ti'aitatɨ. Maamaya Nekutsita katinitewakaitɨni 'Erinatani nu'aya Kerutsareme kiekame.
2KI 24:9 Kuhakini Yawé kemɨkatinake katiniuyurieni, yaxeikɨa paapaya kemɨtiuyuriekai.
2KI 24:10 Mɨkɨ tukaritsie, Nawukurunutsuxi Wawiruniya kwieyaritsie ti'aitame kuyaximama, Kerutsareme mekaniu'axɨani kiekari warita mekanayaxetɨkɨne.
2KI 24:11 Kepaukari kiekari warita mematetɨkatei, Nawukurunutsuxi Wawiruniya kwieyaritsie ti'aitame mana kaninuani mɨkɨ kiekari makuma.
2KI 24:12 Hikɨ Kuhakini Kura kwieyaritsie ti'aitame kaniyuyetuani, meta warutsieya, meta 'iparewiwametemama, kuyaximama tewa'aitɨwamete meta hipatɨ te'i'uximayatsiriwamete. 'Atahaika wiyari ti'aitatɨ, Wawiruniya kwieyaritsie ti'aitame Kuhakini kaniuwiya.
2KI 24:13 Yawé kemutayɨkai, Nawukurunutsuxi naime tukita timieme piinite mɨraye'atɨka katinetɨni meta paratsiyuta timieme, naime metetitaratɨ piinite hurukɨ mɨtiwewiyatɨkatei 'Ixaheri kwieyaritsie ti'aitame Tsarumuni mɨtiuti'aitakai tukita timieme mɨrayanikɨ.
2KI 24:14 Metatsiere Kerutsareme kaniwayehapani: kuyaxi tewa'aitɨwamete meta kuyaxi memɨkamama meta teɨteri tinaime memɨtewewiwawe meta tepɨakɨ tewewiwamete, meyunaitɨ mepuyupaɨmekai tamamata miriyari teɨteri. Mɨkɨ kiekaritsie xeikɨa mepuyuhayewaxɨ teɨteri tixaɨtɨ memɨkateheuxeiya.
2KI 24:15 Nawukurunutsuxi kaniwarehapani Wawiruniya paitɨ Kerutsareme wayehapaka ti'aitame Kuhakini, ti'aitame maamaya, ti'aitame 'ɨitamama, meta 'iparewiwamete meta teɨteri memɨxikutsixitɨkai waɨkawa memɨteparewiekai mɨkɨ kwieyaritsie.
2KI 24:16 Metatsiere yunaime kuyaxi memeuyutakwiwame kaniwarehapani 'atahuta miriyari memɨyupaɨmekai, meta xeimiriyari teɨteri tinaime memɨtewewiwawe meta tepɨakɨ tewewiwamete, mɨkɨ yunaitɨ kuyakɨ 'aixɨa mepɨ'anenekai. Mɨkɨ Wawiruniyatsie ti'aitame kaniwarehapani Wawiruniya paitɨ.
2KI 24:17 Meta Wawiruniya kwieyaritsie ti'aitame, Mataniyaxi pɨta ti'aitame kanayeitɨani, Kuhakini hetsiemieme mɨkɨ mɨtatatsieyatɨkaikɨ paapaya mumutayatɨkai, meta 'ana Tserekiyaxi pɨta katiniterɨwa.
2KI 24:18 Tserekiyaxi xeitewiyari heimana xewi wiyari kanexeiyakaitɨni kepauka mitsutɨatsie ti'aitatɨ, Kerutsaremetsie tamamata heimana xewi wiyari katiniuta'aita. Maamaya Kamutari pɨtitewakai Keremiyaxi nu'aya, Riwina kiekame.
2KI 24:19 Yaxeikɨa Kuhatsimi hepaɨ, Tserekiyaxi Yawé kemɨkatinake katiniuyurieni,
2KI 24:20 'ayumieme Yawé waɨkawa kaniuyeha'ani Kerutsareme meta Kura wahepaɨtsita, 'ayumieme kaniwarayeweiya hɨxiena memɨka'u'uwani.
2KI 25:1 Hikɨ Tserekiyaxi 'atanaurieka wiyaritsie ti'aitakaku, tamamata metseritsie meta tamamata tukaritsie, Nawukurunutsuxi Wawiruniya kwieyaritsie ti'aitame, kanayeyani yunaime yukuyaxima warawitɨtɨ, hikɨ Kerutsareme kiekariyari makuma mekaniu'axɨani. Hikɨ kiekari hɨxie mekanitiyaxe meta waritana mekanayaxetɨkɨne.
2KI 25:2 'Akuxi kuyaxi kiekari warie mekanatetɨkateitɨni tamamata heimana xewi wiyari ti'aitakaku Tserekiyaxi.
2KI 25:3 Naurieka metseritsie meta 'atanauka tukari 'aye'aku, 'anari tinaime yu'ikwaite mekateniuxɨni mɨkɨ kiekaritsie, pɨtiumawekairi 'ikwai teɨteri wahetsiemieme.
2KI 25:4 Hikɨ kuraru 'amatayewa kiekaritsie makatei mekaneu'inieni tsepanetɨ wawiruniyutsixi memuwaratinakai, hikɨ mɨkɨ tɨkaritsie yunaitɨ kuyaxi mekaniuyuta'una xeime 'ituparitsie mekaneuyehaxɨani kuraru 'ayehutametsie meuyexawakai, paratsiyu haraweriyaya witsimɨtiuye'ane 'aurie. Hikɨ mekaniyuta'una 'Arawa huyeyari 'utɨa,
2KI 25:5 peru kuyaxi wawiruniyutsixi Tserekiyaxi mekananukuweiya, mekanenuku'axe Keriku paitɨ makuweritsie. Kuyaximama mekaniku'eirieni mekaniyuta'unaxɨani,
2KI 25:6 mana wawiruniyutsixi mekaniwiya. Hikɨ mekaneihana Wawiruniya kwieyaritsie ti'aitame hetsɨa, Xiwɨra mɨrakutewatsie mukatei, mana mɨkɨ yakaniutayɨni Tserekiyaxi kemɨranuyeyanikekai.
2KI 25:7 Mana hɨxiena niwemama mekananutixitekiexɨani, meta mɨkɨ hɨxiteya mekaniwatitɨkixɨani, hikɨ wurunitse karenayarikɨ me'iwiwitɨaka mekaneihana Wawiruniya paitɨ.
2KI 25:8 Kuyaxi tiwa'aitɨwame Nawutsararani Wawiruniya kiekame, kaninuani Kerutsareme, 'auxɨwime metseritsie 'atahuta tukaritsie, tamamata heimana 'atanauka wiyari ti'aitakaku Nawukurunutsuxi Wawiruniyutsie ti'aitame,
2KI 25:9 hikɨ mana nuaka Yawé tukieya kaniutataiya meta paratsiyu, metatsiere naime hipame kiite waɨkawa mɨtiyunaki'eriekai meta hipame naime kiite Kerutsareme mieme.
2KI 25:10 Hikɨ kuyaxi wawiruniyutsixi tiwa'aitɨwame tiwa'aitɨakaku kiekari kuraruyari mekaniuka'una, kiekari warie makatei.
2KI 25:11 Nawutsararani teɨteri kaniwarehapani memuyuhayewatɨwekai mɨkɨ kiekaritsie, meta meripaitɨ Wawiruniya kwieyaritsie ti'aitame memutinɨkai.
2KI 25:12 Matsi kaniwaruhayewa teɨteri yemekɨ tixaɨtɨ memɨkateheuxeiya kaxie haraweriyari mana muxuawekai meta 'etsarite memɨhɨkakɨ.
2KI 25:13 Metatsiere kuyaxi wawiruniyutsixi tuxiyu wurunitse tepɨayarikɨ muwewiyatɨkatei, tuki hɨxie mɨti'ukai mekaniutitara meta wurunitse kaxetayarite metatsiere wurunitse katsuyari 'emɨyewa haa mayemakai Yawé tukieya hɨxie mɨtikupikai, mɨkɨ naime wurunitse mekanetɨni Wawiruniya paitɨ.
2KI 25:14 Meta mekatenetɨni xarite, kutsara 'amupapa naxi tutuwemete, kɨmemete meta xakɨrɨte, meta hipame piinite naime wurunitsekɨ mɨtiwewiyatɨka.
2KI 25:15 Metatsiere, kuyaxi tiwa'aitɨwame yuhetsiemieme katinayeitɨani piinite 'ɨkwa taiyamete meta watsute 'amɨnene hurukɨ meta pɨratakɨ mɨtiwewiyatɨka.
2KI 25:16 Wurunitse tuxiyuyari tuki hɨxie mɨti'ukai, katsu 'emɨyewa haa mayemakai meta wurunitse kaxetayarite Tsarumuni mɨtiuti'aitakai Yawé tukita timieme, mɨkɨ wurunitse pɨwaɨkawakai kepaɨmetɨ kiruyari mɨhɨkɨtɨkai pɨkayu'inɨatsinɨakai.
2KI 25:17 Xexuitɨ tuxiyu 'atahaika meturuyari putɨkai. Tuxiyu wapaitɨ menuyatsatɨkatei wurunitsekɨ muwewiyatɨkatei xeimeturuyari 'imeriyu putɨtɨkai, meta herie wipi mɨkawerani hepaɨ pɨtiyuxexeiyakai metatsiere penukuyatsatɨkatei kɨranara manitsana hepaɨ mɨ'anene wurunitsekɨ wewiyatɨkaime. Mɨkɨ tuxiyu muhutakai yaxeikɨa pɨrekuwewiyatɨkatei.
2KI 25:18 Kuyaxi tiwa'aitɨwame manuyeka kaniwarutiwiya, Tserahiyaxi mawari wewiwamete tiwa'aitɨwame meta 'iparewiwame Tsupuniyaxi, meta yuhaikame tuki kitenie tehɨwemete.
2KI 25:19 Meta memɨyuhayewatɨwekai kiekaritsie kaniwarutiwiya: kuyaxi mɨhɨritɨariekai, meta yu'auxɨwime ti'aitame parewiwametemama, meta kemɨtiuyɨ ti'utɨwame kuyaxi wahetsiemieme mɨhɨritɨariekai mɨwarukuxexeɨriwanikɨ, metatsiere haika tewiyari teɨteri kiekaritari mana 'akuxi memɨyuhayewatɨwekai.
2KI 25:20 Hikɨ warutiwiyaka Nawutsararani kuyaxi tiwa'aitɨwame, kaniwarehapani Wawiruniya kwieyaritsie ti'aitame hetsɨa, mɨkɨ Xiwɨra rakutewakaku mukatei.
2KI 25:21 Mana Kamati kwieyaritsie, Wawiruniya kwieyaritsie ti'aitame katiniuta'aita memɨkwi'iwakɨ. Mɨpaɨ mekateniukumaweriyarieni Kura kwieyaritsie kiekatari, hipatɨ xeime kwieyaritsie mekanehapanieni.
2KI 25:22 Nawukurunutsuxi Wawiruniya kwieyaritsie ti'aitame, Kerariyaxi 'Akikani nu'aya Tsapani teukarieya kananukakeni kuwexinaruri mɨhɨkɨtɨnikɨ, teɨteri memuyuhayewaxɨ wahetsiemieme Kura kwieyaritsie.
2KI 25:23 Kepauka kuyaxi tewa'aitɨwamete Kuratsie kiekatari memɨtehetima meta wakuyaxima, kename Wawiruniya kwieyaritsie ti'aitame Kerariyaxi 'anukakekai kuwexinaruri mɨhɨkɨtɨnikɨ, 'ayumieme hetsɨana mekanekɨne Mitsipa paitɨ. Kuyaxi tewa'aitɨwamete mekaniyɨakaitɨni metetetewatɨ: 'Itsimaheri Netaniyaxi nu'aya, meta Kuhanahani Kareya nu'aya, Tserahiyaxi Tanikumeti nu'aya Netupatanaka, meta Katsaniyaxi Mahaka kiekame nu'aya.
2KI 25:24 Kerariyaxi mɨpaɨ katiniwarutahɨawe mɨkɨ kuyaxi tewa'aitɨwamete meta wakuyaxima: «Xepɨkawamakarɨka wawiruniyutsixi ti'aitame parewiwametemama. Xɨka xeme 'ikɨ kwieyaritsie xeyuhayewani, xɨka yaxetekahuni Wawiruniya kwieyaritsie ti'aitame kemaineni, ne mɨpaɨ nepaine 'ana 'aixɨa 'iyari xepu'uwani».
2KI 25:25 Peru 'atahuta metseriyari 'anukayaku 'Itsimaheri Netaniyaxi nu'aya 'Eritsama teukarieya, mɨkɨ te'aitamete wanuiwaritsie mumiemetɨkai, kaneyani tamamata teɨteri wara'inietɨ, hikɨ Kerariyaxi mekaniumieni, meta mekaniwarukwini Kura teɨteriyari meta wawiruniyutsixi memiparewiekai Mitsipa memukutekai hamatɨana.
2KI 25:26 Hikɨ mɨya mete'uyurieka, yunaitɨ mekaniyuta'una 'Ekipitu kwieyaritsie paitɨ, temari meta 'ukirawetsixi yunaitɨ meta kuyaxi tewa'aitɨwamete, wawiruniyutsixi mewamakatɨ.
2KI 25:27 Merikɨtsɨ tamamata heimana huta metseriyaritsie xeitewiyari heimana 'atahuta tukaritsie, Kura kwieyaritsie ti'aitame Kuhakini xeitewiyari heimana tamamata heimana 'atahuta wiyari yuriekaku Wawiruniya kwieyaritsie, kanenayexɨna 'Ewiri-Meruraki Wawiruniyatsie ti'aitame yumatɨari wiyaritsie ti'aitatɨ.
2KI 25:28 Hikɨ 'aixɨa tixeiyatɨ kanayani, meta te'aitamete waheima pikake hamatɨana mana memu'uwakai Wawiruniya kiekariyaritsie.
2KI 25:29 Kuhakini pɨretsu kamixateyari katiniuku'eirieni, mana mɨtiyehane ti'aitame mexayatsie tiutikwa'atɨ kanayani.
2KI 25:30 Metatsiere, Kuhakini kepaɨmexɨa wiyari 'amuyeikakai, Wawiruniyatsie ti'aitame tumini kaniku'ɨitɨwakaitɨni mɨtiyunanairiekakɨ ketita mɨreuyehɨakai.
1CH 1:1 'Arani, Tseti, 'Enuxi,
1CH 1:2 Kainahani, Marareri, Kareri,
1CH 1:3 'Enuki, Matutsareni, Rameki,
1CH 1:4 Nuhexi. Nuhexi niwemama: Tsemi, Kami meta Kapeti.
1CH 1:5 Kapeti niwemama mepɨtetetewakai: Kumexi, Makuki, Marahi, Kawani, Tuwari, Metseki meta Tiratsi.
1CH 1:6 Kumexi niwemama: 'Atsikenatsi, Xipati meta Tukaxima.
1CH 1:7 Kawani niwemama: 'Eritsaha, Taritsi, Tsipɨre meta Xuranini.
1CH 1:8 Kami niwemama mepɨtetewakai: Kutsi, Mitsirahini, Puti meta Kanani.
1CH 1:9 Kutsi niwemama mepɨtetewakai: Tsewa, Kawira, Tsaweta, Xahama meta Tsaweteka. Xakama niwemama mekanakɨne: Tsawaha meta Rerani.
1CH 1:10 Kutsi Nimiruri paapaya kanayani, mɨkɨ tewi kwinimieme reuyutamiewetɨ kanayani 'ena kwiepa.
1CH 1:11 Mitsirahini wa'ukiyari kanayani rureutsixi, 'anameutsixi, rehawitsixi, natuhitsixi,
1CH 1:12 meta paturutseutsixi, katsurukitsixi meta katuritsixi mɨkɨ piritsiteutsixi wa'ukiyarima mepakɨ.
1CH 1:13 Kanani Tsiruni paapaya kanayani matɨarieya, meta Heti,
1CH 1:14 meta mepɨxiɨyarimamatɨkai kewutseutsixi, 'amuxeutsixi, keriketseutsixi,
1CH 1:15 heweutsixi, 'aratseutsixi, tsineutsixi,
1CH 1:16 'axiwareutsixi, tsemareutsixi meta kamatitsixi.
1CH 1:17 Tsemi niwemama: 'Erami, 'Atsuxi, 'Axipatsari, Ruri meta 'Arami. 'Arami niwemama: 'Utsi, Huri, Ketexi meta Metseki.
1CH 1:18 'Axipatsari Tseraki kanipaapayatɨkaitɨni, mɨkɨta 'Ewexi paapaya patɨa.
1CH 1:19 Meta 'Ewexi yuhutame yuniwema kaniwarayexeiya: mexɨakame Pereki pɨtitewakai, mɨkɨ 'utinuiwaku teɨteri yuxaɨta memeukuyaxixɨakɨ yayupapaɨmetɨ. Pereki mutaya pɨtitewakai Kutani.
1CH 1:20 Kutani 'Arimurari paapaya patɨa meta Tserepi, Katsaxi-Maweti, Yeraki,
1CH 1:21 Harurani, 'Utsari, Rikɨra
1CH 1:22 'Uwari, 'Awimaheri, Tsawa,
1CH 1:23 'Upixi, Kawira meta Kuwawi. 'Ikɨ yunaitɨ Kutani mekaniniwemamatɨni.
1CH 1:24 Tsemi, 'Axipatsari, Tseraki
1CH 1:25 'Ewexi, Pereki, Xehu,
1CH 1:26 Tseruki, Nakuxi, Teraki
1CH 1:27 meta 'Apɨrami, 'Apɨrahami mɨtitewatatsiere.
1CH 1:28 'Apɨrahami niwemama: 'Itsahaki meta 'Itsimaheri.
1CH 1:29 'Itsimaheri niwemama: Newayuti mexɨakameya patɨa, Tseraxi, 'Ariweheri, Miwitsani,
1CH 1:30 Mitsima, Rumaha, Matsa, Haraha, Temaha,
1CH 1:31 Ketuxi, Napitsi meta Tserema. Mɨkɨ mepɨhɨkɨ 'Itsimaheri niwemama.
1CH 1:32 'Apɨrahami niwemama Tsetura muwarayexei 'iparewiwameya 'ɨyayatɨtɨ matɨa mepɨhɨkɨ: Tsimɨrani, Kutsani, Merani, Mariyani, 'Itsiwaki meta Tsuhaki. Kutsani niwemama: Tsawa meta Rerani.
1CH 1:33 Mariyani niwemama: 'Epa, 'Epexi, Kanuki, 'Awiraha meta 'Eriraha. Yunaitɨ mɨkɨ Tsetura niwemama mepɨhɨkɨ.
1CH 1:34 'Apɨrahami meta 'Itsahaki paapaya kanayani. 'Itsahaki niwemama mekanakɨne 'Etsahu meta 'Ixaheri.
1CH 1:35 'Etsahu niwemama: 'Eripaxi, Xehueri, Kehutsi, Karani meta Kure.
1CH 1:36 'Eripaxi niwemama: Temani, 'Umaxi, Tsepuhu, Katani meta Kenatsi, Timina meta 'Amareki.
1CH 1:37 Xehueri niwemama: Nakati, Tsera, Tsama meta Mitsaha.
1CH 1:38 Tsehixi niwemama: Rutani, Tsuwari, Tsiwehuni, 'Ahana, Ritsuni, 'Etsexi meta Ritsani.
1CH 1:39 Rutani niwemama: Huri meta Humani. Rutani Timina pɨtaruyatɨkai.
1CH 1:40 Tsuwari niwemama: 'Ariwani, Manakati, 'Ewari, Tsepuhu meta 'Unami. Tsiwehuni niwemama: 'Ayaha meta 'Ahana.
1CH 1:41 'Ahana nu'aya kanayani Ritsuni. Ritsuni niwemama: 'Amirani, 'Etsiwani, 'Itɨrani meta Kerani.
1CH 1:42 'Etsexi niwemama: Wirani, Tsawani meta Yakani. Ritsani niwemama: 'Utsi meta 'Arahani.
1CH 1:43 Te'aitamete 'ena memɨka'uxa 'Erumi kwieyaritsie mekateniuta'aita, 'akuxi 'ixaheritsixi ti'aitame mekahexeiyakaku: Wera Wehuxi nu'aya, kiekarieya Rinawa katinitewakaitɨni.
1CH 1:44 Kepauka mumɨ Wera, 'utɨmanata katiniuta'aita Kuwawi Tsera nu'aya, Wutsira kiekametɨtɨ.
1CH 1:45 Kepauka Kuwawi mumɨ, 'utɨmana katiniuta'aita Kutsani, mɨkɨ Temani kwieyaritsie pɨkiekametɨkai.
1CH 1:46 Kepauka Kutsani mumɨ, 'utɨmana katiniuta'aita Harari Werari nu'aya, mɨkɨ mariyanitsixi kaniwara'iwa Muhawi kwieyaritsie. Kiekarieya katinitewakaitɨni 'Awiti.
1CH 1:47 Kepauka Harari mumɨ, 'utɨmana katiniuta'aita Tsamɨra, Matsireka kiekame.
1CH 1:48 Kepauka Tsamɨra mumɨ, 'utɨmana katiniuta'aita Tsahuri, Xekuwuti mɨrakutewatsie kiekame 'Eupɨrate hatuxameyari tetsita.
1CH 1:49 Kepauka Tsahuri mumɨ, 'utɨmana katiniuta'aita Wahari-Kanani 'Akuwuxi nu'aya.
1CH 1:50 Kepauka Wahari-Kanani mumɨ, 'utɨmana katiniuta'aita Harari. Kiekarieya katinitewakaitɨni Pahu, 'ɨyaya Mehitaweri pɨtitewakai, Matereri nu'aya meta Metsawi teukarieya.
1CH 1:51 Kepaukata Harari mumɨ, 'Erumi kwieyaritsie mekateniuta'aita 'ikɨ 'itsɨkate: Timina, 'Ariwa, Keteti,
1CH 1:52 'Ahuriwama, 'Eraha, Pinuni,
1CH 1:53 Kenatsi, Temani, Miwitsaxi,
1CH 1:54 Makirieri meta 'Irami. 'Ikɨ 'itsɨkate mekanakɨne 'Erumi kwieyaritsie.
1CH 2:1 'Ixaheri niwemama mekanihɨkɨtɨni: Xuweni, Tsimehuni, Rewi, Kura, 'Itsakaxi, Tsawuruni,
1CH 2:2 Rani, Kutse, Wenikamini, Nepɨtahari, Kahari meta 'Atsexi.
1CH 2:3 Kura niwemama: 'Exi, 'Unani meta Tseraxi. 'Ikɨ meyuhaikame 'uka kananeu tewiyari Tsuhaki niweya hetsie puwarayexei. 'Exi Kura pɨmatɨarieyatɨkai, mɨkɨ Yawé kemɨkatinake pɨtiuyuri, hikɨ Yawé tukarieya pinawairi.
1CH 2:4 Tamaxi, Kura mu'eya, tɨɨri yuhutame kaniwarayexeiya Kura hetsiemieme: Paretsi meta Tsera. Hikɨ meyunaitɨ Kura meyu'auxɨwime kaniwarayexeiya tɨɨri.
1CH 2:5 Paretsi niwemama: Ketsiruni meta Kamuri.
1CH 2:6 Tsera niwemama meyunaitɨ meyu'auxɨwitɨ mepakɨ: Tsimɨri, 'Etani, Hemani, Karikuri meta Raxira.
1CH 2:7 Karimi nu'aya 'Akaxi kanayani, tatsɨari mɨkɨ 'axamɨtiuyuri 'Ixaheri hetsiemieme Kakaɨyari 'aitsikaya mɨka'anu'eni naime kememɨteka'unakekai.
1CH 2:8 'Etani nu'aya 'Atsariyaxi kanayani.
1CH 2:9 Ketsiruni niwemama: Kerameri, Xamɨ meta Keruwahi.
1CH 2:10 Xamɨ 'Aminarawi paapaya kanayani, mɨkɨta Nahatsuni paapaya kanayani, Kura nuiwarimama wa'ukiyari matɨa.
1CH 2:11 Nahatsuni Tsarimuni pupaapayatɨkai, mɨkɨta Puhuxi paapaya patɨa.
1CH 2:12 Puhuxi 'Uweri paapaya patɨa, mɨkɨta 'Itsahi paapaya patɨa.
1CH 2:13 Kitsahi nu'aya mexɨakame patɨa 'Eriyáwi, hutarieka mieme 'Awinarawi, hairieka mieme Tsimaha,
1CH 2:14 naurieka mieme Natanaheri, 'auxɨwirieka mieme Xarahi,
1CH 2:15 'ataxewirieka mieme 'Utseni, 'atahutarieka mieme Rawiri.
1CH 2:16 Wa'iwama 'ukari mekatenitetewakaitɨni Tsariwiya meta 'Awikahiri. Tsariwiya niwemama meyuhaikatɨ mekanakɨne: 'Awitsahi, Kuhawi meta 'Atsaheri.
1CH 2:17 'Awikahiri 'Amatsaha mamaaya kanayani Ketexi matɨa memeyexei 'itsimaheri tewiyari.
1CH 2:18 Karewi Ketsiruni nu'aya tɨɨri kaniwarayexeiya yu'ɨitama 'Atsuwa meta Kerihuti wahamatɨa. 'Ikɨ niwemama mekanakɨne: Ketsexi, Tsuwawi meta 'Axiruni.
1CH 2:19 Kepauka 'Atsuwa mumɨ, Karewi 'Epɨrata kaniutiwitɨni, mɨkɨ matɨata yuniwe Kuxi kanayexeiya.
1CH 2:20 Kuxi 'Urihi paapaya kanayani, mɨkɨta Wetsareri paapaya kanayani.
1CH 2:21 Kepauka Ketsiruni haika tewiyari wiyari mexeiyakai, Makixi nu'aya kaniutiwitɨni, Karaha paapaya, mɨkɨ matɨa kaneyexeiya yuniwe Tsekuwi.
1CH 2:22 Tsekuwi Yahixi paapaya kanayani, mɨkɨ xeitewiyari heimana haika kiekariyari katinipinieyatɨkaitɨni Karaha kwieyaritsie.
1CH 2:23 Peru Ketsuxi meta 'Arami mekaninawairieni Yahixi kiekariteya meta Kenati kiekariteya, metatsiere kiekarite wa'aurie mamanetɨkatei. Naitɨ munawaiyarie kanayani haika tewiyari kiekarite. Mɨkɨ meyunaitɨ Makixi nuiwarimama mepɨhɨkɨtɨkai, Karaha paapaya.
1CH 2:24 'Arike Ketsiruni 'umɨku Karewi-'Epɨrata mɨrakutewatsie, 'ɨyaya 'Awiyaxi, 'Atsuxi kanayexeiya, mɨkɨta Tekuha paapaya kanayani.
1CH 2:25 Kerameri niwemama, Ketsiruni matɨarieya, mekanakɨne: matɨarieya Xamɨ, Wuna, 'Ureni, 'Utseni meta 'Ahiyaxi.
1CH 2:26 Kerameri tawari xeime kaniutiwitɨni, mɨkɨ katinitewakaitɨni 'Atara. Mɨkɨ 'Unami mamaaya kanayani.
1CH 2:27 Xamɨ niwemama, Kerameri matɨarieya, mekanakɨne: Mahatsi, Kamini meta 'Ekexi.
1CH 2:28 'Unami niwemama: Tsamahi meta Yara. Tsamahi niwemama: Narawi meta 'Awitsuxi.
1CH 2:29 'Awitsuxi 'ɨyaya katinitewakaitɨni 'Awikahiri, mɨkɨ hamatɨa 'Akiwani kanayexeiya meta Muriri.
1CH 2:30 Narawi niwemama: Tsereri meta 'Apahini. Tsereri kaniumɨni tɨɨri kawarayexeiyawetɨ.
1CH 2:31 'Apahini nu'aya 'Itsi kanayani, 'Itsi nu'aya Tsetsani kanihɨkɨtɨkaitɨni, Tsetsani nu'aya 'Akirahi kanayani.
1CH 2:32 Yara niwemama, Tsamahi 'iwaya, mekanihɨkɨtɨni: Ketexi meta Kunatani. Ketexi kaniumɨni tɨɨri kawarayexeiyawetɨ.
1CH 2:33 Kunatani niwemama: Pereti meta Tsatsa. 'Ikɨ mekanakɨne Kerameri nuiwarimama.
1CH 2:34 Tsetsani 'ukitsi pɨkawarayexei 'ukari puwarayexei pɨta, meta xeime 'uki waɨriyarika ti'uximayatame pexeiyakai 'ekipitutanaka Yaxika titewakame.
1CH 2:35 Mɨkɨ xeime yuniwe kaniwitɨtɨani, mɨkɨ 'Atahi mamaaya kanayani.
1CH 2:36 'Atahi Natani paapaya kanayani, Natani Tsawari paapaya patɨa,
1CH 2:37 Tsawari 'Epɨrari pupaapayatɨkai, 'Epɨrari 'Uweri pupaapayatɨkai,
1CH 2:38 'Uweri Kehu pupaapayatɨkai, Kehu 'Atsariyaxi pupaapayatɨkai,
1CH 2:39 'Atsariyaxi Heretsi pupaapayatɨkai, Heretsi 'Eratsa pupaapayatɨkai,
1CH 2:40 'Eratsa Tsitsimahi pupaapayatɨkai, Tsitsimahi Tsaruni pupaapayatɨkai,
1CH 2:41 Tsaruni Kekamiyaxi pupaapayatɨkai, meta Kekamiyaxi 'Eritsama pupaapayatɨkai.
1CH 2:42 Karewi niwemama, Kerameri 'iwaya, mekanakɨne: matɨarimieme Metsaha, mɨkɨ Tsipi paapaya matɨa, meta Maretsa, Hewuruni paapaya matɨa.
1CH 2:43 Hewuruni niwemama: Kure, Tapuhaki, Xekeni metatsiere Tsema.
1CH 2:44 Tsema Xahami 'ukiyarieya patɨa, mɨkɨta Kuxukuhani paapaya patɨa. Xekeni Tsamahi paapaya patɨa.
1CH 2:45 Tsamahi Mahuni paapaya patɨa. Mahuni Wetsuxi paapaya patɨa.
1CH 2:46 'Epa, Karewi ti'uximayatsiriwame 'ɨyayatɨtɨ matɨa, Karani mamaaya kanayani meta Mutsa, Katsetsi meta. Karani Katsetsi paapaya patɨa.
1CH 2:47 Yarahi niwemama: Xekeni, Kutani, Ketsani, Pereti, 'Epa meta Tsakapi.
1CH 2:48 Mahaka, Karewi ti'uximayatsiriwame 'ɨyayatɨtɨ matɨa, Tsewexi mamaaya kanayani meta Tirikana,
1CH 2:49 metatsiere Tsakapi mamaaya kanayani, Marimana paapaya matɨa, metatsiere Maka Tsewa mamaaya patɨa, mɨkɨ Makiwena paapaya matɨa meta Kiweya. Metatsiere Karewi xeime 'uka kanayexeiya 'Akatsa titewakame.
1CH 2:50 Mɨkɨ mekanakɨne Karewi nuiwarimama. Kuxi niwemama, 'Epɨrata matɨarieya, mekanakɨne: Tsuwari, Kiriati-Yeharini paapaya matɨa,
1CH 2:51 Tsarima, Wereni paapaya, meta Karepi, Weti-Karexi paapaya matɨa.
1CH 2:52 Tsuwari niwemama, Kiriati-Yeharini paapaya, mekanakɨne: Haruhe, hixɨata me'atɨ manakatitsixi,
1CH 2:53 Kiriati-Yeharini tɨɨriyamama, 'itɨritatsixi, putitsixi, tsumatitsixi meta mitsirahitsixi, mɨkɨ wahetsie mepɨyekɨ tsuratitsixi meta 'etsitahuritsixi.
1CH 2:54 Tsarima niwemama: Wereni, netupatari, 'Ateruti-Weti-Kuhawi, hixɨata me'atɨ manakatitsixi, tsurehitsixi,
1CH 2:55 metatsiere te'utɨwamete Kawetsi memɨtamakai, mɨkɨ mepɨhɨkɨtɨkai, tirateutsixi, tsimateutsixi meta tsukatehutsixi. 'Ikɨ mepakɨ kenitsixi, Kamati nuiwarimama, Xekawi tɨɨriyamama wapaapa.
1CH 3:1 'Ikɨ mepɨhɨkɨ Rawiri niwemama memutinunuiwaxɨ Hewuruni kiekariyaritsie: 'Aminuni matɨarieya kanayani 'Akinuhani hetsiemieme Ketsireri kiekame, hutarieka mieme, Tanieri 'Awikahiri hetsiemieme Kaximeri kiekame,
1CH 3:2 hairieka mieme, 'Awitsaruni Mahaka hetsiemieme, ti'aitame Tarimahi nu'aya Ketsuxi mɨti'aitametɨkai, naurieka mieme, 'Aruniyaxi Kakiti hetsiemieme,
1CH 3:3 'auxɨwirieka mieme, Tsepatiyaxi 'Awitari hetsiemieme, 'ataxewirieka mieme, 'Itɨrehani 'Ekɨra hetsiemieme, mɨkɨtatsiere Rawiri mɨ'ɨyayatɨkai.
1CH 3:4 Mɨkɨ meyu'ataxewitɨ mekaniutinunuiwa Hewuruni, kepauka mana mɨti'aitakai 'atahuta wiyari heimana 'ataxewime metseri. Kerutsareme kiekariyaritsieta katiniuta'aita xeitewiyari heimana tamamata heimana haika wiyari.
1CH 3:5 Manata mekaniutinunuiwa Tsimaha, Tsuwawi, Natani meta Tsarumuni, mɨkɨ Wetitsawe hetsie mepɨmiemetetɨkai, 'Amiheri nu'aya.
1CH 3:6 Metatsiere puwarayexei 'Iwikaxi, 'Eritsama, 'Eripereti,
1CH 3:7 Nuka, Nepeki, Kapiha,
1CH 3:8 'Eritsama, 'Erihara meta 'Eripereti, yunaitɨ mepuyu'atanauka.
1CH 3:9 Yunaitɨ mɨkɨ Rawiri mepɨniwemama, meka'inɨaritɨ te'uximayatamete 'ɨitamamatɨtɨ memakɨ wahetsie mɨwarayexei. Wa'iwa 'uka pɨtitewakai Tamaxi.
1CH 3:10 'Ikɨ mepɨhɨkɨ Tsarumuni nuiwarimama te'aitamete memakɨ: Xuwuhani, 'Awiyaxi, 'Atsá, Kutsapati,
1CH 3:11 Kurani, 'Ukutsiyaxi, Kuhatsi,
1CH 3:12 'Amatsiyaxi, 'Atsariyaxi, Kutani,
1CH 3:13 'Akatsi, 'Etsekiyaxi, Manatsexi,
1CH 3:14 'Amuni meta Kutsiyaxi.
1CH 3:15 Kutsiyaxi niwemama mekanakɨne: Mexɨakame Kuhanahani, hutarieka mieme Kuhatsimi, hairieka mieme Tserekiyaxi, naurieka mieme Tsaruni.
1CH 3:16 Kuhatsimi niwemama mekanakɨne Kekuniyaxi meta Tserekiyaxi:
1CH 3:17 Kekuniyaxi niwemama, muwiyarie tewa mehanie, mekanakɨne: Tsaratiheri,
1CH 3:18 Marikirani, Perahiyaxi, Tsenatsaxi, Kekamiyaxi, Hutsama meta Nerawiyaxi.
1CH 3:19 Perahiyaxi niwemama mekanakɨne: Tsuruwaweri meta Tsimi. Tsuruwaweri niwemama mekanakɨne: Metsurani meta Kananiyaxi, wa'iwa 'uka Tserumiti pɨtitewakai.
1CH 3:20 Meta 'ikɨ kaniwarayexeiya meyu'auxɨwime: Katsuwa, 'Uheri, Werekiyaxi, Katsariyaxi meta Yutsawi-Ketseri.
1CH 3:21 Kananiyaxi nuiwarimama mekanakɨne: Peratiyaxi meta Kitsariyaxi, metatsiere Xepahiyaxi niwemama nuiwarimama mepakɨ, meta 'Axinahani niwemama, meta 'Awiriyaxi niwemama metatsiere Tsekaniyaxi niwemama.
1CH 3:22 Tsekaniyaxi nuiwarimama mepakɨ Tsemahiyaxi meta niwemama: Katuxi, 'Ikahari, Wariyaxi, Nehariyaxi meta Tsapati, mɨkɨ yunaitɨ mepuyu'ataxewi.
1CH 3:23 Nehariyaxi niwemama mepakɨ: 'Erihuhenahi, 'Etsekiyaxi meta 'Atsirikani, mɨkɨ yunaitɨ mepuyuhaika.
1CH 3:24 'Erihuhenahi niwemama mepakɨ: Hurawiyaxi, 'Eriyatsiwi, Perahiyaxi, 'Akuwi, Kuhanahani, Rerahiyaxi meta 'Ananihi, mɨkɨ meyunaitɨ mepɨ'atahuta.
1CH 4:1 Kura nuiwarimama mekanihɨkɨtɨni: Paretsi, Ketsiruni, Karimi, Kuxi meta Tsuwari.
1CH 4:2 Xehahiyaxi Tsuwari nu'aya Yakati paapaya kanayani, meta Yakati 'Akumahi paapaya kanayani meta Rakari. Mɨkɨ mekanakɨne tsuratitsixi nuiwariyari.
1CH 4:3 'Etami niwemama menakɨne: Ketsireri, 'Itsima meta 'Iwatsi. Wa'iwa 'uka katinitewakaitɨni Katsereripuni.
1CH 4:4 Metatsiere niwemama mekanakɨne: Penuheri, Keruxi paapaya, meta 'Etsexi, Kutsa paapaya. Mɨkɨ mekanakɨne Kuxi nuiwarimama, 'Epɨrata matɨarieya, Wereni paapaya.
1CH 4:5 'Atsuxi, Tekuha paapaya yuhutame 'ukarawetsixi kaniwarutiwitɨni, Hera meta Nahara.
1CH 4:6 Nahara 'Akutsani mamaaya patɨa meta Hepexi, Temeni meta 'Akatsitari. Mɨkɨ Nahara niwemama mekanakɨne.
1CH 4:7 Hera niwemama mekanakɨne: Tsereti, Yetsukaxi meta 'Etinahani.
1CH 4:8 Kuhutsi 'Anuwi 'ukiyarieya patɨa, meta Tsuwewa, metatsiere 'Akaxikeri tɨɨriyamama Haruni nu'aya.
1CH 4:9 Kawetsi waɨkawa rexeiyatɨ patɨa 'iwamama kememɨka'anekai. Kepauka mamaaya mɨyamɨtiterɨwaxɨ, mɨpaɨ kaniutayɨni: «Netiuka'eniwatɨ nepitiniwexɨ».
1CH 4:10 Hikɨ Kawetsi 'Ixaheri Kakaɨyarieya mɨpaɨ pɨtiutawawiri: «'Aixɨa keneneyurieka, kwie 'eyeume keneneyetuiri, keneneparewieka, 'axamɨ'anetsie keneneuxɨna nemɨkatiuka'eniwanikɨ». Kakaɨyari yakatiniuyurieni kemɨtitawawiri.
1CH 4:11 Keruwi, Tsuka 'iwaya, Mekixi paapaya kanayani, mɨkɨta Mekixi 'Etsituni paapaya kanayani.
1CH 4:12 'Etsituni Weti-Xapaha paapaya kanayani meta Patsehaki metatsiere Tekina, 'Ixi-Nakatsi paapaya matɨa. Mɨkɨ mekanakɨne Xekaha kiekatari.
1CH 4:13 Kenatsi niwemama mekanakɨne: 'Utunieri meta Tserahiyaxi. 'Utunieri niwemama mekanakɨne: Katati
1CH 4:14 meta Mehunutahi, mɨkɨ 'Upɨra paapaya matɨa. Tserahiyaxi Kuhawi paapaya patɨa, mɨkɨta Ke-Karitsini kiekatari wapaapa patɨa, mana kiekatari tepɨakɨ te'uximayatamete memɨhɨkɨtɨkaikɨ.
1CH 4:15 Karewi niwemama Kepune nu'aya mekanakɨne: 'Ixi, 'Eraha meta Nuhani. 'Eraha Kenatsi paapaya kanayani.
1CH 4:16 Yarereri niwemama mekanakɨne: Tsipi, Tsipa, Tiriyaxi meta 'Atsareri.
1CH 4:17 'Etsitɨraxi niwemama mekanakɨne: Ketexi, Mereri, 'Epexi meta Karuni. Xewitɨ Mereri 'ɨyaya ―hetsiena kaniwarayexeiya: Miriyami, Tsamahi meta 'Itsiwa, 'Etsitemuha paapaya matɨa―
1CH 4:18 mɨkɨ Witiha katinitewakaitɨni Parahuni nu'aya. Xewitɨta Mereri 'ɨyaya Kura nuiwarieyatsie kanimiemetɨkaitɨni, mɨkɨ hamatɨa kaniwarayexeiya: Kereri, Keruxi paapaya, Hewexi, Tsuku paapaya, meta Kekutiheri, Tsanuha paapaya.
1CH 4:19 Kehira, Karimi tewiyari, meta 'Etsitemuha, Mahaka kiekame, mɨkɨ Huriyaxi 'ɨyaya niwemama mekanakɨne, tatsɨari, Nakani 'iwaya 'uka.
1CH 4:20 Tsimuni niwemama mekanakɨne: 'Aminuni, Xina, Weni-Kanani meta Tiruni. 'Itsi niwemama mekanakɨne: Tsuketi meta Weni-Tsuketi.
1CH 4:21 Tseraxi nuiwarimama Kura nu'aya mekanakɨne: 'Exi, Rekaha paapaya, Raraha, Maretsa paapaya, meta memɨte'uximaya rinutsie Weti-'Atsiweya kiekariyaritsie mepɨtɨɨriyamama,
1CH 4:22 metatsiere Tsera nuiwarimama mepakɨ Kuhakini, meta Kutsewa kiekariyaritsie kiekatari, Kuhatsi kiekatari meta Tsarape kiekatari, mɨkɨ (mɨpaɨ paine 'utɨarika meripai mieme) kename meka'akunuaxɨawawetɨ Werenitsie 'ukarawetsixi muhawitsixi mewarutiwitɨ.
1CH 4:23 Mɨkɨ mekanihɨkɨtɨkaitɨni 'iwewamete Netahini memɨkiekataritɨkai meta Kerera, mana mekaniyuhayewa ti'aitame mete'uximayatsirietɨ.
1CH 4:24 Tsimehuni nuiwarimama mekanakɨne: Nemuheri, Kamini, Kariwi, Tsera meta Tsahuri.
1CH 4:25 Tsahuri nu'aya kanayani: Tsaruni, Tsaruni nu'aya Miwitsani kanayani, Miwitsani nu'aya Mitsima kanayani.
1CH 4:26 Mitsima nuiwarimama mekanakɨne: Kamuheri, Tsakuxi meta Tsimi.
1CH 4:27 Tsimi tamamata heimana 'ataxewime yuniwema 'ukitsi kaniwarayexeiya meta me'ataxewime 'ukari, peru 'iwamama 'etsiwa xeikɨa mepɨwarayexei tɨɨri, 'ayumieme watɨɨriyama waɨkawa mepɨka'utamɨirixɨ Kura nuiwarimama kememɨyɨ.
1CH 4:28 Weritsewa mekanikuyaxe meta Murara, Katsaxi-Tsuhari,
1CH 4:29 Wiriha, 'Etseni, Turari,
1CH 4:30 Wetuheri, Kuxima, Tsikɨraki,
1CH 4:31 Weti-Marikawuti, Katsaxi-Tsutsini, Weti-Wirahi meta Tsakarahini. Mɨkɨ wakiekarite kanayani kepaukake Rawiri mɨtiuta'aitaxɨ.
1CH 4:32 Wakiekari 'etsimɨyeyeu kanayani 'Etami, 'Ahini, Ximuni, Tukeni meta 'Atsani ―naitɨ 'auxɨwitɨ patɨa―,
1CH 4:33 meta 'akuxi 'iya kiekari 'aurie mamanetɨkatei metatsiere Wahari kwieyaritsiepaitɨ. Mɨkɨ wakie kanayani, kemaine kememɨteheukunuiwa xapayari.
1CH 4:34 Metsuwawi, Kamɨreki, Kutsiyaxi 'Amatsiyaxi nu'aya,
1CH 4:35 Kuheri, Kehu Kutsiwiyaxi nu'aya, Tserahiyaxi nu'aya, 'Atsiheri nu'aya,
1CH 4:36 'Erihuhenahi, Kakuwa, Yetsukahiyaxi, 'Atsahiyaxi, 'Arieri, Ketsimiheri, Wenahiyaxi,
1CH 4:37 Tsitsa Tsipi nu'aya, 'Aruhuni nu'aya, Kerahiyaxi nu'aya, Tsimɨri nu'aya, Tsemahiyaxi nu'aya:
1CH 4:38 'Ikɨ meyunaitɨ memanuyetei mekanihɨkɨtɨkaitɨni yutɨɨriyama wahetsie. Watɨɨriyama waɨkawa memutamɨirixɨkɨ,
1CH 4:39 mekanekɨne Keruxi manayenieretsie, mayeweri tau manatineika hepatsie, 'ɨxa meheuwautɨkaitɨ yutewama wahetsiemieme.
1CH 4:40 Mana mekanitaxeiya 'ɨxa 'aixɨa 'aneneme waɨkawame, kwie 'eyeukame, kayuwatɨ 'umakaku. Mana mekanititekaitɨni meripaitɨ Kami nuiwarimama.
1CH 4:41 Memanuyetei 'ari memutiterɨwarie meniu'axɨani 'Etsekiyaxi ti'aitakaku Kura kwieyaritsie. Mekaniwarutakwini Kami nuiwarimama meta kii kepaɨmeme memukaxei naime mekaniuti'una. Mana waɨkawa 'ɨxa muxuawekaikɨ watewama wahetsiemieme, mana mekaniuyuhayewa, hikɨ 'akuxi mana mekanekuteni.
1CH 4:42 'Auxɨwime tsienituyari kuyaxi, Tsimehuni nuiwarimama memɨhɨkɨtɨkai, meniwanɨ'akaitɨni Peratiyaxi, Nehariyaxi, Xepahiyaxi meta 'Utsiheri, 'Itsi niwemama mekanihɨkɨtɨkaitɨni, Tsehixi hɨriyaritsie mekanekɨne.
1CH 4:43 Mewarukwika 'Amareki teɨterimama memutawikwekai mana memukutekai, mana mekaniuyuhayewa, hikɨ 'akuxi mana mekanetiteni.
1CH 5:1 Xuweni nuiwarimama, 'Ixaheri matɨarieya. Xuweni 'Ixaheri pumatɨarieyatɨkai, peru xapatsie mɨpaɨ pɨkatiu'utsie kememɨte'ununuiwaxɨ memaka'utɨarietsie yu'ukiyari ti'uximayatsiriwame 'ɨyayatɨtɨ matɨa hamatɨa mukahuikɨ. Matɨari miemetɨtɨ heitserie kemɨrexeiyakai Kutse niwemama wahetsie pɨta pɨtiunakixɨ 'Ixaheri nu'aya.
1CH 5:2 Kaniyuritɨni Kura matsi waɨkawa mariwetɨ kanayani kememɨka'anekai 'iwamama, metsɨ mɨtiwa'aitɨa kanayani, peru matɨari miemetɨtɨ heitserie kemɨrexeiyani Kutse hetsie pɨta pɨtiunakixɨ.
1CH 5:3 Xuweni niwemama 'Ixaheri matɨarieya, mekanakɨne: Kanuki, Paru, Ketsiruni meta Karimi.
1CH 5:4 Kuheri nuiwarimama kememɨte'ununuiwaxɨ mekanihɨkɨtɨni: Tsemahiyaxi, Kuki, Tsimi,
1CH 5:5 Mikahiyaxi, Xehahiyaxi, Wahari
1CH 5:6 meta Wehera, mɨkɨ xuwenitsixi wa'ukiyari matɨa. 'Ikɨ 'imatɨrieka mieme kaneihana Tikɨrati-Piretsexi, ti'aitame 'Atsiriya kiekame.
1CH 5:7 'Ikɨ mekanakɨne Wehera maremama, kemɨre'uxa kememɨte'ununuiwaxɨ xapayaritsie: Keyeri manuyekatei matɨa, Tsakariyaxi
1CH 5:8 meta Wera 'Atsatsi nu'aya, Tsema nu'aya, Kuheri nu'aya. Wehera 'Aruhexi kiekame kanayani, kwieya 'akaniyeukaitɨni Newu paitɨ meta Wahari-Mekuni.
1CH 5:9 Tau manatineika hepatsie makumawe maye'atɨka paitɨ pɨye'atɨkatei kwieya 'Eupɨrate haa manuyekatsie, tewamama waɨkawa memuyutimɨirixɨkɨ Karaha kwieyaritsie.
1CH 5:10 Tsahuri ti'aitametɨkaku, xuwenitsixi 'akarenutsixi memɨwatakwinikɨ yamekateniuxata, hikɨ 'ana mekaniwara'iwa, 'ana mana mekanikuyaxe Karaha kwieyaritsie tau manatineika hepatsie.
1CH 5:11 'Ikɨ mekanihɨkɨtɨni Kahari nuiwarimama xuwenitsixi wa'aurie mekanitiyaxe Watsani kwieyaritsie meta Tsarikaha kwieyaritsie:
1CH 5:12 Kuheri Watsani kiekariyaritsie wa'ukiyari kanayani, hutarieka mieme Tsapani kanayani, manata Kanahi meta Tsapati.
1CH 5:13 Wa'iwamarixi, wa'ukiyarima waniwema, yunaitɨ me'atahutatɨ mekanakɨne: Mikaheri, Metsurani, Tsawa, Kurahi, Kakani, Tsiha meta 'Ewexi.
1CH 5:14 'Ikɨ mekanihɨkɨtɨni 'Awikahiri niwemama, mɨkɨta Kuri punu'ayatɨkai, mɨkɨta Karuha punu'ayatɨkai, mɨkɨta Karaha punu'ayatɨkai, mɨkɨta Mikaheri punu'ayatɨkai, mɨkɨta Ketsitsahi punu'ayatɨkai, mɨkɨta Yaru punu'ayatɨkai, mɨkɨta Wutsi punu'ayatɨkai.
1CH 5:15 Mɨkɨ 'iwamarixi muwanɨ'a 'Ahi pɨhɨkɨtɨkai, 'Awirieri nu'aya meta Kuni teukarieya.
1CH 5:16 Mɨkɨ Karaha mekanikuyaxe, Watsani kiekariyaritsie meta kiekari 'etsimɨyeyeu 'auriena mamanetɨkatsie, meta naime Tsaruni kwieyaritetsie mu'ɨxayatsie, kemɨyeukai naime.
1CH 5:17 Kememɨte'ununuiwaxɨ mɨkɨ mepaka'utsie kepauka Kutani mɨti'aitametɨkai Kura kwieyaritsie, meta Keruwuhani 'Ixaheri kwieyaritsie ti'aitame.
1CH 5:18 Xuweni, Kahari wanuiwarima meta Manatsexi nuiwarimama hixɨapa memɨ'axe wakuyaxima mekaniyupaɨmekaitɨni huta tewiyari heimana nauka miriyari heimana 'atahuta tsienituyari heimana haika tewiyari (44.760) teɨteri memɨyɨwawe, tepɨa yuhetsie nunuwame memu'ɨ meta 'ixipara, meyɨwawetɨ tupikɨ, kwinie meteheuyutakwiwawetɨ.
1CH 5:19 Mekaniwarutakwini 'akarenutsixi meta Ketuxi, Napitsi metatsiere Nurawi.
1CH 5:20 Kakaɨyari hetsie memɨtewiyakaikɨ, mekanitawawirieni mɨwaparewienikɨ meyukwitɨwetɨ, hikɨ Kakaɨyari kaniwaruparewieni memɨwara'iwakɨ 'akarenutsixi meta memɨwanɨkai.
1CH 5:21 Watewama mekateniyukapinitɨani huta tewiyari heimana tamamata miriyari (50.000) kameyutsixi, huta tsienituyari heimana huta tewiyari heimana tamamata miriyari (250.000) muxatsi, huta miriyari puxuri, meta teɨteri mekaniwarutiwiya xeitsienituyari miriyari (100.000) meyupaɨmeme,
1CH 5:22 mɨkɨ hipame yumɨireme mekaniwarukwini, Kakaɨyari wahamatɨa muyeikakaikɨ. Hikɨ mana mekanikuyaxe kepaukake memehapanie.
1CH 5:23 Manatsexi nuiwarimama hixɨata memɨ'axe waniwema yumɨiretɨ mepakɨ meta manatsiere mekanikuyaxe, Watsani mɨrakutewatsie Wahari-Heximuni paitɨ me'u'atɨ, Tsenixi mɨrakutewatsie meta Heximuni yemuriyaritsie paitɨ.
1CH 5:24 Memɨwanɨ'akai mekanakɨne yutɨɨriyama wahetsiemieme 'Epexi, 'Itsi, 'Eriheri, 'Atsirieri, Keremiyaxi, Hurawiyaxi meta Yariheri. Mɨkɨ yunaitɨ kwinimieme memɨteheuyutakwiwawe mekanihɨkɨtɨkaitɨni, teɨteri memɨmariwa, yuxexuitɨ yutɨɨriyama mewanɨ'atɨ mepakɨ.
1CH 5:25 Peru 'axamekateniuyurieni yu'ukiyarima wakakaɨyari hɨxie, hipame kakaɨyarixi mewarayexeiyatɨ memakɨkɨ, Kakaɨyari teɨteri mɨwaruka'unakai wakakaɨyarixi.
1CH 5:26 'Ayumieme 'Ixaheri Kakaɨyarieya Puri pupitɨa, tatsɨari, Tikɨrati-Piretsexi, 'Atsiriyatsie ti'aitame, mɨkɨ kaniwarehapani Xuweni nuiwarimama, Kahari nuiwarimama meta Manatsexi nuiwarimama hixɨata memɨ'axe, kaniwarehapani Karaki paitɨ meta Kawuxi, Hara, meta Kutsani hatuxameyari 'aurie, hikɨ 'akuxi mana mekanekuteni.
1CH 6:1 'Ikɨ mekanihɨkɨtɨni Rewi niwemamama: Keritsuni, Kuhati meta Merari.
1CH 6:2 Kuhati niwemama: 'Amirani, 'Itsaxi, Hewuruni meta 'Utsiheri.
1CH 6:3 'Amirani niwemama: 'Aruni, Muitsexi meta Miriyami. 'Aruni niwemama: Narawi, 'Awihu, 'Eriyatsaxi meta 'Itamaxi.
1CH 6:4 'Eriyatsaxi Pinexi paapaya kanayani. Pinexi 'Awitsuha paapaya kanayani,
1CH 6:5 'Awitsuha Wukihi paapaya kanayani, Wukihi 'Utsihi paapaya kanayani,
1CH 6:6 'Utsihi Tserahiyaxi paapaya kanayani, Tserahiyaxi Merayuti paapaya kanayani,
1CH 6:7 Merayuti 'Amariyaxi paapaya kanayani, 'Amariyaxi 'Akituwi paapaya kanayani,
1CH 6:8 'Akituwi Tsaruki paapaya kanayani, Tsaruki 'Akimatsi paapaya kanayani,
1CH 6:9 'Akimatsi 'Atsariyaxi paapaya kanayani, 'Atsariyaxi Kuhanahani paapaya kanayani,
1CH 6:10 Kuhanahani 'Atsariyaxi paapaya kanayani. Mɨkɨ 'Atsariyaxi mawari wewiwame patɨa Tsarumuni tuki mutawewita Kerutsareme.
1CH 6:11 'Atsariyaxi 'Amariyaxi paapaya kanayani, 'Amariyaxi 'Akituwi paapaya kanayani,
1CH 6:12 'Akituwi Tsaruki paapaya kanayani, Tsaruki Tsaruni paapaya kanayani,
1CH 6:13 Tsaruni Kirikiyaxi paapaya kanayani, Kirikiyaxi 'Atsariyaxi paapaya kanayani,
1CH 6:14 'Atsariyaxi Tserahiyaxi paapaya kanayani, Tserahiyaxi Kutsaraki paapaya kanayani.
1CH 6:15 Kutsaraki kanehanieni kepauka Yawé Nawukurunutsuxi mupitɨa Kura meta Kerutsareme kiekatari muwaranuhapanikɨ.
1CH 6:16 Rewi niwemama mekanakɨne Keritsuni, Kuhati meta Merari.
1CH 6:17 Keritsuni niwemama: Riwini meta Tsimi.
1CH 6:18 Kuhati niwemama: 'Amirani, 'Itsaxi, Hewuruni meta 'Utsiheri.
1CH 6:19 Merari niwemama: Makiri meta Mutsihí. 'Ikɨ mekanakɨne rewitsixi wanuiwarima yuxexuitɨ yutɨɨriyama kememɨtewarayexei.
1CH 6:20 Keritsuni nuiwarimama mekanakɨne: Riwini, Yakati, Tsimaha,
1CH 6:21 Kuha, 'Iru, Tsera meta Yatɨrahi.
1CH 6:22 Kuhati nuiwarimama mekanakɨne: 'Aminarawi, Kure, 'Atsixi,
1CH 6:23 'Erikana, 'Ewihatsahapi, 'Atsixi,
1CH 6:24 Takati, 'Uriheri, 'Utsiyaxi meta Tsahuri.
1CH 6:25 'Erikana niwemama mekanakɨne: 'Amatsahi meta 'Akimuti.
1CH 6:26 'Akimuti nuiwarimama mekanakɨne: 'Erikana, Tsupahi, Nakati,
1CH 6:27 'Eriyáwi, Keruhani meta 'Erikana.
1CH 6:28 Tsamuheri niwemama mekanakɨne: Watsini matɨari mieme, meta 'Awiyaxi.
1CH 6:29 Merari nuiwarimama mekanakɨne: Makiri, Riwini, Tsimi, 'Utsa,
1CH 6:30 Tsimaha, Kakiyaxi meta 'Atsahiyaxi.
1CH 6:31 'Ikɨ mekanihɨkɨtɨni kwikamete Rawiri muwaranayexei Yawé tukieyata memɨmiemetetɨnikɨ, kepaukapaitɨ tɨratu kakuniyari muwa meutatekie.
1CH 6:32 Mɨkɨ meputikwikakairi 'ixuriki tukiyari manuwekaitsie, hɨxiena meti'uwetɨ, Tsarumuni 'akuxi tuki katawewiwekaku Yawé hetsiemieme Kerutsareme kiekariyaritsie. Hikɨ tawari mekanitsutɨani yu'uximayatsika kememɨte'uhɨritɨariekai.
1CH 6:33 'Ikɨ meta niwemama kwikari mepɨhɨritɨariekai: Kuhati nuiwarimama, kwikame Hemani Kuheri kaninu'ayatɨkaitɨni, Tsamuheri nuiwarieyatsie mieme,
1CH 6:34 'Erikana, Keruhani, 'Eriheri, Tuha,
1CH 6:35 Tsupi, 'Erikana, Mahati, 'Amatsahi,
1CH 6:36 'Erikana, Kuheri, 'Atsariyaxi, Tsupuniyaxi,
1CH 6:37 Takati, 'Atsixi, 'Ewihatsahapi, Kure,
1CH 6:38 'Itsaxi, Kuhati, Rewi meta 'Ixaheri.
1CH 6:39 Hemani tserieta 'iwaya kaniutikekakaitɨni 'Atsahapi Werekiyaxi nu'aya, Tsimaha nuiwarieya hetsiemieme,
1CH 6:40 Mikaheri, Watsehiyaxi, Marikiyaxi,
1CH 6:41 'Etini, Tsera, 'Arahiyaxi,
1CH 6:42 'Etani, Tsimaha, Tsimi,
1CH 6:43 Yakati, Keritsuni meta Rewi.
1CH 6:44 Hemani 'utatana 'Etani kaniutikekakaitɨni Kitsihi nu'aya, wa'iwa kanihɨkɨtɨkaitɨni meraritsixi wahetsiemieme, 'Awuri, Maruki,
1CH 6:45 Katsawiyaxi, 'Amatsiyaxi, Kirikiyaxi,
1CH 6:46 'Amɨtsí, Wanihi, Tsemexi,
1CH 6:47 Makiri, Mutsihí, Merari meta Rewi.
1CH 6:48 Wa'iwama rewitsixi mekateni'uximayakaitɨni Kakaɨyari tukieyata.
1CH 6:49 'Aruni meta niwemama mepɨhɨritɨariekai mawari memutitaiyanikɨ mawari taiyametsie, meta 'ɨkwa taiyametsie. Kemɨtiu'aitaxɨ Muitsexi, Kakaɨyari ti'uximayatsiriwame meta mekanihɨritɨariekaitɨni Waɨkawa Muyepatsietsie hepaɨtsita muwa 'ixaheritsixi wahetsiemieme 'itiya mawariyari memɨwewiekakɨ.
1CH 6:50 'Aruni nuiwarimama mekanakɨne: 'Eriyatsaxi, Pinexi, 'Awitsuha,
1CH 6:51 Wukihi, 'Utsihi, Tserahiyaxi,
1CH 6:52 Merayuti, 'Amariyaxi, 'Akituwi,
1CH 6:53 Tsaruki meta 'Akimatsi.
1CH 6:54 Kememɨte'ukutetɨkatei 'Aruni nuiwarimama. Kuhati nuiwarimama meri kwie mekaniyetuiriyarieni 'inɨarikɨ,
1CH 6:55 Hewuruni Kura kwieyaritsie, kwie hautinɨkame hakewa memɨtehetihɨweni.
1CH 6:56 Karewi Kepune nu'aya, kiekari kwieyari katiniunake meta 'auriena mamanetɨka kiekari 'etsimɨyeyeu.
1CH 6:57 'Aruni nuiwarimama mekaniyetuiriyarieni kiekarite 'ixaheritsixi wahetsie nunuwame, pɨhɨkɨtɨkai: Hewuruni, Riwina, Katixi, 'Etsitemuha,
1CH 6:58 Hireni, Rewixi,
1CH 6:59 'Atsani meta Weti-Tsemetsi, kwie heutinɨtɨkaime memɨtehatihɨwenitsie.
1CH 6:60 Wenikamini nuiwarimama wakwietsieta mekaniyetuiriyarieni: Kehewa, 'Aremeti meta 'Anatuti, kwie heutinɨtɨkaime hakewa memɨtehetihɨweni. Naitɨ tamamata heimana haika kiekariyari mekaniyetuiriyarieni, yutɨɨriyama kememɨtewarexeiyakai.
1CH 6:61 Kuhati nuiwarimama memuyuhayewaxɨ mepɨyetuiriyarie 'inɨarikɨ tamamata kiekariyari Manatsexi nuiwarimama hixɨata memɨ'axe wakwieyaritsie.
1CH 6:62 Keritsuni nuiwarimama, kememɨyupaɨmekai watɨɨriyama, mekaniyetuiriyarieni tamamata heimana haika kiekariyari 'Itsakaxi, 'Atsexi meta Nepɨtahari wanuiwarima wakwieyaritetsie, metatsiere Manatsexi nuiwarimama Watsani memuyuhayewaxɨ wakwieyaritsie.
1CH 6:63 Merari nuiwarimama, watɨɨriyama kememɨyupaɨmekai, mekaniyetuiriyarieni 'inɨarikɨ tamamata heimana huta kiekariyari Xuweni, Kahari meta Tsawuruni wakwieyaritetsie miemete.
1CH 6:64 'Ixaheritsixi mɨpaɨ rewitsixi mekateniwayetuirieni kwie hakewa memɨtehetihɨweni heutinɨtɨkaime.
1CH 6:65 Mekaniwayetuirieni 'inɨarikɨ Kura nuiwarimama wakiekarite Tsimehuni meta Wenikamini, meripaitɨri memutiterɨwariekai.
1CH 6:66 Hipatɨta Kuhati nuiwarimama 'inɨarikɨ mekaniyetuiriyarieni kiekarite 'Epɨrahini kwieyaritsie miemete.
1CH 6:67 Kiekari teɨteri wahetsie nunuwame mekaniyetuiriyarieni Tsikeni 'Epɨrahini yemuriyaritetsie, Ketsehexi,
1CH 6:68 Kumehani, Weti-Kuruni,
1CH 6:69 'Ayaruni meta Kahati-Ximuni, kwie hakewa memɨtehetihɨweni heutinɨtɨkaime.
1CH 6:70 Hipatɨta Kuhati nuiwarimama mekaniyetuiriyarieni 'Anexi meta Wirehani kiekariteyari Manatsexi nuiwarimama hixɨata memɨ'axe wakwieyaritsie mieme, kwie hakewa memɨtehetihɨweni heutinɨtɨkaime.
1CH 6:71 Keritsuni nuiwarimama mekaniyetuiriyarieni Manatsexi nuiwarimama hixɨata memɨ'axe wakwieyaritsie mieme: Kurani Watsani kwieyaritsie mieme, meta 'Atsitaruti, kwie hakewa memɨtehetihɨweni heutinɨtɨkaime.
1CH 6:72 'Itsakaxi nuiwarimama wakwieyaritsie mekaniyetuiriyarieni: Tseretsi, Tawerati,
1CH 6:73 Xamuti meta 'Aneni, kwie hakewa memɨtehetihɨweni heutinɨtɨkaime.
1CH 6:74 'Atsexi nuiwarimama wakwieyaritsie mekaniyetuiriyarieni Matsari, 'Awuruni,
1CH 6:75 Hukuki meta Xekuwi, kwie hakewa memɨtehetihɨweni heutinɨtɨkaime.
1CH 6:76 Nepɨtahari nuiwarimama wakwieyaritsie mekaniyetuiriyarieni Tseretsi Karereya kwieyaritsie mieme, Hamuni meta Kiriyatahini, kwie hakewa memɨtehetihɨweni heutinɨtɨkaime.
1CH 6:77 Hipatɨta Merari nuiwarimama mekaniyetuiriyarieni kiekarite Tsawuruni nuiwarimama wakwieyaritsie miemete: Ximuni meta Tawuxi, kwie hakewa memɨtehetihɨweni heutinɨtɨkaime.
1CH 6:78 Xuweni nuiwarimama wakwieyaritsie miemete, Kurutani hatetsitayaritsie tau manatineika hepatsie mukuma, Keriku 'anutaɨye mekaniyetuiriyarieni, Wetsexi makumawetsie mɨti'ane, Katsa,
1CH 6:79 Karemuti meta Mepati, kwie hakewa memɨtehetihɨweni heutinɨtɨkaime.
1CH 6:80 Kahari nuiwarimama wakwieyaritsie mekaniyetuiriyarieni Xamuti Karaha kwieyaritsie, Makanahini,
1CH 6:81 Hetsiwuni meta Katsexi, kwie hakewa memɨtehetihɨweni heutinɨtɨkaime.
1CH 7:1 'Itsakaxi niwemama meyunaukatɨ mepakɨ: Tura, Puwa, Yatsuwi meta Tsimiruni.
1CH 7:2 Tura niwemama mekanakɨne: 'Utsihi, Xepahiyaxi, Keriheri, Yamahi, 'Iwitsani meta Tsamuheri, mɨkɨ meyunaitɨ kwinimieme mekateneuyutakwiwawekaitɨni, meta yu'iwama Tura nuiwarimama mewanɨ'atɨ mekanakɨne. Kemaine wanuiwari xapayari, Rawiri 'amuyeikakaitsie xeitewiyari heimana huta miriyari heimana 'ataxewime tsienituyari (22.600) mekaniyupaɨmekaitɨni.
1CH 7:3 'Itsirahiyaxi 'Utsihi kaninu'ayatɨkaitɨni, 'Itsirahiyaxi niwemama mekanakɨne: Mikaheri, 'Awiriyaxi, Kuheri meta 'Itsiyaxi, meyunaitɨ mɨkɨ meyu'auxɨwitɨ memɨwanɨ'a mepɨhɨkɨtɨkai.
1CH 7:4 Mepɨyumɨirekai wa'ɨitama meta waniwema, kemaine wanuiwari xapayari, mepɨwarexeiyakai xeitewiyari heimana tamamata heimana 'ataxewime miriyari (36.000) teɨteri kuyaxa miemete.
1CH 7:5 Yunaitɨ 'iwamarixi mepɨhɨkɨtɨkai 'Itsakaxi niwemama nauka tewiyari heimana 'atahuta miriyari (87.000) mepɨhɨkɨtɨkai kuyaxi memeuyutakwiwawe.
1CH 7:6 Wenikamini niwemama mekanakɨne: Wera, Wekexi meta Keriyaheri, mekaniyuhaikani yunaitɨ.
1CH 7:7 Wera niwemama mekanakɨne: 'Etsiwuni, 'Utsihi, 'Utsiheri, Kerimuti meta 'Iri, meyu'auxɨwitɨ mepakɨ. Mɨkɨ yunaitɨ memanuyetei memɨwanɨ'a mepɨhɨkɨtɨkai meta memeuyutakwiwawe, xeitewiyari heimana huta miriyari heimana xeitewiyari heimana tamamata heimana nauka (22.034) mepɨyupaɨmekai kuyakɨ meuyutakwiwawe.
1CH 7:8 Wekexi niwemama mekanakɨne Tsemira, Kuhatsi, 'Eriyetsexi, 'Erihuhenahi, 'Umiri, Kerimuti, 'Awiyaxi, 'Anatuti meta 'Arameti. Mɨkɨ yunaitɨ Wekexi mepɨniwemamatɨkai,
1CH 7:9 memanuyetei memɨwanɨ'a mepɨhɨkɨtɨkai yu'iwama wahetsie meta kuyaxi memeuyutakwiwawe mepɨhɨkɨtɨkai. Kemaine wanuiwari xapayari, xeitewiyari heimana huta tsienituyari (20.200) mekaniyupaɨmekaitɨni.
1CH 7:10 Wirihani Keriyaheri punu'ayatɨkai. Wirahani niwemama mekanakɨne: Kehutsi, Wenikamini, 'Ahuri, Kenana, Tsetani, Taritsi meta 'Akitsakaxi.
1CH 7:11 Mɨkɨ yunaitɨ Keriyaheri mepunuiwarimama, meta memanuyetei memɨwanɨ'a mepɨhɨkɨtɨkai meta memeuyutakwiwawe. Mekaniyupaɨmekaitɨni yunaitɨ, tamamata heimana 'atahuta miriyari heimana huta tsienituyari (17.200) teɨteri kuyaxa miemete.
1CH 7:12 'Ixi niwemama mekanihɨkɨtɨni: Tsupini meta Kupini. Kutsini 'Akexi nu'aya patɨa.
1CH 7:13 Nepɨtahari niwemama mekanakɨne: Yatseri, Kuni, Ketsexi meta Tsaruni. Mɨkɨ mekanihɨkɨtɨni Wiriha nuiwarimama.
1CH 7:14 Manatsexi niwemama yuparewiwame 'ɨyayatɨtɨ mɨhɨkɨtɨkai Tsiriya kiekame hetsie muwarayexei mekanakɨne: 'Atsirieri meta Makixi, 'ikɨ 'imatɨrieka mieme Karaha paapaya patɨa.
1CH 7:15 Makixi Mahaka kaniutiwitɨni, Kupini meta Tsupini wa'iwa. Hutarieka mieme waniwe katinitewakaitɨni Tserupekari, mɨkɨ 'ukarawetsixi xeikɨa kaniwarutinuarieni.
1CH 7:16 Makixi 'ɨyaya Mahaka xeime nunutsi kanayexeiya, mɨkɨ Peretsi katiniterɨwa. Mɨkɨ Tseretsi 'iwaya kanayani 'Urani meta Xekeni wapaapa.
1CH 7:17 Werahani 'Urani nu'aya kanayani. Mɨkɨ mekanakɨne Karaha niwemama, Makixi nu'aya, mɨkɨta Manatsexi nu'aya.
1CH 7:18 'Iwaya 'uka Hamureketi 'Itsuri mamaaya kanayani, meta 'Awihetsexi Makira matɨa.
1CH 7:19 Tsemira niwemama mekanakɨne: 'Ahiyani, Tsikeni, Rikeki meta 'Anihani.
1CH 7:20 'Epɨrahini nuiwarimama: Tsutera, Wereri, Takati, 'Erara, Takati,
1CH 7:21 Tsawari, Tsutera, 'Etsexi meta 'Erari. Kahati kiekatari 'ikɨ yuhutame mekaniwarukwini watewama mewarunawatsirieku.
1CH 7:22 Mɨixa tukari 'Epɨrahini yuniwema wahetsiemieme kaniyuhiweriekaitɨni, hikɨ 'iwamama mekaniu'axɨani me'inɨtɨanike.
1CH 7:23 Hikɨ tawari yu'ɨya matɨa xeime mekanayexeiya nunutsi, mɨkɨ Weriya katiniterɨwa hiwerika muxuawekaikɨ wakie.
1CH 7:24 Weriha nu'aya 'uka Tsera kiekari Weti-Kuruni meutitewatsie mukuma kaniutawewieni meta Weti-Kuruni mukuweritsie mukuma, metatsiere 'Utseni-Tsera.
1CH 7:25 Weriha nuiwarimama mekanakɨne: Xepa, Xetsepi, Teraha, Takani,
1CH 7:26 Rarani, 'Amihuri, 'Eritsama,
1CH 7:27 Nuni meta Kutsuhexi.
1CH 7:28 Hakewa mɨwarekwietɨkai hakewa memetitekai kanayani Weteri meta kiekari 'etsimɨyeyeu 'auriena mamanetɨka, Narani tau manatineika hepatsie, Ketsehexi meta kiekari 'etsimɨyeyeu 'auriena mamanetɨka tau makayuyuipike hepatsie, meta Tsikeni kiekari 'etsimɨyeyeu 'auriena mamanetɨka naime, metatsiere 'Ayaha kiekariyari 'etsimɨyeyeu 'auriena mamanetɨka naime.
1CH 7:29 Manatsexi nuiwarimama Wetsehani katiniwapinitɨkaitɨni meta Tanaki, Mekiru metatsiere Ruxi, yu'aurie kiekari 'etsimɨmɨyeyeu mexeiyatɨka naime. Mɨkɨ kiekariyaritetsie mekanikuyaxe Kutse 'Ixaheri nu'aya nuiwarimama.
1CH 7:30 'Atsexi niwemama mekanakɨne: 'Imɨna, 'Itsiwa, 'Itsiwi, Weriya meta wa'iwa 'uka Tsera.
1CH 7:31 Weriya niwemama mekanakɨne: Hewexi meta Marikiheri, mɨkɨ Wiritsawiti paapaya matɨa.
1CH 7:32 Hewexi niwemama mekanakɨne: Kapireti, Tsemexi, Kutani meta wa'iwa 'uka Tsuha.
1CH 7:33 Kapireti niwemama mekanakɨne: Patsaki, Wimari meta 'Atsiwati.
1CH 7:34 'Iwaya Tsemexi niwemama mekanakɨne: Xuheka, Kehuwa meta 'Arami.
1CH 7:35 'Iwaya Heremi niwemama mekanakɨne: Tsupaha, 'Imɨna, Tseretsi meta 'Amari.
1CH 7:36 Tsupaha niwemama mekanakɨne: Tsuhaki, Haxinepexi, Tsuhari, Werihi, 'Imɨra,
1CH 7:37 Wetsexi, Huri, Tsama, Tsiritsa, 'Itɨrani meta Wehera.
1CH 7:38 Ketexi niwemama mekanakɨne: Kepune, Pitsipa meta 'Araha.
1CH 7:39 'Ura niwemama mekanakɨne: 'Araki, Kaniheri meta Xitsiya.
1CH 7:40 'Ikɨ meyunaitɨ 'Atsexi nuiwarimama mepɨkɨkɨ, memanuyetekai memɨwanɨ'akai yu'iwama mepɨhɨkɨtɨkai, teɨteri 'aixɨa memɨteheuyutakwiwawe, memɨtɨrɨkawi meta memɨmamariwawe. Kemaine wanuiwari xapayaritsie memaka'uxatsie mekanihɨkɨtɨkaitɨni xeitewiyari heimana 'ataxewi miriyari (26.000) teɨteri kuyaxa miemete.
1CH 8:1 Wenikamini niwemama mekanakɨne: mexɨakame, Wera, hutarieka mieme, 'Atsiweri, hairieka mieme, 'Akaraha,
1CH 8:2 Naurieka mieme, Nuka, meta 'auxɨwirieka mieme, Xapaha.
1CH 8:3 Wera niwemama mekanakɨne: 'Araxi, Keraha, 'Awihuri,
1CH 8:4 'Awitsuha, Nahamani, 'Akuhaki,
1CH 8:5 Keraha, Tsepupani meta Hirami.
1CH 8:6 'Ahuri niwemama, memanuyetekai yu'iwama memɨwanɨ'akai Kehewa mɨrakutewatsie memɨtitekai, 'arike memekɨ Manakati paitɨ, mekaniyɨakaitɨni:
1CH 8:7 Nahamani, 'Ahiyaxi meta Keraha, 'Utsa paapaya meta 'Akihuri. Keraha katiniuyurieni Manakati paitɨ mɨwarewitɨ.
1CH 8:8 Tsakarahini 'arike yu'ɨitama waruku'eirieku Kutsini meta Waraha, tawari kaniwarayexeiya yuniwema Muhawi kwieyaritsie.
1CH 8:9 Yu'ɨya Huretsi matɨa Kuwawi kanayexeiya meta Tsiwiha, Metsaha, Marikani,
1CH 8:10 Kehutsi, Tsakiyaxi meta Mixima. 'Ikɨ niwemama menanuyetei memɨwanɨ'a yu'iwama mekanakɨne.
1CH 8:11 Kutsini matɨata kaneyexeiya 'Awituwi meta 'Eripari.
1CH 8:12 'Eripari niwemama makanakɨne: 'Ewexi, Mitsani meta Tsemeri. Tsemeri kiekarite 'Unuhu meta Ruri kaniutiwewieni, meta kiekari 'etsimuyeyeu wa'aurie mamanetɨka,
1CH 8:13 Weriya meta Tsema memanuyetei memɨwanɨ'a mekanakɨne 'Ayaruni kiekatari wahetsiemieme, meta mekaniwarutaweiya Kahati kiekatari.
1CH 8:14 Weriya niwemama mekanakɨne: 'Akihu, Tsatsaki, Keremuti,
1CH 8:15 Tsewariyaxi, 'Arari, 'Arexi,
1CH 8:16 Mikaheri, 'Itsipa meta Yuká.
1CH 8:17 Tsewariyaxi, Metsurani, Hitsiki, 'Ewexi,
1CH 8:18 'Itsimerahi, Ketsiriyaxi meta Kuwawi, mɨkɨ mekanakɨne 'Eripari niwemama.
1CH 8:19 Yakini, Tsikɨri, Tsawiri,
1CH 8:20 'Erihenahi, Tsiretahi, 'Eriheri,
1CH 8:21 'Arahiyaxi, Werahiyaxi meta Tsimɨrati, mɨkɨ mekanakɨne Tsimi niwemama.
1CH 8:22 'Itsipani, 'Ewexi, 'Eriheri,
1CH 8:23 'Awuruni, Tsikɨri, Kanahani,
1CH 8:24 Kananiyaxi, 'Erami, 'Anatutiyaxi,
1CH 8:25 'Ipirahiyaxi meta Peniheri, mɨkɨ mepakɨ Tsatsaki niwemama.
1CH 8:26 Tsamɨtserahi, Tsehariyaxi, 'Atahariyaxi,
1CH 8:27 Karetsiyaxi, 'Eriyaxi meta Tsikɨri, mɨkɨ mekanakɨne Keruhani niwemama.
1CH 8:28 Kemaine wanuiwari xapayari, mɨkɨ memanuyetei memɨwanɨ'a mepakɨ meta Kerutsareme mepɨkiekataritɨkai.
1CH 8:29 Kehiheri Kawahuni paapaya, Kawahuni kanikiekametɨkaitɨni. 'Ɨyaya pɨtitewakai Mahaka.
1CH 8:30 Niwemama mepakɨ 'Awuruni matɨari mieme, Tsuxi, Kihitsi, Wahari, Nexi, Narawi,
1CH 8:31 Keruxi, 'Akihu, Tsekexi
1CH 8:32 meta Mikuruti, mɨkɨ Tsimaha paapaya matɨa. Meta 'ikɨ Kerutsareme mepɨtitekai yu'iwama wahetsɨa.
1CH 8:33 Nexi Kihitsi paapaya kanayani, mɨkɨta Tsahuri paapaya kanayani, mɨkɨta Kunatani paapaya matɨa, meta Marikitsuha, 'Awinarawi metatsiere 'Etsiwahari.
1CH 8:34 Kunatani Meriwahari paapaya kanayani, mɨkɨta Mikahiyaxi paapaya kanayani.
1CH 8:35 Mikahiyaxi niwemama mekanakɨne Pituhuni, Mereki, Tareya meta 'Akatsi.
1CH 8:36 'Akatsi Kuhara paapaya kanayani, mɨkɨta 'Aremeti paapaya kanayani meta 'Atsimaweti meta Tsimɨri. Tsimɨri Mutsaha paapaya kanayani,
1CH 8:37 Mutsaha Winaha paapaya kanayani, mɨkɨta Xapaha paapaya kanayani, Xapaha 'Eratsa paapaya kanayani, mɨkɨta 'Atseri paapaya kanayani.
1CH 8:38 'Atseri 'ataxewime yuniwema puwarayexei, mekatenitetewakaitɨni: 'Atsirikani, Wukuru, 'Itsimaheri, Tsehariyaxi, 'Awiriyaxi meta Kanahani. 'Ikɨ mekanakɨne 'Atseri niwemama.
1CH 8:39 'Iwaya 'Etseki niwemama mekanakɨne: mexɨakame, 'Urani, hutarieka mieme, Kehutsi, hairieka mieme, 'Eripereti.
1CH 8:40 'Urani niwemama meheuyutakwiwawetɨ mekanakɨne meta metemɨiwawetɨ tupikɨ. Waɨkawa yuniwema mekaniwarayexeiya meta yuteukarima: yunaitɨ xeitsienituyari heimana huta tewiyari heimana tamamata (150) mekaniyupaɨmekaitɨni. Yunaitɨ mɨkɨ Wenikamini nuiwarimama mekanihɨkɨtɨkaitɨni.
1CH 9:1 Yunaitɨ 'ixaheritsixi mekanaka'utsieni yunuiwari xapayaritsie meta mekanaka'utsieni te'aitamete waxapatsie 'Ixaheri kwieyaritsie memɨte'aitakai. Kakaɨyari memɨkaheu'eniekaikɨ, Kura kwieyaritsie kiekatari mekanehapanieni Wawiruniya.
1CH 9:2 Mexɨakate tawari mana memu'axɨa yukie yukiekaritsie mekaniyɨakaitɨni 'ixaheritsixi, mawari wewiwamete, rewitsixi meta tukita te'uximayatamete.
1CH 9:3 Hipatɨ Kura, Wenikamini, 'Epɨrahini meta Manatsexi wanuiwarima Kerutsareme mekaniu'axɨani mana metiyaxeke.
1CH 9:4 Kura nuiwarimama wahetsiemieme mekaniu'axɨani: 'Utahi 'Amihuri nu'aya, 'Umiri nu'aya, 'Imɨrí nu'aya, Wanihi nu'aya, Paretsi nuiwarieyatsie miemete, Kura nu'aya.
1CH 9:5 Tsiru kiekatari: 'Atsahiyaxi mexɨakame mieme, yuniwema warawitɨtɨ.
1CH 9:6 Tsera nuiwarimama hetsiemieme: Kehueri meta 'iwamama, yunaitɨ mepɨhɨkɨtɨkai 'ataxewime tsienituyari heimana nauka tewiyari heimana tamamata (690) teɨteri.
1CH 9:7 Wenikamini nuiwarimama hetsiemieme: Tsaru Metsurani nu'aya, Hurawiyaxi nu'aya, Tsenuha nu'aya,
1CH 9:8 'Iwinehiyaxi Keruhani nu'aya, 'Eraha 'Utsihi nu'aya, mɨkɨta Mikuri nu'aya, Metsurani Tsepatiyaxi nu'aya, mɨkɨta Xehueri nu'aya, mɨkɨta 'Iwiniyaxi nu'aya,
1CH 9:9 yumarema warawitɨtɨ. Kemaine wanuiwari xapayari, mekaniyupaɨmekaitɨni yunaitɨ 'atanauka tsienituyari heimana huta tewiyari heimana tamamata heimana 'ataxewi (956), mɨkɨ yunaitɨ memanuyetei yu'iwama memɨwanɨ'a mekanihɨkɨtɨkaitɨni.
1CH 9:10 Mawari wewiwamete wanuiwari hetsiemieme: Kerahiyaxi, Kuyariwi, Kakini,
1CH 9:11 'Atsariyaxi Kirikiyaxi nu'aya, heitserie Metsurani nuiwarieyatsie mieme, Tsaruki, Merayuti meta 'Akituwi, ti'aitame matɨa Kakaɨyari tukita miemekɨ,
1CH 9:12 'Arahiyaxi Keruhani nu'aya, mɨkɨta Patsuxi nu'aya, mɨkɨta Marikiyaxi nu'aya, Matsahi 'Arieri nu'aya, heitserie Katsera nuiwarieyatsie mieme, Metsurani, Metsiremiti meta 'Imexi,
1CH 9:13 meta wamarema, yunaitɨ mekanihɨkɨtɨkaitɨni xeimiriyari heimana 'atahuta tsienituyari heimana haika tewiyari (1.760), mɨpaɨ mekaniyupaɨmekaitɨni memanuyetei memɨwanɨ'akai xeikɨa, teɨteri memɨte'akumaikai Kakaɨyari tukieyata memɨte'uximayakakɨ.
1CH 9:14 Rewitsixi wanuiwariyari hetsiemieme: Tsemahiyaxi Katsuwi nu'aya, heitserie 'Atsirikani nuiwarieyatsie mieme, Katsawiyaxi meta Merari,
1CH 9:15 Wakiwakaxi, Heretsi, Karari meta Mataniyaxi Mikahiyaxi nu'aya, Tsikɨri nu'aya, mɨkɨta 'Atsahapi punu'aya,
1CH 9:16 'Awiriyaxi Tsemahiyaxi nu'aya, mɨkɨta Karari punu'aya, mɨkɨta Kerutuni punu'aya, Werekiyaxi 'Atsá nu'aya, mɨkɨta 'Erikana nu'aya, netupatari wakwietsie mukatei.
1CH 9:17 Kitenie memu'uwekai: Tsaruni, 'Akuwi, Tarimuni meta 'Akimani meta yumarema warawitɨtɨ, Tsaruni wa'ukiyari pɨhɨkɨtɨkai.
1CH 9:18 Hikɨ 'akuxi mepi'ɨwiya ti'aitame kitenieya, tau manatineika hepa muwietsie, meta rewitsixi mematitei wakitenie mepu'uwe.
1CH 9:19 Metatsiere, Tsaruni Kure nu'aya, mɨkɨta 'Ewihatsahapi nu'aya, mɨkɨta Kurehe nu'aya, meta maremama Kurehitsixi mɨkɨ xeinuiwari memɨhɨkɨ, mɨkɨ mepɨhɨritɨariekai 'ixuriki tukiyari mɨranutahakitɨretsie memɨ'ɨwiyanikɨ, meripaitɨ watutsima wahepaɨ memi'ɨwiyakai Yawé hakewa mekatei kitenieyari.
1CH 9:20 Meripaitɨ, Pinexi 'Eriyatsaxi nu'aya puwa'ukiyaritɨkai, Yawé hamatɨana kaniuyeikakaitɨni.
1CH 9:21 Tsakariyaxi Metseremiyaxi nu'aya, mɨkɨ kitenie hɨweme pɨhɨkɨtɨkai 'ixuriki tukiyari kitenieyaritsie.
1CH 9:22 Kemɨ'ane memanayexeiyarie kitenie memu'uwenikɨ yunaitɨ mekanihɨkɨtɨkaitɨni huta tsienituyari heimana tamamata heimana huta. Wakiekaritsie kanitikateni wanuiwari xapayarite kememɨte'aka'utsie. Rawiri meta Tsamuheri tewi mɨtixeiya, yamekateniwaruhɨritɨani kememɨteyuriekakekai.
1CH 9:23 Kitenie hɨwemete meta waniwema mekanihɨritɨariekaitɨni memi'ɨwiyanikɨ 'ixuriki tukiyari kitenieyari, mɨkɨ Yawé tukieya mɨhɨkɨtɨnikɨ 'amuwekai.
1CH 9:24 Kitenie hɨwemete mekani'ukaitɨni naukakɨa, tatserieta, ta'utata, tayeta meta tahetɨa.
1CH 9:25 'Atahuta tukaritsie, 'iwamarixi meniyuparewiekaitɨni 'axeikɨa memɨtitetɨkatei.
1CH 9:26 Yunaukatɨ kitenie hɨwemete mexɨakate yamekateni'uximayakaitɨni. Rewitsixi mekanihɨkɨtɨkaitɨni, kiita paitɨ meteni'ɨwiyametetɨkaitɨni, meta mɨraye'atɨka Kakaɨyari tukita timieme mekanihɨritɨariekaitɨni.
1CH 9:27 Tɨkarikɨ tehɨwemete mekananieretɨkɨkakaitɨni tuki warita, ximerita tukita naitsarie mekateneuyepiwakaitɨni.
1CH 9:28 Hipatɨta mepɨhɨritɨariekai tita mawari matiwewiwa mɨtiyukumaɨwa tuki manuwe hetsiemieme, mepɨteti'inɨnɨatakai memɨtehewayepinekaitsie meta memɨte'uti'utakaitsie.
1CH 9:29 Hipatɨta mepɨhɨritɨariekai piinite Kakaɨyaritsie timieme mɨtipatsie tukita paitɨ mɨtiyukumaɨwakai, watsute, harina, winu, hatseiti, 'ɨkwa meta witsimɨtiɨ'ɨatɨka.
1CH 9:30 Hipatɨ mawari wewiwamete mepikawewiwakai witsimu'ɨa.
1CH 9:31 Rewi tewiyari Matatiyaxi Tsaruni matɨarieya Kure nuiwarieya hetsiemieme, mɨkɨ pɨhɨritɨariekai tɨriku tsuirayari mɨtiwewiwanikɨ mawariyari.
1CH 9:32 Hipatɨta maremama kuhatitsixi mepikawewiwakai paa Kakaɨyari hetsiemieme mɨpatsietɨka xawatikɨ mieme.
1CH 9:33 Metatsiere kwikamete mepuxuawekai rewitsixi wanuiwarima mepɨhɨkɨtɨkai, yuniwema memɨtewa'aitɨa mepɨhɨkɨtɨkai. Mɨkɨ tuki manuwe mepɨtitekai kaneixeiyakaitɨni waɨka kii. Mɨkɨ mepɨkayɨwawekai tawari yɨkɨ memɨteyurieka, mɨkɨ tukarikɨ tɨkarikɨ yamemɨte'uximayakaikɨ kememɨtehɨritɨariekai.
1CH 9:34 Kemaine wanuiwari xapayari, mɨkɨ memanuyetei mepɨhɨkɨtɨkai memɨwanɨ'a rewitsixi meta Kerutsareme mepɨtitekai.
1CH 9:35 Kawahuni kiekariyaritsie Kehieri kaniukateitɨni, Kawahuni paapaya. 'Ɨyaya Mahaka katinitewakaitɨni,
1CH 9:36 niwemama mekanakɨne: matɨari mieme 'Awuruni, Tsuxi, Kihitsi, Wahari, Nexi, Narawi,
1CH 9:37 Keruxi, 'Akihu, Tsakariyaxi meta Mikuruti,
1CH 9:38 Tsimani paapaya matɨa. Mɨkɨtsiere Kerutsareme mepɨtitekai yumarema wahamatɨa.
1CH 9:39 Nexi Kihitsi paapaya kanayani, Kihitsi Tsahuri paapaya kanayani, Tsahuri Kunatani paapaya kanayani meta Marikitsuha, 'Awinarawi meta 'Etsiwahari.
1CH 9:40 Kunatani Meriwahari paapaya kanayani, Meriwahari Mikahiyaxi paapaya kanayani.
1CH 9:41 Mikahiyaxi niwemama mekanakɨne Pituhuni, Mereki, Tareya meta 'Akatsi.
1CH 9:42 'Akatsi Kara paapaya kanayani, mɨkɨta 'Aremeti paapaya kanayani meta 'Atsimaweti meta Tsimɨri. Tsimɨri Mutsaha paapaya kanayani,
1CH 9:43 Mutsaha Winaha paapaya kanayani, mɨkɨta Xepahiyaxi paapaya kanayani, Xepahiyaxi 'Eratsa paapaya kanayani, mɨkɨta 'Atseri paapaya kanayani.
1CH 9:44 'Atseri meyu'ataxewime kaniwarayexeiya, mekatenitetewakaitɨni: 'Atsirikani, Wukuru, 'Itsimaheri, Tsehariyaxi, 'Awiriyaxi meta Kanahani. Mɨkɨ 'Atseri niwemama mekanakɨne.
1CH 10:1 Merikɨtsɨ piritsiteutsixi mekaniuyutakwini 'ixaheritsixi wahamatɨa, hikɨ 'ana 'ixaheritsixi mekaneuyuta'unaxɨani, yumɨiretɨ mekaniukwi'iwa Kiriwuha hɨriyaritsie.
1CH 10:2 Hikɨ piritsiteutsixi Tsahuri mekananukuweiya, hikɨ niwemama mekaniwarukwini Kunatani, 'Awinarawi meta Marikitsuha.
1CH 10:3 Hikɨ Tsahuri pɨkawakemakairi, 'ana tupikɨ temɨmɨmete piritsiteutsixi mekanitamɨni mekani'axe. Hikɨ 'u'axieka,
1CH 10:4 Tsahuri mɨpaɨ katiniutahɨawe mikuhɨnekai: «'A'ixipara keniwatihanaka keneneumi'a, para memɨkanetsikumemiwanikɨ xitekiya 'inɨariyari memɨkahexeiya, me'axɨame menetsi'uti'atsekɨ menetsinanaimatɨ». 'Ana 'iparewiwame waɨkawa kanimakaitɨni pɨka'uyuwaɨri mimienikɨ, hikɨ Tsahuri yukɨmana yu'ixiparatsie kaniyukaxuni.
1CH 10:5 Kepauka 'ihɨweme Tsahuri muxei mukime, yaxeikɨata mɨkɨ yu'ixiparakɨ kaniuyumieni.
1CH 10:6 Mɨpaɨ mekateniukwini Tsahuri meta niwemama memɨyuhaika. Mɨkɨ tukaritsie yunaitɨ mekaniukwini mɨkɨ niwemama.
1CH 10:7 Kepauka 'ixaheritsixi mayeweritsie kiekatari memunenierixɨ kuyaxi 'ixaheritsixi kememɨte'uyuta'unaxɨakai, meta Tsahuri yaxeikɨa niwemama kememɨte'ukwi'iwakai, mɨkɨta yukiekarite mekaniuku'eiriexɨani mekaniyuta'unaxɨani. Mɨpaɨ mete'iku'eirieku piritsiteutsixi mana mekanitamare.
1CH 10:8 Hikɨ 'uxa'arieka kepauka piritsiteutsixi memu'axɨa memɨwarukwikai wapiinite mete'anupinike, mana mɨkime mekaniutaxeiya Tsahuri meta niwemama Kiriwuha hɨriyaritsie.
1CH 10:9 Hikɨ 'ana mekatenepini piiniteya, mu'uya mekanetuni meta 'ixiparaya, 'ana naitsarie piritsiteutsixi wahetsɨa mekaneitanɨ'axɨani niuki yukakaɨyarixi wahetsɨa memitaxataxɨanikɨ meta yuteɨterima wahetsɨa.
1CH 10:10 Yukakaɨyarixi watukita mekaniyewɨtɨaxɨani piiniteya kuyaxa timieme, meta mu'uya Rakuni tukita mekaniyewieni.
1CH 10:11 Kepauka Kawetsi Karaha kwieyaritsie kiekatari memɨte'utamari piritsiteutsixi Tsahuri kememuyuriekai.
1CH 10:12 'Ana mekaniyukuha'aritɨani yunaitɨ memɨka'ukamama mana Tsahuri kaxarieya mekaniwarunawairieni meta niwemama. Mekaniware'ɨni Kawetsi paitɨ, wa'umete mekanekateuku xiu Kawetsi muwe hetɨa, mɨya mete'uyurieka mekaniuyuhakieni 'atahuta tukari.
1CH 10:13 Hikɨ Tsahuri kaniumɨni Yawé mɨka'anu'enikɨ, niukieya ka'anu'enieka, 'uka mɨtimaiwe hetsɨa kaniuta'iwauni, Yawé kaha'iwawiyatɨ, 'ayumieme tukarieya kaninawairieni meta mɨra'aitakaitsie, Rawiri pɨta kaniyetuirieni 'Itsahi nu'aya.
1CH 11:1 Merikɨtsɨ 'ixaheritsixi teɨteriya yunaitɨ Hewuruni mekaniuyukuxeɨrieni Rawiri hetsɨa, mana mɨpaɨ mekatenitahɨawe: «Tame meta 'ekɨ tepɨ'iwamarixi.
1CH 11:2 Meripaitɨri 'ekɨ, kepauka Tsahuri mɨti'aitametɨkaitsie, 'ekɨ pepɨwanɨ'akai 'ixaheritsixi memɨyukwitɨwekaitsie. Metatsiere Yawé Kakaɨyari mɨpaɨ pɨmatiutahɨawixɨ: “'Ekɨ neteɨterima 'ixaheritsixi pekaniwayewitɨmɨkɨ meta pekatiniwata'aitɨamɨkɨ”».
1CH 11:3 Merikɨte, yunaitɨ 'ukirawetsixi 'Ixaheritsie kiekatari mekanekɨne Hewuruni paitɨ Rawiri hetsɨa, hikɨ mɨkɨ mana tɨratu wahamatɨa kaniuwewieni Yawé hɨxie. Hikɨ 'ana Rawiri hatseiti mekanikawirieni, 'Ixaheri kwieyaritsie ti'aitame mayanikɨ, Yawé kemainekai Tsamuheri kemɨrahɨawekai.
1CH 11:4 Merikɨtsɨ Rawiri meta yunaitɨ 'ixaheritsixi teɨteriyari mekanekɨne Kewutsi mɨrakutewatsie (tatsɨari Kerutsareme), mana kewutseutsixi mekanititekaitɨni.
1CH 11:5 Hikɨ Kewutsi kiekatari Rawiri mɨpaɨ mekateniutahɨawe: «Pepɨkayɨwe 'uwa pematahani». Peru Rawiri Kiekariena Tsiyuni yukuraru 'amatitewa mexeiyakai kana'iwa, metatsiere mumatiwa Rawiri kiekariena.
1CH 11:6 Rawiri mɨpaɨ pɨtiwarutahɨawekai yukuyaxima: «Kemɨ'ane meri kewutseu tewiyari mumieni xeime mɨkɨ kuyaxi wa'ukiyari kanayeimɨkɨ». 'Ana Kuhawi Tsariwiya nu'aya xeime kewutseu tewiyari kaniumieni, mɨkɨ kuyaxi wa'ukiyari kanayeitɨarieni.
1CH 11:7 Rawiri yukie kanayeitɨani mɨkɨ kiekari yukuraru 'amatitewa mexeiya, hikɨ 'ayumieme mɨpaɨ katinitewaka «Rawiri Kiekarieya».
1CH 11:8 Meta kiekari kaniutawewieni kwie meukawiwiyatsie 'itsutɨaka meta kiekari warita, meta Kuhawi Kerutsareme kiekariyari 'aixɨa kaniyurienekaitɨni.
1CH 11:9 Rawiri matsi waɨkawa tɨrɨkaɨyetɨ kanayeiximekaitɨni, Yawé Naimekɨmɨtɨrɨkaɨye hamatɨana muyeikakaikɨ.
1CH 11:10 'Ikɨ mepɨhɨkɨtɨkai Rawiri kuyaximama wa'ukiyarima, mɨkɨ mepiparewiekai kepauka mɨti'aitametɨkaitsie, 'ana yunaitɨ 'ixaheritsixi me'uyukuxeɨrieka ti'aitame mekaneyeitɨani 'Ixaheri kwieyaritsie miemekɨ, meripaitɨ Yawé kemainekai 'Ixaheri hepaɨtsita.
1CH 11:11 'Ikɨ Rawiri kuyaximama mekanihɨkɨtɨni memaka'utɨarie yemekɨ memɨkamamakai: Yatsuwehani Kakumuni nu'aya, mɨkɨ matsi pɨhɨkɨtɨkai mexɨakame memuyuhaika memɨkamamakai, heiwa meyukwitɨwetɨ haika tsienituyari puwarukwi teɨteri yupitsikakɨ.
1CH 11:12 Hutarieka miemeta pɨhɨkɨtɨkai 'Eriyatsaxi Ruruhu nu'aya, 'Akuki nuiwarieya, mɨkɨtatsiere yemekɨ pɨkamakai peuyutamiewekai.
1CH 11:13 Rawiri hamatɨa Patsiramini kaniuyeikakaitɨni, hakewa piritsiteutsixi memeyukuxeɨriekai mewatakwinike. Manata tsewara pɨ'etsiekai, kepauka kuyaxi 'ixaheritsixi memuyuta'unaxɨ,
1CH 11:14 'Eriyatsaxi meta Rawiri tsewara mayema mekaniyuhayewa waheima mekaniutanuani piritsiteutsixi mekaniwarukwini. 'Ana Yawé kaniwarupitɨani memɨtehayu'iwakɨ.
1CH 11:15 Xeitewiyari heimana tamamata kuyaxi tewa'aitɨwamete, mɨkɨ meyuhaikatɨ, mekanekɨne mu'aiyatsiepaitɨ, Rawiri muwayekateitsie paitɨ 'Arurani terɨyarita paitɨ, piritsiteutsixi mayeweritsie Xepahini mekanikutekaitɨni.
1CH 11:16 'Ana Rawiri kaniyu'awietakaitɨni, 'anata Wereni kiekariyaritsie piritsiteutsixi mekanihɨkaitɨni.
1CH 11:17 Hikɨ Rawiri mɨyeharimɨnekaikɨ mɨpaɨ kaniutayɨni: «Nemɨniyɨweniketɨ haa nemɨtiharenikɨ Wereni kitenieyaritsie mɨtiniere».
1CH 11:18 Hikɨ memuyuhaika memɨkamama piritsiteutsixi memakuteitsie me'uyekɨneka, Wereni haputsuyarita haa mekaniwatihana, hikɨ Rawiri mekanehanirieni. Peru Rawiri pɨka'enuhari, kanitayeurieni pɨta Yawé hetsiemieme,
1CH 11:19 mɨpaɨ kaniutayɨni: «Kakaɨyari hɨxie 'ikɨ haa nepɨka'anuhareni. Xɨka ne'enuhareni, memi'atɨa waxuriya nemanuhareni hepaɨ nepɨyɨni. Yutukari mepɨyetua kemɨ'ane haa memɨ'atɨa». Hikɨ 'ayumieme pɨka'enuhari. 'Ikɨ meyuhaikatɨ mɨpaɨ mepɨteyuriekai waɨkawa.
1CH 11:20 'Awitsahi Kuhawi 'iwaya, mɨkɨ memɨyuhaika katiniwa'aitɨwametɨkaitɨni, mɨkɨ 'aixɨa katinikuxaxatsiwakaitɨni. Mɨkɨ heiwa yupitsika hakwetɨ kaniyutamieni, haika tsienituyari teɨteri kaniwarukwini.
1CH 11:21 Mɨkɨ matsi waɨkawamekɨ kaniyɨwekaitɨni kuyakɨ keyuri memɨyuhaika, 'ana mɨkɨ muwanɨ'a kanayani, peru mɨkɨ wahamatɨa pɨka'u'inɨatsie.
1CH 11:22 Wenahiyaxi Kuyara nu'aya kuya pɨhɨkɨtɨkai Kawɨtseri kiekame. Mɨkɨ teɨteri yuhutame memeuyutakwiwawe pɨwarukwi Muhawi kiekatari, meta heiwa 'u'ɨwiyakaku putsu muyewakita heukahaka xeime maye kaniumieni.
1CH 11:23 Meta xeime 'ekipitutanaka huta meturuyari heimana 'imeriyu 'utewime kaniumieni, pitsika kanakwekaitɨni kwiniepame. Wenahiyaxi matsi kɨye xeikɨa pakwekai, pitsikaya kaninawairieni mɨkɨkɨ kanimieni.
1CH 11:24 Wenahiyaxi Kuyara nu'aya mɨpaɨ pɨtiyurienekai waɨkawa, mɨkɨta 'aixɨa tikuxaxatsiwatɨ patɨa memuyuhaika hepaɨ,
1CH 11:25 peru mɨkɨ wahamatɨa pɨka'u'inɨatsie, tsepa xeitewiyari heimana tamamata memuyupaɨme memɨkamama muwara'iwakai. Hikɨ 'ana Rawiri yuhɨwemete muwanɨ'a kaneyeitɨani.
1CH 11:26 'Ikɨ kuyaxi memɨyɨwawekai memɨkamamakai mekanihɨkɨtɨni: 'Atsaheri, Kuhawi 'iwaya, 'Erikanani Ruruhu nu'aya Wereni kiekame,
1CH 11:27 Tsamuti Haruri kiekame, Heretsi Peruni kiekame,
1CH 11:28 'Ira 'Iketsi nu'aya Tekuha kiekame, 'Awihetsexi 'Anatuti kiekame,
1CH 11:29 Tsiwekahi Kutsa kiekame, 'Irahi 'Akuki nuiwarieya hetsiemieme,
1CH 11:30 Marahi netupatanaka, Kereri Wanaha nu'aya Netupaha kiekame,
1CH 11:31 'Itahi Xiwahi nu'aya, Kiweha kiekame Wenikamini kwieyaritsie mɨti'ane, Wenahiyaxi Piratuni kiekame,
1CH 11:32 Kurahi Kahatsi 'akiyaritsie kiekame, 'Awiheri Weti-'Arawa kiekame,
1CH 11:33 'Atsimaweti Wakurini kiekame, 'Erihawa Tsariwini kiekame,
1CH 11:34 Katseni Kitsuni kiekame niwemama, Kunatani Tsakehe nu'aya 'Arari kiekame,
1CH 11:35 'Ahiyani Tsakaxi nu'aya 'Arari kiekame, 'Eripari 'Uxi nu'aya,
1CH 11:36 Hepexi Mekera kiekame, 'Ahiyaxi Peruni kiekame,
1CH 11:37 Ketsiru Kaximeri kiekame, Narahi 'Etsiwahi nu'aya,
1CH 11:38 Kuheri Natani 'iwaya, Miwaxi Hakɨri nu'aya,
1CH 11:39 Tsereki 'amuni tewiyari, Nakarahi Weruti kiekame Kuhawi hɨwemetɨkai Tsariwiya nu'aya,
1CH 11:40 'Ira 'itɨrita tewiyari, Karewi 'itɨrita tewiyari,
1CH 11:41 'Uriyaxi Heti tewiyari, Tsawari 'Akirahi nu'aya,
1CH 11:42 'Arinaha Tsitsaha nu'aya Xuweni nuiwarieya, xuwenitsixi muwanɨ'a pɨhɨkɨtɨkai meta xeitewiyari heimana tamamata teɨteri mekaneweiyakaitɨni.
1CH 11:43 Kanahani Mahaka nu'aya, Kutsapati Mitini kiekame,
1CH 11:44 'Utsiyaxi 'Atsitaruti kiekame, Tsama meta Kehieri Kutani niwemama 'Aruhexi kiekame,
1CH 11:45 Keriyaheri Tsimɨri nu'aya, meta 'iwaya Yuká Titsi kiekame,
1CH 11:46 'Eriheri Mahawa kiekame, Kerewahi meta Kutsawiyaxi 'Erinahani niwemama, 'Itimaha Muhawi tewiyari,
1CH 11:47 'Eriheri, 'Uweri meta Katsiheri Tsuwaha kiekame.
1CH 12:1 'Ikɨ mekanihɨkɨtɨni Rawiri memutinɨi kuyaxi Tsikɨraki 'uyeikakaku, kepauka mɨkɨ 'ateewa muyeikakai heyeweiyaku Tsahuri Kihitsi nu'aya. Mɨkɨ mekaniparewieni kepauka mɨkɨ muyumienekaitsie.
1CH 12:2 Tupikɨ temɨmɨmete mekanihɨkɨtɨkaitɨni meta tewɨpamekɨ mepɨtetuaxiwawekai meta mepɨtemɨiwawekai yutserieta meta yu'utata. Wenikamini nuiwarimama Tsahuri maremama:
1CH 12:3 Mɨtiwa'aitɨa 'Akihetsexi pɨhɨkɨtɨkai meta Kuhatsi, Tsema mepɨniwemamatɨkai Kiweya kiekame, Ketsiheri meta Pereti 'Atsimaweti mepɨniwemamatɨkai, Weraka meta Kehu 'Anatuti kiekatari,
1CH 12:4 'Itsimahiyaxi kawahunitanaka, mɨkɨ xeitewiyari heimana tamamata kuyaxi puwa'iwatɨkai meta muwanɨ'a pɨhɨkɨtɨkai, Keremiyaxi, Kahatsieri, Kuhanahani, Kutsawari Kerera kiekame,
1CH 12:5 'Erutsahi, Kerimuti, Wehariyaxi, Tsemariyaxi, Tsepatiyaxi Harupi nuiwarieya hetsiemieme,
1CH 12:6 'Erikana, 'Itsiyaxi, 'Atsareri, Kuhetsexi meta Yatsuwehani mɨkɨ Kure mepɨnuiwarimamatɨkai,
1CH 12:7 Kuhera meta Tsewariyaxi, Keruhani niwemama mepɨhɨkɨtɨkai Keruxi kiekatari.
1CH 12:8 Hipatɨta Kahari nuiwarimama Rawiri mekaniutinɨni kepauka muyu'awietakai makumawetsie. Memeuyutakwiwawe memɨkamama mepɨhɨkɨtɨkai, kuyakɨ mepɨha'aritsiekai, mepakumexɨxɨakai pitsikakɨ meta yuhetsie nunuwamekɨ, mayetsi wahepaɨ mepɨtehayu'eririyakai, maxatsi yeutari wahepaɨ mepɨtehanautsawawekai.
1CH 12:9 Mɨpaɨ mepɨtetetewakai: Mexɨakame pɨhɨkɨtɨkai 'Etsexi, 'Awiriyaxi hutarieka mieme, 'Eriyáwi hairieka mieme,
1CH 12:10 Mitsimanaha naurieka mieme, Keremiyaxi 'auxɨwirieka mieme,
1CH 12:11 'Atahi 'ataxewirieka mieme, 'Eriheri 'atahutarieka mieme,
1CH 12:12 Kuhanahani 'atahairieka mieme, 'Eritsawari 'atanaurieka mieme,
1CH 12:13 Keremiyaxi tamamatarieka mieme meta Makawanahi tamamata heimana xewi mieme.
1CH 12:14 'Ikɨ Kahari nuiwarimama kuyaxi wa'ukiyarima mepɨhɨkɨtɨkai, yakɨ mɨtitɨrɨkaɨye puwakemakai xeitsienituyari, yemekɨ mɨtɨrɨkaɨye puwakemakai xeimiriya.
1CH 12:15 'Ikɨ mekanihɨkɨtɨni Kurutani hatuxameyaritsie memanukɨ mexɨakame metseriyari 'anuhaku, kepauka haa muwayeneikatsie naime muweritsie meuyunitɨwa, hikɨ mana kiekatari mekaniwareutaweiyaxɨani 'anutaɨyetari meta 'anataɨyetari.
1CH 12:16 Hipatɨta kuyaxi Wenikamini nuiwarimama hetsiemiemete meta Kura hetsiemiemete Rawiri mekaniutinɨni mayu'awietakaitsie.
1CH 12:17 Rawiri kanayeyani waranukunakeke mɨpaɨ katiniwarutahɨawe: ―Xɨka 'aixɨa 'anemekɨ xekɨyɨaka xenetsiparewienike nekanixetanaki'erimɨkɨ, peru xɨka xenetsi'aye'unietɨ xeyɨaka xenetsiyetuanike, ta'ukiyarima wakakaɨyari yakeretimani meta ketiwarukwinitɨani, netsɨ tiyumiekame nepɨkahɨkɨ.
1CH 12:18 'Amatsahi hetsie 'Iyari kaninuani, xeitewiyari heimana tamamata mɨwanɨ'a, mɨpaɨ kaniutayɨni karima: «Rawiri tame 'ahetsɨa tepumiemete. 'Ahamatɨa tepu'uwa, 'Itsahi pemɨnu'aya. Haikakɨa yatepaitɨka kayuwatɨ tepɨmatsipitɨa, 'ekɨ meta kemɨ'ane mɨmatsiparewie. Kemɨ'ane mɨmatsiparewie Kakaɨyari kanihɨkɨtɨni». 'Ana Rawiri kaniwarutanaki'erieni meta yukuyaxima wa'ukiyarima wahamatɨa kaniwaranuka'uitɨani.
1CH 12:19 Yaxeikɨatatsiere hipatɨ kuyaxi Manatsexi nuiwarimama Rawiri mekaniutinɨni kepauka 'ikɨ piritsiteutsixi wahamatɨa mumiekai Tsahuri metamienike. Peru piritsiteutsixi wa'ukiyarima mepuyu'eni mɨkawaparewienikɨ. Waɨkawa mete'utixataka mekanita'imaiya yu'ɨtɨa mɨyemiekɨ, mɨpaɨ me'utiyuaka: «Rawiri tiyu'aitɨwame Tsahuri kanitinɨimɨkɨ, mɨpaɨ katatinikwimɨkɨ».
1CH 12:20 'Ikɨ mekanihɨkɨtɨni Manatsexi nuiwarimama Rawiri memutinɨi kepauka Tsikɨraki metɨa: 'Arinatsi, Kutsawari, Keriyaheri, Mikaheri, Kutsawari, 'Erihú meta Tsiretahi, manatsexitsixi wa'ukiyarima mepɨhɨkɨtɨkai xeimiriyari kuyaxi memɨwanɨ'akai.
1CH 12:21 Rawiri mekaniparewiekaitɨni kepauka memɨwakwitɨwekai hipame tenawayamete, mɨkɨ yuxexuitɨ memɨkamama memeuyutakwiwawe mepɨhɨkɨtɨkai meta kuyaxi memɨwanɨ'a mepɨhɨkɨtɨkai.
1CH 12:22 Yamepɨte'axekai kuyaxi Rawiri hetsɨa me'itinɨnike, mɨpaɨ yumɨireme tiwarexeiyatɨ kanayani Rawiri kuyaxi.
1CH 12:23 'Ipaɨ mekaniyupaɨmekaitɨni kuyaxi waɨkawa memeuyutakwiwawe Rawiri hetsɨa memu'axɨa Hewuruni mɨrakutewatsie, ti'aitame memeyeitɨanikɨ Tsahuri hetsiemieme, Yawé kemutayɨkai:
1CH 12:24 Kura nuiwarimama mepɨyupaɨmekai: 'ataxewi miriyari heimana 'atahaika tsienituyari (6.800) kuyaxi 'ari meha'aritsietɨ kuyaxa miemekɨ.
1CH 12:25 Tsimehuni nuiwarimama mekaniyupaɨmekaitɨni: 'atahuta miriyari heimana xeitsienituyari (7.100) kuyaxi yemekɨ memeuyutakwiwawe.
1CH 12:26 Rewi nuiwarimama mekaniyupaɨmekaitɨni: nauka miriyari heimana 'ataxewi tsienituyari (4.600),
1CH 12:27 'Aruni nuiwarimama mekaniyupaɨmekaitɨni, haika miriyari heimana 'atahuta tsienituyari (3.700) kuyaxi, Kuyara wa'ukiyari pɨhɨkɨtɨkai,
1CH 12:28 meta temaikɨ Tsaruki, waɨkawa meuyutamiewe, pɨwa'ukiyaritɨkai xeitewiyari heimana huta yu'iwama memanuyetekai.
1CH 12:29 Wenikamini nuiwarimama, Tsahuri 'iwamama mekaniyupaɨmekaitɨni: haika miriyari teɨteri, mɨkɨ Tsahuri mepaweiyakai 'aixɨa mepɨte'ixeiyakai meripaitɨ.
1CH 12:30 'Epɨrahini nuiwarimama mekaniyupaɨmekaitɨni: xeitewiyari miriyari heimana 'atahaika tsienituyari (20.800) teɨteri memɨkamama, yu'iwama watsata memɨmariwakai.
1CH 12:31 Manatsexi nuiwarimamata hixɨata me'atɨ mekaniyupaɨmekaitɨni: tamamata heimana 'atahaika miriyari teɨteri memanayexeiyarie Rawiri ti'aitame memanukakenikɨ.
1CH 12:32 'Itsakaxi nuiwarimama mekaniyupaɨmekaitɨni: huta tsienituyari memanuyetei yu'iwama wahetsie mieme. Mɨkɨ teɨteri mepɨtemaiwawekai tukari hepaɨtsita, 'Ixaheri hepaɨtsita tita 'aixɨa mɨti'anekai mepɨtemaikai.
1CH 12:33 Tsawuruni nuiwarimama mekaniyupaɨmekaitɨni: huta tewiyari heimana tamamata miriyari (50.000) teɨteri memeuyutakwiwawekai tsepa tita mete'ɨ'ɨtɨ, memɨyuwaɨriyakai memɨyutakwinikɨ Rawiri hetsiemieme.
1CH 12:34 Nepɨtahari nuiwarimama mepɨyupaɨmekai: xeimiriyari mepɨhɨkɨtɨkai memanuyetei, mɨkɨ yuxexuitɨ mepɨwanɨ'akai xeitewiyari heimana tamamata heimana 'atahuta miriyari (37.000) teɨteri, yuhetsie nunuwame meta pitsika me'u'ɨkame.
1CH 12:35 Rani nuiwarimama mekaniyupaɨmekaitɨni: xeitewiyari heimana 'atahaika miriyari heimana 'ataxewime tsienituyari (28.600) kuyaxi memɨyuwaɨriyakai memɨyutakwinikɨ.
1CH 12:36 'Atsexi nuiwarimama mekaniyupaɨmekaitɨni: huta tewiyari miriyari teɨteri kuyakɨ memɨha'aritsiekai.
1CH 12:37 Hipatɨta nuiwarite Kurutani 'anutaɨye memɨtamakai tatsɨari Xuweni nuiwarimama meta Kahari nuiwarimama meta hixɨata me'atɨ Manatsexi nuiwarimama mekaniyupaɨmekaɨtɨni: xeitsienituyari heimana xeitewiyari miriyari (120.000) teɨteri mete'upitɨ tita kuyaxa mɨreuyewetse.
1CH 12:38 Yunaitɨ mɨkɨ kuyaxi meyuwaɨriyatɨ memɨyutakwinikɨ mekanekɨne Hewuruni paitɨ, mana Rawiri memanukakenikɨ ti'aitame memeyeitɨanikɨ naitsarie 'Ixaheri kwieyaritsie miemekɨ. Hipatɨta 'ixaheritsixi mepɨwarutinɨi yunaitɨ Rawiri mekananukakeni.
1CH 12:39 Yunaitɨ mana mekaniyuhayewa haika tukari, metekwatɨ meta mete'ietɨ Rawiri hamatɨa, meripaitɨri 'iwamama mepɨte'ukuha'aritakai tita memɨtekwanikekai.
1CH 12:40 Metatsiere hurawa kiekatari meta 'Itsakaxi, Tsawuruni, Nepɨtahari wanuiwarima mepɨwa'atɨwakai puxuri, kameyutsixi, muratsixi, meta tuurutsixi kwietsanamete wahetsie meteha'ikatatɨ tɨriku mɨtɨxiyari, xapa patsaruyari papatsietɨkaime, kaxie patsaruyari, winu meta huriwa hatseitiyari. Meta mekateniwarehapanirieni tuurutsixi meta muxatsi meyumɨireme, 'ixaheritsixi waɨkawa temawierika memexeiyakaikɨ mana.
1CH 13:1 Hikɨ Rawiri waruta'iwawiyaka kuyaxi xeimiriyari meta kuyaxi xeitsienituyari memɨtewa'aitɨatɨka meta yunaitɨ memanuyetei,
1CH 13:2 mɨpaɨ katiniwarutahɨawe 'ixaheritsixi yunaime memɨyuxeɨriekai: «Xɨka 'aixɨa'aneni, xɨka Yawé takakaɨyari mɨpaɨ tinakeni, tepɨwata'inieni yunaime 'Ixaheri kwieyaritsie memɨtama, meta mawari wewiwamete metatsiere rewitsixi xexuime kiekaritetsie memeutitei, meketatsi'utinɨni
1CH 13:3 Kakaɨyari tɨratuya kakuniyari temɨkweiyukɨ temi'atɨanikɨ. Yurikɨ Tsahuri mɨti'aitakaitsiepaitɨtɨ tepɨkahe'eriwa».
1CH 13:4 Kemɨtiwarutahɨawixɨ yunaitɨ teɨteri pɨwarunakixɨ, hikɨ yunaitɨ yamekaniutiyuani mɨpaɨ mɨtiyɨnikɨ.
1CH 13:5 Hikɨ Rawiri yunaime kaniwarukuxeɨrieni 'ixaheritsixi, Tsikuxi 'Ekipitu kwieyari maka'atɨkatsie paitɨ meye'atɨkaime meta Rewu-Kamati paitɨ meye'atɨkaime, Kakaɨyari tɨratuya kakuniyari memɨkweiyukɨ Kiriati-Yeharini paitɨ mekatei.
1CH 13:6 Hikɨ Rawiri meta yunaitɨ 'ixaheritsixi mekanekɨne Wará paitɨ, Kiriati-Yeharini tɨtɨ Kura kwieyaritsie, mana memiyekwenikɨ Kakaɨyari tɨratuya kakuniyari, mɨkɨtsie Yawé mutahɨawarɨwa yuteɨtamete watsata mɨti'aita.
1CH 13:7 Tɨratu kakuniyari kaxeta hekwametsie mekanikateni, 'Awinarawi kie mekaneyekweni. 'Utsa meta 'Akihu kaxeta mekaniunɨ'aximekaitɨni.
1CH 13:8 Rawiri meta yunaitɨ 'ixaheritsixi Kakaɨyari hɨxie mekaniuhukaitɨni waɨkawa meyutemamawietɨ meta me'utikwitɨ, mete'ukayuitɨwatɨ, me'ukanariwiximetɨ, me'ukaitsawiximetɨ, meta kuxineta me'uhɨtsiximetɨ.
1CH 13:9 Kiruni kwieyatsie me'uyehutɨ, tɨriku matihenatsie, tuurutsixi kwietsanamete mekanekaxɨrieni, hikɨ 'Utsa yumamatekɨ tɨratu kakuniyari kaniutuika 'anatiwenikɨ.
1CH 13:10 Yawé kaniuyeha'ani 'Utsa hetsiemieme tɨratu kakuniyari mumayɨakɨ, 'ana kwitɨwa kanimieni.
1CH 13:11 'Ana Rawiri kaniuyeha'ani Yawé 'Utsa mumikɨ. 'Ayumieme mana Peretsi-'Utsa katiniuterɨwa, hikɨ 'akuxi mɨpaɨ pɨrakutewa.
1CH 13:12 'Ana Rawiri Kakaɨyari heumakatɨ mɨpaɨ kaniutayɨni: «Nepɨkahenukweniri Kakaɨyari tɨratuya kakuniyari».
1CH 13:13 'Ayumieme Rawiri yukiekaritsie pɨkaheitɨ, matsi mɨpaɨ katiniu'aita 'Uweri-'Erumi kie manukweiyanikɨ, Kahati kiekame hetsɨa.
1CH 13:14 Mɨpaɨ tiuyɨku Kakaɨyari tɨratuya kakuniyari 'Uweri-'Erumi kie kaniyuhayewa haika metseri, hikɨ 'ana Yawé 'Uweri-'Erumi tɨɨriyamama 'aixɨa kaniwayuriekaitɨni meta tita mɨrexeiyakai.
1CH 14:1 Ti'aitame Hirami Tiru kiekame, yunɨ'arima Rawiri kanenɨ'arieni mete'utɨkɨme kariuxa kɨyeyari, meta kii wewiwamete metatsiere kɨyekɨ te'uximayatamete paratsiyuya memɨtawewienikɨ.
1CH 14:2 Mɨkɨkɨ Rawiri mɨpaɨ katinetimani kename Yawé, yuteɨterima wanaki'erietɨ, 'enukake 'Ixaheri kwieyaritsie mɨti'aitanikɨ, meta mariweme hayeitɨaximekai hakewa mɨre'aita.
1CH 14:3 Rawiri hipameta 'ukari kaniwarutiwitɨni Kerutsareme kiekariyaritsie, mɨkɨ wahamatɨa tɨɨri kaniwarayexeiya 'ukitsi 'ukari.
1CH 14:4 Mɨpaɨ mepɨtetewakai 'ukitsi mɨwarayexei: Tsamuha, Tsuwawi, Natani, Tsarumuni,
1CH 14:5 'Iwikaxi, 'Eritsuha, 'Eripereti,
1CH 14:6 Nuka, Nepeki, Kapiha,
1CH 14:7 'Eritsama, Weriyara meta 'Eripereti.
1CH 14:8 Hikɨ kepauka memɨte'utamari piritsiteutsixi kename Rawiri hanukakeriekai 'Ixaheri kwieyaritsie ti'aitame mayanikɨ, mekanayekɨne me'itamienike. Peru Rawiri yakatinetimani wahepa kaneyani.
1CH 14:9 'Ari piritsiteutsixi Xepahini mayeweritsie hipame wahetsɨa mekanitahaxɨakaitɨniri.
1CH 14:10 Hikɨ 'ayumieme Rawiri Kakaɨyari mɨpaɨ katiniuta'iwawiya: ―¿Netiyɨwe piritsiteutsixi nemɨwatakwini? ¿penetiparewieni nemɨwara'iwakɨ? Yawé mɨpaɨ katinita'eiya: ―Keniwarutakuya, ne nekameniparewimɨkɨ pemɨwara'iwakɨ.
1CH 14:11 Hikɨ Rawiri mekanekɨne Wahari-Peratsini paitɨ, mana Rawiri kaniwara'iwa. Hikɨ Rawiri mɨpaɨ kaniutayɨni mana: «Kakaɨyari peutaha memɨnetsi'aye'unie watsata haa waɨkawa mɨtɨrɨkaɨye hepaɨ». 'Ayumieme mana Rawiri Wahari-Peratsini katiniuterɨwa.
1CH 14:12 Mana piritsiteutsixi yukakaɨyarixima mekaniwaruku'eirieni, hikɨ mɨkɨ mekaniutitaiyarieni Rawiri mɨpaɨ tiuta'aitaku.
1CH 14:13 Piritsiteutsixi tawarita hekwamekɨ mayeweritsie kiekatari mekaniwarutakwini.
1CH 14:14 'Ayumieme tawarita Rawiri Kakaɨyari kaniutahɨawe, mɨkɨta mɨpaɨ katinita'eiya: ―Wahɨxie pe'uyame pepɨkayɨwe, wawarita pɨta kenemie waritsamu kɨyexiyari mati'upaitɨ, hikɨ mana xekeniwaretakuya wa'utɨma memɨhu meri.
1CH 14:15 Kepauka yuariya peme'enieni kuyaxi muwa memeuhuni hepaɨ, wapaitɨ kɨyexi kɨtsita, 'ana xekanayekɨnikuni xemɨwaretakwinikɨ, mɨkɨ pɨ'inɨaritɨni kename ne Kakaɨyari 'ahɨxie ne'umie kuyaxi piritsiteutsixi nemɨwakwinikɨ.
1CH 14:16 Mɨpaɨ Rawiri katiniuyurieni, Kakaɨyari kemɨrehɨawekai, kuyaxi piritsiteutsixi yunaime mekaniwarukwini Kawahuni huyeyari 'utɨma meta Ketsehexi huyeyari 'utɨma paitɨ.
1CH 14:17 Rawiri waɨkawa mariwetɨ kanayani naitsarie kaniutamariwa, Yawé mɨpaɨ katiniuyurieni yunaitɨ teɨteri memimakaxenikɨ.
1CH 15:1 Merikɨte Rawiri kii yuhetsiemieme kaniutiwewieni Kerutsareme kiekariyaritsie, xeimeta kaniutawewieni 'ixuriki kiyari, tɨratu kakuniyari hetsiemieme.
1CH 15:2 Hikɨ mɨpaɨ kaniutayɨni: «Rewitsixi xeikɨa mepɨyɨwawe Kakaɨyari tɨratuya kakuniyari memukweiximenikɨ, mɨkɨ Yawé kaniwaranayexeiya mɨpaɨ memɨte'uximayakakɨ yuheyemekɨ».
1CH 15:3 Hikɨ Rawiri 'ixaheritsixi yunaime kaniwarukuxeɨrieni Kerutsareme Yawé tɨratuya kakuniyari memɨ'atɨanikɨ hakewa 'aixɨa mɨrekuyuriekai hetsiena mieme.
1CH 15:4 Metatsiere 'Aruni nuiwarimama kaniwarukuxeɨrieni meta rewitsixi. 'Ipaɨ yupaɨmeme kaniwaruta'inieni:
1CH 15:5 Kuhati nuiwarimama, xeitsienituyari heimana xeitewiyari mepɨhɨkɨtɨkai, 'Uriheri pɨwanɨ'akai mɨkɨ yu'iwama.
1CH 15:6 Merari nuiwarimama, huta tsienituyari heimana xeitewiyari mepɨyupaɨmekai, 'Atsahiyaxi yu'iwama muwanɨ'a pɨhɨkɨtɨkai.
1CH 15:7 Keritsuni nuiwarimama, xeitsienituyari heimama xeitewiyari heimana tamamata mepɨyupaɨmekai yunaitɨ, wa'iwa Kuheri mɨtiwa'aitɨa pɨhɨkɨtɨkai.
1CH 15:8 'Eritsapani nuiwarimama, huta tsienituyari mepɨyupaɨmekai, wa'iwa Tsemahiyaxi muwanɨ'a pɨhɨkɨtɨkai.
1CH 15:9 Hewuruni nuiwarimama, nauka tewiyari mepɨhɨkɨtɨkai, 'Eriheri muwanɨ'a pɨkɨkɨtɨkai yu'iwama.
1CH 15:10 'Utsiheri nuiwarimama, xeitsienituyari heimama tamamata heimana huta mepɨyupaɨmekai, 'Aminarawi muwanɨ'a pɨhɨkɨtɨkai mɨkɨ yu'iwama.
1CH 15:11 Meta Rawiri mawari wewiwamete katiniwarutanɨ'airieni, Tsaruki meta 'Awiyataxi, meta rewitsixi 'Uriheri, 'Atsahiyaxi, Kuheri, Tsemahiyaxi, 'Eriheri meta 'Aminarawi,
1CH 15:12 hikɨ mɨpaɨ katiniwarutahɨawe: «Xeme rewitsixi xemɨwa'ukiyarimakɨ, xeme 'aixɨa xekeneuyuyurieka Kakaɨyari hetsɨa metatsiere yu'iwama, Yawé 'Ixaheri Kakaɨyarieya, tɨratuya kakuniyari xemɨkweiyukɨ, temi'atɨanikɨ hakewa 'aixɨa nemɨrekuyuri hetsiena mieme.
1CH 15:13 Matɨari tepɨkaxe'uta'ini xeme, tameta Yawé takakaɨyari tepɨka'uta'iwawiyaxɨ, yemekɨ kemɨreuyewetse, 'ayumieme mɨkɨ puyeha'a tahepaɨtsita».
1CH 15:14 Merikɨte mawari wewiwamete meta rewitsixi 'aixɨa mekaniuyuyurieni Yawé tɨratuya kakuniyari memɨkweiyukɨ, 'Ixaheri Kakaɨyarieya.
1CH 15:15 Hikɨ rewitsixi mekaneikweni yunaiparitsie Kakaɨyari tɨratuya kakuniyari, Yawé Muitsexi kemɨtiuta'aitɨakai.
1CH 15:16 Hikɨ Rawiri rewitsixi wa'ukiyarima katiniwaruta'aitɨani kwikamete memɨwaranuka'uitɨanikɨ, yu'iwamatɨme kwikari witsi'anuyɨneme memutikwikanikɨ 'aripakɨ, kanaritekɨ, meta tepɨa mɨxikɨrawi mutitirirɨka.
1CH 15:17 'Ayumieme Rewitsixi Hemani Kuheri nu'aya mekananukakeni, meta 'Atsahapi Werekiyaxi mɨnu'ayatɨkai, meta 'Etani Kutsahiyaxi nu'aya, Merari nuiwarimama.
1CH 15:18 Metatsiere mekaniwaranuka'uitɨani wa'iwama waparewiwamete memakɨnekɨ, hipatɨ mɨkɨ tuki kitenie tehɨwemete mepɨhɨkɨtɨkai: Tsakariyaxi Katsiheri nu'aya, Tsemiramuti, Kehieri, 'Unihi, 'Eriyáwi, Wenahiyaxi, Matsehiyaxi, Matatiyaxi, 'Eriperehu, Mikiniyaxi, 'Uweri-'Erumi meta Keyeri.
1CH 15:19 Memutikwika: Hemani, 'Atsahapi meta 'Etani wurunitse tepɨayarikɨ mɨxikɨrawi mutitirirɨkakɨ mepɨte'ukayuitɨwakai.
1CH 15:20 Tsakariyaxi, 'Atsiheri, Tsemiramuti, Kehieri, 'Unihi, 'Eriyáwi, Matsehiyaxi meta Wenahiyaxi kanaritekɨ mepukakanariwiwakai.
1CH 15:21 Matatiyaxi, 'Eriperehu, Mikiniyaxi, 'Uweri-'Erumi, Keyeri meta 'Atsatsiyaxi, mɨkɨ 'arɨpa mepu'ɨkai 'atahaikatɨ pɨrime manutiwɨ kwikamete memɨwaruwitɨximenikɨ.
1CH 15:22 Kenaniyaxi rewitsixi wa'ukiyari, waɨkawa mɨtimaiwekaikɨ, kwikamete pɨwaranukuwitɨkɨkai.
1CH 15:23 Werekiyaxi 'Erikana matɨa kitenie tehɨwemete mepɨhɨkɨtɨkai tɨratu kakuniyari muwayekatsie.
1CH 15:24 Mawari wewiwamete Tsewaniyaxi, Kutsapati, Natanaheri, 'Amatsahi, Tsakariyaxi, Wenahiyaxi meta 'Eriyetsexi, kuxineta meputihɨtsiwakai tɨratu kakuniyari hɨxie meti'utɨ. 'Uweri-'Erumi meta Kehiyaxi mɨkɨtatsiere kitenie tehɨwemete tɨratu kakuniyari muyeka mepɨhɨkɨtɨkai.
1CH 15:25 Waɨkawa meyutemamawietɨ, Rawiri meta 'ukirawetsixi 'ixaheritsixi wa'ukiyarima, meta kuyaxi memanuyetei xeimiriyari memɨtewa'aitɨatɨka, Yawé tɨratuya kakuniyari mekanekukweni 'Uweri-'Erumi kie paitɨ.
1CH 15:26 Kakaɨyari rewitsixi muwaparewiekaikɨ Yawé tɨratuya kakuniyari memukweiximenikɨ, tuurutsixi mekaniwarutimawa 'atahuta meyupaɨmeme meta muxatsi 'ukitsi wahepaɨ meyupaɨmeme.
1CH 15:27 Rawiri rinu witsimɨ'ane 'ixurikiyari kananakatɨkɨkaitɨni, yaxeikɨata yunaitɨ rewitsixi tɨratu kakuniyari memukweiximekai, meta kwikamete meta Kenaniyaxi kwikamete mɨtiwa'aitɨa. Metatsiere Rawiri penakatɨkɨkai mawari wewiwame kamixaya 'etsimɨnena.
1CH 15:28 Hikɨ temawierika hiwariyaritsata meta muxatsi wa'awate 'utihɨtsieriwakaku meta kuxinetate, tepɨa mɨxikɨrawi mutitirirɨka, 'arɨpatetsie meta kanarite tiutiyuanekaku, yunaitɨ 'ixaheritsixi Yawé tɨratuya kakuniyari mekaniukweiximekaitɨni.
1CH 15:29 Hikɨ kepauka Yawé tɨratuya kakuniyari meutahatɨarieximekai Kerutsareme kiekariyari kitenieyaritsie, Mikari Tsahuri nu'aya yukiita wapaitɨ kananierekaitɨni, hikɨ kepauka ti'aitame Rawiri muxei 'utsunarɨmeme temawierikakɨ, kaneikaxani'erietɨyani yu'iyaritsie.
1CH 16:1 Kakaɨyari tɨratuya kakuniyari kani'atɨarieni Rawiri hakewa 'ixuriki kiyari meta'aitakai. Muwa mekaneitateni hikɨ mawari taiyariyari mekaniuwewieni meta memɨyuxewinikɨ mawariyari Kakaɨyari hɨxie.
1CH 16:2 'Arike mawari heutipareku, Rawiri Yawé kaniutawawirieni teɨteri 'aixɨa mɨwayurienikɨ
1CH 16:3 meta 'ixaheritsixi yuxexuime 'ukitsi meta 'ukari paa kaniwaruta'ɨitɨani meta takɨ takari tsuirayari, meta kaxie patsaruyari tsuirayari.
1CH 16:4 Hikɨ Rawiri hipame rewitsixi Yawé tɨratuya kakuniyari kaniwaruhɨritɨani hetsiena mieme memɨte'uximayakakɨ, pamɨpariyutsi memipitɨakakɨ meta witsimemutiyuanenikɨ Yawé hepaɨtsita, 'Ixaheri kakaɨyarieya.
1CH 16:5 Memanayexeiyarie mepɨhɨkɨtɨkai: 'Atsahapi mexɨakame pɨhɨkɨtɨkai: Tsakariyaxi, hutarieka mieme pɨhɨkɨtɨkai: manatari mepɨhɨkɨtɨkai Kekiyeri, Tsemiramuti, Kehieri, Matatiyaxi, 'Eriyáwi, Wenahiyaxi, 'Uweri-'Erumi meta Keyeri, mɨkɨ 'arɨpakɨ teyuitɨwamete mepɨhɨkɨtɨkai meta kanaritekɨ. 'Atsahapi tepɨa mutitirirɨka pɨyuitɨwametɨkai.
1CH 16:6 Mawari wewiwamete Wenahiyaxi meta Kahatsieri matɨa kuxineta meputihɨtsiwakai Yawé tɨratuya kakuniyari hɨxie.
1CH 16:7 Mɨkɨ tukaritsie, matɨari pɨyɨanekai Rawiri kwikari mɨyetɨa 'Atsahapi meta 'iwamama wahetsɨa 'ikɨ nɨawari Yawé hetsiemieme.
1CH 16:8 «'Aixɨa xekenaitɨkani Yawé hetsiemieme, kemɨtimariwe xekenekuxatani, xekenekuxatani kemɨtiuyuri teɨteri watsata.
1CH 16:9 Xekeneutikwikani, nɨawari hetsiena mieme. xekenekuxatani mariwemekɨ kemɨtiuyuri.
1CH 16:10 Xekeneyutemamawieka mɨmariwe mɨpatsie xemexeiyakɨ. xekeneyutemamawieka yurikɨ Yawé xemɨkuwautɨwe.
1CH 16:11 Yawé hetsɨa xekeneyu'awietani mɨtɨrukaɨyekɨ, yaxeketenahɨaweni yuheyemekɨ.
1CH 16:12 Xekenaye'eriwani mariwemekɨ kemɨtiuyuri, 'inɨari kemɨtiuwewi meta 'aitsika ke'aneneme mɨyetɨa.
1CH 16:13 »'Ixaheri nuiwarimama, Yawé ti'uximayatsiriwame Kakuwu niwemama, Yawé mɨxe'anayexei:
1CH 16:14 Yawé takakaɨyari pɨhɨkɨ, naitsarie kwiepa katini'aitani kemɨtiheitserie.
1CH 16:15 Mɨkɨ yutɨratɨ yuhemekɨ kana'eriwani, xeimiriyari nuiwariyari wahamatɨa yuniuki kaniyetɨani.
1CH 16:16 'Apɨrahami matɨa tɨratu kemɨtiuwewi, meta 'Itsahaki matɨa kemɨtiuyuhɨritɨa,
1CH 16:17 Kakuwu yakatiniutahɨawe, 'aitsika kaneyeitɨirieni, 'ixaheritsixi wahetsiemieme tɨratu yuheyemekɨ mieme kanayeitɨani:
1CH 16:18 “'Ekɨ Kanani kwieyari nekamaniyetuiriemɨkɨ, piinitɨarika 'ahetsiemieme mɨhɨkɨtɨni hepaɨ”.
1CH 16:19 Kepauka 'akuxi temɨkatamɨirekai, tewatari tekanihɨmetɨkaitɨni yakɨ teyupaɨmetɨ mɨkɨ kwieyaritsie,
1CH 16:20 kepauka hipame kwieyaritetsie xemu'uwakai meta kepauka hipame te'aitamete wahetsɨa xemu'uwakai,
1CH 16:21 Kakaɨyari pɨkatiupitɨa waɨriyarika temɨteta'aitɨarienikɨ, te'aitamete kaniwarutatieni 'iya wanaki'erietɨ:
1CH 16:22 “Neteɨterima nemɨwaranayexei xepɨkawa'uximatɨaka. Neniukamete xepɨkatewakwinitɨaka”.
1CH 16:23 »Yunaitɨ teɨteri kwiepa memɨtama Yawé mekenɨawani. Meke'ikuxatani tukari mɨyehane kemɨtiyuwikweitsitɨwa.
1CH 16:24 Nuiwarite watsata xekenekuxatani witsikemɨ'ane, meta mariwemekɨ kemɨtiyuriene xekenekuxatani yunaime teɨteri watsata.
1CH 16:25 Yawé matsi kanimariweni, hetsiena pɨtinake witsimɨtikɨhɨawarɨwani, matsi waɨkawa makaxiwatɨ keyuri hipatɨ kakaɨyarixi.
1CH 16:26 Tixaɨtɨ mepɨkatehɨkɨ teɨteri wakakaɨyarixi, matsi Yawé muyuawi kaniutawewieni,
1CH 16:27 Xawatɨriya meta kemɨtimariwe hɨxiena kanixuaweni, temawierika kanixuaweni meta tɨrɨkariya tukieya muyepatsieta.
1CH 16:28 »Yawé xeketeneyetuiri, yunaitɨ teɨteri, Yawé yaxeketeneutahɨawi witsikemɨ'ane meta kemɨtitɨrɨkaɨye.
1CH 16:29 Yawé yaxeketeneutahɨawi witsikemɨ'ane mɨmariwekɨ, hɨxiena xekeneu'axɨa 'imikieri xete'epinirietɨ, Yawé xekenayexeiyani tukieya witsimɨ'aneta.
1CH 16:30 Yunaitɨ teɨteri kwiepa memɨtama meke'eyemakaxeni. Mɨkɨ kwie 'apuyeye, mɨkɨta pɨkakuyuani.
1CH 16:31 Muyuawi keyutemawieka meta kwie ke'utanaweni. nuiwarite mɨpaɨ meke'utiyuani: “Yawé pɨti'aitame”.
1CH 16:32 »Haramara ke'utayuaneni meta yunaitɨ mana memɨteye'uwa. 'Ɨtsi keyutemawieka meta tita mana memɨtexɨawe.
1CH 16:33 Kɨyexi hɨritsie mieme ke'utikwikani temawierikakɨ Yawé hɨxie, mɨkɨ 'ukanamieni kwiepa tita'aitake.
1CH 16:34 »'Aixɨa xeketenahɨaweni Yawé mɨkɨ 'aixɨa mɨtiuka'iyarikɨ, meta naki'eriyaya mɨwaɨkawa hawaikɨ pɨkaheu'axe.
1CH 16:35 Mɨpaɨ xeketenahɨaweni: “Ketaneutawikweitsitɨa, Kakaɨyari, tawikweitsitɨwame pemɨhɨkɨ. Ketaneukuxeɨri ketaneɨxɨna Kakaɨyari memɨka'ayexeiya watsata temɨka'u'uwanikɨ, temɨmatsinɨawanikɨ kepemɨtimariwe, temɨyutemamawiekakɨ tematsinɨawatɨ”.
1CH 16:36 Yawé 'aixɨa kerahɨawarɨwani, 'Ixaheri Kakaɨyarieya, yuheyemekɨ meta kaheu'akamekɨ». Hikɨ yunaitɨ teɨteri mɨpaɨ mekaniutiyuani: «Mɨpaɨ ketiɨyɨni», hikɨ 'aixɨa mekaniutiyuani Yawé hepaɨtsita.
1CH 16:37 Rawiri Yawé tɨratuya kakuniyari 'Atsahapi kaniuhɨritɨani meta 'iwamama, memɨte'uximayakakɨ hetsiena mieme, yamemɨteyuriekakɨ kemɨreuyewekai tukarikɨ.
1CH 16:38 'Uweri-'Erumi kitenie tihɨwemekɨ kaniutahɨawe meta 'iwamama haika tewiyari heimana 'atahaika memɨyupaɨmekai, metatsiere 'Uweri-'Erumi Kerutuni nu'aya meta Kutsa.
1CH 16:39 Mawari wewiwame Tsaruki meta 'iwamama mawari wewiwamete kaniwaruhɨritɨani Yawé tukieya Kawahuni hɨriyaritsie paitɨ makawekai,
1CH 16:40 mana mawari taiyariyari yamemɨtehewewiekakɨ Yawé hetsiemieme, ximeri meta taikai Yawé 'aitsikaya kemainekai 'ixaheritsixi memɨyetuiriyarie.
1CH 16:41 Hipameta kaniwaranayexeiya, Hemani meta Kerutuni meta hipame, Yawé hetsiemieme memutikwikanikɨ: «Naki'eriyaya hawaikɨ pɨkaheu'axe».
1CH 16:42 Hemani meta Kerutuni matɨa kuxinetate mepexeiyakai, tepɨa mutitiraurɨka meta hipame, Kakaɨyari nɨawarieya hamatɨa memɨte'ukayuitɨwanikɨ. Kerutuni niwemama kitenie mepɨtehɨwemetetɨkai.
1CH 16:43 Hikɨ 'arike yunaitɨ mekaneutayeixɨani yukie, meta Rawiri yutɨɨriyama wahetsɨa kanakunuani meta Kakaɨyari kaniutawawirieni 'aixɨa muwayurienikɨ niwemama.
1CH 17:1 Merikɨtsɨ Rawiri yuparatsiyuta 'ayekaitɨri Natani kakaɨyari niukameya mɨpaɨ katiniutahɨawe: ―Neuxei, 'aixɨa pɨka'ane ne kariuxa paratsiyuyarita nemayekani, Yawé tɨratuya kakuniyari 'ixuriki tukiyarita hayekaikaku.
1CH 17:2 Natani mɨpaɨ katinita'eiya: ―'Aixɨa pɨ'ane, yaketineuyuri 'a'iyaritsie kepemɨti'akuhɨawe, Kakaɨyari 'ahamatɨa kaniuyeikani.
1CH 17:3 Peru mɨkɨ tɨkariyaritsie Kakaɨyari niukieya Natani hetsie kaninuani mɨpaɨ katinitahɨawe:
1CH 17:4 «Kenemie Rawiri neti'uximayatsiriwame mɨpaɨ ketinetaxatɨa kename Yawé ne mɨpaɨ nehaine: “'Ekɨ pepɨkahɨkɨtɨni kii pemɨtawewieni muwa ne nemayekanikɨ.
1CH 17:5 Meripaitɨ 'ixaheritsixi nemɨwarayewitɨtsietɨtɨ meta hikɨ 'akuxi kiita nepɨkahayeyerɨwe, matsi 'ixuriki tukiyarita xeikɨa ne'ayekaitɨ nepukuyeikakai.
1CH 17:6 Kepauka 'ixaheritsixi wahamatɨa nemuyeikakai, kepauka 'itsɨkate nemɨwarutanɨ'a, neteɨterima memɨwa'ɨwiyanikɨ, ne mɨkɨ nepɨkawarutati kariuxa kiyari newa'aitɨatɨ”.
1CH 17:7 »'Ayumieme, Rawiri neti'uximayatsiriwame mɨpaɨ ketinetahɨawi, Yawé Naimekɨmɨtɨrɨkaɨye mɨpaɨ paine: “Ne muxatsi wakuraruta nepɨmatsi'aye'ini, neteɨterima 'ixaheritsixi pɨta pemɨtiwata'aitɨanikɨ.
1CH 17:8 Ne 'ahamatɨa nepuyeikakai tsepa hakewa pemuyeikakai, meyunaime nepɨwaruka'unaxɨ kemɨ'ane memɨmatsi'aye'uniekai. Hikɨri waɨkawa pemariweme nekamanayeitɨamɨkɨ, 'ena kwiepa hipatɨ memɨmamariwawe wahepaɨ.
1CH 17:9 Yaxeikɨatatsiere kwie nekanikuha'aritɨamɨkɨ neteɨterima 'ixaheritsixi wahetsiemieme, mana nemɨwaka'eni hepaɨ nepɨwayurieni mana mepɨtiteni mekamariutsietɨ. 'Axamemɨte'u'iyari mepɨkaxe'uximatɨaniri kememɨxeyuriekai tsutɨapai,
1CH 17:10 kepauka 'itsɨkate nemɨwaranuka'uitɨa neteɨterima wahetsie 'ixaheritsixi. Meta mɨpaɨ nekamatinahɨaweni, ne yunaime memɨmatsi'aye'unie nekaniwaka'unamɨkɨ, metatsiere ne, Yawé, nekamanipitɨamɨkɨ 'anuiwari pehexeiyatɨ pemayanikɨ.
1CH 17:11 Kepauka pemɨkumawere 'atewarima memakuhe pemɨyemie, ne xeime 'aniwetɨme nekananukakemɨkɨ 'ahetsiemieme, mɨkɨta nepiparewieni heitserie mɨtita'aitakɨ.
1CH 17:12 Mɨkɨ katiniyuriemɨkɨ kii mɨtawewieni nehetsiemieme, neta nekaniparewimɨkɨ yuheyemekɨ mɨtita'aitakɨ.
1CH 17:13 Ne nepu'ukiyarieyatɨni, mɨkɨta pɨneniwetɨni. Hatsuaku ne'inaki'erietɨ nepɨka'ihayewa, meripaitɨ 'ayeta mɨtiuta'aitaxɨ kenemɨtihayewaxɨ.
1CH 17:14 Matsi, mɨkɨ yuheyemekɨ nekie nepihɨrita meta nemɨra'aitatsie meta hikɨ yuheyemekɨ pɨti'aitani”».
1CH 17:15 Natani 'ikɨ tinaime Rawiri katiniutaxatɨani, kemɨtiuhekɨatsitɨiyarie yemekɨ.
1CH 17:16 Hikɨ ti'aitame Rawiri 'ixuriki tukiyarita kaninuani tɨratu kakuniyari muyeka, hikɨ Yawé hɨxie mɨpaɨ kaniutayɨni: «Yawé pemɨkakaɨyari, ne tixaɨtɨ nepɨkatihɨkɨ meta netɨɨriyama, titayari nemariweme penerayeitɨwa.
1CH 17:17 Yawé nekakaɨyari, ¿ketitayari waɨkawa matsi penetiyexatɨa penetiyetuiriekatɨtɨri, meta kename yuheyemekɨ nenuiwarima 'aixɨa pewayurieka? wa'atɨtɨ ne tewi mɨmariwe nepɨtihɨkɨ pepɨnetsiyuriene, Yawé Kakaɨyari 'aku.
1CH 17:18 ¿Ketsɨkuta tawari ne ne'utayɨni ke'aixɨa pemɨnetixeiyakɨ, 'ekɨtsɨ pekanenimateni ne ti'a'uximayatsiriwame?
1CH 17:19 Yawé, 'ekɨ 'ikɨ naime mɨtimamariwawe pekatiniyurieneni, ne ti'a'uximayatsiriwame pemɨnetsinaki'eriekɨ, mɨpaɨ mɨmatinakekɨ, meta matsiɨkɨme pekatinayeitɨani mɨkɨ.
1CH 17:20 Yawé, tame yatepɨtehetima 'ahepaɨ tiuka'iyaritɨ pumawe, meta tawarita xewitɨ 'ahepaɨ Kakaɨyari pumawe.
1CH 17:21 Pumawe 'ateɨterima 'Ixaheri nuiwariyari wahepaɨ me'anetɨ. Mɨkɨ nuiwari xeikɨa mepɨhɨkɨ pemɨwaranayexei 'ena kwiepa, 'ateɨterima pemɨwarayeitɨanikɨ, meta kepemɨtimariwe pemɨ'ahekɨatakɨ wahetsiemieme. Kepauka 'Ekipitu pemɨwarayewitɨ 'ateɨrima, huyeta mamariwaweme pepɨtiuyuri meta hipame nuiwarite pepɨwarayewei meta wakakaɨyarixi.
1CH 17:22 'Ixaheritsixi 'ahetsiemieme pepɨwarayeitɨa 'ateɨterima memakɨnekɨ yuheyemekɨ, 'ekɨta Yawé, wakakaɨyari pemɨhɨkɨtɨnikɨ.
1CH 17:23 »Kamɨtsɨ Yawé, kepemɨtitahɨawixi mati'uximayatsiriwame meta nuiwarimama wahetsiemieme, mɨpaɨ ketinaye'atɨa 'aniuki,
1CH 17:24 kepemɨtimariwe pema'eriwanikɨ 'aixɨa pemɨrahɨawarɨwanikɨ yuheyemekɨ, meta yunaitɨ mɨpaɨ memutiyuanenikɨ: “Yawé Naimekɨmɨtɨrɨkaɨye 'ixaheritsixi wakakaɨyari kanihɨkɨtɨni”. Hikɨ 'ana Rawiri ti'a'uximayatsiriwame nuiwarimama mematsi'ayexeiyatɨ mekaniu'uwakuni.
1CH 17:25 »'Ekɨ nekakaɨyari, ne ti'a'uximayatsiriwame pekanetiniutaxatɨani kename nenuiwarima te'aitamete pewarayeitɨani, 'ayumieme ne ti'a'uximayatsiriwame nepɨyuwaɨri 'ipaɨ nemɨmatitahɨawekɨ.
1CH 17:26 Yawé, Kakaɨyari 'ekɨ pepɨhɨkɨ, 'ekɨ pepɨtitaxatɨa ke'aixɨa pemiyurieni ti'a'uximayatsiriwame.
1CH 17:27 'Aixɨa pepɨtiwaruxei ti'a'uximayatsiriwame nuiwarimama 'aixɨa pemɨwayurienikɨ, pewa'uwiyakaku yuheyemekɨ 'amemu'uwanikɨ. 'Ekɨ Yawé 'aixɨa pepɨwaruyuri, 'ayumieme 'aixɨa me'itɨarietɨ mepɨyuhayewa yuheyemekɨ».
1CH 18:1 Merikɨtsɨ yapaɨmexɨa tukari 'anukayaku, Rawiri piritsiteutsixi kaniwarutakwini kaniwara'iwa, tiwa'aitɨatɨ kanayani meta wakiekari kaniwarunawairieni Kahati meta 'auriena kiekari mamanetɨka.
1CH 18:2 Yaxeikɨata muhawitsixi kaniwara'iwa, hikɨ Rawiri tiwa'aitɨatɨ kanayani, hetsɨana meteyukutuayatɨ mekanakɨne.
1CH 18:3 Metatsiere Rawiri Harari-'Etsexi kana'iwa ti'aitame Tsuwa kiekame, Kamati kwieyaritsie, kepauka mɨkɨ 'Eupɨrate kwieyaritsie mɨtamiekai 'aixɨa 'iyurienike mana mɨti'aitanikɨ.
1CH 18:4 Rawiri kaninawairieni xeimiriyari kaxetate kuyaxa miemete, 'atahuta miriyari kuyaxi memutei kawayutsixi wahetsie, meta xeitewiyari miriyari kuyaxi yu'ɨkama memuhukai, meta kawayutsixi tirutari puwaruti'ɨkamɨraxɨa, puwaruhayewaxɨ xeikɨa xeitsienituyari kaxetate wahetsiemieme.
1CH 18:5 Meta kepauka tsiriyutsixi Ramatsiku kiekatari memu'axɨa ti'aitame Harari-'Etsexi Tsuwa kiekame meparewienike, mɨkɨ Rawiri kaniwarukwini xeitewiyari heimana huta miriyari meyupaɨmeme.
1CH 18:6 Hikɨ Ramatsikutsie kuyaxi tehɨwemete kaniwaru'uitɨani, mɨkɨta tsiriyutsixi meteyukutuayatɨ Rawiri hetsɨa mekanakɨne. Naitsarie Rawiri kemɨtiyumienekai katinayu'iwakaitɨni, Yawé miparewiekaikɨ.
1CH 18:7 Huru tepɨayari kɨmana memɨyukunaruma memi'ɨkai Harari-'Etsexi parewiwamete 'ahurawa memuti'u, Rawiri yupiini katinayeitɨani Kerutsareme paitɨ katinetɨni.
1CH 18:8 Metatsiere waɨkawa wurunitse kaniukaxeiya, Tewaki kiekariteyaritsie muxɨawekai, meta Kuni kiekariyaritsie, Harari-'Etsexi mɨkiekariteyatɨkai. Mɨkɨ wurunitse kaniuyurieni Tsarumuni mitiwewi haa makamare katsu 'emɨyewa, keuruwite tuki hɨxie mɨti'ukai meta hipatɨta pɨtimɨirekai wurunitsekɨ mɨtiwewiyatɨkatei tukita timieme.
1CH 18:9 Tuhu, Kamati kiekariyaritsie ti'aitame, katiniutamarieni kename Rawiri, Tsuwa kwieyaritsie ti'aitame Harari-'Etsexi ha'iwakai.
1CH 18:10 Meta ti'aitame Tuhu Harari-'Etsexi paye'uniekai, 'ayumieme yuniwe 'Arurani kanenɨ'ani ti'aitame Rawiri hetsɨa meitawaɨritɨanikɨ, Harari-'Etsexi ma'iwaxɨkɨ. Meta Tuhu katineinɨ'airiekaitɨni 'imikierite piinite hurukɨ mɨtiwewiyatɨka, pɨratakɨ meta wurunitsekɨ.
1CH 18:11 Hikɨ mɨkɨ 'imikieri naime ti'aitame Rawiri Yawé katiniyetuirieni, yaxeikɨa kemɨtiuyuriekai 'Erumi kwieyaritsie mɨreyetɨkai meta Muhawi, 'Amuni, Piritsiteu kwieyari meta 'Amareki kwieyaritsie.
1CH 18:12 Meta 'Awitsahi Tsariwiya nu'aya 'erumitsixi kaniwara'iwa Mayeweri Maye'unaya mɨrayetewatsie, mana kaniwarukwini tamamata heimana 'atahaika miriyari.
1CH 18:13 Yaxeikɨatatsiere 'Erumi kiekariyaritsie kuyaxi tehɨwemete kaniwaru'uitɨani, 'ana 'erumitsixi Rawiri hetsɨa meteyukutuayatɨ mekanakɨne. Naitsarie kemɨtiyumienekai Rawiri, Yawé kaniparewiekaitɨni mɨrayu'iwakɨ.
1CH 18:14 Rawiri naitsarie 'Ixaheri kwieyaritsie katiniuta'aita, kemɨtiheitserie 'aixɨa 'anemekɨ.
1CH 18:15 Kuhawi Tsariwiya nu'aya kuyaxi tiwa'aitɨwame manuyeka pɨhɨkɨtɨkai, Kutsapati 'Akiruri nu'aya ti'utɨwame pɨhɨkɨtɨkai.
1CH 18:16 Tsaruki 'Akituwi nu'aya meta 'Akimereki 'Awiyataxi nu'aya, mɨkɨ mawari wewiwamete mepɨhɨkɨtɨkai, Tsawitsa kemɨtiuyɨ ti'utɨwame pɨhɨkɨtɨkai.
1CH 18:17 Wenahiyaxi Kuyara nu'aya kuyaxi kereteutsixi meta pereteutsixi pɨtiwa'aitɨwametɨkai, matsi ti'aitame Rawiri niwemama mexɨakate te'uximayatamete mepɨhɨkɨtɨkai paratsiyuta.
1CH 19:1 Yapaɨmexɨa 'anuyeyaku, Nakaxi kaniumɨni 'amunitsixi tiwa'aitɨwame, nu'aya pɨta kanitsutɨani ti'aitatɨ.
1CH 19:2 'Ana Rawiri mɨpaɨ katiniu'erieni: «'Aixɨa 'anemekɨ tepɨyuxeiyani Kanuni Nakaxi nu'aya matɨa, 'ukiyarieya matɨa 'aixɨa ketemɨteyuxeiyakai». Hikɨ yunɨ'arima kaniwarenɨ'ani memeinɨtɨanikɨ Rawiri hetsiemieme 'ukiyarieya mumɨkaikɨ. Kepauka Rawiri nɨ'arimama memu'axɨa 'amunitsixi wakwieyaritsie Kanuni mekunɨtɨatɨwetɨ.
1CH 19:3 Hikɨ memanuyetei 'amunitsixi mɨpaɨ mekateneyemaritɨani ti'aitame: «¿Yuri petiwa'eririe 'ekɨ ti'aitame, kename Rawiri wareyenɨ'a memɨmatsinɨtɨanikɨ xeikɨa 'a'ukiyari hetsiemieme? Matsitsɨ 'ikɨ mekaniku'awienieretɨweni takiekaritsie 'arike me'ika'unake».
1CH 19:4 Merikɨte Kanuni katiniuta'aita Rawiri nɨ'arimama memɨtiwiyarienikɨ meta wamɨxiya mataxiriexɨanikɨ meta wakamixate manutsanariexɨanikɨ hixɨapa, mehanamamawetɨ mekanenɨ'arieni yu'utɨma.
1CH 19:5 Rawiri nɨ'arimama yemekɨ mekaniyutetewiyakaitɨni. Kepauka Rawiri mɨtiutamari kememɨte'anuyekɨ, niuki kanenɨ'ani mɨpaɨ haineme yuhetsiemieme: «Keriku xekeneyuhayewa, kepaukake xemɨxiya metiwawere xekanahuni».
1CH 19:6 Kepauka Kanuni meta 'amunitsixi memɨtehetima Rawiri ke'axamemuyuriekai, 'ana kwitɨ xeitewiyari heimana tamamata heimana haika miriyari kiruyari raheteme pɨrata mekanenɨ'ani Metsuputamiya paitɨ, memɨniɨtɨarienikɨ kaxetate meta kuyaxi kawayutsixi wahetsie memutei, metatsiere 'Arami-Mahaka kiekatari meta Tsuwa kiekatari.
1CH 19:7 Kaxetate kuyaxa miemete xeitewiyari heimana tamamata heimana huta miriyari paɨmemekɨ mekatenayukatuani memɨparewiyanikɨ meta ti'aitame Mahaka kiekame mekaniuta'inieni kuyaximama yunaime, mɨkɨ Merewa murakutewa hɨxie mekanitiyaxe. Meta 'amunitsixi mekanayekɨne yukiekaritetsie mekaniuyukuha'aritɨani memɨyutakwinikɨ.
1CH 19:8 Kepauka Rawiri mɨpaɨ mɨretima, Kuhawi kanenɨ'ani yunaime kuyaxi warawitɨkɨme.
1CH 19:9 Hikɨ 'amunitsixi mekanekɨne yukiekari kitenie mekanitiyaxe, hipatɨta te'aitamete memuta'iniriekai 'ateewa mɨtahekɨatsie mekanitiyaxe.
1CH 19:10 Kepauka Kuhawi yamɨretima kememɨte'uniwakai yuhɨxie meta yu'utɨma, 'ayumieme kaniwaranuyeteɨxɨ kuyaxi 'ixaheritsixi yemekɨ memɨyɨwawe tsiriyutsixi memɨwatakwinikɨ,
1CH 19:11 memuyuhayewaxɨ kuyaxi yumuta 'Awitsahi kaniuhɨritɨani 'amunitsixi memɨwatakwinikɨ.
1CH 19:12 Kuhawi 'Awitsahi mɨpaɨ katiniuhɨritɨani: «Xɨka tsiriyutsixi menetsiha'iwani 'ekɨ pekaneniparewimɨkɨ. Xɨkata 'amunitsixi mematsiha'iwani ne nekameniparewimɨkɨ.
1CH 19:13 Pepɨkamaka, tateɨterima wahetsiemieme tekaniyutakwikuni meta takakaɨyari kiekariteya hetsiemieme. Yawé yaketiuyurieni kehapaɨ mɨkɨ mɨtinake».
1CH 19:14 Hikɨ Kuhawi meta kuyaximama tsiriyutsixi mekaniwarutakwini, peru tsiriyutsixi Kuhawi mekaniutimakani mekaniuyuta'una.
1CH 19:15 'Amunitsixi me'uneniereka tsiriyutsixi kememɨteyuta'unakai mɨkɨta mekaniyuta'una 'Awitsahi memakatɨ yukiekaritsie mekaniyuti'awieta. Hikɨ Kuhawi Kerutsareme kanakunuani.
1CH 19:16 Hikɨ tsiriyutsixi 'ixaheritsixi mewara'iwaku, niuki mekanenɨ'ani 'Eupɨrate 'anutaɨye yu'iwama tsiriyutsixi wahetsɨa. Tsupaki pɨhɨkɨtɨkai Harari-'Etsexi kuyaximama tiwa'aitɨwame, mɨkɨ kananuyeyerɨni wahetsiemieme.
1CH 19:17 Kepauka Rawiri mɨtiutamari 'ixaheritsixi yunaime kaniwarukuxeɨrieni, hikɨ Kurutani hatuxameyari 'anutaɨye mekananukɨne, hikɨ mana 'aixɨa mekateniuyu'uitɨani tsiriyutsixi mewatakwinike. Hikɨ tsiriyutsixi mekanitsutɨani mekaniwarutakwini,
1CH 19:18 peru mɨyatɨtɨ mekaniuyuta'una 'ixaheritsixi mewamakatɨ. Rawiri kaniwarukwini 'atahuta miriyari kuyaxi tsiriyutsixi kawayutsixi wahetsie memutekai meta huta tewiyari miriyari kuyaxi yɨ'ɨkama memuhukai, metatsiere Tsupaki kaniumieni kuyaxi wa'ukiyari.
1CH 19:19 Tsiriyutsixi meha'iwarieku, 'ixaheritsixi mewara'iwaku, yunaitɨ Harari-'Etsexi hetsɨa memɨtehawiyakai memɨteyukutuayakai metehetimaika Rawiri hetsɨa pɨtari mekaniyuyetuani kayuwatɨ memexeiyanikɨ. Mana mɨtiyehane tsiriyutsixi tawari mepɨka'uyuwaɨri 'amunitsixi memɨwaparewienikɨ.
1CH 20:1 Merikɨtsɨ taxarita kepauka te'aitamete memayekɨkatsie, Kuhawi kanayeyani yukuyaxima warawitɨtɨ, hikɨ 'amunitsixi wakwieyaritsie meye'axɨaka mekaniwarakuyuniya. Metatsiere Xawaha kiekariyaritsie paitɨ mekaniye'axɨani, mekaniwarutakwini mekanika'una. Peru Rawiri Kerutsareme kanekunuakaitɨni.
1CH 20:2 'Amunitsixi tiwa'aitɨwame huru mumayari manamakai Rawiri kaninawairieni, xeitewiyari heimana tamamata heimana haika kiruyari pɨrahetekai, tetexi witsimɨ'anene peukutetɨkaitei. Hikɨ Rawiri pɨta mekananutiketsirieni. Metatsiere mɨkɨ kiekariyaritsie waɨkawa mekatenayetɨni piinitɨarika mɨraye'atɨka.
1CH 20:3 Hikɨ Rawiri mana Xawaha kiekatari waɨriyarika te'uximayatamete kaniwarayeitɨani, kɨyexi xitekemete, tepɨa manuxɨtekɨ te'uximayatamete meta kɨ'ewemete. Yaxeikɨata kaniwaruyurieni 'amunitsixi teɨteriyari, hikɨ 'arike Kerutsareme kanakunuani yunaime yukuyaxima warawitɨtɨ.
1CH 20:4 Merikɨtsɨ mɨyatiuyɨku tawarita piritsiteutsixi wahamatɨa mekaniuyutakwini Ketsehexi mɨrakutewatsie. 'Ana Tsiwekahi Kutsa kiekame Tsipahi kaniumieni, mɨkɨ 'amemutɨtɨ wanuiwari pɨhɨkɨtɨkai. Mɨpaɨ 'ixaheritsixi mekateniwara'iwa piritsiteutsixi.
1CH 20:5 Metatsiere hutarieka mewarutakwiku piritsiteutsixi, 'Erikanani Yahixi nu'aya Rakimi kaniumieni, Kuriyati Kahati kiekame 'iwaya, mɨkɨ pitsika pakwekai 'epakame.
1CH 20:6 Tawarita mekaniuyutakwini Kahati kiekariyaritsie. Manata xewitɨ 'ememutɨtɨ kaniukateitɨni, mɨkɨ yumamatetsie yu'ɨkatetsie 'ataxexuime pexeiyatɨkatei yumamate tɨɨrixi, tatsɨari xeitewiyari heimana nauka yumamate tɨɨrixi pexeiyakai.
1CH 20:7 Mɨkɨ 'ixaheritsixi wahɨxie pɨyutamariwekatakai, peru Kunatani Tsimaha nu'aya, tatsɨari Rawiri 'iwaya, mɨkɨ kanimieni.
1CH 20:8 Mɨkɨ 'ememutɨtɨ Xapaha nuiwarimama mepɨhɨkɨtɨkai Kahati mɨkiekametɨkai, peru Rawiri meta kuyaximama mekaniwarukwini.
1CH 21:1 Merikɨte kauyumarie 'ixaheritsixi waraye'unietɨ kanayani Rawiri kaniuyuitɨani kuyaxi mɨwati'inɨatakɨ.
1CH 21:2 'Ayumieme Rawiri Kuhawi mɨpaɨ katiniuta'aitɨani, meta teɨteri memanuyetei: ―Xekenehu kuyaxi xekeniwareti'inɨata Weritsewa xe'itsutɨame 'atsita Rani meye'atɨkaime, yanemɨretimanikɨ keyupaɨmetɨ memɨyɨwawe kuyakɨ memɨnete'uximayatsiriekakɨ.
1CH 21:3 Kuhawi mɨpaɨ katinita'eiya: ―Matsi Yawé kewarutimɨiriya xeitsienituyari mexɨa 'ateɨterima. Mɨkɨrikɨ yunaitɨ mepɨ'ateɨterima, ¿peru ketitayarikuta 'akuxi petimaimɨkɨ ketemɨtapaɨme, ti'aitame? Mɨya pemɨtiyurimɨkɨ 'ateɨterima 'ixaheritsixi 'axapewaruyurieni xeikɨa.
1CH 21:4 Matsi ti'aitame niukieya kananu'enierieni keyuri Kuhawi, hikɨ 'ayumieme kanayeyani naitsarie 'Ixaheri kwieyaritsie. 'Ariketa kanakunuani Kerutsareme,
1CH 21:5 hikɨ 'ana Rawiri katiniyetuirieni keyupaɨmeme muwaraka'utɨakai kuyaxi: 'Ixaheri kwieyaritsie xeimiyuniyari heimana xeitsienituyari miriyari (1.100.000) mepɨyupaɨmekai, meta Kura kwieyaritsie kiekatari nauka tsienituyari heimana haika tewiyari heimana tamamata miriyari (470.000) mepɨyupaɨmekai.
1CH 21:6 Peru Kuhawi Rewi nuiwarimama pɨkawaruti'inɨataxɨ meta Wenikamini nuiwarimama, Kuhawi hepaɨtsita 'axamɨ'anekaikɨ mɨkɨ ti'aitame 'aitsikaya.
1CH 21:7 Metatsiere Kakaɨyari hepaɨtsita mɨkɨ 'aitsika 'axapɨ'anekai, 'ayumieme 'ixaheritsixi 'axapuwaruyuri.
1CH 21:8 Hikɨ Rawiri Kakaɨyari mɨpaɨ katiniutahɨawe: «Yemekɨ waɨkawa 'axanepɨtiuyuri 'ikɨ kuyaxi nemɨwaruti'inɨataxɨkɨ. Mɨka'uka'iyari hepaɨ nepɨtiuyuri. Nepɨmatsiwawirie kwerietɨ netineuyehɨwiri ne ti'a'uximayatsiriwame».
1CH 21:9 Yawé Kahari mɨpaɨ katiniutahɨawe yuniukame, Rawiri hetsiemieme mɨti'uximayakai:
1CH 21:10 «Kenemie Rawiri mɨpaɨ ketinetahɨawi, Yawé mɨpaɨ kanaineni: “Nepɨmatsipitɨa xeime pemanayexeiyakɨ 'ikɨ haikame 'uximatɨarikate. Yakenetineutahɨawi ke'aneme nepɨmatsipitɨani”».
1CH 21:11 Hikɨ Kahari Rawiri hetsɨa kaneyani mɨpaɨ katineitahɨawe: ―Yawé mɨpaɨ kanaineni: “'Ikɨ mɨhaika ke'aneme pepɨnakierie:
1CH 21:12 haika wiyari haakaxa, nutsu haika metseri memɨxe'aye'unie mepɨxekwitɨweni 'ixiparakɨ, nutsu haika tukari kwiniya pɨtaweni meta niuki tuayame Yawé hetsɨa mieme pɨxekwika naitsarie 'Ixaheri kwieyaritsie”. Keneutimaixɨa yanetineutahɨawi neta yanemɨreitahɨawekɨ kemɨ'ane mɨnetsiheyenɨ'a.
1CH 21:13 Rawiri Kahari mɨpaɨ katiniuta'eiya: ―Yemekɨ 'atsinepɨkatiyumaiwe ke'aneme nemanayexeiya. Matsi 'aixɨa pɨ'ane Yawé mɨnetsi'uximatɨanikɨ, naki'eriyaya mɨmariwekɨ, 'aixɨa pɨka'ane teɨteri xɨka menetsi'u'uximatɨani.
1CH 21:14 Yawé, 'ayumieme 'Ixaheri kwieyaritsie kwiniya kanenɨ'ani, 'ana haika tewiyari heimana tamamata miriyari (70.000) mekaniukwini 'ixaheritsixi.
1CH 21:15 Meta Kerutsareme kiekariyaritsie yuniuki tuayame kanenɨ'ani mana kiekatari mɨwakwinikɨ. Hikɨ Yawé kepauka mixei wakwineme, kemɨtiwakwinitɨakai pɨwarutinenimayataxɨ, hikɨ niuki tuayame mɨpaɨ katiniutahɨawe: «'Ariri. Ketineuhayewa 'ari». 'Ana yemekɨ, niuki tuayame Yawé hetsɨa mieme 'Uxinahani kewutseu tewiyari tɨriku matihenatsie kaniuwekaitɨni.
1CH 21:16 Rawiri kepauka manukunierixɨ, 'ana niuki tuayame Yawé hetsɨa mieme kaniuxeiya wapaitɨ 'uyewiekame, yu'ixipara Kerutsareme hepa heutatserakame. Hikɨ 'ana Rawiri meta 'ukirawetsixi hiwerika kamixayari me'anakatɨtɨkaitɨ mekaniukahɨxima'uni kwiepa.
1CH 21:17 Hikɨ Rawiri Kakaɨyari mɨpaɨ katiniutahɨawe: «Yawé pemɨnekakaɨyari, ne nepɨtiuyuri nemɨtiuta'aitaxɨ memɨti'inɨatsienikɨ teɨteri. Mɨkɨ teɨteri 'atsimepɨkate'uyuri. Nepɨta nekanihɨkɨtɨni 'axanemɨtiuyuri. Nepɨta netineukwinitɨa meta netɨɨriyama, 'ariri 'ateɨterima pepɨkawakwika».
1CH 21:18 Merikɨte niuki tuayame Yawé hetsɨa mieme Kahari mɨpaɨ katiniutahɨawe: «Rawiri mɨpaɨ ketinetahɨawi tenutsari mawari wewiwame Yawé hetsiemieme pɨtawewieni 'Uxinahani kewutseu tewiyari tɨriku matihenatsie».
1CH 21:19 Hikɨ Rawiri mana kaneyani mɨraye'atɨanikɨ, Kahari kemɨtitahɨawekai Yawé hetsiemieme.
1CH 21:20 'Uxinahani tɨriku mana pu'unekai, kepauka ta'aurie manakunierixɨ niuki tuayame kaniuxeiya. Meyunaukatɨ niwemama hamatɨana memu'uwakai mekaniutinautsa mekaniuyuti'awieta.
1CH 21:21 Kepauka 'Uxinahani Rawiri muxei kwieya makuma hepa 'amiekame, hepana kanayeyani 'enunakeke, hikɨ hɨxiena kaniukahɨximakeni.
1CH 21:22 Hikɨ Rawiri mɨpaɨ katinitahɨawe: ―'Ikɨ 'akwie yayeume keneneutuiri, mana mawari wewiwame Yawé hetsiemieme nemɨtawewienikɨ, mɨtihayewakɨ kwiniya tatsikwitɨ teɨteri. Keneneutuiri yemekɨ kemɨraye'axe.
1CH 21:23 'Uxinahani Rawiri mɨpaɨ katiniutahɨawe: ―Neti'aitɨwame, ne nekamanimimɨkɨ, 'ekɨ mana kemɨmatinake yaketineuyuri. Ne tuurutsixi kwietsanamete nekaniwayetɨamɨkɨ mawari taiyariyari pemɨwarayeitɨanikɨ, meta kɨyexi tɨriku 'uwame nepɨyetuani kɨmana pematinainikɨ meta tɨriku hatsi mawariyari pemayeitɨanikɨ. Ne mɨkɨ tinaime nekametinimikwani.
1CH 21:24 Peru ti'aitame Rawiri 'Uxinahani mɨpaɨ katiniutahɨawe: ―Hawaikɨ mɨpaɨ 'aixɨa pɨka'ane. Yawé nepɨkatiyetuirieni tita mɨti'apiini, meta mawari taiyariyari nepɨka'iwewirieni nekarayukatuame. Naimekɨ nekatinayukatuamɨkɨ kepaɨmemetsie mɨti'axe.
1CH 21:25 Rawiri 'Uxinahani huru tuminiyari 'ataxewime tsienituyari kaniu'ɨitɨani mɨkɨ kwiekɨ.
1CH 21:26 Mana kanitawewieni mawari wewiwame Yawé hetsiemieme, mana mawari taiyariyari kaniuwewieni meta memɨyuxewinikɨ mawariyari. Hikɨ Rawiri kaniuyutanenewieni, 'ana Yawé Kakaɨyari kanita'eiya mɨkɨ mawari hetsie tai kaneyenɨ'ani muyuawitsie mieme.
1CH 21:27 Hikɨ Yawé yuniuki tuayame katiniutaxatɨani, mɨkɨ yu'ixipara muka'utakɨ.
1CH 21:28 Rawiri 'uniereka Yawé menu'eniekaikɨ, mana mawari kaniwewirieni.
1CH 21:29 'Ana 'ixuriki tukiyari Yawé hetsiemieme meta mawari taiyariyari wewiwame Muitsexi mitiwewiekai makumawetsie, Kawahuni paitɨ pɨreku'ukai.
1CH 21:30 Peru Rawiri waɨkawa heumatɨ Yawé pɨkaheku'iwawiyaxɨ mana, niuki tuayame Yawé hetsɨa mieme 'ixiparaya muxeikɨ.
1CH 22:1 Hikɨ Rawiri mɨpaɨ kaniutayɨni: «'Ena Yawé Kakaɨyari tukieya kaniyutawewimɨkɨ, meta mawari taiyariyari wewiwame 'ixaheritsixi mana mawari memɨtiwewiwanikɨ».
1CH 22:2 Merikɨtsɨ Rawiri katiniuta'aita tewatari memɨkuxeɨriyanikɨ 'Ixaheri kwieyaritsie memɨtitekai. Mɨkɨ hipame kaniwaranayexeiya tetexi memɨtixixienikɨ kɨmana Kakaɨyari tukieya mɨtawewiyanikɨ.
1CH 22:3 Metatsiere Rawiri waɨkawa tepɨa kaniukuxeɨrieni mɨkɨkɨ mɨtitiwewiyanikɨ kɨrapuxite meta 'ituparitsie mawɨwɨre, meta waɨkawa wurunitse kaniukuxeɨrieni.
1CH 22:4 Yaxeikɨatsiere kariuxa kɨyeyari waɨkawa kaniukuxeɨrieni, mɨkɨ Tsirunitari meta Tiru kiekatari kariuxa kɨyeyari waɨkawa meni'atɨiriekaitɨni.
1CH 22:5 Rawiri mɨpaɨ pɨtiku'eriwakai: «Neniwe Tsarumuni 'akuxi pɨtemaikɨ meta pɨkarakumate, tuki muyutawewieni Yawé hetsiemieme yemekɨ 'apɨtimariweni pumariwani naitsarie kwiepa, 'ayumieme tinaime nepɨtikuha'aritsirieni». Hikɨ mexi Rawiri 'uyeikakai tinaime katiniukuxeɨrieni.
1CH 22:6 Hikɨ yuniwe Tsarumuni 'utakwewieka kanihɨritɨani tuki mɨtawewienikɨ Yawé 'Ixaheri Kakaɨyarieya hetsiemieme.
1CH 22:7 Rawiri Tsarumuni mɨpaɨ katiniutahɨawe: «Neniwe, ne mɨpaɨ nepɨtinekɨhɨawekai tuki nepɨtawewienikekai Yawé nekakaɨyari hetsiemieme.
1CH 22:8 Peru Yawé mɨpaɨ kanetiniutahɨawe: “'Ekɨ nehɨxie waɨkawa teɨteri pepɨwarukwi meta waɨkawamexɨa kuyaxa pepɨwewienekai, 'ayumieme 'ekɨ tuki pepɨkatawewieni.
1CH 22:9 Peru xewitɨ 'aniwe kayuwatɨ 'uyeikatɨ payani, ne yanepɨtiyurieni hipatɨ nuiwarite kemɨ'ane memeye'unieka 'aixɨa memɨte'ixeiyakɨ kayuwatɨ nekaniwapitɨamɨkɨ, 'ayumieme Tsarumuni katinitewakamɨkɨ. Kepauka mɨkɨ mɨtita'aita, ne 'ixaheritsixi kayuwatɨ nekaniwapitɨamɨkɨ meta 'aixɨa 'iyarikɨ memu'uwanikɨ.
1CH 22:10 Mɨkɨ pɨtiyurieni tuki mɨtawewieni nehetsiemieme. Mɨkɨ mɨneniwetɨni hepaɨ nepɨtimaika, neta nemɨ'ukiyarieyatɨni hepaɨ nepɨ'aneni hetsiena mieme. Meta yanekatiniyuriemɨkɨ yuheyemekɨ nuiwarimama memɨteta'aitakɨ 'Ixaheri kwieyaritsie”.
1CH 22:11 »Hikɨ 'ayumieme neniwe, Yawé 'akakaɨyari kematsiparewieka tukieya pemɨtawewienikɨ, yemekɨ mɨkɨ kemutayɨ.
1CH 22:12 Kematsi'upitɨani pemɨtimaiwenikɨ meta pemɨrakumaikakɨ, kepauka pemanuyeyerɨni 'ixaheritsixi wahetsiemieme, 'aitsikaya pemaye'atɨanikɨ. Mɨkɨ Yawé 'akakaɨyari kanihɨkɨtɨni.
1CH 22:13 Xɨka peheye'atɨaka 'aitsikate kemutiyuane Yawé mɨwayetuiri 'Ixaheri meta Muitsexi yatikuxatakaku, mɨpaɨ 'aixɨa pekatiniuyeikamɨkɨ. Petɨrɨkaɨyetɨ pepɨra'iwani. Pepɨkamaka meta pepɨkatihayewani.
1CH 22:14 »Neuxei, waɨkawa netiuta'uximayataka nepɨtiukuxeɨri Yawé tukieya hetsie timieme, haika miyuniyari heimana haika tsienituyari miriyari kiruyari raheteme huru, xeitewiyari heimana tamamata heimana haika miyuniyari kiruyari raheteme pɨrata, metatsiere wurunitse meta tepɨa waɨkawa nekaniukuxerieni kayu'inɨatsinɨakame. Meta tetexi, yaxeikɨa kɨyexi nekatiniukuxeɨrieni, peru 'ekɨta matsi waɨkawa ketinekuwawa.
1CH 22:15 Metatsiere pekaniwarexeiyani te'uximayatamete meyuwaɨkawame: Tetexi xixiwamete, kii wewiwamete, kɨyexikɨ te'uximayatamete, meta naime 'uximayatsikatsie mekatenakumaika,
1CH 22:16 hurukɨ, pɨratakɨ, wurunitsekɨ, meta tepɨakɨ. Merikɨ keneutsutɨa ketine'uximayakari Yawé kematsiparewieka».
1CH 22:17 Hikɨ Rawiri yunaime 'ixaheritsixi wa'ukiyarima kaniwaruhɨritɨani yuniwe Tsarumuni memiparewienikɨ.
1CH 22:18 Mɨpaɨ pɨtiwarutahɨawixɨ: «Yawé xekakaɨyari xehamatɨa kaniuyeikani, kayuwatɨ kanixepitɨaka naitsarie muyehane. Ta'aurie kiekatari kaneniyetuirieni, meta mɨkɨ hikɨ Yawé katiniwa'aitɨaka meta xeme teɨterimama.
1CH 22:19 'Ayumieme hikɨ Yawé yukakaɨyari xekeneutiwawa yurikɨ yemekɨ yu'iyarikɨ. Xekeneutsutɨa tuki 'uximayatsikayari Yawé kakaɨyari hetsiemieme, tɨratu kakuniyari meta naime Kakaɨyari tipiiniteya mɨtipatsietɨka muwa xemɨte'atɨanikɨ tukieya mɨtawewiyanita».
1CH 23:1 Merikɨte Rawiri waɨkawa 'ukiratsitɨtɨri yuniwe Tsarumuni kananukakeni ti'aitame mayanikɨ 'Ixaheri kwieyaritsie.
1CH 23:2 Yunaime 'ixaheritsixi wa'ukiyarima kaniwarukuxeɨrieni meta mawari wewiwamete metatsiere rewitsixi.
1CH 23:3 Hikɨ rewitsixi mekaniuti'inɨatsieni, xeitewiyari heimana tamamata wiyari memɨhɨtɨkatei, meputipaɨmerixɨ xeitewiyari heimana tamamata heimana 'atahaika miriyari (38.000) 'ukitsi.
1CH 23:4 Mɨkɨ, xeitewiyari heimana nauka miriyari (24.000) meyupaɨmetɨ Yawé tukieya manuwe mepɨhɨritɨariekai 'uximayatsika, meta 'ataxewi miriyari meyupaɨmetɨ ti'aitame 'aurie meputi'ukai hipatɨta mepɨ'itsɨkatetɨkai,
1CH 23:5 nauka miriyari kitenie tehɨwemete mepɨhɨkɨtɨkai, hipatɨta nauka miriyari Yawé hetsiemieme kwikamete mepɨhɨkɨtɨkai kanaritekɨ, Rawiri miti'aitakai mɨpaɨ 'ayumieme.
1CH 23:6 Hikɨ Rawiri rewitsixi me'ayehaikame kaniwarayeitɨani Rewi niwemama kememɨyupaɨmekai, mekanihɨkɨtɨni: Keritsuni, Kuhati meta Merari.
1CH 23:7 Keritsuni niwemama: Rarani meta Tsimi.
1CH 23:8 Rarani niwemama mepɨyuhaikakai: Kehieri puwamatsikatɨkai, Tsetani meta Kuheri.
1CH 23:9 Mɨkɨ mepakɨ Rarani nuiwarimama wa'ukiyarima. Tsimi yuhaikame pɨwarayexei: Tserumiti, Katsiheri meta Karani.
1CH 23:10 Tawari Tsimi niwemama yunaukatɨ mepakɨ: Yakati, Tsitsa, Kehutsi meta Weriya. Mɨkɨ Tsimi niwemama mepakɨ.
1CH 23:11 Yakati wamatsika pɨhɨkɨtɨkai, Tsitsa hutarieka mieme. 'Ikɨ Kehutsi meta Weriya matɨa waɨkawa tɨɨri memɨkawarayexeikɨ, xeinuiwari memɨhɨkɨtɨni hepaɨ xeikɨa mepɨte'inɨatsiekai, yunaitɨ xei'uximayatsikayari mepupitɨarie.
1CH 23:12 Kuhati niwemama mepɨyunaukakai: 'Amirani, 'Itsaxi, Hewuruni meta 'Utsiheri.
1CH 23:13 'Amirani niwemama mepakɨ, 'Aruni meta Muitsexi. 'Aruni meta nuiwarimama mepanayexeiyarie mawari memɨwewiekakɨ yemekɨ mɨpatsietɨka, 'ɨkwa memukutaiyanikɨ, Yawé hetsiemieme memɨte'uximayakakɨ meta Kakaɨyari memɨwawiriekakɨ 'aixɨa muwayuriekakɨ teɨteri.
1CH 23:14 Muitsexi, tewi Kakaɨyari menayexei, meta niwemama mekaniu'inɨatsieni Rewi nuiwarimama wahamatɨa.
1CH 23:15 Muitsexi niwemama mepakɨ, Keritsuni meta 'Eriyetsexi.
1CH 23:16 Keritsuni nu'aya matɨarieya patɨa, Tsewuheri.
1CH 23:17 'Eriyetsexi xeime xeikɨa payexei yuniwe, Xekawiyaxi patɨa, mɨkɨ hɨrixɨa waɨkawa yuniwema puwarayexei.
1CH 23:18 'Itsaxi nu'aya mexɨakame patɨa Tserumiti.
1CH 23:19 Hewuruni nu'aya mexɨakame patɨa Keriyaxi, hutarieka mieme 'Amariyaxi, hairieka mieme Kahatsieri, naurieka mieme Kekamani.
1CH 23:20 'Utsiheri nu'aya mexɨakame patɨa Mikahiyaxi, hutarieka mieme 'Itsiyaxi pɨtitewakai.
1CH 23:21 Merari niwemama mepɨhɨkɨtɨkai Makiri meta Mutsihí. Makiri niwemama mepɨhɨkɨtɨkai 'Eriyatsaxi meta Kihitsi.
1CH 23:22 'Eriyatsaxi tɨɨri 'ukitsi kawarayexeiyaka kaniumɨni: 'ukari xeikɨa pɨwarayexei. Mɨkɨ yatewa yu'iwama mepɨwarutiwitɨ Kihitsi niwemama.
1CH 23:23 Mutsihí yuniwema yuhaikame puwarayexei: Makiri, 'Eraxi meta Keremuti.
1CH 23:24 'Ikɨ Rewi nuiwarimama mepɨhɨkɨ, niwemama yuxexuitɨ kememɨteyutamɨiriyaxɨ. 'Ana mepaka'utsie kemɨtetewakai wa'ukiyarima. Mɨkɨ mepɨte'uximayakai Yawé tukieya manuwe 'amemɨyumate xeikɨa, xeitewiyari heima meutiyune wiyari xeikɨa mepexeiyatɨkatei.
1CH 23:25 Rawiri mɨpaɨ kaniutayɨni: «Kepauka paitɨtɨ Yawé, 'ixaheritsixi takakaɨyari, yuteɨterima mɨtatsi'anukayatsaxɨ meta yukie mayeitɨa yuheyemekɨ Kerutsareme kiekariyatsie,
1CH 23:26 pɨkaheuyewetseri rewitsixi tuki memɨkutɨtɨwenikɨ meta piinitɨarika muwa mawaritsie timieme».
1CH 23:27 'Imatɨrieka Rawiri kemɨtiu'aitaxɨ, yunaitɨ rewitsixi xeitewiyari wiyari memɨhɨtɨka mekanaka'utsieni memɨteta'uximayatakɨ,
1CH 23:28 'Aruni nuiwarimama memɨwaparewienikɨ, Yawé tukieya manuwe memɨteta'uximayatakɨ. Takwa mepɨhɨritɨariekai meta kiita 'etsimuyeyeyeuta yaxeikɨa meta mepɨhɨritɨariekai piinite mawaritsie timieme memɨteti'itiwanikɨ, meta hipame 'uximayatsika tuki hetsiemieme.
1CH 23:29 Yaxeikɨata mepɨhɨritɨariekai paa Kakaɨyari hɨxie mieme, meta tɨriku mɨtɨxiyari 'aixɨa mɨ'ane hatsite mawariyari hetsiemieme, harina papayari mɨkakuxanariyarietɨka meta mawari mɨtixarikietɨka mɨti'etsarietɨka metatsiere te'inɨnɨatamete naime hepaɨtsita mepɨhɨkɨtɨkai.
1CH 23:30 Mepɨhɨritɨariekai ximeri meta taikai memɨ'axenikɨ pamɨpariyutsi memipitɨakakɨ meta meminɨawanikɨ Yawé.
1CH 23:31 Metatsiere mepɨhɨritɨariekai mawari taiyariyari memutiwewiwanikɨ Yawé hetsiemieme mutiwewiwakai xawatikɨ meta metseri 'etsimɨpenitsie meta hipatɨ 'ixɨarari maye'axenitsie. Mɨpaɨ yamekateni'uximayakaitɨni Yawé hetsiemieme yayupapaɨmetɨ, kememɨte'aitɨariekai.
1CH 23:32 Mɨpaɨ mepɨtehɨritɨariekai 'ixuriki tukiyari memɨ'ɨwiyanikɨ meta tuki muyepatsie. Kepauka memɨte'uximayakai Yawé tukieyata, wa'iwama 'Aruni nuiwarimama yametewarahɨawekaku mepɨte'uximayakai.
1CH 24:1 'Aruni nuiwarimama 'ipaɨ mekateniuyu'uitɨani: 'Aruni niwemama mepɨhɨkɨ Narawi, 'Awihu, 'Eriyatsaxi meta 'Itamaxi.
1CH 24:2 Narawi meta 'Awihu mekaniukwini tɨɨri mekawarayexeiyawawetɨ wapaapa kamɨwekaku 'akuxi, hikɨ 'Eriyatsaxi meta 'Itamaxi xeikɨari mawari wewiwamete mekanakɨne.
1CH 24:3 'Eriyatsaxi nuiwarieya Tsaruki, meta 'Itamaxi nuiwarieya 'Akimereki, mɨkɨ Rawiri meparewiekaku 'aixɨa katiniwaru'uitɨani mawari wewiwamete kehapaɨ memɨte'uximayatakekai.
1CH 24:4 'Eriyatsaxi nuiwarimama wa'ukiyarima memɨyuwaɨkawakai keyuri 'Itamaxi nuiwarimama wa'ukiyarima, 'ipaɨ mekateniwaru'uitɨani: Tamamata heimana 'ataxewi mepɨyupaɨmekai 'Eriyatsaxi nuiwarimama wa'ukiyarima, meta 'Itamaxi nuiwarimama wa'ukiyarima 'atahaika mepɨyupaɨmekai.
1CH 24:5 Yunaitɨ 'inɨarikɨ mekaniupitɨarieni 'uximayatsika, yunaitɨ 'Eriyatsaxi nuiwarimama meta 'Itamaxi nuiwarimama watsata mepanu'ukai 'uximayatsika memakumate tukita mieme meta Kakaɨyaritsɨa mieme.
1CH 24:6 Ti'utɨwame Tsemahiyaxi Natanaheri nu'aya, Rewi nuiwarieya hetsiemieme, mɨkɨ kaniwaraka'utɨani kememɨtetewakai ti'aitame hɨxie meta 'iparewiwamete, mawari wewiwamete Tsaruki meta 'Akimereki 'Awiyataxi nu'aya, mawari wewiwamete nuiwariyari wa'ukiyarima, meta rewitsixi nuiwariyari wa'ukiyarima wahɨxie. 'Eriyatsaxi nuiwarimama hutakɨa mekaniupitɨarieni 'inɨari, peru 'Itamaxi nuiwarimama heiwamieme xeikɨa.
1CH 24:7 'Inɨari matɨari mieme pɨtiunakixɨ Kuyariwi, hutarieka pɨtiunakixɨ Kerahiyaxi,
1CH 24:8 hairieka pɨtiunakixɨ Karini, naurieka pɨtiunakixɨ Tsehurini,
1CH 24:9 'auxɨwirieka pɨtiunakixɨ Marikiyaxi, 'ataxewirieka pɨtiunakixɨ Mikamini,
1CH 24:10 'atahutarieka pɨtiunakixɨ Kuhutsi, 'atahairieka pɨtiunakixɨ 'Awiyaxi,
1CH 24:11 'atanaurieka pɨtiunakixɨ Ketsuha, tamamatarieka pɨtiunakixɨ Tsekaniyaxi,
1CH 24:12 tamamata heimana xewi mieme patɨa 'Eriyatsiwi, tamamata heimana hutarieka mieme patɨa Yakini,
1CH 24:13 tamamata heimana hairieka mieme patɨa Hupá, tamamata heimana naurieka mieme patɨa Ketsewa,
1CH 24:14 tamamata heimana 'auxɨwi mieme patɨa Wirika, tamamata heimana 'ataxewi mieme patɨa 'Imexi,
1CH 24:15 tamamata heimana 'atahuta mieme patɨa Hetsixi, tamamata heimana 'atahaika mieme patɨa 'Aputsexi,
1CH 24:16 tamamata heimana 'atanauka mieme patɨa Petahiyaxi, xeitewiyaritsie mieme patɨa 'Etsekieri,
1CH 24:17 xeitewiyari heimana xewitsie mieme patɨa Kakini, xeitewiyari heimana hutarieka mieme patɨa Kamuri,
1CH 24:18 xeitewiyari heimana hairieka mieme patɨa Rerahiyaxi, xeitewiyari heimana naurieka mieme patɨa Mahatsiyaxi.
1CH 24:19 Mɨpaɨ mekateniuyu'uitɨani Yawé tukieyata memɨteta'uximayatakɨ, yemekɨ Yawé 'ixaheritsixi takakaɨyari 'Aruni kemɨrahɨawekai, mawari wewiwamete wa'ukiyari.
1CH 24:20 'Ikɨ Rewi nuiwarimama memuyuhayewaxɨ memaka'utɨarie mepɨhɨkɨ: 'Amirani nuiwarimama Tsuwaheri wa'ukiyari patɨa, Tsuwaheri nuiwarimama Keheriyaxi wa'ukiyari patɨa.
1CH 24:21 Xekawiyaxi nuiwarimama 'Itsiyaxi wa'ukiyari patɨa, mɨkɨ mɨmexɨakametɨkai.
1CH 24:22 'Itsaxi nuiwarimama Tserumuti wa'ukiyari patɨa, Tserumuti nuiwarimama Yakati wa'ukiyari patɨa.
1CH 24:23 Hewuruni niwemama: mexɨakame Keriyaxi patɨa, hutarieka mieme 'Amariyaxi patɨa, hairieka mieme Kahatsieri patɨa, naurieka mieme Kekamani.
1CH 24:24 'Utsiheri nuiwarimama Mikahiyaxi wa'ukiyari patɨa, Mikahiyaxi nuiwarimama Tsamixi wa'ukiyari patɨa,
1CH 24:25 'Itsiyaxi Mikahiyaxi pɨ'iwayatɨkai, 'Itsiyaxi nuiwarimama Tsakariyaxi wa'ukiyari patɨa,
1CH 24:26 Merari nuiwarimama Makiri meta Mutsihí wa'ukiyarima mepakɨ, Wenuhu nuiwarimama Katsiyaxi wa'ukiyari patɨa.
1CH 24:27 Merari nuiwarimama hipatɨta: Katsiyaxi hetsiemiemete: Wenuhu, Tsukani, Tsakuxi meta 'Iwiri.
1CH 24:28 Makiri hetsiemiemete: 'Eriyatsaxi, mɨkɨ tɨɨri pɨkawarayexei.
1CH 24:29 Kihitsi hetsiemiemete: nu'aya Kerameri.
1CH 24:30 Mutsihí niwemama wahetsiemieme: Makiri, 'Eraxi meta Keremuti. 'Ikɨ mepɨhɨkɨ rewitsixi wanuiwarima wa'ukiyarima kememɨyutipaɨmerixɨ.
1CH 24:31 Yaxeikɨa yu'iwama 'Aruni nuiwarimama wahepaɨ 'inɨarikɨ 'uximayatsika mepupitɨarie ti'aitame Rawiri hɨxie, meta Tsaruki, 'Akimereki meta mawari wewiwamete nuiwariyari wa'ukiyarima meta rewitsixi wa'ukiyarima. 'Amemɨyumate meta yakɨ memɨyumate yaxeikɨa mepɨtepitɨariekai 'uximayatsikakɨ.
1CH 25:1 Teyuitɨwamete memakɨne, Rawiri meta kuyaxi tewa'aitɨwamete mekaniwaranayexeiya 'Atsahapi niwemama, Hemani meta Kerutuni niwemama, mɨkɨ Kakaɨyari niukieya memɨtahekɨatakɨ meteyuitɨatɨ 'aripatsie, kanarikɨ meta mɨtiutitirirɨkakɨ. 'Ikɨ mekanihɨkɨtɨni memaka'utɨarie mɨpaɨ memɨteta'uximayatakɨ:
1CH 25:2 'Atsahapi niwemama: Tsakuxi, Kutse, Netaniyaxi meta 'Atsarera. Mɨkɨ pɨwakuyuitɨwakai 'Atsahapi, meta pɨtihekɨatakai kwikarikɨ ti'aitame Rawiri yarehɨawekaku.
1CH 25:3 Kerutuni niwemama me'ataxewitɨ: Kerariyaxi, Tseri, Kitsariyaxi, Tsimihi, Katsawiyaxi meta Matatiyaxi. 'Ikɨ wapaapa Kerutuni pɨtiwa'aitɨakai, mɨkɨ meteyuitɨatɨ 'aripakɨ Yawé niukieya mepɨhekɨatakai meta pamɨpariyutsi mepipitɨakai me'inɨawatɨ.
1CH 25:4 Hemani niwemama: Wukiyaxi, Mataniyaxi, 'Utsiheri, Tsewuheri, Keremuti, Kananiyaxi, Kananihi, 'Erihata, Kirariti, Xumaniti-'Etsexi, Kutsiwekatsa, Maruti, Hutixi meta Mahatsihuti.
1CH 25:5 Mɨkɨ yunaitɨ Hemani mepɨniwemama, ti'aitame hetsiemieme Kakaɨyari niukameya mɨhɨkɨtɨkai, hikɨ mɨkɨ Kakaɨyari niukieyakɨ 'aixɨa meputiyuanekai tɨrɨkariyaya hepaɨtsita. Kakaɨyari Hemani tɨɨri peiyenɨ'airi, tamamata heimana meyunaukame 'ukitsi meta 'ukari yuhaikame.
1CH 25:6 Mɨkɨ Yawé tukieyatapaitɨ wapaapa pɨtiwaku'ɨkitɨwakai kepauka memutikwikakai mɨtiutitiraurɨkakɨ, kanaritekɨ meta 'aripakɨ. 'Atsahapi, Kerutuni meta Hemani, mɨkɨ yamepɨteyuriekai ti'aitame kemɨtiwa'aitɨakai.
1CH 25:7 Mɨkɨ huta tsienituyari heimana nauka tewiyari heimana 'atahaika (288) mepɨyupaɨmekai yunaitɨ, mɨkɨ mepɨte'uti'ɨkitɨariekai Yawé hetsiemieme kwikamete memɨhɨkɨtɨnikɨ.
1CH 25:8 Yu'uximayatsika mepupitɨarie 'inɨarikɨ kepauka memɨte'ukayuitɨwani, yunaitɨ 'etsimemɨyumate meta 'amemɨyumate meta te'ɨkitamete metatsiere teyu'ɨkitɨwamete meyunaitɨ.
1CH 25:9 Hikɨ mexɨakame pɨtiunakixɨ Kutse 'Atsahapi nu'aya, niwemama meta 'iwamama meyunaitɨ tamamata heimana huta mepɨyupaɨmekai, hutarieka pɨtiunakixɨ Kerariyaxi, 'iwamama meta niwemama meyunaitɨ tamamata heimana huta mepɨyupaɨmekai.
1CH 25:10 Hairieka pɨtiunakixɨ Tsakuxi, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:11 Naurieka pɨtiunakixɨ 'Itsihiri, niwemama meta 'iwamama, meyunaitɨ tamamata heimana huta mepɨyupaɨmekai.
1CH 25:12 'Auxɨwirieka pɨtiunakixɨ Netaniyaxi, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:13 'Ataxewirieka pɨtiunakixɨ Wukiyaxi, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:14 'Atahutarieka pɨtiunakixɨ Ketsarera, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:15 'Atahairieka pɨtiunakixɨ Kitsariyaxi, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:16 'Atanaurieka pɨtiunakixɨ Mataniyaxi, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:17 Tamamatarieka pɨtiunakixɨ Tsimi, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:18 Tamamata heimana xewi pɨtiunakixɨ 'Atsareri, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:19 Tamamata heimana huta pɨtiunakixɨ Katsawiyaxi, niwemama meta 'iwamama meyunaitɨ tamamata heimana huta memɨyupaɨmekai.
1CH 25:20 Tamamata heimana hairieka pɨtiunakixɨ Tsuwaheri, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:21 Tamamata heimana naurieka pɨtiunakixɨ Matatiyaxi, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:22 Tamamata heimana 'auxɨwirieka pɨtiunakixɨ Keremuti, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:23 Tamamata heimana 'ataxewirieka pɨtiunakixɨ Kananiyaxi, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:24 Tamamata heimana 'atahutarieka pɨtiunakixɨ Kutsiwekatsa, niwemama meta 'iwamama tamamata heimana huta mepɨyupaɨmekai.
1CH 25:25 Tamamata heimana 'atahairieka pɨtiunakixɨ Kananihi, yuniwema meta 'iwamama meyunaitɨ tamamata heimana huta mepɨyupaɨmekai.
1CH 25:26 Tamamata heimana 'atanaukarieka pɨtiunakixɨ Maruti, niwemama meta 'iwamama meyunaitɨ tamamata heimana huta mepɨyupaɨmekai.
1CH 25:27 Xeitewiyaritsie pɨtiunakixɨ 'Eriyata, yuniwema meta 'iwamama meyunaitɨ tamamata heimana huta mepɨyupaɨmekai.
1CH 25:28 Xeitewiyari heimana xewi pɨtiunakixɨ Hutixi, yuniwema meta 'iwamama meyunaitɨ tamamata heimana huta mepɨyupaɨmekai.
1CH 25:29 Xeitewiyari heimana huta pɨtiunakixɨ Kirariti yuniwema meta 'iwamama meyunaitɨ tamamata heimana huta mepɨyupaɨmekai.
1CH 25:30 Xeitewiyari heimana hairieka pɨtiunakixɨ Mahatsihuti, yuniwema meta 'iwamama meyunaitɨ tamamata heimana huta mepɨyupaɨmekai.
1CH 25:31 Xeitewiyari heimana naurieka pɨtiunakixɨ Xumaniti-'Etsexi, yuniwema meta 'iwamama meyunaitɨ tamamata heimana huta mepɨyupaɨmekai.
1CH 26:1 Kitenie tehɨwemete kememɨte'u'uitɨarie: Kurehe nuiwarimama hetsiemieme: Metseremiyaxi Kurehe nu'aya, 'Atsahapi nuiwarieyatsie mieme.
1CH 26:2 Metseremiyaxi niwemama mepakɨ: Matɨari mieme Tsakariyaxi, hutarieka mieme Keriyaheri, hairieka mieme Tsewariyaxi, naurieka mieme Katinieri
1CH 26:3 'auxɨwirieka mieme 'Erami 'ataxewirieka mieme Kuhanahani, 'atahutarieka mieme 'Erihuhenahi.
1CH 26:4 'Uweri-'Erumi niwemama mepakɨ: Mexɨakame mieme Tsemahiyaxi, hutarieka mieme Kutsawari, hairieka mieme Kuha, naurieka mieme Tsakaxi, 'auxɨwirieka mieme Natanaheri,
1CH 26:5 'ataxewirieka mieme 'Amiheri, 'atahutarieka mieme 'Itsakaxi. 'atahairieka mieme Pehuritahi. Kakaɨyari 'Uweri-'Erumi 'aixɨa kaniuyurieni tɨɨri waɨkawa mɨwarayexeiyakɨ.
1CH 26:6 'Uweri-'Erumi nu'aya Tsemahiyaxi mɨkɨta tɨɨri pɨwarayexei, mɨkɨ mepakɨ yutɨɨriyama wahetsiemieme memanuyetekai, teɨteri memɨkamama mepɨhɨkɨtɨkai.
1CH 26:7 Tsemahiyaxi niwemama mepɨhɨkɨtɨkai, 'Utini, Xapahiri, 'Uweri, 'Eritsawari meta wa'iwama 'Erihu meta Tsamakiyaxi, mɨkɨ yunaitɨ teɨteri memɨkamama mepɨhɨkɨtɨkai.
1CH 26:8 Mɨkɨ yunaitɨ 'Uweri-'Erumi mepɨnuiwarimamatɨkai. Mɨkɨ meta waniwema meta wa'iwama teɨteri memɨkamama memɨtɨrɨkawi mepɨhɨkɨtɨkai 'uximayatsikakɨ. Yunaitɨ haika tewiyari heimana huta mepɨyupaɨmekai, 'Uweri-'Erumi nuiwarimama.
1CH 26:9 Metseremiyaxi niwemama meta 'iwamama meyunaitɨ, tamamata heimana 'atahaika mepɨyupaɨmekai, mɨkɨ teɨteri memɨkamama mepɨhɨkɨtɨkai.
1CH 26:10 Kutsa niwemama, Merari nuiwarieya hetsiemieme, mepɨhɨkɨ Tsimɨri, wa'ukiyari matɨa (tsepa mɨkamexɨakametɨkai, peru 'ukiyarieya manuyeka kaneyeitɨani),
1CH 26:11 hutarieka mieme Kirikiyaxi patɨa, hairieka mieme Tewariyaxi patɨa meta naurieka Tsakariyaxi. Mɨkɨ yunaitɨ Kutsa niwemama meta 'iwamama mepakɨ tamamata heimana haika.
1CH 26:12 Merikɨte mɨpaɨ mekateniu'uitɨarieni kitenie tehɨwemete, memanuyetei meta wa'iwama, Yawé tukieyata memɨte'uximayakakɨ.
1CH 26:13 Kitenie kepauka memɨtetahɨnikekai mepupitɨarie 'inɨarikɨ yuxexuitɨ nuiwarite 'amemɨyumate meta 'etsimemɨyumate yunaitɨ.
1CH 26:14 'Inɨarikɨ kememɨte'upitɨarie, Tseremiyaxi pɨtiunakixɨ 'itupari tau manatineika hepa meuwie, meta nu'aya Tsakariyaxi, mɨtimaiwekai mɨ'ɨxatsitametɨkai, pɨtiunakixɨ 'itupari tayetatsie meuwie.
1CH 26:15 'Uweri-'Erumi pɨtiunakixɨ kitenie tahetɨa hepatsie meuwie, meta niwemama mepɨhɨritɨarie 'ikwaite mɨtiuyepine tukita timieme.
1CH 26:16 Tsupini meta Kutsa matɨa Tsareketi kitenieyari mekateniunake, tau makayuyuipike hepatsie, huye teikɨmana meutiyɨnetsie. Yuxexuitɨ nuiwarite kemɨ'ane kitenieyaritsie memɨte'unakixɨ mana mekatenihɨkaitɨni yayupapaɨmetɨ:
1CH 26:17 Xexuime tukaritsie me'ataxewitɨ rewitsixi tau manatineika hepa meukitenietsie mepu'uwekai, yunaukatɨ tayeta hepatsie, meta yunaukatɨ tahetɨa hepatsie, meta yuhuhutatɨ xexuime 'ikwaite mɨtiuyepitɨkatsie mepɨtehɨkai.
1CH 26:18 Takwa tau makayuyuipike hepa mukumatsie yuhutatɨ mepɨtehɨkai rewitsixi meta yunaukatɨ mɨkɨ huyeyari 'utɨma.
1CH 26:19 Mɨpaɨ mekateniu'uitɨarieni kitenie tehɨwemete Kure meta Merari wanuiwarima.
1CH 26:20 Hipatɨta rewitsixi mepɨte'ɨhɨritɨarie tukita timieme piini mɨraye'atɨka meta mɨtipatsietɨka Kakaɨyari hetsie timieme muwa mɨtiuyepitɨkatsie.
1CH 26:21 Rarani Keritsuni punuiwarieyatɨkai, Kehieri manuyeka kanayani Rarani nuiwarimama wahetsie.
1CH 26:22 Kehieri niwemama Tsetani meta Kuheri, mɨkɨ mepɨhɨritɨarie piinite mɨraye'atɨka Yawé tukita timieme.
1CH 26:23 Tsewuheri, Keritsuni nuiwarieya Muitsexi nu'aya, mɨkɨ tumini hɨwemete wa'ukiyari pɨhɨkɨtɨkai yunaime wahetsiemieme, 'Amirani nuiwarimama, 'Itsaxi nuiwarimama, Hewuruni nuiwarimama meta 'Utsiheri nuiwarimama.
1CH 26:25 'Eriyetsexi nuiwarimama kememɨte'unuiwaxɨ, Xekawiyaxi, Kitsariyaxi, Kurani, Tsikɨri meta Tserumiti.
1CH 26:26 Tserumiti meta 'iwamama mepuhɨritɨarie piinite mɨtipatsietɨka hipatɨ memɨteyetua, ti'aitame Rawiri, meta nuiwarite wa'ukiyarima, meta kuyaxi xeimiriyari meta xeitsienituyari tewa'aitɨwamete meta hipatɨ kuyaxi tewa'aitɨwamete.
1CH 26:27 Mɨkɨ mepɨteyetuakai piinitɨarika kuyaxa memɨteha'iwakai, kɨmana Yawé tukieya 'aixɨa muku'itɨarienikɨ.
1CH 26:28 Tserumiti meta 'iwamama mepɨhɨritɨariekai, Tsamuheri Kakaɨyari niukameya mɨtiyetua, Tsahuri Kihitsi nu'aya mɨtiyetua, meta 'Awinexi Nexi nu'aya meta Kuhawi Tsariwiya nu'aya memɨteyetua.
1CH 26:29 Kenaniyaxi meta niwemama, 'Itsaxi memɨnuiwarimama, mɨkɨ mepɨ'itsukatetɨkai ti'aitame mepɨparewiekai 'aixɨa mepɨte'akayuruwakai naime 'uximatɨarikatsie 'Ixaheri kwieyaritsie.
1CH 26:30 Katsawiyaxi meta maremama, mɨkɨ Hewuruni nuiwarimama mepɨhɨkɨtɨkai, xeimiriyari heimana 'atahuta tsienituyari mepɨkɨkɨtɨkai teɨteri memɨkamama. Mɨkɨ Kurutani 'anutaɨye tau makayuyuipike hepa 'ixaheritsixi watsata mepɨte'uximayakai Yawé hetsiemieme meta ti'aitame hetsiemieme.
1CH 26:31 Hewuruni nuiwarimama wa'ukiyari Keriyaxi pɨhɨkɨtɨkai. Huta tewiyari wiyari Rawiri ti'aitakaku, kaneutixeiyariexɨani Hewuruni nuiwarieya xapayari, mekaniutaxeiyarieni Katsexi kiekariyaritsie Karaha kwieyaritsie teɨteri memɨkamama.
1CH 26:32 Mɨkɨ teɨteri memɨkamama mekaniyupaɨmekaitɨni huta miriyari heimana 'atahuta tsienituyari (2.700). Rawiri ti'aitame kaniwaruhɨritɨani memɨte'uximayakakɨ Xuweni nuiwarimama, Kahari nuiwarimama, meta Manatsexi nuiwarimama hixɨapa memɨ'axe wahetsiemieme, tinaimekɨ Kakaɨyari hetsiemieme meta ti'aitame hetsie timieme.
1CH 27:1 'Ikɨ mekanihɨkɨtɨni kememɨte'aka'utɨarie xapatsie nuiwarite wa'ukiyarima, xeimiriyari meta xeitsienituyari kuyaxi memɨtewa'aitɨa, meta ti'aitame parewiwametemama kuyaxi 'ixaheritsixi memɨhɨritɨariekai. Xeikuyaxiyari mepɨyupapaɨmekai xeitewiyari heimana nauka miriyari, mɨkɨ mepɨte'utahɨwekai xeimetseri xeiwiyaritsie ti'aitame hetsiemieme.
1CH 27:2 Matɨari metseritsie miemete kuyaxi, xeitewiyari heimana nauka miriyari memɨyupaɨme, wa'ukiyari pɨhɨkɨtɨkai Yatsuwehani Tsawirieri nu'aya,
1CH 27:3 Paretsi nuiwarieya hetsiemieme. Mɨkɨ wa'ukiyari pɨhɨkɨtɨkai yunaime kuyaxi memɨwanɨ'a mexɨakame metseritsie memɨte'uta'uximayatakai.
1CH 27:4 Hutarieka metseritsie miemete kuyaxi, xeitewiyari heimana nauka miriyari memɨyupaɨme, Rurahi 'Akuki nuiwarieya hetsiemieme, mɨkɨ manuyeka pɨhɨkɨtɨkai. Mɨkɨ wa'ukiyari Mikuruti pɨtitewakai.
1CH 27:5 Hairieka metseritsie miemete kuyaxi xeitewiyari heimana nauka miriyari memɨyupaɨme, wa'ukiyari pɨhɨkɨtɨkai Wenahiyaxi, mawari wewiwamete tiwa'aitɨwame Kuyara nu'aya.
1CH 27:6 Wenahiyaxi xeitewiyari heimana tamamata kuyaxi memɨkamama puwanɨkai, meta mɨkɨ muwanɨ'a pɨhɨkɨtɨkai. Mɨkɨ nu'aya 'Amitsawari hairieka metseritsie miemete wahamatɨa payewekai.
1CH 27:7 Naurieka metseritsie miemete kuyaxi xeitewiyari heimana nauka miriyari memɨyupaɨme, 'Atsaheri muwanɨ'a pɨhɨkɨtɨkai, Kuhawi 'iwaya. 'Arike hetsiena mieme kananukakeni nu'aya Tsewariyaxi.
1CH 27:8 'Auxɨwirieka metseritsie miemete kuyaxi xeitewiyari heimana nauka miriyari memɨyupaɨme, Tsamuti 'Itsiraha kiekame muwanɨ'a pɨhɨkɨtɨkai.
1CH 27:9 'Ataxewirieka metseritsie miemete kuyaxi xeitewiyari heimana nauka miriyari memɨyupaɨme, 'Ira muwanɨ'a pɨhɨkɨtɨkai 'Iketsi Tekuha kiekame nu'aya.
1CH 27:10 'Atahutarieka metseritsie miemete kuyaxi xeitewiyari heimana nauka miriyari memɨyupaɨme, Heretsi muwanɨ'a pɨhɨkɨtɨkai Peruni kiekame 'Epɨrahini nuiwarieya.
1CH 27:11 'Atahairieka metseritsie miemete kuyaxi xeitewiyari heimana nauka miriyari memɨyupaɨme, Tsiwekahi Kutsa kiekame muwanɨ'a pɨhɨkɨtɨkai, Tsera nuiwarieyatsie mieme.
1CH 27:12 'Atanaurieka metseritsie miemete kuyaxi xeitewiyari heimana nauka miriyari memɨyupaɨme, 'Awihetsexi 'Anatuti kiekame muwanɨ'a pɨhɨkɨtɨkai Wenikamini nuiwarieya hetsiemieme.
1CH 27:13 Tamamata metseritsie mieme, Marahi Netupa kiekame muwanɨ'a pɨhɨkɨtɨkai, mɨkɨta pɨwarexeiyakai xeitewiyari heimana nauka miriyari, Tsera nuiwarieya hetsiemieme.
1CH 27:14 Tamamata heimana xewi metseritsie miemete, muwanɨ'a pɨhɨkɨtɨkai Wenahiyaxi Piratuni kiekame, 'Epɨrahini nuiwarieya hetsiemieme, mɨkɨta pɨwarexeiyakai xeitewiyari heimana nauka miriyari.
1CH 27:15 Tamamata heimana huta metseritsie miemete, Kerirahi Netupa kiekame muwanɨ'a pɨhɨkɨtɨkai, 'Utunieri nuiwarieya hetsiemieme, mɨkɨta xeitewiyari heimana nauka miriyari puwarexeiyakai.
1CH 27:16 Merikɨte 'ikɨta mepɨhɨkɨ 'Ixaheri nuiwarimama wa'ukiyarima memakɨ: Xuweni nuiwarimama wahetsiemieme: 'Eriyetsexi Tsikɨri nu'aya muwanɨ'a pɨhɨkɨtɨkai, Tsimehuni nuiwarimama wahetsiemieme: Tsepatiyaxi Mahaka nu'aya muwanɨ'a pɨhɨkɨtɨkai,
1CH 27:17 Rewi nuiwarimama wahetsiemieme: Katsawiyaxi Kemuheri nu'aya muwanɨ'a pɨhɨkɨtɨkai, 'Aruni nuiwarimama wahetsiemieme: Tsaruki muwanɨ'a pɨhɨkɨtɨkai,
1CH 27:18 Kura nuiwarimama wahetsiemieme: 'Erihú Rawiri 'iwaya muwanɨ'a pɨhɨkɨtɨkai, 'Itsakaxi nuiwarimama wahetsiemieme: 'Umiri Mikaheri nu'aya muwanɨ'a pɨhɨkɨtɨkai,
1CH 27:19 Tsawuruni nuiwarimama wahetsiemieme: 'Itsimahiyaxi 'Awiriyaxi nu'aya muwanɨ'a pɨhɨkɨtɨkai, Nepɨtahari nuiwarimama wahetsiemieme: Kerimuti 'Atsirieri nu'aya muwanɨ'a pɨhɨkɨtɨkai,
1CH 27:20 'Epɨrahini nuiwarimama wahetsiemieme: 'Utseyaxi 'Atsatsiyaxi nu'aya muwanɨ'a pɨhɨkɨtɨkai, hixɨata me'atɨ Manatsexi xiɨyarimama wahetsiemieme: Kuheri Perahiyaxi nu'aya muwanɨ'a pɨhɨkɨtɨkai,
1CH 27:21 Tawarita hixɨata me'atɨ Manatsexi nuiwarimama Karaha kwieyaritsie memɨtitekai wahetsiemieme: 'Iruhu Tsakariyaxi nu'aya muwanɨ'a pɨhɨkɨtɨkai, Wenikamini nuiwarimama wahetsiemieme: Katsiheri 'Awinexi nu'aya muwanɨ'a pɨhɨkɨtɨkai,
1CH 27:22 Rani nuiwarimama wahetsiemieme: 'Atsareri Keruhani nu'aya muwanɨ'a pɨhɨkɨtɨkai. 'Ikɨ mepɨhɨkɨtɨkai 'Ixaheri nuiwarimama memɨwanɨ'akai.
1CH 27:23 Peru Rawiri pɨkawaraka'utɨa 'ukitsi xeitewiyari wiyari memɨkahexeiyakai, mɨkɨ Yawé mɨpaɨ putayɨkai kename 'ixaheritsixi mekayu'inɨatsinɨakakekai, mɨyuawitsie miemete xɨrawetsixi wahepaɨ.
1CH 27:24 Kuhawi Tsariwiya nu'aya kanitsutɨani waraka'utɨanike, peru yunaime pɨkawaraka'utɨa Kakaɨyari muyeha'akɨ 'ixaheritsixi wahetsiemieme. 'Ayumieme kememɨyupaɨmekai mepɨkahaka'utɨarie Rawiri ti'aitakaku kemɨtiuyɨ xapayaritsie.
1CH 27:25 Mɨraye'atɨka mɨtiuyepine ti'aitame tipiinieya pɨhɨritɨariekai 'Atsimaweti 'Arieri nu'aya. Kunatani 'Utsiyaxi nu'aya pɨtihɨritɨariekai watsiyata timieme, kiekaritetsie timieme, kiekari 'etsimɨyeyeutsie timieme meta kiekarite kuraru 'amatitetewa mexeiyatɨkatsie timieme.
1CH 27:26 Memuka'etsa mɨwanɨ'a 'Etsiri pɨhɨkɨtɨkai Keruwi nu'aya.
1CH 27:27 Tsimi Xamati kiekame pɨhɨritɨariekai kaxie haraweriyarite. Tsawiri Tsepani kiekame pɨhɨritɨariekai winu mɨti'utakɨ kita.
1CH 27:28 Wahari-Kanani Kerexi kiekame pɨhɨritɨariekai huriwa haraweriyarite meta xapa 'iteɨriyarite Tsepera yemuriyaritetsie mieme. Kuhatsi pɨhɨritɨariekai hatseiti mɨwa'utsie.
1CH 27:29 Tsitɨrahi Tsaruni kiekame wakaitsixi pɨhɨritɨariekai Tsaruni kwieyaritsie memu'uwakai. Tsapati 'Arurahi nu'aya wakaitsixi pɨhɨritɨariekai mayeweweritsie memɨye'uwakai.
1CH 27:30 'Uwiri 'Itsimaheri nuiwarieya kameyutsixi pɨhɨritɨariekai. Keheriyaxi merunutitanaka mɨkɨta puxuri 'ukari pɨhɨritɨariekai.
1CH 27:31 Katsitsi Hakaxi nuiwarieya muxatsi pɨhɨritɨariekai. 'Ikɨ yunaitɨ mekanihɨkɨtɨkaitɨni ti'aitame parewiwametemama tipiinieya memɨtehɨritɨariekai.
1CH 27:32 Kunatani Rawiri tatatsieya, ti'utɨwame mɨtimaiwekai, ti'aitame 'ɨxatsitɨwameya pɨhɨkɨtɨkai. Kehieri Kakumuni nu'aya pɨwa'ɨwiyakai ti'aitame niwemama.
1CH 27:33 'Akituperi mɨkɨtatsiere ti'aitame 'ɨxatsitɨwameya pɨhɨkɨtɨkai. Hutsahi 'araki tewiyari ti'aitame 'aixɨa mɨtimate pɨhɨkɨtɨkai.
1CH 27:34 Kuyara Wenahiyaxi nu'aya meta 'Awiyataxi 'arike 'Akituperi hetsiemieme mepanuka'ui. Kuhawi kuyaxi yunaime wa'ukiyari pɨhɨkɨtɨkai.
1CH 28:1 Merikɨtsɨ Rawiri Kerutsaremetsie kaniwarukuxeɨrieni: yunaime 'Ixaheri nuiwarimama memɨwanɨ'a, yunaime kuyaxi memɨwanɨ'a xeimetseri memɨte'utahɨwekai, xeimiriyari meta xeitsienituyari memɨhɨritɨarietɨkatei, meta ti'aitame tipiinieya memɨtehɨritɨariekai, tewamama memɨwahɨkai meta niwemama, paratsiyu memɨhɨritɨariekai, kuyaxi memeuyutakwiwawe meta kuyaxi memɨkamama.
1CH 28:2 Kananukukeni ti'aitame Rawiri mɨpaɨ kaniutayɨni: Ne'iwamarixi xekeneneu'eni. Ne mɨpaɨ nepɨtiku'eriwakai tuki nepɨtawewienikekai, muwa Yawé takakaɨyari tɨratuya kakuniyari mayekanikɨ meta muwa mayeyerɨnikɨ Kakaɨyari. Tinaimeri nepɨtiuxeɨriekai mɨtawewierekɨ,
1CH 28:3 peru Kakaɨyari mɨpaɨ pɨnetiutahɨawixi: “Tuki 'ekɨ pepɨkanetsitawewirieni, 'ekɨtsɨ kuya yumemiwame pekanihɨkɨtɨni meyuwaɨkawame pekaniwarukwini”.
1CH 28:4 »Merikɨte Yawé 'Ixaheri Kakaɨyarieya, ne'iwama watsata pɨnetsi'anayexei 'Ixaheritsie munetsi'anukakenikɨ nemɨtita'aitakɨ yuheyemekɨ. Mɨkɨtsɨ Kura nuiwariyari kananayexeiya te'aitamete nuiwariyari memakɨnekɨ, mɨkɨ nuiwaritsie penayexei nenuiwari, meta ne'iwama watsata ne pɨnetsi'anayexei, 'Ixaheritsie ti'aitame nemayanikɨ.
1CH 28:5 Meta neniwema memɨyɨmɨire Yawé mɨnetsi'upitɨa watsata, neniwe Tsarumuni panayexei Yawé 'uwenieyatsie mayerɨnikɨ 'ixaheritsixi mɨtiwata'aitɨanikɨ.
1CH 28:6 Kakaɨyari mɨpaɨ pɨnetiutahɨawixɨ: “Tsarumuni 'aniwe kaniyɨanemɨkɨ tuki mɨtawewieni meta kuraruyari, ne nepenayexei neniwe pɨhɨkɨtɨni neta 'ukiyarieya nepɨhɨkɨtɨni.
1CH 28:7 Xɨka yatikamieni ne'inɨari niukiyaritsie meta kenemɨti'aita, hikɨ kemɨtikamie, hikɨ 'ana nepipitɨani yuheyemekɨ mɨti'aitanikɨ”.
1CH 28:8 »Kakaɨyari mɨtatsi'enie hɨxie, meta yunaitɨ 'ixaheritsixi Yawé teɨterimama xemɨhɨkɨ, nepɨxehɨritɨa yaxemɨtekahunikɨ naime 'inɨari niukiyaritsie Yawé takakaɨyari kemɨti'aita. Xɨka mɨpaɨ xetekakɨne 'ikɨ kwie witsimɨraku'anetsie xepu'uwani meta xeniwema wahetsiemieme payani yuheyemekɨ.
1CH 28:9 »'Ekɨ Tsarumuni neniwe kena'eriwani 'a'ukiyari Kakaɨyarieya. Meta kenayexeiyani naime 'a'iyarikɨ meta 'aixɨa 'anemekɨ 'a'eriwamekɨ. Karikɨ Yawé 'iyari kanixeiyani meta naime 'iyaritɨarika kanimaika. Xɨka pe'itiwauni, pɨmatsipitɨani pemitaxeiyakɨ, mexɨka pe'iku'eirieni yuheyemekɨ kamaniku'eirimɨkɨ.
1CH 28:10 Pepɨkaratɨtɨmaiyani Yawé kemɨmaranayexei tuki pemitawewirienikɨ muyepatsie mayanikɨ hetsiena mieme. 'Ayumieme keneyuwaɨriyani 'ari ketine'uximayaka».
1CH 28:11 Hikɨ Rawiri Tsarumuni kaniyetuirieni tuki 'inɨariyari kemɨtiwewierekekai meta kiite 'auriena mawetɨkatei, tatsɨari tuki kitenie hɨxie kii 'etsimɨpe mukuwewiere, kii mɨrewati'utsiwa, kii yuheima ma'u, kii kemuyepaɨmenikekai taɨtana, meta muyepatsie tɨratu kakuniyari kanamikiyari mɨwayuhayewatsie.
1CH 28:12 Meta kaniyetuirieni kemɨtiyɨnikekai Yawé tukieya takwayaritsie kemɨtiku'eriwakai, meta kii mawetɨka kemɨ'ayumiemetɨnikɨ, tumini tukita mieme hepaɨtsita meta hakewa mɨreti'utsiwani piinite mɨtipatsietɨka tukita timieme.
1CH 28:13 Metatsiere, kaniyetuirieni mawari wewiwamete meta rewitsixi kememɨte'uximayatakekai, meta piinite mɨtipatsietɨka muwa mɨtiyepikai kemɨ'ayumiemetɨnikekai Yawé tukita.
1CH 28:14 Yaxeikɨata, huru 'anayuhayewame kaniyetuirieni meta pɨrata mɨtitiwewiyanikɨ piinite tukita timieme xexuime 'uximayatsikatsie timieme.
1CH 28:15 Metatsiere kaniti'inɨatsirieni huru meta pɨrata kɨxeme 'uitɨwame mɨtiwewierekɨ meta kɨxemeya, kepaɨmetɨ mɨyɨnikekai hurukɨ mɨtiwewieri meta pɨratakɨ mɨtiwewiere, xexuitɨ hakewa mɨ'ayumiemetɨkai.
1CH 28:16 Metatsiere kaniti'inɨatsirieni huru meta pɨrata mexa paa maname hetsiemieme, huru mɨtiwiriyarieni hetsiemieme meta pɨrata mɨtiwiriyarieni.
1CH 28:17 Meta kaniyetuirieni huru 'aixɨa mɨ'ane, ti'itɨpiyame manuxɨte 'amupapa mɨtiwewiyanikɨ meta watsu 'amɨnene metatsiere xarite. Kaniti'inɨatsirieni 'aye'akame huru meta pɨrata xexuime tekɨxitetsie mieme kepaɨmetɨ mɨyɨnikekai huru meta pɨrata.
1CH 28:18 Mexa 'ɨkwa taiyame hetsiemieme kaniyetuirieni huru 'aixɨa mɨ'ane. Metatsiere kaniyetuirieni ke'anetɨ mɨtawewierekekai Yawé kaxetaya, tatsɨari Kakaɨyari teɨtametemama yu'anatekɨ Yawé tɨratuya kakuniyari memanukanakai.
1CH 28:19 Rawiri mɨpaɨ kaniutayɨni: «'Ikɨ tinaitɨ katinaka'utɨarieni Yawé yatiutahekɨataku, yanemɨretimanikɨ keti'anenetɨ mɨtitiwewiyani».
1CH 28:20 Meta mɨpaɨ Rawiri yuniwe Tsarumuni katiniutahɨawe: «Kenetɨrɨkaɨyeni meta ketinayu'iwani, hikɨri ketine'uximayaka. Pepɨkamaka meta pepɨkayuweranariyani, karikɨ Kakaɨyari Yawé, nekakaɨyari, 'ahamatɨa kaniuyeikamɨkɨ. Pɨkamatsiku'eirieni pɨkamatsinutuita kepaukake tuki pemɨnɨni.
1CH 28:21 Pepɨwarexeiya mawari wewiwamete meta rewitsixi memɨteta'uximayata Kakaɨyari tukieyata. Metatsiere pewarexeiyatɨ pepayani kemɨ'ane memɨyuwaɨriya yɨkɨmana waɨkawa memɨte'akumate tinaime 'uximayatsika hepaɨtsita. Nuiwarite memɨwanɨ'a meta yunaitɨ teɨteri mepɨmatsiparewieni».
1CH 29:1 Rawiri ti'aitame memɨyuxeɨriekai mɨpaɨ katiniwarutahɨawe: «Kakaɨyari neniwe Tsarumuni kananayexeiya, peru mɨkɨ 'akuxi pɨkarakumate 'uximayatsika pɨmariwe. 'Ikɨ tuki 'amɨpa tewi pɨkatipiinieya, matsi Kakaɨyari Yawé pɨta katinipiinieyatɨni.
1CH 29:2 Waɨkawamekɨ neyuwaɨriyatɨ nekatiniukuha'arita Kakaɨyari tukieya hetsiemieme. Piinite tukita timieme mɨtitiwewiyanikɨ nekatiniuxeɨrieni, huru, pɨrata, wurunitse, tepɨa, kɨyexi, meta waɨkawa 'unitse teteyari, tetexi 'ixurikitsie mɨkayatsarɨwa, tetexi mɨherɨkarietɨka witsimutiyɨtɨka, tetexi witsimɨ'anene yutsata meta waɨkawame marimuri teteyari.
1CH 29:3 Ketipaɨmeme nemɨtiukuxeɨriekai mɨkɨ nekati'inɨatatɨ, nekakaɨyari tukieya nenaki'erietɨ nepiyetuani tuki hetsiemieme naime huru meta pɨrata nemeixeiya:
1CH 29:4 xeitsienituyari miriyari kiruyari pɨrahetekai huru 'Upixi mieme, meta huta tsienituyari heimana xeitewiyari heimana tamamata miriyari kiruyari raheteme pɨrata 'aixɨa mɨ'ane, mɨkɨkɨ tuki muwakuwiriyarienikɨ,
1CH 29:5 piinite hurukɨ mɨtitiwewierekɨ meta pɨratakɨ, metatsiere tsepa tita memɨte'utiwewi tepɨakɨ te'uximayatamete. ¿Kemɨ'aneta hikɨ xeme 'imikieri pɨyetuani Yawé hetsiemieme?»
1CH 29:6 Hikɨ 'ukirawetsixi yutɨɨriyama memɨwareuxeiya, 'Ixaheri nuiwarimama memɨwanɨ'a, xeimiriyari kuyaxi memɨwanɨ'a meta xeitsienituyari kuyaxi memɨwanɨ'a metatsiere ti'aitame 'uximayatsikaya memɨhɨritɨariekai, mɨkɨ 'imikieri mekaniyetuani kememɨteheuyɨwawekai.
1CH 29:7 Mɨkɨ mekaniyetuani Kakaɨyari tukieya hetsiemieme mɨtitiwewiyanikɨ, xeitsienituyari heimana haika tewiyari heimana 'auxɨwi miriyari (165.000) kiruyari raheteme meta tamamata miriyari huru tuminiyari, haika tsienituyari heimana xeitewiyari heimana tamamata (330.000) kiruyari raheteme huru, 'ataxewi tsienituyari miriyari kiruyari raheteme wurunitse tepɨayari, meta haika miyuniyari heimana haika tsienituyari kiruyari raheteme tepɨa.
1CH 29:8 Kemɨ'ane tetexi memeixeiyakai witsimɨ'anene mekaniyetɨani Kehieri hetsɨa, mɨkɨ Keritsuni nuiwarieya pɨhɨkɨtɨkai, mekaniyetuani Yawé tukieyata mieme mɨrayanikɨ.
1CH 29:9 Hikɨ yunaitɨ kiekatari waɨkawa mekaniyutemamawiekaitɨni memɨyɨwawekaikɨ memiyetuani 'imikieri Yawé hetsiemieme, yaxeikɨa ti'aitame Rawiri waɨkawa kaniyutemawiekaitɨni.
1CH 29:10 Merikɨte Rawiri Yawé 'aixɨa katiniutahɨawe yunaime teɨteri wahɨxie, mɨpaɨ 'utaitɨ: «'Aixɨa peketikɨhɨawarɨwani Yawé, ta'ukiyari 'Ixaheri Kakaɨyarieya, yemekɨ yuheyemekɨ.
1CH 29:11 'Ekɨ Yawé katini'apinitɨni, kepemɨtimariwe meta kepemɨtitɨrɨkaɨye, witsikepemɨ'ane, kepemɨrayu'iwa meta kepemɨti'aitame. Naitɨ katini'apinitɨni ketipaɨmetɨ mɨtixuawe muyuawitsie meta kwiepa. Yaxeikɨata 'ekɨ xeikɨa pekatini'aitametɨni, 'ekɨ yunaime waheima pekatini'aitani.
1CH 29:12 'Ahetsɨa xikutɨriya payeneika meta 'aixɨa mɨti'ane, 'ekɨ yunaime pekatiniwa'aitɨaka. 'Ahetsie puxuawe tɨrɨkariya meta mɨyɨwenikɨ, meta 'ekɨ pepɨhɨkɨ mariweme pemɨrayeitɨani meta yunaime pemuwatɨrɨkariya.
1CH 29:13 'Ayumieme, takakaɨyari, pamɨpariyutsi tepɨmatsipitɨa, meta witsipemɨ'anetsie mieme 'aixɨa tepaitɨka.
1CH 29:14 »Peru, ne tixaɨtɨ nepɨkatihɨkɨ meta neteɨterima tixaɨtɨ mepɨkatehɨkɨ, tita meta 'imikieri temateyetuiri tixaɨtɨ pɨkatihɨkɨ. Yurikɨtsɨ 'ekɨ, tinaitɨ 'apiini katinihɨkɨtɨni, tame ketita temateyetuiri, mɨkɨ katinihɨkɨtɨni 'ekɨ pemɨtatiyetuiri.
1CH 29:15 'Ahɨxie tame, ku'uwamete tekanihɨkɨtɨni meta kɨkamete, ta'ukiyarima memɨ'anekai hepaɨ meripaitɨ. Tatukari 'ena kwiepa 'etɨri hepaɨ kani'aneni mɨkareutetere.
1CH 29:16 Yawé takakaɨyari, 'ikɨ naitɨ ketita temɨte'ukuxeɨri tuki temɨtawewienikɨ 'ahetsiemieme, 'ekɨ pepɨtatiupitɨa. Naitɨ pɨti'apiini.
1CH 29:17 Nekakaɨyari 'aku, ne nepɨtimate 'ekɨ 'iyarite pepɨxeiya kemɨtiku'eriwa meta pepinaki'erie tita mɨtiheitserie. 'Ayumieme ne'iyari heitseriekaku nematiyetuiri 'ikɨ naime piinite, meta nepɨwaruxei 'ateɨterima meyutemamawietɨ kememɨte'iyetua yumawari kememɨteyuwaɨriya.
1CH 29:18 Yawé, ta'ukiyarima wakakaɨyari 'Apɨrahami, 'Itsahaki meta 'Ixaheri, hikɨ hepaɨ meteyɨkɨhɨaweme keniwapitɨaka wa'iyaritsie yuheyemekɨ, mɨkɨ yu'iyaritsie memɨmatsiha'eriwanikɨ keniwapitɨaka.
1CH 29:19 Yaxeikɨata neniwe Tsarumuni keneupitɨa 'iyari 'aixɨa tiyɨkɨhɨaweme, yamɨtikamienikɨ meta yamɨtiyurienenikɨ 'a'aitsikatsie meta 'a'inɨari niukiyari naimetsie. Keneupitɨa tuki mɨtawewienikɨ hetsiena timieme nemɨtiukuha'aritaxɨ».
1CH 29:20 Hikɨ Rawiri yunaime teɨteri mɨpaɨ katiniwarutahɨawe: «Yawé xekenenɨawani yukakaɨyari». Hikɨ yunaitɨ teɨteri Yawé mekaniutanɨawa, yu'ukiyarima wakakaɨyari, meta Yawé hɨxie mekaniukahɨxima'uni metatsiere ti'aitame hɨxie.
1CH 29:21 Hikɨ 'uxa'arieka, Yawé mekaniyetuirieni waɨkawa mawari meta mawari taiyariyari, yunaime 'ixaheritsixi wahetsiemieme: xeimiriyari turutsixi temari, xeimiriyari muxatsi 'ukitsi meta xeimiriyari muxatsi 'etsimemɨpepe, winu mawariyari heutinɨtɨkaime, meta waɨkawa hipame mawari.
1CH 29:22 Mɨkɨ tukaritsie mepɨte'ukwai meta mepɨte'anu'i meyutemamawietɨ Yawé hɨxie. Hikɨ 'ana hutarieka teɨteri Tsarumuni ti'aitame mayanikɨ yamekaniutiyuani Rawiri nu'aya, Yawé hɨxie hatseiti mu'uyatsie mekanikawirieni ti'aitame mayanikɨ, meta Tsaruki mekaniukawirieni mawari wewiwame mayanikɨ.
1CH 29:23 Hikɨ Tsarumuni Yawé 'uwenieya hetsie kanayerɨni yu'ukiyari hetsiemieme Rawiri, hikɨ ti'aitakaku naitɨ 'aixɨa katiniuyɨni. Yunaitɨ 'ixaheritsixi yamekatenikahukaitɨni kemainekai.
1CH 29:24 Yunaitɨ 'ixaheritsixi wa'ukiyarima, kuyaxi waɨkawa memɨyɨwawe meta ti'aitame Rawiri niwemama yamekaniutiyuani 'aixɨa 'anemekɨ memiparewienikɨ ti'aitame Tsarumuni.
1CH 29:25 Yawé mariweme kanayeitɨani Tsarumuni naitsarie 'Ixaheri kwieyaritsie, meta kanipitɨani mɨti'aitanikɨ mariwemekɨ mariwatɨ, nixewitɨ mɨkareixeiyakai hepaɨ te'aitamete 'Ixaheritsie memanuka'ui.
1CH 29:26 Rawiri 'Itsahi nu'aya katiniuta'aita naitsarie 'Ixaheri kwieyaritsie.
1CH 29:27 Naimekɨ, pɨtiuta'aitaxɨ huta tewiyari wiyari 'Ixaheri kwieyaritsie: Hewuruni pukatei ti'aitatɨ 'atahuta wiyari, meta Kerutsareme 'ukaitɨ pɨtiuta'aitaxɨ xeitewiyari heimana tamamata heimana haika wiyari.
1CH 29:28 Hikɨ kaniumɨni waɨkawa 'ukiratsitɨtɨri, 'aixɨa raniuwakaku hetsiena mieme meta waɨkawa xikutɨtɨ, nu'aya Tsarumuni hetsiena mieme katiniuta'aita.
1CH 29:29 Naime Rawiri kemɨtiuyuri, mɨtiutsutɨatsie meta 'imatɨrieka kemɨtiuyuri, kemɨtiuta'aitaxɨ kemɨtitɨrɨkaɨyekai, meta kemɨtiyuri, 'Ixaheri kwieyaritsie kemɨtiuyɨ meta kiekari 'auriena mamanetɨkatsie, naitɨ katinaka'utɨarieni kemɨtiuyɨ xapayaritetsie mɨtaniere Tsamuheri meka'utɨatsie, Kakaɨyari niukameya Natani meka'utɨatsie meta mɨtaniere Kahari meka'utɨatsie.
2CH 1:1 Merikɨtsɨ Tsarumuni Rawiri nu'aya mɨra'aita tɨrɨkaɨyetɨ kanayani, Yawé Kakaɨyarieya hamatɨana muyeikakaikɨ meta waɨkawa tɨrɨkaɨyeme kanayeitɨani.
2CH 1:2 Hikɨ Tsarumuni yunaime 'ixaheritsixi teɨteriyari kaniwarutahɨawe, 'ikɨ xeimiriyari meta xeitsienituyari kuyaxi tewa'aitɨwamete metatsiere kuwexinaruritsixi, meta yunaime 'Ixaheri nuiwarimama wa'ukiyarima.
2CH 1:3 Hikɨ mɨkɨ meta yunaitɨ memeweiyakai mekaniyukuxeɨrieni tukita Kawahuni mɨrakutewatsie, muwa Kakaɨyari mekaniutahɨawekaitɨni, Muitsexi Yawé ti'uximayatsiriwame, makumawetsie 'ixuriki tukiyari Kakaɨyari hetsiemieme mitawewiekai.
2CH 1:4 Kerutsareme kiekariyaritsie Kakaɨyari tɨratuya kakuniyari kaniukateitɨni, Rawiri mana pi'atɨakai Kiriati-Yeharini paitɨ kepauka meiyetɨtsie,
2CH 1:5 peru mawari taiyame wurunitse tepɨayarikɨ mɨwewiya Wetsareri mitawewi, 'Urihi nu'aya meta Kuxi teukarieya, Kawahuni paitɨ kanewekaitɨni, Yawé tukieya hɨxie. 'Ayumieme Tsarumuni meta 'ixaheritsixi mana mekanekɨne Yawé mehetahɨaweke.
2CH 1:6 Mana Tsarumuni Yawé hɨxie, mana mawari taiyame hɨxie 'uyaka 'ixuriki tukiyari manuwe, hetsiena xeimiriyari mawari taiyariyari kaniuwewieni.
2CH 1:7 Hikɨ mɨkɨ tɨkaritsie Kakaɨyari Tsarumuni hɨxie kaniuyuhekɨata mɨpaɨ katinitahɨawe: —Tita pemɨreuyehɨwa kenetineutawawiri.
2CH 1:8 Mɨpaɨ Tsarumuni katinita'eiya: —'Ekɨ ne'ukiyari Rawiri pe'inaki'erietɨ 'aixɨa pepɨtixeiyakai, hikɨta ne hetsiena mieme nemɨtita'aitakɨ pepɨnetsi'anayexei.
2CH 1:9 Yawé meta Kakaɨyari, ne'ukiyari Rawiri kepemɨtiutahɨawixi kenaye'atɨa, 'ekɨtsɨ ti'aitame pekanenayeitɨani teɨteri memɨyumɨire wahetsiemieme tumuanari kwiepa mieme hepaɨ.
2CH 1:10 Ne nepɨmatsiwawirie nemɨtimaiwenikɨ meta nemɨreutamaiwenikɨ nemɨtiwata'aitɨanikɨ 'ikɨ 'ateɨterima memɨyumɨire, xɨka mɨpaɨ pekanetiupitɨani, ¿kemɨ'ane pɨyɨwe mɨtiwata'aitɨani?
2CH 1:11 Hikɨ Kakaɨyari Tsarumuni mɨpaɨ katiniutahɨawe: —Metsɨ pekaneniwawirieka pemɨtimaiwenikɨ meta pemɨrakumaikakɨ para neteɨterima pemɨtiwata'aitɨanikɨ, wahetsiemieme ti'aitame nemɨmatsi'ayeitɨa, peru 'atsipepɨkahaine pemɨxikutɨnikɨ, pemɨrexeiyanikɨ meta pemɨmariwanikɨ, memɨmatsi'aye'unie memɨkwinikɨ meta tukari waɨkawa pemexeiyanikɨ 'atsipepɨkahaine,
2CH 1:12 ne nepɨmatiyetuirieni. Peru nekamanipitɨamɨkɨta pemɨxikutɨnikɨ, pemɨrexeiyanikɨ meta pemɨmariwanikɨ, meripaitɨ te'aitamete kenemɨkatiwarupitɨa meta nixewitɨ 'a'utɨma memanuka'uni mɨpaɨ mepɨkayɨni.
2CH 1:13 Hikɨ 'arike Tsarumuni 'ixuriki tukiyari manuwe Kawahuni mɨrakutewatsie 'akaneka kanayeyani Kerutsareme kaneyani, mana 'ukaitɨ katiniuta'aita naime 'Ixaheri kwieyaritsie.
2CH 1:14 Kawayutsixi Tsarumuni waɨkawa warexeiyatɨ patɨa meta kaxetate kuyaxa miemete: xeimiriyari heimana nauka tsienituyari (1.400) meyupaɨmeme pɨwarexeiyakai kaxetate, meta kawayutsixi tamamata heimana huta miriyari (12.000) mepɨyupaɨmekai, mɨkɨ kawayutsixi kaxetate kuyaxa mieme muwa'utɨ mepɨye'ɨnekai meta hipatɨ Kerutsareme paitɨ yuparatsiyu 'aurie pɨwaye'ɨnakai.
2CH 1:15 Kerutsareme kiekariyaritsie ti'aitame pɨrata meta huru kwinimieme paɨmeme pexeiyakai tetexi kemɨti'ane hepaɨ, meta kariuxa kɨyeyari waɨkawame pexeiyakai piní makuweri mieme hepaɨ.
2CH 1:16 Tsarumuni kawayutsiximama 'Ekipitu kwieyaritsie mepɨnanaiyakatetɨkai meta Kuha, mana paitɨ ti'aitame tetuayametemama mepɨwatinawekai.
2CH 1:17 Kaxeta kuyaxa mieme 'Ekipitu kwieyaritsie nanaiyakame pɨraye'akai 'ataxewime tsienituyari pɨrata tuminiyari, yuxewitɨ kawayu paye'akai xeitsienituyari heimana huta tewiyari heimana tamamata. 'Ikɨ kaxetate kuyaxa miemete meta kawayutsixi yunaime te'aitamete hetitsixi meta tsiriyutsixi 'arike mepɨwatuiriekaita.
2CH 2:1 Merikɨtsɨ Tsarumuni yakaniutayɨni yuparatsiyu mɨtawewienikɨ meta tuki Yawé hetsiemieme.
2CH 2:2 Hikɨ te'ikatamete kaniwaru'uitɨani haika tewiyari heimana tamamata miriyari, meta nauka tewiyari miriyari tetexi xixiwamete memɨteta'uximayatakɨ hɨritsie. Pɨwaru'uitɨata haika miriyari heimana 'ataxewi tsienituyari te'uximayatamete tewa'aitɨwamete.
2CH 2:3 Hikɨ Tsarumuni 'ikɨ niuki Hirami Tirutsie ti'aitame kanenɨ'airieni: «Kenenanɨ'airi kariuxa kɨyeyari, ne'ukiyari Rawiri kepemɨreyenɨ'airi hepaɨ paratsiyu mɨtawewienikɨ.
2CH 2:4 Ne tuki Yawé takakaɨyari hetsɨa mieme nekanitawewimɨkɨ. Hetsiena mieme patsiekame nepayeitɨani, muwa 'ɨkwa witsimu'ɨa nemɨtitaiyanikɨ, meta paa mɨpatsie yanepɨremaniriwani, mawari taiyariyari ximeri meta taikai nepitiwewiriwani, mawari xawatikɨmieme meta metseri manatiwenitsie mieme, meta hipame 'ixɨarari Yawé takakaɨyari hetsiemieme. 'Ikɨ 'Ixaheri kwieyaritsie yuheyemekɨ mɨpaɨ mepɨteyurieka.
2CH 2:5 »Tuki nekanitawewimɨkɨ mariwekame, matsi takakaɨyari kanimariweni keyuri kakaɨyarixi.
2CH 2:6 Perutsɨ, ¿tete'itawewirieni tuki, matsitɨtɨ muyuawi tsepa kemeutitewa hetsiena mieme 'etsipɨyewa? Ne tsepa tixaɨtɨ nemɨkatihɨkɨ, tuki nepitawewirieni muwa 'ɨkwa mɨtitaiyarɨwanikɨ hetsiena mieme.
2CH 2:7 »Xeime kenenanɨ'airi ti'uximayatame rakumaikame hurukɨ, pɨratakɨ, wurunitsekɨ, tepɨakɨ, 'ixuriki kwimɨxeta, mɨxeta meta mɨyɨtsikimaɨyekɨ, mɨreutaxixiwe naimekɨ, mɨtita'uximayatakɨ 'ena kiekatari memɨteheutamate nemɨwarexeiya wahamatɨa Kura kwieyaritsie meta Kerutsareme, ne'ukiyari Rawiri meripaitɨ mɨwaruta'iniekai.
2CH 2:8 »Kenenanɨ'airi Riwanu mieme kariuxa kɨyeyari meta huku kwinimieme mɨraye'atɨka kɨyeyari, ne nepɨtimate te'a'uximayatamete mepɨte'akumate 'ikɨ kɨyexi witeyarikɨ. Neteɨterima meta 'ateɨterima yunaitɨ mekatenita'uximayatakuni,
2CH 2:9 kɨyexi waɨkawa memɨkuxeɨrienikɨ, tuki nemɨtawewieni 'apatɨ kanayeimɨkɨ mariwetɨ.
2CH 2:10 Te'a'uximayatsiriwamete kɨyexi memɨtiwiteni nekaniwayetuiriemɨkɨ xeitewiyari miriyari tɨriku 'ikayari, xeitewiyari miriyari tsewara 'ikayari, kaxie winuyari nauka tsienituyari heimana huta tewiyari miriyari rituruyari meta yaxeikɨa paɨmeme rituruyari huriwa hatseitiyari».
2CH 2:11 Hikɨ Hirami Tiru kwieyaritsie ti'aitame, Tsarumuni kaniuta'eiya xapa kaneinɨ'airieni mɨpaɨ 'ayetaineme: «Yawé ti'aitame kamenayeitɨani yuteɨterima wahetsiemieme, waɨkawa matsinaki'erietɨ.
2CH 2:12 Yawé 'aixɨa ketikuxaxatsiwani, 'Ixaheri Kakaɨyarieya, kwie meta taheima muyema muyuawi mutawewi, ti'aitame Rawiri mupitɨa yuniwe mayexeiyakɨ, timaiweme meta reutamaiweme, mɨkɨ kanitawewimɨkɨ paratsiyu 'amɨpa meta Yawé tukieya.
2CH 2:13 »Kamɨtsɨ Hirami-'Awihi nepɨmatsi'anunɨ'airieni, mɨtimaiwe meta mɨreutamaiwe,
2CH 2:14 maamaya Rani xiɨyarieya pɨhɨkɨ meta 'ukiyarieya Tiru pɨkiekame. Mɨkɨ katineuta'uximayataweni, hurukɨ meta pɨratakɨ, wurunitsekɨ meta tepɨakɨ, tetetsie meta kɨyetsie, meta 'ixuriki kwimɨxetakɨ meta mɨyɨtsikimaɨyekɨ, rinu 'ixurikiyarikɨ meta 'ixuriki mɨxetakɨ, meta naime katineutaxixiweni meta tsepa kemɨtiu'aitɨarie kaniyɨweni. Hirami katinita'uximayatamɨkɨ 'ateɨterima memɨtemate wahamatɨa meta Rawiri 'a'ukiyari meta neti'atɨwame mɨwaranayexei wahamatɨa.
2CH 2:15 »Hikɨ ketananɨ'airi tɨriku, tsewara, huriwa hatseitiyari meta kaxie winuyari pemɨtatsi'utaxatɨa neti'aitɨwame.
2CH 2:16 Tame hɨritsie Riwanu mieme kɨyexi tepɨtiwiteni kepaɨmeme pemeuyehɨwa, te'itihɨame waɨkakawame tepenuhautsitɨani haramaratsie Kupe paitɨ. 'Ekɨtari mana pekatinita'aitamɨkɨ Kerutsareme paitɨ manutɨkienikɨ».
2CH 2:17 Tsarumuni 'Ixaheri kwieyaritsie memɨtitekai tewa kiekatari yunaime kaniwaruti'inɨata. Meripaitɨri Rawiri pɨwaruti'inɨatakai, hikɨta 'ikɨ mepakɨ xeitsienituyari heimana huta tewiyari heimana tamamata heimana haika miriyari heimana 'ataxewi tsienituyari (153.600).
2CH 2:18 Te'ikatamete kaniwarayeitɨani haika tewiyari heimana tamamata miriyari (70.000) meyupaɨmeme, tetexi xixiwamete hɨritsie memu'uwani kaniwarayeitɨani nauka tewiyari miriyari (80.000) meyupaɨmeme, meta te'uximayatamete tewa'aitɨwamete kaniwarayeitɨani haika miriyari heimana 'ataxewi tsienituyari meyupaɨmeme (3.600).
2CH 3:1 Hikɨ kanitsutɨani Tsarumuni Yawé tukieya wewienetɨ Muriya yemuriyaritsie Kerutsareme kiekariyaritsie, hakewa Yawé meyuhekɨataxɨ 'ukiyarieya Rawiri hɨxie. Mana kanitawewieni hakewa Rawiri metaxatakai, 'Arahuna maka'etsakaitsie, kewutseu tewiyari.
2CH 3:2 'Uximayatsika kaniutsutɨani nauka wiyari ti'aitatɨ meta hutarieka metseritsie meta hutarieka tukariyaritsie.
2CH 3:3 'Ikɨ 'inɨari Tsarumuni miyetɨa kanihɨkɨtɨni Kakaɨyari tukieya tsutɨmeyari hetsiemieme, 'emeutatewatsie xeitewiyari heimana 'atahuta meturuyari pexeiyakai, 'etsimauyewatsie 'atanauka meturuyari pexeiyakai.
2CH 3:4 Tuki hɨxie kii meukumɨakai kitenietsie yaxeikɨa pɨtewikai tuki 'etsimauyewatsie kematayeukai, tatsɨari, 'atanauka meturuyari tewitɨ meta 'atanauka meturuyari heutitewatɨ. Taɨtanatsie huru mɨhɨkɨakɨ pɨwakuwiri Tsarumuni.
2CH 3:5 Tukita 'amuyeyewatsie huku mɨraye'axe mexayari kaniwakumana, mɨkɨtsie takɨ 'ɨkiyari kaniwaku'utɨani meta huru tepɨayari 'aixɨa mɨ'ane kaunariyari.
2CH 3:6 Tuki witsikaniuta'itɨarieni tetexi witsimɨ'anenekɨ meta huru Pariwahini kwieyaritsie miemekɨ.
2CH 3:7 Tuki taɨta pikaxite manuyehe huru kanitiwirieni, meta kitenie manuyehe, tuki 'ixumeriyari, meta 'ituparite, meta tuki 'ixumeriyaritsie kaniwarawewiexɨani Kakaɨyari teɨtametemama.
2CH 3:8 Tsarumuni Waɨkawa Muyepatsie kaniutawewieni, yaxeikɨa paɨmeme pexeiyatɨkatei tuki kematayeukai, 'ipaɨ paɨmeme pexeiyakai, 'atanauka meturuyari tewitɨ, yaxeikɨata 'atayeutɨ. Taɨtanatsie huru muhɨkɨakɨ kaniwakuwirieni, xeitewiyari heimana haika miriyari kiruyarikɨ.
2CH 3:9 Huru kɨrapuxiyari xexuitɨ meriyu kiruyari pɨrahetekai. Yaxeikɨata kii wapaitɨ muyewaɨkawa huru kaniuyewiriexɨani.
2CH 3:10 Waɨkawa Muyepatsietsie Kakaɨyari teɨtametemama yuhutatɨ memɨtiwewiyanikɨ katiniuta'aita, meta huru kaniwarukawirieni.
2CH 3:11 Kakaɨyari teɨtametemama yuhutatɨ yu'anate metatseratɨkaitɨ 'atanauka meturuyari mepatayeukai. Yuxewitɨ Kakaɨyari teɨtameya 'anateya xexuitɨ huta meturuyari heimana xeitewiyari heimana 'auxɨwi tsenitimeturuyari pexeiyatɨkatei, xewitɨ 'anaya tuki 'ixumeriyaritsie peuta'axekai, xeimekɨta hutarieka mieme Kakaɨyari teɨtameya 'anayatsie peuta'axeikai.
2CH 3:12 Kakaɨyari teɨtameya hutarieka mieme mɨkɨtatsiere 'anateya xexuitɨ huta meturuyari heimana xeitewiyari heimana 'auxɨwi tsenitimeturuyari pexeiyatɨkatei, xewitɨ 'anaya tuki 'ixumeriyaritsie peuta'axeikai, xeimekɨta matɨari mieme Kakaɨyari teɨtameya 'anayatsie peuta'axekai.
2CH 3:13 Kakaɨyari teɨtametemama mepɨti'ukai heitserie meheutanenieretɨ tukita, yunaitɨ yu'anate metaweratɨkaitɨ 'atanauka meturuyari mepatayeukai.
2CH 3:14 'Ixuriki 'amayetsuye tukita meuwiere putawewi 'ixuriki mɨyɨtsikimaɨyekɨ, mɨxeta, kwimɨxeta, meta rinu 'ixurikiyarikɨ, meta mɨkɨtsie katiniuta'aita Kakaɨyari teɨtametemama memaxuiyaxɨanikɨ.
2CH 3:15 Tuki hɨxie tuxiyu hutame kaniuti'aita tamamata heimana 'ataxewi meturuyari 'utɨtɨme, meta mu'uteya menuyatsatɨkatei huta meturuyari tawari heimana 'etsiwa kaniutɨtɨkaitɨni,
2CH 3:16 metatsiere tepɨa kaunariyari tsariekame kaniuta'aita, tuxiyu 'emeutitewatsie kanenakuwɨtɨani, meta kɨranara manitsana hepaɨ mɨ'anene 'ɨkiyari kaniuti'aita xeitsienituyari paɨmeme, tepɨa kaunariyari hetsie kaneiyatsaxɨani.
2CH 3:17 Tuki hɨxie tuxiyu kaniti'uitɨani, xeime 'utatana xeimeta tserietana tayeta hepatsie. Matɨari mieme Kakini katiniterɨwa, hutarieka mieme Wuhatsi.
2CH 4:1 Hikɨ Tsarumuni mawari taiyame xeime kaniutawewieni wurunitse tepɨayarikɨ, 'atanauka meturuyari tewime meta 'atanauka meturuyari 'atayeume meta nauka meturuyari heimana 'imeriyu heutitewame.
2CH 4:2 Meta katsu 'emɨyewa haa makatuare kaniutawewieni tepɨa kwaxiyariekamekɨ xikɨraɨyeme, nauka meturuyari heimana 'imeriyu 'anutatewame, meta huta meturuyari heimana xeitewiyari heimana 'auxɨwi tsenitimeturuyari heutitewame. Meta tamamata haika meturuyari heimana 'imeriyu pɨyeukai.
2CH 4:3 Tenimeyari hetɨa huta xurukuyari tuurutsixi puwarata'utɨa, xeimeturuyaritsie xeitewiyari meyupaɨmetɨ mepa'utɨkatei, mɨkɨ yunaitɨ katsu matɨa mepɨyuxewiriyakai.
2CH 4:4 Katsu 'emɨyewa tamamata heimana huta tuurutsixi wurunitsekɨ memɨwewiyatɨka wahetsie puyemakai, hetɨana mepeutakɨkɨtsakai, yuhaikatɨ tuurutsixi tayeta mepeutinenierekai, yuhaikatɨta tau makayuyuipike hepatsie, yuhaikatɨta tatsutɨa hepatsie, meta yuhaikatɨta tau manatineika hepatsie.
2CH 4:5 Katsu haa makamare 'atahaika tsenitimeturuyari pɨtsuikai, meta tenimeyari ye'ɨ tenimeyari hepaɨ kani'anekaitɨni meta tuturi mɨtaxutuiximeni hepaɨ pɨtiyuxexeiyakai. Mɨkɨtsie haika tewiyari heimana 'ataxewi miriyari rituruyari haa pɨrakanakekai.
2CH 4:6 Yaxeikɨata Tsarumuni tamamata katsu 'itsimɨyeyeu kaniutiwewieni, ta'utata 'auxɨwime kaniuti'uitɨani meta tatserieta yaxeikɨa paɨmeme. Para naitɨ mawari taiyametsie timieme mana mɨtitihauxinarɨwanikɨ, peru mawari wewiwamete katsu 'emɨyewatsie mepɨyutihauxinakai.
2CH 4:7 Meta tamamata kɨxeme 'uitɨwame kaniutiwewieni hurukɨ wewiyatɨkaime, hikɨ tukita kaneita'uitɨani, 'auxɨwime ta'utata meta 'auxɨwime tatserieta.
2CH 4:8 Metatsiere Tsarumuni mexa kaniutiwewieni tamamata paɨmeme tukita kaneita'uitɨani, ta'utatatsie 'auxɨwime kaniti'uitɨani meta tatserieta 'auxɨwime. Meta tukita mieme xakɨrɨte xuriya kwekwewiwame xeitsienituyari kaniutiwewieni hurukɨ.
2CH 4:9 Mawari wewiwamete watakwa putawewi, meta takwa 'amakuyewa 'itupari hexeiyatɨkaime, mɨkɨ wurunitse tepɨayari pɨwiriyarietɨkatei.
2CH 4:10 Katsu 'emɨyewa wurunitsekɨ mɨwewiya tuki hɨxie tserietanatsie kanitikeni, tatsutɨa hepatsie.
2CH 4:11 Yaxeikɨata xarite, tepɨa 'amɨtɨtɨ naxi tutuweme, meta xakɨrɨte xuriya kwekwewiwame katiniutiwewieni. Hikɨ Hirami mɨpaɨ katiniutinɨni tinaime, Kakaɨyari tukieyata timieme mɨrayanikɨ Tsarumuni kemɨtita'aitɨakai, tatsɨari:
2CH 4:12 Hutame wurunitse tuxiyuyari, hutame tuxiyu mu'uteya tuturi hepaɨ tiyuxexeiyame, wurunitse wipiyari muhuta tuxiyu mu'uteya hetsiemieme,
2CH 4:13 nauka tsienituyari kɨranara manitsana hepaɨ mɨ'anene 'ɨkiyari huta xurukuyari manukutetɨkatei xexuime wipitsie,
2CH 4:14 kaxetate meta katsu yakɨ mɨyeyeu tihauxinamete,
2CH 4:15 katsu 'emɨyewa haa makamare meta tuurutsixi tamamata heimana huta memituika,
2CH 4:16 xarite, tepɨa 'amɨtɨtɨ naxi tutuweme, meta tepɨa 'amɨtɨtɨ manuxɨte. Hirami-'Awi 'ikɨ mɨyamɨtipaɨme Tsarumuni mɨtiutiwewiri Yawé tukieya hetsie timieme mɨrayanikɨ naitɨ wurunitse tepɨayarikɨ mɨxawatɨkɨ pɨtiwewiyatɨkatei.
2CH 4:17 Ti'aitame katiniuta'aita Kurutani mayeweritsie mɨtitiwewiyanikɨ kwiepa 'inɨarita mɨtitixeriyarienikɨ, Tsukuti mɨrakutewatsie meta Tsaretani wahixɨapa.
2CH 4:18 Piinite wurunitsekɨ mɨtiutiwewiya pɨtimɨirekai Tsarumuni mɨtiuta'ai, 'ayumieme naitɨ kemɨrahetekai wurunitse pɨka'uyɨwekaxɨa mi'inɨatakɨ kepaɨmetɨ muyɨ.
2CH 4:19 Metatsiere Tsarumuni katiniuta'aita hipameta piinite Kakaɨyari tukieyata timieme: 'ɨkwa taiyame hurukɨ mɨwewiya, mexate paa manamarike Yawé hetsiemieme,
2CH 4:20 kɨxeme 'uitɨwamete huru mɨhɨkɨakɨ muwewiyatɨka meta kɨxeme hetsiena muyeyaxe, mutitaiyarɨwanikɨ Waɨkawa Muyepatsie hɨxie, yemekɨ meripaitɨ kemɨraka'utsiekai,
2CH 4:21 tuturi hurukɨ mɨwewiyatɨka, kɨxemete, meta 'itɨ manuxɨte 'amɨpa, mɨkɨta naitɨ huru mɨhɨkɨakɨ pɨtiwewiyatɨkatei,
2CH 4:22 tixikamete, xakɨrɨte xuriya kwekwewiwame, xari 'emɨnena meta 'ɨkwa taiyame 'etsimɨpepe, tukita mɨreutahakitɨretsie, tatsɨari, Waɨkawa Muyepatsie 'itupariyarite meta 'ituparite Muyepatsietsie meuwɨkai, mɨkɨta huru pɨkawiriyarietɨkatei.
2CH 5:1 Hikɨ kepauka mɨtiutinɨrie naitɨ mɨtiuta'aitakai Yawé tukieya hetsie timieme, 'ana Tsarumuni pɨtiuta'aitaxɨ mɨti'atɨarienikɨ huru, pɨrata, meta naime piinite 'ukiyarieya Rawiri Yawé mɨtiyetuiriekai, hikɨ katiniuti'uta Kakaɨyari tukita waɨkawa mɨraye'atɨka mɨtiuyepinetsie.
2CH 5:2 Hikɨ Tsarumuni katiniwarutanɨ'airieni 'ukirawetsixi 'ixaheritsixi meta yunaime yunuiwari hetsiemieme memanuyetei, meta 'ixaheritsixi wa'ukiyarima, memɨyukuxeɨrienikɨ Kerutsareme, kakuni tɨratu 'inɨariyari Yawé hetsiemieme memanukwenikɨ, Rawiri kiekariena memiyekwenikɨ, Tsiyuni mɨrakutewatɨtɨ, tukita memeitatenikɨ.
2CH 5:3 Hikɨ 'atahutarieka metseriyari 'ixɨarariyaritsie, 'ana yunaitɨ 'ixaheritsixi mekaniuyukuxeɨrieni ti'aitame hɨxie.
2CH 5:4 Hikɨ kepauka memu'axɨa yunaitɨ 'ukirawetsixi 'ixaheritsixi, 'ana rewitsixi tɨratu kakuniyari mekaniutikweni.
2CH 5:5 Mawari wewiwamete meta rewitsixi mekaneikweni metatsiere 'ixuriki tukiyari meta tinaime muwa mɨtiyepikai mɨtipatsietɨka mekatenetɨni.
2CH 5:6 Ti'aitame Tsarumuni meta hamatɨana 'ixaheritsixi memɨyuxeɨriekai mana tɨratu kakuniyari hɨxie mekaniwarutimawa muxatsi meta tuurutsixi meyumɨireme mɨwaruti'inɨata pɨkayɨwekai.
2CH 5:7 Hikɨ mawari wewiwamete mekaneikweni tɨratu kakuniyari Yawé tukita mutanieretsie, Waɨkawa Muyepatsietsie, muwa Kakaɨyari teɨtametemama wa'anate hetɨa mekaniteni.
2CH 5:8 Mɨkɨ Kakaɨyari teɨtametemama yu'anate metaweratɨkaitɨ mutanieretsie, kakuni mepanukanakai meta kɨyexi kɨmana mɨkukweiyane.
2CH 5:9 Kɨyexi 'ikwekweweme 'apɨtɨkai kakuni hetsiemieme kɨtsimeyarite puyuhekɨakai Waɨkawa Muyepatsie hɨxie, takwa paitɨ pɨkayuhekɨakai, hikɨ 'akuxi yaxeikɨa pɨre'ane.
2CH 5:10 Mɨkɨ kakunitsie tetexi hutatɨ pɨyemanekai Muitsexi mana meikamanaxɨ Huré mɨrakutewatsie, Yawé tɨratu muwewitsie 'ixaheritsixi wahamatɨa 'Ekipitu me'ayekɨneku.
2CH 5:11 Mawari wewiwamete tuki Muyepatsieta mekaniwayekɨne. Yunaitɨ mawari wewiwamete mana memu'uwakai mekaniuyu'itiekaitɨni, memɨte'uximayakai meta memɨkate'uximayakai.
2CH 5:12 Yunaitɨ kwikamete rewitsixi —tatsɨari, 'Atsahapi, Hemani, Kerutuni, waniwema meta wa'iwama— mawari taiyame 'aurie mekaniti'ukaitɨni tau manatineika hepatsie, rinu kamixayari mehanakatɨtɨkaitɨ meta xakɨ mutitiraurɨka me'u'ɨtɨ, 'aripa meta kanarite me'u'ɨtɨ. Wa'aurie mepɨti'ukai mawari wewiwamete xeitsienituyari heimana xeitewiyari meyupaɨmetɨ kuxineta me'utihɨtsiwatɨ.
2CH 5:13 Kuxinetakɨ teyuitɨwamete meta kwikamete Yawé mekaninɨawakaitɨni meta pamɨpariyutsi mekanipitɨakaitɨni kuxinetakɨ meteyuitɨatɨ, tepɨa mutitiraurɨkakɨ meta hipame kanaritekɨ. Kepauka memutikwikaxɨ mete'ukayuitɨwatɨ yunaitɨ mɨpaɨ mete'ukwitɨ: «Yawé 'aixɨa pɨtiuka'iyari, naki'eriyaya hawaikɨ pɨkaheu'axe», 'ana haiwitɨri Yawé tukieya panukana.
2CH 5:14 Muyehaiwitɨriyakaikɨ mawari wewiwamete mepɨka'uyɨwekaxɨa memiyeweiyanikɨ mete'uximayatɨ, tukita Yawé xawatɨriyaya witsi'anetɨ mɨhɨnekaikɨ.
2CH 6:1 Hikɨ Tsarumuni mɨpaɨ kaniutayɨni: «Yawé, 'ekɨ mɨpaɨ peputayɨ kename yɨriya haiwitɨriyaritsie pe'uyeikani,
2CH 6:2 ne matsi tuki witsi'aneme nepɨmatsi'utawewiri, muwa pemayekanikɨ 'aheyemekɨ».
2CH 6:3 Hikɨ Tsarumuni ta'aurie kanaweni teɨteri wahepa Kakaɨyari tawawirienike 'aixɨa mɨwayurienikɨ yunaime 'ixaheritsixi mana memɨti'ukai,
2CH 6:4 mɨpaɨ kaniutayɨni: «'Aixɨa ke'itɨarieka Yawé 'ixaheritsixi takakaɨyari, mɨkɨ hikɨ yutɨrɨkariyakɨ pɨraye'atɨa ne'ukiyari Rawiri kemɨtiutahɨawixɨ mɨpaɨ 'utaitɨ:
2CH 6:5 “Kepauka 'Ekipitu kwieyaritsie nemɨwarayewitɨtsie paitɨtɨ neteɨterima 'ixaheritsixi, ne xeime kiekari nepɨka'anayexei 'Ixaheri nuiwarimama watsata mana nemɨtawewiyarienikɨ tuki hakewa nemayekanikɨ, meta xeime tɨma nepɨka'anayexei mɨtiwata'aitɨanikɨ 'ixaheritsixi teɨteriyari.
2CH 6:6 Matsi, Kerutsareme nepanayexei mana nemukanikɨ, meta Rawiri nepanayexei neteɨterima 'ixaheritsixi mɨtiwata'aitɨanikɨ”.
2CH 6:7 »Merikɨte, ne'ukiyari Rawiri waɨkawa pɨyuwaɨriyakai mitawewienikɨ tuki Yawé hetsiemieme, 'ixaheritsixi takakaɨyari,
2CH 6:8 peru Yawé mɨpaɨ pɨtitahɨawixɨ: “Nehepaɨtsita 'aixɨa pɨ'ane pemɨ'awaɨriyakɨ tuki nehetsiemieme pemɨwewimɨkɨkɨ.
2CH 6:9 Peru, 'ekɨ pepɨkahɨkɨtɨni pemɨnetsitawewirieni, 'aniwe pɨta 'ahetsie mɨyeyani pɨtiyurieni, mɨkɨ tuki pɨtawewieni nehetsiemieme”.
2CH 6:10 »Hikɨri Yawé katinaye'atɨani kemutayɨ: Yemekɨ kemutayɨkai, hikɨ ne nekananukakeni ne'ukiyari Rawiri 'utɨma nemɨtita'aitakɨ 'Ixaheri kwieyaritsie, meta tuki nekaniutawewieni Yawé hetsiemieme, 'ixaheritsixi takakaɨyari.
2CH 6:11 Muwa kakuni nekaneutateni, tɨratu maye'uxa mayemane Yawé miwewi 'ixaheritsixi wahamatɨa».
2CH 6:12 Hikɨ meta, Tsarumuni mawari taiyame Yawé hetsiemieme hɨxie kaniutakeni, meta yunaime 'ixaheritsixi memɨyuxeɨriekai wahɨxie, yumamate teikɨ kanetseraxɨani.
2CH 6:13 Mana pita'aitakai mɨtawewiyanikɨ takwa hixɨapa wapaitɨ kekame wurunitsekɨ wewiyakame, yaxeikɨa heutatetewame huta meturuyari heimana xeitewiyari heimana 'auxɨwi tsenitimeturuyari, meta xeimeturuyari heimana xeitewiyari heimana tamamata heimana 'auxɨwi tsenitimeturuyari heutitewame. Mana wapaitɨ, kaniukatunumakeni hikɨ yuheima hemetɨ muyuawitsie,
2CH 6:14 mɨpaɨ katiniuyunenewieni: «Yawé, 'ixaheritsixi takakaɨyari, xewitɨta Kakaɨyari 'apɨka'uyeika 'ahepaɨ 'anetɨ muyuawitsie meta kwiepa, 'ekɨtsɨ 'atɨratu pekanaye'atɨwani meta pekaniwanenimayaka yuheyemekɨ kemɨ'ane memɨmate'uximayatsirie meta yu'iyarikɨ memɨmatsi'uweiya.
2CH 6:15 Yapepɨtiuyuri 'ari nepaapa Rawiri matsiparewiwame kepemɨtiutahɨawixɨ, 'ikɨ tukaritsie 'atɨrɨkariyakɨ pepɨraye'atɨa kepemutayɨ 'aniukikɨ.
2CH 6:16 »Hikɨta, Yawé, 'ixaheritsixi takakaɨyari, yaxeikɨata kenaye'atɨa ne'ukiyari Rawiri 'ipaɨ kepemɨtitahɨawixɨ: “Xɨka 'aniwema 'aixɨa metekahuni, xɨka yamete'u'uwani ne'aitsikate kemaine 'ekɨ kepemɨtikatɨa, yuheyeme mepɨhɨkɨtɨni 'anuiwari hetsiemiemete te'aitamete 'Ixaheri kwieyaritsie nehɨxie me'u'uwatɨ”.
2CH 6:17 Yawé, 'ixaheritsixi takakaɨyari, ketinaye'atɨa 'ikɨ kepemɨtitahɨawixɨ Rawiri mati'uximayatsiriwame.
2CH 6:18 »Peru ¿tiyɨwekuta 'ekɨ, nekakaɨyari, 'ena kwiepa pemukani teɨteri wahamatɨa? Matsi muyuawitɨtɨ, tsepa kemeutitewa, mana pepɨkatinake, matsi 'ikɨ tuki nemutawewi 'etsipupe.
2CH 6:19 Peru, Yawé nekakaɨyari, nenenewieri keneu'eni meta waɨkawa kenemɨmatiwawirie ne matsiparewiwame. Keneu'eni nehiwari meta nenenewieri nemiyetua 'ahɨxie.
2CH 6:20 Kenexeiyani tukarikɨ tɨkarikɨ 'ikɨ tuki, hakewa mɨmatsihenakixɨ muwa pemayekanikɨ, pemi'eniekakɨ nenenewieri 'ena nemiyetuaya ne ti'a'uximayatsiriwame.
2CH 6:21 Keneu'eni waɨkawa kenemɨmatiwawirie ne ti'a'uximayatsiriwame meta 'ateɨterima 'ixaheritsixi kepauka memɨyunenewie 'uwa. Ketane'enieka muyuawitsie paitɨ hakewa 'ekɨ pemeyeika, ketaneu'eni meta ketatineuyehɨwiri.
2CH 6:22 »Xɨka xewitɨ 'axatiuyurieni yu'iwa hepaɨtsita, xɨka 'utanɨ'arieni 'ena 'atuki manuwe mawari taiyame hɨxie 'uwetɨ yamɨtayɨnikɨ,
2CH 6:23 'ekɨ keneu'eni muyuawitsie paitɨ meta kemɨtiheitserie ketineuyuri te'a'uximayatsiriwamete wahetsie. 'Uximatɨarika keneupitɨa kemɨ'ane 'axamɨtiuyuri yemekɨ kemɨreuyewetse hetsiena mieme, kemɨ'aneta 'axamɨkatiuyuri keneuxɨna heitserie 'amuyeikakɨ.
2CH 6:24 »Xɨka 'ateɨterima 'ixaheritsixi memɨwaraye'unie mewara'iwa 'ahepaɨtsita 'axamemɨte'uyurikɨ, xɨka kwitɨwata me'u'axɨani 'ahetsɨa mariweme mematsi'ayeitɨani, xɨka meyutanenewieni waɨkawamekɨ 'ena tuki manuwe,
2CH 6:25 'ekɨ keniwaru'eni taheima muyuawitsie paitɨ meta ketiniwareuyehɨwiri 'ateɨterima 'ixaheritsixi ke'axamemɨte'uyuri meta keniwarakunuitɨa 'ikɨ kwieyaritsie pemɨwayetuiritsie meta wa'ukiyarima.
2CH 6:26 »Kepauka 'ateɨterima 'axamemɨteyurieni 'ahepaɨtsita, xɨkata 'ekɨ pewaruhiweritɨani xɨka muyuawitsie pereunani mɨkakawiyekɨ, xɨkata mɨkɨ kwitɨwa meyutanenewieni 'ena meta mariweme mematsi'ayeitɨani meta ke'axamemɨte'uyuri mete'uhayewa,
2CH 6:27 'ekɨ keniwaru'eni muyuawitsie paitɨ meta ketiniwareuyehɨwiri ke'axamemɨte'uyuri mate'uximayatsiriwamete, 'ateɨrima 'ixaheritsixi. Keniwaruwitɨximeni huye 'aixɨa mɨ'ane memuweiyanikɨ, meta wiyeri kenanɨ'a 'ikɨ kwieyaritsie, mɨti'apiini, 'ekɨtsɨ pekaniwayetuirieni 'ateɨterima mɨtiwahetsiemiemetɨnikɨ.
2CH 6:28 »Kepauka 'ikɨ kwieyaritsie mɨhaakaxatɨni, kwiniya muxuaweni, mɨka'ukawiwiyeni, yatɨni kepauka waxa kwiniyayari mɨtaweni, yatɨni 'utsikari xɨka me'utixuawere, yatɨni memɨtatsi'aye'unie xeime takiekari warie xɨka mehatetɨkani, meta tsepa tita 'uximatɨarika mɨtinua yatɨni kwiniya,
2CH 6:29 xɨka kwitɨwata mete'uka'eniwatɨ yuxexuitɨ 'ixaheritsixi, yametehetimame ke'axamemɨte'uyuri, xɨka yumamate 'ikɨ tuki hepa mehatatseraxɨani, meyunenewietɨ meta waɨkawamekɨ mematsiwawirietɨ,
2CH 6:30 'ekɨ keniwaru'eni muyuawitsie paitɨ, hakewa pemeyeika, meta ketiniwareuyehɨwiri. Yaketiniwarakapitɨa yuxexuitɨ kememɨte'uyuri, 'ekɨtsɨ pekatinimaika, 'ekɨ xeikɨa tewi 'iyarieya pekanimaika.
2CH 6:31 Mɨpaɨ mɨkɨ yunaitɨ 'ekɨ mepɨmatsimakaxeni meta kepemɨti'aita mepɨte'u'uwani mexi 'ena kwiepa me'u'uwani meripaitɨ ta'ukiyarima pemɨwayetuiritsie.
2CH 6:32 »Yaxeikɨata tewa kiekame 'ateɨterima 'ixaheritsixi wahetsɨa mɨkamieme, peru metsihemarietɨ waɨkawa kepemɨtiyuriene meta 'atɨrɨkariya kepemɨranakanɨ'awa meta kepemɨtitɨrɨkaɨye, meyetɨa tewa paitɨ xeime kwieyaritsie. Kepauka mɨkɨ tewa kiekame munuani meta muyutanenewieni 'ena 'ikɨ tuki manuwe,
2CH 6:33 'ekɨ keneu'eni muyuawitsie paitɨ, hakewa pemeyeika, yaketineupitɨa ketita mɨmatitawawirieni. Mɨpaɨ yunaitɨ teɨteri kwiepa memɨtama mepɨmatsihetimani meta, 'ateɨterima 'ixaheritsixi wahepaɨ, 'ekɨ mepɨmatsimakaxeni meta mɨpaɨ mepɨtehetimani kename 'ikɨ tuki nemitawewita 'ekɨ pehahɨawarɨwa.
2CH 6:34 »Kepauka pemɨwarayewitɨni 'ateɨterima memɨwaraye'unie memɨwakwiyukɨ, tsepanetɨ hakewa, xɨka nenewieri mematsipitɨaka meta xɨka 'ikɨ kiekari pemenayexei hepa mehataneniereni, tuki nemitawewi 'ahetsiemieme hepa,
2CH 6:35 'ekɨ keneu'eni muyuawitsie paitɨ wanenewieri meta waɨkawamekɨ kememɨmatewawirie, hikɨ kememɨte'anuyehu wahetsie keneutanua.
2CH 6:36 »Merikɨte xewitɨ tewi 'amɨka'uyeikakɨ 'axamɨti'ane hetsiena mɨtiumawe, xɨka 'ateɨterima 'axamete'uyurieni 'ahepaɨtsita, xɨka 'ekɨ pewaruyeheka pewayetuani mɨwaraye'unie hetsɨa mɨwaranuhapanikɨ xeime kwieyaritsie, hetewakaku yatɨni hehurakaku,
2CH 6:37 xɨka xeime kwieyaritsie mehehapanieme, memɨwara'iwaxɨ wakwieyaritsie, xɨka mete'uhayewa ke'axamemɨte'uyuri, meta xɨka 'ahetsɨa me'u'axɨani, xɨka 'ipaɨ mete'uyunenewieni: “Tame tahetsie pɨrahɨiwa, 'axatepɨte'uyuri, ke'axamɨti'ane tepɨtekakɨ”,
2CH 6:38 meta memɨwarehapa wakwieyaritsie paitɨ xɨka 'ahetsɨa yu'iyarikɨ meyuyetuani meta kememɨteyumatekɨ, xɨka nenewieri memetsiheyetuirieni meta kwie wa'ukiyarima pemɨwayetuiri hepa xɨka mehataneniereni meta kiekari pemenayexei hepa meta tuki 'ahetsiemieme nemitawewi hepa,
2CH 6:39 'ekɨ wanenewieri meta waɨkawamekɨ kememɨmetewawirieka keneu'eni muyuawitsie paitɨ, hakewa pemeyeika, hikɨ kememɨte'anuyehu wahetsie keneutanua. Ketiniwareuyehɨwiri 'ateɨterima, 'axamemɨte'uyuri 'ahepaɨtsita.
2CH 6:40 »Hikɨta, nekakaɨyari mɨpaɨ nepaine, kenetaniereni meta ketemɨteyunenewie 'ena te'u'uwatɨ ketane'enieka.
2CH 6:41 »Kenenua, Yawé Kakaɨyari,
2CH 6:42 Yawé Kakaɨyari,
2CH 7:1 Kepauka Tsarumuni yunenewietɨ mɨtiutahayewaxɨ, muyuawitsie tai kanakaneni naime mawari taiyariyari meta hipame mawarite kaniutixɨtsitɨani, meta tukita Yawé xawatɨriyaya witsimɨ'ane kaniutahɨne.
2CH 7:2 Yemekɨ tukita pɨhɨnekai Yawé xawatɨriyaya witsimɨ'ane, 'ayumieme mawari wewiwamete mepɨkayɨwawekai muwa memeutahaxɨani.
2CH 7:3 Kepauka 'ixaheritsixi tai memuxei waheima 'akaneikame meta Yawé xawatɨriyaya witsimɨ'ane tukita mɨhɨnekai, mekaniukatunuma'uni, meta kwiepa paitɨ metihɨxima'utɨ, Yawé hepaɨtsita 'aixɨa mekaniutiyuani, mɨpaɨ me'utiyuatɨ: «Yawé 'aixɨa pɨtiuka'iyari, naki'eriyaya hawaikɨ pɨkaheu'axe».
2CH 7:4 Hikɨ ti'aitame meta yunaitɨ teɨteri mawarite mekaniuwewieni Yawé hɨxie.
2CH 7:5 Ti'aitame Tsarumuni kaniwarutimawa xeitewiyari heimana huta miriyari tuurutsixi meta xeitsienituyari heimana xeitewiyari miriyari muxatsi. Mɨpaɨ ti'aitame meta yunaitɨ teɨteri tukita mekateniyetuani Yawé hetsiemieme 'ixɨarari mekaniuwewieni.
2CH 7:6 Mawari wewiwamete ketita memɨtehɨritɨariekai yamepɨteyuriekai. Rewitsixi mepɨte'ukayuitɨwakai kanarite ti'aitame Rawiri mitiwewiekaitsie kɨmana Yawé mɨnɨawariekakɨ, meta kɨmana mɨpaɨ mɨtiukwikakai: «Naki'eriyaya hawaikɨ pɨkaheu'axe». Mawari wewiwamete kuxineta mekaniutihɨtsiwakaitɨni rewitsixi wahɨxie, meta 'ixaheritsixi yunaitɨ 'amekaniti'ukaitɨni.
2CH 7:7 Metatsiere Tsarumuni takwa hixɨapatsie mukuma patsiekame kanayeitɨani, Yawé tukieya hɨxie mukuma, meta mana mawari taiyariyari kaniuwewieni meta wiya memuyuxewinikɨ mawariyari, mana mawari taiyame wurunitsekɨ mɨwewiya Tsarumuni mitawewitsie pɨkatinakekai mawari taiyariyari mayani, wiya meta hatsite mawariyari.
2CH 7:8 'Ana Tsarumuni meta yunaitɨ 'ixaheritsixi 'ixɨarari mekaniuwewieni 'atahuta tukari. Memuyuxeɨriekai yemekɨ mepɨyumɨirekai naitsarie mepayeixɨakai, Rewu-Kamati mɨrakutewatsie meye'atɨkaitɨ 'atsita 'Ekipitu hatuxameyaritsie meye'atɨkaitɨ.
2CH 7:9 'Atahairieka tukaritsie mekaniuyukuxeɨrieni, 'ixɨarari memuwewiekaikɨri 'atahuta tukari mawari taiyame patsietɨ mayeitɨariekɨ, meta tawarita 'akuxi 'atahuta tukari 'ixɨarari memɨwewiekaikɨ.
2CH 7:10 Xeitewiyari heimana haika tukaritsie, 'atahuta metseriyaritsie, Tsarumuni teɨteri kaniwarutateutɨani, meta mɨkɨ mekanakunuaxɨani yukiekaritetsie meyutemamawietɨ waɨkawa meta 'aixɨa 'iyari Yawé 'aixɨa mɨtiuyuriekaikɨ Rawiri, Tsarumuni meta yuteɨterima 'ixaheritsixi wahetsiemieme.
2CH 7:11 Kepauka Tsarumuni minɨ tuki Yawé hetsiemieme meta paratsiyu 'amupa, mɨpaɨ pɨraye'atɨa naime kemɨtiku'eriwakai kemɨtiyurienikekai mɨkɨ wahetsie.
2CH 7:12 Hikɨ Yawé kaniuyuhekɨata hɨxiena tɨkarikɨ, mɨpaɨ katinitahɨawe: «'Anenewieri nepu'eni, meta 'ikɨ tuki nepanayexei muwa mawari nemɨtimawiyarɨwanikɨ.
2CH 7:13 Kepauka nemɨreunani muyuawitsie mɨkakawiyekɨ, yatɨni 'utsikari nemɨtiwata'aitɨani para kwiepa memɨtekakɨmekɨ, mexɨkatɨni kwiniya nehenɨ'ani neteɨterima wahetsɨa,
2CH 7:14 xɨka neteɨterima, Yawé teɨterimama memɨte'uterɨwarɨwa, tixaɨtɨ xɨka mekatehayuyeitɨani meta xɨka meyutanenewieni, meta xɨka menetsi'anukuwauni, mete'uhayewa ke'axamemɨteyuriekai, ne muyuawitsie paitɨ nepɨwa'enieni, nekatiniwareuyehɨwiriemɨkɨ ke'axamemɨte'uyuri meta wakwie 'aixɨa nekaniyurimɨkɨ.
2CH 7:15 Ne nekanitanierekamɨkɨ, meta nekanita'enakamɨkɨ ke'anetɨ nenewieri 'ena mɨyetuiyani.
2CH 7:16 Hikɨtɨtɨ meta yuheyemekɨ nekanenayexeiya meta patsiekame nekanayeitɨamɨkɨ 'ikɨ tuki mɨkɨta nemayekanikɨ. Nepita'ɨwiya nekatihayewatɨ, neminaki'eriekɨ ne'iyarikɨ.
2CH 7:17 »'Ekɨta, xɨka 'ape'uyeikani nehɨxie mɨtikamiekai hepaɨ 'a'ukiyari Rawiri, xɨka yapetikayani naimetsie kenemɨmatita'aitɨani meta xɨka pe'eye'atɨani ne'aitsikate meta ne'inɨari niukiyari,
2CH 7:18 'ana ne yanepɨtiyurieni 'anuiwarima xeikɨa memɨte'aitanikɨ, tɨratu kenemɨtiuwewi 'a'ukiyari Rawiri hamatɨa mɨpaɨ nerehɨawetɨ: “Hatsuaku pɨkaheuyeweka 'anuiwaritsie miemetɨtɨ mɨti'aitani 'Ixaheri kwieyaritsie”.
2CH 7:19 »Peru xɨka xeme xenetsi'uku'eirieni, xɨka yaxekatekakɨne ne'aitsikatetsie meta ne'inɨari niukiyaritsie nemɨxeyetuiri, xɨka xenetsi'uku'eirieni hipame pɨta kakaɨyarixi xemɨtewata'uximayatsirienikɨ meta xemɨwarayexeiyanikɨ,
2CH 7:20 ne nepɨxe'akumaweriya kwie nemɨxeyetuiritsie meta 'ikɨ tuki nepɨtixani'erieni patsiekame nemayeitɨa nehetsiemieme. Hikɨ 'ana 'atsieriwamete nepɨxe'ayeitɨani yunaime teɨteri wahetsiemieme.
2CH 7:21 Tsepa hikɨ 'ikɨ tuki mɨmariwe, paye'ani tukari kepauka yunaitɨ kemɨ'ane hɨxiena muyeyani pɨtimani, meta mɨpaɨ katinita'iwaumɨkɨ: “¿Titayari Yawé mɨya tiwaruyuri 'ikɨ teɨteri meta 'ikɨ tuki?”
2CH 7:22 Mɨpaɨ pɨtita'eiyarieni: “Yawé memuku'eirikɨ, wa'ukiyarima wakakaɨyari, 'Ekipitu mɨwarayewitɨ, hipame pɨta kakaɨyarixi mepɨwaranukuwei, mepɨwarayexeiyakai meta mepɨtewa'uximayatsiriekai. 'Ayumieme Yawé 'uximatɨarika waɨkawa pupitɨa wahetsie”».
2CH 8:1 Ti'aitame Tsarumuni xeitewiyari wiyari kaniuyurieni Yawé tukieya wewienetɨ meta yuparatsiyu.
2CH 8:2 Mɨyatiuyurieka, Hirami kiekarite miyetuiriekai 'aixɨa kaniutiyurieni meta 'ixaheritsixi kaniwayetuirieni.
2CH 8:3 Metatsiere Kamati kiekariyari kaniutamieni Tsuwa kwieyaritsie mukuma, hikɨ kaniwara'iwa.
2CH 8:4 Tamuxi kiekariyari 'aixɨa kaniuyurieni makumawetsie, meta 'aixɨa kaniutiyurieni naime ti'utamete Kamati mɨrakutewatsie mitiwewiekai.
2CH 8:5 Meta kiekarite kuraruyari 'amatitetewa 'aixɨa kaniutiyurieni Weti-Kuruni wapaitɨ mukuma meta Weti-Kuruni hetɨana mukuma, kuraru kanatuani, 'itupari kaneuwɨtɨani meta kɨmana mɨreunarɨmikeni.
2CH 8:6 Yaxeikɨa Warati kiekariyari 'aixɨa puyuri metatsiere naime hakewa memɨteheuta'utanikekai meixeiyakai, meta kaxetate kuyaxa miemete hakewa meti'utani meta kawayutsiximama wahetsiemieme, meta naime tita mɨreuwewimɨkɨkai Kerutsareme pɨtiutiwewi, meta Riwanu mɨrakutewatsie meta naitsarie keyeumetsie mɨti'aitakai.
2CH 8:7 Nuiwarite teɨteri memɨka'ixaheritsixi (tatsɨari, hetitsixi, 'amuxeutsixi, peretseutsixi, heweutsixi meta kewutseutsixi, mɨkɨ teɨteri memuyuhayewaxɨ mɨkɨ kwieyaritsie 'ixaheritsixi memɨkawarukwi), Tsarumuni waɨriyarika wapitɨatɨ katiniwaruta'aitɨani 'uximayatsika mahetekɨ, hikɨ 'akuxi yaxeikɨa mekateniyurieka.
2CH 8:9 Peru Tsarumuni 'ixaheritsixi waɨriyarika te'uximayatamete pɨkawarayeitɨa, matsi kuyaximama mepɨhɨkɨtɨkai, kuyaxi tewa'aitɨwamete, kaxeta memuhapana tewa'aitɨwamete meta kuyaxi kawayutsixi wahetsie memutei tewa'aitɨwamete.
2CH 8:10 Metatsiere ti'aitame Tsarumuni pɨwarexeiyakai huta tsienituyari heimana huta tewiyari heimana tamamata mɨra'uximayatsietsie te'aitamete, te'uximayatamete memɨwaxeiyakai.
2CH 8:11 Parahuni nu'aya 'uka, Tsarumuni Rawiri kiekarienatsie peyewitɨ paratsiyu mitawewirita pi'atɨa, mɨpaɨ 'utayɨka: «Rawiri 'Ixaheri kwieyaritsie ti'aitame paratsiyuyata ne'ɨya pɨkahayekani, karikɨ Yawé kakunieya hakewa mehupukai kanipatsieka».
2CH 8:12 Mawari taiyame Yawé hetsiemieme mitawewiekaitsie tuki hɨxie, mana Tsarumuni mawari taiyariyari kaniutiwewiwakaitɨni Yawé hetsiemieme
2CH 8:13 kemɨ'ane tukaritsie meuyewekai, Muitsexi kemɨtiwaruta'aitɨakai: Xawatikɨ mieme, metseri mɨhekwa 'ixɨarariyaritsie, meta 'ixɨarari mɨhaikatsie xeiwiyaritsie mieme, tatsɨari, Paa mɨkakuxanariyarietɨka 'ixɨarariyari, meta Tsemana 'ixɨarariyari metatsiere Xamaru 'ixɨarariyari.
2CH 8:14 'Ukiyarieya Rawiri kemutayɨkai, mawari wewiwamete Tsarumuni mɨpaɨ katiniwaru'uitɨani memɨteta'uximayatakɨ. Rewitsixi kaniwaruhɨritɨani kwikarikɨ meminɨawanikɨ meta mawari wewiwamete memɨwaparewiekakɨ kememɨte'uximayakai tukarikɨ. Meta kitenie tehɨwemete kaniwaru'uitɨani xexuime kitenietsie, Rawiri mɨpaɨ mɨtiu'aitakaikɨ Kakaɨyari hetsɨa mieme.
2CH 8:15 Ti'aitame kemɨtiu'aitakai mawari wewiwamete meta rewitsixi wahetsiemieme yakatiniuyɨni, metatsiere piinite mɨraye'atɨka hetsiemieme.
2CH 8:16 Naitɨ Tsarumuni 'uximayatsikaya yakatiniuyɨni, kepauka paitɨ tuki tsutɨmeyari mukatsutɨarietsie 'atsita kepauka meminɨ me'iwewietɨwetɨ. Mɨpaɨ Yawé tukieya 'aixɨa yemekɨ katiniunɨrieni.
2CH 8:17 'Ariketa Tsarumuni petɨa 'Etsihuni-Kewexi mɨtiukutewatsie meta 'Erati, 'Erumi hatetsitayaritsie.
2CH 8:18 Hirami, 'iparewiwametemama yametekahukaku, Tsarumuni nawiya 'amɨpapa kanenɨ'airieni meta yemekɨ haramara hepaɨtsita memɨte'akumate. Mɨkɨ meta Tsarumuni parewiwametemama haramaratsie mekanekɨne 'Upixi paitɨ meneye'axɨani, muwa mekaneiyetɨni huru tamamata heima 'auxɨwi miriyari (15.000) kiruyari, ti'aitame Tsarumuni mekaniyetuirieni.
2CH 9:1 Merikɨtsɨ ti'aitame 'uka Tsawa kiekame Tsarumuni kaniutamarieni kemɨtikuxaxatsiwakai, hikɨ ti'aitame 'uka kaneyani Kerutsareme paitɨ para mita'inɨatakɨ mukwaniwetɨkakɨ miti'iwawiyakɨ. Kaninuani yumɨireme yuteɨterima warawitɨtɨ, kameyutsiximama witsimɨtiu'ɨatɨka mepɨte'ɨtɨkɨkai meta huru waɨkawame metatsiere tetexi witsimɨ'anene. Kepauka Tsarumuni hetsɨa munua, mɨkɨ naimekɨ katiniti'iwawiya kemɨtiku'eriwakai,
2CH 9:2 mɨkɨta katinitaxatɨani naime ketitakɨ mɨtiti'iwawiyaxɨ. Nitixaɨtɨkɨ pɨkatiu'iyɨri Tsarumuni, tsepa kemɨtikwaniwetɨkatei.
2CH 9:3 Ti'aitame 'uka Tsawa kiekame kanihɨxiyakaitɨni 'ixeiyatɨ kemɨtimaiwekai Tsarumuni meta paratsiyuya mitawewi xeiyatɨ, mexayatsie 'ikwai mɨrapinirikekai, 'iparewiwamete wa'ɨpari, kemɨti'uximayatsiyariekai meta hetsɨana te'uximayatamete wakemarite meta winu 'uitɨwamete, meta mawari taiyariyari Yawé tukita mitiwewiwakai xeiyatɨ.
2CH 9:5 Hikɨ mɨpaɨ ti'aitame katiniutahɨawe: «Tita nemɨretamari nekwieyaritsie paitɨ kepemɨtiuyuri hepaɨtsita meta kepemɨtimaiwe, kaniyuritɨni.
2CH 9:6 Ne yuri nepɨkare'eriekai 'ikɨ 'atsita nepeyetɨa, hikɨri nehɨxikɨ nepunierixɨ. Matsi xɨari 'etsiwa xeikɨa nepɨremariekai waɨkawa kepemɨtimaiwe. Waɨkawa matsi pepɨrexeiya keyuri tita nemɨre'eni 'ahepaɨtsita.
2CH 9:7 Kemeteyutemamawie 'ateɨterima. Kemeteyutemamawie memɨmete'uximayatsirie 'ahamatɨa yamemɨte'u'uwa me'i'enietɨ kepemɨtimaiwe.
2CH 9:8 Meta 'aixɨa kerahɨawarɨwani Yawé 'akakaɨyari, 'aixɨa 'anemekɨ mɨmatsi'uxei meta yu'uwenitsie mɨmatsihaye pemɨ'inɨarieyatɨnikɨ hetsiena mieme peti'aitatɨ. 'Ixaheritsixi wanaki'erietɨ, 'akakaɨyari ti'aitame kamanayeitɨani wahetsie pemɨtita'aitakɨ kehapaɨ 'aixɨa mɨ'ane meta kemɨtiheitserie, mɨkɨ yuheyemekɨ yuteɨterima pɨwakamanikeyu».
2CH 9:9 Hikɨ ti'aitame 'uka, Tsarumuni katiniyetuirieni 'imikieri haika miriyari heimana 'atanauka tsienituyari heimana haika tewiyari (3.960) kiruyari huru, tetexi witsimɨ'anene, meta waɨkawa witsimɨtiu'ɨatɨka. Tawari hatsuaku pɨka'utixuawerixɨ waɨkawa witsimu'ɨatɨka ti'aitame 'uka Tsawa kiekame Tsarumuni mumi hepaɨ paɨmetɨ.
2CH 9:10 Huru kememɨte'atɨa 'Upixi mieme Hirami teɨterimama meta Tsarumuni teɨterimama, mekani'atɨanita huku kɨyeyari kwinie mɨraye'axe meta tetexi witsimɨ'anene.
2CH 9:11 Mɨkɨ kɨyeyarikɨ, ti'aitame kanitiwewieni Yawé tukieyata mieme 'imɨmɨi 'amatayeyeu witsimɨ'anene meta paratsiyuta mieme, metatsiere haripa kaniutiwewieni meta kanarite teyuitɨwamete wahetsiemieme. Hatsuaku meripaitɨ mɨpaɨ pɨkatiyɨwekai Kura kwieyaritsie.
2CH 9:12 Mɨkɨta ti'aitame Tsarumuni, katinimini naime tita ti'aitame 'uka Tsawa kiekame tiutihiwe'erieka mɨtitawawiri, mɨkɨ matsi waɨkawa pɨratɨa keyuri kepaɨmeme ti'aitame Tsarumuni mɨtiumikai. Hikɨ 'arike, kanakunuani ti'aitame 'uka yukwieyari hetsie paitɨ yunaime memiparewie wahamatɨa.
2CH 9:13 Tsarumuni xeiwiyari 'anuyeyeikakaku xeitewiyari heimana huta miriyari kiruyari huru pɨ'atɨiriyarɨwakai,
2CH 9:14 tetuayamete memɨteyukutuaya ka'inɨaritɨ. Metatsiere 'Arawiya kwieyaritsie te'aitamete meta kuwexinaruritsixi 'Ixaheri kwieyaritsie memu'uitɨariekai Tsarumuni hetsɨa mekaniyetuayakaitɨni huru meta pɨrata.
2CH 9:15 Hikɨ ti'aitame Tsarumuni kaniutiwewieni huta tsienituyari yuheima nunuwame 'apapame hurukɨ wewiyatɨkaime tsunarietɨkaime, xexuitɨ 'etsiwatɨkaku 'atahuta kiruyari huru kaniuyɨni.
2CH 9:16 Metatsiere kanitiwewieni haika tsienituyari yuheima nunuwame yakɨ yeyeume, yaxeikɨa hurukɨ wewiyatɨkaime tsunarietɨkaime, xexuitɨ haika kiruyari huru kaniuyɨni. Mɨkɨ yuheima nunuwame ti'aitame yuparatsiyuta piti'utaxɨ «Riwanu Makukariuxaya» mɨtitewata.
2CH 9:17 Metatsiere ti'aitame xeime 'uweni 'apame kaniutawewieni maripirikɨ tatsɨari 'erepanite 'awateyakɨ, herie huru 'aixɨa mɨ'ane pɨkawiriyariekai.
2CH 9:18 'Uweni yuhetɨa peixeiyakai 'imumɨi 'amatayewa 'ataxewimexɨa panukuhetei mana mutiyeikanikɨ, 'uweni hetsiena mawekai hurukɨ puwewiyakai, pamamatɨkatei, xexuime mamateya 'aurie mayetsi yuxexuitɨ mepeuti'utɨkatei,
2CH 9:19 meta 'imumɨi 'amatayewatsie 'ataxewimexɨa manukuhetsie mepa'utɨkatei mayetsi tamamata heimana huta meyupaɨmetɨ, manukunenieretsie mepeuka'utɨkatei naitsata. Tawari xewitɨ pumawekai 'uweni naitsarie kwiepa Tsarumuni 'uwenieya hepaɨ 'anetɨ.
2CH 9:20 Naitɨ Tsarumuni tekɨxiteya meta naitɨ xakɨrɨteya paratsiyutana mɨtiyepikai, «Riwanu Makukariuxaya» mɨtitewata, mɨkɨ naitɨ huru 'aixɨa mɨ'anekɨ pɨtiwewiyatɨkatei. Xewitɨ tɨma pɨratakɨ pɨkatiwewiyakai, 'ana Tsarumuni muyeikakaitsie pɨrata 'araye'akame pɨka'eriwakai.
2CH 9:21 Haika wiyari 'anuyeyeikakaku, ti'aitame Tsarumuni kanuwateya 'amupapa meixeiyakai Hirami teɨterimama memikunɨ'atɨwekai, mɨkɨ Taritsi kaneyekɨkakaitɨni huru 'utɨtɨ, pɨrata meta maripiri tatsɨari 'erepanite 'awateya, hutseri memawɨriwawe meta 'aruxi witsimemɨ'anene.
2CH 9:22 Ti'aitame Tsarumuni waɨkawa matsi pɨtimaiwekai meta waɨkawa matsi pɨxikutɨkai keyuri hipatɨ te'aitamete kwiepa memɨtamakai.
2CH 9:23 Yunaitɨ mɨkɨ te'aitamete mekani'iwatatɨwekaitɨni me'i'eniekutɨ kemɨtimaiwekai Kakaɨyari 'ipitɨaku,
2CH 9:24 xexuime wiyaritsie mekateni'atɨiriwakaitɨni 'imikieri: piinite hurukɨ mɨtiwewiyatɨka meta pɨratakɨ, kemarite, 'ixiparate meta witsimɨtiu'ɨatɨka, kawayutsixi meta muratsixi.
2CH 9:25 Tsarumuni pexeiyakai nauka miriyari kurarute kawayutsixi meta kaxetate kuyaxa miemete wahetsiemieme, meta puwarexeiyakai tamamata heimana huta miriyari kawayutsixi mɨkɨ pɨtiwamikwakai kuraruta meta yuparatsiyu 'aurie Kerutsareme paitɨ.
2CH 9:26 Tsarumuni ti'aitame naitsarie katiniwaruta'aitɨani te'aitamete kememɨte'ukutetɨkatsie, 'Eupɨrate hatuxameyari manuyekatsie 'itsutɨatɨ 'atsita piritsiteu kwieyaritsie meta 'Ekipitu kwieyari maka'atɨkatsie paitɨ.
2CH 9:27 Kerutsareme kiekariyaritsie ti'aitame pɨrata waɨkawa pexeiyakai tetexi hepaɨ katinixeiyakaitɨni, meta kariuxa kɨyeyari waɨkawa pexeiyakai piní makuweri mieme hepaɨ.
2CH 9:28 Kawayutsiximama 'Ekipitu kwieyaritsie mepɨnanaiyakatetɨkai meta hipame kwieyaritsie.
2CH 9:29 Hipatɨta kemɨtiuyɨ Tsarumuni ti'aitakaku, kepauka paitɨtɨ mitsutɨa meta kepauka mɨtiutahayewaxɨ, mɨkɨ katinaka'utɨarieni kemɨtiuyɨ xapayaritsie Natani Kakaɨyari niukameya kemɨraka'utɨa, meta kemɨtiyɨni xapayaritsie 'Ahiyaxi Tsiru kiekame kemɨraka'utɨa, meta kemɨtiunierixɨ xapayaritsie 'Iruhu mɨniere kemɨtiyɨni kemɨraka'utɨa Keruwuhani Nawati nu'aya hepaɨtsita mieme.
2CH 9:30 Tsarumuni huta tewiyari wiyari Kerutsareme 'ukaitɨ katiniuta'aita naitsarie 'Ixaheri kwieyaritsie.
2CH 9:31 Kepauka mumɨ, kaniukateukieni 'ukiyarieyatɨkai Rawiri kiekariena, hikɨ nu'aya Xuwuhani kanitsutɨani ti'aitatɨ 'utɨmana.
2CH 10:1 Hikɨ Xuwuhani kaneyani Tsikeni paitɨ, mana yunaitɨ 'ixaheritsixi memeyuxeɨriekaikɨ ti'aitame memeyeitɨanikɨ.
2CH 10:2 Hikɨ mɨkɨ hepaɨtsita Keruwuhani Nawati nu'aya katiniutamarieni, 'ayumieme 'Ekipitu kanakunuani, mana kaneyakaitɨni meripaitɨ ti'aitame Tsarumuni 'ayemakatɨ.
2CH 10:3 Kepauka 'ixaheritsixi kɨmana memɨte'utanɨ'a mɨ'atɨarie, hikɨ mɨkɨ meta yunaitɨ 'ixaheritsixi mekanekɨne Xuwuhani hetsɨa mɨpaɨ mekatenitahɨawe:
2CH 10:4 —'Apaapa kwinimieme raheteme yuku pɨtatsi'utitɨtɨa teka'ikemakame. Hikɨri 'ekɨ ha'exanime ketaneutitɨtɨa te'ikemakame, keyuri 'apaapa mɨtatsi'utitɨtɨa, hikɨ 'ana tepɨmateta'uximayatsirieni.
2CH 10:5 Xuwuhani mɨpaɨ katiniwarutahɨawe: —Xekeneuhuni hikɨ, peru xekenayenexɨa haika tukari 'anukayayu. Hikɨ kepauka teɨteri memekɨ,
2CH 10:6 ti'aitame Xuwuhani kaniwaruta'iwawiya 'ukirawetsixi paapaya Tsarumuni mayeyurikaitsie memɨparewiekai. Mɨpaɨ katiniwaruta'iwawiya: —¿Kexehaitɨka xeme, kenetiwata'eiya 'ikɨ teɨteri?
2CH 10:7 Mɨkɨ mɨpaɨ mekaniutiyuani: —Xɨka 'ekɨ ti'aitame 'aixɨa petiuka'iyarikamɨkɨ 'ikɨ teɨteri wahetsiemieme, xɨka kemɨtiwanake pewaru'enieni, xɨka pewaruta'eiya pewanaki'erietɨ, mɨkɨ mepɨmateta'uximayatsirieni yuheyemekɨ.
2CH 10:8 Peru Xuwuhani 'ukirawetsixi wa'ɨxatsi pɨka'anu'eni kememɨte'itahɨawixɨ, matsi temari pɨtata kaniwaruta'iwawiya hamatɨana memutiwawerixɨ meta 'anari memiparewiekai.
2CH 10:9 Mɨpaɨ katiniwaruta'iwawiya: —¿Kexehaitɨka xeme, kenetiwata'eiya 'ikɨ teɨteri mɨpaɨ memɨnetekɨhɨawe: “Ha'exanime kenayeitɨa 'apaapa kwinimieme raheteme yuku pɨtatsi'utitɨtɨa teka'ikemakame”?
2CH 10:10 Mɨkɨ temari, hamatɨana memutiwawerixɨ, mɨpaɨ mekatenita'eiya: —Teɨteri 'ipaɨ memɨmetehahɨawe ti'aitame: “'Apaapa kwinimieme raheteme yuku pɨtatsi'utitɨtɨa, 'ekɨri ha'exanime kenayeitɨa”. Neuxei, 'ipaɨ ketiniwaruta'eiya: “Ne ne'itɨwame 'etsimupe matsi 'akanipani keyuri nepaapa kemanupakai, xɨka nepaapa waɨkawa tixe'uta'uximayatsitɨani, ne matsi tawari waɨkawa nepɨtixeta'uximayatsitɨani.
2CH 10:11 Xɨka mɨkɨ yuku haheteme xe'anutitekirieni, neta matsi waɨkawa nepɨxeti'ikatɨani. Xɨka mɨkɨ xetiwayakaitɨni kɨyekɨ, ne kawayutsixi wawayamekɨ tepɨa manuyatsatɨkakɨ nepɨxetiwani”.
2CH 10:12 Merikɨte hairieka tukari 'aye'aku, kemutayɨkai ti'aitame Xuwuhani, hɨxiena Keruwuhani kaninuani yunaime teɨteri wahamatɨa.
2CH 10:13 Peru ti'aitame Xuwuhani kaniwaruta'eiya tiyukananaimakamekɨ: 'ukirawetsixi wa'ɨxatsi pɨka'anu'eni,
2CH 10:14 matsi temari wa'ɨxatsi pɨta kaniu'enieni. Mɨpaɨ katiniwarutahɨawe: «Xɨka ne'ukiyari yuku haheteme xe'utitɨtɨani, neta matsi waɨkawa nepɨxeti'ikatɨani. Xɨka mɨkɨ xetiwayakaitɨni kɨyekɨ, ne kawayatsixi wawayamekɨ tepɨa manuyatsatɨkakɨ nepɨxetiwani».
2CH 10:15 Ti'aitame teɨteri mɨkawaru'enikɨ, mɨpaɨ pɨtiuyɨ Kakaɨyari yahainekaku. Mɨpaɨ pɨraye'atɨarie Yawé niukieya Keruwuhani Nawati nu'aya kemɨtiutahɨawekai, Kakaɨyari niukameya 'Ahiyaxi Tsiru kiekame Keruwuhani yapɨtiutahɨawekai.
2CH 10:16 Kepauka memɨtehetima kename ti'aitame 'ari kawaru'eni, yunaitɨ 'ixaheritsixi mɨpaɨ mekateniuhiwakaitɨni meyuxewitɨ: «'Ixaheritsixi teɨteriyari, yunaitɨ yukie xekeneutayeixɨa. 'Ekɨta, Rawiri, 'ahetsɨa miemete xeikɨa keniwarayexeiyani. Tameri Rawiri hetsɨa tixaɨtɨ tepɨkatehayexeiya. Tixaɨtɨkuta pɨkatatiyetuirieni 'Itsahi nu'aya». Hikɨ mekaneutayeixɨani, yuxexuitɨ yukie.
2CH 10:17 Peru mɨyatɨtɨ, Xuwuhani piyeweiyakai ti'aitatɨ 'ixaheritsixi wahetsie Kura kiekariteyaritsie memutetɨkatei.
2CH 10:18 Hikɨ 'arikeke, ti'aitame Xuwuhani 'Arunirani kanenɨ'ani waɨriyarika memɨte'uximaya mɨhɨritɨariekai mɨnierimiekɨ, peru yunaitɨ 'ixaheritsixi tetexikɨ mekaneitituaxixɨani mekanimieni. Hikɨ mexɨiwa ti'aitame 'anutiyerɨka yukaxetatsie kaneyu'una Kerutsareme paitɨ.
2CH 10:19 Hikɨ mɨpaɨ tiuyɨku 'anatɨtɨ 'ixaheritsixi Rawiri nuiwarimama mepuwaruku'eiri, hikɨ yaxeikɨa mepɨ'ane.
2CH 11:1 Xuwuhani Kerutsareme nuaka kaniwarukuxeɨrieni Kura nuiwarimama meta Wenikamini, xeitsienituyari heimana nauka tewiyari miriyari (180.000) kuyaxi mekanakɨne yunaitɨ, mɨwatakwinikɨ 'ixaheritsixi hikɨ mɨpaɨ tiyurieme yunaime wahetsie mɨtita'aitakɨ.
2CH 11:2 Peru Yawé niukieya kaninuani Tsemahiyaxi hetsɨa, mɨkɨ tewi Kakaɨyari payexeiyakai, mɨpaɨ 'aneme niuki kaniupitɨarieni:
2CH 11:3 «Mɨpaɨ ketineutahɨawi Xuwuhani Tsarumuni nu'aya mɨti'aitame Kura kwieyaritsie, meta yunaime 'ixaheritsixi Kura kwieyaritsie memɨtitei meta Wenikamini,
2CH 11:4 mɨpaɨ kanaineni Yawé: “Hawaikɨ xepɨkawakwitɨweni yu'iwama 'ixaheritsixi. Yuxexuitɨ yukie xekeneutayeixɨa, karikɨ ne yanehainekaku mɨyakatiniuyɨni”». Hikɨ mɨkɨ mekanenu'enieni Yawé niukieya meta mekateniuhayewa Keruwuhani metamienike.
2CH 11:5 Merikɨte Xuwuhani Kerutsareme kaniuyuhayewa, hikɨ kiekarite Kura mieme 'ikɨ 'aixɨa kaniutiyurieni:
2CH 11:6 Wereni, 'Etami, Tekuha,
2CH 11:7 Wetsuxi, Tsuku, 'Arurani,
2CH 11:8 Kahati, Maretsa, Tsipi,
2CH 11:9 'Arurahini, Rakixi, 'Atseka,
2CH 11:10 Tsura, 'Ayaruni meta Hewuruni. 'Ikɨ kiekarite 'aixɨa muti'itɨarie kanimiemetɨkaitɨni Kura kwieyaritsie meta Wenikamini kwieyaritsie.
2CH 11:11 Xuwuhani kuyaxi tewa'aitɨwamete kaniwaru'uitɨani, kiekarite kuraruyari 'amatitɨtɨ tawari 'akanetitɨriya, meta mana 'ikwaite katiniuti'uta, hatseiti meta winu,
2CH 11:12 meta katiniyetuani yuheima nunuwamete meta pitsikate. Mɨpaɨ naime kiekarite 'aixɨa kaniukuyurieni, hikɨ Kura meta Wenikamini kwieyaritetsie ti'aitatɨ kanayani.
2CH 11:13 Naitsarie kiekatari 'Ixaheri kwieyaritsie mekaniu'axɨani mawari wewiwamete meta rewitsixi para Xuwuhani memɨtinɨnikɨ.
2CH 11:14 Rewitsixi yukwie mekaniuku'eirieni memɨtehatihɨwetsie meta hipame yupiinitɨarika Kura kwieyaritsie pɨta memɨyehukɨ meta Kerutsareme, Keruwuhani meta niwemama Yawé memayexeiyani memɨkawapitɨakaikɨ.
2CH 11:15 Wahetsiemieme, Keruwuhani kaniwarutihɨawe yuhetsiemieme mawari wewiwamete tukiteta kakaɨyarixi memɨtewamawiriekakɨ, tsipuri wa'ɨkiyari memɨwarayexeiyanikɨ meta tsikerutsixi muwaruti'aitakai memɨtiwewiyanikɨ.
2CH 11:16 Rewitsixi wa'utɨma mekanekɨne teɨteri yunaitɨ 'Ixaheri nuiwarimama wahetsiemiemete yu'iyarikɨ Yawé memɨkuwautɨwekai, 'Ixaheri Kakaɨyarieya. Kerutsareme mekaniu'axɨani Yawé mawari memɨwewirienikɨ, yu'ukiyarima wakakaɨyari.
2CH 11:17 Mɨkɨ memu'axɨakɨ kaniutatɨrɨkaxɨani Kura kwieyaritsie ti'aitame, meta Xuwuhani Tsarumuni nu'aya mekaniuparewieni haika wiyari metatsiere Rawiri meta nu'aya Tsarumuni mekaniwaranukuweiya heitserie kememɨte'u'uwakai.
2CH 11:18 Xuwuhani kaniutiwitɨni Makarati Kerimuti nu'aya, Rawiri nu'aya meta 'Awikahiri, 'Eriyáwi niweya meta 'Itsahi teukarieya.
2CH 11:19 Mɨkɨtsie tɨɨri mɨwarayexei mekanihɨkɨtɨni Kehutsi, Tsemariyaxi meta Tsakani.
2CH 11:20 'Ariketa Mahaka kaniutiwitɨni 'Awitsaruni niweya. Mɨkɨtsieta kaniwarayexeiya 'Awiyaxi, 'Atahi, Tsitsa meta Tserumiti.
2CH 11:21 Xuwuhani Mahaka waɨkawa kaninaki'eriekaitɨni 'Awitsaruni niweya keyuri hipame yu'ɨitama meta te'uximayatametemama 'ɨitamamatɨtɨ. 'Ɨitamama yunaitɨ mepɨyupaɨmekai tamamata heimana 'atahaika meta haika tewiyari mepɨyupaɨmekai te'uximayatametemama 'ɨitamamatɨtɨ, meta yuniwema puwarayexei xeitewiyari heimana 'atahaika 'ukitsi meta haika tewiyari 'ukari.
2CH 11:22 Xuwuhani 'Awiyaxi kananukakeni yu'iwama mɨtiwa'aitɨakakɨ Mahaka nu'aya, ti'aitame payanikekai mɨpaɨ pɨtiku'eriyakai.
2CH 11:23 Hikɨ timaiweme payuyeitɨa, hipame yuniwema waɨkawa pɨtiwayetuiri piinitɨarika, meta waɨkawa 'ukari puwakuniukiri wa'ɨitama memakɨne, hikɨ Kura kwieyaritsie naitsarie kaniwareutanɨ'axɨani meta Wenikamini kwieyaritsie, metatsiere naime kiekari yukuraru 'amatitɨtɨ mexeiyatɨkatsie.
2CH 12:1 Hikɨ kepauka Xuwuhani tɨrɨkaɨyetɨ matɨa meta yu'iyarikɨ ti'aitatɨ matɨa, mɨkɨ meta yunaitɨ 'ixaheritsixi Yawé 'aitsikateya mekaniuku'eirieni,
2CH 12:2 meta kemɨtinake yamepɨkatekakɨ. 'Ayumieme 'auxɨwirieka wiyari ti'aitakaku Xuwuhani, Tsitsaki 'Ekipitu kwieyaritsie ti'aitame, Kerutsareme kaniutamieni.
2CH 12:3 Xeimiriyari heimana huta tsienituyari kaxetate kuyaxa miemete mewarahapatɨ, haika tewiyari miriyari kawayutsixi wahetsie memutei meta mekayu'inɨatsinɨatɨ kuyaxi riwiyutsixi, tsukienutsixi meta 'etiupetsixi 'Ekipitu kwieyaritsie memanexɨakai,
2CH 12:4 Tsitsaki kiekarite yukuraru 'amatitɨtɨ mexeiyatɨkatsie kaneutahani Kura kwieyaritsie miemetetsie meta Kerutsareme paitɨ kaninuani.
2CH 12:5 Hikɨ Xuwuhani hɨxie kaniutakeni Kakaɨyari niukameya Tsemahiyaxi meta Kura kwieyaritsie kiekatari wa'ukiyarima wahɨxie Tsitsaki memakatɨ Kerutsareme memɨyuxeɨriekai. Mɨpaɨ katiniwarutahɨawe: —Yawé mɨpaɨ kanaineni: “Xeme xemɨnetsi'uku'eirikɨ, neta hikɨ nekanixeku'eirimɨkɨ, para Tsitsaki mɨxekwinikɨ”.
2CH 12:6 'Ixaheritsixi wa'ukiyarima meta ti'aitame yunaitɨ tixaɨtɨ mekatehayuyeitɨaka, mɨpaɨ mekaniutiyuani: —Yawé heitseriemekɨ yamɨtikamie pɨhɨkɨ.
2CH 12:7 Kepauka Yawé muwaruxei tixaɨtɨ mekate'ayuyeitɨakame, tawarita Tsemahiyaxi mɨpaɨ katiniutahɨawe: «Tixaɨtɨ mepɨkate'ayuyeitɨa, 'ayumieme nepɨkawaka'una, yapaɨmexɨa tukari 'anukayayu nepɨwaxɨna. Tsitsaki nepɨkapitɨani Kerutsareme mɨka'unakɨ,
2CH 12:8 peru nepipitɨani mɨtixeta'aitɨanikɨ, xemɨtehetimamatenikɨ kehapaɨ mɨ'ane neti'uximayatsirietɨ kehapaɨta mɨ'ane te'aitamete tiwa'uximayatsirietɨ hipame kwieyaritsie miemete».
2CH 12:9 Tsitsaki 'Ekipitu kwieyaritsie ti'aitame, Kerutsareme kaniutamieni, hikɨ katinetɨni piinite mɨraye'atɨka Yawé tukieyata timieme meta paratsiyu 'amupata timieme. Naime katinetɨni, metatsiere yuhetsie nunuwame hurukɨ mɨwewiyatɨkatei Tsarumuni miti'aitakai.
2CH 12:10 Hikɨ mɨkɨ hetsiemieme, ti'aitame Xuwuhani kaniti'aita hepaɨna 'aneneme peru wurunitse tepɨayarikɨ wewiyatɨkaime, hikɨ kaniwaruhɨritɨani kuyaxi wa'ukiyarima paratsiyu 'amupa kitenieyaritsie memɨtehɨkai.
2CH 12:11 Kepauka ti'aitame meta'axekai Yawé tukita, kuyaximama mekaneiteɨtakaitɨni me'i'ɨtɨ yuhetsie nunuwame, kepaukata memakununuwakai kitenie tehɨwemete wakiita mepitixɨrɨwakai.
2CH 12:12 Xuwuhani tixaɨtɨ mɨkarayuyeitɨakɨ, meta Kura kwieyaritsie 'akuxi tixaɨtɨ 'aixɨa ti'anetɨ mɨtiyuhayewanekaikɨ, Yawé ha'atɨ pɨtiuhayewaxɨ hepaɨtsitana, hikɨ 'ayumieme yemekɨ pɨka'ika'unaxɨ,
2CH 12:13 Ti'aitame Xuwuhani tɨrɨkaɨyetɨ kanayani, hikɨ pitsutɨa tawari Kerutsareme ti'aitatɨ. Maamaya Nuhama pɨtitewakai 'amuni tewiyari pɨhɨkɨtɨkai. Xuwuhani huta tewiyari heimana xewi wiyari pexeiyakai kepauka mitsutɨa ti'aitatɨ, tamamata heimana 'atahuta wiyari katiniuta'aita Kerutsareme kiekariyaritsie, Yawé mɨkɨ kiekari manayexeiyakaitsie yunaime 'Ixaheri xiɨyarimama watsata para mana mɨtayerɨnikɨ.
2CH 12:14 Peru Xuwuhani 'axatiyurienetɨ xeikɨa patɨa, hatsuaku yu'iyarikɨ Yawé pɨka'anukuwau.
2CH 12:15 Kemɨtiuyɨ Xuwuhani ti'aitakaku, mɨtiukatsutɨatsie 'atsita kepauka mɨtiutahayewaxɨ, meta yakememɨteyukwitɨwekai Keruwuhani matɨa, katinaka'utɨarieni kemɨtiuyɨ xapayaritsie Kakaɨyari niukameya Tsemahiyaxi xapayatsie meta tewi mɨtixeiya 'Iru xapayatsie.
2CH 12:16 Kepauka mumɨ Xuwuhani, kaniukateukieni Rawiri kiekariena. Hikɨ nu'aya 'Awiyaxi kanitsutɨani 'utɨmana ti'aitatɨ.
2CH 13:1 Merikɨtsɨ tamamata heimana 'atahaika wiyari ti'aitakaku Keruwuhani, 'Awiyaxi ti'aitame kanayani Kura kwieyaritsie,
2CH 13:2 hikɨ Kerutsareme 'ukaitɨ katiniuta'aita haika wiyari. Maamaya Mikahiyaxi pɨtitewakai, 'Uriheri Kiweya kiekame punu'ayatɨkai. Mɨkɨta mepɨyutikwi 'Awiyaxi matɨa Keruwuhani.
2CH 13:3 Hikɨ memɨyukwiyukɨ, 'Awiyaxi nauka tsienituyari miriyari yukuyaxima kaniwaranayexeiya, yemekɨ memeuyutakwiwawe. Keruwuhani metatsiere 'atahaika tsienituyari miriyari kaniwaranayexeiya yukuyaxima, hikɨ 'aixɨa mekateniuyu'uitɨani memɨwatakwinikɨ.
2CH 13:4 Hikɨ 'Epɨrahini muhɨriyatsie, Tsemarahini yemuriyaritsie 'Awiyaxi 'anutiyaka, mɨpaɨ katiniuhiwa: «Keruwuhani. 'Ixaheritsixi. Yunaitɨ xeme xekeneneu'eni.
2CH 13:5 Xepɨtemate Yawé 'Ixaheri kakaɨyarieya, Rawiri pɨyetuiri 'Ixaheri kwieyaritsie mɨti'aitanikɨ meta nuiwarimama tɨratu puwewi 'atsikayɨweme.
2CH 13:6 Peru, Nawati nu'aya Keruwuhani, Tsarumuni Rawiri nu'aya ti'uximayatsiriwame, kaniku'eirieni 'eye'unietɨ kanayani tiyu'aitɨwame.
2CH 13:7 Hipatɨ teɨteri 'axamete'u'iyaritɨ Xuwuhani Tsarumuni nu'aya mekaniutinɨni, kepauka 'ikɨ mɨtemaikɨtɨkai meta mɨkatɨrɨkaɨyekai, mɨkɨ mepɨka'ipitɨa, pɨka'uyɨwekaxɨa mɨwara'iwa.
2CH 13:8 »Xeme mɨpaɨ xeteku'eriwa hikɨ, xemɨyumɨirekɨ meta tsikerutsixi hurukɨ memɨwewiyatɨka xemɨwarexeiyakɨ, kakaɨyarixi memɨwewiyatɨka Keruwuhani mɨxe'utiwewiri xehe'iwake xeteyu'erie Yawé mɨra'aita, muwayetuiri Rawiri niwemama.
2CH 13:9 Metsɨ xekaniwarayeweiya 'Aruni nuiwarimama, Yawé mawari wewiwametemama memɨhɨkɨ, meta rewitsixi. Mɨkɨ wahetsiemieme hipame mawari wewiwamete xekaniwarutihɨawe, tsepa ke'anetɨ muwa'atɨa xeime tsikeru meta 'atahuta muxatsi 'ukitsi mɨkɨ xekaniwarayeitɨwani mawari wewiwamete memɨkayuri kakaɨyarixi wahetsiemieme, teɨteri Kakaɨyari memɨkamate wahepaɨ xepɨteyurie.
2CH 13:10 »Tame 'apɨta, Yawé tepɨkaku'eiriwawe, mɨkɨ mɨtakakaɨyarikɨ. 'Aruni nuiwarimama yaxeikɨa tamawari wewiwamete mepɨhɨkɨ Yawé memɨte'uximayatsirie meta rewitsixi mepɨhɨritɨarie memɨwaparewiekakɨ tukita.
2CH 13:11 Tukari mɨyehane, ximeri meta taikai, Yawé mepɨtemawirie mawari taiyariyari meta 'ɨkwa witsimu'ɨa mekanitairieka, metatsiere, yareuhanemekɨ taikai paa mɨpatsie mepemaniriwa huru mexayaritsie, meta kɨxeme mepetitaiya 'i'uitɨwame hurukɨ mɨwewiya hetsie muye'u. Tame hɨrixɨa Yawé takakaɨyari tepayexeiya, xeme xemiku'eiri.
2CH 13:12 'Ayumieme Kakaɨyari meta mawari wewiwametemama, tahɨxie mekananuyeteni. Kuxinetate kaniha'aritsieka mɨtihɨtsierienikɨ kepauka temɨxetakwini. 'Ixaheritsixi, Yawé xepɨkamietɨweni, xe'ukiyarima wakakaɨyari, xeme xepɨkayɨwawe xeme'iwa».
2CH 13:13 Keruwuhani 'Awiyaxi mɨkatimaritɨanikɨ, hipame yukuyaxima kuyaxi Kura miemete wa'utɨma kaniwarutanɨ'ani, hipameta wahɨxie pɨta kaniwarutanɨ'ani.
2CH 13:14 Kepauka memanakunenierixɨ Kura kiekatari, mekaniwaruxeiya 'ixaheritsixi mewakwitɨweme wa'utɨa memeu'ukai. Hikɨ 'ana Yawé mekaniutahɨawe, meta mawari wewiwamete kuxineta mekaniutihɨtsieni.
2CH 13:15 Hikɨ kepauka Kura kiekatari karima memutihiwaxɨ memuyutakwinikɨ, 'ana Kakaɨyari Keruwuhani kana'iwa meta 'ixaheritsixi, 'Awiyaxi pɨta kaniupitɨani mɨrayu'iwakɨ meta Kuratsie kiekatari.
2CH 13:16 'Ixaheritsixi mekaniyu'unakukaitɨni, peru Kakaɨyari kaniwayetuani Kuratsie kiekatari memɨwakwinikɨ.
2CH 13:17 'Awiyaxi meta kuyaximama yuwaɨkawame mepɨwareuyehɨa, mekaniwarukwini 'auxɨwime tsienituyari miriyari 'ixaheritsixi kuyaxiyari 'aixɨa memɨ'anene.
2CH 13:18 'Ana tukaritsie 'ixaheritsixi mekana'iwarieni, Kuratsie kiekatari mepɨte'ayu'iwaxɨ Yawé yu'ukiyarima wakakaɨyari hetsie memɨtewiyakaikɨ.
2CH 13:19 'Awiyaxi meta kuyaximama mekaniwaranukuweiya Keruwuhani kuyaximama, hikɨ kaninawairieni kiekarite Weteri, Ketsana meta 'Epɨrahini kiekariyari meta 'auriena mamanetɨka.
2CH 13:20 Keruwuhani tɨrɨkaɨyeme mayuyeitɨani pɨkayɨwekai kepauka 'Awiyaxi mɨti'aitametɨkai. 'Imatɨrieka Keruwuhani Yawé 'iwaku kaniumɨni.
2CH 13:21 'Apɨta 'Awiyaxi matsi waɨkawa tɨrɨkaɨyetɨ kanayani. Yu'ɨitama tamamata heimana nauka kaniwarexeiyakaitɨni, niwemama 'ukitsi xeitewiyari heimana huta mepuyupaɨmekai meta niwemama 'ukari tamamata heimana 'ataxewi mepuyupaɨmekai.
2CH 13:22 Hipatɨta kemɨtiuyɨ 'Awiyaxi ti'aitakaku, meta kemɨtiuyeikakai meta 'uximayatsikaya, katinaka'uka Kakaɨyari niukameya 'Iru xapayatsie.
2CH 14:1 'Awiyaxi kaniumɨni, hikɨ kaniukateukieni Rawiri kiekariena, hikɨ nu'aya 'Atsá kanitsutɨani yupaapa 'utɨma ti'aitatɨ. Kepauka mɨkɨ mɨti'aitakai, mɨkɨ kwieyaritsie kayuwatɨ pumakai tamamata wiyari.
2CH 14:2 'Atsá yapɨtiuyuri kehapaɨ 'aixɨa mɨ'ane meta kemɨtinake Yawé yukakaɨyari.
2CH 14:3 Mɨkɨ kaniti'una mawari taiyame meta kakaɨyarixi watukite, tetexi mɨpatsietɨka kaniutitara meta kaneti'unaxɨani kɨyexi 'Atserá kakaɨyariyari 'ɨkiyarite.
2CH 14:4 Metatsiere, mɨpaɨ katiniwaruta'aitɨani Kuratsie memɨtitekai Yawé hetsɨa meke'u'axɨanike, yu'ukiyarima wakakaɨyari hetsɨa, meta 'aitsikateyatsie meta 'inɨari niukiyaritsie yamemɨtekahunikɨ.
2CH 14:5 Mɨpaɨ 'Atsá katinikumaweriya tukite meta 'ɨkwa taiyamete kakaɨyarixi wahetsiemiemete naitsarie kiekaritsie meuxuawekai Kura kwieyaritsie, hikɨ mɨkɨ kepauka mɨti'aitakaitsie kayuwatɨ mepexeiyakai.
2CH 14:6 'Atsá Kura kwieyaritsie kanitiwewieni kiekarite kuraruyari 'amatitɨtɨ, merikɨte mɨkɨ wiyaritsie Yawé kanipitɨani kayuwatɨ mumakakɨ mɨra'aita, hikɨ Kura kwieyaritsie kiekatari kayuwatɨ mehexeiyatɨ mekaniu'uwakaitɨni, pɨkayumienekai nixeime matɨa.
2CH 14:7 'Atsá Kuratsie kiekatari mɨpaɨ katiniwarutahɨawe: «Mɨkɨ kiekarite tawari 'aixɨa tepitiyurieni, meta waritana tepewewietɨkɨne kuraru 'amatayewa tuxiyu hexeiyatɨkaime, kitenie hexeiyatɨkaime meta reunarɨmikeme. 'Ikɨ kwie 'akuxi pɨtitapini, Yawé takakaɨyari temanukuwaukɨ, tame temenukuwaukɨ, mɨkɨ kataniupitɨani kayuwatɨ temexeiyanikɨ ta'aurie kiekatari wahamatɨa». Hikɨ yapɨtiuyunakixɨ kepauka tawari kiekarite 'aixɨa memutiyuri.
2CH 14:8 'Atsá Kura kwieyaritsie kuyaxi pɨwarexeiyakai haika tsienituyari miriyari meyupaɨmeme, mɨkɨ pitsika mepɨ'ɨkai meta yuhetsie nunuwame 'ayeyeume, meta Wenikamini nuiwariyari hetsiemiemete huta tsienituyari heimana nauka tewiyari miriyari, mɨkɨ tupi mepɨ'ɨkai meta yuhetsie nunuwame 'etsimɨyeyeu. Mɨkɨ yunaitɨ mepɨhɨkɨtɨkai kuyaxi memeuyutakwiwawe memɨtɨrɨkawi.
2CH 14:9 Hikɨ 'etiupe tewiyari Tsera kaninuani waraye'unietɨ warawitɨtɨ xeimiyuniyari kuyaxi meta haika tsienituyari kaxetate kuyaxa miemete warahapatɨ, hikɨ kaninuani Maretsa mɨrakutewatsie paitɨ.
2CH 14:10 Ti'aitame 'Atsá kanayeyani para menukunakekɨ mayeweritsie Tsepata mɨrayetewatsie, hikɨ mana 'aixɨa mekateniuyu'uitɨani Maretsa 'ehurakaku.
2CH 14:11 'Atsá mana Yawé yukakaɨyari kaniutahɨawe, mɨpaɨ katinitahɨawe: «Yawé, 'ekɨ xeikɨa pepɨyɨwe kemɨ'ane mɨkatɨrɨkaɨye pemuparewieni meta mɨtɨrɨkaɨye. Yawé takakaɨyari ketaneuparewi, tame 'ahetsie tepɨtewiya, meta 'aixɨa temetetahɨaweke tepeyekɨ 'ikɨ memɨyumɨire tewatakwinike. 'Ekɨ Yawé, takakaɨyari pekanihɨkɨtɨni. Pepɨka'ipitɨaka tewitɨtɨ mɨmatsi'a'iwani».
2CH 14:12 Kepauka 'etiupetsixi 'Atsá meta Kuratsie kiekatari memɨwarutakwi Yawé kaniwara'iwa. 'Ana 'etiupetsixi mekaniyuta'una,
2CH 14:13 peru 'Atsá meta kuyaximama mekaniwaranukuweiya Keraxi mɨrakutewatsie paitɨ. Mana 'etiupetsixi mekaniukaxɨriyani, nixewitɨ 'ayenieretɨ pɨka'uyuhayewaxɨ, Yawé meta kuyaximama memɨwarukwikɨ. Kuratsie kiekatari waɨkawa piinite mekatenetɨni,
2CH 14:14 yaxeikɨata mekaniwarutakwini Keraxi 'aurie mamanetɨkatei kiekarite, mɨkɨ waɨkawa mekanimamakaitɨni Yawé hɨxie, hikɨ mekateniwarunawatsirieni, piinite waɨkawa memɨtehexeiyakaikɨ mana.
2CH 14:15 Metatsiere, tehɨwemete mematiteitsie mekanitahaxɨani, tewaxi yuwaɨkawa memaxuawetsie, hikɨ mekaniware'arieni yuwaɨkawame muxatsi meta kameyutsixi. Hikɨ 'anake Kerutsareme mekanakunuaxɨani.
2CH 15:1 Merikɨtsɨ 'Iyari Kakaɨyari hetsɨa mieme 'Atsariyaxi 'Ureri nu'aya hetsie kaninuani,
2CH 15:2 hikɨ mɨkɨ kaneyani 'Atsá manukunakekɨ, 'itaxeiyaka mɨpaɨ katinitahɨawe: «'Atsá, meta Kuratsie kiekatari meta Wenikamini nuiwarimama, xekeneneu'eni. Xehamatɨa Yawé kaniuyeikamɨkɨ, peru xɨka xeme hamatɨana xe'u'uwani. Xɨka xeme xe'enukuwauni, mɨkɨ xemitaxeiyakɨ kanixepitɨamɨkɨ, peru xɨka xe'iku'eirieni, mɨkɨta kanixeku'eirimɨkɨ.
2CH 15:3 Mɨixa wiyari panuyetɨa 'ixaheritsixi yuri Kakaɨyari mekahayexeiyatɨ meta xewitɨ pɨkatiwakuxaxatɨwakai, mawari wewiwamete mɨtiwata'ɨkitɨani pumawekai yaxeikɨata nixeime 'inɨari niukiyari mepɨka'aye'atɨakai.
2CH 15:4 Peru kepauka mete'uka'eniwatɨ Yawé 'ixaheritsixi yukakaɨyari hetsɨa memu'axɨa, meta kepauka memenukuwau, mɨkɨ kaniwarupitɨani memitaxeiyakɨ.
2CH 15:5 Mɨkɨ tukaritsie kɨkamete wahetsiemieme pɨkati'aixɨa'iyaritɨkai nixewitɨ pɨka'utawikwewekai, matsi naitsarie kwie mumanetɨkatsie teɨteri mepɨte'uka'eniwakai waɨkawa.
2CH 15:6 Nuiwarite meta kiekarite mepuyukwitɨwekai, Kakaɨyari mɨtiwakwinitɨakaikɨ waɨkawa 'uximatɨarikakɨ.
2CH 15:7 Peru xeme, heitserie xekeneti'uka xekatehayewatɨ kuya tihɨweme hepaɨ, mɨpaɨ xete'uximayatɨ yu'iwarika xekatenipitɨariekuni».
2CH 15:8 Kepauka 'Atsá mɨkɨ niuki mu'eni Kakaɨyari niukameya 'Atsariyaxi 'Ureri nu'aya mitaxataxɨ, kaniyuwaɨriya muwakumaweriyakɨ kakaɨyarixi memɨwewiyatɨka 'axamemɨ'anene naitsarie Kura kwieyaritsie meta Wenikamini kwieyaritsie, meta kiekarite ma'iwakaitsie 'Epɨrahini muhɨriyatsie. Metatsiere, mawari taiyame Yawé hetsiemieme 'aixɨa kaniuyurieni Yawé tukieya hɨxie takwa muwekai.
2CH 15:9 'Ariketa kaniwaruta'inieni Kuratsie kiekatari meta Wenikamini kwieyaritsie kiekatari, metatsiere 'Epɨrahini nuiwarimama, Manatsexi meta Tsimehuni nuiwarimama wahamatɨa memɨtitekai, yuwaɨkawatɨri 'ixaheritsixi 'Atsá mekaniutinɨkaitɨni, menenieretɨ Yawé Kakaɨyarieya hamatɨana muyeikakaikɨ.
2CH 15:10 Hikɨ 'Atsá haika metseri 'umiekaku tamamata heimana 'auxɨwi wiyari ti'aitakaku, mekaniuyukuxeɨrieni Kerutsareme kiekariyaritsie.
2CH 15:11 Mɨkɨ tukaritsie Yawé mekaniutimawirieni 'atahuta tsienituyari tuurutsixi meta 'atahuta miriyari muxatsi memɨwareyehapa memeyukukwitsie miemete.
2CH 15:12 Hikɨ tɨratu mekaniuwewieni, mɨpaɨ mekaniutiyuani meyuhɨritɨatɨ kename naimekɨ yu'iyarikɨ meta kememɨteyumatekɨ me'itiwauni Yawé, yu'ukiyarima wakakaɨyari.
2CH 15:13 Kemɨ'ane Yawé mɨka'anukuwauni, 'ixaheritsixi wakakaɨyari, mɨkɨ kanimieriemɨkɨ, tsepa 'amuyumate yatɨ 'etsimuyumate, tsepa mɨti'uki yatɨ mɨti'uka.
2CH 15:14 Mɨpaɨ mekaniutiyuani meyuhɨritɨatɨ Yawé hɨxie, karima me'utihiwatɨ meta kuxineta me'utihɨtsiwatɨ metatsiere 'awate.
2CH 15:15 Yunaitɨ Kuratsie kiekatari mekaniyutemamawiekaitɨni mɨya memɨte'uyuhɨritɨakaikɨ, naimekɨ yu'iyarikɨ memɨte'uyuriekaikɨ meta Yawé memanukuwaukɨ yuri meyɨatɨ, meta mɨkɨ muyuwaɨrikɨ memitaxeiyakɨ, mɨkɨta muwarupitɨakaikɨ kayuwatɨ memu'uwanikɨ nuiwarite wa'aurie kiekatari wahamatɨa.
2CH 15:16 Metatsiere, ti'aitame 'Atsá yukutsi Mahaka kemɨti'aitametɨkai kanita'imaiya, mɨkɨ 'Atserá 'uka kakaɨyariyari mutawewiekaikɨ 'axa'aneme. 'Atsá 'ɨkiyari kaniutatara, tumuanari kaneyeitɨani meta kanitataiya Kiruni 'akiyaritsie paitɨ.
2CH 15:17 Tsepa 'Atsá 'Ixaheri kwieyaritsie kakaɨyarixi watuki mɨka'uti'unaxɨ, 'aixɨa pɨtiuyeikakai yuheyemekɨ Yawé hetsiemieme,
2CH 15:18 meta Kakaɨyari tukita huru meta pɨrata kani'atɨani metatsiere piinite yupaapa matɨa memɨteyetuakai mɨtipatsiekakɨ.
2CH 15:19 Meta pɨkatiyukwinekai xeitewiyari heimana tamamata heimana 'auxɨwi wiyari 'Atsá ti'aitametɨkaku.
2CH 16:1 'Atsá ti'aitakaku xeitewiyari heimana tamamata heimana 'ataxewi wiyari, Watsaha, 'Ixaheri kwieyaritsie ti'aitame, Kuratsie kiekatari kaniwarutakwini, hikɨ Xama kiekariyari 'aixɨa kaniuyurieni meta kuraruyari 'akanatitewarita, mana 'Atsá Kuratsie ti'aitame mɨka'utayeikanikɨ.
2CH 16:2 Hikɨ 'Atsá kaniwayetɨni pɨrata meta huru Yawé tukieyata meta yuparatsiyuta mieme, hikɨ Weni-'Arari kanenɨ'airieni Tsiriya kwieyaritsie ti'aitame, 'ana mɨkɨ Ramatsiku pɨti'aitakai. Metatsiere 'ipaɨ 'aneme niuki kaneinɨ'airieni:
2CH 16:3 «Tɨratu tepɨwewieni 'ekɨ ne matɨa, meripaitɨ 'apaapa meta nepaapa wahepaɨ. Ne nepɨmatsihenɨ'airiwa huru meta pɨrata. Tɨratu kepemɨrexeiya Watsaha 'Ixaheri kwieyaritsie ti'aitame hamatɨa ketineuhayewa, 'ena mɨnetsihayewakɨ netsimienetɨ».
2CH 16:4 Weni-'Arari yapɨtiutanaki'eri ti'aitame 'Atsá kemainekai, hikɨ kaniwarutanɨ'ani kuyaxi tewa'aitɨwamete 'Ixaheri kiekariteyaritsie memɨtahaxɨanikɨ memɨwatakwinikɨ. 'Ana mɨpaɨ mekateniwara'iwa 'Iyuni kiekariyari, Rani meta 'Aweri-Mahini meta naime kiekarite ti'utamete Nepɨtahari mieme.
2CH 16:5 Kepauka Watsaha mɨpaɨ mɨretima, kaniuta'imani mɨtihayewarienikɨ Xama kiekariyari kuraruyari 'amatitewa wewiyanetɨ.
2CH 16:6 Hikɨ ti'aitame 'Atsá yunaime kaniwaruta'inieni Kura kwieyaritsie kiekatari, hikɨ naime katinetɨni Xama mɨtitipikai, tetexite meta kɨyexite Watsaha kɨmana 'iya kiekari kuraruyari 'amatitewaritakai, matsi mɨkɨkɨ Kehewa kiekariyari meta Mitsipa, mɨkɨ wakuraruyarite 'akanatitewaritaxɨani.
2CH 16:7 Hikɨ 'iya tukaritsie neniereme Kananihi kaninuani 'Atsá hɨxie, Kuratsie ti'aitame, mɨkɨ mɨpaɨ katinitahɨawe: «Tsiriya kwieyaritsie ti'aitame parewiya pemutawawirikɨ, Yawé 'akakaɨyari pemɨka'utawawirikɨ, kuyaxi tsiriyutsixi mekameniutawikweiya.
2CH 16:8 Metatsiere 'etiupetsixi meta riwiyutsixi mɨkɨ kuyaxiyari mepɨyumɨirekai, meta kaxetate waɨkawa mepɨwarexeiyakai kuyaxa miemete meta kawayutsixi, matsi Yawé kaniwayetuani 'ahetsɨa, 'ana mɨkɨ tukaritsie 'ekɨ hetsiena pemɨtiwiyakaikɨ.
2CH 16:9 Yawé naitsarie kwiepa kanitaniereni, mɨwaparewienikɨ hetsiena mieme yamemɨtekahu. Peru hikɨ 'ena mɨtiyehane pekanimierienemɨkɨ, 'axatiyurienetɨ muyutemawie hepaɨ pemɨtiuyurikɨ».
2CH 16:10 'Atsá kaniuyeha'ani mɨtaniere mɨya mɨtitahɨawixɨkɨ, hikɨ kanita'aita katsariyanata manutahɨiyanikɨ. 'Ana mɨtiyehane, 'Atsá katiniwakwinitɨakaitɨni yayupaɨmeme teɨteri.
2CH 16:11 'Atsá kemɨtiuyuri ti'aitatɨ, matɨari paitɨ 'atsita 'imatɨarieka kemɨtiuyuri, mɨkɨ pɨraka'utɨarie Kura kwieyaritsie te'aitamete waxapatsie meta 'Ixaheritsie te'aitamete waxapatsie.
2CH 16:12 'Atsá katiniutakwine yu'ɨkatetsie, xeitewiyari heimana tamamata heimana 'atanauka wiyari ti'aitatɨ, meta tsepanetɨ kwinie mɨ'anekai tikuyetɨ, Yawé pɨka'utiwau, matsi teyu'uayemawamete pɨta pɨwaranukuwau.
2CH 16:13 Hikɨ huta tewiyari heimana xewi wiyari ti'aitatɨ, 'Atsá kaniumɨni, hikɨ kaniukateukieni yu'ukiyarima wahamatɨa.
2CH 16:14 Mekanikateuku hakewa mɨkɨ meita'aitakai muwaye'inierienikɨ Rawiri kiekarienatsie, hakewa mahuni kaniukawewiyarieni mana kanatekieni witsimɨtiu'ɨatɨka 'anahɨnekaku meta yutsata waɨkawa witsimu'ɨatɨka 'aixɨa mɨrekuwewiyatɨka. Meta hetsiena mieme waɨkawa mekanatinaini nerɨkwari 'ahatitetereme mekaniutawewieni.
2CH 17:1 Ti'aitame 'Atsá 'utɨma ti'aitatɨ kanitsutɨani nu'aya Kutsapati, mɨkɨ Kura tɨrɨkaɨyeme kanayeitɨani 'Ixaheri 'itamienikɨ.
2CH 17:2 Kuyaxi kaniwaruku'uitɨaxɨani naitsarie Kura kiekariteyaritsie kuraruyari 'amatitɨtɨtsie, meta kuyaxi tehɨwemete kaniwarutanɨ'axɨani naitsarie Kura kwieyaritsie meta 'Epɨrahini kiekariyaritetsie paapaya 'Atsá me'iwakai.
2CH 17:3 Yawé Kutsapati hamatɨa kaniuyeikakaitɨni paapaya matɨari kemɨtiyurienekai hepaɨ mɨtiyurienekaikɨ, mɨkɨ Wahari kakaɨyarixiyari pɨkawaranukuwau,
2CH 17:4 matsi yupaapa Kakaɨyarieya kananukuwauni, Kakaɨyari 'aitsikateyatsie yakatinikamiekaitɨni, pɨkawaranukuwei 'ixaheritsixi kememɨteyuriekai.
2CH 17:5 'Ayumieme Yawé waɨkawa tɨrɨkariya kanipitɨani mɨra'aitatsie. Yunaitɨ Kuratsie kiekatari 'imikieri mekatenituirietɨwekaitɨni, hikɨ Kutsapati waɨkawa rexeiyatɨ kanayani, meta waɨkawa 'aixɨa pɨtixeiyariekai.
2CH 17:6 Yutemawietɨ Yawé 'aitsikateyatsie yakatinikamiekaitɨni, metsɨ kaniwarukumaweriya kakaɨyarixi watuki meta 'uka kakaɨyariyari 'Atserá 'ɨkiyarite.
2CH 17:7 Hikɨ Kutsapati hairieka wiyari ti'aitatɨ, kaniwarutanɨ'ani yuparewiwamete Weni-Kahiri, 'Awiriyaxi, Tsakariyaxi, Natanaheri meta Mikahiyaxi, para teɨteri memɨtewati'ɨkitɨanikɨ Kura kiekariteyaritsie.
2CH 17:8 Mɨkɨ wahamatɨa mekanekɨne rewitsixi Tsemahiyaxi, Netaniyaxi, Tsewariyaxi, 'Atsaheri, Tsemiramuti, Kunatani, 'Aruniyaxi, Tuwiyaxi meta Tuwaruniyaxi, meta mawari wewiwamete 'Eritsama meta Kurani.
2CH 17:9 Yawé xapaya mekanehurieni 'inɨari niukiyari maye'uxa, para Kuratsie kiekatari memɨtewati'ɨkitɨanikɨ. Hikɨ mɨpaɨ naitsarie Kura kiekariteyaritsie mekaniukakɨne, teɨteri metewa'ɨkitɨatɨ.
2CH 17:10 Yunaitɨ hipame nuiwaritetsie te'aitamete Kura 'aurie kiekatari Yawé mekaniutimakani, hikɨ nixewitɨ pɨka'uyuwaɨri Kutsapati mɨtamieni.
2CH 17:11 Piritsiteutsixitɨtɨ Kutsapati mekateni'atɨirieni, 'imikierite meta pɨrata, 'aixɨa mɨtiwaxeiyanikɨ. Yaxeikɨata 'arawetsixi muxatsi 'ukitsi memɨwaiyatɨka 'atahuta miriyari heimana 'atahuta tsienituyari (7.700) mekani'atɨirieni, meta tsipuri 'ukitsi 'atahuta miriyari heimana 'atahuta tsienituyari (7.700).
2CH 17:12 Kutsapati matsi waɨkawa tɨrɨkaɨyetɨ kanayeiximekaitɨni. Kura kwieyaritsie kaniutiwewieni kiekari kuraruyari 'amatitɨtɨ meta kiekarite hakewa mɨreti'utsiwani,
2CH 17:13 meta kiekaritetsie waɨkawa 'ikwaite pɨrexeiyakai. Kerutsareme kiekariyaritsie pɨwarexeiyakai kuyaxi waɨkawa kwinimieme memɨteheuyutakwiwawe,
2CH 17:14 kememɨte'aka'utsie, kuyaxi kemɨ'ane nuiwaritsie memɨmiemetetɨkai: Kuyaxi xeimiriyari wa'ukiyarima Kura kwieyaritsie miemete: 'Arinatsi, kuyaxi wa'ukiyari, haika tsienituyari miriyari mɨtiwa'aitɨa.
2CH 17:15 'Utɨmana pɨmiekai Kuhanahani, huta tsienituyari heimana nauka tewiyari miriyari mɨtiwa'aitɨa,
2CH 17:16 'Utɨmana pɨmiekai 'Amatsiyaxi Tsikɨri nu'aya, Yawé mɨti'uximayatsiriekakɨ yuxaɨta muyuyexataxɨ, kuyaxi huta tsienituyari miriyari katiniwa'aitɨakaitɨni.
2CH 17:17 Wenikamini nuiwarimama: 'Erihará, mɨkɨ kuya yemekɨ peuyutamiewekai, mɨkɨta kuyaxi huta tsienituyari miriyari pɨtiwa'aitɨakai tupi memu'ɨkai meta yuhetsie nunuwame.
2CH 17:18 'Utɨmana pɨmiekai Kutsawari, xeitsienituyari heimana nauka tewiyari miriyari (180.000) mɨtiwa'aitɨakai memɨte'uti'ɨkitɨariekai kuyaxa miemekɨ.
2CH 17:19 'Ikɨ yunaitɨ ti'aitame mekateni'uximayatsiriekaitɨni, meka'inɨaritɨ mɨkɨ mɨwareutanɨ'axɨakai kiekarite kuraruyari 'amatitɨtɨtsie naitsarie Kura kwieyaritsie.
2CH 18:1 Kutsapati matsi waɨkawa rexeiyatɨ kanayani meta 'aixɨa pɨtixeiyariekai, mɨkɨ 'Akawi matɨa memuyutimaretakaikɨ,
2CH 18:2 hikɨ yapaɨmexɨa wiyari 'anuyeyaku kaneyani kaneiku'iwata Tsamariya kiekariyaritsie. Mana 'Akawi muxatsi kaniwarukwini yuwaɨkawa meta wakaitsixi Kutsapati hetsiemieme meta memeweiyakai, meta mana kanita'inieni memɨyukwiyukɨ Xamuti Karaha kwieyaritsie miemekɨ.
2CH 18:3 'Akawi, 'Ixaheri kwieyaritsie ti'aitame, mɨpaɨ Kutsapati katiniuta'iwawiya, Kura kwieyaritsie ti'aitame: —¿Nehamatɨa pereuyeiwe, temɨwatakwinikɨ Xamuti Karaha kwieyaritsie kiekatari? Kutsapati mɨpaɨ kaniutayɨni: —'Ekɨtsɨ kepemɨtayɨni ne yanepɨtikayani, yaxeikɨa neteɨterima. 'Ahamatɨa tekanihuni tekanitakwiyuni.
2CH 18:4 Peru mɨpaɨta kaniutayɨni: —Peru mexi 'atsitekateyuriwawe, Yawé tepɨta'iwawiya.
2CH 18:5 Hikɨ 'Ixaheri kwieyaritsie ti'aitame kaniwarukuxeɨrieni Kakaɨyari niukametemama nauka tsienituyari, mɨkɨ mɨpaɨ katiniwaruta'iwawiya: —¿Teteyɨwawe temɨwatakwini Xamuti Karaha kwieyaritsie kiekatari, nutsutɨ hawaikɨ? Mɨkɨ mɨpaɨ mekaniutiyuani: —Ti'aitame kenemie, Kakaɨyari kamaniparewimɨkɨ pekaniwara'iwamɨkɨ.
2CH 18:6 Peru Kutsapati mɨpaɨ kaniutayɨni: —¿Xewitɨ 'ena katiuyeika Yawé niukameya, mɨyɨwe temita'iwawiyakɨ?
2CH 18:7 'Ixaheri kwieyaritsie ti'aitame mɨpaɨ katinita'eiya: —Xewitɨ 'akuxi 'apuyeika mɨyɨwe mɨkɨ Yawé muta'iwawiya tahetsiemieme, Mikahiyaxi katinitewaka 'Imɨra nu'aya. Peru mɨkɨ ne nekanixani'erieka, hatsuaku 'aixɨa ti'aneme nehetsiemieme pɨkanetixaxatɨwa, ke'axamɨtiyɨni xeikɨa pɨtixaxata. Kutsapati mɨpaɨ katinitahɨawe: —Mɨpaɨ pepɨka'utaineni.
2CH 18:8 Hikɨ 'Ixaheri kwieyaritsie ti'aitame xeime kaniuta'inieni yuparewiwame, mɨpaɨ katinita'aitɨani: —Yapauka xekenene'atɨiri Mikahiyaxi 'Imɨra nu'aya.
2CH 18:9 'Ixaheri kwieyaritsie ti'aitame, meta Kutsapati Kura kwieyaritsie ti'aitame, te'aitamete wakamixate me'anakatɨtɨkaitɨ meta yu'uwenitetsie menatekaitɨni, teɨteri memayukuxexeɨriwatsie Tsamariya kiekariyari kitenieyaritsie, meta wahɨxie yunaitɨ Kakaɨyari niukametemama mekaniku'ukaitɨni metewakuxaxatɨwatɨ.
2CH 18:10 Tserekiyaxi Kenana nu'aya, mɨkɨ tepɨa 'awayari mutiwewiekai, mɨpaɨ kaniutayɨni: «Yawé mɨpaɨ kanaineni: “'Ikɨ 'awatekɨ pekaniwatakwimɨkɨ tsiriyutsixi pepɨkawahayewa kepaukake pemɨwakwini”».
2CH 18:11 Hipatɨta Kakaɨyari niukametemama meniparewiekaitɨni yaxeikɨa me'utiyuatɨ, mɨpaɨ mete'ikɨhɨawetɨ 'Akawi: «Ti'aitame keniwarutakuya Xamuti Karaha kwieyaritsie kiekatari, pekaniwara'iwamɨkɨ Yawé kamaniparewimɨkɨ».
2CH 18:12 Hikɨ, Mikahiyaxi 'iniwame mɨpaɨ katinitahɨawe: —Neuxei, yunaitɨ Kakaɨyari niukametemama mɨpaɨ meputiyuane, kename ti'aitame rayu'iwa. 'Ekɨta hetsiena mieme 'aixɨa ketinexata, 'aniuki meta mɨkɨ waniuki meyutaxewirekɨ.
2CH 18:13 Peru Mikahiyaxi mɨpaɨ kaniutayɨni: —Yurikɨ mɨpaɨ nekanaineni Yawé hɨxie, mɨpaɨ nekamatinahɨaweni ne ti'aitame yanepɨretaxatɨani Kakaɨyari kemɨnerahɨaweni.
2CH 18:14 Kepauka munua ti'aitame hɨxie, mɨpaɨ katinita'iwawiya: —Mikahiyaxi, ¿teteyɨwawe temɨwatakwini Xamuti Karaha kwieyaritsie kiekatari, nutsutɨ hawaikɨ? Mikahiyaxi mɨpaɨ katinita'eiya: —Xekeniwarutakuya xekatenayu'iwakɨni, Kakaɨyari kaniwayetuamɨkɨ xehetsɨa.
2CH 18:15 Hikɨ ti'aitame mɨpaɨ katinitahɨawe: —¿Kepaɨmexɨa waɨriyarika nepɨmatsipitɨaka, para yurikɨ xeikɨa pemɨnetikuxaxatɨwanikɨ, Yawé hetsiemieme?
2CH 18:16 Hikɨ Mikahiyaxi mɨpaɨ kaniutayɨni: —Yunaime 'ixaheritsixi nekaniwaruxeiya metaxɨrietɨkaime hɨritsie, muxatsi memɨkatehekakutsiyari wahepaɨ. Hikɨ Yawé mɨpaɨ kaniutayɨni: “'Ikɨ teɨteri yukutsiyari mepɨkahexeiya. Yuxexuitɨ mekeheutayeixɨani yukie kayuwatɨ mehexeiyatɨ”.
2CH 18:17 'Ixaheri kwieyaritsie ti'aitame mɨpaɨ Kutsapati katiniutahɨawe: —Kamɨ kenemainekai, 'ikɨ hatsuaku 'aixɨa ti'aneme pɨkaneraxaxatɨwani, ke'axamɨtiyɨni xeikɨa pɨnetixaxatɨwa.
2CH 18:18 Tawarita Mikahiyaxi mɨpaɨ kaniutayɨni: —Xekeneu'eni Yawé niukieya: Yawé nepuxei yu'uwenitsie 'akaime 'auriena yunaitɨ kuyaxi muyuawitsie miemete mepɨti'ukai, tserietana meta 'utatana.
2CH 18:19 Hikɨ Yawé mɨpaɨ kaniutayɨni: “¿Kemɨ'ane 'Akawi 'Ixaheri kwieyaritsie ti'aitame pɨkemakaxɨani ti'itaiyatɨ, Xamuti Karaha kwieyaritsie kiekatari muwatakwinikɨ meta mana mɨmɨnikɨ?” Yuxexuitɨ yɨkɨ metenikuxatakaitɨni kehapaɨ memɨteku'eriwakai.
2CH 18:20 'Arike 'imatɨrieka, xewitɨ 'iyari kaninuani, Yawé hɨxie kaniutakeni, mɨpaɨ kaniutayɨni: “Ne nepikemakaxɨani neti'itaiyatɨ”. Yawé mɨpaɨ katinitahɨawe: “¿Kehapaɨ petiyurieni?”
2CH 18:21 'Iyari mɨpaɨ kaniutayɨni: “Nepɨyemie hikɨ 'iyari mɨti'itawa nepayani Kakaɨyari niukametemama hetsɨana memɨmiemete wahetsie”. Hikɨ Yawé mɨpaɨ katinitanɨ'ani: “Kenemie mɨpaɨ ketinekaye'a, pepeyɨwekaxɨani pepeikemakaxɨani peti'itaiyatɨ”.
2CH 18:22 Kenemaine, Yawé kaniwarupitɨani 'iyari mɨti'itawa 'ikɨ Kakaɨyari niukametemama 'ahetsɨa miemete, Yawé 'ari yakaniutayɨni ke'axamɨmatiyurieni.
2CH 18:23 Tserekiyaxi Kenana nu'aya mɨpaɨ tiu'enaka kananukukeni hikɨ Mikahiyaxi 'auritapa kaneutiwani. Meta mɨpaɨ katinita'iwawiya: —¿Titayari kename 'iyari Yawé hetsɨa mieme netsi'uku'eiri peraine, kename 'ekɨ pɨta meretaxatɨa?
2CH 18:24 Mikahiyaxi mɨpaɨ katinita'eiya: —Yapekatinetimaimɨkɨ kepauka peyu'awietanetɨ xeikɨa 'apemuyeikani.
2CH 18:25 Hikɨ 'Ixaheri kwieyaritsie ti'aitame mɨpaɨ katiniuta'aita: —Mikahiyaxi xekeneuwiyaka xekenanuhani 'Amuni kuwexinaruri 'ena mieme hetsɨa meta Kuhatsi neniwe hetsɨa.
2CH 18:26 Mɨpaɨ xeketeniwaretahɨawi kename mɨpaɨ nehaine meke'enutahɨani mɨkɨ tewi, nitixaɨtɨ mepɨkateheimikwani paa xeikɨa meta haa, kepaukake ne nemakunuani 'aixɨa nereu'erietɨ.
2CH 18:27 Peru Mikahiyaxi mɨpaɨ kaniutayɨni: —Xɨka 'ekɨ pehakunuani 'aixɨa pereu'erietɨ, mɨpaɨ pɨtimatsiɨkɨni kename Yawé kanetiutaxatɨa. Xeme xeyunaitɨ xepɨkatehatɨtɨmaiyani tinaime kenemutayɨ.
2CH 18:28 'Ixaheri kwieyaritsie ti'aitame, meta Kutsapati, Kura kwieyaritsie ti'aitame, mekanekɨne yunaitɨ Xamuti kiekariyari mehetamienike Karaha kwieyaritsie.
2CH 18:29 Mana 'Ixaheri kwieyaritsie ti'aitame mɨpaɨ Kutsapati katiniutahɨawe: «Ne nekaniyutamiemɨkɨ yɨkɨ nerekemaritɨ, peru 'ekɨ 'akamixate witsimɨ'anene ketinanakapitɨ». Hikɨ 'Ixaheritsie ti'aitame yɨkɨ tiyukemaritɨaka kaniyutamieni.
2CH 18:30 Peru Tsiriya kwieyaritsie ti'aitame mɨpaɨ katiniwaruta'aitɨakaitɨni kaxetate kuyaxa miemete nɨ'awamete tewa'aitɨwamete: «'Ixaheri kwieyaritsie ti'aitame xeikɨa xekenetami'a, nixeime tawari xepɨkahemietɨweni».
2CH 18:31 Kepauka kuyaxi kaxeta memuhapana tewa'aitɨwamete Kutsapati memuxei, mɨpaɨ mekateniu'erieni: «'Ikɨ 'Ixaheri kwieyaritsie ti'aitame pɨyɨane». Hikɨ mekanenukuweiya me'itamienike, peru Kutsapati kaniutahiwa, meta Yawé Kakaɨyari kaniparewieni, yakatiniuyurieni memɨka'itamienikɨ.
2CH 18:32 Hikɨ kaxeta memuhapana tewa'aitɨwamete mɨpaɨ metenetimani kename 'Ixaheri kwieyaritsie ti'aitame kayɨanekai, hikɨ 'ana mekanihayewa me'iweiyatɨ.
2CH 18:33 Matsi, xewitɨ katiniutamɨni yutupikɨ hau'erietɨ hikɨ 'Ixaheri kwieyaritsie ti'aitame kaniu'axe katinikwinitɨani, tepɨa kamixayari manakatɨkɨkai taɨta kaneukakeni. Hikɨ ti'aitame, kaxetaya mahanakai mɨpaɨ katiniutahɨawe: «Keneukunuitɨa, kenenetuamie hakewa mɨkarayukwinetsie, 'ariri nepɨtiukwinitɨarie».
2CH 18:34 Tukarikɨ waɨkawamekɨ mekaniyukwitɨwekaitɨni, hipatɨ kuyaxi 'Ixaheri kwieyaritsie ti'aitame 'amekaniukekaitɨni kaxetayatsie tsiriyutsixi wahɨxie, kepaukake mukutaikairixɨ, hikɨ kaniumɨni kepauka tau makayunixɨ.
2CH 19:1 Kepauka Kura kwieyaritsie ti'aitame Kutsapati munua 'aixɨa 'anemekɨ yuparatsiyuta Kerutsareme,
2CH 19:2 mɨtaniere Kehu Kananihi nu'aya hetsɨana nuaka mɨpaɨ katinitahɨawe: «¿Titayari 'axamemɨte'u'iyari petiwaruparewi, wahamiku perayuyeitɨa teɨteri Yawé memaye'unie? Mɨya pemɨyɨkɨ, Yawé waɨkawa kaniha'aka 'ahamatɨa.
2CH 19:3 Peru heiwa 'aixɨa pepɨtiuyurita, 'ekɨtsɨ pekaniwarukumaweriya 'ikɨ kwieyaritsie 'uka kakaɨyariyari 'Atserá 'ɨkiyarite, meta pe'inaki'erietɨ naimekɨ 'a'iyarikɨ Kakaɨyari pekanikuwauni».
2CH 19:4 Kutsapati Kerutsareme kaniukateitɨni, peru kanayeyeikakaitɨni teɨteri kaniwaruka'iwatakaitɨni, Weritsewa 'itsutɨame 'atsita 'Epɨrahini hɨriyaritetsie, para Yawé hetsɨa memanuaxɨanikɨ, yu'ukiyarima wakakaɨyari hetsɨa.
2CH 19:5 Xexuime Kura kiekariteyari kuraruyari 'amatitɨtɨtsie 'itsɨkate memuku'utɨkanikɨ kaniwarutihɨawe
2CH 19:6 meta mɨpaɨ katiniwarayehɨtɨani: «Kexemɨteyurie xekeneyukweriwayurieka, tewi pɨkaxe'anuka'uitɨa matsi Yawé pɨta, mɨkɨ xehamatɨa kaniuyeikamɨkɨ kepauka yaxemɨtiyuani kemɨ'ane heitserie mexeiya.
2CH 19:7 'Ayumieme, Yawé xekenemakaxeni meta xekeneyukweriwayurieka kexemɨteyurie, karikɨ Yawé takakaɨyari kemɨkatiheitserie temɨteyurieka pɨka'inake meta hipame xeikɨa temɨwaparewieka meta tuminikɨ hipame wahetsie temɨnuaka».
2CH 19:8 Kerutsareme kiekariyaritsie, meta Kutsapati kaniwaru'uitɨani rewitsixi, mawari wewiwamete meta 'Ixaheri nuiwarimama wa'ukiyarima, Yawé 'aitsikateya hetsiemieme memɨte'uximayakakɨ meta teɨteri memuyu'uximatɨa 'aixɨa memɨtewarakayuririwanikɨ. Mɨkɨ Kerutsareme mekanititekaitɨni.
2CH 19:9 Kutsapati mɨpaɨ katiniwaruta'aitɨani: «Xeme xekatenita'uximayatakuni Yawé xe'ayemakatɨ, naimetsie yaxetekahutɨ, xe'iyari 'aixɨa tiyukɨhɨawekaku.
2CH 19:10 Merikɨte kepauka xe'iwama memɨ'axɨani hipame kiekaritetsie kiekatari mexetaxanetɨanike 'imieri hepaɨtsita, yatɨni tsepa titakɨ 'inɨari niukiyari hepaɨtsita timieme, 'aitsikate, xemeri xekaniwarayehɨtɨwakuni Yawé hepaɨtsita 'axamemɨkateyuriekakɨ, mɨkaha'akakɨ wahepaɨtsita meta xehepaɨtsita. Xɨka mɨpaɨ xetekahuni xehetsie pɨkarahɨiyani.
2CH 19:11 »'Amariyaxi mawari wewiwamete tiwa'aitɨwame mɨkɨ pɨxetitaxatɨani naime tita mɨraniereni Kakaɨyari hepaɨtsita. Meta Tsewariyaxi 'Itsimaheri nu'aya, Kura nuiwarimama wa'ukiyari, mɨkɨta xɨka raniereni kuwiyexinu kemɨti'uximaya hepaɨtsita pɨxeparewieka. Yaxeikɨata rewitsixi mepɨxeparewiekata xeme. Xekeneyuwaɨriyani, xeketene'uximayakari. Yawé 'aixɨa memɨtekahu wahamatɨa kaniuyeikamɨkɨ».
2CH 20:1 'Arike mɨyatiuyɨku, muhawitsixi, 'amunitsixi meta mehunitsixi yameyupaɨmetɨ me'itaxewiriyaka, Kutsapati yamekateniutahɨawe memɨyutakwinikɨ,
2CH 20:2 hikɨ xewitɨ katineikuxatɨani: «Hipatɨ Haramara Mɨmɨki 'anutaɨye kiekatari yumɨiretɨ mekaniyuha'aritɨaka meta 'Erumi kiekatari. Hikɨri Katsetsuni-Tamaxi mekanetiteni 'ume'ahutɨ, 'Enikari mɨrakutewa».
2CH 20:3 Kutsapati waɨkawa matɨ, Yawé kaniutahɨawe meta naitsarie Kura kwieyaritsie yakatiniuta'aita memuyuhakienikɨ.
2CH 20:4 Naitsarie Kura kiekariteyaritsie kiekatari mekaniu'axɨani yunaitɨ meyunɨtɨ Yawé parewiya memɨtawawirienikɨ.
2CH 20:5 Yawé tukieya manuwe, takwa mɨhekwa hɨxie, Kutsapati 'utakeka Kuratsie kiekatari memɨyuxeɨrie meta Kerutsaremetari wahɨxie,
2CH 20:6 mɨpaɨ kaniutayɨni: «Yawé, ta'ukiyarima wakakaɨyari, 'ekɨ pekanihɨkɨtɨni Kakaɨyari muyuawitsie pemakawe, meta yunaime nuiwarite pemɨtiwa'aitɨa pekanihɨkɨtɨni. 'Ekɨ waɨkawa pekanitɨrɨkaɨyeni yemekɨ xewitɨ 'apɨka'uyeika mɨmatsi'a'iwa 'ekɨ.
2CH 20:7 'Ekɨ pepɨtiuyuri, takakaɨyari, 'ixaheritsixi 'ateɨterima wahɨxie pemɨwarayewei 'ikɨ kwieyaritsie kiekatari. Meta 'ekɨ pepɨtiuyuri, 'ahamiku 'Apɨrahami nuiwarimama pemɨwayetuiri 'ikɨ kwie yuheyemekɨ mɨwahetsiemiemetɨnikɨ.
2CH 20:8 Mɨkɨ mana mepɨkuyaxixɨ meta tuki meputawewi 'ahetsiemieme, mɨpaɨ me'utiyuatɨ:
2CH 20:9 “Kepauka tahetsie munuani 'uximatɨarika, yatɨni xɨka tetekwinitɨarieka 'ixiparakɨ, yatɨni kwiniyakɨ, yatɨni haakakɨ, xɨka te'uyukuxeɨrieni 'ahɨxie 'ikɨ 'atuki manuwe hakewa pemayeka, xɨka karima tematsi'utahɨawe waɨkawa te'uximatɨarietɨ, 'ekɨ pepɨtatsi'enieni meta pepɨtatsitawikweitsitɨani”.
2CH 20:10 »Kepauka 'Ekipitutsie 'ixaheritsixi memayekɨ, 'ekɨ pepɨkawarupitɨa 'amunitsixi memɨwakwini, meta muhawitsixi metatsiere tsehixi hɨriyaritsie memɨtitei, matsi xaɨtsie pepɨwareukɨnɨ'a mɨkɨ nuiwarite memɨkawareuyehɨpanikɨ.
2CH 20:11 Neuxei hikɨ mɨya mekataniyurieka, 'amekanahuni metatsitaweiyake 'ikɨ kwietsie pemɨtatsiyetuiri taheyemekɨ mɨtahetsiemiemetɨnikɨ.
2CH 20:12 Takakaɨyari 'aku, 'uximatɨarika keniwarupitɨa. Tame tepɨkayɨwawe temɨwara'iwa mɨkɨ memɨyumɨire 'umemahu metatsitakwinike. 'Atsitepɨkatemate ketemɨteyurieka. 'Ahetsie xeikɨa tetewiyatɨ tepɨta'ikwewa».
2CH 20:13 Yunaitɨ 'ukitsi Kuratsie kiekatari Yawé hɨxie 'amekaniti'ukaitɨni, meta yu'ɨitama wahamatɨa meta yuniwema, metatsiere 'etsimemɨtɨtɨ.
2CH 20:14 Merikɨte 'ana Yawé 'Iyarieya Kahatsieri hetsie kaninuani, Tsakariyaxi nu'aya, Wenahiyaxi teukarieya, Keyeri tutsieya meta Mataniyaxi, mɨkɨ rewi tewiyari pɨhɨkɨtɨkai, meta 'Atsahapi nuiwarieya, mɨkɨ xeikɨa mana puyeikakai mɨrayuxeɨritɨtsie.
2CH 20:15 Kahatsieri mɨpaɨ kaniutayɨni: «Xekeneu'enana, Kuratsie kiekatari meta Kerutsareme, meta yaxeikɨata keneu'ena ti'aitame. Yawé mɨpaɨ kanaineni: “Xepɨkaheumamaka. Xepɨkaheuyuyexɨrɨwani kepauka xemɨwaxeiya mɨkɨ kuyaxi memɨyumɨire, matsi xeme xepɨkayutakwini nepɨta nekaninetamiemɨkɨ.
2CH 20:16 'Uxa'a, kepauka mɨkɨ Tsihitsi teikɨmanayaritsie memutihunitsie, xemeta wahepa xekanayekɨnikuni hikɨ 'aki manuyekatsie xekaniwanakekakuni, Keruheri makumawetsie hɨxie.
2CH 20:17 Peru xeme xepɨkaheyutakwini wahamatɨa. Matsi kayuwatɨ xeketene'uka xeikɨa, para xemɨnenierekɨ Yawé kemɨtixetawikweitsitɨani. Kura meta Kerutsareme kiekatari, xepɨkaheumamaka meta xepɨkaheuyuyexɨrɨwani. 'Uxa'a ximeri xekenayekɨni wahepa, karikɨ, ne Yawé xehamatɨa nekaniuyeikamɨkɨ”».
2CH 20:18 Kutsapati meta Kuratsie kiekatari metatsiere Kerutsareme kiekatari yunaitɨ kwiepa mekaniukahɨxima'uni meta Yawé 'aixɨa mekateniutahɨawe,
2CH 20:19 meta rewitsixi Kuhati meta Kure niwemama 'amekaniti'uni Yawé 'Ixaheri Kakaɨyarieya metanɨawake karima.
2CH 20:20 'Uxa'arieka, ximeri paitɨ Tekuha makumawetsie mekanekɨne. Me'uhukaku, Kutsapati 'a'utakeka mɨpaɨ kaniutayɨni: «Kuratsie kiekatari meta Kerutsareme, xekeneneu'eni: Yawé hetsie yuri xeketene'erieka, xepɨxɨnarieni. Kakaɨyari niukametemama yuri xeketeniwa'eririeka, 'aixɨa katiniyɨmɨkɨ xehetsiemieme».
2CH 20:21 'Arike yunaime teɨteri waruta'iwawiyaka, Kutsapati kaniwaranayexeiya kemɨ'ane memanuyeyaxe kuyaxi wahɨxie para Yawé menɨawatɨ memuhunikɨ witsikemɨ'ane meta kemɨtipatsie, mɨpaɨ mepɨte'ukwikakai: «Yawé pamɨpariyutsi xekenepitɨaka, mɨkɨ mɨkatihayewakɨ tatsinaki'erietɨ».
2CH 20:22 Kepauka 'ikɨ nɨawari me'ikwikatɨ memitsutɨa, Yawé kaniwaruhupieni 'amunitsixi, muhawitsixi meta Tsehixi hɨriyaritsie kiekatari memayekɨnekai Kuratsie kiekatari mewaraye'unietɨ, hikɨ kaniwara'iwa.
2CH 20:23 Muhawitsixi meta 'amunitsixi mekaniwarutakwini Tsehixi hɨriyaritsie kiekatari, mekaniwarukwini 'atsita yunaime mekaniwarukumaweriya. Hikɨ Tsehixi kwieyaritsie kiekatari mewarukumaweriyaka, yukɨmana mekaniyutakwini hikɨ mekaniyukwixɨani yuxexuitɨ.
2CH 20:24 Kepauka Kuratsie kiekatari makumawe tuxiyuyaritsie memu'axɨa mewaxeiyake memɨwaraye'unie kuyaxi memɨyumɨire, nitixaɨtɨ mepɨkate'uxei, mɨkite xeikɨa mepɨwaruxei kwiepa meheutiheikame. Nixewitɨ 'ayeyuritɨ pɨka'utayu.
2CH 20:25 Hikɨ Kutsapati 'ana yuteɨterima warawitɨtɨ mekanekɨne memɨtehekupinikɨ piinite mɨraye'atɨka, hikɨ mɨkite watsata waɨkawa piinitɨarika mekateniutaxeiya, 'ixurikite meta kukate mɨraye'atɨka. Yuxexuitɨ mekateniutipixɨani naime tita memɨteheupikukai. Piinite katiniwaɨkawakaitɨni, haika tukari mekaniuyurieni metekuteɨxɨtɨ.
2CH 20:26 Naurieka tukaritsie mekaniyukuxeɨrieni Weraka mayeweritsie, mana Yawé 'aixɨa mekateniutahɨawe, 'ayumieme mana Weraka mayeweritsie mekateniuterɨwa, mana hikɨ yaxeikɨa mɨpaɨ katinematiwani.
2CH 20:27 Hikɨ 'arike, yunaitɨ Kuratsie meta Kerutsareme kiekatari, Kutsapati warawitɨtɨ, Kerutsareme mekananuaxɨani waɨkawa meyutemamawietɨ Yawé mɨwaruxɨnaxɨkɨ memɨwaraye'uniekai wahetsɨa.
2CH 20:28 Me'u'axɨaka, Yawé tukita mekaneutahaxɨani mete'ukayuitɨwatɨ 'aripakɨ, rirakɨ meta kuxinetatekɨ.
2CH 20:29 Hikɨ nuiwarite kwiepa memɨtama me'u'enanaka Yawé kemɨtiwarutakwikai 'ixaheritsixi memɨwaraye'uniekai, matsi kwinimieme Kakaɨyari me'ayemakatɨ mekanakɨne.
2CH 20:30 'Ayumieme Kutsapati ti'aitakaku kayuwatɨ pumakai, meta Kakaɨyari kayuwatɨ kaniwarupitɨani naitsarie mɨtiuyehanetsie.
2CH 20:31 Merikɨtsɨ Kutsapati kanitsutɨani Kura kwieyaritsie ti'aitatɨ xeitewiyari heimana tamamata heimana 'auxɨwi wiyari hexeiyatɨ, Kerutsareme kiekariyaritsie pɨtiuta'aitaxɨ xeitewiyari heimana 'auxɨwi wiyari. Maamaya pɨtitewakai 'Atsuwa Tsiriki nu'aya.
2CH 20:32 Mɨkɨ piweiyakai yupaapa 'Atsá ke'aixɨa mɨtiuyuri, hatsuaku pɨkatiuhayewaxɨ, matsi Yawé kemɨtinake pɨtiyurienekai.
2CH 20:33 Peru pɨka'iti'unaxɨ kakaɨyarixi memɨte'atimawiyarɨwa, 'akuxi teɨteri memɨkayuyetuawawekaikɨ yu'ukiyarima wakakaɨyari hetsɨa.
2CH 20:34 Hipatɨta kemɨtiuyɨ Kutsapati ti'aitakaku, mɨtiukatsutɨatsie timieme meta 'imatɨrieka timieme, katinaka'utɨarieni kemɨtiuyɨ xapayaritsie Kehu Kananihi nu'aya miti'utɨatsie, 'Ixaheri kwieyaritsie te'aitamete waxapa hamatɨa mɨ'inɨatsie.
2CH 20:35 'Arikekeri Kutsapati, 'Ukutsiyaxi 'Ixaheri kwieyaritsie ti'aitame kaniutinɨni, mɨkɨ ti'aitame 'axapɨtikamiekai,
2CH 20:36 mekaniuyunɨni kanuwate 'amupapa tituayamete memɨtiwewienikɨ Taritsi paitɨ memuhukɨ. Kanuwate 'amupapa mepitiwewiwakai 'Etsihuni-Kewexi mɨtiyetewatsie.
2CH 20:37 Hikɨ 'Eriyetsexi Ruriyaxi nu'aya, Maretsa kiekame, Kutsapati hepaɨtsita mɨpaɨ katiniutahekɨata: «'Ukutsiyaxi pemutinɨikɨ, Yawé katinika'unamɨkɨ ketita pemɨtiwewiene». Mɨpaɨ pɨtiuyɨ, kanuwate 'amupapa kaniukayunixɨani, mepɨka'ɨyɨwekaxɨa Taritsi memuhukai.
2CH 21:1 Kutsapati kaniumɨni kaniukateukieni yu'ukiyarima wahamatɨa Rawiri kiekariena, 'utɨmanata nu'aya Kurani titewatɨ kanitsutɨani ti'aitatɨ.
2CH 21:2 'Iwamama mepɨhɨkɨtɨkai 'Atsariyaxi, Kehieri, Tsakariyaxi, 'Atsariyaxi, Mikaheri meta Tsepatiyaxi mepɨtetetewakai. 'Ikɨ yunaitɨ Kutsapati 'Ixaheri kwieyaritsie ti'aitame niwemama mekanakɨne.
2CH 21:3 Wapaapa 'imikieri katiniwayetuiriekaitɨni pɨratate, hurute metatsiere piinite mɨraye'atɨka tiwaɨkawame, meta kaniwayetuirieni kiekarite kuraruyari 'amatitɨtɨ Kura kwieyaritsie miemete, peru mɨra'aita yuniwe Kurani kaniyetuirieni, mɨkɨ nu'aya mexɨakame mɨhɨkɨtɨkaikɨ.
2CH 21:4 Kepauka Kurani yupaapa hetsiemieme ti'aitatɨ tɨrɨkaɨyetɨ matɨa, 'ana yu'iwama kaniwarukwini yunaime meta hipame 'ixaheritsixi wa'ukiyarima.
2CH 21:5 Kurani xeitewiyari heimana tamamata heimana huta wiyari pexeiyakai kepauka mitsutɨa ti'aitatɨ, hikɨ katiniuta'aita Kerutsareme kiekariyaritsie 'atahaika wiyari.
2CH 21:6 Peru Yawé kemɨkatinake katiniuyurieni, 'Ixaheri kwieyaritsie te'aitamete ke'axamemɨte'uyuri mɨpaɨ pɨtikatɨa, 'Akawi tɨɨriyamama ke'axamemɨte'uyuri wahepaɨ, metatsiere 'Akawi nu'aya 'uka kaniutiwitɨni paitɨ.
2CH 21:7 Peru Yawé pɨka'uyuwaɨri mika'una Rawiri nuiwarieya ma'eriwakaikɨ tɨratu kemɨtiuwewi hamatɨana, mɨpaɨ mɨtitahɨawekaikɨ kename kɨxeme yuheyemekɨ takakekai hetsiena mieme meta nuiwarimama wahetsiemieme.
2CH 21:8 Kepauka Kurani mɨti'aitametɨkai, 'erumitsixi mekanayutsana Kura hetsie memɨtehawiyakai, yuxaɨta ti'aitame mekananukakeni yuhetsiemieme.
2CH 21:9 'Ayumieme, Kurani kaneyani kuyaximama tewa'aitɨwamete warawitɨtɨ meta yunaime kaxetate kuyaxa miemete warahapatɨ. Hikɨ 'erumitsixi mɨkɨ warita mekanayaxetɨkɨne meta kaxetate kuyaxa miemete wanɨ'awamete tewa'aitɨwamete wawarita, peru tɨkarikɨ Kurani kanitaxeiya hakewa meuyehani.
2CH 21:10 'Anatɨtɨ mɨtiyehane 'Erumi kwieyari Kura kwieyaritsie pɨkatiwiya, metatsiere yaxeikɨa Riwina kiekariyari kanayutsana mɨkɨ mɨya memɨyɨ wahepaɨtsita. 'Ikɨ mɨya pɨtiuyɨ Kurani Yawé muku'eirikɨ, 'ukiyarimama wakakaɨyari.
2CH 21:11 Meta matsi Kurani kakaɨyarixi watukite kaniutiwewieni yemuritetsie Kura kwieyaritsie, mɨya tiuyurieku 'ana teɨteri Kerutsareme meta Kuratsie kiekatari kakaɨyarixi mewarayexeiyatɨ mekanakɨne.
2CH 21:12 Kakaɨyari niukameya 'Eriyaxi xapa kaneinɨ'airieni mɨpaɨ 'ayetaineme: «Yawé mɨpaɨ kanaineni, 'a'ukiyari Rawiri kakaɨyarieya: “Meripaitɨ 'apaapa Kutsapati 'aixɨa kemɨtiyurienekai pemɨka'anukuweikɨ meta 'Atsá, Kura kwieyaritsie mɨti'aitametɨkai,
2CH 21:13 matsi pɨta 'Ixaheri kwieyaritsie te'aitamete ke'axamemɨte'uyuri wahepaɨ pemɨtiuyurikɨ, mɨya petiuyurieku Kuratsie meta Kerutsareme kiekatari Kakaɨyari me'ayexeiyatɨ mepɨka'akɨ, 'Akawi niwemama kememɨte'uyuri, metatsiere 'a'iwama pemɨwarukwikɨ, 'apaapa niwemama, mɨkɨ 'aixɨa memɨte'u'iyarikai keyuri 'ekɨ,
2CH 21:14 'ayumieme Yawé kwiniya mariweme kananɨ'amɨkɨ 'ateɨterima wahetsie, 'aniwema, 'a'ɨitama, meta naime tita pemɨrexeiya hetsie.
2CH 21:15 'Ekɨta yaxeikɨa kwiniya kamenanɨ'airiemɨkɨ 'ayuriepa, kwinie mayakame tukari manukayeikanitsie kwinie matsi pekaniyɨximemɨkɨ, hekɨa 'akwinuri kanawiwimɨkɨ”».
2CH 21:16 Hikɨ Yawé piritsiteutsixi meta 'arawetsixi 'etiupetsixi wa'aurie kiekatari kaniwaruyuitɨani Kurani me'aye'unietɨ memakɨnekɨ.
2CH 21:17 'Ayumieme mekanekɨne Kura kiekatari memɨwatakwinikɨ, hikɨ mekaniwara'iwa, 'ana tinaime mekatenetɨni piinite mɨraye'atɨka paratsiyu 'amupata memɨte'ukaxei, metatsiere Kurani niwemama meta 'ɨitamama mekaniwarewitɨni. Niweya nixewitɨ pɨka'uyuhayewaxɨ 'ayenieretɨ, Kuhakatsi xeikɨa kaniuyuhayewa, kwi wamuta mɨhɨkɨtɨkai.
2CH 21:18 Hikɨ 'arikeke, Yawé kwiniya Kurani kaneyenɨ'airieni yuriepana kayu'uayemarinɨakame.
2CH 21:19 Mɨixa tukari kananukayani, hikɨ huta wiyari 'aye'aku, kaniumɨni waɨkawamekɨ tiukakukuinetɨ, mɨkɨ kwiniyakɨ kwinuriteya kanawiwieni. Teɨterimama mehe'eriwatɨ hetsiena mieme mepɨkahatinai, meripaitɨ 'ukiyarimama wahetsiemieme kememɨte'atiyuriximekai.
2CH 21:20 Kepauka Kurani mitsutɨa ti'aitatɨ xeitewiyari heimana tamamata heimana huta wiyari pexeiyakai, meta 'atahaika wiyari Kerutsareme katiniuta'aita. Kepauka mumɨ nixewitɨ hetsiena mieme hiwerika 'inɨariyari pɨka'uwewi, meta kaniukateukieni Rawiri kiekariena, peru hawaikɨ te'aitamete memuyehetsie pɨka'ukateukie.
2CH 22:1 Merikɨtsɨ ti'aitame Kurani 'umɨku, Kerutsareme kiekatari 'Ukutsiyaxi mekaniutahɨawe ti'aitame mayanikɨ, Kurani nu'aya 'etsimuyumate, matsikamama yunaime memɨwarukwikaikɨ 'arawetsixi waparewiwamete mematitekaitsie me'u'axɨaka. Mɨpaɨ 'Ukutsiyaxi Kurani nu'aya ti'aitame katinayani Kura kwieyaritsie.
2CH 22:2 'Ukutsiyaxi huta tewiyari heimana huta wiyari kanexeiyakaitɨni kepauka ti'aitatɨ mitsutɨa, hikɨ Kerutsaremetsie xeiwiyari katiniuta'aita. Warutsieya 'Atahariya pɨhɨkɨtɨkai, 'Umiri teukarieya.
2CH 22:3 Metatsiere 'Ukutsiyaxi, 'Akawi niwemama ke'axamemɨte'uyuri wahepaɨ katiniuyurieni, maamaya katini'ɨkitɨakaitɨni ke'axamɨtiyurienikɨ.
2CH 22:4 Yawé kemɨkatinake katiniuyurieni, kememɨte'uyuri 'Akawi niwemama. Hikɨ paapaya 'umɨku, 'Ukutsiyaxi mɨkɨ 'iwamama memi'ɨxatsitɨaka kaniwarayeitɨani, mɨpaɨ mɨkɨ katineuyeweni.
2CH 22:5 Mɨkɨ mɨpaɨ 'aneme 'ɨxatsi me'ipitɨakaku, 'Ukutsiyaxi Kurami kaniutinɨni 'Akawi nu'aya, 'Ixaheri kwieyaritsie ti'aitame, hikɨ kaneyani Xamuti Karaha kwieyaritsie Katsaheri memetamienikɨ Tsiriyatsie ti'aitame, peru kepauka memɨwakwitɨwekai tsiriyutsixi Kurami mekateniukwinitɨani.
2CH 22:6 'Ayumieme kanakunuani Ketsireri paitɨ, mana meyuyutɨanikɨ Xamuti kiekariyaritsie mɨrekwinitɨariekɨ, kepauka meyutami Katsaheri hamatɨa, Tsiriyatsie ti'aitame. Hikɨ Kurami 'Akawi nu'aya mɨtiuka'eniwakaikɨ Ketsireri 'ukaitɨ, 'Ukutsiyaxi Kurani nu'aya, Kura kwieyaritsie ti'aitame, kaneiku'iwata.
2CH 22:7 Hikɨ Kakaɨyari yapainekai kename 'Ukutsiyaxi hemɨnikekai, kepauka Kurami mɨ'iwatamiekai. Yapauka 'Ukutsiyaxi munuatsie, Kurami matɨa kanayeyani para Kehú memanukunakekɨ Nimitsi nu'aya, mɨkɨ Yawé kanenayexeiyakaitɨni para 'Akawi nuiwarimama mɨwarakumaweriyakɨ.
2CH 22:8 Mexi Kehú wakwinekai 'Akawi nuiwarimama, kaniwaranukunake Kuratsie kiekatari wa'ukiyarima meta 'Ukutsiyaxi 'iwamama memiparewiekai, hikɨ mɨkɨ kaniwarukwini.
2CH 22:9 Hikɨta katiniuta'aita 'Ukutsiyaxi muwawiemiekɨ, Tsamariyatsie muyuti'awietakai, peru kaniuwiyarieni Kehú hetsɨa kani'atɨarieni, mɨkɨta katiniuta'aita mɨmierienikɨ. Peru mɨyatɨtɨ, kaniukateukieni, teɨteri mɨpaɨ memutiyuanekaikɨ: «Kutsapati kaninu'ayatɨni, naimekɨ yu'iyarikɨ Yawé mutiwau». 'Anari 'Ukutsiyaxi niwemama nixewitɨ pɨka'ɨyɨwekaxɨa yɨwetɨ ti'aitame mayanikɨ Kuratsie.
2CH 22:10 Kepauka 'Atahariya 'Ukutsiyaxi maamaya mɨpaɨ mɨretima kename nu'aya hemɨkai, 'ana kanitsutɨani yunaime ti'aitame niwemama wakwitɨ Kura kwieyaritsie kiekatari.
2CH 22:11 Peru 'uka Kutsawa, ti'aitame nu'aya meta mawari wewiwame Kuyara 'ɨyaya, Kuhatsi kaniuti'awieta 'Ukutsiyaxi nu'aya kepauka ti'aitame niwemama 'ari memɨkwi'iwarɨmekai. Kaniti'awieta kiita kukutsumeta 'ukaratsi miweriyakai hamatɨa, 'Atahariya pɨka'itaxei, 'ayumieme pɨka'umierie. 'Ikɨ mɨya pɨtiuyuri 'Ukutsiyaxi 'iwaya mɨhɨkɨtɨkaikɨ.
2CH 22:12 'Ataxewi wiyari Kuhatsi kani'awietɨkaitɨni wahetsɨa Kakaɨyari tukita, mexixi 'Atahariya ti'aitakai mɨkɨ kwieyaritsie.
2CH 23:1 Hikɨ 'atahuta wiyaritsie, mawari wewiwame Kuyara kaniyutatuani, hikɨ 'ikɨ kuyaxi tewa'aitɨwamete kaniwarutakwewieni: 'Atsariyaxi Keruhani nu'aya, 'Itsimaheri Kuhanahani nu'aya, 'Atsariyaxi 'Uweri nu'aya, Matsehiyaxi 'Arahiyaxi nu'aya, meta 'Eritsapati Tsikɨri nu'aya.
2CH 23:2 'Ikɨ naitsarie Kura kwieyaritsie mekaniukakɨne mewa'inietɨ rewitsixi naime Kura kiekariteyaritsie memeutitekai meta 'ixaheritsixi wa'ukiyarima, Kerutsareme memuhukɨ.
2CH 23:3 Mana yunaitɨ meyuxeɨrietɨ Kakaɨyari tukieya manuwetsie ti'aitame matɨa tɨratu mekaniuwewieni. Kuyara mɨpaɨ katiniwarutahɨawe: «Kamɨ 'ena ti'aitame nu'aya. Mɨkɨ kanihɨkɨtɨni mɨti'aitanikeyu, yemekɨ Yawé Rawiri nuiwarimama kemɨtiwarutahɨawixɨ.
2CH 23:4 Hikɨ 'ayumieme 'ipaɨ xekateniyurikuni: Xeiteritsiyari xeyupaɨmetɨ xeme, mawari wewiwamete meta rewitsixi kemɨ'ane xemɨte'uximaya xawatikɨ, kiteniete xekanitahɨikuni,
2CH 23:5 hipatɨta xeiteritsiyari meyupaɨmetɨ paratsiyu manuwe mepɨti'uka, meta hipatɨta xeiteritsiyari 'imatɨremete Tenari kitenieyaritsie mepu'uni, mexixi yunaitɨ teɨteri tuki takwayaritsie meyuxeɨrieka.
2CH 23:6 Mawari wewiwamete meta rewitsixi xeikɨa 'ana memɨte'uximayaka tukita mekaneutahaxɨakuni, mɨkɨtsɨ 'ayumieme mekanipatsieka, nixewitɨ tawari meutahani pɨkayɨweni. Pauyewetse teɨteri Yawé 'aitsikayatsie yamemɨtekahuni.
2CH 23:7 'Ixipara xe'u'ɨtɨ, rewitsixi ti'aitame warita naitsarie xekenawetɨkani, xɨka xewitɨ tukita heutahani, xekeneumi'a. Ti'aitame yuxaɨtame xepɨkakuhayeikawani, tsepa kemɨtikuyeikani».
2CH 23:8 Rewitsixi meta yunaitɨ Kura kwieyaritsie kiekatari yamekatenikakɨne naimetsie mawari wewiwame Kuyara kemɨtiwaruta'aitɨa. Yuxexuitɨ yuteɨterima mekaniwarukuxeɨriexɨani, memɨte'uximayakai xawatikɨ meta memɨkate'uximakai yunaitɨ, mawari wewiwame Kuyara nixeime 'ekipuyari pɨkawaruhayewaxɨ tsepa memɨte'utahayewakai.
2CH 23:9 Hikɨ Kuyara kuyaxi tewa'aitɨwamete katiniwarutapitɨani pitsikate meta tepɨa yuhetsie nunuwame 'amɨyeyeu meta 'etsimɨyeyeu Rawiri mɨtipinieyatɨkai, mɨkɨ kani'utsiekaitɨni Kakaɨyari tukita,
2CH 23:10 hikɨ kememɨte'uni kaniwaruka'uitɨani yunaime. Yuxexuitɨ, yupitsika me'u'ɨtɨ, ti'aitame mepɨ'ɨwiyakai mawari taiyame 'aurie, meta tuki hɨxie tserietana mekaniuka'uni 'utatana meheutiyunetɨ.
2CH 23:11 Hikɨ mekaniwayewitɨni ti'aitame nu'aya, mekanenamanirieni kuruna, mekaniyetuirieni xapa tɨratu 'aye'ukame meta ti'aitame mekaneyeitɨani. Kuyara meta niwemama hatseiti mekanikawirieni meta mɨpaɨ mekateniuhiwa: «Ti'aitame ke'ayeyurini».
2CH 23:12 Kepauka 'Atahariya teɨteri wanautsari wahiwari mu'eni meta ti'aitame hetsiemieme 'aixɨa mehaitɨkaime, kaneyani Yawé tukieya manuwe, hakewa teɨteri meme'uwakai.
2CH 23:13 Mana ti'aitame kaniuxeiya 'a'uweme, tuki hɨxie wurunitse tuxiyuyari 'aurie, meta 'auriena mekaniti'ukaitɨni kuyaxi wa'ukiyarima meta teyuitɨwamete. Yunaitɨ teɨteri meyutemamawietɨ kuxineta meniutihɨtsiwakaitɨni, meta kwikamete, kanarite xawerite mete'u'ɨtɨ, nɨawarikatsie mekaniwarahanakaitɨni. Mɨya tiuniereka, 'Atahariya yukamixa kaneukatsana meta mɨpaɨ katiniuhiwa: «Xepɨnetsi'uku'eiri, xepɨnetsi'uku'eiri».
2CH 23:14 Hikɨ mawari wewiwame Kuyara, yakatinaki'erietɨ Yawé tukita mɨmierienikɨ, kaniwarayenɨ'ani kuyaxi tewa'aitɨwamete kuyaxi memɨhɨritɨariekai, mɨpaɨ katiniwaruta'aitɨani: «Xekenanuyehani xemati'utsie, meta xɨka xewitɨ heimana henuaka, xekenemi'a 'ixiparakɨ».
2CH 23:15 Hikɨ mekaniwiya meta paratsiyu manuwe mekaneihana kawayutsixi memanutakɨkatsie, mana mekanimieni.
2CH 23:16 Hikɨ Kuyara tɨratu kaniuwewieni yunaime teɨteri wahamatɨa, meta ti'aitame matɨa, Yawé teɨterimama memɨhɨkɨtɨnikɨ.
2CH 23:17 Hikɨ yunaitɨ teɨteri mekanekɨne tuki Wahari hetsiemieme manuwe, hikɨ mekanika'una. Mawari taiyamete mekaniuti'una meta kakaɨyarixi memɨwewiyatɨka, meta mawari taiyamete hɨxie Matani mekananutixiteni mawari wewiwame Wahari hetsiemieme.
2CH 23:18 'Arike Kuyara te'ɨwiyamete kaniwaru'uitɨani Yawé tukita, mawari wewiwamete meta rewitsixi mɨkɨ mepɨtewa'aitɨakakekai. Mɨkɨ Rawiri kaniwaru'uitɨakaitɨni kememɨte'uximayata mawari taiyariyari memɨwewiekakɨ Yawé hetsiemieme, kemɨre'uxa Muitsexi 'aitsikayatsie, meta memutikwikanikɨ meyutemamawietɨ, Rawiri kemɨtiu'aitaxɨ.
2CH 23:19 Yaxeikɨata kuyaxi tehɨwemete Yawé tukieyata memanutakɨkatsie kaniwaru'uitɨani, para hipatɨ memɨkaheutahakenikɨ kemɨ'ane memɨka'itiyatɨka.
2CH 23:20 Hikɨ kwitɨwata, Kuyara, kuyaxi tewa'aitɨwamete warawitɨtɨ, mana kiekatari memɨmamariwawe, kuwexinaruritsixi meta yunaitɨ teɨteri, ti'aitame kanewitɨni paratsiyu manuwe paitɨ Yawé tukieya manuwe miyewitɨ, kitenie takwa miemetsie meheutahaxɨaka, hikɨ Kuhatsi ti'aitame 'uwenitsie mekanayeni.
2CH 23:21 Yunaitɨ teɨteri mekaniyutemamawiekaitɨni, meta kiekari 'aixɨa 'iyari kanikumakaitɨni, 'ari 'Atahariya mumieriekaikɨri 'ixiparakɨ.
2CH 24:1 Kuhatsi 'atahuta wiyari pexeiyakai kepauka mitsutɨa ti'aitatɨ, Kerutsaremetsie huta tewiyari wiyari katiniuta'aita. Weritsewa maamaya pɨkiekametɨkai Tsiwiha titewatɨ.
2CH 24:2 Mexi Kuyara mawari wewiwame 'a'uyeikakai, Kuhatsi 'aixɨa pɨtiyurienekai Yawé kemɨtinake.
2CH 24:3 Yuhutame 'ukari Kuyara kaniwaranayexeiya Kuhatsi 'ɨitamama memakɨnekɨ, mɨkɨ wahetsie Kuhatsi tɨɨri kaniwarayexeiya 'ukitsi meta 'ukari.
2CH 24:4 Yapaɨmexɨa tukari 'anukayaku Kuhatsi Yawé tukieya kananukuketɨani.
2CH 24:5 Hikɨ mawari wewiwamete meta rewitsixi warukuxeɨrieka mɨpaɨ katiniwarutahɨawe: «Naitsarie Kura kiekariyaritetsie xekeneutayeixɨa, 'ixaheritsixi yunaime wahetsɨa tumini xekenetawawa, para Kakaɨyari tukieya xeiwiyari 'anuyeyeikakaku 'aixɨa temikuyuruwanikɨ. Yapauka xekenehu». Hikɨ rewitsixi kememɨte'utahɨawariekai yamepɨkatekakɨ.
2CH 24:6 'Ana ti'aitame Kuyara mawari wewiwamete tiwa'aitɨwame tiutanɨ'airieka mɨpaɨ katinitahɨawe: «¿Titayari rewitsixi pekatiwamexɨitɨa tumini memɨ'ɨiyukɨ Kuratsie meta Kerutsaremetsie Muitsexi, Yawé ti'uximayatsiriwame, meta 'ixaheritsixi meyuxeɨrietɨ kememɨte'uxa kepaɨmetɨ mɨyetuiwanikekai 'Ixuriki tukiyari tɨratu kakuniyari muyeka hetsiemieme?»
2CH 24:7 Matsi Kakaɨyari tukita 'Atahariya meta niwemama meteneu'unakaitɨni, meta muwa Yawé tukieyata timieme piinite mɨtipatsietɨka Wahari kakaɨyarixiyarite mekateniwaruxatɨakaitɨni.
2CH 24:8 'Ayumieme ti'aitame katiniuta'aita kakuni mɨtawewiyanikɨ meta takwa mɨtayerienikɨ, Yawé tukieya kitenieya 'aurie.
2CH 24:9 Meta katiniuta'aita niuki kaneutanɨ'axɨani Kuratsie meta Kerutsaremetsie Yawé hetsiemieme memi'atɨaxɨanikɨ Muitsexi, Yawé ti'uximayatsiriwame, kemɨtiwaru'aitɨa 'ixaheritsixi makumawetsie.
2CH 24:10 Yunaitɨ teɨteri wa'ukiyarima meta yunaitɨ teɨteri meyutemamawietɨ mekaniyetuaxɨani yutumini, meta kakunitsie mekaneikaxɨrieni 'atsita mekanitahɨniya.
2CH 24:11 Rewitsixi kakuni tumini mayemane ti'aitame te'uximayatsiriwamete wahetsɨa mekaneitɨkɨkaitɨni, para mɨkɨ memiti'inɨatakɨ. Kepauka tumini waɨkawa mayemaneni, kani'axekaitɨni ti'utɨwame ti'aitame hetsɨa mieme meta mawari wewiwamete tiwa'aitɨwame nɨ'arieya, mɨkɨ mekanenati'ɨwekaitɨni naime, hikɨ meta mekaniyetuatɨkɨkakaitɨni kakuni hakewa metayeixakai. 'Ipaɨ mepɨteyuriekai xexuime tukaritsie, mɨpaɨ meteyurietɨ tumini waɨkawa mepuxeɨri.
2CH 24:12 Hikɨ ti'aitame meta Kuyara Yawé tukieyatsie te'uximayatamete waxexeiyamete tumini mekaniwayetuiriwakaitɨni, mɨkɨta mepɨwa'iniekai tetexi xitekemete, kɨyexi xitekemete, meta memɨte'akumate tepɨakɨ te'uximayatamete meta wurunitsekɨ, tuki 'aixɨa memuyurienikɨ.
2CH 24:13 Tuki 'aixɨa yuruwamete waxexeiyamete 'aixɨa 'anemekɨ mekateniuta'uximayata meta yapauka 'atsita kepaukake meminɨ 'uximayatsika. Yawé tukieya 'aixɨa mekaniuyurieni meta 'aixɨa 'aneme mekaniuhayewa meta matɨari kemɨ'anekai hepaɨ 'aneme.
2CH 24:14 Kepauka memɨnɨ, ti'aitame meta Kuyara tumini muyuhayewaxɨ mekaniwayetuirieni, mɨkɨta mɨkɨkɨ mekateniutiwewieni piinite Yawé tukieyata timieme: Kakaɨyari memayexeiyanitsie timieme, meta mawari taiyariyari hetsie timieme, meta kutsarate 'amɨpapa meta huru watsuteyari meta pɨrata. Xexuime tukaritsie, kepauka Kuyara 'amuyeikakai, mawari taiyariyari kaniutiwewiwakaitɨni Yawé tukieya manuwe.
2CH 24:15 Peru Kuyara 'ukiratsi kanayani, hikɨ waɨkawa 'ukiratsitɨtɨ kaniumɨni. Kepauka mumɨ xeitsienituyari heimana xeitewiyari heimana tamamata wiyari pexeiyakai.
2CH 24:16 Kaniukateukieni Rawiri kiekariena te'aitamete wahamatɨa, mɨkɨ 'ixaheritsixi wahetsiemieme 'aixɨa mɨtiuyurikɨ meta Kakaɨyari hetsiemieme meta tukieya hetsiemieme.
2CH 24:17 'Arike Kuyara 'umɨku, Kura kwieyaritsie kiekatari wa'ukiyarima ti'aitame hɨxie mekaniu'axɨani hɨxiena memɨkatunuma'unikɨ, mɨkɨta wa'ɨxatsi kaniu'enieni.
2CH 24:18 Yawé tukieya mekaniuku'eirieni, yu'ukiyarima wakakaɨyari, hikɨ 'Atserá 'ɨkiyarite mekaniwarayexeiyakaitɨni pɨta meta kakaɨyarixi memɨwewiyatɨka. Mɨkɨkɨ 'axamemɨte'uyurikɨ, Kakaɨyari yuhaxɨa kaneyenɨ'ani Kuratsie kiekatari wahetsie meta Kerutsaremetari.
2CH 24:19 Hikɨ Yawé yuniukamete kaniwareyenɨ'airieni para memɨwarayehɨtɨanikɨ ta'aurie memaxɨrienikɨ, peru mɨkɨ mepɨkawaru'eni.
2CH 24:20 Hikɨ 'Iyari Kakaɨyari hetsɨa mieme Tsakariyaxi hetsie kaninuani, Kuyara mawari wewiwame nu'aya, hikɨ 'ikɨ, teɨteri wahɨxie 'utakeka, mɨpaɨ kaniutayɨni: «Yawé Kakaɨyari mɨpaɨ kanaineni: ¿Titayari ne'aitsikatetsie yaxekatekahu? Mɨpaɨ xe'anetɨ xehetsiemieme 'aixɨa pɨkatiyɨni. Xeme xemɨnetsi'uku'eirikɨ, neta nekanixeku'eirimɨkɨ».
2CH 24:21 Peru mɨkɨ mekaniyu'enieni Tsakariyaxi Kuyara nu'aya kememɨyurieni, hikɨ ti'aitame yatiuta'aitaku, mekanimieni tetexikɨ me'itituaxatɨ Yawé tukieya takwayaritsie. Mɨpaɨ ti'aitame Kuhatsi, Kuyara 'aixɨa kemɨtiuka'iyarikai kahe'eriwatɨ, nu'aya Tsakariyaxi kaniumieni, mɨkɨ mɨximetɨ mɨpaɨ kaniutayɨni: «Yawé yakeretimani 'ikɨ naime, meta xehetsie kerahɨani».
2CH 24:23 Hikɨ xeiwiyari 'anuyeyaku, kuyaxi tsiriyutsixi mekaniu'axɨani Kuhatsi hetsɨa me'eye'unietɨ, Kura kwieyaritsie mekanitahaxɨani meta Kerutsareme kiekariyaritsie, hikɨ 'arike teɨteri wa'ukiyarima mewarukwika, Ramatsikutsie ti'aitame naime piinite mɨraye'atɨka mana memɨte'ukaxei mekatenenɨ'airieni.
2CH 24:24 Tsepa tsiriyutsixi 'etsimemɨyupaɨmekai, Yawé kaniwarupitɨani kuyaxi memɨyumɨire memɨwara'iwakɨ, Kuratsie kiekatari Yawé memuku'eiriekaikɨ, yu'ukiyarima wakakaɨyari. Mɨpaɨ Kuhatsi pɨrakapitɨarie.
2CH 24:25 Kepauka tsiriyutsixi memekɨ, Kuhatsi me'uhayewaka waɨkawa mete'ikwinitɨaka, 'iparewiwamete mekaniku'eirieni me'eye'unietɨ mekanakɨne, hikɨ mekanimieni yu'utatsie kakaime, Kuyara mawari wewiwame nu'aya mumikɨ mekatenekapitɨani. Hikɨ Rawiri kiekariena mekanikateuku, peru hawaikɨ te'aitamete memakuhetsie pɨka'ukateukie.
2CH 24:26 Kuhatsi memumi 'ikɨ mepɨhɨkɨ, Tsawari titewatɨ, maamaya pɨtitewakai Tsimati 'amuni tewiyari, meta Kutsawari titewatɨ, maamaya pɨtitewakai Tsimɨriti muhawi tewiyari.
2CH 24:27 Kuhatsi niwemama kememɨte'uyuri, meta kakaɨyari niukametemama waɨkawamexɨa Kuhatsi kememɨte'utahɨawixɨ meta Kakaɨyari tukieya ke'aixɨa muyuriekai, naitɨ mɨkɨ katinaka'utɨarieni hipatɨ kememutiyuane te'aitamete waxapa hepaɨtsita xapayaritsie. Nu'aya 'Amatsiyaxi kanitsutɨani 'utɨmana ti'aitatɨ.
2CH 25:1 'Amatsiyaxi xeitewiyari heimana 'auxɨwi wiyari kanexeiyakaitɨni kepauka mitsutɨa ti'aitatɨ, hikɨ Kerutsaremetsie xeitewiyari heimana 'atanauka wiyari katiniuta'aita. Maamaya Kuharani pɨtitewakai, Kerutsareme pɨkiekametɨkai.
2CH 25:2 'Amatsiyaxi Yawé kemɨtinake katiniuyurieni, tsepanetɨ yemekɨ 'iyarieya ya'anekaku katiuyuri.
2CH 25:3 Hikɨ kepauka 'Amatsiyaxi ti'aitatɨ tɨrɨkaɨyetɨ matɨa, kaniwarukwini paratsiyuta te'uximayatamete 'ukiyarieya ti'aitame memumi.
2CH 25:4 Matsi, Yawé kemɨtiuta'aitaxɨ, teyumiekate waniwema pɨkawarukwi, mɨpaɨtsɨ katine'uka Muitsexi 'inɨari niukiyari kemɨraka'utɨatsie: «Wa'ukiyarima mepɨkakwi'iwa waniwema 'axamemɨte'uyurikɨ, meta waniwema mepɨkakwi'iwa wa'ukiyarima 'axamemɨte'uyurikɨ, matsi yuxexuitɨ mekanikwi'iwakuni yuxexuitɨ ke'axamemɨte'uyurikɨ».
2CH 25:5 'Amatsiyaxi kaniwarukuxeɨrieni Kuratsie kiekatari, meta Kura meta Wenikamini kiekatari wahetsiemieme memanuyeyaxe kaniwaranayexeiya xeimiriyari tewa'aitɨwamete meta xeitsienituyari kuyaxi tewa'aitɨwamete, kaniwarukuxeɨriexɨani kemɨ'ane memɨ'iwamarixitɨkai. Kaniwaruka'utɨanita 'ukitsi xeitewiyari meutiyune wiyari memexeiyatɨka, hikɨ mekanakɨne haika tsienituyari miriyari 'ukitsi memeuyutakwiwawe pitsikakɨ meta yuhetsie nunuwame memeuta'ɨiwawe.
2CH 25:6 Metatsiere, haika miriyari heimana haika tsienituyari pɨrata kiruyarikɨ kaniwaruta'inieni 'ixaheritsixi xeitsienituyari miriyari memɨyɨwawe memeuyutakwiwawe.
2CH 25:7 Peru xewitɨ tewi Kakaɨyari hetsɨa mieme kaninuani hetsɨana meta mɨpaɨ katinitahɨawe: —Ti'aitame, 'ekɨ pepɨkawapitɨaka 'ahamatɨa memɨyehukɨ kuyaxi 'ixaheritsixi, karikɨ Yawé 'Epɨrahinitsie kiekatari wahamatɨa pɨka'uyeika.
2CH 25:8 Xɨka 'ekɨ wahamatɨa peheyani, Kakaɨyari yapɨtiyurieni memɨmatsi'aye'unie memɨmatsi'a'iwakɨ tsepa pemuyutami yuwaɨkawame pewarawitɨtɨ, karikɨ Kakaɨyari tɨrɨkariya kanexeiyani mɨraparewienikɨ meta kaneixeiyani mɨraka'unakɨ.
2CH 25:9 'Amatsiyaxi tewi Kakaɨyari hetsɨa mieme mɨpaɨ katiniuta'iwawiya: —¿Keriyɨni haika miriyari heimana haika tsienituyari pɨrata kiruyarikɨ nemɨtinetuakai kuyaxi 'ixaheritsixi wahetsiemieme? Mɨkɨ mɨpaɨ katinita'eiya: —Yawé pɨyɨwe matsi waɨkawa mɨmatiyetuirieni keyuri mɨkɨ.
2CH 25:10 Hikɨ 'ayumieme 'Amatsiyaxi 'ixaheritsixi kuyaxiyari kaniwaruta'imaiya 'Epɨrahini kwieyaritsie memanexɨakai, meta kaniwarenɨ'ani yu'utɨma yukwieyaritsie. Mɨpaɨ tiuyɨku, mɨkɨ kuyaxi waɨkawa mekaniuyeha'ani Kura hepaɨtsita, hikɨ meha'atɨ mekanakunuaxɨani yukie.
2CH 25:11 Hikɨ 'Amatsiyaxi kamatɨ, kaniwarewitɨni kuyaxi mayeweritsie Maye'unaya mɨrayetewatsie, mana tamamata miriyari kaniwarukwini Tsehixi kiekatari.
2CH 25:12 Meta kuyaxi Kuratsie kiekatari mekaniwarutiwiyata hipame me'ayeneniereme tamamata miriyari. Mɨkɨ mekaniwaranutiwitɨni hɨritsie paitɨ 'amanutitɨtɨtsie, hikɨ mana tekɨa mekaniwarakaxɨrieni. Yunaitɨ mekaniutitsane mekaniukwini.
2CH 25:13 Mexi mɨyameteyurie, 'Amatsiyaxi kuyaxi mɨkawarutanaki'eri Kura kiekariteyaritsie mekanitahaxɨani, Tsamariya me'itsutɨaka Weti-Kuruni paitɨ meye'axɨaka mekaniwarukwini haika miriyari teɨteri meta piinite mɨraye'atɨka tiwaɨkawame mekatenetɨni.
2CH 25:14 Kepauka 'Amatsiyaxi makunua 'erumitsixi wara'iwaka, Tsehixi kiekatari wakakaɨyarixi kaniwaretɨni, yukakaɨyarixi kaniwarayeitɨani, warayexeiyatɨ kanayani meta 'ɨkwa watairietɨ.
2CH 25:15 'Ayumieme Yawé kaniuyeha'ani 'Amatsiyaxi hepaɨtsita, hikɨ yuniukame xeime kaneinɨ'airieni mɨpaɨ rehɨawetɨ: —¿Titayari kakaɨyarixi petiwarayexeiya memɨka'uyɨwekaxɨa yuteɨterima wahetsie memɨtanuani 'ekɨ pewakwinekaku?
2CH 25:16 Ti'aitame Kakaɨyari niukameya hɨxie kaniuyeniuni, mɨpaɨ katinitahɨawe: —¿'Ekɨta kemɨ'ane pɨmatsi'utahɨawixɨ ti'aitame 'ɨxatsitɨwameya pemayanikɨ? Xɨka peka'awaɨriyani pemɨmierienikɨ, 'axapepɨkanetikɨhɨaweni. Kakaɨyari niukameya 'imatɨrieka xeikɨa mɨpaɨ katinitahɨawe: —Ne xeikɨa mɨpaɨ nepɨtimate, mɨya pemɨtiyurienekɨ meta ne'ɨxatsi pemɨka'u'enikɨ, Kakaɨyari yaputayɨri pɨmatsika'una.
2CH 25:17 Matsi, 'Amatsiyaxi, Kura kwieyaritsie ti'aitame, hipatɨ yamete'ikɨhɨawekaku wa'enietɨ, niuki kanenɨ'ani Kuhatsi hetsɨa, Kuhakatsi nu'aya meta Kehú teukarieya, 'Ixaheri kwieyaritsie ti'aitame, mɨpaɨ katinehɨawekaitɨni: «Kenaye'a, temɨyutakwinikɨ».
2CH 25:18 Peru Kuhatsi, 'Ixaheri kwieyaritsie ti'aitame, 'Amatsiyaxi Kura kwieyaritsie ti'aitame, mɨpaɨ katiniuta'eiya: «Tupiriya xuya Riwanu kiekame kariuxa 'amutewi mɨpaɨ katiniutahɨawe: “'Aniwe 'uka keneyetua neniwe 'ɨyaya mayanikɨ”. Peru kwitɨwata mana mekaniuyekɨne 'ɨrawetsixi yeutari Riwanu kiekatari, hikɨ mɨkɨ xuya mekaniutaketsini.
2CH 25:19 'Ekɨ pepɨ'ata'ɨre, 'Erumi pema'iwaxɨkɨ, hikɨ 'ayumieme kwinimieme pekatini'atemawieka. 'Aixɨa kani'aneni, kene'ata'ɨreni kuta, peru 'akie keneukani. Pepɨka'iwauneni 'ekɨ pemɨmierienikɨ meta Kura mɨka'unarienikɨ».
2CH 25:20 Kakaɨyari yamainekaikɨ 'Amatsiyaxi mɨyetuanikekaikɨ meye'unie hetsɨa kakaɨyarixi mɨwarayexeiyakaikɨ 'Erumi kwieyaritsie miemete, 'Amatsiyaxi Kuhatsi pɨka'anu'eni.
2CH 25:21 Hikɨ 'ayumieme Kuhatsi, 'Ixaheri kwieyaritsie ti'aitame, kaneyani Weti-Tsemetsi paitɨ, Kura kwieyaritsie, 'Amatsiyaxi hamatɨa mɨyutamienikɨ.
2CH 25:22 'Ixaheritsixi mekaniwara'iwa Kura kwieyaritsie kiekatari, hikɨ mɨkɨ mekaniyuta'unaxɨani yukie.
2CH 25:23 Weti-Tsemetsi mɨrakutewatsie, Kuhatsi, 'Ixaheri kwieyaritsie ti'aitame, 'Amatsiyaxi kaniuwiya, Kura kwieyaritsie ti'aitame, Kuhatsi nu'aya meta Kuhakatsi teukarieya. Hikɨ kaneyanita Kerutsareme mana kuraru 'amatayewa kaniuka'una xeitsienituyari heimana nauka tewiyari meturuyari tewime, Kitenie 'Epɨrahini mɨtitewatsie 'itsutɨaka kitenie paitɨ 'Itsikina mɨtitewatsie kani'atɨani.
2CH 25:24 Metatsiere, naime huru kanetɨni, pɨrata meta piinite Kakaɨyari tukita mɨrayepikai 'Uweri-'Erumi mɨti'ɨwiyakai. Metatsiere katinetɨni piinite waɨkawa mɨraye'atɨka paratsiyuta mɨrayepikai, meta hipame kaniwarehapani, hikɨ Tsamariya paitɨ kanakunuani.
2CH 25:25 'Amatsiyaxi Kuhatsi nu'aya, Kura kwieyaritsie ti'aitame, tamamata heimana 'auxɨwi wiyari kaniutihuni 'akuxi Kuhatsi Kuhakatsi nu'aya 'umɨkuri, 'Ixaheri kwieyaritsie ti'aitame.
2CH 25:26 Hipatɨta kemɨtiuyɨ 'Amatsiyaxi ti'aitametɨkaku, mɨtiukatsutɨatsie timieme meta 'imatɨrieka timieme, mɨkɨ katinaka'utɨarieni Kura kwieyaritsie te'aitamete waxapatsie, meta 'Ixaheri kwieyaritsie te'aitamete waxapatsie.
2CH 25:27 Kepauka paitɨtɨ 'Amatsiyaxi Yawé muku'eiri, hipatɨ meheye'unietɨ mekanakɨne Kerutsareme kiekariyaritsie, hikɨ 'Amatsiyaxi kaniyuta'una Rakixi paitɨ, peru mekanenukuweiya, mana paitɨ mekanimieni.
2CH 25:28 Hikɨta mekaneitɨni kawayutsie Kura kwieyaritsie, Rawiri kiekariena paitɨ, mana kaniukateukieni yu'ukiyarima wahamatɨa.
2CH 26:1 Hikɨ yunaitɨ Kura kwieyaritsie kiekatari 'Utsiyaxi mekaniutahɨawe ti'aitame mayanikɨ, mɨkɨ tamamata heimana 'ataxewi wiyari pɨhɨkai, hikɨ mekanenukakeni yupaapa 'Amatsiyaxi hetsiemieme mɨtita'aitakɨ.
2CH 26:2 Mɨkɨ 'Utsiyaxi katiniuyurieni, 'arike ti'aitame 'Amatsiyaxi 'umɨku, 'Erati kiekariyari 'aixɨa muyuri meta tawari Kura hetsie rawiyame mayeitɨa.
2CH 26:3 'Utsiyaxi kepauka mitsutɨa ti'aitatɨ tamamata heimana 'ataxewi wiyari pexeiyakai, meta pɨtiuta'aitaxɨ Kerutsareme 'ukaitɨ huta tewiyari heimana tamamata heimana huta wiyari. Maamaya Kekuriyaxi pɨtitewakai, Kerutsareme kiekame.
2CH 26:4 'Utsiyaxi Yawé kemɨtinake katiniuyurieni, mɨkɨ naimetsie 'ukiyarieya 'Amatsiyaxi ke'aixɨa mɨtikatɨa kanenukuweiya,
2CH 26:5 hikɨ, mexi Kakaɨyari niukameya Tsakariyaxi 'a'uyeikakai, mɨkɨ mɨtiti'ɨkitɨa Kakaɨyari mayemakaxenikɨ, 'ana kaniyuwaɨriyakaitɨni Kakaɨyari mayexeiyani. Kepauka 'Utsiyaxi Kakaɨyari mayexeiyakai, Kakaɨyari yakatiniuyurieni hetsiena 'aixɨa mɨtiyɨnikɨ.
2CH 26:6 'Utsiyaxi piritsiteutsixi kaniwarutakwini, hikɨ Kahati kuraruyari 'amatayewa kaniuka'una, metatsiere Kawiniya meta 'Atsiruri wakuraru kaniuka'una. Matsi 'Atsiruni kwieyaritsie hipame kiekarite kaniutiwewieni, piritsiteutsixi watsata.
2CH 26:7 Kepauka piritsiteutsixi mɨwarutakwi Kakaɨyari kaniparewieni, meta 'arawetsixi Kuxi-Wahari kiekatari mɨwarutakwitsie, metatsiere mehunitsixi mɨwarutakwitsie.
2CH 26:8 'Amunitsixi mekateniyukutuayakaitɨni 'Utsiyaxi hetsɨa, hikɨ 'ana waɨkawa tɨrɨkaɨyetɨ kanayani meta 'Ekipitu paitɨ mariwatɨ kanayani.
2CH 26:9 Metatsiere 'Utsiyaxi Kerutsaremetsie tuxiyu kaniutiwewieni meta 'a'atitɨtɨme kanayeitɨani, kitenie 'Itsikina mɨtitewa heima meta kitenie Mayeweritsie mɨtitewa heima, meta kuraru 'amatayewa 'etsikinayaritsie heima kanewewieni.
2CH 26:10 Metatsiere, makumawetsie tuxiyu kaniutiwewieni, meta putsute waɨkawa kaniutiwewieni, yumɨireme tewaxi muwarexeiyakaikɨ muweritsie meta hɨri manaweweritsie. Meta kaniwarexeiyakaitɨni kwietsanamete meta kaxie haraweriyaritsie te'uximayatamete hɨritsie memu'uwakai meta mayeweweritsie, yemekɨ pinakekai kwie muka'etsani.
2CH 26:11 'Utsiyaxi yukuyaxima kaniwarexeiyakaitɨni kuyaxa memayekɨkakaitsie yayupapaɨmetɨ mekanayekɨkakaitɨni, Keyeri ti'utɨwame meta Matsehiyaxi paratsiyuta ti'uximayatame kememɨtewaraka'utɨa mewa'inɨatatɨ metatsiere Kananiyaxi yatiwarahɨawekaku ti'aitame parewiwameya.
2CH 26:12 Mɨkɨ yunaitɨ nuiwarite wa'ukiyarima mepɨhɨkɨtɨkai huta miriyari heimana 'ataxewi tsienituyari, yunaitɨ mɨkɨ memeuyutakwiwawe memɨtɨrɨkawi.
2CH 26:13 'Ikɨ memɨtewa'aitɨa kuyaxi memɨte'uti'ɨkitɨarie kuyaxa miemekɨ mepɨhɨkɨtɨkai, haika tsienituyari heimana 'atahuta miriyari heimana 'auxɨwi tsienituyari mepɨyupaɨmekai, mɨkɨ mepɨyutakukuyakai tɨrɨkaɨyemekɨ ti'aitame meparewietɨ memeye'unie mɨwarutakukuyakaitsie.
2CH 26:14 Mɨkɨ kuyaxi 'Utsiyaxi katiniwayetuirieni, yuhetsie nunuwamete, pitsika 'amɨtɨtɨ, yumu'utsie nunuwamete, tepɨa kamixayarite, tupite meta tewɨpame.
2CH 26:15 Kerutsaremetsie kaniutiwewieni makinate hipatɨ temaiwawemete me'inetɨaku, tuxiyutsie mekaneka'uitɨani meta kiekari muta'etsikinatɨkatsie mɨkɨkɨ memɨte'utituaxanikɨ tetexi 'anenemekɨ meta 'ɨrɨkɨ. Kakaɨyari tɨrɨkaɨyemekɨ 'iparewiekaku, 'Utsiyaxi waɨkawa tɨrɨkaɨyetɨ kanayani meta tewapaitɨ pɨmariwakai.
2CH 26:16 Peru, kepauka 'Utsiyaxi tɨrɨkaɨyetɨ matɨa, kaniyuta'ɨre, 'ayumieme mɨpaɨ katiniyuka'una. Yawé 'aye'unietɨ kanayani, yu'ukiyarima wakakaɨyari, kaniyuwaɨriya Yawé tukita meutahani 'ɨkwa mɨtaiyakɨ 'ɨkwa taiyametsie.
2CH 26:17 Hikɨ 'utɨmana kaneutahani 'Atsariyaxi mawari wewiwamete tiwa'aitɨwame, warawitɨtɨ Yawé mawari wewiwametemama nauka tewiyari meyupaɨmeme, mɨkɨ yunaitɨ teɨteri memɨka'ukamama mepɨhɨkɨtɨkai,
2CH 26:18 hikɨ hɨxiena meti'utɨ mɨpaɨ mekatenitahɨawe: «'Ekɨ ti'aitame pepɨkapitɨarie Yawé 'ɨkwa witsimu'ɨa pemɨkutairiwanikɨ. 'Ikɨ mawari wewiwamete 'Aruni nuiwarimama xeikɨa mekaniyɨwaweni, mɨkɨtsɨ xeikɨa mekanipatsieka 'ɨkwa memukutaiyanikɨ. Hikɨ kwitɨwa tukita 'ekɨ kenanuyeye'a, karikɨ 'axapekatiniuyurieni, mɨpaɨ Yawé Kakaɨyari 'aixɨa pɨkamatixeiya».
2CH 26:19 Mɨkɨkɨ 'Utsiyaxi kaniuyeha'ani, yumamatsie 'ɨkwa taiyame ma'ɨkai yuha'aritɨatɨri 'itaiyake. Peru 'ana kwitɨwa, muwa Yawé tukita, 'ɨkwa taiyame 'aurie 'uwetɨ meta mawari wewiwamete wahɨxie, yapauka yuhɨxie nawi kwiniyayari hexeiyatɨ kanayani.
2CH 26:20 Mawari wewiwamete tiwa'aitɨwame 'Atsariyaxi meta hipatɨ mawari wewiwamete 'Utsiyaxi me'uxeiyaka nawi kwiniyayari hexeiyakame muwa mekaniwayenɨ'ani yapauka. Matsi mɨkɨtɨtɨta, yumexɨitɨatɨ kaniwayeyani, Yawé 'uximatɨarika mipitɨakaikɨ.
2CH 26:21 Ti'aitame 'Utsiyaxi nawi kwiniyayari hexeiyatɨ kanayani, pɨka'anayewe mɨya'anetɨ kaniumɨni. Pauyewekai yuxaɨta xeikɨa kiita mayekani, meta kaniuta'imaiyarieni Yawé tukita mɨkaheutahakenikɨ. Nu'aya Kutani paratsiyu kaniuhɨritɨarieni meta mɨkɨ kwieyaritsie mɨti'aitanikɨ.
2CH 26:22 Hipatɨta kemɨtiuyɨ 'Utsiyaxi ti'aitametɨkaku, mɨtiukatsutɨatsie timieme meta 'imatɨrieka timieme, katinaka'utɨani Kakaɨyari niukameya Kitsariyaxi, 'Amuxi nu'aya.
2CH 26:23 Kepauka 'Utsiyaxi mumɨ, yu'ukiyarima wahamatɨa kaniukateukieni heuhurakaku te'aitamete memɨwateuketsie, nawi kwiniyayari mexeiyakaikɨ. Hikɨ nu'aya Kutani 'utɨmana kanitsutɨani ti'aitatɨ.
2CH 27:1 Merikɨtsɨ Kutani kepauka mitsutɨa ti'aitatɨ xeitewiyari heimana 'auxɨwime wiyari pexeiyakai, hikɨ Kerutsareme 'ukaitɨ katiniuta'aita tamamata heimana 'ataxewi wiyari. Maamaya Kerutsa pɨtitewakai Tsaruki nu'aya.
2CH 27:2 Kutani yakatiniuyurieni Yawé kemɨtinake, naimetsie 'ukiyarieya 'Utsiyaxi ke'aixɨa mɨtikatɨa kanenukuweiya, peru Yawé tukita pɨkaheta'axekai. Matsi teɨteri, mepiyeweiyakai 'axameteyurietɨ.
2CH 27:3 Kutani katiniuyurieni Yawé tukieyatsie mieme 'itupari wapaitɨ mieme 'aixɨa muyuri. Metatsiere waɨkawa 'uximayatsika pɨtiuyuri 'Uperi kuraruyari hetsiemieme.
2CH 27:4 Kura hɨriyaritetsie kiekarite kaniutiwewieni, meta kiekarite kuraruyari 'amatitɨtɨ metatsiere tuxiyu kaniutiwewieni hɨritsie paitɨ.
2CH 27:5 Hikɨ Kutani kaniwarutakwini 'amunitsixi, meta kaniwara'iwa. Haika wiyari mekaniuyurieni, 'amunitsixi mete'ikupitɨwatɨ xeiwiyari 'aye'axekaku haika miriyari heimana nauka tsienituyari kiruyari pɨrata, huta miyuniyari heimana huta tsienituyari miriyari kiruyari tɨriku meta tsewara mɨpaɨ tɨriku hepaɨ paɨmeme.
2CH 27:6 Merikɨte Kutani waɨkawa tɨrɨkaɨyetɨ kanayani muyuwaɨrikɨ yamɨtikamienikɨ Yawé yukakaɨyari hetsiemieme.
2CH 27:7 Hipatɨta kemɨtiuyɨ Kutani ti'aitametɨkaku meta kemɨtiyumienekai meta kemɨtikatɨa, katinaka'utɨarieni 'Ixaheri kwieyaritsie te'aitamete meta Kura kwieyaritsie te'aitamete waxapatsie.
2CH 27:8 Kutani pexeiyakai kepauka mitsutɨa ti'aitatɨ xeitewiyari heimana 'auxɨwime wiyari, hikɨ Kerutsareme 'ukaitɨ katiniuta'aita tamamata heimana 'ataxewi wiyari.
2CH 27:9 Kepauka mumɨ, kaniukateukieni Rawiri kiekariena, hikɨ nu'aya 'Akatsi kanitsutɨani 'utɨmana ti'aitatɨ.
2CH 28:1 'Akatsi kepauka mitsutɨa ti'aitatɨ xeitewiyari wiyari pexeiyakai, Kerutsareme kiekariyaritsie 'ukaitɨ pɨtiuta'aitaxɨ tamamata heimana 'ataxewi wiyari. Peru yututsi Rawiri hepaɨ pɨka'anekai, 'Akatsi yapɨkatiuyuri Yawé Kakaɨyari kemɨtinake.
2CH 28:2 Matsi, 'Ixaheri kwieyaritsie te'aitamete ke'axamemɨte'uyuri wahepaɨ katiniuyurieni, meta kakaɨyari Wahari 'ɨkiyari kaniutiwewieni tepɨa kwaniyarietɨkaimekɨ.
2CH 28:3 Metatsiere, 'ɨkwa kaniutitaiyakaitɨni mayeweritsie Weni-Hinuni meta yuniwema kaniwarutitaiya taipa mawari memakɨnekɨ, nuiwarite mana memɨtamakai Yawé mɨwarayeweiyakai 'ixaheritsixi wahɨxie ke'axamemɨte'uhukai wahepaɨ.
2CH 28:4 Metatsiere mawari pɨwewienekai meta 'ɨkwa putitaiyakai kakaɨyarixi wamawari taiyame hetsie, meta hɨri 'amanutitɨtɨtsie meta naime kɨyexi waɨkawa mɨ'e'etɨ hetɨa.
2CH 28:5 'Ayumieme Tsiriyatsie ti'aitame hetsɨa Yawé Kakaɨyarieya kaniyetuani. Tsiriyutsixi mekane'iwa, meta yuwaɨkawame mekaniwarutiwiya mekaniwarehapani Ramatsiku paitɨ. Metatsiere 'Ixaheri kwieyaritsie ti'aitame 'Akatsi kana'iwa, mɨkɨta kuyaximama yumɨireme kaniwarukwini.
2CH 28:6 Xeitukaritsie Pekaki Xemariyaxi nu'aya kaniwarukwini Kura kwieyaritsie xeitsienituyari heimana xeitewiyari miriyari, yunaitɨ mɨkɨ kuyaxi memeuyutakwiwawe mepɨhɨkɨtɨkai, mɨya mepɨte'anuyekɨ Kuratsie kiekatari Yawé memuku'eirikɨ, yu'ukiyarima wakakaɨyari.
2CH 28:7 Tsikɨri, 'Epɨrahini kiekame mɨtɨrɨkaɨye kuya, Matsehiyaxi kaniumieni, ti'aitame nu'aya, meta 'Atsirikani, ti'uximayatame paratsiyu mɨhɨritɨariekai, metatsiere 'Erikana, mɨkɨ ti'aitame 'utɨma tɨrɨkariya pexeiyakai.
2CH 28:8 Kuyaxi 'ixaheritsixi yu'iwama Kuratsie kiekatari mekaniwarehapani huta tsienituyari miriyari teɨteri, meteyunɨtɨ 'ukarawetsixi, tɨɨri 'ukitsi meta 'ukari. Meta waɨkawa piinite mekatenetɨni, hikɨ mekatenepini Tsamariya kiekariyaritsie paitɨ.
2CH 28:9 Tewi 'Ureri titewatɨ mana kaniukateitɨni, Yawé niukameya kanihɨkɨtɨkaitɨni. Kepauka kuyaxi 'ixaheritsixi Tsamariyatsie memuti'axekai, mɨkɨ Kakaɨyari niukameya kanayeyani waranukunakeke mɨpaɨ katiniwarutahɨawe: —Yawé, xe'ukiyarima wakakaɨyari, Kuratsie kiekatari xehetsɨa kaniwayetuani, mɨkɨ mɨha'akaikɨ wahepaɨtsita. Peru xeme xekananutikɨne, xekawanenimayatɨ xekaniwarukwini, Kakaɨyari kaniuniere muyuawitsie paitɨ.
2CH 28:10 Hikɨta, Kuratsie meta Kerutsaremetsie kiekatari waɨriyarika te'uximayatamete xetewayeitɨaku. Xemeta xehetsie katinahɨiwani 'axaxekateniuyurieni Yawé xekakaɨyari hepaɨtsita.
2CH 28:11 'Ayumieme, yaxeketenekakɨni kenemɨtayɨni: xekeniwarutatua pɨretsutsixi. ¿Mɨkɨ mekatexe'iwama? Yawé kaniuyeha'ani xehepaɨtsita.
2CH 28:12 Hikɨ 'Atsariyaxi Kuhanahani nu'aya, Werekiyaxi Metsiremuti nu'aya, 'Etsekiyaxi Tsaruni nu'aya, meta 'Amatsaha Harɨrahi nu'aya, 'Epɨrahini nuiwarimama wa'ukiyarima memɨhɨkɨtɨkai, kuyaxa memanukɨ wahɨxie mekaniu'uni,
2CH 28:13 mɨpaɨ mekateniwarutahɨawe: —Pɨretsutsixi xemɨwaruhapaxime 'ena xepɨkawa'atɨwani, mɨkɨkɨ Yawé tame tahetsie pɨrahɨani. ¿Kamɨtsɨ xete'imɨiriyaku tita 'axatemɨte'uyuri? 'Ari pɨmɨire tita 'axatemɨte'uyuri, 'ari Yawé puyeha'a 'Ixaheri hetsiemieme.
2CH 28:14 Hikɨ kuyaxi mekaniwaruhayewa pɨretsutsixi memɨwaruhapaximekai, meta piinite memɨtehatɨkɨkai teɨteri wa'ukiyarima wahɨxie mekatenitipini meta yunaime teɨteri wahɨxie.
2CH 28:15 Hipatɨ mekaniutihɨawarieni pɨretsutsixi memɨhɨritɨarienikɨ, meta kamixate meta kakaite piinite memɨte'atɨatsie timiemekɨ mekateniwarutiketɨani yunaime kemɨ'ane memeumamawekai. Hikɨ meta mekateniwarumini mekaniwaruharitɨani, meta hatseiti mekaniwarukawiriexɨani. Hipatɨri, memɨka'ukɨniwawekai mekaniware'ikata puxuri wahetsie Keriku kiekariyaritsie paitɨ, makutakɨya mɨrakutewatsie, wa'iwama memɨwaretinɨitɨanikɨ. 'Arike mɨkɨ teɨteri yamete'uyurieka Tsamariyatsie mekanakunuaxɨani.
2CH 28:16 'Ana mɨtiyehanetsie, ti'aitame 'Akatsi parewiya kaniwarutawawirieni 'Atsiriyatsie te'aitamete,
2CH 28:17 hekwamekɨ 'erumitsixi Kuratsie memɨtahaxɨakaikɨ meta yayupaɨmeme teɨteri memɨwarehapakaikɨ.
2CH 28:18 Metatsiere piritsiteutsixi Kura kiekariteyaritsie mekanitahaxɨani mekateniwarunawatsirieni kiekari muweritsie mukumanetsie meta Nekexi mɨrakutewatsie, meta yuhetsiemieme mekanayeitɨani kiekarite Weti-Tsemetsi, 'Ayaruni, Kereruti, Tsuku, Timinaha meta Kimitsu, meta kiekarite wa'aurie mamanetɨkatei, hikɨ mɨkɨ mana mekaniyutikitɨani.
2CH 28:19 Mɨpaɨ Yawé Kuratsie kiekatari katiniwarunanaimani, 'Akatsi hetsiemieme tiwa'aitɨwame, mɨkɨ kaniwarupitɨani Kuratsie kiekatari 'axamemɨteyurieka, meta mɨkɨ Yawé yemekɨ kaniuku'eirieni 'eye'unietɨ kanayani.
2CH 28:20 Metatsiere Tikɨrati-Piretsexi, 'Atsiriyatsie ti'aitame, 'Akatsi mɨparewienikekai, kanitamieni pɨta.
2CH 28:21 Hikɨ 'Akatsi 'Atsiriyatsie ti'aitame katiniyetuirieni tinaime Yawé tukita mɨrayepikai mɨraye'atɨka, meta paratsiyuta mɨrayepikai, meta 'iparewiwametemama wakiita mɨrayepitɨkatei, peru mɨkɨ tixaɨtɨ pɨkaratɨa.
2CH 28:22 Tsepa waɨkawa mu'uximatɨariekai, ti'aitame 'Akatsi kaniyeweiyakaitɨni Yawé ka'enietɨ.
2CH 28:23 Mawari katiniwayetuirieni kakaɨyarixi Ramatsiku miemete meme'iwakai, mɨpaɨ tiu'erieka: «Kakaɨyarixi Tsiriya miemete kememɨtewaparewie teyu'aitɨwamete, neta mekaneniparewikuni xɨka netiwarutimawirieni». Peru mɨkɨ kakaɨyarixi mekanika'una meta naime 'Ixaheri kwieyari.
2CH 28:24 Meta 'Akatsi katiniukuxeɨrieni piinite Yawé tukita timieme katiniutitara, hikɨ muwa tukita katineunaxɨani, metatsiere Kerutsareme kiekariyaritsie naime 'itsikinatsie mawari taiyame kaniutiwewieni kakaɨyarixi wahetsiemieme.
2CH 28:25 Meta naime Kura kiekariteyaritsie kanitiwewieni tukite kakaɨyarixi wahetsiemieme 'ɨkwa muwa memɨtaiyatɨwenikɨ hipame kakaɨyarixi wahetsiemieme, mɨpaɨ Yawé hɨxie 'axakatiniyurienekaitɨni, yu'ukiyarima wakakaɨyari.
2CH 28:26 Hipatɨta kemɨtiuyɨ ti'aitametɨkaku, kepauka mɨtiukatsutɨatsie timieme meta 'imatɨrieka timieme, metatsiere kemɨtikatɨa, katinaka'utɨarieni Kuratsie te'aitamete meta 'Ixaheritsie te'aitamete waxapatsie.
2CH 28:27 'Akatsi kaniumɨni, kaniukateukieni Kerutsareme kiekariyaritsie, peru 'Ixaheri kwieyaritsie memɨte'uta'aitaxɨ memuyehetsie pɨka'ukateukie. Nu'aya 'Etsekiyaxi kanitsutɨani ti'aitatɨ 'utɨmana.
2CH 29:1 'Etsekiyaxi xeitewiyari heimana 'auxɨwi wiyari kanexeiyakaitɨni kepauka mitsutɨa ti'aitatɨ, Kerutsareme 'ukaitɨ katiniuta'aita xeitewiyari heimana 'atanauka wiyari. Maamaya 'Awiyaxi pɨtitewakai Tsakariyaxi nu'aya.
2CH 29:2 'Etsekiyaxi Yawé kemɨtinake katiniuyurieni, tutsieya Rawiri 'aixɨa kemɨtikatɨa naimetsie mɨpaɨ katinikayani.
2CH 29:3 Mexɨakame metseritsie meta matɨari wiyaritsie ti'aitatɨ, 'Etsekiyaxi katiniuta'aita Yawé tukita 'ituparite meuyepiyaxɨanikɨ, meta 'aixɨa kanitiyurieni.
2CH 29:4 Mawari wewiwamete meta rewitsixi kaniwarukuxeɨrieni memayukuxexeɨriwatsie tau manatineika hepatsie,
2CH 29:5 mɨpaɨ katiniwarutahɨawe: «Rewitsixi xekeneneu'eni. Hikɨri xeme xekeneuyu'iti, meta Yawé tukieya xekeneu'iti, xe'ukiyarima wakakaɨyari, meta muwa tita mɨkati'itiyatɨka xeketeniwayexɨri.
2CH 29:6 Ta'ukiyarima mekaniku'eirieni meta Yawé takakaɨyari kemɨkatinake mekateniuyurieni. Mekaniku'eirieni Yawé, meta mekanitixani'erieni hakewa mayeka.
2CH 29:7 Yaxeikɨata memanutakɨkatsie takwa kitenieyaritsie mepɨtehauna, kɨxeme mekaniutɨxɨani, meta 'ɨkwa metaiyatɨwetɨ mekateniuhayewa metatsiere mepɨte'uhayewaxɨ tukita mawari taiyariyari me'iwewirietɨ 'Ixaheri Kakaɨyarieya.
2CH 29:8 »'Ayumieme Kura kiekatari meta Kerutsareme Yawé 'uximatɨarika kaniwarupitɨani, tixaɨtɨ titewiweme tiyumariutame hepaɨ 'aneme kanayeitɨani meta memɨnanaimariekakɨ, xeme hikɨ kexemɨte'ixeiya.
2CH 29:9 'Ayumieme ta'ukiyarima 'ixiparakɨ mekaniukwi'iwa, taniwema 'ukitsi, 'ukari, meta ta'ɨitama yunaitɨ mekanehapanieni tewa paitɨ.
2CH 29:10 »Ne hikɨ tɨratu nekaniwewimɨkɨ Yawé 'Ixaheri kakaɨyarieya hamatɨa, tahepaɨtsita mɨkaha'akakɨri.
2CH 29:11 Merikɨte, neniwema, yaxetekahutɨ xepɨkatehayewani, Yawé kanixe'anayexeiya xeme hɨxiena xemu'uwanikɨ, meta xemeyexeiyanikɨ, xemɨte'i'uximayatsiriekakɨ meta 'ɨkwa xemikutairiwanikɨ».
2CH 29:12 'Ikɨ rewitsixi mekanihɨkɨtɨni memuyuwaɨri memɨteta'uximayatakɨ: Kuhati nuiwarimama: Mahati 'Amatsahi nu'aya, meta Kuheri 'Atsariyaxi nu'aya. Merari nuiwarimama: Kihitsi 'Awɨri nu'aya, meta 'Atsariyaxi Yarereri nu'aya. Keritsuni nuiwarimamata: Kuha Tsimaha nu'aya, meta 'Ereni Kuha nu'aya.
2CH 29:13 'Eritsapani nuiwarimama: Tsimɨri meta Keyeri. 'Atsahapi nuiwarimama: Tsakariyaxi meta Mataniyaxi.
2CH 29:14 Hemani nuiwarimamata: Kehieri meta Tsimi. Kerutuni nuiwarimama: Tsemahiyaxi meta 'Utsiheri.
2CH 29:15 'Ikɨ yu'iwama mewarukuxeɨrieka, me'uyu'itieka Yawé tukieya takwayatsie mekaneutahaxɨani memi'itienikɨ, ti'aitame kemɨtiwara'aitɨwakai, Yawé niukieya kemaine.
2CH 29:16 'Arikeke mawari wewiwamete Yawé tukieyata mekaneutahaxɨani memi'itienikɨ. Tukita mɨrayepikai takwa mekateniwayexɨrieni tinaime tita mɨkati'itiyatɨka muwa memɨte'ukaxei, hikɨ rewitsixi mewarukuxeɨrieka Kiruni 'akiyaritsie mekaniwareukaxɨrieni.
2CH 29:17 Mexɨakame tukaritsie meta mexɨakame metseritsie mekanitsutɨani tuki me'itietɨ, hikɨ 'atahaika tukariyaritsie tuki kitenie kii meukuwewiyatsie meputihukai. Me'i'itietɨ meminɨnikɨ tawarita 'atahaika tukari mekaniuyurieni, hikɨ mekaniuyurieni tamamata heimana 'ataxewi tukari mɨkɨ mexɨakame metseriyaritsie.
2CH 29:18 'Arike, 'Etsekiyaxi ti'aitame hɨxie mekaniu'axɨani, mɨpaɨ mekatenitahɨawe: «Yawé tukieya tekaniu'itieniri, mawari matitaiyarɨwa meta tinaime ketipaɨmetɨ mɨtiuyɨne, meta mexa paa manamarike meta ketipaɨmeme mɨreuyehɨwa.
2CH 29:19 Metatsiere, tekateniu'itieni meta 'aixɨa tekateniutiyurieni tinaime piinite, kepauka ti'aitatɨ 'Akatsi Kakaɨyari 'uku'eirieka kati'itiyakame mɨrayeitɨa, hikɨ mɨkɨ Yawé mawari taiyameya hɨxie tekatenetipini».
2CH 29:20 Kwi ximeri paitɨ 'Etsekiyaxi ti'aitame 'anukukeka, kaniwarukuxeɨrieni kiekaritsie kiekatari wa'ukiyarima, mɨkɨ waruta'inieka wahamatɨa Yawé tukieya manuwe mekanekɨne.
2CH 29:21 Mekaniwarehapani 'atahuta tuurutsixi, 'atahuta muxatsi 'ukitsi, meta 'atahuta muxatsi tɨɨrixi, metatsiere 'atahuta tsipuri mawari memayanikɨ te'aitamete wahetsiemieme, tuki hetsiemieme meta Kuratsie kiekatari wahetsiemieme, memɨ'itiyanikɨ. Ti'aitame mawari wewiwamete 'Aruni nuiwarimama katiniwaruta'aitɨani mawari taiyariyari memɨtehayeitɨanikɨ Yawé mawari taiyameya hetsie.
2CH 29:22 Mawari wewiwamete turutsixi mekaniwarukwini, meta muxatsi 'ukitsi, metatsiere muxatsi tɨɨrixi, mɨkɨ waxuriyakɨ mawari taiyame mekaniuxurimani.
2CH 29:23 'Imatɨrieka, tsipuri memɨyetuiya memɨ'itiyanikɨ hetsiemieme mekaniwarehapani ti'aitame hɨxie meta yunaime teɨteri wahɨxie mɨkɨ wahetsie memutimenikɨ,
2CH 29:24 mɨkɨta mewarukwika waxuriyakɨ mawari taiyame mekaniuxurimani mɨkɨ mawarikɨ memɨ'itiyanikɨ yunaitɨ 'ixaheritsixi, mɨpaɨ ti'aitame mɨtiuta'aitakaikɨ mɨkɨ mawari taiyariyari meta 'itiya mawariyari yunaime 'ixaheritsixi wahetsiemieme ke'utimawarienike.
2CH 29:25 'Etsekiyaxi Yawé tukieyata rewitsixi kaniwaru'uitɨani, tepɨa mutitirirɨkakɨ, 'aripakɨ meta kanarite 'etsimɨpepekɨ memɨte'ukayuitɨwanikɨ, yemekɨ Rawiri kemɨtiwaru'aitɨakai, Kakaɨyari niukameya Natani, meta Kahari, tewi mɨtixeiya ti'aitame hetsiemieme. 'Ikɨ Yawé 'aitsikaya mekaniyetuani niukametemama.
2CH 29:26 Rewitsixi 'amekaniti'ukaitɨni kanarite mete'u'ɨtɨ Rawiri miti'aitakai, meta mawari wewiwamete kuxineta mepɨ'ɨkai.
2CH 29:27 Hikɨ 'Etsekiyaxi katiniuta'aita mawari taiyariyari mɨwewiyanikɨ mawari taiyametsie. 'Amɨtiuyutsutɨa mawari taiyariyari, kaniutsutɨarienita kwikari Yawé hetsiemieme, meta kuxineta hɨtsierietɨ, yunɨtɨ kanarite Rawiri miti'aitakai, 'Ixaheri kwieyaritsie ti'aitame.
2CH 29:28 Yunaitɨ teɨteri mekanititunuma'ukaitɨni 'atsita kepaukake mɨtiutahayewarie mawari taiyarietɨ, mexi kwikamete mekwikakai meta kuxineta 'utihɨtsieriwakai.
2CH 29:29 Kepauka memɨte'utahayewaxɨ mawari taiyariyari mewewietɨ, ti'aitame meta yunaitɨ hamatɨana memu'uwakai mekaniukahɨxima'uni Yawé mariweme me'ayeitɨatɨ.
2CH 29:30 Ti'aitame 'Etsekiyaxi meta teɨteri wa'ukiyarima rewitsixi mekaniwaruta'aitɨani Yawé hetsiemieme memitikwikakɨ nɨawari Rawiri meta 'Atsahapi tewi mɨtixeiya memitiwewi. Rewitsixi meyutemamawietɨ yamekatenikakɨne, meta mɨkɨ mekaniukahɨxima'uni mariweme me'eyeitɨatɨ Kakaɨyari.
2CH 29:31 'Etsekiyaxi mɨpaɨ kaniutayɨni: «Hikɨ xeme Yawé hetsiemieme xemɨyu'iti, xekenakɨni tukieya manuwe mawari xekeneyetua meta 'imikierite pamɨpariyutsi xeketenahɨaweni».
2CH 29:32 Hikɨ teɨteri tuurutsixi mekaniwa'atɨani haika tewiyari heimana tamamata meyupaɨmeme, xeitsienituyari muxatsi 'ukitsi, huta tsienituyari muxatsi tɨɨrixi, mawari taiyariyari memakɨnekɨ Yawé hetsiemieme.
2CH 29:33 Metatsiere tuurutsixi 'ataxewi tsienituyari meta muxatsi haika miriyari mekaniyetuiyani memɨpatsienikɨ memɨtimawarienikɨ.
2CH 29:34 Peru mawari wewiwamete memɨkayuwaɨkawakaikɨ mepɨkawakemakai tewaxi memɨyumɨire memɨwatikwipieni, wa'iwama rewitsixi mekaniwaruparewieni mɨkɨ 'uximayatsika memɨnɨnikɨ, 'ana hipatɨta mawari wewiwamete mekaniuyu'itieni, matsi rewitsixi xeiya mekatenayeitɨwakaitɨni 'itiya hepaɨtsita keyuri mawari wewiwamete.
2CH 29:35 'Ana waɨkawa mawari taiyariyari kaniuwewiyani, meta wiya temɨtaxewinikɨ mawariyari hetsiemieme, meta kaxie winuyari mawariyari xexuime mawari taiyariyari hetsiemiemete. Mɨpaɨ tawari katiniutsutɨarieni Kakaɨyari 'ayexeiyarietɨ Yawé tukita.
2CH 29:36 'Etsekiyaxi meta teɨteri yunaitɨ mekaniyukatemamawieni Kakaɨyari teɨteri muwarukuha'aritɨakɨ, naime mɨkɨ yapauka memɨteyurienikɨ.
2CH 30:1 'Etsekiyaxi niuki kaneutanɨ'axɨani naitsarie 'ixaheritsixi teɨteriyari wahetsɨa meta Kuratsie kiekatari, metatsiere nuiwarite 'Epɨrahinitsie miemete meta Manatsexi nuiwarimama, Yawé tukieya manuwe memɨyukuxeɨrienikɨ Kerutsareme kiekariyaritsie Patsikwa 'ixɨarariyari memɨwewienikɨ Yawé 'Ixaheri Kakaɨyarieya hetsiemieme.
2CH 30:2 Ti'aitame, meta teɨteri wa'ukiyarima meta yunaitɨ teɨteri, mɨpaɨ mepɨte'uxatakai kename Patsikwa 'ixɨarariyari mewewienikekai hutarieka metseritsie.
2CH 30:3 Peru mepɨka'uyɨwekaxɨa mɨkɨ tukaritsie yumɨiretɨ 'akuxi mawari wewiwamete memɨkayu'itiwawekaikɨ, meta teɨteri Kerutsareme memɨkayukuxeɨriwawekaikɨ.
2CH 30:4 Kememɨte'uxa ti'aitame meta yunaitɨ teɨteri muwarunakixɨkɨ,
2CH 30:5 yamekateniuxata naitsarie 'Ixaheritsie mɨpaɨ memɨtekaxatɨarienikɨ, Rani kiekariyaritsie me'itsutɨame 'atsita Weritsewa paitɨ, yunaitɨ meke'uyukuxeɨrienike Kerutsaremetsie Yawé hetsiemieme Patsikwa 'ixɨarariyari memɨwewienikɨ, 'Ixaheri Kakaɨyarieya, mɨixa panuyemiekairi memɨka'iwewiwawekai kemɨre'uxa.
2CH 30:6 Hikɨ naitsarie 'Ixaheritsie meta Kuratsie mekaneutayeixɨani niuki tuayamete ti'aitame meta 'iparewiwametemama waxapate me'uhurietɨ, kemɨra'aitakai ti'aitame mɨpaɨ meteniwakuxaxatɨwakaitɨni: «'Ixaheritsixi teɨteriyari, Yawé hetsɨa xekeneu'axɨa, 'Apɨrahami, 'Itsahaki meta 'Ixaheri wakakaɨyari, mɨkɨta xehetsɨa munuanikɨ xeme xemuyuhayewaxɨ, 'Atsiriyatsie te'aitamete wahetsɨa xemutawikwei.
2CH 30:7 Xe'ukiyarima wahepaɨ xepɨka'aneni, meta yu'iwama wahepaɨ, Yawé memuku'eiri me'eye'unietɨ memakɨ, yu'ukiyarima wakakaɨyari. 'Ayumieme mɨkɨ xeme nanaimariwamete kanixe'ayeitɨani, hikɨ kexemɨteneniere.
2CH 30:8 Yu'iyaritsie xetsetse'itɨ xepɨkahayuyeitɨaka, xe'ukiyarima wahepaɨ. Yawé hetsɨa xekeneyuyetua, meta tukitana xekeneutahaxɨa, mɨkɨ patsiekame mayeitɨa yuheyemekɨ. Yawé yukakaɨyari xekenayexeiyani, ha'atɨ mɨtihayewakɨ xehepaɨtsita.
2CH 30:9 Yawé hetsɨa xɨka xe'u'axɨani, xe'iwama meta xeniwema memɨwarehapa mepɨwaretinenimayata, hikɨ memanuaxɨani 'ikɨ kwieyaritsie mepeyɨwekaxɨani. Yawé xekakaɨyari pɨtiuyukanenimaya meta mɨreuyehɨwirieni pɨyɨwe. Xɨka xeme ta'aurie xehaxɨrieni hetsɨana xe'u'axɨani, mɨkɨ hatsuaku pɨkaxeku'eirieni».
2CH 30:10 Hikɨ niuki tuayamete mekaneutayeixɨani naitsarie 'Epɨrahini meta Manatsexi kiekariteyaritsie, 'atsita Tsawuruni paitɨ mekaniye'axɨani, peru yunaitɨ mekaniutinawekaitɨni meta mekaniwananaimakaitɨni.
2CH 30:11 Matsi, hipatɨ 'Atsexi nuiwarimama, Manatsexi meta Tsawuruni wanuiwarima tixaɨ mekatehayuyeitɨaka mekanekɨne Kerutsaremetsie.
2CH 30:12 Metatsiere Kuratsie kiekatari, Kakaɨyari waruyuitɨaku, yamekatenikakɨne meyuxewitɨ ti'aitame kemɨra'aitakai meta teɨteri wa'ukiyarima, Yawé niukieya kemainekai.
2CH 30:13 Hikɨ hutarieka metseritsie, Kerutsaremetsie mekaniuyukuxeɨrieni yumɨiretɨ teɨteri Paa mɨkakuxanariyarietɨka 'ixɨarariyari memɨwewienikɨ.
2CH 30:14 Kerutsareme kiekariyaritsie mawari taiyame kakaɨyarixi mɨwahetsiemiemetɨkai mekaniuti'una meta 'ɨkwa taiyamete, hikɨ Kiruni 'akiyaritsie mekateneukaxɨrieni.
2CH 30:15 Hutarieka metseriyaritsie tamamata heimana nauka tukariyaritsie, Patsikwa 'ixɨarariyari mekaniuwewieni. Mawari wewiwamete meta rewitsixi mekaniyutitetewiya, 'ayumieme mekaniuyu'itieni meta mawari taiyariyari mekaniuwewieni Yawé tukieya manuwe,
2CH 30:16 hikɨ 'arike mɨyamete'uyurieka kememɨte'uximayakai mɨpaɨ mekateniu'uni, kemaine 'inɨari niukiyari Muitsexi kemɨraka'utɨa, tewi Kakaɨyari hetsɨa mieme. Rewitsixi mawari wewiwamete xuriya mekaniwayetuiriwakaitɨni, mɨkɨta mawari taiyame mekanikɨ'ɨyakaitɨni.
2CH 30:17 Yumɨiretɨ teɨteri memɨkayu'itiwawekaikɨ 'akuxi, Yawé hetsiemieme memɨpatsienikɨ muxatsi Patsikwa 'ixɨarariyaritsie miemete rewitsixi mekaniwarukwini wahetsiemieme.
2CH 30:18 Yumɨiretɨ teɨteri 'Epɨrahinitsie, Manatsexitsie, 'Itsakaxitsie meta Tsawurunitsie memeyekɨ Patsikwa mekaniukwani mekayu'itieka, kemainekai 'aitsika yamekatekakɨneka. Peru 'Etsekiyaxi mɨpaɨ katiniuyunenewieni wahetsiemieme: «Ketiniwareuyehɨwiri, Kakaɨyari 'aixɨa pemɨtiuka'iyari,
2CH 30:19 kemɨ'ane memɨyuwaɨri yu'iyarikɨ Yawé 'ahetsie memɨtewiyanikɨ, wa'ukiyarima wakakaɨyari, tsepa mɨkayu'iti 'a'aitsika kemaine 'itiya hepaɨtsita mɨtikuxata».
2CH 30:20 Hikɨ Yawé 'Etsekiyaxi kaniu'enieni meta teɨteri katiniwareuyehɨwirieni.
2CH 30:21 Hikɨ 'ixaheritsixi Kerutsareme memu'uwakai waɨkawa meyutemamawietɨ Paa mɨkakuxanariyarietɨka 'ixɨarariyari mepɨwewiekai, 'atahuta tukari mepuyuri. Rewitsixi meta mawari wewiwamete Yawé mepɨnɨawakai xexuime tukaritsie, meputikwikakai meteyuitɨatɨ.
2CH 30:22 'Etsekiyaxi rewitsixi kaniwarutawaɨritɨani Yawé hetsiemieme mete'uximayatɨ memayuti'uitɨakai. 'Atahuta tukari 'ixɨarari mekaniuwewieni meta patsikwa 'ikwaiyari mekanikwakaitɨni, memuyuxewinikɨ mawariyari mewewietɨ meta Yawé menɨawatɨ, yu'ukiyarima wakakaɨyari.
2CH 30:23 Merikɨte yunaitɨ teɨteri me'uyu'enieka yamekateniuxata tawarita 'atahuta tukari 'ixɨarari memɨwewienikɨ, hikɨ mɨkɨ waɨkawa meyutemamawietɨ 'ixɨarari mekaniuwewieni mɨkɨ 'atahuta tukari.
2CH 30:24 Hikɨ Kura kwieyaritsie ti'aitame 'Etsekiyaxi, teɨteri memɨyuxeɨriekai kaniwarumini xeimiriyari tuurutsixi meta 'atahuta miriyari muxatsi, metatsiere Kuratsie kiekatari wa'ukiyarima mekaniwarumini, xeimiriyari tuurutsixi meta tamamata miriyari muxatsi. Hikɨ yumɨiretɨ tawari mawari wewiwamete mekaniyu'itieni.
2CH 30:25 Yunaitɨ teɨteri Kuratsie memɨyuxeɨriekai mekaniyutemamawiekaitɨni, yaxeikɨata mawari wewiwamete, rewitsixi meta 'Ixaheri kwieyaritsie memeyekɨ, tewanarixi 'ixɨararipa memu'axɨa, metatsiere Kura kwieyaritsie kiekatari.
2CH 30:26 Kepauka paitɨtɨ 'amuyeikakai Tsarumuni, Rawiri nu'aya, 'Ixaheritsie ti'aitame, Kerutsaremetsie pɨkawewiyawekai 'ixɨarari mɨpaɨ titemawierimatɨ.
2CH 30:27 Hikɨ 'arike rewitsixi meta mawari wewiwamete 'ameti'uka Kakaɨyari mekaniutawawirieni teɨteri 'aixɨa mɨwayurienikɨ, hikɨ Yawé kaniwaru'enieni, wanenewieri muyuawitsie paitɨ kaniu'enieni, muyepatsietsie paitɨ Kakaɨyari muwayeka.
2CH 31:1 Kepauka meutiparixɨ 'ixɨarari, yunaitɨ 'ixaheritsixi mana memu'uwakai Kura kiekariteyaritsie mekaniukakɨne tetexi mɨpatsietɨka meta 'uka kakaɨyariyari 'Atserá 'ɨkiyari memɨtitarakɨ. Metatsiere naime mekaniuti'una mawari matiwewiwa meta kakaɨyarixi watuki muxuawekai Kura kwieyaritsie meta Wenikamini, 'Epɨrahini metatsiere Manatsexi kwieyaritsie. 'Arike mɨya mete'uyurieka, mɨkɨ yunaitɨ yukiekaritetsie mekanakunuaxɨani meta yuxexuitɨ yukie.
2CH 31:2 Hikɨ 'Etsekiyaxi mawari wewiwamete meta rewitsixi 'aixɨa katiniwaru'uitɨani, para yuxexuitɨ yu'uximayatsika memexeiyanikɨ, para mawari taiyariyari memɨwewiekakɨ meta temɨtaxewinikɨ mawariyari, Kakaɨyari memayexeiyanikɨ, memutikwikanikɨ Yawé menɨawatɨ, meta Yawé tukieya kitenieyaritetsie memɨte'uximayakakɨ.
2CH 31:3 Hikɨ ti'aitame yutewama yayupaɨmeme kaniwayetuani mawari taiyariyari ximeri mieme meta taikai mieme memakɨnekɨ, meta mawari taiyariyari xawatitsie mieme, meta metseri mɨhekwa hetsiemieme, meta patsiekamekɨ memuyukuxexeɨriwatsie mieme, kemɨre'uxa Yawé 'aitsikayatsie.
2CH 31:4 Yaxeikɨata Kerutsareme kiekatari mɨpaɨ katiniwaruta'aitɨani mawari wewiwamete meta rewitsixi memɨtewayetuirienikɨ tita mɨtiwahetsiemiemetɨkai, mɨkɨ Yawé 'aitsikayatsie mieme memɨte'uximayakakɨ xeikɨa
2CH 31:5 Yapauka mɨyamete'uta'aitɨarieka, 'ixaheritsixi tiwaɨkawa mekateniyetuani matɨari mɨtiukaxuawerixɨ 'imɨarite, kaxie winuyari, huriwu hatseitiyari meta xiete, meta tinaime 'ɨtsita timieme. Metatsiere tita memɨteheuxeiyakai tamamatatsie mieme xeime mekateniyetuani.
2CH 31:6 Metatsiere, 'Ixaheritsie kiekatari meta Kura kiekariteyaritsie kiekatari mekateniyetuani tamamatatsie mieme xeime tuurutsixi meta muxatsi, meta tinaime mekateniyetuani tita mɨtipatsiekai Yawé yukakaɨyari hetsiemieme, hikɨ mɨkɨ naime mekateniukuxeɨriexɨani.
2CH 31:7 Hikɨ hairieka metseriyaritsie mekanitsutɨani piinite mete'ukuxexeɨriwatɨ, hikɨ 'atahuta metseriyaritsie mekateniutahayewa.
2CH 31:8 Kepauka 'Etsekiyaxi meta 'iparewiwametemama memɨte'uxei 'anenetɨ tiuwetɨkaime, 'ana Yawé 'aixɨa mekateniutahɨawe meta teɨterimama 'ixaheritsixi.
2CH 31:9 Hikɨ 'Etsekiyaxi rewitsixi meta mawari wewiwamete kaniwaruta'iwawiya mana mɨtikuxeɨrietɨka hepaɨtsita memɨte'itaxatɨanikɨ,
2CH 31:10 hikɨ mawari wewiwamete tiwa'aitɨwame 'Atsariyaxi Tsaruki nuiwarieya, mɨpaɨ katinita'eiya: «Kepauka teɨteri memitsutɨa Yawé tukita 'imikieri mete'atɨwatɨ, tepeixeiya ta'ikwai 'atsita panuyuhayewa, Yawé yuteɨterima muwaparewiekɨ. Mɨkɨ mana mɨtitixeɨrietɨka mutiyuhayewaxɨ katinihɨkɨtɨni».
2CH 31:11 Hikɨ 'Etsekiyaxi katiniuta'aita Yawé tukita kii ti'utamete 'aixɨa mɨreuye'itɨarienikɨ, hikɨ mɨpaɨ mekateniuyurieni.
2CH 31:12 Tinaime mekateniuti'uta 'aixɨa metekahutɨ 'imikierite, tamamatatsie timieme xeime, meta piinite mɨtiyetuiya mɨtipatsietɨka. 'Ikɨ pɨtihɨritɨariekai Kunaniyaxi rewi tewiyari, meta 'iwaya Tsimi piparewiekai.
2CH 31:13 Ti'aitame 'Etsekiyaxi meta 'Atsariyaxi, mɨkɨ Kakaɨyari tukita mɨti'uximaya, mɨkɨ mekaniwarutihɨawe hipameta te'ɨwiyamete, Kehieri, 'Atsatsiyaxi, Nakati, 'Atsaheri, Kerimuti, Kutsawari, 'Eriheri, 'Itsimakiyaxi, Mahati, meta Wenahiyaxi, 'ikɨ mepɨwayetua Kunaniyaxi mɨtiwa'aitɨakakɨ meta 'iwaya Tsimi.
2CH 31:14 Rewi tewiyari Kurehe 'Imɨna nu'aya, tau manatineika hepatsie kitenie mukeka, kaniuhɨritɨarieni 'imikieri Yawé hetsiemieme mɨyetuiwa, meta mɨtiwayetuiriwanikɨ mɨkɨ 'imikieri Yawé hetsiemieme mɨyetuiyakai, meta piinite mɨtiyetuiya mɨtipatsietɨka.
2CH 31:15 Mɨkɨ pɨtiwa'aitɨakai, 'Ereni, Minikamini, Ketsuha, Tsemahiyaxi, 'Amariyaxi meta Tsekaniyaxi. 'Ikɨ mepukutetɨkatei mawari wewiwamete wakiekaritetsie. Mɨkɨ mepɨtewatapitɨwakai 'aixɨa 'anemekɨ 'imikieri yu'iwama, 'amemɨyumate meta yakɨ memɨyumate.
2CH 31:16 Mekatenitapitɨariwakaitɨni 'ukitsi haika wiyari memexeiyatɨka meutiyune memaka'uxa mɨkɨ wanuiwari xapayaritsie, meta yamemɨte'uximaya Yawé tukita, kepauka memɨte'uximayakai meta titakɨ memɨte'uximayakai.
2CH 31:17 Mawari wewiwamete mekanaka'utsiwakaitɨni yuxexuitɨ yunuiwarima wahetsie, meta rewitsixi xeitewiyari wiyari memɨhɨtɨka, kememɨte'uximaya meta kepauka memɨte'uta'uximayatanitsie.
2CH 31:18 Memaka'utsiwakaitsie tɨɨri 'etsimemuyumate, 'ukarawetsixi, tɨɨri 'ukitsi meta tɨɨri 'ukari mekanaka'utsiwakaitɨnita, tatsɨari yunaitɨ, mɨkɨ yunaitɨ mepatsiekame mekanayuyeitɨakaitɨni heitseriemekɨ.
2CH 31:19 Metatsiere, naitsarie kiekaritetsie mekanixuawekaitɨni teɨteri memɨhɨritɨariekai 'ikwaite memɨtewayetuiriwanikɨ mawari wewiwamete 'Aruni nuiwarimama, meta rewitsixi watsata xapatsie memaye'ukai meta kiekari 'aurie memeutitekai.
2CH 31:20 'Etsekiyaxi matsi yaxeikɨata katiniuyurieni naitsarie Kura kwieyaritsie, 'aixɨa 'anemekɨ, heitseriemekɨ meta yatikamietɨ Yawé hɨxie yukakaɨyari.
2CH 31:21 Tinaime tita mɨtiuta'aitaxɨ Kakaɨyari tukieya hetsie timieme, yu'iyarikɨ yuwaɨriyatɨ katiniuyurieni, kemaine 'aitsika meta 'inɨari niukiyari, Kakaɨyari kaniutiwauni, hikɨ hepaɨtsitana yakatiniuyɨni.
2CH 32:1 'Arike 'Etsekiyaxi matsiɨkɨme 'inɨari tiuyurieku keyamɨtikamiekai, 'ana Tsenakeriwi, 'Atsiriya kwieyaritsie ti'aitame, Kura kwieyaritsie kanitahani, hikɨ kiekarite kuraruyari 'ematitetewa warita mekanayaxetɨkɨne, meyuwaɨriyatɨ memika'unakɨ.
2CH 32:2 Kepauka 'Etsekiyaxi mɨtiutamari kename 'uhamiekai Tsenakeriwi Kerutsareme hetsie, para mɨkɨta mɨtamienikɨ,
2CH 32:3 yunaime kaniwarukuxeɨrieni kuyaxi tewa'aitɨwamete meta teɨteri wa'ukiyarima, katiniwaruta'aitɨani putsute memeukanaxɨanikɨ kiekari warita mumanetɨkatei, hikɨ mɨkɨ yamekatenikakɨne.
2CH 32:4 Hikɨ yumɨiretɨ teɨteri mekaniuyukuxeɨrieni, yunaitɨ meyuparewietɨ haixa mekaneukanaxɨani meta 'aki mana muyekatei, para te'aitamete 'atsiriyutsixi kepauka memɨ'axɨani haa waɨkawa memɨkataxeiyakɨ.
2CH 32:5 'Etsekiyaxi kamatɨ, kuraru 'amatayewa muka'unariekai naime 'aixɨa kaniuyurieni meta tuxiyu mɨkɨtsie kaniutiwewieni, metatsiere hutarieka mieme kuraru 'amatayewa kaniutawewieni herie mieme, meta Rawiri kiekariena kwie mutihɨniyarietsie kuraruyari 'ahatitetewame kaniutiwewieni, meta katiniuta'aita pitsika waɨkawa mɨtiwewiyanikɨ meta tepɨa mɨxikɨrawi yuhetsie nunuwame.
2CH 32:6 Hikɨ kuyaxi tewa'aitɨwamete kuyaxi wahɨxie kaniwati'uitɨani, meta warukuxeɨrieka teɨteri memayukuxexeɨriwatsie kiekari kitenieyaritsie, mɨpaɨ katiniwarutahɨawe:
2CH 32:7 «Xekeneyuwaɨriyani, xepɨkaheumamaka. Xepɨka'utiweranareni, kepauka 'Atsiriyatsie ti'aitame kuyaxi yumɨireme mɨwa'atɨani, tame xeime tekanexeiyani waɨkawa matsi mɨtɨrɨkaɨye.
2CH 32:8 Mɨkɨ teɨteri wahetsie kaniuyukutɨrɨkariyani, tameta Yawé takakaɨyari hetsie tekaneuwaɨreni, mɨkɨ kataniparewieka meta mɨkɨ pɨta kaniuyutamemiwani tahetsiemieme». 'Etsekiyaxi niukieya me'u'enieka Kura kwieyaritsie ti'aitame, 'ana teɨteri wa'iyari 'aixɨa kaniuyɨni.
2CH 32:9 Tsenakeriwi, 'ana Rakixi mɨrakutewatsie kaniukateitɨni yunaime yukuyaxima wahamatɨa, hipame yuparewiwamete kaniwarutanɨ'ani mɨpaɨ memɨtewaretahɨawekɨ 'Etsekiyaxi, Kura kwieyaritsie ti'aitame, meta yunaime Kuratsie kiekatari Kerutsareme kiekariyaritsie memu'uwakai:
2CH 32:10 «Mɨpaɨ kanaineni Tsenakeriwi, 'Atsiriya kwieyaritsie ti'aitame: “¿Ketitatsie xetewiyatɨ xete'ane Kerutsareme xemɨye'uwa, panatsi kiekari warita 'ari tekahatetɨka?
2CH 32:11 ¿Kari 'atsixepɨkatemate mɨkɨ 'Etsekiyaxi kanixekwimɨkɨ haakakɨ meta hariyakɨ? Mɨkɨ katinixe'itaiyani mɨpaɨ mɨtixekɨhɨawe kename Yawé xetawikweitsitɨani nekaxekwini.
2CH 32:12 ¿Tamɨ 'Etsekiyaxi katiuyuri, miti'unaxɨ tukite meta mawari matiwewiwa kakaɨyarixi wahetsiemieme, meta mɨpaɨ mɨtiuta'ai Kura kwieyaritsie kiekatari meta Kerutsaremetari memɨtemawatɨwenikɨ xeimetsie xeikɨa, meta mɨkɨtsie xeikɨa 'ɨkwa memɨtitaiyanikɨ?
2CH 32:13 ¿Xɨari 'atsixepɨkatemate ne meta meripaitɨ ne'ukiyarima ketemɨwaruyuri yunaime nuiwarite kwiepa memɨtama? ¿Kamɨtsɨ mɨkɨ nuiwarite wakakaɨyarixima wahetsie mete'utanua nemɨkawaka'unakɨ?
2CH 32:14 Mɨpaɨta yaxeikɨa mɨkɨ nuiwarite ne'ukiyarima memɨwaruka'unaxɨ mɨkɨ wakakaɨyarixi nixewitɨ mɨkawarutawikweitsitɨa hepaɨ nehetsɨa, yaxeikɨata 'ikɨ xekakaɨyari pɨkayɨwekaxɨani mɨxetawikweitsitɨani nehetsɨa.
2CH 32:15 Nɨka xete'u'itaiyarieni meta 'Etsekiyaxi yuri xepɨkate'eririeka. Xepɨka'i'enieka. Xɨka nixewitɨ kakaɨyari mɨkɨ nuiwarite meta te'aitamete wahetsɨa mieme ka'uyɨwekaxɨani mɨwatawikweitsitɨani nehetsɨa meta meripaitɨ ne'ukiyarima te'aitamete wahetsɨa, xeme matsi xekakaɨyari pɨkayɨwekaxɨani mɨxetawikweitsitɨani nehetsɨa”».
2CH 32:16 Tsenakeriwi parewiwametemama mepiyeweiyakai Yawé Kakaɨyari hepaɨtsita 'axame'utiyuatɨ, meta 'Etsekiyaxi 'iparewiwameya hepaɨtsita.
2CH 32:17 Yaxeikɨata Tsenakeriwi xapa kanenɨ'ani Yawé, 'Ixaheri kakaɨyarieya, hepaɨtsita 'axahaitɨ, mɨpaɨ 'utaitɨ: «Hipatɨ nuiwarite wakakaɨyarixi hepaɨ memɨka'uyɨwekaxɨa memɨwatawikweitsitɨani nehetsɨa, mɨkɨta 'Etsekiyaxi kakaɨyarieya pɨkayɨwekaxɨani yuteɨteriama muwaxɨna nehetsɨa».
2CH 32:18 Tsenakeriwi parewiwametemama, mekaniwahiwiekaitɨni karima Kerutsareme kiekatari wapaitɨ memaka'ukai kurarutsie. Mekaniwahiwiekaitɨni hepɨrayu niukiyarikɨ, para memɨtimamanikɨ meta mɨpaɨ kiekari memɨteka'unakɨ.
2CH 32:19 Kerutsareme kiekatari wakakaɨyari mekanixatakaitɨni hipatɨ nuiwarite kwiepa memɨtama wakakaɨyarixi wahepaɨ 'aneme mekanayeitɨwakaitɨni, mamakɨ memɨwewiyatɨka.
2CH 32:20 Hikɨ 'ayumieme, ti'aitame 'Etsekiyaxi meta Kakaɨyari niukameya Kitsariyaxi 'Amuxi nu'aya muyuawitsie meheutinenieretɨ karima mekaniuyutanenewieni.
2CH 32:21 Hikɨ Yawé yuniuki tuayame kaneyenɨ'ani mɨwakwinikɨ yunaime kuyaxi meta tewa'aitɨwamete 'Atsiriyatsie ti'aitame memakuteitsie, meta kuyaximama tewa'aitɨwamete, hikɨ mɨkɨ 'ana yutewiyatɨ kanakunuani yukiekaritsie. Meta kepauka meutaha yukakaɨyari tukita, niwemamatɨtɨ mekanimieni.
2CH 32:22 Mɨpaɨ Yawé 'Etsekiyaxi katiniutawikweitsitɨani meta Kerutsareme kiekatari, Tsenakeriwi 'Atsiriyatsie ti'aitame hetsɨa, meta yunaime memeye'uniekai, meta naitsarie mɨkɨ kwieyaritsie kayuwatɨ kaniwarupitɨani.
2CH 32:23 Hikɨ 'ayumieme yumɨiretɨ mekanekɨne Kerutsareme Yawé mawari meheyetuirienike, meta 'imikierite 'Etsekiyaxi hetsiemieme, Kura kwieyaritsie ti'aitame. Mɨpaɨ tiuyɨku 'Etsekiyaxi naitsarie nuiwarite watsata kaniutamariwa.
2CH 32:24 Hikɨ 'iya tukaritsie 'Etsekiyaxi waɨkawa katiniutakwine hikɨ kaniumɨnitɨma. 'Ana Yawé kaniutahɨawe 'aixɨa miyurienikɨ, mɨkɨta kanita'eiya meta 'inɨari mariweme kanixeitsitɨani.
2CH 32:25 Peru 'Etsekiyaxi Kakaɨyari ke'aixɨa miyuri pamɨpariyutsi pɨka'ipitɨa, matsi pɨta kaniuyuta'ɨre. Mɨkɨkɨ Yawé waɨkawa kaniuyeha'ani hepaɨtsitana, meta Kura Kerutsareme wahepaɨtsita.
2CH 32:26 Hikɨ 'Etsekiyaxi meta Kerutsareme kiekatari wahamatɨa, 'aixɨa mekaniuyuyurieni kemɨtiuyuta'ɨrekai, hikɨ kepauka mɨkɨ 'amuyeikakai, Yawé tawari pɨka'uyeha'a mɨkɨ wahamatɨa.
2CH 32:27 Merikɨte 'Etsekiyaxi matsi waɨkawa rexeiyatɨ kanayani meta waɨkawa 'aixɨa katinixeiyariekaitɨni. Katiniuti'uta waɨkawa pɨratate, hurute, tetexi witsimɨ'anene, witsimɨtiu'ɨatɨka, tepɨa yuhetsie nunuwame meta hipame piinite mɨraye'atɨka.
2CH 32:28 Mɨkɨ kiite pexeiyakai muwa ti'utame tɨriku, kaxie winuyari meta hatseiti, meta kurarute yunaime tewaxi wahetsiemieme pexeiyakai meta kurarute muxatsi wahetsiemiemete.
2CH 32:29 Yaxeikɨata kiekarite waɨkawa kaniutiwewieni, mɨkɨ wakaitsixi meta muxatsi yumɨireme yakɨmemɨpepe meta 'amemɨtepapa pɨtiwarexeiyakai, mɨkɨ Kakaɨyari waɨkawa katiniyetuirieni.
2CH 32:30 Metatsiere 'Etsekiyaxi katiniuyurieni Kikuni haixayari meuna, tetɨata kwieta pɨta mitahuyetɨa Rawiri Kiekariena tau makayuyuipike hepatsie mi'atɨa. 'Etsekiyaxi naime tita mɨtiutiwewi hepaɨtsita 'aixɨa katiniuyɨni.
2CH 32:31 Hikɨ kepauka Wawiruniyatsie ti'aitame parewiwametemama yunɨ'arima memɨwareyenɨ'a memɨti'iwaunikɨ mariweme 'inɨari mɨtiuyɨkɨ mɨkɨ kwieyaritsie, 'ana Kakaɨyari 'Etsekiyaxi kaniuku'eirieni mita'inɨatakɨ meta naime yamɨretimanikɨ 'iyarieya kemɨ'anekai.
2CH 32:32 Tawarita kemɨtiuyɨ 'Etsekiyaxi ti'aitametɨkaku, meta 'aixɨa kemɨtiuyuri, Kakaɨyari niukameya Kitsariyaxi 'Amuxi nu'aya kemɨtiunierixɨ xapayaritsie katinaka'utɨarieni meta Kuratsie meta 'Ixaheritsie te'aitamete waxapayaritsie katinaka'utɨarieni.
2CH 32:33 Hikɨ 'Etsekiyaxi kaniumɨni yu'ukiyarima waheima kaniukateukieni Rawiri nuiwarimama memuyehetsie. Yunaitɨ Kuratsie meta Kerutsareme kiekatari mekaneikuxeiya 'aixɨa me'utiyuatɨ hepaɨtsitana. Hikɨ nu'aya Manatsexi katiniuta'aita 'utɨmana.
2CH 33:1 Hikɨ Manatsexi tamamata heimana huta wiyari kanexeiyakaitɨni kepauka mitsutɨa ti'aitatɨ, Kerutsareme 'ukaitɨ katiniuta'aita huta tewiyari heimana tamamata heimana 'auxɨwi wiyari.
2CH 33:2 Peru Yawé kemɨkatinake katiniuyurieni, hipame nuiwarite wayeiyari 'uweiyatɨ kanayani Yawé muwarayeweiyakai 'ixaheritsixi wahɨxie.
2CH 33:3 Kakaɨyarixi watukite 'aixɨa kaniutiyurieni paapaya 'Etsekiyaxi miti'unakai, meta matsi, mawari taiyamete kaniutiwewieni waharitsixi wahetsiemieme meta 'uka kakaɨyariyari 'Atserá 'ɨkiyari kaniutiwewieni. Yunaime xurawetsixi wahɨxie kaniukatunumakeni meta kaniwarayexeiyakaitɨni.
2CH 33:4 Yawé tukita mawari taiyame kaniutiwewieni, mɨkɨ hetsiemieme Yawé mɨpaɨ putayɨkai: «Kerutsareme nepukani neheyemekɨ».
2CH 33:5 Yawé tukieya takwaya naime hutametsie mawari taiyame kaniutiwewieni xurawetsixi muyuawitsie miemete wahetsiemieme.
2CH 33:6 Yuniwema mawari taiyariyari kaniwarayeitɨani mayeweritsie Weni-Hinuni mɨrayetewatsie, mariweme katiniyurienekaitɨni 'axamɨ'anetsie tiwiyatɨ, katiniyukewaiyakaitɨni meta kemɨtiyɨni katinimaiwekaitɨni, meta mɨkite wahamatɨa memɨtekuxata kaniwarayexeiyakaitɨni. Yawé kemɨkatinake xeikɨa katiniyurienekaitɨni, hikɨ mɨpaɨ katiniyehaxɨatɨani.
2CH 33:7 'Atserá 'uka kakaɨyariyari 'ɨkiyari mitawewiekai Kakaɨyari tukieyata kaneitakeni, mɨkɨ hetsiemieme Kakaɨyari mɨpaɨ Rawiri mɨtiutahɨawekai meta nu'aya Tsarumuni: «'Ikɨ tukita Kerutsareme muwetsie, kiekari nemenayexeitsie yunaime 'Ixaheri nuiwarimama watsata, muwa nepayekani neheyemekɨ.
2CH 33:8 Hatsuaku tawarita 'ixaheritsixi nepɨkawarayeweiya kwie wa'ukiyarima nemɨwayetuiritsie, xɨka metehaye'atɨaka xɨka yametekahuni naime kenemɨtiwaruta'aitɨa, tatsɨari, naime ne'inɨari niukiyaritsie meta ne'aitsikatetsie nemɨwayetuiri Muitsexi ya'utainekaku».
2CH 33:9 Manatsexi Kuratsie kiekatari meta Kerutsaremetari kaniwareuyexɨrieni, mɨkɨ matsi waɨkawa 'axameteyurietɨ mekanakɨne keyuri hipatɨ nuiwarite Yawé mɨwaruka'unaxɨ 'ixaheritsixi wahɨxie.
2CH 33:10 Yawé yuteɨterima kaniwarutahɨawe meta Manatsexi, peru mɨkɨ mepɨkahenu'eni.
2CH 33:11 'Ayumieme Yawé kaniwarenɨ'airieni 'Atsiriyatsie ti'aitame kuyaximama wa'ukiyarima, hikɨ mɨkɨ Manatsexi mekaniuwiya meta Wawiruniya paitɨ mekaneihana tsurieyatsie me'iwiwitɨaka meta wurunitse tepɨayari kaunariyarikɨ.
2CH 33:12 Hikɨ mɨya tiuka'eniwatɨ, Yawé kaniutahɨawe, yu'ukiyarima wakakaɨyari, tixaɨtɨ karayuyeitɨatɨ yemekɨ kaniyuyetuani naimekɨ.
2CH 33:13 Yawé nenewieri kaniupitɨani, mɨkɨta kani'enieni waɨkawamekɨ kemɨtiwawiriekai kanipitɨani Kerutsareme makunuani meta kanipitɨani tawarita mɨtita'aitakɨ. Mɨpaɨ 'ana Manatsexi katinetimani kename Yawé Kakaɨyari xeikɨa hɨkɨ.
2CH 33:14 Hikɨ mɨyatiuyɨku, Manatsexi kuraru 'amatayewa 'a'atitewame kaniutawewieni Rawiri kiekariena warita, Kikuni warita tau makayuyuipike hepatsie putsutɨkai, meta mayeweritsie puyehanekai, 'atsita kitenie Tsapa mɨtitewatsie, meta 'Uperi warita kanahanekaitɨni. Metatsiere, kuyaxi wa'ukiyarima kaniwaruku'uitɨaxɨani naime Kura kiekariteyari yukuraru 'amatitɨtɨ mexeiyatɨkatsie,
2CH 33:15 meta Yawé tukieyata nuiwarite kwiepa memɨtama wakakaɨyarixi kaniwarayexɨrieni meta kakaɨyari 'ɨkiyari, 'ateewapai kiekari warita mekatenexɨrieni naime mawari taiyame mutiwewiekai yemuritsie Yawé tukieya manuwekai meta Kerutsareme.
2CH 33:16 Hikɨta mawari taiyame Yawé hetsiemieme 'aixɨa kaniuyurieni, hikɨ mana memɨyuxewinikɨ mawariyari kaniuwewieni meta pamɨpariyutsi mawariyari, meta Kuratsie kiekatari Yawé memayexeiyanikɨ kaniwaruta'aitɨani, 'Ixaheri Kakaɨyarieya.
2CH 33:17 Peru mɨyatɨtɨ, teɨteri yaxeikɨa mepiyeweiyakai kakaɨyarixi watukiteta metemawatɨwetɨ, peru Yawé yukakaɨyari hetsiemieme mepɨteyuriekai xeikɨa.
2CH 33:18 Hipatɨta kemɨtiuyɨ Manatsexi ti'aitametɨkaku, nenewierieya Kakaɨyari kemɨtiutahɨawixɨ, meta Kakaɨyari niukametemama kememɨte'ikuxaxatɨwakai Yawé hetsiemieme, 'Ixaheri Kakaɨyarieya, katinaka'utɨarieni kemɨtiuyɨ xapayaritsie 'Ixaheritsie te'aitamete waxapatsie.
2CH 33:19 Naitɨ 'axakemɨtiuyuri meta Kakaɨyari 'aye'unietɨ kemɨratɨa, hakewa tuki 'etsimɨpepe metiwewi, 'uka kakaɨyariyari 'Atserá kemɨtiutiwewi meta hipame kakaɨyarixi, 'arike Kakaɨyari hɨxie kemɨtiyuyetua, nenewierieya meta Yawé kemɨtita'ei, 'ikɨ naitɨ katinaka'uka kemɨtiuyɨ xapayaritsie Kutsahi mɨraka'utɨatsie.
2CH 33:20 Hikɨ kepauka Manatsexi mumɨ, kaniukateukieni yuparatsiyuta, hikɨ nu'aya 'Amuni kanitsutɨani 'utɨmana ti'aitatɨ.
2CH 33:21 Merikɨte kepauka 'Amuni mitsutɨa ti'aitatɨ xeitewiyari heimana huta wiyari pexeiyakai, hikɨ Kerutsareme 'ukaitɨ huta wiyari pɨtiuta'ai.
2CH 33:22 Peru Yawé kemɨkatinake pɨtiuyuri, 'ukiyarieya Manatsexi kemɨtiuyuri hepaɨ, kakaɨyarixi yunaime katiniwarutimawirieni 'ukiyarieya mɨwarutiwewiekai meta warayexeiyatɨ kanayani.
2CH 33:23 Peru, yu'ukiyari Manatsexi hepaɨ pɨka'uyɨ, Yawé hetsɨa pɨkayuyetua, matsi waɨkawa 'axapɨtiyurienekai xeikɨa.
2CH 33:24 'Amuni parewiwametemama mekaniku'eirieni me'eye'unietɨ mekanakɨne, hikɨ mekanimieni paratsiyutana.
2CH 33:25 Peru teɨteri, yunaime mekaniwarukwini kemɨ'ane me'iku'eirieka memimi, hikɨ hetsiena mieme nu'aya Kutsiyaxi ti'aitame mekanayeitɨani.
2CH 34:1 Merikɨtsɨ Kutsiyaxi kepauka mitsutɨa ti'aitatɨ 'atahaika wiyari kanexeiyakaitɨni, hikɨ Kerutsareme 'ukaitɨ katiniuta'aita xeitewiyari heimana tamamata heimana xewi wiyari.
2CH 34:2 Kutsiyaxi Yawé kemɨtinake katiniuyurieni, naimetsie yakatinikamiekaitɨni meripaitɨ tutsieya Rawiri kemɨtikatɨa, ni'etsiwatɨma pɨka'iku'eiri.
2CH 34:3 Hikɨ 'atahairieka wiyaritsie ti'aitatɨ, 'akuxi temaikɨtɨtɨ, Kutsiyaxi kanitsutɨani yututsi Rawiri Kakaɨyarieya kuwaunetɨ. Tamamata heimana huta wiyaritsie kanitsutɨani Kura kwieyari meta Kerutsareme kiekariyari wa'itietɨ, tuki 'etsimɨpepe kaniuti'una, meta 'uka kakaɨyariyari 'Atserá 'ɨkiyarite, tetexi kakaɨyarixiyari meta tepɨakɨ memɨwewiyatɨka.
2CH 34:4 Hɨxiena kaniuti'unarieni waharitsixi memɨte'atimawiyarɨwakai, meta 'ɨkwa matitaiyarɨwakai, meta kaniutimurarieni 'Atserá 'ɨkiyarite, meta tetexi kakaɨyarixiyari metatsiere tepɨakɨ memɨwewiyatɨka mekaniutitararieni tumuanari mekanayeitɨarieni, hikɨ mɨkɨ tumuanari kanakuwiwiyani memɨtewamawiriekai memakateukie heima.
2CH 34:5 Mawari taiyametetsie mɨkɨ kakaɨyarixi wamawari wewiwamete wa'umeteyari kaniutitaiya, mɨpaɨ Kura meta Kerutsareme katiniu'itieni.
2CH 34:6 Yaxeikɨata katiniuyurieni Manatsexi kiekariteyaritsie, 'Epɨrahini, Tsimehuni, meta Nepɨtahari wakiekariteyaritsie, meta wa'aurie mamanetɨkatsie.
2CH 34:7 Naitsarie 'Ixaheri kwieyaritsie mawari matiwewiwa kaniuti'una, kakaɨyarixi memɨwewiyatɨka tumuanari kaniwarayeitɨani meta 'uka kakaɨyariyari 'Atserá 'ɨkiyari, meta 'ɨkwa matitaiyarɨwakai kaniuti'una. Hikɨ 'arike Kerutsareme kanakunuani.
2CH 34:8 Hikɨ tamamata heimana 'atahaika wiyari ti'aitatɨ, 'arike mɨkɨ kwieyari meta tuki 'u'itiekari, Kutsiyaxi kaniwarutanɨ'ani Tsapani 'Atsariyaxi nu'aya meta Matsehiyaxi, kuwexinaruri mɨhɨkɨtɨkai mɨkɨ kiekariyaritsie, meta ti'utɨwame Kuha Kuhakatsi nu'aya, Yawé Kakaɨyari tukieya memɨhekwariyakɨ.
2CH 34:9 Hikɨ mɨkɨ mawari wewiwamete tiwa'aitɨwame Kirikiyaxi hetsɨa mekaniu'axɨani meta tumini mekaniyetuirieni Yawé tukieya manuwe memukuxeɨriyariekai, meta rewitsixi kitenie tehɨwemete Manatsexi kwieyaritsie kiekatari memɨwayetuiriekai meta 'Epɨrahinitsie kiekatari, meta naitsarie 'Ixaheritsie kiekatari, Kuratsie meta Wenikaminitsie kiekatari, meta Kerutsareme kiekatari memiyetuakai.
2CH 34:10 Hikɨta tumini mekaniyetuiriyarieni tuki 'aixɨa yuruwamete waxexeiyamete, mɨkɨta mekaniwayetuirieni tumini te'uximayatamete Yawé tukieya memɨhekwariyatɨwekai.
2CH 34:11 Metatsiere tumini mekaniwaru'ɨitɨani kɨyekɨ memɨteheutawewiwawe meta kii wewiwamete, mɨkɨkɨ memɨtetinanenikɨ tetexi meta kɨyexi pikaxite manuyehini kii hetsie Kuratsie te'aitamete memiku'eiriekai.
2CH 34:12 'Ikɨ teɨteri yu'uximayatsikatsie yamepɨtekahukai. Memanuyetekai mepɨhɨkɨtɨkai rewitsixi Yakati meta 'Awiriyaxi, Merari nuiwarimama, meta Tsakariyaxi meta Metsurani, Kuhati nuiwarimama. Rewitsixi kwinie memɨteheutakanariwiwawekai,
2CH 34:13 tetɨkɨmete tewa'aitɨwamete mepɨhɨkɨtɨkai meta yunaitɨ mana memɨte'uximayakai, tsepa ketitatsie memɨte'uximayakai. Mɨkɨ rewitsixi hipatɨ kemɨtiuyɨ te'utɨwamete mepɨhɨkɨtɨkai, paratsiyuta memɨtehɨritɨariekai meta kitenie tehɨwemete.
2CH 34:14 Kepauka tumini memɨwaye'ɨi Yawé tukieyata, Kirikiyaxi mawari wewiwame xapa kaniutaxeiya 'inɨari niukiyari maye'uxa Yawé hetsɨa mieme, Muitsexi kemɨraka'utɨa.
2CH 34:15 Hikɨ Kirikiyaxi kemɨtiuyɨ ti'utɨwame Tsapani mɨpaɨ katiniutahɨawe: «Xapa nepetaxei 'inɨari niukiyari maye'uxa Yawé tukita». Hikɨ kaniyetuirieni,
2CH 34:16 meta mɨkɨ Tsapani ti'aitame kanehuririeni. Mɨpaɨ katinitahɨawe: —Ti'aitame, matsiparewiwamete naimetsie yamekatenekahuni kememɨte'uta'aitɨarie.
2CH 34:17 Tumini mekaniwaye'ɨni Yawé tukita mayemanekai, meta mekaniwayetuirieni te'uximayatamete waxexeiyamete, metatsiere te'uximayatamete.
2CH 34:18 Meta kemɨtiuyɨ ti'utɨwame Tsapani, ti'aitame mɨpaɨ katiniutahɨawe kename mawari wewiwamete tiwa'aitɨwame Kirikiyaxi xapa heiyetuiriekai, hikɨ mɨkɨ kanekaterɨwa ti'aitame hɨxie:
2CH 34:19 Kepauka ti'aitame 'inɨari niukiyari mu'eni, yukamixa kaneukatsana hiwerika 'inɨariyari wewietɨ,
2CH 34:20 hikɨ meta mɨpaɨ katiniwaruta'aitɨani, Kirikiyaxi, 'Akikani Tsapani nu'aya, meta 'Awɨruni Mikahiyaxi nu'aya, meta kemɨtiuyɨ ti'utɨwame Tsapani, meta 'Atsahiyaxi hurawa 'iparewiwame:
2CH 34:21 —'Ikɨ xapa mɨyamayetainekɨ mutaxeiyarie, xekenehu Yawé nehetsiemieme xekeneuta'iwawiya, meta 'ixaheritsixi meta Kuratsie kiekatari memuyuhayewatɨwe wahetsiemieme. Xɨari Yawé tahetsie yuhaxɨa kaneyenɨ'aniri meripaitɨ ta'ukiyarima niukieya memuku'eirikɨ meta yamemɨkatekakɨkɨ 'ikɨ xapatsie kemɨre'uxa.
2CH 34:22 Hikɨ Kirikiyaxi meta hipatɨ ti'aitame muwarutanɨ'a mekanekɨne 'uka Hurira Kakaɨyari niukameya hetsɨa mekaniu'axɨani me'ita'iwawiyake, kiekari mɨhekwa makuma Kerutsareme 'aurie mukatei. Hurira Tsaruni pɨ'ɨyayatɨkai, mawari wewiwamete wakemarite mɨtihɨritɨariekai, Tikiwa nu'aya meta Kaxihatsi teukarieya.
2CH 34:23 Hurira mɨpaɨ katiniwaruta'eiya: «Yawé mɨpaɨ kanaineni, 'ixaheritsixi wakakaɨyari: “Mɨpaɨ xeketenetahɨawi kemɨ'ane mɨxehetanɨ'a,
2CH 34:24 kename ne, Yawé, mɨpaɨ netixehayehɨtɨwa: ‘'Uximatɨarika nekananɨ'amɨkɨ 'ena, meta 'ena kiekatari wahetsie, meta yanepɨtiyurieni naitɨ maye'atɨarienikɨ kemɨre'uxa mɨkɨ xapatsie ke'axaxemɨ'itɨarieni makaterɨwarie Kuratsie ti'aitame hɨxie.
2CH 34:25 Mɨkɨ mepɨnetsi'uku'eiri, hipame kakaɨyarixi 'ɨkwa mepɨwatairietɨwe, meta yunaime yutetexi kakaɨyarixiyarikɨ mekaneniuyehaxɨatɨani. 'Ayumieme waɨkawa nepɨha'a 'ikɨ kwieyaritsie mieme, meta nepɨkatihayewa.’
2CH 34:26 Peru Kuratsie ti'aitame, mɨxehetanɨ'a xemɨnetsita'iwawiyakɨ, mɨpaɨ xeketenetahɨawi kename ne, Yawé, 'Ixaheri Kakaɨyarieya, mɨpaɨ nehaine niuki mu'eni hepaɨtsita:
2CH 34:27 ‘'A'iyari muyuitɨariekɨ meta tixaɨtɨ pemɨkarayuyeitɨakɨ nehɨxie pe'u'enaka 'ikɨ kwieyaritsie meta 'ena kiekatari wahetsiemieme kenemutayɨ, meta 'akamixa pemeukatsanaxɨkɨ hiwerikakɨ meta nehɨxie pemutatsuakakɨ, ne nekamaniu'enieni. Ne, Yawé, mɨpaɨ nekanaineni.
2CH 34:28 'Ayumieme, nekamanika'uxipitɨamɨkɨ 'a'ukiyarima wahamatɨa, pekanikateukiemɨkɨ kayuwatɨ 'umakaku. 'Ekɨ pepɨkaniere 'uximatɨarika kenemɨranunɨ'ani 'ikɨ kwieyaritsie meta 'ena kiekatari wahetsie.’”» Hikɨ mɨkɨ mekanakunuaxɨani memutanɨ'arie ti'aitame memɨtehetaxatɨanikɨ.
2CH 34:29 Hikɨ ti'aitame yunaime kaniwaruta'inieni 'ukirawetsixi Kura kwieyaritsie kiekatari meta Kerutsaremetari.
2CH 34:30 Yunaime Kuratsie kiekatari wahamatɨa meta Kerutsaremetari, mawari wewiwamete, rewitsixi, meta yunaitɨ mɨkɨ kwieyaritsie kiekatari, 'amemɨyumate meta 'etsimemɨyumate, mɨkɨ wahamatɨa ti'aitame Yawé tukieyata kaneutahani, hikɨ muwa wahɨxie kanekaterɨwa tɨratu xapayari Yawé tukita mutaxeiyariekai.
2CH 34:31 Hikɨ 'anukukeka ti'aitame, Yawé hɨxie tɨratu kaniuwewieni kanihekwariya. Yakaniutayɨni Yawé mayexeiyanikɨ meta yamɨtikamienikɨ, naimekɨ yu'iyarikɨ meta naime kemɨtiyumatekɨ, 'aitsikateyatsie, 'inɨari niukiyaritsie, mɨpaɨ mɨreye'atɨanikɨ tɨratu niukiyari mɨkɨ xapatsie maye'uxa.
2CH 34:32 Hikɨta 'arike yakatiniuyurieni yunaitɨ mana Kerutsareme memɨyuxeɨriekai meta Wenikaminitsie kiekatari yamemɨtiyuanikɨ tɨratu hetsiemiemekɨ yamemɨtekakɨnekɨ. Hikɨ Kerutsareme kiekatari yamekatenikakɨne wa'ukiyarima wakakaɨyari tɨratuya kemainekai.
2CH 34:33 Kutsiyaxi naime yeiyari 'axamɨ'anene kaniukumaweriya naitsarie 'ixaheritsixi wakwieyaritsie, meta yapɨtiuyuri yunaitɨ 'Ixaheritsie memɨtitekai Yawé yukakaɨyari memayexeiyanikɨ. Mexi Kutsiyaxi 'a'uyeikakai, Yawé mepɨka'uku'eiri, yu'ukiyarima wakakaɨyari.
2CH 35:1 Hikɨ Kutsiyaxi Kerutsareme Patsikwa 'ixɨarariyari kaniuwewieni Yawé hetsiemieme. Tamamata heimana nauka tukaritsie meta mexɨakame metseritsie.
2CH 35:2 Kutsiyaxi mawari wewiwamete kaniwaru'uitɨani meta kaniwatuikakaitɨni memɨyuwaɨriyani Yawé tukita memɨte'uximayakakɨ.
2CH 35:3 Meta rewitsixi memɨhɨritɨariekai 'ixaheritsixi memɨtewa'ɨkitɨakakɨ meta memɨpatsiekai Yawé hetsiemieme, mɨpaɨ katiniwarutahɨawe: «Tɨratu kakuniyari mɨpatsie tukita xekeneutateka Tsarumuni Rawiri nu'aya mitawewita, 'Ixaheritsie ti'aitame, xemɨka'ikukwetɨwenikɨri. Yawé yukakaɨyari hetsiemieme xeketene'uximayaka meta teɨterimama 'ixaheritsixi wahetsiemieme.
2CH 35:4 'Aixɨa xeketeneuyu'uitɨa yayupapaɨmetɨ, nuiwari kexemɨyupapaɨme, kemɨre'uxa kememɨte'u'aitaxɨ Rawiri, 'Ixaheritsie ti'aitame, meta nu'aya Tsarumuni.
2CH 35:5 Tukita xekeneuta'uti, xe'iwama 'ixaheritsixi kepaɨ nuiwariyari memɨhɨkɨ, para 'ixaheritsixi xeinuiwariyaritsixi rewitsixi yayupaɨmeme memɨwarexeiyatɨkanikɨ.
2CH 35:6 Muxatsi xekeniwarukuya Patsikwa 'ixɨarariyaritsie miemete, xepatsietɨ xekenayuyeitɨa meta naime xeketeneukuha'aritɨa yu'iwama wahetsiemieme, meta xeketenaye'atɨa Yawé kemɨtiu'aitaxɨ Muitsexi ya'utainekaku».
2CH 35:7 Hikɨ Kutsiyaxi yutewama, teɨteri mana memu'uwakai kaniwarumini xeitewiyari heimana tamamata muxatsi meta tsipuri, meta haika miriyari tuurutsixi, mɨkɨkɨ Patsikwa 'ixɨarariyari memɨwewienikɨ.
2CH 35:8 Yaxeikɨata teɨteri wa'ukiyarima mekateniyetuani 'imikieri teɨteri wahetsiemieme meta mawari wewiwamete meta rewitsixi wahetsiemieme. Hikɨ Kirikiyaxi, Tsakariyaxi, meta Kehieri, Kakaɨyari tukita te'uximayatamete, mekateniwayetuirieni mawari wewiwamete huta miriyari heimana 'ataxewi tsienituyari muxatsi meta tsipuri, meta haika tsienituyari tuurutsixi, Patsikwa 'ixɨarariyari memɨwewienikɨ.
2CH 35:9 Kunaniyaxi meta 'iwamama Tsemahiyaxi meta Natanaheri, meta Katsawiyaxi, Keyeri meta Kutsawari, rewitsixi memɨwa'ukiyarimatɨkai, mekaniwayetuirieni rewitsixi 'auxɨwime miriyari muxatsi meta tsipuri, meta 'auxɨwi tsienituyarita tuurutsixi.
2CH 35:10 Hikɨ mete'ukuha'aritɨakari, mawari wewiwamete 'aixɨa mekateniu'uni tukita, meta rewitsixi 'aixɨa mekateniuyu'uitɨani yayupapaɨmetɨ, ti'aitame kemɨtiwaru'aitɨa.
2CH 35:11 Kepauka tewaxi memɨwaranutixitekekai Patsikwa 'ixɨarariyari hetsiemiemete, mawari wewiwamete mawari taiyame mepɨkuxurimawakai, meta rewitsixi tewaxi mepɨwatikwipiwakai.
2CH 35:12 Hikɨ mepɨwayetuiriwakaita xeinuiwariyarite mawari kepaɨmeme Yawé hetsiemieme memitataiyakekai, kemɨre'uxa Muitsexi xapayatsie. Yaxeikɨata tuurutsixi mekaniwaruyurieni.
2CH 35:13 Hikɨta mekaniwarutiwarɨka muxatsi Patsikwatsie miemete, 'aitsika kemaine, metatsiere, turutsixi mekaniwaruka'etsa xariteta, 'itsari 'etsameteta meta katsuweratetsie, hikɨ meta yapauka mekaniwarutamini yunaime teɨteri.
2CH 35:14 Hikɨta mekanikuha'aritɨani Patsikwa 'ikwaiyari yuhetsiemieme meta mawari wewiwamete 'Aruni nuiwarimama wahetsiemieme. Rewitsixi mekanikuha'aritɨani yuhetsiemieme meta mawari wewiwamete wahetsiemieme, mɨkɨ tukari memɨkahɨkaikɨ tɨkarikɨke mekateniutahayewa mawari taiyariyari mewewietɨwetɨ meta wiya metaiyatɨwetɨ.
2CH 35:15 Kwikamete 'Atsahapi nuiwarimama mekateni'uximayakaitɨni, kememɨte'u'aitakai Rawiri, 'Atsahapi, Hemani, meta Kerutuni, ti'aitame hetsiemieme mɨtaniere. Yaxeikɨata kitenie tehɨwemete mekateniutahɨni kitenie hakewa memehɨritɨariekai, mɨkɨ 'ana yu'uximayatsika mepɨka'uhayewaxɨ, 'ayumieme wa'iwama rewitsixi Patsikwa 'ikwaiyari mekaniwarukawewirieni.
2CH 35:16 Mɨpaɨ mekateniu'uximayata Yawé hetsiemieme Patsikwa 'ixɨarariyari memɨwewienikɨ meta mawari taiyariyari memɨwewienikɨ Yawé mawari taiyameyatsie, Kutsiyaxi ti'aitame kemɨtiuta'aitakai.
2CH 35:17 'Ana, 'ixaheritsixi mana memɨyuxeɨriekai Patsikwa mekaniuwewieni meta Paa mɨkakuxanariyarietɨka 'ixɨarariyari 'atahuta tukari.
2CH 35:18 Kepaukapaitɨtɨ Kakaɨyari niukameya Tsamuheri 'amuyeikakaitsie pɨkawewiyawekai Patsikwa 'ixɨarariyari 'ipaɨ 'anetɨ, meta nixewitɨ ti'aitame mɨpaɨ pɨkatiwewi Patsikwa 'ixɨarariyari, Kutsiyaxi kemɨtiwewi mawari wewiwamete wahamatɨa meta rewitsixi, meta Kuratsie kiekatari, meta 'ixaheritsixi meta Kerutsaremetari wahamatɨa.
2CH 35:19 'Ikɨ Patsikwa 'ixɨarariyari kaniuwewiyani tamamata heimana 'atahaika wiyari Kutsiyaxi ti'aitakaku.
2CH 35:20 Hikɨ 'arike Kutsiyaxi tuki 'aixɨa 'uyuriekuri, 'Ekipitutsie ti'aitame Nekahu, kanayeyani muyutamienikɨ Karikemitsi mɨrakutewatsie, mɨkɨ kiekari 'Eupɨrate hatɨayari tetsita pɨkumakai, peru Kutsiyaxi kanayeyani 'itamienike.
2CH 35:21 Hikɨ Nekahu yuniuki tuayamete kaneinɨ'airieni mɨpaɨ memɨte'itahɨawekɨ: «Pepɨka'anuyehakeni, Kuratsie ti'aitame. Ne hikɨ nepɨkanekumiene 'ahamatɨa, 'iya nuiwari memɨnetsimietɨwe pɨta nekaniwakukwineni. Kakaɨyari mɨnetsiparewie, mɨpaɨ pɨnerahɨawekai nekeyumexɨitɨaka mɨkɨkɨ. 'Ayumieme Kakaɨyari hɨxie pepɨka'uyehakeni, mɨkɨ mɨkamatsi'uka'unanikɨ».
2CH 35:22 Kutsiyaxi matsi yapɨkatikatɨa kemɨrahɨawarɨwakai, Nekahu kemɨrehɨawekai Kakaɨyari yatitaxatɨaku, matsi, kamixate yɨkɨ ti'aneneme ranakatɨka hikɨ kaneyani makuweritsie Mekiru mɨrakutewatsie Nekahu hamatɨa muyutamieniku.
2CH 35:23 Hikɨ tupikɨ temɨmɨmete me'itamɨkɨ, ti'aitame Kutsiyaxi mɨpaɨ katiniwarutahɨawe yuparewiwamete: «Xekenenanuyewitɨki, yemekɨ waɨkawamekɨ nepɨtiukwinitɨarie».
2CH 35:24 'Iparewiwamete mekanenayehana kaxetayatsie mekanipata xeime kaxetatsie pɨta, meta mekaneitɨni Kerutsareme paitɨ. Mana kaniumɨni, hikɨ kaniukateukieni 'ukiyarimama memuyehetsie. Meta yunaitɨ Kuratsie kiekatari meta Kerutsaremetari mekaniyuhiweriekaitɨni hetsiena mieme.
2CH 35:25 Hikɨ Kutsiyaxi hetsiemieme Keremiyaxi hiwerika kwikariyari kaniutawewieni, meta 'ana mɨtiyehane meta hikɨ, kwikamete 'ukitsi meta 'ukari Kutsiyaxi kwikariyari mepa'eriwa kepauka meyuhiwerietɨ memɨkwika xewitɨ mɨyu. 'Ikɨ kwikari 'ixaheritsixi yunaitɨ memimatekai, paye'uxa hiwerika kwikariyari xapayaritsie.
2CH 35:26 Hipatɨta kemɨtiuyɨ Kutsiyaxi ti'aitametɨkaku, heitserie kemɨtikatɨa Yawé 'aitsikateya kemaine,
2CH 35:27 kemɨtiuyuri, mɨtiukatsutɨatsie timieme 'atsita 'imatɨrieka timieme, katinaka'utɨarieni 'Ixaheritsie te'aitamete meta Kuratsie te'aitamete waxapatsie.
2CH 36:1 Hikɨ teɨteri kiekatari Kuhakatsi Kutsiyaxi nu'aya mekananukakeni, ti'aitame mayanikɨ yu'ukiyari hetsiemieme, Kerutsaremetsie.
2CH 36:2 Kuhakatsi kepauka mitsutɨa ti'aitatɨ xeitewiyari heimana haika wiyari pexeiyakai, Kerutsareme 'ukaitɨ pɨtiuta'aitaxɨ haika metseri.
2CH 36:3 Peru, 'Ekipitutsie ti'aitame kanenakahɨani mɨkati'aitanikɨ Kerutsaremetsie, meta mɨkɨ kwieyaritsie kiekatari kaniwarutawawirieni haika miriyari heimana haika tsienituyari kiruyari pɨrata meta xeitewiyari heimana tamamata heimana haika kiruyari huru.
2CH 36:4 Hikɨta 'Eriyakini Kuhakatsi 'iwaya pɨta ti'aitame kanayeitɨani Kura kwieyaritsie meta Kerutsaremetsie, meta Kuhatsimi pɨta katiniterɨwa. Peru Kuhakatsi pɨretsu payeitɨa, Nekahu kaneihana 'Ekipitu paitɨ.
2CH 36:5 Hikɨ Kuhatsimi kepauka mitsutɨa ti'aitatɨ xeitewiyari heimana 'auxɨwi wiyari pexeiyakai, meta Kerutsareme 'ukaitɨ pɨtiuta'aitaxɨ tamamata heimana xewi wiyari, peru Yawé yukakaɨyari kemɨkatinake katiniuyurieni.
2CH 36:6 'Ayumieme Wawiruniyatsie ti'aitame Nawukurunutsuxi Kuhatsimi kaniutamieni, hikɨ meta kaneihana Wawiruniya paitɨ wurunitse tepɨayarikɨ wiwiekame.
2CH 36:7 Metatsiere, Nawukurunutsuxi Yawé tukieyata timieme piinite katinetɨni Wawiruniya paitɨ, hikɨ yutukita katineutapini Wawiruniya paitɨ.
2CH 36:8 Hipatɨta kemɨtiuyɨ Kuhatsimi ti'aitametɨkaku, meta ke'axamɨtiuyuri metatsiere naitɨ kemɨtiyuri, katinaka'utɨarieni 'Ixaheritsie meta Kuratsie te'aitamete waxapatsie. Hikɨ nu'aya Kuhakini kanitsutɨani 'utɨmana ti'aitatɨ.
2CH 36:9 Kepauka Kuhakini mitsutɨa ti'aitatɨ tamamata heimana 'atahaika wiyari pexeiyakai, meta Kerutsareme 'ukaitɨ pɨtiuta'aitaxɨ haika metseri heimana tamamata tukari, peru Yawé kemɨkatinake katiniuyurieni.
2CH 36:10 'Ayumieme, mexɨakame wiyaritsie 'itsutɨakaku ti'aitame Nawukurunutsuxi katiniuta'aita Wawiruniya paitɨ manuhanienikɨ, meta Yawé tukita timieme piinite waɨkawa mɨraye'atɨka mame, meta Tserekiyaxi pɨta ti'aitame kanayeitɨani Kura kwieyaritsie meta Kerutsaremetsie, Kuhakini 'iwaya yatewa.
2CH 36:11 Tserekiyaxi xeitewiyari heimana xeiwiyari pexeiyakai kepauka mitsutɨa ti'aitatɨ, meta Kerutsareme 'ukaitɨ katiniuta'aita tamamata heimana xeiwiyari,
2CH 36:12 peru Yawé yukakaɨyari kemɨkatinake katiniuyurieni. Kakaɨyari niukameya Keremiyaxi pɨka'anu'eni, Yawé hetsiemieme mɨtikuxatakai,
2CH 36:13 metatsiere ti'aitame Nawukurunutsuxi puku'eiri 'eye'unietɨ patɨa, kename meyuxewinikekai memɨte'uxatakai. Tserekiyaxi matsi yu'iyaritsie pɨtse'ikai, meta pɨkayuwaɨri Yawé hetsɨa munuanikɨ, 'Ixaheri Kakaɨyarieya hetsɨa.
2CH 36:14 Yaxeikɨata mawari wewiwamete wa'ukiyarima meta teɨteri waɨkawa 'axameteyurietɨ mekanakɨne, hipame nuiwarite wa'aurie kiekatari wayeiyari 'axamɨ'anene mepanukuwei, hikɨ tuki ka'itiyakame mekanayeitɨani Yawé yuhetsiemieme patsiekame mayeitɨakai Kerutsareme kiekariyaritsie.
2CH 36:15 Waɨkawa wanaki'erietɨ yuteɨterima meta yutuki hakewa mayeka, Yawé, wa'ukiyarima wakakaɨyari, waɨkawamexɨa pɨwarenɨ'a yuniukamete memɨwarayehɨtɨanikɨ.
2CH 36:16 Peru mɨkɨ Kakaɨyari nɨ'arimama mepɨwananaimakai, waniuki mepɨka'eniekai, 'axamepɨtewakumamatekekai Kakaɨyari niukametemama. Hikɨ 'imatɨrieka, Yawé yuhaxɨa kaniutatuani teɨteri wahetsie, pumawekai xewitɨ wahetsie mɨtanuani.
2CH 36:17 Hikɨ Yawé wawiruniyutsixi tiwa'aitɨwame kanenɨ'ani wahetsɨa, hikɨ mɨkɨ muwa tukita kaniwarukwini 'ixiparakɨ temari, meta mɨkɨ pɨkawarutinenimayataxɨ temari, 'ɨimarixi, 'ukirawetsixi meta 'ukiraixi. Kakaɨyari yunaime kaniwayetuani hetsɨana.
2CH 36:18 Meta tinaime piinite Kakaɨyari tukieyata timieme, 'amɨtipapa meta 'etsimɨtipepe, meta tukita mɨtiyepikai mɨraye'atɨka, meta ti'aitame tipiiniteya meta 'iparewiwamete tiwapiini, mɨkɨ katinetɨkieni Wawiruniya paitɨ.
2CH 36:19 Hikɨ Kakaɨyari tukieya mekaniutataiya, Kerutsareme kuraruyari 'amatayewa mekaniuka'una, meta paratsiyute mekaniutitaiya meta tinaime mekateniutitara piinite mɨraye'atɨkatei muwa mɨtiyepitɨkatei.
2CH 36:20 Kemɨ'ane memutawikwei memɨka'ukwi, ti'aitame Wawiruniya paitɨ kaniwarehapani, hikɨ waɨriyarika te'i'uximayatsiriwamete mekanakɨne meta niwemama, waɨriyarika te'uximayatamete mepɨhɨkɨtɨkai 'atsita kepaukake peritsiyatanaka mɨtiuta'aitaxɨ.
2CH 36:21 Mɨpaɨ Yawé niukieya katinaye'atɨarieni Keremiyaxi ya'utainekaku. Kwie kaniuka'uxipieni xawati tukariyari hexeiyatɨ kanayani kemɨreuterixɨ yuxaɨta kumatɨ, kepaukake maye'a haika tewiyari heimana tamama wiyari.
2CH 36:22 Merikɨte mexɨakame wiyaritsie Tsiru ti'aitakaku, Peritsiya kwieyaritsie ti'aitame 'iyarieya Yawé mɨpaɨ katiniuyuitɨani mɨkɨ minetɨanikɨ 'aitsika naitsarie mitanɨ'axɨanikɨ mɨra'aitatsie, hikɨ mɨpaɨ mɨraye'atɨarienikɨ Yawé niukieya niukameya Keremiyaxi kemutayɨ. Ti'aitame yakaniutayɨni yuniukikɨ meta mɨpaɨ yakatinaka'utsieni, mɨpaɨ katiniuta'aita:
2CH 36:23 «'Ipaɨ pɨra'aita Tsiru, Peritsiya kwieyaritsie ti'aitame: »Yawé, Kakaɨyari muyuawitsie makawe, mɨnetsiyetuiri nuiwarite yunaime kwiepa memɨtama, mɨpaɨ pɨnera'aitɨwa tuki neke'itawewirieni Kerutsareme kiekariyaritsie, Kura kwieyaritsie mɨti'ane. 'Ayumieme, kemɨ'ane Kura kwieyaritsie mɨkiekametɨni, keheyani, hikɨ Yawé kehei'ɨwiyani kakaɨyarieya».
EZR 1:1 Merikɨtsɨ mexɨakame wiyaritsie ti'aitakaku Tsiru, Peritsiya kwieyaritsie ti'aitame, Yawé ti'aitame 'iyarieya mɨpaɨ katiniuyuitɨani, mɨkɨ ti'aitame minetɨanikɨ 'aitsika naitsarie mitanɨ'axɨanikɨ mɨra'aitatsie, hikɨ mɨpaɨ mɨraye'atɨarienikɨ Yawé niukieya Keremiyaxi kemɨtiupitɨa. Ti'aitame mɨpaɨ 'aneme 'aitsika kaniutawewieni, meta yakaniutayɨni yuniukikɨ meta mɨpaɨ katinaka'utsieni:
EZR 1:2 «'Ipaɨ paine Tsiru, Peritsiya kwieyaritsie ti'aitame: »Yawé, Kakaɨyari taheima makawe, hikɨ 'ena kwiepa yunaime te'aitamete mɨnetsiyetuiri, kaneniuhɨritɨani nemitawewienikɨ tuki Kerutsareme kiekariyaritsie, Kura kwieyaritsie.
EZR 1:3 Hikɨ 'ayumieme, kemɨ'ane Kura mɨkiekame, Kerutsareme keheyani Yawé tukieya metawewienikɨ, 'Ixaheri Kakaɨyarieya, mɨkɨ Kakaɨyari Kerutsareme muyeika, merikɨte mɨkɨ Kakaɨyari kewareparewieka nekanaineni.
EZR 1:4 Meta mɨpaɨ nepɨra'aita yunaitɨ kiekatari naitsarie kiekaritetsie hakewa meme'uwa huriyutsixi memɨyuhayewatɨwe xekeniwareparewi xetewakupitɨwatɨ pɨrata meta huru, piinite meta tewaxi, meta kexemɨteyɨwawe xeketeneyetua 'imikieri Kakaɨyari tukieyatsie mieme Kerutsareme kiekariyaritsie metawewiyani».
EZR 1:5 Hikɨ Wenikamini nuiwarimama meta Kura nuiwarimama 'ukirawetsixi memanuyetei, yaxeikɨa yunaitɨ mawari wewiwamete meta rewitsixi, yunaitɨ kemɨ'ane Kakaɨyari mɨpaɨ mɨtiwaruyuitɨa wa'iyaritsie memɨyehukɨ tuki tawarita memetawewienikɨ, yamekateniuxata memɨyehukɨ Kerutsareme.
EZR 1:6 Hikɨ memɨkawateɨterimatɨkai yunaitɨ mekaniwaruparewieni pɨratakɨ meta hurukɨ, piinitekɨ meta tewaxi wahekɨ, piinite mɨraye'atɨkakɨ, meta 'imikierite mekateniwayetuirieni tiwaɨkawame kememɨteyɨwawekai.
EZR 1:7 Metatsiere, ti'aitame Tsiru, katiniuta'aita mɨrewayetɨkienikɨ piinite Nawukurunutsuxi mɨrewayetɨkai Yawé tukita Kerutsareme, hikɨ mɨkɨ yukakaɨyari tukita pɨta katineutapikaitɨni.
EZR 1:8 Tsiru katiniyetuani tumini hɨweme Mitɨriratexi hetsɨa, mɨkɨta tiuti'inɨataka, katiniyetuani Tsetsiwatsaxi hetsɨa Kura kwieyaritsie memakunuaxɨanikekai wa'ukiyari.
EZR 1:9 Mɨkɨ piinite mɨtiyetuiya mɨpaɨ katinipaɨmekaitɨni: watsute 'amɨnene hurukɨ mɨwewiyatɨka 30 watsute 'amɨnene pɨratakɨ mɨwewiyatɨka 1.000 nawaxate 29
EZR 1:10 watsute yakɨ mɨnenekai hurukɨ mɨwewiyatɨka 30 watsute yakɨ mɨnenekai pɨratakɨ mɨwewiyatɨka 410 meta yɨkɨ ti'anenetɨ hipatɨ 1.000
EZR 1:11 Mɨkɨ tiyunɨtɨ hurukɨ pɨratakɨ mɨtiwewiyatɨka pɨtipaɨmekai: 'auxɨwime miriyari heimana nauka tsienituyari (5.400) piinite. Naime 'ikɨ piinite Tsetsiwatsaxi katinetɨni Kerutsareme paitɨ kepauka Wawiruniya memehapaniekaitsie memupitɨarietsie Kerutsareme memakunuaxɨanikɨ.
EZR 2:1 'Ikɨ 'ena mepaye'uxa teɨteri Kura kwieyaritsie memɨkiekataritɨkai Nawukurunutsuxi, Wawiruniyatsie ti'aitame, muwarehapa Wawiruniya paitɨ, meta kemɨ'ane memupitɨarie Kerutsareme meta Kura kwieyaritsie hutarieka memɨ'axɨanikɨ. Yuxexɨitɨ mɨkɨ mekaniu'axɨani yukiekaritsie,
EZR 2:2 mewaraweiyatɨ Tsuruwaweri, Ketsuha, Nehemiyaxi, Tserahiyaxi, Xerahiyaxi, Maxirukeyu, Wiritsani, Mitsipaxi, Wihiwahi, Xekuni meta Wanaha. 'Ikɨ 'ixaheritsixi kaniwaxapayaritɨni kemeyupaɨmetɨ memakunuaxɨa:
EZR 2:3 Parutsi niwemama 2.172
EZR 2:4 Tsepatiyaxi niwemama 372
EZR 2:5 'Araki niwemama 775
EZR 2:6 Pakati-Muhawi niwemama, tatsɨari Ketsuha meta Kuhawi waniwema 2.812
EZR 2:7 'Erami niwemama 1.254
EZR 2:8 Tsatuhu niwemama 945
EZR 2:9 Tsakahi niwemama 760
EZR 2:10 Wanihi niwemama 642
EZR 2:11 Wewahi niwemama 623
EZR 2:12 'Atsikari niwemama 1.222
EZR 2:13 'Arunikani niwemama 666
EZR 2:14 Wihiwahi niwemama 2.056
EZR 2:15 'Arini niwemama 454
EZR 2:16 'Atexi niwemama 'Etsekiyaxi tɨtɨ 98
EZR 2:17 Wetsahi niwemama 323
EZR 2:18 Kuraha niwemama 112
EZR 2:19 Katsuni niwemama 223
EZR 2:20 Kiwaxi niwemama 95
EZR 2:21 Wereni kiekatarita 123
EZR 2:22 Netupa kiekatari 56
EZR 2:23 'Anatuti kiekatari 128
EZR 2:24 'Atsimaweti kiekatari 42
EZR 2:25 Kiriati-Yeharini, Kapira meta Weruti kiekatarita 743
EZR 2:26 Xama meta Kehewa kiekatari 621
EZR 2:27 Mikimatsi kiekatari 122
EZR 2:28 Weteri meta 'Ahi kiekatarita 223
EZR 2:29 Newu kiekatari 52
EZR 2:30 Makiwitsi kiekatari 156
EZR 2:31 Xewitɨta 'Erami kiekatari 1.254
EZR 2:32 Karini kiekatari 320
EZR 2:33 Ruri, Kariri meta 'Unuhu kiekatari 725
EZR 2:34 Keriku kiekatari 345
EZR 2:35 Tsena kiekatari 3.630
EZR 2:36 Mawari wewiwamete Kerahiyaxi nuiwarimama, Ketsuha tɨɨriyamama 973
EZR 2:37 'Imexi niwemamata 1.052
EZR 2:38 Patsuxi niwemamata 1.247
EZR 2:39 Karini niwemamata 1.017
EZR 2:40 Rewitsixi Ketsuha nuiwarimama meta Karimieri, mɨkɨ Hurawiyaxi niwemama memɨhɨkɨtɨkai 74
EZR 2:41 Kwikamete 'Atsahapi nuiwarimama 128
EZR 2:42 Kitenie memu'uwe Tsaruni, 'Atexi, Tarimuni, 'Akuwi, Katita meta Tsuwahi wanuiwarima 139
EZR 2:43 Tukita te'uximayatamete 'ikɨ waniwema mepɨhɨkɨtɨkai Tsika, Katsupa, Tawahuti,
EZR 2:44 Kerutsi, Tsihaka, Paruni,
EZR 2:45 Rewana, Hakawa, 'Akuwi,
EZR 2:46 Hakawi, Tsarimahi, Kanahani,
EZR 2:47 Kireri, Kahaxi, Xehahiyaxi,
EZR 2:48 Xetsini, Nekura, Katsani
EZR 2:49 'Utsa, Patsehaki, Wetsahi,
EZR 2:50 'Atsena, Mehunini, Neputsini,
EZR 2:51 Wakuwuki, Kakupa, Kaxikuxi,
EZR 2:52 Watsiruti, Mekira, Karitsa,
EZR 2:53 Warikuxi, Tsitsara, Temaha,
EZR 2:54 Netsihaki meta Katipaha.
EZR 2:55 Tsarumuni te'uximayatsiriwamete wanuiwarima mekanihɨkɨtɨkaitɨni Tsutahi niwemama meta Tsupereti, Perura,
EZR 2:56 Kahara, Rarikuni, Kireri,
EZR 2:57 Tsepatiyaxi, Katiri, Pukereti-Hatsewahini meta 'Amuni.
EZR 2:58 Tukita te'uximayatamete meta Tsarumuni te'uximayatsiriwamete wanuiwarima meyɨnɨtɨ mepɨyupaɨmekai 392
EZR 2:59 Hipatɨta mekaniu'axɨani Teri-Meraki me'anexɨaka, Teri-Karitsa, Keruwi, 'Aruhuni meta 'Imexi, peru mɨkɨ mepɨka'ɨyɨwekaxɨa memɨyutahekɨatakɨ kename 'ixaheritsixi mehɨkɨ:
EZR 2:60 Rerahiyaxi xiɨyarimama, Tuwiyaxi meta Nekura, yunaitɨ mepɨyupaɨmekai 652
EZR 2:61 Hipatɨ mawari wewiwamete, wa'ukitsiema waxapayari pɨka'ukaxeiyarie mepɨka'ɨyɨwekaxɨa 'ixaheritsixi memayuyeitɨani: Kawahiyaxi, Kuhutsi meta Waxitsirahi wanuiwarima, ('ikɨ 'imatɨrieka mieme xeime Karaha kiekame nu'aya kaniutiwitɨni Waxitsirahi mɨtitewakai, hikɨ mɨkɨ yumune hepaɨ katiniuyuterɨwa).
EZR 2:62 Mɨkɨ meniuyutiwauni kememɨte'ununuiwaxɨ xapayaritsie, peru memɨka'utaxeiyariekɨ, mepɨka'upitɨarie mawari wewiwamete memɨhɨkɨtɨnikɨ.
EZR 2:63 Kuwexinaruri pɨkawarupitɨa mɨkɨ mawari mɨpatsietɨka memɨtekwaka, 'arike kepauka mawari wewiwame yamɨtayɨni 'inɨari wewietɨ 'urimi meta tumimi hekɨ.
EZR 2:64 Yunaitɨ memɨyukuxeɨri mepakɨ: huta tewiyari heimana huta miriyari heimana haika tsienituyari heimana haika tewiyari teɨteri (42.360),
EZR 2:65 mekawa'inɨatatɨ waɨriyarika te'uximayatamete 'ukari meta 'ukitsi, mɨkɨta 'atahuta miriyari heimana haika tsienituyari heimana xeitewiyari heimana tamamata heimana 'atahuta (7.337) mepɨyupaɨmekai meta mekaniwarexeiyakaitɨni huta tsienituyari kwikamete 'ukitsi meta 'ukari.
EZR 2:66 Meta 'atahuta tsienituyari heimana xeitewiyari heimana tamamata heimana 'ataxewi (736) kawayutsixi, meta huta tsienituyari heimana huta tewiyari heimana 'auxɨwi (245) muratsixi,
EZR 2:67 nauka tsienituyari heimana xeitewiyari heimana tamamata heimana 'auxɨwi (435) kameyutsixi meta 'ataxewime miriyari heimana 'atahuta tsienituyari heimana xeitewiyari (6.720) puxuri.
EZR 2:68 Kepauka Kerutsareme memu'axɨa Yawé tukieya manuwekai, hipatɨ 'ukirawetsixi meteniyetɨani mɨtawewiyanikɨ tawarita Yawé tukieya meripaitɨ hakewa mewekai.
EZR 2:69 Kememɨteheuyɨwawekai mekateniyetuaxɨani, 'uximayatsika tawarita muyutsutɨanikɨ: nauka tsienituyari heimana nauka tewiyari heimana 'atahaika (488) kiruyari huru kanayani, huta miriyari heimana 'atahuta tsienituyari heimana huta tewiyari heimana tamamata (2.750) kiruyari pɨrata kanayani meta xeitsienituyari paɨmeme mawari wewiwamete wakamixate.
EZR 2:70 Hikɨ mawari wewiwamete, rewitsixi meta hipatɨ 'ixaheritsixi Kerutsareme kiekariyaritsie menitiyaxe, peru kwikamete, kitenie tehɨwemete meta tukita te'uximayatamete metatsiere hipatɨ 'ixaheritsixi meneutayeixɨani yukiekaritetsie meripaitɨ mematitekaitsie.
EZR 3:1 'Atahutarieka metseritsie, kepaukari 'ixaheritsixi yunaitɨ yukiekaritetsie memeutayeixɨakai hakewa memetitekai meripaitɨ, hikɨ mekaniuyukuxeɨrieni Kerutsareme kiekariyaritsie meyuxewitɨ.
EZR 3:2 Hikɨ Ketsuha Kutsaraki nu'aya meta 'iwamama yunaitɨ, mɨkɨ mawari wewiwamete memɨhɨkɨtɨkai, metatsiere Tsuruwaweri Tsaratiheri nu'aya meta 'iwamama yunaitɨ mekanitsutɨani tawarita mekanitawewieni mawari taiyame 'Ixaheri Kakaɨyarieya hetsiemieme, mana mawari taiyariyari memɨwewietɨwenikɨ 'inɨari niukiyari kemɨraka'utɨakai Muitsexi Kakaɨyari ti'uximayatsiriwame.
EZR 3:3 Matsi teɨteri mana memɨtamakai mewamakatɨ, mawari taiyame 'axeikɨa meniutawewieni meripaitɨ manuwekai. Hikɨ mana mɨtiyehane ximeri mawari taiyariyari Yawé hetsiemieme yamekateniuwewiximekaitɨni meta taikai.
EZR 3:4 Yaxeikɨata kemɨre'uxa 'inɨari niukiyaritsie kememɨte'u'aitɨarie, Xamaru 'ixɨarariyari mekaniuwewieni, mawari taiyariyari mekaniutiwewieni xexuime tukari hetsiemieme kemɨre'uxakai,
EZR 3:5 yaxeikɨatatsiere mekanitsutɨani mawari taiyariyari xexuime tukaritsie yamɨreuyuhane, meta metseri manutahanitsie mawariyari meta 'ixɨarari patsiekamekɨ memuyukuxexeɨriwa, Yawé kemɨtiu'aitaxɨ. Meta teɨteri mawari mekaniwewiriekaitɨni meyuwaɨriyatɨ.
EZR 3:6 'Akuxi tuki tenariyari katsutɨariewekaku, 'atahuta metseritsie mexɨakame tukaritsie teɨteri menitsutɨaniri Yawé mawari taiyariyari mewewirietɨ.
EZR 3:7 Hikɨ kii wewiwamete meta kɨyekɨ te'uximayatamete tuminikɨ mekateniwarupitɨani. Metatsiere Tsirunitari meta Tiru kiekatari 'ikwai, mɨti'iwa meta hatseiti mekaniwayetuirieni, kariuxa kɨyeyari Riwanu mieme memɨ'atɨanikɨ Kupe hurawa haramaratsie me'eyenetɨame, Peritsiya kwieyaritsie ti'aitame Tsiru kemɨtiuta'aitaxɨ.
EZR 3:8 Tsuruwaweri Tsaratiheri nu'aya, meta Ketsuha Kutsaraki nu'aya, meyɨnɨtɨ yunaitɨ wa'iwama, mɨkɨ mawari wewiwamete mepɨhɨkɨtɨkai, meta rewitsixi meyɨnɨtɨ, yaxeikɨa yunaitɨ memehapaniekai memu'axɨakai, mekanitsutɨani tuki hutarieka memɨtawewienikɨ, hutarieka wiyaritsie hutarieka metseriyaritsie meteheutewitɨ Kerutsareme memu'axɨatsie. Rewitsixi xeitewiyari wiyari meutiyune memɨhɨtɨkatei mekaniuhɨritɨarieni memɨtanenierenikɨ kemɨti'uximayatsiekai Yawé tukieya hetsiemieme.
EZR 3:9 Hikɨ 'ayumieme Ketsuha, yuniwematɨ meta 'iwamama yunaitɨ, yaxeikɨata Karimieri meta niwemama, mɨkɨ Hurawiyaxi memɨnuiwarimamatɨkai, meta Henarari nuiwarimama, meta yuniwematɨ wa'iwama yunaitɨ, mɨkɨ rewitsixi mepɨhɨkɨtɨkai, mekaniuyɨnɨni memɨtewa'aitɨakakɨ te'uximayatamete Kakaɨyari tukieya memɨwewietɨwe.
EZR 3:10 Kepauka te'uximayatamete Yawé tukieya tenariyari memutsutɨa, mawari wewiwamete yukamixate mɨpatsietɨka me'anakatɨtɨkaitɨ meniu'axɨani meta yukuxineta me'u'ɨtɨ, metatsiere 'Atsahapi nuiwarimama rewitsixi meniu'axɨani mutitirirɨka me'u'ɨtɨ, mɨkɨ 'ameniku'uni Yawé metanɨawake, kemɨraka'utɨakai meripaitɨ Rawiri, ti'aitame matɨa 'Ixaheri kwieyaritsie.
EZR 3:11 Yawé pamɨpariyutsi mekanipitɨakaitɨni yunaitɨ, meyuxewitɨ 'ikɨ kwikari menikwikakaitɨni: «Kakaɨyari 'aixɨa pɨtiuka'iyari, 'Ixaheri mariwemekɨ kemɨtinaki'erie yuheyemekɨ pinaki'erie». Yunaitɨ teɨteri Yawé meninɨawakaitɨni karima me'utihiwatɨ mehehɨawetɨ, tuki tenariyari 'ariri mutsutɨariekaikɨ.
EZR 3:12 Yumɨiretɨ hipatɨ mawari wewiwamete, rewitsixi meta hipatɨ 'ukirawetsixi tuki matɨari mieme memuxei, mehe'eriwatɨ mekaniutitsuani waɨkawa kepauka tuki tenariyari hekwamekɨ memuxei, mexi hipatɨta temawierikakɨ me'utihiwakai.
EZR 3:13 Pɨkamatsiɨkɨkai hiwari xɨka temawierika hɨkɨtɨkaitɨni yatɨ hiwerika, teɨteri karima memutihiwakaikɨ, wahiwari 'ateewa paitɨ pɨ'eniɨriɨkɨkai.
EZR 4:1 Merikɨtsɨ kepauka Kura nuiwarimama meta Wenikamini nuiwarimama memɨwaraye'unie mɨpaɨ memɨtehetima kename memu'axɨakai Wawiruniya memehapaniekai Yawé, 'Ixaheri Kakaɨyarieya, tukieya hutarieka mehewewietɨwekai,
EZR 4:2 'ana Tsuruwaweri hetsɨa mekaniu'axɨani meta huriyutsixi wa'ukiyarima wahɨxie, mɨpaɨ mekateniwarutahɨawe: —Xeketaneupitɨa temɨtetaparewienikɨ 'uximayatsikatsie, tameta xemeyexeiya Kakaɨyari tekanayexeiyani, tame mawari taiyariyari tekaniwewirieka kepaukapaitɨtɨ 'Etsaxikaruni 'ena mɨtatsi'atɨa, 'Atsiriya kwieyaritsie ti'aitame.
EZR 4:3 Perɨtsɨ Tsuruwaweri, meta Ketsuha metatsiere 'ixaheritsixi wa'ukiyarima mɨpaɨ mekateniwaruta'eiya: —Tame xeme temɨxe'upitɨani tepɨkayɨwawe xemɨtatsiparewienikɨ takakaɨyari tukieya hutarieka temɨtawewienikɨ. Tame teyuxaɨta tenenukuhanikuni Yawé tukieya, 'Ixaheri Kakaɨyarieya, Tsiru kemɨtiu'aitaxɨ, Peritsiya kwieyaritsie ti'aitame.
EZR 4:4 Hikɨ mɨkɨ mekanitsutɨani mekayuwaɨriyame memɨwarayeitɨanikɨ Kura teɨteriyari mewamariutatɨ kememɨte'uximayakai memɨtehayewakɨ.
EZR 4:5 Mekateniupitɨarieni paitɨ hipatɨ 'ukirawetsixi 'ɨxatsitamete memɨtehayewanikɨ kememɨteku'eriwakai. Mɨpaɨ metenanuyehukaitɨni Tsiru ti'aitatɨ kemɨreuterixɨ Peritsiyatsie ti'aitame, metatsiere Raríyu ti'aitakaku, ti'aitame tsiere mɨkɨ matɨa Peritsiya kwieyaritsie.
EZR 4:6 Yaxeikɨa kepauka mitsutɨa Kerikexi ti'aitatɨ, mɨkɨ memɨwaraye'unie xapa mekanenɨ'ani Kura kwieyaritsie meta Kerutsareme kiekatari mewaxanetatɨ.
EZR 4:7 Meta kepauka 'Aritakexiketsi ti'aitame matɨa Peritsiya kwieyaritsie, yaxeikɨata mɨkɨ Witsirani, Mitiriratexi, Taweri meta hipatɨ wa'iwama meyɨnɨtɨ xapa mekaneinɨ'airieni, mɨkɨ 'arameu niukiyarikɨ kanakaterɨwarieni.
EZR 4:8 Metatsiere, Xekuni kuyaxi tiwa'aitɨwame meta Tsimitsahi ti'utɨwame matɨa 'Aritakexiketsi xapa mekanenɨ'airieni Kerutsareme kiekatari wahepaɨtsita raye'ukame. Xapa mɨpaɨ kanayetainekaitɨni:
EZR 4:9 Xekuni kuyaxi tiwa'aitɨwame meta Tsimitsahi ti'utɨwame 'ikɨ xapa teputa'utɨa, teyunaitɨ ta'iwama 'itsɨkate, kuwexinaruritsixi meta te'uximayatamete Peritsiyatsie, 'Ereki, Wawiruniya meta Tsutsa (tatsɨari, 'eramitari).
EZR 4:10 'Ikɨ xapa hepaɨtsita yaxeikɨa yamepɨteha'eriwa hipatɨ nuiwarite mumariwe ti'aitame 'Atsinapaxi muwa'atɨa Tsamariya kiekariyari mukama meta hipame kiekarite tau makayuyuipike hepatsie haa manuyeka 'Eupɨrate 'anutaɨye.
EZR 4:11 Ti'aitame 'Aritakexiketsi, mɨpaɨ tepaitɨka mate'uximayatsiriwamete 'Eupɨrate 'anutaɨye temɨtama tau makayuyuipike hepatsie:
EZR 4:12 Mɨpaɨ tepɨmetehahɨawe ti'aitame huriyutsixi pemɨwareyenɨ'a mekaniu'axɨani Kerutsareme, hikɨ mɨkɨ kiekari mɨkaheu'ena mekanihekwatɨatɨweni 'axamɨtiuka'iyari. Tenariyari 'ariri kanitsutɨarieka.
EZR 4:13 Mɨpaɨta ketinemaika ti'aitame xɨka 'ikɨ teɨteri kiekari me'anukuhana meta xɨka kuraruyari me'ɨnɨni, mana kiekatari mekaheu'enanatɨ mepakɨne, mepɨkateyutuani kepemaine, meta mekateparewikutɨ mepakɨne, 'ayumieme mɨkɨkɨ 'uximatɨarika pɨrayani 'atumini mukamariketsie 'aparatsiyuta.
EZR 4:14 Tame te'a'uximayatsiriwamete temɨhɨmekɨ ti'aitame, tepɨkatawaɨriya mɨpaɨ pemɨtinanaimarieka. 'Ayumieme 'ikɨ xanetsika tepɨmatsihenɨ'airiwa.
EZR 4:15 'Ekɨ ti'aitame ketineta'aita naitɨ xapa metixeiyarienikɨ kemɨtiɨyɨ xapayarite hipatɨ te'aitamete memanuka'ukaitsie mieme. 'Ana mɨpaɨ pepɨretimani 'ikɨ kiekari kemɨkareu'enakai, kememɨte'ixani'eriekai te'aitamete meta hipatɨ kiekarite 'auriena mumanetɨka, meta kaniuka'unarieni mana 'axati'anetɨ mɨtixuawekaikɨ.
EZR 4:16 'Ayumieme tekamenayehɨtɨwani, xɨka mɨkɨ kiekari 'anukuketɨarieni meta kuraruyari xɨka 'ɨnɨrieni, 'ekɨ ti'aitame 'Eupɨrate 'anutaɨye tau makayuyuipiketsie kepemɨti'aita pekaneiyehɨamɨkɨ.
EZR 4:17 Waruta'eiyaka, ti'aitame mɨpaɨ katiniwaru'utɨirieni: Xehetsiemieme Xekuni kuyaxi tiwa'aitɨwame meta ti'utɨwame Tsimitsahi, meta xe'iwama Tsamariya kiekatari, meta hipatɨ haa 'Eupɨrate 'anutaɨye xemɨtitei tau makayuyuipike: Nepɨxewaɨritɨa.
EZR 4:18 Xeme xapa xemɨnetsiheyenɨ'airi, 'akaterɨwarieka putahekɨatsie nehɨxie.
EZR 4:19 'Ari nepɨtiuta'aitaxɨ xapate mɨtixeiyarienikɨ, mɨpaɨ pɨtiuyɨ, tepikaxei mɨkɨ kiekaritsie meripaitɨ 'axamɨti'ane pɨtixuawekai, meta te'aitamete mepɨkawareu'eniekai,
EZR 4:20 meta kename Kerutsareme kiekariyaritsie te'aitamete metɨrɨkawitɨ me'utixuawerixɨ, memɨte'aitakai naitsarie tau makayuyuipike hepatsie haa 'Eupɨrate manuyeka 'anutaɨye naime kwieyaritsie, mepɨtekupitɨariwakai wahekɨ, meta mepɨteyetuiriyarɨwakai, meta memɨteyuniɨtɨakai mepɨtekupitɨariwakai 'anamakame.
EZR 4:21 'Ayumieme, xeketenewareta'aitɨa mɨkɨ teɨteri memɨtehehayewakɨ yu'uximayatsika, mekeheihayewa kiekari tawarita mehewewietɨwetɨ, kepaukake ne hekwamekɨ 'aitsika waxapa hɨkɨtɨme nemɨtawewieni.
EZR 4:22 Yapauka xeketenaye'atɨa 'ikɨ kenemɨxerahɨawe hepaɨtsita, para kwinimieme 'ikɨ 'uximatɨarika mɨkati'anenikɨ reuyewenikɨ kemɨtiyetuiwa tumini neparatsiyuta.
EZR 4:23 Kepauka ti'aitame 'Aritakexiketsi xapaya makaterɨwarie Xekuni hɨxie meta ti'utɨwame Tsimitsahi metatsiere wa'iwama, mɨkɨ yunaitɨ Kerutsareme mekanekɨne, mewakwikutɨ 'ixiparakɨ, huriyutsixi waɨriyarika mekaniwarɨpitɨani memɨtehayewakɨ yu'uximayatsika.
EZR 4:24 Mɨpaɨ 'ayumieme 'uximayatsika mekaniuhayewa Kakaɨyari tukieya mewewietɨwetɨ Kerutsareme kiekariyaritsie, kepaukake Rariyu mɨti'aitakai hutarieka wiyari.
EZR 5:1 Hikɨ Kakaɨyari niukametemama Hakehuxi meta Tsakariyaxi 'Iru nu'aya mekateniwarutaxatɨani huriyutsixi Kura memɨtamakai meta Kerutsareme, 'Ixaheri Kakaɨyarieya hetsiemieme mekaniutiyuanekaitɨni kename wata'ɨwiyakai.
EZR 5:2 Hikɨ 'ayumieme Tsuruwaweri Tsaratiheri nu'aya meta Ketsuha Kutsaraki nu'aya mekanitsutɨani tawarita Kakaɨyari tukieya mewewietɨwetɨ Kerutsareme kiekariyaritsie. Kakaɨyari niukametemama wahamatɨa mekaniu'uwakaitɨni mewaparewietɨ.
EZR 5:3 'Ana tukariyaritsie kwitɨwa, Tatenahi 'Eupɨrate 'anutaɨye tau makayuyuipike hepatsie kuwexinaruri, meta Tsetaxi-Wutsinahi metatsiere wa'iwama, huriyutsixi wahetsɨa mekaniye'axɨani, mɨpaɨ mekateniwaruta'iwawiya: «¿Kemɨ'ane pɨxe'upitɨa 'ikɨ tuki hekwamekɨ xemɨtawewienikɨ, meta hekwamekɨ xemenukuketɨanikɨ?»
EZR 5:4 Tawarita mɨpaɨ mekateniwaruta'iwawiya: «¿Kehapaɨ metetetewa 'uximayatsika memɨ'aita mɨkɨ tuki hekwamekɨ memanukuketɨaxime?»
EZR 5:5 Matsi huriyutsixi wa'ukiyarima Kakaɨyari mɨwa'ɨwiyakaikɨ, waɨriyarika mepɨka'upitɨarie memɨtehayewakɨ yu'uximayatsika kepaukake Rariyu yamɨtayɨnikekai xapatsie.
EZR 5:6 Hikɨ Tatenahi, mɨkɨ kwieyaritsie kuwexinaruri, meta Tsetaxi-Wutsinahi meta wa'iwama, kuwiyexinu parewiwamete mɨkɨ kwieyaritsie, ti'aitame Rariyu xapa mekanenɨ'airieni,
EZR 5:7 mɨpaɨ hayetaineme: Ti'aitame Rariyu hetsiemieme: Tepɨmatsiwaɨritɨa.
EZR 5:8 Ti'aitame mɨpaɨ pemɨtimaikakɨ tepɨmatehaxaxatɨwa Kura kwieyaritsie tepanukɨ, Kakaɨyari mɨmariwe tukieya manuwekai, hikɨ tekaneixeiya hekwamekɨ kanewewiyaneni tetexi 'anenemekɨ, meta herie mexa kanekamarɨwani. Mɨkɨ 'uximayatsika yemekɨ me'ikweriwayurietɨ mekatene'uximayaka, peru yapauka mekateneyurieka.
EZR 5:9 Tekaniwareta'iwawiya wa'ukiyarima kemɨ'ane pɨxetiuta'aitɨa 'ikɨ tuki hekwamekɨ manukuketɨarienikɨ,
EZR 5:10 meta kemetetetewa mɨkɨ 'uximayatsika memɨ'aita, 'ekɨ ti'aitame temɨmatsi'aka'utɨirienikɨ.
EZR 5:11 Mɨkɨ mɨpaɨ mepɨtateheta'ei: «Kakaɨyari taheima mɨti'aita meta kwiepa tekateni'uximayatsiriwametetɨni, hikɨta hutarieka tuki tekaniwewietɨweni meripaitɨ mutawewiyakai mɨnɨriekai mɨixa kananuyemieni xewitɨ mariwetɨ 'Ixaheri kwieyaritsie ti'aitame kanita'aita.
EZR 5:12 Peru meripaitɨ kiekatari ta'ukiyarima Kakaɨyari taheima makawe mekaniuyehaxɨatɨani, mɨkɨ Nawukurunutsuxi mamayatsie kaniwayetuani, ti'aitame Wawiruniya kwieyaritsie kiekame hetsɨa, mɨkɨ karireu tewiyari tuki kaniuka'una meta teɨteri kaniwarehapani 'ena kiekatari Wawiruniya kwieyaritsie paitɨ.
EZR 5:13 »Peru 'arikeke, xeiwiyari Tsiru ti'aitatɨ, Wawiruniya kwieyaritsie, mɨpaɨ katiniuta'aita 'ikɨ Kakaɨyari tukieya manukuhanienikɨ tawarita.
EZR 5:14 Meta Wawiruniya tukieyata katiniwayepiini piinite, hurukɨ, pɨratakɨ, mɨtiwewiyatɨka Nawukurunutsuxi tukita mɨrewayepikai Kerutsareme kiekariyaritsie, Wawiruniya tukieyata pɨta mɨreutapikai, hikɨ Tsetsiwatsaxi katiniyetuirieni kuwexinarurikɨ mitahɨawekai 'ena.
EZR 5:15 Hikɨ Tsiru, Tsetsiwatsaxi katiniuta'aitɨani mɨkɨ naime piinite Kerutsareme tukita mɨtiyetuanikɨ, meta ke'itawewienike hutarieka tuki meripaitɨ hakewa mewekai.
EZR 5:16 Hikɨ 'ayumieme Tsetsiwatsaxi Kerutsareme kaninuani kanikatsutɨani Kakaɨyari tukieya tenariyari. 'Anamɨtiyehane katini'uximatsieka, peru 'akuxi kapɨnɨriewe».
EZR 5:17 Kamɨtsɨ tame mɨpaɨ tekanaitɨkani Ti'aitame xɨka 'aixɨa 'aneni, xapa ke'utixeiyarieni Wawiruniyatsie te'aitamete waxapatsie mɨraka'utɨarie kemɨtiuyɨ, yatemɨtehetimanikɨ xɨka 'aku yuritɨni ti'aitame Tsiru tiuta'aita Kakaɨyari tukieya hekwamekɨ mɨtawewiyanikɨ Kerutsareme kiekariyaritsie. Meta tepɨmatsiwawirie yapemɨtatitaxatɨanikɨ ti'aitame kepemɨtiyurieni 'ikɨ hepaɨtsita.
EZR 6:1 Hikɨ Rariyu ti'aitame katiniuta'aita Wawiruniyatsie xapate mɨtitixeiyarienikɨ kiita mɨtiwati'utsiwatsie.
EZR 6:2 Hikɨ 'Ewatana paratsiyuyata, Meriya kwieyaritsie, xapa kwikwietɨ kaniutaxeiyarieni mɨpaɨ katinaye'ukaitɨni:
EZR 6:3 Mexɨakame wiyari ti'aitatɨ, ti'aitame Tsiru 'ikɨ xapa kaniutawewieni Kakaɨyari tukieya Kerutsareme kiekariyaritsie muwe hepaɨtsita: Tuki tenariyari ke'utsutɨarieni, tawarita ke'utawewiyani muwa mawari taiyariyari mɨtiwewiwanikɨ. Xeitewiyari heimana 'atahuta meturuyari pexeiyani mɨpaɨ heutitewatɨ meta mɨpaɨ 'atayeutɨ,
EZR 6:4 haika xurukuyari pexeiyani tetexi 'amɨnene, meta xeixurukuyari mexa. Naitɨ tita mana reuyewetɨ mɨrayani tinayukatuiyamɨkɨ tumini 'ena paratsiyuta miemekɨ.
EZR 6:5 Meta piinite hurukɨ mɨtiwewiyatɨka meta pɨratakɨ Nawukurunutsuxi mɨrewayetɨ tukita Kerutsareme kiekariyaritsie, Wawiruniya pɨta mɨrepi, tawarita kehetɨkieni Kerutsareme, Kakaɨyari tukieyata kereutapiyani, hakewa matsi memieme.
EZR 6:6 Hikɨ ti'aitame Rariyu kuwexinaruri Tatenahi mɨpaɨ katiniuta'aitɨani 'Eupɨrate 'anutaɨye tau makayuyuipike hepatsie mɨti'aita, metatsiere Tsetaxi-Wutsinahi meta wa'iwama, kuwexinaruri hamatɨa memɨte'uximayakai mɨkɨ kwieyaritsie: Kerutsareme kiekariyaritsie xepɨkahe'uwani
EZR 6:7 Kakaɨyari tukieya mawewiyanetsie xepɨkateheyu'uximatɨaka. Xekeniwarehayewa kuwexinaruri Kura kiekame meta huriyutsixi wa'ukiyarima tuki memetawewienikɨ hutarieka meripaitɨ manuwekaitsie.
EZR 6:8 Metatsiere mɨpaɨ nepaine xemeta xepɨwareparewieni, xeteheyutɨatɨ tita mɨreuyeweka tuki manukuketɨarienikɨ, tuminikɨ mɨkɨ kwieyaritsie xemɨteyukutɨayakɨ 'ena paratsiyuta. 'Exepɨkateheutewini reuyewekaku tukitsie timieme xeketeneyutua, 'uximayatsika mɨkahewakekanikɨ.
EZR 6:9 Metatsiere, xepɨwareyetuiriwani tsikerutsixi, muxatsi 'ukitsi, muxatsi tɨɨrixi, mawari taiyariyari memakɨnekɨ Kakaɨyari taheima makawe hetsiemieme, nixeime tukaritsie mepɨkaheuyeweka, meta tɨriku heutinɨkame, 'una, kaxie winuyari, meta hatseiti, naime tita memɨteheuyehɨaka, mawari wewiwamete kememaitɨkanitsɨ Kerutsareme memetitei.
EZR 6:10 Mɨpaɨ mɨkɨ mepɨyɨwaweni Kakaɨyari taheima makawe mawari memɨwewirieka witsimu'ɨa meta memiwawiriekakɨ ne, ti'aitame, netukari meta neniwema wahetsiemieme.
EZR 6:11 Mɨpaɨta meta nekanaineni, kemɨ'ane 'ikɨ 'aitsika mɨkahaye'atɨani, mɨkɨ kɨyetsie kekaxuiyani, kɨye kiiya hetsie 'anuyehanieme meta kiiya ke'uka'unarieni.
EZR 6:12 Kakaɨyari Kerutsareme kananayexeiya mana memeyexeiyanikɨ, ke'ika'una ti'aitame kemɨ'ane yatɨni hipatɨ teɨteri 'ikɨ 'aitsika 'axamuyurieni yatɨni xɨka Kakaɨyari tukieya kemɨ'ane mɨka'unamɨkɨni. Ne, Rariyu, 'ikɨ 'aitsika nekaniunetɨani. Mɨpaɨ xeketenemaika meta kemɨre'uxa mɨpaɨ keraye'atɨarieka.
EZR 6:13 Merikɨte kuwexinaruri Tatenahi 'Eupɨrate 'anutaɨye mɨti'aitakai tau makayuyuipike hepatsie, meta Tsetaxi-Wutsinahi meta wa'iwama, ti'aitame Rariyu kemɨtiwaru'aitɨa mɨpaɨ metenaye'atɨani kemɨre'ukai.
EZR 6:14 'Ayumieme huriyutsixi wa'ukiyarima memanuyetekai meniyɨwawekaitɨni memiyeweiyani 'uximayatsika meta meminɨnikɨ, kememaitɨkatei Kakaɨyari niukametemama Hakehuxi meta Tsakariyaxi 'Iru nu'aya. Mekaninɨni tuki hutarieka mieme, 'Ixaheri Kakaɨyarieya kemɨtiwaru'aitɨakai meta te'aitamete Peritsiya kiekatari Tsiru, Rariyu yaxeikɨa 'Aritakexiketsi.
EZR 6:15 Rariyu ti'aitametɨkaku 'ataxewirieka wiyaritsie, tuki manukuhanie hutarieka kaniunɨrieni hairieka tukaritsie 'araxi metseriyaritsie.
EZR 6:16 Hikɨ 'ixaheritsixi —tatsɨari yunaitɨ mawari wewiwamete rewitsixi meta hipatɨ memu'axɨakai memehapaniekai—, waɨkawamekɨ meyutemamawietɨ Kakaɨyari tukieya hetsiemieme 'ixɨarari mekaniuwewieni.
EZR 6:17 Kakaɨyari 'ixɨarari mekaniuwewirieni 'imikieri mawariyari, xeitsienituyari tsikerutsixi, huta tsienituyari muxatsi 'ukitsi, muxatsi 'etsimemɨpepe nauka tsienituyari, meta tamamata heimana huta tsipuri, kememɨyupaɨmekai 'Ixaheri nuiwarimama, 'itiya mawariyari memakɨnekɨ yuxexuitɨ 'axamemɨte'uyurikɨ memɨteheuyehɨwiyarienikɨ.
EZR 6:18 Meta, kemɨre'uxa Muitsexi xapateyatsie, mawari wewiwamete mekaniwaru'uitɨani kememɨte'uximayaka meta rewitsixi kememɨteyuriekakekai, kepauka memɨyukuxexeɨriwani memuyutinenewiwanitsie Kakaɨyari hetsiemieme Kerutsareme.
EZR 6:19 Memu'axɨa memehapaniekai Patsikwa 'ixɨarariyari mekaniuwewieni mexɨakame metseritsie tamamata heimana nauka tukariyaritsie.
EZR 6:20 Mawari wewiwamete meta rewitsixi meyɨnɨtɨ 'aixɨa mekaniuyuyurieni, hikɨ me'uyu'itieka, Patsikwa 'ixɨarariyaritsie muxa 'etsimupe mekaniumieni, yunaime wahetsiemieme memu'axɨakai memehapaniekai, meta yu'iwama mawari wewiwamete wahetsiemieme meta yuhetsiemieme.
EZR 6:21 Memu'axɨakai 'ixaheritsixi Patsikwa mekaniukwani meta wahamatɨa mekateniukwani mana kiekatari mɨkɨ tukaritsie memɨte'uhayewakai yuyeiyari me'uweiyatɨ Yawé 'Ixaheri Kakaɨyarieya memayexeiyanikɨ pɨta.
EZR 6:22 'Atahuta tukari waɨkawa meyutemamawietɨ paa mɨkakuxanariyarietɨka 'ixɨarariyari mekaniwewiekaitɨni, Yawé tawarita temawierika muwarupitɨakaikɨ meta ti'aitame Peritsiyatsie mɨti'aita mɨwaruparewiekaikɨ yamɨtiuyurikɨ meta mɨwarupitɨakɨ 'Ixaheri Kakaɨyarieya tukieya hutarieka memanukuhanakɨ.
EZR 7:1 Merikɨtsɨ 'Aritakexiketsi ti'aitametɨkaku Peritsiya kwieyaritsie, mana xewitɨ tewi kaniuyeikakaitɨni 'Etsitɨraxi titewatɨ, Tserahiyaxi nu'aya, 'Atsariyaxi nu'aya, Kirikiyaxi nu'aya,
EZR 7:2 Tsaruni nu'aya, Tsaruki nu'aya, 'Akituwi nu'aya,
EZR 7:3 'Amariyaxi nu'aya, 'Atsariyaxi nu'aya, Merayuti nu'aya,
EZR 7:4 Tserahiyaxi nu'aya, 'Utsihi nu'aya, Wukihi nu'aya,
EZR 7:5 'Awitsuha nu'aya, Pinexi nu'aya, 'Eriyatsaxi nu'aya meta 'Aruni nu'aya mawari wewiwame mexɨakame matɨa.
EZR 7:6 'Ikɨ 'Etsitɨraxi kaninuani Wawiruniya 'aneka. Ti'ukitame kanihɨkɨtɨkaitɨni 'aitsika 'inɨari niukiyari naime makumaikai Yawé 'Ixaheri Kakaɨyarieya Muitsexi mupitɨa. Ti'aitame waɨkawa kaninaki'eriekaitɨni, Yawé Kakaɨyari hamatɨana kaniuyeikakaitɨni.
EZR 7:7 Kerutsareme kiekariyaritsie hipatɨ 'ixaheritsixi 'Etsitɨraxi matɨa mekaniu'axɨani hipatɨ mawari wewiwamete, rewitsixi, kwikamete, kitenie tehɨwemete meta tukita te'uximayatamete menihɨkɨtɨkaitɨni. 'Ikɨ mɨpaɨ katiniɨyɨni 'atahuta wiyari 'Aritakexiketsi ti'aitakaku.
EZR 7:8 'Etsitɨraxi kaninuani Kerutsareme 'auxɨwirieka metseriyaritsie 'atahuta wiyari 'Aritakexiketsi ti'aitakaku.
EZR 7:9 Wawiruniya kanayeyakaitɨni mexɨakame tukaritsie mexɨakame metseritsie, Kerutsareme kaninuani mexɨakame tukaritsie 'auxɨwirieka metseriyaritsie, Kakaɨyari 'aixɨa 'anemekɨ miparewiekaikɨ meta hamatɨana mumiekaikɨ.
EZR 7:10 'Etsitɨraxi yemekɨ Yawé 'aitsikaya kaniuyuti'ɨkitɨakaitɨni, meta mɨpaɨ katiniuyeikakaitɨni meta 'ixaheritsixi niwa'ɨkitɨakaitɨni mɨkɨ 'inɨari niukiyarite.
EZR 7:11 Ti'aitame 'Aritakexiketsi xapa 'Etsitɨraxi kaniyetuirieni, mɨkɨ mawari wewiwame nihɨkɨtɨkaitɨni meta ti'ɨkitame 'inɨari niukiyari hepaɨtsita Yawé 'ixaheritsixi muwayetuiri:
EZR 7:12 'Aritakexiketsi, te'aitamete tiwa'aitɨwame, 'Etsitɨraxi nekametini'utɨirieka, pemɨmawari wewiwame meta pemɨti'ɨkitame Kakaɨyari taheima makawe 'aitsikaya hepaɨtsita: Nekameniwaɨritɨaka.
EZR 7:13 Mɨpaɨ nepaine kemɨ'ane 'ixaheritsixi memeɨkɨnikuni Kerutsareme 'ahamatɨa memɨyehukɨ mepɨyɨwawe, tsepa mawari wewiwamete meta rewitsixi meyunaitɨ.
EZR 7:14 Ne ti'aitame meta 'atahuta netsi'ɨxatsitɨwamete tepɨmatsinɨ'a pemɨnierimiekɨ kememe'ane Kerutsareme meta Kura kwieyaritsie 'inɨari niukiyari kemaine Kakaɨyari 'aitsikaya hetsiena pemɨtiwiya.
EZR 7:15 Huru meta pɨrata kenatɨtɨ ne, ti'aitame, meta netsi'ɨxatsitɨwamete temiyetua ketemɨteyuwaɨriya 'Ixaheri Kakaɨyarieya hetsiemieme, Kerutsareme muyeika.
EZR 7:16 Meta kenatɨtɨ naime purata meta huru Wawiruniya kwieyaritsie pemikaxeiya, yɨnɨkame mana memɨtama teɨteri memɨteyetɨaxɨani meta mawari wewiwamete memɨteyetuaxɨani 'akakaɨyari tukieya hetsiemieme Kerutsareme kiekariyaritsie mewe.
EZR 7:17 Mɨkɨ tuminikɨ ketiniwaretinanai, memɨkateheuyewekakɨ, tsikerutsixi, muxatsi 'ukitsi meta muxatsi tɨɨrixi meta hatsite mawariyari meta kaxie winuyari, mawari taiyametsie xemɨtehetimawanikɨ Kakaɨyari tukieyata Kerutsareme kiekariyaritsie.
EZR 7:18 Mɨreyuhayewa pɨratate meta hurute 'ekɨ meta 'a'iwama tsepa kexemeiyuri kehapaɨ 'aixɨa me'aneni, peru xekakaɨyari kemɨtinake xeikɨa.
EZR 7:19 Perutsɨ xeikɨa tukita piinite petineutapimɨkɨ mɨtipatsietɨka pemɨtiyetuiriyarie, me'ayumiemetetɨnikɨ 'akakaɨyari tukieya hetsiemieme Kerutsareme kiekariyaritsie.
EZR 7:20 Tawarita tixaɨtɨ reuyewetɨ xɨka rayani 'akakaɨyari tukieyatsie timieme, ti'aitame tuminieyakɨ katinayukatuiyamɨkɨ.
EZR 7:21 Meta mɨpaɨ nekanaineni, ne ti'aitame 'Aritakexiketsi, mɨpaɨ nekatina'aitani, yunaitɨ tumini 'ɨwemete 'Eupɨrate 'anutaɨye xemɨtama tau makayuyuipike hepatsie, yapauka xeteneyutuakuni kepaɨmeme meta'iwauni yatɨni tita mɨreta'iwauni 'Etsitɨraxi mawari wewiwame meta ti'ɨkitame Kakaɨyari taheima makawe 'aitsikaya kemaine hepaɨtsita.
EZR 7:22 Xemeiyetuirieni kaniyɨweni tsepa haika miriyari heimana haika tsienituyari kiruyari pɨrata, xeitewiyari heimana huta miriyari rituruyari tɨriku, huta miriyari heimana huta tsienituyari rituruyari kaxie winuyari, huta miriyari heimana huta tsienituyari rituruyari hatseiti, meta naime 'una kepaɨmetɨ meuyeweka.
EZR 7:23 Kakaɨyari taheima makawe naime kemɨtixe'uta'aitɨa yutuki hetsiemieme, yapauka yaxeteneyuri, mɨpaɨ mɨkaha'akakɨ ne, ti'aitame, nemɨra'aitatsie meta neniwema wahepaɨtsita.
EZR 7:24 Meta mɨpaɨ nepɨtixe'aitɨa, xepɨkawarewiyani mawari wewiwamete, rewitsixi, kwikamete, kitenie tehɨwemete meta Kakaɨyari tukieyata te'uximayatamete yunaime.
EZR 7:25 Merikɨte 'ekɨ 'Etsitɨraxi, Kakaɨyari mɨmatsipitɨa pemɨtimaiwenikɨ, 'ahetsie tininakeni te'uximayatamete pemɨwaranayexeiyakɨ meta 'itsɨkate mana kiekatari wahetsiemieme 'Eupɨrate 'anutaɨye tau makayuyuipike hepatsie memɨtama, yunaime Kakaɨyari 'aitsikaya memɨmate wahetsiemieme nekanaineni. Hipatɨta kemɨ'ane memɨka'imate keniwareti'ɨkitɨa.
EZR 7:26 Xɨka xewitɨ 'akakaɨyari 'aitsikaya kahanu'enieni meta ne, ti'aitame, ne'aitsika, yapauka yaketineuta'aita mɨmierienikɨ, yatɨni yukwietsie mayeweiyarienikɨ, yupiinite mɨtinawaiyarienikɨ yatɨni manutahɨiyanikɨ.
EZR 7:27 «Yawé 'aixɨa ke'itɨarieka ta'ukiyarima meripaitɨ memu'uwakai wakakaɨyari, ti'aitame 'iyarieya muyuitɨa witsi'anekame kanayeitɨani tukieya hepaɨtsita Kerutsaremetsie.
EZR 7:28 Hawaikɨ kahau'akamekɨ netsinaki'erietɨ, mɨkɨ pɨnetsi'upitɨa 'aixɨa 'anemekɨ ti'aitame mɨnetsixeiyanikɨ, meta 'i'ɨxatsitɨwamete yaxeikɨa yunaitɨ te'uximayatamete hetsɨana memɨmamariwawe 'aixɨa memɨnetexeiyanikɨ. Yawé nekakaɨyari nehamatɨa muyeikakaikɨ, nepɨtɨrɨkariyarie hikɨ 'ixaheritsixi wa'ukiyarima neniwarukuxeɨrieni Kerutsareme kiekariyaritsie memɨnetsi'anuweiyakɨ».
EZR 8:1 'Ikɨ mekanihɨkɨtɨni 'ixaheritsixi wa'ukiyarima kepauka 'Aritakexiketsi ti'aitakaku nehamatɨa Wawiruniya memɨyekɨ Kerutsareme temu'axɨa, kemaine kememɨte'ununuiwaxɨ waxapayari:
EZR 8:2 Pinexi nuiwarieyatsie mieme: Keritsuni, 'Itamaxi hetsiemieme: Tanieri, Rawiri hetsiemieme: Katuxi,
EZR 8:3 Tsekaniyaxi tɨɨriyamama hetsie mɨmiemetɨkai. Parutsi hetsiemieme: Tsakariyaxi meta xeitsienituyari heimana huta tewiyari heimana tamamata teɨteri hamatɨana memayuka'utɨa.
EZR 8:4 Pakati-Muhawi hetsiemiemete: 'Erihuhenahi mɨkɨ Tserahiyaxi munu'ayatɨkai meta huta tsienituyari teɨteri.
EZR 8:5 Tsekaniyaxi hetsiemieme: Kahatsieri nu'aya meta haika tsienituyari teɨteri hamatɨana memu'axɨa.
EZR 8:6 'Arini hetsiemiemete: 'Eweri mɨkɨ Kunatani munu'ayatɨkai meta huta tewiyari heimana tamamata teɨteri hamatɨana memu'axɨa.
EZR 8:7 'Erami hetsiemieme: Kitsariyaxi 'Atahariyaxi nu'aya, meta teɨteri haika tewiyari heimana tamamata meyupaɨmetɨ hamatɨana memu'axɨa.
EZR 8:8 Tsepatiyaxi hetsiemieme: Tsewariyaxi Mikaheri nu'aya meta nauka tewiyari hamatɨana memu'axɨa.
EZR 8:9 Kuhawi hetsiemieme: 'Awiriyaxi Kehieri nu'aya meta teɨteri huta tsienituyari heimana tamamata heimana 'atahaika hamatɨana memu'axɨa.
EZR 8:10 Tserumiti hetsiemieme: Kutsipiyaxi nu'aya meta teɨteri xeitsienituyari heimana haika tewiyari hamatɨana memu'axɨa.
EZR 8:11 Wewahi hetsiemieme: Tsakariyaxi Wewahi nu'aya meta teɨteri xeitewiyari heimana 'atahaika meyupaɨmetɨ hamatɨana memu'axɨa.
EZR 8:12 'Atsikari hetsiemieme: Kuhanahani Hakatani nu'aya meta xeitsienituyari heimana tamamata teɨteri hamatɨana memu'axɨa.
EZR 8:13 'Arunikani hetsiemiemete: 'Eripereti, Keyeri meta Tsemahiyaxi, 'imatɨrieka miemete 'ikɨ nuiwaritsie, meta wahamatɨa haika tewiyari teɨteri menayuka'utɨani.
EZR 8:14 Wihiwahi hetsiemiemete: 'Utahi, Tsawuri meta teɨteri haika tewiyari heimana tamamata meyupaɨmetɨ wahamatɨa menayuka'utɨani.
EZR 8:15 'Ikɨ 'ixaheritsixi wa'ukiyarima nekaniwarukuxeɨrieni 'aki haa muhane 'aurie 'Ahawa hayaritsie meuyekuke, mana tetitetɨ haika tukari tekaniuyurieni. Hikɨ kepauka yunaime teɨteri nemɨwaruti'inɨataxɨ meta mawari wewiwamete, nixeime Rewi nuiwarieya nepɨka'utaxei.
EZR 8:16 Hikɨ 'ayumieme neniwarukuxeɨrieni 'Eriyetsexi, 'Ariheri, Tsemahiyaxi, 'Erinatani, Kariwi, 'Erinatani, Natani, Tsakariyaxi meta Metsurani, mana memɨtitekai wa'ukiyarima memɨhɨkɨtɨkai meta nekaniwaruta'inieni Kuyariwi meta 'Erinatani mɨkɨ te'ɨkitamete,
EZR 8:17 mɨkɨ 'Irirú hetsɨa nekaniwarenɨ'ani Katsipiya kiekatari wa'ukiyari hetsɨa. Mɨpaɨ nekatiniwaruhɨritɨani, Hiru meta 'iwamama Katsipiyatsie memanuyetei yunaime, memɨwaretawawirienikɨ te'uximayatamete takakaɨyari tukita.
EZR 8:18 Kakaɨyari mɨtatsiparewiekaikɨ, xeime 'ixaheri tewiyari metaneyenɨ'airieni yemekɨ rakumaikame Tserewiyaxi titewakame Makiri nu'aya, Rewi nuiwarieyatsie mieme. Hamatɨana meniu'axɨani niwemama meta 'iwamama, meyunaitɨ tamamata heimana 'atahaika mekaniyupaɨmekaitɨni.
EZR 8:19 Metatsiere mepɨtatsiheyenɨ'airi Katsawiyaxi meta Kitsariyaxi, mɨkɨ Merari nuiwarimama mepɨhɨkɨtɨkai, waniwema mepɨwaraweiyakai meta wa'iwama, yunaitɨ xeitewiyari mepɨyupaɨmekai.
EZR 8:20 Metatsiere, Rawiri meta 'iparewiwamete meyunaitɨ hipame memɨwarutihɨawekai rewitsixi memɨwaparewiekakɨ, mɨkɨ mekataneyenɨ'airieni huta tsienituyari heimana xeitewiyari meyupaɨmeme teparewiwamete, mɨkɨ mekanaka'utɨarieni kememɨtetetewakai.
EZR 8:21 Hikɨ, haa 'Ahawa manuyeka heutahurakakɨ tetitetɨ, neniwaruta'aitɨani temɨtahakienikɨ takakaɨyari hɨxie tixaɨtɨ temɨkatehayuyeitɨanikɨ, meta temitawawirienikɨ huyeta tahamatɨa mɨyemiekɨ, tame, taniwema, yaxeikɨata tapiinite ti'ɨwiyatɨ.
EZR 8:22 Yemekɨ, nepenetitewiyaxɨ ti'aitame hetsɨa xeikuyaxiyari kawayatsixi wahetsie me'utekame newaretawaunike memɨtatsi'aye'unie wahepaɨtsita memɨtatsihe'ɨwiyanikɨ, ti'aitame yatemɨtehahɨawekaikɨri kename Kakaɨyari wa'ɨwiya kemɨ'ane hetsiena yuri memɨte'erie, peru meta kename kemɨ'ane Kakaɨyari memuku'e'eiriwa ha'atɨ 'uximatɨarika wakupitɨwa.
EZR 8:23 Hikɨ 'ayumieme tekaniuyuhakieni meta tekaniyunenewiekaitɨni takakaɨyari tewawirietɨ mɨtatsi'ɨwiyanikɨ, mɨkɨta kataniu'enieni.
EZR 8:24 'Arike nekaniwaranayexeiya tamamata heimana huta mawari wewiwamete wa'ukiyarima memakɨne: Mɨkɨ Tserewiyaxi, Katsawiyaxi meta tamamata wa'iwama.
EZR 8:25 Mɨkɨ wahɨxie huru neniuti'inɨata kemɨreuhapanakai, piinite mɨtipatsietɨka meta memɨteyetua ti'aitame meta 'i'ɨxatsitɨwamete, 'iparewiwamete memɨmamariwawe meta 'ixaheritsixi mana memenenierekai memɨteheyetua piinite Kakaɨyari tukieyatsie timieme.
EZR 8:26 Nemɨtiuti'inɨataxɨ kemɨrahetekai 'ipaɨ katinipaɨmekaitɨni: xeitewiyari heimana xewi miriyari heimana nauka tsienituyari heimana huta tewiyari heimana tamamata kiruyari pɨrata, piinite pɨratakɨ mɨtiwewiyatɨka haika miriyari heimana haika tsienituyari kiruyari pɨrahetekai, meta huru haika miriyari heimana haika tsienituyari kiruyari,
EZR 8:27 xeitewiyari huru watsuyari 'atahaika kiruyari mɨrahetekai, meta hutame wurunitse xariteyari witsi'aneneme, huru hepaɨ witsitiyuxexeiyame.
EZR 8:28 Hikɨ mɨpaɨ nekatiniwarutahɨawe: «Xeme meta piinite Yawé hetsɨa miemete xekanakɨne xepatsietɨ. Pɨrata meta huru 'imikieri kanihɨkɨtɨni Yawé hetsɨa mɨyetuiya kememɨteyuwaɨriya, mɨkɨ Yawé ta'ukiyarima wakakaɨyari hetsiemieme.
EZR 8:29 Xeme xeketene'ɨwiyani meta xeketene'utani kepaukake hutarieka meti'inɨatsieni Yawé tukieyata Kerutsareme paitɨ, mawari wewiwamete mexɨakate wahɨxie, meta rewitsixi metatsiere 'ixaheritsixi wa'ukiyarima wahɨxie».
EZR 8:30 Hikɨ mawari wewiwamete yaxeikɨa rewitsixi metenanupiini pɨrata, huru meta piinite hipame mɨtiuti'inɨatsiekai mɨranɨtɨkienikɨ takakaɨyari tukieyata Kerutsareme paitɨ.
EZR 8:31 Merikɨte tamamata heimana huta tukariyaritsie mexɨakame metseritsie 'Ahawa hayaritsie tekaniyekɨne Kerutsareme tehekɨneka. Ketemɨte'ɨkɨ tahuyeta Kakaɨyari tahamatɨa kaniumiekaitɨni, katane'ɨwiyakaitɨni memɨtatsi'aye'unie meta tenawayamete wahepaɨtsita.
EZR 8:32 Kerutsareme te'uta'axɨaka haika tukari teni'uxipiekaitɨni.
EZR 8:33 Naurieka tukaritsie pɨrata, huru, meta hipame piinite teteniuti'inɨata takakaɨyari tukieyata, hikɨ naime teteniyetuani mawari wewiwame Meremuti hetsɨa 'Uriyaxi nu'aya. 'Eriyatsaxi Pinexi nu'aya mana pɨnierekai hamatɨana pakatei, meta rewitsixi Kutsawari Ketsuha nu'aya, meta Nuhariyaxi Winuhi nu'aya.
EZR 8:34 'Ana tukaritsie naime teteniuti'inɨata kemɨreuhapanakai meta naime teteniuti'inɨata kemɨtipaɨmekai, meta naitɨ kemɨrahetekai kanaka'utsieni.
EZR 8:35 Hikɨ, Yawé hetsiemiemeta, 'ixaheritsixi takakaɨyari, memehapaniekai 'ari memu'axɨakai mawari taiyariyari mekaniuwewieni meta 'itiya mawariyari yunaitɨ keyupaɨmetɨ memu'axɨa, meniwarutimawa tsikerutsixi tamamata heimana huta, nauka tewiyari heimana tamamata 'ataxewi muxatsi 'ukitsi, haika tewiyari heimana tamamata heimana 'atahuta muxatsi 'etsimemɨpepe meta tsipuri tamamata heimana huta.
EZR 8:36 Meta ti'aitame 'aitsikaya meniyetuani hɨritɨariekate mana memuwetɨkatei wahetsɨa meta mana mukuwexinaruritɨkai hetsɨa 'Eupɨrate 'anutaɨye tau makayuyuipike hepatsie, mɨkɨta naimekɨ meniwaruparewieni teɨteri meta Kakaɨyari tukieya hetsiemieme.
EZR 9:1 Merikɨtsɨ 'arike, 'ixaheritsixi wa'ukiyarima 'ahurawa mekanakɨne, mɨpaɨ mekaneteniutahɨawe: «'Ixaheritsixi meta mawari wewiwamete metatsiere rewitsixi, mepɨkayɨwawe memɨkawanɨkakɨ mɨkɨ teɨteri 'ena hurawa kiekatari, matsi pɨta kememɨteyurie wahepaɨ naime 'axameteniyurieka, kananeutsixi wayeiyari meta hetitsixi, peretseutsixi, kewutseutsixi, 'amunitsixi, muhawitsixi, 'ekipitutari meta 'amuxeutsixi.
EZR 9:2 Meta mɨkɨ waniwema 'ukari mekaniwarutiwitɨni yaxeikɨata mana yuniwema mekaniwaneɨkitɨatɨweni, mɨpaɨ Kakaɨyari teɨterimama mekateniwanɨitɨatɨweni 'ena memɨtama teɨteri wahamatɨa. Kemɨ'ane meri memɨte'ukatsutɨa 'axameteyurietɨ mekanihɨkɨtɨni 'ixaheritsixi wa'ukiyarima meta kuwexinaruritsixi».
EZR 9:3 Hikɨ kepauka 'ikɨ nemɨtiu'eni, nekamixa ne'ixuriki nekaneukatsana, nemu'utsie nekɨpate nekaniukahuna meta nemɨxiya, hikɨ waɨkawamekɨ nenutuixietɨ neniutitunumakeni.
EZR 9:4 Hikɨ meta, 'ukirawetsixi memanuyetei 'axamemɨte'uyurikɨ, ne'aurie yunaitɨ mekaniyukuxeɨrieni keyupaɨmetɨ 'Ixaheri Kakaɨyarieya niukieya memɨ'eniekai. Netsietɨ yaxeikɨa neniyuhiweriekaitɨni kepaukake taikai maye'a mawari mawewiwatsie.
EZR 9:5 Kepauka mawari taikai mieme maye'a 'anake nekaniunenɨtɨani, nekamixa meta 'ixuriki meukatsatsani ne'anakatɨtɨ, nekaniukatunumakeni, teikɨ nekanemeni Yawé nekakaɨyari hetsɨa,
EZR 9:6 nenewierikɨ mɨpaɨ nekatinitahɨawe: «Nekakaɨyari, nepuyuxamurie meta nepeunetewiya nemɨmatsi'anutixeiyakɨ, ke'axatemɨte'uyuri mutimɨirixɨkɨ matsi pɨtatsi'anukateukixɨ teyunaime, tahetsie ketemɨte'uhɨpa muyuawitsiepairi kaniye'ani.
EZR 9:7 Kepauka paitɨtɨ ta'ukiyarima 'axamemɨte'uyuri meta hikɨ 'akuxi, ke'axatemɨte'uyuri pɨmariwe. 'Axatemɨte'uyurikɨ, tame, meta tate'aitɨwamete, metatsiere mawari wewiwamete, tekaniyetuiyani hipame te'aitamete ta'aurie memɨtama wahetsɨa. 'Ixiparakɨ tepɨte'ukwinixɨ, 'ateewa tepehapanie, tepɨtenawatsiyarie meta tenanaimarietɨ, hikɨ 'akuxi ketemɨte'anuyehu.
EZR 9:8 »Hikɨ perutsɨ 'ekɨ Yawé, takakaɨyari, 'ekɨ 'aixɨa pepɨtiuka'iyari tahetsiemieme, yayupaɨmeme pemɨwarupitɨakɨ pemɨwaruxɨnaxɨkɨ 'ateɨterima temɨtahayewatɨwe meta pemanuyeika makupatsie memɨ'axɨanikɨ. Pepɨtatsi'upitɨa hekɨariya hekwame temɨxeiyanikɨ meta 'etsiwa nɨtɨarika pepɨtatsi'upitɨa waɨriyarika te'uximayatamete tehɨkɨtɨkaku.
EZR 9:9 Tsepanetɨ waɨriyarika temɨte'uximayatamete, pepɨkatatsi'uku'eiri, takakaɨyari, matsi pɨta kepemɨtiyukanenimaya matsiɨkɨme pepayeitɨa tahetsie Peritsiya kwieyaritsie te'aitamete wahɨxie. Hekwame tukari pekataniupitɨani 'atuki hekwamekɨ temanukuketɨanikɨ, 'aixɨa temiyurienikɨ muka'unarie, meta pepɨtatsi'ɨwiya Kura kwieyaritsie yaxeikɨa Kerutsaremetsie.
EZR 9:10 »Merikɨte hikɨ, mɨya temɨte'uyuri, ¿keri hikɨ temetetahɨawe? 'A'aitsikatsie yatepɨkatekakɨ
EZR 9:11 pemɨtatsiyetuiri 'aniukamete yamete'aka'utɨwakaku, kepauka mɨpaɨ pepɨtarayehɨtɨa: “Kwie xema'iwatsie ka'itiyatɨ kanexuaweni mana teɨteri memɨtama mepɨka'itiya, naitsarie kwieyari kemɨyewa 'axamɨti'ane mekatenihɨniyani.
EZR 9:12 'Ayumieme xeme yuniwema 'ukari meta 'ukitsi, xepɨkawapitɨaka mana memɨtama memɨwarutiwitɨkɨnikɨ. Hatsuaku tɨma mɨkɨ xepɨkawareparewieka kayuwatɨ memu'uwanikɨ meta memɨtehexeiyanikɨ, xeme pɨta xetɨrɨkaɨyetɨ xemuhunikɨ meta mɨkɨ kwieyari 'aixɨa mɨ'anetsie timieme xemɨtetikwanikɨ, hikɨ 'ariketa yuniwema xemɨwaku'eiririenikɨ yuheyemekɨ”.
EZR 9:13 »Ketemɨte'anuyekɨ 'axatemɨte'uyurikɨ 'axatemɨte'u'iyarikɨ, mɨpaɨ tepɨtehetima 'ekɨ, takakaɨyari, 'akuxi 'uximatɨarika pepɨkatatsiyetuiriewe yemekɨ mɨtahetsiemieme, matsi pɨta yateyupaɨmetɨ temɨyuhayewakɨ pekataniupitɨani.
EZR 9:14 ¿Ketiyɨwekuta tawarita 'a'aitsika temɨtitsanani 'ukarawetsixi 'ena memɨtama tewawitɨtɨwetɨ 'axamemɨteyurie? ¿'Aixɨa katiyɨnikeyu tahepaɨtsita xɨka pe'uyeha'ani, xɨka petatsi'ukwini yayupaɨmeme tɨma pekawahayewatɨ, nixeime tɨma mɨyuta'una peka'ipitɨatɨ?
EZR 9:15 Yawé, 'Ixaheri Kakaɨyarieya, heitseriemekɨ yapemɨtikamie pepɨhɨkɨ. 'Ekɨ pepɨtatsi'upitɨa hikɨ tame 'akuxi temɨtahayewanikɨ. Tame 'axatepɨte'uyuri, peru hikɨ 'ahɨxie tekaniti'uka, tsepanetɨ mana temɨti'u heitserie tepɨkahexeiya».
EZR 10:1 Merikɨtsɨ 'Etsitɨraxi kepauka yunenewietɨ 'utatsuatɨ puyutahekɨataxɨ Kakaɨyari tukieya hɨxie titunumawetɨ, teɨteri 'auriena yuwaɨkawatɨ mekaniyukuxeɨrieni 'ukitsi, 'ukarawetsixi, tɨɨri yunaitɨ 'ixaheritsixi. Yunaitɨ mɨkɨ teɨteri mana memɨyukuxeɨri mekaniutitsuanakaitɨni waɨkawamekɨ.
EZR 10:2 Hikɨ xewitɨ 'Erami nuiwarieyatsie mieme, Tsekaniyaxi titewatɨ Kehieri nu'aya, 'Etsitɨraxi hepa 'uyaka mɨpaɨ katinitahɨawe: «Tame takakaɨyari kemaine mɨpaɨ tepɨkateyurie, 'ukarawetsixi huma kiekatari tekaniwarutiwitɨni, peru 'akuxi pɨyɨwe 'aixɨa temɨtayurieni 'ixaheritsixi.
EZR 10:3 Hikɨmɨ tɨratu takakaɨyari hetsɨa tekaniwewikuni, mɨpaɨ tehaitɨkaitɨ kename yunaime mɨkɨ 'ukarawetsixi meta waniwema tewarayeweiyaxɨani, 'ekɨ kepemɨtara'ɨxatsitɨwa, meta yunaitɨ Kakaɨyari niukieya memɨnaki'erie kememaitɨka. Yaketiɨyɨni naitɨ 'inɨari niukiyari kemaine.
EZR 10:4 Kenanukɨkexi, 'ikɨ hepaɨtsita matsi 'ekɨ yapetiniyurimɨkɨ, tame tepɨmatsiparewieka. Hikɨmɨ yaketineuyuri, kenetɨrɨkaɨyeni».
EZR 10:5 Hikɨ 'Etsitɨraxi 'ikɨ tiu'enieka kananukukeni, yakatiniuyurieni mawari wewiwamete wa'ukiyarima, meta rewitsixi, metatsiere 'ixaheritsixi yunaitɨ mekaniyɨhɨritɨani kename 'aku mete'aye'atɨani, kememutiyua hepaɨtsita, hikɨ mɨkɨ yamekateniutanaki'erieni.
EZR 10:6 'Anaketa 'Etsitɨraxi Kakaɨyari tukita kanewayeyani, kaneyani Kuhanahani kiita 'Eriyatsiwi nu'aya hetsɨa. Mana paa kakwatɨ haa kaharetɨ kaniyuhayewa, waɨkawamekɨ munutuixiekaikɨ memu'axɨakai hutarieka 'axamemɨte'uyuriekaikɨ.
EZR 10:7 Hikɨ 'arike Kura kiekatari meteniukaxatɨarieni meta Kerutsareme memɨtama kename meke'uyukuxeɨrienike Kerutsareme yunaitɨ kemɨ'ane mehehapaniekai hutariekata memu'axɨakai.
EZR 10:8 Meta mɨpaɨ mekateniwarayemari'itɨani kename kemɨ'ane haika tukari heutineyu 'ana mɨkanuani, te'aitamete memanuyetei mɨpaɨ mepaitɨkatei, mɨkɨ yupiinite pɨtinawaiyarieni meta 'ixaheritsixi wahetsɨa payeweiyarieni.
EZR 10:9 'Ayumieme haika tukari heutineku, xeitewiyari tukariyaritsie 'atanauka metseritsie, Kerutsareme yunaitɨ teɨteri mekaniyukuxeɨrieni, Kura meta Wenikamini kiekatari. Teɨteri yunaitɨ Kakaɨyari tukieya hɨxie mekanitiyaxe, me'ɨyɨyɨakatɨkaitɨ mɨya mɨtikuxaxatsiwakaikɨ meta muwiyekaikɨ wahetsie waɨkawa.
EZR 10:10 Hikɨ mawari wewiwame 'Etsitɨraxi 'utakeka mɨpaɨ katiniwarutahɨawe: —Xeme 'axaxepɨte'uyuri, mɨpaɨ xeteyurietɨ xepitimɨiriyaxɨ 'axamɨti'ane 'Ixaheri hetsie mɨrahɨiwanikɨ, hipame 'ukarawetsixi xekaniwarutiwitɨni hipame kakaɨyarixi memɨwarayexeiya.
EZR 10:11 Hikɨ, 'ayumieme, xekeneyutahekɨata ke'axaxemɨte'uyuri Yawé ta'ukiyarima wakakaɨyari hetsɨa, hikɨ 'ana tita mɨtinake pɨta yaxeketeneyurieka. Teɨteri Kakaɨyari memɨka'ayexeiya xekeniwaruku'eiri meta mɨkɨ 'ukarawetsixi memɨkatateɨterima.
EZR 10:12 Yunaitɨ mana memɨyuxeɨriekai karima mɨpaɨ mekaniutiyuani: —Naime kepemɨtarahɨawe yatekateniyurikuni.
EZR 10:13 Perɨtsɨ xeikɨa tepɨkayɨwawe 'ena kwiepa temɨtiteni, witarita tekaniyɨaka, 'ikɨ matsi xeitukari ya huta tukari pɨkamieme, tekanimɨireni 'ikɨ 'axamɨ'ane temeɨtiwiwiexɨa.
EZR 10:14 Mɨpaɨ tepaitɨka tame 'aixɨa katiyɨni te'aitamete memanuyetei xeikɨa memɨyuhayewa, yunaitɨ kemɨ'ane takiekaritsie memɨtitetɨka 'ukarawetsixi hipame memɨwarutiwitɨ mɨkɨ tukari ke'utipiyani kepauka memayenexɨani, 'itsɨkate mɨkɨ kiekaritsie miemete wahamatɨa me'aye'utɨ, kepaukake takakaɨyari mɨkahaxɨapieni 'axatemɨte'uyurikɨ.
EZR 10:15 Kunatani 'Atsaheri nu'aya meta Kahatsiyaxi Tikiwa nu'aya, mɨkɨ xeikɨa yamepɨkateha'eriwakai, rewitsixi mewaparewiekaku Metsurani meta Tsawetahi.
EZR 10:16 Memu'axɨakai memehapaniekai meripaitɨ yameteniuyurieni kehepaɨ memɨte'uxatakai. Hikɨ mawari wewiwame 'Etsitɨraxi kaniwaranayexeiya hipame meta kememɨtetetewakai kaniwarutiterɨwa hipame 'ukirawetsixi, muyukatsutɨatsie mexɨakame tukaritsie tamamata metseritsie mana kaniwarukuxeɨrieni para 'aixɨa mɨtiyurienikɨ mɨkɨ hepaɨtsita.
EZR 10:17 Mexɨakame tukaritsie mexɨakame metseritsie mekateniutahayewa 'aixɨa meteyurietɨ mɨkɨ yunaime wahetsiemieme 'ukarawetsixi hipame memɨwarutiwitɨxɨa wahepaɨtsita.
EZR 10:18 Mawari wewiwamete wanuiwarima hipame 'ukarawetsixi memɨwarutiwitɨkai 'ikɨ mekanihɨkɨtɨni: Ketsuha Kutsaraki nu'aya, meta wa'iwama: Matsehiyaxi, 'Eriyetsexi, Kariwi meta Kerariyaxi,
EZR 10:19 mɨkɨ yameniutiyuani yu'ɨitama memɨwaku'eiriexɨanikɨ, meta xeime muxa 'ukitɨme mekaniutimawa 'axamemɨte'uyurikɨ 'itiya mawariyari mayanikɨ.
EZR 10:20 'Imexi nuiwarimama: Kananihi meta Tsewariyaxi.
EZR 10:21 Karini nuiwarimama: Matsehiyaxi, 'Eriyaxi, Tsemahiyaxi, Kehieri meta 'Utsiyaxi.
EZR 10:22 Patsuxi nuiwarimama: 'Erihuhenahi, Matsehiyaxi, 'Itsimaheri, Natanaheri, Kutsawari meta 'Eratsa.
EZR 10:23 Rewitsixi kemɨ'ane memɨyɨakai: Kutsawari, Tsimi, Kerahiyaxi Kerita tɨtɨ mɨtitewakai, Petahiyaxi, Kura, meta 'Eriyetsexi.
EZR 10:24 Kwikamete kemɨ'ane memɨyɨakai: 'Eriyatsiwi. Kitenie tehɨwemete kemɨ'ane memɨyɨakai: Tsaruni, Tereni meta 'Urihi.
EZR 10:25 Hipatɨta meta 'ixaheritsixi kemɨ'ane memɨyɨakai: Parutsi nuiwarimama: Xamiyaxi, Ketsiyaxi, Marikiyaxi, Mikamini, 'Eriyatsaxi, Marikiyaxi meta Wenahiyaxi.
EZR 10:26 'Erami nuiwarimama: Mataniyaxi, Tsakariyaxi, Kehieri, 'Awɨri, Keremuti meta 'Eriyaxi.
EZR 10:27 Tsatuhu nuiwarimama: 'Erihuhenahi, 'Eriyatsiwi, Mataniyaxi, Keremuti, Tsawari meta 'Atsitsa.
EZR 10:28 Wewahi nuiwarimama: Kuhanahani, Kananiyaxi, Tsawahi meta 'Atɨrahi.
EZR 10:29 Wanihi nuiwarimama: Metsurani, Maruki, 'Arahiyaxi, Yatsuwi, Tsehari meta Xamuti.
EZR 10:30 Pakati-Muhawi nuiwarimama: 'Arɨna, Kerari, Wenahiyaxi, Matsehiyaxi, Mataniyaxi, Wetsareri, Winuhi meta Manatsexi.
EZR 10:31 Karini nuiwarimama: 'Eriyetsexi, 'Itsiyaxi, Marikiyaxi, Tsemahiyaxi, Tsimehuni,
EZR 10:32 Wenikamini, Maruki meta Tsemariyaxi.
EZR 10:33 Katsuni nuiwarimama: Matenahi, Matata, Tsawari, 'Eripereti, Keremahi, Manatsexi meta Tsimi.
EZR 10:34 Wanihi nuiwarimama: Marahi, 'Amirani, 'Uheri,
EZR 10:35 Wenahiyaxi, Weriyaxi, Keruhi,
EZR 10:36 Waniyaxi, Meremuti, 'Eriyatsiwi,
EZR 10:37 Mataniyaxi, Matenahi, Katsahi.
EZR 10:38 Winuhi nuiwarimama: Tsimi,
EZR 10:39 Tseremiyaxi, Natani, 'Arahiyaxi,
EZR 10:40 Manarewahi, Tsatsahi, Tsarahi,
EZR 10:41 'Atsareri, Tseremiyaxi, Tsemariyaxi,
EZR 10:42 Tsaruni, 'Amariyaxi meta Kutse.
EZR 10:43 Newu nuiwarimama: Keyeri, Matatiyaxi, Tsawari, Tsewina, Karahu, Kuheri meta Wenahiyaxi.
EZR 10:44 'Ikɨ yunaitɨ hipame 'ukarawetsixi memɨkawateɨterimatɨkai mekaniwarutiwitɨkaitɨni, hipatɨ 'ari tɨɨri mekaniwarayexeiyaxɨakaitɨni wahetsie.
NEH 1:1 'Ikɨ kanihɨkɨtɨni Nehemiyaxi kemɨraka'utɨa Hakariyaxi nu'aya: Hikɨ kitsireu metseriyaritsie xeitewiyari wiyari 'anuyemiekaku, ne Tsutsa kiekariyaritsie ne'ukaiku,
NEH 1:2 ne'iwa Kananihi mɨtitewa kaninuani hipame teɨteri Kura kiekatari warawitɨtɨ. Hikɨ nekaniwaruta'iwawiya kememɨte'aka'iyuniwakai huriyutsixi Wawiruniya memɨkaheyehapanie, meta Kerutsareme kemɨraku'anekai.
NEH 1:3 Mɨkɨ mɨpaɨ mekaneteniuta'eiya: «Huriyutsixi Wawiruniya memɨkaheyehapanie waɨkawamekɨ mepɨteheka'eniwa meta mepeyutetewiya. Kerutsareme kuraruyari 'akuxi pe'uni naitɨ, 'itupariyarite kanetaiyarietɨkani».
NEH 1:4 Mɨpaɨ netiu'enaka, ne'utatsuatɨ nekanayani, mɨixa tukari neninehiweriekaitɨni, nekaniunehakieni, meta neyunenewietɨ Kakaɨyari muyuawitsie makawe newawirietɨ.
NEH 1:5 Mɨpaɨ nekatinitahɨawe: «Yawé, Kakaɨyari muyuawitsie pemakawe, pemɨmariwe pemayemakaxiwa, 'atɨratu pemaye'atɨwa, 'aixɨa pemɨtiuka'iyari memɨmatsinaki'erie wahetsie meta yamemɨtekahu kepemɨti'aita wahetsiemieme,
NEH 1:6 nepɨmatsiwawirie waɨkawa keneneu'eni, kwi keneuxeiya ti'a'uximayatsiriwame 'ahetsɨa mieme, tukarikɨ tɨkarikɨ muyunenewie 'ixaheritsixi 'ateɨterima wahetsiemieme. Nepɨtihekɨata 'ixaheritsixi meta ne netɨɨriyama wahetsiemieme, 'axatemɨte'uyurikɨ 'ahepaɨtsita.
NEH 1:7 Kemɨkametinake tepɨte'uyuri meta yemekɨ 'axateputayuri, yatepɨkatekakɨ 'aitsika hepaɨtsita pemɨtatsiyetuiri mati'uximayatsiriwame Muitsexi ya'utainekaku.
NEH 1:8 »Kenaye'eri, waɨkawa nepɨmatsiwawirie, Muitsexi kepemɨtiutahɨawixɨ: “Xɨka 'axaxete'uyurieni ne nepɨxetaxɨriexɨani hipame nuiwarite watsata,
NEH 1:9 matsi xɨka nehetsɨa xe'u'axɨani, yaxetekahutɨ yaxete'u'uwatɨ kenemɨti'aita tsepa hakewa xemehapanie kwiepa, mana nekanixehayewitɨmɨkɨ hakewa kwie nemanayexeitsie ne hakewa nemekanitsie nekanixe'atɨamɨkɨ”.
NEH 1:10 »Mɨkɨ mepɨ'ateɨterima te'a'uximayatsiriwamete pemɨwarutixɨnaxɨ peti'atuaka waɨkawa mariweme petiyurienetɨ kepemɨtitɨrɨkaɨye.
NEH 1:11 Yawé, nepɨmatsiwawirie keneu'eni tanenewieri, tepɨte'a'uximayatsiriwamete, pɨtatsinake temetsihayexeiyanikɨ. Yaxeikɨata nepɨmatsiwawirie 'ikɨ ti'uximayatame 'ahetsɨa mieme 'aixɨa keneuyuri ti'aitame 'aixɨa mɨtixeiyakɨ». 'Ana ti'aitame tekɨxieya hanitɨwameya nepɨhɨkɨtɨkai.
NEH 2:1 Nitsani metseriyaritsie 'ari xeitewiyari wiyari 'Aritakexiketsi ti'aitakaku, ti'aitame winu ne'uhanitɨaku, mɨkɨ meripaitɨ nenutuixiekame mɨkanetsixexeiyakaikɨ,
NEH 2:2 mɨpaɨ kanetiniuta'iwawiya: ―¿Titayarikuta petinutuixie? Wa'atɨ matsi pepɨkatikuye, xɨari tixaɨtɨ pɨta kukwiniya pɨmatiyuriene. Ne waɨkawa nepekamatɨya
NEH 2:3 mɨpaɨ nekatinita'eiya: ―Ti'aitame waɨkawa tukari pekepitɨarieka. ¿Titayarikuta nekatinutuixieka, panatsi kiekaritsie ne'ukiyarima memakateukie naitɨ kaheka'unarie meta 'ituparite naitɨ kahetata'i?
NEH 2:4 Ti'aitame mɨpaɨ kanetiniuta'iwawiya: ―¿Kekuta netiyurieni 'ahetsiemieme? Ne nepitawawiri Kakaɨyari muyuawitsie makawe mɨnetsiparewienikɨ,
NEH 2:5 mɨpaɨ nekatinita'eiya: ―Ti'aitame xɨka metsinakeni, xɨka waɨkawa nematsiparewieka, nematsiwawirie Kura kwieyaritsie pemɨnetsi'anunɨ'anikɨ para kiekari nemanukuketɨanikɨ ne'ukiyarima mematihetsie.
NEH 2:6 Ti'aitame mɨpaɨ kanetiniuta'iwawiya, 'uka mɨti'aitame 'auriena 'utikaiku: ―¿Kekuta pereuyetere? ¿Kepauka kuta pepakunuani? Kepauka yanemɨtitaxatɨa ti'aitame yakatiniutanaki'erieni nemɨyemiekɨ.
NEH 2:7 Tawarita mɨpaɨ netinitahɨawe: ―Ti'aitame 'ahepaɨtsita xɨka 'aixɨa 'aneni, xapa keniwaranunɨ'airi kuwexinaruritsixi tau makayuyuipike hepatsie memɨtama wahetsɨa haa 'Eupɨrate manuyekatsie, para heitserie nemuyanikɨ Kura kwieyaritsie nemeta'anikɨ,
NEH 2:8 ximɨxi nematsiwawirie huku mɨ'ɨwiya 'Atsahapi mɨpaɨ pemɨtitahɨawekɨ huku kɨyeyari mɨnetsiminikɨ, tukita 'itupari nemeuwɨtɨaxɨanikɨ, meta kiekari kuraruyari hetsiemieme meta kiita hakewa nemayekani hetsiemieme. Ti'aitame yakatiniutanaki'erieni kenemɨrewawiriwakai, Kakaɨyari mɨnetsiparewiekaikɨ.
NEH 2:9 Kepauka nemeta'a kuwexinaruritsixi tau makayuyuipike hepatsie 'Eupɨrate 'anutaɨye kiekatari wahetsɨa, xapa neniwarehuritɨani ti'aitame hetsɨa mieme. Metatsiere ti'aitame mɨpaɨ tiniuta'aitakaitɨni kename kuyaximama kawayutsixi wahetsie memutei meta memɨtewa'aitɨa menetsi'anuteɨtakekai.
NEH 2:10 Peru Tsamɨwarati huruni tewiyari meta Tuwiyaxi 'amuni tewiyari ti'uximayatame, pɨkawarunakixɨ mɨpaɨ mete'u'enanaka kename xewitɨ nuakai 'ixaheritsixi wahetsie tanuanike.
NEH 2:11 Merikɨte haika tukari 'anukamiekaku Kerutsareme nenuaka,
NEH 2:12 tɨkarikɨ nekaniwayeyani hipame teɨteri newarawitɨtɨ, peru xeimetɨma 'atsinepɨkarahɨawekai Kakaɨyari kemɨnetiku'iyaritɨwakai Kerutsareme hetsie kenemɨtiyurienikekai. Xeime xeikɨa mura tepahanakai tatsɨari ne nemanakatei.
NEH 2:13 Mɨkɨ tɨkaritsie nepuwayetɨa Mayeweri kitenieyaritsie nekaneuyehani, haixa Yawi Mayu'eriya mɨtitewa matiniere hepatsie meta Xatsi kitenieyari manuwietsie hepatsie. Kerutsareme kuraruyari nekaniuxeiya mu'uni meta 'itupariyarite naitɨ mɨxɨxɨwi.
NEH 2:14 Nekaneyanita Haixata kitenieyari hepatsie meta haa mayema Ti'aitame hetsiemieme, peru huye nepɨka'ukaxei ne'anakaitɨ muwa nemeutahanikekai.
NEH 2:15 Hikɨ 'uyɨwikaku 'akuxi 'aki'utɨma nekaneutayune kuraru ne'uxeiyarɨmetɨ. 'Imatɨrieka nekanakunuani Mayeweri kitenieyaritsie nekaneutahani.
NEH 2:16 Kuwexinaruritsixi 'atsimepɨkatehetima hakewa nemanutɨa meta kenemɨrekuyuri, 'ana 'akuxi nixeime huriyu tewiyari mɨpaɨ nepɨkatitahɨawiwekai: mawari wewiwame tɨma, 'ukirawetsixi meta, nitɨma kuwexinaruritsixi meta kemɨ'ane memɨteta'uximayatakekai.
NEH 2:17 'Ayumieme mɨpaɨ nepɨtiwarutahɨawixɨ: ―Xeme xemunenierixɨ xepɨhɨkɨ ketemu'itɨarie. Kerutsareme pu'uni, 'itupariyari pɨxɨxɨwi taikɨ. Hikɨmɨtɨka, xekeneuyuwaɨriya. Kerutsareme kuraruyari 'aixɨa tepuyurieni para hipatɨri tawarita memɨkatatsinanaimakakɨ.
NEH 2:18 Hikɨ nekatiniwarutaxatɨani Kakaɨyari kemɨnetiparewiekai, yanekaniutayɨni ti'aitame kemainekai. Mɨyamete'u'enanaka mɨpaɨ mekaniutiyuani: ―Hikɨmɨtɨka tekatenita'uximayatakuni. Kememutiyua yamekateniuyurieni.
NEH 2:19 Kepauka yamemɨtehetima Tsamɨwarati huruni tewiyari, Tuwiyaxi 'amuni tewiyari ti'aitame parewiwameya meta Ketseni 'arawe tewiyari waɨkawa mekataninanaimakaitɨni metatsixani'erietɨ mɨpaɨ metateniku'iwawiyakaitɨni: ―Neuxei, ¿kexeteyurie? ¿Kamɨtsɨ ti'aitame kemɨkatinake xeteyurie?
NEH 2:20 Ne mɨpaɨ netiniwaruta'eiya: ―Kakaɨyari muyuawitsie makawe kataniparewimɨkɨ. Tame te'i'uximayatsiriwamete, tepikatsutɨani kiekari 'aixɨa temukuyurienikɨ. Xeme 'ena xepɨka'itsɨkate, xepɨkayɨwawe 'ena xemuyeniukanikɨ, Kerutsaremetsie kemɨtiɨyɨ xepɨkate'akumate.
NEH 3:1 Hikɨ 'Eriyatsiwi mawari wewiwamete tiwa'aitɨwame meta 'iwamama mawari wewiwamete yunaitɨ meteniuta'uximayata kitenie 'aixɨa mekaniuyurieni Muxatsi Memanutahake mɨtitewa. 'Aixɨa mekaniyurieni kemɨrekuwewiyakai, 'itupariyari mekaneuwɨtɨaxɨani, yaxeikɨata kuraru 'aixɨa mekaniuyurieni Xeitsienituyari Tuxiyuyari mɨtitewa manuwe me'itsutɨaka Tuxiyu Kananeri mɨtitewa manuwe ye'akame.
NEH 3:2 Manata memitsutɨa teɨteri Keriku kiekatari 'aixɨa mekaniyurieni, Tsakuxi 'Imɨrí nu'aya manata kaniyetsutɨani.
NEH 3:3 Tsapari wakitenieyari mɨtitewa 'aixɨa mekaniyurieni Tsena nuiwarimama. Kɨyexi mekananuyetuani meta 'itupari mekaneuwieni kitenie, reunarɨmikeme kɨyexi heuku'uweme.
NEH 3:4 Manata mitsutɨa kuraru 'aixɨa muyuri Meremuti katiniuyurieni, 'Uriyaxi nu'aya Kuhutsi teukarieya, manata menumɨa Metsurani katiniuyurieni, Werekiyaxi nu'aya Metsetsaweri teukarieya. Manata menumɨa Tsaruki katiniuyurieni Wanaha nu'aya.
NEH 3:5 Tekuha kiekatarita 'aixɨa mekaniyurieni kuraru mɨyuhayewanekai, tsepa wa'ukiyarima memɨkawaruparewi memɨte'aitakai.
NEH 3:6 Kitenie Ketsana mɨtitewa 'aixɨa mekaniyurieni Kuyara Patsehaki nu'aya meta Metsurani Wetsuriyaxi nu'aya matɨa. Kɨyexi mekananuyetuani meta 'itupari mekaneuwieni kitenie, reunarɨmikeme meta kɨyexi heuku'uweme.
NEH 3:7 Manata kuraru 'aixɨa memuyuri Meratiyaxi kawahunitanaka, Karuni merunutitanaka mekateniuyurieni. Mɨkɨ mekaniwarutinɨni Kawahuni kiekatari meta Mitsipa kiekatari, kuwexinaruri mɨtiwa'aitɨa mepɨhɨkɨtɨkai tau makayuyuipike hepatsie haa 'Eupɨrate 'anutaɨye kiekame.
NEH 3:8 'Utsiheri pɨratakɨ ti'uximayatame Karahiyaxi nu'aya mana kanenumɨani kuraru 'aixɨa kuyuruwatɨ, manata xewitɨ witsimɨtiu'ɨatɨka wewiwame nenumɨani Kananiyaxi titewatɨ. Mɨkɨ meyuhutatɨ 'aixɨa mekaniyurieni Kerutsareme kuraruyari naime kuraru 'Amatayewa manuyeka ye'akame.
NEH 3:9 Manata kanenumɨani 'aixɨa 'ikuyuruwatɨ Xepahiyaxi Kuxi nu'aya, mɨkɨ pukuwexinaruritɨkai mana hixɨapa 'akame Kerutsareme hetsiemieme,
NEH 3:10 manata kanenumɨani Kerahiyaxi Karumaha nu'aya, kiiya hɨxie mɨyekatei, manata kanenumɨani Katuxi Katsawiniyaxi nu'aya.
NEH 3:11 Manata Marikiyaxi Karini nu'aya meta Katsuwi Pakati-Muhawi nu'aya 'aixɨa mekaniyurieni kuraru meta tuxiyu Huxunu mɨtitewa.
NEH 3:12 Manata Tsaruni Haruketsi nu'aya, mukuwexinaruritɨkai hixɨapa 'akame Kerutsareme hetsie, kuraru 'aixɨa kaniuyurieni niwemama 'ukari me'iparewiekaku.
NEH 3:13 Mayeweri kitenieyari 'aixɨa kaniuyurieni Kanuni meta Tsanuha kiekatari, 'itupari mekaneuwieni kitenie, reunarɨmikeme meta kɨyexi heuku'uweme. Metatsiere kuraru 'aixɨa mekaniuyurieni 'auxɨwi tsienituyari meturuyari tewime 'atsita Xatsi kitenieyari paitɨ 'u'akame.
NEH 3:14 Marikiyaxi Xekawi nu'aya, Weti-Hakereni kwieyaritsie mukuwexinaruritɨkai, 'aixɨa kaniyurieni Xatsi kitenieyari, 'itupari kaneuwieni kitenie, reunarɨmikeme meta kɨyexi heuku'uweme.
NEH 3:15 Tsaruni Kurikutse nu'aya, kuwexinaruri Mitsipa hetsiemieme, 'aixɨa kaniyurieni Haixata kitenieyari, kanenukitɨani, 'itupari kaneuwieni kitenie 'aixɨa reunarɨmikeme meta kɨyexi heuku'uweme. Metatsiere kuraru 'aixɨa kaniuyurieni haa mayema Tsiruhe kuraruyari, ti'aitame harawerieya 'aurie muyehane, 'atsita huye tete 'imɨmɨiyari 'amatayewa manutihane Rawiri kiekariena meutiyune.
NEH 3:16 Nehemiyaxi 'Atsiwuki nu'aya, Wetsuxi kiekariyaritsie hixɨapa 'akametsie mɨkuwexinaruritɨkai, kuraru 'aixɨa kaniuyurieni Rawiri wateukiyapa wahɨxie muyehane, meta 'atsita haa mayema meta kuyaxi waki manuwe muyehane paitɨ.
NEH 3:17 Manata 'aixɨa mekaniyurieni rewitsixi meta Xekuni Wanihi nu'aya. Manata Katsawiyaxi 'aixɨa kaniyurieni Kehira kiekariyari hixɨata 'akametsie mɨkuwexinaruritɨkai, katiniuta'uximayata kuraru 'aixɨa yurienetɨ yukiekari hetsiemieme.
NEH 3:18 Manata mekanitsutɨani 'iwamama: Wawahi Henarari nu'aya, Kehira kiekariyari hixɨapa 'akametsie kuwexinaruri mɨhɨkɨ,
NEH 3:19 meta 'Etsexi Ketsuha nu'aya, mukuwexinaruri Mitsipa kiekariyaritsie, kuraru 'aixɨa kaniuyurieni 'itsikina kii kuyaxa timieme mɨtiuyepine manuwetsie mutihane.
NEH 3:20 Manata mikatsutɨa mutatsikuritsie 'atsita mawari wewiwamete tiwa'aitɨwame 'Eriyatsiwi kitenienatsie 'u'akame, 'aixɨa kaniyurieni Waruki Tsawahi nu'aya waɨkawa yuwaɨriyatɨ.
NEH 3:21 Manata mikatsutɨa 'Eriyatsiwi kitenietsie 'atsita naime kiiya manu'axe, 'aixɨa kaniyurieni Meremuti 'Uriyaxi nu'aya Kuhutsi teukarieya.
NEH 3:22 Manata memenɨmɨa mawari wewiwamete mekateniuyurieni kiekari 'aurie mematetɨkatei.
NEH 3:23 Wenikamini Katsuwi matɨa 'aixɨa mekaniyurieni kuraru wakite hɨxie muyehanekai. 'Atsariyaxi, Matsehiyaxi nu'aya 'Ananiyaxi teukarieya, 'aixɨa kaniyurieni kuraru kiiya hɨxie muyeka.
NEH 3:24 Winuhi Henarari nu'aya 'aixɨa kaniyurieni kuraru 'Atsariyaxi kiiya manuwe 'itsutɨaka 'atsita tsikuritanatsie, tatsɨari mutitunitsie.
NEH 3:25 Parari 'Utsahi nu'aya 'aixɨa kaniyurieni kuraru 'itsutɨaka mutitunitsie, tuxiyu 'amutewi manuwe hɨxie mɨti'ane paratsiyu manuwe, kuyaxi watakwa 'aurie. Manata kanenumɨani Perahiyaxi, Parutsi nu'aya.
NEH 3:26 Tuki manuwe te'uximayatamete 'Uperi kiekatari, kuraru 'aixɨa mekaniuyurieni tau manatineika Haa kitenieyari hɨxie muyeka meta tuxiyu 'amutewi mana muwe 'aixɨa mekaniuyurieni.
NEH 3:27 Tekuha kiekatari kuraru 'aixɨa mekaniuyurieni tuxiyu 'amutewi manuwe hɨxie me'itsutɨaka 'atsita 'Uperi kuraruyari manuyekatsie paitɨ.
NEH 3:28 Mawari wewiwamete yuxexuitɨ kuraru 'aixɨa mekaniuyuriexɨani yukii hɨxie muyekatsie Kawayutsixi wakitenietsie me'itsutɨaka.
NEH 3:29 Manata kanenumɨani 'aixɨa 'iyurietɨ Tsaruki 'Imexi nu'aya, kiiya hɨxie muyekateikɨ. Manata 'aixɨa kaniyurieni Tsemahiyaxi Tsekaniyaxi nu'aya, tihɨweme mɨhɨkɨtɨkai kitenie Tau Manatineika mɨtitewatsie.
NEH 3:30 Manata Kananiyaxi Tseremiyaxi nu'aya, meta Kanuni 'ataxewirieka mieme Tsarape nu'aya, mɨkɨta kuraru yatewime 'aixɨa mekaniuyurieni. Metsurani Werekiyaxi nu'aya manata kanenumɨani 'aixɨa kaniyurieni, kiiya hɨxie muyekatei.
NEH 3:31 Marikiyaxi pɨratakɨ ti'uximayatame, kuraru 'aixɨa kaniuyurieni tukita te'uximayatamete wakie mɨye'axe meta tetuayamete wakie mɨye'axe, Memati'iwawiyarɨwa kitenieyari hɨxie meta 'atsita kuyaxi tehɨwemete mematiteitsie paitɨ.
NEH 3:32 Manata 'atsita Muxatsi wakitenie 'u'akame 'aixɨa mekaniyurieni pɨratakɨ te'uximayatamete meta tetuayamete.
NEH 4:1 Kepauka Tsamɨwarati yamɨretima kename kuraru 'amatayewa tehekwatɨatɨwekai, mɨkɨ pɨka'inakixɨ waɨkawamekɨ, hikɨ huriyutsixi kaniwananaimakaitɨni yuniukikɨ.
NEH 4:2 Yu'iwama meta kuyaxi Tsamariya kiekatari wahɨxie mɨpaɨ kaniutayɨni: ―¿Kemeteyurie kuta 'ikɨ huriyutsixi haweri memɨ'anene? ¿Mɨpaɨ meteyumatekuta kename mepitɨarieni 'aixɨa memiyurienikɨ, tawarita memitsutɨanikɨ metemawatɨwetɨ? ¿Xeitukari kuta me'inɨnike meteyu'erie? ¿Mɨkɨ kuta tetexi mɨtata'ikɨ meta kii 'unimeyarikɨ tihekwame metetawewienike meteyu'erie?
NEH 4:3 Tuwiyaxi 'amuni tewiyari, hamatɨana muyeikakai mɨpaɨta mɨkɨ kaniutayɨni: ―Mɨkɨ kurarutsie xɨka kauxai 'anutiyani naitɨ kanika'unimɨkɨ.
NEH 4:4 'Ayumieme mɨpaɨ tepɨte'uyunenewi: «Takakaɨyari pemɨhɨkɨ, keniwaru'eni, kememɨtatenanaima yuniukikɨ. Yaketineuyuri 'axa'anemekɨ kememutiyuane wahetsie pɨta mɨtinakekɨ: memɨwaraye'unie wahetsɨa keniwayetua, memanutaxɨriyanikɨ xeime kwieyaritsie.
NEH 4:5 Ke'axamemutiyua pepɨkatiwareuyehɨwirieka, 'axakememɨte'uyuri pepɨkaratɨtɨmaiyani, 'axamemɨtewakɨhɨawekɨ kemɨ'ane kuraru 'aixɨa memuyurie».
NEH 4:6 Merikɨte teniyeweiyakaitɨni tete'uximayatɨ, hikɨ kuraru tehekwariyatɨ hixɨapa teniuti'axɨani kemeutitewakai teɨteri meyuwaɨriyatɨ memɨte'uta'uximayataxɨkɨ.
NEH 4:7 Peru kepauka Tsamɨwarati meta Tuwiyaxi, metatsiere 'arawetsixi, 'amunitsixi meta 'Atsiruri kiekatari yamemɨtehetima kenameri 'ari manaye'u'unikaitsie ranunarixɨaximekai, 'ana waɨkawa mekaniuyeha'ani,
NEH 4:8 hikɨ mekateniutixata Kerutsareme memɨtamienikɨ waɨkawa memɨwa'uximatɨanikɨ.
NEH 4:9 Hikɨ 'ayumieme teniyunenewiekaitɨni takakaɨyari tewawirietɨ, meta teniwaru'uitɨani yɨwikɨta meta hekɨta tehɨwemete mɨpaɨ temɨteyutahɨkakɨ.
NEH 4:10 Hikɨ teɨteri Kura kwieyaritsie kiekatari mɨpaɨ mekaniutiyuanekaitɨni: «Tetexi tɨkɨmete mepu'u'uxeri, kaniwaɨkawanitsɨ muka'unixɨ, tepɨkayɨwekaxɨani 'aixɨa temiyurienikɨ 'ikɨ kuraru 'amatayewa».
NEH 4:11 Memɨtatsi'aye'unieta mɨpaɨ mekaniutiyuanekaitɨni: «'Atsimekatemaikaku wahetsɨa tepɨye'axɨani temɨwakwinikɨ, mɨpaɨ teteyurieyu 'ana 'uximayatsika pɨhayewarieni».
NEH 4:12 Hipatɨ huriyutsixi mɨkɨ wa'aurie memeutitekai yamekateniuta'axekaitɨni mɨpaɨ me'utiyuatɨ: «Mepɨxetakwini tsepa hakewa memakanexɨa».
NEH 4:13 Hikɨ 'ana teɨteri nekaniwaru'uitɨani 'axeikɨa 'iwamarixi, 'ixipara me'u'ɨkame, tupi meta 'ɨrɨ 'amɨtɨtɨ, kuraru warita hakewa manayeyeyɨkɨtɨkateitsie.
NEH 4:14 Hikɨ mɨkɨ 'aixɨa netiuyuriekari, mɨpaɨ nekatiniwarutahɨawe 'ukirawetsixi meta kuwexinaruritsixi, metatsiere teɨteri yunaime: «Xepɨkawamakaxeni. Ti'aitame xekena'eriwani, mɨmariwe mɨmakaxiwa, xekeneuyutakuya yu'iwama wahetsie xenuatɨ, yuniwema wahetsie, yu'ɨitama meta yukii hetsie xenuatɨ».
NEH 4:15 Kepauka memɨtatsi'aye'unie memɨtehetima kename yatetemaikai kememɨteku'eriwakai meta kename Kakaɨyari mɨpaɨ memɨteyurienikɨ kawarupitɨa, tekaniu'axɨani temakurarutatɨwe taxexuitɨ ta'uximayatsikatsie.
NEH 4:16 Mana mɨtiyehane hixɨata me'atɨ neteɨterima meteni'uximayakaitɨni, hipatɨta mekatenitahɨkaitɨni 'ixipara me'u'ɨtɨ meta pitsika, tupi, memɨyukunarɨma meta kuyaxi wakamixa me'anakatɨtɨkaitɨ. Memanuyetei mekaniwaparewiekaitɨni yunaime Kura kwieyaritsie kiekatari.
NEH 4:17 Kuraru 'aixɨa memuyuriekai meta memɨtetuatɨwekai, mepɨyu'ɨwiyakai mete'uximayatɨ kapa me'utakwi'iwakɨ.
NEH 4:18 Yunaitɨ memɨte'uximayakai kuraru 'aixɨa memɨyuriekai yu'ixipara mekanakawɨtɨatɨkateitɨni. Ne'aurie kaniutiwekaitɨni kuxineta makwe'e yɨkɨ xɨka tiuyɨni tatsihiwiwame.
NEH 4:19 Ne mɨpaɨ nekatiniwarahɨawekaitɨni 'ukirawetsixi meta kuwexinaruritsixi, meta yunaime teɨteri: «Ta'uximayatsika pɨwaɨkawa yemekɨ, tameta 'ateewa tepu'u kurarutsie.
NEH 4:20 'Ayumieme, xɨka te'utakwi'iwa, kuxineta xepe'enieni, 'ana xeiya xekenahu tahetsɨa. Takakaɨyari kaniyutamiemɨkɨ tahetsiemieme».
NEH 4:21 Hikɨ, 'amɨtikatare 'atsita taikai yɨwikɨta xurawetsixi meyuhekɨareyu, hixɨata me'atɨ teɨteri metenitahɨkaitɨni pitsika me'u'ɨtɨ kapa te'utakwi'iwakɨ, mexi hipatɨ tete'uximayakai.
NEH 4:22 Mɨkɨ tukaritsie teɨteri mɨpaɨ nekatiniwarutahɨawe: «Yunaitɨ xeme meta teparewiwamete, Kerutsaremetsie xekeneyukuhayeikawani tɨkarikɨ xemɨte'utahɨwenikɨ, tukarikɨta xemɨte'uta'uximayatanikɨ».
NEH 4:23 Ne meta ne'iwama meta memɨtatsiparewiekai, meta memɨnetsikɨhɨtɨwekai, tepɨka'uyuti'ixurikipiwakai: teyuxexuitɨ tame yatepɨteyuha'aritɨakai te'utakwi'iwakɨ.
NEH 5:1 Hikɨ 'Ukitsi meta 'ukarawetsixi mana kiekatari mɨpaɨ mekateniwarutahɨawe yu'iwama huriyutsixi tɨrɨkaɨyemekɨ,
NEH 5:2 hipatɨ mɨpaɨ memutiyuanekaikɨ: «Xɨka tewaruti'inɨata taniwema 'ukitsi meta 'ukari tekanitamɨireniri. Waɨkawa tɨriku tekaneuyehɨaka temɨwikwekakɨ».
NEH 5:3 Hipatɨta mɨpaɨ mepɨteha'akai: «Tɨriku tekuwautɨwetɨ temɨkakwinikɨ haakakɨ, takwie tekaniutuani temati'etsatsie, ta'iteɨrite meta takiite».
NEH 5:4 Hipatɨtatsiere mɨpaɨ mekaniutiyuanekaitɨni: «Takwie hetsiemieme tumini tepuwaye'ɨi meta kaxie haraweriyaritsie mieme, mɨpaɨ temɨte'ipitɨanikɨ ti'aitame kemɨtatiwawirie.
NEH 5:5 Tsepa tame 'iwamarixi temɨhɨkɨ, taniwema meta waniwema yaxeikɨa memɨ'anene, tameri taniwema 'ukitsi 'ukari tekaniwarutuani hipame waɨriyarika memɨtewa'uximayatsiriekakɨ. Mekanixuaweni taniwema 'ukari waɨriyarika mete'uximayatɨ, tepɨkayɨwawe temɨteyutuanikɨ wahetsiemieme mexɨxɨnime temɨwarayeitɨanikɨ, tixaɨtɨ temɨkatehexeiyakɨri, takwie meta takaxie haraweriyarite hipatɨ pɨtiwapiiniri».
NEH 5:6 Kepauka nemɨwaru'eni mɨpaɨ me'utiyuaneme, waɨkawa nekaniuyeha'ani.
NEH 5:7 'Arike waɨkawa neheitimaixɨaka, neniwarutatieni 'ukirawetsixi meta kuwexinaruritsixi: ―'Aixɨa pɨka'ane yu'iwama tumini xewaniɨtɨatɨ xemɨwawawirieka xete'ana'iwakamekɨ. Hikɨ yunaime nekaniwaruta'inieni memɨyukuxeɨrienikɨ wahetsiemieme,
NEH 5:8 mana mɨpaɨ nekatiniwarutahɨawe: ―Waɨriyarika teyupitɨatɨ, ta'iwama tepɨwarutawikweitsitɨa huriyutsixi memutuiyakai hipame nuiwarite wahetsɨa. Hikɨta xeme yu'iwama xetewatua, panatsi tame tekawarutawikweitsitɨa. 'Ana yunaitɨ kayuwatɨ mekaniutamare, mepɨkayɨwawekai yɨkɨ memɨtiyuani.
NEH 5:9 Mɨpaɨta nekaniutayɨni: ―Kexemɨteyurie mɨkɨ 'aixɨa pɨka'ane. ¿Matsi kareuyewetse Kakaɨyari hɨxie 'aixɨa xemɨteyurieka, para temɨkateyutewinɨakakɨ hipame nuiwarite wahɨxie, memɨtatsi'aye'unie?
NEH 5:10 Ne, ne'iwama meta nete'uximayatsiriwamete, tepɨwaniɨtɨa tumini meta tɨriku. Peru hikɨri tepɨtehayewa tetewawawirietɨ hanamakamekɨ.
NEH 5:11 Ne waɨkawamekɨ nepɨxewawirie wakwie xemɨwayetuirienikɨ, wakaxie haraweriyari, huriwu haraweriyari meta waki, metatsiere xeitsienituyaritsie mieme xeime pɨrata meta tɨriku, winu, hatseiti waɨriyarika xemɨwawawiriekai.
NEH 5:12 Mɨkɨ mɨpaɨ mekaniutiyuani: ―'Aixɨa pɨ'ane, kepemaine naimekɨ yatepɨteyurieni. Tinaime tepɨtewayetuirieni, nitixaɨtɨ tekatewawawirietɨ. Hikɨ mawari wewiwamete nekaniwaruta'inieni mɨkɨ wahɨxie yamemɨtiyuanikɨ kename yametekakɨne.
NEH 5:13 Hikɨ nekamixa 'amɨtewi ne'utakatseka mɨpaɨ nekaniutayɨni: ―Kakaɨyari mɨpaɨ ketikatse meta yukie kehayeweiyarieni naime tita mɨrexeiya ketiunawaiyarieni kemɨ'ane yamɨkatikayani. Mɨpaɨ ketikatse Kakaɨyari, tixaɨ karexeiyakame ke'ayeitɨani. Yunaitɨ teɨteri memɨyuxeɨriekai mɨpaɨ mekaniutiyuani: ―Mɨpaɨ ketiɨyɨni. Hikɨ Yawé hepaɨtsita 'aixɨa mekaniutiyuani, meta teɨteri yamekatenikakɨne kememutiyua.
NEH 5:14 Xeitewiyari wiyari 'Aritakexiketsi ti'aitakaku, kepauka nemutahɨawarie Kura kwieyaritsie kuwexinaruri nemɨhɨkɨtɨnikɨ, 'atsita xeitewiyari heimana tamamata heimana huta wiyaritsie, tatsɨari, tamamata heimana huta wiyari, ne'iwama meta ne nekuwexinaruritɨtɨ kenemɨtiwaukakekai tepɨkate'utawau.
NEH 5:15 Peru meripaitɨ memanuka'ukai 'ana mekaniwawiyakaitɨni waɨkawa teɨteri, tukarikɨ yameteniwawawiriekaitɨni 'ikwai meta winu huta tewiyari pɨrata tuminiyarikɨ raye'akame. Metatsiere tewa'uximayatsiriwamete teɨteri waɨriyarika meteniwa'aitɨakaitɨni. Ne hawaikɨ mɨpaɨ nepɨkatiuyuri Kakaɨyari nemakatɨ.
NEH 5:16 Matsi ne meta nete'uximayatsiriwamete tepɨte'uta'uximayataxɨ, kuraru 'aixɨa tepuyuriekai tixaɨtɨ kwie tepɨkate'unanai.
NEH 5:17 Nemexatsie xeitsienituyari heimana huta tewiyari heimana tamamata mekateniutikwa'akaitɨni, huriyutsixi meta nehamatɨa memɨtehɨritɨariekai, tekawa'inɨatatɨ hipame kwieyaritsie memaneikakai.
NEH 5:18 Xeitukaritsie tepɨta'inɨaritɨakai mɨtikawewiyanikɨ ta'ikwai, xewitɨ tuuru, meyu'ataxewitɨ muxatsi, yayupaɨmetɨta wakanari, tamamata tukari 'anukayeikakakuta winu waɨkawatɨ ni'atɨariwakaitɨni. Peru hatsuaku nepɨkatiutawau nekuwexinaruritɨtɨ kenemɨtiwaukakekai, teɨteri waɨkawa memɨte'uka'eniwakaikɨ.
NEH 5:19 Nekakaɨyari, kenena'eriwani, naime kenemɨtiuyuri 'ikɨ teɨteri wahetsiemieme, 'aixɨa keneneyurieka.
NEH 6:1 Tsamɨwarati, Tuwiyaxi, Ketseni 'arawe tewiyari meta yunaitɨ memɨtatsi'aye'unie, metenetimani kename ne kuraru ne'anukuketɨakai meta kenameri naitɨ 'akanɨrietɨkatei (peru 'akuxi 'itupari pɨkaheuwɨtɨkatei).
NEH 6:2 Hikɨ Tsamɨwarati meta Ketseni 'ikɨ niuki mekaneneyenɨ'airieni: «'Ahamatɨa tepɨtakuxeɨrieni xeime 'Unuhu kiekariyaritsie mayeweri». Yurikɨ kememɨnetenɨ'airietɨwekai menetekwinitɨakutɨ xeikɨa mekaniutiyuanekaitɨni.
NEH 6:3 'Ayumieme mɨpaɨ netiniwarenɨ'airieni: «Matsi tukari nepɨkahexeiya waɨkawamekɨ nepɨti'uximaya, nepɨkayɨwe nemeuyani. Ne xɨka neheuyani 'aixɨa pɨkayɨni 'uximayatsika pɨranukaweni».
NEH 6:4 Naukakɨa menetenetanɨ'airieni, peru yaxeikɨa netiniwaku'eiyakaitɨni.
NEH 6:5 'Auxɨwirieka mɨpaɨ Tsamɨwarati kanetineyenɨ'airieni, xeime 'iparewiwame 'utɨma, yaxeikɨa reku'ukame xapa 'anutiyepiekame,
NEH 6:6 mɨpaɨ katine'ukaitɨni: «Mɨpaɨ pɨtiutaine teɨteri mɨpaɨ meputiyuane, Ketseni yaxeikɨa paine, kename 'ekɨ meta huriyutsixi kuraru 'aixɨa xeheyurie mɨpaɨ xeteku'eriwatɨ yuxaɨta xeteyuta'aitɨanike. Mɨpaɨ nepɨtiu'enakare kename 'ekɨ ti'aitame peyeimɨkɨ,
NEH 6:7 kename texaxatamete pewaretihɨawixɨ para ti'aitame Kerutsaremetsie memɨmatsi'ayeitɨanikɨ, mɨpaɨ memɨtiyuanikɨ: “Kura kwieyaritsie ti'aitame tepexeiya”. 'Ayumieme kenamie mɨkɨ hepaɨtsita temɨtetaxatakɨ, mexi 'akuxi ti'aitame karetamariwe mɨkɨ hepaɨtsita».
NEH 6:8 Neta mɨpaɨ nepɨreinɨ'airi: «Kepemaine yurikɨ pepɨkahetaine. Naitɨ 'ikɨ kepemaine peheiwewietɨ pepetaine».
NEH 6:9 Yurikɨ, metatsimariutatɨ xeikɨa mekaniutiyuanekaitɨni. Temɨtehayewakɨ temɨka'inɨnikɨ ta'uximayatsika. «Hikɨ, Ti'aitame, kenenetɨrɨkariyani nemiyeweiyanikɨ neti'uximayatɨ».
NEH 6:10 Hikɨ ne Tsemahiyaxi kie nekaneyani, Rerahiyaxi nu'aya Mehitaweri teukarieya, yukiita kanayekateitɨni reunatɨkaitɨ. Mɨkɨ mɨpaɨ kanetiniutahɨawe: «Tepɨtakuxeɨrieni Kakaɨyari kiita teteheunatɨkaitɨ, tukita 'upaitɨ, mekanayenexɨakuni mematsimienike. Huu, 'ikɨ tɨkariyaritsie pepɨmierieni».
NEH 6:11 Peru ne mɨpaɨ nekatinitahɨawe: ―Ne nepɨkahɨkɨ memɨyu'una. 'Ukitsi nehepaɨ memɨ'anene mepɨkayu'awiwieta tukita yutukari memɨtawikweitsitɨanikɨ. Ne nepɨkaneti'awieta.
NEH 6:12 Mɨpaɨ nepɨretima Kakaɨyari pɨkaheiyenɨ'akai, matsi Tsamɨwarati meta Tuwiyaxi mepɨte'ipitɨakai para mɨpaɨ mɨtiyurienikɨ.
NEH 6:13 Puyuritɨkai, mepɨte'ipitɨakai mɨnetsitimariutakɨ, 'axanemɨtiyurienikɨ ne'i'enietɨ niukitana. 'Anata 'axamemɨtiyuanikɨ nehepaɨtsita kename heitserie yanekatikamie.
NEH 6:14 «Nekakaɨyari, kena'eriwani kememɨnetsiyurikɨ Tsamɨwarati meta Tuwiyaxi. Yaxeikɨa kena'eriwani 'ukaratsi 'aniukame muyuxata Nuhariyaxi meta hipatɨ 'aniukamete memuyuxata memɨnetsitimariutakekai».
NEH 6:15 Kuraru 'amatayewa niɨnɨre 'eruri metseriyaritsie xeitewiyari heimana 'auxɨwi tukariyaritsie. 'Aixɨa me'iyurietɨwetɨ mekaniuyurieni huta tewiyari heimana tamamata heimana huta tukari.
NEH 6:16 Kepauka memɨtatsi'aye'unie memɨte'utamari, nuiwarite ta'aurie hurawatari mekaniutimamani meta mekaniyutitetewiya, mɨpaɨ memɨtehetimakɨ kename Kakaɨyari tatsiparewiekaku xeikɨa tete'uyuri.
NEH 6:17 Naime mɨkɨ tukaritsie Kura kwieyaritsie kiekatari 'ukirawetsixi Tuwiyaxi matɨa mekaniyu'eniekaitɨni,
NEH 6:18 'ana yumɨiretɨ Kura teɨteriyari mekaninɨkaitɨni Tsekaniyaxi mumunieyatɨkaikɨ 'Araki nu'aya, meta nu'aya Kuhanahani Metsurani mumunieyatɨkaikɨ Werekiyaxi nu'aya.
NEH 6:19 Nehɨxie Tuwiyaxi 'aixɨa metenikuxatakaitɨni, peru 'arike naime metenikuxaxatɨwakaitɨni ne kenemutainekai. 'Ayumieme Tuwiyaxi, xapakɨ kanenimariutamɨkɨkaitɨni.
NEH 7:1 Kepauka kuraru munɨrie 'itupari meuwɨtɨarie kitenie, mekaniutihɨawarieni kitenie tehɨwemete, kwikamete meta rewitsixi.
NEH 7:2 Ne'iwa Kananihi, mɨkɨ tewi yamɨtikamie Kakaɨyari mayemakaxe mɨhɨkɨtɨkai, Kerutsareme nenihɨritɨani Kananiyaxi mame kuyaxi tiwa'aitɨwame mɨhɨkɨ mɨkɨ kiekariyaritsie.
NEH 7:3 Yuhutame mɨpaɨ nekatiniwarutahɨawe: «Kerutsareme kitenieyaritetsie kepauka tau manatinenitsie katineuyepierikemɨkɨ, pɨreunarɨmikenita taikai tehɨwemete mekahekɨniwawekaku 'akuxi, hikɨ kɨyexi mekaneu'uitɨakuni. Meta Kerutsareme kiekatari mekaniwa'uitɨakuni tehɨwemete, hipatɨ mepɨtetahɨni kememɨte'uku'utɨkɨka hipatɨta yukie hɨxie».
NEH 7:4 Kiekari yemekɨ 'akaniyeukaitɨni, peru teɨteri mana kiekatari mepɨkayumɨirekai, naitɨ kii 'aixɨa mɨka'itɨarietɨkateikɨ.
NEH 7:5 Kakaɨyari mɨpaɨ kanetiniuyuitɨani ne'iyaritsie nemɨwakuxeɨrienikɨ memanuyetei 'ukirawetsixi, hipatɨ ti'aitame parewiwametemama meta yunaime teɨteri, nemɨwaraka'utɨanikɨ kemɨ'ane nuiwaritsie memɨmiemetetɨkai, meta xapa nekaniutaxeiya kememɨte'ununuiwaxɨ memaye'uxa matɨari memu'axɨakai. Mana mɨpaɨ katine'ukaitɨni:
NEH 7:6 'Ikɨ xapa kanihɨkɨtɨni Kura kwieyaritsie kiekatari, tatsɨari, Nawukurunutsuxi Wawiruniya kwieyaritsie ti'aitame mɨwarehapakai, memepitɨarie memakunuaxɨanikɨ Kerutsareme meta Kura kwieyaritsie. Yuxexuitɨ yukiekaritsie mekanakunuaxɨani,
NEH 7:7 mekaniwa'atɨani Tsuruwaweri, Ketsuha, Nehemiyaxi, 'Atsariyaxi, Xahamiyaxi, Nakamani, Maxirukeyu, Wiritsani, Mitsipereti, Wihiwahi, Nehumi meta Wanaha. 'Ikɨ mekanihɨkɨtɨni 'ixaheritsixi memakunuaxɨa waxapayari:
NEH 7:8 Parutsi nuiwarimama 2.172
NEH 7:9 Tsepatiyaxi nuiwarimama 372
NEH 7:10 'Araki nuiwarimama 652
NEH 7:11 Pakata-Muhawi nuiwarimama, tatsɨari, Ketsuha meta Kuhawi waniwema 2.818
NEH 7:12 'Erami nuiwarimama 1.254
NEH 7:13 Tsatuhu nuiwarimama 845
NEH 7:14 Tsakahi nuiwarimama 760
NEH 7:15 Winuhi nuiwarimama 648
NEH 7:16 Wewahi nuiwarimama 628
NEH 7:17 'Atsikari nuiwarimama 2.322
NEH 7:18 'Arunikani nuiwarimama 667
NEH 7:19 Wihiwahi nuiwarimama 2.067
NEH 7:20 'Arini nuiwarimama 655
NEH 7:21 'Atexi nuiwarimama, tatsɨari, 'Etsekiyaxi nuiwarimama 98
NEH 7:22 Katsumi nuiwarimama 328
NEH 7:23 Wetsahi nuiwarimama 324
NEH 7:24 Karipi nuiwarimama 112
NEH 7:25 Kawahuni nuiwarimama 95
NEH 7:26 Wereni meta Netupa kiekatari 188
NEH 7:27 'Anatuti kiekatari 128
NEH 7:28 Weti-'Atsimaweti kiekatari 42
NEH 7:29 Kiriati-Yeharini, Kapira meta Weruti kiekatari 743
NEH 7:30 Xama meta Kehewa kiekatari 721
NEH 7:31 Mikimatsi kiekatari 122
NEH 7:32 Weteri meta 'Ahi kiekatari 123
NEH 7:33 xewitɨta Newu kiekatari 52
NEH 7:34 xewitɨta 'Erami kiekatari 1.254
NEH 7:35 Karini kiekatari 320
NEH 7:36 Keriku kiekatari 345
NEH 7:37 Ruri, Kariri, meta 'Unuhu kiekatari 721
NEH 7:38 Tsena kiekatari 3.930
NEH 7:39 Mawari wewiwamete Kerahiyaxi nuiwarimama, Ketsuha niwemama 973
NEH 7:40 'Imexi nuiwarimama 1.052
NEH 7:41 Patsuxi nuiwarimama 1.247
NEH 7:42 Karini nuiwarimama 1.017
NEH 7:43 'Ikɨ rewitsixi mekanihɨkɨtɨni memakunuaxɨa Ketsuha meta Karimieri nuiwarimama, Hurawiyaxi tɨɨriyamama memɨhɨkɨtɨkai 74
NEH 7:44 Kwikamete 'Atsahapi nuiwarimama 148
NEH 7:45 Kitenie tehɨwemete Tsaruni, 'Atexi, Tarimuni, 'Akuwi, Katita meta Tsuwahi wanuiwarima 138
NEH 7:46 Tukita te'uximayatamete 'ikɨ wanuiwarima mepɨyɨakai: Tsika, Katsupa, Tawahuti,
NEH 7:47 Kerutsi, Tsikaka, Paruni,
NEH 7:48 Rewana, Hakawa, Tsarimahi,
NEH 7:49 Kanahani, Kireri, Kahaxi,
NEH 7:50 Xehahiyaxi, Xetsini, Nekura,
NEH 7:51 Katsani, 'Utsa, Patsehaki,
NEH 7:52 Wetsahi, Mehunini, Nepitsetsini,
NEH 7:53 Wakuwuki, Kakupa, Kaxikuxi,
NEH 7:54 Watsiruti, Mekira, Karitsa,
NEH 7:55 Warikuxi, Tsitsara, Temaha,
NEH 7:56 Netsihaki meta Katipaha.
NEH 7:57 Tsarumuni memɨparewiekai wanuiwarima, Tsutahi niwemama mekanihɨkɨtɨkaitɨni, meta Tsupereti niwemama, Perura niwemama,
NEH 7:58 Kahara niwemama, Rarikuni niwemama, Kireri niwemama,
NEH 7:59 Tsepatiyaxi niwemama, Katiri niwemama, Pukereti-Hatsewahini niwemama meta 'Amuni niwemama.
NEH 7:60 Tukita te'uximayatamete meta Tsarumuni te'uximayatsiriwamete wanuiwarima 392
NEH 7:61 Hipatɨta mekaniu'axɨani Teri-Meraki mehanexɨaka, Teri-Karitsa, Keruwi, 'Aruhuni meta 'Imexi, peru mɨkɨ wahetsiemieme xapa pumawekai wa'ukiyarima memaye'uxa, kemɨ'ane memɨtehanuiwaritɨkai xɨka 'ixaheritsixi mehɨkɨtɨkaitɨni:
NEH 7:62 Rerahiyaxi, Tuwiyaxi meta Nekura wanuiwarima 642
NEH 7:63 Hipatɨta mawari wewiwamete, mepɨka'uyɨwekaxɨa yamemɨtiyuani kemɨ'ane memɨtehanuiwaritɨkai 'Ixaheri hetsiemieme, 'ikɨ: Kawahiyaxi meta Kuhutsi meta Waxitsirahi wanuiwarima ('ikɨ 'imatɨrieka mieme Karaha kiekame Waxitsirahi titewakame niweya kaniutiwitɨni, mana 'eyehanaka mɨpaɨ katiniuyuterɨwa).
NEH 7:64 Mɨkɨ mekaniuyutiwauni memaka'uxatsie watutsima, peru mepɨkawarukaxei, 'ayumieme mepanayexɨriya mawari wewiwamete memɨkahɨkɨtɨnikɨ.
NEH 7:65 Mɨkɨ kuwexinaruri katiniwarukunamirieni mawari memɨkatekwakakɨ, 'arike mawari wewiwame wahetsiemieme 'inɨari kemɨtiwewienikekai 'urimi meta tumimikɨ.
NEH 7:66 Yunaitɨ teɨteri mekaniyupaɨmekaitɨni, huta tewiyari heimana huta miriyari heimana haika tsienituyari heimana haika tewiyari (42.360) teɨteri.
NEH 7:67 Meka'inɨaritɨ waɨriyarika te'uximayatamete 'ukitsi 'ukari, memɨyupaɨmekai, 'atahuta miriyari heimana haika tsienituyari heimana xeitewiyari heimana tamamata heimana 'atahuta (7.337), meta mekaniwarexeiyakaitɨni huta tsienituyari heimana huta tewiyari heimana 'auxɨwi kwikamete 'ukitsi meta 'ukari.
NEH 7:68 Matsita mekaniwarexeiyakaitɨni 'atahuta tsienituyari heimana xeitewiyari heimana tamamata heimama 'ataxewi (736) kawayutsixi, huta tsienituyari heimana huta tewiyari heimana 'auxɨwi muratsixi,
NEH 7:69 nauka tsienituyari heimana xeitewiyari heimana tamamata heimana 'auxɨwi (435) kameyutsixi meta 'ataxewi miriyari heimana 'atahuta tsienituyari heimana xeitewiyari (6.720) puxuri.
NEH 7:70 Hipatɨ 'ixaheritsixi wa'ukiyarima mɨraye'axe mepɨteyetɨa 'uximayatsika hetsiemieme: kuwexinaruri 'atahaika kiruyari huru kaniyetuani, meta watsute 'amɨnene huta tewiyari heimana tamamata meta 'auxɨwi tsienituyari heimana xeitewiyari heimana tamamata (530) mawari wewiwame wakemarite,
NEH 7:71 'Ixaheritsixi wa'ukiyarima xeitsienituyari heimana haika tewiyari kiruyari huru mekaniyetuani meta xeimiriyari heimana huta tsienituyari heimana tamamata (1.210) kiruyari pɨrata,
NEH 7:72 yunaitɨ teɨteri xeitsienituyari heimana haika tewiyari kiruyari huru mekaniyetuani meta xeimiriyari heimana xeitsienituyari (1.100) kiruyari pɨrata, mawari wewiwamete wakemariteta 'amɨtɨtɨ haika tewiyari heimana 'atahuta paɨmeme.
NEH 7:73 Mawari wewiwamete, rewitsixi, kitenie tehɨwemete, kwikamete, teɨteri kiekatari, tukita te'uximayatamete meta hipatɨta 'ixaheritsixi yukiekaritsie mekaneukuyaxixɨani. 'Atahuta metseri haye'aku, 'ixaheritsixi yukiekaritsie mekaniukutetɨkateitɨni.
NEH 8:1 Hikɨ teɨteri yunaitɨ mekaniuyukuxeɨrieni, takwa Haa kitenieyari hɨxie mukumakaitsie. Hikɨ ti'ɨkitame 'Etsitɨraxi mekananayexeiya 'inɨari niukiyari Muitsexi hetsɨa mieme makaterɨwakɨ, Yawé 'ixaheritsixi mɨwayetuiriekai yamemɨtekahunikɨ.
NEH 8:2 Hikɨ 'atahutarieka metseritsie mexɨakame tukaritsie, mawari wewiwame 'Etsitɨraxi 'inɨari niukiyari kani'atɨani memayuxeɨrie wahɨxie, mekaniyuxeɨriekaitɨni 'ukitsi meta 'ukari metatsiere tɨɨri memɨteheutamariwawe,
NEH 8:3 kanekaterɨwa yunaime wahɨxie mana takwa Haa kitenieyari hɨxie. Yunaitɨ teɨteri kayuwatɨ mekaniumakaitɨni me'i'enietɨ, 'inɨari niukiyari xapayari kemɨtikuterɨwarɨwakai, ximeri me'utayuaka tukake mekateniutahayewa.
NEH 8:4 Ti'ɨkitame 'Etsitɨraxi wapai kanakawekaitɨni kɨyexi 'a'uyeheikametsie mutawewiyakai 'anamieme. Tserietana mekaniuti'ukaitɨni Matatiyaxi, Tsema, 'Aniyaxi, 'Uriyaxi, Kirikiyaxi meta Matsehiyaxi, 'utatanata mekaniuti'ukaitɨni, Perahiyaxi, Mitsaheri, Marikiyaxi, Katsumi, Katsiwarana, Tsakariyaxi meta Metsurani.
NEH 8:5 'Etsitɨraxi wapaitɨ nakawekaitɨni yunaitɨ teɨteri mekanixeiyakaitɨni. Kepauka memunenierixɨ 'inɨari niukiyari nanutayepiwakaitɨni, 'ana yunaitɨ 'amekaniti'uni.
NEH 8:6 Hikɨ 'Etsitɨraxi Yawé pamɨpariyutsi kaniupitɨani, Kakaɨyari mɨmariwe. Hikɨ teɨteri yunaitɨ teikɨ mekanemeixɨani, mɨpaɨ me'utiyuatɨ: «Mɨpaɨ ketiɨyɨni, mɨpaɨ ketiɨyɨni». Hikɨ mekaniukahɨxima'uni kwiepa, Yawé hepaɨtsita 'aixɨa mekaniutiyuani.
NEH 8:7 Rewitsixi Ketsuha, Wanihi, Tserewiyaxi, Kamini, 'Akuwi, Tsawetahi, Huriyaxi, Matsehiyaxi, Kerita, 'Atsariyaxi, Kutsaweri, Kanahani meta Perahiyaxi mekaniwahekɨatɨakaitɨni teɨteri 'inɨari niukiyari, mɨkɨ me'enanatɨ mepɨkakuyuatɨkatei.
NEH 8:8 Mɨkɨ 'aixɨa mekateniterɨwakaitɨni 'inɨari niukiyari Kakaɨyari hetsɨa mieme meta mekanihekɨatakaitɨni kemaine memeiti'enietɨkɨkanikɨ.
NEH 8:9 Teɨteri me'i'enieka 'inɨari niukiyari mekanitsutɨani me'utitsuatɨ. 'Ayumieme kuwexinaruri Nehemiyaxi, mawari wewiwame meta ti'ɨkitame 'Etsitɨraxi, rewitsixi teɨteri memɨtewa'ɨkitɨakai, mɨpaɨ mekateniwarutahɨawe: «Xepɨka'utitsuanani meta xepɨkanututuixieka, 'ikɨ tukari patsietɨ kanayeimɨkɨ Yawé hetsiemieme takakaɨyari».
NEH 8:10 Hikɨta Nehemiyaxi mɨpaɨ katiniwarutahɨawe: «Xekeneuhuniri. 'Aixɨa xeketenekwaka, xeketene'ieka mɨrakaka meta 'ikwaikɨ xekeneyuparewieka kemɨ'ane mɨkarexeiya hamatɨa, 'ikɨ tukari patsietɨ matɨakɨ Yawé hetsiemieme. Xepɨkanututuixieka, temawierika Yawé hetsiemieme katanitɨrɨkariyani».
NEH 8:11 Yaxeikɨatsiere rewitsixi yunaime mekaniwanɨtɨakaitɨni. Mɨpaɨ metewakɨhɨawetɨ: «Kayuwatɨ. Xepɨkanututuixieka, 'ikɨ tukari kanipatsieka».
NEH 8:12 Hikɨ yunaitɨ teɨteri mekanekɨne metehekwanike metehe'ienike meta 'ikwai meteheyutaminike, meyutemamawietɨ metehetimaika kememɨteheta'ɨkitɨarie.
NEH 8:13 'Uxa'arieka, yunaitɨ 'ukirawetsixi, mawari wewiwamete yunaitɨ meta rewitsixi, 'Etsitɨraxi ti'ɨkitame hetsɨa mekaniuyukuxeɨrieni 'inɨari niukiyari memuyuti'ɨkitɨanikɨ kehapaɨ mɨtikuxatatɨka.
NEH 8:14 Mana mekanikaxeiya mɨpaɨ re'ukame Yawé Muitsexi kemɨtiuta'aitɨa kename 'ixɨarari memɨwewienitsie 'atahuta metseriyaritsie 'ixaheritsixi xamarutɨa me'ukutetɨkanikekai,
NEH 8:15 mɨpaɨta katine'ukaitɨni meketewarutaxatɨanike naitsarie kiekaritsie meta Kerutsaremetsie 'ikɨ 'aitsika: «Yemuritsie xekenehu huriwu xawari xekenetɨyu, huriwu yeuta mieme, tsikwai, takɨ meta naime tita waɨka mɨtixawariyatɨka, xamaru temɨtiwewienikɨ, kemɨre'uxa».
NEH 8:16 Teɨteri yamekatenikakɨne tupiriya mekani'atɨani, mɨkɨkɨ xamaru mekaniutiwewieni kii heima, takwa, Kakaɨyari tukieya takwayaritsie, Haa kitenieyari takwayaritsie meta 'Epɨrahini kitenieyari takwayaritsie.
NEH 8:17 Yunaitɨ teɨteri mehehapanieka memu'axɨa xamaru mekaniutiwewieni mɨkɨtɨa mekanayetetɨkateitɨni. Mɨpaɨ mepɨkateyuriwawekai 'ixaheritsixi kepauka Kutsuhexi Nuni nu'aya 'amuyeikakaitsietɨtɨ, 'ixɨarari mariweme mekaniuwewieni.
NEH 8:18 'Ixɨarari mewewietɨ 'atahuta tukari mekaniuyurieni, naime mɨkɨ tukaritsie 'Etsitɨraxi 'inɨari niukiyari Kakaɨyari hetsɨa mieme kaniwaterɨwiriekaitɨni. 'Atahaika tukaritsie 'ixɨarari mɨpatsie mekaniuwewieni, kemɨre'ukai 'inɨari niukiyari.
NEH 9:1 Xeitewiyari heimana nauka tukariyaritsie mɨkɨ metseriyaritsie mekaniuyukuxeɨrieni 'ixaheritsixi meyuhakienike, hiwerika kamixayari mekananakatɨxɨani meta naxi yumu'utsie meneutiwiwiexɨani.
NEH 9:2 Teewatari wahetsɨari me'ayekɨneka meniuyutihekɨata 'axakememɨte'uyuri yumɨireme wahɨxie meta watewarima ke'axamemɨte'uyuri,
NEH 9:3 hikɨ yamekaniutiyuani yuhetsie mekatenahɨani. Haika hurayari mekaniuyurieni 'inɨari niukiyari meterɨwatɨ Yawé yukakaɨyari hetsɨa mieme, meta haika hurayari mekaniyuhekɨatakaitɨni ke'axamemɨte'uyuri, 'imatɨrieka hɨxiena mekaniukahɨxima'uni.
NEH 9:4 Hikɨ rewitsixi Ketsuha, Wanihi, Karimieri, Tsewaniyaxi, Wuni, Tserewiyaxi, Wahani meta Kenani wapaitɨ mekaneuti'uni karima mekaniuyutanenewieni Yawé Kakaɨyari mehahɨawetɨ.
NEH 9:5 Rewitsixi Ketsuha, Karimieri, Wanihi, Katsawiniyaxi, Tserewiyaxi, Huriyaxi, Tsewaniyaxi meta Petahiyaxi mɨpaɨ mekaniutiyuani karima: «Hikɨmɨtɨka, Yawé hetsiemieme 'aixɨa xekeneutiyua takakaɨyari hikɨ mɨtiyehane meta yareuyuhanemekɨ. 'Aixɨa peke'itɨarieka Tati'aitɨwame. Pekenɨawarieka witsikepemɨ'ane kepemɨtitewa, 'aixɨa pɨ'ane pemɨnɨawarieka 'aixɨa pemɨ'itɨariekakɨ.
NEH 9:6 »'Ekɨ xeikɨa Yawé pepɨhɨkɨ. 'Ekɨ muyuawi peputawewi, naime muyuawi kemɨyewa xurawetsixi warexeiyakame. 'Ekɨ tukari pepɨwapitɨa tita pemɨtiutawewi: kwie meta haramara yunaime mana memɨtexuawe. 'Ayumieme xurawetsixi muyuawitsie miemete 'ahɨxie mepukahɨxima'uwe.
NEH 9:7 »'Ekɨ, Yawé meta Kakaɨyari, 'Apɨrami pemanayexei pepɨhɨkɨ. 'Ekɨ 'Uxi karireutsixi wakwieyaritsie paitɨ pepiyewitɨ, 'Apɨrahami pepɨtiterɨwaxɨ.
NEH 9:8 Hetsiena pepikaxei 'iyari heitserie yamɨtikamie 'ayumieme tɨratu hamatɨana pepuwewi. Mɨpaɨ pepɨtitahɨawixɨ kename nuiwarimama kananeutsixi wakwie pewayetuirienikekai, meta 'etitsixi, 'amuxeutsixi meta peretseutsixi, kewutseutsixi, keriketseutsixi wakwie. Pepɨraye'atɨa kepemutayɨ heitseriemekɨ yapemɨtikamie pemɨhɨkɨkɨ.
NEH 9:9 »'Ekipitu tatewarima wa'uximatɨarika pepu'eni, Haramara Mɨxeta 'aurie kememɨteyuhiweriekai pepuwaru'eni.
NEH 9:10 Mariweme pepɨtiuyuri waɨkawamexɨa Parahuni hetsɨa, 'iparewiwametemama meta yunaitɨ teɨteri, penieretɨ kememɨtewananaimakai 'ateɨterima kememɨwayuriekai. Mɨpaɨ petiuyurieku hikɨ pepukuxaxatsiwa naitsarie.
NEH 9:11 Wahɨxie haramara pepanutayepi, mepanukɨ 'ayewakikaku. Peru memɨwaruweiyakai haramara 'ameukatewatsie pepɨwareukaxɨri, tetexi wahepaɨ tetɨata paitɨ.
NEH 9:12 Haiwitɨri 'a'uwemekɨ pepɨwaruwitɨximekai tukarikɨ, tai 'a'uwemekɨ tɨkarikɨ pepɨwaruwitɨximekai: memuhunikɨ wahuye pepɨhekɨariwiekai.
NEH 9:13 »Tsinahi hɨriyaritsie pepunua, muyuawitsie paitɨ pepuwarutahɨawixɨ. Ketitamɨtiheitserie pepɨtiwarutaxatɨa meta 'inɨari niukiyari yuri maine, 'aitsika 'aixɨa mɨ'anene.
NEH 9:14 Pepɨwarutaxatɨa Xawati tukariyari mɨpatsie, Muitsexi ti'a'uximayatsiriwame mɨhɨkɨtɨkaitsie 'aitsika 'inɨari niukiyari pepɨwayetuiri.
NEH 9:15 »Meheuhaakakwikukaku paa muyuawitsie miemekɨ pepɨwarutihuxaitɨa, meheuharikukaku pepɨwaruharitɨa haa 'aitsie mieme. Kwie pepɨwayetuiri pemɨwayetuirienikekai pemainekai.
NEH 9:16 Tatewarima ta'ukiyarima mepuyuta'ɨrixɨ, yamemɨtekakɨne mepɨka'uyuwaɨri 'a'aitsika hetsie.
NEH 9:17 Mematsi'enienike mepɨkayuwaɨri, mariweme kepemɨtiuyuri wahetsiemieme mepɨkahaye'eri. Waɨkawa mepɨtsetse'ikai meta mepɨkaheu'enanakai 'atsita xeime mepanuyeye muwarakunuitɨanikɨ 'Ekipitu waɨriyarika memɨteha'uximayakaitsie. Peru 'ekɨ pepɨkawaruku'eiri Kakaɨyari pemɨtareuyehɨwirie pemɨhɨkɨkɨ, pemɨtiuyukakwewimɨkɨ meta pemɨtiuyukanenimaya, haxɨakɨ pekayumexɨitɨatɨ, peru waɨkawa petiuyukanaki'erietɨ.
NEH 9:18 »Tsepa tsikeru memutawewi tepɨakɨ wewiyakame, mɨpaɨ memutiyua: “'Ikɨ kani'akakaɨyaritɨni 'Ekipitu matsiyewitɨ”, tsepa yemekɨ kwinimieme 'ahɨxie 'axamemɨte'uyuri,
NEH 9:19 'ekɨ pepɨkawaruku'eiri makumawetsie 'ekɨ kwinimieme pemɨtiuyukanenimayakɨ. »Hatsuaku pɨkawaruku'eiri hai 'amuwekai tukarikɨ mɨwaruwitɨximekai huyeta, meta pɨkatiuhayewaxɨ wahekɨariwiyatɨ tai 'a'uwemekɨ tɨkarikɨ mɨwa'inɨaritɨkai kememɨteheuyune.
NEH 9:20 »'A'iyari 'aixɨa mɨ'anekɨ memɨtemaiwawenikɨ pepɨwarupitɨa. Manana pepɨkawarunawairi me'ikwakaku, haa pepɨwaruharitɨa memɨkaheuharikunikɨ.
NEH 9:21 Huta tewiyari wiyari makumawetsie pepɨtiwamikwakai. Tixaɨtɨ reuyewetɨ pɨkaratɨa wahetsiemieme. Wakamixate pɨka'utitsanixɨ meta wa'ɨkate pɨka'utihai.
NEH 9:22 »Pepɨwayetuiri te'aitamete meta kiekari, yuxexuime kwie pepɨwaruxatɨa. Te'aitamete mepɨwara'iwaxɨ 'Uhuki meta Tsikuni, memɨte'aitakai Hetsiwuni kwieyaritsie meta Watsani kwieyaritsie.
NEH 9:23 Waniwema pepɨwarutimɨiriyaxɨ xurawetsixi muyuawitsie miemete wahepaɨ, kwietsie pepɨwa'atɨa watewarima pemɨwaraxaxatɨwakaitsie.
NEH 9:24 Waniwema mɨkɨ kwieyaritsie mepu'axɨa. Wahɨxie pepɨtiwaruta'aitɨa kananeutsixi mana memu'uwakai, te'aitamete pepɨwayetuiri meta teɨteri mana kiekatari, kemɨtiwanake wahetsie yamemɨteyurienikɨ.
NEH 9:25 Kiekarite kuraruyari 'amatitetewa mepɨwara'iwaxɨ meta kwie 'aixɨa mɨ'anene, kiite yukii mepayeitɨaxɨa piinitɨarika tihɨpɨneme, meta putsute muyewawaki, kaxie haraweriyarite meta huriwu, metatsiere waɨkawa 'iteɨrite 'ikwaxi mɨrexeiyatɨka. Meteniutikwani meta meniutihuxani metatsiere meniutiwaiyata, mepɨteha'inɨataxɨ waɨkawa ke'aixɨa pemɨwaruyuri.
NEH 9:26 »Peru mekaheu'enanatɨ mepakɨ: menetsi'aye'unietɨ mepakɨ, 'a'aitsika meputixani'eri, 'aniukamete 'ahetsɨa miemete mepɨwarukwi memɨwa'iniekai memɨ'axɨanikɨ 'ahetsɨa, yemekɨ 'ahɨxie 'axamepɨte'uyuri.
NEH 9:27 'Ayumieme memɨwaraye'unie hetsɨa pepɨwayetua, mɨkɨta mekaniwaru'uximatɨani. 'Uximatɨarikatsata memanahiwiwakaitɨni, muyuawitsie paitɨ peniwaru'enieni, pemɨtiuyukakwewimɨkɨkɨ pekaniwareyenɨ'ani memɨwatawikweitsitɨani memɨwaxɨnakɨ memɨwaraye'unie wahetsɨa.
NEH 9:28 Peru kepauka memuxɨnarie, yaxeikɨatsiere mepɨteyuriekai, 'ekɨta pepɨwayetuayakai memɨwaraye'unie wahetsɨa, mɨkɨ mekateniwaruta'aitɨwakaitɨni. Hekwamekɨ mekameniutahiwiwakaitɨni pemɨwaparewienikɨ, hikɨ muyuawitsie paitɨ pekaniwaku'eniwakaitɨni. Waɨkawa pemɨwanaki'eriekaikɨ mɨixa peniwarutawikweitsitɨani.
NEH 9:29 Pepɨwaraye'eritɨa 'a'inɨari niukiyaritsie memanuaxɨanikɨ, peru mɨkɨ mepuyuta'ɨrixɨ meta 'a'aitsikatsie yamepɨkatekakɨ. 'Axamepɨte'uyuri 'a'aitsikate hepaɨtsita, tukari mɨtiyupitɨwa kemɨ'ane meye'atɨwa. Mekaheu'enanatɨ mepɨmatsi'uku'eiri, metsetse'itɨ mepayuyeitɨa meta mepɨkayuwaɨri memɨmatsi'enieni.
NEH 9:30 »Mɨixa wiyari pepɨwanewiekai, 'a'iyarikɨ pepɨwaraye'eritɨwakai 'aniukamete yame'utiyuanekaku, peru mɨkɨ mepɨka'u'enana. 'Ayumieme pepɨwayetua mɨkɨ kwieyaritsie memɨtama wahetsɨa.
NEH 9:31 Peru 'ekɨ, waɨkawa pemɨtiuyukanenimayakɨ pepɨkawarukwi meta pepɨkawaruku'eiri, Kakaɨyari 'aixɨa pemɨtiuka'iyari meta pemɨti'akanenimaya.
NEH 9:32 »Hikɨta, takakaɨyari, Kakaɨyari pemɨmariwe, pemɨmakaxiwa meta pemɨtɨrɨkaɨye, tɨratu pemaye'atɨwa meta yapepɨtikamie, 'etsiwa tiuyɨme pepɨka'erieka kememɨte'ukwinitɨarie, tate'aitɨwamete, kuwexinaruritsixi, mawari wewiwamete meta 'aniukamete, ta'ukiyarima meta teyunaitɨ 'ateɨteri, te'aitamete 'Atsiriya kiekatari memɨtatsi'a'iwaxɨtsietɨtɨ 'atsita hikɨ.
NEH 9:33 'Ekɨ heitserie pepɨtiyurienekai tame kemɨtatiuyuri, 'ekɨ yapepɨtikatɨa. Tame 'apɨta 'axatepɨte'uyuri.
NEH 9:34 Tate'aitɨwamete meta kuwexinaruritsixi, tamawari wewiwamete meta tatewarima, 'a'inɨari niukiyaritsie yamepɨkatekakɨ meta mepɨka'i'eni 'a'aitsikate metatsiere kepemɨtiwaraye'eritɨwakai.
NEH 9:35 Mɨkɨ, kepauka memɨte'aitakai, mepɨka'uyuwaɨri memɨmetsi'ayexeiyani meta mepɨka'uyuwaɨri 'axakememɨteyuriekai memuku'eirienikɨ, tsepa waɨkawa petiwarumikutɨtɨ meta kwie pewayetuirieku 'ayeukame tiuxuaweriweme.
NEH 9:36 »'Ayumieme hikɨ waɨriyarika te'uximayatamete tepɨhɨkɨ, waɨriyarika te'uximayatamete 'ikɨ kwieyaritsie pemɨwayetuiritsie tatewarima mana timieme 'ikwaxi memɨtekwakakɨ meta memɨte'ukaxexeiyanikɨ.
NEH 9:37 Waɨkawa kemɨtiutixuxuawere hikɨ te'aitamete wahetsiemieme katinihɨkɨtɨni 'axatemɨte'uyurikɨ tahetsie pemɨwarupitɨa. Tɨrɨkariya memexeiyakɨ, kemɨtiwanake mepɨtatsiyurie tame meta tatewama. Waɨkawa tepu'uximatɨarie.
NEH 9:38 »Naimekɨ mɨkɨkɨ, tame tɨratu tepɨwewieni meta tepɨte'aka'utɨani, kuwexinaruritsixi, rewitsixi meta mawari wewiwamete mepitseyumani».
NEH 10:1 'Ikɨ mekanihɨkɨtɨni memitseyuma: Nehemiyaxi Hakariyaxi nu'aya kuwexinaruri mɨhɨkɨ, Tserekiyaxi,
NEH 10:2 Tserahiyaxi, 'Atsariyaxi, Keremiyaxi,
NEH 10:3 Patsuxi, 'Amariyaxi, Marikiyaxi,
NEH 10:4 Katuxi, Tsewaniyaxi, Maruki,
NEH 10:5 Karini, Meremuti, 'Awiriyaxi,
NEH 10:6 Tanieri, Kinetuni, Waruki,
NEH 10:7 Metsurani, 'Awiyaxi, Mikamini,
NEH 10:8 Mahatsiyaxi, Wirikai meta Tsemahiyaxi. 'Ikɨ mawari wewiwamete mekanihɨkɨtɨkaitɨni.
NEH 10:9 Rewitsixi teɨteriyari: Ketsuha 'Atsaniyaxi nu'aya, Winuhi, Henarari xiɨyarimama, Karimieri,
NEH 10:10 meta wa'iwama Tsewaniyaxi, Huriyaxi, Kerita, Perahiyaxi, Kanahani,
NEH 10:11 Mikahiyaxi, Xekuwi, Katsawiyaxi,
NEH 10:12 Tsakuxi, Tserewiyaxi, Tsewaniyaxi,
NEH 10:13 Huriyaxi, Wanihi meta Weninu.
NEH 10:14 Memanuyetei mana kiekatari: Parutsi, Pakati, Muhawi, 'Erami, Tsatuhu, Wanihi,
NEH 10:15 Wunihi, 'Atsikari, Wewahi,
NEH 10:16 'Aruniyaxi, Wihiwahi, 'Arini,
NEH 10:17 'Atexi, 'Etsekiyaxi, 'Atsuxi,
NEH 10:18 Huriyaxi, Wetsahi, Katsumi,
NEH 10:19 Karipi, 'Anatuti, Newahi,
NEH 10:20 Makipiyaxi, Metsurani, Hetsixi,
NEH 10:21 Metsetsaweri, Tsaruki, Karuha,
NEH 10:22 Peratiyaxi, Kanahani, 'Anahiyaxi,
NEH 10:23 'Utseyaxi, Kananiyaxi, Katsuwi,
NEH 10:24 Haruketsi, Pirika, Tsuweki,
NEH 10:25 Xekuni, Katsawina, Matsehiyaxi,
NEH 10:26 'Ahiyaxi, Kanahani, 'Anahani,
NEH 10:27 Maruki, Karini meta Wanaha.
NEH 10:28 Meta hipatɨta teɨteri ―mawari wewiwamete, rewitsixi, kitenie tehɨwemete, kwikamete, tukita memɨte'uximaya, meta yunaitɨ kemɨ'ane memɨwaruku'eiriekai hipame teɨteri kwiepa memɨtama 'inɨari niukiyari memaye'atɨanikɨ, wa'ɨitama, waniwema 'ukitsi 'ukari meta yunaitɨ kemɨ'ane memɨ'enawawekai―
NEH 10:29 yu'iwama mekaniwarutinɨni memanuyetei, yurikɨ meyuhɨritɨatɨ yamekaniutiyuani kename yametekakɨne, yamemɨte'u'uwanikɨ 'inɨari niukiyari Kakaɨyari Muitsexi tiyu'uximayatsiriwame mɨyetuiri kemaine, meta yamemɨtekakɨnekɨ naime Yawé 'aitsikateyatsie.
NEH 10:30 Metatsiere yatekaniutiyuani taniwema temɨkawawikitɨatɨwenikɨ memɨka'ixaheritsixi 'ikɨ kwieyaritsie memu'uwa wahamatɨa meta memɨkawikietɨwenikɨ waniwema taniwema wahamatɨa.
NEH 10:31 Metatsiere yatekaniutiyuani xɨka teɨteri xaɨtsie kiekatari xawatikɨ me'u'axɨani metetuatɨ piinite tewaxi yatɨni tsepa kepauka 'ixɨarari hatinekaku, tame tixaɨtɨ tepɨkatenaneni. Yaxeikɨatatsiere tepɨte'uxa 'atahutarieka wiyaritsie tepɨkaka'eni, meta memɨtehapitɨka tepɨtewareuyehɨwirieni.
NEH 10:32 Mɨpaɨta tekateniuxata, tepiyetuayani nauka kɨramuyari raheteme pɨrata xeiwiyari 'anuyeyeikakaku, takakaɨyari tukita tita mɨreuyewetse hetsiemieme mayanikɨ:
NEH 10:33 paa Kakaɨyari hɨxie mamanarɨwa, mɨtiutimawarɨwani, meta mawari taiyariyari tukarikɨ yamɨtiutiwewiwa hetsiemieme, mawari xawati mieme, mawari metseri mɨhekwanitsie mieme meta 'ixɨarari mɨpatsietɨka mutiwewiwanitsie mieme, 'imikieri mɨpatsietɨka hetsiemieme, meta mawari 'ixaheritsixi ke'axamemɨte'uyuri memɨ'itiyanikɨ hetsiemieme, meta naime tita memɨteheuyehɨwa takakaɨyari tukita.
NEH 10:34 Kɨyexi temɨyetuayani hetsiemieme, teyunaitɨ 'inɨarikɨ tekaniuyuta'iwa, kemɨ'ane wahetsie mɨtinakekekai, mawari wewiwamete, rewitsixi meta teyunaitɨ teɨteri, mɨpaɨ temɨtemaikakɨ kemɨ'ane memi'atɨwani kepauka tukaritsie, xeiwiyari 'aye'axekaku, Yawé tukieyata mieme takakaɨyari, mɨtakakɨ mawarieya matiwewiwa, 'inɨari niukiyaritsie kemaine.
NEH 10:35 Yaxeikɨata yatekaniutiyuani Yawé tukieyata temɨteyetuayanikɨ xeiwiyari 'anuyeyeikakaku tawaxata mɨtikaxuawere matɨari timieme meta ta'iteɨritetsie timieme 'ikwaxi,
NEH 10:36 metatsiere muwa temɨwayetuayanikɨ taniwema matɨari miemete meta tatewama mexɨakate, wakaitsixi meta muxatsi, mawari wewiwamete wahetsɨa Kakaɨyari tukieyata memɨte'uximaya, kemɨreuku'uxa 'inɨari niukiyaritsie.
NEH 10:37 Metatsiere mɨpaɨ tekateniuxata temɨteyetuayanikɨ Kakaɨyari tukieyata timieme mɨtiwati'utsiwatsie, muwa tepiyetuani harina 'aixɨa mɨ'ane, meta hipame 'imikieri, ta'iteɨri 'ikwaxiyari, kaxie winuyari mɨhekwa meta hatseiti, mawari wewiwamete wahetsie timieme takakaɨyari tukita memɨte'uximaya. Metatsiere yatekateniuxata temiyetuanikɨ tamamatatsie mieme xeime tita temɨte'uka'etsa rewitsixi wahetsiemieme mɨrayanikɨ, mɨkɨtsɨ mekanihɨkɨtɨni naime 'ikɨ memɨte'uyetɨtɨkɨka
NEH 10:38 Xewitɨ mawari wewiwame 'Aruni xiɨyarieyatɨtɨ rewitsixi wahamatɨa kaniyemieni kepauka tamamatatsie mieme xeime hetsie timieme memɨtetɨyu. Rewitsixi tamamata hetsiemieme xeime tawarita mana hepaɨna paɨmeme mepɨte'anakapineni memiyetuayanikɨ Kakaɨyari tukieyata mɨtiuyepinetsie.
NEH 10:39 'Ixaheritsixi meta rewitsixi mekaniyetuayakuni 'imikieri, tɨriku, kaxie winuyari meta hatseiti mɨtipatsietɨka mɨtiuyepinetsie meta mawari wewiwamete memɨwayeyaxike wa'aurie, kitenie tehɨwemete meta kwikamete, kepauka memɨte'uximaya. Mɨpaɨ tekateniuxata takakaɨyari tukieya mɨpaɨ temɨte'ɨwiyanikɨ.
NEH 11:1 'Ixaheritsixi memanuyetei Kerutsareme mekanitiyaxe. Hipatɨta memuyuhayewaxɨ mekaniyuta'iwa tamamatatsie mieme xewitɨ Kerutsareme muyuhayewakɨ kiekari mɨpatsietsie, hipatɨta me'atanaukatɨ hipame kiekaritetsie mekaniyuhayewa.
NEH 11:2 Hikɨ teɨteri Kakaɨyari mekaniutawawirieni 'aixɨa muwayurienikɨ kemɨ'ane yukɨmana memuyuyetua Kerutsareme memɨtiyaxekɨ wahetsiemieme.
NEH 11:3 'Ikɨ mekanihɨkɨtɨni 'ikɨ kwieyaritsie memanuyetei Kerutsareme memuyuhayewaxɨ meta hipame kiekaritetsie Kura kwieyaritsie. 'Ixaheritsixi, mawari wewiwamete, rewitsixi, tukita te'uximayatamete meta Tsarumuni te'uximayatsiriwamete wanuiwarima mana mekaniyuhayewa, yuxexuitɨ yukiekaritsie meta yukwieyaritsie.
NEH 11:4 'Ikɨ mekanihɨkɨtɨni huriyutsixi wenikamini xiɨyarimama Kerutsareme memuyuhayewaxɨ: Kura memɨxiɨyarimama: 'Atahiyaxi 'Utsiyaxi nu'aya, Tsakariyaxi nu'aya, 'Amariyaxi nu'aya, Tsepatiyaxi nu'aya, Marareri nu'aya, mɨkɨ Paretsi memɨxiɨyarimamatɨkai.
NEH 11:5 Meta Matsehiyaxi Waruki nu'aya, Kurikutse nu'aya, Katsahiyaxi nu'aya, 'Arahiyaxi nu'aya, Kuyariwi nu'aya, Tsakariyaxi nu'aya, Tsiruni niwemama.
NEH 11:6 Yunaitɨ Paretsi nuiwarimama Kerutsareme memuyuhayewaxɨ nauka tsienituyari heimana haika tewiyari heimana 'atahaika kuyaxi memɨkamama (468) mekaniyupaɨmekaitɨni.
NEH 11:7 Wenikamini xiɨyarimama: Tsaru Metsurani nu'aya, Kuhe nu'aya, Perahiyaxi nu'aya, Kurahiyaxi nu'aya, Matsehiyaxi nu'aya, 'Itiheri nu'aya, Kitsariyaxi nu'aya,
NEH 11:8 'iwamama Kawahi meta Tsarahi. Yunaitɨ 'atanauka tsienituyari heimana xeitewiyari heimana 'atahaika (928) mekaniyupaɨmekaitɨni.
NEH 11:9 Manuyekatei mexɨakame mieme Kuheri kanihɨkɨtɨkaitɨni Tsikɨri nu'aya, hutarieka mieme manuyeka kanihɨkɨtɨkaitɨni Kura Tsenuha nu'aya.
NEH 11:10 Mawari wewiwamete: Kerahiyaxi Kuyariwi nu'aya, Kakini,
NEH 11:11 Tserahiyaxi Kirikiyaxi nu'aya, Metsurani nu'aya, Tsaruki nu'aya, Merayuti nu'aya, 'Akituwi nu'aya, Kakaɨyari tukieya mɨhɨritɨarie mɨhɨkɨtɨkai,
NEH 11:12 meta maremama memɨhɨkɨtɨkai 'atahaika tsienituyari heimana xeitewiyari heimana huta (822) tukita mekateni'uximayakaitɨni, metatsiere 'Arahiyaxi Keruhani nu'aya, Perariyaxi nu'aya, 'Amɨtsí nu'aya, Tsakariyaxi nu'aya, Patsuxi nu'aya, Marikiyaxi nu'aya,
NEH 11:13 meta wamarema, mɨkɨ memanuyetei mepɨhɨkɨtɨkai yuniwema memɨwareuxeiya, yunaitɨ huta tsienituyari heimana huta tewiyari heimana huta mekaniyupaɨmekaitɨni, metatsiere 'Amatsahi 'Atsareri nu'aya, 'Akitsahi nu'aya, Metsiremuti nu'aya, 'Imexi nu'aya,
NEH 11:14 meta maremama, yunaitɨ xeitsienituyari heimana xeitewiyari heimana 'atahaika (128) mekaniyupaɨmekaitɨni yemekɨ memɨtehayu'iwa. Wa'ukiyari Tsawirieri Kerurini nu'aya kanihɨkɨtɨkaitɨni.
NEH 11:15 Rewitsixi: Tsemahiyaxi Katsuwi nu'aya, 'Atsirikani nu'aya, Katsawiyaxi nu'aya, Wunihi nu'aya,
NEH 11:16 Tsawetahi meta Kutsawari memanuyetei mekanihɨkɨtɨkaitɨni rewitsixi wahetsie, mekanihɨritɨariekaitɨni 'uximayatsika Kakaɨyari tukieya warita mieme.
NEH 11:17 Mataniyaxi Mikahiyaxi nu'aya, Tsawiri nu'aya, 'Atsahapi nu'aya, muwa'ukiyaritɨkai memutikwikakai pamɨpariyutsi Kakaɨyari mɨpitɨariekatsie meta memɨyunenewiekatsie, Wakuwukiyaxi Mataniyaxi pɨparewiwametɨkai yu'iwamaritsie meta 'Awɨra Tsamuha nu'aya, Karari nu'aya, Kerutuni nu'aya.
NEH 11:18 Rewitsixi kiekari mɨpatsietsie memuyuhayewaxɨ yunaitɨ huta tsienituyari heimana nauka tewiyari heimana nauka (284) mekaniyupaɨmekaitɨni.
NEH 11:19 Kitenie tehɨwemete: 'Akuwi, Tarimuni meta maremama, kitenie tehɨwemete. Yunaitɨ xeitsienituyari heimana haika tewiyari heimana tamamata heimana huta (172) mekaniyupaɨmekaitɨni.
NEH 11:20 Hipatɨta 'ixaheritsixi meta mawari wewiwamete, hipatɨ rewitsixi, Kura kwieyaritsie mekanitamakaitɨni naitsarie, yuxexuitɨ yukwietsie.
NEH 11:21 Tukita te'uximayatamete Tsika meta Kitsipa memɨwanɨ'akai, 'Uperi yemuriyaritsie mekaniyuhayewa.
NEH 11:22 Rewitsixi wa'ukiyari Kerutsareme memɨtitekai 'Utsihi katinitewakaitɨni Wanihi nu'aya, Katsawiyaxi nu'aya, Mataniyaxi nu'aya, Mikahiyaxi nu'aya, xewitɨ 'Atsahapi nuiwarieya mɨhɨkɨ. 'Ikɨ mepɨhɨritɨariekai kwikari hepaɨtsita Kakaɨyari tukieyata.
NEH 11:23 Mɨkɨ ti'aitame pɨtiwa'aitɨakai kehapaɨ memɨte'uximayakakekai kwikamete naime tukaritsie.
NEH 11:24 Ti'aitame, Petahiyaxi Metsetsaweri nu'aya kananukakeni yunaime teɨteri wahetsiemieme miparewiekakɨ, mɨkɨ Tsera nuiwarieyatsie pumiemetɨkai Kura nu'aya.
NEH 11:25 Hipatɨ huriyutsixi 'ikɨ kiekaritetsie mekaniuyuhayewa meta yu'aurie 'etsiyeyeume mexeiyatɨkatsie: Kiriati-'Ariwa, Riwuni, Yekatseri,
NEH 11:26 Ketsuha, Murara, Weti-Pereti,
NEH 11:27 Katsaxi-Tsuhari, Weritsewa,
NEH 11:28 Tsikɨraki, Mekunaha,
NEH 11:29 'Eniximuni, Tsura, Karimuti,
NEH 11:30 Tsanuha, 'Arurani, Rakixi meta 'Atseka, tatsɨari Weritsewa tsutɨtɨ 'atsita mayeweri Hinuni paitɨ ye'atɨkaitɨ.
NEH 11:31 Wenikamini nuiwarimama Kehewa kiekariyaritsie mekanitiyaxe, Mikimatsi, 'Ahiyatsi, Weteri meta kiekari 'auriena mamanetɨkatsie,
NEH 11:32 'Anatuti, Nuwi, 'Ananiyaxi,
NEH 11:33 Katsuxi, Xama, Kitahini,
NEH 11:34 Kariri, Tsewuhini, Newarati,
NEH 11:35 Ruri meta 'Unuhu, mayeweritsie Yumamakɨ Memɨteheutawewiwawe mɨrayetewatsie.
NEH 11:36 Hipatɨ rewitsixi Kura kwieyaritsie kiekatari Wenikamini nuiwarimama mekaniwarutinɨni.
NEH 12:1 'Ikɨ mawari wewiwamete mekanihɨkɨtɨni meta rewitsixi memu'axɨa Tsuruwaweri hamatɨa Tsaratiheri nu'aya, meta Ketsuha hamatɨa: Tserahiyaxi, Keremiyaxi, 'Etsitɨraxi,
NEH 12:2 'Amariyaxi, Maruki, Katuxi,
NEH 12:3 Tsekaniyaxi, Xekuni, Meremuti,
NEH 12:4 'Iru, Kinetuni, 'Awiyaxi,
NEH 12:5 Mikamini, Mariyaxi, Wirika,
NEH 12:6 Tsemahiyaxi, Kuyariwi, Kerahiyaxi,
NEH 12:7 Tsaru, 'Amuki, Kirikiyaxi meta Kerahiyaxi. 'Ikɨ mekanihɨkɨtɨni memanuyetei mawari wewiwamete meta wamarema Ketsuha muyeikakaitsie.
NEH 12:8 Rewitsixi mekanihɨkɨtɨkaitɨni Ketsuha, Winuhi, Karimieri, Tserewiyaxi, Kura meta Mataniyaxi, kepauka Kakaɨyari pamɨpariyutsi mukupitɨariwakai mɨkɨ pɨhɨritɨariekai 'ana memutikwikanikɨ yu'iwama yunaitɨ.
NEH 12:9 Wakuwukiyaxi meta 'Unihi, memɨwa'iwama, wahɨxie mekaniti'uwekaitɨni mewaranutaxeiyatɨ memutikwikakaitsie.
NEH 12:10 Ketsuha xiɨyarimama mekanihɨkɨtɨkaitɨni Kuhakimi, 'Eriyatsiwi, Kuyara,
NEH 12:11 Kuhanahani meta Karuha.
NEH 12:12 Mawari wewiwamete wa'ukiyarima, Kuhakimi ti'aitakaku 'ikɨ mekanihɨkɨtɨkaitɨni: Tserahiyaxi nuiwarimama: Merahiyaxi puwa'ukiyaritɨkai, Keremiyaxi nuiwarimama: Kananiyaxi puwa'ukiyaritɨkai,
NEH 12:13 'Etsitɨraxi nuiwarimama: Metsurani puwa'ukiyaritɨkai, 'Amariyaxi nuiwarimama: Kuhanahani puwa'ukiyaritɨkai,
NEH 12:14 Meriku nuiwarimama: Kunatani puwa'ukiyaritɨkai, Tsewaniyaxi nuiwarimama: Kutse puwa'ukiyaritɨkai,
NEH 12:15 Karini nuiwarimama: 'Arɨna puwa'ukiyaritɨkai, Merayuti nuiwarimama: Kerikahi puwa'ukiyaritɨkai,
NEH 12:16 'Iru nuiwarimama: Tsakariyaxi puwa'ukiyaritɨkai, Kinetuni nuiwarimama: Metsurani puwa'ukiyaritɨkai,
NEH 12:17 'Awiyaxi nuiwarimama: Tsikɨri puwa'ukiyaritɨkai, Minikamini nuiwarimama: mɨkɨta yuxeime yu'ukiyari mepexeiyakai, Muhariyaxi nuiwarimama: Piritahi puwa'ukiyaritɨkai,
NEH 12:18 Wirika nuiwarimama: Tsamuha puwa'ukiyaritɨkai, Tsemahiyaxi nuiwarimama: Kunatani puwa'ukiyaritɨkai,
NEH 12:19 Kuyariwi nuiwarimama: Matenahi puwa'ukiyaritɨkai, Kerahiyaxi nuiwarimama: 'Utsihi puwa'ukiyaritɨkai,
NEH 12:20 Tsarahi nuiwarimama: Karahi puwa'ukiyaritɨkai, 'Amuki nuiwarimama: 'Ewexi puwa'ukiyaritɨkai,
NEH 12:21 Kirikiyaxi nuiwarimama: Katsawiyaxi puwa'ukiyaritɨkai, Kerahiyaxi nuiwarimama: Natanaheri puwa'ukiyaritɨkai.
NEH 12:22 Kepauka 'Eriyatsiwi, Kuyara, Kuhanahani meta Karuha mawari wewiwamete wa'ukiyarima memɨhɨkɨtɨkaitsie rewitsixi wa'ukiyarima meta mawari wewiwamete wa'ukiyarima mekanaka'utsieni Raríyu ti'aitakaku Peritsiya kiekame.
NEH 12:23 Rewitsixi wa'ukiyarima Kuhanahani 'Eriyatsiwi nu'aya muyeikakaitsie xeikɨari mekanaka'utsieni kemɨtiuyɨ xapayaritsie.
NEH 12:24 Rewitsixi wa'ukiyarima mekanihɨkɨtɨkaitɨni Katsawiyaxi, Tserewiyaxi meta Ketsuha Karimieri nu'aya. Kepauka maye'axekai memɨtikwika wa'iwama mɨkɨ wahɨxie mekaniti'uwekaitɨni memɨtikwikakɨ meta pamɨpariyutsi memipitɨanikɨ, Rawiri kemɨtiu'aitaxɨ, tewi Kakaɨyari hetsɨa mieme.
NEH 12:25 Mataniyaxi, Wakuwukiyaxi, 'Awiriyaxi, Metsurani, Tarimuni meta 'Akuwi kitenie tehɨwemete mekanihɨkɨtɨkaitɨni meta mɨtiuyepitɨkatsie kitenie 'aurie.
NEH 12:26 Yunaitɨ 'ikɨ Kuhakimi Ketsuha nu'aya meta Kutsaraki teukarieya muyeikakaitsie mekaniu'uwakaitɨni, meta Nehemiyaxi mukuwexinaruritɨkaitsie, meta mawari wewiwame meta ti'ɨkitame 'Etsitɨraxi mɨhɨkɨtɨkaitsie.
NEH 12:27 Kepauka maye'a kuraru hetsiemieme 'ixɨarari memɨwewienikɨ, mekaniwarutiwauni rewitsixi naitsarie kememɨte'ukutetɨkatei mekaniwarewitɨni, Kerutsareme 'ixɨarari memɨwewienikɨ kwikarikɨ meta pamɨpariyutsi me'ipitɨatɨ, meteyuitɨatɨ mɨtiutitiraurɨkakɨ, 'aripakɨ meta 'aripa 'etsimupekɨ.
NEH 12:28 Hikɨ mekaniuyukuxeɨrieni kwikamete Kerutsareme 'aurie kiekatari meta Netupa 'aurie kiekarite 'etsimɨyeyeutsie kiekatari,
NEH 12:29 meta Weti-Kirikari kiekatari, yaxeikɨatsiere Kehewa kwieyaritsie kiekatari meta 'Atsimaweti kiekatari, mɨkɨ Kerutsareme 'aurie mekaniuyutikitɨakaitɨni kwikamete.
NEH 12:30 Mawari wewiwamete meta rewitsixi me'uyu'itieka meri, 'ariketa teɨteri, meta kiteniete, metatsiere kuraru mekateniu'itieni.
NEH 12:31 Hikɨ Kura kwieyaritsie kiekatari memanuyetei yanekatiniwarutahɨawe memanutikɨnekɨ kurarutsie, meta kwikamete meyumɨireme nekaniwarukuxeɨrieni me'ayehutame. Hipatɨ tatserieta meneutayune kuraru hetsie me'uhutɨ, Xatsi kitenieyari hepa me'erietɨ,
NEH 12:32 kwikamete wa'utɨa 'Utsahiyaxi kaniumiekaitɨni Kura kwieyaritsie memanuyetei warawitɨtɨ,
NEH 12:33 'Atsariyaxi, 'Etsitɨraxi, Metsurani,
NEH 12:34 Kura, Wenikamini, Tsemahiyaxi meta Keremiyaxi.
NEH 12:35 'Ikɨ mekaniwaruweiyakaitɨni mawari wewiwamete kuxineta me'u'ɨtɨ: Tsakariyaxi Kunatani nu'aya, Tsemahiyaxi nu'aya, Mataniyaxi nu'aya, Mikahiyaxi nu'aya, Tsakuxi nu'aya, 'Atsahapi nu'aya,
NEH 12:36 meta maremama Tsemahiyaxi, 'Atsareri, Mirarahi, Kirarahi, Mahi, Natanaheri, Kura meta Kananihi, kanarite memu'ɨkai Rawiri tipiinieya, tewi Kakaɨyari hetsɨa mieme. Matsi yunaime wahɨxie ti'ɨkitame 'Etsitɨraxi kaniumiekaitɨni.
NEH 12:37 Haixata kitenieyaritsie meye'axɨaka, heitserie mekaneutiyune teikɨmana tetexi 'imɨmɨiyari 'amatayewatsie Rawiri kiekariena, kuraru teikɨmana meutiyunetsie, Rawiri paratsiyuya manuwe 'aurie muyehanetsie mekaniuyekɨne, Haa kitenieyaritsie paitɨ mekaniye'axɨani, tau manatineika hepatsie.
NEH 12:38 Hutarieka miemete kwikamete ta'utata meneutayune memanuyukunakekɨ, Huxunu tuxiyuyari kuraruyari 'utɨma meta kuraru 'amatayewa 'utɨma. Ne wa'utɨa nekaniumiekaitɨni, hipame teɨteri hixɨapa memɨ'axe newarawitɨtɨ.
NEH 12:39 Kitenie 'Epɨrahini mɨtitewa heima tekaniuyekɨne meta Ketsahana heima, meta kitenie Tsapari mɨtitewa heima, tuxiyu Kananeri mɨtitewa hetsie meta tuxiyu Xeitsienituyari mɨtitewatsie meta Muxatsi wakitenie mɨtitewatsie, 'atsita Kuyaxi kitenie mɨtitewatsie paitɨ tekaniye'axɨani. Mana tekaniwa'uni.
NEH 12:40 Kwikamete memayehuta tukita 'aixɨa mekateniuyu'uitɨani. Yaxeikɨata ne meta memanuyetei hixɨapa memɨ'axe 'aixɨa tekateniuyu'uitɨani,
NEH 12:41 meta mawari wewiwamete 'Eriyakini, Matsehiyaxi, Minikamini, Mikahiyaxi, 'Erihuhenahi, Tsakariyaxi, Kananiyaxi,
NEH 12:42 Matsehiyaxi, Tsemahiyaxi, 'Eriyatsaxi, 'Utsihi, Kuhanahani, Marikiyaxi, 'Erami meta 'Etsexi, mekateniukayuitɨwakaitɨni meta mekaniutikwikakaitɨni yutɨrɨkarima, 'Itsirahiyaxi mɨtiwa'aitɨa pɨhɨkɨtɨkai.
NEH 12:43 Mɨkɨ tukaritsie mawari waɨkawa kaniuwewiyani meta 'ixɨarari mepuwewi Kakaɨyari temawierika muwarupitɨakɨ. Metatsiere 'ukarawetsixi meta tɨɨri mepɨte'uparewi. Yemekɨ waɨkawa temawierika Kerutsareme puxuawekai teewapaitɨ mepɨ'enieriekai.
NEH 12:44 Mɨkɨ tukaritsie, mekaniutihɨawarieni 'imikierite mɨtiwati'utsiwa memɨhɨritɨarieni, matɨari mɨtiukaxuxuawere, tamamatatsie timieme. Mɨkɨ naitsarie mepɨtehatɨtɨkɨkani mɨraka'etsitɨre timieme kiekarite 'aurie, 'inɨari niukiyari kemɨti'aita, mawari wewiwamete wahetsiemieme meta rewitsixi. Teɨteri Kura kwieyaritsie kiekatari waɨkawa mekaniyutemamawiekaitɨni mawari wewiwamete meta rewitsixi wahetsiemieme kememɨte'uximayakai,
NEH 12:45 mɨkɨ wahetsiemieme kememɨte'u'aitakai Rawiri meta nu'aya Tsarumuni mɨpaɨ mekateni'uximayakaitɨni Kakaɨyari hetsiemieme meta 'itiya hepaɨtsita mekateni'uximayakaitɨni, kwikamete meyɨnɨtɨ meta kitenie tehɨwemete.
NEH 12:46 Mɨixa wiyari panuyemie kepauka Rawiri muyeikakaitsie meta 'Atsahapi, 'ana mepɨte'ukatsutɨa mewarexeiyatɨ kwikamete wa'ukiyarima, nɨawari memutikwika meta pamɨpariyutsi memipitɨa Kakaɨyari.
NEH 12:47 Tsuruwaweri muyeikakaitsie meta Nehemiyaxi, 'ixaheritsixi yamepɨteyetuayakai ketipaɨmetɨ memutikwika mɨtiwahetsiemieme meta kitenie tehɨwemete. Metatsiere 'imikierite mekaniyetuayakaitɨni rewitsixi wahetsiemieme, mɨkɨta rewitsixi 'Aruni niwemama mepɨtewayetuiriwakai ketipaɨmetɨ mɨtiwahetsiemiemetɨkai.
NEH 13:1 Mɨkɨ tukaritsie teɨteri wahɨxie kanakaterɨwarieni Muitsexi xapaya 'inɨari niukiyari maye'uxa, mana kaniukaxeiyarieni kename 'amunitsixi meta muhawitsixi mekawapitɨakakekai Kakaɨyari teɨterimama wahamatɨa,
NEH 13:2 memɨkatewarumikɨ meta memɨkawaruharitɨakɨ makumawetsie. Meta 'akuxi matsi Warami memɨte'upitɨakɨ mɨwakewaiyakɨ, peru ke'axatemɨ'itɨarienikekai takakaɨyari pipataxɨ 'aixɨa pɨtatsi'uyuri pɨta.
NEH 13:3 Hikɨ me'i'enieka 'inɨari niukiyari kemainekai, 'ana 'ixaheritsixi watsata mekaniwarayenɨ'ani yunaime kemɨ'ane yu'ukiyarima memɨwarexeiyakai teewapai kiekatari.
NEH 13:4 Mɨpaɨ katiyɨwekaku 'akuxi, mawari wewiwame 'Eriyatsiwi mɨhɨritɨarie Kakaɨyari tukita timieme mɨtiuyepitɨkatsie, Tuwiyaxi kaniutimareta,
NEH 13:5 kii kanixatɨani 'apakame. Muwa pɨtiti'utsiwakai 'imikierite, 'ɨkwa, piinite tita tukita mɨtiyukumaɨwa, tamamatatsie mieme xewitɨ mɨtiyetuiwa: tɨriku, kaxie winuyari meta hatseiti rewitsixi wahetsiemieme, kwikamete meta kitenie tehɨwemete, meta mɨtiyetuiwa mawari wewiwamete wahetsie timieme.
NEH 13:6 Ne 'ana Kerutsareme nepɨka'uyeikakai, xeitewiyari heimana tamamata heimana huta wiyaritsie ti'aitakaku 'Aritakexiketsi, Wawiruniya kwieyaritsie ti'aitame, ne 'ana nepetɨa ti'aitame hetsɨa. 'Arike yapaɨmexɨa wiyari 'anuyeyaku, ti'aitame netsi'upitɨaku,
NEH 13:7 nekanakunuani Kerutsareme, hikɨ 'ana nekatinetimani 'Eriyatsiwi ke'axamɨtiuyuriekai Tuwiyaxi muxatɨakɨ kii Kakaɨyari tukieya takwayaritsie 'uweme.
NEH 13:8 Mɨkɨkɨ waɨkawa nepuyeha'a kiita nepɨtiwayexɨri naime Tuwiyaxi tipiiniteya.
NEH 13:9 Hikɨta nepɨtiuta'aitaxɨ kii mɨ'itiyanikɨ meta muwa mɨreutapiyanikɨ piinite mɨtipatsietɨka Kakaɨyari tukieyata timieme, 'imikierite meta 'ɨkwa.
NEH 13:10 Metatsiere yanepɨretima kename rewitsixi tita mɨtiwahetsiemieme mekateyetuiriyarɨwakai, meta kename rewitsixi meta kwikamete memɨhɨritɨariekai tukita memɨte'uximayakakɨ meheutayeixɨakai yukwietsie.
NEH 13:11 'Ana nepɨwarutati memanuyetei, mɨpaɨ nepɨtiwarutahɨawixɨ: «¿Titayari Kakaɨyari tukieya yuxaɨta xete'uku'eiri?» Hikɨ nekaniwarukuxeɨrieni meta kememɨte'uximayakai mɨpaɨ nekatiniwaru'uitɨani.
NEH 13:12 Yunaitɨ Kura kwieyaritsie kiekatari kiita mɨtiwati'utsiwatsie mekateni'atɨani tamamatatsie mieme xeime memɨteyetuaya, tɨriku, kaxie winuyari meta hatseiti.
NEH 13:13 Mɨkɨ kiite mɨtiwati'utsiwa nekaniwaruhɨritɨani mawari wewiwamete Tseremiyaxi, ti'utɨwame Tsaruki, meta rewi tewiyari Perahiyaxi, waparewiwame nekaniutahɨawe Kanahani Tsakuxi nu'aya Mataniyaxi teukarieya. Mɨkɨ yunaitɨ 'aixɨa mekateniu'iyarikaitɨni, meta mɨkɨtsiere memɨtewatapitɨwa mekanihɨkɨtɨkaitɨni.
NEH 13:14 «'Ikɨ naime ketina'eriwani, nekakaɨyari, 'aixɨa keneneyurieka, pepɨkaratɨtɨmaiyani ke'aixɨa nemɨtiuyuri 'atukitsie mieme meta pemayexeiyarieka hetsiemieme».
NEH 13:15 'Ana mɨtiyehane Kura kwieyaritsie mɨpaɨ netiniuniere, xawatikɨ hipatɨ kaxie takari mekaniutiketsinakaitɨni, hipatɨta muratsixi wahetsie mekateni'ikatatɨwekaitɨni, tɨriku 'anahɨatɨkaime, kaxie winuyari, kaxie takari, xapa takariyari meta naime tita mɨti'ikatsiwa Kerutsareme mekatenetɨkɨkaitɨni. 'Ana nekaniwarutatieni memɨtetuakaikɨ 'ikwaite mɨkɨ tukaritsie.
NEH 13:16 Metatsiere Tiru kiekatari Kerutsareme memɨtitekai, kiekaritsie tsapari mekaniwa'atɨwakaitɨni, huriyutsixi mekaniwatuiriekaitɨni xawatikɨ.
NEH 13:17 Hikɨ Kura kwieyaritsie kiekatari wahetsiemieme memanuyetei 'ukirawetsixi nekaniwarutatieni, mɨpaɨ nekatiniwarutahɨawe: «Xeme 'axaxekateniyurieka xawati kapatsiekame xemayeitɨwakɨ.
NEH 13:18 Mɨpaɨ mekateniuyurieni xe'ukiyarima meripaitɨ, 'ayumieme takakaɨyari katatiniukwinitɨani meta 'ikɨ kiekari. ¿Kamɨtsɨ yaxeteha'eriwa tawarita 'Ixaheri hetsiemieme Kakaɨyari mɨyeha'anikɨ xawati kapatsiekame xemayeitɨwakɨ?»
NEH 13:19 Hikɨ nekatiniuta'aita Kerutsareme kitenieyaritetsie mɨreunamiexɨanikɨ, xawati tukariyari kayutsutɨawekaku, mepɨkateheuyepiwanikekai 'atsita 'uxa'ariekake. Metatsiere hipame memɨnete'uximayatsirie kitenie nepɨwaru'uitɨaxɨa nixeimetɨma 'ika memɨkapitɨakakɨ meutahatɨarieni.
NEH 13:20 Heiwa yatɨ hutakɨa tetuayamete me'ayemɨiretɨ Kerutsareme warie mekaniukatariyarieni.
NEH 13:21 Mɨpaɨ nekatiniwarutatieni: «Kuraru warie xepɨkayukuhayeikawani. Tawari xɨka mɨpaɨ xe'uyɨni, ne nepɨxe'anutaxɨrieni». 'Anatɨtɨ mɨtiyehane tawariri xawatikɨ mepɨkaheukɨkɨnixɨa.
NEH 13:22 Hikɨ rewitsixi nekaniwaruta'aitɨani memɨyu'itienikɨ meta memɨtetahɨnikɨ kitenie, xawatikɨ patsiekame memayeitɨakakɨ. «'Ikɨ naime ketina'eriwani, nekakaɨyari, meta waɨkawa pemɨti'akanaki'eriekɨ, kenenenenimayaka».
NEH 13:23 'Ana mɨtiyehane tsiere nepɨretima hipatɨ huriyutsixi 'ukari memɨwaruwitɨkɨkai 'Atsiruri kiekatari, 'Amuni kiekatari meta Muhawi.
NEH 13:24 Waniwema hixɨapa me'atɨ 'Atsiruri niukiyarikɨ mekaniutiniukakaitɨni meta yatɨni hipame waniukikɨ, huriyutsixi waniukikɨ mekaniuwawetɨ.
NEH 13:25 Hikɨ nekaniwarutatieni yanekatiniwarutahɨawe 'axamemɨ'itɨarienikɨ, hipame nekaniwarutiwani, meta wakɨpate nekaniukahuna, meta waɨriyarika nekaniwarupitɨani yamemɨtiyuanikɨ Kakaɨyari hɨxie. Mɨpaɨ nekatiniwarutahɨawe: «Yaxepɨkatenaki'erieka xeniwema 'ukari 'iya waniwema memɨwawitɨtɨweni, meta xeme, meta xeniwema 'ukitsi, waniwema 'ukari mepɨkawawitɨtɨweni.
NEH 13:26 ¿Xekatemate mɨpaɨ yɨanetɨ Tsarumuni 'axakatiuyuri 'Ixaheri kwieyaritsie ti'aitame? Nixeime kwieyaritsie tawarita mɨpaɨ 'anetɨ ti'aitame pɨka'anukake: Kakaɨyari pinaki'eriekai, ti'aitame peyeitɨa 'Ixaheri kwieyaritsie. Peru mɨkɨ 'ɨitamama 'ukarawetsixi 'ateewa kiekatari mekateniuyurieni Tsarumuni ke'axamɨtiuyuri.
NEH 13:27 Xemeta tsiere mɨpaɨ 'axaxekateniuyurieni xewawitɨtɨwetɨ 'ukari 'ateewa kiekatari».
NEH 13:28 Kuyara niwemama xewitɨ, mawari wewiwamete tiwa'aitɨwame 'Eriyatsiwi nu'aya, nepitanɨ'a nehamatɨa mɨka'uyeikanikɨ Tsamɨwarati huruni tewiyari mumunieyatɨkaikɨ.
NEH 13:29 «Nekakaɨyari, keniwara'eriwani mawari wewiwamete mekapatsietɨkaime memayuyeitɨa meta tɨratu memiwewi mawari wewiwamete meta rewitsixi tixaɨtɨ memɨkatehayeitɨa».
NEH 13:30 Ne mɨpaɨ nekatiniwaru'itieni huriyutsixi teewakiekatari nekaniwarayenɨ'ani, meta mawari wewiwamete meta rewitsixi yanepɨtiwaru'uitɨa kememɨte'uximayakai.
NEH 13:31 Metatsiere 'aixɨa nekatiniwaru'uitɨani kɨyexi mɨyetuiwa hepaɨtsita kemɨ'ane tukaritsie memiyetuayani, metatsiere matɨari timieme 'ikwaxi mɨtiyetuiwa hepaɨtsita 'aixɨa nekatiniwaru'uitɨani. «Nekakaɨyari, kenena'eriwani, 'aixɨa keneneyurieka».
EST 1:1 Hikɨ ti'aitame 'Atsuheru, pɨti'aitakai xeitsienituyari heimana xeitewiyari heimana 'atahuta (127) kwieyaritetsie, 'akaniyeukaitɨni Hiriya mɨrakutewatsie meta Kutsi kwieyaritsie paitɨ ye'atɨkaitɨ.
EST 1:2 'Atsuheru kiekarieya 'aixɨa mɨrekukurarutuiyarie Tsutsa mɨrakutewatsie 'ukaitɨ katini'aitakaitɨni.
EST 1:3 Hairieka wiyaritsie ti'aitatɨ 'ixɨarari kaniuwewieni yunaitɨ te'aitamete memiparewie wahetsiemieme, mekanekɨkɨnixɨani kuyaxi wa'ukiyarima Peritsiya kwieyaritsie kiekatari meta Meriya miemete, meta 'auriena memuti'u meta kwieyarite kepaɨmetɨ mana mɨrawiyatɨkatei meta kuwexinaruritsixi,
EST 1:4 xeitsienituyari heimana nauka tewiyari tukari 'aye'aku, yunaime wahɨxie katiniwaruxeitsitɨani waɨkawa witsiti'anenekame kemɨrexeiyakai meta mariwemekɨ kemɨti'aitametɨkai.
EST 1:5 Mɨkɨ naitɨ ranuyeyaku, tawarita ti'aitame 'ixɨarari kaniuwewieni, 'atahuta tukari kaniuyurieni, Tsutsa kiekariyari 'aixɨa mɨrekukurarutuiyarie memɨtama wahetsiemieme, waɨkawa memɨmatiwa meta waɨkawa memɨkamatiwa yunaitɨ. 'Ikɨ 'ixɨarari kaniuwewiyani paratsiyu hixɨapapaitɨ mɨra'iteɨritsietsie,
EST 1:6 mɨkɨ witsitiniyuxexeiyakaitɨni rinu 'ixurikiyari meuwɨkai tuxatɨ meta yuyuawitɨ, 'ayukawiyatɨ rinu mutuxa meta 'ixuriki mɨtaɨraɨye matɨa, mɨkɨ karena kaunariyari hepaɨ pɨ'anekai pɨratakɨ wewiyatɨ tete mukawetɨka witsimɨtiyuxexeiyatsie rawiwiyatɨ. Mana tsiere kanixuawekaitɨni 'ɨpari 'amɨpapa hurukɨ meta pɨratakɨ wewiyatɨkaitɨ meta takwa pakumanekai tetexi witsimɨ'anene, perɨra teteyari meta hipatɨ tetexi witsimɨ'anenekɨ.
EST 1:7 Huru tekɨxiyari xexuitɨ yɨkɨ pɨtiyuxexeiyatɨkatei, kaxie winuyari waɨkawa mɨraye'axe kaniukatuariwakaitɨni muxuawekaikɨ, mɨkɨ ti'aitame pɨtiwamikwakai waɨkawa mɨyɨwekaikɨ.
EST 1:8 Yunaitɨ teɨteri memuta'inierie mekanipitɨariekaitɨni tsepa kememɨteheu'iku, nawayamete mɨpaɨ memɨtehetahɨawariekɨ ti'aitame niukieyakɨ mekanikatu'akaitɨni kepaɨmeme memeuyehɨakai.
EST 1:9 'Uka ti'aitame Watsiti yuhetsiemiemeta 'ixɨarari kaniuwewieni 'ukarawetsixi wahetsiemieme ti'aitame 'Atsuheru paratsiyuyata.
EST 1:10 'Atahuta tukaritsie, winukɨ ti'aitame 'Atsuheru kwinimieme katiniyutemawiekaitɨni, mɨpaɨ katiniwaruta'aitɨani 'atahuta memɨte'i'uximayatsiriekai —Mehumani, Witsita, Kaxiwuna, Wihita, 'Awakita, Tsetaxi meta Kaxikatsi—
EST 1:11 hɨxiena mekehewitɨnike 'uka ti'aitame 'anakuruname, 'auriena makanikɨ witsitiyuxexeiyatɨ memɨwaxeiyanikɨ teɨteri meta te'aitamete, mɨkɨ yemekɨ witsitini'ɨimarikaitɨni.
EST 1:12 Peru kepauka te'uximayatamete 'uka mɨpaɨ memɨte'utahɨawixɨ ti'aitame kemɨtiwareta'aitɨakai, peru 'uka ti'aitame pɨka'uyuwaɨri mɨyemiekɨ hetsɨana. Ti'aitame 'ana matsi waɨkawa kaniuyeha'ani.
EST 1:13 Yapauka ti'aitame temaiwawemete kaniwarutakwewieni 'inɨari niukiyari memakumate, 'ana mɨpaɨ tiniɨyɨximekaitɨni kepauka ti'aitame 'aixɨa mɨtiyurieni, mɨkɨ kaniwaruti'iwawiyakaitɨni temaiwawemete.
EST 1:14 'Ahurawa memuti'ukai mekanihɨkɨtɨkaitɨni: Kaxitsena, Tsetaxi, 'Arimata, Taritsi, Meretsi, Maritsena meta Memukani, 'atahutatɨ te'uximayatamete Peritsiya meta Meriya kiekatari mekanipitɨariekaitɨni ti'aitame hamatɨa memɨtekuxatanikɨ meta mɨkɨ meteni'uximayakaitɨni ti'aitame hetsiemieme waɨkawa mɨra'aitsietsie.
EST 1:15 Ti'aitame mɨpaɨ katiniwaruta'iwawiya: —¿Ke'iyurieni 'uka ti'aitame Watsiti ti'aitame te'uximayatsiriwamete mɨkawaranu'enikɨ ti'aitame tiwa'aitɨakaku, 'inɨari niukiyari kehaine?
EST 1:16 Ti'aitame hɨxie meta 'iparewiwametemama, Memukani mɨpaɨ kaniutayɨni: —'Uka ti'aitame Watsiti 'ekɨ ti'aitame xeikɨa 'axapɨkamatsi'uyuri, matsita yunaime 'ahetsɨa memɨte'uximaya meta kwieyarite keyupaɨmetɨ 'ena memɨte'awiya.
EST 1:17 Yunaitɨ 'ukarawetsixi mɨpaɨ mekatenetimaikuni 'uka ti'aitame kemɨtiuka'iyari, 'ana yɨkɨnama mekaniwatinanaimakuni, mɨpaɨ me'utiyuatɨ: “Ti'aitame 'Atsuheru katiniutanɨ'ani 'uka ti'aitame Watsiti hetsɨana munuanikɨ, peru mɨkɨ pɨkahenu'eni”.
EST 1:18 Kepauka 'ukirawetsixi wa'ɨitama Peritsiya meta Meriya kiekatari memɨtehetimani 'uka ti'aitame kemɨtiuka'iyari, yaxeikɨa mekateniwa'eiyakuni 'ahetsɨa memɨteta'uximayata. Peru mɨkɨ pɨkareuyunuani tenanaimarietɨ.
EST 1:19 »Tamɨtsɨ xɨka matsikunanakeni, xapa pemɨtawewieni mana mɨraka'utsieni xewitɨ pɨkayɨweni mipatanikɨ Peritsiya meta Meriya 'inɨari niukiyari kemɨre'uxa: kename 'ahɨxie ti'aitame 'Atsuheru hatsuaku Watsiti kaheyuhekɨatani, meta 'uka ti'aitame kemɨtihɨritɨariekai xewitɨ pɨta ke'anukakeni matsi 'aixɨa tiuka'iyaritɨ.
EST 1:20 Mɨpaɨ mɨkɨ xapa kepauka memeitimani hakewapaitɨ temeuye'atɨka, yunaitɨ 'ukarawetsixi yɨkɨnama 'aixɨa mekateniwaxeiyakakuni, tsepa memɨmamariwawe meta tsepa memɨkamamariwawe».
EST 1:21 Ti'aitame meta hetsɨana memɨte'uximaya mɨkɨ 'ɨxatsi kaniwarunake, mɨpaɨ katiniuyurieni Memukani kemainekai,
EST 1:22 xapa kaneutanɨ'axɨani naitsarie kwie keyeumetsie mɨti'aitakai, keyupaɨmetɨ mana memɨte'awiyakai wa'utɨarikakɨ, kiekari kemɨtiukumanekai waniukikɨ raye'utɨkaime, mɨpaɨ tiwarahɨawetɨ waniukikɨ kiekari mukumanetɨkatsie yuxexuitɨ 'ukitsi yu'ɨitama yutɨɨriyama meketewareu'aitɨaka.
EST 2:1 Mɨixa tukari 'anukayaku, ti'aitame 'Atsuheru 'uhaxɨapieka, kanaye'erieni Watsiti kemiyuriekai meta kemɨtiuyuriekai kemɨtiuxatsiekai hetsiena mieme.
EST 2:2 Hikɨ teparewiwamete te'uximayatamete mɨpaɨ mekaniutiyuani: «Meke'utiwawieni naitsarie 'ɨimarixi witsimemɨte'ɨimaritɨka ti'aitametsie mieme.
EST 2:3 Ti'aitame kiekari mukumanetɨkatsie kewaru'uitɨani memɨwatiwaunikɨ, 'ukari witsimemɨte'ɨimarixi memɨwakuxeɨrienikɨ, Tsutsa kiekariyaritsie 'ukarawetsixi wakiita. Mɨkɨ Kekahi meke'uhɨritɨani mɨwa'ɨwiyanikɨ, ti'uximayatame mɨkaneɨke ti'aitame hetsiemieme 'ukarawetsixi wahɨwemekɨ ti'aitame hetsɨa miemete, kewaruti'uayemani witsimemɨteyuxexeiyanikɨ.
EST 2:4 Ketiuta'aita Watsiti hetsiemieme 'uka ti'aitame kemɨ'ane matsi waɨkawa minake». Mɨkɨ niuki kaninakire ti'aitame, mɨpaɨ katiniuta'aita.
EST 2:5 Tsutsa kiekariyaritsie niukateitɨni xewitɨ huriyu tewiyari Wenikamini nuiwarieya hetsiemieme, Maxirukeyu titewatɨ Yahixi nu'aya, Tsimi teukarieya, Kihitsi tutsieya,
EST 2:6 muwiyariekai Kerutsareme mɨyehanie kepauka Nawukurunutsuxi, Wawiruniya kwieyaritsie ti'aitame, Kekuniyaxi mehatsie, Kura kwieyaritsie ti'aitame.
EST 2:7 Maxirukeyu yutatatsi niweya kanexeiyakaitɨni Karatsa titewakame. Mɨkɨ 'ɨimari 'Etsitexi kɨɨta kanimatiwakaitɨni, kanitaweriyakaitɨni kaninutuitɨkaitɨni paapaya maamaya mekaniukumawerekaitɨni, witsitini'ɨimarikaitɨni witsitiniyuxexeiyakaitɨni. Paapamama me'ukwiku, Maxirukeyu kanitaweriya yuniwe kanayeitɨakaitɨni.
EST 2:8 Kepauka mukuxaxatsiwakai xapa ti'aitame kemainekai, yumɨiretɨ 'ukari mekaniukuxeɨriyani Tsutsa kiekariyaritsie Kekahi kaniwa'ɨwiyakaitɨni. 'Etsitexi meta kanewitɨkieni ti'aitame paratsiyuyata, Kekahi kaniyetuiriyarieni, mana mɨkɨ 'ukari 'ɨimarixi wakii kanihɨritɨariekaitɨni.
EST 2:9 'Etsitexi Kekahi 'aixɨa katinixeiyakaitɨni. 'Ayumieme mɨkɨkɨ kaniuyukumexɨitɨani witsimɨtiyuxexeiyanikɨ 'uayete katinimikwakaitɨni meta 'ikwai 'aixɨa ti'anenekame. Kaniwaranuyehapani 'atahuta 'ukari memita'ɨwiyanikɨ mete'i'uximayatsirietɨ, paratsiyuta 'ɨimarixi 'aixɨa memɨ'anene, meta muyekukutsuni 'aixɨa tiuye'anekame kaniuxatɨarieni 'ukarawetsixi wakiita.
EST 2:10 'Etsitexi pɨkayutaxa hakewa mekiekametɨkai meta yu'ukiyarima, Maxirukeyu me'imaiyakaikɨ.
EST 2:11 Maxirukeyu yakatiniutiyeikakaitɨni hareni hɨxie, timaimɨtɨ 'Etsitexi kemɨraka'iyuniwakai meta kememɨte'ixeiyakai.
EST 2:12 Hikɨ ti'aitame 'Atsuheru hetsɨa meutahanikɨ, tamamata heimana huta metseri kaniyurimɨkɨ 'aixɨa yuyurietɨ kemɨre'uxa: 'ataxewime metseri mixaxi hatseitiyarikɨ meta 'ataxewime metseri witsimu'ɨatɨkakɨ kaniyu'uayemakamɨkɨ.
EST 2:13 Mɨkɨ naime raye'atɨame, 'uka ti'aitame hɨxie kaniyuhekɨatamɨkɨ, kaniyɨwemɨkɨ hareni timieme mɨrepini paratsiyupaitɨ, tita mɨreuyehɨaka.
EST 2:14 Yɨwikɨta neta'axekaitɨni paratsiyuta, ximeri kani'axekaitɨni Tsatsikaxi 'i'ɨwiyakaku, ti'uximayatame ti'aitame tuxexerimama wa'ɨwiyame. Pɨkayuhekɨatakai ti'aitame hɨxie, 'itihiwe'erienikɨ titanɨ'airienikɨ.
EST 2:15 Kepauka 'Etsitexi 'Awikahiri niweya, Maxirukeyu mitaweriyaxɨ yutatatsi niweya, kanaye'ani muyuhekɨatakɨ ti'aitame hɨxie, mɨkɨ Kekahi ti'aitame hetsiemieme 'ukarawetsixi wa'ɨwiyame tita mɨtiwaxatɨakai tixaɨtɨ pɨkatiuta'iwau. 'Ana yunaitɨ mekanihɨxiyakaitɨni me'ixeiyatɨ.
EST 2:16 'Anari 'Etsitexi kanewitɨkieni paratsiyuta, ti'aitame 'Atsuheru hɨxie, tamamata metseritsie, tewe metseriyaritsie, 'atahutarieka wiyaritsie ti'aitakaku.
EST 2:17 Ti'aitame 'Etsitexi kaniutihiwe'erieni kehipame 'ɨimarixi, mɨkɨ 'aixɨa katiniuxeiya keyuri hipame 'ukari. Hikɨ kuruna kanenamanirieni 'uka ti'aitame kanayeitɨani Watsiti hetsiemieme.
EST 2:18 Ti'aitame 'ixɨarari kaniuwewieni 'Etsitexi hetsiemieme meta yunaitɨ memiparewiekai mete'i'uximayatsirietɨ wahetsiemieme. Mɨpaɨ katiniwaruta'aitɨani kwieyarite mamanetɨkatsie, 'ixɨarari memukuwewiexɨanikɨ xeitukari, 'imikierite katineutanɨ'axɨani naitsarie 'aixɨa 'anemekɨ.
EST 2:19 Mexi meyuxeɨriekai hutarieka miemete 'ukari, Maxirukeyu ti'aitame kitenie kaniutakateitɨni.
EST 2:20 'Etsitexi yaxeikɨa 'atsikapainekai kemɨ'ane memɨpaapamamatɨkai meta hakewa mekiekametɨkai, Maxirukeyu kemɨrehɨawekai, yaxeikɨa Maxirukeyu kaneu'eniekaitɨni meripai hepaɨ kepauka 'iweriyakaku kemɨrei'eniekai.
EST 2:21 Mɨkɨ tukaritsie, Maxirukeyu ti'aitame kitenie 'utakaiku, yuhutatɨ mekaniuyeha'ani ti'aitame parewiwamete Wihitani Teretsi matɨa ti'aitame hetsɨa miemete, memɨte'ɨwiyametetɨkai, mɨpaɨ mekaniutiyuani kename ti'aitame 'Atsuheru memieni.
EST 2:22 Maxirukeyu retimaika kemɨtiuxatsie, 'uka ti'aitame 'Etsitexi mɨpaɨ katiniutahɨawe, mɨkɨta ti'aitame mɨpaɨ katiniutahɨawe Maxirukeyu hetsiemieme.
EST 2:23 Kepauka mɨtiuti'iwauritɨxɨ mɨkɨ, mɨpaɨ mekatenetimani kename tiyuritɨkai, yuhutatɨ ti'aitame te'uximayatsiriwamete kɨyetsie mekanikaxuiyaxɨani. 'Ikɨ naitɨ katinaka'utsieni kepauka mɨraka'utɨarietsie ti'aitame hɨxie.
EST 3:1 Mɨyatiuyɨkukeri ti'aitame 'Atsuheru 'Amani waɨkawa mariweme kanayeitɨani Hamerata nu'aya, 'Akaki nuiwarieya, kanipitɨani hetsɨana mɨti'uximayakakɨ matsi waɨkawa katinipitɨani keyuri hipame.
EST 3:2 Yunaitɨ te'uximayatamete paratsiyu kitenie miemete ti'aitame muwayekatsie, mekaniukatunuma'uwekaitɨni 'Amani hɨxie, mariweme mekanayeitɨwakaitɨni, ti'aitame mɨpaɨ mɨtiu'aitakaikɨ. Peru Maxirukeyu hɨxiena pɨka'ukatunumakiekakai meta mariweme pɨka'eriekai.
EST 3:3 Hikɨ paratsiyuta memɨte'uximaya ti'aitame kitenie memɨhɨritɨariekai, Maxirukeyu mɨpaɨ mekateniuta'iwawiya: «¿Titayari ti'aitame kemaine yapekatikamie?»
EST 3:4 Tukari meukayunetsie mekanitate'akaitɨni mɨixa. Peru mɨkɨ pɨkawa'eniekai. 'Ayumieme mekanitaxata 'Amani hetsɨa mixeiyakɨ Maxirukeyu kemɨyɨanekai, mɨkɨri kaniyutaxatakaitɨni kename huriyu tewiyaritɨkai.
EST 3:5 Kepauka 'Amani Maxirukeyu muxei hɨxiena mɨka'ukatunumakiekakaikɨ meta mariweme mɨka'eriekaikɨ kaniuyeha'ani.
EST 3:6 Kepauka 'Amani mɨretima Maxirukeyu hakewa mekiekametɨkai, katiniuhayewa yuxaɨtame 'imienike kanitiwauni yunaime Maxirukeyu teɨterimama wahetsɨa, tatsuari huriyutsixi 'Atsuheru mɨra'aitakaitsie memɨtamakai.
EST 3:7 Hikɨ mexɨakame metseriyaritsie nitsahani tamamata heimana huta wiyari 'Atsuheru ti'aitakaku, mekaniuyuta'iwa 'Amani hɨxie, yamemɨtehetimanikɨ kemɨ'ane metseritsie meta tukaritsie mɨtinake, huriyutisixi memɨkwi'iwakɨ. Hikɨ 'inɨari memuwewi katinikanake tamamata heimana huta, 'araxi metseriyaritsie.
EST 3:8 Hikɨ 'Amani ti'aitame 'Atsuheru mɨpaɨ katiniutahɨawe: —'Ena mepuxuawe hipatɨ teɨteri naitsarie metaxɨrietɨ kiekari mukumanetsie watsata pemɨra'aitatsie, 'inɨari niukiyari kememɨtehexeiya kememɨte'uhu yɨkɨ pɨ'ane, hipatɨ kememɨteheixeiya. Yamepɨkatekahu 'inɨari niukiyaritsie kepemɨti'aita, 'aixɨa pɨka'ane memu'uwani me'ayenenieretɨ.
EST 3:9 Xɨka matsinakeni xapa keneutawewi raka'ukame memɨkwi'iwakɨ, ne nekaniyetuamɨkɨ te'uximayatamete wahɨxie haika tsienituyari heimana xeitewiyari heimana tamamata miriyari (330.000) kiruyari pɨrata, tumini mɨwati'utsiwa mɨyuhayewakɨ.
EST 3:10 Hikɨ ti'aitame hanira tseyuyari yumamatsie 'anutihɨnaka 'Amani kaniu'ɨitɨani Hamerata nu'aya, 'Akaki nuiwarieya meta huriyutsixi mɨwaraye'unie.
EST 3:11 Ti'aitame 'Amani mɨpaɨ katiniutahɨawe: —'Atumini kena'ɨtɨ kemɨmatinake yakeniwareyuri mɨkɨ teɨteri.
EST 3:12 Mexɨakame metseritsie tamamata heimana hairieka tukaritsie mekaniuta'inierieni te'utɨwamete ti'aitame hetsɨa memɨte'uximaya. Mekatenaka'utɨani kiekari mukumane wa'utɨarikakɨ meta waniukikɨ kemɨtiwa'aitɨakai, 'Amani ti'aitame mɨtiwa'aitɨakai kwie mukumanetsie te'uximayatamete yɨkɨ memɨte'uniuka muwa memɨte'uximayakai kuwexinaruritsixi meta wa'ukiyarima. Naitɨ katinaka'utsieni kename ti'aitame 'Atsuheru haine, meta kanititseyumani ti'aitame hanirayakɨ.
EST 3:13 Hikɨ xapa me'utiwewieka tupiritsixi mekaniwareutanɨ'axɨani, kwie mukumanetsie mɨpaɨ mekateniwarunɨ'ani memɨwakwinikɨ yunaime huriyutsixi temari, 'ukirawetsixi, 'ukarawetsixi, tɨɨri meta wapiini memɨtewanawairienikɨ xeitukaritsie, tamamata hairieka tukaritsie tamamata heimana hutarieka metseritsie, tatsɨari 'araxi metseriyaritsie.
EST 3:14 Kwie mukumanetɨkatsie 'inɨari niukiyari 'ɨkiyari mepexeiyatɨkani, mɨpaɨ memɨteyukuxaxatɨwanikɨ memɨyukuha'aritɨwanikɨ mɨkɨ tukaritsie.
EST 3:15 Hikɨ tupiritsixi mekaneutayeixɨani ti'aitame yatiwaruta'aitɨaku, meta tsiere mɨkɨ xapa kaniutaxatsieni Tsutsa kiekariyaritsie. Hikɨ ti'aitame 'Amani hamatɨa me'anukayaxeka mekananu'ieni, mexi Tsutsa kiekariyaritsie mekayumaiwawekai.
EST 4:1 Kepauka Maxirukeyu mɨretima kemɨtiutainekai, yukamixa kaneukatsana, hiwerika kamixayari kananakatɨni meta naxi kaniuyukawiwirieni, kiekaritsie kaniuyeikakaitɨni karima 'utatsuatɨ.
EST 4:2 Paratsiyuta mepɨkapitɨariekai hiwerika kamixayari me'anakatɨtɨkaitɨ, ti'aitame kitenie xeikɨa kaniye'axekaitɨni.
EST 4:3 Naitsarie mɨra'aitakaitsie kiekaritetsie, mana waɨkawa huriyutsixi mekaniyuhakiekaitɨni mete'uka'eniwatɨ me'utitsuatɨ. Mɨkɨ yuwaɨkwatɨ hiwerika kamixayari me'anakatɨtɨkaitɨ, naxipa mekanitihipitekaitɨni.
EST 4:4 Kepauka 'uka ti'aitame 'Etsitexi hɨwemete 'ukari meta ti'aitame te'uximayatsiriwamete memu'axɨa mekatenitaxatɨani kemɨtiutainekai, mɨkɨ waɨkawa kaniuyukahiwerieni, hikɨ Maxirukeyu kamixate katinenɨ'airieni menakatɨnikɨ hiwerika kamixayari mɨka'anakatɨkɨnikɨri, peru mɨkɨ pɨka'itanaki'eri.
EST 4:5 Hikɨ 'Etsitexi Hataki katiniutanɨ'airieni, ti'aitame ti'uximayatsiriwame ti'aitame hetsiemieme mɨkeriekai mi'ɨwiyanikɨ, mɨpaɨ katinita'aitɨani meti'iwaunikɨ Maxirukeyu titakɨ mɨtiyu'iyaritɨa titayari mɨtiyuhiwerie.
EST 4:6 Hikɨ Hataki Maxirukeyu hetsɨa kaniye'ani, kiekaritsie kaniuyeikakaitɨni teɨteri memayutixexeɨriwatsie, ti'aitame kitenie hɨxie.
EST 4:7 Maxirukeyu katinitaxatɨani kemɨranuyeyakai, meta kanitaxatɨani kepaɨmeme 'Amani tumini mɨyetuakai tumini hɨweme hetsɨa huriyutsixi memɨkwi'iwakɨ.
EST 4:8 Kanihɨritɨani tsiere xapa Tsutsa kiekariyaritsie mɨyetuiya 'ɨkiyarieya, mɨkɨ mɨti'aitakai memɨkwi'iwakɨ, mɨkɨ 'Etsitexi meixeitsitɨanikɨ, mɨreitaxatɨanikɨ, meitatienikɨ ti'aitame hɨxie mɨtakenikɨ mitawawirienikɨ yuteɨterima wahetsie mɨtanuanikɨ.
EST 4:9 Hikɨ Hataki kanakunuani 'Etsitexi katiniutaxatɨani Maxirukeyu kemainekai.
EST 4:10 Hikɨ 'Etsitexi Hataki mɨpaɨ katiniuta'aitɨani Maxirukeyu mɨpaɨ mɨretahɨawekɨ:
EST 4:11 «Yunaitɨ ti'aitame hetsɨa te'uximayatamete meta kiekari mukumanetɨkatsie mɨpaɨ mepɨtemate, tsepa kemɨ'ane 'uki 'uka, ti'aitame ka'ita'inieyu, hɨxiena mɨye'ani takwa 'upaitɨ mɨyematsie, xei'inɨariyari xeikɨa kanixuaweni: Xɨka heutahani kanimieriemɨkɨ xeimieme. Kaniupitɨariemɨkɨ xeikɨa ti'aitame xɨka huru 'itsɨyari ratserieni 'atukarikɨ pɨmareuyehɨwirieni. Ne xeitewiyari heimana tamamata tukari panukamie ti'aitame pɨkaneretanɨ'airiewe hɨxiena nemɨtakenikɨ».
EST 4:12 Kepauka mɨretima Maxirukeyu 'Etsitexi kemainekai,
EST 4:13 hikɨ mɨpaɨ katininɨ'airieni: «Mɨpaɨ pepɨkareku'eriwani, 'ekɨ xeikɨa ti'aitame kiita pemayekakɨ xeikɨa pepɨtawikweni yunaime huriyutsixi watsata.
EST 4:14 Xɨka 'ekɨ kayuwatɨ petiuyerɨni, xaɨtsiepɨta kanayenemɨkɨ tatsixɨname huriyutsixi, peru 'ekɨ meta 'apaapa 'iwamama mekanikwikuni yunaitɨ. Xɨari yakɨ 'uwenitsie pepɨkanua xɨari mɨpaɨ temɨte'anuyekɨnekekaikɨ pepanukake».
EST 4:15 'Etsitexi Maxirukeyu mɨpaɨ katinenɨ'airieni 'iku'eiyatɨ:
EST 4:16 «Kenemieka mɨpaɨ ketineyuri keniwarekuxeɨri yunaime huriyutsixi Tsutsa kiekatari, para memeyuhakienikɨ nehetsiemieme. Haika tukari xepɨkatehekwaka xepɨkahehareka tukarikɨ meta tɨkarikɨ. Neta nepɨnehakieni neparewiwamete teyunaitɨ xehepaɨ. Kepauka nemɨraye'atɨani, ti'aitame hɨxie nepɨtakeni, tsepa 'inɨari mɨkahaine hepaɨ. Xɨka ne'umierieni, tsepa neketiumierie».
EST 4:17 Hikɨ Maxirukeyu heyaka yakatinikayani 'Etsitexi kemɨtita'aitɨakai.
EST 5:1 Hairieka tukaritsie, 'Etsitexi 'iwi 'amɨtewi witsimɨ'ane 'anakatɨka kaneyani paratsiyu kitenie kwitɨwa takwa mukumatsie, ti'aitame hɨxie. Ti'aitame muwa kanakateitɨni yu'uwenitsie, kitenie heuyenieretɨ.
EST 5:2 Kepauka 'uka ti'aitame 'Etsitexi muxei takwa 'uwekame, 'aixɨa 'anemekɨ kanixeiya huru 'itsɨyari kanitserieni. Hikɨ 'Etsitexi 'aniuyani huru 'itsɨyari kaniumayɨani.
EST 5:3 Hikɨ Ti'aitame mɨpaɨ katinita'iwawiya: —¿Ketita perayexeiya, 'uka ti'aitame 'Etsitexi? ¿Ketita pera'iwawa? Tsepa nemɨra'aita kemɨyewa hixɨapa 'akame nepɨmatsiyetuiriewe.
EST 5:4 'Etsitexi mɨpaɨ katinita'eiya: —Xɨka matsinakeni ti'aitame, kenemie hikɨ taikaiyaritsie 'ixɨarari 'ahetsiemieme nepewewieni meta 'Amani kena'inietɨ.
EST 5:5 Hikɨ Ti'aitame mɨpaɨ katiniuta'aita: —Xeiya 'Amani xekenewitɨyu 'Etsitexi temɨte'aye'atɨirienikɨ kaniutayɨni. Hikɨ ti'aitame meta 'Amani mekanekɨne 'ixɨararipa 'Etsitexi mɨwareta'iniekaikɨ.
EST 5:6 Kepaukari me'ietɨ ti'aitame tawarita, 'Etsitexi kaniuta'iwawiya: —Yakenetineutahɨawi tita pereuyehɨwa nepɨmatiyetuirieni. ¿Tita pera'iwawa? Tsepa kwie nemɨra'aita kemɨyewa hixɨapa 'akame nepɨmatsiyetuiriewe.
EST 5:7 'Etsitexi mɨpaɨ katinita'eiya: —Nemɨreuyehɨwa meta nemɨra'iwawa kanihɨkɨtɨni,
EST 5:8 xɨka 'aixɨa penetimaika, xɨka matsinakeni pemɨraye'atɨani nemɨreuyehɨwa meta nemɨra'iwawa, 'uxa'a pekanayenemɨkɨ 'Amani matɨa 'ixɨarari nemɨxewewirienitsie, 'anake yanekatinixetahɨawimɨkɨ.
EST 5:9 Mɨkɨ tukaritsie 'Amani kwinimieme tiyutemawietɨ newayeyani 'aixɨa tiku'eriwatɨ, peru kepauka Maxirukeyu muxei ti'aitame kitenie hɨxiena pɨka'anukuke meta nitɨma pɨka'uyɨyɨakakai, waɨkawa kaniuyeha'ani hetsiena mieme.
EST 5:10 Peru 'uyɨnɨtɨaka yukie kaneyani. 'Amani yuhamikuma kaniwaruta'inieni meta yu'ɨya Tseretsi,
EST 5:11 katiniwarutaxatɨani kemɨtixikutɨkai meta niwemama kememɨyupaɨmekai, ti'aitame kemɨtixeiyakai kemɨtinaki'eriekai naimekɨ kemɨrenukake ti'aitame hetsɨa te'uximayatamete waheimapai mɨkawenikɨ.
EST 5:12 Tawarita 'Amani mɨpaɨ kaniutayɨni: —Matsi ne xeikɨa nekanihɨkɨtɨni 'uka ti'aitame 'Etsitexi muta'ini 'ixɨararipa ti'aitame mewewiritsie. Metatsiere 'uxa'a kaneneta'inieni nemeiteɨtakɨ.
EST 5:13 Peru naitɨ mɨkɨ ne nehepaɨtsita tixaɨtɨ pɨkatihɨkɨ, huriyu Maxirukeyu nemɨxeiyakɨ kuxi ti'aitame kitenie.
EST 5:14 'Ɨyaya Tseretsi meta yunaitɨ hamikumama mɨpaɨ metenitahɨawe: —Kɨye 'anuyemɨtsɨme keneuta'aita huta tewiyari heimana tamamata tsikuriyari 'utewime, ximerita ti'aitame keneutawawiri Maxirukeyu mana mɨkaxuiyanikɨ. Mɨpaɨ 'aixɨa 'iyari pekanimieni 'ixɨararipa ti'aitame matɨa. 'Amani kemɨtiutahɨawarie kaninake, katiniuta'aita kɨye 'anuyemɨtsɨtɨ mɨkakerienikɨ.
EST 6:1 Hikɨ ti'aitame mɨkɨ tɨkaritsie pɨkakuwekai, 'ana katiniutanɨ'ani kemɨtiuyɨ xapayari muhuriyamiekɨ, kepauka mɨti'aitakaitsie mieme makaterɨwarienikɨ.
EST 6:2 Mana mɨpaɨ tineuku'ukaitɨni kename Maxirukeyu Wihitani meta Teretsi mame warutaxatakai ti'aitame hɨwemetemama, mɨpaɨ memɨtekuxatakaikɨ kename ti'aitame 'Atsuheru memienikekai.
EST 6:3 Ti'aitame mɨpaɨ kaniutayɨni: —¿Ke'u'itɨarie tita tiyetuiriyarie yu'iwarika Maxirukeyu 'ikɨkɨ? 'Iparewiwametemama mɨpaɨ mekatenita'eiya: —Tixaɨtɨ 'atsipɨkatiyuriwe hetsienamieme.
EST 6:4 Kepauka 'Amani paratsiyu kitenie takwa munua ti'aitame tawawirienike, Maxirukeyu kɨye muta'aitakaitsie pɨhetsiena miemetɨkai. Hikɨ ti'aitame kaniuta'iwauni. —¿Kemɨ'ane takwa puyeika?
EST 6:5 'Iparewiwamete mɨpaɨ mekaniutiyuani: —Takwa muyeika 'Amani kaniyɨaneni. Ti'aitame mɨpaɨ katiniuta'aita: —Kewatayani.
EST 6:6 Kepauka 'Amani muwataha ti'aitame mɨpaɨ katinita'iwawiya: —¿Kehepaɨ 'itɨariwa tewi ti'aitame 'aixɨa mɨtixeiya? Hikɨ 'Amani mɨpaɨ kaniutayɨni yuxatatɨ: «¿Kemɨ'ane tawarikuta ti'aitame 'aixɨa pɨtixeiyarie nexeikɨa nekanihɨkɨtɨni?»
EST 6:7 'Ayumieme mɨpaɨ kaniutayɨni: —Ti'aitame tewi 'aixɨa mɨtixeiya,
EST 6:8 'ixurikikɨ ketiutanɨ'ani ti'aitame menakatɨkɨkai meta kawayuya manutiyeixa yumu'utsie witsiti'anenekame reukapikame.
EST 6:9 'Ixurikite meta kawayu ketiyetuiriyarieni ti'aitame kemɨ'ane ti'uximayatame 'aixɨa mɨtixeiya, ti'aitame tewi 'aixɨa mɨtixeiya mɨtitiketɨanikɨ, ke'utiyani kiekaritsie 'ehanatɨ, mɨpaɨ tiuhiwatɨ: “Mɨpaɨ kani'itɨariwani tewi ti'aitame 'aixɨa mɨtixeiya”.
EST 6:10 Ti'aitame 'Amani mɨpaɨ katiniutahɨawe: —Yapauka kenemie 'ixuriki pe'ahurietɨ meta kawayu pe'ahanatɨ yaketineuyuri kepemutayɨ, Maxirukeyu huriyu tewiyari ti'aitame kitenie mutaka. Pepɨkaratɨtɨmaiyani nixeiniukiyari tɨma naimekɨ kepemutayɨ yaketineuyuri.
EST 6:11 Hikɨ 'Amani 'ixuriki 'anuhurieka meta kawayu 'anuhanaka, Maxirukeyu katiniutikemaritɨani, kawayutsie 'anakaime kiekaritsie 'ehanatɨ kaniuyeikakaitɨni, mɨpaɨ 'utaitɨ: «Mɨpaɨ kani'itɨariwani tewi ti'aitame 'aixɨa mɨtixeiya».
EST 6:12 Maxirukeyu kaninuani ti'aitame paratsiyu kitenie, 'Amani yukieta kanakunuani yumexɨitɨatɨ, nutuixietɨ heuyutinatɨ yɨhɨxie.
EST 6:13 Yu'ɨya Tseretsi meta yunaime yuhamikuma katiniwarutaxatɨani kemɨranuyeyakai. Hikɨ 'ɨxatsitamete waɨkawa memɨtemaiwawekai meta 'ɨyaya Tseretsi mɨpaɨ mekatenitahɨawe: —Maxirukeyu xɨka pemiemɨkɨ, xɨka huriyu tewiyari hɨkɨtɨni pepɨkayɨwekaxɨani. Kaniyuritɨni 'ekɨpɨta pekanimieriemɨkɨ.
EST 6:14 Hikɨ mexi'akuxi metekuxatakai 'Amani hamatɨa, mekaniu'axɨani ti'aitame te'uximayatsiriwamete mekaneiwitɨni mexɨima 'ixɨararipa 'Etsitexi meiwewiekai hetsɨa.
EST 7:1 Ti'aitame 'Amani matɨa 'ixɨararipa mekananɨkɨne 'uka ti'aitame 'Etsitexi hetsɨa,
EST 7:2 hutarieka tukaritsie me'ietɨwetɨ tawarita ti'aitame kanita'iwawiya: —Kenetineutaxatɨa tita pereuyehɨwa, 'uka ti'aitame 'Etsitexi, ne nematiyetuirieni. ¿Tita pera'iwawa? Tsepa ne hixɨata 'akame nepɨmatsiyetuiriewe nemɨra'aitatsie.
EST 7:3 'Etsitexi mɨpaɨ katinita'eiya: —Xɨka 'aixɨa penetimaika ti'aitame, xɨka matsinakeni, ne tukari nepeuyehɨakaku. Nepɨra'iwawa neteɨterima pemɨwatinenimayatakɨ.
EST 7:4 Ne meta neteɨterima tekaniutuiyani temeuyehɨiyanikɨ temɨkwi'iwakɨ teyunaitɨ. Xɨka xeikɨa temɨte'uximayakakɨ te'utuiyanike, ne 'atsinepɨkahainenikeyu, mɨkɨkɨ pɨkaheuyewekakeyu nemɨmatsi'uximatɨaka ti'aitame.
EST 7:5 Ti'aitame 'Atsuheru mɨpaɨ 'Etsitexi katiniuta'iwawiya: —¿Kemɨ'ane mɨkɨ pɨhɨkɨ mɨyamɨtiuka'iyari mɨka'uyukatewiya? ¿Hakewa peyeika?
EST 7:6 'Etsitexi mɨpaɨ katinita'eiya: —Mɨtatsi'aye'unie 'Amani kanihɨkɨtɨni 'axamɨtiuka'iyari. 'Amani waɨkawa kaniutimani ti'aitame hɨxie meta 'uka ti'aitame hɨxie.
EST 7:7 Ti'aitame kananukukeni waɨkawa ha'atɨ, kananuyeyani makutsiɨraɨyetsie paratsiyuta 'ietɨ tiuhayewaka. Peru 'Amani retimaika kename ti'aitame kareiyehɨwirienikekai, kaniuyuhayewa 'uka ti'aitame 'Etsitexi tawawirienike mɨreiyehɨwirienikɨ mɨkamierienikɨ.
EST 7:8 Kepauka ti'aitame hutarieka muwa munua 'ixɨarari maxuawetsie, 'Etsitexi mexi yu'ɨparitsie 'akatei 'Amani 'auriena kaniukaweni. Mɨyatiuniereka, ti'aitame karima mɨpaɨ kaniutayɨni: —Hikɨ 'akuxi matsi 'uka ti'aitame hamatɨa tihuimɨkɨ ne'ixeiyakaku nekiita. Yapauka mɨpaɨ 'utayɨku ti'aitame, 'Amani yuhɨxie kaneutihɨiyani.
EST 7:9 Kaxiwuna titewatɨ ti'aitame ti'uximayatsiriwame, mɨpaɨ kaniutayɨni: —Kɨye 'Amani kie kaneweni huta tewiyari heimana tamamata tsikuriyari 'utewitɨ. Mita'aitakai Maxirukeyu hetsiemieme meripaitɨ 'ahetsie mutanua. Ti'aitame mɨpaɨ katiniuta'aita: —Mana xekenekaxu'i.
EST 7:10 Mɨpaɨ katiniuyɨni 'Amani kɨyetsie kaniukawiyani Maxirukeyu hetsiemieme mita'aitakai. Mɨpaɨ katiniuhaxɨapieni ti'aitame mɨha'akai.
EST 8:1 Mɨkɨ tukaritsie ti'aitame 'Atsuheru 'uka ti'aitame 'Etsitexi 'Amani tipiinieya katiniyetuirieni, huriyutsixi mɨwaraye'uniekai. Maxirukeyu ti'aitame hɨxie kaninuani, 'Etsitexi titaxatɨaku kename marieyatɨkai.
EST 8:2 Ti'aitame yutseyu hanirayari kananutihɨna, 'Amani mekamakai, Maxirukeyu kaniu'ɨitɨani. 'Etsitexi 'Amani mɨra'aitakaitsie Maxirukeyu pɨta katiniuhɨritɨani meta piiniteya.
EST 8:3 Hikɨ tawarita 'Etsitexi ti'aitame hetsɨa kaniye'ani. Hɨxiena kanatiweni 'utatsuatɨ, kanitawawirieni 'Amani 'Akaki nuiwarieya huriyutsixi kemɨtiwaru'aitaxɨ yamɨkatiyɨnikɨ.
EST 8:4 Ti'aitame huru 'itsɨyari 'Etsitexi kaniutserieni. Hikɨ 'anukukeka ti'aitame hɨxie,
EST 8:5 mɨpaɨ kaniutayɨni: —Xɨka 'aixɨa penetimaika, xɨka 'aixɨa 'aneni keneyutemawieka nehamatɨa, mɨpaɨ ketineu'aita mɨkahaye'atɨarienikɨ huriyutsixi memɨkwi'iwakekai pemɨra'aitatsie naitsarie, 'Amani miti'utɨa Hamerata nu'aya, 'Akaki nuiwarieya.
EST 8:6 Ne yanepɨkara'eriwakai memɨte'uka'eniwanikekai neteɨterima. Nepɨkaheunierimɨkɨkai neteɨterima memɨkwi'iwakekaitsie.
EST 8:7 Ti'aitame 'Atsuheru 'uka ti'aitame 'Etsitexi meta huriyu tewiyari Maxirukeyu, mɨpaɨ katiniwarutahɨawe: —'Amani huriyutsixi mɨya mɨwaruyurikɨ 'ayumieme 'Etsitexi nepɨtiupitɨa piiniteya, mɨkɨta kɨyetsie pukawiya.
EST 8:8 Hikɨta xapa xekeneutawewi, ne kename nehaine, huriyutsixi wahetsiemieme kemɨxetinake, xekeneutseyuma ne nehanirakɨ. Xapatsie raka'utɨariekame kename ne nehaine meta tseyumariekame nehanirakɨ, 'anari xewitɨ mikupatani pɨkayɨweni.
EST 8:9 Yapauka te'utɨwamete ti'aitame hetsɨa miemete mekaniuta'inierieni. Hairieka metseritsie xeitewiyari heimana haika tukariyaritsie, tsiwani metseriyaritsie mekaniyuakaitɨni. Tinaka'utsieni naime Maxirukeyu huriyutsixi kemɨtiwaru'aitɨa, kuwexinaruritsixi meta memɨte'aitɨarie xeitsienituyari heimana xeitewiyari heimana 'atahuta kwieyaritsie memɨtamakai, Hiriya meta Kutsi meye'atɨkaitɨ. Mɨkɨ 'aitsika kaniuti'utɨarieni xexuitɨ kwieyarite mukumanetsie kememɨte'u'utɨwakai meta kememɨte'uniukakai huriyutsixi waniukikɨ.
EST 8:10 Maxirukeyu 'aitsika naka'utɨani ti'aitame 'Atsuheru kename haine hanirayakɨ 'ititseyumaka, ti'aitame tupiritsiximama kaniwareutanɨ'axɨani naitsarie, kawayutsixi kurarutana miemete kwinimieme memayɨwawe wahetsie me'utekame.
EST 8:11 Ti'aitame niukieya huriyutsixi kaniwarupitɨani memuyukuxeɨrienikɨ meta memuyukɨhɨanikɨ kemɨ'ane memɨwatakwini, para memɨwakwinikɨ tsepa kemɨ'ane kwieyaritsie kiekatari xɨka mewakwikuni wa'ɨitama, watɨɨriyama meta wapiinite yupiinite memɨte'ayeitɨanikɨ.
EST 8:12 Mɨpaɨ memɨteyurienikɨ naime kiekari mukumanetsie 'Atsuheru mɨra'aitakaitsie, huriyutsixi mekanitipini tamamata heimana haika tukariyaritsie, 'araxi metseriyaritsie.
EST 8:13 Mɨkɨ xapa 'ɨkiyaya naitsarie kwie mukumanetsie kaniyuhayewaxɨamɨkɨ, yunaitɨ mekete'utamarieni kiekari mukumanetsie. Huriyutsixi memuyuha'aritɨakakɨ mɨkɨ tukariyaritsie memɨwaraye'unie memɨwatakwinikɨ.
EST 8:14 Tupiritsiximama, ti'aitame yatiwa'aitɨakaku, yapauka mekanayekɨne kawayutsixi kwinimieme memayɨwawe wahetsie me'utetɨ. Mɨkɨ xapa kanikuxaxatsiwakaitɨni yaxeikɨata Tsutsa kiekariteyaritsie.
EST 8:15 Maxirukeyu kaniwayeyani ti'aitame hɨxie 'aixɨa rekemaritɨ muyuawi, mutuxa meta huru kurunayari 'ayeukame 'anamatɨ, meta rinu 'ixurikiyari taɨraɨyeme 'anatatɨtɨ. Tsutsa kiekariyaritsie mekaniutihiwakaitɨni meyutemamawietɨ.
EST 8:16 Huriyutsixi wahetsiemieme mɨkɨ pɨhekɨariyatɨkai meta temawierika tukariyari patɨa, memutihiwanikɨ 'aixɨa 'anemekɨ.
EST 8:17 Xexuime kwieyaritsie meta kiekarite mukumanetsie hakewa xapate meye'axekai ti'aitame niukieya, mana temawierika kanixuawekaitɨni mekaniyunɨtɨakaitɨni huriyutsixi 'ixɨarari mewewietɨ. Meyumɨiretɨ hipame kwieyaritetsie teɨteri huriyutsixi mekanayuyeitɨani memamatɨ.
EST 9:1 Ti'aitame xapaya kaniuye'axɨanikekaitɨni tamamata heimana haika tukari, tamamata heimana huta metseriyaritsie, 'araxi metseriyari mɨhɨkɨ. Huriyutsixi memɨwaraye'unie mekanitakwewiekaitɨni mɨkɨ tukaritsie memɨwakwinikɨ, peru xapate kaniuyupataxɨani huriyutsixi mekateniwa'aitɨakaitɨni kemɨ'ane memɨwakwikukai.
EST 9:2 'Atsuheru mɨra'aita memɨte'awiya, huriyutsixi mekaniyuxeɨriekaitɨni yukiekaritsie memɨwatakwinikɨ 'iya memɨwaraye'uniekai. Nixewitɨ mɨwatakwinikɨ pɨkayuwaɨriyakai yunaitɨ mepɨmamakai.
EST 9:3 Yunaitɨ naitsarie kwieyaritsie te'uximayatamete meta ti'aitame parewiwamete, kuwexinaruritsixi, huriyutsixi mekaniwaparewiekaitɨni, Maxirukeyu memakatɨ.
EST 9:4 Maxirukeyu 'aixɨa tiyurienetɨ kanayuyeitɨani paratsiyuta. Nikuxaxatsiwakaitɨni naitsarie kwiepa waɨkawa mariwetɨ kanayeiximekaitɨni.
EST 9:5 Huriyutsixi 'ixiparakɨ mekaniwarukwini yunaime memɨwaraye'uniekai. Mekaniwarakumaweriya, yamekateniuyurieni kemɨtiwanake memɨwaxani'eriekai wahetsiemieme.
EST 9:6 Tsutsa kiekariteyaritsie 'auxɨwime tsienituyari teɨteri mekaniwarukwini.
EST 9:7 Meta mekaniukwi'iwa Paritsanirata, Raripuni, 'Atsipata,
EST 9:8 Purata, 'Arariyaxi, 'Arirata,
EST 9:9 Parimatsita, 'Aritsai, 'Arirahi, meta Wahitsata,
EST 9:10 tamamata memɨhɨkɨtɨkai 'Amani niwemama Hamerata nu'aya, huriyutsixi memɨwaraye'uniekai. Peru piiniteya mepɨkatehepi.
EST 9:11 Mɨkɨ tukaritsie ti'aitame retimaika keyupaɨmetɨ memukwi'iwaxɨ Tsutsa kiekariteyaritsie,
EST 9:12 'uka ti'aitame 'Etsitexi mɨpaɨ katiniutahɨawe: —Huriyutsixi 'auxɨwime tsienituyari memɨwarukwi, meta tamamata 'Amani niwemama Tsutsa kiekariyaritsie, matsi kiekari mamanetɨkatsie kememɨteheyurie. Kenetineutaxatɨa titapereuyehɨwa, yanepɨtikayani. ¿Tita tawarita pereuyehɨwa? Yapɨtiyɨni kepemɨtayɨni.
EST 9:13 'Etsitexi mɨpaɨ kaniutayɨni: —Ti'aitame xɨka matsinakeni, huriyutsixi Tsutsa kiekatari keniwarupitɨa 'uxa'ake memɨtetahayewakɨ hikɨ mieme kepemɨtiwarupitɨa, meta keniwarupitɨa tamamata 'Amani niwemama kɨyexitsie memɨkaxuiyaxɨanikɨ.
EST 9:14 Ti'aitame mɨpaɨ katiniuta'aita. Tsutsa kiekariyaritsie xapa kaniyetuiyani, tamamata me'aye'ukame 'Amani niwemama kɨyexitsie memɨkaxuiyaxɨanikɨ.
EST 9:15 Huriyutsixi Tsutsa kiekatari mekaniuyukuxeɨrieni tamamata heimana nauka tukariyaritsie, 'araxi metseriyaritsie, 'ana mekaniwarukwini haika tsienituyari teɨteri, peru wapiinite mepɨkatehepi.
EST 9:16 Metatsiere, huriyutsixi kwie mamanetɨkatsie ti'aitame mɨra'aitatsie mekaniuyukuxeɨriexɨani yuhetsie memɨtanuanikɨ memɨwaraye'unie wahepaɨtsita. Haika tewiyari heimana tamamata heimana 'auxɨwi miriyari memɨwaxani'eriekai mekaniwarukwini, mɨkɨta wapiinite mepɨkatehetɨ.
EST 9:17 Mɨkɨ katiniuyɨni tamamata heimana haika tukariyaritsie 'araxi metseriyaritsie. Tamamata heimana nauka tukariyaritsie mekaniuka'uxipieni, 'ixɨarari mekaniuwewieni.
EST 9:18 Huriyutsixi Tsutsa kiekatari tamamata heimana haika tukaritsie memuyuxeɨri meta tamamata heimana nauka, tamamata heimana 'auxɨwiriekatsie mekaniuka'uxipieni, 'ixɨarari mekaniuwewieni meyutemamawietɨ.
EST 9:19 'Ayumieme huriyutsixi naitsarie kiekaritsie memeutitekai kiekari 'etsimɨyeyeutsie, 'ixɨarari mekaniutiwewiwakaitɨni tamamata heimana nauka tukaritsie 'araxi metseriyaritsie, temawierika tukariyari meta 'ixɨarari tukari, 'ana yunaitɨ mekateniyutamikwakaitɨni.
EST 9:20 Hikɨ Maxirukeyu 'ikɨ naime raka'utɨaka kemɨtiuyɨ, xapate kaneutanɨ'axɨani yunaime huriyutsixi wahetsɨa, 'ateewa paitɨ memetitekai wahetsɨa meta 'ahurawa mɨtiuyehanetsie 'Atsuheru mɨra'aitakaitsie,
EST 9:21 mɨpaɨ tiwa'aitɨatɨ xeiwiyari 'anuyeyeikakaku memitiwewiwanikɨ 'ixɨarari tamamata heimana nauka tukaritsie meta 'auxɨwirieka tukariyaritsie 'araxi metseriyaritsie,
EST 9:22 'ana memuxɨnariekɨ huriyutsixi hipatɨ mewaraye'uniekaku kepauka wahiwerika temawierika matɨa, kepauka meta wakukwiniya temawierika 'ixɨarariyari patɨa. 'Ayumieme peuyewekai memitiwewiwanikɨ temawierika tukariyari meta 'ixɨarari, yu'ikwai meta hipame metewatamikwatɨ, tixaɨtɨ memɨkatehexeiya metewakumikwatɨ.
EST 9:23 Mɨpaɨ huriyutsixi meteku'eriwatɨ yuyeiyari mekanayeitɨani 'ixɨarari me'utiwewiwatɨ mekanakɨne, Maxirukeyu kemɨtiwaraka'utsiriekai mete'aye'atɨwatɨ mepakɨ.
EST 9:24 'Amani Hamerata nu'aya, 'Akaki nuiwarieya, huriyutsixi mɨwaraye'unie, naime mɨkɨ katiniuyuriekaitɨni huriyutsixi memɨkwi'iwakɨ puri kaniuwewiekaitɨni wahetsiemieme, —tatsɨari kemɨ'ane mɨrayu'iwa— mɨwahɨxiyatsitɨanikɨ mɨwakwinikɨ.
EST 9:25 Peru kepauka 'Etsitexi ti'aitame hɨxie mutaniu, mɨkɨ xapatsie mɨpaɨ katiniu'aita kename 'Amani kemɨtiu'aitaxɨ huriyutsixi wahetsiemieme hetsiena tinakekekai, mɨkɨ meta niwemama kɨyetsie mekekaxuiyaxɨanike.
EST 9:26 Mɨpaɨ tiuyɨku mɨkɨ tukaritsie katiniuterɨwarieni Purimi, puri hetsie 'ayehaniekame. Kemɨreku'uxa xapatsie, kememɨte'unenierixɨ kememɨte'anuyekɨ,
EST 9:27 hikɨ huriyutsixi mekaniuyu'enieni yuhetsiemieme meta yuniwema wahetsiemieme, para yunaitɨ meyuxewitɨ memitiwewiwanikɨ xeiwiyari 'anuyeyeikakaku memɨkatehayewanikɨ, kemɨreuku'uxa mɨkɨ tukaritsie.
EST 9:28 Para yunaitɨ nuiwarite meta naitsarie kwieyaritetsie meta yunaitɨ teɨteri kiekaritetsie, memaye'eriwanikɨ memitiwewiwanikɨ mɨkɨ tukaritsie xeiwiyari 'anuyeyeikakaku. Mɨkɨ Purimi tukariyari huriyutsixi yamepɨte'itiwewiwanikekai, memɨkaheiyehɨpanikɨ meta waxiɨyarima.
EST 9:29 'Uka ti'aitame 'Etsitexi 'Awikahiri niweya, huriyu tewiyari Maxirukeyu matɨa, mekatenaka'utɨani meteha'aitatɨ hutarieka xapa Purimi hetsiemieme.
EST 9:30 Mɨkɨ xapa kaneutanɨ'axɨani yunaime huriyutsixi wahetsɨa xeitsienituyari heimana xeitewiyari heimana 'atahuta kwieyaritsie, 'Atsuheru pɨtiwa'aitɨakai 'aixɨa 'anekamekɨ meta yurikɨ haitɨ,
EST 9:31 Purimi 'ixɨarariyari mematinenetɨwanikɨ kemɨ'ane tukariyaritsie, kememaitɨkatei huriyu tewiyari Maxirukeyu 'uka ti'aitame 'Etsitexi matɨa, kememɨtekuxatakai yuhetsiemieme meta yuniwema wahetsiemieme, memɨyuhakiekaitsie memuyuhiweriekaitsie meta.
EST 9:32 Kemɨtiu'aitaxɨ 'Etsitexi Purimi hetsiemieme, mɨpaɨ katinaka'utɨarieni xapatsie.
EST 10:1 Ti'aitame 'Atsuheru tumini kaniwarutawawirieni naitsarie mɨra'aitatsie meta haramara hixɨapa kwie mɨyemanetsie kiekatari memɨteyukutuayanikɨ.
EST 10:2 Naitɨ Maxirukeyu kemɨtiu'aitaxɨ tɨrɨkaɨyemekɨ, kemɨtiuyɨ xatsikayari 'aye'atɨ mariwetɨ kemɨratɨa ti'aitame 'iparewiekaku, naitɨ kanaka'uka te'aitamete waxapatsie, Meriya meta Peritsiya waxapayaritsie.
EST 10:3 Huriyu tewiyari Maxirukeyu mariwetɨ kanayani yuteɨterima wahetsiemieme, hutarieka mieme ti'aitame kanayani 'Atsuheru 'utɨa. Yumɨiretɨ 'aixɨa mekatenixeiyakaitɨni, yuteɨterima mɨwaparewieka minakekaikɨ 'aixɨa 'anemekɨ memu'uwanikɨ.
JOB 1:1 'Utsi kwieyaritsie tewi xewitɨ kaniukateitɨni heitseriemekɨ 'aixɨa tiyurienetɨ meta hetsiena karahɨiwakaku, Kakaɨyari 'ayemakatɨ meta 'axamɨti'anekɨ yupatatɨ. Mɨkɨ tewi Kuwi pɨtitewakai.
JOB 1:2 Yuniwema 'atahutame 'ukitsi pɨwarexeiyakai meta yuhaikame 'ukari,
JOB 1:3 'atahuta miriyari muxatsi puwakutsiyaritɨkai, kameyutsixi haika miriyari, tuurutsixi kwietsanamete 'auxɨwime tsienituyari meta puxuri 'ukari 'auxɨwi tsienituyari, meta memɨte'i'uximayatsirie mepɨyumɨirekai. Mɨkɨ tewi yemekɨ waɨkawa mɨrexeiya pɨhɨkɨtɨkai yunaime puwara'iwakai mana tau manatineika hepatsie memɨtamakai.
JOB 1:4 Niwemama yu'ixɨarari yuxexuitɨ yukie mekanikuwewiwakaitɨni, yu'iwama 'ukari memuyuhaika mepuwaruta'iniwakai memɨtekwanikɨ meta memɨti'ienikɨ wahamatɨa.
JOB 1:5 Kepaukari yunaitɨ memanayexɨni yu'ixɨarari mewewietɨwetɨ, Kuwi puyumexɨitɨakai niwemama 'aixɨa memuyuyurienikɨ. Ximeri paitɨ mɨkɨ yuxexuime wahetsiemieme mawari taiyariyari putiwewiwakai, mɨpaɨ tiku'eriwatɨ: «Heiwatɨ 'axamemɨteniuyuri neniwema meta yu'iyaritsie Kakaɨyari hepaɨtsita 'axamemɨniutiyua». Kuwi mɨpaɨ pɨtiyurienekai yuheyemekɨ.
JOB 1:6 'Ana tukari kanaye'akaitɨni Kakaɨyari niwemama Yawé hɨxie memɨ'axɨanikɨ, mɨkɨ wahamatɨata Kauyumarie kaninuani.
JOB 1:7 Yawé mɨpaɨ katinita'iwawiya: ―¿Hakewa pepeyetɨa? Kauyumarie mɨpaɨ katinita'eiya: ―Naitsarie kwietsie nekanayani nekananieretɨyani kemakuyewa.
JOB 1:8 Hikɨ Yawé tawarita kanita'iwawiya: ―¿Keri petiku'eriwa neti'uximayatsiriwame Kuwi hetsiemieme? Nixewitɨ mɨkɨ hepaɨ 'anetɨ kwiepa kaniumaweni, tewi 'aixɨa mɨtiuka'iyari meta hetsiena mɨkarahɨiwa kanihɨkɨtɨni, kenemɨrehɨawe kaneni'enieka meta 'axamɨti'anekɨ yukweriwayurietɨ.
JOB 1:9 Kauyumarie mɨpaɨ Yawé katiniuta'eiya: ―Kuwi kameni'enieka, waɨkawa pemɨtiyetuirienikɨ xeikɨa.
JOB 1:10 'Ekɨ matsi pekani'ɨwiyani, tɨɨriyamama meta piiniteya naime. Meta 'aixɨa pekaniyurieka kemɨti'uximaya, muxatsi meta tewaxi yunaitɨ kwiepa memɨtehakɨhɨnekɨ.
JOB 1:11 Matsi xɨka 'amamá pe'utatsera meta tita mɨrexeiya naime petinawairieni, hekɨatsɨ 'axamɨkatayɨni 'ahɨxie.
JOB 1:12 Yawé mɨpaɨ katinita'eiya: ―'Aixɨa kani'aneni. Ketita mɨrexeiya naime piinite 'amamatsie katini'aneni, matsi xeikɨa mɨkɨ pepɨkakumaɨwani. Mɨya tiutahɨawarieka, Kauyumarie Yawé hɨxie kanayeyani.
JOB 1:13 Heiwa kepauka tukari maye'a Kuwi niwemama 'ukitsi meta 'ukari yu'iwa 'amɨyumate hetsɨa 'ixɨarari mewewiekaku.
JOB 1:14 Hikɨ tewi niuki tuayame Kuwi hetsɨa kaninuani mɨpaɨ tikɨhɨawenetɨ: «Mexi 'akuxi tuurutsixi mehekwietsanatɨwekai meta puxuri hurawa 'ɨxapa metehekwatɨwekai,
JOB 1:15 Tsawaha kiekatari mekatanetakwini mekateneware'arieni. Te'uximayatamete 'ixiparatekɨ mekaniwarekwini. Ne xeikɨa nekaneyuta'una, hikɨ nekaneyeyani 'ahetsɨa nemɨmatitaxatɨanikɨ».
JOB 1:16 Mexi 'akuxi tewi tikuxaxatɨwakai katitahayewawekaku, xewitɨta kaninuani mɨpaɨ 'utaitɨ: «Xawaturiya muyuawitsie hakaneka muxatsi kaniwaretitaiya meta te'uximayatamete. Ne xeikɨa nekaneyuta'una nemamiekɨ nemɨmatitaxatɨanikɨ».
JOB 1:17 Mexi 'akuxi tewi tikuxaxatɨwakai katitahayewawekaku, tawarita xewitɨ kaninuani mɨpaɨ kaniutayɨni: «Tenawayamete kariteutsixi me'u'axɨaka, me'ayehaikatɨ kameyutsixi yupiini mekaniwarayeitɨani mekaniwarehapani. Te'uximayatamete 'ixiparakɨ mekaniwarekwini. Ne xeikɨa nekaneyuta'una, hikɨ nekaneyeyani nemɨmatitaxatɨanikɨ».
JOB 1:18 Mexi 'akuxi tewi tikuxatakai katitahayewawekaku, tawarita xewitɨ kaninuani mɨpaɨ kaniutayɨni: «'Ekɨ 'aniwema 'ukitsi meta 'ukari 'ixɨarari mekanewewiekaitɨni yu'iwa 'amɨyumate hetsɨa,
JOB 1:19 yapauka 'eka tɨrɨkaɨyetɨ kaniukuyani makumawetsie hatineka, 'ana kii hetsie kaniyukexɨani hikɨ naukakɨa meutatsikuritɨkatsie naime kaniuka'una. Kii temari wahetsie kaniu'une, yunaitɨ mekanekwini. Ne xeikɨa nekanetawikweni, hikɨ nekaneyeyani nemɨmatitaxatɨanikɨ».
JOB 1:20 Hikɨ mɨya tiu'enaka, Kuwi nanukukeni yukamixa kaneukatsana, yumu'u kaniukaherɨka, meta kwiepa kaniuka hɨximakeni nenewieri wewienike.
JOB 1:21 Hikɨ mɨpaɨ kaniutayɨni: «Nemawetɨ nemaama hetsie nepayene meta nemawetɨ nepɨyemie. Yawé pɨnetiyetuiriekai Yawé kanetiniunawairieni. Yawé hepaɨtsita 'aixɨa keraniuwani».
JOB 1:22 Tsepanetɨ 'ikɨ naitɨ mɨyamɨtiɨyɨ, Kuwi 'axapɨkatiuyuri meta Kakaɨyari hetsie pɨkarahɨa.
JOB 2:1 'Ana tukari kanaye'akaitɨni Kakaɨyari niwemama Yawé hɨxie memɨ'axɨanikɨ, mɨkɨ wahamatɨa Kauyumarie kaninuanita Yawé hɨxie mɨtakenikɨ.
JOB 2:2 Yawé mɨpaɨ katinita'iwawiya: ―¿Hakewa pepeyetɨa? Kauyumarie mɨpaɨ katinita'eiya: ―Naitsarie kwiepa nekanakuyani, naitsarie kemakuyewa.
JOB 2:3 Yawé tawarita mɨpaɨ katinita'iwawiya: ―¿Kuwi neti'uximayatsiriwame hepaɨtsita kepetiku'eriwa? Xewitɨ mɨkɨ hepaɨ 'anetɨ kwiepa kaniumaweni, tewi heitseriemekɨ yamɨtiyuriene meta hetsiena mɨkarahɨiwa kanihɨkɨtɨni, kenemɨrehɨawe kaneni'enieka meta 'axamɨti'anekɨ kaniyɨ'ɨwiyani, tsepanetɨ 'ekɨ waɨriyarika pemɨnetsi'utawawiri 'axanemiyurienikɨ tsepa 'atsikatiuyuri, matsi 'akuxi mɨyatɨtɨ nehetsie yuri pɨti'erie.
JOB 2:4 Kauyumarie mɨpaɨ kaniutayɨni: ―Xɨka matsi 'akuxi xewitɨ katiukwinitɨarieni hakewa meikukukuinetsie tixaɨtɨ pɨkareuyehɨwa. Peru matsi yutukari mɨtawikweitsitɨanikɨ, tewi tita mɨrexeiya naime katiniyetuamɨkɨ.
JOB 2:5 Tsiparatsɨ keneumayɨa ketineukwinitɨa, hekɨatsɨ 'ahepaɨtsita 'ahɨxie 'axamɨkatayɨni.
JOB 2:6 Yawé Kauyumarie mɨpaɨ katiniutahɨawe: ―'Aixɨa kani'aneni. Kuwi 'amamatsie nekaniyetuaka. Matsi xeikɨa nekamaniwawirieka, tukarieya pepɨka'ikunawairiwani.
JOB 2:7 Mɨyatiutahɨawarieka, Kauyumarie Yawé hɨxie 'uwetɨ kanayeyani Kuwi mu'uximatɨanikɨ, haiyakɨ tikwinitɨanike naime kemutewi, ketateyatsie naitɨ 'atsita mu'uyatsie.
JOB 2:8 Kuwi naxi hixɨapa 'ukaitɨ, xari tarimeyarikɨ yukaherɨkatɨ katiniuyeixakaitɨni.
JOB 2:9 'Ɨyaya mɨpaɨ katinikɨhɨawekaitɨni: ―¿'Akuxi yuri peti'erie? Kakaɨyari hepaɨtsita 'axakeneutayɨka keneumɨtsi.
JOB 2:10 Kuwi mɨpaɨ katinita'eiya: ―'Ukaratsi, 'atsimɨkatimate kemɨreuyewetse yamɨtiyuriene hepaɨ pepɨtiuxaxata. Xɨka Kakaɨyari hetsɨa 'aixɨa mɨti'ane tetehanunanakeni, ¿yaxeikɨata tekatemaikakeyu 'axamɨti'ane tahetsie mɨtinakenikɨ? Tsepanetɨ 'ikɨ naitɨ mɨyamɨtiɨyɨ, Kuwi 'axapɨkatiuyuri yuniukikɨ.
JOB 2:11 Hikɨ Kuwi hamikumama memuyuhaika yamepɨtehetima 'uximatɨarika kemɨrexeiyakai yuhetsie, mete'utaxataka mekanayekɨne hakewa memetitetɨkateitsie yunaitɨ memuhukɨ memeinɨtɨanikɨ kemutiukakukuinekai hepaɨtsita. Mɨkɨ mepɨhɨmetɨkai 'Eripaxi Temani kiekame, Wirirari Tsuha kiekame meta Tsupaxi Namati kiekame.
JOB 2:12 'Ateewa me'uhutɨ 'akuxi menixeiya, matsi mepɨka'imaiwawekai. Mekaniutitsuani kememuyuatɨka, yukamixate mekaneukatsanaxɨani, kwie teikɨ mehewiwiwatɨ meta yumu'utsie naxi mekaneutiwiwiexɨani,
JOB 2:13 hikɨ 'atahuta tukari meta 'atahuta tɨkari Kuwi 'aurie mekanititekaitɨni me'iteɨtatɨ. Nixewitɨ mɨkɨ 'atsipɨkatitahɨawixɨ, memixeiyakaikɨ matsi waɨkawa kemɨtiukakukuinekaikɨ.
JOB 3:1 Hikɨ mɨyatiɨyɨku, Kuwi pɨkayɨwekairi kaiwatɨ mumaka hikɨ 'axaputayɨ kepauka mutinuiwaxɨ hetsiemieme.
JOB 3:2 Mɨpaɨ kaniutayɨni Kuwi:
JOB 3:3 «Ke'ukumawere tukari kepauka nematinuiwaxɨtsie mieme meta tɨkarikɨ mɨpaɨ mɨtiutaniukietsie: “'Ukitɨtɨ kanetinuiwa”.
JOB 3:4 Mɨkɨ tukari yɨriya kehayani, Kakaɨyari 'amautitewa muyeika tɨma yapɨkatimaika, xawaturiya hetsiena tɨma pɨkaxuaweni.
JOB 3:5 Yɨriya meta 'etɨriya 'amayetsuye hetsiena ketinakeni. Haiwitɨri yu'etɨrikɨ ke'enukanani, yɨriya hekɨariyaya ke'a'iwa.
JOB 3:6 'Ana tɨkariyaritsie yɨriya 'e'ayetsuitɨ kenuani, mɨkɨ tukari wiyaritsie pɨka'inɨatsieka, meta nixeime metseriyaritsie tɨma pɨka'aka'utsieni.
JOB 3:7 'Ana tɨkariyaritsie nixewitɨ pɨkatinunuiwani, hiwari temawierikayari mɨkɨtsie pɨkaxuaweni.
JOB 3:8 Tɨrɨkariya memexeiya 'axame'utiyuatɨ yameke'utiyuani 'axamɨ'itɨarienikɨ, Rewiyatahini haramaratsie mɨyeyeika meke'anutahɨtɨani.
JOB 3:9 Ximeri miemete xurawetsixi meke'ɨyɨre, yakɨ xeikɨa hekɨariya tukarikɨ mieme meke'ukwewieni, meta matɨari xawatɨriya manatineika mepɨkaxeiyani.
JOB 3:10 Matsi nemaama hukayatsie pɨkareuna nemutinuiwaxɨtsie meta mɨka'uta'imakɨ 'ikɨ naime 'uximatɨarika nemɨtixeiyakɨ.
JOB 3:11 »¿Ketitayari nemɨkitɨ nekatiutinuiwaxɨ? ¿Ketitayari ne'uweka nekatiɨmɨ?
JOB 3:12 ¿Ketitayari nemaama tunuteyatsie netiukutekie, meta tsitsitsie nemɨtsitsitɨarienikɨ?
JOB 3:13 Ne hikɨ nekahe'uximatɨarietɨ nepe'uxipiekakeyu, tinakemekɨ hikɨ nepekutsunikeyu
JOB 3:14 'ena kwiepa te'aitamete meta 'ɨxatsitamete wahamatɨa, paratsiyute 'amɨtimamariwawe memutiwewi hikɨ mɨreuyewe,
JOB 3:15 kuwexinaruritsixi huru waɨkawa memɨyetua watsata meta yukiiteta pɨratate memɨte'utihɨniyaxɨakai.
JOB 3:16 ¿Ketitari nunutsi manuyewe hepaɨ nekatiuteukie, mɨkɨ tɨɨri hatsuaku hekɨariya memɨka'uxei wahepaɨ?
JOB 3:17 Mana 'axamemɨte'u'iyari mekatenikuhayeikawani ke'axamemɨteyuriekɨ. Mana waɨriyarika memɨte'uximayatsitɨarie mekaniuka'uxipiweni.
JOB 3:18 Yaxeikɨata memanutaxɨriya 'uxipiya kayuwatɨ mekanexeiyakakuni, mɨtiwa'aitɨwame hiwarieya memɨka'eniekɨ.
JOB 3:19 Mana mekaniyutinɨnɨweni memɨkamamariwawe meta memɨmamariwawe, meta ti'uximayatame yukutsiyari hɨxie kanetatuiyamɨkɨ.
JOB 3:20 »¿Ketitayari Kakaɨyari memɨte'uka'eniwa tiwapitɨa hekɨariya memɨxeiyanikɨ? ¿Ketitayari tukari tiwapitɨa memɨte'uka'eniwa?
JOB 3:21 Mɨkɨ memɨkwikwi'ini yamepɨteha'eriwakaku matsi mepɨkaheixeiya mɨɨya, tsepanetɨ memiwautɨwe waɨkawa, mɨraye'axe mɨ'awietɨ kememɨkatewautɨwe hepaɨ.
JOB 3:22 Waɨkawamekɨ mepuyutemamawiekakeyu, me'utinawetɨ mɨkite memakateukiwatsie xɨka me'atɨarienike.
JOB 3:23 ¿Ketitayari Kakaɨyari tewi tikunamirie yamɨkatimate hakewa metɨa?
JOB 3:24 Paa nekatakwaiwetɨ 'akuxi, ne'aiwarikakɨ nekanayeikani, netsuari haa hepaɨ kanitayeuriweni.
JOB 3:25 Ketita matsi waɨkawa nemɨtimakakai, nehetsie katiniunake, ketita matsi waɨkawa munetimariutakai, nehetsie yakatiniuyɨni.
JOB 3:26 'Uxipiya meta kayuwatɨ nepɨkahexeiya, nemaka'uxipienitsie nepɨkataxeiyawe, 'uximatɨarika xeikɨa nehetsie pɨtinake».
JOB 4:1 Hikɨ 'Eripaxi Temani kiekame Kuwi mɨpaɨ katiniuta'eiya:
JOB 4:2 «Xɨari pɨkamatsi'unakiwe xɨka xewitɨ yɨkɨ matiutahɨawe, ne nepɨkayɨwe nemɨtinewiekakɨ,
JOB 4:3 'Ekɨ yumɨireme teɨteri pepɨwarayehɨtɨwakai meta pepɨwaparewiekai 'aixɨa petiwarahɨawetɨ memɨwerarani,
JOB 4:4 'Ekɨ 'aniukikɨ pepɨwaranukuhapanakai memekaxɨrɨwekai meta watunute petɨrɨkariyatɨ memanuyewerarani yutunutetsie,
JOB 4:5 Matsi hikɨ kepemɨtiuka'eniwa pepɨkatinewie, waɨkawa yɨkɨ peti'akɨhɨawetɨ pepɨ'akuhayeikawa meta peweranitɨ.
JOB 4:6 ¿Kari pepɨkayɨwenikeyu Kakaɨyari pe'ayemakatɨ yuri pemɨti'eriekakɨ meta kepemɨtiuyeikakɨ kename 'axapekatiyurienetɨ 'apeka'uyeika?
JOB 4:7 »Keneutimaixɨa: ¿Kemɨ'ane 'axakatiyurienetɨ pukumawerixɨ? ¿Kepauka teɨteri 'aixɨa memɨte'u'iyari mepeuyewe?
JOB 4:8 Kenemɨretima mɨpaɨ pɨneti'ɨkitɨa kemɨ'ane 'axamɨti'ane mɨtika'eni, mɨkɨ 'uximatɨarika kanika'itsanamɨkɨ.
JOB 4:9 Kakaɨyari 'iiyaya kaniwatakukuyani, haxɨaya kaniwarakɨxɨxɨtsitɨwani.
JOB 4:10 Tsepanetɨ maye muyutahaxɨatɨwa meta niwemama kememɨte'i'ɨke, naime yutamete mekaniwaye'uniyariexɨakuni,
JOB 4:11 maye kanimɨmɨkɨ 'ikwaiya mɨtiumawekɨ, meta maye niwemama mekanitayeixɨakuni.
JOB 4:12 »'Awie niuki nehetsie kaniye'ani, yuariyaya 'etsiwa xeikɨa nekaniu'enieni.
JOB 4:13 Tɨkarikɨ heinɨtsi nehetsie kaninuani kaneneuyehɨani, kepauka teɨteri waɨkawa memeukukutsutsie,
JOB 4:14 marika waɨkawa nehexeiyatɨ nekaniyuhayewa, naitɨ ne'umete kaniutiyɨyɨakakaitɨni.
JOB 4:15 Nehɨxietsie 'iyari 'ekayari kaneniuyuitɨani, meta nekɨpate kaniutitsetseriya.
JOB 4:16 'Etɨriya nehɨxie kaniyuhayewa, matsi pɨkayuxeiyanɨakai kemɨ'ane mɨhɨkɨtɨkai. Kayuwatɨ katiniukeni, meta niukieya nekaniu'enieni mɨpaɨ 'utaineme:
JOB 4:17 »“Xewitɨ matsi tewi kaniumaweni heitseriemekɨ yatikamietɨ Kakaɨyari hepaɨ. Tewi pɨkayɨwe waɨkawa 'itiyatɨ mayanikɨ kemɨ'ane Mitawewi hepaɨ.
JOB 4:18 Matsi Kakaɨyari te'i'uximayatsiriwamete wahetsie yuri pɨkati'erie, meta niuki tuayamete yuhetsɨa miemete, yakatiniwakɨhɨaweni kememɨkate'enu'eniwa,
JOB 4:19 matsiri teɨteri haxukɨ memɨwewiyatɨka kepauka yuri tiwaruta'eriri, tumuanarikɨ mekaniwewiyatɨkani, mekanitipɨnarɨwani kakwaniwemekɨ kɨpi tikɨmeme hepaɨ.
JOB 4:20 Ximeri mepayeneniere peru taikai mepɨkwikwi'i meta yuheyemekɨ mepukumamawere, nixewitɨ tɨma pɨkawaraye'eriwa.
JOB 4:21 Wakaunari kanaxitewani, hikɨ 'ixuriki kiiyari hepaɨ mekaniuka'unikeni. Mekanitakukuweni metemaiwawetɨ mekahakɨniwawetɨ”.
JOB 5:1 »Parakuta xɨka peyɨweni keneutaniu, matsi ¿kemɨ'ane pɨmatsita'eiya? ¿Ke'aneme kakaɨyari pepɨtahɨawe?
JOB 5:2 Memɨkayuwaɨriya memɨteyu'ɨkitɨakakɨ wahaxɨa kaniwakwika, memɨkayɨkɨhɨawe wa'ɨtetsarika kaniwakwika.
JOB 5:3 Ne mɨkatimaiwe nekanimaika kwitɨwa waɨkawa rexeiyatɨ kanayeikani, matsi kiiya yapauka 'axapu'itɨarie.
JOB 5:4 Waniwema teewa me'u'uwatɨ mekawikweitsitɨarietɨ mekaniyuhayewakuni, mɨrayutixanetsiwatsie mekaninanaimarieka, xewitɨtɨma wahetsie pɨkatanuani.
JOB 5:5 Wa'itsanari mekanikwaka memɨyehakakwitɨwe, xuyatsata me'ikatɨkɨtɨ, tita waɨkawa memɨtehexeiya memɨyeharikwitɨwe mekanihareka.
JOB 5:6 Tsepanetɨ 'uximatɨarika kwiepa katineika, meta kukuinari mana mɨkahatineika,
JOB 5:7 tewi kaniutinuiwa naimekɨ mɨtiuka'eniwanikɨ, tai tsipɨrikiyari kemɨtita'eke hepaɨ.
JOB 5:8 »Ne xɨka netiuka'eniwanike, Kakaɨyari hetsɨa 'ahurawa nepuyanike, hɨxiena naimekɨ nepɨnetahekɨatawe.
JOB 5:9 Mɨkɨ mariweme katiniyurieneni keyatemɨkatemate, kemɨtiyuriene yutɨrɨkariyakɨ pɨkayu'inɨatsinɨa.
JOB 5:10 Mɨkɨ wiyeri kwiepa kaneyenɨ'awani meta haa hɨritetsie pɨtixuawitɨani 'ɨtsitsata.
JOB 5:11 Mɨkɨ tixaɨtɨ memɨkatehayuyeitɨa kaniwaranukuhapanani meta memuyuheiwerie 'aixɨa puwayurie.
JOB 5:12 Mete'akumaitɨ kememɨteyuriku mɨkɨ yamɨtiyɨnikɨ pɨkatikupitɨwa, wa'uximayatsika tixaɨtɨ pɨkatitixuawitɨani.
JOB 5:13 Memɨte'akumate Kakaɨyari yakatiniwakupitɨwani kememɨteku'eriwakaitsie memuyukaxɨrienikɨ, meta 'axamemɨte'u'iyari kememɨte'uxa hepaɨtsita katinanu'unani.
JOB 5:14 Hekɨtatɨtɨ mɨkɨ mekaniyɨrixieka, hekɨtatɨtɨ me'u'uwatɨ mekanikumetɨweni mɨyɨwini hepaɨ.
JOB 5:15 Matsi memɨte'uka'eniwa kaniwawikweitsitɨaka memɨtɨrɨkawi mewa'uximatɨakaku meta kememutiyuane 'axamewayurikutɨ.
JOB 5:16 Tixaɨ memɨkatehexeiya kememɨteta'ikwewa mɨpaɨ kani'aneni, 'axamemɨte'u'iyari watenie kemɨranunamie.
JOB 5:17 »'Aixɨa kani'itɨarieka tewi, kemɨ'ane Kakaɨyari mɨti'ɨkitɨa. Naimekɨmɨtɨrɨkaɨye 'uximatɨarikakɨ meti'ɨkitɨakaku pepɨka'ixani'erieka.
JOB 5:18 Mɨkɨ katinakwinitɨamɨkɨ, matsita katina'uayemamɨkɨ, katinakuwaxɨamɨkɨ peruta katineunuitɨiriemɨkɨ.
JOB 5:19 Kamaniparewiemɨkɨ 'ataxewimexɨa pe'uximatɨariekaku, meta 'atahutarieka 'axapepɨkaranuyeyani.
JOB 5:20 Kepauka haakaxa muxuaweni, pemɨkamɨnikɨ kamanitawikweitsitɨamɨkɨ, kuyaxa kepauka muxuaweni, pemɨkamierienikɨ 'ixiparakɨ 'ahetsie kanitanuamɨkɨ.
JOB 5:21 'Axapetikɨhɨawarɨwakaku kameni'awietakamɨkɨ, meta pepɨkamaka xɨka heiwa haye'ani memɨka'unarienikɨ.
JOB 5:22 Kememɨteka'unarieni meta haakaxa hepaɨtsita pekaniutanawemɨkɨ, meta 'ɨtsita memɨtexɨawe 'ɨrawetsixi pepɨkawamakaxeni,
JOB 5:23 matsi 'ɨtsita tɨratu pekaniwewimɨkɨ tetexi wahamatɨa meta 'ɨtsita memɨtexuawe 'ɨrawetsixi kaiwatɨ mehexeiyatɨ 'ahamatɨa mekaniu'uwakuni.
JOB 5:24 'Akie pematayerunitsie yapekatinetimaimɨkɨ 'aixɨa kemɨti'ane, kepauka 'atewama pemɨwa'inɨatani, nixewitɨtɨma pɨkaheuyewekani.
JOB 5:25 Tɨɨri yɨwaɨkawame pewarexeiyatɨ pekanayeimɨkɨ, meta 'anuiwarima tupiriya 'ɨtsita mieme hepaɨ.
JOB 5:26 Pe'ukiratsitɨtɨri mɨkite memakateukiwa pekani'atɨariemɨkɨ matsi 'aixɨa 'akuxi pereu'erietɨ, tɨriku 'aixɨa 'anenekaku ka'inɨiwatɨ kemɨtikuxexeɨriwa hepaɨ.
JOB 5:27 »'Ikɨ kaniyuritɨni tekatenetimani. 'Ayumieme keneu'eni meta 'ahetsie yaketineuyuri».
JOB 6:1 Hikɨ Kuwi mɨpaɨ katinita'eiya:
JOB 6:2 «Matsi 'aixɨa pɨyunikeyu kenemɨtiukakukuine xɨka ti'inɨnɨatametsie 'uti'inɨatsienike meta naitɨ kenemɨti'uximatɨarie.
JOB 6:3 Xɨari haramara xiekari mɨtika kemɨkarahete reuyeta pɨreuhaniwe. 'Ayumieme hau'erietɨ nemutaniuni hepaɨ xepɨnete'u'eni.
JOB 6:4 Naimekɨmɨtɨrɨkaɨye 'ɨrɨteya kanetinikwinitɨaka, ne'iyari mɨkɨ 'uayeya mɨmɨya kani'ukweni. Kakaɨyari marika nehetsie kaneyenɨ'ani.
JOB 6:5 ¿Puxu yeutanaka xɨka yu'ikwai hexeiyani tiutatsuaka? ¿Tuuru kepauka yu'ikwai mexeiya tiutamuwa?
JOB 6:6 ¿'Ikwai ka'unamatɨ hahamuritɨ tiyɨwe mɨkwaiyanikɨ? ¿Tawári hetsie mɨyeka manuyehekɨa keha'ane?
JOB 6:7 Matsi yanepɨkara'eriwa neme'inɨatakɨ, nepɨtiutakwikwine mɨkɨ 'ikwaikɨ.
JOB 6:8 »Matsi xɨka Kakaɨyari netsiyetuirienike tita nemɨtiwawirie. Kakaɨyari xɨka tita nemɨreuyehɨwa netiyetuirienike.
JOB 6:9 Xɨka Kakaɨyari naime netsi'utimuraxɨanike, xɨka yumama mɨtɨrɨkaɨye nehetsie 'utatuanike, netsi'ukumaweriyake.
JOB 6:10 Ne mɨyatɨtɨ 'akuxi 'ipaɨ nepɨtinenɨtɨakakeyu, tsepanetɨ kenemɨtiuka'eniwakɨ waɨkawa netiukakukuinetɨ: Kakaɨyari Mupatsie niukieya nepɨkahehɨa.
JOB 6:11 »Tawari tɨrɨkari pɨkayuhayewane nemɨta'ikwewanikɨ meta tixaɨtɨ nepɨkatitakwewi ne'ayeyuritɨ nemuyeikanikɨ.
JOB 6:12 ¿Tete mayetse'i kuta netihɨkɨ? ¿Wurunitse waiyariyari kuta nerexeiya?
JOB 6:13 ¿Kenetiyɨwe nekɨmana nemuyuparewienikɨ, naimeri netiunawaiyarieka tita nemɨrexeiyakai?
JOB 6:14 »Tsepanetɨ xewitɨ Naimekɨmɨtɨrɨkaɨye 'ayemakatɨ mɨtiuhayewaxɨ, hamikuya pɨka'iku'eiri yurikɨ yatiparewietɨ.
JOB 6:15 Matsi ne'iwama 'aki hayari kemɨtiyukupata hepaɨ mekani'aneneni, 'uhanetɨ watahautsitɨwatɨ:
JOB 6:16 kepauka 'ɨwi mɨkakukenitsie waɨkawa 'akananutinenereni, kepauka 'ɨwi mɨtipare 'apatayeyeure,
JOB 6:17 matsi 'uhanetɨ katinikuhayeikawani mɨtiuwakinitsie, mukɨxɨxɨretsie yuhuyeripa kanakumamawereni.
JOB 6:18 Kɨkamete xaɨtsie pɨta mekaniukɨkani, makumawetsie mekanekɨkani, muwa mekanetakukuweni.
JOB 6:19 Kɨkamete Temaha kiekatari haa mekaniuwauximeni, yuharerutamete Tsawa kiekatari meta'ikwiewatɨ haa mekaniuwauximeni.
JOB 6:20 Yuri kememɨte'eriekai mekani'u'uxeni, kepauka mana memu'axɨa mepu'iyɨri.
JOB 6:21 Yaxeikɨata xeme kaxetiniyurieka: xɨka tixaɨtɨ mariweme xete'uxeiya xekaniutimamaweni.
JOB 6:22 ¿Kemɨ'ane pɨxetiutawawiri tixaɨtɨ xemɨneteminikɨ, yatɨni yutuminikɨ xemɨteyutuanikɨ nehetsiemieme?
JOB 6:23 ¿Kemɨ'ane pɨxetiutawawiri xemɨnetsixɨnakɨ memɨnetsi'aye'unie wahetsɨa, yatɨni memɨkate'uyukanenimaya wahetsɨa xemɨnetsitawikweitsitɨanikɨ?
JOB 6:24 »Kenetineuta'ɨkitɨa, 'anari nepɨkataniuni, ketitatsie 'axanetiuyuri keneneuxeitsitɨa.
JOB 6:25 Niuki 'aixɨa manɨyɨne 'axapɨkatiyuyuruwa, matsi tixaɨtɨ pɨkatiyunaki'erie 'axakexemutiyuane xeikɨa.
JOB 6:26 ¿Neniukikɨ nehetsie xete'ahɨani, 'atsixekatemaitɨ xewitɨ mɨwaɨripie hetsie mayeneikakɨ 'eka hepaɨ 'anetɨ?
JOB 6:27 Xeme matsi xekaniyuwaɨriyani nutui hepaɨtsita xemuyuta'iwakɨ, meta yuhamiku xekaniutuawaweni tsepa titakɨ.
JOB 6:28 »Xekeneneuxeiya nehɨxie, ¿Nexetiku'itaiyame xenete'erie?
JOB 6:29 Xekeneutimaixɨa hau'erietɨ xepɨkateyurieka, mɨpaɨ xeketenetimati, ne 'axanepɨkatiuka'iyari.
JOB 6:30 ¿'Axaniuki kuta nehetsie tixɨawe? ¿kamɨtsɨ neneni katimate tita 'aixɨa mɨti'ane meta 'axamɨti'ane?
JOB 7:1 »Teyunaitɨ waɨriyarika tepɨte'uximaya 'ena kwiepa. Tukari mɨyehane xeime hetsɨa temɨte'uximayaka hepaɨ pɨtimatsiɨkɨ.
JOB 7:2 Waɨriyaka ti'uximayatame tukarikɨ taikai mayanikɨ kemɨtitakwewie hepaɨ, ti'iwame hepaɨ kemɨtita'ikwewa mɨtipitɨarienikɨ yu'uximayatsikakɨ,
JOB 7:3 yakɨxeikɨa waɨkawa metseriyariri nepuyeika mɨpaɨ netiuka'eniwatɨ, tɨkarikɨ netiuka'eniwatɨ nepuyeika nehetsie tiunakeku.
JOB 7:4 Ne'ukaitɨ mɨpaɨ nepɨtiku'eriwani: “¿Kepaukari pɨkahekɨare?” Yɨriya hawaikɨ mɨkaheu'aka hepaɨ nepɨtimate, ne'itaritsie ta'aurie xeikɨa nekanawautseni kepaukake mɨkahekɨare.
JOB 7:5 Newaiyaritsie kwitsiterikɨ nepeɨnɨtsa meta nepaukarani, nenawiyari kananukutsanikeni meta pɨniya kaniuhaneni.
JOB 7:6 »Netukari xeiya kaniuhuni tepɨa kemɨrehuiwa reuyeta, kata'ikwewatɨ xeikɨa kanaka'iyuniwani.
JOB 7:7 Kakaɨyari kenaye'eri, netukari xei'itukariyari kanihɨkɨtɨni, hatsuakuri neyutemawietɨ nepɨka'ayani.
JOB 7:8 Hikɨ memɨnetsixeiya, matsi 'uxa'a mepɨkanetsixeiyaniri, tsepa pemɨnetsixeiyamɨkɨ, matsi nepɨka'uyeikaniri.
JOB 7:9 Haiwitɨri ta'eketɨ kemɨtiukumamawere hepaɨ, mɨkite wateukiyata memeukakɨka tawariri mepɨkawatikɨka.
JOB 7:10 Hatsuakuri yukie mepɨka'axe, memakuteitsie mekanakumamawereni.
JOB 7:11 »'Ayumieme nepɨkayɨwe nemɨtinewieni ne'utaniutɨ, ne'iyaritsie kenemɨtiuka'eniwakɨ nekaniutaineni, meta mɨyamɨnetiyurie waɨriyarika kanenipitɨaka 'axa'anemekɨ nemɨtaniunikɨ.
JOB 7:12 ¿Kamɨtsɨ ne haramara netihɨkɨ meta mumariwe maukatewatsie kiekame, xemɨnetsitaxeiyanikɨ xeikɨa?
JOB 7:13 Kepauka 'ipaɨ nemɨtiku'eriwa kename ne'itaritsie nenɨtɨarieni yatɨni ne'aiwarika heunuani ne'uximatɨarietɨ,
JOB 7:14 matsi mana neheinɨtsita pekanenimariutani, 'axakenemɨtiniere neheinɨtsita waɨkawa pekaneniutimariutani.
JOB 7:15 Yanepɨra'eriwakaku nekɨipitɨa ne'ahuiyame nemɨmɨnikɨ, newaiyaritsieri nemɨka'uyeikanikɨ.
JOB 7:16 Nepɨkaheunierimɨkɨri, yuheyemekɨri nemuyeikani yanepɨkara'eriwa. Keneneuhayewari, netukariri tixaɨtɨ pɨkatihɨkɨ.
JOB 7:17 »¿Tewi ketita tihɨkɨ, waɨkawa meuyewetse pemeyeitɨwa, meta hetsiena mieme pemɨ'ahɨawenikɨ,
JOB 7:18 ximeri paitɨ pepitaxexeiya meta tsiere naime hurayaritsie yapemɨti'inɨatanenikɨ?
JOB 7:19 'Ariri pepɨkanetsitaxeiyani, tsikere 'etsiwa 'aɨrika nemaxɨnikɨ kenenepitɨaka.
JOB 7:20 Xɨka 'axanetiuyurieni, 'ekɨ 'ahetsie nitixaɨtɨ 'atsipɨkati'ane, teɨteri wa'ɨwiyame pehɨkɨtɨtɨ. ¿Ketitayari nehetsie petituaxane? ¿Nutsɨ waɨkawa nepɨmatsi'uximatɨa?
JOB 7:21 ¿Ketitayari 'axakenemɨtiuyuri pekanereuyehɨwirie? ¿Ketitayari 'axakenemɨtiuyurikɨ pekaratɨmai? kwitɨwa matsi, tumuanaritsata nekanihuimɨkɨ, pekanenitiwaɨmɨkɨ, matsi nepuka'uyeikaniri».
JOB 8:1 'Ikɨkɨ Wirirari Tsuha kiekame 'ipaɨ katinita'eiya:
JOB 8:2 «¿Kepaɨmexɨa yape'utaitɨ 'apepuyeikani? 'aniuki 'eka waɨkawa mɨtɨrɨkaɨye hepaɨ mɨ'anekɨ.
JOB 8:3 ¿Kamɨtsɨ Kakaɨyari tita mɨtiheitserie 'axatiyurie? ¿Kamɨtsɨ Naimekɨmɨtɨrɨkaɨye titituna tita mɨtiheitserie?
JOB 8:4 Xɨka 'aniwema Kakaɨyari hepaɨtsita 'axamete'uyurieni, mɨkɨ mɨyakatiniwarakapitɨani 'axakememɨte'uyurikɨ.
JOB 8:5 Matsi xɨka 'ekɨ Kakaɨyari pe'ayexeiyatɨ pe'ayani, Naimekɨmɨtɨrɨkaɨye xɨka pe'utawawirieni mɨmareuyehɨwirienikɨ,
JOB 8:6 xɨka pe'itiyaka meta heitseriemekɨ yapetikamieni, mɨkɨ 'ahetsie kanitanuamɨkɨ meta hutarieka hakewa pemetayerɨnitsie kamaniyetuiriemɨkɨ.
JOB 8:7 Matɨari tita pemɨrexeiyakai mɨkɨ 'etsiwa xeikɨa mɨhɨkɨ pɨtihɨkɨtɨkai, 'uxa'atɨni warie waɨkawa kepemɨrexeiyani hepaɨtsita.
JOB 8:8 »Meripaitɨ kiekatari keniwaruta'iwawiya, keneuti'iwau wapaapama tita memɨte'ukaxei hepaɨtsita.
JOB 8:9 Tame takaike tekaniutinunuiwa, 'atsitepɨkatemate, 'etɨriya hepaɨ tatukari kani'aneni 'ena temanu'uwa.
JOB 8:10 Peru mɨkɨ mepɨmatsitaxatɨani, 'ana yapepɨretimani, kememɨtehetima 'ahetsɨa yamepɨtetaxata.
JOB 8:11 ¿Tiyɨwe papiru 'iteɨriyari haa mɨka'ayemanetsie mɨtawere? ¿Tiyɨwe mɨtiwawere haka hakewa haa mumawetsie?
JOB 8:12 Tsepanetɨ muxutu meta xewitɨ ka'enuwiteke, mɨkɨmeri kanitiwaukeni hipatɨ tupiriya katiwawekaku.
JOB 8:13 Kemɨ'ane Kakaɨyari mematɨmai mɨpaɨ katiniwayurieka, mɨpaɨ katineutiparikeni ketita memɨtetakwewie Kakaɨyari memɨka'ayexeiya.
JOB 8:14 Katɨrɨkaɨyemekɨ mekanita'ikwewani, yuri mekateni'erieka tuká winiyarieyatsie.
JOB 8:15 Kepauka mɨkɨ hetsie mɨrawiya pɨkayɨwe mana mɨyɨtɨrɨkariya, mepatixɨrieni kepauka mɨkɨ hirutsie memɨte'awiya.
JOB 8:16 'Iteɨri waɨkawa yuxawari mexeiya xɨripa muwe hepaɨ mekani'aneneni, yumamatekɨ harawerita naitsarie mɨ'etɨriwie:
JOB 8:17 Tetetsata yunanarikɨ kwi katineukawiwiyani kanikuwauneni kwimɨrawiyakɨ.
JOB 8:18 Peru xɨka manuwetsie hahunarieni, hakewa mewekaitsie 'atsipɨkatimatsiɨkɨre.
JOB 8:19 Mɨpaɨ temawierikaya katineutiparikeni, meta mana kwiepa hipatɨ pɨtata 'iteɨri kanitineikani.
JOB 8:20 »Kakaɨyari 'aixɨa mɨtiuka'iyari pɨnaki'erie, kemɨ'ane 'axamɨtiyuriene pɨkaparewie.
JOB 8:21 Hekwamekɨ pemutanawenikɨ pɨmatsipitɨani, meta pe'atemawietɨ pemutahiwanikɨ.
JOB 8:22 Memɨmatsi'aye'unie mepuyutewiyatsitɨani, meta 'axamemɨteyurie wakii pukumaweriya».
JOB 9:1 Kuwi mɨpaɨ tiniwaruta'eiya:
JOB 9:2 «Tsepa yemekɨ nemɨtimate kename mɨpaɨ tiɨyɨ, pɨkayɨwe tewi mumɨwe Kakaɨyari hɨxie 'aixɨa muyuyurienikɨ.
JOB 9:3 Xɨka xewitɨ mɨkɨ 'axatihɨawimɨkɨni, 'iwaurikaya xeimiriyaritsie timieme pɨkayɨwe xeimetɨma muta'eiya.
JOB 9:4 Mɨkɨ waɨkawa katinimaiweni tɨrɨkariyaya kanimariweni. ¿Kemɨ'ane pɨyɨwe 'itamieme 'aixɨa 'iyari mɨyɨxɨna?
JOB 9:5 Hɨri kanikuyuitɨwani mɨkɨ mɨpaɨ katimaikaku, meta yuhaxɨakɨ kaniwakupatani xaɨtsie.
JOB 9:6 Mɨkɨ kwie tsutɨmeyari naime kanikuyuitɨwani meta 'ikitsaraɨte kwie mutuikatɨka kaniwatayuitɨwani.
JOB 9:7 Tau kaniutate'ani, hikɨ 'ɨrɨya kanikɨtɨtɨtseni, xurawetsixi waxawatɨriya kaneukunarɨmani.
JOB 9:8 Mɨkɨ yuxaɨta muyuawi kaniutawerani, meta haramara hamewarieya maunuitɨanikɨ kaniyɨweni.
JOB 9:9 Mɨkɨ Hararu meta Terɨka kaniwarunetɨani, meta Tsimanixi metatsiere xurawetsixi memɨyuwaɨkawa tatsutɨa memuyetei.
JOB 9:10 Mɨkɨ mamariwaweme witsi'aneneme pɨtiyuriene 'atsikatiyumainɨakame, tɨrɨkaɨyemekɨ kemɨtiyuriene pɨkayu'inɨatsinɨa.
JOB 9:11 Xɨka nehɨxie 'uyeyanike, nepɨka'ixeiyakeyu, xɨka nehetsɨa hayeyanike, nepɨkayuwe nemixeiyakɨ.
JOB 9:12 Xɨka tixaɨtɨ yupiini rayeitɨani, ¿kepaikɨ pɨyɨwe mita'imaiyakɨ? ¿Kepaikɨ pɨyɨwe mita'iwawiyakɨ kemɨtiuyurikɨ?
JOB 9:13 Kakaɨyari yuhaxɨa pɨkakununuitɨwa, Xahawi meta 'iparewiwametemama 'ɨkatɨana mekanikatunuma'uweni.
JOB 9:14 »¿Kamɨtsɨ ne kenetita'eiyakeyu? ¿Niukikɨ 'axanemɨti'eiyakɨ hakewa nepeitaxeiya?
JOB 9:15 Tsepa 'axanemɨkatiyuruwame, nepɨkayɨwe nehetsie nemɨtanuanikɨ, nenimayatsika nemuta'iwauni xeikɨa nepɨyɨwe ne'itsɨkame hɨxie.
JOB 9:16 Tsepa ne'itahɨaweyu mɨkɨ mɨnetsi'uta'ei, peru mɨnetsi'enieni nepɨkara'eriwa,
JOB 9:17 'Eka naime mɨti'unawekɨ pɨnetsi'umiewe, 'etsitipemekɨtɨtɨ waɨkawa mɨnetiuka'enitsitɨiya pɨyɨwe.
JOB 9:18 Pɨkanetsi'upitɨawe nemɨta'ienikɨ, matsi pɨta, waɨkawa hiwerika pɨnetsi'upitɨawe.
JOB 9:19 Tɨrɨkariyakɨ xɨka ti'aneni, Mɨkɨ matsi kanitɨrɨkaɨyeni. Xɨka 'itaxaneta, ¿kemɨ'ane pɨyɨwe mi'atɨanikɨ?
JOB 9:20 Tsepa 'aixɨa 'anemekɨ nemuyeika, neneni kanenanutahɨamɨkɨ, tsepa 'atsinemɨka'utaine, nehetsie katinahɨiyamɨkɨ.
JOB 9:21 »'Aixɨa 'anemekɨ nepuyeika, matsi mɨkɨ tixaɨtɨ pɨkatiyunaki'erie, netukari waɨkawa nepɨkanaki'erie.
JOB 9:22 Tinaitɨ yaxeikɨa katini'aneni, 'ayumieme nekanaineni: “'Aixɨa memɨte'u'iyari meta 'axamemɨte'u'iyari yunaime yaxeikɨa katiniwareuyehɨpani”.
JOB 9:23 Xɨka kwiniya 'utaweni hipame wahetsie yapauka me'ukwini, 'axamɨkatiyuriene kaninanaimaka tiuka'eniwakaku.
JOB 9:24 Xɨka xewitɨ kwietsie 'ɨyɨkɨtɨrɨkariyani 'axatiuka'iyaritɨ, mɨkɨ 'itsɨkate wahɨxi kanautinarɨmani. ¿Kemɨ'ane yapɨtiyurieni? mɨkɨri xɨka yakatiuyurieni.
JOB 9:25 »Nanautsame kemɨkahayɨwe netukari mɨpaɨ kaniyeyɨximeni, kaniumieni tixaɨtɨ 'aixɨa mɨti'ane nepɨkaretimaiwe.
JOB 9:26 Kanuwa ha'exanitɨ muhauximeni hepaɨ kani'aneni, kwixɨ hepaɨ kanayɨweni kepauka yu'ikwai mɨtitɨximeni hepaɨ.
JOB 9:27 Xɨka 'ipaɨ ne'utayɨni: “Ne'uximatɨarika nepatɨmaiya, 'aixɨa ne'utaitɨ nepayani, nepɨnepatari kenemɨraka'erie, ne'utanawetɨ nepayani”,
JOB 9:28 kenemɨtiuka'eniwa waɨkawa mɨkɨkɨri nepuma, mɨpaɨ nepɨtimate kename heitserie nehexeiyame meka'erie.
JOB 9:29 'Ariri nehetsie mɨrahɨiwakɨ, ¿titayari waɨriyarika netinepitɨaka yakɨxeikɨa?
JOB 9:30 Tsepa xapunikɨ nemuti'ɨwaxɨ naime ne'uyutaxapunimawatɨ meta nemamatsie xapuni mutumuanikɨ,
JOB 9:31 haa 'ukuri'ɨatɨ muhanetsie 'ekɨ pekaneneukahɨamɨkɨ, hikɨ nekamixatetɨtɨ kanenitixani'erimɨkɨ.
JOB 9:32 »Kakaɨyari tewi hepaɨ pɨka'ane, teyunaitɨ tahamatɨa 'itsɨkame hɨxie temuti'unikɨ.
JOB 9:33 Tatsata 'itsɨkame kaniumaweni teyuhutame tahetsiemieme yamɨtayɨnikɨ.
JOB 9:34 Xewitɨ pumawe neheima nunuwame Kakaɨyari 'iwaɨyɨya 'ateewa mehɨanikɨ nemɨka'imakaxenikɨ kemɨnetimariutakɨ.
JOB 9:35 Nekaheumatɨ neputaniukanikeyu, matsi mɨpaɨ nemɨyɨni nepɨkayɨwe.
JOB 10:1 »Nepuwaɨripieri nepu'uxe ne'ayenieretɨ. 'Ayumieme nepenatituaya ne'uximatɨarika, ne'iyaritsie 'axamɨti'ane ratsiwime nemɨrexeiya.
JOB 10:2 Kakaɨyari mɨpaɨ nepɨrahɨawe: nehetsie pepɨkatiuhɨpani. Tita kuta nehepaɨtsita perayexeiya yakeneutayɨki.
JOB 10:3 ¿Pemɨnetsinanaimakakɨ 'aixɨa ti'ane meta 'amamakɨ pemitawewi pemɨxani'erieka mexi 'aixɨa petiwaxeiya 'axamemɨte'u'iyari kememutekuxata yamemɨteyurienikɨ?
JOB 10:4 Tewi mɨmɨwe hepaɨ 'ahɨxite pɨka'anene, tewi kemɨtiniere hepaɨ 'ekɨ pepɨkatiniere.
JOB 10:5 Tatukari 'atukari hepaɨ pɨka'ane, kepemɨreuteriwe tewi mɨpaɨ pɨkatiteriwe 'a'uyeikatɨ,
JOB 10:6 pemɨtiwaunenikɨ titakɨ nehetsie mɨrahɨiwa naime nehetsiemieme peku'iwawatɨ 'axakenemɨtiuyurikɨ.
JOB 10:7 'Ekɨ pepɨtimate nehetsie pɨkarahɨiwa, 'ahetsie nemuyuye'unakɨ nepɨkayɨwe.
JOB 10:8 »'Ekɨ 'amamakɨ pepɨnetsi'utawewi, 'ekɨ yane'aneme pepɨnetsi'ayeitɨa. ¿Hikɨta penetikumaweriya netukariri mana pe'u'atɨanike?
JOB 10:9 Kena'eriwani 'ekɨ pepɨnetsi'utawewi, haxukɨ. ¿Hikɨta tumuanari penerayeitɨani?
JOB 10:10 'Ekɨ pekatiniuyurieni retsi hepaɨ pemɨnetsiheyeuri, meta pemɨnetsi'utakerɨanariyaxɨ kexiu hepaɨ.
JOB 10:11 Wai meta nawikɨ 'ekɨ pepɨnetsi'utiketɨa, pepɨnetsi'utawipaxɨ ne'umete pepaukunaxɨa meta netatayari.
JOB 10:12 'Anaki'eriyakɨ heima pepuwewi tukari pepɨnetsi'upitɨa, penetsi'ɨwiyatɨ pepɨnetsiyetuiri ne'iiya.
JOB 10:13 »Matsi tixaɨtɨ pepɨti'awietakai, meta mɨpaɨ nepɨtimate 'ekɨ yapepɨtimaikai:
JOB 10:14 'Ekɨ pepɨnetsixeiya, xɨka 'axanetiuyurieni meta pepɨkanerauyehɨwirieni 'axakenemɨtiyurienitsie.
JOB 10:15 Xɨa'ui xɨka nehetsie rahɨiyaka, Xɨka nehetsie karahɨiyaka nemumatsi'anutaxeiya nepɨkayɨwe. Tewiyarikakɨ waɨkawa nepɨhɨne, netiku'eriwatɨ kenemɨtiuka'eniwa.
JOB 10:16 Xɨka ne'anukukeni, maye hepaɨ xeikɨa pepɨnetsitahupie 'etsiwa xeikɨa xɨka ne'ukuyuani 'atɨrɨkariya nepuku'eniwa.
JOB 10:17 Nehetsiemieme pepɨwahekɨata hipame hekwamekɨ memɨtetahekɨatakɨ, nehetsiemiemeri 'ahaxɨa pepɨtimɨiriyarɨme. 'Akuyaxima mepɨnetsimietɨwe yameyupapaɨmetɨ.
JOB 10:18 »¿Titari penetiupitɨa nemɨtinuiwakɨ? Nemɨniɨmɨkaitɨniri mexi xewitɨ kanetsixeiyawekai.
JOB 10:19 Matsikutari nemɨkaniuyeikanike, nemɨniukateukiekaitɨni nemutinuiwaxɨtsie.
JOB 10:20 'Imatɨrieka netukari kemɨti'inɨatsie 'ari kanaye'ani. Neyutemawietɨ 'akuxi 'etsiwa 'ena nemuyeikanikɨ kenenepitɨaka
JOB 10:21 mexixi nekaheyeiwe nemɨkahanuanitsie, kwie 'etsiwa makuhekɨatsie meta 'etɨpiwari hepaɨ mɨ'anetsie,
JOB 10:22 kwiepa waɨkawa makɨyɨwitsie, kwiepa meta 'etɨriya hepaɨ 'anu'atɨkaikaku meta muyuxamurietsie, hakewa hekɨariya yɨriya hepaɨ me'anetsie».
JOB 11:1 Mɨpaɨta kaniutayɨni Tsupaxi Namati kiekame:
JOB 11:2 «¿Tekate'ita'eiya mɨkɨ niuki mɨya mɨpaɨme? ¿'Ikɨ kwinie mɨtiyuniuwie kamɨtsɨ 'atsikatiyuruwame?
JOB 11:3 ¿Naitɨ mɨkɨ niuki mɨya mɨpaɨme teka'utiniukame tarayeitɨani? Peti'ata'ɨreni xewitɨ tawari kamatsitatieyu.
JOB 11:4 'Ekɨ mɨpaɨ peputaine: “Ne heitseriemekɨ 'anepuyeika, Kakaɨyari hɨxie ne 'axanepɨkatiyuriwe”.
JOB 11:5 Kenetinakekeyu xɨka Kakaɨyari 'utaniunike, 'ahepaɨtsita mieme tikuxatatɨ
JOB 11:6 mɨmatsitahekɨatɨanikɨ tewi kemɨkatimaiwe, mɨkɨ matsi hɨrixɨa 'ayemɨiremekɨ katinimaika. Hikɨ 'ana yapepɨretimanikeyu waɨkawa 'axapetiuyuriekutɨtɨ Kakaɨyari 'etsiwa xeikɨa mɨmatikwinitɨa.
JOB 11:7 »¿Petiyɨwekuta Kakaɨyari ketɨtɨ mɨtiyuriene pemɨretimani, yatɨni Naimekɨmɨtɨrɨkaɨye heitserie kemɨrexeiya pemanuku'axe?
JOB 11:8 ¿Ke petiuyuriwe? Muyuawitsie kemeutitewa matsi reuyeta kaneutitewani. Kemeukatewa mɨkite memeukaxɨriwatsie matsi reuhetɨa kaneukatewani. Hatsuaku mɨkɨ pepɨkaretimani.
JOB 11:9 Kwiepa kemakuyewa matsi reuyeta kaniyeuka, naitɨ haramara kematayewa matsi reuyeta kanatayeuka.
JOB 11:10 »Xɨka nuame, metsi'anutahɨani, meta metsi'uta'iwawiya kepemɨtiuyurikɨ, ¿kepaikɨ pɨyɨwe mita'imaiyakɨ?
JOB 11:11 Kakaɨyari pɨwamate teɨteri tewiyarika memɨkahexeiya, kepauka 'axamemɨteyurie, mɨkɨ pɨkatiwareuyehɨwirie.
JOB 11:12 Tewi mɨkayɨkɨhɨawe timaiwetɨ payani kepauka puxu yeutanakatsie tewi mayenuiwa.
JOB 11:13 »Matsi xɨka 'a'iyari pe'iyetuirieni meta xɨka 'amamate hetsɨana peheutatsera,
JOB 11:14 xɨka ke'axapemɨtiuyurikɨ petiuhayewa meta 'akie 'axamɨti'ane peka'upitɨani,
JOB 11:15 hikɨ 'ana pekayutewiyatɨ pepayani heitseriemekɨ pe'uyeikatɨ meta pekaheumatɨ.
JOB 11:16 'Aheyemekɨ pekatinatɨmaiyamɨkɨ kepemɨtiuka'eniwa, yatɨni haa manuyetɨa hepaɨ xeikɨa pekatini'erimɨkɨ.
JOB 11:17 'Ana 'atukari waɨkawa hekɨatɨ payani keyuri tau tukamieme hepaɨ, meta yɨriya ximeri mieme hepaɨ pɨyɨni.
JOB 11:18 'Aixɨa 'iyari pepuyeikani, 'akuxi muxuawekɨ pemɨta'ikwewanikɨ, 'ahetsie nunuwame 'apuweni meta pekayu'iyaritɨatɨ pepeukukutsuni.
JOB 11:19 Pepuka'uxipiweni xeime peka'ayemakatɨ, meta yumɨiretɨ mepɨ'axɨani 'ahetsɨa pemɨwaparewienikɨ.
JOB 11:20 Peru 'axamemɨte'u'iyari wahɨxite kanitɨxɨamɨkɨ, memɨyuta'una mepɨkayɨwekaxɨani. Tixaɨtɨ mepɨkatetakwewie, memɨkwini tukariyari xeikɨa mepɨtakwewie».
JOB 12:1 Mɨkɨ hepaɨtsita Kuwi mɨpaɨ katinita'eiya:
JOB 12:2 «Xeme xɨari kiekari xemanukuhana xepɨhɨkɨ. Kepauka xeme xemɨkwini, timaiwetɨ xewitɨ pumaweni.
JOB 12:3 Neta xehepaɨ nekatinimaiweni, xeme xeikɨa waɨkawa xete'uyemaikame xepɨkayu'erieka. Neta mɨkɨ tinaime nekatinakumaika.
JOB 12:4 »Ne, Kakaɨyari nepɨkɨhɨawekai mɨkɨta pɨnetsiku'eiyakai, hikɨri nehamikuma netsi'atsemete memɨhɨkɨtɨnikɨ nepayuyeitɨa, ne 'atsieriwame nepɨhɨkɨ, heitserie nemexeiya nehetsie mɨkarahɨiwa.
JOB 12:5 Teɨteri 'aixɨa 'iyari memeutitei mɨpaɨ meputiyuane: “Kemɨ'ane mɨtiukwinitɨarie tawari peuyewetse waɨkawa mɨnɨitɨarienikɨ”, “Kemɨ'ane matiwexime, pauyewetse matitaimarieni”.
JOB 12:6 Tenawayamete 'aixɨa 'iyari yukie mepeutitei, 'aixɨa 'iyari mepu'uwa Kakaɨyari memɨhaxɨatɨa mɨpaɨri mepɨteku'eriwa me'ikemakame meyu'erietɨ.
JOB 12:7 »Matsi tewaxi yeutari keniwaruta'iwawiya, mɨkɨ mekamenayehɨtɨakuni, wikixi memawɨwawe keniwaruta'iwawiya, mɨkɨ mepɨmatetaxatɨani,
JOB 12:8 kwie matɨa ketineutaxata, mɨkɨ pɨmatita'ɨkitɨani, ketsɨte haramaratsie memɨye'uwa wahamatɨa ketineutaxata, mɨkɨ mepɨmatsi'aye'eritɨani.
JOB 12:9 Mɨkɨ yunaitɨ mɨpaɨ mepɨtemate Yawé muwarunetɨakɨ yɨtɨrɨkariyakɨ.
JOB 12:10 Teyunaitɨ temayeyuyuri mɨkɨ tɨrɨkariyayatsie tetewiyatɨ tepɨte'ane, meta teyunaime ta'iiya pɨtatsipitɨa temɨtɨrɨkawinikɨ.
JOB 12:11 Naka niuki kani'enieka 'i'inɨatatɨ kemanɨyɨne neni 'ikwai kemɨra'inɨnɨata hepaɨ.
JOB 12:12 Mɨtimaiwenikɨ mɨ'ayumieme 'ukirawetsixi wahetsie kanixuaweni, meta mɨixa wiyari 'uyeikatɨ peiti'enietɨyani.
JOB 12:13 »Kakaɨyari hetsɨa puxuawe mɨtimaiwenikɨ mɨ'ayumieme meta tɨrɨkariya, 'ɨxatsi meta meiti'enietɨyani mɨkɨ pɨtipiinieya.
JOB 12:14 Tita mɨkɨ mɨtika'una, xewitɨ pɨka'enukuketɨani, kemɨ'ane manutahɨani, xewitɨ pɨkayɨwe mɨwayexɨna.
JOB 12:15 Xɨka mɨkɨ wiyeri kaheyenɨ'ani, pɨtitiwauke, xɨka 'i'eirieni tsepa muwiye, naitɨ kwie pukayuyuipike.
JOB 12:16 Tɨrɨkariya hetsɨana kanimiemetɨni meta ke'aixɨa mɨti'aitakɨ, memukwamanarie meta memɨteyukwamana kaniwakemaka.
JOB 12:17 Teɨteri 'ɨxatsitamete puwatewiyatsitɨa mekaheukemaritɨkaime pɨwarayeitɨa meta 'itsɨkate mekatemaiwaweme kaniwarayeitɨwani.
JOB 12:18 Te'aitamete wa'itsɨ pɨwakunawairiwa puwaranakaxɨrɨwa, waɨriyarika te'uximayatamete wahepaɨ me'aneneme puwarayeitɨwa hanika meheukaweratɨkaime.
JOB 12:19 Mawari wewiwamete pɨwatewiyatsitɨa meka'ukakaikame pɨwarayeitɨa, meta waɨkawa memeuka'u puwaratixɨrɨwa.
JOB 12:20 'Ɨxatsitamete watenitsie muwiere pɨyɨwe meta 'ukirawetsixi mekatemaiwaweme muwarayeitɨani.
JOB 12:21 Memeu'enieriekai 'aixɨa mekatexeiyariekame puwarayeitɨwa, meta memeuka'u titatsie memɨteyukɨtɨrɨkariya puwakunawairiwa.
JOB 12:22 Pɨtikuhekɨata tsepa yɨriya taɨta timieme, hekɨaripa pɨti'atɨwa waɨkawa yɨwipa timieme.
JOB 12:23 Nuiwarite memamariwaweme puwarayeitɨwa yatɨni puwaka'una, metehexeiyame puwarayeitɨwa yatɨni naitsarie puwataxɨrɨwa.
JOB 12:24 Kiekaritsie memanuyetei mekatemaiwaweme puwarayeitɨwa, makumawetsie hau'erietɨ meku'uwame puwarayeitɨwa.
JOB 12:25 Yɨwipa mekaniu'uwani mete'anawiwiyatɨ, meta mepɨtakeitsarietɨkɨka tarɨwekarixi wahepaɨ.
JOB 13:1 »Naime mɨkɨ nehɨxikɨ nekatiniuxeiya, nekatiniu'enieni meta nekatinetimaitɨyani.
JOB 13:2 Neta waɨkawa nekatiniuyemaika xehepaɨ, xeme xeikɨa waɨkawa xete'uyemaikame xepuyu'erie.
JOB 13:3 Matsi yemekɨ nepɨtixatamɨkɨ pɨta Naimekɨmɨtɨrɨkaɨye hamatɨa, pɨnetsinake nemɨtitixatakɨ Kakaɨyari hamatɨa ketitayari nemɨti'ane.
JOB 13:4 Xeme matsi netsikwamanamete xekaniyɨaka, teyu'uayemawamete tixaɨtɨ memɨkateyunaki'erie xepɨhɨkɨ.
JOB 13:5 Xɨka xetehayewanike xe'utiniutɨ. Mɨkɨri mɨpaɨ pɨtimatsiɨkɨnikeyu kename xetemaiwawe.
JOB 13:6 Hikɨta ne xepɨnetsi'enieni, kwi xekeneu'eni kenemɨtayɨni.
JOB 13:7 ¿Kakaɨyari hepaɨtsita xemɨte'u'itani xeteyuwaɨririya? ¿Hetsienamieme kwamanarikakɨ xetekuxatatɨ?
JOB 13:8 ¿Xe'iparewiekame xeteyu'erie? ¿Xemeri hetsiena miemete niukametemama xete'ayuyeitɨwa?
JOB 13:9 ¿Xɨka mɨkɨ xeheutixeiyaxɨani ketiɨyɨwe? ¿Xete'ikwamanawawe teɨteri kememɨte'ayukwamana wahepaɨ?
JOB 13:10 Kanahekɨaka matsi mɨkɨ pɨta kanixe'utatieweni xɨka xeme xete'itawatɨ hetsiena mieme xeyuhekɨatani.
JOB 13:11 ¿Kamɨtsɨ xekate'itimakawawe xawatɨriyaya? ¿Xehetsie katiukawewe mariutsikaya?
JOB 13:12 Yakɨ xeikɨa kememɨtekuxatakɨ naxi hepaɨ pɨtiyumatsiɨkɨ, yuheima nunuwame haxukɨ muwewiya mɨtariwe hepaɨ.
JOB 13:13 »Xeketeneuhayewa xe'utiniutɨ xekeneneupitɨa nemɨtaniunikɨ, yaketiuyɨni kenemɨyɨ.
JOB 13:14 ¿Titayari kwinie 'anekɨa netiyukakeka, meta netukari netitatuaka?
JOB 13:15 Tsepa mɨnetiumi. Ne hetsiena nepɨtitakwewie. Matsi hɨxiena kenemɨtiuyeikakɨ yanepɨtayɨni.
JOB 13:16 Mɨkɨ pɨhɨkɨ mɨnetsitawikweitsitɨani: metsɨ xewitɨ Kayaɨyari mɨka'ayexeiya pɨkayɨwe hɨxiena mɨtakeni.
JOB 13:17 »Neniuki xekeneu'eni, kenemɨtayɨni xekeneu'enana:
JOB 13:18 Neuxei neheima kenemɨtitanuani 'aixɨa nekatiniuyurieniri, mɨpaɨ nepɨtimateri nehetsie pɨkarahɨiyani.
JOB 13:19 ¿Xewitɨ nehetsie mɨrahɨani tiyɨwe? Xɨka xewitɨ yɨweni, tawariri nepɨkataniuni kepaukakeri nemɨmɨni.
JOB 13:20 »Kakaɨyari, tihutame xeikɨa nemumatiwawirie kenetineupitɨa, hikɨ 'ana 'ahɨxie nepɨkaneti'awieta:
JOB 13:21 'Ariri pepɨkanetikwinitɨaka meta keneneuhayewa penetsimariutatɨ.
JOB 13:22 Nemɨnetahekɨatakɨ keneneutahɨawi, nepɨmatsita'eiya, yatɨni keneneupitɨa nemɨtaniunikɨ, 'ekɨta keneneuta'eiya.
JOB 13:23 Kepaɨmexɨa 'axanemɨtiuyuri keneuti'inɨata, yakenetineuxeitsitɨa 'inɨari kenemɨreutitsanaxɨa meta ke'axanemutayɨkɨ.
JOB 13:24 ¿Ketitayari pekanetixeiyamɨkɨ? ¿Ketitayari nemɨmatsi'aye'unieka hepaɨ petiyɨane?
JOB 13:25 ¿Xatsi 'u'enirɨmeme pe'utimariutame petitatemɨxikita? ¿Kuxari peranukuweiya?
JOB 13:26 Nehetsiemieme pepɨraka'utɨa hatsiwimekɨ, temaikɨyari paitɨ ke'axanemɨtiuyurikɨ, mɨkɨkɨ pepɨnetiuka'enitsitɨwa.
JOB 13:27 Ne'ɨkatetsie tepɨa karenayarikɨ pepɨnetsi'akuwie, kenemɨtiuyeikakɨ pepɨnetsikuxeiyane xeikɨa, neketa xeikɨa pepu'iyeikene kenemɨtikuyeika.
JOB 13:28 »Nawi winu makatuarike mɨtaxɨxime hepaɨ tewi pɨ'ane, kamixa tepaxi memitakwai hepaɨ pɨ'ane.
JOB 14:1 »Tukari 'etsipɨpaɨme, timɨireta 'uximatɨarika, tewi 'ukaratsitsie mɨyenuiwaxɨ meixeiya.
JOB 14:2 Tuturite hepaɨ kani'aneni, mɨkɨ mɨtineika kwitɨwata kanitiwaukeni, 'etɨriya 'akareuteteretɨ kemɨtiyukupata hepaɨ pɨ'ane.
JOB 14:3 ¿Xeime mɨpaɨ 'aneme hetsieta pereutaniere? ¿Xeimeta nehepaɨ petiuta'iwawiyawe?
JOB 14:4 ¿Kemɨ'ane pɨyɨwe mɨkati'itiya ti'itiyakame mɨrayeitɨani? xewitɨ pumawe mɨpaɨ mɨtiyurieni.
JOB 14:5 Tewi tukarieya 'ari puti'inɨatsie, 'ekɨ 'ari yapeputayɨ kepaɨmeme metseriyari 'amuyeikani, 'inɨariyari 'apepuyete mana manutiyani pɨkayɨwe.
JOB 14:6 Keneuhayewa pe'ixeiyatɨ, keneuhayewa kayuwatɨ 'amuyeikanikɨ, yutukaritsie yutitemawieyuke yu'iwarikakɨ.
JOB 14:7 »Xɨka kɨye hawitekieni, pɨyɨwe mayɨraxɨanikɨ meta mayɨraxɨani pɨkatiyɨnare.
JOB 14:8 Xɨka mɨkɨ nanayarieya 'ukirawetsixi 'akɨne kwiepa meta mɨkɨ kɨtsunuyari 'umɨni yukwiepa,
JOB 14:9 matsi kepauka haa hetsiena mɨye'ani kanitaxutuimɨkɨ, 'iteɨri hekwamekɨ muka'iteɨtsie hepaɨ kanikayɨramɨkɨ.
JOB 14:10 Matsi tewi, pɨmɨwe meta yɨtɨrɨkariya peuyehɨpa, yu'iiya 'imatɨrieka mieme panatituaya, hikɨ 'ana pukumamawere.
JOB 14:11 Haramaratsie haa kemɨranati'eke hepaɨ, meta haa 'aki 'amupapatsie kemɨrakawauke hepaɨ,
JOB 14:12 mɨpaɨta teɨteri, kepauka kayuwatɨ memɨte'uhipite, tawariri mepɨka'anuku'uwe. Mexi muyuawi 'atsikayɨweni, memukwi mepɨka'anuku'uni meta mepɨka'anutaneniere mekutsutɨ.
JOB 14:13 »Xɨka yɨwenike mɨkite wateukiyapa pemɨneniuti'awieta kepauka 'ahaxɨa manuyeyanike. Tsikere yapaɨmexɨa xɨka penetsi'utipinirienike, 'ariketa xɨka penetsi haye'erienike.
JOB 14:14 Xɨka tewi 'umɨni, tawariri 'ayeyuritɨ pɨka'ayani. Kenemɨreutere netiuka'eniwatɨ ne'uyeikatɨ nepɨta'ikwewani kepaukake nemɨxɨnarieni.
JOB 14:15 'Ekɨ pepɨnetsitahɨawe, neta nepɨmatsita'eiya, pepɨnetsi xeiyamɨkɨni pemɨnetsi'utawewikɨ.
JOB 14:16 Meta pepi'inɨatamɨkɨni kenemɨtiuyeika, matsi ke'axanemɨtiuyurikɨ pepɨkahe'eriwaniri.
JOB 14:17 Kuxitari 'anutawipemeta 'inɨari kenemɨreutitsanaxɨakɨ pepika'uta, meta naime ke'axanemɨtuiyuri pepɨnereuyehɨwirieni.
JOB 14:18 »Matsi hɨri kemɨtika'unike yapapaɨmetɨ, tetexi kemɨtiyukupata makainiketsie,
JOB 14:19 haa 'ayepari kemɨtixɨtɨa meta haa mɨtɨrɨkaɨye kwie kemɨretutuwe, mɨpaɨta 'ekɨ tewi ketita mɨtitakwewie pepɨreutiparitɨwa.
JOB 14:20 'Ekɨ naimekɨ mɨkɨ tewi pepa'iwa, mɨkɨ pukumamawere, yɨkɨtiyuxexeiyame pepayeitɨwa, hikɨ 'ana pepeinɨ'awa.
JOB 14:21 Xɨka niwemama 'aixɨa metehahɨawaruwani, mɨkɨ pɨkaremaika, xɨka mehenanaimarieka, mɨkɨ 'atsipɨkaretimani.
JOB 14:22 Yuxaɨta xeikɨa kukwiniya pe'enie yuwaiyaritsie, yuxaɨta xeikɨa peyuhiwerie».
JOB 15:1 Merikɨte 'Eripaxi Temani kiekame Kuwi mɨpaɨ katiniuta'eiya:
JOB 15:2 «Mɨtimaiwe 'atsimɨkatimate hepaɨ pɨkatiyu'eiya meta 'ekaniuki pɨkawewie.
JOB 15:3 Meta niukikɨ yakɨ xeikɨa 'utaitɨ pɨkayumiene meta niukikɨ tixaɨtɨ mɨkatiyunaki'erietɨkakɨ.
JOB 15:4 'Ekɨ matsi 'ahetsie pekanihayewani Kakaɨyari pe'ayemakatɨ, meta waɨkawa peka'eyexeiyatɨ mɨkɨ kemɨtinake.
JOB 15:5 'Axamɨti'ane petipitɨakaku 'ateni yakatinihekɨatani, yaxeikɨa pepɨtiuxaxata teyukwamanamete wahepaɨ.
JOB 15:6 'Aniukikɨ pekananuyutahɨpani, nekɨma hawaikɨ, 'Ateni yakatinikuxatani 'ahetsiemieme.
JOB 15:7 »¿'Ekɨmerikuta tewi pemutinuiwaxɨ petihɨkɨ? ¿'Ekɨmerikuta petiutinuiwaxɨ yemurite kanewekaku?
JOB 15:8 ¿Petiu'enaxɨ kuta Kakaɨyari waxeɨrietɨ kemɨtiwa'ɨxatsitɨatsie? ¿'Ekɨxeikɨa kamɨtsɨ petiuyemate?
JOB 15:9 ¿Kepetimate 'ekɨ tame temɨkate'uyemate? ¿Kepereti'ena 'ekɨ tame mɨpaɨ tekate'i'eniekaku?
JOB 15:10 Tame tekanimutuxatɨkani meta waɨkawa wiyari tekanexeiyatɨkani, tame matsi waɨkawa tekateniuxeiya keyuri 'apaapa.
JOB 15:11 ¿'A'iyaritsie pɨkareuyeyeika tsepa Kakaɨyari matsinɨtɨa meta metsikɨhɨawetɨ 'aixɨa 'anemekɨ?
JOB 15:12 ¿Ketitayari haxɨakɨ xeikɨa perayeika? ¿Ketitayari 'ahɨxitekɨ petiutimerɨka?
JOB 15:13 ¿Ketitayari Kakaɨyari hɨxie xeikɨa petiha'a meta 'aneni pepɨkapirenutɨa pepitatua xeikɨa?
JOB 15:14 »¿Ketita tihɨkɨ tewi 'aixɨa 'aneme muyu'erieka, meta 'uka hetsie yenuiwakatɨtɨ heitserie muyupitɨanikɨ?
JOB 15:15 Xɨka Kakaɨyari te'i'uximayatsiriwamete memɨpatsie wahetsie yuri kati'erieka, meta muyuawi tɨma 'itiyakame pɨka'ayeitɨa,
JOB 15:16 ketiyɨwe matsi tewi hetsie yuri mɨte'eriekakɨ, mɨxani'eriwa 'axatiyurienetɨ meta yu'iyaritsie heuharimɨkɨkaku 'axamɨti'anekɨ.
JOB 15:17 »Keneneu'eni, kenemɨtayɨni, ketita nemɨtiuxei yanepɨtayɨni,
JOB 15:18 Mɨkɨ kanihɨkɨtɨni temaiwawemete memihekɨataxɨ, tixaɨtɨ mekate'anukanatɨ yupaapama wahetsie tita memɨtehetima.
JOB 15:19 Mɨkɨxeikɨa kwie mepɨyetuiriyarie, xewitɨtɨma teewa kiekame wahixɨata pɨka'uyetɨa.
JOB 15:20 Kakaɨyari mɨka'ayexeiya pɨtiuka'eniwani kepaɨmexɨa muyeikani, mɨkatiyukanenimaya tukarieya kaniuti'inɨatsiyarieniri.
JOB 15:21 Mariutsika kani'enieka. Kepauka kayuwatɨ muma, tenawayamete hetsɨana mekaniye'axeni.
JOB 15:22 Makɨyɨwitsie xɨka 'uyani pɨkahakunuani pɨtiku'eriwa, 'ixiparakɨ mumieriemɨkɨkɨ.
JOB 15:23 Hau'erietɨ pukuyeika, wirɨkɨxi puwa'ikwai xeikɨa, pɨtimate hetsiena maye'aximekɨ yɨriya tukariyari.
JOB 15:24 'Aixɨa mɨkatiyuriekɨ meta mɨtiuka'eniwakɨ marika piwewirie, yumariutatɨ ti'aitame mitamierieximeni hepaɨ,
JOB 15:25 Kakaɨyari mu'unikɨ heu'u'urawitɨ, Naimekɨmɨtɨrɨkaɨye hepaɨtsita mariweme mayuyeitɨakɨ.
JOB 15:26 Yɨkɨipi heitserie 'anukuhanatɨ Kakaɨyari mutamikɨ, 'atsutsuime 'a'ɨtɨ yuheima nunuwame mɨtɨrɨkawi.
JOB 15:27 »Tsepa yɨhɨxie mayewaiya wiyakɨ, meta mɨranayuhayewa wai manayuhɨayatsie,
JOB 15:28 kiɨripa kanetayerɨmɨkɨ, kiita hipatɨ memɨkahayeteita, kii matixɨriximeta.
JOB 15:29 Waɨkawa kemɨrexeiyakaikɨ katiniku'eirimɨkɨ, pɨkareutere tita mɨrexeiya kemɨrexeiya kwiepa manukatsie tɨma pɨkatitaxiɨni.
JOB 15:30 Makɨyɨwitsie 'uyeikatɨ muyuta'unakɨ pɨkayɨwe, yɨrarimeyari kanitayɨnarimɨkɨ tai xɨriyarikɨ Kakaɨyari 'iiyaya kanitaxɨtsitɨamɨkɨ.
JOB 15:31 Mɨkɨ pɨkayukwamanani meta niuki yakɨ mainetsie yuri pɨkati'erieka, mɨpaɨ yɨanetɨ tixaɨtɨ pɨkatiukaxeiya.
JOB 15:32 Meripaitɨ yapɨrakapitɨarieni kahaye'awekaku 'akuxi kemɨtiyurienikekaikɨ, meta xawariri pɨkatitsitsiɨraxɨani.
JOB 15:33 Kaxie nanari takariyari mɨtsitsiɨrawi mɨrauyewe hepaɨ kaniyɨmɨkɨ, huriwu mɨkatixuturuwe hepaɨ kaniyɨmɨkɨ.
JOB 15:34 Kakaɨyari memɨka'ayexeiya wanɨtɨ 'aixɨa mɨti'ane pɨkatiukaxeiya, 'itarikakɨ tumini memɨ'iwaku wakii taikɨ kanitixɨtsitɨariemɨkɨ.
JOB 15:35 Tita mɨkatiheitserie yuhetsie mepɨpitɨa meta 'axamɨti'ane mepɨtiniweya, wahetsie kwamanarika kanayeneikani memitiniweyani hepaɨ».
JOB 16:1 Mɨkɨ hepaɨtsita, Kuwi mɨpaɨ kaniutayɨni:
JOB 16:2 «Niuki 'ipaɨ 'anuyɨtɨkaime waɨkawa nepeye'eniwari, xeme matsi, xenetsinɨtɨanike xepɨnetsi'uximatɨa pɨta.
JOB 16:3 ¿Kamɨtsɨ xekatehayewa kayuwatɨ xe'umatɨ? ¿Ketitakɨ kuta 'axanetixematɨa xemɨnetsiye'eiyarɨmenikɨ?
JOB 16:4 Netatsiere yaxeikɨa nekatinixe'utahɨawiweni xɨka xeme nehepaɨ xetekukuyenike. Netatsiere xehepaɨtsita kexemɨte'uka'eniwanikɨ witsi'anemekɨ yanepɨtikuxatanike, nemu'u ne'uyuitɨwatɨ nexeheunanaimatɨ.
JOB 16:5 Neniukikɨ nekanixe'anutanieritɨawenike, nekanixe'ɨnɨtɨanike netenikɨ.
JOB 16:6 »Xɨka ne'utaniukani, nekukuiniya pɨka'anukanunuwa, xɨka neka'utaniuni, yaxeikɨata tsiere pɨkaheunuani.
JOB 16:7 Yurikɨ Kakaɨyari pɨnetsi'uka'unaxɨ, netɨɨriyama puwarutayuniyaxɨ.
JOB 16:8 Pɨnetsi 'anutinama xeikɨa, nehepaɨtsita pɨtihekɨata, pɨnetsi'utawatsiɨxaxɨ mɨyane'anetɨ nekɨmana xeikɨa katinikuxaxatsiwani nehetsie pɨrahɨiya yakɨxeikɨa.
JOB 16:9 »Ha'atɨ Kakaɨyari pɨnetsi'uweiya pɨnetsititsana, nehetsiemieme yutamete putixikauteke, mɨnetsi'aye'unie kwi pɨnetsixeiya xeikɨa.
JOB 16:10 Teɨteri nehetsimieme waɨkawamekɨ mepɨnetsinanaima, teyuyuriyamete ne'auritapa mepɨnetsihautiwaya, yunaitɨ meyɨnɨtɨ nehepaɨtsita xeikɨa mepeuniuka.
JOB 16:11 Kakaɨyari 'axamemɨte'u'iyari wahetsɨa xeikɨa pɨnetsiyetɨa, 'axamemɨte'u'iyari wahetsɨa pɨnetsi heutahɨa.
JOB 16:12 Ne 'aixɨa 'iyari nepuyeikakai, mɨkɨ pɨnetsiheutitsanaxɨa, nekɨipitɨa 'awiereka pɨnetsiheutimuraxɨa, nehetsie puyuta'iwiri mɨnetsitamienikɨ.
JOB 16:13 Tupikɨ temɨmɨmete hetsɨana miemete mepɨnetsi'anutina. Mekate'uyukanenimayatɨ nemumete mekananuyexuni, meta nenema meta netsiɨrika payewiwi kwiepapaitɨ.
JOB 16:14 Waɨkawa pɨnetiukwinitɨa 'akuxi pɨnetikwinitɨa, pɨnetsi'anukuwei yumemiwame mɨhɨkɨtɨni hepaɨ.
JOB 16:15 »Newaiyari heiwerika kamixayari pɨhɨkɨ, Nekana tumuanaripa peuyune.
JOB 16:16 Waɨkawa ne'utatsuatɨ nehɨxie nepayexeta, tsuarikɨ nepɨwatiyɨyɨwi nehɨxitetɨa,
JOB 16:17 matsi nemamakɨ 'axanepɨkatiuyuri nepeu'itiyatɨka, kenemɨtiyunenewie pɨheitserie.
JOB 16:18 »Xɨa'ui kwie, nexuriya pepɨka'anukanarɨmani. Nehiwari maununuwanikɨ pepɨka'ipitɨaka.
JOB 16:19 Hikɨtɨtɨ muyuawitsie xewitɨ kanenixeiyani, 'ahautitewakaku neheima nunuwame kaneyeikani.
JOB 16:20 Nehamiku pɨhɨkɨ nehetsiemieme metaniuni, mɨkɨ hɨxie waɨka nekaniyuhiwerieka,
JOB 16:21 Kakaɨyari hɨxie nehetsiemieme mɨtaniunikɨ, xewitɨ yuhamikuma wahetsiemieme xeime hɨxie maniuka hepaɨ.
JOB 16:22 Yapaɨmexɨa wiyari xeikɨa kananukayeimɨkɨ mexixi ne nekaheyeiwe nemɨkahakunuanitsie.
JOB 17:1 »'Ariri nekanewaɨriyatɨ nepayeixime, netukari pɨtixɨximeri, nemakateukieni kanenitakwewiekari.
JOB 17:2 Netsiyuriyamete mepɨnetsi'anutinama, nehɨxite pɨtiuka'eniwa netsiyuriyamete newaxeiyatɨ.
JOB 17:3 »Xɨa'ui Kakaɨyari, nehetsie keneutanua, ¿Kemɨ'ane tawari pɨyɨwe neheima mɨtanuani?
JOB 17:4 'Ekɨ mekaheta'eriwaweme pepɨwarayeitɨa, 'ayumieme pepɨkawapitɨani memɨte'ayu'iwakɨ.
JOB 17:5 Kemɨ'ane ti'iwatɨ yuhamikuma wahetsie mɨrahɨani, yuniwemata kaniwaxeiyamɨkɨ mekwiximeme.
JOB 17:6 »Kakaɨyari teɨteri wateta kaneniyetuani memɨnetsikuxatatɨwenikɨ, xewitɨtɨma pɨkayu'eirie nehɨxie menetsiku'aɨtsikawiyatɨ.
JOB 17:7 Mɨyanetiuka kukuinetɨ nepɨkahauniereri, naitɨri newaiyari 'etɨriya hepaɨ pɨ'ane.
JOB 17:8 Teɨteri 'aixɨa memɨte'u'uwa xɨka menetsi'uxeiya mepɨkɨhɨxiyawa, wahetsie mɨkarahɨiwa mekaniuyeha'arɨweni Kakaɨyari memɨka'ayexeiya wahepaɨtsita,
JOB 17:9 tewi heitseriemekɨ yamɨtikamie yuhuyeta xeikɨa kaniumieni meta yumamatsie meu'itiyatɨka kanitɨrɨkaɨyeni.
JOB 17:10 »Kamɨtsɨ xeme yunaitɨ xekenakɨni nehepaɨtsita xetekuxatatɨ, Xetsata xeimetɨma timaiweme nepɨkakaxeiya.
JOB 17:11 Netukari kananukayeikani, meta kenemɨtinekɨhɨawekai yapɨkatiɨyɨ metatsiere yaxeikɨa ne'iyari tita mɨreuyehɨakai.
JOB 17:12 'Ikɨ teɨteri yɨriya hekɨariya mekanayeitɨwani, naitɨ kaniɨyɨwini, matsi 'ipaɨ mekaniutiyuaneni: “Kanikuhekɨarirɨmeniri”.
JOB 17:13 Hakewa nemekateukieni mɨkɨxeikɨa xɨka netakwewieka nekii mayanikɨ, kamɨtsɨ makɨyɨwitsie xeikɨa neyuka'itɨame nepeukuni,
JOB 17:14 mɨtiyɨpɨniyawe “Nepaapa” nepɨtiuterɨwani, kwitsiterita “Nemaamama” meta “Ne'iwama 'ukari”.
JOB 17:15 Kamɨtsɨ, ¿tita nemɨtitakwewie hakewa peyuhayewa? ¿Kepaikɨ nehetsie tita nemɨtitakwewie pɨtixeiya?
JOB 17:16 ¿Nehamatɨa reukahani mɨkite wakitenietsie paitɨ? ¿Teyunaitɨ teteheukahaxɨani tumuanaripa paitɨ?»
JOB 18:1 Merikɨte Wiriha Tsuha kiekame mɨpaɨ katinita'eiya:
JOB 18:2 «¿Kepaukari peputihayewa waɨkawa petikuxatatɨ? 'Aixɨa ketine'atimaixɨaka 'anakeri tepɨtetixata.
JOB 18:3 ¿Ketitayari yeutari memumamariwawe wahepaɨ petatiyuriene? ¿Temɨka 'u'iyarini hepaɨ petatiku'eriya?
JOB 18:4 'Ahaxɨakɨ 'a'iyari pekanitatsanarɨmeni, matsi kwie 'akumawetɨ pɨkayuhayewa 'akɨmana, meta 'ayepari pɨkakuyuaxɨani yuhuyeripa.
JOB 18:5 »'Axamɨtiuka'iyari kɨxemeya kanitɨmɨkɨ, taiya 'amanutitetere tatɨri katinihayewamɨkɨ.
JOB 18:6 Xawatɨriya kiitana kaniyɨrirɨmeni, kɨxeme mikɨxiya kanitɨmɨkɨ.
JOB 18:7 Heutɨrɨkaɨyetɨ kemɨtikuyeikakai pɨkaheuwaɨreri, yuhetsiemiemekɨ kemɨtiyukuhɨawe kanetihɨamɨkɨ.
JOB 18:8 Yu'ɨkatekɨ winiyari hetsie kanikakemɨkɨ, mɨkɨ winiyarieya 'ihɨatɨ kanayeimɨkɨ.
JOB 18:9 Yuketatetɨa wahɨatɨkaitɨ puyuhayewa, yuheyemekɨ hɨatɨ kaniyuhayewamɨkɨ.
JOB 18:10 Winiyari kwiepa 'awie kumatɨ kanitakwewieka, winiyari manumietsie kanikuwereni.
JOB 18:11 Tsepa hakewa kanimariutsieka, 'utɨmana xeikɨa kanikuyeikani.
JOB 18:12 Mɨtika'enitsitɨwa xeikɨa kanikuweiyaneni, tita mɨti'uximatɨa pɨka'ipitɨa xeikɨa 'etsiwatɨma.
JOB 18:13 Kwiniya waiyarieya kanitaxɨtɨaximeni, mɨki mamateya meta 'ɨkateya kanitikwaiximeni.
JOB 18:14 Hakewa 'aixɨa 'anemekɨ mekateitsie 'ateewa paitɨ puyuhayewa, hikɨri ti'aitame mɨtiyumariuta hetsɨa kaniumieni.
JOB 18:15 Kiitana tai naime katiniuyetaiyarɨmeniri, hatsupure tatɨ kaniuyenɨka muwayekatsie.
JOB 18:16 Kɨtsunu nanayari kaniutiwaniri, xawariyari mu'utana miemeri naitɨ kaniutiyɨnare.
JOB 18:17 Kwiepa kanakuyeitɨariemɨkɨ mɨkaku'eriwanikɨ, pɨkakuxaxatsiwanitɨma mɨkɨ kwieyaritsie.
JOB 18:18 Hekɨaripa hayehanieme yɨwipa kaneutahɨiyamɨkɨ, 'ena kwiepa kanayenɨ'arieni.
JOB 18:19 Yuteɨterima watsata tɨma yuniwema meta yu'iwama pɨkawarexeiya, hakewa mɨkɨ mekatei xewitɨtɨma hayeyuritɨ pɨkayuhayewa.
JOB 18:20 Tau manatineika hepatsie meta makayuyuipike hepatsie, teɨteri mepɨhɨxiyani mɨkɨ kemɨ'itɨarienikɨ 'ana waɨkawa mepɨtimamani.
JOB 18:21 Mɨpaɨ kani'aneni 'axamɨtiyuriene kiiya, Kakaɨyari mɨkamate manukatsie».
JOB 19:1 Mɨkɨ hepaɨtsita Kuwi mɨpaɨ kaniutayɨni:
JOB 19:2 «¿Kepaukakeri xepɨnetsihayewa xenetekwinitɨatɨ meta yuniukikɨ xenetsi'anukapɨnatɨ?
JOB 19:3 Mɨixari yaxepɨnete'utahɨawixɨ. Waɨkawamekɨ 'axaxepɨnetsiyurie karixepɨkaheyutetewiya.
JOB 19:4 Xɨka xeniu tiyuritɨni neri xaɨtsie neheukuyune, 'axakenemɨtiuyuri nehetsie nepɨtiuyuri.
JOB 19:5 Matsi xɨka xeme 'aixɨa xe'aneneme xeyu'erieka nehepaɨtsita, meta xemamariwaweme xeyu'erieka xemaye'axɨanikɨ nehetsɨa kenemɨkatiyɨwekɨ ne,
JOB 19:6 mɨpaɨ xeketenemaika Kakaɨyari pɨta pɨnetsiyuriene kemɨ'ane mɨnetikwinitɨa, kemɨ'ane winiyarieyatsie nemuyewie.
JOB 19:7 »Tsepa mɨpaɨ nemɨtiuhiwa: “Nepɨnanaimarie”, xewitɨ pɨkanetsiha'eiya, tsepa xekeneneuparewi nemaine, nehetsie pɨkatinuitɨ.
JOB 19:8 Kakaɨyari nehuye panunari, nepɨkayɨwe nemanutayanikɨ, nehuye 'uyɨwime kanayeitɨani.
JOB 19:9 Naime pɨnetiunawairi titakɨ 'aixɨa nemɨtixeiyariekai, nemu'utsieri kuruna pɨnetsi'anutihaniri.
JOB 19:10 Naime pɨnetsiheutiwitexɨa, kɨye hepaɨ, pɨnetsi'akumaweriyaxɨ, tita nemɨtitakwewiekai pahunaxɨ nanayaritsie paitɨ.
JOB 19:11 Nehepaɨtsitari kaniuyeha'ani, kemɨ'ane mɨkɨ muwaraye'unie kanenayeitɨani.
JOB 19:12 Kuyaximama meyuwaɨkawatɨ 'upɨta mekanahuni, yuhuye mekaniuwewiximeni nehetsɨa meye'axɨanike, nemanuka 'aurie mekanikuyaxe.
JOB 19:13 »Yapɨtiuyuri ne'iwama memɨnetsiku'eirienikɨ, meta nehamikuma mepɨnetsihehɨari.
JOB 19:14 Nemarema nemuwamatekai mepeutayeixɨa, mepɨnetsihatɨmairi yuheyemekɨ.
JOB 19:15 Nekie memɨ'iwata, meta nete'uximayatsiriwamete memɨkanetsimateni hepaɨ xeikɨa mepɨ'anene, kwi mepɨnetsikuxexeiya mɨxeɨmatsiwa hepaɨ.
JOB 19:16 Mɨneti'uximayatsirie nepahɨawe, matsi mɨkɨ pɨkanetsiku'eiya, tsepa netɨtɨ nekatihayewatɨ nemiwawirie.
JOB 19:17 Ne'ɨya ne'iiya pɨxani'erie, yaxeikɨata ne'iwama 'axamepɨnete'ɨkwe.
JOB 19:18 Matsipaitɨri tɨɨri mepɨkanetsixeiyaku, kepauka memɨnetsikuxexeiya, mepɨnetsiyuriya.
JOB 19:19 Yunaitɨ nehamikuma mepɨnetsixani'erie, yunaitɨ memɨnetsinaki'eriekai mepɨnetsi'aye'unie.
JOB 19:20 Nenawiyari meta newaiyari ne'umetetsie pukuwewerikeri, netiuka'eniwatɨ 'etsiwa nepayeyuri.
JOB 19:21 »Xekeneneutinenimayata nehamikuma xemɨhɨkɨ, xekenenenenimayaka, Kakaɨyari pɨnetsi'anayewaxɨa.
JOB 19:22 ¿Titayari Kakaɨyari hepaɨ xenetekuweiyatɨwe? ¿Xe'iyaritsie kareuyeyeika ne'ayeniereme xenetekwa'a?
JOB 19:23 »Xɨka neniuki haka'ɨkienike, xɨka xapatsie haka'utɨarienike.
JOB 19:24 Xɨka matsi yuheyemekɨ tetetsie yuhayewake, ha'ɨkietɨ tepɨa kwaniyariekametsie ti'utɨwamekɨ.
JOB 19:25 Ne nepɨtimate nehetsie nunuwame payeyuri, meta 'imatɨrieka panukukeni tumuanaripa.
JOB 19:26 Kepaukari newaiyari mɨka'une, 'akuxi Kakaɨyari nehɨxikɨ nekanexeiyamɨkɨ.
JOB 19:27 Ne nekɨmana nepixeiyamɨkɨ, ne yanepɨra'eriwakaku nemixeiyakɨ, xewitɨ kamatiwatɨ hawaikɨ. Mɨyanemɨtinekɨhɨawekɨ heiwe'erika pɨnetsitaxɨtɨaxime netaɨta paitɨ.
JOB 19:28 »Xeme mɨpaɨ xeputiyuane: “Hikɨmɨ hetsiena tepɨtehahɨani, mɨkɨ hetsie 'axamɨti'ane katinixɨaweni”.
JOB 19:29 Matsi xekeneyɨ'ɨwiyani 'ixipara hepaɨtsita, mɨkɨkɨ haxɨaya 'ukanamieni tita 'axatemɨteyurie hepaɨtsita, xemɨtemaikakɨ kename 'itsɨkame 'a'uwe».
JOB 20:1 Mɨkɨ hepaɨtsita Tsupaxi Namati kiekame mɨpaɨ kaniutayɨni:
JOB 20:2 «Ne'eriwametsie waɨkawa nemɨnehɨawekɨ yanepɨtayɨni, yemekɨ 'aixɨa nepɨkareu'erie.
JOB 20:3 Tierika ne'u'enieka yukɨnepɨreka'erietɨya, kenemɨtimaiwekɨ pɨnetsikuyuitɨwa nemɨtaniunikɨ.
JOB 20:4 »'Ekɨ pepɨtimate meripaitɨ, kepauka Kakaɨyari tewi mukayetsie kwiepa,
JOB 20:5 'axamɨtiuka'iyari kemɨtiyutemawie 'apɨkareutere, Kakaɨyari mɨka'ayexeiya temawierikaya yakatinimieni.
JOB 20:6 Kemɨtiyuta'ɨrekɨ tsepanetɨ muyuawitsie mɨye'axe meta tsepa yumu'ukɨ haiwitɨri mukuyuituwa,
JOB 20:7 mɨkɨ kanikumawerimɨkɨ yuheyemekɨ, kwitarai hepaɨ, memeitima mɨpaɨ mekanitiyuakuni: “¿Ke'ɨyɨ?”
JOB 20:8 Yɨwikɨta mɨtiuheinɨni hepaɨ, tɨkarikɨ mɨtiuxeiyatsitɨarieni hepaɨ, yapauka pɨtapare tawariri pɨkataxeiyarieni.
JOB 20:9 Keyupaɨmetɨ memixei tawariri mepɨka'ixeiya, meta hakewa mekateitsie hutarieka pɨkanuani.
JOB 20:10 Niwemamata tixaɨtɨ memɨkatehexeiya mekateniwayetuiriekuni, wapaapa tita mɨtiunawakai.
JOB 20:11 Xe'umete mɨtɨrɨkawi hikɨ xetemaritɨkaku 'uxa'atɨni warie mɨkɨ hamatɨa xekanika'uxipikuni tumuanaritsata.
JOB 20:12 »Tsepa yuteta 'axamɨti'ane hakakame memɨ'erie meta yuneni hetɨa mi'awieta,
JOB 20:13 tsepa mɨkahewayetuaya, matsi xɨka 'i'awietani ka'itaunietɨ,
JOB 20:14 mɨkɨ paa kwa'ameyatsie yekaitɨ kanatsiɨrimɨkɨ, mɨkɨ taɨtana yekaitɨ xaye meixeiya 'uaye mumɨya hepaɨ 'anetɨ kanayeimɨkɨ.
JOB 20:15 Waɨkawa mɨrexeiyanikɨ kemɨranukaxɨ kanitahayamɨkɨ, Kakaɨyari yakatiniyurimɨkɨ yuhuriepa menatihayanikɨ.
JOB 20:16 Kuu meixeiya 'uaye mumɨya kananatiyuinimɨkɨ, kuu nenieya mumɨya kanimiemɨkɨ.
JOB 20:17 'Aki muyehapanetsie pɨkakuyani, retsi kuneriyari meta xiete hatɨayari muyehapanetsie,
JOB 20:18 Pɨkatitikwani tita mɨra'iwaxɨ yu'uximayatsikakɨ, pɨkayukatemawieni tita waɨkawa mɨtiukaxeikɨ,
JOB 20:19 tixaɨtɨ memɨkatehexeiya mɨtiwarunawairikɨ waɨriyarika wapitɨatɨ tixatɨ mɨkatiwaruhayewikɨ, meta kii mɨka'utiwewi kutsiyari mayuyeitɨakɨ.
JOB 20:20 »Yuhukatsie pɨka'utahɨpɨrike, tita mɨtikwaimɨkɨkai pɨkatiutatetexiwakai.
JOB 20:21 Tita mɨtikwakai pɨkakuhayeikawakai, 'ayumieme kayuwatɨ kemɨrexeiyakai 'apɨkareutere.
JOB 20:22 Kepauka waɨkawa mɨrexeiya, haweri katiniyurimɨkɨ, hetsiena 'axati'anetɨ rahetetɨ katinanutatemɨkɨ.
JOB 20:23 Kepauka 'axamɨtiuka'iyari yutaɨta mɨtahɨne, Kakaɨyari waɨkawa yuhaxɨa mɨkɨ hetsie kanitatuamɨkɨ, hetsiena mukawiye hepaɨ.
JOB 20:24 Tsepanetɨ muyuta'unaxɨ tepɨakɨ mɨtiwewiyatɨka 'imieriyarikɨ, 'ɨrɨ wurunitseyarikɨke kanenuyexuimɨkɨ.
JOB 20:25 Kepauka nemaya hetsie meta wari'ɨtɨana 'ɨrɨ mɨtsɨmeyari xehahanake xemuyuta'inɨata, xekanitimamakuni tsiɨrika xexeiyatɨ,
JOB 20:26 tita waɨkawa mɨraye'atɨkatei mɨrexeiyakai makɨyɨwitsie kaneukaxɨriyamɨkɨ. Tai ka'anutihɨtsieriwatɨ kanitaxɨtsitɨamɨkɨ meta tinaime kiitana tita mɨreyuhayewa.
JOB 20:27 Taheima muyema muyuawi katinitahekɨatamɨkɨ ke'axamɨtiuyurikɨ, kwie meta yapɨtayɨni mitaxanetakɨ.
JOB 20:28 Kepauka Kakaɨyari haxɨaya maye'anitsie, haa tɨrɨkaɨyetɨ kaniwayenemɨkɨ kiiya kanita'unamɨkɨ.
JOB 20:29 Kakaɨyari mɨpaɨ katinikuha'aritsirieka 'axamɨtiyuriene, mɨpaɨ ti'aneme xeikɨa katinenayexeirieni».
JOB 21:1 Mɨkɨ hepaɨtsita Kuwi mɨpaɨ katinita'eiya:
JOB 21:2 «Neniuki yemekɨ xekeneu'eni, mɨkɨkɨ nɨtɨarika xekanenipitɨakuni.
JOB 21:3 Kayuwatɨ xeketeneteni mexi netikuxata, xekenenenanaimaka 'arike netitahayewayuke.
JOB 21:4 »¿Tewi mɨmɨwe kuta hetsiemieme netikuxata? ¿Kexeteku'eriwa ketitayari nemɨtinewieka nekatiyɨwe?
JOB 21:5 Xekeneneuxeiya, meta xekenehɨxiyaka, yumamakɨ yutenitsie xekeneuwɨka.
JOB 21:6 Xɨka mɨpaɨ netiku'eriwani, waɨkawa nepekamatɨyeika, netaɨta pɨnetsi'utanɨtsa neheuxerimɨtɨ.
JOB 21:7 ¿Titayari 'axamemɨte'u'iyari mete'u'uwa, 'ukirawetsixitɨtɨri meta waɨkawa matsi meteheuxeiyatɨri?
JOB 21:8 Memakuteitsie mekutekame mekaniwaxeiyakuni yuniwema meta yuxiɨyarima.
JOB 21:9 'Aixɨa 'iyari mepu'uwa yukie, meta mepɨkamariutsie, Kakaɨyari 'iwaɨyɨya pɨkatiwakwinitɨa.
JOB 21:10 Watúrutsixi yemekɨ 'aixɨa me'aneneme memuwatinuariwa mepɨhɨkɨ, wawakaitsixima mepɨtiniweya meta mepɨka'anuye'iwetsiwa.
JOB 21:11 Yutɨɨriyama memɨnautsatɨwenikɨ mepɨwapitɨa muxatsi memɨhɨkɨtɨni wahepaɨ, tɨɨri tsimemupepe me'utitsukwakatɨ mepuyutemamawie.
JOB 21:12 Xekeneutikwikani teputsie meta kanaritsie kemekɨyɨnekɨ, pirikɨxakɨ xeketeneukayuitɨwani kemekɨyɨnekɨ.
JOB 21:13 'Aixɨa tiwayuriekaku mepu'uwa, meta yu'iyarikɨ mɨki teukiyapa mepɨ'axe.
JOB 21:14 Kakaɨyari mɨpaɨ mekatenikɨhɨaweni: “Kayuwatɨ ketaneuhayewa. Kemɨmatinake yatemɨtekahunikɨ tepɨkaheumaiku.
JOB 21:15 ¿Kemɨ'ane Naimekɨmɨtɨrɨkaɨye pɨhɨkɨ, tame temeyexeiyanikɨ? ¿Ketita teteha'iwa xɨka xeikɨa tame nenewieri te'iyetuirieka?”
JOB 21:16 Matsi ke'aixɨa memɨteheuxeiya yɨtɨrɨkariyakɨ mepɨkate'ukaxei. 'Axamemɨteyurieri wa'ɨxatsi ne nepɨka'enieka.
JOB 21:17 »¿Kepauka 'axamemɨte'u'iyari wakɨxeme pɨtɨxɨa? ¿Kepauka 'axamɨtiwayurie wahetsie pɨye'axe? ¿Kepauka Kakaɨyari, yuhaxɨakɨ, pɨtiwakwinitɨa
JOB 21:18 'eka 'uwakaxa kemɨre'enitsitɨwa hepaɨ, kuxari 'eka mɨtɨrɨkaɨye mei'enitsitɨwa hepaɨ?
JOB 21:19 Mɨpaɨ xepɨnetetahɨawe kename Kakaɨyari tiuti'utaxɨ yamɨtiwarakapitɨanikɨ 'axamemɨteyurie waniwema wahetsiemieme. Matsi kemɨ'ane 'axamɨtiuyuri kerakapitɨani, mɨkɨ yamɨretimanikɨ.
JOB 21:20 'Axatiyuruwame ketiuka'eniexɨani yuxaɨta muyutatɨmaiyakɨ. Naimekɨmɨtɨrɨkaɨye haxɨaya ke'anu'ieni.
JOB 21:21 ¿Kekutari tiyɨkɨhɨaweni yutɨɨriyama wahetsiemieme mɨwaku'eirieni, xɨkari yapaɨmexɨa xeikɨa heuyeweka mukumawerekɨ?
JOB 21:22 »¿Kemɨ'ane pɨyɨwe Kakaɨyari mɨtiuta'ɨkɨtɨani mɨkɨ mɨtimaiwenikɨ, mɨkɨ matsi katihɨkɨ heitseriemekɨ yamɨtayɨni waɨkawa memauka'u wahetsiemieme?
JOB 21:23 Hipatɨ 'akuxi yakɨ meyumatetɨ mekanitakukuweni, 'aixɨa meteheu'erietɨ meta meka'uximatɨarietɨ,
JOB 21:24 wakwatsapaɨ waɨkawa wiyatɨkaikaku, wa'umete waɨkawa tɨrɨkawikaku 'akuxi.
JOB 21:25 Hipatɨ mekanitakukuweni meyuhɨawetɨ, 'aixɨa mɨti'ane mekateha'inɨatawawetɨ.
JOB 21:26 Tumuanaripa yuxexuitɨ mekanikuhikuni, mɨkɨ yunaitɨ kwitsiterixikɨ mekaneunɨtɨkaikuni.
JOB 21:27 »Nepɨtimate xeme kexemɨteku'eriwa, meta yaxetekuxatatɨ kexemɨnetsiyurienikɨ xeikɨa.
JOB 21:28 Yaxeikɨatsiere nekatinimaika mɨpaɨ xekaniyuku'iwawiyani: “¿Hakewa waɨkawa meukawe kiiya pewe? ¿Hakewa 'axamemɨte'u'iyari wakii peti'u?”
JOB 21:29 ¿Kɨkamete xekatewata'iwawiyawawe? ¿Kwi xekatewaku'eniwa kememutiyuanekɨ?
JOB 21:30 'Axamɨtiwayurie tukariyaritsie, 'axamɨtiuka'iyari puyutawikweitsitɨwa, kepauka haxɨa tukariyari maye'anitsie putawikweitsitɨariwa,
JOB 21:31 ¿Kemɨ'ane hɨxiena mɨkɨ kemɨtiuka'iyarikɨ yapɨtitahɨawiwe? ¿Kemɨ'ane mɨrekapitɨani pɨyɨwe mɨkɨ kemɨtiuyurikɨ?
JOB 21:32 Kepauka mɨkite memakateukiwatsie manukweiyani, maka'awietsie heima kanita'ɨwiyariemɨkɨ,
JOB 21:33 yɨmɨiretɨ teɨteri mekaniweiyani 'utɨmana, meta yumɨiretɨ mekanika'awiwietani teukiyata. Kwieta paitɨ muyeweritsie kani'uxipieka kayuwatɨ.
JOB 21:34 »¿'Akuxi xenetetakwewie xenetsinɨtɨanike yuniuki mɨkawaɨriyakɨ? Kexemɨneteku'eiya naitɨ mɨkɨ pɨti'itarika».
JOB 22:1 Mɨkɨ hepaɨtsita 'Eripaxi Temani kiekame mɨpaɨ katinita'eiya:
JOB 22:2 «¿Xewitɨ tiyɨwe, waɨkawa timaiwetɨ, Kakaɨyari hetsiemieme tixaɨtɨ tiyunaki'erietɨ mayanikɨ?
JOB 22:3 ¿Tixaɨtɨ 'aixɨa ti'aneme tikaxeiya Naimekɨmɨtɨrɨkaɨye, tewi heitserie pemexeiya pehɨkɨtɨkaku? ¿Mɨkɨ tixaɨtɨ rexeiyatɨ rayani xɨka 'aixɨa 'anemekɨ pe'uyeikani?
JOB 22:4 ¿Kamɨtsɨ pemeyemakaxekɨ metiutate'a, 'ayumieme memataheitseritɨariwatsie meranuwitɨni?
JOB 22:5 Matsi kaniwaɨkawani 'axakepemɨtiuyuri. 'Axakepemɨtiuyuri pɨkayu'inɨatsinɨa.
JOB 22:6 'A'iwama pepɨtiwakwetatɨakai, meta pekaheiyehɨatɨ wakemarite pepɨwakunawairiwakai, meka'ukemarime pepɨwakuhayeikawakai.
JOB 22:7 Kemɨ'ane meuharimɨkɨkai pepɨkaharitɨakai, 'ikwai meuyehɨakai pepikweririekai.
JOB 22:8 Tewi waɨkawa meukawe pepa'ayeitɨa meta kwie 'ahetsiemieme pepayeitɨa, tewi waɨkawa pemumariwe, mɨkɨtsie 'aixɨa pekatiniuyerɨni.
JOB 22:9 Wiuraxi tixaɨtɨ pepɨkatiwakumikwakai, meta nutuite naime pepɨtiwakunawairiwakai.
JOB 22:10 'Ayumieme hikɨ winiyari 'a'aurie kanakani, meta 'ayumieme pekanimariutsieka,
JOB 22:11 yɨriya pekaheuniereme kamenayeitɨaka, haa mɨtɨrɨkaɨye kameniukayunitɨwani.
JOB 22:12 »Kakaɨyari matsi muyuawi 'ameutitewatsie kaniuyeikani. Xurawetsixi keniwareutixeiya, 'aheutitewakaku memakatei.
JOB 22:13 Matsi 'ipaɨ pekaniutaineni: “¿Kakaɨyari ketimate? ¿Kamɨtsɨ tiyɨwe makɨyɨwitsie mɨtatsitaheitseritɨani?
JOB 22:14 Mɨkɨ muyuawi taheima muyema hetsie kaniyeikaneni muyuawi manuye'atɨkatsie ye'axetɨ, meta haiwitɨri 'e'ayetsuitɨ kaneitinarɨmani, 'ayumieme pɨkatatsixeiya”.
JOB 22:15 »¿Meripai mieme yeiya petiyeweiyani 'axateyuruwamete kememɨte'u'uwakai?
JOB 22:16 Kahaye'awekaku 'akuxi yutukari mekaniutatɨmaiya, haa mɨtɨrɨkaɨye watsutɨmeyari kanahautsitɨaxɨani.
JOB 22:17 Kakaɨyari mɨpaɨ mekateniutahɨawe: “Kayuwatɨ ketaneuhayewa. ¿Kekuta 'ekɨ petatsiyurieni, Naimekɨpemɨtɨrɨkaɨye?”
JOB 22:18 Kakaɨyari katiniuyurieni 'aixɨa mɨti'ane mɨtiuta hɨniyaxɨ wakiita. Ne 'axamemɨteyurieri wa'ɨxatsi nepɨka'enieka.
JOB 22:19 «Heitseriemekɨ yamemɨtekahu mekaniyutemawieka 'axamemɨte'u'iyari kememɨte'uka'unarɨwa mewaxeiyatɨ, wahetsie mɨkarahɨiwa mɨpaɨ mekaniutiyuaneni mewananaimatɨ:
JOB 22:20 “Memɨtatsi'aye'unieri mekaniuka'unarieni, wapiinite taipa naitɨ katiniutixɨni”.
JOB 22:21 »Kakaɨyari hetsɨa 'aixɨa kene'ayuri, kayuwatɨ pehexeiyame kene'ayeitɨa mɨkɨ hamatɨa, 'ahetsie katinanuamɨkɨ perexeiyatɨ pemayanikɨ.
JOB 22:22 'Ɨkitsikaya tetana mayeneika keneutanaki'eri, 'a'iyaritsie niukieya kenaka'ɨki.
JOB 22:23 Naimekɨmɨtɨrɨkaɨye hetsɨa xɨka penuani meta 'axamɨti'ane 'akie xɨka perayeweiya, naimekɨ pekanihekwatɨariemɨkɨ,
JOB 22:24 xɨka 'ahuru 'aixɨa mɨ'anene kwiepa pe'itixɨrieni tetexitsata meta 'aita,
JOB 22:25 Naimekɨmɨtɨrɨkaɨye 'ahuru kanihɨkɨtɨkamɨkɨ 'ahetsiemieme, meta mɨkɨ 'apɨrata 'aixɨa mɨ'ane kanihɨkɨtɨkamɨkɨ 'ahetsiemieme.
JOB 22:26 Naimekɨmɨtɨrɨkaɨye hetsie pepɨ'atemawieka, Kakaɨyari hetsɨa pepeutaniereni.
JOB 22:27 Kepauka pemuyunenewie, mɨkɨ kameni'enimɨkɨ, 'ekɨta kepemɨti'ahɨritɨakɨ pekaneye'atɨiriemɨkɨ.
JOB 22:28 Ketita pemɨtitsutɨani yapɨtikɨyɨneni, 'ahuyeta xawatɨriya pɨhekɨariwieka,
JOB 22:29 Memuyuti'ɨre Kakaɨyari tixaɨtɨ pɨkatiwarayeitɨwa, tixaɨtɨ memɨkatehayuyeitɨa kaniwaranuku'uitɨwani.
JOB 22:30 Mɨkɨ wahetsie mɨkarahɨiwa kaniwawikwetsitɨaka, 'aixɨa pemɨtiuyurikɨ pekanitawikwetsitɨariemɨkɨ».
JOB 23:1 Mɨkɨ hepaɨtsita Kuwi mɨpaɨ kaniutayɨni:
JOB 23:2 «Netaɨta nepɨha'a yaxeikɨa nemuti'uximatɨariekɨ, neputa'aiwa Kakaɨyari mamaya mahete nehetsie tiunakeku.
JOB 23:3 Xɨa'ui, xɨka ne netimaikake Kakaɨyari hakewa nemekaxeiyakɨ. Xɨka neyɨwenike nemeta'anikɨ mɨkɨ hakewa meyeika.
JOB 23:4 Mɨkɨ hɨxie nepitaxanetakeyu ketitayari nemɨti'ane, 'aixɨa yemekɨ nepɨreixatɨanikeyu mɨyanemɨranuyemiekɨ.
JOB 23:5 Yanepɨretimanikeyu kemɨnereta'eiya, meta nepeitimaitɨyanikeyu.
JOB 23:6 ¿Kamɨtsɨ mɨkɨ yutɨrɨkariyakɨ neraye'uniekakeyu? Nekatixaɨtsietɨ. Mɨkɨ matsi pɨkanetsitaxanetakeyu.
JOB 23:7 Mɨkɨ hɨxie tsepa kemɨ'ane tewi heitserie hexeiyatɨ pɨyɨwe yuhetsiemieme yamutayɨnikɨ, meta ne nexɨnitɨ nepayeiwe yuheyemekɨ ne'itsɨkame hɨxie.
JOB 23:8 »Xɨka tau manatineika hepatsie neheyani, mana nepɨkaheitaxeiya, xɨkata makayuyuipike hepatsie neheyani, manata nepɨkaheixeiya.
JOB 23:9 Tayetatsie xɨka rayexeiyani, nepɨka'ixeiya, xɨkata tatsutɨa hepa heyani, ne 'atsinepɨkaretimani.
JOB 23:10 Matsi mɨkɨ, nehuye naime pakumate, xɨka netsi'uta'inɨatake, ne huru 'aixɨa mɨ'ane hepaɨ ne'anetɨ nepayeiwe.
JOB 23:11 Huyeya hetsie xeikɨa ne nepumie, huyeya nepuweiya xaɨtsie nekaheukuyuyuikipetɨ.
JOB 23:12 'Aitsikateya tetana mayeneika nepɨka'uku'e'eiriwa, netaɨta paitɨ yemekɨ nepiti'utaxɨ niukiteya tetana mayenexɨa.
JOB 23:13 »Matsi mɨkɨ Ti'aitame kanihɨkɨtɨni, ¿kemɨ'ane pɨyɨwe kemɨtiyurienekɨ mɨta'imaiya? Mɨkɨ kemɨtiyurimɨkɨ, yapɨtiyuriene.
JOB 23:14 Mɨkɨ yapɨtiyurieni nehetsiemiemekɨ kemɨtiu'eri, naime kemɨtiku'eriwa yapɨtiyurieni.
JOB 23:15 'Ayumieme hɨxiena neputimamawe, xɨka naime mɨkɨ netiuti'eriexɨani, waɨkawa neputimamawe.
JOB 23:16 Kakaɨyari yapɨtiuyuri ne'iyaritsie nemumakakɨ, Naimekɨmɨtɨrɨkaɨye pɨnetsimariuta.
JOB 23:17 Tsepanetɨ mɨya nemɨtiuka'eniwa, yɨriya netenie pɨka'uwiere, meta yɨriya 'amayetsuye nehɨxie mɨnetsiheukunama.
JOB 24:1 »Xɨka Naimekɨmɨtɨrɨkaɨye hɨxie kemɨtiyɨni naitɨ tihekɨaka, ¿titayari memimate 'atsimekate'ixeiyawawe heitseriemekɨ kemɨtiyuriene?
JOB 24:2 Hipatɨ mekanixuaweni hakewa wakwie meuka'atɨka 'aixɨa mekate'ixeiyatɨ, meta tewaxi 'inawarite mekateniwamitɨweni,
JOB 24:3 nutuite wapuxurima mekaniwanawairietɨweni, wiuraxi watuurutsixi kwietsanamete mekaniwatanawairiwani memɨtehapitɨkakɨ,
JOB 24:4 memɨteheuyehɨwa huyeta mekaniwataweweiyani, tixaɨtɨ memɨkateheuxeiya waɨriyarika mekaniwapitɨaka memuyuti'awietakɨ xeikɨa.
JOB 24:5 Puxuri yeutari makumawetsie memu'uwani wahepaɨ, tixaɨ memɨkateheuxeiya mekaniyumexɨitɨaka yu'ikwai memɨtehexeiyanikɨ, meta mɨkɨtɨtɨ kwie makumawe yuniwema pɨtiwamikwa.
JOB 24:6 Kayuwaxata mɨaxa muyukuhayeikawa mekaniteɨxɨtɨweni, meta 'axamemɨte'u'iyari waharawerita kaxie mekanititeɨxɨni.
JOB 24:7 Yu'ixuriki memɨkahexeiyakɨ, yɨwikɨta meka'ukemaritɨ mekaniukatariyarɨwani, mepɨkaheixeiya 'ɨkari xeri hetsiemieme.
JOB 24:8 Wiyeri hɨritsie miemekɨ mepɨtihawire, yuhetsie nunuwame memɨkahexeiyakɨ, terɨta mekaneuyuta'unani.
JOB 24:9 Nutui putsitsinawaiyarie yumaamatsie, tixaɨtɨ mɨkarexeiya pukuname mɨrapinekɨ.
JOB 24:10 Yu'ixuriki memɨkahexeiyakɨ, meka'ukemaritɨ 'amekaniu'uwani, tɨriku me'ɨtɨximetɨtɨ, haakakɨ mekanikwiximeni.
JOB 24:11 Hɨriwa takariyari tɨxɨmetsie mepɨpɨna, kaxie mekanitiketsinani 'atixawametsie, matsi harimɨyakɨ mekanikwiximeni.
JOB 24:12 Kiekaritsie memɨkwixime wahiwari kani'eniɨriɨkɨni, memɨwitekietɨka wahiwari parewiya kana'iwawani, matsi Kakaɨyari tɨma 'atsipɨkaretimamate.
JOB 24:13 »Hipatɨ hekɨariya mepaye'unie, mɨpaɨ mepɨkate'u'uwa yuhuye mepɨkahetimaiwawe.
JOB 24:14 Kakahekɨariwekaku 'akuxi, tiyumemiwame panukukeka, tixaɨtɨ mɨkarexeiya meta mɨreuyehɨwa pukumemiwa, kepaukata mɨkɨyɨre tinawayame kanayuyeitɨwani.
JOB 24:15 Hipame wa'ɨitama muwakumaɨwa hɨxiteya yɨriya kanitakwewieka, mɨpaɨ yuhetsiemieme pɨtiyɨkɨhɨawe: “Xewitɨ pɨkanetsixeiya”, yɨhɨxie kaneuyuku'awietani.
JOB 24:16 Yɨwikɨta, tinawayame xeime kiita peuhake, matsi tukarikɨ yukiita peuyunama, hekɨariyatsie timiemekɨ tixaɨtɨkɨ pɨkatiyɨkɨhɨawe.
JOB 24:17 Mɨkɨ yunaime wahetsiemieme, hekɨariya yɨriya 'emayetsuye pɨhɨkɨ, yɨriya mumariwe pɨta mepɨnaki'erie».
JOB 24:18 «'Axamemɨte'u'iyari kwaimuxari haa heima muyeka hepaɨ mekani'aneneni, wakwie 'axakani'itɨarieka, mepɨkateta'uximayatari kaxie harawerita.
JOB 24:19 Xɨri meta kwie muwaki hepaɨ 'ɨwi hayari yapauka kemɨti'itse, mɨpaɨta 'axateyuruwamete mɨki teukiyapa mepɨteheukahapawa.
JOB 24:20 Wamaamatɨtɨ pɨwaratɨmai, kwitsiterixi mepɨwakwa'a, xewitɨ tawariri pɨkawaraye'erieni, mepawitewa kɨyexi hepaɨ.
JOB 24:21 'Uka mɨkaniwewe mepɨnanaima, 'uka tɨɨri mɨkawarexeiya, hatsuaku wiuraxi wahetsie timieme 'aixɨa mɨti'ane mepɨkatewautɨwe.
JOB 24:22 Matsi Kakaɨyari, yɨtɨrɨkariyakɨ, waɨkawa memeuka'u puwarehapana, kepauka Kakaɨyari manukukeni wahepaɨtsita, xewitɨ 'ayeyuritɨ pɨkayuhayewa.
JOB 24:23 Kakaɨyari kaniwapitɨaka 'aixɨa 'iyari memu'uwanikɨ, matsi wataxeiyatɨ pɨkatihayewa.
JOB 24:24 Yapaɨmexɨa 'aixɨa mepɨtexeiyarieni, matsi yapaukata pɨtiukumamawere, tixaɨtɨ mepɨkatehayeitɨariwa, tupiriya memakututuwe hepaɨ, tɨriku takari kemɨtikaxitewa hepaɨ.
JOB 24:25 ¿Kemɨ'ane neniuki ta'inɨatame kename yakɨ nehaine pɨtayɨni, meta kemɨ'ane neniuki tixaɨtɨ pɨkarayeitɨani?»
JOB 25:1 Mɨkɨ hepaɨtsita Wirirari Tsuha kiekame mɨpaɨ kaniutayɨni:
JOB 25:2 «Kakaɨyari kanitɨrɨkaɨyeni kanimakaxiwani, mɨkɨ yakatini'aitani muyuawi meutitewatsie.
JOB 25:3 ¿Kamɨtsɨ kuyaximama meteyu'inɨatsinɨa? ¿Kemɨ'ane hetsie hekɨariyaya pɨkaye'axe?
JOB 25:4 ¿Ketiyɨwe tewi kename 'atsikatiyuruwame mɨtayɨnikɨ Kakaɨyari hɨxie? ¿Tewi ketiyɨwe 'aixɨa 'aneme mayuyeitɨani 'ukaratsi hetsie yenuiwame?
JOB 25:5 Metsatɨtɨ Kakaɨyari hɨxie yuhekɨariya pɨkahexeiya, meta xurawetsixi mepɨka'itiyatɨka,
JOB 25:6 matsi tewi tita tihɨkɨ, kwitsi kanihɨkɨtɨni, matsi tewi tixaɨtɨ pɨkatihɨkɨ, hareku mɨkatiyunaki'erie kanihɨkɨtɨni».
JOB 26:1 Kuwi mɨpaɨ katinita'eiya:
JOB 26:2 «'Ekɨ hɨrixɨa memɨwerarani xɨaritsɨ pekaniwakuparewiwani. 'Ekɨ hɨrixɨa memɨkatɨrɨkawi xɨaritsɨ pekaniwawikweitsitɨaweni.
JOB 26:3 Matsi 'ɨxatsi 'aixɨa mɨ'ane 'ekɨ pepɨka'iyetuiriewe 'atsimɨkatimate. Meta 'ekɨ kepemɨreitimaitɨyeikakɨ pepɨkatiwahekɨatɨa.
JOB 26:4 ¿Kepaikɨ pumatsi'uparewi mɨyapemɨtayɨnikɨ? ¿Ke'anetɨ 'iyari matsi'uwiyaku mɨyapeputayɨ?»
JOB 26:5 «Marikakɨ mekaniutiyɨyɨakani mɨkite, haramara hetɨapai memɨtama.
JOB 26:6 Kakaɨyari hɨxie mɨkite wateukiyapa peukahekɨa, tiyu'uname miti'awieta pɨkayɨwe.
JOB 26:7 Kakaɨyari muyuawi pɨtawera tixaɨtɨtsie katiuyemakame, meta kwie tixaɨtɨtsie pukatiuyeyetsa.
JOB 26:8 Haiwitɨritsie haa pɨ'eima, matsi hai pɨkatitsanike heteriyakɨ.
JOB 26:9 Metseri mɨxikɨraɨyenitsie kaneikunarɨmani kepauka hai hetsiena muyeweratsie.
JOB 26:10 Ketewa 'atɨ muyuxeiyanɨa haa heima pɨka'inɨaritaxɨa hekɨariya meta yɨriya mɨpatanikɨ.
JOB 26:11 Tierikayakɨ mamatɨ, muyuawi mutuikatɨka putiyɨyɨaka.
JOB 26:12 Xɨka mɨkɨ 'uta'ieni hai muyuawitsie pɨta'enitsitɨwa, Kakaɨyari yutɨrɨkariyakɨ haramara kaniutatakeni. Kemɨtimaiwekɨ Haxi kaniutaxiteni, yutɨrɨkariyakɨ kuu 'amupa haramara kiekame kaniutatsana.
JOB 26:14 'Ikɨ matsi 'inɨari xeikɨa kanihɨkɨtɨni kemɨtiuyuriwekɨ, 'etsiwa xeikɨa ketemɨteku'enakarekɨ. ¿Kemɨ'ane meitimaitɨyani pɨyɨwe tɨranarieya mɨtɨrɨkaɨye?»
JOB 27:1 Merikɨtsɨ Kuwi, tawarita kaniutaniuni, mɨpaɨ kaniutayɨni:
JOB 27:2 «Kakaɨyari hetsie nenehɨritɨatɨ, Naimekɨmɨtɨrɨkaɨye, kemɨ'ane nehetsiemieme mɨkayuwaɨriya 'aixɨa mɨtiyurienikɨ, kemɨ'ane netukari mɨyatiuka'eniwame mayeitɨa,
JOB 27:3 mexi 'akuxi nehetsie tukari xuawe meta netsurita Kakaɨyari 'iyaya nehexeiya,
JOB 27:4 'etsiwa tɨma neteni 'axaranɨyɨneme pɨkatitaxata, meta neneni 'itarika pɨkatahekɨata.
JOB 27:5 Hatsuaku nepɨkaxepitɨani kename xeme yurikɨ xetekuxata, mexi ne'ayeyuri, kename heitserie nehexeiya nepaineni.
JOB 27:6 Ne yemekɨ kename nehetsie karahɨiwa neputaineni, nepɨkaxepitɨani. Mexi ne'uyeikani, tewiyarika ne'iyaritsie pɨkaxuaweni.
JOB 27:7 »'Axateyuruwamete wahepaɨ memɨnetsi'aye'unie ketiwaruyurieni, meta nehepaɨtsita memeuniuka heitseriemekɨ yamemɨkatekahu wahepaɨ.
JOB 27:8 ¿Kakaɨyari memɨka'ayexeiya kemeteta'ikwewa kepauka memɨtakukuwetsie, kepauka watukari Kakaɨyari muwanawairietsie?
JOB 27:9 ¿Kakaɨyari wahiwari pɨ'enie kepauka wahetsie 'uximatɨarika mɨye'axe?
JOB 27:10 ¿Kamɨtsɨ Naimekɨmɨtɨrɨkaɨye hetsie meteyutemamawie, yatɨni yuheyemekɨ Kakaɨyari metehahɨawe?
JOB 27:11 »Ne hikɨ tixaɨtɨ nekatinixehekɨatsitɨiyamɨkɨ Kakaɨyari tɨrɨkariyayatsie mieme. Naimekɨmɨtɨrɨkaɨye kemɨtiyuriemɨkɨ nepɨka'enukanani.
JOB 27:12 Xɨka xemetɨtɨ 'ikɨ naime xetexexeiyaniri, ¿kamɨtsɨ titayari waɨkawa xeteniukixie?»
JOB 27:13 «'Ikɨ piinitɨarika Kakaɨyari katini'utani katiniwayetuiriemɨkɨ 'axamemɨte'u'iyari, 'ikɨ 'imikieri memɨkateyukanenimaya Naimekɨmɨtɨrɨkaɨye katiniwayetuiriemɨkɨ:
JOB 27:14 Tsepa tɨɨri keyupaɨmeme mɨwarexeiyani, mepɨkwi'iwa 'ixiparakɨ, meta hatsuaku tɨɨriyamama 'etsimemɨpepe mepɨkatihuxani.
JOB 27:15 Kehateta memɨyuhayewa yaxeikɨa mepɨkateukieni, wiuraxi wahetsiemieme mepɨka'utitsuanani.
JOB 27:16 Tsepa waɨkawa pɨrata memukuxeɨri tumuanari hepaɨ, meta 'ixurikite yuheima memɨtiyetɨkɨ haxu hepaɨ,
JOB 27:17 heitserie mexeiyani pɨhɨkɨtɨni kemɨ'ane mɨkɨ kamixate mɨranakatɨni, meta kemɨ'ane hetsiena mɨkarahɨiwa pɨrata pɨwata'ɨitɨani.
JOB 27:18 Kii memɨtiwewiwa kwitsiteri tekɨmemete wahepaɨ pɨ'anene, nenieremete waxamaru hepaɨ pɨ'anene.
JOB 27:19 Mepukahipite waɨkawa meteheuxeiyatɨ, matsi 'imatɨrieka: kepauka memanutanenieretsie, wapiinite naitɨ pɨtitipaparike.
JOB 27:20 Wahetsie pɨ'axe haa tɨrɨkaɨyetɨ mariwetɨ, yɨwikɨta 'eka tɨrɨkaɨyetɨ puwaratixɨrɨwa.
JOB 27:21 'Eka tau manatineika hepa mieme puware'enitsitɨwa, hikɨ 'ana mepukumamawere, kaniwarakuhunani memakuteitsie.
JOB 27:22 Wahetsie kaniuwautseni kawanenimayatɨ, mexi mɨkɨ tɨrɨkariyaya memakatɨ meyuta'unarɨmeni.
JOB 27:23 Yumamate puyuitɨwa wananaimatɨ pɨtiutapine, yumaɨxiwarikɨ, memakuteitsie kaniwaranuyenɨ'awani».
JOB 28:1 Minaxi kanixɨaweni pɨrata mana mayeneika, meta hakewa huru mekwaxiyarie.
JOB 28:2 Tepɨa kwie hetsie kanayeneikani, tetetsie kuwɨre kanayekunarɨwani.
JOB 28:3 Minaxi hetsie ti'uximayatame yɨriya kaneutiparitɨwani: tetexi wayemuinatɨ muta'atɨkatsie, tetexi witsimɨ'anene puwaune waɨkawa muyeyɨwitsie.
JOB 28:4 Teewa paitɨ teɨteri memɨkahakuteitsie, teɨteri hatsuaku memɨkahanu'uwatsie peuta'ine, 'ateewa paitɨ teɨteri memɨkahanu'uwatsie, kaunari hetsie 'ukuwietɨ.
JOB 28:5 Kwiepa 'ikwai pɨtineika, matsi kwie taɨta taikɨ mɨtiutiteke hepaɨ ti'anenetɨ katiniyepika.
JOB 28:6 Tetetsie tete waɨkawa mayeyuyuawi payeneika meta tumuanaritsie huru peutitei.
JOB 28:7 Kwixɨ 'ateewa 'uyewietɨ yu'ikwai mɨxeiya pumawe muwa hemarietɨ meta piwame pɨka'ixeiyawe.
JOB 28:8 Xewitɨ tɨma yeutanaka mana pɨka'uyeyeiwe, meta mayetsi manatɨma mepɨka'unieretɨkɨka.
JOB 28:9 Minaxi mɨ'iniene tete mayetse'i pɨtsunane meta hɨrite tsutɨmeyari pukuhekɨata.
JOB 28:10 'Ayeparitsietɨtɨ hewayexawame payeitɨa, meta yuhɨxitekɨ pɨtiutaxexeiya waɨkawa mɨraye'atɨka.
JOB 28:11 Haa 'apapatɨ muwawɨtɨkatsie pikuwaune, meta tita mɨti'awietsiekai pɨtihekɨata.
JOB 28:12 Matsi, ¿hakewa peikaxeiya mɨtimaiwenikɨ mɨ'ayumieme? ¿Hakewa petikie mɨreutamaiwenikɨ mɨ'ayumieme?
JOB 28:13 Xewitɨ tɨma tewi 'atsipɨkatimate kemɨraye'axe, 'ena kwiepa temanu'uwa pɨka'ukaxexeiyarɨwa.
JOB 28:14 Haa 'emeukatewa mɨpaɨ paine: «'Uwa puyemawe». Haramarata mɨpaɨ paine: «'Ena pumawe».
JOB 28:15 Huru witsimɨ'anekɨ pɨkayunanainɨa, meta pɨrata tsepa waɨkawa mahetekɨ pɨkayu'axinɨa.
JOB 28:16 Huru kwi mukwaxiyariekɨ pɨkayunanainɨa, meta tete mɨyɨwi mayemerɨkawikɨ meta tete yuawimekɨ mutimerɨka waɨkawa mɨraye'axekɨ.
JOB 28:17 Huru meta tete xikɨri manuyehekɨa hepaɨna pɨka'anene, meta mɨtiupata pɨkayɨwe hurukɨ mɨtiwewiyatɨkakɨ.
JOB 28:18 Matsi titayari tetehexaxatani tete mɨxeta meta mɨtsiɨraɨye. Mɨtimaiwenikɨ matsi pɨraye'axe keyuri tetexi mayetataɨrawi.
JOB 28:19 Tete mayetaxaɨye Kutsi kwieyaritsie mieme hepaɨna pɨka'ane, meta pɨkayɨwe huru 'aixɨa mɨ'anekɨ minaneni.
JOB 28:20 ¿Hakewa kamɨtsɨ payeneika mɨtimaiwenikɨ mɨ'ayumieme? ¿Hakewa petikie mɨreutamaiwenikɨ mɨ'ayumieme?
JOB 28:21 Yunaitɨ memɨte'u'uwa wahɨxie pɨ'awietɨ, metatsiere wikixi wahɨxie pɨyu'awieta.
JOB 28:22 Mɨɨya tiyu'uname matɨa mɨpaɨ meputiyuane: «'Etsiwa tepɨtemarie hepaɨtsitana miemekɨ».
JOB 28:23 Kakaɨyari xeikɨa pɨyɨwe hetsɨana mɨye'ani, mɨkɨ xeikɨa pɨtimate hakewa mɨkɨ meyeka.
JOB 28:24 Mɨkɨ kwie manu'atɨkatsie paitɨ pɨniere, mɨkɨ naime pɨtixeiya muyuawi hetɨa tita mɨtixɨawe.
JOB 28:25 Kepauka mɨkɨ 'eka tɨrɨkariyaya mupitɨakai meta kepauka haa mu'inɨataxɨ kematiyeukakɨ,
JOB 28:26 kepauka mukawiwiyenikɨ mupitɨa meta wiyeri mɨtɨrɨkawi kemɨtiɨkɨkanikɨ,
JOB 28:27 hikɨ kemɨtimaiwenikɨ mɨ'ayumieme kaniuxeiya kani'inɨarita mɨraye'axe hepaɨ katinixeiya, kanita'inɨata, hikɨ heitixeiyaxɨaka 'aixɨa kaniyurieni.
JOB 28:28 Hikɨ teɨteri mɨpaɨ katiniwarutahɨawe: «Ti'aitame 'ayemakatɨ mɨtimaiwenikɨ kanihɨkɨtɨni. 'Axamɨti'ane hepaɨtsita yukweriwayurietɨ: mɨkɨ mɨreutamaiwe pɨhɨkɨtɨni».
JOB 29:1 Kuwi tawarita mɨpaɨ kaniutayɨni:
JOB 29:2 «Waɨkawa metserite manuyekɨ nepuku'eriwa, kepauka Kakaɨyari mɨnetsi'ɨwiyakaitsie.
JOB 29:3 Yɨkɨxemekɨ neheima pɨnetsikɨxiyakai, makɨyɨwi hekɨariyayatsie nepuyeikakai.
JOB 29:4 'Iya tukari nepa'eriwa, kepauka yakɨ nemɨnemaikaitsie, 'ana Kakaɨyari nekii 'aixɨa pɨyuriekai yunaki'eriyakɨ.
JOB 29:5 »Kepauka 'akuxi Naimekɨmɨtɨrɨkaɨye nehamatɨa muyeikakaitsie, meta neniwema ne'aurie memɨtiyaxikekaitsie,
JOB 29:6 kepauka retsi kuneriyarikɨ neketatetsie nemeyuhauxinakai, meta 'ayeparitsie hatseiti hayari paneikakai,
JOB 29:7 kepauka nemayeyeikakai kiekari kitenie wa'ɨxatsitɨwame nemɨhɨkɨtɨkai, kepauka yuwaɨkawa memayuxeɨrietsie 'ɨparitsie nemayeixakai,
JOB 29:8 temari menetsixeiyame hu mepɨkɨkakai, 'ukirawetsixi meta mepɨti'uwekai,
JOB 29:9 memanuyetei metekuxatatɨ mepɨtekuhayeikawakai meta yumamakɨ yutenie mepɨwɨwɨrekai.
JOB 29:10 Memanuyetei 'a'inɨkai metekuxatatɨ mepakɨkakai, meta waneni wateta pukuwewerikekai.
JOB 29:11 Kemɨ'ane memɨnetsi'eniwakai netikuxatakaku, 'aixɨa meputiyuanekai nehepaɨtsita, kemɨ'ane memɨnetsixexeiyakai, 'aixɨa meputiyuanekai.
JOB 29:12 Tixaɨtɨ mɨkarexeiya xɨka parewiya ha'iwawani nehetsɨa, ne nepiparewiekai, yaxeikɨatatsiere nutui, yuparewiwame mɨkahexeiya.
JOB 29:13 Tixaɨtɨ memɨkatetakwewie 'aixɨa mepɨnetekɨhɨawekai, nekɨmana temawierikakɨ wiuraxi wa'iyari putihiwakai.
JOB 29:14 Tita mɨtiheitserie kamixayari nepanakatɨkɨkai, mɨkɨ nemata nemuwawiwa pɨhɨkɨtɨkai meta nemu'utsie nemayɨhɨaya heitserie nemexeiyanikɨ.
JOB 29:15 Memɨkaheuneniere wahetsiemieme wahɨxite nepatɨa, memɨka'ɨkɨniwawe wahetsiemieme, wa'ɨkate nepatɨa.
JOB 29:16 Memɨteheuyehɨwa wapaapa nepatɨa, meta teewatari wahetsie nunuwame nepatɨa.
JOB 29:17 'Axamemɨte'u'iyari watamete nepanaye'unaxɨa, watametetsie paitɨ wa'ikwai nepayeha.
JOB 29:18 »'Ana mɨpaɨ nepɨtiu'eri: “Nekiita nepɨmɨni, netukari kayu'inɨatsinɨatɨ payani xiekari haramara tetsita mɨtika hepaɨ.
JOB 29:19 Nenanayarite hata paitɨ pɨreukawiyaxɨani, haɨtsikari tɨkarikɨ mieme nexawaritsie peukayaxe.
JOB 29:20 Mariweme kenemɨrexeiya nehetsie puyuhayewani witsimɨ'anene, meta netupi yanepɨrakweka”.
JOB 29:21 »Teɨteri mepɨnetsi'eniwakai neniuki metakwewietɨ kayuwatɨ metetetɨ me'enukwewienike, kayuwatɨ me'umatɨ ne'ɨxatsi mepuka'ɨnakai.
JOB 29:22 Ne kepauka nemɨtiutaxaxatakai, xewitɨ 'axapɨka'utainekai nehepaɨtsita, neniuki wanakata pɨtikunanakekai.
JOB 29:23 Neniuki mepɨtakwewiekai me'enukwewienike xewitɨ wiyeri 'emɨreutetere kemɨtitakwewie hepaɨ.
JOB 29:24 Xɨka ne nehanaweni newaxeiyatɨ, mɨkɨ yuri mepɨkanete'eririekai, nehɨxie nemakananekɨ mɨkɨkɨ mepɨyuwaɨriyakai.
JOB 29:25 Huye ke'aneme memuweiyani nepuwaxeitsitɨakai, ne wayeta nepayeixakai, wahamatɨa nepuyeikakai ti'aitame yukuyaxima watsata muyeikani hepaɨ, kemɨ'ane memɨyuhiwerie wanɨtɨwame hepaɨ netiyumaitɨ.
JOB 30:1 »Hikɨ matsi nehepaɨtsita tɨɨritɨtɨ mekaniutinaweni, ne mɨkɨ wapaapama nepɨkawaruhɨritɨawe tɨma netsɨikɨrima nemuxatsima wahɨwemete.
JOB 30:2 ¿Titakɨ tiyunaki'eriekake nehetsiemieme watɨrɨkariya, matsi tɨrɨkariya mekahexeiyakaku?
JOB 30:3 Mete'uka'eniwatɨ haakakɨ meta meteheuyehɨatɨ, makumawe 'amanutitewatsie paitɨ mepu'uwakai tɨkarikɨ, yeuta kwiepa mɨkahakietatsie.
JOB 30:4 'Ɨtsita tupiriyate ratsiwitɨkaime mepɨtekupitɨwekai meta matsikɨi nanayari mepɨkwakai.
JOB 30:5 Mepayeweiyariekai kiekaritsie, mewahiwietɨ tenanawayamete wahepaɨ.
JOB 30:6 'Ayumieme puwakietɨkai 'aki 'utɨma haa muwakitsie, 'ai mukatataritɨa meta terɨta.
JOB 30:7 'Ɨtsitsata meputihiwakai, tupiriyatsata 'axeikɨa mepɨtihipitekai.
JOB 30:8 Teɨteri 'atsimemɨkatemate mekanihɨkɨtɨni, 'axamemɨtemariwa, 'ayumieme yukie mepayeweiyarie.
JOB 30:9 »Hikɨ matsi ne menetsikuxatatɨ xeikɨa kenemɨ'ane mekaneni'ɨkeni. Hikɨ netsi'atsemete mekanakɨne.
JOB 30:10 Mepɨnetsi xani'erie, mepɨnetsi'uku'e'eiriwa, nehɨxie mepɨnetsihaye'aɨtsikawiya.
JOB 30:11 Hikɨri matsi Kakaɨyari tixaɨtɨ nekatiyunaki'eriekame mɨnetsi'ayeitɨa, nehɨxie 'axame'utiyuatɨ mepɨkatehayewa.
JOB 30:12 Netserieta mepɨti'u yunaitɨ teɨteri menetsimietɨwetɨ, mepɨnetsiwiniyatɨwe ne'ɨkatsie meta mepiwewie nehetsɨa kememɨte'aye'axɨani.
JOB 30:13 Nehuyeta mepɨte'anuna, xewitɨ mɨkanetsiparewiekɨ yamepɨteyurie memɨnetsika'unakɨ.
JOB 30:14 'Amepahu ne'ixumeritsie memeu'inieni hepaɨ, kii 'u'unimetsata mepɨnetsimietɨwe mekatehayewatɨ.
JOB 30:15 Marika nehetsie punua, 'aixɨa 'anemekɨ kenemɨtixeiyariekai 'eka hepaɨ petɨa, newikweitsitɨarika hai hepaɨ putiutapaparike.
JOB 30:16 »Hikɨta netukari nepɨtatɨmaiyarɨme, nekukwiniya kwinimieme pɨneti'uximatɨa.
JOB 30:17 Yɨwikɨta ne'umete pɨnetsititara, kukuiniya nehetsie pɨkaheununuwa.
JOB 30:18 Kakaɨyari yutɨrɨkariyakɨ nekamixatsie pɨnetsiwiya, pɨnetsikɨxɨipina nekamixa nekɨipitɨa mieme hepaɨ.
JOB 30:19 Karima haxuta pɨnetsiheukahɨpa, meta naxi tumuanari pɨnetsihayeitɨwa.
JOB 30:20 »Kakaɨyari 'aku, 'ekɨ nepɨmatsihahiwiwa, matsi pepɨkanetsiku'eiya, ne 'ahɨxie nepɨ'axe, matsi 'ekɨ waɨriyarika pepɨnetsikuxexeiya.
JOB 30:21 Kwinimiemeri pepɨnetinanaima, 'atɨrɨkariyakɨ pepɨnetsi'anayewaya.
JOB 30:22 'Eka hetsie pepɨnetsiheutahɨpa pepɨnetsi'anuku'enitsitɨwa, wiyeri mɨtɨrɨkaɨyetsie pepɨnetsi'uyehɨpa.
JOB 30:23 Yanepɨtimate teukiyapa kepemɨnereukatuanikɨ, hakewa teyunaitɨ 'atemu'uwa temɨtakukuwe metakiekaritsie.
JOB 30:24 »Matsi kemɨ'ane ma'iwarie tawari menukawaxɨani pɨkayɨwe, tiuka'eniwatɨ mahiwa parewiya ha'iwawatɨ.
JOB 30:25 Ne memɨte'uka'eniwa wahetsiemieme neputatsuaka. Tixaɨtɨ memɨkatehexeiya wahetsiemieme nekaninehɨaweni.
JOB 30:26 Kepauka 'aixɨa mɨti'ane nemɨtikwewiekai, 'axamɨti'ane pɨtinua, kepauka hekɨariya nemukuwaunekai, yɨriya pɨnua.
JOB 30:27 Nepɨkatihayewa netaɨta neyɨhɨawetɨ, nepɨtinewie netiuka'eniwatɨ.
JOB 30:28 Nenehɨawetɨ 'anepuyeika, matsi tau mɨxɨkakɨ hawaikɨ, teɨteri wahɨxie neputakeka, parewiya newautɨ.
JOB 30:29 Yawixi memayu'eririya wa'iwa nepatɨa, nɨpexitsixi tɨkarikɨ miemete wa'iwa.
JOB 30:30 Nenawiyari pukatai, meta kanikatsanikeni, naitɨ newaiyari pɨta'a hɨiyakɨ.
JOB 30:31 Nekanari yuariyaya hiwerika pɨhɨkɨ, nepirikɨxa yuariyaya nutuixiya pɨhɨkɨ.
JOB 31:1 »Ne nehɨxitekɨ tɨratu nepuwewiekai kapa 'uka ne'uxeiyakɨ ne'ihiwe'erietɨ.
JOB 31:2 ¿Kakaɨyari 'amutewi hetsɨa timieme ketita neranunakekeyu? ¿Ketita netiyetuiriyarienikeyu Naimekɨmɨtɨrɨkaɨye hetsɨa timieme 'emeutitewatsie?
JOB 31:3 'Axateyuruwamete memɨka'unarienikɨ kaniwahetsiemiemetɨni meta 'axamekani'itɨariekuni 'axamemɨte'u'iyari.
JOB 31:4 ¿Kamɨtsɨ Kakaɨyari kanetixeiya kenemɨtiuyeika meta kati'inɨata kenemɨtiumiekɨ?
JOB 31:5 »Xɨka 'axa'anemekɨ ne'uyeikani, yatɨni kwamanarikakɨ xeikɨa neyumexɨitɨaka,
JOB 31:6 Kakaɨyari kenetsi'u'inɨata ti'inɨnɨatame 'aixɨa mɨ'anekɨ, hikɨ 'ana yapɨretimani kename 'atsinemɨkatiuyuri nehɨkɨ.
JOB 31:7 Xɨka kenemɨtiuyeikakɨ ne'uku'eirieni, xɨka ne'iyari nehɨxite tita mɨtihiwe'erie 'anukuweiya, yatɨni nemamakɨ mɨirikɨa tewinɨari netihɨniyani,
JOB 31:8 mekete'utikwani hipatɨ tita ne nemɨtiuka'e, meta naitɨ ne'etsari kereuyehɨiyani.
JOB 31:9 »Xɨka xeime 'ukaratsikɨ netiu'irɨwiyarieni, xɨka nehepaɨ tewi kitenie ne'utihupakaitɨni,
JOB 31:10 kamɨtsɨ ne'ɨya xeime 'uki 'ikuya ke'ukatɨxɨ, meta hipatɨ 'ukitsi hamatɨana meke'ukahini.
JOB 31:11 Mɨkɨri yemekɨ tewiyarika pɨhɨkɨtɨnikeyu, 'axamɨti'ane mɨkɨkɨ nemutaxanetsiewekaikɨ.
JOB 31:12 'Ɨkwari mɨreuyehɨani hepaɨ pɨtimatsiɨkɨnike. Naime mɨrakɨxɨtsitɨa tita nemɨtiuka'e nanayari 'ɨarime hepaɨ.
JOB 31:13 »Xɨka neyuta'imani 'aixɨa nemɨtiyurienikɨ nete'uximayatsiriwamete 'ukitsi meta 'ukari wahetsiemieme, kepauka memɨnetsi'anati'eiyakaitsie,
JOB 31:14 ¿keri netayɨni kepauka Kakaɨyari mɨnetsita'iwawiyatsie? ¿kenehaineni kepauka mɨnetsitakwewienitsie?
JOB 31:15 Mɨkɨ Kakaɨyari nemaamatsie mɨnetsiyeweriyaxɨ mɨkɨtatsiere mɨwarutiwewi kanihɨkɨtɨni, tamaamama wahetsie teyetekaku kataniutiwaweriya.
JOB 31:16 »Hatsuaku nepɨkatiuhayewaxɨ memɨteheuyehɨwa wa'iwaurika ne'enietɨ, meta wiuraxi nepɨkawaruhayewaxɨ mekwiximeme,
JOB 31:17 hatsuaku paa nexaɨta nepɨka'utakwai, meta nutuite nekatiwakweririetɨ.
JOB 31:18 Nemɨtemaikɨtɨkaitsie paitɨ ne wahetsiemieme wapaapa nepɨhɨkɨ, nunutsiyari paitɨ wiuraxi nemuwaruwitɨxime nepɨhɨkɨ.
JOB 31:19 Xɨka xeime ne'uhayewa yu'ixuriki kahexeiyatɨ mɨmɨnikɨ, yatɨni xewitɨ mɨreuyehɨwa mɨranakatɨni karexeiyani,
JOB 31:20 xɨka mɨkɨ yu'iyarikɨ 'aixɨa kahaineni nemuxatsi wahuxarikɨ newarutikemaritɨaku,
JOB 31:21 yatɨni xɨka nutuite wahetsiemieme nemama ne'utatsera waɨkawa nemɨyɨwekaikɨ heitseriekamekɨ yanemɨtayɨnikɨ 'itsɨkame nehɨkɨtɨtɨ,
JOB 31:22 nemamate kehewayexɨnixɨani nenaiparita, mɨrewayewiyatɨkatsie kehewayetekixɨani.
JOB 31:23 Yuheyemekɨ ne Kakaɨyari yamɨtiwarakapitɨwakɨ nepɨmakaxe, mɨkɨ ti'aitame mumariwe hɨxie nepɨkayɨwe nemɨyɨxɨna.
JOB 31:24 »¿Kamɨtsɨ tuminitsie xeikɨa netita'ikwewa, yatɨni huru 'aixɨa mɨ'ane mɨpaɨ nerehɨawe: “'Ahetsie nepɨtiwiya”?
JOB 31:25 Piinitɨarika waɨkawa kenemɨrexeiyakai hatsuaku mɨkɨkɨ nepɨkaheyuta'ɨrixɨ.
JOB 31:26 Tau xawatɨriyaya mariweme nepɨkahayeitɨwa, yatɨni metseri xawatɨriyaya,
JOB 31:27 'awietɨma nepɨkawarayexeiya, meta 'itsiya netenie mieme nepɨkawarenɨ'airiwa.
JOB 31:28 'Ikɨ 'axamɨti'anekɨ yaxeikɨata nepɨtaxanetsienikeyu, Kakaɨyari muyuawitsie makawe nepuku'eirienikekai.
JOB 31:29 »Hatsuaku nepɨkayukatemawi mɨnetsi'aye'unie 'atiweku. Meta tiuka'eniwakaku.
JOB 31:30 Hatsuaku neteta 'axanepɨka'utayɨ xeime hetsiemieme 'axakehe'itɨarieka nehaitɨ.
JOB 31:31 ¿Kemɨ'ane nekiita pɨka'utahuxai, kemɨ'ane nemexatsie mɨrapikai pɨkatiutikwai?
JOB 31:32 Hatsuaku yeikame nekitenie nepɨkareunamiri, hatsuaku nemɨka'imate yɨwikɨta kaye'utɨa pɨkahekatei.
JOB 31:33 Hatsuaku ke'axanemɨtiuyuri nepɨka'anukana, hipatɨ teɨteri wahepaɨ, nehetsie mɨkarahɨiwanikɨ nepɨkahanukanakai,
JOB 31:34 hipatɨ 'axamenete'utahɨawekɨ. Hatsuaku kayuwatɨ nepɨkatiuya meta nekiita nepɨkaheuyunakai newamakatɨ ne'iwama memunetsinenixeiyanikɨ.
JOB 31:35 »Matsi yemekɨ yanepɨra'eriwakaku xɨka Kakaɨyari netsi'u'enienike. 'Ena netseyu nepaumani: Naimekɨmɨtɨrɨkaɨye kenetsi'uta'eiya. Xɨka mɨkɨ netsimiemɨkɨni, mɨpaɨ mɨkɨ yakeraka'utɨani.
JOB 31:36 Mɨkɨ xanetsika nenaiparitsie nepikɨtɨneni, meta kuruna hepaɨ nekanenamakamɨkɨ.
JOB 31:37 Hɨxiena nepɨtakeni nemanuyeka nemɨhɨkɨtɨni hepaɨ, meta nepɨtitaxatɨani xexuimekɨ kenemɨtiuyeikakaikɨ.
JOB 31:38 »Xɨka nekwie nehepaɨtsita hahiwani, meta naitɨ xurukuyari xɨka 'utitsuanani,
JOB 31:39 xɨka xeime 'itsanarieya ne'utikwani nekatipitɨaka, yatɨni xɨka wakutsiyarima memɨkayuwaɨriyanikɨ newaru'uximatɨani,
JOB 31:40 hikɨ nekwiepa tɨriku hetsiemieme xuya pɨta ke'utinexɨani, meta tupiriya tsewara hetsiemieme». Mɨpaɨ Kuwi 'utayɨka katinanunɨni tikuxatatɨ.
JOB 32:1 Kepauka Kuwi hamikumama memuyuhaika memɨtehetima kename mɨkɨ heitserie mexeiya yu'eriekai, 'anari mepɨka'ita'ei.
JOB 32:2 Matsi 'Erihú Warakeri nu'aya Wutsi kiekame, Xamɨ nuiwarieya hetsie mumiemetɨkai, waɨkawa Kuwi hepaɨtsita kaniuyeha'ani, Kakaɨyari heitserie kahexeiyame mayeitɨakɨ, mɨkɨ pɨta yɨkɨmana heitserie hexeiyame mayuyeitɨakɨ.
JOB 32:3 Yaxeikɨata hamikumama memuyuhaika wahepaɨtsita kaniuyeha'ani memɨka'ɨyɨwekaxɨakɨ Kuwi memɨta'eiyakɨ meta hetsiena memɨte'ɨhɨakɨ.
JOB 32:4 Merikɨte 'Erihú kaniwatakwewiekaitɨni Kuwi 'akuxi katitaxatɨawetɨ, mɨkɨ waɨkawa wiyari memexeiyatɨkateikɨ,
JOB 32:5 matsi kepauka mɨwaruxei memuyuhaika meka'utiniukame, waɨkawa kaniuyeha'ani.
JOB 32:6 Hikɨ kaniutaniuni 'Erihú Warakeri nu'aya Wutsi kiekame: «Ne yemekɨ nepɨtemaikɨ, xemeta xepu'ukirawetsixi, 'ayumieme waɨkawa nepumakai kenemɨtiku'eriwa yanemɨtayɨnikɨ.
JOB 32:7 Mɨpaɨ nepɨtiunehɨawixɨ: “'Ukirawetsixi meri meke'utiniuni kememɨte'uyemate, 'ukirawetsixi meri kememɨtemaiwawe meke'itahekɨata”.
JOB 32:8 Matsi tewi meitimaitɨyeikanikɨ mupitɨa 'iyari hetsiena mɨyeka kanihɨkɨtɨni, Naimekɨmɨtɨrɨkaɨye 'iiya 'ipitɨakaku.
JOB 32:9 'Ukirawetsixi xeikɨa memɨtemaiwawe mepɨkahɨkɨ, meta 'ayumaitɨ xeikɨa pɨkaretimani tita mɨtiheitserie.
JOB 32:10 »'Ayumieme waɨkawamekɨ nepɨxewawirie, xemɨnetsi'enienikɨ, netatsiere 'etsiwa nepɨrexeiya nemɨtixetaxatɨanikɨ.
JOB 32:11 Mexi xetekuxatakai, kayuwatɨ nepɨtikatei nexekwewietɨ meta nexe'enietɨ 'aixɨa kexemɨtekuxatakaikɨ, mexixi niuki xewautɨwekai,
JOB 32:12 yemekɨ waɨkawamekɨ nepi'eni. Matsi 'akuxi xepɨkayɨwawe yaxemɨtehetimanikɨ kename Kuwi yuri ka'utaine, xewitɨ pɨka'ita'eiyawe mɨkɨ kemɨtikuxatakɨ.
JOB 32:13 Mɨpaɨ xepɨkahaitɨkani: “Tameri mɨtimaiwenikɨ mɨ'ayumieme tepukaxei, Kakaɨyari ke'ita'eiya, matsi teɨteri pɨkatixaɨ”.
JOB 32:14 Kuwi nehepaɨtsita 'atsipɨkahaine, meta ne xehepaɨ nepɨkatita'eiya.
JOB 32:15 »Kuwi, 'ahamikuma mepuyuxamurie, mepɨkayɨwawe memuti'anikɨ, niuki pɨwareuyehɨwa.
JOB 32:16 ¿Neta kayuwatɨ netiyerɨni, mɨkɨ memɨkamatsi'uta'eikɨ?
JOB 32:17 Netatsiere nepɨrexeiya yanemɨtayɨnikɨ, meta nematsiɨkɨme nepayeitɨani kenemɨtiuyematekɨ.
JOB 32:18 Niukikɨ nepɨka'ixɨa, 'iyari nehetsie mɨyeka waɨriyarika pɨnetsipitɨa nemɨtaniunikɨ.
JOB 32:19 Winu pɨteyutsie mɨyema hepaɨ nekani'aneni, winu nawi kɨxauriyari mɨhekwatsie yematɨ mɨtatsanirɨme hepaɨ.
JOB 32:20 Peuyewetse nemɨtaniuni meta nemɨnenɨtɨanikɨ, neteni nepanutayepieni yanemɨtita'anikɨ.
JOB 32:21 Ne xeime hetsiemieme nepɨkataniuni, meta xeime witsinepɨkatitahɨawe.
JOB 32:22 Ne xeime witsinepɨkareutaxatɨawe, xɨka mɨpaɨ netiutiyurieni, kemɨ'ane mɨnetsi'utawewi pɨnetikwinitɨani.
JOB 33:1 »Kuwi, nepɨmatsiwawirie neniuki pemɨ'enienikɨ, yemekɨ pemi'enienikɨ naime kenemɨtayɨni.
JOB 33:2 'Ariri neteni nekananutayepieximeni, nekatinitaxatamɨkɨ nekawaɨripiwetɨ.
JOB 33:3 Neniuki 'iyari 'aixɨa mɨtiuka'iyaritsie kaniyekɨkani, neteni yakatinimaika heitseriemekɨ.
JOB 33:4 Kakaɨyari 'iyarieya pɨnetsi'utawewi, Naimekɨmɨtɨrɨkaɨye 'iiyaya tukari pɨnetsi'upitɨa.
JOB 33:5 Xɨkapeyɨweni, keneneuta'eiya, keneu'akuha'aritɨa, yapemɨneranutahɨawixɨanikɨ.
JOB 33:6 Kakaɨyari hɨxie, 'ekɨ matɨa ne yaxeikɨa tepɨ'anene, netatsiere kwiekɨ nekaniwewiyakametɨni.
JOB 33:7 Pepɨka'utimamaweni meta pepɨkanetsimakaka, meta nemamá haheteme 'ahetsie pepɨka'erieka.
JOB 33:8 »Matsi wa'atɨ mɨpaɨ nepɨtiu'enaxɨ mɨpaɨ pepainekai (ne nepa'eriwa):
JOB 33:9 “Ne 'axanepɨkatiyuruwame. 'Axamɨti'ane nepɨkarexeiya. Nepɨ'itiya meta nehetsie pɨkarahɨiwa.
JOB 33:10 Matsi, Kakaɨyari nehetsie waɨkawa pɨtiɨhɨa, nemeye'unie pɨnetsi'ayeitɨa.
JOB 33:11 Ne'ɨkatetsie tepɨa karenakɨ pɨnetsi'ɨhɨa meta kenemɨtikuyeika pɨnetsita'ɨwiya”.
JOB 33:12 »Matsi keneneupitɨa yanemumatitahɨawekɨ kename yakɨ pe'utaine, matsi Kakaɨyari pumariwe keyuri teɨteri.
JOB 33:13 ¿Titayari hetsiena mieme pere'ahaxɨatɨwa kename kamatsiku'eiya pe'utaitɨ?
JOB 33:14 Kakaɨyari waɨkawamexɨa yakatatinahɨaweni, tsepa temɨka'i'enie.
JOB 33:15 Heiwa tekutsukaku taheinɨtsita, heiwata yɨwikɨta katatinixeiyatsitɨaka, kepauka yemekɨ kwi tekutsukaku, yatɨni kepauka herie temɨtikukutsu ta'utatsie,
JOB 33:16 mɨkɨ tanakata pɨtatsikɨhɨawe meta temumamakakɨ pɨtatsihayemari'itɨwa,
JOB 33:17 mɨtatsipatakɨ 'axaketemɨteyuriekɨ meta temɨtehayewanikɨ teyuta'ɨretɨ,
JOB 33:18 mɨki teukiyata temɨkaheukaxɨrienikɨ, meta mɨki kitenie temɨkaheutahaxɨanikɨ.
JOB 33:19 Heiwa Kakaɨyari waɨkawa kukuiniyakɨ pɨraka'enitsitɨiya, ra'umete kwinimieme ratikukuinetɨ.
JOB 33:20 'Ana tawaiyari 'ikwai pɨtixani'erie, 'ikwai witsimɨ'anenekɨ putahewa.
JOB 33:21 Tawaiyari tepeuyehɨpa kayuhekɨakamekɨ, ta'umete muyukuhekɨkɨare muti'inɨata pɨyɨwe.
JOB 33:22 'Ana pehurani temakateukienitsie, rahetsieri paye'aximeni mumɨnikɨ.
JOB 33:23 »Matsi xɨka xewitɨ niuki tuayame, xeimiriyari watsata 'ayeneme, tewi hetsiemieme xɨka 'utaniuni, xɨka ya'utayɨni kename heitserie hexeiya,
JOB 33:24 xɨka 'itinenimayata meta Kakaɨyari xɨka mɨpaɨ tiutawawirieni: “Keneutawikweitsitɨa mɨki teukiyata mɨkaheukahɨiwanikɨ, 'ari hetsiena mieme nemɨtiyutuani nekanexeiyani”,
JOB 33:25 hikɨ 'ana tewi kanitahekwariyariemɨkɨ, nunutsiyari kemɨ'anekai hepaɨ 'anetɨ kanayeimɨkɨ.
JOB 33:26 Kakaɨyari pɨtahɨawe, mɨkɨta piparewieni, hɨxiena pixeiyani hikɨ yutemawietɨ pɨtahiwa, meta 'ana Kakaɨyari 'atsikatiyuruwame payeitɨani.
JOB 33:27 'Ana tewi yumɨireme wahɨxie yapɨtayɨni: “'Axanepɨtiuyuri, mɨtiheitserie neputsewixima, matsi mɨkɨkɨ yanepɨkarakapitɨarie.
JOB 33:28 Kakaɨyari pɨnetsi'utawikweitsitɨa mɨki teukiyapa nepɨkaheukawe, nepayeyuri, hekɨariyatsie 'akuxi nepuyeika”.
JOB 33:29 »'Ikɨ naime Kakaɨyari yapɨtiyuriene heiwamieme, hutarieka meta hairieka paitɨ,
JOB 33:30 mɨtatsitawikwetsitɨanikɨ temɨkakwinikɨ, hekɨariya tukaritsie mieme mɨtatsihekɨariwiyanikɨ 'akuxi.
JOB 33:31 »Kuwi, yemekɨ keneneu'eni, kayuwatɨ ketinekani, nepɨtaniuni.
JOB 33:32 Xɨka perayexeiyani, keneneuta'eiya, keneutaniu, ne xatsunikɨ nepɨmatitaxatɨanikeyu.
JOB 33:33 Yatɨni pepɨkatitaxata, kayuwatɨ keneneu'eni ne kemɨtimaiwenikɨ nepɨmatitaxatɨani».
JOB 34:1 Metatsiere 'Erihú mɨpaɨ kaniutayɨni:
JOB 34:2 «Xeme temaiwawemete, neniuki xekeneu'eni, xeme 'ɨxatsitɨariekate, yemekɨ xekeneneu'eni.
JOB 34:3 Naka 'enakareme niuki puwata'inɨnɨata, neni 'ikwai mɨrewata'inɨnɨata hepaɨ.
JOB 34:4 Teyunaitɨ 'ikɨ mɨyamɨti'ane tepeitimaixɨani, yatepɨtiyuani teyunaitɨ tita matsi 'aixɨa mɨti'ane.
JOB 34:5 »Kuwi mɨpaɨ putaine: “Ne 'axanepɨkatiyuruwame, matsi Kakaɨyari nehetsie 'aixɨa mɨtiyurieni pɨkayuwaɨriya.
JOB 34:6 Mɨti'itawa nekani'eriwanitsɨari, tsepa tewi heitserie nemexeiya nemɨhɨkɨ, 'ɨrɨteya 'ari pɨnetsimiexime, tsepa 'axanekatiuyuri”.
JOB 34:7 ¿Hakewa xewitɨ Kuwi hepaɨ 'anetɨ peyeika, yunanaimarika haretɨ haa hepaɨ?
JOB 34:8 Kaninakeni 'axateyuruwamete muwatemawiekakɨ meta 'axamemɨte'u'iyari muwanɨkakɨ.
JOB 34:9 Meta mɨpaɨ putaine kename tewi tixaɨtɨ kara'iwa Kakaɨyari naki'eritɨatɨ xeikɨa xɨka 'uyeikani.
JOB 34:10 »Teɨteri xemɨtemaiwawe xekeneneu'eni: Kakaɨyari 'axamɨtiuyurieni pɨkayɨwe, meta Naimekɨmɨtɨrɨkaɨye kemɨkatiheitseriekɨ yapɨkatiyurieni.
JOB 34:11 Kakaɨyari tewi kemɨtiu'uximayataxɨkɨ yapɨrekapitɨwa, kemɨreuyewetse hetsiena yapɨtiyuriene.
JOB 34:12 Mɨpaɨ tepɨkateku'eriwani kename Kakaɨyari kemɨkatiheitserie tiyuriene. Naimekɨmɨtɨrɨkaɨye heitserie kemɨrexeiya pɨka'anutuna.
JOB 34:13 ¿Kemɨ'ane kwiepa tɨrɨkariyaya pipitɨa? ¿Kemɨ'ane penukake kwiepa mɨti'ɨwiyanikɨ?
JOB 34:14 Xɨka mɨpaɨ tiu'erieni kename yu'iyari tatsinawairieni, yu'iiya xɨka tatsi'unawairieni kɨmana tukari temexeiyakɨ,
JOB 34:15 yunaitɨ teɨteri mekaniukumaweriweni, yunaitɨ tumuanari mekanakɨniwaweni.
JOB 34:16 »'Ikɨ ketineu'eni, xɨka yurikɨ petimaiweni, yemekɨ keneu'eni kenemɨtayɨni.
JOB 34:17 ¿Tiyɨwekuta tita mɨtiheitserie tixani'erietɨ mɨtiuta'aita? ¿Kamɨtsɨ Kakaɨyari heitserie mexeiya mɨtɨrɨkaɨye hetsie perahɨani,
JOB 34:18 kemɨ'ane te'aitamete memamariwaweme mɨkawarayeitɨa meta memɨtɨrɨkawi yatiwakɨhɨawetɨ 'axakememɨteyuriekɨ?
JOB 34:19 Kakaɨyari te'aitamete mexɨakate xeikɨa waɨkawa pɨkawaparewie, meta xikutsixi xeikɨa pɨkawaparewie tixaɨtɨ memɨkateheuxeiya kawanaki'erietɨ. Yunaitɨ matsi mɨkɨ 'iwewarimama mepɨhɨkɨ.
JOB 34:20 Yapauka tɨkari hixɨapa menitakukuweni, teɨteri mekanitiyɨyɨakani marikakɨ mekanitakukuweni, Memɨmamariwawe mekananakaxɨriwani teɨteri 'atsimekateyuriekaku.
JOB 34:21 »Kakaɨyari hɨxiteya teɨteri wahuye pɨwaxeirie, mɨkɨ yuxexuitɨ kememɨte'u'uwa pɨ'ɨwiya.
JOB 34:22 Pumawe yɨriya meta 'etɨri 'emayetsuye 'axateyuruwamete mɨwati'awietakɨ.
JOB 34:23 Kakaɨyari mitixeiyaxɨani pɨkaheuyewetse kepauka muwata'iwawiyakɨ.
JOB 34:24 Pɨkati'iwauni 'akuxi memɨmamariwawe muwaranakaxɨrienikɨ, meta hipame pɨta muwaranuti'uitɨanikɨ.
JOB 34:25 Kakaɨyari naime katinaka'utɨwani kememɨteyurie, yɨwikɨta kaniwaratixɨrɨwani meta kaniwatiketsinani,
JOB 34:26 putiwaruka'enitsitɨwa ke'axamemɨte'uyurikɨ yunaime teɨteri wahɨxie,
JOB 34:27 me'iweiyatɨ memɨte'uhayewaxɨkɨ 'aitsikaya memɨka'anuku'erikɨ.
JOB 34:28 Hetsɨana paitɨ memiye'atɨakɨ tixaɨtɨ memɨkatehexeiya meta memɨteheuyehiwa wahiwari, hikɨ Kakaɨyari kani'enieni.
JOB 34:29 ¿Matsi kepaikɨ hetsiena pɨrahɨawe xɨka mɨkɨ kayuwatɨ tiuyerɨni? ¿Kepaikɨ pixeiyawe xɨka yunierika 'awietani? Mɨkɨ yunaime teɨteri meta wakiekari waheima pɨkawe,
JOB 34:30 'axamemɨte'u'iyari memɨkate'aitanikɨ meta teɨterimama waruwiniyakɨ.
JOB 34:31 »Xɨka 'ipaɨ petitahɨawe: “Yurikɨ ne'axanepɨtiuyuri, tawariri 'axanepɨkamatitahɨawe.
JOB 34:32 Yakenetineuta'ɨkitɨa tita 'akuxi nemɨkatixeiya, xɨka 'axanetiuyurieni, tawariri mɨpaɨ nepɨkatiyurieni”.
JOB 34:33 ¿Kakaɨyari metiupitɨawe, 'ekɨ kemɨmatinake, tsepa 'ekɨ pemɨka'itanaki'eri? Ne nepɨkahɨkɨ yanemɨtayɨni, matsi 'ekɨ pɨta, 'ayumieme yakeneutayɨki kepemɨtiku'eriwa.
JOB 34:34 »Memɨtemaiwawe yamekenete'utahɨawe meta xeme xemeti'enatɨkɨka xemɨnetsi'enie:
JOB 34:35 “Kuwi 'atsikatimaitɨ putaine, niukieyatsie pumawe meitimaitɨyanikɨ”.
JOB 34:36 Kuwi keheutixeiyariexɨani, 'axatiyuruwame hepaɨ kaniutayɨni.
JOB 34:37 'Axatiuyuriekatɨtɨ tawari 'akuxi mɨkaheu'ena kanayuyeitɨwani, meta 'akuxi tahɨxie kataniyuriyani, metatsiere Kakaɨyari hepaɨtsita waɨkawa 'axakaniutayɨni».
JOB 35:1 Metatsiere 'Erihú mɨpaɨ kaniutayɨni:
JOB 35:2 «¿Kuwi, heitserie pehexeiyame peti'a'erie kepauka 'ipaɨ pemutaine: “Ne matsi heitserie nepexeiya keyuri Kakaɨyari”?,
JOB 35:3 meta 'ipaɨ pemɨtita'iwawiyakɨ: “¿Titakuta rayani nehetsie xɨka 'axanekatiuyurieni?”
JOB 35:4 'Aixɨa kani'aneni, ne nekanixeta'eiyamɨkɨ 'ekɨ, meta 'ahamikuma.
JOB 35:5 Muyuawitsie keneutinieri, kwi keneuyu'ɨwiya, haiwitɨri meutitewatsie keneutixeiya.
JOB 35:6 Xɨka 'axapetiuyurieni, ¿Kakaɨyari titakɨ 'axapetiyurie? Xɨka waɨkawa 'axapetiuyurieni, ¿Titakɨ petikwinitɨa?
JOB 35:7 Xɨka 'aixɨa petiuyeikani, ¿tita petipitɨa? ¿Ketita ranupini 'ahetsɨa timieme?
JOB 35:8 Tsepa 'axapemɨtiyuriene yatɨni 'aixɨa pemɨtiyuriene, kemɨ'ane yamemɨ'itɨarieni 'ahepaɨ teɨteri wahetsie katininakimɨkɨ.
JOB 35:9 »Yunaitɨ teɨteri meputihiwa 'axamɨti'ane waɨkawa manutatekekɨ wahetsie, parewiya mepa'iwawa memɨxɨnarienikɨ mɨtɨrɨkaɨye muwananaimakɨ.
JOB 35:10 Peru xewitɨ mɨpaɨ pɨkahaine: “¿Hakewa Kakaɨyari, mɨnetsi'utawewi, tɨkarikɨ tɨrɨkariya hekwame mɨnetsikupitɨwa,
JOB 35:11 waɨkawa mɨtati'ɨkitɨa keyuri yeutari memumariwawe, waɨkawa tetemaiwaweme mɨtatsi'ayeitɨa keyuri wikixi?”
JOB 35:12 Xɨka Kakaɨyari teɨteri mehahiwatɨkaikaku kawaku'eiyani, karikɨ 'axamemɨte'u'iyarikɨ memuyuti'ɨrekɨ kaniyɨaneni.
JOB 35:13 Kakaɨyari pɨkawa'enie tixaɨtɨ mɨkatihɨkɨ memuku'iwawakɨ, Naimekɨmɨtɨrɨkaɨye pɨkawa'enimɨkɨ.
JOB 35:14 Tsepa kepauka kename peka'ixeiya pemaine, kepemɨtiuyuri hɨxiena pɨti'ane, 'ayumieme peuyewetse pemikwewieka.
JOB 35:15 'Ekɨ mɨpaɨ peputaine kename Kakaɨyari kahayu'eriya meta karaka'enitsitɨani, meta kename 'atsikaretimamate waɨkawa 'axamɨti'ane hepaɨtsita,
JOB 35:16 matsi 'ekɨ Kuwi, 'atsipekatimaitɨ peputaniuka, waɨkawa peputaniuka matsi 'atsipepɨkatimate kepemutaine».
JOB 36:1 'Erihú kaniyeweiyakaitɨni mɨpaɨ 'utaitɨ:
JOB 36:2 «Ketinenewieka 'akuxi nepɨmatitaxatɨani Kakaɨyari hetsiemieme 'akuxi nepɨtitaxata.
JOB 36:3 Kenemɨtiuyemate 'ateewa peyetɨa, yanepɨtayɨni mɨnetsi'utawewi heitseriemekɨ pɨtiyuriene.
JOB 36:4 Yurikɨ nepaine neniuki pɨka'itarika, tewi mɨtimaiwe 'ahɨxie pepuketsa.
JOB 36:5 »Kakaɨyari pɨtɨrɨkaɨye, 'atsimɨkatiyuruwame pɨka'anuyehɨpa, Kakaɨyari pɨtɨrɨkaɨye, meta naime pɨtimate.
JOB 36:6 'Axamɨtiuka'iyari 'amuyeikanikɨ pɨkapitɨa, matsi mu'uximatɨarie heitserie kemɨrexeiyanikɨ pupitɨa.
JOB 36:7 Heitseriemekɨ memu'uwa yuheyemekɨ puwa'ɨwiya, te'aitamete wahamatɨa memɨte'aitanikɨ puwapitɨa meta yuheyemekɨ waheima puwaka'uitɨwa.
JOB 36:8 Matsi xɨka mehɨatɨkani karenakɨ, xɨka me'uximatɨarietɨkani kaunarikɨ memɨhɨatɨkani hepaɨ,
JOB 36:9 Kakaɨyari kexemɨte'uyurikɨ yapɨtayɨni meta kexemɨteyuti'ɨrekɨ 'axaxete'uyurieka.
JOB 36:10 Yunakatekɨ memɨ'enananikɨ pɨwapitɨa mete'ɨkitɨarietɨ meta puwawawirie 'axamemɨteyuriekɨ memuyupatakɨ.
JOB 36:11 Xɨka mɨkɨ mehenu'enieni meta me'eyexeiyatɨ mehakɨne, waɨkawa metehexeiyatɨ mepuyuhayewa kepaɨmexɨa memu'uwani, meta meyutemamawietɨ mepakɨne kememɨteheutere.
JOB 36:12 Matsi xɨka meka'enu'enieni, 'atsimekatemaitɨ mɨki kitenie mepeutahaxɨani.
JOB 36:13 »Kakaɨyari memɨka'ayexeiya yu'iyaritsie haxɨa mepu'uta, parewiya mepɨkaha'iwawa tsepa Kakaɨyari mɨtiwaruka'enitsitɨwa.
JOB 36:14 'Ayumieme kwitɨwa temaritɨtɨ mekanitakukuweni, 'ukitsi yuhamatɨa memukahipite tukita hepaɨ.
JOB 36:15 Kemɨ'ane memɨte'uka'eniwa, Kakaɨyari puwaxɨna mete'uka'eniwakaku, meyuhiweriekaku, pɨwanɨtɨa.
JOB 36:16 »Kakaɨyari pɨmatsixɨna waɨkawa petiuka'eniwakaku, 'ahakuyeukaku pɨmatsihɨani, 'amexatsie 'ikwaite 'aixɨa mɨti'anene pɨtitahɨniya.
JOB 36:17 Matsi 'ekɨ Kakaɨyari memɨka'ayexeiya kememɨtepitɨarie mɨpaɨ pepɨtipitɨarieni, tita mɨtiheitserie meta kepemɨranutahɨiyani mepumatsi'axe.
JOB 36:18 Kene'a'ɨwiyani waɨkawa perexeiyatɨ pemayanikɨ petihiwe'erietɨ, tiyukwamaname pepɨkahe'ayeitɨwani.
JOB 36:19 Waɨkawa kepemɨrexeiya pukamatsiparewieni, meta naitɨ 'a'uximayatsika.
JOB 36:20 Yɨriya pepɨkatakwewieka, kepauka teɨteri wakiekari mati'utsie matixɨriwa.
JOB 36:21 Kene'a'ɨwiyani 'axamɨti'ane hepaɨtsita, 'ayumieme hikɨ pekatiniuka'eniwani.
JOB 36:22 »Kakaɨyari 'aixɨa katinahɨawarɨwani yutɨrɨkariyakɨ. Xewitɨ ti'ɨkitametɨtɨ hepaɨna 'anetɨ pumawe.
JOB 36:23 ¿Kemɨ'ane pita'iwawiyawe kemɨtiyuriene? ¿Kemɨ'ane kename heuyewe pɨtitahɨawiwe?
JOB 36:24 'Uximayatsikaya hepaɨtsita 'aixɨa pehaitɨ pepɨkaratɨtɨmaiyani, nɨawarikɨ hepaɨtsitana 'aixɨa katinaniuwani.
JOB 36:25 Yunaitɨ teɨteri memixeiya mepɨyɨwawe, tsepanetɨ 'ateewa paitɨ.
JOB 36:26 Kakaɨyari pumariwe tepɨka'imate. Pɨkayu'inɨatsinɨa kepaɨmeme wiyari mexeiya.
JOB 36:27 »Mɨkɨ haɨtsi pɨtaxɨrɨwa haa 'aki 'utɨma wiyeri hepaɨ muhanekɨ hatɨatsie mɨye'axenikɨ,
JOB 36:28 hai wiyeri pɨkaxɨrɨwa, teɨteri wahetsie waɨkawa mɨkaxɨrienikɨ.
JOB 36:29 ¿Kemɨ'ane hai 'emutayeyeure petimaitɨyeika, meta tɨranari tsatana mayuane?
JOB 36:30 Kakaɨyari xekeneuxeiya yuxawatɨriya yu'aurie kemɨrexeiya, meta mɨkɨkɨ haramara 'upaitɨ pɨhɨniya.
JOB 36:31 Kakaɨyari pɨti'aita nuiwarite wahetsie meta 'ikwaite waɨkawame pɨtiwayetuirie.
JOB 36:32 Mimierika yumamatsie pɨti'ɨwe, meta yapɨtita'aitɨwa hakewa mɨrekamɨni.
JOB 36:33 Tɨranarieya yapaine kename wiyeri tɨrɨkaɨye, meta wakaitsixi 'ɨaritɨ mepi'enie kename 'uhamie.
JOB 37:1 »'Ari 'ena ne'atimietɨ nepuma, ne'iyari putɨrarɨka, wa'atɨri ne'iyari pɨrewatiyeixime.
JOB 37:2 Keneu'eni, keneu'eni niukieya tɨranarieya, yuarikaya tetana mayeneika xekeneu'eni.
JOB 37:3 Muyuawi hetɨa kemakuyewa naitsarie pɨtimimiene, merɨkariyaya, kwie manu'atɨkatsie paitɨ pɨye'axe.
JOB 37:4 'Utɨmanata kaniumieni niukieya mumariwe tɨranariyari, kaniyuku'eiyani meta yumimierɨkari pɨkahayewa.
JOB 37:5 Kakaɨyari yuniuki 'utatɨrarɨkame payeitɨwa hikɨ 'ana mariweme pɨtiyuriene: Kakaɨyari timamariwaweme mɨtiuyurieni pɨyɨwe meta tepɨkayɨwawe mɨkɨ temeitimanikɨ.
JOB 37:6 'Ɨwi mɨpaɨ katinikɨhɨaweni: “Kwiepa keneukaxɨri”, wiyeri meta: “'Atɨrɨkariya keneuhekɨata”.
JOB 37:7 Yapɨtiyuriene teɨteri yunaitɨ yukiita memeutahaxɨanikɨ, yunaitɨ kemɨtiyuriene memetimanikɨ.
JOB 37:8 Yeutari yuhetsie nunuwame mepɨkuwautɨwe, meta yuterɨta mepuyukuhayeikawa.
JOB 37:9 'Eka tatsutɨa mieme wiyeri mɨtɨrɨkaɨye pu'atɨwa, meta 'eka tayeta mieme xeri pɨ'atɨwa.
JOB 37:10 Kakaɨyari yu'iiyakɨ 'ɨwi pɨtiwewiwa 'ana haa naitɨ puxexere.
JOB 37:11 Haiwitɨri haa kaniutitɨtɨwani, meta yumimierɨkari mana kaniyenenetɨwani,
JOB 37:12 hikɨ mɨkɨ mekaniku'uwani, naitsarie kwiepa kemakuyewa, mete'aye'atɨanike Kakaɨyari kemɨtiwaru'aitɨa,
JOB 37:13 'Aixɨa mɨtiuka'iyarikɨ, hai muyukuxeɨrienikɨ yapɨtiyuriene, hipame mɨtiwakwinitɨanikɨ yatɨni 'aixɨa muwayurienikɨ.
JOB 37:14 »Kuwi, yaketinetewini 'akuxi, keneneu'eni, Kakaɨyari mariwemekɨ kemɨtiyurie hepaɨtsita keneuyuti'iyaritɨa.
JOB 37:15 ¿Petimate Kakaɨyari haiwitɨri kemɨtikuyuitɨwa, meta kemikuyuruwa merɨkariyayakɨ mukuxawatɨrenikɨ?
JOB 37:16 ¿Petimate kehepaɨ haiwitɨri 'ateewa mɨtiuyeyeixa, Kakaɨyari mamariwaweme timaiwemekɨ kemɨtiyuriene?
JOB 37:17 'Ekɨ, pemɨyexɨrimɨne 'akamixate peranakatɨtɨ kepauka mɨxɨkanitsie 'eka tatsutɨa mieme 'i'atɨwakaku,
JOB 37:18 ¿petiyɨwe pemiparewieni muyuawi 'axemɨtayeuriya, 'ayetse'ime wurunitse xikɨriyari tepɨayari hepaɨ?
JOB 37:19 »Ketatineutaxatɨa ketemɨte'ita'eiyakɨ, tametsɨ yemekɨ 'atsitemɨkatematekɨ, tepɨkatemate ketemɨtiyuani.
JOB 37:20 Ne nepɨkanewaɨriya nemitawawirienikɨ kename netaniuni. ¿Kemɨ'ane puyuwaɨriya mɨtaniuni meta mumierieni?
JOB 37:21 Xewitɨ pɨkayɨwe tau mɨxawatɨ kwi muxeiyakɨ kepauka muyuawitsie 'eka haiwitɨri mɨta'enitsitɨaxɨanitsie.
JOB 37:22 Tixawatɨtɨ taimaɨyetɨ tayeta pɨrayemie, Kakaɨyari mana payemie, mariwemetsie yekaitɨ.
JOB 37:23 Naimekɨmɨtɨrɨkaɨye temanunake pɨkayɨwe, tɨrɨkariyaya yemekɨ pumariwe. Pumamariwawe ke'aixɨa mɨtiyuriene meta kemɨtiheitseriekɨ, xeime waɨriyarika pukati'uximayatsitɨa.
JOB 37:24 Mɨkɨ kemɨ'ane metemaiwaweme memuyu'erie tixaɨtɨ pɨkatiwarayeitɨa, 'ayumieme teɨteri mepimakaxe».
JOB 38:1 Yawé Kuwi kaniuta'eiya 'eka waɨkawa tɨrɨkaɨyemetsie. Mɨpaɨ katinitahɨawe:
JOB 38:2 «¿Kemɨ'ane 'ikɨ pɨyɨane, ne'ɨxatsi hepaɨtsita mɨ'iyɨrie, 'atsikatiyumainɨakamekɨ 'utaniutɨ?
JOB 38:3 Kene'akuha'aritɨa pemɨnetsita'eiyakɨ, ne nepɨmatsita'iwawiya, 'ekɨta pepɨnetsita'eiya.
JOB 38:4 »¿Hakewa pepeyeikakai kepauka kwie tsutɨmeyari nemutawewitsie? Keneneutaxatɨa, xɨka 'aku yemekɨ petiuyemaika.
JOB 38:5 Xɨari pepɨtimate kemɨ'ane miti'inɨataxɨ meta kemɨ'ane ti'inɨnɨatamekɨ mi'inɨataxɨ.
JOB 38:6 ¿Tsutɨmeyari ketita hetsie ratei, yatɨni kemɨ'ane tete tsikuritana mieme pukaye
JOB 38:7 mexixi me'utikwikakai xurawetsixi ximeri miemete meta yunaitɨ niuki tuayamete meyutemamawietɨ me'utihiwakai?
JOB 38:8 »¿Kemɨ'ane haramara muwatinetsie pɨreuna kepauka kwie taɨta muwatitekixɨtsie?
JOB 38:9 ¿Kepauka haiwitɨrikɨ nemitikemaritɨa meta kepauka yɨriya 'e'ayetsuimekɨ nemita'eimaxɨ?
JOB 38:10 ¿Kepauka hakewa meye'atɨkanikɨ nemipitɨa meta kitenieyatsie mɨreukukeka nemeukutetsie?
JOB 38:11 ¿Yatɨni kepauka 'ipaɨ nemɨtitahɨawixɨ: “'Ena xeikɨa pepɨye'atɨyeikani, 'ena 'ahamewari 'amɨnene pɨka'anutitsukwakani”?
JOB 38:12 »¿Heiwamiemeri pe'uyeikatɨ ximeri petiuta'aitɨa, yatɨni tau 'ɨrɨya hakewa meukakɨxé petitaxatɨa,
JOB 38:13 kwie kemɨyewa manuye'atɨkatsie paitɨ mɨye'anikɨ meta mɨkɨkɨ yunaime 'axamemɨte'u'iyari muwakuyuitɨanikɨ?
JOB 38:14 Kwie puyukupata, haxu tseyu hetɨa hepaɨ, 'ixuriki witsimɨ'ane mukatutuni hepaɨ 'anetɨ kanayuyeitɨwani.
JOB 38:15 'Axateyuruwamete hekɨaripana mepayeweweiyarɨwa, meta watɨrɨkariya mɨyuti'ɨre pɨka'unarɨwa.
JOB 38:16 »¿Haramara haixayari hakewa metineika peremarie, meta perekuyeixɨari meukatetewatsie paitɨ?
JOB 38:17 ¿Mɨki kitenie petiuxeiyatsitɨarie? ¿Waɨkawa muyeyɨwi kitenie petiuxei?
JOB 38:18 ¿Petimate kwie kemɨyewa? Xɨka yurikɨ 'ikɨ naime petimaika, kenetineutaxatɨa.
JOB 38:19 »¿Ke'anetɨ huye hekɨaripa mieme pɨhɨkɨ? ¿Hakewa pɨre'ane yɨriya mexuawe?
JOB 38:20 ¿Petiyɨwe wakwie manuye'atɨkatsie pemɨwarewitɨni? ¿Wahuye memakuteitsie mieme kemɨreuyune petimate?
JOB 38:21 Yemekɨ pepɨtimate, 'anari xɨari peputinuiwakai. Mɨixari wiyari pepuyeika.
JOB 38:22 »¿Pe'ixeiyake pereutahari 'ɨwi teeyari muyexeɨrietsie,
JOB 38:23 nemi'uta kepauka nemuwa'uximatɨanitsie, kuyaxa miemetsie meta mɨtiyutakwitɨtsie?
JOB 38:24 ¿Ke'anetɨ huye pɨhɨkɨ hakewa xawatɨriya mɨtakɨkatsie, yatɨni hakewa 'eka tau manatineikatsie kwiepa mayeneika?
JOB 38:25 ¿Kemɨ'ane haa peuyepiwa waɨkawa mɨkawiyekɨ, meta kemɨ'ane wiyeri mɨtɨrɨkaɨye pupitɨa,
JOB 38:26 teɨteri memɨkahakuteitsie mɨkahatuanikɨ, meta makumawetsie xewitɨtɨma mɨkahekietsie,
JOB 38:27 kwie makuwaki muyunakɨ meta mana tupiriya mɨtinenikɨ?
JOB 38:28 ¿Kamɨtsɨ wiyeri yupaapa rexeiya? ¿Xewitɨ haɨtsi tiutinuiwitɨa?
JOB 38:29 ¿Hakewa 'ɨwi peyenunuiwa? ¿Kemɨ'ane pitinuiwitɨwa tee muyuawitsie mieme?
JOB 38:30 Haa 'ayepari hepaɨ katiniutse'ireni, meta haramara 'amatiyewa kaniuxexereni.
JOB 38:31 »¿Kamɨtsɨ Tsimanixi memɨwiwietɨka petiwarakɨwɨtɨawe, mexɨkatɨni Terɨka kaunariyari pemɨxɨna?
JOB 38:32 ¿Petiyɨwe muyuawitsie memɨteka'u xurawetsixitɨtɨ ximeripaitɨ pemuwaranetɨani? ¿Hararu 'Amupa petiuta'aitɨawe kepauka maneikanikɨ meta Hararu yakɨ mupe?
JOB 38:33 ¿Petimate ke'anenetɨ 'aitsikate muyuawitsie mɨti'aita? ¿Pemɨtiwata'aitɨanikɨ yunaime 'ena kwiepa petiyɨwe?
JOB 38:34 »¿Petiyɨwe haiwitɨri pemutahiwieni 'ahetsie wiyeri waɨkawa mɨkaxɨrienikɨ?
JOB 38:35 ¿'Ekɨ petihɨkɨ mimierɨka pemɨhekɨata? ¿Kamɨtsɨ mɨpaɨ memeteku'eiya: “'Ena tepɨti'u kepehaineni”?
JOB 38:36 ¿Kemɨ'ane kuaxu mɨtimaiwenikɨ piyetuiri, yatɨni kemɨ'ane wakana 'ukiri meitimaitɨyeikanikɨ pupitɨa?
JOB 38:37 ¿Kemɨ'ane pɨtimaiwe haiwitɨri puti'inɨatawe? ¿Kemɨ'ane pɨyɨwe xarite muyuawitsie mieme metiyeuriexɨanikɨ
JOB 38:38 kepauka kwie mɨtse'ire meta hapukwa mɨnararaninitsie?
JOB 38:39 »¿'Ekɨ mayetsi 'ukari wa'ikwai petixɨ'erie meta mayetsi tɨɨrixi petiwahuxaitɨa
JOB 38:40 kepauka terɨta memɨyu'awieta yatɨni kepauka mehupatɨ 'amemukuhe?
JOB 38:41 ¿'Ekɨ petihɨkɨ kwatsari pemɨtiwamikwa kepauka waniwema memɨteha'iwawa nehetsɨa, meta kepauka memeu'uwa xeikɨa mekatekwatɨ?
JOB 39:1 »¿Petimate kepauka kwaxuri memɨtitawaya? ¿Maxatsi petiwaxexeiya kepauka memɨtiniweyatsie?
JOB 39:2 ¿Petimate kepaɨmexɨa metseriyari memukuyuruwa? ¿Petimate kepauka memɨtiniweya?
JOB 39:3 Kepauka yuniwema muwarayexeiya kananakatutsitani, kukuiniyaya mana kaniu'axeni kepauka mɨtiniwenitsie.
JOB 39:4 Niwemama mekanitiwawereni meta yeuta metɨrɨkawitɨ mekanakɨkani, hikɨ mehekɨkatɨ mepɨkahanunuwari.
JOB 39:5 »¿Kemɨ'ane puxu yeutanaka putatua? ¿Kemɨ'ane kaunarieya puxɨnaxɨ?
JOB 39:6 Ne kwie makumawe nekaniyetuirieni, kiena mayanikɨ mɨkarakuteitɨtsie.
JOB 39:7 Kiekaritsie tiyuariyaya pɨ'atse, meta ti'ikatɨwame hiwarieya pɨka'enie.
JOB 39:8 Yemuritsie puyeika yu'ikwai tikuwaunetɨ, kwiepa mɨtitsitsiɨrawi tiwaunetɨ.
JOB 39:9 »¿'Ekɨ yuri peti'erie kename turu yeutanaka yuwaɨriya matita'uximayatsirienikɨ? ¿'Akuraruta tɨkarikɨ tiuyuhayewawe?
JOB 39:10 ¿Petiyɨwe xɨka pe'itamu'uyaritɨani kaunarikɨ xuruku mɨtiwewienikɨ? ¿'A'ɨtɨma mumieni 'ukwietsanarɨmetɨ tiyɨwe?
JOB 39:11 ¿'Ekɨ hetsiena petiwiya mɨkɨ waɨkawa mɨtɨrɨkaɨyekɨ? ¿Waɨkawame kepemɨti'uximaya petipitɨawe mɨkɨ pɨta mɨtita'uximayatakɨ?
JOB 39:12 ¿Yuri peti'erie mɨkɨ 'a'ikú mɨtitɨanikɨ meta mikuxeɨrienikɨ hakewa pemeiti'unitsie?
JOB 39:13 »'Aru 'amɨnena kaniyutemawieka yu'anate tikatsetɨ, matsi 'anateya kuaxu 'amɨnena 'anateya hepaɨ pɨka'anene.
JOB 39:14 Mɨkɨ kwiepa kanititawayani, xiekaripata kaniku'e'eiriwani mɨtitsinekɨ,
JOB 39:15 tsepanetɨ mitiketsi pɨka'ikweriwayurie, yatɨni tsepa memɨmamariwawe yeutari memitiketsi.
JOB 39:16 Yuniwema 'aixɨa pɨkatiwaxeiya hetsɨana memɨkamiemetetɨni hepaɨ, pɨkayɨhɨawe tsepanetɨ 'uximayatsikaya yakɨxeikɨa mɨratɨa,
JOB 39:17 Kakaɨyari mɨtimaiwenikɨ mɨka'ipitɨakɨ meta meitimaitɨyeikanikɨ pɨka'iyetuiri.
JOB 39:18 Matsi kepauka mutanautsatsie kwinimieme kananayeyɨneni, kawayutsixi meta yaxikemete kaniwatawe'erieka.
JOB 39:19 »¿Kawayu tɨrɨkariyaya petiyetuiri? ¿Kɨipieya petiutakemaritɨa kɨpateya 'atɨtɨmekɨ?
JOB 39:20 ¿'Ekɨ petihɨkɨ 'utsika hepaɨ pemɨtitsunatsitɨwa, ha'atɨ 'utapuxerɨkatɨ kemɨtiwamariuta?
JOB 39:21 Kawayu yu'utɨa kemɨranuyeketsina, yuhetsie hauyu'ɨtɨ mɨtɨrɨkaɨyekɨ, meta makuweritsie kaniutananautsani.
JOB 39:22 Marika pɨtawe'erie, tixaɨtɨ pɨkareumakaxe, pɨka'utimamawe tsepa 'ixiparakɨ mutamierie.
JOB 39:23 'Auriena 'ɨrɨ kaniukuyuatɨyeikani, kaniutixawatɨreni pitsika 'amɨtɨtɨ meta 'ɨrɨ 'amɨtɨtɨ.
JOB 39:24 Waɨkawa munautsarɨmekɨ kwitɨ kaniuye'axeni, kepauka kuxineta mutahɨtsierienitsie muwaketɨani pɨkayɨwe.
JOB 39:25 Kepauka kuxineta metayuani, kanitatsuriximɨkɨ tiyu'iwamɨtɨ, mɨreyukwitɨne 'ateewa paitɨ kani'ɨkweni, meta yukukuyamete wahiwari kani'enieka metatsiere kuyaxi tewa'aitɨwamete wahiwari.
JOB 39:26 »¿'Ekɨ kepemɨtimaiwekɨ piwame mukuwienenikɨ petipitɨa meta tatsutɨa paitɨ mɨye'anikɨ 'uwiximetɨ?
JOB 39:27 ¿Yapehainekaku kwixɨ 'ateewa tiuyewiwiere kuwienetɨ meta 'aheutitewakaku yu'itɨa mɨtawewienikɨ?
JOB 39:28 'Aitsie kanikieka, muwa kaniyekukutsuni, mukatataritsie 'aitsie kaniyu'awietani.
JOB 39:29 Manapaitɨ tita mɨtitakwani kanitaxeiyani, 'ateewa paitɨ hɨxiteya katinikuxexeiyani.
JOB 39:30 Niwemama 'etsimemupepe mekaniyutemamawieka 'imieri xuriyayatsie, hakewa timɨkitɨ mɨreka, mana piwame kaniuyekani».
JOB 40:1 Yaxeikɨata Yawé Kuwi mɨpaɨ katiniutahuawe:
JOB 40:2 «¿Kemɨ'ane Naimekɨmɨtɨrɨkaɨye mɨniukima tiyɨwe mitaheitseritɨanikɨ? Kakaɨyari ke'uta'eiya kemɨ'ane hetsiena mɨtiuhɨpa».
JOB 40:3 Hikɨ Kuwi mɨpaɨ katinita'eiya:
JOB 40:4 «Yanemɨmatita'eiyakɨ nepɨkayɨwe, tixaɨtɨ nepɨkatihɨkɨ, Nemamakɨ netenie nepuwiere.
JOB 40:5 Heiwa yaneputayɨ, tawari yanepɨkatayɨni, hutarieka neputaniu, tawariri waɨriyarika nepɨkayupitɨani».
JOB 40:6 Hikɨ Yawé Kuwi mɨpaɨ katiniuta'eiya 'eka tɨrɨkaɨyemetsie. Mɨpaɨ katinitahɨawe:
JOB 40:7 «Kene'akuha'aritɨaka nehetsɨa kenaye'a. Ne nekamaniti'iwawiyamɨkɨ, 'ekɨta pekaneniku'eiyamɨkɨ.
JOB 40:8 »¿Kamɨtsɨ ne heitserie kenemɨrexeiya tixaɨtɨ pekarayeitɨani? ¿Nehetsie perahɨani 'ekɨ heitserie pehexeiyatɨ pemayanikɨ?
JOB 40:9 ¿'Amamá kuta nemamá hepaɨ titɨrɨkaɨye? ¿'Aniuki kuta neniuki hepaɨ tiutatɨrarɨka?
JOB 40:10 Xɨka'aku peyɨweni, keneuyukunama witsi'anemekɨ xawatɨmekɨ, kenematsiɨkɨni 'aixɨa petiuka'iyaritɨ meta pemariwetɨ.
JOB 40:11 'Ahaxɨa mɨtiyumemiwa keneutatua, memuyuti'ɨre pewaxeiyatɨ tixaɨtɨ mekatehɨmetɨme keniwarayeitɨa,
JOB 40:12 memuyuti'ɨre keniwaruxeiya tixaɨtɨ mekatehɨmetɨme keniwarayeitɨa, 'axamemɨte'u'iyari keniwarutipɨna hakewa tsepa meme'uwa.
JOB 40:13 Yunaime tumuanaripa keniwarukateuki, keniwaruti'eimaka muwatixawatsie keniwareukaxɨri.
JOB 40:14 Ne, nehetsie yanepɨretimani, 'amamá tserieta wikweitsitɨarika muxuawekɨ.
JOB 40:15 »'Eripaniti keneuxeiya, nemitawewi 'ahepaɨ, tupiriyakɨ xeikɨa mɨtiyumikwa tuurutsixi kwietsanamete wahepaɨ.
JOB 40:16 Kepaɨmetɨ tɨrɨkariyaya naiparieyatsie puxuawe. Tɨrɨkariyaya 'ameukunenere hukayatsie kanixuaweni.
JOB 40:17 Kwaxieya kariuxa kɨyeyari hepaɨ pɨtiuyuane, teuriteya tatayari pɨyutsatɨka.
JOB 40:18 'Umeteya purunitse tepɨayari hepaɨ pɨtitsetse'i, watuteya tepɨa muka'utɨka hepaɨ pɨ'anene.
JOB 40:19 Ketita nemɨtiutiwewi mɨkɨ pumexɨakame, ne xeikɨa, Nemitawewi, nepɨyɨwe hetsɨana nemɨye'anikɨ 'ixipara ne'akwetɨ.
JOB 40:20 Yemurite 'ikwaxi hetsienamieme katiniutixuawitɨwani, mana mekaniutinanautsani yeutari.
JOB 40:21 Tuturi 'ayeyeutɨ meumanetɨka hapa mɨye'uwa hetɨa me'axetɨ mekaniuka'uxipiweni, hakatsata mekaniuyuti'awiwietani haa mayematsie.
JOB 40:22 Tuturi 'ayeyeutɨ meumanetɨka yu'etɨpiwari kaniwapitɨaka, hapuri hatetsita meuta'utɨka kaniti'eimani.
JOB 40:23 Tsepanetɨ haa muwayenena menutawaya waɨkawa tɨrɨkaɨyetɨ mɨkɨ pɨka'utimamawe, kayuwatɨ kanayeyurini tsepanetɨ Kurutani hatuxameyari tsurieyatsie mɨreutawaya.
JOB 40:24 ¿Kemɨ'ane hɨxiena puyeyeiwe miwiyakɨ? ¿Kepaikɨ pɨyɨwe tsurieya muwiyakɨ yamɨkatiyurienikɨ?
JOB 41:1 »¿Haxi kwaitsɨkɨ pemukwaitsɨpiya petiyɨwe, yatɨni nenieya tihɨayamekɨ pemɨhuani?
JOB 41:2 ¿Petiyɨwe kaunari mɨtse'ikɨ tsurieyatsie pemenuhɨanikɨ, yatɨni 'aurieyatsie 'iwipamekɨ pemanuyexawariya?
JOB 41:3 ¿'Aixɨa 'anemekɨ metitahuawe yatɨni kename pe'inenimayaka tiutaineni?
JOB 41:4 ¿Kamɨtsɨ tɨratu tiwewieni 'ahamatɨa yuheyemekɨ ti'a'uximayatsiriwame mayanikɨ?
JOB 41:5 ¿Mɨkɨ hamatɨa petiutiwaikawe wikixi kepemɨtiwarutiwaika hepaɨ, yatɨni pemihɨanikɨ 'aniwema memixeiyanikɨ?
JOB 41:6 ¿Tetuayamete memituanikɨ meteyɨwawe, yatɨni 'etsipepeme memɨtixitexɨanikɨ me'ituanike?
JOB 41:7 ¿Pitsikate nawieya hetsie pemuyehatɨaxɨani petiyɨwe, yatɨni 'ɨrɨ mu'uyatsie?
JOB 41:8 Xɨka hetsiena 'amamakɨ peheutimeni, hatsuaku mɨkɨ kemetiutamikɨ pepɨkahatɨmaiya, meta tawari yapemiyurienikɨ pepɨka'awaɨriyari.
JOB 41:9 Yakɨ xeikɨa mɨyapepɨtiku'eriwa pe'iwiyamɨtɨ, xɨka 'ixeiyatɨtɨ xeikɨa kaneuyuyehɨamɨkɨ.
JOB 41:10 Xewitɨ kaniumawe miyehaxɨatɨanikɨ. ¿Kemɨ'ane kamɨtsɨ pɨyɨwe mitamienikɨ?
JOB 41:11 ¿Kemɨ'ane tixaɨtɨ pɨrexeiya nemɨrekapitɨanikɨ? Naitɨ mɨtixuawe muyuawi hetɨa mɨkɨ katininepiinitɨni.
JOB 41:12 »Mɨkɨ teuriteya kemɨ'anenekɨ nepɨkayɨwe ne'ikuxatatɨ nemɨtihayewanikɨ, kemɨtitɨrɨkaɨyekɨ meta witsikemɨ'anekɨ.
JOB 41:13 ¿Kepaikɨ pɨyɨwe mitikemaripienikɨ 'ixiparaya minawairienikɨ? ¿Kepaikɨ paye'awe hetsɨana tepɨa mitakeitsitɨanikɨ?
JOB 41:14 ¿Kepaikɨ puyuwaɨriya menutatetapienikɨ, tameteya mɨtsetse'i mɨxeiyakɨ mumamariwawe?
JOB 41:15 Yuwari'ɨtɨa 'etsiyeyeutɨ tepɨa memanetɨkani hepaɨ kani'aneni, mɨkɨ naitɨ yuwiyatɨkaitɨ tɨrɨkawitɨ,
JOB 41:16 yemekɨ hurawa kani'uka, 'eka tɨma watsata pɨkaheuyeyeika,
JOB 41:17 xexuitɨ kaniyuwiyatɨkani, yunaitɨ kaniyuwiyatɨkani, 'ateewa mi'uitɨani pɨkayɨwe.
JOB 41:18 Yuhɨtsiyakɨ xawatɨriya kanitanenetsitɨwani, hɨxiteya tau 'ɨrɨya ximeri mieme hepaɨ katinimatsiɨkɨni.
JOB 41:19 Tetana tai kanayeneikani, tai tsipurikiyari kaniwayeneikani.
JOB 41:20 Yutsurita kɨtsi kaniwakanenetsitɨwani, xari haka taiyari hetsie 'uyekaitɨ mukwanani hepaɨ.
JOB 41:21 Yu'iiyakɨ tɨxari kanikutaiyani, meta tai tetana kanayeneikani.
JOB 41:22 Kɨipieyatsie tɨrɨkariyaya kaniyekani, mɨkɨ hɨxie, yunaitɨ teɨteri mepɨkayukuwawaɨriya.
JOB 41:23 Nawiyari tse'itɨ kaniyuwiyani, pɨtiwiya yemekɨ pɨkayuyuitɨarinɨa.
JOB 41:24 Tawieya kanitse'ini, 'ayepari hepaɨ, tse'itɨ tete tɨxɨme hepaɨ,
JOB 41:25 Kepauka manukukenitsie, memɨtɨrɨkawi mekaniutimamaweni, kepauka muyutakatsetsie mekaniuyuta'unani.
JOB 41:26 Tsepa 'ixipara menuku'axixɨ 'atsipɨka'iyurieni, meta 'ɨrɨ pɨkatikwinitɨani, meta pitsika meta 'ɨrɨ 'amɨtɨtɨ.
JOB 41:27 Tepɨa mɨaxa hepaɨ pɨtimate, purunitseta kɨye mɨpɨnini hepaɨ.
JOB 41:28 'Ɨrɨkɨ mitaweiya pɨkayɨwe, tete tewɨpametsie mieme xatsi hepaɨ katinixeiyani.
JOB 41:29 Tete tsunamekɨ xeikɨa kanikutsikɨtɨwani, kaniutanaweni pitsika yuariyayakɨ.
JOB 41:30 Yutawitsie xari tarimeyari kaneuka'uitɨaka kwietsanari huyerieya pewewietɨyeika.
JOB 41:31 'Ameukatewa watsu tikwaniyameta hepaɨ katinikwaniyani, haramara putatake witsimu'ɨa puteyutsie mɨyemaka hepaɨ.
JOB 41:32 Hamewari tuxame 'utimerɨkame yu'ɨtɨma kaniuhayewarɨmeni, 'ameukatewa kɨpaya mutuxani hepaɨ pɨtiyuxexeiya.
JOB 41:33 Mɨkɨ mumariwe tixaɨtɨ mɨkatimakaxe kanihɨkɨtɨni, xewitɨ kwiepa kaniumaweni hepaɨna 'anetɨ.
JOB 41:34 Yunaime memɨtɨrɨkawi tixaɨtɨ memɨkatehɨmetɨni hepaɨ katiniwaxeiyani, memuyuti'ɨre yunaime katiniwa'aitɨwametɨni».
JOB 42:1 Hikɨ Kuwi Yawé kaniuta'eiya. Mɨpaɨ katinitahɨawe:
JOB 42:2 «Ne mɨpaɨ nepɨtimate 'ekɨ naimekɨ pepɨyɨwe, xewitɨ pɨkayɨwe yamɨtiuyurieni 'ekɨ pemɨ'iyɨrienikɨ.
JOB 42:3 Mɨpaɨ pepɨra'iwawa: “¿Kemɨ'ane 'ikɨ pɨyɨane, kenemɨtimaiwe hepaɨtsita mɨ'iyɨrie?” Mɨpaɨ nepɨretima waɨkawa 'atsinemɨkareitimaitɨyeika hepaɨtsita nepɨtiutixa, yemekɨ mariweme hepaɨtsita tita 'atsinemɨkatimatekɨ 'akuxi.
JOB 42:4 »'Ipaɨ peputayɨ: “Hikɨta 'ekɨ keneneu'eni, neta nepɨtitaxata, ne nepɨtaniuni nepɨmatsita'iwawiya, 'ekɨta pepɨnetsita'eiya”.
JOB 42:5 Ne nepɨmatsimariekaixeikɨa, matsi hikɨ nehɨxikɨ nepɨmatsixeiya.
JOB 42:6 'Ayumieme, kenemutayɨ tawari mɨpaɨ nepɨkatayɨni, kenetineuyehɨwiri 'ena ne'ukaitɨ nepaine tumuanaritsata meta naxitsata».
JOB 42:7 Hikɨ Kuwi mɨpaɨ tiutahɨaweka, Yawé 'Eripaxi Temani kiekame hetsɨa kaneyani mɨpaɨ katinitahɨawe: «Ne yemekɨ waɨkawa nepɨha'a 'ahepaɨtsita meta 'ahamikuma memuyuhuta wahepaɨtsita, Kuwi neti'uximayatsiriwame kemutayɨ matsi kani'aixɨatɨni, xeme matsi kexemutiyua nehepaɨtsita pɨkatiyuri.
JOB 42:8 'Ayumieme hikɨ 'atahutame tuurutsixi xekeniwarahapani meta 'atahutame muxatsi 'ukitsi, hikɨ Kuwi neti'uximayatsiriwame hetsɨa xekenehu mawari taiyariyari xekenewewi yuhetsiemieme. Kuwi neti'uximayatsiriwame kaneyutanenewimɨkɨ xehetsiemieme, neta nenewierieya ne'enieme nepɨkaxetewiyatsitɨani. Matsi mɨpaɨ xeketenetimati, Kuwi kemutayɨ hepaɨtsita, matsi xeme kexemutiyua nehepaɨtsita pɨkayuri».
JOB 42:9 'Eripaxi Temani kiekame, Wirirari Tsuha kiekame meta Tsupaxi Namati kiekame mepɨtehaye'atɨa Yawé kemɨtiwarahɨawekai, meta Yawé Kuwi nenewierieya 'u'enieka yakatiniuyurieni.
JOB 42:10 'Ariketa Kuwi 'uyutanenewieku yuhamikuma wahetsiemieme, Yawé tawari kanipitɨani mɨtikaxeiyakɨ, hutakɨa matsi rana'iwame meripaitɨ piinitɨarika kemɨrexeiyakai katiniyetuirieni.
JOB 42:11 Yunaitɨ 'iwamama 'ukitsi 'ukari meta yunaitɨ meripaitɨ memimatekai, kiena mekaniu'axɨani hamatɨana 'ikwai 'ixɨarariyari mekaniuwewieni. Mekaninɨtɨani meta mekanituika kemɨtiuka'eniexɨakɨ Yawé 'uximatɨarika kemɨreiyenɨ'airikɨ, meta 'ana mɨkɨ yuxexuitɨ xexuime pɨrata tuminiyari mekanikɨ'ɨitɨaxɨani meta huru hanirayari.
JOB 42:12 Merikɨtsɨ Yawé Kuwi waɨkawa matsi 'aixɨa kaniuyurieni 'imatɨrieka wiyariyaritsie keyuri matɨari, muxatsi tamamata heimama nauka miriyari warexeiyatɨ kanayani, Kameyutsixita 'ataxewime miriyari, tuurutsixi kwietsanameteta xeimiriyari meta puxuri 'ukarawetsixi xeimiriyari.
JOB 42:13 Yaxeikɨatsiere tamamata heimana yunaukame yuniwema 'ukitsi meta 'ukari yuhaikame puwarayexei.
JOB 42:14 Matɨari mieme wa'iwa Kukuru pɨtiuterɨwaxɨ, hutariekata Kanera meta hairieka Witsimɨti'ɨimari.
JOB 42:15 'Ana naitsarie kwiepa mepumawekai 'ɨimarixi Kuwi niwemama hepaɨ mete'ɨimaritɨkaitɨ. Wapaapa waɨkawa piinitɨarika katiniwaruku'eiririeni, yaxeikɨatatsiere wa'iwama.
JOB 42:16 Muixari 'anuyemiekaku mɨyamɨtiɨyɨtsie Kuwi xeitsienituyari heimana huta tewiyari wiyari kaniutihuni. Yuniwema kaniwaruxeiya, meta yuniwema waniwema, 'akuxi matsi nauriekatsie miemete.
JOB 42:17 Mɨixa Kuwi kaniutihuni 'a'uyeikatɨ meta waɨkawa 'ukiratsitɨtɨkeri kaniumɨni ka'uyeiwetɨ.
PSA 1:1 'Aixɨa kani'itɨarieka tewi kemɨ'ane 'axamemɨte'u'iyari wa'ɨxatsi mɨka'enie, meta 'axamemɨteyurie wahuyeta mɨka'umie meta 'axamemɨteniniuki wahamatɨa mɨkayuxewiriya,
PSA 1:2 matsi Yawé 'aitsikayatsie pɨta muyutemawieritɨa, miku'eriwa tukarikɨ meta tɨkarikɨ.
PSA 1:3 Mɨkɨ kɨye hepaɨ kani'aneni hatetsita muka'iteɨtsie hepaɨ kepauka tukarieya maye'axe kaniukaxuxuawereni xawariyari hatsuaku pɨkatiyɨnare. Naimekɨ kemɨtiyuriene 'aixɨa pɨtikuyɨne.
PSA 1:4 Peru, 'axamemɨte'u'iyari xatsi 'eka miku'enitsitɨane hepaɨ mekani'aneneni.
PSA 1:5 'Ayumieme kepauka 'axateyuruwamete memetahɨawarieni mepanutaxɨriyani, meta 'aixɨa memɨtekakɨ memayuxeɨrie mana 'axamemɨteyurie mepɨkahepitɨarieni.
PSA 1:6 Yawé 'aixɨa memɨte'u'iyari wahuye kani'ɨwiyani, 'axamemɨteyurie matsi wahuye kanitatɨmaiyariemɨkɨ.
PSA 2:1 ¿Titayari nuiwarite mete'uyuti'ɨre, meta teɨteri tixaɨtɨ mɨkatiyunaki'erie xeikɨa meteku'eriwa?
PSA 2:2 Te'aitamete mepeye'unie, 'itsɨkate Yawé mepɨkaha'eriwa meta kemɨ'ane manayexeiyarie hepaɨtsita.
PSA 2:3 Mɨpaɨ mekaniutiyuaneni: «Tepɨa kaunariyari tepɨtitekixɨani. Yuku hetsɨana mieme tepuku'eirieni».
PSA 2:4 Muyuawitsie ti'aitame kaniutanaweni, Yawé kaniwa'atseni wananaimatɨ.
PSA 2:5 Yuhaxɨakɨ pɨwarayehɨtɨwa, Ha'atɨ pɨwarutate'a mɨpaɨ 'utaitɨ:
PSA 2:6 «Ti'aitame nekananukakeni Tsiyuni nehɨri mɨpatsie hetsie».
PSA 2:7 Ne Yawé 'aitsikaya nepɨtaxata: «'Ekɨ pepɨneniwe», pɨnerahɨawe, «Hikɨri nekamaniutinuiwitɨani.
PSA 2:8 Kenetineutawawiri, nepɨmatiyetuirieni, nuiwarite nepɨmatsiyetuirieni, 'ahetsiemieme pɨrayani naitɨ kwie manuye'atɨka.
PSA 2:9 Mana pekatinita'aitamɨkɨ tepɨa 'itsɨyari pe'akwetɨ, pekaniwatitaramɨkɨ haxu xariteyari hepaɨ».
PSA 2:10 Xeme te'aitamete, xekenayeneniereni, xekeneyuwaɨriyani xemɨte'ɨkitɨariekakɨ, kwiepa xemɨ'itsɨkate.
PSA 2:11 Yawé xekenayexeiyani xeheyemakatɨ, xeyutemamawietɨ xekenenɨawani.
PSA 2:12 Yaxeketenekahuni, kapa 'uyeha'anikɨ kapa xe'ukwinikɨ huyeta, mɨkɨ yapauka kaniuyeha'arɨweni. 'Aixɨa meke'itɨarieka kemɨ'ane memɨyu'awieta hetsɨana.
PSA 3:1 Rawiri nɨawarieya, kepauka muyuta'unaxɨ yuniwe hepaɨtsita 'Awitsaruni. Yawé, mepɨyɨmɨire memɨnetsi'aye'unie, mepuyuwaɨkawa nehɨxie memu'uwe,
PSA 3:2 meteyumɨireta mɨpaɨ memutiyuane: «Kakaɨyari pɨka'itawikweitsitɨani».
PSA 3:3 Matsi 'ekɨ, Yawé, pepɨnetsiheutinama kuya kɨmana muyukunarɨma pehɨkɨtɨtɨ, 'ekɨ pepɨnexawatɨriya, 'ekɨ nemu'u pepanukunieritɨa.
PSA 3:4 Yawé neputahiwiwa kenemuyuane, yɨhɨri mɨpatsie hetsie paitɨ pɨnetsiheta'eiya.
PSA 3:5 Ne nepukahupu, nepeukukutsu nepanutaneniereta, Yawé mɨnetsi'ɨwiyakɨ.
PSA 3:6 Mepɨkanetsi 'utimariuta kuyaxi memɨyuwaɨkakawa memɨnetsi 'uweiya tsepa hakewa.
PSA 3:7 Yawé, xeiya. Keneneutawikweitsitɨa, nekakaɨyari. Wa'auritapa keniwareutiwaxɨa memɨnetsi'aye'unie. 'Axamemɨte'u'iyari watamete kenewaye'unaxɨa.
PSA 3:8 Yawé, wikweitsitɨarika pɨti'apiini, 'aixɨa ketineuyuri 'ateɨterima wahetsɨa.
PSA 4:1 Teyuitɨwamete wa'ukiyari. 'Ikɨ kanaritekɨ ke'utakwikarieni. Rawiri nɨawarieya. Keneneuta'eiya kenemerahɨawe, 'ekɨ nekakaɨyari nehetsie nunuwame pemɨhɨkɨkɨ. Kepauka nemɨ'uximatɨarie 'ekɨ pepɨnetsinɨtɨa, Nenenewieri keneu'eni kenemaine keneneutinenimayata.
PSA 4:2 Xemeta 'ukirawetsixi xemamariwaweme xemuyu'erie, ¿kepaukake xepɨtehayewa 'axaxeteyurietɨ 'aixɨa xemɨteyuriekakɨ nehetsiemieme? ¿Kepaukake xepɨtehayewa memɨkayuri kakaɨyarixi xewarayexeiyatɨ?
PSA 4:3 Mɨpaɨ xeketenemaika, Yawé kemɨ'ane 'aixɨa mɨtiyuriene kaninaki'erieka. Yawé kaneni'enieka kepauka nemehɨawe.
PSA 4:4 Kepauka xemɨha'a 'axaxepɨkateyurieka, xemuhenitsie xekeneyu'iyaritɨaka 'axaxemɨte'uyurikɨ yu'iyaritsie xekeneyumaika.
PSA 4:5 'Aixɨa mɨ'ane mawari xekeneyetuaka Yawé hetsie yuri xete'erietɨ.
PSA 4:6 Yuwaɨkawatɨ mɨpaɨ mekaniutiyuaneni: «¿Kemɨ'ane 'aixɨa mɨti'ane pɨtatiuxeitsitɨawe?» Yawé, pe'atemawietɨ ketaneuxeiya matsiɨkɨme kene'ayeitɨa tahetsie.
PSA 4:7 'Ekɨ ne'iyari temawierieka pepupitɨa 'anuyuhayewame, tɨriku, winu memeuxeiya wareuyeta katiniyutemawieka.
PSA 4:8 Neka'uximatɨarietɨ nekaniukahupuni nekaniukakukutsuni, 'ekɨtsɨ xeikɨa Yawé, 'aixɨa 'iyari pekanenayenieritɨaka.
PSA 5:1 Teyuitɨwamete wa'ukiyari. 'Ikɨ pirikɨxakɨ ke'utakwikarieni. Rawiri nɨawarieya. Yawé, neniuki keneu'eni, kenemɨtiutatsuaka.
PSA 5:2 Kenemaine, neti'aitɨwame meta nekakaɨyari kenene'enieka, 'ekɨ xeikɨa nepɨmatsiwawirie.
PSA 5:3 Yawé, ximeri paitɨ pepɨnetsi'enie, ximeri paitɨ nepɨmatiwawirie, kepauka pepɨnetsita'eiya nepɨta'ikwewa.
PSA 5:4 'Ekɨ Kakaɨyari pepɨkahɨkɨ 'axamɨti'anekɨ muyutemawie, 'ahamatɨa mepɨkayɨwawe memuyuxewiriyani 'axamemɨte'u'iyari.
PSA 5:5 'Ahɨxie memɨti'uni mepɨkayɨwawe mamariwawemete memɨyu'erie, pekaniwaxani'erieka 'axamemɨteyurie.
PSA 5:6 Memɨte'itawa pepɨwaka'una Yawé, pepɨwa'uxie teyukwamanamete meta memɨteyumemiwa.
PSA 5:7 Peru ne, nepɨyɨwe 'akiita nemeutahani 'anaki'eriya mɨmariwekɨ, 'atuki mɨpatsieta nepɨyɨwe nemɨkatunumakeni.
PSA 5:8 Yawé, yuwaɨkawatɨ memɨnetsi'aye'uniekɨ, 'aixɨa mɨti'anetsie keneneuwitɨximeni, 'ahuyeta keneneparewieka.
PSA 5:9 Kememutiyuane yurikɨ mepɨkatekuxata, yutaɨta 'axati'aneme mepɨtehexeiya, wateta mɨki teukiyapa pɨhɨkɨ reutenitɨ, yunenikɨ mepɨteyu'itaiya.
PSA 5:10 Keniwaranutaxɨri, Kakaɨyari, kememɨteyukɨhɨawekɨ mɨkɨkɨ mekeheyukaxɨrieni. Pepɨkawanaki'erieka yuwaɨkawa memuwarukwikɨ, mematsi'aye'unietɨ memakɨkɨ.
PSA 5:11 Peru 'ahetsɨa memuyu'awieta mekeyutemamawieka, meke'utikwikani kwikari 'aixɨa manuyɨtɨka. Waɨkawa keniwa'ɨwiyani memuyuwaɨriya, yunaitɨ memɨmatsinaki'erie.
PSA 5:12 'Ekɨ Yawé 'aixɨa pepɨwayurie yamemɨtekahu, kuya muyukunarɨma pehɨkɨtɨtɨ pepɨwareutinama mɨpaɨ mɨmatinakekɨ.
PSA 6:1 Teyuitɨwamete wa'ukiyari. 'Ikɨ kanari 'atahaikatɨ mawɨtsie ke'utakwikarieni. Rawiri nɨawarieya. Yawé, pepɨkanetsi'utate'ani peha'atɨ, pepɨkanetikwinitɨaka 'ahaxɨakɨ.
PSA 6:2 Yawé kenenenenimayaka nepɨmɨximeri, Yawé 'aixɨa kenetineuka'eritɨa netaɨta nepeuhaɨtɨ.
PSA 6:3 Ne'iyari waɨkawa pɨyumuina, ¿kepaukake tamɨ Yawé pepɨnetsiparewieni?
PSA 6:4 Yawé, kenenua tukari keneneupitɨa, keneneutawikweitsitɨa 'anaki'eriyakɨ.
PSA 6:5 Mɨkitɨ pɨkayɨwe mɨmatsihaye'erienikɨ, 'ukateukieme, ¿kemɨ'ane pɨmatsitanɨawa?
PSA 6:6 Tsuarikɨ nepu'uxeri tɨkarikɨ, ne'itari ne'ukaikɨ pɨyuyuna, ne'utá ne'ukaikɨ nepɨhawiya.
PSA 6:7 Nehɨxite pɨkaheuniereri netiukakukuinetɨ, pukwixime memɨnetsi'aye'unie ya'ane mewiwiekaku.
PSA 6:8 Nehamatɨa xepɨka'u'uwani yunaitɨ 'axaxemɨte'u'iyari, Yawé nehiwerika kaniu'enieni.
PSA 6:9 Yawé pu'enaxɨ kenemɨtitawawiri, Nenenewieri Yawé pu'eni.
PSA 6:10 Yunaitɨ memɨnetsi'aye'unie mekaniyutitetewiyakuni meta mekani'iyɨriekuni, kwitɨwa mepuyuta'una meyutetewiyatɨ.
PSA 7:1 Rawiri yuhiwerietɨ Yawé kemɨtiutahɨawixɨ Kutsi Wenikamini tewiyari hepaɨtsita. Keneneutawikweitsitɨa, Yawé nekakaɨyari, 'ahetsɨa nemɨneti'awiwietakɨ. Nehetsie keneutanua yunaime memɨnetsi'uweiya wahepaɨtsita.
PSA 7:2 Xɨka mɨpaɨ pekatiuyurieni, mekanenitakwaikuni mayetsi wahepaɨ, mekanenitatsanakuni, xewitu nehetsie pɨkatanuani.
PSA 7:3 Yawé nekakaɨyari, ¿kekuta netiuyuri?, ¿ketitakɨ 'axanetiuyuri?
PSA 7:4 Xɨka nehamiku 'axane'uyurieni, xɨka netikuhɨwirieni kemɨ'ane mɨnetikwinitɨa,
PSA 7:5 kamɨtsɨ mɨnetsi'aye'unie kenetsi'anukuweiya kenetsi'anuku'axe, kwiepa kenetsi'ukahɨani meta tsepari tixaɨtɨ mɨkanerayeitɨa.
PSA 7:6 Yawé, keneuyeha'a, memɨnetsi'aye'unie kememɨteha'a wahepaɨtsita. Kakaɨyari, 'aixɨa ketineuyuri kenenaye'eri.
PSA 7:7 'A'aurie teɨteri mekeyukuxeɨrieni, pemɨtita'aitakɨ mɨkɨ watsata 'ameutitewatsie.
PSA 7:8 'Ekɨ, Yawé, teɨteri wa'itsɨkame pepɨhɨkɨ. Nehetsieta yaketineuyuri heitseriemekɨ kenemɨtiuyeikakɨ, yakenetinakapitɨa kenemɨtiuyurikɨ.
PSA 7:9 Kakaɨyari heitserie pemexeiya, 'ekɨ pemɨtimate wa'iyari kemɨtiku'eriwa, ketineukumaweriya 'axateyuruwamete ke'axamemɨteyurie keneparewieka heitserie mexeiya.
PSA 7:10 Kakaɨyari nehetsie nunuwame pekanihɨkɨtɨni, 'aixɨa memɨteyukɨhɨawe pekaniwawikweitsitɨaka.
PSA 7:11 Kakaɨyari 'itsɨkame 'aixɨa mɨtiuka'iyari kanihɨkɨtɨni, Kakaɨyari kaniwahekani 'axamemɨteyurie tukarikɨ.
PSA 7:12 Xɨka 'axamɨtiuka'iyari katiuhayewa, Kakaɨyari yu'ixipara kanikuha'aritɨamɨkɨ meta yutupi,
PSA 7:13 'ari mɨɨya kaniukuha'aritɨani, meta 'ɨrɨ tai mexeiya kaniukuha'arita.
PSA 7:14 Xekeneuxeiya 'axamɨtiuka'iyari: 'Axamɨti'anekɨ kanitihukatamɨkɨ, 'itarika kanitiniwemɨkɨ.
PSA 7:15 'Aheukatewame kaniuti'ine, muwata kaneukawemɨkɨ.
PSA 7:16 Ke'axamɨtiyuriene yɨkɨmana katiniyukwinitɨamɨkɨ, mu'uyatsie kanikawemɨkɨ kemɨtiukananaima.
PSA 7:17 Yawé nepɨnɨawani 'aixɨa mɨtiuka'iyarikɨ. Yawé 'amutewi nepɨtemawieritɨani kwikarikɨ.
PSA 8:1 Teyuitɨwamete wa'ukiyari. Kemanɨyɨne «Kaxie mɨpɨnarie» hepaɨ mɨpaɨ ketiukwikarieni. Rawiri nɨawarieya. Yawé, tati'aitɨwame, pemɨmariwe naitsarie kwiepa. Muyuawi heima pemɨxawatɨriwie.
PSA 8:2 Memɨmetsi'aye'unie wahepaɨtsita pepɨtiuyuri wateta muwayenenikɨ memetsinɨawanikɨ tɨɨri 'etsimemutɨtɨ meta memɨtsitsewe, memɨmatsi'aye'unie meta memayu'eririya kayuwatɨ pemɨwapitɨanikɨ.
PSA 8:3 Kepauka muyuawi nemɨxeiya, 'amamakɨ pemitawewi, metsa meta xurawetsixi mana pemɨwaruyeyatsaxɨ,
PSA 8:4 mɨpaɨ nepɨtineku'iwawiya: «¿Tewi tita tihɨkɨ, pemiku'eriwanikɨ? ¿Teɨteri tita metehɨkɨ, pemɨwa'eniekakɨ?»
PSA 8:5 'Etsiwatɨkaku 'ahepaɨ 'aneme peputawewi, pepenutikurunatɨa 'aixɨa mɨti'anekɨ:
PSA 8:6 mɨti'aitanikɨ pepipitɨa naime tita pemɨtiutawewitsie, naime pepɨtiyetuiri mɨtiwata'aitɨanikɨ,
PSA 8:7 muxatsi, tuurutsixi kwietsanamete, yunaime yeutari,
PSA 8:8 memɨte'awɨwawe, ketsɨte meta yunaime memɨtekuyuatɨka haramaratsie memɨteye'uwa.
PSA 8:9 Yawé, tati'aitɨwame, pepɨmariwe naitsarie kwiepa.
PSA 9:1 Teyuitɨwamete wa'ukiyari. «Nunutsi kemɨtiumɨ» kemanɨyɨne mɨpaɨ ketiukwikarieni. Rawiri nɨawarieya. Yawé, ne'iyarikɨ nepɨmatsitanɨawa, mariwemekɨ kepemɨtiyuriene naime netikuxatatɨ.
PSA 9:2 Nepɨnetemawieka 'ahetsie netiwiyatɨ, kwikari 'ahetsiemieme nekwikatɨ, 'aku 'Apemutewi.
PSA 9:3 Memɨnetsi'aye'unie mepukununuwa, mepekaxɨrɨwe meta mepɨtakukuwe 'ahɨxie.
PSA 9:4 'Ekɨ heitserie pemɨnetsi'upitɨakɨ, nehetsie pepunua, 'ekɨ 'itsɨkame 'aixɨa pemɨtikuyuruwa, 'a'uwenitsie pepaka.
PSA 9:5 Kakaɨyari memɨkamate, pepɨwarutati, 'axamemɨte'u'iyari pepɨwaruka'unaxɨ, pepɨwarukumaweriyaxɨ yuheyemekɨ xewitɨ mɨkawara'eriwanikɨ.
PSA 9:6 'Uximatɨarika kaheu'akamekɨ memɨtatsi'aye'unie pepɨwarupitɨa, wakiekari pepuka'unaxɨ, xewitɨ pɨkawara'eriwari.
PSA 9:7 Yawé matsi yuheyemekɨ katini'aitametɨni, 'aixɨa mɨtiyurienikɨ yu'uwenitsie kanakani.
PSA 9:8 Kwiepa memɨtama kaniwataxanetamɨkɨ kemɨtiheitseriekɨ, teɨteri katiniwata'aitɨamɨkɨ 'aixɨa 'anemekɨ.
PSA 9:9 Yawé, memɨnanaimarie waparewiwame kanihɨkɨtɨni, wahetsie nunuwame kanihɨkɨtɨni kepauka memɨte'uka'eniwa.
PSA 9:10 'Ahetsie yuri mepɨte'erie kemɨ'ane memɨmatsimate, 'ekɨ, Yawé, pemɨkawaruku'e'eiriwakɨ kemɨ'ane memɨmatsikuwautɨwe.
PSA 9:11 Yawé kwikarikɨ xekenetemawieritɨaka, Tsiyuni hetsie ti'aitame, kemɨtiuyuri nuiwarite watsata xeketenekuxatani.
PSA 9:12 Wahetsie mɨkarahɨiwa wahetsie nunuwame kaniwara'eriwani, memɨ'uximatɨarie memehɨawe yapauka kaniwa'enieka.
PSA 9:13 Yawé, kenenenenimayaka, keneneuxeiya kememɨnete'uximatɨa memɨnetsiheka. Mɨki teukiyapa kenenatihani,
PSA 9:14 Kerutsareme kitenieyaritsie 'akwikarikɨ nepɨmatsikuxatani, 'awikweitsitɨarikatsie nemɨnetemawiekɨ.
PSA 9:15 Kakaɨyari memɨkamate putsu memutiwewita mekaneukaxɨrieni, wa'ɨkate kaniutseixɨani winiyari yɨkɨmana memuti'awietakaitsie.
PSA 9:16 Yawé kanimatiwani 'aixɨa mɨtiuka'iyarikɨ, 'axamɨtiuka'iyari yuwiniyaritsie kaniyukahɨpani.
PSA 9:17 Mɨki teukiyata mekaneukaxɨrɨweni 'axamemɨte'u'iyari, meta yunaitɨ Kakaɨyari mematɨtɨmaiya.
PSA 9:18 Perutsɨ kemɨ'ane mɨreuyehɨwa pɨkahatɨmaiyarieni yuheyemekɨ, tita mɨtitakwewie tixaɨtɨ mɨkarexeiya pepɨtiyetuirieni.
PSA 9:19 Yawé, yaketineuyuri. Tewi mɨrayu'iwanikɨ pepɨka'ipitɨaka, nuiwarite 'ahɨxie memɨti'unikɨ yaketineuyuri.
PSA 9:20 Yawé, marika keniwarupitɨa, kename tixaɨtɨ mekatehɨkɨ teɨteri mɨpaɨ meketehetimani.
PSA 10:1 ¿Yawé, titayari 'ateewa paitɨ petiuyeika? ¿Titayari kepauka temɨte'uka'eniwatsie petiu'ati'awiwieta?
PSA 10:2 Kwinimieme tiha'atɨ tiyumiekame mɨkayɨhɨawe kaniuweiyani, peru hatsuaku yuwiniyaritsie kaniyuhɨamɨkɨ.
PSA 10:3 'Axatiyuruwame tita mɨtihiwe'erie mariweme pɨrayeitɨwa, naime mɨtihiwe'erie hepaɨtsita 'aixɨa putaine Yawé xani'erietɨ.
PSA 10:4 'Axatiyuruwame teikɨ peneniere 'uyuta'ɨretɨ, 'etsiwatɨma Kakaɨyari pɨkaku'eriwa.
PSA 10:5 Naitɨ 'uximayatsikayatsie 'aixɨa pɨtikuyɨne, peutiteewa meta peteewa hetsiena mieme 'a'aitsika metimanikɨ, pɨwananaima kemɨ'ane mɨwaraye'unie.
PSA 10:6 Mɨpaɨ katiniyukɨhɨaweni: «Nitixaɨtɨ pɨkanerekahɨani. Yanetinetemawietɨ 'anepuyeikani. Hatsuaku 'uximatɨarika nepɨkahekaxeiya».
PSA 10:7 'Axaniuki tetana kanihɨneni, 'itarika meta tierika, yunenitɨa katini'awietani 'axamɨti'ane meta nanaimarika.
PSA 10:8 Kaniutihupani kiekari 'etsimɨyeyeutsie, kaniuyuti'awiwietani mɨwakwinikɨ hipame, kaniwatakukuyani 'atsimemɨkateyurie 'atsimemɨkayɨa.
PSA 10:9 Maye hepaɨ terɨta payehupu mɨkayɨhɨawe hupietɨ 'iwiyake, heimana 'uweme yuwiniyaritsie kanihanimɨkɨ.
PSA 10:10 Waɨkawa mɨtɨrɨkaɨyekɨ 'imierimama kwiepa menatixɨrɨweni.
PSA 10:11 Mɨpaɨ kaniutaineni yuxaɨta: «Kakaɨyari pɨkawara'eriwa teɨteri. Yuhɨxie kaneuyukunaka, tixaɨtɨ pɨkatixeiya».
PSA 10:12 Xeiya, Yawé. Kakaɨyari, ketaneuparewi. Memɨkayuhɨawawe pepɨkawaratɨtɨmaiyani.
PSA 10:13 'Axapɨmatikumamateke 'axatiyuruwame. Mɨpaɨ pɨtiku'eriwa kename 'atsipeka'iyurieni.
PSA 10:14 'Ekɨ pepɨniere ketemɨte'uximatɨarie meta ketemɨtenanaimarie, 'ekɨ pepɨkaratɨmaiya 'aixɨa pepɨtiyurieni mɨkɨ hepaɨtsita. Mɨyamemɨte'anuyehu matsi 'ahetsie mekaneuwaɨreni, 'ekɨ pepɨhɨkɨ nutuite waparewiwame.
PSA 10:15 'Axamɨtiuka'iyari tɨrɨkariyaya keneunawairi meta Kakaɨyari mɨka'ayexeiya. Ke'axamemɨteyurie yaketiniwarakapitɨa, meta keniwarukumaweriya yunaime.
PSA 10:16 Yawé ti'aitame kanihɨkɨtɨni yuheyemekɨ, matsi 'iya memɨkametsimate mepeuyehɨiyani yukwietsie.
PSA 10:17 'Ekɨ, Yawé, haweri memɨyɨa wanenewieri pepɨ'enie, pepɨwatɨrɨkariya meta kememɨmatewawirie pepɨraye'atɨwa.
PSA 10:18 'Ekɨ nutuite meta memɨte'uka'eniwa wahetsie pepɨnua, tewi kwiekɨ mɨwewiya, 'axamɨti'ane mɨkati'enenikɨri.
PSA 11:1 Teyuitɨwamete wa'ukiyari. Rawiri nɨawarieya. Yawé hetsie nepɨne'awieta. ¿Titayari mɨpaɨ xenetehahɨawe: «Keneuyuta'una 'ɨtsita, wikixi wahepaɨ»?
PSA 11:2 Xekeniwaruxeiya kehepaɨ yutupi memɨtehawɨwɨtɨwa 'axateyuruwamete: yutupi kaunariyaritsie mekanika'uitɨwani 'ɨrɨ, 'aixɨa memɨte'u'iyari mewatamɨnike 'awie paitɨ metitetɨ.
PSA 11:3 Xɨka tsutɨmeyari 'uka'unarieni, ¿tewi 'aixɨa mɨtiuka'iyari ketiuyuriwe?
PSA 11:4 Yawé yutuki muyepatsieta kanayekani, muyuawitsie Yawé yu'uweni kanexeiyani, kayuwatɨ xeikɨa tewi kwikanitaxeiyani, kanixeiyani kemɨtiyuriene.
PSA 11:5 Yawé kaniwaxeiyani kememɨteyurie 'aixɨa memɨte'u'iyari meta 'axateyuruwamete, kaniwa'uxiwe'erieka kemɨ'ane memɨteyukananaima.
PSA 11:6 'Axamemɨte'u'iyari wahetsie tɨɨ wiyeriyari kananɨ'amɨkɨ meta tai kanikawiwimɨkɨ, 'eka kwinimieme tixɨkatɨ kaniku'ekamɨkɨ, mɨkɨ wa'iwarika kanayeimɨkɨ.
PSA 11:7 'Aixɨa katiniuka'iyarini Yawé, 'aixɨa mɨti'ane katininaki'erieka, 'ayumieme heitserie memexeiya mepixeiya kemɨraka'erie.
PSA 12:1 Teyuitɨwamete wa'ukiyari. Kanari 'atahaikatɨ mawɨkɨ ke'utakwikarieni. Rawiri nɨawarieya. Yawé ketaneutawikweitsitɨa, teɨteri 'aixɨa memɨtekahu mepumaweri, mepumaweri 'ena kwiepa teɨteri heitseriemekɨ memu'uwa.
PSA 12:2 Meteyu'itaiyatɨwetɨ xeikɨa 'amekaniu'uwani yunaitɨ, 'aixɨa mete'uxaxatatɨtɨ kwitɨwata 'axamekaniutiyuaneni.
PSA 12:3 Yawé, 'ekɨ mɨkɨ teɨteri pepɨwareuyehɨani memɨte'itawa meta memɨteyukananaima,
PSA 12:4 mɨpaɨ memutiyuane: «Taniukikɨ tekatenayu'iwakuni, tanenikɨ xeikɨa tekaneuta'ɨka. Nixewitɨ tame pɨkatatsikema».
PSA 12:5 Yawé mɨpaɨ kanaineni: «Hikɨ nekananukukemɨkɨ, memɨ'uximatɨarie nekaniwatawikweitsitɨamɨkɨ, tixaɨtɨ mɨkarexeiya mɨnanaimariekɨ, mɨreuyehɨwa mɨtiuka'eniwakɨ».
PSA 12:6 Yawé niukieya kani'itiyaka, pɨrata 'aixɨa mɨ'itɨarie hepaɨ pɨ'ane, tepɨa 'aixɨa mɨwati'itɨariwatsie 'atahutamexɨa kanikwaxiyarieka.
PSA 12:7 Yawé, 'ekɨ pepɨtatsi'ɨwiyani 'ekɨ yuheyemekɨ tahetsie pepɨnuaka 'ikɨ teɨteri mɨyamemɨtatsiyuriekɨ,
PSA 12:8 tsepa 'axamemɨte'u'iyari kwiepa meyuwaɨkatɨ memɨxuawe, tsepa 'axamɨti'ane waɨkawa mɨtitamɨirirɨme.
PSA 13:1 Teyuitɨwamete wa'ukiyari. Rawiri nɨawarieya. Yawé, ¿kepaukake pepɨnetsihaye'erieni? ¿Kepaukake pepɨnetsi'anu'enieni?
PSA 13:2 ¿Kepaukake nepɨka'uximatɨarieka meta ne'iyari pɨkanetsi'ukukuineni? ¿Kepaukake mɨnetsi'aye'unie pɨtihayewa neti'aitɨatɨ?
PSA 13:3 Yawé nekakaɨyari, keneneuxeiya keneneuta'eiya, keneneupitɨa neheuniereme kenenayeitɨa. Mɨpaɨ netukari nepɨkaheuyehɨani,
PSA 13:4 mɨpaɨ 'ana mɨnetsi'aye'unie: «Nepe'iwaxɨ», pɨkatayɨni, pɨkayutemawiekari mɨkanetsi'atihɨanikɨ.
PSA 13:5 Ne 'anaki'eriya mɨmariwetsie nepɨtiwiya, ne'iyari puyutemawie 'awikweitsitɨarikakɨ.
PSA 13:6 Nepikwika nɨawari Yawé hetsiemieme. Yawé nehetsiemieme 'aixɨa pɨtiuka'iyari.
PSA 14:1 Teyuitɨwamete wa'ukiyari. Rawiri nɨawarieya. 'Atsimɨkatimate yu'iyaritsie mɨpaɨ kaniutaineni: «Kakaɨyari pumawe». Mɨkɨ mepɨtipɨnirɨme, xani'eriwamekɨ yameteyurietɨ. Xewitɨtɨma pɨka'uyeika 'aixɨa tiyurienetɨ.
PSA 14:2 Muyuawitsie paitɨ Yawé teɨteri kaniwataxeiyani, pɨtaniere xewitɨ 'aku kapuyeika timaiwetɨ Kakaɨyari kuwaunetɨ.
PSA 14:3 Yunaitɨ mepeuyexɨri, nixewitɨ pɨkayuhayewaxɨ. Xewitɨ tɨma 'apɨka'uyeika 'aixɨa tiyurienetɨ, nixewitɨ pɨka'uyeikatɨma.
PSA 14:4 ¿Kamɨtsɨ 'atsimekatemate yunaitɨ 'axamemɨteyurie, neteɨterima memɨwakwa'a paa memɨhɨkɨtɨni hepaɨ? Hatsuaku Yawé mepɨkahahɨaweni.
PSA 14:5 Mana mekaniwamariutani xeikɨa, peru Kakaɨyari heitserie memexeiya kaniwaparewieka.
PSA 14:6 Xeme tixaɨtɨ memɨkatehexeiya kememɨteyukɨhɨawe xemɨtewakwatsirie, peru Yawé wahetsie kaninuaka.
PSA 14:7 Kakaɨyari mɨpaɨ mɨtina'eriwanike Kerutsareme hetsiemieme wikweitsitɨarika mɨnanɨ'ani. Kepauka Yawé yuteɨterima mɨwatawikweitsitɨani, 'ana 'ixaheritsixi yunaitɨ mekaniyukatemamawiekuni.
PSA 15:1 Rawiri nɨawarieya. Yawé, ¿kemɨ'ane 'atukita payeyerɨwe? ¿Kemɨ'ane 'ahɨri mɨpatsietsie puyutakiitɨawe?
PSA 15:2 Hetsiena mɨkarahɨiwa xeikɨa kaniyɨweni, 'aixɨa mɨtiyuriene yu'iyarikɨ yurikɨ mɨtikuxata,
PSA 15:3 yuniukikɨ hipame mɨkawarekaxɨrɨwa, yu'aurie kiekame 'axamɨkatikuxaxatɨwa, yuhepaɨtewi 'axamɨkayurie,
PSA 15:4 kemɨ'ane Kakaɨyari muwa'uxie mɨkawanaki'erie, peru mɨwanaki'erie Yawé memayemakaxe, mɨraye'atɨwa kemɨtayɨni tsepa tiuka'eniwatɨ,
PSA 15:5 kemɨ'ane tumini mɨtiyuniniɨtɨwa mɨrana'iwakɨ kayɨanetɨ, kemɨ'ane mɨka'inake tumini mɨtanaki'erienikɨ 'aixɨa mɨtiuka'iyari mɨnanaimanikɨ. Kemɨ'ane 'ipaɨ mɨtiuyeika yuheyemekɨ 'apuweni kawatayuitɨariwatɨ.
PSA 16:1 Rawiri kwikarieya. Kakaɨyari kenene'ɨwiyani, 'ahetsie xeikɨa nemɨne'awietakɨ.
PSA 16:2 Ne Yawé mɨpaɨ nepɨmarahɨawe: «'Ekɨ pepɨnekakaɨyari. Nexaɨta nepɨkayɨwe, 'ahetsie xeikɨa netiwiyatɨ 'aixɨa ti'aneme nepɨrexeiya».
PSA 16:3 Kwiepa miemete memɨpatsie, memɨmamariwawe wahetsie nepɨnetemawie.
PSA 16:4 Peru kemɨ'ane kakaɨyarixi memuwarayexeiyani waɨkawa mepɨtekwineni. Ne hatsuaku newarayexeiyatɨ nepɨka'ayani wakakaɨyarixi meta mawari nepɨkawawewirieni, meta kememɨtetetewa nepɨkawakuxatani.
PSA 16:5 'Ekɨ, Yawé, ne'ikwai pekanihɨkɨtɨni meta tita nemɨti'ie, 'ekɨ yapekatinimaika kemɨnetiyurieni netukari hepaɨtsita.
PSA 16:6 Witsimɨraku'anetsie nepɨnehayewaxɨ yarainekaku, 'imikieri witsiti'anetɨ nehetsie pɨtiunakixɨ.
PSA 16:7 Yawé hepaɨtsita 'aixɨa nepaineni mɨneti'ɨkitɨakɨ, tɨkarikɨ pɨnetsihayehɨtɨwa ne'eriwametsie.
PSA 16:8 Ne Yawé neheyemekɨ yanepɨranuyeyetsa, mɨkɨ netserieta 'utiwekaku, xewitɨ pɨkanetsi'atihɨani.
PSA 16:9 'Ayumieme ne'iyaritsie nepuyutemawie, netaɨta naitɨ nepuyutemawie, 'ayumieme ne'iyarikɨ yuri neti'erietɨ 'anepuyeika.
PSA 16:10 'Ekɨ pepɨkanetsiku'eirieni mɨkite wateukiyapa, 'ekɨ pepɨkanetsipitɨani nemɨtapɨnekɨ 'aparewiwame yanemɨtikamie.
PSA 16:11 Pepɨnetsi'uxeitsitɨa huye tukari nemexeiyanikɨ, waɨkawa pepɨnetsihetemawieritɨani kepauka 'ahɨxie nemeta'ani, 'atserieta meta yuheyemekɨ yanepɨreyutemawieka.
PSA 17:1 Rawiri nenewierieya. Yawé, heitseriekamekɨ kenemetiwawirie keneu'eni, nehiwari keneu'eni keneneuparewi, nenenewieri kwi keneu'eni, ne neti'itawatɨ nepɨka'utaine.
PSA 17:2 Nehetsie nunuwame kenehɨkɨtɨni 'ekɨ, 'ekɨ pemɨtimatekɨ tita mɨtiheitserie.
PSA 17:3 'Ekɨ ne'iyari pepɨmate, 'ekɨ tɨkarikɨ pepɨnetsixeiya, tsiparatsɨ keneneuta'inɨata, nehetsie 'axamɨ'ane pepɨkakaxeiya. Ne 'axanepɨkatayɨni
PSA 17:4 hipatɨ teɨteri kememɨte'uniuka wahepaɨ, netsɨ 'aniuki nekanaye'atɨaka. Teɨteri memɨteyukananaima wahuye nepɨka'uweiya
PSA 17:5 ne nepɨkawa'ɨke nepɨne'ɨwiya, 'ahuye 'etsimatayeyeu 'utɨma nepumie nekahekawautsetɨ.
PSA 17:6 Kakaɨyari 'aku, 'ekɨ xeikɨa nepɨmatsihahiwiwa, 'ekɨ pemɨnetsiku'eiyakɨ, 'ahurawa keneneu'eni pemi'enienikɨ nenenewieri.
PSA 17:7 'Ekɨ, 'atɨrɨkariyakɨ pemɨwawikweitsitɨawe, kemɨ'ane memuyu'unarɨme memɨwaraye'unie mewaruweiyakaku, 'inɨari yakenetineuxeitsitɨa waɨkawa kepemɨti'akanaki'erie.
PSA 17:8 Kenene'ɨwiyani 'ahɨxi hixɨapa mɨyeka pemɨti'ɨwiya hepaɨ, kenene'awietani, wakana yu'anatɨa yuniwema mɨtiwa'ɨwiya hepaɨ,
PSA 17:9 kenene'awietani 'axateyuruwamete memɨnetsimietɨwekɨ, memɨnetsi'aye'unie newarita mematetɨkakɨ.
PSA 17:10 Yu'iyaritsie xeikɨa mepɨteheunama, 'axamekatenikuxatani hipame mewa'iwakutɨ xeikɨa.
PSA 17:11 'Ahurawa xeikɨa mekanenita'ɨwiyani kenemɨtiyuriene, mekanenihupieka menetsimiekutɨ.
PSA 17:12 Mayetsi memɨtehupa hepaɨ mekani'aneneni, mayetsi yuwai memɨtetahupie hepaɨ.
PSA 17:13 Hikɨmɨ, Yawé, 'ekɨta wahɨxie keneukexi. Keniwara'iwa. 'A'ixiparakɨ keneneutawikweitsitɨa 'axateyuruwamete memɨnetsi'uweiyakɨ.
PSA 17:14 Yawé, 'atɨrɨkariyakɨ keneneutawikweitsitɨa 'ikɨ teɨteri memɨkwiwawe mepɨnetsi'uweiya, yutukari memumikie 'ena kwiepa pɨmieme xeikɨa. Kwinie mɨraye'atɨkakɨ xeikɨa pepɨwarutihɨniyaxɨ, waniwema waɨkawa metehexeiyatɨ mepakɨ, wanuiwarima wahetsiemieme paitɨ pɨranayuhayewaxɨ.
PSA 17:15 Peru ne matsi heitseriekamekɨ 'ahɨxie nepumatsihexeiya. 'Ahɨxie kepauka nemanutaniere nematsihexeiyatsie mɨkɨkɨri ne'iyari 'aixɨa peyɨni.
PSA 18:1 Teyuitɨwamete wa'ukiyari. Rawiri kwikarieya, Tsahuri heye'uniekaku meta yunaitɨ memeye'uniekai me'ikuweiyatɨwekaku. Yawé Rawiri kemɨtiutawikweitsitɨa. 'Ana mɨpaɨ kaniutayɨni: Yawé, yuheyemekɨ nepɨmatsinaki'erie, 'ekɨ pepɨnetɨrɨkariya.
PSA 18:2 Yawé 'ai hepaɨ kani'aneni, mɨnetsikunama, mɨnetsiwikweitsitɨa, nekakaɨyari kanihɨkɨtɨni, 'ai 'amutitɨtɨ taɨta mɨnetsi'awieta. Nehetsie kaninunuwametɨni, tɨrɨkaɨyemekɨ mɨnetsiwikweitsitɨa, mɨkɨ 'ateewa paitɨ pɨnetsi'awieta.
PSA 18:3 Yawé nepahɨawe, meuyewetse mɨnɨawariekakɨ, memɨnetsi'aye'unie wahetsɨa pɨnetsihayeha.
PSA 18:4 Mɨki winiyariyaritsie nepunexei nehɨatɨ, haa kwinimieme mɨtiwakuxikɨriwatsie mekaneneukahɨpani.
PSA 18:5 Kaunarikɨ kaneniutahɨani nemɨkateukienikɨ, mɨki winiyariyaritsie nekaniunexeiya.
PSA 18:6 Ne'uximatɨarietɨ Yawé nekaniutahɨawe, nekakaɨyari nekaniutahiwieni, mɨkɨ yutukita paitɨ kaneniu'enieni, nehiwari nakatana paitɨ katiniunake.
PSA 18:7 Kwie naitɨ kaniutayuani kaniuta'une, kaniwatayuaxɨani hɨri tsutɨmeyarite, Kakaɨyari haxɨayakɨ kanewatayuaxɨani.
PSA 18:8 Tsuritana kɨtsi kanewakaneikakaitɨni, tetanata tai watixɨtsitɨwatɨ, tɨɨ xawawatɨme kaniwayenenetɨwakaitɨni.
PSA 18:9 Muyuawi hanutayepieka niwakayani, hai yɨyɨwimetsie 'akiekatɨ.
PSA 18:10 Xeime yuteɨtametsie 'akaitɨ, muyuawitsie xuruku kaniutawewieni 'eka 'anayatsie 'akaitɨ kaneyani.
PSA 18:11 Yɨwita kaneuyuka'awieta, hai yɨyɨwimetsata hakɨkɨ naitɨ nanukanakaitɨni.
PSA 18:12 Kwinimieme mɨtixawatɨkaikɨ hai niukaxɨrieni, tee meta tɨɨ tatɨkaitɨ.
PSA 18:13 Muyuawitsie, tee meta tɨɨ tatɨkaitɨ kaxɨrɨwekaku, Yawé niukieya kanayu'eniɨriɨkɨre tɨranari hepaɨ, 'Amutewi niukieya waɨkawa kanayu'eniɨriɨkɨre.
PSA 18:14 Yu'ɨrɨkɨ kaniwarutamɨni, mimierɨkari mɨmamariwawe, memɨnetsi'aye'unie kaniwarutaweiya, kaniwarutinautsitɨani.
PSA 18:15 Yawé, pemɨtiuyutatikɨ, 'ahaxɨa 'iiyarikɨ, haramara mayema kananatihekɨare, kanahekɨare kwie tsutɨmeyari mituikatɨka.
PSA 18:16 Yumamá 'ameutitewatsie paitɨ kanakatsera, nemamatsie kanikawiere kanenewatihana haramara meukatewatsie.
PSA 18:17 Kaneniuxɨna mɨnetsi'aye'unie mɨtɨrɨkaɨye hetsɨa, meta memɨnetsixani'eriekai wahetsɨa, matsi mɨkɨ mepɨtɨrɨkawikai ne kenemɨkatitɨrɨkaɨye.
PSA 18:18 Kepauka nemekawe mekaneniutamieni, matsi Yawé netsiparewiwame kanayani.
PSA 18:19 'Amakuyewatsie kaneni'atɨani, kaneniutawikweitsitɨani netsinaki'erietɨ.
PSA 18:20 Yawé kanetinakapitɨani heitseriekamekɨ kenemɨtiyuriene, yakanetiniuta'iwitsitɨani nemamakɨ 'axanemɨkatiuyurikɨ.
PSA 18:21 Yawé huyeyatsie xeikɨa nemumiekɨ, hawaikɨ 'axanemɨkareyurienekɨ nekakaɨyari nemɨkaku'eiriwekɨ.
PSA 18:22 Titakɨ mɨneranutahɨani naime nepɨtimate, 'aitsikaya nepɨkahatɨtɨmaiya.
PSA 18:23 Hamatɨana 'aixɨa nepɨtiuyeika nepɨkanewaɨriya 'axanemɨtiyurienenikɨ.
PSA 18:24 Yawé kanetiniyetuirieni heitseriekamekɨ kenemɨtiuyeika, nemamakɨ ke'axanemɨkatiyuriene.
PSA 18:25 'Ekɨ 'aixɨa pepɨtiuka'iyari kemɨ'ane 'aixɨa mɨtiuka'iyari hamatɨa, 'aixɨa 'anemekɨ pepɨwanenimaya kemɨ'ane 'aixɨa memɨte'u'uwa,
PSA 18:26 kayuwatɨ pepuyeika kemɨ'ane kayuwatɨ muyeika hamatɨa, peru kemɨ'ane mutiuyukananaima hamatɨa petimaiwetɨ pepuyeika.
PSA 18:27 Kemɨ'ane tixaɨtɨ memɨkate'ayuyeitɨa pepɨwapitɨa memɨte'ayu'iwanikɨ, peru kemɨ'ane memɨte'uyukatawe'erie tixaɨtɨ pepɨkatiwarayeitɨwa.
PSA 18:28 Yawé, 'ekɨ nekɨxeme takame pepɨnetsihayewirie, 'ekɨ nekakaɨyari, neyɨriya pepɨhekɨariwiya.
PSA 18:29 'Ekɨ penetsiparewiekaku hipame kuyaxi nepɨwatakwini, nekakaɨyari, hamatɨa kiekari kuraruyarita nemeukahani nepɨyɨwe.
PSA 18:30 Kakaɨyari huyeya pɨheitserie, Yawé niukieya kani'itiyaka. Kakaɨyari kuya tepɨaya kanihɨkɨtɨni kemɨ'ane mana memuyu'awieta wahetsiemieme.
PSA 18:31 ¿Kemɨ'ane Kakaɨyari pɨhɨkɨ, Yawé xeikɨa kanihɨkɨtɨni? ¿Kemɨ'ane tete pɨhɨkɨ, takakaɨyari xeikɨa kanihɨkɨtɨni?
PSA 18:32 Mɨkɨ netɨrɨkariya kanayeikani nehuye mɨheitseritɨa,
PSA 18:33 ne'ɨkate maxa 'ɨkateya kanayeitɨwani, meta kepauka 'ateewa nemakakanitsie pɨkanetsipitɨa nemanakawenikɨ,
PSA 18:34 pɨneti'ɨkitɨa nemeyutamiewenikɨ, nemamate pɨtɨrɨrikaya purunitse tupiyari nemahapananikɨ.
PSA 18:35 'Ekɨ 'atepɨakɨ pepɨnetsiwikweitsitɨa, 'atseriekɨ pepɨnetsiwiya, 'aixɨa pemɨtiuka'iyarikɨ neputawikwewe.
PSA 18:36 Huyeta 'aixɨa pɨtiyurie xeiya nemumienikɨ, nemɨkahetiketamɨrikenikɨ.
PSA 18:37 Nepɨwaranukuwei memɨnetsi'aye'unie, nepɨwaranuku'axixɨ, ne nepɨkahewake yunaime newarakumaweriyakake.
PSA 18:38 Nepɨwaretipɨnaxɨ. Tawari mepɨkahanuku'ui. Nehetɨa mekanekaxɨrieni.
PSA 18:39 'Ekɨ tɨrɨkariya pepɨnetsi'upitɨa nemɨnetamienikɨ, nehetɨa 'axamemɨte'u'iyari pekaniwati'uitɨani.
PSA 18:40 Memɨnetsi'aye'unie memɨkaxɨrienikɨ yapekatiniuyurieni, neta mɨpaɨ nekatiniwareuyehɨani memɨnetsi'uxiekai.
PSA 18:41 Parewiya mepuku'iwawakai, xewitɨ mɨwatawikweitsitɨanikɨ pɨka'utine. Yawé meputahiwi, matsi mɨkɨ pɨkawaruta'ei.
PSA 18:42 Nepɨwarutitɨxixɨ. Tumuanari hepaɨ mepɨteyuxexeiyakai 'eka mei'enitsitɨwa. Nepɨwarutiketsi haxu hepaɨ huyeta mɨtika.
PSA 18:43 Memɨnetsi 'uximatɨakai wahetsɨa pepɨnetsi 'ɨxɨnaxɨ, hikɨ matsi hipame nuiwarite wayeta pepɨnetsikake, hikɨ mepɨnetsi'ayexeiya teɨteri nemɨkawamatekai.
PSA 18:44 Yapauka menetsi'enietɨ, mepuyuyetuayakai nehetsɨa, teewatari mepɨyɨa, mɨyatɨtɨ nehɨxie mepanakatutsire.
PSA 18:45 Mɨkɨ nemɨkawamate meputimamawe, me'utiyɨyɨakatɨ mepɨwayekɨka memuwayu'awietata.
PSA 18:46 Yawé kaniuyeikani. 'Aixɨa keramamatiwani ne'ai. Kenɨawarieka nekakaɨyari netsiwikweitsitɨwame.
PSA 18:47 Kakaɨyari nehetsiemieme mɨtiwarakapitɨwa memɨnetsi'aye'unie pɨhɨkɨ, nuiwarite nehetɨa muwaku'uitɨwa.
PSA 18:48 'Ekɨ pepɨnetsiwikweitsitɨa memɨnetsi'aye'unie wahetsɨa, memɨnetsi'aye'unie waheima pepɨnetsikake, pepɨnetsiwikweitsitɨa teɨteri 'axamemɨte'u'iyari wahetsɨa.
PSA 18:49 Yawé, 'ayumieme ne 'aixɨa nepaine 'ahepaɨtsita nuiwarite watsata meta nɨawari 'ahetsiemieme neputikwika kepemɨtitewakɨ.
PSA 18:50 Yawé mɨrayu'iwanikɨ pipitɨa ti'aitame menukake, menayexei Rawiri meta nuiwarimama pɨkawahayewa yuheyemekɨ wanaki'erietɨ.
PSA 19:1 Teyuitɨwamete wa'ukiyari hetsiemieme. Rawiri nɨawarieya. Muyuawi taheima muyema hetsie pɨmatsiɨkɨ Kakaɨyari kemɨtimariwe, mɨkɨkɨ pɨtihekɨata yumamakɨ kemɨtiutawewi.
PSA 19:2 Tukari xeime tukari yapɨtikuxaxatɨwa kemɨtiɨyɨ, tɨkari xeime tɨkari yapɨrahɨawe.
PSA 19:3 Tsepa memɨkatexatawawe, tsepa waniuki mɨkayu'eniɨriɨkɨ,
PSA 19:4 naitsarie kwiepa kaniwaku'eiyani, waniuki kwie manu'axe kaniye'axeni. Kakaɨyari muyuawitsie tau kiiya kaniukawewieni.
PSA 19:5 Mɨkɨ yukiita kaniwayeyeikani neneɨkeme hepaɨ tiyutemawietɨ, waukawa yutemawietɨ yeikame hepaɨ, kaneyeikani yuhuyeta.
PSA 19:6 Muyuawi panakuyeika xeitaparitsie 'umietɨta xeitaparitsie pɨta kaneukayuyuipikeni, yunaime waxɨriwiyatɨ xeime kahayewatɨ.
PSA 19:7 Yawé tɨratuya 'aixɨa kani'aneni: hekwame tukari katiniyupitɨwani. Yawé 'aitsikaya hetsie yuri mɨti'erie 'aixɨa kaniyurieka: 'atsimɨkatimate timaiweme kanayeitɨwani.
PSA 19:8 Yawé kemɨti'aita kaniheitserietɨni: 'iyari kanitemawieritɨaweni. Yawé niukieya kanihekɨaka: hɨxite hauneniereme kanayeitɨwani.
PSA 19:9 Yawé xɨka temakaxeni 'aixɨa kani'aneni: yuheyemekɨ kani'ayumiemetɨni. Yawé kemɨranutahɨani kaniyuritɨni: naitɨ kemɨtiyuyuruwa kaniheitserietɨni.
PSA 19:10 Matsi huru reuyeta pɨtiyunaki'erinɨa, huru 'aixɨa mɨ'ane reuyeta, matsi xiete reuyeta pɨrakaka, xiete yuxɨrɨkatsie muhane hepaɨ.
PSA 19:11 Kɨmana tewi 'ahetsɨa mieme kanaye'eritɨariwani, Kemɨ'ane memeye'atɨwa waɨkawa 'imikieri pepɨtiwakupitɨwa.
PSA 19:12 Xewitɨ 'apɨka'uyeika timaitɨ kename 'axatiyuriene. Kenetineuyehɨwirieka titakɨ 'atsinemɨkatinemate.
PSA 19:13 Keneneuxɨna 'axanemɨtiyurienekɨ nemɨtiyukatawe'eriekɨ, pepɨkanetsipitɨaka mɨkɨ 'axamɨti'ane mɨnetsikuyuitɨwanikɨ. Mɨpaɨ nehetsie pɨkarahɨiwani meta nepɨka'imɨiriyani 'axamɨti'ane.
PSA 19:14 'Ekɨ kenenaki'erieka, neniuki meta kenemɨtiku'eriwa, Yawé, ne'ai meta pemɨnetsiwikweitsitɨwame.
PSA 20:1 Teyuitɨwamete wa'ukiyari. Rawiri nɨawarieya. Yawé, kemetsi'uta'eiya kepauka pemɨ'a'uximatɨa, Kakuwu Kakaɨyarieya kemetsi'ɨwiyani.
PSA 20:2 Kemetsi'uparewieni yutukita 'ayekaitɨ, Tsiyunitsie paitɨtɨ kemetsi'uparewieni.
PSA 20:3 'Amawarika naime keha'eriwani, mawari taiyariyari kemetsinaki'eririeka.
PSA 20:4 'A'iyarikɨ tita pemɨreuyehɨwa kemetiyetuirieni, kepemɨtiku'eriwa kepemɨtiyurimɨkɨ yaketiuyɨni.
PSA 20:5 Tame tepuyutemamawieka kepauka pemɨrayu'iwa, takakaɨyari hetsiemieme tapatera teikɨ tenetseraxɨakuni. Yawé naime kemetiyetuirieni tita pemɨrewawiriwa.
PSA 20:6 Hikɨ mɨpaɨ nepɨtimate Yawé ti'aitame menayexei pɨtawikweitsitɨani, pita'eiya muyuawi mɨpatsietsie paitɨ yutɨrɨkariyakɨ memamariwaweme pɨwara'iwa.
PSA 20:7 Mɨkɨ yukaxetate kuyaxa miemetsie mekaneuwawaɨreni, 'iyata yukawayutsixi 'amemɨpapa wahetsie mekaneuwawaɨreni, peru tameta takakaɨyari Yawé hetsie tekaneuwawaɨreni.
PSA 20:8 Mɨkɨ mekana'iwarɨwani meta mekanatixɨrɨweni, peru tame tepanuku'uwe, 'atepɨti'u.
PSA 20:9 Yawé, keneupitɨa ti'aitame mɨrayu'iwakɨ. Kepauka temetsitahɨawe ketaneku'eiyani.
PSA 21:1 Teyuitɨwamete wa'ukiyari. Rawiri nɨawarieya. Ti'aitame puyutemawie 'atɨrɨkariyakɨ, Yawé. Waɨkawamekɨ puyutemawie pemiparewiekɨ mɨrayu'iwakɨ.
PSA 21:2 Pepeye'atɨiri tita yu'iyarikɨ mɨreuyehɨakai, pepɨkatitikweriri tita mɨra'iwawakai.
PSA 21:3 Pepenukunakixɨ 'aixɨa pe'iyurietɨ waɨkawamekɨ, kuruna pepenaketsiri huru 'aixɨa mɨ'anekɨ wewiyakame.
PSA 21:4 Tukari pɨmetsi'utawawiri, 'ekɨ pepiyetuiri: tukari waɨkawame meta 'atiteriweme.
PSA 21:5 Pemiparewikɨ waɨkawa tɨrɨkaɨyetɨ payeitɨarie, waɨkawa mariweme pepayeitɨa.
PSA 21:6 Hetsiena mieme haixa kemɨtiuneika mɨpaɨ 'aixɨa pepiyurie, pemiteɨtakɨ waɨkawa puyutemawie.
PSA 21:7 Ti'aitame Yawé hetsie kaneuwaɨreni, 'Amutewi naki'eriyayatsie, 'ayumieme hatsuaku pɨka'atiweni.
PSA 21:8 'Atɨrɨkariyakɨ kemɨ'ane memɨmetsi'aye'unie yunaime pepɨwatiwiya, 'atseriekɨ pekaniwa'aximɨkɨ kemɨ'ane memɨmetsi'uxie.
PSA 21:9 Yawé, kepauka 'ekɨ pemuyuhekɨata, huxunu mɨtaka hepaɨ me'anekame pekaniwarayeitɨamɨkɨ. Yuhaxɨakɨ Yawé kaniwareuyehɨamɨkɨ, tai kaniwatixɨtsitɨamɨkɨ.
PSA 21:10 Yunaime 'ena kwiepa waniwema pepɨwarakuyeitɨani, yunaime nuiwarite watsata 'ena memu'uwa.
PSA 21:11 Tsepa memiwautɨwe kehepaɨ memɨmetekwinitɨanikɨ tsepa memuyukapiniriwa 'ahepaɨtsita, mɨkɨ yamepɨkateyurieni.
PSA 21:12 Peru kepauka 'ekɨ pemɨwata'unieni 'atupikɨ mɨkɨ mekanitanautsaxɨakuni.
PSA 21:13 Yawé, 'atɨrɨkariya keneuhekɨata, tameta nɨawari 'ahetsiemieme tepɨtikwika, waɨkawamekɨ pemɨre'a'iwakɨ.
PSA 22:1 Teyuitɨwamete wa'ukiyari. Kemanɨyɨne «Maxa 'uka muxei kahekɨarirɨmekaku» mɨpaɨ ketiukwikarieni. Rawiri nɨawarieya. Nekakaɨyari 'aku, nekakaɨyari 'aku, ¿titayari penetiuku'eiri? Teewa pepuwe kepenetiuwikweitsitɨani, 'ateewa paitɨ neniuki, mɨkaha'eniɨriɨkɨtsie neputatsuaka.
PSA 22:2 Nekakaɨyari, tukarikɨ nemetsihahiwiwa 'ekɨta pepɨkanetsiheku'eiya, tɨkarikɨta yaxeikɨa nemetikɨhɨawetɨ nepɨka'uxipie.
PSA 22:3 'Ekɨ matsi pepɨpatsie, 'ekɨ pepɨti'aitame, 'ekɨ 'ixaheritsixi pepɨwakwikari.
PSA 22:4 Ta'ukiyarima 'ahetsie mepɨtewiyakai, 'ahetsie yuri mepɨte'eriekai, 'ekɨta pepɨwaruxɨnaxɨ,
PSA 22:5 mepɨmetsi'utahiwi, 'ekɨta pepɨwarutawikweitsitɨa, 'ahetsie mepɨte'uwiyaxɨ, 'ekɨta pepɨkawarexɨri.
PSA 22:6 Ne matsi nepɨkatewi, kwitsi nepɨhɨkɨ, teɨteri waɨkawa mepɨnetsiyuriya, yunaitɨ teɨteri mepɨnetsixani'erie.
PSA 22:7 Yunaitɨ memɨnetsixeiya, meputinawe, mepɨnetsi'utate'a, yumu'u me'utitsiketɨ:
PSA 22:8 «'Ikɨ Yawé hetsie yuri katini'erieka, kamɨtsɨ Yawé ke'itawikweitsitɨani. Metsɨ mɨkɨ hetsie xeikɨa kaniyukɨhɨaweni, mɨkɨ matsi ke'ixɨna».
PSA 22:9 Matsi 'ekɨ nemaama hetsie pepɨnetsiyenuiwitɨa, nemaama hetsie pepɨnetsi'ukute, 'ahetsie neyɨkɨhɨaweme pepɨnetsi 'ayeitɨa.
PSA 22:10 Nekatinuiwawekaku 'akuxi 'ekɨ pepɨnetsi'ɨwiyakai, nemaama hetsie neyekaiku paitɨ, 'ekɨ pepɨnekakaɨyari.
PSA 22:11 Hawaikɨ, pepɨkanetsi'uku'e'eiriwani, karikɨ 'uximatɨarika 'ahurawa kaniuyeikani, xewitɨ pumawe mɨnetsiparewienikɨ.
PSA 22:12 Memɨnetsi'aye'unie yuwaɨkawatɨ ne'aurie mepa'utɨka, mekaniti'uka metɨrɨkawitɨ turutsixi Watsani kiekatari wahepaɨ.
PSA 22:13 Nehetsiemieme meputikwaxawa, mayetsi memuyuti haxɨatɨwa hepaɨ wai metatsanake.
PSA 22:14 Haa hepaɨ netukari pɨtayeuriwe, ne 'umete naitɨ pɨxɨxɨni. Ne 'iyari xɨrɨka hepaɨ 'anetɨ patɨa, netaɨta witsɨanitɨ puhane.
PSA 22:15 Netɨrɨkariya haxu hepaɨ puwa, neneni pukuwewerike. Mɨkite watsata pepɨnetsi'ukateukixɨ.
PSA 22:16 Tsɨikɨri tixaɨtɨ memɨte'anukuweiya hepaɨ mepɨnetsi'anutinama, 'axateyuruwamete mekaneniuweiyani, nemamatetsie mekaneneukeixɨani meta ne'ɨkatetsie.
PSA 22:17 Naime ne'umete nemuti'inɨata nepɨyɨwe, teɨteri mekani'axeni menetsixeiyake wa'iyari 'aixɨa mɨ'anekɨ.
PSA 22:18 Ne'ixurikite mepɨyutahuritɨa meta mekaniyuta'iwa ne'ixɨrikikɨ.
PSA 22:19 Yawé, peru 'ekɨ 'ateewa pepɨkaheyeikani, pemɨnetɨrɨkariyakɨ, kwitɨwa kenaye'a pemɨnetsiparewienikɨ.
PSA 22:20 Netukari keneutawikweitsitɨa 'ixiparakɨ ne'umierienikɨ, netukari witsimɨ'ane, tsɨikɨri memɨtɨrɨkawi wahetsɨa.
PSA 22:21 Mayetsi wateta kenenewayehani, tuurutsixi menetsi'utsikɨpakɨ keneneutawikweitsitɨa.
PSA 22:22 Ne'iwama nepɨtiwataxatɨani kepemɨtiuka'iyari, 'ahetsɨa miemete memayuxeɨrie watsata ne'uwetɨ nepɨmetsitanɨawa.
PSA 22:23 Yawé xekenenɨawani kemɨ'ane xemeyemakaxe. Mariweme xekenayeitɨaka, Kakuwu niwemama. Xekenayexeiyani, 'ixaheri nuiwarimama.
PSA 22:24 Mɨkɨ mɨkatiuyukaxani'eriekɨ meta tixaɨtɨ mɨkarexeiya kemɨtiuka'eniwa mɨka'ixeiya xeikɨa, hɨxiena pɨkayuti'awiwieta, matsi kani'enieka, kepauka mɨkɨ maniuka.
PSA 22:25 'Ekɨ yapepɨnetikuyuitɨwa kenemɨtiukwika yuwaɨkawame wahɨxie, kemɨ'ane memɨmetsi'ayemakaxe wahetsie, nepeye'atɨani kenemutayɨ.
PSA 22:26 Tixaɨtɨ memɨkateheuxeiya mepɨtekwani, mɨkɨ mepɨtihuxani, Yawé mepɨtanɨawa kemɨ'ane memikuwautɨwe, wa'iyari ke'ayeyurini yuheyemekɨ.
PSA 22:27 Yawé mekanaye'erikuni, hetsɨana mekani'axɨakuni yunaitɨ kwie manuye'atɨkatsie paitɨ memɨtama, hɨxiena mekanikatunuma'uikuni yunaitɨ kwiepa memɨtama wanuiwarima.
PSA 22:28 Karikɨ Yawé katini'aitametɨni, yunaime nuiwarite katiniwa'aitɨaka.
PSA 22:29 Yunaitɨ kwiepa waɨkawa memɨtehexeiya mekaniyutitemamawikuni meta hɨxiena mekanikahɨxima'uikuni, hɨxiena mekanikatunuma'uikuni yunaitɨ memukwi, yunaitɨ tukari memɨyupitɨani memɨkayɨwawe.
PSA 22:30 Teɨteri 'imatɨrieka miemete mekaneyexeiyakakuni, kemɨ'ane memu'uwani 'uxa'atɨni warie Tati'aitɨwame mekanikuxaxatɨariwakuni.
PSA 22:31 Teɨteri memɨkatinunuiwawe 'akuxi mepɨtetaxatɨarieni Kakaɨyari heitseriekamekɨ kemɨtiuyuri.
PSA 23:1 Rawiri nɨawarieya. Yawé netsihɨweme kanihɨkɨtɨni, tixaɨtɨ nepɨkareuyehɨwa,
PSA 23:2 makutsiɨraɨyetsie kaneniuka'uxipitɨwani. Haa kayuwatɨ mɨtimatsie kaneni'atɨwani,
PSA 23:3 tawarita pɨnetsitɨrɨkariya hekwamekɨ. Huye mɨheitserie 'utɨa kaneniuwitɨximeni mɨpaɨ mɨkɨ 'aixɨa mɨtikɨhɨawarɨwanikɨ.
PSA 23:4 Mɨpaɨ tsepa kweriwa'anekɨa nemumie, 'uyɨwikaku tixaɨtɨ nepɨkareumakaxe, 'ekɨ nehamatɨa pemuyeikakɨ, muxatsi wahɨweme 'itsɨya pemakwe'ekɨ 'ahetsie nepeuwaɨre.
PSA 23:5 'Ekɨ 'ixɨarari pepɨnetsiwewirie memɨnetsi'aye'unie wahɨxie. Witsimu'ɨa nemu'utsie pepɨnetsi'ukawiri, netekɨxi 'anakayeuriweme pepayeitɨa.
PSA 23:6 'Aixɨa kepemɨtiuka'iyari meta 'anaki'eriya nehexeiyatɨ nepuyeikani, kepaɨmexɨa tukari pemɨnetsipitɨaka, meta Yawé kiitana yuheyemekɨ nepayekani.
PSA 24:1 Rawiri nɨawarieya. Yawé kwie naitɨ pɨtipiinieya meta hetsiena naitɨ mɨtixuawe, kwie naitɨ kemɨnena, meta keyupaɨmetɨ mana memɨte'u'uwa,
PSA 24:2 mɨkɨ haramara heima kwie 'unetɨaka, haa panuyetuaxɨa.
PSA 24:3 ¿Kemɨ'ane Yawé hɨrieyaritsie panutiyeiwe? ¿Kemɨ'ane tukieya muyepatsieta pautahawe?
PSA 24:4 Kemɨ'ane 'aixɨa mɨtiyuriene meta yu'iyaritsie mɨ'itiya, kemɨ'ane kakaɨyarixi tixaɨtɨ memɨkateyunaki'erie mɨkawarayexeiya meta mɨkatiyɨhɨritɨa ti'itawatɨ.
PSA 24:5 Kemɨ'ane mɨpaɨ mɨ'ane Yawé 'aixɨa kaniyurieka, Kakaɨyari 'iwikweitsitɨwame hetsiena mieme heitseriemekɨ yakatiniyuriemɨkɨ.
PSA 24:6 Mɨpaɨ kani'aneni nuiwari kemɨ'ane mɨmetsi'ayexeiya, kemɨ'ane memɨmetsikuwaɨtɨwe, Kakuwu Kakaɨyarieya.
PSA 24:7 Kitenie xekeneyuyepiexɨa, 'itupari meripaitɨ xemumiemete xekeneyuyepiexɨa, Ti'aitame witsimɨ'ane kaneutahamɨkɨ.
PSA 24:8 ¿Kemɨ'ane mɨkɨ Ti'aitame witsimɨ'ane pɨhɨkɨ? Yawé, mɨtɨrɨkaɨye meta mɨrayu'iwa, Yawé, kwinimieme mɨreuyutamiewe.
PSA 24:9 Kitenie xeketeneuyepiexɨa, 'itupari meripaitɨ xemumiemete xekeneyuyepiexɨa, Ti'aitame witsimɨ'ane kaneutahamɨkɨ.
PSA 24:10 ¿Kemɨ'ane mɨkɨ Ti'aitame witsimɨ'ane pɨhɨkɨ? Yawé Naimekɨmɨtɨrɨkaɨye kanihɨkɨtɨni, mɨkɨ Ti'aitame witsimɨ'ane kanihɨkɨtɨni.
PSA 25:1 Rawiri nɨawarieya. 'Ekɨ, Yawé, ne'iyari nepɨmetsiyetuirie,
PSA 25:2 nekakaɨyari, 'ahetsie yuri nepɨti'erie, pepɨkanetsipitɨaka nemɨnanaimariekakɨ, memɨnetsi'aye'unie pepɨkawapitɨaka memɨnetsiyuriyanikɨ.
PSA 25:3 Kemɨ'ane 'ahetsɨa mɨreutakwewie hatsuaku pɨkatiyutewinɨani, kemɨ'ane hipame memuwakwamana mɨkɨ mepuyutitetewiya.
PSA 25:4 Yawé, 'ahuye nemaikame kenenayeitɨa, 'ahuye kemɨreuyune keneneuxeitsitɨa.
PSA 25:5 Yuri pemainekɨ keneneuwitɨximeni meta peneti'ɨkitɨatɨ. 'Ekɨ nekakaɨyari pepɨhɨkɨ meta netsiwikweitsitɨwame, tukarikɨ 'ahetsie timieme nepɨtitakwewie.
PSA 25:6 Yawé, kenaye'eri kewitsipemɨtiuka'iyari, waɨkawa kepemɨti'akanaki'erie, yuheyemekɨ kepemɨnetixeitsitɨa,
PSA 25:7 'axakenemɨtiuyuri kenatɨmaiya 'aitsika nemeutitsanaxɨakɨ temaikɨyari. Kenenaye'eri kepemɨti'akanaki'eriekɨ, 'ekɨ Yawé 'aixɨa pemɨtiuka'iyarikɨ.
PSA 25:8 Yawé 'aixɨa pɨtiuka'iyari meta kemɨtiheitseriekɨ pɨtiyuriene, 'Ayumieme 'axateyuruwamete huye pɨwaxeitsitɨa.
PSA 25:9 Mɨkɨ tixaɨtɨ memɨkate'ayuyeitɨa 'aixɨa 'anemekɨ kaniwaruwitɨximeni, meta yuhuye kaniwa'ɨkitɨaka.
PSA 25:10 Naitɨ Yawé huyeya kaninaki'eriyatɨni meta kaniyuritɨni, kemɨ'ane 'aitsika memaye'atɨwa meta tɨratuya.
PSA 25:11 'Aixɨa pemɨtikɨhɨawarɨwanikɨ Yawé, Kenetineuyehɨwiri waɨkawa 'axakenemɨtiuyurikɨ.
PSA 25:12 ¿Kemɨ'ane tewi Yawé payemakaxe? Mɨkɨ huyeta 'aixɨa 'anemekɨ kaniyewitɨkiemɨkɨ.
PSA 25:13 'Aixɨa 'anemekɨ kaniuyeikamɨkɨ, wanuiwarimata kwie mekaniyetuiriyariekuni.
PSA 25:14 Yawé puwanaki'erie kemɨ'ane memeyexeiya, meta yutɨratu kaniwahekɨatsitɨiyani.
PSA 25:15 Ne Yawé xeikɨa nepayexeiya, mɨkɨ xeikɨa winiyaritsie mɨnetsi'uxɨna mɨyɨwekɨ.
PSA 25:16 Nehepa kenatanieri keneneuxeiya, kenenenenimayaka nexaɨtame nepuyeika, 'uximatɨarika nehexeiyatɨ.
PSA 25:17 Ne'iyaritsie 'uximatɨarika puyumɨiriya, mɨyanemɨtiuka'eniwakɨ keneneɨxɨna.
PSA 25:18 Ne'uximatɨarika keneuxeiya meta kenemɨ'uximaya, 'axakenemɨtiuyuri naime kenanuyeitɨa.
PSA 25:19 Neuxei memɨnetsi'aye'unie mepuyuwaɨkawari, 'uxiwe'erika mepexeiya nehetsie 'axamenetsiyurikutɨ.
PSA 25:20 Kenene'ɨwiyani nemɨkakumemieriwanikɨ, keneneutawikweitsitɨa, pepɨkanetsipitɨaka nemɨtinetewinɨakakɨ, 'ahetsɨa nekaniyu'awietani.
PSA 25:21 Nehetsie nunuwame kenehɨkɨtɨni, 'aixɨa nemɨtiuka'iyarikɨ meta heitserie nemuyeikakɨ, 'ahepaɨtsita nemeuta'ikwewakɨ.
PSA 25:22 Kakaɨyari, 'ixaheritsixi keniwarɨxɨna naimekɨ kememɨte'uka'eniwakɨ.
PSA 26:1 Rawiri nɨawarieya. Yawé, heitseriemekɨ ketineuyuri nehetsiemieme, ne 'aixɨa nepɨtiuyeika, Yawé, 'ahetsie nepɨtiwiya nekahekawaɨtsetɨ.
PSA 26:2 Yawé, keneneutixeiyaxɨa keneneuta'inɨata, netaɨta keneneu'iti meta ne'iyaritsie.
PSA 26:3 Waɨkawamekɨ kepemɨtiyukanaki'erie yanepɨre'eriwa, meta yuri pemainetsie xeikɨa nepuyeika.
PSA 26:4 Ne memɨte'itawa nepɨkawatemawie, meta kwamanarikakɨ memɨtekuxata wahamatɨa nepɨka'uyeika,
PSA 26:5 'axamemɨte'u'iyari wahamatɨa nemuyeikani nepɨxani'erie, 'aixɨa memɨkate'u'iyari wahamatɨa nepɨkayuxewi.
PSA 26:6 Neheu'itiyatɨkaitɨ meta nehetsie karahɨiwakaku, Yawé, 'amawari taiyame warita nepayeika,
PSA 26:7 karima 'anɨawari ne'utakwitɨ, meta naime mamariwawemekɨ kepemɨtiyuriene.
PSA 26:8 Yawé, ne 'atuki waɨkawa nepɨnaki'erie, hakewa mematsiɨkɨ witsikepemɨ'anekɨ.
PSA 26:9 Kepauka nemɨmɨni, 'axateyuruwamete meta teyumiekate wahamatɨa pepɨkanetsi'inɨatani,
PSA 26:10 teɨteri tumini memumana 'itarikakɨ me'e'iwaka wahamatɨa.
PSA 26:11 Ne matsi 'aixɨa nepɨtiuyeika nehetsie pɨkarahɨiwa, keneneɨxɨna kenenenenimayaka.
PSA 26:12 'Ena kwiepa 'anepuwe, meta yumɨiretɨ meyuxeɨriekaku Yawé hetsiemieme 'aixɨa nekanitayɨmɨkɨ.
PSA 27:1 Rawiri nɨawarieya. Yawé nehekɨariwiwame kanihɨkɨtɨni meta netsiwikweitsitɨwame, ¿kemɨ'ane nepumakaxeni? Yawé netukari mɨ'ɨwiya kanihɨkɨtɨni, ¿kemɨ'ane 'aku pɨnetsi'utimariutawe?
PSA 27:2 Kepauka 'axateyuruwamete nehepa memahu menetsika'unake, kepauka memɨnetsi'aye'unie neneɨkixiwima memɨnetsimietɨwe, mɨkɨ pɨta mekanetiwitseweni mekanekaxɨrɨweni.
PSA 27:3 Tsepa kuyaxi memɨnetsi'anutina, ne'iyari pɨkatimani, tsepa nehetsiemieme kuyaxa matɨa, nematsi nepɨrawiyani.
PSA 27:4 Xeime xeikɨa Yawé nepɨtiwawirie, ne mɨkɨ xeikɨa nepuweiya: Yawé kiita nemayekanikɨ naime tukarikɨ kenemɨreutere ne'ayeyuritɨ nemixeiyanikɨ witsikemɨ'ane Yawé meta tukitana nemɨhekwariyarienikɨ.
PSA 27:5 Metsɨ kepauka 'uximatɨarika tukariyari maye'ani mɨkɨ kaneni'awietakamɨkɨ yukiita, tukieya nehetsie kaninuakamɨkɨ, 'ateewa kanenakakemɨkɨ, 'ai heima paitɨ.
PSA 27:6 Nerayu'iwame kanenayeitɨamɨkɨ memɨnetsi'aye'unie ne'aurie memahane wahɨxie, tukitana kwikari nekanitimawiriemɨkɨ meta nɨawari Yawé hetsiemieme nekanitikwikamɨkɨ.
PSA 27:7 Nehiwari keneu'eni, Yawé, kepauka nemetsihahɨawe, keneneutinenimayata keneneuta'eiya.
PSA 27:8 Ne'iyari mɨpaɨ kanetinahɨaweni: «Nierikaya keneutiwawa». Neta, Yawé, 'anierika nekaniwauneni.
PSA 27:9 Pepɨkayu'awietaneni nehetsiemieme, 'ikɨ ti'a'uximayatsiriwame pepɨkahehɨpani pe'ihekatɨ, 'ekɨ netsiparewiwame pekanihɨkɨtɨni, nexaɨtame pepɨkanetsikuhayeikawani meta pepɨkanetsi'uku'e'eiriwani, Kakaɨyari netsiwikweitsitɨwame.
PSA 27:10 Tsepanetɨ nepaapa meta nemaama memɨnete'uku'eiri, Yawé pɨnetsitituni.
PSA 27:11 Yawé, 'ahuyeta keneneuwitɨximeni, huye mɨheitserie 'utɨma keneneuwitɨximeni, hipatɨ memɨnetsihupiekɨ.
PSA 27:12 Pepɨkanetsiyetuayani memɨnetsi'aye'unie nehetsie memɨye'axɨanikɨ, nehepaɨtsita menetsi'itatɨ mekananuku'uni menetsinanaimakutɨ xeikɨa mekanenanutate'ani.
PSA 27:13 Perutsɨ xeimekɨ yanepɨtimate: Yawé naki'eriyaya 'akuxi nepɨxeiyani 'ena kwiepa memu'uwa wahamatɨa.
PSA 27:14 Yawé kenetakwewieka, kene'awaɨriyani, tɨrɨkariya kenexeiyani, Yawé kenetakwewieka.
PSA 28:1 Rawiri nɨawarieya. Yawé, ne nepɨmatsihahɨawe, 'ekɨ nehetsie nunuwame pepɨhɨkɨ, pemɨka'enani hepaɨ pepɨkayɨaneni, xɨka pekanetsi'uta'eiya, kanihekɨaka nekanimɨmɨkɨ.
PSA 28:2 Nehiwari kenanu'eni kepauka 'ahetsɨa nemɨye'axetsie parewiya neheuyehɨatɨ, kepauka Waɨkawa Muyepatsietsie nemamate nemeutatsetseratsie.
PSA 28:3 Pepɨkanetsihehanani 'axamemɨte'u'iyari wahamatɨa, 'axateyuruwamete wahamatɨa, 'aixɨa memutekuxata yuhepaɨ teɨteri wahamatɨa, peru yu'iyaritsie 'axamɨti'ane metexeɨrietɨ.
PSA 28:4 Yaketiniwarupitɨa kememɨte'uyuri, 'axakememɨteyuriekaikɨ. Kememɨte'u'uximayataxɨ mɨpaɨ ketiniwarupitɨa, tita mɨtiwahetsiemieme.
PSA 28:5 Yawé, kemɨtiuyuri mɨpaɨ memɨkateku'eriwakɨ, meta tita mɨtiutawewi yutɨrɨkariyakɨ memɨkatematekɨ, mɨkɨ kaniwaka'unamɨkɨ, tawarita hatsuaku pɨkawaranuku'uitɨani.
PSA 28:6 Yawé witsiketikuxaxatsiwani, nehiwari mu'enikɨ waɨkawa ne'iwawiriekaku.
PSA 28:7 Yawé netɨrɨkariya kanihɨkɨtɨni meta nehetsie nunuwame, ne'iyari hetsiena katiniwiyani, mɨkɨ kaneniparewieka. Ne'iyari kaniutitsukwakani temawierikakɨ, ne'utakwitɨ pamɨpariyutsi nekanipitɨamɨkɨ.
PSA 28:8 Yawé yuteɨterima muwatɨrɨkariya kanihɨkɨtɨni, meta kemɨ'ane pemenayexei pekaniwikweitsitɨaka.
PSA 28:9 'Ateɨterima keniwarutawikweitsitɨa, 'aixɨa keniwayurieka 'ahetsɨa miemete, keniwaruwitɨximeni yuheyemekɨ muxatsi wahɨweme hepaɨ.
PSA 29:1 Rawiri nɨawarieya. 'Aixɨa xeketenahɨaweni Yawé, muyuawitsie xemɨte'i'uximayatsirie, 'aixɨa xeketenahɨaweni Yawé witsikemɨ'ane, kemɨtitɨrɨkaɨye.
PSA 29:2 'Aixɨa xeketenahɨaweni Yawé witsikemɨ'ane mɨkɨ xeikɨa 'aixɨa mɨtikɨhɨawaruwanikɨ, Yawé hɨxie xekenekahɨxima'uti tukitana mariweme xe'ayeitɨatɨ.
PSA 29:3 Yawé hiwarieya haa heima kaniuyeikani, Kakaɨyari witsimɨ'ane tɨranarieya kanayuaneni, Yawé, haa heima waɨkawa 'uyuanekaku kaniuyeikani.
PSA 29:4 Yawé hiwarieya kanayuaneni tɨrɨkaɨyetɨ, Yawé hiwarieya kanayuaneni mariwetɨ.
PSA 29:5 Yawé hiwarieya kariuxa kanititarani, Yawé kariuxa Riwanu mieme kanititarani,
PSA 29:6 Riwanu hɨriyari tsikeru hepaɨ katiniutsunatsitɨwani, Heximuni hɨriyari tuuru mɨkamaxiu hepaɨ katiniutsunatsitɨwani.
PSA 29:7 Yawé hiwarieya tai kanitanenetsitɨwani,
PSA 29:8 Yawé hiwarieya makumawe kaniutayuitɨwani, Yawé makumawetsie Karetsi kaniutayuitɨwani.
PSA 29:9 Yawé hiwarieya tuaxa kanitikatseni meta hɨri metsekame kanikuhayeikawani, tukitana yunaitɨ mɨpaɨ mekateniuhiwani: «'Aixɨa kani'aneni».
PSA 29:10 Yawé, wiyeritsie yu'uweni kanexeiyani, Yawé yuheyemekɨ katini'aitani.
PSA 29:11 Yawé yuteɨterima tɨrɨkariya kaniwapitɨaka, Yawé yuteɨterima 'aixɨa kaniwayurieka kayuwatɨ wapitɨatɨ.
PSA 30:1 Kwikari yukie mieme. Rawiri nɨawarieya. Yawé, 'aixɨa nepaineni 'ahetsiemieme, pemɨnetsi'anukuketɨakɨ, memɨnetsi'aye'unie pemɨkawarupitɨakɨ memɨnetsi'atsenikɨ.
PSA 30:2 Yawé nekakaɨyari, parewiya nemetsi'utawawiri 'ekɨta 'aixɨa nereu'eriekame pepɨnetsi'ayeitɨa.
PSA 30:3 Yawé, 'ekɨ teukiyapa pepɨnetsihatiha, tawarita pepɨnetsi'anutanieritɨa mɨkite watsata.
PSA 30:4 Yawé xekenenɨawani, xeme 'aixɨa xemɨte'u'uwa hetsiena mieme, kemɨtipatsie xekenenɨawani.
PSA 30:5 Haxɨaya 'etsiwa xeikɨa katineutetereni, peru yuhemekɨ pɨtiuyukanaki'erie. Xɨka tɨkarikɨ tsuari xuaweni, ximerita temawierika puxuaweni.
PSA 30:6 Kepauka 'aixɨa nemɨtinemaikai, mɨpaɨ neniutayɨni: «Hatsuaku nepɨkahatihɨiyani».
PSA 30:7 Yawé, 'ekɨ 'aixɨa pemɨtiuka'iyarikɨ, 'ateewa paitɨ pepɨnetsi'uti'awietaxɨ, hikɨta pepuyuti'awietaxɨ, neta nehɨxiyatɨ nepuyuhayewaxɨ.
PSA 30:8 Yawé, 'aixɨa pemɨtiuka'iyari, 'ekɨ nemetsihahiwiwa, 'ekɨ yemekɨ waɨkawa nemetsiwawirie.
PSA 30:9 ¿Tita pera'iwa xɨka ne ne'umɨni, ne xɨka ne'ukateukieni? ¿Kamɨtsɨ tumuanari metitanɨawa, yatɨni 'aniuki yuri maine tikuxataneni?
PSA 30:10 Neuxei, Yawé, kenenenenimayaka, 'Ekɨ kenehɨkɨtɨni netsiparewiwame, Yawé.
PSA 30:11 Nehiwerika matsi neiya pepayeitɨa, hiwerika kamixayari pepɨnetsi'anutihɨniri, 'ixɨararipa miemekɨ pepɨnetsi'utikemaritɨa,
PSA 30:12 nemetsitanɨawakɨ, 'ahetsiemieme 'aixɨa nemainenikɨ, ne kayuwatɨ nemɨka'umakakɨ. Yawé nekakaɨyari, ne yuheyemekɨ pamɨpariyutsi nepɨmatsipitɨaka.
PSA 31:1 Teyuitɨwamete wa'ukiyari. Rawiri nɨawarieya. Yawé, 'ahetsɨa nepiwaune yu'awiwietame, pepɨkanetsipitɨaka nemɨtiyutewinɨakakɨ, heitserie pemexeiyakɨ, keneneuxɨna.
PSA 31:2 Kwi yemekɨ keneneu'eni, yapauka penetsiparewienike kene'axeni. 'Ekɨ neterɨ 'amuyeyewa kenehɨkɨtɨni, netɨrɨkariya netsiwikweitsitɨwame kenehɨkɨtɨni.
PSA 31:3 Keneneuwitɨximeni, 'ekɨtsɨ nehetsie nunuwame pekanihɨkɨtɨni meta pemɨnetsikurarutɨiya, keneneuwitɨximeni mɨkɨkɨ 'ahepaɨtsita 'aixɨa mɨraniuwanikɨ.
PSA 31:4 Keneneɨxɨna memɨnetsi'aye'unie mepɨnetsi'uwiniyaxɨ, 'ekɨ nehetsie nunuwame pemɨhɨkɨkɨ.
PSA 31:5 'Amamatsie ne'iyari nepɨyetua, Yawé, keneneutawikweitsitɨa, yuri Kakaɨyari.
PSA 31:6 Nepɨwaxani'erie kakaɨyarixi memɨwarayexeiya, ne 'aku, 'ahetsie nepɨtiwiya, Yawé.
PSA 31:7 Nepɨnetemawie yemekɨ 'anaki'eriyatsie, 'ekɨ ne'uximatɨarika pemuxeikɨ meta ne'iyari 'uximatɨarikaya pemɨmatekɨ.
PSA 31:8 Pepɨkanetsiyetua mɨnetsi'aye'unie hetsɨa, matsi pɨta xaɨtsie pepɨnetsi'atɨa 'a'akuyeukaku.
PSA 31:9 Yawé, kenenenenimayaka, nepɨ'uximatɨarie, nehɨxite pɨtixɨxime kukuiniyakɨ, meta ne'iyari, metatsiere newaiyari.
PSA 31:10 Tukarikɨ yanepɨtiuka'eniwa, wiiyari panuyekɨka tsuarikɨ xeikɨa, nutuixiya netɨrɨkariya pɨtixɨtɨaxime, ne'umeyari pɨtiweranaxime.
PSA 31:11 Memɨnetsi'aye'unie wahetsiemieme mɨyane'anekaku, 'atsieriwame nekanihɨkɨtɨni ne'aurie memutetɨka wahetsiemieme, Nehamikuma mekanenimakaka, kepauka kiekaritsie nemɨyeyeika mekanitananautsani.
PSA 31:12 Mekanenatɨmaiya, nemumɨni hepaɨ, xari mutatarixɨ hepaɨ nekani'aneni.
PSA 31:13 Yuwaɨkawatɨ 'axamekatenikuxatani nehetsiemieme: «Nekanimaka naitsarie». 'Axeikɨa metiyaxeka kememɨnetemienikɨ mekateniutaxata, mekanenimiekuni mekaniutiyuaneni.
PSA 31:14 Yawé, netsietɨ 'ahetsie nekatiniwiyani, mɨpaɨ nekaniutaineni: «'Ekɨ pepɨnekakaɨyari».
PSA 31:15 Naitɨ netukari 'ahetsie katini'aneni, memɨnetsi'aye'unie meta memɨnetsi'uweiya wahetsɨa keneneuxɨna.
PSA 31:16 Meti'uximayatsiriwame hetsie keyuhekɨare ke'aixɨa pemɨtiuka'iyari, waɨkawa pemɨtiuyukanaki'eriekɨ, keneneutawikweitsitɨa.
PSA 31:17 Yawé, pepɨkawapitɨaka memɨnetsitewinɨanikɨ, 'ekɨ nemetsihahiwiwakɨ pemɨnetsiparewienikɨ. Mɨkɨ pɨta mekete'uyutewinɨani 'axateyuruwamete, teukiyapa keniwareukaxɨri.
PSA 31:18 Memɨte'itawa wateni kayuwatɨ keneupitɨa, 'aixɨa memɨte'u'iyari wahepaɨtsita memeuniukakɨ meyutemamawietɨ, 'axame'utiyuatɨ.
PSA 31:19 Pɨmariwe ke'aixɨa pemɨtiuka'iyari, witsipepɨtiwaxeiya kemɨ'ane memɨmatsi'ayemakaxe, teɨteri wahɨxie 'aixɨa pepɨwayurie kemɨ'ane 'ahetsɨa memuyu'awieta.
PSA 31:20 'Ahɨxie me'u'uwakaku pepɨwa'ɨwiya teɨteri 'axamemɨwayuriekɨ, 'Akiita pe'ayekaitɨ pepɨwa'ɨwiya 'axamemutiyuane wahepaɨtsita.
PSA 31:21 'Aixɨa ke'itɨarieka Yawé, nehetsiemieme yunaki'eriya mɨmariwe mɨyetuakɨ kepauka kiekari 'anutinamiekaku nemuyeikakaitsie.
PSA 31:22 Kepauka nemɨhɨxiyakaitsie mɨpaɨ neputayɨ: «'Ari 'ahɨxie ne'uyeikatɨ nepɨwayehɨiya». Peru pepɨnetsi'u'eni 'ekɨ kenemetiwawiriekai kepauka parewiya nemetsi'utawawiri.
PSA 31:23 Yawé xekenenaki'erieka, yunaitɨ xemei'enie, mɨkɨ kaniwa'ɨwiyani kemɨ'ane 'aixɨa mɨtiwamate, kemɨ'aneta memuyuti'ɨre tita mɨtiwahetsiemieme yakatiniwarakapitɨwani.
PSA 31:24 Xekeneyuwaɨriyani, xekeneyukuha'aritɨa xemɨyɨwawenikɨ, yunaitɨ kemɨ'ane Yawé hetsiemieme xemɨtetakwewie.
PSA 32:1 Rawiri nɨawarieya. Wa'ɨkitsika. Keyutemawieka kemɨ'ane 'inɨari niukiyari heutitsanaxɨaka mɨreuyehɨwiyarie, kemɨ'ane 'axatiuyurieka mu'itiya.
PSA 32:2 Keyutemawieka 'iya kemɨ'ane Yawé 'atsimɨkarehɨawe kename 'axatiyuriene meta 'iyarieyatsie kwamanarika mumawe.
PSA 32:3 Kepauka kayuwatɨ nemɨtiuya, ne'umeyari kaniutixɨni nemutatsuakakaikɨ tukarikɨ.
PSA 32:4 Waɨkawa nekaheutɨrɨkaɨyetɨ nekanayani taxarita xɨrikɨ ketemɨtetiweranare hepaɨ, tukarikɨ tɨkarikɨ pemɨnetikwinitɨakaikɨ.
PSA 32:5 Peru nekaniuyutahekɨata 'ahɨxie ke'axanemɨtiuyuri, ke'axanemɨtiuyuri nepɨkamatiuti'awitsiri. Mɨpaɨ nekatiniuyuhɨawe: «Nepitaxatɨani Yawé ke'axanemɨtiuyuri», 'ekɨta pekanetineuyehɨwirieni naime ke'axanemɨtiuyuri.
PSA 32:6 'Ayumieme 'ahetsiemieme 'aixɨa memɨteyurie mepɨmatsihahɨawe, kepauka memu'uximatɨarie, tsepa haa 'amuparixɨ mɨkɨ wahetsɨa pɨkaheuti'ani.
PSA 32:7 'Ekɨ nehetsie nunuwame pepɨhɨkɨ, 'ekɨ netsi'ɨwiyame pepɨhɨkɨ kepauka nemɨyekweriwa'itɨariene, 'ana kwikari pekanenipitɨamɨkɨ kenemɨrayu'iwaxɨ hetsiemieme.
PSA 32:8 Yawé mɨpaɨ kanaineni: «Ne petimaikame nekamenayeitɨamɨkɨ, huye ke'aneme pemuweiyani ne nekamenixeiyatsitɨamɨkɨ, ne nekamenita'ɨxatsitɨamɨkɨ, meta nekamenita'ɨwiyamɨkɨ.
PSA 32:9 Muratsixi meta kawayutsixi wahepaɨ pepɨka'aneni, memɨkatemaiwawe, kepauka pemimaxiutatsie pirenuya 'utakekame xeikɨa kaniyɨweni, 'ahurawa pemehanakɨ».
PSA 32:10 'Axateyuruwamete wa'uximatɨarika tiwaɨkawatɨ pɨtiwatakwewie, peru Yawé hetsie memɨtewiya pɨwaranukanama yunaki'eriyakɨ.
PSA 32:11 Xekeneyutemamawieka xeme xehetsie mɨkarahɨiwa, xekeneyutemamawieka Yawé hetsie, xekeneutikwikani xeme xeyunaitɨ xe'iyari mɨ'itiyatɨka.
PSA 33:1 Yawé xekenenɨawani yutemawierima xeme xehetsie mɨkarahɨiwa, 'aixɨa memɨtekahu kaniwahetsiemiemetɨni Yawé hetsiemieme memutikwikanikɨ.
PSA 33:2 Yawé xekenenɨawani kanari hayuanekaku, xekeneutikwikani xaweri hayuanekaku.
PSA 33:3 Kwikari hekwame hɨxiena xekeneutakwika, xeketeneyuitɨaka xeyutemamawietɨ, meta temawierika hiwariyari xekenewewieka.
PSA 33:4 Yawé niukieya kaniheitserieka 'aixɨa katini'aneneni naime tita mɨtiutiwewi.
PSA 33:5 Yawé 'aixɨa mɨti'ane meta mɨtiheitserie katininaki'erieka, naki'eriyaya kwiepa kanakɨnɨka.
PSA 33:6 Yawé niukieyakɨ muyuawi kaniuneni, 'iiyayakɨ xurawetsixi mekaniutixuawere.
PSA 33:7 Mɨkɨ haramaratsie haa panatihanɨwe xarita, meta xariteta haramara 'ameukatewa kanikuxexeɨriwani.
PSA 33:8 Yunaitɨ kwiepa xemɨtama Yawé xekenayemakaka, yunaitɨ teɨteri mana kiekatari xekenayexeiyani,
PSA 33:9 mɨkɨ 'utaniuku, naitɨ pɨtiune, mɨkɨ tiuta'aitaku, naitɨ 'aixɨa pɨtiuyɨ.
PSA 33:10 Nuiwarite kwiepa memɨtama kememɨteyuriku Yawé pɨkawapitɨa memeye'atɨanikɨ, ke'axamemɨteyuriku teɨteri pɨkawapitɨa.
PSA 33:11 Peru Yawé kemɨtiyurimɨkɨ, yapɨtikɨyɨne yuheyemekɨ, kemɨtiku'eriwa peye'atɨwa.
PSA 33:12 'Iya nuiwari keyutemawieka Kakaɨyarieya Yawé mɨhɨkɨkɨ, yuteɨterima mɨwaranayexei hetsiena mieme memɨhɨkɨtɨnikɨ.
PSA 33:13 Yawé muyuawitsie paitɨ pɨtaniere, pɨwaxeiya yunaime teɨteri,
PSA 33:14 mɨkɨ pɨwataxeiya yu'uwenitsie paitɨ 'akaitɨ, yunaime teɨteri kwiepa memɨtama.
PSA 33:15 Mɨkɨ pɨhɨkɨ yunaime 'iyari mɨwarutiwewiri, kememɨteyurie naime pɨtimate.
PSA 33:16 Ti'aitame pɨkayutawikweitsitɨwa tsepanetɨ kuyaxi yuwaɨkawame mɨwarexeiya, meta tiyumemiwame kwinimieme mɨtiyɨwe waɨkawa mɨtɨrɨkaɨyekɨ pɨkatawikweni.
PSA 33:17 Tixaɨtɨ pɨkatihɨkɨ kawayutsixi wahetsie teyukwitɨwetɨ temɨte'ayu'iwakɨ, tsepa waɨkawa mɨtɨrɨkaɨye pɨkatiyuwikweitsitɨwa.
PSA 33:18 Matsi Yawé pɨwa'ɨwiya memeyemakaxe, naki'eriyayatsie memɨtewiya,
PSA 33:19 kepauka memɨkwi'iwarɨmeni wahetsie kaninuaka, kepauka haakaxa mayeikatsie, pɨkawapitɨa memɨkwinikɨ.
PSA 33:20 Yemekɨ 'aixɨa 'iyari Yawé hetsie tetewiyatɨ tepɨtetakwewie, mɨkɨ tatsiparewiwame pɨhɨkɨ meta tahetsie nunuwame.
PSA 33:21 Ta'iyari puyutemawie hetsiena mieme, mɨpatsietsie temɨtewiyakɨ.
PSA 33:22 Yawé, 'anaki'eriya mɨmariwe, tahamatɨa yaketiuyeikani, yemekɨ ketemɨte'itakwewie 'ahetsiemieme.
PSA 34:1 Rawiri nɨawarieya, kepauka mɨtiu'ita mɨka'uka'iyarini hepaɨ 'anetɨ hayuyeitɨaka 'Awimereki hɨxie, wayehɨiyaka kemɨretɨa. Yawé hepaɨtsita 'aixɨa neputaineni yuheyemekɨ, netenikɨ yanepɨtinɨawani.
PSA 34:2 Ne'iyari Yawé pɨnɨawa, nitixaɨtɨ memɨkate'ayuyeitɨa me'enaname meyutemawietɨ mepakɨne.
PSA 34:3 Mariweme Yawé xekenayeitɨwani nehamatɨa, teyuxewitɨ tepinɨawani kemɨtimariwe.
PSA 34:4 Yawé nekaniutiwauni, mɨkɨta pɨnetsi'uta'ei, waɨkawa nemakaku naime pɨnetiunawairi.
PSA 34:5 Yunaitɨ memehɨawe mekaniyutemamawieka mehekɨariwietɨ, hatsuaku me'ayukatewiwiyatɨ mepɨkahakɨka.
PSA 34:6 Ne tixaɨtɨ nekatihɨkɨtɨtɨ Yawé nekaniutahɨawe, mɨkɨ kaneniu'enieni, kaneniɨxɨna naime kenemɨtiuka'eniwakai.
PSA 34:7 Yawé niuki tuayameya tihɨweme kaneyenɨ'awani memeyexeiya mɨwa'ɨwiyanikɨ, wa'aurie kaniuyeikani waparewienike.
PSA 34:8 Xeketeneuta'inɨata, xeketenetimati Yawé 'aixɨa kemɨtiuka'iyari, xekeneyutemamawieka kemɨ'ane hetsiena xemuyu'awieta.
PSA 34:9 Yawé xekenemakaka, xeme hetsɨana miemete xemɨpatsie, neuxei yunaitɨ memeyemakaxe tixaɨtɨ pɨkatiwareuyehɨwa.
PSA 34:10 Mayetsi tɨɨrixi mepɨtiweranare meta mepeuhaakakwiku, peru kemɨ'ane Yawé memukuwautɨwe tixaɨtɨ pɨkatiwareuyehɨwa.
PSA 34:11 Xekenakɨni tɨɨri, xekeneneu'eni, Yawé kehepaɨ mɨrayemakaxenikɨ nepɨtixeta'ɨkitɨani.
PSA 34:12 Kemɨ'ane tukari meuyehuwa, kemɨ'ane tukari witsi'anemetsie meuyeimɨkɨ,
PSA 34:13 yuneni ke'upirenutɨani 'axamɨti'ane mɨkatikuxatanikɨ meta yutenietsie ke'uwiere 'itarika mɨkatikuxatanikɨ,
PSA 34:14 'axatiyurienetɨ ketiuhayewa, 'aixɨa pɨta ketiyurieneni, kayuwatɨ muyeikanikɨ keyumexɨitɨaka, mɨpaɨ xeikɨa ketiuyeikani.
PSA 34:15 Yawé 'aixɨa memɨteyurie kaniwaxeiyani, wanenewieri yapauka kani'enieka,
PSA 34:16 'axamemɨteyurie Yawé pɨwaraye'unie, kwiepa mɨwarakuyeitɨanikɨ.
PSA 34:17 Wahetsie mɨkarahɨiwa Yawé mekanahɨaweni, mɨkɨta kaniwa'enieka, kememɨte'uximatɨarie naimekɨ kaniwaparewieka.
PSA 34:18 Kemɨ'ane yu'iyaritsie memɨte'uka'eniwa Yawé wa'aurie 'ahurawa kaniutiweni, kemɨ'ane yu'iyaritsie memuyutsaipɨna kaniwarutawikweitsitɨwani.
PSA 34:19 Hetsiena mɨkarahɨiwa 'uximatɨarikaya pɨmɨire, Yawé matsi naimekɨ kaniwaparewieka,
PSA 34:20 'umeteya naime pɨ'ɨwiya, nixeimetɨma pɨka'akamuriyarieni.
PSA 34:21 'Axamɨti'ane 'axateyuruwamete pɨwaka'una, wahetsie mɨkarahɨiwa memɨwaraye'unie mekananutaxɨriyakuni.
PSA 34:22 Yawé te'i'uximayatsiriwamete wahetsie kaninuaka, mepɨka'anutaxɨriyani hetsiena memɨtewiya.
PSA 35:1 Rawiri nɨawarieya. Yawé, nepumieriene, nehetsie keneutanua, keniwarutakuya kemɨ'ane memɨnetsimietɨwe.
PSA 35:2 Tepɨa kamixayari kenanakatɨtɨ meta tepɨa 'amɨyewa kene'akuha'aritɨaka nehetsɨa kenenua pemɨnetsiparewienikɨ.
PSA 35:3 'Apitsika keneutikwe'i meta 'ahatsa, memɨnetsi'uweiya wahɨxie keneukexi. Mɨpaɨ keneutayɨki: «Ne 'awikweitsitɨwame nepɨhɨkɨ».
PSA 35:4 Meke'uhɨxiyani meke'uyutitetewiya kemɨ'ane memɨnetsimieku, meke'ukunuaxɨani meyutetewiyatɨ 'axamemɨnetsiyuriku.
PSA 35:5 'Ɨxa hepaɨ mekehe'enitsitɨarieni, niuki tuayame Yawé hetsɨa mieme wakwinekaku,
PSA 35:6 wahuyeta ke'uyɨwini meta ke'uharuanini, niuki tuayame Yawé hetsɨa mieme waruweiyakaku.
PSA 35:7 Nitixaɨtɨ wahetsiemieme nekarayexeiyakaku memɨnetsi'uwiniyaxɨkɨ, nitixaɨtɨ wahetsiemieme nekarayexeiyakaku nehetsiemieme meputi'inixɨ,
PSA 35:8 haweri me'anenetɨ 'uxa'atɨniwarie meke'akɨne, yuwiniyarita mekeheukaxɨrieni, putsu memitawewita.
PSA 35:9 Mɨpaɨ ne'iyari pɨtiyutemawieka Yawé hetsie, puyutemawieka mutawikweitsitɨariekɨ,
PSA 35:10 'ana mɨpaɨ yemekɨ nepɨtayɨni: «Xewitɨ pumawe 'ahepaɨ 'anetɨ Yawé. 'Ekɨ pepɨwawikweitsitɨa haweri memɨyɨa memɨtɨrɨkawi wahetsɨa, haweri memɨ'anene meta tixaɨtɨ memɨkateheuxeiya pepɨwawikweitsitɨa memɨtewa'uximayatsitɨa wahetsɨa».
PSA 35:11 Mete'itawatɨ menetsitaxanetake mepɨ'axe, menetsita'iwawiyake tita 'atsinemɨkatimatekɨ.
PSA 35:12 Ne newanenimayakaku 'axa'anemekɨ mepɨnete'akapitɨwa, mɨkɨkɨ pɨnetsihekukukuine ne'iyaritsie,
PSA 35:13 metsɨ kepauka mɨkɨ memɨtekukuyeni ne hiwerika kamixayari nepanakatɨkɨkai, nenutuixietɨ nepayeikakai nepɨnetihakiwakai. Ne matsi nepɨnenenewiekai ne pɨta nemɨtikuyenikɨ.
PSA 35:14 Ne hiwerika kamixayari nepanakatɨkɨkai, nehamiku hetsiemieme hepaɨ, yatɨni ne'iwa hetsiemieme hepaɨ. Nenutuixietɨ nepakatutsitakai, nemaama hetsiemieme nemutatsuakani hepaɨ ne'anetɨ.
PSA 35:15 Peru kepauka ne nemekawe, mɨkɨ mepuyukatemamawi, mepuyukuxeɨri nehepaɨtsita metekuxatatɨ. Teɨteri ne nemɨkawamatekai, mekaneniuyeheka nehepaɨtsita meniukixietɨ mekatehayewatɨ mekanakɨne.
PSA 35:16 Waɨkawa mepɨnetsimariutakai, mepɨnetsinanaimakai, nehepaɨtsita yutamete meputixikautekekai.
PSA 35:17 Ti'aitame, ¿kepaukake 'ikɨ 'aixɨa pepɨtiyurieni? Netukari keneutawikweitsitɨa, netukari muyuxewi, mayetsi mepɨnetsitakwaixime.
PSA 35:18 Ne pamɨpariyutsi nepɨmetsipitɨani yumɨireme wahɨxie, yuwaɨkawame wahɨxie nepɨmetsitanɨawa.
PSA 35:19 Pepɨkawapitɨaka memɨnetsiyuriyanikɨ, memɨnetsi'aye'unie meteyukwamanatɨ. Memɨnetsinanaimaka pepɨkawapitɨaka 'atsinekawayurienekaku.
PSA 35:20 'Aixɨa metekuxatatɨ mepɨka'u'uwa, matsi 'itarika mepɨwewie 'ikɨ kwieyaritsie 'aixɨa memɨte'u'uwa wahepaɨtsita.
PSA 35:21 Karima meputinawe, meta mɨpaɨ meputiyuane: «Neuxeitsɨkuta yaranuyetɨa».
PSA 35:22 Yawé, 'ekɨ naime 'ikɨ pepɨtixeiya, matsi pepɨkaranukanaka. Ti'aitame, pepɨkanetsi'uku'e'eiriwani.
PSA 35:23 Kenanutanieri, kenanukukexi nekakaɨyari. Nehetsiemieme 'aixɨa ketineuyuri Ti'aitame, nehetsie keneutanua.
PSA 35:24 Nehetsiemieme 'aixɨa ketineuyuri heitserie kepemɨrexeiya, Yawé nekakaɨyari, memɨnetsinanaimaka pepɨkawapitɨaka.
PSA 35:25 Pepɨkawapitɨaka mɨpaɨ memɨteku'eriwanikɨ: «Mɨpaɨ tepɨteheixeiyakukai». Mɨpaɨta memɨtiyuani pepɨkawapitɨaka: «Tepenukaxɨ yemekɨ 'ayeniereme».
PSA 35:26 Meke'uyutitetewiya meta meke'u'iyɨrieni yunaitɨ kemɨ'ane memuyutemamawie nemekawekɨ, meke'utixani'eriwa mekeheutewiyarieka yunaitɨ kemɨ'ane tixaɨtɨ memɨkanete'erie.
PSA 35:27 Peru meke'utihiwa temawierikakɨ kemɨ'ane memɨnetsiparewie, meta mɨpaɨ yuheyemekɨ meke'utiyuaneni: «Yawé 'aixɨa ketikuxaxatsiwani, 'iparewiwame 'aixɨa mɨtiuyeika minakekɨ».
PSA 35:28 Ne ke'aixɨa pemɨtiuka'iyari nepukuxataneni, tukari mɨyehane 'ahetsiemieme kwikari nepukwikani.
PSA 36:1 Teyuitɨwamete wa'ukiyari. Rawiri kwikarieya, Yawé parewiwameya. 'Axatiyuruwame mɨpaɨ kanaineni: «Kakaɨyari neka'ayexeiyatɨ ne'iyaritsie paitɨ yanepɨ'ane». Kemɨtixeiya Kakaɨyari pɨkamakaxe.
PSA 36:2 Mɨpaɨ pɨtiku'eriwa kename 'aixɨa tiuka'iyari 'axamɨti'ane pɨkaxani'erie.
PSA 36:3 Yakɨ xeikɨa pɨtikuxata pɨtiyukananaima, 'aixɨa mɨti'ane kaneuyehɨani meta 'aixɨa mɨtiyurienenikɨ.
PSA 36:4 Yu'utatsie kakaitɨ 'axamɨtiyurienikɨ xeikɨa pɨtiku'eriwa, 'axamɨ'ane huyeyari pɨkataunie, 'axamɨti'ane pɨkatiku'eiriwe.
PSA 36:5 Yawé, 'anaki'eriya muyuawitsie paitɨ pɨye'axe, kepemɨkatiyupata haitsie paitɨ pɨye'axe.
PSA 36:6 Kemɨtiheitserie 'ahetsɨa mieme hɨri 'amutɨtɨ hepaɨ pɨ'ane, ke'aixɨa pemɨtiyuriene haramara mɨmariwe 'emeukatewa hepaɨ pɨ'ane. Yawé, 'ekɨ pepɨwa'ɨwiya teɨteri meta yeuta memɨte'u'uwa,
PSA 36:7 witsipɨ'ane 'anaki'eriya mɨmariwe, Kakaɨyari. Yunaitɨ teɨteri mepikaxexeiya memuyu'awietanikɨ 'a'anate 'etɨriyayatɨa.
PSA 36:8 'Akie meputihuxarɨwe naitɨ mɨtixuawekɨ, 'ahaa 'aixɨa ma'ane muwanake pepɨwaharitɨa.
PSA 36:9 'Ahetsie tukari mɨtiwiekɨ, 'Ahekɨariyapa te'u'uwatɨ hekɨariya temuxeiya tepɨyɨwawe.
PSA 36:10 Kenewanaki'erieka kemɨ'ane memɨmetsimate, heitserie memexeiya wahetsiemieme 'aixɨa ketineyurieneni.
PSA 36:11 Kwinimieme mɨtiyutamariwekata pɨkanetsitaketsinani, Kakaɨyari mɨka'ayexeiya 'axamɨkanetsiyurienikɨ pepɨka'ipitɨaka.
PSA 36:12 Xekeniwaruxeiya kememɨtehekaxɨrɨwe 'axateyuruwamete: Kepauka memekaxɨrɨwe kwiepa, tawarita memanuku'uni mepɨkayɨwawe.
PSA 37:1 Rawiri nɨawarieya. Pepɨka'a'iyaritɨaka Kakayari memɨka'ayexeiya kememɨteyuriekɨ, meta pepɨkatihiwe'erieka tita memɨtehexeiya heitseriemekɨ yamemɨkatekahu,
PSA 37:2 yapauka mɨtiyɨnarekɨ tupiriya hepaɨ, yapauka mepɨtiwauke 'ɨxa mɨtsitsiɨrawi hepaɨ.
PSA 37:3 'Ekɨ Yawé hetsie ketinewiyani, 'aixɨa ketineyurieneni, kwiepa keneuyeikani meta 'aixɨa ketinekamieni.
PSA 37:4 Yawé 'anaki'eriya keneyetuiri, mɨkɨ pɨmetiyetuirieni tita pemɨreuyehɨwa 'a'iyarikɨ.
PSA 37:5 Yawé 'ahuye kenehɨritɨaka, hetsiena ketinewiyani, mɨkɨta yapɨtiyurieni 'ahetsiemieme.
PSA 37:6 Mɨpaɨ kepauka pemɨtaxanetsieni 'aixɨa mɨti'ane 'ahetsie pɨhekɨariwieximeni, keheitserie pemɨrexeiya pɨhekɨaka tuka hepaɨ.
PSA 37:7 Kayuwatɨ pekaniukixietɨ keneuyeikani Yawé hɨxie, petiuka'eniwatɨ hetsienamieme ketinetakwewieka, Pepɨka'ahɨaweni hipatɨ kememɨte'ukaxexeiya wahetsiemieme, kememɨteku'eriwa 'axamemɨteyurie wahepaɨ.
PSA 37:8 Ketineuhayewa peha'atɨ, keneuku'eiri haxɨa, pepɨka'utaweranareni, mɨkɨ 'axamɨ'anetsie katiniyu'iniwani.
PSA 37:9 Karikɨ Kakaɨyari memɨka'ayexeiya mekanakumaweriyariekuni, matsi kemɨ'ane Yawé hetsiemieme memɨtetakwewie, kwie mekaniyetuiriyariekuni.
PSA 37:10 'Apɨkareutereri 'axateyuruwamete memɨka'u'uwanikɨ, tsepa 'aheyemekɨ pemɨwarutiwau pepɨkawataxeiya.
PSA 37:11 Peru kemɨ'ane kayuwatɨ memu'uwa kwie mekanimikiekuni, yu'iyarikɨ 'aixɨa mekateniu'uwakuni.
PSA 37:12 'Axateyuruwamete 'aixɨa memɨte'u'uwa mepɨwaheka, yutamete mekaniutixikautekeni wahetsiemieme.
PSA 37:13 Matsi Yawé kaniutanaweni 'axateyuruwamete wahetsiemieme, timaitɨ watukari maye'aximekɨ.
PSA 37:14 'Axateyuruwamete yu'ixipara mekanewatihapanani, yutupi mekanahapanani, tixaɨtɨ mɨkarexeiya meta mɨreuyehɨwa memɨwaratixɨrienikɨ, 'aixɨa memɨte'u'uwa memɨwakwinikɨ.
PSA 37:15 Wa'ixiparatɨtɨ wa'iyaritsie kaniuyekemɨkɨ, watupi kanitimurixɨamɨkɨ.
PSA 37:16 'Aixɨa pɨ'ane kemɨ'ane 'aixɨa mɨtiuka'iyari 'etsiwa xeikɨa rexeiyatɨ, keyuri 'axateyuruwamete waɨkawa kememɨtehexeiya,
PSA 37:17 matsi Kakaɨyari memɨka'ayexeiya watɨrɨkariya kaneutiparitɨariemɨkɨ, peru Yawé heitserie memexeiya kaniwaparewimɨkɨ.
PSA 37:18 Yawé 'aixɨa memɨte'u'uwa watukari kani'ɨwiyani, tita memɨteyetuiriyarieni pɨtiwahetsiemiemetɨni yuheyemekɨ.
PSA 37:19 Kepauka 'uximatɨarika tukariyari maye'ani mepɨtekaxeiya, haakaxa tukariyaritsie waɨkawa mepɨtehexeiyani.
PSA 37:20 'Axateyuruwamete, Yawé memaye'unie, mekanikumawerikuni kepauka memeuyehɨiyani. Mekanikumawerikuni tuturi yeuta mieme hepaɨ, kɨtsi kemɨtitaparike mɨpaɨ mekaniyɨkuni.
PSA 37:21 'Axamemɨte'u'iyari mekaniyuniɨrɨweni, peru mepɨkateyutuarita, matsi heitserie memexeiya mepɨteyumikwa 'aixɨa 'anemekɨ.
PSA 37:22 Yawé 'aixɨa mɨwayurie, kwie mekaniyetuiriyariekuni, peru kemɨ'ane mɨkɨ 'axamɨwayurie mekanikumaweriyariekuni.
PSA 37:23 Yawé tewi kaniheitseritɨaka 'aixɨa 'anemekɨ mumienikɨ, kepauka minake kemɨtiuyeikanikɨ,
PSA 37:24 tsepa metiwitsei pɨkahekaweni, Yawé yumamakɨ miwiyakɨ.
PSA 37:25 Ne temaikɨ nepatɨa, hikɨri nepu'ukiratsi, peru hatsuaku heitserie memexeiya haweri mɨraku'ane nepɨkawaxeiyawe, meta waniwema paa hawaikɨ mepɨkahewauka.
PSA 37:26 Yuheyemekɨ meyutemamawietɨ 'aixɨa 'anemekɨ mepɨtewaniɨtɨa, waniwema wahekɨ 'aixɨa mepɨ'itɨarie hipatɨ.
PSA 37:27 'Axapetiyurienetɨ ketineuhayewa, 'aixɨa pɨta ketineyurieneni, 'ana yuheyemekɨ mana pepuyeikani hakewa pemekani.
PSA 37:28 Karikɨ Yawé 'aixɨa mɨti'ane katininaki'erieka, meta pɨkawanutuita kemɨ'ane yu'iyarikɨ meminaki'erie. Yawé kaniwa'ɨwiyakamɨkɨ yuhemekɨ, peru 'axateyuruwamete wanuiwari kaniwarakumaweriyamɨkɨ.
PSA 37:29 Heitserie memexeiya kwie mepɨyetuiriyarieni, yuheyemekɨ mana mepu'uwani.
PSA 37:30 Heitserie mexeiya kemɨtimaiwe pɨtikuxata, niukieya tita mɨtihetserie puweiya.
PSA 37:31 Kakaɨyari 'aitsikaya 'iyarieyatsie kaniyekani, hatsuaku mepɨkahekaxɨrɨwe.
PSA 37:32 'Axamemɨte'u'iyari 'aixɨa memɨte'u'iyari, mekaniwakuhupiwani mewakwikutɨ.
PSA 37:33 Peru Yawé pɨkawapitɨani yamemɨwayurienikɨ, meta yapɨkaretanaki'erieni memanutaxɨriyanitsie.
PSA 37:34 Peru 'ekɨ, Yawé hetsie timieme ketinetakwewieka, meta yaketineuyeikani kemɨtinake, mɨkɨ kamenetemawieritɨamɨkɨ kwie pemɨyetuiriyarienikɨ. Kepauka 'axateyuruwamete memɨka'unarieni, 'ekɨ pekaniwaxeiyamɨkɨ.
PSA 37:35 Ne nepixei 'axatiyuruwame mariweme, kariuxa hepaɨ ranukaime.
PSA 37:36 Matsi kaniukumawere, nemitiwau nepɨka'itaxeiri.
PSA 37:37 Kwi keniwaruxeiyata 'aixɨa memɨtekahu: tukari 'upamie kayuwatɨ memɨkuwautɨwe wahetsiemieme.
PSA 37:38 Peru yunaitɨ 'axateyuruwamete mekanikumaweriyariekuni, tukari 'umamie 'axateyuruwamete wahetsiemieme memeuyehɨiyani tukariyari kanihɨkɨtɨni.
PSA 37:39 Heitserie memexeiya wawikweitsitɨarika Yawé hetsie kanayeneikani, mɨkɨ mɨwatɨrɨkariya kanihɨkɨtɨni kepauka memɨte'uka'eniwatsie.
PSA 37:40 Yawé kaniwaparewieka meta kaniwaxɨnani, 'axateyuruwamete wahetsie kaniwaxɨnani meta kaniwawikweitsitɨaka, mɨkɨ hetsie mekaneuwawaɨreni.
PSA 38:1 Rawiri nɨawarieya, mawari hetsiemieme. Yawé, kepauka pemɨha'a pepɨkanetsi 'utate'ani, peha'atɨ pepɨkanetikwinitɨaka.
PSA 38:2 'A'ɨrɨ nehetsie kaniuye'uniri, nehetsie 'atɨrɨkariya kaniukaweni.
PSA 38:3 Naitɨ newaiyari pɨtikuye pemɨha'akɨ nehepaɨtsita hawaikɨ tɨma newaiyaritsie 'aixɨa nepɨkareu'erie, waɨkawamekɨ 'axanemɨtiuyurikɨ, ne'umete mɨyapɨtiuka'eniwa.
PSA 38:4 Nepɨka'ikemari 'axamɨti'ane, mɨkɨ 'ika kwinimieme pɨrahete.
PSA 38:5 Nemɨka'uka'iyarikɨ nehaiya kaniyepɨnirɨmeni 'axakaniukɨ'ɨareni.
PSA 38:6 Nepu'uxeri, waɨkawamekɨ nepɨnemuina, tukarikɨ nenutuixietɨ nepuyeika.
PSA 38:7 Netaɨta nepɨta'a hɨiyakɨ, naitɨ newaiyaritsie tɨma 'aixɨa nepɨkareu'erie.
PSA 38:8 Nepɨwerani, nemehɨiyani hepaɨ nepɨreu'erie, ne'iyari puta'aiwa tiuka'eniwatɨ.
PSA 38:9 Ti'aitame, nepɨmetsiyetuirie yemekɨ tita nemɨreuyehɨwa, 'ekɨ 'ahepaɨtsita pɨkati'awietɨ.
PSA 38:10 Kwinimieme pɨtiɨtɨrarɨka ne'iyari, nepɨkaheutɨrɨkaɨyeri, 'ari nepɨkaniereri.
PSA 38:11 Nehamikuma meta memɨnetsimate nehaiya mekanimakaxeni, ne'iwama 'ateewa xeikɨa mekaniu'uwani.
PSA 38:12 Winiyari mekaniuwɨwɨtɨwani memɨnetsimieku, kemɨ'ane 'axa'anekɨa memɨnetsihɨaku mepɨkatehayewa yameteku'eriwatɨ, tukarikɨ nehetsiemieme xeikɨa mepɨtekuxata.
PSA 38:13 Peru ne mɨkaheu'ena nepaneyeitɨwa, nepɨkawa'enie, nekaniuweme nepaneyeitɨwa, 'atsinepɨkatiwaku'eiya.
PSA 38:14 Memɨkaheu'enana wahepaɨ nepɨ'ane meta memɨyɨkɨhɨani memɨkayɨwawe wahepaɨ.
PSA 38:15 Yawé, ne nepɨmetsitakwewie, 'ekɨ neti'aitɨwame, nekakaɨyari, 'ekɨ pepɨyɨaneni nehetsiemieme pemɨwata'eiya.
PSA 38:16 Nepɨmetsiwawirie xeikɨa mepɨkanetsinanaimaka, memamariwaweme mepɨka'ayuyeitɨaka kepauka nemekawenitsie.
PSA 38:17 'Ari nekanimɨximeni, kukuiniya pɨkanetsihayewa 'etsiwatɨma.
PSA 38:18 Ke'axanemɨtiuyuri nepɨnetahekɨata, 'axamɨti'ane pɨnetsi'iyarimɨtsitɨa.
PSA 38:19 Mepɨyumɨire 'itarikakɨ memɨnetsi'aye'unie, yamepɨte'ane memɨnetsi'aye'unie nitixaɨtɨ karanierekaku.
PSA 38:20 'Aixɨa nemɨtiyurienekɨ, 'axa'anemekɨ mepɨnete'akapitɨwa, 'aixɨa mɨti'anekɨ xeikɨa nemɨnewaɨriyakɨ, 'ayumieme mepɨnetsi'aye'unie.
PSA 38:21 Yawé, pepɨkanetsi'uku'e'eiriwani, nekakaɨyari, nexaɨtame pepɨkanetsikuhayeikawani.
PSA 38:22 Neti'aitɨwame netsiwikweitsitɨwame, yapauka keneneuparewi.
PSA 39:1 Teyuitɨwamete wa'ukiyari. Kerutuni hetsiemieme. Rawiri nɨawarieya. Ne mɨpaɨ nepɨtiu'eri: «Teɨteri 'axateyuruwamete wahɨxie nemuyeikakɨ nepɨne'ɨwiyani kenemɨtiuyeika, nepɨtinewieka kapa 'axane'utayɨnikɨ, matsi netenie nepuwieka».
PSA 39:2 Hikɨ kayuwatɨ mana nepuyeikakai, nepɨka'utaniu. 'Aixɨa mɨti'ane meta nepɨkatikuxatakai. Matsi ne'uximatɨarika kanitimiekaitɨni,
PSA 39:3 ne'iyari pɨtakai netawitsie. Mɨyanetiku'eriwakaku, matsi tai kaniutani 'ayumieme mɨpaɨ nekaniutayɨni:
PSA 39:4 «Yawé, keneneutaxatɨa 'ena kwiepa netukari kereutere, kepaɨmexɨa xeikɨa nepuyeikani, keneneutaxatɨa netukari ke'emɨkatiteriwe.
PSA 39:5 Netukari pɨkawaɨkawa pemɨnetsi'upitɨa, 'akɨmana, kepaɨmeme wiyari nemuyurieni tixaɨtɨ pɨkatihɨkɨ. Xeihɨtsiyari xeikɨa pɨhɨkɨ tewi mɨmɨwe.
PSA 39:6 Tewi tukarieya 'etɨriya hepaɨ xeikɨa kani'aneni meuyewautse. Yakɨ xeikɨa pɨyɨaneni piinitɨarika xɨka tixeɨrieka, 'atsipɨkatimatsiɨkɨ kemɨ'ane mɨranupiini.
PSA 39:7 »Hikɨta, Ti'aitame, ¿titari netitakwewieka? 'Ahetsietimieme xeikɨa nepɨtitakwewie.
PSA 39:8 'Axanemɨtiuyurikɨ keneneutawikweitsitɨa. Pepɨkawapitɨaka 'atsimemɨkatemate memɨnetsiyuriyanikɨ.
PSA 39:9 »Kayuwatɨ nepuyeika, netenie nepuwie, 'ekɨ pemɨhɨkɨkɨ pɨta mɨyapemɨtiyurie.
PSA 39:10 'Ariri pepɨkanetsitiwayani, 'a'iwaɨyɨ pɨnetsikumemiwatɨma.
PSA 39:11 'Ekɨ teɨteri pepɨtiwaruka'enitsitɨwa, pepɨwatiwaya ke'axamemɨteyurie, kwitsi tikɨmeme hepaɨ, pepɨreuyehɨpa tita memɨtehiwe'erie. Xeihɨtsiyari xeikɨa kanihɨkɨtɨni tewi mɨmɨwe.
PSA 39:12 »Yawé, nenenewieri keneu'eni, nehiwari keneu'eni, ne'utatsuakakaku 'anakata pepɨkaheuyukanarɨmani. 'Ahɨxie ne pemɨkanetsimate nepɨhɨkɨ, yeikame nekanihɨkɨtɨni, netutsima wahepaɨ.
PSA 39:13 Pepɨkaha'aka, nenetemawiekame kenenayeitɨa mexi nekamɨwe meta 'ena ne'uyeika».
PSA 40:1 Teyuitɨwamete wa'ukiyari. Rawiri nɨawarieya. Yawé netakwewietɨ nekanayani nekawaɨripietɨ, mɨkɨ pɨnetsi'uxei, nehiwari kaniu'enieni.
PSA 40:2 Mɨkɨ teukiyata kanenatihana, haxuta paitɨ meta yeuta paitɨ nemɨkawamarietsie, tetetsie kanenakeni, kwiepa 'aixɨa 'anekɨa kaneniukayeni.
PSA 40:3 Kwikari hekwame kaneniupitɨani nemitakwikanikɨ, nɨawari 'aixɨa haineme takakaɨyari hetsiemieme. Mɨpaɨ mete'uneniereka yumɨiretɨ mekaniutimamani, Yawé hetsie metewiyatɨ mekanakɨne.
PSA 40:4 'Aixɨa pɨ'itɨarie tewi Yawé hetsie mɨtiwiya, memɨkayuri kakaɨyarixi memɨwarayexeiya wahetsɨa parewiya mɨkaha'iwawa.
PSA 40:5 Yawé nekakaɨyari, pɨwaɨkawa mamariwaweme kepemɨtiuyuri. Pɨkayɨwe temiti'inɨata ke'aixɨa pemɨtiuka'iyari tahetsiemieme. Xɨka ne'itaxata, pɨwaɨkawa matsi kenemɨkarayexatawe.
PSA 40:6 'Ekɨ pɨkametsinake tinaitɨ mawari, 'ekɨ matsi neheu'ename pepɨnetsi'ayeitɨa, 'ekɨ pepɨkahe'iwawa mawari taiyarikayari meta mawarika 'axamɨtiuyuri hetsiemieme.
PSA 40:7 'Ayumieme mɨpaɨ neputayɨ: «Ne 'ena pepɨnetsihexeiya, niuki xapatsie kemaine nehetsiemieme.
PSA 40:8 Nekakaɨyari, pɨnetsinake kemɨmetinake mɨpaɨ nemɨtiyurienenikɨ, 'a'inɨari niukiyari ne'iyaritsie nepexeiya».
PSA 40:9 Yuwaɨkawatɨ meyuxeɨriekaku, nepɨtiutahekɨataxɨ heitserie kemɨmetinake. Yawé, 'ekɨ pepɨtimate, neteni yuheyemekɨ nemɨka'anutanamakɨ.
PSA 40:10 Keheitserie mɨmetinake nepɨka'i'awieta ne'iyaritsie, matsi nepikuxatane ke'aixɨa pemɨtikamie meta kepemɨratawikwetsitɨani. Yumɨiretɨ meyuxeɨriekaku nepɨka'enukanama, 'anaki'eriya mɨmariwe meta tita yurikɨ mɨraine.
PSA 40:11 Yawé, kenenenenimayaka, 'anaki'eriyakɨ kenene'awietani meta yuri pemainekɨ.
PSA 40:12 Waɨkawa 'axamɨti'anene pɨneranutinama, pɨtimɨire nemɨtiuti'inɨata nepɨkayɨwe. Pɨnetsi'anuku'axixɨ ke'axanemɨtiuyuri, 'ari nepɨkaheuniere. Nekɨpate reuyeta kanipaɨmeni, ne'iyari kaneuyuyehɨpani.
PSA 40:13 Yawé, xeiya kenaye'a pemɨnetsixɨnakɨ. Yawé, kwitɨwa kenaye'a keneneuparewi.
PSA 40:14 Mekeheuyuyexɨrieni meke'uyutitetewiya, yunaitɨ kemɨ'ane memɨnetsimieku, mekeheuyuta'unaxɨani me'a'iwarieme, yunaitɨ kehate memɨtekuwautɨwe 'axamenetsiyurikutɨ,
PSA 40:15 kememɨte'a'iwarieni memɨnetsinanaima meneniereme meke'utimamani.
PSA 40:16 Kemɨ'ane memɨmetsikuwaɨtɨwe meke'uyukatemamawieni 'ahetsie, kemɨ'ane 'awikweitsitɨarika memɨnaki'erie, mɨpaɨ yuheyemekɨ meke'utiyuaneni: «Pɨmariwe yemekɨ Yawé».
PSA 40:17 Neta, tixaɨtɨ nemɨkarexeiya meta nereuyehɨatɨ, Ti'aitame kenetsi'uxeiya. 'Ekɨ netsiwikweitsitɨwame pepɨhɨkɨ, netsixɨname, 'apepɨkareutewini, nekakaɨyari 'aku.
PSA 41:1 Teyuitɨwamete wa'ukiyari. Rawiri nɨawarieya. 'Aixɨa pɨ'itɨarie kemɨ'ane memɨwerarani 'aixɨa mɨtiwaxeiya, Yawé hetsiena kanitanuamɨkɨ kepauka 'uximatɨarika hetsiena mɨye'ani.
PSA 41:2 Yawé hetsiena kanitanuamɨkɨ, tukari kanipitɨamɨkɨ, yutemawiekame kanayeitɨamɨkɨ xeime kwieyaritsie meta memeye'unie yɨkɨ memiyurieni pɨkawapitɨani.
PSA 41:3 Kepauka mɨtitakwine, Yawé kanitatɨrɨkariyamɨkɨ, 'aixɨa reu'eriekame kanayeitɨamɨkɨ.
PSA 41:4 Ne mɨpaɨ neputaine: «Yawé, keneneutinenimayata, 'aixɨa keneneuyuri, 'ahepaɨtsita 'axanepɨtiuyuri».
PSA 41:5 Memɨnetsi'aye'unie 'axa'anekɨa memɨnetsiheukahɨpa, mɨpaɨ meputiyuane nehetsiemieme: «¿Kepaukari pɨmɨni? ¿Kepaukari tepitatɨmaiya?»
PSA 41:6 Kepauka memɨnetsi'uyexeiyatɨkɨka heitseriemekɨ mepɨka'uta'axe, 'uwata memɨyekɨne 'axamenetekuxatatɨ mepakɨka.
PSA 41:7 Memɨnetsi'aye'unie meyukuxeɨrieme nehetsiemieme mepɨte'utixaxata, nehetsie mepɨte'ahɨpa. Mɨpaɨ mekaniutiyuaneni:
PSA 41:8 «Mɨkɨ yu'utatsie 'akaitɨ hatsuakuri pɨka'anukukeni, 'axamɨti'ane hetsiena kanikahani».
PSA 41:9 Nehamiku 'ɨaritɨ yemekɨ hetsiena nemɨtiwiyakai kwi nehamatɨa mɨrakwaiwekai, nehepaɨtsitari kaneuniukani.
PSA 41:10 Yawé, 'ekɨ matsi, keneneutinenimayata, kenenanukuketɨa neta nemɨnekɨhɨanikɨ.
PSA 41:11 'Ana mɨpaɨ nepɨretimani nemɨmetsinaki'atsitɨakɨ: xɨka mɨnetsi'aye'unie kanetsi'a'iwa.
PSA 41:12 'Aixɨa nemɨtiuyeikakɨ pepɨnetsituikani, 'ahɨxie yuheyemekɨ ne'uyeikame pepɨnetsi'ayeitɨani.
PSA 41:13 'Aixɨa ketikuxaxatsiwani Yawé, 'Ixaheri Kakaɨyarieya, tsepanetɨ xeitsienituyari wiyari manuyekɨka yaxeikɨa ketikuxaxatsiwani.
PSA 42:1 Teyuitɨwamete wa'ukiyari. Kure niwemama wa'ɨkitsika. Maxa yeutanaka heuharimɨtɨ haa kemɨtikuwaune, neta mɨpaɨ nepɨmetikuwaune Kakaɨyari.
PSA 42:2 Nepeuharimɨkɨ Kakaɨyari hetsie timiemekɨ, Kakaɨyari mayeyuri hetsie. ¿Kepauka Kakaɨyari hɨxie nepɨtakeni?
PSA 42:3 Tukarikɨ tɨkarikɨ tsuarikɨ xeikɨa nepayeniere, mɨpaɨ neranutahɨawarɨwatɨ tsepa kepauka: «¿Hakewa tamɨ 'akakaɨyari?»
PSA 42:4 Mɨpaɨ neti'erieme nepɨtikuhayeikawa ne'utatsuatɨ: Ne nepayeyeikakai yumɨireme wahamatɨa, nepɨwarewitɨkɨkai Kakaɨyari tukita. Temawierika hiwariyari meta pamɨpariyutsi 'ixɨarariyari tepatinenetɨwakai.
PSA 42:5 ¿Titayari yɨkɨ netinekɨhɨaweni? ¿Titayari netine'uximatɨaka? Kakaɨyari hetsɨa timieme matsi nepɨtitakwewieka meta nepinɨawani. Mɨkɨ pɨnetsiwikweitsitɨwame meta pɨnekakaɨyari.
PSA 42:6 Hikɨ yemekɨ nepɨtiuka'eniwa, nekakaɨyari, 'ayumieme nemetsiku'eriwa Kurutani kwieyaritsie paitɨ, Heximuni hɨriyaritsie meutitewatsie paitɨtɨ, Mitsaxi hɨriyaritsie paitɨ.
PSA 42:7 Xeime terɨtsie puwa'eiya haa manukaxɨrɨwe kwinimieme mutainetsie, naitɨ 'ahamewari nehetsie pɨkaxɨrɨwe.
PSA 42:8 'Ikɨ nenewieri pɨhɨkɨ Kakaɨyari tukari mɨnetsi'upitɨa hetsiemieme: tukarikɨ Yawé yunaki'eriya kenetsiheyenɨ'airiwani, tɨkarikɨta kwikarieya nepuku'eriwani.
PSA 42:9 Nekakaɨyari mɨpaɨ nekatinahɨaweni, Ne'ai: «¿Titayari peneratɨmai? ¿Titayari nenehiwerietɨ 'ena netiuyeikani nenanaimarietɨ memɨnetsi'aye'unie wahetsiemieme?»
PSA 42:10 Mɨki ne'umeyarita paitɨ kaniuhakeni menetsinanaimakaku memɨnetsi'aye'unie, mɨpaɨ neranutahɨawarɨwatɨ nehɨxie tsepa kepauka: «¿Hakewa tamɨ 'akakaɨyari?»
PSA 42:11 ¿Titayari yɨkɨ netinekɨhɨaweni? ¿Titayari netine'uximatɨaka? Kakaɨyari hetsɨa timieme matsi nepɨtitakwewieka, meta nepinɨawani. Mɨkɨ netsiwikweitsitɨwame kanihɨkɨtɨni meta nekakaɨyari.
PSA 43:1 Kakaɨyari, 'aixɨa ketineuyuri nehetsie. Nehetsie keneutanua 'ikɨ nuiwari wahɨxie yuri memɨkate'erie, keneneutawikweitsitɨa teɨteri memɨte'itawa watsata meta 'axamemɨte'u'iyari.
PSA 43:2 'Ekɨ pepɨnekakaɨyari meta nehetsie nunuwame pepɨhɨkɨ: ¿Titayari pekanera'eriwa? ¿Titayari netinehiwerieka? ¿Titayari netiuka'eniwani memɨnetsi'aye'unie wahetsiemieme?
PSA 43:3 'Ahekɨariya kenanɨ'a meta tita yuri pemɨraine, mɨkɨ 'ahɨri mɨpatsietsie paitɨ kenetsi'uye'atɨani, mekenetsihewitɨni hakewa paitɨ pemeyeika.
PSA 43:4 Hikɨ nekaninuamɨkɨ 'ahetsiemieme mawari taiyametsie, Kakaɨyari hetsɨa temawierika mayeneikakɨ, Kakaɨyari, muwa nekakaɨyari 'aku kanarikɨ nekamenitanɨawamɨkɨ.
PSA 43:5 ¿Titayari yɨkɨ netinekɨhɨaweni? ¿Titayari netine'uximatɨaka? Matsi Kakaɨyari hetsie nepɨtiwiyani, meta nepinɨawani. Mɨkɨ pɨnetsiwikweitsitɨwame meta pɨnekakaɨyari.
PSA 44:1 Teyuitɨwamete wa'ukiyari. Kure niwemama wa'ɨkitsika. Kakaɨyari, tepɨte'u'eni 'ahetsie timieme, tapaapama mepɨtate'utaxatɨa mamariwaweme kepemɨtiuyuri memu'uwakaitsie, 'iya tukaritsie meripaitɨ:
PSA 44:2 'Atɨrɨkariyakɨ hipame nuiwarite pepɨwarutawei, mana pɨta pepɨwa'atɨa tapaapama, 'iya teɨteri pepɨwarakumaweriyaxɨ, tapaapama pepɨwaruparewi.
PSA 44:3 Wa'ixipara pɨkatiuyuri kwie mema'iwaxɨ, yukɨmana mepɨkate'uyuri memɨte'ayu'iwaxɨ: matsi 'atɨrɨkariya pɨtiuyuri, 'amamá 'atserieta mieme pɨtiuyuri, 'anierika xawatɨriyaya pɨtiuyuri, 'ekɨ pemɨwanaki'eriekaikɨ.
PSA 44:4 'Ekɨ xeikɨa ti'aitame nehetsiemieme pepɨhɨkɨ meta nekakaɨyari. Kakuwu mɨrayu'iwakɨ pepiparewi.
PSA 44:5 'Ekɨ petatsiparewiekaku memɨtatsi'aye'unie tepɨwara'iwaxɨ, kepemɨtitewa hekɨ tepɨwarutipɨnaxɨ memɨtatsi'aye'uniekai.
PSA 44:6 Ne netupi hetsie nepɨkaheuwaɨre, ne'ixipara nemɨrayu'iwakɨ pɨkanetsi'uparewiwe,
PSA 44:7 'ekɨ matsi petatsiparewiekaku memɨtatsi'aye'unie tepɨwara'iwa, memɨtatsi'aye'unie meyutetewiyame pepɨwarayeitɨwa.
PSA 44:8 Taheyemekɨ tepɨtatemamawieka Kakaɨyari hetsie. Yuheyemekɨ tepinɨawani.
PSA 44:9 Peru hikɨ pepɨtatsihexɨri teyutetewiyame pepɨtatsi'ayeitɨa, pepɨkatatsiparewieri temuyukwitɨwetsie.
PSA 44:10 Mɨtatsi 'aye'unie hɨxie tema'iwarienikɨ yapepɨtiuyuri, mepɨtatsi 'ayewei memɨtatsi 'aye'unie mepɨtate'unawatsiri.
PSA 44:11 Muxatsi temɨhɨkɨtɨni hepaɨ pepɨtatsiyetua temɨtikwaiyanikɨ, mekataneutaxɨriexɨani naitsarie kwiepa.
PSA 44:12 'Ateɨterima pekaniwarutuani ka'ɨrimekɨ, tixaɨtɨ pepɨkaranɨ'ɨi pewarutuaka.
PSA 44:13 Ta'aurie kiekatari wahɨxie tetewiwekame pepɨtatsi'ayeitɨa, nanaimariwamete 'atsieriwamete tekanihɨkɨtɨni.
PSA 44:14 Kwiepa memɨtama wananaitɨwamete tekanihɨkɨtɨni, yunaitɨ teɨteri memu'uwa mekatani'atseni tame.
PSA 44:15 'Etsiwatɨma nepɨkahayewarie nekananaimarietɨ, waɨkawari nepaunetewiya,
PSA 44:16 waɨkawa memɨnetsinanaimakɨ menetsi'utahiwiwatɨ, mɨnetsi'aye'unie ya'aneme wiwiekaku muyuwaɨriya mɨraka'una.
PSA 44:17 Mɨya tepɨte'anuyehu hikɨ, hatsuaku tekametsihatɨmaiyakutɨtɨ meta 'atɨratu teka'uku'eiriekutɨtɨ.
PSA 44:18 Tepɨkametsiku'eiriewawe, 'ahuye meta tepɨkaku'eiriewawe.
PSA 44:19 Matsi 'ekɨ yawixi memayu'eriyaya waterɨta pepɨtatsiheukaxɨri, waɨkawa mayeyɨwitsie pepɨtatsiheutaxɨri.
PSA 44:20 Xɨka tehetɨmaiyake takakaɨyari, xɨka yatɨni hipame kakaɨyarixi wahɨxie te'ukatunuma'unike,
PSA 44:21 ¿tamɨ Kakaɨyari karetimanikeyu, mɨkɨ naime mɨtimate tita temɨte'awieta tahetsie?
PSA 44:22 'Ahetsie temɨtewiyakɨ, tepɨtakwikwiwa yuheyemekɨ, muxatsi memɨkwaiya wahepaɨ tepɨte'anuyehu memehapawa mehekwi'iwake.
PSA 44:23 Ti'aitame, 'ari kenanutanieri. ¿Titayari petikutsu? Kenanukukexi. Pepɨkatatsihexɨrɨwani 'aheyemekɨ.
PSA 44:24 ¿Titayari tahepa pekatinierimɨkɨ? ¿Titayari 'atsipekaraine tete'uka'eniwakaku meta tenanaimariekaku?
PSA 44:25 Tepa'iwarie kwiepa paitɨ tepɨtihe, tawaiyari kwiepa paitɨ patixɨrɨwe.
PSA 44:26 Kenanukukexi, kenaye'a ketaneuparewi, 'anaki'eriyakɨ taheima keneutanua.
PSA 45:1 Teyuitɨwamete wa'ukiyari. «Tuturi» yuariyaya keneuweiyani. Kure niwemama wa'ɨkitsika. Neɨkiyapa mieme. Ne'iyaritsie peyeyuane kwikari hekwatɨ, ne'ikuxatakaku kemanuyɨne ti'aitame hɨxie, 'utɨwame witsimɨtiu'utɨwa hepaɨ kani'aneni neneni.
PSA 45:2 'Ekɨ tewi witsipemɨti'axexeiya pekanihɨkɨtɨni, witsipekatiniuxaxatani, Kakaɨyari 'aixɨa pɨmatsiyurie yuheyemekɨ.
PSA 45:3 Witsi'aneme mariwemekɨ, yu'ixipara kanakawieka, 'iya mɨrayu'iwa.
PSA 45:4 Mariwemekɨ, kananutiyeixani rayu'iwake tita yuri mɨraine hetsiemieme kaniyumieneni, meta tixaɨtɨ mɨkarayuyeitɨa meta tita mɨtiheitseriekɨ, mariweme ketiyurieneni 'atɨrɨkariya.
PSA 45:5 'A'ɨrɨ kwinimieme mɨranuyemɨtsɨ ti'aitame memaye'unie wa'iyaritsie keheu'uni, meta nuiwarite 'ahetɨa meke'ukaxɨrieni.
PSA 45:6 Kakaɨyari, 'a'uweni yuheyemekɨ 'apuwe, 'a'itsɨ pemɨti'aitame hetsiemieme, mɨkɨ 'itsɨ 'aixɨa mɨti'anekɨ mɨti'aita kanihɨkɨtɨni.
PSA 45:7 'Ekɨ 'aixɨa mɨti'ane pepɨtinaki'erie, 'axamɨti'aneta pepɨti'uxiwe'erie, 'ayumieme Kakaɨyari pɨmetsi'anayexei 'ekɨ, 'a'iwama pɨkawaranayexei, 'akakaɨyari temawierika hatseitiyari pɨmetsi'ukawiri.
PSA 45:8 Mixaxi 'ɨakariyari, 'aruhe meta kanera, mɨpaɨ pu'ɨatɨka 'akemarite, paratsiyu witsimɨtiuye'anetsie 'umetekɨ tiwaku'utɨkaimeta pe'ayekaiku, pɨmetsitemawieritɨa kanari yuariyaya.
PSA 45:9 'Ukari te'aitamete waniwema witsimemɨ'anene memɨmetsiparewie watsata mekaniye'uwani, 'atserietata 'uka ti'aitame kanakani huru 'Upixi miemekɨ 'utixawatɨretɨ.
PSA 45:10 Keneu'ena, 'uka yemekɨ keneu'a'ɨwiya: 'Akiekari kenatɨmaiya meta 'a'iwama.
PSA 45:11 Ti'aitame witsikepemɨti'ɨimari kamenihiwe'erieka, mɨkɨ meti'aitɨwame kanihɨkɨtɨni, hɨxiena kenanakatutsita.
PSA 45:12 'Ukari Tiru kiekatari mekani'axɨakuni 'imikieri mete'upitɨ, teɨteri mana kiekatari memɨxikutsixi 'aixɨa mepɨmetexeiyani.
PSA 45:13 'Uka witsimɨti'ɨimari 'aixɨa katiniyuxexeiyani, yukiita wayemietɨ hurukɨ 'utixawatɨretɨ 'iwieya reuxuiyakaku.
PSA 45:14 Kemari ranakapitɨ 'aixɨa mɨti'anenekɨ reuxuiyatɨ kanewitɨwani ti'aitame hɨxie, 'ɨtɨmanata 'ɨimarixi me'eweiyatɨ.
PSA 45:15 Temawierikakɨ mekanewitɨwani ti'aitame paratsiyuta paitɨ.
PSA 45:16 'Aniwemata yupaapama wa'uwenitsie mekanayaxikuni, memanuyetei pekaniwarayeitɨamɨkɨ naitsarie kwiepa.
PSA 45:17 Pemukahatɨmaiyarienikɨ yanepɨtiyurieni yuheyemekɨ, 'ayumieme nuiwarite mepɨmetsitanɨawa, yuheyemekɨ yuheyemekɨ.
PSA 46:1 Teyuitɨwamete wa'ukiyari. Kure niwemama wakwikari 'etsi'uyuatɨ mutakwika. Kakaɨyari tahetsie nunuwame kanihɨkɨtɨni, hetsiena temɨta'awieta, yuheyemekɨ tatsiparewiwame kepauka temu'uximatɨarie.
PSA 46:2 'Ayumieme tepɨkaheumamaka, tsepa kwiepa kemɨtiyɨane tsepa yemurite haramara hixɨapa mɨtiukayunixɨa,
PSA 46:3 tsepa hamewarieya kwinimieme mɨtiutatɨrarɨka, ha'akaku hɨxiena tsepa hɨrite mutiyuane.
PSA 46:4 Haa mana kaniuyehaneni Kakaɨyari kiekarieya mɨtemawieritɨa, 'Amutewi kie makupatsietsie.
PSA 46:5 Mana Kakaɨyari kaniukani, kiekari hatsuaku pɨkahatiweni, kepauka mukahekɨkɨaretsie Kakaɨyari kaniwaparewiekamɨkɨ.
PSA 46:6 Nuiwari mukumane mekanimamaka, te'aitamete mekaniuyɨyɨakatɨkani, kepauka Kakaɨyari mutaniuka, kwie kanita'unikeni.
PSA 46:7 Yawé, Naimekɨmɨtɨrɨkaɨye tahamatɨa kaniuyeikani, hetsiena temɨta'awieta Kakuwu Kakaɨyarieya kanihɨkɨtɨni.
PSA 46:8 Xekenakɨni xekeneuxeiya Yawé mamariwaweme pɨtiyuriene, mɨkɨ kwiepa makumawenikɨ pɨtiuyuri.
PSA 46:9 Kuyaxa kaneutipariya naitsarie kwiepa. Tupi kaniutimura, pitsika 'amɨtɨtɨ kaniutimura, kaxetate kuyaxa mieme taipa kaneuxɨrieni.
PSA 46:10 «Kayuwatɨ xeketeneteni, mɨpaɨ xeketenetimati ne Kakaɨyari nemɨhɨkɨkɨ. Ne 'aixɨa nekatinitahɨawariemɨkɨ nuiwarite watsata. Ne nemariwetɨ nekanayeitɨariemɨkɨ kwiepa».
PSA 46:11 Yawé Naimekɨmɨtɨrɨkaɨye tahamatɨa kaniuyeikani, hetsɨana temɨta'awieta Kakuwu Kakaɨyarieya kanihɨkɨtɨni.
PSA 47:1 Teyuitɨwamete wa'ukiyari. Kure niwemama wakwikari. Yunaitɨ teɨteri xeketeneutapineni, Kakaɨyari xekeneutahiwiwani temawierikakɨ.
PSA 47:2 Yemekɨ pɨtɨrɨkaɨye Yawé 'Amutewi, pɨmariwe ti'aitame 'ena kwiepa naitsarie.
PSA 47:3 Pɨtatsi'uhɨritɨa nuiwarite temɨwakuyuitɨanikɨ, yunaime teɨteri pɨtatsi'uxatɨa,
PSA 47:4 'imikieri tahetsiemieme pɨranayexei Kakuwu muyuta'ɨrixɨ kɨmana pɨhɨkɨ, kemɨ'ane waɨkawa mɨnaki'eriekai.
PSA 47:5 Kakaɨyari Yawé yu'uwenitsie kanayerɨni, temawierika hiwariyaritsata meta kuxineta yuariyaya.
PSA 47:6 Kakaɨyari xekenenɨawani, xekenekwikani hetsiena mieme, xekeneutikwikani nɨawari tati'aitɨwame hetsiemieme.
PSA 47:7 Kakaɨyari kanihɨkɨtɨni ti'aitame 'ena kwiepa naitsarie, 'ayumieme, nɨawari xekeneutikwikani mariwemekɨ.
PSA 47:8 Kakaɨyari katini'aitani, naime nuiwarite kwiepa memɨtama wahetsiemieme, yu'uweni mɨpatsietsie 'akaitɨ.
PSA 47:9 Teɨteri wa'ukiyarima mekaniyukuxexeɨriwani, 'Apɨrahami Kakaɨyarieya teɨterimama wahetsɨa me'itahɨaweke,
PSA 47:10 mɨkɨtsɨ Kakaɨyari katinipiinieyatɨni naitsarie kiekari mukumane kwiepa. Mɨkɨ mariwemekɨ 'aixɨa katinikuxaxatsiwamɨkɨ.
PSA 48:1 Nɨawari. Kure niwemama wakwikari. Yawé pɨmariwe, minɨawani yemekɨ 'aixɨa pɨ'ane takakaɨyari kiekarienatsie. Hɨrieya mɨpatsietsie,
PSA 48:2 hɨri witsimɨ'ane, naitsarie kwiepa watemawierika pɨhɨkɨ. Tsiyuni hɨriyari, tayeta katini'aneni, Ti'aitame mɨmariwe kiekarieya kanihɨkɨtɨni.
PSA 48:3 Tsiyuni muwe tuxiyu 'amutewita, Kakaɨyari kaniyuhekɨata tiyu'awiwietame 'aixɨa mɨ'ane kemɨtihɨkɨ.
PSA 48:4 Te'aitamete mekaniyukuxeɨrieni mekaniyutinɨni, yunaitɨ mɨkɨ kiekari me'unietɨ mekanewakɨne,
PSA 48:5 peru kepauka memixei kayuwatɨ mekateniu'uni, waɨkawa memamatɨ mekaneutayeixɨani.
PSA 48:6 Mana waɨkawa memamatɨ mekanakɨne, meta 'ukaratsi mɨtiniwerɨmeni hepaɨ 'anetɨ wahetsie katininuani.
PSA 48:7 'Eka kwinimieme mɨtitɨrɨkaɨyekɨ, kanuwate 'amɨpapa Taritsi mieme peputimuraxɨa.
PSA 48:8 Yemekɨ kehepaɨ temɨte'u'enanakai hikɨ tepunenierixɨ, Yawé Naimekɨmɨtɨrɨkaɨye kiekarienatsie, meta takakaɨyari kiekarienatsie: Mɨkɨ hatsuaku pɨkaheitiparitɨani.
PSA 48:9 'Atukita paitɨ, neuxei Kakaɨyari, 'anaki'eriya tepuku'eriwa.
PSA 48:10 'Anɨawari, neuxei Kakaɨyari, meta kepemɨtitewa hepaɨ pɨ'ane, kwie manu'axe paitɨ kaniuyeikani, 'amamá tserieta miemetsie tita mɨtiheitserie katinihɨneni.
PSA 48:11 'Ekɨ 'aixɨa pemɨtiyurienekɨ hɨri Tsiyuni kaniyutemawieka, meta Kura kiekariyaritsie mamanetɨka kaniyutemamawieka.
PSA 48:12 Tsiyuni 'aurie xekenahuni, waritana xekenakɨni meta xekeneuti'inɨata tuxiyuya,
PSA 48:13 kuraruyari 'aixɨa yemekɨ xeketeneuxeiya, xekeneutixeiyaxɨa hakewa memeyuti'awiwieta, mɨpaɨ 'uxa'atɨni warie xemɨtewakuxaxatɨwanikɨ yuniwema meta yuteukarima.
PSA 48:14 'Ikɨ Kakaɨyari takakaɨyari yuheyemekɨ kanihɨkɨtɨni. Mɨkɨ yuheyemekɨ kataniuwitɨximemɨkɨ.
PSA 49:1 Teyuitɨwamete wa'ukiyari. Kure niwemama wakwikari. 'Ikɨ xeketeneu'eni, yunaitɨ teɨteri: xekeneu'enana, kwiepa xemɨtama naitsarie,
PSA 49:2 yunaitɨ xemɨwerarani meta yunaitɨ waɨkawa xemɨmamariwawe, yunaitɨ xikutsixi meta tixaɨtɨ xemɨkateheuxeiya.
PSA 49:3 Nepɨtikuxatani timaiwemekɨ, ne'iyari timaitɨ pɨtikuxatani.
PSA 49:4 Temaiwawemete waniuki kwi 'ahurawa nepɨ'enieni, netiyuitɨatɨ kanarikɨ nepɨxetaxatɨani niuki mɨ'awie.
PSA 49:5 ¿Titayari nereumaka kepauka 'uximatɨarika nehetsie munuani? ¿Titayari nereumaka kepauka memɨnetsi'aye'unie memɨnetsinanaimatsie?
PSA 49:6 Pukaheuyewetse xikutsixi nemuwamakaxenikɨ yupiinitsie memɨtewiya meta yupiinitekɨ memuyutimariwekata.
PSA 49:7 Nixewitɨ xeime mutawikweitsitɨani pɨkayɨwe, meta pɨkayɨwe Kakaɨyari mɨtiupitɨani xeime tukarieyakɨ.
PSA 49:8 Xeime tukarieya mutawikweitsitɨani katinaye'aka, pumawe ka'inɨaritɨ kemɨraye'axe.
PSA 49:9 Xewitɨtɨma yapɨkatiuyeika, hatsuaku kamɨwetɨ.
PSA 49:10 Meyunaitɨ yaxeikɨa mepɨtetakukuwe, memɨtemaiwawe meta memɨkatemaiwawe yaxeikɨa mepɨtakukuwe, wapiinitɨarika hipatɨ wapiini pɨrayeika.
PSA 49:11 Tsepa kwie memeuxeiyakai yuhepaɨ titetewakame, teukiyapa wakii yuheyemekɨ pɨhɨkɨtɨni, wakie pɨhɨkɨtɨni yuheyemekɨ.
PSA 49:12 Tsepa xiku xewitɨ mayuyeitɨa, peru mɨkɨ 'apɨkareutere, yeutari wahepaɨ mepɨtakukuwe.
PSA 49:13 Mɨpaɨ kani'aneni yuhetsie memɨtewiya wahuye, mɨpaɨ mekateneutiparikuni 'iya memuyuti'ɨre.
PSA 49:14 Muxatsi wahepaɨ, mekane'ariyani teukiyapa, muwa kaniware'arieni mɨki. Wakaxari kwieta paitɨ kanetipɨnimɨkɨ, wakii witsimɨ'anene mati'utsie 'ahetewakaku. 'Uxa'arieka ximeri teɨteri heitserie memexeiya mekateniwata'aitɨakuni.
PSA 49:15 Peru Kakaɨyari kanenitawikweitsitɨamɨkɨ teukiyapa yuhamatɨa kanenanuwitɨmɨkɨ.
PSA 49:16 Pepɨkamaka xewitɨ xɨka xiku hayuyeitɨani meta xɨka yukii witsi'aneme 'utawewieni,
PSA 49:17 mɨkɨ kepauka mɨmɨni tixaɨtɨ pɨkaranupini, hamatɨana pɨkatiyehu piiniteya.
PSA 49:18 Tsepa 'a'uyeikatɨ kename 'aixɨa tiuyeika maine, tsepa teɨteri 'aixɨa memɨtehehɨawe xiku matɨakɨ,
PSA 49:19 yaxeikɨa kanimɨmɨkɨ yupaapama wahepaɨ, tawariri hekɨariya pɨkaxeiya.
PSA 49:20 Tsepa xiku xewitɨ mayuyeitɨa, peru mɨkɨ 'apɨkareutere, yeutari wahepaɨ mepɨtakukuwe xeikɨa.
PSA 50:1 'Atsahapi nɨawarieya. Yawé kananiukani, kakaɨyarixi mɨwakakaɨyari: teɨteri kaniwa'inieka tau manatineika metsutɨme tau makayuyuipiketsie paitɨ meye'atɨkaime.
PSA 50:2 Kakaɨyari kaniutimerɨkani Tsiyuni paitɨ, kiekari witsimɨ'ane meta 'aixɨa mɨ'anetsie.
PSA 50:3 Takakaɨyari 'ukanamieni, peru kayuwatɨ hexeiyatɨ 'upɨkahamie, tai kananuyekani hɨxiena naime tititaiyatɨ, waritana katiniutatɨrarɨkani.
PSA 50:4 Yawé muyuawi meta kwie kaniwa'inieka, memɨnenierekɨ yuteɨterima mɨwataxanetatsie:
PSA 50:5 «Memɨpatsie xekeniwarukuxeɨri, nehamatɨa tɨratu memuwewi mawarikɨ».
PSA 50:6 Muyuawi 'aixɨa mɨti'ane katinihekɨatani kayuhekɨakamekɨ: Kakaɨyari kani'itsɨkametɨni 'aixɨa tiuka'iyaritɨ.
PSA 50:7 «Xekeneu'enana, neteɨterima, nepɨtitaxata, 'Ixaheri, nepɨmetsitahekɨata: Ne nepɨ'akakaɨyari, ne xeikɨa Kakaɨyari nepɨhɨkɨ.
PSA 50:8 Ne nepɨkamatsihate'a mawarika pemɨwewiekɨ meta mawari taiyariyari, mɨkɨ yapemɨnetiutimawiriwakɨ.
PSA 50:9 Ne nepɨkawareuyehɨwari tsikerutsixi 'akuraruta miemete, meta tsipuri 'ukitsi 'akie miemete,
PSA 50:10 yeutari mekateninepiinitɨni, metatsiere xeimiriyari hɨriyaritetsie tewaxi yeuta memu'uwa.
PSA 50:11 Memɨte'awɨwawe nepɨwamate, yunaitɨ yeuta memɨte'u'uwa nepiini mepɨtehɨkɨ.
PSA 50:12 Xɨka ne neheuhaakamɨkɨni, nepɨkametitaxatɨani, metsɨ kwie naitɨ katininepiinitɨni, meta tita mɨrexeiya.
PSA 50:13 ¿Kamɨtsɨ ne tuurutsixi wawaiyari netikwa'a, yatɨni tsipuri 'ukitsi waxuriya neti'ie?
PSA 50:14 Kakaɨyari kenexatɨaka kepemɨti'awaɨriyakɨ, 'Amutewi hetsɨa kepemɨti'ahɨritɨa ketinaye'atɨa.
PSA 50:15 Keneneutahɨawi kepauka 'uximatɨarika pemexeiya, ne nepɨmetsixɨna, 'ekɨta 'aixɨa pepɨnetitahɨawe».
PSA 50:16 Peru Kakaɨyari 'axatiyuruwame mɨpaɨ katinahɨaweni: «'Ekɨ heitserie pepɨkahexeiya ne'aitsika pemukuxatanikɨ, yatɨni netɨratu pemɨkuxatanikɨ.
PSA 50:17 Kenemɨti'aita, pepɨxani'erie, neniuki, pepehɨpa.
PSA 50:18 Xɨka tinawayame pe'uxeiya, pepitinɨnɨwe, hipame wa'ɨitama memɨwakumaɨwa wahamatɨa pepuyeika.
PSA 50:19 'Axamɨti'anekɨ, 'aneni pepɨtatua, 'aneni puyuwaɨriya mɨtiu'irɨmanikɨ.
PSA 50:20 Pepɨ'iyamate 'a'iwa hetsiemieme pemɨtikuxatanikɨ, matsi pepi'uximatɨa yemekɨ 'a'iwa.
PSA 50:21 Mɨpaɨ pekatiniyurieneni, neta 'atsinepɨkahaine, ¿xɨari mɨpaɨ pepɨtiku'eriwa kename ne 'ahepaɨ ne'ane? Peru hikɨ ne nekamenitatiemɨkɨ, 'ahɨxie nemetsi'anutaxeiyatɨ nepɨmetsitaxaneta.
PSA 50:22 »Xeme Kakaɨyari xematɨmai, xekeneutimaixɨa kenemaine, xɨkate mɨpaɨ xeka'ɨyɨni, ne nekanixetitsanamɨkɨ, nixewitɨ tɨma pɨkaxetawikweitsitɨani.
PSA 50:23 Kemɨ'ane pamɨpariyutsi mɨnetsipitɨa, 'aixɨa mɨnerahɨawe, kemɨ'ane yuhuye 'ɨwiyatɨ mumie, newikweitsitɨarika nekanipitɨamɨkɨ».
PSA 51:1 Rawiri nɨawarieya, kepauka tixaxatame Natani meikuxei Rawiri Wetitsawe hamatɨa 'axamete'uyurieku. Kakaɨyari, kenenenenimayaka, mɨmariwekɨ 'anaki'eriya, mɨwaɨkawakɨ kepemɨtiuyukanenimaya, ke'axanemɨtiuyuri kenetinanuyeitɨiri.
PSA 51:2 Keneneutahauxina naime 'axamɨti'anekɨ kenanuyeitɨa nexurikime.
PSA 51:3 Ke'axanemɨtiuyuri nepɨtimate, mɨpaɨ xeikɨa nepɨtiku'eriwa.
PSA 51:4 'Ahepaɨtsita 'axanepɨtiuyuri, 'ahepaɨtsita xeikɨa, 'ahɨxie 'axanepɨtiuyuri, 'ayumieme 'ekɨ heitserie pepexeiya, ke'aixɨa pemɨtiyuriene, 'aixɨa pɨ'ane.
PSA 51:5 Ne mɨpaɨ nepɨtimate nemutinuiwaxɨtsietɨtɨ 'axanepɨtiuka'iyari, 'axanetiyuruwametɨtɨ nemaama hetsie nepɨyenuiwaxɨ.
PSA 51:6 Ne mɨpaɨ nepɨtimate 'ekɨ tita yuri mɨraine pepɨnaki'erie, 'ekɨ ha'awiekamekɨ pepɨnetiuta'ɨkitɨa nemɨtimaiwenikɨ.
PSA 51:7 'Aixɨa keneneuyuri hitsupu xawarikɨ penetsikuwayatɨ, 'aixɨa ne'anetɨ nekanayeimɨkɨ, keneneuhauxina, witsinetituxatɨ nekanayeimɨkɨ 'ɨwi kemɨkatituxa.
PSA 51:8 Keneneupitɨa temawierika, temawierika keneupitɨa 'ikɨ 'umete pemika'unaxɨ.
PSA 51:9 'Ahɨxie tita 'axanemɨtiuyuri kenatɨmaiya meta naime 'axamɨti'ane kenanuyeitɨa.
PSA 51:10 Kakaɨyari, nehetsie keneunetɨa 'iyari mɨ'itiya, 'iyari nehetsie mɨyeka keneuhekwatɨa.
PSA 51:11 Pepɨkanetsikupatani 'ahetsɨa nemuyeikanikɨ, 'a'iyari mɨtiyupata pepɨkanetsikunawairiwani.
PSA 51:12 'Awikweitsitɨarika temawierikayari tawarita keneneupitɨa, 'iyari yatikamietɨ kenetsikuyuitɨwani.
PSA 51:13 Mɨpaɨ ne'anetɨ 'axateyuruwamete 'ahuye nepɨwaxeitsitɨaka, 'axateyuruwamete 'ahetsɨa mepɨ'axɨani.
PSA 51:14 Nekakaɨyari, netsiwikweitsitɨwame, keneneutawikweitsitɨa xuriya nemɨtayeurikɨ, 'ana ne nepɨmetsinɨawani 'aixɨa pemɨtiyurienekɨ.
PSA 51:15 Neti'aitɨwame, neteni keneupitɨa, nemɨmetsinɨawanikɨ.
PSA 51:16 Mawari 'ekɨ pɨkametsinake meta mawari taiyariyari, xɨka metsinakenike ne nepɨmetsixatɨakakeyu.
PSA 51:17 Mawari mɨmetsinake 'iyari muyuhiwerie pɨhɨkɨ, 'ekɨ Kakaɨyari, pepɨka'ixani'erie 'iyari mɨtiuka'eniwa meta 'axamɨti'ane mɨtiuhayewaxɨ.
PSA 51:18 Kemɨmetinake, Tsiyuni 'aixɨa mɨtiukaxexeiyanikɨ yaketineuyuri, Kerutsareme tetsariyaya kuraruyari keneutawewi.
PSA 51:19 Hikɨ 'ana mawari 'aixɨa mɨ'anene pɨmetsinakire, naitɨ mawari taiyariyari, meta 'amawari taiyametsie mepɨtimawarieni tsikerutsixi.
PSA 52:1 Teyuitɨwame wa'ukiyari. Kwikari Rawiri 'ɨkitsikaya, kepauka Ruheki 'Erumi tewiyari, Tsahuri mɨpaɨ mɨtiutaxatɨa: «Rawiri 'Akimereki kie kaneyani». ¿Titayari 'axamɨti'anetsie pereu'ayetuika, tewi pemɨtɨrɨkaɨye? Kakaɨyari naki'eriyaya yuheyemekɨ yakatineuyuhaneni.
PSA 52:2 'Aneni, nawaxa mataxikauni hepaɨ pɨ'ane, pɨtiyuka'unamɨkɨ meta 'itarika pɨwewie.
PSA 52:3 'Aixɨa mɨti'ane pepɨkatinaki'erie, matsi 'axamɨti'ane waɨkawa pepɨnaki'erie, tita yuri mɨraine pepɨkanaki'erie, matsi 'itarika pepɨnaki'erie.
PSA 52:4 Kwinimieme ti'itawame neni pepexeiya, Kwinimieme pɨmetinake 'aniukikɨ hipame pemɨwaratixɨrɨwanikɨ.
PSA 52:5 Peru neuxei Kakaɨyari pɨmetsika'una yuheyemekɨ, 'akiita pɨmetsiwayehɨani, 'ena kwiepa pɨmetsi'akumaweriya hipatɨ memanu'uwatsie.
PSA 52:6 Heitserie memexeiya mɨkɨ mepɨtexeiya, 'ana mepɨtimamani, 'ana mɨpaɨ mepɨtiyuani me'inanaimatɨ:
PSA 52:7 «'Ena tewi xekanixeiyani Kakaɨyari hetsɨa mɨkaye'a mɨkɨ hetsiena mɨtanuanikɨ, matsi pɨta yupiinitɨarikatsie mɨtiwiyakai, 'axatiyurienetɨ 'amuyeikakai».
PSA 52:8 Peru neuxei ne huriwa mɨtsiɨraɨye hepaɨ nekani'aneni, Kakaɨyari kie muxutu, Kakaɨyari naki'eriyayatsie nekatiniwiyani yuheyemekɨ yareuyuhanemekɨ.
PSA 52:9 Naime tukaritsie ne nekameninɨawakamɨkɨ 'a'uximayatsikakɨ, ne 'ahetsie nepɨtiwiyani 'ahetsie memɨtewiya wahɨxie, 'ekɨtsɨ 'aixɨa pekatiniuka'iyarini.
PSA 53:1 Teyuitɨwamete wa'ukiyari. 'Ikɨ kwikari kanayukwikani hewayenutuixietɨ. Kwikari Rawiri 'ɨkitsikaya. Kemɨ'ane 'atsimɨkatimate mɨpaɨ kanaineni yu'iyaritsie: «Kakaɨyari kaniumaweni». 'Axamemɨteyurie mepɨhɨkɨ, naitɨ kememɨteyurie mɨxani'eriwa xeikɨa pɨtihɨkɨ, nixewitɨ tɨma 'aixɨa pɨkatiyuriene.
PSA 53:2 Kakaɨyari muyuawitsie paitɨ teɨteri kaniwataxeiyani, 'iwaunetɨ xeime timaiweme meta Kakaɨyari kuwauneme.
PSA 53:3 Peru yunaitɨ mepeuyexɨri 'axamepɨte'uyuri yunaitɨ, Xewitɨ tɨma 'apɨka'uyeika 'aixɨa tiyurienetɨ, pumawe nixewitɨ.
PSA 53:4 ¿Kamɨtsɨ 'atsimekatemate 'axamemɨteyurie, kemɨ'ane neteɨterima memɨwakwa'a paa hepaɨ? Hatsuaku Kakaɨyari mepɨkahahɨawe.
PSA 53:5 Mekaniwamariutani xeikɨa, kepauka mɨkaheuyewetse memɨmamakakɨ. Kemɨ'ane memɨmetsi'aye'uniekai wa'umete Kakaɨyari kaniutaxɨrieni, 'ekɨ pekaniwatewiyatsitɨamɨkɨ, Kakaɨyari mɨwarayexɨrikɨ xeikɨa.
PSA 53:6 Kakaɨyari mɨpaɨ mɨnainenike Tsiyuni tiyuwikweitsitɨwame mɨnanɨ'anike 'ixaheritsixi mɨwatawikweitsitɨanikɨ. Kepauka Kakaɨyari yuteɨterima mɨwarakunuitɨanitsie, Kakuwu kaniyutemawiekamɨkɨ: 'ixaheritsixi meta yunaitɨ mekaniyutemamawiekakuni.
PSA 54:1 Teyuitɨwate wa'ukiyari. Kanarikɨ ke'utanɨawarieni. Kwikari Rawiri 'ɨkitsikaya, kepauka Tsipi kiekatari Tsahuri mɨpaɨ memɨte'utahɨawixɨ: «Rawiri kaniyu'awietani tahamatɨa». Kakaɨyari, keneneutawikweitsitɨa pemɨtɨrɨkaɨyekɨ, nehetsie keneutanua 'ekɨ pemɨyɨwekɨ.
PSA 54:2 Kakaɨyari, nenenewieri keneu'eni, kenemutaine keneneu'eni.
PSA 54:3 Neuxei, teɨteri nemɨkawamate mekanenimietɨweni, mekanenimiekuni mɨkɨ memɨteyukananaima, mɨkɨ teɨteri 'ekɨ Kakaɨyari mepɨkametsinaki'eriku.
PSA 54:4 Peru Kakaɨyari netsiparewiwame kanihɨkɨtɨni, ti'aitame mɨnetsi'ayeyuritɨa kanihɨkɨtɨni,
PSA 54:5 mɨkɨ 'axamɨti'ane memɨnetsi'aye'unie wahetsie pɨta katininakimɨkɨ. Yawé, ke'aixɨa pemɨtikamiekɨ keniwaruka'una.
PSA 54:6 Kenemɨtiyuwaɨriya mawari nepɨmetsiwewirieni, meta nepɨmetsitanɨawa, Yawé ke'aixɨa pemɨtiuka'iyari,
PSA 54:7 'ekɨtsɨ pekaneniuxɨna naimekɨ kenemɨti'uximatɨariekai, ne nekaniuniere memɨnetsi'aye'unie kememɨte'a'iwarie.
PSA 55:1 Teyuitɨwamete wa'ukiyari. Rawiri 'ɨkitsikaya. 'Ikɨ kanaritekɨ ke'utakwikarieni. Kakaɨyari, nenenewieri keneu'eni, kenemɨmetiwawirie pepɨkayuti'awiwietani.
PSA 55:2 Kenenanu'eni meta keneneuta'eiya, 'uximatɨarika nepexeiya. Kwinimieme pɨnetsiyurie,
PSA 55:3 mɨnetsi'aye'unie tierikaya meta Kakaɨyari memɨka'ayexeiya kememɨte'uyukananaima, mɨkɨ netiuka'eniwame mepɨnetsi'ayeitɨwa meta kepauka memuyeha'arɨwe mepɨnetsi'anutate'a.
PSA 55:4 Ne'iyari putimamawe netaɨta paitɨ, waɨkawa pɨtɨrarɨka nemɨmɨximeni hepaɨ.
PSA 55:5 Nepuyɨyɨaka marikakɨ, nepɨmariutsie yemekɨ.
PSA 55:6 Kukuru 'anateya xɨka nehexeiyanike, nepanuwienikeyu hakewa nemeka'uxipieni.
PSA 55:7 'Ateewa paitɨ nepeyeiwe: makumawetsie neheyeikatɨ nepayeiwe.
PSA 55:8 Xeiya nepewiwe hakewa nemeneti'awiwietatsie, 'eka netsihe'enitsitɨanikɨ 'eka kwinimieme mɨtitɨrɨkaɨye.
PSA 55:9 Ti'aitame, keniwaruka'una, mekayu'eniekame keniwarayeitɨa. Kiekaritsie nanaimarika 'imieri xeikɨa nepɨxeiya,
PSA 55:10 tukarikɨ meta tɨkarikɨ yukuraru 'utɨa mekanikɨnetɨweni, mɨkɨ kuraruta 'axamɨti'ane xeikɨa kanixuaweni.
PSA 55:11 Mana 'axamɨti'ane tiyu'uname xeikɨa kanixuaweni, mana kaye 'utɨma 'itarika nanaimarika yakatinixuaweni.
PSA 55:12 Xɨka mɨnetsi'aye'unie netsi'anutatiexɨani, ne nepinewiwe, xɨka mɨnetsi'aye'unie netsinanaimaka, ne nepɨneti'awietawe.
PSA 55:13 Peru 'ekɨ pepɨyɨane, tewi nehepaɨ pemɨ'ane, ne'iwa, yemekɨ nehamiku,
PSA 55:14 'ahamatɨa nemuyeikakai 'aixɨa 'iyari, tanaitɨ Kakaɨyari tukita temeta'axekai.
PSA 55:15 Memɨnetsi'aye'unie wahetsie mɨɨya ke'aye'ani 'atsimekateha'eriwakaku. Me'ayenenieretɨ teukiyapa mekeheukaxɨrieni, wahetsietsɨ 'axamɨti'ane kaniyekani.
PSA 55:16 Peru ne Kakaɨyari nekanitahɨawimɨkɨ, mɨkɨta Yawé kanenitawikweitsitɨamɨkɨ.
PSA 55:17 Ximeri, taikai meta tɨkarikɨ nekanehɨaweni ne'uximatɨarietɨ, mɨkɨta kaneni'enieka.
PSA 55:18 Tsepa yuwaɨkawatɨ memɨnetsimietɨwe, mɨkɨ netukari kaniutawikweitsitɨwani, kuyaxa nehepaɨtsita mieme wewiyakaku.
PSA 55:19 Kakaɨyari, mɨti'aitame yuheyemekɨ, kaneni'enimɨkɨ mɨkɨ kaniwanutuixitɨamɨkɨ. Mɨkɨ teɨteri hatsuaku mepɨkayupata, Kakaɨyari mepɨkamakaxe.
PSA 55:20 Yumamate teikɨ mepetsetsera yuhamikuma wahepaɨtsita, peru mepɨkatehaye'atɨwa kememɨteyutipiniri.
PSA 55:21 Yuteta witsimepɨte'eniuriɨkɨ wiya witsima'ane hepaɨ, peru yu'iyaritsie 'imieri xeikɨa mepuku'eriwa. Waniuki witsipɨ'ane hatseiti hepaɨ, peru 'ixipara mataxikakauni mepɨhɨkɨ.
PSA 55:22 Yawé ketineyetuiri kepemɨranuyemie, mɨkɨ kamenituikakamɨkɨ, mɨkɨ pɨka'ipitɨani heitserie mexeiya matiwautsenikɨ, yumuinatɨ yuheyemekɨ mɨkayukuhayeikawanikɨ.
PSA 55:23 'Ekɨ matsi Kakaɨyari, memɨkametsi'ayexeiya pepɨwaratixɨrieni teukiyapa pepɨwareukaxɨrieni, teɨteri xuriya memɨtayeuri memɨte'itawa, mɨkɨ yutukari hixɨapa tɨma mepɨka'utinexɨani. Ne matsi, 'ahetsie nepɨtiwiya.
PSA 56:1 Teyuitɨwamete wa'ukiyari. Kwikarieya xekeneuweiyani «Tuaxatsie kukuru 'ateewa muyeka». Rawiri 'ikɨ nɨawari meka'utɨa, kepauka piritsiteutsixi pɨretsu memeyeitɨa Kahati kiekariyaritsie. Kenenenenimayaka, xɨa'ui Kakaɨyari, teɨteri mepuxuawe menetsi'uweiyatɨ. Tukarikɨ mepɨnetsimietɨwe memɨnetsi'aye'unie,
PSA 56:2 tukarikɨ mekaneniuweiyani menetsimiekutɨ, mekaniyumɨireni meyuti'ɨretɨ memɨnetsimietɨwe.
PSA 56:3 Kepauka nemeuma, 'ahetsie xeikɨa nepɨtiwiya.
PSA 56:4 Kakaɨyari hetsie nepɨtiwiya, niukieya nepɨnɨawa, Kakaɨyari hetsie nepɨtiwiya, nepɨkaheuma. Ketitayari kuta tewi netimakaka 'atsimɨkanetsi'uyuriwe.
PSA 56:5 Tukarikɨ neniuki mekanititunani, kememɨnetenanaimani xeikɨa, mɨpaɨ mekateniku'eriwani.
PSA 56:6 Mekanenihupieka xeikɨa, kwi mekaniyɨaka menetsimiekutɨ kwi xeikɨa mekanenixeiyani kenemɨtiyuriene.
PSA 56:7 Nekakaɨyari, 'ahaxɨakɨ mɨkɨ teɨteri keniwarunanaima. Nitɨma memuyuta'una pepɨkawapitɨaka.
PSA 56:8 'Ekɨ pepi'inɨata kenemɨtiyuku'unane, puteyutsie ne'ukai pepɨkatua. ¿Kamɨtsɨ pekareye'utɨa?
PSA 56:9 Kepauka ne parewiya nemɨmetsitawawirieni, memɨnetsi'aye'unie mekanitanautsaxɨakuni. Ne mɨpaɨ nekatinimaika: Kakaɨyari nehamatɨa puyeika.
PSA 56:10 Kakaɨyari hetsie nepɨtiwiya, niukieya nepɨnɨawa, Yawé hetsie nepɨtiwiya, niukieyatsie nepɨnetemawie,
PSA 56:11 Kakaɨyari hetsie nepɨtiwiya, ne nepɨkaheuma. ¿Ketitarikuta tewi netimakaka 'atsimɨkatiuyuriwe?
PSA 56:12 Kakaɨyari, ne 'ahetsiemieme nepɨnetipiniri, ne kenemɨtiyutemawie nepumatitimawirieni.
PSA 56:13 'Ekɨ Kakaɨyari, nemekawautsetsie pepɨnetsi'ɨxɨnaxɨ, teukiyapa pepɨnetsi'ayeha, yuheyemekɨ 'ahɨxie nemɨmienikɨ tukarikɨ hekɨariyatsie.
PSA 57:1 Teyuitɨwamete wa'ukiyari. Yuariyaya xekeneuweiyani «Pepɨkawaka'unani». Rawiri 'utɨarikaya, kepauka Rawiri terɨta mayekatei 'uyu'unarɨmetɨ Tsahuri makatɨ. Xɨa'ui Kakaɨyari, kenenenenimayaka, keneneutinenimayata, ne 'ahetsie nepɨtiwiya. 'A'anate 'etɨriyayatɨa nepɨneti'awieta, naitɨ 'uximatɨarika ranuyeyayuke nepuwayeyani.
PSA 57:2 Kakaɨyari 'Amutewi nekanahiwiwani, Kakaɨyari kemɨ'ane mɨnetsiparewie.
PSA 57:3 Muyuawitsie paitɨ 'akawetɨ kaneniutawikweitsitɨwani, kemɨ'ane memɨnetsi'uweiya menetsimienike kaniwatate'ani. Kakaɨyari yunaki'eriya meta tita yuri mɨraine kanenanɨ'airiemɨkɨ.
PSA 57:4 'Ɨrawetsixi teyukwa'amete wahixɨapa nekaniuweni, teɨteri me'ayu'eririyatɨ ne'aurie mekanawetɨkani. Watamete 'ɨrɨ meta pitsika kanihɨkɨtɨni. Waneni, 'ixipara mataxikauni kanihɨkɨtɨni.
PSA 57:5 Peru 'ekɨ, Kakaɨyari, muyuawi reuyeta peputewi, 'axawatɨriya kwie naime kehekɨariwiyani.
PSA 57:6 Winiyari nehuyeta mekaniuwieni, 'ana nekanewaɨriyatɨ nepatɨa. Nehuyeta mekanewatixawarita, peru mɨkɨ pɨta muwa mepeukaxɨri.
PSA 57:7 Kakaɨyari, ne'iyari pɨheitserie, ne'iyari puyuwaɨriya. Nɨawari 'ahetsiemieme nepɨtikwika.
PSA 57:8 Ne 'iyari, kenanutanieri. Kanari meta xaweri xekenanutanenieri. Hekwame tukari tepanutahɨtɨani.
PSA 57:9 Ti'aitame, nepɨmetsinɨawani teɨteri watsata, nɨawari 'ahetsiemieme nepɨtikwika nuiwarite wahɨxie.
PSA 57:10 'Anaki'eriya mɨmariwe muyuawitsie paitɨ mɨye'axekɨ, Yuri kepemɨtarahɨawe haitsie paitɨ pɨye'axe.
PSA 57:11 'Ekɨ, Kakaɨyari, muyuawi reuyeta peputewi, 'axawatɨriya kwie naime kehekɨariwiyani.
PSA 58:1 Teyuitɨwamete wa'ukiyari. Kwikarieya xekeneuweiyani «Pepɨkawaka'unani». Rawiri 'utɨarikaya. ¿Kamɨtsɨ xeme 'itsɨkate, 'aixɨa 'anemekɨ xete'aita, yemekɨ xetewaheitseritɨa kepauka teɨteri xemɨxanetɨarie?
PSA 58:2 Matsi pɨta wa'atɨ, yu'iyaritsie kemɨkatiheitserie xeteku'eriwa, meta xenanaimarika mɨkɨ kwieyaritsie kanihekɨaka.
PSA 58:3 'Axateyuruwamete 'amɨtitinuiwatsie 'axameteyurietɨ mekanakɨkani, kemɨ'ane memɨte'itawa yumaamama wahetsie paitɨ meyetetɨ mekaneuyexɨrɨweni.
PSA 58:4 Kuuterixi mɨyakame kememɨtehexeiya hepaɨ 'aneme mepexeiya, kuu 'amumu'uyewa hepaɨ kaheu'enatɨ mayuyeitɨwa
PSA 58:5 ka'i'enimɨtɨ timaiweme yuitɨarikaya, tsepa kepauka mɨti'uximaya waɨkawa tiwareutayuitɨiriewetɨ kuuterixi.
PSA 58:6 Kakaɨyari, keniwaranaye'uniri watamete, Yawé, mɨkɨ mayetsi watamete 'amɨtɨtɨ keniwaranatihapaniri.
PSA 58:7 'Amamatetsie haa hepaɨ meke'ukakunetɨkɨne, kepauka yutupi memahapani wa'ɨrɨ kehakamurixɨani.
PSA 58:8 Kɨrɨpu 'aɨrikaya mɨkareutetere hepaɨ meke'ɨyɨni nunutsi mɨkitɨ mutinuiwaxɨ hekɨariya mɨka'uxei hepaɨ.
PSA 58:9 'Atsimekatemaitɨ, xuya hepaɨ meke'anutatani, 'eka keware'enitsitɨani, tsepa memɨyuyuri yatɨni memɨwawaki.
PSA 58:10 Heitserie mexeiya puyukatemawieni kepauka mɨniere petiwarakapitɨwakaku, Kakaɨyari mɨka'ayexeiya xuriyayatsie yewetɨ.
PSA 58:11 Hikɨ teɨteri mɨpaɨ mepɨtiyuani: «Puyuri heitserie memu'uwa mepɨte'akapitɨariwa yu'iwarikakɨ, puyuri xewitɨ Kakaɨyaritɨtɨ 'apuyeika kwiepa heitserie tiyurienetɨ».
PSA 59:1 Teyuitɨwamete wa'ukiyari. Kwikarieya xekeneuweiyani «Pepɨka'ika'unani». Rawiri 'utɨarikaya, kepauka Tsahuri mɨtiuta'ai Rawiri kiiya mɨhɨriekakɨ meta mɨmierienikɨ. Xɨa'ui, Kakaɨyari, keneneutawikweitsitɨa memɨnetsi'aye'unie wahetsɨa, nehetsie kenenuaka nemɨmierienekɨ.
PSA 59:2 'Axateyuruwamete wahetsɨa keneneutawikweitsitɨa, meta memɨteyumemiwa wahetsɨa.
PSA 59:3 Keniwaruxeiya kememɨnetehupietɨwe. Yawé, teɨteri 'axamete'u'iyaritɨ mekanenimiekuni tsepa ne 'axanekatiyuriene.
PSA 59:4 Mekaniyumexɨitɨaka me'aye'axɨanike tsepa ne 'axanekawayuriene. Xeiya kenaye'a keneneuparewi. Keneneuxeiya hikɨ kenemɨ'ane.
PSA 59:5 'Ekɨ, Yawé, Kakaɨyari pepɨhɨkɨ Naimekɨmɨtɨrɨkaɨye. 'Ixaheri Kakaɨyarieya pepɨhɨkɨ. Xeiya kenanukukeka keniwaru'uximatɨa yunaime nuiwarite, pepɨkawanenimayaka mɨkɨ memɨteyukananaima.
PSA 59:6 Tɨkarikɨ mekani'axeni, tsɨikɨri wahepaɨ mete'uyuhaxɨatɨwatɨ kiekari warita mekaneuhupatɨkani.
PSA 59:7 Mekanatakwaimuxatɨkani yutenie, 'ixipara yuteta mekanatinenetɨwani, mɨpaɨ me'utiyuatɨ: «Kemɨ'ane kuta pɨtatsi'enie».
PSA 59:8 'Ekɨ matsi, Yawé, xɨa'ui pepaine wahetsiemieme, pepanawe nuiwarite wahetsiemieme.
PSA 59:9 'Ekɨ, netɨrɨkariya pekanihɨkɨtɨni, 'ahetsɨa nepeutaniere, 'ekɨtsɨ, Kakaɨyari, nehetsie nunuwame pekanihɨkɨtɨni.
PSA 59:10 'Ekɨ Kakaɨyari pekanihɨkɨtɨni pemɨnetsinaki'erie, pe'anuyekaitɨ pekaniyemieni nehɨxie pemɨwareka'unakɨ memɨnetsi'aye'unie.
PSA 59:11 Peru pepɨkawarekukukuyani, neteɨterima memɨkatehatɨtɨmaiyanikɨ. Keniwaranutarɨwaitɨaxɨa kepemɨtitɨrɨkaɨye, haweri keniwaruyuri. Tati'aitɨwame, 'ekɨ tahetsie nunuwame pekanihɨkɨtɨni.
PSA 59:12 Yutetakɨ 'axamemutiyuanekɨ, yuniukikɨ 'axamemɨteyuriekɨ, kememɨteyutimariwekata winiyaritsie meke'ukaxɨrieni. Memɨteyukakwatsekɨ 'itarikakɨ memutiniukakɨ,
PSA 59:13 keniwarutixɨtsitɨa 'ahaxɨakɨ, yemekɨ keniwarutixɨtsitɨa memɨka'u'uwanikɨ. 'Ana yumɨiretɨ mɨpaɨ mepɨtehetimani kename 'aku 'ixaheritsixi wahetsie Kakaɨyari ti'aita, metatsiere kwie manu'axe paitɨ.
PSA 59:14 Mɨkɨtsɨ tɨkarikɨ mekani'axeni, tsɨikɨri wahepaɨ mete'uyuhaxɨatɨwatɨ kiekari warita mekaneuhupatɨkani.
PSA 59:15 Mana mekaniu'uwani tsepa hakewa 'ikwai meheuwautɨkaitɨ, xɨka mekahuxaka mekaniutitsuanani.
PSA 59:16 Ne matsi 'atɨrɨkariya nepɨnɨawani, ximerita 'anaki'eriya nepɨnɨawani, 'ekɨ nehetsie nunuwame pemɨhɨkɨkɨ, kepauka nemu'uximatɨarie 'ahetsɨa nepɨneti'awiwieta.
PSA 59:17 'Ekɨ netɨrɨkariya pekanihɨkɨtɨni, nɨawari nepɨtikwika 'ahetsiemieme, 'ekɨtsɨ, Kakaɨyari, nehetsie nunuwame pekanihɨkɨtɨni. 'Ekɨ Kakaɨyari pekanihɨkɨtɨni pemɨnetsinaki'erie.
PSA 60:1 Teyuitɨwamete wa'ukiyari. Yuariyaya xekeneuweiyani «Tuturi tɨratuyari». Rawiri 'ɨkitɨarikaya, kepauka 'arameutsixi muwarutakwi Metsuputamiya yeta kiekatari meta Tsiriya hixɨapa kiekatari, meta kepauka Kuhawi makunua tawarita tamamata heimana huta miriyari (12.000) 'erumitsixi muwarukwi mayeweri Maye'unaya mɨrayetewatsie. Neuxei, Kakaɨyari, 'ekɨ pepɨtatsihexɨri 'ekɨ pepɨtatsi'utatsanaxɨ, pepɨtatsi'uyehekaxɨ, hikɨ 'aixɨa ketaneuyuri.
PSA 60:2 Kwie pekaniutayuitɨani, pekanitatsiniya, 'aixɨa keneuyuri mukatataritsie, karikɨ kaneuku'unikeni.
PSA 60:3 Waɨkawa temɨta'inɨatsienikɨ pepɨtatsi'upitɨa, winu pepɨtatsi'u'itɨa mɨtawaiya.
PSA 60:4 'Ahetsie memɨtewiya 'inɨari keniwaruwewiri memɨyuta'unakɨ temɨmɨmete wahɨxie.
PSA 60:5 'Atseriekɨ ketaneutawikweitsitɨa, ketaneta'eiya 'ateɨterima pemɨwanaki'erie memɨtawikwenikɨ.
PSA 60:6 Kakaɨyari mɨpaɨ kanaineni yutukita: «Tsikeni nepɨtixiteni nerane'iwatɨ, meta mayeweri Tsukuti nepuwati'inɨatsirieni wakwie.
PSA 60:7 Karaha nehetsɨa mieme kanihɨkɨtɨni, Manatsexi nehetsɨa mieme kanihɨkɨtɨni, 'Epɨrahini kuya menaketsa kanihɨkɨtɨni nemu'utsie nunuwame, Kura meta ne'itsɨ kanihɨkɨtɨni.
PSA 60:8 Muhawi hetsie nekaniukamaimawani, 'Erumi hetsie nekakai nekaneutaxɨrɨwani, Piritsiteu kwieyari hetsie nekanahiwani tetehayu'iwaka».
PSA 60:9 ¿Kemɨ'ane pɨnetsi'anuwitɨni kiekari mahɨrietsie? ¿Kemɨ'ane 'Erumi huyeyari pɨnetsixeitsitɨani?
PSA 60:10 'Ekɨ pekanihɨkɨtɨni, Kakaɨyari, kemɨ'ane mɨtatsi'uku'eiri, Kakaɨyari, tawariri takuyaxima wahamatɨa pepɨka'ayeyeika.
PSA 60:11 Ketaneuparewi memɨtatsi'aye'unie wahepaɨtsita, neuxei tixaɨtɨ pɨkatiyunaki'erie tewi parewiyaya.
PSA 60:12 Kakaɨyari tatsiparewiekaku tepɨtehayu'iwa, mɨkɨ memɨtatsi'aye'unie pɨwatiketsini.
PSA 61:1 Teyuitɨwamete wa'ukiyari. Kanaritsie xekeneutikwikani. Rawiri nɨawarieya. Kakaɨyari, nehiwari keneu'eni nenenewieri kene'enieka.
PSA 61:2 Kwie manu'axe paitɨ ne nepɨmetsihahɨawe, ne'iyaritsɨ kanimɨximeni, 'ai heima kenenetuamie muwa nemekuwikwenikɨ.
PSA 61:3 'Ekɨ netsi'awiwietame pepɨhɨkɨ, pemɨnetsitɨrɨkariya memɨnetsi'aye'unie wahetsiemieme.
PSA 61:4 Nepeiyehɨwa 'akie nemukanikɨ yuheyemekɨ nemɨne'awietanikɨ 'a'anatetɨa.
PSA 61:5 'Ekɨ, Kakaɨyari, kenemɨtinehɨritɨa pepu'eni kemɨ'ane memɨmetsi'ayexeiya kepemɨtiwamikwa neta pepɨnetiyetuiri.
PSA 61:6 Kwiepa ti'aitame waɨkawa tukari wiyari keneupitɨa, tukari kaxɨweme keneupitɨa.
PSA 61:7 Keti'aitani 'ahɨxie yuheyemekɨ, 'anaki'eriya meta 'aniuki yuri maine ke'i'ɨwiyani.
PSA 61:8 Mɨpaɨ nepɨtiukwikani 'ahetsiemieme meta nepeye'atɨani kenemutayɨ tukari mɨyehane.
PSA 62:1 Teyuitɨwamete wa'ukiyari. Kerutuni hetsiemieme. Rawiri nɨawarieya. Kakaɨyari hetsie xeikɨa ne'iyari puka'uxipiwe, mɨkɨ hetsɨa xeikɨa newikweitsitɨarika payeneika.
PSA 62:2 Mɨkɨ xeikɨa ne'ai 'amautitewa pɨhɨkɨ netsiwikweitsitɨwame, mɨkɨ nehetsie nunuwame pɨhɨkɨ. Hatsuaku nepɨkahatiweni.
PSA 62:3 ¿Kepaukake xeme xeyunaitɨ xepɨtehayewa xe'imietɨwetɨ xeime tewi xemetihɨanikɨ? 'Ixumeri matiwexime hepaɨ kani'aneni, kuraru mɨta'unirɨme hepaɨ.
PSA 62:4 Hakewa meka huyeripana xeikɨa mana mepiweiyaku. 'Itarikatsie temawierika mepexeiya: 'aixɨa mepɨtehatahɨawe yutenikɨ, yu'iyarikɨ 'axametehaku'eriyatɨ.
PSA 62:5 Kakaɨyari hetsie xeikɨa ne'iyari puka'uxipiwe, mɨkɨ xeikɨa nepɨtakwewie.
PSA 62:6 Mɨkɨ xeikɨa ne'ai 'amautitewa pɨhɨkɨ netsiwikwetsitɨwame, mɨkɨ nehetsie nunuwame pɨhɨkɨ hatsuaku nepɨkahatiweni.
PSA 62:7 Kakaɨyari netsiwikweitsitɨwame pɨhɨkɨ witsine'aneme pɨnetsi'ayeitɨa, 'ai 'amautitewa nehetsie nunuwame kanihɨkɨtɨni, hakewa nemeneti'awieta Kakaɨyari hetsɨa katini'aneni.
PSA 62:8 Hetsiena yuheyemekɨ xeketenewiyani, teɨteri hetsɨana miemete, 'a'iyaritsie ketineuyepiri kepauka hɨxiena pemuwe. Kakaɨyari tahetsie nunuwame kanihɨkɨtɨni.
PSA 62:9 Mɨkɨ teɨteri 'eka hepaɨ mekani'aneni, kemɨ'ane tixaɨtɨ memɨkatehayuyeitɨa, teɨteri memamariwaweme memayuyeitɨa 'itarika mepɨhɨkɨ, yunaime mɨkɨ xɨka waranuyewieni, yunaitɨ mɨkɨ mepɨkahahete.
PSA 62:10 'Axamɨti'anetsie xepɨkatewiyani witsixepɨkateku'eriwani yu'inawarikɨ, tsepa xepiinite mɨtiutimɨirixɨ, mɨkɨ hetsie yu'iyari xepɨkatewiyatsitɨaka.
PSA 62:11 Kakaɨyari yurikɨ pɨraxaxata, ne hutakɨa nepi'eni: 'Ekɨ, Kakaɨyari, pepɨtɨrɨkaɨye,
PSA 62:12 'ekɨ, Tati'aitɨwame, pepɨti'akanaki'erie waɨkawa, 'ekɨ yuxexuime yunaime yapepɨtiwarakapitɨwa kememɨte'uyurikɨ.
PSA 63:1 Rawiri nɨawarieya, kepauka makumawetsie muyeikakai Kura kwieyaritsie. Kakaɨyari, 'ekɨ pepɨnekakaɨyari, ne yemekɨ nepɨmetsiwaune. Ne 'iyari 'akɨmana peuharimɨkɨ, yemekɨ nemetsiheuyehɨwa, kwie mɨwaki haa meuyehɨwa hepaɨ.
PSA 63:2 'Atukita nemetsihaxeiyawe 'atɨrɨkariya meta kepemɨtimariwe nepuxei.
PSA 63:3 'Anaki'eriya 'aixɨa matsi pɨ'ane keyuri tukari, 'Ayumieme ne nepɨmetsinɨawani.
PSA 63:4 'Aixɨa nepaineni 'ahepaɨtsita mexi'akuxi ne'uyeika, nepɨmetsihahɨaweni teikɨ nehemetɨ.
PSA 63:5 Ne'iyari 'aixɨa pɨtika'erieni 'ixɨararipa waɨkawa mɨratikwaiwa hepaɨ, waɨkawa yemekɨ nenetemawietɨ, nepɨmetsinɨawani.
PSA 63:6 Ne'utatsie ne'ukaitɨ nepɨmetsiha'eriwa, nepɨmetsiku'eriwa tɨkarikɨ.
PSA 63:7 'A'anate 'etɨriyayatɨa nepɨkwikani, 'ekɨtsɨ netsiparewiwame pekanihɨkɨtɨni.
PSA 63:8 Ne'iyari yuheyemekɨ 'ahetsie pɨtiwiya, 'amamá 'atserieta mieme pɨnetsikuhana.
PSA 63:9 Kemɨ'ane memɨnetsimieku mepɨka'unarieni, kwieta meukatewatsie mepɨkayune.
PSA 63:10 'Ixiparakɨ mepɨkwi'iwa yawixi memayu'eririya mepɨwatikwani.
PSA 63:11 Ti'aitame Kakaɨyari hetsiemieme puyutemawieka, yunaitɨ kemɨ'ane Kakaɨyari memahɨawe mepitanɨawa, peru memɨte'itawa kayuwatɨ mepɨpitɨarieni.
PSA 64:1 Teyuitɨwamete wa'ukiyari. Rawiri nɨawarieya. Kakaɨyari, neniuki keneu'eni nekukuiniya hepaɨtsita nemaniuka, kenene'ɨwiyani memɨnetsi'aye'unie nemɨkawamakaxenikɨ.
PSA 64:2 Keneneuti'awieta mɨkɨ Kakaɨyari memɨka'ayexeiya memɨnetsi'uweiyakɨ, mɨkɨ 'axamemɨte'u'iyari wahɨxie.
PSA 64:3 Yuneni mepɨmɨwa 'ixipara hepaɨ, meputiniuka niuki 'axa'anɨyɨnemekɨ 'ɨrɨkɨ memɨte'utamɨmɨni hepaɨ.
PSA 64:4 Mehupatɨri, hetsiena mɨkatiuhɨiwa meputamɨmɨ, meka'imariyatɨ 'atsimekatehehɨawetɨ.
PSA 64:5 Kakaɨyari memɨka'ayexeiya yunaitɨ yemekɨ kememɨtexata mepɨyuwaɨritɨa, mepi'inɨata kehepaɨ winiyari memɨtewieni, 'akuxi matsi mɨpaɨ mekaniutiyuaneni: «¿Kemɨ'ane 'aku pixeiya?»
PSA 64:6 Tita mɨkatiheitserie mepɨteku'eriwa, mɨpaɨ meputiyuane: «Yemekɨ 'aixɨa tepɨteku'eriwa». Yemekɨ pɨkayumatiwanɨa teɨteri wa'iyaritɨarika.
PSA 64:7 Peru Kakaɨyari wa'ɨrɨkɨ pɨwatimɨni, 'atsimekateha'eriwatɨ mepatixɨrieni mete'uka'eniwatɨ.
PSA 64:8 Yunenikɨ haweri 'anekɨa mepuyutixɨrieni, kehate memɨwaxeiya mepɨwata'atse.
PSA 64:9 Yunaitɨ teɨteri mepɨtimamani: Kakaɨyari kemɨtiuyuri pɨtaxatsieni 'uximayatsikaya mepuku'eriwani.
PSA 64:10 Heitserie memexeiya Yawé hetsie mekeyutemamawieka, hetsiena hakewa memeyu'awietani meke'utiwauni, yunaitɨ 'iyari heitseriemekɨ memexeiya meke'inɨawani.
PSA 65:1 Teyuitɨwamete wa'ukiyari. Rawiri nɨawarieya. Kwikari. 'Ekɨ, Kakaɨyari 'aku Tsiyuni mieme, Nɨawari pɨ'ahetsiemieme. 'Ekɨ matsi peuyewetse ketemɨteyɨhɨritɨa temɨmete'aye'atɨiriwani,
PSA 65:2 'ekɨtsɨ nenewieri pekani'enieka. Yunaitɨ teɨteri 'ahetsɨa mepɨye'axe,
PSA 65:3 'axamemɨte'u'iyarikɨ. 'Axaketemɨteyurie mɨkɨ pɨtatsihatixɨrɨwa, 'ekɨ matsi pepɨtareuyehɨwirie.
PSA 65:4 'Aixɨa ke'itɨarieka 'iya kemɨ'ane 'ekɨ pemanayexei, 'iya kemɨ'ane 'ahetsɨa pemɨ'atɨa 'atakwa mukanikɨ. 'Akie timieme 'aixɨa mɨti'anekɨ tekehuxaka, kepemɨtatiumi 'atuki mɨpatsieta timiemekɨ.
PSA 65:5 'Ekɨ, Kakaɨyari 'aku tatsiwikweitsitɨwame, pepɨtatsiku'eiya mariwemekɨ heitseriemekɨ, 'ekɨ pepɨtakwewiya naitsarie kwie manu'axe paitɨ meta haramara manu'axe paitɨ.
PSA 65:6 'Ekɨ, 'atɨrɨkariyakɨ, hɨri peputiwewi, kepemɨtitɨrɨkaɨye pepɨtiuyuri.
PSA 65:7 'Ekɨ matsi haramara ha'akaku pepinɨtɨa, hamewarieya kemɨtiuyuanekai, meta teɨteri wahiwari.
PSA 65:8 Yunaitɨ naitsarie kwiepa memɨtama mepɨmama mariwemekɨ kepemɨtiyuriene, tau manatineika meta makayuyuipike 'ekɨ kwikari witsi'anɨyɨneme pepɨwapitɨa.
PSA 65:9 'Ekɨ peti'ɨwiyatɨ kwiepa pepɨtiweriya, waɨkawamekɨ pepɨtiweriya. Kakaɨyari 'akiteyatsie haa pɨhɨpɨne, tɨriku teɨteri memexeiyanikɨ. Mɨpaɨ kwie 'aixɨa pekaniyurieka.
PSA 65:10 Xuruku hakɨ pepɨhatuiya, haxu pepɨtipeniya pepekuweririta, kwie pepɨyumenariya wiyerikɨ meta tita mɨtitineika 'aixɨa pepɨtiyurie.
PSA 65:11 'Ekɨ xeiwitari xeitaxari pepikemaritɨa waɨkawa petixuaweritɨatɨ, kaxetate pɨtihɨpɨrike waɨkawa mɨtixuawekɨ.
PSA 65:12 'Ɨxa pɨtsitsiɨrawi makuwakitsie mieme, yemurite temawierika kamixateyari panakatɨkɨ.
PSA 65:13 Mukuweweritsie tewaxi kiekari hepaɨ mepɨteyuxexeiya, mayeweweritsie tɨriku pɨhɨkɨa, meputikwika meputihiwa temawierikakɨ.
PSA 66:1 Teyuitɨwamete wa'ukiyari. Kwikari. Nɨawari. Kakaɨyari xekenehiwieka yutemawierima, yunaitɨ teɨteri kwiepa xemɨtama.
PSA 66:2 Nɨawari hetsiena mieme xekeneutikwikani, Kakaɨyari witsikemɨ'ane kwikari xekenepitɨaka.
PSA 66:3 Kakaɨyari mɨpaɨ xeketeneutahɨawi: «Yemekɨ pɨmamariwawe 'a'uximayatsika. Pɨmariwe 'atɨrɨkariya memɨmetsi'aye'unie 'ahɨxie memamatɨ mepuyuyetua.
PSA 66:4 Yunaitɨ kwiepa memɨtama 'ahɨxie mepukahɨxima'uwe, memetsitanɨawake, kwikari 'ahetsiemieme mepɨtikwika».
PSA 66:5 Xekenakɨni xeketeneuxeiya Kakaɨyari kemɨtiyurieni, tahetsiemieme mariweme kemɨtiuyuri,
PSA 66:6 Haramara 'akuwakime kanayeitɨani, teɨteri me'uhutɨ mana mekaniukɨne. Tepɨyutemamawieka hetsiena.
PSA 66:7 Yutɨrɨkariyakɨ pɨti'aita yuheyemekɨ, naitsarie nuiwarite puwaxeiya. 'Axamemɨte'u'iyari hetsiena mepɨkate'uhɨpani.
PSA 66:8 Yunaitɨ teɨteri, 'aixɨa xeketenekɨhɨaweni takakaɨyari, kwikari hetsiena mieme 'eniɨriɨkɨme xekenayeitɨa.
PSA 66:9 Mɨkɨ tatukari kani'ɨwiyani, pɨtatsi'ɨwiya temɨkahekaxɨrɨwenikɨ.
PSA 66:10 Kakaɨyari 'aku, 'ekɨ pepɨtatsi'uta'inɨataxɨ, tepɨa pɨrata hepaɨ 'aixɨa pepɨtatsi'utiyuri.
PSA 66:11 Winiyaritsie pepɨtatsi'ukaxɨri, takwatsapaɨ 'ika raheteme pepɨtatsi'utitɨtɨa.
PSA 66:12 Kawayutsixi taheima mepuyekɨ, tamu'ute meputitaraxɨ, taipa tepuyekɨ meta hapa, matsi 'imatɨrieka 'aixɨa 'anemekɨ tepupitɨarie.
PSA 66:13 'Atukita nepeutahani mawari taiyariyari nepɨmatsipitɨani meta kenemutayɨ nepɨraye'atɨani,
PSA 66:14 netenikɨ kenematiutahɨawixɨ meta kenemutayɨ netiuka'eniwatɨ.
PSA 66:15 Mawari taiyariyari nepɨmetsiwewirieni tewaxi memɨwaiyatɨkakɨ, muxatsi 'ukitsi wamawari kɨtsiyari wahamatɨa, tuurutsixi nepɨmetsitimawirieni meta tsipuri 'ukitsi.
PSA 66:16 Xeme xekenakɨni, Kakaɨyari xemɨmakaxe, xekeneu'enana, nepɨtixetaxatɨani mɨkɨ kemɨtiuyuri naime nehetsiemieme.
PSA 66:17 Netenikɨ nekanitahiwieni, nenenikɨ nekanitanɨawa.
PSA 66:18 Xɨka ne'iyaritsie 'axamɨti'ane neranukananike, Ti'aitame pɨkanetsi'enienikekai,
PSA 66:19 peru neuxei Kakaɨyari kaneniu'enieni, yakatiniuyurieni kenemɨtitahɨawixɨ netiuka'eniwatɨ.
PSA 66:20 'Aixɨa ke'itɨarieka Kakaɨyari, nenenewieri manu'enikɨ yunaki'eriya mɨkanetsi'utikweririkɨ.
PSA 67:1 Teyuitɨwamete wa'ukiyari. Kanaritsie xekeneutikwikani. Nɨawari. Kwikari. Kakaɨyari ketatsinenimayaka meta 'aixɨa ketatsiyurieka. Kakaɨyari tahetsie matsiɨkɨme ke'ayuyeitɨaka,
PSA 67:2 'ena kwiepa huyeya mɨxeiyariekakɨ, meta yunaitɨ nuiwarite meke'imaika wikweitsitɨarikaya.
PSA 67:3 Kakaɨyari 'aku, teɨteri mekemetsitemawieritɨaka, yunaitɨ teɨteri kwiepa memɨtama mekemetsinɨawani.
PSA 67:4 Xekeneyutemamawieka nuiwarite meta xekeneutikwikani yutemawierima, 'ekɨ wahetsɨa pemɨti'aitakɨ heitseriemekɨ, nuiwarite kwiepa memɨtama pepɨwaruwitɨxime.
PSA 67:5 Kakaɨyari 'aku, teɨteri mekemetsitemawieritɨaka, yunaitɨ teɨteri kwiepa memɨtama mekemetsinɨawani.
PSA 67:6 Hikɨ kwie yu'ikwaxi pɨtixuawitɨani, Kakaɨyari 'aixɨa pɨtiyurieka, mɨtakakaɨyari.
PSA 67:7 Kakaɨyari 'aixɨa pɨtatsiyurieni, mepitimakani yunaitɨ naitsarie kwiepa memɨtama.
PSA 68:1 Teyuitɨwamete wa'ukiyari. Rawiri nɨawarieya. Kwikari. Kakaɨyari 'akeneutakexi, memɨmetsi'aye'unie mekeheutaweiyariexɨani, meke'uyuta'una kemɨ'ane memi'uxie.
PSA 68:2 Yunaitɨ meke'ukumawere, kɨtsi 'ekatsie mɨtiupaparike hepaɨ, Kakaɨyari memɨka'ayexeiya Kakaɨyari hɨxie meke'ukumawere, xɨrɨka taipa kemɨtiutakwanike hepaɨ.
PSA 68:3 Matsi heitserie memexeiya mekeyutemamawieka pɨta, Kakaɨyari hɨxie meke'utikwikani yemekɨ.
PSA 68:4 Kakaɨyari xekenenɨawani, kemɨtiuka'iyari nɨawariyari, xekenehiwieka kemɨ'ane haiwitɨritsie 'akaitɨ mukuyeika, hɨxiena xekeneyutemamawieka. Yawé katinitewaka.
PSA 68:5 Nutuite wa'ukiyari, wiuraxi wahetsie nunuwame Kakaɨyari kanihɨkɨtɨni yutuki mupatsieta 'ayekaitɨ.
PSA 68:6 Kakaɨyari kii puwaxatɨa kemɨ'ane memexɨriya meta pɨwaxɨna kemɨ'ane memehapanie, kemɨ'ane memɨtehayuye'unie makuwakitsie mepuyuhayewa.
PSA 68:7 Kakaɨyari 'aku, kepauka pemayetɨa 'ateɨterima wahɨxie, kepauka makumawetsie pemɨwarayewitɨtɨya,
PSA 68:8 kwie kaniutayuani, meta muyuawitsie waɨkawa wiyeri kanakaneni, Kakaɨyari hɨxie, Tsinahi mieme Kakaɨyari. Kakaɨyari hɨxie, 'ixaheritsixi wakakaɨyari.
PSA 68:9 Kakaɨyari 'aku, 'ekɨ waɨkawa wiyeri pepeyenɨ'a, 'aixɨa pepiyuri kwie tahetsiemieme.
PSA 68:10 'Atɨɨriyama kwiepa mepɨtamarixɨ, Kakaɨyari 'aku, petiu'akanaki'erietɨ 'aixɨa pepɨtiuyuri tixaɨtɨ mɨkarexeiya hetsiemieme.
PSA 68:11 Tati'aitɨwame yuniuki kaniyetuani, yumɨiretɨ hikɨ 'ukari mepikuxata:
PSA 68:12 «Mekaniuyu'unarɨmeni te'aitamete meta wakuyaxima, kiita memɨteheku'eiri, 'ukarawetsixi piinite mekateniyutapitɨwani:
PSA 68:13 kukuru 'anateya pɨrata mɨkawiriyarietɨka, 'anɨteya huru mɨxawawatɨ pɨhɨkɨ. 'Ekɨ pepeuku muxatsi watsata».
PSA 68:14 Kepauka Naimekɨmɨtɨrɨkaɨye te'aitamete kwiepa memɨtama mɨwarutawei, 'ɨwi hepaɨ mepɨteyuxexeyakai kemɨtika'unike hepaɨ Tsarimuni hɨriyaritsie.
PSA 68:15 Watsani hɨriyari, hɨri mɨmamariwawe, Watsani hɨriyari, hɨri kwinimieme mutɨtɨ:
PSA 68:16 ¿Titayari hɨri kwinimieme mɨtɨtɨ kwi mete'ixexeiya me'ɨtetsatɨ, mɨkɨ hɨri Kakaɨyari minake mana muyeikanikɨ, hakewa Yawé yuheyemekɨ meyeikani?
PSA 68:17 Kaxetate kuyaxa mieme Kakaɨyari tipiinieya xeimiriyaritsixi mekaniyu'inɨatani, Tsinahi paitɨ yeyaka Ti'aitame wahamatɨa kaninuani yutukita meutahanikɨ.
PSA 68:18 Yawé Kakaɨyari, kepauka 'ekɨ pemanutitɨa taheima, pepɨwarewitɨ memanutaxɨriya, waɨkawa 'imikieri pepɨrepi teɨteri memɨmeteyetuiri, metatsiere memayu'eririya tiwapiini, mana wahamatɨa pemeyutakiitɨanikɨ.
PSA 68:19 'Aixɨa ketikuxaxatsiwani Tati'aitɨwame, takakaɨyari meta tatsiwikweitsitɨwame, tukari manukayeika ta'ikakɨ pɨtatsiparewie.
PSA 68:20 Takakaɨyari, Kakaɨyari tiyuwikweitsitɨwame pɨhɨkɨ, Yawé Tati'aitɨwame pɨkatatsipitɨa temɨkwinikɨ.
PSA 68:21 Kakaɨyari kemɨ'ane memaye'unie mɨkɨ wamu'u pɨtipɨna, wakɨpate witsimɨ'anene 'axameteyurietɨ memu'uwa.
PSA 68:22 Ti'aitame mɨpaɨ kanaineni: «Watsani nekanixe'akunuitɨamɨkɨ, haramara meukatewatsie nepɨxehatiwitɨni,
PSA 68:23 memɨxe'aye'unie waxuriya xe'ɨkatetsie ke'utiwiriere, mɨkɨta tsɨikɨri me'itsename yuhetsie timieme memɨtehexeiyanikɨ».
PSA 68:24 Tukita mepuyuhekɨa xuruku me'utɨ memetsi'ayexeiyatɨ tati'aitɨwame.
PSA 68:25 Kwikamete mepanuyetei, wa'ɨtɨma teyuitɨwamete, wahamatɨa 'ukari memɨte'utikatse.
PSA 68:26 'Aixɨa xeketenehekɨatani Kakaɨyari xeɨripa, Yawé xekenenɨawani, 'Ixaheri nuiwarimama.
PSA 68:27 Kaniwaruwitɨximeni temaikɨ nuiwari Wenikamini, wa'utɨmata yumɨiretɨ te'aitamete Kura nuiwariyaritsie miemete metatsiere te'aitamete Tsawuruni meta Nepɨtahari kiekatari.
PSA 68:28 Kakaɨyari 'aku, 'atɨrɨkariya kenanakanɨ'a, Kakaɨyari 'aku, keneuhekɨata 'atɨrɨkariya, tahetsiemieme 'aixɨa pemɨtiuyurikɨ.
PSA 68:29 'Atuki Kerutsareme muwekɨ te'aitamete mepɨmetemini 'aixɨa mɨti'ane.
PSA 68:30 Keneutati'a mɨkɨ tupiriyatsata muwe mariwetɨ 'axati'anetɨ, mɨkɨ memayu'eririya tuurutsixi nuiwarite watsata tsikerutsixi wahepaɨ memɨteyuxexeiya. Yaketineuyuri pɨrata tepɨayari mɨmetsiyetuirienikɨ 'utatsuatɨ, nuiwarite keniwarutaweiya 'axamemɨte'u'iyari.
PSA 68:31 'Ekipitu pɨwaranɨ'ani yuhetsɨa miemete, Kutsi Kakaɨyari hetsɨa punuani mɨkɨ ti'aitɨwame mayanikɨ.
PSA 68:32 Kwiepa te'aitamete 'aku, Kakaɨyari xekeneutakwikani, nɨawari ti'aitame hetsiemieme xekeneutikwikani,
PSA 68:33 kemɨ'ane haiwitɨritsie 'akaitɨ mukuyeika, muyuawi meripaitɨ mieme hetsie, niukieya mɨ'enieriekakɨ yamɨtiyuriene, niukieya mutatɨrarɨka.
PSA 68:34 Xekenemaika Kakaɨyari tɨrɨkariyaya, katini'aitani 'ixaheritsixi wahetsie, tɨrɨkariyaya meutitewatsie kanixuaweni.
PSA 68:35 Kakaɨyari 'aku, 'atukita pepɨmariwe, 'ixaheritsixi wakakaɨyari tɨrɨkari pɨtiyupitɨwa, yuteɨterima tɨrɨkariya pɨwapitɨa. Kakaɨyari 'aixɨa ketikuxaxatsiwani.
PSA 69:1 Teyuitɨwamete wa'ukiyari. «Tuturi» kwikariyari xekeneuweiyani. Rawiri nɨawarieya. Nekakaɨyari, keneneutawikweitsitɨa, nekɨipitɨa paitɨri haa puku'axe.
PSA 69:2 Nepɨkayunirɨme putsu meukatewata, titatsie nerakeni pumawe. 'Amutiyewatsie hixɨapa nepuyewie, haa muhane pɨnetsi'uhautsitɨaxime.
PSA 69:3 Nepu'uxeri parewiya neha'iwawatɨ, nekɨipitsie nepanatiwakiri. Nehɨxite pu'u'uxeri, Kakaɨyari parewiyaya netakwewietɨ.
PSA 69:4 Nekɨpate kemɨpaɨme reuyeta mepɨyupaɨme memɨnetsixani'erie yakɨxeikɨa, mepuyumɨire memɨnetsi'aye'unie 'itarikakɨ memɨnetsimieku. ¿Titakuta netiyetuani nemɨkatiunawa?
PSA 69:5 Kakaɨyari 'aku, 'ekɨ pepɨtimate nemɨkayukɨhɨawekɨ, ke'axanemɨtiuyuri nemɨtiuti'awieta nepɨkayɨwe.
PSA 69:6 Yawé Tati'aitɨwame, Naimekɨmɨtɨrɨkaɨye, mepɨkatewinɨarieka ne 'axanemɨtiuyurikɨ memɨmetsitakwewie, 'Ixaheri Kakaɨyarieya 'aku, mepɨkaha'iwarieka nehetsiemieme kemɨ'ane memɨmetsikuwautɨwe.
PSA 69:7 'Ahetsiemieme nepɨtiuka'eniwa ne'utatieriwatɨ, nehɨxie nepayenɨtsa tewiyarikɨ.
PSA 69:8 Ne'iwama wahetsiemieme nemɨkamatiwani hepaɨ nekani'aneneni, 'ateewa kiekame nekanihɨkɨtɨni nemaama niwemama wahetsiemieme.
PSA 69:9 'Akii nemukweriekɨ netaɨta nepɨtaxɨtsitɨariexime, nehetsie xeikɨa katininakeni memɨmetsi'aye'unie watierika.
PSA 69:10 Kepauka nemutatsuakatsie meta kepauka nemɨnehakietsie, nekatininewiekamɨkɨ kememɨnetehahɨaweni,
PSA 69:11 kepauka hiwerika kamixayari nemanakatɨkɨtsie, 'atsieriwame nekanihɨkɨtɨni.
PSA 69:12 Kitenie memutayaxike nehepaɨtsita niuki mekanixɨatɨaka, memɨtarɨwe 'axa'anemekɨ mekaneniutakwikani.
PSA 69:13 Peru Yawé, neuxei nepumetiwawirie hikɨ 'ekɨ mɨpaɨ mumetinakekɨ. Kakaɨyari 'aku, 'anaki'eriya mɨmariwekɨ, keneneuta'eiya, 'aixɨa pemɨtikamiekɨ, keneneutawikweitsitɨa.
PSA 69:14 Kenenewatihani muyehaxuyatsie, nemɨkayunekɨ pepɨkanetsipitɨaka. Keneneɨxɨna memɨnetsixani'erie wahetsie, hata 'ameukatewatsie.
PSA 69:15 Pepɨkanetsipitɨaka haa mɨnetsihehautsitɨwanikɨ, muwatixawa 'emeukatewa mɨnetsiheukakwa'anikɨ pepɨkanetsipitɨaka, meta teukiya neheima muwiwikenikɨ.
PSA 69:16 Yawé, keneneta'eiya 'aixɨa pemɨtiuka'iyari naki'eriya pemexeiyakɨ, yemekɨ pemɨti'akanenimayakɨ, nehetsɨa kenenua.
PSA 69:17 'Ikɨ meti'uximayatsiriwame pexeiyatɨ pepɨkatikuhayeikawani, yapauka keneneta'eiya, nepɨtiuka'eniwa.
PSA 69:18 'Ahurawa kenayaka, keneneutawikweitsitɨa, keneneɨxɨna memɨnetsi'aye'unie watsata.
PSA 69:19 'Ekɨ pepɨtimate kememɨnete'ute'a, nenetewiyame mepɨnetsi'ayeitɨwa, pepɨtimate kemɨ'ane memɨnetsi'aye'unie.
PSA 69:20 Watierika ne'iyari kaniutatsana, nehetsiemiemeri xɨari pɨkayɨwe 'aixɨa mɨtiyɨni. Nenimayatsika neputiwau, nepɨka'ikaxei, nɨtɨarika neputiwau, nepɨka'itaxei.
PSA 69:21 Ne'ikwaitsie matsiwi mepɨkaye, neheuharimɨkɨkaku matsina mepɨnetsi'uharitɨa.
PSA 69:22 Wawiniyari kehayani wa'ixɨarari, memɨte'ukaxexeiya wawiniyari kehayani.
PSA 69:23 Wahɨxite ke'utiture, memɨkaheunenierenikɨ, watɨrɨkariya ke'uxɨni yuheyemekɨ.
PSA 69:24 'Ahaxɨa wahetsie keneukawiwi, 'ahaxɨa kewaranuku'axe.
PSA 69:25 Makumawe ke'ayani memakutei, waxamaru ke'uxaxawani.
PSA 69:26 Yemetsɨ kemɨ'ane pemɨ'uximatɨani kaniuweiyarieka, kemɨ'ane pemɨtikwinitɨani kaninanaimarieka mɨtiuka'eniwakɨ.
PSA 69:27 'Axakemɨtiyuriene keneutinɨitɨa waɨkawa 'axamɨti'ane, 'awikweitsitɨarikatsie pepɨkawaraye'uitɨaka.
PSA 69:28 Meke'ayeyeitɨarieni tukari xapayaritsie, heitserie memexeiya wahamatɨa mepɨka'aye'uka.
PSA 69:29 Kakaɨyari 'aku, ne tixaɨtɨ nemɨkarexeiya meta nemɨtiuka'eniwa, 'awikweitsitɨarika nehetsie kenuaka.
PSA 69:30 Kwikarikɨ nepinɨawani Kakaɨyari kemɨtitewa, pamɨpariyutsikɨ 'aixɨa nepɨrehɨaweni.
PSA 69:31 Mɨkɨ mawari matsi Yawé pinakire keyuri tuuru yatɨni tsikeru ha'awatɨ meta 'anuketatɨ.
PSA 69:32 Tixaɨtɨ memɨkatehexeiya mɨkɨ metexeiyame mepuyutemamawieka, xeme xekeneyuwaɨriyani, Kakaɨyari xemukuwautɨwe.
PSA 69:33 Karikɨ Yawé kaniwa'enieka kemɨ'ane memɨteheuyehɨwa, meta yuteɨterima memehapanie pɨkawarexɨrɨwa.
PSA 69:34 Meke'inɨawani muyuawi meta kwie, haramara meta yunaitɨ mana memɨteye'uwa,
PSA 69:35 Kakaɨyari Tsiyuni kanitawikweitsitɨamɨkɨ, meta Kura kiekariyari kananukuketɨamɨkɨ. Mana mekanikumarikuni teɨterimama kwie wahetsiemieme kanayeimɨkɨ.
PSA 69:36 Wahetsiemieme katinayeimɨkɨ te'uximayatame waniwema, Ti'aitame memɨnaki'erie mana mekanitiyaxikuni.
PSA 70:1 Teyuitɨwamete wa'ukiyari. Rawiri 'iwaurikaya. Kakaɨyari 'aku, xeiya keneneutawikweitsitɨa, Yawé, xeiya keneyumexɨitɨatɨ keneneuparewi.
PSA 70:2 Kemɨ'ane memɨnetsimieku mekeheuyuyexɨrieni meha'iwarieme. Mekeyutewiyatsitɨani mekete'uhayewa 'atsimekateyurieme, yunaitɨ kemɨ'ane memɨnetsika'unaku.
PSA 70:3 Yu'utɨma mekehekɨne, meyutetewiyatɨ, yunaitɨ kemɨ'ane haweri memɨnetsiyurie.
PSA 70:4 Matsi kemɨ'ane memɨmetsikuwautɨwe 'ahetsie mekeyutemawieka, yemekɨ, kemɨ'ane 'awikweitsitɨarika memɨnaki'erie mɨpaɨ meke'utiyuaneni: «Kakaɨyari kanimariweni».
PSA 70:5 Ne tixaɨtɨ nepɨkarexeiya yemekɨ nepɨreuyehɨwa, Kakaɨyari 'aku, xeiya kenaye'a. 'Ekɨ netsiparewiwame pepɨhɨkɨ, netsixɨname, Yawé, 'apepɨkareutewini.
PSA 71:1 Yawé, ne 'ahetsɨa nepɨne'awieta, nemɨtewinɨarieka pepɨkanetsipitɨaka.
PSA 71:2 Heitserie pemɨtiyurienekɨ, nehetsie keneutanua keneneɨxɨna, keneneu'eni, keneneutawikweitsitɨa.
PSA 71:3 'Ekɨ kenehɨkɨtɨni neterɨ muwa nemuyuti'awiwieta, muwa xeikɨa yuheyemekɨ nemeta'axeni kenehɨkɨtɨni, ketineuta'aita nemɨtawikweitsitɨarienikɨ, 'ekɨ 'ai nehetsie nunuwame pemɨhɨkɨkɨ.
PSA 71:4 Nekakaɨyari, keneneɨxɨna, 'axateyuruwamete memɨnetsiwiyakɨ, 'axateyuruwamete meta memɨteyukananaima watɨrɨkariyatsie.
PSA 71:5 Yawé, 'ekɨ Ti'aitame, nepɨmetsitakwewie, temaikɨyari paitɨtɨ 'ahetsie nepɨtiwiya.
PSA 71:6 'Ahetsie xeikɨa nepɨtiwiya nemutinuiwaxɨtsie paitɨtɨ, 'ukaratsitsie pepɨnetsiyenuiwitɨa. Yuheyemekɨ nepɨmetsinɨawani.
PSA 71:7 Yuwaɨkawame wahepaɨtsita, 'inɨari nepɨhɨkɨ, matsi 'ekɨ nehetsie nunuwame pepɨhɨkɨ pemɨkawatayuane.
PSA 71:8 Ne nepɨmetsinɨawa yemekɨ waɨkawa, tukarikɨ kepemɨtimariwekɨ nepɨtikuxata.
PSA 71:9 Kepauka 'ukiratsi nemayani pepɨkanetsihehɨpani, kepauka nemɨkayɨweni pepɨkanetsi'uku'e'eiriwani.
PSA 71:10 Metsɨ memɨnetsi'aye'unie nehepaɨtsita mieme mekatenikuxatani, kemɨ'ane memɨnetsihupie mekanenikuxatani.
PSA 71:11 Mɨpaɨ mekaniutiyuaneni: «Kakaɨyari kaniku'eirieni. Xekenanukuweiya xekenewiya, xewitɨ hetsiena pɨkahetanuani».
PSA 71:12 Nekakaɨyari, pepɨkanetsi'uku'e'eiriwani, Nekakaɨyari, xeiya kenaye'a pemɨnetsiparewienikɨ.
PSA 71:13 Nehetsie memɨte'ahɨpa tixaɨtɨ mekatehɨkɨtɨtɨ meke'ukwini, keniwarutewiyatsitɨa kemɨ'ane memɨnetsi'atihɨanikɨ memukuwaɨtɨwe.
PSA 71:14 Netsietɨ nemenitakwewieka, matsi waɨkawa nemeninɨawani waɨkawa nekaniyutemawieka.
PSA 71:15 Tukarikɨ nepikuxatani ke'aixɨa pemɨtiyuriene meta 'awikweitsitɨarika, tsepanetɨ yemekɨ naime nemɨtitaxata nemɨkayɨwe.
PSA 71:16 Yawé Ti'aitame, nepitaxata 'a'uximayatsika mɨmamariwawe, nepaye'erieni heitserie kepemɨtiyuriene, heitserie xeikɨa kepemɨtiyuriene.
PSA 71:17 Kakaɨyari 'aku, 'ekɨ pepɨnetiuti'ɨkitɨa temaikɨyari paitɨ, hikɨ 'akuxi nepikuxata mariweme kepemɨtiyuriene.
PSA 71:18 Kepauka 'ukiratsi nemayani, kepauka nemumutuxakari, Kakaɨyari 'aku, pepɨkanetsi'uku'e'eiriwani, 'umemahu 'atɨrɨkariya newataxatɨayuke, memɨkatinunuiwawawe 'akuxi kepemɨtiuyuri newataxatɨayuke.
PSA 71:19 Kakaɨyari 'aku, 'ekɨ mariweme pepɨtiuyuri, heitserie kepemɨtiyuriene meutitewatsie pɨye'axe. ¿Kakaɨyari 'aku, kemɨ'ane 'aku 'ahepaɨ pɨtiuka'iyari?
PSA 71:20 Waɨwaka 'uximatɨarikatsie pepɨnetsi'atiwitɨxime, matsi tawarita tukari pepɨnetsipitɨani, kwieta meukatewatsie paitɨ tawarita muwa pepɨnetsi'atihana.
PSA 71:21 Tawarita waɨkawa netɨrɨkaɨyeme pepɨnetsi'ayeitɨani 'ana pepɨnetsinɨtɨani.
PSA 71:22 Nekakaɨyari, ke'aixɨa pemɨtikamiekɨ, nepɨmetsinɨawani kanaritsie, nepɨmetsinɨawani, 'ixaheritsixi wakakaɨyari mɨpatsie, xawerikɨ nepɨmetsinɨawani.
PSA 71:23 Kepauka nɨawari 'ahetsiemieme nemɨtikwika neputahiwani neyutemawietɨ, 'ekɨtsɨ netukari pekaniutawikweitsitɨani.
PSA 71:24 Tukarikɨ yaxeikɨa nepɨtikuxatani keheitserie pemɨtiyuriene, karikɨ kemɨ'aneri memɨnetsika'unakukai mekaniutewiyatsitɨarieni mekaneuyuyexɨrieni.
PSA 72:1 Tsarumuni nɨawarieya. Kakaɨyari 'aku, heitserie hexeiyame kenayeitɨa 'ikɨ ti'aitame, meta heitserie kepemɨrexeiya ti'aitame nu'aya mɨpaɨ ketineupitɨa.
PSA 72:2 Mɨkɨ 'ateɨterima pɨwataheitseritɨani meta heitserie mehexeiyame pɨwarayeitɨani tixaɨtɨ memɨkateheuxeiya 'ahetsɨa miemete.
PSA 72:3 Hɨrite 'aixɨa pɨtiwayatsa 'ateɨterima, hɨri 'amanutitɨtɨ heitserie pɨwapitɨani.
PSA 72:4 Ti'aitame tixaɨtɨ memɨkateheuxeiya heitserie pɨwapitɨani meta yemekɨ memɨteheuyehɨwa pɨwatawikweitsitɨani, mɨkɨ pɨwatipɨna 'axamemɨte'u'iyari.
PSA 72:5 Ti'aitame ke'uyeikani keti'aitametɨni xeimiriyari nuiwariyaritsie, tau hepaɨ meta metsa.
PSA 72:6 'Etsaripa kemɨtiukawiwiye hepaɨ ke'aneni, wiyeri kwie mɨtiuhawiya hepaɨ ke'aneni.
PSA 72:7 'Uyeikakaku mɨtiheitserie keranayuhayewani, waɨkawa ketixuaweni tita memɨteheuyehɨwa, kepaukake metsa makayune.
PSA 72:8 Ti'aitame keti'aitani huta haramarayari tsata haa 'Epɨrata manuyeka 'atsita kwie hakewa meu'axe.
PSA 72:9 Hɨxiena meke'utihɨxima'uni makumawetsie nuiwarite memɨtitei, tumuanari meke'utikwani memeye'unie
PSA 72:10 Taritsi kwieyaritsie te'aitamete meketeyutuaka meta haramara tetsita 'anutaɨye te'aitamete mekete'i'atɨiriwani Tsawani meta Tsewa kiekatari.
PSA 72:11 Yunaitɨ te'aitamete hɨxiena meke'ukahɨxima'uni, yunaitɨ nuiwarite mekete'i'uximayatsirieka.
PSA 72:12 Mɨkɨ piparewieni kemɨ'ane parewiya ma'iwawani, meta tixaɨtɨ mɨkarexeiya pɨparewieni mɨkarekaparewiwame.
PSA 72:13 Pɨwatinenimayata tixaɨtɨ memɨkate'ayeitɨarie meta tixaɨtɨ memɨkatehexeiya, haweri memɨ'anene watukari pɨtawikweitsitɨani.
PSA 72:14 Pɨwaxɨna kememɨtenanaimarie, mɨtimatekɨ watukari meuyewetsekɨ.
PSA 72:15 Ti'aitame ke'uyeikani. Huru keyetuiriyarieni Tsawa mieme. Ketiyunenewitɨni hetsiena mieme yuheyemekɨ, 'aixɨa ke'itɨarieka naime tukaritsie.
PSA 72:16 Naime kwieyaritsie tɨriku kexuaweni, hɨritsie paitɨ ke'uwetuarɨkani tɨriku. Riwanu hepaɨ 'uriyari ke'utipaɨmere, manukuyari tupiriya 'ɨtsita mieme hepaɨ ke'utipaɨmere.
PSA 72:17 Kekuxaxatsiwani yuheyemekɨ, tau hepaɨ kereutere ku'eriwatɨ. Hetsiena mieme nuiwarite 'aixɨa mekeyuyurieka, yunaitɨ mɨkɨ 'aixɨa mekete'ikɨhɨaweni.
PSA 72:18 Yawé Kakaɨyari 'aixɨa ketikɨhɨawarɨwani, 'Ixaheri Kakaɨyarieya, muyuxewi xeikɨa mariweme mɨtiyuriene.
PSA 72:19 'Aixɨa keraniuwani hetsiena mieme yuheyemekɨ, kemɨtimariwe ke'utahekɨatsieni naitsarie.
PSA 72:20 Rawiri nenewierieya 'Itsahi nu'aya 'enapu'axe.
PSA 73:1 'Atsahapi nɨawarieya. Yurikɨ, Kakaɨyari 'aixɨa pɨtiuka'iyari 'Ixaheri hetsɨa, 'iyari 'aixɨa mɨ'anene memexeiya wahetsɨa.
PSA 73:2 Ne nekanatiwenitɨma, 'etsiwatɨkaku nekanekaxikiuna.
PSA 73:3 Nepɨwarekahekatɨya newaruxeiyaka 'axateyuruwamete mete'ukaxexeiyakaku.
PSA 73:4 Mɨkɨ nitixaɨtɨkɨ mepɨkate'ukakukuine, 'aixɨa mepɨteheu'erie.
PSA 73:5 Hipatɨtɨma 'axamepɨkatewakumamateke, hipame wahepaɨ mepɨkate'uka'eniwa.
PSA 73:6 Kememɨteyuti'ɨre kuka memakatɨtɨkani hepaɨ mepɨteyuxexeiya kememɨtewananaima 'ixurikikɨ kememɨte'anuyuku'eima hepaɨ mepɨ'anene.
PSA 73:7 'Axamɨti'anekɨ mepɨhɨpɨne, matsi paitɨ mepɨmatsiɨkɨ ke'axamemɨteyuriku.
PSA 73:8 Mepɨteyukatawe'erie, 'ayehutamekɨ meputiniuka, meha'atɨ mepɨteyu'aitɨwa meta mepɨteyute'a.
PSA 73:9 Yuniukikɨ muyuawi hepaɨtsita 'axamepɨtiyuane, yuniukikɨ kwiepa mepɨte'aita.
PSA 73:10 'Ayumieme wahetsɨa mepeta'axe teɨteri, yuri mepɨtewa'eririe kememutiyuane.
PSA 73:11 'Atsita mɨpaɨ mekaniutiyuani: «¿Kekuta Kakaɨyari retimani? ¿Kamɨtsɨ 'Amutewi timaiwe?»
PSA 73:12 Mɨpaɨ mekani'aneni Kakaɨyari memɨka'ayexeiya, tixaɨtɨkɨ mekateyu'iyaritɨatɨ, matsi waɨkawa metehexeiyatɨ mepakɨka.
PSA 73:13 Yurikɨ, ¿tita tiyunaki'erie ne'iyari 'itiyakame nemayeitɨakakɨ, meta nemamate 'atsimɨkatiyuruwanikɨ,
PSA 73:14 tukarikɨ netiweiwatɨ, meta ximeri netiuka'enitsitɨariwatɨ?
PSA 73:15 Xɨka mɨpaɨ ne'utayɨnike: «Wahepaɨ nepɨtiuniukani», 'anuiwarima nepuwakwamanakekai.
PSA 73:16 Kepauka nemɨtimaimɨkɨkai naime, 'ika nepukaxei neka'iwerime,
PSA 73:17 Kakaɨyari tukieyata neheutahakake, muwa nepɨretima 'axateyuruwamete hakewa memeyehu:
PSA 73:18 Yurikɨ, 'ekɨ huye mɨxikiunitsie pepɨwara'uitɨa, pepɨwaranataima memukumawerekɨ.
PSA 73:19 Yapauka mepeuyehɨiyani, yemekɨ memariutsietɨ.
PSA 73:20 Xewitɨ tiheinɨtɨ manutaniere hepaɨ, mɨpaɨ, kepauka Ti'aitame pemanukukeni, mɨkɨ pepuwaratɨmaiyatsitɨani ke'axamemɨteyumate.
PSA 73:21 Ne'iyari puyuhiweriekai nepɨkanewaɨriyakai,
PSA 73:22 'atsinekatimaitɨ. Yeutanaka hepaɨ nepuyɨ 'ahepaɨtsita.
PSA 73:23 Ne matsi yuheyemekɨ 'ahamatɨa nepuyeika, 'ekɨtsɨ 'atseriekɨ pekaneniwiyani.
PSA 73:24 'A'ɨxatsikɨ pepɨnetsi'uwitɨxime, 'arike matsi witsi'aneme pepɨnetsi'ayeitɨani.
PSA 73:25 ¿Kemɨ'ane 'aku muyuawitsie nepexeiya metsɨ 'ekɨ xeikɨa? Xɨka 'ahamatɨa ne'uyeikani, kwiepa timiemeri nepɨkareuyehɨwa.
PSA 73:26 Tsepa newaiyari mɨtimɨxime meta ne'iyari, matsi Kakaɨyari ne'iyari pɨtseiriyani, mɨkɨ nehetsiemieme xeikɨa kanihɨkɨtɨni yuheyemekɨ.
PSA 73:27 Mepɨkwini kemɨ'ane memɨmetsi'uku'eiri, 'ekɨ pepɨwaka'una 'ahetsie memɨkatewiya.
PSA 73:28 Matsi 'aixɨa pɨ'ane Kakaɨyari hamatɨa nemuyeikani 'ahurawa. Yawé Ti'aitame nehetsie nunuwame nepayeitɨa, naime wewiyaya nemɨtikuxatanikɨ.
PSA 74:1 'Atsahapi kwikarieya. Kakaɨyari 'aku, ¿titayari petatiuku'eiri yuheyemekɨ? ¿Titayari waɨkawa petiuyeha'a 'amuxatsima wahepaɨtsita?
PSA 74:2 Keniwaraye'eri teɨteri pemɨwaranayexei meripaitɨ, nuiwari pemuwarɨxɨnaxɨ 'ahetsɨa memumiemetetɨnikɨ. Kenaye'eri 'ikɨ Tsiyuni hɨriyari, hikɨ pemanukatsie.
PSA 74:3 Kenaye'a yuheyemekɨ mɨti'u'uni hepa, tuki naime kaniuka'una mɨtatsi'aye'unie.
PSA 74:4 Memɨmetsi'aye'unie 'axeɨripa mekaniuyuhaxɨatɨatɨkɨkani, patera mekanika'uitɨwani kename metehayu'iwa.
PSA 74:5 Kɨ'ewemete wahepaɨ yeuta mekateniyuxexeiyani, hatsakɨ kɨyexi mehawiteketɨ.
PSA 74:6 Hatsakɨ meta titsunamekɨ mekanitimuraxɨani kɨyexite ti'utɨarietɨkaime.
PSA 74:7 'Atuki mekaniutataiya, pemuwayeka kapatsiekame mekanayeitɨani.
PSA 74:8 Yu'iyaritsie mɨpaɨ mekaniutiyuani: «Naxi tekaneyeitɨakuni». Tinaime mekateniutitaiya hakewa makupatsietɨkateitsie mana kwiepa.
PSA 74:9 Tepɨka'ixeiyari tapatera 'ateewa 'uyewiekame, Kakaɨyari niukameyari pumawe, 'etsiwa tɨma tepɨkatemate kemɨreutere mɨpaɨ tiyɨanetɨ.
PSA 74:10 Kakaɨyari 'aku, ¿Kepaukake mepɨtehayewa memɨtatsi'aye'unie metatsinanaimatɨ? ¿Yuheyemekɨ 'axame'utiyuatɨ 'ahepaɨtsita?
PSA 74:11 ¿Titayari kayuwatɨ petiuma pemɨkayɨweni hepaɨ? ¿Titayari 'atapa perawie?
PSA 74:12 Kakaɨyari 'aku, 'ekɨ neti'aitɨwame pepɨhɨkɨ meripaitɨtɨ, 'ena kwiepa 'ekɨ wikweitsitɨarika pepexeiya.
PSA 74:13 'Ekɨ haramara pepukumanaxɨa 'atɨrɨkariyakɨ, haramaratsie memɨteye'uwa memɨmamariwawe wamu'ute peputitaraxɨ.
PSA 74:14 'Ekɨ Rewiyatahini mu'uya peputataraxɨ, pepɨwarumi makumawetsie memɨte'u'uwa.
PSA 74:15 'Ekɨ pepɨtiuyuri haixa pemanetɨaxɨa meta hatɨa, haa manuyehapane waɨkawa pepikawatsiɨxaxɨ.
PSA 74:16 Pɨti'apiini tukari, meta tɨkari, 'ekɨ metsa mana pepuyeye meta tau,
PSA 74:17 kwie hakewa meuye'atɨkani 'ekɨ pepi'inɨaritɨa, witarita meta xexerixa pepayeitɨwa.
PSA 74:18 Yawé, kena'eriwani mɨmetsi'aye'unie payu'ɨre, teɨteri yuri memɨkate'erie 'ahetsiemieme 'axamepaitɨka.
PSA 74:19 Memayu'eririya wahetsiemieme 'akukuru mɨtakwaiyanikɨ pepɨka'iyetuayani, pepɨkawaratɨtɨmaiyani, hikɨ nihatsuaku, tixaɨtɨ memɨkatehexeiya watukari.
PSA 74:20 Kena'eriwani 'atɨratu, naitsarie 'ikɨ kwieyaritsie nanaimarika xeikɨa kanixuaweni.
PSA 74:21 Haweri mɨranuyemie pepɨkapitɨaka mɨnanaimarieka, kemetsinɨawani kemɨ'ane mɨreuyehɨwa meta tixaɨtɨ mɨkarexeiya.
PSA 74:22 Kakaɨyari 'aku, xeiya tahetsie keneutanua, kena'eriwani tukarikɨ 'axakememutiyuane 'ahepaɨtsita memɨka'u'iyari.
PSA 74:23 Keneu'eni memɨmetsi'aye'unie wahiwari, kememutiyuane mekatehayewatɨ.
PSA 75:1 Teyuitɨwamete wa'ukiyari. Yuariyaya xekeneuweiyani «Pepɨka'ika'unani». 'Atsahapi nɨawarieya. Kwikari. Kakaɨyari 'aku, pamɨpariyutsi tepɨmetsipitɨa, 'aixɨa 'anemekɨ tepɨmetsihahɨawe, yunaitɨ naitsarie 'a'uximayatsika mɨmamariwawe mepukuxata.
PSA 75:2 'Ekɨ mɨpaɨ pepaine: «Kepauka ne yanemɨra'eriwani, 'aixɨa mɨ'anekɨ nepɨwaranutaxɨrieni.
PSA 75:3 Kepauka kwie mutayuane meta teɨterimama yunaitɨ, ne nekanihɨkɨtɨni 'aixɨa nemikuyuruwa».
PSA 75:4 «Xepɨka'uyuti'ɨreni», mɨpaɨ nekatiniwarahɨaweni memuyuti'ɨre. «Temaiwawemete xepɨka'ayuyeitɨaka», Kakaɨyari memɨka'ayexeiya nekatiniwarahɨaweni.
PSA 75:5 «Temaiwawemete xepɨkayu'erieka muyuawitsie miemekɨ, xepɨka'utiniukani witsi'anemekɨ».
PSA 75:6 Tewi mariwetɨ mayeitɨariwanikɨ tau manatineika pɨkamieme, meta makayuyuipiketsie tatsutua,
PSA 75:7 matsi Kakaɨyari pɨhɨkɨ 'itsɨkame: hipame pɨwahiweritɨa, hipameta 'aixɨa pɨwayurie.
PSA 75:8 Yawé mamayatsie tekɨxi kanaweni winu mukwaimuxa, haxɨaya kanihɨkɨni 'uyematɨ meta tiyutsata tinɨtɨ, kepauka mɨkɨ mitiyeurieni, yunaitɨ kwiepa memɨtama Kakaɨyari memɨka'ayexeiya mekaniti'ikuni kepaukake memiyexɨni.
PSA 75:9 Ne 'ikɨ hepaɨtsita nepɨtikuxatani yuheyemekɨ, nepinɨawani Kakuwu Kakaɨyarieya.
PSA 75:10 Kwinimieme memɨteyuti'ɨre Kakaɨyari meka'ayexeiyatɨ pekaniwarakumaweriyamɨkɨ, meta heitserie memexeiya watɨrɨkariya hetsiemieme 'aixɨa nekanitayɨmɨkɨ.
PSA 76:1 Teyuitɨwamete wa'ukiyari. Kanaritsie xekeneutikwikani. 'Atsahapi nɨawarieya. Kwikari. Kakaɨyari pɨmatiwa Kura kwieyaritsie, 'Ixaheri kwieyaritsie mariwemekɨ pumatiwa.
PSA 76:2 Tsareme mɨrakutewatsie tukieya puwe, Tsiyuni pɨkiekariena.
PSA 76:3 Mana pitimuraxɨ 'ɨrɨ 'aixɨa mɨ'anene, kuya kɨmana muyukunarɨma, 'ixiparate, naime kuyaxa timieme.
PSA 76:4 Witsipepɨ'ane, 'ekɨ matsi pepɨmariwe keyuri hɨri yuheyemekɨ mieme.
PSA 76:5 Memɨtehayu'iwa hikɨ mepatixɨriwa, teukiyapa mepeukaxɨriwa. Nixewitɨ mɨkɨ teɨteri yukukuyamete yumamate pɨka'anukuhapani mɨwaparewienikɨ.
PSA 76:6 Kakuwu Kakaɨyarieya, kepauka 'ekɨ pemɨwarutiti, kawayutsixi meta memanatei meputimama mepɨkayɨwawekai memɨyekɨnekɨ.
PSA 76:7 'Ekɨ, yuheyemekɨ xeikɨa pepɨmakaxiwani. ¿Kemɨ'ane 'aku pɨmetsiha'iwa kepauka 'ekɨ pemɨyeha'ani?
PSA 76:8 Muyuawitsie paitɨ pepihekɨataxɨ heitserie kepemɨti'uximaya, kwie, matɨ, kayuwatɨ pɨtimakai.
PSA 76:9 Kakaɨyari 'aku, kepauka 'ekɨ pemayetɨa heitserie petiyurienike, tixaɨtɨ memɨkatehexeiya kwiepa memɨtama wahetsiemieme pewatawikweitsitɨanike.
PSA 76:10 Tewi haxɨaya nɨawari 'ahetsiemieme payeika, Kemɨ'ane memuyukuhayewa meteka'eniexɨame 'ixɨarari mekameniwewiriekuni.
PSA 76:11 Yawé yukakaɨyari hetsɨa yaxeketeneuyuhɨritɨa, meta xeketenaye'atɨwani, yunaitɨ kwie wa'aurie mukumanetsie mekete'iyetuiriwani Kakaɨyari mɨmakaxiwa,
PSA 76:12 kuwexinaruritsixi watɨrɨkariya mɨwakunawairiwa, kemɨ'ane kwiepa te'aitamete memayemakaxe.
PSA 77:1 Teyuitɨwamete wa'ukiyari. Kerutuni hetsiemieme. 'Atsahapi nɨawarieya. Kakaɨyari nepahɨawe ne'iwawirietɨ yemekɨ, Kakaɨyari nepahɨawe mɨnetsi'eniekɨ.
PSA 77:2 Kepauka nemu'uximatɨarie, ti'aitame neputiwawa, tɨkarikɨ neka'uxetɨ teikɨ nepememe, peru 'akuxi nepɨkanɨtɨariewe ne'iyaritsie.
PSA 77:3 Kakaɨyari nepa'eriwa, matsi neputatsuaka, hetsiena nepɨnekɨhɨawe, yemekɨ nepeɨmɨmɨkɨ.
PSA 77:4 Pepɨkanetsipitɨa nemɨkutsuni, kwinimieme nepɨti'uximatɨarie nepɨkaniuwe.
PSA 77:5 Nepɨraye'eriwa meripaitɨ timieme, meripaitɨ wiyaritsie kemɨtiuyɨ.
PSA 77:6 Nepa'eriwa kepauka ne'iyari muyutemawiekai. Hikɨ matsita 'ipaɨ nepɨtiyɨkɨhɨawe:
PSA 77:7 «¿Tarexɨrienitsɨkamɨ ti'aitame yuheyemekɨ? ¿Tawaritsɨkamɨ ke'aixɨa mɨtiuka'iyari mɨpaɨ katiyɨni?
PSA 77:8 ¿Kamɨtsɨ naitɨ tiuyɨ naki'eriyaya mɨkaxɨwekai, meta naimekɨ kemɨtarahɨawekai yuheyemekɨ?
PSA 77:9 ¿Ratɨmai Kakaɨyari ke'aixɨa mɨtiuka'iyarikai, yuhaxɨakɨri katareunenimaya?»
PSA 77:10 Mɨpaɨ nepɨti'eriwa: «'Ikɨ yemekɨ pɨnetsihekukukuine: 'Amutewi yɨtɨrɨkariyakɨ pɨkatatsiparewie».
PSA 77:11 Nepiku'eriwa pɨta Yawé kemɨtiuyuri, nepe'eriwa mariweme kemɨtiuyuri meripaitɨ.
PSA 77:12 Nepɨnekɨhɨaweni mariweme kemɨtiuyuri, nepikuxatani yutɨrɨkariyakɨ kemɨtiuyuri.
PSA 77:13 Kakaɨyari 'aku, naitɨ 'ahuye pɨpatsie kepemɨtiyurienekɨ, kakaɨyaritɨtɨta xewitɨ pumawe hepaɨna timariwetɨ.
PSA 77:14 'Ekɨ Kakaɨyari pepɨhɨkɨ mariweme pemɨtiyuriwe, 'atɨrɨkariya pemɨhekɨata teɨteri wahetsie.
PSA 77:15 'Atɨrɨkariyakɨ 'ateɨterima pepuwarɨxɨnaxɨ, Kakuwu nuiwarimama meta Kutse.
PSA 77:16 Kakaɨyari 'aku, haa pɨmetsi'utimaka, haa mepɨmetsi'uxei hikɨ hamewari mepuwewi, mɨkɨ meta haramara 'ameukatewa putima.
PSA 77:17 Haiwitɨri wiyeri pukaxɨri, muyuawi tɨranarikɨ putayua, muyuawi merɨkariyakɨ putatsanixɨ.
PSA 77:18 Petayua 'ayuariya haikɨri 'amɨpatsie, 'amerɨkariya kwie puhekɨariyaxɨ, kwie putayua yuariyakɨ.
PSA 77:19 Haramaratsie 'ahuye pepanuwewi, haa waɨkawa 'apametsie pepɨtɨa, peru 'aketate pɨka'uhekɨarixɨ.
PSA 77:20 Muitsexi 'Aruni wahekɨ, 'ateɨterima pepɨwarewitɨ muxatsi wahepaɨ.
PSA 78:1 'Atsahapi 'ɨkitɨarikaya. Neteɨterima, ne'ɨkitɨarika xekene'enieka, kenemaine xekene'enanaka.
PSA 78:2 Ne 'ɨxatsikɨ nepɨtitaxata, meta meripaitɨ timieme tita 'atsimɨkatimatsiɨkɨkai,
PSA 78:3 tita temɨte'u'eni meta tita temɨtemate, tapaapama memɨtate'utaxatɨa.
PSA 78:4 Tanuiwari tepɨkawati'awitsirieni, 'umemahu tepɨtewataxatɨani. Yawé tɨrɨkariyaya meta mamariwaweme kemɨtiuyuri meta witsiti'aneme kemɨtiuyuri.
PSA 78:5 Mɨkɨ 'aitsika putaxa Kakuwu hetsiemieme, 'aitsika putahekɨataxɨ 'Ixaheri hetsiemieme, tatutsima pɨtiwaruta'aitɨa yunuiwarima memɨtewata'ɨkitɨanikɨ,
PSA 78:6 memimaikakɨ nuiwarite 'umemahu meta waniwema memɨtinunuiwa, mɨkɨta yuniwema memɨtewati'ɨkitɨanikɨ.
PSA 78:7 'Ana mɨpaɨ Kakaɨyari hetsie metewiyatɨ memakɨnekɨ meta kemɨtiuyuri memɨkahatɨtɨmaiyanikɨ, matsi memeye'atɨwanikɨ 'aitsikateya.
PSA 78:8 Mɨpaɨ yututsima wahepaɨ memɨka'anenikɨ: mɨkɨ nuiwari memɨkayukɨhɨawekai, memɨka'u'iyarikai, mɨkɨ yu'iyarikɨ Kakaɨyari hetsie memɨkatewiyakai.
PSA 78:9 'Epɨrahini nuiwarimama, yu'ɨrɨ me'utɨtɨ mepuyuta'unaxɨ kepauka memuyutakwitsie.
PSA 78:10 Mɨkɨ Kakaɨyari wahamatɨa tɨratu kemɨtiuwewiekai mepɨkaheye'atɨa, matsi pɨta mepiku'eiri 'aitsikateya.
PSA 78:11 Mepetɨmai kemɨtiuyuri, mariweme wahɨxie kemɨtiuwewi,
PSA 78:12 wapaapama wahɨxie mariweme kemɨtiuyuri, 'Ekipitutsie Tsuhani kwieyaritsie.
PSA 78:13 Haramara hixɨapa puhuyetaxɨ mana memukɨnekɨ, haa pɨti'ukai 'ixumeri hepaɨ peutiheitseriekai.
PSA 78:14 Tukarikɨ haiwitɨri puwaruwitɨximekai, tɨkarikɨta taikɨ pɨwahekɨariwiyakai.
PSA 78:15 Makumawetsie 'ai hixɨapa puxite, pɨwaruharitɨa haa kwinimieme tiuhaneme,
PSA 78:16 'aitsie haa panetɨa haa 'aki'utɨma mieme hepaɨ, haa panetɨa hatɨa mieme hepaɨ.
PSA 78:17 Peru tawarita hepaɨtsitana 'axamepɨte'uyuri, makumawetsie Kakaɨyari 'Amutewi mepaye'uniekai.
PSA 78:18 Naimekɨ Kakaɨyari meputa'inɨataxɨ, 'ikwai mepitawawiri tita memɨteheukwaikukai.
PSA 78:19 Niuki mepɨxɨatɨakai Kakaɨyari hepaɨtsita, matsi 'akuxi mɨpaɨ meputiyua: «¿Kakaɨyari kamɨtsɨ tiyɨwe mexa makumawetsie mutakeni tatiminike?
PSA 78:20 Kepauka tete muwatsie, haa kwinie panetɨya tɨrɨkaɨyetɨ, perutsɨ ¿'ikwai tatiumiwe tsiere?, ¿yuteɨterima wai tsɨkamɨ tiwarumiwe?»
PSA 78:21 Yawé kepauka mɨkɨ mɨtiu'eni, waɨkawa kaniuyeha'ani, puyeha'a Kakuwu hepaɨtsita, puyeha'a 'Ixaheri hepaɨtsita.
PSA 78:22 Kakaɨyari hetsie memɨkate'uwikɨ, yuri memɨkate'eriekaikɨ kename mɨkɨ watawikweitsitɨani.
PSA 78:23 Meutitewatsie paitɨ haiwitɨri mɨpaɨ katiniuta'aitɨani, hikɨ muyuawitsie katineuyepiere.
PSA 78:24 Manana mɨkawiyekɨ yatiniuyurieni memɨtekwanikɨ, hatsi muyuawitsie mieme kaniwarumini.
PSA 78:25 Yunaitɨ mɨkɨ niukituayamete wa'ikwai mekaniutikwani, Kakaɨyari 'ikwai kaniwareyenɨ'airieni kaniwarutihuxaitɨani.
PSA 78:26 Kakaɨyari 'eka tɨrɨkaɨyeme kaniuyuitɨani tau manatineikatsie, yutɨrɨkariyakɨ 'eka tatsutɨa mieme kanewatihana.
PSA 78:27 'Eka tumuanari kemɨtiukawiwiwa, mɨpaɨ wai katiniukawiwieni, wikixi haiwitɨriyari kaniwa'atɨirieni, xiekari hepaɨ mepɨteyuxexeiyakai.
PSA 78:28 Mematitekai wahixɨapa kaniwarukaxɨrieni meta waxamaru 'aurie.
PSA 78:29 Meteniukwani wa'iyaritsie katineuyeyani, Kakaɨyari katiniwaraye'atɨirieni kememutiyua.
PSA 78:30 Peru waheiwe'erika 'apɨkareuterixɨ: 'ikwai yuteta 'akuxi mepayeyekai,
PSA 78:31 kepauka Kakaɨyari haxɨaya wahetsie munua: 'ukitsi waɨkawa memɨtɨrɨkawi kaniwarukwini, temari 'ixaheritsixi 'aixɨa memɨ'anene kaniwarukwini.
PSA 78:32 Mɨyamete'anuyekɨnekatɨtɨ, yaxeikɨa 'axamekateniyuriekaitɨni yuri mekapɨte'uta'eri mariweme kemɨtiyurienekai.
PSA 78:33 'Ayumieme, Kakaɨyari watukari 'etsitewime kanayeitɨani xei'itukariyari hepaɨ, watukari waɨkawa mematimariutsiwatsie kanitixɨrɨweni.
PSA 78:34 Kepauka Kakaɨyari muwaku'uximatɨwakai, mɨkɨta 'anake mekanitiwawakaitɨni, meyuwaɨriyatɨ tawarita mekani'axekaitɨni hetsɨana.
PSA 78:35 Mekanaye'eriwakaitɨni kename Kakaɨyari wa'ai hɨkɨ, kename Kakaɨyari 'Amutewi wawikweitsitɨwame hɨkɨ.
PSA 78:36 Peru 'arike yutetakɨ mekanikwamanakaitɨni, yunenikɨ mekani'itakaitɨni.
PSA 78:37 Yu'iyarikɨ Kakaɨyari mepɨka'ayexeiyakai, yamepɨkatekakɨ tɨratuya kemainekai.
PSA 78:38 Hikɨ mɨkɨ puwarutinenimayataxɨ, wakwewietɨ, pɨtiwareuyehɨwiri 'axakememɨte'uyuri, pɨkawaruka'unaxɨ. Mɨixa pɨka'uyeha'a pɨyunɨtɨakai, pɨtinewakai kemɨtiyɨanekai pɨkaha'akai.
PSA 78:39 Paye'eri kename tixaɨtɨ mekatehɨkɨtɨkai mekwiwawekai, 'etsiwa xeikɨa yamɨreutetere 'eka hepaɨ tawarita pɨkanuani.
PSA 78:40 Mɨixa me'eye'unietɨ mepakɨ makumawetsie mepinutuitaxɨ yemekɨ makuwakitsie.
PSA 78:41 Kakaɨyari yamepɨte'inɨatatɨwekai, Mɨpatsie 'Ixaheri hetsiemieme mepɨhaxɨatɨakai.
PSA 78:42 Mepɨkaheye'eri kemɨtitɨrɨkaɨyekai, kemɨtiwaruwitɨ me'uximatɨariekaku,
PSA 78:43 'Ekipitu mariwemekɨ kemɨtiuyuri, meta kemɨtiuyuri yutɨrɨkariyakɨ Tsuhani kwieyaritsie,
PSA 78:44 kepauka haa 'Ekipitu mieme xuriya mayeitɨa mepɨkayɨwawekai memɨtihareni 'aki'utɨma,
PSA 78:45 kepauka nakatarixi mɨwarenɨ'a memɨwatikenikɨ, meta temutsi memɨwaka'unakɨ,
PSA 78:46 kepauka 'utsikari wawaxata mɨwarenɨ'a, 'utsikari memuyuwaɨkawa wa'etsita memɨte'ukaxɨ,
PSA 78:47 kepauka tee wakaxie nanari mutituaxixɨ meta xapa 'iteɨriyari 'ɨwi mitiwatsiɨxaxɨ,
PSA 78:48 kepauka tee tewaxi mɨwarukwi, meta muxatsi mimierɨkarikɨ,
PSA 78:49 kepauka wahetsɨa yuhaxɨa meutahɨa, ha'atɨ, kawanenimayatɨ, waraye'unietɨ: kuyaxi niuki tuayamete teyu'unamete pɨwarenɨ'a.
PSA 78:50 Yuhaxɨa kaniutatuani, pɨkawarutawikweitsitɨa mɨkitsata, matsi pɨwayetua kwiniya tsata.
PSA 78:51 Tɨɨri yunaime pɨwarukwi mexɨakate 'Ekipitutsie, matɨari miemete Kami memakutekaitsie.
PSA 78:52 Yuteɨterima pɨware'ari muxatsi wahepaɨ, makumawetsie pɨwarewitɨ, muxatsi wahepaɨ,
PSA 78:53 tiwa'ɨkitɨatɨ hetsiena memɨtewiyanikɨ memɨkaheumamakakɨ. Peru memɨwaraye'uniekai haramarakɨ kaniwaranukanani.
PSA 78:54 Yuteɨterima kwie mɨpatsietsie kaniwa'atɨani, 'ikɨ hɨri yutseriekɨ me'iwaxɨ.
PSA 78:55 'Ixaheritsixi wahetsiemieme nuiwarite kaniwarayeweiya, mɨkɨ kwie yuteɨterima kaniwayetuirieni, memɨwayetekaitsieta 'ixaheritsixi kaniwareutayatsa.
PSA 78:56 Peru mɨkɨ Kakaɨyari mekaniuta'inɨata: Mɨmariwe me'aye'unietɨ mekanakɨne 'aitsikateya mepɨka'anu'eni.
PSA 78:57 Heitserie mepɨka'u'uwakai 'axamepɨte'u'iyarikai, yupaapama wahepaɨ, 'axamepɨte'u'iyarikai watupi mututuni hepaɨ mepɨ'anenekai.
PSA 78:58 Mekaniyehaxɨatɨani tukite 'etsimupepe memutiwewikɨ, mamakɨ wewiyakate memuwarayexeiyakaikɨ.
PSA 78:59 Kakaɨyari retimaika waɨkawa kaniuyeha'ani, mɨkɨkɨ 'ixaheritsixi kaniwaruku'eirieni.
PSA 78:60 Tuki Tsiru muwekai kaniuku'eirieni, tukieya manuwekai 'ena kwiepa,
PSA 78:61 memɨwaraye'unie kaniwarupitɨani tɨrɨkariyaya witsimɨ'ane memanukwenikɨ.
PSA 78:62 Kwinimieme pɨtiuyeha'a yuteuterima wahetsiemieme, hipame 'ixiparakɨ memɨwakwinikɨ kaniwarupitɨani.
PSA 78:63 Temari taikɨ mekaniukwi'iwa, kwikari 'ukari mematiwikiwa wahetsiemieme pukumawerixɨ,
PSA 78:64 mawari wewiwamete 'ixiparakɨ mepukwi'iwaxɨ, wiuraxi mepɨka'uyɨwekaxɨa wahetsiemieme memuyuhiwerieka.
PSA 78:65 Hikɨ 'ana Ti'aitame kananutaniere, tiheinɨtɨ xewitɨ manutaniere hepaɨ, yumemiwame winukɨ kwinimieme mɨtiuhiwa hepaɨ.
PSA 78:66 Memɨwaraye'uniekai mema'iwarienikɨ yakatiniuyurieni, memɨyutitetewiyakɨ yuheyemekɨ yakatiniuyurieni.
PSA 78:67 Kutse niwemama kaniwarexɨrieni, 'Epɨrahini xiɨyarimama pɨkawaranayexei,
PSA 78:68 matsi pɨta, Kura nuiwarimama pɨwaranayexei, meta Tsiyuni hɨriyari mɨnaki'erie.
PSA 78:69 Yutuki kaniutawewieni, heutitewame muyuawi hepaɨ, kwie hepaɨ, ke'aixɨa miyuri yuheyemekɨ.
PSA 78:70 Rawiri tiyu'uximayatsiriwame kananayexeiya, muxatsi mɨwahɨwemetɨkai,
PSA 78:71 kaninawairieni muxatsi wa'arɨwame mɨhɨkɨtɨkai, Kakuwu hɨwemeya mayanikɨ meta teɨterimama, 'ixaheritsixi wahɨweme hetsɨana miemete.
PSA 78:72 Rawiri yu'iyarikɨ kaniwarutahɨni, timaiwetɨ kaniwaku'arienekaitɨni.
PSA 79:1 'Atsahapi nɨawarieya. Kakaɨyari 'aku, teɨteri memɨka'ahetsɨa miemete mepɨtatsi'unawairi tita pemɨtatiyetuiriekai, 'atuki mɨpatsie kapatsiekame mepayeitɨa, Kerutsareme 'unime mepayeitɨa.
PSA 79:2 'Ateɨterima wakaxari wirɨkɨxi wa'ikwai mepɨwarayeitɨa, yamemɨtekahu wawaiyari yeutari wa'ikwai katinayani.
PSA 79:3 Naitsarie Kerutsaremetsie xuriya meputayeuri, haa memutayeurieni hepaɨ, meta mɨkite muwakateuku kaniumaweni.
PSA 79:4 Ta'aurie kiekatari tahetsiemieme niuki mekaniwewieka, tame tekanihɨkɨtɨni 'atsieriwamete ta'aurie memahane wahetsiemieme.
PSA 79:5 ¿Yawé, kepaukake tamɨ? ¿Kamɨtsɨ 'aheyemekɨ petiha'aka? ¿'Ahaxɨa kamɨtsɨ tai hepaɨ tiutataweni?
PSA 79:6 Keniwaruyeheka 'iya nuiwarite memɨkametsimatekɨ, te'aitamete memɨkametsihahɨawekɨ.
PSA 79:7 Neuxei Kakuwu kaniutakwaiyani, meta mɨkɨ kwieyari 'unime mekanayeitɨani.
PSA 79:8 Meripaitɨ ke'axatemɨte'uyuri kenatɨmaiya, yapauka ketaneutinenimayata, neuxei tame tekaniyumuinani.
PSA 79:9 Xɨa'ui Kakaɨyari, tatsiwikweitsitɨwame, mariweme pemɨtiyuriwe kepemɨtitewakɨ, ketaneuparewi, 'aixɨa pemɨtiuka'iyarikɨ, ketaneɨxɨna 'axatemɨte'uyurikɨ ketatineuyehɨwiri.
PSA 79:10 Neuxei nuiwarite mɨpaɨ mekanitiyuakuni: «¿Tamɨri hakewa wakakaɨyari?» Ketaneuxeiyatsitɨa, teɨteri 'ahetsɨa memɨkamiemete wahɨxie yaketiniwarakapitɨa, 'ateɨterima waxuriya memutayeurikɨ mɨpaɨ keniwaruyuri 'ekɨta.
PSA 79:11 'Ahetsɨa paitɨ keheye'ani memehapanie watsuari, 'atɨrɨkariyakɨ memɨkwi'iwa keniwarutawikweitsitɨa.
PSA 79:12 Ti'aitame, ta'aurie kiekatari 'atahutamexɨa ketiniwarakapitɨa 'axamemutiyuakɨ 'ahepaɨtsita.
PSA 79:13 Tameta, 'ateɨterima meta 'amuxatsima 'akuraruta miemete, tepɨmetsinɨawani yuheyemekɨ, nuiwarite memanuyekɨka nuiwarite memanuyekɨka kwikari 'ahetsiemieme teputikwikani.
PSA 80:1 Teyuitɨwamete wa'ukiyari. Yuariyaya xekeneuweiyani «Tuturi tɨratuyari». 'Atsahapi nɨawarieya. 'Ixaheri hɨweme, 'ekɨ kutse pemuwitɨxime muxatsi wahepaɨ, 'ekɨ metsiteɨtamete watsata pe'atikaitɨ, ketaneu'eni. Keneuxawatɨxɨa
PSA 80:2 'Epɨrahini hɨxie, Wenikamini meta Manatsexi wahɨxie. Keneuhekɨata 'atɨrɨkariya, kenenua ketaneutawikweitsitɨa.
PSA 80:3 Xɨa'ui, Kakaɨyari, 'aixɨa ketaneuyuri, 'aixɨa ketatineuxeiya, ketaneutawikweitsitɨa.
PSA 80:4 ¿Kepaukake tamɨ pepɨtihayewa peha'atɨ Yawé Kakaɨyari Naimekɨmɨtɨrɨkaɨye, 'ateɨterima wanenewieri hepaɨtsita?
PSA 80:5 'Ikwai petatsiminike hiwerika pepɨtatsi'upitɨa temiti'ienikɨ, memɨte'iekai wahetsiemieme, waɨkawa wa'ukai pepɨwayetuirie memiti'ienikɨ.
PSA 80:6 Ta'aurie kiekatari memɨtatsi'atsenikɨ yapepɨtatsi'uyuri, memɨtatsi'aye'unie mepɨtatsiyuriya.
PSA 80:7 Kakaɨyari Naimekɨmɨtɨrɨkaɨye 'aixɨa ketaneuyuri, 'aixɨa ketatineuxeiya, ketaneutawikweitsitɨa.
PSA 80:8 'Ekipitu paitɨ xeime kaxie pepeyetui, memɨka'ateɨterima pewarutaweiyaka, mana pepikaye.
PSA 80:9 Kwiepa 'aixɨa pemɨrakuyuritsie, mana kanananataxɨani hikɨ kwiepa waɨkawa kaniutaxiɨni.
PSA 80:10 'Etɨriyaya hɨritetsie paitɨ pepuye'atɨatɨya, kɨtsimeyari yunaime kariuxa 'amutɨtɨ pɨwara'iwakai.
PSA 80:11 Xawarieya haramaratsie paitɨ kaneuta'axɨani, muwatiyɨraxɨa 'Eupɨrata paitɨ kaneuta'ani.
PSA 80:12 ¿Titayari kuraruya petiuka'unaxɨ? Yunaitɨ mana memuyekɨka 'iteɨrieya kaxie mekanika'inɨweni.
PSA 80:13 Tuixuri yeutari mekanikumaweriyarɨmeni, yeutari mekanikwaka.
PSA 80:14 Xɨa'ui Kakaɨyari, Naimekɨmɨtɨrɨkaɨye tahetsɨa kenenua. Muyuawitsie paitɨ kenakanieri 'ikɨ kaxie kene'ɨwiyani.
PSA 80:15 'Atseriekɨ nanari pemukaye kanihɨhɨtɨni. Mɨkɨ hekwamekɨ matiyɨraxɨ 'ahetsiemieme pɨhɨkɨ.
PSA 80:16 'Akaxie nanayari kaniuka'unarieni, taikɨ kaniutataiyarieni, 'atierikakɨ 'ateɨterima mepɨte'uka'eniwa.
PSA 80:17 Keneuparewi tewi pemanayexei, 'aniwe 'ahetsiemieme pemitaweriyaxɨ.
PSA 80:18 Tame tepɨkametsiku'eirieni, ketananutanieritɨa, 'ana tepɨmetsihahɨaweni.
PSA 80:19 Yawé Kakaɨyari Naimekɨmɨtɨrɨkaɨye, 'aixɨa ketaneuyuri, 'aixɨa ketatineuxeiya, ketaneutawikweitsitɨa.
PSA 81:1 Teyuitɨwamete wa'ukiyari. Yuariyaya xekeneuweiyani «Kaxie mɨpɨnarie» hepaɨ mɨpaɨ ketiukwikarieni. 'Atsahapi nɨawarieya. Xeyutemamawietɨ Kakaɨyari xekenekwikani, mɨtatsitɨrɨkariya, Kakuwu Kakaɨyarieya xekenehiwieka xeyutemamawietɨ.
PSA 81:2 Nɨawari hetsiena mieme xekeneyuitɨaka. 'Ari tepu 'etsimɨpe xekeneutahutsunani, xaweri meta kanari witsimutaine.
PSA 81:3 Muxa 'uki 'awaya xekeneutahɨtsi metseri manatiwenitsie, meta metsa mɨxikɨraɨyenitsie, ta'ixɨarari tukariyaritsie.
PSA 81:4 'Ikɨ 'aitsika kanihɨkɨtɨni 'ixaheritsixi wahetsiemieme, Kakuwu Kakaɨyarieya 'aitsikaya kanihɨkɨtɨni.
PSA 81:5 Tɨratu Kutse hamatɨa kaniuwewieni, kepauka memayekɨ 'Ekipitu kwieyaritsie. Niuki nemɨka'i'enie nekaniu'enieni:
PSA 81:6 «'Ika nekamaniunawairieni pemetɨkɨkai, kiriwa mahete 'ari pekaniunawaiyarieni.
PSA 81:7 Pe'uximatɨarietɨ pemɨnetsi'utahɨawixɨ, nekameniɨxɨna, nene'awietatɨ hai mɨmariwetsie nekameniuta'eiya, Meriwa hayaritsie nekameniuta'inɨata.
PSA 81:8 »Neteɨterima kenemɨtixe'ayehɨtɨwa xekeneneu'eni, xɨa'ui 'ixaheritsixi, xɨka xeikɨa xenetsi'u'enienike.
PSA 81:9 Teewatanaka kakaɨyaritɨme xeime pepɨkahayexeiyani, xeime kakaɨyaritɨme yɨkɨ 'aneme hɨxie pepɨkahekatunumaweni.
PSA 81:10 Ne nepɨhɨkɨ Yawé 'akakaɨyari, 'Ekipitu nemɨmetsi'ayewitɨ. Kenakwaxaka, ne 'ateta nekatinitahɨniyamɨkɨ.
PSA 81:11 »Neuxei peru neteɨterima mepɨkanetsi'u'eni, 'ixaheritsixi yamepɨkatekakɨ kenemainekai.
PSA 81:12 'Ayumieme nepɨwaruku'eiri wa'iyari mɨtsetse'ikaikɨ, kemɨtiwanake memɨyɨakaikɨ.
PSA 81:13 »Xɨka neteɨterima xeikɨa menetsi'u'enienike, xɨka 'ixaheritsixi nehuyeta me'uhunike,
PSA 81:14 yapauka ne memɨwaraye'unie nekaniwara'iwake, meta nekaninuanike memɨwaraye'unie wahetsɨa netɨrɨkariyakɨ.
PSA 81:15 Kemɨ'ane Yawé memɨxani'erie hɨxiena mepuyuyetuawawekai, meta yuheyemekɨ mekatenikwinitɨarienikekaitɨni.
PSA 81:16 'Ekɨta tɨriku 'aixɨa mɨ'anekɨ pekatinimikienikekaitɨni, meta xiete 'aitsie miemekɨ».
PSA 82:1 'Atsahapi nɨawarieya. Kakaɨyari puwa'ɨxatsitɨa muyuawitsie mieme tikuxatatɨ, pɨwaxaneta kakaɨyarixi wahixɨapa 'uwetɨ kemɨtiwaranutaxɨrienikɨ:
PSA 82:2 «¿Kepaukari tamɨ xepɨtehayewa 'axaxeteyurietɨ, kepauka 'aixɨa xepɨtiyuani Kakaɨyari memɨka'ayexeiya wahetsiemieme?
PSA 82:3 Nutui hetsie xekenenuaka kemɨranuyemie, meta kemɨ'ane yuhetsie mɨtanuanikɨ mɨkayɨwe, tixaɨtɨ mɨkarexeiya meta mɨti'uximayatsitɨarie wahetsiemieme 'aixɨa xeketeneyurieka.
PSA 82:4 Mɨkayɨhɨawe meta hawerimɨ'ane xekenewawikweitsitɨaka, Kakaɨyari memɨka'ayexeiya metewa'aitɨakaku xekeniwarɨxɨna.
PSA 82:5 »Mɨkɨ 'atsimepɨkatemate, mɨkɨ mepɨkaheti'enatɨkɨka. Yɨwipa mepu'uwa, mɨkɨ putayuane kwie tsutɨa naitɨ.
PSA 82:6 »Ne mɨpaɨ nepɨtixekɨhɨawe: “Xeme xepɨmamariwawe, yunaitɨ xeme 'Amutewi xepɨniwemama”.
PSA 82:7 Peru xekanikwikuni tewi mɨmɨwe hepaɨ, xekanatixɨrikuni hipatɨ te'aitamete wahepaɨ».
PSA 82:8 Kenanukukexi, Kakaɨyari 'aku, kwiepa tita mɨtiheitserie yaketineuyuri, nuiwarite yunaitɨ memɨte'apiinimakɨ.
PSA 83:1 Kwikari. 'Atsahapi nɨawarieya. Kakaɨyari 'aku, kayuwatɨ pepɨka'umaka, Kakaɨyari 'aku, pemɨkaheu'ena pepɨkahɨkɨtɨni 'atsipekatiyurimɨtɨ.
PSA 83:2 Keniwaruxeiya memɨmetsi'aye'unie kememɨteyukwiku, memɨmetsixani'erie mepɨmetsi'iwaku.
PSA 83:3 Metemaiwawetɨ 'ateɨterima wahepaɨtsita mepɨtekuxata, 'axamewayurienike pemɨwanaki'erie.
PSA 83:4 Mɨpaɨ mekaniutiyuaneni: «Hikɨmɨtɨka, wanuiwari tepauyehɨani. 'Ixaheri manɨyɨne pɨkaku'eriwaniri».
PSA 83:5 Yunaitɨ mekaniyutaxewireni, tɨratu mekaniuwewieni 'ahepaɨtsita miemeyari metekuxatatɨ:
PSA 83:6 'Erumi teɨterimama memukutetɨka meta 'Itsimaheri, Muhawi kiekatari meta Hakaxi teɨterimama,
PSA 83:7 Kewari, 'Amuni meta 'Amareki wateɨterima, Piritsiteu kwieyari hetsie kiekatari meta Tiru kiekatari.
PSA 83:8 Meta 'Atsiriya kaniwarɨnɨni, Ruti nuiwarimama kaniwaparewieka.
PSA 83:9 Mariyani kepemɨwaruyuri mɨpaɨta mɨkɨ keniwaruyuri, kepemɨwaruyuri Tsitsara meta Kawini, Kitsuni 'akiyari manuyekatsie,
PSA 83:10 mɨkɨ 'Eniruxi mɨrakutwatsie memukwi kwiepa memuyuhayewaxɨ kwitarai hepaɨ.
PSA 83:11 'Urewi meta Tsewi kepemɨwaruyuri mɨpaɨta keniwaruyuri memanuyetei mana memɨtama, memanuyetei te'aitamete yaxeikɨa keniwaruyuri kepemɨwaruyuri hepaɨ Tsewa meta Tsarimuna,
PSA 83:12 Mɨpaɨ memaitɨkatei: «Tapiini tepayeitɨani Kakaɨyari kwieya mu'ɨxaya».
PSA 83:13 Nekakaɨyari, 'ɨtsi haikɨritsie hepaɨ ketiniwaruxikɨriwitsitɨa, xatsi 'eka mei'enitsitɨwa hepaɨ.
PSA 83:14 Tai kɨyexite kemɨtitixɨxɨtsitɨwa meta tai hɨri kemɨtititaiya hepaɨ,
PSA 83:15 mɨpaɨ ketiniwaranukuweiya pewamariutatɨ, waɨkawa keniwarutimariuta 'a'ekakɨ.
PSA 83:16 Yawé, keniwarutewiyatsitɨa, memɨmetsitiwaunikɨ.
PSA 83:17 Yuheyemekɨ meke'utewiyatsitɨarieni, meke'ukwini tixaɨtɨ mekatehayuyeitɨatɨ.
PSA 83:18 Meketehetimani 'ekɨ Yawé pemɨhɨkɨkɨ, mɨpaɨ pemɨtitewa, mɨpaɨ meketemaika 'ekɨ xeikɨa 'Amutewi pemɨhɨkɨkɨ 'ena kwiepa naitsarie.
PSA 84:1 Teyuitɨwamete wa'ukiyari. Yuariyaya xekeneuweiyani «Kaxie mɨpɨnarie» hepaɨ ketiukwikarieni. Kure niwemama wanɨawari. Yawé Naimekɨmɨtɨrɨkaɨye, 'akiekarite witsipɨ'anene.
PSA 84:2 Nepeiyehɨwa ne'iyarikɨ Yawé takwana, 'ariri mana neheuyeimɨtɨ nekanimɨximeni. Nekanikwikani Kakaɨyari tukari mɨtiyupitɨwa ne'iyarikɨ meta naime newaiyarikɨ.
PSA 84:3 Yawé Naimekɨmɨtɨrɨkaɨye, neti'aitɨwame meta nekakaɨyari pemɨhɨkɨ, wikitɨtɨ 'amawari taiyame 'aurie yukii putaxexeiya, metatsiere wiki 'itsitame muwa yu'itua putawewiwa, muwa mɨti'itsinienikɨ.
PSA 84:4 'Aixɨa ke'itɨarieka kemɨ'ane 'akiita mɨkiekame, yuheyemekɨtsɨ kameninɨawani.
PSA 84:5 'Aixɨa ke'itɨarieka kemɨ'ane 'ahetsɨa tɨrɨkariya mukaxexeiya, 'ahuyeta xeikɨa mumienikɨ muyukɨhɨawe.
PSA 84:6 Kepauka 'ukaitsata muyeyani haixatsata kanayeitɨwani, meta wiyeri ximeri mieme katiniutiwaweriyani mayeweritsie.
PSA 84:7 Metsɨ 'ateewa kɨkamete mekaniuhuni, matsi waɨkawa tɨrɨkariya mekanipitɨarieka, Tsiyuni mekaniye'axeni Kakaɨyari hɨxie, kakaɨyarixi muwakakaɨyari hetsɨa.
PSA 84:8 Yawé, Kakaɨyari Naimekɨmɨtɨrɨkaɨye, nenenewieri keneu'eni, keneneu'eni, Kakuwu Kakaɨyarieya.
PSA 84:9 Kakaɨyari 'aku, tepɨa tahetsie nunuwame, pemanayexei keneuxeiya 'aixɨa 'anemekɨ.
PSA 84:10 'Aixɨa pɨ'ane 'atakwa nemukanikɨ xeitukari, pɨkaheuyewetse xeimiriyari takwa nemeyeikani, pɨnetsinake Kakaɨyari kiiya kitenie nemɨ'ɨwiyani, 'aixɨa pɨka'ane Kakaɨyari memɨka'ayexeiya wahetsɨa nemukani.
PSA 84:11 Yawé tau hepaɨ kani'aneni meta tepɨa tahetsie nunuwame, Kakaɨyari tahetsiemieme witsipɨtikuxata. Yawé kaniwareu'enieka heitseriemekɨ memu'uwa wahetsie karahɨpatɨ.
PSA 84:12 Yawé Naimekɨmɨtɨrɨkaɨye, 'aixɨa meke'itɨarieka 'ahetsie memɨtewiya.
PSA 85:1 Teyuitɨwamete wa'ukiyari. Kure niwemama wanɨawari. Yawé, 'aixɨa pepɨtiuka'iyari 'ikɨ kwie mɨti'apiini hepaɨtsita Kakuwu pemuhekwariyaxɨkɨ,
PSA 85:2 Pepɨtiwareuyehɨwiri 'ateɨterima 'axamemɨte'uyurikɨ, pepɨrayukatua naime 'axamemɨte'uyurikɨ,
PSA 85:3 pepukahaxɨapi, pepɨtiuhayewaxɨ 'ahaxɨa pe'utaiyaka.
PSA 85:4 Tawarita matsi 'aixɨa ketaneuyuri, Kakaɨyari tatsiwikweitsitɨwame, ketineuhayewa 'axakepemɨtatiku'eriya.
PSA 85:5 ¿Kamɨtsɨ petiha'aka 'aheyemekɨ tahepaɨtsita? ¿Peha'atɨ 'aheyemekɨ perayani?
PSA 85:6 ¿Tawarita tukari hekwame pekatatiyetuirieni, 'ateɨterima 'ahetsiemieme memɨyutemawiekakɨ?
PSA 85:7 Yawé, ketaneuxeitsitɨa 'anaki'eriya mɨkaxɨwe, ketaneyetuiri 'awikweitsitɨarika.
PSA 85:8 Nepi'enieni Yawé Kakaɨyari kemaine: mɨkɨ yuteɨterima kayuwatɨ memexeiyanikɨ pɨwapitɨani wahetsiemieme meta kemɨ'ane hetsiena mieme 'aixɨa memɨtekahu, tawarita 'atsimemɨkatemate wahepaɨ mepɨkayɨaka.
PSA 85:9 'Ahurawa puyeika watawikweitsitɨanike kemɨ'ane memimakaxe, kemɨtimariwe mɨmatsiɨkɨnikɨ 'ena kwiepa.
PSA 85:10 Naki'eriya meta tita yuri mɨraine puyukaxeiya, kayuwatɨ mɨ'ayumie meta mɨtiheitserie hamatɨa mepuyuti'itseni.
PSA 85:11 'Ena kwiepa pɨtineni tita mɨtiyuri, muyuawitsieta 'aixɨa mɨti'ane puyuhekɨare.
PSA 85:12 Yawé 'aixɨa pɨtatsiyurieni, takwie 'ikwaxi waɨkawa pɨtitixuaweriya.
PSA 85:13 Tita mɨtiheitserie hɨxiena panuyeyerɨni mɨkɨ pɨwatahuyetɨani.
PSA 86:1 Rawiri nenewierieya. Yawé, keneneu'eni keneneuta'eiya, haweri nepɨ'ane waɨkawa nepɨreuyehɨwa.
PSA 86:2 Netukari kene'ɨwiyani, heitseriemekɨ yanemɨtikamiekɨ 'ahetsiemieme. 'Ekɨ pepɨnekakaɨyari, 'ahetsie nepɨtiwiya, kenewikweitsitɨaka ti'a'uximayatsiriwame.
PSA 86:3 Ti'aitame, kenenenenimayaka, 'ekɨ xeikɨa nekamenahiwiwani tukarikɨ.
PSA 86:4 Ti'a'uximayatsiriwame 'iyarieya 'aixɨa keneuyuri, karikɨ ti'aitame, 'ekɨ xeikɨa ne'iyari nekameniyetuirieka.
PSA 86:5 Ti'aitame, 'ekɨ 'aixɨa pekatiniuka'iyarini meta pekanetineuyehɨwiriemɨkɨ, pɨmariwe 'anaki'eriya kemɨ'ane memɨmetsihahɨawe wahetsɨa.
PSA 86:6 Yawé, nenenewieri keneu'eni, ne'iwaurika kenanu'eni.
PSA 86:7 Kepauka nemɨ'uximatɨarieka 'ana nekamenahɨaweni, 'ekɨ pemɨnetsiku'eiyakɨ.
PSA 86:8 Yawé, tawarita xewitɨ pumawe kakaɨyarixi watsata 'ahepaɨ tiuka'iyaritɨ, pumawe wewiyaya pemɨtiutiwewi hepaɨ ti'anenetɨ.
PSA 86:9 Yunaime nuiwarite pemɨwarutiwewi mepɨ'axɨani, 'ahɨxie mepɨkatunuma'uni, Ti'aitame, 'ahetsiemieme 'aixɨa mepɨtiyuani.
PSA 86:10 'Ekɨ pemɨmariwekɨ meta mariwemekɨ pemɨtiyurienekɨ, 'ekɨ xeikɨa pepɨkakaɨyari.
PSA 86:11 Yawé, 'ahuyeta nemumienikɨ kenetine'ɨkitɨaka nemumienikɨ 'aixɨa netikamietɨ. Ne'iyaritsie 'aixɨa netinekɨhɨaweme kenenayeitɨa nemɨmetsimakaxenikɨ.
PSA 86:12 Neti'aitɨwame nekakaɨyari, ne'iyarikɨ nepɨmetsinɨawani, yuheyemekɨ 'aixɨa nepɨmerahɨaweni.
PSA 86:13 Mɨmariwekɨ 'anaki'eriya nehetsiemieme, pepɨnetsi'utawikweitsitɨa mɨki teukiyata neheukaweximekaku.
PSA 86:14 Kakaɨyari 'aku, teɨteri meyɨwaweme meyuxatatɨ mepɨnetsimietɨwe, yuwaɨkawatɨ meyɨnɨtɨ teyumiekate mekanenimiekuni. Teɨteri peka'uyeikame me'erietɨ mekaniyɨaka.
PSA 86:15 'Ekɨ peru, Ti'aitame, Kakaɨyari pepɨtiuyukakwewimɨkɨ petiuyukanenimayatɨ, pepɨkahayu'eriya, waɨkawa peti'akanaki'erietɨ meta yuri pehaitɨ.
PSA 86:16 Kenenua nehetsɨa, kenenenenimayaka, keneneutatɨrɨkariya ne ti'a'uximayatsiriwame. Ne 'aniwe 'aixɨa nemɨtiuka'iyari keneneutawikweitsitɨa.
PSA 86:17 'Inɨari keneneuwewiri kepemɨnetinaki'eriekɨ, memɨnetsi'aye'unie memixeiyakɨ memɨyutitetewiyakɨ, 'ekɨtsɨ Yawé, pemɨnetsi'uparewikɨ meta pemɨnetsi'unɨtɨakɨ.
PSA 87:1 Kure niwemama wanɨawari. Kwikariyari. Kakaɨyari kiekarieya tsutɨmeyari hɨri mɨpatsietsie katini'aneni.
PSA 87:2 Yawé Tsiyuni 'itupariyarite memeutahaketsie kaninaki'erieka, Kakuwu kiekariteya kemɨkatinaki'erie.
PSA 87:3 'Ahetsiemieme, Kakaɨyari kiekarieya, witsi'anemekɨ katinikuxaxatsiwani:
PSA 87:4 «Kemɨ'ane memɨnetsimate nekaniwa'inɨatani Xahawi meta Wawiruniya, metatsiere Piritsiteutsixi wakie, meta Tiru, metatsiere Kutsi. Mɨpaɨ katinikuxaxatsiwani: “'Ikɨ Tsiyuni kaniutinuiwa”».
PSA 87:5 Yurikɨ, Tsiyunitsie mɨpaɨ pɨtitaniukieni: «'Ikɨ meta 'iya mana mekaniutinunuiwa. Mɨkɨ 'Amutewitɨtɨ kanikamani».
PSA 87:6 Yawé teɨteri mɨpaɨ katiniwa'utɨamɨkɨ: «'Ikɨ Tsiyunitsie kaniutinuiwa».
PSA 87:7 Mexi 'akuxi me'utikwika meta meteneitɨwe, mɨpaɨ meputiyuane: «'Ahetsie naitɨ pɨtihekɨa kenemɨtiunuiwaxɨ».
PSA 88:1 Teyuitɨwamete wa'ukiyari. Hemani 'ɨkitsikaya 'etsirahi tewiyari. Tikwikame kwikariyari. Kure niwemama wanɨawari. Yawé, Kakaɨyari netsiwikweitsitɨwame, tukarikɨ tɨkarikɨ nekanahiwani 'ahɨxie.
PSA 88:2 'Ahetsɨa paitɨ nenenewieri keheuye'ani, kenemɨmatiwawirie kenene'enieka.
PSA 88:3 Nepɨhɨne 'uximatɨarikakɨ 'ari netukari mɨki teukiyapa kaneukaniereni.
PSA 88:4 'Ari nekani'inɨatsieka putsuta memeukaxɨriwa wahamatɨa, kuya mɨkatɨrɨkaɨye nekanihɨkɨtɨni.
PSA 88:5 'Ari yateewa nekaniutekieka, mɨkite watsata, mɨki hepaɨ nepɨtinexexeiya kwieta matika hepaɨ, 'iya kemɨ'ane 'ari pemɨkawara'eriwa, memanakaxɨri 'amamatsie.
PSA 88:6 Putsu meukatewatsie pekaneneukahɨani, waɨkawa muyemariwetsie meukatewatsie.
PSA 88:7 'Ahaxɨa kemɨrahete nehetsie pukawe, pekanenehana 'ahamewarikɨ.
PSA 88:8 Pekaneniunawairieni yunaime nehamikuma meta mɨkɨ wahɨxie nexani'eriwame pepɨnetsi'ayeitɨa. Nekananutahɨiyaka meta nemuyuxɨna nepɨkayɨwe,
PSA 88:9 nehɨxite pɨkaheuneniere hiwerikakɨ. Yawé, ne tukarikɨ nemetsihahɨawe, 'ahepa nekaneutamemeni.
PSA 88:10 ¿Kamɨtsɨ mɨkite watsata mariweme pemɨtiuyurieni petiyɨwe? ¿Kamɨtsɨ mɨkite me'anuku'ume pamɨpariyutsi memetsi'upitɨani tiyɨwe?
PSA 88:11 ¿Kamɨtsɨ mɨkite watsata 'anaki'eriya rekuxaxatsiwa, meta ke'aixɨa pemɨtikamie meukatewatsie?
PSA 88:12 ¿Kamɨtsɨ yɨwipa timatiwa mariweme kepemɨtiyuriene, yatɨni heitserie kepemɨrexeiya kwie matɨmaiyarietsie?
PSA 88:13 Yawé, ne waɨkawamekɨ nepɨmetsiwawirie keneneuparewi, ximeri nepɨmetsi'utiwawa neyunenewietɨ.
PSA 88:14 ¿Yawé, titayari peneti'uxiwe'erie? ¿Titayari pekanetixeiyamɨkɨ?
PSA 88:15 Ne nepɨtiuka'eniwa temaikɨyari paitɨtɨ, heiwa 'ari nepɨkukweriwayɨne. Pekaneneyenɨ'airieni yemekɨ waɨkawa 'uximatɨarika 'ari tawarita nekapɨyɨwe.
PSA 88:16 'Ahaxɨa yemekɨ nehetsie kaniukawiwieni, 'a'iwaɨyɨ kanenitaxɨtɨaximeni.
PSA 88:17 Haramara hepaɨ ne'aurie mepɨhɨne tukarikɨ, mekaneniukurarutɨiya yemekɨ.
PSA 88:18 Pekaneniunawairieni nehamikuma meta waɨkawa nemɨwanaki'erie, hikɨ yɨriya hamatɨa xeikɨa tekaniyunaki'erieka.
PSA 89:1 'Etani 'ɨkitsikaya 'etsirahi tewiyari. Yawé 'aku, yuheyeme nepikwikani 'anaki'eriya mɨmariwe, yuheyemekɨ nepikuxatani ke'aixɨa pemɨtikamie.
PSA 89:2 Mɨpaɨ nepaineni 'anaki'eriya heitserie 'amuyeikakɨ, yapehaitɨ ke'aixɨa pemɨtikamie muyuawi yamɨtiuyema hetsie.
PSA 89:3 Mɨpaɨ peputayɨ: «Ne tɨratu nepuwewi nemenayexei hamatɨa, Rawiri mɨpaɨ yurikɨ nepɨtiutahɨawixɨ neti'uximayatsiriwame:
PSA 89:4 “'Anuiwari yunaitɨ te'aitamete nepɨwarayeitɨani, meta yanepaine 'a'uweni 'amuwenikɨ yuheyemekɨ”».
PSA 89:5 Yawé, mariweme kepemɨtiyuriene muyuawi peyexeiya, meta ke'aixɨa pemɨtikamie memɨpatsie mepeyexeiya.
PSA 89:6 ¿Kemɨ'ane muyuawitsie Yawé hepaɨ pɨ'ane? ¿Kemɨ'ane muyuawitsie 'uyeikatɨ Yawé hepaɨ pɨ'ane?
PSA 89:7 Kakaɨyari waɨkawa pumakaxiwa memɨpatsie memayuxeɨrietsie, pɨmariwe yemekɨ 'amemu'uwa 'auriena wahetsiemieme.
PSA 89:8 Xewitɨ 'ahepaɨ 'anetɨ pumawe Yawé Kakaɨyari Naimekɨpemɨtɨrɨkaɨye, tɨrɨkariya pemexeiya meta 'aixɨa pemɨtikamie.
PSA 89:9 'Ekɨ pepɨti'aita hamewari mɨtɨrɨkaɨyetsie, 'ekɨ kayuwatɨ pepipitɨa hamewari muyuane.
PSA 89:10 Xahawi peputapɨnaxɨ mɨki hepaɨ, 'atɨrɨkariyakɨ pepɨwareutaxɨriexɨa memɨmetsi'aye'unie.
PSA 89:11 'Ahetsie pɨmieme muyuawi, meta pɨti'apiini kwie, 'ekɨ kwie peputawewi meta naitɨ hetsiena mɨtixuawe.
PSA 89:12 'Ekɨ tayeta meta tatsutɨa peputiwewi, Tawuxi meta Heximuni hɨriyarite mepɨmetsikwika yutemawierima.
PSA 89:13 'Amamatekɨ mariweme pemɨtiuyurieni pepɨyɨwe, pepɨtɨrɨkaɨye pepɨrayu'iwa yemekɨ.
PSA 89:14 'Aixɨa mɨti'ane meta tita mɨtiheitserie mɨkɨ 'a'uweni pɨtsutɨmeyari, meta 'aniukamete mepɨhɨkɨ naki'eriya meta yuri mɨraine.
PSA 89:15 'Aixɨa meke'itɨarieka memɨmetsihahiwiwa temawierikakɨ, Yawé, meta 'ahekɨariyatsie memuhu,
PSA 89:16 kemɨ'ane tukarikɨ 'ahetsiemieme memuyutemamawie meta memetsi'ayexeiyatɨ heitserie pemexeiyakɨ.
PSA 89:17 'Ekɨtsɨ watɨrɨkariya witsipemɨ'ane pekanihɨkɨtɨni wahetsiemieme, mɨpaɨ mɨmatinakekɨ waɨkawa tɨrɨkariya pepɨtatsipitɨa.
PSA 89:18 Yawé, 'ekɨ tepɨa tahetsie nunuwame pepɨhɨkɨ, 'ekɨ, 'Ixaheri hetsie pemɨpatsie, petati'aitɨwame pepɨhɨkɨ.
PSA 89:19 Heiwa 'ekɨ 'ateɨterima pepɨtiwarutaxatɨa heinɨtsi hepaɨ 'anemekɨ, mɨpaɨ pepɨtiwarutahɨawixɨ 'ateɨterima yamemɨtekahu: «Ne nekaniparewieka xeime waɨkawa meuyutamiewe, xeime tewi 'aixɨa nemɨtixeiya hetsiena mieme 'aixɨa nepaine.
PSA 89:20 Rawiri nekaniutaxeiya, neti'uximayatsiriwame, nekanikawirieni ne'atseiti mɨpatsiekɨ.
PSA 89:21 Nemamá yuheyemekɨ pituikani, netɨrɨkariya pitatɨrɨkariya.
PSA 89:22 Meye'unie pɨkahe'iwani meta pɨkatita'aitɨani mɨtiyukutuayanikɨ, xewitɨ tɨma 'axamɨtiuka'iyari pɨkatita'aitɨani.
PSA 89:23 Kemɨ'ane memitamieni ne nepuwatipɨna, kemɨ'ane memitixani'erieni ne nepuwaka'una.
PSA 89:24 Nenaki'eriya ke'aixɨa mɨtikamie hamatɨana puyeikani, tɨrɨkariyaya nehetsiemiemekɨ 'aixɨa pɨraniuwani.
PSA 89:25 Ne tɨrɨkariya nekanipitɨamɨkɨ haramaratsie mɨti'aitanikɨ, meta haa muyehapanetsie mɨtiwa'aitɨakakɨ.
PSA 89:26 Mɨkɨ mɨpaɨ kanetinitahɨawimɨkɨ: “'Ekɨ ne'ukiyari pekanihɨkɨtɨni, nekakaɨyari, ne'ai netsiwikweitsitɨwame”.
PSA 89:27 Ne neniwe matɨari mieme heitserie nekanipitɨamɨkɨ, mexɨakame kanayeimɨkɨ te'aitamete kwiepa memɨtama wahetsie.
PSA 89:28 Nenaki'eriya hetsiena mieme yaxeikɨa kani'anekamɨkɨ, tɨratu ketemɨtehexeiya mɨkɨmatɨa yaxeikɨa kani'anekamɨkɨ.
PSA 89:29 Nuiwarimama memɨteta'aitakɨ 'aixɨa nekaniwayurimɨkɨ meta 'uwenieya yuheyemekɨ, mexi 'akuxi muyuawi 'a'uyemaka.
PSA 89:30 »Peru xɨka niwemama ne'aitsika me'uku'eirieni meta kenemaine mɨpaɨ xɨka mekate'u'uwani,
PSA 89:31 xɨka me'iku'eirieni ne'aitsika meta xɨka mekaheitixeiyaxɨani kenemɨtiu'ai,
PSA 89:32 kɨyekɨ nekatiniwakwinitɨamɨkɨ 'axamemɨte'uyurikɨ meta nekaniwatiwamɨkɨ yamemɨkatekakɨkɨ.
PSA 89:33 Tsepa yamemɨkatekakɨ, nepɨkawahayewa newanaki'erietɨ, meta kenemɨtiwarutahɨawixɨ pɨkareuyeweka.
PSA 89:34 Netɨratu 'axanepɨkayurieni, kenemutayɨ nepɨkahetɨmaiya.
PSA 89:35 Xeimieme xeikɨa yanepaine nemɨpatsiekɨ, meta Rawiri nepɨkati'itaiya:
PSA 89:36 Nuiwarimama yuheyeme nepɨwa'ɨwiyani, 'uwenieya 'apuweni tau hepaɨ pɨreutere nehɨxie.
PSA 89:37 Metsa hepaɨ, 'aixɨa mɨtiuka'iyari mɨtaniere muyuawitsie, mɨpaɨ 'apuweni yuheyemekɨ».
PSA 89:38 Peru neuxei 'ekɨ pepeihɨa, pemenayexei pepɨka'utanaki'eri, pepuyeha'a hamatɨana waɨkawamekɨ.
PSA 89:39 Pepihayewaxɨ 'atɨratu meti'uximayatsiriwame hamatɨa, kwiepa pepihaxime kurunaya.
PSA 89:40 Kuraruya naime pepa'unatɨya, yeuta puyuhayewaxɨ kiiya 'amɨpapa.
PSA 89:41 Yunaitɨ mana memuyekɨka mepɨte'inawatsirie, 'auriena kiekatari mepiyuriya.
PSA 89:42 'Aixɨa pepaine memeye'unie watɨrɨkariya hepaɨtsita, temawierikakɨ pepɨwarutihɨniyaxɨ memeye'unie.
PSA 89:43 'Ixiparaya pepatatamɨraxɨ, meta pepɨka'iparewi muyumienekaitsie.
PSA 89:44 Mɨmariwekai mana pepɨti'atɨiri 'uwenieya kwiepa pe'atihɨaka.
PSA 89:45 Temaikɨtɨme kwitɨwa 'ukiratsi pepayeitɨa, pepitewiyatsitɨa.
PSA 89:46 Yawé, ¿kepaukake pepɨtihayewa peyu'awietanetɨ? ¿Tai hepaɨ tiutatawetɨ 'ahaxɨa yuheyemekɨ?
PSA 89:47 Mɨpaɨ ketinemaika netukari 'apɨkatiteriwe. 'Imatɨrieka, ¿titayari memukwiwawe petiwarutiwewi?
PSA 89:48 ¿Kemɨ'ane 'apuyeika kamɨnike, yatɨni yɨwetɨ muwatiyanikɨ teukiyapa?
PSA 89:49 Tati'aitɨwame, ¿hakewari 'anaki'eriya meripai mieme, Rawiri kepemɨtiutahɨawixɨ yapetikamietɨ?
PSA 89:50 Tati'aitɨwame, kenaye'eri te'a'uximayatsiriwamete kememɨtenanaimarie, meta ne'iyaritsie hipame teɨteri watierika kenemɨrexeiya.
PSA 89:51 Yawé, memɨmetsi'aye'unie mepɨtatsinanaima, kemɨtiumie 'axamepɨte'ikɨhɨawe pemenayexei.
PSA 89:52 'Aixɨa ke'itɨarieka Yawé yuheyemekɨ.
PSA 90:1 Muitsexi nenewierieya, Kakaɨyari nɨ'arieya. Ti'aitame, 'ekɨ tatsi'awiwietame pepɨhɨkɨ tsepa tanuiwari memanuyekɨka.
PSA 90:2 Hɨri katinunuiwawekaku meta kwie pekatawewiwekaku, meripaitɨtɨ metatsiere 'uxa'a warietɨni, 'ekɨ Kakaɨyari pepɨhɨkɨ.
PSA 90:3 'Ekɨ yapepɨtiyuriene teɨteri tumuanari memakɨkanikɨ, kepauka mɨpaɨ pemutaine: «Xemɨkwiwawe, tumuanari xeke'akɨne».
PSA 90:4 Xeimiriyari xɨka 'anuyeyani, 'ahetsiemieme, xeitukari hepaɨ pepɨtixeiya, tɨkarikɨ yapaɨmexɨa hurayari maye'axeni hepaɨ pepɨtixeiya.
PSA 90:5 Pepɨwarakumaweriya teɨteri. Heinɨtsika hepaɨ mepɨ'ane. Ximeri mepɨtinunuiwa, tupiriya hepaɨ
PSA 90:6 ximeri witsi'anetɨ yɨratɨ mɨtineika taikaita 'ari pɨyɨna pɨwaki.
PSA 90:7 'Ahaxɨa yurikɨ pɨtatsikwa'a, pemɨha'akɨ pepɨtatsimariuta.
PSA 90:8 'Ahɨxie tita 'axatemɨte'uyuri pepɨtixeiya, 'ahekɨaripa pɨti'ane 'axatemɨte'uyuri ketemɨte'anukanama.
PSA 90:9 'Ahaxɨakɨ tatukari peyeika naitɨ, xei'itukariyari pɨreutetere tawiyari ketemɨteheutetere.
PSA 90:10 Hipatɨ haika tewiyari heimana tamamata wiyari mepɨtihipite, heiwa tepanuti'axe nauka tewiyari wiyari, xɨka tɨrɨkariya 'akuxi tehexeiyani. 'Apɨpaɨme mɨkɨ wiyari, mɨyatɨtɨ, waɨkawa 'uximayatsika pɨtiuyɨne meta 'uximatɨarika: yapauka kananuyekɨkani, tameta wahamatɨa tekaniuhuni.
PSA 90:11 ¿Kemɨ'ane 'ahaxɨa mɨtɨrɨkaɨye petimaiwe? 'Ahaxɨa pɨmariwe ketemɨteheumama temetsimakaxetɨ.
PSA 90:12 Ketatineuta'ɨkitɨa tatukari 'aixɨa 'anemekɨ temɨ'inɨatanikɨ, ta'iyari mɨtimaiwenikɨ.
PSA 90:13 Yawé, ¿kepauka tahetsɨa pepɨnuani? Keniwanenimayaka mate'uximayatsiriwamete.
PSA 90:14 'Anaki'eriyakɨ ketanehɨniyani ximeri, kepaɨmexɨa tukari temu'uwani teputikwikani teyutemamawietɨ.
PSA 90:15 Kepaɨmexɨa wiyari temɨte'uka'eniwakai petatsihiweritɨatɨ, mɨkɨ tukari hikɨ temawierika pɨta kenayeitɨa.
PSA 90:16 Yaketatineuxeiyatsitɨa 'a'uximayatsikakɨ, witsikepemɨ'anekɨ tanuiwarite wahetsiemieme.
PSA 90:17 Tati'aitɨwame takakaɨyari ketatsiparewieka. 'Aixɨa kenaineni ta'uximayatsika hetsiemieme, huu, 'aixɨa kenaineni ta'uximayatsika hetsiemieme.
PSA 91:1 Kemɨ'ane 'Amutewi hetɨa muyu'awieta 'akaniuyeikamɨkɨ Naimekɨmɨtɨrɨkaɨye 'i'etɨriwiyakaku.
PSA 91:2 Yawé ne mɨpaɨ nepɨrahɨawe: «'Ekɨ 'ahetsɨa nemɨne'awieta pepɨhɨkɨ, 'ahetsie nemɨtiwiya, Kakaɨyari kemɨ'ane yuri nemɨti'eririe netsiparewiekaku».
PSA 91:3 Mɨkɨ xeikɨa metsi'uxɨna pɨyɨwe tiyumemiwame winiyarieyatsie meta kwiniya mɨtiyumemiwatsie,
PSA 91:4 metsɨ yu'anakɨ kamenanukanakamɨkɨ meta 'anateyatɨa muyuti'awieta pɨyɨwe. Yuri kemaine, mɨkɨ 'ahetsie nunuwame payani.
PSA 91:5 Tɨkari mumariwetsie pepɨkaheumaka, meta 'ɨrɨkɨ tukarikɨ mɨtimɨiyanekɨ,
PSA 91:6 meta kwiniya 'etɨriyapa mɨtatsihupienekɨ meta tukarikɨ mɨɨya mɨwaka'unakɨ.
PSA 91:7 Tsepa xeimiriyari 'a'utata mukaxɨri, meta tamamata miriyari 'atserieta, peru 'ekɨ pepɨka'atiweni.
PSA 91:8 Yurikɨ pekaninierimɨkɨ, pekaniwaxeiyamɨkɨ Kakaɨyari memɨka'ayexeiya kepauka memɨte'akapitɨarieni.
PSA 91:9 Metsɨari Yawé hetsɨa pekaniyu'awietani, meta 'ahetsie nunuwame 'Amutewi kanihɨkɨtɨni,
PSA 91:10 nitixaɨtɨ 'uximatɨarika 'ahetsie pɨkatinuani, nitixaɨtɨ kwiniya 'akie pɨkatinuani.
PSA 91:11 Mɨkɨtsɨ yuniuki tuayamete kaniwatanɨ'amɨkɨ naime 'ahuyeta memetsi'ɨwiyanikɨ.
PSA 91:12 Mɨkɨ yumamatekɨ mekamenanukuhanikuni, pemɨkahekawautsenikɨ tetetsie.
PSA 91:13 Mayetsi watsata pepuyeikani, 'ɨrawetsixi meta kuuterixi pepɨwatiketsini.
PSA 91:14 «Ne nepixɨna, mɨkɨ nehamatɨa muyeikakɨ, hetsiena nepunuaka, kenemɨtitewa mɨnetsimatekɨ.
PSA 91:15 Mɨkɨ pɨnetsitahɨawe, neta nepita'eiya, hamatɨana nepuyeikani kepauka 'uximatɨarika mexeiyani, nekanixɨnamɨkɨ 'aixɨa nekatinitahɨawimɨkɨ.
PSA 91:16 Waɨkawa wiyari nepipitɨani, newikweitsitɨarikatsie nepitemawieritɨani».
PSA 92:1 Nɨawari xawatikɨ kwikarɨwame 'uxipiya tukaritsie. Yawé, 'aixɨa pɨ'ane pamɨpariyutsi mɨmatsipitɨaka meta nɨawari mexeiyani 'ahetsiemieme, 'Amutewi 'aku,
PSA 92:2 meta 'anaki'eriya mɨmariwe mukuxatani ximeri, metatsiere ke'aixɨa pemɨtikamie tɨkarikɨ,
PSA 92:3 kanarite meta xaweri hayuanekaku, haripa hayuanekaku ketiutikwikatɨreni.
PSA 92:4 Yawé, 'ekɨ temawierikakɨ pepɨnetsihɨniya mariweme pemɨtiyurienekɨ, 'ayumieme 'aixɨa nepaineni 'atɨrɨkariya 'uximayatsikaya hetsiemieme.
PSA 92:5 Yawé 'aku, waɨkawa pɨmamariwawe 'awewiya, meta pɨkayumatiwanɨa kepemɨtiku'eriwa.
PSA 92:6 Yuri memɨkate'erie 'atsimepɨkatemate, 'atsimemɨkatemate mepɨkaheitimaitɨkɨka,
PSA 92:7 Kakaɨyari memɨka'ayexeiya tsepa memɨyɨra tupiriya hepaɨ, meta tsepa memutixutui, yuheyemekɨ mekaneuyehɨiyakuni.
PSA 92:8 Yawé, 'ekɨ xeikɨa yuheyemekɨ 'aixɨa pekatinahɨawarɨwamɨkɨ.
PSA 92:9 Yawé, yurikɨ mematsi'aye'unie, yurikɨ hekɨakamekɨ mekanikwikuni, metaxɨrietɨkaitɨ naitsarie mekanakɨnikuni 'axateyuruwamete.
PSA 92:10 Tuuru yeutanaka tɨrɨkariyaya pepɨnetsi'upitɨa, pepɨnetsi'ukawiri witsimu'ɨa 'aixɨa mɨ'anekɨ.
PSA 92:11 Nehɨxie memɨkaxɨrienikɨ memɨnetsi'aye'unie yapepɨtiuyuri, meta ne'enatɨ kepauka memɨkwi'iwarɨmenitsie.
PSA 92:12 Takɨ hepaɨ mepɨte'uxutuwe 'aixɨa memɨte'u'iyari, kariuxa Riwanu mieme hepaɨ mepɨte'uwawere.
PSA 92:13 Yawé kie me'etsietɨ, takakaɨyari takwana mepuxutu.
PSA 92:14 Tsepa memu'ukirawetsixi, meputixuxuawereni, yuheyemekɨ metɨrɨkawitɨ metsitsiɨrawitɨ.
PSA 92:15 Meke'ihekɨatani: «Yawé heitserie kanexeiyani, mɨkɨ ne'ai kanihɨkɨtɨni, hetsiena 'axamɨti'ane pɨtiumawe».
PSA 93:1 Yawé katini'aitani, witsi'aneme 'anakatɨtɨ, Yawé mariwemekɨ pɨyutikemaritɨa yɨtɨrɨkariya panakatɨ. 'Aixɨa 'aneme kwie putawewi, hatsuaku pɨkakuyuitɨarieni.
PSA 93:2 Matɨari paitɨ 'uwenieya puyukake, meta 'ekɨ matɨari paitɨ yuheyemekɨ pepuyeika.
PSA 93:3 Yawé, kepauka waɨkawa haa muwayeneikatɨka waɨkawa 'utatɨrarɨkatɨ, kaniuyuaneni hamewarieya.
PSA 93:4 Peru Yawé, muyuawitsie pɨmariwe: waɨkawa tɨrɨkaɨyetɨ haa kemuyuane reuyeta, meta haramara hamewarieya kemɨkatitɨrɨkaɨye.
PSA 93:5 Yawé, 'aitsikaya hetsie temɨtewiyani 'aixɨa pɨ'ane, kiiya mɨpatsiekɨ 'aixɨa pɨ'itɨarie yuheyemekɨ.
PSA 94:1 Yawé, Kakaɨyari 'ekɨ tahetsiemieme pemɨtiwarakapitɨwa, Kakaɨyari tahetsiemieme pemɨtiwarakapitɨwa, pematsiɨkɨme kene'ayeitɨa.
PSA 94:2 Kenanukukexi, 'itsɨkame 'ikɨ kwieyaritsie pemɨti'aita, yaketiniwarakapitɨa kwinimieme memɨteyuti'ɨre.
PSA 94:3 Yawé, ¿kepaukake mepɨtehayewa Kakaɨyari memɨka'ayexeiya meyutemamawietɨ kememɨteyuriekɨ?
PSA 94:4 Yunaitɨ mɨkɨ 'axateyuruwamete mekanihɨkɨtɨni, niuki peraixi, meteyukatawe'erietɨ xeikɨa mekaniutiniukani.
PSA 94:5 Yawé, 'ateɨterima mepɨtiketsinarɨwa, waɨriyarika mepɨte'aitɨarie pemɨwaranayexei.
PSA 94:6 Wiuraxi mepɨwakuya, meta teewatari, metatsiere nutuite.
PSA 94:7 Mɨpaɨ me'utiyuatɨ: «Yawé pɨkaniere, Kakuwu Kakaɨyarieya 'atsipɨkatimate».
PSA 94:8 'Ikɨ xekeneuti'eniexɨa, teɨteri 'atsixemɨkatemate, ¿'atsixemɨkatemate kepaukari xepeiti'enietɨkɨne?
PSA 94:9 ¿Kamɨtsɨ kati'ena kemɨ'ane nakate mɨtatsihawewiriexɨa, meta kamɨtsɨ katiniere kemɨ'ane tahɨxite mutiwewi?
PSA 94:10 ¿Kamɨtsɨ kataranayewaxɨani kemɨ'ane nuiwarite mɨwaranayewaya meta kemɨ'ane 'ena kwiepa mɨ'ɨxatsita?
PSA 94:11 Yawé, teɨteri kememɨteyɨkɨhɨawe kaniwamaika, mɨpaɨ katinimaika kename tixaɨtɨ mekatehɨkɨ.
PSA 94:12 Yawé, keyutemawieka kemɨ'ane 'ekɨ pemanayewaya, kemɨ'ane 'ekɨ pemɨti'ɨkitɨa 'a'aitsikatsie,
PSA 94:13 minewienikɨ kayuwatɨ 'uximatɨarika tukariyari, mexi 'akuxi Kakaɨyari mɨka'ayexeiya putsuya wewiyaneni.
PSA 94:14 Yawé yuteɨterima pɨkawaku'eirieni, mɨwaranayexei pɨkawanutuita.
PSA 94:15 Xanetsika tita mɨtiheitserietsie katinitaxatamɨkɨ, kemɨ'ane 'iyari heitseriekame memexeiyani mɨkɨ mepenukuweiya.
PSA 94:16 Xewitɨ pɨkanetsi'uparewi kepauka Kakaɨyari memɨka'ayexeiya memɨnetsi'utamitsie. Nixewitɨ nehetsie nuatɨ 'axateyuruwamete pɨkawaraye'uniekai.
PSA 94:17 Xɨka Yawé kanetsi'uparewienike, yapauka nemɨme kayuwatɨ nepɨtihunikekai.
PSA 94:18 Yemekɨ 'aixɨa nekatixatawetɨ: «Nepekaharuarɨka», Yawé, 'anaki'eriya 'upayeikakairi netsiparewienike.
PSA 94:19 Kepauka nehetsie 'iyaritɨarika waɨkawa mɨtixɨawekai, 'anɨtɨarika ne'iyari pɨhɨniyakai temawierikakɨ.
PSA 94:20 'Ekɨ te'aitamete 'axamemɨte'u'iyari pepɨkawahamiku, 'axa'anemekɨ memɨte'aita,
PSA 94:21 'aixɨa memɨte'u'iyari wahetsiemieme niuki 'axa'aneme memɨwewie, meta memuwakuya 'atsimemɨkate'u'iyari.
PSA 94:22 Yawé matsi nehetsie nunuwame pɨhɨkɨ, Nekakaɨyari kanihɨkɨtɨni, 'ai nemɨne'awitatsie.
PSA 94:23 Mɨkɨ 'axaxemɨte'uyurikɨ pɨtixe'akapitɨani meta 'axaxemɨteyuriekɨ pɨxeka'una, Yawé takakaɨyari pɨxekwini.
PSA 95:1 Xekenakɨni, Yawé tepɨtanɨawa teyutemamawietɨ, kwi tepehɨaweni 'ai tatsiwikweitsitɨwame.
PSA 95:2 Hɨxiena tepɨye'axeni pamɨpariyutsi te'ipitɨatɨ, kwi tepehɨaweni kwikarikɨ.
PSA 95:3 Yawé Kakaɨyari mɨmariwe mɨhɨkɨkɨ, Ti'aitame mɨmariwe kakaɨyarixi wahetsiemieme.
PSA 95:4 Mamayatsie pɨti'ane kwieta meukatewa, pɨtipiinieya hɨrite 'amanutitɨtɨ.
PSA 95:5 Haramara pɨtipiinieya, mitawewikɨ, yumamakɨ kwie putawewi.
PSA 95:6 Xekenakɨni, hɨxiena tepakatutsitaxɨani, tepɨtitunuma'uni Yawé hɨxie mɨtatsi'utawewi.
PSA 95:7 Mɨkɨ takakaɨyari mɨhɨkɨkɨ, tameta teɨterimama, muxatsimama tekanihɨkɨtɨni mɨtatsihɨ yukuraruta. Xɨka xeme hikɨ niukieya xe'u'enieni,
PSA 95:8 yu'iyari xepɨkatseiriyani, Meriwa mɨrakutewatsie kememuyɨ 'iya tukaritsie hepaɨ, makumawetsie Matsaha xemu'uwakaitsie,
PSA 95:9 kepauka xepaapama memɨnetsi'uta'inɨataxɨ, menetsikwamanakutɨ, wahɨxie yanetiyurienekakutɨtɨ.
PSA 95:10 Huta tewiyari wiyari nepɨha'akai mɨkɨ nuiwari hetsiemieme, mɨpaɨ nekaniutayɨni: «Mɨkɨ teɨteri xeime pɨta huye mepuweiya, nehuye mepɨkamate».
PSA 95:11 Hikɨ neha'atɨ, mɨpaɨ neputayɨ: «Hatsuaku nehetsɨa mepɨkaye'axɨani hakewa nemɨwareka'uxipitɨanikekaitsie».
PSA 96:1 Yawé hetsiemieme xekeneutakwika kwikari hekwame, Yawé hetsiemieme xekenekwikani, teɨteri yunaitɨ kwiepa xemɨtama.
PSA 96:2 Yawé hetsiemieme xekenekwikani, xekenenɨawani, xekenekuxatani tukarikɨ kemɨrayu'iwa.
PSA 96:3 Nuiwarite watsata xekenekuxatani witsikemɨ'ane, meta mariwemekɨ kemɨtiyuriene xekenekuxatani yunaime teɨteri watsata.
PSA 96:4 Kanimariweni Yawé, hetsiena pɨtinakeni witsimɨtikɨhɨawarɨwanikɨ, matsi waɨkawa makaxiwatɨ keyuri hipatɨ kakaɨyarixi.
PSA 96:5 Yunaitɨ nuiwarite wakakaɨyarixi tixaɨtɨ mepɨkatehɨkɨ, matsi Yawé muyuawi kaniutawewieni.
PSA 96:6 Xawatɨriyaya meta kemɨtimariwe niukametemama mekanihɨkɨtɨni, witsipɨtiuye'ane meta tɨrɨkariya kanixuaweni tukieya mɨpatsieta.
PSA 96:7 Yawé xeketeneyetuiri, yunaitɨ teɨteri, Yawé yaxeketeneutahɨawi witsikemɨ'ane meta kemɨtitɨrɨkaɨye.
PSA 96:8 Yawé yaxeketeneutahɨawi witsikemɨ'ane mɨmariwekɨ hetsiena mɨtinakenikɨ, xeketenemawirieka meta takwana xekeneutahakeni.
PSA 96:9 Yawé hɨxie xekenetitunuma'uweni tukieya mɨmariweta, yunaitɨ kwiepa xemɨtama xekenayemakaxeni.
PSA 96:10 Nuiwarite mɨpaɨ meke'utiyuaneni: «Yawé pɨti'aitame». Mɨkɨ kwie putawewi, hatsuaku pɨkakuyuitɨarieni. Mɨkɨ teɨteri wahetsie pɨti'aita heitseriemekɨ.
PSA 96:11 Muyuawi meta kwie xekeneyutemamawieka. Haramara ke'utayuaneni meta yunaitɨ mana memɨteye'uwa.
PSA 96:12 Naitɨ mɨraka'etsitɨre mukumane xeyutemamawietɨ xekeneutikwikani, meta yunaitɨ mana memɨtexuawe. Naitsarie kɨyexite hɨritsie meke'utikwikani.
PSA 96:13 Yawé hɨxie xekeneutikwikani, 'ukanamieniri. 'Ukanamieniri kwiepa 'aixɨa tiyurienike. Kwiepa memɨtama kaniwataxanetamɨkɨ kemɨtiheitseriekɨ, meta teɨteri wahetsie yuri mainekɨ.
PSA 97:1 Yawé pɨti'aitame. Kwie keyutemawieka. Xekeneyutemamawieka kwie haramaratsie xemɨyetei.
PSA 97:2 Haiwitɨri 'anenetɨ yɨyɨwitɨ 'auriena kanatetɨkani, heitserie katinikuxatani yu'uwenitsie 'akaitɨ.
PSA 97:3 Tai hɨxiena 'anuyekaitɨ kaniumieni, memeye'unie mɨwatitaiya.
PSA 97:4 Mimierikayakɨ kwiepa kanakuhekɨkɨareni, 'ixeiyatɨ kwie kaniwatayuaneni.
PSA 97:5 Yawé hɨxie, kwie naime mukutsiyari, hɨrite pɨtixɨrɨwe katira hepaɨ.
PSA 97:6 Muyuawi pikuxata heitserie kemɨrexeiya, yunaitɨ teɨteri mepixeiya kemɨtimariwe.
PSA 97:7 Meke'utewiyatsitɨarieni yunaitɨ kakaɨyarixi memɨwarayexeiya, kemɨ'ane memɨyuti'ɨre memɨkakakaɨyarixi wahekɨ. Yunaitɨ kakaɨyarixi hɨxiena xekeneukahɨxima'uti.
PSA 97:8 Yawé, heitserie kepemɨtiyurienekɨ, Tsiyuni mɨkɨ pɨti'enie mɨkɨkɨ puyutemawie, meta Kura kiekariyarite puyutemamawie.
PSA 97:9 'Ekɨ Yawé 'Apemutewi pemɨhɨkɨkɨ, kwiepa naitsarie pemɨti'aita. 'Ekɨ matsi memɨkakakaɨyarixi wayeta yemekɨ pepɨkawe.
PSA 97:10 Yawé pɨwanaki'erie kemɨ'ane 'axamɨti'ane memɨxani'erie, 'aixɨa memɨteyurie mɨkɨ watukari pɨ'ɨwiya, kepauka Kakaɨyari memɨka'ayexeiya memuwa'uximatɨa wahetsie kaninuaka.
PSA 97:11 Heitserie memexeiya hekɨariya wahetsie pɨ'axe, meta temawierika pɨ'axe kemɨ'ane yu'iyaritsie 'aixɨa memɨteyɨkɨhɨawe wahetsie.
PSA 97:12 Xekeneyutemamawieka Yawé hetsie, xeme teɨteri heitserie xemexeiya, meta 'aixɨa xekenaitɨkani hetsiena mieme kemɨtipatsie.
PSA 98:1 Nɨawari. Xekenekwikani Yawé hetsiemieme kwikari hekwame, mariweme mɨtiuyurikɨ. Yɨtɨrɨkariyakɨ, yumamá patsiekamekɨ, mɨwara'iwaxɨkɨ memeye'unie.
PSA 98:2 Yawé pitihekɨata kemɨrayu'iwaxɨkɨ, pɨtiwahekɨatɨa heitserie kemɨrexeiya nuiwarite wahɨxie.
PSA 98:3 Paye'eri naki'eriya kemɨrexeiya meta ke'aixɨa mɨtikamie, 'ixaheritsixi teɨteriyari wahetsiemieme, yunaitɨ teɨteri kwiepa memɨtama yamepɨtemate takakaɨyari wikweitsitɨarikaya hetsiemieme.
PSA 98:4 Kwi xekenahɨaweni Yawé xeyutemamawietɨ, yunaitɨ kwiepa xemɨtama. Xekeneutikwikani xeyutemamawietɨ kwikari meta nɨawari.
PSA 98:5 Xekeneutikwikani nɨawari Yawé hetsiemieme haripa hayuanekaku, kanarikɨ meta kwikari witsihanɨyɨtɨkaime.
PSA 98:6 Kwi xekenahɨaweni Yawé xeyutemamawietɨ, Ti'aitame, pirikɨxa hayuanekaku meta kuxineta.
PSA 98:7 Haramara ke'utatɨrarɨkani meta yunaitɨ mana memɨteye'uwa, meta kwie, meta mana memɨtama.
PSA 98:8 'Aki haa 'amupapa muyehapane mekete'utahutsunani, meta hɨrite meke'utikwikani meyutemamawietɨ.
PSA 98:9 Yawé hɨxie xekeneutikwikani, 'ukanamieniri kwiepa 'aixɨa tiyurienike. Kwiepa memɨtama wahetsie 'aixɨa katiniyurimɨkɨ, teɨteri wahetsie 'aixɨa 'anemekɨ katinita'aitamɨkɨ.
PSA 99:1 Yawé ti'aitame kanihɨkɨtɨni: nuiwarite meke'utiyɨyɨakani. Mɨkɨ yuteɨtamete watsata yu'uweni kaniukeka: kwie ke'utayuaneni.
PSA 99:2 Yawé kanimariweni Tsiyuni hetsie, meta kanimariweni yunaime teɨteri waheima.
PSA 99:3 'Aixɨa keraniuwani hetsiena mieme mɨmariwekɨ makaxiwatɨ: mɨkɨ kanipatsieka.
PSA 99:4 Ti'aitame pemɨtɨrɨkaɨye, 'aixɨa mɨti'ane pemɨtinaki'erie: 'ekɨ mɨtiheitserie pepɨtiukaye meta Kakuwu hetsie 'aixɨa pepɨtiyuriene heitseriemekɨ.
PSA 99:5 Yawé hetsiemieme witsixekenaitɨkani mɨtakakaɨyari: hetɨana xekenetihɨxima'uweni: mɨkɨ kanipatsieka.
PSA 99:6 Muitsexi 'Aruni hamatɨa, mawari wewiwamete wahamatɨa mepaye'ukai, meta Tsamuheri, kemɨ'ane memehɨawekai wahamatɨa. Yawé meputahɨawixɨ, mɨkɨta pɨwaruta'ei,
PSA 99:7 haiwitɨritsie 'amuwekaitsie paitɨ kaniwarutahɨawe. Mekaneye'atɨani 'aitsikateya, 'inɨari niukiyari mɨwayetuiritsie.
PSA 99:8 Yawé meta takakaɨyari, 'ekɨ pepɨwaruta'ei, 'ekɨ wahetsiemieme Kakaɨyari petiwareuyehɨwirietɨ pepatɨa, meta kepauka pemɨwaru'uximatɨa 'axamete'uyurieku.
PSA 99:9 Yawé hetsiemieme witsixekenaitɨkani mɨtakakaɨyari: xekenayexeiyani tukitana: Kanipatsieka Yawé takakaɨyari.
PSA 100:1 Pamɨpariyutsi nɨawariyari. Kwixekenahɨaweni Yawé xeyutemamawietɨ, teɨteri kwiepa xemɨtama,
PSA 100:2 Yawé xekenayexeiyani yutemawierima. Hɨxiena xekeneti'uweni karima xe'utikwitɨ.
PSA 100:3 Yawé xekenemaika Kakaɨyari mɨhɨkɨkɨ, mɨkɨ pɨtatsi'utawewi, hetsɨana tepɨmiemete. Tepɨteɨterimama, tame muxatsimama tepɨhɨkɨ kuraruyata miemete.
PSA 100:4 Kiteniena xekeneutahaxɨa pamɨpariyutsi xe'ipitɨatɨ, xekeneu'axɨa takwana nɨawari hetsiena mieme xe'utikwitɨ, pamɨpariyutsi xekenepitɨaka, 'aixɨa xekenaitɨkani hetsiena mieme.
PSA 100:5 Yawé 'aixɨa katiniuka'iyarini meta naki'eriyaya hawaikɨ pɨkaheu'axe, 'aixɨa katinikamieni yuheyemekɨ.
PSA 101:1 Rawiri nɨawarieya. Naki'eriya nepɨtakwika meta tita mɨtiheitserie: Yawé, nɨawari 'ahetsiemieme nepɨtikwika.
PSA 101:2 'Aixɨa netiyurienetɨ nepumienikeyu huye 'aixɨa mɨ'ane 'utɨma: ¿Kepauka pepɨnetsiha'iwatamie? Nekie 'anepukanikeyu 'aixɨa netinekɨhɨawetɨ ne'iyaritsie.
PSA 101:3 Ne nepɨkayuta'iyaritɨani yanemɨtiyurienikɨ tixaɨtɨ 'axamɨti'ane hepaɨtsita mieme. Teɨteri kemɨtiheitserie yamemɨkateyurie nepɨwaxani'erie, naime nepɨtixani'erie kememɨteyurie.
PSA 101:4 Nehetsie naime nekatinehɨamɨkɨ 'axamɨti'ane, nehetsie munuani 'axamɨti'ane pɨkayɨweni.
PSA 101:5 Kemɨ'ane 'awie yu'iwa hepaɨtsita 'axamɨtayɨni, yuheyemekɨ ne kayuwatɨ nepipitɨani, kemɨ'ane mariweme mayuyeitɨwa meta timaiweme nepɨkayɨwe nemɨtinewiriekakɨ.
PSA 101:6 Kwi nepɨwaxeiyani 'iya kwiepa memɨtama 'aixɨa memɨte'u'uwa, nehamatɨa memu'uwanikɨ, nehetsiemieme xeikɨa mepɨte'uximayaka, kemɨ'ane wahetsie mɨkarahɨiwa.
PSA 101:7 Xewitɨ tɨma nekiita pɨka'ayekani, kemɨ'ane meteyukananaimatɨ 'amemu'uwa, meta pɨkayɨweni nehɨxie muyeikani xewitɨ 'itarikakɨ tikuxatatɨ.
PSA 101:8 Xeitukari manukayeikani nepɨkawapitɨaka 'amemu'uwani yunaime Kakaɨyari memɨka'ayexeiya kwiepa memɨtama, Yawé kiekarieyatsie nepɨwarayeweiya yunaime 'axateyuruwamete.
PSA 102:1 Mɨtiuka'eniwa nenewierieya kanihɨkɨtɨni, mɨximetɨ, yutatuatɨ yuhiwerietɨ Yawé kemɨtiutahɨawixɨ. Yawé, keneu'eni nenenewieri, 'ahetsɨa keye'ani ne'iwaurika hiwariyari.
PSA 102:2 Neuxei kwerietɨ keneneuxeiya kepauka nemɨtiuka'eniwa. Kwi keneneu'eni, yapauka keneneuta'eiya kepauka nemetsihahɨawe.
PSA 102:3 Karikɨ kɨtsi hepaɨ netukari kanitiparikeni, ne'umete kanenikukwaxiyani tɨɨ hepaɨ.
PSA 102:4 Ne'iyari pɨkayɨweri meta 'iteɨri hepaɨ pɨtawaxime, metatsiere nepɨkareukwaimɨkɨ.
PSA 102:5 Waɨkawa karima nemuta'aiwakɨ kaniyɨweni ne'umete muti'inɨata.
PSA 102:6 Nekaneunutuixieka nɨpe yuxaɨta makumawetsie muyeika hepaɨ nekatiniyumaika, mikɨri hepaɨ nekatiniyumaika kiekari mu'uni tsata muyeika.
PSA 102:7 Nemeukuni nepɨkayɨweri, wiki yuxaɨta kii heima makaka hepaɨ nepɨtiyumate.
PSA 102:8 Tsepa kepauka memɨnetsi'aye'unie yuniukikɨ mepɨnetekwinitɨa, meta mekaneniutaterɨwani paitɨ kepauka 'axamemɨtiyuani.
PSA 102:9 Naxi xeikɨa kanine'ikwaitɨni, nemɨti'ie hamatɨa ne'ukai nekananuye'eni.
PSA 102:10 Pe'uyeha'aka waɨkawa, pepɨnetsi'anukuketɨa 'ariketa 'ateewa pepɨnetsiheukahɨani.
PSA 102:11 Netukari 'etɨri mɨyukupata hepaɨ pɨ'ane, tupiriya hepaɨ nepɨtayɨnarirɨme.
PSA 102:12 Yawé, 'ekɨ 'aheyemekɨ pekatini'aitani, yuheyemekɨ 'ekɨ 'apekatiniteriweni yunaime nuiwarite watsata.
PSA 102:13 Pekananukukemɨkɨ meta Tsiyuni pekanitinenimayatamɨkɨ, 'ari mɨkɨ tukari kanaye'aniri pemitinenimayatatsie. Mɨkɨ tukari kemɨtiu'inɨaritsie kanaye'ani.
PSA 102:14 'Ahetsɨa miemete mate'uximayatsiriwamete mekanixɨamayaka kemɨtiuta'unekai, 'unimeyari mexeiyatɨ mepinaki'erie.
PSA 102:15 Yawé mekanimakaxekakuni nuiwarite kwiepa memɨtama, te'aitamete kwiepa memɨte'aita yunaitɨ mekanimaikakuni kemɨtimariwe.
PSA 102:16 Karikɨ Yawé Tsiyuni tawarita kanihekwatɨamɨkɨ, meta kemɨtitɨrɨkaɨye matsiɨkɨtɨ kanayeimɨkɨ.
PSA 102:17 Memɨyuhiwerie wanenewieri pe'enietɨ pekanayeimɨkɨ, kememɨmetewawirieka tsiepɨre pepɨraye'atɨwani.
PSA 102:18 'Ikɨ keraka'utɨarieni 'iya memɨtinunuiwa wahetsiemieme, meta kiekari memɨnetɨarieni Yawé 'aixɨa meketehahɨaweni.
PSA 102:19 Yawé kanakaniere yutuki mɨmariweta 'ayekaitɨ, kwiepa naitsarie kanakuniere muyuawitsiepaitɨtɨ,
PSA 102:20 'ateewa memehapanie watsuari 'enienike meta mɨwaxɨnakɨ 'ari memɨkwi'iwarɨme,
PSA 102:21 meta Tsiyunitsie Yawé mukuxaxatsiwanikɨ meta Kerutsaremetsie mɨnɨawariekakɨ,
PSA 102:22 kepauka yunaitɨ teɨteri meta te'aitamete memɨyukuxexeɨriwa Yawé metahɨaweke.
PSA 102:23 'Ane'umiekaku Kakaɨyari netɨrɨkariya kaniutixɨtɨani, netukari 'etsikaniutipaɨmeriya.
PSA 102:24 'Ayumieme mɨpaɨ nekaniutayɨni: «Nekakaɨyari, pepɨkanetsihewitɨkɨni, netukari hixɨapa, 'ekɨ 'aheyeme pepuyeika.
PSA 102:25 Tsɨtuapai 'ekɨ kwie pekaniunetɨani, meta muyuawi kani'awewiyatɨni.
PSA 102:26 Mɨkɨ mekaneuyewekuni, 'ekɨ peru 'apepuyeika. Naitɨ mɨkɨ katinitixɨmɨkɨ 'ixuriki hepaɨ. Meta kemari hepaɨ pepipataxɨani, huma pepeitawiwieni.
PSA 102:27 'Ekɨ peru yaxeikɨa mɨkɨ pepɨhɨkɨtɨni, meta 'atukari hawaikɨ pɨkaheu'axe.
PSA 102:28 Mate'uximayatsiriwamete waniwema 'amepu'uwani, meta wanuiwarima 'amepu'uwani 'ahɨxie».
PSA 103:1 Rawiri nɨawarieya. Ne'iyarikɨ Yawé nepɨnɨawani, ke'inɨawani naitɨ newaiyari patsietɨ kemɨtitewakɨ.
PSA 103:2 Ne'iyarikɨ Yawé nepɨnɨawani, meta nepɨkaratɨtɨmaiyani 'aixɨa kemɨtiyuparewiwakɨ.
PSA 103:3 Mɨkɨ pɨmereuyehɨwirie naime 'axakepemɨtiuyuri meta kepemɨtiuka'eniwa naime 'aixɨa kameniyurieka,
PSA 103:4 mɨkɨ pitawikweitsitɨwa 'atukari mɨkite watsata meta metsinaki'erietɨ payeika meta metsinenimayatɨ,
PSA 103:5 mɨkɨ waɨkawa pɨmetsiparewie pe'uyeikakaku tita pemɨreuyehɨwa meta kwixɨ hepaɨ pɨmetsihekwariya metsitɨrɨkariyatɨ.
PSA 103:6 Yawé kemɨtiheitserie yapɨtiyuriene meta memɨnanaimarie wahetsie kaninuaka.
PSA 103:7 Muitsexi yuhuye kaniuxeitsitɨani, 'ixaheritsixi kaniwarutahekɨatɨani yu'uximayatsika.
PSA 103:8 Yawé 'aixɨa katiniuka'iyarini meta katiniyukanenimayaka, yapauka pɨka'uyeha'arɨwe meta waɨkawa naki'eriya pexeiya.
PSA 103:9 Yapɨkatarate'a tukarikɨ meta yuheyeme tatsihekatɨ pɨkahayeika.
PSA 103:10 Ke'axatemɨte'uyuri mɨpaɨ yeme pɨkatatsiyuriene meta mɨpaɨ pɨkatarakapitɨwa ke'axatemɨte'uyuri.
PSA 103:11 Kanimariweni naki'eriyaya kemɨ'ane memeyemakaxe wahetsiemieme, taheima kemeutitewa hepaɨ.
PSA 103:12 Tita ke'axatemɨte'uyuri mɨkɨ 'ateewa katinewiwieni, kemeteewa tau manatineikatsie 'atsita makayuyuipiketsie hepaɨ.
PSA 103:13 Yawé waɨkawa pɨwanenimaya kemɨ'ane memeyemakaxe wahetsiemieme, nuariekame yuniwema wahetsiemieme kemɨtiuka'iyari hepaɨ.
PSA 103:14 Ketemɨte'u'iyari mɨkɨ katanimaika, katinimaika tame haxu temɨhɨkɨkɨ.
PSA 103:15 Tewi tupiriya hepaɨ kani'aneni, tukarieya pɨtixutuwe tuturi 'ɨtsita mieme hepaɨ:
PSA 103:16 kepauka mɨ'ekawarieni, pukumamawere huyerieyatɨma pɨkayukuhekɨkɨare.
PSA 103:17 Peru Yawé naki'eriyaya hawaikɨ pɨkaheu'axe, yuheyemekɨ pɨtiwiya kemɨ'ane memeyemakaxe wahetsie, waniwema meta mɨkɨ waniwema wahetsie 'aixɨa mɨti'ane puxuawe,
PSA 103:18 kemɨ'ane tɨratuya memaye'atɨa wahetsie meta meme'eriwa 'aitsikaya mɨpaɨ memɨteyuriekakɨ.
PSA 103:19 Yawé muyuawitsie yu'uweni kaniukakeni, kemɨti'aita yakatiniyɨaneni yunaime wahetsie.
PSA 103:20 Yawé xekenenɨawani, xeme niukieya tuayametemama, xemɨtɨrɨkawi niukieya xemaye'atɨa meta kemɨti'aita yaxemɨtekahu.
PSA 103:21 Yunaitɨ kuyaximama, Yawé xekenenɨawani, te'i'uximayatsiriwamete kemɨtinake yaxemɨtekahu.
PSA 103:22 Yawé xekenenɨawani, yunaitɨ keyupaɨmeme mɨxe'utawewi naitsarie mɨra'aita xemɨtama. Ne'iyarikɨ Yawé nepɨnɨawani.
PSA 104:1 Ne'iyarikɨ Yawé nepɨnɨawani. Yawé nekakaɨyari, 'ekɨ pepɨmariwe, witsi'aneme pepanakatɨ ti'aitame kamixaya.
PSA 104:2 Xawatɨmekɨ pekaneuyukunaka 'ixuriki tuxamekɨ hepaɨ, muyuawi peputaweraxɨ 'ixuriki hepaɨ.
PSA 104:3 Haiwitɨritsie 'akii 'amɨpapa peputiwewi meta hai 'akaxeta kuyaxa mieme pepayeitɨwa. 'Ekɨ pekananutiyeixani 'eka 'anateyatsie.
PSA 104:4 'Eka 'aniuki tuayamete pepɨwarayeitɨwa, meta mimierika mepɨmate'uximayatsirie.
PSA 104:5 'Ekɨ kwie pekaniukamani tsutɨmeyaritsie, hikɨ mana hatsuaku pɨkahewatayuani,
PSA 104:6 haramarakɨ pepitikemaritɨa, meta haa hɨritsie puyuhayewaxɨ.
PSA 104:7 Peru 'ekɨ pewarutatieku haa mepekɨ, 'aniuki yuariyaya me'u'enieka meputinautsaxɨ.
PSA 104:8 Hɨritsie mekanitiyune, mayeweweritsie kaniu'axɨani, hakewa 'ekɨ pemɨwaretanɨ'a.
PSA 104:9 Hakewa memeuye'atɨkani pepɨwaru'inɨaritɨa memɨka'anuyekɨkanikɨ, tawarita hatsuaku kwie naime mepɨka'anukanani.
PSA 104:10 'Ekɨ pekatiniyurieneni haixa haa muhapanenikɨ hɨritsie mayeweweritsie, meta yeuta muxuawenikɨ.
PSA 104:11 Mɨkɨtsie yunaitɨ yeutari meputihareweni, muwa puxuri yeutari witsimekatenihareka.
PSA 104:12 Taheima memu'uwa wikixi mekaniyu'ituatɨaka haa 'aurie meta mekaniutikwikani kɨyexi xawaritsata.
PSA 104:13 Taheima 'akie paitɨtɨ hɨrite pepɨhatuiya, kwie 'a'uximayatsikakɨ 'aixɨa pɨreu'erie.
PSA 104:14 Tupiriya pepɨyɨratɨa tewaxi wahetsiemieme, meta 'iteɨrite teɨteri memika'etsa kwiepa timieme yu'ikwai memɨtehexeiyanikɨ:
PSA 104:15 kaxie winuyari 'iyari mɨtemawieritɨawe, hatseiti meta yuhɨxie mieme mayemerɨkaɨyenikɨ, meta 'ikwai memayenenierenikɨ.
PSA 104:16 Yawé kɨyexiteya 'aixɨa katinehatuiyarieka, kariuxa kɨyeyari Riwanu paitɨ mika'e.
PSA 104:17 Mɨkɨtsie wikixi mepuyu'ituatɨa, huku 'amutɨtɨtsie kwaxuri 'amemɨnene mekaniyukitɨaka.
PSA 104:18 Hɨri 'amanutitɨtɨtsie tsipuri yeutari mekaniu'uwani, meta 'aita mekaneixeiyani yu'awiwietame haitsɨrixi.
PSA 104:19 'Ekɨ metsa pekaniutawewieni, mi'inɨatanikɨ xeimetseri hetsiemieme. Metatsiere tau, mɨtimate kepauka makayuyuipike.
PSA 104:20 'Ekɨ yɨriya pekani'atɨwani, kani'axeni, hikɨ mɨkɨ tɨkaritsie yutawima memɨteku'uwa yeutari mekanewayekɨkani.
PSA 104:21 Mayetsi mepuyutihaxɨatɨwa, yu'ikwai meha'iwawatɨ, Kakaɨyari mewawirietɨ wa'ikwai mɨwaminikɨ.
PSA 104:22 Peru kepauka tau manatineikatsie mekanitakɨkani mekayuhekɨatakutɨ, yuterɨta mekaneutahakeni.
PSA 104:23 Hikɨ teɨteri mekanayekɨkani yu'uximayatsika menɨnike, meteta'uximayatake kepaukake mɨkɨyɨre.
PSA 104:24 Yawé 'aku, pɨtimɨire tita pemɨtiutiwewi. Mɨkɨ tinaime pepɨtiutiwewi petimaiwetɨ. Kwiepa kemakuyewa mekanihɨneni pemɨtiwarutiwewi.
PSA 104:25 Mana haramara kaniyemaka, 'a'atayeutɨ hawaikɨ kaheu'atɨ, hetsiena memɨtexuawe meteyumɨiretɨ, 'amemɨtepapa meta 'etsimemɨtepepe, kememɨteyupaɨme pɨkayɨwe mɨwaruti'inɨata.
PSA 104:26 Mana kanuwate 'amɨpapa kaniye'uwani meta mana kanikuyuaneni Rewiyatahini mɨmariwe, 'ekɨ pemitawewi hamatɨana pemɨwaikanenikɨ.
PSA 104:27 Mɨkɨ yunaitɨ mekanita'ikwewani 'ahetsie pemɨtiwaminikɨ kepauka memɨtekwa'a.
PSA 104:28 'Ekɨ pepɨtiwayetuirie, mɨkɨta mepuka'itsana, kepauka 'amamakɨ pemɨtiwamikwa, mɨkɨ waɨkawa metehexeiyatɨ mepakɨka.
PSA 104:29 Xɨka pewaruhayewa, meputimamawe, xɨka wa'iiya pewarunawairieni mepɨtakukuwe meta tumuanari mepakɨka.
PSA 104:30 Xɨka 'a'iiya pehanɨ'ani, tawarita mepɨtixuawere, meta mɨpaɨ kwie naitɨ puyuhekwatɨani.
PSA 104:31 Yawé kepemɨtimariwe yuheyemekɨ mɨpaɨ peke'aneni, Yawé keyutemawieritɨaka tita mɨtiutawewi hetsiemieme.
PSA 104:32 Mɨkɨ kwie kanixeiyani meta kanitayuitɨwani, hɨri kanikumaɨwani meta kɨtsi kaniwatinenetɨwani.
PSA 104:33 Yawé nenɨawatɨ nepayani kenemɨreutere, nekakaɨyari nɨawarieya neputikwikani mexi 'akuxi ne'ayeniereni.
PSA 104:34 Keyutemawieka kenemɨtiku'eriwakɨ, netsitɨ, nekaniyutemawieka Yawé hetsiemieme.
PSA 104:35 'Axateyuruwamete kwiepa meke'akumawere, tawariri mepɨka'u'uwani. Ne'iyarikɨ Yawé nepɨmetsinɨawani. Yawé kenɨawarieka.
PSA 105:1 Pamɨpariyutsi Yawé xekenepitɨaka, mɨkɨ xekenahɨaweni, yunaime nuiwarite wahetsɨa 'uximayatsikaya xekenehekɨatani.
PSA 105:2 Xekenekwikani, nɨawarieyakɨ xekeneyutemamawieka, naime mariweme kemɨtiuyuri mɨkɨ xeketenekuxatani.
PSA 105:3 Yemekɨ xekeneuyuti'ɨreni patsiekamekɨ kemɨtitewakɨ hetsiemieme, Yawé memɨkuwautɨwe wa'iyari keyutemamawieka.
PSA 105:4 'Ahurawa xekeneɨkɨni Yawé hetsɨa meta tɨrɨkariyaya hetsɨa, xepɨkatehayewani xe'ikuwaɨtɨwetɨ.
PSA 105:5 Xekenaye'eriwani mariwemekɨ kemɨtiuyuri, 'inɨari kemɨtiuwewi, meta 'aitsika ke'aneneme mɨyetua.
PSA 105:6 Xeme, 'Apɨrahami xiɨyarimama, mɨkɨ Kakaɨyari ti'uximayatsiriwame. Xeme, Kakuwu niwemama, Kakaɨyari mɨxe'anayexei.
PSA 105:7 Mɨkɨ Yawé kanihɨkɨtɨni, tame takakaɨyari, 'ena kwiepa naitsarie 'aitsikaya kanixuaweni.
PSA 105:8 Mɨkɨ yutɨratu yuheyemekɨ pa'eriwa, kemutayɨ yuniukikɨ xeimiriyari nuiwariyari wahetsiemieme.
PSA 105:9 Mɨkɨ kanihɨkɨtɨni tɨratu 'Apɨrahami hamatɨa muwewi, 'Itsahaki hamatɨa kemɨtiuyuhɨritɨa.
PSA 105:10 Kakuwu yakatiniutahɨawe 'aitsika kaneyeitɨirieni, 'Ixaheritsixi wahetsiemieme tɨratu yuheyeme mieme kanayeitɨani,
PSA 105:11 kepauka mɨpaɨ mutayɨ: «Kanani kwieyari nekameniyetuiriemɨkɨ, piinitɨarika 'ahetsie mɨtinakenikɨ».
PSA 105:12 Kepauka 'akuxi temɨkayumuirekai, teewanarixi tekanihɨkɨtɨkaitɨni yakɨ teyupaɨmetɨ mɨkɨ kwieyatsie,
PSA 105:13 ku'uwamete mekanihɨkɨtɨkaitɨni tsepa kemɨ'ane kwieyaritsie, meta tsepa kemɨ'ane te'aitamete wahetsɨa,
PSA 105:14 xeime pɨka'upitɨa waɨriyarika mɨtiwata'aitɨanikɨ, matsi wahetsiemieme te'aitamete kaniwarutatieni:
PSA 105:15 «Neteɨterima nemuwaranayexei xepɨkawa'uximatɨaka, Neniukamete xepɨkatewakwinitɨaka».
PSA 105:16 Kakaɨyari haakaxa kanayeitɨani mɨkɨ kwieyaritsie tɨriku kaneuyehɨani naime.
PSA 105:17 Peru mɨkɨ wahɨxie xeime kanenɨ'ani: Kutse titewakame, waɨriyarika ti'uximayatame hepaɨ kaniutuiyani.
PSA 105:18 'Ɨkateyatsie tepɨa mepeiwɨtɨiriexɨa, panutahɨiyakai yukɨipitɨa tepɨa patekakai.
PSA 105:19 Kepaukake maye'a kemutayɨ kemɨtiyɨnikekai, 'ana Yawé niukieya matsiɨkɨtɨ patɨa kename yuritɨkai.
PSA 105:20 'Ana ti'aitame katiniuta'aita mɨxɨnarienikɨ, teɨteri mɨtiwa'aitɨakai kaniwayeyepieni.
PSA 105:21 Ti'aitame kaneyeitɨani yukie naime hepaɨtsita meta tita mɨrexeiyakai katinihɨritɨani,
PSA 105:22 kanipitɨani mana kemɨ'ane memɨmexɨakate mɨtiwati'ɨkitɨanikɨ, meta kemɨtimaiwekai 'ukirawetsixi mɨtiwakuxaxatɨwanikɨ.
PSA 105:23 Hikɨ 'Ixaheri 'Ekipitu paitɨ kaninuani, Kakuwu teewatanaka pɨhɨkɨtɨkai Kami kwieyatsie.
PSA 105:24 Yawé yapɨtiuyuri memɨtamɨirekɨ teɨterimama yumɨireme pɨwarayeitɨa, memeye'uniekai matsi mepɨkayumɨirekai,
PSA 105:25 'ayumieme mepɨwaruyehekaxɨ teɨterimama meta te'i'uximayatsiriwamete mewananaimatɨ mepakɨ.
PSA 105:26 Hikɨ kaniwarutanɨ'ani Muitsexi meta 'Aruni, mɨkɨ muwaranayexei,
PSA 105:27 mɨkɨ 'inɨari mepuwewi watsata, mariweme mepɨte'uyuri Kami kwieyaritsie.
PSA 105:28 Yɨriya wahetsɨa kanenɨ'ani, mɨkɨ kwieyaritsie kanakuyɨre, peru mɨkɨ niukieya mepɨka'u'eni.
PSA 105:29 Haa wahetsɨa mieme xuriya payeitɨa tsapari meta mekaniukwini.
PSA 105:30 Naitɨ 'Ekipitu kwieyaritsie temutsi mekaniutaweni, te'aitamete wakiita paitɨ mepuxuawekai.
PSA 105:31 Kepauka Kakaɨyari mutaniu, naitsarie mɨkɨ kwieyaritsie meputixuawerixɨ, nakatarixi meyumɨiretɨ meta xaipɨtsi memɨteyukewe.
PSA 105:32 Wiyeri tee wiyeriyari pɨta kanayeitɨani, meta mimierɨkari waɨkawa mɨkɨ kwieyaritsie kanenɨ'ani,
PSA 105:33 naime kaxie haraweriyari kaniumura meta piní haraweriyari, naitsarie mɨkɨ kwieyaritsie kɨyexi katiniumure.
PSA 105:34 Kakaɨyari kepauka yamutayɨ, mekaniu'axɨani 'utsikari, mekayu'inɨatsinɨatɨ.
PSA 105:35 Tinaime mekateniutikwani tupiriya yɨrariyari xawariyari mɨkɨ kwieyaritsie, 'etsaripa 'ikwaxi naime mekateneukuxɨxɨani.
PSA 105:36 Kaniwarukwini yunaime tɨɨri mexɨakate mɨkɨ kwieyaritsie miemete, tɨɨri 'aixɨa memɨ'anene mekaniukwini.
PSA 105:37 'Ixaheritsixi kaniwarayewitɨni huru me'utɨkɨme meta pɨrata, yunaitɨ mɨkɨ xiɨyari xewitɨ tɨma pɨkahekawe.
PSA 105:38 'Ekipitutari mepuyukatemamawi kepauka memayekɨ, memɨwamakaxekaikɨ 'ixaheritsixi.
PSA 105:39 Yawé haiwitɨrikɨ kaniwa'etɨriwiyakaitɨni, meta taikɨ yɨwikɨta kaniwahekɨariwiyakaitɨni.
PSA 105:40 Kepauka 'ikwai memuta'iwau, mɨkɨ xɨ'aurixi kaniwareyenɨ'airieni, 'ikwai muyuawitsie miemekɨ kaniwarutihuxaitɨani.
PSA 105:41 'Ai kaneuyepieni, 'ana haa kananeni makumawetsie kaniuhanekaitɨni hatɨa hepaɨ.
PSA 105:42 Kakaɨyari yutɨratu mɨpatsie pɨkahatɨmai, 'Apɨrahami mɨti'uximayatsiriwame hamatɨa miwewi.
PSA 105:43 Yuteɨterima kaniwarayewitɨni, muwaranayexei, waɨkawa temawierimakamekɨ meta temawierima me'utihiwame.
PSA 105:44 Kaniwayetuirieni nuiwarite wakwietɨkai, tita mana teɨteri memɨte'uka'etsakai wapiini pɨratɨa,
PSA 105:45 para yukakaɨyari 'aitsikaya memayexeiyanikɨ meta mɨpaɨ memɨte'u'uwanikɨ kemaitɨka. Yawé kenɨawarieka.
PSA 106:1 Yawé kenɨawarieka. Pamɨpariyutsi xekenepitɨaka Yawé, mɨkɨ 'aixɨa mɨtiuka'iyarikɨ, naki'eriyaya mɨwaɨkawa hawaikɨ pɨkaheu'axe.
PSA 106:2 Xewitɨ pɨkayɨwe yemekɨ mikuxatanikɨ Yawé mariweme kemɨtiuyuri, yatɨni pɨkayɨwe minɨawanikɨ yemekɨ kemɨreuyewetse.
PSA 106:3 'Aixɨa meke'itɨarieka heitserie 'aixɨa memɨteyurie meta yuheyemekɨ kemɨtinake memɨteyurie.
PSA 106:4 Yawé, kenenaye'eri, kepauka pemɨwatinenimayata 'ateɨterima, kenaye'a kepauka tukari pemaye'atɨani wikweitsitɨarika pemɨtixuawitɨani.
PSA 106:5 Keneneupitɨa 'ateɨterima wahamatɨa nemuyeikani 'aixɨa 'iyari pemɨwapitɨanitsie, keneneupitɨa 'ateɨterima memuyutemamawiekatsie neta nemɨnetemawiekakɨ, meta nemɨmetsinɨawanikɨ pemɨwaranayexei wahamatɨa.
PSA 106:6 'Axatepɨte'uyuri, yaxeikɨa tapaapama wahepaɨ, 'axatepɨte'uyuri meta 'axamɨti'ane waɨkawa tepɨte'uyuri.
PSA 106:7 Kepauka tapaapama 'Ekipitu memɨtitekatsie, mariwemekɨ kepemɨtiuyuri hetsiena yuri mepɨkate'uta'eri, ke'aixɨa pemɨtiuka'iyari 'aheyemekɨ mɨpaɨ mepɨkatehetima meta Haramara Mɨxeta tetsita mepuyeha'a.
PSA 106:8 Peru Kakaɨyari pɨwarutawikweitsitɨa, yuhetsiemieme mariweme mayuyeitɨanikɨ, yutɨrɨkariya matsiɨkɨme mayeitɨanikɨ.
PSA 106:9 Haramara Mɨxeta kaniutatieni, hikɨ mɨkɨ kanakawani, mana haramara 'amatiyewatsie kaniwaruwitɨtɨyani makumawetsie memɨkɨne hepaɨ.
PSA 106:10 Kaniwarutawikweitsitɨani memɨwaraye'unie wahepaɨtsita, kemɨ'ane memɨwaxani'eriekai wahepaɨtsita.
PSA 106:11 Memɨwaraye'uniekai haa waheima kaniuyeurieni, mɨkɨ xewitɨ tɨma pɨka'utawikwei.
PSA 106:12 Hikɨ 'ana tapaapama niukitsie yuri mepɨte'uta'eri meta nɨawari hetsienamieme meputakwikaxɨ.
PSA 106:13 Peru yapauka mekatenatɨmaiya kemɨtiuyuri meta meta'ikwewatɨ mepɨka'akɨ kemɨtiwarahɨawekai.
PSA 106:14 Makumawetsie kemɨtiwanake meteyurietɨ mepu'uwakai, yemekɨ makumawetsie me'u'uwatɨ Kakaɨyari mekaniuta'inɨata.
PSA 106:15 Mɨkɨta tita memɨte'itawawiri katiniwayetuirieni, peru kwiniyata kaniwarenɨ'airieni tiyumemiwame.
PSA 106:16 Makumawetsie metitetɨ Muitsexi mekaniutiniukimatɨkɨne meta 'Aruni, mɨpatsiekai Yawé hetsiemieme.
PSA 106:17 Kwie kanewatiyepiere hikɨ 'ana Ratani kaneukakwani, meta kaniwareukateuku 'Awirani memaweiyakai.
PSA 106:18 Mɨkɨ mɨyamemɨyupaɨmekai tai kaniwarutixɨtsitɨani, mekaniutitani 'axateyuruwamete.
PSA 106:19 Huré hɨriyaritɨa me'u'axɨaka tsikeru mekaniutawewieni, kakaɨyari wewiyakame hɨxie mekaniukatunuma'uni.
PSA 106:20 Kakaɨyari waɨkawa watemawieritɨakaku mepiku'eiri, tuuru pɨta 'ɨkiyaya mepanukuwei tupiriya mukwa'a.
PSA 106:21 Kakaɨyari mekanatɨmaiya muwarutawikweitsitɨa meta waɨkawa mamariwaweme mɨtiuyuri 'Ekipitu kwieyaritsie:
PSA 106:22 mariweme katiniuyurieni Kami kwieyaritsie metatsiere Haramara Mɨxeta tetsita.
PSA 106:23 Kakaɨyari mɨpaɨ putayɨ kename wakwinikekai peru mɨpaɨ pɨkatiuyuri Muitsexi hetsiemieme menayexei, hɨxiena kaniukeni huyetana meta pɨka'ipitɨa ha'atɨ mɨwaka'unakɨ.
PSA 106:24 Kwie witsimɨ'ane mepɨka'utanaki'eri, Kakaɨyari kemɨtiwakɨhɨawekai yuri mepɨkate'ita'eriri.
PSA 106:25 Yu'ixuriki xamaruyarita me'ayetetɨkaitɨ 'axamekateniutixatatɨkɨne meta Yawé mepɨka'anu'eni.
PSA 106:26 'Ayumieme, mɨkɨ mɨpaɨ putayɨ wahepaɨtsita, makumawetsie kename wakwinikekai,
PSA 106:27 waniwemata hipame nuiwarite watsata wakaxɨrienikekai meta naitsarie kwiepa wataxɨriexɨanikekai.
PSA 106:28 Mekaniyuyetuani kakaɨyari Wahari-Pehuxi hetsɨa meta kakaɨyarixi memɨka'ayeneniere wamawarika mepɨte'utikwai.
PSA 106:29 Mɨkɨkɨ Yawé mepuyehaxɨatɨa 'axameteyurietɨ, hikɨ wahetsie kaninuani kwiniya.
PSA 106:30 Peru Pinexi wahetsiemieme 'aixɨa pɨtiuyuri, 'ana kwiniya paunua wahetsɨa pɨkaye'a.
PSA 106:31 Mɨkɨ kemɨtiuyuri 'aixɨa mɨtiuka'iyari payeitɨarie yuheyemekɨ, hikɨ 'enamɨtiyehane 'aixɨa ketikuxaxatsiwani.
PSA 106:32 Haa manakaxɨrɨwe Meriwa 'aurie Yawé mekaniuyehaxɨatɨani, mɨkɨ mɨyamemɨte'uyurikɨ Muitsexi hetsie pɨrahui.
PSA 106:33 Waɨkawa me'ihaxɨatɨakaku mɨkɨ kaniutaniuni, kahayu'eriwatɨ kemutainekai.
PSA 106:34 Mepɨkawaruka'unaxɨ hipame teɨteri Yawé mɨwaruta'aitakai memɨwakwinikɨ,
PSA 106:35 matsi 'axateyuruwamete mekaniwarutinɨni wayeiyari mehayexeiyatɨ mekanakɨne.
PSA 106:36 Mepɨwarayexeiyakai wakakaɨyarixi, hikɨ mɨkɨ wawiniyari kanayani.
PSA 106:37 Yuniwema 'ukitsi meta 'ukari mekaniwamawakaitɨni mɨkɨ kakaɨyarixi 'axamemɨ'anene wahetsiemieme.
PSA 106:38 Mekaniwarukwini 'atsimemɨkateyuriekame, yuniwema 'ukitsi meta 'ukari. Kepauka kakaɨyarixi Kanani miemete memɨwarutimawiri, mɨkɨ waxuriyakɨ mɨkɨ kwie 'axa'itɨarietɨ patɨa.
PSA 106:39 Mɨkɨ mɨyamɨti'ane meka'itiyakame pɨwarayeitɨa, meta mɨkɨkɨ mepuyutsewixima.
PSA 106:40 Yawé waɨkawa puyeha'a yuteɨterima wahetsiemieme, hetsɨana memɨmiemetetɨkai waxani'erietɨ patɨa.
PSA 106:41 'Ayumieme kaniwayetuani nuiwarite 'axateyuruwamete wahetsɨa, hikɨ waɨriyarika metewa'aitɨatɨ mepakɨ memɨwaraye'uniekai.
PSA 106:42 Memɨwaraye'uniekai mepɨtewaruta'uximayatsitɨa, kemɨtiwanake mepɨtewaruta'aitɨa.
PSA 106:43 Mɨixa Kakaɨyari wahetsie putanua, peru mɨkɨ, memɨ'iyamakaikɨ 'axameteyurietɨ, yaxeikɨa 'axameteyurietɨ mepakɨ.
PSA 106:44 Kepauka Kakaɨyari mɨwaruxei meyuhiweriekame, meta kepauka mi'eni wa'aiwari hiwariyari,
PSA 106:45 yutɨratu paye'eri wahamatɨa miwewi, naki'eriyaya mɨmariwekɨ kaniwarutinenimayata.
PSA 106:46 Yakatiniuyurieni memɨwaraye'unie wahetsiemieme, mɨkɨta memuwatinenimayatakɨ.
PSA 106:47 Yawé, ketaneutawikweitsitɨa, takakaɨyari pemɨhɨkɨ, tawarita ketaneukuxeɨri takwieyaritsie, pamɨpariyutsi temɨmetsipitɨakakɨ pepatsietɨ kepemɨtitewa, meta teyutemamawietɨ temɨmetsinɨawanikɨ.
PSA 106:48 Yawé 'aixɨa kerahɨawarɨwani, 'Ixaheri Kakaɨyarieya, yuheyemekɨ meta kaheu'akamekɨ. Yunaitɨ teɨteri mɨpaɨ meke'utiyuani: «Mɨpaɨ ketiɨyɨni». Yawé kenɨawarieka.
PSA 107:1 Yawé pamɨpariyutsi xekenepitɨaka, karikɨ mɨkɨ 'aixɨa katiniuka'iyarini, naki'eriyaya yuheyemekɨ katiniteriweni.
PSA 107:2 Mɨpaɨ meke'utiyuaneni Yawé mɨwarutawikweitsitɨa, mɨwaruxɨnaxɨ mɨwaraye'unie tiwa'aitɨakaku,
PSA 107:3 Naitsarie kwiepa wara'iniexɨaka mɨwarukuxeɨri, tayeta meta tatsutɨa miemete, tatserieta meta ta'utata miemete.
PSA 107:4 Memeuyexɨriekai makumawetsie meu'uwatɨ, huye kiekaritsie haneme mekahexeiyatɨ mekahemaririetɨ.
PSA 107:5 Meheuharikutɨ meta meheuhakakwikutɨ, mepɨkwiximekai.
PSA 107:6 Yawé mekaniutahiwieni me'utitsuatɨ mete'uka'eniwatɨ, hikɨ mɨkɨ mete'uka'eniwakaku kaniwaruxɨna.
PSA 107:7 Huye mɨheitserie 'utɨma kaniwarewitɨni, 'atsita kiekaritsie kaniwaye'atɨani.
PSA 107:8 Yawé naki'eriyaya mɨmariwekɨ, pamɨpariyutsi xekenepitɨaka, mariweme mɨtiuyurikɨ teɨteri wahetsiemieme.
PSA 107:9 Kemɨ'ane meuharimɨkɨ mɨkɨ pɨharitɨa, meta kemɨ'ane meuhakamɨkɨ 'aixɨa mɨti'anekɨ pitahuxaitɨa.
PSA 107:10 Meyuhiwerietɨ mehɨatɨkaitɨ, 'amepu'uwakai waɨkawa makɨyɨwitsie.
PSA 107:11 Kakaɨyari niukieya memɨka'u'enikɨ, 'Amutewi kemɨtiwa'ɨxatsitɨakai yamemɨkatekakɨkɨ.
PSA 107:12 'Uximayatsika mahete kaniwarupitɨani, mepekaxɨrɨwekai, xewitɨ pumawekai mɨwaparewienikɨ.
PSA 107:13 Meyuhiwerietɨ Yawé mekaniutahiwieni, hikɨ mɨkɨ kememɨte'uka'eniwakai pɨwarutawikweitsitɨa.
PSA 107:14 Yemekɨ yɨriyatsata kaniwarayehapani meta kaniwaruxɨna memɨhɨatɨkatei kaneutekixɨani.
PSA 107:15 Yawé naki'eriyaya mɨmariwekɨ, pamɨpariyutsi xekenepituaka, mariweme mɨtiyurienekɨ teɨteri wahetsiemieme.
PSA 107:16 Wurunitse 'itupariyari putitaraxɨ, meta tepɨa kɨyeyari 'etsipepetɨ kaneutanexɨani.
PSA 107:17 Mepɨte'ukwinitɨarie memɨka'anu'enanakɨ, mepu'uximatɨarie 'axamemɨte'uyurikɨ.
PSA 107:18 Naitɨ 'ikwaite pɨkawanakekai me'ixeiyatɨ meputihewakai, 'etsiwatɨkaku mekaniukwikaitɨni.
PSA 107:19 Meyuhiwerietɨ Yawé mekaniutahiwieni, hikɨ mɨkɨ kememɨte'uka'eniwakaikɨ pɨwarutawikweitsitɨa.
PSA 107:20 Yuniuki kanenɨ'ani 'aixɨa meteheu'eriekame mɨwarayeitɨanikɨ, mɨkɨ mɨpaɨ katiniwarutawikweitsitɨani teukiyapa.
PSA 107:21 Yawé naki'eriyaya mɨmariwekɨ, pamɨpariyutsi xekenepitɨaka, mariweme mɨtiyurienekɨ teɨteri wahetsiemieme.
PSA 107:22 Mawari meke'iyetuirieka pamɨpariyutsi me'ipitɨatɨ, 'uximayatsikaya mekekuxatani me'utihiwatɨ temawierikakɨ.
PSA 107:23 Haramaratsie mepɨkɨnetɨwekai yukanuwate 'amɨpapatsie, meyukuharerutatɨwetɨ haramaratsie 'ateewapai mepeta'axekai.
PSA 107:24 Mana haramara meukatewatsie, Yawé 'uximayatsikaya mekaniuxeiya meta mariweme kemɨtiuyuri.
PSA 107:25 Kepauka Kakaɨyari mutaniu, 'eka tɨrɨkaɨyetɨ kaniukuyani, 'ana 'apapatɨ kaniwakɨkakaitɨni hamewari,
PSA 107:26 muyuawitsie ye'axetɨ meta meukatewatsie heukakɨkatɨ. Kweriwa 'anekɨa, mɨkɨ mekaneuyuyexɨrieni.
PSA 107:27 Memɨtarɨweka hepaɨ mepekaxɨrɨwekai, mepɨtakeitsarietɨkɨkakai, tixaɨtɨ mepɨkateyunaki'eriekai, tsepa memɨtemaiwawe memɨyɨakai.
PSA 107:28 Waɨkawa meyuhiwerietɨ Yawé mekaniutahiwieni me'utitsuatɨ, hikɨ mɨkɨ kememɨte'uka'eniwakaikɨ kaniwarutawikweitsitɨani.
PSA 107:29 'Eka mɨtɨrɨkaɨye kaniupata wiyeri 'etsimupepekɨ: hamewari 'amɨnene kayuwatɨ kaniutamare.
PSA 107:30 'Ana kayuwatɨ mutamarixɨtsie mekaniyukatemamawieni. Meta 'ana Kakaɨyari kaniwarewitɨni hakewa memeɨkɨnekai.
PSA 107:31 Yawé naki'eriyaya mɨmariwekɨ, pamɨpariyutsi xekenepitɨaka, mariweme mɨtiyurienekɨ teɨteri wahetsiemieme.
PSA 107:32 Yunaitɨ teɨterimama meyuxeɨrietɨ mariweme mekehayeitɨaka. 'Ukirawetsixi 'itsɨkate 'aixɨa meke'utiyuaneni hetsiena mieme.
PSA 107:33 Haa 'amɨpapa muyehapane makumawe Kakaɨyari payeitɨa, haixa mukunenieretsie muwakitsie payeitɨa,
PSA 107:34 kwie 'aixɨa mɨtiu'anekai kwie muxiekariya payeitɨa, mana kiekatari 'axamemɨte'uyurikɨ.
PSA 107:35 Makumawetsie haa waɨkawa xuaweme payeitɨa, kwie mɨwakitsie haixa xuaweme payeitɨa,
PSA 107:36 mana memɨkiekakɨ pɨwa'atɨa memɨyehakakwitɨwe, hikɨ mɨkɨ mana kiekari mekaniukamani.
PSA 107:37 Mekaniuka'eni, kaxie haraweriyari mekaniutiwewieni, waɨkawa mekateniukaxeiya.
PSA 107:38 Kakaɨyari 'aixɨa kaniwaruyurieni, hikɨ mɨkɨ mekaniyutimɨire, meta yaxeikɨa watewama kaniwarutimɨiriya.
PSA 107:39 Kepauka mɨkɨ 'etsimemɨyupaɨmeni, waɨriyarika mete'uximayatsitɨarietɨ 'axamɨti'anekɨ meta hiwerikakɨ.
PSA 107:40 Kakaɨyari 'uximatɨarika pɨwakupitɨwa memamariwaweme memayuyeitɨwa, meta kaniwarenɨ'awani makumawetsie yeuta.
PSA 107:41 Peru tixaɨtɨ memɨkateheuxeiya 'aixɨa 'anekɨa kaniwa'atɨwani, meta watɨɨriyama tewaxi wahepaɨ katiniwamɨiriyani.
PSA 107:42 Kepauka 'aixɨa memɨte'u'iyari mɨpaɨ memɨteneniere mepuyukatemamawieni, peru yunaitɨ 'axamemɨte'u'iyari kayuwatɨ mepɨtamare.
PSA 107:43 Kemɨ'ane mɨtimaiwe, mɨpaɨ timaitɨ kehayani meta 'aixɨa kereitimani Yawé naki'eriyaya mɨmariwe.
PSA 108:1 Kwikari. Rawiri nɨawarieya. Kakaɨyari, ne'iyari pɨheitserie, ne'iyari 'aixɨa pɨ'ane, nɨawari 'ahetsiemieme nepɨtikwika.
PSA 108:2 Xekenanutanenieri haripa meta xaweri. Hekwame tukari nekananutanieritɨamɨkɨ.
PSA 108:3 Yawé, nepɨmetsinɨawani hipame teɨteri watsata, 'anɨawari neputikwikani hipame nuiwarite watsata.
PSA 108:4 'Anaki'eriyatsɨ kanimariweni muyuawi kana'iwani, muyuawitsie paitɨ kaniye'axeni 'aniuki yuri maine.
PSA 108:5 Neuxei Kakaɨyari, 'ekɨ muyuawi pekana'iwani, meta 'axawatɨriya naime kwie kananukanaka.
PSA 108:6 Ketaneuxɨna 'atɨrɨkariyakɨ, ketaneuta'eiya 'ateɨterima pemɨwanaki'erie memɨtawikwenikɨ.
PSA 108:7 Kakaɨyari mɨpaɨ putayɨ yutukita: «Nerayu'iwakamekɨ Tsikeni nepɨtixitexɨani, meta mayeweri Tsukuti nepɨti'inɨata.
PSA 108:8 Karaha meta Manatsexi, nehetsɨa mekanimiemetɨni, 'Epɨrahini kuya menaketsa kanihɨkɨtɨni nemu'utsie nunuwame, Kura meta ne'itsɨ kanihɨkɨtɨni.
PSA 108:9 Muhawi hetsie nekaniukamaimawani, 'Erumi hetsie nekakai nekaneutaxɨrɨwani, Piritsiteu kwieyari hetsie nepetahiwa neyutemawietɨ».
PSA 108:10 ¿Kemɨ'ane kiekari mukurarutɨarietsie pɨnetsi'anuwitɨni? ¿Kemɨ'ane 'Erumi huyeyari pɨnetsixeiyatsitɨani?
PSA 108:11 'Ekɨ pekanihɨkɨtɨni, Kakaɨyari, kemɨ'ane pemɨtatsi'uku'eiri. Neuxei Kakaɨyari, takuyaxima pepɨkawaparewieri.
PSA 108:12 Ketaneuparewi mɨtatsi'aye'unie hepaɨtsita, tewi parewiyaya tixaɨtɨ pɨkatiyunaki'erie.
PSA 108:13 Kakaɨyari tatsiparewiekaku tepɨtehayu'iwa, mɨkɨ memɨtatsi'aye'unie pɨwatiketsini.
PSA 109:1 Teyuitɨwamete wa'ukiyari. Rawiri nɨawarieya. Kakaɨyari, ne nepɨmetsinɨawa, kayuwatɨ pepɨka'umaka.
PSA 109:2 Neuxei teɨteri memɨkametsimate memɨte'itawa nehetsie mepɨtehahɨa menetsi'itatɨ, waniuki mɨtiyukwamanakɨ 'axamepɨnetekuxata,
PSA 109:3 yemekɨ kwinimieme meneteheuhekatɨ mepɨnetsixaneta, peru yakɨ xeikɨa mepɨtekuxata.
PSA 109:4 Newanaki'eriekakutɨtɨ 'axamepɨnetekuxata, peru ne mɨkɨ nepɨwayetua neyunenewietɨ 'ahetsɨa.
PSA 109:5 Tsepa ne 'aixɨa nemɨtiuka'iyari wahetsiemieme mɨkɨ 'axa'anemekɨ mepɨnete'akapitɨwa, menetsinaki'eriekakeme, mepɨnetsixani'erie pɨta.
PSA 109:6 Xeime 'axamɨtiuka'iyari keneutanɨ'a hetsiena mɨrahɨanikɨ, tserietana kehayerɨni mitaxaneta.
PSA 109:7 Hetsiena kerahɨiyani kepauka mɨtaxanetsieni, meta 'itarikayatɨtɨ hetsiena kerahɨani.
PSA 109:8 Tukarieya yapauka keneunawairi, meta xewitɨ pɨta 'uximayatsikayatsie ke'uyehani.
PSA 109:9 Tɨɨriyamama nutuite meke'akɨne, 'ɨyaya wiuratɨtɨ ke'uyuhayewa.
PSA 109:10 Tɨɨriyamama meheu'uwatɨ xeikɨa meke'akɨne meta meteku'iwautɨwetɨ, teteɨxɨmete meke'akɨne kii mu'u'unita.
PSA 109:11 Memɨte'iniɨtɨakai piiniteya yupiinite meketehayeitɨani, teɨteri teewatari tipiiniteya mekete'unawani.
PSA 109:12 Mɨkɨ nutuite xewitɨ pɨkawanenimayaka, meta pɨkawanaki'erieka.
PSA 109:13 Mɨkɨ nuiwariyari ke'ukumawere, meta nuiwari hekwatɨ 'umamietsie ke'umaweniri.
PSA 109:14 Yawé, kena'eriwani paapaya ke'axamɨtiuyuri, meta maamaya kemɨtiuyuri.
PSA 109:15 Yawé yaketiwaxeiyani, meta mematɨmaiyarienikɨ 'ena kwiepa yaketiuyurieni.
PSA 109:16 'Aixɨa tiyurienetɨ mɨratɨmaikɨ, tixaɨtɨ memɨkatehexeiya, memɨteheuyehɨwa meta yu'iyaritsie memu'uximatɨarie, pɨwarutawei meta pɨwarukwi.
PSA 109:17 Pinakekai xeime 'axamuyurienikɨ, hikɨ 'axamɨ'itɨarienikɨ hetsiena ketiunake. Mɨka'inakekaikɨ xeime 'aixɨa muyurienikɨ, 'aixɨa mɨ'itɨarienikɨ hetsiena mieme keheteewani.
PSA 109:18 'Axamutayɨkɨ kaniyuta'eima yukamixa manakatɨni hepaɨ, mɨkɨ waiyarieyatsie ke'anuyeneni haa hepaɨ, 'umeteya hetsie paitɨ keheye'ani hatseiti hepaɨ.
PSA 109:19 Mɨkɨ 'axamɨti'ane ke'ita'eima 'ixuriki hepaɨ. Karima ke'itahɨani hɨiyame hepaɨ.
PSA 109:20 Yawé mɨpaɨ ketiwarakapitɨani kemɨ'ane memɨnetsixaneta, kemɨ'ane memɨnetsi'ita meta 'axamemɨnetekuxata.
PSA 109:21 Yawé neti'aitɨwame 'aixɨa pemɨtiuka'iyari, 'ekɨ 'ahetsiemiemekɨ 'aixɨa kenetinexeiyani, keneneuparewi 'anaki'eriya mɨmariwekɨ meta 'aixɨa pemɨtiuka'iyarikɨ.
PSA 109:22 Ne tixaɨtɨ nepɨkarexeiya, nepɨreuyehɨwa, ne'iyari yemekɨ pu'uximatɨarie pɨtiuka'eniwa.
PSA 109:23 'Anɨari nepɨtaparirɨme 'etɨri yɨwikɨta mieme hepaɨ kɨpi hepaɨ nepɨ'ane 'anateya mɨtsatsani 'ekakɨ.
PSA 109:24 Haakakɨ nepɨkakewe ne'ɨkate pɨwerarani, ne'umete kaniyuhekɨkɨaka newaiyaritsie.
PSA 109:25 Teɨteri kepauka memɨnetsikuxexeiya mepɨnetsinanaima, menetsikuxexeiyatɨ, yumu'u meputitsike.
PSA 109:26 Yawé, nekakaɨyari, keneneuparewi, 'anaki'eriya mɨmariwekɨ, keneneutawikweitsitɨa.
PSA 109:27 Mɨpaɨ meketehetimani 'ikɨ 'ekɨ pɨta pemɨnetsiyurienekɨ, Yawé.
PSA 109:28 Tsepa mɨkɨ 'axamemɨnetsi'uyuri. 'Ekɨ matsi 'aixɨa keneneuyuri. Tsepa memaye'axɨa nehetsɨa, 'ekɨ matsi pepɨwatewiyatsitɨani, neta ti'a'uximayatsiriwame nepɨnetemawieka.
PSA 109:29 Nehetsie memɨtehahɨpa meke'utewiyatsitɨarieni waɨkawa, meke'uyutitetewiya yemekɨ.
PSA 109:30 Ne matsi Yawé, pamɨpariyutsi nekamenipitɨakamɨkɨ, nekameninɨawakamɨkɨ yumɨireme watsata.
PSA 109:31 Mɨkɨ haweri memɨyɨa mɨwawikweitsitɨwame, hetsiena waɨkawa rahɨiwakaku mierieximekaku.
PSA 110:1 Rawiri nɨawarieya. Yawé mɨpaɨ katiniutahɨawe Neti'aitɨwame: «Netserieta kenayexi ne nekaniwaka'unamɨkɨ memɨmetsi'aye'unie, 'ahɨxie nekaniwa'atɨamɨkɨ».
PSA 110:2 Yawé kemetsi'uparewieni pemɨtita'aitakɨ naitsarie Kerutsareme pe'ukaitɨ. Mana 'ekɨ ketine'aitani memɨmetsi'aye'unie wahixɨata.
PSA 110:3 'Akuyaxima mepuyuwaɨriyani tukaritsie kepauka xemuyutakwini, hɨrite mɨpatsietɨkatsie me'u'uwatɨ. Tau 'ɨrɨya manatinexɨanitsie, kepauka 'ahetsie mɨtinake hekwamekɨ pɨmatsitɨrɨkariya.
PSA 110:4 Yawé yaputayɨ kename yatikayani mɨkɨ pɨkatihayewa pɨkatipata: «'Ekɨ mawari wewiwame pekanihɨkɨtɨni yuheyemekɨ mieme, Merikitsereki hepaɨ».
PSA 110:5 Tati'aitɨwame 'atserieta kanakani, te'aitamete kaniwatipɨnamɨkɨ kepauka mɨyeha'ani tukariyaritsie.
PSA 110:6 Nuiwarite yakatiniwarakapitɨamɨkɨ, mɨkite kaniwakuxeɨrimɨkɨ, mu'ute kanitipɨnamɨkɨ naitsarie kwiepa.
PSA 110:7 Huyeta 'umietɨ tati'aitɨwame 'akitsie kanitiharimɨkɨ, hikɨ mɨpaɨ tawarita kanitatɨrɨkaxɨamɨkɨ.
PSA 111:1 Yawé kenɨawarieka. Yawé nepɨnɨawani naimekɨ ne'iyarikɨ meyumɨireme watsata, heitserie memu'uwa meyuxeɨriekaku wahamatɨa.
PSA 111:2 Yawé 'uximayatsikaya kanimamariwaweni meta waɨkawa mepuyutemamawie kemɨ'ane mɨkɨkɨ memɨteyɨ'ɨkitɨa.
PSA 111:3 Witsipɨ'anene pɨmamariwawe 'uximayatsikaya, kemɨtiheitserie yapɨtiyuriene yuheyemekɨ.
PSA 111:4 Yawé, mariwemekɨ yapɨtiuyuri temiku'eriwanikɨ. Yawé, 'aixɨa pɨtiuka'iyari pɨtiyukanenimaya.
PSA 111:5 Kemɨ'ane memeyemakaxe pɨtiwamikwa, yutɨratu kemɨtiuwewi yakatine'eriwani.
PSA 111:6 Yuteɨterima yutɨrɨkariya kaniwaruxeiyatsitɨani, tiwayetuirieka hipame nuiwarite tiwapiinite.
PSA 111:7 'Uximayatsikateya 'aixɨa pɨ'anene, kemɨtiheitserie pɨtiyuriene, naitɨ 'aitsikaya yuri putiyuane, 'aixɨa pɨ'ane hetsiena temɨtewiyanikɨ,
PSA 111:8 mɨkɨtsɨ yuheyemekɨ kani'ayumiemetɨni, yuri mainetsie katiniwiyani meta mɨheitserietsie.
PSA 111:9 Kakaɨyari yuteɨterima kaniwaruxɨna, hikɨ yutɨratu mɨpaɨ katiniuwewieni yuheyemekɨ mieme. Mɨkɨ mɨpatsie meta mɨtɨrɨkaɨye katinitewaka.
PSA 111:10 Xɨka xewitɨ timaiwetɨ heuyeimɨkɨni ke'itsutɨani Yawé 'ayemakatɨ, kemɨ'ane 'aitsika memaye'atɨa mekanimatsiɨkɨni, heitseriemekɨ yamekateniyurieka. Peuyewetse Kakaɨyari temɨnɨawani yuheyemekɨ.
PSA 112:1 Yawé kenɨawarieka. 'Aixɨa kani'itɨarieka kemɨ'ane Yawé mayemakaxe meta kaniyutemawieka 'aitsikaya 'aye'atɨatɨ.
PSA 112:2 Heitseriemekɨ yamemɨtekahu waniwema 'ena kwiepa mekatenita'aitakuni, meta 'aixɨa mekani'itɨariekakuni.
PSA 112:3 Yukie waɨkawa piinite mepɨtehexeiyani, meta yuheyemekɨ 'aixɨa mepɨteyurieka.
PSA 112:4 'Aixɨa memɨte'u'iyari mekanihekɨariwiyarieka yɨwipa. Kakaɨyari 'aixɨa pɨtiuka'iyari, pɨtiyukanenimaya meta heitserie pɨtiyuriene.
PSA 112:5 'Aixɨa pɨ'itɨarie kemɨ'ane mɨtiyuniniɨtɨwa piinite 'aixɨa 'anemekɨ, meta 'aixɨa 'anemekɨ yupiinitsie mɨti'uximaya.
PSA 112:6 'Aixɨa mɨtiuka'iyari yuheyemekɨ pukuxaxatsiwani, hatsuakutɨma 'axamɨti'ane pɨkare'iwa.
PSA 112:7 Pɨkatimani kepauka niuki 'axa'aneme mɨtaxatɨarieni, 'iyarieya heitserie 'aixɨa pɨtiyɨkɨhɨaweni Yawé hetsie yuri ti'erietɨ.
PSA 112:8 'Iyarieya pɨxewini, pɨkaheumaka, 'ariketa memeye'unie puwaxeiya me'atixɨriekame.
PSA 112:9 Tixaɨtɨ memɨkatehexeiya pɨtiwamikwa tita mɨrexeiya, ke'aixɨa mɨtiyuriene yuheyemekɨ katiniyurieneni, kemɨtiyurieneni 'aixɨa 'anemekɨ pɨmatiwani.
PSA 112:10 'Axamɨtiuka'iyari mɨkɨ pɨtixeiya, hikɨ pɨyeha'ani, yutame 'utaxikauteketɨ 'atsipɨyɨni. 'Axateyuruwamete kememɨteku'eriwa mɨkɨ yapɨkatikɨyɨne.
PSA 113:1 Yawé kenɨawarieka. Yawé te'uximayatsiriwamete, xekenenɨawani Yawé Kakaɨyari.
PSA 113:2 Yawé hepaɨtsita 'aixɨa keraniuwani, hikɨ mɨtiyehane meta yuheyemekɨ.
PSA 113:3 Yawé kenɨawarieka, tau 'amɨranatinenitsie meta kepaukake makayune.
PSA 113:4 Yawé naitsarie nuiwarite wahetsie katini'aitani, muyuawitsie katini'aitani.
PSA 113:5 Xewitɨ Yawé takakaɨyari hepaɨ pɨka'ane, 'uweni hexeiyatɨ muyuawitsie
PSA 113:6 mɨkɨ mana paitɨ muyuawi meta kwie pɨtaxeiya tixaɨtɨ karayuyeitɨatɨ.
PSA 113:7 Mɨkɨ tixaɨtɨ mɨkarexeiya tumuanaripa kanatihanani, meta xatsi matiwiwiwatsie patihana mɨreuyehɨwa,
PSA 113:8 te'aitamete memɨmamariwawe wa'aurie kaniwarayayatsani, teɨterimama tewa'aitɨwamete wa'aurie.
PSA 113:9 'Uka mɨkaniwewe, yukii mexeiyanikɨ kanipitɨaka meta tɨɨri mɨwarayexeiyakɨ. Yawé kenɨawarieka.
PSA 114:1 Kepauka 'Ixaheri, Kakuwu xiɨyarimama, memayekɨ 'Ekipitu kwieyaritsie, hipame teɨteri wakie,
PSA 114:2 Kura Kakaɨyari tukieya kanayani, 'Ixaheri kwieyari mɨra'aita patɨa.
PSA 114:3 Haramara 'ixaheritsixi waruxeiyaka huye kananuwewieni memanukɨnekɨ, metatsiere hatuxame Kurutani ka'uhanetɨ kanayani.
PSA 114:4 Hɨrite 'amɨtɨtɨ muxatsi 'ukitsi wahepaɨ mepɨte'utsunaxɨa metatsiere yemurite 'etsimɨpepe.
PSA 114:5 ¿Haramara, kemetiuyuri, titayari peranutayepierixɨ? ¿'Ekɨta Kurutani, titayari perewake pe'uhanetɨ?
PSA 114:6 Xemeta hɨrite 'amɨtɨtɨ meta yemurite 'etsixemɨpepe, ¿titayari muxatsi 'ukitsi wahepaɨ xete'utsunaxɨa?
PSA 114:7 Neuxei kwie, Yawé hɨxie keneuyɨyɨakani, Kakuwu Kakaɨyarieya hɨxie.
PSA 114:8 Mɨkɨ 'aitsie haa kananetɨani, meta tete mayetse'itsie haixa kananetɨaxɨani.
PSA 115:1 Yawé, 'aixɨa pɨ'ane 'ekɨ pemɨnɨawarieka, 'anaki'eriyakɨ meta yuri pemɨtikuxatakɨ, tame matsi heitserie tepɨkahexeiya.
PSA 115:2 Hipatɨ teɨteri mɨpaɨ meputiyuaneni, metatsinanaimatɨ: «¿Hakewa 'aku xekakaɨyari?»
PSA 115:3 Takakaɨyari muyuawitsie kaniuyeikani, mɨkɨ yakatiniyurieneni kemɨtinake.
PSA 115:4 Peru mɨkɨ nuiwarite memɨwarayexeiya kakaɨyarixi huru meta pɨrata mekanihɨkɨtɨni, teɨteri wawewiya.
PSA 115:5 Meputeni, peru mepɨkaniuwawe, mepuhɨxi, peru mepukaheuneniere,
PSA 115:6 mepunaka, peru mepɨkaheu'enana, meputsuri, peru mepɨkateheu'ɨkwe,
PSA 115:7 mepumama, peru mepɨkatemayɨawawe, mepɨ'ɨka, peru mepɨka'ɨkɨniwawe, mepɨkɨipi peru mepɨkayɨwawe memɨtehata'eiyakɨ.
PSA 115:8 Kemɨ'ane memɨwatiwewiwa, mɨkɨ wahepaɨ mepɨ'anene, metatsiere yunaitɨ yuri memɨte'erie wahetsie.
PSA 115:9 Matsi 'ixaheritsixi, Yawé hetsie yuri xeketene'erieka, mɨkɨ kanixeparewiwametɨni meta xehetsie nunuwame kanihɨkɨtɨni.
PSA 115:10 'Aruni xiɨyarimama, Yawé hetsie yuri xeketene'erieka, mɨkɨ kanixeparewiwametɨni meta xehetsie nunuwame kanihɨkɨtɨni.
PSA 115:11 Kemɨ'ane Yawé xemayemakaxe, mɨkɨ hetsie yuri xeketene'erieka, mɨkɨ kanixeparewiwametɨni meta xehetsie nunuwame kanihɨkɨtɨni.
PSA 115:12 Yawé pɨkatatsi'atɨmaiya meta 'aixɨa kataniyurieka: 'ixaheritsixi 'aixɨa kaniwayurieka, meta 'Aruni xiɨyarimama 'aixɨa kaniwayurieka,
PSA 115:13 'aixɨa kaniwayurieka kemɨ'ane Yawé memayemakaxe, 'aixɨa kaniwayurieka 'amemɨtɨtɨ meta 'etsimemɨtɨtɨ.
PSA 115:14 Yawé kewamɨiriyani xetɨɨriyama meta xeniwema watɨɨriyama.
PSA 115:15 Yawé hetsɨa timieme 'aixɨa mɨti'ane wahetsie ketinakeni, muyuawi mutawewi meta kwie.
PSA 115:16 Muyuawi Yawé katinipiinieyatɨni, peru teɨteri kwie kaniwayetuirieni.
PSA 115:17 Memukwiri mepɨkayɨwawe Yawé memɨnɨawani, memukateukiekɨri.
PSA 115:18 Tame tekanihɨkɨtɨni Yawé temɨnɨawa hikɨ meta yuheyemekɨ. Yawé kenɨawarieka.
PSA 116:1 Ne Yawé nepɨnaki'erie mɨkɨ mɨnetsi'eniekɨ waɨkawamekɨ nehehɨawekaku.
PSA 116:2 Mɨkɨ nenenewieri mɨ'eniekɨ, yuheyemekɨ yanepɨrehɨawe.
PSA 116:3 Mɨki yuwiniyarikɨ pɨnetsihɨakai, 'uximatɨarika pɨnetsi'umi tɨma, 'anari waɨkawa nepɨtiuka'eniexɨa.
PSA 116:4 Hikɨ 'ana Yawé waɨkawamekɨ mɨpaɨ nekatiniutahɨawe: «Yawé, waɨkawamekɨ nepɨmetsiwawirie, netukari keneutawikweitsitɨa».
PSA 116:5 Yawé pɨtiyukanenimaya heitserie pɨtiyuriene, takakaɨyari naimekɨ witsipɨtiuka'iyari.
PSA 116:6 Teɨteri yuhetsie memɨkaheutanuawawe Yawé wahetsie kaninuaka, ne nepɨkayɨwekairi mɨkɨ pɨnetsi'utawikweitsitɨa.
PSA 116:7 Ne'iyari, kayuwatɨ kenexeiyaniri, 'ahetsiemieme Yawé 'aixɨa katiniuka'iyarini.
PSA 116:8 'Ekɨ pepɨnetsi'utawikweitsitɨa nemɨximekaku, ne'ukai pepa'itiexɨa, nemekawautsenikɨ pepɨkanetsipitɨa.
PSA 116:9 'Ayumieme yuheyemekɨ Yawé hɨxie nepuyeikani, mexixi 'ena kwiepa mɨranu'uwatɨka ne'uyeika.
PSA 116:10 Tsepa mɨpaɨ nemɨmatikɨhɨawe: «Waɨkawa nepɨtiuka'eniwa ne'iyaritsie», peru Kakaɨyari hetsie yuri nepɨti'erie.
PSA 116:11 Mɨpaɨ neputayɨ newaɨripietɨ: «Yunaitɨ memɨte'itawa mepɨhɨkɨ».
PSA 116:12 Nepɨkayɨwe kenemɨrekapitɨani Yawé, waɨkawa 'aixɨa mɨti'ane mɨnetiupitɨakɨ.
PSA 116:13 Nepɨyɨwe xeikɨa pamɨpariyutsi nemɨmetsipitɨaka 'awikweitsitɨarikakɨ, meta nemetsinuawatɨ neyunenewietɨ Yawé.
PSA 116:14 Metatsiere neraye'atɨatɨ xeikɨa Yawé kenemɨrahɨawe yunaime teɨterimama wahɨxie.
PSA 116:15 Yawé puyukahiwerɨwa kepauka hetsiena yamemɨtekahu memɨtakukuwe.
PSA 116:16 Yawé, ne ti'a'uximayatsiriwame nepɨhɨkɨ, nemaamata ti'a'uximayatsiriwame pɨhɨkɨtɨkai. Kepauka tepɨa kaunariyarikɨ nemɨhɨakai, 'ekɨ pepeitekixɨa.
PSA 116:17 Kenemɨtiyutemawie mawariyari nepɨmetsiwewirieni meta nepɨmetsikuxatani Yawé.
PSA 116:18 Yawé nepɨraye'atɨirieni kenemutayɨ, yunaime teɨterimama wahɨxie,
PSA 116:19 Yawé kiita hɨxie takwa, Kerutsareme 'ahixɨapa. Yawé kenɨawarieka.
PSA 117:1 Nuiwarite yunaitɨ kwiepa xemɨtama, Yawé 'aixɨa xeketenahɨaweni. Yunaitɨ teɨteri kwikari hetsiena mieme xekeneutikwikani.
PSA 117:2 Naki'eriyaya kanimariweni tahetsiemieme. Yawé yuheyemekɨ 'aixɨa pɨtikamie. Yawé kenɨawarieka.
PSA 118:1 Yawé pamɨpariyutsi xekenepitɨaka, mɨkɨ 'aixɨa katiniuka'iyarini, kemɨtiuyukanaki'erie yuheyemekɨ kataninaki'erieka.
PSA 118:2 'Ixaheritsixi mɨpaɨ meke'utiyuaneni: «Kakaɨyari pɨkatihayewa tatsinaki'erietɨ yuheyemekɨ».
PSA 118:3 'Aruni xiɨyarimama mɨpaɨ meke'utiyuaneni: «Kakaɨyari pɨkatihayewa tatsinaki'erietɨ yuheyemekɨ».
PSA 118:4 Mɨpaɨ meke'utiyuaneni kemɨ'ane Yawé memayemakaxe: «Kakaɨyari pɨkatihayewa tatsinaki'erietɨ yuheyemekɨ».
PSA 118:5 Waɨkawa netiuka'eniwatɨ Yawé nekaniutahɨawe, hikɨ mɨkɨ kaneniuta'eiya 'aixɨa kaneniuyurieni nemɨkatiuka'eniwanikɨ.
PSA 118:6 Yawé nehamatɨa kaniuyeikani, ne nepɨkaheuma, ¿xewitɨ tewi 'atsimɨnetsi'uyurieni pɨkayɨwe?
PSA 118:7 Yawé nehamatɨa kaniuyeikani, mɨkɨ netsiparewiwame kanihɨkɨtɨni, tsiparatsɨ nekaniwaxeiyamɨkɨ kwiepa mekuheime memɨnetsi'aye'unie.
PSA 118:8 Matsi 'aixɨa pɨ'ane Yawé hetsie muyu'awietanikɨ, pɨkaheuyewetse tewi hetsie mɨtiwiyani.
PSA 118:9 Matsi 'aixɨa pɨ'ane Yawé hetsie muyu'awietani, 'aixɨa pɨka'ane teɨteri memɨmamariwawe wahetsie mɨtiwiyani.
PSA 118:10 Yunaitɨ nuiwarite menetsi'aye'unietɨ mekanaketɨkɨne, peru Yawé netsi'uparewieku nekaniwara'iwa.
PSA 118:11 Naitsarie nuiwarite mekaneniuhupieni, peru Yawé netsi'uparewieku nekaniwara'iwa.
PSA 118:12 Xietexi wahepaɨ nehetsie mepɨteheukayexɨa, peru meputitai kɨximɨari mɨtitatawe hepaɨ. Yawé netsi'uparewieku nekaniwara'iwa.
PSA 118:13 Menetsinanaimatɨ mepɨnetsihetaimaxɨ nemekawenikɨ, peru Yawé kaneniuparewieni.
PSA 118:14 Yawé netɨrɨkariya kanihɨkɨtɨni meta nekwikari, mɨkɨ netsiwikweitsitɨwame kanihɨkɨtɨni.
PSA 118:15 Heitseriemekɨ memu'uwa wakiita puxuawe hiwarika temawierikayari metehayu'iwaka: «Yawé yutɨrɨkariyakɨ mariweme pɨtiyuriene,
PSA 118:16 Yawé tɨrɨkariyaya pɨnɨawarie. Yawé yutɨrɨkariyakɨ mariweme pɨtiyuriene».
PSA 118:17 Hawaikɨ nepɨkamɨni, nepayeniereni Yawé mariwemekɨ kemɨtiyuriene nemikuxatanikɨ.
PSA 118:18 Yawé pɨnetsi'ukuwaxɨa tiyukukuinemekɨ, peru nemɨmɨnikɨ pɨkanetsiyetua.
PSA 118:19 Xekeneteneuyepiri kitenie hakewa memeutahaketsie 'aixɨa 'anemekɨ memu'uwa, ne nemeutahanikɨ pamɨpariyutsi Yawé nemɨpitɨanikɨ.
PSA 118:20 Mɨkɨ Yawé kitenieya kanihɨkɨtɨni, muwa mekaneutahakeni teɨteri heitserie memexeiya.
PSA 118:21 Pemɨnetsi'uta'eikɨ pamɨpariyutsi nepɨmetsipitɨani, 'ekɨ netsiwikweitsitɨwame pemɨhɨkɨkɨ.
PSA 118:22 Kii wewiwamete tete memutixani'eri, matsi mɨkɨ tete 'itsikina mieme kanayani.
PSA 118:23 Mɨkɨkɨ tepɨhɨxiya mariwemekɨ, Yawé pɨta matsi katiniuyurieni.
PSA 118:24 'Ikɨ tukaritsie Yawé mɨpaɨ katiniuyurieni, 'aixɨa tepɨteku'eriwani tepuyutemamawieka hetsiena mieme.
PSA 118:25 Yawé, wikweitsitɨarika ketaneupitɨa, Yawé, temɨtehayu'iwakɨ ketaneupitɨa.
PSA 118:26 'Aixɨa ke'itɨarieka kemɨ'ane 'umamie Yawé hetsɨa mieme hɨkɨtɨtɨ. Yawé kiita paitɨ 'aixɨa tepɨte'ikɨhɨawe.
PSA 118:27 Yawé kanikakaɨyaritɨni meta katanihekɨariwiyani, hikɨmɨ tepɨwatinɨni Kakaɨyari teɨterimama tuturi tepanupini mawari taiyame 'awayatsie paitɨ tepikɨwɨtɨani.
PSA 118:28 'Ekɨ pepɨnekakaɨyari, 'ayumieme pamɨpariyutsi nepɨmetsipitɨa, 'ekɨ pepɨnekakaɨyari, 'ayumieme nepɨmetsinɨawa.
PSA 118:29 Yawé pamɨpariyutsi xekenepitɨaka, mɨkɨ 'aixɨa katiniuka'iyarini, mɨkɨ yuheyemekɨ kataninaki'erieka.
PSA 119:1 'Aixɨa mekani'itɨarieka kemɨ'ane huye 'aixɨa mɨ'ane 'utɨa memuhu, Yawé 'aitsikaya kemaine mɨpaɨ memɨte'u'uwa.
PSA 119:2 'Aixɨa mekani'itɨarieka kemɨ'ane 'a'inɨari niukiyari memu'uta meta yu'iyarikɨ memikuwautɨwe.
PSA 119:3 Hatsuakutɨma 'axamepɨkateheyurie, matsi pɨta Kakaɨyari huyeya mepuweiya.
PSA 119:4 'Ekɨ 'aitsika pekaniyetuani, heitseriemekɨ maye'atɨariwanikɨ.
PSA 119:5 Waɨkawamekɨ nepɨnewaɨriya nehuye 'aixɨa nemuyurienikɨ, nemeye'atɨanikɨ 'a'aitsika.
PSA 119:6 Hatsuaku nepɨkatewiyatsitɨarieni kepauka naime 'a'aitsika nemaye'atɨaka.
PSA 119:7 Ne ne'iyarikɨ nepɨmetsitanɨawa, kepauka nemeitimani ke'aixɨa pemɨti'aitakɨ.
PSA 119:8 'A'inɨari niukiyari nepaye'atɨani, pepɨkanetsi'uku'e'eiriwani naimekɨ.
PSA 119:9 ¿Kehepaɨ 'anetɨ temaikɨ pɨ'itiyaka? Yatikamietɨ 'aniuki kemaine.
PSA 119:10 Ne naime ne'iyarikɨ nepɨmetsikuwaɨne, pepɨkanetsipitɨaka 'a'aitsika nemuku'e'eiriwanikɨ.
PSA 119:11 Ne'iyaritsie 'aniuki nepu'uta kapa 'ahetsiemieme 'axanetiuyurienikɨ.
PSA 119:12 Yawé, 'aixɨa pemɨrayurieni pepɨhɨkɨ. Keneneuta'ɨkitɨa 'a'aitsika nemetimanikɨ.
PSA 119:13 Ne naime 'a'aitsika yanekatinikuxatani pemɨtatsi'uta'ɨkitɨa.
PSA 119:14 Waɨkawamekɨ nepɨnetemawie 'aniuki kemaine mɨpaɨ netiuyeikatɨ keyuri waɨkawa nerexeiyatɨ.
PSA 119:15 'A'aitsika nepuku'eriwa, meta 'ahuye'utɨa xeikɨa nepɨne'ɨwiya.
PSA 119:16 'A'aitsikatsie temawierika nepukaxexeiya, hatsuaku nepɨkahetɨmaiya 'aniuki.
PSA 119:17 Ne ti'a'uximayatsiriwame 'aixɨa kenetinexeiyani, mɨpaɨ nemɨtiuyeikanikɨ meta 'aniukitsie yanemɨtikamienikɨ.
PSA 119:18 Neheuniereme kenenayeitɨa, nemixeiyakɨ 'a'ɨkitsikate mɨmamariwawe.
PSA 119:19 Ne kuyeikame nekanihɨkɨtɨni 'ena kwiepa, 'a'aitsika pepɨkanetsi'awitsirieka.
PSA 119:20 Mɨixa nekɨipitsie pɨrekaka, ke'aixɨa pemɨti'aita neheumaimɨtɨ.
PSA 119:21 'Ekɨ pepɨwarutate'a memuyuti'ɨre, 'axameke'itɨarieka kemɨ'ane yamemɨkatekahu 'a'aitsikatsie.
PSA 119:22 'Ekɨ pepɨkawapitɨaka hipatɨ memɨnetsiyuriyani, ne matsi 'a'aitsikatsie yanemɨtikamiekɨ.
PSA 119:23 Kemɨ'ane tɨrɨkariya memexeiya nehetsiemieme mepɨtekuxata kememɨnetsiyurienikɨ, peru matsi ne ti'a'uximayatsiriwame 'a'aitsika xeikɨa nepuku'eriwa.
PSA 119:24 'A'aitsika pɨnetsitemawieritɨa, meta mɨkɨ netsi'ɨxatsitɨwamete mepɨhɨkɨ.
PSA 119:25 Kwiepa nekanitihɨximaweni, tukari keneneupitɨa 'aniukitsie kepemaine.
PSA 119:26 Kepauka nemɨmetsi'utaxatɨa kenemɨtiyurienikɨ, 'ekɨ pepɨnetsi'uta'ei. 'A'aitsika keneneuti'ɨkitɨa.
PSA 119:27 Keneneupitɨa 'a'aitsika hepaɨtsita nemɨtimaikakɨ, mariwemekɨ kepemɨtiuyuri nemuku'eriwanikɨ.
PSA 119:28 Hiwerikakɨ ne'iyari pɨtaxɨxime: ne'iyari ketinemikwani 'aniuki kemainekɨ.
PSA 119:29 Pepɨkanetsipitɨaka huye mututuni nemanukuweweiyanikɨ, 'aniuki kemaine netimaikame kenenayeitɨaka.
PSA 119:30 Nepɨnewaɨriya huye mɨheitserie nemuweiyanikɨ, meta 'a'aitsika nepanayexei nemiweiyanikɨ.
PSA 119:31 Yawé, ne 'a'aitsikatsie nepɨtiwiya, pepɨkanetsipitɨaka nemɨtewiyatsitɨarienikɨ.
PSA 119:32 'A'aitsika huyeyari 'utɨma nekaniunautsarɨmeni, 'ekɨtsɨ waɨkawa nemɨnekɨhɨawenikɨ pekaneniupitɨani.
PSA 119:33 Yawé, kenetineuti'ɨkitɨa 'a'aitsika nemuweiyanikɨ, hikɨ ne yanekatinikayeimɨkɨ kemaine kenemɨreutere ne'uyeikatɨ.
PSA 119:34 Nemɨtimaiwenikɨ keneneupitɨa 'a'aitsikatsie yanemɨtiyurienikɨ, naime ne'iyarikɨ nekaneye'atɨakamɨkɨ.
PSA 119:35 'A'aitsika huyeyari 'utɨma keneneuwitɨximeni, mɨkɨtsie temawierika nepukaxexeiya.
PSA 119:36 Ne'iyari 'a'aitsikatsie yɨkɨhɨaweme kenayeitɨa, matsi tumini 'iwarikayarikɨ 'axamɨ'anetsie pɨkayɨhɨaweni.
PSA 119:37 Nitixaɨtɨ mɨkatihɨkɨ hetsie nenekɨ'ɨwiyame pepɨkanetsihayeitɨaka, matsi tukari keneneupitɨa 'aniukitsie kepemaine.
PSA 119:38 'Aniuki kenaye'atɨa 'ikɨ ti'a'uximayatsiriwame hetsie, kepemɨtiyuriene memɨmetsihayemakaxe wahetsie.
PSA 119:39 'Uximatɨarika tewiweme kenemɨrexeiya, mɨkɨ hepaɨtsita keneneɨxɨna, 'ekɨ matsi 'itsɨkame 'aixɨa pemɨtiuka'iyari pepɨhɨkɨ.
PSA 119:40 Ne 'a'aitsika niukiyari nepɨnaki'erie. Tukari keneneupitɨa heitseriemekɨ 'ekɨ kepemɨtiyupitɨwa.
PSA 119:41 Yawé, 'anaki'eriya mɨmariwe kenenanɨ'airi meta wikweitsitɨarika 'ahetsɨa miemekɨ kepemutayɨ.
PSA 119:42 'Ana nepɨyɨweni nemɨwaruta'eiya 'axamemɨnetekɨhɨawe, ne 'aniukitsie nemɨtiwiyakɨ.
PSA 119:43 Yuri netikuxatame xeikɨa kenenayeitɨaka, 'a'aitsika hetsie xeikɨa nekanita'ikwewani.
PSA 119:44 Yuheyemekɨ 'a'aitsikatsie heitseriemekɨ yanepɨtikamieni.
PSA 119:45 'Aixɨa 'anemekɨ nepukuyeikani 'atsinekatiku'eriwatɨ, ne 'a'aitsika nemuweiyakɨ.
PSA 119:46 Ne te'aitamete nepɨtiwataxatɨani 'a'aitsika hepaɨtsita, hawaikɨ nepɨkanetitewiya,
PSA 119:47 matsi 'a'aitsika nemɨnaki'eriekɨ, meta mɨkɨkɨ ne nekaniyutemawieka.
PSA 119:48 Ne 'a'aitsika nekaninaki'erieka, mɨkɨkɨ nekaniyutemawieka, 'a'aitsika nemuku'eriwani pɨnetsinake.
PSA 119:49 Kena'eriwani 'ikɨ ti'a'uximayatsiriwame ke'aneme niuki pemiyetuiri, mɨkɨ niukikɨ neta'ikwewame pemɨnetsi'ayeitɨa.
PSA 119:50 'Ikɨ netsinɨtɨwame kanihɨkɨtɨni kepauka nemɨtiuka'eniwa: 'aniukitsie kepemaine tukari kanenipitɨaka.
PSA 119:51 Memɨyuti'ɨre kwinimieme 'axamepɨnetekɨhɨawe, ne peru 'a'aitsika nepɨka'uku'e'eiriwa.
PSA 119:52 Yawé, ne 'a'aitsika nepa'eriwa meripaitɨ mieme, mɨkɨtsie nɨtɨarika nepukaxexeiya.
PSA 119:53 'Axateyuruwamete wahepaɨtsita nepɨha'a, 'a'aitsika memuku'eirikɨ.
PSA 119:54 'A'aitsika nekwikari pɨhɨkɨ, 'ena yapaɨmexɨa nemanuyeikatsie.
PSA 119:55 Yawé, yɨwikɨta nepɨmetsihahɨawe kepemɨtitewakɨ, nepɨnewaɨriya 'a'ɨkitsika nemaye'atɨanikɨ.
PSA 119:56 Ne 'a'aitsika memaye'atɨwanikɨ nehɨritɨarika kanihɨkɨtɨni.
PSA 119:57 Yawé, 'ekɨ tita nemɨrexeiya pekanihɨkɨtɨni. 'Aniuki kemaine nepeye'atɨani, mɨpaɨ nepaine.
PSA 119:58 Ne'iyarikɨ yemekɨ yanepɨtikamienikeyu kemɨmetinake, keneneutinenimayata kepemutayɨ.
PSA 119:59 'Ari netukari nepeutimaixɨa, mɨpaɨ nepɨtinewaɨriya nemeye'atɨanikɨ 'a'aitsika.
PSA 119:60 Nepɨnemexɨitɨa, xeiya nepɨrayeitɨwa 'a'aitsika nemaye'atɨanikɨ.
PSA 119:61 Tsepanetɨ 'axamemɨte'u'iyari memɨnetsiwiniyaku, ne matsi 'a'aitsika nepɨkahatɨtɨmaiya.
PSA 119:62 Tɨkari hixɨapa nepanukukeka pamɨpariyutsi nemetsipitɨanike, 'a'aitsika heitseriemekɨ mɨtikuxatakɨ.
PSA 119:63 Kemɨ'ane memɨmetsihayemakaxe nekaniwahamikutɨni, meta 'a'aitsikatsie yamemɨtekahu.
PSA 119:64 Yawé, 'a'aitsika keneneuti'ɨkitɨa, kwiepa waɨkawa puxuawe 'anaki'eriya mɨmariwe.
PSA 119:65 Yawé, ti'a'uximayatsiriwame 'aixɨa ketinexeiyani, 'aniuki kemainekɨ.
PSA 119:66 Kenenepitɨaka nemɨtimaiwenikɨ meta nemeitimaitɨyeikanikɨ, ne 'a'aitsikatsie yuri nekatini'erieka.
PSA 119:67 Meripaitɨ mexixi nekatikwiniwekai, 'ateewa nepuyeikakai, peru hikɨ 'aniukitsie yanepɨtikamie.
PSA 119:68 'Ekɨ 'aixɨa pepɨtiuka'iyari, meta 'aixɨa pepɨtiyuriene, 'a'aitsikate keneneuti'ɨkitɨa.
PSA 119:69 Tsepanetɨ memuyuti'ɨre nehetsiemieme 'axakememutiyuane, ne nepeye'atɨwa 'a'aitsika yemekɨ ne'iyarikɨ.
PSA 119:70 Mɨkɨ mepɨka'u'iyari yemekɨ, peru ne nepuyutemawie 'a'aitsikakɨ.
PSA 119:71 'Aixɨa pɨ'ane pemɨnetiukwinitɨa, 'a'aitsika mɨkɨkɨ nepetima.
PSA 119:72 'A'ɨkitsika matsi waɨkawa pɨraye'axe nehetsiemieme, keyuri pɨrata meta huru tuminiyari waɨkawatɨ.
PSA 119:73 'Atɨrɨkariyakɨ pepɨnetsi'utawewi, kenemɨ'aneni yapepɨnetiuwewi. Nemeitimaitɨyeikanikɨ keneneupitɨa 'a'aitsika nemɨmaikakɨ.
PSA 119:74 Kemɨ'ane memɨmetsihayemakaxe kepauka memɨnetsixeiya mekaniyutemamawieka, 'aniukitsie yuri nemɨti'eriekɨ neta'ikwewatɨ.
PSA 119:75 Yawé, ne nepɨtimate 'a'aitsika 'aixɨa pɨ'ane, meta pɨheitserie kepemɨnetikuwaya.
PSA 119:76 'Anaki'eriya mɨmariwe kehɨkɨtɨni mɨnetsinɨtɨani, 'ikɨ ti'a'uximayatsiriwame kepemɨtiutahɨawixɨ.
PSA 119:77 'Anenimayatsika kenuani tukari kenetsi'upitɨani, 'a'aitsikatsie nemuyutemawiekɨ.
PSA 119:78 Memuyuti'ɨre meke'utewiyatsitɨarieni yakɨ xeikɨa memɨnetsiniukimakɨ, ne matsi, 'a'aitsika nepuku'eriwani.
PSA 119:79 Kemɨ'ane memɨmetsi'ayemakaxe mekenetsi'utinɨni, kemɨ'ane 'a'aitsika memɨmate.
PSA 119:80 Ne'iyari heitseriemekɨ keyukɨhɨaweni 'a'aitsikatsie, ne nemɨkatewiyatsitɨarienikɨ hatsuaku.
PSA 119:81 'Awikweitsitɨarika netakwewietɨ netukari pɨtixɨxime. 'Aniuki kemaine mɨpaɨ nekatinita'ikwewani.
PSA 119:82 Kepemutayɨkɨ neta'ikwewatɨ nepɨkaheuniereri, meta mɨpaɨ nekaniutaineni: «¿Kepaukari pepunuani penetsinɨtɨanike?»
PSA 119:83 Nawi kɨxauriyari hepaɨ nepɨtiyuxexeiya kɨtsikɨ mɨyɨxaɨye, peru 'a'aitsika kemaine nepɨkahatɨmaiya.
PSA 119:84 ¿Kepaɨmexɨa 'akuxi 'ikɨ ti'a'uximayatsiriwame 'apuyeikani? ¿Kepauka memɨnetsi'aye'unie pepɨtiwarakapitɨani?
PSA 119:85 Putsu mekaniutiwewieni memuyuti'ɨre muwa nemeukawenikɨ, 'a'aitsika kemaine mɨpaɨ memɨkatekahu.
PSA 119:86 Naitɨ 'a'aitsika yuri paine, keneneuparewi 'atsinekatiyurienekaku, memɨnetsi'uweiyakɨ menetsi'itatɨ.
PSA 119:87 'Etsiwatɨkaku kwiepa mepɨnetsi'ukumaweriyaxɨ nemɨka'uyeikanikɨ, peru ne 'a'aitsika nepɨka'uku'e'eiriwa.
PSA 119:88 'Anaki'eriya mɨmariwekɨ tukari keneneupitɨa, hikɨ 'ana 'a'aitsika nepaye'atɨani.
PSA 119:89 Yawé, 'aniuki yuheyemekɨ pɨ'ayumieme, meta muyuawitsie 'aniuki pɨ'enierie.
PSA 119:90 'Ekɨ 'aheyemekɨ yapepɨtikamie, kepauka kwie pemutawewi, heitseriemekɨ 'aixɨa pɨyɨ.
PSA 119:91 Hikɨ naitɨ pɨtixuawe, kepemɨtiu'aitaxɨ, yunaitɨ mematsi'enietɨ yamekateniyurieka.
PSA 119:92 Xɨka 'a'aitsika kanetsitemawieritɨakake, hiwerikakɨri nekaniumɨnike.
PSA 119:93 'A'aitsika hatsuaku nepɨkahatɨmaiya, mɨkɨkɨ tukari pemɨnetsi'upitɨakɨ.
PSA 119:94 'Ahetsɨa nepɨmieme, keneneutawikweitsitɨa, meta 'a'aitsika nemukuwaunekɨ neheye'atɨanike.
PSA 119:95 'Axateyuruwamete mepɨnetsihupietɨwe menetsimienike, peru ne tawarita 'a'aitsikakɨ nepɨtɨrɨkariyarieni.
PSA 119:96 Mɨpaɨ nepɨretima tita mɨtiheitserie 'apu'axe, peru 'a'aitsikate hawaikɨ pɨkahau'atɨka.
PSA 119:97 Yemekɨ ne waɨkawa 'a'ɨkitsika nepɨnaki'erie. Tukarikɨ mɨkɨ xeikɨa nepuku'eriwa.
PSA 119:98 'A'aitsikate waɨkawa netimaiweme pɨnetsi'ayeitɨa keyuri memɨnetsi'aye'unie, matsi mɨkɨ yuheyemekɨ nehetsiemieme mɨhɨkɨkɨ.
PSA 119:99 Matsi waɨkawa nepɨtimaiwe nete'ɨkitɨwamete nepɨwara'iwa, 'a'aitsika xeikɨa nemuku'eriwakɨ.
PSA 119:100 Ne matsi waɨkawa nepɨtiuyemate keyuri 'ukirawetsixi, 'a'aitsika kemaine mɨpaɨ nemɨtikamiekɨ.
PSA 119:101 Ne huye 'axamɨ'anene nepɨka'uweiya, 'aniuki nemaye'atɨwanikɨ.
PSA 119:102 'A'ɨkitsika nepɨka'uku'e'eiriwa, 'ekɨ mɨpaɨ pemɨneti'ɨkitɨakɨ.
PSA 119:103 'Aniuki nenenitsie witsipɨrakaka. Waɨkawa matsi pakaka keyuri xiete kemɨrakaka neteta.
PSA 119:104 'A'aitsikatsie netimaiwetɨ nepatɨa, 'ayumieme naime mɨti'itawa huyeyari nepɨxani'erie.
PSA 119:105 'Aniuki ne'ɨkatsie kɨxeme kanihɨkɨtɨni, nehuyeta mɨhekɨariwie.
PSA 119:106 Ne tɨratu nepuwewi nekɨmana, meta yanepɨra'eriwa: kename 'a'aitsikatsie yanetikayani.
PSA 119:107 Yawé, pɨtimɨireri kenemɨtiuka'eniwa, tukari keneneupitɨa 'aniuki kemainekɨ.
PSA 119:108 Yawé, kenenaki'erieka 'ikɨ temawierika mawariyari neteta mayeneika, 'a'aitsika keneneuti'ɨkitɨa.
PSA 119:109 Netukari kaunari 'etsimɨpe hepaɨ pɨ'ane, peru 'a'aitsika nepɨkahatɨtɨmaiya.
PSA 119:110 'Axamemɨte'u'iyari mepɨnetsiwiniyatɨwe, peru ne 'a'aitsikate nepɨka'uku'e'eiriwa.
PSA 119:111 'A'aitsika nehetsiemieme pɨhɨkɨ yuheyemekɨ, mɨkɨ ne'iyari mepɨtemawieritɨa.
PSA 119:112 Nepɨnewaɨriya ne'iyarikɨ 'a'aitsika nemaye'atɨakakɨ, yuheyemekɨ meta kepaɨmexɨa nemɨyurieni.
PSA 119:113 Memɨkate'aye'atɨa nepɨwaxani'erie, peru 'a'ɨkitsika nepɨnaki'erie.
PSA 119:114 'Ekɨ netsi'awiwietame pepɨhɨkɨ meta kɨmana nemuyukunarɨma pepɨhɨkɨ, 'aniuki kemaine mɨpaɨ nekatinita'ikwewani.
PSA 119:115 Xekeneutayeixɨa, 'axaxemɨte'u'iyari, ne Kakaɨyari 'aitsikaya nepaye'atɨani.
PSA 119:116 Kepemutayɨ keneneparewieka, mɨpaɨ nepɨtiwikweka, 'ahetsie kenemɨtitakwewie pepɨka'ikupatani.
PSA 119:117 Nehetsie kenenuaka, ne mɨpaɨ netiwikwetɨ, yuheyemekɨ 'ana 'a'aitsikatsie yanepɨtikamieni.
PSA 119:118 'Ekɨ pepɨkawanaki'erie kemɨ'ane 'a'aitsika memuku'eiri, 'iyaritɨarika kwamanarika memuwewiekɨ xeikɨa.
PSA 119:119 Kwiepa memɨtama memɨkametsihetimaiwawe xatsi hepaɨ pekatiniwaxeiyani, ne 'ayumieme 'a'aitsika nepɨnaki'erie.
PSA 119:120 Marikakɨ 'ahɨxie nepɨyɨyɨaka, yaxeikɨata 'a'aitsika ne'ayemakatɨ.
PSA 119:121 Ne heitseriemekɨ yanekatinikamieni kehepaɨ 'aixɨa mɨ'ane, pepɨkanetsi'eirieka memɨnetsi'aye'unie memɨnetsi'axekɨ.
PSA 119:122 'Ikɨ ti'a'uximayatsiriwame 'aixɨa mɨtikanikɨ yaketineuyuri, memuyuti'ɨre mepɨkanetsi'uximatɨaka.
PSA 119:123 Nemetsitakwewietɨ pemɨnetsitawikweitsitɨanikɨ nepɨkaheuniere, neta'ikwewatɨ pemeye'atɨanikɨ ke'aixɨa pemɨti'aitakɨ.
PSA 119:124 Ti'a'uximayatsiriwame hetsie yaketineuyuri waɨkawa kepemɨtiuyukanaki'eriekɨ, 'a'aitsika keneneuti'ɨkitɨa.
PSA 119:125 Ne ti'a'uximayatsiriwame nepɨhɨkɨ: nemɨreutamaiwenikɨ keneneupitɨa, 'ana 'a'aitsika nekanetimaimɨkɨ.
PSA 119:126 Yawé, 'ari tukari paye'a yapemɨtiyurienikɨ, matsi 'a'aitsika nixewitɨ pɨka'aye'atɨa.
PSA 119:127 Nitixaɨtɨ 'ena kwiepa timieme nepɨkatinaki'erie, matsi 'a'aitsika xeikɨa nepɨnaki'erie, huru kenemɨkatinaki'erie, huru 'aixɨa mɨ'itɨarie reuyeta.
PSA 119:128 'Ayumieme 'a'aitsikate nepuku'eriwa peru kwamanarika nepɨtixani'erie.
PSA 119:129 Naitɨ 'a'aitsikate pɨmamariwawe, 'ayumieme naime nepaye'atɨa.
PSA 119:130 Kepauka 'aniuki mukuxaxatsiwa mɨkɨ katanihekɨariwiyani, meta 'atsimɨkatimate kaneitimaitɨyeikani.
PSA 119:131 Waɨkawa nehauharimɨtɨ nepikuwaune, neteni nepanutayepiwa nehanatiwakitɨ, yemekɨ nemeimaimɨkɨkɨ 'a'aitsika.
PSA 119:132 Kenenaye'eri, keneneutinenimayata yaxeikɨa kepemɨtiwanenimaya memɨmetsinaki'erie.
PSA 119:133 Keneneuwitɨximeni kepemutayɨ 'aniukikɨ, pepɨkanetsipitɨaka 'axamɨti'ane mɨnetikuyuitɨwanikɨ.
PSA 119:134 Keneneɨxɨna teɨteri kememɨnetenanaimakɨ, karikɨ ne nepeye'atɨani 'a'aitsika.
PSA 119:135 Nehetsie pematsiɨkɨtɨ kene'ayeitɨa ke'aixɨa pemɨtiuka'iyari, 'a'aitsika keneneuti'ɨkitɨa.
PSA 119:136 Haa hepaɨ ne'ukai pɨtiuhapane, 'a'aitsika mɨka'aye'atɨariwakɨ.
PSA 119:137 'Ekɨ Yawé, heitseriemekɨ pepɨti'uximaya, meta 'a'aitsikate pɨheitserietɨka.
PSA 119:138 'A'aitsikate 'aixɨa pɨ'anene kepemɨtiuta'aitaxɨ, 'aixɨa pɨ'ane hetsiena temɨtewiyanikɨ.
PSA 119:139 Ne'ɨtetsatɨ nepɨha'a, memɨnetsi'aye'unie 'aniuki memɨka'eniekɨ.
PSA 119:140 Kepemutayɨ 'aniukikɨ puta'inɨatsie waɨkawa, 'ayumieme ne nepinaki'erie.
PSA 119:141 Tsepa ne nitixaɨtɨ nemɨkatihɨkɨ meta nemɨxani'eriwa, peru ne 'a'aitsika nepɨkahatɨtɨmaiya.
PSA 119:142 Heitseriemekɨ kepemɨtiyuriene 'aixɨa peti'aitatɨ yuheyemekɨ, 'a'aitsika yuri kanaineni.
PSA 119:143 'Uximatɨarika meta hiwerika nepexeiya, peru 'a'aitsika pɨnetsitemawieritɨa.
PSA 119:144 'A'aitsikate yuheyemekɨ heitseriemekɨ pɨtikuxata, nereutamaiwetɨ nemuyeikanikɨ keneneupitɨa.
PSA 119:145 Yemekɨ naime ne'iyarikɨ nekamenahɨaweni, Yawé, keneneuta'eiya, 'ana 'a'aitsika nepaye'atɨani.
PSA 119:146 Nepɨmetsihahiwiwa: «Keneneutawikweitsitɨa». 'A'aitsikate nepaye'atɨani.
PSA 119:147 Ximeri paitɨ nepanukukeka nemetsitawawirienike parewiya, ne 'aniukitsie nepaɨwaɨre neta'ikwewatɨ.
PSA 119:148 Tɨkarikɨ nepɨkatikukutsu, 'aniuki neku'eriwatɨ kepemutayɨ.
PSA 119:149 'Anaki'eriya mɨmariwekɨ neniuki keneu'eni, Yawé, kepemɨti'aitakɨ tukari keneneupitɨa.
PSA 119:150 Memɨnetsi'aye'unie 'axamemɨte'u'iyari 'ahurawa mekaniu'uwaniri, peru 'a'aitsika hepaɨtsita 'ateewa mekaniu'uwani.
PSA 119:151 Yawé, 'ekɨta 'ahurawa pekaniuyeikani, meta naitɨ 'a'aitsikate kemutiyuane kaniyuritɨni.
PSA 119:152 Mɨixa nepuyurieri 'a'aitsika nematetɨ, peminetɨa yuheyemekɨ mɨ'ayumiemetɨnikɨ.
PSA 119:153 Keneneuxeiya kenemɨtiuka'eniwa, keneneutawikweitsitɨa, ne matsi 'a'aitsika kemaine nepɨkahatɨmaiyawe.
PSA 119:154 Nehetsie keneutanua, keneneutawikweitsitɨa, kepemutayɨkɨ tukari kenenepitɨaka.
PSA 119:155 'Axateyuruwamete wahetsiemieme 'apeteewa wikweitsitɨarika, mɨkɨ 'a'aitsika memɨkakuwautɨwekɨ.
PSA 119:156 Yawé, waɨkawamekɨ pepɨtiyukanenimaya, tukari keneneupitɨa kepemɨti'aitakɨ.
PSA 119:157 Memɨnetsi'aye'unie mepɨyumɨire meta memɨnetsi'uweiya, peru ne 'a'aitsikate nepɨka'uku'e'eiriwa.
PSA 119:158 Kepauka memɨteyukwamana nemɨwakuxexeiya nepekahayamɨkatɨyeika, 'aniuki memɨkahaye'atɨakɨ.
PSA 119:159 Yawé, neuxei keneneuxeiya 'a'aitsikate waɨkawa kenemɨtinaki'erie, waɨkawa kepemɨtiyukanaki'eriekɨ, tukari keneneupitɨa.
PSA 119:160 Naitɨ 'aniuki heitseriemekɨ yurikɨ pɨtikuxata xeikɨa, kepemɨti'aita yuheyemekɨ kani'ayumiemetɨni.
PSA 119:161 Yakɨ xeikɨa mepɨnetsi'uweiya teɨteri memamariwawetɨ, matsi 'aniuki xeikɨa nepayemakaxe.
PSA 119:162 Ne nepɨnetemawie 'aniukikɨ kepemutayɨ, tewi waɨkawa mɨtiukaxei kemɨtiyutemawie hepaɨ.
PSA 119:163 Yemekɨ nepixani'erie naime 'itarika, matsi waɨkawa 'a'aitsika nepɨnaki'erie.
PSA 119:164 Xeitukaritsie 'atahutamexɨa nepɨmetsinɨawani, ke'aixɨa pemɨti'aitakɨ.
PSA 119:165 Kemɨ'ane 'a'aitsika memɨnaki'erie yemekɨ 'aixɨa 'iyari mekaniu'uwani, nitixaɨtɨtsie mepɨkatehekaxɨrɨwe.
PSA 119:166 Yawé, ne 'awikweitsitɨarika nepɨtakwewie meta yanepɨtiyuriene 'a'aitsikate kemaine.
PSA 119:167 Naime ne'iyarikɨ 'a'aitsikate nepaye'atɨa. Waɨkawa nepeinaki'erie.
PSA 119:168 'A'aitsikate nepeu'enie, 'ekɨ naime nehuye pemɨmatekɨ.
PSA 119:169 Nehiwerika hiwariyari pekehe'enieni, Yawé, nereutamaiweme kenenayeitɨa, 'aniuki kemainekɨ.
PSA 119:170 Waɨkawa kenemɨmetiwawirie pekenetsihe'enieni, keneneuxɨna, kepemutayɨkɨ.
PSA 119:171 Ne nemetsinɨawatɨ nepɨkatihayewani, 'ekɨtsɨ 'a'aitsikate pekaneni'ɨkitɨaka.
PSA 119:172 'Aniuki 'aixɨa manɨyɨne nepitakwika, naitɨ 'a'aitsikate heitseriemekɨ mɨtikuxatakɨ.
PSA 119:173 'Atɨrɨkariyakɨ keneneuparewi, ne 'a'aitsikate nemanayexeikɨ.
PSA 119:174 Yawé, ne 'awikweitsitɨarika yemekɨ nepeuyehɨwa. 'A'aitsikate pɨnetemawierika.
PSA 119:175 Tukari 'akuxi keneneupitɨa nemetsinɨawatɨ 'anemuyeikanikɨ, kepemɨti'aita kenetsi'uparewieni.
PSA 119:176 Muxa meuyewe hepaɨ nekaniuyɨni, kenaye'a ti'a'uximayatsiriwame kenawaumie, 'a'aitsikate nemɨkahatɨmaiyawekɨ.
PSA 120:1 Ku'uwamete wakwikari. Kepauka nemɨtiuka'eniwa Yawé nepahɨawe, mɨkɨta pɨnetsiku'eiya.
PSA 120:2 Yawé, keneneutawikweitsitɨa memɨte'itawa menetsi'uweiyakaku meta 'iya kwinimieme memɨteheuta'itawawe.
PSA 120:3 Xeme xemɨte'itawa, Kakaɨyari 'uxa'atɨni waɨkawa xehetsie pɨrahɨani.
PSA 120:4 Kuyaxi wa'ɨrɨ kwinimieme mɨranuyemɨtsɨkɨ, tɨɨ waɨkawa tatɨkaimekɨ.
PSA 120:5 Xɨa'ui ne, 'ateewa nemuyeika Metseki kwieyaritsie, 'ena nemuka Tseraxi 'ixuriki kiiyari mati'u.
PSA 120:6 Mɨixari 'ena nepuka kayuwatɨ memu'uwani mɨkawanake wahetsɨa.
PSA 120:7 Ne kaneninakeni kayuwatɨ heitseriemekɨ nemuyeikanikɨ, peru xɨka kayuwatɨ kehepaɨ temɨte'u'uwanikɨ netikuxatani, mɨkɨta kuyaxa pɨta mepukuxatani.
PSA 121:1 Ku'uwamete wakwikari. Hɨrite 'amutɨtɨ kwi nepautixeiya, nepɨneku'iwawiya: ¿Keraneni netsiparewiwame?
PSA 121:2 Netsiparewiwame Yawé kanihɨkɨtɨni, kwie meta muyuawi mɨtiutiwewi.
PSA 121:3 Pɨkametsipitɨani pemekawautsenikɨ, kemɨ'ane mɨmetsi'ɨwiya pɨkakutsu.
PSA 121:4 Hatsuaku pɨkaheukukutsu nipɨkaheukuni, kemɨ'ane 'ixaheritsixi muwa'ɨwiya.
PSA 121:5 Yawé kanihɨkɨtɨni mɨmetsi'ɨwiya, Yawé kameni'etɨriwiyani 'ahetsie kaninuaka.
PSA 121:6 Tukarikɨ tau pɨkametikwinitɨani, meta yaxeikɨa metsa yɨwikɨta.
PSA 121:7 Yawé 'ahetsie kaninuakamɨkɨ, 'atukari kani'ɨwiyakamɨkɨ naime 'axamɨti'ane hepaɨtsita.
PSA 121:8 Yawé 'akie pɨmetsi'ɨwiyani meta 'ahuyeta, hikɨtɨtɨ meta yuheyemekɨ.
PSA 122:1 Ku'uwamete wakwikari. Rawiri nɨawarieya. Ne nepuyukatemawiwa kepauka mɨpaɨ nemɨrahɨawarɨwa: «Hikɨmɨ Yawé tukieyata tepuhu».
PSA 122:2 Kerutsareme, 'ari tekaniu'axɨani 'ena 'akitenie tekaniuti'uka.
PSA 122:3 Kerutsareme, kiekari 'aixɨa 'anemekɨ mɨwewiya mana yunaitɨ memuyukuxexeɨriwanikɨ.
PSA 122:4 Mana nuiwarite mekani'axeni, nuiwarite Yawé hetsɨa miemete, Yawé 'aixɨa metetahɨaweke 'aixɨa kemɨtiuka'iyari wahetsiemieme, kehepaɨ 'aneme 'Ixaheri 'aitsika mɨyetuiriyariekai.
PSA 122:5 Mana kanihɨkɨtɨni 'aixɨa mɨtikɨyɨne 'ixaheritsixi wahetsiemieme, Rawiri nuiwarimama waparatsiyu mana kaniuweni.
PSA 122:6 Kerutsareme hetsiemieme tepuyunenewieka kayuwatɨ mexeiyanikɨ: «'Aixɨa 'anemekɨ memu'uwanikɨ kemɨ'ane memɨmetsinaki'erie.
PSA 122:7 Kerutsareme kuraruyarita memɨye'uwa kayuwatɨ mekehexeiyani, meta 'aparatsiyuta 'aixɨa me'itɨarietɨ».
PSA 122:8 Hikɨta, ne'iwama meta nehamikuma wahetsiemieme mɨpaɨ nepaine: «'Aixɨa 'anemekɨ meke'u'uwani».
PSA 122:9 Kerutsareme, 'ahetsɨa muwekɨ Yawé takakaɨyari tukieya nepɨtikuwauni 'aixɨa mɨti'ane 'ahetsiemieme.
PSA 123:1 Ku'uwamete wakwikari. Ne 'ahetsɨa xeikɨa nepautiniere, muyuawitsie 'a'uweni 'apuwe, mana xeikɨa nepeuti'ikwewa.
PSA 123:2 Waɨriyarika te'uximayatamete kememɨteta'ikwewa yukutsiyari niukieyakɨ yumamakɨ warahɨawekaku, meta 'ukaratsi waɨriyarika ti'uximayatame kemɨtita'ikwewa, mɨti'uximayatsirie 'ɨyaya niukieya yumamakɨ hehɨawekaku, mɨpaɨta tame tepɨteta'ikwewa Yawé takakaɨyari hetsie, kepaukake mɨkɨ mɨtatsitinenimayata.
PSA 123:3 Yawé ketaneutinenimayata, ketaneutinenimayata, 'ari tepu'u'uxe ketemɨtenanaimarie.
PSA 123:4 Mɨixari tepɨte'uka'eniwa teyuriyarietɨ, 'ari mɨixamexɨa mepɨtatsi'utiti memuyutimariwekata, meta waɨkawamexɨari mepɨtatsi'unanaima memɨyuti'ɨre.
PSA 124:1 Ku'uwamete wakwikari. Rawiri nɨawarieya. 'Ayumieme hikɨ 'ixaheritsixi yaxeikɨa xekeneutiyuaneni: —Xɨka Yawé tahetsie ka'utanuanike,
PSA 124:2 keteyɨakake xɨka Yawé tahetsie ka'utanuanike kepauka yunaitɨ kwiepa memɨtama metatsi'aye'unietɨ memakɨtsie,
PSA 124:3 teyunaime te'ayeneniereme mepɨtatsi'anukaxɨxɨanikekai kepauka memuyeha'atsie tahepaɨtsita,
PSA 124:4 haa tahetsie muwayeneni hepaɨ tepɨyɨnikekai, temehauxɨani hepaɨ tepɨyɨnikekai,
PSA 124:5 haa mɨtɨrɨkaɨye hepaɨ teyunaime mepɨtatsiheuyehɨanikekai.
PSA 124:6 Yawé hepaɨtsita 'aixɨa keraniuwani, mɨkɨ mɨkawarupitɨakɨ yutametekɨ memɨtatsititsanakɨ.
PSA 124:7 Wikixi wahepaɨ, tekateniyutawikweitsitɨani, tixɨ'erɨwame winiyarieyatsie, winiyari kaniutatsane, hikɨ tame takaniuyuta'una.
PSA 124:8 Yawé tatsiparewiwame kanihɨkɨtɨni, muyuawi mutawewi meta kwie.
PSA 125:1 Ku'uwamete wakwikari. Yawé hetsie kemɨ'ane yuri memɨte'erie hɨri Tsiyuni hepaɨ mekani'aneni, hatsuaku tɨma mɨkakuyuitɨarieni, yuheyemekɨ 'amuka.
PSA 125:2 Kerutsareme yemurite 'auriena matetɨka kemɨreinatɨka, mɨpaɨta Yawé yuteɨterima katiniwareukunaka, hikɨtɨtɨ meta yuheyemekɨ.
PSA 125:3 'Axateyuruwamete mepɨkateta'aita Kakaɨyari teɨterimama wahetsie, heitseriemekɨ memu'uwa hatsuaku 'axamemɨkateheyuriekakɨ.
PSA 125:4 Yawé, 'aixɨa keniwayurieka 'aixɨa memɨte'u'iyari, kemɨ'ane 'iyari mɨheitserie memexeiya.
PSA 125:5 Peru kemɨ'ane huye mututuni 'utɨa memuhu, Yawé, keniwaranuyexɨri, 'axateyuruwamete wahamatɨa. 'Ixaheri kwieyaritsie kayuwatɨ ke'umaka.
PSA 126:1 Ku'uwamete wakwikari. Kepauka Yawé, memehapaniekai mɨwarupitɨa, Tsiyuni memɨ'axɨanikɨ, temɨteheinɨka hepaɨ tepɨtenenierekai.
PSA 126:2 'Ana temawierika tehexeiyatɨ tepakɨ, meta tepɨkatehayewakai te'utikwitɨ. Hipatɨ nuiwarite mɨpaɨ mekaniutiyuanekaitɨni: «Yawé mariwemekɨ wahetsiemieme pɨtiyuriene».
PSA 126:3 Huu, Yawé tahetsiemieme mariwemekɨ pɨtiyuriene, hikɨ mɨkɨkɨ waɨkawa tepuyutemamawie.
PSA 126:4 Yawé, hikɨ keniwa'atɨa ta'iwama memehapanie haa 'akitsie kepemɨtiwayenenetɨwa makuwakitsie hepaɨ.
PSA 126:5 Kemɨ'ane yu'ukaikɨ memuka'etsa, temawierikakɨ mepɨka'itsana.
PSA 126:6 Kemɨ'ane 'utatsuatɨ 'imɨari mɨ'iwiene, yutemawietɨ pɨka'itsana.
PSA 127:1 Ku'uwamete wakwikari. Tsarumuni nɨawarieya. Xɨka Yawé kii ka'utawewieni, yakɨ xeikɨa 'iwewiwamete mekateniyu'uxitɨaka. Xɨka Yawé xeime kiekari ka'ɨwiyani, tɨkarikɨ tehɨwemete yakɨ xeikɨa mekaniyɨaka.
PSA 127:2 Yakɨ xeikɨa ximeri paitɨ xekananuku'uweni, meta yakɨ xeikɨa 'arike xekaniukahipiteni, meta yakɨ xeikɨa kwinimieme xekateni'uximayaka 'ikwai xemɨte'ukaxexeiyanikɨ. Karikɨ Kakaɨyari kutsi kaniwapitɨaka pɨta kemɨ'ane mɨwanaki'erie.
PSA 127:3 Tɨɨri 'imikieri mekanihɨkɨtɨni Yawé hetsɨa miemete, tɨɨri tahetsie memɨyekɨka ta'iwarika witsimɨ'ane mekanihɨkɨtɨni.
PSA 127:4 Kepauka temaikɨ tɨɨri mɨwarayexeiya yumemiwame 'ɨrɨ kemɨra'ɨ hepaɨ kani'aneni.
PSA 127:5 'Aixɨa xepɨ'itɨarie kemɨ'ane 'ɨrɨ 'uitɨwameta xemihɨniya mɨkɨ 'ɨrɨ 'aixɨa mɨ'anenekɨ. Mɨkɨkɨ hatsuaku mepɨkatewiyatsitɨarieni memɨwaraye'unie wahɨxie kepauka memɨtaxanetsieni yemekɨ 'itsɨkate wahɨxie.
PSA 128:1 Ku'uwamete wakwikari. 'Aixɨa mepɨ'itɨarie kemɨ'ane Yawé memayemakaxe, kehate huyetana memuhu.
PSA 128:2 Peti'uximayatɨ tita pemɨtiukaxexeiyani, mɨkɨkɨ pepɨti'amikwani, 'aixɨa 'iyari xepu'uwani meta xepɨte'ukaxexeiyani.
PSA 128:3 'A'ɨya 'akie pukani, kaxie nanari witsimɨtixuawe hepaɨ pɨ'aneni, 'amexatsie 'aniwema meputiteni, witsimepɨteyuxexeiyani huriwu yɨrameyari hepaɨ.
PSA 128:4 Mɨkɨ pɨhɨkɨ tewi 'aixɨa kemu'itɨarieni kemɨ'ane Yawé mayemakaxe.
PSA 128:5 Yawé 'aixɨa kemetsiyurieka Tsiyuni paitɨ, meta peke'uniere Kerutsaremetsie ke'aixɨa mɨtiyɨaneni kepaɨmexɨa tukari pemɨyurieni.
PSA 128:6 'Aniwema waniwema pemɨwaxeiyakɨ peke'uyeikani. 'Ixaheri kwieyaritsie kayuwatɨ ke'umaka.
PSA 129:1 Ku'uwamete wakwikari. Hikɨta 'ixaheritsixi mɨpaɨ meke'utiyuani: —Yumɨiretɨ mepɨnetsi'uhiweritɨa temaikɨyaritsie paitɨtɨ,
PSA 129:2 yumɨiretɨ mepɨnetsi'uhiweritɨa temaikɨyaritsie paitɨtɨ, peru yemekɨ mepɨkanetsiha'iwawe.
PSA 129:3 Newaritsie hararu mepukahatɨkɨ, xuruku meputiwewi heukatetewame.
PSA 129:4 Peru Yawé, heitseriemekɨ yamɨtikamie, kaneniuxɨna 'axateyuruwamete menetsihɨakaku.
PSA 129:5 Mekeha'iwarieni meke'utewiyatsitɨarieni yunaitɨ kemɨ'ane Kerutsareme memaye'unie.
PSA 129:6 Tupiriya kii heima mieme hepaɨ meke'ɨyɨni, kataweriwetɨ mɨtiwauke,
PSA 129:7 tixitekeme tixaɨtɨ pɨkati'axe meta 'ihuruwame tixaɨtɨ pɨkati'axe.
PSA 129:8 Wa'aurie memuyekɨka xewitɨ tɨma mɨpaɨ pɨkatiwarahɨaweni: «Yawé xeme 'aixɨa kexeyurieka, Yawé tepɨwawirie 'aixɨa mɨxeyuriekakɨ».
PSA 130:1 Ku'uwamete wakwikari. Yawé, ne yemekɨ 'ekɨ karima nepɨmetsihahɨawe waɨkawa netiuka'eniwatɨ kwie 'ameukatewatsie.
PSA 130:2 Ti'aitame, neniuki keneu'eni. Yemekɨ heitseriemekɨ keneneu'eni waɨkawamekɨ kenemetiwawirie.
PSA 130:3 'Ekɨ Yawé, xɨka naime ke'axatemɨte'uyurikɨ pekatatsixeiriekake, Yawé, ¿kamɨtsɨ kemɨ'ane hetsie pɨkatiuhɨiyawe?
PSA 130:4 Peru 'ekɨ pepɨtareuyehɨwiriwa, 'ayumieme peuyewetse temɨmetsi'ayemakaxenikɨ.
PSA 130:5 Ne Yawé nepɨtakwewie, ne'iyarikɨ naimekɨ nekanitakwewieka, niukieya kemaine mɨpaɨ nepɨtita'ikwewa.
PSA 130:6 Ne'iyarikɨ naimekɨ Yawé nepɨtakwewie, matsi waɨkawa tehɨwemete kememɨkateta'ikwewa ximeri mayanikɨ. Tehɨwemete ximeri kememɨtetakwewie hepaɨ,
PSA 130:7 xemeta mɨpaɨ, 'ixaheritsixi, Yawé xeketenetakwewieka. Hetsiena waɨkawa naki'eriya muxuawekɨ, meta mɨkɨ yurikɨ tatsixɨname mɨhɨkɨkɨ.
PSA 130:8 Mɨkɨ 'ixaheritsixi kaniwaxɨnamɨkɨ naime ke'axamemɨte'uyuri hepaɨtsita.
PSA 131:1 Ku'uwamete wakwikari. Rawiri nɨawarieya. Yawé, ne'iyari mariwetɨ pɨkahayuyeitɨwa, meta nehɨxite tiyukatawe'eriekamekɨ pɨkataneniere, meta nepɨkatikuwaune nemɨmariwenikɨ, metatsiere mariweme nemɨtiyurienikɨ nepɨka'ikuwaune kenemɨkatiyɨwe.
PSA 131:2 Matsi pɨta: kayuwatɨ nepɨyupitɨa. Nunutsi hepaɨ nepɨ'ane yumaamatsie meukuka 'utsitsitɨarieka. Ne'iyari nunutsi xike mutsitsitɨarie hepaɨ pɨ'ane.
PSA 131:3 'Ixaheri, Yawé hetsie keneta'ikwewani hikɨ meta yuheyemekɨ.
PSA 132:1 Ku'uwamete wakwikari. Yawé, Rawiri kena'eriwani meta kemɨtiuka'eniwa.
PSA 132:2 Kena'eriwani kemɨtiuyuhɨritɨa Yawé hetsɨa, Kakuwu hetsie Mɨtɨrɨkaɨye kemɨtiutahɨawixɨ:
PSA 132:3 «Ne nekie nepɨkatayerɨni, meta 'etsiwatɨma ne'utatsie nepɨkaka'uxipieni,
PSA 132:4 meta nepɨkaheukuni, 'etsiwatɨma nepɨka'anukɨpe,
PSA 132:5 xɨka neka'itaxeiyaweni 'akuxi Yawé hakewa tukieya nemetawewieni Mɨtɨrɨkaɨye Kakuwu meyexeiya».
PSA 132:6 'Epɨrata tɨratu kakuniyari teputamari, hikɨ tepeitaxei Yakaxi kwieyaritsie:
PSA 132:7 «Hikɨmɨ tekanihuni tukitana paitɨ, hɨxiena tepekatunuma'uni».
PSA 132:8 Yawé, kenanukukexi 'atukita kenenua pemuwaka'uxipienitsie, 'ekɨ meta 'atɨratu kakuniyari mɨtɨrɨkaɨye.
PSA 132:9 Mawari wewiwamete 'aixɨa meke'uyukuyurieni kemɨreuyewetse. 'Ahetsie memɨtewiya mekemetsinɨawani meyutemamawietɨ.
PSA 132:10 Rawiri ti'a'uximayatsiriwame pemɨnaki'eriekɨ, pepɨka'iku'e'eiriwani pemenayexei.
PSA 132:11 Yawé Rawiri mɨpaɨ katiniuhɨritɨani mɨkɨ yapɨtikayani pɨka'ipata: «Xeime 'anuiwaritɨme 'a'uwenitsie nekanayemɨkɨ.
PSA 132:12 Xɨka 'aniwema netɨratu mehaye'atɨani meta ne'aitsikate nemɨwata'ɨkitɨani, hikɨ mɨkɨ waniwema 'a'uwenitsie mepayaxe yuheyemekɨ».
PSA 132:13 Yawé, Kerutsareme panayexei, mana yukie mayeitɨanikɨ pinakixɨ, mɨpaɨ putayɨ:
PSA 132:14 «'Ena netuki nepɨtakeni yuheyemekɨ, 'ena ne'ukaitɨ nepɨtita'aita, mɨpaɨ mɨnetinakekɨ.
PSA 132:15 'Aixɨa nepɨtiyurieka 'ikwai 'ikɨ kiekaritsie timieme, meta tixaɨtɨ memɨkatehexeiya 'ikwai nepɨwamikwani.
PSA 132:16 Mawari wewiwamete wikweitsitɨarikakɨ nekaniwatikemaritɨamɨkɨ, meta hetsiena memɨtewiya mekanitanɨawakuni meyutemamawietɨ.
PSA 132:17 »Hikɨ tawarita Rawiri tɨrɨkariya nepɨpitɨani, meta nemenayexei kɨxemeya nepɨtaiya.
PSA 132:18 Memeye'unie tewiyarika nepɨwapitɨani, peru mɨkɨ matsi kurunaya mariwetɨ payani 'utimerɨkatɨ».
PSA 133:1 Ku'uwamete wakwikari. Rawiri nɨawarieya. Yemekɨ 'aixɨa pɨ'ane meta witsipɨ'ane xɨka 'iwamarixi 'aixɨa 'iyari meyuxeiyatɨ yunaitɨ me'u'uwani.
PSA 133:2 Mɨpaɨ xɨkati'aneni witsipɨti'ane, hatseiti mawari wewiwamete wahetsiemieme mɨ'ukweni hepaɨ, witsimɨtiukuke 'Aruni mɨxiyayatsie, wamu'utsie 'akaneikatɨ wakemari manukanenieretsie paitɨ mukaneika.
PSA 133:3 Witsipɨ'ane haɨtsi hepaɨ Heximuni hɨriyaritsie mɨkaxɨrɨwe hayari Kerutsareme kiekariyaritsie makayeneika. Hakewa 'aixɨa 'anemekɨ memuyuxeiya, Yawé 'aixɨa kaniwayurieka meta tukari mɨkaxɨwe kaniwapitɨaka.
PSA 134:1 Kɨkamete wakwikari Kerutsareme memeutikɨka. Yawé hetsiemieme 'aixɨa xekenaitɨkani xeme yunaitɨ te'i'uximayatsiriwamete, yɨwikɨta Yawé tukieyata xemeyexeiya.
PSA 134:2 Yumamate tukita xekeneutatseraxɨa meta Yawé hetsiemieme 'aixɨa xekenaitɨkani.
PSA 134:3 Yawé Tsiyuni paitɨ 'ukaitɨ, muyuawi meta kwie mutawewi, 'aixɨa kexeyurieka.
PSA 135:1 Yawé kenɨawarieka. Yawé xekenenɨawani. Yawé te'uximayatsiriwamete, xekenenɨawani.
PSA 135:2 Xeme Yawé tukita yaxemɨteye'uwa, meta takakaɨyari tukieya takwayaritsie.
PSA 135:3 Yawé xekenenɨawani, karikɨ mɨkɨ 'aixɨa katiniuka'iyarini, nɨawari hetsiena mieme xekeneutikwikani, mɨpaɨ katininakeni.
PSA 135:4 Yawé Kakuwu panayexei yuhetsiemieme mayeitɨanikɨ, 'ixaheritsixi teɨterimama memakɨnekɨ.
PSA 135:5 Ne mɨpaɨ nepɨtimate Yawé, tati'aitɨwame, matsi pumariwe keyuri hipatɨ kakaɨyarixi.
PSA 135:6 Yawé naime yapɨtiyuriene kemɨtinake, taheima muyuawitsie meta 'ena kwiepa, haramaratsie meta naitsarie meukatetewatsie.
PSA 135:7 Kwie manu'axetsie paitɨ haiwitɨri panuku'enitsitɨwa, mimierikari peyenɨ'awa wiyeritsata metatsiere 'eka pewatiyepiwa muye'ɨnetsie.
PSA 135:8 'Ekipitutari waniwema mexɨakate kaniwarukwini, teɨteri waniwema meta tewaxi waniwema.
PSA 135:9 'Ekipitu kwieyaritsie, Kakaɨyari 'inɨari mamariwaweme kanenɨ'ani Parahuni hetsie meta yunaime te'i'uximayatsiriwamete wahetsie.
PSA 135:10 Yumɨireme nuiwarite kaniwarukwini, te'aitamete metɨrɨkawime kaniwarukwini.
PSA 135:11 Tsikuni, 'amuxeutsixi tiwa'aitɨwame, ti'aitame 'Uhuki Watsani kwieyaritsie, meta yunaime te'aitamete Kanani memɨtamakai.
PSA 135:12 Mɨkɨ wakwie kaniyetuani, 'ixaheritsixi wakwie mayanikɨ yuheyemekɨ.
PSA 135:13 Yawé, 'ekɨ yuheyemekɨ 'apekaniuyeikani, 'aheyemekɨ 'aheyemekɨ 'apepuweni.
PSA 135:14 Yurikɨ Yawé yuteɨterima wahetsie kanitanuamɨkɨ, meta te'i'uximayatsiriwamete kaniwatinenimayatamɨkɨ.
PSA 135:15 Nuiwarite wakakaɨyarixima huru pɨrata mekanihɨkɨtɨni, tewi wewiyaya mepɨhɨkɨ.
PSA 135:16 Meputeni, peru mepɨkaniuwawe, mepɨhɨxi, peru mepɨkaheuneniere,
PSA 135:17 mepunaka, peru mepɨkaheu'enana, nitɨma 'eka mepɨkahexeiya yuteta.
PSA 135:18 Kemɨ'ane memɨwatiwewiwa, mɨkɨ wahepaɨ mepɨ'anene, meta yunaitɨ kemɨ'ane wahetsie yuri memɨte'erie.
PSA 135:19 'Ixaheritsixi, Yawé hetsie 'aixɨa xekenaitɨkani, 'Aruni xiɨyarimama, Yawé hetsie 'aixɨa xekenaitɨkani,
PSA 135:20 Rewi nuiwarimama, Yawé hetsie 'aixɨa xekenaitɨkani, kemɨ'ane xemeyemakaxe, Yawé hetsie 'aixɨa xekenaitɨkani.
PSA 135:21 Tsiyuni paitɨ Yawé 'aixɨa xeketenahɨaweni, Kerutsaremetsie mɨkie. Yawé kenɨawarieka.
PSA 136:1 Yawé pamɨpariyutsi xekenepitɨaka, karikɨ mɨkɨ 'aixɨa katiniuka'iyarini,
PSA 136:2 Pamɨpariyutsi xekenepitɨaka Kakaɨyari mumariwe kakaɨyarixi kememɨka'anene,
PSA 136:3 Pamɨpariyutsi xekenepitɨaka te'aitamete Tiwa'aitɨwame,
PSA 136:4 Mɨkɨ xeikɨa mariweme mɨtiwewiwe,
PSA 136:5 Timaiwetɨ muyuawi mutawewi,
PSA 136:6 Kemɨ'ane kwie mutaweraxɨ haramara hetsie,
PSA 136:7 Kemɨ'ane muyuawitsie memeukatei muwarunetɨa memɨhekɨariwie,
PSA 136:8 Tau munetɨa mɨhekɨariwiekakɨ tukarikɨ,
PSA 136:9 Metsa meta xurawetsixi, tɨkarikɨ memɨhekɨariwiekakɨ,
PSA 136:10 Kemɨ'ane 'ekipitutari waniwema mexɨakate mɨwarukwi,
PSA 136:11 'Ixaheritsixi 'Ekipitu muwarayewitɨ,
PSA 136:12 Yumamá mɨtɨrɨkaɨye tatseratɨ,
PSA 136:13 Kemɨ'ane Haramara Mɨxeta manutayepi,
PSA 136:14 Hixɨapa muwaruwitɨtɨya 'ixaheritsixi,
PSA 136:15 Parahuni meta kuyaximama Haramara Mɨxeta hetsie mɨwarukayunitɨa,
PSA 136:16 Kemɨ'ane makumawetsie yuteɨterima muwaruyewitɨtɨya,
PSA 136:17 Memamariwaweme te'aitamete mɨwaruka'unaxɨ,
PSA 136:18 Te'aitamete memɨte'ayu'iwa mɨwarukwi,
PSA 136:19 Tsikuni, 'amuxeutsixi tiwa'aitɨwame mumi,
PSA 136:20 Ti'aitame 'Uhuki Watsani kiekame mumi,
PSA 136:21 Mɨkɨ wakwie yuteɨterima kaniwayetuirieni,
PSA 136:22 Mɨkɨ 'ixaheritsixi te'i'uximayatsiriwamete mɨtiwarutapitɨa,
PSA 136:23 Hatsuaku mɨkatatsihatɨtɨmaiya, tsepa haweri temu'itɨarie,
PSA 136:24 Memɨtatsi'aye'unie wahetsɨa mɨtatsiwikweitsitɨa,
PSA 136:25 Yunaime memɨte'ayeneniere mɨtiwamikwa,
PSA 136:26 Kakaɨyari muyuawitsie makawe pamɨpariyutsi xekenepitɨaka.
PSA 137:1 Wawiruniya hatetsitayaritsie tepetiyaxikekai, 'ana Kerutsareme teha'eriwatɨ tepetitsuanakai.
PSA 137:2 Mɨkɨ Kiekaritsie hapuri kɨyeyari meti'utsie mana takanarite tepeɨkɨwɨwɨtɨwakai.
PSA 137:3 Mana kiekatari memɨtatsi'upɨretsutaxɨ, mepɨtatsihe'aitɨakai kwikari temetikwikakɨ, tate'uximayatsitɨwamete xekeneyutemamawieka mepɨtatehekɨhɨawekai, mɨpaɨ mepɨtatehetihɨawekai: «Xekeneutakwika tahetsiemieme xeime kwikari Kerutsareme mieme».
PSA 137:4 Tame tepɨkayɨwawe kwikari Yawé hetsiemieme temutikwikani xeime kwieyaritsie paitɨ.
PSA 137:5 Kerutsareme, Kerutsareme, xɨka ne 'uxa'atɨni nemetsihatɨmaiyake, nemamá netserie mieme ke'utawani.
PSA 137:6 Xɨka nekametsiha'eriwatɨ nehayani, netemawierikakɨ xɨka nemetsihatɨmaiya, neneni ke'anatixitekieni.
PSA 137:7 Yawé, 'erumitsixi keniwara'eriwani, kepauka Kerutsareme muka'unixɨ. Mɨpaɨ mepɨte'uhiwakai: «Naime, naime xekeneuka'una tsutɨmeyari 'ɨarime».
PSA 137:8 'Ekɨta Wawiruniya niweya, 'uxa'atɨni pekanika'unariemɨkɨ, 'aixɨa ke'itɨarieka kemɨ'aneta 'ekɨ mɨmetsika'una kepemɨtatsi'uyuri tame.
PSA 137:9 'Aixɨa ke'itɨarieka kemɨ'ane tɨɨri muwatiwiya meta 'aitsie muwatitetsewani.
PSA 138:1 Rawiri nɨawarieya. Yawé, ne ne'iyarikɨ nepɨmetsinɨawani, meta nepɨkwikani nɨawari 'ahetsiemieme kakaɨyarixi wahɨxie.
PSA 138:2 'Atuki mɨwayepatsie hepa neheutanieretɨ nepɨkatunumakeni, 'anaki'eriya mɨmariwekɨ meta 'aixɨa pemɨtikamiekɨ nepɨmetsitanɨawa. Naime pemɨtiutawewitsie matsiɨkɨme pemayeitɨakɨ kepemɨtimariwe meta 'aniuki pemaye'atɨakɨ.
PSA 138:3 Pepɨnetsi'uta'ei kepauka nemɨmetsihahɨawekai, tawarita pepɨnetsi'utɨrɨkariyaxɨ.
PSA 138:4 Neuxei Yawé, yunaitɨ te'aitamete kwiepa memɨtama 'aniuki me'enieme mepɨmetsitanɨawa.
PSA 138:5 Temawierika mepexeiyani me'utikwitɨ 'ahuye memarietɨ, Yawé, 'atɨrɨkariya mɨmariwekɨ.
PSA 138:6 Yawé muyuawitsie kaniuyeikani, meta puwaxeiya tixaɨtɨ memɨkateyu'erie, 'iyata memɨyuti'ɨre 'ateewa kaniwaxeiyani.
PSA 138:7 Tsepanetɨ ne waɨkawa 'uximatɨarikatsie nemuyetɨa, 'ekɨ tukari pepɨnetsipitɨani, memɨnetsi'aye'unie memɨha'atsie 'amamá pepeutatsera, 'atɨrɨkariyakɨ pepɨnetsitawikweitsitɨani.
PSA 138:8 Yawé pɨraye'atɨani kemɨti'erieni nehetsiemieme. Yawé, 'anaki'eriya mɨmariwe pɨkayupata yuheyemekɨ, 'ekɨ pepɨnetsi'utawewi pepɨkanetsi'uku'e'eiriwani.
PSA 139:1 Teyuitɨwamete wa'ukiyari. Rawiri nɨawarieya. Yawé, 'ekɨ pepɨnetsixeiya, 'ekɨ pepɨnetsimate.
PSA 139:2 Pepɨtimate kepauka 'anemayeixa meta kepauka nemanukukeka, Tsepa kemeteewa kenemɨtiyɨkɨhɨawe pepɨtimate.
PSA 139:3 Pepɨtimate kepauka nemukuyeika meta kepauka nemu'uxipie, naime pepɨtimate nitixaɨtɨ pepɨkatitɨmaiya.
PSA 139:4 Neniuki 'akuxi neteta kawayenewekaku 'ekɨ Yawé matsi, pekatinimaikari naime kenemɨtayɨni.
PSA 139:5 'Ekɨ naitsarie pepɨnetsi'ɨwiya, 'amamakɨ pepɨnetsi'anukanama.
PSA 139:6 Kepemɨtimaiwe pɨmariwe yemekɨ, ne nepɨkayɨwe nemeitimaitɨyani.
PSA 139:7 'A'iyari hɨxie nemuyuti'awieta xaɨtsie nepɨkayɨwe. Nemuyuta'una xaɨtsie 'ahɨxie nemɨka'uyeikanikɨ nepɨkayɨwe.
PSA 139:8 Muyuawitsie xɨka ne'anutiyanike, mana pepeyeika 'ekɨ, xɨka meukatewatsie neheukamieni, muwatatsiere pepeyeika.
PSA 139:9 Xɨka neheyani tau manatineikatsie, yatɨni haramara manu'axetsie,
PSA 139:10 muwapaitɨta 'atɨrɨkariya pɨnetsihekuwitɨneni, meta nepayeniereni 'atɨrɨkariyakɨ.
PSA 139:11 Xɨka mɨpaɨ ne'utayɨni: «Yɨriya kenetsi'anukanani, hekɨariya nehetsiemieme yɨriya xeikɨa kehayani»,
PSA 139:12 'ahetsiemieme yɨriya pɨkayɨriya, tɨkarikɨ 'ahetsiemieme tukarikɨ hepaɨ pɨ'ane. 'Ahetsiemieme yɨriya meta hekɨariya yaxeikɨa pɨ'anene.
PSA 139:13 'Ekɨ pepɨtiutawewi naime netaɨta timieme, nemaama hetsie pepɨnetsi'ayenuiwitɨa.
PSA 139:14 Kepemɨnetiutawewi mariwemekɨ pɨti'ane 'ayumieme nepɨmetsinɨawa. 'A'uximayatsika pɨnetsihɨxiyatsitɨa, 'ikɨ naime hepaɨtsita mɨpaɨ nepɨtimate.
PSA 139:15 Ne'umete pɨwawerekai 'ekɨ pe'ixeiyakaku kepauka 'awie nemɨwewiyakaitsie kwieta meukatewatsie, nemuwipariekaitsie.
PSA 139:16 Pepɨnetsixeiyakai kepauka tewi hepaɨ nemɨyɨximekai: 'ana naitɨri 'axapatsie pɨraka'ukai nehetsie timieme, netukari kemɨreuterekekai paka'ukairi, 'akuxi xeitukari tɨma neka'uyeikakaku.
PSA 139:17 Kakaɨyari, kepemɨtiku'eriwa nehetsiemieme witsipɨ'anene. Naitɨ mɨkɨ yɨnɨtɨ yemekɨ pɨwaɨkawa.
PSA 139:18 Xɨka ne'iti'inɨatake, xiekari kemɨpaɨme matsi mɨkɨ pɨwaɨkawa. Xɨka ne'iti'inɨata ne'i'inɨatatɨ nepeukuwe, kepauka nemayɨhɨtɨani ne'aurie 'akuxi 'ekɨ pepukani.
PSA 139:19 Kakaɨyari, xɨka 'axateyuruwamete pewarukwinike 'aixɨa pɨ'anenikeyu. Teɨteri memɨteyumemiwa nehamatɨa memɨka'u'uwanikɨ yapetiuyurienike,
PSA 139:20 mɨkɨ 'ahetsiemieme 'axamemutiyuane 'itarikakɨ 'ahetsie memɨtehahɨpa.
PSA 139:21 Yawé, ne nepɨwaxani'erie kemɨ'ane memɨmetsixani'erie, meta nepɨkawareuxeiyamɨkɨ kemɨ'ane memɨkametsinaki'erie.
PSA 139:22 Ne yuheyemekɨ nepɨwareuheka, memɨmetsi'aye'unie neta nepɨwaraye'unie.
PSA 139:23 Kakaɨyari, ne'iyari keneuxeiya, keneneuta'inɨata kenemɨtiyɨkɨhɨawe.
PSA 139:24 Keneneuxeiya xɨka huye 'axamɨ'ane 'utɨma ne'umieni, matsi pɨta keneneuwitɨximeni tukari mɨkaxɨwe huyeyari 'utɨma.
PSA 140:1 Teyuitɨwamete wa'ukiyari. Rawiri nɨawarieya. Neuxei Yawé, 'axateyuruwamete watsata keneneutawikweitsitɨa, kenene'ɨwiyani memɨteyukananaima wahepaɨtsita,
PSA 140:2 memɨyu'iyaritɨa xeikɨa hipame ke'axamemɨwayurieni meta tsepa kepauka kwi memayukwiwawe.
PSA 140:3 Yuneni kuu nenieya hepaɨ xeikɨa mepimɨwa, kuu 'uayeya mɨmɨya mepexeiya yutenitsie.
PSA 140:4 Yawé, kenene'ɨwiyani 'axateyuruwamete wahepaɨtsita, kenene'ɨwiyani memɨteyumemiwa wahepaɨtsita, mɨkɨ memɨnetsihatihɨaximekɨ xeikɨa.
PSA 140:5 Mɨkɨ memɨyuti'ɨre winiyari mepɨnetsi'uketsiri, kaunari nehɨxie mepɨtiye, nemekawenikɨ nehɨxie mepɨte'u'una.
PSA 140:6 Ne mɨpaɨ Yawé nepɨrahɨawe: «'Ekɨ pepɨnekakaɨyari. Yawé, keneneu'eni kenemetiwawirie waɨkawa».
PSA 140:7 Yawé Ti'aitame, netsiwikweitsitɨwame pemɨtɨrɨkaɨye, kepauka nemɨmierienenitsie pemɨnetsiparewie:
PSA 140:8 Yawé, pepɨkawapitɨaka 'axateyuruwamete memɨtehayu'iwanikɨ, pepɨkawapitɨaka kememɨteku'eriwa mɨpaɨ memɨteyurienikɨ, kapa me'uyuti'ɨrenikɨ.
PSA 140:9 Memɨnetsi'uweiya wahetsie pɨta kenanunɨ'a 'axamɨti'ane nehetsiemieme memeiyenɨ'akai.
PSA 140:10 Tɨɨ wiyeriyari ke'ukaxɨrieni wahetsie, taipa mekeheukaxɨriyani, meta putsu meukatetewata, para hatsuaku tawarita memɨkawatikɨkanikɨ.
PSA 140:11 Meke'ukumawere 'ena kwiepa teɨteri memɨte'itawa, 'uximatɨarikakɨ mete'uka'eniwatɨ meke'ukwini yunaitɨ teɨteri memɨteyukananaima.
PSA 140:12 Ne mɨpaɨ nepɨtimate Yawé teɨteri 'aixɨa memɨte'u'uwa meta tixaɨtɨ memɨkatehexeiya puwaparewie, meta wahetsie punua heitserie kememɨtehexeiya.
PSA 140:13 Yurikɨ 'aixɨa memɨte'u'uwa mepɨmetsinɨawani meta 'ahɨxie mekaniu'uwakuni.
PSA 141:1 Rawiri nɨawarieya. Yawé, 'ekɨ nepɨmetsihahɨawe, yapauka kenenanu'eni. Kepauka nemɨmetsihahɨawe keneneuta'eiya kenemɨmetiwawirie.
PSA 141:2 'Ahetsɨa paitɨ kehenuani nenenewieri 'ɨkwa mawariyari hepaɨ, teikɨ nememe'ekɨ mawari taikai mieme hepaɨ.
PSA 141:3 Yawé, netenitsie tihɨweme keneutaketsa, pepɨkanetsipitɨaka 'axanemɨtikuxatanikɨ.
PSA 141:4 Pepɨkanetsipitɨaka 'axanemɨtiyukɨhɨawenikɨ, meta pepɨkanetsipitɨaka kapa 'axanetiuyurienikɨ, pepɨkanetsipitɨaka 'ixɨararipa nemuyeikanikɨ 'axateyuruwamete wahamatɨa.
PSA 141:5 'Aixɨa mɨti'ane kenetsiku'imaiyani, naki'eriya kenetsi'utate'ani, witsimu'ɨa 'axateyuruwamete wapiini nemu'utsie pɨkayuhayewani, nemuyunenewiekɨ wahepaɨtsita ke'axamemɨteyuriekɨ.
PSA 141:6 Kepauka xe'itsɨkate 'aitsie memakaxɨriyani, 'ana mɨpaɨ xepɨtehetimani kename ne yurikɨ nehainekai.
PSA 141:7 Mɨpaɨ xepɨtiyuani: «Kwie kemɨtitawiwiwe, kepauka hararu hetsiena muye'inetɨyeikatsie, mɨpaɨta ta'umete pɨtiutaxɨri teukiyapa tetsita».
PSA 141:8 Yawé Ti'aitame, 'ahetsie ne nepɨtiwiya, 'ahetsɨa ne nepɨne'awieta, pepɨkanetsipitɨaka nemɨmierienikɨ.
PSA 141:9 Winiyari nehɨxie muwɨwɨtɨariwakɨ kenene'ɨwiyani, 'axateyuruwamete menetsiwiniyatɨwekaku.
PSA 141:10 'Axateyuruwamete yuwiniyaritsietɨtɨ meke'uyewɨre, neta newikweitsitɨarietɨ neke'ayani.
PSA 142:1 Rawiri 'ɨkitsikaya. Kepauka terɨta mayekatetsiemieme. Nenewieri. Karima ne'utahiwatɨ, Yawé parewiya nepɨwawirie, karima ne'utahiwatɨ, Yawé nepɨwawirie mɨnetsinenimayakakɨ.
PSA 142:2 Mɨkɨ xeikɨa nepɨtihekɨatɨa kenemɨtiuta'aiwa, nepɨtikuxaxatɨwa kenemɨtiuka'eniwa.
PSA 142:3 Kepauka nemɨkayɨwenitsie, 'ekɨ matsi huye pepɨnetsixeitsitɨa. Huye nemiweiya 'utɨma hipatɨ winiyari nehetsiemieme mepuwɨwɨtɨwa.
PSA 142:4 Tsiparatsɨ keneneuxeiya: nixewitɨ parewiya pɨkanetsiyetuirie. Nepɨkaheixeiya hakewa nemeyuti'awieta, xewitɨ pumawe nehepaɨtsita yu'iyaritɨatɨ.
PSA 142:5 Yawé, 'ekɨ parewiya nepɨmetsiwawirie, 'ekɨ ne mɨpaɨ nepɨmerahɨawe: «'Ekɨ hakewa nemeyu'awieta pepɨhɨkɨ, 'ena kwiepa tixaɨtɨ nepɨkarexeiya, 'ekɨ xeikɨa nepɨmetsihexeiya».
PSA 142:6 Kenemɨmetiwawirie keneneu'eni, ne hikɨ nekaniweranini, keneneutawikweitsitɨa memɨnetsi'uweiya wahepaɨtsita, mɨkɨ matsi waɨkawa memɨtɨrɨkawikɨ.
PSA 142:7 Nepanutahɨiya keneniwayexɨna, nemetsinɨawatɨ nemayanikɨ. 'Ana teɨteri 'aixɨa memɨte'u'uwa ne'aurie mekani'axɨakuni menenieretɨ 'aixɨa pemɨnetsi'uyurikɨ.
PSA 143:1 Rawiri nɨawarieya. Yawé, nenewieri keneu'eni, kenemɨmetiwawirie keneneuta'eiya. 'Aixɨa pemɨtikamiekɨ meta kemɨtiheitseriekɨ pemuyeikakɨ, keneneuta'eiya.
PSA 143:2 'Ekɨ meti'uximayatsiriwame pepɨka'utakwekwewiwani pemita'iwawiyakɨ, 'ahɨxie xewitɨ mɨkayɨwekɨ mɨpaɨ mutayɨnikɨ ne 'atsinepɨkatiyuruwame.
PSA 143:3 Mepɨnetsimieku memɨnetsi'aye'unie: kwiepa mepɨnetsi 'ɨhɨa nehɨxima. Yɨwita nemuyeikanikɨri waɨriyarika mepɨnetsipitɨa, meripaitɨ memukwi wahepaɨ.
PSA 143:4 Kenemɨtinewaɨriyakai pumaweri netɨrɨkariya, ne'iyariri pɨka'uyuane nepɨka'i'enie.
PSA 143:5 Nepɨtiku'eriwa meripaitɨ kemɨtiɨyɨ: mariweme kepemɨtiuyuri nepuku'eriwa, mɨpaɨ nepɨtimate kepemɨtiuyuri 'amamakɨ.
PSA 143:6 Nemamatekɨ 'ahepa nepeutame'e, waɨkawa nemɨmetsiheuyehɨwakɨ, kwie muwaki haa kemɨreuyehɨwa hepaɨ.
PSA 143:7 Yawé, yapauka keneneuta'eiya, 'ari netukari pɨtixɨxime. Pepɨkanetsiwarixiwiyani, xɨka mɨpaɨ pe'aneni, mɨwatixawata memeukakɨka wahepaɨ nekaniyɨmɨkɨ.
PSA 143:8 Ximeri mukatataretsie 'anaki'eriyakɨ kenenaye'eritɨwani, 'ahetsie yuri nemɨti'eriekɨ. Huye keneneuxeitsitɨa ke'aneme nemuweiyani, 'ekɨ xeikɨa ne'iyari nemɨmetsiyetuiriekɨ.
PSA 143:9 Yawé, memɨnetsi'aye'unie wahepaɨtsita keneneɨxɨna, 'ahetsie xeikɨa nemikuwaunekɨ nemɨyu'awietani.
PSA 143:10 Kemɨmetinake kenetineuta'ɨkitɨa mɨpaɨ nemɨtiyurienenikɨ, 'ekɨ nekakaɨyari pemɨhɨkɨkɨ. 'A'iyari 'aixɨa mɨ'ane kenetsi'uwitɨximeni 'uwerikaku hetsiena temetiketamɨre 'umawekaku.
PSA 143:11 Yawé, 'ekɨ Kakaɨyari 'aixɨa pemɨtiuka'iyarikɨ, tukari keneneupitɨa, heitseriemekɨ pemɨti'uximaya, nemɨtsaipɨnekɨ keneneɨxɨna.
PSA 143:12 Pemɨtiyukanaki'eriekɨ memɨnetsi'aye'unie keniwarukumaweriya, yunaime memɨnetsi'aye'unie keniwarukuya, ne ti'a'uximayatsiriwame nemɨhɨkɨkɨ.
PSA 144:1 Rawiri nɨawarieya. Yawé 'aixɨa ke'itɨarieka, ne'ai mɨhɨkɨkɨ, pɨneti'ɨkitɨa kuyaxa timiemekɨ, nemamate pukuha'aritɨwa nemeuyutamiewenikɨ.
PSA 144:2 Mɨkɨ nekakaɨyari kanihɨkɨtɨni mɨtiyukanaki'erie, nehetsie nunuwame, mɨmariwe hetsiena nemɨne'awieta, netsixɨname, kɨmana nemɨyukunarɨma kanihɨkɨtɨni. Mɨkɨ mɨnetsipitɨa kanihɨkɨtɨni neteɨterima nemɨtiwa'aitɨakakɨ.
PSA 144:3 Yawé, ¿tita tihɨkɨ tewi pemi'ɨwiyanikɨ? ¿Tita teɨteri metehɨkɨ pemɨwaku'eriwanikɨ?
PSA 144:4 Teyunaitɨ teɨteri xeimieme muka'ietɨyani hepaɨ tepɨ'anene, tatukari 'etɨri hepaɨ pɨ'ane yapauka mukumamawere.
PSA 144:5 Yawé, muyuawi taheima muyema kenanutayepieka, muwa kenakayaka, hɨrite keneumayɨaxɨa, yaketineuyuri kɨtsi muwatinexɨanikɨ.
PSA 144:6 'Amimierɨkari keneukaxɨri keniwareutaxɨriexɨa, 'a'ɨrɨkɨ ketineutamɨ'i, meta keniwarutaweiya memɨtatsi'aye'unie.
PSA 144:7 Muyuawitsie paitɨ 'atɨrɨkariya kenenanakanɨ'airi hikɨ keneneutawikweitsitɨa hapa nekayunirɨmekaku, nehetsie keneutanua teɨteri nemɨkawamate memɨnetsi'uweiyakɨ.
PSA 144:8 Kepauka memutiniuka, 'itarika mepɨkuxata, yumamá yutserieta mieme mepanukuhapana, yakɨ xeikɨa metekuxatatɨ.
PSA 144:9 Kakaɨyari, xeime hekwame kwikari nepɨtakwika 'ahetsiemieme, nɨawari 'ahetsiemieme nepɨtikwika kanari tamamata mawɨtsie.
PSA 144:10 'Ekɨ te'aitamete memɨte'ayu'iwanikɨ pepɨwapitɨa, Rawiri ti'a'uximayatsiriwame pepɨ'ɨwiya 'ixipara mɨka'imienikɨ.
PSA 144:11 Kenenewikweitsitɨaka, hipatɨ teɨteri memɨnetsi'uweiyakɨ nehetsie keneutanua. Kepauka memutiniuka, 'itarikakɨ mepɨtekuxata, yumamá mepanukuhapana, yakɨ xeikɨa metekuxatatɨ.
PSA 144:12 Taniwema, kepauka temari memakɨne, meke'utiwawere kɨyexi waɨkawa mɨ'etɨriwiwawe hepaɨ, taniwema 'ukari 'ixumeri kii mutuikatɨka hepaɨ meke'aneneni witsimɨreukuwewiyatɨka paratsiyu witsimɨtiyuxexeiyanikɨ.
PSA 144:13 Yaketineuyuri ta'iku temakayayatsatsie ketineutihɨniya 'ikwai waɨkawa ketiutimɨire. Tamuxatsima miriyarite keniwarayeitɨa, 'atsita mekayu'inɨatsinɨakame keniwarayeitɨa takwieyaritsie.
PSA 144:14 Tatuurutsixi kwietsanamete raheteme memɨtekemakakɨ keniwarupitɨa, takiekaritsie 'aixɨa reukukurarutɨariekame kenayeitɨa, meta 'aiwari hiwariyari ke'umaweni takaye'utɨma.
PSA 144:15 Kemɨ'ane kiekari mɨpaɨ mɨrexeiya 'aixɨa ke'itɨarieka. 'Aixɨa mepɨ'itɨarie kemɨ'ane kiekari Yawé yukakaɨyaritɨme memayexeiya.
PSA 145:1 Rawiri nɨawarieya. Nekakaɨyari meta neti'aitɨwame, nepɨmetsinɨawani, 'aixɨa nepaineni yuheyemekɨ 'ahetsiemieme.
PSA 145:2 Tukarikɨ 'aixɨa nepaineni 'ahepaɨtsita, yuheyemekɨ nepɨmetsinɨawani.
PSA 145:3 Yawé kanimariweni, meta kaneuyeweka teminɨawani, kemɨtimariwe pɨkayumainɨa.
PSA 145:4 Yuxexuitɨ tanuiwariyari mepe'eriwani 'a'uximayatsika, mepikuxatani mariwemekɨ kepemɨtiuyuri.
PSA 145:5 Pepukuxaxatsiwani kepemɨtimariwe kepemɨti'aita, neta nepiku'eriwani mariwemekɨ kepemɨtiuyuri.
PSA 145:6 Mɨpaɨ putikuniuwani 'atɨrɨkariya kemɨtiyɨwe, ne matsi 'a'uximayatsika mɨmariwe nepukuxatani.
PSA 145:7 Pepukuxaxatsiwani waɨkawa kepemɨtiyukanaki'erie, temawierikakɨ te'utihiwatɨ tepɨmetsitakwika pemɨrayu'iwakɨ.
PSA 145:8 Yawé 'aixɨa pɨtiuka'iyari pɨtiyukanenimaya, pɨkahayu'eriya matsi waɨkawa pɨtiyukanaki'erie.
PSA 145:9 Yawé 'aixɨa pɨtiuka'iyari, mɨkɨ kaniwanenimayaka yunaime mɨtiwarutiwewi.
PSA 145:10 Yawé, yunaime pemɨtiwarutiwewi mekemetsinɨawani, 'ateɨterima yamemɨtekahu 'aixɨa mekehaitɨkani 'ahetsiemieme.
PSA 145:11 Meketekuxatani witsikepemɨti'aita, meta mariwemekɨ kepemɨtiuyuri,
PSA 145:12 yunaitɨ kwiepa memɨtama memeitimanikɨ mariweme kepemɨtiuyuri meta witsipe'anetɨ kepemɨtimariwe metatsiere 'aixɨa 'anemekɨ kepemɨti'aita.
PSA 145:13 Kepemɨti'aitani yuheyemekɨ hawaikɨ pɨkaheu'aka, 'ekɨ pepɨti'aitani naime wiyaritsie. Yawé yuniuki paye'atɨa, meta 'aixɨa pɨtiuka'iyari naime yu'uximayatsikatsie.
PSA 145:14 Yawé mematixɨrie kaniwaranuku'uitɨwani meta memu'uximatɨarie kaniwatɨrɨkariyani.
PSA 145:15 Meteyunaitɨ mepɨmetsixeiya xeikɨa, meta'ikwewatɨ pemɨtiwaminikɨ.
PSA 145:16 Peyuwaɨriyatɨ 'amamá pepanutayepiwa pepɨwahuxaitɨa, yunaime memɨte'u'uwa.
PSA 145:17 Yawé heitserie pɨti'uximaya kemɨtayɨni pɨraye'atɨwa meta naime yapɨtiyuriene yunaki'eriyakɨ.
PSA 145:18 Kemɨ'ane Yawé memahɨawe 'ahurawa wa'aurie kaniuyeikani, kemɨ'ane yurikɨ yemekɨ memehɨawe.
PSA 145:19 Pɨraye'atɨwa kememɨtehehɨawe meteheuyehɨatɨ memeyemakaxe, wahiwari 'aiwariyari 'enietɨ yapɨtikamie meta puwawikweitsitɨa.
PSA 145:20 Yawé kemɨ'ane meminaki'erie mɨkɨ yunaime pɨwa'ɨwiya, peru 'axamemɨte'u'iyari yunaime puwareuyehɨani.
PSA 145:21 Yawé yuheyemekɨ nepɨmetsinɨawani. Yunaitɨ kwiepa memɨtama mepɨmetsinɨawani, hikɨ meta yuheyemekɨ.
PSA 146:1 Yawé kenɨawarieka. Ne'iyari, Yawé kenenɨawani.
PSA 146:2 Ne Yawé nepɨnɨawani kenemɨreutere, mexixi ne'ayeniere, nɨawari Kakaɨyari hetsiemieme neputikwikani.
PSA 146:3 Teɨteri memɨtɨrɨkawi wahetsie xepɨkatewiyani, mɨkɨta mepɨkwiwawe xeikɨa, mepɨkayuwawe memɨxetawikweitsitɨanikɨ.
PSA 146:4 Kepauka mɨmɨni tumuanari kanayeimɨkɨ xeikɨa, 'ana kemɨtiku'eriwakai naitɨ katineuyewemɨkɨ.
PSA 146:5 'Aixɨa kani'itɨarieka kemɨ'ane Kakuwu kakaɨyarieya miparewie, meta kemɨ'ane Yawé mɨtakwewie yukakaɨyari,
PSA 146:6 muyuawi meta kwie mɨtiutiwewi, haramara meta yunaitɨ titamexi mana memɨteye'uwa, mɨkɨ matsi yurikɨ xeikɨa katinikuxatani.
PSA 146:7 Yawé memɨnanaimarie wahetsie 'aixɨa katiniyurieka, memɨyehakakwitɨwe katiniwamikwani meta memanutaxɨriwa kaniwaranayexɨnani.
PSA 146:8 Yawé memɨkahauneniere kaniwaranutanieritɨwani, Yawé mematixɨri kaniwaranuku'uitɨwani, Yawé kaniwanaki'erieka 'aixɨa memɨte'u'uwa.
PSA 146:9 Yawé ku'uwamete kaniwa'ɨwiyani, nutuite meta wiuraxi kaniwaparewieka, peru 'axateyuruwamete kememɨteku'eriwa kananutunani.
PSA 146:10 Kerutsareme 'aku, Yawé keti'aitani yuheyemekɨ. 'Akakaɨyari keti'aitani yuheyemekɨ. Yawé kenɨawarieka.
PSA 147:1 Yawé kenɨawarieka. Yemekɨ 'aixɨa pɨ'ane takakaɨyari hetsiemieme nɨawari temɨkwikani, 'aixɨa pɨ'ane meta mɨkɨ heitserie pexeiya teminɨawanikɨ.
PSA 147:2 Yawé Kerutsareme panukuketɨa, memehapanie 'ixaheritsixi puwakuxexeɨriwa,
PSA 147:3 memɨyuhiwerie 'aixɨa meteheu'eriekame puwarayeitɨwa memawitekietɨkatsie puwaranaku'eima.
PSA 147:4 Puwa'inɨata xurawetsixi kememɨyupaɨme mɨkɨ yunaime puwaterɨwa yuxexuime.
PSA 147:5 Tati'aitɨwame pɨmariwe, meta tɨrɨkariyaya pɨmɨire, kemɨtimaiwe hawaikɨ pɨkaheu'axe,
PSA 147:6 Yawé puwaranuku'uitɨwa tixaɨtɨ memɨkateheuxeiya, matsi pɨta 'axateyuruwamete puwaratixɨrɨwa.
PSA 147:7 Xekenenɨawani Yawé pamɨpariyutsi xe'ipitɨatɨ, xekeneukakanariwiwani kanarikɨ Kakaɨyari nɨawarieya xe'utikwitɨ.
PSA 147:8 Mɨkɨ hai kanikuyuitɨwani, kwiepa wiyeri kaneyenɨ'awani meta hɨritsie 'ɨxa pɨweriya.
PSA 147:9 Tewaxi mɨkɨ pɨtiwamikwa meta kwatsari tɨɨrixi puwawaweriya pɨtiwamikwa me'utitsuanakaku.
PSA 147:10 Yawé pɨkayutemawie kawayu tɨrɨkariyayakɨ, meta tewi kemɨranautsawekɨ,
PSA 147:11 matsi kaninaki'aka kemɨ'ane memeyemakaxe wahetsiemieme, kemɨ'ane naki'eriyayatsie memɨtewiya.
PSA 147:12 Kerutsaremetari, Yawé hepaɨtsita 'aixɨa xekeneutiyuaneni, yukakaɨyari xekenenɨawani.
PSA 147:13 Kerutsareme 'itupariyarita meukukeka kanitɨrɨkariyani mɨtse'inikɨ meta 'aixɨa kaniwayurieka mana kiekatari.
PSA 147:14 Mɨpaɨ pɨtixepitɨa 'aixɨa xemɨtexeiyariekakɨ meta 'ikwai 'aixɨa mɨ'ane kanixemikwani.
PSA 147:15 Yuniuki kwiepa peyenɨ'awa, naitsarie pɨtakɨka niukieya yumexɨitɨatɨ.
PSA 147:16 'Ɨwi pɨkawiwiwa mata mutuxa hepaɨ, haɨtsi wiyeri naxi hepaɨ pɨkawiwiwa.
PSA 147:17 Tee pɨkaxɨrɨwa tetexi 'etsimɨpepe hepaɨ, xewitɨ pɨkayɨwe minewieni haɨtɨriyaya.
PSA 147:18 Matsi yuniuki kanenɨ'awani mitiparitɨanikɨ, mɨkɨ 'eka punenetɨwa mitiparitsitɨanikɨ, meta haa muwayenexɨanikɨ.
PSA 147:19 Yuniuki 'ixaheritsixi pɨwahekɨatɨa, meta yu'aitsikate yɨ'ɨkitɨarika puwarupitɨa.
PSA 147:20 Mɨpaɨ xeime tawarita nuiwari pɨkayuriwe, 'atsimepɨkatehetimaiwawe mɨkɨ 'aitsikaya hepaɨtsita. Yawé kenɨawarieka.
PSA 148:1 Yawé kenɨawarieka. Muyuawitsie paitɨ Yawé xekenenɨawani, meutitewatsie xekenenɨawani.
PSA 148:2 Niuki tuayametemama yunaitɨ, xekenenɨawani, kuyaximama yunaitɨ, xekenenɨawani.
PSA 148:3 Tau meta metsa, meke'inɨawani, xurawetsixi xemutimerɨkare, xekenenɨawani.
PSA 148:4 Xemeta muyuawi 'amautitewa, xekenenɨawani, xemetatsiere haa muyuawitsie xemuyema.
PSA 148:5 Yawé kemɨtimariwe, 'aixɨa ketikuxaxatsiwani, mɨkɨ yatiuta'aitaku naitɨ katiniutawewiyani.
PSA 148:6 Naitɨ yapɨtiuyɨ yuheyemekɨ, 'aitsika punetɨa mɨkakuyuitɨariwanikɨ.
PSA 148:7 Yawé xekenenɨawani kwiepa, haramara 'amaukatewatsie kiekatari,
PSA 148:8 tee meta merɨkariya, 'ɨwi meta haiwitɨri, 'eka mɨtɨrɨkaɨye meye'atɨwa 'aitsikaya,
PSA 148:9 yemurite meta 'amanutitɨtɨ hɨri, kariuxa meta 'ikwaxi mɨtikayaxike naitɨ,
PSA 148:10 tewaxi meta yeutari, memɨtekɨwɨtɨwe meta kuuterixi,
PSA 148:11 yunaitɨ nuiwarite meta kwiepa te'aitamete, mexɨakate meta kwiepa kuwexinaruritsixi,
PSA 148:12 temari meta 'ɨimarixi, 'ukirawetsixi meta tɨɨri.
PSA 148:13 Yawé xekenenɨawani, mɨkɨ xeikɨa mɨmariwekɨ, kemɨtimariwe kwie pa'iwa meta muyuawi.
PSA 148:14 Mɨkɨ yuteɨterima kaniwatɨrɨkariyani. Mɨkɨ xeikɨa mekenɨawani yunaitɨ hetsiena memɨtewiya, 'ixaheritsixi, 'ahurawa teɨterimama. Yawé kenɨawarieka.
PSA 149:1 Yawé kenɨawarieka. Kwikari hekwame xekenekwikani Yawé hetsiemieme, teɨterimama hetsiena memɨtewiya wahamatɨa xekenenɨawani.
PSA 149:2 'Ixaheritsixi mekeyutemamawieka mɨwarutawewi hetsiemieme, Kerutsaremetari xekeneyutemamawieka xeti'aitɨwame hetsiemieme.
PSA 149:3 Meke'inɨawani mete'ukaketsinatɨ, kwikari meke'utikwikani xawerimakame meta tepu 'etsimupekɨ.
PSA 149:4 Yawé muyutemawiekɨ yuteɨterima wahetsiemieme, tixaɨtɨ memɨkatehayuyeitɨa memɨtehayu'iwanikɨ puwapitɨa.
PSA 149:5 Hetsiena xemɨtewiya xekeneyutemamawieka mɨkɨ xepitɨakaku xemɨtehayu'iwaxɨkɨ, tsepa yu'utatsie xemuhe xekeneutihiwani xeyutemamawietɨ.
PSA 149:6 Kakaɨyari nɨawarieya 'ateta kehayeneikani, 'ixipara pekehakweka naitsata hautixikakaunime,
PSA 149:7 para yunaitɨ nuiwarite memɨtehakapitɨarienikɨ ke'axamemɨteyuriekɨ meta kiekarite mɨtiwaka'enitsitɨanikɨ,
PSA 149:8 para te'aitamete memɨtihɨiyanikɨ, tepɨa kaunariyari mɨtse'ikɨ hayehutamekɨ,
PSA 149:9 para maye'atɨarienikɨ wahetsie kemɨraka'utsie kememɨte'anuyekɨnekɨ. 'Ikɨkɨ mɨpaɨ mepɨteyutemamawieka teɨterimama. Yawé kenɨawarieka.
PSA 150:1 Yawé kenɨawarieka. Kakaɨyari xekenenɨawani tukitana, xekenenɨawani muyuawitsie mɨtɨrɨkaɨyekɨ.
PSA 150:2 Xekenenɨawani mariweme mɨtiyurienekɨ, xekenenɨawani mɨmariwekɨ.
PSA 150:3 Xekenenɨawani kuxineta yuarikayayakɨ, xekenenɨawani kanaritsie meta xaweritekɨ.
PSA 150:4 Xekenenɨawani xete'ukaketsinatɨ meta tepu 'etsimupepekɨ, xekenenɨawani pirikɨxakɨ meta kanaritsie mawɨkɨ.
PSA 150:5 Xekenenɨawani tepɨa mutatiraurukakɨ, xekenenɨawani 'amɨtiuyuatɨkakɨ.
PSA 150:6 Yawé xekenenɨawani yunaitɨ xemɨtehayeneniere. Yawé kenɨawarieka.
PRO 1:1 Tsarumuni 'ɨxatsiteya Rawiri nu'aya, 'Ixaheri kwieyaritsie ti'aitame:
PRO 1:2 petimaiwetɨ pemayanikɨ meta 'aixɨa 'anemekɨ pemuyeikanikɨ, meta mɨtiuyemate niukieya pemetimaitɨyeikanikɨ,
PRO 1:3 mɨtaheitseritɨarienikɨ yamɨtimaikakɨ tita 'aixɨa mɨti'ane tita 'axamɨti'ane, heitseriemekɨ yamɨtikamienikɨ hepaɨtsita, heitseriemekɨ 'aixɨa mɨtiyurienenikɨ meta yunaime 'aixɨa mɨtiwaxeiyanikɨ,
PRO 1:4 'aixɨa 'anemekɨ pɨtiwapitɨa kemɨ'ane 'atsimemɨkatemate, meta temari mete'uyemaitɨ memakɨnekɨ, kemɨtiuyurieni hepaɨtsita.
PRO 1:5 Mɨtimaiwe 'ikɨ ke'u'enieni, matsi waɨkawa mɨretimanikɨ, matsi heitserie kaneti'enatɨyeimɨkɨ,
PRO 1:6 meitimanikɨ tita 'ɨxatsi 'inɨariyari mɨtixata mɨkɨ pɨtimaika, temaiwawemete waxatsika mɨkayumainɨa.
PRO 1:7 Yawé 'ayemakatɨ mɨtiuyemaikakɨ kanitsutɨni, 'atsimemɨkatemate mɨtimaiwenikɨ mɨ'ayumieme mepɨxani'erie meta memɨtaheitseritɨarienikɨ.
PRO 1:8 Temaikɨ, keneu'eni 'apaapa kemɨmatiku'ɨxatsitɨwa, meta 'amaama kemɨmati'ɨkitɨa pepɨkahetɨtɨmaiyani.
PRO 1:9 Mɨpaɨ xɨka yapetikamieni 'amu'utsie witsimɨ'ane pemanakeka hepaɨ pepɨ'aneni, meta kuka pematitɨkɨni hepaɨ pepɨ'aneni.
PRO 1:10 Temaikɨ, xɨka 'axateyuruwamete memateku'itaiyani, wahamatɨa pepɨkaheyeikani.
PRO 1:11 Xɨka mɨpaɨ memetehahɨaweni: «Kɨmɨ tahamatɨa kenemie. Xeime tepuhupieni tsepa 'atsimɨkatiuyuri tepeimieni yakɨxeikɨa.
PRO 1:12 Tepeitakwani naime 'ayeniereme mɨki teukiyata teɨteri kemɨtiwakwa'a hepaɨ, yaxeikɨa meukatewatsie meukahɨiya naimitɨ hepaɨ.
PRO 1:13 Tetetinawame naime piinitɨarika tetehexeiyatɨ tepakɨne, 'Ana 'inawari tinaime takiita tekatenitihɨniyakuni.
PRO 1:14 Teyunaitɨ teyutinɨme tepɨtekunawatɨweni, tita temɨtenawani teyunaitɨ tahetsiemieme pɨrayeikani».
PRO 1:15 Peru neuxei temaikɨ, pepɨkawareu'enieka mɨkɨ. 'Axamemɨteyurie wahuye keneuku'eiri.
PRO 1:16 Mɨkɨ mepuyuwaɨriya 'axamemɨteyuriekakɨ, mekaniyumexɨitɨaka xuriya memɨtayeurienikɨ xeikɨa.
PRO 1:17 Xɨka winiyari 'anutawieni yakɨ xeikɨa pɨrayeika, wikixi yunaitɨ me'ixeiyakaku.
PRO 1:18 Peru mɨkɨ 'axamemɨte'u'iyari yɨkɨmana yutukari mepɨwiniyatɨwe, mɨpaɨ mekateniyuka'unakuni.
PRO 1:19 Mɨpaɨ mepɨtetakukuwe kemɨ'ane yuhetsiemieme xeikɨa memutekuwautɨwe, mɨpaɨ yutukari mepɨtetatɨmaiya.
PRO 1:20 Mɨtimaiwenikɨ mɨ'ayumieme 'uka hepaɨ kaye 'utɨa kanahiwani, yuwaɨkawatɨ teɨteri memaxuawetsie waɨkawa kanahiwani.
PRO 1:21 Kaye 'itsikinayaritsie waɨkawa mɨranuyekɨkatɨretsie kanahiwani, kiekari mɨranutahakitɨretsie yurikɨ katinikuxatani:
PRO 1:22 «Xeme temari 'atsixemɨkatehetimaiwawe 'akuxi, ¿kepaukake xepɨtehayewa mɨyaxeteyurietɨ? Xemeta xeteyukatawe'erietɨ xemutiwaweriyarie, ¿kepaukake xepɨtehayewa xeyutemawietɨ kexemɨte'u'iyarikɨ? Xemeta 'atsixemɨkatemate, ¿kepaukake xepɨtehayewa 'aixɨa mɨti'ane xete'uxiwe'erietɨ?
PRO 1:23 Xekeneneu'eni kenemɨxerahɨawe, ne nepɨnewaɨriya nemɨtixetaxatɨanikɨ 'iyaritsie miemekɨ kenemɨtiyumate netaɨta, yanekatinixepitɨamɨkɨ kenemɨtiku'eriwa yaxemɨtehetimanikɨ.
PRO 1:24 Kepauka nemɨxekɨhɨawekaitsie xeme xepɨkanetsi'u'eni, kepauka nemɨxe'u'iniwakaitsie nehetsɨa xepɨkahakɨ,
PRO 1:25 Matsi pɨta naime ne'ɨxatsitɨarika xeputixani'eri, meta kenemɨtixeha'imaiyakai xemɨkanetsi'anu'enikɨ,
PRO 1:26 'Ayumieme neta 'ana neputanaweni xehetsiemieme, kepauka xemɨ'uximatɨariekatsie. Ne nepɨhɨkɨtɨni nemutanaweni xehepaɨtsita, kepauka marika mɨxe'axenitsie,
PRO 1:27 kepauka marika xehetsie munuani 'eka mɨtɨrɨkaɨye hepaɨ meta kepauka 'uximatɨarika mɨxe'anuhapani haikɨri kwinimieme mɨtitɨrɨkaɨye hepaɨ.
PRO 1:28 »Hikɨ 'ana xekanenitahɨawikuni, peru ne nepɨkaxeta'eiya, 'ana xepɨnetsitiwauni, peru xepɨkanetsitaxeiya.
PRO 1:29 Xemɨtemaiwawenikɨ xeputixani'eri meta Yawé xe'ayemakatɨ xemɨkahakɨkɨ,
PRO 1:30 Neniuki ne'ɨxatsi xemɨkahanu'enikɨ, kenemɨtixeku'imaiyakai xemɨka'anu'enikɨ,
PRO 1:31 Tita tewi mɨtiuka'e mɨkɨ katinika'itsanamɨkɨ, pɨtitimɨiriya tita yuhetsie mɨtiupitɨa pɨka'ikemakaxɨani,
PRO 1:32 Kememɨteheuyexɨri meta tita 'atsimemɨkatematekɨ mɨkɨ puwakwini, watemawierika tixaɨtɨ mɨkatiyunaki'erie puwareuyehɨani.
PRO 1:33 Matsi kemɨ'ane mɨnetsi'anu'enieni 'aixɨa 'iyari 'apuyeikani, meta tixaɨtɨ pɨkareumakaxeni».
PRO 2:1 Temaikɨ, xɨka neniuki pe'anu'enieni, meta ne'aitsika pe'uti'uta 'ahetsie.
PRO 2:2 Xɨka 'anaka mɨtimaiwenikɨ mɨ'ayumieme 'u'enieni. Meta 'a'iyarikɨ pe'ayetuani pemɨrakumaikakɨ.
PRO 2:3 Xɨka mɨrakumaikakɨ pe'utahɨawe, meta pemeitimaitɨyeikanikɨ pe'uta'iwauni.
PRO 2:4 Xɨka pɨrata hepaɨ petikuwauneni, tumini mɨ'awietɨ hepaɨ,
PRO 2:5 hikɨ yapepɨretimani Yawé kemɨrayemakaxenikɨ meta pepikaxeiya Kakaɨyari kemɨtiuyemate.
PRO 2:6 Yawé xeikɨa katiniyupitɨwani mɨtimaiwenikɨ mɨ'ayumieme, mɨrakumaikakɨ tatsiere pɨtiyupitɨwa tetana kanayeneikani.
PRO 2:7 Mɨkɨ kaniwaparewieka 'aixɨa memɨte'u'iyari. Meta kaniwa'ɨwiyani kemɨ'ane heitserie memu'uwa.
PRO 2:8 Mɨkɨ heitserie yamemɨtekahu wahuye kani'ɨwiyani meta 'aixɨa memɨteyurie wahuye.
PRO 2:9 Hikɨ 'ana pekaneitimaimɨkɨ heitseriemekɨ 'apemuyeikanikɨ, meta hipame 'aixɨa pemɨtiwaxeiyanikɨ yunaime.
PRO 2:10 Mɨtimaiwenikɨ mɨ'ayumieme 'a'iyaritsie kaninuamɨkɨ, meta pemɨtimaikakɨ 'ana 'aixɨa 'iyari 'apepuyeikani pe'atemawietɨ.
PRO 2:11 'Aixɨa pemɨreitimamatekɨ pɨmatsi'ɨwiyani, 'ahetsie kepemɨtiuyemate pumatsi'awietani.
PRO 2:12 Mɨtimaiwenikɨ mɨ'ayumiememe 'axamɨti'anetsie pɨmatsixɨna, meta teɨteri 'axamemutiyuane wahetsɨa,
PRO 2:13 huye mɨheitserie me'uku'eirieka, huye mumariwetsie pɨta memuhunikɨ.
PRO 2:14 Mepuyutemawie 'axameteyurietɨ, pɨwanake kepauka teɨteri 'axamemɨteyurietsie.
PRO 2:15 Huye mututuni memuweiya meta huye xaɨtsie meukuyuyune.
PRO 2:16 Xɨka petimaiweni 'uka mɨwikie hepaɨtsita pepɨ'a'ɨwiyani, meta 'uka pemɨka'imate niukieya witsimutaine hepaɨtsita.
PRO 2:17 Mɨkɨ 'uka Kakaɨyari hamatɨa tɨratu kemɨtiuwewi hatɨmaiyaka, yɨkɨna kemɨtiuku'eiri 'ɨimariyari mitiwitɨ,
PRO 2:18 kemɨ'ane menuweiya mɨkɨ mɨkitewatsata kaniyɨaneni, huyeteya yɨwipa xeikɨa kanimiemetetɨni.
PRO 2:19 Kemɨ'ane mɨkɨ 'uka winiyarieyatsie mɨyɨhɨani hatsuakuri pɨkahakunuani, tukari huyeyari pɨkakaxeiya.
PRO 2:20 'Ayumieme mɨpaɨ pepɨtiuyeikani huye 'aixɨa mɨ'ane 'utuma, meta huye heitserie memu'uwa memiweiya pepuweiyani.
PRO 2:21 Heitseriemekɨ yamemɨtekahu wahetsie mɨkarahɨiwa, kwie wahetsiemieme kanayeimɨkɨ meta yuheyemekɨ mana mekaniu'uwakuni.
PRO 2:22 Kemɨ'ane 'axamemɨteyurie mepakumaweriyarieni, yukwie memɨtsewiximakɨ yuheyemekɨ mekanikwi'iwakuni.
PRO 3:1 Temaikɨ, pepɨkaratɨtɨmaiyani kenemɨmati'ɨxatsitɨa, matsi pɨta, yuheyemekɨ kena'eriwani ne'aitsika.
PRO 3:2 Karikɨ xɨka mɨpaɨ pe'aneni mɨixa wiyari pekanitihuimɨkɨ meta 'aixɨa 'iyari pepuyeikani.
PRO 3:3 Hatsuaku pepɨkaratɨtɨmaiyani peti'akanaki'erietɨ meta yuri petikuxatatɨ: 'Aheyemekɨ mɨpaɨ ketinekamieni meta 'a'iyaritsie paitɨ kena'utɨaka.
PRO 3:4 Mɨpaɨ xɨka petikamieni Kakaɨyari 'aixɨa pɨmatixeiyani, meta teɨteri 'aixɨa meputiyuaneni 'ahepaɨtsita.
PRO 3:5 Yawé hetsie ketinewiyani naime 'a'iyarikɨ, hawaikɨ kepemɨtimaiwe 'ahetsie pepɨkatiwiyani.
PRO 3:6 Kakaɨyari kena'eriwani naimekɨ kepemɨtiyurienekɨ, 'ana mɨkɨ 'ahuye pɨheitseritɨaka.
PRO 3:7 Kwinimieme perakumaikame pepɨkayuxatani: matsi pɨta Yawé kenayemakaxeni meta 'axamɨti'ane hepaɨtsita kene'apatani.
PRO 3:8 Mɨpaɨ xɨka petikamieni 'aixɨa pepɨreu'erieka 'awaiyaritsie, meta pepɨtɨrɨkaɨyeni.
PRO 3:9 Yawé kenayexeiyani tita pemɨrexeiyakɨ, meta matɨarimieme 'ikwaxi keneyetuirieka tita pemɨtiukaxexeiya.
PRO 3:10 Mɨpaɨ xɨka petiyurieneni 'akaretatsie tɨriku takariyari panakaxɨrɨweni, meta 'akiita kaxie winuyari mɨhekwa pɨxuaweni.
PRO 3:11 Temaikɨ, xɨka Yawé matsi'anayewayani meti'ɨkitɨatɨ pepɨka'i'uxiwe'erieka, meta kepauka mɨmatsi'utate'ani pepɨka'uyeha'arɨweni.
PRO 3:12 Yawé matsi pɨwaranayewaya tiwa'ɨkitɨatɨ kemɨ'ane mɨwanaki'erie, tewi yuniwe 'inaki'erietɨ kemɨti'ɨxatsitɨa hepaɨ.
PRO 3:13 'Aixɨa kani'itɨarieka kemɨ'ane mɨtimaiwenikɨ mɨ'ayumieme mukaxei, meta kemɨ'ane waɨka mɨtiuyemaikakɨ mutaxei.
PRO 3:14 Kepauka pemɨtimaiwe, matsi waɨkawa pekanipitɨarieka keyuri pɨrata meta huru.
PRO 3:15 Kepauka pemɨtimaiwe, matsi waɨkawa pekanipitɨarieka keyuri tetexi witsimɨ'anene, pɨtiumawe hepaɨna witsiti'anetɨ.
PRO 3:16 Kepauka pemɨtimaiwe, pepɨxatɨarieni mɨixa wiyari pemexeiyanikɨ, meta 'aixɨa pepɨtixeiyarieka meta waɨkawa pepɨrexeiyani.
PRO 3:17 Kepauka pemɨtimaiwe witsi'anemetsie pepumieni, naitɨ 'aixɨa katini'anemɨkɨ 'ahetsiemieme.
PRO 3:18 Mɨkɨ kɨye tukari tiyupitɨwame kanihɨkɨtɨni kemɨ'ane memitapa wahetsie, 'Aixɨa mekani'itɨarieka kemɨ'ane memeixeiya.
PRO 3:19 Yawé kwie kaniutawewieni kemɨtiuyematekɨ, muyuawi tatsiere 'akaniuyemani taheima kemɨrakumatekɨ.
PRO 3:20 Mɨkɨ yareitimaixɨaku haramara kaniupatsirixɨani meta haa kanetinetɨaxɨani, meta haiwitɨritsie wiyeri 'akaneikatɨ kanayani.
PRO 3:21 Temaikɨ, kene'a'ɨwiyani 'aixɨa ti'aneme pemɨranayexeikɨ, pepɨkahetɨtɨmaiyani 'ɨxatsi 'aixɨa pemɨtiu'eni.
PRO 3:22 Xɨka mɨpaɨ petikamieni mɨixa wiyari 'apepuyeikani, meta kuka pematitɨkɨni hepaɨ pepɨ'aneni.
PRO 3:23 Hikɨ 'aixɨa 'iyari pepumieni, meta hatsuaku pepɨkahekaweni.
PRO 3:24 Kepauka pemɨkahunitsie, tixaɨtɨkɨ pepɨkareumaka, hikɨ pekahume 'aixɨa 'iyari pekaneukumɨkɨ.
PRO 3:25 Pepɨkaheumaka xɨka yapauka 'axamɨti'ane tiukuyani, meta kepauka 'uximatɨarika 'axateyuruwamete wahetsiemieme munuani pepɨkaheumaka.
PRO 3:26 Yawé yuheyemekɨ 'ahamatɨa kaniuyeikamɨkɨ, meta kameni'ɨwiyakamɨkɨ winiyaritsie kapa pe'uwierekɨ.
PRO 3:27 Pepɨkahe'imaiyani kemɨ'ane parewiya mɨmatsitawawirieni, xɨka perexeiyani tita mɨreuyehɨwa.
PRO 3:28 'Ahepaɨ tewi hatsuaku 'ipaɨ pepɨkarahɨaweni: «Nepɨkayɨwe 'arike pepayeneni, 'uxa'ake nepɨmatsiparewieni», xɨka perexeiyanitɨtɨ hikɨ titakɨ pemɨtiparewieni.
PRO 3:29 Tita 'axamɨti'ane 'ahepaɨ tewi pepɨkawiwirieka, 'iya 'aixɨa mɨmatiku'eriya.
PRO 3:30 'Imieri pepɨkakuwauneni xeime hetsie, xɨka mɨkɨ 'atsikametsi'uyurieni.
PRO 3:31 Memayu'eririya ketita memɨtehexeiya pepɨkatihiwe'erieka, 'ekɨ meta memayu'eririya pepɨkawa'ɨkeni.
PRO 3:32 Yawé kaniwaxani'erieka 'axamemɨte'u'iyari, peru kemɨ'ane 'aixɨa memɨte'u'iyari kaniwanaki'erieka.
PRO 3:33 Yawé 'uximatɨarika kanipitɨaka, kemɨ'ane 'axamɨtiyuriene kie, matsi 'aixɨa katiniyurieka kemɨ'ane yamemɨtekahu wakie.
PRO 3:34 Yawé kaniwananaimaka kemɨ'ane memɨte'uyukatawe'erie, peru kemɨ'ane tixaɨtɨ memɨkate'ayuyeitɨa mɨkɨ puwaparewie.
PRO 3:35 Kemɨ'ane memɨtemaiwawe 'aixɨa mepɨtehamamatiwani, matsi kemɨ'ane memɨkayuwaɨriya memɨwaparewienikɨ teɨteri hipame 'aixɨa pɨ'ane 'axamemɨtehamamatiwanikɨ.
PRO 4:1 Temari nemɨxenaki'erie, xekeneneu'eni rapaapa kemɨtiyu'ɨxatsitɨwa hepaɨ, xekeneyuwaɨriyani waɨkawa xemɨtemaikakɨ.
PRO 4:2 Ne nepɨxeyetuirieni 'ɨxatsi 'aixɨa manɨyɨtɨka, 'ayumieme ne'ɨkitɨarika xepɨkahatɨtɨmaiyani.
PRO 4:3 Kepauka ne nemununutsitɨkaitsie nepaapa hetsɨa nepukatei, meta nemaama nemuyuxewini hepaɨ pɨnetinaki'eriekai,
PRO 4:4 nepaapa 'ipaɨ pɨnetiu'ɨxatsitɨa: «'A'iyarikɨ keneu'eni 'ikɨ 'ɨxatsitɨarika, yaketinekamieni ne'aitsikatsie, 'ana mɨixa wiyari pepuyeikani.
PRO 4:5 Mɨtimaiwenikɨ mɨ'ayumieme kenekuwawa meta waɨkawa perakumaitɨ pemayanikɨ, neniuki pepɨkahatɨtɨmaiyani, meta 'aheyemekɨ kena'eriwani.
PRO 4:6 Mɨtimaiwenikɨ mɨ'ayumieme hatsuaku pepɨka'uku'e'eiriwani. Mɨkɨ pɨmatsi 'awietani, kenenaki'erieka mɨkɨta pɨmatsi'ɨwiyani.
PRO 4:7 Mɨtimaiwenikɨ mɨ'ayumieme yemekɨ peuyewetse pemɨtimaiwenikɨ 'ahetsie kenexeiyani. 'Ekɨ pemeitimaitɨyeikanikɨ kenekuwaɨneni keyuri piinitɨarika.
PRO 4:8 Mɨtimaiwenikɨ mɨ'ayumieme waɨkawa keneku'eriwani, mɨkɨ matsi 'aixɨa perahɨawarɨwame kamenayeitɨamɨkɨ, kene'awaɨriyani pemɨtimaiwenikɨ 'aixɨa pekatinitamatiwamɨkɨ,
PRO 4:9 'amu'utsie witsimɨ'ane pehanakekame pumatsi'ayeitɨani, kuruna witsi'aneme kameniyetuiriemɨkɨ».
PRO 4:10 Temaikɨ 'aku, keneu'eni neniuki, hikɨ 'ana mɨixa wiyari 'apepuyeikani.
PRO 4:11 Ne nepɨmati'ɨkitɨa petimaiwetɨ 'apemuyeikanikɨ, nepɨmetsi'uwitɨxime huye mɨheitserie pemuweiyanikɨ.
PRO 4:12 Kepauka mɨkɨ 'utɨa pemumienitsie, hawaikɨ pepɨkahekaweni, tsepa pemunautsarɨme, pepɨkahetiketamɨre.
PRO 4:13 Kenemɨmati'ɨkitɨa yuheyemekɨ kena'eriwani, 'aixɨa ketine'ɨwiyani ne'ɨkitsika mɨkɨ pɨ'atukari.
PRO 4:14 'Axamemɨteyurie wahuye pepɨka'anukuweweiyani, 'axamemɨteyurie wahuyeta pepɨka'umieni.
PRO 4:15 Mɨkɨ wahuye hepaɨtsita kene'a'ɨwiyani. Mɨkɨ 'utɨa pepɨka'umieni. Mana pepɨka'uyeikani, keneuku'eiri.
PRO 4:16 'Axateyuruwamete mepɨka'ukakukutsu xɨka 'akuxi 'axakatiyuriweni, mepukakukutsu kepaukake xeime memɨka'una.
PRO 4:17 'Axamɨti'ane kaniwa'ikwaitɨni, meta nanaimarika kaniwawinutɨni.
PRO 4:18 Heitseriemekɨ yamemɨtekahu wahuye witsipɨ'ane, kepauka tau 'ɨrɨya ximeri manatinexɨaxime hepaɨ: hekɨariya waɨkawa mɨhekɨariwiexime hepaɨ kepaukake hekɨariya 'aixɨa tixawatɨtɨ mayani.
PRO 4:19 Peru 'axateyuruwamete wahuye mɨpaɨ pɨka'ane, yɨriya kwinimieme mɨtiyɨwi hepaɨ pɨ'ane, 'atsimepɨkatemate ketitatsie memɨtehekaxɨrɨwe.
PRO 4:20 Temaikɨ 'aku, neniuki keneu'eni, 'a'iyarikɨ keneu'ena.
PRO 4:21 Hawaikɨ neniuki pepɨkaheuyehɨpani, 'a'iyaritsie yemekɨ keneye'ɨnani.
PRO 4:22 Mɨkɨ kemɨ'ane memikaxexeiya tukari kaniwapitɨaka, 'Aixɨa pemɨreu'eriekakɨ 'awaiyaritsie meta 'a'iyaritsie kani'ayumiemetɨni.
PRO 4:23 Matsi 'a'iyari kene'ɨwiyani tinaime piinitɨarika hepaɨtsita, mɨkɨ hetsie tukari mayeneikakɨ.
PRO 4:24 'Atetakɨ keneyu'ɨwiyani 'axapemɨkatikuxatanikɨ, kemɨkatiheitserie petikuxatatɨ ketineuhayewa.
PRO 4:25 Heitseriemekɨ pɨta keneutaniereni, tita pemɨtixeiya mɨkɨkɨ kene'a'ɨwiyani.
PRO 4:26 'Ahuye kene'ɨwiyani kepemɨtimie, keneheitseritɨaka naime 'ahuye.
PRO 4:27 Heitserie keneumieni 'a'utata pepɨkaheukuyuyuipikeni meta 'atserieta. 'Axamɨti'ane ketineuku'eiri.
PRO 5:1 Temaikɨ, keneneu'eni kenemɨtimaiwe, Yemekɨ keneu'ena heitserie kemɨtikamieni,
PRO 5:2 merikɨte kepauka pemɨtikuxatanitsie petimaiwetɨ ketinekuxatani.
PRO 5:3 'Uka mɨka'a'ɨya tenieyatsie xiete kaniuhaneni, nenieya matsi witsiputaine, keyuri huriwa hatseitiyari.
PRO 5:4 Peru 'imatɨriekake matsi waɨkawa hatsiwitɨ payeika keyuri tsiɨrika, meta kwinimieme pɨrataxikaunare keyuri 'ixipara naitsata meutixikakauni.
PRO 5:5 Mɨkɨ mɨkite watsata kaniumieni, mɨkɨ mɨki teukiyapa kaneyani.
PRO 5:6 'Etsiwa tɨma tukari huyeyari pɨkamate, yakɨxeikɨa puyeika 'atsikatimaitɨ.
PRO 5:7 Neuxei, temaikɨ 'aku, keneneu'eni, neniuki pepɨkahatɨtɨmaiyani.
PRO 5:8 Mɨkɨ 'uka mɨka'a'ɨya pepɨka'enieka, 'ahurawa kiteniena tɨma pepɨkaye'axeni,
PRO 5:9 'Atɨrɨkariya peyetuayu kapa petiutakwine, kapa 'atukari memayu'eririya wahetsɨa peyetuani,
PRO 5:10 'atumini waɨriyarika peme'iwaxɨ kapa hipame wahetsiemieme rayanikɨ, kapa hipame wakiita tiyuhayewanikɨ titapemɨra'iwaxɨ.
PRO 5:11 'Imatɨarieka tixaɨtɨ pekarexeiyatɨ pepɨtatsuani, kepauka haweri pe'anetɨ pemayani tixaɨtɨ pekarexeiyatɨ.
PRO 5:12 'Anake mɨpaɨ pekanitayɨmɨkɨ: «Titayari 'ɨxatsi nekatiu'eni kemɨtikuxaxatsiwakai. Titayari ne'iyaritsie netitatawe'eri mɨkɨ 'ɨkitɨarika.
PRO 5:13 Nepɨka'i'eni nete'ɨkitɨwamete waniuki, hatsuaku nepɨkawaru'eni nete'ɨkitɨwamete.
PRO 5:14 Hikɨri yemekɨ kwinimieme haweri 'anekɨa nekaniyuhayewa, yunaime teɨteri wahɨxie».
PRO 5:15 Haa 'ahaputsuta mieme xeikɨa kenehareka, haa 'ahaixata maneika xeikɨa.
PRO 5:16 ¿'Ahaa kaye'utɨma mɨtayeuriweni metinake metatsiere 'ahaa 'ahaixata mieme teɨteri memayukuxexeɨriwatsie mɨtayeuriweni metinake?
PRO 5:17 Mɨkɨ haixa katini'apiinitɨni, 'ekɨ xeikɨa, hawaikɨ pɨkayɨwe hipame pemɨwaharitɨaka.
PRO 5:18 'Aixɨa ke'itɨarieka 'a'ɨya. Kene'atemawieka temaikɨyari pemitiwitɨ hamatɨa.
PRO 5:19 Maxa witsimɨti'ɨimari hepaɨ kani'aneni, kapura yeutanaka 'ɨimari hepaɨ kani'aneni mɨtiyukanaki'erie. Naki'eriyaya kematsitemawieritɨaka. Naki'eriyaya yuheyemekɨ 'ahetsie ketiwiyani.
PRO 5:20 ¿Temaikɨ 'aku, titayari peti'awaɨriyani 'uka mɨka'a'ɨya hamatɨa? ¿Titayari xeime 'ɨyaya naki'eriyaya petikuwauneni?
PRO 5:21 Tahuyeta ketemɨteyurie Yawé naime kanixeiyani, tahuye naime kanimaika.
PRO 5:22 'Axatiyuruwame yɨkɨmana puyuwiniya 'axatiyurienetɨ, 'axamɨti'ane mɨrexeiya kaunariyari mɨkɨ kanenutahɨaximeni.
PRO 5:23 Mɨpaɨ mekatenitakukuweni memɨkayɨ'ɨxatsitɨarinɨa, kanimɨmɨkɨ mɨkaheu'enakɨ.
PRO 6:1 Temaikɨ 'aku, xɨka xewitɨ pemimate matsi'inieka hetsiena mieme pemɨrayukatuanikɨ, xɨka pemɨka'imate kename pera'akatuani petitahɨawe,
PRO 6:2 xɨka 'aniuki 'anatiyani kename yapetikayani, pekaniyutahɨamɨkɨ 'aniukikɨ,
PRO 6:3 merikɨte 'ahepaɨ tewi kameniuwiniya. Temaikɨ 'aku, xɨka peyuxɨnamɨkɨni, 'ikɨ huye kanihɨkɨtɨni: Xeiya kenemie hetsɨana tixaɨtɨ pekarayuyeitɨatɨ, tɨratu kepemɨtiuwewi keneutawawiri pemɨtihayewanikɨ.
PRO 6:4 Pepɨkakutsuni, kenayeniereni.
PRO 6:5 Keneu'ata'una maxa mɨtiutananautsa hepaɨ hupierienetɨ, meta wiki winiyari mɨtiutawikweiya hepaɨ.
PRO 6:6 'Ekɨ pemɨ'a'ɨraxie, paratsɨ tsarɨ keneuxeiya. Mana keneye'ɨki kemɨtiyuriene petimaiwetɨ pekanayeimɨkɨ.
PRO 6:7 Mɨkɨ mepɨkaheixeiya kemɨ'ane mɨwanɨ'a, meta kemɨ'ane mɨtiwa'aitɨa.
PRO 6:8 Mɨkɨ yunaitɨ, witarita mekateniuka'utani, 'itsanaxa yu'ikwaite mekateniuka'utani.
PRO 6:9 'Ekɨ pemɨ'a'ɨraxie, ¿kepaɨmexɨa 'akuxi mɨpaɨ pepɨtiuhupuni? ¿Kepaukake tamɨ pepanutaniere?
PRO 6:10 'Etsiwa peheukukutsutɨ, 'etsiwa pe'uka'uxipiwetɨ, meta 'atapa pe'awietɨ,
PRO 6:11 tinawayame hepaɨ katininuamɨkɨ tixaɨtɨ pekarexeiyatɨ pemayani, tewi titakɨ mɨramieni 'akwetɨ 'ahetsɨa munuani hepaɨ katininuamɨkɨ haakaxa.
PRO 6:12 'Axamɨtiuka'iyari tewi mɨka'uyukatewiya, ti'itawatɨ xeikɨa kanikuyeikani tsepa hakewa,
PRO 6:13 mɨpaɨ mepɨtekuxata yu'iwama wahamatɨa 'iyari mewewietɨ, yu'ɨkatekɨ meta yu'itɨwamekɨ mekaniku'inɨaritani xeikɨa.
PRO 6:14 'Axamɨtiyuriene kaniyu'iyaritɨaka 'axamɨti'anekɨ xeikɨa, meta kanikuwauneni mɨpaɨ tiyuhaxɨatɨamɨtɨ.
PRO 6:15 'Ayumieme yapauka haweri katiniwakuyuruwani, yapauka 'ana kanika'unariemɨkɨ pɨkayɨwekaxɨani yuheima mɨtanuanikɨ.
PRO 6:16 'Ataxewitɨ kanixuaweni teɨteri kememɨteyurie Yawé mi'uxiwe'erie, meta xeime matsi mixani'erie:
PRO 6:17 yuhɨxitekɨ kwinie memɨte'uneniere, yunenikɨ memɨte'itawa, yumamatekɨ 'axamɨkatiuka'iyari xuriyaya mɨtayeuriwa,
PRO 6:18 yu'iyaritsie mɨtiha'aritɨa 'axatiyurimɨtɨ, yu'ɨkatekɨ xeikɨa mɨyumexɨitɨa 'axamɨtiyurienenikɨ,
PRO 6:19 kemɨtiunierixɨ ti'itawatɨ mɨtikuxata, meta kemɨ'ane yu'iwama mɨwakwamana memuyukwitɨwenikɨ.
PRO 6:20 Neuxei temaikɨ, 'apaapa 'aitsikaya naime kenaye'atɨwani meta 'amaama 'ɨkɨtɨarikaya pepɨkahehɨpani.
PRO 6:21 'A'iyaritsie kenaka'utɨa, kenakatɨkɨni kuka hepaɨ.
PRO 6:22 Kepauka pemukuyeika 'apaapa meta 'amaama wa'aitsika pɨmatsi'uwitɨximeni, kepauka pemukutsu wahɨritɨarika pɨmatsi'ɨwiyani, meta kepauka pemanutanieretsie, 'ahamatɨa memɨtekuxatani hepaɨ kani'aneni yu'aitsikakɨ.
PRO 6:23 Kɨxeme kanihɨkɨtɨni 'aitsika, meta 'ɨkitɨarika hekɨariwiwame kanihɨkɨtɨni, 'ɨxatsitɨarika tukari huyeyari kanihɨkɨtɨni pemɨkaheuyewenikɨ.
PRO 6:24 Mɨkɨ 'ɨxatsi pɨmatsi'ɨwiyani 'iya 'uka hepaɨtsita 'axamɨtiuka'iyari, xewitɨ mɨka'a'ɨya, yuniukikɨ mɨtiyuwiniya hepaɨtsita.
PRO 6:25 'A'iyaritsie pepɨka'ihiwe'erieka witsimɨti'ɨimarikɨ, kene'akweriwayurieka yuhɨxitekɨ metsi'uwiniyakɨ,
PRO 6:26 karikɨ 'uka tuminikɨ muyuwitɨnɨa 'atumini xeikɨa kanitixɨtɨamɨkɨ, meta xɨka xeime 'ɨyaya peyurieneni kɨnaya 'atukari pumatsinawairieni.
PRO 6:27 ¿Kepaikɨ pɨyɨwe tɨɨ yutawitsie mayatsa, kamixaya kahataiyatɨ?
PRO 6:28 ¿Kepaikɨ pɨyɨwe matitɨɨyatsie muyeyani, kakukwaxiketɨ?
PRO 6:29 Kamɨtsɨta kemɨ'ane xeime 'ɨyaya mukumayɨani, hamatɨana mɨkahuni hetsienatsɨ pɨrahɨiyani.
PRO 6:30 'Axapɨkatiyuxexeiya xewitɨ tinawanetɨ, mɨyehaakamɨnekɨ xeikɨa,
PRO 6:31 xɨka 'uwiyarieni, matsi katiniyetuamɨkɨ, 'atahutamexɨatsie timieme mɨtiunawakɨ, matsi yupiinite naime katininawaiyariemɨkɨ.
PRO 6:32 Peru matsi kemɨ'ane xeime 'ɨyaya meta kɨnaya mukumaɨwa, pɨkaheitimaitɨyeika, kemɨ'ane mɨpaɨ mɨtiuka'iyari yɨkɨmana kaniyukamiemɨkɨ.
PRO 6:33 Katinikwinitɨariemɨkɨ kanitewiyatsitɨariemɨkɨ, meta hatsuaku pɨkaratɨmaiya kemɨtiuyuri.
PRO 6:34 Meta 'uki kaniha'akamɨkɨ 'ɨyaya munanaimakɨ, kepauka 'uki mɨyɨkɨhɨani 'anatukaritsie pɨkareiyehɨwirieni.
PRO 6:35 'Uki mɨnanaimarie tixaɨtɨ pɨkatitanaki'erieni, tsepa witsiti'aneneme mɨtiyexatɨarie, mɨkɨkɨ pɨkayukatemawieni.
PRO 7:1 Temaikɨ, ne'ɨkitsikatsie yaketinekamieni, meta ne'aitsika keneuti'uta 'a'iyaritsie.
PRO 7:2 Yaketinekamieni kenemɨti'aita pe'ayenieretɨ 'apekaniuyeikamɨkɨ, ne'ɨkitsika kene'ɨwiyani 'ahɨxi mɨyɨwi kepemɨtikweriwayurie hepaɨ.
PRO 7:3 'A'itɨwametetsie keneutapietɨkani, kenaka'utɨa 'a'iyaritsie paitɨ.
PRO 7:4 Titakɨ yapemɨtimaiwe mɨkɨ pumatsiparewieni yaxeikɨa 'akuri hepaɨ, titakɨ kepemɨtimate mɨkɨ pumatsiparewieni kemɨ'ane pemumate hepaɨ.
PRO 7:5 Mɨkɨ mepɨmatsixɨna 'ukaratsi mɨka'a'ɨya hepaɨtsita, meta 'uka mɨwikie hepaɨtsita pepɨ'a'ɨwiyani witsitikuxatakaku.
PRO 7:6 Heiwa nekiita ne'ayekaitɨ 'itupari 'etsimayewatsie neheunieretɨ,
PRO 7:7 Nepɨne'ɨwiyaxɨ temari memɨka'u'iyari wahetsie, mɨkɨ temari watsata xeime kwi nepuxei xeime yemekɨ 'atsimɨkatimate.
PRO 7:8 Kayetsie kananuyani, 'etsikina kaniye'ani, hikɨ 'anɨari 'umietɨ 'ukaratsi kiiya hepa kaneyani.
PRO 7:9 Hikɨ kanikɨyɨrirɨmekaitɨni. 'Ari waɨkawa 'ukuyɨrekuri.
PRO 7:10 Yapauka 'ukaratsi kanewayeyani 'enukunakeke, 'uka tuminikɨ muyuwitɨnɨa hepaɨ reyukukemaritɨatɨ, yuhetsie pɨkamatsiɨkɨkai kemɨtiyurienikekai.
PRO 7:11 (Mɨkɨ 'uka waɨkawa pɨtikuxata 'utahiwatɨ hipame kawa'enietɨ, mɨpaɨ memɨ'anene 'ukarawetsixi yukiita yemekɨ mepɨkahayetei.
PRO 7:12 Kaye'utɨma mepu'uwa meta teɨteri memayuxeɨrietsie, meta yamepɨtehupa 'itsikinatsie).
PRO 7:13 Hikɨ yapauka temaikɨ kananakawiyatɨyani meta kani'itseni, metatsiere kayukatewiyakamekɨ mɨpaɨ katinitahɨawe:
PRO 7:14 «Nekiita 'aixɨa memɨteyuxeiyanikɨ mawariyari nekanexeiyani, tɨratu nemuwewiekai nekakaɨyari hamatɨa hikɨri nekatinaye'atɨani.
PRO 7:15 'Ayumieme nepeyetɨa nepɨmatsihekunakixɨ, nepɨmatsikuwaunekai, 'ari nepɨmatsi'ukaxei.
PRO 7:16 Ne'utatsie nekaneika'ita rinu 'ixurikiyari waɨkawa mɨti'utɨka 'Ekipitu miemekɨ.
PRO 7:17 Nemukahuputsie witsimu'ɨa nekaneukawirieni, mixaxi witsimu'ɨa, 'aruhe meta kanera.
PRO 7:18 Hikɨmɨ, naki'eriya tekɨxi winuyari naime tepanu'ieni, naki'eriyakɨ tepuyutitemamawieni tsepa temukatariyarie.
PRO 7:19 Nekɨna yukie pɨka'uka, kanayeyani hikɨ 'ateewa paitɨ.
PRO 7:20 Yutumini waɨkawa kane'ɨni, kwitɨwa pɨkanuani xeimetseri kaneyurimɨkɨ».
PRO 7:21 Mɨpaɨ witsitikuxaxatɨwatɨ, kanikemakaxɨani.
PRO 7:22 Hikɨ 'ana 'utɨmana kaneyani, tuuru huyeta metɨa hemierienike hepaɨ, maxa winiyaritsie muyewierixɨ hepaɨ,
PRO 7:23 'ɨrɨkɨ mumɨiya yutawitsie, wiki winiyaritsie muyewierixɨ hepaɨ, 'atsikatimaitɨ mana yutukari kanitatɨmaiyamɨkɨ.
PRO 7:24 'Ayumieme hikɨ temaikɨ, keneneu'eni, neniuki yemekɨ keneu'eni.
PRO 7:25 'A'iyari xaɨtsie pɨka'uyuyuipikeni 'uka kemɨmetikɨhɨawekɨ, mɨkɨ 'ɨxatsieya huyeyari 'utɨa pepɨkaheuyewautseni,
PRO 7:26 karikɨ yumɨiretɨ mɨpaɨ mekateniukwini, mepuyumɨire kɨmana memukwi.
PRO 7:27 Kiitana mɨki teukiyapa kanihɨkɨtɨni, yunaitɨ muwa memɨtahake mepɨtakukuwe.
PRO 8:1 Mɨtimaiwenikɨ mɨ'ayumieme 'uka hepaɨ kani'inieka. Mɨtiuyemaikakɨ mɨ'ayumieme waɨkawa kanahiwani.
PRO 8:2 Mɨtimaiwenikɨ mɨ'ayumieme wapaitɨ kanakekani, meta huye 'utɨa kaniutakekani teɨteri wahamatɨa tikuxatatɨ, meta huye manuyunanaketsie.
PRO 8:3 Kiekari kitenieyaritsie 'utakekatɨ, karima kanahiwani mɨpaɨ 'utaitɨ:
PRO 8:4 «Xeme teɨteri, nekatinixekɨhɨaweni, nekanixehahɨaweni xeyunaime teɨteri.
PRO 8:5 Xeme 'atsixemɨkatemate, xetemaiwawetɨ xekenayuyeitɨa. Xeme xemɨkayuwaɨriya xemɨteyɨ'ɨkitɨakakɨ, xeheitimaitɨkɨkatɨ xekenakɨni.
PRO 8:6 Xekeneneu'eni, waɨkawa tita mɨreuyewetse nepɨtitaxata, nepɨtitaxata kemɨtiheitserie.
PRO 8:7 Ne netetakɨ tita mɨtiyuri xeikɨa nepɨtikuxata, yaxeikɨa neteni 'itarika kanixani'erieka.
PRO 8:8 Niuki neteta mayeneika naitɨ 'aixɨa pɨ'anene, nitixaɨtɨ 'axamɨti'ane pɨkatinɨ'ɨ ninanaimarika.
PRO 8:9 Kanihekɨaka neniuki memɨtemaiwawe wahetsiemieme, meta kaniyuritɨni memɨtemate wahepaɨtsita.
PRO 8:10 Ne'ɨkitsika pɨta xekeneutanaki'eri pɨrata pɨkatixaɨ, kenemɨtimaiwe xekeneutanaki'eri pɨkatixaɨ huru.
PRO 8:11 Mɨtimaiwenikɨ mɨ'ayumieme matsi waɨkawa katinaye'aka keyuri tetexi witsimɨ'anene, tsepa tita witsimɨti'ane hepaɨna pɨka'ane.
PRO 8:12 »Ne, mɨtimaiwenikɨ, nemɨ'ayumieme mɨtiuyematekɨ hamatɨa nekaniuyeikani, kepauka yɨkɨnemɨtiyurieni nekanine'iyaritɨaka meri.
PRO 8:13 Kemɨ'ane Yawé mayemakaxe, mɨkɨ 'axamɨti'ane pɨtixani'erie, ne muyuta'ɨrenikɨ nekani'uxieka meta nanaimarika, 'aixɨa 'anemekɨ mɨka'uyeika meta niuki 'axamanɨyɨtɨka.
PRO 8:14 'Ɨkitɨarika nehetsie kanayeneikani meta tita mɨtiheitserie, nehetsie kanayeneikani petimaiwetɨ pemayanikɨ meta pemɨtɨrɨkaɨyenikɨ.
PRO 8:15 Newaparewiekaku te'aitamete mekateni'aitani meta kuwexinaruritsixi 'aitsika 'aixɨa 'aneneme mekanitiwewiwani.
PRO 8:16 Te'aitamete mexɨakate nekɨmana mepɨteha'aita meta 'itsɨkate naitsarie kwiepa nepuwaranuka'uitɨwa.
PRO 8:17 Kemɨ'ane memɨnetsinaki'erie, neta nekaniwanaki'erieka, kemɨ'ane memɨnetsikuwautɨwe, ne nematsiɨkɨme nepaneyeitɨwa.
PRO 8:18 Nehetsɨa waɨkawa mɨrexeiyanikɨ kanixuaweni meta 'aixɨa pemɨramamatiwanikɨ, waɨkawa pepɨtiukaxexeiyani meta 'atiteriwemekɨ pepɨrexeiyani.
PRO 8:19 Pemɨtimaiwenikɨ mɨ'ayumieme yanematipitɨakaku matsi 'ikwaxi 'aixɨa mɨ'ane kanihɨkɨtɨni keyuri huru, ne'iwarika matsi 'aixɨa pɨ'ane keyuri pɨrata.
PRO 8:20 Tita mɨtiheitserie hetsie nekaniumieni, 'aixɨa mɨti'ane hetsie nekananiukani,
PRO 8:21 waɨkawa nepɨtiyetuirie kemɨ'ane mɨnetsinaki'erie, meta waɨkawa mɨrexeiyanikɨ.
PRO 8:22 »Yawé pɨnetsi'utawewi mexɨakame wewiyaya nemayanikɨ, matsi meripaitɨ timieme 'akuxi hipame katitiwewiwetɨ.
PRO 8:23 Ne matsi yemekɨ meripaitɨ nekaniunetɨarieni, meripaitɨ kwie 'akuxi kanetɨariewekaku.
PRO 8:24 Kepauka nemunetɨarietsie haramara mumariwe pumawekai, meta 'ana haixa pumawekai waɨkawa 'uhanetɨ.
PRO 8:25 Nekaniutinuiwa meripaitɨ 'akuxi yemurite kanetɨariewekaku, meta hɨri tsutɨmeyari 'umawekaku,
PRO 8:26 meripaitɨ mɨkɨ kwie kanetɨariewekaku meta mana witsikemutiu'ane metatsiere 'akuxi kwie tumuanariyari mexɨakame kanetɨariewekaku.
PRO 8:27 Ne nepunierixɨ kepauka Kakaɨyari muyuawi 'amuyematsie, meta haramara heima ketewa 'atɨ muyuxeiyanɨa muka'inɨaritaxɨtsie, ne 'ana nepɨtanierekai.
PRO 8:28 Kepauka muyuawitsie haiwitɨri muyeye, meta haixate tɨrɨkawime metinetɨaxɨa haramara 'ameukatewatsie,
PRO 8:29 kepauka haramara mupitɨa hakewa meye'atɨkani, meta 'aitsikaya meu'eniekakɨ, kepauka kwie tsutɨmeyari mukayatsaxɨtsie,
PRO 8:30 ne 'ana nepɨnierekai, 'uximayatsikaya 'aixɨa nepɨyuriekai. Tukari mɨyehane ne waɨkawa nepɨnetemawiekai, temawierika nepexeiyakai hɨxiena ne'uyeikatɨ,
PRO 8:31 kwie mɨkɨ mutawewikɨ nepɨnetemawiekai, meta teɨteri memunetɨariekɨ nepɨnetemawiekai.
PRO 8:32 »Hikɨ 'ayumieme, temari 'aku, xekeneneu'eni: 'aixɨa mepɨ'itɨarieni kemɨ'ane nehuye 'utɨa memuhuni.
PRO 8:33 Ne'ɨxatsi xekeneu'eni meta xeketenemaiwaweni, hawaikɨ xepɨka'itawe'erieka temaiwawemete wa'ɨkitsika.
PRO 8:34 'Aixɨa mepɨ'itɨarieni kemɨ'ane memɨnetsi'enie, kemɨ'ane nekitenie memutatei tukarikɨ meta'enanatɨ, mɨranutakɨkatɨretsie meta'ikwewatɨ.
PRO 8:35 Yuri nekanaineni, kemɨ'ane mɨnetsikaxeiya, tukari kanikaxeiyamɨkɨ, metatsiere Yawé 'aixɨa kaniyurimɨkɨ.
PRO 8:36 Kemɨ'ane mɨkanetsitanaki'erieni, mɨkɨ yɨkɨmana kaniyutsewiximamɨkɨ, kemɨ'ane mɨnetsitixani'erieni, mɨkɨ mɨɨya pɨta kaninaki'erieka».
PRO 9:1 Mɨtimaiwenikɨ mɨ'ayumieme 'uka hepaɨ yukii kaniutawewieni meta 'atahutame mituikatɨka kaniutiwewieni.
PRO 9:2 Hikɨ 'ixɨarari kaniukuha'aritɨani, kaxie winuyari kaniukawewieni meta mexatsie 'aixɨa katiniupini.
PRO 9:3 Kaniwarutanɨ'ani 'ukari mɨtiwa'aitɨa, 'emanutitewatsie kiekaritsie mɨpaɨ memɨteheukahiwakɨ.
PRO 9:4 «Nehetsɨa xekeneu'axɨa xemɨkatemaiwawe, xeme temari peuyewetse xemɨtemaika.
PRO 9:5 Xekenakɨni, nepaa xekena'inɨata meta kaxie winuyari nemikawewi.
PRO 9:6 'Atsixekatemaitɨ xeketeneuhayewa, hikɨ 'ana xekanayenenierekakuni, timaiweme huyeya 'utɨa xekeneuhuni.
PRO 9:7 »Kemɨ'ane mɨtiyuyuriya mɨta'ɨxatsitɨani mɨkɨ pɨtatierieni xeikɨa, kemɨ'ane mɨtiyukatawe'erie mɨtaheitseritɨani mɨkɨ pɨtananaimarieni xeikɨa.
PRO 9:8 Mɨtiyukatawe'erie pepɨka'ɨxatsitɨaka kapa metsi'uti'uxiwe'erieni, 'aixɨa pɨyɨni xɨka mɨtimaiwe pe'uta'ɨxatsitɨani, mɨkɨ hɨrixɨa matsinaki'erietɨ payani.
PRO 9:9 Mɨtimaiwe keneuta'ɨxatsitɨa, hikɨ mɨkɨ waɨkawa timaiwetɨ kanayeimɨkɨ, heitserie yamɨtikamie ketineuta'ɨkitɨa, hikɨ mɨkɨ waɨkawa timaitɨ kanayeimɨkɨ.
PRO 9:10 »Kemɨ'ane timaiwetɨ meuyeimɨkɨ ke'itsutɨani meri Yawé 'ayemakatɨ, xɨka Kakaɨyari Mɨpatsie maika mɨkɨ pɨtimaiweni.
PRO 9:11 Nehetsie petiwiyakaku, 'atukari nepɨtimɨiriya, nehetsie petiwiyatɨ waɨkawa wiyari pepɨtihuni.
PRO 9:12 Xɨka petimaiweni, 'a'iwarika kanihɨkɨtɨni pemɨtimaiwenikɨ, xɨka memɨtemaiwawe pewatawe'erieka mɨkɨkɨ 'ekɨ pekatinika'eniexɨamɨkɨ».
PRO 9:13 'Uka mɨka'uka'iyari, 'axakatiniuka'iyarini, mɨkayɨkɨhɨawe meta pɨkayukatewiya.
PRO 9:14 Yukitenie kanayeyeixani, xɨkata kiekaritsie 'uyeikani waɨkawa teɨteri memaxuawetsie kaniyeixarini,
PRO 9:15 meta kaniwa'iniwani kɨkamete yuhuyeta mɨheitserietsie me'uhukaku.
PRO 9:16 «Nehetsɨa xekeneu'axɨa xeme temari yakɨ xeikɨa xemɨteyurie.
PRO 9:17 Haa 'inawariekame matsi yemekɨ witsipa'ane. Paa matsi witsikana'aneni xiete hepaɨ xɨka 'itikwani 'awie».
PRO 9:18 Perɨ mɨkɨ 'atsimepɨkatemate xɨka kiitana mɨki 'ayekani, mɨkɨ 'inierimama 'atsimepɨkatemate xɨka mɨki teukiyata meheukaxɨrɨweni.
PRO 10:1 Tsarumuni niukieya kemɨtimaiwekai: Nunutsi mɨtimaiwe yupaapa pɨtemawieritɨa, nunutsi mɨkayuwaɨriya teɨteri muwaparewienikɨ yumaama kanihiweritɨaka.
PRO 10:2 Tumini 'axa'anemekɨ 'iwariekame nitixaɨtɨkɨ pɨkatiyunaki'erie, matsi tewi heitseriemekɨ yamɨtiyuriene pɨkamɨni.
PRO 10:3 Kemɨ'ane heitserie yamɨtiyuriene Yawé pɨka'ihayewa heuhakamɨkɨme, peru kemɨ'ane 'axamɨtiyuriene tita mɨreukwaimɨkɨ mɨra'inɨatakɨ pɨka'ipitɨa.
PRO 10:4 Xɨka pe'a'ɨraxieka tixaɨtɨ pekarexeiyatɨ pepayani, xɨka peti'uximayaka waɨkawa perexeiyatɨ pekanayeimɨkɨ.
PRO 10:5 Kemɨ'ane mɨtimaiwe 'itsanaxa katiniuti'utani, kemɨ'ane 'itsanaxa mukutsu puyutitewiya 'arike.
PRO 10:6 Tewi heitseriemekɨ yamɨtikamie waɨkawa 'aixɨa kani'itɨarieka, 'axatiyuruwame witsipɨtikuxata matsi katiniyukananaimaka.
PRO 10:7 Heitserie memu'uwakai tewara'eriwatɨ 'aixɨa tepɨ'itɨarie, mɨkɨ 'axamemɨte'u'iyarikai kwitɨwa mepatɨmaiyarɨwa.
PRO 10:8 Kemɨ'ane yu'iyaritsie mɨtimaiwe mɨkɨ yapɨtikamie kemɨti'aitɨarie, peru 'axamɨtiyuriene yutemawietɨ meta 'axamɨtiniuki kanika'unariemɨkɨ.
PRO 10:9 Kemɨ'ane heitseriemekɨ 'amuyeika, 'aixɨa 'iyari 'apuyeika, 'axatiuka'iyaritɨ 'amuyeika teɨteri mepɨtehetimani kemɨtiyuriene.
PRO 10:10 Yɨhɨxikɨ yu'iwa putitaxatɨani meta waɨkawa 'uximatɨarika pɨtixuawitɨani, 'axamɨtiyuriene yutemawietɨ meta 'axamɨtiniuki pɨka'unarieni xeikɨa.
PRO 10:11 Tewi heitserie 'amuyeika niukieya tukari tiyupitɨwame kanihɨkɨtɨni, 'axamɨtiuka'iyari witsipɨtiuxaxata peru katiniyukananaimaka.
PRO 10:12 'Uxiwe'erika matsi waɨkawa 'imieri kaninetɨaweni, peru naki'eriya naime mɨtareuyehɨwirienikɨ kaniyɨweni.
PRO 10:13 Mɨtimaiwe teta mɨtimatenikɨ niukiyari payeneika, kemɨ'aneta yakɨ xeikɨa mɨtiyuriene kaneuyeweka yuwaritsie mukuweiwanikɨ.
PRO 10:14 Kemɨ'ane mɨtimaiwe kemɨtimaiwe kani'utani, peru 'axamɨtiyuriene yutemawietɨ kemɨtiuxaxata yapauka katinaka'unamɨkɨ.
PRO 10:15 Xiku xikutɨriyaya hetsiena kaninuaka, peru tewi tixaɨtɨ mɨkarexeiya hetsiena nitixaɨtɨ pɨkatitanuani.
PRO 10:16 Tewi 'aixɨa mɨtiyuriene tukari kanipitɨariemɨkɨ, 'axamɨtiuka'iyari 'iwarikaya 'axamɨti'ane katinihɨkɨtɨni.
PRO 10:17 Kemɨ'ane muyuwaɨriya mɨtaheitseritɨarienikɨ tukari kanikaxeiyamɨkɨ, kemɨ'ane mɨka'enu'eni mɨkɨ peuyeweni.
PRO 10:18 Kemɨ'ane 'uxiwe'erika mɨ'awieta mɨkɨ katini'itawani, kemɨ'ane mɨkayuwaɨriya muwapariewienikɨ teɨteri hipame wahetsiemieme kananiuweni.
PRO 10:19 Kemɨ'ane kwinimieme mɨraniuwe, waɨkawa 'axakatinikuyuruwani, kemɨ'ane mɨtimaiwe 'atsipɨka'utaine.
PRO 10:20 Heitseriemekɨ yamɨtikamie niukieya pɨrata mɨ'itiya hepaɨ kani'aneni, matsi 'axamɨtiuka'iyari kemɨtiku'eriwa tixaɨtɨkɨ pɨkatiyunaki'erie.
PRO 10:21 Heitserie 'amuyeika niukieya hipame waɨkawa kaniwaparewieka, yakɨxeikɨa 'axamemɨteyurie meyutemamawietɨ kememɨteyurie yuwiniyaritsie mekanixɨrɨweni.
PRO 10:22 Yawé hetsɨa katinayeneikani waɨkawa mɨrexeiyanikɨ, yu'iyaritɨatɨ tixaɨtɨ pɨkara'iwa.
PRO 10:23 Mɨkayuwaɨriya teɨteri waparewienike yɨkɨmana puyutemawieritɨa 'axatiyurienetɨ, peru mɨtimaiwe puyutemawieritɨa kemɨtiuyematekɨ.
PRO 10:24 'Axamɨtiuka'iyari ketita mɨtimakaxe, mɨpaɨ yapɨtipitɨarieni, tewi heitseriemekɨ 'amuyeika tita mɨreuyehɨwa, mɨkɨ pɨraye'ani hetsienamieme.
PRO 10:25 Kepauka wiyeri mumariwe mukuyani pukumawere 'axatiyuruwame, peru kemɨ'ane heitseriemekɨ yamɨtikamie yuheyemekɨ pɨtseɨyeni.
PRO 10:26 Mɨratsiwi rakwame ratametsie 'axapɨrayurieni meta kɨtsi rahɨxita kemɨtiyukukuine, mɨpaɨ kani'aneni mɨyɨ'ɨraxie kemɨ'ane mɨti'aitɨa hepaɨtsita.
PRO 10:27 Kemɨ'ane Yawé mayemakaxe tukari mɨireme kanipitɨariemɨkɨ, peru kemɨ'ane 'axamɨtiyuriene tukarieya pɨkamɨire.
PRO 10:28 Yamemɨtekahu temawierika mekanikaxeiyakuni, 'axamemɨteyurieta tita memɨtetakwewie pɨkahaye'ani.
PRO 10:29 Yawé huyeyatsie yamemɨtekahu kaniwa'ɨwiyani, kaniwaka'unanita 'axamemɨteyurie.
PRO 10:30 Heitserie yamemɨtekahu hatsuaku mepɨkahekaxɨrieni, 'axamemɨteyurie hatsuaku kwiepa mepɨka'u'uwani.
PRO 10:31 Heitserie yamemɨtekahu 'aixɨa 'anemekɨ mepɨtekuxata memɨtemaiwawekɨ, peru 'axamemɨteniniuki mepɨkapitɨarie memɨtiniunikɨ.
PRO 10:32 Heitserie 'amemu'uwa witsimepɨte'uniuka, peru 'axamemɨteyurie 'axa'anenemekɨ xeikɨa meputiniuka.
PRO 11:1 Yawé kaniwa'uxieka memɨteyukwamana, peru kemɨ'ane memɨkateyukwamana matsi 'aixɨa katiniwaxeiyani.
PRO 11:2 Kemɨ'ane mɨtiyukatawe'erie kaniyutewiyatsitɨamɨkɨ, kemɨ'ane mariweme mɨka'ayuyeitɨa, timaiwetɨ payani.
PRO 11:3 Heitserie 'amemu'uwa tita mɨtiheitserie puwaruwitɨxime, kemɨ'ane memɨte'itawa wa'itarika puwaka'una.
PRO 11:4 Xikutɨriya tixaɨtɨ pɨkarayani kepauka 'itsɨkame mɨmariwe hɨxie mɨtaxanetsienitsie, peru heitserie 'axɨka'uyeikani mɨkitsata pɨtawikweni.
PRO 11:5 Heitseriemekɨ 'amemu'uwa tita mɨtiheitserie puwaruwitɨxime, peru 'axamɨti'ane 'axateyuruwamete pɨwarekaxɨrɨwa.
PRO 11:6 Tita mɨtiheitserie puwawikweitsitɨa heitseriemekɨ yamemɨtekahu, peru tita memɨtehiwe'erie 'axateyuruwamete kaniwaranutaxɨrɨwani.
PRO 11:7 Kepauka 'axatiyuruwame mɨmɨni, pɨmɨnita tita mɨtitakwewiekai, meta pɨmɨni kemɨtiku'eriwakai mariwetɨ kemɨrayanikekai.
PRO 11:8 Heitseriemekɨ yamemɨtekahu mepɨwikweitsitɨarie kwaniwemetsata, matsi 'axatiyuruwame haweri pɨranuyeyani.
PRO 11:9 'Axatiyuruwame yutetakɨ yuhepaɨ tewi kanika'unani, peru heitseriemekɨ yamemɨtekahu memɨtehakumatekɨ mepuwikwe.
PRO 11:10 Kepauka heitseriemekɨ muyeika Yawé miparewie, naitɨ kiekari puyutemawie, kepauka 'axatiyuruwame mumɨni, waɨkawa temawierika puxuawe.
PRO 11:11 Heitseriemekɨ yamemɨtekahu kiekari 'aixɨa mepuyurie, peru 'axateyuruwamete yuniukikɨ mepika'una.
PRO 11:12 Yakɨ xeikɨa mɨtiyuriene 'axaputaine yuhepaɨ tewi hepaɨtsita, peru kemɨ'ane mɨtimaiwe puyupirenutɨa.
PRO 11:13 Teɨteri niuki peraixi tinaime mepɨte'axatawawe hipatɨ memɨtemaikakɨ, teɨteri 'aixɨa memɨte'u'iyari naime mepɨkatekuxata.
PRO 11:14 Ti'aitame xɨka 'aixɨa kati'aitani kiekari kanatiwemɨkɨ, 'aixɨa mɨtiyɨnikɨ yuwaɨkawatɨ 'ɨxatsitamete mepeuyewetse.
PRO 11:15 Kanikweriwa'aneni xeime pemɨka'imate hetsiemieme pemɨre'akatuayanikɨ, kemɨ'ane mɨkayuwaɨriya xeime hetsiemieme mɨrayukatuanikɨ 'aixɨa 'iyari kaniuyeikani.
PRO 11:16 'Ukaratsi 'aixɨa mɨtiuka'iyari 'aixɨa pɨtixeiyarie, teɨteri memɨteyukananaima tumini xeikɨa mepɨ'iwaku.
PRO 11:17 Kemɨ'ane 'aixɨa 'iyarikɨ mɨtiyukanenimaya yɨkɨmana puyuparewie, kemɨ'ane 'axamuwayurie hipame mɨkɨta yɨkɨmana 'axapuyuyurie.
PRO 11:18 'Axatiyuruwame kwamanarikakɨ xeikɨa katina'i'iwani, matsi kemɨ'ane heitseriemekɨ yamemɨtekahu wa'iwarika 'aixɨa kani'aneni.
PRO 11:19 Kemɨ'ane heitseriemekɨ yamɨtikamie waɨkawa tukari pupitɨarieni, kemɨ'ane 'axamɨti'ane mɨranukuwei kwitɨwa pumierieni.
PRO 11:20 Yawé puwaxani'erie kemɨ'ane wa'iyari mututuni, matsi puyutemawie kemɨ'ane heitseriemekɨ yamemɨtekahu wahetsiemieme.
PRO 11:21 'Axateyuruwamete mepɨkateheuyehɨwiyarieni 'axamemɨte'uyurikɨ, peru heitseriekamekɨ yamemɨtekahu mepuyutawikweitsitɨani.
PRO 11:22 'Uka witsimɨti'ɨimari matsi kayɨkɨhɨawetɨ mutaniuka, huru hanirayari hepaɨ kani'aneni tuixu tsurieyatsie muyewie.
PRO 11:23 Heitseriemekɨ yamemɨtekahu ketita memɨtehiwe'erie 'aixɨa pɨtikuyɨne, 'axateyuruwamete kememɨteku'eriwa 'axapɨtikuyɨne.
PRO 11:24 Kemɨtiwamikwa waɨkawa yutemawietɨ, mɨkɨ waɨkawa matsi pɨtipitɨarieni, matsi hipatɨ kememɨte'apitɨkakɨ xɨka mɨpaɨ mekate'uyutuani matsi kwinimieme haweri me'anenetɨ mepakɨne.
PRO 11:25 Kemɨ'ane tita mɨrexeiyakɨ hipame muwaparewie 'aixɨa pɨ'itɨarie, kemɨ'ane hipame muwaparewie mɨkɨta waɨkawa puparewiyani.
PRO 11:26 Kemɨ'ane tɨriku mɨti'awieta yuhetsiemieme mɨkɨ teɨteri 'axameke'utiyuani hepaɨtsitana, peru 'aixɨa pɨ'itɨarieni kemɨ'ane 'aixɨa 'iyari mituani.
PRO 11:27 Kemɨ'ane ximeri paitɨ manukukeka 'aixɨa tiyurienike, 'aixɨa ti'aneme pɨtiukaxexeiya, kemɨ'ane 'axamɨti'ane mɨtinake, 'axamɨti'ane pɨrenuku'axe.
PRO 11:28 Kemɨ'ane yupiinitɨarikatsie mɨtiwiya kanitayɨnarimɨkɨ, matsi heitseriemekɨ yamɨtikamie kɨye mɨyɨra hepaɨ kani'aneni.
PRO 11:29 Kemɨ'ane yukie 'uximatɨarika mɨwiwie tixaɨtɨ 'aixɨa ti'aneme pɨkatikuhayeikawa, kemɨ'ane 'axamɨtiyuriene yutemawietɨ xeime mɨtimaiwe ti'uximayatsirietɨ payani.
PRO 11:30 Heitseriemekɨ yamɨtikamie mɨkɨ kɨye tukari tiyupitɨwame hepaɨ kani'aneni. Mɨtimaiwe tukari 'aixɨa 'aneme kaniwapitɨaka memeuyexɨrixime.
PRO 11:31 Heitseriemekɨ yamemɨtekahu 'ena kwiepa yu'iwarika mekanexeiyani, matsi waɨkawa yemekɨ mekatenakapitɨariwani 'axateyuruwamete.
PRO 12:1 Kemɨ'ane muyuwaɨriya mɨtita'ɨkitɨarieni puyuwaɨriyata mɨretimanikɨ, matsi kemɨ'ane 'ɨkitɨarika mu'uxiwe'erie mɨkɨ pɨka'uka'iyari.
PRO 12:2 Tewi 'aixɨa mɨtiuka'iyari mɨkɨ Yawé piparewie, matsi kemɨ'ane 'axamɨtiuka'iyari hetsiena katiniɨhɨpani.
PRO 12:3 Xewitɨ pɨkayɨwe 'axamɨti'ane hetsie tiwiyatɨ 'aixɨa muyukuyurieni, matsi heitseriemekɨ yamemɨtekahu wananari 'atsipɨkayɨni.
PRO 12:4 'Uka 'inɨari mayuyeitɨwa yɨkɨna pɨtemawieritɨa, matsi 'uka tewinɨarika mɨwewie yɨkɨna 'umeteya pɨtixɨtɨaxime.
PRO 12:5 Teɨteri heitseriemekɨ yamemɨtekahu kememɨteku'eriwa pɨheitserie, matsi 'axatiyuruwame 'ɨxatsieyatsie 'itarika xeikɨa puxuawe.
PRO 12:6 'Axateyuruwamete waniuki winiyari mɨmɨɨya pɨhɨkɨ, matsi heitseriemekɨ yamemɨtekahu yuniukikɨ hipame mepɨwawikweitsitɨa.
PRO 12:7 'Axateyuruwamete mepatixɨrɨwe tawari hatsuaku mepɨka'anuku'uwe, matsi heitseriemekɨ yamemɨtekahu waniwema 'amepu'uwani yuheyemekɨ.
PRO 12:8 Tewi mɨtimaiwe 'aixɨa pɨtikuxaxatsiwa, matsi kemɨ'ane 'aixɨa mɨkatiuka'iyari kanixani'eriwani.
PRO 12:9 Matsi 'aixɨa pɨ'ane waɨkawa mɨkarexeiya peru yu'uximayatamete warexeiyatɨ 'amuyeika, 'aixɨa pɨka'ane kename matiwa 'utaitɨ peru yu'ikwai karexeiyatɨ.
PRO 12:10 Tewi heitseriemekɨ yamɨtikamie yapɨtimate yunaime tewaxi wahetsiemieme kememɨte'uka'eniwa, matsi 'axatiyuruwame nitixaɨtɨ pɨkatinenimaya.
PRO 12:11 Kemɨ'ane yukwietsie mɨti'uximaya mɨkɨ 'anayuhayewame 'ikwai kanexeiyakamɨkɨ, kemɨ'ane yakɨxeikɨa mɨti'uximaya yakɨxeikɨa pɨtiyuriene.
PRO 12:12 'Axateyuruwamete ke'axamemɨteyuriku wawiniyari pɨhɨkɨ xeikɨa, matsi heitseriemekɨ yamemɨtekahu wananari 'aixɨa pɨ'itɨarie.
PRO 12:13 Kemɨ'ane mɨti'itawa yuniukikɨ pɨyutahɨani, matsi heitseriemekɨ yamɨtikamie 'uximatɨarikatsata panukukeka.
PRO 12:14 Xewitɨ 'aixɨa kemɨtikuxatakɨ, meta yumamakɨ kemɨti'uximayakɨ mɨkɨkɨ pɨtipitɨarieni.
PRO 12:15 'Axamɨtiyuriene yutemawietɨ tsepa kemɨtiyuriene hetsiena mieme 'aixɨa pɨ'ane, matsi kemɨ'ane mɨtimaiwe memɨtemaiwawe wa'ɨxatsi pɨta kani'enieka.
PRO 12:16 'Axamɨtiyuriene yutemawietɨ yapauka kaniuyeha'arɨweni, matsi mɨtimaiwe katiniukanewieka kepauka 'axamɨtitahɨawarieni.
PRO 12:17 Kemɨ'ane yurikɨ munierixɨ mɨkɨ heitseriemekɨ katinikuxatani, matsi kemɨ'ane mɨka'unierixɨ mɨkɨ 'itarikakɨ pɨtikuxata xeikɨa.
PRO 12:18 Kemɨ'ane 'axamɨtiuxaxata mɨkɨ niukieya 'ixipara hepaɨ pɨtiyuxiteke, matsi mɨtimaiwe niukieya pu'uaye.
PRO 12:19 Kemɨ'ane yurikɨ mɨtikuxata yuheyemekɨ 'apuyeikani, matsi kemɨ'ane mɨti'itawa yatewimekɨ xeikɨa 'apuyeikani.
PRO 12:20 Kemɨ'ane 'axamemɨteyurie wa'iyaritsie kwamanarika puxuawe, matsi kemɨ'ane 'aixɨa 'iyari temu'uwanikɨ mɨtikuxata mɨkɨ temawierika pexeiya.
PRO 12:21 Heitseriemekɨ yamɨtikamie 'axamɨti'ane 'atsipɨka'iyurieni, matsi 'axatiyuruwame 'axamɨti'ane pɨrenukanani.
PRO 12:22 Yawé memɨte'itawa puwaxani'erie, matsi pɨnaki'a yuri memɨtekuxata wahetsiemieme.
PRO 12:23 Tewi mɨtimaiwe yapɨka'utaine tita mɨrakumate, matsi memɨkayuwaɨriya teɨteri memuwaparewieni wa'iyari pahiwa tinaime tikuxatanetɨ.
PRO 12:24 Kemɨ'ane waɨkawa mɨti'uximaya mɨkɨ ti'aitame kanayeitɨariemɨkɨ, matsi muyu'ɨraxie waɨriyarika ti'uximayatame payani.
PRO 12:25 'Uximatɨarikakɨ tewi punutuixie yu'iyaritsie, peru niuki 'aixɨa manɨyɨne pitemawieritɨa.
PRO 12:26 Heitseriemekɨ yamɨtikamie yuhepaɨ tewi kaniuwitɨximeni 'aixɨa 'anemekɨ, matsi 'axatiyuruwame xɨka huyeya 'anukuweiya pɨreuyehɨani xeikɨa.
PRO 12:27 Kemɨ'ane mɨyɨ'ɨraxie pɨkayɨwe yu'ikwai mɨtikaxeiya, matsi kemɨ'ane mɨti'uximaya waɨkawa 'ikwai pɨrexeiya.
PRO 12:28 Heitseriemekɨ yamemɨtekahu wahuye tukari maxuawe peutiyune, mɨkɨ huyeta mɨɨya pɨkaxuawe.
PRO 13:1 Nunutsi mɨtimaiwe yupaapa 'ɨxatsieya kani'enieka, matsi mɨtiyukatawe'erie kepauka mɨ'ɨxatsitɨarie pɨka'iku'eniwa.
PRO 13:2 Kemɨ'ane 'aixɨa 'anemekɨ mɨtikuxata, mɨkɨ 'aixɨa 'anemekɨ pɨtiyumikwa, kemɨ'ane 'axamemɨte'u'iyari puwanake hipame memuwananaimanikɨ.
PRO 13:3 Kemɨ'ane mɨyupirenutɨa yutukari kanikweriwayurieka, matsi kemɨ'ane kwinimieme mɨtiyuxatsikawie yukɨmana puyuka'una.
PRO 13:4 Mɨyɨ'ɨraxie pɨreuyehɨwa, peru nitixaɨtɨ pɨkatiukaxexeiya, kemɨ'ane mɨti'uximaya naime yu'ikwai pɨrexeiya.
PRO 13:5 Heitseriemekɨ yamɨtikamie 'itarika pɨxani'erie, 'axatiyuruwame tewiyarika pukuwewiene meta 'axamɨramamatiwanikɨ.
PRO 13:6 Heitseriemekɨ yamɨtikamie pɨ'ɨwiyarie, matsi 'axatiyuruwame 'axamɨti'ane pika'una.
PRO 13:7 Xewitɨ xiku puyuxata, peru tixaɨtɨ karexeiyatɨ, xewitɨ tixaɨtɨ mɨkarexeiya hepaɨ pɨ'ane, peru naime pɨrexeiya.
PRO 13:8 Xiku yutuminikɨ xeikɨa yutukari putawikweitsitɨwa, matsi tixaɨtɨ mɨkarexeiya xewitɨ pɨkaheye'unie.
PRO 13:9 Kemɨ'ane heitseriemekɨ yamemɨtekahu wahekɨariya waɨkawa pɨxawatɨ, matsi 'axateyuruwamete kɨxeme mɨtɨtɨki hepaɨ mepɨ'anene.
PRO 13:10 Teɨteri memɨteyukatawe'erie mekaniyukwitɨweni xeikɨa, matsi kemɨ'ane 'ɨxatsi memɨ'enie mɨkɨ mekatenimaiwaweni.
PRO 13:11 Tumini mexɨiwa mayu'i'iwa yapaukata kanitixɨrɨweni, kemɨ'ane tumini meuta'ɨwiyawe, mɨkɨ 'axɨkai xiku kanayeimɨkɨ.
PRO 13:12 Kepemɨtiku'eriwa xɨka yakatiuyunake mɨkɨ 'iyari pɨhiweritɨawe, kepemɨtiku'eriwa xɨka yatiuyunake mɨkɨ kɨye tukari tiyupitɨwame hepaɨ pɨ'ane.
PRO 13:13 Kemɨ'ane 'ɨxatsi mɨka'anu'enieni pɨkareuyehɨwiyarieni, kemɨ'ane 'aitsika kemainetsie yamɨtikayani 'aixɨa 'anemekɨ pɨrakapitɨarieni.
PRO 13:14 Memɨtemaiwawe wa'ɨkitɨarika mɨkɨ haa tukari mɨtiyupitɨwa hepaɨ pɨ'ane, meta winiyari mɨtiyumemiwatsata pɨtiyuwikweitsitɨwame.
PRO 13:15 Kemɨ'ane 'ɨxatsi 'aixɨa 'aneme mukuxata, mɨkɨ 'aixɨa pɨtikuxaxatsiwa, matsi 'axamɨtiuka'iyari huyeya yuheyemekɨ pɨkayupata.
PRO 13:16 Mɨtimaiwe puyuwaɨriya 'aixɨa mɨtiyurienikɨ yatimaitɨ tita mɨtiheitserie, matsi mɨkayɨwaɨriya mɨwaparewienikɨ kemɨtiyɨkɨhɨawe xeikɨa pɨtiyuriene.
PRO 13:17 Tupiri 'axamɨtiuka'iyari niuki 'axa'aneneme xeikɨa pɨ'atɨwa, tupiri 'aixɨa mɨtiuka'iyari 'aixɨa ti'aneneme pɨti'atɨwa.
PRO 13:18 Kemɨ'ane 'ɨkitɨarika mɨka'anu'enieni tixaɨtɨ karexeiyatɨ payani meta tewiyatsitɨarietɨ, matsi kemɨ'ane manu'ena waɨkawa 'aixɨa pɨrahɨawarɨwani.
PRO 13:19 Kepauka yamɨraye'ani ketemɨteku'eriwa 'ana tepuyutemamawie, matsi mɨkayuwaɨriya hetsiemieme pukwaniwe 'axamɨti'ane mɨtihayewakɨ.
PRO 13:20 Kemɨ'ane memɨtemaiwawe wahamatɨa 'amuyeika, timaiwetɨ kanayeimɨkɨ wahepaɨ, kemɨ'ane memɨkayuwaɨriya wahamatɨa 'amuyeika 'axa'anemɨtsie kaniyukakemɨkɨ.
PRO 13:21 'Axatiyuruwame 'axamɨti'ane hetsiena kaniye'axeni, matsi heitseriemekɨ yamɨtikamie 'aixɨa mɨti'anekɨ 'apɨrapiniyarieni.
PRO 13:22 Tewi 'aixɨa mɨtiuka'iyari yuteukarima piinitɨarika pɨtiwaku'e'eiririwa, 'axatiyuruwame piinitɨarikaya mɨkɨ heitseriemekɨ yamemɨtekahu wahetsiemieme pɨta katinayeimɨkɨ.
PRO 13:23 Teɨteri tixaɨtɨ memɨkateheuxeiya memati'etsatsie waɨkawa 'ikwai kanixuaweni, matsi naitɨ katineuyewautseni xɨka kemɨtiheitserie mekate'uyurieni.
PRO 13:24 Kemɨ'ane yuniwe mɨkati'ɨkitɨa ka'enayewayatɨ mɨkɨ pɨka'inaki'erie, matsi xɨka 'ikuwayani ti'ɨkitɨatɨ mɨkɨ yuniwe pɨnaki'erie.
PRO 13:25 Tewi heitseriemekɨ yamɨtikamie pɨtikwa'a kepaukake mɨtahuxani, matsi 'axatiyuruwame heuhaakamɨtɨ 'apuyeikani.
PRO 14:1 'Uka mɨtimaiwe yuniwema 'aixɨa mɨti'anekɨ puwaxewiriya, matsi 'uka mɨkatimaiwe, yɨkɨmana puwataweiyaxɨani yuniwema.
PRO 14:2 Kemɨ'ane 'aixɨa 'anemekɨ mumie Yawé kanayemakaxeni, kemɨ'ane Yawé xani'erietɨ mumie mɨkɨ 'axakatiniyurieneni.
PRO 14:3 'Axamɨtiyuriene yutemawietɨ yuta'ɨretɨ xeikɨa katinikuxatani, matsi mɨtimaiwe kemɨtikuxata puyukweriwayurie.
PRO 14:4 Hakewa tuurutsixi kwietsanamete mememawe mana 'iku payewawaki, tuurutsixi kwietsanamete watɨrɨkariyakɨ 'itsanari putiwawaɨkare.
PRO 14:5 Kemɨ'ane munierixɨ mɨkɨ yurikɨ pɨtikuxata 'itsɨkame hɨxie yapɨtayɨni, matsi mɨti'itawa 'itsɨkame hɨxie yuri pɨkatikuxata yakɨ xeikɨa putaineni.
PRO 14:6 Kemɨ'ane mɨtiyukatawe'erie mɨtimaiwenikɨ mɨ'ayumieme pukuwaune matsi pɨka'ikaxexeiya, matsi kemɨ'ane yamɨtimate tita mɨti'aixɨa hetsiena mieme pɨkakwaniwe mɨtimaiwenikɨ.
PRO 14:7 Mɨkayuwaɨriya hamatɨa pepɨka'uyeikani, hatsuaku mɨkɨ niukieyatsie tixaɨtɨ pepɨkaretimani.
PRO 14:8 Mɨtimaiwe yapɨtimate kemɨtiyurieni ke'anemekɨ mumieni, matsi mɨkatimaiwe yukɨmana puyukwamana.
PRO 14:9 'Axamemɨteyurie meyutemamawietɨ kepauka wahetsie mɨrahɨiwa meputinawe meyuku'imawatɨ, matsi memɨtemaiwawe Kakaɨyari 'aixɨa pɨtiwaxeiya.
PRO 14:10 Ta'iyari yapɨtimate ketemɨte'uka'eniwa meta xewitɨ pɨkayɨwe xeime temawierikaya mɨhekɨatani.
PRO 14:11 'Axatiyuruwame kiiya kanika'unariemɨkɨ, matsi heitseriemekɨ yamemɨtekahu wakii 'aixɨa pɨ'itɨarie.
PRO 14:12 Tewi mɨpaɨ pɨtimate kename huye muxuawe naitɨ 'aixɨa 'anene, matsi mɨkɨ naitɨ huye mɨki teukiyapa kaneukayuyuneni.
PRO 14:13 Xɨka waɨkawa 'utananeni ra'iyaritsie pɨtiyukukuine, matsi temawierika kepauka meu'atɨyani tsuari xeikɨa payeika.
PRO 14:14 Mɨka'uka'iyari puyutemawie ke'axamɨtiyuriene hepaɨtsita, tewi 'aixɨa mɨtiuka'iyari puyutemawie 'aixɨa mɨtiyurienekɨ.
PRO 14:15 Tewi 'atsimɨkatimate kemɨreuyewetse naime yuri pɨrayeitɨwa, matsi mɨtimaiwe kaniyɨ'ɨwiyani kemɨtimie.
PRO 14:16 Mɨtimaiwe Yawé kanayemakaxeni 'ayumieme kaniyɨ'ɨwiyani 'axamɨti'ane hepaɨtsita, matsi mɨkayuwaɨriya puyuta'ɨre meta puyuwaɨriya mɨpaɨ 'utaitɨ nenekaniyɨweni.
PRO 14:17 Kemɨ'ane mayu'eriya yapauka 'axapɨtiyurieni 'atsikatimaitɨ, matsi kemɨ'ane mɨtimaiwe mɨkɨ pɨtiukanewie.
PRO 14:18 'Atsimemɨkatemate kemɨreuyewetse yamemɨteyurienikɨ wa'imikieri 'axamɨti'anene pɨrayani, matsi memɨtemaiwawe mepɨpitɨarie metemaiwawetɨ kemɨreuyewetse memumatsiɨkɨnikɨ.
PRO 14:19 'Axateyuruwamete 'aixɨa memɨte'u'iyari wahɨxie mekanikatunuma'uikuni, 'axamemɨte'u'iyari mekanitihɨxima'uikuni heitseriemekɨ yamemɨtekahu wakitenietsie.
PRO 14:20 Kemɨ'ane tixaɨtɨ mɨkarexeiya hamikumamatɨtɨ mekani'uxiwe'erieka, matsi mekaniyumɨireni xiku memɨnaki'erie.
PRO 14:21 'Axapɨtiyurieneni xɨka yuhepaɨ tewi 'uxieka, 'aixɨa pɨ'itɨarieka kemɨ'ane tixaɨtɨ memɨkatehexeiya mɨwanenimaya.
PRO 14:22 Kemɨ'ane 'axamemɨteyuriku mepeiyehɨani huye 'aixɨa mɨ'ane, matsi naki'eriya meta tita yuri mɨraine mepukaxexeiya kemɨ'ane 'aixɨa memɨteyurie.
PRO 14:23 Naime 'uximayatsikatsie 'ikwaxi puxuawe matsi xɨka yakɨxeikɨa tikuxatani tixaɨtɨ karexeiyatɨ payani.
PRO 14:24 Mɨtimaiwe pumatsiɨkɨ yatimaitɨ tita mɨreuyewetse yamɨtiyurienikɨ, memɨka'u'iyari mepumatsiɨkɨ kememɨterukutsixikɨ.
PRO 14:25 Kemɨ'ane yurikɨ munierixɨ pɨtikuxata 'itsɨkate wahɨxie hipame wawikweitsitɨatɨ, matsi kemɨ'ane ka'uniereka yamɨtikuxata 'atsimɨkatiuyuri kanimierinɨamɨkɨ.
PRO 14:26 Kemɨ'ane Yawé mayemakaxe mɨkɨ yuhetsie nunuwame pexeiya meta tɨɨriyamama mepɨ'ɨwiyarieka.
PRO 14:27 Kemɨ'ane Yawé mayemakaxe mɨkɨ tukari pupitɨarie 'anayuhayewame, meta mɨki winiyariyaritsie kaniutawikweweni.
PRO 14:28 Ti'aitame teɨteri yuwaɨkawame wahetsie ti'aitatɨ pumariwe, ti'aitame kawarexeiyatɨ kemɨ'ane mɨtiwaruta'aitɨani pɨtewiyatsitɨarieni.
PRO 14:29 Kemɨ'ane mɨka'ayu'eriya pɨmatsiɨkɨ waɨkawa kemɨtimaiwe, matsi yapauka mayu'eriya pɨmatsiɨkɨ ke'axamɨtiyurie yutemawietɨ.
PRO 14:30 Xɨka yu'iyaritsie 'aixɨa tiyɨkɨhɨaweni 'aixɨa pɨreu'erieka yuwaiyaritsie, matsi 'uxiwe'erika naime 'umete pɨtixɨtɨaxime.
PRO 14:31 Kemɨ'ane tixaɨtɨ mɨkarexeiya mɨnanaima mɨkɨ Kakaɨyari pɨnanaima kemɨ'ane mitawewi, matsi tixaɨtɨ mɨkarexeiya mɨnenimaya mɨkɨ Kakaɨyari hepaɨtsita 'aixɨa pɨtiyukɨhɨawe.
PRO 14:32 'Axatiyuruwame kanekawautseni yukɨmana 'axatiyurienetɨ, kemɨ'ane heitseriemekɨ yamɨtikamie tsepa mɨmɨxime pɨ'ɨwiyarieka.
PRO 14:33 Memɨtemaiwawe yu'iyaritsie kememɨte'uyemate pɨtihɨpɨne, matsi memɨkayuwaɨriya 'etsiwatɨma mepɨka'imate.
PRO 14:34 Kepauka teɨteri heitseriemekɨ yamemɨtekahu kiekari mariwetɨ payeika, matsi kepauka teɨteri 'axamemɨteyurie naime kiekari mepɨtewiyatsitɨa.
PRO 14:35 Kemɨ'ane mɨtimaiwe ti'aitame pɨtemawieritɨa yu'uximayatsikakɨ, matsi ti'aitame pɨha'a ti'uximayatameya yamɨkatikamiekɨ mitewiyatsitɨakɨ.
PRO 15:1 Niuki heitserie 'aixɨa manɨyɨne haxɨa pukuxeriya, matsi niuki mɨxɨka waɨkawa haxɨa kanayeitɨwani.
PRO 15:2 Memɨtemaiwawe metekuxatakaku hipatɨ waɨkawa mepɨtehetimamateke, mɨkayuwaɨriya teɨteri muwaparewienikɨ yakɨ xeikɨa katinikuxatani.
PRO 15:3 Yawé naitsarie puyeika tanieretɨ, waxeiyatɨ 'aixɨa memɨte'u'iyari meta 'axamemɨteyurie.
PRO 15:4 Niuki mɨtiyɨnɨtɨwa mɨkɨ ra'iyaritsie tukari tiyupitɨwame kanihɨkɨtɨni, matsi niuki 'axamanɨyɨne 'iyari pɨhiweritɨawe.
PRO 15:5 'Axamɨtiyuriene yutemawietɨ panati'ewa paapaya 'i'ɨxatsitɨakaku, katinimaiweni kemɨ'ane mɨyɨ'ɨxatsitɨarinɨa.
PRO 15:6 Heitseriemekɨ yamɨtikamie kiena 'ikwai panayuhayewa, matsi 'axamɨtiuka'iyari kie 'uximatɨarika waɨkawa puxuawe.
PRO 15:7 Memɨtemaiwawe metekuxatakaku hipatɨta metemaitɨ mepakɨka, memɨkayuwaɨriya hipame memuwaparewienikɨ wa'iyari 'etsiwatɨma mɨpaɨ pɨkatiku'eriwa.
PRO 15:8 Yawé 'axateyuruwamete wamawari kani'uxiwe'erieka, matsi puyutemawie heitseriemekɨ yamemɨtekahu wanenewierikɨ.
PRO 15:9 Yawé 'axateyuruwamete wahuye kani'uxiwe'erieka, matsi puwanaki'erie kemɨ'ane tita mɨtiheitserie memɨte'uweiya.
PRO 15:10 Kemɨ'ane huye 'aixɨa mɨ'ane muku'eirieni waɨkawa katinita'ɨkitɨariemɨkɨ 'anayeweiwatɨ, matsi kemɨ'ane mitixani'eri mɨkɨ pumierieni.
PRO 15:11 Yawé naime katinimaika teukiyapa meta meukatewatsie timieme, matsi tewi kemɨtiyɨkɨhɨawe yu'iyaritsie mɨkɨ pumate.
PRO 15:12 Kemɨ'ane mɨtiyukatawe'erie pɨka'inake mɨta'ɨxatsitɨarienikɨ, meta pɨka'inake memɨtemaiwawe mɨwanɨka.
PRO 15:13 'Iyari xɨka yutemawieka pɨmatsiɨkɨ tahɨxie paitɨ, 'iyari xɨka tiuka'eniwani yaxeikɨa pɨmatsiɨkɨta.
PRO 15:14 Memɨtemaiwawe mepɨyuwaɨriya matsi waɨkawa memɨte'uyemaikakɨ, memɨkayuwaɨriya hipame memuwaparewienikɨ 'axaniuki xeikɨa mepukwa'a.
PRO 15:15 Naitɨ tukari 'axapɨ'anene munutuixie hetsiemieme, matsi muyutemawie hetsiemieme tukarikɨ 'ixɨarari puxuawe.
PRO 15:16 Matsi 'aixɨa pɨ'ane 'etsiwa mɨrexeiyani Yawé 'ayemakatɨ, matsi 'aixɨa pɨka'ane waɨkawa mɨrexeiyani tiuka'eniwatɨ.
PRO 15:17 'Aixɨa pɨ'ane mɨtitsitsiɨrawi xɨka tetekwaka teyunaki'erietɨ, 'aixɨa pɨka'ane wai xɨka tekwaka teyu'uxiwe'erietɨ.
PRO 15:18 Kemɨ'ane mayu'eriya yapauka payumiewe, kemɨ'ane mɨka'ayu'eriya kayuwatɨ puwapitɨa hipame.
PRO 15:19 Mɨyɨ'ɨraxie huyetana waɨkawa xuya kanixuaweni, matsi heitseriemekɨ yamemɨtekahu wahuye 'apatayewa.
PRO 15:20 Temaikɨ mɨtimaiwe yupaapa pɨtemawieritɨa, matsi temaikɨ mɨka'uka'iyari yumaama pɨtewiyatsitɨa xeikɨa.
PRO 15:21 Mɨkatimaiwe puyutemawie yakɨ xeikɨa tiyurienetɨ, matsi mɨtimaiwe yuhuye yɨkɨmana pɨheitseritɨa.
PRO 15:22 Kepauka 'ɨxatsi meuyewetse ketemɨteku'eriwa yapɨkatikɨyɨne, kepauka tanaitɨ temuyu'enie teyu'ɨxatsitɨatɨ 'aixɨa pɨtikɨyɨne.
PRO 15:23 Witsipɨ'ane xɨka 'aixɨa 'anemekɨ waku'eiyani, meta waɨkawa witsipɨ'ane xɨka 'uta'eiyarieni kepauka meuyewetse.
PRO 15:24 Mɨtimaiwe tukari huyeyari taheima meutiyune 'utɨa pumie, mɨki teukiyapa meukahɨiyanikɨ puyutawikweitsitɨwa.
PRO 15:25 Yawé memɨyuti'ɨre wakii kaniti'unani, matsi wiuraxi wakwie pɨ'ɨwiya kapa me'unawaiyarienikɨ.
PRO 15:26 Yawé kaniwa'uxieka 'axateyuruwamete yakɨ xeikɨa kememɨteku'eriwa, matsi pinake niuki mɨheitserie.
PRO 15:27 Kemɨ'ane waɨkawa mɨrexeiyanikɨ mɨtihiwe'erie 'aixɨa pɨka'ane tɨɨriyamama wahetsiemieme, matsi tumini mɨka'anu'ɨwe hetsiena mɨraka memɨteheuyehɨwirienikɨ mɨkɨ yuheyemekɨ tukari hexeiyatɨ payani.
PRO 15:28 Heitseriemekɨ yamɨtikamie yapɨtimate yu'iyaritsie kemɨtayɨni, matsi 'axamemɨteyurie 'axati'aneme xeikɨa mepɨtekuxata.
PRO 15:29 Yawé 'axateyuruwamete kawa'enietɨ 'ateewa puyeika, matsi heitseriemekɨ yamemɨtekahu wanenewieri kani'enieka.
PRO 15:30 Kepauka xewitɨ 'aixɨa 'iyari mɨratahɨawe 'ana 'iyari puyutemawieka, meta niuki 'aixɨa manɨyɨne tɨrɨkariya pɨtiyupitɨwa.
PRO 15:31 Matsi kemɨ'ane 'ɨxatsi mɨ'enie yapɨretimaixime yutukari hetsiemieme, 'ayumieme memɨtemaiwawe watsata puyeikani.
PRO 15:32 Kemɨ'ane 'ɨxatsi mɨkanaki'erie yɨkɨmana puyunanaimani, matsi kemɨ'ane 'ɨxatsi manu'enieni timaiwetɨ payani.
PRO 15:33 Kemɨ'ane Yawé mayemakaxe heitseriemekɨ yapɨtikamie meta pɨtimaiweni, kemɨ'ane tixaɨtɨ mɨkarayuyeitɨa 'aixɨa pɨrahɨawarɨwa 'aixɨa mɨtiyurienekɨ.
PRO 16:1 Tewi yaputaine kemɨtiyurimɨkɨ, matsi Yawé pɨta yapɨtipitɨani kemɨtiyurieni.
PRO 16:2 Tewi yapɨtiku'eriwa yuhetsiemieme kemɨtiyurieni kename 'aixɨa ti'ane naitɨ, matsi Yawé pimate kehepaɨtɨtɨ mɨtiyuriene.
PRO 16:3 Naime kepemɨtiyurienekɨ Yawé ketineuhɨritɨa, kepemɨtiku'eriwa 'ana yapɨtiyɨni.
PRO 16:4 Yawé naime kemɨtiyuriene yatimaitɨ pɨtiyuriene, meta 'axatiyuruwame putawewi 'imatɨrieka tukaritsie mutika'eniexɨanikɨ.
PRO 16:5 Yawé memuyuti'ɨre kaniwa'uxiwe'erieka, matsi kaniyuritɨni katinika'eniexɨamɨkɨ.
PRO 16:6 Xeyunaki'erietɨ meta yuri xehaitɨkaitɨ xekateneuyuyehɨwiriekakuni, Yawé 'ayemakatɨ xeikɨa pɨyɨwe 'axamɨti'ane mɨnewienikɨ.
PRO 16:7 Yawé kepauka tewi 'aixɨa mɨtixeiya hetsienamieme kaniyutemawieka, metatsiere memeye'unie 'aixɨa mete'ixeiyakame kaniwarayeitɨaka.
PRO 16:8 Matsi 'aixɨa pɨ'ane 'etsiwa mɨrexeiyani heitseriemekɨ yatikamietɨ, matsi 'aixɨa pɨka'ane waɨkawa mɨrexeiyani heitseriemekɨ yakatikamietɨ.
PRO 16:9 Tewi yapɨtiku'eriwa kemɨtiyurienikɨ yuhetsiemieme, matsi Yawé pɨta heitserie pexeiya mɨpaɨ mɨtiyurienikɨ.
PRO 16:10 Ti'aitame Kakaɨyaritsie timieme pɨtikuxata, mɨkɨ 'itarikakɨ manutahɨiyanikɨ yapɨkatayɨni.
PRO 16:11 Ti'inɨnɨatamete 'aixɨa mɨ'anene Yawé hetsɨa pumieme, naime ti'inɨnɨatamete Kakaɨyari kaninetɨani.
PRO 16:12 Ti'aitame 'axamemɨteyurie kaniwa'uxiwe'erieka, karikɨ 'uweni 'aixɨa 'anemekɨ katini'aitametɨni.
PRO 16:13 Ti'aitame kaniyutemawieka mɨkɨ yamemɨtekahu wa'enietɨ, kemɨ'ane yurikɨ mɨtikuxata pɨnaki'erie.
PRO 16:14 Ti'aitame haxɨaya katiniyumemiwani, matsi kemɨ'ane mɨtimaiwe kaniyɨweni minɨtɨanikɨ.
PRO 16:15 Ti'aitame xɨka 'aixɨa 'anemekɨ ratahɨawe putukari, parewiyaya 'imikieri mɨraye'axe hepaɨ kani'aneni.
PRO 16:16 Matsi mɨtimaiwenikɨ mɨ'ayumieme katinaye'aka keyuri huru, meta katinaye'aka mɨtiuyemaikakɨ keyuri pɨrata.
PRO 16:17 Kemɨ'ane heitseriemekɨ yamɨtikamie huyetana 'axamɨti'ane pɨtiumawe, kemɨ'ane yutukari mɨwikweitsitɨamɨkɨ, kaniyɨ'ɨwiyani kemɨtimie.
PRO 16:18 Kemɨ'ane mɨtiyukatawe'erie tiyu'uname hetsiena pɨye'ani, kemɨ'ane muyuta'ɨre pekaweni.
PRO 16:19 'Aixɨa pɨ'ane xɨka haweri memɨ'anene wahamatɨa tixaɨtɨ katihɨkɨtɨni, keyuri memuyuti'ɨre wahamatɨa pemɨxikutɨnikɨ.
PRO 16:20 Kemɨ'ane niuki meti'enietɨyeika, 'aixɨa ti'aneme pɨtiukaxexeiya, meta 'aixɨa pɨ'itɨarie kemɨ'ane Yawé hetsie mɨtiwiya.
PRO 16:21 Kemɨ'ane mɨtimaiwe mɨtiuyemate katinitewaka, kemɨ'ane witsi'anemekɨ mɨtikuxata 'aixɨa pɨti'enierie.
PRO 16:22 Haa muhane hepaɨ mekani'aneneni kemɨ'ane kememɨteyuriekɨ 'aixɨa memɨtehakumate, 'axamemɨteyurie meyutemamawietɨ pɨkayɨwe mɨtiwaruti'ɨkitɨani.
PRO 16:23 Kemɨ'ane 'aixɨa mɨtiyukɨhɨawe kaniyɨweni yuneni mupirenutɨani, yunenikɨ kemɨtiyuriene naime katinimaika.
PRO 16:24 Mutiyukanaki'erie niukieya xiete hepaɨ kana'aneni, 'atukari 'aixɨa kaniyurieka meta 'awaiyaritsie 'aixɨa pekatineu'erieka.
PRO 16:25 Teɨteri kememɨteyurie 'aixɨa ti'aneme mepɨte'erie, matsi mɨkɨ huye mɨki teukiyapa kaneukayuneni.
PRO 16:26 Kemɨ'ane yehaakamɨnetɨ 'amuyeika haaka waɨriyarika pipitɨa mɨti'uximayakakɨ, kemɨtiyehaakamɨnekɨ waɨriyarika pɨti'uximaya mɨtikwanikɨ.
PRO 16:27 Mɨka'uka'iyari pɨhɨne 'axamɨti'anekɨ huxunu hepaɨ, meta 'axamɨraniuwe tai hepaɨ katiniyutaiyani.
PRO 16:28 Kemɨ'ane 'axamɨtiuka'iyari 'imieri pawiwiwe, niukiperai kaniwataxɨrɨwani 'aixɨa memɨteyuku'eriya.
PRO 16:29 Mayu'eriya yuhepaɨ tewi kanikwamanani, kani'inieka xeikɨa yuhuyeta 'axakemɨtiyurienetsie.
PRO 16:30 Kemɨ'ane yuhɨxikɨ 'inɨari metsiwewirie mɨkɨ 'axametsiyurimɨtɨ pɨyɨane, kemɨ'ane mita'atse 'ariri mɨkɨ 'axakatiniuyurieni.
PRO 16:31 Mutuxaiya kuruna kanihɨkɨtɨni 'aixɨa kemɨtixeiyariekakɨ, 'aixɨa 'anemekɨ 'uyeikatɨ kane'iwamɨkɨ.
PRO 16:32 Matsi 'aixɨa pɨ'ane petiukanewietɨ keyuri pera'a'iwamɨtɨ, matsi 'ekɨ 'a'iyari kenenɨtɨaweni keyuri kiekarite peka'a'iwake.
PRO 16:33 Teɨteri kememɨteyurienikɨ yamepɨtekuwaɨtɨwe, matsi Yawé pɨta yapɨtikuyuruwa.
PRO 17:1 'Aixɨa pɨ'ane matsi kayuwatɨ temu'uwanikɨ tsepa paa tsetse'ime temukwa'a, keyuri temuyukwitɨweni 'ixɨarari tewewietɨwetɨ.
PRO 17:2 Ti'uximayatame mɨtimaiwe yukutsiyari nu'aya mɨkayukatewiya pɨtita'aitɨani, hikɨ mɨkɨta pɨtiyetuiriyarieni tita mɨtipiinieyatɨkai yukutsiyari niwemama wahamatɨa.
PRO 17:3 Tai kwinimieme mɨtixɨkakɨ huru meta pɨrata kanikwaxiyarieka huxunuta, matsi ta'iyari Yawé pɨta kani'inɨatani.
PRO 17:4 'Axatiyuruwame yuhepaɨ 'axatiyuruwame kani'enieka, mɨti'itawa yuhepaɨ mɨti'itawa kani'enieka.
PRO 17:5 Kemɨ'ane tixaɨtɨ mɨkarexeiya muyuriya mɨkɨ Kakaɨyari mitawewi kani'uxiwe'erieka, kemɨ'ane muyutemawie 'ixeiyatɨ tiuka'eniwame mɨkɨ pɨkareuyehɨwiyarieni pu'uximatɨarieni.
PRO 17:6 'Ukiratsi teukarimama kurunaya mekanihɨkɨtɨni, tɨɨri yupaapama wahekɨ mepuyuti'ɨre.
PRO 17:7 'Aixɨa pɨka'ane mɨka'uka'iyari 'aixɨa mɨtikuxatani, yaxeikɨa 'aixɨa pɨka'ane ti'aitame mɨtiku'itawanikɨ.
PRO 17:8 Kemɨ'ane tumini mɨwata'ɨitɨwa 'awie yamemɨteyurienikɨ hipatɨ kemɨtinake, mɨkɨ 'itsɨ mariweme makwe'e puyu'erie, matsi mɨkɨ kemɨtiyuriene naitɨ yapɨtikɨyɨne.
PRO 17:9 Kemɨ'ane mɨreiyehɨwirie 'axamutayɨ mɨkɨ naki'eriya pukaxexeiya, kemɨ'ane 'axamɨraniuwe kareiyehɨwirietɨ hamiku pɨkahexeiya.
PRO 17:10 Kemɨ'ane mɨtimaiwe xeiniukiyarikɨ peu'ena, mɨka'uka'iyarita tsepa xeitsienituyarimexɨa muweiya mɨkɨ pɨka'anu'ena.
PRO 17:11 Kemɨ'ane mayu'eriya kemɨ'ane mɨtamieni kanikuwauneni, peru xeime panɨnɨ'aiyarieni matsi waɨkawa mɨtɨrɨkaɨye.
PRO 17:12 'Aixɨa pɨ'ane hutse xɨka 'anukunake mayu'eriya yuniwema munawaiyarie, keyuri 'atsimɨkatimate xɨka ranukunake.
PRO 17:13 Kemɨ'ane 'aixɨa tixeiyarietɨ 'axamɨti'anekɨ mɨtiwarakapitɨwa, yuheyemekɨ tɨɨriyamama 'axamepɨ'itɨarieka.
PRO 17:14 Xɨka 'imieri 'utsutɨani haa manutanama manuta'una hepaɨ pɨtikɨyɨne, matsi 'aixɨa pɨ'ane mɨtihayewani 'axatiyurienetɨ.
PRO 17:15 Yawé 'ikɨ hutame pu'uxiwe'erie: hetsiena mɨrahɨiwa xɨka 'uxɨnarieni 'aixɨa pɨka'ane hetsiena mɨkarahɨiwa pɨta xɨka 'anutahɨiyani.
PRO 17:16 Mɨka'uka'iyari xɨka 'atsikatimaika tsepa tumini mexeiya, pɨkayɨweni mɨtimaiwenikɨ mɨ'ayumieme mɨnanenikɨ.
PRO 17:17 Hamiku yuheyemekɨ pɨtiuyukanaki'erie, kepauka 'uximatɨarika mexeiyanitsie yu'iwa hepaɨ pɨtimaika.
PRO 17:18 Tewi mɨkatimaiwe yapɨtayɨni xeime hetsiemieme mɨrayukatuanikɨ, mɨkɨ xeime hetsiemieme rapitɨ payeika.
PRO 17:19 Kemɨ'ane minake 'axamɨtiyurienenikɨ mɨkɨ kaninakeni muyutamienikɨ, kemɨ'ane kwinimieme mɨraniuwe tenieya manutatsanarienikɨ kanikuwaneni.
PRO 17:20 Kemɨ'ane mɨtiyukwamana hatsuaku 'aixɨa 'itɨarietɨ pɨka'ayani, kemɨ'ane mɨti'itawa tsiepɨre hetsiena katinahɨiwani.
PRO 17:21 Kemɨ'ane temaikɨ katiyu'aitɨarinɨakame mexeiya mɨkɨ pɨrahiweritɨaka, xɨka mɨpaɨ 'anekame hexeiyani temawierika pɨka'ukaxeiya.
PRO 17:22 Waɨkawa yu'iyaritsie xɨka yutemawieka 'uaye hepaɨ kani'aneni, kepauka pemɨkayutemawieka 'awaiyaritsieta pepuwerani.
PRO 17:23 'Axateyuruwamete tumini memɨnaki'erie tixaɨtɨkɨ 'awie yameteyurienike, 'itsɨkate niuki tutunime xeikɨa mekani'enieka tumini memanɨ'ɨwekɨ.
PRO 17:24 Kemɨ'ane mɨtimaiwenikɨ mɨ'ayumieme mexeiya waɨkawa kaninaki'erieka, mɨkayuwaɨriya hipame muwaparewienikɨ 'atsipɨkatimate ketita mɨreuyehɨwa.
PRO 17:25 Temaikɨ mɨka'uka'iyari yupaapa xeikɨa pɨhaxɨatɨwame, yaxeikɨata yumaama kani'uximatɨaka.
PRO 17:26 'Aixɨa mɨtiuka'iyari xɨka 'anutahɨani 'aixɨa pɨka'ane, yaxeikɨata 'aixɨa pɨka'ane 'aixɨa mɨtiuka'iyari xɨka 'ukuwaxɨani heitseriekamekɨ 'amuyeikakɨ.
PRO 17:27 Kemɨ'ane mɨtimaiwe 'etsiwa xeikɨa pɨtikuxata, kemɨ'ane mɨtiuyemate mɨkɨ yapauka yuhetsie pɨkatikupitɨwa.
PRO 17:28 Matsi 'axamɨtiyuriene yutemawietɨ timaiwetɨ payani xɨka kayuwatɨ tiuyerɨni, xɨka tiuhayewa yutetakɨ matsi timatetɨ pɨ'eriwani tsepa 'atsimɨkatimate.
PRO 18:1 Kemɨ'ane yuxaɨtame xeikɨa mayu'eriwa yuhetsiemieme xeikɨa pɨtikuwaune, naime 'ɨxatsi 'aixɨa mɨ'ane hepaɨtsita puyeha'arɨwe.
PRO 18:2 Mɨkayuwaɨriya teɨteri muwaparewienikɨ pɨka'inake meitimaitɨyeikanikɨ, pinake xeikɨa 'etsiwa kemɨtiuyemate mɨtikuxatani.
PRO 18:3 'Axamɨtiuka'iyari 'axapɨraxaxatsiwa xeikɨa, tewinɨarikaya xeikɨa hetsiena puxuawe.
PRO 18:4 Tewi mɨtimaiwe niukieya haramara 'amatiyewa 'emeukatewa hepaɨ kani'aneni, meta haa 'aki'utɨa muhane hepaɨ kani'aneni kemɨ'ane mɨtimaiwe.
PRO 18:5 'Aixɨa pɨka'ane xɨka hetsiena mɨrahɨiwa 'uxɨna, meta 'aixɨa pɨka'ane xɨka heitserie mexeiya hetsie pɨta rahɨiwani.
PRO 18:6 Mɨkayuwaɨriya teɨteri muwaparewienikɨ 'axa'anemekɨ xeikɨa putaniuka, yutetakɨ xeikɨa 'axaputaine mɨtamierienikɨ.
PRO 18:7 Tewi kenametimate mutaine mɨkɨ yuwiniyaritsie puyutahɨani, yutenikɨ kemɨtikuxata mɨkɨ yakɨ xeikɨa pɨrayani.
PRO 18:8 'Axaniuki witsikatini'eniɨriɨkɨni 'aixɨa ma'aneni hepaɨ, mɨkɨ rataɨta paitɨ kaniye'axeni.
PRO 18:9 Kemɨ'ane mɨyɨ'ɨraxie mɨkati'uximaya, kaniyutaxewireni xeime mɨraka'una hamatɨa.
PRO 18:10 Yawé kawi 'amutewi hepaɨ kani'aneni, hetsɨana mekaniutinanautsani heitseriemekɨ yamemɨtekahu memɨtawikweitsitɨarienikɨ.
PRO 18:11 Kiekari mɨtɨrɨkaɨye mukurarutɨarie hepaɨ katinimaika xiku tita waɨkawa mɨrexeiyakɨ, meta kuraru 'amatitɨtɨ mɨkayu'unanɨa hetsiena nunuwame kani'erieka kemɨrexeiyakɨ mɨxiku.
PRO 18:12 Muyuta'ɨre yukɨmana kaniyutaxɨtɨamɨkɨ, kemɨ'ane tixaɨtɨ mɨkarayuyeitɨa 'aixɨa tixeiyarietɨ kanayeitɨariemɨkɨ.
PRO 18:13 Mɨka'uka'iyari kaniyutewiyatsitɨmɨkɨ, xɨka 'aixɨa kati'enawetɨ waruta'eiya.
PRO 18:14 Yuwaɨriyatɨ kemɨtiuka'eniwa kananayewemɨkɨ mɨtikuye, ¿matsi kemɨ'aneta mukayuwaɨriya keranayeweni yuhiwerietɨ?
PRO 18:15 Kemɨ'ane mɨtiuyemate yu'iyaritsie katinimaiweni, memɨtemaiwawe mɨtiuyemaikakɨ mekanikuwaɨtɨweni.
PRO 18:16 'Imikierikɨ naitsarie kitenietsie katineuyepierikeni, meta yaxeikɨa teɨteri memɨmamariwawe yukitenietsie mepɨmeteheuyepirieni.
PRO 18:17 'Itsɨkame hɨxie kemɨ'ane matɨari mieme maniuka kename 'axakatiuyuri 'utaitɨ, peru hipatɨta mekani'axɨakuni memunenierixɨ yame'utiyuatɨ kename 'axatiuyuri.
PRO 18:18 Kakaɨyari 'imieri mayetɨrɨkaɨye kaneutiparitɨwani, 'imatɨrieka pɨhekɨare kemɨ'ane heitserie mexeiya.
PRO 18:19 Matsi pukwaniwe ta'iwa temɨnɨtɨanikɨ keyuri kiekari naitsata heunatɨkaime, kepauka tewi mɨtiyuxaneta tepɨa 'itupari warita mutuika hepaɨ 'aneme kanexeiyani yu'iyaritsie.
PRO 18:20 Tewi pɨhɨne tita mɨtikuxatakɨ, meta putahuxarɨwa yatikuxatatɨ.
PRO 18:21 Neni tɨrɨkariya kanexeiyani tukari mɨrapitɨanikɨ meta mɨranawairienikɨ, 'apepɨrapiniyarieni 'atenikɨ kepemutayɨ.
PRO 18:22 Kemɨ'ane yu'ɨya mukaxei temawierika kanikaxeiyamɨkɨ: Yawé 'inaki'erietɨ mɨtiyetuirikɨ.
PRO 18:23 Tixaɨtɨ mɨkarexeiya katiniku'iwawani, xikuta kanita'eiyamɨkɨ 'ihekatɨ.
PRO 18:24 Mekanixuaweni hipatɨ hamikutsixi 'axamɨraku'anetsie memumatsi'atɨanikɨ, hipatɨta hamikutsixi mekanixuaweni 'aixɨa mete'u'iyaritɨ keyuri 'a'iwa.
PRO 19:1 Matsi 'aixɨa pɨ'ane tixaɨtɨ karexeiyatɨ peru 'aixɨa tikamietɨ, keyuri kayuwaɨriyatɨ teɨteri muwaparewienikɨ meta 'axatiniukitɨ.
PRO 19:2 'Aixɨa pɨka'ane pekareutamaiwetɨ xɨka petiutsutɨani, kemɨ'ane muyutimexɨitɨani mɨkɨ puyutewinɨani.
PRO 19:3 Tewi mɨka'uka'iyarikɨ 'ayumieme yuhuye peuyehɨpa, meta Yawé hetsiemieme puyeha'awe.
PRO 19:4 Kemɨ'ane mɨxiku hamikumama mekaniyumɨireni, matsi kemɨ'ane tixaɨtɨ mɨkarexeiya hamikuya piku'eiri.
PRO 19:5 Kemɨ'ane 'uniereme muyuxata tiku'itawatɨ mɨkɨ katinika'enitsitɨariemɨkɨ, yaxeikɨata kemɨ'ane mɨti'itawa pɨkareuyehɨwiyarieni.
PRO 19:6 Xikutsixi waɨkawa hamikutsixi mekaniwareuxeiyani, yunaitɨ teɨteri mekaniwatemawikuni 'etsiwa 'imikierikɨ.
PRO 19:7 Kemɨ'ane tixaɨtɨ mɨkarexeiya 'iwamama mekanixani'erieka, matsiri hamikumamatɨtɨ mepɨkahenuku'erieni. Tsepanetɨ mɨwakuwaune memiparewienikɨ, hawaikɨ pɨkawarekaxeiya.
PRO 19:8 Kemɨ'ane timaitɨ 'amuyeika mɨkɨ yukɨmana yu'iyaritsie kaniyunaki'erieka, kemɨ'ane yuhetsie mɨtimaiwe 'aixɨa pɨtiyeyani.
PRO 19:9 Kemɨ'ane 'uniereme muyuxata tiku'itawatɨ mɨkɨ katinika'enitsitɨariemɨkɨ, kemɨ'aneta mɨti'itawa mɨkɨ kanika'unariemɨkɨ.
PRO 19:10 Mɨkayuwaɨriya hipame muwaparewienikɨ 'aixɨa pɨka'ane witsimɨtiuye'anetsie mayekanikɨ, meta 'aixɨa pɨka'ane waɨriyarika mɨti'uximaya te'aitamete memanuyetei mɨtiwata'aitɨanikɨ.
PRO 19:11 Mɨtimaiwe heitseriemekɨ yakatinikamieni katiniyukanenimayaka, matsi witsimɨtiuka'iyari kaninenimayaka kemɨ'ane 'axamiyuri.
PRO 19:12 Maye mahiwa hepaɨ kani'aneni ti'aitame haxɨaya, kepauka mɨkɨ muyutemawie 'ɨxa mɨhatuiyarie hepaɨ kani'aneni.
PRO 19:13 Temaikɨ 'axamɨtiuka'iyari yupaapa kanihiweritɨaka, 'uka muwikie mayu'eriya haa mɨkatsuke hepaɨ yɨkɨna katini'uximatɨaka.
PRO 19:14 Kii meta tumini rapaapa katinaku'eiririemɨkɨ, 'uka mɨtimaiwe Yawé 'imikierieya kɨnaya hetsiemieme kanihɨkɨtɨni.
PRO 19:15 Kemɨ'ane mɨyɨ'ɨraxie kwinimieme katinikuneni xeikɨa, meta kaniyehaakamɨneni.
PRO 19:16 Kemɨ'ane 'inɨari niukiyaritsie yamɨtikamie mɨkɨ yuhetsiemieme kaneye'atɨaka, matsi kemɨ'ane mitixani'erieni kanimɨmɨkɨ.
PRO 19:17 Tixaɨtɨ mɨkarexeiya xɨka tumini pe'umini Yawé pekaniniɨtɨaka. Mɨkɨ Yawé pumerakapitɨani 'aixɨa kepemɨtiuyurikɨ.
PRO 19:18 'Aniwe keneheitseritɨaka mexixi 'akuxi yu'ɨxatsitɨarinɨa, matsi pepɨka'iparewieka mɨmɨnikɨ peka'ita'ɨxatsitɨayu.
PRO 19:19 Kemɨ'ane mayu'eriya waɨkawa katinika'eniexɨamɨkɨ 'uximatɨarikakɨ, kemɨ'ane minɨtɨamɨkɨ matsi waɨkawa piyehaxɨatɨani.
PRO 19:20 Kemɨ'ane 'ɨxatsi mɨ'enie kaniyuwaɨriyani 'aixɨa mɨtitahɨawarienikɨ, matsi waɨkawa timaiwetɨ kanayeimɨkɨ.
PRO 19:21 Tewi waɨkawa puyu'iyaritɨa yu'iyaritsie yamɨtiyurienikɨ, matsi 'imatɨrieka Yawé kemɨtinake yapɨtiyɨni.
PRO 19:22 Yunaitɨ teɨteri mekanitakwewieka kemɨ'ane wa'enietɨ muwatanaki'erienikɨ, matsi 'aixɨa pɨ'ane tixaɨtɨ mɨkarexeiyani keyuri ti'itawatɨ.
PRO 19:23 Yawé 'ayemakatɨ xɨka 'uyeikani tukari kaniukaxeiyamɨkɨ, hamatɨana 'akaniuyeikamɨkɨ 'aixɨa 'iyari meta katiuka'eniwatɨ.
PRO 19:24 Mɨyu'ɨraxie xakɨtsie xeikɨa kaneukamemeni, matsi 'akuxi kaneiyehɨaka mɨramikiwanikɨ yuteta paitɨ.
PRO 19:25 Kemɨ'ane mɨtiyukatawe'erie ke'ukuweiyaxɨani, 'ana 'atsimɨkatimate kemɨreuyewetse yamɨtiyurienikɨ niereme yapɨretimani, kemɨ'ane mɨtiuyemate keneutaheitseritɨa 'ana tiuyemaitɨa kanayeimɨkɨ.
PRO 19:26 Kemɨ'ane yupaapa mɨtinawatsiriwa meta yumaama takwa paitɨ manuyehɨpa, mɨkɨ temaikɨ mɨka'uka'iyari meta mɨka'uyukatewiya kanihɨkɨtɨni.
PRO 19:27 Temaikɨ, xɨka ne'ɨkitsika peka'u'enieni, 'ɨxatsi 'aixɨa mɨ'ane pekaniku'eirimɨkɨ.
PRO 19:28 Kemɨ'ane 'uniereme yuxatatɨ mɨtiku'itawa mɨkɨ tita mɨtiheitserie kaninanaimaka, 'axatiyuruwame teta kanayeneikani tita 'axamɨti'ane xeikɨa.
PRO 19:29 'Iwaɨyɨ kaniha'aritsieka mɨtiuyukatawe'erie hetsiemieme, mɨkayuwaɨriya teɨteri muwaparewienikɨ kanikuweiyaxɨamɨkɨ.
PRO 20:1 Xɨka winu 'anu'ieni ka'uka'iyaritɨ payani, yaxeikɨa nawa xɨka 'anu'ieni teɨteri pɨwaxamurieni, xewitɨ 'ietɨ timaiweme hepaɨ pɨkatiku'eriwa.
PRO 20:2 Ti'aitame kepauka mɨha'a maye muyutahaxɨatɨwa hepaɨ kani'aneni, kemɨ'ane miyehaxɨatɨani tukarieya pukweriwa'aneni.
PRO 20:3 Kemɨ'ane haxɨa mɨnɨtɨawe 'aixɨa pɨrahɨawarɨwa, matsi 'axamɨtiyuriene yutemawietɨ pitsutsutɨwame.
PRO 20:4 Mɨyɨ'ɨraxie kepauka mɨkatakwietsana pɨkaka'eni, kepauka 'itsanaxa maye'ani pɨreuyehɨaka peru pɨkarexeiyani.
PRO 20:5 Tewi kemɨtiku'eriwa haa 'ameukateewa hepaɨ pɨ'ane, matsi kemɨ'ane mɨtimaiwe yapauka peitimaitɨyeika.
PRO 20:6 Yumɨiretɨ mɨpaɨ meputiyuane kename 'ahetsie metewiya, ¿kemɨ'ane pɨyɨwe tewi 'aixɨa mɨtiuka'iyari mɨtaxeiyakɨ yuri mɨti'eririekakɨ?
PRO 20:7 'Aixɨa katinixeiyarieka kemɨ'ane 'aixɨa 'anemekɨ 'amuyeika, Niwemama yupaapa hepaɨ meteyurietɨ 'aixɨa mekani'itɨarieka.
PRO 20:8 Kepauka ti'aitame yu'uwenitsie 'amayerɨni wataxanetake, mɨkɨ 'ana xeinieriyarikɨ tinaime 'axamɨti'ane katinaku'itiwani.
PRO 20:9 ¿Kemɨ'ane mɨpaɨ pɨtayɨni: «Ne'iyari kani'itiyaka 'axamɨti'ane katiniumaweni»?
PRO 20:10 Tiwɨwɨtɨwame 'axamɨ'ane meta 'inɨaritsie mɨtiyukwamana: mɨkɨ tihutame Yawé pɨtixani'erie.
PRO 20:11 'Ikɨ temaikɨ kemɨtiyuriene teɨteri yamepɨtemate, kemɨtiyuriene yemekɨ xɨka 'aixɨa ti'aneni yatɨ hawaikɨ.
PRO 20:12 Tanakatekɨ temeu'enanakɨ meta tahɨxitekɨ temeunenierenikɨ, mɨkɨ tihuhutame Yawé katiniutiwewieni.
PRO 20:13 Pekunetɨ xeikɨa tixaɨtɨ perexeiyatɨ pepɨka'ayani, matsi pɨta peti'uximayatɨ 'ikwai pekanexeiyakamɨkɨ 'anayuhayewame.
PRO 20:14 Tinaweme mɨpaɨ kanaineni: «Tixaɨtɨ pɨkatiyunaki'erie 'utaitɨ», matsi 'arikeketa mɨpaɨ kanainemɨkɨ 'aixɨa pɨ'ane.
PRO 20:15 Huru waɨkawa kanixuaweni meta tetexi witsi'anenetɨ, matsi waɨkawa pɨraye'axe timaiweme 'ɨxatsieya kemanɨyɨne.
PRO 20:16 Xɨka xeime hetsiemieme pera'akatuani kemɨ'ane pemɨka'imatetsiemieme, tixaɨtɨ pepɨtitawawiyarieni pemɨtiyetuanikɨ 'akamixa 'emutsuye paitɨ pekaneuyehɨamɨkɨ.
PRO 20:17 Tewi mɨti'itawa witsira'anekame pɨtikwa'a xeime tiu'itaiyaka, matsi 'imatɨrieka mɨkɨ tewi kanitahɨnimɨkɨ xiekari 'axamɨ'ane tetana meutawiwieni hepaɨ.
PRO 20:18 Kepemɨti'a'ɨwiyanikɨ kene'enieka memɨtemaiwawe wa'ɨxatsika, matsi pemɨyɨwekaxɨanikɨ waɨkawa mɨrayukwitɨnetsie.
PRO 20:19 Kemɨ'ane niukiperai mɨhɨkɨ tinaime pɨraxatawe teɨteri memɨtehetimanikɨ, kemɨ'ane waɨkawa memutiniuka wahamatɨa pepɨka'axewiriyani.
PRO 20:20 Kemɨ'ane yupaapa yumaama wahepaɨtsita 'axamutaine, mɨkɨ kanimɨmɨkɨ yemekɨ yɨwipa kaniyuhayewakɨ.
PRO 20:21 Tita pemɨra'iwaxɨ pekati'uximayatɨ, 'imatɨrieka temawierika pepɨkahexeiyani.
PRO 20:22 Hatsuaku mɨpaɨ pepɨkahaineni: «Yanepɨrekapitɨani mɨkɨ 'axamɨnetsi'uyurikɨ». Yawé yuri ketine'eririeka mɨkɨ pumatsiparewieni.
PRO 20:23 Yawé tiwɨwɨtɨwame 'axamɨ'anene meta 'inɨaritsie mɨtiyukwamana, mɨkɨ tihutame Yawé pɨtixani'erie.
PRO 20:24 Tewi kemɨtimie Yawé kaniwitɨximeni. ¿Tewi yukɨmana yuhuye keretimani?
PRO 20:25 Pukweriwa'ane xɨka Yawé hɨxie kename petiyetuani hetsɨana timieme pehaitɨ, matsi 'arikeke xɨka yapekatikayani kepemutayɨ 'aixɨa pɨka'ane.
PRO 20:26 Ti'aitame mɨtimaiwe tɨriku manuyexɨrɨwa hepaɨ pɨtiyuriene, mɨkɨ 'axateyuruwamete murinata hepaɨ kaniwareuyetɨxɨni.
PRO 20:27 Tewi 'iyarieya Yawé kɨxemeya kanihɨkɨtɨni, temɨtemaiwawenikɨ tahetsie ketemɨ'anene meta tataɨta.
PRO 20:28 Nenimayatsika meta tita yuri mɨraine ti'aitame kanitɨrɨkariyani, mɨkɨ tiyukanenimayatɨ xeikɨa yu'uwenitsie kanayeixani.
PRO 20:29 Temari witsikememɨteheu'erie mɨkɨ kaniwatɨrɨkariyatɨni, meta 'ukirawetsixi yamemɨtekahu mɨkɨ wamutuxaiya mɨixa wiyari memu'uwa kaniwa'inɨaritɨni.
PRO 20:30 'Iwaɨyɨ mɨtiyukukuine pu'uaye meta 'aixɨa kamaniyurimɨkɨ, xɨka pekuweiwani matsi 'aixɨa pekaniyɨmɨkɨ 'a'iyaritsie.
PRO 21:1 Ti'aitame 'iyarieya 'aki'utua haa muhane hepaɨ kani'aneni Yawé yatinɨ'akaku, 'itanɨ'awakaku mɨkɨ hakewa meinake.
PRO 21:2 Yunaitɨ teɨteri 'aixɨa meteyuriekame mekaniyu'erieka, matsi Yawé pɨtatsixeiya ta'iyaritsie ketemɨteyuriku.
PRO 21:3 Kepauka teɨteri kemɨtiheitserie yamemɨteyurie, mɨkɨ Yawé pinake keyuri mawari.
PRO 21:4 Kemɨ'ane mɨtiyukatawe'erie yu'iyaritsie meta timaiweme muyu'erie, meta 'axateyuruwamete wahepaɨ xɨka tiyurieneni mɨkɨ 'axamɨti'ane pɨtihɨkɨ.
PRO 21:5 Kepauka 'aixɨa mɨtiuyu'iyaritɨani: 'aixɨa pɨtiyɨni, kepauka mexɨiwa mɨtiuyurieni: 'axapɨtiyɨni.
PRO 21:6 'Itarikakɨ xɨka tiukaxeiya waɨkawa pɨtiparike yapauka haiwitɨri hepaɨ peru pɨmɨya winiyari hepaɨ.
PRO 21:7 Memɨteyukananaima yɨkɨmana mekaniyuka'unakuni, memɨkayuwaɨriyakɨ heitseriemekɨ yamemɨteyuriekakɨ.
PRO 21:8 Kepauka tewi 'aixɨa mɨkatiuyeika huyeya tunitɨ payani, matsi kemɨ'ane heitseriemekɨ 'amuyeika huyeya kanixeuraɨyeni.
PRO 21:9 Matsi 'aixɨa kati'ane 'etsi'uyeyeukaku mayekani, keyuri kii 'apameta 'uka mayu'eriya hamatɨa.
PRO 21:10 'Axatiyuruwame 'axamɨti'anetsie xeikɨa kaniyu'iyaritɨaka, hatsuaku 'aixɨa tiyurienetɨ pɨka'ayani yuhepaɨ tewi hetsiemieme.
PRO 21:11 Kepauka 'axamɨtiuka'iyari mɨtika'enitɨarieni, 'ana mɨtiyukatawe'erie yapɨretimani, kepauka mɨtimaiwe mɨ'ɨxatsitɨarie, 'ana mɨkatimaiwe yapɨretimani.
PRO 21:12 Heitseriemekɨ yamɨtikamie 'axatiyuruwame kiiya kanixeiyani, meta kemɨtika'unarieni kanixeiyani.
PRO 21:13 Kemɨ'ane tixaɨtɨ mɨkarexeiya mɨka'enieni ra'iwawakaku, mɨkɨtatsiere yaxeikɨa petatsuani 'anari xewitɨ pɨka'ita'eiya.
PRO 21:14 'Awie 'imikieri xɨka pe'utuituarieni haxɨa kaninɨtɨaweni, 'ana kwitɨwa pekaninɨtɨarieka kepemɨtiha'akai.
PRO 21:15 Tewi heitseriemekɨ yamɨtikamie pinake muyutemawieka kepauka hipatɨ hepaɨna memɨteyurie, matsi 'axatiyuruwame kanimaka xeikɨa.
PRO 21:16 Kemɨ'ane mɨtihayewa 'aixɨa tiyurienetɨ yuhuyeta, mɨkɨ yapauka mɨkite watsata kaniyuhayewamɨkɨ.
PRO 21:17 Kemɨ'ane 'ixɨarari minake tixaɨtɨ karexeiyatɨ payani: winu xeikɨa mɨnaki'eriekɨ meta witsimɨtiu'ɨatɨka mɨkɨ hatsuaku waɨkawa rexeiyatɨ pɨkahayani.
PRO 21:18 'Axamɨtiyuriene 'aixɨa mɨtiyuriene hetsiemieme katinayukatuamɨkɨ, tiyumiekame meta tinawayame mepɨtehayukatuani teɨteri 'aixɨa memɨte'u'iyari wahetsiemieme.
PRO 21:19 Matsi 'aixɨa pɨ'ane makumawetsie pemukani 'axaɨta, matsi 'aixɨa pɨka'ane 'uka mɨha'a meta mayu'eriya hamatɨa pemukanikɨ.
PRO 21:20 Timaiweme kiitana waɨkawa witsipɨtiuye'ɨa meta xikutɨriya pɨtihɨne, matsi mɨkayuwaɨriya muwaparewienikɨ hipame katinitsewiximaka.
PRO 21:21 Kemɨ'ane heitseriemekɨ yamɨtikamie meta mɨtiyukanaki'erie, mɨkɨ tukari kanikaxeiyamɨkɨ, 'aixɨa ti'aneme pɨtikaxeiya meta 'aixɨa pɨraxaxatsiwani.
PRO 21:22 Mɨtimaiwe memɨtɨrɨkawi wakiekaritsie kaniye'amɨkɨ kaniwara'iwamɨkɨ, meta wa'ixumeri kananuta'unaxɨamɨkɨ ka'uniweme mɨkɨ memɨ'eriekai.
PRO 21:23 Kemɨ'ane mɨyukweriwayurie kemɨtikuxatakɨ, mɨkɨ hatsuaku hipatɨ mepɨka'i'uximatɨani.
PRO 21:24 Mɨtiyukatawe'erie mɨkɨ puwatewiyatsitɨa hipame meta pɨtiyuyuriya, meta kemɨtiyuta'ɨrekɨ xeikɨa hipame 'axapuwayurie.
PRO 21:25 Mɨyu'ɨraxie hiwe'erikakɨ kanimɨmɨkɨ, mɨkati'uximayatamɨkɨkɨ,
PRO 21:26 tukarikɨ xeikɨa kanaka'iyuniwani tihiwe'erietɨ, matsi heitseriemekɨ yamɨtikamie katiniyetuaka 'iyarieya ya'anekaku tixaɨtɨ katiwakweririetɨ.
PRO 21:27 Yawé 'axateyuruwamete wamawari pɨxani'erie, meta tsiere kepauka 'axa'anemekɨ mawari memɨyetua mɨkɨ pɨxani'erie.
PRO 21:28 Kemɨ'ane 'uniereme muyuxata ti'itawatɨ mɨkɨ kanika'unariemɨkɨ, matsi kemɨ'ane yuri mɨtikuxata kemɨtiunierixɨ pupitɨarieni yamɨtayɨnikɨ kemɨtiunierixɨ.
PRO 21:29 'Axamɨtiuka'iyari kemɨtiyuhɨawixɨ kename 'aixɨa 'ane putaine, matsi tewi heitseriemekɨ yamɨtikamie kemɨtiuyeikakɨ kaniyuti'eriexɨamɨkɨ.
PRO 21:30 Tewi kemɨtimaiwe Yawé hɨxie tixaɨtɨ pɨkatihɨkɨ, meta tiuyemaitɨ, 'ɨxatsitawetɨ tixaɨtɨ pɨkatihɨkɨ kemutaine.
PRO 21:31 Yukawayu kanikuha'aritɨwani kuyaxa 'imieriyari tukaritsie mieme, matsi kemɨ'aneta mɨrayu'iwa Yawé yatipitɨakaku pɨrayu'iwani.
PRO 22:1 Matsi 'aixɨa pɨ'ane pemumatiwanikɨ 'aixɨa petiuka'iyaritɨ, keyuri huru meta pɨrata waɨkawa pehexeiyatɨ xeikɨa.
PRO 22:2 Mɨxiku meta tixaɨtɨ mɨkarexeiya mɨkɨ yaxeikɨa mepɨ'anene, mɨkɨ yuhutame Yawé kaniwarutiwewieni.
PRO 22:3 Kemɨ'ane mɨtimaiwe 'axamɨti'ane katinixeiyani mɨkɨ 'ateewa puyeyeika, matsi mɨkatimaiwe mana kaniuyeyeikani 'ayumieme pɨtiuka'eniwa.
PRO 22:4 Tixaɨtɨ pekare'ayeitɨatɨ Yawé pe'ayemakatɨ mɨpaɨ pekatinipitɨariemɨkɨ, waɨkawa pepɨrexeiyani 'aixɨa pepɨrahɨawarɨwani meta tukari pepupitɨarieka.
PRO 22:5 'Axateyuruwamete wahuyeta xuya puxuawe meta winiyari, matsi kemɨ'ane yutukari mɨ'ɨwiya mana pɨka'uyeyani.
PRO 22:6 'Aniwe 'etsimuyumate kenekuxaxatɨwani huye 'aixɨa mɨ'ane, kepauka 'ukiratsi mayani hatsuaku pɨka'iku'eirieni.
PRO 22:7 Tixaɨtɨ mɨkarexeiya xiku katini'uximayatsiriwametɨni, waɨriyarika mekateniwa'uximayatsirieka memɨtewarapiniriekɨ.
PRO 22:8 Kemɨ'ane 'axa'anekamekɨ muka'etsa mɨkɨ 'axati'aneme katinika'itsanamɨkɨ, Yawé ha'atɨ yu'itsɨkɨ kanika'unamɨkɨ.
PRO 22:9 Kemɨ'ane mɨtiyukanenimaya mɨkɨta Kakaɨyari 'aixɨa kaniyuriekamɨkɨ, tixaɨtɨ memɨkatehexeiya mɨtiwamikwakɨ.
PRO 22:10 Keneuku'eiri kemɨ'ane mɨtiyukatawe'erie 'ana 'imieri pukumawere, 'ana kayuwatɨ pɨtamare tierika meta tewiyarika.
PRO 22:11 Kemɨ'ane yu'iyaritsie mɨti'itiya mɨtinaki'erie mɨkɨ kanipitɨarieka 'aixɨa mɨti'anekɨ mɨtaniunikɨ, mɨkɨ ti'aitame kanihamikutani.
PRO 22:12 Yawé mɨtimaiwe pɨ'ɨwiya kemɨ'ane waɨkawa mɨtimate, matsi kemɨ'aneta mɨti'itawa niukieya kani'uxiwe'erieka.
PRO 22:13 Muyu'ɨraxie mɨpaɨ kaniutaineni: «Maye takwa peyeika, mana kaye'utɨa netsihetatsana».
PRO 22:14 'Uka hipatɨ memikumaɨwa tenieya mɨkɨ putsu 'emeukatewa hepaɨ kani'aneni, mɨkɨta muwa kaneukahɨiyamɨkɨ kemɨ'ane hamatɨana muyutaxewire Yawé 'ihekakaku.
PRO 22:15 'Axamɨtiuyurienikɨ yutemawietɨ temaikɨ hetsie kaniyekani, matsi kɨyekɨ kuweiwatɨ ti'ɨkitɨatɨarietɨ 'ana pɨretimani.
PRO 22:16 Xɨka tixaɨtɨ mɨkarexeiya petiunawatsirieni xiku pehayeimɨtɨ, xɨka waɨkawa 'imikieri xiku petikumikwani, matsi pɨta 'akɨmana tixaɨtɨ pekarexeiyatɨ pepa'ayeitɨwa.
PRO 22:17 Memɨtemaiwawe waniuki kene'enieka yemekɨ kememutiyuane, 'a'iyaritsie 'aixɨa ketineu'ahɨawi kenematikɨhɨawe ne'ɨkitɨarikatsie.
PRO 22:18 Matsi 'aixɨa kani'aneni pemeixeiyani 'ataɨta paitɨ ne'ɨkitsika, meta pe'ikuxatatɨ witsi'anemekɨ.
PRO 22:19 Yawé hetsie yuri ketine'eririeka, 'ekɨ nekamatiniuta'ɨkitɨani 'ikɨ tukaritsie.
PRO 22:20 Ne nematsi'uti'utɨiri xeitewiyari heimana tamamata xatsikayari, mana niuki kanayehuni temaiwawemete wa'ɨxatsi.
PRO 22:21 'Ikɨ niuki yuri maitɨka kametinita'ɨkiatɨamɨkɨ pe'ihiwe'eriekaku, kɨmana 'aixɨa pemɨtiwata'eiyakɨ kemɨ'ane memetsita'iwawiya.
PRO 22:22 Tixaɨtɨ mɨkarexeiya pepɨkananaimaka, mɨkɨ tixaɨtɨ mɨkarexeiyakɨ, meta 'itsɨkate wahetsɨa pepɨkawaxanetani mɨkɨ parewiya mekaneuyehɨaka.
PRO 22:23 Yawé tixaɨtɨ mɨkarexeiya hetsie kanitanuamɨkɨ, kemɨ'ane naime mɨtinawairieni mɨkɨta naime pɨtinawaiyarieni.
PRO 22:24 Teɨteri memɨteyukananaima pepɨkawahamikutaneni, meta memayu'eririya wahamatɨa pepɨka'uyeikani,
PRO 22:25 nɨka ke'axamemɨteyurikɨ pewaruta'ɨke, 'ekɨta nɨka winiyaritsie wahepaɨ pe'ahɨani.
PRO 22:26 Mɨrapine hetsiemieme pepɨkare'akatuayani, meta pepɨkarapika xeime hetsiemieme,
PRO 22:27 'ekɨ xɨka peka'iyemanani ketitakɨ pemɨrekapitɨani, pekaninawaiyariemɨkɨ naime 'ahupume.
PRO 22:28 Pepɨka'ikupatani kwie 'inɨariyari meripaitɨ mieme, kememɨte'u'inɨaritaxɨ tatutsima meripaitɨ miemetexi.
PRO 22:29 ¿Tewi xeime yemekɨ 'aixɨa mɨtiu'uximayata petixexeiya? Mɨkɨ te'aitamete wahetsɨa pɨti'uximayaka, teɨteri memɨkamatiwa wahetsɨa pɨkati'uximayaka.
PRO 23:1 Kepauka ti'aitame hetsɨa pemɨtikwani, kwiyemekɨ keneu'a'ɨwiya ketita 'ahɨxie mɨrapine.
PRO 23:2 Xɨka kwinimieme peti'akwaiwieka, yapauka pepɨkatikwaka.
PRO 23:3 'Ikwaiya witsimɨ'ane pepɨkahiwe'erieka, matsi mɨkɨ 'ikwai kwamanarika kanihɨkɨtɨni.
PRO 23:4 Pepɨkati'a'uxitɨaka xiku pemayanikɨ, kwinimieme pepɨkatihiwe'erieka.
PRO 23:5 ¿Kamɨtsɨ pemixeiya petiyɨwe?, matsi pumawe. Wa'atɨ wa'anate manexɨani hepaɨ mekani'aneneni, mɨkɨ mekananɨwɨxɨakuni xeikɨa kwixɨri wahepaɨ.
PRO 23:6 Mexa 'aurie pepɨka'utiyeixani xeime tewi mɨtiukakwerie hamatɨa, meta 'ikwaiya witsimɨ'anene pepɨkahiwe'erieka,
PRO 23:7 mɨkɨ kanihɨkɨtɨni 'axatiyukɨhɨawetɨ mumatsi'inie, mɨpaɨ kanitayɨmɨkɨ «ketinekwaka ketine'ieka», matsi 'iyarieya yaka'anekaku pumatikɨhɨawe.
PRO 23:8 Naime pekatinanatihayamɨkɨ ketita pemɨtiutikwai, 'ekɨ kepemɨtitixatɨa tixaɨtɨ pɨkarayani hetsienamieme.
PRO 23:9 Mɨkayuwaɨriya muwaparewienikɨ hipame pɨkaheuyewetse pemi'ɨxatsitɨaka, 'anari mɨkɨ matsiyuriyatɨ kanayeimɨkɨ tsepa 'ɨxatsi pemikuxaxatɨwa.
PRO 23:10 Pepɨka'ikupatani kwie 'inɨariyari meripaitɨ miemete kemɨtiu'inɨatsie, tɨɨri nutuite wakwie pepɨkawanawairieka,
PRO 23:11 matsi waɨkawa kanitɨrɨkaɨyeni wahetsie nunuwame, mɨkɨ wahetsie kanitanuamɨkɨ pemɨkawatsewiximanikɨ.
PRO 23:12 'Aixɨa ketineu'ena 'a'iyaritsie meta kepemɨti'ɨkitɨarie, 'ana pemɨtimaiwenikɨ naime yapepɨretimani.
PRO 23:13 Temaikɨ peheitseritɨatɨ pepɨka'ihayewani, tsepa pemikuwaxɨa mɨkɨkɨ pɨkamɨni.
PRO 23:14 Matsi yaperehɨawetɨ keneukuwaxɨa, mɨkɨ mɨpaɨ katiniyutawikweitsitɨamɨkɨ mɨkite watsata.
PRO 23:15 Neuxei temaikɨ xɨka petimaiwetɨ 'a'iyaritsie pe'ayani, neta ne'iyaritsie neyutemawietɨ nekanayeimɨkɨ.
PRO 23:16 Yaxeikɨa waɨkawa netaɨta paitɨ nekaninetemawiekamɨkɨ, kepauka 'akɨmana 'aixɨa pemɨtikuxata kemɨreuyewetse.
PRO 23:17 'A'iyaritsie pepɨkatihiwe'erieka 'axateyuruwamete waɨkawa kememɨteheuxeiya, matsi pɨta Yawé pe'ayemakatɨ meta pe'akwerietɨ yaketinekamieni yuheyemekɨ.
PRO 23:18 Mɨpaɨ peti'atemawietɨ pe'ukiratsitɨtɨ pepɨmɨni, titakɨ pemɨtita'ikwewa mɨkɨ hatsuaku pɨkaka'unarieni.
PRO 23:19 Temaikɨ, kenene'enieka meta waɨkawa ketinemaiweni, 'ahuyeta heitseriemekɨ keneumieni 'aixɨa petiyurienetɨ.
PRO 23:20 Kwinimieme memɨteyu'iwawie wahamatɨa pepɨka'uyeikani, meta kwinimieme memɨteyukwaiwawie wahamatɨa,
PRO 23:21 kwinimieme memɨteyu'iwawie meta kwinimieme memɨteyukwaiwawie mɨkɨ tixaɨtɨ mekatehexeiyatɨ mepakɨne, memɨyɨ'ɨraraxiekɨ 'ixuriki tsatsanime mepanakatɨxɨani.
PRO 23:22 Kene'enieka 'apaapa mumatsi'ayexei, 'amaama pepɨka'uxieka kepauka waɨkawa mɨtseɨyeni yuwaiyaritsie.
PRO 23:23 Tita mɨtiyuri meta mɨtimaiwenikɨ mɨ'ayumieme 'ahetsie keneupitɨa, meta pemɨheitseritɨariekakɨ meta pemeitimaitɨyeikanikɨ, meta pepɨka'itsewiximaka.
PRO 23:24 Temaikɨ yamɨtikamie yupaapa waɨkawa kanitemawieritɨaka, meta kemɨ'ane yuniwe timaiweme mexeiya kaniyutemawieka.
PRO 23:25 Mekeyutemamawieka 'apaapa meta 'amaama, mɨkɨ mematsi'utinuiwitɨakɨ.
PRO 23:26 Temaikɨ, yakenetineutahɨawi 'aixɨa peti'akɨhɨawetɨ 'a'iyaritsie pemumienikɨ, nehuyeta keneumieni pepɨkaheuyewautseni.
PRO 23:27 Karikɨ 'uka tuminikɨ mɨyuwitɨnɨa putsu 'emeukatewa kanihɨkɨtɨni, meta 'uka mɨka'a'ɨya putsu 'amuwakuyewa kanihɨkɨtɨni.
PRO 23:28 Mɨkɨ 'uka 'ukitsi muwahupie tinawayame hepaɨ kaniyɨaneni, mɨkɨ 'ukitsi yɨ'ɨitama wahetsie memɨkatewiyanikɨ xeikɨa puwakuwaune.
PRO 23:29 ¿Kemɨ'ane pɨwahetsiemieme hiwerika? ¿Kemɨ'ane mepɨte'uka'eniwani? ¿Kemɨ'ane pɨwahetsiemieme 'imieri? ¿Kemɨ'aneta niukixiya pɨwahetsiemieme? ¿Kemɨ'aneta yakɨ xeikɨa mepɨte'uka'eniwani? ¿Kemɨ'aneta puwahetsiemieme hɨxite mukuyuyuawi?
PRO 23:30 Kemɨ'ane puteyu winu mayema mɨka'utatuaya, meta kemɨ'ane mɨkatihayewa hehekwame manu'ienikɨ.
PRO 23:31 Pepɨka'aku'ɨwiyani winu kemɨ'anekɨ, meta tekɨxita yematɨ kemɨtiumerɨkakɨ, meta tsepa witsikemukɨ'ɨare,
PRO 23:32 karikɨ mɨkɨ kuu mayu'eriya mɨrakeni hepaɨ kani'aneni, 'imatɨrieka mɨrakenitsie kukuiniyakɨ katinamiemɨkɨ.
PRO 23:33 'Ahɨxitekɨ yɨkɨ ti'aneneme pepɨtixeiya, 'anari 'axapetiyukɨhɨawetɨ pekanayeimɨkɨ.
PRO 23:34 Haramara hixɨapa muhauxime hepaɨ pepɨti'amaika, meta kanuwa nɨ'awame hepaɨ pepɨyɨaneni peheuyuyehɨatɨ.
PRO 23:35 Mɨpaɨ peputaineni: «Nepeutiweiyaxɨa, matsi pɨkanetsihekwinixɨ, Nekaneutiweiyaxɨani, matsi pɨkanetsi'ukukuine. Kepauka pemanutaniere mɨpaɨ pepɨti'erieni, tawarita nepikuwauni 'etsiwa nemenu'ienikɨ».
PRO 24:1 'Axateyuruwamete kememɨteyurie meta tita memɨtehexeiya pepɨkatihiwe'erieka, meta pemuwanɨkakɨ pepɨkakuwauneni,
PRO 24:2 mɨkɨ meteyukananaimatɨ xeikɨa mekaniu'uwani, meta hipame 'uximatɨarika memuwapitɨanikɨ xeikɨa mekatenikuxatani.
PRO 24:3 Waɨkawa rakumaitɨ pɨyɨwe kii mutsutɨani, kepemɨtiuyematekɨ kii tenarieya peputsutɨani.
PRO 24:4 'Aixɨa perakumaitɨ 'akiita pepɨtitahɨniya, witsimɨti'anenekɨ meta waɨkawa mɨraye'atɨkakɨ.
PRO 24:5 Tewi mɨtimaiwe waɨkawa kanitɨrɨkaɨyeni, meta kemɨ'ane meu'ena matsi waɨkawa tɨrɨkaɨyetɨ payeixime.
PRO 24:6 Kepauka pemɨ'atamieni kaneuyeweka pemɨ'atimaixɨanikɨ, meta pemɨra'a'iwanikɨ yumɨireme wa'ɨxatsi keneu'eni.
PRO 24:7 Xewitɨ tewi 'axamutiyuriene yutemawietɨ hatsuaku timaiwetɨ pɨka'ayani, meta teɨteri wahɨxie 'aixɨa mɨtayɨni pɨkayɨwe.
PRO 24:8 Kemɨ'ane 'axatiyurimɨtɨ muyuha'aritɨa, mɨkɨ 'axatiyuruwame katiniterɨwariemɨkɨ.
PRO 24:9 'Axamɨtiyuriene yutemawietɨ kemɨtiku'eriwa 'axamɨti'ane kanihɨkɨtɨni, teɨteri memɨteyukatawe'erie mekaniwaxani'erieka.
PRO 24:10 Kepauka pemu'uximatɨarietsie pemɨkayuwaɨriya, 'ekɨ pepumatsiɨkɨ pemɨkatɨrɨkaɨyekɨ.
PRO 24:11 Keniwarutawikweitsitɨa kemɨ'ane memɨkwini yuheyemekɨ, keniwarukunuitɨa kemɨ'ane memɨte'uka'eniwa mekwiximetɨ.
PRO 24:12 Tsepa mɨpaɨ pemutaine, «Ne 'atsinepɨkatimaikai», Kakaɨyari hɨrixɨa pɨtimaikai 'a'iyari kemɨtiyukɨhɨawekai. Meta 'atukari mɨ'ɨwiya yapɨtimate, mɨkɨ tewi 'akatinapiniyariemɨkɨ kemɨtiu'uximayataxɨ.
PRO 24:13 Xiete kenanu'i, 'ekɨ temaikɨ nemɨmatsinaki'erie, mɨkɨ 'aixɨa kana'aneni, yemekɨ witsikatinakakani 'anenitsie xietexi waxieteyari.
PRO 24:14 Mɨpaɨta katinakakani xɨka waɨkawa petimaiweni 'a'iyaritsie, heitseriemekɨ xɨka yapetikamieni Kakaɨyari pɨmatsiparewieka, tita pemɨtitakwewie mɨkɨ hatsuaku pɨkaka'unarieni.
PRO 24:15 Heitseriemekɨ yamɨtikamie kie pepɨkahupaneni 'axatiyuruwame hepaɨ, meta kiitana pepɨkatinanaimaka.
PRO 24:16 Tewi heitseriemekɨ yamɨtikamie tsepa 'atahutamexɨa mekawe, mɨkɨ kananukukemɨkɨ, matsi 'axateyuruwamete mekanekaxɨrɨweni, matsi hatsuaku tawari mepɨka'anuku'uni.
PRO 24:17 Kemɨ'ane metsi'aye'unie kepauka mekawenitsie pepɨka'atemawieka, meta pepɨka'atemawieka 'a'iyaritsie mɨkɨ mɨtiuka'eniwakɨ.
PRO 24:18 Yawé mɨkɨ pɨka'inakire 'ekɨ kepemɨtiku'eriwa, hikɨ mɨkɨ hepaɨtsita Yawé kemɨtiha'akai pɨtihayewa.
PRO 24:19 'Axateyuruwamete wahepaɨtsita pepɨka'uyeha'arɨweni, meta pepɨka'awaɨriyani pemuwa'ɨkenikɨ yamemɨkatekahu,
PRO 24:20 matsi 'axatiyuruwame tixaɨtɨ pɨkatitakwewie, kemɨ'ane yamɨkatikamie kɨxemeya kanitɨmɨkɨ.
PRO 24:21 Temaikɨ, Yawé kenayemakaxeni meta yaketinekamieni ti'aitame hetsiemieme, Yawé memu'uxie wahamatɨa pepɨka'axewiriyani,
PRO 24:22 yapauka xekatenika'eniexɨakuni, 'atsipɨkatimatsiɨkɨ tita 'umuramie.
PRO 24:23 'Ikɨ kanihɨkɨtɨnita tawarita kememutiyua temaiwawemete: 'Aixɨa pɨka'ane hipame xeikɨa waparewietɨ kepauka 'iwaurika muwewienitsie.
PRO 24:24 'Axamɨtiuyuri xɨka hetsiena karahɨiyani kename 'atsikatiuyuri, 'ana yunaitɨ nuiwarite hetsienamieme 'axameputiyuaneni mɨkɨ 'itsɨkame hepaɨtsita meta mekaniti'uxiwe'erikuni.
PRO 24:25 Kemɨ'ane heitseriemekɨ mɨti'aita mɨkɨ 'aixɨa pɨtixeiyarieni, 'axatiyuruwame hetsie mɨrahɨakɨ 'ayumieme pɨnaki'eriwa.
PRO 24:26 Kemɨ'ane 'aixɨa mɨtikuxata yuri mutaine, mɨkɨ witsikani'aneni 'itsiya hepaɨ.
PRO 24:27 'Awaxa meri keneukuha'arita, meta 'aixɨa ketinakuyuri pemaku'etsatsie, mɨpaɨ meri petiyurieme 'arikeketa 'akii pepɨtawewieni.
PRO 24:28 Peti'itawatɨ 'ahepaɨ tewi hepaɨtsita pepɨkatikuxatani 'itsɨkame hɨxie, pepɨkatiku'itawani 'atenikɨ.
PRO 24:29 Mɨpaɨ pepɨkahaineni: «Kemɨnetsi'uyuri mɨkɨ, neta yaxeikɨa nekatinekapitɨamɨkɨ».
PRO 24:30 Mɨyu'ɨraxie mati'etsatsie nekaniuyeyani, meta 'atsimɨkatimate kaxie ma'iteɨritsie 'aurie nekaniuyeyani.
PRO 24:31 Xuya xeikɨa naitsarie kananaye'ukaitɨni, meta tupiriya 'etsiya xeikɨa kananukanakaitɨni, tetexi kuraruyari petaxɨriyatɨkatei xeikɨa.
PRO 24:32 Kenemɨrenierixɨ ne'iyaritsie nepika'ɨnaxɨ, netixeiyatɨ mɨpaɨ nepɨretima:
PRO 24:33 'etsiwa peheukukutsɨtɨ, meta 'etsiwa pe'uka'uxipiwetɨ, meta 'atapa pe'awietɨ,
PRO 24:34 tixaɨtɨ pekarexeiyatɨ pepayani tiyumemiwame 'ahetsɨa munuani hepaɨ pɨtiyɨni, meta pereuyehɨatɨ tinawayame 'ixipara 'akwetɨ 'ahetsɨa munuani hepaɨ pumatiyurieni.
PRO 25:1 'Ikɨta hipatɨ tawari temaiwawemete kememɨte'ɨ'ɨxatsita kanihɨkɨtɨni Tsarumuni meka'utɨa, 'Etsekiyaxi Kura kwieyaritsie ti'aitame, te'utɨwametemama kememɨteheka'ɨkixɨ.
PRO 25:2 Kakaɨyari 'aixɨa kerahɨawarɨwani tixaɨtɨ mɨti'awietakɨ, matsi witsimepɨ'itɨarie te'aitamete kepauka memikaxexeiya.
PRO 25:3 Te'aitamete kememɨteku'eriwa yu'iyaritsie 'atsitepɨkatemate, yaxeikɨa tepɨkatemate muyuawi kemeutitewa meta kwieta kemeukatewa.
PRO 25:4 'Axamɨ'ane pɨrata hetsie keneuka'iti, mɨkɨtsie payeneni tepɨakɨ tiwewiwame mɨtitiwewienikɨ.
PRO 25:5 'Axamɨtiyuriene ti'aitame hetsɨa keneupata, 'ana ti'aitame yu'uweni heitseriemekɨ mɨti'aitanikɨ payeitɨani.
PRO 25:6 Ti'aitame hɨxie mariweme pepɨka'ayuyeitɨwani, meta kwinimieme pepɨka'utaineni 'ahetsiemieme.
PRO 25:7 Matsi pɨta 'aixɨa pɨyɨni ti'aitame xɨka mɨpaɨ metiutahɨawe: «'Ena 'ahurawa kenatiye'a», teɨteri memumariwawe wahɨxie pepɨka'atewiyatsitɨaka. Tita pemɨtiuxei 'ahɨxitekɨ,
PRO 25:8 yapauka pepɨkatihekɨatani mɨrewatixanetsiwatsie, nɨka 'ahepaɨ tewi, yɨkɨ 'utayɨme metsi'utewiyatsitɨani.
PRO 25:9 'Ahepaɨ tewi hepaɨtsita 'aixɨa keneu'ayuri ke'axapemutayɨkɨ, meta xeime 'awie mɨpaɨ pepɨkarahɨaweni mɨkɨ 'axakemɨtiuyurikɨ.
PRO 25:10 Kapa xewitɨ metsi'u'enieme metsi'utewiyatsitɨani, 'anari 'aixɨa pepɨkarahɨawarɨwani.
PRO 25:11 Huru manitsana pɨrata tsikɨiwitiyaritsie mɨyetei hepaɨ kani'aneni, niuki witsimɨ'ane mɨpaɨ kani'aneni xɨka 'aixɨa tiuxatsieni.
PRO 25:12 Hanira meta kuka tɨwame hurukɨ muwewiya hepaɨ kani'aneni, timaiweme matsi'utatieyu xɨka yemekɨ pe'i'enieni.
PRO 25:13 Nɨ'ariekame mɨraye'atɨwa 'aixɨa 'anemekɨ kaniwaxeripitɨaka 'ɨwi hepaɨ kepauka muxɨkanitsie, yukutsiyari puwaɨririe muyuwaɨriyanikɨ.
PRO 25:14 Haiwitɨri meta 'eka wiyeri mɨkakaxɨrɨwa hepaɨ, mɨpaɨ tewi kani'aneni kwinimime mutaine yakatikamietɨ.
PRO 25:15 'A'inɨkai pe'ikɨhɨawetɨ kemɨ'ane kwiepa mɨti'aita kemɨtiku'eriwa pepipata, meta petiu'akanaki'erietɨ petikuxatɨtɨ waɨkawa katinikemaka.
PRO 25:16 Xɨka xiete pe'ukaxeiya, kwinimieme pepɨkatikukwa'ani, nɨkahɨrixɨa waɨkawa pehenu'ieyu pe'utihayani.
PRO 25:17 'Ahepaɨ tewi kie yapepɨkatiyaneni, kapa 'utiwaɨripieme metsi'utixani'erieni.
PRO 25:18 Kemɨ'ane 'itsɨkame hɨxie mɨtikuxata ti'itawatɨ yuhepaɨ tewi hepaɨtsita, mɨkɨ 'ixipara meta titsuname meta 'ɨrɨ manuyemɨtsɨ hepaɨ kani'aneni.
PRO 25:19 Kepauka pemɨ'uximatɨariekatsie xɨka yuri peti'erieka tewi tiyukwamaname hetsie, tamé kɨmietɨ kemɨtiyukukuine meta ra'ɨka 'anumuritɨ mɨpaɨ pepɨti'amaika.
PRO 25:20 Xɨka muyuhiwerie hetsiemieme 'utakwika, winu matsina haiyatsie meuwirieni hepaɨ kani'aneni, yatɨni mawetɨ muyeikani hepaɨ kani'aneni kepauka muhaɨtɨnitsie.
PRO 25:21 Mumatsi'aye'unie xɨka yehaakamɨneni ketineumikwa, meta xɨka heuharimɨkɨni keneuharitɨa.
PRO 25:22 Mɨpaɨ petiyurienetɨ pekanitewiyatsitɨamɨkɨ ke'axamɨtiuyuri hepaɨtsita, 'ana Yawé kametiniyetuiriemɨkɨ 'a'iwarika.
PRO 25:23 Tayetatsie 'eka mayeneika wiyeri kani'atɨwani, yutenikɨ 'axamemutiyuane teɨteri xeikɨa mekaniwahaxɨatɨaka.
PRO 25:24 Matsi 'aixɨa kani'aneni 'etsi'uyeukaku pemayekani, keyuri kii 'apameta 'uka mayu'eriya hamatɨa.
PRO 25:25 Haa haɨtɨme yɨkɨipitsie 'anatiwakitɨ manuhareni hepaɨ, kani'aneni niuki 'aixɨa manuyɨne 'ateewa paitɨ mieme.
PRO 25:26 Haixa muwaikarie meta haa putsuta mieme mu'uayemarie, hepaɨ kaniyɨmɨkɨ tewi heitseriemekɨ 'amuyeika kepauka 'axamɨtiuka'iyari mitaweranariyatsie.
PRO 25:27 Pɨkayɨwe waɨkawa xiete mɨkwaka, meta 'aixɨa pɨka'ane 'aixɨa pemɨrahɨawarɨwanikɨ pemɨtikuwaɨneni.
PRO 25:28 Kiekari muka'unarie kakurarutɨiyarietɨ, tewi yu'iyaritsie mɨpaɨ kani'aneni yukɨmana mɨkatiyu'aitɨawekɨ.
PRO 26:1 'Ɨwi taxarixa pɨkamieme, meta witari 'itsanaxa pɨkamieme, meta 'aixɨa pɨka'ane mɨkayuwaɨriya hipame muwaparewienikɨ hepaɨtsita 'aixɨa mɨraniuwani.
PRO 26:2 Wiiki mukuwiene xeikɨa yatɨni 'itsitame yu'itɨa mɨkahexeiya hepaɨ, mɨpaɨ kani'aneni tewi 'axamɨ'itɨarienikɨ yamɨtiutawawie matsi hetsiena pɨkaye'ani.
PRO 26:3 Kwitaxi kawayutsixi wawayame kanihɨkɨtɨni, meta pirenu puxu hetsiemieme kanihɨkɨtɨni, yaxeikɨata mɨkayuwaɨriya hipame muwaparewienikɨ kaneuyeweka mukuweiyaxɨanikɨ.
PRO 26:4 'Axamɨtiyuriene yutemawietɨ kemɨtiuniuka mɨpaɨ pepɨkatiku'eiyani, kapa 'ekɨta hepaɨna petiyurienetɨ pe'ayani.
PRO 26:5 Tewi mɨkayuwaɨriya muwaparewienikɨ hipame keneuta'eiya kemɨreuyewetse, yɨkɨmana waɨkawa timaiweme mɨkayu'eriekakɨ.
PRO 26:6 Mɨkayuwaɨriya hipame muwaparewienikɨ nɨ'ari pexɨka'ayeituani, yɨ'ɨkatsie yuxiteka mɨtiukakukuineni hepaɨ 'anetɨ payani.
PRO 26:7 Tewi mɨkayuwaɨriya hipame muwaparewienikɨ 'ɨxatsieya tixaɨtɨ pɨkatiyunaki'erie, mɨka'uyeiwe 'ɨkateya tixaɨtɨ mɨkatiyunaki'erie hepaɨ kani'aneni.
PRO 26:8 Mɨkayuwaɨriya hipame muwaparewienikɨ 'aixɨa mɨrahɨaweni tixɨatɨ pɨkatihɨkɨ, tete texɨpametsie 'atatɨarietɨ mehɨiyani hepaɨ katinimatsiɨkɨni.
PRO 26:9 Mɨkayuwaɨriya hipame muwaparewienikɨ kemɨtikuxata, tawekame xuya mamayatsie mutatseni hepaɨ kani'aneni.
PRO 26:10 Tupikɨ timɨmɨme watamɨmɨtɨ mɨtiwakukuinitɨwa yunaime mana memuyekɨka hepaɨ kani'aneni kemɨ'ane mɨkayukuhɨawe muta'ini yukie.
PRO 26:11 Tsɨkɨ 'ukunuaka tawarita yuhayari kemɨtiukukwa'a hepaɨ, mɨpaɨ kani'aneni mɨkayuwaɨriya teɨteri muwaparewienikɨ yaxeikɨa kemɨtiyuriene.
PRO 26:12 ¿Tewi petimate kemɨ'ane timaiweme muyuxata? Tewi mɨkayuwaɨriya muwaparewienikɨ hipame mɨkɨ hetsie matsi katinitakwewiyaka keyuri mɨtiuyemate.
PRO 26:13 Muyu'ɨraxie mɨpaɨ kaniutaineni: «Huyeta tiyukwa'ame kaneyeikani. Kaye'utɨma maye kaneyeikani 'akuxɨnitɨ».
PRO 26:14 'Itupari kemɨranakuwautse mɨrawiyatɨkatsie, yaxeikɨa muyu'ɨraxie mɨpaɨ yu'itaritsie ta'aurie katinawautseni.
PRO 26:15 Mɨyu'ɨraxie xakɨtsie xeikɨa kanikameka, matsi 'akuxi kaneiyehɨaka mɨramikiwanikɨ yuteta paitɨ.
PRO 26:16 Mɨyu'uraxie kwinimieme timaiweme kaniyuxatani, kename 'atahutame temaiwawemete waruta'ɨxatsitɨawe.
PRO 26:17 Kemɨ'ane mɨrayukwitɨnetsie meuyehake ka'inierietɨ, tsɨkɨ nakateyatsie tiwietɨ manukuhana hepaɨ kani'aneni.
PRO 26:18 Xewitɨ heuyuyehɨatɨ mɨtiutatuaxa hepaɨ, 'ɨrɨ tatɨkaimekɨ watakukuyatɨ,
PRO 26:19 mɨpaɨ kani'aneni kemɨ'ane yuhamiku mɨkwamana mɨpaɨ rehɨawetɨ: «Netɨ nepɨka'imainekai».
PRO 26:20 Tai pɨtɨni xɨka kɨyexi ka'anutanetɨarieni, niuki peraixi memɨkahaxuawetsie 'imieri kanikumawerimɨkɨ.
PRO 26:21 Tɨxari tɨɨ kanayeikani, kɨyexikɨ tai kananutatataweni, tewi haxɨa mawauwe 'imieri kanitsutsutɨwametɨni.
PRO 26:22 Niuki perai niukieya yemɨkɨ witsikatini'enierieka, wataɨta paitɨ kaniye'axeni.
PRO 26:23 Kwitame pɨratakɨ muwewiya haxu xariyari hetsie muyeka, tewi mɨpaɨ kani'aneni yu'iyaritsie mɨtihɨniya 'axamɨti'ane.
PRO 26:24 Kemɨ'ane mɨtiyuka'uxiwe'erie yuniukita katini'awietani, matsi yutaɨta 'axakatiniyurimɨkɨni.
PRO 26:25 Kepauka witsimetikuxaxatɨwa yuri pepɨkati'eririeka, 'iyarieyatsie 'axamɨti'ane mɨtihɨnekɨ.
PRO 26:26 Tsepa 'uxiwe'erika muti'awietaxɨ yuhetsie, matsi mɨkɨ mɨirikɨa memayuxeɨrietsie katinitahekɨatsiemɨkɨ ke'axamɨtiuyuri.
PRO 26:27 Putsu xɨka 'utawewieni muwa kaneukawemɨkɨ, meta tete 'amɨnena xɨka hakaina yuhetsie kanikahɨamɨkɨ.
PRO 26:28 Mɨti'itawa kemɨ'ane 'axamɨtikɨhɨawe mɨkɨ kani'uxiwe'erieka, witsimɨtiuxaxata wakwamanatɨ kaniwarekaxɨriemɨkɨ.
PRO 27:1 Pepɨka'uyuta'ɨreni 'uxa'a kepemɨtiyurieni hetsiemieme, 'atsipemɨkatimatekɨ 'uxa'a kemɨtiyɨni.
PRO 27:2 'Ekɨ 'akɨmana 'ahetsiemieme 'aixɨa pepɨkahaineni, hipatɨ pɨta 'aixɨa mekehaitɨkani 'ahepaɨtsita.
PRO 27:3 Tete pahete, xiekari pahete, matsi waɨkawa pahete kepauka tewi mɨha'a yutemawietɨ 'axamɨtiyuriene.
PRO 27:4 Haxɨa 'axapɨtiyuruwame meta pɨtiyu'uname, yaxeikɨata 'uxiwe'erika xewitɨ pɨka'inewie.
PRO 27:5 'Aixɨa pɨ'ane xɨka hekɨa heitserie 'utatierieni, 'aixɨa pɨka'ane mɨnaki'eriwani 'awiexeikɨa.
PRO 27:6 Waɨkawa matsi pepinaki'erieka 'ahamiku kepauka mumatikwinitɨa, keyuri mɨmatsi'aye'unie kepauka mɨmatsi'itseni.
PRO 27:7 Kemɨ'ane mɨkaheuhaakamɨkɨ, xiete kanixani'erieka, matsi kemɨ'ane meuhaakamɨkɨ, tsepa mɨratsiwi katinakakani hetsienamieme.
PRO 27:8 Wiki yu'itɨa kemɨtiuku'e'eiriwa tsepa hakewa, yaxeikɨata tewi mɨpaɨ 'ateewa katineyeikani yutɨɨriyama waku'eirieme.
PRO 27:9 Mixaxi meta witsimɨtiu'ɨatɨka 'iyari kanitemawieritɨwametɨni, 'ekɨta witsikepemɨtiwaxeiya 'iwatamete mɨkɨta waɨkawa pewaparewiekaku mekaniyuwaɨriyani.
PRO 27:10 Pepɨka'iku'e'eiriwani 'ahamiku meta 'apaapa hamikuya. Xɨka pe'a'uximatɨaka 'a'iwa hetsɨa pepɨkaheumieni. 'A'iwa pɨkayɨwe 'ateewa kiekame matsi'uparewieni, 'akie 'ahurawa muka pɨta pɨyɨwe.
PRO 27:11 Temaikɨ, nematsinaki'erie xɨka petimaiwetɨ 'ape'uyeikani ne'iyari kaniyutemawieka, 'ana nekaniyɨwemɨkɨ nemɨwata'eiyakɨ kemɨ'ane memɨnetsi'uxiwe'erie.
PRO 27:12 Kemɨ'ane mɨtimaiwe 'axamɨti'ane katinixeiyani mɨkɨ 'ateewa kaniuyeyeikani, mɨkatimaiwe matsi mana kaniuyeyeikani 'ayumieme pɨtiuka'eniwa.
PRO 27:13 Kemɨ'ane yamɨtayɨni ka'imateme hetsiemieme kename rayukatuani yukemari paitɨ kaneuyehɨamɨkɨ, kemɨ'ane muyuyetuani 'uka xeime 'ɨyaya hetsiemieme yupiini tinaime mɨrexeiya katininawaiyariemɨkɨ.
PRO 27:14 Matsi xɨka pe'itawaɨritɨani 'ahamiku karima pe'utahiwatɨ ximeri paitɨ, mɨpaɨ pumatitahɨawe: «Ketitayari heu'erietɨ penetiutahiwi».
PRO 27:15 Haa mɨkatsuke katihayewatɨ kepauka muwiyenitsie, mɨpaɨ kani'aneni 'uka muyumieriwie.
PRO 27:16 Kemɨ'ane 'uka mɨyamɨ'ane mɨkemakaxɨani, 'eka mɨkemakata pɨyɨweni, meta pɨyɨwe hatseiti yumamatsie mukwewienikɨ.
PRO 27:17 Tepɨa hepaɨna tepɨakɨ xɨka 'atamɨani kanetaxikaunariyamɨkɨ, meta tewi yuhepaɨ teɨteri wahamatɨa katinetimamateni.
PRO 27:18 Kemɨ'ane piní 'iteɨriyari mɨ'ɨwiya mɨkɨ takariyari kanikakwaimɨkɨ, kemɨ'ane 'aixɨa mɨti'uximaya yukutsiyari hetsɨa, matsi 'aixɨa katinixeiyariekamɨkɨ.
PRO 27:19 Hatsie kemɨtihekɨa kepemɨraka'erie 'ahɨxie, meta tewi yu'iyaritsie mɨpaɨ katinimatsiɨkɨni.
PRO 27:20 Teukiya, mɨɨya meta tita teɨteri memɨtehiwe'erie metexeiyatɨ, hatsuaku wa'iyaritsie pɨkareuyeyeika.
PRO 27:21 Taipa pɨrata kani'inɨatsieka, huru huxunuta kani'inɨatsieka, tewi kani'inɨatsiekata kepauka hipatɨ 'aixɨa memaitɨka hepaɨtsitana.
PRO 27:22 'Axamɨtiyuriene yutemawietɨ tsepa meuyetɨxiwa heiwa meta hutarieka, tsepa pemitɨxɨni matatsie 'ikú hepaɨ, hawaikɨ pɨkanawaiyarieni kemɨtiyuriene.
PRO 27:23 Keneu'a'ɨwiya pemɨretimanikɨ kemeteheu'erie 'atewama, 'amuxatsima waɨkawa keniwa'ɨwiyani,
PRO 27:24 kepemɨrexeiya waɨkawa mɨkɨ pɨkatiteriwe, meta tumini tsepa pemexeiya tixaɨtɨ pɨkatihɨkɨ.
PRO 27:25 Kepauka mɨraka'etsitɨretsie 'ɨxa makuwatsienitsie meta matiyɨraxɨanitsie, meta hɨritsie paitɨ tupiriyate mukuxeɨriyanitsie,
PRO 27:26 muxatsi 'akemari mepɨmatsiyetuirieni, kapuratsixita peminanenikɨ hɨritsie 'amakuyewa,
PRO 27:27 mana pekaneixeiyakamɨkɨ kapuratsixi waretsiyari 'anayuhayewame, kɨmana xemɨteyumikwanikɨ yunaitɨ 'atɨɨriyama, meta yaxeikɨa yunaitɨ mete'uximayatsiriwamete.
PRO 28:1 'Axatiyuruwame kaniuyu'unarɨmeni tsepa xewitɨ mɨka'iweiya, matsi heitseriemekɨ yamɨtikamie kayuwatɨ 'apuyeika maye hepaɨ.
PRO 28:2 Kiekaritsie xɨka 'axatiyɨaneni, 'itsɨkate mepɨyutimɨmɨire, kepauka kuwexinaruri mɨtiuyemate, kayuwatɨ putamarike.
PRO 28:3 Kuwexinaruri tixaɨtɨ memɨkatehexeiya muwananaima, mɨkɨ wiyeri mɨtɨrɨkaɨye 'ekamatɨ waxa kemɨreuyehɨpa hepaɨ kani'aneni.
PRO 28:4 Kemɨ'ane 'inɨari niukiyari memuku'eiri 'aixɨa meputiyuaneni 'axateyuruwamete wahepaɨtsita, matsi kemɨ'ane memi'enie mekaniwa'uxiwe'erieka.
PRO 28:5 'Axateyuruwamete tita mɨtiheitserie mepɨkahetimaitɨkɨka, matsi kemɨ'ane Yawé memukuwautɨwe mɨkɨ naime mekatenimaika yamemɨtekahukɨ.
PRO 28:6 'Aixɨa kani'aneni tixaɨtɨ mɨkarexeiya heitseriemekɨ 'amuyeika, matsi 'aixɨa pɨka'ane kepauka xiku 'axa'anemekɨ muyeika.
PRO 28:7 Temaikɨ meti'enatɨyeika yakatinikamieni 'inɨari niukiyaritsie, matsi kemɨ'ane waɨkawa memɨtekwa'a wahetsie mɨtiwiya mɨkɨ yupaapa kanitewiyatsitɨaka.
PRO 28:8 Kemɨ'ane kwinimieme rana'iwamɨtɨ tumini muwaniɨtɨa, matsi kemɨ'ane muwanenimaya memɨkatehexeiya hetsie pɨta pɨtinakeni.
PRO 28:9 Kemɨ'ane 'inɨari niukiyaritsie yamɨkatikamie, Kakaɨyari mɨkɨ nenewierieya kani'uxiwe'erieka.
PRO 28:10 Kemɨ'ane heitseriemekɨ yamemɨtekahu xaɨtsie muwareukuyunitɨani, mɨkɨta yukɨmana yuwiniyaritsie kaniyuhɨamɨkɨ, matsi heitseriemekɨ yamemɨtekahu yu'iwarika 'amepɨtehapiniyarieni 'aixɨa mɨti'ane.
PRO 28:11 Xiku timaiweme kaniyu'erieka, matsi tewi tixaɨtɨ mɨkarexeiya rakumaitɨ yakatineitimamateni mɨkɨ kemɨtiyuriene.
PRO 28:12 Kepauka heitseriemekɨ yamemɨtekahu memɨtehayu'iwa kanimariweni wa'ixɨarari meta watemawierika, matsi kepauka yamemɨkatekahu memɨtehayu'iwa yunaitɨ teɨteri mekaniyuti'awiwietani.
PRO 28:13 Kemɨ'ane 'axamɨti'ane mɨti'awieta hatsuaku 'aixɨa pukatiyeyani, matsi kemɨ'ane muyutahekɨata 'axamɨti'ane mɨtiku'eirieni mɨkɨ katineuyehɨwiyariemɨkɨ.
PRO 28:14 'Aixɨa kani'itɨarieka kemɨ'ane Yawé yuheyemekɨ mayemakaxe, matsi kemɨ'ane yu'iyari mɨtse'iriya 'axa'anekɨa kaniyuhayewamɨkɨ.
PRO 28:15 Maye mahiwa meta hutse meuhakamɨkɨ hepaɨ, kuwexinaruri 'axamɨtiuka'iyari kani'aneni tixaɨtɨ memɨkateheuxeiya muwananaima.
PRO 28:16 Kuwexinaruri 'atsimɨkaretimaitɨyeika katininawayani teɨteri wakwamanatɨ, matsi kemɨ'ane mɨpaɨ mɨkatiyuriene mɨkɨ mɨixa tukari 'apuyeikani.
PRO 28:17 Kemɨ'ane tiyumieme mukuweiyariene, kaniyuku'unanemɨkɨ kepaukake mumierieni, xewitɨ tɨma pɨka'iparewieni.
PRO 28:18 Kemɨ'ane 'aixɨa mɨtixeiyarie heitseriemekɨ yamɨtikamie mɨkɨ kaniyutawikweitsitɨamɨkɨ, matsi kemɨ'ane 'axatiyurienetɨ 'amuyeika putsuta kaneukawemɨkɨ.
PRO 28:19 Kemɨ'ane yukwietsie mɨtikumaɨwa waɨkawa 'ikwai katinexeiyakamɨkɨ, matsi kemɨ'ane muyukuwie tixaɨtɨ karexeiyatɨ kanayeimɨkɨ.
PRO 28:20 Tewi heitseriemekɨ yamɨtikamie mɨkɨ waɨkawa 'aixɨa kani'itɨarieka, kemɨ'aneta mɨyumexɨitɨa xiku mayanikɨ tikwinitɨarietɨ pɨkahayewarieni.
PRO 28:21 'Aixɨa pɨka'ane hipame xeikɨa teɨteri muwaparewieka hipame yɨkɨ tiwaxeiyatɨ, hipatɨ 'axamekateniyurieka paa 'etsipemekɨtɨtɨ.
PRO 28:22 Kemɨ'ane mɨtiukakwerie xiku mayanikɨ puyumexɨitɨa, 'atsikatimaitɨ kepauka tixaɨtɨ karexeiyatɨ mayanikɨ.
PRO 28:23 'Imatɨrieka matsi hatsua 'aixɨa pɨtitahɨawarieni, kemɨ'ane mɨtiyutaheitseritɨani keyuri witsimutaine wakwamanatɨ xeikɨa.
PRO 28:24 Kemɨ'ane yupaapa meta yumaama mɨtinawatsiriwa, katihayewatɨ kename 'axakatiyuriene, mɨkɨ teɨteri 'axamemɨteyurie kaniwahamikutɨni.
PRO 28:25 Kemɨ'ane tumini mɨnaki'erie xeikɨa mɨkɨ waɨkawa kaniyumienemɨkɨ, matsi Yawé hetsie kemɨ'ane yuri mɨti'erie 'aixɨa kani'itɨariekamɨkɨ.
PRO 28:26 Xɨka tewi yuhetsiemieme yuri tiyu'eririeka mɨkɨ pɨkayuwaɨriya muwaparewienikɨ hipame, matsi kemɨ'ane timaiwetɨ yamɨtiyurieni kaniyutawikweitsitɨamɨkɨ.
PRO 28:27 Kemɨ'ane tixaɨtɨ mɨkarexeiya mɨparewie mɨkɨ tixaɨtɨ reuyehɨatɨ pɨkahayani, kemɨ'ane miti'uxiwe'erieni parewiya kemɨreuyehɨwa, mɨkɨ 'axakani'itɨariekamɨkɨ.
PRO 28:28 Kepauka yamemɨkatekahu memɨte'ayu'iwa, teɨteri mekaniyuti'awiwietani, kepaukata memukumaweriyarieni, 'aixɨa memɨteyurie 'aixɨa mekani'itɨariekuni.
PRO 29:1 Kemɨ'ane mɨixa tierikayarikɨ mɨkaheu'ena yapauka kanika'unariemɨkɨ kanenimayatsietɨ.
PRO 29:2 Kepauka heitseriemekɨ yamemɨtekahu memɨte'aitani teɨteri mepuyukatemamawieni, kepauka 'axateyuruwamete memɨte'aitani teɨteri mepɨte'uka'eniwa.
PRO 29:3 Kemɨ'ane mɨtimaiwenikɨ muyuwaɨriya, mɨkɨ yupaapa pɨtemawieritɨa, kemɨ'ane 'ukari 'axateyuruwamete wahamatɨa muyeika, mɨkɨ yutumini pɨxɨtɨa.
PRO 29:4 Kwiepa ti'aitame xɨka kemɨtiheitserie ti'aitani 'aixɨa pɨti'ane kiekariena, kemɨ'ane tuminikɨ memɨtehayukatuayanikɨ xeikɨa muwawawirie kiekari kanika'unani.
PRO 29:5 Kemɨ'ane yuhepaɨ tewi witsimɨtikuxaxatɨwa ti'itaiyatɨ, winiyari hɨxiena puteika.
PRO 29:6 'Axatiyuruwame ke'axamɨtiuyurikɨ pekawautse, matsi heitseriemekɨ yamɨtikamie yutemawietɨ putakwika.
PRO 29:7 Heitseriekamekɨ 'amuyeika puyu'iyaritɨa kememɨte'uka'eniwa tixaɨtɨ memɨkatehexeiya wahetsiemieme matsi waheima kaninuaka, matsi 'axatiyuruwame 'atsipɨkatimate ketita mɨtixatsiwa.
PRO 29:8 Memɨteyukatawe'erie kiekari mekanixamurieka, memɨtemaiwawe matsi waɨkawa kayuwatɨ mekaniwapitɨaka.
PRO 29:9 Kepauka mɨtimaiwe meta yutemawietɨ 'axamɨtiyuriene hamatɨa memuyutakwini, tsepa mutanawe yatɨni muyeha'a mɨkɨkɨ 'aixɨa pɨkatiyɨni.
PRO 29:10 Memɨteyumemiwa mekaniwa'uxiwe'erieka teɨteri 'aixɨa memɨte'u'iyari, meta heitseriemekɨ yamemɨtekahu mekaniwakwika.
PRO 29:11 Tewi mɨkayuwaɨriya hipame muwaparewienikɨ yuhaxɨa pɨkawahana, matsi kemɨ'ane mɨtimaiwe katinakumaika kemɨtiuyunɨtɨani.
PRO 29:12 Kwiepa ti'aitame xɨka memɨte'itawa xeikɨa wareu'enieka, yunaitɨ te'i'uximayatsiriwamete 'axamekateniu'iyarikakuni.
PRO 29:13 Tewi tixaɨtɨ mɨkarexeiya meta mɨtiyukananaima hamatɨa yaxeikɨa mekani'aneneni: Yawé mɨkɨ yuhutame kaniwapitɨaka memayenenierenikɨ.
PRO 29:14 Kwiepa ti'aitame heitseriekamekɨ xɨka 'aixɨa tikuyuruwani tixaɨtɨ memɨkateheuxeiya wahetsiemieme, mɨkɨ meta xiɨyarimama yuheyemekɨ heitserie mekanexeiyakakuni memɨtewata'aitɨanikɨ yuteɨterima.
PRO 29:15 Tewi xɨka ti'ɨkitɨarieka kuweiwatɨ timaiwetɨ kanayeimɨkɨ, matsi kemɨ'ane mɨkaheu'ena yumaama kanitewiyatsitɨaka.
PRO 29:16 Kepauka 'axateyuruwamete memɨyumɨire 'axamɨti'aneta kaniwaɨkawani, matsi teɨteri heitseriemekɨ yamemɨtekahu mekaniwaxeiyakuni kememɨte'atixɨriyani.
PRO 29:17 'Aniwe ketine'ɨkitɨaka, xɨka mɨpaɨ petiuyurieni 'arike 'aixɨa 'iyari pepuyeikani, 'ana temawierika pepexeiyani 'a'iyaritsie hetsienamieme.
PRO 29:18 Hakewa teɨteri 'atsimemɨkatehemate Kakayari kemaine, mekaneuyexɨrɨweni, 'aixɨa mekani'itɨarieka yamemɨtekahu 'inɨari niukiyaritsie.
PRO 29:19 Hawaikɨ niukikɨ xeikɨa pɨkayɨwe ti'uximayatame mɨtiti'ɨkitɨanikɨ, tsepa mumetsi'enie yapɨkatikayani.
PRO 29:20 ¿Tewi petimate kemɨ'ane kaheitimaixɨame mutaniuka? Tewi mɨkayuwaɨriya muwaparewienikɨ hipame mɨkɨ hetsie matsi katinitakwewiyaka keyuri mɨkɨ.
PRO 29:21 Kemɨ'ane tiyu'uximayatsiriwame mɨkaheitseritɨakai kepauka mɨkɨ mununutsitɨkaitsie, 'arikeke mɨkɨ yapɨkatikayani kemɨtita'aitɨani.
PRO 29:22 Tewi mayu'eriya 'imieri xeikɨa kanixuawitɨaka, meta kemɨ'ane mayumiewe waɨkawa 'axapɨtiyurie.
PRO 29:23 Kemɨ'ane muyuta'ɨre tixaɨtɨ pɨkarayani, matsi kemɨ'ane tixaɨtɨ mɨkarayuyeitɨa matsi mariwetɨ kanayeitɨariemɨkɨ.
PRO 29:24 Xɨka tenawayamete pewanɨka, 'ekɨ 'akɨmana pekani'a'uxiwe'erieka, kepauka memɨtiwiyarienitsie, 'itsɨkame hɨxie 'ahetsie pɨrahɨiyani, 'ekɨ 'atsipepɨkatayɨni.
PRO 29:25 Pewamakatɨ teɨteri 'akɨmana pepɨ'awiniya, kemɨ'ane Yawé hetsie yuri mɨti'erie kaniwikweitsitɨarieka.
PRO 29:26 Yumɨiretɨ parewiya ti'aitame hetsɨa mekanikuwautɨweni, matsi Yawé xeikɨa kanihɨkɨtɨni teɨteri heitserie muwapitɨani yuxexuime.
PRO 29:27 Yamemɨtekahu mekaniwa'uxiwe'erieka 'axamemɨteyurie, yaxeikɨata 'axateyuruwamete heitseriekamekɨ 'amemu'uwa mekaniwa'uxiwe'erieka.
PRO 30:1 'Akuhuxi niukieya kemɨtimaiwekai Kakehe nu'aya Matsaha kiekame. Tixaxatame niukieya. 'Ikɨ tewi mɨpaɨ kaniutayɨni: «Neuxei Kakaɨyari 'aku ne nepu'uxe, Kakaɨyari 'aku ne nepu'uxe meta nepɨwerani.
PRO 30:2 »Ne tewi kwinimieme 'atsinemɨkatimate nepɨhɨkɨ, 'etsiwa tɨma ne nepɨkatiuyemate tewi kemɨtimaiwe.
PRO 30:3 Nemɨtimaiwenikɨ 'akuxi ne nepɨkatanaki'eriwe, meta Kakaɨyari mɨpatsie nepɨkamate.
PRO 30:4 »¿Muyuawitsie kemɨ'ane panutitɨari meta kemɨ'ane mana pakane? ¿Kemɨ'ane 'eka puwiyawe yumamakɨ, yatɨni kemɨ'ane haramara pakawimawe? ¿Kemɨ'ane kwie manuye'atɨkanitsie pu'inɨataxɨ? ¿Kemɨ'ane yapɨtimate kepemɨtitewa yatɨni 'aniwe kemɨtitewa?
PRO 30:5 »Kakaɨyari niukieya naitɨ taikɨ puti'inɨatsie, Kakaɨyari kaniwaparewieka kemɨ'ane hetsɨana memɨtewautɨwe 'aixɨa memɨ'itɨariekakɨ.
PRO 30:6 Niukieya pepɨka'anutiyayatsani, kapa metsi'utatienikɨ meta peti'itawame matsiɨkɨme 'ahetsie rayeitɨanikɨ.
PRO 30:7 »Tihutame xeikɨa Yawé nepɨmatiwawirie, mexixi nekamɨwe yakenetineupitɨa.
PRO 30:8 Keneneparewieka nemɨkati'itawanikɨ, tixaɨtɨ nekarexeiyame pepɨkanetsihayeitɨwani meta xiku nemɨka'ayanikɨ, matsi pɨta paa xeitukariyaritsie mieme keneneyetuiriwani.
PRO 30:9 Waɨkawa xɨka nerexeiyani nepɨmatsihatɨmaiyawe, mɨpaɨ ne'utaitɨ: “¿Yawé kemɨ'ane pɨhɨkɨ?” Meta xɨka 'etsiwa xeikɨa nerexeiyanike tinawayame nepayeiwe, 'ekɨ nekakaɨyari 'axapemɨtitahɨawarienikɨ xeikɨa.
PRO 30:10 »Ti'uximayatame 'axapepɨkatikɨhɨaweni kutsiyarieya hɨxie, nɨka 'axape'itɨarietɨ pemayanikɨ mɨkɨ yametiutahɨawe meta yapetiuka'eniexɨani.
PRO 30:11 »Hipatɨ mekanixuaweni yupaapama 'axametewakumamatetɨ, meta yumaamama 'aixɨa mekatewarahɨawetɨ.
PRO 30:12 Hipatɨ mekanixuaweni me'itiyakame meyuxatatɨ, matsi 'akuxi mepɨkayu'itiewawe kememɨkate'itiyakɨ.
PRO 30:13 Hipatɨta mekanixuaweni waɨkawa meyɨwaweme meyu'erietɨ, mɨkɨ yunaitɨ mekaniwaxeiyani mewa'uxietɨ.
PRO 30:14 Hipatɨ tamé 'ixiparayari mekanexeiyani meta natsɨkwai nawaxayari, kwiepa memuwatikwanikɨ tixaɨtɨ memɨkatehexeiya, meta teɨteri memɨteheuyehɨwa 'ena kwiepa memu'uwa.
PRO 30:15 »Xuriya 'itseweme yuhutame yuniwema kaniwarexeiyani, mɨpaɨ mekaniutiyuaneni: “Kena, kena”. »Haikatɨ kanixuaweni 'inɨari hatsuaku memɨkahuxaiwawe, nauriekata mieme hatsuaku mɨpaɨ pɨka'utaine: “Nepɨwaɨripie”:
PRO 30:16 Teukiyapa, meta 'uka mɨkaniwewe, meta kwie hakɨ mɨka'utahɨpɨrike, meta tai hatsuaku mɨkakutɨtɨtse.
PRO 30:17 »Kemɨ'ane yupaapa mɨka'enie, meta yumaama mɨkaheu'enie, kwatsari mana mayeweritsie memu'uwa hɨxiteya meke'utikwani, meta maraikatsixi 'ayeniereme waiyarieya meke'utakwani.
PRO 30:18 »Haikatɨ kanixuaweni 'inɨari mɨnetsihɨxiyatsitɨa, matsi naurieka mieme nepɨka'uyɨwekaxɨa nemeitimanikɨ:
PRO 30:19 kwixɨ huyerieya kemɨtikuwiene muyuawitsie, kuu huyerieya tetetsie kemɨtikuyeika, kanuwa 'amɨpa huyerieya haramaratsie mɨyeyeika, meta 'uki 'uka 'iyarieya kemɨra'i'iwa.
PRO 30:20 »Mapaɨ katiniyurieka 'uka muwikie memɨkakɨnamama memikumaɨwa: tiutikwa'atɨ wayetereuxinatɨ, mɨpaɨ kaniutaineni: “Hawaikɨ matsi 'axanepɨkatiyuriwe”.
PRO 30:21 »Mɨkɨ haikatɨ 'inɨari kwie kaniwatayuitɨwani, naurieka miemeta yaxeikɨa pɨtiyuriene:
PRO 30:22 Waɨriyarika ti'uximayatame ti'aitatɨ mayanikɨ kanaye'aweni, tewi 'atsimɨkatimate 'ikwaiya mɨranayuhayewa.
PRO 30:23 'Uka mɨxani'eriwakai kepauka mɨtiwikieni, meta 'uka waɨriyarika ti'uximayatame ti'aitatɨ mayanikɨ yukutsiyari kiita.
PRO 30:24 »Yunaukatɨ kwiepa 'etsimetepepetɨ mekatenixuaweni, matsi waɨkawa metemaiwawetɨ keyuri temaiwawemete:
PRO 30:25 tsarɨxi mekatɨrɨkawitɨtɨ, yu'ikwaite taxata timieme mekateniuti'utani,
PRO 30:26 haitsɨrixita, yeutari 'etsimepepetɨ, mɨkɨ yuterɨ mekanexeiyani 'aitsie paitɨ,
PRO 30:27 'utsikarita tiyu'aitɨwame memɨkahexeiya, matsi yaxeikɨata mɨkɨ mekateniukɨkani kuyaxi wahepaɨ,
PRO 30:28 'atakwaixita, mekaniyuwiyanɨaka yumamakɨ, matsi mɨkɨta paratsiyuta paitɨ mekaneutahakeni.
PRO 30:29 »Yuhaikatɨta mekanixuaweni 'aixɨa mete'ɨkɨkatɨ, matsi naurieka mieme wahepaɨ 'aixɨa pɨtiuyeika:
PRO 30:30 maye, 'ɨrawetsixi watsata mɨtɨrɨkaɨye, tixaɨtɨ timakatɨ mɨka'ukununuwa,
PRO 30:31 wakanata 'uki yu'anatekɨ kanitɨrɨkaɨyeni, tsiputa 'uki yaxeikɨa, ti'aitameta yukuyaxima wahamatɨa kanitɨrɨkaɨyeni.
PRO 30:32 »Xɨka yamɨkatikamie hepaɨ petiuyeikani, kwinimieme petiu'ata'ɨretɨ, xɨka xewitɨ mɨpaɨ tiku'eriwani, kaneuyeweka yapauka muyutimaixɨanikɨ,
PRO 30:33 kwahu hayari xɨka retsita 'ukatuame xɨka 'iwakumuina kexiu kanihekɨarimɨkɨ, meta xɨka karima 'ukatsurixike xuriya ratsurita kaniwakanemɨkɨ, meta haxɨa xɨka 'utsutɨani kaniuyutakwixɨakuni».
PRO 31:1 Ti'aitame Remuheri niukieya kemɨtimaiwekai. Tixaxatame niukieya, maamaya kemɨtiti'ɨxatsitɨa niukiyari:
PRO 31:2 «¿Temaikɨ 'aku kepetiku'eriwa? ¿Temaikɨ 'aku, kepetiku'eriwa nemɨmatsi'utiniwexɨ? Neyutanenewieku Yawé 'ekɨ pɨmatsiyetua, ¿kehepaɨ nemati'ɨxatsitɨani?
PRO 31:3 'Atɨrɨkariya pepɨkayetuaka 'ukari wahetsie, mɨkɨ te'aitamete paitɨ mekaniwareuyexɨrɨwani.
PRO 31:4 »Remuheri 'aku, 'aixɨa pɨka'ane te'aitamete kaxie winuyari memɨ'ieka, meta nawa kuwexinaruritsixi memanuye'eni,
PRO 31:5 kapa metarɨwetɨ mehetɨmaiya 'inɨari niukiyari kemaine, meta tixaɨtɨ memɨkatehexeiya metewarunawairieni heitserie kememɨtehexeiya.
PRO 31:6 Memukwixime nawa memanu'einikɨ keniwarupitɨa, meta kaxie winuyari kemɨ'ane waɨkawa memɨyu'iyaritɨa.
PRO 31:7 Meke 'enu'ieni, memɨtehatɨmaiyakɨ tixaɨtɨ memɨkatehexeiyakɨ, tawariri memɨkahe'eriwanikɨ kememɨte'uka'eniwa.
PRO 31:8 »Kenewaparewieka yɨkɨmana memɨkaniuwawe 'itsɨkate wahɨxie, kenewanenimayaka wiuraxi meta nutuite.
PRO 31:9 Mɨkɨ wahetsiemieme keneutaniukani 'aixɨa memɨ'itɨarienikɨ, memɨkatehexeiya kenewanenimayaka memɨteheuyehɨwa wahetsie kenenuaka».
PRO 31:10 'Uka 'inɨari mayuyeitɨwa, ¿hakewa peikaxeiya? Matsi kwinimieme katinaye'aka keyuri tetexi witsimɨ'anene waɨkawa mɨraye'atɨka, yukie 'uyeikatɨ yapɨtikamie.
PRO 31:11 Kɨnaya matsi hetsiena kaneuwaɨreni, tixaɨtɨ 'iwarika pɨkareuyehɨwa.
PRO 31:12 Mɨkɨ naime kemɨtiyuriene 'aixɨa kani'aneni kɨnaya hetsiemieme, 'axapɨkatiyuriene kepaɨmexɨa tukari hamatɨana muyeikani.
PRO 31:13 Kanikuyeikani 'ikunanenetɨ muxa huxarieya meta rinu witsimɨ'ane 'ixurikiyari, yumamakɨ tikumaɨwatɨ katini'uximayaka yutemawietɨ.
PRO 31:14 Kanuwa 'amɨpapa yuharerutamete hepaɨ kani'aneni, mɨkɨ 'ateewa katinatɨtɨyeikani yu'ikwaite.
PRO 31:15 Ximeri paitɨ kananukukekani, yuniwema katiniwarutimikwani, meta yuparewiwamete yuhetsɨa miemete katiniwakumikwani.
PRO 31:16 Kwie xeiyame kemɨraye'aka kaninanaimɨkɨ: manata kaxie kanika'iteɨtamɨkɨ me'iwaxɨkɨ.
PRO 31:17 Yuwaɨriyatɨ katini'uximayaka, ximeri meta kwi taikai katiniutahayeikawani ka'uxetɨ.
PRO 31:18 Mɨkɨ yukɨmana katinimaika kemɨtiyuharerutani, yukɨxeme pɨkakutɨtsa tɨkarikɨ yamɨti'uximayakɨ.
PRO 31:19 Xeitapakɨ yumamakɨ kaniwiyakamɨkɨ muxa huxarieya, xeimekɨta 'utsikɨikɨ kanikaunakamɨkɨ.
PRO 31:20 Yumamakɨ ti'uximayatɨ tixaɨtɨ memɨkatehexeiya kaniwaparewieka, mɨkɨkɨ kaniwatuikani kemɨ'ane memɨteheuyehɨwa.
PRO 31:21 Tsepa muhaɨtɨ pɨkayu'iyaritɨa yuniwema wahetsiemieme, mɨkɨ yunaitɨ 'aixɨa memɨte'ukemarikɨ 'ɨkari memɨwawɨtɨatɨkakɨ.
PRO 31:22 'Itsiwame yukɨmana mɨkɨ kanitiwipani, meta rinu 'ixurikiyari 'aixɨa mɨ'anene kanitiwewiwani menakatɨkɨnikɨ meta mɨyɨtsikimaɨye.
PRO 31:23 Meta kɨnaya 'aixɨa katinimariwani yukiekaritsie, mɨkɨ katinihɨritɨarieka 'itsɨkate wahamatɨa hakewa mɨkɨ meme'uwa.
PRO 31:24 Rinu kemariyari wewietɨ kanituaka, meta hɨiyamete mɨtiwewiyatɨka tetuayamete katiniwatuirieka.
PRO 31:25 'Aixɨa katinamamatiwani meta teɨteri yunaitɨ 'aixɨa mepɨte'ixeiya, mɨpaɨ 'anetɨ pɨkama kemɨtiyɨnikɨ 'uxa'atɨni warie.
PRO 31:26 Kepauka mutikuxata, timaiwetɨ katinikuxatani, kepauka mɨti'ɨkita, wanaki'erietɨ kaniyɨaneni.
PRO 31:27 Yukie mɨkɨ yakatiniukani tanieretɨ, kepauka paa mukwa'a me'iwaxɨkɨ katiniutikwa'ani.
PRO 31:28 Tɨɨriyamama me'anuku'uwetɨ mekanitananakeni, kɨnayata yaxeikɨa kaniyutemawieka 'inaki'erietɨ:
PRO 31:29 «Yuwaɨkawatɨ 'ukari 'aixɨa memɨte'u'iyari mekanixuaweni, matsi 'ekɨ yunaime pekaniwara'iwani».
PRO 31:30 Katiniyukwamanani kemɨ'ane witsimɨtiyuxexeiya xeikɨa meta pɨkareutetere, matsi 'uka Yawé mayemakaxe 'aixɨa katinaniuwamɨkɨ hetsiena mieme.
PRO 31:31 'Uka pumatiwani naitsarie kemɨtiukaxuxuawere, meta 'uximayatsikayatsie naitɨ mɨtihekɨakɨ 'aixɨa pɨraniuwani.
ECC 1:1 'Ikɨ kanihɨkɨtɨni ti'ɨkitame niukieya, Rawiri nu'aya, Kerutsareme mɨti'aitametɨkai.
ECC 1:2 Mɨpaɨ kanaineni ti'ɨkitame: —Tita tixaɨtɨ temɨte'erie, tixaɨtɨ pɨkatihɨkɨ, naitɨ tixaɨtɨ pɨkatihɨkɨ.
ECC 1:3 ¿Ketita ra'iwa tewi, waɨkawa tiyurienetɨ 'ikɨ tukaritsie timieme?
ECC 1:4 Hipatɨ mepɨtakukuwe, hipatɨta mepɨtinunuiwa, matsi kwie yaxeikɨa kani'aneni.
ECC 1:5 Tau panatineika meta pakayuyuipike, mɨkɨ yumexɨitɨatɨ yuhuyeripa tawarita yu'ɨtɨma manatinenikɨ.
ECC 1:6 Tatsutɨa kaniu'ekani, tatsierieta hekututuketɨ, tawarita hekwamekɨ muku'ekakɨ yu'utɨma katihayewatɨ kaniu'ekani.
ECC 1:7 'Aki 'amɨpapa haa muhapane haramaratsie peukayuyuipike, peru hatsuaku haramara pɨkatahɨne. Tawarita yu'utɨma kani'atɨwani, mɨkɨ muhapanenikɨ 'axeikɨa.
ECC 1:8 Waɨkawa pɨkwaniwe nemɨtitaxatakɨ matsi waɨkawa kemɨtiyɨwe mɨtiutaxatakɨ. Naka matsi waɨkawa mɨpaɨ katineu'enamɨkɨni, Meta hɨxite pɨka'uxiwe mɨtanierenikɨ.
ECC 1:9 Meripaitɨ kemɨtiuyɨ mɨpaɨta katiniyɨmɨkɨ: ketita meripaitɨ mɨtiutiwewiya naitɨri katinihekɨaka, tawari tihekwatɨ pɨtiumawe 'ena muyuawitɨa.
ECC 1:10 Xewitɨ pɨyɨwe mɨpaɨ mutayɨni: «Neuxei 'ikɨ kanihekwanike». Matsi meripaitɨ katinixuawekaitɨni yuheyemekɨ, tame 'akuxi tekatinunuiwawawekaku.
ECC 1:11 Tame hikɨ hipame tepɨkawara'eriwa kememɨte'uyuri, ta'utɨmata memɨtinunuiwa 'atsimepɨkatehetimani ketemɨteyurie hikɨ.
ECC 1:12 Ne, Ti'ɨkitame, Kerutsareme nepɨti'aitametɨkai 'Ixaheritsixi watsata.
ECC 1:13 Nepɨnewaɨri yanemɨretimanikɨ kemɨti'anekɨ 'ena kwiepa, mɨpaɨ nepɨretima Kakaɨyari 'uximayatsika pɨtatsi'uku'eiriri waɨkawa haheteme tame yatemɨtekakɨnekɨ hetsiena.
ECC 1:14 Naime mɨpaɨ nepɨretima ketemɨteyurie 'ena kwiepa, pɨkatiyupata 'eka muweiyani hepaɨ kani'aneni.
ECC 1:15 Titunime mutaxeurariya pɨkayɨwe, meta pɨkayɨwe miti'inɨatakɨ kepaɨmetɨ meuyewetse.
ECC 1:16 Merikɨte nepɨneti'iyaritɨa: «Waɨkawa nepeukawe meta nepɨtimaiwe keyuri meripaitɨ te'aitamete Kerutsaremetsie, ne naimekɨ nepɨyɨwe nemɨtitiwaunikɨ netimaiwetɨ waɨkawamekɨ meta neheitimaitɨyeikatɨ.
ECC 1:17 Ne yemekɨ nepɨneyetua netimaiwetɨ nemayanikɨ, nekanimaikata mɨkayɨkɨhɨawe meta mɨka'uka'iyari, matsi mɨkɨ 'eka manuku'axe hepaɨ kani'aneni.
ECC 1:18 Matsi puyuri, »kepauka waɨkawa memɨtemaiwawe matsi waɨkawa kanixuaweni 'uximatɨarika, kepauka waɨkawa memɨtemate waɨkawa mepɨte'ukakukuine».
ECC 2:1 Merikɨte mɨpaɨ nekatiniunehɨawe: «Kamɨtsɨ nekatinita'inɨatamɨkɨ naime nemuyutemawieritɨanikɨ 'aixɨa muti'anekɨ matsi waɨkawa tukari nemɨnepitɨanikɨ». Peru tsepa mɨpaɨ nemɨtiuyuri tixaɨtɨ nepɨkatiukaxei.
ECC 2:2 Mɨpaɨ nepɨretima yutemawierikakɨ purukuyaneni xeikɨa, kemɨmatinake pe'uyeikatɨ mɨkɨ tixaɨtɨ pɨkatihɨkɨta.
ECC 2:3 Mɨpaɨta nekatiniuyɨhɨawe yanemɨretimanikɨ winu nekananu'ieni, mexi mɨpaɨ neretimaiximekai, nepɨneyetua nemɨka'uka'iyarini hepaɨ, yanemɨretimanikɨ tita 'aixɨa muti'ane tewi tikaxeiya kemɨtiyurienekɨ 'ena 'uyeikatɨ 'ena kwiepa mexi'ayeniere.
ECC 2:4 Waɨkawa mamariwaweme nekatiniutiwewieni: kii nepunetiwewiri, meta kaxie haraweriyari nepexeiyakai,
ECC 2:5 nehetsie timieme nekatini'uximayakaitɨni, harawerita meta 'iteɨrite, mana nekatiniuka'iteɨrita kɨyexite yu'ikwaxi mexeiyatɨka.
ECC 2:6 Yaxeikɨa putsu 'emeukatetewa nekaniutiwewieni waɨkawa kɨyexi mana muxuawekai nemɨhatuiyanikɨ mɨtiwawerenikɨ.
ECC 2:7 Te'uximayatamete waɨkawa nepɨwarexeiyakai 'ukitsi 'ukari, meta waɨkawa wakaitsixi, meta muxatsi meripaitɨ kiekatari te'aitamete Kerutsareme kememɨkateheuxeiyakai.
ECC 2:8 Huru, pɨrata, piinite mɨraye'axe nepɨtiukuxeɨri te'aitamete tiwapiinite meta kiekarite. Nepɨwarexeiyakaita kwikamete 'ukitsi meta 'ukari, waɨkawa nepɨnetemawiekai teɨteri wahamatɨa, nerexeiyatɨ titakɨ tewi mɨtiyutatua mɨrexeiyanikɨ.
ECC 2:9 Nematsi nemariwetɨ nekanayani, keyuri hipatɨ meripaitɨ te'aitamete Kerutsareme miemete, metatsiere yaxeikɨa nepɨtimaiwekai.
ECC 2:10 Naime mɨpaɨ nepɨtiuyuri kenemɨtiyurimɨkɨkai nekɨmana, naime mɨpaɨ nepɨtiuyuri kemɨnetinakekai, nepɨnekatemawi mɨpaɨ netiuyurieka naime ne'uximayatsikakɨ. 'Ikɨkɨ xeikɨa waɨkawa ne'uximayatsika patɨa.
ECC 2:11 Nepuyuti'iyaritɨa naimekɨ ne'uximayatsikatsie kenemɨtiuyuriekaikɨ, waɨkawa nemɨtineti'uxitɨakɨ neti'uximayatɨ, mɨpaɨ nepɨretima mɨkɨ tixaɨtɨ pɨkatihɨkɨtɨkai, xɨka 'eka pe'anukuweiya pepɨkahenuku'axe, mɨpaɨta katinimatsiɨkɨni tixaɨtɨ pɨkatihɨkɨ 'atukaritsie timieme.
ECC 2:12 Merikɨtsɨ nepeuyuti'eriexɨa kenemɨtimaiwekaikɨ, meta mɨkayukɨhɨawekɨ meta mɨka'uka'iyarikɨ —¿ketiyɨwe tawari ne'utɨma ti'aitame manukakeni yamɨtiyurienikɨ, nehepaɨ pɨtiyurieni xeikɨa?—,
ECC 2:13 mɨpaɨ nepɨretima matsi waɨkawa peuyewetse mɨtimaiwenikɨ keyuri mɨka'uka'iyarini, hekɨariya 'aixɨa mɨ'ane hepaɨ keyuri yɨriya.
ECC 2:14 Kemɨ'ane mɨtimaiwe tanenieretɨ kaniumieni, peru kemɨ'ane 'atsimɨkatimate yɨwipa kaniuyeikani. Peru tawari mɨpaɨ nepɨretima teyunaitɨ yaxeikɨa katatinitakwewieka temɨkwinikɨ.
ECC 2:15 Merikɨte mɨpaɨ nepɨtiunehɨawixɨ: «Kamɨtsɨ mɨka'uka'iyari hepaɨ nepɨtimɨni, ¿merikɨte titakɨ tiyunaki'erie kenemɨtimaiwe?» Mɨpaɨ nepɨtiunehɨawixɨ mɨkɨ tixaɨtɨ pɨkatihɨkɨtɨkai,
ECC 2:16 Mɨtimaiwe meta mɨkatimaiwe tɨma pɨkahaye'eriwa, 'ureumietɨ yaxeikɨa mepɨtehatɨmaiyarieni, metatsiere yaxeikɨa mepɨtekwini memɨtemaiwawe meta memɨkatemaiwawe.
ECC 2:17 Merikɨ netukari neputi'uxiwe'eri, tsepa naimekɨ mɨpaɨ nemɨtiyurienekai 'axapɨ'anekai nekɨmana. Yurikɨ naitɨ tixaɨtɨ pɨkaratɨa, matsi 'eka 'utɨma pemunautsarɨmeni hepaɨ kani'aneni.
ECC 2:18 Yaxeikɨata nepiti'uxiwe'eri kenemɨtiuyuri waɨkawa neti'uximayatɨ 'ena ne'uyeikatɨ, nemiku'eiririenikɨ xeikɨa ne'utɨma manukakeni ti'aitatɨ,
ECC 2:19 'Atsipɨkatimatsiɨkɨ xɨka mɨkɨ timaiwemɨkɨ yatɨ pɨkatimaiweni. Matsi katiniyukapinitɨamɨkɨ waɨkawa neyu'iyaritɨatɨ meta netimaiwetɨ kenemɨtiuyuri 'ena ne'uyeikatɨ. Mɨkɨ meta tixaɨtɨ pɨkaratɨa.
ECC 2:20 Waɨkawa neyu'iyaritɨatɨ matsi 'ipaɨ nepɨtinehɨawixɨ, netixeiyatɨ waɨkawa kenemɨtiuyuriekaikɨ 'ena kwiepa,
ECC 2:21 matsi hipatɨ kememɨtemaiwawekɨ, kememɨte'uyematekɨ mekateni'uximayatakuni, mɨkɨ xeime memɨyetuirienikɨ mɨkatiuta'uximayataxɨ hatsuaku hetsiemieme naimekɨ kememɨte'uyuri. Peru mɨkɨta tixaɨtɨ pɨkatihɨkɨ meta 'axapɨ'ane,
ECC 2:22 Kamɨtsɨ, ¿tita ra'iwanikeyu tewi xɨka yutɨrɨkariyakɨ yɨaneni kemɨtiku'eriwa, waɨkawa yu'iyaritɨatɨ tixaɨtɨ pɨkara'iwa 'ena muyuawitɨa?
ECC 2:23 Naime tukaritsie 'axakani'itɨarieka tiuka'eniwatɨ meta tsikere tɨkarikɨ pɨka'uka'uxipiwe tiku'eriwatɨ. Mɨkɨta yaxeikɨa tixaɨ pɨkatihɨkɨ.
ECC 2:24 Matsi tewitsie pɨtiumawe 'aixɨa ti'anetɨ 'ikwaikɨ xeikɨa 'iiyakɨ pɨ'ayumie yutemawietɨ yu'uximayatsikatsie. Mɨpaɨ nepɨretima mɨkɨta Kakaɨyari hetsɨa kanayeneikani,
ECC 2:25 kamɨtsɨ ¿kemɨ'ane pɨyɨwe mɨtikwanikɨ meta muyutemawiekakɨ xɨka Kakaɨyari hetsɨa katimiemetɨni?
ECC 2:26 Kakaɨyari matsi mɨtimaiwenikɨ meta meitimaitɨyeikanikɨ meta muyutemawiekakɨ kaniyetuirieka kemɨ'ane mɨkɨ minake miyetuirienikɨ, matsi 'axamɨtiyuriene kanihayewani para mɨkɨ mɨtixeɨrienikɨ miyetuirienikɨta kemɨ'anetsiere mɨnaki'erie. Peru mɨkɨta 'axakani'aneni 'eka muweiyani hepaɨ.
ECC 3:1 Xexuime tukaritetsie pɨtika'inɨaritɨka, tukari puxuawe naimetsie timieme kemɨtiuyurieni muyuawi hetɨa:
ECC 3:2 Kepauka temɨtinunuiwa, kepaukata temɨkwini, kepauka mɨtiuka'iteɨrita, kepaukata temɨteka'uta,
ECC 3:3 kepauka mɨtiuyumieni, kepaukata muwaranayexɨrɨwani, kepauka mɨtiuka'unakɨ, kepaukata menukuketɨanikɨ,
ECC 3:4 kepauka mutatsuakanikɨ, kepaukata mutanawenikɨ, kepauka muyuhiwerieka, kepaukata temawierika mexeiyani,
ECC 3:5 kepauka tetexi mutaxɨrieni, kepaukata mititɨkɨ, kepauka muyutapatɨkani, kepaukata muyutateutɨaxɨani,
ECC 3:6 kepauka mɨtikuwauneni, kepaukata mɨkatikuwauneni, kepauka mutiuti'uta, kepaukata mɨrexɨrieni,
ECC 3:7 kepauka mutiutatsana, kepaukata mɨtiutawipa, kepauka mɨka'utaniukani, kepaukata mɨtikuxatani,
ECC 3:8 kepauka muyunaki'erietɨkani, kepaukata mɨtiyuka'uxiwe'erieka, kepauka mukuyaxatɨni, kepaukata kayuwatɨ memexeiyani.
ECC 3:9 Tixaɨtɨ pɨkara'iwa kemɨ'ane waɨkawa tiyu'uxitɨatɨ mɨti'uximaya.
ECC 3:10 Mɨpaɨ nepɨtiniere Kakaɨyari mɨpaɨ pɨtiwarupitɨa hahetemekɨ, tewi mɨpaɨ muti'uximayakakɨ.
ECC 3:11 Kakaɨyari witsiti'aneme katiniunetɨani, mɨpaɨ tewi katiniupitɨani mɨpaɨ mɨtiku'eriwanikɨ 'uxa'atɨniwarie, tsepa tewi mɨkaheitimaitɨyeika Kakaɨyari 'uximayatsikaya mɨkɨ kemɨtiyuriene matɨari paitɨ meta 'imatɨrieka.
ECC 3:12 Ne nepɨtimate tewitsie puxuawe xeikɨa, temawierika meta 'aixɨa mɨtiyurienekɨ mexi'ayeyuri.
ECC 3:13 Mɨpaɨta nepɨtimate kename Kakaɨyari 'imikierieya hɨkɨ, tewi mɨtikwakakɨ mɨti'iekakɨ, meta naime yu'uximayatsikatsie timieme mɨra'inɨnɨatani.
ECC 3:14 Yaxeikɨata mɨpaɨ nepɨtimate naime Kakaɨyari mɨtiunetɨa yuheyemekɨ katiniwiyani, pɨkayɨwe temitanɨitɨanikɨ meta temenakaxɨrienikɨ, Kakaɨyari mɨpaɨ katiniuyurieni temimakaxenikɨ.
ECC 3:15 Hikɨ tita mɨtixuawe, katinixuawekaitɨniri, ketitamɨtinenikekai, 'ariri katinixuaweni. Kakaɨyari mɨpaɨ katiniyurieneni 'ɨxatsieya yamɨreuyuhanenikɨ.
ECC 3:16 Matsi tawari tixaɨtɨ nekatinixeiyanita 'ikɨ tukaritsie: 'axakatiniyɨaneni hakewa meta'iwawiyarienitsie, hakewa mɨheitserie mekuxaxatsiwatsie 'axamɨti'ane kanixuaweni.
ECC 3:17 Merikɨ mɨpaɨta nepɨtiu'eri: «Kakaɨyari heitserie mexeiya meta 'axamɨtiuka'iyari kaniwaranutaxɨriemɨkɨ, muxuawekɨ tukarite yamɨtiuyurienikɨ naimekɨ meta hakewa yamɨreyurienikɨ».
ECC 3:18 Meta mɨpaɨ nepɨtiu'eri teɨteri kememɨteyumate wahepaɨtsita: «Kakaɨyari kaniwa'inɨataneni, mɨkɨ mɨpaɨ memɨteheyutimanikɨ kename yeuta memɨte'u'uwa wahepaɨ me'anene.
ECC 3:19 Teɨteri yeutari wahepaɨ mekatenitakukuweni, yaxeikɨa mekatenita'ikwewani metakukuwetɨ yuxexuitɨ, yaxeikɨa meta kani'aneneni yunaitɨ kememɨte'ayeyuyuri, 'ayumieme tewi pɨkawe'eme tewaxi wahetsiemieme. Yurikɨ naitɨ tixaɨtɨ pɨkarayani,
ECC 3:20 'Axeikɨa naitɨ katiniyemieni. »Naitɨ tumuanaritsie mɨtiyetɨa, tumuanaritsie katininuamɨkɨ.
ECC 3:21 »¿Kemɨ'ane pɨtimate xɨka tewi 'iyarieya 'anutiyeikani 'ameutitewatsie, meta yeutari wa'iyari xɨka 'anukayeikani, 'emeukatewatsie kwiepa?»
ECC 3:22 Mɨpaɨ nepɨretima, tewi hetsie puxuawe xeikɨa, yu'uximayatsikatsie mɨtiwiyanikɨ mɨkɨ hetsiena pɨtiunakixɨ. Kamɨtsɨ, xewitɨ pumawe xeime mɨpaɨ mɨtitahɨawekɨ kemɨtiyɨnikɨ.
ECC 4:1 Merikɨte neniune'ɨwiyata 'ikɨ tukaritsie waɨkawa kememɨte'uka'eniwakai. Nekaniwaruxeiya 'axamemute'anuyehu me'utitsuaname, xewitɨ pumawekai mɨwanɨtɨanikɨ, tɨrɨkariya memexeiya mekaniwa'uximatɨakaitɨni, pumawekai kemɨ'ane muwanɨtɨani.
ECC 4:2 Mɨpaɨ nepɨtiunehɨawixɨ. Matsi waɨkawa mepuyutemamawie kemɨ'ane memukwiri, keyuri memayeneniere,
ECC 4:3 matsi mekaniyutemamawieka kemɨ'ane memɨkatinunuiwawe 'akuxi, 'atsimemɨkatematekɨ ketita 'axamɨti'ane 'ena kwiepa.
ECC 4:4 Meta nekaniuniere 'aixɨa 'aneme yu'uximayatsikakɨ yutukaritsie mekaniwaranutanieritɨwani 'axamemɨtewakɨhɨawe. Mɨkɨta yaxeikɨa tixaɨtɨ pɨkarayani, 'eka pemuweiyani hepaɨ kani'aneni.
ECC 4:5 'Atsimɨkatimate yutapa kanawieka, ya'anetɨ haakakɨ kwikaniyɨaneni.
ECC 4:6 Matsi 'aixɨa pɨ'ane kayuwatɨ mɨti'uximayaka 'etsiwa mɨrexeiyanikɨ, keyuri waɨkawa tikumaɨwatɨ waɨkawa mɨrexeiyanikɨ xɨka waɨkawa tikumaɨwani tixaɨtɨ pɨkarayeika, 'eka muweiyani hepaɨ xeikɨa pɨ'ane.
ECC 4:7 Xaɨtsie tawari tixaɨtɨ mɨkatihɨkɨtsie nekanine'ɨwiya 'ena kwiepa:
ECC 4:8 tewi xeime nekaniuxeiya yuxaɨtame 'uyeikame, tɨɨri kawarexeiyame meta yu'iwama, peru pɨkatihayewakai waɨkawamekɨ yu'iyaritɨatɨ yu'uximayatsikakɨ, hatsuaku mɨpaɨ pɨkatiuyuhɨawixɨ waɨkawa kemɨrexeiyakaikɨ «¿Kamɨtsɨ kemɨ'ane rahetsiemieme ne waɨkawa nepɨti'uximaya, 'aixɨa nemɨtiyurienenikɨ nekayuwaɨriyatɨ?» mɨpaɨ katiniuyuhɨawe. Mɨkɨta tixaɨtɨ pɨkatihɨkɨ kenemɨtiune'uxitɨa waɨkawa.
ECC 4:9 'Aixɨa matsi kani'aneni yuhutatɨ keyuri yuxewitɨ, mɨkɨ matsi waɨkawa mekanitatseirikuni kememɨteyu'uxitɨa.
ECC 4:10 Xɨka xewitɨ 'atiweni, xewitɨ kanenukuhanimɨkɨ. Matsi xɨa'ui kemɨ'ane matiweni, mɨkaheixeiya kemɨ'ane menukuhana.
ECC 4:11 Yuhutatɨ xɨka me'uheni, mekaniyuxɨriyani, matsi yuxaɨta ¿kehepaɨ tiyutaxɨriya?
ECC 4:12 Yuxaɨtame kana'iwariemɨkɨ, matsi yuhutatɨ mekaniyuparewieka. Kaunari xɨka haikani yapauka pɨka'anutekieni.
ECC 4:13 'Aixɨa matsi kani'aneni temaikɨ tixaɨtɨ karexeiyatɨ peru xɨka timaiweni, keyuri ti'aitame meripai mieme 'atsimɨkatimate, kayɨ'ɨxatsitɨarinɨatɨ.
ECC 4:14 Tsepanetɨ 'anutahɨiyame wayeyame 'uwenitsie maya, yatɨni tixaɨtɨ karexeiyatɨ 'utinuiwame ti'aitame mayanikɨ,
ECC 4:15 ne mɨpaɨ nepɨtimate matsi 'ikɨ temaikɨ waɨkawa teɨteri mekaniparewieka, manukakenikɨ ti'aitametɨtɨ.
ECC 4:16 Peru tsepanetɨ teɨteri memɨkayu'inɨatsinɨa te'aitamete memɨwaruweiya, yumɨiretɨta 'arike memɨ'axe, mekayutemamawietɨ mekaniyuhayewani hetsienamieme. Mɨkɨta yaxeikɨa tixaɨtɨ pɨkatihɨkɨ, 'eka manuku'axe hepaɨ pɨ'ane.
ECC 5:1 Kepauka Kakaɨyari kiita pemeutahani, pe'a'ɨwiyatɨ kepemɨtiuyeikakɨ kene'enieka keyuri pe'iyetuirienike mawari 'atsimemɨkatemate wahepaɨ, mɨkɨ 'axameteyuriekame mepɨkayu'erie.
ECC 5:2 Pepɨka'amexɨitɨaka, 'atenikɨ meta kepemɨtiku'eriwakɨ, pe'ahɨritɨatɨ Kakaɨyari hɨxie xeiniukiyarikɨ, mɨkɨ muyuawitsie kanakakani 'ekɨta kwiepa pekaniuyeikani. 'Ayumieme 'aniuki kenexewiriyani.
ECC 5:3 Kemɨ'ane waɨkawa muyu'iyaritɨa katiniuka'eniwani 'axati'aneme tiheinɨtɨ, kemɨ'aneta waɨkawa mutaniuka yakɨ xeikɨa katinikuxatani.
ECC 5:4 Kepauka Kakaɨyari hetsɨa tixaɨtɨkɨ pemɨti'ahɨritɨa, 'apepɨkareutewini yapemɨtikayanikɨ, Kakaɨyari matsi pɨkayutemawie yamemɨkatekahu wahetsiemieme. Kenaye'atɨa kepemutayɨkɨ:
ECC 5:5 Matsi 'aixɨa kani'aneni xɨka tixaɨtɨkɨ katiyuhɨritɨaka, mɨpaɨ tiuyurieme kapa kaheye'atɨanikɨ.
ECC 5:6 'Ateni pepɨkapitɨaka kapa 'axapetiuyurienikɨ, yapepɨkahaineni Kakaɨyari tupirieya hɨxie, kename yapekara'eriwamekɨ petiuyuri. ¿Titayari matsi Kakaɨyari petihaxɨatɨa mɨyape'utaitɨ naime mɨtika'unakɨ 'a'uximayatsika?
ECC 5:7 Matsi waɨkawa xɨkaxuaweni tixaɨtɨ mɨkatihɨkɨ, heinɨtsi 'axa'anenetɨ tiyu'uximatɨwatɨ, yakɨxeikɨa waɨkawa mayeniuwenikɨ, 'ekɨ matsi Kakaɨyari kenayemakaxeni.
ECC 5:8 Xɨka xeime kwieyaritsie pewaruxeiya mewananaimakame tixaɨtɨ memɨkatehexeiya, meta teɨteri mekawapitɨatɨ heitserie memexeiyanikɨ, mɨkɨkɨ pepɨkahɨxiyaka, kemɨ'ane waɨkawa muwe'eme xewitɨ matsi waɨkawa we'emetɨtɨ kanixeiyani, meta waheima matsi xewitɨ mariwetɨ kaniwaxeiyani.
ECC 5:9 Kamɨtsɨ 'ikɨ naimekɨ tixaɨtɨ pɨkatixuawe 'aixɨa mɨti'ane 'ikɨ kwieyaritsie, mɨraka'etsitɨretsieri mɨti'ɨwiyani peuyewetse ti'aitame.
ECC 5:10 Tumini kemɨ'ane mɨnakie'erie, pɨkatahɨniwe tuminikɨ. Kemɨ'ane waɨkawa mɨrexeiyanikɨ mɨyɨane matsi waɨkawa pɨreuyehɨwa. Mɨkɨta yaxeikɨa tixaɨtɨ pɨkatihɨkɨ.
ECC 5:11 Hakewa waɨkawa mɨrexuawe, kananuyuhayewanita mitixɨtɨanikɨ, ¿ketita 'aixɨa mɨti'ane kamɨtsɨ tiutixuaweriyaxɨ kutsiyarieya 'ixeiyaka xeikɨa?
ECC 5:12 Ti'uximayatame 'aixɨa 'anemekɨ kaniukakukutsuni, heiwa waɨkawa tiutikwa'atɨ heiwa 'etsiwa xeikɨa. Mɨxikuta waɨkawa mɨrexeiyakɨ piiniteya pɨka'ipitɨa 'aixɨa 'iyari mɨkutsunikɨ.
ECC 5:13 Hikɨ tukaritsie nepɨtixeiya waɨkawa 'axamɨti'ane: waɨkawa tumini muti'utakɨ xeikɨa kemɨ'ane miti'utaxɨ mu'uximatɨarienikɨ,
ECC 5:14 meta mɨkɨ piinitɨarika pɨreuyewautse hau'erietɨ xɨka petita'uximayatsitɨani. Mɨkɨ kutsiyarieya xɨka heiwa yuniwe hexeiyatɨ 'ayani tixaɨtɨri pɨkarexeiyani miku'eiririenikɨ.
ECC 5:15 Ke'anetɨ mutinuiwaxɨ yumaamatsie, mɨpaɨta 'anetɨ kaniyemieni: mawetɨ kemɨtinua 'ena kwiepa, tixaɨtɨ pɨkaranutɨni waɨkawa yu'uximayatsikatsie timieme.
ECC 5:16 Mɨkɨ matsi mari'itɨarika kanihɨkɨtɨni: ke'anetɨ mɨnua tewi mɨpaɨ 'anetɨta kaniyemieni. ¿Ketitayari kamɨtsɨ waɨkawa rexeiyani tixaɨtɨ karayanikeyu?
ECC 5:17 'Imatɨrieka kepaɨmexɨa muyeikani yɨwipa katinikwakamɨkɨ, meta waɨkawa 'uximatɨarietɨ katinikuyekamɨkɨ 'ayu'eriyatɨ.
ECC 5:18 'Ikɨ kanihɨkɨtɨni kenemɨretima: 'ikɨ tukaritsie 'aixɨa kani'aneni matsi mɨtiutikwa'ani mɨranuye'eni, ketipaɨmeme pemɨrexeiyakɨ pe'atemawietɨ matsi ketinekwaka. Mɨkɨ kanihɨkɨtɨni Kakaɨyari mɨtatsiyetuiri, mɨkɨ tahetsie mɨtiunakixɨ pɨhɨkɨ.
ECC 5:19 Matsi Kakaɨyari kemɨ'ane mɨtiyetuirie waɨkawa mɨrexeiyanikɨ, kaniyetuiriekata yu'uximayatsikatsie timieme mɨtikwakakɨta, mɨkɨ kanihɨkɨtɨni Kakaɨyari kemɨtatimikwa teyuxexuime.
ECC 5:20 Kakaɨyari wa'iyaritsie kemɨtiwahɨniya temawierikakɨ, tewi yutukari 'etsiwa xeikɨa kaniku'eriwani.
ECC 6:1 Xeimeta nekanixeiyani 'axati'aneme 'ikɨ tukaritsie teɨteri watsata:
ECC 6:2 Kakaɨyari hipame kaniwapitɨaka waɨkawa memɨtehexeiyanikɨ meta 'aixɨa memɨtexeiyariekakɨ, meta tixaɨtɨ mepɨkateheuyehɨwa tita memɨteheiwe'erie, matsi hipameta pɨta pɨwapitɨa memɨtetikwanikɨ mɨkɨ naime. 'Ikɨta tixaɨtɨ pɨkatihɨkɨ 'axamɨti'ane.
ECC 6:3 Tewi xɨka warexeiyani xeitsienituyari yuniwema, meta mɨixa wiyari 'uyeikatɨ, tsepa kepaɨmexɨa muyeikani xɨka kayukatemawiwani 'aixɨa mɨti'anekɨ, meta xewitɨ ka'ikateuku, matsi 'aixɨa kani'aneni nunutsi mɨtinuiwa mukitɨ keyuri mɨkɨ.
ECC 6:4 Kamɨtsɨ mɨkɨ nunutsi tixaɨtɨ pɨkaratɨa, yɨriyatsata petɨa, yɨwipa puyuhayewa kemɨtitewakai.
ECC 6:5 Hatsuaku tau pɨkaxeiya meta tixaɨtɨ pɨkaretimani, matsi mɨkɨ kayuwatɨ hexeiyatɨ kanayeimɨkɨ keyuri mɨkɨ tewi,
ECC 6:6 tsepa huta miriyari wiyari 'amuyeikani, 'aixɨa mɨti'ane yakatiyurienetɨ. Matsi teyunaitɨ 'axeikɨa tekanekɨkani.
ECC 6:7 Tewi waɨkawa katini'uximayaka mɨtikwakakɨ, matsi hatsuaku pɨkatahuxani kɨmana.
ECC 6:8 ¿Mɨtimaiwe waɨkawa matsi kerexeiya keyuri mɨkatimaiwe? ¿Ketitari ra'iwakeyu tixaɨtɨ mɨkarexeiya, yutukari hetsiemieme mɨyɨwenikɨ?
ECC 6:9 Matsi tita mɨtiyuhekɨa 'aixɨa kani'aneni keyuri tikuwaunetɨ. Mɨkɨta tixaɨtɨ pɨkatihɨkɨ, 'eka muweiyani hepaɨ kani'aneni.
ECC 6:10 Ketita hikɨ mɨtixuawe 'ari kaneixeiyakaitɨniri kemɨtitewa, yakatinimatsiɨkɨni tita mɨtihɨkɨ: tewitɨtɨ. Xewitɨ muyutamieni pɨkayɨwe xeime waɨkawa mɨtɨrɨkaɨye hamatɨa.
ECC 6:11 Niuki waɨkawa mekananutiyayatsani, matsi tixaɨtɨ pɨkatihɨkɨ. ¿Peru tita tete'a'iwa kɨmana?
ECC 6:12 'Atsitepɨkatemate, ketita matsi 'aixɨa mɨti'ane tahetsiemieme. Tixaɨtɨ pɨkatihɨkɨ yapaɨmexɨa xeikɨa mayeyurini 'etɨri hepaɨ xeikɨa yapauka makumawere. ¿Kemɨ'ane pɨyɨwe yamɨtitahɨawekɨ tukarieya hepaɨtsita, kemɨtiyɨni 'arike mɨyuke?
ECC 7:1 Matsi tewi 'aixɨa peketixeiyarieka, keyuri witsipe'u'ɨatɨ. Matsi katiniyunaki'erieka kepauka temɨkwinitsie, keyuri temɨtinunuiwatsie.
ECC 7:2 'Aixɨa matsi kani'aneni mɨki makateukienitsie pemumie, keyuri 'ixɨararipa. Temɨkwinikɨ teyunaime teɨteri tahetsie kanimiemetɨni, memayeneniereta matsi mɨpaɨ meketemaika.
ECC 7:3 Mɨyuhiwerieka kaneuyeweka keyuri mutanaweni, kananakanutuixieka yuhɨxie, matsi 'aixɨa kaniyurieka 'iyarieya.
ECC 7:4 Mɨtimaiwe kaniku'eriwani kepauka mɨmɨni, matsi 'atsimɨkatimate kaniyu'iyaritɨaka xeikɨa kemɨtiyurienekɨ.
ECC 7:5 Matsi 'aixɨa kani'aneni mɨtimaiwe mɨratate'anikɨ, keyuri 'atsimɨkatimate niukieya tsi'aneneme 'enietɨ.
ECC 7:6 Tixaɨtɨ pɨkatihɨkɨ 'atsimɨkatimate kemɨtikuxata, mɨpaɨ xeikɨa katinimatsiɨkɨni, xuya xarita matikateni hepaɨ. Mɨkɨta tixaɨtɨ pɨkatihɨkɨ.
ECC 7:7 Mɨtimaiwe nanaimarikakɨ katimaiwetɨ kanayeimɨkɨ, tuminikɨ yu'iyari kanikwiemaka.
ECC 7:8 Matsi 'aixɨa kani'aneni tixaɨtɨ mɨreutiparekɨ, keyuri titsutɨarietɨ. Matsi 'aixɨa kani'aneni mɨtiuka'eniwanikɨ waɨkawa keyuri yu'ariwietɨ.
ECC 7:9 Haxɨakɨ xeikɨa pepɨka'ayeweni, matsi mɨkɨ 'atsimɨkatimate kani'iyarieyatɨni.
ECC 7:10 Mɨpaɨ pepɨkahaineni kename meripaitɨ 'aixɨa metiyuriekai. Mɨkɨ kememutiyuane memɨtemaiwawe wahetsɨa pɨkamieme.
ECC 7:11 'Aixɨa kani'aneni pemɨtimaiwenikɨ tita 'aixɨa mɨti'ane hepaɨtsita, hikɨ memu'uwa wahetsie 'aixɨa mɨti'anenikɨ.
ECC 7:12 Pekaniyɨweni mɨtimaiwenikɨ 'etɨriyayatsie pemuyeikanikɨ metatsiere tumini 'etɨriyayaritsie, matsi mɨtimaiwenikɨ mɨ'ayumieme tukari kaniwapitɨamɨkɨ kemɨ'ane memeixeiyani.
ECC 7:13 Kakaɨyari 'uximayatsikaya keneuxeiya: ¿kemɨ'ane pɨyɨwe mitixeurariyakɨ tita mɨkɨ mutiutitunaxɨ?
ECC 7:14 Kepauka 'aixɨa ti'aneme pemɨrexeiyani, kene'atemawieka, matsi kepauka 'axati'aneme pemɨrexeiya, keneutimaixɨa 'uximayatsika naitɨ Kakaɨyari hetsɨa kanayeneikani, tewi 'atsimɨkatimatekɨ ketita mɨtikaxeiya 'arike.
ECC 7:15 Hikɨ tukaritsie nemuyeikakai tinaime nepɨtiuxei: teɨteri 'aixɨa memɨte'u'uwa 'aixɨa mɨti'ane kaniwaka'unani, teɨteri 'axamemɨteyurie 'axamɨti'ane 'apɨtiwareuteritɨa.
ECC 7:16 Kwinimieme 'aixɨa mɨtiyuriene pepɨka'a'erieka, meta kwinimieme mɨtimaiwe pepɨka'ayuyeitɨwani. ¿Matsi ketitayari peti'aka'unamɨkɨ 'akɨmana?
ECC 7:17 'Axapetiyurienetɨ pepɨka'ayuyeitɨwani, meta 'atsimɨkatimate hepaɨ. ¿Ketitayari petimɨni kwitɨwa?
ECC 7:18 'Aixɨa kani'aneni 'ikɨ peha'eriwatɨ, peka'itatuayatɨ tita pemɨrexeiya. Kakaɨyari kemɨ'ane mayemakaxe, mɨkɨ naimetsie yakatinikamieni.
ECC 7:19 Mɨtimaiwenikɨ mɨ'ayumieme matsi mɨtimaiwe kanitɨrɨkariyani, keyuri tamamata te'aitamete xeikiekariyaritsie.
ECC 7:20 Xewitɨ pumawe 'ena kwiepa 'aixɨa 'anetɨ, 'aixɨa tiyurienetɨ hatsuaku 'axakatiyuriwetɨ.
ECC 7:21 Pepɨkawa'enieka yunaime kememutiyuane, mɨpaɨ matsi peyɨanetɨ mati'uximayatsiriwame pepɨka'enieni kepauka 'ahepaɨtsita 'axamɨtayɨni,
ECC 7:22 'ekɨta pekatinimaika, heiwa mɨixa 'axapekaniutaineni hipame wahepaɨtsita.
ECC 7:23 Naime 'ikɨ 'aixɨa nekatiniuyurieni netimaiwetɨ, mɨpaɨ nepɨtiku'eriwakai waɨkawa netimatetɨ nepaneyeitɨani, peru mɨtimaiwenikɨ mɨ'ayumieme 'ateewa paitɨ kaniyuhayewakaitɨni nehetsɨa.
ECC 7:24 'Ateewa yemekɨ 'aheukatewakaku katiniyuhayewa naitɨ tita mɨtixuawe. ¿Kemɨ'ane pɨyɨwe meitimanikɨ?
ECC 7:25 Merikɨte nekaninuani nemɨtitamarienikɨ meta nemɨretimanikɨ, mɨtimaiwenikɨ mɨ'ayumieme nemɨtixeiyaxɨanikɨ, meta piinitɨarika hetsiemieme, 'ana mɨpaɨ nepɨretima 'atsimɨkatimate hɨkɨtɨtɨ 'axakatiniyurieneni meta mɨka'uka'iyari kanirukuyaneni xeikɨa.
ECC 7:26 Tixaɨtɨ matsi nekatiniukaxeiya kwimieme ratsiwime keyuri mɨmɨnikɨ: 'uka mɨtiyu'itaiya kanihɨkɨtɨni, wipi winiyariyari kanexeiyani yu'iyaritsie meta yumamatetsie tepɨa kaunariyari kanexeiyani. Kemɨ'ane Kakaɨyari mɨtemawieritɨa kaniyɨxɨnamɨkɨ mɨkɨ hetsɨa, peru 'axamɨtiyuriene mɨkɨ winiyarieyatsie kaniyukahɨamɨkɨ.
ECC 7:27 Ti'ɨkitameta mɨpaɨ kaniutayɨni: «Neuxei 'ikɨ nekatiniukaxeiya netiutiwauka piinite hepaɨtsita, xexuimetsie:
ECC 7:28 'akuxi nepɨtiwaune ketita nemɨkatikaxeiyawe, matsi tewi xeime nekaniutaxeiya xeimiriyari wahetsɨa mieme, peru yunaime 'ukari wahetsɨa xeimetɨma nepɨkataxeiyawe.
ECC 7:29 'Ikɨ xeikɨa nekatiniukaxeiya: Kakaɨyari tewi kaniutawewieni 'aixɨa 'anekame, peru mɨkɨ kanikuwauni yɨkɨ ti'aneneme».
ECC 8:1 ¿Kemɨ'ane mɨtimaiwe hepaɨ pɨ'ane? ¿Kemɨ'ane pimate kemɨtikuxata? Tewi mɨtimaiwe kanimatsiɨkɨni yuhɨxie meta kemɨtiyukanaki'erie kaniyutemawieka.
ECC 8:2 Ne mɨpaɨ nepaine: Ti'aitame keneu'enieka, Kakaɨyari yapemɨtiutahɨawixɨkɨ.
ECC 8:3 Pepɨka'amexɨitɨaka hɨxiena pemuwayeyanikɨ. Meta tita 'axamɨti'ane pepɨkatiyexɨatɨaka mɨkɨ mɨpaɨ katiniyurieneni kemɨtinake.
ECC 8:4 Ti'aitame niukieya kani'enierieka, xewitɨ pɨkayɨwe mita'iwawiyakɨ kemɨtiuyuri hepaɨtsita.
ECC 8:5 Kemɨ'ane yamɨtikamie mɨkɨ kemɨti'aitɨa pɨkatikwinitɨarieni tixaɨtɨkɨ. Yu'iyaritsie mɨtimaiwe katinimaika kehapaɨ mɨtiyurieneni meta kepauka.
ECC 8:6 Kaniyuritɨni teyunaitɨ ketemɨteyurie kanixɨaweni kepauka, meta kehepaɨ yamɨtiuyurienikɨ, tsepanetɨ tewi waɨkawa mɨtiuka'eniwa yuhepaɨtsita:
ECC 8:7 'atsikatimaitɨ kemɨtiyɨni hetsienamieme, xewi tɨma pɨkayɨwe para mɨtitaxatɨanikɨ.
ECC 8:8 Xewitɨ matsi pumawe tɨrɨkariya hexeiyatɨ yu'iyari mukunuitɨanikɨ, meta pumawe tɨrɨkariya hexeiyatɨ mɨmɨnikɨ hepaɨtsita. Xewitɨri pɨkayɨwe mɨrayukwinetsie meyuta'una meta 'axamɨti'ane 'axatiyuruwame mutatuani.
ECC 8:9 Naimekɨ mɨpaɨ nekatiniukaxeiya waɨkawa netimaimɨtɨ kenemɨtiutiwau nemɨretimanikɨ naime kemɨti'ane 'ena kwiepa: heiwa tewi xeime mɨti'aitɨakakɨ kaniyɨweni 'axamɨtiyurienenikɨ.
ECC 8:10 Nekaniwaruxeiyata 'axateyuruwamete memukateukiexɨa —mɨkɨ memeutahakekai mewayekɨkatɨ hakewa Muyepatsietsie—, mɨkɨtsɨ mekanatɨmaiyarieni yukiekaritsie hakewa mɨpaɨ memeyɨakai. Mɨkɨta yaxeikɨa tixaɨtɨ pɨkatihɨkɨ.
ECC 8:11 Kepauka xeiya mɨkataxanetsieni xɨka 'axatiuyurieni, 'ana teɨteri yu'iyaritsie 'axameteyurietɨ mekanakɨnikuni.
ECC 8:12 'Axatiyuruwame kaniyɨweni xeitsienituyari paɨmexɨa 'axamɨtiuyurieni, meta mɨixa wiyari kaniuyeikamɨkɨ, matsi mɨpaɨta nekatinimaika, 'aixɨa katiniwayuriekamɨkɨ kemɨ'ane Kakaɨyari memayemakaxe mariweme me'ayeitɨatɨ.
ECC 8:13 Matsi 'axateyuruwamete 'aixɨa pɨkatiwayurieka meta mɨixa wiyari mepɨkayurieni. Mɨkɨ 'etɨri hepaɨ xeikɨa mekani'anenekuni, Kakaɨyari memɨkamakaxekɨ.
ECC 8:14 'Ena kwiepa waɨkawa katinixuaweni tixaɨtɨ katiyunaki'erietɨ, teɨteri hipatɨ mekanixuaweni 'aixɨa 'anemekɨ me'u'uwatɨ, matsi 'axateyuruwamete wahepaɨ mekani'itɨarieka, meta mepuxuawe 'axateyuruwamete mɨkɨta yaxeikɨa 'aixɨa mekani'itɨarieka 'aixɨa memɨtekahu wahepaɨ. Neta mɨpaɨ nekanaineni tixaɨtɨ pɨkarayani.
ECC 8:15 'Ayumieme, temawierika nekanexeiyani, tawari tixaɨtɨ pɨkatixuawe 'aixɨa mɨti'ane tewi hetsiemieme hikɨ tukaritsie, matsi mɨtikwakakɨ, mɨranuye'enikɨ xeikɨa, meta yutemawietɨ, mɨpaɨ xeikɨa 'aixɨa kani'aneni xɨka waɨkawa yu'iyaritɨatɨ ti'uximayaka hikɨ tukaritsie, Kakaɨyari 'ipitɨakaku.
ECC 8:16 Naimekɨ yanemɨretimanikɨ mɨtimaiwenikɨ mɨ'ayumieme nemɨtixeiyakɨ naime kemɨti'ane 'ena kwiepa 'uyeikatɨ, nepɨkakuwekai tukarikɨ meta tɨkarikɨ neyu'iyaritɨatɨ.
ECC 8:17 Naime nekatiniuxeiya tita Kakaɨyari mɨtiutawewi. Tewi pɨkayɨwe naime mɨretimanikɨ, Kakaɨyari kemɨtiuyuri 'ikɨ tukaritsie mieme, tsepanetɨ xewitɨ matsi waɨkawa muyutatua mɨretimanikɨ pɨka'itaxeiya, tsepanetɨ xewitɨ mɨtimaiwe mɨpaɨ maine nenepimate, pɨkayɨwe yamɨretimanikɨ.
ECC 9:1 'Ikɨ naimekɨ waɨkawa mɨpaɨ nekatiniyurienekaitɨni, 'ikɨkɨ meta naime nekatiniuta'inɨata, 'aixɨa memɨteyurie meta memɨtemaiwawe kememɨte'uximaya, mɨkɨ Kakaɨyari hetsɨa katinimiemetɨni, tewi 'atsipɨkatimate kemɨtiyukanaki'erieka meta kemɨtiyuka'uxiwe'erie, tsepa hɨxiena mɨti'ane.
ECC 9:2 Teyunaitɨ tekanikukuwemetetɨni: heitseriekamekɨ muyeika meta 'axa'anemɨkɨ muyeika, 'aixɨa mɨtiyuriene 'axamɨtiuka'iyari, mɨ'itiya meta mɨka'itiya, kemɨ'aneta mawari mɨwewie meta kemɨ'ane mɨka'iwewie, 'aixɨa mɨtiuka'iyari 'axatiyuruwame, kemɨ'ane tixaɨtɨkɨ mɨtiyuhɨritɨa meta xewitɨ mɨkatiyɨhɨritɨa.
ECC 9:3 Xewitɨ xeikɨa kaniuyeikani 'axamɨtiyurienenikɨ 'ikɨ tukaritsiemieme: Teyunaitɨ tsieretsɨ tekanikwikuni. Metatsiere tewi 'iyarieya 'axamɨti'anekɨ kanihɨneni, rukuxiya xeikɨa yu'iyaritsie kanexeiyani yuheyemekɨ, 'imatɨrieka xeikɨari kanimɨmɨkɨ.
ECC 9:4 Kamɨtsɨ ¿kemɨ'ane rahetsɨa yapepɨra'eriwa? Yunaitɨ memayeneniere mekanita'ikwewani, matsi 'aixɨa kani'aneni tsɨkɨ mayeniereni keyuri maye mɨkitɨ.
ECC 9:5 Memayeneniere mɨpaɨ mekatenimaika kename mekwini, peru mɨkite 'atsimepɨkatemate meta tixaɨtɨ mepɨkatetakwewie, mɨkɨ yapauka mepatɨmaiyarɨwa.
ECC 9:6 Kememɨteyukanaki'eriekai kememɨte'uyuka'uxiwe'eriekai, meta kememɨte'ukaheiwe'eriekai mana katiniu'axeni, meta hatsuaku yamepɨkateyurieni kememɨteyurie 'ikɨ tukaritsie mieme.
ECC 9:7 Ketinekwaka 'a'ikwaite pe'atemawietɨ, kene'ieka 'awinu yemekɨ pe'awaɨriyatɨ, 'ariri Kakaɨyari kaninaki'aka kepemɨti'uximayakɨ,
ECC 9:8 Tsieretsɨ 'akemarite ketuxani meta hatsuaku pɨkaheuyeweka 'akɨpatetsie witsimu'ɨa.
ECC 9:9 Kene'atemawieka 'uka penaki'erietɨ tukarikɨ kepemɨreutere kepaɨmexɨa Kakaɨyari metsipitɨa 'ena kwiepa. Xexuime tukaritsie yakɨxeikɨa kepemɨtiyuriene. Mɨkɨ kanihɨkɨtɨni 'ahetsie mɨtiunakixɨ kepeti'atatuatɨ pemɨtiukaxei 'ena kwiepa.
ECC 9:10 Naitɨ 'ahetsie mɨti'axe 'aixɨa 'anemekɨ yaketineuyuri, hakewa pemekateukieni, mana mɨkahexuawekɨ 'uximayatsika, kepemɨti'atukaritɨani meta tita pemɨtiuyemate meta kepemɨtimaiwe pɨremaweni.
ECC 9:11 Nepune'ɨwiyaxɨta 'ena kwiepa memanautsawawe xeikɨa mepɨkatehayu'iwa, meta mepɨkatehayu'iwa xeikɨa waɨkawa memɨyɨwawe, metatsiere memɨtemaiwawe xeikɨa mepɨkate'utikwa'ani, meta memɨtemateta tumini waɨkawa mepɨkahexeiya, meta memɨte'uyemate mepɨkayutemamawie 'aixɨa metexeiyarietɨ, matsi pɨta yunaitɨ wahetsie kani'axeni tukarite 'aixɨa 'anenetɨ meta 'axa'anenetɨ.
ECC 9:12 Mɨpaɨta netinetimani xewitɨ 'atsipɨkatimate kepauka tukarieya maye'ani. Ketsɨte kememɨtekuwiniyarɨwa wipi 'axa'anemetsie meta wikixi winiyaritsie mekaniuyewɨwɨreni, yaxeikɨata teɨteri mekaniwiniyarieka mɨpaɨ memɨkateha'eriwanitsie katinaye'axeni wahetsie xeimieme.
ECC 9:13 Tawarita xeime nekanetimani kwiepa nekaratɨmaiyatɨ mɨpaɨ mɨtimaiwekaikɨ:
ECC 9:14 kiekari 'etsiyeukame, teɨteri yakɨ meyupaumetɨ memakuteitsie, xewitɨ ti'aitame tɨrɨkaɨyetɨ mana kaneutahani 'e'iwake, waritana 'imumɨi 'ematayewa mekaniutawewieni memuwara'iwakɨ.
ECC 9:15 Mɨkɨ kiekaritsie tewi mana kaniukateitɨni, tixaɨtɨ karexeiyatɨ matsi xeikɨa pɨtimaiwekai, kemɨtimaiwekaikɨ kaniyɨwekaitɨni kiekari mutawikweitsitɨanikɨ, xewitɨ tɨma pɨkaheye'eri mɨkɨ tewi tixaɨtɨ mɨkarexeiyakaikɨ.
ECC 9:16 Ne mɨpaɨ nepaine «matsi peuyewetse mɨrakumaika keyuri tɨrɨkaɨyetɨ», tsepa kepauka mu'uxiwe'eriwa 'iya tewi mɨtimaiwekɨ tixaɨtɨ karexeiyatɨ, meta xɨka niukieya ka'u'enierieni.
ECC 9:17 Mɨtimaiwe niukieya matsi kaneuyeweka kayuwatɨ mɨ'enierieka, keyuri 'atsimemɨkatemate tiwa'aitɨwame 'utahiwakaku.
ECC 9:18 Kaneuyeweka matsi waɨkawa mɨtimaiwenikɨ, keyuri tituaxame kuyaxa mieme. Xeimekɨ 'axaxɨkapetiuyurieni pekatinitixɨtɨamɨkɨ 'aixɨa mɨti'ane.
ECC 10:1 Xaipɨtsi memɨkwikwi'i 'axamekaniu'ɨatɨkani, tita witsimɨtiu'ɨa katinanuyeitɨwani. Mɨpaɨ katinimatsiɨkɨni xɨka 'etsiwa mɨkayɨkɨhɨawe pe'ayani, pɨkayɨwe muyutaxewire mɨtimaiwenikɨ meta 'aixɨa mɨtixeiyariekakɨ.
ECC 10:2 Mɨtimaiwe katinikuwauneni tita 'aixɨa mɨti'ane yu'iyaritsie, matsi 'atsimɨkatimate katinikuwauneni 'axamɨti'ane.
ECC 10:3 Meta huye'utɨa kemɨtimie 'atsimɨkatimate waɨkawa katineiyehɨaka mɨretimanikɨ, 'anari yunaitɨ mɨpaɨ mekatenetimaikuni kename 'atsikatimate.
ECC 10:4 Xɨka ti'aitame 'uyeha'ani 'ahepaɨtsita, pepɨka'iku'e'eiriwani ketitakɨ pemɨtihɨritɨarie. Petiukanewietɨ waɨkawa 'axapemɨtiuyurikɨ kani'ayumiemetɨni.
ECC 10:5 Xewitɨ kanixuaweni tita 'axamɨti'ane, te'aitamete meheuyexɨrɨwetɨ kememɨteyurie hepaɨ tiyuxexeiyatɨ:
ECC 10:6 'atsimɨkatimate matsi waɨkawa katinihɨritɨarieka timamariwawemekɨ, peru memɨyɨwawe matsi 'etsiwa xeikɨa mekatenihɨritɨarieka.
ECC 10:7 Nekaniwaxeiyanita waɨriyarika te'uximayatamete kawayutsixi wahetsie mekaniuteni te'aitamete wahepaɨ, teɨterita tewa'aitɨwamete yu'ɨkama mekaniku'uwani waɨriyarika te'uximayatamete wahepaɨ.
ECC 10:8 Putsu xɨka 'utawewieni, muwa kaneukawemɨkɨ. Kemɨ'ane 'ixumeri hixɨata 'akame mɨta'una, kuu kanikeimɨkɨ.
ECC 10:9 Xɨka tetexi pe'utitara, mɨkɨ tetexi kametinikwinitɨamɨkɨ. Kemɨ'ane kɨye mawiteni, mɨkɨ kɨyexikɨ katiniyukwinitɨaka.
ECC 10:10 Hatsa xɨka ka'ataxikaunini, meta xɨka ka'etamɨani, matsi karima katinewitekemɨkɨ. Xɨka petimaimɨkɨni ketine'uximayaka 'aixɨa 'anekamekɨ, petimaitɨ meta 'aixɨa peti'a'ɨwiyatɨ.
ECC 10:11 Xɨka kuu tiuyukeni meri 'akuxi kwikarikɨ kakewaiyariewetɨ, tixaɨtɨ pɨkara'iwa 'ikewaiyame.
ECC 10:12 Kepauka mɨtimaiwe mɨtiwakuxaxatɨwa, teɨteri 'aixɨa 'anemekɨ mekani'enieka, matsi kepaukata 'atsimɨkatimate mɨtikuxata, mɨkɨ xeikɨa kaniwaka'unani,
ECC 10:13 Matɨari mieme niukieya tixaɨtɨ pɨkatihɨkɨ, 'imatɨrieka 'aixɨa pɨkatinɨni 'atsimɨkatimatekɨ.
ECC 10:14 Matsi xewitɨ pɨkayɨwe yamɨtayɨnikɨ. Xewitɨ pɨkatimate kemɨtiyɨni, meta 'arikeke kemɨyɨni, xewitɨ pɨkayuwe yamɨtayɨnikɨ.
ECC 10:15 Mɨka'uka'iyari kemɨti'uximaya yakɨ xeikɨa katiniyu'uxitɨaka, meta kiekari huyeyari 'utɨma pɨkahemarie.
ECC 10:16 Xɨa'ui kiekari ti'aitame mɨkatseɨye mɨra'aitatsie, meta tewa'aitɨwamete ximeri paitɨ mekanayatsarɨwani memɨtekwanikɨ.
ECC 10:17 Matsi witsikatinikɨhɨawarɨwani kemɨ'ane kiekaritsie ti'aitame 'aixɨa mɨti'uximaya, meta te'aitamete kepauka memɨtekwa'a mauyewetsetsie, waɨkawa memɨtitɨrɨkaxɨanikɨ memɨtarɨwekakɨ pɨkatixaɨ.
ECC 10:18 Mɨyu'ɨraxie kiiya heima mieme kananuka'unikeni, mɨkatikumaɨwa kiiya kaniuhayeweni.
ECC 10:19 Paa kwatɨ kaniutanawemɨkɨ, winu'ietɨ kaniyutemawiekamɨkɨ, tuminita mitixɨtɨanikɨ kani'ayumiemetɨni.
ECC 10:20 Ti'aitame 'axapepɨkatikumamateni meta 'axapepɨkatiku'eriyani, meta mɨxiku 'awie 'axapepɨkarahɨaweni, wikixi muyuawitsie miemete mekaniyɨwaweni niuki memenɨtɨkirienikɨ. Mekaniu'anani mekaniyɨwaweni memɨte'itaxatɨanikɨ.
ECC 11:1 Hata keneukahɨwa 'apaa, yapaɨmexɨa tukari 'anukayayu 'ana keta pekanitaxeiyamɨkɨ.
ECC 11:2 Me'atahutame yatɨni me'atahaikame ketiniwarumikwa tita pemɨrexeiya, 'atsipemɨkatimatekɨ tita 'uximatɨarikayari 'umɨramie 'ena kwiepa.
ECC 11:3 Haiwitɨri kepauka mayemanenitsie, kwiepa wiyeri kanikaxɨriemɨkɨ. Kɨye xɨka tatsutɨa hataweni, yatɨni tayeta, hakewa meutaweni mana kaniyuhayewamɨkɨ.
ECC 11:4 Kemɨ'ane 'eka xeikɨa mɨtaxeiya, pɨka'uka'etsa, kemɨ'aneta haiwitɨri xeikɨa mɨtaxeiya mɨkɨta pɨka'uka'itsana.
ECC 11:5 Mɨpaɨ 'atsipemɨkatimatekɨ 'eka kemɨreumie, meta kehepaɨ memɨtekununuiwa tɨɨri yumamama wahukatsie, yaxeikɨata Kakaɨyari 'uximayatsikaya pepɨka'enie naime mɨtiutiwewi.
ECC 11:6 Ximeri paitɨ 'a'imɨari keneuka'etsa, taikaita 'uxipiya pepɨkahexeiyani, matsi 'atsipepɨkatimate ke'anetɨ 'etsiyari 'aixɨa mɨtiyɨni, xɨka 'iya yatɨni 'ikɨ, yamatsi naitɨ 'aixɨa 'anenetɨ pɨrayani.
ECC 11:7 Hekɨariya witsikani'aneni, 'aixɨata kani'aneni tau hekɨariyayari xeiyatɨ 'amuyeikani.
ECC 11:8 Xɨka tewi matsi mɨixa wiyari 'a'uyeikani hetsiena yutemawietɨ, matsi tukari tekeha'eriwani 'uximatɨarika mɨtixuaweretsie waɨkawa katiniyɨmɨkɨ, meta tita 'umɨramie 'ana yakɨ xeikɨa pɨkarayani.
ECC 11:9 Hikɨ kene'atemawieka mexi petemaikɨ, 'a'iyari keneupitɨa mɨyutemawiekakɨ. Kemɨtiku'eriwa keneyeweiyani meta 'ahɨxitekɨ kepemɨtiuyukahiwe'erie, matsi kena'eriwani Kakaɨyari mɨkɨ naimekɨ kamenita'iwawiyamɨkɨ.
ECC 11:10 'A'iyaritsie haxɨa pepɨkapitɨaka, 'ahetsie tita 'axamɨti'ane ketinayeweiya, matsi temaikɨ yu'erietɨ meta temaikɨyari yakɨxeikɨa kanihɨkɨtɨni.
ECC 12:1 Kemɨ'ane matsi'utawewi kena'eriwani, hikɨri pemɨtemaikɨ, mexinetɨ tukari 'axamɨ'ane ka'aye'awe, kepauka mɨpaɨ pemɨtayɨni: «Pɨkanetsinakeri 'anemuyeikanikɨ mɨixa wiyari»,
ECC 12:2 matsi'utawewi kena'eriwani mexinetɨ mehekɨariwie tau meta hekɨariya xuawe, metseri meta xurawetsixi mehekɨariwie, meta mexi haiwitɨri 'anuku'eke kepauka wiyeri mɨtitahayewatsie.
ECC 12:3 Tukari Kanaye'amɨkɨ kepauka kii hɨwemete memɨtiyɨyɨaka marikakɨ, mekananakatutsirikuni yukukuyamete, 'anari mekatenihayewakuni tɨxɨmete memɨkayumɨirenikɨ, 'anarita mepɨkaneniereni, 'itupari 'etsi mayeyeutsie memaneniere.
ECC 12:4 Katinaunarirɨmemɨkɨ kitenie kaye 'utɨa mieme, 'anari kananukanuaximemɨkɨ murina yuariyaya, wikixi yukwikari mekananukuhanikuni, matsi wakwikari pɨtɨkini puka'enierieka.
ECC 12:5 Marika Kanitixuawerimɨkɨ hɨrite 'amanutitɨtɨtsie, 'anarita huyeta kaniumariwemɨkɨ. 'Arimenitɨra meta 'ana kanitixutuimɨkɨ, 'utsikari mekani'axɨakuni yumɨiretɨ, mekanikakɨmikuni 'anari tixaɨtɨ tiyunaki'erietɨ pɨka'ayani, tewi kaniyemieni kiekari 'emɨtiteriwetsie, kaye'utɨa mekaniyexɨrietɨwekuni, meyuhiwerietɨ 'akaxari mexeiyatɨ.
ECC 12:6 Kena'eriwani kemɨ'ane matsi'utawewi, mexi katatsaniwe pɨrata hɨiyameyari, meta mexi katatariwe huru xariyari, meta xari haa manakaxɨrɨwetsie katitawaxɨawe, tsikɨrɨrɨiya katitarixɨawawe putsuta mɨiretɨ ka'ayeiwe.
ECC 12:7 'Anari kwiepa tumuanari kanayeimɨkɨ, meripaitɨ mɨ'anekai hepaɨ, 'iyari kanakunuamɨkɨ Kakaɨyari hetsɨa, mɨkɨ mana meiyenɨ'akɨ.
ECC 12:8 Ti'ɨkitame mɨpaɨ nekanaineni: 'ikɨ tukari tixaɨtɨ pɨkarexeiya, naitɨ 'axakatini'aneni.
ECC 12:9 Matsi waɨkawa timaiwetɨ, ti'ɨkitame teɨteri katiniwarutaxatɨani naime ketita mɨretima. Mɨkɨ naime katineutixeiyaxɨani yumarima, mɨireme temaiwawemete kememɨte'u'ɨxatsita waxapa kanayeitɨani.
ECC 12:10 Tsiepɨre hipame niukite kaniutaxeiya 'aixɨa 'anuyɨtɨkaime, mɨkɨta kaniti'utɨani yumarima yuri mainekɨ.
ECC 12:11 Memɨtemaiwawe waniuki tiyutseweme hepaɨ kani'aneneni. Kɨrapuxite 'aixɨa mɨretsunini hepaɨ mekatenikuxatani, xewitɨ xeikɨa tixaxatame tiwakuxaxatɨwakaku.
ECC 12:12 Ne matsi mɨkɨ hepaɨtsita nematsihaye'eritɨwa 'ekɨ neniwe nematsinaki'erie, waɨkawa xapate xɨka'utiwewieni pɨkayɨnɨrinɨa, meta xɨka pe'ititerɨwa pekaniti'uximɨkɨ waɨkawa.
ECC 12:13 'Imatɨarieka 'ikɨ niuki naitɨ kaniu'enierieni. Kakaɨyari matsi kenayemakaxeni, yaketinekamieni 'aitsikayatsie, 'ikɨ naitɨ tewi hetsie kanimiemetɨni.
ECC 12:14 'Uximayatsika matsi, 'axamɨ'anene meta 'aixɨamɨ'ane meta 'awie ketemɨteyurie Kakaɨyari naime kanita'iwaumɨkɨ.
SOL 1:1 Tsarumuni kwikarieya xapayari.
SOL 1:2 Xɨka, penetsi'u'itsenike 'ateni kemɨtiyu'itsewekɨ, matsi 'aixɨa pɨ'ane 'anaki'eriya, keyuri winu.
SOL 1:3 Witsimu'ɨata pemɨ'akawiriwa, yemekɨ puwanake, 'ekɨtɨtɨ pekanihɨkɨtɨni waritsamu witsimu'ɨa. Kauka 'ayumieme 'ɨimarixi memenenaki'erie.
SOL 1:4 Kene'amexɨitɨaka, 'ahetsiemieme yemekɨ kenenayeitɨa. Kenenanuwitɨki pemuyehuputsie, ti'aitame. Wahamikuma Tepuyutemamawieka ta'iyarikɨ teyunaitɨ, tepiku'eriwani kepemɨti'amaɨwa keyuri winu. Titakɨ mɨmatinaki'erieka panayuhayewa.
SOL 1:5 'Uka mɨyɨwi nepɨhɨkɨ, peru witsinepɨti'iɨmari, 'ukari 'aku Kerutsaremetari, nekaniyɨwini Tseraxi teɨteriyari waxamaru hepaɨ, witsinekatini'ɨimarika Tsarumuni 'ixuriki kiiyarieya hepaɨ.
SOL 1:6 Newaiyaritsie xepɨkanetsixeiyani nemɨyɨwikɨ, tau nenawiyari mɨyakaniuyurieni. Ne'iwama 'ukitsi mekaneniuyeheka, kaxie haraweriyari 'ɨwiyariyarikɨ mekaneniuta'aitɨani waɨriyarika, meta nekaxie 'aixɨa nepɨkatiɨ'ɨwiyaxɨ.
SOL 1:7 Kenetineutaxatɨa, 'uki nemɨmatsinaki'erie, ¿hakewa 'amuxatsima pepɨwaretihɨwe? ¿hakewa tuka pepɨwareti'uxipitɨwa? ¿Ne titayari netikuyeika xeikɨa, 'ahamikuma wamuxatsima wahamatɨa?
SOL 1:8 Xɨka 'atsipekatimaika, 'uka witsipemɨti'ɨimari 'ukari watsata pe'uyeikatɨ, muxatsi waketate kemɨreuyuyune kenanukuweiya meta 'atsipuri tɨɨrixi keniwahɨneni, muxatsi wahɨwemete wakii maku'utsie.
SOL 1:9 'Ekɨ meta kepemɨreuyukuniɨtɨa, 'uka nemɨmatsi naki'erie, Kawayutsixi nepɨwaraye'eriwa witsimemɨtehekɨniɨtɨarietɨka yumu'uyaritsie Parahuni kaxetaya memuhaxime.
SOL 1:10 Witsipɨtiyuxexeiya 'a'aurite meta kepemɨti'akutsa'a. 'Akɨipi witsipɨtiutimerɨka 'akukakɨ.
SOL 1:11 'Anakɨtsa tepɨtiwewieni hurukɨ meta pɨratakɨ.
SOL 1:12 Ti'aitame mexi mexatsie 'utika, witsimu'ɨa nemɨnetawiri kaniɨkɨ'ɨareni hetsiena.
SOL 1:13 'Uki neminaki'erie, mixaxi witsimu'ɨa purutsata mɨyeka hepaɨ kani'aneni, netawitsie kaneukukutsuni neheikukwekaku.
SOL 1:14 'Uki neminaki'erie, 'aukwe tuturiyari witsimu'ɨa hepaɨ kani'aneni 'Enikaritsie kaxie 'iteɨriyari hepaɨ.
SOL 1:15 Kwinimieme pepɨti'ɨimari, 'uka nemɨmatsinaki'erie. Witsipepɨ'ane. 'Ahɨxite, kukuruxi memɨyuhuta wahepaɨ pɨtiyuxexeiya.
SOL 1:16 Kwinimieme pepɨtitemaikɨ, 'uki nemɨmatsinaki'erie. Yemekɨ 'ekɨ pepɨnetsinake. 'Uki mɨnaki'eriwa 'Ɨxa mɨtsitsiɨrawi ta'itari kanayeimɨkɨ kepauka temɨyutiwitɨnitsie,
SOL 1:17 takii pikaxiyari kariuxa kanihɨkɨtɨni Huku mɨxexeurawi xawarikɨ kananukakitsieka.
SOL 2:1 Ne tuutu Tsarunitsie mayeweri mɨxuawe nekanihɨkɨtɨni, xewitɨ tuturi texuxuri mayeweritsie mieme.
SOL 2:2 'Uka neminaki'erie, kepauka hipame 'ukarawetsixi watsata muyeika, tuturi texuxuri xuyatsata muwe hepaɨ katiniyuxexeiyani.
SOL 2:3 'Uki neminaki'erie kepauka hipame 'ukitsi watsata muyeika, xikɨti 'ɨtsitsata mɨkawe hepaɨ katiniyuxexeiyani. Kaneninakeni hetɨana nemɨ'etɨpieka, witsikatinakakani takariyari.
SOL 2:4 Kanenewitɨni kiita 'ixɨarari muwatiwewiwatsie, muwa yunaki'eriya 'inɨariyari kaniwarepitɨani.
SOL 2:5 Kaxie takari patsaruyarikɨ keneneutatɨrɨkariya, manitsanakɨ keneneutahuxaitɨa, nekanimɨximeni naki'eriyakɨ.
SOL 2:6 Mamaya 'utatana miemetsie nemu'u mɨniuka'uxipitɨanike, meta yutserieta miemekɨ kwimɨneniukwenike.
SOL 2:7 Ne mɨpaɨ nepɨtixewawirie, 'ukarawetsixi Kerutsareme kiekatari, maxatsi 'ɨimarixi yeuta memu'uwakɨ, 'uka neminaki'erie xepɨkahehɨtɨaka xepɨkahei'uximatɨaka tsepa kepaukake yukɨmana manutanierixɨ.
SOL 2:8 'Uki neminaki'erie hiwarieya. Neuxei, 'ena kanamieni, 'utsunarɨmetɨ hɨritetsie, 'anutitsukwakatɨ hɨri 'amɨnenetsie.
SOL 2:9 'Uki neminaki'erie maxa hepaɨ katiniyuxexeiyani, maxa temaikɨ hepaɨ kani'aneni. Paratsɨ xekeneuxeiya, takiiwarie warita kaniutiweni, 'awienierenetɨ maxawariyarietɨkata, yɨkɨ'ɨwiyatɨ mayexaxawata.
SOL 2:10 'Uki neminaki'erie mɨpaɨ kanetiniutahɨawe: «Kenanukukexi 'uka nemɨmatsinaki'erie, hikɨmɨ kenewaye'a, 'uka witsipemɨti'ɨimari.
SOL 2:11 Neuxei, kananuyeyaniri xexerixa, hamatɨanata kaniutanɨni wiyeri.
SOL 2:12 Yeuta 'ari tuturi kanitineikani, kwikari tukariyari kanaye'aniri. 'Ariri naitsarie kwiepa kani'eniɨriɨkɨni kukuruxi memeɨyɨyɨxawi wakwikari.
SOL 2:13 'Ariri piní matɨari mieme takariyari kanixuaweni, 'Ari kaxie xututɨ witsikaniukɨ'ɨareni. Kenanukukexi, 'uka nemɨmatsinaki'erie, nehetsɨa kenaye'a, 'uka witsipemɨti'ɨimari».
SOL 2:14 Nekukuru pemeutuxa, 'ai mukatataritsie pemuyu'awieta, meta hɨri 'amɨtiumariwetsie paitɨ, kenanieri nepɨmatsixeiya, keneutaniu nepumatsi'enieni, 'aniuki 'aixɨa kanimayaka meta witsipekatini'axexeiyani.
SOL 2:15 Kauxaitsi xekeniwarutiwiya, mɨkɨ kauxaitsi tɨɨrixi takaxie memɨtsewixima, takaxie haraweriyari xuturiyari.
SOL 2:16 'Uki neminaki'erie nehetsiemieme kanihɨkɨtɨni, neta hetsiena mieme, mɨkɨ yumuxatsima kaniwarutihɨweni tuturi texuxuritsata.
SOL 2:17 Tau ka'akayuniwekaku 'akuxi meta 'etɨri ka'akumaweriwekaku 'akuxi, nehetsɨa kani'axeni, 'uki neminaki'erie. Maxa hepaɨ katiniunanautsani, maxa temaikɨ hepaɨ, hɨritsie paitɨ.
SOL 3:1 Tɨkarikɨ, ne'itaritsie ne'ukaitɨ 'uki neminaki'erie nekaniutiwauni, matsi nepɨka'itaxei.
SOL 3:2 Ne 'anukukeme nekaneyeikani kiekaritsie, huye mayehapanetsie meta waɨkawa mɨrewatuiyatsie, 'uki neminaki'erie nekuwaunetɨ. Ne'iwaunetɨ nepɨka'itaxeiyawe.
SOL 3:3 Mekaneniukaxexeyani kiekaritsie tehɨwemete. Mɨpaɨ netiwara'iwawiya: «¿'Uki neminaki'erie hawaikɨ xekatehexeiya?»
SOL 3:4 Mɨya netiwaru'iwawiyakake nekanikaxeiya 'uki neminaki'erie. Nekanitapa, neka'itatuayatɨ, nemaama kie nekaneiwitɨkɨni, kiita paitɨ hakewa nemaama mɨnetsiwatiniwexɨtsie.
SOL 3:5 Ne mɨpaɨ nepɨtixewawirie, 'ukarawetsixi Kerutsareme kiekatari, maxatsi 'ɨimarixi yeuta memu'uwakɨ, 'uka neminaki'erie xepɨkahehɨtɨaka xepɨkahei'uximatɨaka tsepa kepaukake manutanierixɨ.
SOL 3:6 ¿Titatihɨkɨ makumawetsie mɨretineika kɨtsi 'amuweni hepaɨ tiyuxexeiyatɨ, mixaxi meta 'ɨkwa witsimu'ɨa tsata, meta waɨkawa witsimu'ɨatɨka nɨtɨ?
SOL 3:7 Neuxei, Tsarumuni kaxetaya kaniyɨaneni. Haika tewiyari kuyaxi me'eweiyatɨ mana pamie, 'ixaheritsixi kuyaxiyaritsie memanayexeiyarie kwinimieme yeme memɨteheuyutakwiwawe.
SOL 3:8 Yunaitɨ 'ixipara mekanakawɨtɨatɨkani, meta mekateniuti'ɨkitɨarieni memeuyutakwiwawenikɨ, yunaitɨ yu'ixipara yuhɨiyametsie mekanikawɨtɨatɨkani tɨkarikɨ mɨkweriwa'anekɨ.
SOL 3:9 Tsarumuni yukaxeta kaniutawewieni kɨye 'aixɨa mɨ'anenekɨ Riwanu mieme.
SOL 3:10 Matiwetɨka Pɨratakɨ kaniutiwewieni, hurukɨta mitseiriyatɨka. 'Ɨpariyarita kaniutawipa taɨraɨyemekɨ, taɨtana mekaniwaku'utɨani me'inaki'erietɨ 'ukari Kerutsareme kiekatari.
SOL 3:11 Xekeniwayekɨni 'ukarawetsixi Tsiyunitari. Ti'aitame Tsarumuni xekenexeiyani. Yumu'utsie kanenamaka Kuruna maamaya menamaniri kepauka mutineɨkixɨtsie mieme kepauka 'iyarieya muyutemawiekai.
SOL 4:1 Kwinie yemekɨ pepɨti'ɨimari 'uka nemɨmatsinaki'erie. Witsipepɨti'axexeiya. 'Ahuxite 'ixuriki pemeukuwera warita, kukuruxi memeutuxa mepɨhɨkɨ. 'Akɨpate tsipuri xeitewayari memeuyɨyɨwi wahepaɨ pɨtiyuxexeiya Karaha hɨriyaritsie memu'uwa.
SOL 4:2 'Atamete muxatsi hekwamekɨ memutixikieni hepaɨ pɨtiyuxexeiya, xike memanatikɨ me'uka'ɨyarieka. Yuxexuitɨ mɨkɨ yu'iwama mepuwarexeiya, xewitɨ pɨkayuxaɨta.
SOL 4:3 'Ateni hɨiyame mɨxeta hepaɨ pɨtiyuxexeiya, 'aniuki pɨnetsihehana. 'A'aurite 'ixuriki pemeukuwera warita, xikɨti hixɨata mɨxitekieka hepaɨ pɨtiyuxexeiya.
SOL 4:4 'Akɨipi Rawiri tuxiyuya hepaɨ pɨtiyuxexeiya, tetexi mɨxitekietɨkakɨ mɨwewiya, hetsiena pukuwɨ xeimiriyari kɨmana memɨyukunarɨma, kuyaxi memɨyukunarɨma mɨkɨ naitɨ pɨhɨkɨ.
SOL 4:5 'Atsitsi yuhutatɨ maxatsi yeutari wahepaɨ mepɨteyuxexeiya, 'ɨimari niwemama yuhutame muwarayexei memɨtekwatɨwe tuturi texuxuritsata.
SOL 4:6 'Akuxi kakɨyɨriwekaku, 'akuxi 'etɨri katipariwekaku, nekananutiyeimɨkɨ mixaxi yemuriyaritsie, meta 'ɨkwa witsimu'ɨa hɨriyaritsie.
SOL 4:7 Naitɨ 'ekɨ witsipepɨ'ane, 'uka nemɨmatsinaki'erie, naitɨ 'aixɨa pepɨ'ane.
SOL 4:8 Hikɨmɨ tepanukakɨne Riwanu hɨriyaritsie, 'uka nemɨmatsihɨawene, Hikɨmɨ tepanukakɨne Riwanutsie. Kenanakaye'a 'Amaná hɨriyari 'amanutitewitsie, Tsenixi meta Heximuni yekɨrita. Kenanakaye'a hakewa mayetsi meme'uwatsie, mɨkɨ hɨritsie hakewa tɨwexi memayu'eririya wakietsie.
SOL 4:9 Ne'iyari pepɨhɨa, ne'iwa 'uka nemetsihahɨawe, xeihɨxiyarikɨtɨtɨ penetsi'uxeiyaku, 'akuka xeiwiwierikɨ ne'iyari pepɨhɨa.
SOL 4:10 Kwinie yemekɨ witsipa'ane 'anaki'eriya, ne'iwa 'uka nemetsihɨawene. Matsi witsipa'ane 'anaki'eriya, winu kemɨkaha'ane, meta pemuyutawiriwa witsimu'ɨa tixaɨtɨ kemɨkatiɨ'ɨa hepaɨ pepɨ'ɨa.
SOL 4:11 'Uka nemetsihahɨawe, 'atenitsie xiete payeneika, retsi meta xiete 'anenitɨa pepɨ'awieta. Riwanu kemu'ɨa mɨpaɨta pɨ'ɨatɨka 'akamixate.
SOL 4:12 Haraweri tuturi muwa'etsie mɨreuname pekanihɨkɨtɨni, ne'iwa 'uka nemetsihahɨawe, haraweri tuturi muwa'etsie mɨreuname meta haixa manukaname pekanihɨkɨtɨni.
SOL 4:13 'Atsitsi xeiharaweriyari pɨhɨkɨtɨka xikɨti muwa'etsie, witsi'anenetɨ 'ikwaxi, tuturiyari naaru meta hatsahaxi,
SOL 4:14 naitɨ kɨyexi muwatsuayatɨka witsimu'ɨatɨka, naaru meta 'atsapɨrani, karamu meta kanera, mixaxi meta 'aruhe, witsimɨti'anene xeikɨa naitɨ.
SOL 4:15 'Ekɨ haa pekanihɨkɨtɨni harawerita mieme, haixa haa mayenierenikɨ mɨ'ayumieme mexeiya pekanihɨkɨtɨni, haa 'akiyari pekanihɨkɨtɨni Riwanu makanena.
SOL 4:16 Kenanutanieri, 'eka tayeta mieme. 'Eka tatsutɨa mieme, niwa kenaye'a. Neharawerita xekeneuka'ekawi, witsikemɨtiuye'ɨa xekeneutawiwiexɨa. Yuharawerita 'uki neminaki'erie kehamieni muwa mieme 'ikwaxi witsima'ane keha'inɨata.
SOL 5:1 Neharaweritari nekaninuani, 'uka ne'iwa nemɨmatsi naki'erie, muwa nepikaxei mixaxi waritsamu meta, muwa xiete kwaiyarikɨ ne'iyari paye'axe. Muwa nepikaxexeiya waɨkawa winu meta retsi, naitɨ 'ikɨ pɨtinehetsiemieme. Wahamikuma Hamikutsixi, xeketenekwaka xeketene'ieka, xekeneutitarɨwai naki'eriyakɨ.
SOL 5:2 Ne nepukutsukai, matsi ne'iyari payenierekai. Hikɨ xeime niuki nekaniu'enieni. 'Uki neminaki'erie kitenie kanatawekaitɨni. «Ne'iwa 'uka nemɨmatsi naki'erie, witsipemɨti'ɨimari nekukuru, keneneupitɨa nemeutahanikɨ. Nemu'utsie haɨtsikɨ nepumu'uhawi, tɨkarikɨ mieme hawiriya nekɨpatetsie panakaxɨrɨwe».
SOL 5:3 Nematsi nekaniyutikemaripieni, nekapɨyɨwe tawari nemɨranakatɨni. Nematsi ne'ɨkatetsie nekaneuyuhauxixɨaniri, titayari tawari nereuyukwiemawani.
SOL 5:4 'Uki neminaki'erie mɨreukukekatsie hewakuxawakaku, muwa kaneukumeni, netaɨta nemeiyehɨakaikɨ waɨkawa nepɨnekatemawi.
SOL 5:5 Ne'anukukeka 'uki nemɨnaki'eirie nekatineuyepirieni, mixaxi nemamatetsie kanikakukekaitɨni. Ne'itɨwametetsie paitɨ kananuyetsukekaitɨni mɨreuyepieriketsie paitɨ kanikaxɨrɨwekaitɨni.
SOL 5:6 Kepauka nemɨreiyepiriri 'uki neminaki'erie, 'ari kaniukumawekaitɨniri. Neyakaitɨniri, hikɨ 'utɨmana nekaneyani. Nekanitiwauni peru nepɨka'itaxei. Kepauka nemitahiwi pɨkanetsiheta'ei.
SOL 5:7 Mekaneniutaxeiya tehɨwemete kiekaritsie meye'uwatɨ, kiekari kuraruyari memɨ'ɨwiya mekaneteniukwinitɨani mekaneneutiwaxɨani, nexikuri mekananutihurieni.
SOL 5:8 Ne mɨpaɨ nepɨtixewawirie 'ukari Kerutsareme kiekatari, xɨka 'uki neminaki'erie hawaikɨ xehekaxeiya, mɨpaɨ xeketenetahɨawi kename netikuye ne'inaki'erietɨ.
SOL 5:9 'Uka kwinie yemekɨ witsipemɨti'ɨimari, ketatineutaxatɨa, ¿kehepaɨ timatsiɨkɨ 'uki peminaki'erie hipame 'ukitsi watsata? ¿Kehepaɨ timatsiɨkɨ 'uki peminaki'erie hipame 'ukitsi watsata, mɨkɨ pemɨtatsiwawirie?
SOL 5:10 'Uki neminaki'erie kwinie yemekɨ pɨtitemaikɨ, xetamekɨ 'utimerɨkatɨ, tsepa tamamata miriyari wahamatɨa muyeika kanimatsiɨkɨni.
SOL 5:11 Mu'uya kanihurutɨni xeikɨa, kɨpateya 'etsiwa kanitutunini yɨyɨwitɨ kwatsa kemeu'ane hepaɨ.
SOL 5:12 Hɨxiteya kukuruxi wahepaɨ kani'aneneni 'aki'utɨa memɨyetei retsikɨ me'ɨwatɨkaitɨ, tetexi witsimɨ'anene hepaɨ metehekutetɨ.
SOL 5:13 'Auriteya waritsamu 'etsiyari hepaɨ pɨ'anene, tupiriya witsimu'ɨatɨka 'etsiyari. Teniteya tuturite 'atsutsena kanihɨkɨtɨni muwa matineika mixaxi.
SOL 5:14 Mamateya huru tepɨayari kanihɨkɨtɨni tupatsiyukɨ ti'utɨkaitɨ. Hukaya putimerɨka witsimɨtiharuani hepaɨ ti'utɨ yuyuawimekɨ.
SOL 5:15 Teuriteya huta 'ikitsaraɨyari pɨhɨkɨ 'anuyexawawatɨtɨ huru mɨhɨkɨakɨ yuwetɨkaitɨ. Hɨxiena xɨka 'uyeikani pumariwekare, Riwanu muyeikani hepaɨ kariuxa tsata.
SOL 5:16 Tenieya kanakakani, mɨkɨ witsikani'aneni 'uki. Mɨpaɨ kani'aneni 'uki neminaki'erie, nehamiku, 'ukarawetsixi Kerutsareme kiekatari.
SOL 6:1 ¿Kekuta reuyunixɨ 'uki peminaki'erie, 'uka yemekɨ witsipemɨti'ɨimari? ¿Hakewa kuta petɨa? 'Ahamatɨa te'uhutɨ tepiwauyu.
SOL 6:2 'Uki neminaki'erie kaneyani yuharawerita, waritsamu muye'etsietsie, muwa mɨtiwaikakɨ, tuturi 'atsutsena tipinike.
SOL 6:3 Ne 'uki neminaki'erie hetsiemieme nekanihɨkɨtɨni, 'uki neminaki'erie nehetsieta kanimiemetɨni, Mɨkɨ yumuxatsima tuturi 'atsutsena tsata kaniwarutihɨweni.
SOL 6:4 'Ekɨ 'uka nemɨmatsinaki'erie, witsipepɨti'ɨimari kiekari Tiritsa hepaɨ, witsipe'anetɨ kiekari Kerutsareme hepaɨ, pemɨmariwe xurawetsixi wahepaɨ.
SOL 6:5 Kwi pepɨkanetsixeiyaniri, nepeɨxɨyarie 'ahɨxite netsixeiyakaku. 'Akɨpate tsipuri xeitewayari wahepaɨ pɨtiyuxexeiya memuyuhayatɨwe Karaha hɨriyaritsie.
SOL 6:6 'Atamete tsipuri 'ukari tɨɨrixi wahepaɨ pɨ'anene hekwamekɨ memuti'ɨwaxɨ. Yuxexuitɨ mɨkɨ mepuyuhuhuta, xewitɨ yuxaɨta pɨka'uyeika.
SOL 6:7 'A'aurite pemeuyukunama warita manitsana hepaɨ pɨtiyuxexeiya.
SOL 6:8 Tsepa haika tewiyari 'ukari te'aitamete wa'ɨitama memakɨne, tsepa nauka tewiyari 'ukari memɨhɨkɨ ti'aitame hutarieka 'ɨitamama tsepa mekate'inɨaritɨ 'ukari 'ɨimarixi,
SOL 6:9 peru xewitɨ hɨkɨa xeikɨa kanihɨkutɨni nekukuru 'etsimupe witsimɨti'ɨimari, 'uka kwinie maamaya mɨtinaki'erie, 'aixɨa mɨtixeiya mitiniwexɨ. Hipatɨ 'ukari kepauka memixeiya 'aixɨa mepɨtehehɨawe, 'ukari te'aitamete wa'ɨitama witsimemɨ'anene meta hipatɨ 'ukarawetsixi ti'aitame hutarieka 'ɨitamama mekaninɨawani.
SOL 6:10 ¿Kemɨ'ane 'ikɨ pɨyɨane witsi'anetɨ tau 'ɨrɨya hepaɨ? Witsikani'aneni metsa hepaɨ, xawatɨtɨ tau hepaɨ, mariwetɨ xurawetsixi muyuawitsie memeukatei wahepaɨ.
SOL 6:11 Nekaneyani kariu haraweriyari muyema nemɨtixeiyakɨ hekwamekɨ mayeweritsie mɨtiyɨyɨra, ne'ixeiyamɨtɨ kaxie mɨyɨyɨra, meta manitsana kɨyeyariteyari muxutu.
SOL 6:12 'Atsinekareyutimaiwekaku, netemawierikakɨ kauka kaxetatsie nenekaya, takiekaritsie ti'aitame kaxetayatsie.
SOL 6:13 Keneukunua, 'uka Tsurami kiekame keneukunua, keneukunua tahamatɨa keneuyeikani, tepɨmatsiheuxeiyaku. 'Uki mɨnaki'eriwa ¿Titayarikuta 'uka Tsunami kiekame xeteheuxeiyaku, neiya hutakɨa yu'utɨma mehewetɨkaikaku miemetsie hepaɨ?
SOL 7:1 'Uka ti'aitame pemunu'aya witsipemɨti'ɨimari, witsipɨtiyuxexeiya 'a'ɨkate kakaitsie heutawetɨkaitɨ. Witsipemanupe, nakɨtsa hepaɨ pɨ'ane 'aixɨa reutamaiwetɨ mitiwewiwa hepaɨ.
SOL 7:2 'Axɨtemutsi tekɨxi hepaɨ pɨ'ane winu witsi'anetɨ mɨhɨne hepaɨ pɨ'ane. 'Ahuka tɨriku hɨriyari hepaɨ pɨ'ane waritana tuturi 'atsutsena mahane.
SOL 7:3 'Atsitsi maxatsi tɨɨrixi yuhutatɨ wahepaɨ mepɨteyuxexeiya, maxa 'ɨimari yuhutame yuniwema muwarayexeiya hepaɨ.
SOL 7:4 'Akɨipi tuxiyu mutuxa mɨtse'i kanihɨkɨtɨni, 'Ahɨxite huta haixayari pɨhɨkɨ Hetsiwuni mieme, Wati-Xawini kitenie 'aurie mɨtineniere. 'Atsuri Riwanu tuxiyuyari hepaɨ pɨ'ane, Ramatsiku meutaniere.
SOL 7:5 'Amu'u waɨkawa pahekɨa Kaximeru hɨriyari kɨtsie mieme hepaɨ. Hiru mɨyɨtsikimawi hepaɨ pɨ'anene 'akɨpate, 'etsiwa tsiturawime pehewawɨtɨatɨ ti'aitame kwi pɨmatsixeiya 'aumɨ.
SOL 7:6 Yemekɨ kwinie pepɨti'ɨimari, 'uka nemɨmatsinaki'erie, 'ukaratsi witsipemɨtiuka'iyari pepɨhɨkɨ.
SOL 7:7 Kwinie peputewi takɨ 'amɨtɨtɨ hepaɨ, meta 'atsitsi huta takariyarieya pɨhɨkɨ.
SOL 7:8 Ne mɨpaɨ nepɨtiuyɨhɨawixɨ: «Nekananutimakimɨkɨ takɨ 'amutewitsie, takariyari nepiini netinayeitɨamɨkɨ». 'Atsitsi kaxie takari hepaɨ ke'aneneni, manitsana hepaɨ peke'ɨ'ɨaka,
SOL 7:9 winu witsima'ane hepaɨ keha'aneni 'ateni. 'Uka mɨnaki'eriwa Winu witsima'ane 'uki neminaki'erie hetsɨa keye'ani, tenieyatsie ke'utayani meta tameteyatsie.
SOL 7:10 Ne 'uki neminaki'erie hetsiemieme nepɨhɨkɨ, kanenikuwauneni waɨkawa netsihaunaki'erietɨ.
SOL 7:11 Niwa kenaye'a, 'uki nemɨmatsinaki'erie, yeuta tekaniyehuni, muwa yɨwikɨta tepeka'iyunieni tuturite yeutamieme tsata.
SOL 7:12 Ximeri paitɨ tepeuhu kaxie haraweriyari tsata, tepeunieriyu kaxie kareyɨyɨrari, Xɨkari tuturiyari hetixutuweni, xɨka 'ikwaxi mayehatsiyatɨka hexutukari. Mana nekameneyetuiriemɨkɨ nenaki'eriya.
SOL 7:13 Manirakura witsimu'ɨa kanitawiwiwani, meta naitɨ takitenie katinapika 'ikwaxi witsimɨ'anene hikɨketimieme meta 'aikɨ paitɨ timieme, nekametini'utsirieka 'ahetsietimieme 'uki nemɨmatsinaki'erie.
SOL 8:1 Xɨka ne'iwa pehɨkɨtɨnike, nemaama tsitsieyatsie pemutawerixɨ. Kepauka nemɨmatsi'anukunake kiekaritsie nepɨmatsiku'itsewenikeyu, xewitɨ pɨkayɨwenikeyu kename 'axaneyɨane mɨnerahɨaweni.
SOL 8:2 'Amamatsie nekawietɨ, nemaamakie nepɨmatsi'atɨanikeyu, pemɨnetita'ɨkitɨanikɨ naki'eriya hepaɨtsita. Winu nepɨmatsi'anu'itɨanikeyu naitɨ tinɨkame, meta 'ikwaxi neharaweritamieme hayari.
SOL 8:3 Mɨtiniyɨweniketɨ nemu'u 'utatana nemɨniuka'uxipitɨani. Mɨtiniyɨweniketɨ yutseriekɨ mɨneniuwiya.
SOL 8:4 Ne nepɨxewawirie, 'ukarawetsixi Kerutsareme kiekatari, xepɨka'ihɨtɨaka meta xepɨka'i'uximatɨaka 'uka neminaki'erie, mɨkɨ yɨkɨmana kepaukake manutaniere.
SOL 8:5 ¿Kemɨ'ane pɨyɨane makumawetsie matimie 'uki minaki'erie hetsie rawiyatɨ? 'Uki mɨnaki'eriwa Xikɨti hetɨa nepɨmatsi'anutahɨtɨa, mana 'amaamatsie pepɨkaya, meta manatsiere pɨmatsi'utiniwexɨ.
SOL 8:6 Kenena'utɨaka 'a'iyaritsie tseyu hepaɨ, tepɨa hepaɨ 'amamatsie kenena'utɨaka. Waɨkawa pɨtɨrɨkaɨye naki'eriya, mɨki hepaɨ, kaniyuritɨni naki'eriya, mɨki teukiya hepaɨ. Naki'eriya taiyari Kakaɨyari taiyaya hepaɨ kani'aneni.
SOL 8:7 Tsepa haa muwaɨkawa pɨkayɨwe mitɨnikɨ, meta haa hatɨa mieme mikumaweriya tɨma pɨkayɨwe. Xewitɨ xɨka tita naime mɨrexeiya tipatamɨkɨni naki'eriyakɨ, 'axamɨtikɨhɨawarɨwanikɨ xeikɨa katinikaxeiyamɨkɨ.
SOL 8:8 Kwinimieme yemekɨ 'etsipuyumate tataru 'uka 'akuxi tsitsiteya pɨkahanexɨawawe. ¿Keteteyurieni xɨka ta'iwa 'uta'iwaurieni?
SOL 8:9 Xɨka kiekari kuraruyaritɨnike, heimana tepetayatsakeyu pɨrata. Xɨkata 'itupari hɨkɨtɨnike, heimana tepikamanikeyu kariuxa mexayari.
SOL 8:10 Ne kiekari kuraruyari nekanihɨkɨtɨni, meta netsitsite huta tuxiyuyari pɨhɨkɨ. 'Ayumieme kepauka 'uki neminaki'erie mɨnetsikuxexeiyatsie kayuwatɨ nemukaxeiya hepaɨ nekatiniyumaika.
SOL 8:11 Tsarumuni kaxie haraweriyari kanexeiyakaitɨni Wahari-Kamuni paitɨ, hipame te'uximayatamete kaniwarehɨritɨani. Mɨkɨ yuxexuitɨ mekaniyetuiriwakaitɨni 'ikwaxi mekaxuxuawerekai, xeimiriyari pɨrata tuminiyari.
SOL 8:12 Tsarumuni xeimiriyari tumini kena'ɨtɨ, xemeta te'uximayatamete huta tsienituyari, peru nekaxie haraweriyari nexeikɨa pɨtinepiini.
SOL 8:13 'Ekɨ, tuturi muwa'etsietɨkatsie pemɨti'aita, 'aniuki xeikɨa mekanita'enieka tahamikuma, kenetaniu kuta tepi'enieni.
SOL 8:14 Xeiya keneumietɨ, 'uki nemɨmatsinaki'erie. Keneunautsarɨmetɨ maxa hepaɨ, maxa 'etsimupe hepaɨ, hɨritetsie waritsamukɨ muwiriyarietɨkatsie.
ISA 1:1 Kemɨtiunierixɨ Kitsariyaxi 'Amuxi nu'aya Kura nuiwariyari hepaɨtsita meta Kerutsareme, 'Utsiyaxi, Kutani, 'Akatsi meta 'Etsekiyaxi, Kura kwieyaritsie te'aitamete mete'aitakaku.
ISA 1:2 Muyuawi, xekeneu'enana. Kwie, meta keneu'ena. Yawé mɨpaɨ kanaineni: «Ne tɨɨri nekaniwarutiwaweriya 'ameyumateme nekaniwarayeitɨani, peru mɨkɨ menetsi'aye'unietɨ mekanakɨne.
ISA 1:3 Tuuru kwietsaname yukutsiyari kanimateni meta puxu kanemarieka hakewa kutsiyarieya mɨreitimikwa, peru 'ixaheritsixi mɨpaɨ mepɨkatemate, neteɨterima mepɨkaheu'enana».
ISA 1:4 Xɨa'ui nuiwari 'axateyuruwamete, teɨteri xehetsie mɨrahɨiwa, 'axateyuruwamete nuiwariyari, tɨɨri heitseriemekɨ yaxemɨkateyurie. Yawé xekaniuku'eirieni. Mɨpatsie 'Ixaheri hetsiemieme tixaɨtɨ tihɨkɨtɨme xepɨka'ayeitɨa. Yu'ɨtɨma xekanekɨne.
ISA 1:5 ¿Ketitayari tawarita xetetiweiwani? ¿Ketitayari xete'iyeweiyani xe'eye'unietɨ? Naitɨri'amu'u kaniweiyaka, naitɨri 'a'iyari katinikuyeni.
ISA 1:6 Xeketatetsie tsutɨtɨ xeyekɨrita paitɨ ye'atɨ naitsarie xepɨteheukukuye: mɨkɨ naimetsie xepeukuweiyatɨka, xepeukuyuyuawi, meta haiya hayepietɨkaime xepexeiya, nixewitɨ pɨkaxeti'uayemawe meta pɨkaxe'anakɨhɨaxɨawe, nixewitɨ hatseitikɨ pɨkaxeka'uayemawe.
ISA 1:7 Xekwieyaritsie kanakumaweni, kiekariteya tai harakunayari kanihɨkɨtɨkani, metanenierekakutɨtɨ kɨkamete wa'etsarita timieme mekateniukaxɨrɨwani, wakwie kanakumaweni, 'ateewa kiekatari memɨwaruka'una hepaɨ.
ISA 1:8 Tsiyuni witsimɨti'ɨimari xamaru 'ewiweme harawerita mieme hepaɨ kaniuyɨni, pinixi ma'etsietsie 'etɨpiweme hepaɨ kaniuyɨni, kiekari manutinamieka hepaɨ kani'aneni.
ISA 1:9 Xɨka Yawé Naimekɨmɨtɨrɨkaɨye hipame kawaruhayewake me'ayeneniereme, hikɨ xɨari Tsuruma hepaɨ pɨraku'anenike, meta xɨari Kumuxa hepaɨ tepauyewenike.
ISA 1:10 Yawé niukieya xekeneu'eni, xeme Tsuruma hetsie xemɨte'aita. Xekeneu'eni takakaɨyari 'ɨkitɨarikaya, Kumuxa kiekatari.
ISA 1:11 Yawé mɨpaɨ kanaineni: «Tixaɨtɨ pɨkatihɨkɨ waɨkawa memɨnetemawirie. Muxatsi 'ukitsi wamawari taiyarikakɨ 'ari nepɨwaɨripieri meta tewaxi memɨwaiyatɨka wawiyayarikɨ, tuurutsixi, muxatsi meta tsipuri waxuriya pɨkanetsinake.
ISA 1:12 ¿Titayari nehɨxie xete'axe? ¿Kemɨ'ane pɨxe'uta'aitɨa tewaxi xemɨwa'atɨwanikɨ netuki takwa memɨte'akuketsinanikɨ?
ISA 1:13 Xepɨkanetsi'atɨiriwaniri mawari tixaɨtɨ mɨkatihɨkɨ, 'ɨkwa witsimu'ɨa nekanixani'erieka. Metsa manatiwenitsie, 'uxipiya tukari, mɨrayutixexeɨritɨretsie, nepɨkayɨweri nemɨtinewieka yakɨ xeikɨa kememɨnete'ayexeiya.
ISA 1:14 Metsa 'ixɨarariyari meta wa'ixɨarari naime ne nepɨxani'erie, xekaneniuti'ikatɨani netinewietɨri nepu'uxe.
ISA 1:15 Kepauka teikɨ xemememe, ne nepɨkaxexeiyaniri, tsepanetɨ yunenewieri xemɨmɨiriya, ne nepɨka'i'enieni, yumamatetsie naitɨ xemeuxuxurekɨ.
ISA 1:16 Xekeneuyuhauxixɨa, xekeneuyu'itiexɨa. Nehɨxieri 'axaxepɨkateyurieka. 'Axaxeteyurietɨ xeketeneuhayewa.
ISA 1:17 'Aixɨa mɨti'ane pɨta xeketenemaika. Mɨtiheitserie xekeneutiwawa, mɨtiuyukananaima xekeneutati'a. Nutui hetsiemieme xekeneutaniu meta wiura hetsie xekenenuaka».
ISA 1:18 Yawé mɨpaɨ kanaineni: «Xekenakɨni, 'aixɨa tepɨtayurieni 'ahekɨakamekɨ, ¿'Axakexemɨteyuriekɨ xuriya muweka hepaɨ ti'ane? 'Ɨwi hepaɨ tituxatɨ kanayeimɨkɨ. ¿'Axakexemɨteyuriekɨ tixeta mɨyɨtsikimaɨyeni hepaɨ? Muxa huxarieya mutuxa hepaɨ kaniyɨmɨkɨ.
ISA 1:19 Xɨka xeme xeyuwaɨriyani yaxemɨtekakɨnekɨ, kwiepa timieme 'aixɨa mɨti'anene xekatenikwakakuni.
ISA 1:20 Xɨka xekayuwaɨriyani meta 'akuxi xeheye'unieka. 'Ixiparakɨ xekanikwi'iwakuni».
ISA 1:21 Kiekari pemɨkawatayuanekai hikɨri xeime hamatɨa tuminikɨ pepukahupu. Meripaitɨ 'aixɨa ti'aneme waɨkawa pepɨrexeiyakai. Mɨtiheitserie hetsiena puyuhayewakai, hikɨ matsi teyumiekate xeikɨa mepuyuhayewatɨwe.
ISA 1:22 'Apɨrata temɨxikitɨ kanayani, 'akaxie winuyari 'aixɨa ma'ane, haa kanayani.
ISA 1:23 Te'aitamete 'ahetsɨa miemete mepunetsi'aye'unie, tenawayamete mepuwa'iwama, yunaitɨ 'itarikakɨ metekuxatatɨ memɨtepitɨariekakɨ mepɨnaki'erie tixaɨtɨ xeikɨa mepɨte'iwaku. Nutui hetsiemieme mepɨkahaniutɨka, meta wiura hetsiemieme.
ISA 1:24 'Ayumieme Ti'aitame mɨpaɨ kanaineni, Yawé Naimekɨmɨtɨrɨkaɨye, mɨtɨrɨkaɨye 'Ixaheri hetsiemieme: «Kenemɨtiha'akɨ yanepɨtiyurieni memɨnetsi'aye'unie wahetsie, nekatiniwarakapitɨamɨkɨ mɨkɨ kememɨnetsi'uyuri.
ISA 1:25 Tawarita netɨrɨkariya xehetsie nepɨtatuani, temɨxikiyari xapunikɨ nepuku'itieni meta naime nekanakuyeitɨamɨkɨ titakɨ pemɨkati'itiyakaikɨ.
ISA 1:26 'A'itsɨkate 'aixɨa nekaniwatiyurimɨkɨ matɨari hepaɨ, meta 'a'ɨxatsitɨwamete matɨari hepaɨ. Hikɨ 'ana “Kiekari heitserie mexeiya” pekatinitewakamɨkɨ, “Kiekari mɨkawatayuitɨariwa”».
ISA 1:27 Tsiyuni pɨnanaiyani mɨtawikweitsitɨarienikɨ tika'eniexɨame, meta tita mɨtiheitseriekɨ, kemɨ'ane mɨtihayewa 'axatiyurienetɨ.
ISA 1:28 Peru kemɨ'ane memɨkayuwaɨriya meta 'axamemɨteyurie mekanikumaweriyariekuni, meta mekanikwikuni kemɨ'ane Yawé memuku'eirieni.
ISA 1:29 Xekanititewiyakuni xiu kɨyeyari kwinimieme xemɨtenaki'erie, tuturite muwa'iteɨtsietsie memenayexei wahetsiemieme tewiyarika katinayeimɨkɨ.
ISA 1:30 Xiu kɨyeyari xawariyari muwawaki hepaɨ kanitiyɨmɨkɨ, haraweri tuturi mɨwa'etsietsie mɨka'ukahatuiyarɨwa hepaɨ.
ISA 1:31 Tewi mɨtɨrɨkaɨye mɨaxa hepaɨ kaniyɨmɨkɨ, meta 'uximayatsikaya tai tsipɨrikiyari hepaɨ, 'axeikɨa hutatɨ kanititaimɨkɨ, xewitɨ pumaweni mitɨnikɨ.
ISA 2:1 Kitsariyaxi kemɨtiunieritɨarie 'Amuxi nu'aya Kura hetsiemieme meta Kerutsareme:
ISA 2:2 'Imatɨrieka tukaritsie, hɨri Yawé kiiya manuwe pɨkawatayuitɨarieni matsi 'a'utewitɨ kanayeimɨkɨ, hɨrite naime kana'iwamɨkɨ, hetsɨana yunaitɨ nuiwarite mekani'axɨakuni.
ISA 2:3 Teɨteri meyumɨiretɨ mekani'axɨakuni, meta mɨpaɨ mekanitiyuakuni: «Xekenakɨni, Yawé hɨrieyatsie tepanutikɨne, Kakuwu Kakaɨyarieya kie, yuhuye mɨtatsiheta'ɨkitɨanikɨ meta huyetana xeikɨa temuhunikɨ». Karikɨ Tsiyunitsie xeikɨa 'ɨkitɨarika kanayenexɨamɨkɨ, meta Kerutsaremetsie Yawé niukieya.
ISA 2:4 Mɨkɨ nuiwarite watsata kaniwataxanetamɨkɨ meta mɨkɨ yuwaɨkawame wa'itsɨkame kanihɨkɨtɨkamɨkɨ. Yu'ixipara hararu mepayeitɨaxɨani meta yupitsika 'ɨxa xikame mekanayeitɨaxɨakuni. Nuiwariteri 'ixiparakɨ mepɨkayutakwini, tawariri mepɨkayuti'ɨkitɨani kuyaxa miemekɨ.
ISA 2:5 Kakuwu kiekarieya, niwa kenaye'a, Yawé hekɨariyayatsie tepuhuni.
ISA 2:6 'Ateɨterima pepɨwaruku'eiri, Kakuwu nuiwarimama, tau manatineika kiekatari muyuawitsie miemekɨ memɨteyɨ'ɨkitɨa wayeiyarikɨ memɨhɨpɨnekɨ, meta memɨtehetimamateke piritsiteutsixi kememɨtewarexeiya wahepaɨ, meta tɨratu mepuyuwewirie 'ateewa kiekatari wahamatɨa.
ISA 2:7 Wakwietsie huru meta pɨrata pɨhɨne, mɨraye'atɨka memɨteheuxeiya pɨkati'inɨari. Wakwietsie kawayutsixi kwinimieme mepɨte'ane, meta wakaxetate kuyaxa mieme pɨkati'inɨari.
ISA 2:8 Wakwietsie kakaɨyarixi memɨwewiyatɨka mepɨhɨne, teɨteri yuwewiya hɨxie mepukatunuma'uwe, yumamakɨ ketitamemɨte'utiwewi.
ISA 2:9 Tewi tixaɨtɨ pɨkarayeitɨariwa, tewi pɨkayɨwe 'atsimɨtiuyurieni. Pɨkayɨweri pemɨtiwareuyehɨwirieni.
ISA 2:10 'Aitá keneutahaki, kwauni tsata keneuyuti'awieta Yawé pe'ayemakatɨ meta witsikemɨ'anekɨ mariwetɨ.
ISA 2:11 Kwinimieme mɨtiyuta'ɨre hɨxiteya tixaɨtɨ pɨkarayeitɨarieni teɨteri kememɨteyuti'ɨre kanititunariexɨariemɨkɨ. 'Iya tukaritsie Yawé xeikɨa 'aixɨa katinikuxaxatsiwamɨkɨ.
ISA 2:12 Yawé Naimekɨmɨtɨrɨkaɨye xeime tukaritsie kanayenemɨkɨ yunaitɨ memuyuti'ɨre meta mamariwaweme memayuyeitɨwa wahepaɨtsita, yunaime memuyuti'ukita wahepaɨtsita, tixaɨtɨ mekatehɨkɨtɨme mɨwarayeitɨanikɨ,
ISA 2:13 kariuxa Riwanutsie mieme, muyuti'ɨre meta kwinimieme mutɨtɨ hepaɨtsita, meta naime xiu Watsanitsie mieme hepaɨtsita,
ISA 2:14 hɨri naime 'amutɨtɨtsie mieme hepaɨtsita, meta yemurite 'amutɨtɨ hepaɨtsita,
ISA 2:15 tuxiyu kwinimieme mutɨtɨ naime hepaɨtsita, kuraru mɨtɨrɨkawi hepaɨtsita,
ISA 2:16 yunaime kanuwate 'amupapa Taritsi mɨye'axe wahepaɨtsita, meta yunaime kanuwate 'amupapa witsimɨ'anene wahepaɨtsita.
ISA 2:17 Tewi kwinimieme mɨtiyuta'ɨre kanititunariexɨamɨkɨ, teɨteri kememɨteyuti'ɨre tixaɨtɨ pɨkarayeitɨarieni. 'Iya tukaritsie Yawé xeikɨa 'aixɨa katinikuxaxatsiwamɨkɨ,
ISA 2:18 meta yuri memɨkakakaɨyarixi yuheyemekɨ mepukumaweriyarieni.
ISA 2:19 Teɨteri terɨta mekaneutahaxɨakuni, meta kwiepa makutsitsinitsie, Yawé me'ayemakatɨ meta witsikemɨ'anekɨ mariwetɨ, kepauka mɨkɨ manukukenitsie kwie tayuitɨanike.
ISA 2:20 'Iya tukaritsie tewi yukakaɨyarixi hurukɨ memɨwewiyatɨka meta pɨratakɨ, mɨkɨ mɨwarutiwewiekai muwarayexeiyanikɨ, teuxari meta 'atsixi memuyekietsie puwareutaxɨrieni.
ISA 2:21 Tetexi terɨyarita kaneutahamɨkɨ meta 'ai mukatatarita, Yawé me'ayemakatɨ meta witsikemɨ'anekɨ mariwetɨ, kepauka mɨkɨ manukukeni kwie mɨwatayuitɨanikɨ.
ISA 2:22 Tewitsie yuri xete'erietɨ xeketeneuhayewa, mɨkɨ 'etsiwa xeikɨa katinaye'aka. Tukarieya xeihɨtsieriyari kanihɨkɨtɨni.
ISA 3:1 Tsiparatsɨ xekeneu'enana. Ti'aitame, Yawé Naimekɨmɨtɨrɨkaɨye, Kerutsareme meta Kura pɨtinawairieni, naime parewiya meta naime titakɨ memɨteyumikwakai: naime 'ikwai memɨteheuyehɨakai, meta naime haa kememɨteheuyehɨakai.
ISA 3:2 Mɨkɨ mɨka'utimamawe meta kwinimieme mɨreuyutamiewe pakumaweriya, 'itsɨkame meta Kakaɨyari niukameya, muyuawitsie miemekɨ mɨtiyɨ'ɨkitɨa meta 'ukiratsi,
ISA 3:3 kuyaxi wa'ukiyari meta mariwemekɨ ti'uximayatame, 'ɨxatsitame, meta kwinimieme mɨreutawewiwe meta 'utakwitɨ tixaɨtɨmexi mɨtiwawiwiya.
ISA 3:4 Memanuyetei temari pɨta nepɨwarayeitɨani, meta tɨɨri te'aitamete nepuwarayeitɨani.
ISA 3:5 Yuxexuitɨ hipame wahamatɨa mepuyuti'uximatɨani: yuhepaɨ 'ukitsi mepuyu'uximatɨaka, yu'aurie kiekatari, temaikɨ, 'ukiratsi hamatɨa, tewi tixaɨtɨ mɨkatihɨkɨ, waɨkawa mɨtiyunaki'erie hamatɨa.
ISA 3:6 Hikɨ xewitɨ tewi yu'iwa kaniwiyamɨkɨ yupaapa kie, mɨpaɨ katinitahɨawimɨkɨ: «'Ekɨ pemanuyeyerɨni pepɨhɨkɨtɨni, 'ekɨ tuwaxa 'amɨyewa pemexeiyakɨ, 'ikɨ kiekari naitɨ mu'unitsie 'aixɨa ketineuyuri».
ISA 3:7 Matsi mɨkɨ mɨpaɨ katinita'eiyamɨkɨ: «Ne tiyu'uayemawame nepɨkahɨkɨ, nekie paa pɨkaxɨawe meta tuwaxa 'amɨyewa nepɨkahexeiya, teɨteri nemɨtiwata'aitɨanikɨ pepɨkanetsi'anuyeyetsani».
ISA 3:8 Kerutsareme kaniwatayuakeni, Kura kanika'unikeni, mɨya mepɨte'anuyehu Yawé kemɨkatinake memutiyuanekɨ meta mɨpaɨ memɨte'u'uwakɨ: me'ixani'erietɨ mɨkɨ mariwetɨ witsikemɨtiyuxexeiya.
ISA 3:9 Kememɨteyurie yuhɨxie paitɨ mepumatsiɨkɨ meta ke'axamemɨteyuriekɨ mekaniyutemamawieka Tsurumatari wahepaɨ, kememɨteyurie naime mepɨtewaxeitsitɨa. Xɨa'ui mɨkɨ wahetsiemieme, yɨkɨmana 'axa'anekɨa memeuyukaxɨrɨwakɨ.
ISA 3:10 Heitseriemekɨ yamɨtikamie mɨpaɨ xeketeneutahɨawi kename 'aixɨa 'anemekɨ yeyani, kemɨtiuyurikɨ kaniyutemawiekamɨkɨ 'ikwaxi xeiyatɨ.
ISA 3:11 Xɨa'ui 'axamɨtiuka'iyari, matsi 'aixɨa 'anemekɨ pɨkayeyani. Ti'uximayatɨ kemɨtiuyuri yakatinipitɨariemɨkɨ.
ISA 3:12 Xɨa'ui neteɨterima, waɨriyarika memɨtewa'aitɨa tɨɨri mepɨhɨkɨ meta 'ukarawetsixi mepɨte'aitamete. Xɨa'ui neteɨterima, memɨxe'uwitɨxime mepɨxeheuyexɨrie, huyeta yeuta mepeukuyuyuipike.
ISA 3:13 Yawé puyukuha'aritɨwa wahetsie mɨrahɨanikɨ, 'apuwe yuteɨterima wataxanetake.
ISA 3:14 Yawé 'iwaurika kaniwewimɨkɨ 'ukirawetsixi wahepaɨtsita meta yuteɨterima wahɨxie memanuyetei: «Xeme kaxie xekaniukaxɨtɨani, tixaɨtɨ mɨkarexeiya tipiiniteya xekiita katineyepika.
ISA 3:15 ¿Titakɨ heitserie xetehexeiyatɨ neteɨterima xetewananaima tixaɨtɨ memɨkatehexeiya waheima xete'uyehu?», mɨpaɨ kanaineni Ti'aitame, Yawé Naimekɨmɨtɨrɨkaɨye.
ISA 3:16 Yawé mɨpaɨ kanaineni: «Tsiyuni niwemama 'ukari kwinimieme mekateniyuti'ɨreni yɨkɨipi mehutseratɨkaitɨ mekaniku'uwani, xeime kwamanamɨtɨ kemɨtiuneniere meta kememɨte'ɨkɨka mepuyumatsiɨkɨ, yu'ɨkatetsie memɨteheutapietɨka mete'utiyuitɨwatɨ.
ISA 3:17 'Ayumieme Yawé nerɨitsitekɨ kaniwakanɨmɨkɨ Tsiyuni niwemama 'ukari wamu'utsie, Yawé yemekɨ memu'umetsekame kaniwahayewamɨkɨ».
ISA 3:18 'Iya tukaritsie, Ti'aitame naime pɨtikɨxɨnaxɨani tita memɨteheukapine: kakaitsie tepɨa mɨkamanetɨka, kɨpatetsinamete, tɨpunite,
ISA 3:19 nakɨtsate, matsɨwate, 'ixurikite kɨmana memanuyukunarɨma,
ISA 3:20 tuwaxate, tepɨa kaunariyari 'ɨkatetsie mieme, hɨiyamete, witsimɨtiu'ɨatɨka, mɨrakatɨriketɨka,
ISA 3:21 hanira, mɨxikɨrawi tsuritsiemieme,
ISA 3:22 kamixate witsimɨti'anene, matate, kamixa witsimɨnene, kɨtsɨurite 'etsimɨnene,
ISA 3:23 xikɨrite, 'ixurikite 'aixɨa mɨ'anene, mukuretsi meta xikurite.
ISA 3:24 Witsimɨtiu'ɨakai katinitikuri'ɨakaxɨamɨkɨ, hɨiyame kaunari pɨhɨkɨtɨni, mepɨkahunixɨani witsimemɨteyutsikeniyari, hiwerika kamixayari mepanakatɨni witsimɨ'anene memanakatɨkɨniyari, mepuyutetewiyani witsimemuyukuyuruwaniyari.
ISA 3:25 'Ateɨterima 'ixiparakɨ mepɨkwi'iwa, meta memɨka'ukamama 'ahetsɨa miemete meyukwitɨwetɨ mepukwi'iwa.
ISA 3:26 Kiekari 'itupariyari putitsuanani meta hiwerika kamixayari panakatɨni, yuxaɨta kiekari nutuixietɨ, kwiepa pɨtayerɨni.
ISA 4:1 'Iya tukaritsie, 'ukarawetsixi me'atahutatɨ 'uki xeime mepuwiya, mɨpaɨ mepɨte'itahɨawe: «Tame taxaɨtame tepɨteyumikwani meta tepɨteyuketɨaka, 'ekɨ tsikere kepemɨtitewakɨ ketaneyetuiri: Ketaneɨxɨna temɨkatewinɨariekakɨ».
ISA 4:2 'Iya tukaritsie, Yawé 'iteɨrieya meukuyɨra witsipɨ'aneni meta witsipɨtiyuxexeiyani, kwiepa timieme 'ikwaxi puwatemawieritɨani keyupaɨmetɨ 'ixaheritsixi memɨtawikweni.
ISA 4:3 Hikɨ kemɨ'ane Tsiyunitsie 'ayenieretɨ muyuhayewa meta kemɨ'ane Kerutsaremetsie 'ayenieretɨ muyuhayewa mɨkɨ Memɨpatsietɨka mepɨtetetewaka, meta mepaye'uxani Kerutsaremetsie tukari memexeiyanikɨ.
ISA 4:4 Ti'aitame Yawé 'iyari tiyu'uximatɨwamekɨ meta 'iyari taikɨ mɨtiyuxɨtsitɨwakɨ, Yawé Tsiyuni niwemama 'ɨimarixi kaniwahauximɨkɨ titakɨ memɨkate'itiyatɨkateikɨ meta xuriya pakuyeitɨani Kerutsareme kepaɨmetɨ makuxuaweni.
ISA 4:5 Hikɨ Yawé hai kɨtsiyari pɨtawewieni tukarikɨ mieme meta tai kwinimieme 'anutatetereme tɨkarikɨ mieme, Tsiyuni hɨriyaritsie meta kemɨ'ane mana memuyutixexeɨriwa yunaime waheima. Naime xawatɨriya heima panukawereni 'ɨkari 'atsuitɨ
ISA 4:6 mɨkɨ mɨwaranukanakakɨ, tukarikɨ mɨ'etɨriwiekakɨ, muwa'awietanikɨ wiyerikɨ meta wiyeri mɨ'ekama hepaɨtsita.
ISA 5:1 Nepɨtakwika nehamiku nemɨnaki'erie hetsiemieme kaxie haraweriyari nɨawariyari hepaɨtsita. Nehamiku kwinimieme nemɨtinaki'erie kaxie haraweri xeime pexeiyakai 'ukakɨakaku 'aixɨa tiuxuaweriwekaku.
ISA 5:2 Kaniwati'ine, tetexi kananuyexɨrieni 'aixɨa 'anekɨa kanika'iteɨta. Mɨkɨ hixɨapa tuxiyu kaniutakeni meta mana matipɨnarɨwani kaniutawewieni. Mɨkɨ 'aixɨa 'anenetɨ kaxie mɨtixuawerekɨ pɨta'ikwewakai, matsi xeikɨa kaxie hatsinatɨ kaniukaxuawere.
ISA 5:3 Hikɨ Kura teɨteriyari, Kerutsareme kiekatari, yaxekeneutiyua kemɨ'ane mɨya'aneme peutiwiwiexɨa nekaxie haraweriyari nutsɨtɨ ne pɨnehetsiemieme.
ISA 5:4 ¿Tawarita 'akuxi kenetiyurienikekai nekaxie haraweriyari hetsiemieme tita reuyewetɨ ratɨa? Ne 'aixɨa 'anenetɨ kaxie mɨkayaxekɨ nepɨta'ikwewakai. ¿Titayari kaxie hatsinatɨ tiukaxuawerixɨ?
ISA 5:5 Ne nepɨtixetaxatɨani kenemɨtiyurieni nekaxie haraweriyari hepaɨtsita: Kuraruyari nepa'unatɨyani, kanika'unariemɨkɨ, tetsariya 'amɨtɨtɨ nekanika'unamɨkɨ, hetsiena katina'uitɨmɨkɨ.
ISA 5:6 Yuxaɨta nekaniku'eirimɨkɨ, pɨkakawitekieni mɨkakayɨrakɨ meta pɨkakakwietsanarieni, mana xuya pɨtinexɨani meta 'ɨtsi. Ne hai nepɨtita'aitɨani mɨkɨ hetsie mɨka'ukawiwiyenikɨ.
ISA 5:7 Kaxie haraweriyari Yawé Naimekɨmɨtɨrɨkaɨye tipiinieya 'ixaheri teɨteriyari mekanihɨkɨtɨni, Kura teɨteriyari kwiepa mɨraka'etsitɨre manayexeiyarie mekanihɨkɨtɨni. Mɨkɨ 'aixɨa mɨti'ane pɨtitakwewiekai, matsi xeikɨa xuriya 'uhaneme pukaxei, mɨtiheitserie pɨtitakwewiekai, matsi xeikɨa kukuiniya hiwariyari pukaxei.
ISA 5:8 Xɨa'ui 'iya kemɨ'ane yukii waɨkawa mexeiya meta kwie mɨraka'etsitɨre waɨkawa yupiini memɨte'ayeitɨwa nixeime tɨma mekahayewirietɨ mana mɨtayerɨnikɨ, yuxaɨta xeikɨa 'axeikɨa metitetɨ mepuyukuhayeikawa.
ISA 5:9 Yawé Naimekɨmɨtɨrɨkaɨye mɨpaɨ nerahɨaweme nekaniu'enieni: «Kiite waɨkawatɨ yuxaɨta kaniyuhayewamɨkɨ, pumaweni kemɨ'ane kiite 'amupapata mayekanikɨ.
ISA 5:10 Kaxie haika hetariyayari xeikɨxauriyari xeikɨa payani, meta tamamata merirayari 'imɨari xeimerirayari xeikɨa kanayeimɨkɨ».
ISA 5:11 Xɨa'ui kemɨ'ane ximeri paitɨ memanuku'uwe winu xeikɨa me'iyuka memɨtitaruwenikɨ, memukutaikaiyarɨwa winukɨ metaruwetɨ.
ISA 5:12 Wa'ixɨararitsie winu puxuawe meta kanarite, xawerite, tepu meta pirikɨxa. Peru Yawé kemɨtiuyuri mepɨkayɨkɨ'ɨwiya meta ketita mɨtiutiwewi yamepɨkatemate.
ISA 5:13 'Ayumieme neteɨterima 'ateewa mepanuhapanieni memɨkanetsimatekɨ, waɨkawa memeuka'u hetsɨana miemete haakakɨ mekanikwikuni meta teɨteri meyumuiretɨ hariyakɨ mekanikwikuni.
ISA 5:14 'Ayumieme teukiya yukɨipi waɨkawa panatixawariya, ka'inɨarimekɨ yuteni kananutayepiwani. Muwa mepeukakɨka waɨkawa memeuka'u meta tixaɨtɨ memɨkatehɨkɨ, 'ixɨarari yuariyaya meta waikari meta kememutiyɨ naime mete'atɨtɨ.
ISA 5:15 Tewi tixaɨtɨ pɨkarayeitɨarieni, teɨteri mekanitihɨxima'uikuni, kwinimieme memɨteyuti'ɨre mekanika'unariekuni.
ISA 5:16 Yawé Naimekɨmɨtɨrɨkaɨye 'aixɨa katinikuxaxatsiwamɨkɨ 'axamɨti'ane mɨtiukwinitɨakɨ, Kakaɨyari mɨpatsie matsiɨkɨtɨ kanayuyeitɨamɨkɨ kemɨtiheitserie patsietɨ.
ISA 5:17 Muxatsi mepɨtetikwani yu'ɨxata memɨyɨaka hepaɨ, tsipuri mepɨtetikwani xikutsixi mematitekaitsie.
ISA 5:18 Xɨa'ui kemɨ'ane 'axamɨti'ane memɨte'uhaxime 'itarika kaunariyarikɨ, meta 'axakememɨteyurie memuhaxime kaxeta kaunariyarikɨ.
ISA 5:19 Mɨpaɨ mekaniutiyuaneni: «Kakaɨyari keyumexɨitɨaka, kemɨtiyurieni keyukumexuitɨani tame temixeiyakɨ, 'ahurawa kehayani meta yaketiɨyɨni 'Ixaheri hetsiemieme Mɨpatsie kemɨtiyurimɨkɨ, mɨpaɨ yatemɨtehetimanikɨ».
ISA 5:20 Xɨa'ui kemɨ'ane 'axamɨti'ane 'aixɨa ti'anekame mɨtiuterɨwa, meta 'aixɨa mɨti'ane 'axati'anekame mayeitɨwa, yɨriya hekɨariya memɨxata, meta hekɨariya yɨriya memayeitɨwa, mɨratsiwi hakakame memɨxata, meta makaka hatsiwime memayeitɨwa.
ISA 5:21 Xɨa'ui kemɨ'ane waɨkawa metemaiwaweme memuyuxata, kwinimieme meteheutamaiwaweme memuyu'erie.
ISA 5:22 Xɨa'ui kemɨ'ane kwinimieme winu memɨteheuta'iwawe, memɨkamama timɨireme mete'anuye'etɨ memɨtitaruwenikɨ,
ISA 5:23 tumini memanu'ɨwe hetsiena mɨraka memɨteheuyehɨwirienikɨ, meta 'atsimɨkatiuyuri heitserie kemɨrexeiyakɨ mepɨkaparewiku.
ISA 5:24 'Ayumieme, tai nerɨkwari xatsi kemɨtitixɨxɨtsitɨwa meta tai 'ɨxa muwawaki kemɨtititaiya, nanarieya mɨtipɨniya, meta kwauni hepaɨ tuturiyari katiniti'enimɨkɨ. Yawé Naimekɨmɨtɨrɨkaɨye 'inɨari niukiyarieya memɨka'utanaki'erikɨ meta 'Ixaheri hetsiemieme Mɨpatsie niukieya memɨnanaimakɨ.
ISA 5:25 'Ayumieme Yawé haxɨaya kaniutani yuteɨterima wahepaɨtsita, hetsiena yumamá kananukuhana meta kaniwani, hɨrite kaniwatayuatɨkani, mɨkite xatsi hepaɨ mekateniyukuhayeikawani mɨranuyekɨkatɨretsie hixɨapa. Mɨyatɨtɨ haxɨaya pɨkatiuhayewaxɨ, yumamate 'akuxi kanitatseratɨkani.
ISA 5:26 Paterakɨ xeime nuiwari teewatanaka kani'iniemɨkɨ, kwie manu'axe paitɨ kiekame kanitawikɨiyamɨkɨ, mɨkɨ nuiwari kwitɨwa kaninuamɨkɨ meta mexɨima.
ISA 5:27 Mɨkɨ nixewitɨ pɨkati'uxe meta pɨkahekaweni, pɨkaheukumɨkɨni meta pɨkaheukuni, nixewitɨ hɨiyameya pɨkaweranaxɨani meta kakaiya kwitaxiyari pɨkahatekixɨani.
ISA 5:28 Wa'ɨrɨ kwinimieme pɨranuyemɨtsɨ, naitɨ watupi payuhapatɨka, wakawayutsixi tepɨa memeumanatɨka tete mɨtse'i hepaɨ pɨ'anene, meta wakaxetate 'itsikɨriyarita teɨka puwayenenetɨwa.
ISA 5:29 Maye 'ukaratsi mɨtiyuhaxɨatɨwa hepaɨ katiniyu'eniɨriɨkɨni, meta mayetsi tɨɨrixi wahepaɨ, 'utitsinawatɨ yutahaxɨatɨame kaniwiyamɨkɨ tita mɨtitakwani, meta kanenuhanimɨkɨ nixewitɨ pɨkayɨwe minawairienikɨ.
ISA 5:30 'Iya tukaritsie kaniyutahaxɨatɨamɨkɨ hepaɨtsitana, haramara kemɨtiutarɨrɨrɨka hepaɨ. Xɨka xewitɨ kwie 'uxeiya, 'ɨyɨwime hetsiena pɨxeiya meta 'uximatɨariekame, 'ana hekɨariya kaniyuti'awietamɨkɨ hai 'amayetsuye warita.
ISA 6:1 Mɨkɨ wiyaritsie ti'aitame 'Utsiyaxi 'ɨmɨkuri, Ti'aitame Kakaɨyari nekaniuxeiya wapaitɨ 'aheutitewametsie 'akakaime mariwetɨ 'uwenitsie 'akaime, yu'ixurikitsie mataxitɨanikɨ tukita naitɨ puyenɨkakai.
ISA 6:2 Heimana mepuyewɨkai 'iteɨtametemama, yuxexuitɨ 'anate 'ataxexuime mepexeiyatɨkatei, hutamekɨ yuhɨxie mekaneuyutinatɨkateitɨni, hutamekɨta yɨ'ɨkate meteheutinatɨkatei meta hutamekɨ mete'ɨwɨwekai.
ISA 6:3 Mɨpaɨ yuxexuitɨ meteyutahɨawetɨ: «Kanipatsieka, kanipatsieka, kanipatsieka Yawé Naimekɨmɨtɨrɨkaɨye, naitsarie kwiepa pɨmatsiɨkɨ witsikemɨ'ane».
ISA 6:4 Waniuki yuariyaya me'u'enieka, kitenie tsutumeyari kɨyeyari kaniwatayuaxɨani meta tukita kɨtsi kaniuyeyerɨni.
ISA 6:5 Hikɨ nekaniutahiwa: «Xɨa'ui ne, nehetsie pɨrahɨiwa. Tewi nepɨhɨkɨ neteta mɨkati'itiya pɨrayeneika meta teɨteri 'axame'utiyuaneme watsata nepuyeika, matsi Ti'aitame nepuxei, Yawé Naimekɨmɨtɨrɨkaɨye».
ISA 6:6 Hikɨ 'ana xewitɨ Kakaɨyari teɨtameya nehepa kanawietɨyani. Yumamatsie tɨɨ kanatukaitɨni, tepɨa titɨkɨmekɨ mawari taiyametsie meyetukai.
ISA 6:7 Mɨkɨkɨ netenitsie kaneniuyuitɨani, mɨpaɨ kanetiniutahɨawe: «Neuxei, 'ikɨ 'ateni kaniuyuitɨani, 'axamɨti'ane pemɨrexeiyakai katineukuyeitɨarieni, meta ke'axapemɨtiuyuri, pekatineuyehɨwiyarieni».
ISA 6:8 Hikɨ Ti'aitame niukieya nekaniu'enieni mɨpaɨ 'utaineme: ―¿Kemɨ'ane nepɨtanɨ'ani? ¿Kemɨ'ane tahetsiemieme pɨmie? Hikɨ mɨpaɨ nekaniutayɨni: ―Ne kenenanɨnɨ'a. 'Ena nekaniuweni.
ISA 6:9 Mɨkɨ mɨpaɨ kaniutayɨni: ―Kenemie mɨkɨ teɨteri mɨpaɨ ketiniwaretahɨawi: »“Tsepa kwi xemɨta'enana matsi xepɨkaheti'enatɨkɨne, tsepa kwi xemɨtaneniere matsi tixaɨtɨ xepɨkatexeiya”.
ISA 6:10 'Ikɨ teɨteri wa'iyari tsetse'ime kenayeitɨa, wa'enakareme kenanunaxɨa meta mekaheuneniereme keniwarayeitɨa, nɨkahɨrixɨa me'uneniere, me'u'enanani, meta yu'iyarikɨ meheitimaixɨani, kapa mete'uhayewame 'aixɨa meteheu'erietɨ mehayeitɨarieni».
ISA 6:11 Hikɨ mɨpaɨ nekaniutayɨni: ―¿Ti'aitame, 'ikɨ kereutere? Mɨkɨ mɨpaɨ kaniutayɨni: «Kepaukake kiekarite mɨka'unariexɨanitsie nixewitɨ mana mɨka'uyeikanitsie, kepaukake kiita teɨteri memɨka'ayetetɨkanitsie, meta 'ɨtsi yuxaɨta kumanekaku 'axa'anekɨa,
ISA 6:12 Yawé yunaime teɨteri kepaukake 'ateewa paitɨ mɨwaranɨnɨ'anitsie, meta mɨkɨ kwie kepaukake yuheyemekɨ yuxaɨta muyuhayewatsie.
ISA 6:13 Xɨka 'akuxi kwie tamamatatsie mieme xewitɨ yuhayewaneni, mɨkɨ 'akuxi mekanakumaweriyariekuni. Peru kepauka xiu mawitekietsie meta tuaxa kutsunuyari kemɨtiyukuhayeikawa, mɨkɨ yɨrameyari mɨpatsie kanihɨkɨtɨni».
ISA 7:1 'Akatsi, Kutani nu'aya, 'Utsiyaxi teukarieya, Kura kwieyaritsie katini'aitakaitɨni. Mɨkɨ tukaritsie Xetsini, ti'aitame Tsiriya kwieyaritsie, Pekaki Xemariyaxi nu'aya, ti'aitame 'Ixaheri kwieyaritsie, Kerutsareme mekaniu'axɨani me'itamienike, matsi mɨkɨ mepɨka'ɨyɨwekaxɨa me'e'iwake.
ISA 7:2 Rawiri paratsiyuyata niuki kaniuye'ani kename Tsiriya 'Epɨrahini hamatɨa meheyutinɨkai, 'Akatsi 'iyarieya kaniwatayuani meta teɨterimama mekaniutimamani, 'ɨtsita kɨyexite 'ekakɨ kemɨtiutiyuatɨka hepaɨ.
ISA 7:3 Yawé Kitsariyaxi mɨpaɨ katiniutahɨawe: «Kenemie 'aniwe Tsehaxi-Yatsuwi pe'awitɨtɨ 'Akatsi hetsɨa, haa wapaitɨ meukatuarike manuhuyeritɨarie manu'axe pekaneikaxeiyamɨkɨ, huyeta 'Ekwame Kwieya makuma huyeyari manuyehane 'utɨa.
ISA 7:4 Mɨpaɨ ketinetahɨawi meyɨ'ɨwiyanikɨ, meta kayuwatɨ meyeikanikɨ, pɨkamaka Xetsini Tsiriyu tewiyari mɨha'akɨ, meta Xemariyaxi nu'aya hɨxie pɨkamaka, mɨkɨ wahekɨ pɨkayu'iyaritɨaka huta kɨyexiyari manukɨtsiyatɨkakɨ.
ISA 7:5 Mɨpaɨtatsiere ketinetahɨawi kename 'Epɨrahini, Xemariyaxi nu'aya hamatɨa meyunɨtɨ meta Tsiriyu tewiyari, mɨpaɨ mete'uxa kename me'itamieni, mɨpaɨ memɨteku'eriwakɨ
ISA 7:6 Kura kwieyaritsie mekaniye'axɨanikeyu, mexetimariutame, mexeha'iwame manata ti'aitame Taweri nu'aya memanukakenikɨ.
ISA 7:7 Matsi neuxei mɨpaɨ ketinetahɨawi mɨpaɨ kename ne nehaine Yawé naimekɨmɨyɨwe: »“Mɨkɨ mɨpaɨ pɨkaraye'ani meta mɨpaɨ pɨkatiyɨni.
ISA 7:8 Ramatsiku, Tsiriya kanimu'uyatɨni, meta Xetsini, Ramatsiku kanimu'uyatɨni, matsi haika tewiyari heimana 'auxɨwi wiyari 'anuyeyayu 'Epɨrahini kanika'unariemɨkɨ yuheyemekɨ kanikumawerimɨkɨ.
ISA 7:9 Tsamariya 'Epɨrahini kanimu'uyatɨni, meta Xemariyaxi nu'aya Tsamariya kanimu'uyatɨni. Xɨka xeme nehetsie yuri xekate'erieka, yuheyemekɨ 'axepɨkateheutere”».
ISA 7:10 Yawé hutarieka 'Akatsi mɨpaɨ katiniutahɨawe:
ISA 7:11 ―Yawé 'akakaɨyari keneutawawiri 'inɨari mɨmatsiwewirienikɨ, tsepa kwieta tetɨata paitɨ, yatsepa muyuawi meutitewatsie paitɨ.
ISA 7:12 Peru 'Akatsi mɨpaɨ katinita'eiya: ―Ne Yawé nepɨkata'inɨata, meta tixaɨtɨ nepɨkatitawawirieni.
ISA 7:13 Hikɨ Kitsariyaxi mɨpaɨ kaniutayɨni: «Xekeneu'enana hikɨ xeme Rawiri nuiwarimama. Xeme teɨteri xewa'uximatɨatɨ xepɨkatehayewaku, yaxeikɨata nekakaɨyari xe'uximatɨatɨ.
ISA 7:14 'Ayumieme Ti'aitame 'inɨari kanixewewiriemɨkɨ: 'Ɨimari kanitihukatamɨkɨ kanitiniwemɨkɨ, 'Emanuheri katiniterɨwamɨkɨ.
ISA 7:15 Kepauka 'aixɨa mɨti'ane xeikɨa mɨtinaki'erieka, 'axamɨti'ane mɨkatinaki'erieka, retsi kuneriyari xietemakame kanikwa'amɨkɨ.
ISA 7:16 Karikɨ mɨkɨ nunutsi 'aixɨa mɨti'ane katitanaki'eriwekaku 'akuxi meta 'axamɨti'ane karehɨawekaku, mɨkɨ te'aitamete memɨyuhuta pemɨwamakaxe wakwie kaniku'eiriwamɨkɨ.
ISA 7:17 »Yawé 'ahetsɨa kani'atɨamɨkɨ, meta 'ateɨterima wahetsie metatsiere 'apaapa nuiwarimama wahetsie, hatsuaku mɨkatiyɨwekai hepaɨ kepauka 'Epɨrahini Kura hamatɨa memeyutaxɨriexɨatsie paitɨ, karikɨ mɨkɨ 'Atsiriyatsie ti'aitame kanita'inimɨkɨ».
ISA 7:18 'Iya tukaritsie Yawé yuwikɨarikɨ xaipɨ kanita'inimɨkɨ 'Ekipitu hatɨayaritsie 'aheteewakaku muyeika, meta xiete kanita'inimɨkɨ 'Atsiriya kwieyaritsie muyeika.
ISA 7:19 Mɨkɨ yunaitɨ mekani'axɨakuni 'aki'utɨma meukatetewatsie mekaniyuti'ituatɨakuni, 'ai mukatataritsie, naime 'aki'utɨma muyexuyatɨkatsie meta naime haa matinenieretsie.
ISA 7:20 'Iya tukaritsie, ti'aitame 'Atsiriya kiekame hetsɨa nawaxa niɨwiekame hepaɨ 'Eupɨrata 'anutauye miemekɨ, Yawé 'Ixaheri mu'uyatsie kanikaximɨkɨ, meta huxarieya 'awie mieme metatsiere mɨxiyaya.
ISA 7:21 'Iya tukaritsie, xewitɨ tewi xeime tsikeru meta yuhutame tsipuri kaniwatiwaweriyamɨkɨ,
ISA 7:22 waɨkawa retsi mekanayexexeiyakuni retsi kunerimakame kanexeiyakamɨkɨ kɨmana mɨtiutikwa'anikɨ. Meta kemɨ'ane mana yunaitɨ kwiepa memuyuhayewa retsi kuneriyari xietemakame mekani'iekakuni.
ISA 7:23 'Iya tukaritsie, hakewa xeimiriyari kaxie kɨyeyari meku'ukai xeimiriyari pɨrata tuminiyarikɨ xewitɨ mɨraye'akai, mɨkɨ tixaɨtɨ pɨkatiyuhayewa 'ɨtsi meta xuya xeikɨa,
ISA 7:24 mɨkɨ naitsarie kwiepa kanakɨnɨmɨkɨ. Mana mɨye'anikɨ xeikɨa tupi meta 'ɨrɨ rapitɨ kaniyɨwemɨkɨ.
ISA 7:25 Mɨkɨ xuya meta 'ɨtsi pemakatɨ, hɨritetsie hakewa meripaitɨ hatsarunikɨ mɨreka'etsitɨrekaitsie pepɨkamie, mana tewaxi mematatuiwatsie kanayeimɨkɨ meta muxatsi memanu'uwatsie.
ISA 8:1 Yawé mɨpaɨ kanetiniutahɨawe: «Xeime mexa 'a'atayeume keneuti'ɨka, ti'utɨwamekɨ mana ketinaka'utɨa: “Mahexi-Tsarari-Katsiwatsi hetsie timieme”.
ISA 8:2 Ne nekaniwata'inimɨkɨ hipame 'aixɨa nemɨtiwamate memɨnenierekɨ, mawari wewiwame 'Uriyaxi meta Tsakariyaxi Kewerekiyaxi nu'aya».
ISA 8:3 Hikɨ 'uka tixaxatame hamatɨa nekaniukahuni, mɨkɨ kaniutihukata, xeime nunutsi kaniutiniweni. Hikɨ Yawé mɨpaɨ kanetiniutahɨawe: «Mahexi-Tsarari-Katsiwatsi ketineuterɨwa.
ISA 8:4 Mɨkɨ nunutsi “nepaapa” “nemaama” 'akuxi mɨtayɨni kayɨwekaku, Ramatsiku waɨkawa kemɨrexeiyakai meta Tsamariya piinitɨarika mɨra'iwakai 'Atsiriyatsie ti'aitame hetsɨa katinanɨtɨkiemɨkɨ».
ISA 8:5 Yawé tawarita mɨpaɨ kanetiniutahɨawe:
ISA 8:6 «'Ikɨ teɨteri memiku'eirikɨ Tsiruhe hayari kayuwatɨ muhane Xetsini hetsie pɨta memuyutemamawie meta Xemariyaxi nu'ayatsie,
ISA 8:7 Ti'aitame 'ari haa 'Eupɨrate hatɨayari wahetsie kaniwayenetɨamɨkɨ haa waɨkawa mɨtɨrɨkaɨye: ti'aitame 'Atsiriya kiekame kaniyɨanemɨkɨ kemɨtimariwe. Naime haa manuyehapanekai tihɨniyame kanenatiyeuriexɨamɨkɨ, hakewa meta'atɨkatsie panakayeurieni.
ISA 8:8 Kura kwieyaritsie paitɨ kaniye'amɨkɨ, kanikayunitɨamɨkɨ, kɨipitɨana paitɨ kaniuku'atɨyeimɨkɨ. Neuxei 'Emanuheri, yu'anate taweratɨkaitɨ, 'akwie kemɨyewa kananukanamɨkɨ».
ISA 8:9 'Ikɨ xekeneu'eni, nuiwarite, yunaitɨ nuiwarite 'ateewa kietari: Xekeneutihiwa kuyaxa miemekɨ, xekanakawitekiexɨakuni. Xekeneuyukuha'aritɨa kuyaxa xemuhukɨ, xekanititsanariexɨakuni. Xekeneuyukuha'aritɨa kuyaxa xemuhukɨ, temɨxiki xepayeitɨarieni.
ISA 8:10 Yaxeketeneu'utɨa kexemɨteyurieni, matsi kanitayeitɨariemɨkɨ, Yaxeketeneuxata, matsi mɨkɨ yapɨkatiyɨni, Kakaɨyari tahamatɨa muyeikakɨ.
ISA 8:11 Yawé karima kaneniutahɨawe mɨpaɨ kanetinayehɨtɨani kename 'ikɨ teɨteri wahuye neka'uweiyani. Mɨpaɨ kanetiniutahɨawe:
ISA 8:12 «Xeme 'ikɨ teɨteri 'iya memaye'unie memɨte'uterɨwa xemeta mɨpaɨ mɨkɨ xepɨkate'uterɨwani, tita mɨkɨ memɨtemakaxe xeme mɨkɨ xepɨkatemakaxeni, meta xemɨmariutsiekakɨ xepɨkayupitɨaka.
ISA 8:13 Yawé Naimekɨmɨtɨrɨkaɨye xeikɨa xeme patsiekame xekanayeitɨakakuni, mɨkɨ xeikɨa xekanayexeiyakakuni, mɨkɨ xeikɨa xekanayemakaxekakuni.
ISA 8:14 Yawé tuki kanihɨkɨtɨkamɨkɨ. Matsi tete kanihɨkɨtɨkamɨkɨ hetsiena memɨtiketamɨrike 'Ixaheritsie nuiwarite memuyuhuta wahetsiemieme, mɨkɨ tete puwarekaxɨrieni. Kerutsareme kiekatari wahetsiemieme Kaunari kanayeimɨkɨ meta winiyari.
ISA 8:15 Yuwaɨkawatɨ mekanitiketamɨrixɨakuni, mekanekaxɨrikuni meta mekanitimurixɨakuni. Winiyari mekaniwɨtɨiyariekuni, mɨkɨtsie mekaniwɨrikuni».
ISA 8:16 Kepemɨtiwatahekɨatɨanikɨ mɨ'ayumieme 'aixɨa ketineu'uta, keneutseyuma 'inɨari niukiyari memɨnetsi'aweiya watsata.
ISA 8:17 Yawé katiniuhayewa Kakuwu kiekarieya xeiyatɨ, peru ne hetsiena netiwiyatɨ nepɨta'ikwewani, mɨkɨtsie kenemɨtita'ikwewa nekanexeiyani.
ISA 8:18 'Ena xepɨnetsixeiya, neniwemama Yawé mɨnetsiyetuiri wahamatɨa. 'Ixaheritsie 'uxa'atɨni kemɨtiyɨni 'inɨari tepɨhɨkɨ Yawé Naimekɨmɨtɨrɨkaɨye hetsiemieme, Tsiyuni hɨriyaritsie 'amuka.
ISA 8:19 Xɨka xewitɨ mɨpaɨ xerahɨaweni: «Mɨkite wahamatɨa memɨtekuxata meta memɨtehetimamateke wikixi wahepaɨ me'utiyuatɨ wahetsɨa tepɨta'iwauni, ¿tamɨ kareuyewetse teɨteri yukakaɨyarixi memɨwarahɨawenikɨ meta mɨkite, memu'uwa wahetsiemieme?»,
ISA 8:20 ne mɨpaɨ nekatinixehahɨaweni: «'Inɨari niukiyari meta kepemɨtiwatahekɨatɨanikɨ mɨ'ayumiemetsie xeketenewiyani». Kemɨ'ane mɨkɨtsie tiwiyatɨ mɨtihayewa, 'uxa'atɨni pɨkakahekɨariwiyarieni.
ISA 8:21 Xeme xekaniyeha'akuni kepauka xemu'uximatɨarieka meta xeyehakakwitɨwetɨ kwiepa naitsarie xeku'uwatɨ. 'Ana teikɨ xehenenieretɨ, ti'aitame meta Kakaɨyari wahepaɨtsita 'axaxekanitiyuakuni,
ISA 8:22 meta kwiepa mekanenieretɨ, 'uximatɨarika xeikɨa mepɨxeiya, yɨriya meta marika 'etɨriya tsata, mewatiyɨwitsie yuheyemekɨ mekaneukaxɨriyakuni.
ISA 9:1 Mɨyatɨtɨ, tawarita 'etɨriya pɨkatixuawere kemɨ'ane mu'uximatɨariekai hetsiemieme. Meripaitɨ Kakaɨyari Tsawuruni kwieyari tixaɨtɨ pɨkarayeitɨa meta Nepɨtahari kwieyari, matsi 'uxa'atɨni Karereya hetsiemieme 'aixɨa katinaniuwamɨkɨ, memɨkahuriyutsixi wakwieyaritsie, haramara huyeyaritsie, Kurutani 'anutaɨye hetsie.
ISA 9:2 Teɨteri yuwipa memu'uwakai hekɨariya mariweme mekaniuxeiya, kemɨ'ane yɨriya 'a'ayetsuime hetsie memu'uwakai hekɨariya kaniwaruhekɨariwiya.
ISA 9:3 'Ekɨ nuiwari muwerenikɨ yapepɨtiuyuri, waɨkawa temawierika pepɨwarupitɨa. Mɨkɨ 'ahɨxie mepuyutemamawie kepauka memuka'itsana hepaɨ, kepauka mete'a'iwaka piinitɨarika memɨteyutapitɨwa hepaɨ.
ISA 9:4 Yemekɨ 'ekɨ pepitamuraxɨ, Mariyani kemɨra'iwarie hepaɨ, wayuku kemɨtiwa'aitɨakai waɨriyarika, tepɨa kemɨrahete memanakatekakai, 'itsɨ ti'aitame waɨkawamekɨ kemɨtiwara'ikatɨakai.
ISA 9:5 Naitɨ kakai kuyaxamieme 'imieritsata manɨkɨ, meta kamixate naitɨ xuriya mɨwetɨka taipa katineuwiwiyamɨkɨ, nerɨkwari kanitixɨtsitɨamɨkɨ.
ISA 9:6 Matsi nunutsi tahetsɨa mutinuiwaxɨkɨ, 'uki xeime tekaniutuitɨarieni, tɨrɨkariya naiparieyatsie kanika'uxipimɨkɨ, meta 'ipaɨ katiniterɨwariemɨkɨ: 'Ɨxatsitame, mɨmariwe, Kakaɨyari mɨtɨrɨkaɨye, Yuheyemekɨ mɨtapaapa, Ti'aitame kayuwatɨ tiyupitɨwame.
ISA 9:7 Kemɨti'aitanikɨ kanitamɨirimɨkɨ meta kayuwatɨ kemɨtiyupitɨwakɨ, meta mɨkɨ pɨka'uye'atɨyani. Rawiri 'uwenieyatsie 'akaitɨ katinita'aitamɨkɨ meta hakewa mɨre'aitakaitsie, 'amuwenikɨ meta mituikanikɨ heitseriemekɨ meta kemɨreuyewetse hikɨ meta yuheyemekɨ. 'Ikɨ yakatinaye'atɨamɨkɨ Yawé Naimekɨmɨtɨrɨkaɨye 'ɨtetsarikaya.
ISA 9:8 Yawé yuniuki kaneyenɨ'ani, Kakuwu hepaɨtsita kaneiyenɨ'ani, 'Ixaheri hetsie kaniukaweni.
ISA 9:9 'Ikɨ hepaɨtsita yunaitɨ teɨteri mepɨtehetimamateke ―'Epɨrahini meta Tsamariya kiekatari―, yunaitɨ meyuti'ɨretɨ mɨpaɨ memutiyuane meta yu'iyaritsie meyɨwaweme meyu'erietɨ:
ISA 9:10 «Xɨka xɨnariya 'uka'une, tetexi xitekietɨkaimekɨ tekanitawewiekuni, xɨka piní pikaxiyari 'anuyexɨrieni, kariuxa pikaxiyarikɨ tekanenukahekwatɨakuni».
ISA 9:11 Peru Yawé matsi kaniwatɨrɨkariyamɨkɨ Xetsini memaye'unie, memeye'unie kaniwarukuyuitɨani.
ISA 9:12 Tsiriyutsixi tau makayuyuipike hepatsie kiekatari, meta piritsiteutsixi tau manatineika hepatsie kiekatari 'Ixaheri mekaniutakwani xeikwaiyarikɨ. Tsepanetɨ 'ikɨ naitɨ mɨyamɨtiɨyɨ, Kakaɨyari haxɨaya pukaheunuawe, matsi 'akuxi yumamá kanitatseratɨkani.
ISA 9:13 Peru teɨteri mɨpaɨ mepɨkatehetimaiwawe kemɨ'ane mɨyɨane mɨtiwakwinitɨa, Yawé Naimekɨmɨtɨrɨkaɨye mepɨkatiwauwawe.
ISA 9:14 'Ayumieme xeitukaritsie Yawé 'Ixaheri mu'uya kananutixitemɨkɨ meta kwaxieya, takɨ meta haka.
ISA 9:15 'Ukirawetsixi mu'u mekanihɨkɨtɨni meta teɨteri waɨkawa memauka'u mepɨhɨkɨ. Kakaɨyari niukametemama kwaxi mekanihɨkɨtɨni, te'ɨkitamete memɨte'itawa.
ISA 9:16 Kemɨ'ane 'ikɨ kiekari memuwitɨxime mepeiyehɨa, kemɨ'ane memuwitɨkiexime mepɨ'iyɨrie.
ISA 9:17 'Ayumieme Ti'aitame temari 'aixɨari pɨkatiwaxeiya, nutuite meta wiuraxi pɨkawatinenimayata, mɨkɨ yunaitɨ 'axamemɨteyuruwametekɨ, wateni 'axamɨti'anene pɨtikuxata. Tsepanetɨ 'ikɨ naitɨ mɨyamɨtiɨyɨ, Kakaɨyari haxɨaya pukaheunuawe, matsi 'akuxi yumamá kanitatseratɨkani.
ISA 9:18 'Axamɨti'ane tai hepaɨ panutitetere 'ɨtsi meta xuya mɨtixɨxɨtsitɨwa, meta kɨyexi 'amayetsuye mɨtaiyawe hikɨ panutiyeika teɨka hepaɨ, kɨtsi 'a'utewime hetsie.
ISA 9:19 Yawé Naimekɨmɨtɨrɨkaɨye haxɨayakɨ kwie taikɨ kananutataimɨkɨ. Teɨteri mɨtitaiwawe mepakɨne: 'Ana nixewitɨ yu'iwa pɨkatinenimayata.
ISA 9:20 Hipatɨ tita watserieta mɨtitipika mepɨtetikwani, matsi yaxeikɨa mepɨteheuhaakakwikuni, hipatɨta tita wa'utata mɨtitipika mepɨtetikwani, peru yaxeikɨa mepɨkatihuxani. Yuniwema mekaniwatikwaikuni.
ISA 9:21 Manatsexi 'Epɨrahini kanitakwaimɨkɨ, meta 'Epɨrahini Manatsexi kanitakwaimɨkɨ, mɨkɨ meyunɨtɨ yuhutatɨ Kura mekanitamiekuni. Tsepanetɨ 'ikɨ naitɨ mɨyamɨtiɨyɨ, Kakaɨyari haxɨaya pukaheunuawe, matsi 'akuxi yumamá kanitatseratɨkani.
ISA 10:1 Xɨa'ui kemɨ'ane 'aitsika 'axa'aneneme memɨtiwewiwa te'utɨwamete me'eka'utɨwatɨ mewananaimatɨ.
ISA 10:2 Tixaɨ memɨkatehexeiya wahetsie heitserie kememɨtehexeiya memukunama, meta kemɨtiheitserie memɨkawapitɨa neteɨterima memɨte'uka'eniwa. Wiuraxi wa'ikwai mepɨtewanawairie meta nutuite mepɨwanawatɨwe.
ISA 10:3 ¿Kemeteyurieni kepauka memɨta'iwawiyarienitsie, kepauka 'ateewa paitɨ wiyeri tɨrɨkaɨyetɨ muwayanitsie? ¿Kemɨ'ane mepanukuwauni xɨka parewiya meheuyehɨaka? ¿Hakewa yupiinite waɨkawa memɨtehexeiya mepɨteheti'uta?
ISA 10:4 Tawariri yɨkɨ memɨte'uyurieni mepɨkayɨwaweni tixaɨtɨ memɨkatehɨkɨ mekanayuyeitɨakuni xeikɨa memanuhapanieni wahamatɨa yatɨni mekanikwikuni hipatɨ memɨkwi'iwa wahamatɨa. Tsepanetɨ 'ikɨ naitɨ mɨyamɨtiɨyɨ, Kakaɨyari haxɨaya pukaheunuawe, matsi 'akuxi yumamá kanitatseratɨkani.
ISA 10:5 «Xɨa'ui 'Atsiriya, nehaxɨa kɨyeyari. Nehaxɨa 'iwaɨyɨyari wamamatsie katini'aneni.
ISA 10:6 Nekanitanɨ'amɨkɨ xeinuiwariyaritsie 'axamemɨteyurie wahetsɨa, nekanitanɨ'amɨkɨ teɨteri memɨnetsihaxɨatɨa wehetsɨa, memɨtewanawatsirienikɨ meta tita waɨkawa memɨtehexeiya, meta memuwatiketsinikɨ haxu kaye 'utɨa mɨtikani hepaɨ.
ISA 10:7 Matsi 'Atsiriya mɨpaɨ pɨkatiyɨkɨhɨawekai yamɨtiyurienikɨ 'ikɨ hepaɨtsita, meta tsikere pɨka'iti'eriexɨa. Xeikɨatɨ pɨtiutiwau mɨtiyuka'unakɨ meta yɨmɨireme nuiwarite muwarakumaweriyakɨ.
ISA 10:8 Mɨpaɨ xeikɨa 'utaitɨ: “Yunaitɨ memanuyetei nehetsɨa miemete te'aitamete mekanihɨkɨtɨni.
ISA 10:9 Karinu Karikemitsi hepaɨ kani'aneni. Kamati 'Axipari hepaɨ kani'aneni, meta Tsamariya Ramatsiku hepaɨ kani'aneni.
ISA 10:10 Kehepaɨ netɨrɨkariyakɨ nemɨtiwara'iwaxɨ hipame te'aitamete kakaɨyarixi yuwaɨkawame mewarexeiyakame, wakakaɨyarixi 'ɨkiyari meyumɨireme keyuri Kerutsareme meta Tsamariya kiekatari,
ISA 10:11 Tsamariya kenemuyuri meta kakaɨyariximama, mɨpaɨta Kerutsareme nekaniyurimɨkɨ meta kakaɨyariximama”».
ISA 10:12 Kepauka Yawé mɨtitahayewa Tsiyuni hɨriyaritsie kemɨtiyurienikɨ meta Kerutsareme hetsie, mɨkɨ mɨpaɨ kanitayɨmɨkɨ: «'Atsiriyatsie Ti'aitame nekatinikwinitɨamɨkɨ 'iyarieya kwinimieme mɨtiyuta'ɨrekɨ, meta kwinimieme mɨtiyukatawe'eriekɨ hɨxiteya».
ISA 10:13 Mɨpaɨtsɨ kaniutaineni: «'Ikɨ netɨrɨkariyakɨ nekatiniuyurieni, kenemɨtimaiwe nekatiniuyurieni, netsɨ kwinimieme nekatineuta'eriweni. Hipame teɨteri wakwie manuka'atɨkatsie nekaniupataxɨani, kwinimieme mɨraye'atɨka memɨtehexeiyakai nekatiniwarunawairieni, kwinimieme mɨreuyutamiewe hepaɨ ne'anetɨ tewa'aitɨwamete nekaniwaruka'una.
ISA 10:14 Xewitɨ 'itua hetsie meukamemeni hepaɨ, teɨteri tita memɨteheuxeiyakai nehetsie timieme pɨratɨa, tawári 'uku'eiriwaku xewitɨ menatitɨkɨ hepaɨ, naime kwie nepiini nepayeitɨa, xewitɨ tɨma pɨka'utawerikixɨ nitɨma yuyekarau pɨka'anutayepi mɨtatsuanikɨ».
ISA 10:15 ¿Kamɨtsɨ tiyɨwe hatsa yɨweme muyuxatani keyuri mikumaɨwa, yatɨni tixitekeme yɨweme muyuxatani keyuri kemɨ'ane mikumaɨwa? 'Itsɨ mɨyɨweni hepaɨ mikuhananenikɨ kemɨ'ane mekwe'e, yatɨni kɨye mɨkaxani mɨyɨweni hepaɨ menukukwenikɨ waɨkawa matsi haheteme keyuri mexa.
ISA 10:16 'Ayumieme Ti'aitame kanenunɨ'amɨkɨ Yawé Naimekɨmɨtɨrɨkaɨye, kwiniya mɨyakame panunɨ'ani kuyaximama memɨtɨrɨkawi wahetsie. Mamariwaweme mɨwarayeitɨaniyari, matsi pɨta kanatinaimɨkɨ wahetsiemieme, tai nerɨkwariyari mɨtiyukukuine hepaɨ.
ISA 10:17 'Ixaheri hekɨariyari tai kanayeimɨkɨ, wahetsie Mɨpatsie nerɨkwari kanayeimɨkɨ. Xeitukaritsie xuyayari kanititaiyamɨkɨ, meta wa'ɨtsite kanitixɨtsitɨamɨkɨ.
ISA 10:18 Katinika'unamɨkɨ naime hakewa meuye'atɨka muhukuya witsikemɨtiyuxexeiya meta harawerieya mukumane, mɨtikukuyeni hepaɨ kwaiyatɨkaime kanihayewamɨkɨ.
ISA 10:19 'Etsiwa xeikɨa kɨyexi hɨritsie kaniyuhayewakɨmɨ nunutsitɨtɨ kaniyɨwemɨkɨ miti'inɨatakɨ.
ISA 10:20 'Iya tukaritsie 'ixaheri nuiwarimama memuyuhayewaxɨ meta Kakuwu kie kiekatari memukuwikwei tawariri hetsiena mepɨkatewiya kemɨ'ane tiwakwinitɨatɨ mɨwarukwi, matsi yurikɨ waparewiwame Yawé, Mɨpatsie 'Ixaheri hetsiemieme, kanihɨkɨtɨkamɨkɨ.
ISA 10:21 Memuyuhayewaxɨ mekani'axɨakuni, Kakuwu nuiwarieya memuyuhayewaxɨ mekani'axɨakuni Kakaɨyari Mɨtɨrɨkaɨye hetsɨa.
ISA 10:22 'Ixaheri, tsepanetɨ 'ateɨterima xiekari haramara tetsita mɨtika hepaɨ memɨyupaɨme, memuyuhayewaxɨ xeikɨa mekani'axɨakuni. 'Ari yakatiniutaniukieni memɨka'unarienikɨ, heitseriemekɨ katiniyɨmɨkɨ yuheyemekɨ.
ISA 10:23 Karikɨ Ti'aitame, Yawé Naimekɨmɨtɨrɨkaɨye, yakatinaye'atɨamɨkɨ mika'unakɨ kemutayɨ mɨkɨ nuiwari.
ISA 10:24 'Ayumieme, Ti'aitame mɨpaɨ paine, Yawé Naimekɨmɨtɨrɨkaɨye: «Neteɨterima, Tsiyuni xemɨtama, 'Atsiriya pepɨkamakaka. Tsepanetɨ yu'itsɨkɨ mɨmatsi'uwa meta tsepa kɨye 'iwaɨyɨpame manukukwei, 'Ekipitu mɨtiuyuri hepaɨ.
ISA 10:25 'Ena mɨtiyehane yapaɨmexɨa tukari 'anukayayu neha'atɨ 'ahepaɨtsita nepɨtihayewa, meta nehaxɨa memɨmetsi'aye'unie kaniwaka'unamɨkɨ».
ISA 10:26 Yawé Naimekɨmɨtɨrɨkaɨye kawayatsixi wawayamekɨ kaniwatiwamɨkɨ, Mariyani kemɨtiuka'unaxɨ hepaɨ 'Urewi 'aiyaritsie. Haramara hetsie yu'itsɨ kaneutatseramɨkɨ, 'Ekipitu kemɨtiuyuri.
ISA 10:27 'Iya tukaritsie mɨkɨ 'ika 'anaiparitsie pemetɨkɨ pekaninawairiemɨkɨ meta waɨkawa pemɨtawaiyatakɨ yuku 'akwipitɨa pemateka kananumurimɨkɨ.
ISA 10:28 'Ayati paitɨ kaninuamɨkɨ rayuye'uniekame, Mikuruni kaniuyeyeimɨkɨ, meta yupiinite Mikimatsi katiniku'eirimɨkɨ.
ISA 10:29 Mayekuni 'uyaka, mɨpaɨ kanaineni: «Kehewa tekananukutsikuni». Xama kaniuyɨyɨakani marikakɨ, meta Kiweya kiekatari, Tsahuri kiekarieya mepuyuta'unaxɨ.
ISA 10:30 Karini niweya witsipemɨti'ɨimari, karima keneutahiwa. Rahitsi, keneu'ena. Xɨa'ui 'Anatuti.
ISA 10:31 Marimena kaniuyuta'una, Kewini kiekatari hakewa memeyuti'awieta mekaniwautɨweni.
ISA 10:32 Hikɨtɨtɨ Nuwi mekaniwa'uikuni, yumamá kanitakatsimɨkɨ hɨri hepaɨtsita Tsiyuni niweya witsimɨti'ɨimari kiekariyaritsie, Kerutsareme hɨriyaritsie.
ISA 10:33 Xekeneuxeiya. Ti'aitame, Yawé Naimekɨmɨtɨrɨkaɨye, kɨyexi pɨtimura yemekɨ waɨkawa tɨrɨkaɨyemekɨ. Kɨyexi 'amɨtɨtɨ kanawitekiexɨamɨkɨ, matsi waɨkawa 'amutɨtɨ kanatixɨriwani.
ISA 10:34 Hatsakɨ 'ɨtsi 'amayetsuye kanayewitewani, meta Riwanu witsimɨtiyuxexeiyakai puwakapenixɨ.
ISA 11:1 'Itsahi kutsunuyaritsie xewitɨ yɨrari kananemɨkɨ, mɨkɨ yɨrari nanaritsie kananemɨkɨ.
ISA 11:2 Yawé 'Iyarieya mɨkɨ hetsie kanika'uxipiemɨkɨ: 'iyari mɨtimaiwenikɨ meta meti'enatɨyeikanikɨ, 'iyari 'ɨxatsi mexeiya meta tɨrɨkariya, 'iyari waɨkawa mɨrakumate meta Yawé mayemakaxe.
ISA 11:3 Mɨkɨ puyutemawieka Yawé 'ayemakatɨ, kemɨtinierekɨ mɨkɨkɨ pɨkawaxanetani, meta yapɨkatiyurieni kemɨti'enakɨ,
ISA 11:4 matsi heitseriemekɨ 'aixɨa pɨtiyurieni memɨnanaimarie wahetsiemieme, meta 'aixɨa pɨtiyurieni tixaɨtɨ memɨkatehexeiya wahetsiemieme 'ena kwiepa. Kwie pɨka'una kɨye 'iwaɨyɨpame yuteta miemekɨ, 'axatiyuruwame yu'iiyakɨ pumieni.
ISA 11:5 Tita mɨtiheitserie hɨiyame yunaiparie manakateika pɨhɨkɨtɨni meta yuri mɨraine hɨiyame manakuteika pɨhɨkɨtɨni.
ISA 11:6 Yawi muxa hamatɨa 'apuyeikani, tɨwe tsipu 'etsimupe hamatɨa pukuhuneni, meta tsikeru temaikɨ meta maye temaikɨ yuhamatɨa mepuku'uwani, nunutsi 'etsiyumaitɨ pɨwaku'arieneni.
ISA 11:7 Wakaxi hutse 'ukaratsi hamatɨa pɨtitikwani, waniwema yuhamatɨa mepukuhitɨweni, meta maye tuuru hepaɨ 'ɨxa pɨtikwani.
ISA 11:8 Nunutsi mɨtsitsewe kuu 'amumu'uyewa 'uaye mumɨya mexeiya muwayekie 'aurie pɨtiwaika, meta nunutsi yutsitsi muku'eiritsitɨarieke kuu 'ituayatsie peukameni.
ISA 11:9 Xewitɨ pumaweni 'axamɨwayurienikɨ meta mɨtiwakwinitɨanikɨ nehɨri naitɨ mɨpatsie hetsie, kwie kanitahɨnimɨkɨ Yawé memaitɨ memakɨne mɨ'ayumiemekɨ haramara hakɨ kemɨranatiyeuriwe hepaɨ.
ISA 11:10 'Iya tukaritsie 'Itsahi nanarieya panukukeni teɨteri wa'inɨari hepaɨ, mɨkɨ hepa nuiwarite mepɨtinautsa, meta witsi'anetɨ payani hakewa mɨkɨ metayerɨni.
ISA 11:11 'Iya tukaritsie Yawé tawarita yumamá kaneutatseramɨkɨ yuteɨterimama memuyuhayewatɨwe muwakuxeɨrienikɨ, 'Atsiriyatsie memuyuhayewaxɨ, 'Ekipitu, Paturutsi meta Kutsi, 'Erami, Tsinaxi meta Kamati, meta haramara hatetsitayari 'ametetewatsie.
ISA 11:12 Patera panuwieni nuiwarite wahetsiemieme, 'ixaheritsixi memutaweiyarie puwaxeɨrieni, naitsarie kwiepa Kura nuiwarimama memeutaweiyariexɨa puwakuxeɨrieni.
ISA 11:13 'Epɨrahini 'ɨtetsarikaya pukumawere, Kura memaye'unie mepukumaweriyarieni, 'Epɨrahini Kura tawariri pɨkatitikwatsirieni, Kura 'Epɨrahini tawariri waɨriyarika pitɨatɨ pɨkatita'aitɨani.
ISA 11:14 Yunaitɨ tau makayuyuipike hepatsie mepeutayune, piritsiteutsixi wakwie mukɨatsie mepɨwatakwini, yunaitɨ tau manatineika kiekatari mepɨtewanawatsirieni, 'Erumi meta Muhawi wahetsie mepɨteta'aita, metatsiere 'amunitsixi mekateniwata'aitɨakuni.
ISA 11:15 Yawé 'Ekipitu haramarayari kanikawatsiɨxamɨkɨ, yumamá haa 'Eupɨrate hetsie kaneutatseramɨkɨ, meta 'eka xɨkame kanikuwiwimɨkɨ, 'atahutame 'akiyari kaniuyetuamɨkɨ mana memɨkɨnekɨ yukakaitsie me'u'utɨ.
ISA 11:16 Teɨterimama memuyuhayewaxɨ wahetsiemieme, 'Atsiriya memuyuhayewaxɨ wahetsiemieme, huye kanitixuawerimɨkɨ, kemɨtiɨyɨ hepaɨ 'ixaheritsixi wahetsiemieme 'Ekipitu kepauka memayekɨtsie.
ISA 12:1 'Iya tukaritsie 'ekɨ mɨpaɨ pepɨtayɨni: «Yawé, ne nepɨmetsinɨawani tsepanetɨ meripaitɨ nehepaɨtsita pemɨtiuyeha'akai. Peha'atɨ pepɨtiuhayewaxɨ, meta pekaneniɨnɨtɨaniri.
ISA 12:2 Kakaɨyari netsiwikweitsitɨwame kanihɨkɨtɨni. Hetsiena yuri nepɨti'erieka meta nepɨkaheumaka. Yawé netɨrɨkariya kanihɨkɨtɨni, Yawé nekwikari pɨhɨkɨ, mɨkɨ netsiwikweitsitɨwame kanihɨkɨtɨni».
ISA 12:3 Xeme xeyutemamawietɨ haa xepuwatihanɨni wikweitsitɨarika hayaritsie.
ISA 12:4 'Iya tukaritsie mɨpaɨ pɨtitaniukieni: «Yawé xekenenɨawani, xekenahɨaweni, kemɨtiuyuri xekenekuxatani teɨteri watsata, xekenekuxatani kemɨtimariwe kemɨtitewakɨ.
ISA 12:5 Yawé hetsiemieme nɨawari xekeneutikwikani, mariwemekɨ mɨtiyuriene, 'ikɨ mɨpaɨ ketiutaxatsieni kwiepa naitsarie.
ISA 12:6 Keneutakwikani meta keneutahiwani temawierikakɨ, Tsiyuni kiekatari, pumariwe yurikɨ, 'ahamatɨa 'uyeikatɨ, Mɨpatsie 'Ixaheri hetsiemieme».
ISA 13:1 Niuki Wawiruniya hepaɨtsita Kitsariyaxi 'Amuxi nu'aya kemɨtiuhekɨatsitɨiyarie:
ISA 13:2 Xeime hɨri metsekame hetsie patera xekeneuyuitɨwani, kuyaxi xekeniwarutahɨawi xe'utihiwatɨ, yumamakɨ xekeniwaru 'inɨaritɨa 'itupari meuwietsie memɨxikutsixi wakitenie memeutahaxɨanikɨ.
ISA 13:3 Memɨpatsie nehetsɨa miemete nekatiniwaruta'aitɨaniri, nekuyaxima nekaniwaruta'inieni, memuyutemamawie nemɨrayu'iwakɨ, memɨnetsiparewienikɨ 'iya nemɨtiwakwinitɨanikɨ.
ISA 13:4 Neuxei xekeneu'enana. Hɨritsie meyuwaɨkawatɨ wayuariya pa'eniɨriɨkɨ, yuwaɨkawatɨ wa'atɨ muwa mepɨtehahu. Neuxei xekeneu'enana. Yuwaɨkawatɨ te'aitamete wayuarika pa'eniɨriɨkɨ, nuiwarite memuyukuxeɨri. Yawé Naimekɨmɨtɨrɨkaɨye kaniwakuha'aritɨamɨkɨ kuyaxi memuyukwiyutsie.
ISA 13:5 'Ateewa kwieyaritsie mekaneyekɨne, kwie manuye'atɨkatsie paitɨ. Yawé yuhaxɨakɨ yuha'aritɨatɨ 'ukanamieni naime kwie mɨka'unakɨ.
ISA 13:6 Xekeneutitsuanani, Yawé munuanikɨ kanehuraniri. Naimekɨmɨtɨrɨkaɨye hetsie yeyaka kaniwareuyehɨamɨkɨ.
ISA 13:7 'Ayumieme mamate naitɨ kanitiweranareni, teɨteri yunaitɨ mekayuwaɨriyatɨ mekaniyukuhayeikawani.
ISA 13:8 Yunaitɨ mekanimamaka, kukuiniya meta hiwerika kaniwawiyani: kukuiniyakɨ mekaniyu'uimɨratɨweni, memɨniwetuweni hepaɨ. Me'akamamatɨ, yuxexuitɨ mekananuyutaxexeiyani, yuhɨxie me'ayexetatɨ.
ISA 13:9 Neuxei. Yawé 'ari tukarieya kanaya'aximeni ―tukari 'axamɨ'ane, haxɨa tukariyari―, kwie 'akumaweme kanayeitɨamɨkɨ meta 'axateyuruwamete kaniwarakumaweriyamɨkɨ.
ISA 13:10 Xurawetsixi meta taheima temiemete mehekɨariewietɨ mekatenihayewakuni, tau 'anatineximetɨ kaniyɨrimɨkɨ meta metseri pɨkahekɨariwieni.
ISA 13:11 Kwiepa memɨtama 'axakememɨteyuriekɨ nepɨtiwakwinitɨani, meta 'axateyuruwamete 'axamemɨteyuriekɨ. Memɨteyukananaima kememɨte'uyuti'ɨre nekaneutiparitɨamɨkɨ memamariwaweme memuyuxata memuyuti'ɨre tixaɨtɨ nepɨkatiwarayeitɨani.
ISA 13:12 Teɨteri yakɨ meyupaɨmeme nekaniwarayeitɨamɨkɨ keyuri huru 'aixɨa mɨ'ane, teɨteri memɨkwiwawe yakɨ mepɨyupaɨmeni huru matsi 'apɨpaɨmeni 'Upixi mieme.
ISA 13:13 'Ayumieme yanepɨtiyurieni muyuawi mɨtayuanikɨ meta kwie hakewa meuyema mɨtayuanikɨ, Yawé Naimekɨmɨtɨrɨkaɨye haxɨayakɨ kepauka mɨyeha'ani tukariyaritsie.
ISA 13:14 Maxa 'ɨimari yeutanaka muweiyarieka hepaɨ, muxatsi memɨkatehekakutsiyari hepaɨ, yukie yuxexuitɨ mekani'axɨakuni, yuxexuitɨ yukwietsie mekaniyuta'unaxɨakuni.
ISA 13:15 Kemɨ'ane mɨwiyarieni mɨkɨ kananuyetsekiemɨkɨ, kemɨ'ane manutahɨiyani 'ixiparakɨ kanemieriemɨkɨ.
ISA 13:16 Menenierekaku, waniwema mekanititetseweiyakuni, wakiita katininawariemɨkɨ meta wa'ɨitama wahamatɨa waɨriyarika mewapitɨatɨ mekanikahikuni.
ISA 13:17 Neuxei. Ne merutsixi nekaniwata'inimɨkɨ mɨkɨ wahepaɨtsita, teɨteri pɨrata memɨkaheuyehɨwa meta hurukɨ memɨkayutemamawiekai.
ISA 13:18 Yutupikɨ temari mekaniwaranuyemɨixɨakuni, nunutsi hukatsie mɨyeka mepɨkatinenimayata meta tɨɨri mepɨkawatinenimayata.
ISA 13:19 Wawiruniya, witsimɨtiyuxexeiya te'aitamete wahetsiemieme, karireutsixi memiheiwe'erie meta memuyuta'ɨrenikɨ mɨ'ayumieme, Tsuruma meta Kumuxa wahepaɨ katinanuyeyeimɨkɨ kepauka mɨkɨ Kakaɨyari mɨwaruka'unaxɨ.
ISA 13:20 Tawariri teɨteri mana mepɨkayutikitɨani, meta 'uxa'atɨni mana pɨkatikuyaxitɨ. Harawe tewiyari mukatewa tɨma mana yu'ixuriki kiiyari pɨkatawewieni, nimana tɨma muxatsi wahɨweme yumuxatsi pɨkawaka'uxipitɨani.
ISA 13:21 Mana teyukwa'amete makumawetsie kiekatari mekanika'uxipikuni, wakiita mikɨrixi mepɨtahɨne. Mana 'aruxi 'amemɨnene wakie payani meta tsipuri yeutari mana mepɨtitsuna.
ISA 13:22 Wakiita 'aixɨa mɨ'aneneta tsɨikɨri yeutari mepɨtitsuani, meta waparatsiyu witsimɨ'aneneta yawixi memayu'eririya mepɨtitsuani. Mɨkɨ huraya kanaye'aximeni, mɨkɨ tukarieya 'apɨkareutere.
ISA 14:1 Yurikɨ, Yawé Kakuwu kanitinenimayatamɨkɨ, hekwamekɨta 'Ixaheri kananayexeiyamɨkɨ. Wakwietsie kaniwa'atɨamɨkɨ. Kɨkamete mekaniwatinɨikuni, Kakuwu nuiwarimama wahamatɨa mekaniyutinɨikuni.
ISA 14:2 Teɨteri yukwietsie mepɨwatanaki'erieni meta wakiekaritsie paitɨ mepuwatuayu. 'Ixaheritsixi teyu'uximayatsiriwamete 'ukitsi meta 'ukarawetsixi Yawé kwieyatsie mepɨwarayeitɨani, memɨwaraye'uniekai mekaniwaranutaxɨriekuni meta mekateniwata'aitɨakuni kemɨ'ane memɨtewa'aitɨakai.
ISA 14:3 Kepauka Yawé kexemɨte'uka'eniwakaikɨ mɨxeka'uxipitɨani, kexemute'u'uximatɨarie meta waɨriyarika xepitɨarietɨ xemɨte'aitɨariekaitsie,
ISA 14:4 'ikɨ xatsika xepɨtaxata ti'aitame Wawiruniya hetsiemieme: Neuxei kereutiparixɨ waɨriyarika mɨtati'aitɨakai, meta haxɨaya kereutiparixɨ.
ISA 14:5 Yawé 'axateyuruwamete wakɨye kananumura, memɨmamariwawe wa'itsɨ pakamuraxɨ
ISA 14:6 haxɨakɨ meta yatiwaruwayatɨ teɨteri pɨtiwakwinitɨakai, haxɨa mɨkapariwekɨ nuiwarite mɨtiwa'aitɨakai meta puwaruweiyakai.
ISA 14:7 Kwie naitɨ 'aixɨa 'iyari kani'uxipieka, meta temawierikakɨ mekaniutihiwani.
ISA 14:8 Metsɨ huku meta kariuxa Riwanu mieme 'ɨaritɨ mekaniutinaweni 'ahepaɨtsita, mɨpaɨ mekaniutiyuaneni: «Kepauka pematihɨiyatsie paitɨ, tawariri xewitɨ pɨkatatsihawitexɨawe».
ISA 14:9 Hutipaitɨ meukatewatsie, 'ahekɨ, teukiyapa putayɨyɨaka matsi'anunakeke, 'ahekɨ mɨyapemuyɨkɨ mɨkite mepanutaneniere, kemɨ'ane kwiepa memanuyetekai. Yapɨtiyurie yunaitɨ nuiwaritetsie te'aitamete yu'uwenitsie memanuku'unikɨ.
ISA 14:10 Mɨkɨ yunaitɨ mekaniti'akuni mɨpaɨ mekametenikɨhɨaweni: «'Ekɨta pekaniutaweranaxɨani. 'Ekɨtsɨari ta'iwa pekanihɨkɨtɨni».
ISA 14:11 'Ekɨ kepemɨtiyuta'ɨrekai teukiyapa kaneukahɨiyani, 'a'aripa yuariyaya yunɨkame. Kwitsiteri watsata pekanikutsuni, meta harekuxi mekamaninɨkani.
ISA 14:12 Kekuta pe'ɨyɨka muyuawitsie pepanakahɨiya, xurawe tuxakɨta mieme. 'Ekɨ, nuiwarite pemɨtiwa'aitɨakai, kwiepa pekaniukaweni.
ISA 14:13 'A'iyaritsie mɨpaɨ peputainekai: «Muyuawitsie paitɨ nepanutiyani. Ne'uweni mana paitɨ nepɨtakeni Kakaɨyari xurawetsiximama waheima. Tayeta mutiniere paitɨ nepɨtita'aita, kakaɨyarixi wahɨritsie paitɨ.
ISA 14:14 Nekananutiyeimɨkɨ haiwitɨri yekɨrita paitɨ 'emeutitewatsie, 'Amutewi hepaɨ nekani'anekamɨkɨ».
ISA 14:15 Peru neuxei teukiyapa pepeukahɨiya, putsu 'emeukatewatsie.
ISA 14:16 Kemɨ'ane memɨmatsixeiya, kwi mepɨmatsikuxexeiya, meta kepemɨranuyeyanikɨ mɨpaɨ meputiyuane: «¿Kamɨtsɨ 'ikɨ kwie mutayuitɨwakai tihɨkɨ meta te'aitamete muwamariutakai,
ISA 14:17 kwie naime 'akumaweme mayeitɨwakai, wakiekarite mɨti'unakai meta memanutaxɨriya hatsuaku mɨkawatatuayakai?»
ISA 14:18 Yunaitɨ nuiwarite tewa'aitɨwamete 'aixɨa 'anemekɨ mepu'uxipie, yuteukiyapa yuxexuitɨ.
ISA 14:19 Matsi 'ekɨ teukiya kameniuhayani kɨye kutsunuyari mutaxainixɨ hepaɨ. Kemɨ'ane 'ixiparakɨ memukwi'iwaxɨ, kemɨ'ane teukiyapa tetɨata memeukakɨ, mɨkɨri naime mepɨmatsi'anukana. Mɨki ketsinariekame hepaɨ pekani'aneni.
ISA 14:20 Te'aitamete wahamatɨa teukiya pehexeiyatɨ pepɨka'ayani, 'akwie pemuka'unaxɨkɨ meta 'ateɨterima pemɨwarukwikɨ. Tawariri pɨkataxatsieni 'axateyuruwamete wanuiwari.
ISA 14:21 Wapaapama 'axamemɨte'uyurikɨ, xekeneukuha'arita niwemama hakewa memekwi'iwakɨ. Mepɨka'anuku'uweni kwie wahetsie mɨtinakenikɨ meta kiekaritekɨ kwiepa mepɨkahakɨnɨtsani.
ISA 14:22 «Ne mɨkɨ wahepaɨtsita nekananukukemɨkɨ ―Yawé mɨpaɨ kanaineni―. Ne Wawiruniya nepɨka'una kemɨtitewakɨ meta nuiwarieya, tsutumeyari meta 'imatɨreme ―Yawé mɨpaɨ kanaineni Naimekɨmɨtɨrɨkaɨye―.
ISA 14:23 Naikatsi 'ɨtsita kiekatari wakie nepayeitɨani, haa mayema, meta tiyu'uname matsikɨiyarikɨ nepeku'itieni», Yawé Naimekɨmɨtɨrɨkaɨye mɨpaɨ kanaineni.
ISA 14:24 Yawé Naimekɨmɨtɨrɨkaɨye kaniyuhɨritɨani: «Yemekɨ kenemɨtiku'eriwa, mɨpaɨ katinaye'amɨkɨ, kehepaɨ nemɨtiyurienikekai, mɨpaɨ katiniyɨmɨkɨ.
ISA 14:25 'Atsiriya 'ena nekwiepa nekanika'unamɨkɨ, nehɨritetsie nekanitiketsixɨamɨkɨ. Neteɨterima mɨkɨ yuku hetsɨana mieme me'anuyetetɨ mekatenihayewakuni, 'ari wanaiparietsie mɨkɨ 'ika pɨkahahetere».
ISA 14:26 'Ipaɨ nekatiniyurimɨkɨni naime kwie hetsie, 'ikɨ kanihɨkɨtɨni nemamá nemeutatsera nuiwarite yunaime wahetsie.
ISA 14:27 Xɨkari mɨpaɨ tiɨyɨhɨawe Yawé Naimekɨmɨtɨrɨkaɨye, ¿kemɨ'ane pɨyɨwe mita'imaiyakɨ? Xɨkari mɨkɨ yumamá hautatserani, ¿kemɨ'ane pɨyɨwe muwaketɨanikɨ?
ISA 14:28 'Ikɨ niuki Kitsariyaxi hetsie kaninuani kepauka ti'aitame 'Akatsi mumɨ mɨkɨ wiyaritsie:
ISA 14:29 Piritsiteutsixi yunaitɨ xeme, xepɨkayutemamawieka kename 'akamurixɨ 'itsɨ kɨmana pemɨtiweiwakai, matsi kuu xewitɨ kanayenemɨkɨ kuu nanayaritsie, mɨkɨ nuiwarieya kuu hawiwetɨ kanayeimɨkɨ.
ISA 14:30 Kemɨ'ane memɨnanaimarie muxatsi wahepaɨ mepɨtetikwani, memɨteheuyehɨwa 'aixɨa 'anemekɨ mepɨka'uxipieni. Matsi wananayari haakakɨ nepɨmieni, memuyuhayewa nekaniwaka'unamɨkɨ.
ISA 14:31 Keneutatsuakani meta keneutahiwani, kiekari 'ituparieya. Keneuyɨyɨakani marikakɨ, naitɨ Piritsiteu kwieyari. Matsi tayeta kuyaxi kɨtsi haiyari hepaɨ meteyuxexeiyatɨ 'umekanayehuni, meta nixewitɨ pɨkahanayeyeika yu'utuma kememɨtehewetɨka.
ISA 14:32 ¿Ke'aneme niuki tepɨwayetuirieni tupiritsixi mɨkɨ nuiwaritsie miemete? Kename Yawé Tsiyuni 'a'utake, mana memuyuti'awietakɨ teɨterimama memɨte'ukakukuine.
ISA 15:1 Niuki Muhawi hepaɨtsita mieme: 'Axi kiekariyari Muhawi kwieyaritsie mukuma, kaniuka'unarieni, xeitɨkariyaritsie kaneutipariyarieni. Kixi kiekariyari Muhawi kwieyaritsie mukuma, kaniuka'unarieni, xeitɨkariyaritsie kaneutipariyarieni.
ISA 15:2 Riwuni kiekatari tukita mekaneutahakeni, kakakaɨyarixi memɨte'atimawiyarɨwatsie, memɨtitsuanikɨ. Muhawi kaniutatsuakani Newu hetsiemieme meta Merewa. Yunaitɨ yumu'utsie mekanimu'uxirietɨkani, meta yɨmɨxiya naime mekanataxitɨkani.
ISA 15:3 Yunaitɨ, mekaniutitsuanani, kaye 'utɨma mekaniu'uwani, hiwerika kamixayari me'anakatɨtɨkaitɨ. Kii heima mekaniutitsuanani meta teɨteri memayukuxexeɨriwatsie.
ISA 15:4 Hetsiwuni meta 'Eraré karima mekaniutihiwani, Yahatsa mɨrakutewatsie paitɨ kana'eniɨriɨkɨni wahiwari. 'Ayumieme memɨkamama muhawitsixi mekaniutihiwani, peru mekaniutiyɨyɨakani marikakɨ.
ISA 15:5 Ne 'iyari Muhawi hetsiemieme kaniutahiwani, memuyu'unatɨwe Tsuhaxi paitɨ mekanekɨkani, meta 'Ekɨrati-Tseritsiya paitɨ. Ruhiti paitɨ mekananutikɨkani me'utitsuatɨ, 'uximatɨarikatsata, mekaniutihiwani me'u'uxetɨri Kurunahini huyeyari 'utɨma.
ISA 15:6 Haa kanakawaxɨani Nimirini mieme, tupiriya kaniutiyɨnare. 'Ɨtsiri kaniumaweni, tiyɨratɨ tixaɨtɨ pɨkatiyuhayewaxɨ.
ISA 15:7 'Ayumieme mekatenetɨni, Hapuri 'akiyari manuyeka matsi huma paitɨ, waɨkawa piinitɨarika memɨte'ukuxeɨriekai.
ISA 15:8 Me'u'uxetɨ memutihiwa Muhawi kwieyari manuye'atɨkatsie paitɨ kaniumieni. 'Ekɨrahini paitɨ watsuari kaniye'axeni, metatsiere Wexi-'Erini kaniye'axeni.
ISA 15:9 Rimuni hayaritsie xuriyakɨ pɨhɨpɨne, matsi tawarita kwiniya nekanikawiwimɨkɨ: xeime maye nepanɨnɨ'ani muhawitsixi memuyuta'unaxɨa wahetsiemieme meta kemɨ'ane 'akuxi kwiepa memu'uwani wahetsiemieme.
ISA 16:1 Muxatsi xekenanɨ'airi 'ikɨ kwieyaritsie mɨti'aita hetsɨa, Tseratsie meyekɨneme makumawetsie 'utɨa, meta Tsiyuni niweya hɨriyaritsie paitɨ.
ISA 16:2 'Ukarawetsixi muhawitsixi, 'Axinuni mayekunitsie, wikixi memutamariutsieni hepaɨ mepɨteyuxexeiya, memamatɨ yu'itua memuku'e'eiriwa.
ISA 16:3 «Ketaneuta'ɨxatsitɨa, yaketineɨyɨhɨawi. Tuka yemekɨ muhekɨakatsie, 'a'etɨriya kenetawerani tɨkarikɨ hepaɨ. Memuyuta'unaxɨa keniwaruti'awieta, memuyu'awieta pepɨkawaruku'e'eiriwani.
ISA 16:4 Muhawitsixi memuyuta'unaxɨa keniwarupitɨa 'ahetsie memuyuti'awietakɨ. Keniwakweriwayurieka tiyuka'uname hepaɨtsita». Kepauka kememɨtekwinitɨariekai meutipare, meta kememɨteka'unarienikekaikɨ mana mɨtiu'anitsie, kwiepa mɨtatsi'aye'unie kanikumawerimɨkɨ.
ISA 16:5 Heitseriemekɨ 'uweni 'apuweni, xewitɨ Rawiri nuiwarieyatɨtɨ mana katinita'aitamɨkɨ 'aixɨa 'anemekɨ: 'itsɨkame mɨ'ɨtetsa heitserie mɨtikuxatani kanayeimɨkɨ meta 'inaketɨ 'aixɨa mɨtiyurieneni.
ISA 16:6 Mɨpaɨ tekatenimaika Muhawi yemekɨ kaniyuta'ɨreni, tepɨtemate kemɨtiuyukatawe'erie, kemɨtiuyutamariwekata meta kemɨtiyukananaima, ke'axamɨtiuxaxata kayu'enietɨ.
ISA 16:7 'Ayumieme meputitsuana Muhawitsixi, mɨkɨ yunaitɨ Muhawi hetsiemieme meputitsuana. Xekeneutitsuanani, xekeneyuhiwerieka, kaxie patsaruyari tsuirayari Kixi-Karetseti miemekɨ.
ISA 16:8 Hetsiwuni mɨraka'etsitɨretsie katiniutiyɨnare, yaxeikɨata Tsiwima mieme kaxie haraweriyari. Nuiwarite tewa'aitɨwamete kaxie 'aixɨa mɨ'anenekai mekaniutiketsini, Katsexi paitɨ mɨye'axekai meta makumawetsie paitɨ mɨye'akai. Nanarieya 'ateewa pɨta'atɨkatei haramaratsie paitɨ pɨye'akai.
ISA 16:9 'Ayumieme neputatsuaka, Katsexi kemɨtiutatsuaka hepaɨ, kaxie Tsiwima miemekɨ. Xemeta, Hetsiwuni kiekariyari meta 'Eraré, ne'ukaikɨ nepɨxetihawiya. Temawierika hiwariyari pepeunuitɨa 'a'ikwaxi witsitikwakwaxime meta kepemɨtika'inɨwekai hetsiemieme.
ISA 16:10 Harawerita pumaweri temawierika. Nixewitɨ kaxie harawerita pɨkaheyekwika meta pɨkahahiwa, nixewitɨ kaxie pɨkaketsinane muwatiketsinarɨwatsie, ne hiwari kaxie tsata mieme nekaneutiparitɨani.
ISA 16:11 'Ayumieme netaɨta neputayɨyɨaka Muhawi hetsiemieme, 'aripatsie manutiwɨ hepaɨ puyɨne, naitɨ ne'iyari puyuane Kixi-Karetseti hetsiemieme.
ISA 16:12 Tsepa muhawi kiekatari kakaɨyarixi memɨte'atimawiyarɨwa memɨteheutahake, tixaɨtɨ mepɨkatekaxeiya matsi xeikɨa mepɨti'uxe, kepauka yutukita memuyunenewiyu, tsepa kememɨyɨa yakɨ xeikɨa mepɨyɨaka.
ISA 16:13 'Ikɨ Yawé kaniniukieyatɨni meripaitɨ kemutayɨ Muhawi hepaɨtsita mieme.
ISA 16:14 Hikɨ matsi Yawé mɨpaɨ kanaineni: «Haika wiyari ka'anuyeyeiwekaku, ti'uximayatame kemɨtiu'inɨnɨata hepaɨ ti'inɨaritɨ, 'ana kemɨtimariwe Muhawi meta teɨterimama memɨyumɨire mepɨnanaimarieni, yayupaɨmetɨ xeikɨa mepuyuhayewa meta memɨwerarani mekaniyuhayewakuni».
ISA 17:1 Niuki Ramatsiku hepaɨtsita mieme: «Ramatsiku xekeneuxeiya. Kiekariri pɨkahɨkɨtɨni. 'Unitɨ kwinie netɨ kanikemɨkɨ.
ISA 17:2 Kiekarite 'Aruhexi mieme kaniku'eiriwamɨkɨ, 'ɨ'ɨxayatɨ kanayeimɨkɨ mana muxatsi mekatenitikwaikuni nixewitɨ kawamariutakaku.
ISA 17:3 'Epɨrahini kiekari mɨtɨrɨkaɨye kaneuyehɨamɨkɨ, Ramatsiku ti'aitame kahexeiyatɨ kaniyuhayewamɨkɨ. 'Arami memuyukuhayewaxɨ meta tita memɨtehexeiyakai mɨkɨ 'ixaheritsixi waniwema wahetsiemieme katinayeimɨkɨ
ISA 17:4 »'Iya tukaritsie Kakuwu kemɨtimariwekai kanitaweranaxɨamɨkɨ meta kemɨtiwaiyakai kanitawamɨkɨ.
ISA 17:5 Tɨriku 'itsaname hepaɨ kani'anekamɨkɨ, yumamakɨ tɨriku 'uriyari pɨka'itsana, kepauka 'uriyari manukutɨkieni Xepahini mayeweritsie hepaɨ pɨtiyɨni.
ISA 17:6 Peru hipatɨ puyuhayewa, kepauka huriwu manuyekatsiwa hepaɨ, hutatɨ yatɨni haikatɨ takari puyukuhayeikawa xawaritetsie meutitetewatsie, heiwatɨ naukatɨ yatɨni 'auxɨwitɨ naime xawarite kɨyeyaritetsie».
ISA 17:7 'Iya tukaritsie tewi, kemɨ'ane mitawewi pɨtiwauni, Mɨpatsie 'Ixaheri hetsiemieme kwi pɨxeiya.
ISA 17:8 Kakaɨyarixi memɨte'atimawiyarɨwari pɨkaxeiya mitiwewiekai, meta kakaɨyarixi 'Atserá 'ɨkiyarite pɨka'anakuxeiya, meta hakewa 'ɨkwa matitaiyakaitsie mɨtiutiwewiekai.
ISA 17:9 'Iya tukaritsie kiekarite mɨtɨrɨkawi, muku'eiriwaxɨ 'ixaheritsixi ya'aneme meheutiwiwiexɨaku, kiekarite muku'eiriwaxɨ hepaɨ tiyuxexeiyatɨ kanayeimɨkɨ 'uhukuyatɨ meta 'u'ɨtsiyatɨ mayeika hepaɨ. Naitɨ 'akumawetɨ kanayeimɨkɨ.
ISA 17:10 'Akakaɨyari metsiwikweitsitɨwame pematɨmaikɨ, 'ai mɨmatsitseiriya pemɨkahaye'erikɨ. 'Ayumieme, tsepanetɨ 'iteɨri 'aixɨa 'aneme pemuka'iteɨtaxɨ meta tsepa kaxie 'ateewa mieme pemukayatsaxɨ,
ISA 17:11 tsepanetɨ tsipemɨtikuweriya 'apemɨtika'iteɨtaxɨtsie paitɨ, meta tsepanetɨ 'uxa'arieka pemitixutuitsitɨa, kukuiniya tukariyaritsie meta kwiniya mɨkayu'uayemarinɨa tukariyaritsie, tixaɨtɨ pɨkatikaxuawere.
ISA 17:12 Xɨa'ui yumɨiretɨ nuiwarite wayuarika. Haramara kemɨtiutapauwarɨka mɨpaɨ meputaine. Xɨa'ui teɨteri wahiwari. Wayuarika haa 'ateewa meukaxɨrɨweni hepaɨ meputaine.
ISA 17:13 Tsepanetɨ mɨkɨ teɨteri memutihiwa haa 'ateewa meukaxɨrɨweni hepaɨ tiyu'eniɨriɨkɨmekɨ, kepauka mɨkɨ mɨwarutate'a mepuyuta'una, 'ekakɨ mepu'enitsitɨariexime xatsi hɨritetsie mieme hepaɨ, meta 'eka tɨrɨkaɨyetɨ kwauni mu'enitsitɨaximeni hepaɨ.
ISA 17:14 Kutaikaireyu, mekaniutimariutsiwani. Kakatariwekaku 'akuxi, mepukumamawere. Mɨpaɨta mepɨte'anuyekɨne kemɨ'ane memɨtatsitaweiya, mɨpaɨta ti'anetɨ wahetsie 'upɨramie kemɨ'ane takie memɨtenawatɨwe.
ISA 18:1 Xɨa'ui kwie waɨkawa 'utsikari memutitsiwarɨkatsie Kutsi hatɨayarite manuyehetsie matsi humapaitɨ,
ISA 18:2 Niru hayari 'utɨma tupiritsixi pɨwarayenɨ'awa haka kanuwayaritsie. Xekeneuhuni, tupiritsixi kwinimieme xemayɨwawe, xeime kwieyaritsie teɨteri kwinie me'utɨtɨ memaxuawetsie meta yuwaiyaritsie meheumerɨkawitɨ, mɨkɨ nuiwari naitsarie kiekaritsie mɨmakaxiwa, mɨkɨ nuiwari mɨtɨrɨkaɨye mɨtiyu'aitɨwa, mɨkɨ kiekari haa 'anuyehapanekaku mukuma.
ISA 18:3 Kepauka hɨritsie 'inɨari manukuhanieni meta kuxineta metayuani, xekeneyɨ'ɨwiya, kwiepa xemɨtama, xekeneu'enana, 'ikɨ kwietsie kiekatari.
ISA 18:4 Mɨpaɨ Yawé kanetiniutahɨawe: «Muyuawitsie paitɨ kayuwatɨ nehexeiyatɨ nekanakanierekamɨkɨ, tau xawatɨriyaya hepaɨ, haɨtsi hai kemɨranutinenetɨwa hepaɨ 'uxɨkakaku kepauka mɨtiuka'inɨiwatsie».
ISA 18:5 Katika'inɨiyawekaku 'akuxi, kepauka tuturi mɨkawiwieni meta kaxie takari mutikwakwaxe, 'ana yɨrariyari kanikawitekiemɨkɨ meta xawari nanari naitɨ kanewatihunariexɨamɨkɨ.
ISA 18:6 Mɨkɨ naitɨ kaniku'eiriwamɨkɨ, wirɨkɨxi hɨritsie kiekatari meta yeutari teyukwa'amete wahetsiemieme katinayeimɨkɨ, witaritata kwixɨri wa'ikwai katinayeimɨkɨ, muhaɨtɨnitsieta, yunaitɨ yeutari teyukwa'amete.
ISA 18:7 'Iya tukaritsie mɨkɨ teɨteri 'amemutɨtɨ meta yuwaiyaritsie memeumerɨkawi, teɨteri mɨkɨ naitsarie memɨmakaxiwa, mɨkɨ nuiwari memɨtɨrɨkaɨye memɨteyu'aitɨwa, wakiekari haa 'anuyehapanekaku mɨyema, Yawé Naimekɨmɨtɨrɨkaɨye mawari mekaniwewiriekuni. Tsiyuni hɨriyaritsie mekanenutɨkiriekuni hakewa mekiena kemɨtitewakɨ Yawé Naimekɨmɨtɨrɨkaɨye.
ISA 19:1 Niuki 'Ekipitu hepaɨtsita mieme: Yawé xekeneuxeiya. 'Ekipitu kaniye'aka hai kwinimieme 'ayɨweme hetsie 'akaitɨ. 'Ekipitu miemete kakaɨyarixi me'ixeiyatɨ mekaniutiyɨyɨakani, 'ekipitutari wa'iyari kanitiweranareni.
ISA 19:2 «Yanekatiniyurimɨkɨ 'ekipitutari memayuye'uniekakɨ, yu'iwamatɨ mepuyutakwini, yuhamikumatɨ mepuyutakwini, kiekarite mepuyutakwini, te'aitamete mepuyutakwini.
ISA 19:3 'Ekipitutari mekayuwaɨriyatɨ mepakɨne meta yukakaɨyarixi mekaniwatahɨawikuni: meta mɨkite wa'iyarite, teyukewaiyamete meta mɨkite wahamatɨa memɨtekuxata meta memɨtehetimamateke, ne matsi kememɨteku'eriwa nepɨkawapitɨani.
ISA 19:4 Nepɨwapitɨani 'axamete'u'iyaritɨ memɨtewata'uximayatsitɨanikɨ, ti'aitame 'axatiuka'iyaritɨ katiniwata'aitɨamɨkɨ», Ti'aitame mɨpaɨ kanaineni, Yawé Naimekɨmɨtɨrɨkaɨye.
ISA 19:5 Niru hayari pakawani, xiekari xeikɨa wakitɨ pahekɨare.
ISA 19:6 Haa muhapanekaitsie 'axapɨraye'ɨatɨkani, meta 'Ekipitu 'akiyarite pakawaxɨani, yemekɨ 'uwakitɨ puyuhayewa. 'Uwá meta haka hatetsita mieme kanitiyɨnarimɨkɨ.
ISA 19:7 Niru hatetsitayaritsie, haa hakewa meye'akai, naitɨ pɨkaretsiɨraɨyeniri. Niru 'aurie naitɨ mɨti'etsiekai 'akumawetɨ puyuhayewa, pɨtikumawere.
ISA 19:8 Yunaitɨ ketsɨteweiyamete mepɨtitsuani mepuyutihiwerieni, Niru hetsie kemɨ'ane kwaitsɨ memeukawiwiwa, wipi memɨwiwietɨwe mekani'amɨxɨakuni.
ISA 19:9 Me'iyɨrietɨ mekanakɨnikuni memɨte'uximaya rinu 'aixɨa meyurietɨ, kememɨteta'ikwewa rinukɨ 'itsamete mekateneuyehɨakuni.
ISA 19:10 Mepɨ'iyɨrienita 'ixuriki memɨwewie, yunaitɨ te'uximayatamete mekaniyutihɨawikuni.
ISA 19:11 Tsuhani kiekatari memanuyetei 'atsimemɨkatemate mepɨhɨkɨ, 'ɨxatsitamete waɨkawa memɨtemaiwawe Parahuni mepɨ'ɨxatsitɨa tixaɨtɨ 'atsimekatemaitɨ. ¿Titayari mɨpaɨ xete'ikɨhɨawe: «Ne xewitɨ memɨtemaiwawe nekanihɨkɨtɨni, te'aitamete meripaitɨ miemete memɨnete'uta'ɨkitɨa»?
ISA 19:12 ¿Kwinimieme pemɨtimaiwekai hakewa peyuhayewaxɨ? Peketiuxeitsitɨarieni meta peketiutaxatɨarieni Yawé Naimekɨmɨtɨrɨkaɨye 'Ekipitu hepaɨtsita kemɨtiyurimɨkɨ.
ISA 19:13 Tsuhani kiekatari memanuyetei 'atsimemɨkatemate mepakɨ, Menipitsi kiekatari memanuyetei mepɨte'u'irɨwiyarie. Teɨteri watetexi memɨhɨkɨtɨkai tsikurita mieme 'Ekipitu mepeuyehɨa kemɨtimiekai.
ISA 19:14 Yawé wahetsie pupitɨa 'iyari 'iyɨriwame. 'Ekipitu naimekɨ kemɨtiyuriene kemɨtimiekai mekaneiyehɨani. Tawekame mutahewa hepaɨ, 'Ekipitu kanitakitsarietɨyeikani.
ISA 19:15 'Ekipitu hetsie 'aixɨa mutiuyurieni pɨkayɨwe, tsepa mu'uya mɨhɨkɨ yatɨni kwaxieya, yatɨni takɨ yatɨni haka.
ISA 19:16 'Iya tukaritsie 'ekipitutari 'ukari wahepaɨ mepɨteyuxexeiyani. Meputiyɨyɨakani marikakɨ kepauka Yawé Naimekɨmɨtɨrɨkaɨye yumamá manukuhana 'iyuitɨwatɨ yukuha'aritɨwatɨ mɨtiwakwinitɨanikɨ.
ISA 19:17 Kura kwieyari 'ekipitutari mepimakaxeni. Yawé Naimekɨmɨtɨrɨkaɨye kemɨtiyurimɨkɨ wahepaɨtsita mieme, Kura kwieyari xɨka haterɨwarɨwani kemɨ'ane memi'enieni me'enaname waɨkawa meputimamaweni.
ISA 19:18 'Iya tukaritsie 'Ekipitu kwieyaritsie 'auxɨwitɨ kiekari pukumare kananitari waniukikɨ me'utiniutɨ, Yawé Naimekɨmɨtɨrɨkaɨye hetsie memɨtewiyanikɨ yamepɨtiyuani. Mɨkɨ xewitɨ Tau Kiekariyari pɨtitewaka.
ISA 19:19 'Iya tukaritsie Yawé hetsiemieme mawari taiyame xewitɨ 'Ekipitu kwieyari hixɨapa pɨtakeni, metatsiere kwieyari manuye'atɨkatsie tete pɨtakerieni Yawé hetsiemieme.
ISA 19:20 Mɨkɨ 'inɨari pɨhɨkɨtɨni 'Ekipitutsie ma'eriwanikɨ Yawé Naimekɨmɨtɨrɨkaɨye. Kepauka mɨkɨ Yawé memɨtahɨawe waɨriyarika memɨtewa'aitɨa wahepaɨtsita, mɨkɨ wawikweitsitɨwame kaniwaranɨ'airiemɨkɨ meta wahetsie nunuwame kaniwaxɨnamɨkɨ.
ISA 19:21 'Ayumieme Yawé 'ekipitutari wahetsie matsiɨkɨme kanayuyeitɨamɨkɨ, 'iya tukaritsie mɨkɨ Yawé mekanetimaikuni: mawari me'iwewirietɨ mekaneyexeiyakakuni hatsite mekateniyetuiriwakuni, Yawé hetsiemieme yamekateniyɨhɨritɨakuni meta mekateneye'atɨiriekuni.
ISA 19:22 Yawé 'ekipitutari katiniwakwinitɨamɨkɨ, tiwakwinitɨametɨtɨ kaniwa'uayemamɨkɨ. Mɨkɨ Yawé hetsɨa mekani'axɨakuni, mɨkɨ kaniwa'enimɨkɨ kememɨte'ikɨhɨaweni meta 'aixɨa meteheu'eriekame puwarayeitɨani.
ISA 19:23 'Iya tukaritsie huye pɨtixuawere 'Ekipitu yehanetɨ 'Atsiriya ye'atɨ. 'Atsiriya kiekatari 'Ekipitu mepɨyehu meta 'Ekipitu kiekatarita 'Atsiriya mepɨyehu, yuxexuitɨ mɨkɨ meyunɨtɨ Kakaɨyari mepayexeiyani.
ISA 19:24 'Iya tukaritsie 'Ixaheri puhɨkɨtɨni, 'Ekipitu meta 'Atsiriya meyunɨtɨ, kwiepa memɨtama 'aixɨa mepɨ'itɨarieni wakɨmana.
ISA 19:25 Yawé Naimekɨmɨtɨrɨkaɨye 'aixɨa kaniwayurimɨkɨ, mɨpaɨ 'utaitɨ: «'Aixɨa kani'itɨarieka 'Ekipitu neteɨterima meta 'Atsiriya nemɨwarutawewi, metatsiere 'Ixaheri neteɨterima nemɨwaranayexei memɨhɨkɨ».
ISA 20:1 Kepauka kuyaxi tiwa'aitɨwame menɨ'arie 'Atsiriyatsie ti'aitame Tsarikuni meinɨ'a, 'Atsiruri kiekariyaritsie mekaniu'axɨani, 'ana mɨkɨ mekaniwarutakwini meta mekaniwara'iwa.
ISA 20:2 Mɨkɨ tukaritsie Yawé Kitsariyaxi hetsie kaniutaniuni 'Amuxi nu'aya. Mɨpaɨ katinitahɨawe: «Neuxei, hiwerika kamixayari pemanakatɨkɨ kenanutihɨna meta 'akakai». Mɨpaɨ Kitsariyaxi katiniuyurieni, heumawetɨ 'akaniuyeikakaitɨni meta heumamawetɨ.
ISA 20:3 Hikɨ Yawé mɨpaɨ kaniutayɨni: «Mɨpaɨ kemɨtiuyeikakai nenɨ'ari Kitsariyaxi haika wiyari heumawetɨ meta kaheukakaitɨ, pɨ'inɨari 'Ekipitu meta Kutsi wahetsiemieme,
ISA 20:4 mɨpaɨta, 'ekipitutari memuyutetewiyanikɨ, ti'aitame 'Atsiriya kiekame kaniwaranuhapamɨkɨ memamaweme meta meka'ukakaikame, me'anamamaweme, 'ekipitutari mepanuhapanieni meta Kutsi kemɨ'ane memanutaxɨriyani, yaxeikɨa temari tsepa 'ukirawetsixi.
ISA 20:5 Kemɨ'ane 'Etihupiya hetsie memɨtewiya meta kemɨ'ane 'Ekipitu hetsiemieme memuyuti'ɨre mɨkɨ mepɨtimamani meta mepuyutitetewiya.
ISA 20:6 'Iya tukaritsie haramara tetsita kiekatari mɨpaɨ mepɨtiyuani: “Neuxei, mɨya mepɨte'anuyehu wahetsie temɨtetakwewiekai, wahetsɨa temeta'axekai parewiya teheuyehɨatɨ, ti'aitame 'Atsiriya tatsi'uweiyakaku tahetsie memɨtanuanikɨ. Hikɨtari, ¿hakewa tepeyuta'una?”»
ISA 21:1 Niuki makumawe haramara 'aurie mukuma hepaɨtsita: Nekexi muyekɨka haikɨri mɨtɨrɨkaɨye hepaɨ, kwie makumawetsie xewitɨ kanayeneximeni mariwetɨ.
ISA 21:2 Mariweme nepɨtiuxeiyatsitɨarie nepɨtiuhekɨatsitɨiyarie: mɨtiyukwamana pɨtiyukananaimaka, tiyu'uname pɨtiyuka'unani. 'Erami keneyumieneni. Meriya kiekatari xeiya xekeneyukwitɨweni. Naime hiwerika nepautiparitɨani.
ISA 21:3 'Ayumieme newaiyari puyɨyɨaka kukuiniyakɨ, 'etsipemekɨ kukuiniyakɨ nepɨtiuka'eniwa, niweyame hepaɨ, ketitanemɨti'eniekɨ, nepɨtiuka'eniwa, ketita nemɨtixeiyakɨ, nemakame pɨnetsi'ayeitɨa.
ISA 21:4 Nepɨkaheneta'eriwa, nemariutsietɨ xeikɨa nepɨyɨyɨaka, taikai kwinimieme mɨnetinakekai hikɨri nepimakaxe.
ISA 21:5 Mɨkɨ mexate mana mepuku'uitɨa, 'itari mekanikuwerani, mepɨtekwa'a meta mepɨte'ie. Xemanuyetei, 'axekeneti'uka. Xekenanuku'uti, yuheima nunuwame xekeneutiwiyama.
ISA 21:6 Yawé mɨpaɨ kanetiniutahɨawe: «Kenemie, xeime tihɨweme keneuketsa, mɨtikuxatanikɨ naime kemɨtiniereni.
ISA 21:7 Kepauka kaxetate yukukuyamete kawayutsixi mehenawɨtɨakame mɨwaxeiyani, yatɨni teɨteri puxuri wahetsie me'utekame yatɨni kameyutsixi wahetsie, ke'uniere yukɨ'ɨwiyatɨ, waɨkawamekɨ yukɨ'ɨwiyatɨ».
ISA 21:8 Tihɨweme kaniutahiwa: «Ti'aitame, tukari manukayeika, tuxiyutsie ne'akawetɨ nepɨkatihayewa, tɨkarikɨ mana nepukatariyarɨwa kenemɨtihɨritɨarie netita'ɨwiyatɨ.
ISA 21:9 Mana xewitɨ tewi kanamieni kaxetatsie kawayutsixi me'ehanatɨ. 'Ikɨ kaniniukieyatɨni: “'Ari Wawiruniya kanatiweni, kanatiweni. Naitɨ kakaɨyariximama wa'ɨkiya kwiepa katinanukuheni”».
ISA 21:10 Neteɨterima, tɨriku mu'urie hepaɨ mɨ'ane, ne nekamatinaxaxatɨwani kenemɨtiu'enaxɨ Yawé Naimekɨmɨtɨrɨkaɨye hetsiemieme, 'Ixaheri Kakaɨyarieya.
ISA 21:11 Niuki Rumaha hepaɨtsita mieme: Xewitɨ Tsehixi kwieyaritsie paitɨ pɨnetsihehiwie: «Tihɨweme, ¿'ɨyɨwitɨ 'akuxi kereutere? Ti'ɨwiyame, ¿mɨkahekɨarekɨ kereutere?»
ISA 21:12 Tihɨweme mɨpaɨ kaniutayɨni: «'Ari kanikahekɨarirɨmeniri, peru yaxeikɨata tɨkari 'ukanamieni. Xɨka xeheu'iwaukuni, xekeneku'iwawani, xɨka tawari xehayenexɨakuni xekenayenexɨa».
ISA 21:13 Niuki 'Arawiya hepaɨtsita mieme: Kɨkamete Rerani kiekatari, makumawetsie 'akɨ'ɨtsiyakaku xemukutei:
ISA 21:14 mɨyeharimɨne xekenanunaki haa xekeneuharitɨa. Temaha kwieyaritsie kiekatari, yu'unamete 'ikwai xeketeniwarumikwa,
ISA 21:15 mɨkɨ 'ixipara memakatɨ mekaniyu'unarɨmeni, 'ixipara mɨhekɨa, tupi karima mayuhapatɨka meta mɨrayukwitɨnetsie.
ISA 21:16 Yawé mɨpaɨ kanetiniutahɨawe: «Xeiwiyari ka'anuyeyeiwekaku, ti'uximayatame mɨtiu'inɨnɨata hepaɨ ti'inɨatsieme, Tseraxi kemɨtimariwekai naitɨ kaneutiparimɨkɨ.
ISA 21:17 Temɨmɨmete 'etsiyupaɨmetɨ mekaniyuhayewakuni, Tseraxi kiekatari yukukuyamete, mana memutawikwei». Yawé mɨpaɨ kaniutayɨni, 'Ixaheri Kakaɨyarieya.
ISA 22:1 Niuki mayeweri hepaɨtsita mieme kenemɨtiuxeiyatsitɨarie: Hikɨta kepeyɨane, kii heima paitɨ pepanutitɨa,
ISA 22:2 kiekari waɨkawamekɨ 'axamɨretainetsie, mepɨkayu'enie meta mepɨ'ietɨwe. 'Ateɨterima nixewitɨ 'ixiparakɨ pɨka'umierie meta mepɨkahekwi'iwaxɨ mɨrayukwitɨnetsie.
ISA 22:3 Meyunaitɨ 'ahetsɨa memanuyetei mepuyuta'unaxɨ meyunɨtɨ, matsi mekaniutiwiyarieni tupi mekahapaxɨawawetɨ 'akuxi. Yunaitɨ pemuwaranutaxɨrie mekaniutiwiyarieni mexi'akuxi meyuta'unarɨmekai.
ISA 22:4 'Ayumieme mɨpaɨ neputayɨ: «Nexaɨtame xekeneneuhayewa, nekanitatsuamɨkɨ netiuka'eniwatɨ. Waɨriyarika xepɨkanetsikunɨtɨwani: Nekiekari niweya kaniuka'unarieni».
ISA 22:5 Ti'aitame, Yawé Naimekɨmɨtɨrɨkaɨye, yakaniutayɨni xeitukari marika mɨtixuawerekɨ, xeitukaritsie tixaɨtɨ temɨkate'ayeitɨarienikɨ meta temeuyuyexɨriekakɨ mayeweri nemuxeiyatsitɨarietsie, xeitukaritsie kuraru mɨka'unarienikɨ meta hɨritetsie temekahiwanikɨ.
ISA 22:6 Kaxetate yukukuyame hetsie me'utetɨ, 'Erami yu'ɨrɨ kaniuti'ɨni, Kixi yuheima nunuwame kaniwaruxeiyatsitɨani.
ISA 22:7 Kaxetate yukukuyame pɨhɨpɨne mayeweri manayexeiyarietsie, 'akitenie me'utetɨ mepuyutsaipɨna.
ISA 22:8 Kura kwieyari mɨyɨkɨhɨani pɨkayɨwe. Mɨkɨ tukaritsie xeme xepɨyu'ɨwiyaxɨ Paratsiyuta makukariuxaya kuyaxa timieme mɨtiyepikai.
ISA 22:9 Xepunenierixɨ Rawiri kiekariena waɨkawamexɨa meutahani pɨyɨwekai, haputsu kiekari hetɨamiemetsie haa xeputi'utaxɨ,
ISA 22:10 Kii Kerutsareme mieme xeputi'inɨataxɨ hipame xeputi'unaxɨ kuraru 'aixɨa xemuyurienikɨ,
ISA 22:11 huta kuraruyari tsata xeime haputsu xeputawewi haa mukamarekɨ haputsu meripaitɨ mieme taɨta, peru xepɨkayu'ɨwiyaxɨ kemɨ'ane mɨtiyurienekai, meta kemɨ'aneri meripaitɨ mɨpaɨ mutayɨkai.
ISA 22:12 'Iya tukaritsie Ti'aitame, Yawé Naimekɨmɨtɨrɨkaɨye, pɨxe'utahɨawixɨ xemutitsuananikɨ xeyuhiwerietɨ, yumu'utsie xemuyukaxinikɨ meta xemuyutihiwerienikɨ.
ISA 22:13 Peru neuxei, temawierika puxuawe. Wakaitsixi mepɨmawarie, muxatsi mepɨtakwikwiwa, wai pukwaiya meta winu pɨ'iya. «Tepɨtekwaka tepɨ'ietɨweni, 'uxa'a temɨkwinikɨri».
ISA 22:14 Yawé Naimekɨmɨtɨrɨkaɨye mɨpaɨ kanetiniu'enitsitɨiya: «'Ikɨ 'axakememɨte'uyurikɨ hatsuaku nepɨkatiwareuyehɨwirieni kepaukake memukwini. Ne nekanaineni Ti'aitame, Yawé Naimekɨnemɨtɨrɨkaɨye».
ISA 22:15 Ti'aitame mɨpaɨ kanaineni, Yawé Naimekɨmɨtɨrɨkaɨye: «Kenemie Tsewina hetsɨa, paratsiyu mɨhɨritɨarie, mɨpaɨ ketinetahɨawi:
ISA 22:16 »“¿'Ena kepetiyuriene? ¿Kemɨ'ane heitserie pɨmatsi'upitɨa 'uwa teukiya pemɨti'inekɨ? ¿Titayari meutitewatsie 'a'uxipiweme petiwewiene, ketitayari 'aitsie perewaye'ine?
ISA 22:17 »”Neuxei tewi pemɨtɨrɨkaɨye Yawé 'ari kameniwiyarɨmeni metsihehɨanike metsinanaimatɨ.
ISA 22:18 Perúta hepaɨ kametinikurupamɨkɨ, meta kwie 'ahakuyeumetsie kameneutahɨamɨkɨ. Mana pekanemɨmɨkɨ, manari kaniyuhayewamɨkɨ 'akaxetate witsimɨ'anenekai kuyaxa miemete. Mati'aitɨwame kiita pekanitewiyatsitɨariemɨkɨ.
ISA 22:19 Nekamenanakahɨamɨkɨ kepemɨtihɨritɨarietsie, meta pemɨra'uximayatsie pekananayehɨiyamɨkɨ”.
ISA 22:20 »'Iya tukaritsie neti'uximayatsiriwame 'Eriyakini Kirikiyaxi nu'aya nekanitahɨawimɨkɨ.
ISA 22:21 'Akamixa 'amɨtewi nepenakatɨtɨani, 'ahɨiyamekɨ nepenahɨani, kepemɨti'aitakai mɨpaɨ nepɨtihɨritɨani. Kerutsareme kiekatari wapaapa hepaɨ 'anetɨ payani meta Kura nuiwariyari wahetsiemieme.
ISA 22:22 Rawiri kiiya yawiyari naiparieyatsie nepayatsa, mɨkɨ tita mɨreuyepieni nixewitɨ mɨreunani pɨkayɨweni meta tita mɨkɨ mɨreunani nixewitɨ pɨkayɨweni mɨreuyepieni.
ISA 22:23 Kutsunu hepaɨ kwiepa 'a'uweme nekanikatsunamɨkɨ, meta 'uweni 'aixɨa mɨtixeiyarie hepaɨ pɨ'aneni paapaya xiɨyarimama wahetsiemieme.
ISA 22:24 Mɨkɨ hetsie pɨtiyeyani naitɨ 'aixɨa mɨti'ane waniwematsie: nuiwarimama neta wayɨrari, ye'ɨ 'etsimupe hetsie, tekɨxite hetsie meta ye'ɨrɨte hetsie.
ISA 22:25 »'Iya tukaritsie ―Yawé mɨpaɨ kanaineni Naimekɨmɨtɨrɨkaɨye― kɨtsunu kanakainimɨkɨ makuweritsie muwe, kanahunariemɨkɨ nanari'ɨaritɨ kanatiwemɨkɨ, naime kemɨre'ikakai ratɨtɨ». Yawé mɨpaɨ kanaineni.
ISA 23:1 Niuki Tiru hepaɨtsita mieme: Xekeneutitsuanani, kanuwate Taritsi miemete, xekii meti'unariekɨ meta haramara tetsita xemuwa'axetsie. Tsipɨre kwieyaritsie paitɨ mana paitɨ me'u'uwatɨ mekateniutamarieni.
ISA 23:2 Kayuwatɨ xekeneumaka, haramara tetsita kiekatari, Tsiruni kiekatari tetuayamete, kanuwa nɨ'awamete waɨkawa metehexeiyame xemɨwarayeitɨa.
ISA 23:3 Haa mɨmamariwawetsie Tsikuxi hatsiyari kananetɨarieni, Tiru kiekariyari waɨkawa mɨratuiya patɨa nuiwarite wahetsiemieme, Niru hatetsitayaritsie mutiuka'etsiwakai mɨkɨkɨ waɨkawa mepɨte'ana'iwakai.
ISA 23:4 Tsiruni, keneyutewiyani, haramaratsie pemɨtiwiya, haramara mɨpaɨ kaniutayɨni: «Kemɨtiyukukuine niwenetɨ nepɨkatimate meta nepɨkaheyeniweya, tɨɨri nepɨkawareyewaweriya meta 'ukari nepɨkawareuta'ɨxatsitɨawe».
ISA 23:5 Kepauka 'Ekipitu niuki mɨye'ani, Tiru hepaɨtsita metemarietɨ mekaniyutihiwerikuni.
ISA 23:6 Taritsi xekeneuyekɨni, haramara tetsita kiekatari, xekeneutitsuanani.
ISA 23:7 ¿'Ikɨ xekiekari muyutemawie tihɨkɨ, kiekari meripaitɨ mieme, teɨterimama memeiwitɨ 'ateewa paitɨ mekuyaxeke?
ISA 23:8 ¿Kemɨ'ane mɨyaputayɨ Tiru hepaɨtsita, kiekari piinite raye'atɨkaime mɨtitiwewiwakai, tetuayametemama memanuyetei mepɨhɨkɨtɨkai, meta wahamatɨa memɨte'uximaya naitsarie kwiepa mepɨmatiwakai?
ISA 23:9 Yawé Naimekɨmɨtɨrɨkaɨye hepaɨtsitana mɨpaɨ kaniutayɨkaitɨni kemɨ'ane kwinimieme mɨtiyuta'ɨre mɨka'unakɨ meta yunaime teɨteri memeuka'u kwiepa tixaɨtɨ mɨkatiwarayeitɨanikɨ.
ISA 23:10 Taritsi niweya, Niru hepaɨ 'akwie keneuka'etsa, 'ari 'akanuwa muwaye'axekaitsie kaniukumaweni.
ISA 23:11 Yawé haramaratsie yumamá kaneutatsera, meta te'aitamete kaniwarutiyɨyɨakitsitɨani, meta katiniuta'aita Kanani kiekariyari 'aixɨa mɨ'ane mɨka'unarienikɨ.
ISA 23:12 Mɨkɨ mɨpaɨ kaniutayɨni: «'Ɨimari waɨriyarika 'ahamatɨa mɨtiukahitɨxɨ, Tsiruni niweya: tawarita peyutemawietɨ pepɨkahayani. »Kenanukukeka, Tsipɨre paitɨ 'anutaɨye kenanuye'a, peru yaxeikɨa mana 'aixɨa 'anemekɨ pepɨkatayerɨni».
ISA 23:13 Karireutsixi wakwie keneuxeiya. Mɨkɨ teɨteriyari mekaniumaweniri. 'Atsiriya makumawetsie yeutari memayu'awieta wakie pɨta kanayeitɨani. Makeme me'utawewieka wakurarutsie mekaneukatsunaxɨani, wakii 'aixɨa mɨ'anenekai mekaniuti'una, naime 'u'unime mekaniuhayewa.
ISA 23:14 Kanuwate Taritsi mieme, xekeneutitsuanani, xekiekari 'aixɨa mɨ'ane muka'unariekɨ.
ISA 23:15 'Iya tukaritsie Tiru kanatɨmaiyariemɨkɨ haika tewiyari heimana tamamata wiyari, ti'aitame kemɨreutetere 'ayenieretɨ. Peru mɨkɨ wiyari tixɨyu, kemanɨyɨne 'uka tuminikɨ muyuwitɨnɨa kwikariyari mɨpaɨ katiniyurimɨkɨ Tiru kiekariyari:
ISA 23:16 «'Ekɨ, 'uka tuminikɨ pemuyuwitɨnɨa, 'aripa keneutikweka kiekari warita kenaye'a, yemekɨ kepemɨtiyɨwe ketineukayuitɨa, meta waɨkawa kwikari keneutikwika, 'uxa'atɨniwarie pemuku'eriwanikɨ».
ISA 23:17 Haika tewiyari heimana tamamata wiyari 'anuyeyayu, Yawé Tiru panukuketɨani, mɨkɨ tawarita puyutuani, tuminikɨ muyumayɨinɨa payuyeitɨani yunaime te'aitamete wahamatɨa.
ISA 23:18 Peru ketipaɨmeme mɨtiyetua meta kepaɨmeme mana'i'iwani Yawé hetsɨa mieme tipatsietɨ pɨrayeikani, pɨkati'utɨni meta pɨkatixeɨriyaka xeikɨa. Tita mɨrana'iwarieka Yawé hetsiemieme memɨte'uximaya wahetsiemieme pɨrayeikani, memɨteyumikwanikɨ 'anayuhayewamekɨ meta 'ixuriki witsimɨ'anenekɨ memuyukemaritɨakakɨ.
ISA 24:1 Neuxei, Yawé kwiepa puwaka'una meta puwarakumaweriya, puwa'uximatɨa yunaime, meta mana kiekatari puwataweweiya.
ISA 24:2 Yaxeikɨata mepɨte'anuyekɨne mawari wewiwame meta teɨteri, 'uki ti'aitame meta ti'uximayatame, 'ukaratsi ti'aitame meta 'ukaratsi ti'uximayatame, tituayame meta tinaweme, tumini tiyuniniɨtɨwame meta yuniɨrɨweme, mɨrapiniyarie meta mɨrapine.
ISA 24:3 Kwie naitɨ kanakumaweriyarieni, yuheyemekɨ mekanakumaweriyarieni, Yawé mɨpaɨ mutayɨkɨ.
ISA 24:4 Kwie kaniwakini kaniyɨnani, 'iteɨrite kaniyɨyɨnani meta kanitakukuweni, kwiepa memɨmamariwawekai mekaniweraranini.
ISA 24:5 Kwie puyutsewixima, mana kiekatari memiketsinakɨ, yamemɨkatekakɨkɨ 'inɨari niukiyaritsie, 'inɨari niukiyari memɨkahanu'enikɨ, 'aitsikate memeutitsanaxɨakɨ, tɨratu yuheyemekɨ mumieme mekaneutitsanaxɨani.
ISA 24:6 'Ayumieme kwie 'axa'itɨrietɨ kanitaxɨximeni, mana kiekatari wahetsie mɨrahɨiwakɨ. 'Ayumieme tai kaniwaxɨtsitɨaka, yayupaɨmetɨ xeikɨa mekaniyuhayewatɨweni.
ISA 24:7 Winu mɨhekwa kaniukawani, meta kaxie kaniutayɨnare, naitɨ 'iyarite muyutemamawiekai meripaitɨ kaniyuhiwerietɨkani.
ISA 24:8 Tepu 'utiyuatɨri katiniuhayewa, temawierika 'ixɨarariyariri kaniukumawere, 'aripa hayuatɨ katiniutahayewa.
ISA 24:9 Kwikamete me'utikwitɨ winuri mepɨka'ie, tarɨwekarixi wahetsiemieme winu patsiwiri.
ISA 24:10 Kiekari muyuxamurie 'unitɨ kaniyuhayewa, naitɨ kitenie pɨtiukaname.
ISA 24:11 Tsuari puxuawe kaye'utɨma winu mumawekɨ, naitɨ temawierika pukumawerixɨ, naitɨ temawierika kaniukumaweriyarieni.
ISA 24:12 Kiekari naitɨ kani'u'unini, 'itupariyari 'etsiyeyeutɨ kaneutimaneni.
ISA 24:13 Mɨpaɨ kwie hixɨapa katiniyɨmɨkɨ nuiwarite wahetsie, kepauka huriwu takariyari mɨka'inɨiwatsie karima kuweiwatɨ hepaɨ, kepauka muyuhayewaxɨ mutiwawiwa hepaɨ matɨari mɨka'inɨiwatsie 'anuyeyayu.
ISA 24:14 Muyuhayewaxɨ paniuka meta kanahiwani temawierikakɨ, tau makayuyuipiketsie pahiwa Yawé mɨmariwe hahɨawetɨ.
ISA 24:15 'Ayumieme, tau manatineikatsie, Yawé 'aixɨa xeketenekuxatani, Yawé kemɨtitewa, 'Ixaheri Kakaɨyarieya, haramara tetsita mɨtiuyehanetsie mɨpaɨ xekenaitɨkani.
ISA 24:16 Kwie manu'axetsie paitɨ kwikarieya tekani'enieka: «'Aixɨa mɨtiuka'iyari 'aixɨa ketikuxaxatsiwani». Ne matsi mɨpaɨ nepaine: «Ne xɨa'ui. Kukuinari nehetsie pɨye'a». Kemɨ'ane memɨteyukananaima mepɨteyukananaima, 'axamemɨte'u'iyari yamekateniyurieka kememɨteyurienikɨ.
ISA 24:17 Marika, mɨki teukiya meta winiyari mepɨxe'aye'unie, kwiepa xemɨtama.
ISA 24:18 Kemɨ'ane muyuta'una mɨkɨ hiwari makatɨ putsu 'emeukatewata kaneukawemɨkɨ, kemɨ'ane meukatewata muwatiyani winiyaritsie kaniyɨhɨamɨkɨ, katineuyepiekari muyuawitsie kitenie 'etsimayeyeutsie neniereme, meta kwie tsutɨmeyari kaniwatayuaneniri.
ISA 24:19 Kwie kaniutaxɨkeni, pɨkayuwiyamɨkɨ, kwie pukatsinetɨyeika, pukatarike, kwie putayuane yemekɨ waɨkawa putayuane.
ISA 24:20 Kwie pɨkitsariene tawekame hepaɨ, kɨyexi kiiyari hepaɨ kaniwatayuaneni. Waɨkawa pahete hetsiena 'axamɨti'ane mɨrexeiyakɨ, kanatiwemɨkɨ tawarita mɨka'anukukenikɨ.
ISA 24:21 'Iya tukaritsie Yawé katiniwakwinitɨamɨkɨ muyuawitsie tɨrɨkariya memexeiya meta kwiepa te'aitamete.
ISA 24:22 Xeime putsuta mekaneukaxɨriyakuni, pɨretsutsixi wahepaɨ katsariyanata memaye'u, 'arike mɨixa tukari 'anukayayu mekatenikwinitɨariekuni.
ISA 24:23 Metseri kaniyɨrimɨkɨ tau kaniyutitewiyamɨkɨ, 'ana Tsiyuni hɨriyaritsie, Kerutsareme hetsie, Yawé Naimekɨmɨtɨrɨkaɨye katinita'aitamɨkɨ, mana miemete 'ukirawetsixi mepixeiyani mariweme.
ISA 25:1 Yawé, 'ekɨ pepɨnekakaɨyari, 'aixɨa nepaineni kepemɨtitewakɨ meta nepɨmetsinɨawani mariweme pemɨtiyurienekɨ. Meripaitɨ kepemɨtiyɨhɨawixɨ mɨpaɨ pepɨtiyuriene heitseriemekɨ.
ISA 25:2 Kiekari, 'uniyari kwiniemieme netɨ 'uweme pepayeitɨa, kiekari 'aixɨa mɨreukukurarutɨarie pepanuti'unaxɨ. 'Ari 'ateewa kiekatari waparatsiyu kiekari pɨkahɨkɨ, tawariri pɨka'anukuketɨarieni.
ISA 25:3 'Ayumieme teɨteri metɨrɨkawitɨ 'aixɨa mepɨmatehahɨawe, nuiwarite 'axamemɨte'u'iyari wakiekari pɨmatsi'ayemakaxe.
ISA 25:4 'Ekɨtsɨ pemɨhɨkɨkɨ, kepauka memu'uximatɨariekatsie, tixaɨtɨ memɨkate'eriwa wa'inɨari, mɨreuyehɨwa hetsie nunuwame, wiyeri mɨtɨrɨkaɨye hepaɨtsita 'ewiweme hetsiemieme, 'etɨriya xɨri hepaɨtsita mieme, Matsi, 'axamemɨte'u'iyari wahɨtsierikayari wiyeri mɨtɨrɨkaɨye hepaɨ kani'aneni kuraru mɨtse'i maye'unie,
ISA 25:5 xɨri makumawetsie mieme hepaɨ kani'aneni. 'Ekɨ teewatari wayuariya kayuwatɨ pepɨkupitɨwa, xɨri haiwitɨri kemɨtixeriya hepaɨ, meta pepenukayunitɨa 'axamemɨte'u'iyari wakwikari.
ISA 25:6 Yawé Naimekɨmɨtɨrɨkaɨye, 'ikɨ hɨriyaritsie katinikuha'aritɨamɨkɨ yunaime teɨteri wahetsiemieme 'ikwai 'ixɨarariyari witsiti'aneneme ranapikame, winu xeiwiyari mexeiya 'ixɨarariyari, 'ikwaite 'aixɨa ti'anenekame meta winu 'aixɨa mɨ'ane xeiwiyari mexeiya.
ISA 25:7 'Ikɨ hɨriyaritsie kaneikutsanamɨkɨ 'ixuriki teɨteri yunaime muwareukunama, meta matakɨ nuiwarite yunaime muwakanama.
ISA 25:8 Mɨki mɨɨya kanikumaweriyamɨkɨ yuheyemekɨ, Yawé naimekɨmɨyɨwe yunaime teɨteri kaniwara'ukaipiexɨamɨkɨ, meta naitsarie kwiepa teɨterimama memɨkananaimariekakɨri katinikumaweriyamɨkɨ.
ISA 25:9 'Iya tukaritsie mɨpaɨ pɨtitaniukieni: «Huu, 'ikɨ pɨtakakaɨyari, hetsiena yuri tepɨte'erieka, mɨkɨ pɨtatsi'utawikweitsitɨa. 'Ikɨ pɨhɨkɨ Yawé, hetsiena yuri temɨte'erie, tepɨtatemamawieka tepuyutemamawieka wikweitsitɨarikayatsie».
ISA 25:10 Yawé tɨrɨkariyaya 'ikɨ hɨritsie puyuhayewa, peru Muhawi makumatsie pɨtaketsinarieni, 'ɨxa mɨtiketsinarɨwa hepaɨ muwatiketsinaruwatsie.
ISA 25:11 Mana yumamá pɨtatseraxɨani, tewi hauweme hepaɨ. Peru Yawé kememɨteyuti'ɨre kaniwanawairiemɨkɨ, meta ke'axamɨtiyurimɨkɨ yumamatekɨ.
ISA 25:12 Kanika'unamɨkɨ, kanetihɨamɨkɨ meta kaniwatayuitɨamɨkɨ 'akuraru 'amatitewa meta 'aixɨa mɨ'anene, kepaukake tumuanari mayani 'anake kanihayewamɨkɨ.
ISA 26:1 'Iya tukaritsie 'ikɨ kwikari pɨtakwikarieni Kura kwieyaritsie: «Kiekari tepexeiya tɨrɨkaɨyeme. Kuraru 'amatayewa hepaɨ, tahetsie nunuwame hepaɨ, Kakaɨyari yuwikweitsitɨarika pɨyetua.
ISA 26:2 'Itupari xekeneuyepi, meutahanikɨ nuiwari 'aixɨa mɨtiuka'iyari heitseriemekɨ yamɨtikamie.
ISA 26:3 'Aixɨa 'anemekɨ 'amuyeika pepipitɨani kayuwatɨ hexeiyatɨ 'amuyeikanikɨ, 'ahetsie yuri mɨti'eriekɨ.
ISA 26:4 Yawé hetsie yuri xeketene'erieka yuheyemekɨ, Yawé 'ai mɨhɨkɨkɨ yuheyemekɨ.
ISA 26:5 Mɨkɨ memeuka'u pɨwaratixɨrɨwa meta puwaka'una kiekari muyuta'ɨre: pika'una kwiepa petihɨpa, kanetihɨpani tumuanaripa heutenime kanayeitɨwani.
ISA 26:6 Memɨkatɨrɨkawi meta memɨnanaimarie mekaniwatiketsinani yuketakɨ».
ISA 26:7 Heitserie mexeiya huyeya makuweri kanihɨkɨtɨni. 'Ekɨ, heitseriemekɨ 'apemuyeika, huyeya 'akuwerime kenayeitɨirieka.
ISA 26:8 Yawé, huu, 'ahetsie tepɨta'ikwewa, petati'ɨkitɨakaku yatepɨtehetimamateke mɨpaɨ temɨte'u'uwanikɨ, kepemɨtitewa meta pemɨkahatɨtɨmaiyarɨwa mɨkɨ pɨhɨkɨ temeiyehɨwa tatukaritsie.
ISA 26:9 Tɨkarikɨ naime ne'iyarikɨ nepɨmatsi heuyehɨwa, ximeri ne'iyari pɨmatsi'utiwawa. Kepauka 'aixɨa pemɨtiyuriene kwiepa, kwiepa memɨtama mepɨtehetimamateke tita mɨtiheitserie.
ISA 26:10 Tsepa 'axamɨtiuka'iyari mɨnenimayatsie, pɨkaretimamateke tita mɨtiheitserie, 'aixɨa mɨti'ane mɨraxuawetsie 'axapɨtiyuriene pɨta, Yawé kemɨtimariwe pɨka'imate.
ISA 26:11 Yawé, 'amamá pepanukuhana, peru mɨkɨ mepɨka'ixeiya. 'Ateɨterima wahetsiemieme kepemɨti'ɨtetsa meke'ixeiya, 'ana meke'uyutitetewiya, taikɨ meke'utixɨtsitɨarieni memɨmetsi'aye'unie muwahetsiemieme.
ISA 26:12 Yawé, 'ekɨ kayuwatɨ pepɨxuawitɨa tahetsiemieme, 'ekɨtsɨ pekanihɨkɨtɨni yapemɨtiyuriene naime ta'uximayatsikakɨ.
ISA 26:13 Yawé, takakaɨyari, hipatɨ te'aitamete meripaitɨ mepɨtate'uta'aitɨa, peru 'ahetsiemieme xeikɨa 'aixɨa tepaitɨka.
ISA 26:14 'Ari mepukwi, tawariri mepɨka'anutaneniere, 'etɨri mepɨhɨkɨri, tawarita mepɨka'anuku'uni. 'Ekɨ 'uximatɨarika pepɨwarupitɨa meta pepɨwaruka'unaxɨ, yapepɨtiuyuri memɨkaha'eriwanikɨri.
ISA 26:15 Yawé, 'ekɨ nuiwari mariweme pepayeitɨa, mariweme pepa'ayeitɨa meta witsipe'anetɨ pepe'ayeitɨa, kwie hakewa meuye'atɨkatei tawarita 'apepitayeuritaxɨ.
ISA 26:16 Yawé, 'uximatɨarikatsata mepɨmatsi'utiwau, nenewierikɨ 'etsiwa xeikɨa me'eniɨriɨkɨtɨ kepauka 'ekɨ pemɨtiwaruka'enitsitɨatsie.
ISA 26:17 Yawé, tame 'ahɨxie tepu'axɨa kepauka 'uka mayehuka hepaɨ te'utiyuatɨ mutahiwa yu'ɨimɨranetɨ kukuiniyakɨ kepauka mɨtiniwerɨmenitsie.
ISA 26:18 Tekaneyexeiya, tekaniyuti'ɨimɨra, peru 'eka xeikɨa tekanayexeiya. Kwiepa wikweitsitɨarika tepɨka'atɨa, meta kwiepa memɨtama mepɨka'utinunuiwaxɨa.
ISA 26:19 Peru 'ahetsie metewiyatɨ memukwi mepanutaneniere, wa'umete tukari hexeiyatɨ payani. Xekenanutanenieri xekeneutihiwani temawierikakɨ, tumuanaripa xemɨkiekatari. Haɨtsi 'ahetsɨa mieme, haɨtsi ximeri mieme hepaɨ kani'aneni, kwie meta yumɨkite puwayetuani.
ISA 26:20 Neteɨterima nehetsɨa miemete, yukiita xekeneutahaxɨa xeheutahaxɨame xeketeneunama, yaxeketeneuteri xeyu'awietatɨ, haxɨa hanuyeyayuke.
ISA 26:21 Xekenayeneniereni, Yawé yukiita kaniwayeyeimɨkɨ 'axamemɨteyurie tiwakwinitɨanike kwiepa memɨtama. Kwie xuriya mutayeuriya kanihekɨatamɨkɨ, xuriya mana memutayeuri pɨkawa'awietaniri.
ISA 27:1 'Iya tukaritsie Yawé kuu Rewiyatahini mɨtitewa katinikwinitɨamɨkɨ, kwinimieme mɨrayu'unawe, kwinimieme mɨrakwinɨriwawe. Yu'ixiparakɨ mɨtiyumemiwakɨ, mɨmariwekɨ meta mɨtɨrɨkaɨyekɨ, kuu mɨmariwe kanimiemɨkɨ haramaratsie mɨyeyeika.
ISA 27:2 «'Iya tukaritsie kaxie nanari haraweriyari manayexeiyarie xekenenɨawani:
ISA 27:3 Ne, Yawé, 'ihɨweme nekanihɨkɨtɨni, tukarikɨ nekaxie nanayari yanekatinihatuiyani. Tukarikɨ tɨkarikɨ yanekatini'ɨwiyani nitixaɨtɨ 'axamɨkatiyurienikɨ.
ISA 27:4 Nepɨkaha'a. Xɨka 'ɨtsi meta xuya hexeiyani, ne nekanitamieweni meta naime nekaniutitaiyaweni,
ISA 27:5 xɨka mɨkɨ nemi'awietanikɨ yara'eriwanike nehamatɨa kayuwatɨ hexeiyatɨ 'ayuyeitɨani, huu, nehamatɨa kayuwatɨ hexeiyame ke'ayuyeitɨaka».
ISA 27:6 Tukari kanaye'amɨkɨ kepauka Kakuwu nanarieya manexɨani, kepauka 'Ixaheri mɨtayɨra meta mɨkaxutuni, kwiepa yu'ikwaxikɨ kanakɨnɨmɨkɨ.
ISA 27:7 Yawé pɨka'ikuwaxɨa kemɨ'ane memikuwayakai muwarukuwaxɨa hepaɨ. Pɨkawarukwi memɨteyumemiwa mutiwarukwi hepaɨ.
ISA 27:8 Kaniyuritɨni hetsiena kuyaxa kaniutixuawitɨani, kaneyeweiya yu'iiyakɨ 'eka 'iiyayari tau manatineika miemekɨ.
ISA 27:9 Mɨpaɨ Kakuwu 'axakemɨtiuyurikɨ pɨti'itiyarieni, mɨpaɨ xeikɨa katiniyɨmɨkɨ 'axakemɨtiuyuri mɨreuyehɨwiyarienikɨ: tetexi kakaɨyarixi memɨte'atimawiyarɨwa naitɨ tumuanari kehayani, tetexi mu'uniwe mɨtɨxieka hepaɨ, meta 'Atserá 'ɨkiyaya 'a'uwetɨ pɨkakuhayeikarɨwani meta mawari taiyame 'ɨkwa witsimu'ɨa nixewitɨ tɨma.
ISA 27:10 Kiekari 'aixɨa mɨreukukurarutɨarie panuka'unarie, mɨka'akukiepaya pɨhɨkɨ, makumawe muku'eiriwaxɨ hepaɨ. Muwa tsikeru kaneuta'ariwani, mana katiniutikwa'ani meta tupiriyate katinikwaka.
ISA 27:11 Kepauka mɨtiwauke, kɨyexiyari kanitimurikeni, hikɨ 'ukarawetsixi mekani'axeni kɨmana me'atinainike. 'Ikɨ teɨteri memɨkayɨkɨhɨawe mekanihɨkɨtɨni, 'ayumieme muwarutawewi pɨkawanenimaya, nitɨma pɨkawanenimaya kemɨ'ane mɨwarutawewi.
ISA 27:12 'Iya tukaritsie Yawé tɨriku pɨtiketsini 'Eupɨrate hayari manuye'anetsie paitɨ 'itsutɨame 'Ekipitu hayari manuyekatsie paitɨ ye'atɨkaime, xeme 'ixaheritsixi yuxexuitɨ xepeu'itsanariexɨani xemukuxeɨriyanikɨ.
ISA 27:13 'Iya tukaritsie kuxineta mariwetɨ kanitahɨtsieriemɨkɨ. Kemɨ'ane 'Atsiriya memehapanie meta kemɨ'ane 'Ekipitu memanutaxɨriya mekani'axɨakuni Yawé memayexeiyanikɨ hɨri mɨpatsietsie Kerutsareme.
ISA 28:1 Xɨa'ui memuyuti'ɨre wakuruna 'Epɨrahini kiekatari memɨtarɨwe, tutu mɨyɨna witsikemɨtiyuxexeiyakai, hɨri 'ayewerikaku 'aixɨa raye'anekaku muwe. Xɨa'ui winukɨ mematixɨri.
ISA 28:2 Neuxei, Ti'aitame xeime kanexeiyani tɨrɨkaɨyeme meta mariweme: Mɨkɨ kwiepa katinahɨamɨkɨ rananaimatɨ, tee mukaxɨrieni hepaɨ, 'eka mɨtiyuka'una hepaɨ, wiyeri mɨhaikɨrima hepaɨ, haa muwayeneni hepaɨ.
ISA 28:3 'Epɨrahini memɨtarɨwe wakuruna kɨmana memuyuti'ɨre, kanitaketsinariemɨkɨ.
ISA 28:4 Mɨkɨ tutu mɨyɨna witsikemɨtiyuxexeiyakai, hɨri 'ayewerikaku 'aixɨa raye'anekaku mɨyewe, mexɨakame xapa mukwaxi kanayeimɨkɨ katika'inɨiyawekaku 'akuxi: xewitɨ 'ixeiyame yapauka 'eka'inɨme, kanitakwaimɨkɨ.
ISA 28:5 'Iya tukaritsie Yawé Naimekɨmɨtɨrɨkaɨye kuruna witsimɨtiyuxexeiya kanihɨkɨtɨkamɨkɨ, patsaruxi mutixawatɨre keyupaɨmetɨ memuyuhayewa mehe'eriwatɨ wahetsiemieme.
ISA 28:6 Mɨkɨ 'iyari pupitɨani heitseriemekɨ yamɨtiyurienenikɨ kemɨ'ane mɨtita'aita, meta kuyaxi pɨwapitɨani memuyuwaɨriyanikɨ kiekaritsie mɨranutahakitɨretsie memɨtetahɨkakɨ.
ISA 28:7 Metatsiere mawari wewiwamete meta Kakaɨyari niukametemama, kaxie winuyarikɨ mepeukeitsarietɨweni, mepeukeitsarietɨwe winu waɨkawa mɨtɨrɨkaɨyekɨ winukɨ mepɨkaheta'eriwawe, winukɨ mepetiketamɨrike. Kepauka Kakaɨyari mɨtiwaxeitsitɨa mɨpaɨ mepɨkatekuxata, kepauka yamemaitɨka, meputirukuwa xeikɨa.
ISA 28:8 Puyuri, naitɨ wamexate pɨhayarimatɨka, hawaikɨ tɨma pɨkahanaka'itiyarie.
ISA 28:9 «¿Kemetemate kemɨ'ane mepɨteha'ɨkitɨa? ¿Kemɨ'ane niuki mepɨtehakuxaxatɨwa? ¿Tɨɨri metate'erie hekwamekɨke temutsitsinawaiyarie, hekwamekɨke tatsitsi temuku'eiri?
ISA 28:10 ¿Tɨɨri mɨixamexɨa mɨpaɨ memutiyuane: “a-b-c-d-e, a-e-i-o-u, 'etsiwa 'ena, 'etsiwa huma”?»
ISA 28:11 Matsitsɨ 'aixɨa kani'aneni, Kakaɨyari 'ikɨ yuteɨterima kaniwatahɨawimɨkɨ wayuriyatɨ yɨkɨ niuki 'anuyɨnemekɨ meka'i'eniekamekɨ,
ISA 28:12 mɨkɨ teɨteri mɨpaɨ mɨtiwarutahɨawekai: «'Ena 'uxipiya maxuawe kanihɨkɨtɨni, kemɨ'ane mu'uxe ke'uka'uxipieni», metatsiere mɨpaɨ mɨtiwarutahɨawixɨ: «'Ena 'uxipiya tukari kanihɨkɨtɨni». Matsi mepɨka'i'eni.
ISA 28:13 'Ayumieme Yawé niukieya wahetsiemieme kanayeimɨkɨta: «a-b-c-d-e, a-e-i-o-u, 'etsiwa 'ena, 'etsiwa humapaitɨ». Kepauka memɨyekɨne yukutama pɨta me'uhutɨ, memɨtekwinekɨ, winiyaritsie memeyuxɨrienikɨ meta putsuta memeukaxɨrienikɨ.
ISA 28:14 'Ayumieme, teɨteri xemɨte'aita xeyuti'ɨretɨ 'ikɨ kiekariyaritsie Kerutsareme, Yawé niukieya xekeneu'eni:
ISA 28:15 Xeme mɨpaɨ xemutiyuane: «Tɨratu tepuwewi mɨki hamatɨa, mɨki teukiyapa hamatɨa tɨratu tepuwewi. Kepauka 'uximatɨarika munuani, pɨkayɨwe mɨkatatsi'axekɨ, tame tita mɨti'itarika tahetsie nunuwame temayeitɨakɨ meta tita kwamanarika mɨtihɨkɨ tatsi'awiwietame».
ISA 28:16 'Ayumieme Yawé naimekɨmɨyɨwe mɨpaɨ paine: «Ne Tsiyunitsie tete nepayeni 'inɨatsiekame, tete 'uta'etsikiname witsi'aneme tenaritsie miemetɨme, kemɨ'ane hetsiena mɨtiwiyani 'aixɨa 'iyari puyeikani.
ISA 28:17 Tita 'aixɨa mɨti'ane ti'inɨnɨatame hepaɨ 'aneme 'anepɨtakeni, meta mɨtiheitserie hetsiemieme, tepɨa mahete hiru manawie. Tee, xehetsie nunuwame 'itarikakɨ mɨhɨkɨ kaneuyehɨamɨkɨ, meta haa hakewa xemeyu'awieta kanikayunitɨamɨkɨ.
ISA 28:18 Pɨhayewarieni tɨratu xemuwewi mɨki hamatɨa, 'atsikapɨtiyɨni tsepa mɨki teukiya hamatɨa xemɨte'utaxa. Kepauka 'uximatɨarika tiyumemiwame 'umamie, mɨkɨ kanixetipɨnamɨkɨ.
ISA 28:19 Kepauka manuyeyeikani, pɨxehehapanani, ximeri yapɨranuyeyeikani, tukarikɨ meta tɨkarikɨ». Kepauka xemeitimani 'ikɨ niuki yemekɨ xekanitimamakuni.
ISA 28:20 'Utá 'etsipɨtɨtɨ hetsiena muta'ɨtserita pɨkayɨwe, 'ixuriki 'etsipɨyewa kɨmana muyuta'eima pɨkayɨwe.
ISA 28:21 Kaniyuritɨni, Yawé kananukukemɨkɨ Peratsini hɨriyaritsie hepaɨ, Kemɨtiukuyua Kawahuni mayeweritsie hepaɨ, yu'uximayatsika 'aye'atɨanike xewitɨ mɨka'imaiwe, yu'aitɨarika maye'atɨanikɨ.
ISA 28:22 'Ayumieme hikɨ, xeketeneuhayewa xeteyukananaimatɨ, kapa matsi kwinimieme tepɨa kaunariyarikɨ xeyutihɨani, Ti'aitame mɨpaɨ mɨnetiutaxatɨakɨ, Yawé Naimekɨmɨtɨrɨkaɨye, 'ikɨ kexemɨteheuyehɨiyani hepaɨtsita kemɨtiuxatsie 'ikɨ kwieyari naime hepaɨtsita.
ISA 28:23 Xekeneu'enana, neniuki xekeneu'eni, kayuwatɨ xekeneu'enana, neniuki xekeneu'eni:
ISA 28:24 Kepauka ti'uximayatame mukwietsanane ka'enike, ¿ka'uxipietɨ tiyuriene? ¿Tukarikɨ kwietsananetɨ meta rakuxexeɨriwatɨ raka'iyuniwa?
ISA 28:25 Kepauka kwie 'aixɨa makuyurieni, 'imɨari witsima'ane meta kuminutsi kanika'emɨkɨ. Tɨriku kaniuka'etsani xuruku tiwewieme, tsewara hakewa maka'etsiwatsie, meta manunenieretsie 'iku kanika'emɨkɨ.
ISA 28:26 Kakaɨyari kanihɨkɨtɨni kemɨ'ane mɨtikuxaxatɨwa mɨti'ɨkitɨa kehepaɨ mɨtiyurienikɨ.
ISA 28:27 'Imɨari witsima'ane manuxɨtetɨkakɨ pɨkakaweiwa, meta kuminutsi hetsie kaxeta 'ɨkaya pɨka'uyeyeika, matsi witsimu'ɨa tuturiyari kɨye 'etsipemekɨ kaniweiwani, meta kuminutsi kɨye 'apamekɨ.
ISA 28:28 'Uriyari kanitiketsinarɨwani, peru waɨkawa pɨkaketsinarɨwa, meta ka'uxipietɨ pɨtiketsinarɨwa. Hetsiena kaxeta 'ɨkaya kaniuyehanietɨyeikani, peru kawayutsixi mepɨka'itɨxiwawe.
ISA 28:29 'Ikɨtsiere Yawé Naimekɨmɨtɨrɨkaɨye hetsie katinayeneikani, kanimariweni yu'ɨxatsikɨ meta waɨkawa katinimaika.
ISA 29:1 Xɨa'ui, 'Ariheri, 'Ariheri, kiekari hakewa Rawiri metayatsie. Tawarita xeiwiyari xekenanutiyetsa meta tawarita xeiwiyari, 'ixɨarari tukariyari yakereuyuweiyani.
ISA 29:2 Peru 'Ariheri hetsɨa nekaninuamɨkɨ nemɨtika'enitsitɨanikɨ, tsuari kanitixuawerimɨkɨ meta hiwerika, nehetsiemieme tɨɨ yayatsame pɨhɨkɨtɨni mawari matitaiyarɨwatsie.
ISA 29:3 'A'aurie nekanitayerɨmɨkɨ nemetsitamienieke, kɨyexikɨ nekamanakurarutɨiyatɨyeimɨkɨ, 'akurarutsie temeukatsunaxɨani tekanitiwewiekuni.
ISA 29:4 Nitixaɨtɨ pekatihɨkɨtɨtɨ, kwiepa pe'ukaitɨ pekanitahiwamɨkɨ, tumuanaripa 'aniuki waɨriyarika xeikɨa kani'eniɨriɨkɨkamɨkɨ. 'Aniuki kwieta kanatinemɨkɨ tiyumariutame niukieya hepaɨ, 'aniuki tumuanari tsatapaitɨ, waɨriyarika kaniyu'eniɨriɨkɨkamɨkɨ.
ISA 29:5 Peru memɨyumɨire memɨmetsi'aye'unie kwie waɨkawa mutumuani mekanakɨnikuni, meta yumɨiretɨ memɨkateyukanenimaya kuxari mekanakɨnikuni 'eka mei'enitsitɨwa. Yapauka, kwitɨwa,
ISA 29:6 Yawé Naimekɨmɨtɨrɨkaɨye 'ahetsɨa kaninuamɨkɨ, mimierɨkarikɨ kaninuamɨkɨ, kwie watayuitɨwatɨ, meta waɨkawa tɨranari xuawitɨatɨ, kaninuamɨkɨ haikɨri 'amɨpa mɨtɨrɨkɨye 'ayu'eriyame hamatɨa meta tai tiyutaiyame hamatɨa.
ISA 29:7 Memɨyɨmɨire nuiwarite 'Ariheri memɨmietɨwe, yunaitɨ kemɨ'ane memimietɨwe meta titatsie mɨtiyutɨrɨkariya, kemɨ'ane memenutinama, heinɨtsi hepaɨ mekaniyɨkuni, heiwa yɨwikɨta mɨtiuniere hepaɨ.
ISA 29:8 Haakamɨkame rekwatɨ mɨtiyuheinɨtsa hepaɨ, peru manutanieretsie reuhaakamɨkɨni, harimɨkame heharetɨ mɨtiyuheinɨtsa hepaɨ, matsi manutanieretsie ranatiwakini. Nuiwarite mɨpaɨ mekaniyɨkuni yunaitɨ memɨyuwaɨkawa Tsiyuni hɨriyari memɨmietɨwe.
ISA 29:9 'Atsixekatemaitɨ xekenakɨni, xemamatɨ xekaniuwawetɨ xekeneti'uti, xekaheunenieretɨ xekenakɨni, tixaɨtɨ tɨma xekatexeiyatɨ, xekenetarɨweka, peru winukɨ hawaikɨ, xekenekeitsarietɨweni, peru winukɨ hawaikɨ.
ISA 29:10 Yawé xehetsie kanikawiwieni 'iyari waɨkawa xemeukutsukɨ, Kakaɨyari niukametemama mekaneniereme puwarayeitɨa, Kakaɨyari hetsie timiemekɨ memɨtaneniere wahɨxie pɨwareutinaxɨa.
ISA 29:11 Xehetsiemieme, naitɨ 'ikɨ kexemɨteneniere xekanixeiyani xeikɨa nawi kwikwiekametsie 'anukanakame. Xɨka mɨkɨ mukwikwiya xeime xeyetuirieni mɨreutaterɨwawe, mɨpaɨ xɨka xete'itahɨawe: «Pamɨpariyutsi xɨa'ui, 'ikɨ kenakaterɨwa», mɨkɨ mɨpaɨ kanitayɨmɨkɨ: «Nepɨkayɨwe, kananukanaka».
ISA 29:12 Xɨka xeimeta mɨkɨ mukwikwiya xeyetuirieni mɨkatiterɨwawe, xɨka mɨpaɨ xete'itahɨawe: «Pamɨpariyutsi xɨa, 'ikɨ kenakaterɨwa», mɨkɨ mɨpaɨ kanitayɨmɨkɨ: «Matsi nepɨkatiterɨwawe».
ISA 29:13 Ti'aitame mɨpaɨ kanaineni: «'Ikɨ teɨteri mepɨnetsinɨawa yutenikɨ meta 'aixɨa mepɨnetehahɨawe, peru wa'iyari 'ateewa puyeika. Memɨnetsihayexeiya 'aitsikakɨ xeikɨa mekaniyɨaka teɨteri yametewa'aitɨakaku.
ISA 29:14 'Ayumieme, tawarita 'ikɨ teɨteri nekaniwahɨxiyatsitɨamɨkɨ mariwemekɨ netiyurienetɨ, temaiwawemete kememɨtemaiwawe mekaneiyehɨakuni kememɨteheutamaiwawekai metematetɨri mepɨka'akɨne».
ISA 29:15 Xɨa'ui kemɨ'ane, kememɨteyuriku me'awietakutɨ, Yawé hɨxie memuyu'awieta meukatetewatsie, 'axamepɨteyurie yɨwikɨta, meta mɨpaɨ mepɨteku'eriwa: «¿Kemɨ'ane kuta pɨtatsixeiya? ¿Kemɨ'ane pɨtatsimate?»
ISA 29:16 Keri titayari mɨya meteyɨa. ¿Kamɨtsɨ 'iwewame haxu hamatɨa yaxeikɨa mete'anene? ¿Kamɨtsɨ mutawewiya kemɨ'ane mitawewi mɨpaɨ titahɨawe: «Mɨkɨ pɨkanetsi'utawewi»? ¿Kamɨtsɨ xari yu'iwewame mɨpaɨ tiutahɨawiwe: «Mɨkɨ 'atsipɨkatimate»?
ISA 29:17 Riwanu kwitɨwa kwie 'aixɨa mɨ'ane mɨraku'etsitɨre kanayeimɨkɨ, meta mɨraku'etsitɨrekaitsie makukariuxaya kanayeimɨkɨ.
ISA 29:18 'Iya tukaritsie memɨkaheu'enana mepɨyɨwaweni nawi kwikwiyaritsie terɨwarika mayemie memɨ'enienikɨ, meta memɨkaheuneniere wahɨxite pɨneniereni muyɨwitsie meta 'etɨriyaritsie me'u'uwatɨ.
ISA 29:19 Tixaɨtɨ memɨkateheuxeiya meyutemamawietɨ Yawé hetsiemieme mekanakɨnikuni, yemekɨ waɨkawa memɨteheuyehɨwa mekaniyukatemamawikuni Mɨpatsie 'Ixaheri hetsiemieme.
ISA 29:20 Memɨteyukananaima mepɨka'u'uwaniri, memɨteyukatawe'erie mekanikumawerikuni, Meta yunaitɨ kemɨ'ane memɨkakutsu 'axameteyurietɨ mekaneuyehɨiyakuni.
ISA 29:21 Kemɨ'ane niukikɨ xeime hetsie mɨtiɨhɨpa, kemɨ'ane tixanetɨariwame memɨwiniya, meta 'itarikakɨ 'aixɨa mɨtiuyeika memɨnanaima.
ISA 29:22 'Ayumieme, Yawé, 'Apɨrahami hetsie nunuwame, mɨpaɨ katiniwarahɨaweni Kakuwu nuiwarimama: «Kakuwu pɨkayutewiyaniri, meta yuhɨxie pɨka'ayexetare.
ISA 29:23 Kepauka mɨkɨ yuniwema muwaxeiya, meta neti'uximayakame mɨkɨ watsata, mɨkɨ yunaitɨ nepatsiekame mepayeitɨaka kenemɨtitewa, patsiekame mepayeitɨaka Kakuwu hetsie Mɨpatsie, meta 'Ixaheri Kakaɨyarieya mepayemakaxeni.
ISA 29:24 Kemɨ'ane 'iyari heuyexɨriekame memexeiyakai yamepɨtehetimani, meta 'axamemɨteniniukikai yamepɨtetanaki'erieni memɨta'ɨxatsitɨarienikɨ».
ISA 30:1 Yawé mɨpaɨ kaniutayɨni: «Xɨa'ui tɨɨri memɨkaheu'enana kememɨteyurienikɨ memɨtekuxata nehetsɨa mɨkatimiemekɨ, ne'iyari kemɨkatinake memɨtekuxata, 'axamɨti'ane waɨkawa memukuxeɨrie,
ISA 30:2 mekanetsi 'uta'iwawiyatɨ 'Ekipitu memeukakɨka, Parahuni hetsɨa memekɨka wahetsie munuakakɨ, meta 'Ekipitu 'etɨriyayatɨa memuyu'awieta.
ISA 30:3 Parahuni xehetsie munua xetewiyarika payani. 'Ekipitu hetɨa xemɨ'etɨpie, tixaɨtɨ xetehɨkɨtɨme pɨkaxe'ayeitɨani.
ISA 30:4 Tsepa Tsuhani xemɨwarexeiya paratsiyuta te'uximayatamete, yatɨni tsepa Kanetsi paitɨ xenɨ'arima memɨte'u'axɨa,
ISA 30:5 yunaitɨ mepɨtewiyatsitɨarieni, mɨkɨ teɨteri tixaɨtɨ memɨkateyunaki'erie ya'aneme meheutiwiwiexɨaku, nitixaɨtɨkɨ memɨkatewaparewie meta memɨkawareuyehɨwa, tewiyarika xeikɨa meta 'atsimepɨkatematé kememɨteyurienikɨ».
ISA 30:6 'Ikɨ kanihɨkɨtɨni kenemutayɨ tewaxi wahepaɨtsita Nekexi makumawetsie memuyekɨka: Kwiepa kweriwa'anekɨa 'uximatɨarika tsata, mayetsi mexuawekaku, kuuterixi mexuawekaku meta kuuterixi memawɨwawe, mɨkɨ mekatenetɨni puxuri wahetsie nuiwari tixaɨtɨkɨ memɨkateyunaki'erie mana tita waɨkawa memɨtehexeiyakai, tita waɨkawa mɨraye'atɨka memɨtehexeiyakai kameyutsixi wahetsie mekatene'ikata.
ISA 30:7 'Ekipitu parewiyaya nitixaɨtɨ pɨkatihɨkɨ, 'ayumieme mɨpaɨ nepɨtiterɨwa: «Xahawi, mɨkakuyuane».
ISA 30:8 Kamɨtsɨ, mɨkɨ wahɨxie kenemie, meta mexatsie ketina'utɨa. Nawi kwikwiekametsie kenaka'utɨa, 'uxa'atɨni warie yamɨre'ukakɨ kemɨtiɨyɨ yuheyemekɨ.
ISA 30:9 'Ikɨ teɨteri memɨkaheu'enana memɨhɨkɨkɨ 'ayumieme, tɨɨri memɨteyukwamana mekanihɨkɨtɨni, tɨɨri Yawé 'ɨnɨari niukiyari memɨka'eniku.
ISA 30:10 Memɨtaneniere Kakaɨyari hetsie timiemekɨ, mɨpaɨ mekateniwakɨhɨaweni: «Kexemɨtetanenierekɨ xeketeneuhayewa», meta Kakaɨyari niukametemama mɨpaɨ mekateniwakɨhɨaweni: «Tawariri tita yuri mɨraine xepɨkatatekuxaxatɨwani. Witsimɨranuyɨtɨka pɨta xeketatenekuxaxatɨwani, xeketenekuxatani witsiketemɨteku'eriwa.
ISA 30:11 Huye xekeneuku'eiri, mɨkɨ huye xekeneuhayewa, xeketaneuhayewa Mɨpatsie 'Ixaheri hetsiemieme kemɨtatsiyurieneni».
ISA 30:12 Mɨpaɨ kanaineni 'Ixaheri hetsie Mɨpatsie: «Xeme 'ikɨ niuki xepɨkahanu'eni, 'uximatɨarikatsie pɨta yuri xepɨte'uta'eri meta 'axamɨti'anetsie, mɨkɨtsie pɨta xepuyutɨrɨkariya.
ISA 30:13 'Ayumieme 'axakexemɨte'uyuri xehɨxie pɨtakeni kuraru 'amatitewa hepaɨ meta 'ukatsitsinitɨ, hatiweximetɨ: hikɨ, yapauka, kanatiwemɨkɨ.
ISA 30:14 'Axakexemɨye'uyuri 'etsipepetɨ kanayeimɨkɨ, 'etsipepetɨ, xari mutatare hepaɨ: nixewitɨ tɨma 'etsiyeutɨ tiyunaki'erietɨ pɨkayuhayewa, kɨmana tɨɨ taipa manayetɨkɨ pɨkayɨweni meta putsuta haa muwatihana».
ISA 30:15 'Ayumieme mɨpaɨ kanaineni Yawé naimekɨmɨyɨwe, 'Ixaheri hetsie Mɨpatsie: «Xɨka xete'uhayewa meta kayuwatɨ xehexeiyatɨ xe'akɨne, xekanitawikweitsitɨariekuni, 'aixɨa 'iyari xe'u'uwatɨ meta yuri xete'erietɨ xekanitɨrɨkariyariekuni, peru xeme mɨpaɨ xemɨtehetimani xepɨkayuwaɨriya.
ISA 30:16 Xepɨkayɨne mɨpaɨ xeputiyuane: “Tekaniyuta'unakuni kawayutsixi wahetsie te'utetɨ”. 'Ayumieme, mɨpaɨ xekateniyuta'unakuni. Mɨpaɨ xekaniutiyuaneni: “Kawayutsixi memanautsawawetsie tekananutiyaxikuni”. 'Ayumieme, kwinimieme mehayɨwawetɨ mepayenexɨani memɨwaraye'unie.
ISA 30:17 Yuxewitɨ xekwinekaku, xeimiriyari xeme xekaniyuta'unakuni, yu'auxɨwitɨ mexekwitɨwekaku, xeme yunaitɨ xekaniyuta'unakuni. Xekaniku'eiriwakuni hɨritsie kɨye patera manuyewiwierekai hepaɨ yemuritsie patera 'inɨari hepaɨ».
ISA 30:18 'Ayumieme Yawé kanixekwewieka, mɨxeparewienikɨ, 'ayumieme kanixehahɨaweni kemɨtixenenimaya xemeitimanikɨ. Yawé Kakaɨyari heitserie mɨtiyurienekɨ. 'Aixɨa meke'itɨarieka kemɨ'ane hetsiena timieme memɨtetakwewie.
ISA 30:19 Teɨteri Tsiyunitari, Kerutsareme xemɨtama, tawariri xepɨkatitsuani. Kakaɨyari mɨtiyukanenimaya pɨxetinenimayata kepauka xemitahiwieni parewiya xeku'iwawatɨ. Yapauka kepauka mɨxe'enieni, pɨxeta'eiya.
ISA 30:20 Tsepa ti'aitame paa mɨxe'umi xemaye'uniwanikɨ meta haa xemu'uximatɨariekakɨ, xeti'ɨkitɨwame tawariri pɨkayuti'awieta, yuhɨxitekɨ xepixeiya.
ISA 30:21 Tsepa tatserieta pemeukuyunixɨ yatsepa ta'utata, 'anakata mɨpaɨ pepɨti'ena niuki mɨpaɨ matikɨhɨaweme: «'Ikɨ mɨkɨ huye kanihɨkɨtɨni, keneuweiyani».
ISA 30:22 Hikɨ memɨkakakaɨyarixi pemɨwarexeiya mekapatsiekame pekaniwarayeitɨamɨkɨ pɨratakɨ meta hurukɨ memɨkawiriyarietɨka, pekaniwarexɨrimɨkɨ tixaɨtɨ mɨkati'itiyaka hepaɨ, mɨpaɨ pekatiniwatahɨawimɨkɨ: «Xekenanuyekɨni».
ISA 30:23 Yawé wiyeri pɨxehanɨ'airieni 'imɨari xemɨka'eni hetsiemieme, meta 'ikwaxi waɨkawa mɨtitixuawere witsipa'aneni. 'Iya tukaritsie xetewama 'ɨxa 'eyeyeumetsie mepɨtetikwani.
ISA 30:24 Tuurutsixi meta puxuri memɨte'uximaya 'aixɨa 'aneneme mume 'etsime mekanitikwaikuni, nakitsaraɨkɨ meta parakɨ teikɨ mewiwiya.
ISA 30:25 'Imieri tukariyari maye'anitsie, kepauka tuxiyu makainariexɨani, 'ana 'akitsie haa 'uhapanetɨ kanayeimɨkɨ meta haixa kanitixuawerimɨkɨ naitsarie hɨritsie 'amutɨtɨtsie.
ISA 30:26 Kepauka Yawé yuteɨterima wa'umete manaku'eimaxɨanitsie meta muwa'uayemanitsie mɨtiwarukwinitɨakai, 'ana metsa tau hepaɨ tixawatɨtɨ kanayeimɨkɨ, meta tau xawatɨriyaya 'atahutamexɨa tawarita xawatɨtɨ kanayeimɨkɨ, tau 'axeikɨa 'atahutatɨ mɨkɨxeni hepaɨ.
ISA 30:27 Neuxei. Yawé kemɨtitewa 'ateewa kanamieni, haxɨakɨ tatɨ waɨkawa kɨtsi 'anawietɨ, tenieyatsie pɨhɨpɨne haxɨa, nenieya tai mɨtiyuxɨtsitɨwa hepaɨ pɨ'ane.
ISA 30:28 'Iyaya haa manatiyeurieni hepaɨ kani'aneni takɨipitɨa paitɨ pɨye'axe, nuiwarite kaniwaranuyekatsimɨkɨ katsemetsie wareuyehɨanike. Teɨteri wateta kaniwarutakeitsitɨani pirenu yeuta memeukuyunekɨ.
ISA 30:29 Xeme xeputikwikani patsiekamekɨ memuyukuxexeɨriwa tɨkariyaritsie hepaɨ, xe'iyarite puyutemamawieka, kepauka xewitɨ manutiyani pirikɨxa 'uhɨtsieximetɨ hepaɨ Yawé hɨrieyatsie, 'Ixaheri 'Aiya hetsie.
ISA 30:30 Yawé katani'enitɨamɨkɨ yuniuki mɨmariwe, yutɨrɨkariya tahɨxie kanikatetɨamɨkɨ: haxɨaya mutarɨrɨrɨka meta taiya mɨtiyuxɨxɨtsitɨwa, haa tsata, 'eka tsata meta tee tsata.
ISA 30:31 Yawé niukieya 'Atsiriya kanitimuraxɨamɨkɨ, yu'itsɨkɨ kaniwamɨkɨ.
ISA 30:32 Xei'iwaɨyɨyarikɨ Yawé hetsiena kemɨranutatetɨwa yukɨye 'iwaɨyɨpame mɨtiyukwinitɨwakɨ tepu meta haripa hayuanekaku katiniyurimɨkɨ, yumamá 'uyuitɨwatɨ, kaniwatakwimɨkɨ.
ISA 30:33 Tupeti meripaitɨri kaniyukuha'aritɨani, ti'aitame hetsiemieme kanihɨkɨtɨni. Teeka kaniwati'inierieni heukatewatɨ 'awatiyeutɨ, waɨkawa tai meta kɨyexi hexeiyame, Yawé 'ihɨtsieyu kanitaimɨkɨ, tai hayari hatɨa muhaneni hepaɨ.
ISA 31:1 Xɨa'ui kemɨ'ane 'Ekipitu memekɨka parewiya mekuwautɨwetɨ, meta kemɨ'ane kawayutsixi wahetsie memuyukuparewie, kemɨ'ane kaxetate kuyaxa miemetetsie memuyukuparewie meta memanutiyaxike wahetsie, peru Mɨpatsie 'Ixaheri hetsiemieme memɨkaha'eriwa, meta Yawé memɨkakuwautɨwe.
ISA 31:2 Yawé, matsi mɨtimaiwe kanihɨkɨtɨni, kwiniya kani'atɨamɨkɨ, meta kemɨtayɨni yakatinikamieni. 'Axamemɨte'u'iyari kaniwa'uximatɨamɨkɨ, meta kemɨ'ane memɨwaparewie.
ISA 31:3 'Ekipitutari, matsi, mepɨteɨteri, mepɨkakakaɨyarixi, wakawayutsixi mepɨwaite, 'iyarite mepɨkahɨkɨ. Kepauka Yawé mɨtiwakwinitɨani, kemɨ'ane parewiya mɨyetua kanekawemɨkɨ, meta kemɨ'ane memuparewiya kanatiwemɨkɨ. Yunaitɨ mekanikwikuni.
ISA 31:4 Mɨpaɨtsɨ Yawé kanetinahɨaweni: «Maye muyutahaxɨatɨwa yu'ikwai hetsie nuatɨ, kepauka hepaɨtsitana memuyukuxeɨrieni yunaitɨ muxatsi wahɨwemete, maye temaikɨ hepaɨ wahiwarikɨ mɨka'utimamawe meta kayuwatɨ mɨkatiukieka wayuarikakɨ, mɨpaɨta Yawé Naimekɨmɨtɨrɨkaɨye katininuamɨkɨ watakwinike, Tsiyuni hɨriyaritsie, 'amanutitewitsie.
ISA 31:5 Memawɨwawe yu'itua kememɨte'ɨwiya, mɨpaɨta Yawé Naimekɨmɨtɨrɨkaɨye Kerutsareme pɨtita'ɨwiya, pi'awietani meta piparewieka, hetsiena punuaka meta pitawikweitsitɨwani».
ISA 31:6 Xeme 'ixaheritsixi, xekeneu'axɨa 'iya hetsɨa kemɨ'ane xe'aye'unietɨ xemakɨ waɨkawamekɨ.
ISA 31:7 Karikɨ 'iya tukaritsie xeme yuxexuitɨ xepɨwarexɨrieni yukakaɨyarixi memɨwewiyatɨka pɨratakɨ meta hurukɨ mɨkɨ xemamate 'axamɨtiyuruwame mɨwarutiwewiekaikɨ.
ISA 31:8 «'Atsiriya 'ixiparakɨ kanimieriemɨkɨ, peru tewi pɨka'imieni, 'ixipara kanikumaweriyamɨkɨ, peru tewi 'ixiparaya pɨkatixaɨ. Kaniyuta'unamɨkɨ 'ixipara makatɨ, meta temarimama mekatenita'aitɨariekuni waɨriyarika mepitɨarietɨ.
ISA 31:9 Marikakɨ memɨwayuti'awiwieta kanita'unimɨkɨ, memanuyetei yupatera mekaniku'eirikuni». Yawé mɨpaɨ kanaineni, yutai Tsiyunitsie mexeiya, meta yuhuxunu Kerutsaremetsie mexeiya.
ISA 32:1 Neuxei, xewitɨ ti'aitame heitseriemekɨ katinita'aitamɨkɨ meta kuwexinaruritsixi 'aixɨa 'anemekɨ mekatenita'uximayatakuni.
ISA 32:2 Yuxexuitɨ mɨkɨ 'eka hepaɨtsita memuyu'awietani hepaɨ mekani'anekuni, wiyeri mɨ'ekama mɨkawakema, haa 'akite 'utɨma muhapaneni hepaɨ makumawetsie, 'ai 'etɨriyari mekanihɨkɨtɨkakuni makumawetsie.
ISA 32:3 Kemɨ'ane memeuneniereni 'aixɨa mepɨteneniereni, memeu'enana mepuku'enakareni.
ISA 32:4 Mekaheitimaitɨkɨkatɨ memutiniuka mepeitimaitɨkɨkani meta mepeti'enatɨkɨkani, memɨnenurietɨka 'aixɨa mepɨte'uxaxatani.
ISA 32:5 Tewi 'aixɨa mɨtiuka'iyariri pɨkatiuterɨwarɨwani mɨka'uka'iyari meta mɨtiuyuka'irɨwiya heitserie pɨkaxeiyarieka.
ISA 32:6 Mɨka'uka'iyari tixaɨtɨ mɨkatiyunaki'eriekɨ katinikuxatani, 'axamɨti'ane xeikɨa katiniku'eriwani, 'inɨari niukiyaritsie yapɨkatikamie meta Yawé hepaɨtsita 'itarikakɨ katinikuxatani, meuhaakamɨkɨ heuhakamɨkɨme kanikuhayeikawani, meta kemɨ'ane meuharimɨkɨ pɨkakuharitɨwa.
ISA 32:7 Mɨtiyukwamana katinikuwauneni kemɨtiwakwamanakɨ, meta yakatinikuxatani kehepaɨ mɨtiwananaimanikɨ, tixaɨtɨ memɨkatehexeiya kaniwaka'unani 'itarikakɨ, tsepanetɨ tixaɨtɨ mɨkarexeiya mɨtixanetane.
ISA 32:8 Matsi, tewi 'aixɨa mɨtiuka'iyari, 'aixɨa mɨti'anekɨ kaniyɨhɨaweni, meta ke'aixɨa mɨtiyuriene mɨkɨtsie kanimatsiɨkɨni.
ISA 32:9 'Ukarawetsixi nitixaɨtɨkɨ xemɨkateyɨhɨawe, xekenanuku'uti meta xekeneneu'eni. 'Ukari kename 'atsikatixeyurieni xemɨteku'eriwa, xekeneneu'eni kenemɨtixetahɨawe.
ISA 32:10 Xeme, 'atsikatixeyurienike xemuyu'erie, xeiwiyari 'anuyeyayu matsi xekanitiyɨyɨakakuni marikakɨ, karikɨ kaxie pɨkatixuawere, pɨkatika'inɨiyani.
ISA 32:11 'Ukarawetsixi xemɨkayu'iyaritɨa, xekenemamaka. Xeme, 'aixɨa 'iyari xemu'uwa, xekeneuyɨyɨakatɨkani. Xekeneuyutikemaripi, xekeneuyutimaweripi, hiwerika kamixayari pɨta xekenanakatɨki.
ISA 32:12 Yutawitsie xekeneuyuhutsunani, kwie 'aixɨa mɨ'anene xemaka'etsa hetsiemieme, kaxie 'aixɨa mutiukaxuxuawere hetsiemieme,
ISA 32:13 kwie hetsiena neteɨterima memu'uwa hetsiemieme xuya xuawekaku meta 'ɨtsi, naitsarie kiita hakewa temawierika mexuawe meta 'ikɨ kiekari temawierika mexeiya hetsiemieme.
ISA 32:14 Paratsiyu kaniku'eiriwamɨkɨ meta kiekari teɨteri yuwaɨkawa memimatekai, yuheyemekɨ terɨ xeikɨa kanakɨnikuni kiekari 'aixɨa mɨ'anene meta tuxiyute, puxuri tiwa'iyari kanayeimɨkɨ, 'ɨxa mɨtineni muxatsi wahetsiemieme kanayeimɨkɨ,
ISA 32:15 kepaukake taheima paitɨ 'Iyari temakanɨ'airiyarieni tahetsie mɨtinakenikɨ. Hikɨ makumawetsie kwie 'aixɨa mɨ'ane mɨraka'etsitɨre kanayeimɨkɨ, meta kwie 'aixɨa mɨ'ane mɨraka'etsitɨre 'uhukuyatɨ kanayeimɨkɨ.
ISA 32:16 Tita mɨtiheitserie makumawetsie kaniuyeikamɨkɨ, meta kwie 'aixɨa mɨ'ane mɨraka'etsitɨretsie tita mɨtiheitserie mana kaniuyeikamɨkɨ.
ISA 32:17 Tita mɨtiheitserie kayuwatɨ mexeiyanikɨ mɨ'ayumieme kanayehɨamɨkɨ, 'aixɨa 'iyari temu'uwanikɨ 'ikwaxiyari kanayehɨamɨkɨ.
ISA 32:18 Neteɨterima kayuwatɨ 'umakaku mekaniu'uwakuni, kiite 'aixɨa 'anenemeta, witsitiu'anekaku mepu'uxipieka.
ISA 32:19 Tsepanetɨ tee waɨkawa huku mukatuaxixɨ meta tsepa kiekari 'akuweritɨ mayeitɨarie,
ISA 32:20 'aixɨa xeke'itɨarieka xeme, xemuka'etsa haatetsita, meta tuuru puxu hamatɨa xemɨwarutatuaya.
ISA 33:1 Xɨa'ui 'ekɨ, pemɨtiyuka'uname, 'akuxi pemɨkaka'unariewe. Xɨa'ui 'ekɨ, pemɨtiyukananaima, 'akuxi pemɨkananaimariewe. Kepauka 'ari pemɨtiyuka'una, 'ekɨta pepɨka'unarieni, kepauka pemɨtiyunanaimani, 'ekɨta pepɨnanaimarieni.
ISA 33:2 Yawé, tame ketanenenimayaka, 'ahetsiemieme temɨta'ikwewakɨ. Tsiepɨre ximeri tahetsie nunuwame kenehɨkɨtɨni, meta tawikweitsitɨwame kepauka temu'uximatɨarie.
ISA 33:3 'Aniuki mutarɨrɨrɨka me'enietɨ, teɨteri mekanitakɨkani, kepauka pemanukukiekatsie, nuiwarite kwiepa memɨtama mekanitananautsani.
ISA 33:4 Xepiinite xepɨtenawaiyarietɨwe wa'atɨ 'utsikari waxa mepɨtekwa'a mepɨteyurie, wahetsɨa mepɨ'axe memɨwaraye'unie 'utsikari kwinie memɨyenexime wahepaɨ.
ISA 33:5 'Aixɨa pɨrahɨawarɨwa Yawé meutitewatsie muyeika Tsiyunitsie 'aixɨa pɨtiyuriene kemɨtiheitserie.
ISA 33:6 Mɨkɨ pɨhɨkɨtɨni 'aixɨa 'iyari pemuyeikanikɨ, waɨkawa wikweitsitɨarika pɨmatsimini, meta pemɨtimaiwenikɨ meta pemɨtimaikakɨ, xɨka Yawé pemakaka mɨkɨ waɨkawa mɨraye'axe pɨhɨkɨtɨni 'ahetsiemieme.
ISA 33:7 Xekeniwaruxeiya kememɨte'uhiwa kuyaxi memɨka'ukamama kaye 'utɨma, nɨ'ariekate kayuwatɨ mumakakɨ memɨtekuxata meputitsuana kwi meyuhiwerietɨ.
ISA 33:8 Huye yuxaɨtame puyehapane, nixewitɨ huyeta pukaheyeika. Tɨratu peutitsanariexɨa, memunenierixɨ 'aixɨa 'iyari mepɨkaxeiyarie, nixewitɨ 'aixɨa pɨkatixeiyarie.
ISA 33:9 Kwie kaniyuheiwerieka meta kaniuwakini, Riwanu kaniyutewiyani meta kanitiyɨnareni, mayeweri Tsaruni makumawetsie hepaɨ 'anetɨ kanayani, Watsani meta Kaximeru kemɨtiutsiɨraɨyekai mɨpaɨri pɨkatiu'ane.
ISA 33:10 Yawé mɨpaɨ kanaineni: «Hikɨ nekananukukemɨkɨ. Hikɨ 'aixɨa nekatinitahɨawariemɨkɨ, nehetsiemieme 'aixɨa katinitaniukiemɨkɨ.
ISA 33:11 Xeme kuxarikɨ xepɨtihukata meta xatsi xepɨtiniweni, peru ne'iiya tai mɨhɨkɨ kanitixɨtsitɨamɨkɨ.
ISA 33:12 Teɨteri naxi mekanayeitɨariekuni, xuya mawitekietɨka hepaɨ mekatenitaiyariekuni».
ISA 33:13 Xeme, 'ateewa xemu'uwa, kenemɨtiuyuri xekeneu'enana, meta xeme, hurawa xemutetɨka, netɨrɨkariya xekenetimati.
ISA 33:14 'Axateyuruwamete Tsiyuni hetsie mekanimamaka, kwie mutayuane 'axateyuruwamete kaniwaranuku'axikeni: «¿Kemɨ'ane tame pɨyɨwe taipa mɨkiekametɨnikɨ mɨtiyɨxɨtsitɨwatsie? ¿Kemɨ'ane tame pɨyɨwe yuheyemekɨ mukuma nerɨkwari tsata mukiekametɨnikɨ?»
ISA 33:15 Kemɨ'ane xeikɨa heitserie yamɨtikamie meta heitseriekamekɨ mɨtikuxata, 'axa'anemekɨ tumini mɨkaha'i'iwa, meta tumini mɨtanaki'erienikɨ 'aixɨa mɨtiuka'iyari mɨnanaimanikɨ yuhetsie mɨkapitɨa, mɨkayuwaɨriya teyumemiwamete muwa'enienikɨ, mayukɨpiriya 'axamɨti'ane mɨkatixeiyanikɨ.
ISA 33:16 Mɨkɨ meutitewatsie pɨkiekametɨni, yu'awiwietame pexeiyani 'aitsie mɨtɨrɨkaɨyetsie, paa pemikieka, haa waɨkawa pexeiyani.
ISA 33:17 'Ahɨxite ti'aitame witsi'anemekɨ pɨxeiya, meta kwie xekanixeiyakuni 'ayeukame.
ISA 33:18 'Ataɨta mɨpaɨ pepɨti'erieni pematɨ, meta mɨpaɨ pepɨtayɨni: «¿Hakewari peyeika wa'inɨnɨatame? ¿Hakewari peyeika tumini mɨtatsiwawiriekai? ¿Hakewari peyeika tuxiyutsie timieme mɨraka'utɨwa?»
ISA 33:19 Tawari mɨkɨ teɨteri memuyuti'ɨre pepɨkawaxeiya, mɨkɨ teɨteri waniuki mɨkayu'eniɨriɨkɨ, niuki kayumainɨakame memexeiya.
ISA 33:20 Tsiyuni keneuxeiya, ta'ixɨarari kiekariyari, 'ahɨxite Kerutsareme kanixeiyamɨkɨ, kii 'aixɨa mɨrewe, 'ixuriki kiiyari 'aixɨa mɨrekuwe, kɨyeyarite mukatsutsuni pɨkahatihunixɨani, kaunariteya pɨkahatekixɨani.
ISA 33:21 Mana Yawé matsiɨkɨme payeitɨani yutɨrɨkariya. Haa 'a'atayeyeutɨ maxuawe payani meta 'etsihatayeyeutɨ manuyehapane. Kanuwa 'etsimupe muwekiexime mana pɨka'uyeyani, meta kanuwa 'amupapa mɨtɨrɨkawi.
ISA 33:22 Yawé mɨtatsi'uwitɨxime mɨhɨkɨkɨ, Yawé manuyeka kanihɨkɨtɨni. Yawé tati'aitɨwame mɨhɨkɨkɨ: Mɨkɨ katanitawikweitsitɨamɨkɨ.
ISA 33:23 'Akaunarite kaniuweranaxɨani: Patera manuwie pɨkakuhana 'ixuriki heitserie pɨka'anuyewɨ. Waɨkawa piinitɨarika memɨte'a'iwaxɨ mekatenetapixɨakuni, meta memɨka'ɨkɨniwawe 'ɨaritɨ mekateninawakuni.
ISA 33:24 Nixewitɨ mɨpaɨ pɨkatayɨni: «Nepɨtikuye», mana kiekatari 'axakememɨte'uyurikɨ mepɨteheuyehɨwiyarieni.
ISA 34:1 Nuiwarite, 'ahurawa xekenewakɨni xemɨ'enananikɨ. Teɨteri, kayuwatɨ xekeneu'enana. Kwie ke'i'enieni, meta naitɨ mana mɨtixuawe, kwiepa kemakuyewa, meta tita mɨtixuaweriya.
ISA 34:2 Yawé kaniha'aka yunaime nuiwarite wahamatɨa, meta yunaime kuyaxi wahamatɨa. Mɨkɨ kaniwaruka'una yunaime memɨkwi'iwakɨ kaniwayetuani.
ISA 34:3 Wakaxarite kanexɨriyamɨkɨ, wawaiyari 'ukuri'ɨatɨkaitɨ kanitipɨnimɨkɨ, waxuriya hɨrite kanitixɨtɨaximeni.
ISA 34:4 Xurawetsixi muyuawitsie memeukatei mekanitaxɨriexɨakuni, meta muyuawi kaniyutakwikwiemɨkɨ xapa hepaɨ, yunaitɨ xurawetsixi yuxawatɨriya meneuyehɨakuni, kaxie xawari wakitɨ kemɨrakawiwike, meta xapa takari wawakitɨ kemɨtikaxɨrɨwe.
ISA 34:5 Ne'ixipara muyuawitsie kaniutitaweni, 'ari 'akanakamieni 'Erumi hetsie tiwakwinitɨanike, mɨkɨ teɨteri 'ari yanepɨtiwarutahɨawixɨ nemɨwareuyehɨanikɨ.
ISA 34:6 Yawé 'ixiparaya kanixuriyamaka, tsipuri meta muxatsi waxuriyakɨ, kaniwiyamaka, muxatsi 'ukitsi wamumé wiyayari xiteyarikɨ. Yawé mawarika puwewie Wutsira paitɨ, meta puwarukwi 'Erumi kwieyaritsie yumɨireme.
ISA 34:7 Wahamatɨa mekanikwikuni tuurutsixi yeutari wahepaɨ memɨ'anene, meta tsikerutsixi metatsiere tuurutsixi. Wakwietsie xuriya kanitayeurimɨkɨ, wiya tumuanaritsie kanakɨnɨmɨkɨ.
ISA 34:8 Yawé mɨyɨkɨhɨanikɨ kanitukarieyatɨni, mɨrayukatuani wiyari kanihɨkɨtɨni Tsiyuni hetsie tanuanike.
ISA 34:9 'Erumi 'akiyaritetsie kwetsɨka muwitsɨani hayari kaniuhapanekamɨkɨ, kwauniyari hatsupure mɨta'a kanayeimɨkɨ meta tiyutaiyatɨ kwetsɨka muwitsɨani kanayeimɨkɨ mɨkɨ kwieyari.
ISA 34:10 Tukarikɨ meta tɨkarikɨ pɨkakutɨtɨtseni, kɨtsi yapɨretineikani. Yuheyemekɨ 'akumawetɨ payani waxiɨyari, hatsuaku xewitɨ mana pɨka'uyeyani.
ISA 34:11 Piwame meta naika 'ɨtsita kiekatari mana mepɨkiekataritɨni mana mikɨri meta kwatsa hamatɨa mepuyuti'ituatɨani. Kakaɨyari 'Erumi kwieyaritsie pɨtitamɨiriya ti'inɨnɨatamekɨ yuxamuriekame payeitɨwa tepɨa mahete hirukɨ mɨwiwiekɨ pɨrakumaweriya.
ISA 34:12 Memanuyetei mana mepɨka'u'uwani meta mana xewitɨ pɨkati'aitani, yunaitɨ mana te'aitamete mekanikumawerikuni.
ISA 34:13 Waparatsiyuta xuya pɨtinexɨani, meta wakii 'aixɨa mɨ'aneneta 'ɨtsi pɨtinexɨani. Yawixi memayu'eririya wakii payani meta 'aruxi 'amemɨnene wa'itua.
ISA 34:14 Teyukwa'amete makumawetsie miemete mepuyutinɨni tsɨikɨri yeutari wahamatɨa, tsipuri yeutari mepuyɨkɨhɨaweni hipame wahamatɨa, metatsiere mana mepɨkiekataritɨni memawɨwawe tɨkarikɨ miemete mekanikaxeiyakuni yu'uxipiweme.
ISA 34:15 Mana mikɨri puyuta'ituatɨani pɨtitixɨrieni, yu'anatetɨa yupixɨxɨitsi puwata'ɨwiya. Manatatsiere mepuyukuxeɨrieni wirɨkɨxi, meyu'iwamatɨkaitɨ.
ISA 34:16 Yawé xapaya xekenakaxeiya, hikɨ xekenakaterɨwa: Nixewitɨ 'ikɨ yeutanaka pɨkaheuyeweka, yunaitɨ yu'iwama mepɨwareuxeiyani. Yawé mɨpaɨ katiniu'aita, meta 'Iyarieya kaniwakuxeɨrimɨkɨ.
ISA 34:17 Mɨkɨ kaniwaranuyexeirieni hakewa memeyuhayewa, yumamakɨ kaniwaru'itɨirieni wakwie. Mɨkɨ mana yukie mekanayeitɨakuni yuheyemekɨ, mana mekaniyuhayewakuni waxiɨyarima yuheyemekɨ.
ISA 35:1 Makumawe puyukatemawieni meta 'ɨtsi mɨtiwawaki, makumawe puyutemawieka meta tuturi hepaɨ pɨtaxutuni.
ISA 35:2 Pɨkaxutuni puyutemawieka: putahiwani temawierikakɨ. Riwanu tsimɨtiyuxexeiya mɨpaɨ pɨtipitɨarieni, meta Kaximeru metatsiere Tsaruni 'aixɨa kememɨte'utixuawitɨwakai. Mɨkɨ Yawé mariweme mepɨxeiya, Kakaɨyari witsi'anetɨ kemɨtimariwe.
ISA 35:3 Xekenetseiriyani mamate mɨwerarani, tuunute xekenetseiriyani muyɨyɨakatɨka,
ISA 35:4 mɨpaɨ xeketeniwarutahɨawi yu'iyaritsie memɨmama: «Xekenetɨrɨkawini, xepɨkamamaka Xekakaɨyari kaninuamɨkɨ, punuani mɨtiwarakapitɨanikɨ, tiwapitɨanike kahekɨakamekɨ kanixetawikweitsitɨamɨkɨ».
ISA 35:5 Hikɨ 'ana memɨkaheuneniere wahɨxite heunenieretɨ kanayeimɨkɨ, meta memɨkaheu'enana meheu'enanatɨ mekanakɨnikuni,
ISA 35:6 mɨka'uyeiwe kanititsunamɨkɨ maxa hepaɨ, meta mɨkaniuwe temawierikakɨ kanitahiwamɨkɨ. Makumawetsietsɨ haa kanitinexɨamɨkɨ, waɨkawa haa kanetinexɨamɨkɨ makuwakitsie.
ISA 35:7 Xiekari mɨxɨka haa kwekwewiwame kanayeimɨkɨ, kwie waɨkawa meuharimɨkɨ hetsiena haixa kanetinexɨamɨkɨ meta hapurarai. Hakewa yawixi memayu'eririya memetikukutsukai mana haka kɨyexi hatamete kanitinexɨamɨkɨ.
ISA 35:8 Mana huye puyehaneni “Huye mɨpatsie” katiniterɨwariemɨkɨ. Mɨkɨ 'utɨma memɨka'itiyatɨka mepɨka'uyekɨne, meta memɨka'u'iyari mana memuyekɨne mepɨkayɨwaweni, huye memuweiya wahetsiemieme xeikɨa kanayeimɨkɨ.
ISA 35:9 Mana maye pɨka'uyeikani, meta tiyukwa'ame mɨkɨ 'utɨma pɨkayemie, Mɨkɨ 'utɨma nitixaɨtɨ pɨkatitaxeiyarieni. Mana mekaniuyekɨnikuni xeikɨa memutawikweitsitɨarie.
ISA 35:10 Yawé hetsɨa mekani'axɨakuni memutawikweitsitɨarie, Tsiyuni mekaneutahaxɨakuni temawierika kwikariyari mekwikatɨ, yuheyeme temawierikakɨ mekurunatɨarietɨkaitɨ. Temawierika pɨta kaniwaranuku'aximɨkɨ, nutuixiya meta hiwerika kaniyemieni.
ISA 36:1 Tamamata heimana nauka wiyari ti'aitakaku 'Etsekiyaxi, Tsenakeriwi 'Atsiriya kwieyaritsie ti'aitame, Kura kaniutamieni meta kiekariteya mɨtɨrɨkawi yuhetsiemieme kanayeitɨani.
ISA 36:2 Ti'aitame 'Atsiriya kiekame Rakixi paitɨ 'ukaitɨ kuyaxi tiwa'aitɨwame kanenɨ'ani, yumɨireme kuyaxi warawitɨkɨme, ti'aitame 'Etsekiyaxi hamatɨa mɨretaxatakɨ Kerutsareme paitɨ. Kepauka kuyaxi tiwa'aitɨwame, haa wapaitɨ meukatuarike manuhuyeritɨarie manuyekatsie mu'uxipi, 'Ekwame Kwieya makuma huyeyari manuyehane 'utɨa,
ISA 36:3 hikɨ kanayeyani 'enunakeke 'Eriyakini paratsiyuta mɨti'aitakai Kirikiyaxi nu'aya, warawitɨtɨ kemɨtiuyɨ ti'utɨwa Tsewina meta ti'utɨwame Kuha 'Atsahapi nu'aya.
ISA 36:4 Kuyaxi tiwa'aitɨwame manuyeka mɨpaɨ katiniwarutahɨawe: ―Mɨpaɨ xeketenetahɨawi 'Etsekiyaxi kename mɨpaɨ haine ti'aitame mɨmariwe, ti'aitame 'Atsiriya kiekame: “¿Ketitatsie peti'atɨrɨkariya?
ISA 36:5 'Ekɨ mɨpaɨ pemutaine kename perakumate meta kename kuyaxi pewarexeiya, peru neuxei mɨkɨ pɨniuki xeikɨa. ¿Ketitatsie petiwiya, titayari peti'awaɨriya penetsi'aye'unietɨ pemayanikɨ?
ISA 36:6 Neuxei, 'ekɨ 'Ekipitutsie pemɨtiwiya, mɨkɨ 'itsɨ mɨxainitsie, xɨka hetsiena perawiya manumure meta mɨtiwakwinitɨa kemɨ'ane mana memɨtehawiwiya. Mɨkɨ Parahuni kanihɨkɨtɨni ti'aitame 'Ekipitu kiekame, kemɨ'ane hetsiena memɨtewiya wahetsiemieme.
ISA 36:7 Xɨka 'ekɨ mɨpaɨ penetiutahɨawe: ‘Tame Yawé hetsie tepɨtewiya takakaɨyaritsie’, ¿kamɨtsɨ mɨkɨ katixatsiwa, 'Etsekiyaxi, 'iya hakewa Kakaɨyari hetsiemieme mawari matiwewiwatɨkateitsie meta tukite 'etsimupepe pemuti'unaxɨ, mɨpaɨ petiwakɨhɨawetɨ Kuratsie kiekatari meta Kerutsaremetari: ‘'Ikɨ mawari taiyame hɨxie xeikɨa kaniyɨwemɨkɨ xemeyexeiyanikɨ’?”
ISA 36:8 »Hikɨ 'Etsekiyaxi, 'ikɨ tɨratu keneuwewi neti'aitɨwame hamatɨa, ti'aitame 'Atsiriya kiekame: Ne nepɨmatsiyetuirie huta miriyari kawayutsixi, xɨkata 'ekɨ mɨpaɨ yupaɨmeme pewakuwaumɨkɨ memanutiyaxe.
ISA 36:9 'Ekɨ pepɨkayɨwe xeime tɨma pemutaweiyakɨ tsepa waɨkawa mɨkayɨwe neti'aitɨwame hetsɨa miemete, tsepa 'Ekipitu hetsie pemuyɨkɨ'ɨ kaxetate yumemiwame mexeiyakɨ meta kawayatsixi.
ISA 36:10 ¿Kamɨtsɨ xeme mɨpaɨ xɨari xepɨteku'eriwa kename ne Yawé kanetsiparewiekaku neyɨane 'ikɨ kiekari nemu'unamɨkɨ? Matsi mɨkɨ mɨpaɨ kanetineta'aitɨani: “Mɨkɨ kwieyaritsie kenemieka keneka'una”».
ISA 36:11 'Eriyakini hamatɨa Tsewina meta Kuha mɨpaɨ kuyaxi tiwa'aitɨwa mekateniutahɨawe: ―Neuxei pamɨpariyutsixɨa, tame temate'uximayatsiriwamete 'arameu niukiyarikɨ ketatinekuxaxatɨwani tame mɨkɨ tekani'enieka. Hepɨrayukɨ pepɨkatatsikɨhɨaweni, yunaitɨ kurarutsie memakatei mepɨta'enana.
ISA 36:12 Peru kuyaxi tiwa'aitɨwame mɨpaɨ kaniutayɨni: ―Ne neti'aitɨwame pɨkanetsiheyenɨ'a 'ekɨ meta mati'aitɨwame hamatɨa xeikɨa nemɨtixetaxatɨanikɨ, matsita kurarutsie memakatei yunaime. Metsɨ yunaitɨ mɨkɨ meta xeme yukwita xekanitikwaikuni meta yuxixi xekanitiharikuni.
ISA 36:13 Mɨpaɨ 'utayɨka, kuyaxi tiwa'aitɨwame 'akaniutakeni, hikɨ kwi 'utahiwatɨ hepɨrayukɨ mɨpaɨ kaniutayɨni: ―Ti'aitame mumariwe niukieya xekeneu'eni, ti'aitame 'Atsiriya kiekame:
ISA 36:14 Mɨpaɨ kainaneni ti'aitame: “'Etsekiyaxi nɨka tixe'u'itaiya. Mɨkɨ mɨxe'utawikweitsitɨani pɨkayɨwe.
ISA 36:15 'Etsekiyaxi xepɨka'enieka mɨxekemakaxɨanikɨ Yawé hetsie yuri xemɨte'eriekakɨ mɨpaɨ xetikɨhɨawetɨ: ‘Yurikɨ Yawé pɨtatsixɨna, 'ikɨ kiekari 'Atsiriyatsie ti'aitame hetsɨa pɨkakaweni.’”
ISA 36:16 »'Etsekiyaxi xepɨka'enieka. Mɨpaɨ kanaineni ti'aitame 'Atsiriya kiekame: “Nehamatɨa kayuwatɨ xemexeiyanikɨ tɨratu xekeneuwewi, xekeneyuyetua. Mɨpaɨ xɨka xe'ɨyɨni xepɨtetikwani yukaxietsie timieme meta yupiní 'ikwaxiyari, metatsiere xepɨtihareni yuputsuta,
ISA 36:17 kepaukaketa ne nemayeneni nemɨxe'anuwitɨni xekwie hepaɨ 'anemetsie, kwie tɨriku maxuawetsie meta kaxie winuyari, paa maxuawetsie meta kaxie harawerita”.
ISA 36:18 »Xepɨka yuwaɨriyani xɨka 'Etsekiyaxi mɨpaɨ tixekɨhɨaweni: “Yawé tahetsie kanitanuamɨkɨ”. ¿Hipatɨ nuiwari kamɨtsɨ wakakaɨyarima wahetsie mete'utanua kepauka ti'aitame 'Atsiriya kiekame wahetsɨa mɨye'a?
ISA 36:19 ¿Hakewa kamɨtsɨ Kamati kakaɨyarimama meta 'Axipari? ¿Hakewa kamɨtsɨ Tsepariwahini kakaɨyarimama? ¿Kamɨtsɨ Tsamariya tiutawikweitsitɨa 'Atsiriya hetsɨa?
ISA 36:20 Xewitɨtɨma kakaɨyaritɨtɨ 'ikɨ nuiwarite wakwieyaritsie 'uyeikatɨ pɨkayɨwe yukiekari mɨxɨnakɨ netɨrɨkariyatsie. ¿Kamɨtsɨ tiyɨweta Yawé Kerutsareme hetsie mutanuani kepauka nemika'una?»
ISA 36:21 Peru teɨteri kayuwatɨ mepumakai ni'etsiwatɨma mepɨka'utiniu, ti'aitame mɨpaɨ mainekaikɨ: «Xepɨka'iku'eiyani».
ISA 36:22 Hikɨ 'Eriyakini Kirikiyaxi nu'aya, mɨti'uximayakai paratsiyuta, meta Tsewina kemɨtiuyɨ ti'utɨwame metatsiere mɨraka'utɨwa Kuha 'Atsahapi nu'aya, yukamixa meheukatsanaxɨaka hiwerika 'inɨariyari memexeiyanikɨ, menekɨne 'Etsekiyaxi hetsɨa, mekatenitaxatɨani kemutayɨkai kuyaxi tiwa'aitɨwame.
ISA 37:1 Kepauka ti'aitame 'Etsekiyaxi mɨpaɨ mɨtiu'enaxɨ, yukamixa kaneukatsana, hiwerika kamixayari 'anakatɨka Yawé tukita kaneyani.
ISA 37:2 Metatsiere 'Eriyakini paratsiyuta mɨti'aitametɨkai, meta kemɨtiuyɨ ti'utɨwame Tsewina metatasiere 'ukirawetsixi mawari wewiwamete kaniwarenɨ'ani, yunaitɨ mɨkɨ hiwerika kamixayari me'anakatɨtɨkaime, Kakaɨyari niukameya Kitsariyaxi 'Amuxi nu'aya hamatɨa memɨtehetixatakɨ.
ISA 37:3 Mɨpaɨ mekatenitahɨawe: «'Etsekiyaxi mɨpaɨ kanaineni: “Hikɨ 'ikɨ tukaritsie nutuixiya tukariyari kanihɨkɨtɨni meta kukuiniya metatsiere 'axatekaniu'itɨarieni, kepauka nunutsi yumaamatsie mɨka'anuyeyeiwe tinuiwake hepaɨ, matsi maamaya mɨkaheutɨrɨkaɨye mitinuiwitɨanikɨ.
ISA 37:4 Heiwatɨ Yawé 'Akakaɨyari kuyaxi tiwa'aitɨwame niukieya 'u'enieni, ti'aitɨwameya 'Atsiriyatsie ti'aitame meinɨ'a, Kakaɨyari mayeniere 'axamɨretahɨawekɨ. Yawé 'Akakaɨyari ketiwarukwinitɨani niuki mɨya'aneme mɨwaru'enirikɨ. Hikɨ keneyutanenewi, teɨterimama memuyuhayewatɨwe wahetsiemieme, 'akuxi 'amemu'uwa”».
ISA 37:5 Kepauka ti'aitame 'Etsekiyaxi te'uximayatsiriwamete Kitsariyaxi memɨtehekuxatɨa,
ISA 37:6 mɨkɨ mɨpaɨ katiniwarutahɨawe: «Tixe'aitɨwame mɨpaɨ xeketenetahɨawi Yawé mɨpaɨ kanaineni: “Pepɨkamaka mɨkɨ niuki 'axamanɨyɨne pemu'enikɨ, meta kemutayɨ nehetsiemieme ti'aitame 'Atsiriya kiekame nɨ'arieya.
ISA 37:7 Neuxei, ne xeime 'iyari hetsiena nekanikayemɨkɨ, kepauka mɨ'ena kename kereyɨ kaniyemieni yukwieyaritsie. Muwapaitɨ yanekatiniyurimɨkɨ 'ixiparakɨ memierienikɨ”».
ISA 37:8 Kepauka kuyaxi tiwa'aitɨwawe mɨretima kename 'Atsiriya kwieyaritsie ti'aitame kiekari Rakixi mɨrakutewatsie 'ayeyakai, 'ayumieme kaneyani, hikɨ ti'aitame kanetaxeiya yumieneme Riwina hamatɨa.
ISA 37:9 Metatsiere Tsenakeheri katiniutaxatɨarieni kename Tiraka, ti'aitame Kutsi kiekame, hayeyakai 'itamienike. Hikɨ mɨpaɨ retimaka niuki tuayamete 'Etsekiyaxi hetsɨa kaniwarenɨ'ani
ISA 37:10 mɨpaɨ memɨteheitahɨawekɨ: «'Ekɨ 'Etsekiyaxi, ti'aitame Kura kwieyaritsie: 'Akakaɨyari hetsiena yuri pemɨti'erie nɨkatɨ metiu'itaiya, mɨpaɨ matikɨhɨawetɨ: “Ti'aitame 'Atsiriya kiekame Kerutsareme pɨkaka'una”.
ISA 37:11 Pekatinimaikari kememɨte'uyuri te'aitamete 'Atsiriyatsie miemete hipame kwieyaritsie, yunaime mepɨwarakumaweriyaxɨ. ¿Kamɨtsɨ 'ekɨ petitawikweiya?
ISA 37:12 ¿Kamɨtsɨ netutsima memɨwaruka'unaxɨ: Kutsani, Karani, Xetsepi meta Hereni kiekatari Teratsaxi memɨtamakai, wakakaɨyarima wahetsie mete'utanua?
ISA 37:13 ¿Kamɨtsɨ hakewa mepe'uwa te'aitamete, Kamati kiekame, 'Axipari kiekame, meta Tsepariwahini kiekariyaritsie kiekame, yatɨni Hena kiekame meta Hiwa kiekame?»
ISA 37:14 'Etsekiyaxi yutupiritsixi waxapa 'anuhurieka, mɨkɨ kanekaterɨwa. Hikɨta Yawé tukita kaneyani, Yawé hɨxie 'itawenaka,
ISA 37:15 mɨpaɨ katiniyunenewieni Yawé hɨxie:
ISA 37:16 «Yawé Naimekɨpemɨtɨrɨkaɨye, 'Ixaheri Kakaɨyarieya, 'ekɨ 'uweni pemexeiya 'ateɨtamete wahetsie: 'ekɨ xeikɨa te'aitamete kwiepa memɨtama pepɨwakakaɨyari. 'Ekɨ muyuawi peputawewi meta kwie.
ISA 37:17 Keneta'enani, Yawé, keneu'ena, kenanutanieri, Yawé meta keneniereni, naime niuki keneu'eni Tsenakeriwi kemɨtiunɨ'a Kakaɨyari pemayeniere 'axapemɨtitahɨawarienikɨ.
ISA 37:18 »Yawé, kaniyuritɨni te'aitamete 'atsiriyutsixi yunaime 'ikɨ nuiwarite mekaniwarakumaweriya meta wakwie.
ISA 37:19 Wakakaɨyarixima taipa mekaniwareuxɨrieni meta mekaniwaruti'una, mɨkɨ memɨkakakaɨyarixitɨkaikɨ matsi xeikɨa kɨyexi meta tetexi memɨhɨkɨtɨkaikɨ, teɨteri wawewiya.
ISA 37:20 Merikɨte hikɨ, Yawé, takakaɨyari, ketaneutawikweitsitɨa mɨkɨ memɨtatsi'uniekɨ, yunaitɨ nuiwarite kwiepa memɨtama mɨpaɨ memɨtehetimanikɨ kename 'ekɨ xeikɨa Yawé, Kakaɨyari pehɨkɨ».
ISA 37:21 Hikɨ Kitsariyaxi 'Amuxi nu'aya 'ikɨ niuki 'Etsekiyaxi kanenɨ'airieni: «Yawé mɨpaɨ kanaineni, 'Ixaheri Kakaɨyarieya: “Kepemɨnerawawiriwa Tsenakeriwi hepaɨtsita, 'Atsiriyatsie ti'aitame,
ISA 37:22 'ikɨ niuki kanihɨkɨtɨni ne Yawé kenemutayɨ hetsiena mieme: »”Tsiyuni niweya 'ɨimari kamenixani'erieka meta kaniutanaweni 'ahetsiemieme. Kerutsareme niweya 'uka matsixeiyatɨ yumu'u kaniuyuitɨwani pemɨ'ata'unaxɨkɨ.
ISA 37:23 ¿Kemɨ'ane 'axapepɨranutahɨawixɨa? ¿Kemɨ'ane hetsiemieme 'axapeputayɨ? ¿Kemɨ'ane pepanutahiwiexɨa meta kemɨ'ane hɨxie pepuyuta'ɨrixɨ? Mɨpatsie 'Ixaheri hetsiemieme hepaɨtsita.
ISA 37:24 Te'a'uximayatsiriwamete pepɨwarenɨ'a Yawé 'axamemɨtehetahɨawekɨ, mɨpaɨ pe'utaitɨ: ‘Nekaxetate yukukuyamete memɨyɨmɨirekɨ hɨri 'amɨtɨtɨtsie nepanutitɨa, Riwanu mukɨatsie. 'Iteɨrieya kariuxa 'amutɨtɨ nepawitexɨa, hukuya mɨxexeurawi 'aixɨa mɨ'anene. Hɨriteya 'amanutitɨtɨ nepanuku'axixɨa, muhukuyatɨka witsimɨtiu'anene.
ISA 37:25 Haputsu neputiwewi 'ateewa kwie mukumanetsie, haa mana mieme nepanuhari. Neketatekɨ 'Ekipitu hatɨayarite nepayewatsiɨxaxɨa’.
ISA 37:26 »”¿Mɨpaɨ pekaretimaiwe? Mɨixa wiyari panuyemieri ne nemɨtiukuha'aritaxɨ. Ne meripaitɨ yaneputayɨ, hikɨta nepeye'atɨa, 'Ayumieme 'ekɨ pepɨwaruka'unaxɨ kiekarite mɨtɨrɨkawi.
ISA 37:27 Mana kiekatari, mepɨkatɨrɨkawi, meputimama meta mepuyutetewiya. Kɨyexi 'ɨtsita mieme hepaɨ mepɨ'ane, 'ɨxa mɨyɨra hepaɨ, Kii heima tupiriya mɨnewe hepaɨ kataweriwetɨ mutawauke.
ISA 37:28 »”Ne nepɨtimate kepauka pemanukayeixa, kepauka pemeutahake, kepauka pemɨwayeyeika, meta kepauka nehepaɨtsita pemuyeha'arɨwe.
ISA 37:29 Nehepaɨtsita pemuyutahaxɨatɨakɨ hau'erietɨ pe'utaniuku 'aniuki nemu'enikɨ, 'atsuritsie tixikɨraɨyeme nepɨtiuyewieni 'ateta nepɨmatsi'utapirenutɨani, kemɨ'ane huye 'utɨa pemunua mɨkɨ 'utɨa nepɨmatsi'anunɨ'ani.
ISA 37:30 »”'Etsekiyaxi 'ikɨ pɨ'inɨaritɨni 'ahetsiemieme: »”'Ikɨ wiyaritsie xepɨtetikwani tita mɨtitineni yuxaɨta, hutarieka wiyaritsie manatsiere mɨtitinexɨani. Peru hairieka wiyaritsie xepɨka'eni meta xepɨka'itsana, kaxie haraweri xepɨka'eni meta 'ikwaxiyari xepɨtikwani.
ISA 37:31 Tawarita Kura xiɨyarimama 'amemu'uwa mepananayataxɨani, meta mepɨkaxuawere.
ISA 37:32 Kerutsaremetsie hipatɨ memuyuhayewaxɨ, Tsiyuni hɨriyaritsie hipatɨ mepukuwikweni. 'Ikɨ ne'ɨtetsari mɨyapɨtiyurieni, Yawé Naimekɨmɨtɨrɨkaɨye 'ɨtetsarikaya.
ISA 37:33 »”Ne, Yawé, mɨpaɨ nekanaineni ti'aitame 'Atsiriya kiekame hetsiemieme: »”'Ikɨ kiekaritsie pɨkaheutahani, meta 'ɨrɨ hetsɨana tɨma pɨkaheutahɨani. Kuya muyukunarɨma 'a'ɨtɨ hetsɨana pɨkaye'ani, meta kurarutana meukatsunakɨ pɨkatiwewieni.
ISA 37:34 Ke'aneme huye 'utɨa munua mɨkɨ 'utɨa kaniyemieni, 'ikɨ kiekaritsie pɨkaye'ani. Ne, Yawé, mɨpaɨ nekanaineni.
ISA 37:35 Nekɨmana neminaki'eriekɨ, meta Rawiri neti'uximayatsiriwame nemɨnaki'eriekɨ, 'ikɨ kiekari hetsie nepɨtanuani meta nepitawikweitsitɨani”».
ISA 37:36 Hikɨ Yawé niuki tuayameya muyuawitsie mieme kanayeyani xeitsienituyari heimana nauka tewiyari heimana 'auxɨwi miriyari (185.000) kuyaxi 'atsiriyutsixi memakutekatsie kaniwarukwini. 'Uxa'arieka ximeri memanuku'ui hipatɨ wa'iwama, mana yunatɨ mɨkite mepukuhetei.
ISA 37:37 'Ayumieme Tsenakeriwi, ti'aitame 'Atsiriya kiekame, manukateitsie kaneyani. Niniwe kiekariyaritsie kaninuani mana kaniyuhayewa.
ISA 37:38 Peru kepauka, tukita yunenewienekaku yukakaɨyari 'ayexeiyakaku Nitsiruki, niwemama 'Aruramereki, Tsaretsexi hamatɨa mekanimieni 'ixiparakɨ, mɨya mete'uyurieka mekaniuyuta'una 'Ararati kwieyaritsie paitɨ. Hikɨ nu'aya 'Etsaxikaruni 'utɨmana ti'aitame kanayani.
ISA 38:1 Mɨkɨ tukaritsie 'Etsekiyaxi katiniutakwine waɨkawamekɨ, 'ari kanimɨximekaitɨni. Hikɨ Kakaɨyari niukameya Kitsariyaxi 'Amuxi nu'aya kaneikuxeiya, mɨpaɨ katineitahɨawe: «Yawé mɨpaɨ kanaineni: “'Akie 'aixɨa ketineukuyuri, 'ari pekanimɨmɨkɨ, 'aixɨa pepɨkatika'erieniri”».
ISA 38:2 'Etsekiyaxi 'ixumeritsie heunieritaka Yawé mɨpaɨ katiniutawawirieni:
ISA 38:3 «Yawé, kena'eriwani ne 'ahɨxie 'aixɨa nepɨtikatɨa meta ne'iyarikɨ 'aixɨa netinekɨhɨawetɨ, kemɨmatinake yanepɨtiuyuri». Hikɨ 'Etsekiyaxi karima kaniutatsuani.
ISA 38:4 Hikɨ Yawé niukieya Kitsariyaxi hetsie kaninuani mɨpaɨ katinitahɨawe:
ISA 38:5 «'Etsekiyaxi hetsɨa kenemie mɨpaɨ ketinetahɨawi Yawé mɨpaɨ kanaineni, 'atutsi Rawiri Kakaɨyarieya: “Nekani'enieni 'anenewieri meta 'a'ukai nekaniuxeiya, tawarita 'akuxi tamamata heimana 'auxɨwi wiyari nekamanipitɨaka pemuyeikanikɨ.
ISA 38:6 'Ekɨ meta 'ikɨ kiekari nepɨxetawikweitsitɨani ti'aitame 'Atsiriya kiekame mɨkaxeka'unanikɨ. Ne 'ikɨ kiekaritsie nekanitanuamɨkɨ.
ISA 38:7 'Ikɨ kani'inɨaritɨni nemɨmatsiyetuirieni kenemɨmarahɨawe:
ISA 38:8 Yanepɨtiyurieni 'Akatsi 'inɨarieyatsie tau 'etɨriyaya tamamata 'inɨariyari pɨkayani yu'utɨma”». Hikɨ mɨpaɨ katiniɨyɨni tamamata 'inɨariyari kanikayani tau 'etɨrieya.
ISA 38:9 'Arike 'Etsekiyaxi Kura kwieyaritsie ti'aitame tikuyetɨ 'aixɨa tiuka'erieka mɨpaɨ katinaka'utɨani:
ISA 38:10 «Ne mɨpaɨ neputainekai: “'Ari kauka mɨki teukiyata nenikayune, kaukari tukari nekahexeiyatɨ nenayani”.
ISA 38:11 Ne mɨpaɨ neputainekai: “Tawariri Yawé nepɨkaxeiya memayeneniere memanu'uwatsie, tawariri teɨteri nepɨkawaxeiya, 'ena kwiepa memɨte'u'uwa”.
ISA 38:12 Nekii nekaniuka'uniyarieni, nekaniunawaiyarieni, muxatsi wahɨweme 'ixuriki xamaruya hepaɨ. 'Itsame hepaɨ, netukari nekatiniutakwikwieni, maye'itse mɨkɨ kananuyeteke. Yapauka xeitɨkariyaritsie kaneniukumaweriya.
ISA 38:13 Netinewietɨ nepikwewi kepaukake tau 'ɨrɨya manatine, mɨkɨ peru, maye hepaɨ naime ne'umeyarite putimuraxɨ. Yapauka xeitɨkariyaritsie kaneniukumaweriya.
ISA 38:14 Wiki 'itsitame kuyeikame hepaɨ nekatiniutsuani, meta waurai hepaɨ, kukuru hepaɨ neputainekai. Muyuawitsie nieriyakɨ nehɨxite puti'uxixɨa. Nepu'uximatɨarie, Yawé. Kwerietɨ keneneuparewi.
ISA 38:15 »Neuxei ¿kenehaineni? Mɨkɨ mɨpaɨ kanetiniutaxatɨani, meta mɨpaɨ katiniuyurieni. Ne'iyaritsie kukuiniyakɨ nepɨkakutsu.
ISA 38:16 Yawé, teɨteri 'aniukitsie xeikɨa mepɨtewiya, yaxeikɨata ne'iyari mana 'aixɨa ti'aneme pɨtiukaxexeiya. 'Ekɨ 'aixɨa pepɨnetiuka'eritɨa tukari pepɨnetsi'upitɨa.
ISA 38:17 Mɨpaɨ nepɨtimate, 'aixɨa mɨti'anenikɨ 'uximatɨarikatsata nepuyetɨa. Penetsinaki'erietɨ pepɨkanetsi'upitɨa mɨki teukiyata nemɨkayunekɨ, 'axakenemɨtiuyuri pepuwarixiwiyaxɨ.
ISA 38:18 Mɨki teukiya 'aixɨa pɨkamarahɨawe, mɨki pɨkamatsinɨawa. Mɨki teukiyata memeukakɨka tixaɨtɨ mepɨkatetakwewie wahetsie kepemɨtiwiyanikɨ.
ISA 38:19 Kemɨ'ane memu'uwa, peru kemɨ'ane xeikɨa memu'uwa, mɨkɨ mepɨhɨkɨ memɨmatsinɨawa, hikɨ ne kenemɨmatinɨawa. Wapaapama yunaitɨ yuniwema mekateniwataxatɨakuni wahetsie kepemɨtiwiyanikɨ.
ISA 38:20 »Yawé pɨnetsitawikweitsitɨani, Yawé tukita teye'uwatɨ kanaritekɨ tepinɨawani naimekɨ ketemɨteheutere».
ISA 38:21 Kitsariyaxi mɨpaɨ painekai: «xapa 'ikwaxiyari witsɨanime xekenekawewi, haiyayatsie xekeneuwiri, mɨkɨkɨ 'aixɨa katinika'erimɨkɨ».
ISA 38:22 'Etsekiyaxi meta mɨpaɨ katiniuta'iwaukaitɨni: «¿Ke'aneme 'inɨari nepɨyetuiriyarieni Yawé tukita nemanutiyanikɨ?»
ISA 39:1 'Iya tukaritsie ti'aitame Wawiruniya kiekame Meruraki-Wararani Wararani nu'aya, xapa niuki 'aye'ukame 'Etsekiyaxi kanenɨ'airieni meta 'imikieri, tiutamarieka kename rekuyekai meta kenameri 'etsiwa 'aixɨa reu'eriekai.
ISA 39:2 'Etsekiyaxi mɨkɨ ranupika kaniyutemawiekaitɨni, mɨkɨta tupiritsixi katiniwaruxeitsitɨani naime yupiinite waɨkawa mɨraye'atɨka mɨrexeiyakai: pɨrata, huru, witsimɨtiɨ'ɨatɨka, hatseiti 'aixɨa mɨ'ane, meta kuyaxa timieme mɨtiuyepine tinaime. 'Etsekiyaxi naime yuparatsiyuta timieme pɨtiwaruxeitsitɨa nitixaɨtɨ pɨkatiuhayewaxɨ meta keyeumetsie mɨti'aita naime puwaruxeitsitɨa.
ISA 39:3 Hikɨ Kakaɨyari niukameya Kitsariyaxi ti'aitame 'Etsekiyaxi hetsɨa kaneyani mɨpaɨ katinita'iwawiya: ―¿Ketita mɨkɨ teɨteri meteheuyehɨakai? ¿Hakewa mepeyekɨ? 'Etsekiyaxi mɨpaɨ katinita'eiya: ―'Ateewa mekaneyekɨne Wawiruniya kwieyaritsie paitɨ, mana meheyekɨneka mepɨnetsiheku'iwataxɨ.
ISA 39:4 Kakaɨyari niukameya mɨpaɨ katinita'iwawiya: ―¿Ketita 'aparatsiyuta timieme mete'uxei? 'Etsekiyaxi mɨpaɨ katinita'eiya: ―Tinaime muwa timieme mepɨte'uxei, tixaɨtɨ nepɨkatiuti'awietaxu mɨraye'axe memɨkatexeiyakɨ tinaime nepɨtiwaruxeitsitɨa.
ISA 39:5 Hikɨ Kitsariyaxi mɨpaɨ katinitahɨawe: ―Yawé Naimekɨmɨtɨrɨkaɨye niukieya keneu'eni:
ISA 39:6 “Tukari kanaye'amɨkɨ kepauka tita naitɨ 'aparatsiyuta mɨtiyepine mɨraye'atɨka 'apaapama muwa memɨte'uku'eiri, mɨkɨ Wawiruniya katinanutɨkiemɨkɨ. Nitixaɨtɨ pɨkatiyuhayewa ―Yawé mɨpaɨ kanaineni―.
ISA 39:7 Meta hipatɨ 'aniwema meta 'anuiwarima mekananuhapaniekuni mekaneneɨkiwawetɨ memayeitɨarienikɨ Wawiruniya kiekariyaritsie ti'aitame paratsiyuyata memɨte'uximayakakɨ”.
ISA 39:8 'Etsekiyaxi mɨpaɨ katinita'eiya: ―Yawé niukieya 'ekɨ pemɨnetsi'atɨiri 'aixɨa kani'aneni. Mɨkɨ mɨpaɨ pɨtiku'eriwakai: «Mexi ne ne'uyeikani, kayuwatɨ pumaka meta 'aixɨa 'iyari nepuyeikani».
ISA 40:1 Xekenewanɨtɨaka, neteɨterima xekenewanɨtɨaka —wakakaɨyari mɨpaɨ kanaineni—.
ISA 40:2 Kerutsareme witsixeketenekɨhɨaweni, mɨpaɨ xeketeneutahɨawi 'ari mekatenaye'atɨani mete'uximayatɨ, 'axamɨtiuyurikɨ 'ari katiniuyutuani, 'ari Yawé kaniwaru'uximatɨani 'axakememɨte'uyurikɨ matsi waɨkawa hepaɨna paɨmemekɨ.
ISA 40:3 Xewitɨ kanahiwani: «Makumawetsie huye xekeneukuha'aritɨa Yawé hetsiemieme, mu'ayepariyatsie kwie xekeneutihɨniya huye 'aixɨa xekeneuyuri takakaɨyari hetsiemieme.
ISA 40:4 Mayeweweritsie kwie ke'utihɨne, meta hɨri matitei 'akuweritɨ pɨta kehayani, 'aki manuyeheitɨkatsie ke'akuparekure meta 'aki 'amɨpapa manuyeheitɨkatsie.
ISA 40:5 Hikɨ Yawé yuxawatɨriya kanihekɨatamɨkɨ, yunaitɨ kwiepa memɨtama mekanixeiyakuni.
ISA 40:6 Niuki mɨpaɨ kanaineni: «Keneutahiwani». Neta mɨpaɨ neraine: «Kehepaɨ netiuhiwani kuta». «Yunaitɨ teɨteri tupiriya hepaɨ mepɨ'anene, meta witsikememɨ'anene tuturi yeuta mieme hepaɨ kani'aneni.
ISA 40:7 Tupiriya kaniutawaukeni, tuturi kaniutayɨnareni, Yawé 'iiyaya wahetsie mɨye'axekɨ. Yurikɨ, teɨteri tupiriya mekanihɨkɨtɨni.
ISA 40:8 Tupiriya kanitiwaukeni meta tuturi kanitiyɨnareni, matsi takakaɨyari niukieya yuheyemekɨ kanayeniereni».
ISA 40:9 Tsiyuni, niuki 'aixɨa manɨyɨne xaxatame, hɨri 'a'utewime hetsie keneutiye'a. Kerutsareme, niuki 'aixɨa manɨyɨne tuayame, karima keneutahiwa. Keneutahiwa, pepɨkamaka, kiekarite Kura kwieyaritsie mukumane mɨpaɨ ketiniwarutahɨawi: «'Ena puyeika xekakaɨyari».
ISA 40:10 Neuxei, Yawé naimekɨmɨyɨwe kaniye'aka waɨkawa tɨrɨkaɨyetɨ, yutɨrɨkariyakɨ katini'aitani. Teɨterimama mekaniweiyani, tita mɨra'iwaxɨ hamatɨana kaniumieni.
ISA 40:11 Muxatsi wahɨweme yumuxatsima kemɨtiwa'ɨwiya hepaɨ, muxatsi tɨɨrixi kaniwaratɨkɨni, yutawie kaniwarutiyatsani, meta memɨhehekwa niwetɨka wakweriwayurietɨ kaniwaruwitɨximeni.
ISA 40:12 ¿Kemɨ'ane haramara pu'inɨatawe yumama meuwewerikɨ, meta kemɨ'ane yu'itɨwametekɨ muyuawi naime pu'inɨatawe? ¿Kemɨ'ane kwie tumuanariyari kiriwata pu'inɨataxɨ? ¿Kemɨ'ane hɨri panuyewi ti'inɨnɨatametsie?
ISA 40:13 ¿Kemɨ'ane Yawé 'iyarieya ketewamɨ'axe pi'inɨataxɨ, yatɨni kemɨ'ane 'i'ɨxatsitɨwameya payeiwe?
ISA 40:14 ¿Yawé kemɨ'ane hetsɨa pɨye'a ta'iwaunike yamɨtiyurienikɨ, kemɨ'ane huye mɨheitserie pixeitsitɨa? ¿Kemɨ'ane mɨtimaiwenikɨ pipitɨa yatɨni kemɨ'ane mɨtimaiwenikɨ huyeyari pixeitsitɨa?
ISA 40:15 Kakaɨyari hɨxie, haa tsuniyari wariteta meukatsuke hepaɨ nuiwarite mepɨ'anene, ti'inɨnɨatame mɨranuyewɨwɨtɨwatsie tumuanari 'etsipetɨ matikani hepaɨ. Yawé kwie haa hixɨapa mɨyetei ti'inɨnɨatemetsie kananuyewɨwɨtɨwani kwie kwi mɨmiyuanini mɨhɨkɨtɨni hepaɨ.
ISA 40:16 Riwanu kɨyexiyarikɨ xɨka hatinaini mawari taiyame heuyewetɨ 'akuxi payani, meta tewamamakɨ mawari taiyariyari xɨka 'uwewieni mepeuyeweka 'akuxi.
ISA 40:17 Yunaitɨ nuiwarite hɨxiena tixaɨtɨ mepɨkatehɨkɨ, mepɨkate'aye'atɨka hetsiena mieme.
ISA 40:18 ¿Kemɨ'ane Kakaɨyari hepaɨ 'aneme mepayeitɨani? ¿Kehepaɨ mete'iwewieni?
ISA 40:19 Tiwewiwame kakaɨyaritɨme kanitawewimɨkɨ, hurukɨ tiwewiwame huru pikawiriwa meta pɨrata kukayari pitiwewiriwa.
ISA 40:20 Kemɨ'ane tixɨatɨ mɨkarexeiya mawari mɨyetuanikɨ kɨye kaniutiwawani mɨkapɨniwe, meta kwinimieme mɨreutawewiwe kaniutiwawani kɨye kakaɨyariyari mɨtawewienikɨ ka'atiwautseme.
ISA 40:21 ¿Kamɨtsɨ xeme mɨpaɨ xekatemaikai? ¿Mɨpaɨ xekatehetimaiwawekai? ¿Mɨpaɨ xakate'utahɨawarie matɨari paitɨ? ¿Mɨpaɨ xekatehetima kwie muyukamatsie paitɨ?
ISA 40:22 Mɨkɨ katini'aitani muyuawi taheima muyema hetsie, mana teɨteri memu'uwa 'utsikari wahepaɨ mekateniyuxexeiyani. Mɨkɨ muyuawi kaniutawerani 'ixuriki xamaruyari hepaɨ, meta 'aixɨa katinikuwerani muwa mayekanikɨ.
ISA 40:23 Mɨkɨ memɨtɨrɨkawi kaniwarexɨrɨwani, meta 'ena kwiepa memɨte'aita tixaɨtɨ pɨkatiwarayeitɨwa.
ISA 40:24 Yu'aweri 'iteɨriyarikɨ mekaniukayatsarieni, hikɨke mekaniuka'etsieni, kwiepa wananayari katiniwiyaxɨaximenike, kepauka wahepa mɨreutahɨtsiwatsie mɨkɨ mekanitiwaukeni, hikɨ 'eka mɨtɨrɨkaɨye xatsi hepaɨ kaniware'enitsitɨwani.
ISA 40:25 «¿Kamɨtsɨ kemɨ'ane hepaɨ kename ne'ane xepɨtiyuani? ¿Kemɨ'ane nehepaɨ pɨ'ane?», mɨpaɨ kanaineni Mɨpatsie.
ISA 40:26 Teikɨ xekenenenieri, muyuawi xekeneutixeiya: ¿Kemɨ'ane mɨkɨ naime pɨtiutawewi? Kemɨ'ane xurawetsixi memuyumɨire 'aixɨa mɨtiwakuyayatsa yuxexeime, meta mɨwakɨhɨawe waterɨwatɨ yuxexuime. Kanimariweni tɨrɨkariyaya, kanitɨrɨkaɨyeni tɨrɨkariyaya, tixaɨtɨ wapaitɨ pɨkareuyewetse.
ISA 40:27 ¿Titayari Kakuwu petiniukixie? ¿Titayari 'Ixaheri peha'atɨ mɨyapetiutaine: «Yawé nehuye pɨkaxeiya, nekakaɨyari heitserie kenemɨrexeiya pɨka'imate»?
ISA 40:28 ¿Kamɨtsɨ pekatimate? ¿Kamɨtsɨ mɨpaɨ pekaretimaiwe? Yawé yuheyeme Kakaɨyari kanihɨkɨtɨni, naime kwie manu'atɨka mutawewi. Mɨkɨ pɨka'uxiwe meta pɨkawaɨripiwe, meta kemɨtiuyemate yemekɨ pɨkayumainɨa.
ISA 40:29 Mɨkɨ kemɨ'ane mu'uxe tɨrɨkaɨyeme payeitɨwa, meta kemɨ'ane memɨwerarani puwatɨrɨkariyatɨa.
ISA 40:30 Temari 'akuxi meputi'uxike, meputiwaɨripiwe, tɨɨri mehetixɨtemɨriketɨ mepekaxɨrɨwe,
ISA 40:31 peru Yawé hetsie kemɨ'ane memɨtewiya tɨrɨkariya hekwamekɨ mepukaxexeiya, kwixɨri wahepaɨ mepɨtiwɨxɨani: mepɨtinautsa mepɨkatiwaɨripieni, mepuhuni mepɨkati'uxe.
ISA 41:1 «'Ateewa haramara tetsita xemɨtitei, nehɨxie kayuwatɨ xekeneumaka. Nuiwarite, yutɨrɨkariya xekenehekwariyani. 'Ahurawa xekenakɨneka xeketenekuxatani, tepɨtaxeɨrieka nemɨxetaxanetakɨ.
ISA 41:2 »¿Kemɨ'ane pita'ini 'iya yuheyemekɨ yamɨrayu'iwa tau manatineika kiekame? Mɨkɨ yumamatsie nuiwarite kaniwakuhɨweni, mɨkɨ hɨxie te'aitamete mekaniyuyetuayani. Yu'ixiparakɨ tumuanari kaniwarayeitɨwani, yutupikɨ kaniwata'enitsitɨwani xatsi memɨhɨkɨtɨni hepaɨ.
ISA 41:3 Hikɨ 'aixɨa 'iyari kaniwaranukuweweiyani mɨkɨ huye 'utɨa hatsuaku mɨka'uyetɨatsie.
ISA 41:4 ¿Kemɨ'ane 'ikɨ pɨtiuyuri? ¿Kemɨ'ane yamɨtiyɨnikɨ yapainekai? ¿Kemɨ'ane nuiwarite puwarutahɨawixɨ tsutɨa paitɨ? Ne, Yawé, mexɨakame nekanihɨkɨtɨni, meta mɨkɨtsiere nekanihɨkɨtɨkamɨkɨ 'imatɨrieka tukaritsie».
ISA 41:5 Haramara tetsita kiekatari mekanixeiya, mekanimamaka meta kwie manuye'atɨkatsie kaniwatayuaneni. 'Ari 'ahurawa mekanahuni, 'umekanahuniri.
ISA 41:6 'Iwamarixi yunaitɨ mekaniyuparewieka, yu'iwamatɨ mɨpaɨ mekateniyutahɨaweni: «Kenetɨrɨkaɨyeni».
ISA 41:7 Mɨreutawewiwe yuwaɨriyame kanayeitɨaka hurukɨ tiwewiwame, meta titsunamekɨ mɨtitiweririta mɨpaɨ tepɨa hetsie tiwerime mɨrayeitɨwa pɨrahɨawe: «'Aixɨa pɨ'ane tepɨa mɨtiwiyatsitɨwani», hikɨ kakaɨyari wewiyakame pukɨrapuxima mɨkawatayuanenikɨ.
ISA 41:8 «Peru 'ekɨ, 'Ixaheri, neti'uximayatsiriwame, 'ekɨ Kakuwu, nemɨmatsi'anayexei, 'Apɨrahami nehamiku nuiwarieya.
ISA 41:9 Kwie manu'axetsie paitɨ nepɨmatsiyewitɨ, kwie manuye'atɨkatsie paitɨ nepɨmatsi'utahɨawixɨ, mɨpaɨ nekametiniutahɨawe: “'Ekɨ neti'uximayatsiriwame pekanihɨkɨtɨni”. Ne nepɨmatsi'anayexei, nepɨkamatsi'utixani'eri.
ISA 41:10 'Ayumieme pepɨkamaka, netsɨ 'ahamatɨa nekaniuyeikani, pepɨka'a'uximatɨaka, ne nepɨ'akakaɨyari. Nepɨmatsitɨrɨkariyani meta nepɨmatsiparewieka, ne nepɨmatsituikani nemamakɨ 'aixɨa mɨtiyuriekɨ.
ISA 41:11 »Yunaitɨ kemɨ'ane memuyeha'awe 'ahepaɨtsita yurikɨ mekanitewiyatsitɨariekuni nitixaɨtɨ mepɨkate'akɨne, kemɨ'ane memɨmetsi'aye'unie mepukumawere, wa'atɨtɨ mepɨkate'u'uwakai.
ISA 41:12 Tsepa pemɨwarutiwau memɨmetsi'aye'unie, pepɨkawataxeiya. Kemɨ'ane memɨmatsimietɨwe nitixaɨtɨ mepɨkatehakɨne, wa'atɨtɨ mepɨkate'u'uwakai.
ISA 41:13 Netsɨ Yawé nekanihɨkɨtɨni, 'Akakaɨyari, 'amamá 'atserie mieme mutuika, Ne nekanihɨkɨtɨni mɨpaɨ nemɨmerahɨawe: “Pepɨkamaka, ne nepɨmatsiparewieni”.
ISA 41:14 Kakuwu kwitsi, pepɨkamaka, 'Ixaheri 'etsipemɨpe ―Yawé mɨpaɨ kanaineni―, yaxeikɨa netsiere nekamaniparewimɨkɨ, Mɨpatsie 'Ixaheri hetsiemieme matsiwikwetsitɨwame kanihɨkɨtɨni.
ISA 41:15 »'Ekɨ tipɨname nekamanayeitɨamɨkɨ pehekwame meta pe'atamɨariekame, hutakɨa peheutixikakaunime. Hɨri pepɨtipɨna, tumuanari pekaneyeitɨamɨkɨ, hɨri 'amanutitɨtɨ mɨaxa pepayeitɨani.
ISA 41:16 Pekaniwarexɨrimɨkɨ, meta 'eka kanenu'enitsitɨamɨkɨ, 'eka mɨtɨrɨkaɨye kaniwataxɨriexɨamɨkɨ. Peru 'ekɨ Yawé hetsie petiwiyatɨ pekaniyutemawiekamɨkɨ, 'Ixaheri hetsie Mɨpatsie kɨmana pekani'ata'ɨrimɨkɨ.
ISA 41:17 »Tixaɨtɨ memɨkatehexeiya meta memɨteheuyehɨwa haa mekanikuwautɨweni, matsi mepɨka'itaxeiyawawe, harimɨyakɨ waneni pɨwawaki. Peru ne, Yawé, nepɨwata'eiya, ne, 'Ixaheri Kakaɨyarieya, nepɨkawaku'eirieni.
ISA 41:18 Haa nepanetɨaxɨani hɨrite muwawakitsie, meta mayeweweritsie haixa nepetinetɨaxɨani. Makumawetsie haa xuaweme nepayeitɨani, meta makuwakitsie haixa xuaweme nepayeitɨani.
ISA 41:19 Makumawetsie nekatinikayatsamɨkɨ, kariuxa, meki, tsikwai kɨyeyari meta huriwu. Kwie muwakitsie huku mɨxexeurawi nekanikayatsamɨkɨ, huku yunɨkame metatsiere kwetsi kɨyeyari,
ISA 41:20 teɨteri memɨnenierekɨ meta mɨpaɨ memɨtemaikakɨ, meta kwi memɨyɨ'ɨwiyakɨ meta mɨpaɨ memɨtehetimamatenikɨ, Yawé tɨrɨkariyaya mɨyamɨtiuyurikɨ, 'Ixaheri Kakaɨyarieya mɨpatsie mɨtiutawewikɨ.»
ISA 41:21 Yawé mɨpaɨ kanaineni: «Yuhetsie xekeneutanua, xeketeneuhekɨata naime kexemɨteheima —Kakuwu ti'aitɨwameya mɨpaɨ kanaineni—.
ISA 41:22 Hurawa xekenakɨni meta xeketenekuxatani kemɨtiyɨni, meta kemɨtiɨyɨ meripaitɨ, mɨpaɨ temɨtemaikakɨ kehepaɨ mɨtiyeyɨximekai. Xeketateneutaxatɨa kemɨtiyɨni 'uxa'awarie.
ISA 41:23 Yaxekeneutiyua 'uxawarietɨni kemɨtiyɨni, 'ana mɨpaɨ tepɨtehetimani kename xeme xekakaɨyarixi. Yɨkɨ xeketeneuyuri, 'aixɨa ti'aneme yatɨni 'axati'aneme, temɨnenierekɨ meta temɨtimamanikɨ.
ISA 41:24 Yurikɨ xeme nitixaɨtɨ xepɨkatehɨkɨ, metatsiere tixaɨtɨ yɨkɨ xemɨte'uyurieni xepɨkayɨwawe. Kanixani'eriwani xeikɨa kemɨ'ane mɨxe'anayexei.
ISA 41:25 »Tayeta xeime nekaniuta'inieni, hikɨ kaninuani ne'itahɨaweku, tau manatineikatsie kanenahɨaweni. 'Iwewame hepaɨ yɨ'ɨkakɨ haxu katiniɨpɨnani, te'aitamete haxu hepaɨ katiniwarupɨnani.
ISA 41:26 ¿Kemɨ'ane yaputayɨ meripaitɨ, yatemɨtemaikakɨ? ¿Kemɨ'ane meri yaputayɨ, mɨpaɨ temɨtiyuanikɨ: “Yurikɨ painekai”? Nixewitɨ yapɨka'utayɨ, nixewitɨ pɨka'u'enierie niuki kuxatatɨ.
ISA 41:27 Ne mexɨakame nekanayani Tsiyuni mɨpaɨ nemɨtiutahɨawixɨ: “Neuxei, mekaniu'axɨaniri”. Ne Kerutsaremetsie nemeiyenɨ'a nekanihɨkɨtɨni tupiri niuki 'aixɨa 'anuyɨneme mukuxata.
ISA 41:28 Nekananuyeneniereni watsata, nixewitɨtɨma pumawe, mana watsata 'ɨxatsitawetɨ, nixewitɨ pɨkanetsiku'eiya nemɨwaku'iwawiyatsie.
ISA 41:29 Mɨkɨ yunaitɨ te'itawamete mepɨhɨkɨ. Kememɨteyurie tixaɨtɨ pɨkatihɨkɨ, wakakaɨyarixi 'eka xeikɨa mepɨhɨkɨ, teyu'uximatɨwamete.
ISA 42:1 »'Ikɨ neti'uximayatsiriwame kanihɨkɨtɨni, nemiparewie, nemenayexei, hetsiena mieme nemɨnetemawie, ne'iyari hetsiena nekaniupitɨani, kemɨtiheitserie nuiwarite watsata yakatiniyurimɨkɨ.
ISA 42:2 Pɨkatahiwa, pɨka'enierieni 'utahiwatɨ, kaye 'utɨma pɨkatahiwa.
ISA 42:3 Haka mutapɨnarie pɨka'anumura, kɨxeme witayari tsepa mɨkwauniya pɨka'ikutɨtsani. Kemɨtiheitserie yuheyemekɨ yapɨtiyurieni,
ISA 42:4 pɨkatirukuniuni meta pɨkatiwaɨripieni kepaukake kemɨtiheitserie mitatse'iriya. 'Ateewa haramara tetsita kiekatari 'inɨari niukiyarieya mepɨtakwewie».
ISA 42:5 Kakaɨyari mɨpaɨ kanaineni, Yawé, kemɨ'ane muyuawi mutawewi meta mitaweraxɨ, kemɨ'ane kwie mukama, meta tita mana mɨtixuawe, mana kiekatari teɨteri wa'iiya muwapitɨa, tukari muwapitɨa mana memu'uwa:
ISA 42:6 «Ne, Yawé, heitseriemekɨ nepɨmatsi'anayexei, 'amamatsie nepɨkawierixɨ. Ne nepɨmatsi'utawewi, ne tɨratu nepɨmatsi'ayeitɨa teɨteri wahetsiemieme, hekɨariya pemɨhɨkɨtɨnikɨ nuiwarite wahetsiemieme,
ISA 42:7 memɨkaheuneniere pemɨwaranutanieritɨanikɨ, pɨretsutsixi pemɨwarayehapanikɨ, meta kemɨ'ane yɨriya tsata memu'uwa pemɨwarayehapanikɨ.
ISA 42:8 »Ne Yawé nekanihɨkɨtɨni, mɨpaɨ nekatinitewaka. Hipame kenemɨtimariwe nepɨkawapitɨa, meta nenɨawari kakaɨyarixi nepɨkawapitɨa.
ISA 42:9 Meripaitɨtimieme pɨraye'atɨarieri, hikɨta hekwame nepɨtikuxata, mɨpaɨ katiyɨwekaku 'akuxi nepɨtikuxata».
ISA 42:10 Yawé hetsiemieme xeime kwikari hekwame xekeneutakwika, xeme, haramaratsie xematineika, meta yunaitɨ mana xemɨye'uwa, xekeneutikwikani kwie manu'axe xemɨtitei, xeme, 'ateewa haramara tetsita xemɨtitei.
ISA 42:11 Xeme makumawetsie meta kiekarite mana mukumane xekeneutihiwani, meta kiekarite hakewa Tseraxi meyeika. Tsera kiekatari temawierikakɨ meke'utikwikani, meta meke'utihiwani hɨri 'amanutitɨtɨtsie paitɨ.
ISA 42:12 Yawé mariwemekɨ xekenekuxatani kwikarieya xekeneutikwikani 'ateewa paitɨ haramara tetsita.
ISA 42:13 Yawé kanayeyeimɨkɨ kuya yumemiwame hepaɨ, tewi yumemiwame hepaɨ 'ɨtetsatɨ. Hiwaritsata kaniyutamiemɨkɨ, memeye'unie kaniwara'iwamɨkɨ.
ISA 42:14 «Mɨixa tukari kayuwatɨ neputamarixɨ, nepɨka'utaniuka meta nepɨtinewie. Peru hikɨ nepɨtahiwa niweyame hepaɨ, nekanitatsuamɨkɨ ne'uta'aiwatɨ kukuiniyakɨ.
ISA 42:15 Hɨrite yemurite nekaniti'unamɨkɨ, naime mana mɨtixuawe nekatinitiwatsiɨxamɨkɨ, haa manuyehapane nekanikawatsiɨxamɨkɨ, meta haa muyemanetsie,
ISA 42:16 memɨkaheuneniere nekaniwaranuwitɨmɨkɨ huyeta memɨkahemaririetsie, huyeta nepɨwaranuwitɨni xewitɨ mɨkahemarietsie, wahetsiemieme yɨriya hekɨariya nepayeitɨani, nepakuweririta mɨkahakuweweritsie. Mɨpaɨ nekatiniyurimɨkɨ, meta nepɨkawaku'eirieni.
ISA 42:17 Peru kakaɨyarixi wahetsie memɨtewiya mepeuyexɨrieni meta tewiyarika mehexeiyatɨ mepakɨne, kemɨ'ane wewiyakate mɨpaɨ memɨtewakɨhɨawe: “Xeme takakaɨyarixi xekanihɨkɨtɨni”.
ISA 42:18 »Xemɨkaheu'enana, xekeneu'enana. Xemɨkaheuneniere, xekeneɨyɨ'ɨwiya.
ISA 42:19 ¿Kemɨ'ane matsi waɨkawa pɨkaheuniere keyuri neti'uximayatsiriwame, meta kemɨ'ane matsi waɨkawa pɨkaheu'ena keyuri neniuki tuayame? ¿Kemɨ'ane matsi waɨkawa pɨkaheuniere keyuri nenɨ'ari, meta kemɨ'ane matsi waɨkawa pɨkaheuniere keyuri Yawé ti'uximayatsiriwame?
ISA 42:20 'Ekɨ pepɨtiuxei waɨkawa, peru 'atsipepɨkaretimaiwe, pepɨwatixaxawa 'anakata, peru nitixaɨtɨ pepɨkati'enie».
ISA 42:21 Yawé puyukatemawi, kemɨtiheitserie tinaki'erietɨ, 'aitsikaya mɨmariwenikɨ witsi'anetɨ.
ISA 42:22 Peru 'ikɨ teɨteri mepɨte'unawatsiyarie meta mepɨte'unawaiyarie yupiinite, yunaitɨ terɨta meputiwiyarie yatɨni mepanutaxɨriya xaɨtsie paitɨ. Mepɨte'unawatsiyarie, nixewitɨ wahetsie pɨkanua, mepɨte'unawaiyarie yupiinite, nixewitɨ wahetsiemieme pɨkahaniuka.
ISA 42:23 ¿Kemɨ'ane xeme 'ikɨ pɨti'enieni, 'arikeketa kemɨ'ane 'ikɨ pɨtitaxata?
ISA 42:24 ¿Kemɨ'ane Kakuwu pɨyetua mɨtinawaiyarienikɨ yupiinite yatɨni kemɨ'ane 'Ixaheri pɨyetua mɨtinawatsiyarienikɨ? Yawé kanihɨkɨtɨni kemɨ'ane hetsiena mieme teɨterimama 'axamemɨte'uyuri. Huyeya mepɨka'anukuwei meta 'aitsikaya mepɨka'anu'eni.
ISA 42:25 'Ayumieme Yawé hetsiena yuhaxɨa pukawiwi, haxɨa kuyaxa mieme pipitɨa. Taikɨ penukana, peru 'atsipɨkaretima, pitaxɨtsitɨa, matsi mɨkɨ yakɨ yɨaneme puta'eri.
ISA 43:1 Peru hikɨ Yawé mɨpaɨ kanaineni, Kakuwu, mɨmatsi'unetɨa, 'Ixaheri, mɨmatsi'uta'iwewaxɨ: «Pepɨkamaka, ne nekameniutawikweitsitɨani, ne nekamenahɨaweni kepemɨtitewakɨ, 'ekɨ nehetsɨa mieme pekanihɨkɨtɨni.
ISA 43:2 Kepauka hapa pemuyani, ne 'ahamatɨa nekaniumiemɨkɨ, kepauka hatuxametsie pemanuyani, haa 'aheima pɨka'uyeuriweni, kepauka taipa pemumieni, pepɨkakwaxe pepɨkatatani,
ISA 43:3 Ne Yawé nekanihɨkɨtɨni, 'akakaɨyari, Mɨpatsie 'Ixaheri hetsiemieme, matsiwikweitsitɨwame, ne 'Ekipitu nekaniyetuani nemɨtinetuanikɨ 'ahetsiemieme nemɨmatsitawikweitsitɨanikɨ, Kutsi meta Tsewa mame.
ISA 43:4 'Ekɨ 'ahetsiemiemekɨ teɨteri nekaniwayetuamɨkɨ, 'atukari hetsiemieme hipame kiekari nekaniwayetuamɨkɨ. Ne nemɨmatsinaki'eriekɨ, witsinemɨmatixeiyakɨ meta 'ekɨ waukawa pepɨraye'axe.
ISA 43:5 Pepɨkamaka, ne 'ahamatɨa nekaniuyeikani, tau manatineika hepa meme'uwa 'anuiwarima nekaniwa'atɨamɨkɨ, meta tau makayuyuipike hepa meme'uwa nepɨwa'atɨani nemɨxekuxeɨrienikɨ.
ISA 43:6 Tayeta mieme mɨpaɨ nekatinitahɨawimɨkɨ: “Keniwayetua” meta tatsutɨa mieme mɨpaɨ nekatinitahɨawimɨkɨ: “Pepɨkawarukununuitɨwani”. Xekeniwa'atɨa neniwema 'ateewa paitɨ memu'uwa meta neniwema 'ukari kwie manu'axe memu'uwa.
ISA 43:7 Yunaime xekeniwa'atɨa kemɨ'ane nehetsiemieme mematerɨwarɨwa, kemɨ'ane mɨnetsinɨawanikɨ nemitawewi, kemɨ'ane nemitawewi meta nemita'iwewaxɨ”».
ISA 43:8 Kiekari mɨkaheuniere xekenayeweiya, tsepa netɨ mɨrekahɨxi, kiekari mɨkaheu'ena, tsepa netɨ nakate mexeiya.
ISA 43:9 Meke'uyukuxeɨrieni yunaitɨ nuiwarite meta kiekarite mekeyukuxexeuriwani. ¿Kemɨ'ane mɨkɨ watsata xewitɨ 'ikɨ niuki putaxataxɨ meta kemɨ'ane pɨtatiutaxatɨa meripaitɨ kemɨtiɨyɨ? Memunenierixɨ mekewaruxeɨrieni mɨmatsiɨkɨrekɨ kename yuri me'utiyuane, hipatɨta memɨ'enananikɨ mɨpaɨ memɨtiyuanikɨ: «Puyuri».
ISA 43:10 Yawé mɨpaɨ kanaineni: «Xeme nehetsɨa miemete xekanihɨkɨtɨni xemunenierixɨ, nete'uximayatsiriwamete nemɨxe'anayexei, xemɨnetsimatenikɨ meta nehetsie yuri xemɨte'eriekakɨ, meta mɨpaɨ xemɨtemaikakɨ kename Ne nehɨkɨ. Meripaitɨ ne 'akuxi neka'uyeikakaku xewitɨ kakaɨyaritɨtɨ 'apɨka'uyeikakai, meta ne'utɨma xewitɨ pɨkatineni.
ISA 43:11 Ne, Yawé nekanihɨkɨtɨni, tawarita xewitɨ tiyuwikweitsitɨwame kaniumaweni.
ISA 43:12 Ne nekatiniutaxata, nekanixe'utawikweitsitɨani meta neniuki nekaniutaxata. Ne nekatiniuyurieni xetsata, hawaikɨ xewitɨ kakaɨyaritɨtɨ mɨpaɨ pɨkatiuyuri». Yawé mɨpaɨ kanaineni: «Xeme xemunenierixɨ xekanihɨkɨtɨni, neta Kakaɨyari nekanihɨkɨtɨni.
ISA 43:13 Meripaitɨtɨ, Ne nekanihɨkɨtɨni. Nixewitɨ nemamatsie muyuxɨna pɨkayɨwe. Kenemɨtiyurieni, nixewitɨ pɨka'itatara».
ISA 43:14 Yawé mɨpaɨ kanaineni, xewikweitsitɨwame, Mɨpatsie 'Ixaheri hetsiemieme: «Xehetsiemieme teɨteri Wawiruniya nepɨwaranɨnɨ'ani, yunaime nepɨwataxɨriexɨani yu'unamete nepuwarayeitɨani. Kanuwa 'amupapa hetsie kɨmana memɨyuti'ɨrekaitsie, karireutsixi nepɨwara'iwa.
ISA 43:15 Ne Yawé nekanihɨkɨtɨni, mɨpatsie, tixe'aitɨwame, 'Ixaheri nuiwariyari nemukama».
ISA 43:16 Yawé mɨpaɨ kanaineni, kemɨ'ane haramaratsie huye mutawewi, 'anuyeyɨkɨme mayeitɨa haramara 'uyuanekaku,
ISA 43:17 kemɨ'ane kaxetate kuyaxamieme mɨwarayewitɨ meta kawayutsixi, kuyaxi meta kuyaxa wewiwamete, mɨkɨ 'amemukuhi tawarita memɨka'anuku'unikɨ, kɨxeme witayari hepaɨ kaniɨtɨni:
ISA 43:18 «Xeketenatɨmaiya meripaitɨ timieme, meripaitɨ hepaɨ xepɨkate'u'uwani.
ISA 43:19 Hekwame nekatininetɨamɨkɨ. 'Ari yakatiniyɨaneni, ¿Kari xepɨkatemate? Makumawetsie huye nekaniwewieneni, meta nitixaɨtɨ mɨkaranuyeikatsie haixa nekaniwewieneni.
ISA 43:20 Yeuta memɨte'u'uwa mekanenayexeiyani, yawixi memayu'eririya meta 'aruxi 'amemɨnene, haa makumawetsie nepanenetɨwa, meta nitixaɨtɨ mɨkaranuyeika hatuxame nekananuyetu'ani, neteɨterima nemɨwaranayexei nemɨwatiharitɨanikɨ,
ISA 43:21 neteɨterima nehetsiemieme nemuwarutawewi, memɨnetsinɨawanikɨ naitsarie.
ISA 43:22 »Peru 'ekɨ Kakuwu, pepɨkanetsihahɨawe, 'ekɨ 'Ixaheri, peputi'uxixɨ nehetsiemieme.
ISA 43:23 Muxa pepɨkanetsi'atɨiriewe 'amawari taiyariyari, nehetsiemieme yapepɨkatikamie 'amawarikɨ. Peru nepɨkamatsi'uximatɨa hatsi mawariyari pemɨwewienikɨ, meta 'ɨkwa witsimu'ɨa pemɨtaiyakɨ.
ISA 43:24 Pepɨkanetsinanairiewe 'uwá witsimu'ɨa, meta 'amawarite wiyayarikɨ pepɨkanetsihuxaitɨa. Matsi, 'ekɨpɨta 'axapepɨneranutahɨawe 'axakepemɨtiuyurikɨ meta pepɨnetsiwaɨripitɨa 'axapetiyurienetɨ.
ISA 43:25 »Ne matsi nekɨmana nemɨnenaki'eriekɨ 'aitsikaya pemutitsanaxɨkɨ nekananuyeitɨani, meta tawariri 'axakepemɨtiuyurikɨ nepɨkaha'eriwa.
ISA 43:26 Kenenaye'eritɨa kuta. Tepuyutaxaneta, yakeneutayɨki xɨka yakɨ xeikɨa petiukwinitɨarieni.
ISA 43:27 'Axiɨyari mexɨakame 'axakatiniuyurieni, 'aniukamete menetsi'aye'unietɨ mekanakɨne.
ISA 43:28 'Ayumieme tukita memɨte'uximayakai nitixaɨtɨ nepɨkatiwarayeitɨa, Kakuwu nepɨyetua mɨka'unarienikɨ naitɨ, 'Ixaheri nepɨyetua mɨtixani'eriwakɨ.
ISA 44:1 »Peru hikɨ, Kakuwu, neti'uximayatsiriwame, 'Ixaheri, nemɨmatsi'anayexei, keneu'ena.
ISA 44:2 Yawé mɨpaɨ kanaineni, kemɨ'ane mɨmatsi'unetɨa, kemɨ'ane 'amaama hetsie mɨmatsikaye, mɨkɨ pɨmatsiparewimɨkɨ: “Kakuwu pepɨkamaka, neti'uximayatsiriwame, Ketsuruni, nemenayexei,
ISA 44:3 kwie meuharimɨkɨ hakɨ nekanakuhatuiyamɨkɨ, kwie mɨwaki, haixa 'akiyari nekaniuyetuaxɨamɨkɨ, ne'iyari 'anuiwarima nekaniwapitɨamɨkɨ, meta 'aixɨa nekaniwayurimɨkɨ kemɨ'ane memɨtiyɨrarɨme 'anuiwarima,
ISA 44:4 Mayeweritsie tupiriya kemɨranukɨyɨyɨra mɨpaɨ mepɨtetayɨra, hapuri 'aki'utɨma mɨnewe hepaɨ.
ISA 44:5 Xewitɨ mɨpaɨ pɨtayɨni: ‘Yawé hetsɨa nepɨmieme’, xewitɨta Kakuwu nuiwarieya payuyeitɨwani, xewitɨta yumamatsie mɨpaɨ pɨre'utɨaka: ‘Ne Yawé hetsɨa nepɨmieme’, meta 'Ixaheri pɨtiyuterɨwani”.
ISA 44:6 »Yawé mɨpaɨ kanaineni, Yawé Naimekɨmɨtɨrɨkaɨye, 'Ixaheri ti'aitameya meta 'iwikweitsitɨwame: “Ne mexɨakame nekanihɨkɨtɨni meta 'imatɨreme netɨhɨkɨ, tawarita xewitɨ kakaɨyaritɨtɨ kaniumaweni.
ISA 44:7 ¿Kemɨ'ane nehapaɨ pɨ'ane? Yake'utayɨni. Yake'utayɨni kemɨratiyɨxime kepauka nekiekari meripaitɨtɨ nemukamatsie, yake'utayɨni kemɨtiyɨni 'arike, kehepaɨ mɨtiyɨni ketikuxatani.
ISA 44:8 Xepɨka'uyɨyɨakatɨkani nixepɨkamamaka. ¿Xekateha'eriwa nemitahekɨataxɨ meripaitɨ? Xeme xemunenierixɨ xekanihɨkɨtɨni. ¿Tawarita xewitɨ Kakaɨyari tiuyeika? Hawaikɨ, tawarita xewitɨ 'Ai pumawe, ne xeime tawarita nepɨkamate”».
ISA 44:9 Kakaɨyarixi memɨwatiwewiwa tixaɨtɨ mepɨkatehɨkɨ, wawewiya kwinimieme mɨraye'axe yakɨxeikɨa pɨtihɨkɨ. Yutewinɨarika puyuriene, kemɨ'ane memixeiya mepɨkatemate mepɨkaneniere.
ISA 44:10 ¿Kemɨ'ane kakaɨyaritɨme puwewie yatɨni tepɨakɨ pitakwaxiya nitixaɨtɨ katiyunaki'eriekame hetsiena mieme?
ISA 44:11 Kemɨ'ane memeyexeiya mɨkɨ mekaniyutewiyatsitɨakuni, tewewiwamete teɨteri xeikɨa mepɨhɨkɨ. Yunaitɨ mɨkɨ nehetsɨa mekeye'axɨani, memamatɨ meta meyutetewiyatɨ yunaitɨ mɨkɨ mekaniyuhayewakuni.
ISA 44:12 Tepɨakɨ ti'uximayatame tepɨa kaniutikwekweweni, kɨmana tɨɨpa katini'uximayaka, titsunamekɨ kakaɨyaritɨme kaniutawewiwani, kemɨreutɨrɨkaɨye katiniuta'uximayatani. Heuhaakamɨtɨ, 'uxetɨ, kaharetɨ, meta 'ari 'anutarɨwewetɨ.
ISA 44:13 Kɨyekɨ ti'uximayatame katiniuti'inɨnɨatani ti'inɨnɨatamekɨ, katiniuta'utɨwani kɨyetsie, tepɨa 'i'inemekɨ katiniuta'uximayatani, meta xikɨraɨyeme kaniutawewiwani. Tewi hepaɨ 'aneme kaniutawewiwani, tewi mu'uya kaniuta'ɨkeni, tukita mayewenikɨ.
ISA 44:14 Kariuxa mekanawitekeni, huku mɨxexeurawi meta tuaxa mekaniutayayatsani, mana mekanikuhayeikawani mɨtiwawerekɨ, yatɨni huku mekaniukayayatsani wiyeri mitiweriyakɨ.
ISA 44:15 Tewi tikwaxiyamekɨ kaneiyehɨaka, yapaɨmemekɨta kaniutikɨxeweni, 'atinaime papa kaniuta'ɨariyani. Metatsiere kɨmana kakaɨyaritɨme kaniutawewiwani hɨxiena kaniukatunumakekani, kakaɨyaritɨme tawewieme hɨxiena kanakatutsitani.
ISA 44:16 Hixɨapa 'akame kɨyexi kanititaiyani, mɨkɨkɨ yu'ikwai kaniukawewiwani, mana wai kaniutawarɨkani, mɨkɨkɨ kaniutahuxarɨwani. Metatsiere kaniutikɨxeweni, mɨpaɨ 'utaitɨ: «'Ari nepɨtaxɨrirɨmeri, tai ne'anutaxeiyatɨ».
ISA 44:17 Peru yapaɨmetɨ mɨyuhayewaxɨkɨ, yukakaɨyaritɨme kaniutawewiwani, hɨxiena kaniukatunumakekani. Waɨkawa 'iwawirietɨ mɨpaɨ tikɨhɨawetɨ: «Keneneutawikweitsitɨa, 'ekɨtsɨ nekakaɨyari pekanihɨkɨtɨni».
ISA 44:18 'Atsimepɨkatemate, tixaɨtɨ 'atsimepɨkatehetimaitɨkɨka, wahɨxite peukutsiku, mepɨkaneniere, mepɨkatemaiwawe, mepɨkaheiti'enietɨkɨka.
ISA 44:19 Memɨtemaika meta memɨtemaiwaweni pɨwareuyehɨwa, mepɨkayu'iyaritɨa meta mɨpaɨ mɨtayɨni mepɨkayɨwawe: «Kɨye hixɨapa 'akamekɨ nepatinai, papa nekaniuta'ɨariya tɨɨtsie, wai ne'utawarɨkaka nepitakwai. ¿Kamɨtsɨ netiyɨwe tixaɨtɨ tixani'eriwame nemayeitɨani kɨyexi mana mɨtihekɨ? ¿Kɨye yatewime hɨxie netititunumakeni?»
ISA 44:20 Naxikɨ mepɨtekwa'a, xe'iyari kemɨtiyɨkɨhɨawe xepiweiya pɨtixe'itaiya, yɨkɨmana xemuyutawikweitsitɨani xepɨkayɨwawe, meta mɨpaɨ xemutiyuani: «'Ikɨ nemɨrexeiya katini'itarikatɨni».
ISA 44:21 «Kakuwu kena'eriwani 'ikɨ, 'ekɨ neti'uximayatsiriwame pekanihɨkɨtɨni, 'Ixaheri. Ne nekameniunetɨani, 'ekɨ neti'uximayatsiriwame pekanihɨkɨtɨni, 'Ixaheri, ne nepɨkametsihatɨmaiya.
ISA 44:22 'Aitsika pemutitsanaxɨakɨ neputayeitɨa haiwitɨri ximeri mieme hepaɨ, metatsiere ke'axapemɨtiuyuri nepekuyeitɨa haɨtsi hepaɨ. Nehetsɨa kenenua, nekameniutawikweitsitɨani».
ISA 44:23 Muyuawi taheima mieme temawierikakɨ xekeneutikwikani, Yawé 'ikɨ katiniuyurieni. Karima xekeneutihiwani, meukatewatsie kwieta. Hɨrite xekenekwikani, meta muhukuya, naitɨ yukɨyeximatɨ. Karikɨ Yawé Kakuwu kaniutawikweitsitɨani, Kakaɨyari kemɨtimariwe 'Ixaheri kaniuhekɨatsitɨiya.
ISA 44:24 «Yawé mɨpaɨ kanaineni, Metsiwikweitsitɨwame, kemɨ'ane 'amaamatsie mɨmetsikaye: »“Ne Yawé nekanihɨkɨtɨni, naime mɨtiutiwewi, ne nexaɨta muyuawi 'anekaniuyemani meta kwie 'anekanikumani. ¿Kemɨ'ane 'ana nehamatɨa puyeikakai?
ISA 44:25 »”Kakaɨyari niukametemama memɨte'itawa wa'inɨari yanepɨkaraye'atɨwa, meta memɨtehetimamateke nepuwatewiyatsitɨa, memɨtemaiwawe mekatemaiwaweme nepɨwarayeitɨwa meta kememɨtemaiwawekɨ tixaɨtɨ katiyunaki'eriekame nepayeitɨwa.
ISA 44:26 Nete'uximayatsiriwamete waniuki nepaye'atɨwa meta netupiritsixi waniuki nepaye'atɨwa. Ne mɨpaɨ nekanaineni Kerutsareme tawarita kiepa kanayeimɨkɨ, kiekarite Kura kwieyaritsie miemete kananukakitsiemɨkɨ, mu'u'uni 'aixɨa kaniti'itɨariemɨkɨ.
ISA 44:27 Ne mɨpaɨ nekanaineni haramara mɨmariwe ke'akawani, meta haa mana meukayuyune ke'ukawaxɨani.
ISA 44:28 Ne mɨpaɨ nekanaineni Tsiru nemuxatsi wahɨweme kanihɨkɨtɨni, kemɨnetinake mɨkɨ yapɨtikayani, yapɨtitanaki'erieni Kerutsareme manukakitɨarienikɨ, meta tuki tenariyari manukuwewiyanikɨ”».
ISA 45:1 Yawé mɨpaɨ Tsiru katinahɨaweni, menayexei, kemɨ'ane mamaya tserietanatsie mɨtiwierixɨ nuiwarite mɨtiwata'aitɨanikɨ, meta te'aitamete watepɨate mɨwanawairienikɨ, memanutakɨnetsie kiteniete mɨreuyepiexɨanikɨ, meta kiteniete reuyepietɨkaime mɨhayewaxɨanikɨ:
ISA 45:2 «'Ahɨxie nepumieni, hɨri meutiteitsie nepɨrakuweririta, wurunitse 'itupariyarite nepɨtitara, meta tepɨa meuku'uwetɨka nepanuxitexɨani.
ISA 45:3 Yɨwita timieme mɨraye'axe nepɨmatipitɨani, meta piinitɨarika 'awie mɨti'utsie, ne Yawé nemɨhɨkɨ mɨpaɨ pemɨtimaikakɨ, 'Ixaheri Kakaɨyarieya, kepemɨtitewakɨ mɨmatsihaterɨwa.
ISA 45:4 Kakuwu neti'uximayatsiriwame hetsiemieme, 'Ixaheri nemenayexei, nepɨmetsihahɨawe kepemɨtitewakɨ, meta 'aixɨa pemɨtixeiyariekakɨ mɨpaɨ nepumatiuterɨwaxɨ, tsepa 'ekɨ pemɨkanetsimate.
ISA 45:5 Ne Yawé nekanihɨkɨtɨni, tawarita xewitɨ pumawe, tawari xewitɨ Kakaɨyaritɨtɨ pumawe. Tsepa 'ekɨ pemɨkanetsimate, ne nepɨmatsitɨrɨkariyani,
ISA 45:6 mɨpaɨ xemɨtemaikakɨ tau manatineika hepatsie meta makayuyuipiketsie tawarita xewitɨ Kakaɨyari kaniumaweni. Ne Yawé nekanihɨkɨtɨni, tawarita xewitɨ kaniumaweni.
ISA 45:7 Ne hekɨariya nekaniunenetɨwani meta yɨriya, 'aixɨa mɨti'ane nekatini'atɨwani meta 'uximatɨarika, ne, Yawé, naime 'ikɨ nekatiniunenetɨwani.
ISA 45:8 »Wiyeri keneukaxɨrɨwani muyuawi meutitewatsie, haiwitɨri, tita mɨtiheitseriekɨ keneukawiwiyeni. Kwie huhutakatɨ ke'anutayepierixɨani. Wikweitsitɨarika ke'utineni. Hamatɨana ke'utawere tita mɨtiheitserie. Ne, Yawé, nekaninetɨani».
ISA 45:9 Xɨa'ui kemɨ'ane mɨniukixie mitawewi hepaɨtsita. Xɨa'ui kemɨ'ane mɨtari mɨtitariwe kwiepa timieme tsata. ¿Kamɨtsɨ tiyɨwe haxu kemɨ'ane mipɨna mɨpaɨ mɨtiutahɨawe: «Kepemɨtiyuriene kene'a'ɨwiya. 'Aye'ɨ pɨkahawiwietɨkari.»?
ISA 45:10 Xɨa'ui kemɨ'ane yupaapa mɨpaɨ mɨranutahɨawe: «Neuxei ketitayari penetiutinuiwitɨa». Xɨa'ui yumaama mɨpaɨ mɨranutate'a: «Neuxei ketitayari penetiutiniwexɨ».
ISA 45:11 Yawé mɨpaɨ kanaineni, Mɨpatsie 'Ixaheri hetsiemieme, mitawewi: «Xeme neniwema wahetsiemieme xemɨnetsi'uta'iwawiya 'uxa'atɨni kemɨtiwayurieni pɨkayɨwe, yatɨni yaxemɨnetetahɨawekɨ kenemɨtiyurienikɨ.
ISA 45:12 Ne kwie nekaniutawewieni, hetsiena teɨteri nekaniwarunetɨani. Nemamate katiniuyurieni muyuawi 'amuyemanaxɨ, meta mana xurawetsixi memuyeyaxekɨ nekaniwaruta'aitɨani.
ISA 45:13 Tsiru hetsiemieme kemɨtiheitseriekɨ nekatiniyurimɨkɨ, huyeya heitserie nekaniuyetemɨkɨ. Mɨkɨ nekiekari kananukuketɨamɨkɨ, meta kemɨ'ane memanutaxɨriya kaniwatixɨnamɨkɨ, peru tixaɨtɨ tuminikɨ meta 'axamɨtayɨnikɨ xɨka xewitɨ tumini 'i'ɨitɨaka. Ne mɨpaɨ nekanaineni, Yawé Naimekɨnemɨtɨrɨkaɨye».
ISA 45:14 Yawé mɨpaɨ kanaineni: «'Ekipitu mɨtiwewiya meta piinitɨarika Kutsi timieme, naitɨ 'apiinite katinayeimɨkɨ, tsaweutsixi, teɨteri kwinimieme memɨtɨtɨ, 'a'utɨa mepuhuni tepɨakɨ mehɨatɨkaitɨ. 'Ahɨxie mepɨtitunuma'uni, waɨkawa memetsiwawirietɨ mɨpaɨ mepɨtiyuani: “Yuxewitɨ xeikɨa Kakaɨyari 'apuyeika tawarita xewitɨ pumawe, mɨkɨ Kakaɨyari 'ahamatɨa puyeika”».
ISA 45:15 'Ekɨ, Kakaɨyari meta 'Ixaheri wikweitsitɨwame, 'ekɨ Kakaɨyari pemɨkahekɨa pepɨhɨkɨ.
ISA 45:16 Yunaitɨ kemɨ'ane kakaɨyarixi memɨwawewie mepɨtewiyatsitɨarieni meta nitixaɨtɨ mepɨkatehayeitɨarieni, nitixaɨtɨ mekatehɨkɨtɨtɨ mepɨyehu.
ISA 45:17 Peru 'Ixaheri Yawé pitawikweitsitɨani, yuheyeme wikweitsitɨarikakɨ, tawarita hatsuaku pɨkatewiyatsitɨarieni meta tawariri tixaɨtɨ pekatihɨkɨtɨtɨ pepɨka'ayeitɨarieni.
ISA 45:18 Karikɨ Yawé mɨpaɨ kanaineni, kemɨ'ane muyuawi 'amuyema, Kakaɨyari kwie mutawewi, minetɨa meta 'amiyeye, makumawenikɨ mɨka'itawewi, mitawewi mana mɨkiepatɨnikɨ: «Ne Yawé nekanihɨkɨtɨni, tawarita xewitɨ kaniumaweni.
ISA 45:19 Hawaikɨ 'ikɨ kwieyari mɨyɨwitsie 'awiekamekɨ nepɨkaxetahɨawiwe. Meta Kakuwu nuiwarimama mɨpaɨ nepɨkatiwatahɨawiwe: “Xekeneneutiwawa peru xepɨkanetsitaxeiya”. Ne, Yawé, nepɨtikuxata tita mɨtiheitserie, meta yanepaine tita 'aixɨa mɨti'anekɨ.
ISA 45:20 »Xekeneuyukuxeɨri xemeyuta'unaxɨa nuiwarite watsata, xekeneuyukuxeɨri, xekenakɨni. 'Atsimemɨkatemate mekanihɨkɨtɨni kemɨ'ane kɨye kakaɨyarixiyari memɨwarɨ'ɨ, meta kakaɨyarixi wahɨxie memuyunenewixime memɨkateyuwikweitsitɨwa.
ISA 45:21 Yaxekeneutiyua, xeketeneutahekɨata. ¿Kemɨ'ane 'ipaɨ putayɨ meripaitɨ, kemɨ'ane yaputayɨ meripaitɨ? ¿Kamɨtsɨ ne, Yawé, yanekatiutayɨ? Tawarita xewitɨ Kakaɨyari kaniumaweni, Kakaɨyari heitserie hexeiyatɨ meta tiyuwikweitsitɨwatɨ, tawarita xewitɨ kaniumaweni.
ISA 45:22 »Nehetsɨa tawarita xekeneu'axɨa, xemɨtawikweitsitɨarienikɨ, yunaitɨ kwie manu'axetsie paitɨ xemu'uwa, karikɨ ne nekanikakaɨyaritɨni, tawarita xewitɨ kaniumaweni.
ISA 45:23 Ne mɨpaɨ yurikɨ nekaniuyuhɨritɨani nehetsiemieme, heitseriekamekɨ yanekaniutayɨni niuki nemɨka'ipatakɨ: Nehɨxie yunaitɨ mepɨkatunuma'uni, nehetsiemieme yamepɨteyuhɨritɨani yunaitɨ teɨteri.
ISA 45:24 Mɨkɨ mɨpaɨ mepɨtiyuani nehetsiemieme: “Yawé hetsie xeikɨa kanixuaweni tita mɨtiheitserie meta tɨrɨkariya”». Yunaitɨ kemɨ'ane memiyehekaxɨ mɨkɨ hɨxie mekaniti'uikuni, mekanitewiyatsitɨariekuni.
ISA 45:25 Matsi yunaitɨ 'Ixaheri nuiwarimama Yawé katinehekɨatamɨkɨ heitserie kememɨtehexeiyakɨ meta 'aixɨa kememɨtexeiyarie.
ISA 46:1 Weri panakatutsi, Newu kwiepa kaniukaweni, wakakaɨyarixi tetɨkɨmete wahetsie meputɨkiexime. Wa'ɨkiyarite 'ahetetɨ naitsarie pukɨtɨkiene, 'ika mɨtiyu'uxitɨwa pɨhɨkɨ xeikɨa.
ISA 46:2 Mana 'axeikɨa yunaitɨ mekaniyuyetuani meta mekananakatutsireni, 'ika memukuwikweitsitɨani mepɨkayɨwawe, mɨkɨtɨtɨ memanutaxɨriwatatsie mekanekɨkani.
ISA 46:3 «Kakuwu tɨɨriyamama, xeneneu'eni, 'Ixaheri niwemama yunaitɨ kexemɨyupaɨme, huriepapaitɨ xeyeteme nemɨxe'utitɨkixɨ, meta warɨitsie nemɨxe'utiwaweriyaxɨ.
ISA 46:4 Meta kepauka 'akuxi xemu'ukirawetsixitɨni meta xemumutuxatɨkanitsie, ne mɨkɨ yaxeikɨa nekanihɨkɨtɨkamɨkɨ, ne nekanixetuikakamɨkɨ. Ne nekaxeniutiwewieni, nepɨxe'ɨwiyani, nepɨxeparewieka meta nepɨxewikweitsitɨaka.
ISA 46:5 »¿Kemɨ'ane hamatɨa pepɨnetsi'inɨata, kemɨ'ane hepaɨ nepɨ'ane? ¿Kemɨ'ane hepaɨ nepɨtinexexeiya, kemɨ'ane hamatɨa yaxeikɨa tepɨ'anene?
ISA 46:6 Hipatɨ huru yukɨtsiurita mieme mepɨxɨtɨa meta pɨrata ti'inɨnɨatametsie mepɨku'inɨnɨata, xeimeta tiwewiwame meputa'iniwa kakaɨyaritɨme mɨwatawewirienikɨ, mɨkɨ kakaɨyaritɨme hɨxie panakatutsita 'itahɨaweke.
ISA 46:7 Yunaiparitsie me'etetɨ mekanititɨkɨni, manuwekaitsie mekanitaketsani, mana puyukuhayeikawa. Mukuyuaxɨani manuwetsie pɨkayɨwe. Tsepa waɨkawa memihiwie, pɨkawata'eiya, mɨkɨ pɨkayɨwe xe'uximatɨarikatsie mɨxe'utawikweitsitɨani.
ISA 46:8 »Xemɨkateheuyu'enie, 'ikɨ xekena'eriwani, xekeneutimaixɨa, yumu'utsie xekeneye'ɨnani.
ISA 46:9 Meripaitɨ timieme xeketenaye'eri, ne Kakaɨyari nepɨhɨkɨ, tawarita xewitɨ pumawe, ne Kakaɨyari nepɨhɨkɨ, tawarita xewitɨ nehepaɨ 'anetɨ pumawe.
ISA 46:10 Ne yanekaniutayɨni tsutɨa paitɨ kepauka tukari maye'ani, meripaitɨ nepɨtikuxata, kemɨtiyɨni. Ne mɨpaɨ nepaine: Ne kenemaineni yapɨtiyɨni, meta kemɨnetinake yanepɨtiyurieni.
ISA 46:11 Tau manatineika hepa paitɨ 'uyeikame wirɨkɨ wai mukwa'a neputa'iniwa, meta kwiepa 'aheteewametsie, tewi kemɨ'ane kenemɨtiyurieni mɨraye'atɨani nepɨta'inieni. Kenemutayɨ, yanepɨtiyurieni maye'anikɨ, kenemɨtiu'iyaritaxɨ, mɨpaɨ nepɨtiyurieni.
ISA 46:12 Xeme xekeneneu'eni, xe'iyari mɨtsetse'i, tita mɨtiheitserietsie 'ateewa xemu'uwa.
ISA 46:13 Tita mɨtiheitserie nehetsɨa mieme pɨkaheteewa, newikweitsitɨarika kwitɨwari paye'ani pɨkareutere. 'Ari nekani'atɨamɨkɨ. Tsiyuni wikweitsitɨarika nekanipitɨamɨkɨ, meta 'Ixaheri kenemɨtimariwe nepɨxeitsitɨani.
ISA 47:1 »Kenanakaye'a, tumuanaripa keneutayexi, Wawiruniya niweya 'uka 'ɨimari, kwiepa keneutayexi, 'uka karireutsixi waniwe, 'uweni kaniumaweniri. Hatsuakuri witsipetiyɨritɨ witsipe'anetɨ pepɨkatitahɨawarieni.
ISA 47:2 Tete murinayari keneutitu'i, harina keneuyetɨxi, 'ixuriki 'ahɨxie pemeukuwera keneɨkɨxɨna. 'A'iwi keneukutuka, 'a'ɨkate keneutimaweriyaka, hatɨatetsie kenanuye'a.
ISA 47:3 Kepemɨtimawe kanihekɨarimɨkɨ, 'atewiyarika pekanihekɨatamɨkɨ. Ne nekaninekɨhɨamɨkɨ, nixeime nepɨkareuyehɨwirieni».
ISA 47:4 Tatsiwikweitsitɨwame Mɨpatsie 'Ixaheri hetsiemieme kanihɨkɨtɨni, Yawé Naimekɨmɨtɨrɨkaɨye katinitewaka.
ISA 47:5 «Kayuwatɨ ketineuyexi, 'uka karireutsixi waniwe, yɨwita keneutahaki. Tawariri hatsuaku “'uka nuiwarite tiwa'aitɨwame” pemɨkatiterɨwarienikɨ.
ISA 47:6 Ne neteɨterima wahetsiemieme nepɨha'akai, 'ayumieme mekapatsiekame nepuwarayeitɨa nehetsiemiemete. Nepuwayetua 'amamatsie, 'ekɨta pepɨkawarutinenimayataxɨ. 'Ukirawetsixi waɨkawa raheteme pepɨtiwaruta'aitɨa.
ISA 47:7 Mɨpaɨ peputayɨ: “'Uka neheyemekɨ ti'aitame nepɨhɨkɨtɨni”. Peru mɨpaɨ pepɨkatimaikai, meta pepɨkaheitimaixɨa kepemɨreutiparekekai.
ISA 47:8 »Hikɨ 'ikɨ keneu'eni, pemɨtiukahiwe'erie, 'ekɨ kayuwatɨ pemuyeika, mɨpaɨ pemuti'akɨhɨawe: “Ne nekanihɨkɨtɨni, tawarita xewitɨ kaniumaweni. Hatsuaku wiura nepɨkahayani meta neniwema nekawarexeiyatɨ nepɨka'ayani”.
ISA 47:9 Yapauka, xeitukaritsie, naitɨ mɨkɨ 'ahetsie katinaye'amɨkɨ: 'aniwema pekaniwareuyehɨamɨkɨ meta wiura pekanayeimɨkɨ, mɨkɨ mekamenitimariutakuni, tsepa waɨkawa pemɨti'akewaiya meta kepemɨtiuyemate yɨkɨ pemɨtiyurienikɨ.
ISA 47:10 'Ekɨ 'axapemɨtiyurienetsie pepɨtiwiya, mɨpaɨ pekaniutaineni: “Nixewitɨ pɨkanetsixeiya”. Kepemɨtimaiwe meta kepemɨtimate pɨmati'itaiya kepauka 'axɨata mɨpaɨ pemutaine: “Ne nekanihɨkɨtɨni, tawarita xewitɨ kaniumaweni”.
ISA 47:11 Peru 'uximatɨarika kaninuamɨkɨ 'ahetsie pemuwaranayexɨrieni pepɨkayɨweni kepemɨtiuyematekɨ, kwiniya 'ahetsie kaninuamɨkɨ 'ekɨ pepɨka'itawikweiya. 'Ahetsie katininuamɨkɨ kepemɨkati'akɨhɨawetsie, yapauka 'ahetsie katininuamɨkɨ.
ISA 47:12 »Merikɨte, keneyeweiyani, peti'akewaiyatɨ 'ikewari kepaɨmeme pemuyematekɨ, nunutsiyari paitɨ pemiti'ati'ɨkitɨa. Heiwatɨ petiunakitsitɨani, heiwatɨ pemakaxiwatɨ pe'ayani.
ISA 47:13 Waɨkawa 'ɨxatsikɨ pepu'uxe. Muyuawitsie miemekɨ memɨteyɨ'ɨkitɨa 'ahetsɨa miemete meke'uyukuxeɨrieni, xurawetsixi memɨwaxeiya, kemɨtiyɨni memɨtekuxata xeimetseri 'anukayeikakaku, mekematsi'utawikweitsitɨani tita 'ahetsie mɨraye'aximekɨ.
ISA 47:14 Keniwaruxeiya. Mɨaxa hepaɨ mekani'aneni, tai kaniwatixɨtsitɨamɨkɨ. Yɨkɨmana taipa memuyutawikweitsitɨani mepɨkayɨwawe. 'Ena tɨɨ pumawe muyutaxɨriyakɨ, meta tai 'auriena mutiyerɨni.
ISA 47:15 Mɨpaɨ mekani'aneneni teyukewaiyamete 'ahetsiemieme wahetsɨa pemuta'axekai, wahamatɨa nunutsiyari paitɨ pemuyuharerutakai. Mɨkɨ yuxexuitɨ 'axamepɨteyurie, xewitɨ pumawe mɨwatawikweitsitɨanikɨ.
ISA 48:1 »'Ikɨ xeme xeketeneu'eni, Kakuwu tɨɨriyamama, Kura nuiwarimama, 'ixaheritsixi xemɨte'uterɨwarɨwa, Yawé hetsiemieme xemɨyuhɨritɨa, meta 'Ixaheri Kakaɨyarieya memahɨawe, peru yu'iyarikɨ xemɨkayɨa meta kemɨtiheitseriekɨ.
ISA 48:2 Xeme mɨpaɨ xemɨteyuterɨwa “kiekari mɨpatsietsie kiekatari,” 'Ixaheri Kakaɨyarieyatsie yuri xemɨte'erie, Yawé Naimekɨmɨtɨrɨkaɨye mɨtitewa hetsie:
ISA 48:3 Mɨixa panuyemie nepɨtiutaxa meripaitɨ kemɨtiɨyɨ. Ne nepitahekɨataxɨ, netɨtɨ nepɨxe'utaxatɨa. Yapauka mɨpaɨ nepɨtiuyuri, hikɨ yapɨraye'atɨarie mɨkɨ.
ISA 48:4 Ne nemɨtimaikaikɨ 'ekɨ pemɨ'iyari tse'i, 'akɨipi tepɨa mɨhɨkɨkɨ, meta 'anierika wurunitse mɨhɨkɨkɨ.
ISA 48:5 'Ayumieme ne meripaitɨ mɨkɨ nepɨmatiutaxatɨa, nepɨmatiuhekɨatɨa mɨpaɨ 'akuxi katiyɨwekaku, mɨpaɨ pemɨkahainenikɨ: “Mɨkɨ nekakaɨyari mamakɨ muwewiya katiniuyurieni. Mɨkɨ nekakaɨyarixi memɨxixiyatɨka meta memɨtaiyarietɨka mɨyamekateniuyurieni”.
ISA 48:6 Naime 'ikɨ hepaɨtsita pepɨtimate, ¿kamɨtsɨ pekatitaxata? »Hikɨ mɨtiyehane tihehekwame nepɨmatixeitsitɨani, tita mɨti'awietɨ meta tita pemɨkatimate.
ISA 48:7 Hikɨke mɨtiutawewiya katinihɨkɨtɨni, meripaitɨ kapɨtimieme, meripaitɨ mɨkɨ pepɨkati'eniwekai, mɨpaɨ pemɨkahainenikɨ: “'Ari ne mɨpaɨ nepɨtimaikai”.
ISA 48:8 Hatsuaku mɨpaɨ pepɨkati'enawekai, meta mɨpaɨ pepɨkatimaikai, meripaitɨ pepɨkaheu'enakai. Ne nekatinakumaika pemɨtiyukananaima, nunutsiyari paitɨtɨ “mɨrayuye'unie” pekatiniuterɨwarɨwani.
ISA 48:9 Kenemɨtitewa nemɨnaki'eriekɨ nehaxɨa nepɨnewie, nenɨawarikɨ nepuyupirenutɨa, nemɨkametsikumaweriyakɨ.
ISA 48:10 Neuxei. Nekameniu'itieni peru hawaikɨ pɨrata hepaɨ, nekameniuta'inɨata 'uximatɨarika huxunuyarita.
ISA 48:11 Nehetsiemieme nekameniuyurieni. Yanepɨkatinaki'erie nekapatsiekame xemɨnetsi'ayeitɨwanikɨ kenemɨtitewakɨ. Tawarita xeime nepɨkapitɨani witsikenemɨ'anekɨ.
ISA 48:12 »Kakuwu keneneu'eni, 'Ixaheri, nemɨmatsi'anayexei: Ne Kakaɨyari nepɨhɨkɨ, ne mexɨakame nepɨhɨkɨ, meta 'imatɨrieka mieme.
ISA 48:13 Ne'utakɨ kwie 'aixɨa nepuyuri, netseriekɨ muyuawi neputaweraxɨ. Ne nepuwarutaterɨwaxɨ, hikɨ mɨkɨ yunaitɨ mepuhekɨarixɨa.
ISA 48:14 »Xekeneuyukuxeɨri xeme yunaitɨ xekeneu'enana: ¿Kemɨ'ane mɨkɨ xewitɨ pɨtiutaxa 'ikɨ? Yawé minaki'erie yapɨtiyurieni Wawiruniya hetsie, tɨrɨkariyaya karireutsixi wahetsie pɨtinakeni.
ISA 48:15 Ne xeikɨa mɨpaɨ nekaniutayɨni, ne nekanita'inieni. Ne nekani'atɨamɨkɨ, katinayu'iwamɨkɨ kenemɨtita'aitɨani.
ISA 48:16 »Hurawa ne'aurie xekeniwakɨni, 'ikɨ xeketeneu'eni: »Tsutɨa paitɨtɨ, hawaikɨ 'awie nepɨkaretaxa, kepaukata mɨpaɨ mɨtiyɨni, ne mana nepuyeikani». Hikɨta Yawé naimekɨmɨyɨwe pɨnetsiheyenɨ'a 'Iyari yuhetsɨa miemekɨ.
ISA 48:17 Yawé mɨpaɨ kanaineni, Matsiwikweitsitɨwame, Mɨpatsie 'Ixaheri hetsiemieme: «Ne Yawé Kakaɨyari nepɨhɨkɨ, mɨmati'ɨkitɨa tita 'ahetsiemieme 'aixɨa mɨti'ane, mɨmatsi'uwitɨxime kemɨ'ane huye pemuweiyanitsie.
ISA 48:18 Xɨka ne'aitsika pe'u'enienike, kayuwatɨ pemexeiyakɨ hatɨa hepaɨ pɨ'anenike, heitseriekamekɨ kepemɨtiuyeika haramara hamewariyari muwakɨka hepaɨ pɨ'anenike.
ISA 48:19 Xiekari hepaɨ 'anuiwarima mepɨyupaɨmenike, 'aniwema, xiekari 'uriyari hepaɨ, kememɨtetewa hatsuaku mepɨka'akuyeitɨarienikekai, metatsiere nehɨxie mepɨkahayeitɨarienikekai».
ISA 48:20 Wawiruniya kiekariyaritsie xekenayekɨni. Karireutsixi watsata xekenayekɨni xemuyuta'unakɨ. Mɨpaɨ xeketeneutaxata xe'utihiwatɨ temawierikakɨ, meta yunaitɨ meketehetimani. 'Ikɨ niuki xekeneuta hekɨata kwie manu'axe paitɨ, mɨpaɨ xekeneutiyua: «Yawé Kakuwu kaniutawikweitsitɨani tiyu'uximayatsiriwame».
ISA 48:21 Kepauka makumawetsie muwaruwitɨtɨya, mepɨka'uharikwi, yapɨtiuyuri 'aitsie manenikɨ haa wahetsiemieme, tete kaneutara, haixa mana kananexɨani.
ISA 48:22 «'Axamɨtiuka'iyari kayuwatɨ pɨkahexeiya», Yawé mɨpaɨ kanaineni.
ISA 49:1 Xekeneneu'eni, haramara tetsita 'ateewa xemeutitei, 'ikɨ xeketeneu'eni, nuiwarite teewatari: Yawé pɨnetsi'anayexei nekatinuiwawekaku 'akuxi, nemaamatsie neyekaiku pɨnetsi'utaterɨwaxɨ.
ISA 49:2 Neteta 'ixipara 'atamɨariekame patike, pɨnetsi'uti'awietaxɨ yumamá 'etɨrieyatsie, 'ɨrɨ hepaɨ witsine'aneme pɨnetsihayeitɨa, meta pɨnetsi'uti'awietaxɨ yɨ'ɨrɨ 'uitɨwameta.
ISA 49:3 Mɨpaɨ kanetiniutahɨawe: «'Ixaheri, 'ekɨ neti'uximayatsiriwame pepɨhɨkɨ, 'ahekɨ 'aixɨa nepɨtitahɨawarieni».
ISA 49:4 Neta mɨpaɨ neputayɨ: «Yakɨ xeikɨa nepɨti'uximaya, neputiwaɨripiri 'atsinekatiyuriwetɨ. Peru heitserie kenemɨrexeiya Yawé mamayatsie pɨti'ane, tita nemɨra'iwaxɨ nekakaɨyari hetsɨa pɨrekupine».
ISA 49:5 Hikɨta Yawé mɨpaɨ kanaineni, nemaamatsie mɨnetsikaye, ne ti'uximayatame hetsiena mieme nemayanikɨ, Kakuwu nemɨ'atɨanikɨ hetsɨana, 'ixaheritsixi 'auriena memɨ'axɨanikɨ, Yawé hɨxie ne 'aixɨa nemɨtiuka'iyarikɨ, Kakaɨyarita nehetsie nunuwame pɨhɨkɨ:
ISA 49:6 «Neti'uximayatsiriwame pepɨhɨkɨ, meta Kakuwu nuiwarimama pemɨwahekwariya, meta 'ixaheritsixi pemɨwa'atɨani, kemɨ'ane nemɨwa'ɨwiya, hikɨ 'ayumieme nuiwarite wahekɨariwiyame nekamenayeitɨamɨkɨ, newikweitsitɨarika kwie manu'axe paitɨ pemɨtaxatakɨ».
ISA 49:7 Mɨpaɨ kanaineni Yawé, Tiyuwikweitsitɨwame meta Mɨpatsie 'Ixaheri hetsiemieme, mɨnanaimarie nuiwarite memixani'erie mɨpaɨ katinahɨaweni, ti'uximayatame kuwexinaruritsixi wahetsiemieme: «Te'aitamete mepɨmatsixeiya 'ana 'amepɨti'uni, memanuyetei memetsixeiyame 'ana mepakatutsitaxɨani, Yawé hekɨ, 'Ixaheri hetsie Mɨpatsie, yamɨtikamie meta mɨmetsi'anayexei».
ISA 49:8 Mɨpaɨ kanaineni Yawé: «Yemekɨ kepauka yanemɨra'eriwakai 'ana nepɨmetsi'uta'ei, kepauka newikweitsitɨarika maye'a 'ana nepɨmetsi'uparewi. Hikɨri nekameni'ɨwiyakamɨkɨ, meta ne tɨratu nepɨmetsi'ayeitɨa teɨteri wahetsiemieme, tawari 'akwieyari 'aixɨa pemukuyurienikɨ, meta kwie yuxaɨta mukumane 'aniwema pemɨwaxatɨanikɨ,
ISA 49:9 mɨpaɨ pemɨtiwatahɨawekɨ memanutaxɨriya: “Xekenewayekɨni”, meta yɨwita memu'uwa: “Xekanixɨxɨniniri”. »Huye 'aurie xepɨtetikwani meta naitsarie hɨri mu'aiyatsie yu'ikwai xepɨkaxeiya.
ISA 49:10 Xepɨkaheuhaakakwikuni meta xepɨkaheuharikuni, tau pɨkaxetiweranariya meta xepɨkaxɨrikwini, kemɨ'ane mɨxenenimaya mɨxekuwitɨnenikɨ, meta haixa muhapanetsie kanixekuwitɨnemɨkɨ.
ISA 49:11 Naime nehɨritetsie huye nekanitiwewimɨkɨ, meta nehuye 'a'atayeyeume nekanitiwewimɨkɨ.
ISA 49:12 Neuxei. Mɨkɨ mekani'axɨakuni 'ateewa paitɨ meheyekɨneme, hipatɨ tayeta mepakanexɨani, hipatɨta tau makayuyuipiketsie, hipatɨta 'Atsuhani kwieyaritsie mepanexɨani».
ISA 49:13 Xeme muyuawi, xekeneutihiwani temawierikakɨ. Kwie, keneyutemawieka. Hɨrite, kwikari xekenekwikani. Yawé yuteɨterima muwanɨtɨakɨ meta tixaɨtɨ memɨkateheuxeiya muwanenimayakɨ.
ISA 49:14 Peru Tsiyuni mɨpaɨ putayɨ: «Yawé pɨnetsi'uku'eiri. Ti'aitame pɨnetsihatɨmai».
ISA 49:15 «¿Kamɨtsɨ tiyɨwe niwekame yuniwe tsitsitɨwatɨ metɨmaiya, meta yuniwe naki'erietɨ miku'eirieni? Tsepa mɨkɨ mɨyɨwe metɨmaiya, peru ne nepɨkamatsihatɨmaiya.
ISA 49:16 Nemamá meuweweritsie nepɨmatsiha'utɨa, 'akuraru yuheyemekɨ nepɨkahatɨtɨmaiya.
ISA 49:17 Memɨmatsi'anukakitɨani mepuyukumexɨitɨani, memɨmatsi'uka'unakai mepɨmatsiku'eirieni, meta heyekɨa memɨmatsi'ɨhɨa.
ISA 49:18 Keneutanierixɨa, kenanieretɨye'a, yunaitɨ mekaniyukuxeɨriximeni, 'ahepa 'umekanahuni. Ne yuri nekaniutaineni ne'ayenieretɨ, —kanaineni Yawé—, yunaime mɨkɨ witsipemɨtiyuxexeiyanikɨ pekaniwarayeitɨamɨkɨ, mɨkɨ wahekɨ wikiwame kamixayari pemanakatɨnitsie tetexi mɨraye'axe pemɨreukapine pepɨtihekɨata.
ISA 49:19 »Tsepa pemuka'unarienike, tsepa yeuta pemuhayewarienike, tsepa 'axaɨta pemu'ahayewake, hikɨri mepɨkatenakeni 'ateɨterima 'ahetsie, 'ateewa mepuyuhayewari memɨmetsikwakai.
ISA 49:20 'Aniwema meheuyexɨrieme pemɨ'eriekai 'anakata mɨpaɨ mepɨmeteheukahɨawe: “'Ena nehetsiemieme 'etsipakuyewa, tawari 'ayeume kwie nepeuyehɨwa mana nemukanikɨ”.
ISA 49:21 Hikɨ mɨpaɨ pepɨti'erieni: “¿Kemɨ'ane tɨɨri waɨkawa pɨnetsiyetuiri? Ne tɨɨri nepɨkawarexeiyakai, nepɨkaniwewekai, nepuka'unariekai, nepehɨiyakai, peru 'ikɨ, ¿kemɨ'ane puwarutiwaweriyaxɨ? Nexaɨtame nepunehayewakai, peru 'ikɨ, ¿kemetehanexɨa?”»
ISA 49:22 Mɨpaɨ kanaineni Yawé naimekɨmɨyɨwe: «Ne nuiwarite mɨpaɨ nepɨtiwatahɨawe, yunaime teɨteri mɨpaɨ nepɨtiwata'aitɨani. Mɨkɨ 'aniwema yumamatsie mepɨwara'ɨka, meta 'aniwema 'ukari yuwaritsie mepɨwarutɨkɨni.
ISA 49:23 Te'aitamete yuniwema wahepaɨ mepɨwatiwaweriya, meta wa'ɨitama mepɨmatsitiwaweririeni. 'Ahɨxie mepɨtihɨxima'uni kwiepa, kwie mepakutsena pemiketsina. 'Ana mɨpaɨ pepɨretimani ne Yawé nemɨhɨkɨkɨ, mepɨkatewiyatsitɨarieni kemɨ'ane nehetsie yuri memɨte'erie».
ISA 49:24 ¿Yukukuyamete piinitɨarika memɨte'a'iwaxɨ mɨtiwarunawairieni tiyɨwe? ¿Tiyɨwe manutahɨiya manayexɨnekɨ?
ISA 49:25 Peru mɨpaɨ paine Yawé: «Huu, kuya mɨtɨrɨkaɨye xeime tewi manutahɨa pɨnawaiyarieni, meta mɨkatiyukanenimaya piinitɨarika mɨra'iwaxɨ pɨtinawaiyarieni, kemɨ'ane memɨmatsimietɨwe nekaniwatakwimɨkɨ, netɨtɨ nekaniwatawikweitsitɨamɨkɨ 'aniwema.
ISA 49:26 Yanepɨtiyurieni memɨmatsi'aye'unie yuwaiyari memɨtikwanikɨ, meta yuxuriyakɨ memɨtitarɨwenikɨ winu mɨhɨkɨtɨni hepaɨ. Hikɨ 'ana yunaitɨ teɨteri mɨpaɨ mepɨtehetimani ne, Yawé, 'awikweitsitɨwame nemɨhɨkɨkɨ, ne, Mɨtɨrɨkaɨye Kakuwu hetsiemieme, Nemumatsixɨname nemɨhɨkɨkɨ».
ISA 50:1 Yawé mɨpaɨ kanaineni: «Ne xemaama, nepuku'eiri, ¿Peru hakewa 'eiriya xapayari? ¿Yatɨni kemɨ'ane nemɨrapiinirie hetsɨa nepɨxe'utua? Xeme xekaniutuiyani 'axaxemɨte'uyurikɨ, xeme xekaniutuiyani, 'axaxemɨteyuriekaikɨ xeme xemaama kaniuku'eiriwa.
ISA 50:2 ¿Titayari nemunuatsie xeime tɨma nekatiutaxei? ¿Titayari xewitɨ kanetiuta'ei nemɨxe'utahɨawixɨtsie? ¿Kamɨtsɨ nekatiyɨwe nemɨxe'utawikweitsitɨanikɨ? ¿Kamɨtsɨ netɨrɨkariya katiyɨwe mɨxe'uxɨna? 'Etsiwa ne neyutahaxɨatɨayu haramara kanakawaukeni, meta hatɨa makumawe nekanayeitɨwani, haa heuyewekakaku tsapari mekanitakukuweni hariyakɨ, meta mekanitipɨkeni.
ISA 50:3 Muyuawi yɨriyakɨ nekaniukemaritɨani meta naxi nekanikawiriwani muyuhiwerieka hepaɨ».
ISA 50:4 Yawé naimekɨmɨyɨwe pɨnetsi'upitɨa nemeutaniuwenikɨ netimaiwetɨ, kemɨ'ane mu'uxe neniukikɨ nemutuikanikɨ. Ximeri yakanetinanutahɨtuwani, meta nenakata neheu'ename kanenayeitɨaka para nemeu'enanikɨ teyɨ'ɨkitɨwamete wahepaɨ.
ISA 50:5 Yawé naimekɨmɨyɨwe neheu'ename kanenayeitɨani, hawaikɨ nepɨkahe'eiyani, meta ne'utɨa nepɨkayeyeika.
ISA 50:6 Newari nepɨyetua kemɨ'ane memɨnetsikuwayakai wahetsɨa, ne'auri nepɨyetua kepauka hipatɨ nemɨxiya memanuyehunakai, neyuriyariekaku meta kepauka nemuku'aɨtsikawiyarɨwakai nenierika nepɨka'uti'awietaxɨ.
ISA 50:7 Yawé naimekɨmɨyɨwe matsi mɨnetsiparewiekɨ, hatsuaku tixaɨtɨ mekanete'ayeitɨatɨri mepɨkahakɨne. 'Ayumieme nenierika neputseiriyaxɨ tete mɨtse'i hepaɨ, mɨpaɨ nepɨtimate hawaikɨ nepɨkatewiyatsitɨarieni.
ISA 50:8 Ne'aurie hurawa kaniuyeikani kemɨ'ane nehetsie mɨtanuani. ¿Kemɨ'ane kamɨtsɨ pɨnetsitaniukimani? Kehamieni nehetsɨa. ¿Kemɨ'ane pɨnetsixaneta? Kenetsi'utaxaneta kuta.
ISA 50:9 Yawé naimekɨmɨyɨwe kanihɨkɨtɨni mɨnetsiparewie. ¿Kemɨ'ane pɨnetsi'anutahɨani? Yunaitɨ mɨkɨ mepukumawere, 'ixuriki mutaxɨ tepaxietɨ hepaɨ.
ISA 50:10 ¿Kemɨ'ane xeme Yawé payemakaxe meta kemɨ'ane xeme tiyu'uximayatsiriwame peu'enie? Tsepanetɨ yɨwikɨta mumie, 'etsiwa tɨma kahekɨariwiyarietɨ, Yawé hetsie yuri keti'erieka, meta Kakaɨyari hetsie ketiwiyani.
ISA 50:11 Peru xeme tai xemukutaiya meta 'utsi xemuti'ɨwe, kɨmana xeyukɨxirietɨ xemuhunikɨ, xemitaiyatɨka xehekɨariwiyakaku. 'Ayumieme nepɨxe'anunɨ'airieni: 'uximatɨarika waɨkawa, mana xepɨkwini.
ISA 51:1 «Xeme, mɨtiheitserie xemɨtekuwautɨwe, meta Yawé xemukuwautɨwe, xekeneneu'eni. 'Ai xekeneuxeiya kemɨ'ane hetsie xemɨyekɨ, tetexi mɨxixiyatɨka muwati'inieriwa hetsie pemaye'inierie.
ISA 51:2 'Apɨrahami xekeneuxeiya, yupaapa, meta Tsara, mɨxe'utiniwexɨ. Kepauka ne nemenayexei, puyuxaɨtatɨkai, peru ne 'aixɨa nepiyuri, mɨtamɨirekɨ.
ISA 51:3 Yurikɨ, Yawé Tsiyuni kaninɨtɨamɨkɨ, mɨti'u'uni naime katininɨtɨamɨkɨ. Makumawe 'Ereni kanayeitɨamɨkɨ, Yawé yuharaweri pɨtawewieni kwie makuwakitsie. Mana temawierika pɨtixuawere, pamɨpariyutsi meta kwikari nɨawari.
ISA 51:4 »Xekeneneu'eni, neteɨterima, xekeneneu'eni, nuiwari nehetsɨa mieme: nehetsie kaniyeyeimɨkɨ 'ɨkitɨarika, meta 'aixɨa mɨti'ane hekɨariya kanihɨkɨtɨkamɨkɨ nuiwarite wahetsiemieme.
ISA 51:5 'Ari kanehurani tita mɨtiheitserie, newikweitsitɨarika 'ari 'ukanamieni, netɨrɨkariya 'aixɨa puwayurieni nuiwarite. Hatetsita 'ateewa memukutetɨka nehetsie yuri mepɨte'erie, netɨrɨkariyatsie mepɨta'ikwewa.
ISA 51:6 Teikɨ muyuawitsie xekeneutinenieri, meta kwie xekeneuxeiya: muyuawi kɨtsi hepaɨ pukumawere, kwie 'ixuriki hepaɨ pɨtaxɨni, meta xaipɨtsi wahepaɨ mana kiekatari meputekwini. Peru newikweitsitɨarika yuheyemekɨ puxuaweni, peru mɨtiheitserie nehetsɨa mieme hatsuaku pɨkaheuyeweni.
ISA 51:7 »Xekeneneu'eni, xeme tita mɨtiheitserie xemɨtemate, teɨteri ne'inɨari niukiyari yu'iyaritsie xemɨye'ɨna: Teɨteri 'axametexekɨhɨawekaku xepɨkamamaka, meta xepɨka'utiweranareni mexe'anutate'akaku,
ISA 51:8 Kɨpi kaniwatikwaimɨkɨ 'ixuriki mɨtikwa'a hepaɨ, kwitsi kaniwatikwaimɨkɨ muxa huxarieya kemɨtikwa'a hepaɨ. Peru tita mɨtiheitserie nehetsɨa mieme yuheyemekɨ puxuaweni, newikweitsitɨarika, yuheyemekɨ pɨka'uye'atɨkani».
ISA 51:9 Kenanutanieri, Yawé tɨrɨkariyaya. Kenanutanieri, tɨrɨkariya kamixayari kenanakatɨki. Kenanutanieri meripaitɨ hepaɨ, meripaitɨ memu'uwakai wahepaɨ. ¿'Ekɨ pekatiuyuri Xahawi pemutaxite, meta hapa kiekame pemanuyetse?
ISA 51:10 ¿'Ekɨ pekatiuyuri haramara pemakawatsiɨxaxɨ, haramara 'amatiyewa? ¿Haramara tetɨata huye pemutawewi mana memɨkɨnekɨ pemɨwarutawikweitsitɨa?
ISA 51:11 Yawé kemɨ'ane wahetsiemieme mɨrayukatua mepɨ'axɨani, Tsiyuni mepeutahaxɨani me'utikwitɨ, temawierika yuheyeme mieme mepɨpitɨarieni. Temawierika waɨkawa mepexeiyani, kukuiniya mepɨkahexeiyani meta 'ukai.
ISA 51:12 «Ne nekanihɨkɨtɨni kemɨ'ane nemɨwanɨtɨa. ¿Kemɨ'aneta 'ekɨ pepɨhɨkɨ, teɨteri pemɨwarayemakaxe, memɨkwiwawe, tupiriya mehɨkɨtɨme?
ISA 51:13 ¿Yawé pepatɨmai, mɨmatsi'utawewi, muyuawi mutaweraxɨ meta kwie mukama? ¿Pematɨ tukarikɨ 'apetiuyeikani mɨmatsi'aye'unie haxɨayakɨ muyuwaɨriya mɨraka'unakɨ? Peru, ¿hakewa peyuhayewaxɨ mɨkɨ haxɨaya?
ISA 51:14 Kwitɨwa mepɨtixɨnarieni pɨretsutsixi, kiita me'aye'utɨ mepɨkakwini, meta paa meheuyehɨatɨ mepɨkahakɨne.
ISA 51:15 Ne Yawé nemɨhɨkɨkɨ 'akakaɨyari, ne haramara neputayuitɨwa, hamewarieya putixiuwarɨka, Yawé Naimekɨmɨtɨrɨkaɨye nekatinitewaka.
ISA 51:16 Neniuki 'ateta nekameniupitɨani meta nemamá 'etɨrieyatsie pekaniyeweni, muyuawi 'anepuyema meta kwie nepukama, meta Tsiyuni mɨpaɨ nepɨrahɨawe: “'Ekɨ nekiekari pepɨhɨkɨ”».
ISA 51:17 Kenanutanieri, Kerutsareme, kenanutanieri. 'Ekɨ kenanukukexi, Yawé mamayatsie haxɨa tekɨxiyari pemanu'i, 'ekɨ, tekɨxieya naime pemanɨxɨ 'iya tekɨxi teɨteri muwaratixɨrɨwa.
ISA 51:18 Yunaitɨ tɨɨri pemɨwarayexei, nixewitɨ mɨkɨ pɨkamatsi'anukuwitɨ, tɨɨri pemɨwarutiwaweriyaxɨ, nixewitɨ mɨkɨ pɨkamatsi'anukuha.
ISA 51:19 'Ikɨ tihutatɨ 'axamɨmetiyurie 'ahetsie katiniu'axɨani: pemakumaweriyarienikɨ meta pemɨka'unarienikɨ, haaka meta 'ixipara. ¿Kemɨ'ane pɨmatsitinenimayata? ¿Kemɨ'ane pumatsinɨtɨani?
ISA 51:20 'Aniwema mekaniukwinitɨma, tsipuri yeutari wahepaɨ winiyaritsie, kaye'utɨma 'itsikina mekaniukaxɨrieni. Yawé haxɨaya wahetsie katininakeni, meta Kakaɨyari kemɨtiwaraye'uxiwe'erie.
ISA 51:21 'Ayumieme 'ikɨ ketineu'eni, 'ekɨ pemɨyuhiwerie, pemɨtawe, winu peka'ietɨ.
ISA 51:22 Yawé 'ahetsɨa mumieme 'ipaɨ kanaineni meta 'akakaɨyari, 'akakaɨyari, maniuka yuteɨterima wahetsiemieme: «'Amamatsie nekamaniunawairieni, tekɨxi mɨmatsi'anutawaitɨakai. Mɨkɨ tekɨxita nehaxɨa muyema, hawaikɨ tawarita pepɨka'enu'ieni.
ISA 51:23 Kemɨ'ane memɨmatsi'uximatɨa wamamatsie nepekeni, 'iya mɨpaɨ memɨmate'utahɨawixɨ wahetsie: “Kwiepa keneuhu'i 'ahetsie temuyekɨnekɨ”. Hikɨ kwiepa peheumu'utɨ pekatiniuhuni, yunaitɨ kwiepa memɨtama memɨmatsitaketsinikɨ».
ISA 52:1 Kenanutanieri, Tsiyuni, kenanutanieri. Tɨrɨkariya kenanakatɨki. Kerutsareme, kiekariyari pemɨpatsie, 'akamixa witsimɨ'ane kenanakatɨki, kemɨ'ane xitekiya 'inɨariyari memɨkahexeiya meta kemɨ'ane memɨka'itiyatɨka, 'ahetsie tawari mepɨkaheutahaxɨani.
ISA 52:2 Kerutsareme keneuyutakwiepi. Kenanukukexi, 'a'uwenitsie kenenua. 'Akɨipitɨa tepɨa kaunariyari maka kenewaxɨna, tsiyuni niweya 'uka pemanutahɨiya.
ISA 52:3 Yawé mɨpaɨ kanaineni: «Xeme nitixaɨtɨkɨ xepɨkate'utuiya, 'ayumieme tuminikɨ xepɨkaxɨnarieni».
ISA 52:4 Yawé naimekɨmɨyɨwe mɨpaɨ kanaineni: «Meripaitɨ manuyetɨatsie, neteɨterima 'Ekipitu mepekɨ mana mepɨtitekai, 'imatɨrieka 'ikɨ tukaritsie, 'Atsiriya pɨtiwa'uximayatsitɨa yakɨ xeikɨa».
ISA 52:5 Yawé mɨpaɨ kanaineni: «¿'Ena ne kenetiyuriene? Neteɨterima yakɨ mepɨwarehapa, tewa'aitɨwamete mepɨwananaima. Meta tukarikɨ nehetsiemieme 'axameputiyuane.
ISA 52:6 'Ayumieme neteɨterima kenemɨtitewa mepɨnetsihetimani, 'iya tukaritsie mɨpaɨ mepɨtehetimani ne nemɨhɨkɨkɨ mɨpaɨ nemutaine: “'Ena nepuwe”».
ISA 52:7 Witsipɨ'anene 'ɨkateya kemɨ'ane niuki 'aixɨa manuyɨne mukuxata hɨritsie, kemɨ'ane “kayuwatɨ mumakakɨ” mukuxata, kemɨ'ane niuki 'aixɨa manɨyɨne mukuxata, kemɨ'ane wikweitsitɨarika mukuxata, kemɨ'ane Tsiyuni mɨpaɨ mɨrahɨawe: «'Akakaɨyari pɨti'aita».
ISA 52:8 Keneu'ena. Matsihɨwemete meputihiwa, yunaitɨ temawierikakɨ meputihiwa, yɨhɨxikɨ memixeiyakɨ Yawé Tsiyuni kaniye'amɨkɨ.
ISA 52:9 Kerutsareme mu'uni, xekenekwikani temawierika kwikariyari. Yawé yuteɨterima muwarɨnɨtɨakɨ, Kerutsareme mutawikweitsitɨakɨ.
ISA 52:10 Yawé yutɨrɨkariya matsiɨkɨme kanayeitɨamɨkɨ yunaime nuiwarite wahɨxie, meta yunaitɨ kwie manu'axe kiekatari takakaɨyari wikweitsitɨarikaya mepɨxeiya.
ISA 52:11 Xeme, Yawé tipiiniteya xemɨte'u'ikata, xekenewayekɨni. Xeketeneuku'eiri, xekeneuyu'iti. Tixaɨtɨ mɨkati'itiya xepɨkatekumaɨwani.
ISA 52:12 Perutsɨ mexɨima xepɨkawayekɨkani, xepɨkawayenanautsani, Yawé pɨxe'uwitɨxime, 'Ixaheri Kakaɨyarieya xehetsie pɨtanuani.
ISA 52:13 Neuxei, neti'uximayatsiriwame pɨra'iwa, 'aixɨa pɨtitamatiwa, mariweme payeitɨarieni 'aheutitewametsie payerieni.
ISA 52:14 Yumɨiretɨ mepɨhɨxiyani me'ixeiyatɨ, 'axamɨraka'eriekaikɨ, tewi hepaɨ mɨkatiyuxexeiyakaikɨ.
ISA 52:15 Yaxeikɨata, yumɨiretɨ nuiwarite mepɨhɨxiyani, hɨxiena te'aitamete memɨtiniuni mepɨkayɨwekaxɨani, tita memɨkate'utaxatɨarie memɨtexeiyakɨ, meta mepɨtehetimani tita memɨkate'eniwawekai.
ISA 53:1 ¿Kemɨ'ane taniukitsie yuri pɨtiuta'eri, kemɨ'ane Yawé tɨrɨkariyaya puxeiyatsitɨarie?
ISA 53:2 Mɨkɨ hɨxie putawerixɨ yɨrari mɨyɨri hepaɨ, makuwakitsie tiwiyatɨ. Witsipɨka'anekai meta pɨkamariwekai, kemɨtiyuxexeiyakai pɨkaheiwa'anekai meta witsipɨkatiyuxexeiyakai pɨkaheiwe'eriwakai.
ISA 53:3 Teɨteri mepinanaimakai mepɨka'inaki'eriekai, pɨtiukakukuinekai, mɨtiuka'eniwanikɨ pɨ'ayumiemetɨkai. Nixewitɨ pɨka'ixeiyamɨkɨkai, putixani'eriwaxɨ, mariweme tepɨka'eriekai.
ISA 53:4 Peru yurikɨ takwiniya putitɨ, kukuiniya tahetsiemieme punewi, peru tame tiukwinitɨarieme teputa'eri, Kakaɨyari 'enayewaxɨame teputa'eri meta tixaɨtɨ kareyeitɨame.
ISA 53:5 Matsi mɨkɨ putsekie 'aitsika temutitsanaxɨakɨ, temɨxiki payeitɨarie 'axatemɨte'uyurikɨ, mɨkɨ hetsie pɨtiunakixɨ mɨtikwinitɨarienikɨ, kemɨraye'akai kayuwatɨ temu'uwanikɨ, pamɨpariyutsi mɨtiukwinitɨariekɨ kɨmana 'aixɨa teteheu'erietɨ tepayeitɨarie.
ISA 53:6 Teyunaitɨ tepeuyexɨriekai, muxatsi wahepaɨ, teyuxexuitɨ tepu'uwakai kemɨtatinake, peru Yawé hetsiena pɨtiɨhɨa naime 'axatemɨte'uyurikɨ.
ISA 53:7 Pɨtiukwinitɨarie, nitixaɨtɨ pɨkarayeitɨarie, peru 'etsiwatɨma pɨka'utaniu, muxa nunutsi hepaɨ, pehanie memierienikɨ, muxa 'uka mɨxikie hepaɨ, pɨka'utatsua, meta 'etsiwatɨma pɨka'utaniu.
ISA 53:8 Hikɨ me'iwiyakari meta me'itaxanetaka, mekanimieni, xewitɨ pɨkayuti'iyaritɨa nuiwarieya hepaɨtsita mukumawerekɨ. Kanawitekieni 'ena kwiepa teɨteri memanu'uwatsie, kaniukuweiyaxɨani teɨteri 'axamemɨte'uyurikɨ.
ISA 53:9 Pukateukie 'axateyuruwamete watsata, meta pumierie 'axateyuruwamete wahamatɨa, tsepa hatsuaku 'axamɨkatiuyuri, meta nanaimarika tetana mɨka'utixuawerixɨ.
ISA 53:10 Peru Yawé puyuwaɨri temɨxiki meyeitɨanikɨ meta mɨtika'enitsitɨanikɨ, matsi mɨkɨ yutukari 'itiya mawariyari mayeitɨakɨ, yunuiwari puwaxeiya, tukari waɨkawa pɨpitɨarieni, meta yapɨtiyurieneni Yawé kemɨtinake.
ISA 53:11 'Arikeke tikwineme, hekɨariya kanixeiyamɨkɨ meta 'iyarieya 'aixɨa kaniyɨmɨkɨ, mɨrakumatekɨ neti'uximayatsiriwame heitserie mexeiya heitserie kaniwapitɨamɨkɨ yuwaɨkawame, 'axamemɨte'uyurikɨ pɨranukɨtɨni.
ISA 53:12 'Ayumieme, nepipitɨani mariwemekɨ mɨti'aitanikɨ, piinitɨarika mɨra'iwaxɨ memɨtɨrɨkawi wahamatɨa pɨtiyetuiriyarieni, yutukari mɨyetuakɨ tsepa mumierie, 'axatiyuruwame payeitɨarie. Yumɨiretɨ ke'axamemɨte'uyuri putitɨ, 'axateyuruwamete wahetsie putanua.
ISA 54:1 «'Ekɨ 'ukaratsi hatsuaku pemɨkatiniwewe, keneutahiwani temawierikakɨ. 'Ekɨ, hatsuaku niweyame kukuiniyaya pemɨkamate, keneutakwikani meta keneutahiwani temawierikakɨ. 'Ukaratsi muku'eiriwaxɨ matsi waɨkawa tɨɨri warexeiyatɨ kanayeimɨkɨ, mɨwikie kemɨkatiwarexeiya
ISA 54:2 »'Axamaru 'akeneutayeuriya, 'ixuriki meɨwɨ 'akiita keneɨxɨnaxɨa. Hawaikɨ peheuye'atɨkaitɨ pepɨkahayuyeitɨwani. 'Akaunari 'akeneutitɨriya, 'akɨtsunute kwi keneuka'uitɨa.
ISA 54:3 Karikɨ 'atserieta meta 'a'utata pekanitawerimɨkɨ, 'anuiwarite hipame nuiwarite waɨkawa mepuwara'iwa, kiekaritetsie hikɨ makumamawe mana mepɨyutikiitɨani.
ISA 54:4 »Pepɨkamaka, hatsuaku pepɨkatewiyatsitɨarieni. Pepɨkayu'iyaritɨaka, hatsuaku nitixaɨtɨ petihɨkɨtɨtɨ pepɨkahayeitɨarieni. Pemɨ'ɨimaritɨkaitsie mieme tewiyarika pepatɨmaiya, meta tawariri pemɨwiuratɨkaitsie 'axapemɨtikɨhɨawarɨwakai pepɨkahaye'erieni.
ISA 54:5 Kemɨ'ane mɨmatsi'utawewi mɨkɨ kani'akɨnatɨni, Yawé Naimekɨmɨtɨrɨkaɨye katinitewaka. Matsiwikweitsitɨwame kanihɨkɨtɨni Mɨpatsie 'Ixaheri hetsiemieme, naime kwie Kakaɨyarieya katinitewaka.
ISA 54:6 Yawé kamanitahɨawimɨkɨ 'ukaratsi 'eiriwakame hepaɨ, 'ukaratsi tiuka'eniwatɨ muyu'iyaritɨa hepaɨ, 'uka wikiekame 'etsiyumaitɨ mutiwiki hepaɨ mɨtixani'eriwakɨ xeikɨa
ISA 54:7 Nepɨmatsi'uku'eiri yatewimekɨ xeikɨa, peru waɨkawamekɨ nematsinenimayatɨ tawarita 'ahetsɨa nepunuani.
ISA 54:8 Yatewimekɨ xeikɨa, ne'uyeha'aka, nepɨkamatsixeiyamɨkɨkai, peru yuheyemekɨ nematsinaki'erietɨ nepɨmatsitinenimayata
ISA 54:9 »Kepauka Nuhexi 'amuyeikakai hepaɨ nepaine, kepauka nemɨyuhɨritɨa kename haa hatsuaku kwie kakayunitɨanikekai. Hikɨ mɨpaɨ nekatiniyuhɨritɨaka tawariri nepɨkamatsiyeheka, meta tawariri nepɨkamatsitatieni.
ISA 54:10 Tsepa hɨrite muyupataxɨa, meta tsepa hɨrite 'etsimɨtɨtɨ mɨtiwatayuatɨka, hatsuaku nematsinaki'erietɨ nepukatihayewa, meta netɨratu kayuwatɨ 'amuyeikanikɨ mɨ'ayumieme nepɨkatananaimani, —Yawé mɨpaɨ kanaineni, mɨmatsinenimaya—.
ISA 54:11 »Neuxei 'ekɨ, kiekari pemuyuhiwerie, pemɨmariutsie meta pemɨkanɨtɨarie. Yuawitɨ tsiɨraɨyemekɨ nepumatsitakeni, meta tetexi yuawimekɨ mukutuxie hekɨ 'atenari nepɨkatsutɨani.
ISA 54:12 Tetexi mɨxetakɨ 'atetsariya nepatiwewiexɨani, tetexi mɨxawawatɨkɨ 'a'itupari nepɨtiwewieni, meta tetexi witsimɨ'anenekɨ 'akuraru nepawewietɨyani.
ISA 54:13 Yawé 'aniwema yunaime kaniwata'ɨxatsitɨamɨkɨ, yemekɨ 'aixɨa 'anemekɨ mepɨtiteni.
ISA 54:14 Mɨtiheitseriekɨ pepɨtseiriyarieni, waɨriyarika pepɨkati'aitɨarieka, meta nitixaɨtɨ pepɨkarayemakaka, pepɨkamaka, meta hatsuaku pepɨkatimani.
ISA 54:15 Xɨka xewitɨ matsimiemɨkɨni, ne nepɨkatiyurieneni, kemɨ'ane mumatsitamieni 'ahɨxie kanikawemɨkɨ.
ISA 54:16 »Neuxei, ne tepɨakɨ tiwewiwame nekaniunetɨani, tɨɨ 'anutataiyatɨ mɨti'uximaya, tepɨa tiyumemiwame mɨtiwewiwa xexuitɨ kemɨtiyuruwametetɨni. Neta nekaninetɨani tiyuka'uname muwaruka'unanikɨ.
ISA 54:17 Tsepa tepɨa matsimemiwame 'ahetsiemieme mutawewiya yapɨkatiyurieni, kemɨ'ane mɨmatsixanetani mɨkɨ tenieyatsie pepuwiere. 'Ikɨ kanihɨkɨtɨni te'uximayatamete memɨte'ukuhayewiyarie, tita mɨtiheitserie nehetsie mɨyetɨa
ISA 55:1 »Xekenakɨni haa mayema yunaitɨ kemɨ'ane xemeuhariku. Xekenakɨni xeketenananaiyu meta xeketenakwaiyu kemɨ'ane tumini xemɨka'umana. Xekenakɨni, winu xekeneunanai meta retsi xekateyutuatɨ.
ISA 55:2 ¿Titayari tumini xetexɨtɨa paa kahɨkɨtɨmetsie, meta yu'iwarika tita mɨkatihuxaiyatsie? 'Aixɨa xekeneteneu'eni, xekatenitikwaikuni tita 'aixɨa mɨti'ane, meta 'aixɨa xekateniku'eriwakuni witsira'aneme xetekwatɨ.
ISA 55:3 Kayuwatɨ xekeneneu'eni, nehetsɨa xekeneu'axɨa, xekeneneu'eni, 'axekaniu'uwakuni. Xehamatɨa tɨratu nepɨwewieni yuheyemekɨ mieme, Rawiri nemɨnaki'eriekɨ.
ISA 55:4 Ne nepenukake teɨteri wahetsiemieme munierixɨ mɨhɨkɨtɨnikɨ, wa'ukiyari mɨmariwe hepaɨ.
ISA 55:5 Mɨpaɨ pepɨtiyurieni hipame nuiwarite pekaniwata'inimɨkɨ, pemɨkawamatekai, meta nuiwarite memɨkamatsimatekai 'ahepa mepɨtinautsa, pamɨpariyutsitsɨ Yawé 'akakaɨyari, Mɨpatsie 'Ixaheri hetsiemieme, waɨkawa 'aixɨa petixeiyariekame mɨmatsi'ayeitɨa».
ISA 55:6 Yawé xekeneutiwawa mexi yuwaɨriya xemikaxeiyakɨ, xekeneutahɨawi mexi 'ahurawa 'uyeika.
ISA 55:7 'Axatiyuruwame yuhuye ke'uku'eirieni, meta 'axamɨtiyuriene 'axatiku'eriwatɨ ketiuhayewa. Yawé hetsɨa kenuani, takakaɨyari hetsɨa, mɨkɨ puyuwaɨriya mɨreuyehɨwirienikɨ, nenimayatsikaya hetsiena pɨtinake.
ISA 55:8 «Karikɨ xeme kexemɨteku'eriwa ne mɨpaɨ nepɨkatiku'eriwa, kexemɨte'u'uwa ne mɨpaɨ nepɨkatiuyeika
ISA 55:9 Nehuye meta kenemɨtiku'eriwa matsi 'apeutitetewa keyuri xehuye meta kexemɨteku'eriwa, matsi waɨkawa peutitewa keyuri muyuawitsie kemeutitewa.
ISA 55:10 Wiyeri meta 'ɨwi muyuawitsie kemɨrakaneika, kwitɨwa pɨka'anutinunuwa kwiepa kakahatuawetɨ, mɨtiyɨratɨakakɨ, kemɨ'ane muka'etsa 'imɨari mexeiyanikɨ meta paa mexeiyanikɨ kemɨ'ane mɨtikwa'a,
ISA 55:11 mɨpaɨta pɨ'ane neniuki neteta mayeneika: Nehetsɨa pɨkanuani 'atsikatiyuriwetɨ, matsi yapɨtiyurieni meri kemɨnetinake, pɨraye'atɨani kenemɨtiku'eriwa.
ISA 55:12 Xeme xepayekɨne xeyutemamawietɨ meta xepanuwitɨkieni yuhuyeta kayuwatɨ. Xe'uhukaku, hɨri 'etsimɨtɨtɨ meta 'amɨtɨtɨ mepɨtihiwa karima meyutemamawietɨ, meta mepɨtetapini yunaitɨ kɨyexi yeuta miemete.
ISA 55:13 'Ɨtsi muxuyatɨka hetsiemieme huku mɨxexeurawi pɨtiwawere, kieká hetsiemieme tsikwai kanitixuawerimɨkɨ. 'Ana Yawé 'aixɨa pɨtitahɨawarieni, mɨkɨ 'inɨarieya payani yuheyemekɨ».
ISA 56:1 Yawé mɨpaɨ kanaineni: «Tita mɨtiheitserie xeketenexeiyani, heitseriemekɨ yaxeketeneu'uwaniri, newikweitsitɨarika 'ari kaninuaximeni, mɨtiheitserie nehetsɨa mieme matsiɨkɨtɨ kanayeimɨkɨ.
ISA 56:2 'Aixɨa ke'itɨarieka kemɨ'ane mɨpaɨ mɨtiuyeika, kemɨ'ane yu'iyarikɨ meye'atɨa, kemɨ'ane 'uxipiya tukari ma'eriwa kapatsiekame ka'ayeitɨatɨ, kemɨ'ane mɨyɨ'ɨwiya 'axamɨkatiyurienenikɨ».
ISA 56:3 'Ateewa kiekame yɨkɨmana Yawé hetsie mɨtiwiyanikɨ muyuyetua mɨpaɨ pɨka'utaineni: «Yawé yuteɨterima watsata pɨnetsi'anuyeweiya». Meta ti'aitame ti'uximayatsiriwame mɨkaneɨke mɨpaɨ pɨka'utaineni: «Kɨye muwaki xeikɨa nepɨhɨkɨ».
ISA 56:4 Karikɨ Yawé mɨpaɨ kanaineni: «Teɨteri te'aitame te'uximayatsiriwamete memɨkaneneɨke xawati 'uxipiya tukariyari mema'eriwa, yameketeyurieka kemɨnetinake, netɨratutsie meketewiyani,
ISA 56:5 ne yanepɨtiyurieni kememɨtetetewa mema'utsienikɨ netukita meta nekiekaritsie, mɨpaɨ matsi 'aixɨa pɨ'ane tɨɨri 'ukitsi 'ukari keyuri mewarexeiyatɨ. Meta nepɨwatiterɨwa yuheyemekɨ miemekɨ mɨkɨ hatsuaku pɨkahakayeitɨarieni.
ISA 56:6 'Ateewa kiekatari Yawé hetsɨa memu'axɨa memɨte'i'uximayatsiriekakɨ, Yawé memɨnaki'eriekakɨ, meta memeyexeiyanikɨ, yunaitɨ mɨkɨ 'uxipiya tukari mema'eriwa kapatsiekame meka'ayeitɨatɨ, meta netɨratutsie yamemɨtekahu,
ISA 56:7 nehɨri mɨpatsietsie nekaniwaranutiwitɨmɨkɨ, nenenewieri kiiyarita temawierika waɨkawa nepɨwapitɨani. Nepitanaki'erieni mawari taiyariyari meta hipame mawarite memitimawani nemawari taiyametsie, nekiitsɨ mɨpaɨ katinitewakamɨkɨ nenewieri kiyari yunaitɨ teɨteri wahetsiemieme».
ISA 56:8 Yawé mɨpaɨ kanaineni naimekɨmɨyɨwe, kemɨ'ane muwakuxexeɨriwa 'ixaheritsixi memeutaweiyariexɨa: «Neteɨterima nepɨwakuxeɨrieni hipame teɨteri meyunɨkame, meta 'akuxi hipame nemuwarukuxeɨri».
ISA 56:9 Yeutari meta teyukwa'amete 'ɨtsita miemete, xeyunaitɨ xekenakɨni xeketeniwarutikwa'i.
ISA 56:10 Yunaitɨ 'ixaheritsie memɨtetahɨ mepɨkaheuneniere, nixewitɨ mɨkɨ pɨkatimate. Yunaitɨ mɨkɨ tsɨikɨri memɨkaniuwawe mepɨhɨkɨ, memɨka'utihe'ewa. Mepuhe xeikɨa meteheinɨtɨ, mukutsuni puwanake.
ISA 56:11 Tsɨikɨri kwinie memɨteyukwaiwawie mepɨhɨkɨ, hatsuaku mepɨkahuxaiwawe. Muxatsi wahɨwemete mekanihɨkɨtɨni 'atsimekateheitimaitɨkɨkatɨ, yuxexuitɨ kemɨtiwanake xeikɨa mekaniu'uwani. Nitixaɨtɨ mekateha'eriwatɨ, yu'iwarikakɨ xeikɨa mepuyumexɨitɨa.
ISA 56:12 «Xekenakɨni, winu tepanukuwauni, winukɨ tepɨtitarɨweni —yunaitɨ mɨpaɨ mepɨte'uhiwa—. 'Uxa'ata yaxeikɨa hikɨ hepaɨ tepɨtiyɨni, peru matsi waɨkawa».
ISA 57:1 Heitseriemekɨ 'amuyeika kanimɨmɨkɨ, xewitɨ hetsiena mieme pɨkayu'iyaritɨa, te'a'uximayatsiriwamete yamemɨtekahu mekanitakukuweni xewitɨ 'atsipɨkaretimamateke, heitseriemekɨ memu'uwa mekanitakukuweni 'axamɨti'anekɨ memɨkatekwinenikɨ.
ISA 57:2 Kemɨ'ane huye mɨheitserie 'utɨa memuhu kayuwatɨ mehexeiyatɨ mepɨtakukuwe, 'aixɨa 'iyari mepuka'uxipiwe mɨki 'itarieyatsie.
ISA 57:3 «Xeme, 'ukaratsi mutiyukewaiya niwemama, 'uki 'ukaratsi tuminikɨ muyumayɨinɨa mukumaɨwa niwemama, 'ahurawa xekenakɨni.
ISA 57:4 ¿Kemɨ'ane xeme xepɨtehayuriya? ¿Kemɨ'ane hepaɨtsita xepu'uxiwa'a xe'ikuneniwiyatɨ? ¿Xeme xekatehɨkɨ 'axaxemɨte'u'iyari, te'itawamete nuiwariyari xekatehɨkɨ?
ISA 57:5 Tuaxatsata, meta kɨyexi mɨ'e'etɨtɨa, ketita xemɨtehiwe'eriekɨ xepɨkayupirenutɨa, 'aki'utɨa meta 'ai mukatataritsie, tɨɨri mepɨwamawatɨwe.
ISA 57:6 Tetexi ha'ute 'aki'utɨa mieme pemɨtiukuhayewiyarie pɨrayani, yurikɨ, mɨkɨ 'ahetsiemieme pɨrayani. Mɨkɨ wahetsie hatseiti peputiyeuri, hatsi mawariyari pepɨyetua. Mɨkɨ naime mɨyapemɨtiuyurikɨ, ¿'atsinekatitayɨni?
ISA 57:7 Hɨri 'a'utewimetsie manutimɨtsɨtsie, mana paitɨ pepuyuka'utatɨa, mana paitɨ pekananutiyani pemɨtitimawakɨ.
ISA 57:8 'A'itupari warita meta muka'utɨkatsie pekatina'utɨani memɨkakaɨyarixi wa'ɨkiyakɨ. Pekaneniuku'eirieni, pekaniyutikemaripieni, 'a'utá pemikawitsie pekananutiyani, tɨratu pekaniuwewieni teɨteri wahamatɨa kemɨ'ane pemeuhiwe'eriekai hamatɨana pemɨkahunikɨ, meta pepixei maweme.
ISA 57:9 Muruki hetsɨa pepanɨtɨa, huriwa hatseitiyari pepeihaniri, witsimu'ɨatɨka 'ahetsiemieme peputimɨiriyaxɨ. 'Ateewa pepɨwarenɨ'a 'anɨ'arima, meta mɨki teukiyata pepuwareukanɨ'a.
ISA 57:10 Waɨkawa pekuyeikatɨ peputi'uxixɨ, peru mɨpaɨ pepɨka'utayɨ: “'Ena xeikɨa nepɨye'ani”. Pepuyɨwekaxɨa tɨrɨkariya waɨkawa pepukaxei, 'ayumieme pepɨka'u'amɨ.
ISA 57:11 »¿Kemɨ'ane pɨmatsi'utimariu, kemɨ'ane marika pɨmatsi'upitɨa, titayari penetiu'itai? Pepɨkanetsihaye'eri, nitixaɨtɨ pepɨkanerayeitɨa. ¿Xɨari pepɨkanetsimakaxe, mɨixa 'atsinemɨka'utayɨkɨ?
ISA 57:12 Ne nepɨmatsitaxaneta 'aixɨa kepemɨtiyuriene peti'uximayatɨ, nitixaɨtɨ pɨkarayani 'ahetsiemieme.
ISA 57:13 Kepauka pemutahiwani parewiya pehawawatɨ, 'akakaɨyarixi mekematsi'utawikweitsitɨani kemɨ'ane yemekɨ pemɨwaranayexei. Mɨkɨ yunaime 'eka kaniwaranu'enitsitɨamɨkɨ, xeihɨtsieriyarikɨ mekanikumawerikuni. Peru kemɨ'ane nehetsie muyu'awieta kwie pɨyetuiriyarieni hetsiena mieme mɨhɨkɨtɨnikɨ meta yukwie kanayeitɨamɨkɨ nehɨrɨ mɨpatsie».
ISA 57:14 Mɨpaɨ pɨtitaniukieni: «Xekeneutiwewi, xekeneutiwewi, huye xekeneukuha'arita. Xeketenanutaxɨriexɨa neteɨterima wahuyeta mɨtiu'utɨka».
ISA 57:15 Mɨpaɨ mainekɨ 'amutewi meta mumariwe, yuheyemekɨ 'amuyeika, mɨpatsie mɨtitewa: «Ne meutitewatsie nekanikiekametɨni mɨpatsietsie, Peru yaxeikɨata yu'iyaritsie muyuhiwerie meta tixaɨtɨ mɨkarayuyeitɨa hamatɨa nepuyeika, nemɨwatɨrɨkariyanikɨ yu'iyaritsie memɨwerarani kemɨ'ane yu'iyaritsie memɨyuhiwerie nepɨwatɨrɨkariya.
ISA 57:16 Yuheheyemekɨ nepɨkamatsixanetani, meta yuheyemekɨ nepɨkaha'aka, xɨka mɨpaɨ 'anenike nehɨxie yunaitɨ memɨte'u'uwa nemuwarutiwewi mekaniukwiwaweni.
ISA 57:17 Neteɨterima memɨteyukahiwe'eriekɨ nepuyeha'a, 'axamemɨteyuriekaikɨ, ne'uyeha'aka nepɨwaru'uximatɨa, nepuwaruku'eiri, peru matsi mɨkɨ mepenukuwei huye 'axamɨ'anene.
ISA 57:18 Wahuye nepɨxeiya, peru ne 'aixɨa meteheu'eriekame nekaniwarayeitɨamɨkɨ, 'aixɨa 'anemekɨ nepuwaranuwitɨni, yemekɨ nepuwanɨtɨani. Meta memutitsuana wahetsiemieme,
ISA 57:19 mɨpaɨ mete'ukwikame nekaniwarayeitɨamɨkɨ: Kayuwatɨ mepɨpitɨarieni 'ateewa memu'uwa, meta 'ahurawa memu'uwa. Ne 'aixɨa meteheu'eriekame nekaniwarayeitɨamɨkɨ ―Yawé mɨpaɨ kanaineni―,
ISA 57:20 peru 'axateyuruwamete haramara muyuane hepaɨ mekani'aneneni, kayuwatɨ mutamare mɨkayɨwe, hamewarieya haxu mɨ'atɨwa meta tɨniriya.
ISA 57:21 'Axateyuruwamete kayuwatɨ memu'uwani mepɨkayɨwawe ―nekakaɨyari mɨpaɨ kanaineni―.
ISA 58:1 »Keneutahiwa karima, pepɨka'utimamaweni. Kwi keneutahiwa kuxineta hepaɨ. Neteɨterima keniwarutaxaneta memɨnetsi'aye'uniekɨ, 'axamemɨte'uyurikɨ, Kakuwu nuiwarimama.
ISA 58:2 Tukarikɨ mekaneniwautɨweni, nehuye mepɨmaiku, wa'atɨtɨ nuiwari heitserie memu'u'uwa mepɨtehɨkɨ, wa'atɨtɨ ne'inɨari niukiyari mepɨkate'uku'eiri. Mepɨnetsiwawirie heitseriemekɨ yanemɨtiyurienikɨ wahetsiemieme, puwanake nehepa 'ahurawa memakɨne,
ISA 58:3 meta mɨpaɨ xepɨnete'anutahɨawe: “¿Titayari teteyuhakie, panatsi 'ekɨ yapera'eriwa? ¿Titayari teteyuhiwerieka, panatsi 'ekɨ petatsixeiya?” »Peru kepauka xeme xemuyuhakie, xepuyuharerutatɨwe xeikɨa meta yuhetsɨa miemete kwinimieme xepɨtewa'uximayatsitɨa.
ISA 58:4 Xeme xeikɨa xepuyuhakie xeyutikwinike meta xeyutitienike, xeyutihutsunike. Xɨka xenakeni Kakaɨyari mɨxeta'eiyakɨ, xekeneyuhakieka, peru hikɨ xemɨyɨa hepaɨ hawaikɨ.
ISA 58:5 Mɨkɨ hakiya ne nemenayexei xeitukari xeikɨa pɨkamieme para tewi mɨtiuka'eniwanikɨ yuwaiyaritsie, manakatutsirekɨ xeikɨa haka hatɨa mieme hepaɨ, hiwerika kamixayari manakatɨnikɨ meta naxi muyukawirienikɨ. Xeme mɨkɨ hakiya xepɨte'uterɨwa, meta Yawé tukari minake.
ISA 58:6 »Hakiya nemanayexei, nemuwaxɨnakɨ pɨ'ayumieme kemɨkatiheitserietsie tepɨakɨ memɨhɨatɨka, yuku kwitaxiyari nemɨxɨnakɨ, kemɨ'ane waɨriyarika memɨte'aitɨarie nemɨwaxɨnakɨ, meta tinaimekɨ memɨtehɨatɨka nemɨwaxɨnakɨ.
ISA 58:7 Hakiya kani'ayumiemetɨni meuhakamɨkɨ hamatɨa pemɨtikwanikɨ, meta 'aixɨa pemɨtiwakiitɨanikɨ memɨka'ukii, mɨkarekakemari pemɨtikemaritɨanikɨ, meta kemɨ'ane 'ahepaɨ memɨ'anene hupemɨkawaraxɨrɨwanikɨ.
ISA 58:8 Xɨka mɨpaɨ petikamieni, 'ahekɨariya panatineni tau 'ɨrɨya hepaɨ 'anetɨ, 'ana yapauka 'aixɨa pekatinika'erimɨkɨ, tita mɨtiheitserie 'ahuye kananutayepimɨkɨ, meta Yawé xawatɨriyaya kamenanukuweiyamɨkɨ.
ISA 58:9 Pepitahɨawe, Yawé pɨmatsita'eiya, parewiya pepɨtawauni, mɨkɨ mɨpaɨ pɨtayɨni: “'Ena nekaniuweni”. »Xɨka yuku mahete pehehɨani, meta xanetsika metatsiere 'axaniuki,
ISA 58:10 xɨka memeuhakakwiku pewaparewieka, meta kemɨ'ane tiuka'eniwatɨ mɨreuyehɨwa xɨka petikumikwani, 'ana yɨwipa 'ahekɨariya kanitaimɨkɨ, 'atɨkari tuka hepaɨ 'anetɨ kanayeimɨkɨ.
ISA 58:11 Yawé yuheyemekɨ kamenikuwitɨnemɨkɨ, pɨmatsihuxaitɨaka kwie makuwakitsie, meta 'a'umeyarite kanititɨrɨkariyamɨkɨ. Haraweri 'aixɨa mɨtihatuiyarie pekanayeimɨkɨ, haixa pekanayeimɨkɨ mɨka'ukawauke.
ISA 58:12 'Ateɨterima kiekari meripaitɨ mieme mu'u'uni 'aixɨa mepɨtiyurieni, tenari meripaitɨ mieme mepanukuketɨani, “kurarute mu'u'uni 'aixɨa mɨtiyuruwa” pepɨtitewaka, meta “huye mɨtikɨnetɨne 'aixɨa yuruwame”.
ISA 58:13 »Xɨka xawati tukariyari kapatsiekame pe'ayeitɨatɨ petiuhayewa, meta pekayuharerutaneni netukari mɨpatsietsie, xɨka xawati “tukari witsimɨ'ane” petiuterɨwani, meta xɨka Yawé tukarieya mɨpatsie, “mɨmariwe” petiuterɨwani, xɨka kapatsiekame pe'ayeitɨatɨ petiuhayewa, meta xɨka pe'eyexeiyani pekayuharerutatɨ, meta niuki tixaɨtɨ mɨkatiyunaki'eriekɨ peka'utaniutɨ,
ISA 58:14 hikɨ 'ana Yawé hetsie temawierika pekanikaxeiyamɨkɨ, hɨritsie pe'uyeikame kawayutsie pe'anakaime nepɨmatsi'ayeitɨani, meta peyutemawiekame nepɨmatsi'ayeitɨani 'apaapa Kakuwu kwie nemɨyetuiritsie».
ISA 59:1 Yawé tɨrɨkariyaya 'etsipɨkatewi mɨratawikweitsitɨanikɨ, meta mɨkaheu'ena pɨkahɨkɨ.
ISA 59:2 'Axaxemɨte'uyuri kanihɨkɨtɨni xekakaɨyari hetsɨa 'ateewa mɨxeti'uitɨa. Mɨkɨ 'axamɨti'ane katiniyurieneni nierikaya meukunama mɨkaxe'eniekakɨ.
ISA 59:3 Xeme yumamatetsie xepeuxuxure, meta yu'itɨwametetsie 'axamɨti'anekɨ xepɨteheuwetɨka. Xeteni 'itarika pɨtikuxata, meta xeneni 'axa'anemekɨ pɨtikuxata.
ISA 59:4 Nixewitɨ pɨkahahiwa tita mɨtiheitserie rawawatɨ, nixewitɨ yuri mɨrainekɨ pɨkarataxaneta. 'Itarikatsie xepɨtewiya, yunaitɨ xepɨteyu'itaiyatɨwe. 'Axamɨti'anekɨ xepɨtihukata 'axamɨtiuka'iyari xepɨtiniweya xeikɨa.
ISA 59:5 Kuterixi watawári xepɨtsiniya meta tukatsi wawiniyari xepɨwewie. Kemɨ'ane mɨkɨ tawári mutakwani pɨmɨni, xɨka xewitɨ mɨkɨ tawári 'utare, kuu kanayenemɨkɨ.
ISA 59:6 Yu'itsari xemiwewie xemenakatɨni pɨkayɨwe, tita xemɨtewewiekɨ xemeuyukunani xepɨkayɨwawe. Wawewiya, 'axatiyurɨwame wewiyaya xeikɨa katinihɨkɨtɨni, wamamate 'axamɨti'ane xeikɨa katininetɨaka.
ISA 59:7 Wa'ɨkate kaniyumexɨitɨaka 'axamɨtiyurienikɨ hepaɨtsita, mepuyumexɨitɨa 'atsimɨkatiuka'iyari xuririyaya memɨtayeurienikɨ. 'Axa'aneme xeikɨa 'iyari mekaniwewieka, yuhuyeta mekateniu'unani meta ti'u'unime mekatenikuhayeikawani.
ISA 59:8 Kayuwatɨ muyeikanikɨ mɨ'ayumieme huyeyari mepɨkamate, 'aixɨa ti'anetɨ wahuyeta katiniumaweni, Huye tutunime mekaniwewietɨweni, kemɨ'ane mɨkɨ 'utɨa mumie kayuwatɨ muyeikani pɨkamate.
ISA 59:9 'Ayumieme tita 'aixɨa mɨti'ane tahetsɨa 'ateewa puyeika, meta tita mɨtiheitserie temɨkaheuta'axetsie puyeika. Hekɨariya tepɨtakwewiekai, peru naitɨ yɨriya xeikɨa pɨhɨkɨ, hekɨaripa te'u'uwatɨtɨ, yɨriya 'a'ayetsuikame tsata tepu'uwa.
ISA 59:10 Memɨkaheuneniere wahepaɨ 'ixumeritsie tekumetɨwetɨ tekaniuhuni, ta'itsɨkɨ xeikɨa teteheutsetɨwetɨ tekaniu'uwani memɨka'uhɨxi wahepaɨ. Tsepa tuka tepekaxɨrɨwe mɨyɨwini hepaɨ, tsepanetɨ 'aixɨa temɨteheu'erie, mɨkite wahepaɨ tepɨ'anene.
ISA 59:11 Teyunaitɨ tame hutseri wahepaɨ teputiyuane, kukuruxi memeutuxa wahepaɨ teputiyuane. Mɨtiheitserie tepɨtetakwewiekai, peru pɨkanua, mɨtatsitixɨna 'akuxi 'ateewa 'apuyeika.
ISA 59:12 'Ekɨ pepɨtimate waɨkawamekɨ temɨtehayuye'uniekɨ, tita 'axatemɨte'uyuri pɨtatsixaneta. Temɨtehayuye'unie tahamatɨa 'apuyeika, 'axatemɨte'uyuri tepɨmate.
ISA 59:13 Temɨkaheu'enana tepɨhɨkɨ, Yawé tepɨka'anu'eni. Takakaɨyari tepuwarixiwiyaxɨ. Teɨteri tepuwananaima meta tepɨwakwamana, 'itarikakɨ tepɨtekuxata ta'iyaritsie mayeneikakɨ.
ISA 59:14 Mɨpaɨ te'anetɨ 'aixɨa mɨti'ane tepɨkuwarixiwiya, meta tita mɨtiheitserie 'ateewa puyeika, teɨteri memayukuxexeɨriwatsie tita yuri mɨraine mepekahɨpa, heitserie yatepɨkateyurie.
ISA 59:15 Yuri mɨraine hawaikɨ pɨkahematsiɨkɨ, kemɨ'ane 'axamɨti'ane memuku'e'eiriwa tinaime yupiinite mepɨtekunawaiyarɨwa. Yawé pixei matsi pɨka'inakixɨ tita mɨtiheitserie mumawekɨ.
ISA 59:16 Kanixeiyani, kanihɨxiyaka mumawekɨ wahetsiemieme haniutɨ. 'Ayumieme yɨkɨmana kanayenemɨkɨ muwatawikweitsitɨanikɨ, mɨtiheitserie hetsɨanamieme kaniwatuikakamɨkɨ.
ISA 59:17 Tita mɨtiheitserie yuhetsie nunuwame hepaɨ panutikeni, meta yumu'utsie kananuyukanani kuya xupureruya tiyuwikweitsitɨwamekɨ, mɨtiwarakapitɨanikɨ kamixayari panakatɨni, meta yu'ɨtetsarika matayarikɨ puyuta'eima.
ISA 59:18 Yapɨtiwapitɨani kememɨte'uyuri, 'ateewa haramara tetsita kiekatari yapɨwayurieni: waɨkawa ha'atɨ memeye'unie wahepaɨtsita, meta pɨtiwarakapitɨani.
ISA 59:19 Tau makayuyuipike hepa kiekatari Yawé kemɨtitewakɨ mepɨtimakani, meta tau manatineikatsie kiekatari mumariwe mepeu'enieka. Karikɨ kaninuamɨkɨ haa tɨrɨkaɨyetɨ muwayeneika hepaɨ, Yawé hɨtsierieyakɨ muwayenexɨa.
ISA 59:20 «Tiyuwikweitsitɨwame Tsiyuni kaninuamɨkɨ, yunaime Kakuwu hetsɨa miemete wahetsɨa kaninuamɨkɨ 'axamete'u'iyaritɨ mekete'uhayewa.
ISA 59:21 Yawé mɨpaɨ kanaineni: «'Ikɨ netɨratu kanihɨkɨtɨni xehamatɨa nemiwewie: Ne'iyari xehetsie mɨyeka, meta neniuki nemɨmatsi'upitɨa pemekaterɨwakɨ 'ape'uyuatɨ, hatsuaku pɨkamatsiku'eirieni, meta 'aniwema wahetsie meta 'anuiwarima wahetsie, hikɨtɨtɨ meta yuheyemekɨ
ISA 60:1 »Kenanukukexi, kenexawatɨni, 'ahekɨariya kaninuaniri. Yawé xawatɨriyaya 'ahetsie kaniutitataweni.
ISA 60:2 Neuxei, kwie yɨriya kananukanaka, teɨteri wahetsie yɨriya 'amayetsuye kanixuaweni. Peru Yawé hekɨariyaya ximeri mieme 'ahetsie kanitaimɨkɨ, xawatɨriyaya 'ahetsie matsiɨkɨtɨ payani.
ISA 60:3 Nuiwarite mepuwitɨkieximeni 'axawatɨriya mexeiyatɨ, meta te'aitamete, 'ahekɨariya ximeri mieme mexeiyatɨ.
ISA 60:4 »Teikɨ kenenieri, kenanieretɨye'a: yunaitɨ mepuyuxeɨrie meta 'ahetsɨa mepɨ'axe. 'Aniwema 'ateewa mepaneika, 'aniwema 'ukari mepɨ'atɨariwa me'ɨtɨkietɨ.
ISA 60:5 Mɨpaɨ petiniereme waɨkawa pepuyukatemawieni, 'a'iyari puyuaneni, temawierikakɨ, mɨraye'atɨka mekamani'atɨiriekuni haramaratsie mieme, 'ahetsɨa katini'atɨariemɨkɨ nuiwarite tiwapiini mɨraye'atɨka.
ISA 60:6 'Ahetsɨa kameyutsixi mewaruhapatɨ yuwaɨkawatɨ mepɨ'axɨani, Mariyani meta 'Epa kiekatari. Tsawa kiekatari yunaitɨ mekani'axɨakuni, huru me'ɨtɨtɨ meta 'ɨkwa witsimu'ɨa, meta Yawé nɨawarieya mekuxatatɨ.
ISA 60:7 Yunaitɨ Tseraxi muxatsimama 'ahetsɨa mepuyukuxeɨrieni, meta Newayuti hetsɨa miemete muxatsi 'ukitsi mepɨmeteta'uximayatsirieni, mawari witsimu'ɨa hepaɨ nemawari taiyametsie mepanutikɨne, Ne witsitiyuxexeiyame nepayeitɨani netuki mɨmariwe.
ISA 60:8 »¿Kemɨ'ane mepɨhɨkɨ hai hepaɨ memanuyekɨka, meta kukuruxi memeutuxa wahepaɨ yu'ituatsie memekɨka?
ISA 60:9 'Ateewa kiekatari haramara tetsita, mepɨnetsitakwewie, kanuwa 'amupapa Taritsi mieme mexɨakate kani'axɨamɨkɨ, 'ateewa 'aniwema waratɨme, meta wahuru wapɨrata hatɨtɨ, Yawé memɨyetuirienikɨ 'akakaɨyari, Mɨpatsie 'Ixaheri hetsiemieme, mɨkɨ pemariweme pɨmatsi'ayeitɨa.
ISA 60:10 »Tewanarixi 'akuraru mepanukuhana, meta tewa'aitɨwamete mepɨmateta'uximayatsirieni. Tsepa neha'atɨ nemɨmatiukwinitɨakai, kemɨnetinakekɨ nepɨmatsinenimayaka.
ISA 60:11 'Akitenie yapɨreuyepietɨkani, tukarikɨ meta tɨkarikɨ pɨkareunarɨmiketɨkani, 'ahetsɨa pɨti'atɨarieni nuiwarite tiwapiinite waɨkawa muraye'atɨka, meta 'ahɨxie xuruku mehewetɨkaitɨ mepuku'uni tewa'aitɨwamete mema'iwarie.
ISA 60:12 Kemɨ'ane nuiwari mɨkameti'uximayatsirie, pɨkumawere, naitɨ pɨka'unarieni.
ISA 60:13 »Riwanu kemɨtimariwekai mɨpaɨ pepɨyɨni, huku 'amutɨtɨ, kwetsi kɨyeyari, meta tsiiná pɨ'atɨarieni, witsipemɨrakuyurienikɨ netuki manuwe. 'Aixɨa nepiyurieni hakewa ne'ɨkate meyuwetɨka.
ISA 60:14 'Ahɨxie mepɨkahɨxima'uni kemɨ'ane waɨriyarika memɨxete'aitɨakai waniwema, yunaitɨ kemɨ'ane memɨmatsixani'erie 'a'ɨkatɨa mepɨtihɨxima'uni, “Yawé Kiekarieya” mepɨmateterɨwa, “Tsiyuni Mɨpatsie 'Ixaheri hetsiemieme”.
ISA 60:15 »Tsepa pemuku'eiriwakai meta pemutixani'eriwakai, tsepa xewitɨ 'ahuye 'utɨma mɨka'uyeyeikakai, yanepɨtiyurieni 'ahetsie yuheyemekɨ pemuyuta'ɨrenikɨ meta temawierika yamɨreuyuhanenikɨ.
ISA 60:16 Nuiwarite waretsikɨ pepɨtikwaka, te'aitamete memɨtehexeiyakɨ pepɨtsitsitɨarieka. Hikɨ 'ana mɨpaɨ pepɨretimani kename, ne Yawé, 'awikweitsitɨwame nehɨkɨ, kename ne, nemɨtɨrɨkaɨye Kakuwu hetsiemieme, nemumatsiwikweitsitɨwame nehɨkɨ.
ISA 60:17 Wurunitse hetsiemieme huru nepɨmatsi'atɨirieni, meta tepɨa hetsiemieme pɨrata nepɨmatsi'atɨirieni. Kɨyexi hetsiemieme Wurunitse nepɨmatsi'atɨirieni, meta tetexi hetsiemieme, tepɨa nepɨmatsi'atɨirieni. Yanepɨtiyurieni kayuwatɨ pemexeiyanikɨ, meta tita mɨtiheitserie mɨmatsikuyuitɨwanikɨ.
ISA 60:18 'Akwietsie nanaimarika pɨkamariwani, meta pepɨkaka'unarieni, metatsiere 'akwie manuye'atɨka pɨka'anuye'unarietɨyani, matsi pɨta 'akurarute “Wikweitsitɨarika” pepɨtiterɨwa, meta 'a'ituparite “Nɨawari” pepɨtiterɨwa.
ISA 60:19 Tau pɨkahɨkɨtɨniri tukarikɨ mɨmatsihekɨariwiyani, meta metsa yuhekɨariyakɨ pɨkamatsihekɨariwiyani, Yawé pɨta 'ahekɨariya yuheyemekɨ mieme kanihɨkɨtɨkamɨkɨ, 'akakaɨyari pɨmatsixawatɨriyani.
ISA 60:20 'Atau hatsuaku pɨka'akayune, meta 'ametseri hatsuaku pɨkatɨni, Yawé kanihɨkɨtɨkamɨkɨ 'ahekɨariya yuheyemekɨ mieme, meta hiwerika tukariyari kaneutiparimɨkɨ.
ISA 60:21 Hikɨ 'ana yunaitɨ 'ateɨterima heitserie mepu'uwani, meta yukwietsie mepu'uwani yuheyemekɨ. 'Iteɨri nemikake mɨyɨra xepɨhɨkɨtɨni, newewiya 'aixɨa muyɨ kɨmana nemɨmariwe.
ISA 60:22 Waɨkawa mɨwerani xeimiriyarikɨ pɨtaxiɨni, 'etsimutewi nuiwari tɨrɨkaɨyetɨ payani. Ne Yawé nekanihɨkɨtɨni, kepauka tukari maye'ani yanekatiniyurimɨkɨ, nepɨkatihayewa».
ISA 61:1 Yawé naimekɨmɨyɨwe 'iyarieya nehetsie kaniyekani, mɨpaɨ mɨneranayexeikɨ niuki 'aixɨa manɨyɨne nemuwakuxaxatɨwanikɨ tixaɨtɨ memɨkateheuxeiya. Pɨnetsiheyenɨ'a yu'iyaritsie memɨte'ukakukuine 'aixɨa meteheu'eriekame nemɨwarayeitɨanikɨ, 'ateewa memehapanie nemɨwakuxaxatɨwanikɨ, meta kemɨ'ane memanutaxɨriya nemɨwaranayexɨnakɨ,
ISA 61:2 Yawé parewiyaya tukariyari nemɨkuxatanikɨ kemɨraye'anikɨ meta takakaɨyari kepauka mɨtiwarakapitɨani tukariyari, kemɨ'ane memuyuhiwerie nemɨwanɨtɨanikɨ,
ISA 61:3 Tsiyunitari memɨte'uka'eniwa nemɨwatɨrɨkariyanikɨ. Pɨnetsiheyenɨ'a kuruna nemɨxe'anutiketsirienikɨ naxiri pɨkahɨkɨtɨni, temawierika hatseitiyari nemɨxekawirienikɨ nutuixiyari pɨkahɨkɨtɨni, kamixa 'ixɨararipa mieme nemɨxe'anakatɨtɨanikɨ 'iyari mɨkayuwaɨriyari pɨkahɨkɨtɨni. Tuaxa tita mɨtiheitserie mɨrexeiya xepɨteterɨwarieni, Yawé 'iteɨrieya, kɨmana witsitixeiyarietɨ mayuyeitɨanikɨ.
ISA 61:4 Meripaitɨ mɨtiuka'unarie 'aixɨa xepɨtetiyurieni, meripaitɨ mieme kii mu'u'uni xepanuku'uitɨani, kiekari mu'u'uni 'aixɨa xepɨtiyurieni, meta meripaitɨ kiekatari wakii 'unimeyari mɨti'u'uni.
ISA 61:5 Hipatɨ teɨteri xemɨkawamate xemuxatsima mepɨwahɨtɨweni, xekwietsie meta xekaxie haraweriyaritsie mepɨteta'uximayata teɨteri 'ateewa kiekatari.
ISA 61:6 Peru xeme «Yawé mawari wewiwametemama» xepɨteterɨwarieni, mɨpaɨ mepɨxetekɨhɨaweni «takakaɨyari te'uximayatsiriwamete». Nuiwarite waɨkawa piinitɨarika kememɨtehexeiyakɨ xepɨtekwaka, wapiinite mɨraye'atɨka xetehexeiyatɨ xemuyuti'ɨre.
ISA 61:7 Mɨwatewiyaritɨnikekai, neteɨterima mepɨtekumikiwani waɨkawa 'imikieri kememɨteheuyehɨwa, memɨnanaimariekanikeyu, mepuyutemamawieka yukwiepa me'u'uwatɨ wakwie mayanikekaitsie, mɨpaɨ me'anekaku yukwietsie hutame hetsie timiemekɨ mepɨtekuhayewiyarieni, meta watemawierika yuheyemekɨ mieme payani.
ISA 61:8 «Ne Yawé, tita mɨtiheitserie nepɨtinaki'erie, peru nepi'uxiwe'erie 'inawari meta 'axamɨti'ane. 'Aixɨa nemɨtiuka'iyarikɨ wa'iwarika nepɨtiwamini, meta wahamatɨa tɨratu yuheyemekɨ mieme nepɨwewieni.
ISA 61:9 Xiɨyarimama mepetimatiwa nuiwarite watsata, meta waniwema, teɨteri watsata. Kemɨ'ane memɨwaxeiya, mepɨwaretimani kename mɨkɨ nuiwari Yawé 'aixɨa mɨwayurie mehɨkɨ».
ISA 61:10 Yawé hetsiemieme nepɨnetemawie yemekɨ waɨkawa, nekakaɨyari hetsie temawierika nepexeiya. Mɨkɨ wikweitsitɨarika kamixayari mɨnetsi'anakatɨtɨakɨ meta tita mɨtiheitserie matayari pɨnetsiwakuketɨa. Neneɨkeme hepaɨ nekani'aneni witsimɨrekemari, yatɨni wikiwame hepaɨ nekatinekukani.
ISA 61:11 Kwie kemɨtiyɨrariyawe, meta haraweri 'etsiya kemɨtitinenetɨwa, mɨpaɨ Yawé naimekɨmɨyɨwe katinitinetɨamɨkɨ tita mɨtiheitserie meta nɨawari yunaime nuiwarite wahɨxie.
ISA 62:1 Tsiyuni nemɨnaki'eriekɨ kayuwatɨ nepɨka'umaka, Kerutsareme nemɨnaki'eriekɨ nepɨkati'uxe, kepauka hetsiena tita mɨtiheitserie mutitataweni tau 'ɨrɨya hepaɨ, meta wikweitsitɨarikaya 'utsi kɨxeme mɨta'a hepaɨ.
ISA 62:2 Nuiwarite kwiepa memɨtama tita mɨtiheitserie 'ahetsɨa mieme mepɨxeiya, meta yunaitɨ te'aitamete kepemɨtimariwe, hekwamekɨ pekanitaterɨwariemɨkɨ, Yawé pɨmatsitaterɨwa.
ISA 62:3 Yawé mamayatsie kuruna hepaɨ pepɨ'aneni pemariwetɨ, ti'aitame haremaya hepaɨ pepɨ'aneni 'akakaɨyari mamayatsie.
ISA 62:4 «'Eiriwakame» pepɨkatiterɨwarieniri, meta 'akwie «Makumawe» pɨkatiterɨwarieni, matsi «Netemawierika» pepɨtiterɨwarieni, 'akwie «Ne'ɨya» pɨtitewaka, Yawé 'ahetsiemieme puyutemawieka, meta 'akwie pɨrekakɨnani.
ISA 62:5 Temaikɨ 'uka mutiuwitɨkɨ hepaɨ, mɨpaɨ kemɨ'ane mɨmatsi'anukakitɨani pumatiwitɨni, neneɨkeme mitiwitɨni xeiyatɨ muyutemawie hepaɨ, mɨpaɨta 'akakaɨyari pɨtiyutemawieka 'ahetsiemieme.
ISA 62:6 Kerutsareme, 'akurarutsie tehɨwemete nepɨwaru'uitɨa hatsuaku mepɨkatehayewa, tukarikɨ meta tɨkarikɨ yamepɨtehayeneniereni. Xeme, Yawé xemahɨawe, xepɨka'uxipieka,
ISA 62:7 meta yukakaɨyari xepɨka'uxipitɨaka, Kerutsareme 'aixɨa yurieyuke, nɨawari hayeitɨarieyuke kwiepa memɨtama wahetsiemieme.
ISA 62:8 Yawé mɨpaɨ katiniuyɨhɨritɨani, yumamá yutserieta miemekɨ meta yɨtɨrɨkariyakɨ: «Hatsuaku tawariri memɨmetsi'aye'unie nepɨkawamini 'a'iku memɨtikwanikɨ, meta kaxie winuyari mɨhekwa pemɨtiuta'uximayataxɨ hetsiemieme mepɨka'anu'ieni 'ateewa kiekatari, kɨmana 'ekɨ pemɨtiuta'uximayataxɨ.
ISA 62:9 Yawé menɨawatɨ mepitikwani yu'iku kemɨ'ane memika'e, netuki takwayaritsie winu mepanu'ieni kemɨ'ane kaxie harawerita memɨte'uta'uximayataxɨ».
ISA 62:10 Kitenietetsie xekeneutahakeni, xekeneutahakeni. Huye xekeneukuha'arita teɨteri wahetsiemieme. Huye 'a'atayeume xekeneutawewi. Tetexi naime huyeta metetɨka xekenexɨri. Patera xekeneuyuitɨwani teɨteri hipatɨ memixeiyanikɨ.
ISA 62:11 Mɨpaɨ 'aneme Yawé niuki kaniyetuaka kwie manu'axe paitɨ mɨye'anikɨ: «Tsiyuni niweya 'uka mɨpaɨ xeketeneutahɨawi: “Mana kanamieni Metsiwikweitsitɨwame. Yu'imikieri katinapika, Tita mɨra'iwaxɨ hamatɨana kaniumieni”».
ISA 62:12 «Teɨteri memɨpatsie» mepɨtetetewaka, «Yawé muwarutawikweitsitɨa». «Kiekari pemɨnaki'eriwa» 'ekɨta pepɨtitewaka, «Kiekari hatsuaku mɨkaku'eiriwa».
ISA 63:1 ¿Kemɨ'ane pɨyɨane 'Erumi makamie, meta Wutsira makamie, 'ixuriki yɨtsikimaɨyeme 'anakatɨtɨ? ¿Kemɨ'ane pɨyɨane mɨkɨ witsimɨrekemari, yutɨrɨkarima mumie? «Ne nekaniyɨaneni, heitseriemekɨ nemɨtikuxata, tɨrɨkariya nemexeiya nemɨratawikweitsitɨanikɨ».
ISA 63:2 ¿Titayari 'a'iwite tixeta, kaxie matiketsinarɨwa te'uximayatamete wahepaɨ?
ISA 63:3 «Ne kaxie nexaɨtame nekaniutiketsini, hipatɨ teɨteri mepɨkanetsi'uparewi. Nekanitiketsini nehaxɨakɨ, nekaniwarutipɨna neha'atɨ. Waxuriya ne'ixuriki kaniuwirieni, naime nekamixa nekaniutawirieni.
ISA 63:4 'Ariri kepauka nemɨnekɨhɨani yanepɨtimate. Newikweitsitɨarika wiyari paye'ari.
ISA 63:5 Neuxei, peru pumawekai kemɨ'ane mɨnetsiparewieni, nepɨhɨxiya xewitɨ mɨkanetsiparewimɨkɨkɨ. Netɨrɨkariya katiniuyurieni nemɨrayu'iwaxɨ, nehaxɨatɨtɨ kaneniuparewieni.
ISA 63:6 Neha'atɨ teɨteri kwiepa memɨtama nepɨwarutiketsi, nepɨwarutitarɨwaitɨa nehaxɨa tekɨxiyarikɨ, waxuriya kwiepa 'uhaneme nepayeitɨa».
ISA 63:7 Yawé naki'eriyaya mɨmariwe nepaye'erieni, meta kemɨtiuyuri 'aixɨa pɨ'ane minɨawanikɨ, naime kemɨtiuyuri tahetsiemieme, kemɨtiuyukanenimaya meta naki'eriyaya mɨmariwekɨ. Huu, pɨmɨire 'aixɨa 'anemekɨ kemɨtiuyuri 'Ixaheri nuiwarimama wahetsiemieme.
ISA 63:8 Mɨpaɨ nepaine: «Yurikɨ neteɨterima mepɨhɨkɨ, neniwema hatsuaku memɨkanete'itaiya». Mɨpaɨ pɨratɨa wawikweitsitɨwame
ISA 63:9 naime kememɨte'uka'eniwakaikɨ. Mɨkɨtɨtɨ puwarutawikweitsitɨa, xeime pɨkaheyenɨ'a meta nixeime niuki tuayame. Yunaki'eriyakɨ meta yunenimayatsikakɨ kaniwarutawikweitsitɨani, kaniwaranukutɨkɨ, kaniwaretɨkɨ yumamatetsie meripaitɨ hepaɨ.
ISA 63:10 Peru mɨkɨ mepɨkahenu'eni, meta 'iyarieya mɨpatsie mepu'iyarimɨtɨa. 'Ayumieme waraye'unietɨ patɨa, mɨkɨtɨtɨ pɨwarutakwi.
ISA 63:11 Teɨterimama meripaitɨ mieme mepaye'eri, Muitsexi muyeikakaitsie: ¿Hakewari haramaratsie muwaranawitɨ, muxatsi wahɨweme muxatsi mɨtiwaruwitɨkɨ hepaɨ? ¿Hakewari yu'iyari mɨpatsie watsata mɨ'atɨa,
ISA 63:12 yamɨtiuyuri yumamá mariwemekɨ Muitsexi tserieta mumienikɨ, kemɨ'ane haa manutayepi mana muyanikɨ, yuheyemekɨ matiwatɨ mayanikɨ?
ISA 63:13 ¿Hakewari haramaratsie muwaranawitɨ, makumawetsie yeikame kawayutsie manaka hepaɨ, witsi'anekɨa muwarawitɨ memɨkahekaxɨri?
ISA 63:14 Yawé 'iyarieya puwaruka'uxipitɨa tewaxi makuweritsie memɨtekwatɨwe wahepaɨ. Mɨpaɨ pepɨtiwaruwitɨ 'ateɨterima, waɨkawa pemariwetɨ pemayanikɨ.
ISA 63:15 Kenakanieri muyuawitsie paitɨ, keneutanierixɨa 'akiekari mɨpatsietsie meta witsimɨtiyuxexeiyatsie paitɨ. ¿Hakewari 'atɨrɨkariya meta 'a'ɨtetsarika? pepɨtatsikweririe mɨmɨirekɨ kepemutiyukanenimaya, witsikepemɨtiuka'iyari.
ISA 63:16 Peru 'ekɨ tapaapa pepɨhɨkɨ, tsepa 'Apɨrahami mɨkatatsimate meta tsepa 'Ixaheri mɨkatatsimaiwe, 'ekɨ, Yawé, tapaapa pepɨhɨkɨ, «Tatsiwikweitsitɨwame» yuheyemekɨ pepɨtitewa.
ISA 63:17 ¿Titayari Yawé, petareuyexɨrɨwa 'ahuyeta, meta titayari ta'iyari petitseiriya temɨkametsimakaxenikɨ? Kenenua te'a'uximayatsiriwamete pemɨwanaki'eriekɨ, 'anuiwarite 'ahetsɨa miemete yuheyemekɨ memɨhɨkɨ.
ISA 63:18 'Ateɨterima yatewimekɨ 'atuki mepexeiyakai, peru hikɨ memɨtatsi'aye'unie mepitiketsixɨa.
ISA 63:19 Wa'atɨtɨ hatsuaku pepɨkatatiuta'aitɨa tepɨ'ane, wa'atɨtɨ hatsuaku kepemɨtitewa temɨkate'uterɨwarieni hepaɨ.
ISA 64:1 Mɨpaɨ tepɨteha'eriwakaku muyuawi xɨka pewakayepienike muwa pemakanenikɨ, Hɨrite 'ahɨxie putiyɨyɨakawe,
ISA 64:2 tai kɨyexi kemɨtikutaiya hepaɨ, meta haa kemɨtikwaniyawe. Mɨpaɨ kepemɨtitewakɨ pepɨtiwaxeitsitɨani memɨmetsi'aye'unie watsata, 'ahɨxie meti'utɨ nuiwarite meputiyɨyɨakawawe.
ISA 64:3 Kepauka pemanakatɨa mariwemekɨ pepɨtiuyuri mɨpaɨ tekateha'eriwakaku, 'ahɨxie hɨrite putiyɨyɨakaxɨ.
ISA 64:4 Xewitɨ tawarita, meripaitɨtɨ mɨpaɨ pɨkati'enawe, meta xewitɨ mɨpaɨ pɨkatinieriwe, xeime Kakaɨyari 'ahepaɨ tiyurieneme pɨkaxeiyawe kemɨ'ane hetsiena memɨtewiya wahetsiemieme 'aixɨa tiyurieneme.
ISA 64:5 Pewaranunakeke pepayeyeika, memuyutemamawie heitseriemekɨ yamemɨtekahu meta 'ahuye mema'eriwa. Peru pepuyeha'arɨwe xɨka tekaheu'enanaka xɨka 'ahuye te'uku'eirieni. ¿Kehepaɨ tetetawikweni?
ISA 64:6 Teyunaitɨ teɨteri temɨka'itiyatɨka tepɨhɨkɨ, naitɨ heitseriemekɨ ketemɨteyurie 'ixurikite mɨtɨtɨnini hepaɨ pɨ'ane. Teyunaitɨ tepɨtiwauke kɨye xawari hepaɨ, titakɨ 'axatemɨte'uyuri 'eka hepaɨ pɨtatsi'u'enitsitɨaxime.
ISA 64:7 Nixewitɨ pɨkamatsihahɨawe, nixewitɨ pɨkayɨtɨrɨkariya 'ahetsie mɨtiwiyanikɨ. Metsɨ pekataniwarixiwiyani pekataniyetuani pɨta 'axamɨti'ane mɨtatsikuyuitɨanikɨ.
ISA 64:8 Peru tsepa mɨyatɨtɨ, Yawé, 'ekɨ ta'ukiyari pepɨhɨkɨ, tame haxu tepɨhɨkɨ, 'ekɨta 'iwewame. Teyunaitɨ tame 'awewiya tepɨhɨkɨ.
ISA 64:9 Waɨkawa pepɨkaha'aka, Yawé, pepɨkaheye'eriwaniri yuheyemekɨ 'axaketemɨte'uyuri. Nepɨmatsiwawirie, mɨpaɨ ketinemaika, kename tame 'ateɨterima tehɨkɨ.
ISA 64:10 'Akiekarite mɨpatsietɨka puka'unariexɨa, metatsiere Tsiyuni makumawe pɨta kanayani, Kerutsareme yuxaɨta kanekumaka.
ISA 64:11 Tatuki mɨpatsie meta mɨmariwe, hakewa tapaapama memɨmatsihenɨawakai, tai kanitaxɨtsitɨani. 'U'unitɨ katiniyuhayewa naitɨ tita waɨkawa temɨteheuyehɨakai.
ISA 64:12 'Ikɨ mɨya mɨtiɨyɨkɨ, Yawé, ¿'atsipekatiyurieni? ¿Kayuwatɨ petiumaka meta petatikwinitɨatɨ ka'inɨarimekɨ xeikɨa?
ISA 65:1 «Kemɨ'ane memɨkanetsiku'iwawakai wahetsɨa pɨta nepunehekɨataxɨ, kemɨ'ane memɨkanetsikuwautuwekai wahetsɨa yanepɨtiutanaki'eri memɨnetsitaxeiyakɨ. 'Iya nuiwari memɨkanetsihahɨawekai, mɨpaɨ nepɨtitahɨawixɨ: “'Ena nepuwe”.
ISA 65:2 Tukarikɨ nemamá nepaɨtatsera 'iya teɨteri memɨkanetsi'enie wahetsɨa, 'axamɨ'ane huyeyari 'utɨma memuhu, kememɨteku'eriwa xeikɨa yameteyurietɨ.
ISA 65:3 Mɨkɨ teɨteri mepɨhɨkɨ nehɨxie memɨnetsihaxɨatɨa tukarikɨ, harawerita mawari mekaniwewietɨweni meta 'ɨkwa witsimu'ɨa mekanitaiyatɨweni mawari taiyametetsie,
ISA 65:4 mɨkite wateukiyapa putayeixa meta yuxaɨtame tɨkarikɨ maku'awietsie pɨkatariyarɨwa kakutɨ, tuixu waiyari pukwa'a, meta yuxarita wai mɨka'itiya puka'eetsa,
ISA 65:5 mɨpaɨta kaniutaineni: “Teewa xekeneu'uwani. 'Ahurawa nehetsɨa xepɨkahakɨkani. Ne yemekɨ nekanipatsieka xehetsiemieme”. 'Ikɨ naitɨ pɨkanetinake kɨtsi nemɨ'ɨkweni hepaɨ, tai yamɨtita'a tukarikɨ kanihɨkɨtɨni.
ISA 65:6 »Nehɨxie yakatinaka'utsieni: Ne kayuwatɨ nepɨkatiyerɨni. Yanepɨtiwarakapitɨani, mekatenikwinikuni yuwaiyaritsie,
ISA 65:7 xeme 'axakexemɨte'uyuri hetsiemieme meta xepaapama kememɨte'uyuri ―Yawé mɨpaɨ kanaineni―. Mɨkɨta 'ɨkwa witsimu'ɨa mekaniutitaiya hɨritsie, meta hɨri 'amanutitɨtɨtsie 'axamepɨnete'utama, nekatiniwakwinitɨamɨkɨ wawaiyaritsie meripaitɨ 'axamemɨte'uyurikɨ».
ISA 65:8 Yawé mɨpaɨ kanaineni: «Kepauka xewitɨ kaxie takari witsi'aneneme mɨtaxeiya, mɨpaɨ putaine: “Nemarima 'aixɨa, 'akuxi kanayemaneni hayari”. Mɨpaɨta yaxeikɨa nepɨtiyurieni nete'uximayatsiriwamete nemɨwanaki'eriekɨ: Yunaime nepɨkawaka'una.
ISA 65:9 Kakuwu hetsie nuiwari nepuwarayenetɨani, meta Kura hetsie nepuwarayenetɨani kemɨ'ane 'ikɨ hɨrite wapiini mayani. Kemɨ'ane nemuwaranayexeiya tiwapiini payani, mana mepɨtiteni nete'uximayatsiriwamete.
ISA 65:10 Neteɨterima kemɨ'ane memɨnetsikuwautɨwe, Tsaruni makuweritsie wamuxatsima mepu'uwani, 'Akuhuxi mayeweritsie, wawakaitsixi mepɨye'uwani.
ISA 65:11 »Peru xeme Yawé xemuku'e'eiriwa meta nehɨri mɨpatsie xematɨmai, kakaɨyarixi waɨkawa mɨrexeiyanikɨ meta 'aixɨa pemɨtiumienikɨ memɨ'ayumiemete wahetsiemieme mexa xemukuha'arita meta winu nɨkame xemukatu'a,
ISA 65:12 'Ixiparakɨ xemukwi'iwakɨ nepɨxeyetuani, yunaitɨ xeme xepakatutsitaxɨani xemanutixitekiexɨanikɨ, Nexe'utahɨaweku xemɨkanetsi'uta'eikɨ, kepauka nemɨxe'utahɨawixɨ xepɨkanetsi'u'eni. Matsi 'axaxepɨte'uyuri pɨta nehɨxie tita mɨkanetinake xepɨte'anukuwei».
ISA 65:13 'Ayumieme, mɨpaɨ kanaineni Yawé naimekɨmɨyɨwe: «Nete'uximayatsiriwamete mepɨtekwaka, peru xeme xepɨhaakakwini, nete'uximayatsiriwamete mepɨhareka, peru xeme xepɨharikwini, nete'uximayatsiriwamete mepuyutemamawieka, peru xeme xepuyutetewiyani.
ISA 65:14 Nete'uximayatsiriwamete meputikwikani yu'iyarikɨ meyutemamawietɨ, peru xeme xeputihiwani yu'iyaritsie xete'uka'eniwatɨ, xeputitsuanani yu'iyaritsie xete'uka'eniwatɨ.
ISA 65:15 Nemɨwaranayexei wahetsie pɨtinake kexemɨtetewa 'axaxemɨ'itɨarikakɨ. Yawé naimekɨmɨyɨwe pɨxekwini, peru te'uximayatamete yuhetsɨa miemete yɨkɨ pɨtiwatiterɨwa.
ISA 65:16 Tsepa kemɨ'ane xewitɨ 'aixɨa mɨ'itɨariekakɨ mɨkɨ kwieyaritsie xɨka tiutawauni, yapɨtiyurieni Kakaɨyari yuri mɨhɨkɨ hetsiemieme, meta tsepa kemɨ'ane 'ikɨ kwietsie yamɨtiyɨhɨritɨani, yapɨtiyurieni Kakaɨyari yuri mɨhɨkɨ hetsiemieme, 'Uximatɨarika meripaitɨ mieme mepatɨmairi, hikɨ nepɨka'iku'eriwari.
ISA 65:17 »Kayuwatɨ xekeneu'enana, 'ari nekaninetɨaximeni muyuawi hekwame meta kwie hekwame. Tawariri pɨkatitaxatsieni meripaitɨ timieme, meta pɨkaha'eriwani.
ISA 65:18 Matsi xekeneyutemamawieka, yuheyemekɨ xekeneyutemamawieka, tita nemɨtinetɨaximekɨ: Nepinetɨaxime xeime Kerutsareme yutemawiekame, kiekari temawierika waɨkawa hexeiyakame.
ISA 65:19 Nepuyutemawieka Kerutsareme hetsiemieme meta nepuyutemawieka neteɨterima wahetsiemieme, tawarita mana pɨka'enierieni tsuari hiwariyari meta kukuiniya hiwariyari.
ISA 65:20 »Hatsuakuri mana tɨɨri kwitɨwa metakukuwetɨ mepɨkatixuawere, meta 'ukirawetsixi kwitɨwa mepɨkatakukuweni. Kemɨ'ane mɨmɨni xeitsienituyari hexeiyatɨ temaikɨ hepaɨ 'anetɨ pɨyɨaneni, peru kemɨ'ane mana mɨka'utineni 'axamɨ'itɨarieka hepaɨ 'anetɨ payeitɨarieni.
ISA 65:21 Kii mepɨtiwewieni, muwa mepayetetɨkani, kaxie mepɨka'eni meta takarieya mepɨtikwani.
ISA 65:22 'Ari kii mepɨkatiwewieni hipatɨ pɨta muwa memeutayaxekɨ, meta kaxie xepɨkaka'eni hipatɨ pɨta memitikwanikɨ. Matsi neteɨterima watukaritsie kɨye tukarieya kemɨ'ane mɨpaɨ kani'anemɨkɨ, nemɨwaranayexeiya kememɨteyurieni mepɨtekaxeiya mepɨteha'inɨata.
ISA 65:23 'Ari yakɨ xeikɨa mepɨkateta'uximayata, meta tɨɨri mepɨkawarayexeiya 'axamemɨ'itɨarienikɨ, mɨkɨ metatsiere waxiɨyarima 'ɨimari Yawé 'aixɨa miyurie mekanakɨnikuni.
ISA 65:24 'Akuxi mekanetsitahɨawiwekaku, ne nepuwata'eiya, 'akuxi meputiniukani peru ne 'ari newa'enieyu.
ISA 65:25 Maye muxa hamatɨa yunaitɨ mepɨtetikwani makutsiɨraɨyetsie, maye 'ɨxa pɨtikwani tuuru hepaɨ, meta kuu 'ikwaiya tumuanari pɨhɨkɨtɨni. Naitsarie nehɨri mɨpatsietsie tiyukwinitɨwatɨ kaniumawekamɨkɨ meta tiuyuka'unatɨ»,
ISA 66:1 Yawé mɨpaɨ kanaineni: «Muyuawi ne'uweni kanihɨkɨtɨni, kwie meta, hetsiena nemɨnewetɨka kanihɨkɨtɨni. Kii xemɨnetsi'utawewirieni pɨkayɨwe. Tixaɨtɨ kiiyari xepɨkanete'uxatɨawawe.
ISA 66:2 Netɨrɨkariya katiniuyurieni naime 'ikɨ mɨtiutawewi: mɨpaɨ tiɨyɨku 'ayumieme katiniuneni ―Yawé mɨpaɨ kanaineni―. »Ne nepuwaxeiya tixaɨtɨ memɨkateheuxeiya meta yu'iyaritsie memɨte'uka'eniwa, kemɨ'ane neniuki memayemakaxe.
ISA 66:3 Peru kemɨ'ane tuurutsixi memɨwamawatɨwe mɨkɨ teɨteri memɨwatakukuya wahepaɨ mepɨ'anene, kemɨ'ane muxatsi memɨwamawatɨwe mɨkɨ tsɨikɨri wakɨipi memanutimura wahepaɨ mepɨ'anene, kemɨ'ane hatsi mawariyari mɨwewie mɨkɨ tuixuri waxuriya memɨyetuaya wahepaɨ mepɨ'ane, meta kemɨ'aneta 'ɨkwa witsimu'ɨa mukutaiya mɨkɨ memɨkakakaɨyarixi memuwarayexeiya wahepaɨ kani'aneni. Mɨkɨ yuxaɨta yuhuye mepanayexeiyaxɨa, meta mepuyutemawieritɨa mɨxani'eriwakɨ.
ISA 66:4 'Ayumieme ne 'uximatɨarika nekananayexeiyamɨkɨ wahetsiemieme tita waɨkawa memɨtemakaxe nekatiniwaranunɨ'airiemɨkɨ. Nixewitɨ mɨkanetsi'uta'eikɨ kepauka nemɨwarahɨawekaitsie, kepauka nemutaniu, nixewitɨ pɨka'u'enaxɨ. Matsi, 'axamepɨte'uyuri nehɨxie tita mɨkanetinake mepɨte'anayexei».
ISA 66:5 Yawé niukieya xekeneu'eni, xeme niukieya xemayemakaxe: «Mɨpaɨ xe'iwama mekaniutiyuaneni memɨxexani'erie meta memɨxehayeweweiya kenemɨtitewakɨ xemɨnetsikuxatakɨ: “Yawé mariwetɨ kehayeitɨarieni, temawierika xehetsie temɨxeiyakɨ”. Peru mɨkɨ pɨta mepɨtewiyatsitɨarieni.
ISA 66:6 Hiwari pa'eniɨriɨkɨ kiekaritsie, tukita payeneika hiwari: Yawé hiwarieya kanihɨkɨtɨni memeye'unie yakatiniwarakapitɨamɨkɨ tita wahetsie mɨtimieme.
ISA 66:7 »Meripaitɨ ka'itakwiniwekaku 'akuxi Kerutsareme nunutsi kanayexeiya, 'akuxi ka'aye'awekaku matiniwenitsie, 'ukitɨme kaniutiniweni.
ISA 66:8 ¿Kemɨ'ane 'ari mɨpaɨ pɨtiu'enaxɨ? ¿Kemɨ'ane hepaɨna 'aneme puxei? ¿Tiyɨwe xewitɨ nuiwari mɨtinuiwa xeitukaritsie? ¿Xeikiekariyari mutinuiwa tiyɨwe xeitukaritsie? Matsi, Tsiyuni yutɨɨriyama kaniwarayexeiya 'akuxi ka'itakwiniwetɨ waɨkawa.
ISA 66:9 Xɨka ne niweyametsie nereuyepieni, nepipitɨani nunutsi mɨtinuiwakɨ ―Yawé mɨpaɨ kanaineni―. Nepɨkareunani niweyametsie, karikɨ ne nemɨhɨkɨkɨ memɨtiniweyanikɨ yanemɨtiwakupitɨwa
ISA 66:10 Matsi Kerutsareme hamatɨa xekeneyutemamawieka, kemɨ'ane yunaitɨ xeminaki'erie, hamatɨana xekeneutitsukwakani temawierikakɨ, yunaitɨ kemɨ'ane xemutitsuanakai hamatɨana.
ISA 66:11 Karikɨ xeme xekanititsitsitɨariekuni meta xekanitihuxaitɨariekuni, nɨtɨarika xekanikaxeiyakuni tsitsitsie, xepɨtihuxani, xepuyutemamawieka tsitsi 'amɨnenetsie».
ISA 66:12 Karikɨ Yawé mɨpaɨ kanaineni: «Mɨkɨ kayuwatɨ waɨkawa nepɨpitɨani haa tɨrɨkaɨyetɨ muhane hepaɨ, meta kwiepa memɨtama tiwapiini nepɨtipitɨani haa manatiyeuriweni hepaɨ. Xeme xepɨtsitsitɨarieka, xepa'ɨiyaka, tunutetsie xepukuheni.
ISA 66:13 Niwekame yuniwe kemɨtinɨtɨwa hepaɨ, mɨpaɨ ne nepɨtixenɨtɨani, Kerutsaremetsie xekaninɨtɨariekuni».
ISA 66:14 Kepauka xeme mɨpaɨ xemɨteneniere, yu'iyaritsie xepuyutemamawieka, hikɨ mɨkɨ waiyarieya pɨtaxutuni tupiriya hepaɨ, Yawé matsiɨkɨme payeitɨani yutɨrɨkariya te'i'uximayatsiriwamete watsata, meta yuhaxɨa kemɨ'ane memeye'unie watsata.
ISA 66:15 Yawé 'ukanamieniri tai hetsie yewetɨ. Kaxetateya kuyaxa mieme haikɨri mɨtɨrɨkawi pɨhɨkɨ. Yuhaxɨa pɨyetuani, tai nerɨkwariyarikɨ puyutahaxɨatɨani.
ISA 66:16 Taikɨ meta 'ixiparakɨ Yawé teɨteri yunaime puwataxaneta. Yawé tɨrɨkariyayatsie yumɨiretɨ mepɨkwini.
ISA 66:17 «Wahamatɨa mekanikwikuni kemɨ'ane mepatsiekame memayuyeitɨa meta kemɨ'ane memuyu'itie memeutahaxɨanikɨ harawerita, xeime manuyeka me'uweiyatɨ, meta kemɨ'ane tuixu waiyarieya memɨkwa'a, naikatsi meta hipame mɨtixani'eriwa ―Yawé mɨpaɨ kanaineni―.
ISA 66:18 »Ne, mɨkɨ 'axamemɨteyuriekɨ meta 'axamemɨteku'eriwakɨ, nepɨwaxeɨrimɨkɨ yunaime teɨteri kwiepa memɨtama, nuiwarite meta yɨkɨ 'anenemekɨ niuki memutiniuka mekani'axɨakuni mekanenixeiyakuni kenemɨtimariwe.
ISA 66:19 »'Inɨari nekaniwawewiriemɨkɨ, hipatɨ memɨyuhayewa nuiwarite kwiepa memɨtama wahetsɨa nepɨwaranunɨ'ani: Taritsi kiekariyaritsie, Puri, Riria (mana kiekatari kwinie mepɨteheutamɨiwawekai), Tuwari meta Kɨretsiya, meta haramara tetsita meteewatsie hakewa memɨkanetsihetamariwawe meta kenemɨtimariwe memɨka'ixeiyawawe. Mɨkɨ mekanenitaxatakuni kenemɨtimariwe nuiwarite watsata.
ISA 66:20 Meta naitsarie xe'iwama nuiwarite watsata memutetɨka nehɨri mɨpatsietsie Kerutsareme xepuwa'atɨani, mawari hepaɨ Yawé hetsiemieme, kawayutsixi, kaxetate yukukuyamete, kaxetate titɨkɨmete, muratsixi meta kameyutsixi wahetsie me'utekame xepɨwa'atɨani ―Yawé mɨpaɨ kanaineni—. 'Ixaheritsixi wahepaɨ, watsute 'aixɨa 'anenemeta, hatsi mawariyari Yawé tukita memɨte'atɨwa hepaɨ xekateniwa'atɨakuni.
ISA 66:21 Mɨkɨ wahetsieta hipame nepuwaranayexeiya, mawari wewiwamete memakɨnekɨ meta rewitsixi ―Yawé mɨpaɨ kanaineni―.
ISA 66:22 »Kemɨreutere ne'ixeiyakaku muyuawi meta kwie mɨhekwa neminetɨani, mɨpaɨta xenuiwarima meta kememɨtetetewa mepɨteheutere ―Yawé mɨpaɨ kanaineni―.
ISA 66:23 Xeimetseriyari 'anukayeikakaku meta xawati xeitsemana miemetsie, yunaitɨ kwiepa memɨtama mepɨ'axɨani nehɨxie memɨkatunuma'unikɨ ―Yawé mɨpaɨ kanaineni―.
ISA 66:24 Hikɨ kepauka memuwayekɨnetsie mepɨwaxeiya wakaxarite kemɨ'ane memɨnetsi'utami. »Kwitsi pɨkamɨni muwakwa'a, meta tai pɨkatɨni muwatixɨtsitɨwa: memɨxani'eriwa mepakɨne yunaitɨ kwiepa memɨtama wahɨxie».
JER 1:1 'Ikɨ Keremiyaxi niukieya kanihɨkɨtɨni Kirikiyaxi nu'aya. Keremiyaxi 'Anatuti kiekatari mawari wewiwamete wanuiwaritsie pumiemetɨkai, kiekari Wenikamini kwieyaritsie mukumakai.
JER 1:2 Yawé niukieya Keremiyaxi hetsɨa kaninuani, tamamata heimana haika wiyari Kutsiyaxi 'Amuni nu'aya ti'aitakaku Kura kwieyaritsie.
JER 1:3 Metatsiere hetsɨana kaninuani Kuhatsimi Kutsiyaxi nu'aya ti'aitakaku Kura kwieyaritsie, meta 'imatɨrieka wiyaritsie Tserekiyaxi Kutsiyaxi nu'aya ti'aitakaku Kura kwieyaritsie, tatsɨari tamamata heimana xeiwiyari heimana 'auxɨwime metseriyaritsie, kepauka Kerutsaremetari memehapanietsie.
JER 1:4 Merikɨtsɨ Yawé mɨpaɨ kanetiniutahɨawe:
JER 1:5 «Meripaitɨ 'amaamatsie 'akuxi nekamatsikayewetɨ nepumatsimatekai, nepɨmatsi'anayexeiyakairi, pekatinuiwawekaku 'akuxi, nepɨmatsi'anuyewaukairi, Neniukame nepɨmatsi'ayeitɨakairi nuiwarite wahetsiemieme».
JER 1:6 Ne mɨpaɨ nepɨtita'ei: «Yawé nekakaɨyari. Xɨa'ui 'akuxi 'aixɨa nepɨkareutaxatawe meta temaikɨ nepɨhɨkɨ yakɨnepɨnemate».
JER 1:7 Peru Yawé mɨpaɨ pɨnetiutahɨawixɨ: «Mɨpaɨ pepɨkahaineni: “Temaikɨ nepɨhɨkɨ yakɨnepɨnemate”, matsi hikɨ ne hakewa nemɨmatsihetanɨ'ani pekanimieni, kenemɨmatitahɨawe naimekɨ yapekanitayɨmɨkɨ.
JER 1:8 Ne 'ahamatɨa nepuyeikani 'aheima nemɨtanuanikɨ, nixeimetɨma pepɨkahaumakaka». Yawé mɨpaɨ nekanaineni.
JER 1:9 Hikɨ Yawé netenitsie kaneniutamayɨani, mɨpaɨ kanetiniutahɨawe: «Hikɨ 'atenitsie neniuki nekamaniupitɨani pemeutaniuwenikɨ.
JER 1:10 Neuxei, ne hikɨ heitserie nekamanipitɨaka nuiwarite meta te'aitamete wahetsie, »pemɨwarahunanikɨ meta pemɨwaka'unanikɨ, pemɨwareuyehɨpanikɨ meta pemuwaratixɨrɨwanikɨ, pemɨwaranuku'uitɨwanikɨ meta pemɨtika'iteɨtakɨ».
JER 1:11 Yawé niukieya nehetsɨa kaninuani mɨpaɨ kanetiniutahɨawe: «Keremiyaxi, ¿ketita petixeiya?» Mɨpaɨ nekatinita'eiya: «'Arimenituru 'iteɨriyari xeimamayari nepɨxeiya».
JER 1:12 Yawé mɨpaɨ kaniutayɨni: «'Aixɨa pepɨtiunierixɨ, neta mɨpaɨ nepɨtita'ɨwiya neniuki maye'atɨarienikɨ».
JER 1:13 Hutarieka, Yawé niukieya nehetsɨa kaninuani mɨpaɨ kanetiniutahɨawe: «¿Tita 'aku petixeiya?» Mɨpaɨ nekatinita'eiya: «Xari nekanixeiyani 'ukwakeme tayeta hakayeuriweme».
JER 1:14 Hikɨ Yawé mɨpaɨ kanetiniutahɨawe: «Yunaime 'ikɨ kwieyaritsie memɨtama wahetsie 'uximatɨarika nekananunɨ'amɨkɨ, xeyeta kanakayuamɨkɨ.
JER 1:15 Ne nekaniwata'inimɨkɨ te'aitamete xeyeta miemete —ne Yawé mɨpaɨ nekanaineni—. »Mekani'axɨakuni, yu'uweni mekani'atɨaxɨakuni Kerutsareme mɨranutahakitɨretsie mekanikuyaxikuni, kuraruyari naime mekanika'unakuni, meta naime Kura kiekariyarite mekaniwatakwikuni.
JER 1:16 Ne neteɨterima wahetsiemieme yanepɨtayɨni nemɨtiwaka'enitsitɨanikɨ, waɨkawa 'axamemɨte'uyurikɨ, memɨnetsi'uku'eirikɨ, hipame kakaɨyarixi pɨta 'ɨkwa memɨwatairietɨwekaikɨ, meta yumamatekɨ mete'utiwewieka memɨte'ayexeiyakaikɨ.
JER 1:17 »Peru 'ekɨ keneuyukuha'aritɨa. Kenemie yaketiniwaretahɨawi naime ne kenematitahɨawe. Pepɨka'utimamaweni mɨkɨ wahɨxie, xɨka pe'utimani marika wahɨxie matsi nekamanipitɨamɨkɨ.
JER 1:18 Ne hikɨ kiekari yukuraru 'a'atitewame mexeiya hepaɨ nekamatiniupitɨani, tepɨa 'apatɨ 'amuwe hepaɨ meta wurunitse tepɨayari kuraruyari hepaɨ, naime 'ikɨ kwieyaritsie hepaɨtsita, Kura kwieyaritsie te'aitamete wahepaɨtsita, 'itsɨkate meta mawari wewiwamete metatsiere yunaitɨ 'ikɨ kwieyaritsie kiekatari wahepaɨtsita.
JER 1:19 Mepɨmatsitamieni peru mepɨkamatsikemakaxɨani, karikɨ ne 'ahamatɨa nekaniuyeikamɨkɨ nematsixɨnake», Yawé mɨpaɨ nekanaineni.
JER 2:1 Yawé niukieya nehetsɨa kaninuani:
JER 2:2 «Kenemie Kerutsareme kiekatari mɨpaɨ ketiniwaretaxatɨa Yawé mɨpaɨ kanaineni: »“Nepa'eriwa matɨari 'ɨimariyari kepemɨnetinaki'eriekaitsie, 'anaki'eriyakɨ kepauka nemetsi hewitɨtsie, kepauka makumawetsie pemɨnetsi'uweiyakai, 'iya kwietsie 'etsiya mumawetsie.
JER 2:3 'Ixaheri pɨpatsiekai Yawé hetsiemieme, matɨari mieme 'ikwaxi pɨhɨkɨtɨkai hetsiena mieme, kemɨ'ane memitikwa'akai mete'uka'eniwatɨ mepakɨkakai, wahetsie 'uximatɨarika pɨ'axekai”»,
JER 2:4 Yawé niukieya xekeneu'eni Kakuwu xiɨyarimama, yunaitɨ 'Ixaheri nuiwarima teɨterimama.
JER 2:5 Yawé mɨpaɨ kanaineni: «¿Ketita 'axati'aneme mete'ukaxei nehetsie xetutsima, merikɨte yemekɨ menetsi'uku'eiri? Tixaɨtɨ mɨkatiyunaki'erie 'utɨa pɨta mepekɨ, 'ayumieme tixaɨtɨ mepɨkatehakɨ.
JER 2:6 Hatsuaku mɨpaɨ mepɨka'utiyua: “¿Hakewari Yawé 'Ekipitu mɨtatsihayewitɨ, makumawetsie mɨtatsi'uwitɨximekai, 'uwakikaku kweriwa'anekɨa, tixaɨtɨ mɨkaraxuawetsie meta 'umariwekaku, hakewa xewitɨ muka'anuyeikatsie meta xewitɨ muwa mɨkakietsie?”
JER 2:7 Ne nepɨxe'atɨa kwie 'aixɨa mɨ'anetsie, mana 'ikwaxi mɨtixuawe xemɨtekwakakɨ tinaitɨ mana mɨtixuawe. Peru xeme xe'u'axɨaka nekwie ka'itiyakame xepayeitɨa, xeme kwie nemɨxeyetuiri ne'ixani'eriekame xepayeitɨa.
JER 2:8 Hatsuaku mawari wewiwamete mɨpaɨ mepɨka'utiyua: “¿Hakewari Yawé?” 'Inɨari niukiyari memakumate hatsuaku mepɨkanetsi hetima, teɨteri wahetsiemieme memanuyetekai menetsi'aye'unietɨ mepakɨ, neniukamete Wahari hetsiemieme pɨta mepɨte'utaxa meta kakaɨyarixi tixaɨtɨ memɨkateyunaki'erie pɨta mewaruweiyatɨ mepakɨ.
JER 2:9 'Ayumieme, hikɨ 'akuxi hekwamekɨ nepɨxetaxaneta, metatsiere xeniwema waniwema wahetsie nepɨrahɨani,
JER 2:10 »Xekenehu Tsipɨre kwieyari haramara hixɨapa mɨyema hatetsitana, meta xekenenenieri mana kereyɨane, hipame xekeniwarutanɨ'a Tseraxi paitɨ, mana memenenierekɨ kemɨreyɨane, hikɨ xekeneuyu'ɨwiya xɨka hawaikɨ meripaitɨ mɨpaɨ reyɨni:
JER 2:11 ¿Kamɨtsɨ xewitɨ nuiwari tiuyeika hipame kakaɨyarixi waruku'eirieka hipame pɨta wareweiyaka, tsepanetɨ mekakakaɨyarixi? Neteɨterima mepɨnetsi'uku'eiri, nemɨmariwe wahetsiemieme, tixaɨtɨ mɨkatiyunaki'erie hekɨ.
JER 2:12 Muyuawi, kenemaka, 'ikɨ mɨya mɨtiɨyɨkɨ. Keneutayɨyɨakani meta waɨkawa keneutimamaweni.
JER 2:13 »Pɨtihuta 'axamɨti'ane neteɨterima 'axakememɨte'uyuri: Mepɨnetsi'uku'eiri, haixa mayeniere muhane nehɨkɨtɨme, putsute pɨta haa mukatuariketɨka yɨkɨmana mepuyutiwewiriexɨa, putsute mɨtatari haa mɨkareuteteritɨwa.
JER 2:14 ¿'Ixaheri kuta waɨriyarika ti'uximayatame tihɨkɨ? Mɨra'uximayatsietsie pɨka'utinuiwaxɨ. ¿Kamɨtsɨ titayari tinawatsiyarie?
JER 2:15 Mayetsi meputitsua hetsiena mieme, mepuyutihaxɨatɨa karima hetsiena mieme. Kwieya yuxaɨtame puyuhayewaxɨ, kiekariteya naitɨ putitaiyarie, nixewitɨri mana pɨka'uka.
JER 2:16 »'Akuxi matsi waɨkawa pemɨtiuka'eniwanikɨ, Menipitsi kiekatari meta Tapinetsi kiekatari mekameniukaxini pemu'umetsekame mekamenayeitɨani.
JER 2:17 Mɨpaɨ pekatinanuyemieni 'akakaɨyari Yawé pemuku'eirikɨ, mɨmatsi'uwitɨximekai 'ahuyeta.
JER 2:18 Hikɨta, tixaɨtɨ pepɨkarekaxeiya 'Ekipitu xɨka peheyani haa Niru mieme pemanuharenikɨ. Tixaɨtɨ pepɨkarekaxeiya 'Atsiriya xɨka peheyani haa 'Eupɨrate mieme pemanuharenikɨ.
JER 2:19 'Axakepemɨtiuyuri mɨkɨ 'ahetsie pɨrahɨani, heitserie yapemɨkatikatɨakɨ pepe'atimani. Keneutimaixɨa ke'axamɨ'ane meta kemɨtiuka'eniexɨani xɨka Yawé 'akakaɨyari 'uku'eirieni meta xɨka pekanetsi'ayemakatɨ pe'ayani
JER 2:20 »Mɨixa wiyari panuyemie 'ayuku pemanumuraxɨ, pemɨhɨakai pepɨ'axɨnaxɨ meta mɨpaɨ peputayɨ: “'Ahetsiemieme nepɨkareu'uximayatamɨkɨ”. Naitsarie hɨri 'amanutitɨtɨtsie, meta naime kɨyexi mɨ'e'etɨtɨkatɨa, pepɨ'ayetua tuminikɨ pemɨkumayɨiwanikɨ.
JER 2:21 Ne nepumatsi'uka'e hatsi 'aixɨa mɨ'anekɨ, kaxie 'aixɨa mɨ'ane nemanayexei hepaɨ. ¿Titayari petiu'apataxɨ kaxie 'axamɨ'ane nemɨka'imate peratɨa?
JER 2:22 Tsepa waɨkawa mɨtiyeitɨawekɨ pemɨ'akahauxi, meta tsepa waɨkawa xapuni pemɨ'akawiri, 'akuxi ne, 'axamɨti'ane 'ahetsie nepɨxeiyani
JER 2:23 »¿Pepɨkayɨwe mɨpaɨ pemutayɨni: “Neka'itiyatɨ nepɨkahayuyeitɨa, meta Wahari kakaɨyarixiyarite newarayexeiyatɨ nepɨka'uyeika”? Kenaye'eri kepemɨtiuyuri mayeweritsie. Keneu'atimaixɨa kepemɨtiuyuri. Kameyu 'ukaratsi manautsawe, naitsarie pemukuyeika.
JER 2:24 Puxu 'ukaratsi yeutanaka 'ɨtsita xeikɨa pemɨ'iyamate. Kepauka 'ahetsie pemɨreuyehɨwa, 'ekapa pepɨreuti'ɨkwe, kepauka pemeu'aweiyanɨaka, xewitɨ matsi'ukunuitɨani pɨkayɨwe. Nixewitɨtɨma 'uki pɨkati'uxe matsikuwaunetɨ: kepauka 'atukari maye'axe, yapauka pɨmetsi'ukaxeiya.
JER 2:25 »Peheumamawetɨ pepɨkakuyeikani, petiu'akwinitɨani, meta pemanatiwaukenikɨ pepɨkayupitɨaka. Peru 'ekɨ mɨpaɨ peputaine: “Hawaikɨ yemekɨ nepɨkayɨwe nemɨtihayewa yanetiyurienetɨ. Nepuwanaki'erie hipame kakaɨyarixi, meta mɨkɨ wa'ɨtɨma nepumieni”.
JER 2:26 »'Ixaheritsixi mepuyutitetewiya, meta tewa'aitɨwamete, 'itsɨkate meta mawari wewiwamete, Kakaɨyari niukametemamata tsiere, tinawayame kemɨtiyutewiya kepauka mɨxeiyarieni hepaɨ.
JER 2:27 Kɨye yatewime mɨpaɨ xepɨtekɨhɨawe: “'Ekɨ pepɨnepaapa”, meta xeime tete mɨpaɨ xepɨtehahɨawe: “'Ekɨ pepɨnetsi'utinuiwitɨa”. Xepɨnetsi'uwarixiwiyaxɨ, xepɨkanetsixeiyaku. Peru xehetsie 'uximatɨarika munuanitsie mɨpaɨ xepɨnetekɨhɨawe: “Kenanukukexi meta ketaneutawikweitsitɨa”.
JER 2:28 Kura, ¿hakewari tamɨ kakaɨyarixi pemɨ'atiwewiri? Yuwaɨkawame kakaɨyarixi pepɨwarexeiya kiekarite hepaɨ. Mɨpaɨ ketiniwarutahɨawi meke'anuku'uni. Xɨka 'aku memetsitawikweitsitɨakuni kepauka 'uximatɨarika pemexeiyanitsie.
JER 2:29 »¿Titayari xenetexaneta? Xeme yunaitɨ xenetsi'aye'unietɨ xepakɨ
JER 2:30 »Yakɨ xeikɨa nepɨtiwakwinitɨa neteɨterima, kenemɨtiwaheitseritɨa mepɨka'eniku. Maye mɨkatiuyukamariya hepaɨ, xe'ixipara puwarutikwai Kakaɨyari niukametemama xehetsɨa miemete.
JER 2:31 »Peru xeme, hikɨ miemete, xekeneu'eni Yawé niukieya: ¿Kamɨtsɨ ne makumawe netihɨkɨ yatɨni makumariwe 'Ixaheri hetsiemieme? ¿Titayari neteɨterima mɨpaɨ mete'utiyuane: “Tekanixɨxɨnini, tawari 'ahetsɨa tepɨka'axɨani”?
JER 2:32 ¿Kamɨtsɨ tiyɨwe 'uka 'ɨimari yukukate mɨraye'atɨka mɨratɨmaiya, yatɨni wikiwame 'iwiyari matɨmaiya? Neuxei mɨixa wiyariri kananuyemieni neteɨterima memɨnetsihatɨmaitsie.
JER 2:33 Keperakumate 'ekɨ pemɨwakuwaunikɨ 'ahamatɨa memɨkahini. Matsi 'ukarawetsixi 'axamemɨte'u'iyari 'ahetsie mepɨtehetimamateke.
JER 2:34 'Akamixa xuriyamakame pepanakatɨkɨ, teɨteri wahetsie mɨkarahɨiwa waxuriya meta nutuite, hatsuaku pemɨkawarutaxei metenawatɨweme. Naime 'ikɨkɨ
JER 2:35 'ahetsie nepɨrahɨani: mɨpaɨ pemutainekɨ kename 'axapekatiyuriwe, mɨpaɨ pemutainekɨ kename 'atsipekatiyuruwame, mɨpaɨ pemutainekɨ meta: “Kakaɨyari pɨkaha'ari nehamatɨa”.
JER 2:36 Yapauka pepɨ'akupata hipame wahetsie pɨta petiwiyamɨtɨ. Yaxeikɨatsiere 'Ekipitu kameniku'eirimɨkɨ, 'Atsiriya kemɨmatiuku'eiri hepaɨ.
JER 2:37 Mana pekaniyeyeimɨkɨ 'akatutsitɨa peheukumetɨkaitɨ, karikɨ Yawé kaniwarexɨrieni kemɨ'ane wahetsie pemɨtiwiyakai, wahamatɨa 'aixɨa pepɨkatiyeyani.
JER 3:1 »'Inɨarikɨ, xewitɨ 'uki yɨ'ɨya kaniuku'eirieni, mɨkɨta 'uka kanihayewa xeime pɨta 'uki tiwitɨnike. ¿Tiyɨwe 'uki matɨari mewitɨkɨkai nuame mitiwitɨnikɨ? Pɨkayɨwe. Mɨpaɨ xɨkatiuyɨni kwie naime ka'itiyakame kanayeitɨamɨkɨ. Mɨpaɨ kani'aneni, 'ekɨri yumɨireme pekaniwarukumayɨani, 'ayumieme pekapɨyɨweri nehetsɨa hutarieka pemunuani —Yawé mɨpaɨ kanaineni—.
JER 3:2 »Keneuxeiya 'iya hɨrite mɨmeetse: Hakewa 'ahamatɨa pɨkarekahitɨwe. Harawe tewiyari makumawetsie 'amuyeika hepaɨ, huye tetsita pepɨkayeixakai, 'atuxexerima pewakwewietɨ. Kwie ka'itiyakame pekanayeitɨani memɨka'akɨnama wahamatɨa pehunetɨ.
JER 3:3 'Ayumieme pɨkawiyemɨkɨ, 'ayumieme taxarita mieme wiyeri pɨkanua. 'Ukaratsi tuminikɨ muyuwitɨnɨa hepaɨ pepɨti'akɨhɨawe, tewiyarika pepɨkamate.
JER 3:4 Mɨixa wiyari pɨka'anuyemie mɨpaɨ pemɨnetiumarekai: “Nepaapa, 'ɨimariyari pemɨnehamiku,
JER 3:5 ¿'aheyemekɨ petiha'a? ¿Haxɨa peti'utani 'aheyemekɨ?” Mexi petikuxatakai, kepemɨtiuyɨwekaxɨa 'axapepɨtiuyuri».
JER 3:6 Kepauka Kutsiyaxi ti'aitametɨkaku Yawé mɨpaɨ kanetiniutahɨawe: «¿Petimate kemɨtiyuriene 'Ixaheri, yamɨkatikamie hɨkɨtɨtɨ? Kaneyani hɨri 'amanutitɨtɨtsie, mana kɨyexi mɨ'e'etɨtɨa tuminikɨ muyumayɨinɨa kanayuyeitɨani.
JER 3:7 Ne mɨpaɨ nepɨtiku'eriwakai 'arike mɨpaɨ tiyurieme tsenekatɨ tinenuani nehetsɨa. Peru pɨkanua nehetsɨa. Taruya 'ikɨ naime pɨtiuxei, Kura yamɨkatikamie,
JER 3:8 yaxeikɨatatsiere punierixɨ kenemɨtiku'eiri 'Ixaheri mɨnetsihehɨa, 'eiriya xapayari kenemɨtitawewiri hipame wahamatɨa mukahuikɨ. Mɨyatɨtɨ taruya, Kura 'axamɨtiuka'iyari, pɨka'utima, yaxeikɨa pɨnetsi'uku'eiri, hipame wahamatɨa hunetɨ kanayani.
JER 3:9 »'Ixaheri mɨkatiuhayewaxɨkɨ hipame wahamatɨa hunetɨ, kwie ka'itiyakame kanayeitɨani meta kemɨ'ane mɨkayɨkɨna mukumaɨwa kanayuyeitɨani tete meta kɨye kakaɨyarixiyari muwarayexeiyakaikɨ.
JER 3:10 Tsepanetɨ 'ikɨ naitɨ mɨyamɨtiɨyɨ, taruya Kura 'axamɨtiuka'iyari, pɨkanua nehetsɨa yu'iyarikɨ, kenametɨ nehetsɨanua kaniuyɨni», Yawé mɨpaɨ kanaineni.
JER 3:11 Yawé mɨpaɨ kanetiniutahɨawe: «Mɨnetsihehɨa 'Ixaheri matsi 'aixɨa pɨtiuka'iyari keyuri Kura 'axamɨtiuka'iyari.
JER 3:12 Kenemie tayeta 'ikɨ niuki kenetaxata: »“Kenenua, 'Ixaheri pemɨnetsi'uku'eiri. Neha'atɨ nepɨkamatsixeiya —Yawé mɨpaɨ kanaineni—. Haxɨari 'ahetsiemieme nepɨka'utani yuheyemekɨ, ne nemɨtiyukanenimayakɨ
JER 3:13 Keneu'atimaixɨa xeikɨa ke'axapemɨtiuyuri, meta kename Yawé pe'aye'unietɨ pehatɨa 'akakaɨyari. Naime kɨyexi mɨ'e'etɨtɨka hetɨa hipame kakaɨyarixi pepɨwarayexeiyakai, meta kepemɨkati'awaɨriya yapemɨtikamienikɨ”».
JER 3:14 Yawé mɨpaɨ kanaineni: «Nehetsɨa xekeneu'axɨa xemɨnetsi'uku'eiri, karikɨ ne xekɨna nekanihɨkɨtɨni. Yuxexuime xeikiekariyaritsie nepɨwarayewitɨxɨani meta yuhuhutakame xeinuiwaritsie miemete, Tsiyuni paitɨ nepuwa'atɨani.
JER 3:15 Muxatsi wahɨwemete nepɨwahɨritɨani yamemɨtekahu kemɨnetinake, memɨwa'ɨwiyanikɨ metemaiwawetɨ meta mete'akumaitɨ.
JER 3:16 »'Iya tukaritsie, kepauka xemuyutimɨire kepauka xemɨyuwaɨkawani 'ikɨ kwieyaritsie, 'ipaɨri pɨkatitaniukieni: “Tɨratu kakuniyari Yawé hetsiemieme”. Xewitɨri pɨkahe'eriwani, hauyewetɨ pɨkahayani meta hekwatɨ pɨkatawewiyani —mɨpaɨ kanaineni Yawé—.
JER 3:17 »'Iya tukaritsie Kerutsareme pɨtiterɨwarieni: ‘‘Yawé 'uwenieya”. Yunaitɨ nuiwarite mepuyukuxeɨrieni Kerutsareme memeyexeiyanikɨ Yawé kemɨtitewa, meta yu'iyari 'axamɨtiuka'iyari mepɨka'eniekari.
JER 3:18 »Mɨkɨ tukaritsie Kura nuiwariyari mepuyutinɨni 'Ixaheri xiɨyarimama wahamatɨa, yunaitɨ mekanayekɨnikuni tayeta kwie mukumatsie, mekani'axɨakuni kwie watutsima nemɨwayetuiritsie.
JER 3:19 »Ne mɨpaɨ nepɨtiunehɨawixɨ: »“Ne neniwe 'uki hepaɨ nemereuxeiyamɨkɨkaku, kwie yuheiwe'erinɨakame nepɨmatsiyeturienikeyu, 'imikieri yemekɨ witsimɨ'ane 'ikɨ nuiwarite watsata”. Ne mɨpaɨ nepɨtiku'eriwakai “Ne'ukiyari” penetimareke nepɨ'eriekai, meta hatsuaku penetsi'uweiyatɨ pekatihayewake nepɨ'eriekai.
JER 3:20 Peru 'ekɨ, 'Ixaheri tewiyari, pepɨkanetsiheu'enie 'ukaratsi yɨkɨna 'uku'eirieka xeime manukuwei hepaɨ»,
JER 3:21 Hiwari payu'eniɨriɨkɨ hɨrite mɨmeetsetsie, 'Ixaheritsixi wahiwerika hiwariyari, 'axameteyurietɨ 'amemu'uwakaikɨ, Yawé yukakaɨyari mematɨmaikɨ.
JER 3:22 «Xekeneu'axɨa, xemɨnetsi'uku'eiri, nepɨxeti'uayemani heitserie xemɨka'u'uwakɨ». «'Ena tepu'uwa, 'ahetsɨa teputi'axe, 'ekɨ Yawé takakaɨyari pemɨhɨkɨkɨ.
JER 3:23 Yurikɨ hɨritsie ketemɨteyuriekai pɨtikwamanarika, meta yemuritsie kemɨtiutatɨrarɨka pɨti'itarika. Yurikɨ Yawé takakaɨyari hetsie 'Ixaheri wikweitsitɨarikaya puxuawe.
JER 3:24 Kakaɨyarixi kepauka tewarayexeiyatɨ temakɨ pɨtiutixɨ piinite tatutsima 'etsiteyumatekaku memɨte'ukaxeiyakai: muxatsi meta wakaitsixi, tɨɨri 'ukitsi meta 'ukari.
JER 3:25 Tatewiyarikatsie tepahini, tatewinɨarika ketatsi'anukanani. Tame meta tatutsima Yawé takakaɨyari hepaɨtsita 'axatepɨte'uyuri. Tɨɨriyari paitɨtɨ meta hikɨ 'akuxi, yatepɨkatekakɨniwawe Yawé takakaɨyari kemɨtinake».
JER 4:1 Yawé mɨpaɨ kanaineni: «'Ixaheri, xɨka penuamɨkɨ nehetsɨa, kenenua nehetsɨa. Xɨka nehɨxie kakaɨyarixi pewarexɨrieni memɨxani'eriwa meta xɨka pekanetsi'uku'eirieni,
JER 4:2 xɨka yurikɨ, 'aixɨa 'anemekɨ meta heitseriemekɨ, yape'utayɨni: “Yurikɨ Yawé 'amuyeikakɨ”, hikɨ, “hetsiena mieme nuiwarite 'aixɨa me'itɨarietɨ mepakɨne, meta me'inɨawatɨ mepakɨne”».
JER 4:3 Yawé mɨpaɨ kanaineni Kura meta Kerutsareme kiekatari wahetsiemieme: «Xekenekwietsanatɨweni hakewa mɨkareka'etsitɨwetsie, meta xuyatsata xepɨka'etɨweni.
JER 4:4 Kura kwieyaritsie kiekatari meta Kerutsareme, yu'iyaritsie xeketeneu'utɨa tɨratu 'inɨariyarikɨ: xitekiya 'inɨariyari xekeneuyuwewiri Yawé xemayexeiyanikɨ, nɨkahɨrixɨa 'axaxemɨte'uyurikɨ nehaxɨa 'utani tai hepaɨ kayutɨnɨatɨ xe'utitaiya.
JER 4:5 »'Ikɨ xeketenetaxata Kura kwieyaritsie, meta xeketenetaxata Kerutsareme kiekariyaritsie. 'Awa xekeneutahɨtsi naitsarie 'ikɨ kwieyaritsie. Kwi mɨpaɨ xeketeneuhiwa: “Xekeneuyukuxeɨri meta tekaneutahaxɨakuni kiekarite yukuraru 'ahatitetewame mexeiyatɨkata”.
JER 4:6 Tsiyuni xekeneutamawiya paterakɨ memuyuta'unakɨ, hakewa xemeyuti'awieta xekeneutiwawa, kayuwatɨ xepɨkate'uka. Ne xeyetatsie nekanekanetɨamɨkɨ 'uximatɨarika meta tiyu'uname mariweme.
JER 4:7 Maye yuterɨta kanewayeyaniri, xewitɨ nuiwarite 'uname kanayeyaniri, yukie kanayeyaniri 'akwie 'akumaweme mɨhayewakɨ, 'akiekarite 'u'unitɨ kaniyuhayewamɨkɨ meta yemekɨ kiɨripa kanayeimɨkɨ.
JER 4:8 'Ayumieme, hiwerika kamixayari xekenanakatɨxɨa, xekeneutitsuanani xeyu'iyaritɨatɨ, karikɨ Yawé haxɨaya mɨtiyukwaxiya 'akuxi tahetsie pɨkahayeyeiwe.
JER 4:9 »'Iya tukaritsie ti'aitame peuyuyehɨani meta teɨteri wahetsiemieme memanuyetei mepeuyuyexɨrieni, mawari wewiwamete waɨkawa mepɨtimamani meta Kakaɨyari niukametetemama mepɨkatexatawaweni»,
JER 4:10 Ne mɨpaɨ nekaniutayɨni: «Neuxei, Yawé nekakaɨyari, pepɨwakwamanane 'ikɨ teɨteri meta Kerutsaremetari. Mɨpaɨ peputayɨ: “Kayuwatɨ mepexeiyani”, peru xɨari 'ixipara wakɨipitɨa peuwe».
JER 4:11 'Iya tukaritsie mɨpaɨ mepɨtetahɨawarieni 'ikɨ teɨteri meta Kerutsaremetari: «Hɨrite mɨmeetse makumawetsie mɨtiteitsie paitɨ 'eka xɨkatɨ pataneika neteɨterima wakiekari nemɨnaki'erie makuma hepa 'erietɨ. Mɨkɨ 'eka tihename pɨkahɨkɨ meta tɨriku hename pɨkahɨkɨ,
JER 4:12 'eka nemanɨ'ani mɨpaɨ pɨka'ayumieme mɨkɨ matsi waɨkawa pɨtɨrɨkaɨye, karikɨ ne yanekanitayɨmɨkɨ wahetsie nekatiniɨhɨamɨkɨ».
JER 4:13 Xekeneuxeiya hai hepaɨ 'a'ahume. Kaxetamama wiyeri mɨtɨrɨkaɨye hepaɨ pɨtiyuxexeiya. Kawayutsiximama kwinimieme matsi mepayɨwawe kwixɨtsi kememɨkahayɨwawe. Xɨa'ui tame. Tame tepeuyexɨri.
JER 4:14 Kerutsareme, 'a'iyaritsie keneu'a'iti 'axamɨti'anekɨ, pemɨtawikweitsitɨarienikɨ. ¿Kepaukake pepɨtihayewa 'iyaritɨarika kemɨmatikuyuitɨwa?
JER 4:15 Xewitɨ pahiwa 'uximatɨarika haxaxatatɨ Rani kwieyaritsie paitɨ meta 'Epɨrahini hɨriyaritetsie paitɨ.
JER 4:16 «Xekeniwarayehɨtɨa nuiwarite, xeketeneutaxata Kerutsareme kiekariyaritsie: “'Ateewa kiekatari mepɨ'axɨani memɨtatsi'anutinanikɨ kuyaxa hepaɨ mete'uhiwatɨ Kura kiekariteya hepaɨtsita”.
JER 4:17 Mepaketɨkɨ waritana 'etsiya mɨhɨrieka hepaɨ, netsi'aye'unietɨ matɨakɨ
JER 4:18 Kepemɨtiuka'iyari kepemɨtiyuriene 'ayumieme 'ikɨ mɨya pepɨranuyemie. 'Ikɨ 'a'uximatɨarika kanihɨkɨtɨni. Kwinimieme pɨratsiwi. Pɨmatikwinitɨa 'a'iyaritsie».
JER 4:19 Waɨkawa nepɨnehiwerie, nepɨtiuka'eniwa. Kukuiniya pɨnetsi'uta'ɨimura. Ne 'iyari puwatayuane. Xɨa'ui ne'iyari. Kayuwatɨ nemɨtiuyerɨni nepɨkayɨwe. Nepi'enie 'awa metahɨtsieriwa meta hiwari mɨrayukwine mieme.
JER 4:20 Xɨka tiuyutakwini tawarita pɨtiyutakwini, naitɨ 'ikɨ kwieyari pɨka'unariexime. Yapauka puka'unarie ne'ixuriki kiiyari hakewa nemayekatei.
JER 4:21 ¿Kepaukari tamɨ patera kayuwatɨ pɨtamare meta 'awa hetahɨtsieriwatɨ?
JER 4:22 «Neteɨterima mepɨka'u'iyari, mepɨkanetsimate, tɨɨri 'atsimemɨkatemate mepɨhɨkɨ memɨkatemaiwawe. Kwinimieme mepanayeyɨne 'axamemɨteyurienikɨ, 'aixɨa memɨteyurienikɨ mepɨkamate».
JER 4:23 Kwiepa nepeukanierixɨ, kwie pɨkamatsiɨkɨkai puyuxamuriekai, muyuawitsie nepeutinierixɨ, manatatsiere naitɨ pɨyɨwikai.
JER 4:24 Hɨrite nepuxei, puyɨyɨakatɨkatei, naitɨ yemurite pɨti'unikekai.
JER 4:25 Nemunierixɨ, xewitɨ tɨma pɨkayuhayewanekai, yunaitɨ wikixi mepeuyuta'unaxɨakai.
JER 4:26 Nemunierixɨ, kwie 'aixɨa mɨ'ane makumawe pɨhɨkɨtɨkai, naitɨ kiekarite 'u'unitɨ puyuhayewanekai, Yawé mɨyamɨtiuyuriekaikɨ, haxɨaya mɨtiyukwaxiyakɨ.
JER 4:27 Yawé mɨpaɨ kanaineni: «Naitɨ 'ikɨ kwieyari 'akumawetɨ kanayeimɨkɨ, peru naimeta nepɨkaka'una.
JER 4:28 'Ayumieme 'ikɨ kwieyari puyuhiwerieka, meta muyuawi meutitewatsie pɨkɨyɨre, 'ari mɨpaɨ nekaniutayɨni, nepɨkatihayewa, 'ari mɨpaɨ nepɨtiu'eri, ne'ɨtɨa nepɨkatayani».
JER 4:29 Tupikɨ temɨmɨmete meta kawayutsixi wahetsie memutei wayuariya me'enietɨ yunaitɨ kiekatari mepɨtananautsa. Hipatɨ 'ɨtsita mepɨtahake, hipatɨta 'aitsie mepeutiwɨwɨre. Naitɨ kiekari puku'eiriwaxɨ, xewitɨ tɨma kiekame pɨka'uyuhayewaxɨ.
JER 4:30 ¿Kepetiyurimɨkɨ, kiekari pemuka'unarie? ¿Titayari 'ixuriki witsimɨtixeta peranakatɨkɨ? ¿Titayari huru pereukapine? ¿Titayari 'ahɨxita perayu'utɨwa? Yakɨ xeikɨa witsipepɨ'akuyuruwa, karikɨ 'atuxexerima mekamenixani'erieka, mepiwautɨwe xeikɨa kememɨmetemienikɨ.
JER 4:31 Hiwari nepɨ'enie, niweyame hiwarieya hepaɨ 'anɨyɨneme, 'aiwarika matɨari mɨniweneni 'aiwarikaya hepaɨ 'anɨyɨneme. Tsiyuni witsimɨti'ɨimari 'aiwarieya kanihɨkɨtɨni, waɨriyarika meka'ietɨyeika, yumamá 'utatsetseratɨ mɨpaɨ mutaine: «Xɨa'ui ne, nepɨmɨximeri. Teyumiekate 'ari mepɨnetsiwiya».
JER 5:1 «Kerutsareme kayeyaritetsie xekeneutikɨni, 'anɨkai xekunieretɨwetɨ, teɨteri memayukuxexeɨriwatsie xekeneutinieri. Xɨka xeime xehetaxeiya heitseriemekɨ yatiyurieneme, tita yuri mɨraine tikuwauneme, ne nepɨreiyehɨwirieni 'ikɨ kiekari.
JER 5:2 Tsepa mɨpaɨ memɨteyuhɨritɨa: “Yurikɨ Yawé mayeyurikɨ”, yakɨ xeikɨa mekateniyuhɨritɨaka».
JER 5:3 Yawé, 'ekɨ pepɨtikuwaune 'ateɨterima yamemɨtekahunikɨ. Pepɨtiwarukwinitɨa mɨkɨ teɨteri, matsi pɨkawarekwinixɨ, pepɨwarutayuniyaxɨ, matsi mepɨka'uyuwaɨri 'aixɨa memuyuyurienikɨ. Yunierika meputseiriyaxɨ 'ai hepaɨ, mepɨka'uyuwaɨri memɨtehayewakɨ.
JER 5:4 Hikɨ mɨpaɨ nepɨtiu'eri: «Mɨpaɨ pɨ'ane hawerimɨ'ane, memɨka'u'iyarini wahepaɨ mepɨte'u'uwa, memɨka'imatekɨ Yawé huyeya meta yukakaɨyari 'aitsikateya.
JER 5:5 Memanuyetei wahetsɨa nepumie hikɨ nepɨtiwaretaxatɨani, mɨkɨ hɨrixɨa mepimate Yawé huyeya meta kemɨti'aita wakakaɨyari». Peru mɨkɨta yuyuku mepanumuraxɨ meta kaunari kɨmana memɨhɨatɨkatei xekananutekixɨani.
JER 5:6 'Ayumieme maye yeutanaka pɨtiwakwinitɨani meta puwatikwani 'ɨrawe makumawetsie kiekame, wakiekarite hɨxie tɨwe puhupa wahupietɨ, kemɨ'ane muwayeyani pɨtatsanarieni, waɨkawa 'axamemɨte'uyurikɨ meta mɨiremekɨ yamemɨkatekakɨkɨ.
JER 5:7 «¿Titayari nemereuyehɨwirieka? 'Aniwema mepɨnetsi'uku'eiri, memɨkakakaɨyarixi wahetsɨa mepɨteyuhɨritɨa. Kepauka nemɨtiwakupiniriekai tita memɨteheuyehɨakai, mɨkɨ memɨkayɨ'ɨitama mepɨwarukumayɨa 'ukarawetsixi yuwaɨkawatɨ memɨwakumaɨwa wakiita mepuyukuxexeɨriwakai.
JER 5:8 Kawayutsixi 'aixɨa memɨtemikie meta waɨkawa memɨtɨrɨkawi wahepaɨ mepɨ'anene, yunaitɨ 'ukarawetsixi memɨkawa'ɨitama wahekɨ mekaniutitsuanani».
JER 5:9 Yawé mɨpaɨ kanaineni: «¿Kareuyewetse mɨkɨkɨ nemɨtiwakwinitɨani? ¿Kareuyewetse mɨkɨ nuiwari mɨya memɨte'u'iyari nemɨtiwarakapitɨanikɨ mɨkɨ kememɨnetsi'uyuri?
JER 5:10 »Xuruku 'utɨa xekeneutayeixɨa 'ikɨ kaxie mayematsie, xekenayehuna, peru hipame xekeneuhayewa. Xekenamuraxɨa yɨrariyarite, karikɨ mɨkɨ Yawé hetsɨa pɨkamiemete.
JER 5:11 Teɨteri 'Ixaheri hetsiemiemete meta Kura kwinimieme yemekɨ yamepɨkatehu»,
JER 5:12 Mɨkɨ Yawé hepaɨtsita mekateniu'itani, mɨpaɨ paitɨ matsi mekaniutiyuaneni: «Kakaɨyari pɨka'uyeika. Tahetsie 'axati'anetɨ pɨkatinuani, kuyaxa tahetsie pɨkanuani meta haakaxa».
JER 5:13 Kakaɨyari niukametemama 'eka hepaɨ mepɨ'anene: Yawé niukieya wahetsie pumawe. Mɨpaɨ ketiwaruyurieni kememutiyuane.
JER 5:14 'Ayumieme, Yawé mɨpaɨ paine, Kakaɨyari Naimekɨmɨtɨrɨkaɨye: «Mɨpaɨ memutiyuanekɨ teɨteri, neniuki 'atenie tai hepaɨ kani'anemɨkɨ, meta 'ikɨ teɨteri, kɨyexi kwinimieme netɨ muwe hepaɨ. Mɨkɨ tai kaniwatixɨtsitɨamɨkɨ.
JER 5:15 »Teɨteri 'ixaheritsixi, xehetsɨa neni'atɨamɨkɨ xeime nuiwari teewatanaka, xeime nuiwari mɨtɨrɨkaɨye meta meripaitɨ mɨmieme, xeime nuiwari waniuki xemɨkamate, waniuki xemɨka'enie
JER 5:16 Mɨkɨ yunaitɨ kuyaxi mepɨka'ukamama, wa'ɨrɨ mɨki peutiwie.
JER 5:17 Tita pemɨti'etsa meta 'a'ikwai naime mepɨtekaxɨni, 'aniwema 'ukitsi meta 'ukari yunaime mepɨwakwini, 'amuxatsi meta 'awakaitsixi mepɨwakwini, 'akaxie meta piní mepɨkaxɨni. 'Akiekarite kuraruyari 'amatitetewa, wahetsie pemeuwaɨrekai, naitɨ pɨka'unarieni».
JER 5:18 Yawé mɨpaɨ kanaineni: «Peru mɨkɨ tukaritsie, 'akuxi yunaime nepɨkaxeka'una.
JER 5:19 Kepauka mɨpaɨ pemɨtita'iwawiyarieni: “¿Titayari Yawé takakaɨyari mɨya tatiuyuri?”, 'ekɨ mɨpaɨ pekatiniwata'eiyamɨkɨ: “Xeme kexemɨnete'uku'eiri meta yukwietsietɨtɨ hipame kakaɨyarixi xemuwarayexeiyakaikɨ, mɨpaɨta xeime kwieyaritsie hipame teɨteri xepɨtewarayexeiyani”.
JER 5:20 »'Ikɨ Kakuwu xiɨyarimama xeketeniwarutaxatɨa meta yaxeikɨa Kura kwieyaritsie:
JER 5:21 'Ikɨ ketineu'eni, kiekari pemɨka'uka'iyari meta pemɨka'awaɨriya yapemɨtikamienikɨ, hɨxi pehexeiyatɨ peru pemɨkaheuniere, naka pehexeiyatɨ peru pemɨkaheu'ena».
JER 5:22 Yawé mɨpaɨ kanaineni: «¿Kamɨtsɨ petiuhayewaxɨ penetsi'ayemakatɨ? ¿Kareuyewetse pemɨnetsi'ayemakaka? Ne xiekari 'anekanitiyeni haramara mata'atɨka 'inɨarieya mɨhɨkɨtɨnikɨ, mana muye'atɨyeikanikɨ yuheyemekɨ. Tsepa hamewari mana mɨreutiwaya, mana pɨka'anutitsuna, tsepa kwinimieme mutaine, mɨkɨ 'inɨari heima pɨka'anutiyani.
JER 5:23 Peru 'ikɨ teɨteri 'iyari tse'ime mepexeiya kaheu'ename, mepɨnetsi'uku'eiri, 'axamete'u'iyaritɨ mepakɨ.
JER 5:24 Mepɨkayu'iyaritɨa tɨma meta mɨpaɨ mepɨka'utiyuane: “Yawé tepayemakaxeni, takakaɨyari, wiyeri meyenɨ'awa tukarieya 'aye'axekaku, wiyeri witaritari mieme meta taxarita mieme, meta tsemana temɨ'inɨatatsie pɨtatsi'inɨaritɨa mɨkɨ tsemanayaritsie temɨka'itsanakɨ”.
JER 5:25 Ke'axaxemɨte'uyuri xeme naime 'ikɨ pɨtixe'unawairi, 'axamɨti'ane xemɨtehexeiya pɨxekunamirie ke'aixɨa xemɨ'itɨariekakeyu.
JER 5:26 Kanahekɨaka nekiekaritsie mekanixuaweni 'axamemɨte'u'iyari, mehupatɨ xeikɨa wikixi wahupiwamete wahepaɨ, winiyari memuwɨwɨtɨwa teɨteri memɨwawiniyakɨ.
JER 5:27 Wikixi wakiite hepaɨ waɨkawa mehɨpɨnetɨ, wakiite 'irɨmarikɨ xeikɨa pɨtihɨpɨne, 'ayumieme kwinie metehexeiyatɨ mepayuyeitɨa meta mamariwawemete mepakɨ,
JER 5:28 kwinimieme metewaiyatɨkaitɨ meta meyuti'ɨretɨ. Ke'axamemɨteyurie hawaikɨ pɨkaheu'axe: nutui hetsiemieme 'aixɨa mepɨkate'akayuruwa, 'aixɨa 'anemekɨ 'amuyeikanikɨ, metatsiere tixaɨtɨ memɨkateheuxeiya heitserie kememɨtehexeiyakɨ yamepɨkateyurie».
JER 5:29 Mɨpaɨ kanaineni Yawé: «¿Kareuyewetse mɨkɨkɨ nemɨtiwakwinitɨani? ¿Kareuyewetse mɨkɨ nuiwari mɨya memɨte'u'iyari neta nemɨtiwarakapitɨanikɨ mɨkɨ kememɨnetsi'uyuri?
JER 5:30 »Yemekɨ mariwemekɨ meta mariutsika pɨtiutine 'ikɨ kwieyaritsie.
JER 5:31 Kakaɨyari niukametemama 'itarikakɨ mepɨtekuxata, mawari wewiwamete mepɨte'aita kemɨtiwanake, meta neteɨterima mɨpaɨ pɨtiwanake. Peru, ¿Kexeteyurieni xeme kepauka naitɨ mɨtinɨretsie?
JER 6:1 »Xekenayekɨni Kerutsareme kiekariyaritsie Wenikamini xiɨyarimama. 'Awa xekenetahɨtsi Tekuha paitɨ. 'Inɨari xekenanuyewi Weti-Hakereni paitɨ. 'Uximatɨarika mepɨtatsiwewirieni meta mepɨtatsika'una, kuyaxi meyumɨiretɨ metɨrɨkaɨyetɨ tayeta 'amepayehu.
JER 6:2 Tsiyuni nekanika'unarɨmeni, witsimɨti'ɨimari meta mukweriwa'ane.
JER 6:3 Tehɨwemete meta yumuxatsima mewara'arietɨ mepɨ'axɨani hetsɨana: 'auriena mepayaxetɨkɨne, yuxexuitɨ mepenayexeiyaxɨani hakewa wamuxatsima memɨtehetikwa'anikɨ».
JER 6:4 «Xekeneuyukuha'aritɨa mɨkɨ temɨtamienikɨ. Tekanitamiekuni tuka haye'ayu. Peru, xɨa'ui tame, tukarikɨ pɨkareutere meta 'etɨriya 'apɨtewi tɨkarikɨ mieme.
JER 6:5 Hikɨmɨtɨka, tɨkarikɨ tepɨwatakwini, titatsie memɨteyukɨtɨrɨkariya tepɨwaka'unierieni».
JER 6:6 Mɨpaɨ kanaineni Yawé Naimekɨmɨtɨrɨkaɨye: «Kɨyexi xekeneutiwiteki xekeneutawewi makeme Kerutsareme xemeutahaxɨanikɨ. 'Ikɨ kiekari peuyewetse mɨtikwinitɨarienikɨ, mana nanaimarika xeikɨa muxuawekɨ.
JER 6:7 Putsuta haa kemɨrewatineika, mɨpaɨta 'axamɨti'ane Kerutsareme pɨtiuhane. Hetsiena nanaimarika xeikɨa pɨrayu'eniɨriɨkɨ meta 'imieri, mana kwiniya xeikɨa nepɨxeiya meta teɨteri mewitekietɨkaime.
JER 6:8 Keneu'apata, Kerutsareme, nemɨkamatsi'uku'e'eiriwanikɨ. Xɨka mɨpaɨ peka'ɨyɨni, makumawe nepɨmatsihayeitɨani, xewitɨ mɨka'anuyeika».
JER 6:9 Yawé mɨpaɨ kanaineni Naimekɨmɨtɨrɨkaɨye: «Xekeniwarutiwawa 'ixaheritsixi memuyuhayewaxɨ. 'Aixɨa xeketeniwaruwawa, kaxie 'imatɨrieka mieme xemɨwautɨweni hepaɨ, mamateyatsie tawarita xekeneukaxeiya, kaxie 'inɨweme mɨtiuka'iyari hepaɨ».
JER 6:10 ¿Kemɨ'ane nepɨtahɨawe? ¿Kemɨ'ane nepayemari'itɨani? ¿Kemɨ'ane pɨnetsi'enieni? Yunakata mepeukanatɨka mepɨkaheti'enatɨkɨka. Yawé niukieya 'axamepɨte'enie, mepixani'erie memi'enienikɨ.
JER 6:11 Peru ne Yawé haxɨayakɨ nepɨhɨne, meta nepɨka'inewieri. «'Ahaxɨa tɨɨri kaye 'utuma memɨye'uwa wahetsie keneukawiwi, metatsiere temari wahetsie, karikɨ mekanitiwiyariekuni memɨneneɨke meta memɨwikie, 'ukirawetsixi meta kwinimieme memɨte'ukirawetsixi».
JER 6:12 Yawé mɨpaɨ kanaineni: «Wakiite, wakwie meta wa'ɨitama hipame wahetsiemieme katinayeimɨkɨ, karikɨ ne netɨrɨkariya nekananunɨ'amɨkɨ 'ikɨ kwieyaritsie kiekatari wehetsiemieme.
JER 6:13 »'Etsimemɨyumate meta memu'ukirawetsixi, yunaitɨ mepɨtehiwe'erie tita mɨkatiheitseriekɨ memɨte'iwanikɨ. Kakaɨyari niukametemama meta mawari wewiwamete, yunaitɨ mepɨte'itawa.
JER 6:14 Neteɨterima mepɨwa'uayema herie miemekɨ xeikɨa, meta mɨpaɨ mepɨtewarahɨawe: “Kayuwatɨ puma, kayuwatɨ puma”, 'aixɨtsɨ kayuwatɨ mɨka'umatsie.
JER 6:15 ¿Kamɨtsɨ mete'uyutitetewiyaxɨ kemɨtixani'eriwakɨ yamete'uyurieka? Hawaikɨ, tixaɨtɨkɨ mepɨkateyutitetewiyawawe, mepɨka'imate paitɨ tita mɨtitewiyarika. 'Ayumieme, tsepari kemɨ'ane memɨwarutakwi, kepauka 'uximatɨarika wahetsie nemɨkawiwieni, nepɨwaka'una»,
JER 6:16 Yawé mɨpaɨ kanaineni: «Huyeta xekenewa'uti hikɨ xekeneutanierixɨa, xekeneuta'iwau huye meripai mieme hepaɨtsita. Xekeneuta'iwau huye 'aixɨa mɨ'ane hepaɨtsita, hikɨ mɨkɨ xepɨka'uku'e'eiriwani. Mɨpaɨ xepɨte'ikaxeiya 'uxipiya xemuku'eriwa. Peru mɨkɨ mɨpaɨ mekaniutiyuani: “Hawaikɨ tepɨka'enukuweiya”.
JER 6:17 Ne kuyaxi tehɨwemete nepuwaru'uitua xehetsiemieme, hikɨ mɨpaɨ neputayɨ: “Xekeneta'enanaka 'awa petayuani”. Mɨkɨ mɨpaɨ mekaniutiyuani: “Tame tepɨkata'enanaka”.
JER 6:18 'Ayumieme, nuiwarite xekeneu'enana. Xepɨtehetimani tita neteɨterima wahetsie mɨtinuani.
JER 6:19 Neuxei, kwiepa xemɨtama naitsarie xekeneu'enana: 'Ikɨ teɨteri wahetsie 'uximatɨarika nepɨ'atɨani, ke'axamemɨteyɨkɨhɨawekaikɨ xeikɨa, neniuki memɨka'u'enikɨ, matsi ne'ɨkitɨarika mepehɨa.
JER 6:20 ¿Titakɨ nereiyehɨwa 'ikɨ 'ɨkwa Tsawa manetɨarie, meta 'ikɨ 'uwá makaka xeime kwieyaritsie 'ateewa paitɨ manetɨarie? Wamawari taiyariyari pɨkanetsinake, wamawarika pɨkanetsinake».
JER 6:21 'Ayumieme, Yawé mɨpaɨ kanaineni: «'Ikɨ teɨteri wahuyeta nepɨtiu'uitɨani. Wapaapama meta waniwema 'ukitsi mana mepekaxɨrieni, wa'aurie memɨtitei meta hamikutsixi mepɨkwini».
JER 6:22 Yawé mɨpaɨ kanaineni: «Neuxei. Tayeta kuyaxi mepayehu, xewitɨ nuiwari mariwetɨ puyukuha'aritɨwa kwie manu'axetsie paitɨ.
JER 6:23 Tupi mepu'ɨ meta pitsika, mepayu'eririya meta mepɨkateyukanenimaya. Wahiwari haramara hepaɨ pɨtiyu'eniɨriɨkɨ, meta kawayutsixi wahetsie meputei. Tsiyuni niweya witsipemɨti'ɨimari, 'ahetsɨa mepɨta'erie, meyuha'aritɨatɨ memɨyutakwinikɨ».
JER 6:24 'Ari tepɨtemarie, meta tamamate pɨtiweranare, hiwerika pɨtatsikema, kemɨtiukakukuine niweyame mɨpaɨ tepɨte'uka'eniwa.
JER 6:25 'Akanamieni mɨtatsi'aye'unie 'ixipara hakwetɨ. Yeuta xepɨka'ayekɨkani, meta huyeta xepɨkaheu'uwani. Naitsarie marika puxuawe.
JER 6:26 Hiwerika kamixayari kenanakatɨki, nekiekari, naxipa keneutikurupi. Hatsiwimekɨ keneutatsuakani, 'aniwe mexɨakame hetsiemieme kepemuyɨwe hepaɨ xɨka 'umɨni, karikɨ pɨkatatimaritɨani mɨtatsika'una 'umamie.
JER 6:27 «'Ekɨ Keremiyaxi ne nekiekaritsie nepɨmatsi'anukake, wa'inɨnɨatamekɨ nekamananayexeiya xɨka 'aixɨa 'aneni meta nenieremekɨ, pemɨretimanikɨ meta pemitixeiyaxɨanikɨ kememɨte'u'uwa.
JER 6:28 Yunaitɨ mɨkɨ te'ayuye'uniekate mepɨhɨkɨ, 'axaniukikɨ xeikɨa memuku'uwa, yunaitɨ mɨkɨ wurunitse mepɨhɨkɨ meta tepɨa, 'axa'anemekɨ memɨwewiya.
JER 6:29 'Eka yɨtɨrɨkariyakɨ tai kananutihɨtsiwani, tepɨa purumu tai pikwaniyawe, peru 'axamemɨte'u'iyari 'aixɨa mepɨkayuyurinɨa, tixaɨtɨ pɨkarayeika tsepa mu'itiya.
JER 6:30 'Ayumieme mɨpaɨ mepɨte'uterɨwarɨwa “Pɨrata manuyewiwiya”: Yawé hetsiemieme mekananuyewiwiyani».
JER 7:1 'Ikɨ kanihɨkɨtɨni Yawé niukieya Keremiyaxi hetsɨa mɨye'a:
JER 7:2 «Yawé tukieya kitenieyari hɨxie keneutakexi, hikɨ mana pe'uwetɨ 'ikɨ niuki keneutaxata: Xekeneu'eni Yawé niukieya, xeme yunaitɨ, Kura kwieyaritsie kiekatari kemɨ'ane 'uwa xemeutahake 'ikɨ kitenieyaritsie Yawé xemayexeiyanikɨ.
JER 7:3 Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “'Aixɨa xete'u'uwatɨ xekenakɨni meta 'aixɨa xeteyurietɨ, hikɨ ne nepɨxepitɨaka 'axemu'uwanikɨ 'akuxi 'ikɨ kwieyaritsie.
JER 7:4 'Ipaɨ memutiyuane wahetsie xepɨkatewiyani: ‘'Ikɨ kanihɨkɨtɨni Yawé tukieya Yawé tukieya, Yawé tukieya’.
JER 7:5 Xɨka yurikɨ 'aixɨa xete'u'uwatɨ xehakɨne meta 'aixɨa xeteyurietɨ, xɨka yurikɨ heitserie xe'u'uwatɨ xehakɨne xeyunaitɨ,
JER 7:6 xɨka teewatanaka xekananaimaka meta nutui metatsiere wiura, xɨka xekawakwika teɨteri 'atsimemɨkateyurie 'ikɨ kwieyaritsie, hipame xɨka kakaɨyarixi xekakawarayexeiyani, kɨmana xeme 'axaxemuyuyurieni,
JER 7:7 hikɨ 'ana nepɨxepitɨani xemu'uwanikɨ 'ikɨ kwieyaritsie, kwie xe'ukiyarima nemɨwayetuiritsie yuheyemekɨ.
JER 7:8 »”Peru xeme matsi niuki 'itarikatsie xepɨtewiya, tixaɨtɨ mɨkatiyunaki'erietsie.
JER 7:9 Xepɨtenawaya, xepɨteyumemiwa, hipame wa'ɨitama xepuwakumaɨwa, 'itarikakɨ xepɨteyɨhɨritɨa, Wahari 'ɨkwa xepɨtairietɨwe, hipame kakaɨyarixi xepuwaruweiya hatsuaku xemɨkawaretima,
JER 7:10 'ariketa mekani'axeni nehɨxie 'ikɨ tukita kenemɨtitewakɨ mutaterɨwarɨwa, hikɨ 'ana mɨpaɨ meputiyuane: ‘Teputawikweitsitɨarie’, tawarita tita mɨtixani'eriwa naime tete'uweiyatɨ temuhunikɨ.
JER 7:11 ¿Kamɨtsɨ xeme mɨpaɨ xetemate 'ikɨ netuki kenemɨtitewakɨ mutaterɨwarɨwa tenawayamete waterɨ tihɨkɨ? Ne mɨpaɨ nekatinixeiyani —Yawé mɨpaɨ kanaineni—.
JER 7:12 »”Xekenehu hikɨ Tsiru paitɨ netuki manuwekai, hakewa matɨari nemayekateita, mana xekenenenieri kenemiyuri teɨteri 'ixaheritsixi 'axamemɨteyuriekaikɨ”».
JER 7:13 Yawé mɨpaɨ kanaineni: «“Hikɨta yaxeikɨa xeme xepɨteyurie, meta yaxeikɨa mɨixari nepɨxe'utahɨawixɨ xemeta xepɨkaheu'enana, hikɨta nemɨxe'utahɨawixɨ xemɨkanetsi'anu'enikɨ,
JER 7:14 kenemɨtiuyuri Tsiru mɨpaɨta netiniyurimɨkɨ 'ikɨ tuki kenemɨtitewakɨ mutaterɨwarɨwa hepaɨtsita hetsiena xemɨtewiya, metatsiere kwie nemɨxeyetuiri meta xe'ukiyarima.
JER 7:15 Nepɨxe'ayenɨ'ani nehɨxie nepɨkaxexeiyani, xe'iwama kenemɨwaruyuri hepaɨ, yunaime 'Epɨrahini xiɨyarimama”.
JER 7:16 »'Ekɨta Keremiyaxi, 'ikɨ teɨteri wahetsiemieme pepɨkanetsihahɨaweni. Waɨriyarika pepɨkanetsipitɨaka wahetsiemieme penetsiwawirietɨ. Pepɨkayeweka, ne nepɨkamatsi'enieni.
JER 7:17 ¿Tamɨ pekatiniere kememɨteyurie Kura kiekariyaritsie meta Kerutsareme kayeyari 'utɨma?
JER 7:18 Tɨɨri kɨyexi mepukuxexeɨriwa, wapaapama tai mana mepukutaiya, meta 'ukarawetsixi tɨxi mepɨkuhawiya tsuira memɨtiwewienikɨ “'uka muyuawitsie ti'aitame” titewakame memɨtimawirienikɨ. Metatsiere nehɨxie 'axamekateniyurieka kepauka kaxie winuyari memɨtiyeuriwa hipame kakaɨyarixi wahetsiemieme».
JER 7:19 Yawé mɨpaɨ kanaineni: «Peru ne 'axamepɨkanetsiyurie, yuxaɨta mekaniyuyurieka, mekanitewiyatsitɨariekuni.
JER 7:20 »'Ayumieme Yawé naimekɨmɨyɨwe mɨpaɨ kanaineni: “'Ena nehaxɨa nekananɨ'amɨkɨ: teɨteri wahetsie meta tewaxi wahetsie, kɨyexi yeuta mieme hetsie meta 'ikwaxi 'ena kwiepa mɨtixuawetsie, nehaxɨa pɨtaka pɨkayɨtɨnɨaka”.
JER 7:21 »Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “Xekeneukuxeɨri yumawari taiyariyari meta mawari, wai xekenetikwa'i.
JER 7:22 Yurikɨ, kepauka xe'ukiyarima nemɨwarayewitɨ 'Ekipitu ne tixaɨtɨ nepɨkatiwaruta'aitɨa mawari taiyariyari meta mawari hepaɨtsita.
JER 7:23 Ne xeikɨa 'ipaɨ nekatiniwarutahɨawe: ‘Xekeneneu'enieka. Ne 'ana xekakaɨyari nepɨhɨkɨtɨni, xemeta neteɨterima. Xekeneu'uwani kehepaɨ nemɨtixe'uta'aitɨa, 'aixɨa 'iyari 'axemu'uwanikɨ’.
JER 7:24 Peru mɨkɨ mepɨkanetsi'anu'eni yamepɨkatekakɨ, yu'iyari mɨkaheu'ena meta 'axamɨtiuka'iyari pɨta kemɨtiwakɨhɨawekai mepanukuwei. Mɨpaɨ me'ɨyɨka mekanewa'uni pɨta, yukutama mekaniyekɨne.
JER 7:25 Kepauka paitɨtɨ 'Ekipitu nemɨwarayewitɨ xe'ukiyarima, nepɨkatihayewa neniukamete newarenɨ'awatɨ.
JER 7:26 Mɨyatɨtɨ yamepɨkatekakɨ mepɨkanetsi'anu'eni, matsi yu'iyari meputseiriyaxɨ yu'ukiyarima wareuyeta mete'u'iyaritɨ mepakɨ”.
JER 7:27 »'Ekɨ 'ikɨ naime pepɨtiwataxatɨani, peru mɨkɨ mepɨkamatsi'enieni. Pepɨwatahɨawe peru mepɨkamatsita'eiya.
JER 7:28 Hikɨ mɨpaɨ pepɨtiwatahɨawe: “'Ikɨ nuiwari mepɨhɨkɨ Yawé yukakaɨyari niukieya memɨka'u'eni, muwataheitseritɨanikekai memɨka'itanaki'eri. Tita yuri mɨraine wahetsie pumawe meta wateta.
JER 7:29 »”'Akɨpate keneukaxika, kenewiwi, kenetsuamie hɨri mumetsetsie paitɨ, Yawé mɨwarexɨrikɨ muwaruku'eirikɨ 'iya nuiwari memiyehaxɨatɨa”».
JER 7:30 »Mɨpaɨ kanaineni Yawé: “Kura nuiwarimama 'axamekateniuyurieni tita nemɨtixani'eriekɨ. Netuki kenemɨtitewakɨ mutaterɨwarɨwa kapatsiekame mekanayeitɨani, muwa kakaɨyarixi memɨxani'eriwa mekaniwareuta'uitɨani.
JER 7:31 Yaxeikɨata watuki mekaniutawewieni Tupeti mieme, mayeweritsie Weni-Hinuni, mana memɨwatitaiyanikɨ yuniwema 'ukitsi meta 'ukari, nihatsuaku tɨma mɨpaɨ nemɨkatiu'aitaxɨ nitɨma mɨpaɨ nemɨkatiunehɨawixɨ”.
JER 7:32 Mɨpaɨ kanaineni Yawé: “'Ayumieme tukari kanaye'amɨkɨ kepauka Tupeti mɨkatiuterɨwarɨwanitsie meta mayeweri Weni-Hinuni, matsi pɨta Mayeweritsie Yuwaɨkawatɨ Memakwi'iwaxɨ pɨtiuterɨwarɨwani, mumawenikɨ kwie Tupeti paitɨ mekanikateukiwakuni mana memɨtikwikwiwani.
JER 7:33 'Ikɨ teɨteri wawaiyari wirɨkɨxi wa'ikwai pɨrayani meta yeutari, xewitɨ 'apɨka'uyeikani mɨwatamariutakɨ.
JER 7:34 Kura kiekariteyaritsie meta Kerutsareme kayeyaritsie yanepɨtiyurieni temawierika hiwariyari mukumawerekɨ, meta neneɨkeme kwikarieya metatsiere wikiwame kwikarieya, karikɨ naitɨ 'ikɨ kwieyari makumawe kanayeimɨkɨ”.
JER 8:1 »Yawé mɨpaɨ kanaineni: “'Iya tukaritsie te'aitamete wa'umete pɨwatixɨriyani meta Kura kiekatari wahetsiemieme memanuyetekai, meta mawari wewiwamete meta Kakaɨyari niukametemama, metatsiere Kerutsareme kiekatari wa'umete.
JER 8:2 Tau hɨxie tiheitɨ kanayeimɨkɨ meta metseri hɨxie, meta yunaime xurawetsixi muyuawitsie miemete wahɨxie, mɨkɨ muyuawitsie miemete memɨwanaki'eriekai, memɨwarayexeiyakai memuwaruweiyakai meta memɨwarahɨawekai. Wa'umete pɨkaku'ɨiyani meta pɨkakateukieni, kwitarai hepaɨ kwiepa puyuhayewa.
JER 8:3 Naitsarie kwiepa hakewa nemɨwareutanɨ'axɨa memutawikwei 'ikɨ nuiwaritsie miemete 'axamemɨte'u'iyari, kemɨ'ane memuyuhayewa memɨkwinikɨ mepuyuwaɨriyani matsi memayeyuyurinikɨ pɨkatixaɨ. Mɨpaɨ kanaineni Yawé Naimekɨmɨtɨrɨkaɨye”.
JER 8:4 »Peru 'ekɨ mɨpaɨ ketiniwarayehɨtɨa ne Yawé mɨpaɨ nemainekɨ: »“Kepauka teɨteri memekaxɨrɨwe, ¿kamɨtsɨ mekate'anuku'uwe? Kepauka xewitɨ yuhuyeta 'umietɨ meuyeweni, ¿kamɨtsɨ karanuani yuhuyeta?
JER 8:5 ¿Titayari kamɨtsɨ 'ikɨ teɨteri humete'uyunixɨ? ¿Titayari Kerutsareme 'uyupataka katiyuwaɨriya munuanikɨ tawari? 'Itarika mepɨkataunie, meta mepɨkayuwaɨriya nehetsɨa memɨ'axɨanikɨ.
JER 8:6 Kwi yemekɨ nepu'enaxɨ, nemi'enienikɨ tsikere xeime heitserie tikuxatame, peru xewitɨ pɨkatihayewawe ke'axamɨtiuyuri, xewitɨ tɨma pɨka'ixeɨmate kename 'axatiyuriene. Yunaitɨ yamepɨteyurie kemɨtiwanake, kawayutsixi memɨkayuwiyanɨa wahepaɨ kepauka memɨyutakwinitsie.
JER 8:7 Wikixitɨtɨ muyuawitsie memu'uwa mepɨtemate xeiwiyaritsie watukari kemɨraye'axe, Kukuru meuyɨwi meta 'itsitame meta waurai mepɨtemate kepauka xaɨtsie pɨta memɨyehu. Peru neteɨterima mepɨka'imate Yawé 'aitsikateya.
JER 8:8 »”Mepɨka'uyukatetewiya mɨpaɨ meputiyuane: ‘Tepɨtemaiwawe, Yawé 'inɨari niukiyari 'ipaɨ paine’, matsi te'utɨwamete wa'anɨ yɨkɨ katini'utɨani.
JER 8:9 Memɨtemaiwawe mepɨtewiyarikatsitɨarieni, mepɨtiwiyarieni mepɨteka'eniexɨani. Xɨka me'iku'eirieni Yawé niukieya, ¿ketitakɨ metemaiwawetɨ metehakɨne?
JER 8:10 'Ayumieme wa'ɨitama hipame 'ukitsi nepɨwayetuirieni, meta wakwie hipame pɨta nepɨwayetuirieni. Karikɨ 'etsimeyumatetɨ meta 'ameyumatetɨ, yunaitɨ mepɨtehiwe'erie mɨkatiwapiini, Kakaɨyari niukametemama meta mawari wewiwamete, yunaitɨ mekateni'itawani.
JER 8:11 Neniwe 'uka witsimɨti'ɨimari mepi'uayema herie miemekɨ xeikɨa, meta mɨpaɨ mepɨte'ikɨhɨawe: ‘Kayuwatɨ puma, kayuwatɨ puma’, 'aixɨtsɨ kayuwatɨ mɨka'umatsie.
JER 8:12 ¿Kamɨtsɨ mete'uyutitetewiyaxɨ kemɨtixani'eriwakɨ yamete'uyurieka? Hawaikɨ, tixaɨtɨkɨ mepɨkateyutitetewiyawawe, mepɨka'imate paitɨ tita mɨtitewiyarika. 'Ayumieme, mepatixɨrieni kemɨ'ane mematixɨriyani wahamatɨa, kepauka 'uximatɨarika wahetsie nemɨkawiwieni
JER 8:13 »Yawé mɨpaɨ kanaineni: “Kepauka kaxie nemeu'inɨimɨkɨ tixaɨtɨ nepɨkatiukaxexeiya, meta piní hetsie 'ikwaxi pɨkaheukatei, xawariyari pɨyɨyɨna. Kamɨtsɨ, hikɨ ne nepɨtixenawairieni tita nemɨtixeyetuiri”».
JER 8:14 «¿Keteteyurie 'ena tetitetɨ? Hikɨmɨtɨka, teyunaitɨ kiekari kuraruyari 'amatitetewatsie tepɨyehu mana temekwinikɨ. Yawé takakaɨyari pɨtatsikwine. Haa pɨtatsi'uharitɨa 'uayemakame, 'axatemɨte'uyurikɨ hepaɨtsitana.
JER 8:15 Tepɨta'ikwewakai kayuwatɨ temu'uwanikɨ, peru 'aixɨa ti'anetɨ pɨkatinua. Tekatekukuyetɨ temu'uwanikɨ tepɨta'ikwewakai, peru matsi pɨta punua marika.
JER 8:16 Rani kiekariyaritsie pa'eniɨriɨkɨ kawayutsixi wapuxerikayari, meta kepauka memetitsuana, naitɨ kwie puwatayuane. 'Ikɨ kwieyari meka'unake 'umekanahuni, meta naime tita mana mɨtixuawe, kiekari meta mana kiekatari».
JER 8:17 «Xekeneunenieri. Kuuterixi xehetsɨa nepɨwareutaxɨrɨwa kuuterixi memɨmɨya memɨxetikeni, meta mɨkɨ wahepaɨtsita tiuyemaitɨ xewitɨ pumawe»,
JER 8:18 Nekukuiniriya pɨkayunɨtɨarinɨa, ne'iyari pɨmɨxime.
JER 8:19 Neteɨterima waniwe 'uka hiwarieya pa'eniɨriɨkɨ 'ikɨ kwieyari manuye'atɨkatsie paitɨ: «¿Tamɨ Yawé Tsiyuni katitikie? ¿Tamɨ mana kati'aita?» «Yukakaɨyarixikɨ memɨnetsi'uyehaxɨatɨakɨ, kakaɨyarixi tixaɨtɨ memɨkateyunaki'erie meta memɨkawamatekɨ».
JER 8:20 «'Itsanari kananutiyani, witari kananuyeyani, peru tame 'akuxi tepɨkatawikweitsitɨariewawe».
JER 8:21 Neteɨterima waniwe 'uka mɨtiukwinitɨariekɨ neta nepɨtiukakukuine, nepɨnehiwerie, netari nepeuma.
JER 8:22 ¿Kamɨtsɨ Karaha tiumaweri waritsamu? ¿Kamɨtsɨ manari tiumawe tiyu'uayemawame? ¿Titayari neteɨterima 'aixɨa mekateka'eriwawe?
JER 9:1 Nemu'u haixa xɨka hɨkɨtɨnike, meta nehɨxite 'ukai haixayari, tukarikɨ meta tɨkarikɨ nemutsuanenikɨ, neniwe 'uka teɨterimama memukwi'iwaxɨkɨ.
JER 9:2 Makumawetsietɨ kii nemɨnexeiyani huye tetsita. Neteɨterima nepuwaruku'eiriwe, 'ateewa nepeyeiwe. Yunaitɨ mɨkɨ hipame wa'ɨitama memɨwakumaɨwa mepɨhɨkɨ, yunaitɨ mepɨnetsi'uku'eiri hipame mepɨwaranukuwei.
JER 9:3 «Waneni 'itarikakɨ pɨtikuxata xeikɨa 'ɨrɨ tupitsie waɨkawamekɨ mɨtiutamɨni hepaɨ, 'ikɨ kwieyaritsie 'itarika pɨrayu'iwa, tita yuri mɨraine pɨkatixaɨ, 'axa'anemetsie meyuka'uitɨwatɨ matsi kwinimieme mekateniyurieka ne mepɨkanetsimate
JER 9:4 Xekeneyu'ɨwiyani tsepa mɨ'ahamiku, yu'iwama yuri xepɨkatewa'eririeka, tsepa mɨra'iwa mepɨteyu'itaiya, metatsiere hamiku pɨtiuyukananaima.
JER 9:5 Yunaitɨ mepɨteyu'itaiyatɨwe, yurikɨ mepɨkateyukuxaxatɨwa. Yuneni mepɨte'uta'ɨkitɨa mɨti'itawanikɨ, meta 'axamepɨteyurie kepaukake memɨti'uxe.
JER 9:6 »Keremiyaxi, 'ekɨ memɨte'itawa watsata pekaniuyeikani, yu'itarikakɨ mepɨkayuwaɨriya memɨnetsihetimanikɨ»,
JER 9:7 'Ayumieme, mɨpaɨ kanaineni Yawé Naimekɨmɨtɨrɨkaɨye: «Ne 'aixɨa nekanixetiyurimɨkɨ, nekanixeta'inɨatamɨkɨ. ¿Ketawari netiyurieni neteɨterima wahetsiemieme?
JER 9:8 Waneni 'ɨrɨ hepaɨ pɨ'anene pɨmɨya, wateni 'itarika xeikɨa pɨmate, 'aixɨa mepɨtekuxata yuhamikuma wahamatɨa, peru yutaɨta mewawiniyatɨwetɨ».
JER 9:9 Yawé mɨpaɨ kanaineni: «¿Kareuyewetse mɨkɨkɨ ne nemɨtixekwinitɨani? ¿Kareuyewetse teɨteri mɨpaɨ nemɨtiwarakapitɨanikɨ kememɨte'uyurikɨ?»
JER 9:10 Nekanititsuamɨkɨ meta ne'uta'aiwatɨ hɨritsie, makuweritsie makumawetsie hiwerika kwikariyari nekaniutakwikamɨkɨ, makumawe mɨhɨkɨkɨ: yuxewitɨri mana pɨka'uyeika tewaxi watsuari pɨka'enierieri. Wikixitɨtɨ metatsiere yeutari, yunaitɨ mepɨteheuyuta'unaxɨa.
JER 9:11 «Kiekari Kerutsareme kii 'unimeyari kwinienetɨ muwe nepayeitɨani, yawixi memayu'eririya wakie nepayeitɨani. Makumawe nepayeitɨani Kura kiekariteyari, teɨteri mana mekatiteme nepayeitɨani».
JER 9:12 ¿Kemɨ'ane kwinimieme pɨtimaiwe 'ikɨ metimaitɨyanikɨ? ¿Kemɨ'ane Yawé pitahɨawixɨ, 'ikɨ naime hepaɨtsita mɨtitaxatakɨ? ¿Titayari 'ikɨ kwieyari tiuka'unarie, yuxaɨta tikuma makumawe hepaɨ xewitɨ mana mɨka'uyeyeikanikɨ?
JER 9:13 Yawé mɨpaɨ kanaineni: «Mɨkɨ ne'inɨari niukiyari mepuku'eiri nemɨwayetuiri, mepɨkanetsi'anu'eni meta mɨpaɨ mepɨkate'u'uwakai.
JER 9:14 Yu'iyari mɨkaheu'ena mepanukuwei, Wahari kakaɨyarixiyarite mepɨwaranukuwei, wa'ukiyarima kememɨtewaru'ɨkitɨa».
JER 9:15 'Ayumieme, mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: «'Ikɨ teɨteri 'ikwai hatsiwime neniwatimimɨkɨ meta haa 'uayemakame neniwatiharitɨamɨkɨ.
JER 9:16 Naitsarie nuiwarite watsata nepɨwataxɨriexɨani teɨteri memɨkawamate meta watutsima memɨkawaretima wahetsɨa, nepɨwaranukuweiya 'ixiparakɨ kepaukake yunaime nemɨwakwini».
JER 9:17 Mɨpaɨ kanaineni Yawé Naimekɨmɨtɨrɨkaɨye: «Kayuwatɨ xekeneu'enana. 'Ukarawetsixi tsuakamete xekeniwarutahɨawi. Kwinie memɨteheutatsuawawe meke'u'axɨani.
JER 9:18 Xeiya meke'u'axɨani, tahetsiemieme meke'utitsuanani. Tahɨxita 'ukai kanitihɨnimɨkɨ, meta ta'ukai kananakaxɨrimɨkɨ,
JER 9:19 Tsiyuni paitɨ kana'eniɨriɨkɨni tsuari meta hiwerika: “Tepuka'unarie, teputewinɨarie yemekɨ. Peuyewetse takwie temuku'eirienikɨ, takiite naitɨ mutiuka'unariekɨ”».
JER 9:20 'Ukarawetsixi, xekeneu'eni Yawé niukieya, xenakate ke'i'enieni niuki tetana mieme. Yuniwema 'ukari xeketenewa'ɨkitɨaka kwikari hiwerikapa mieme, meta hipatɨta mekeyuti'ɨkitɨani 'ikɨ hiwerika kwikariyarikɨ:
JER 9:21 «Mɨɨya 'ituparite 'etsimayeyeutsie nenieremeta kaneutahani, taparatsiyuta kaneutahani, tɨɨri kaniwarutayuniya kaye'utɨma memu'uwakai, meta temari teɨteri memayukuxexeɨriwatsie memu'uwakai.
JER 9:22 Mɨkite mepeutihe hayekɨa kwitarai hepaɨ mɨraka'etsitɨretsie, mɨaxa hepaɨ 'ihɨayame 'utɨa mɨyehixime, xewitɨ mɨka'iti'ɨwe»,
JER 9:23 Yawé mɨpaɨ kanaineni: «Pɨkayuta'ɨreni mɨtimaiwe mɨtimaiwekɨ, meta mɨtɨrɨkaɨye yutɨrɨkariyakɨ, meta mɨxiku mɨrexeiyakɨ.
JER 9:24 Xɨka xewitɨ yuta'ɨrimɨkɨ, keyuta'ɨre mɨnetsimatekɨ meta mɨpaɨ mɨretimakɨ kename ne Yawé nehɨkɨ, nemɨti'uximaya kwiepa naki'eriyakɨ, heitseriemekɨ meta 'aixɨa 'anemekɨ, netsɨ mɨpaɨ kanetininakeni
JER 9:25 Yawé mɨpaɨ kanaineni: «Tukari kanaye'amɨkɨ kepauka ne nemɨtiwakwinitɨani kemɨ'ane xeikɨa yuwaiyaritsie xitekiya 'inɨariyari memexeiya:
JER 9:26 'Ekipitu nekatinikwinitɨamɨkɨ meta Kura, 'Erumi, 'Amuni, Muhawi, meta yunaime makumawetsie memu'uwa yumu'utsie memuyukaxika. Yunaitɨ nuiwarite xitekiya 'inɨariyari mepɨkahexeiya, peru matsi 'ixaheritsixi xitekiya 'inɨariyari yu'iyaritsie mepɨkahexeiya».
JER 10:1 'Ixaheritsixi teɨteriyari, xekeneu'eni Yawé niukieya.
JER 10:2 Mɨpaɨ kanaineni: «Xeme xepɨkawa'ɨkeni hipatɨ nuiwarite kememɨteyurie, meta xepɨkamamaka 'inɨari muyuawitsie miemekɨ, tsepa hipatɨ nuiwarite memimakaxe.
JER 10:3 Teɨteri wayeiyari tixaɨtɨ pɨkatihɨkɨ. Kɨye mepawiteke 'ɨtsita, kɨyekɨ mɨti'uximayatawe pititsatsewe.
JER 10:4 Hurukɨ meta pɨratakɨ witsi'aneme mepayeitɨwa, kɨrapuxikɨ menikutseiriyani meta titsunamekɨ mɨkawatayuanenikɨ.
JER 10:5 »Wakakaɨyarixima mepɨkaniuwawe, 'ewieri wikixi wamariutame hepaɨ mepɨtematsiɨkɨ xutsi ma'etsietsie muwe hepaɨ. Peuyewetse memɨkɨtɨkietɨweni memɨka'ɨkɨniwawekɨ. Xepɨkawamakarɨka, 'axamemɨxe'uyurieni mepɨkayɨwawe, metatsiere 'aixɨa memɨxe'uyurieni».
JER 10:6 Yawé, xewitɨ pumawe 'ahepaɨ 'anetɨ. Pepɨmariwe 'ekɨ, 'ekɨ yemekɨ pepɨmariwe meta pepɨtɨrɨkaɨye.
JER 10:7 ¿Kemɨ'ane pɨka'itimakani, yunaime nuiwarite Tiwa'aitɨwame? 'Ekɨ mɨpaɨ pɨreuyewetse 'ahetsiemieme. Yunaitɨ memɨtemaiwawe memu'uwa watsata, meta yunaitɨ te'aitamete watsata, xewitɨ pumawe 'ahepaɨ 'anetɨ.
JER 10:8 Yunaitɨ mepɨka'u'iyari 'axamemɨteyurienikɨ xeikɨa pɨwanake, kɨyexi kakaɨyarixiyari 'ɨxatsitamete mepɨhɨkɨ wahetsiemieme.
JER 10:9 Taritsi paitɨ patɨwa pɨrata 'etsimutsutsui, meta 'Upatsi huru patɨwa. Memɨkakakaɨyarixi wa'ɨkiyari, mɨtataɨrawi meta mɨxeta memanakatɨtɨka, teɨteri tewewiwamete meta tepɨa kwaniyamete mɨkɨ yunaitɨ wawewiya mepɨhɨkɨ.
JER 10:10 Peru Yawé xeikɨa yuri Kakaɨyari kanihɨkɨtɨni, Kakaɨyari mayeyuri, yuheyemekɨ Ti'aitame. Kepauka muyeha'arɨwe, kwie kanewatayuaneni, nuiwarite haxɨaya memunewieni mepɨkayɨwawe.
JER 10:11 «Mɨpaɨ pepɨtiwatahɨawe: “Mɨkɨ kakaɨyarixi muyuawi memɨka'utawewi meta kwie, mekanikumawerikuni 'ena kwiepa meta muyuawi hetɨa”».
JER 10:12 Kakaɨyari kwie kaniutawewieni yutɨrɨkariyakɨ, kemɨtimaiwekɨ kwie 'aixɨa katiniuyeni, muyuawi 'ayeume kanayeitɨani kemɨtimaiwekɨ.
JER 10:13 Kepauka mɨkɨ mɨtaniuni, tɨranarikɨ haa muyuawitsie pakaneika, hai kanewa'iniwani kwie manuye'atɨka paitɨ. Mimierɨkaritsata wiyeri kaneyenɨ'awani, meta 'eka muye'ɨnetɨkatsie peiyepiwa.
JER 10:14 Teɨteri 'atsimemɨkatemate meta memɨte'ukatawe'erie mepɨhɨkɨ, kakaɨyarixi wawewiwamete mepuyutetewiya yuwewiyakɨ. Tita memɨtewewie pɨti'itarika, meta mepɨka'ayeneniere.
JER 10:15 Tixaɨtɨ mepɨkateyunaki'erie, wawewiya pɨnanaiyɨkɨ xeikɨa, kepauka tukari maye'ani memɨtekwinitɨarienitsie, mepɨka'unarieni.
JER 10:16 Kakaɨyari Kakuwu manayexei nuiwarieya mayanikɨ mɨkɨ wahepaɨ pɨka'ane, matsi mɨkɨ naime mɨtiunetɨa kanihɨkɨtɨni, Yawé Naimekɨmɨtɨrɨkaɨye katinitewaka, meta nuiwarieya 'Ixaheri kanihɨkɨtɨni.
JER 10:17 'Apiinite ketineukuteɨxi kwiepa, 'ekɨ 'akiekari manutinamie.
JER 10:18 Karikɨ mɨpaɨ kanaineni Yawé: «Hikɨrixɨa 'ikɨ kwieyaritsie kiekatari 'ateewa neniwarexɨrimɨkɨ texupamekɨ nemɨwarexɨrieni hepaɨ. Hura meti'uitɨariekame nekaniwarayeitɨamɨkɨ, meta yanekatiniwapitɨamɨkɨ mɨkɨ memɨtiwiyarienikɨ».
JER 10:19 Xɨa'ui ne, nepeutimurariexɨa. Kenemɨtiukwinitɨarie pɨkayu'uayemarinɨa. Peru pɨnekwiniya peuyewetse neminewieka.
JER 10:20 Naitɨ nexamaru puka'unarie, meta naitɨ pɨteteki nekaunarite. Neniwema 'ukitsi yunaitɨ mepɨnetsi'uku'eiri, mepɨka'u'uwari. Xewitɨri pumawe nexamaru mɨtawewieni, meta ne'ixuriki kiiyari mɨkawieni.
JER 10:21 Muxatsi wahɨwemete 'atsimekatemaitɨ mepakɨ, Yawé mepɨka'utiwau, 'ayumieme kememɨteku'eriwakai yapɨkatiuyɨ, wamuxatsi naitsarie mepeutaxɨriexɨa.
JER 10:22 Xekeneu'enana. Niuki kani'atɨarieni. Tɨranari 'upamie tayeta kiekatari wahetsɨa payeneni, Kura kiekariyari tepayani yawixi memayu'eririya wakie, kii 'unimeyari kwinienetɨ muwe kanayeimɨkɨ.
JER 10:23 Yawé, ne nepɨtimate tewi yutukari pɨkakutsiyari, pɨkapitɨarie yeikame kemɨtinake mumieni.
JER 10:24 Yawé, keneneutaheitseritɨa perutsɨ heitseriemekɨ, hawaikɨ 'ahaxɨakɨ, mɨpaɨ pekaneniuka'unaweni.
JER 10:25 Hipame nuiwarite wahetsie pɨta 'ahaxɨa keneukanɨ'a, memɨkamatsimate wahetsie, meta 'iya memɨkamatsihahɨawe wahetsie. Karikɨ Kakuwu mekaniutakwani, naime mekanaxɨni, meta kiena makumawe mekanayeitɨani.
JER 11:1 'Ikɨ niuki kanihɨkɨtɨni Yawé Keremiyaxi kemɨtiutahɨawixɨ:
JER 11:2 «'Ikɨ tɨratu kemutiyuane keneuti'eni, hikɨ keniwarutaxatɨa teɨteri Kura kwieyaritsie meta Kerutsareme kiekatari.
JER 11:3 Mɨpaɨ ketiniwarutahɨawi, Yawé mɨpaɨ kanaineni, 'Ixaheri Kakaɨyarieya: “'Axake'itɨarieka tewi kemɨ'ane yamɨkatikamie 'ikɨ tɨratu kemutiyuane,
JER 11:4 ne netiwaraka'utɨirieka xe'ukiyarima kepauka nemɨwarayewitɨtsie 'Ekipitu, mɨkɨ huxunu tepɨa muwatitaiyarɨwata”. Mɨpaɨ nekatiniwarutahɨawe: “Xekenenanu'eni meta yaxeketenekakɨni kenemɨtixe'aka'utɨiri, hikɨ 'ana xeme neteɨterima xepakɨne neta xekakaɨyari nepɨhɨkɨtɨni.
JER 11:5 'Ana nepeye'atɨani kenemɨtiwarutahɨawixɨ xe'ukiyarima, kenemɨtiwayetuirienikekai kwie retsi meta xiete waɨkawa maxuawetsie, xeme hikɨ xemeixeiya”». Ne mɨpaɨ nekatinita'eiya: «Yawé, mɨpaɨ ketiɨyɨni».
JER 11:6 Yawé mɨpaɨ kanetiniutahɨawe: «'Ikɨ naime ketineutaxata Kura kiekariyaritetsie meta Kerutsareme kayeyari'ɨtɨa, mɨpaɨ pe'utaitɨ: “Xekeneu'eni 'ikɨ tɨratu kemutiyuane, meta xekenaye'atɨa.
JER 11:7 Kepauka paitɨ xe'ukiyarima 'Ekipitu nemɨwarayewitɨ hikɨ 'akuxi, nepɨkatihayewawe mɨpaɨ netixekɨhɨawetɨ: ‘Xekeneneu'enieka’.
JER 11:8 Peru yamepɨkatekakɨ meta mepɨkanetsi'u'eni, yu'iyari mɨtsetse'i meta 'axamɨtiuka'iyari kemɨtiyɨkɨhɨawe mɨkɨ xeikɨa mepanukuwei. 'Ayumieme 'ikɨ tɨratutsie kemaine ke'axamɨtiupitɨarieni mɨpaɨ nepɨtiwarupitɨa, ne kenemɨtiwaruta'aitɨakai memeye'atɨanikɨ, matsi mɨkɨ mepɨkaheye'atɨa”».
JER 11:9 Meta Yawé mɨpaɨ kanetiniutahɨawe: «Menetsi'aye'uniekamekɨ mepɨte'utaxa Kura teɨteriyari meta Kerutsaremetari.
JER 11:10 Wa'ukiyarima ke'axamemɨte'uyuri yaxeikɨa mepɨteyurie, memɨka'uyuwaɨri nehetsiemieme yamemɨtekahunikɨ. Hipame pɨta kakaɨyarixi mekaniwareweiya mekaniwarayexeiyani. 'Ixaheritsixi meta Kura xiɨyarimama, tɨratu kenemɨtiuwewi wa'ukiyarima wahamatɨa mɨkɨ mekanititsanaxɨani.
JER 11:11 'Ayumieme Yawé mɨpaɨ kanaineni: “Ne, nekanenunɨ'amɨkɨ 'uximatɨarika, xewitɨtɨma mɨkɨ pɨkatawikweiya. Tsepa memɨnetsihahɨawe, nepɨkawa'enieni.
JER 11:12 Hikɨ 'ana Kura kiekatari meta Kerutsaremetari mepuhu kakaɨyarixi 'ɨkwa memuwarutairiexɨakai wahetsɨa, peru mɨkɨ mepɨkawatawikweitsitɨani kepauka wahetsie 'uximatɨarika munuanitsie.
JER 11:13 'Ekɨ, Kura, yuwaɨkawame kakaɨyarixi pepɨwarexeiya kiekarite hepaɨ. Pepitiwewi waɨkawame puretini kaye hepaɨ pɨtiyuxexeiya Kerutsaremetsie, 'ɨkwa taiyame Wahari hetsiemieme, tewinɨarika 'ahetsiemieme pepɨtiyurienekai”.
JER 11:14 »Peru 'ekɨ Keremiyaxi, 'ikɨ teɨteri wahetsiemieme pepɨkara'iwawani. Waɨriyarika pepɨkanetsipitɨaka nemɨmatsi'enienikɨ, ne nepɨkahanu'ena kepauka memɨnetsitahɨawe mete'uka'eniwatɨ.
JER 11:15 »¿Ketiyuriene 'uka neminaki'erie netukita, waɨkawamekɨ 'axatiuyuriekakeri? ¿Kamɨtsɨ mawari tiyɨwe 'uximatɨarika mutaweiya xehetsie mɨkaye'anikɨ? ¿'Ana xeyutemamawietɨ xetehakɨniwawe?»
JER 11:16 Yawé mɨpaɨ kametiniuterɨwa: «'Uriwu 'amupa, 'ikwaxi witsi'anenemekɨ mɨhɨne». Peru waɨkawa mimierɨkaritsata pɨmetsi'utaiyaxɨ, hikɨ 'amamate 'axawari pɨtixɨxime.
JER 11:17 Yawé Naimekɨmɨtɨrɨkaɨye, mɨmatsi'uka'e, 'uximatɨarika panayetua 'ahetsiemieme, 'axamemɨte'uyurikɨ 'ixaheritsixi meta Kura nuiwarimama. Mɨpaɨ kanaineni Yawé: «Waɨkawa mepɨnetsi'u'uximatɨa Wahari 'ɨkwa memutitairiwakaikɨ».
JER 11:18 Yawé pɨnetiutahekɨatɨa 'ana yanepɨretima. Pɨnetiuxeitsitɨa ke'axamemɨte'uyuriekai.
JER 11:19 Matsi ne muxa mumaxiu mumierieni hepaɨ nepɨ'anekai, 'atsinepɨkatimaikai kehepaɨ memɨteku'eriwakai nehetsiemieme meta mɨpaɨ meputiyuanekai: «Kɨye tepahɨani naime 'ikwaxi heukateme, tepekumaweriya 'ena kwiepa temanu'uwatsie, nixewitɨri mɨkahe'eriwanikɨ».
JER 11:20 Peru 'ekɨ, Yawé Naimekɨpemɨtɨrɨkaɨye, 'aixɨa pemɨrakayuruwa kemɨtiheitseriekɨ, xewitɨ kemɨtiyumate kemɨtiku'eriwa pemɨtimate, keneneuxeiyatsitɨa kepemɨwayurieni, 'ari nekamatiniyetuirieni kenemɨranuyemie.
JER 11:21 «'Ayumieme Yawé mɨpaɨ kanaineni 'Anatuti kiekatari wahepaɨtsita memɨmatsimieku meta mɨpaɨ memutiyuane: “Yawé hetsiemieme pepɨkatihekɨatani, xɨka yapekara'eriwani tame temɨmatsimienikɨ”.
JER 11:22 'Ayumieme, mɨpaɨ kanaineni Yawé Naimekɨmɨtɨrɨkaɨye: “Ne nepɨtixekwinitɨani. Temari 'ixiparakɨ mepɨkwi'iwa, meta tɨɨri 'ukitsi 'ukari haakakɨ mepɨkwini.
JER 11:23 Mɨkɨ nixewitɨ pɨkayuhayewa. Kepauka maye'ani nemɨwa'uximatɨanitsie 'ana 'uximatɨarika nenanayetuamɨkɨ 'Anatuti kiekatari wahetsie”».
JER 12:1 'Ekɨ, Yawé heitseriemekɨ pekatinikuxatani kepauka nemɨniukixie 'ahamatɨa. Matsi hikɨ nepɨmatitaxatɨanikeyuta 'etsiwa tita mɨtiheitserie hepaɨtsita. ¿Titayari 'axamemɨte'u'iyari 'aixɨa mete'itɨarie? ¿Titayari teyukwamanamete kayuwatɨ mete'u'uwa?
JER 12:2 'Ekɨ pepɨwaruka'etsa, mɨkɨta mepananayata, mepɨtiwawere meta mepukaxuxuawere. Yutenikɨ mepɨmatsinɨawa, peru wa'iyaritsie pepɨkayeka.
JER 12:3 Yawé, 'ekɨ ne pepɨnetsimate, 'ekɨ pepɨnetsixeiya meta pepɨtimate kenemɨtinewaɨriya 'ahetsiemieme. Keniwaranuhapani, muxatsi memɨkwi'iwa wahepaɨ, keniwaranuyeteɨxi 'iya tukaritsie memɨkwi'iwakɨ.
JER 12:4 ¿Kepaukake pɨkawiye 'ena kwiepa, kepaukake pɨtitiyɨra tupiriyate? Yeutari meta memɨte'awɨwawe mepɨkwi'i teɨteri 'axamemɨte'uyurikɨ 'ikɨ kwieyaritsie kiekatari, memuyuwaɨriya mɨpaɨ memɨtiyuanikɨ: «Kakaɨyari kepauka temeuyeweni pɨkatatsixeiya».
JER 12:5 «Xɨka teɨteri memanautsawawe wahamatɨa pe'uti'uxikeni, ¿Kehepaɨ petiwaruta'iwawe kawayutsixi? Xɨka pehekawautseni makuweritsie, ¿kepeyɨniri Kurutani mu'ɨtsiyatsie?
JER 12:6 'A'iwamatɨtɨ, 'axeikɨa nunuiwakate, mepɨmetsi'uku'eiri meta 'axameputiyuane 'ahepaɨtsita. Tsepa waɨkawa witsimemɨmetekɨhɨawe, yuri pepɨkatiwa'eririeka.
JER 12:7 »Neteɨterima nepuwaruku'eiri, tita mɨtinepiinitɨkai nepiku'eiri, neteɨterima nemɨwanaki'erie nepuwayetua memɨwaraye'unie wahetsɨa.
JER 12:8 Nepiinite nemɨtiwayetuirienikekai nehepaɨtsita mayetsi wahepaɨ meputiyuane. Mepɨnetsikukewe tɨma, 'ayumieme nepɨwaxani'erie.
JER 12:9 Nehetsiemieme neteɨterima wiki witsimeu'ane hepaɨ nepɨtiwaxeiyakai memimietɨwe wirɨkɨxi. Xekenehu, xekeniwarukuxeɨri yunaime yeutari. Xekeniwa'atɨa memitakwanikɨ.
JER 12:10 Yuwaɨkawatɨ muxatsi wahɨwemete nekaxie haraweriyari mepuka'unaxɨ, nekwie naime mepakuketsi, neharaweri witsimɨ'anekai makumawe mepayeitɨa.
JER 12:11 'Unime mepuhayewaxɨ, 'akuwakime meta 'akumaweme nehɨxie, naitɨ 'ikɨ kwieyari puka'unarie nixewitɨ mɨkaheiyehɨwakɨ.
JER 12:12 Naitsarie makumawetsie yemurite mɨtiteitsie mekaniu'axɨani teyumemiwamete. Yawé 'ixiparaya 'ikɨ kwieyari kanika'unamɨkɨ naime 'etsiwatɨma yayeume pɨkahayewa, meta nixewitɨ kayuwatɨ pɨkahexeiyani.
JER 12:13 Tɨriku mepuka'e hikɨ xuya mepuka'itsanaxɨ, yakɨ xeikɨa pɨratɨa wa'uxiya. Yawé waɨkawa mɨha'akɨ mepuyutitetewiya tita memɨte'uka'itsanaxɨkɨ».
JER 12:14 Yawé mɨpaɨ kanaineni: «Yunaitɨ teɨteri 'auriena kiekatari 'axamemɨte'u'iyari neteɨterima 'ixaheritsixi tita nemɨtiwarumi memɨte'umayɨa, nepuwarahuna wakwiepa, meta Kura xiɨyarimama watsata nekaniwaxɨnamɨkɨ.
JER 12:15 'Arike newarahuname, nekaniwatinenimayatamɨkɨ, nekaniwa'atɨamɨkɨ yuxexuime wakwietsie nemɨwayetuiritsie.
JER 12:16 Xɨka yemekɨ meheitimani neteɨterima wahuye, mɨpaɨ kememɨtewaru'ɨkitɨakai neteɨterima Wahari hetsiemieme kememɨteyɨhɨritɨakakɨ, mɨpaɨ xɨka metehetimani kenemɨtitewakɨ xɨka meyuhɨritɨatɨ mɨpaɨ me'utiyuani: “Yawé 'ake'uyeikani yemekɨ”, hikɨ 'ana neteɨterima watsata mekaniyuhayewakuni.
JER 12:17 Peru kemɨ'ane nuiwari mɨkaheu'enani, yuheyemekɨ nepikumaweriya meta nepɨwaka'una», Yawé mɨpaɨ kanaineni.
JER 13:1 Yawé mɨpaɨ kanetiniutahɨawe: «Rinu hɨiyameyari keneu'ananairi kena'ahɨa kɨmana, peru pepɨka'itahawiyani».
JER 13:2 Yawé kemɨnetiuta'aitɨakai, hɨiyame nekaniunaneni kɨmana nekanayɨhɨani.
JER 13:3 Hikɨ Yawé hutarieka mɨpaɨ kanetiniutahɨawe:
JER 13:4 «Hɨiyame pemunanai pemenakuteka kenahurietɨ, Perati paitɨ kenemie, mana keneti'awieta 'aita mukataritɨkata».
JER 13:5 Hikɨ nekaneyani Perati paitɨ nekaneiti'awieta, Yawé kemɨnerahɨawekai.
JER 13:6 Mɨixa tukari 'anukayaku, Yawé mɨpaɨ kanetiniutahɨawe: «Perati kenemie hɨiyame kenewaumie nemetsi'uta'aitɨa pemeiti'awietakɨ muwa».
JER 13:7 Perati nekaneyani, hakewa hɨiyame nemeti'awietakai nekanewatihurieni, peru 'axani'anekaitɨniri kanipɨnikaitɨni tixaɨtɨkɨ pɨkatiyunaki'eriekairi.
JER 13:8 Hikɨ Yawé mɨpaɨ tawari kanetiniutahɨawe:
JER 13:9 «Mɨpaɨ kanaineni Yawé: “Mɨkɨ kemɨ'ane mɨpaɨ nekatiniwaka'uniriemɨkɨ Kura xiɨyarimama kememɨteyuti'ɨre metatsiere Kerutsareme kiekatari.
JER 13:10 'Ikɨ teɨteri 'axamemɨte'u'iyari, memɨkayuwaɨriya yamemɨtekakɨnekɨ kenemɨti'aita, yu'iyari mukaheu'ena memuweiya meta hipame kakaɨyarixi memɨwarayexeiya, 'ikɨ hɨiyame tixaɨtɨ mɨkatiyunaki'erie hepaɨ mepɨyɨni.
JER 13:11 Tewi hɨiyame kemɨranakuteika, mɨpaɨ nepɨtiwareuyehɨakai hurawa 'Ixaheri teɨteriyari meta Kura nuiwarimama —Yawé mɨpaɨ kanaineni— neteɨterima memɨhɨkɨtɨnikɨ meta memɨnetsihekɨatanikɨ, nemariweme meta witsine'anemekɨ nemɨxeiyariekakɨ. Perutsɨ yamepɨkatekakɨ”.
JER 13:12 »Mɨpaɨtatsiere ketiniwarutahɨawi: “Yawé mɨpaɨ kanaineni, 'Ixaheri Kakaɨyarieya: ‘Naitɨ xarite winukɨ kanitihɨniyariemɨkɨ’. Xɨka mɨkɨ mɨpaɨ memete'utahɨawe: ‘¿Tekate'akumatekuta panatsi naitɨ xarite winukɨ ka'utihɨniyarɨwa?’,
JER 13:13 hikɨ 'ana mɨpaɨ pekatiniwata'eiyamɨkɨ, Yawé mɨpaɨ kanaineni: ‘Winukɨ nekaniwatihɨniyamɨkɨ memɨtitarɨwenikɨ yunaime teɨteri 'ena kiekatari: ti'aitame Rawiri 'uwenieyatsie memayaxike, mawari wewiwamete meta yunaime Kerutsaremetari.
JER 13:14 Yanekatiniwapitɨamɨkɨ memuyutikwinikɨ yunaitɨ, wapaapama meta waniwema 'ukitsi yaxeikɨa. Ne nepɨkawatinenimayata matsi nepɨxeka'una nekaxeheunenimayatɨ’. Yawé mɨpaɨ kanaineni”».
JER 13:15 Xekeneneu'eni, yemekɨ xekeneu'enana. Mariweme xepɨkahayuyeitɨwani, Yawé mɨpaɨ kanaineni.
JER 13:16 Yawé yukakaɨyari 'aixɨa xeketenahɨaweni, mexi'akɨxi yɨriya kaheyenɨ'awe meta 'akuxi xeme hɨri mɨ'e'etɨtsie xekahekaxɨriwawe. Xeme hekɨariya xepɨtakwewie, peru mɨkɨ kanipatamɨkɨ yɨriya 'amayetsuyekɨ, 'ɨyuwime kanayeitɨamɨkɨ.
JER 13:17 Peru xɨka xeme xekahanu'enanani, 'awie nekanitatsuamɨkɨ xeme xemuyuti'ɨrekɨ, nehɨxita 'ukai panexɨani hatsiwimekɨ, Yawé muxatsimama 'ateewa memanuhapanienikɨ kayukwieyaritsie.
JER 13:18 Mɨpaɨ ketineutahɨawi ti'aitame meta ti'aitame maamaya: «Tixaɨtɨ xekatehɨkɨtɨme xekenayuyeitɨa, kwiepa xekenetiyaxi, yumu'utsieri kuruna xepɨkahana'uitɨaka, kuruna witsimɨtixawawatɨ».
JER 13:19 Nekexi kiekariyaritsie pɨreuname, xewitɨ pumawe mɨreuyepieni. Yunaitɨ Kura xiɨyarimama mekanehapanieni, yunaitɨ mekananutaxɨriyani yemekɨ.
JER 13:20 Xekeneutanenieri xekeniwaruxeiya tayeta memayehu. ¿Hakewari muxatsi pemɨhɨritɨarie, muxatsi wahetsiemieme pemuyuta'ɨrekai?
JER 13:21 ¿Kepetayɨni xɨka Yawé mɨkɨ memanuyetenikɨ waru'uitɨani 'iya kemɨ'ane 'ekɨ pemɨtiwaruti'ɨkitɨa 'iya 'aixɨa pemɨtiwamaikai? ¿Yemekɨ kamerekwine 'ukaratsi mɨniwene kukuiniyaya hepaɨ?
JER 13:22 Xɨkata pe'ata'iwawiya: «¿Titayari mɨya neranuyemie?», waɨkawa 'axapepɨtiuyuri 'a'iwi pekaniutatsaniyarieni meta pekaniukumayɨiyani penanaimarietɨ.
JER 13:23 ¿Kamɨtsɨ 'etiupe tewiyari yunawiyari mupata tiyɨwe, yatɨni tiyɨwe tɨwe meupitu muyutayeitɨani? Yaxeikɨata xeme 'aixɨa xemɨte'uyurieni xepɨkayɨwawe, xepɨ'iyamate 'axaxemɨteyuriekakɨ xeikɨa.
JER 13:24 «'Ɨxa hepaɨ nepɨxetawiwiexɨani 'eka kemɨrei'enitsitɨwa makumawetsie.
JER 13:25 'Ikɨ mɨyati'anetɨ 'ahetsie katiniunake, 'ahetsiemieme nemi'inɨatakai —Yawé mɨpaɨ kanaineni—. Metsɨri pekanenatɨmaiya, 'itarikatsie pɨta pekatiniuwiya,
JER 13:26 neta 'a'iwi teikɨ nekanitihanimɨkɨ 'ahɨxie paitɨ nekamaneukunamɨkɨ nekatinihekɨatamɨkɨ 'atewiyarika.
JER 13:27 Nepɨniere hipame wahamatɨa kepemɨtihune, pemutatsuaka yewa hepaɨ, peka'akatewiyatɨ hipame pewakumaɨwatɨ, meta kemɨtixani'eriwakɨ yapetiyurienetɨ 'ahetsie, yeuta paitɨ meta hɨritetsie. Xɨa'ui 'ahetsie, Kerutsareme. ¿Kepaukake tamɨ pepɨtihayewa peka'itiyatɨ pehɨkɨtɨtɨ?»
JER 14:1 'Ikɨ Yawé niukieya kanihɨkɨtɨni Keremiyaxi hetsɨa munua, kemɨtikuwanikekai hepaɨtsita:
JER 14:2 «Kura kaniyuhiwerieka kiekariteya kanikwiximeni, hiwerika kanixuaweni mɨkɨ kwieyaritsie, meta Kerutsaremetari wa'aiwari kana'eniɨriɨkɨni.
JER 14:3 Memɨxikutsixi yuteɨterima hanɨiyakɨ mekaniwanɨ'aka, mɨkɨ putsu matineniere mekanekɨkani, Peru haa mepɨka'ukaxexeiya. Meyutetewiyatɨ mehɨxiyatɨ, mekanakununuwani xarite 'uyewawakime me'uhapatɨ meta yumu'utsie meheutimetɨkaitɨ.
JER 14:4 Kwiepa kaniutsinini, mɨka'ukawiwiyekɨ 'ikɨ kwieyaritsie. Mekaniyutetewiyani memuka'etsa, yumu'utsie meheutimetɨkaitɨ.
JER 14:5 Maxatsi yeuta yuniwema mepɨwaruku'e'eiriwa 'ɨxa mumawekɨ.
JER 14:6 Puxuri yeutari hɨri mɨmetsetsie me'u'uwatɨ, meta wahɨxite tiwaxɨaximekaku, yawixi wahepaɨ mekateniu'iweni hakakɨ tupiriyate mumawekɨri».
JER 14:7 Tsepa ke'axatemɨte'uyuri tahetsie mɨrahɨpa, peru 'ekɨ Yawé, 'aixɨa pemɨramamatiwanikɨ yaketineuyuri, waɨkawamekɨ yatepɨkatekahu, 'ahepaɨtsita 'axatepɨte'uyuri.
JER 14:8 'Ekɨ pekanihɨkɨtɨni, 'ixaheritsixi wawikweitsitɨwame meta memɨmatsitakwewie 'uximatɨarika xuawekaku, ¿titayari yeikame hepaɨ petiyɨane 'ikɨ kwieyaritsie, 'ateewa yeikame hepaɨ yɨwikɨta xeikɨa manuhupu?
JER 14:9 ¿Titayari petihɨxiya, kuya mɨkayɨwe mɨtiyutawikweitsitɨani hepaɨ? Yawé, 'ekɨ tahamatɨa pepuyeika, kepemɨtitewa mɨpaɨ tepɨtematiwa, pepɨkatatsi'uku'e'eiriwani.
JER 14:10 Yawé mɨpaɨ kanaineni 'ikɨ teɨteri wahepaɨtsita: «'Ikɨ teɨteri puwanake memeu'uwanikɨ, yɨ'ɨkate mepɨkamaniyatɨa. 'Ayumieme ne nepɨkawanaki'erie, matsi ne nekaniwaraye'eritɨamɨkɨ ke'axamemɨte'uyuri hikɨ nekatiniwakwinitɨamɨkɨ mɨkɨkɨ».
JER 14:11 Hikɨ Yawé mɨpaɨ kanetiniutahɨawe: «Pepɨkanetsiwawirieka 'ikɨ teɨteri wahetsiemieme 'aixɨa memɨtetenikɨ.
JER 14:12 Tsepa memuyuhakie, wahiwari nepɨka'enieni, tsepa mawari taiyariyari memɨnetsiwewirie meta hatsite mawariyari nepɨka'itanaki'erieni. Ne nepuwakwini yurikɨ, 'ixiparakɨ, haakakɨ meta kwiniyakɨ».
JER 14:13 Peru neta mɨpaɨ nekatinitahɨawe: «Yawé nekakaɨyari. Hipatɨ 'aniukamete mɨpaɨ mepɨtewakɨhɨawe kename 'ixiparakɨ mekatakwi'iwa meta kename mekahaakakwini, matsi kename 'ekɨ kayuwatɨ pewapitɨani mɨixa 'ikɨ kwieyaritsie».
JER 14:14 Yawé mɨpaɨ kanetiniuta'eiya: «Kaniyakɨtɨni kememɨtekuxata mɨkɨ Kakaɨyari niukametemama kename nehetsiemieme meyɨa metekuxatatɨ. Ne nepɨkawarutanɨ'a, ne nepɨkatiwata'aitɨawe, meta nepɨkawatahɨawiwe. Tita memɨtexehekɨatɨa kememɨtenieritɨarie 'irɨmari kanihɨkɨtɨni, yakɨ temaiwawemete mepɨhɨkɨ, yakɨ xeikɨa yuhetsiemieme mepɨteku'eriwa.
JER 14:15 'Ayumieme Yawé mɨpaɨ kanaineni: “Yakɨ Kakaɨyari niukametemama nehetsiemieme memɨtekuxata ne nekawanɨ'akaku, meta mɨpaɨ memutiyuane kename katiyutakwini, haakaxa kahayani 'ikɨ kwieyaritsie, mɨkɨ haakakɨ mekanikwikuni meta 'ixiparakɨ.
JER 14:16 Meta teɨteri memɨte'utaxatɨarie Kerutsareme kayeyari 'utɨma menixɨrietɨkɨnikuni haakakɨ meta 'ixiparakɨ, pumaweni kemɨ'ane mɨkɨ mɨwakateuku, wa'ɨitama, waniwema 'ukitsi, meta waniwema 'ukari, mɨpaɨ nepɨtiwarakapitɨani ke'axamemɨte'uyurikɨ”.
JER 14:17 »'Ekɨ mɨpaɨ pekatiniwaretahɨawimɨkɨ: »“Ne 'ukai ke'uhapaneni tukarikɨ meta tɨkarikɨ, nekatihayewatɨ, neteɨterima waniwe 'uka 'ɨimari pɨtiuka'eniwa waɨkawa, tɨrɨkaɨyemekɨ kaniuweiyani.
JER 14:18 Xɨka 'ɨtsita neheyani, teɨteri mekwikwi'ime nepɨwaxeiya 'ixiparakɨ memukwi'iwaxɨ, xɨka kiekaritsie neheutahani, haakakɨ memɨtekukuye nepɨwaxeiya. Kakaɨyari niukameya meta mawari wewiwame, 'ikɨ kwieyaritsie ku'uwamete mekanihɨkɨtɨni 'atsimekatemaitɨ kememɨteyurie”».
JER 14:19 ¿Kamɨtsɨ yemekɨ Kura perehɨari? ¿Tsiyuni petixani'erie? ¿Titayari mɨya petatikwinitɨa matsi temɨta'uayemaniri tepɨkayɨwawe? Tukari kayuwatɨ muma tepɨtakwewiekai, peru tixaɨtɨ 'aixɨa mɨti'ane tepɨkate'ukaxei. Tukari tepɨtakwewiekai 'aixɨa teteheu'erietɨ temakɨnekɨ, peru tahetsie marika xeikɨa kaninuani.
JER 14:20 Yawé, tame ke'axatemɨte'uyurikɨ tepayukumate, meta tapaapama ke'axamemɨte'uyuri, tame 'axatepɨte'uyuri 'ahepaɨtsita.
JER 14:21 'Aixɨa pemɨrahɨawarɨwanikɨ pepɨkatatsihexɨrɨwani, 'a'uweni mɨmariwe pepɨkananaimaka. Kenaye'eri tɨratu kepemɨtiuwewi tahamatɨa. Pepɨkaheihɨpani.
JER 14:22 ¿Kamɨtsɨ tiyɨwe xewitɨ kakaɨyari wewiyakametɨtɨ wiyeri manayenɨ'ani? Yawé meta pemɨtakakaɨyari, ¿tamɨ 'ekɨ pekatihɨkɨ wiyeri pemeyenɨ'awa, muyuawi yuxaɨta pɨkayɨwe? Naime 'ekɨ 'ikɨ pepɨtiutawewi, 'ayumieme tepɨta'ikwewa 'ahetsie.
JER 15:1 Yawé mɨpaɨ kanetiniutahɨawe: «Tsepa Muitsexi meta Tsamuheri nehɨxie memɨteti'ui, ne nepɨkawarutinenimayatawe 'ikɨ teɨteri. Hikɨ keniwaranunɨ'a nehɨxie memɨka'u'uwanikɨ. Mekeheuhuni.
JER 15:2 Xɨka mɨpaɨ memateha'iwawiyani: “¿Hakewa kuta tepeyehu?”, mɨpaɨ ketiniwarayemari'itɨa mɨpaɨ ne Yawé nemainekɨ: »“Kemɨ'anetsɨ memɨkwinikɨ memɨ'ayumiemete, meke'ukwini, kemɨ'ane 'ixiparakɨ memɨkwinikɨ memɨ'ayumiemete, 'ixiparakɨ meke'ukwini, haakakɨ memɨkwinikɨ memɨ'ayumiemete, haakakɨ meke'ukwini, kemɨ'ane memanuhapanienikɨ memɨ'ayumiemete mekehehapanieni”.
JER 15:3 »Ne neniwaranunɨ'airiemɨkɨ naukame 'uximatɨarika —Yawé mɨpaɨ kanaineni—: 'ixipara mɨtiyumemiwa, tsɨikɨri memɨwatahapaxɨanikɨ, wirɨkɨxi memɨwatitutsenikɨ meta yeutari naimeri memɨwatikwanikɨ.
JER 15:4 Te'aitamete yunaitɨ kwiepa memɨtama memɨmamakakɨ nekatiniyurimɨkɨ, Manatsexi 'Etsekiyaxi nu'aya, Kura kwieyaritsie ti'aitame, kemɨtiuyurikɨ Kerutsareme.
JER 15:5 «¿Kemɨ'ane pɨmetsitinenimayata, Kerutsareme? ¿Kemɨ'ane 'ahetsiemieme pɨtatsuani? ¿Kemɨ'ane puyuwaɨriya mɨta'iwaunikɨ kepemɨreu'erie?»
JER 15:6 Yawé mɨpaɨ kanaineni: «'Ekɨ pepɨnetsi'uku'eiri, 'a'utɨa pepetɨa. Nemamá 'ahetsie nekanitatseramɨkɨ nekamenika'unamɨkɨ, nepu'uxeri nematsinenimayatɨ.
JER 15:7 Kiekari kitenie nekameneuyewiwimɨkɨ nakitsaraɨkɨ. 'Ekɨ 'aniwema 'ukitsi yunaime nekameninawairiemɨkɨ, neteɨterima yunaime nekaniwaka'unamɨkɨ, 'axameteyurietɨ memɨkate'uhayewaxɨkɨ.
JER 15:8 Xiekari haramara mɨtika reuyeta hepaɨ meyupaɨmeme nekaniwarayeitɨamɨkɨ xewiuraxi, tuka yemekɨ tiyuka'uname nepanunɨ'ani temari wamaamama wahepaɨtsita. Yapauka wahetsie nekatinipitɨamɨkɨ 'uximatɨarika meta hiwerika.
JER 15:9 Kaniku'amɨweni kemɨ'ane 'atahutame yuniwema 'ukitsi mɨwarayexeiyakai, ka'u'iwetɨ payeika. Tsepa mutuka pukɨ'iyɨriwa, 'ukaratsi yutewiyatɨ payeika yemekɨ. Kemɨ'ane memɨyuhayewa nepuwayetuani memɨkwi'iwakɨ memɨwaraye'unie wahɨxie»,
JER 15:10 Xɨa'ui nehetsie, nemaama, pemɨnetsi'utiniwexɨ niuki nemɨxɨatɨakakɨ meta nemɨnemienenikɨ naime 'ikɨ kwieyaritsie wahepaɨtsita. Ne xeime nepɨkatiniɨtɨawe meta nepɨkanetaniɨwe, peru yunaitɨ 'axamepɨnetekumamateke.
JER 15:11 Yawé mɨpaɨ kaniutayɨni: «Ne yurikɨ nekamenixɨnamɨkɨ 'aixɨa mɨti'anenikɨ, yanepɨtiyurieni 'aneɨkixiwi metsitawawirienikɨ pemiparewienikɨ 'uximatɨarikatsata kememɨtekwine.
JER 15:12 »¿Kamɨtsɨ tiyɨwe tewi tepɨa makamura, tepɨa tayeta mieme meta wurunitse?
JER 15:13 'Axapemɨtiuyurikɨ nekatiniyetuamɨkɨ xepiinite mɨraye'atɨka, tixaɨtɨ nekatiwautɨ, tita waɨkawa pemɨrexeiya meta piinite mɨraye'atɨka, naime 'ikɨ 'akwietsie.
JER 15:14 'Aneɨkixiwima pemɨtiwata'uximayatsirienikɨ yanekatiniyurimɨkɨ xeime kwieyaritsie pemɨka'imatetsie, nehaxɨatsie tai kaniutani xehetsie kaneutanerɨkwawani».
JER 15:15 Yawé, 'ekɨ pepɨtimate. Kenena'eriwani, kenene'ɨwiyani. Memɨnetsi'uweiya ketiniwarakapitɨa. Wahepaɨtsita kepemɨtiukanewiekɨ, pepɨkanetsipitɨaka nemɨka'unarienikɨ, 'ahetsiemieme neuxei nepɨtiuka'eniwa.
JER 15:16 Kepauka 'aniuki nemukaxexeiyakai, ne nepitikwa'akai, mɨkɨ pɨnetemawierikatɨkai meta ne'iyari pɨtemawierikayatɨkai, kepemɨtitewakɨ nehetsie nematsihexeiyakɨ, Yawé, Kakaɨyari Naimekɨmɨtɨrɨkaɨye.
JER 15:17 Ne 'ixɨararitsata memɨ'iyamatɨka nepɨkawatinɨiwe, meta wahamatɨa nepɨkanetitemawiwe 'akuxi, nexaɨtame nepuyeika, nehamatɨa pemuyeikakɨ meta pekaneniuyehaxɨatɨani wahepaɨtsita.
JER 15:18 ¿Titayari katihayewawe nekukuiniya? ¿Titayari katiyu'uayemarinɨa nekukuiniya? ¿Titayari katiyumɨkɨ? ¿Nehetsiemieme yakɨ haa manukatsukwaka pepɨhɨkɨtɨni haixa mɨkawani?
JER 15:19 'Ayumieme Yawé mɨpaɨ kanaineni: «Xɨka petiuhayewa, ne nepumatsi'anukuhana 'anata pepɨnetsi'ayexeiyani. Xɨka petiuhayewa yakɨ petikuxatatɨ, xɨka yurikɨ xeikɨa petikuxatani yemekɨ meuyewetsekɨ, neniukame 'ekɨ pepayani. Mɨkɨ 'ahetsɨa meke'u'axɨani, peru 'ekɨ wahetsɨa pepɨkaheyeikani.
JER 15:20 Ne yanekatiniyurimɨkɨ 'ikɨ teɨteri wahetsiemieme wurunitse mukawe mɨkaha'iwarie hepaɨ pemɨ'anenikɨ, mepɨmatsitamieni, peru mepɨkamatsiha'iwa, ne 'ahamatɨa nemuyeikakɨ nemetsitawikweitsitɨanike meta nemɨmatsixɨnakɨ
JER 15:21 Nepɨmatsixɨna 'axamemɨte'u'iyari wahetsie, nepɨmatsitawikweitsitɨani memayu'eririya waxɨtetetsie».
JER 16:1 Yawé niukieya nehetsɨa kaninuani mɨpaɨ kanetiniutahɨawe:
JER 16:2 «Pepɨka'utineneɨkeni, tɨɨri 'ukitsi meta 'ukari 'ena pepɨkawarayexexeiyani».
JER 16:3 Mɨpaɨ Yawé mainekɨ, tɨɨri 'ukitsi, 'ukari 'ena memutinunuiwaxɨ wahetsiemieme meta wamaamama memɨwarutiniwexɨ meta wapaapama 'ikɨ kwieyaritsie memɨwarutinuari wahetsiemieme:
JER 16:4 «Mekanikwikuni waɨkawame kwiniya 'axa'anenemekɨ. Xewitɨ pɨkayuhayewa mɨtatsuani wahetsiemieme meta mɨwakateukukɨ, kwiepa mekaniyuhayewakuni kwitarai hepaɨ. 'Ixipara meta haaka kaniwarakuxɨtɨamɨkɨ, wakaxari wirɨkɨxi meta yeutari wa'ikwai katinayeimɨkɨ».
JER 16:5 Yawé mɨpaɨ kanaineni: «Kiita pepɨkaheuhakeni hakewa memuyuhiwerie memɨwayeteitsie, wahamatɨa pepɨkahetatsuakani meta pepɨkawarenɨtɨaneni, karikɨ 'ikɨ teɨteri kayuwatɨ nemɨwarupitɨakai nekaniwarunawairieni meta nenaki'eriya metatsiere nemɨwanenimayakai —mɨpaɨ kanaineni Yawé—.
JER 16:6 'Ikɨ kwieyaritsie mekanikwikuni 'amemɨyumate meta 'etsimemɨyumate, xewitɨ pɨkayuhayewa wahetsiemieme mɨtatsuanikɨ, meta mɨwakateukukɨ, nixewitɨtɨma yuwaiyaritsie pɨkayuxiteni wahetsiemieme meta pɨkayukaxini.
JER 16:7 Nixewitɨ memunututuixie wahetsiemieme 'ixɨarari pɨkawewieni wanɨtɨanike mumɨ hetsiemieme, nixewitɨ winu pɨkahanitɨarieni mɨyɨnɨtɨanikɨ, meta tsepa maamaya mɨtiɨmɨ meta paapaya.
JER 16:8 »Xeime kiita pepɨkaheutahakeni 'ixɨarari hexuawekaku, wahamatɨa pepɨkarekwaka meta pepɨkahe'ieka.
JER 16:9 Mɨpaɨ mainekɨ Yawé Naimekɨmɨtɨrɨkaɨye, 'Ixaheri Kakaɨyarieya: Naime 'ixɨarari temawierikayari nekatinanu'atɨamɨkɨ 'ikɨ kiekaritsie timieme, neneɨkeme meta wikiwame wakwikari. 'Ikɨ yakatiniyɨmɨkɨ yutukaritsie, meta xeme xekaninenierikuni.
JER 16:10 »Kepauka 'ikɨ naime pemɨtiwataxatɨani teɨteri, mɨkɨ mekamanita'iwawiyakuni: “¿Titayari Yawé takakaɨyari tahetsiemieme tita'ai 'uximatɨarika mariweme? ¿Yawé takakaɨyari hepaɨtsita kuta ke'axatete'uyuri?”
JER 16:11 Hikɨ mɨpaɨ pekatiniwata'eiyamɨkɨ: “Meripaitari xe'ukiyarima memɨnetsi'uku'eirikɨ, hipame pɨta kakaɨyarixi memuwaranukuweikɨ, metewa'uximayatsirietɨ memakɨkɨ meta mewarayexeiyatɨ 'ayumieme xepɨte'anuyehu. Ne mepɨnetsi'uku'eiri, 'inɨari niukiyari mepɨkahaye'atɨa —Yawé mɨpaɨ kanaineni—.
JER 16:12 Xemeta kwinimieme matsi xepɨyɨa xe'ukiyarima wareuyeta. Yuxexuitɨ yu'iyari 'axamɨ'ane mɨkaheu'ena xepuweiya, xepɨkanetsihanu'eniwawe.
JER 16:13 'Ayumieme nepɨxe'ayeweiya 'ikɨ kwieyaritsie, xeime kwieyaritsie xemɨka'imatetsie xe'ukiyarima memɨkaheitimatsie, mana tukarikɨ tɨkarikɨ hipame kakaɨyarixi xepɨwarayexeiyani. Ne nepɨkaxetinenimayata”».
JER 16:14 Mɨpaɨ kanaineni Yawé: «'Ayumieme tukari paye'ani kepauka mɨpaɨri mɨkatitaniukieni: “Yawé ke'uyeikani, 'ixaheritsixi 'Ekipitu kwieyaritsie mɨwarayewitɨ”,
JER 16:15 matsi pɨta: “Yawé ke'uyeikani, muwarayewitɨ 'ixaheritsixi kwie tayeta mukumatsie, meta naime kwieyaritetsie hakewa mɨwareutanɨ'axɨakai”. Ne nekaniwaranuitɨamɨkɨ wakwietsie, meripaitɨ wa'ukiyarima nemɨwayetuiritsie».
JER 16:16 Yawé mɨpaɨ kanaineni: «Ne nekaniwaranunɨ'amɨkɨ yuwaɨkawame ketsɨteweiyamete, mɨkɨ xeme mepɨxetitekaina. 'Ariketa, nekaniwaranɨnɨ'amɨkɨ yuwaɨkawame memɨxe'aye'unie, memɨxe'anukuweiya naitsarie hɨritetsie, yemuritetsie meta 'aita, yeutari tewakukuyamete wahepaɨ mepɨxe'anukuweiya.
JER 16:17 Yurikɨ nehɨxite naime pɨtixeiya kexemɨteyurie, nixewitɨ pɨka'anukaname. Ke'axaxemɨteyurie nehɨxie muyuti'awieta pɨkayɨwe.
JER 16:18 Ne nekatinixe'akapitɨamɨkɨ meri 'axakexemɨte'uyurikɨ meta 'axaxemɨte'u'iyarikɨ matsi tawari hepaɨna paɨmemekɨ, kakaɨyarixikɨ memɨxani'eriwakɨ memɨkwikwi'ikɨ nekwie 'axaxemuyurikɨ, meta kwie nemɨxeyetuiritsie xepɨte'utahɨniyaxɨ tita nemɨtixani'erie».
JER 16:19 Yawé, netɨrɨkariya meta pemɨnetsi'awieta, 'ahetsɨa nemɨneti'awiwieta kepauka 'uximatɨarika nemexeiyani: kwie manu'axetsie paitɨ 'ahetsɨa nuiwarite mepɨ'axɨani, hikɨ mɨpaɨ mepɨtiyuani: «'Itarika xeikɨa ta'ukiyarima mepɨte'umikie, tixaɨtɨ mɨkatihɨkɨ mepɨte'umikie, nitixaɨtɨ mɨkatiyunaki'erie.
JER 16:20 ¿Kamɨtsɨ tiyɨwe tewi yukakaɨyarixi mɨwarutiwewieni? Matsi mɨkɨ mepɨkakakaɨyarixi».
JER 16:21 'Ayumieme, hikɨ 'ikɨ 'ɨkitsika nepɨxewewirieni, netɨrɨkariya nepɨxehekɨatsitɨiya. 'Anake mɨpaɨ xepɨtehetimani ne Yawé nemɨtitewakɨ.
JER 17:1 «Kura ke'axamɨtiuyuri katina'utɨarieni tepɨa manuyemɨtsɨkɨ, kana'utɨarieni tepɨa 'atsimɨkayɨwekɨ, tete mɨxixiya 'iyariyaritsie meta mawari taiyameyate 'awateyatsie.
JER 17:2 'Aixɨa mepɨtehe'eriwa xeniwema 'ukitsi xemawari taiyamete kɨyexi mɨ'e'etɨ hetɨa muwetɨka, meta 'uka 'Atserá kakaɨyariyari 'ɨkiyari yemuri 'amanutitɨtɨtsie muwetɨka
JER 17:3 meta nehɨritsie mɨhekɨatsie. »Naime tita waɨkawa pemɨrexeiya hipame kuyaxi nekatiniwayetuiriemɨkɨ, 'apiinite mɨraye'atɨka meta 'atukite 'etsimupepe, naime ke'axapemɨtiuyurikɨ naime 'akwieyaritsie.
JER 17:4 'Akɨmana pekatineuyehɨamɨkɨ tita nemɨmatiumikai. Waɨriyarika ti'uximayatame nepɨmatsihayeitɨani memɨmatsi'aye'unie wahetsɨa, xeime kwieyaritsie pemɨka'imatetsie, nehaxɨa pemutaiyaxɨkɨ, mɨkɨri yakatinitakamɨkɨ yuheyemekɨ».
JER 17:5 Yawé mɨpaɨ kanaineni: «Tewi 'axake'itɨarieka kemɨ'ane tewitsie mɨtiwiya. Tewi 'axake'itɨarieka kemɨ'ane yɨtɨrɨkariya hetsie mɨtiwiya meta yu'iyari mukupata Yawé hetsie mɨkatiwiyanikɨ.
JER 17:6 'Ɨtsi hepaɨ 'anetɨ kanayeimɨkɨ makumawetsie muwe hepaɨ: 'atsipɨkaretimani kepauka tukari 'aixɨa mɨ'ane munuani. Makuwakitsie kaniuwemɨkɨ, 'una kwieyaritsie, xewitɨ mɨkahanuyeika.
JER 17:7 »'Aixɨa ke'itɨarieka tewi Yawé hetsie mɨtiwiya, meta yuri mɨti'erie hetsiena.
JER 17:8 Kɨye muka'iteɨtsie hatetsita hepaɨ 'anetɨ kanayeimɨkɨ, nanarieya hapa meukayuyune, mɨka'ukama xɨri tsepa munua, xawariyari yamɨtitsitsiɨrawi. Mɨtiukuwauketsie mɨkayu'iyaritɨa, meta mɨkatihayewa 'ikwaxi 'ukaxuaweriyatɨ».
JER 17:9 Tixaɨtɨ pɨtiumawe 'iyari hepaɨ tiyukwamanatɨ. 'Aixɨa miyurieni pɨkayɨwe. ¿Kemɨ'ane pɨyɨwe meitimanikɨ?
JER 17:10 «Ne Yawé, 'iyari 'awie nepɨxeiya, meta kemɨtiku'eriwa nepɨ'inɨata, yanemɨtiwapitɨanikɨ yuxexuime kememɨteyurie meta yuxexuitɨ kememɨte'ukaxuxuawere».
JER 17:11 Kemɨ'ane muyuxikutɨane kemɨtiheitseriekɨ kayɨanetɨ mɨkɨ wiki kayutawári mɨtsiniya hepaɨ kani'aneni. Yutukari hixɨapa katineuyehɨamɨkɨ, 'imatɨrieka mɨkɨ ka'uka'iyaritɨ kanayeimɨkɨ.
JER 17:12 'Uweni mɨxawatɨ, tsutɨa paitɨ mariweme mayeitɨariwa, muwa tatuki kanihɨkɨtɨni.
JER 17:13 Yawé, 'ekɨ 'ixaheritsixi memɨmatsitakwewie pepɨhɨkɨ, kemɨ'ane memɨmatsiku'eirieni mekanitewiyatsitɨariekuni. Kemɨ'ane matsihatɨmaiya kwiepa mɨra'utsieni hepaɨ 'anetɨ puyuhayewa, Yawé muku'eirikɨ, haixa mayeyuri mɨhɨkɨ.
JER 17:14 Yawé, keneneu'uayema nemanayewenikɨ, keneneutawikweitsitɨa, nepɨwikweitsitɨarieka, karikɨ 'ekɨ xeikɨa nekwikari pekanihɨkɨtɨni.
JER 17:15 Yunaitɨ mɨpaɨ mekateniu'iwawani: «¿Hakewa kuta Yawé niukieya? Matsiɨkɨtɨ kehayuyeitɨani».
JER 17:16 Peru ne nepɨkanemexɨitɨa nemɨmatsiku'eirienikɨ meta muxatsi wahɨweme 'ahetsiemieme nehɨkɨtɨtɨ netihayewake, meta yanepɨkara'eriwa 'uximatɨarika tukariyari 'umamienikɨ. 'Ekɨ pepɨtimate kenemutaine, 'ahɨxietsɨ nekaniutayɨni.
JER 17:17 Marika nehetsiemieme pepɨkahɨkɨtɨni, 'ekɨ netsi'awiwietame pepɨhɨkɨ kepauka 'uximatɨarika muxuawenitsie.
JER 17:18 Tewiyarika pepɨkanetsipitɨaka, mɨkɨ pɨta keniwarutewiyarikatsitɨa. Pepɨkanetsimariutani, mɨkɨ pɨta keniwamariutani. Tukari kwaniweme keniwaranɨ'airi, tsepari keniwaruka'una yuheyemekɨ.
JER 17:19 Yawé mɨpaɨ kanetiniutahɨawe: «Kenemie kiekari kitenie keneukexi, Kura kwieyaritsie te'aitamete memanutakɨkatsie meta memanayekɨkatsie, metatsiere naime Kerutsareme kitenieyaritetsie,
JER 17:20 mɨpaɨ ketiniwarutahɨawi: “Yawé niukieya xekeneu'eni, Kuratsie te'aitamete meta yunaitɨ teɨteri Kura kiekatari metatsiere yunaitɨ Kerutsareme kiekatari 'ikɨ kitenieyaritetsie xemeutahake.
JER 17:21 Yawé mɨpaɨ kanaineni: ‘Xekeneyukweriwayurieka 'ika xepɨka'utitɨkɨni xawatikɨ meta xepɨkatehanutatɨkɨni 'ena Kerutsareme kitenieyaritetsie.
JER 17:22 Metatsiere yukiita xepɨkatehewayetɨkɨni xawatikɨ, meta 'etsiwa tɨma xepɨkate'uximayaka. Xekena'eriwani xawati 'uxipiya tukari, kehepaɨ nemɨtiwaru'aitɨa xetutsima.
JER 17:23 Peru mɨkɨ mepɨkanetsihanu'eni yamepɨkatekakɨ, matsi pɨta mekaheu'enanatɨ mepayuyeitɨa, memɨ'enananikɨ mepɨka'uyuwaɨri meta memɨta'ɨxatsitɨarienikɨ’.
JER 17:24 »”Yawé mɨpaɨ kanaineni: ‘Xɨka yurikɨ xenetsihanu'enieni, xɨka xawatikɨ 'ika xeka'anutatɨtɨkɨne 'ikɨ kiekari kitenieyaritetsie, matsi xɨka xehe'eriwani 'ikɨ tukari tixaɨtɨkɨ xekate'uximayatɨ,
JER 17:25 hikɨ 'ana mekaneutahaxɨakuni 'ikɨ kiekari kitenieyaritetsie te'aitamete meta memanuyetei, Rawiri 'uwenieyatsie mekanayaxikuni. Mɨkɨ mana mekaneutahaxɨakuni kaxetatetsie meta kawayutsixi wahetsie me'utetɨ, Kura teɨteriyari meta Kerutsareme kiekatari mekaniwarateɨtakakuni, hikɨ 'ana 'ikɨ kiekaritsie yuheyeme pɨkiepatɨni.
JER 17:26 Kura kiekariteyaritsie kiekatari mekani'axɨakuni meta Kerutsareme 'aurie kiekatari, Wenikamini kwieyaritsie kiekatari meta Tsepera kiekatari, mɨhɨriyatsie meta Nekexi kiekatari. Yawé tukita mekani'atɨakuni mawari mɨtataiyarieni, hatsite mawariyari meta 'ɨkwa, metatsiere pamɨpariyutsi mawariyari.
JER 17:27 Peru xɨka ne'aitsikatsie yaxekatekakɨne xawati xɨka xehatɨmaiya meta xɨka Kerutsareme kitenieyaritetsie 'ika xeteheutahatɨwani xawatikɨ, hikɨ 'ana 'itupariteya nekanitaiyaxɨamɨkɨ, kayutɨnɨakamekɨ meta paratsiyute kanititaimɨkɨ Kerutsareme miemete’ ”».
JER 18:1 'Ikɨ Yawé niukieya kanihɨkɨtɨni Keremiyaxi hetsɨa munua:
JER 18:2 «Kenemie hikɨ kwitɨwa 'iwewame kiita, muwa nekametinetaxatɨamɨkɨ».
JER 18:3 Hikɨ nekaneyani 'iwewame kiita, nekaneitaxeiya ti'uximayakame tixikɨraɨyemetsie.
JER 18:4 Hikɨ xari muwewiekai 'axakaniuyɨni mamayatsie, tawarita xeime xari kaniutawewieni, kepaukake 'aixɨa 'aneme mayeitɨani.
JER 18:5 'Ana Yawé niukieya nehetsɨa kaninuani mɨpaɨ kanetiniutahɨawe:
JER 18:6 «Teɨteri 'Ixaheritsixi, ¿kamɨtsɨ nekatiyɨwe xehetsie mɨpaɨ nemɨtiuyurieni 'iwewame kemɨtiuyuri haxukɨ? —Yawé mɨpaɨ kanaineni—. Xeme teɨteri 'ixaheritsixi, haxu 'iwewame yumamatsie kemɨratu'u, mɨpaɨta xeme xepɨ'ane nemamatsie.
JER 18:7 Mɨpaɨ nemɨtiuxata nepɨyɨwe nemuwarahunakɨ, nemuwaratixɨrienikɨ meta nemuwarakumaweriyakɨ xeime nuiwari yatɨni xewitɨ mɨra'aitatsie,
JER 18:8 peru xɨka mɨkɨ nuiwari tiuhayewa 'axatiyurienetɨ, neta nepɨtihayewa kenemɨti'uximatɨanikekai meta kenemɨtiunehɨawekai hepaɨtsitana.
JER 18:9 Mɨpaɨta neputayɨwe xeime nuiwari nemɨkamanikɨ meta nemikayenikɨ yatɨni xewitɨ mɨra'aitatsie.
JER 18:10 Peru xɨka nehɨxie mɨkɨ nuiwari 'axatiuyurieni xɨka kanetsiheu'enieka, nekatinihayewamɨkɨ ke'aixɨa nemɨtiu'eriekai hetsiena mieme.
JER 18:11 Hikɨta ketiniwarutaxatɨa Kura kiekatari meta Kerutsareme, mɨpaɨ ketiniwarayehɨtɨa Yawé mɨpaɨ kanaineni: “Nekaniha'aritɨaka 'uximatɨarika xehetsiemieme nekaniwewieka kehepaɨ nemɨtiyurieni xehepaɨtsita. Huye 'axamɨ'ane xekeneuhayewa, xeketenehɨwa, 'aixɨa xekeneyuyuri pɨta ke'axaxemɨte'u'uwakaikɨ meta ke'axaxemɨteyuriekaikɨ”.
JER 18:12 Mɨkɨ mɨpaɨ mekanitiyuakuni: “Yakɨ xeikɨa peputaine. Ketemɨteku'eriwa yatepɨteyurieka, meta teyuxexuitɨ 'axatepɨteyurieka ta'iyari 'axamɨ'ane kemɨtatikɨhɨawe”».
JER 18:13 'Ayumieme Yawé mɨpaɨ kanaineni: «Xekeneuta'iwau hipame nuiwarite watsata: ¿Hakewa xewitɨ mɨpaɨ pɨre'enaxɨ? 'Ixaheri 'ɨimari yemekɨ 'axa'anemekɨ pɨtiuyuri.
JER 18:14 ¿Kamɨtsɨ 'ɨwi Riwanu hɨriyaritsie 'ai 'amanutitɨtɨtsie titipapare? ¿Kamɨtsɨ haa mɨhaɨtɨ hɨritsie makaneika tiukawauke?
JER 18:15 Peru neuxei, neteɨterima mepɨnetsihatɨmai, hipame kakaɨyarixi tixaɨtɨ memɨkateyunaki'erie 'ɨkwa mepuwatairietɨwe. Yuhuyeta mepekaxɨri, huye meripaitɨ mieme 'utɨa, hipame huyetsie memu'uwanikɨ meta muka'uyeyɨkɨtsie.
JER 18:16 Mɨya meyɨatɨ yukwie yuxaɨtame mekaniuku'eirieni, tixaɨtɨ tiyuriyarɨwame menayeitɨani. Kemɨ'ane mana muyeyani yumu'u kaniyuitɨamɨkɨ matɨ.
JER 18:17 'Eka tau manatineika matineika hepaɨ, nekanixetaxɨriexɨamɨkɨ mɨxe'aye'unie hɨxie. Kepauka xemu'uximatɨariekatsie nekanawaritamɨkɨ nepɨkahaniere».
JER 18:18 Teɨteri mɨpaɨ mekaniutiyuani: «Xekeneuyukuxeɨri tepɨtetixata Keremiyaxi hepaɨtsita. 'Inɨari niukiyari pɨkaheuyeweka mawari wewiwame hetsie, 'ɨxatsi mɨtimaiwe hetsie pɨkaheuyeweka tɨma meta niuki Kakaɨyari niukameya hetsie pɨkaheuyeweka. Niukikɨ tepeye'atɨirieni, tsepa kemaine yatepɨkateyurieni».
JER 18:19 Yawé, keneneu'eni kwerietɨ. Keniwaru'eni kemɨ'ane nehetsie memɨtehahɨpa.
JER 18:20 ¿Kamɨtsɨ 'aixɨa mɨti'ane 'axamɨ'anekɨ tiyupitɨaritɨre? Mɨkɨri putsu mekaniwati'inieni muwa nemeukawenikɨ. Ne matsi nematsi'utahɨawixɨ wahetsiemieme nemɨtaniunikɨ, 'ahaxɨa wahetsie mɨkatinakenikɨ.
JER 18:21 'Ayumieme waniwema 'ukitsi keniwayetua haakakɨ memɨkwinikɨ, keniwaruku'eiri 'ixiparakɨ memɨkwi'iyanikɨ. Wa'ɨitama wiuraxi meke'akɨne meta yuniwema 'ukitsi mekawarexeiyatɨ, wakɨnama meke'ukwi'iwa, waniwema temari mekehekwi'iwa 'ixiparakɨ meheyukwitɨwetɨ.
JER 18:22 Hiwari kehewaku'eiyani wakiita paitɨ, kepauka 'atsimekateha'eriwakaku pemɨwaranɨ'ani wahetsɨa yɨmɨireme tenawayamete. Mekaniuti'ineri muwa nemeukawenikɨ, meta winiyari nehɨxie mekaniuwɨtɨaxɨani.
JER 18:23 Yawé, peru 'ekɨ pepɨrakumate naime kememɨteku'eriwa kememɨnetemieni. Ke'axamemɨteyurie pepɨkatiwareuyehɨwirieka, meta ke'axamemɨte'uyuri pepɨkahekuyeitɨwani 'ahɨxie. 'Ahɨxie meke'ukaxɨriyani. Kepauka wahekɨ pemɨha'a 'ana keniwaraye'atɨiri.
JER 19:1 Yawé mɨpaɨ kanaineni: «Kenemie 'iwewame hetsɨa, xeime haxu xariyari kenenanairi. Hikɨ keniwaruta'ini memetsi'anuweiyakɨ hipame 'ukirawetsixi mana kiekatari meta mawari wewiwamete 'ukirawetsixi,
JER 19:2 hikɨ kenemie mayeweritsie Weni-Hinuni paitɨ, 'Iwewamete wakitenie hɨxie hepatsie, mana niuki pepɨtaxata ne kenemɨmatitahɨawe.
JER 19:3 Mɨpaɨ ketiniwarutahɨawi: “Kura kwieyaritsie te'aitamete meta Kerutsareme kiekatari, Yawé niukieya xekeneu'eni. Yawé Naimekɨmɨtɨrɨkaɨye mɨpaɨ kanaineni, 'Ixaheri Kakaɨyarieya: ‘'Uximatɨarika xehetsie nekananɨ'amɨkɨ 'ikɨ kwieyaritsie, hikɨ kemɨ'ane mɨkɨ mɨti'enieni nakatana katinenauwanamɨkɨ.
JER 19:4 Mɨkɨtsɨ mekaneniuku'eirieni. 'Ikɨ kwie 'axamekaniuyurieni mana 'ɨkwa mekaniutitaiya hipame kakaɨyarixi wahetsiemieme memɨkawamatekai meta watutsima meta te'aitamete Kura kwieyaritsie memɨkawaretima. Metatsiere 'atsimekateyuruwame waxuriya mekaniutayeurieni 'ikɨ kwieyaritsie.
JER 19:5 Tukite 'etsimupepe Wahari hetsiemiemete mekaniutiwewieni, mana yuniwema 'ukitsi memɨwatitaiyanikɨ mawari taiyariyari memayanikɨ Wahari hetsiemieme, ne mɨpaɨ nemɨkatiwaru'aitɨatsie mɨpaɨ nepɨka'utayɨ tɨma, ni'etsiwatɨma mɨpaɨ nemɨkatiu'eri.
JER 19:6 'Ayumieme tukari paye'ani 'uxa'a warie Tupeti pɨkatitewakari meta mayeweri Weni-Hinuni, matsi Mayeweri Mɨrayutikwikwitɨre pɨrayetewaka —Yawé mɨpaɨ kanaineni—.
JER 19:7 'Ikɨ kwieyaritsie Kura kememɨteku'eriwakai meta Kerutsareme mɨpaɨ nepɨkatiwapitɨani, yanekatiniyurimɨkɨ 'ixiparakɨ memɨkwi'iwakɨ memɨwaraye'unie wahɨxie, tatsɨari kemɨ'ane memɨwarakumaweriyakekai wahetsɨa, wawaiyari nekanihayewamɨkɨ wirɨkɨxi wahetsiemieme meta yeutari, wa'ikwai mɨrayanikɨ.
JER 19:8 'Ikɨ kiekari makumawe nekanayeitɨamɨkɨ meta 'atsieriwame. Mana kemɨ'ane muyeyani kanihɨxiyamɨkɨ kemɨtiukwinitɨariekɨ mekaniutinawekuni.
JER 19:9 Memɨxe'aye'unie mexe'anutinakaku mexete'uka'enitsitɨiyakaku mexekwikukaku, yanepɨtiyurieni hakakɨ yuniwema 'ukitsi meta yuniwema 'ukari xemɨwatikwanikɨ meta yunaitɨ xemuyutikwanikɨ’ ”.
JER 19:10 »Hikɨ keneutatara xari xeimiriyari tarimeyari mayanikɨ, pemɨwarawitɨkɨ wahɨxie,
JER 19:11 mɨpaɨta ketiniwarayemari'itɨa ne Yawé kenemaine Naimekɨnemɨtɨrɨkaɨye: “'Ikɨ nuiwari nekanitataramɨkɨ meta 'ikɨ kiekari, xewitɨ xari mutatara hepaɨ, mitamɨani mɨkayɨwekɨ. Tupeti meta mekaniwakateukikuni mɨkite xaɨtsie kwie mumawenikɨri”.
JER 19:12 Yawé mɨpaɨ kanaineni: “Mɨpaɨ 'ena nekatiniyurimɨkɨ meta 'ena kiekatari wahetsie, 'ikɨ kiekari, Tupeti ke'anetɨ muyuhayewaxɨ mɨpaɨta kaniyɨmɨkɨ.
JER 19:13 Naitɨ kiite Kerutsareme mieme meta naitɨ te'aitamete waparatsiyu Kura mieme, tatsɨari, naitɨ mɨkɨ kiite heima 'ɨkwa mutitaiyarie xurawetsixi wahetsiemieme, meta mana kaxie winuyari memutiyeuri hipame kakaɨyarixi wahetsiemieme, mɨkɨ naitɨ ka'itiyatɨ kanayeimɨkɨ Tupeti hepaɨ”».
JER 19:14 Kepauka makunua Keremiyaxi Tupeti hanuyaka, hakewa Yawé meinɨ'akai mɨtixatamiekɨ, hikɨ Yawé tukieya manuwe takwayaritsie kaniutakeni, mana mɨpaɨ katiniwarutahɨawe yunaime teɨteri:
JER 19:15 «Yawé mɨpaɨ kanaineni Naimekɨmɨtɨrɨkaɨye, 'Ixaheri Kakaɨyarieya: “Neniuki xemɨka'eniekɨ 'ikɨ kiekari meta naitɨ kiekarite 'auriena mamanetɨka, xehetsie nekanenɨ'amɨkɨ naime 'uximatɨarika nemɨxehaxaxatɨwakai”».
JER 20:1 Kepauka mawari wewiwame Patsuxi 'Imexi nu'aya, Yawé tukieya mɨhɨritɨarie mexɨakame mɨhɨkɨtɨkai, mu'enaxɨ Keremiyaxi kemɨtikuxatakai,
JER 20:2 'ana katiniuta'aita Keremiyaxi Kakaɨyari niukameya mukuweiyaxɨanikɨ meta Wenikamini kitenieyari 'amautitewatsie kɨyexi hanuyexaxawametsie memeiye'ɨkatsitɨanikɨ, Yawé tukieya manuwe hɨxie.
JER 20:3 'Uxa'arieka, kepauka Patsuxi kɨyexi mayunexaxawatsie mixɨnaxɨ, Keremiyaxi mɨpaɨ katinitahɨawe: «Yawé Patsuxi pɨkamatiterɨwari, matsi pɨta “Marika naitsarie” pepɨtitewaka.
JER 20:4 Mɨpaɨtsɨ Yawé kanaineni: “Marika 'ahetsie nekani'atɨamɨkɨ meta 'ahamikuma wahetsie, mɨkɨ memɨwaraye'unie mekaniwakwikuni, 'ekɨtɨtɨ pekaniwaxeiyamɨkɨ. Kura kiekatari yunaime nekaniwayetuamɨkɨ Wawiruniyatsie ti'aitame hetsɨa, Wawiruniya paitɨ mekananuhapaniekuni, yatɨni 'ixiparakɨ pɨxekwini.
JER 20:5 Metatsiere, memɨxe'aye'unie nekaniwayetuiriemɨkɨ naime tita waɨkawa xemɨteheuxeiya 'ikɨ kiekariyaritsie, naime tita xemɨte'ukaxei xete'uximayatɨ meta waɨkawa mɨraye'atɨka, meta Kura kwieyaritsie te'aitamete tita piinite mɨraye'atɨka memɨtehexeiyakai, memɨtewanawatsirienikɨ meta memɨtehanutɨnikɨ Wawiruniya paitɨ.
JER 20:6 'Ekɨta Patsuxi pekananuhaniemɨkɨ Wawiruniya paitɨ meta yunaitɨ 'atɨɨriyama. Mana pekanemɨmɨkɨ, mana pekanekateukiemɨkɨ yunaitɨ 'ahamikuma wahamatɨa kemɨ'ane yakɨ xeikɨa pemɨtiwakuxaxatɨwakai”».
JER 20:7 Yawé, pepɨnetsi'ukwamanaxɨ 'aniuki witsi'anemekɨ, neta nepɨmatsi'anu'eni. 'Ekɨ matsi waɨkawa pepɨtɨrɨkaɨyekai, pepɨnetsi'a'iwaxɨ. Yunaitɨ teɨteri mepɨnetsinanaima, yamepɨnete'atse tukarikɨ.
JER 20:8 Kepauka nemutaniuka, mɨpaɨ nepɨtiuhiwa: «Nanaimarika 'ukanamieniri». 'Ayumieme Yawé niukieyakɨ neyuriyarietɨ nepayeika meta nenanaimarietɨ.
JER 20:9 Xɨka mɨpaɨ ne'utayɨni: «Tawari nepɨka'enuku'erieni, tawariri hetsiena mieme nepɨkatitaxata», hikɨ niukieya netaɨta tai hepaɨ 'anetɨ kanayeikani ne'umeyari 'ɨarime kanititaiyani. Nepɨtikuwaune nemɨtinewienikɨ, peru nepɨkayɨwe netinewienike.
JER 20:10 Yɨmɨireme nepɨwa'enie menetsinanaimatɨ mɨpaɨ meputiyuane: «Naitsarie marika puxuawe». Hipatɨta mɨpaɨ mekaniutiyuaneni: «Xekeneutaxaneta. Hikɨmɨtɨka tepitaxaneta». Nehamikutsixitɨtɨ yamekatena'eriwani nemekawenikɨ. Meta mɨpaɨ mekaniutiyuaneni: «Tepiwiniya. 'Anake tekane'iwakuni tekatenekapitɨakuni».
JER 20:11 Peru Yawé nehamatɨa kaniuyeikani yumemiwame kwinimieme mɨtiyɨwe hepaɨ, 'ayumieme memɨnetsi'uweiya mekana'iwariekuni mekapɨyɨwekaxɨani, yamepɨkateyurieni mekaniyutitetewiyakuni. Ke'axamemɨ'itɨarieni hatsuaku pɨkahatɨmaiyarieni.
JER 20:12 Yawé Naimekɨpemɨtɨrɨkaɨye, 'ekɨ 'aixɨa mɨtiuka'iyari pemɨmate, tewi kemɨtiyu'iyaritɨa kemɨtiku'eriwa pemi'enie, keneneuxeitsitɨa kepemɨtiwarakapitɨani, 'ahetsɨari nekaniwayetuani kememɨnetsiyurie.
JER 20:13 Yawé xekenenɨawani kwikarikɨ. Mɨkɨ tixaɨtɨ memɨkateheuxeiya kaniwawikweitsitɨaka 'axamemɨte'u'iyari mewaruweiyakaku.
JER 20:14 'Axake'itɨarieka 'iya tukari nematinuiwaxɨtsie. 'Axake'itɨarieka 'iya tukari kepauka nemaama mɨnetsi'ayexeitsie.
JER 20:15 'Axake'itɨarieka 'iya tewi nepaapa mutemawieritɨa kepauka mɨpaɨ mɨtitahɨawixɨ: «'Ukitɨme pekanayexeiya».
JER 20:16 Yawé kiekarite kemɨtiuka'unaxɨ kawareunenimayatɨ mɨpaɨ ke'u'itɨarieni mɨkɨ tewi. Hiwarika ximeri ke'enieka meta tuka mɨrayukwine hiwariyari.
JER 20:17 ¿Ketitayari nemaama yuriepana paitɨ Kakaɨyari kanetiupitɨa nemɨmɨnikɨ? Mɨpaɨ mɨkɨ neteukiya payanikekai, ne 'ana nepɨkatinuiwakekai hetsiena.
JER 20:18 ¿Ketitayari nemaama yuriepana neranuyetɨa 'uximatɨarika xeikɨa nemɨxeiyakɨ meta hiwerika, meta nemɨmɨnikɨ tewiyarika tsata?
JER 21:1 'Ikɨ Yawé niukieya kanihɨkɨtɨni Keremiyaxi hetsɨa munua kepauka ti'aitame Tserekiyaxi muwarenɨ'a Patsuxi Marikiyaxi nu'aya, meta mawari wewiwame Tsupuniyaxi Matsehiyaxi nu'aya, mɨpaɨ memɨte'itahɨawekɨ:
JER 21:2 «Yawé keneutahɨawi hikɨ tahetsiemieme, karikɨ Nawukurunutsuxi Wawiruniya kwieyaritsie ti'aitame katanikwineni. Heiwatɨ Yawé mariweme tiuyurieni, mɨyemiekɨ yukie».
JER 21:3 Keremiyaxi mɨpaɨ katiniwarutahɨawe: «Mɨpaɨ xeketenetahɨawi Tserekiyaxi
JER 21:4 Yawé mɨpaɨ kanaineni, 'Ixaheri Kakaɨyarieya: “Ne 'akuyaxima nekaniwakunuitɨamɨkɨ, ti'aitame Wawiruniya kiekame memɨmietɨwekɨ meta karireutsixi, 'ariri wakuraru warita mematetɨka. Yanekatiniyuriemɨkɨ 'akuyaxima yukiekaritsie pɨta memuyukuxeɨrienikɨ.
JER 21:5 Netɨtɨ nekanixetakwimɨkɨ. Tɨrɨkaɨyemekɨ nekatiniyurimɨkɨ, haxɨama meta waɨkawa nekareunenimayatɨ,
JER 21:6 nekatiniwakwinitɨamɨkɨ teɨteri meta tewaxi, yaxeikɨata 'ena kiekatari mekanikwikuni kwiniya 'axa'anemekɨ.
JER 21:7 Mɨkɨ naitɨ ranuyeyayu, Tserekiyaxi Kura kwieyaritsie ti'aitame nekaniyetuamɨkɨ, meta yunaime memɨte'i'uximayatsiriekai meta teɨteri kemɨ'ane memɨtawikweni kwiniyakɨ, kuyaxatsata meta haakaxatsata —Yawé mɨpaɨ kanaineni—. Nekaniwayetuamɨkɨ Nawukurunutsuxi Wawiruniya kwieyaritsie ti'aitame hetsɨa, meta memɨxekuwautɨwe mexekwinike wahetsɨa. Nawukurunutsuxi kanixekwimɨkɨ 'ixiparakɨ kaxeheunenimayatɨ yɨkɨ katixeku'eriyatɨ”.
JER 21:8 »'Ikɨta teɨteri mɨpaɨ ketiniwarayehɨtɨa Yawé mɨpaɨ kanaineni: “Nekanixexatɨaka tukari huyeyari meta mɨki huyeyari.
JER 21:9 Kemɨ'ane 'ikɨ kiekaritsie muyuhayewa kanimɨmɨkɨ 'ixiparakɨ, kwiniyakɨ, yatɨni haakakɨ. Peru kemɨ'ane muwayeyani muyuyetuani memɨxe'anutinama karireutsixi wahetsɨa, kanayeyurikamɨkɨ. Mɨpaɨ katiniyutawikweitsitɨamɨkɨ.
JER 21:10 Karikɨ ne 'ikɨ kiekari 'axanekaniyuriemɨkɨ, 'aixɨa nepɨka'iyurieniri, —Yawé mɨpaɨ kanaineni—. Wawiruniyatsie ti'aitame hetsɨa kaniyetuiyamɨkɨ, mɨkɨ kanitataiyamɨkɨ”.
JER 21:11 »Mɨpaɨta ketiniwarutahɨawi Kura kwieyaritsie te'aitamete waxiɨyari, Yawé niukieya meke'u'enieni.
JER 21:12 Rawiri xiɨyarimama mɨpaɨ ketiniwarayehɨtɨa Yawé mɨpaɨ kanaineni: »“Heitseriemekɨ xeketeneyurieka naime tukaritsie, xekeneɨxɨna 'uximayatsika 'anutiyakame mɨpitɨarie, nɨka hɨrixɨa 'utani nehaxɨa tai hepaɨ meta 'utani xewitɨ ka'itɨwemekɨ, xeme 'axaxemɨteyuriekɨ.
JER 21:13 Ne nekamanaye'unieka, Kerutsareme, 'uka ti'aitame mayeweri heima kiekame, 'ai hetsie 'akuwerikaku pemuka —Yawé mɨpaɨ kanaineni—. Xeme mɨpaɨ xemutiyuane: ‘¿Kemɨ'ane pɨtatsikemaka? ¿Kemɨ'ane peutahani temɨwayu'awietatsie?’”
JER 21:14 Yawé mɨpaɨ kanaineni: “Ne 'uximatɨarika nekanixepitɨamɨkɨ kexemɨte'ukaxuxuawerekɨ, xehɨri muhukuya nekanitaiyamɨkɨ, mɨkɨ tai naime 'aurienata katinakɨxɨtsitɨamɨkɨ”».
JER 22:1 Yawé mɨpaɨ kanaineni: «Kenemie Kura kwieyaritsie ti'aitame kie, muwa 'ikɨ niuki kenetaxata:
JER 22:2 “'Ekɨ, Kura kwieyaritsie ti'aitame, Rawiri 'uwenieyatsie pemaka, 'aparewiwamete meta 'ateɨterima, 'ikɨ kitenieyaritsie memeutahake, Yawé niukieya xekeneu'eni.
JER 22:3 Mɨpaɨ kanaineni Yawé: ‘Yaxeketeneyurieka kemɨtiheitserie meta kehepaɨ 'aixɨa mɨ'ane. Munawarie xekeneɨxɨna minanaima tɨrɨkariyaya mamayatsie. 'Ateewa kiekame 'axaxepɨkayurieka xepɨka'inanaimaka, meta nutui, meta wiura, metatsiere xeime xepɨkakumemiwani 'atsikatiyurieneme 'ikɨ kwieyaritsie.
JER 22:4 Xɨka yemekɨ 'ikɨ niuki xehaye'atɨani, hikɨ 'ana 'ikɨ paratsiyu kitenie mekaneutahaxɨakuni te'aitamete Rawiri 'uwenieya hetsie memayaxe, kaxetatetsie me'utetɨ meta kawayutsixi wahetsie, yuparewiwamete mewarawitɨtɨ meta yuteɨterima.
JER 22:5 Peru 'ikɨ niuki xɨka xekahaye'atɨani, ne mɨpaɨ nekanaineni 'ikɨ paratsiyu 'uniyari kwinienetɨ kanikemɨkɨ. Ne Yawé, mɨpaɨ nekanaineni’ ”».
JER 22:6 Karikɨ Yawé mɨpaɨ kanaineni 'ikɨ paratsiyu Kura mieme hepaɨtsita: «'Ekɨ nekɨmana, Karaha hepaɨ pekani'aneni meta Riwanu wiyeyari hepaɨ, peru ne mɨpaɨ nekanaineni makumawe nekamanayeitɨamɨkɨ, kiekarite ka'akukiepayatɨkaime.
JER 22:7 'Ahetsɨa te'unamete nekamaneutanɨ'airiemɨkɨ, yu'ɨrɨ me'ɨ'ɨkame yuxexuitɨ, 'akariuxa memawitexɨanikɨ witsimɨtitemari meta taipa mekaneixɨrikuni.
JER 22:8 »Teɨteri waɨkawamexɨa kiekatari 'ena mekaniuyekɨnikuni, hikɨ mɨpaɨ mekateniyuta'iwawiyakuni: “¿Titayari Yawé 'ikɨ kiekari mumariwe mɨyatiuyuri?”
JER 22:9 Mɨpaɨta mekatenita'eiyariekuni: “Yawé yukakaɨyari tɨratuya memuku'eirikɨ, hipame kakaɨyarixi pɨta mewarayexeiyatɨ meta metewa'uximayatsirietɨ memakɨkɨ”».
JER 22:10 Xepɨka'utitsuanani mumɨ hepaɨtsita, meta xepɨkayuhiwerieka hetsiena mieme. Xekeneutitsuanani matsi mehanie hetsiemieme, hatsuaku mɨkanuani hepaɨtsita meta tawariri yukwie mɨkaxeiyakɨ matinuiwaxɨtsie.
JER 22:11 Yawé mɨpaɨ kanaineni Tsaruni hetsiemieme Kutsiyaxi nu'aya, Kura kwieyaritsie ti'aitame, yupaapa 'utɨa manukake Kutsiyaxi, mehanie 'ateewa: «Tawari mɨkanuani,
JER 22:12 matsi kanemɨmɨkɨ hakewa mehanie. 'Ikɨ kwieyari tawariri pɨkaxeiya.
JER 22:13 »Xɨa'ui nepaine yukii mɨwewiene hepaɨtsita meta heimana menawewiwa tiyukananaimatɨ meta heitserie katiyurienetɨ. Xɨa'ui nepaine yuhepaɨ tewi waɨriyarika mɨti'aitɨa hetsiemieme yakɨxeikɨa mɨti'uximayatsitɨa, mɨti'uximayakɨ mɨkatipitɨa.
JER 22:14 Xɨa'ui nepaine mɨpaɨ mutaine hetsiemieme: “Kii nekanitawewimɨkɨ waɨkawa mariweme, wapaitɨ 'a'uyeyeyeume”. 'Ituparite 'etsimayeyeutsie neniereme 'aheuyeyeume mepeuyepiexɨa, herie kariuxa kɨyeyari kamaneme meta xetamekɨ kawiriyariekame.
JER 22:15 »¿Kamɨtsɨ peti'aitametɨni kariuxakɨ waɨkawamekɨ mɨya petiuyurieka? 'Apaapa pɨkatikwakai xeikɨa pɨkati'iekai xeikɨa, matsi heitserie yapɨtiyurienekai meta tita mɨti'aixɨa, 'ayumieme 'aixɨa 'iyari puyeikakai.
JER 22:16 Kemɨ'ane tixaɨtɨ mɨkarexeiya puparewiekai meta kemɨ'ane mɨreuyehɨwa, 'ayumieme 'aixɨa 'iyari puyeikakai. ¿Mɨpaɨ kati'ane kemɨ'ane mɨnetsimate? —Yawé mɨpaɨ kanaineni—.
JER 22:17 »Peru 'ahɨxite meta 'a'iyari 'iwarika 'axamɨti'ane xeikɨa pukuwautɨwe, mepɨtekuwautɨwe xeikɨa 'atsimemɨkate'u'iyari waxuriya memɨtayeurienikɨ meta waɨriyarika memɨte'aitanikɨ meta nanaimarikakɨ».
JER 22:18 'Ayumieme mɨpaɨ kanaineni Yawé Kura kwieyaritsie ti'aitame hepaɨtsita Kuhatsimi Kutsiyaxi nu'aya: «Xewitɨtɨma hetsiena mieme pɨkatatsuani meta mɨpaɨ pɨkatihiwa: “Xɨa'ui ne'iwatɨkai 'uki. Xɨa'ui ne'iwatɨkai 'uka”. Xewitɨ pɨkayukahiwerieni hetsiena mieme meta mɨpaɨ pɨkatihiwa: “Xɨa'ui, tati'aitɨwametɨkai. Xɨa'ui, mumariwekai”.
JER 22:19 Puxu hepaɨ katineteukiemɨkɨ, Kananuyehaniemɨkɨ kanehɨiyamɨkɨ, Kerutsareme kitenieyaritetsie 'ateewa paitɨ».
JER 22:20 «Riwanu hɨriyaritsie keneutiyaka karima keneutahiwa, meta Watsani hetsie. 'Awarini hetsie paitɨ keneutahiwani, yunaitɨ 'atuxexerima memukwi'iwaxɨkɨ.
JER 22:21 Ne nepɨmatsi'utahɨawixɨ kepauka 'aixɨa 'iyari pemuyeikakaitsie, peru 'ekɨ mɨpaɨ peputayɨ: “Ne nepɨkamatsi'enieni”. 'Ɨimariyari paitɨtɨ mɨyapepɨtiuka'iyari: hatsuaku pepɨkanetsihanu'eniwe.
JER 22:22 Yunaime muxatsi wahɨwemete 'eka kaniwaranu'enitsitɨamɨkɨ, meta xetuxexerima 'ateewa mekananuhapaniekuni. Xeme 'axaxemɨte'uyurikɨ hikɨ xepuyutitetewiya tixaɨtɨ xepɨkatehayeitɨarieni.
JER 22:23 'Ekɨ Riwanu tsata pemayeka, kariuxatsata 'a'itɨa pemutawewi, kepetitsuani kepauka 'akukuiniya munuani, niweyame kukuiniyaya hepaɨ».
JER 22:24 Yawé mɨpaɨ kanaineni: «Ne yurikɨ nemayeyuri mɨpaɨ nekanaineni, tsepa Kekuniyaxi Kuhatsimi nu'aya, Kura kwieyaritsie ti'aitame, nemamá tserieta hanira hepaɨ mɨ'ane, mana nekanenutixɨnamɨkɨ.
JER 22:25 Ne nekamaniyetuamɨkɨ memɨmatsimieku wahetsɨa meta waɨkawa pemɨwamakaxe wahetsɨa, tatsɨari Nawukurunutsuxi hetsɨa, Wawiruniyatsie ti'aitame, meta wawiruniyutsixi wahetsɨa.
JER 22:26 'Ekɨ meta 'amaama mɨmatsi'utiniwexɨ xeime kwieyaritsie nekameneutahɨamɨkɨ xemɨkahatinunuiwaxɨtsie, meta mana xekanekwikuni.
JER 22:27 Hatsuakuri xepɨka'axɨani yukwietsie xeme'eriwanitsie».
JER 22:28 Kekuniyaxi xari mɨkaheuyehɨiya mɨtari pɨhɨkɨ, xewitɨ mɨka'iheiwe'erie. ¿Titayari xeime kwieyaritsie reutahɨiya mɨkɨ meta yunaitɨ nuiwaritemama, xeime kwieyaritsie memɨka'imatetsie?
JER 22:29 Kwie, kwie, kwie. Yawé niukieya keneu'eni.
JER 22:30 Yawé mɨpaɨ kanaineni: «'Ikɨ tewi xekenaka'utɨa tewi mɨka'utinuari hepaɨ, tewi 'aixɨa mɨkatiyetɨa hepaɨ. Karikɨ nixewitɨ xiɨyarieyatɨtɨ Rawiri 'uwenieyatsie pɨkatita'aita, meta hatsuaku pɨkatita'aita Kura kwieyaritsie».
JER 23:1 «Xɨa'ui muxatsi wahɨwemete memɨteyuka'una meta nemuxatsi memɨtehatikwa'atsie yeuta pɨta memuwatanɨ'awa», Yawé mɨpaɨ kanaineni.
JER 23:2 'Ayumieme Yawé mɨpaɨ kanaineni, 'Ixaheri Kakaɨyarieya, teɨteri memɨhɨritɨarie wahetsiemieme: «Xeme neteɨterima xepɨwareutaxɨriexɨa, xepɨwareutaweiyaxɨa yemekɨ xepɨkawa'ɨwiya. 'Ayumieme, ne nekatinixekwinitɨamɨkɨ 'axakexemɨte'uyurikɨ —mɨpaɨ kanaineni Yawé—.
JER 23:3 Keyupaɨmetɨ memuyuhayewatɨwe neteɨterima nekaniwakuxeɨrimɨkɨ kemɨ'ane kwieyaritsie nemɨwareutanɨ'axɨa nekaniwarakunuitɨamɨkɨ wakwietsie, mematiwaweretsie memayutimɨiriyatsie.
JER 23:4 Muxatsi wahɨwemete wahetsiemieme nekaniwaranuka'uitɨamɨkɨ memɨwa'ɨwiyanikɨ, mekamamatɨ mekanakɨnikuni meka'utimariutsiwatɨ, nixewitɨ tɨma heuyewetɨ pɨkahayani —Yawé mɨpaɨ kanaineni—.
JER 23:5 Yawé mɨpaɨ kanaineni: «Tukari kanamieni, kepauka Rawiri nuiwarieyatsie xeime 'aixɨa tiuka'iyarime nemanukuketɨanikɨ, mɨkɨ katinita'aitamɨkɨ timaiwetɨ 'ikɨ kwieyaritsie, yakatiniyurienemɨkɨ tita mɨtiheitserie meta 'aixɨa mɨti'ane.
JER 23:6 Mɨkɨ tukaritsie Kura kwieyari kanitawikweitsitɨariemɨkɨ, 'ixaheritsixi yu'iyarikɨ mekaniu'uwakuni. 'Ipaɨ pɨtitaterɨwarieni: “Yawé tatsiwikweitsitɨwame pɨhɨkɨ”».
JER 23:7 Yawé mɨpaɨ kanaineni: «'Ayumieme, tukari paye'ani kepaukari mɨpaɨ memɨka'utiyuaneni: “Yawé ke'ayeyurini, 'ixaheritsixi muwarayewitɨ 'Ekipitu kwieyaritsie”,
JER 23:8 matsi pɨta: “Yawé ke'ayeyurini, 'ixaheritsixi mɨwarayewitɨ kiekari tayeta mukumatsie meta naitsarie kwieyaritsie kemɨtiwareutanɨ'axɨakai”. Hikɨ yukwieyaritsie metitetɨ mekanakɨnikuni».
JER 23:9 Kakaɨyari niukametemama wahetsiemieme: Ne'iyari pɨnetsi'ukukuine meta ne'umeyari pɨnetsitikukuine. Yawé hetsiemiemekɨ meta niukieya mɨpatsiekɨ, tawekame hepaɨ nepɨtinexexeiya, winu mitawaitɨa hepaɨ.
JER 23:10 'Axamemɨ'itɨariekɨ, kayu'ɨitama wahamatɨa memɨhitɨwe mepɨhɨne 'ikɨ kwieyaritsie, 'ikɨ kwieyari puyuhiwerie meta makumawetsie 'ɨxa putiwa. Kakaɨyari niukametemama 'axamepɨteyurie, yutɨrɨkariyakɨ tita mɨkatiheitseriekɨ mepɨteyurie.
JER 23:11 «Memɨka'itiyatɨka mepɨhɨkɨ Kakaɨyari niukametemama meta mawari wewiwamete: netukita 'urawa 'axakememɨte'uyuri nepɨtiukaxei
JER 23:12 »'Ayumieme wahuye haruanitɨ kanayeimɨkɨ, yɨwita meneukataimariekuni, mɨkɨtsie mekaneuyunixɨakuni». Yawé mɨpaɨ kanaineni: «Ne wahetsie 'uximatɨarika nekanikawiwimɨkɨ kepauka nemɨtiwaka'enitsitɨiya wiyari maye'anitsie.
JER 23:13 »Kwinimieme 'axati'aneme nepɨtixeiya Kakaɨyari niukametemama Tsamariyatari wahetsie: mekatenihekɨatani Wahari hetsiemieme, mɨpaɨ neteɨterima 'ixaheritsixi mekateniwareuyexɨrieni.
JER 23:14 Meta Kakaɨyari niukametemama Kerutsareme kiekatari 'axamɨti'ane wahetsie nepɨtixeiya: kayɨ'ɨitama wahamatɨa mepɨhitɨwe, mete'itawatɨ mepu'uwa, 'axateyuruwamete waheima mepunua, nixewitɨ pɨkatihayewawe 'axatiyurienetɨ. Mɨkɨ yunaitɨ Tsuruma hepaɨ mekani'aneni nehepaɨtsita, meta Kerutsaremetari Kumuxa hepaɨ mekani'aneni».
JER 23:15 'Ayumieme mɨpaɨ kanaineni Yawé Naimekɨmɨtɨrɨkaɨye Kakaɨyari niukametemama wahetsiemieme: «Ratsitsiwime memɨtetikwanikɨ yanekatiniyurimɨkɨ meta haa memanuharenikɨ 'uayemakame, Kakaɨyari niukametemama Kerutsareme kiekatari memɨte'utahɨniyaxɨkɨ 'axamɨti'ane 'ikɨ kwieyaritsie».
JER 23:16 Yawé mɨpaɨ kanaineni Naimekɨmɨtɨrɨkaɨye: «Kakaɨyari niukametemama kememutiyuane xepɨkawa'enieka, yakɨ xemɨtetakwewiekaku mepɨtexekuxaxatɨwa, kememɨte'unenierixɨ yakɨ mepɨtekuxata mɨpaɨ xeikɨa meteku'eriwatɨ, Yawé teta kahayeneku.
JER 23:17 Kemɨ'ane memɨnetsixani'erie mɨpaɨ mepɨtewakuxaxatɨwa kename 'aixɨa 'iyari me'u'uwani kename ne nehaine, kemɨ'ane yu'iyari mɨkaheu'ena memeu'enie mɨpaɨ mepɨtewakuxaxatɨwa kename 'axamɨti'ane wahetsie katinuani.
JER 23:18 Nixewitɨ mɨkɨ Yawé 'ɨxatsieya pɨka'eniwe. Nixewitɨ mɨkɨ niuki pɨkataxatɨariewe meta pɨkatahekɨatsitɨiyariewe. Nixewitɨ mɨkɨ yapɨkatikayeiwe meta niukieya pɨka'anu'eniwe.
JER 23:19 Yawé 'ekaya kanayeyani waɨkawa ha'atɨ, haikɨri tiyumemiwatɨ kanayeyani 'axamemɨte'u'iyari wahetsie mɨye'anikɨ.
JER 23:20 Yawé haxɨaya pɨkaheunuani kepaukake 'aixɨa mɨtiyurieni naime 'iyarieya kemɨtiku'eriwa. 'Imatɨrieka tukaritsieke xekaneitimaitɨkɨnikuni hekɨakamekɨ.
JER 23:21 Ne mɨkɨ Kakaɨyari niukametemama nepɨkawarenɨ'a, peru mɨkɨ xeiya mekanenautsatɨkɨne, ne nepɨkawarutahɨawixɨ, peru mɨkɨ mekatenihekɨatani.
JER 23:22 Xɨka ne newaruta'uxatsitɨanike, neniuki mekanitaxatakekaitɨni neteɨterima wahetsɨa, huye 'aixɨa mɨ'anetsie mekaniwara'uitɨanikekaitɨni meta 'aixɨa meteyuriekame mekaniwarayeitɨanikekaitɨni.
JER 23:23 »¿Kamɨtsɨ hurawa Kakaɨyari xeikɨa netihɨkɨ? ¿'Ateewata Kakaɨyari nekatihɨkɨ?
JER 23:24 ¿Kamɨtsɨ tewi tiyɨwe muyuti'awietakɨ hakewa nemɨkaheitaxeiyanikɨ? —Yawé mɨpaɨ kanaineni—. ¿Ne nekatihɨkɨ naitsarie muyuawi meta kwie nemɨhɨniya?
JER 23:25 »Kakaɨyari niukametemama nepuwa'enie kememutiyuane 'itarika mepɨnaki'erie yakɨ metexatakutɨ nehetsiemieme, mɨpaɨ mekaniutiyuaneni: “Nepɨtiuheinɨ, nepɨtiuheinɨ”.
JER 23:26 ¿Kepaukake mepɨtehayewa 'itarika kwinie yuri mete'eririetɨ meta kwamanarikakɨ meteku'eriwatɨ?
JER 23:27 Yuheinɨtsika mekuxatatɨ neteɨterima memɨnetsihatɨmaiyakɨ mekaniutiyuaneni, watutsima kememɨnetehatɨmai Wahari mehayexeiyatɨ mehakɨneka.
JER 23:28 Kemɨ'ane Kakaɨyari niukameya mɨtiuheinɨ ke'itaxata, peru kemɨ'ane neniuki mɨ'enieni, ke'itaxata 'aixɨa 'anemekɨ. ¿Kerayexeiya kuxari 'ikú hamatɨa? —mɨpaɨ kanaineni Yawé—.
JER 23:29 Neniuki tai hepaɨ kani'aneni, meta titsuname hepaɨ tetexi mɨti'una —Yawé mɨpaɨ kanaineni—.
JER 23:30 »'Ayumieme ne Kakaɨyari niukamememama nepuwaraye'unie neniuki memɨnawatɨwekɨ yuxexuitɨ —Yawé mɨpaɨ kanaineni—.
JER 23:31 Ne Kakaɨyari niukametemama nepuwaraye'unie yuneni memɨtatua memeuniukɨkɨ xeikɨa memutiniuka —Yawé mɨpaɨ kanaineni—.
JER 23:32 Ne Kakaɨyari niukametemama nepɨwaraye'unie 'itarika heinɨtsiyarikɨ memɨtekuxata, meta kepauka memutekuxatatsie neteɨterima memeuyexɨrienikɨ xeikɨa memɨteyurie wa'itarikakɨ wa'ɨrikakɨ —Yawé mɨpaɨ kanaineni—. Ne nepɨkawarenɨ'awe meta tixaɨtɨ nepɨkatiwata'aitɨawe. Tixaɨtɨkɨ mepɨkateyunaki'erie 'ikɨ teɨteri wahetsiemieme —Yawé mɨpaɨ kanaineni—.
JER 23:33 »Xɨka 'ikɨ teɨteri, ya xewitɨ Kakaɨyari niukameya, yatɨni mawari wewiwame, xɨka mɨpaɨ mera'iwawiyani: “¿Ke'aneme Yawé niukieya pepɨtatsitaxatɨani?”, 'ekɨ mɨpaɨ pepɨtiwata'eiya: “¿Ke'aneme niuki xepɨxata?” Ne nepɨxeku'eirieni —Yawé kanaineni—.
JER 23:34 Xɨka xewitɨ Kakaɨyari niukameya, yatɨni xewitɨ mawari wewiwame, yatɨni xewitɨ tewi, mɨpaɨ haineni: “'Ikɨ Yawé niukieya kanihɨkɨtɨni”, ne mɨkɨ tewi nekatinika'enitsitɨamɨkɨ meta yunaime kiena kiekatari.
JER 23:35 Peuyewetse mɨpaɨ memɨteyɨkɨhɨawenikɨ yuhamikumatɨ meta yu'iwamatɨ: “¿Yawé ke'utayɨ?”, yatɨni “¿Yawé kehaine?”
JER 23:36 Peru tawari mɨpaɨ mepɨka'utiyuaneni: “Yawé niukieya”, karikɨ mɨkɨ xexuimekɨ niuki kemɨtikuxata yuniuki kaniyurienemɨkɨ, xeme xekanititunaxɨani Kakaɨyari mayeyuri niukieya, Yawé Naimekɨmɨtɨrɨkaɨye takakaɨyari.
JER 23:37 Mɨpaɨ petiniwakɨhɨawemɨkɨ Kakaɨyari niukametemama: “¿Yawé kexetiku'eiya? ¿Ketixehahɨawe?”
JER 23:38 Peru xeme xɨka mɨpaɨ xe'utiyuani: “Yawé niukieya”, 'ayumieme Yawé mɨpaɨ kanaineni: “Xeme mɨpaɨ xemutiyuakɨ: ‘Yawé niukieya’, mɨpaɨ xemɨka'utiyuanenikɨ nexeha'imaiyakakutɨtɨ.
JER 23:39 'Ayumieme hikɨ nekanixehatɨmaiyamɨkɨ nekanixetaxɨriexɨamɨkɨ nehɨxie xemɨka'u'uwanikɨ, 'ikɨ kiekari nemɨxeyetuiri meta xetutsima mame.
JER 23:40 Meta nekanixe'uximatɨamɨkɨ yuheyemekɨ xemuyuriyariekakɨ, meta xepuyutewiwiyani mɨkɨ hatsuaku pɨkahatɨmaiyarieni”».
JER 24:1 'Arike Nawukurunutsuxi, Wawiruniya kwieyaritsie ti'aitame, Kerutsareme wayehapaku Kekuniyaxi ti'aitame Kura kwieyaritsie Kuhatsimi nu'aya, meta Kura kwieyaritsie miemekɨ 'ukirawetsixi memanuyetekai, tewewiwamete, tepɨa tsunamete, Yawé pɨnetsi'uxeitsitɨa, huta tsikɨiwitiyari xapa takariyari Yawé tukieya hɨxie kumaneme.
JER 24:2 Xeime hetsie xapa witsi'anenetɨ payetekai, matɨari mɨtikwakwaxe mieme hepaɨ, hutarieka mieme hetsieta payetekai xapa kwinimieme 'axa'anenetɨ kayukwainɨatɨkaitɨ.
JER 24:3 Hikɨ Yawé kaneniuta'iwawiya: «¿Keremiyaxi ketita petixeiya?» Ne mɨpaɨ nekatinita'eiya: «Xapa takari nepɨxeiya. Hipatɨ 'aixɨa kani'aneneni, hipatɨta kwinimieme 'axakani'aneneni kayukwainɨatɨ».
JER 24:4 Hikɨ Yawé niukieya nehetsɨa kaninuani:
JER 24:5 «Yawé 'ipaɨ kanaineni, 'Ixaheri Kakaɨyarieya: “Kemɨ'ane memehapanie Kura kwieyaritsie kiekatari, nemuwarayenɨ'a 'ikɨ kwieyaritsie wawiruniyutsixi wakwieyaritsie paitɨ, mɨpaɨ nekatiniwaxeiyamɨkɨ mɨkɨ xapa witsimɨ'anene hepaɨ.
JER 24:6 'Aixɨa nekatiniwaxeiyamɨkɨ, nekaniwarakunuitɨamɨkɨ 'ikɨ kwieyaritsie. Nekaniwaranukuketɨamɨkɨ, nepɨkawaka'unari, nepuwaka'eni meta nepɨkahehuna.
JER 24:7 'Iyari nepuwayetuirieni netsimateme, ne Yawé nemɨhɨkɨkɨ. Mɨkɨ mepɨneteɨterimatɨni, neta nepɨwakakaɨyaritɨni, nehetsɨa mekani'axɨakuni yu'iyarikɨ.
JER 24:8 »”Peru Tserekiyaxi ti'aitame Kura kwieyaritsie, meta 'iparewiwametemama, metatsiere memuyuhayewaxɨ Kerutsareme —yaxeikɨa 'ikɨ kwieyaritsie memuyuhayewaxɨ meta 'Ekipitu memetitei— xapa 'axamɨ'anene hepaɨ nekatiniwaxeiyamɨkɨ, kwinimieme 'axamɨ'anenekɨ mɨkayukwainɨa —Yawé mɨpaɨ kanaineni—.
JER 24:9 Yanepɨtiyurieni hipatɨ mewaxeiyatɨ memɨmamakakɨ meta mepɨte'uka'eniwani, yunaime nuiwarite memɨtama wahetsie. Meta tsepa hakewa ne nemɨwaretanɨ'axɨani, muwa 'aixɨa mepɨkate hexeiyarieka, mepeyuriyarieka, mepenanaimarieka, 'axamepe'itɨarieka.
JER 24:10 Wahetsɨa kuyaxa nekananɨnɨ'amɨkɨ, haaka meta kwiniya, kepaukake memakumaweriyarieni 'ena kwiepa nemɨwayetuiritsie meta watutsima”».
JER 25:1 'Ikɨ niuki kanihɨkɨtɨni Keremiyaxi kemɨtiutahɨawarie yunaitɨ Kura kiekatari wahepaɨtsita. Mɨpaɨ katiniutahɨawarieni naurieka wiyari Kuhatsimi Kutsiyaxi nu'aya ti'aitakaku Kura kwieyaritsie, tatsɨari mexɨakame wiyari ti'aitakaku Nawukurunutsuxi, ti'aitame Wawiruniya kwieyaritsie.
JER 25:2 Keremiyaxi Kakaɨyari niukameya mɨpaɨ katiniwarutahɨawe yunaime Kura kiekatari, meta Kerutsareme kiekatari yunaime:
JER 25:3 «Tamamata heimana haika wiyari Kutsiyaxi 'Amuni nu'aya ti'aitakaku Kura kwieyaritsie, 'ana paitɨtɨ 'atsita hikɨ —kananuyemieniri xeitewiyari heimana haika wiyari—, Yawé kanetinikuxaxatɨwani, neta waɨkawamexɨa 'ari nekatinixe'utaxatɨani, xeme peru xepɨkanetsihanu'eniwawe.
JER 25:4 »Meta mɨixamexɨa Yawé Kakaɨyari niukametemama yɨnɨ'arima kanixeheyenɨ'airieni, peru xeme xepɨkawa'enie xepɨkawa'eniku.
JER 25:5 Mɨkɨ mepɨxe'ayemari'itɨwakai mɨpaɨ meputiyuanekai: “Ke'axaxemɨte'u'uwa xeketeneuhayewa, metatsiere 'axaxemɨteyurie. Mɨpaɨ xeyɨme 'axepu'uwani yuheyemekɨ kwie Yawé mɨxeyetuiritsie meta xe'ukiyarima.
JER 25:6 Hipame kakaɨyarixi xepɨkawaranukuweweiyani xemɨtewa'uximayatsiriekakɨ meta xemɨwarayexeiyanikɨ, xepɨkanetsihaxɨatɨaka yumamatekɨ tiwewiyatɨkaimekɨ, ne 'ana 'axanepɨkaxeyurieni”».
JER 25:7 Yawé mɨpaɨ kanaineni: «Peru xeme xepɨkanetsi'anu'eni, matsi xekaneniuyehaxɨatɨani yumamatekɨ tiwewiyayakɨ, yɨkɨmana xemɨteyukwinitɨanikɨ.
JER 25:8 »'Ayumieme mɨpaɨ kanaineni Yawé Naimekɨmɨtɨrɨkaɨye: “Neniuki xemɨka'anu'enikɨ,
JER 25:9 ne yanetiniyurimɨkɨ kiekarite tayeta mukumane memɨ'axɨanikɨ meta tine'uximayatsiriwame Nawukurunutsuxi Wawiruniya kwieyaritsie ti'aitame. Neniwa'atɨamɨkɨ 'ikɨ kwieyaritsie hepaɨtsita, meta 'ena kiekatari wahepaɨtsita meta yunaime nuiwarite 'auriena mamanetɨka wahepaɨtsita, neniwaka'unamɨkɨ yunaime: metewiwemetɨkaime neniwarayeitɨamɨkɨ, 'atsieriwamete meta hakumaweme yuheyeme —Yawé mɨpaɨ kanaineni—.
JER 25:10 Temawierika hiwariyari nekananukayunitɨamɨkɨ, meta kwikari mɨraneɨkitɨne mieme meta murina yuariyaya, metatsiere kɨxeme hekɨariyaya.
JER 25:11 Naitɨ 'ikɨ kwieyari 'akumariwetɨ kanayeimɨkɨ meta 'akumawetɨ, meta 'ikɨ nuiwarite ti'aitame Wawiruniyatsie metenita'uximayatsiriekuni haika tewiyari heimana tamamata wiyari”.
JER 25:12 »Peruri kepauka maye'ani haika tewiyari heimana tamamata wiyari, ne nekatinikwinitɨamɨkɨ Wawiruniyatsie ti'aitame 'axamɨtiuyurikɨ meta 'iya nuiwari, karireutsixi wakwie, nekanakumaweriyamɨkɨ yuheyeme —Yawé mɨpaɨ kanaineni—.
JER 25:13 Naime tita nemɨtitaxatɨa yanetiniyurimɨkɨ mɨkɨ kwieyaritsie mɨti'axɨanikɨ, tita mɨraka'uxa 'ikɨ xapatsie meta Keremiyaxi ketita mɨtiutaxa nuiwarite wahetsiemieme.
JER 25:14 Hikɨ karireutsixi metenita'aitɨariekuni, yumɨiretɨ nuiwarite meta te'aitamete memamariwawetɨ meteniwata'aitɨakuni. Mɨpaɨ netiniwarakapitɨamɨkɨ 'axamemɨte'u'iyarikɨ meta 'axamemɨte'uyurikɨ».
JER 25:15 Yawé, 'Ixaheri Kakaɨyarieya, mɨpaɨ kanetiniutahɨawe: «Kamɨ winu tekɨxiyari kenanuhani mɨnehaxɨa, keniwaranu'itɨa yunaime kemɨ'ane nuiwarite wahetsɨa nemɨmatsitanɨ'ani.
JER 25:16 Kepauka mɨkɨ memenu'ieni, mekitsarietɨwetɨ meta rukutsixi mekanakɨnikuni, kuyaxi nemɨwaranunɨ'anikɨ wahetsiemieme».
JER 25:17 Hikɨ Yawé tekɨxi nenanuhanirieni, hikɨ neniwaranu'itɨani yunaime nuiwarite kemɨ'ane wahetsɨa Yawé mɨnetsi'utanɨ'a:
JER 25:18 Kerutsareme nepanu'itɨa, meta Kura kiekariteya, yunaime mana te'aitamete meta waparewiwamete, memɨka'unarienikɨ, memɨmakaxiwanikɨ 'axamemɨ'itɨarienikɨ, memɨnanaimariekakɨ, hikɨ ketemɨteneniere.
JER 25:19 Metatsiere Parahuni nekananu'itɨani ti'aitame 'Ekipitu kiekame meta memɨte'i'uximayatsirie, 'iparewiwametemama meta yunaime teɨterimama,
JER 25:20 yunaime kɨkamete, yunaime 'Utsi kwieyaritsie te'aitamete, yunaime te'aitamete piritsiteutsixi: 'Atsikaruni kiekatari, Kahatsa kiekatari meta 'Ekuruni kiekatari, metatsiere memuyuhayewatɨwekai 'Atsiruri kiekatari,
JER 25:21 'Erumi meta Muhawi, meta 'Amuni niwemama 'ukitsi,
JER 25:22 yunaime te'aitamete Tiru meta Tsiruni kiekatari, yunaime te'aitamete haramara tetsita memutetɨka 'anutaɨye paitɨ,
JER 25:23 Rerani, Temaha meta Wutsi, meta yunaime teɨteri yumu'u memeutixika,
JER 25:24 yunaime 'Arawiya kwieyaritsie te'aitamete, yunaime te'aitamete makumawetsie kiekatari memayewaɨkawa nuiwarite,
JER 25:25 Yunaime te'aitamete Tsimɨri kiekatari, 'Erami kiekatari meta Meriyatari,
JER 25:26 yunaime te'aitamete tayeta memɨtama, hurawa meta 'ateewa mukumane, metatsiere yunaime te'aitamete kwiepa memɨtama. Mɨkɨ wa'ɨtɨaketa kanenu'imɨkɨ Tsetsaki kwieyaritsie ti'aitame.
JER 25:27 «'Ekɨ mɨpaɨ pekatiniwatahɨawimɨkɨ: “Yawé mɨpaɨ kanaineni Naimekɨmɨtɨrɨkaɨye, 'Ixaheri Kakaɨyarieya: ‘Xekene'ieka, xekeneutitarɨwai, xekeneutihaya, xekenekaxɨri tawari xemɨka'anuku'unikɨ, kuyaxi nemɨwaranunɨ'anikɨ xehetsiemieme’ ”.
JER 25:28 Xɨka pewahanitɨakaku tekɨxi mekahenu'ieni, 'ekɨ mɨpaɨ petiniwatahɨawimɨkɨ: “Mɨpaɨ paine Yawé Naimekɨmɨtɨrɨkaɨye: ‘Peuyewetse xemenu'ieni’.
JER 25:29 Nekanenunɨ'amɨkɨ 'uximatɨarika kenemɨtitewakɨ mutaterɨwarɨwa kiekariyaritsie. ¿Kamɨtsɨ mɨpaɨ xetemate nekatixe'uximatɨani?” Mɨpaɨ kanaineni Yawé Naimekɨmɨtɨrɨkaɨye: “Matsi xekani'uximatɨariekuni, ne ne'ixipara nekaniwatihanani 'ena kwiepa memɨtama yunaime wahetsiemieme”.
JER 25:30 »Keremiyaxi, 'ekɨ keneutaxata naime 'ikɨ niuki mɨkɨ wahetsiemieme: »“Yawé peyutahaxɨatɨwa meutitewatsiepaitɨ, yukie makupatsietsie paitɨ yuniuki hekɨtɨrarɨkame kanekuyuitɨwani. Kanayuhaxɨatɨwani waɨkawa yumuxatsima wahepaɨtsita, kanahiwani kaxie takari memɨketsitɨwe wahepaɨ, yunaime kwiepa memɨtama wahepaɨtsita.
JER 25:31 Rɨrɨnarieya kwie manu'axetsie paitɨ kana'eniɨriɨkɨni, Yawé nuiwarite kwiepa memɨtama wahetsiemieme pɨranieritɨa, yunaime teɨteri wahetsiemieme mɨkɨ pɨ'itsɨkame, mɨkɨ 'axamemɨte'u'iyari 'ixiparakɨ puwatakukuya”»,
JER 25:32 Yawé mɨpaɨ kanaineni Naimekɨmɨtɨrɨkaɨye: «'Uximatɨarika kaniyewierirɨmeni yunaime nuiwarite wahetsie mariwetɨ 'eka 'ukanamieni kwie manu'axetsie paitɨ».
JER 25:33 'Iya tukaritsie, Yawé muwakwini naitsarie kwie manuye'atɨkatsie paitɨ menitixuawerikuni. Nixewitɨ wahetsiemieme pɨkatatsuani meta pɨkawakateuku, herie kwiepa mekaniyuhayewakuni kwitarai hepaɨ.
JER 25:34 Muxatsi wahɨwemete, xekeneutitsuanani meta xekenahiwatɨkani, kwiepa xekeneutikurupi, muxatsi xemɨhɨritɨarie, watukari maye'akɨ kepauka memɨkwi'iwa, naitsarie menitaxɨriyaxɨakuni, muxatsi 'ukitsi wahepaɨ mekanikwi'iwakuni.
JER 25:35 Muxatsi wahɨwemete memɨyuta'una mepɨkayɨwekaxɨani, muxatsi memɨhɨritɨarie memuyuta'una mepɨkayɨwaweni.
JER 25:36 Muxatsi wahɨwemete wahiwari xekeneu'eni, meta muxatsi wahɨwemete watsuari, Yawé wa'ɨxa tawari mɨkatinetɨanikɨ.
JER 25:37 Witsi mɨrayetɨraranikai makumawe kanayeitɨarieni, Yawé haxɨayakɨ.
JER 25:38 Maye yuterɨ kemɨtiuku'e'eiriwa hepaɨ Yawé yukwie mɨpaɨ katiniuku'eirieni, 'ixiparakɨ mɨtiyumemiwakɨ, Yawé haxɨaya mutatawekɨ.
JER 26:1 Kuhatsimi ti'aitatɨ 'itsutɨakaku Kutsiyaxi nu'aya Kura kwieyaritsie, Yawé Keremiyaxi mɨpaɨ katiniutahɨawe:
JER 26:2 «Yawé mɨpaɨ kanaineni: “Yawé tukieya takwayaritsie keneutakexi, yaketiniwarutahɨawi naime kenemetitahɨawe Kura kwieyaritsie memɨtama Yawé tukieyata memuta'axe menetsitahɨaweke. Neniuki 'etsiwatɨma pepɨka'anayehayeikawani.
JER 26:3 Heiwatɨ memɨniu'enana 'axameteyurietɨ memɨteniuhayewaxɨ. Xɨka mete'uhayewa, neta nepɨtihayewa ke'axanemɨwayurienikekai 'axamemɨteyuriekaikɨ.
JER 26:4 'Ekɨ mɨpaɨ pekatiniwarayehɨtɨamɨkɨ ne Yawé kenemaine: Xɨka xekanetsihanu'enieni xɨka 'inɨari niukiyari nemɨxeyetuiritsie yaxɨkaxekatekakɨne,
JER 26:5 xɨka xekawaru'enieni nenɨ'arima neniukamete, mɨixari nemɨwarenɨ'a xehetsɨa, xemeta xepɨkahanu'enanawawe,
JER 26:6 hikɨ 'ana ne Tsiru kenemɨtiuyuri mɨpaɨta nekatiniyurimɨkɨ 'ikɨ tukikɨ: 'Ikɨ kiekari 'axamɨ'ane nekanipitɨamɨkɨ yunaime nuiwarite wahetsiemieme’ ”».
JER 26:7 Mawari wewiwamete, Kakaɨyari niukametemama meta yunaitɨ teɨteri 'ikɨ niuki mekaniu'enieni Keremiyaxi Kakaɨyari niukameya mitaxataxɨ Yawé tukieya hɨxie.
JER 26:8 Peru kepauka Keremiyaxi teɨteri tiwakuxaxatɨwatɨ mɨranunɨ naime Yawé kemɨti'aitɨakai, mawari wewiwamete, Kakaɨyari niukametemama meta yunaitɨ teɨteri mekaniwiya mɨpaɨ mekatenitahɨawe: «Pekanimɨmɨkɨ.
JER 26:9 ¿Titayari Yawé hetsiemieme petiutahekɨataxɨ, kename 'ikɨ tuki Tsiru mieme hepaɨ yɨni, meta kename 'ikɨ kiekaritsie kiepa ka'ayani kumawere?» Hikɨ yunaitɨ teɨteri Yawé tukieya manuwe memu'uwakai Keremiyaxi hetsie kwinienetɨ mekananukeni.
JER 26:10 Kepauka Kura kwieyaritsie memanuyetei 'ikɨ memɨte'u'eni, ti'aitame paratsiyuta mewayekɨneka mekanekɨne Yawé tukieya manuwe, hikɨ Kitenie Mɨhekwa mɨranutahakitɨretsie mekanitiyaxe.
JER 26:11 Mana mawari wewiwamete meta Kakaɨyari niukametemama ti'aitame parewiwametemama meta yunaime teɨteri mɨpaɨ mekateniwarutahɨawe: «'Ikɨ tewi ke'umierieni, 'ikɨ kiekari hepaɨtsita 'axamɨtikuxatakɨ, xeme kexemɨte'i'enie».
JER 26:12 Peru Keremiyaxi mɨpaɨ katiniwarutahɨawe ti'aitame parewiwametemama meta yunaime teɨteri: «Yawé kanenetanɨ'ani nemɨtitaxatakɨ 'ikɨ tuki hepaɨtsita meta 'ikɨ kiekari hepaɨtsita naime tita xemɨte'u'eni.
JER 26:13 Hikɨ 'ayumieme xeketeneuhayewa ke'axaxemɨte'u'uwa meta kexemɨteyurie, Yawé xekeneu'enieka yukakaɨyari, hikɨ Yawé katinihayewamɨkɨ ke'axamɨxeyurienikekaikɨ.
JER 26:14 Neta, tsepa hikɨ kexemɨnetsi'uyuri xeme kemɨtixenake.
JER 26:15 Peru mɨpaɨ xeketenemaika xɨka xeme xenetsi'umieni, 'atsikatiuka'iyarime xuriyaya xepɨtayeurieni yuhetsie meta yunaime 'ena kiekatari wahetsie. Peru kaniyuritɨni Yawé kaneneyenɨ'ani 'ikɨ niuki nemɨxetaxatɨanikɨ hekɨakamekɨ».
JER 26:16 Ti'aitame parewiwametemama meta yunaitɨ teɨteri mɨpaɨ mekateniwarutahɨawe mawari wewiwamete meta Kakaɨyari niukametemama: «'Ikɨ tewi pɨkaheuyewetse mumierienikɨ, matsi Yawé takakaɨyari hetsiemieme pɨtikuxata».
JER 26:17 Hikɨ hipatɨ 'ukirawetsixi mɨkɨ kwieyaritsie kiekatari menanuku'uni mɨpaɨ mekateniwaraye'eritɨani yunaime teɨteri
JER 26:18 kename, 'Etsekiyaxi kepauka mɨti'aitametɨkai, Mikeyaxi Muretseti kiekame yunaime Kura kwieyaritsie kiekatari wahetsiemieme mɨpaɨ tiuxatakai: «Mɨpaɨ kanaineni Yawé Naimekɨmɨtɨrɨkaɨye: “Tsiyuni kanakukwietsanariemɨkɨ kwie mɨraka'etsitɨre hepaɨ, Kerutsareme 'unitɨ kanayeimɨkɨ, meta tuki yemuriyari 'ɨtsita kanayeimɨkɨ”.
JER 26:19 »¿Kamɨtsɨ 'Etsekiyaxi Kura kwieyaritsie mɨti'aitakai, meta yunaitɨ teɨteri Mikehaxi mete'umi? Matsi 'Etsekiyaxi Yawé kaniutimakani, meta kanitawawirieni mɨwatinenimayatakɨ. Hikɨ 'ana Yawé katiniuhayewa ke'axamuwayurienikekai kemɨtiwarutahekɨatɨakai. Hikɨta matsi tahetsie waɨkawa 'axamɨti'ane katininakirɨmeni tame mɨyateteyuriekaku».
JER 26:20 Xewitɨtatsiere Kakaɨyari niukameya kaniuyeikakaitɨni Kiriati-Yeharini kiekametɨtɨ, 'Uriyaxi titewatɨ Tsemahiyaxi nu'aya, Yawé hetsiemieme katinikuxatakaitɨni. Mɨkɨ 'ikɨ kiekari hepaɨtsita katiniutaxata meta 'ikɨ kwieyari hepaɨtsita, yemekɨ Keremiyaxi kemutaine.
JER 26:21 Kepauka ti'aitame Kuhatsimi meta 'iparewiwametemama meta yunaitɨ 'ukirawetsixi memi'eni kemɨtikuxatakai, ti'aitame kanimienikekaitɨni, peru, 'Uriyaxi retimaika kaniutimani kaniuyuta'una 'Ekipitu paitɨ kaneyani.
JER 26:22 Ti'aitame Kuhatsimi 'arike 'Erinatani 'Akuwuxi nu'aya kanenɨ'ani meta hipame 'ukitsi warawitɨkɨme 'Ekipitu paitɨ,
JER 26:23 hikɨ mɨkɨ 'Uriyaxi 'Ekipitu paitɨ mekaniyehana ti'aitame Kuhatsimi hɨxie mekani'atɨani, mɨkɨ katiniuta'aita mɨmierienikɨ 'ixiparakɨ meta mɨki teukiyata meukahɨiyanikɨ haweri 'anekɨa.
JER 26:24 Peru 'Akikani Tsapani nu'aya Keremiyaxi hetsie kaniutanuani, pɨkawarupitɨa teɨteri memiwiyakɨ meta memikumemiwanikɨ.
JER 27:1 Tserekiyaxi Kutsiyaxi nu'aya ti'aitatɨ 'itsutɨakaku Kura kwieyaritsie, Yawé Keremiyaxi mɨpaɨ katiniutahɨawe:
JER 27:2 Yawé mɨpaɨ kanetiniutahɨawe: «Yuku keni'atawewiri meta nawi kwitaxiyarikɨ pe'iwiwitɨame, 'akatutsitɨa keneutitɨki.
JER 27:3 Hikɨ Kerutsareme memɨ'axe Tserekiyaxi Kura kwieyaritsie ti'aitame hetsɨa, mɨkɨ wa'utɨma niuki kenanunu'a, 'Erumi, Muhawi, 'Amuni, Tiru meta Tsirunitsie te'aitamete wahetsɨa.
JER 27:4 'Ikɨ niuki keniwayetuiri memɨtewa'aitɨa wahetsiemieme: “Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: ‘Mɨpaɨ xeketenewaretahɨawi memɨtexe'aitɨa:
JER 27:5 Ne, waɨkawa netɨrɨkariyakɨ mumariwekɨ, kwie neputawewi, teɨteri meta yunaime yeutari hetsiena memɨ'uwa, nepɨyɨwe nemuwayetuanikɨ kemɨ'ane hetsɨa mɨnetsinakeni.
JER 27:6 Hikɨri 'ikɨ naime nuiwarite wakwie nenɨ'ari Nawukurunutsuxi, Wawiruniyatsie ti'aitame hetsɨa nekaniyetuamɨkɨ, yunaime yeutari 'ɨarime nekatiniyetuirieni.
JER 27:7 Yunaitɨ nuiwarite mekatenita'uximayatsiriekuni, nu'aya meta teukarieya, kepaukaketa mɨkɨ kwieyatsie maye'ani yuwaɨkawatɨ nuiwarite memɨte'ita'aitɨanikɨ meta te'aitamete memamariwawetɨ.
JER 27:8 Xɨka xewitɨ nuiwari meta ti'aitame kayuwaɨriyani Nawukurunutsuxi mɨti'uximayatsiriekakɨ Wawiruniyatsie ti'aitame, meta xɨka yuku ka'utanaki'erieni mɨkɨ hetsɨa mieme, ne mɨkɨ nuiwari 'ixiparakɨ neni'uximatɨamɨkɨ, haakakɨ meta kwiniyakɨ, kepaukake Nawukurunutsuxi mika'una —Yawé mɨpaɨ kanaineni—.
JER 27:9 »” ’'Ayumieme, Kakaɨyari niukametemama mete'itawatɨ memɨtekuxata xepɨkawareu'enieka meta memɨtehetimamateke, heinɨtsika hekɨatamete, muyuawitsie timiemekɨ memɨteyɨ'ɨkitɨa meta memɨteyukewaiya, mɨpaɨ memɨtexekɨhɨawe kename ti'aitame Wawiruniyatsie xekate'uximayatsirieka.
JER 27:10 Mete'itawatɨ memɨtexekuxaxatɨwa yukwiepa xemayekɨnekɨ xeikɨa pɨ'ayumieme, ne nemɨxe'ayeweiyakɨ meta xemɨkwinikɨ kani'ayumiemetɨni.
JER 27:11 Matsi kemɨ'ane nuiwari Wawiruniyatsie ti'aitame mɨtita'uximayatsirieni meta yamɨtikayani —Yawé mɨpaɨ kanaineni—, ne kwieyatsie nekanihayewamɨkɨ mana mukanikɨ meta mɨtiyuka'etsiriwanikɨ’ ”».
JER 27:12 Tserekiyaxi Kura kwieyaritsie ti'aitame, yaxeikɨa nekatiniutahɨawe: «Wawiruniyatsie ti'aitame hetsɨa xeketeneuta'uximayata, yaxeketenekahuni meta teɨterimama yunaime, mɨpaɨ xeteyurietɨ xepayeyuyurini.
JER 27:13 ¿Titayari 'ekɨ meta 'ateɨterima xetekwini 'ixiparakɨ, haakakɨ, kwiniyakɨ, Yawé kemɨtiwarutahɨawixɨ yunaime nuiwarite, kemɨ'ane mɨkayuwaɨriyani mɨti'uximayakakɨ Wawiruniya kwieyaritsie ti'aitame hetsɨa?
JER 27:14 Xepɨkawareu'enieka Kakaɨyari niukametemama kename ti'aitame Wawiruniya kiekame xekate'uximayatsirieka memutiyuane, mɨkɨ kememɨtekuxata pɨ'itarika.
JER 27:15 Yawé mɨpaɨ kanaineni: “Ne mɨkɨ nepɨkawareyenɨ'a. Mɨkɨ mete'itawatɨ kenemɨtitewakɨ mekatenikuxatani, ne nemɨxehayeweiyakɨ xeikɨa kani'ayumiemetɨni, meta xeme xemɨkwinikɨ yaxeikɨata Kakaɨyari niukametemama xehetsɨa miemete”».
JER 27:16 Yaxeikɨatsiere nekatiniwarutaxatɨani mawari wewiwamete meta yunaime teɨteri mɨpaɨ nekatiniwarutahɨawe Yawé mɨpaɨ kanaineni: »Xepɨkawa'enieka Kakaɨyari niukametemama mɨpaɨ memɨtexekɨhɨawe kename kwitɨwa rakunuitɨarieni piinite Yawé tukita timieme Wawiruniya mɨretɨkie. Mɨkɨ mekateniku'itawani xeikɨa.
JER 27:17 Xepɨkawa'enieka. Wawiruniyatsie ti'aitame hetsɨa xekeneyuyetua, mɨpaɨ xɨka xe'ɨyɨni 'axekaniu'uwakuni. Hikɨ 'ana pɨkaheuyewekari 'ikɨ kiekari mɨka'unarienikɨ.
JER 27:18 Xɨka yurikɨ Kakaɨyari niukametemama mehɨkɨtɨni meta Yawé niukieya mehexeiyani, Yawé Naimekɨmɨtɨrɨkaɨye nemɨhɨkɨ mekenetsi'utawawirieni Wawiruniya mɨkaranutɨkienikɨ Yawé netukita 'akuxi mɨtiyuhayewane meta Kura kwieyaritsie ti'aitame paratsiyuyata meta Kerutsareme.
JER 27:19 »Mɨkɨ tuxiyu hutatɨ mɨti'ukai meta katsu 'emɨyewa haa mayemakai meta kaxetate haa tuayamete metatsiere hipatɨ piinite mɨtiuyuhayewaxɨ 'ikɨ kiekaritsie,
JER 27:20 Nawukurunutsuxi mɨkaretɨ Wawiruniyatsie ti'aitame, kepauka Kekuniyaxi Kuhatsimi nu'aya, Kura kwieyaritsie ti'aitame, meha Wawiruniya paitɨ Kerutsareme 'iyehanaka, meta hipame teɨteri memeuka'u Kuratsie meta Kerutsareme kiekatari wahamatɨa,
JER 27:21 tatsɨari, mɨtiuyuhayewaxɨ Yawé tukita meta Kura kwieyaritsie ti'aitame paratsiyuyata meta Kerutsareme kiekariyaritsie, mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya:
JER 27:22 “Naitɨ 'ikɨ katinanutɨkiemɨkɨ Wawiruniya paitɨ —Yawé mɨpaɨ kanaineni—, mana katiniyuhayewamɨkɨ kepaukake ne nemiwaumie nemi'atɨanikɨ 'ena”».
JER 28:1 'Auxɨwirieka metseriyaritsie mɨkɨ naurieka wiyaritsie, Kura kwieyaritsie ti'aitame Tserekiyaxi 'itsutɨakaku ti'aitatɨ, Kakaɨyari niukameya Kananiyaxi 'Atsuxi nu'aya Kawahuni kiekame, Yawé tukita mɨpaɨ kanetiniutahɨawe, mawari wewiwamete meta yunaime teɨteri wahɨxie:
JER 28:2 —Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “Wawiruniyatsie ti'aitame yukuya nekanitamuramɨkɨ.
JER 28:3 Huta wiyari 'anuyeyayu tinaime 'ena nekatini'atɨamɨkɨ Yawé tukita timieme Nawukurunutsuxi mɨretɨ Wawiruniya paitɨ.
JER 28:4 Metatsiere Kekuniyaxi Kuhatsimi nu'aya, Kuratsie ti'aitame, 'ena nekani'atɨamɨkɨ meta yunaime Kuratsie kiekatari kemɨ'ane memehapanie Wawiruniya paitɨ. Wawiruniyatsie ti'aitame yukuya nekanitamuramɨkɨ. Ne Yawé mɨpaɨ nekanaineni”.
JER 28:5 Mawari wewiwamete meta yunaime teɨteri wahɨxie Yawé tukieya manuwe takwa meti'ukaku, Kakaɨyari niukameya Keremiyaxi Kananiyaxi mɨpaɨ katiniuta'eiya:
JER 28:6 —'Aixɨa pɨ'ane. Yawé mɨpaɨ ketiuyurieni. Yawé keraye'atɨani kepemaine. Keti'atɨani 'ena piinite Yawé tukieyata timieme meta yunaime Wawiruniya memehapanie.
JER 28:7 Peru xekeneu'enana kenemɨtayɨni 'ekɨ meta yunaitɨ teɨteri:
JER 28:8 Kakaɨyari niukametemama meripaitɨ miemete 'akuxi tame teka'u'uwakaku kuyaxa hepaɨtsita mekateniutaxata meta haakaxa meta kwiniya yumɨireme nuiwarite wahetsiemieme meta te'aitamete memɨmamariwawe wahetsiemieme.
JER 28:9 Peru xewitɨ Kakaɨyari niukameya kayuwatɨ mumakakɨ hepaɨtsita mɨtikuxata, mɨkɨ yurikɨ pumatiwa Kakaɨyari niukameya mɨhɨkɨkɨ Yawé meiyenɨ'a xɨkate yatiɨyɨni kemutayɨ.
JER 28:10 Hikɨ Kananiyaxi Kakaɨyari niukameya yuku kananakakweni Keremiyaxi katutsitɨana makatei, hikɨ kanitamura.
JER 28:11 Mɨpaɨta kaniutayɨni yunaime teɨteri wahɨxie: —Yawé mɨpaɨ kanaineni: “Huta wiyari 'akuxi ka'anuyeyeiwekaku mɨpaɨ nekatinitamuramɨkɨ Nawukurunutsuxi, Wawiruniyatsie ti'aitame yukuya, yunaime nuiwarite wakatutsitɨa maka hahetetɨ”. Hikɨ Kakaɨyari niukameya Keremiyaxi, kaneyani.
JER 28:12 Yapaɨmexɨa tukari 'anukayaku Kananiyaxi yuku mutamuraxɨtsie Keremiyaxi katutsieyatsie makatei, Yawé mɨpaɨ katinitahɨawe:
JER 28:13 «Kenemie Kananiyaxi mɨpaɨ ketinayemari'itɨa Yawé mɨpaɨ kanaineni: “'Ekɨ kɨye yukuyari pekaniutamura, peru ne tepɨa yukuyari nekanitawewimɨkɨ hetsiena mieme.
JER 28:14 Karikɨ Yawé mɨpaɨ kanaineni Naimekɨmɨtɨrɨkaɨye, 'Ixaheri Kakaɨyarieya: ‘Tepɨa yukuyari wakatutsitɨa nekaniwaratekiriemɨkɨ yunaime nuiwarite, Nawukurunutsuxi mɨtiwata'aitɨanikɨ, Wawiruniyatsie ti'aitame, mɨkɨta mekatenita'uximayatsiriekuni. Metatsiere yunaime yeutari nekaniyetuiriemɨkɨ’ ”».
JER 28:15 Hikɨ Keremiyaxi Kakaɨyari niukameya Kananiyaxi mɨpaɨ katiniutahɨawe: —Yemekɨ keneu'ena. Yawé 'ekɨ kametsiheyenɨ'akutɨtɨ, 'a'itarikatsie yuri memɨte'eriekakɨ pekatiniuyurieni teɨteri wahetsie.
JER 28:16 'Ayumieme Yawé mɨpaɨ kanaineni: “Yanepɨtiyurieni 'ena kwiepa pemakumawerekɨ. Yawé hepaɨtsita 'axape'utayɨku teɨteri Kakaɨyari me'aye'unietɨ memakɨkɨ, 'ikɨ wiyaritsie pekanimɨmɨkɨ”.
JER 28:17 Hikɨ mɨpaɨ katiniɨyɨni, Kananiyaxi kakaɨyari niukameya mɨkɨ wiyaritsie 'atahuta metseriyaritsie 'umiekaku kaniɨmɨni.
JER 29:1 'Ikɨ xapa pɨhɨkɨ Keremiyaxi muwarenɨ'airi Kerutsareme 'uyeikatɨ, memuyuhayewatɨwekai 'ukirawetsixi memehapanie, meta mawari wewiwamete, Kakaɨyari niukametemama meta yunaime teɨteri Nawukurunutsuxi mɨwarehapakai Wawiruniya paitɨ Kerutsareme wayehapaka.
JER 29:2 'Ikɨ pɨtiɨyɨ ti'aitame Kekuniyaxi Kerutsaremetsieri yehanieku, ti'aitame maamaya hamatɨa, paratsiyu memɨhɨritɨarie, Kura kwieyaritsie meta Kerutsaremetsie memanuyetei, tewewiwamete meta tepɨa memuwewie.
JER 29:3 'Ikɨ xapa 'Eratsa Tsapani nu'aya meta Kemariyaxi Kirikiyaxi nu'aya wa'utɨa nekaneinɨ'ani, Tserekiyaxi, Kura kwieyaritsie ti'aitame, muwarutanɨ'akai, Wawiruniyatsie ti'aitame Nawukurunutsuxi memehuritɨanikɨ. Xapa mɨpaɨ pɨraka'utɨariekai:
JER 29:4 Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya, yunaime Kerutsareme kiekatari Wawiruniya paitɨ nemɨwarehapa:
JER 29:5 «Mana mepɨtiteni mepuyutikitɨani muwa mepayeteni, mepɨteyu'etsirieka mɨkɨ memɨtekwakakɨ.
JER 29:6 Xekeneutiwikiexɨa meta xekeneutineɨkixɨa, meta tɨɨri 'ukari meta 'ukitsi xekeniwarayexeiyaxɨa, meta xeniwema 'ukitsi meke'utineɨkixɨani meta 'ukari meke'utiwikiexɨani, xeteukarima wahetsie memayenunuiwaxɨanikɨ. Mɨpaɨ xepɨteheyɨmɨiriyani, yaxeikɨa xemɨkaheyupaɨmenikɨ.
JER 29:7 Yaxeikɨa hakewa nemɨxehenɨ'a, mana kiekariyaritsie 'aixɨa 'iyari xeketene'uximayaka meta Yawé xekenewawirieka hetsiena mieme, 'aixɨa 'iyari xe'u'uwakaku, xeme kiekaritsie 'aixɨa 'anemekɨ xepu'uwani».
JER 29:8 Yawé mɨpaɨ kanaineni, Naimekɨmɨtɨrɨkaɨye 'Ixaheri Kakaɨyarieya: «Kakaɨyari niukametemama meta memɨtehetimamateke xehamatɨa memu'uwa xepɨkawapitɨaka memɨxekwamananikɨ. Waheinɨtsikatsie yuri xepɨkate'erieka.
JER 29:9 Mɨkɨ kememɨtekuxata kenemɨtitewakɨ pɨti'itarika. Ne nepɨkawarenɨ'awe», Yawé mɨpaɨ kanaineni.
JER 29:10 Yawé mɨpaɨ kanaineni: «Kepauka Wawiruniya haika tewiyari heimana tamamata wiyari xemaye'atɨarieni, xehetsɨa nekanenuamɨkɨ, xehetsiemieme kenemutayɨkai nekaneye'atɨamɨkɨ, nemɨxe'atɨanikɨ 'ikɨ kwieyaritsie».
JER 29:11 Yawé mɨpaɨ kanaineni: «Nekatinimaika xehetsie kenemɨtiyurieni, 'aixɨa mɨti'anekɨ, 'axamɨti'anekɨ hawaikɨ, 'imatɨriekata nemuxeyetuirienikɨ tita xemɨtetakwewie.
JER 29:12 Hikɨ 'ana xeme xepɨnetsitahɨawe, xepɨ'axɨani xenetetawawirienike, meta ne nepɨxe'enieni.
JER 29:13 Kepauka yu'iyarikɨ xemɨnetsitiwauni xepɨnetsitaxeiya».
JER 29:14 Yawé mɨpaɨ kanaineni: «Xepɨnetsitaxeiya, xemehapaniekai nepɨxe'atɨani. Nekanixekuxeɨrimɨkɨ naitsarie nuiwarite meta kiekarite watsata hakewa nemɨxeheutanɨ'axɨakai, meta hakewa xemeyehapanie mana nepɨxe'atɨani», Yawé mɨpaɨ kanaineni.
JER 29:15 Xeme mɨpaɨ xeputiyuaneni: «Yawé Kakaɨyari niukametemama pɨtatsiheyenɨ'airi 'ena Wawiruniya»,
JER 29:16 peru Yawé mɨpaɨ kanaineni, ti'aitame hepaɨtsita Rawiri 'uwenieya hetsie maka meta teɨteri kiekaritsie memuyuhayewaxɨ, tatsɨari xe'iwama memɨkahehapanie xe'ɨtɨa.
JER 29:17 Yawé Naimekɨmɨtɨrɨkaɨye mɨpaɨ kanaineni: «Kuyaxa 'ixiparayari, haaka meta kwiniya nekananunɨ'amɨkɨ. Xapa takariyari pɨpɨnitɨ mɨkayukwainɨa hepaɨ nekaniwayurimɨkɨ.
JER 29:18 Nekaniwarayeweiyamɨkɨ 'ixiparakɨ, haakakɨ meta kwiniyakɨ, te'aitamete kwiepa memɨtama yunaitɨ mepuwaxani'erieka, 'axamepɨ'itɨarieka meta 'atsieriwamete meta mepuyuriyarieka naitsarie nuiwarite wahetsɨa hakewa ne nemuwaranɨnɨ'anitsie.
JER 29:19 Xeme xemɨka'enanawawekɨ meta yaxemɨkatekakɨniwawekɨ neniukitsie, tsepa mɨixa menete'uximayatsiriwamete Kakaɨyari niukametemama nemɨwarenɨ'awa mepɨkawaru'eni —Yawé mɨpaɨ kanaineni—.
JER 29:20 »Peru xeme yunaitɨ Kerutsareme xemeyehapanie Wawiruniya paitɨ xemɨ'atɨarie, neniukitsie yaxeketenekahuni».
JER 29:21 Yawé mɨpaɨ kanaineni Naimekɨmɨtɨrɨkaɨye, 'Ixaheri Kakaɨyarieya, 'Akawi Kurahiyaxi nu'aya meta Tserekiyaxi Matsehiyaxi nu'aya wahepaɨtsita, yakɨxeikɨa memɨtekuxata nehetsiemieme: «Wawiruniyutsie ti'aitame Nawukurunutsuxi hetsɨa nekaniwayetɨamɨkɨ mɨkɨ kaniwakwimɨkɨ xeme xetanenierekaku.
JER 29:22 Mɨkɨ wahekɨ, yunaitɨ Kura kiekatari memehapanie Wawiruniya memɨtitei mɨpaɨ mekaniutiyuanekuni 'axamemɨ'itɨarienikɨ: “Yawé yaxeikɨa 'ahetsie ketiuyurieni, Tserekiyaxi meta 'Akawi wahetsie kemɨtiuyuri, Wawiruniyatsie ti'aitame taipa kemɨtiwarutitaiyaxɨ”.
JER 29:23 'Ixaheri kwieyaritsie kwinimieme 'axamepɨte'uyuri: Hipame wa'ɨitama mepɨwarukumayɨa meta kenemɨka'utayɨ 'itarika xeikɨa mepɨte'utaxa nehetsiemieme. Ne yanekatinimaika meta nepunierixɨ kemɨtiɨyɨ», Yawé mɨpaɨ kanaineni.
JER 29:24 Metatsiere Tsemahiyaxi Nekerani nu'aya mɨpaɨ pekatinitahɨawimɨkɨ
JER 29:25 Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: «'Ekɨ kepemɨti'akɨhɨawe xeikɨa xapa pepɨwarenɨ'airi yunaime Kerutsareme kiekatari, meta Tsupuniyaxi Matsehiyaxi nu'aya hetsɨa, meta yunaime mawari wewiwamete wahetsɨa. Xapatsie mɨpaɨ raye'ukame:
JER 29:26 “Yawé kamenanayexeiya mawari wewiwame pemayanikɨ Kuyara hetsiemieme, Yawé tukita pemɨti'ɨwiyanikɨ. Kemɨ'ane Kakaɨyari niukameya ka'uka'iyaritɨ mayuyeitɨaka, kɨye 'anuyexawametsie meta watixawakaku ke'anutahɨiyani tepɨakɨ hɨatɨ.
JER 29:27 ¿Titayaritsɨkamɨ 'ekɨ Keremiyaxi 'Anatuti kiekame pekatitatiewe, xehamatɨa muyeika Kakaɨyari niukameya yuxatatɨ?
JER 29:28 Mɨkɨ kataneyenɨ'airieni xapa Wawiruniya paitɨ, mɨpaɨ raye'utɨariekame: ‘Xemehapanie 'axekateneuterikuni, 'ayumieme xekeneyutikitɨa muwa xemayetenikɨ, meta xeketeneyuka'etsiriwani xemɨtekwakakɨ’ ”».
JER 29:29 Hikɨ Tsupuniyaxi mawari wewiwame xapa maye'utɨarie Keremiyaxi Kakaɨyari niukameya kanakaterɨwirieni.
JER 29:30 Hikɨ 'ana Yawé Keremiyaxi mɨpaɨ katiniutahɨawe:
JER 29:31 «Hikɨ yunaime ketiniwarutaxatɨa memehapanie Yawé mɨpaɨ kanaineni Tsemahiyaxi Nekerani kiekame hetsiemieme: “Tsemahiyaxi mɨtixe'utaxatɨa ne nekaheiyenɨ'aku, 'itarikatsie yuri pɨtixe'uta'eritɨa,
JER 29:32 Ne, Yawé, Tsemahiyaxi Nekerani kiekame nekatinikwinitɨamɨkɨ meta yunaime tɨɨriyamama, teɨteri menetsi'aye'unietɨ memakɨkɨ mɨkɨ tiuyurieku. Mɨkɨri yunaitɨ 'aixɨa mɨti'ane mepɨkatexeiya kenemɨtiyurieni neteɨterima wahetsie”», Yawé mɨpaɨ kanaineni.
JER 30:1 Yawé niukieya Keremiyaxi hetsɨa kaninuani:
JER 30:2 «Yawé mɨpaɨ kanaineni, 'Ixaheri Kakaɨyarieya: “Xapatsie ketinaka'utɨa naime tita nemɨmatiutaxatɨa”.
JER 30:3 Yawé mɨpaɨ kanaineni: “Karikɨ tukari kanaye'amɨkɨ, kepauka ne nemɨwarakunuitɨani memehapaniekai neteɨterima 'ixaheritsixi meta Kura teɨteriyari, nekaniwa'atɨamɨkɨ kwie wa'ukiyarima nemɨwayetuiritsie, hikɨ mana mekanitiyaxikuni”», Yawé mɨpaɨ kanaineni.
JER 30:4 'Ikɨ Yawé niukieya kanihɨkɨtɨni Keremiyaxi kemɨtiutaxatɨa 'Ixaheri meta Kura kwieyari wahepaɨtsita:
JER 30:5 «Yawé mɨpaɨ kanaineni: »“Memumariutsie wahiwari tepɨ'enie, kayuwatɨ pɨka'uma, matsi marika xeikɨa puxuawe.
JER 30:6 Xekeneuti'iwau xekeneuyu'ɨwiya 'ukitsi kuta metetiniweya. ¿Titayaritsɨkamɨ yunaime 'ukitsi netiwaxeiya yukwatsapaɨtsie me'akɨwɨkame, 'ukarawetsixi memɨtiniwexɨaxime wahepaɨ? ¿Titayari kwinimieme mete'anakamama yunaitɨ?
JER 30:7 Xɨa'ui. Mɨkɨ tukaritsie pumariwekareni, tukari hatsuaku kemɨkatiyɨwe pɨtiyɨni. Kakuwu hetsiemieme hiwerika pɨrayani, peru mana ya'anekɨa payewikweitsitɨarieni”.
JER 30:8 »Mɨpaɨ kanaineni Yawé Naimekɨmɨtɨrɨkaɨye: “'Iya tukaritsie, yuku nekanitamuramɨkɨ neteɨterima yɨkɨipi heima memetɨkɨ, kɨmana memɨwiwietɨka nekanititekimɨkɨ, hatsuakuri teewatari tewa'uximayatsiriwamete mepɨkahakɨne.
JER 30:9 Yawé, yukakaɨyari xeikɨa xepɨte'uximayatsirieka, meta Rawiri, tixe'aitɨwame nepayeitɨani.
JER 30:10 »”Pepɨkamaka, Kakuwu, neti'uximayatsiriwame, pepɨka'utimamaweni 'Ixaheri —Yawé mɨpaɨ kanaineni—. 'Ekɨ Kakuwu, nekamenixɨnamɨkɨ mɨkɨ kwie 'ateewa mukuma hetsie, meta 'anuiwarima memehapanie neniwa'atɨamɨkɨ. 'Aixɨa 'iyari pe'uyeikatɨ pekanayeimɨkɨ meta peka'uximatɨarietɨ, Hatsuakuri xewitɨ pɨkamatsitimariuta.
JER 30:11 Karikɨ ne 'ahamatɨa nekaniuyeikani nemetsitawikweitsitɨanikɨ —Yawé mɨpaɨ kanaineni—. Yunaime nuiwarite nekaniwaka'unamɨkɨ yuheyemekɨ kemɨ'ane wahetsɨa nemetsiheutanɨ'akai. Peru 'ekɨ naime nepɨkametsika'una, matsi nepumatikwinitɨani kemɨtiheitseriekɨ xeikɨa, peuyewetsetsiere nemumatikwinitɨakakɨ”.
JER 30:12 »Yawé mɨpaɨ kanaineni: »“Kenemumatikwinitɨa pɨkayu'uayemarinɨa, 'ahaiya 'uayeyari pɨkaxɨawe.
JER 30:13 Xewitɨ pumawe 'ahetsie mɨtanuanikɨ kepemɨranuyemie, ke'axapemɨtiuyurikɨ pumawe 'uayeyari meta 'akwiniyakɨ 'aixɨa pemɨtika'erienikɨ.
JER 30:14 Yunaitɨ memumatsinaki'eriekai mepumatsi'uku'eiri, mepɨkamatsiha'eriwari. Waɨkawa 'axapemɨtiuyurikɨ, meta mɨmɨirekɨ ke'axapemɨtiuyuri, nekamenanayewayani nekamenayemari'itɨwani, xewitɨ mɨrayuye'unie kemɨrayurieni hepaɨ.
JER 30:15 ¿Ketitayari pera'aiwa 'akukuiniyakɨ, panatsi 'akukuiniya yu'uayemarinɨa? Ke'axapemɨtiuyuri pɨtimɨire meta waɨkawamekɨ 'axapemɨtiuyurikɨ, 'ayumieme mɨyanekametinipitɨaka.
JER 30:16 »”Yunaitɨ kemɨ'ane memɨxetikwani mekanitikwaiyakuni, yunaitɨ memɨxe'aye'unie 'ateewa mekananuhapaniekuni. Yunaitɨ kemɨ'ane memɨxetenawatsirieni mekateninawatsiyariekuni, yunaitɨ kemɨ'ane memɨtexenawairieni mekateninawaiyariekuni.
JER 30:17 Peru ne nekamenimanetsikitɨamɨkɨ meta kepemɨtiukwinitɨarie nekani'uayemamɨkɨ —Yawé mɨpaɨ kanaineni— pemehɨiya pemɨtiuterɨwaruwakaikɨ, Tsiyuni tixaɨtɨ mɨkarexeiya, xewitɨ mɨkahe'eriwakɨ”.
JER 30:18 »Yawé mɨpaɨ kanaineni: »“Kakuwu xamaruyata tita mɨtiyepikai nekatinanuitɨamɨkɨ, meta xekiite nekanitinenimayatamɨkɨ, kiekari kaniyukamamɨkɨ maku'unarie hetsie, meta paratsiyu kaniyukakemɨkɨ hakewa mewekai.
JER 30:19 Xehetsie kwikari witsi'anɨyɨtɨ kaniyeyeimɨkɨ, temawierika hiwariyari. Xexiɨyarima nekaniwatamɨiriyamɨkɨ, yu'utɨa xepɨkakakɨne, nexenaki'erietɨ nekanayeimɨkɨ, xepɨkatixani'eriwari.
JER 30:20 Xeniwema 'ukitsi meripai kememɨ'anekai mɨpaɨ mekani'anekuni, nehɨxie xekiekari kanikumakamɨkɨ, peru kemɨ'ane memɨxe'aye'unie nekatiniwakwinitɨamɨkɨ.
JER 30:21 Xetsata manuyeyerɨni kanayenemɨkɨ, mɨkɨ xewitɨ xeti'aitɨwame kanayeimɨkɨ. Ne'aurie hurawa 'uyeikame nekanayeitɨamɨkɨ, mɨkɨ nehamatɨa 'uyeikatɨ payani, ¿kemɨ'ane yutukari puyetuawe nehetsɨa maye'anikɨ?
JER 30:22 Xeme neteɨterima xepɨhɨkɨtɨni, neta Xekakaɨyari nepɨhɨkɨtɨni”».
JER 30:23 Yawé 'ekaya kanayeyani ha'atɨ, 'eka waɨkawa tɨrɨkaɨyetɨ haikɨri tiyumemiwatɨ kanayenɨ'arieni 'axamemɨte'u'iyari wahetsiemieme.
JER 30:24 Yawé haxɨaya pɨkatihayewa matsi kemutayɨ naitɨ pɨraye'ani 'iyarieya kemɨtiyɨkɨhɨawe. Naime 'ikɨ hetsie xekatenetimaikuni 'imatɨrieka tukariyaritsie.
JER 31:1 Yawé mɨpaɨ kanaineni: «'Iya tukaritsie, 'Ixaheri tɨɨriyamama Wakakaɨyari nepɨhɨkɨtɨni mɨkɨta neteɨterima mepɨhɨkɨtɨni».
JER 31:2 Yawé mɨpaɨ kanaineni: «Teɨteri memuyuti'awietaxɨ tiyukwitɨnekaku, makumawetsie 'aixɨa 'iyari mekateniuyaxe, 'Ixaheri kepauka 'uxipiya mukuwaunekaitsie».
JER 31:3 Mɨixa wiyari panuyemie kepauka Yawé mɨpaɨ mɨnetiutahɨawixɨ: «Hawaikɨ kaheu'akamekɨ nepɨmetsinaki'erie, 'ayumieme 'aixɨa 'anemekɨ nepɨxe'ɨwiya,
JER 31:4 'Ɨimari 'ixaheri mieme. Hekwamekɨ nekamenanukuketɨamɨkɨ, puyuri, tawari petɨrɨkaɨyetɨ pepayani. Hekwamekɨ tepu 'etsimɨyeyeu xekaniti'ɨikuni temawierikakɨ xekatenikaneikuni.
JER 31:5 Tawari kaxie xekanika'ekuni Tsamariya hɨriyaritsie, kemɨ'ane memika'eni meyutemamawietɨ mepikwaka.
JER 31:6 Tukari kanaye'amɨkɨ kepauka tehɨwemete memɨtihiwa 'Epɨrahini hɨriyaritsie: “Xekenatihuni, Tsiyuni paitɨ tepanutikɨne, Yawé hɨrieyatsie takakaɨyari”».
JER 31:7 Yawé mɨpaɨ kanaineni: «Xekeneutikwikani xeyutemamawietɨ Kakuwu hetsiemieme, temawierikakɨ xekeneutihiwani nuiwarite 'aixɨa memɨ'itɨarie wahetsiemieme. Nɨawarika kwi xekeneu'enitsitɨa mɨpaɨ xe'utiyuatɨ: “Yawé, 'ateɨterima keniwarutawikweitsitɨa, 'Ixaheri hetsie memuyuhayewaxɨ keniwarutawikweitsitɨa”.
JER 31:8 Ne tayeta kiekari mukumatsie nekanixe'ayewitɨmɨkɨ, nekanixekuxeɨrimɨkɨ tsepa hakewa paitɨ xeme'uwa. Yumɨiretɨ mekani'axɨakuni. Xehamatɨa mekani'axɨakuni memɨkaheuneniere meta memuhurietɨka, memayehukatɨka meta memɨniwetɨka.
JER 31:9 Xe'utitsuatɨ xekani'axɨakuni, nexenɨtɨatɨ nekanixe'ayewitɨmɨkɨ. Hakewa haa mauyehane mana nekanixe'atɨamɨkɨ huyeta 'uwerikaku xemɨkahekaxɨrienikɨ. Ne 'Ixaheri paapaya nepɨhɨkɨ, neniwe 'Epɨrahini mexɨakame pɨhɨkɨ.
JER 31:10 »Nuiwarite, Yawé niukieya xekeneu'eni, meta xekenekuxatani haramara tetsita meteewatsie paitɨ: “Kemɨ'ane 'Ixaheritsixi mɨwareutaweiyaxɨa, mɨkɨ kaniwakuxeɨrimɨkɨ, muxatsi wahɨweme hepaɨ nekatiniwa'ɨwiyamɨkɨ”.
JER 31:11 Yawé 'Ixaheritsixi puwarutawikweitsitɨa, memɨtɨrɨkawi wahetsɨa kaniwarayewitɨni.
JER 31:12 Mekani'axɨakuni Tsiyuni hɨriyari 'amanutitewitsie paitɨ mekanitakwikakuni, Yawé witsimɨtiuka'iyarikɨ mepuyutemamawieka: nepɨtixeyetuirieni tɨriku, kaxie winuyari mɨhekwa meta hatseiti, muxatsi waniwema meta wakaitsixi. 'Iteɨri 'aixɨa mɨreukuhatuiyarie hepaɨ xekani'anekuni, tawariri xeweraranitɨ xepɨkahakɨne.
JER 31:13 Hikɨ 'ana 'ɨimarixi temawierikakɨ mepɨtekaneini, temari meta 'ukirawetsixi yunaitɨ. Wakukuiniya temawierika nekanayeitɨamɨkɨ meta nekaniwanɨtɨamɨkɨ, kememɨte'uka'eniwa temawierika nekanayeitɨamɨkɨ.
JER 31:14 Mawari wewiwamete memɨtekwaka waɨkawa mepɨtehexeiyani, meta 'aixɨa mekateniu'uwakuni neteɨterima»,
JER 31:15 Yawé mɨpaɨ kanaineni: «Xamatsie paitɨ hiwari pa'eniɨriɨkɨ, tsuari meta hiwerika. Xakeri kanetaineni, yuniwema 'ukitsi wahekɨ hetatsɨatɨ meta mɨkɨ kapɨyɨnɨtɨarinɨa, niwemamari 'ukitsi memɨka'u'uwakɨ».
JER 31:16 Yawé mɨpaɨ kanaineni: «Ketineuhayewa pe'utatsɨatɨ, 'a'ukai kena'itiexɨa, kepemɨtiuka'eniwakɨ mɨkɨkɨ pepɨrakapitɨarieni: 'aniwema 'ukitsi kiekari muwaraye'unietsie mekanayekɨnikuni
JER 31:17 Tita pemɨtitakwewie pepɨkahetɨtɨmaiyani: 'aniwema 'ukitsi yukiekaritsie mekani'axɨakuni
JER 31:18 »Nekani'enieniri 'Epɨrahini kiekatari wahiwerika: “Tepɨtekwinitɨarie tuuru mɨkamaxiu hepaɨ, hikɨ yatepɨteha'eriwa pemɨtatsitimaxiutakɨ. Ketane'atɨa, 'aixɨa ketaneuyuri, 'ekɨtsɨ, takakaɨyari, Yawé pekanihɨkɨtɨni.
JER 31:19 Tame tepumatsi'uku'eiriekai, peru tepaye'eri, mɨpaɨ teteheyutimaika tatawitsie tepeuyuhutsunakai. Tepeuyutetewiya tixaɨtɨ tepɨkatehayuyeitɨa temariyari ketemɨte'utewinɨarie mɨtimɨirekɨ”.
JER 31:20 »'Epɨrahini tewiyari neniwe 'uki neminaki'erie pɨhɨkɨ. 'Ikɨ neniwe 'uki kanihɨkɨtɨni waɨkawa neminaki'erie. Kepauka nemɨtikwinitɨa, nepeye'eriwa ne'inaki'erietɨ. Mɨkɨ hetsiemieme waɨkawa nepɨne'iyaritɨa, mɨkɨ waɨkawamekɨ nepeunenimaya
JER 31:21 »'Ahuyeta 'inɨari keneuyewɨtɨaxɨa, peha'inɨaritatɨ hakewa pemeuyetɨa, huyeta 'aixɨa ketineyɨ'ɨwiya. 'Ixaheri 'ɨimari kenenua, kenakunua tawari 'akiekaritsie.
JER 31:22 ¿Kepaukake pepɨtihayewa pekuyeikatɨ, neniwe 'uka yapemɨkatikamie? Yawé tihekwame katininetɨamɨkɨ 'ena kwiepa, 'ukaratsi yukɨna hetsɨa kaninuamɨkɨ».
JER 31:23 Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: «Kepauka ne 'aixɨa pe'itɨariekame nemɨmatsi'ayeitɨani, Kura kwieyaritsie meta kiekariteyaritsie mɨpaɨ mekaniutiyuanekuni: »“Hɨri mɨpatsie, heitserie mexeiya kie: Yawé kexe'ɨwiyani”.
JER 31:24 Mana 'axeikɨa mekanititekuni Kura meta kiekariteyari, yunaitɨ 'etsamete meta muxatsi wahɨwemete.
JER 31:25 Mɨyeharimɨne nekaniharitɨamɨkɨ meta mɨyehakamɨne nekatinimimɨkɨ».
JER 31:26 'Ana nekananutaniere, meta nehɨxite nekananutayepiexɨani. Witsiti'anemeri netiuheinɨka.
JER 31:27 Yawé mɨpaɨ kanaineni: «Tukari kanaye'amɨkɨ, teɨteri waniwema meta tewaxi waniwema nekaniwaka'emɨkɨ, 'Ixaheri meta Kura kwieyaritsie nekaniwatamɨiriyamɨkɨ.
JER 31:28 Mɨpaɨ kenemɨtiwata'ɨwiya nemɨwaka'unakɨ meta kenemɨtiwarakumaweriya, 'uximatɨarika newapitɨatɨ, yaxeikɨata nemɨwaranuku'uitɨanikɨ meta nemuwaranukayatsakɨ nepɨyɨwe —Yawé mɨpaɨ kanaineni—.
JER 31:29 'Iya tukaritsie mɨpaɨ pɨkatitaniukieni: »“Wapaapama kaxie takari matsina meputikwai, waniwemata 'ukitsi watamete pɨkɨitsietɨka”.
JER 31:30 'Apɨtata, kemɨ'ane kaxie hatsiname mɨtikwani tameteya kanikɨitsiexɨamɨkɨ, tatsɨaritɨtɨ yuxexuitɨ ke'axamemɨte'uyurikɨ mekanikwikuni».
JER 31:31 Yawé mɨpaɨ kanaineni: «Tukari kanaye'amɨkɨ, tɨratu hekwame nemɨwewienitsie 'ixaheri teɨteriyari meta Kura xiɨyarimama wahamatɨa.
JER 31:32 Tɨratu kenemɨtiuwewi wa'ukiyarima wahamatɨa mɨpaɨ pɨka'aneni, kepauka 'Ekipitu nemɨwarayewitɨ mɨkɨ yamepɨkatekakɨ, tsepa ne wakɨna nemɨhɨkɨtɨkai —Yawé mɨpaɨ kanaineni—.
JER 31:33 »'Ikɨ tɨratu kanihɨkɨtɨni 'iya tukari 'anuyeyayu nemɨwawewirieni 'ixaheri teɨteriyari —Yawé mɨpaɨ kanaineni—: Wa'eriwametsie ne'inɨari niukiyari nepɨwapitɨani meta wa'iyaritsie nekanika'utɨamɨkɨ. Ne wakakaɨyari nekanihɨkɨtɨkamɨkɨ mɨkɨta neteɨterima mepɨhɨkɨtɨni.
JER 31:34 Pɨkayɨweniri xewitɨ yuhepaɨ tewi mɨti'ɨkitɨakakɨ meta yu'iwa mɨpaɨ haitɨ: “Yawé kenemateni”, karikɨ yunaitɨ, 'etsimemuyumate paitɨ meta 'amemuyumate mekanenetimaikuni —Yawé mɨpaɨ kanaineni—. Ne ke'axamemɨte'uyurikɨ nekatiniwareuyehɨwiriemɨkɨ, hatsuakuri nepɨkahaye'erieni».
JER 31:35 Yawé mɨpaɨ kanaineni, Yawé Naimekɨmɨtɨrɨkaɨye pɨtitewa, kemɨ'ane tau mɨtatsiyetuirie tukarikɨ mɨkɨxenikɨ, metseri meta xurawetsixi, tɨkarikɨ memɨhekɨariwiekakɨ, meta haramara muwatayuitɨwa hamewarieya mutatɨrarɨkanikɨ:
JER 31:36 «Xɨka 'ikɨ 'inɨarikɨ mekatehaye'atɨaka —Yawé mɨpaɨ kanaineni—, hikɨ 'ana 'Ixaheri xiɨyarimama tawariri hatsuaku nenuiwarima mepɨkahɨkɨtɨni».
JER 31:37 Yawé mɨpaɨ kanaineni: «Xɨka muyuawi kemeutitewa yu'inɨatsinɨakake, meta kwie tsutɨmeyari yuxeiyanɨakake, hikɨ ne 'Ixaheri nuiwarieya nepuwaruku'eirienike naimekɨ ke'axamemɨte'uyurikɨ.
JER 31:38 Yawé mɨpaɨ kanaineni: «Tukari kanaye'amɨkɨ Yawé kiekarieya manukuketɨarienikɨ, tuxiyu Kananeri manuwe tsutɨarietɨ kitenie 'Itsikina mɨtitewatsie paitɨ ye'atɨkaitɨ.
JER 31:39 Kaunari ti'inɨnɨatame heitserie kanihaniemɨkɨ, mana Karewi hɨriyaritsie paitɨ, Kuha paitɨ kanititunimɨkɨ.
JER 31:40 Naitɨ mayeweri hakewa mɨkite memeukaxɨriwa meta naxi, naitɨ kwietsanari, Kiruni 'akiyaritsie paitɨ meta kawayutsixi wakitenieyaritsie, mutatsikuri tau manatineika hepatsie, mɨkɨ kanipatsiekamɨkɨ Yawé hetsiemieme. Hatsuakuri kiekari pɨkahahunarieni meta pɨkaka'unarieni».
JER 32:1 'Ikɨ Yawé niukieya kanihɨkɨtɨni Keremiyaxi hetsɨa mɨye'a, Tserekiyaxi tamamata wiyari ti'aitakaku Kura kwieyaritsie, tatsɨari Nawukurunutsuxi tamamata heimana 'atahaika wiyari ti'aitakaku.
JER 32:2 Hikɨ 'ana tukaritsie Wawiruniyatsie ti'aitame Kerutsareme mekananutinakaitɨni meta Keremiyaxi Kakaɨyari niukameya kanipɨretsutsiekaitɨni ti'aitame paratsiyuya manuwe kuyaxi watakwa.
JER 32:3 Tserekiyaxi, Kura kwieyaritsie ti'aitame kanipɨretsutakaitɨni mɨpaɨ tikɨhɨawetɨ: «¿Titayari mɨpaɨ petihekɨata: “Yawé mɨpaɨ kanaineni”? Mɨpaɨ petihekɨatatɨ Yawé mɨpaɨ kanaineni: “'Ikɨ kiekari nekaniyetuamɨkɨ Wawiruniya ti'aitame hetsɨa, mɨkɨ yuhetsie kanihɨimɨkɨ,
JER 32:4 meta Tserekiyaxi, Kura kwieyaritsie ti'aitame, wawiruniyutsixi pɨkawatawikweiya matsi kaniyetuiyamɨkɨ Wawiruniya kwieyaritsie ti'aitame hetsɨa, yɨhɨxie mekaniutinenierikuni”.
JER 32:5 Yaxeikɨatsiere Yawé mɨpaɨ kanaineni: “Nawukurunutsuxi Tserekiyaxi kananuhanimɨkɨ Wawiruniya paitɨ, mana peyuhayewani xɨkakeri neheiyehɨaka hetsɨana nepenuani”, yaxeikɨata: “Tsepa xeme wawiruniyutsixi xemuwarutakwi xepɨkawara'iwa”».
JER 32:6 Keremiyaxi mɨpaɨ kaniutayɨni: «Yawé niukieya nehetsɨa kaniye'ani,
JER 32:7 mɨpaɨ nerahɨawetɨ: “Kanameri, 'atatatsi Tsaruni nu'aya, kaninuamɨkɨ 'ahetsɨa mɨpaɨ 'utaitɨ, peminanairienikɨ kwie 'Anatuti mekuma, 'ekɨ heitserie pemexeiyakɨ meta hurawa pemɨ'iwayakɨ”.
JER 32:8 »Hikɨ yakatiniɨyɨni Yawé kemainekai, ne'iwa Kanameri kaninuani netsikuxeiyanetɨ paratsiyu manuwe kuyaxi watakwa mɨpaɨ kanetiniutahɨawe: “'Anatuti mukuma nekwie nemaka'etsa keneunanai, Wenikamini kwieyaritsie, 'ekɨ heitserie pekanexeiyani meta yapemɨtiyurieni peminanenikɨ 'ekɨ ne'iwa 'ahurawa pemɨhɨkɨkɨ”. Hikɨ yanekatinetimani mɨkɨ Yawé niukieya mɨhɨkɨtɨkaikɨ.
JER 32:9 Kanameri yatewa ne'iwa kwie 'Anatuti mekuma nekaniunanairieni, tamamata heimana 'atahuta pɨratayarikɨ.
JER 32:10 Hipame memɨnenierekɨ nekaniwarukuxeɨrieni, wahɨxie xapatsie nekaneuyu'ɨtɨani, nekanitseyumani, meta nekatiniuyutuani kemɨraye'arɨkai.
JER 32:11 Hikɨ xapa 'anukanatɨ mutseyumarie 'ɨkiyaya nekananuhurieni meta manutayepiekai 'ɨkiyaya kehepaɨ nemɨtinanekai mɨraye'ukai,
JER 32:12 hikɨ Waruki, Neriyaxi nu'aya nekaniyetuirieni meta Matsehiyaxi teukarieya, Kanameri hɨxie, xapa memunenierixɨ memitseyuma, meta yunaitɨ huriyutsixi teɨteriyari kuyaxi watakwa memɨtitekai wahɨxie.
JER 32:13 Mɨkɨ wahɨxie Waruki mɨpaɨ nekatiniutahɨawe:
JER 32:14 “Mɨpaɨ kanaineni, Yawé Naimekɨmɨtɨrɨkaɨye, 'Ixaheri Kakaɨyarieya: ‘Xapa 'anukanatɨ mutseyumarie 'ɨkiyaya kenanuhuri meta manutayepie 'ɨkiyaya mɨraka'utsie, xarita keneukayetsa mɨixa wiyari muwa mɨyekanikɨ’.
JER 32:15 Yawé mɨpaɨ kanaineni Naimekɨmɨtɨrɨkaɨye, 'Ixaheri Kakaɨyarieya: ‘Hekwamekɨ kanitinanaiyamɨkɨ kiite, kwie meta kaxie 'etsiyari 'ikɨ kwieyaritsie’ ”.
JER 32:16 »Waruki Neriyaxi nu'aya xapa mɨraka'utsiekai ne'iyetuiriekari, Yawé mɨpaɨ nekatiniutahɨawe:
JER 32:17 »Yawé nekakaɨyari. 'Ekɨ 'atɨrɨkariyakɨ kwie meta muyuawi peputiwewi. 'Ahepaɨtsita tikwaniwetɨ pɨtiumawe.
JER 32:18 'Anaki'eriya heitserie pumatsiɨkɨ meyuwaɨkawame wahetsie, peru meta waniwema 'ukitsi pepɨtiwakwinitɨa wa'ukiyarima 'axamete'uyurieku. Kakaɨyari pemɨmariwe pemɨtɨrɨkaɨye, Yawé Naimekɨmɨtɨrɨkaɨye pemɨtitewa.
JER 32:19 Kepemɨtiku'eriwa pumamariwawe, yemekɨ witsipɨ'anene 'a'uximayatsika. Pepuwataxeiya yunaime teɨteri kememɨteyurie, yuxexuime yapemɨtiwarakapitɨanikɨ kememɨtekakɨ meta kememɨte'u'uximayataxɨakɨ.
JER 32:20 'Ekɨ mariwemekɨ kepemɨtiuyuri meta 'inɨaritekɨ 'Ekipitu kwieyaritsie, hikɨta 'akuxi yapepɨtiyuriene, 'Ixaheri kwieyaritsie meta naitsarie 'ena kwiepa, mɨpaɨ pemɨtiyurienekɨ 'aixɨa pepɨraxaxatsiwa.
JER 32:21 'Ekɨ 'amamá tɨrɨkaɨyeme petatseratɨ, meta 'inɨarite mamariwawemekɨ, meta waɨkawa makaxiwamekɨ, 'Ekipitu kwieyaritsie 'ateɨterima 'ixaheritsixi pepɨwarayewitɨ.
JER 32:22 'Ixaheritsixi 'ikɨ kwie pepɨwayetuiri, hakewa retsi meta xiete waɨkawa maxɨawetsie, wa'ukiyarima kepemɨtiwarutahɨawekai kename pewayetuirienikekai.
JER 32:23 Peru kepauka 'ena memu'axɨa meta yukwie memayeitɨanikɨ, mepɨkametsi'anu'eni, 'a'inɨari niukiyaritsie yamepɨkatekakɨ meta kepemɨtiwaru'aitɨakai. 'Ayumieme 'ikɨ 'uximatɨarika pepɨwarupitɨa.
JER 32:24 Hikɨri mekaniu'axɨani kuyaxi kiekari hetsie tetsariya mekaniutawewieni me'ika'unake. Kuyaxakɨ, haakakɨ meta kwiniyakɨ wawiruniyutsixi wahetsɨa kiekari kaniyetuiyamɨkɨ memimietɨwe. Yawé kepemainekai naitɨ paye'atɨariwa, 'ekɨ penierekaku.
JER 32:25 Yawé nekakaɨyari, wawiruniyutsixi kiekari meka'unakeyutɨtɨ, 'ekɨ mɨpaɨ pepɨnerahɨawe: “Kwie keneu'ananairi ha'atɨkaikamekɨ yuwaɨkawa wahɨxie”».
JER 32:26 Hikɨ Yawé niukieya Keremiyaxi hetsɨa kaninuani:
JER 32:27 «Ne Yawé, Kakaɨyari nepɨhɨkɨ, yunaime teɨteri wahetsiemieme. ¿Kamɨtsɨ tixaɨtɨ katiyɨwetɨ nehetsiemieme tixɨawe?
JER 32:28 'Ayumieme Yawé mɨpaɨ kanaineni: 'Ikɨ kiekari nekaniyetuamɨkɨ wawiruniyutsixi wahetsɨa nekaniwayetuamɨkɨ meta Nawukurunutsuxi hetsɨa, tiwa'aitɨwame mɨhɨkɨ, mɨkɨ kanika'unamɨkɨ.
JER 32:29 Wawiruniyutsixi kepauka kiekaritsie memɨtahaxɨani, mepitaiya, kiite heima hakewa 'ɨkwa memetitaiyakai Wahari hetsiemieme menetsi yehaxɨatɨanike, meta hipame kakaɨyarixi wahetsiemieme kaxie winuyari mɨtiyeuriwakai mawariyari.
JER 32:30 Meripaitɨtɨ 'Ixaheritsixi meta Kura kiekatari, 'axamepɨteyurie nehɨxie. 'Ixaheri teɨteriyari menetsihaxɨatɨatɨ mepɨkatehayewaku yameteyurietɨ —Yawé mɨpaɨ kanaineni—.
JER 32:31 'Ikɨ kiekari memukamatsie paitɨtɨ hikɨta, mɨyamemɨyɨakɨ waɨkawamekɨ mepɨnetsi'uyehaxɨatɨa. 'Ayumieme nehɨxie nepuwakumaweriya,
JER 32:32 naimekɨ 'axakememɨte'uyuri 'Ixaheri meta Kura teɨteriyari: mɨkɨ, tewa'aitɨwamete, memanuyetei, mawari wewiwamete meta kakaɨyari niukametema, yunaitɨ Kuratsie meta Kerutsaremetsie kiekatari.
JER 32:33 Mɨkɨ mepɨkanetsixeiyakai, mepɨnetsiwarixiwiyakai xeikɨa. Tsepa 'aixɨa nemɨtiwa'ɨkitɨakai, mepɨkaku'enakarekai meta 'aixɨa memuyuyurienikɨ mepɨkanaki'eriekai.
JER 32:34 Netukita kenemɨtitewakɨ mutaterɨwarɨwa mekaniwareuta'uitɨwakaitɨni yukakaɨyarixi ne nemuwaxani'erie, mɨpaɨ kapatsiekame mekatenayeitɨakaitɨni.
JER 32:35 Yaxeikɨata Wahari hetsiemieme puretini mepɨtiwewiwakai Weni-Hinuni mayeweri meta mana yuniwema 'ukitsi meta 'ukari mepuwatimawakai Muruki hetsiemieme, tita mɨtixani'eriwakɨ kenemɨkatiwaruta'aitɨa mepɨteyuriekai meta mɨpaɨ tɨma nepɨkatiku'eriwakai. Mɨpaɨ Kura 'axatiyurieneme mepɨte'ayeitɨa.
JER 32:36 »'Ayumieme Yawé mɨpaɨ kanaineni, 'Ixaheri Kakaɨyarieya, 'ikɨ kiekari hetsiemieme, Wawiruniyatsie ti'aitame kanixetiwiyamɨkɨ kuyaxa 'ixiparayakɨ, haakakɨ meta kwiniyakɨ:
JER 32:37 Nemɨxeheutanɨ'axɨa waɨkawa neha'atɨ meta nehaxɨa makaxiwakaku naitsarie nuiwarite watsata, nekanixekuxeɨrimɨkɨ, meta 'ikɨ kiekaritsie nekanixe'atɨamɨkɨ 'aixɨa 'iyari xemɨtetenikɨ.
JER 32:38 Mɨkɨ mepɨneteɨterimatɨni, neta Xekakaɨyari nepɨhɨkɨtɨni.
JER 32:39 Wa'eriwametsie meta kememɨte'u'uwa nekaniwataxewiririemɨkɨ, yuheyemekɨ memɨnetsihayemakaxenikɨ, 'aixɨa 'anemekɨ memu'uwanikɨ meta waniwema 'ukitsi.
JER 32:40 Wahamatɨa tɨratu mɨkaxɨwe nepuwewieni: Hatsuaku nepɨkawaku'eirieni nepuwaparewieka, wa'iyaritsie memɨnetsi'ayemakaxenikɨ nepuwapitɨani, 'anari mepɨkanetsiku'eirieni.
JER 32:41 Nekaniyutemawiekamɨkɨ newaparewietɨ, meta naime ne'iyarikɨ meta naime kenemɨtinematekɨ yurikɨ 'ikɨ kwieyaritsie nekaniwakayatsamɨkɨ.
JER 32:42 »Yawé mɨpaɨ kanaineni: Kenemɨti'atɨa 'uximatɨarika 'ikɨ teɨteri wahetsiemieme, mɨpaɨta nekatinaye'atɨamɨkɨ 'aixɨa mɨti'ane tita nemɨtiwarutaxatɨa.
JER 32:43 Kwie mekaniyutinanairiekuni 'ikɨ kwieyaritsie, 'ikɨ hepaɨtsita mɨpaɨ xemutiyuane: “Kwie makumawe kanihɨkɨtɨni, teɨteri meta tewaxi memɨtehakumawe, wawiruniyutsixi wahetsɨa puyetuiya”.
JER 32:44 Wenikamini kwieyaritsie meta Kerutsareme 'aurie, Kura kiekariyaritetsie, mayehɨriya, mayeweritsie, meta Nekewi paitɨ, mana kwie kanitinanaiyamɨkɨ tuminikɨ, xapatsie meteneu'utɨaxɨakuni, meta kanititseyumariemɨkɨ memɨneniere wahɨxie —Yawé mɨpaɨ kanaineni—, ne 'aixɨa me'itɨariekame nekaniwarayeitɨamɨkɨ».
JER 33:1 Yawé niukieya Keremiyaxi hetsɨa kaninuani hutarieka, kepauka 'akuxi mupɨretsutɨkai kuyaxi watakwa:
JER 33:2 «Mɨpaɨ kanaineni Yawé mɨtitewa, kwie mutawewi 'aixɨa mɨtiuyuri mikama:
JER 33:3 “Keneneutahɨawi, ne nekamanita'eiyamɨkɨ, pekatinetimaimɨkɨ tita mɨtimamariwawe meta mɨti'awietsie 'ekɨ 'akuxi pemɨkatimate”.
JER 33:4 Mɨpaɨtsɨ Yawé kanaineni, 'Ixaheri Kakaɨyarieya, 'ikɨ kiekaritsie kiite hepaɨtsita meta Kura kwieyaritsie te'aitamete waparatsiyu hepaɨtsita, mɨka'unariexɨani mana tuxiyu memɨtiwewiexɨani memuyuti'awietakɨ memuwakwitɨwe wahepaɨtsita meta watetsariya hepaɨtsita:
JER 33:5 “Wawiruniyutsixi mekani'axɨakuni kiekari memɨka'unakɨ meta mɨkite memɨwatahɨniyakɨ. Nehaxɨakɨ 'ikɨ kiekari nepɨkaxeiyari, nekatinikwinitɨamɨkɨ mekanitayunikuni 'axamemɨteyuriekaikɨ.
JER 33:6 »”Yaxeikɨata 'aixɨa meteheu'eriekame nekaniwarayeitɨamɨkɨ, nekaniwati'uayemamɨkɨ, nekaniwaranayexɨrimɨkɨ, yurikɨ 'aixɨa 'iyari memu'uwanikɨ yanekatiniyurimɨkɨ.
JER 33:7 Kura meta 'Ixaheri 'aixɨa me'itɨariekame nekaniwarayeitɨamɨkɨ, matɨari hepaɨ nekaniwaranukuketɨamɨkɨ.
JER 33:8 Nekaniwa'itimɨkɨ 'axamemɨte'uyurikɨ nehepaɨtsita, naimekɨ nekatiniwareuyehɨwiriemɨkɨ memɨnetsi 'aye'uniekaikɨ.
JER 33:9 Kerutsareme netemawierika kanihɨkɨtɨkamɨkɨ, meta ne kwikari mɨxawatɨ nuiwarite kwiepa memɨtama wahɨxie. Mɨpaɨ mekatenetimaikuni ne ke'aixɨa nemuwayurie, menitimamakuni, menitiyɨyɨakakuni 'aixɨa nemɨtiwareukuyatsakɨ, meta kayuwatɨ nemuwapitɨakɨ”.
JER 33:10 »Yawé mɨpaɨ kanaineni: “Xeme mɨpaɨ xeputiyuane kename 'ikɨ kiekari 'uni, teɨteri meta tewaxi me'umawe. Matsi Kura kiekariyaritsie meta Kerutsareme kayeyaritsie, makumawetsie tewi xeniu hawaikɨ mɨkareyeika nitewaxitɨma, hutarieka mekani'enieriekuni
JER 33:11 temawierika hiwariyarikɨ, neneɨkeme meta wikiwame wakwikari meta Yawé kiita memɨtemawatɨwe waniuki pamɨpariyutsi memipitɨa meta 'ipaɨ mete'ukwitɨ: »” ‘Pamɨpariyutsi xekenepitɨaka Yawé Naimekɨmɨtɨrɨkaɨye, Yawé 'aixɨa mɨtiuka'iyarikɨ, naki'eriyaya yuheyeme mumiemekɨ’”. Yawé mɨpaɨ kanaineni: “Ne 'aixɨa me'itɨariekame nekaniwarayeitɨamɨkɨ 'ikɨ nuiwarite, matɨari hepaɨ 'anetɨ kanayeimɨkɨ”.
JER 33:12 »Yawé Naimekɨmɨtɨrɨkaɨye mɨpaɨ kanaineni: “'Ikɨ kiekari mu'unarie, tewaxi meta teɨteri memakumawe meta naime wakiekari, hekɨamekɨ 'ɨxa kanitiyɨramɨkɨ hakewa tehɨwemete yumuxatsima memɨwaraka'uxipitɨanitsie.
JER 33:13 Kiekarite mɨhɨriyatsie mukumane, meta muweritsie, Nekexi, Wenikamini kwieyaritsie, meta Kerutsareme 'aurie, Kura kiekariteyaritsie mukumane, muxatsi hutarieka wahɨwemete mekaniwati'inɨatakuni —Yawé mɨpaɨ kanaineni—.
JER 33:14 »”Tukari kanaye'amɨkɨ —Yawé mɨpaɨ kanaineni—, kepauka kenemutayɨ nemeye'atɨani ke'aixɨa nemuwayurienikekai 'Ixaheri meta Kura wanuiwarite.
JER 33:15 »”'Iya tukaritsie, meta 'iya wiyaritsie, Rawiri hetsie neneikunuiwitɨamɨkɨ xeime 'aixɨa tiuka'iyarime, mɨkɨ 'aixɨa tiuyeikatɨ kanayeimɨkɨ, heitseriemekɨ 'ikɨ kwieyaritsie.
JER 33:16 'Iya tukaritsie Kura kaniwikweitsitɨariekamɨkɨ, meta Kerutsareme 'aixɨa 'iyari kaniuyeikamɨkɨ. Mɨpaɨ katiniuterɨwarɨwamɨkɨ: ‘Yawé tahetsiemieme tita mɨtiheitserie pɨhɨkɨ’ ”.
JER 33:17 Karikɨ Yawé mɨpaɨ kanaineni: “Hatsuaku xewitɨ pɨkaheuyeweni Rawiri xiɨyarieyatɨtɨ 'Ixaheri teɨteriyari wa'uwenitsie mɨkahayerɨnikɨ.
JER 33:18 Metatsiere rewitsixi, mawari wewiwamete xewitɨ pɨkaheuyeweka nehɨxie mawari taiyariyari mɨyetuayanikɨ, meta hatsi mawariyari, meta tukarikɨ naime mawari memɨyetuayanikɨ”».
JER 33:19 Yawé niukieya Keremiyaxi hetsɨa kaninuani:
JER 33:20 «Yawé mɨpaɨ kanaineni: “Xɨka xeme netɨratu tukarikɨ miemete mɨka'aye'atɨariekakɨ yaxete'uyurieni, meta netɨratu tɨkarikɨ miemetsie, mɨpaɨ xeme tukari meta tɨkari mɨka'aye'anikɨ xepɨyɨwawenikeyu,
JER 33:21 yaxeikɨata xepɨyɨwawenikeyu xemititsanaxɨanikɨ netɨratu neti'uximayatsiriwame Rawiri kenemɨtiuwewiriekaikɨ, mɨkaheixeiyanikɨ xewitɨ 'utɨmana 'uwenieyatsie mayerɨnikɨ, meta mawari wewiwamete, rewitsixi memɨnete'uximayatsiriwamete.
JER 33:22 Ne yɨmɨireme neti'uximayatsiriwame Rawiri xiɨyarieya nekaniwarayeitɨamɨkɨ meta rewitsixi memɨnete'uximayatsirie, xɨrawetsixi wahepaɨ memɨkayu'inɨatsinɨa meta xiekari haramara tetsita mɨtika hepaɨ nekaniwatipaɨmeriyamɨkɨ”».
JER 33:23 Yawé niukieya Keremiyaxi hetsɨa kaninuani:
JER 33:24 «Pepɨtimate 'ekɨ mɨpaɨ memutiyuane 'ikɨ teɨteri kename ne Yawé, newarexɨri yuhutame te'aitamete nemɨwaranayexeiyakai. 'Ayumieme neteɨterima mepuwaxani'erie nuiwari hepaɨ mepɨkatewaxeiya.
JER 33:25 Yawé mɨpaɨ kanaineni: “Ne xɨka netɨratu tukarikɨ mieme meta tɨkarikɨ mieme neka'uwewienike, meta 'inɨari niukiyari neka'uwewienike muyuawitsie meta kwiepa mɨtiwa'aitɨa,
JER 33:26 hikɨ ne nepuwarexɨrienikeyu Kakuwu xiɨyarimama meta neti'uximayatsiriwame Rawiri, xeime nepɨka'anayexeiyakekai nuiwarieya mɨti'aitanikɨ 'Apɨrahami, 'Itsahaki meta Kakuwu xiɨyarimama wahetsie. Peru ne 'aixɨa me'itɨariekame nekaniwarayeitɨamɨkɨ nekaniwatinenimayatamɨkɨ”».
JER 34:1 Yawé niukieya Keremiyaxi hetsɨa kaninuani kepauka Nawukurunutsuxi Wawiruniyatsie ti'aitame, Kerutsareme mumienekai meta kiekarite 'auriena mamanetɨka, yunaime yukuyaxima wara'inietɨ meta yunaime te'aitamete meta hipame teɨteri mɨtiwa'aitɨakai warawitɨtɨ:
JER 34:2 «Yawé mɨpaɨ kanaineni, 'Ixaheri Kakaɨyarieya: “Kenemie Tserekiyaxi mɨpaɨ ketinayemari'itɨa, Kura kwieyaritsie ti'aitame, 'ipaɨ kanaineni Yawé: ‘'Ikɨ kiekari Wawiruniya kwieyaritsie ti'aitame hetsɨa nekaniyetuamɨkɨ, mɨkɨ kanitataiyamɨkɨ.
JER 34:3 'Ekɨ pemɨ'ata'unakɨ pepɨkayɨwekaxɨani mɨkɨ tɨrɨkariyaya hetsie, yurikɨ pekaniwiyariemɨkɨ pekaniyetuiyamɨkɨ ti'aitame hetsɨa. Pekanixeiyamɨkɨ kemɨraka'erie ti'aitame Wawiruniyu kiekame, mɨkɨ 'ahɨxie 'utinieretɨ kamenitahɨawimɨkɨ, hikɨ Wawiruniya paitɨ pekananuhaniemɨkɨ’.
JER 34:4 »”'Ayumieme, 'ekɨ, Kura kwieyaritsie ti'aitame, Tserekiyaxi, Yawé kemaine 'ahetsiemieme keneu'eni. Yawé mɨpaɨ kanaineni: ‘'Ekɨ 'ixiparakɨ pepɨkamierieni,
JER 34:5 matsi 'aixɨa 'iyari pekanimɨmɨkɨ’. Yawé mɨpaɨ kanaineni: ‘Ne mɨpaɨ nekamatinahɨaweni, kepauka te'aitamete meripaimiemete memukwitsie, 'apaapama mɨkɨ wahetsiemieme witsimu'ɨa kememɨte'utitaiyaxɨ mɨpaɨta pemɨkikaku katiniyɨmɨkɨ, me'utitsuatɨ mɨpaɨ me'utiyuatɨ 'ahetsiemieme: Xɨa'ui neti'aitɨwame’ ”».
JER 34:6 Kakaɨyari niukameya Keremiyaxi 'ikɨ naime Tserekiyaxi katiniutaxatɨani, Kura kwieyaritsie ti'aitame, Kerutsareme paitɨ.
JER 34:7 Hikɨ mekaniyeweiyakaitɨni Wawiruniya kwieyaritsie ti'aitame kuyaximama Kerutsareme memietɨwetɨ, meta Kura kwieyaritsie kiekarite 'akuxi muyuhayewanekai, tatsɨari Rakixi meta 'Atseka mɨkɨ xeikɨa kiekarite kuraruteya 'amatitetewatɨka pɨhɨkɨtɨkai.
JER 34:8 Yawé niukieya Keremiyaxi hetsɨa kaninuani Tserekiyaxi ti'aitame tɨratu 'uwewieku yunaime teɨteri Kerutsareme wahamatɨa waɨriyarika memɨte'uximayatsitɨarie muwaxɨnakɨ.
JER 34:9 Mɨpaɨ metenikuxatakaitɨni yuxexuitɨ 'ixaheritsixi meniwahayewakekaitɨni memɨtewareu'aitɨa 'ukarawetsixi meta 'ukitsi hepɨrayutsixi teɨteriyari, meta xewitɨ huriyu tewiyari pɨkare'aitɨaka.
JER 34:10 Yunaitɨ teɨteri meta memanuyetei mɨpaɨ memɨte'uxatakai meniwaruhayewa memɨtewareu'aitɨakai, xewitɨ pɨka'uhayewarie mɨtiwa'aitɨakakɨ.
JER 34:11 Peru 'ariketa yaxeikɨa mekateniuyurieni, tawarita mekateniwaruta'aitɨani kemɨ'ane memɨwaruhayewakai.
JER 34:12 Yawé niukieya Keremiyaxi hetsɨa kaninuani:
JER 34:13 «Yawé mɨpaɨ kanaineni 'Ixaheri Kakaɨyarieya: “Ne tɨratu nekaniuwewieni xe'ukiyarima wahetsie kepauka 'Ekipitu nemɨwarayewitɨtsie, hakewa waɨriyarika memɨtehe'uximayatsitɨariekaitsie. Mɨpaɨ nekatiniwaruta'aitɨani
JER 34:14 'atahuta wiyari 'anuyeyeikakaku mepɨwakuhayeikawanikekai hepɨrayutsixi kemɨ'ane yɨkɨmana muyutuani xeime hetsɨa. 'Ataxewime wiyari waɨriyarika tita'uximayatayu 'ana mekaniwarutatuayanikekaitɨni. Peru xetutsima mepɨka'anu'enana yamepɨkatekakɨ.
JER 34:15 Xemeta mɨpaɨ xe'utiyuaka, xemɨtewa'aitɨa xewaruhayewaka, 'aixɨa xepɨyɨkai, kemɨnetinake xepɨte'uyuriekai. 'Akuxi matsi kepauka xeme tɨratu xemuwewiekaitsie nehɨxie xeputiyuanekai, netukita kenemɨtitewakɨ mutaterɨwarɨwa.
JER 34:16 Hikɨta ta'aurie xepaxɨri, meta kenemɨtitewa nekapatsiekame xepayeitɨa. Tawarita yuxexuitɨ waɨriyarika xepɨwapitɨa memɨxete'uximayatsiriekai 'ukarawetsixi meta 'ukitsi, xewarɨxɨnakatɨtɨ hikɨtari hekwamekɨ xepɨtewareu'aitɨa”.
JER 34:17 »'Ayumieme Yawé mɨpaɨ kanaineni: “Mepɨkanetsi'anu'eniwawe, yu'iwama memɨkawahayewawekɨ. 'Ayumieme ne xehetsiemieme yanekanaineni mɨtitatuiyanikɨ —Yawé mɨpaɨ kanaineni—: kuyaxa nenitatuamɨkɨ, kwiniya meta haakaxa, kemɨxetiyuriekɨ kwiepa te'aitamete yunaitɨ menitimamakuni.
JER 34:18 Netɨratu xemutitsanaxɨakɨ, meta nehɨxie kexemɨte'uxa xemɨkahaye'atɨakɨ, tuuru xeiwiyari hɨkame hixɨapa xemuxite hepaɨ nenixeyurimɨkɨ, meta hutame xehayexɨrieka hetsiena xemuyekɨ tɨratu yuri xemayeitɨanikɨ.
JER 34:19 Kura kwieyaritsie miemete memanuyetei meta Kerutsaremetsie, meta paratsiyuta te'uximayatamete meta mawari wewiwamete, meta yunaitɨ kemɨ'ane tuuru hixɨapa xitekiekametsie memuyekɨ,
JER 34:20 neniwayetuamɨkɨ memɨwaraye'unie wahetsɨa, memuwakuwautɨwe memɨwakwinikɨ, wakaxari wirɨkɨxi meta yeutari teyukwa'amete wa'ikwai katinayeimɨkɨ.
JER 34:21 »”Kura kwieyaritsie ti'aitame, Tserekiyaxi, meta memanuyetei wahetsɨa miemete, nekaniwayetuamɨkɨ memɨwaraye'unie wahetsɨa, memɨwakuwaɨtɨwe mewakwinike wahetsɨa, tatsɨari ti'aitame Wawiruniya kiekame kuyaximama wahetsɨa, tsepa yatewimekɨ mihayewakaitɨkaku.
JER 34:22 Netinita'aitamɨkɨ —Yawé mɨpaɨ kanaineni—, neniwa'atɨamɨkɨ 'ikɨ kiekaritsie. Menixetakwikuni, mexetiwiyame, kiekari menayetaiyakuni. Kura kwieyaritsie kiekarite mumanetɨka 'akumaweme nekanayeitɨamɨkɨ, ka'akukiepayakame”».
JER 35:1 Yawé niukieya Keremiyaxi hetsɨa kaninuani, Kuhatsimi Kutsiyaxi nu'aya, Kura kwieyaritsie ti'aitametɨkaku, mɨpaɨ katinitahɨawe:
JER 35:2 «Xekawitsixi wahetsɨa kenemie, keniwareta'ini Yawé kiita memayenexɨanikɨ mɨrewayutixexeɨritɨretsie, muwa kaxie winuyari keniwaru'itɨa».
JER 35:3 Hikɨ Katsaniyaxi nenikuwauni, nehepaɨ mɨtitewa Keremiyaxi nu'aya Kawatsiniyaxi teukarieya, meta 'iwamama meta yunaime niwemama 'ukitsi meta yunaime xekawitsixi teɨteriyari.
JER 35:4 Yawé kiita nekaniwarewitɨni, Kanahani niwemama 'ukitsi memuwayutixexeɨriwatsie 'Irariyaxi nu'aya, Kakaɨyari hetsɨa ti'uximayatame. 'Ikɨ kii memanuyetei memuwayutixexeɨriwa wa'aurie kaniuwekaitɨni, tatsɨari Matsehiyaxi Tsaruni nu'aya kiiya heima, tuki kitenie tihɨweme, memuwayutixexeɨriwa waheima.
JER 35:5 Xekawitsixi nekaniwarukatu'iriexɨani winu watsuteta meta tekɨxiteta hɨpɨneme, hikɨ mɨpaɨ nekatiniwarutahɨawe: «Xekene'ieka».
JER 35:6 Mɨkɨ mɨpaɨ mekaneteniuta'eiya: «Tame winu tepɨkaye'e, Kunarawi, Xekawi nu'aya tatutsi mɨpaɨ mutatiuta'aitɨakɨ: “Hatsuaku winu xepɨkahe'ieka, xeme metatsiere xexiɨyarima,
JER 35:7 meta kii xepɨkayuwewirietɨweni, 'imɨari xepɨka'etɨweni, meta kaxie xepɨka'uka'etsani, 'ikɨ naime xepɨkatehexeiyani. 'Ixuriki kiiyarita xeikɨa yuheyemekɨ xekenayeteni, mɨixa tukari xemu'uwanikɨ 'ikɨ kwieyaritsie tewanarixi xemɨhɨkɨkɨ”.
JER 35:8 Tame naimekɨ yatepɨtekahu Kunarawi, Xekawi nu'aya, tatutsi kemɨtatiuta'aitɨa. Winu hatsuaku tepɨkahe'ieka, ta'ɨitama meta taniwema 'ukitsi.
JER 35:9 Kii tepɨkatiwewiwa muwa temayetenikɨ, kaxie tepɨkahexeiya meta kwie temuka'etsanikɨ.
JER 35:10 'Ixuriki kiiyarita tepayetei meta naimekɨ yatepɨtekahu Kunarawi tatutsi kemɨtatiu'aitɨa.
JER 35:11 Peru kepauka Nawukurunutsuxi Wawiruniya kwieyaritsie ti'aitame 'ikɨ kwieyari mutami, 'ana mɨpaɨ teputiyua: “Hikɨmɨtɨka Kerutsareme paitɨ tepɨyehu, tepɨtata'una, kuyaxi wawiruniyutsixi meta tsiriyutsixi wahekɨ”. 'Ayumieme hikɨ Kerutsareme tepɨtitei».
JER 35:12 Hikɨ Yawé niukieya Keremiyaxi hetsɨa kaninuani:
JER 35:13 «Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “Kenemie yunaime teɨteri Kura meta Kerutsareme kiekatari mɨpaɨ ketiniwaretahɨawi: 'Ikɨkɨ mɨpaɨ xeketenetimati meta ne'aitsika xekenaye'atɨa —Yawé mɨpaɨ kanaineni—.
JER 35:14 Kunarawi xiɨyarimama Xekawi nu'aya yamekatenikahuni kename winu meka'iekakekai memɨtehahɨawarɨwakaikɨ, hikɨ 'akuxi mepɨka'iye'e karikɨ mekanei'enieka watutsi kemɨtiwaru'aitɨa. Xeme matsi mɨixa yanetixekɨhɨawekakutɨtɨ, yaxepɨkatekakɨniwawe.
JER 35:15 Yaxeikɨata, nepɨkatihayewa nexehenɨ'airiwatɨ memɨnete'uximayatsirie neniukametema, mɨpaɨ nemɨxetitahɨawekɨ: ‘Huye 'axamɨ'ane xekeneuhayewari, xekeneyumanetsikitɨa kexemɨteyuriekɨ meta hipameri kakaɨyarixi xepɨkawaruweiyani xemɨtewa'uximayatsiriekakɨ. Mɨpaɨ 'ana xeniu'uwakuni kwie nemɨxeyetuiritsie meta xetutsima nemuwayetuiriekaitsie’. Peru xeme xepɨkanetsi'eniwawe, kenemaine yaxepɨkatekakɨniwawe.
JER 35:16 Kunarawi xiɨyarimama Xekawi nu'aya, mekaneye'atɨani 'aitsika watutsi kemɨtiwaru'aitɨa, matsi 'ikɨ teɨteri mepɨkanetsi heu'enie”.
JER 35:17 »'Ayumieme Yawé mɨpaɨ kanaineni, Kakaɨyari Naimekɨmɨtɨrɨkaɨye, 'Ixaheri Kakaɨyarieya: “Kura hetsiemieme meta yunaime Kerutsareme kiekatari wahetsie nekanenɨnɨ'amɨkɨ, naime 'uximatɨarika nemɨxe'utaxatɨa, nexe'utahɨawekutɨtɨ yaxepɨkatekakɨ, nexehahɨawekaku xekapɨnetsi'uta'ei”».
JER 35:18 Yaxeikɨa Keremiyaxi mɨpaɨ xekawitsixi katiniwarutahɨawe: «Yawé mɨpaɨ kanaineni Naimekɨmɨtɨrɨkaɨye, 'Ixaheri Kakaɨyarieya: “Xeme xemeye'atɨakɨ Kunarawi xe'ukiyari 'aitsikaya, meta naime kemutayɨ yaxemɨtekahukɨ meta yaxemɨte'uyurikɨ naime mɨkɨ kemɨxetiu'aitɨa,
JER 35:19 Yawé mɨpaɨ kanaineni Naimekɨmɨtɨrɨkaɨye, 'Ixaheri Kakaɨyarieya: ‘Kunarawi, Xekawi nu'aya, yuheyemekɨ xeime nuiwari pexeiyani kaheuyewekamekɨ mɨneti'uximayatsiriekakɨ naime tukaritetsie’ ”».
JER 36:1 'Ikɨ Yawé niukieya Keremiyaxi hetsɨa kaninuani Kuhatsimi Kutsiyaxi nu'aya nauka wiyari ti'aitakaku, Kura kwieyaritsie:
JER 36:2 «Xapa mukwikwiya kenekuwawa mana ketinaka'utɨa naime kenemɨmatiutaxatɨa kepauka Kutsiyaxi muyeikakaitsie mieme, nematikuxaxatɨwakai hikɨ 'akuxi yaxeikɨa nemutaine 'Ixaheri hepaɨtsita, meta Kura meta hipame nuiwarite wahetsiemieme.
JER 36:3 Kepauka Kura kiekatari mɨpaɨ memɨtehetimani naime 'uximatɨarika wahetsiemieme kenemɨtiwaranɨnɨ'airieni kenemɨtiku'eriwa, heiwatɨ mete'uhayewa 'axa'anemekɨ kememɨte'u'uwa, meta ne nemɨtiwareuyehɨwirienikɨ 'axakememɨte'uyurikɨ».
JER 36:4 Keremiyaxi Waruki kaniuta'inieni Neriyaxi nu'aya, mɨkɨ tikuxaxatɨwakaku, Waruki tinaka'utɨwakaitɨni xapa mukwikwiyatsie naime Yawé kemɨtitahɨawekai.
JER 36:5 Hikɨ Keremiyaxi Waruki mɨpaɨ katiniutahɨawe: «Nepanutahɨiya nepɨkayɨwe Yawé tukita nemeutahani.
JER 36:6 'Ayumieme kenemie Yawé tukita hakiya tukariyaritsie, muwa kenakaterɨwa teɨteri Kerutsareme kiekatari wahɨxie Yawé niukieya kenemetiutaxatɨa meta xapa mukwikwiyatsie kepemɨraka'utɨa. Yaxeikɨata tsiere yunaime teɨteri Kura kiekatari keniwarakaterɨwiri yukiekaritsie memayeixɨa.
JER 36:7 Heiwatɨ wa'iwaurika Yawé hetsɨa mɨniye'a, yuxexuitɨ memɨtehayewakɨ ke'axaxemɨte'u'uwakɨ, kaniyuritɨni waɨkawa kanimariweni haxɨa Yawé muwarutaxatɨa yamɨtiyurienikɨ 'ikɨ teɨteri wahepaɨtsita».
JER 36:8 Waruki Neriyaxi nu'aya yakatinikayani Kakaɨyari niukameya Keremiyaxi kemɨtita'aitɨakai: Yawé tukieyata, xapa mukwikwiyatsie kemɨraye'ukai kanakaterɨwa.
JER 36:9 'Atanauka metseriyaritsie 'auxɨwime wiyari ti'aitakaku Kuhatsimi Kutsiyaxi nu'aya, Kura kwieyaritsie ti'aitame, yunaitɨ Kerutsareme kiekatari meta hipame Kura kiekariteyaritsie memayeixɨakai kiekatari, meniuta'inierieni memuyuhakienikɨ Yawé hetsiemieme.
JER 36:10 Waruki wapaitɨ kaneutiyani Yawé tuki takwa 'upaitɨ, Kitenie Mɨhekwa mɨtitewa mɨranutahakitɨretsie, mana Kemariyaxi Tsapani nu'aya memuwayutixexeɨriwatsie paitɨ, kemɨtiuyɨ ti'utɨwame, xapa mukwikwiyatsie Keremiyaxi niukieya maye'ukai kanekaterɨwa yunaime teɨteri wahɨxie.
JER 36:11 Mikahiyaxi Kemariyaxi nu'aya Tsapani teukarieya, naime Yawé niukieya kaniu'enieni xapa mukwikwiyatsie maye'ukai.
JER 36:12 Hikɨ kaneyani ti'aitame paratsiyuyata, kemɨtiuyɨ ti'utɨwame kiita, hakewa memeyuxeɨriekai yunaitɨ memanuyetei, tatsɨari, kemɨtiuyɨ ti'utɨwame 'Eritsama, Rerahiyaxi Tsemahiyaxi nu'aya, 'Erinatani 'Akuwuxi nu'aya, Kemariyaxi Tsapani nu'aya, Tserekiyaxi 'Ananiyaxi nu'aya meta yunaitɨ memanuyetei.
JER 36:13 Mikahiyaxi naime katiniwarutaxatɨani tita mɨtiu'eni Waruki mɨrakaterɨwakai teɨteri wahɨxie.
JER 36:14 Hikɨ yunaitɨ memanuyetei Yehuri Netaniyaxi nu'aya mekanenɨ'ani, Tseremiyaxi teukarieya, Kutsi tutsieya, Waruki mɨpaɨ mɨtitahɨawekɨ: «Xapa mukwikwiya teɨteri wahɨxie pemekaterɨwaxɨ kenahurietɨ, kenamie». Waruki Neriyaxi nu'aya xapa 'utihurieka wahetsɨa kaninuani.
JER 36:15 Hikɨ memanuyetei mɨpaɨ mekatenitahɨawe: —'Akenayerɨka ketanakaterɨwiri mɨkɨ xapa mukwikwiyatsie kemɨraye'uxa. Waruki wahɨxie kanekaterɨwa.
JER 36:16 Kepauka mekanɨ, kwinie metemamatɨ kwi mekaniyuxexeiyakaitɨni, mɨpaɨ metenitahɨawe: —Hikɨmɨ 'ikɨkɨ naime mɨpaɨ tepɨte'itahɨawe ti'aitame.
JER 36:17 Hikɨ Waruki mɨpaɨ mekateniuta'iwawiya: —Ketatineutaxatɨa, ¿kepereimaika kuta 'ikɨ pepɨraka'utɨa? ¿Keremiyaxitsɨ menetaxatɨa?
JER 36:18 Waruki mɨpaɨ katiniwaruta'eiya: —Huu, mɨkɨ pɨneretaxatɨa, neta xapa mukwikwiyatsie yɨwimekɨ nepɨraka'utɨa.
JER 36:19 Hikɨ memanuyetei Waruki mɨpaɨ mekateniutahɨawe: —'Ekɨ meta Keremiyaxi, xekeneyuti'awieta. Xewitɨ karakumaikaku hakewa xemeyu'awieta.
JER 36:20 Xapa mukwikwiya me'uku'eirieka kemɨtiuyɨ ti'utɨwame 'Eritsama kiita, memanuyetei takwa mekaniu'axɨani, ti'aitame hɨxie, mɨpaɨ mekatenitahɨawe kemɨtiuyɨkai.
JER 36:21 Ti'aitame, Yehuri kaniutanɨ'ani xapa mukwikwiya muwaumiekɨ, Yehuri neyani 'Eritsama memuwayutixexeɨriwatsie xapa mukwikwiya nekuhurieni nekaterɨwa ti'aitame hɨxie meta yunaime memanuyetei wahɨxie hamatɨana memayetekai.
JER 36:22 'Atanauka metseriyaritsie mekaniyɨakaitɨni, 'ayumieme ti'aitame yukiita nayekateitɨni muhaɨtɨkaikɨ, tɨɨ tatɨkaime 'aurie nikɨxekaitɨni.
JER 36:23 Kepauka Yehuri yapapaɨmeme mɨyeterɨwarɨmekai hahaikakame yatɨni nanaukakame, ti'aitame ti'utɨwame nawaxayakɨ nenuxitekekaitɨni taipa neiwiwakaitɨni. Mɨpaɨ xapa mukwikwiya naime katiniutaxɨtɨani, naitɨ taipa kaniutaxɨni.
JER 36:24 Ti'aitame meta memanuyetei tɨma mepɨka'utimama, nitɨma yukamixa mepɨkaheukatsanaxɨa.
JER 36:25 Mɨpaɨ ti'aitame katiniuyurieni, me'iku'imaiyakakutɨtɨ 'Erinatani, Rerahiyaxi meta Kemariyaxi xapa mukwiwiya mɨkatataiyanikɨ, peru ti'aitame pɨkawaru'eni.
JER 36:26 Matsi pɨta Kerameri kaniutanɨ'ani yuniwe 'uki, Tserahiyaxi 'Atsirieri nu'aya, meta Tseremiyaxi 'Awɨreri nu'aya, ti'utɨwame Waruki memuwiyakɨ meta Kakaɨyari niukameya Keremiyaxi. Peru Yawé puwaruti'awietakairi.
JER 36:27 Ti'aitame xapa mukwikwiya 'utataiyakuri Waruki mɨraka'utɨakai Keremiyaxi tikuxaxatɨwakaku, Yawé niukieya Keremiyaxi hetsɨa kaninuani:
JER 36:28 «Tawari xeime xapa mukwikwiya keneutihurieka, yaxeikɨa ketineu'utɨa xeime xapa mukwikwiyakaitsie kemɨreuku'ukai, Kuhatsimi mitataiyaxɨ, Kura kwieyaritsie ti'aitame.
JER 36:29 Mɨpaɨ Kuhatsimi ketineuta'imaiya, Yawé mɨpaɨ kanaineni: “'Ekɨ 'iya xapa mukwikwiyakai peputataiyaxɨ, mɨpaɨ pe'utaitɨ: ‘¿Titayari 'ena peraka'utɨa kename Wawiruniya kwieyaritsie ti'aitame 'uhamie 'ikɨ kwie mɨka'unakɨ meta yunaime mɨtiwatayuniyakɨ teɨteri meta tewaxi?’ ”
JER 36:30 'Ayumieme Yawé mɨpaɨ kanaineni, Kuhatsimi, Kura kwieyaritsie ti'aitame hetsiemieme: “Xewitɨri mɨkɨ nuiwarieya Rawiri 'uwenieyatsie pɨkahayerɨni, kaxarieya nehɨiyamɨkɨ, xɨripa nihuimɨkɨ meta tɨkarikɨ haɨtɨpa kaniukaikamɨkɨ.
JER 36:31 Nekatinikwinitɨamɨkɨ 'axakemɨtiuyurikɨ, xiɨyarimama meta te'i'uximayatsiriwamete. Wahetsiemieme nekanenɨnɨ'amɨkɨ, meta Kerutsareme meta Kura kiekatari wahetsiemieme, nekatiniwaranɨnɨ'airiemɨkɨ 'axamɨti'anene tita nemɨtiwarutaxatɨakai, memɨkanetsi'anu'enikɨ”».
JER 36:32 Hikɨ Keremiyaxi tawari xeime xapa mukwikwiya kaniutihurieni, ti'utɨwame Waruki kaniuhuritɨani Neriyaxi nu'aya. Waruki xapa mukwikwiyatsie katinaka'utɨani naime Keremiyaxi kemutayɨ, matɨari xapa mukwikwiyakai hepaɨ ni'anekaitɨni, ti'aitame Kuhatsimi mitataiyaxɨ. Matsi tawari waɨkawa nanutinɨitɨarieni hepaɨna ranɨyɨtɨkaitɨ.
JER 37:1 Wawiruniyatsie ti'aitame Nawukurunutsuxi, Kura kwieyaritsie mɨti'aitametɨnikɨ Tserekiyaxi, Kutsiyaxi nu'aya kananukakeni, Kekuniyaxi Kuhatsimi nu'aya hetsiemieme.
JER 37:2 Peru Yawé niukieya mepɨka'u'eni Keremiyaxi kemɨtiwarutaxatɨakai, Tserekiyaxi meta nɨ'arimama, ni teɨteri Kura kwieyaritsie memɨtamakai.
JER 37:3 Hikɨ ti'aitame Tserekiyaxi, Kukari Tseremiyaxi nu'aya meta mawari wewiwame Tsupuniyaxi Matsehiyaxi nu'aya, Kakaɨyari niukameya Keremiyaxi mɨpaɨ memɨtehetahɨawekɨ: «Tahetsiemieme keneuyutanenewi, Yawé takakaɨyari pewawirietɨ».
JER 37:4 'Ana 'akuxi Keremiyaxi teɨteri watsata kaniuyeikakaitɨni, kapanutahɨiyawekai 'akuxi.
JER 37:5 Mɨkɨ tukaritsieta Parahuni kuyaximama mekanayekɨnekaitɨni 'Ekipitu kwieyaritsie. Kepauka wawiruniyutsixi memɨte'utamari Kerutsareme mekunatɨ hikɨ 'ana menekɨne.
JER 37:6 Yawé niukieya Kakaɨyari niukameya Keremiyaxi hetsɨa kaninuani:
JER 37:7 «Yawé mɨpaɨ kanaineni, 'Ixaheri Kakaɨyarieya: “Mɨpaɨ xeketenetahɨawi ti'aitame Kura kwieyaritsie mieme mɨxehetanɨ'a xemɨnetsita'iwawiyakɨ: ‘Parahuni kuyaximama memayekɨ mexeparewienike, mekanakunuaxɨakuni 'Ekipitu paitɨ.
JER 37:8 Wawiruniyutsixita mekanakunuaxɨakuni 'ikɨ kiekari memɨka'unakɨ, menixetiwiyakuni, 'ana kiekari menitataiyakuni’ ”.
JER 37:9 »Yawé mɨpaɨ kanaineni: “Mɨpaɨ xepɨkateku'eriwani kename wawiruniyutsixi meyehu. Yakɨ xekateniku'eriwani. Mɨkɨ mepɨkayehu.
JER 37:10 Tsepa yunaime xemɨtewarukwi kuyaxi wawiruniyutsixi, hipatɨ xeikɨa xɨka meyuhayewake mete'uka'eniwatɨ mematiteitsie, mɨkɨ mekananuku'uikuni kiekari mekanitataiyakuni”».
JER 37:11 Kepauka Parahuni kuyaximama me'ayekɨneku, kuyaxi wawiruniyutsixi Kerutsareme memuku'eiri,
JER 37:12 'ana Keremiyaxi Kerutsareme nayeyanikekaitɨni Wenikamini kwieyaritsie niyemiekaitɨni, mana 'iwamama wakwie mɨyetuiriyarienikekai ranupiinike.
JER 37:13 Hikɨ Wenikamini kitenieyaritsie hautahaximekaku, Kakaɨyari niukameya Keremiyaxi, kuyaxi tiwa'aitɨwame 'Iriyaxi Tseremiyaxi nu'aya, Kananiyaxi teukarieya, mɨpaɨ katinitahɨawe: —'Ekɨ wawiruniyutsixi pewatinɨnike pekaniyɨaneni.
JER 37:14 Keremiyaxi mɨpaɨ katinitahɨawe: —Yakɨ pepaine, ne wawiruniyutsixi nepɨwatinɨni nepɨkatiku'eriwa. Peru 'Iriyaxi yakɨ tinita'eririeni, 'iwiyaka kaneihana memanuyetei wahetsɨa.
JER 37:15 Mɨkɨ waɨkawa mekaniuyeha'ani Keremiyaxi hepaɨtsita, meheitiwaxɨaka menenutahɨani kemɨtiuyɨ ti'utɨwame Kunatani kiita, katsariyana memayeitɨata.
JER 37:16 Mɨpaɨ Keremiyaxi katinanutahɨiyani, watixawakaku neukahɨiyani, mɨixa tukari muwa natiwekaitɨni.
JER 37:17 Ti'aitame Tserekiyaxi katiniutanɨ'ani Keremiyaxi mɨ'atɨarienikɨ paratsiyuyata, muwa kanita'iwawiya 'awie: —¿Tawari Yawé niukieya 'ahetsɨa katiye'awe? Keremiyaxi mɨpaɨ katinita'eiya: —Huu, ti'aitame pekaniyetuiyamɨkɨ ti'aitame Wawiruniya kiekame hetsɨa.
JER 37:18 Hikɨta, Keremiyaxi ti'aitame Tserekiyaxi kaniuta'iwawiya: —¿Ketita 'axanetiuyuri 'ahepaɨtsita ti'aitame, yatɨni pemɨtiwa'aitɨa wahepaɨtsita, yatɨni 'ateɨterima wahepaɨtsita, ketitayari peneranutahɨa?
JER 37:19 ¿Hakewari Kakaɨyari niukametemama, memɨtexekuxaxatɨwakai mɨpaɨ me'utiyuatɨ, kename Wawiruniyatsie ti'aitame kaxetakwinikekai xeme meta 'ikɨ kwieyari?
JER 37:20 Peru hikɨ yemekɨ nepɨmatsiwawirie ti'aitame pepɨnetsi'enieni, tawari pepɨkanetsihenɨ'awani kemɨtiuyɨ ti'utɨwame Kunatani kiita, muwa titɨ nemɨnemɨ.
JER 37:21 Hikɨ ti'aitame Tserekiyaxi, Keremiyaxi kaniuta'aita kuyaxi watakwa mɨyewiyanikɨ, mexi paa xuawekai kiekaritsie, katiniuta'aita mukumikiwanikɨ paa huxunuta mukwaxiyarietɨka, mawewiya kayeyaritsie. Mɨpaɨ tinaka'iyuniwakaitɨni tukarikɨ Keremiyaxi kuyaxi watakwa.
JER 38:1 Tsepatiyaxi Matani nu'aya, Kerariyaxi Patsuxi nu'aya, Kukari Tseremiyaxi nu'aya meta Patsuxi Marikiyaxi nu'aya, mɨpaɨ mekateniumarieni kename Keremiyaxi mɨpaɨ tiwakɨhɨawekai teɨteri:
JER 38:2 «Yawé mɨpaɨ kanaineni: “Kemɨ'ane 'ikɨ kiekaritsie muyuhayewa kanimɨmɨkɨ haakakɨ, 'ixiparakɨ yatɨni kwiniyakɨ. Peru kemɨ'ane wawiruniyutsixi wahetsɨa muyuyetuani kaniuyeikamɨkɨ. Meme'iwapaɨ kaniyuyetuamɨkɨ, 'ana matsi kanitawikweimɨkɨ”.
JER 38:3 Yawé mɨpaɨ kanaineni: “'Ikɨ kiekari Wawiruniyatsie ti'aitame kuyaximama mene'iwakuni meta xenitiwiyariekuni”».
JER 38:4 Memanuyetei ti'aitame mɨpaɨ mekateniutahɨawe: —'Ikɨ tewi tepɨmieni. Mɨpaɨ tikuxatatɨ puwamariuta kuyaxi meta teɨteri 'ikɨ kiekaritsie memuyuhayewatɨwe. 'Ikɨ tewi 'aixɨa mɨti'ane pɨkatikuwaune 'ena kiekatari wahetsiemieme, matsi 'axamemɨ'itɨarienikɨ xeikɨa.
JER 38:5 Ti'aitame Tserekiyaxi mɨpaɨ kaniutayɨni: —Nepɨxeyetuirie. Ne tsepa nemɨti'aitame xeme nexe'aye'unietɨ nepɨka'ayani.
JER 38:6 Hikɨ mɨkɨ Keremiyaxi me'uwiyaka, kaunarikɨ me'iwiwitɨatɨ putsuta mekaneikahɨani kuyaxi watakwa, Marikiyaxi kaniputsuyatɨkaitɨni ti'aitame nu'aya. Peru mɨkɨ putsuta haa pɨka'uyemakai, haxu xeikɨa puyekatei mɨkɨta Keremiyaxi kaniukahanieni.
JER 38:7 'Etiupe tewiyari 'Ewemereki, ti'uximayatame ti'aitame hetsiemieme, katiniutamarieni kename putsuta Keremiyaxi heukahɨiyakai. Hikɨ kepauka mɨrakuxaxatsiwa ti'aitame 'uyeikakaku Wenikamini 'itupariyari meuwietsie,
JER 38:8 'Ewemereki paratsiyuta kaniwayeyani mɨpaɨ katinitahɨawe:
JER 38:9 —Ti'aitame meta neti'aitɨwame, 'iku teɨteri 'axamepɨte'uyuri. Keremiyaxi putsuta mepeukahɨa, muwa haakakɨ kanimɨmɨkɨ, paa mumawekɨri 'ikɨ kiekaritsie.
JER 38:10 Hikɨ ti'aitame 'etiupe tewiyari 'Ewemereki mɨpaɨ katiniuta'aitɨani: —Yuhaikame 'ukitsi keniwareta'inieka Keremiyaxi xekenewatihani putsuta mexi kahemɨwe.
JER 38:11 'Ewemereki mɨpaɨ katiniuyurieni, meta paratsiyuta neutahani 'ixurikite mɨrewati'utsiwatsie, meripaitɨ timieme rewayehurieka, putsuta Keremiyaxi tineukatuirieni kaunaritsie.
JER 38:12 'Ewemereki Keremiyaxi mɨpaɨ katiniutahɨawe: —'Axetɨa keneuta'itaxɨa 'ikɨ 'ixurikite 'axamɨti'anene, kaunari mɨkamerekwinitɨakakɨ. Mɨpaɨ katinikayani Keremiyaxi.
JER 38:13 'Ukitsi kaunari muwa meheukawiwieka mekanewatihana putsuta. Keremiyaxi kuyaxi watakwa kaniyuhayewa.
JER 38:14 Tserekiyaxi ti'aitame katiniuta'aita Keremiyaxi manuwitɨkienikɨ Yawé tukita hairieka kitenieyaritsie, muwa mɨpaɨ katinitahɨawe: —Tixaɨtɨkɨ nepɨmatita'iwawiya, ximɨxixi tixaɨtɨ pepɨkaneranukanamiriwani.
JER 38:15 Keremiyaxi mɨpaɨ ti'aitame katiniuta'eiya: —Xɨka nemetsi'utaxatɨani neti'aitɨwame, 'ekɨ pekanenita'aitamɨkɨ nemumierienikɨ. Xɨka nemetsi'uta'ɨxatsitɨani, pekapɨnetsi'enieni.
JER 38:16 Peru Tserekiyaxi 'awie mɨpaɨ Keremiyaxi katiniutahɨawe: —Yawé hɨxie mɨpaɨ nepɨmerahɨawe, tukari mɨtatsi'upitɨa, nepɨkamatsimieni meta nepɨkamatsiyetuani 'ikɨ memetsimieku wahetsɨa.
JER 38:17 Keremiyaxi mɨpaɨ Tserekiyaxi katiniutahɨawe: —Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “Xɨka 'ekɨ ti'aitame peyutatuani kuyaxi tewa'aitɨwamete Wawiruniya kwieyaritsie ti'aitame hetsɨa miemete wahetsɨa, pekanitawikweimɨkɨ meta 'ikɨ kiekari pɨkatataiyarieni, 'Ekɨ ti'aitame meta 'atɨɨriyama 'amekaniu'uwakuni.
JER 38:18 Peru xɨka pekayuyetuani kuyaxi tewa'aitɨwamete Wawiruniya kwieyaritsie ti'aitame hetsɨa miemete wahetsɨa, karireutsixi 'ikɨ kiekari mekana'iwakuni, kanitataiyariemɨkɨ meta xeme xemuyuta'una xepɨkayɨwekaxɨani”.
JER 38:19 Tserekiyaxi ti'aitame mɨpaɨ kaniutayɨni: —Ne huriyutsixi nepɨwareumakaxe wawiruniyutsixi memɨwarutinɨi, titɨtɨ mɨkɨ wahetsɨa nemɨniyetuiya memɨnetsitinanaimanikɨ.
JER 38:20 Keremiyaxi mɨpaɨ katinita'eiya: —Ti'aitame Yawé niukieya keneu'enieka ne kenemetikuxaxatɨwa, 'ana wawiruniyutsixi wahetsɨa pepɨkayetuiyani. 'Ekɨ 'ana 'atsipepɨkaranuyeyani, 'atukari pepɨtawikweitsitɨani.
JER 38:21 Peru xɨka heitseriemekɨ pekayuyetuani, Yawé mɨpaɨ kanetinahɨaweni:
JER 38:22 Yunaitɨ 'ukarawetsixi Kura kwieyaritsie ti'aitame paratsiyuyata memuyuhayewatɨwe mekaniyetuiyakuni kuyaxi tewa'aitɨwamete Wawiruniya kwieyaritsie ti'aitame hetsɨa miemete wahetsɨa, mɨkɨta mɨpaɨ mekanitiyuakuni 'ahepaɨtsita: »“'Ahamikuma 'aixɨa pemɨtiwamate mekameniu'itani meta mekamena'iwa. 'A'ɨkate peuyuyune haxupa, 'ahamikuma mepɨmetsi'uku'eiri”.
JER 38:23 »Yunaitɨ 'ukarawetsixi meta 'aniwema 'ukitsi mekaniyetuiyakuni wawiruniyutsixi wahetsɨa, 'ekɨta ti'aitame pepɨkayɨwekaxɨani pemɨ'ata'unakɨ, matsi Wawiruniyatsie ti'aitame hetsɨa pekaniyetuiyamɨkɨ meta kiekari kanayetaiyariemɨkɨ».
JER 38:24 Tserekiyaxi Keremiyaxi mɨpaɨ katiniuta'eiya: —'Ikɨ niukiyari hepaɨtsita xewitɨ pɨkatimaika, nɨkahɨrixɨa pe'umɨni.
JER 38:25 Xɨka memanuyetei metehetimani kename ne 'ahamatɨa netiutaxa, xɨka me'u'axɨame mɨpaɨ memete'utahɨawe: “Ketatineutaxatɨa ti'aitame kehepaɨ pemɨtiutahɨawixɨ, meta mɨkɨ kehepaɨ metiutahɨawixɨ, tixaɨtɨ pepɨkataranukanamirieka, mexɨka pekatiutaxata tame tekamenimiekuni”,
JER 38:26 'ekɨta mɨpaɨ pekatiniwatahɨawimɨkɨ: “Ti'aitame netawawirienike nepunua tawari mɨkanetsihenɨ'awanikɨ Kunatani kiita, muwa nehemɨnikɨ”.
JER 38:27 Hikɨ mɨpaɨ katiniɨyɨni. Yunaitɨ memanuyetei mekaniu'axɨani Keremiyaxi meti'iwawiyake, peru mɨkɨ kaniwaruta'eiya kehepaɨ mɨtitahɨawekai ti'aitame. Hikɨ mekanihayewa, xewitɨ mɨka'u'enakaikɨ mɨkɨ kememɨte'uxatakai.
JER 38:28 Keremiyaxi Kuyaxi watakwa kaniyuhayewakaitɨni kepaukake Kerutsareme muka'unarie. Kerutsareme mɨpaɨ katiniuka'unarieni:
JER 39:1 Tamamata metseriyaritsie, Tserekiyaxi ti'aitakaku 'atanauka wiyari Kura kwieyaritsie, 'ana ti'aitame Nawukurunutsuxi Wawiruniya kiekame yunaime yukuyaxima warawitɨtɨ Kerutsareme mekaniu'axɨani menaketɨkɨne.
JER 39:2 Naurieka metseriyaritsie, 'atanauka tukaritsie, tamamata heimana xewi wiyaritsie Tserekiyaxi ti'aitakaku, kiekari kuraruyaritsie meneu'ine,
JER 39:3 muwa meneuhaxɨani Wawiruniya kwieyaritsie ti'aitame kuyaximama tewa'aitɨwamete yunaitɨ, kitenie hixɨapa miemetsie menitiyaxe: Nexikari-Tsaretsexi Tsamɨkaxi kiekame, Newu Tsaritsekini, xewitɨ mariwemekɨ mɨhɨritɨarie, Nexikari-Tsaretsexi, meta yunaitɨ ti'aitame Wawiruniyu kiekame hetsɨa miemete memanuyetei memɨhɨkɨtɨkai.
JER 39:4 Waruxeiyaka Tserekiyaxi Kura kwieyaritsie ti'aitame meta kuyaxi yunaitɨ meniuyuta'una, yɨwikɨta meniwayekɨne ti'aitame mɨra'etsa huyeyari 'utɨa, 'itupari hutakuraruyari meuwietsie meniuyekɨne, 'Arawa huyeyari menanukuweiya.
JER 39:5 Peru Kuyaxi wawiruniyutsixi mekaniwaranukuweiya Keriku makuweritsie mekaniwaruye'axe. Mana Tserekiyaxi mekaniuwiya mekaneihana Nawukurunutsuxi ti'aitame Wawiruniyu hetsɨa, Xiwɨra mukatei Kamati kwieyaritsie. Mana yaniutayɨni kemɨ'itɨarienikekai Tserekiyaxi,
JER 39:6 nierekaku niwemama 'ukitsi wakɨipi kananutixitekiexɨani, metatsiere yunaitɨ Kura kiekatari waɨkawa memiparewiekai.
JER 39:7 Hikɨ Tserekiyaxi kaniuta'aitsieni hɨxiteya mayetɨkiexɨanikɨ, wurunitse tepɨayarikɨ kaniuwiwitɨarieni manuhanienikɨ Wawiruniya paitɨ.
JER 39:8 Wawiruniyutsixi paratsiyu mekaniutaiya meta teɨteri wakii, Kerutsareme kuraruyari mekaniuta'una.
JER 39:9 'Imatɨrieka Nawutsararani kuyaxi tiwa'aitɨwame, teɨteri memuyuhayewatɨwekai metatsiere wawiruniyutsixi memuwarutinɨkai, Wawiruniya paitɨ kaniwarehapani.
JER 39:10 Nawutsararani Kuyaxi wa'ukiyari, Kura kwieyaritsie xeikɨa kaniwaruhayewa teɨteri tixaɨtɨ memɨkateheuxeiyakai. Mɨkɨ 'ana kwie kaniwaruxatɨani meta kaxie maye'etsiekai.
JER 39:11 Keremiyaxi hetsiemiemeta, ti'aitame Nawukurunutsuxi Wawiruniya kiekame mɨpaɨ Nawutsararani kuyaxi wa'ukiyari katiniuta'aitɨakaitɨni:
JER 39:12 «'Aixɨa ketine'ɨwiyani pekatikwinitɨatɨ, tita mɨreuyehɨwa naime ketinekupinirieka».
JER 39:13 Kuyaxi wa'ukiyari Nawutsararani, Newutsatsiwani ti'uximayatame waɨkawa mɨtihɨritɨarie, Nexikari-Tsaretsexi xewitɨ mariwemekɨ mɨtihɨritɨarie meta yunaitɨ Wawiruniya kwieyaritsie ti'aitame hetsɨa te'uximayatamete,
JER 39:14 mekateniuta'aita Keremiyaxi muwayehanienikɨ kuyaxi watakwatsie, Kerariyaxi 'Akikani nu'aya hetsɨa mekanihɨani, Tsapani teukarieya, memenuwitɨnikɨ tawari yukie. Mɨpaɨ Keremiyaxi teɨteri wahamatɨa 'uyeikatɨ kanayani.
JER 39:15 'Akuxi Keremiyaxi pɨretsutɨkaku kuyaxi watakwa Yawé mɨpaɨ katinitahɨawe:
JER 39:16 «Kenemie meta 'Ewemereki mɨpaɨ ketinetahɨawi, 'etiupe tewiyari, Yawé Naimekɨmɨtɨrɨkaɨye mɨpaɨ kanaineni 'Ixaheri Kakaɨyarieya: “Neniuki nekanaye'atɨamɨkɨ kenemutayɨ 'ikɨ kiekari hepaɨtsita, 'axamɨti'anekɨ meta hawaikɨ 'aixɨa mɨti'anekɨ. 'Iya tukaritsie, 'ekɨ pekaninierimɨkɨ kepauka mɨpaɨ mɨtiyɨnitsie.
JER 39:17 Peru mɨkɨ tukaritsie ne nemenitawikweitsitɨamɨkɨ, —Yawé mɨpaɨ kanaineni—, teɨteri pemɨwarayemakaxe mepɨkametsi'axe.
JER 39:18 Netsɨ yurikɨ nekamanitawikweitsitɨamɨkɨ, —Yawé mɨpaɨ kanaineni—, pekapɨmierieni 'ixiparakɨ, matsi 'atukari pekana'iwamɨkɨ, nehetsie yuri pemɨtiuta'erikɨ”».
JER 40:1 Yawé niukieya Keremiyaxi hetsɨa kaninuani 'arike Nawutsararani kuyaxi tiwa'aitɨwame 'ixɨnaku Xama kiekariyaritsie. Nawutsararani mana nitaxeiyakaitɨni pɨretsutsiekame hɨakame tepɨakɨ, Kura kiekatari meta Kerutsaremetari wahamatɨa Wawiruniya memanuhapanienikekai.
JER 40:2 Kuyaxi tiwa'aitɨwame Keremiyaxi yuxaɨtame 'uta'inieka mɨpaɨ katinitahɨawe: «Yawé 'akakaɨyari 'ikɨ 'uximatɨarika hetsiemieme mɨpaɨ katiniu'aita 'ikɨ kwieyari hetsiemieme,
JER 40:3 hikɨri Yawé kemutayɨkai kaneye'atɨani. 'Ikɨ naitɨ yapɨtixeyurie Yawé hepaɨtsita 'axaxemɨte'uyurikɨ meta niukieyatsie yaxemɨkatekakɨkɨ.
JER 40:4 Peru hikɨ nekamenixɨnamɨkɨ 'amamatetsie tepɨakɨ pemɨhɨakɨ. Xɨka peheuyeimɨkɨni nehamatɨa Wawiruniya, hikɨmɨtsɨ, ne nekamaneta'ɨwiyamɨkɨ. Xɨkata yapekara'eriwani, keneukunua. Keneutanierixɨa kemakuyewa, hakewa metsihekunanakeni kenemie».
JER 40:5 Keremiyaxi 'atsikahainekaku, Nawutsararani tawari mɨpaɨ tinitahɨawe: «Kenemie Kerariyaxi 'Akikani nu'aya hetsɨa, Tsapani teukarieya, ti'aitame Wawiruniya kiekame kanenukakeni Kura kiekariyaritsie kuwexinaruri mɨhɨkɨtɨnikɨ, hamatɨana keneyeikani meta 'ateɨterima wahamatɨa, yatɨni tsepa hakewa mɨmatsihenakeni». Hikɨ kuyaxi tiwa'aitɨwame tinimini 'ikwai meta 'imikieri, hikɨ nitatuani.
JER 40:6 Hikɨ Keremiyaxi neyani Kerariyaxi 'Akikani nu'aya hetsɨa, Mitsipa kiekariyaritsie, hamatɨana niuyuhayewa kiekari hixɨapa, kiekari 'akuxi muyuhayewanekai mɨkɨ kwieyaritsie.
JER 40:7 Kepauka memɨtehetima memanuyetei meta kuyaxi yeuta memɨtitekai kename ti'aitame Wawiruniya kiekame Kerariyaxi 'anukakekai 'Akikani nu'aya, mɨkuwexinaruritɨnikɨ mɨkɨ kwieyaritsie, kename 'ihɨritɨakai 'aixɨa mɨtimaikaikɨ teɨteri 'ukitsi, 'ukarawetsixi metatsiere tɨɨri, meta tixaɨtɨ memɨkateheuxeiya mɨkɨ kwieyaritsie memɨtamakai 'akuxi Wawiruniya memɨkahehapaniewawekai,
JER 40:8 hikɨ menekɨne Mitsipa Kerariyaxi hetsɨa meheyutaxatake. Menihɨkɨtɨkaitɨni: 'Itsimaheri Netaniyaxi nu'aya, Kuhanahani Kunatani Kareya niwemama 'ukitsi, Tserahiyaxi Tanikumeti nu'aya, 'Epahi niwemama 'ukitsi Netupa kiekame, meta Ketsaniyaxi Mahaka kiekame nu'aya teɨterimama yunaitɨ.
JER 40:9 Kerariyaxi, 'Akikani nu'aya, Tsapani teukarieya, mɨpaɨ tiniwarutahɨawe meta teɨterimama: «Wawiruniyutsixi xepɨkawamakaka. Xɨka xeme 'ena xeyuhayewani 'ikɨ kwieyaritsie xeheyexeiyatɨ ti'aitame Wawiruniya kiekame, ne mɨpaɨ nepaine 'aixɨa 'iyari xepu'uwani.
JER 40:10 Ne Mitsipa neniyuhayewakamɨkɨ xehetsiemieme nemaniukanikɨ wawiruniyutsixi wahetsɨa 'enapai memɨye'axetsie. Peru xeme xeketenetsutɨaka xete'utatɨ kaxie winuyari, 'ikwaxi wita timieme meta hatseiti, kiekaritsie xekeneutiteni hakewa xemetitekai».
JER 40:11 Yunaitɨ huriyutsixi Muhawi memu'uwakai 'Amuni meta 'Erumi, metatsiere hipame kwieyaritsie memu'uwakai, mɨpaɨ metenetimani kename ti'aitame Wawiruniya kiekame yayupaɨmeme waruhayewakai Kura kwieyaritsie mieme, kuwexinarurikɨ 'enukakeka Kerariyaxi, 'Akikani nu'aya, Tsapani teukarieya.
JER 40:12 Hikɨ yunaitɨ huriyutsixi meniu'axɨani Kura kwieyaritsie, naitsarie hakewa memekɨnekai. Me'u'axɨaka Mitsipa meniyutaxata Kerariyaxi hetsɨa, mɨkɨtatsiere kaxie winuyari meniuti'ɨna meta 'ikwaxi wita timieme waɨkawame.
JER 40:13 Kuhanahani Kareya nu'aya, meta yunaitɨ memanuyetei, kuyaxi meyɨnɨtɨ yeuta memetitekai, meniyutaxata Kerariyaxi hetsɨa Mitsipa kiekariyaritsie,
JER 40:14 mɨpaɨ mekatenitahɨawe: —¿Petimate Warixi ti'aitame 'Amuni kiekame, 'Itsimaheri meyenɨ'a Netaniyaxi nu'aya mumetsimienikɨ? Peru Kerariyaxi, 'Akikani nu'aya yuri pɨkatiwaruta'eriri.
JER 40:15 Mitsipa kiekariyaritsie Kuhanahani Kareya nu'aya mɨpaɨ Kerariyaxi katiniutahɨawe 'awie: —Keneneupitɨa 'Itsimaheri Netaniyaxi nu'aya nemumiemiekɨ. Xewitɨ 'atsikatimaikaku. ¿Ketitayari tete'i'eirieka mɨmetsimienikɨ? Matsi xɨka mɨpaɨ tiɨyɨni mekanitayeixɨakuni huriyutsixi 'a'aurie memu'axɨa, mekaneuyewekuni keyupaumetɨ memuyuhayewatɨwe Kura kiekariyaritsie.
JER 40:16 Peru Kerariyaxi, 'Akikani nu'aya mɨpaɨ Kuhanahani Kareya nu'aya katiniuta'eiya: —Mɨpaɨ pepɨkatiku'eriwani. Pɨ'itarika kepemaine 'Itsimaheri hetsiemieme.
JER 41:1 'Atahutarieka metseriyaritsie 'Itsimaheri Netaniyaxi nu'aya 'Eritsama teukarieya, te'aitamete wanuiwari wahetsie mayenekai meta ti'aitame ti'uximayatsiriwame meripaitɨ mɨhɨkɨtɨkai, Mitsipa kiekariyaritsie kaninuani tamamata teɨteri warawitɨtɨ, Kerariyaxi 'Akikani nu'aya hetsɨa niuyutaxata. Mitsipa kiekariyaritsie metekwatɨ yunaitɨ,
JER 41:2 'Itsimaheri Netaniyaxi nu'aya kananukukeni meta tamamata memeweiyakai yunaitɨ, Kerariyaxi 'ixiparakɨ kaniumieni 'Akikani nu'aya, Tsapani teukarieya. Mɨpaɨ mekatenimieni kemɨ'ane manukakeriekai kuwexinarurikɨ mɨkɨ kwieyaritsie miemekɨ ti'aitame Wawiruniya kiekame menukakekai.
JER 41:3 Meta 'Itsimaheri yunaime kaniwarukwini huriyutsixi meta kuyaxi Mitsipa kiekariyaritsie memɨtitekai Kerariyaxi hamatɨa.
JER 41:4 'Uxa'arieka kepauka 'akuxi xewitɨ 'atsimɨkatimaikai Kerariyaxi 'umierieku,
JER 41:5 meniu'axɨani Tsikeni, Tsiru, Tsamariya me'ayenexɨaka nauka tewiyari teɨteri yumɨxiya me'ataxitɨkaitɨ, yukamixa meheukatsanatɨkaitɨ, meheuxitekietɨkaitɨ yɨkɨmana mɨyameheyutiyurieka. Metenapikaitɨni hatsite mawariyari, 'ɨkwa, me'iyetuanike Yawé kiita.
JER 41:6 Mitsipa yeyaka 'Itsimaheri Netaniyaxi nu'aya, niwarekunake 'utatsuatɨ, mɨpaɨ tiniwarutahɨawe: —Xekenaxeiyayu Kerariyaxi, 'Akikani nu'aya.
JER 41:7 Meka'aye'axɨawawekaku 'akuxi kiekari hixɨapa, 'Itsimaheri Netaniyaxi nu'aya meta teɨterimama memeweiyakai mekaniwarukwini meta watixawakaku mekaniwareukaxɨrieni.
JER 41:8 Hipatɨ mɨkɨ wahamatɨa memuhukai tamamata 'Itsimaheri meniutawawirieni waɨriyarika mɨpaɨ me'utiyuatɨ: —Pepɨkatatsikukukuyani, 'ɨtsita tepɨtehe'awieta tɨriku, tsewara, hatseiti meta xiete. 'Itsimaheri waru'enieka pɨkawarukwi wa'iwama wahepaɨ.
JER 41:9 Ti'aitame 'Atsá putsu kaniutawewiekaitɨni kepauka Watsaha 'Ixaheritsie ti'aitame mitamiekaitsie, mɨkɨ putsu 'Itsimaheri kaniutahɨniya teɨteri muwarukwi wahekɨ meta Kerariyaxi muwa kaneukahɨani.
JER 41:10 Mɨya tiuyurieka 'Itsimaheri niwarehapani ti'aitame niwemama 'ukari meta yunaime teɨteri memuyuhayewatuwekai Mitsipa kiekariyaritsie, Nawutsararani kuyaxi tiwa'aitɨwame Kerariyaxi mɨhɨritɨakai, 'Akikani nu'aya. 'Itsimaheri, Netaniyaxi nu'aya nayeyani warahapatɨ 'amunitsixi wakwieyaritsie hepa.
JER 41:11 Kepauka Kuhanahani, Kareya nu'aya meta yunaitɨ kuyaxi tewa'aitɨwamete hamatɨana memu'uwakai, memɨtehetima 'Itsimaheri Netaniyaxi nu'aya kemɨtiuyuriekai,
JER 41:12 yuteɨterima mewarukuxeɨrieka mekanekɨne memeitamienikɨ. Mekaniwaranuku'axe haa waɨkawa matiniere 'aurie Kawahuni kiekariyaritsie.
JER 41:13 Hikɨ 'Itsimaheri memaweiyakai kuyaxi mekaniyukatemamawieni Kuhanahani me'uxeiyaka Kareya nu'aya, yunaitɨ kuyaxi tewa'aitɨwamete me'eweiyakaku.
JER 41:14 Yunaitɨ teɨteri 'Itsimaheri Mitsipa mɨwayehapa Kuhanahani Kareya nu'aya hetsɨa pɨta menekɨne.
JER 41:15 Peru 'Itsimaheri Netaniyaxi nu'aya meta 'atahaikatɨ teɨterimama mekaniuyuta'una 'Amuni kwieyaritsie paitɨ mekaniyuta'una.
JER 41:16 Hikɨ Kuhanahani Kareya nu'aya, yunaitɨ kuyaxi tewa'aitɨwamete memeweiyakai, meniwarutawikweitsitɨani Mitsipa 'Itsimaheri Netaniyaxi nu'aya mɨwayehapakai, Kerariyaxi 'umieka 'Akikani nu'aya, mɨkɨ mekanihɨkɨtɨkaitɨni: kuyaxi, 'ukarawetsi, tɨɨri, meta te'uximayatamete memɨmamariwawe.
JER 41:17 Menekɨne Keruti-Kimani meniye'axɨani Wereni 'aurie, 'Ekipitu menitayunekekaitɨni mɨpaɨ mana meteniku'eriwakaitɨni
JER 41:18 meyuta'unake wawiruniyutsixi mewamakatɨ. Waɨkawa menimamakaitɨni, 'Itsimaheri Netaniyaxi nu'aya Kerariyaxi mumiekaikɨ 'Akikani nu'aya, ti'aitame Wawiruniya kiekame kuwexinarurikɨ menukakekai mɨkɨ kwieyaritsie miemekɨ.
JER 42:1 Hikɨ Kuhanahani Kareya nu'aya meta 'Atsariyaxi 'Utsahiyaxi nu'aya, meta kuyaxi wa'ukiyarima meyunɨtɨ meta yunaitɨ teɨteri tɨɨri 'etsimemɨyumate meta memu'ukirawetsixi,
JER 42:2 mɨpaɨ Kakaɨyari niukameya Keremiyaxi mekateniutahɨawe: —Neuxei ketaneu'eni ketemutiyuane, Yawé 'akakaɨyari keneutahɨawi tame temɨtahayewatɨwe tahetsiemieme. Pekatinimaika meripaitɨ waɨkawa temɨhɨkɨtɨkai hikɨri 'etsitekaniyupaɨmeni.
JER 42:3 Yawé 'akakaɨyari keneutahɨawi ketatsi'uxeitsitɨani huye ke'aneme temanukuweiya meta ketemɨteyurieka.
JER 42:4 Keremiyaxi mɨpaɨ katiniwaruta'eiya: —'Aixɨa pɨ'ane. Yawé nekanitahɨawimɨkɨ, xekakaɨyari, kexemaitɨka. Nepɨtixetaxatɨani naime kemɨnetitahɨawe, nitixaɨtɨ nepɨkatixe'anukanamirieni.
JER 42:5 Mɨkɨta mɨpaɨ Keremiyaxi mekateniutahɨawe: —Yawé 'akakaɨyari kehɨkɨtɨni munierixɨ yuri mɨtikuxata tahepaɨtsita mieme, xɨka yatekatekakɨne mɨkɨ kemɨtatita'aitɨani 'ekɨ yapetatitaxatɨayu.
JER 42:6 Xɨka tatsinakimɨkɨ yatɨ pɨkatatiunakixɨ, tame Yawé takakaɨyari kemɨtayɨni yatetenikakɨnikuni, mɨkɨ kemɨ'ane hetsɨa temɨmatsinɨ'a. Mɨpaɨ Yawé takakaɨyari niukieya te'anu'enieme, 'aixɨa 'iyari te'u'uwatɨ tekanakɨnikuni.
JER 42:7 Tamamata tukari 'anukayaku, Yawé niukieya Keremiyaxi hetsɨa kaninuani.
JER 42:8 Hikɨ Kuhanahani kaniuta'inieni Kareya nu'aya meta yunaime kuyaxi wa'ukiyarima memeweiyakai, metatsiere yunaime teɨteri 'etsimemuyumate meta 'ukirawetsixi,
JER 42:9 mɨpaɨ katiniwarutahɨawe: «Mɨpaɨ kanaineni Yawé, 'Ixaheri Kakaɨyarieya, hetsɨana xemɨnetsi'utanɨ'a xehetsiemieme nemɨtitaxatɨanikɨ:
JER 42:10 “Xɨka 'ena xeyuhayewani 'ikɨ kwieyaritsie, ne kii hepaɨ nekanixekatsutɨamɨkɨ, hatsuaku nepɨkaxeka'una, ne nekanixeka'emɨkɨ, hatsuaku nepɨkaxehahuna, hikɨke nemɨ'iyarixiekɨ 'uximatɨarika nexe'upitɨaka.
JER 42:11 Ti'aitame Wawiruniya kiekame xepɨkamakaka, hikɨ xemeyemakaxe, xepɨka'imakaka ne xehamatɨa nekaniuyeikani nexetawikweitsitɨanike mɨkɨ tɨrɨkariyayatsie, —mɨpaɨ kanaineni Yawé—.
JER 42:12 Ne nenixetinenimayatamɨkɨ mɨkɨta kanixetinenimayatamɨkɨ meta kanixepitɨamɨkɨ yukwietsie xemɨ'axɨanikɨ”.
JER 42:13 »Peru xɨka xekahenu'enieni Yawé xekakaɨyari niukieya, xɨka mɨpaɨ xe'utiyuani: “Tame 'ikɨ kwieyaritsie tepɨkatahayewa,
JER 42:14 matsi 'Ekipitu tepɨyehu, kuyaxa memawetsie, hakewa kuxineta temɨkahe'enieni, hakewa temɨkahehaakakwini, mana tekanetitekuni”,
JER 42:15 'ayumieme 'ikɨ Yawé Naimekɨmɨtɨrɨkaɨye 'Ixaheri Kakaɨyarieya niukieya xekeneu'eni, xeme Kura kwieyaritsie kiekatari xemuyuhayewatɨwe: Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “Xɨka xeme xeka'anu'enanani 'Ekipitu pɨta xehekɨne mana xemetitenikɨ,
JER 42:16 kuyaxa waɨkawa xemimakaxe xehetsɨa paitɨ kanenuamɨkɨ, haakaxa xemimakaxe kanixe'anukuweiyamɨkɨ 'Ekipitu paitɨ, hikɨ mana xekanekwikuni.
JER 42:17 Yunaitɨ kemɨ'ane memɨka'enana memɨyehuxime 'Ekipitu paitɨ memetitenikɨ, mekanekwikuni mana kuyaxakɨ meta haakakɨ meta kwiniyakɨ. Nixewitɨ pɨkaheyuhayewa meta nixewitɨ pɨkaheyuta'una mɨkɨ 'uximatɨarikatsata wahetsiemieme nemenunɨ'ani”.
JER 42:18 Mɨpaɨtsɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “Kehepaɨ Kerutsareme kiekatari wahetsiemieme waɨkawa nemɨtiuyeha'a, mɨpaɨta xehetsiemieme waɨkawamekɨ nekatiniyeha'amɨkɨ xɨka xehekɨne 'Ekipitu. 'Axaxe'itɨarietɨ xepakɨne, waɨkawa mepumamaka hipatɨ mexexeiyatɨ, meta xepɨtixani'eriwa xepuyuriyarieka meta hatsuakuri 'ikɨ kwieyaritsie xepɨka'axɨani”.
JER 42:19 »Xemɨyuhayewatɨwe Kura teɨteriyari. Yawé mɨpaɨ katinixehahɨaweni 'Ekipitu xepɨkaheuhuni. Yurikɨ hikɨ ne nekanixehayehɨtɨwani.
JER 42:20 Xeme 'axaxekaniɨyɨni kweriwa 'anekɨa xekaniyuka'uitɨani kepauka xemɨnetsi'utanɨ'a Yawé xekakaɨyari hetsɨa, mɨpaɨ xepɨnete'utahɨawixɨ: Yawé keneutahɨawi, takakaɨyari, tahetsiemieme, ketatineutaxatɨa kemɨtayɨni naime mɨpaɨ yatemɨtekakɨnekɨ.
JER 42:21 Hikɨri nekatinixe'utaxatɨani xeme, peru yaxemɨtekakɨne xepɨkayuwaɨririya Yawé takakaɨyari niukieya kemaine, ni'etsiwatɨma yaxepɨkatekakɨniku.
JER 42:22 Peru mɨpaɨ xeketenemaika hakewa xemeyuhayewaku mana xepekwini kuyaxakɨ, haakakɨ meta kwiniyakɨ».
JER 43:1 Kepauka Keremiyaxi mɨtiutahayewaxɨ teɨteri tiwakuxaxatɨwatɨ naime Yawé Kakaɨyari kemɨtitahɨawekai kemɨtiwataxatɨanikekai,
JER 43:2 'Atsariyaxi 'Utsahiyaxi nu'aya, Kuhanahani Kareya nu'aya, meta yunaitɨ teɨteri memɨyuti'ɨrekai mɨpaɨ Keremiyaxi mekateniuta'eiya: «Kepemɨtikuxata kani'itarikatɨni. Yawé takakaɨyari mɨpaɨ pɨkamerahɨawe kename 'Ekipitu tekaheuhuni mana temetitenikɨ.
JER 43:3 Waruki Neriyaxi nu'aya tahepaɨtsita yapemɨtayɨnikɨ yakametinikɨhɨaweni, tatsiyetuanike wawiruniyutsixi wahetsɨa, memɨtatsikwinikɨ yatɨni temanuhapanienikɨ Wawiruniya paitɨ».
JER 43:4 Hikɨ Kuhanahani Kareya nu'aya meta kuyaxi tewa'aitɨwamete meta nixewitɨ tewi, Yawé kemainekai yapɨkatikatɨa, nixewitɨ pɨka'ukunua Kura kwieyaritsie.
JER 43:5 Matsi pɨta, Kuhanahani Kareya nu'aya meta kuyaxi memanuyetei, mekaniwarewitɨni teɨteri Kura kiekariyaritsie kiekatari memuyuhayewakai, tatsɨari memakunuaxɨakai meripaitɨ memeutayeixɨakai naitsarie kwiepa:
JER 43:6 'ukitsi, 'ukarawetsixi, metatsiere tɨɨri, ti'aitame niwemama 'ukari, yunaitɨ teɨteri Nawutsararani kuyaxi tiwa'aitɨwame Kerariyaxi mɨhɨritɨakai, 'Akikani nu'aya, Tsapani teukarieya, metatsiere Kakaɨyari niukameya Keremiyaxi, meta Waruki Neriyaxi nu'aya.
JER 43:7 Yawé mɨkahaine hepaɨ mekanekɨne 'Ekipitu kwieyaritsie, Tapinetsi kiekariyatsie paitɨ meniu'axɨani.
JER 43:8 Tapinetsi kiekariyaritsie paitɨ Yawé niukieya Keremiyaxi hetsɨa kaninuani:
JER 43:9 «Tetexi 'aneneme keneutitɨki, huriyutsixi wahɨxie keneukateuki haxu mɨtse'ikɨ kenanu'ixuma makukɨraunitsie Parahuni paratsiyuya manutanenitsie Tapinetsi kiekariyaritsie.
JER 43:10 Hikɨ mɨpaɨ ketiniwarutahɨawi mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “Neti'uximayatsiriwame Nawukurunutsuxi muwawiemiekɨ nekatinitanɨ'amɨkɨ ti'aitame Wawiruniya kiekame, 'ikɨ tetexi heima nekanekemɨkɨ 'uwenieya, mana ti'aitame xamaruya kanitakemɨkɨ.
JER 43:11 'Ekipitu kwieyaritsie kaninuamɨkɨ kanitamiemɨkɨ, 'ana hipatɨ mekanikwi'iwakuni, kemɨ'ane memɨkwi'iwakekai, hipatɨta 'ana mekananuhapaniekuni xeime kwieyaritsie, kemɨ'ane memanuhapanienikekai, hipatɨta 'ixiparakɨ memukwi'iwakekai, 'ixiparakɨ mekanikwi'iwakuni.
JER 43:12 Tuki kanititaiyamɨkɨ 'ekipitutari kakaɨyarixi memɨwayetei, hipame kakaɨyarixi kaniwatitaiyamɨkɨ hipameta xeime kwieyaritsie kaniwaranutɨmɨkɨ pɨretsutsixi wahepaɨ, 'Ekipitu kanitakatsiemɨkɨ muxatsi wahɨweme yukemaritsie 'atetsi kemɨtiwarukatse hepaɨ, hikɨ kaniyemieni 'atsi'iyarieya kati'anekaku.
JER 43:13 Tetexi memuwarayexeiya Weti-Tsemetsi mɨti'u kanatixɨrimɨkɨ, meta kakaɨyarixi 'ekipitutari watukite kanititaiyamɨkɨ”».
JER 44:1 Yawé niukieya Keremiyaxi hetsɨa kaninuani huriyutsixi 'Ekipitu memu'uwakai wahetsiemieme, tatsɨari, Mikiruri memɨtitekai, Tapinetsi meta Menipitsi memɨtitekai, metatsiere 'Ekipitu tsutua meukayunetsie memɨtitekai:
JER 44:2 «Mɨpaɨ kanaineini Yawé Naimekɨmɨtɨrɨkaɨye, 'Ixaheri Kakaɨyarieya: “Xeme xekaniuneniere 'uximatɨarika kenemɨtiuwewi Kerutsareme meta Kura kiekariyaritetsie. Hikɨ mana kii 'u'unitɨ kanexuaweni, nixewitɨ mana kapeka,
JER 44:3 'axamemɨte'uyurikɨ mekatenanuyekɨne. Mɨkɨ mekaneniuyehaxɨatɨani hipame kakaɨyarixi memɨwarayexeiyakaikɨ meta 'ɨkwa memuwatairietɨwekaikɨ mekawamateme meta watutsima memɨkawaretima.
JER 44:4 Mɨixamexɨa Kakaɨyari niukametemama memɨnete'uximayatsirie nekaniwareyenɨ'ani, mɨkɨ hepaɨtsita memɨwata'imaiyakɨ mɨpaɨ memɨkateyuriekakɨ kenemɨtixani'eriekɨ.
JER 44:5 Peru mɨkɨ mepɨka'anu'enana, mepɨkate'uhayewaxɨ ke'axamemɨteyuriekaikɨ, matsi mepiyeweiyakai hipame kakaɨyarixi 'ɨkwa mewatairietɨwetɨ.
JER 44:6 'Ayumieme nehaxɨa Kura kiekariteyari hetsie katiniunake, 'ayumieme waɨkawa nehaxɨa putai Kerutsareme kayeyarite hetsiemieme, mɨkɨ 'akumawetɨ kanayani hikɨ 'akuxi yaxeikɨa pɨti'ane”.
JER 44:7 »Hikɨta, mɨpaɨ kanaineni Yawé, Kakaɨyari Naimekɨmɨtɨrɨkaɨye, 'Ixaheri Kakaɨyarieya: “¿Ketitayari xeme yuxaɨtame 'axamɨti'ane xeteyuwewirie mariweme? ¿Ketitayari xete'iwiwie teɨteri Kura kiekatari memɨkwinikɨ, 'ukitsi, 'ukari, meta tɨɨri xike memutinunuiwaxɨ, yunaitɨ memɨkwinikɨ?
JER 44:8 Xeme xekanenihaxɨatɨaka kexemɨteyuriekɨ, hipame kakaɨyarixi 'ɨkwa xewatairietɨwetɨ 'Ekipitu kwieyaritsie, hakewa xemekɨ muwa xemetitenikɨ. Kexemɨteyuriekɨ xemɨka'unarienikɨ xeikɨa kani'ayumiemetɨni, meta 'axaxemɨ'itɨarienikɨ meta xemuyuriyariekakɨ naitsarie nuiwarite kwiepa memɨtama watsata.
JER 44:9 ¿Kamɨtsɨ xetehatɨmai naime ke'axamemɨte'uyuri xetutsima, meta Kuratsie te'aitamete ke'axamemɨte'uyuri meta wa'ɨitama, meta xeme ke'axaxemɨte'uyuri meta xe'ɨitama Kura kwieyaritsie meta Kerutsareme kayeyari'utɨma?
JER 44:10 Matsi, hikɨ 'akuxi nehɨxie xepɨkatehayewaku kexemɨteyurie meta xepɨkatimamawawe, ne'inɨari niukiyari meta ne'aitsikate kemaitɨka mɨpaɨ xepɨkate'u'uwa, nemɨxeyetuiri xeme meta xetutsima”.
JER 44:11 »'Ayumieme mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “Mɨpaɨ 'ari nekaniutayɨni nexe'aye'unietɨ nekanayuyeitɨamɨkɨ, 'axaxemɨ'itɨarienikɨ, meta yunaime Kura teɨteriyari nemɨxeheuyehɨanikɨ.
JER 44:12 Keyupaɨmetɨ memɨyuhayewa Kura teɨteriyari, kemɨ'ane 'Ekipitu mekɨnikutɨ memɨkatehayewakai, mɨkɨ yunaitɨ mana mekanikwikuni, 'ixiparakɨ, yatɨni haakakɨ mepɨkwini. 'Etsimemɨyumate meta 'amemɨyumate yunaitɨ mekanikwikuni hakakɨ yatɨni 'ixiparakɨ. 'Axaxe'itɨarietɨ xekanakɨnikuni, waɨkawa hipatɨ mepumamaka mexexeiyatɨ yuriyarɨwamete xepakɨne meta xexani'eriwatɨ.
JER 44:13 Haakakɨ, kwiniyakɨ meta 'ixiparakɨ nekatiniwakwinitɨamɨkɨ 'Ekipitu memɨtama, kenemɨwaruyuri Kerutsaremetari.
JER 44:14 Nixewitɨ pɨkatawikweni memuyuhayewaxɨ Kura kiekatari 'Ekipitu memekɨ, meta mepɨkatawikweni tawarita Kura kwieyaritsie memɨ'axɨanikɨ. Tsepa mema'eriwa memɨ'axɨanikɨ Kura kiekariyaritsie, mepɨkayɨwekaxɨani, hipatɨ xeikɨa meyu'unarɨmetɨ mepɨyɨwekaxɨani”».
JER 44:15 Hikɨ 'ukitsi memɨtemaikai wa'ɨitama hipame kakaɨyarixi 'ɨkwa memuwatairietɨwekai, meta 'ukarawetsixi mana memɨta'enanakai, mɨyatɨtɨ mepɨyumɨirekai mana memu'uwakai meta 'Ekipitu kwieyari tsutɨa memɨtamakai, mɨpaɨ Keremiyaxi mekateniutahɨawe:
JER 44:16 —Tame tepɨkahenu'enieni Yawé niukieya pemɨtatsi'utaxatɨa.
JER 44:17 Matsi pɨta, tepiyeweiyani ketemutiyua: 'Ɨkwa tepitairietɨweni meta kaxie winuyari tepitiyeuririwani kakaɨyari 'Uka Muyuawitsie Ti'aitame ketemɨteyuriekai meta meripaitɨ tatutsima kememɨteyuriekai meta tate'aitɨwamete meta waparewiwamete, Kura kiekariyaritsie meta Kerutsareme kayeyari'utɨma. 'Ana tukaritsie waɨkawa 'ikwai tepexeiyakai 'aixɨa 'iyari tepu'uwakai meta tepɨkate'uka'eniwakai.
JER 44:18 Peru kepauka paitɨtɨ temɨte'uhayewaxɨ kakaɨyari 'Uka Muyuawitsie Ti'aitame 'ɨkwa tetairietɨwetɨ meta kaxie winuyari mɨtiyeuriwa te'iyetuiriwatɨ tinaime teteheuyehɨatɨ tepakɨ, meta haakaxa kuyaxa pɨtatsitixɨtɨaxime.
JER 44:19 'Ukarawetsixita mɨpaɨ mekaniutiyuani: —Kepauka tame 'Uka Muyuawitsie Ti'aitame kakaɨyariyari 'ɨkwa temɨtairietɨwekaitsie meta kaxie winuyari mɨtiyeuriwa, takɨnama mekatenimaikaitɨni tsuira ketemɨte'utiwewiwakai 'ɨkiyaya hepaɨ 'aneneme.
JER 44:20 Hikɨ Keremiyaxi yunaime teɨteri mɨpaɨ katiniwaruta'eiya, 'ukitsi meta 'ukarawetsixi memenati'eiyakai:
JER 44:21 —¿Kamɨtsɨ xeme Yawé 'atsikaretimaime xete'erie kexemɨteyuriekai, xeme meta xetutsima, texe'aitɨwamete meta waparewiwamete meta yunaitɨ teɨteri, kepauka 'ɨkwa xemɨwatairietɨwekai Kura kiekariyaritetsie meta Kerutsareme kayeyariteyaritsie?
JER 44:22 Kepauka Yawé 'ari mɨkatinewiwekai ke'axaxemɨteyuriekaikɨ mɨkɨ kemɨkatinake meta tita mɨtixani'eriwakɨ yaxeteyuriekaku, xekwie 'axa'itɨarietɨ kanayeitɨarieni, 'akumawetɨ, meta ka'akukiepayatɨ kanayeitɨarieni, hikɨ yaxeikɨa pɨ'ane.
JER 44:23 Xeme hipame 'ɨkwa xepɨwarutitairi mɨkɨkɨ 'axaxepɨte'uyuri Yawé hetsiemieme, niukieya xepɨka'anu'eni, meta 'inɨari niukiyari hetsɨana mieme xepɨka'aye'atɨa, meta 'aitsikateyatsie yaxepɨkatekakɨ. 'Ayumieme 'ikɨ tukaritsie 'ikɨ 'uximatɨarika xehetsie kaninuani.
JER 44:24 Keremiyaxi mɨpaɨ katiniwarutahɨawe yunaime teɨteri meta 'ukarawetsixi: —Yawé niukieya xekeneu'eni yunaitɨ xeme, Kura kwieyaritsie kiekatari 'Ekipitu xemɨtitei:
JER 44:25 Mɨpaɨ kanaineni Yawé Naimekɨmɨtɨrɨkaɨye, 'Ixaheri kakaɨyarieya: “Kepauka xeme yɨ'ɨitatɨ mɨpaɨ xemutiyuane: ‘Tame tetenaye'atɨakuni ketemutiyua 'ɨkwa tepɨtaiyatɨweni meta kaxie winuyari mɨtiyeuriwa tepiyetuiriwani kakaɨyari 'Uka Muyuawitsie Ti'aitame’, mɨpaɨ xeteyurietɨ xepumatsiɨkɨ kename yaxetekahu 'aku kexemutiyua. 'Aixɨa kani'aneni, xekenehu xeketenaye'atɨa kexemutiyua.
JER 44:26 Peru xekeneu'eni Yawé niukieya xeme xeyunaitɨ, Kura teɨteriyari 'Ekipitu xemɨtitei. Yawé mɨpaɨ kanaineni: ‘Yɨkɨmana yuhɨritɨatɨ mumariwekɨ, xewitɨ tɨma Kura kiekame 'Ekipitu memɨtitei pɨkanetsitahɨawe, meta mɨpaɨ mepɨkatiyuani: Yawé naimekɨmɨyɨwe mayeyuri hetsiemiemekɨ.
JER 44:27 Netsɨ nekaniwata'ɨwiyamɨkɨ 'axanemɨwayurienikɨ xeikɨa, hawaikɨ 'aixɨa nemɨwayurienikɨ. Haakaxakɨ meta kuyaxakɨ yunaitɨ Kura kiekatari 'Ekipitu memɨtama mekanitayunikuni.
JER 44:28 'Etsiyupaɨmetɨ xeikɨa mekaniyɨwekaxɨakuni memakunuaxɨanikɨ Kura kwieyaritsie meyuta'uname kuyaxatsata. Hikɨ 'ana yunaitɨ Kuratsie kiekatari 'Ekipitu memekɨ mɨpaɨ mekatenetimaikuni xɨka neniuki 'aye'atɨariemɨkɨ yatɨni mɨkɨ waniuki’”.
JER 44:29 »Yawé mɨpaɨ kanaineni: “'Ikɨ 'inɨari kanihɨkɨtɨkamɨkɨ kename ne netixekwinitɨani mɨkɨ kwieyaritsie, mɨpaɨ xemɨtemaikakɨ kenemutayɨ paye'atɨarieni.
JER 44:30 Yawé mɨpaɨ kanaineni: ‘Ne Parahuni Hupɨra mɨtitewa, 'Ekipitutsie ti'aitame, kemɨ'ane memeye'unie me'imienike wahetsɨa nekaniyetuamɨkɨ, Tserekiyaxi kenemiyuri Kura kwieyaritsie ti'aitame hepaɨ, meye'uniekai 'imienike hetsɨa Nawukurunutsuxi, Wawiruniya kwieyaritsie ti'aitame’ ”».
JER 45:1 'Ikɨ niuki kanihɨkɨtɨni Kakaɨyari niukameya Keremiyaxi Waruki mutaxatɨa Neriyaxi nu'aya, naurieka wiyari ti'aitakaku Kuhatsimi Kutsiyaxi nu'aya, kepauka Waruki mɨraka'utɨwakai xapa mukwikwiyatsie Keremiyaxi mɨpɨa tikɨhɨawekaku:
JER 45:2 «Yawé mɨpaɨ kanaineni, 'Ixaheri Kakaɨyarieya, 'ahepaɨtsita Waruki:
JER 45:3 “'Ekɨ mɨpaɨ peputayɨ: ‘Xɨa'ui ne. Yawé matsi waɨkawa pɨnetsi'uximatɨa. Nepu'uxeri ne'uta'aiwatɨ, 'uxipiya nepɨkakaxeiyawe’.
JER 45:4 »”Mɨpaɨ ketineutahɨawi, Yawé mɨpaɨ mainekɨ: ‘Nekanika'unamɨkɨ tita nemɨtiutawewi meta tita nemɨtiukaye nekanahunamɨkɨ, mɨyatɨtɨ naime 'ikɨ kwieyaritsie nekatinakumaweriyamɨkɨ.
JER 45:5 ¿Timamariwaweme petikuwaune 'ahetsiemieme? Mɨkɨ pepɨkatiwauka, karikɨ yunaime 'ikɨ teɨteri wahetsie 'uximatɨarika nekananunɨ'amɨkɨ, peru 'ekɨ nekamanipitɨamɨkɨ pemayeyurinikɨ tsepa hakewa pemetɨa, mɨkɨ 'a'iwarika pɨhɨkɨtɨni’ —Yawé mɨpaɨ kanaineni—”».
JER 46:1 Yawé niukieya Kayaɨyari niukameya Keremiyaxi hetsɨa kaninuani nuiwarite wahetsiemieme.
JER 46:2 'Ekipitu hetsiemieme, 'ikɨ niuki Parahuni Nekahu mɨtitewa ti'aitame 'Ekipitu kiekame kuyaximama kaniwahetsiemiemetɨni, naurieka wiyari ti'aitakaku Kuhatsimi Kutsiyaxi nu'aya, Kura kwieyaritsie ti'aitame, kana'iwarieni Karikemitsi tiyetewakaku, hatuxame 'Eupɨrate manuyeka 'aurie, ti'aitame Wawiruniya kiekame Nawukurunutsuxi kane'iwa:
JER 46:3 «Yuheima nunuwame 'amɨyewa meta 'etsimɨyewa xekeneukuha'arita, meta xekeneuhuniri xemuyutakwinikɨ.
JER 46:4 Kawayutsixi xekeniwaranutixiratɨaxɨa, xekenanutiyaxi memanautsawawe wahetsie. Xekeneuyukuha'aritɨa, yumu'utsie nunuwame xekenanuti'uitɨa. Pitsika xekenanuyemɨtsɨtɨaxɨa, tepɨa kamixayari xekenanakatɨxɨa.
JER 46:5 Peru neuxei, ¿ketɨtɨ nepɨtiniere? Kuyaximama mepa'iwarie, memamatɨ yɨ'utɨma mepekɨka. Meka'anakunenieretɨ mekaniyuta'unani. Naitsarie memɨtama mekanimamaka
JER 46:6 Kemɨ'ane waɨkawa manautsawe pɨkayɨwe muyuta'una meta waɨkawa mɨtɨrɨkaɨye pɨkayɨwe muwatawikweiya. Tayeta, 'Eupɨrate hatetsitayaritsie mekanitakeitsarietɨkɨkani meta mekanatixɨrɨweni.
JER 46:7 »¿Kemɨ'ane pɨyɨane manatimie Niru hatɨayari hepaɨ? haa muwatayuitɨariwa hepaɨ kaniuyɨneni.
JER 46:8 'Ekipitu kaniyɨaneni, Niru hatɨayari muwayeneka hepaɨ kanitimieni, haa muwatayuitɨariwa hepaɨ kaniuyɨneni. 'Ekipitu mɨpaɨ kanaineni: “Teikɨ nekanitiyeimɨkɨ, kwie naime nekananukanamɨkɨ, kiekarite naime nekanika'unamɨkɨ meta wateɨterima”.
JER 46:9 Xekeneuyutakuya, kawayutsixi kwinie xemayɨwawe. Kaxetate, karima xekeneyekɨni. Meke'uhuni yemekɨ yukukuyamete. Kɨmana memeyukunani meke'uti'ɨni kuyaxi Kutsi meta Puti kiekatari. Yutupi mekehatseiriyaxɨani kuyaxi Ririyatari.
JER 46:10 »'Ana tukari tati'aitɨwame Yawé Naimekɨmɨtɨrɨkaɨye pɨhetsiemiemetɨni. 'Ana tukaritsie pɨyɨkɨhɨani, memeye'unie katiniwarakapitɨamɨkɨ. 'Ixipara tiyumienetɨ kanitahuxaimɨkɨ, hauharimɨtɨ xuriyakɨ 'aixɨa katinika'erimɨkɨ. Tayeta kwieyaritsie, 'Eupɨrate hatetsitayaritsie, tati'aitɨwame, Yawé Naimekɨmɨtɨrɨkaɨye, waɨkawa puwakwini mawari hepaɨ.
JER 46:11 »'Uka 'ɨimari 'Ekipitu niweya, Karaha kenemie waritsamu kenewaumie. Yakɨ xeikɨa 'uayete pepɨtixeɨrie, pepɨka'anayeweni.
JER 46:12 Nuiwarite yamepɨtemateri kepemɨra'iwarie, 'ahiwari naitsarie kwiepa pɨ'enierie. Yukɨmana kuyaxi yuhetsie mekaniuyexɨrɨweni, hikɨ yunaitɨ kwiepa mekanatixɨrɨweni».
JER 46:13 'Ikɨ Yawé niukieya kanihɨkɨtɨni, Kakaɨyari niukameya Keremiyaxi hetsɨa munua, kepauka Nawukurunutsuxi Wawiruniyatsie ti'aitame 'Ekipitu tamienike munua:
JER 46:14 «'Ikɨ xeketeneutaxata 'Ekipitu kwieyaritsie, xekeneutaxata Mikiruri kiekariyaritsie, Menipitsi meta Tapinetsi: “'Aixɨa xeketeneuyu'uitɨa. Xekeneyukweriwayurieka. 'Ixipara yu'aurie katinamietɨyeikani”.
JER 46:15 ¿Titayari 'akuyaxima metetihɨximawetɨka? Mepɨkayɨwawe 'amemɨti'uka, Yawé muwaratixɨrikɨ.
JER 46:16 Yamekatenekaxɨrɨweni, yuhetsie mekaniuyexɨrɨweni. Mɨpaɨ mekateniyɨkɨhɨaweni: “Kenanukukexi, tekani'axɨakuni tateɨterima wahetsɨa, hakewa temetinunuiwaxɨ, 'ateewa mɨkarayukwinetsie paitɨ”.
JER 46:17 Mana mɨpaɨ mekateniuhiwani: “Parahuni yuarika xeikɨa kanihɨkɨtɨni. Ti'aitame 'Ekipitu kiekame mɨrayu'iwakekaitsie 'ari panuyetɨa”».
JER 46:18 Ti'aitame mɨpaɨ kaniutaineni: «Ne nekanayeyurini. Yawé Naimekɨmɨtɨrɨkaɨye nekatinitewaka. Tawuxi hɨriyari hɨrite naime kemɨtiwara'iwa, meta hɨri Kaximeru haramara kemɨra'iwa, mɨpaɨ timariwetɨ 'upamie mɨxe'aye'unie.
JER 46:19 'Ekɨ, 'Ekipitu pemɨkiekame, 'a'ika keneukuha'aritɨa xeime kwieyaritsie xemanuhapanienikɨ, karikɨ Menipitsi mɨrakutewatsie 'akumawetɨ kanayeimɨkɨ, kii 'u'unitɨ puku'uni teɨteri mepumaweni.
JER 46:20 »Tsikeru wakiya xeiwiyari mexeiya 'Ekipitu kanihɨkɨtɨni, peru 'umekanahuni hetsɨana meye'axɨanike nakatarixi tayeta miemete.
JER 46:21 Kuyaxi xaɨtsie kiekatari pareku me'uhutɨ tsikerutsixi memeuwiyamatɨka wahepaɨ mepɨtematsiɨkɨ, mɨkɨtatsiere mepukununuwa, yunaitɨ meyɨnɨtɨ mepuyuta'una meka'uku'uwetɨ, watukari maye'akɨ kememɨteka'unarienikekai, kepauka memɨtekwinitɨarienikekai.
JER 46:22 'Ekipitu kaniyuta'una kuu hepaɨ 'utaitɨ, meye'unie hepana yɨtɨrɨkarima 'amumiekɨ. Hurawa hepana mekaniuhuni hatsa me'utɨkɨtɨ, kɨ'ewemete wa'atɨ mepɨteyɨa,
JER 46:23 tsepa wa'ɨtsi mɨkahayeyeyɨkɨ, naime mekanakuwitekeni —Yawé mɨpaɨ kanaineni—. Mepuyumɨire 'utsikari wareuyeta, mɨkɨ kɨ'ewemete, nixewitɨ muwaruti'inɨata pɨkayɨwe.
JER 46:24 'Ekipitu witsimɨti'ɨimari kanitewiyarikatsitɨariemɨkɨ meta kaniyetuiyamɨkɨ teɨteri tayeta kiekatari wahetsɨa».
JER 46:25 Yawé Naimekɨmɨtɨrɨkaɨye, 'Ixaheri Kakaɨyarieya mɨpaɨ kanaineni: «'Amuni nekatinikwinitɨamɨkɨ, Tewatsi kiekariyari wakakaɨyari, meta 'Ekipitu, meta wakakaɨyarixima meta mana te'aitamete, meta Parahuni meta yunaime kemɨ'ane hetsiena memɨtewiya.
JER 46:26 Nekaniwayetuamɨkɨ kemɨ'ane memɨwaraye'unie wahetsɨa, Nawukurunutsuxi hetsɨa, ti'aitame Wawiruniya kiekame, meta teɨterimama wahetsɨa. 'Ariketa 'Ekipitu kiepa kanayeimɨkɨ meripaitɨ hepaɨ —Yawé mɨpaɨ kanaineni—.
JER 46:27 »Peru 'ekɨ, Kakuwu neti'uximayatsiriwame, pepɨkamaka, pepɨka'utimamaweni, 'Ixaheri. 'Ateewa pe'uyeikame nekamenitawikweitsitɨamɨkɨ, xeime kwieyaritsie pehanuhanieyu. Kakuwu kayuwatɨ pehexeiyatɨ pekanayeimɨkɨ, 'aixɨa 'iyari pe'uyeikatɨ pekanayeimɨkɨ.
JER 46:28 'Ekɨ Kakuwu neti'uximayatsiriwame, pepɨkamaka, karikɨ ne 'ahamatɨa nekaniuyeikani —Yawé mɨpaɨ kanaineni—. »Tsepa yunaime nuiwarite nemuwarutayuniyaxɨ kemɨ'ane wahetsɨa nemumatsiheutanɨ'a, 'ekɨ matsi nepɨkametsihauyehɨani. Kemɨtiheitseriekɨ nepɨmatsita'ɨxatsitɨani peru metatsiere nepɨmatikwinitɨani».
JER 47:1 Parahuni Kahatsa katamiewekaku 'akuxi, Yawé yuniuki Kakaɨyari niukameya Keremiyaxi kaniupitɨani, piritsiteutsixi wahepaɨtsita:
JER 47:2 «Yawé mɨpaɨ kanaineni: »“Neuxei xekeneuxeiya. Haa tayeta mieme haa muwayeneika hepaɨ putaine. Kwie panukayunitɨwa meta tita mɨrexeiya, meta kiekarite metatsiere teɨteri. Yunaitɨ teɨteri meputihiwa. Meputitsuana teɨteri kwiepa memɨtama.
JER 47:3 Mewa'enietɨ wakawayutsixi wanautsari wakaxetate wayuarika me'enietɨ meta kaxetate waketate me'enietɨ, wapaapama yuniwema 'ukitsi mepɨwata'e'eiriwa, mepɨkatɨrɨkawi marikakɨ.
JER 47:4 Tukari kanaye'aniri piritsiteutsixi memakumaweriyarienikɨ, Tiru meta Tsiruni mɨnawaiyarienikɨ kemɨ'ane 'akuxi minɨ'ɨ miparewie. Piritsiteutsixi kaniwarakuyuniyamɨkɨ Yawé metatsiere yunaime haramara tetsita kiekatari Katuri mɨtitewatsie.
JER 47:5 Yumu'utsie mekaniyukaxikani Kahatsa kiekatari, 'Atsikaruni kiekatari mekaniuwawetɨ mekanakɨne. Xemeta, muweritsie kiekatari xemuyuhayewatɨwe, xepɨkatehayewa xeyutixiteketɨ yuwaiyaritsie.
JER 47:6 »”'Ai nepaine, Yawé 'ixiparaya hetsiemieme. Pepɨkatihayewa peyumienetɨ. 'Anawita kenakunuari. 'Ari kenewakexi, kayuwatɨri.
JER 47:7 »”¿Ketitayari ti'uxipieka, Yawé kanitanɨ'ani 'Atsikaruni mɨtamienikɨ metatsiere haramara tetsita memɨtama?”»
JER 48:1 Mɨpaɨ kanaineni Yawé Naimekɨmɨtɨrɨkaɨye, 'Ixaheri kakaɨyarieya, Muhawi hetsiemieme: «Xɨa'ui Newu hetsiemieme, karikɨ kanika'unariemɨkɨ. Kiriyatahini kaniwiyariemɨkɨ meta kanitewiyarikatsitɨariemɨkɨ. Kiekarieya kuraruyari 'amatitewa nitixaɨtɨ pɨkarayeitɨarieni kanika'unariemɨkɨ.
JER 48:2 Muhawi witsikemɨtixeiyariekai kaniukumawere, Hetsiwuni kiekariyaritsie mekatenikuxatani hepaɨtsitana mieme 'axamemiyurienikɨ: “Neuxei, hikɨmɨtɨka 'ikɨ teɨteri tepɨwarakumaweriya”. 'Ekɨtsiere Marimeni, kayuwatɨ pekanitamarimɨkɨ, pekananukuweiyariemɨkɨ 'ixiparakɨ.
JER 48:3 Tsuari hiwariyari kana'eniɨriɨkɨni Kurunahini kiekariyaritsie mieme: memuta'unariekɨ meta memakumaweriyariekɨ.
JER 48:4 Muhawi kanika'unariemɨkɨ, tɨɨriyamama watsuari 'ari kani'enierieka.
JER 48:5 Ruhiti teikɨmanayaritsie mekaniutihuni tsuarikɨ mekatehayewatɨ, Kurunahini kɨatsaritayaritsie kukuiniya hiwariyari kaniwati'eniɨriɨkɨni, memuka'unariekɨ.
JER 48:6 Xekeneuyuta'unaxɨa. Kemɨ'ane mɨyɨweni ke'uyutawikweitsitɨani. 'Ɨtsi makumawetsie mieme xekeneyu'erieka.
JER 48:7 'Awewiyatsie pemɨtiwiyakɨ meta 'apiinitɨarikatsie, 'ekɨtatsiere pekaniwiyariemɨkɨ. 'Akakaɨyari Kemuxi mɨtitewa kananutɨkiemɨkɨ xeime kwieyaritsie, mara'akatemama meyunaitɨ meta memɨwaparewiekai.
JER 48:8 Ti'uname 'ukanamieni naime kiekarite ka'unake, nixewitɨ kapɨtawikweni. Mayeweritsie ka'ayekiepayatɨ kanayeimɨkɨ, meta hɨri manaweri kanita'unariemɨkɨ, yemekɨ Yawé kemutayɨ.
JER 48:9 Tetetsie xeteha'utɨame xekeneutaketsa ma'eriwanikɨ Muhawi hetsiemieme, karikɨ 'ari kaniuka'unarieni, kiekariteya kanakumaweni, nixewitɨ tɨma tewi mana puka'uyeika.
JER 48:10 »'Axake'itɨarieka kemɨ'ane yamɨkatikayani Yawé 'uximayatsikayatsie. 'Axake'itɨarieka kemɨ'ane xuriya mɨkatayeurieni yu'ixiparakɨ.
JER 48:11 »Muhawi kwieyaritsie kayuwatɨ kaniumakaitɨni 'amɨtiuyukamatsietɨtɨ, kaxie winuyari mɨkawatayuitɨariwa hepaɨ. Hatsuaku mana kiekatari xeime kwieyaritsie mepɨkahehapaniewawe. Winu hepaɨ xeime haxu tekɨxiyarita pɨkakatuariewe. 'Ayumieme 'aixɨa kema'ane pɨkaheuyeiwe, meta yaxeikɨa 'aixɨa pu'ɨa».
JER 48:12 Yawé mɨpaɨ kanaineni: «Peru tukari kanaye'amɨkɨ kepauka teɨteri nemɨwatanɨ'ani Muhawi hetsie, yutekɨxite memɨtiyeuriexɨanikɨ, meta yuye'ɨrɨte memɨtitaraxɨanikɨ.
JER 48:13 Hikɨ Muhawi kaniyutitewiyamɨkɨ yukakaɨyari Kemuxi hetsiemieme, 'ixaheritsixi kememɨteyutitetewiyaxɨ Weteri hetsiemieme, tuki hetsie yemekɨ memɨtewiyakai.
JER 48:14 »Xeme mɨpaɨ xepɨte'uyu'ɨrekai: “Tame temɨtehayu'iwa tekanihɨkɨtɨni, teɨteri kuyaxata miemekɨ temɨkamama”.
JER 48:15 Muhawi kanika'unariemɨkɨ meta kiekariteya, —mɨpaɨ kanaineni Ti'aitame, Yawé Naimekɨmɨtɨrɨkaɨye mɨtitewa—: Mana kiekatari temari 'aixɨa memɨ'anene mekanikwi'iwakuni.
JER 48:16 Muhawi mɨka'unarienitsie kanehuraniri, 'uximatɨarikaya kanaye'aximeniri.
JER 48:17 Xekeneutitsuanani hetsiena mieme yunaitɨ 'auriena kiekatari, kemɨ'ane xemimariekai kemɨtimariwekai. Mɨpaɨ xekeneutiyuaneni: “'Itsɨ panumurarie mɨtɨrɨkaɨyekai meta mumariwekai”.
JER 48:18 »'Ekɨ, Riwuni pemɨkiekame: kenanakaye'a 'a'uwenitsie kwiepa makunaraunitsie keneutayexi, karikɨ Muhawi 'uname 'ekɨta kamenitamiemɨkɨ 'akuraru 'amatitetewa kanika'unamɨkɨ.
JER 48:19 'Ekɨ 'Aruhexi kiekariyaritsie pemɨkiekame, huye 'utɨa keneutakeka keneutanierixɨa, memɨyu'unatɨwe keniwaruta'iwawiya, 'ukitsi meta 'ukarawetsixi: “¿Kekuta muwa reyɨ?”
JER 48:20 Muhawi tixaɨtɨ pɨkarayeitɨarie, kana'iwarieni. Xekeneutitsuanani meta xekeneutihiwani. 'Axinuni hatɨayari 'utɨa xeketeneutaxata kename Muhawi 'uka'unarie.
JER 48:21 'Uximatɨarika kaninuani hɨri makuweritsie paitɨ: Huruni, Yahatsa meta Mepati kiekariyaritsie,
JER 48:22 Riwuni, Newu meta Weti-Riwɨratahini wahetsie,
JER 48:23 Kiriyatahini, Weti-Kamuri meta Weti-Mekuni wahetsie,
JER 48:24 Keriuti meta Wutsira wahetsie, meta naime kiekarite Muhawi kwieyaritsie miemete, hurawa meta 'ateewa mukumanekai.
JER 48:25 Muhawi tɨrɨkariyaya kaniukumawere, tɨrɨkariya pɨkahexeiyari
JER 48:26 »Muhawi xekeneuhayewa matiwenikɨ tawekame hepaɨ, Yawé hɨxie mariweme mayuyeitɨakɨ. Yuhayaritsie ke'ukaweni, 'atsieriwame kehayani.
JER 48:27 'Ekɨ Muhawi, neteɨterima 'ixaheritsixi pepuwananaimakai, pepɨwakuxatakai pewayuriyatɨ, tenawayamete wahamatɨa pemuwarutaxeiya hepaɨ.
JER 48:28 Muhawi kwieyaritsie kiekatari, yukiekaritetsie xekenayekɨni, 'aita xekeneuteni. Kukuruxi wahepaɨ xekene'aneni 'aitekɨa memuyuti'ituatɨwa.
JER 48:29 »Tekanimaika kemɨtiuyuta'ɨre Muhawi, 'ɨrikakɨ panutiyeika. Waɨkawa pɨtiyukatawe'erie meta puyuta'ɨre. Waɨkawa payu'eriya meta mariweme payuyeitɨwa.
JER 48:30 Ne nekanimaika kemɨtiyuwaɨriya 'axa'utaitɨ, peru tsepa kemɨtiyuta'ɨre tixaɨtɨ 'atsipɨkatiyurieni
JER 48:31 'Ayumieme neputatsuaka Muhawi hetsiemieme, yunaime teɨterimama wahetsiemieme nepɨnehiwerie, meta neputa'aiwa kiekari Kixi-Keretsi hetsiemieme.
JER 48:32 'Ahetsiemieme neputatsuaka Tsiwima kiekariyari, kaxie haraweriyari hepaɨ pemɨ'ane, keyuri Katsexi hetsiemieme, 'amamate yɨrariyari haramaratsie peuka'axe meta Katsexi paitɨ, peru kaninuamɨkɨ ti'uname 'aharawerita hetsie naime katinika'unamɨkɨ.
JER 48:33 Kwie 'aixɨa mɨtiu'anetsie Muhawi kwieyaritsie kaniukumawere temawierika meta nanai. Winu nepukumaweriyaxɨ memiwewiekai, meta kaxie ketsinamete memutihiwakai meyutemamawietɨ mepukumawerixɨ, hiwari hikɨ mieme temawierika hiwariyari pɨkahɨkɨri.
JER 48:34 »Hetsuwuni 'aiwarieya kana'eniɨriɨkɨni 'Eraré meta Yahatsa paitɨ, metatsiere Tsuhaxi paitɨ, meta Kurunahini paitɨ meta 'Ekɨrati-Tseritsiya paitɨ. Meta haixate Nimirini mieme kaniukawaxɨani.
JER 48:35 Teɨteri nekaniwarakumaweriyamɨkɨ Muhawi kiekatari mawari memɨwawewirie kakaɨyarixi memɨte'atimawiyarɨwatsie meta yukakaɨyarixi 'ɨkwa memɨwatairie
JER 48:36 »Ne'iyari pirikɨxa muyuhiwerie hepaɨ putaine, ne'iyari patsuaka Muhawi hetsiemieme, pirikɨxa hiwerika mukayuitɨwani hepaɨ putaine ne'iyari patsuaka Kixi-Keretsi hetsiemieme, mɨrakumaweriyariekɨ piiniteya ketipaɨmeme mɨtiuxeɨriekai.
JER 48:37 Yunaitɨ mepumu'umetse meta yunaitɨ mepanuyexirietɨka, meta yumamatetsie naitsarie mepeuxitekietɨka, metatsiere yunaitɨ hiwerika kamixayari mepanakatɨtɨka.
JER 48:38 Naitsarie Muhawi kwieyaritsie kii heima meta naitsarie kaye 'utɨma, tsuari xeikɨa kani'enierieka, Muhawi nemutataraxɨkɨ tekɨxi 'axamɨ'ane mehɨiyani hepaɨ
JER 48:39 Kekuta tiutsanarie. Neuxei mɨya mekateniutsuanani. Muhawi kanawarini tewiyarikakɨ. 'Auriena kiekatari hetsiena mieme mekanimamaka meta mekaniyuriyani».
JER 48:40 Yawé mɨpaɨ kanaineni: «Neuxei. Muhawi maye'unie kwixɨ hepaɨ katiniwieneni, Muhawi heima kaniwieneni.
JER 48:41 Kiekariteyatsie katinitahaxɨamɨkɨ, meta kiekariteya kuraruyari 'amatitɨtɨ kana'iwarieni. 'Iya tukaritsie, kuyaxi Muhawi kiekatari wa'iyari 'uka tiniwerɨmetɨ mɨtiuyɨyɨaka hepaɨ pɨ'aneni.
JER 48:42 Muhawi kwieyari kanikumaweriyariemɨkɨri, Yawé hɨxie mariweme mayuyeitɨakɨ.
JER 48:43 Marika, mɨki teukiya meta winiyari, kaniwatakwewieka Muhawi kiekatari
JER 48:44 Kemɨ'ane muyuta'una marikakɨ putsuta kaneukawemɨkɨ, kemɨ'aneta putsuta muwatiyani winiyaritsie kaniyɨhɨamɨkɨ, karikɨ ne nekani'atɨamɨkɨ Muhawi hetsie 'uximatɨarika kepauka tukarieya maye'ani
JER 48:45 »Kiekatari hipatɨ mekaniyuta'unani Hetsiwuni 'etɨriyayatsie paitɨ, mekaniuku'uweni mekatɨrɨkawitɨ. Hetsiwuni kiekariyaritsie tai payeneika, Tsikuni kiekariyaritsieta, tai Muhawi kanaya mɨtaxɨtsitɨanikɨ meta yunaime teɨteri muwanake hipame wahamatɨa memuyukwitɨwenikɨ meta memuyuti'ɨre wamu'ute.
JER 48:46 Xɨa'ui, Muhawi. Kemuxi kiekarieya puka'unarie, 'aniwema temari mepanuhapanieni, meta yaxeikɨa 'aniwema 'ukitsi mepanuhapanieni xeime kwieyaritsie.
JER 48:47 Peru 'arikeketa, Muhawi hetsie 'aixɨa 'itɨariekame nekanayeitɨamɨkɨ», Yawé mɨpaɨ kanaineni. 'Ena kaniu'aka Muhawi kemɨtikwinitɨarieni.
JER 49:1 Yawé mɨpaɨ kanaineni 'amunitsixi wahetsiemieme: «¿Karikuta 'Ixaheri niwemama 'ukitsi mepɨka'u'uwa? ¿Piiniteya memɨte'anupinikɨ kari pɨkawarexeiya? ¿Titayari kakaɨyari Muruki Kahari kwieyari yupiini rayeitɨa, meta teɨterimamata mɨkɨ kiekariteyaritsie metetitei?»
JER 49:2 Yawé mɨpaɨ kanaineni: «Tukari kanaye'amɨkɨ, kepauka ne kuyaxi nemɨwa'atɨani me'utihiwame memɨyutakwinikɨ Xawaha kiekariyaritsie 'amunitsixi wahetsɨa, kiekarieya 'unitɨ meta ka'akukiepayatɨ kanayeimɨkɨ, meta kiekariteya kanititaiyariemɨkɨ. Hikɨ 'Ixaheri mɨpaɨ mepɨtewanawairieni yukwie meripaitɨ memunawaiyariekai
JER 49:3 »Keneutatsuakani, Hetsiwuni, karikɨ 'Ahi kiekariyari muka'unariekɨ. Xekeneutihiwani Xawaha niwemama 'ukari. Hiwerika kamixayari xekenanakatɨtɨkani, xekeneutitsuanani, kuraru 'amatitewa taɨta paitɨ xekenewanautsatɨweni, Muruki kakaɨyariyari 'ateewa paitɨ kananutɨkiemɨkɨ, yunaitɨ mara'akatemama meta waparewiwamete.
JER 49:4 'Ekɨ pepuyuta'ɨre 'akwie mayeweri hetsiemieme, 'akwie mayeweri 'aixɨa mɨtiuyuruwa hetsiemieme, Neniwe 'uka pemɨnetsi'aye'unie, 'apiinitɨarika mɨraye'atɨkatsie pemɨtiwiya, mɨpaɨ pemutaine: “¿Kemɨ'ane pɨnetsitamieni?”
JER 49:5 Ne marika nekananunɨ'amɨkɨ 'ahetsiemieme pemɨ'akuweiyanenikɨ naitsarie kwiepa —Yawé Naimekɨmɨtɨrɨkaɨye mɨpaɨ kanaineni —. Yunaitɨ xekanitaweiyariekuni yuxexuitɨ xekanitayeixɨakuni, nixewitɨ pɨkaxekuxeɨrieni xemuyuta'unaxɨani.
JER 49:6 »Peru 'arikeketa, 'amunitsixi 'aixɨa me'itɨariekame nekaniwarayeitɨamɨkɨ»,
JER 49:7 Yawé mɨpaɨ kanaineni Naimekɨmɨtɨrɨkaɨye 'Erumi hetsiemieme: «Kaniumaweniri memɨtemaiwawe Temani kwieyaritsie. Memɨtemaiwawekairi mepɨkatekuxata mete'uyemaitɨ. ¿Kamɨtsɨ kemɨtimaiwe tiutsewiximarie?
JER 49:8 Rerani kiekatari: Xekeneuyuta'una, yu'ɨtɨma xekenehu. Terɨta meutatetewatsie xekeneuyuti'awietaxɨa. 'Uximatɨarika nekanipitɨamɨkɨ 'Etsahu hetsie, kanaye'akari tukarieya mɨrakwinitɨarienitsie.
JER 49:9 Kaxie 'inɨwemete xɨka 'ahetsɨa me'u'axɨani, tsiereta yapaɨmeme kaxie mepɨhayewa. Xɨka tɨkarikɨ tenawayamete 'ahetsɨa me'u'axɨani, tinaime mepɨkatehanutɨni.
JER 49:10 Peru ne naime 'Etsahu nekatininawairiemɨkɨ, meta hakewa meyuti'awiwieta nekanitaxeiyamɨkɨ, muyuti'awieta pɨkayɨwe. Yunaitɨ mekanikwi'iwakuni niwemama, 'iwamama meta yunaitɨ 'auriena kiekatari, mekanikumaweriyariekuni meta mepɨka'u'uwaniri.
JER 49:11 Nutuite 'ahetsɨa miemete keniwaruku'eiri, ne watukari nepɨ'ɨwiyani. Meta wiuraxi nehetsie meketewiyani».
JER 49:12 Yawé mɨpaɨ kanaineni: «Kemɨ'ane wahetsie mɨkarahɨiwa mɨtiukwinitɨarienikɨ tekɨxiyari memanu'i, 'ekɨ matsi 'ahetsie mɨrahɨiwa pepɨkahayewarieni pekatikwinitɨarietɨ. Kaneuyeweka pemɨtikwinitɨarieni, matsita 'ekɨ mɨkɨ tekɨxi pekananu'imɨkɨ».
JER 49:13 Yawé mɨpaɨ kanaineni: «Ne nekɨmana mɨpaɨ nekatininehɨritɨaka, Wutsira 'axa'itɨaritɨ kanayeimɨkɨ, teɨteri mekanitimamakuni, tewiyarika kanipitɨariemɨkɨ meta kanakumaweriyariemɨkɨ. Yuheyemekɨ naitɨ kiekariteya 'u'unitɨ kaniyuhayewamɨkɨ».
JER 49:14 Yawé niukieya nepu'eni. Xewitɨ tixaxatame nuiwarite mɨpaɨ pɨtiwakɨhɨawe: «Xekeneuyukuxeɨrieka, 'Erumi kiekariyari xekeneutami'a. Xekeneuyukuha'aritɨa xemitamienikɨ».
JER 49:15 «Kiekari nitixaɨtɨkɨ mɨkatiyunaki'erie nepɨmatsi'ayeitɨani, yunaitɨ teɨteri mepɨmatsixani'erieka.
JER 49:16 'Ekɨ 'aita mukatataritsie pemɨkiekame, meta hɨri 'amanutitɨtɨtsie: pepɨ'akwamanaxɨ hipame pewamariutatɨ meta 'a'iyari 'uyuta'ɨrekaku. Tsepa 'ateewa paitɨ pemɨyuti'itɨatɨa kwixɨ hepaɨ, mana paitɨ nemenanakahɨamɨkɨ
JER 49:17 'Erumi, 'umariwekaremekɨ pekanika'unariemɨkɨ, xewitɨ mɨkɨ kiekari 'aurie xɨka 'uyeyani, kanitimamɨkɨ kiekari 'unime xeiyatɨ.
JER 49:18 Tsuruma, Kumuxa meta kiekarite 'auriena mamanetɨka kememɨte'uka'unarie mɨpaɨ pɨtiyɨni, nixewitɨ tawari mana tewi pɨkayutakitɨani
JER 49:19 »Kurutani mɨ'ɨtsiyata maye mayeneika makutsiɨraɨye 'ɨxapa yapauka mɨ'axe hepaɨ, yapauka neniwatimariutamɨkɨ 'erumitsixi, wahetsiemieme xeime nekananayexeiyamɨkɨ. Tawari Kakaɨyari pumawe nehepaɨ 'anetɨ. Xewitɨ mɨnetsita'iwa pɨkayɨwe. Nixewitɨ muxatsi wahɨweme netsi 'aye'unietɨ pɨka'ayeiwe».
JER 49:20 'Ayumieme, xekeneu'eni Yawé kemɨtiyurienikɨ yatikuxatatɨ: 'Erumi hetsiemieme, xekeneu'eni kemɨtiyurieni Temani kiekatari wahetsiemieme: Waniwema 'etsimemɨtɨtɨ mekananuhapaniekuni muxatsi tɨɨrixi wahepaɨ, 'ayumieme makɨ'ɨxaya wahetsie mumiemetɨkai 'akumawetɨ kanayeimɨkɨ kaniti'unariemɨkɨ.
JER 49:21 Kwie kaniutayuani 'Erumi matihɨiyatsie, Haramara Mɨxeta hetsie paitɨ kanewa'eiyani wahiwari.
JER 49:22 Mɨrayuye'unie kananutiyani mɨtawienikɨ mexɨiwa kaniyutamiemɨkɨ kwixɨ hepaɨ, Wutsira kiekariyaritsie yu'anate kanitaweraxɨamɨkɨ. 'Iya tukaritsie 'Erumi kiekatari kuyaxi kwinimieme memɨte'ayu'iwa meteniuka'eniwakuni, 'uka tiniwerɨmetɨ mɨtiuka'eniwa hepaɨ.
JER 49:23 Niuki Ramatsiku hepaɨtsita mieme: «Kamati meta 'Axipari kiekatari waɨkawa mekanimamaka, memɨte'utamarikɨri 'axakemɨtiyɨni hepaɨtsita. Waɨkawamekɨ mekani'iyarixietɨkani, memɨyunɨtɨani mepɨkayɨwawe hamewari kemɨtiuyuane hepaɨ.
JER 49:24 Ramatsiku kiekatari mepɨkayumaiwawe, mepuyuta'unakekai, peru marikakɨ mepɨka'uyɨwekaxɨa. Hiwerikakɨ meta kukuiniyakɨ mepɨkayɨwawe memayekɨne, 'ukarawetsixi matɨari memɨtiniwexɨaximeni wahepaɨ.
JER 49:25 Ramatsiku kiekariyari yunaitɨ 'aixɨa memutiyuane 'ahepaɨtsita meta pemɨnetsitemawieritɨa. ¿Ketitayari 'ateɨterima mekameteku'eiriwawe?
JER 49:26 'Iya tukaritsie temari kiekaritsie kaye 'utɨma mekaniuheitɨkaikuni, kuyaximama yunaitɨ mekanikwi'iwakuni
JER 49:27 Ramatsiku kuraruyari nekanitaiyamɨkɨ, meta mɨkɨ Weni-'Arari paratsiyuteya kanitixɨtsitɨamɨkɨ».
JER 49:28 Yawé mɨpaɨ kanaineni Tseraxi hetsiemieme meta Katsuxi mɨtiwa'aitɨa wahetsiemieme, Nawukurunutsuxi Wawiruniyatsie ti'aitame muwarutakwikai: «Xekeneuhuni, Tseraxi xekeneutami'a. Xekeniwarutayuniya mɨkɨ teɨteri tau manatineika hepa kiekatari.
JER 49:29 Wa'ixuriki kiiyarite meta watewama mepɨtenawaiyarieni, wanawi 'ɨkariyarite, tinaime wapiinite meta wakameyutsixi. Teɨteri mɨpaɨ metenixehiwiekuni: “Naitsarie marika puxuawe”.
JER 49:30 »Xekeneuyuta'unaxɨa, Katsuxi kiekatari. 'Ari xekeneuyuta'unaxɨa, xekeneuyuti'awieta kwieta 'ameukateewata —Yawé mɨpaɨ kanaineni—. Nawukurunutsuxi, Wawiruniyatsie ti'aitame, katinikuxatani xehetsiemieme kemɨxeyurieni, kanitaxewiriyari xehetsiemieme kemɨtiyurieni.
JER 49:31 »Xekenehu, xekeneutami'a mɨkɨ kiekari kayuwatɨ mɨtima tixaɨtɨ 'atsikatiyuriweme muyu'erie, kiekari mɨkareka'itupari meta kɨyexi meuku'uwe mɨkahexeiya, meta yuxaɨtame 'ateewapaitɨ mukuma
JER 49:32 Wakameyutsixima xepiinite pɨrayani, meta wawakaitsixima memɨyumɨire xekaniwanawairiekuni, Naitsarie kwiepa nekaniwataxɨriexɨamɨkɨ mɨkɨ teɨteri yumu'utsie naime memuyukaxika, tsepa hakewa meme'uwani mepe'uximatɨarieka
JER 49:33 Katsuxi yawixi memayu'eririya wakie kanayeimɨkɨ, kakiepatɨri kanayeimɨkɨ yuheyemekɨ. Nixewitɨ tewi mana pɨkatayerɨni, xewitɨtɨma mana kietɨ pɨka'ayani».
JER 49:34 Yawé kemutayɨ 'Erami hepaɨtsita mieme, yuniukame Keremiyaxi pɨtiutaxatɨa mɨtitaxatakɨ mexɨakame wiyaritsie Tserekiyaxi ti'aitakaku Kura kwieyaritsie.
JER 49:35 Mɨpaɨ kanaineni Yawé Naimekɨmɨtɨrɨkaɨye: «'Erami tupieya nekanitamuramɨkɨ, tita hetsie mɨtiyutɨrɨkariyakai nekanikumaweriyamɨkɨ.
JER 49:36 'Erami kwieyari hetsie kuyaxi naitsarie kiekatari nekaniwa'atɨamɨkɨ naitsarie kiekatari nekaniwarawitɨxɨamɨkɨ. Naitsarie kiekatari wahetsɨa nekaniwataxɨriexɨamɨkɨ, naitsarie kwiepa kemakuyewa mekananuhapaniexɨakuni yayupapaɨmetɨ.
JER 49:37 'Erami kiekatari marika nepɨwapitɨani memɨwaraye'unie wahɨxie, memɨwakwiku wahɨxie, ne nekaniha'aka wahetsiemieme, wahetsie 'uximatɨarika nekani'atɨamɨkɨ —Yawé mɨpaɨ kanaineni—. Memɨwaraye'unie mepɨwaranukuweiya yunaime mewakwimeke mepɨtehayewa.
JER 49:38 Ne'uweni 'Erami nepɨtakeni, meta ti'aitame mana kiekame nekanika'unamɨkɨ meta 'iparewiwametemama
JER 49:39 »Peru 'arikeketa 'Erami 'aixɨa 'itɨariekame nekanayeitɨamɨkɨ»,
JER 50:1 Yawé yuniukame Keremiyaxi kemɨtiutaxatɨa wawiruniyutsixi wahepaɨtsita meta wakwieyari hepaɨtsita mieme:
JER 50:2 «Xeketeniwarutaxatɨa yunaime nuiwarite kwiepa memɨtama. Xekeneutihiwani xe'ikuxatatɨ, patera xe'anuwietɨ. Tixaɨtɨ xepɨkate'anukanaka, matsi mɨpaɨ xekeneutiyuaneni: “Wawiruniya kana'iwarieni. Weri kaniyutitewiyamɨkɨ. Maxiruki kanitimurariexɨamɨkɨ 'etsipepetɨ. Kakaɨyarixi memɨwewiyatɨka meta wa'ɨkiyarite mekaniutimurarieni tixaɨtɨ mepɨkatehayeitɨarie”.
JER 50:3 Xewitɨ nuiwari mimienekɨ tayeta mieme, 'akumaweme mayeitɨanikɨ kwieya. Teɨteri meta tewaxi mekanayekɨnikuni meyu'unarɨmetɨ, xewitɨtɨma mana kapɨtayerɨni.
JER 50:4 »'Iya tukaritsie, 'iya wiyaritsie 'ixaheritsixi meta Kura teɨteriyari mekaniyehuni me'utitsuatɨ Yawé mekuwautɨwetɨ, yukakaɨyari
JER 50:5 Mekanita'iwaukuni Tsiyuni huyeyari kemɨreuyune, hikɨ mɨkɨ huye 'utɨa mekaniyehuni. Me'axɨame Yawé hetsie yemekɨ mekateniwiyakuni tɨratu mekaniwewikuni yuheyemekɨ, hatsuakuri memɨkahetɨmaiya.
JER 50:6 »Neteɨterima muxatsi xeikuraruyari memeuyexɨri hepaɨ mepɨ'ane, wahɨwemete mepɨwarutayutsitɨa, hɨritsie yuxaɨta me'u'uwame mepɨwarayeitɨa. Xeime hɨriyaritsie me'u'uwatɨ xeime hɨriyaritsieta mepekɨka, yukuraru mehatɨmaiyaka.
JER 50:7 Kemɨ'ane memɨwarukaxexeiya, mepɨwatikwa'a, memɨwaraye'unie mɨpaɨ meputiyuane: “Tame tahetsie pɨkarahɨiwa, mɨkɨ pɨta Yawé hepaɨtsita 'axamepɨte'uyuri, wakuraru mɨheitserie kanihɨkɨtɨni, meripaitɨ xetutsima memitakwewiekai”.
JER 50:8 »Xekeneuyuta'una Wawiruniya xe'u'uwatɨ, mɨkɨ kwieyari xekeneuku'eiri. Tsipuri 'ukitsi xekenehɨkɨtɨni muxatsi memɨwaruwitɨxime.
JER 50:9 Karikɨ ne Wawiruniya hepaɨtsita nekaniwaha'aritɨaka yumɨireme teɨteri tayeta miemete memuyutaxewirekɨ. Mekaniyukuha'aritɨakuni memitamienikɨ, tayeta kiekatari mekanika'unakuni. 'Ɨrɨkɨ kwinimieme mepɨteheutamɨiwawe yu'iwarika mete'apitɨ mepakununuwa.
JER 50:10 Wawiruniya naime katininawatsiyariemɨkɨ, kemɨ'ane memɨte'inawatsirieni mekanitihuxaikuni
JER 50:11 »Xeme, neteɨterima xemɨtewarunawatsiri, xekeneyutemamawieka xekeneutinaweni. Tsikerutsixi wahepaɨ xekenetsunatɨweni tupiriya tsata, kawayutsixi wahepaɨ xekeneutiyuaneni.
JER 50:12 Peru xekwieyari tixaɨtɨ pɨkarayeitɨarieni, kemɨ'ane tukari mɨxe'upitɨa tewiyarika kanipitɨariemɨkɨ. Wawiruniya 'imatɨreme kanayeimɨkɨ, makuwaki, makumawe meta maku'ayepariya kanayeimɨkɨ.
JER 50:13 Yawé hetsiena mieme muyeha'akɨ kiepa mana pɨka'ayaniri, matsi yeuta mana kanayeimɨkɨ. Kemɨ'ane Wawiruniya 'aurie muyeyani kanitimamɨkɨ nieretɨ kemu'itɨariekɨ.
JER 50:14 »Wawiruniya warita xekenaketɨkɨni, yunaitɨ tupikɨ temɨmɨmete. Xekeneutamɨ'i, naime yu'ɨrɨkɨ, Yawé hepaɨtsita 'axakatiniuyurieni.
JER 50:15 Waritana xekenaketɨkɨneka xekeneutihiwa, mɨpaɨ xe'utiyuatɨ: Wawiruniya puyuyetuari. Tuxiyuya patixɨri, kuraruya pa'unetɨya. Hikɨri Yawé katinekapitɨamɨkɨ. Xemeta meripaitɨ kemɨxe'uyuri, yaxeikɨata xeme xekeneuyuri.
JER 50:16 Wawiruniya kwieyaritsie memuka'etsa yunaime xekeniwarukuya, meta memɨ'itsanatɨwe. 'Ixiparakɨ memɨtakwikwiwakɨ 'ayumieme, yuxexuitɨ yukiekaritsie mepɨtakɨka, meta yukwieyaritsie mepuyuta'una.
JER 50:17 »'Ixaheritsixi muxatsi xaɨtsie memeukuyunixɨa mepɨhɨkɨ, mayetsi mekaniwareutaxɨriexɨani. Matɨari 'Atsiriyatsie ti'aitame kaniwarutikwani, hutarieka Nawukurunutsuxi, Wawiruniyatsie ti'aitame, naime 'umeteya peutimuraxɨa».
JER 50:18 'Ayumieme mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: «Wawiruniyatsie ti'aitame nekatinikwinitɨamɨkɨ metatsiere kwieya 'Atsiriya kwieyaritsie ti'aitame kenemɨtiukwinitɨa hepaɨ.
JER 50:19 Yanepɨtiyurieni 'ixaheritsixi memakunuaxɨanikɨ makɨ'ɨxayatsie Kaximeru hɨriyaritsie meta Watsani kwieyaritsie memɨtekwatɨwenikɨ. Kememɨteheukwaikukai mepɨtihuxani 'Epɨrahini meta Karaha hɨriyaritetsie.
JER 50:20 'Iya tukaritsie 'Ixaheri ke'axamɨtiuyuri pɨtiwawiyarieni, peru pɨkakaxeiriyarieni. 'Iya tukaritsie Kura hetsie 'axamɨti'ane pɨtiwawieni, peru hetsiena pɨkakaxeiyarieni, karikɨ ne nekatiniwareuyehɨwiriemɨkɨ kemɨ'ane memuyuhayewa
JER 50:21 »Xekeneutami'a Meratahini kwieyari meta Pekuri memɨkiekatari. Xekeniwarukuya, xekeniwaruka'una yunaime. Xeketenaye'atɨa naime kenemɨti'aita
JER 50:22 Mɨkɨ kwieyaritsie kuyaxa yuariyaya payu'eniɨriɨkɨ yemekɨ mariwemekɨ mepekumaweriyarɨwa.
JER 50:23 Ketiumurarie meta keratihɨiya tepɨa titsuname kwiepa memɨtama yunaime muwatitsunakai. Wawiruniya makumawe kanayani yunaime nuiwarite wahixɨapa.
JER 50:24 Winiyari nekaniuwieni 'ahetsiemieme, hikɨ mɨkɨtsie pekaniuwiere ni'atsipekatimaitɨ. Pepɨkatiumaritɨarie yapauka pepuwiyarie, Yawé pe'aye'unietɨ pematɨakɨ.
JER 50:25 Yawé katineuyepieniri piinite kuyaxa timieme mɨtiuyepinetsie, katinewayepini muyutamienikɨ yuhaxɨa maye'atɨanikɨ, Yawé naimekɨmɨyɨwe, meta Naimekɨmɨtɨrɨkaɨye, mɨkɨ yu'uximayatsika pexeiya 'eye'atɨanike wawiruniyutsixi wakwieyaritsie.
JER 50:26 Xekeneutami'a naitsarie kwiepa xemutetɨka. Wa'iku muye'ɨnetɨkatsie xeketeneuyepiexɨa. Xekeneukuxeɨri 'iku kwauyari hepaɨ, xekeniwarukuya yunaime. Xewitɨ tɨma pɨkayukuhayeikawani.
JER 50:27 Watsikerutsixi yunaime xekeniwarukuya. Hakewa memetikwikwiwa mana xekeniwaranuhapani. Xɨa'ui nepaine wahetsiemieme, watukari maye'akɨ, kepauka memɨtekwinitɨarienitsie.
JER 50:28 Yu'unamete wahiwari pa'eniuriukɨ, Wawiruniyatsie memayuye'unaxɨa, Tsiyuni mekatenikuxatatɨweni Yawé kemɨtiwarakapitɨa, takakaɨyari, tukieya memuka'unaxɨkɨ.
JER 50:29 »Tupikɨ temɨmɨmete xekeniwarukuxeɨri Wawiruniya memɨtamienikɨ, yunaime kemɨ'ane memɨteheutamɨiwawe, waritana xekenayaxetɨkɨni, nixeime xepɨkatayutsitɨwani. Kememɨte'uyuri mɨpaɨ xekeniwaruyuri, yaxeikɨa xeketeniwarakapitɨa kememɨxe'uyuri. Mɨkɨ Yawé muta'iwaxɨkɨ, Mɨpatsie 'Ixaheri hetsiemieme.
JER 50:30 'Ayumieme 'iya tukaritsie temari mana kiekatari kaye 'utɨma mekanikaxɨrikuni meta yunaitɨ kuyaximama menikwikuni
JER 50:31 »Nekamenaye'unieka 'ekɨ, kiekari pemɨ'ata'ɨre —Ti'aitame mɨpaɨ kanaineni, Yawé Naimekɨmɨtɨrɨkaɨye—, 'ari 'atukari kanaye'ani, kepauka pemɨtikwinitɨarienitsie.
JER 50:32 Muyuta'ɨre kanekawitseimɨkɨ, kanekawemɨkɨ, pumaweni kemɨ'ane menukuhana. Nekanititaiyamɨkɨ naime kiekariteya, tai naime katinititaiyamɨkɨ wa'aurie mɨrahane».
JER 50:33 Mɨpaɨ kanaineni Yawé Naimekɨmɨtɨrɨkaɨye: «'Ixaheritsixi meta Kura kiekatari memu'uximatɨarie mekanihɨkɨtɨni, memɨwaraye'unie mepɨwaranutaxɨri, mepɨkawapitɨa mexɨxɨnitɨ memu'uwanikɨ.
JER 50:34 Peru waxɨname kanitɨrɨkaɨyeni, Yawé Naimekɨmɨtɨrɨkaɨye katinitewaka. Yutɨrɨkariyakɨ wahetsie kanitanuamɨkɨ, 'aixɨa 'iyari kwiepa memu'uwanikɨ kaniwapitɨamɨkɨ, peru Wawiruniya hetsiemieme, marika kanipitɨamɨkɨ.
JER 50:35 »Wawiruniyutsixi mɨɨya pɨwapitɨani. Memanuyetei meta memɨtemaiwawe mana kiekatari puwakwini
JER 50:36 Kakaɨyari niukametemama memɨte'itawa puwakwini. Meka'u'iyarime pɨwarayeitɨani. Wakuyaxima memɨyɨwawe puwakwini. Memamakame puwarayeitɨani.
JER 50:37 Wakawayutsixima meta wakaxetate meke'ukwi'iwa. Yunaitɨ 'inierimama meke'ukwi'iwa. 'Ukarawetsixi wahepaɨ meke'utimamani. Tita memɨtehexeiyakai mɨraye'atɨka kereuyehɨiyani. Mekete'unawatsiyarieni.
JER 50:38 Haa mana mieme ke'ukumaweriyarieni. Ke'ukawatsiɨxarieni. Wawiruniya kakaɨyarixi wa'ɨkiyari kwieyari mɨhɨkɨkɨ, kakaɨyarixi 'axamemɨ'anene teɨteri rukutsixi mekaniwarayeitɨwani.
JER 50:39 »'Ayumieme teyukwa'amete makumawetsie miemete tsɨikɨri yeutari wahamatɨa mana mepu'uwani, metatsiere 'aruxi 'amemɨnene wakie kanayeimɨkɨ. Tawariri kiepa pɨkahayani, 'akumawetɨ kanayeimɨkɨ yuheyemekɨ.
JER 50:40 Kepauka Tsuruma meta Kumuxa Kakaɨyari mika'unaxɨ hepaɨ raku'anetɨ payani, meta kiekarite 'auriena mamanetɨkatei, Mana nixewitɨ pɨkayutakiitɨani, nixewitɨ tewi mana pɨkatayerɨni
JER 50:41 »Tayeta kuyaxi mekanayehuni, kwie manuye'atɨkatsie paitɨ kiekatari kaniyuha'aritɨaka xewitɨ kiekari mariwetɨ meta te'aitamete meyumɨiretɨ.
JER 50:42 'Umekanahuni tupi me'u'ɨtɨ meta pitsika 'amɨtɨtɨ, mɨkɨ 'axamekateniu'iyarini mepɨkate'uyukanenimaya. Kawayutsixi wahetsie me'utetɨ mekanahuni, wayuarika haramara kemutaine mɨpaɨ katini'eniɨriɨkɨni. Kiekari Wawiruniya witsimɨraye'ane, mematsika'unake, 'ahepa 'umekanahuni xuruku mehewetɨkaitɨ, muyuxewini hepaɨ meteyuxexeiyatɨ.
JER 50:43 Ti'aitame Wawiruniya kiekame katiniutamarieniri, katɨrɨkaɨyetɨri kanayani, hiwerika hexeiyatɨ patɨa, meta kukuiniya hexeiyatɨ kanayani hukame mɨtiniwerɨmeni hepaɨ.
JER 50:44 Kurutani mɨ'ɨtsiyata maye mayeneika makutsiɨraɨye 'ɨxapa yapauka mɨ'axe hepaɨ, 'ɨxapa makutsiɨraɨyetsie, yapauka neniwatimariutamɨkɨ Wawiruniya kiekatari, wahetsiemieme ne xeime nekananayexeiyamɨkɨ. Tawari Kakaɨyari pumawe nehepaɨ 'anetɨ. Xewitɨ mɨnetsita'iwa pɨkayɨwe. Nixewitɨ muxatsi wahɨweme netsi'aye'unietɨ pɨka'ayeiwe».
JER 50:45 'Ayumieme xekeneu'eni Yawé kemɨtiyurimɨkɨ Wawiruniya hepaɨtsita, xekeneu'eni kemɨtiyɨkɨhɨawe, wawiruniyutsixi wakwieyari hepaɨtsita: Mekananayehapanietɨkɨnikuni muxatsi 'etsimemupepe, mɨkɨ mɨyamemɨte'uyurikɨ, memɨtehatikwa'akaitsie 'akumawetɨ kanayeimɨkɨ.
JER 50:46 Kwie kanitayuamɨkɨ Wawiruniya matiwenitsie mɨka'unarienitsie, watsuari kani'enieriekamɨkɨ nuiwarite watsata.
JER 51:1 Yawé mɨpaɨ kanaineni: «'Eka tɨrɨkaɨyeme tiyu'uname nekaninetɨamɨkɨ Wawiruniya hetsiemieme meta Rewi Kamahi kiekatari wahetsiemieme.
JER 51:2 Wawiruniya hetsiemieme nepuwaranunɨ'ani teɨteri teikɨ memeihɨanikɨ, tɨriku kemɨtihenarɨwa hepaɨ mɨ'itɨarienikɨ, kepaukake 'akumaweme memɨhayewa. Kepauka mu'uximatɨarieni naitsarie kiekatari mepitamieni.
JER 51:3 Tupikɨ temɨmɨmete xepɨkawapitɨaka memɨtetamɨnikɨ, xepɨkawapitɨaka tepɨa kamixayari memanakatɨkɨni. Waniwema temari xepɨkawahayewani, wakuyaxima yunaime xekeniwarukuya.
JER 51:4 Wawiruniyutsixi yukwieyaritsie mekanikaxɨrikuni, kaye'utɨma 'ixiparakɨ mekananuyetsekiexɨakuni.
JER 51:5 Tsepa 'Ixaheritsixi meta Kura kiekatari waɨkawa wahetsie mɨrahɨiwa Mɨpatsie 'Ixaheri hetsiemieme hɨxie, wakakaɨyari pɨkawaruku'eiri, Yawé Naimekɨmɨtɨrɨkaɨye.
JER 51:6 »Wawiruniya xemu'uwa xekeneuyuta'una. Ke'uyutawikweitsitɨani kemɨ'ane mɨyɨweni. Kapa mɨkɨ 'axamemɨte'uyurikɨ mana xe'ukwi'iwa wahetsiemieme. Karikɨ kanaye'aniri tukari kepauka Yawé mɨtiwarakapitɨani, mɨkɨ yapuwayurieni kememɨte'uyurikɨ.
JER 51:7 Yawé mamayatsie Wawiruniya huru tekɨxiyari kanihɨkɨtɨkaitɨni naitsarie kwiepa memɨtama mɨwarutitarɨwaitɨa. Nuiwarite mɨkɨta winu mekananu'ieni hikɨ meka'u'iyaritɨ mekanayexɨrieni.
JER 51:8 Peru yapauka Wawiruniya kanatiweni kaneutimurixɨani. Xekeneutitsuanani hetsiena mieme. Waritsamu xekene'atɨa temi'uayemanikɨ, heiwatɨ 'anayeweni.
JER 51:9 »“Wawiruniya tepu'uayemakai, peru pɨka'anayewe, tepiku'eirieni, xekenakunuaxɨa yuxexuitɨ yukwieyaritsie, muyuawitsie paitɨ kanematiwani ke'axamɨtiuyuri, hai manuyekate paitɨ kaneuti'aka”.
JER 51:10 »“Yawé pɨtiuhekɨataxɨ heitserie ketemɨtehexeiyakɨ. Xekenayeixɨa, Tsiyunitsie tepɨtetaxata Yawé kemɨtiuyuri, takakaɨyari”.
JER 51:11 »Yu'ɨrɨ xekenanuyemɨaxɨa. Yuhetsie nunuwame xekeneuti'ɨi. Yawé mɨpaɨ pɨtiwaru'iyaritɨa Meriya kiekatari te'aitamete Wawiruniya memɨka'unakɨ. 'Ikɨ kanihɨkɨtɨni Yawé kemɨtiwarakapitɨani, kemɨtiyukɨhɨani yutuki hetsiemieme.
JER 51:12 Kuyaxa paterayari xekenanuwi Wawiruniya kuraruyari hetsiemieme. Xehɨwemete xekeniwarutɨrɨkariya. 'Ateewa nenieremete xekeniwaru'uitɨa. 'Imieri xekeneukuha'arita. Yawé katinaye'atɨamɨkɨ ke'ayumieme mɨtiyurienekai, kemɨtiuta'aitakai wawiruniyutsixi wahetsiemieme katinaye'atɨamɨkɨ.
JER 51:13 'Ekɨ, haa waɨkawa xuawekaku pemɨkiekame meta waɨkawa mɨraye'atɨka pemɨrexeiya pemɨxiku, 'a'imatɨrieka tukaritsie pekaniyɨaneni, pe'uyeikatɨ 'ena xeikɨa pekanati'ani.
JER 51:14 Yawé Naimekɨmɨtɨrɨkaɨye yuhɨritɨatɨ mɨpaɨ kaniutayɨni: “Memɨmetsi'aye'unie 'utsikari memɨyumɨire wahepaɨ meyupaɨmeme nepɨwarayeitɨani, 'ahetsiemieme meputihiwani memɨmatsiha'iwaxɨkɨ”.
JER 51:15 »Yawé kwie kaniutawewieni yɨtɨrɨkariyakɨ, kemɨtimaiwekɨ kwie 'aixɨa katiniuyeni, muyuawi 'ayeume kanayeitɨani kemɨrakumatekɨ.
JER 51:16 Tɨranarieya heyuayu, wiyeri kanikuyuaneni muyuawitsie, kwie manu'atɨka paitɨ hai kanewa'iniwani, mimierɨka tsata wiyeri kaneyenɨ'awani, meta 'eka muye'ɨnetɨkatsie peiyepiwa.
JER 51:17 »Yunaitɨ teɨteri 'atsimemɨkatemate meta memɨte'ukatawe'erie mepɨhɨkɨ, yunaitɨ kakaɨyarixi wawewiwamete mepɨyutetewiya yuwewiyakɨ. Wakakaɨyarixi 'itarika memɨhɨkɨkɨ, mepɨka'ayeneniere mepɨka'uti'iwe.
JER 51:18 Tixaɨtɨ mepɨkateyunaki'erie, wawewiya pɨnanaiyɨkɨ xeikɨa, kepauka tukari maye'ani memɨtekwinitɨarienitsie mepɨka'unarieni.
JER 51:19 Kakaɨyari Kakuwu manayexei nuiwarieya mayanikɨ mɨkɨ wahepaɨ pɨka'ane, mɨkɨ naime mɨtiunetɨa kanihɨkɨtɨni. Yawé Naimekɨmɨtɨrɨkaɨye katinitewaka, Meta nuiwarieya 'Ixaheri kanihɨkɨtɨni.
JER 51:20 »'Ekɨ nemaxu pepɨhɨkɨ, nemɨyutamemiwatsie mieme, 'akɨmana nuiwarite meta te'aitamete nepɨwatitsuna.
JER 51:21 'Akɨmana memutei meta kawayutsixi nepɨwatitsuna, 'akɨmana kaxetate kuyaxa miemete meta memɨwarunɨ'a nepɨwatitsuna.
JER 51:22 'Akɨmana 'ukitsi meta 'ukari nepɨwatitsuna, 'akɨmana temari meta 'ukirawetsixi nepɨwatitsuna, 'akɨmana temari meta 'ɨimarixi nepɨwatitsuna.
JER 51:23 'Akɨmana muxatsi wahɨwemete meta muxatsi nepɨwatitsuna, 'akɨmana teɨteri 'etsamete meta tuurutsixi kwietsanamete nepɨwatitsuna, 'akɨmana memanuyetei meta te'aitamete nepɨwatitsuna.
JER 51:24 »Peru xeme xehɨxie nekatinekapitɨamɨkɨ Wawiruniya meta yunaime mana kiekatari 'axamemɨte'uyurikɨ Tsiyuni kiekariyaritsie
JER 51:25 »Ne nekamenaye'unieka hɨri pemɨti'aka'uname, naime kwie pemuka'unaxɨ —Yawé mɨpaɨ kanaineni—. Netɨrɨkariyakɨ nekamanimayɨamɨkɨ, tekɨa nekamaneukakurupamɨkɨ hɨri mɨta'i nekamanayeitɨamɨkɨ.
JER 51:26 'Ahetsɨa mieme tete 'itsikina mieme mayanikɨ pɨkatituiyani, meta tete kii tsutɨmeyari mayanikɨ pɨkatituiyani, yuheyemekɨ pe'akumawetɨ pekanayeimɨkɨ
JER 51:27 »Kuyaxa paterayari xekenanuwi mɨkɨ kwieyaritsie. Kuxineta xekeneutahɨtsi nuiwarite watsata. Xekeniwaruta'ini memeye'uniekakɨ te'aitamete 'Ararati kiekame, Mini kiekame, meta 'Atsikenatsi kiekame. Xeime kuyaxi wa'ukiyari xekenanuyeyetsa. Kawayutsixi meke'ayekɨne 'utsikari memɨyumɨire wahepaɨ meteyuxexeiyatɨ.
JER 51:28 Xekeniwaruta'ini nuiwarite memeye'uniekakɨ, te'aitamete Meriya kiekatari, kuwexinaruritsixi meta teparewiwamete 'ahurawa memuti'u. Keyeume kwietsie mɨti'aita xekeniwaruta'ini.
JER 51:29 Kwie kanitayuamɨkɨ meta kaniyutakatsimɨkɨ, Yawé katinaye'atɨwani kemɨtiyurienikekai Wawiruniya hetsie, hakumaweme kanayeitɨamɨkɨ nixewitɨ mana pɨkayutakiitɨani.
JER 51:30 Mekateniuhayewa kuyaxi Wawiruniya kiekatari meyukwitɨwetɨ, mekaniuyuti'awieta kiekari yukuraru 'amatitetewa mexeiyatɨkata. Mekatɨrɨkawitɨ mepakɨ, 'ukarawetsixi wahepaɨ metemamatɨ mekanakɨne. Wakii kaniutitaiyarieni wakiita mɨreunatɨkatei katineumurariexɨani.
JER 51:31 Tixaxatame kanayenautsa xeime tixaxatame 'utɨma, xewitɨ tupiri xeime tupiri kananukuweiya, Wawiruniyatsie ti'aitame memɨtetaxatɨanikɨ kename naime kiekaritsieri mewatahaxɨakairi kuyaxi.
JER 51:32 Hapa 'etsimatiyeyeutsie memanukɨkatsie mekaniutetɨkani, mayehakayatɨka mekaniutitaiya, hikɨ waɨkawa kuyaxi mekanimamaka».
JER 51:33 Mɨpaɨtsɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: «Wawiruniya kiekariyari witsimɨraku'ane, tɨriku waxayari hepaɨ pɨ'ane, ka'itsanarieximetɨ, 'ari tukarieya kanaye'ani mɨka'itsanarienikɨ».
JER 51:34 «Nawukurunutsuxi, Wawiruniyatsie ti'aitame, kaneniutakwani, kaneniuhɨxiyatsitɨani, xakɨ mayewaki hepaɨ ne'aneme kaneniuhayewa. Tiyukwa'ame mɨmariwe haramaratsie muyeyeika hepaɨ kanenanukaxɨni, 'aixɨa mɨnetiu'inɨataxɨkɨ putahuxai 'ariketa mɨnetsi hanatihayanikɨ.
JER 51:35 Kerutsareme kiekatari mɨpaɨ mekanaitɨkani: “Wawiruniya hetsie ketiunake nanaimarikakɨ ke'axamɨtatsi'uyuri”. Mɨpaɨ mekanaitɨkani Tsiyuni kiekatari: “Taxuriya ke'utayeurieni wawiruniyutsixi wahetsie”».
JER 51:36 'Ayumieme, Yawé mɨpaɨ kanaineni: «Kepemɨranuyetɨa 'ahetsie nekanitanuamɨkɨ, mɨpaɨ nekatiniwarakapitɨamɨkɨ, naime haramaraya nekanikawatsiɨxamɨkɨ, meta haixateya nekanikawatsiuxamɨkɨ.
JER 51:37 Wawiruniya 'unitɨ kaniyuhayewamɨkɨ, yawixi memayu'eririya wakie kanayeimɨkɨ, hipatɨ mepumamaka me'ixeiyatɨ 'axamɨtiyuxexeiyakɨ meta tewiwetɨ, ka'akukiepayatɨ kanayeimɨkɨ.
JER 51:38 Mana kiekatari yunaitɨ mayetsi wahepaɨ mekaniutiyuaneni, mayetsi tɨɨrixi wahepaɨ mekateniutsuanani.
JER 51:39 Kepauka mɨxɨkanitsie, nekaniwarakaharitɨamɨkɨ, nekaniwatitarɨwaitɨamɨkɨ yamemɨtiyɨnikɨ kemɨtiwanake. Mɨpaɨ yuheyemekɨ mekaneukutsikuni hatsuaku mepɨka'anutaneniere
JER 51:40 Nekaniwaranuhapamɨkɨ memekwi'iwakɨ, muxatsi tɨɨrixi memɨhɨkɨtɨni wahepaɨ, muxatsi 'ukitsi yatɨni tsipuri memɨhɨkɨtɨni wahepaɨ.
JER 51:41 »Kehepaɨ tiuwiyarie Tsetsaki. Kehepaɨ ra'iwarie, yunaitɨ kwiepa memɨtama hetsiena mieme memɨyuti'ɨrekai. Wawiruniya makaxiwatɨ kanayani nuiwarite wahetsiemieme.
JER 51:42 Haramara Wawiruniya heima kaneutiyeurieni, hamewarieya kanenukanani.
JER 51:43 Kiekariteya 'akumawetɨ kaniyuhayewaxɨani: makuwaki hepaɨ, makumetse hepaɨ. Nixewitɨ mana pɨkakie, meta nixewitɨ mana pɨka'uyeyeika.
JER 51:44 Weri kakaɨyariyari wawiruniya mieme nekatinikwinitɨamɨkɨ, tita mɨtiutikwai mihayanikɨ yanekatiniyurimɨkɨ. Nuiwariteri hetsɨana tawari mepɨka'axɨani, meta Wawiruniya kuraruyari 'a'uwetɨri pɨkahayewarieni.
JER 51:45 »Neteɨterima, mɨkɨtsie xekenayekɨni xekeneuyuta'una. Kemɨ'ane mɨyɨweni ke'uyutawikweitsitɨani nehaxɨa mɨtiyutaiyatsie.
JER 51:46 Xepɨkaku'amɨweni, xepɨkamamaka kemɨtikuxaxatsiwakɨ 'ikɨ kwieyaritsie. Xexuitɨ witari manuyekɨkatsie, yɨkɨ 'anetɨta panuyeyeika niuki, nanaimarika mɨkɨ kwieyaritsie pɨtixuawere, meta te'aitamete me'ayuye'unietɨ mepakɨne.
JER 51:47 Tukari 'ari kanaye'aximeni kepauka nemɨtiwakwinitɨani kakaɨyarixi Wawiruniya miemete. Naitɨ mɨkɨ kwieyari kanitewiyatsitɨariemɨkɨ, hetsɨana miemete memɨkwi'iwa mana mekanikaxɨrikuni.
JER 51:48 Hikɨ muyuawi meta kwie, meta yunaitɨ mana memɨte'u'uwa, temawierikakɨ menitihiwakuni Wawiruniya hetsiemieme, karikɨ tayeta menayenexɨakuni memika'una
JER 51:49 »Peuyewetse Wawiruniya mɨka'unarienikɨ 'ixaheritsixi muwarukwikɨ, meta naitsarie kwiepa miemete Wawiruniya muwarukwikɨ.
JER 51:50 Xeme, xemuyuta'unaxɨ xekwi'iwake xekeneuyu'unarɨmeni xekatehayewatɨ. Yawé xekenahɨaweni 'ateewa paitɨ, xepɨkatehayewani Kerutsareme xeheku'eriwatɨ».
JER 51:51 «Tepeuyutetewiyakai 'axatemɨtekɨhɨawarɨwakaikɨ, tewiyarikakɨ tepɨhɨpɨnekai, teɨteri memɨkata'iwama 'ateewa kiekatari Yawé tukieyata memeutahaxɨakɨ».
JER 51:52 «'Ayumieme, tukari 'ukanamieni kepauka wakakaɨyarixi nemɨtiwakwinitɨanitsie, 'ayumieme naitsarie mɨkɨ kwieyaritsie memɨte'uka'eniwa meniti'iteikakuni
JER 51:53 Tsepanetɨ Wawiruniya muyuawitsie paitɨ meuti'axe, meta tsepa mana paitɨ yukuraru mɨtɨrɨkaɨye mutawewi, ne te'unamete nekaniwaranunɨ'amɨkɨ hetsiena mieme
JER 51:54 »Hiwari pa'eniɨriɨkɨ mariwemekɨ muka'unariekɨ, Wawiruniya kwieyari.
JER 51:55 Yawé pika'una naime, hiwarieya peutiparitɨani. Memeye'unie hamewari mɨha'a hepaɨ pɨtiyu'eniɨriɨkɨ, wahiwari pɨwa'eiya.
JER 51:56 Kaniye'aka Wawiruniya 'uname, kuyaximama mekanitiwiyariekuni, watupi kanitimurariemɨkɨ. Karikɨ Yawé Kakaɨyari kanihɨkɨtɨni yakatiniwarakapitɨwani yuxexuime.
JER 51:57 Memanuyetei meta temaiwawemete neniwatitarɨwaitɨamɨkɨ, meta kuwexinaruritsixi, teparewiwamete meta kuyaxi, hikɨ mekaneukutsikuni yuheyemekɨ, hatsuakuri mepɨkahayuhɨtɨani», Ti'aitame mɨpaɨ kanaineni, Yawé Naimekɨmɨtɨrɨkaɨye mɨtitewa.
JER 51:58 Yawé mɨpaɨ kanaineni Naimekɨmɨtɨrɨkaɨye: «Wawiruniya kuraruyarite 'amatayeyeu naitɨ kanika'unariemɨkɨ, meta 'itupariteya mumamariwawe pɨtitaiyarieni. Teɨteri yakɨ xeikɨa meputi'uxixɨ, nuiwarite yakɨ xeikɨa mepɨte'uyu'uxitɨa kɨtsi xeikɨa matɨakɨ hikɨ».
JER 51:59 'Ikɨ 'aitsika kanihɨkɨtɨni Kakaɨyari niukameya Keremiyaxi Tserahiyaxi mɨhɨritɨa Neriyaxi nu'aya Matsehiyaxi teukarieya, kepauka Tserekiyaxi, Kura kwieyaritsie ti'aitame, hamatɨa metɨa Wawiruniya, naurieka wiyari ti'aitakaku. 'Ana Tserahiyaxi memewitɨkie mɨtiwa'aitɨa pɨhɨkɨtɨkai.
JER 51:60 Keremiyaxi tinaka'utɨakaitɨni xapatsie kemɨti'uximatɨarienikekai Wawiruniya, naitɨ hepaɨtsitana raxaxatame.
JER 51:61 Keremiyaxi mɨpaɨ Tserahiyaxi katiniutahɨawe: «Kepauka pemeta'ani Wawiruniya, pepɨkaratɨtɨmaiyani pemɨwarakaterɨwirienikɨ 'ikɨ niuki naime.
JER 51:62 Hikɨ mɨpaɨ pepetayɨni: “Yawé, 'ekɨ mɨpaɨ pepaine kename 'ikɨ kiekari peka'una, kename hakumaweme pehayeitɨani, nixewitɨ hawaikɨ kareyeikame, tewi meta niyeutanakatɨma”.
JER 51:63 Kepauka pemekanɨni xapa, tete kenakahɨaka hapa 'Eupɨrate hetsie keneukawiwi.
JER 51:64 Hikɨta mɨpaɨ ketiniwaretahɨawi: “'Ipaɨ Wawiruniya katinikayunimɨkɨ, tawari pɨka'anukukeniri 'uximatɨarikatsata nemi'atɨirienitsie”». 'Ena kanikɨnɨtsirikeni Keremiyaxi niukieya.
JER 52:1 Tserekiyaxi xeitewiyari heimana xewi wiyari kanexeiyakaitɨni kepauka mitsutɨa ti'aitatɨ, Kerutsareme katiniuta'aita tamamata heimana xewi wiyari. Maamaya Kamutari katinitewakaitɨni Keremiyaxi niweya, Riwina kiekame.
JER 52:2 Kuhatsimi hepaɨ, Tserekiyaxi Yawé kemɨkatinake katiniuyurieni,
JER 52:3 Yawé waɨkawa 'uyeha'aka, Kerutsareme meta Kura pɨwarexɨri hɨxiena memɨka'u'uwanikɨ. 'Ikɨ naitɨ mɨpaɨ katiniɨyɨni Kerutsareme meta Kura kwieyaritsie. Tserekiyaxi, Wawiruniyatsie ti'aitame kiekame 'aye'unietɨ kanayani.
JER 52:4 'Atanauka wiyaritsie, tamamata metseriyaritsie meta tamamata tukaritsie ti'aitakaku Tserekiyaxi, ti'aitame Wawiruniya kiekame Nawukurunutsuxi, yunaime yukuyaxima warawitɨtɨ neyani Kerutsareme niye'ani. Kiekari hɨxie 'utayerɨka tetsariya mekaniutiwewieni kiekari kuraruyari heima memeukatsunaxɨanikɨ.
JER 52:5 Kiekari mepuhupiekai kepaukake Tserekiyaxi tamamata heimana xewi wiyari ti'aitatɨ maye'atɨarie.
JER 52:6 'Atanauka tukaritsie naurieka metseriyaritsie, kepauka haakaxa yemekɨ matɨa mɨkɨ kiekariyaritsie, 'ari 'ikwai katixuawekaku kiekaritsie,
JER 52:7 kiekari kuraruyaritsie mekaneu'ine, tsepanetɨ Wawiruniyutsixi memɨwaranutinakai, yunaitɨ kuyaxi mekaniuyuta'una. Tɨkarikɨ mekaniwayekɨne, xeime 'itupariyaritsie mekaneuyehaxɨani kuraru 'ayehutametsie meuyexawakaita, ti'aitame haraweriyaya witsimɨtiuye'ane 'aurie. Hikɨ mekaniyuta'una 'Arawa huyeyari 'utɨa,
JER 52:8 peru kuyaxi wawiruniyutsixi Tserekiyaxi mekananukuweiya makuweritsie paitɨ Keriku meni'axe. Kuyaximama meneutanautsaxɨani meniku'eirieni yuxaɨtame,
JER 52:9 hikɨ wawiruniyutsixi meniwiya. Hikɨ meneihana ti'aitame Wawiruniya kiekame hetsɨa Xiwɨra mekatei Kamati kwieyaritsie. Mana Nawukurunutsuxi yakaniutayɨni Tserekiyaxi kemɨ'itɨarienikekaikɨ,
JER 52:10 hikɨ hɨxiena niwemama 'ukitsi mekaniwaranutixitexɨani meta Kura kwieyaritsie kiekatari ti'aitame memɨparewiekai.
JER 52:11 Hikɨ yakatiniuta'aita Tserekiyaxi hɨxiteya muwatitɨkiyariexɨanikɨ meta wurunitse tepɨayari karenayarikɨ memihɨanikɨ Wawiruniya memenuhanakɨ, mana katsariyanata hayewetɨ kanemɨni.
JER 52:12 'Auxɨwirieka metseriyaritsie tamamata tukaritsie, tamamata heimana 'atanauka wiyari ti'aitakaku Nawukurunutsuxi Wawiruniya kiekame, ti'uximayatsiriwame Nawutsararani kuyaxi tiwa'aitɨwame, kaneyani Kerutsareme,
JER 52:13 hikɨ Yawé tukieya kaniutataiya, ti'aitame paratsiyuya meta naime kiite Kerutsareme mieme, metatsiere naime kiite 'amupapakai waɨkawa meuyewekai.
JER 52:14 Hikɨ kuyaxi wawiruniyutsixi naime kiekari kuraruyari meniuta'una mɨkɨ tiwa'aitɨakaku.
JER 52:15 Meta Nawutsararani kaniwarehapani teɨteri mɨkɨ kiekaritsie memɨyuhayewatɨwekai 'akuxi, yumamakɨ tewewiwamete memuyuhayewakai meta hipatɨ tɨratu memuwewiekai Wawiruniya kwieyaritsie ti'aitame hamatɨa.
JER 52:16 Matsi kaniwaruku'eirieni yemekɨ tixaɨtɨ memɨkateheuxeiya, kaxie mumanetɨkatei meta kwie memɨ'ɨwiyanikɨ.
JER 52:17 Wawiruniyutsixi tuxiyu tuki hɨxie mukawetɨkatei wurunitse tepɨayarikɨ mɨwewiyatɨkatei mɨkɨ mekaniutitara meta kaxetate haa tuayamete wurunitsekɨ mɨwewiyatɨkatei, meta katsu 'emɨyewa haa makamarike Yawé tukieya hɨxie mumakai, hikɨ mɨkɨ naime Wurunitse menetɨni Wawiruniya paitɨ.
JER 52:18 Metatsiere xarite, kutsara 'amɨpapa, kɨmeme kɨxeme tɨtsamete, watsute 'emɨnene, katsuwerate, meta naime mana mɨtiyukumaɨwakai wurunitsekɨ mɨtiwewiyatɨkatei Kakaɨyari kɨmana memayexeiyanikɨ mɨ'ayumiemetetɨkai.
JER 52:19 Metatsiere, kuyaxi tiwa'aitɨwame katinepini tihauxiname, 'ɨkwa taiyame, xakɨrɨte xuriya kwekwewiwamete, xarite, kɨxeme 'uitɨwamete, xakɨrɨte metatsiere tekɨxite kaxie winuyari mukatuarike naitɨ mɨkɨ huru meta pɨratakɨ pɨtiwewiyatɨkatei.
JER 52:20 Tuxiyu muhuta wurunitsekɨ muwewiyatɨkatei meta haa mayemakai 'emɨyewa, meta tamamata heimana huta tuurutsixi haa mayemakai hetɨa memaye'ukai, meta kaxetate hatuayamete wurunitsekɨ mɨwewiyatɨkatei, ti'aitame Tsarumuni mɨwarutiwewiekai Yawé tukieya hetsiemieme memɨhɨkɨtɨnikɨ, mɨkɨ niwaɨkawakaitɨni wurunitse mi'inɨata kemɨrahete pɨkayɨwekai.
JER 52:21 Tuxiyu tuki hɨxie mukawetɨkatei 'atahaika meturuyari putɨtɨkai, meta 'auxɨwime heimana 'imeriyu kanipapakaitɨni, meta 'atahaika tsenitimeturuyari kanitsutsuikaitɨni, taɨtana kaniuxaxawakaitɨni.
JER 52:22 Tuxiyu mu'uteya heimana manatetɨkatei huta meturuyari kaniutɨtɨkaitɨni, 'etsireuku'utɨkaitɨ, herie karena wipiyari pɨkaweretɨkatei meta kɨranara 'ɨkiyari panakutetɨkatei wurunitsekɨ wewiyatɨkaitɨ. Hutatɨ tuxiyu yaxeikɨa tineuku'utɨkateitɨni.
JER 52:23 Xexuitɨ tuxiyu yɨkɨtsie nenakuyatsatɨkateitɨni nauka tewiyari heimana tamamata heimana 'ataxewi kɨranara 'ɨkiyari, meta karena wipiyari hetsie meukatekai xeitsienituyari kanihɨkɨtɨkaitɨni.
JER 52:24 Meta Nawutsararani kuyaxi wa'ukiyari, kaniwarutiwiya Tserahiyaxi mawari wewiwamete wa'ukiyari, Tsupuniyaxi mawari wewiwame hutarieka mieme, meta memuyuhaika kitenie tehɨwemete.
JER 52:25 Meta kiekaritsie memɨyuhayewatɨwekai, kuyaxi mɨhɨritɨariekai kaniuwiya, meta 'atahuta meyupaɨmeme ti'aitame memɨparewiekai, meta kuyaxi wahetsiemieme kemɨtiuyɨ ti'utɨwame, kuyaxi mɨhɨritɨariekai muwakuwaunenikɨ yuteɨterima watsata meta haika tewiyari kiekatari kiekaritsie memɨyuhayewatɨwekai 'akuxi.
JER 52:26 Hikɨ Nawutsararani warutiwiyaka niwarehapani ti'aitame Wawiruniya kiekame hetsɨa, Xiwɨra mukatei.
JER 52:27 Mana, Kamati kwieyaritsie, ti'aitame katiniuta'aita memɨkwi'iwakɨ. Mɨpaɨ mekatenayehapanieni, Kura kwieyaritsie kiekatari 'ateewa paitɨ.
JER 52:28 'Ipaɨ mekaniyupaɨmekaitɨni Nawukurunutsuxi mɨwarehapa: 'atahuta wiyari ti'aitatɨ, puwarehapa haika miriyari heimana xeitewiyari heimana haika (3.023) huriyutsixi,
JER 52:29 tamamata heimana 'atahaika wiyari ti'aitatɨ, 'atahaika tsienituyari heimana xeitewiyari heimana tamamata heimana huta (832) meyupaɨmeme Kerutsareme kiekatari,
JER 52:30 xeitewiyari heimana haika wiyari ti'aitakaku, Nawutsararani kuyaxi tiwa'aitɨwame, niwarutiwiya 'atahuta tsienituyari heimana huta tewiyari heimana meyu'auxɨwime (745) huriyutsixi. Mɨkɨ meyunaitɨ mepakɨ nauka miriyari heimana 'ataxewime tsienituyari (4.600) teɨteri.
JER 52:31 Xeitewiyari heimana 'atahutarieka tukaritsie, tamamata heimana huta metseriyaritsie, xeitewiyari heimana tamamata heimana 'atahuta wiyari 'anuyemiekaku Kuhakini manutahɨiyatsie kura kwieyaritsie ti'aitame, 'Ewiri-Meruraki, Wawiruniyatsie ti'aitame mexɨakame wiyaritsie ti'aitatɨ Kuhakini kaniutinenimayata kaniwayexɨna katsariyanata manutahɨiyakai.
JER 52:32 'Aixɨa tixeiyatɨ kanayani, wapaitɨ nekakeni hipame te'aitamete Wawiruniya kiekariyaritsie hamatɨana memu'uwakai wareuyeta.
JER 52:33 Kuhakini yu'ixurikite tiuku'eirieka katsariyanata mieme, kemɨreuterixɨ 'a'uyeikatɨ ti'aitame mexayatsie katinitikwa'akaitɨni.
JER 52:34 Metatsiere, kemureuterixɨ 'ayeyuritɨ kepaukake mumɨ, Kuhakini Wawiruniyatsie ti'aitame tumini kaniku'ɨitɨwakaitɨni mɨtiyunanairiekakɨ ketita mɨreuyehɨakai.
LAM 1:1 Xɨa'ui, yuxaɨta puyuhayewaxɨ, kiekari meripaitɨ witsimɨ'anekai teɨteri warexeiyatɨ. 'Ukaratsi wiura hepaɨ pɨtiyuxexeiya, meripaitɨ mumariwekai yunaime nuiwarite watsata. Meripaitɨ wamaama mɨhɨkɨtɨkai. Hikɨri waɨriyarika ti'uximayatame pɨhɨkɨ wahetsiemieme.
LAM 1:2 Tɨkakɨta kwinimieme tiutsuatɨ kaniukatariyarɨwani, 'ukaiya 'aurieyatsie kaniukakɨkani. Nixewitɨtɨma muwanaki'eriekai hikɨ pɨkahenɨtɨwa. Hamikumama yunaitɨ mekaniku'eirieni, me'eye'unietɨ pɨta mekanakɨne.
LAM 1:3 Tixaɨtɨ karayeitɨarieka, tepɨa kaunariyarikɨ 'uwiwitɨarieka, Kura kanehanieni 'ateewa paitɨ. Hipame nuiwarite watsata meyuhayewakɨ, hikɨ 'uxipiya pɨkahekaxeiyawe. Yunaitɨ memiweiyakai mekanenuku'axe, pɨkaheixeiyari kemɨ'ane miparewieni.
LAM 1:4 Kerutsareme huyeyarite 'utɨma 'umietɨ puhiweriyɨkɨ, nixewitɨri patsiekamekɨ 'ixɨararipa memuyukuxexeɨriwatsie pɨkaheta'axe. Kiekari kitenieyarite yuxaɨtame puyuhayewaxɨa: mawari wewiwamete meputi'aiwa, 'ukari 'ɨimarixi mekaneu'erietɨweni, mɨkɨ yunaitɨ 'atsiwimekɨ mekaniu'uwani.
LAM 1:5 Memɨwaraye'uniekai metewa'aitɨatɨ mekanakɨne, kayuwatɨ mekaniu'uwani memɨwaraye'unie. Yawé kaniwaru'uximatɨani, waɨkawa 'axamemɨte'uyurikɨ. Waniwema mekanewitɨkieni 'ateewa paitɨ, memɨwaraye'unie hau'erietɨ mekaniwaruhapaximekaitɨni.
LAM 1:6 Kerutsareme witsikemɨ'anekai naime witsikemɨtiyuxexeiyakai katineuyehɨani. Mana memɨte'aitakai maxatsi wahepaɨ mekani'aneni, 'ɨxa memɨwautɨwe hakewa meheikaxeiya. Mekaniyuta'unani mekayɨwawetɨri, memɨwaruweiya wahɨxie.
LAM 1:7 Paye'eriwa Kerutsareme, kepauka yɨxaɨta nutuixietɨ 'amuyeikakai, meripaitɨ waɨkawa kemɨrexeiyakai pɨra'eriwa meripaitɨ mɨtipiinieyatɨkai. Kepauka memeye'unie hetsɨana memɨye'axɨa, nixewitɨ 'ana pɨkanua 'iparewienike. Memeye'unie mepixei kepauka matiwe, 'ana mɨkɨ mepi'atsekai me'inanaimatɨ.
LAM 1:8 Kwinimieme 'axapɨtiuyuri Kerutsareme, 'ayumieme ka'itiyatɨ kanayani. Meripaitɨ 'aixɨa memɨte'ixeiyakai hikɨ mepi'uxiwe'erie, maweme memɨxeiyakɨ, 'ayumieme mɨkɨ putatsuaka, meta puyutewiya hɨxiena xɨka 'ixeiyamɨkɨni.
LAM 1:9 Kemarieya kaniutatɨnire, 'atsipɨkareitimaitɨya 'arike hetsiena kemɨtiyɨnikekai. Kemɨratiwe pɨkatimaritɨa, kaniumawekaitɨni kemɨ'ane 'inɨtɨani. «Yawé, keneneuxeiya kenemɨtiuka'eniwa. Pɨnetsi'a'iwaxɨ mɨnetsi'aye'unie».
LAM 1:10 Meye'unie naime pɨtiyukapiinitɨa naime mɨraye'atɨka Kerutsareme mɨrexeiyakai, meta mɨkɨ puwaruxei tukita kepauka memeutahaxɨa hipatɨ teɨteri Kakaɨyari memɨka'ayexeiya, 'ekɨ pemɨkawapitɨakai, muwa 'ateɨterima memɨwayutixexeɨriwatsie memeutahakeni.
LAM 1:11 Yunaitɨ teɨterimama mekaniutitsuanani, meta mekaniku'uwani 'ikwai meheuwautɨkaitɨ, yupiinite mɨraye'atɨkakɨ mekatenipatani 'ikwaikɨ memayeyuyurinikɨ 'akuxi. «Yawé, neuxei keneu'a'ɨwiya kehepaɨ memɨnetenanaima».
LAM 1:12 «Xeme huyeta xemuyekɨka, xekeneuyu'ɨwiya: ¿Kamɨtsɨ xekateyu'iyaritua nehetsiemieme? ¿Hakewa xewitɨ nehepaɨ 'aneme 'uximatɨarika pexeiya, Yawé 'uximatɨarika mɨnetsiyetuiri hepaɨ 'anekame? Yawé kepauka muyeha'a nehamatɨa, 'ikɨ 'uximatɨarika kaneyenɨ'ani nehetsiemieme.
LAM 1:13 »Muyuawitsie Yawé tai kaneyenɨ'ani, mɨkɨ ne'umeyari 'ɨarime kaniutitaiya. Winiyari kaniukeni nehɨxie, hikɨ mɨpaɨ kanetiniukunuitɨani. Kaneniuku'eirieni yuheyemekɨ, tukarikɨ yanekatineumɨmɨkɨni.
LAM 1:14 »'Axakenemutiuyuri pahete nehetsie yuku hepaɨ, Kakaɨyari katiniuyurieni mɨnetsi'utitɨtɨa. Nekɨipitɨa kanenakatɨtɨani, 'ariri kɨmana nekani'uxeni. Kaneniyetuani 'iya teɨteri wahetsɨa kemɨ'ane nemɨkawakema nemɨwatanewieni wahetsɨa.
LAM 1:15 »Nekiekaritsie Yawé nekuyaxima yunaime pɨkawaruparewi, hipame pɨta kuyaxi kaniwarukuxeɨrieni memɨnetsitamienikɨ, meta netɨɨriyama memɨwarakuxɨtɨanikɨ. Yawé kanitapɨna yukiekari minaki'erie 'ɨimari Kura niweya, kaxie kemɨtipɨnarɨwa winu mayanikɨ hepaɨ.
LAM 1:16 »'Ikɨ naitɨ pɨnetsitsuaritɨa, hiwerikakɨ nepɨkaheuniereri. Xewitɨ 'ahurawa pɨka'uyeika mɨnetsinɨtɨanikɨ, meta mɨnetsituikakɨ. Neniwema mekaneutaxɨriexɨani mɨtatsi'aye'unie mɨtatsi'a'iwaxɨkɨ».
LAM 1:17 Tsiyuni pahiwa parewiya ha'iwawatɨ, peru pumawe xewitɨ minɨtɨanikɨ. Yawé mɨpaɨ tiuta'aitaku Kakuwu 'aurie mematetɨkatei hikɨ mepeye'unie, hikɨ Kerutsareme kanihɨkɨtɨni xatsi xeikɨa meta mɨka'itiya.
LAM 1:18 «Yawé heitserie kanexeiyani, peru ne 'aitsikateyatsie yanepɨkatikatɨa. Xekeneu'enana, xeme hikɨ teɨteri, kenemɨtiuka'eniwa xekeneuyu'ɨwiya. Mekanehapanieni 'ateewa paitɨ nehetsɨa miemete temari meta 'ɨimarixi.
LAM 1:19 »Meripaitɨ nemɨwanaki'eriekai nekaniwarutahɨawe, peru mɨkɨ mekaneniuku'eirieni. Mawari wewiwamete meta 'ukirawetsixi nehetsɨa miemete yunaitɨ kiekaritsie mekaniukwini, 'ikwai mekuwautɨwetɨ, 'akuxi memayeyuyurinikɨ.
LAM 1:20 »Yawé, keneneuxeiya nepɨtiuka'eniwa. 'Ari nepi'enie nepɨmɨxime. Ne'iyari pɨkayumaiwe, kwinimieme nemɨkaheu'enakaikɨ. Netɨɨriyama mekaniukwi'iwa takwa, 'upaitɨta mɨɨya xeikɨa kanixuaweni.
LAM 1:21 »Teɨteri netsuari mekani'enieka, xewitɨ kaniumaweni mɨnetsinɨtɨani. Yunaitɨ memɨnetsi'aye'unie mekatenimaika kenemɨtiuka'eniwa, mekaniyutemamawieka nehetsie kepemɨtiuyurikɨ. 'Ari kenanɨ'a 'uximatɨarika kepemutayɨ, mɨkɨta mɨpaɨ memɨte'uka'eniwanikɨ ne kenemɨtiuka'eniwa.
LAM 1:22 »'Ahetsɨa paitɨ keheye'ani tita ke'axamemɨte'uyuri. Kepemɨnetiupitɨa 'uximatɨarika ke'axanemɨtiuyurikɨ, mɨkɨta mɨpaɨ ketiniwarupitɨa. 'Ari pɨmɨire kenemɨtiutatsuaka, meta ne'iyari 'ari pɨkɨmɨmɨkɨ».
LAM 2:1 Xɨa'ui, Tsiyuni niweya witsimɨti'ɨimarikai Yawé 'akɨyɨwime kanayeitɨani yuhaxɨa kwauniyarikɨ. Muyuawitsie paitɨ kwiepa kamenakahɨani, haweri pe'anekame kamenayeitɨani kepemɨtimariwekai 'Ixaheri. Kepauka mɨmetsi'uka'unaxɨ ha'atɨ katinatɨmaiya kemɨti'aitakai 'ena kwiepa.
LAM 2:2 Yawé pɨtiuka'unaxɨa katinenimayatɨ naime 'ixaheritsixi wakii, meta ha'atɨ kanika'una Kura witsimɨti'ɨimari hakewa meyutɨrɨkariyakai, meta tixaɨtɨ pɨkarayeitɨa mana ti'aitame meta 'iparewiwamete kaniwarukwini.
LAM 2:3 Yemekɨ Kakaɨyari waɨkawa kaniuyeha'ani, naime 'Ixaheri tɨrɨkariyaya kanakuyeitɨani. Mɨtatsi'aye'unie kaninuani tahetsɨa, hikɨ 'ana Yawé pɨkatatsi'uparewi. Kakuwu hetsie tai manutatani hepaɨ 'anetɨ, watixɨtsitɨaximetɨ yunaime 'auriena mematetɨka.
LAM 2:4 Mɨtatsi'aye'unie hepaɨ, yutupi kaniukuha'aritɨani, yutseriekɨ pekwekai. Mɨtatsi'aye'unie hepaɨ, kaniwarukwini nehetsɨa miemete temuwanaki'erie. Yuhaxɨa tai hepaɨ 'aneme kaniukawiwieni Tsiyuni witsimɨti'ɨimari 'ixuriki kiiya hetsie.
LAM 2:5 Yawé mɨtatsi'aye'unie hepaɨ pɨtiyurie: 'Ixaheri kaniuka'una. Naime paratsiyuya kaniuka'una meta hakewa meyutɨrɨkariyakai. Putimɨiriyaxɨ tahiwerika meta ta'ukai, Kura witsimɨraku'ane hetsiemieme.
LAM 2:6 Xewitɨ xamaru makumaweriya hepaɨ, mɨpaɨ yutuki katiniuka'una. Yawé Tsiyuni pɨratɨmaiyatsitɨa xawati mɨka'utiwewiwanikɨ meta patsiekamekɨ kememɨteyukuxexeɨriwa 'ixɨarariyari, ti'aitame hepaɨtsita puyeha'a meta puwaruhayewaxɨ mawari wewiwamete hetsɨana memɨmiemetetɨkai.
LAM 2:7 Yawé yumawari taiyame puka'utanaki'eri, muyepatsie kaniuku'eirieni. Kaniyetuani memɨtatsi'aye'unie wahetsɨa kuraru paratsiyu mukunakai. Yawé tukita meputihiwa 'ixɨarari mɨwewiyaka hepaɨ.
LAM 2:8 Yawé puyuwaɨri mika'unakɨ kuraru 'amatayewa Tsiyuni witsimɨti'ɨimari warie maka. Kɨye 'utikweka kani'inɨata, hikɨ kanika'una ka'inenimayatɨ. Hiwerika putixuawerixɨ tetsariya 'imɨmɨiyarite mɨranutikɨkatɨre meta kurarute 'amatitetewa wahetsiemieme, mɨkɨ naitɨ kaniuka'unarieni.
LAM 2:9 'Ituparite kaneuxɨriexɨani kwiepa kaniyuhayewa, kaneimuraxɨani 'ituparite warita mauku'uwe. Ti'aitame meta 'iparewiwamete mekane'uwani hipame nuiwarite watsata, 'inɨari niukiyari pɨkakuxaxatsiwari meta Kakaɨyari niukametemama mepɨka'u'uwari, Yawé pɨkatiwaxeitsitɨari.
LAM 2:10 Tsiyuni witsimɨraku'anekaitsie, mana 'ukirawetsixi kwiepa mepeutitei kayuwatɨ xeikɨa, yumu'utsie naxi meheutiwiwatɨ meta hiwerika kamixayari me'anakatɨtɨkaitɨ. Kerutsaremetari 'ɨimarixi mekaneutiteni kwiepa me'akatututsitɨ.
LAM 2:11 Tsuarikɨ nehɨxite pɨtixɨxime, 'ariri kakwaniwemekɨ nepeɨmɨmɨkɨ. Yemekɨ ne'iyarikɨ nepɨkaheuwaɨre nekiekari muka'unariekɨ. Tɨɨritɨtɨ yakɨ memɨyumate mekanitiweranareni, 'ikɨ kiekari kayeyarite 'utɨma.
LAM 2:12 Tɨɨri yumaamama mɨpaɨ metewaku'iwawiyatɨ: «¿Hakewa pexuawe 'ikwai meta winu?», 'anari mepatixɨrɨwe kaye'utɨma mekwikwi'itɨ memɨte'uhipite hepaɨ, meta memɨtsitsewe wamaamama mewareukɨ'ɨkaku 'imatɨrieka mepuka'ietɨkɨka.
LAM 2:13 ¿Kehepaɨ netayɨni 'ahetsiemieme, Kerutsareme witsipemɨti'ɨimari? ¿Kemɨ'ane hepaɨ pepɨ'ane? ¿Ketita 'inɨariyarikɨ nemetitahɨawe nemɨmatsinɨtɨanikɨ, kiekari Tsiyuni 'ɨimari? Haramara kemeukatewa hepaɨ pɨ'ane 'akwinitɨarika. ¿Kemɨ'ane 'aku pɨyɨwe mɨmatsi'u'uayemani?
LAM 2:14 Kakaɨyari niukametemama 'ahetsɨa miemete mepɨmate'utaxatɨa 'itarikakɨ kename kehapaɨ mete'unenierixɨ. Mepɨkamatsi'utahekɨataxɨ ke'axapemɨtiyurienekai, 'ateɨterima kememɨte'anuhapanienikekai mepɨka'itaxataxɨ. Niuki memɨmatsikuxaxatɨwakai 'itarika xeikɨa pɨhɨkɨtɨkai.
LAM 2:15 Keyupaɨmetɨ mana huyeta memuyekɨka mematsixeiyatɨ mekameninanaimaka mekateniutapineni. 'Ahetsiemieme Kerutsareme witsipemɨ'anekai, nanaimarika mepɨwewie, meta me'utiwikɨayatɨ mɨpaɨ mepɨte'u'iwawa: «¿'Ikɨ xeniu tihɨkɨ kiekari witsimɨ'ane? ¿'Ikɨ xeniu kiekari waɨkawa temawierika mexeiya tihɨkɨ yunaime muwara'iwa?»
LAM 2:16 Yunaitɨ memɨmetsi'aye'unie meputiniuka 'axametekuxatatɨ 'ahepaɨtsita, yutamete me'utixikauteketɨ, mematsinanaimatɨ mɨpaɨ meputiyuane: «'Ayeniereme tekaniutakwani. Tukari paye'a temikwewiekai, hikɨri 'ari tahɨxikɨ tepixei».
LAM 2:17 Yawé kaneye'atɨani kemɨtiku'eriwakai, kaneye'atɨani yuniuki, meripaitɨ kemutayɨkai. Kametsinenimayatɨ kwiepa kamenehɨani, katiniupitɨani mɨmatsi'aye'unie mɨmatsitananaimanikɨ, mɨkɨ pɨtata watɨrɨkariya mariweme kanayeitɨani.
LAM 2:18 Teɨteri wa'iyari Yawé mekanihiwieka mete'uka'eniwatɨ. Tsiyuni witsipemɨ'ane 'akuraru 'amatitɨtɨ, tukarikɨ tɨkarikɨ keneuhayewa tsepa 'a'ukai muhanenikɨ haa hepaɨ. Hawaikɨ 'etsiwa pepɨka'uxipieka. 'A'ukai pepɨkaheununuitɨwani.
LAM 2:19 Kenanukukeka keneutahiwani tɨkarikɨ, kepauka tɨkarikɨ tehɨwemete memitsutɨanitsie. Keneu'eiri 'a'iyari 'ukaiya mawari kenayeitɨa Yawé hɨxie. Keneyunenewieka Kakaɨyari hetsɨa kenewauka teikɨ pehemetɨ 'atɨɨriyama watukari hetsiemieme, haakakɨ memɨkwixime kaye'utɨma memeutihe.
LAM 2:20 «Neuxei Yawé, keneu'ati'iyaritɨa: ¿Kemɨ'aneri mɨpaɨ pepɨtiukwinitɨa meripaitɨ? ¿Kamɨtsɨ 'ukarawetsixi yuniwema metewatikwani yuhetsie memɨwarayexei? ¿Metekwi'iwa tsɨkamɨ mawari wewiwamete meta 'ahetsiemiemete niukamete Yawé 'atuki muyepatsietsie?
LAM 2:21 »'Ukirawetsixi meta temari yunaitɨ kaye'utɨma tumuanaritsata mekanitiheni, temari meta 'ɨimarixi nehetsɨa miemete 'ixiparakɨ mekaniukwi'iwa. Peha'atɨ watukari pekaniwarunawairieni, pekaniwarukwini pekawanenimayatɨ.
LAM 2:22 »'Ixɨararipa pemɨta'inieni hepaɨ, kenemɨtika'unarienikɨ naitsarie pekatiniutanɨ'axɨani. Kepauka Yawé pemuyeha'a nixewitɨ pɨkayɨwekai muyuta'una, meta nixewitɨ pɨka'uyuhayewaxɨ 'ayenieretɨ. Kemɨ'ane waɨkawa nemɨwanaki'eriekai meta nemɨtiwaruti'ɨkitɨa, mɨkɨ yunaime mɨtatsi'aye'unie kaniwarukwini».
LAM 3:1 Ne nekanihɨkɨtɨni nemɨtiuka'eniexɨa 'uximatɨarikakɨ Kakaɨyari 'uyeha'aka yukɨyekɨ pɨnetsi'uwa.
LAM 3:2 Kaneniupitɨani yɨwipa nemuyeikanikɨ, hekɨariyatsie pɨkanetsi'upitɨari.
LAM 3:3 Yakanetini'uximatɨaka, heiwatɨma xeitukari pɨka'anukayeika.
LAM 3:4 Newaiyari meta nenawiyaritsie pɨnetsi'utawatsiɨxaxɨ, ne'umeyari pakamuraxɨa.
LAM 3:5 Pɨnetsi'ukurarutɨiyaxɨ 'axamɨti'anekɨ meta nemɨtiuka'eniwanikɨ.
LAM 3:6 Waɨriyarika kaneninɨ'aka yɨwipa xeikɨari nemuyeikanikɨ, meripaitɨri memukwi wahepaɨ.
LAM 3:7 'Ukaneniyenaka, nepɨkayɨwe nemɨyuta'una, tepɨa kaunariyarikɨ mahetekɨ kaneniuhɨani.
LAM 3:8 Tsepa karima nemutahiwa tsepa parewiya nemɨwawa, mɨkɨ nenenewieri pɨka'enimɨkɨ.
LAM 3:9 Nehuyeta tetexi puyatsaxɨ, meta nehuye waɨkawa pekutunaxɨa.
LAM 3:10 Kakaɨyari pɨnetsi'awiexeiyane hutse mɨtihupie hepaɨ, meta maye hepaɨ pɨnetsihupie.
LAM 3:11 Huyeta kanenanayehanani mɨnetsititsanaxɨanikɨ, haweri ne 'anekame mɨnetsihayewakɨ.
LAM 3:12 Yutupi 'ukuha'aritɨaka, kanenimɨneni xeikɨa.
LAM 3:13 Ne'iyaritsie kaneniutamɨni yu'ɨrɨtekɨ metɨkɨta miemetekɨ.
LAM 3:14 Ne, 'atsieriwame xeikɨari nekanihɨkɨtɨni yunaime teɨteri wahɨxie, tukarikɨ nehɨxie mekaniutikwikani menetsinanaimatɨ.
LAM 3:15 Hatsiwimekɨ xeikɨa kaneniutahɨniya, meta kaneniu'itɨani tsiɨrika hepaɨ ratsiwime.
LAM 3:16 Netsi'uwiyaka kwiepa katiniukatuaxixɨani nekɨmana, tumuanari nemɨtikwanikɨ kaneniupitɨani.
LAM 3:17 Pɨnetsi'unawairi kayuwatɨ kenemɨrexeiyakai, 'aixɨa 'iyari 'uyeikatɨ kemɨreu'erieka nepɨka'imateri.
LAM 3:18 Hikɨ mɨpaɨ nekaniutaineni: «Netukari pɨtixɨxime, meta neta'ikwewatɨ Yawé hetsiemieme».
LAM 3:19 Kena'eriwani kuyeikame nemɨhɨkɨ netiuka'eniwatɨ, ratsiwimekɨ nemɨmɨximekɨ.
LAM 3:20 Mɨpaɨ tsiere nepɨtiku'eriwa, 'ayumieme mɨkɨkɨ nepaunutuixie ne'iyaritsie.
LAM 3:21 Peru 'akuxi tawarita mɨpaɨ nepɨtiku'eriwa, mɨkɨ waɨkawa neta'ikwewame pɨnetsihayeitɨwa:
LAM 3:22 Yawé naki'eriyaya mɨmariwe hatsuaku pɨkakumawere, meta kemɨtiyukanenimaya hatsuaku pɨkaxɨni.
LAM 3:23 Xexuime ximeriyaritsie pihekwariya kemɨtiyukanaki'erie, pɨmariwe ke'aixɨa mɨtiuka'iyari.
LAM 3:24 'Ayumieme 'imatɨrieka, mɨpaɨ neputaine: «Yawé xeikɨa kanihɨkɨtɨni tita nemɨrexeiya. 'Ayumieme hetsiena xeikɨa netiwiyatɨ nepɨta'ikwewani».
LAM 3:25 Yawé 'aixɨa katiniuka'iyarini kemɨ'ane yuri memɨte'erie hetsiena wahetsie, meta kemɨ'ane memikuwautɨwe wahetsiemieme.
LAM 3:26 'Aixɨa kani'aneni kayuwatɨ 'umatɨ mitakwewieka, Yawé mayenenikɨ tatsitawikweitsitɨanike.
LAM 3:27 'Aixɨa pɨ'ane xɨka tewi retimani yuku mɨtitɨnikɨ temaikɨyari hepaɨ.
LAM 3:28 Xekeneuhayewa yuxaɨtame xeikɨa muyuhayewanikɨ, mɨpaɨtsɨ Yawé katinipitɨani.
LAM 3:29 Tumuanaripa yɨhɨxima keheuhakeni. Heiwatɨ 'akuxi 'uparewiyani.
LAM 3:30 Tawarita ta'aurie kehaweni tapata yu'auritapa mɨtikwinitɨarienikɨ, para mɨpaɨ 'axa'itɨarietɨ muyuhayewanikɨ.
LAM 3:31 Yawé katanexɨrieni, peru yuheyemekɨ pɨkatatsihexɨrieni.
LAM 3:32 Waɨkawa temɨte'uka'eniwanikɨ pɨtatsipitɨa, peru pɨtatsitinenimayata, naki'eriyaya mɨmariwekɨ.
LAM 3:33 Ti'aitame pɨtatikwinitɨa meta pɨtatsihiweritɨa peru mɨpaɨ mɨtinakekɨ pɨkatiyuriene.
LAM 3:34 Kepauka memɨtiketsinarɨwa yunaitɨ pɨretsutsixi kwiepa memɨtama,
LAM 3:35 kepauka 'Amutewi hɨxie tewi heitserie kemɨrexeiya mɨpaɨ mɨkatipitɨarie,
LAM 3:36 kepauka heitseriemekɨ mɨkaparewiya, ¿Yawé tamɨ mɨpaɨ karetimamateke?
LAM 3:37 ¿Kemɨ'ane pɨyɨwe tixaɨtɨ hepaɨtsita mɨtiutaxata 'ariketa hekɨatsime mayeitɨani Yawé mɨpaɨ kahainekaku?
LAM 3:38 ¿Tamɨ Kakaɨyari xeikɨa yahainekaku yakatikuyɨne, mɨtiutixuxuawere 'axati'anetɨ meta 'aixɨati'anetɨ?
LAM 3:39 ¿Titayari 'ayeyuritɨ 'axaraineni kemɨ'ane 'axatiuyurieyu mɨtiukwinitɨarienitsie?
LAM 3:40 Neuxei hikɨmɨ tepɨtatimaixɨani yateteku'eriwatɨ hikɨ 'ana tepɨ'axɨani Yawé huyeya 'utɨa.
LAM 3:41 Tekaninɨawakakuni Kakaɨyari muyuawitsie makawe ta'iyarikɨ meta tamamatekɨ.
LAM 3:42 'Axatepɨte'uyuri, temɨkaheu'enana tepɨhɨkɨ, 'ekɨta pepɨka'awaɨriya pemɨtareuyehɨwirienikɨ.
LAM 3:43 Waɨkawa peha'atɨ pekataniuweiyani, pekatanikwika pekatatsinenimayatɨ.
LAM 3:44 Haiwitɨritsata pepɨ'ati'awiwieta tanenewieri pemɨka'eniekakɨ.
LAM 3:45 Tepɨa temɨxikiyari mɨkaheuyewetse hepaɨ, pekataneutaxɨriexɨani nuiwarite watsata.
LAM 3:46 Yunaitɨ memɨtatsi'aye'unie meputiniuka tahetsiemieme xeikɨa 'axamepɨtekuxata.
LAM 3:47 'Ari tepatixɨriya tete'uka'eniwatɨ temariutsietɨ, kepauka takiekari muta'unarie.
LAM 3:48 Haa muhane hepaɨ pɨyɨne ne'ukai ne'auritsie, neteɨterima wakiekari mɨmariwe muka'unariekɨ.
LAM 3:49 Nehɨxite xɨari pɨkayunixɨani 'ukaikɨ, katihayewatɨ meta xewitɨ ka'inɨtɨakaku,
LAM 3:50 kepaukake muyuawitsie paitɨ Yawé mɨtatsihaye'erieni mɨtatsixeiya.
LAM 3:51 Pɨnetsihekukukuine yemekɨ ne'iyari taɨta paitɨ, newaxeiyatɨ 'ukarawetsixi mete'uka'eniwame nekiekaritsie kiekatari.
LAM 3:52 Memɨnetsi'aye'unie mekaneniuweiyani nitixaɨtɨ mekatehayexeiyatɨ nehamatɨa, wiki hepaɨ mekaneniwiniyatɨweni.
LAM 3:53 Ne'ayeniereme mekaneniteukikuni tetexikɨ menetsiheukananike newatiyanikɨ.
LAM 3:54 Haa nemu'utsie paitɨri kaniuku'atɨkani, 'ari mɨpaɨ katinimatsiɨkɨni netukari kaniutixɨni.
LAM 3:55 Hikɨ meukatewatsie mɨki teukiyata nekameniutahɨawe, parewiya Yawé nekameniutawawirieni,
LAM 3:56 'ekɨta pepɨnetsi'u'eni kenemɨmatiwawiriekai yemekɨ, hawaikɨ pepɨkaheikanaxɨa 'a'enakareme ne kenemutainekai karima.
LAM 3:57 Ne nepɨmatsi'utahɨawixɨ, hikɨ 'ekɨ nehetsɨa pepunua, mɨpaɨ pepɨnetiutahɨawixɨ: «Pepɨkamaka».
LAM 3:58 Yawé, 'ekɨ nehetsie peputanua 'ana netukari peputawikweitsitɨa.
LAM 3:59 Yawé, 'ekɨ pepunierixɨ ke'aixɨa nemɨkatixeiyariekai, nehetsiemieme kemɨtiheitserie 'aixɨa ketineuyuri.
LAM 3:60 'Ekɨ pepuwaruxei kwinimieme kemenete'aye'unietɨ memɨnetsi'uyuri meta pepɨtimaikai kememɨteku'eriwakai nehetsiemieme.
LAM 3:61 Yawé, 'ekɨ pepɨwaru'eni ke'axamemɨtate'utahɨawixɨ meta naime kememɨteku'eriwakai nehetsiemieme,
LAM 3:62 'ekɨ pepɨtimate tukarikɨ memɨnetsi'aye'unie mepɨnetsikuxata kememɨteyurieni nehetsiemieme.
LAM 3:63 Keniwaruxeiya. Tsepa kememɨteyurie mekaneninanaimaka me'utikwitɨ.
LAM 3:64 Yawé, yaketiniwarakapitɨa, naime kememɨte'uyurikɨ.
LAM 3:65 Mekatemaiwaweme keniwarayeitɨa, 'axamɨti'ane wahetsie ketiunake.
LAM 3:66 Yawé, keniwaranukuweiya peha'atɨ, 'ena kwiepa keniwarakumaweriya.
LAM 4:1 Huru 'ari pɨka'utixawatɨre. Huru 'aixɨamɨ'ane putayɨrixɨ puyutakwitama. Tetexi mɨpatsietɨka kwinimieme mɨraye'atɨka tukita timieme kaye'utɨma katineutiteni.
LAM 4:2 Tsiyuni kiekatari, meripaitɨ mepɨtehaye'akai huru kemɨraye'axe, hikɨri haxu xariteyari hepaɨ mepɨtexeiyarie, 'iwewame nenikamɨti'ane mitiwewi.
LAM 4:3 Yeutari memayu'eririya yutsitsi mepɨyexata yuniwema mepɨwatsitsitɨa, peru 'ukari Kerutsaremetari mepɨka'u'iyari. Yuniwema mepɨwata'e'eiriwa 'aruxi 'amemɨnene makumawetsie memu'uwa wahepaɨ.
LAM 4:4 Tɨɨri yemekɨ waɨkawamekɨ mepeuhariku, waneni 'ari puwawaki. Paa tɨɨri mekaniku'iwawani, peru neuxei nixewitɨ pɨkawamimɨkɨ.
LAM 4:5 Kemɨ'ane meripaitɨ memɨte'utikwa'akai witsiti'anekame hikɨ mekanikwiximeni haakakɨ kaye'utɨma. Meripaitɨ witsimemɨte'ukemarikai mɨyɨtsikimaɨyekɨ hikɨ xatsitsata mekanikurupetɨweni.
LAM 4:6 Ke'axamemɨte'uyuri Tsurumatari matsi kwinimieme 'axamepɨte'uyuri Kerutsareme kiekatari, yapauka kaniuka'unarieni, nixewitɨ pɨka'iparewi.
LAM 4:7 Kwinimieme matsi mepɨtetuxakai mana te'aitamete 'ɨwi hepaɨ, meta retsi hepaɨ, wawaiyari yemekɨ pɨtataɨrawikai, Tete mɨraye'axe mutimerɨka hepaɨ mepɨteyuxexeiyakai.
LAM 4:8 Peru hikɨ kwinimieme mepɨteheutɨtɨni keyuri yɨxari, nixewitɨ pɨkawamate kaye'utɨa. Yuwaiyaritsie kwinimieme mekateniwawakini kɨye hepaɨ, wa'umeyaritetsie kaniuwerixɨani.
LAM 4:9 'Aixɨa mekani'itɨarieka kemɨ'ane memukwi'iwaxɨ 'ixiparakɨ, keyuri haakakɨ memukwi. Haaka wara'iwakaku mekanitakukuweni, karikɨ mɨtiumawekɨ 'ikwaxite 'ɨtsita timieme.
LAM 4:10 'Ukarawetsixi 'aixɨa memɨte'u'iyarikai, yumamá mekaniuhɨniri yuniwematɨme mekaniwaruka'etsa. Yuniwema wahekɨ mekatenikwakaitɨni, kepauka Kerutsareme muka'unarietsie.
LAM 4:11 Yawé yuhaxɨa kaniutatuani, yuhaxɨa mɨtiyukukuine kananayetuani. Tsiyuni taikɨ kaniutataiya meta kanitaxɨtsitɨani tsutɨmeyari naime.
LAM 4:12 Mɨpaɨ mepɨkateha'eriwakai naitsarie te'aitamete, meta yunaitɨ teɨteri naitsarie kiekatari, kename Kerutsareme memaye'unie kiteniena meheutahaxɨanikekai.
LAM 4:13 Peru mɨpaɨ katiniɨyɨni. Kakaɨyari niukametemama 'axamete'uyurieku. Mawari wewiwamete 'axamete'uyurieku. Teɨteri 'axamekateyuriekame memɨwarukwikɨ kiekaritsie kaye'utɨma.
LAM 4:14 Yumamatetsie meheuxuxuretɨ, kaye 'utɨma mekaniu'uwani memɨkaheuneniere wahepaɨ meyɨatɨ. Xewitɨtɨma pɨkayuwaɨriya muwamayɨanikɨ tsikeretɨma wa'ixurikitsie.
LAM 4:15 Teɨteri mɨpaɨ mekateniwaruhiwiwani: «'Ena xepɨka'u'uwani, xemɨka'itiya. Xekeneuhuni. Xekeneuhuni. Xepɨkatatsikumaɨwani tame». Hipame nuiwarite watsata mɨpaɨ mekatenikɨhɨawarɨwani: «Ku'uwamete mekanihɨkɨtɨni, memuyu'unaxɨaxime. Mepɨkayɨwawe 'ena memu'uwani yuheyemekɨ».
LAM 4:16 Yawé tɨtɨ katiniuyurieni muwareutaxɨriexɨa, hikɨri pɨkayu'iyaritɨa wahetsiemieme. Mawari wewiwamete mamariwawemete mepɨkaxatsiwa meta 'ukirawetsixi mepɨkanenimayatsieri.
LAM 4:17 'Imatɨrieka, tahɨxite pɨtitɨximeri teta'ikwewatɨ yakɨxeikɨa xewitɨ tatsiparewienike te'erietɨ. Tuxiyutsie paitɨ tetanenieretɨ tekanita'ikwewani hipatɨ teɨteri memɨtatsitawikweitsitɨanikɨ.
LAM 4:18 'Etsiwa temuku'uwatsie tepuhupierie, kaye 'utɨma temɨye'uwani pɨkayɨweri. Ta'imatɨrieka tukariyari kanehuraniri, 'ariri kanaye'ani, tatukari naitɨ pɨ'inɨatsie.
LAM 4:19 Memɨtatsi'aye'unie matsi kwinimieme mepayɨwawekai keyuri kwixɨtsi muyuawitsie miemete, hɨritsie mepɨtatsi'uweiyatɨkɨkakai, makumawetsieta mekataniuhupieni.
LAM 4:20 Meta kaniuwiyarieni ti'aitame Yawé menayexei, mɨkɨ hetsie tetewiyatɨ temu'uwakai. Mɨkɨ pɨhɨkɨtɨkai hetsiena mieme mɨpaɨ temutiyuanekai: Mɨkɨ 'etɨriyayatɨa te'u'uwatɨ nuiwarite watsata tepu'uwani.
LAM 4:21 Kene'atemawieka meta keneutanaweni, 'Erumi kiekariyari, 'Utsi kwieyaritsie, 'uka ti'aitame hepaɨ pemɨtika. Peru 'arike 'ikɨ tekɨxita 'ekɨta pepanu'ieni, hikɨ 'ana pepɨtitaweni meta pemawetɨ pepayani.
LAM 4:22 Tsiyuni witsipemɨti'ɨimarikai, kanaye'atɨarieni kepemɨtikwinitɨarienikekai, Kakaɨyari tawariri xeime kwieyaritsie pɨkamatsi'anɨnɨ'ani. Peru 'ekɨ, mɨmariwe 'Erumi kiekariyari, kamani'uximatɨamɨkɨ ke'axapemɨtiuyurikɨ meta naime ke'axapemɨtiuyuri katinitahekɨatamɨkɨ.
LAM 5:1 Yawé, kenaye'eri kemɨtatiuyuri, ketemɨteyutewinɨa kenaye'eri.
LAM 5:2 Takwie hipatɨ tiwapiini pɨratɨa, meta takii, 'ateewa kiekatari wapiini katinayani.
LAM 5:3 Tepɨkatehekapaapari, nutuite teputahayewaxɨ, tamaamama wiuraxi mepuyuhayewaxɨ.
LAM 5:4 Haa temɨhare, tekaninaneka xeikɨa, kɨyexi, yaxeikɨa tekaninaneka.
LAM 5:5 Memɨtatsi'uweiya takeputsatsie mekana'uweni, tepu'u'uxe xeikɨa, temuka'uxipieni tepɨkayɨwawe.
LAM 5:6 Tɨratu tekaniuwewieni 'Ekipitu meta 'Atsiriya wahamatɨa, mɨpaɨ 'ikwaite temɨtekaxeiyakɨ.
LAM 5:7 Tapaapama 'axameteyurietɨ mekaniukwini, tame pɨta tekaniu'uximatɨarieni wahetsiemieme.
LAM 5:8 Hikɨri waɨriyarika te'uximayatamete memɨhɨkɨtɨkai mɨkɨ mekatateni'aitɨaka, xewitɨ kaniumaweni mɨtatsixɨnakɨ wahetsɨa.
LAM 5:9 Makumawetsie makukweriwa'anetsie tekaniuyekɨkani, tatukari tekanitatuaka ta'ikwai temukaxexeiyanikɨ.
LAM 5:10 Tanawiyari pɨtatsikutaiya huxunu mɨxɨka hepaɨ, haakakɨ tekanihɨiyatɨkani.
LAM 5:11 Tsiyuni kiekatari 'ukarawetsixi meta Kura kiekariyaritsie 'ɨimarixi waɨriyarika mekaniutimayɨiyani.
LAM 5:12 Ta'ukiyarima memanuyehaitɨtɨakai mekaniukawɨtɨarieni yumamatsie mehɨatɨkaitɨ, meta tixaɨtɨ mepɨkatewarayeitɨa 'ukirawetsixi.
LAM 5:13 Taniwema temari 'aixɨa memɨ'anene tɨxɨmete mepɨwarayeitɨa, tɨɨri kɨyexi mahete me'ɨtɨtɨ mepekaxɨrɨwekai.
LAM 5:14 Hawaikɨri 'ukirawetsixi kiekari kitenie mepɨkatiyaxike, hawaikɨri temari wakwikari tepɨka'enie.
LAM 5:15 Temawierika pɨkaxɨaweri ta'iyaritsie, teye'amete watemawierika nutuixiya pɨta kanayani.
LAM 5:16 Tamu'utsie kuruna tepɨka'anamanari. Xɨa'ui tametsɨari: 'axatekateniuyurieni.
LAM 5:17 Ta'iyarite pukwiximeri, tahɨxite kanititɨximeni,
LAM 5:18 Karikɨ Tsiyuni hɨriyaritsie kanakukiɨriyaka, mana xeikɨa yeutari mekaniu'uwani.
LAM 5:19 Yawé, peru 'ekɨ 'aheyemekɨ pekatini'aitametɨni, 'a'uweni yuheyemekɨ 'akaniuweni.
LAM 5:20 ¿Ketitayarikuta 'aheyemekɨ petaratɨtɨmaiya? ¿Ketitayarikuta mɨixa tukari petatiuku'eiri?
LAM 5:21 Yawé, 'ekɨ ketaneupitɨa 'ahetsɨa temɨ'axɨanikɨ, hikɨ 'ana tame ta'aurie tepaxɨrieni. Meripaitɨ ke'aixɨa temɨ'anekai mɨpaɨ ketatineupitɨa.
LAM 5:22 Yurikɨ, 'ekɨ pepɨtatsi'uku'eiri waɨkawa yemekɨ pepɨha'a tahamatɨa.
EZE 1:1 Xeitewiyari heimana tamamata wiyaritsie, naurieka metseritsie, 'auxɨwirieka tukariyaritsie, memehapanie wahamatɨa ne'uyeikakaku Kewaxi hatɨayari hatetsitatsie, 'ana muyuawi kananakayepiere hikɨ Kakaɨyari heinɨtsika hepaɨ kanetiniuxeitsitɨani.
EZE 1:2 'Ari 'auxɨwime wiyari meta 'auxɨwime metseri panuyemiekai kepauka ti'aitame Kuhakini mehaniekai.
EZE 1:3 (Mɨkɨ tukaritsie, 'Etsekieri Wutsi nu'aya mexi'akuxi Kewaxi hatɨayari tetsita 'uyeikakai, karireutsixi wakwieyaritsie, Yawé yuniuki kaniuhekɨata hetsiena meta heimana kaniutimeni).
EZE 1:4 Kepauka nemunierixɨ neyeta 'eka tɨrɨkaɨyetɨ kanayemiekaitɨni, meta hai wiyerimatɨ kahekɨatɨ tiukamimiwatɨ 'auriena. Tai hixɨapa tepɨa nekaniuxeiya 'utixawatɨreme.
EZE 1:5 Meta tai hixɨapa nekaniwaruxeiya yunaukame memayeneniere wahepaɨ meteyuxexeiyame,
EZE 1:6 mɨkɨ yuxexuitɨ nauka nierikayari mepexeiyatɨkatei meta nauka 'anateyari.
EZE 1:7 Wateurite pɨxexeurawikai, meta waketate tsikeru karutsateya hepaɨ pɨ'anenekai meta meputixawatɨrekai wurunitse mɨharuanariyarie hepaɨ.
EZE 1:8 Naukakɨa wa'etsata, wa'anatetɨa, tewi mamateya mepexeiyatɨkatei. Mɨkɨ yunaukatɨ memayeneniere nierika mepexeiyatɨkatei meta 'anate,
EZE 1:9 wa'anate puyukuwayakai. Kepauka memɨyekɨkakai yu'utɨa mepɨka'ukununuwakai, yuhɨxie xeikɨa mepuhukai.
EZE 1:10 Mɨpaɨ wanierika katinaka'eriekaitɨni: yuhɨxie yunaukatɨ tewi nierikaya mepexeiyatɨkatei, yutserieta maye hepaɨ mepɨte'aka'eriekai, yu'utata tuuru hepaɨ mepɨte'aka'eriekai, yuwaritata kwixɨ hepaɨ mepɨte'aka'eriekai.
EZE 1:11 Yaxeikɨa mepɨkate'aka'eriekai. Yuxexuitɨ yu'anate metaweratɨ mepenukuwɨwɨtɨwakai. Huhutamekɨ wa'anate puyukuwayakai. Hutamekɨta yuwaiyari mepeukunakai.
EZE 1:12 Yunaukatɨ memayeneniere mepuhukai yuhɨxie. Mepuhukai hakewa 'iyari mɨwarenɨ'akai, meta yu'utɨma mepɨka'anakunenierekai.
EZE 1:13 'Ikɨ memayeneniere tɨɨ mɨxawawatɨ hepaɨ mepɨteyuxexeiyakai, yatɨni tai kɨxeme hepaɨ, mepuyuatɨkatei tsepa hakewa. Tai kaniuxawatɨrekaitɨni meta mana mimierɨka kanakaneikakaitɨni.
EZE 1:14 Yunaukame memayeneniere nekaniwaruxeiya, mexɨima mekaneu'uwakaitɨni mimierɨkari hepaɨ mekuyɨatɨ.
EZE 1:15 Nekaniwaruxeiya meyunaukame memayeneniere nauka nierikayari memexeiya, yuxexuime wahetsie netiniuxeiya kwiepa, wa'urie tixikɨrawitɨ katinitimanekaitɨni.
EZE 1:16 Mɨkɨ naukatɨ yaxeikɨa pɨ'anenekai, meta yaxeikɨa putimerɨkatɨkatei tupatsiyu hepaɨ, mɨkɨta yaxeikɨa pɨ'anenekai. Kemutɨtɨkai meta kemɨyeyeukai yaxeikɨata hupaitɨ 'anenetɨ pɨyemanekai.
EZE 1:17 Mɨkɨ mɨxikɨrawikai kanikuyuatɨkateitɨni naukametsie peru kahakununuwatɨ yuhetsie.
EZE 1:18 Mɨxikɨrawikai naukatɨ mana panuyexaxawakai, mana hɨxite kanexeiyakaitɨni naitsarie.
EZE 1:19 Kepauka memayeneniere memuhunitsie, mɨxikɨrawi yaxeikɨata kaniyekɨkakaitɨni, kepaukata kwiepa memanuyewɨwɨrekai, yaxeikɨata mɨxikɨrawi panuyewɨwɨrekai.
EZE 1:20 Memayeneniere mekanekɨkakaitɨni, hakewa 'iyari mɨwarenɨ'akai, mɨxikɨrawi wahepaɨtsita panuyewɨwɨrekai, memayeneniere wa'iyari mɨxikɨrawitsie mɨyetetɨkateikɨ.
EZE 1:21 Kepauka memayeneniere memɨkuyuatɨkatei, mɨxikɨrawita kanikuyuatɨkateitɨni, kepaukata memɨwa'uni mɨxikɨrawita kaniwa'uwekaitɨni kwiepa. Kepauka kwiepa memanuyewɨwɨrekai, yaxeikɨata mɨxikɨrawi panuyewɨwɨrekai wahepaɨ puyɨtɨkatei, memayeneniere wa'iyari mɨxikɨrawitsie mɨyetetɨkateikɨ.
EZE 1:22 Wamu'utsieta memayeneniere waɨkawa katinixuawekaitɨni muyuawitsie hepaɨ, witsikatinakumerɨkaɨyekaitɨni 'ɨwi hepaɨ.
EZE 1:23 Muyuawi hetɨa witsipɨtiyuxexeiyakai, mɨkɨ memayeneniere yu'anate mepɨtatseratɨkatei meta mepuyutawayakai, mɨkɨta yuxexuitɨ huta 'anateyari mepexeiyakai para kɨmana yuwaiyari memeukunakakɨ.
EZE 1:24 Kepauka mɨkɨ memuhunitsie, ne nepi'eniekai wa'anate, haa 'amɨpa hepaɨ pɨtiyu'eniɨriɨkɨkai, Naimekɨmɨtɨrɨkaɨye mahiwa hepaɨ, kuyaxi yumɨiretɨ memutihiwani hepaɨ mematiteitsie. Kepauka memɨwa'unitsie, wa'anate pɨkawɨwɨrekai.
EZE 1:25 Meta memɨwa'unitsie yu'anate mekawɨtɨatɨ, mana yuariya kana'eriurɨkɨre waheima 'amakuyewatsie yumu'utsie memeixeiyakai.
EZE 1:26 Mɨkɨ heima mana nepɨtiuxei muyuawitsie 'uweni hepaɨ ti'anekame tete mutimerɨka hepaɨ, mana makatei tewi hepaɨ pɨtiyuxexeiyakai.
EZE 1:27 Manayukɨhɨatsie huteikɨ meutiyune nepuxei 'utimerɨkame, tepɨa mɨxawatɨ hepaɨ tiyuxexeiyatɨ tai waritana pakatei. Mayuhɨatsie hukɨa meukayune, 'auriena pakuxawatɨkai tai hepaɨ.
EZE 1:28 Xawatɨriya hakuwiwi hepaɨ pɨtiyuhekɨakai, kepauka mukawiwiyetsie mana mutahupu. Naitɨ witsipɨtiyuxexeiyakai Yawé wewiyaya. Mɨpaɨ netiuniereka, kwiepa nekaniutihɨximakeni, 'ana xeime nekaniu'enieni netsihahɨaweme.
EZE 2:1 Mɨkɨ niuki mɨpaɨ kanetiniutahɨawe: «Tewi pemunu'aya keneutakexi, nekamatinitaxatɨamɨkɨ».
EZE 2:2 Netikuxaxatɨwakaku, 'Iyari nehetsie kaninuani, 'akaneniutaketɨani, kaneniupitɨani nemi'eniekakɨ kemɨ'ane mɨnetikuxaxatɨwakai.
EZE 2:3 Mɨpaɨ kanetiniutahɨawe: «Tewi pemunu'aya 'ixaheritsixi wahetsɨa nekamenanunɨ'amɨkɨ. Mɨkɨ nuiwari memɨkaheu'enana mepɨhɨkɨ mekaneniuku'eirieni. Mɨkɨ meta meripai miemete watutsima mekaneniuku'eirieni, 'anatɨtɨ mepɨkanetsiha'eriwa.
EZE 2:4 Ne nematsinɨ'a teɨteri memɨkaheu'enana memɨtsetse'i wahetsɨa, mɨpaɨ pemɨtiwarayehɨtɨanikɨ: “Yawé naimekɨmɨyɨwe mɨpaɨ kanaineni”.
EZE 2:5 Heiwatɨ mematsihe'enieni, yatɨ hawaikɨ, yemekɨ teɨteri 'axamemɨte'u'iyari mekanihɨkɨtɨni, peru tsikere mɨpaɨ mepɨtemaika kename Kakaɨyari niukameya wahamatɨa 'uyeika.
EZE 2:6 'Ekɨ, tewi pemunu'aya, pepɨkawarayemakaka meta waniuki pepɨkamakaka, tsepa xuyatsata meta witsaxatsata pemuwe, tsepa terɨkaxi watsata pemuyeika. Pepɨkaheumaka kememɨtekuxatani, teɨteri memeuyexɨri mekanihɨkɨtɨni.
EZE 2:7 Heiwatɨ mematsi'u'enieni, yatɨ hawaikɨ, yemekɨ teɨteri 'axamemɨte'u'iyari mekanihɨkɨtɨni, peru neuxei 'ekɨ neniuki pepɨwataxatɨani.
EZE 2:8 'Ekɨ, tewi pemunu'aya, keneu'ena kenematitahɨawe, meta 'axapepɨkatiuka'iyarini wahepaɨ. Keneutakwa'i kenanukaxɨwa tita nematimini».
EZE 2:9 Hikɨ nemeutanierixi, mamá nepuxei xapa kwikwiekame 'akwekame nehepa hetatserame.
EZE 2:10 Nehɨxie pitawenaxɨ, mɨkɨtsie naitsata pɨraye'utɨkatei, kememɨteyuhiwerie, kememɨte'uka'eniwa meta kememɨtenanaimarie.
EZE 3:1 Mɨpaɨta kanetiniutahɨawe: «Tewi pemunu'aya, 'ikɨ xapa mɨraye'uxa keneutakwa'i, hikɨ 'ixaheritsixi ketiniwaxatɨamie».
EZE 3:2 Ne nekaniutakwaxani mɨkɨta xapa kanenamini.
EZE 3:3 Mɨpaɨta kanetiniutahɨawe: «Tewi pemunu'aya, xapa nematsiyetuirie keneutakwa'i, kɨmana keneutahuxai». Hikɨ ne nekanitakwani, waɨkawa pakakakai xiete hepaɨ.
EZE 3:4 Tawarita mɨpaɨ kanetiniutahɨawe: «Tewi pemunu'aya, 'Ixaheri nuiwariyari wahetsɨa kenemie, neniuki keniwaretaxatɨa.
EZE 3:5 Nepɨkamatsinɨ'a yɨkɨ memɨte'uniuka wahetsɨa, mɨkwaniwe mɨwa'eniekakɨ, 'ixaheritsixi wahetsɨa nekameninɨ'aka.
EZE 3:6 Nepɨkamatsinɨ'a hipame memɨyumɨire yɨkɨ memɨte'uniuka wahetsɨa, mɨkwaniwe mɨwa'eniekakɨ, tsepa mɨkɨ wahetsɨa nemɨmatsihenɨ'a, nekatinimaika mɨkɨ mekamene'eniewaweni.
EZE 3:7 Peru 'ixaheritsixi teɨteriyari mepɨkametsihe'enieni, pɨkawanake yamemɨtekahuni. Yunaitɨ mana kiekatari mepɨtsetse'i mepɨkateyuxatɨarinɨa.
EZE 3:8 'Ayumieme, neta petse'ime nepɨmatsihayeitɨani, pekaheu'ename wahepaɨ.
EZE 3:9 Pekatariweme nepɨmatsihayeitɨani, tete kwinimieme mɨtitse'i hepaɨ, pekahewatayuaneme 'ai hepaɨ. Pepɨkawarayemakaka meta pepɨka'utimamaweni, tsepa kwinimieme teɨteri 'axamemɨte'u'iyari memɨhɨkɨ».
EZE 3:10 Hikɨ mɨpaɨta kanetiniutahɨawe: «Tewi pemunu'aya, naime ketineu'eni kenemɨmatitahɨawe, 'a'iyaritsie keneuti'uta.
EZE 3:11 Hikɨ kenemie hakewa 'a'iwama memehapanie. Heiwatɨ mematsihe'enieni, yatɨ hawaikɨ, peru 'ekɨ mɨpaɨ ketiniwaretaxatɨa: “Yawé naimekɨmɨyɨwe mɨpaɨ kanaineni”».
EZE 3:12 Hikɨ Kakaɨyari 'Iyarieya kanenanukuketɨani, ne'utɨma mɨpaɨ nekatiniu'ena tɨranarikɨ kwie mutayuaneni hepaɨ: «Yawé xawatɨriyaya 'aixɨa ketikuxaxatsiwani, hakewa meyeika».
EZE 3:13 Nekani'enieni memayeneniere wa'anate memuyutikatsixɨtsie, meta mɨxikɨrawi wa'aurie mutimanekai, wayuariya waɨkawa putirɨrɨrɨkakai.
EZE 3:14 'Iyari kanenanukuketɨani nehetsie katiniuwiya, nenutuixietɨ meta 'axanetiyɨkɨhɨawetɨ nekaneyani, Yawé tɨrɨkariyaya netsiwiyakaku karima.
EZE 3:15 Mɨpaɨ ne'anetɨ Teri-'Awi nekaniye'ani, Kewaxi hatetsitayaritsie, hakewa memehapaniekai 'ixaheritsixi, yemekɨ waɨkawa nenehɨawetɨ wahamatɨa nepuyuhayewaxɨ 'atahuta tukari.
EZE 3:16 'Atahuta tukari 'anukayaku, Yawé mɨpaɨ kanetiniutahɨawe:
EZE 3:17 «Tewi pemunu'aya, 'ekɨ waxexeiyame nekamanayeitɨani, 'ixaheritsixi teɨteriyari. 'Ayumieme, kepauka neniuki pemɨ'enieni, nehetsiemieme ketiniwarutaxatɨa
EZE 3:18 'axatiyuruwame: “Mɨyakɨ katinapiniyarieka”. Xɨka 'ekɨ 'atsipekatitahɨawe 'axatiyuruwame, xɨka pekatiutaxatɨani 'amuyeikanikɨ, mɨkɨ kanimɨmɨkɨ yayɨanetɨ, peru ne mumɨkɨ nekamatinitawawiriemɨkɨ.
EZE 3:19 Xɨkata 'ekɨ petitaxatɨayu, xɨka mɨkɨ 'axamɨti'ane katiuhayewa meta 'axatiyurienetɨ kanimɨmɨkɨ, peru 'ekɨ 'atukari pekanitawikweitsitɨamɨkɨ.
EZE 3:20 Metatsiere, xɨka 'aixɨa mɨtiuka'iyari 'axatiyurienetɨ 'ayani, xɨka ne nehetihɨani, 'ekɨta xɨka pekatitaxatɨani, mɨkɨ kanimɨmɨkɨ meripaitɨ ke'aixɨa mɨtiuyuri pɨkatihekɨare hetsiena. Mɨkɨ kanimɨmɨkɨ ke'axamɨtiuyuri mɨkatiutaxatɨariekɨ, peru ne mumɨkɨ nekamatinitawawiriemɨkɨ.
EZE 3:21 Peru xɨka 'ekɨ petitaxatɨani 'aixɨa mɨtiuka'iyari 'axamɨkatiyurienenikɨ, xɨka mɨkɨ tiuhayewa, mɨkɨ 'akaniuyeikamɨkɨ mɨmatsi'anu'enikɨ pemɨtitaxatɨatsie, 'ekɨta 'atukari pepɨtawikweitsitɨani».
EZE 3:22 Hikɨ Yawé neheima kaniutimeni, mɨpaɨ kanetiniutahɨawe: «Kenanukukexi 'ɨtsita kenemie, mana nekamatinetaxatɨamɨkɨ».
EZE 3:23 Ne nekananukukeni nekaneyani 'ɨtsita. Mana Yawé xawatɨriyaya nekaniuxeiya, kenemɨtixei Kewaxi hatetsitayaritsie, hikɨ kwiepa nehɨxima nekaniukaweni.
EZE 3:24 Hikɨ Kakaɨyari 'Iyarieya nehetsie kaneutahani, 'akaneniutaketɨani mɨpaɨ kanetiniutahɨawe: «'Akiita kenemieka keneuyunama.
EZE 3:25 'Ekɨ tewi pemunu'aya, kaunarikɨ pekanihɨiyamɨkɨ teɨteri watsata pemɨka'uyeikanikɨ.
EZE 3:26 Ne 'aneni mɨwerekɨ yanepɨtiyurieni, mɨpaɨ pekaniuwetɨ pepayani, pemɨwatatieni pepɨkayɨweni, tsepa kwinimieme 'axamemɨteyuruwamete.
EZE 3:27 Peru ne kepauka nematsitahɨawe, 'aneni nepɨtatuani pepɨtiwataxatɨani: “Yawé naimekɨmɨyɨwe mɨpaɨ kanaineni”. Kemɨ'ane meu'enamɨkɨ ke'u'ena, meta kemɨ'ane mɨkaheu'enamɨkɨ pɨka'enani, teɨteri memɨteyukahiwe'erie memɨhɨkɨkɨ.
EZE 4:1 »Tewi pemunu'aya, hikɨta xeime xɨnariya keneuti'ɨi, 'ahɨxie keneutamana, Kerutsareme kiekariyari 'ɨkiyari keneutawewi.
EZE 4:2 Waritana hipame keniwarayatsatɨye'a kuyaxi, tuxiyu keneutiwewi mana memeukatsukwakanikɨ, meta 'imumui 'amatayewa keneutawewi kiekaritsie ye'akame meta makinatsixi mana keniwati'uitɨa memɨwaka'unakɨ.
EZE 4:3 Tepɨa keneuti'ɨi, 'ahepatsie keneutaketsa kiekarita waritana paitɨ puyuhayewani, mɨkɨ keneta'ɨwiyani. Mɨpaɨ kiekari kuyaxi wahekɨ kanakurarutɨiyariekamɨkɨ: 'ekɨtɨtɨ pekaniyɨanemɨkɨ. Mɨkɨ 'inɨari kanihɨkɨtɨkamɨkɨ 'ixaheritsixi wahetsiemieme.
EZE 4:4 »'A'etsama 'a'utama keneuhu'i, mɨkɨ pɨ'inɨaritɨni 'ixaheritsixi 'axakememɨte'uyuri wahetsiemieme. Kepemɨreutere mɨkɨkɨ pekaitɨ wahetsiemieme ke'axamemɨte'uyurikɨ.
EZE 4:5 Ne mɨpaɨ nepɨmarahɨawe, haika tsienituyari heimana nauka tewiyari heimana tamamata tukari mɨpaɨ pepɨrekani, mɨpaɨpaɨ wiyari memuyurikɨ 'ixaheritsixi 'axameteyurietɨ.
EZE 4:6 Mɨpaɨpaɨ tukari heutineyu, tawarita pekanikahuimɨkɨ peru 'atseriekɨ pɨtata, huta tewiyari tukari, mɨpaɨpaɨ wiyari 'axamemɨte'uyuriku, Kura nuiwarimama.
EZE 4:7 Hikɨta Kerutsareme pekanixeiyamɨkɨ kuyaxi wakuraruyari meti'ukame, pewaku'u'uniwatɨ 'amamakɨ pekatiniwataxatɨamɨkɨ kemɨranuyeyani.
EZE 4:8 Ne nekamenihɨamɨkɨ kaunarikɨ, ta'aurie pemɨka'awautsenikɨ mexi ka'aye'awe tukari pemɨtikwinekɨ.
EZE 4:9 »Ketineukuxeɨrieka tɨriku, tsewara, mume, mume 'etsimɨpepe, wawe meta hawena, keneukawewi xeime xakɨtsie, keneupɨna paa pemɨtiwewienikɨ kɨmana, mɨkɨtsɨ 'a'ikwai kanihɨkɨtɨkamɨkɨ haika tsienituyari heimana nauka tewiyari heimana tamamata tukari 'apemukanitsie 'a'utata.
EZE 4:10 Xeitukaritsie paa 'etsipeme pekaniutakwa'amɨkɨ yaxeikɨa 'upaukakaku.
EZE 4:11 Meta mɨkɨ hurayaritsie xeikɨa huta watsuyari pepanuhareweni.
EZE 4:12 Paa peputa'ɨariyani tewi kwitaya petaiyatɨ, meta yunaitɨ mematsixeiyakaku pepitakwa'ani, tsewara tsuirayari mɨhɨkɨtɨni hepaɨ».
EZE 4:13 Hikɨta tawarita mɨpaɨ Yawé kaniutayɨni: «Meta yaxeikɨatsiere, 'ixaheritsixi mekatenikwakakuni kati'itiyakame, naitsarie nuiwarite wahetsɨa hakewa nemɨwaretaxɨriexɨani».
EZE 4:14 Hikɨ mɨpaɨ nekaniutayɨni: «Hawaikɨ, Yawé nekakaɨyari. Ne, hatsuaku tixaɨtɨ 'axati'anekame nepɨkatitakwaiwe. Hikɨ meta nunutsiyari paitɨtɨ, hatsuaku timɨkime waiyarieya nepɨkarekwaka, yatɨni 'ɨrawe 'itexierieya. Wai nepɨkatakwaiwe ka'itiyakame».
EZE 4:15 Mɨkɨ mɨpaɨ kanetiniutahɨawe: «'Aixɨa kani'aneni, nekamanipitɨaka wakaxi kwitaraiyatsie paa pemɨtikwaxiyanikɨ, tewi kwitaya pemɨkayurienenikɨ».
EZE 4:16 Tawarita mɨpaɨ kanetiniutahɨawe: «Tewi pemunu'aya, Kerutsaremetsie tɨriku mukumawerekɨ yanepɨtiyurieni. Teɨteri paa 'etsiwa xeikɨa mekaniutikwa'akuni meta waɨkawa meyuheiwerietɨ, yaxeikɨata haa 'etsiwa xeikɨa meputihareweni meyuheiwerietɨ.
EZE 4:17 Paa meta haa katinikumawerimɨkɨ, kepauka yunaitɨ memɨyuxeiyani kememɨyɨaka, yunaitɨ mekanitiweranaxɨakuni, metakukuwetɨ mekanitixɨkuni ke'axamemɨte'uyurikɨ.
EZE 5:1 »Tewi 'ekɨ pemunu'aya, hikɨ xeime 'ixipara keneutikwe'i 'ataxikaunime nawaxa tiyuxikame kenayeitɨa, naime 'amu'utsie pemɨ'akaxinikɨ, meta 'amɨxiya pemataxinikɨ. Hikɨ ti'inɨnɨatame keneutikweka, mana 'akɨpate pemikaxi 'ayehaikame kenayeitɨa.
EZE 5:2 Kepauka maye'ani, kuyaxi tetsariyayari, mɨhaikatsie mieme xeime kiekari hixɨapa pepɨtataiya, xeimeta 'ixiparakɨ pekanitiximɨkɨ kiekari warita, 'imatɨrieka 'ekatsie pepita'enitsitɨani. Neta, ne'ixipara nepɨwatihana meta nepɨwaranukuweiya mana kiekatari.
EZE 5:3 Hipameta kɨpate kenanuyehurieka, 'akamixa 'amɨtewi kɨtsimeyaritsie kenatawɨtɨa.
EZE 5:4 Yapaɨmemeta keneutihurieka taipa keneuwiwi mɨtitanikɨ. Mana kaniyetatɨyeimɨkɨ 'ixaheritsixi yunaime wakiekaritsie kaniye'amɨkɨ.
EZE 5:5 »Mɨpaɨ kanaineni Yawé naimekɨmɨyɨwe: 'Ikɨ Kerutsareme kiekariyari kanihɨkɨtɨni. Ne nuiwarite wahixɨapa nekanikamani meta kwie 'auriena mamanetɨka.
EZE 5:6 Peru mɨkɨ kenemɨti'aitɨakai 'inɨari niukiyaritsie menetsi'aye'unietɨ mekanakɨne, 'axameteyurietɨ nuiwarite watsata meta kiekari 'auriena mamanetɨka kememɨkateyuriekai. Mɨpaɨ mekaniuyɨni, ne'aitsika mekaniuku'eirieni yuheyemekɨ meta ne'inɨari niukiyari.
EZE 5:7 »'Ayumieme ne mɨpaɨ nepaine, Yawé naimekɨmɨyɨwe: Xeme matsi xepɨkaheu'enana, keyuri nuiwarite xe'aurie mematetɨka, ne'aitsikatsie meta ne'inɨari niukiyaritsie yaxepɨkatekahu, meta mɨkɨ nuiwarite wayeiyari xemanukuweiya xepɨkayɨwawe.
EZE 5:8 'Ayumieme ne, Yawé naimekɨmɨyɨwe, mɨpaɨ nepaine: Nekamenaye'unieka, Kerutsareme, ne nekamatinikwinitɨamɨkɨ mɨkɨ nuiwarite yunaime wahɨxie.
EZE 5:9 'Axamemɨ'anene kakaɨyarixi wahekɨ, ne yanepɨtiyurieni hatsuaku 'ahetsie kenemɨkatiyuriwe nepɨxe'uximatɨani tawariri mɨpaɨ nepɨkawayurieni.
EZE 5:10 Xeme xetsata wapapama yuniwema mewakwa'atɨ mekanitixuawerikuni meta tɨɨri yupapama mepɨwatikwani. Ne nekatiniwakwinitɨamɨkɨ, kemɨ'ane memɨtawikwenita nekaniwataxɨriexɨamɨkɨ nauka 'ekayaritsie.
EZE 5:11 »'Ayumieme ne Yawé naimekɨmɨyɨwe, mɨpaɨ nekanaineni: Xeme netuki ka'itiyakame xepayeitɨa 'axamemɨ'anene kakaɨyarixi wahekɨ, kemɨkareuyewetse xeyɨatɨ, ne nekanixeheuyehɨamɨkɨ nekaxehaunenimayatɨ.
EZE 5:12 Yayupaɨmetɨ hairieka tsiemieme kwiniyakɨ meta haakakɨ kaye'utɨma mekanikwikuni, hipatɨta hairieka tsiemiemete 'ixiparakɨ 'a'aurie mekanikwi'iwakuni, 'imatɨrieka memɨyuhayewatɨwe nauka 'ekayarikɨ nekaniwataxɨriexɨamɨkɨ. Ne ne'ixipara nekaniwatihanimɨkɨ, teɨteri nekaniwaranukuweiyamɨkɨ.
EZE 5:13 Hikɨ nehaxɨa wahetsie puyuhayewa, kɨmana mepɨtihuxani, ne'iyari 'aixɨa kaniyɨmɨkɨ. Kepauka ne neha'atɨ nemɨtihayewa newaruweiyatɨ, mɨpaɨ mepɨtehetimani kename ne Yawé, mɨpaɨ nehaine.
EZE 5:14 »Kii muka'unarie hepaɨ pe'aneme nekamanayeitɨamɨkɨ, nuiwarite 'a'aurie mematetɨka mekamani'atsekakuni. Yunaitɨ 'a'aurie memuyekɨkani mepɨmatsixeiya.
EZE 5:15 Kepauka ne nematikwinitɨani neha'atɨ meta yemekɨ waɨkawa 'uximatɨarikakɨ, nanaimariwame pekanayeimɨkɨ meta xani'eriwame, memayuyemariwanikɨ 'inɨari pepayani, nuiwarite 'a'aurie memahane mɨpaɨ memɨtemaikakɨ. Ne Yawé, mɨpaɨ nekanaineni.
EZE 5:16 »Ne haakakɨ nepɨmatsiwiya, 'ɨrɨ mumɨyakɨ nepɨmatsitamɨni naime mɨtikema. Nekaniwakwimɨkɨ, nekani'atɨamɨkɨ haakakɨ naitɨ wapiinite katinikumawerimɨkɨ.
EZE 5:17 Xɨka mɨkɨ yakɨti'aneni 'akuxi, ne nekaniwatanɨ'amɨkɨ 'ahetsɨa yeutari teyukwa'amete mɨkɨ 'aniwema memɨkamatsihayewieni. Kwiniya 'ahetsie waɨkawa tiye'axekaku pekaniyuxeiyamɨkɨ meta 'axuriya kanitayeuriyamɨkɨ, ne yanekatiniyurimɨkɨ 'ixiparakɨ pemɨmierienikɨ. Ne Yawé mɨpaɨ nekanaineni».
EZE 6:1 Yawé mɨpaɨ kanetiniutahɨawe:
EZE 6:2 «Tewi pemunu'aya, 'Ixaheri hɨriyarite keneuxeiyaxɨa, ketineutaxata wahetsiemieme.
EZE 6:3 Mɨpaɨ ketiniwarutahɨawi: “Xekeneu'enana, 'Ixaheri hɨriyarite, Yawé naimekɨmɨyɨwe niukieyakɨ, hɨrite meta yemurite, haa manuyehapane meta mayeweweritsie: ‘Xehetsiemieme 'ixipara kanayenemɨkɨ, nekaniti'unamɨkɨ xetukite.
EZE 6:4 Mawari taiyamete nekanititaramɨkɨ, 'ɨkwa witsimu'ɨa taiyame 'etsipepeme nepɨtaxɨriexɨani, meta yukakaɨyarixi 'axamemu'ɨatɨka wahɨxie mekwikwi'itɨ mekanikaxɨrikuni.
EZE 6:5 Huu, kakaɨyarixi 'axamemu'ɨatɨka wahɨxie memɨkwinikɨ 'ixaheritsixi yanepɨtiyurieni, wa'umete nekanitaxɨrimɨkɨ mawari mematitaiyatsie 'aurie.
EZE 6:6 Tsepa hakewa xeme'uwa, xekiekari kaniti'unariemɨkɨ meta hakewa xemɨteha'atɨwa. Mawarite xematitaiya kaniti'unariemɨkɨ, xekakaɨyarixi 'ɨkiyarite 'axamɨ'anene, kwinimieme menetɨ mekanikekukɨ me'u'unitɨ, 'ɨkwa taiyame 'etsipepetɨ kanitaxɨriexɨamɨkɨ. Naime tita xemɨte'utiwewi mɨkɨ katinikumawerimɨkɨ.
EZE 6:7 Mɨkɨ xeteɨterima mekanikwikuni, 'ana mɨpaɨ xepɨtehetimani kename ne, Yawé nehɨkɨ.
EZE 6:8 »” ’Peru ne yanepɨtiyurieni hipatɨ memɨkakwinikɨ, hipame nuiwarite wahetsɨa meta wakiekaritetsie mepanuhapanieni.
EZE 6:9 Memutawikwei mepɨnetsihaye'erieni, tsepa hakewa memehapanie muwa mehe'uwatɨ. Mepɨnetsihaye'erieni ne kenemɨtiukwinixɨ yu'iyaritsie 'axamemɨte'uyurikɨ kememɨteyupataxɨ nehetsɨa, kakaɨyarixi 'axamemu'ɨatɨka kememɨtewarayexeiyakai. Mehaye'erieme mepitixani'erieni ke'axamemɨteyuriekai mewarayexeiyatɨ.
EZE 6:10 Hikɨ 'ana mɨpaɨ mepɨtehetimani, kename ne Yawé yakɨ nekatiwarukwinitɨa’”.
EZE 6:11 »Mɨpaɨ kanetiniutahɨawe Yawé naimekɨmɨyɨwe: “Ketineutapini, ketineukaketsina meta keneutahiwa: ‘'Aixɨa nekatinixehahɨaweni waɨkawa 'axa'anemekɨ kexemɨte'uyuri 'ixaheritsixi’. Xekanikwi'iwakuni 'ixiparakɨ, haakakɨ meta kwiniyakɨ.
EZE 6:12 Kemɨ'ane 'ateewa paitɨ muyeikani kwiniyakɨ kanimɨmɨkɨ, kemɨ'aneta hurawa muyeikani 'ixiparakɨ kanimieriemɨkɨ, meta kemɨ'ane mɨkamierieni haakakɨ kanimɨmɨkɨ. Mɨpaɨ nehaxɨa wahetsie nekatinikawiwimɨkɨ,
EZE 6:13 nemɨwakwini yukakaɨyarixi 'axamemu'ɨatɨka wa'aurie mepɨkaxɨrieni, meta wamawarite taiyamete 'aurie, hɨritsie meta yemuritetsie, kɨyexi 'amɨpapa hetɨa, meta naitɨ xiu xawari 'amɨranukate hetɨa, hakewa yukakaɨyarixi 'axamemu'ɨatɨka wahetsiemieme 'ɨkwa witsimu'ɨa taiyariyari memewewi. 'Ana mɨpaɨ mepɨtehetimani kename ne Yawé nehɨkɨ.
EZE 6:14 Netɨrɨkariya wahetsie nekaniyetuamɨkɨ, kwie yuxaɨtame kaniyuhayewamɨkɨ hakewa memetitekai, makumawetsie meta Xiwura mɨrakutewatsie paitɨ. 'Ana mɨpaɨ mepɨtehetimani kename ne Yawé nehɨkɨ”».
EZE 7:1 Yawé mɨpaɨ kanetiniutaxatɨani:
EZE 7:2 «Tewi pemunu'aya, Yawé Ti'aitame mɨpaɨ kanaineni 'ixaheritsixi wahetsiemieme: Tukari kanaye'aximeniri naitsarie kwiepa wahetsiemieme.
EZE 7:3 'Atukari kanaye'aniri. Naitsarie kwiepa xehetsie nehaxɨa nekanikawiwimɨkɨ, nekamanita'iwawiyamɨkɨ naimekɨ kepemɨtiyurienekai, meta tita mɨtixani'eriwa yapemɨtiuyurikɨ.
EZE 7:4 Ne nepɨkamatsitinenimayata, matsi yanepɨtiyurieni pemɨrayukatɨanikɨ ke'axapemɨtiuyurikɨ. Mɨpaɨ 'ana pepɨretimani kename ne, Yawé nehɨkɨ.
EZE 7:5 »Mɨpaɨ kanaineni Yawé Ti'aitame: 'Uximatɨarika yu'utɨma kaneu'uka.
EZE 7:6 Teɨteri memɨkwi'iwa tukariyari kanaye'amɨkɨ, mɨkɨ kwitɨwa mɨpaɨ katiniyɨmɨkɨ.
EZE 7:7 Tukari 'ukanamieni, 'ikɨ kwieyaritsie xemɨtama xehetsiemieme. Tukari kanaye'amɨkɨ. 'Ari kanehurani. Hɨritetsie temawierika pɨkaxuawe, marika xeikɨa puxuawe.
EZE 7:8 'Ari 'ahetsie nekanikahaxɨapieximeni. Nehaxɨa 'ahetsie pɨtinake, nekamanita'iwawiyamɨkɨ naime ke'aixɨa pemɨtiuyuri meta ke'axapemɨtiuyurikɨ.
EZE 7:9 Ne nepɨkamatsitinenimayata, matsi yanepɨtiyurieni pemɨrayukatɨanikɨ ke'axapemɨtiuyurikɨ. Mɨpaɨ 'ana pepɨretimani kenameta ne Yawé netiyukwinitɨwa.
EZE 7:10 »'Ari kanaye'ani tukari. Hikɨri kanihɨkɨtɨni. 'Ari pekatineuyehɨani. Mɨkatiheitserie katinixuaweni, tawe'erika kaniyɨrani,
EZE 7:11 nanaimarika 'axamɨti'ane katinikaxuaweritɨwani. Tixaɨtɨ pɨkatiyuhayewa xehetsiemieme, tsepa kexemuyupaɨme, meta tsepa tita piinite xemɨteheuxeiya pɨkatiyuhayewa.
EZE 7:12 Tukari kanaye'aniri, 'ikɨ tukari kanihɨkɨtɨni. Mɨtinane pɨkayutemawieka meta mɨtiutua pɨka'utatsuakani, matsi ne yunaime wahetsie nehaxɨa nekanikawiwimɨkɨ.
EZE 7:13 Tsepa tituayame mayeniere, tita mɨtiutua pɨkatikuhɨwiyarieni. Mɨkɨ naime Kakaɨyari kemɨnetiuxeitsitɨa mikupatani pɨkayɨwe yuteɨterima wahetsiemieme, 'ayumiemeta xewitɨ yutukari pɨkatawikweitsitɨani.
EZE 7:14 Tsepanetɨ kuxineta mutahɨtsierie meta tsepa memuyukuha'aritɨa, xewitɨ pɨkahayeyani yutamienike, matsi nehaxɨa yunaime wahetsie nekanikawiwimɨkɨ.
EZE 7:15 »Kiekari warita kuyaxa puxuawe, meta kiekaritsie kwiniya meta haaka puxuawe. Kemɨ'aneta yeuta muyeikani 'ixiparakɨ kanimieriemɨkɨ, kemɨ'aneta kiekaritsie muyeikani haakakɨ kanimɨmɨkɨ meta kwiniyakɨ.
EZE 7:16 Kemɨ'ane memuyuta'una hɨritsie mepuyuhayewa kukuruxi wahepaɨ, yuxexuitɨ me'utitsuatɨ 'axakememɨte'uyurikɨ.
EZE 7:17 Naitɨ mamate katɨrɨkawitɨ pakɨne meta yutunutsie mepakayɨyɨakatɨkani.
EZE 7:18 Hiwerika kamixayari mepanakatɨxɨani, waɨkawa meyumariutatɨ mekaniu'uwakuni. Waɨkawa mekaniyutitetewiyakuni, nanaimariwamete mekanakɨnikuni.
EZE 7:19 Pɨrata kaye'utɨma pɨtaxɨriyani, huru xatsi hepaɨ mepɨtexeiyani. Yawé haxɨaya tukariyaritsie, xepɨrata xehuru pɨkaxetawikweitsitɨani, meta mɨkɨ pɨkaxetihuxaitɨani, matsi xehurute kanixe'uyurieni mɨxe'atixɨri.
EZE 7:20 Xepuyuti'ɨrekai huru witsimɨ'anenekɨ, meta mɨkɨkɨ kakaɨyarixi wa'ɨkiyari memɨxani'eriwa xepɨwarutiwewi, xemɨwarayexeiyanikɨ xewanaki'erietɨ. 'Ayumieme mɨkɨ mɨraye'atɨka xani'eriwame nepɨrayeitɨani.
EZE 7:21 'Ateewa kiekatari mekani'axɨakuni hikɨ mekatenixenawatsiriekuni, meta 'axamemɨte'u'iyari mekatenanutɨkuni 'axamekatenitiyuriexɨakuni.
EZE 7:22 Ne nekaniwaku'eirimɨkɨ, netukiri pɨkapatsieka, muwa mekaneutahaxɨakuni teyukwikate 'ana kapatsiekame mekanayeitɨakuni.
EZE 7:23 »Tepɨa kaunariyari xekeneukuha'aritɨa, 'ikɨ kwieyaritsie xuriyakɨ kaniutahɨne, meta kiekari 'axamɨti'anekɨ kanakunɨka.
EZE 7:24 Nuiwarite kwinimieme 'axamemɨte'u'iyari mekani'axɨakuni wakiiteta memɨtahaxɨanikɨ. Memuyuti'ɨre memɨtɨrɨkawikɨ mekanikumaweriyariekuni, meta watukite kapatsietɨ kanayeitɨariemɨkɨ.
EZE 7:25 Kepauka hiwerika mɨwa'axe, yakɨ xeikɨa mekanitiwaukuni kayuwatɨ memexeiyanikɨ.
EZE 7:26 Kwitɨwa yu'utɨma heu'utɨ kani'axɨakuni kwiniya, meta niuki 'axamanuyɨtɨka mukuxata. Kakaɨyari niukameya 'atsipɨkatiniereniri, mawari wewiwame pɨkati'ɨkitaniri, meta 'ukirawetsixi mepɨka'uye'ɨxatsini.
EZE 7:27 Puyuhiwerieka ti'aitame, manuyeka nutuixietɨ puyuhayewani, teɨteri wamamate putiyɨyɨakani. Kexemɨtekakɨ ne mɨpaɨ nekanixeyurimɨkɨ, kexemɨte'uyuri mɨpaɨ netinixe'anutaxɨrimɨkɨ. 'Ana mɨpaɨ xepɨtehetimani kename ne Yawé nehɨkɨ».
EZE 8:1 Merikɨtsɨ 'ataxewirieka wiyaritsie, 'ataxewirieka metseritsie meta 'auxɨwime tukari 'umiekaku, ne nekiita nepayekatei, 'ukirawetsixi Kura kiekariyaritsie miemete wahamatɨa. Yapauka Yawé tɨrɨkariyaya pɨnetsi'uwi.
EZE 8:2 Hikɨ nepunierixɨ, xeime tewi hepaɨ 'anekame nepuxei: manayukɨhɨatsie hɨkɨa meukayune, tai hepaɨ pɨtakai, huteikɨ meutiyuneta, pɨxawatɨkai tepɨa hepaɨ.
EZE 8:3 Mɨkɨ tewi hepaɨ mɨ'anekai mamá hepaɨ 'anekame kaniutatsera, nekɨpatsie kanikawiere. Hikɨ 'eka kwinietewa kaneniuyewieni, kanenehana Kerutsareme yeta Kakaɨyari mɨnetixeitsitɨanikɨ, 'upaitɨ 'itupari meuwietsie kaneni'atɨani, mana kakaɨyari mɨwewiya manuwe Kakaɨyari mɨ'ɨtetsaiya.
EZE 8:4 'Ixaheri Kakaɨyarieya xawatɨriyaya mana pɨhekɨakai, yeuta kenemɨtiunieritɨariekai hepaɨ.
EZE 8:5 Kakaɨyari mɨpaɨ kanetiniutahɨawe: «Tewi pemunu'aya, 'ayeta keneutanieri». Neta muwa nekaneutaniere, muwa kitenietsie, tayeta mawari taiyame 'itupariyari meuwietsie, kakaɨyari 'ɨkiyari nekaniuxeiya Kakaɨyari mɨ'ɨtetsaiya.
EZE 8:6 Mɨpaɨta kanetiniutahɨawe: «Tewi pemunu'aya, ¿petiniere mariwemekɨ xani'eriwamekɨ kememɨteyurie 'ixaheritsixi 'ena, mɨkɨ netukita mepɨnetsiwayewei? Matsi 'akuxi kwinimieme 'axati'anekame pekatinixeiyamɨkɨ».
EZE 8:7 Manata kanenewitɨni tuki takwa mɨranutakɨkatɨretsie. Kuraru makatsie kanaxawakaitɨni.
EZE 8:8 Hikɨ mɨpaɨ kanetiniutahɨawe: «Tewi pemunu'aya, tawarita kurarutsie keneu'ini». Hikɨ ne, waɨkawa nekaneu'ine hikɨ xeime mɨranutahakitɨre 'awietɨme nekaniutaxeiya.
EZE 8:9 Kakaɨyari mɨpaɨ kanetiniutahɨawe: «Keneutahaka, keneutanierixɨa 'axakememɨteyurie muwa».
EZE 8:10 Ne nekaneutahani kuraru taɨtapaitɨ, nekatiniwaruxeiya meteyumɨireme wa'ɨkiyarite: kuterixi wa'ɨkiyate meta hipatɨ yeutari 'axamemɨ'anene, meta yunaitɨ mamakɨ memɨwewiyatɨka 'axamemɨ'anene 'ixaheritsixi memɨwarayexeiyakai.
EZE 8:11 Haika tewiyari heimana tamamata 'ixaheritsixi 'ukirawetsixi memanuyetei, mamakɨ memɨwewiyatɨka wahɨxie mekaniti'ukaitɨni mewakuhɨawetɨ. Katsaniyaxi Tsapani nu'aya wahamatɨa kanayewekaitɨni. Yuxexuitɨ 'ɨkwa taiyame mekaniu'ɨkaitɨni, 'ayumieme kɨtsiyari kaniuyekateitɨni witsi'u'ɨatɨ.
EZE 8:12 Mɨkɨ mɨpaɨ kanetiniutahɨawe: «Tewi pemunu'aya, ¿petiniere 'ixaheritsixi 'ukirawetsixi kememɨteyurie, yukakaɨyarixi 'awie kememɨtewarayexeiya? Mɨpaɨ mekaniutiyuaneni: “Xewitɨ Yawé kaniumaweni mɨtasixeiyanikɨ, Yawé 'ikɨ kwieyari kaniuku'eirieni”».
EZE 8:13 Mɨpaɨta kaniutayɨni: «Tawarita matsi waɨkawa 'axameteyuriekame pekaniwaxeiyamɨkɨ».
EZE 8:14 Hikɨ Yawé tukieya kitenie kanenewitɨni, kitenie tayeta hepatsie. Mana 'ukarawetsixi mekanatekaitɨni, me'utitsuatɨ kakaɨyari Tamuhutsi hetsiemieme.
EZE 8:15 Hikɨ mɨpaɨ Kakaɨyari kanetiniutahɨawe: «Tewi pemunu'aya, ¿'ikɨ petiwaxeiya? 'Akuxi matsi waɨkawa 'axameteyuriekame pekaniwaxeiyamɨkɨ».
EZE 8:16 Hikɨ kanenewitɨni tuki taɨtapaitɨ yamuyeyewatsie. Tuki mɨranutakɨkatɨretsie 'imatɨrieka kii meukuwewiya 'aurie meta mawari taiyametsie, muwa mekanayetekaitɨni xeitewiyari heimana meyu'aɨxɨwitɨ, tau manatineika meheutanenieretɨ, tau mekanayexeiyakaitɨni, Yawé tukieya mewarixiwiyatɨ.
EZE 8:17 Mɨpaɨ kanetiniutahɨawe: «Tewi pemunu'aya, ¿'ikɨ petiwaxeiya? 'Ikɨkɨ Kura 'axamekateyuriekame mekaniyu'erieka, mɨkɨta kwiepa 'axamɨti'ane katiniwiwieka, meta netsihaxɨatɨatɨ mɨkatihayewa. Neuxei yamekanetenihaxɨatɨaka, nekani'ukweni tupiriya 'axamu'ɨa.
EZE 8:18 'Ayumieme ne nepɨyeha'ani. Ne nepɨkawatinenimayata. Tsepa karima me'utihiwatɨ memɨnetsihahɨawe ne nepɨkawa'enieni».
EZE 9:1 Manata Kakaɨyari karima hahiwame nekaniu'enieni: «Xeme xekenakɨni, 'ikɨ kiekariyari wahetsiemieme xemɨtewakwinitɨani kwinie xemɨtehayu'eririya, yuxexuitɨ yu'ixipara xe'u'ɨtɨ mɨtiyumemiwa».
EZE 9:2 Hikɨ huyeta nekaniwaruxeiya 'itupari tayeta meuwie huyeyari'utɨma me'ahukame teɨteri meyu'ataxewime, meyuxexuitɨ 'ixipara me'u'ɨtɨ mɨtiyumemiwa. Wahamatɨa kaniumiekaitɨni xewitɨ rinu matayari 'anakatɨtɨ, mɨkɨ yuhɨiyametsie nekayekaitɨni ti'utɨwame kakunieya. Mɨkɨ yunaitɨ mekaneutahaxɨani, mawari taiyame purunitsekɨ mɨwewiya hɨxie mekaniti'uni.
EZE 9:3 'Ixaheri Kakaɨyari xawatɨriyaya, Kakaɨyari teɨtametemama waheima 'uyewietɨ, kananuku'ene tuki kitenie mɨranutakɨkatɨre kaniuyeyerɨni. Tewi rinu kamixayari manakatɨkɨkai, yuhɨiyametsie ti'utɨwame kakunieya makayekai, Yawé kanitahɨawe
EZE 9:4 mɨpaɨ katinitahɨawe: «Kerutsareme kiekariyari kenayekexiya, wakanata keniwaru'inɨaritɨa kemɨ'ane memutitsuana, memeyuhiwerie naime 'ena 'axamɨtiyɨanekɨ 'ikɨ kiekaritsie».
EZE 9:5 Nekaniu'enata hipame mɨpaɨ katiniwarutahɨawe: «Xekeneyeweiyani. Kiekari xekenayekexiya, xekeniwarukuya xekawareunenimayatɨ.
EZE 9:6 'Ukirawetsixi xekeniwarukuya meta temari, 'ɨimarixi, tɨɨri meta 'ukarawetsixi, tukita xeketeneukatsutɨa, nixeimetɨma xepɨkahekuhayeikawani 'ayeniereme. Peru kemɨ'ane 'inɨari memexeiyani mɨkɨ xepɨkawarekwika». Hikɨ mɨkɨ mekanitsutɨani mewakwitɨ 'ukirawetsixi tuki hɨxie memɨtitekai.
EZE 9:7 'Ariketa mɨpaɨ katiniwarutahɨawe: «Xekeniwayekɨni tuki kapatsiekame xekenayeitɨa, xekeniwarutahɨniya takwa mɨkite». Hikɨ mɨkɨ mekanayekɨne mekanitsutɨani kiekaritsie yunaime mewakwitɨ.
EZE 9:8 Kepauka mɨkɨ memuyukwitɨwekai, ne nexaɨtame nekaniuyuhayewa, nekanatiweni nehɨxima meta mɨpaɨ nekatiniuhiwa: «Yawé, Kakaɨyari, xɨa'ɨi. ¿Kamɨtsɨ 'ahaxɨa Kerutsareme hetsie petikawiwieni, kamɨtsɨ yunaime 'ixaheritsixi petiwakwini?»
EZE 9:9 Yawé mɨpaɨ kanetiniuta'eiya: «'Ixaheri kiekariyari meta Kura kiekariyari 'axakememɨte'uyuri pɨmariwe. 'Ikɨ kwieyaritsie pɨhɨne nanaimarika, kiekari tita mɨkatiheitseriekɨ pɨhɨne. Mɨkɨ mɨpaɨ mekateniku'eriwani: “Yawé 'ikɨ kwieyari kaniuku'eirieni. Yawé kaniumaweni kapɨniere”.
EZE 9:10 'Ayumieme ne nepɨkawatinenimayata, matsi nepɨtiwatawawirieni ke'axamemɨte'uyuri».
EZE 9:11 Hikɨ tewi rinu matayari manakatɨkɨkai meta yuhɨiyametsie ti'utɨwame kakunieya makayekai, mɨpaɨ kanetiniutahɨawe: «Yanekatiniuyurieniri kepemɨnetiu'aitɨakai».
EZE 10:1 'Ariketa nekaniuniere, Kakaɨyari teɨtamete waheima muyematsie nekatiniuxeiya 'uweni hepaɨ ti'anekame, tsapiru teteyarikɨ wewiyakame.
EZE 10:2 Yawé mɨpaɨ tewi rinu matayari manakatɨkɨ katiniutahɨawe: «Mɨxikɨrawita keneutahaki, Kakaɨyari teɨtamete wahetɨa muyemanetsie, mana xeimamayari keneutitɨki tɨɨ Kakaɨyari teɨtamete wahixɨapa mukutei, hikɨ keneutaxɨri naitsarie kiekaritsie». Hikɨ tewi muwa neukahani, ne netanierekaku.
EZE 10:3 Kepauka mɨkɨ tewi meutaha, tukita Kakaɨyari teɨtamete tatsutɨa hepatsie mekaniuti'ukaitɨni, taɨtana yamuyeyewatsie haiwitɨri kanihɨnekaitɨni.
EZE 10:4 Hikɨ Yawé xawatɨriyaya, Kakaɨyari teɨtamete waheima muyekatei, nanuku'ene tuki kitenie mɨranutakɨkatɨre heima pɨta kaniuyeyerɨni. Tukita kanihɨnekaitɨni haiwitɨri, yamuyeyewatsieta Yawé xawatɨriyaya kanihɨnekaitɨni.
EZE 10:5 Kakaɨyari teɨtametemama wa'anate tuki takwayaritsie paitɨ kanayu'eniɨriɨkɨkaitɨni, Kakaɨyari Naimekɨmɨtɨrɨkaɨye niukieya hepaɨ katiniyu'eniɨriɨkɨkaitɨni.
EZE 10:6 Yawé Mɨpaɨ katinita'aitɨani, tewi rinu kamixayari manakatɨkɨkai: «Tai keneutikwe'i mɨxikɨrawi hixɨapa, Kakaɨyari teɨtamete wahixɨapa muyemanetsie». Hikɨ tewi heyaka mɨxikɨrawi wahixɨapa kaniutakeni.
EZE 10:7 Xewitɨ Kakaɨyari teɨtame yumamá kaniutatsera, tai kaniutikweni wahixɨapa mɨtinierekai, tewi rinu kamixayari manakatɨkɨ kaniukweitɨani. Mɨkɨ 'enukweka kaneyani.
EZE 10:8 (Kakaɨyari teɨtamete wa'anatetɨa, nepixeiyakai tewi mamaya hepaɨ 'anekame).
EZE 10:9 Hikɨ nemune'ɨwiyaxɨ, Kakaɨyari teɨtamete wa'aurie nekanixeiya naukame xikɨrawime, yuxexuime wa'aurie. Mɨxikɨrawi witsipɨtimerɨkawikai tete kɨritsuritu hepaɨ.
EZE 10:10 Naukatɨ mɨxikɨrawi yaxeikɨa pɨtiyuxexeiyakai, naitɨ 'axeikɨa muyemanenihepaɨ pɨtiyuxexeiyakai.
EZE 10:11 Kepauka mɨyeyani, tsepa tatserieta ta'utata tayeta tahetɨa, pɨyɨwekai mɨyeyani ta'aurie kahawautsetɨ. Hakewa Kakaɨyari teɨtameya mu'uya meutaniereni muwa mepekɨkakai, tawariri mepɨka'axekai.
EZE 10:12 Naitɨ yuwaiyaritsie, yuwarita, yumamatsie, meta Kakaɨyari teɨtametemama wa'anate, metatsiere mɨnauka mɨxikɨrawi, naitɨ hɨxitekɨ mepɨhɨpɨnekai.
EZE 10:13 Mɨpaɨ netiniu'ena memɨxikɨrawi, «Memɨxikɨrawi» mekateniuterɨwarɨwakaitɨni.
EZE 10:14 Yuxexuitɨ Kakaɨyari teɨtametemama naukanierikayari menexeiyakaitɨni: mexɨakame Kakaɨyari teɨtame hepaɨ raka'eriekame, hutarieka mieme tewi hepaɨ raka'eriekame, hairieka mieme maye hepaɨ raka'eriekame, meta naurieka mieme kwixɨ hepaɨ raka'eriekame.
EZE 10:15 Kakaɨyari teɨtamete, nemɨwaruxei haa Kewaxi manuyekatsie, menanukuwɨxɨani.
EZE 10:16 Kepauka memuhukai, mɨxikɨrawi yaxeikɨa mepuhukai, kepauka memanukuwɨwekai yu'anate mekanitiyuitɨwakaitɨni, yaxeikɨata mɨxikɨrawi mepɨka'ukununuwakai,
EZE 10:17 kepauka memɨwa'uwekai, mɨkɨta mɨxikɨrawi yaxeikɨa, kepauka memanuku'uwekai, mɨxikɨrawita yaxeikɨa kananuku'uwekaitɨni kwiepa, mɨkɨ memayeneniere wa'iyari mɨxikɨrawi hetsie mɨyetekaikɨ.
EZE 10:18 Yawé xawatɨriyaya kananuku'ene tuki kitenie mɨranutakɨkatɨre heima, kaniwakeni Kakaɨyari teɨtamete wahetsie.
EZE 10:19 Ne netanierekaku, Kakaɨyari teɨtamete mekananukuwɨxɨani kwiepa, mɨxikɨrawi wahamatɨa mekanayekɨne mekanewa'uni, Yawé tukieya kitenieyaritsie tau manatineika hepatsie. Kakaɨyari 'Ixaheri hetsiemieme xawatɨriyaya wahetsie kaniuyekateitɨni.
EZE 10:20 Mɨkɨ memayeneniere mepɨyɨakai, Kewaxi hatɨayaritsie 'aurie ne'uwetɨ nemɨwaruxei, 'Ixaheri Kakaɨyarieya hetɨa. Hikɨ mɨpaɨ nekatinetimani kename, Kakaɨyari teɨtametemama meyɨakai.
EZE 10:21 Yuxexuitɨ nauka nierikayari mepexeiyakai meta naukame 'anateyari, yu'anatetɨata mepexeiyakai tewi mamateya hepaɨ 'anenekame.
EZE 10:22 Yaxeikɨa mepɨtehaka'eriekai, Kewaxi hatɨayaritsie nemɨwaruxei hepaɨ. Yuxexuitɨ mɨkɨ yuhɨxima mepuhukai.
EZE 11:1 'Eka kanenanuyewieni, kanenewitɨni Yawé tukieya kitenie paitɨ tau manatineika hepatsie. Mana kitenie meutahanitsie nekaniwaruxeiya xeitewiyari heimana yu'aɨxɨwime teɨteri, wahamatɨa kanayewekaitɨni Katsaniyaxi 'Atsuxi nu'aya meta Peratiyaxi Wenahiyaxi nu'aya, mɨkɨ mana kiekatari wahetsiemieme memanuyetei.
EZE 11:2 Kakaɨyari mɨpaɨ kanetiniutahɨawe: «Tewi pemunu'aya, 'ikɨ mekanihɨkɨtɨni 'axamɨti'ane 'iyariyari memɨwewie meta 'ikɨ kiekariyaritsie 'axa'anemekɨ memɨ'ɨxatsita.
EZE 11:3 Mɨpaɨ meputiyuane: “'Akuxi takii 'aixɨa temɨtiyurieni tukariyari pɨkahɨkɨ. 'Ikɨ kiekari xari kanihɨkɨtɨni, tameta wai tekanihɨkɨtɨni”.
EZE 11:4 Tewi pemunu'aya, 'ayumieme ketineutaxata kemɨtiyɨni, yurikɨ, ketiniwarutahekɨatɨa».
EZE 11:5 Yawé 'Iyarieya nehetsie kaninuani, mɨpaɨ nemɨtikuxatanenikɨ kanetiniuta'aitɨani: «Mɨpaɨ kanaineni Yawé: “Xeme, 'ixaheritsixi, mɨpaɨ xekaniutiyuani, ne kexemɨteyɨkuhɨawe nekatinimaika.
EZE 11:6 'Ikɨ kiekaritsie yuwaɨkawame xekaniwarukwiniri, kaye'utɨma mɨkite wahekɨ mekanihɨpɨneni.
EZE 11:7 'Ayumieme ne Yawé naimekɨmɨyɨwe mɨpaɨ nepaine, mɨkɨ mɨkite kiekari hixɨapa xemɨwarutixɨri, mɨkɨ mekaniwaitɨni, kiekari kemɨ'ane hetsie nemɨxeheukaxɨrieni mɨkɨta kanixaritɨni.
EZE 11:8 Kuyaxa xeteheumakaxe, 'aixɨa kani'aneni, ne Yawé naimekɨmɨyɨwe mɨpaɨ nekanaineni, xehetsiemieme kuyaxa nekananunɨ'amɨkɨ.
EZE 11:9 Nekanixe'ayeweiyamɨkɨ mɨkɨ kiekaritsie, nekanixeyetuamɨkɨ teewatari wahetsɨa, kemɨtiheitseriekɨ nekatinixeka'enitsitɨamɨkɨ.
EZE 11:10 'Ixiparakɨ xekanikwi'iwakuni, ne yanekatiniyurimɨkɨ xemɨte'ayukatuanikɨ kexemɨte'uyuri, 'Ixaheri kwieyari maka'atɨkatsie, 'ana mɨpaɨ xepɨtehetimani kename ne, Yawé nehɨkɨ.
EZE 11:11 Kiekari xari pɨkahayani xehetsiemieme, xemeta wai mɨka'etsarieni xepɨkahakɨne. Ne yanekatiniyurimɨkɨ xemɨte'ayukatuanikɨ kexemɨte'uyuri, 'Ixaheri kwieyari maka'atɨkatsie pɨta.
EZE 11:12 'Ana mɨpaɨ xepɨtehetimani kename ne, Yawé nehɨkɨ. Ne'inɨari niukiyari xepɨka'anukuweiyawawe, kenemɨtiu'aitaxɨ xepɨkaheye'atɨawawe, matsi hipame nuiwarite wayeiyari pɨta xekananukuweiya”».
EZE 11:13 Mexi ne netiwakuxaxatɨwakai kemɨtiyɨni, Peratiyaxi Wenahiyaxi nu'aya natiweni kaniumɨni. Hikɨ ne nehɨxima nekaniukaweni kwiepa, mɨpaɨ nekatiniuhiwa karima: «Xɨa'ui, Yawé nekakaɨyari. ¿Yunaime 'ixaheritsixi memuyuhayewatɨwe petiwakwini?»
EZE 11:14 Yawé yuniuki kaneniyetuirieni:
EZE 11:15 «Tewi pemunu'aya 'aku, mɨpaɨ mekaniutiyuaneni Kerutsareme kiekatari 'a'iwama wahetsiemieme, 'amarema wahetsiemieme meta yunaime 'ixaheritsixi wahetsiemieme: “Mɨkɨ 'ateewa paitɨ mekanekɨne Yawé hɨxie, 'ayumieme tame 'ikɨ kwie tahetsiemieme kanihɨkɨtɨni, mana temu'uwanikɨ”.
EZE 11:16 'Ayumieme, mɨpaɨ ketiniwarayemari'itɨa kename ne, Yawé nemɨtɨrɨkaɨye mɨpaɨ nehaine: “Tsepa nemɨxe'ayewei, 'ateewa paitɨ nemɨxehenɨ'a hipame nuiwaritetsie, tsepa nemɨxeheutaxɨriexɨa hipame kwieyari xemɨka'imatetsie. Kexemɨteheuyetere ne xetuki nepɨhɨkɨtɨni xemɨnetsihahɨawenikɨ, tsepa kemɨ'ane kwieyaritsie xemekɨ”.
EZE 11:17 »Mɨpaɨtatsiere ketiniwarayemari'itɨa kename ne, Yawé mɨpaɨ nehaine: “Ne nepɨxekuxeɨrieni tsepa kemɨ'ane kwieyaritsie xemetitei, nepɨxekuteɨxɨ tsepa ketewa xemeutaxɨriexɨa, 'Ixaheri kwieyari nepɨxeyetuirieni.
EZE 11:18 Mɨkɨ mepɨ'axɨani yukwieyaritsie, mana memɨkayurikakaɨyarixi mepɨwarayexɨrieni meta 'axameteyurietɨ mepɨtehayewa.
EZE 11:19 Ne 'iyari 'aixɨa tiyukɨhɨaweme nepɨwapitɨani, 'iyari hekwame nepɨxe'ukayetsirieni. Tete 'iyariyari memexeiya nepɨwanawairieni, wai 'iyariyari pɨta nepɨwapitɨani,
EZE 11:20 ne'inɨari niukiyari xemaye'atɨwanikɨ meta ne'aitsikatsie mɨpaɨ xemɨte'u'uwanikɨ. Hikɨ 'anari neteɨterima xepɨhɨkɨtɨni, neta xekakaɨyari nepɨhɨkɨtɨni.
EZE 11:21 Peru kemɨ'ane mɨkɨ kakaɨyarixi 'axamemɨ'anene memɨwaruweiya, meta kemɨ'ane 'axamemɨteyurie, ne memɨte'ayukatuanikɨ yanepɨtiyurieni. Mɨpaɨ kanaineni Yawé naimekɨmɨyɨwe”».
EZE 11:22 Kakaɨyari teɨtamete mekananukuwɨxɨani. Memɨxikɨrawita wahamatɨa meniuhukaitɨni, 'Ixaheri Kakaɨyarieya xawatɨriyaya waheima kaniuyemakaitɨni.
EZE 11:23 Yawé xawatɨriyaya nanuyewiere kiekari heima, hɨri Kerutsareme tau manatineika hepatsie kanewakeni.
EZE 11:24 Mɨpaɨ netinieritsitɨarietɨ, 'eka kanenanuyewieni kanenehana, Wawiruniya paitɨ hakewa memehapanie memanu'uwatsie, hikɨ kenemɨtinierekai kaniukumawere.
EZE 11:25 Merikɨte nekatiniwarutaxatɨani memeyehapanie, Yawé kemɨnetiunieritsitɨakai.
EZE 12:1 Yawé yuniukitsie mɨpaɨ kanetiniutahɨawe:
EZE 12:2 «Tewi pemunu'aya, teɨteri memɨkayukɨhɨawe wahamatɨa pekaniuyeikani. Mekaniuhɨxini memeunenierenikɨ, peru mekapeuneniere, mepunaka memeu'enanakakɨ, peru mepɨkaheu'enana. Teɨteri memɨ'iyari tsetse'i mepɨhɨkɨ.
EZE 12:3 »'Ayumieme, tewi pemunu'aya, 'apiini ketineukuha'aritɨaka, pemanuhanienikɨ tuka, yunaitɨ mematsixeiyakaku, pekanayeyeimɨkɨ pemehanieni hepaɨ, peru mɨkamatsiɨkɨ hakewa. Heiwatɨ mɨpaɨ 'ana metehetimani tsepa teɨteri memɨ'iyaritsetse'i memɨhɨkɨkɨ.
EZE 12:4 'A'ika kenewayehani, yunaitɨ mematsixeiyakaku, kutaikaireyuri pekanayeyeimɨkɨ, yunaitɨ mematsixeiyakaku, pemehanieni hepaɨ.
EZE 12:5 Meta yunaime wahɨxie, kurarutsie keneu'ini muwa keneuhaki 'a'ika pe'atɨtɨ.
EZE 12:6 Kuyɨreyu, yunaitɨ mematsixeiyakaku, kenayeye'a 'a'ika pe'anakayetɨ. Kenanuyukanatɨ kwie pemɨkaxeiyanikɨ, mɨpaɨ 'inɨari pekatiniwawewiriemɨkɨ 'ixaheritsixi teɨteriyari».
EZE 12:7 Kenemɨtiuta'aitɨarie yanetiniuyurieni, 'uhekɨakaku 'akuxi ne'ika nekaniutitɨni, nemehanieni hepaɨ. 'Ukutaikairekuri kurarutsie nekaneu'ine nemamakɨ, tɨkarikɨri yunaime wahɨxie, muwa nekananeni ne'ika nenaiparitsie ne'anakawietɨ.
EZE 12:8 Ximeri Yawé mɨpaɨ kanetiniutahɨawe:
EZE 12:9 «Tewi pemunu'aya, yurikɨ teɨteri yu'iyaritsie memɨtsetse'i 'ixaheritsixi mɨpaɨ mekamatenita'iwawiyakuni: “¿Ketɨtɨri pepɨtiyuriene?”
EZE 12:10 Peru 'ekɨ mɨpaɨ ketiniwarutaxatɨa: “Mɨpaɨ kanaineni Yawé naimekɨmɨyɨwe: ‘'Ikɨ niuki 'ixaheritsixi wahetsiemieme kanihɨkɨtɨni, Kerutsaremetari metatsiere wa'itsɨkame’”.
EZE 12:11 Mɨpaɨ ketiniwarutahɨawi: “Ne 'inɨari nekaniyɨaneni xehetsiemieme. Kenemɨtiuyuri, mɨpaɨ xekatenanuyekɨnikuni, xekananuhapaniekuni xepɨretsutsietɨ 'ateewa paitɨ”.
EZE 12:12 Meta xe'itsɨkame yu'ika yunaiparie heutihɨame tɨkarikɨ kanuyeyeimɨkɨ kurarutsie heu'ineme muwa heuhame. 'Anuyukanatɨ kaniyemieni kwie mɨkaxeiyanikɨ.
EZE 12:13 Ne matsi nekaniwiniyamɨkɨ, newiniyaritsie kaniwierimɨkɨ. Mɨpaɨ nekatinenuhanimɨkɨ Wawiruniya paitɨ, karireutsixi wakwietsie, peru mana pɨkahetanierixɨani mana kanemieriemɨkɨ.
EZE 12:14 Kemɨ'aneta hamatɨana memu'uwa, nepɨwataxɨriexɨani tatserieta ta'utata tayeta tatsutɨa naitsarie, kemɨ'ane memiparewie meta kuyaximama, nekaniwaranukuweiyamɨkɨ 'ixipara ne'akwetɨ.
EZE 12:15 Hikɨ 'ana mɨpaɨ mepɨtehetimani kename ne Yawé nehɨkɨ. »Kepauka nemɨwataxɨriexɨani yumɨireme nuiwarite wahetsɨa,
EZE 12:16 nekaniwahayewaxɨamɨkɨ yayupapaɨmeme kuyaxatsata, haakaxatsie meta kwiniyatsata, hipame nuiwarite wahetsɨa kepauka memaye'axɨani, mekaniyutahekɨatakuni 'axamete'aneneme kememɨtewarayexeiyakai. Hikɨ mɨpaɨ mekatenetimaikuni ne, Yawé nemɨhɨkɨ».
EZE 12:17 Yawé mɨpaɨ kanetiniutahɨawe:
EZE 12:18 «Tewi pemunu'aya, kepauka 'apa pemɨkwa'a keneuyɨyɨakani, meta pematɨ peyumariutatɨ kenehareka.
EZE 12:19 Mɨpaɨta ketiniwaraye'eritɨa teɨteri 'ena kiekatari, Yawé naimekɨmɨyɨwe mɨpaɨ kanaineni, Kerutsareme kiekatari meta 'Ixaheri kwieyaritsie memɨtama wahetsiemieme: “Waɨkawa mehaumamatɨ yupa mekaniutikwa'akuni, meta waɨkawa me'uyɨyɨakatɨkaitɨ mekaniharekakuni. 'Ena kiekatari 'axamemɨteyuriekɨ, naitɨ mana mɨtixuawe katinanutɨkiemɨkɨ.
EZE 12:20 Wakiekarite kaniti'unariemɨkɨ, wakwieyaritsie 'akumawetɨ kanayeimɨkɨ. Merikɨte 'ana mɨpaɨ mepɨtehetimani ne, Yawé nemɨhɨkɨ”».
EZE 12:21 Yawé yuniukitsie mɨpaɨ kanetiniutaxatɨani:
EZE 12:22 «Tewi pemunu'aya, ¿kehepaɨtɨtɨ 'ikɨ niuki panuyɨne, 'inɨarikɨ mɨtikuxata waɨkawa mukuxaxatsiwa 'Ixaheri kwieyaritsie: “Tukari kanaye'axeni peru kemɨtiunieritɨarie pɨkahaye'ani”?
EZE 12:23 'Ayumieme mɨpaɨ ketiniwaraye'eritɨa ne, Yawé naimekɨnemɨyɨwe mɨpaɨ nemainekɨ: “Mɨkɨ niuki 'inɨarikɨ mɨtikuxata mana kaniu'amɨkɨ, tawariri 'Ixaheri kwieyaritsie pɨkataxatsieni”. Mɨpaɨta ketiniwarexatɨa: “Tukari kanaye'aximeni kemɨtiunieritɨarie kanaye'aka.
EZE 12:24 Mepukumawereri kemɨtiunieritɨarie ti'itawatɨ, meta niukikɨ yakɨ haitɨ 'Ixaheri kwieyaritsie pukumawere.
EZE 12:25 Ne Yawé kenemɨtayɨni yapɨraye'axeni tukari ka'anutiyeikakaku. Teɨteri wa'iyari mɨtsetse'i, xeme xe'u'uwakaku ne neniuki nepaye'atɨwani. Mɨpaɨ kanaineni Yawé naimekɨmɨyɨwe”».
EZE 12:26 Yawé yuniukikɨ mɨpaɨ kanetiniutahɨawe:
EZE 12:27 «Tewi pemunu'aya, teɨteri 'ixaheritsixi mɨpaɨ mekaniutiyuaneni kename kepemɨtinieritɨarie 'arikeke mieme hɨkɨ, meta kepemɨtikuxata 'arike mɨpaɨ tiyɨni.
EZE 12:28 'Ayumieme, mɨpaɨ ketiniwaraye'eritɨa, kename ne Yawé naimekɨnemɨyɨwe mɨpaɨ nehaine: “Neniuki paye'atɨarieni kepauka nemɨxata: ne kenemaine nepɨraye'atɨani. Mɨpaɨ kanaineni Yawé naimekɨmɨyɨwe”».
EZE 13:1 Yawé yuniukitsie mɨpaɨ kanetiniutahɨawe:
EZE 13:2 «Tewi pemunu'aya, keniwarutahekɨata Kakaɨyari niukametemama 'Ixaheri kwieyaritsie kiekatari yuhetsiemieme memɨtekuxata, mɨpaɨ ketiniwarutahɨawi Yawé niukieya meke'u'enieni.
EZE 13:3 Mɨpaɨ kanaineni Yawé naimekɨmɨyɨwe: “Xɨa'ui texaxatamete 'atsimemɨkatemate, tixaɨtɨ mekatexeitsitɨarietɨ yuhetsiemieme xeikɨa memɨtekuxata.
EZE 13:4 Xɨa'ui, 'Ixaheri. Texaxatametemama 'ahetsɨa miemete, yawixi memayu'eririya wahepaɨ mepɨ'anene, kii 'u'unimeta memayekietɨka.
EZE 13:5 Kwie meuta'inierietɨkatsie mepɨkate'uximaya, meta 'Ixaheri kuraruyari 'aixɨa mepɨkayuriwawe, Yawé tukarieya maye'anitsie mɨkawatayuanenikɨ kuyaxa mayanitsie.
EZE 13:6 Kememɨteneniere pɨtiyakɨ, kememɨtemaiwawe yakɨ meputiyuane. Mɨpaɨ meputiyuane: ‘Yawé mɨpaɨ kanaineni’, peru Yawé kawanɨ'akaku, peru mɨkɨ mepɨta'ikwewa waniuki maye'atɨarienikɨ.
EZE 13:7 Kamɨtsɨ kaniyakɨtɨni kememɨteneniere meta kememɨtemaiwawe, kepauka mɨpaɨ memutiyuane: ‘Mɨpaɨ kanaineni Yawé’, ne mɨpaɨ nekahainekaku.
EZE 13:8 »”'Ayumieme mɨpaɨ kanaineni Yawé naimekɨmɨyɨwe: Xeniuki mɨkayurikɨ meta kexemɨteneniere mɨ'itarikakɨ, ne nekanixe'aye'unieka. Yawé mɨpaɨ kanaineni.
EZE 13:9 Ne mɨkɨ texaxatamete newaraye'unietɨ nekanayeimɨkɨ, mɨkɨ 'itarikakɨ memɨtexeitsitɨarie, meta 'itarikakɨ memɨtemaiwawe. Neteɨterima wahamatɨa mepɨkayuxewini, meta 'ixaheritsixi wahamatɨa mepɨka'aka'utsieni, metatsiere 'Ixaheri kwieyaritsie mepɨkaheutahaxɨani. Hikɨ 'ana mɨpaɨ xepɨtehetimani kename ne, Yawé naimekɨmɨyɨwe nemɨhɨkɨ.
EZE 13:10 »”Mɨpaɨ mekateniwaru'itaiya. 'Ikɨ texaxatamete neteɨterima mekateniwa'itaiyani mɨpaɨ me'utiyuatɨ: ‘Naitɨ 'aixɨa pɨ'ane’. Peru 'aixɨa karewewiyakaku 'ixumeri, witsi'anekame xeikɨa mepɨwewietɨwe 'aixɨa kareku'ixumekaku.
EZE 13:11 Mɨpaɨ ketiniwarutahɨawi tewewiwamete, mɨkɨ wawewiya kanika'unimɨkɨ wiyeri 'ekamatɨ meta waɨkawa teematɨ 'ukanamieni.
EZE 13:12 Kepauka wa'ixumeri matakaine, mɨpaɨ mepɨteta'iwawiyarieni: ‘¿Ke'uyɨ 'ixumeri witsimɨrewewiyakai?’
EZE 13:13 »”'Ayumieme Yawé naimekɨmɨyɨwe mɨpaɨ kanaineni: Neha'atɨ 'eka wiyerimakame nenanunɨ'amɨkɨ, neha'atɨ wiyeri haikɨrimakame meta tee mɨtiyumemiwa nepanɨ'ani.
EZE 13:14 'Ixumeri kwiepa kanikawemɨkɨ witsimɨ'ane, tenariyari kanahekɨarimɨkɨ. Kepauka mɨkɨ makaine, xeme xekanikwikuni. 'Ana mɨpaɨ xepɨtehetimani kename ne Yawé nehɨkɨ.
EZE 13:15 Ne nehaxɨa mɨkɨ 'ixumeri hetsie nenikawiwimɨkɨ, meta kemɨ'ane 'ixumeri witsimɨ'ane memutawewi wahetsie. Ne mɨpaɨ nepɨtixetahɨawe 'ari 'ixumeri kaniumaweni meta kemɨ'ane memitawewi witsi'aneme herie:
EZE 13:16 mɨkɨ texaxatamete 'Ixaheri me'u'uwatɨ memɨtekuxatakai Kerutsareme hepaɨtsita, memɨtexeitsitɨariekai 'itarikakɨ, mɨpaɨ memutiyuanekai kename naitɨ 'aixɨa ti'ane, peru 'aixɨa kati'anekaku. Yawé naimekɨmɨyɨwe mɨpaɨ kanaineni”.
EZE 13:17 »Tewi pemunu'aya, hikɨ keniwarutahekɨata mɨkɨ 'ukarawetsixi 'akiekaritsie memɨtekuxata kemɨtiwanake. Keniwarutaxaneta.
EZE 13:18 Mɨpaɨ ketiniwarayemari'itɨa, Yawé naimekɨmɨyɨwe mɨpaɨ kanaineni: “Xɨa'ui kemɨ'ane memɨteyukewaiya, meta memɨtewatamikwa 'axati'anemekɨ teɨteri metewa'irɨwiyatɨ. Kamɨtsɨ neteɨterima mewakunuitɨanike meteyu'erie, mɨkɨta yuxaɨta yuhetsie metanuanike meteyu'erie.
EZE 13:19 Xeme 'axaxepɨnetsi'uyuri neteɨterima wahɨxie, tsewara xeituiyarikɨ meta paa tarimeyarikɨ. Xete'itawatɨ kexemutiyuane neteɨterima yuri mepɨtexe'eririe, mepuyukuya kemɨ'ane memɨkayukwinikekai, me'u'uwatɨ mepuyuhayewa kemɨ'ane memɨka'u'uwanikekai.
EZE 13:20 »”'Ayumieme Yawé naimekɨmɨyɨwe mɨpaɨ kanaineni: Xekewaiyarika nekanaye'unieka, kɨmana teɨteri xemɨwawiniya wiki muwiniya hepaɨ. Peru ne xetɨrɨkariyatsie nepɨwaxɨna, nepɨwatatuani memɨtawɨxɨanikɨ.
EZE 13:21 Neteɨterima wahetsie nepɨtanuani memɨte'itaiyariekɨ, xemɨkawawiniyanikɨ. 'Ana mɨpaɨ xepɨtehetimani ne Yawé nemɨhɨkɨ.
EZE 13:22 Xemetsɨ kemɨ'ane 'aixɨa mɨtiyukɨhɨawe xekaniunutuixitɨani 'itarikakɨ, ne neka'i'uximatɨakaku. 'Aixɨa xekatenehɨaweni 'axatiyuruwame mɨkatihayewanikɨ 'axakemɨtiyuriene, meta mɨkayutawikwetsitɨanikɨ.
EZE 13:23 'Ayumieme tawarita 'itarikakɨ xepɨkatexeitsitɨarieni meta kemɨtiyɨnikɨ memɨtehetimamatekekɨ tawarita mepɨkate'uximayaka. Ne neteɨterima nekaniwatawikweitsitɨamɨkɨ xetɨrɨkariyatsie, 'ana mɨpaɨ xepɨtehetimani ne Yawé nemɨhɨkɨ”».
EZE 14:1 'Ixaheri kwieyaritsie memanuyetei mekaneneku'iwata, nehɨxie mekanayaxe.
EZE 14:2 Hikɨ Yawé yuniukitsie kanetiniutaxatɨani:
EZE 14:3 «Tewi pemunu'aya, 'ikɨ teɨteri kakaɨyarixi 'axamemu'ɨatɨka yu'iyaritsie mekaniwayeyatsani, mɨkɨ teɨteri mekateniwa'irɨwiyani 'axamemɨteyuriekakɨ. Xɨka menetsiku'iwawiyani nepɨkawapitɨani.
EZE 14:4 'Ayumieme mɨpaɨ ketiniwaraye'eritɨa, Yawé naimekɨmɨyɨwe mɨpaɨ kanaineni: “'Ixaheritsixi kemɨ'ane yu'iyaritsie kakaɨyarixi 'axamemu'ɨatɨka mɨwayeyatsani, meta 'axamɨtiyuriene mɨkɨ me'ikuyuitɨwakaku, 'ariketa xɨka tixaxatame hetsɨa heuyani, ne Yawé nepi'uximatɨani keyupaɨmeme kakaɨyarixi 'axamemɨteyuxexeiya mɨwarayeyatsani.
EZE 14:5 Mɨpaɨ 'ixaheritsixi wa'iyari nehetsɨa nepɨranuitɨani mɨkɨ kakaɨyarixi 'axamemu'ɨatɨka wahekɨ memɨnetsi'uku'eiriekai”.
EZE 14:6 »'Ayumieme, mɨpaɨ ketiniwaraye'erietɨa 'ixaheritsixi teɨteriyari, Yawé naimekɨmɨyɨwe mɨpaɨ kanaineni: “'Ari ta'aurie xekenaxɨri. Xekeneuyupatari kakaɨyarixi xekeniwaruku'eiri, meta 'axaxeteyurietɨ xeketeneuhayewa”.
EZE 14:7 Ne nekatinayukatuamɨkɨ 'ixaheritsixi wahetsiemieme, yatɨni 'ateewa kiekametɨtɨ 'Ixaheri kwieyaritsie 'ukaitɨ kemɨ'ane mɨnetsi'uku'eiri: kemɨ'ane yu'iyaritsie kakaɨyarixi 'axamemu'ɨatɨka mɨwarayeyatsa, meta kemɨ'ane mɨtiwa'irɨwiyane 'axamemɨteyuriekakɨ, meta kemɨ'ane Kakaɨyari niukameya hetsɨa meta'axe netsita'iwawiyake.
EZE 14:8 Ne nekanitahekɨatamɨkɨ 'inɨari nekaneyeitɨamɨkɨ, neteɨterima wahamatɨari pɨka'uyeikani. 'Ana mɨpaɨ xekatenetimaikuni ne Yawé nemɨhɨkɨ.
EZE 14:9 »Xɨka xewitɨ tixaxatame 'itarikakɨ tihekɨatani, ne Yawé yakɨ 'utaineme nemayeitɨakɨ kanainemɨkɨ, ne neteɨterima wahɨxie nekanika'unamɨkɨ.
EZE 14:10 Mɨkɨ tixaxatame meta kemɨ'ane miku'iwawiya, yunaitɨ yaxeikɨa wahetsie pɨrahɨiyani,
EZE 14:11 teɨteri 'ixaheritsixi tawarita memɨkanetsi'uku'e'eiriwanikɨ meta tawarita 'axamemɨkateyuriekakɨ. Hikɨ 'ana neteɨterima mepakɨne, neta wakakaɨyari nepɨhɨkɨtɨni. Yawé naimekɨmɨyɨwe mɨpaɨ kanaineni».
EZE 14:12 Yawé yuniukitsie mɨpaɨ kanetiniutaxatɨani:
EZE 14:13 «Tewi pemunu'aya, xɨka xewitɨ nuiwari 'axatiuyurieni nehetsɨa, xɨka 'akuxi yaxeikɨa 'axatiyurieneni, ne ne'iwaɨyɨ nenanukukweimɨkɨ hetsiena mieme, 'ikwaiteya nekatininawairiemɨkɨ, heuhaakamɨkɨme nekaneyeitɨamɨkɨ, kiekatari mekanikwikuni meta tewaxi.
EZE 14:14 Xɨka mana Nuhexi meta Tanieri metatsiere Kuwi mɨkɨ kwieyaritsie metitenike, mɨkɨ xeikɨa mepɨtawikwenikekai heitserie memexeiyakɨ. Ne Yawé naimekɨmɨyɨwe mɨpaɨ nekanaineni.
EZE 14:15 »Xɨkata mɨkɨ kwieyaritsie yeutari teyukwa'amete newarenɨ'anike, memɨwatikwanikɨ 'akumaweme memayeitɨanikɨ mɨkɨ kwieyari, 'ana teyukwa'amete mewamakatɨ xewitɨ mana pɨka'uyeyanikeyu,
EZE 14:16 meta xɨka mɨkɨ memɨyuhaika mana metitenike, waniwema 'ukitsi meta 'ukari mepɨkatawikwenikekai. Mɨkɨ xeikɨa mepɨtawikwenikekai, peru mɨkɨ kwieyari yuxaɨta puyuhayewakekai. Ne mɨpaɨ nekanaineni Yawé nemɨtɨrɨkaɨye.
EZE 14:17 »Xɨkata mɨkɨ kwieyaritsie kuyaxa nehenɨ'anike, xɨka kiekatari meta tewaxi 'ixiparakɨ memɨkwi'iwakɨ yanetiutanaki'erienike,
EZE 14:18 meta xɨka mɨkɨ memɨyuhaika mana metitenike, waniwema 'ukitsi meta 'ukari mepɨkatawikwenikekai. Mɨkɨ xeikɨa mepɨtawikwenikekai. Ne Yawé naimekɨnemɨyɨwe yurikɨ mɨpaɨ nekanaineni.
EZE 14:19 »Xɨka kwiniya mɨkɨ kwieyaritsie nehenɨ'anike, xɨka nehaxɨa wahetsie ne'ukawiwienike mana kiekatari memɨkwinikɨ meta watewama,
EZE 14:20 xɨka Nuhexi, Tanieri meta Kuwi mɨkɨ kwieyaritsie metitenike, waniwema 'ukitsi meta 'ukari mepɨkatawikwenikekai. Mɨkɨ xeikɨa mepukuwikwenikekai heitserie memexeiyakɨ. Ne Yawé naimekɨmɨyɨwe yurikɨ mɨpaɨ nekanaineni.
EZE 14:21 »Yawé naimekɨmɨyɨwe mɨpaɨ kanaineni: Matsi kwinimieme katiniyɨmɨkɨ kepauka Kerutsaremetsie nemenɨ'ani, nauka 'uximatɨarikayari mɨtiyumemiwa: kuyaxa, haakaxa, yeutari teyukwa'amete meta kwiniya. Mɨkɨkɨ nepɨwakwini mana kiekatari meta watewama.
EZE 14:22 Peru matsi hipatɨ mepuyuhayewa me'anuhapanieme mepɨtixɨnarieni, yuniwema memehapaniekai mepɨwa'atɨani 'ukitsi meta 'ukari. Kepauka memɨ'axɨani xehetsɨa, xepɨwaxeiya 'aixɨa meteyuriekame meta 'aixɨa mete'u'uwame, 'ana xepuyunɨtɨani kenemɨtiuyuri 'uximatɨarikakɨ Kerutsaremetsie.
EZE 14:23 Xeme xepuyunɨtɨani kepauka mɨkɨ xemɨwaxeiya kememɨte'u'uwani meta kememɨte'uximayaka, mɨpaɨ xepɨtehetimani kename yakɨ nekatiuyuri, Kerutsaremetsie. Yawé naimekɨmɨyɨwe mɨpaɨ kanaineni».
EZE 15:1 Yawé yuniukikɨ mɨpaɨ kanetiniutaxatɨani:
EZE 15:2 «Tewi pemunu'aya, ¿tita matsi waɨkawa tiyunaki'erie kaxie nanayari, nutsu kɨyexi yeuta mieme mexayari?
EZE 15:3 Kaxie kɨyeyarikɨ 'ɨpari mutawewieni pɨkayɨwe, yatɨni hetsiena tsikere tixaɨtɨ mɨtiuyewieni pɨkayɨwe.
EZE 15:4 Kɨmana matinaini xeikɨa pɨyɨwe. Peru neuxei, ¿tawarita ketitakɨ tiyunaki'erie kepauka kɨtsiena manutaixɨani meta kepauka tsutɨana paitɨ matani?
EZE 15:5 Kepauka mɨnaimikaitsie nitixaɨtɨkɨ pɨkatiyunaki'eriekai, matsi hikɨri mutatai.
EZE 15:6 »'Ayumieme, Yawé naimekɨmɨyɨwe mɨpaɨ kanaineni: Kaxie nanayari kɨye mɨwakini hepaɨ kenemɨtitataiyaxɨ, mɨpaɨ nepɨwayurieni Kerutsareme kiekatari.
EZE 15:7 Ne nekaniwatakwimɨkɨ newaraye'unietɨ, xeimiemeri taikɨ mekaniutawikweni, peru tawarita xeimekɨ mepɨtitani. Kepauka nemɨwara'iwa, 'ana xeme mɨpaɨ xepɨtehetimani kename ne, Yawé nehɨkɨ.
EZE 15:8 'Ikɨ kwieyari kakiepatɨme nepayeitɨani, mɨkaheu'enakɨ. Yawé naimekɨmɨyɨwe mɨpaɨ kanaineni».
EZE 16:1 Yawé yuniukitsie mɨpaɨ kanetiniutaxatɨani:
EZE 16:2 «Tewi pemunu'aya, Kerutsareme ke'axamɨtiyurienekɨ keneutati'a.
EZE 16:3 Mɨpaɨ ketinaye'eritɨa Yawé naimekɨmɨyɨwe mɨpaɨ kanaineni: “Kerutsareme, 'ekɨ kananeu tewiyari pekanihɨkɨtɨni mana pekaniutinuiwa, 'apaapa 'amuxeu tewiyari kanihɨkɨtɨni, 'amaamata Heti tewiyari.
EZE 16:4 Kepauka pemutinuiwaxɨ 'akwinuri pɨkahakaxitekie, pepɨka'uka'ɨyarie, meta 'una pepɨka'utawiriyarie, 'ixurikikɨ pepɨka'uta'eimarie.
EZE 16:5 Nixewitɨ pɨkamatsi'utinenimayataxɨ, mɨpaɨ metinenimayatɨ. Matsi xeikɨa, kepauka pemutinuiwaxɨ pekanehɨiyani yeuta, tixaɨtɨ katiyunaki'erietɨ mɨrehɨiyani hepaɨ.
EZE 16:6 »”Ne 'a'aurie nepuyetɨa, nepɨmatsi'uxei 'axuriyatsie peyekurupeneme, hikɨ mɨpaɨ nepɨmatiutahɨawixɨ: Neuxei kenayenieretɨ,
EZE 16:7 kenewereni kɨye yeutanaka hepaɨ. »”'Ekɨ pekaniutawere, 'apekaniutatere, 'uka pekanayani. 'Atsitsi kananexɨani, 'ahuxari kaniukaneni, peru neuxei pemawetɨ 'akuxi 'apepuyeikakai.
EZE 16:8 »”Hutariekata 'a'aurie nemuyetɨatsie, nekameniuxeiya. 'Ari kanaye'akaitɨniri pematiwikieni. Hikɨ nematakɨ nekamenanakakamixatɨani pemɨmawekaikɨ. Tɨratu 'ahetsɨa nekaniuwewieni, yatekaniutiyuani, hikɨ nehetsiemieme pekanayani. Yawé naimekɨmɨyɨwe mɨpaɨ kanaineni.
EZE 16:9 »”Nekameniuka'ɨya, pemeuxurekai nekameniuka'itieni meta witsimu'ɨa nekameniutawirieni.
EZE 16:10 Kamixate tixutɨkaime nekametinanakatɨtɨani, nekameneukakaitɨaxɨani nawi 'aixɨa mɨ'ane kakaiyarikɨ. Nekametiniutiketɨani rinu 'ixurikiyarikɨ meta tsera.
EZE 16:11 Tetexi witsimɨ'anenekɨ nekametiniutiniɨtɨani: 'amamatsie nekatineutapiexɨani, kuka nekamenakatɨtɨani,
EZE 16:12 nakɨtsa nepɨmatsi'anuyewɨtɨiri, hanira 'atsuritsie nepuyewi meta kuruna witsi'anekame nepɨmatsi'anaketsiri 'amu'utsie.
EZE 16:13 Pereuniɨtɨ pekaniyuhayewa hurukɨ meta pɨratakɨ metatsiere rinu 'aixɨa mɨ'anekɨ, tsera 'ixurikiyarikɨ meta tixutɨkaimekɨ. Petinikwakaitɨni tɨriku 'aixɨa mɨ'anenekɨ, meta xietekɨ metatsiere huriwu hatseitiyarikɨ. Witsipeti'ɨimaritɨ pepatɨa, 'aixɨa pɨ'anekai waɨkawa matsi 'uka ti'aitame pemayanikɨ.
EZE 16:14 Witsipeti'ɨimaritɨ peputamariwaxɨ naitsarie nuiwaritetsie, netsɨ 'aixɨa nekameniukuyurieni kenemɨtimariwekɨ. Yawé naimekɨmɨyɨwe mɨpaɨ kanaineni.
EZE 16:15 »”Matsi xeikɨa, 'ekɨ witsipemɨtiyuxexeiyakaikɨ pepuyuta'ɨrixɨ, 'ateewa paitɨ peputamariwaxɨ, meta tuminikɨ peyumayɨinɨatɨ pepatɨa. Peka'akatewiyatɨ kemɨ'ane 'ahɨxie memuyekɨkakai pepɨ'ayetua wahetsɨa.
EZE 16:16 'Akamixatekɨ kakaɨyarixi pepɨwarutiwewi witsimeteyuxexeiyame, mana tuminikɨ peyumayɨinɨatɨ pepatɨa. Hatsuaku mɨpaɨ pɨkareyɨwekai.
EZE 16:17 Hurukɨ mɨtiwewiyatɨka meta pɨratakɨ mɨtiwewiyatɨka nemɨmatiumikai, mɨkɨkɨ 'ukitsi wa'ɨkiyari pepɨwarutiwewi, mɨkɨ pewarayexeiyatɨ pepuyumayɨinɨakai.
EZE 16:18 'Akamixate mɨtixutɨka pepɨwaranakatɨtɨa, nehatseiti pepɨwarukawiri meta witsimu'ɨa.
EZE 16:19 Pepitimawaxɨ witsimu'ɨa mawariyari, 'ikwai nemɨmatiyetuirikɨ: tɨriku 'aixɨa mɨ'anene, huriwu hatseitiyari meta xiete. Yawé naimekɨmɨyɨwe mɨpaɨ kanaineni.
EZE 16:20 »”Metatsiere tɨɨri 'ukitsi 'ukari pepɨwayetua, nehamatɨa pemɨwarayexei pepɨwarutimawaxɨ, mɨkɨ 'ɨkiyarite wa'ikwai mayanikɨ. Ke'axapemɨtiyurienekai 'a'iyari kari 'aixɨa pɨka'anekai.
EZE 16:21 Pepɨwarutimawaxɨ neniwema, pepɨwarutitaiyaxɨ mawari memakɨnekɨ 'akakaɨyarixi wahetsiemieme.
EZE 16:22 'Axapetiyurienetɨ meta hipame wahamatɨa pehunetɨ pepɨkahaye'eri pemɨnunutsitɨkaitsie, kepauka naitɨ pemeumawekai meta 'axuriyatsie pemɨyekurupenekaitsie.
EZE 16:23 »”Yawé naimekɨmɨyɨwe mɨpaɨ kanaineni: “Xɨa'ui 'ekɨ, xɨa'ui 'ekɨ. Matsi yemekɨ 'axamɨ'anekɨ pemɨhɨnenikɨ,
EZE 16:24 pepitiwewi tukite kakaɨyarixi wahetsɨa, teɨteri memayukuxexeɨriwatsie.
EZE 16:25 'Etsikinatsie naitsarie pepikuwewiexɨa, muwa pemɨwarayexeiyanikɨ. 'Ateurite pepɨwa'eiririe kemɨ'ane tsepa 'a'aurie muyemie, wahamatɨa pehunetɨ pepɨkatihayewakai.
EZE 16:26 'Ekipitutari wahamatɨa pepukahui, 'a'aurie kiekatari waxieyame 'amɨtɨtɨkai, meta pemɨnetsiyehaxɨatɨanikɨ matsi yuwaɨkawa wahamatɨ pepukahui.
EZE 16:27 Ne ne'iwaɨyɨ nepanukukwei nemɨmatikwinitɨanikɨ, 'akwie yakɨneputayeuriyaxɨ, piritsiteutsixi wakiekaritsie nepɨmatsiyetua, mɨkɨtɨtɨ mepuyutetewiyakai ke'axapemɨtiyurienekaikɨ.
EZE 16:28 Tawarita 'atsiriyutsixi wahamatɨata pepukahui, 'ekɨ mɨkɨkɨ pepɨkahuxaiwekai.
EZE 16:29 Metatsiere yaxeikɨa pepuyɨ, tetuayamete Wawiruniya kiekatari wahamatɨa, yaxeikɨata 'ana 'a'iyari 'axɨa pɨka'uyɨ”.
EZE 16:30 »”Yawé naimekɨmɨyɨwe mɨpaɨ kanaineni: “Ketitayari 'aixɨa pekati'akɨhɨawe. 'Ukaratsi tuminikɨ muyumayɨinɨa hepaɨ pepuyɨ, peka'akatewiyatɨ.
EZE 16:31 Peru kepauka teɨteri memayukuxexeɨriwa pemitiwewi, tukite meta 'etsikinatsie pemɨyuyetuakai, 'ukaratsi tuminikɨ muyumayɨinɨa hepaɨ pepɨkayɨanekai, pemɨkati'awiyakaikɨ.
EZE 16:32 »”'Axapepɨyɨane, hipame wakɨnama pewakumaɨwatɨ. Teewatari xeikɨa pepɨwanaki'erie, 'akɨna pekanaki'erietɨ.
EZE 16:33 Yunaitɨ 'ukarawetsixi tuminikɨ memɨyumayɨinɨa mepɨtepitɨarie, matsi 'ekɨ 'ahamatɨa memukahipite pepɨtiwapitɨa pɨta. Pepɨtiwapitɨata 'awie naitsarie memakɨkanikɨ 'ahamatɨa mekahinike.
EZE 16:34 Nixewitɨ 'ukaratsi mɨkatiuka'iyari hepaɨ pepɨ'anekai: nixewitɨ mɨkamatipitɨakaikɨ, 'ekɨ pɨta pepɨtiyutɨakai peuyewekai pemɨtipitɨariekakekaikɨ. Mɨkɨkɨ yɨkɨ pepɨ'anekai hipame 'ukarawetsixi wahamatɨa.
EZE 16:35 »”'Ayumieme, 'ukaratsi tuminikɨ pemuyumayɨinɨa, Yawé niukieya keneu'eni.
EZE 16:36 Yawé naimekɨmɨyɨwe mɨpaɨ kanaineni: Ke'axapemɨtiyuxexeiya pepihekɨataxɨ, pemawetɨ pepuyuyexatakai memɨmatsikumaɨwa wahetsɨa meta 'akakaɨyarixi 'axamemɨ'anene, 'aniwema waxuriya pepuwaruxatɨa.
EZE 16:37 'Ayumieme, nepɨwakuxeɨrieni yunaime memɨmatsi'ukumayɨa, kemɨ'ane pemɨwarutanaki'eri meta kemɨ'ane pemɨwarutixani'eri. Yunaime naitsarie kiekatari nepɨwakuxeɨrieni 'ahetsɨa, wahɨxie nepɨmatsitakeni pemaweme, mɨkɨta mepɨmatsixeiya naime pemaweme.
EZE 16:38 Nepɨmatsi'anutahɨani hipame wakɨnama mɨwakumaɨwa hepaɨ meta mɨtiyumiekame hepaɨ, nehaxɨa meta ne'ɨtetsarika 'ahetsie nepikawiwieni.
EZE 16:39 Wahetsɨa nepɨmatsiyetuani, mɨkɨ mawari taiyame pemutiwewi mepɨti'una, naime tukite mepɨteti'una. Mɨkɨ 'akamixa mepɨtatsana, meta 'akukate, 'anakɨtsate mepɨmatenawairieni, naime pemaweme mepɨmatsihayewa.
EZE 16:40 Hipame teɨteri mepɨwata'inieni 'ahepaɨtsita miemeyarikɨ, mepɨmatsitituaxixɨani, 'ixiparakɨ mepɨmatsitixitexɨani.
EZE 16:41 'Akii kanititaiyariemɨkɨ, 'ukarawetsixi yumɨireme wahɨxie pekanitaxanetsiemɨkɨ. Ke'axapemɨtiuka'iyarikai mana nekatiniu'atɨamɨkɨ, tawariri memɨmatsikumaɨwa pepɨkatiwapitɨani.
EZE 16:42 Mɨpaɨ nekatinihaxɨapiemɨkɨ meta ne'ɨtetsarika kaneunuamɨkɨ, 'aixɨa 'iyari nekaniuyeikamɨkɨ nekaha'atɨ.
EZE 16:43 Ne 'ahetsie nekatinahɨaka kepemɨtiyurienekɨ pemɨnunutsitɨkaitsie pemɨkahaye'erikɨ, mɨya petiyurienetɨ pepɨnetsi'uyehaxɨatɨa, tawari matsi 'akuxi kwinimieme 'axapetiuyurieku. Yawé mɨpaɨ kanaineni.
EZE 16:44 »”Kemɨ'ane niuki 'inɨarikɨ mɨtikuxata kwi memaxatawawe, mɨpaɨ mepɨtiyuani: ‘Nu'aya yumaama hepaɨ pɨ'ane’.
EZE 16:45 'Ekɨ 'amaama hepaɨ pepɨtiuka'iyari, yukɨna muku'eiri meta yuniwema, 'a'iwama wahepaɨ pepɨtiuka'iyari yukɨnama memɨwaruku'eiri meta yuniwema. Xemaama Heti tewiyari pɨhɨkɨtɨkai, meta xepaapa 'amuxeu tewiyari.
EZE 16:46 'Akuri Tsamariya kanihɨkɨtɨni, kiekari 'ayeta mukuma meta kiekari 'auriena mamanetɨka, 'ataru Tsuruma kanihɨkɨtɨni, kiekari 'atsutɨa mukuma meta kiekari 'auriena mamanetɨka.
EZE 16:47 Kememɨtekahu xeikɨa pepɨkawa'ɨke, matsi ke'axamemɨteyurie pepɨwa'ɨketa. 'Etsiwa yapaɨmexɨa 'anukayaku, 'ekɨ matsi waɨkawa 'axapetiuka'iyaritɨ pepatɨa.
EZE 16:48 Ne Yawé yurikɨ mɨpaɨ nekanaineni: 'Ataru Tsuruma meta kiekari 'auriena mamanetɨka mɨpaɨ tɨma mepɨkate'uyuri 'ekɨ meta kiekari 'a'aurie mamanetɨka kexemɨteyurie.
EZE 16:49 'Ataru Tsuruma meta kiekari 'auriena mamanetɨka, 'axamepɨte'uyuri memuyuta'ɨrixɨkɨ, waɨkawa mepɨte'utikwa'akai, tixaɨtɨ mepɨkateha'eriwakai, haweri memɨ'anene mepɨkawaparewiekai.
EZE 16:50 Hipame wahetsiemieme mariweme mepayuyeitɨwakai, nehɨxie kwinimieme 'axameteyurietɨ. 'Ayumieme kepemɨtiunierixɨ, nepɨwaruka'unaxɨ.
EZE 16:51 Peru neuxei Tsamariya meta kiekari 'auriena mamanetɨka 'ekɨ ke'axakwinimieme pemɨtiyuriene mɨkɨ nihixɨapa mepɨka'uti'axɨa tɨma. 'Ekɨ matsi kwinimieme 'axapetiyurienetɨ pepatɨa, mɨkɨ matsi heitserie mehexeiyame hepaɨ mepɨyɨa 'ekɨ kwinimieme 'axapemɨtiyurienekaikɨ.
EZE 16:52 Hikɨ 'ekɨ 'ahetsie kerahɨiyani, kwinimieme 'axakepemɨtiuyurikɨ heitserie mehexeiyame hepaɨ pekaniwaruyurieni 'a'iwama 'ekɨ kepemɨkareixeiya. Keneuyutitewiyari, ketinayukatua ke'axapemɨtiuyuri. 'A'iwama heitserie mehexeiyame hepaɨ pemɨwaruyuri 'ekɨ kepemɨkareixeiya.
EZE 16:53 »”Peru ne nepɨwapata kememɨte'anutaxɨriyakai Tsuruma meta Tsamariya meta kiekari wa'aurie mamanetɨka, metatsiere 'ahekɨ yaxeikɨa nepɨtiyurieni.
EZE 16:54 Mɨpaɨ 'ekɨ 'axakepemɨtiuyuri tewiyarika pɨmatsipitɨani, mɨpaɨ wanɨtɨwame pepayani.
EZE 16:55 'Ekɨ meta 'a'iwama memuyuhuta, meta kiekari wa'aurie mamanetɨka, meripaitɨ kexemɨ'anekai mɨpaɨ xe'anetɨ xepakɨne.
EZE 16:56 Pekara'eriwa pemi'atsekai 'a'iwa Tsuruma kepauka pemuyuta'ɨrekaitsie,
EZE 16:57 'axapetiyurienetɨ meripai pemɨkamariwakaitsie. Hikɨta 'ekɨ 'atsieriwame pekanihɨkɨtɨni 'erumitsixi wakiekaritsie meta piritsiteutsixi, meta naitsarie mekameninanaimaka.
EZE 16:58 'Anaiparie pekanenakayeka ke'axapemɨyɨanekai, ke'axakwinimieme pemɨyɨanekai. Yawé mɨpaɨ kanaineni.
EZE 16:59 »”Yawé naimekɨmɨyɨwe mɨpaɨ kanaineni: Yanekameniyurimɨkɨ 'axapemɨtiuka'iyarikɨ, tɨratu temuwewiekai yapemɨkatikatɨakɨ kepemɨti'ahɨritɨakai.
EZE 16:60 Matsi ne hɨrixɨa, nepaye'erieni tɨratu kenemɨtiuwewi 'ahamatɨa pemɨ'ɨimaritɨkaitsie, hutarieka tɨratu 'ahamatɨa nepɨwewieni yuheyemekɨ mieme.
EZE 16:61 'Ekɨ pepaye'erieni kepemɨyɨanekai meripaitɨ, pepɨyutitewiya kepauka 'a'iwama nemɨwaranayexeiya, 'akuri meta 'ataru, nepɨmatsiwitɨtɨani 'aniwema memakɨnekɨ, tsepanetɨ tɨratu nemuwewienike 'ekɨ 'ahamatɨa mɨkɨ memɨkaheixeiya.
EZE 16:62 Ne netɨratɨ 'aixɨa nekaniyurimɨkɨ 'ahamatɨa, 'ana mɨpaɨ pepɨretimani kename ne Yawé nehɨkɨ.
EZE 16:63 Kepauka ne nemareuyehɨwirieni, naime ke'axapemɨtiuyurikɨ, 'ekɨ pepaye'erieni ke'axapemɨtiuyuri peru pepɨ'atitewiya, 'aixɨa pepuyuyurieni tawarita 'axapepɨkatayɨni. Yawé naimekɨmɨyɨwe mɨpaɨ kanaineni”».
EZE 17:1 Yawé yuniukitsie mɨpaɨ kanetiniutaxatɨani:
EZE 17:2 «Tewi pemunu'aya: 'Ikɨ niuki keniwarutaxatɨa 'ixaheritsixi teɨteriyari, keniwarutaxatɨa 'ikɨ 'ɨxatsi niukiyari.
EZE 17:3 Mɨpaɨ ketiniwaraye'eritɨa kename ne Yawé nehaine: »Riwanu kaninuani Kwixɨ 'anetɨ, 'a'anateyeyeutɨ, waɨkawa heuhuxatɨ, witsiheu'anetɨ. Kariuxa yekɨrita kaniuyeyerɨni,
EZE 17:4 kanekatutseni yɨrariyari 'amutewitsie. Xeime kwieyaritsie kaneitɨni tetuayamete wahetsɨa, kiekari mɨratuiyatsie kanikayeni.
EZE 17:5 Hikɨ mɨkɨ kwieyaritsie 'imɨari kaniyetɨkɨ, kanika'eni kwie 'aixɨa mɨraku'anetsie. Kanika'eni hapuri kɨyeyari kemɨrayu'etsa, waɨkawa haa 'uhanekaku 'aurie.
EZE 17:6 'Imɨari kaniutineni, kaxie nanari 'apatɨ kanayani, yakɨ hawetɨ, kwixɨ hetsie paitɨ kaneuti'ani mamateya, yunanakɨ waɨkawa katiniukawiya. Mɨpaɨ katinayani kaxie nanari, waɨkawa yɨratɨ.
EZE 17:7 Peru xewitɨ 'apuyeikakaita kwixɨ 'anetɨ, 'a'anateyeyeutɨ, waɨkawa heuhuxatɨ. Tawarita kaxie yunanarikɨ katiniukawiya, manapaita xawari kaniukanetɨani, haa waɨkawa mɨharekakɨ kemɨkatiharekai.
EZE 17:8 Mana puka'etsiekai kwie 'aixɨa mɨ'anetsie waɨkawa haa 'uhanekaku 'auriena, mɨyɨranikɨ meta 'ikwaxi muxuawitɨakakɨ, kaxie nanari witsi'anetɨ mayanikɨ.
EZE 17:9 »Mɨpaɨ ketiniwaraye'eritɨa: Yawé mɨpaɨ kanaineni: »Mɨkɨ kaxie pɨkakaxuawere. Kwixɨ nanarimakame pahuna. 'Ikwaxi pɨka'inɨni, kaxie nanayari pɨtayɨnare. Huu, yɨrariyari pɨtiwani. Pɨkaheuyeweka mamá tɨrɨkaɨyetɨ meta teɨteri meyumɨiretɨ memehunakɨ naime.
EZE 17:10 Tsepa xaɨtsie mukayerie pɨkatawere. 'Eka tau manatineika mayeneika pitawatsiɨxa xɨka 'i'axe. Yurikɨ kanitawamɨkɨ hakewa mekayerie».
EZE 17:11 Yawé yuniukitsie mɨpaɨ kanetiniutaxatɨani:
EZE 17:12 «Keniwaruta'iwawiya 'ikɨ teɨteri memɨ'iyaritsetse'i kehepaɨtɨtɨ 'ikɨ naitɨ manuyɨne. Mɨpaɨ ketiniwaraye'eritɨa, ti'aitame Wawiruniya kiekame Kerutsareme punua, yukwieyaritsiepai Kura kwieyaritsie ti'aitame pehanie meta 'iparewiwamete.
EZE 17:13 Hikɨ xeime panayexei memanuyetei waniwe, waɨriyarika wapitɨatɨ yapɨtiwarutahɨawixɨ tɨratutsie yamemɨtekakɨnekɨ meyuhɨritɨatɨ. Ti'aitame mɨpaɨ katiniwarewitɨni memanuyetei yukwieyaritsie paitɨ.
EZE 17:14 Mɨya pɨwaruyuri waɨkawa Kura kwieyaritsie kiekatari mekatɨrɨkaɨyeme mɨwarayeitɨanikɨ. Mɨpaɨ pɨtiwarutahɨawixɨ mariweme memɨka'ayuyeitɨwanikɨ, waɨriyarika pɨwapitɨakai memeye'atɨanikɨ tɨratu.
EZE 17:15 Hikɨ mɨkɨ ti'aitame Wawiruniya kiekame 'aye'unietɨ patɨa, pɨwarenɨ'a texaxatamete 'Ekipitutsie memiparewienikɨ, kawayutsixi wahekɨ meta kuyaxi yuwaɨkawamekɨ. ¿Kemɨ'ane mɨyamɨtiuyuri tiyuta'una 'aku? ¿Tiyɨwe tɨratu kahaye'atɨame mutawikweni?
EZE 17:16 Hawaikɨtsitɨ, matsi kanimieriemɨkɨ Wawiruniya, ti'aitame kemɨ'ane mitahɨawixɨ kwieyatsie, kemɨ'ane tɨratu hamatɨa muwewi hetsɨa, tɨratu miwewitsitɨa mɨkaheye'atɨiri hetsɨa. Ne Yawé naimekɨmɨyɨwe mɨpaɨ nekanaineni.
EZE 17:17 Parahuni yukuyaxima yunaime wahamatɨa memiparewieni pɨkayɨwe, tsepa tetsariya 'imɨmɨiyari memutawewi meta tsepa tuxiyu memutiwewi waɨkawa teɨteri memɨwakwinikɨ.
EZE 17:18 Kura kwieyaritsie ti'aitame nu'aya, tɨratu pɨkahaye'atɨa. Hikɨ mɨyamɨtiuyurikɨ naime yɨhɨritɨaka pɨkayuta'una.
EZE 17:19 »'Ayumieme, Yawé naimekɨmɨyɨwe mɨpaɨ kanaineni: “Yurikɨ mɨpaɨ nekanaineni nekɨmana nepi'uximatɨani kemɨtiyɨhɨritɨakai netɨratutsie yamɨkatiuyurikɨ.
EZE 17:20 Newiniyari hɨxiena nepuwɨtɨani, mana kaniwierimɨkɨ. Wawiruniya nekanenuhanimɨkɨ, mana kanitaxanetsiemɨkɨ yamɨkatikatɨakɨ.
EZE 17:21 Kuyaximama 'aixɨa memɨ'anene mepɨkwi'iwa 'ixiparakɨ, kemɨ'aneta memuyuhayewa naitsarie nuiwaritetsie nepɨwataxɨriexɨani. 'Ana mɨpaɨ mepɨtehetimani kename ne, Yawé mɨpaɨ nehaine.
EZE 17:22 »”Yawé naimekɨmɨyɨwe mɨpaɨ kanaineni: »”Kariuxa kɨtsita yɨrariyari ne nekaniwatimuramɨkɨ, kemɨ'ane 'amutewinitsie nekanewatimuramɨkɨ, nekanikayemɨkɨ xeime hɨri 'a'utewimetsie.
EZE 17:23 'Ixaheri hɨriyaritsie nekanika'iteɨtamɨkɨ, 'amanutitewatsie, mana mɨtayɨrakɨ meta 'ikwaxi mɨkaxuawitɨanikɨ, kariuxa witsi'anetɨ mayanikɨ. Yunaitɨ wikixi hetsiena mekaniyuti'ituatɨakuni, 'etɨriyayatɨa xeikɨa mekaniu'uwakuni.
EZE 17:24 Yunaitɨ kɨyexi yeuta mieme mɨpaɨ mepɨtehetimani kename ne Yawé nehɨkɨ. Kemɨ'ane kɨye mɨmariweni nepewiteke, kemɨ'ane 'etsimutewini nepitaweriya, Kemɨ'ane kɨye mɨyɨra nepitawatsiɨxa, kemɨ'aneta mɨwaki, mɨtaxutunikɨ yanepɨtiyurie. Ne, Yawé, mɨpaɨ neputayɨ, nepeye'atɨani”».
EZE 18:1 Yawé yuniukitsie mɨpaɨ kanetiniutaxatɨani:
EZE 18:2 «¿Titayari kwi meteheixataku 'ikɨ niuki mɨtikuxata mɨmatiwa 'Ixaheritsie: “Wapaapama kaxie takari matsina meputikwai, waniwemata watamete pɨkɨitsietɨka?”
EZE 18:3 Ne, Yawé naimekɨmɨyɨwe yurikɨ mɨpaɨ nekanaineni, tawariri 'ikɨ xatsika pɨkataxatsieni 'Ixaheri kwieyaritsie.
EZE 18:4 Kemɨ'ane tewi 'axamɨtiyurieni kanimɨmɨkɨ. Mɨpaɨ xeketenemaika tukari pɨtinepiini, tsepa paapaya yatɨni nu'aya.
EZE 18:5 »Kemɨ'ane 'aixɨa mɨtiyuriene heitseriemekɨ yakatinikamieni.
EZE 18:6 Hɨritsie kakaɨyarixi wa'ixɨarari mawewiyanetsie pɨka'uyeika, meta pɨkawarahɨawe kakaɨyarixi 'axamemɨ'anene, 'Ixaheri kwieyaritsie memɨtama. Yu'iwa 'ɨyaya 'axapɨkayuriene, meta 'ukaratsi pɨkakumaɨwa kepauka xuriya mi'axiya.
EZE 18:7 Xeime waɨriyarika pɨkati'aitɨa, pɨkatinawaya, matsi kemɨ'ane mɨrapikai 'ixurikieya kaniyetuiriemɨkɨ miyetuakai, kemɨ'ane meuhakamɨkɨ pɨtimikwa meta kemɨ'ane meumawe pɨtiketɨa.
EZE 18:8 Tumini pɨkatiyuniɨtɨa rana'iwamɨtɨ. Pɨkayuwaɨriya 'axamɨtiuyurieni, meta kepauka mɨtitaxanetɨarieni xeime hetsie xeikɨa pɨkanuaka.
EZE 18:9 Ne'aitsika peu'enie, ne'inɨari niukiyaritsie 'aixɨa 'anemekɨ yapɨtikamie. Mɨkɨ tewi heitserie kanexeiyani, mɨkɨ yuheyemekɨ 'akaniuyeikamɨkɨ. Yawé naimekɨmɨyɨwe mɨpaɨ kanaineni.
EZE 18:10 »Peru mɨpaɨ katiniuyɨweni mɨkɨ tewi nu'aya kanayeneweni, 'axatiuka'iyaritɨ tiyumemiwatɨ, yupaapa ka'uweiyatɨ,
EZE 18:11 hɨritsie paitɨ kakaɨyarixi wa'ixɨarari mawewiyanetsie kuyeikatɨ, yu'iwa 'ɨyaya 'axayurienetɨ,
EZE 18:12 tixaɨtɨ mɨkarexeiya waɨriyarika ti'aitɨatɨ, tinawayatɨ, meta kemɨ'ane mɨrepinirie 'ixurikieya ka'iyetuirietɨ, meta kakaɨyarixi warahɨawetɨ, waɨkawa 'axatiyurienetɨ.
EZE 18:13 Tumini tiyuniɨniɨtɨwatɨ rana'iwatɨ. ¿Mɨkɨ temaikɨ tiyɨwe 'amuyeikani? Nekatixaɨtsietɨ. Mɨyamɨtiyurienekɨ, kanimieriemɨkɨ, kepauka mɨmierieni yukɨmana yɨanetɨ pɨranuyeyani.
EZE 18:14 »'Ikɨ, temaikɨ yuniwe xɨka mehayexeiya paapaya ke'axamɨtiyuriene tixeiyani, peru pɨka'i'ɨke,
EZE 18:15 hɨritsie kakaɨyarixi wa'ixɨarari mawewiyanetsie pɨka'uyeika, meta kawarahɨawetɨ kakaɨyarixi 'Ixaheri kwieyaritsie memɨtama, yu'iwa 'ɨyaya 'axakayurienetɨ,
EZE 18:16 xeime waɨriyarika kati'aitɨatɨ, katinawayatɨ, matsi kemɨ'ane mɨrepinirie yu'ixuriki muku'eiriekai miyetuiriwa, kemɨ'ane meuhakamɨkɨ timikwatɨ meta kemɨ'ane meumawe tiketɨatɨ,
EZE 18:17 pɨkayuwaɨriya 'axamɨtiuyurieni, tumini pɨtiyuniɨtɨa karana'iwatɨ, ne'aitsika peu'enie, ne'inɨari niukiyaritsie yapɨtikamie. Mɨkɨ temaikɨ mɨmierieni pɨkayɨwe paapaya 'axamɨtiuyurikɨ, matsi 'amuyeikani pɨpitɨarie.
EZE 18:18 Paapayata mɨtiyukananaima matɨakɨ, yu'iwa mɨtiunawatsirikɨ, 'axamɨtiyurienekaikɨ yuteɨterima watsata, 'axamɨtiuyurikɨ kanimɨmɨkɨ.
EZE 18:19 »Peru xeme mɨpaɨ xepɨte'u'iwawa: “¿Titayari raniwe pɨta 'axakemɨtiuyuri karanukutɨkɨ?” Mɨkɨ xeniwe 'aixɨa mɨtiuka'iyarikaikɨ heitserie mexeiyakaikɨ, ne'aitsika kananu'enieni meta yakatinikayani. Mɨkɨ temaikɨ 'amuyeikanikɨ kanipitɨarieka.
EZE 18:20 Kemɨ'ane 'axamɨtiyurieni, mɨkɨ kanimieriemɨkɨ, peru nixewitɨ temaikɨ yupaapa hetsiemieme pɨkarayukatuani, meta nixewitɨ yuniwe hetsiemieme pɨkarayukatuani, 'aixɨa mɨtiuka'iyari heitserie pupitɨarieni meta 'axamɨtiuka'iyari pɨrakapitɨarieni 'axamɨti'anekɨ.
EZE 18:21 »Xɨka 'axamɨtiyuriene tiuhayewa naime 'axamɨtiyurienekai, xɨka ne'aitsikatsie yatikamieni, heitserie yatiyurienetɨ, mɨkɨ pɨkamɨni,
EZE 18:22 'akaniuyeikamɨkɨ heitserie 'amuyeikakɨ, Kakaɨyari pɨratɨmaiya 'axatiuka'iyaritɨ mɨkɨ ke'axamɨtiuyurikɨ.
EZE 18:23 Mɨpaɨ xepɨkateku'eriwani kename xɨka 'axatiyuruwame 'umɨni, ne'iyari 'aixɨa kuyɨne. Hawaikɨ matsi pɨnetsinake 'axatiyurienetɨ mɨtihayewakɨ, 'amuyeikanikɨ. Ne, Yawé, mɨpaɨ nekanaineni.
EZE 18:24 »Xɨka heitserie yamɨtikamie 'aixɨa mɨti'ane tiuku'eirieni, 'axatiyurienetɨ xeikɨa xɨka hayani, mɨkɨ 'amuyeikani pɨkapitɨarieni, matsi kanimieriemɨkɨ 'axamɨtiuyurikɨ meta yamɨkatikatɨakɨ, pɨkaraye'eriwa meripaitɨ ke'aixɨa mɨtiyurienekai.
EZE 18:25 »Xeme mɨpaɨ xeputiyuane: “Yawé 'aixɨa pɨkatiuka'iyari”. Peru neuxei xekeneu'enana teɨteri 'ixaheritsixi: ¿Ketitatsiekuta heitseriemekɨ yanekatikamie? Matsi xemepɨta heitserie yaxemɨkatekahu xekanihɨkɨtɨni.
EZE 18:26 Kepauka heitserie mexeiya tita 'aixɨa mɨti'ane mɨtiuku'eiri, 'axatiyurienetɨ 'ayuyeitɨame meta xɨka 'umɨni, peru kanimɨmɨkɨ 'axamɨtiuyurikɨ.
EZE 18:27 Yatɨnita xɨka 'axatiyuruwame 'axamɨti'ane tiuku'eirieni, 'aixɨa pɨta tiyurienetɨ hayani meta heitseriemekɨ yatikamietɨ 'ayani, yutukari kanitawikweitsitɨamɨkɨ.
EZE 18:28 Xɨka 'aixɨa 'uyuyurieni xɨka 'axamɨti'ane tiuku'eirieni, pɨkamɨni matsi 'apuyeikani.
EZE 18:29 »Matsi 'ixaheritsixi teɨteriyari mɨpaɨ mekaniutiyuaneni: “Yawé heitserie pɨkahexeiya”. Neuxei 'ixaheritsixi teɨteriyari, ¿Ketitatsiekuta heitserie nekarexeiya? Matsi xemepɨta heitseriemekɨ yaxemɨkatekahu xekanihɨkɨtɨni.
EZE 18:30 'Ayumieme, xeme yuxexuime, 'ixaheritsixi, kexemɨteyurie mɨpaɨ nepɨtixe'akapitɨani. Yawé naimekɨmɨyɨwe mɨpaɨ kanaineni. Xeketeneuhayewa tinaime 'axamɨti'ane xeketeneuku'eiri, ke'axaxemɨte'uyuri mɨkaxehekaxɨrienikɨ.
EZE 18:31 Hikɨ kwitɨwa xeketenewiwi, tinaime 'axamɨti'ane mɨkanetsinake, 'iyari hekwame xekenayeitɨa meta kexemɨteku'ewa. ¿Titayari xetekwi'ini 'ixaheritsixi teɨteriyari?
EZE 18:32 Xewitɨ mɨmɨkini ne yanepɨkara'eriwa. Xeketeneuhayewa 'axaxeteyurietɨ, 'ana 'axepu'uwani. Mɨpaɨ kanaineni Yawé mɨtɨrɨkaɨye.
EZE 19:1 »'Ikɨ hiwerika 'Ixaheri kwieyaritsie memanuyetei keniwarutaxatɨa:
EZE 19:2 »“Mayetsi wahixɨapa, 'amaama maye 'ukaratsi pɨhɨkɨtɨkai. Mayetsi 'etsi mepepeme watsata pukatei, yuniwema pɨwatsitsitɨakai.
EZE 19:3 Mɨkɨ xeime putaweriyaxɨ, mɨkɨ maye mayu'eriya patɨa pɨretima kemɨtiuhupa mɨtiwiyakɨ tita mɨtitakwani meta teɨteri wakwaiwetɨ patɨa.
EZE 19:4 Nuiwarite mepitamari, mepiwiniyaxɨ putsuta 'uyewakikaku, mepeiha 'Ekipitu me'iwiwitɨatɨ tepɨakɨ.
EZE 19:5 Kepauka maamaya maye 'ukaratsi, yuniwe takwewietɨ muyutatexi, xeimeta kananayexeiya, kwinie rayu'eriyame matsi kanayeitɨani.
EZE 19:6 Kepauka 'ikɨ maye mutatɨrɨkaxɨa, mayetsi wahamatɨa kaniuyeikakaitɨni 'uyuta'ɨretɨ. Pɨretima kemɨtiuhupa mɨtiwiyakɨ tita mɨtitakwani, meta teɨteri wakwa'atɨ kanayani.
EZE 19:7 Paratsiyute puka'unaxɨa, kiekarite kiɨripa payeitɨwakai, pɨwamariutakai yutsuarikɨ yunaime kwiepa kiekatari.
EZE 19:8 Hipatɨ nuiwarite 'auriena kiekatari mekaniyuti'uitɨani me'imienike. Mekaniwiniya, putsuta kaneukaweni.
EZE 19:9 Tepɨakɨ hɨatɨ meta tepɨa kiiyarita 'ayewetɨ, kanehanieni ti'aitame Wawiruniya kiekame hetsɨa. Tepɨata 'ayewetɨ kanehanieni, tsuarieya mɨkahayu'eniɨriɨkɨnikɨ 'Ixaheri hɨriyaritsie.
EZE 19:10 »”Kaxie haraweriyari mayema wahixɨapa, kaxie nanari 'amaama pɨhɨkɨtɨkai haa manuyehane 'aurie 'etsietɨ: waɨkawa 'ukaxuxuaweretɨ meta waɨkawa yɨratɨ, haa waɨkawa muxuawekaikɨ.
EZE 19:11 Mamateya waɨkawa putiwawerixɨ, pɨyɨwekai te'aitamete wa'itsɨ mayanikɨ. Waɨkawa putawerixɨ hipame pɨwara'iwakai yukɨtsimeyarikɨ. 'Ateewa paitɨ puyuxeiyanɨakai 'amutewikaikɨ meta waɨkawa mɨyɨrakaikɨ.
EZE 19:12 Peru kanahunarieni haxɨakɨ, kwiepa kanatihɨiyani. 'Eka tau manatineika mieme pitiwatsiɨxaxɨ, teɨteri 'ikwaxi meukatekai mepukamuraxɨ. Putiwa mamateya 'amɨpapa, meta taikɨ putixɨtsitɨarie.
EZE 19:13 Hikɨri makumawetsie puyuhayewaxɨ, kwie mɨwakitsie 'etsietɨ.
EZE 19:14 Xeime mamayatsie tai kananeni, mɨkɨ tai 'ikwaxiyari kaniutixɨtsitɨani. Nitixaɨtɨ pɨkatiyuhayewaxɨ mamateya 'amɨpapa, 'aixɨa mɨ'anenekai te'aitamete wa'itsɨ mɨtiwewierekekai”. 'Ikɨ hiwerika kwikariyari kanihɨkɨtɨni, kehepaɨ manuyɨne mɨpaɨ xeikɨa ketinɨawarieka».
EZE 20:1 'Auxɨwirieka metseriyaritsie tamamata tukariyaritsie 'atahuta wiyari 'umiekaku, hipatɨ 'Ixaheri kwieyaritsie memanuyetei Yawé meta'iwawiyake mekaniu'axɨani, hikɨ nehɨxie mekanayaxe.
EZE 20:2 Mana Yawé mɨpaɨ kanetiniutaxatɨani:
EZE 20:3 «Tewi pemunu'aya, 'Ixaheri kwieyaritsie memanuyetei wahamatɨa ketineutixata, mɨpaɨ ketiniwarayehɨtɨa, kename mɨpaɨ nehaine Yawé naimekɨnemɨyɨwe: “Xemeri nehetsɨa xetetahu xenetsita'iwawiyake, nekɨmana mɨpaɨ nekatiniyɨhɨritɨaka nepɨkaxepitɨani xemɨnetsiku'iwawiyanikɨ. Ne mɨpaɨ nekanaineni Yawé naimekɨmɨyɨwe”.
EZE 20:4 »Tewi pemunu'aya, 'ekɨ ke'axamemɨteyurie keniwarutaxatɨa. Ke'axamemɨteyuriekai meripaitɨ watutsima mɨkɨ keniwarutaxatɨa.
EZE 20:5 Mɨpaɨ ketiniwarayemari'itɨa ne Yawé naimekɨmɨyɨwe mɨpaɨ nekanaineni: “Kepauka 'Ixaheri nemanayexei, mɨpaɨ nekatiniwaruhɨritɨani kename Kakuwu nuiwarimama wakakaɨyari nehayanikekai. Kepaukata nemuyuhekɨataxɨ wahetsɨa 'Ekipitu paitɨ, mɨpaɨ nekatiniwaruhɨritɨani: ‘Ne Yawé nepɨhɨkɨ xekakaɨyari’.
EZE 20:6 Mɨkɨ tukaritsie mɨpaɨ nepɨtiwarutahɨawixɨ yurikɨ nehaitɨ kename newarayewitɨni 'Ekipitu, kename newaranuwitɨni xeime kwieyaritsie ne nemeikuxeiyakaitsie. Mɨkɨ kwieyaritsie waɨkawa kanexuaweni retsi meta xiete, mɨkɨ yemekɨ witsimɨraku'ane kanihɨkɨtɨni.
EZE 20:7 Yuxexuime mɨpaɨ nepɨtiwaretahɨawixɨ, yukakaɨyarixi memɨxani'eriwa mekewarexɨrienike kwinie memɨtewanaki'erie, meta kakaɨyarixi memɨkawarayexeiyanikɨ 'Ekipitu miemete, ne Yawé xekakaɨyari nemɨhɨkɨkɨ.
EZE 20:8 »”Mɨyatɨtɨ mepɨkanetsi'anu'eni, menetsi'aye'unietɨ mepakɨ. Yukakaɨyarixi mepɨkawarexɨri memɨwanaki'eriekaikɨ, meta kakaɨyarixi 'ekipitu miemete mepɨkawaruku'eiri. 'Ayumieme kepauka 'Ekipitu memu'uwakaitsie, mɨpaɨ nepɨtiu'eri nehaxɨa wahetsie nepɨkawiwieni.
EZE 20:9 Matsi mɨpaɨ netinehɨaweka, mɨpaɨ nepɨtiuyuri hipatɨ nuiwarite 'ixaheritsixi mana watsata memɨtitekai 'axamemɨkahaitɨkanikɨ, wahetsiemieme. Kepaukatsɨ 'ixaheritsixi nemɨwarayewitɨ 'Ekipitu hipame nuiwarite wahɨxie nekatiniuyurieni.
EZE 20:10 »”Ne nepɨwarayewitɨ 'Ekipitu, nepɨwarewitɨ makumawetsie.
EZE 20:11 Ne ne'aitsika nepɨwayetuiri memimaikakɨ ne'inɨari niukiyari, tukari tiyupitɨwame kanihɨkɨtɨni kemɨ'ane hetsiena yamemɨtekakɨne.
EZE 20:12 Meta xawati tukariyari nekaniwayetuirieni 'inɨari mɨhɨkɨtɨnikɨ ne wahamatɨa mɨkɨta nehamatɨa, mɨpaɨ memɨnetehaye'eriwanikɨ, ne Yawé, xawati tukariyari patsiekame nepayeitɨa nehetsiemieme.
EZE 20:13 Peru 'ixaheritsixi teɨteriyari menetsi'aye'unietɨ mepakɨ makumawetsie, ne'aitsika mepɨka'anu'eni meta ne'inɨari niukiyari, tukari tiyupitɨwame mɨhɨkɨkɨ kemɨ'ane hetsiena yamemɨtekakɨne. Matsi meta xawati tukariyari kapatsiekame mepayeitɨa. 'Ayumieme kepauka makumawetsie memu'uwakai, wahetsie nehaxɨa nepɨkawiwienikekai, nepɨwakwinikekai.
EZE 20:14 Peru mɨpaɨ netinehɨaweka mɨpaɨ nepɨtiuyuri 'axamɨkaraniuwanikɨ nehetsiemieme hipame nuiwarite wahɨxie, nekapatsiekame memɨkanetsi'eriekakɨ kemɨ'ane memɨnetsi'uxei 'Ekipitu nemɨwarayewitɨtsie.
EZE 20:15 »”Meta yurikɨ nehaitɨ, mɨpaɨ nepɨtiwarutahɨawixɨ makumawetsie me'u'uwakaku kename kemɨ'ane kwietsie nemɨwaranuwitɨnikekaitsie nekawaranuwitɨni, kwie 'aixɨa mɨ'anetsie, retsi meta xiete waɨkawa muwaxuawetsie.
EZE 20:16 Ne'inɨari niukiyari mepɨka'utanaki'eri meta ne'aitsika mepɨka'anu'eni, meta xawati tukariyari kapatsiekame mepayeitɨa, mɨya mepuyɨ kakaɨyarixi 'axamemu'ɨatɨka memɨwarayexeiyakaikɨ.
EZE 20:17 Matsi ne nepɨwarutinenimayataxɨ, makumawetsie nepɨkawarakumaweriyaxɨ.
EZE 20:18 »”Mana makumawetsie mɨpaɨ nepɨtiwarutahɨawixɨ wanuiwarima: ‘Yu'ukiyarima wa'aitsika xepɨka'uweiyani, wa'inɨari xepɨka'ɨkeni meta wakakaɨyarixi 'axamemu'ɨatɨka xepɨkawarayexeiyani.
EZE 20:19 Ne Yawé xekakaɨyari nekanihɨkɨtɨni. Ne'aitsika xekeneuweiyani, meta ne'inɨari niukiyaritsie yaxeketenekahuni.
EZE 20:20 Xawati tukariyari xekena'eriwani mɨpatsie nehetsiemieme, mɨ'inɨaritɨnikɨ xehetsiemieme meta nehetsiemieme, mɨpaɨ xemɨtemaikakɨ ne Yawé xekakaɨyari nemɨkɨkɨ’.
EZE 20:21 »”Mɨyatɨtɨ, 'ixaheritsixi mepɨkanetsi'anu'eni. Ne'aitsika mepɨka'anukuwei meta ne'inɨari niukiyaritsie yamepɨkatekakɨ, tukari tiyupitɨwame kanihɨkɨtɨni kemɨ'ane hetsiena yamemɨtekakɨne. Matsi nexawati tukariyari kapatsiekame mepayeitɨa. 'Ayumieme kepauka makumawetsie memu'uwakai wahetsie nehaxɨa nepɨkawiwienikekai.
EZE 20:22 Matsi mɨpaɨ netinehɨaweka hipame nuiwarite wahɨxie 'axamɨkaraniuwanikɨ nehetsiemieme, kemɨ'ane memɨnetsi'uxei 'Ekipitu nemɨwarayewitɨtsie.
EZE 20:23 Meta yurikɨ nehaitɨ makumawetsie mɨpaɨ nepɨtiwarutahɨawixɨ kename newataxɨriexɨanikekai, hipame nuiwarite wahetsɨa, meta hipame kwieyaritsie,
EZE 20:24 memɨwarayexeiyakaikɨ yututsima wakakaɨyarixi 'axamemu'ɨatɨka, ne'inɨari niukiyari mepɨkahaye'atɨa meta ne'aitsika mepɨka'utanaki'eri metatsiere xawati tukariyari kapatsiekame mepayeitɨa.
EZE 20:25 'Ayumieme nepɨxeyetuiri 'aitsika 'aixɨa mɨka'anene, meta 'inɨari niukiyari tukari mɨkahexeiya.
EZE 20:26 Xeka'itiyakame nepɨxe'ayeitɨa yumawarikɨ, nepɨxe'upitɨa yuniwema matɨari miemete xemɨwatimawakɨ, xemɨtimamanikɨ meta mɨpaɨ xemɨtehetimanikɨ ne Yawé nemɨhɨkɨkɨ”.
EZE 20:27 »'Ayumieme, tewi pemunu'aya, 'ixaheri teɨteriyari mɨpaɨ ketiniwarayemari'itɨa, ne Yawé naimekɨmɨyɨwe mɨpaɨ nekanaineni: “'Ikɨkɨ nehɨxie xetutsima kemɨkanetinake mepɨte'uyuri, yemekɨ mepɨkanetsi'anu'eni:
EZE 20:28 Kepauka nemɨwa'atɨa kwietsie meripaitɨ yurikɨ nehaitɨ, mɨpaɨ nemainekai kename newayetuirienikekai, mɨkɨ kwieyaritsie tsepa kemɨ'ane hɨri memuxei yatɨni kɨye waɨkawa yɨrakame, mɨkɨ hetɨa mawari meputiwewiwakai, mepɨnetsixatɨakai matsi yemekɨ mɨkanetsinake. Mana 'ɨkwa witsimu'ɨa meputitaiyakai, meta kaxie winuyari mɨtiyeuriwa.
EZE 20:29 Ne mɨpaɨ nekatiniwaruta'iwawiya: ‘¿Kehepaɨtɨtɨri mɨkɨ tukiteta yaxepɨyɨa?’. Hikɨ 'akuxi muwa kakaɨyarixi memayexeiyarietsie, mɨpaɨ katinimatiwani, ‘kakaɨyarixi watuki’”.
EZE 20:30 »'Ayumieme, 'ixaheri teɨteriyari mɨpaɨ ketiniwaraye'eritɨa Yawé naimekɨmɨyɨwe mɨpaɨ kanaineni: “¿Xemeta yututsima wahepaɨ xeka'itiyatɨ xetehayuyeitɨani, meta kakaɨyarixi memɨxani'eriwa xewakumaɨwatɨ?
EZE 20:31 Hikɨtɨtɨ xeme 'axaxekaniyuyurieka yumawarikɨ, meta yuniwema xemɨwamawakɨ, xewataiyatɨ yukakaɨyarixima 'axamemu'ɨatɨka wahɨxie. Hikɨta xeme 'ixaheritsixi xeneteku'iwawiyatɨwe. Ne yurikɨ mɨpaɨ nekanaineni nepɨkanewaɨriya nemɨxeta'eiya. Ne Yawé naimekɨmɨyɨwe mɨpaɨ nekanaineni.
EZE 20:32 Hatsuaku kexemɨteku'eriwa mɨpaɨ pɨkatiyɨni: ‘Hipame nuiwarite wahepaɨ tepɨ'anenikeyu, kwiepa memɨtama wahepaɨ, kɨye memayexeiya meta tete’.
EZE 20:33 Ne Yawé naimekɨmɨyɨwe, yurikɨ mɨpaɨ nekanaineni xehetsie nekatinita'aitamɨkɨ waɨkawa netɨrɨkaɨyetɨ, meta waɨkawa neha'atɨ.
EZE 20:34 Tsepa hakewa xeme'uwa hipame nuiwarite wakwietsie nekanixekuxeɨriemɨkɨ tsepa hakewa xemetayeixɨakai, nekanixekuxeɨrimɨkɨ waɨkawamekɨ netɨrɨkariyakɨ, meta waɨkawa neha'atɨ.
EZE 20:35 Nekanixe'anuwitɨmɨkɨ makumawetsie nuiwarite wahixɨapa, mana nexexeiyatɨ nepɨtixekwinitɨani.
EZE 20:36 Kehepaɨ xetutsima memɨte'ayukatua, 'Ekipitu nemɨwayewitɨtsie makumawetsie me'uhutɨ, xemeta yaxeikɨa nekanixeyurimɨkɨ. Ne Yawé naimekɨmɨyɨwe mɨpaɨ nekanaineni.
EZE 20:37 Muxatsi wahɨweme kehepaɨ yumuxatsi mɨtiwaranuyehapana, mɨpaɨta ne yaxeikɨa nekɨyekɨ nepɨtiwaranuyexexeiya, meta nepɨxe'anayexeiya tɨratu temexeiyanikɨ xehamatɨa.
EZE 20:38 Nepɨwaranuyehapanita 'axamemɨte'u'iyari, metatsiere kemɨ'ane menetsi'aye'unietɨ memakɨ, nekanixe'ayewitɨmɨkɨ hikɨ hakewa xemetitei teewatari wahepaɨ, peru 'Ixaheri kwieyaritsie xepɨkaheutahaxɨani. Hikɨ 'ana mɨpaɨ xeme xepɨtehetimani ne, Yawé nemɨhɨkɨ.
EZE 20:39 »”Xemeta, 'ixaheri teɨteriyari, Yawé naimekɨmɨyɨwe mɨpaɨ kanaineni: Xɨka kaxenakeni yaxemɨtekahunikɨ, xekenehu, yukakaɨyarixi xekeniwarayexeiyani. Peru tawariri kenemɨtitewakɨ kapatsiekame xepɨka'ayeitɨwani yumawarikakɨ, meta yukakaɨyarixi 'axamemu'ɨatɨkakɨ ne nemɨpatsiekɨ.
EZE 20:40 Nehɨri mɨpatsietsie, 'Ixaheri hɨriyari 'amanutitewitsie, mana mepɨnetsi'ayexeiyani yunaitɨ 'ixaheritsixi teɨteriyari, meta yunaitɨ mɨkɨ kwieyaritsie kiekatari. Ne Yawé mɨpaɨ nekanaineni. Mana nepɨxetanaki'erieni, xemawari nepɨxetawawirieni, meta xe'imikieri mexɨakametsie timieme, meta tsepa hipame mawarite xemɨneteyetuiri.
EZE 20:41 Kepauka ne nemɨxe'atɨani, hipame nuiwarite wahetsɨa xemeutayeixɨakai nepɨxekuxeɨrieni, hipame nuiwarite wahɨxie nepɨxetanaki'erieni 'ɨkwa witsimu'ɨa hepaɨ, meta xepɨnetsihetimani kenemɨtipatsie.
EZE 20:42 Kepauka nemɨxe'atɨani 'ixaheri kwieyaritsie, yurikɨ nehaitɨa xetutsima mɨpaɨ nemɨtiwarutahɨawekai kwie nemɨwayetuirienikekaitsie, 'ana mɨpaɨ xepɨtehetimani ne Yawé nemɨhɨkɨ.
EZE 20:43 Mana xepayuye'erieni kexemutiyɨ, 'axa'anemekɨ kexemɨte'uyuri, 'ana xepuyutixani'erieni xemetɨtɨ naimekɨ kexemɨte'uyuri.
EZE 20:44 'Ixaheri teɨteriyari, kepauka ne nemɨxeparewieni, 'aixɨa nemɨrahɨawarɨwanikɨ, nepɨkatixekwinitɨani 'axakexemɨte'uyurikɨ meta kemɨkareuyewetse xemɨte'uyurikɨ, hikɨ xeme mɨpaɨ xepɨtehetimani ne Yawé nemɨhɨkɨ. Ne Yawé naimekɨmɨyɨwe, mɨpaɨ nekanaineni”».
EZE 20:45 Yawé mɨpaɨ kanetiniutaxatɨani:
EZE 20:46 «Tewi pemunu'aya, tatsutɨa keneukanieri, mɨkɨ hepaɨtsita ketineutaxata Nekexi mu'ɨtsiyatsie.
EZE 20:47 Mɨpaɨ ketineutahɨawi: “Nekexi 'ɨtsiyari, Yawé naimekɨmɨyɨwe niukieya keneu'eni: ‘'Ahixɨapatsie tai nekanitaiyamɨkɨ naime kɨyexi kanitixɨtsitɨamɨkɨ, mɨwawaki meta muyuyuri. 'Ikɨ tai pɨkayutɨnɨaka, naime pɨtititaiya tatsutɨa meta tayeta mɨtiuyehane.
EZE 20:48 Yunaitɨ teɨteri mɨpaɨ mekateninenierikuni ne Yawé nemitaiyaxɨkɨ pɨkatɨni’”».
EZE 20:49 Hikɨ ne mɨpaɨ neputayɨ: «Xɨa'ui, Yawé naimekɨmɨyɨwe, yunaitɨ teɨteri mɨpaɨ meputiyuane kename ne'ɨxatsikɨ xeikɨa ne'utaine».
EZE 21:1 Yawé mɨpaɨ kanetiniutaxatɨani:
EZE 21:2 «Tewi pemunu'aya, Kerutsareme hepa keneutanieri, watukite hepaɨtsita ketineutaxata meta 'Ixaheri kwieyari hepaɨtsita,
EZE 21:3 mɨpaɨ ketiniwaretaxatɨa mɨpaɨ ne Yawé nekanaineni: “Ne yurikɨ nepɨmatsi'aye'unie. Ne'ixipara nepɨwatihana nepɨwakwini heitserie memexeiya meta 'axamemɨteyurie.
EZE 21:4 Mɨpaɨ nekanaineni nekaniwakwimɨkɨ, 'aixɨa memɨte'u'iyari meta 'axamemɨte'u'iyari, ne'ixipara naitsarie kwiepa yunaime teɨteri kaniwarakukwimɨkɨ, tayetatsie meta tatsutɨa.
EZE 21:5 'Ana mɨpaɨ mepɨtehetimani kename ne, Yawé 'ixipara nehewatiha meta neka'ika'uta painayarita”.
EZE 21:6 »'Ekɨ, tewi pemunu'aya, yunaime wahɨxie 'a'iyaritsie petiuka'eniwatɨ karima keneutatsua.
EZE 21:7 Kepauka memɨmatsita'iwawiya titayari petiutatsuaka, mɨpaɨ ketiniwarutahɨawi pemu'enaxɨkɨ kemɨtiyɨni. 'Ikɨ niuki wa'iyari kanitimariutamɨkɨ, wamamate kanitiweranaxɨamɨkɨ meta watunute naitɨ pɨtiyɨyɨaka. 'Ari tukari kanaye'aximeni. Mɨkɨ yurikɨ katinaniuwani. Ne Yawé mɨpaɨ nekanaineni».
EZE 21:8 Yawé mɨpaɨ kanetiniutaxatɨani:
EZE 21:9 «Tewi pemunu'aya, ketineutaxata kemɨtiyɨni meta ketiniwarutaxatɨa Yawé mɨpaɨ mainekɨ: »“'Ixipara, 'ixipara, kanatamɨarieni meta kaniutimerɨkani,
EZE 21:10 pɨxawatɨ mutimerɨkanikɨ meta patamɨarie mɨtiyumemiwanikɨ.
EZE 21:11 Putamerɨkariyarieri meta patamɨarie, 'aixɨa pɨ'aneri mɨtiyumemiwa mɨkweitɨarienikɨ.
EZE 21:12 »”Tewi pemunu'aya, keneutahiwani keneutatsuakani, 'ikɨ 'ixipara neteɨterima kaniwaraye'unieka meta 'ixaheritsixi wa'ukiyarima yunaime. Wahetsiemieme kaneyenɨ'arieni, meta neteɨterima wahetsiemieme. 'Ayumieme, 'atawitsie keneuyuhutsunani.
EZE 21:13 »”Yawé naimekɨmɨyɨwe mɨpaɨ kanaineni:
EZE 21:14 »”Tewi pemunu'aya, ketinekuxatani ketinehekɨatani petiutapinetɨ, 'ixiparakɨ keyumieneni katihayewatɨ. Mɨki 'ixiparayari kanihɨkɨtɨni, yunaime mɨwaraye'unie,
EZE 21:15 wa'iyari mɨmamakakɨ meta memuyumɨirenikɨ mɨkite. Kitenieri nekanitikeni 'ixipara mɨtiyumemiwa. 'Ixipara mɨxawatɨ mutimerɨkanikɨ meta patamɨarie mɨtiyumemiwanikɨ.
EZE 21:16 Keneuyuaneni 'atserieta meta 'a'utata, meta naitsarie kenewakwineni. Mataxikaunikɨ keneyumiemeni, 'ixipara mɨtiyumemiwakɨ.
EZE 21:17 Netatsiere xeiya nepɨtikahutsuxɨani nemamakɨ meta neha'atɨ nepɨtihayewa. Ne Yawé mɨpaɨ nekanaineni”».
EZE 21:18 Yawé mɨpaɨ kanetiniutaxatɨani:
EZE 21:19 «Tewi pemunu'aya, hutame huye keneutiwewi wahetsɨa mɨye'anikɨ, Wawiruniya ti'aitame 'ixiparaya. 'Ikɨ huta huyeyari mɨkɨ kwieyaritsie pɨye'atɨkani, huye matsutɨtɨkatsie 'inɨari pepɨka'uitɨaxɨani, kemɨ'ane kiekaritsie mɨhanemetɨka.
EZE 21:20 Xeime huye keneutawewi 'ixipara Xawaha 'amunitsixi memakutei mɨye'anikɨ, meta Kerutsareme wahetsɨa mɨye'anikɨ, meta Kura kiekariyaritsie 'aixɨa mɨrekurarutɨiyarie.
EZE 21:21 Wawiruniyatsie ti'aitame huta huyeyaritsie kaniuweni, memɨtemaiwawe kaniwaku'iwawiyani: 'ɨrɨ kanitikatseni, kakaɨyarixi kaniwara'iwawiyani meta xeime yeutanaka nemaya kanitaxexeiyani.
EZE 21:22 Yutseriekɨ yakatiniu'inɨarita Kerutsareme kemɨyɨni: 'Itupari 'uname kanikuha'aritani, kurarutsiepai makeme kaniwewieka meta wapai neniereme, kuyaxa hiwariyari mekanitsutɨaka, katiniuta'aitari mutsutɨarienikɨ mekwi'iwatɨ.
EZE 21:23 Ke tɨratu memɨte'uwewiekairi Kerutsaremetari, niuki yakɨ tikuxaxatsiwame mepɨta'erieni, peru mɨkɨ ti'aitame pɨwaraye'eritɨani, ke'axamemɨte'uyurikɨ mɨkɨ mepanuhapanieni.
EZE 21:24 »'Ayumieme Yawé naimekɨmɨyɨwe mɨpaɨ kanaineni: »Meputaxatɨarieri ke'axamemɨte'uyuri, mepahekɨatsitɨiyarie kememɨte'ayuye'unie, kanihekɨaka ke'axamemɨte'uyuri, 'ayumieme mepɨtiwiyarieni.
EZE 21:25 »'Ekɨta, pemɨkerie 'Ixaheritsie ti'aitame, 'axapemɨtiuka'iyari pemɨka'itiya, 'atukari kanaye'ani, kepauka pe'uximatɨarietɨ pemakumawere.
EZE 21:26 Yawé naimekɨmɨyɨwe mɨpaɨ kanaineni: 'Amukuretsi 'aixɨa mɨ'ane kenanutihɨna, 'akuruna keneyetua, naitɨ katiniyupatamɨkɨ. Nitixaɨtɨ mɨkatihɨkɨ mariwetɨ kanayeitɨariemɨkɨ, kemɨ'ane mɨmariwe nitixaɨtɨ pɨkarayeitɨarieni.
EZE 21:27 Naime kii 'u'unime nekanayeitɨamɨkɨ. Mɨpaɨ katiniyɨmɨkɨ 'iya nuayu kemɨ'ane heitserie nemipitɨa, 'ena 'aixɨa mɨtiyurienikɨ.
EZE 21:28 »'Ekɨta, tewi pemunu'aya, ketineutaxata mɨpaɨ ketineutahekɨata Yawé naimekɨmɨyɨwe mɨpaɨ kanaineni, 'amunitsixi 'axamemutiyuane wahetsiemieme: “'Ixipara pɨwatihanie mɨtiyumienikɨ: kanatamɨarieka mɨramienikɨ meta kanixawatɨni mutimerɨkanikɨ.
EZE 21:29 Mɨkɨ 'ixipara 'axamemɨte'u'iyari kaniwaranutiwitexɨamɨkɨ, kememɨte'unenierixɨ mɨkayurikɨ meta kememɨtemaiwawe pɨyakɨ. Peru tukarieya kanaye'aniri, kepauka kwitɨwa 'uximatɨarika nemipitɨani.
EZE 21:30 »”'Ixipara, 'apainayarita keneukakexi. Hakewa me'akie, hakewa pemeyetɨa, manata 'ekɨ nekamani'uximatɨamɨkɨ.
EZE 21:31 'Ahetsie nehaxɨa nekanikawiwimɨkɨ, nehaxɨa tai hepaɨ 'anekame nekanita'iemɨkɨ, hipame wahetsɨa nekamaniyetuamɨkɨ 'axamemɨte'u'iyari wahetsɨa memɨteyukukuya.
EZE 21:32 'Ɨxa pekanayeimɨkɨ tai hetsiemieme, 'axuriya nepɨtayeurieni 'akwieyaritsie, 'ena kwiepa pepɨkataxatsieni. Ne Yawé mɨpaɨ nekanaineni”».
EZE 22:1 Yawé mɨpaɨ kanetiniutaxatɨani:
EZE 22:2 «Tewi pemunu'aya, 'ekɨ keniwarutati'a kiekari mɨtiyumemiwa, keneutaxatɨa naime ke'axamɨtiyuriene.
EZE 22:3 Mɨpaɨ ketiniwaraye'eritɨa, Yawé naimekɨmɨyɨwe mɨpaɨ kanaineni: “Xɨa'ui 'ekɨ kiekari, xuriya pemɨtayeuriwa kaye'utɨma, 'axapemɨyuyurie kakaɨyarixi 'axamemu'ɨatɨka pewawewietɨ. Mɨkɨkɨ 'akɨmana pepɨ'aka'una.
EZE 22:4 Xuriya pemutayeurikɨ 'ahetsie pepɨrahɨa, kakaɨyarixi 'axamemu'ɨatɨka pewawewietɨ 'axapepuyuyuri, 'atukari kanehuraniri maye'anikɨ, mɨyaxeikɨari pepɨreuterixɨ. 'Ayumieme tixaɨtɨ pekatiyunaki'eriekame nematsihayeitɨani, meta nuiwarite wahɨxie penanaimariekame.
EZE 22:5 Kiekari 'axamɨ'anekɨ mɨ'iyamate nematsi'ayeitɨani, 'axa'anemekɨ pemɨmariwakɨ, hurawatari meta teewatari mepɨmatsiti'atse.
EZE 22:6 Neuxei, 'Ixaheri kwieyaritsie te'aitamete pekaniwarexeiyani, 'akaye 'utɨma yɨtɨrɨkariyakɨ xeikɨa xuriya mekanitayeuriwani.
EZE 22:7 Mana kiekatari yupaapama tixaɨtɨ mepɨkatewa'erie meta yumaamama, 'ateewa kiekatari mepɨtewa'uximayatsitɨa, nutuite meta wiuraxi mepɨwananaima.
EZE 22:8 Nepiinite mɨtipatsietɨka tixaɨtɨ xepɨkatehayeitɨa, xawati tukariyari kapatsiekame xepayeitɨa.
EZE 22:9 Mana memu'uwa 'itarikakɨ 'axameteyurietɨ xuriya memɨtayeuriwa, meta tukite yeuta meuti'uta timieme mepɨtekwa'a, mana paitɨ waɨkawa 'axamemɨteyurie.
EZE 22:10 Hipatɨta yupaapama wa'ɨitama mepɨwakumaɨwa, meta hipatɨ yu'ɨitama waɨriyarika mepɨwapitɨa memuwakumayɨanikɨ, xuriya wa'axiyakaku.
EZE 22:11 Hipatɨta hipame wa'ɨitama mepɨwakumaɨwa, hipatɨta yumu'e'ema mepɨwakumaɨwa, meta hipatɨ mepu'uwa yutaruma mewananaimatɨ wapaapa yuxewikaku.
EZE 22:12 Hipatɨta mana mepu'uwa meteyumemiwatɨ tumini me'iwatɨ 'awie. 'Axapetiyurienetɨ, pemɨwaniɨtɨa waɨkawa perana'iwatɨ, 'a'iwa pekanihiweritɨaka, meta 'ayumieme pekanenatɨmaiya. Yawé mɨpaɨ kanaineni.
EZE 22:13 »”Peru ne nemamakɨ nepɨtitahutsuni neha'atɨ, 'axa'anemekɨ tumini pemukaxeikɨ, meta hipame pemɨwarukwikɨ kaye'utɨma.
EZE 22:14 Kepauka ne nemɨmatsitamieni, ¿'a'iyari hetsie petiutanuawe, kamɨtsɨ 'amamate titɨrɨkawini? Ne Yawé mɨpaɨ nekanaineni meta nekaneye'atɨamɨkɨ.
EZE 22:15 Hipame nuiwarite watsata nekanixetaxɨriexɨamɨkɨ, hipame teɨteri watsata xekanitayeixɨakuni, 'axakepemɨtiuyuri nekatinanuyeitɨamɨkɨ.
EZE 22:16 Hipatɨ nuiwarite mekanixetixani'eriekuni, peru 'ana mɨpaɨ xepɨtehetimani ne Yawé nemɨhɨkɨ”».
EZE 22:17 Yawé mɨpaɨ yuniukitsie kanetiniutaxatɨani:
EZE 22:18 «Tewi pemunu'aya, yunaitɨ 'ixaheritsixi teɨteriyari nehepaɨtsita mieme kuwɨre temɨxikiyari hepaɨ me'anenetɨ mepayuyeitɨa meta 'etsitaniyu, tepɨa, purumu, pɨrata matitaiyarɨwatsie huxunuta muyukuhayeikawa hepaɨ pɨ'ane.
EZE 22:19 'Ayumieme, Yawé naimekɨmɨyɨwe mɨpaɨ kanaineni: “Xemeri xatsi xemakɨkɨ, nekanixekuxeɨrimɨkɨ Kerutsareme hixɨapa.
EZE 22:20 Kehepaɨ pɨrata, kuwɨre, tepɨa, tepɨa mahete meta temɨxikiyari kuxeɨriyame huxunuta kemɨreukaxɨriwa, mɨpaɨta ne nekatinixekuxeɨriemɨkɨ nehaxɨakɨ nekanixetitaiyamɨkɨ.
EZE 22:21 Nepɨxekuxeɨrieni, nehaxɨakɨ xehetsie nepatinaini, nepɨxetixɨtsitɨani kiekari hixɨapa.
EZE 22:22 Kemɨtikwaniyarɨwa pɨrata huxunu taɨta, mɨpaɨta xeme nekatinixetikwaniyamɨkɨ kiekari hixɨapa, 'ana mɨpaɨ xepɨtehetimani ne Yawé, nehaxɨa xehetsie nemukawiwikɨ”».
EZE 22:23 Yawé mɨpaɨ kanetiniutaxatɨani:
EZE 22:24 «Tewi pemunu'aya, 'Ixaheri mɨpaɨ ketineutahɨawi: “'Ekɨ kwie pemɨka'itiya pekanihɨkɨtɨni, meta wiyerikɨ pemɨkahatuiyarie haxɨa tukariyaritsie”.
EZE 22:25 Mayetsi yeutari memɨteyukwa'a hepaɨ, mɨpaɨta mepɨteyurie texaxatamete teɨteri mepɨwananaima, piinite memɨteheuxeiya mepɨtewanawairie wapiini mɨraye'atɨka, 'ayumieme wiuraxi mepɨyɨmɨireri.
EZE 22:26 Mawari wewiwamete mana miemete ne'inɨari niukiyaritsie yamepɨkatekahu, piinite mɨtipatsietɨka, katipatsiekame mepɨtehayeitɨa. Mɨkɨ mepɨka'imaiwe'erie mɨtipatsie mɨkatipatsie matɨa, meta hipame mepɨkatewa'ɨkitɨa 'aixɨa mɨti'itɨarie meta 'aixɨa mɨkati'itɨarie hepaɨtsita. Meta xawati tukariyari tixaɨtɨ mepɨkatehayeitɨa meta ne watsata nekapatsietɨ nepayeitɨarie.
EZE 22:27 Kiekaritsie memɨ'itsɨkate, yawixi memayu'eririya mepɨhɨkɨ yeutari memɨwakwa'a, mekanitahupani xeikɨa xuriya metayeurienike, hipame mewakwikutɨ, mɨpaɨ memɨte'iwanikɨ 'axa'anemekɨ.
EZE 22:28 Kakaɨyari niukametemama naimekɨ mepɨtekuxata naxikɨ memɨtekawiriwani hepaɨ, mekatexeiyatɨ xeikɨa 'itarikakɨ metekuxatatɨ. Kwinimieme meputiyuane kename Yawé naimekɨmɨyɨwe mɨpaɨ haine, perutsɨ Yawé mɨpaɨ katiwarahɨawekaku.
EZE 22:29 Teɨteri kiekatari mepɨtenawaya meta teɨteri mepɨwananaima, tixaɨtɨ memɨkateheuxeiya waɨriyarika mepɨtewa'aitɨa meta 'ateewa paitɨ kiekatari kwinimieme mepɨtewananaima.
EZE 22:30 Ne xeime nepɨwaune mɨkɨ watsata neteɨterima wahetsie munuakakɨ, wahetsiemieme maniukanikɨ para nemɨkawaka'unakɨ. Peru nepɨka'itaxeiyawe.
EZE 22:31 'Ayumieme wahetsie nehaxɨa nepɨkawiwieni, nepɨwatixɨtsitɨani nehaxɨa taiyarikɨ, meta naime ke'axamemɨte'uyuri wahetsie nepɨrahɨani. Yawé naimekɨmɨyɨwe mɨpaɨ kanaineni».
EZE 23:1 Yawé mɨpaɨ kanetiniutahɨawe:
EZE 23:2 «Tewi pemunu'aya, hikɨ yuhutame 'ukari wahetsiemieme nepɨmatitaxatɨani, wamaama puyuxewikai.
EZE 23:3 'Ɨimarixiyari paitɨ watsisi mɨtimayɨiyanikɨ mepuyutauni, 'Ekipitu paitɨ tuminikɨ meyumayɨinɨatɨ mepakɨ, mana mepu'iyamatɨarie.
EZE 23:4 Mexɨakame 'Ahurá pɨtitewakai, taruyata 'Ahuriwá pɨtitewakai. Mɨkɨ wahamatɨa nepuyeikakai, yuniwema mekaneniyetuirieni 'ukitsi meta 'ukari. ('Ahurá Tsamariya kani'inɨariyaritɨni, taruyata 'Ahuriwá Kerutsareme pɨ'inɨariyari).
EZE 23:5 'Ahurá mexi'akuxi nehetsɨa miemetɨkai, pɨkanetsi'u'eni matsi pɨta, 'atsiriyutsixi warutanaki'erieka yemekɨ kaneuyeweni,
EZE 23:6 mɨkɨ yunaitɨ yukukuyamete kamixa meputɨkɨkai yɨtsikimawime, te'uximayatamete meta kuwexinaruritsixi, meta temari kawayutsixi wahetsie meputekai.
EZE 23:7 'Uka tuminikɨ muyumayɨinɨa hepaɨ, 'atsiriyutsixi wahetsɨa kaniyuyetuani, kakaɨyarixi 'axamemu'ɨatɨka xeikɨa kaniwarayexeiyakaitɨni.
EZE 23:8 Hatsuaku pukatiuhayewaxɨ yayɨanetɨ 'axakaniuyuyurieni naimekɨ, 'Ekipitu paitɨ mitsutɨakai 'ɨimariyari, yumuiretɨ hamatɨana mekaniukahipitekaitɨni, yɨmuɨretɨ mɨpaɨ tsitsieya mekateniutimayɨani.
EZE 23:9 'Ayumieme meminaki'eriekai 'atsiriyutsixi wahetsɨa nekaniyetuani, mɨkɨ mɨwarutiheiwe'erikɨ.
EZE 23:10 Mɨkɨ maweme mekaniuhayewa, meta niwemama 'ukitsi, 'ukari mekaninawairieni, mɨkɨta 'ixiparakɨ mekaniumieni. Yemekɨ mɨkɨ waɨkawa pɨtiukwinitɨarie, 'ayumieme 'ukarawetsixi wahetsiemieme mari'itɨarika kanayani.
EZE 23:11 »Tsepanetɨ taruya munierixɨ 'Ahuriwá kemɨyɨ, mɨkɨ matsi kwinimieme tiuka'iyaritɨ kanayani keyuri kurieya.
EZE 23:12 Yaxeikɨata mɨkɨ kaniyuyetuani, mɨrukuyanenikɨ 'atsiriyutsixi wahetsɨa, yunaime wahetsɨa kuwexinaruritsixi meta kuyaxi tewa'aitɨwamete, yukukuyamete witsimemɨte'ukemarikai, meta temari kawayutsixi wahetsie memeutayaxiwawe.
EZE 23:13 Ne nepɨretima mɨkɨ puyutsewixima, yukuri kananukuweiya kemɨtiuka'iyarikai.
EZE 23:14 Peru matsi 'Ahuriwá kwinimieme katinanutiyani 'axayɨanetɨ, 'ateewa paitɨ kaniutamarima. Katiniuxeiya karireutsixi wa'ɨkiyarite 'ixumeritsie, ti'utɨariekame xetamekɨ,
EZE 23:15 hɨiyamekɨ mepayuhɨatɨkatei meta yumu'utsie 'ahatayeyeumekɨ mepayuhɨatɨkatei. Yunaitɨ mɨkɨ 'aixɨa mepɨte'ukemarikai te'uximayatamete, meta wawiruniyutsixi wahepaɨ mepɨteheyuxexeiyakai Karireya kiekatari.
EZE 23:16 Waruxeiyaka kaneuyuyehɨani mɨwarutihiwe'erikɨ, hipame yunɨ'arima kaniwarenɨ'ani Karireya kiekariyaritsie.
EZE 23:17 Wawiruniya kiekatari me'u'axɨaka hamatɨana mekaniukahini, yamekateniuyurieni kemɨtiwanake. Mekanitsewiximani me'ikumauwatɨ, mɨkɨ mɨyame'iyurieku 'utiwaɨripieka kaniwaruku'eirieni.
EZE 23:18 Matsi kemɨtiyuhekɨatakai teɨteri wahɨxie mawetɨ, matsi mɨkɨ kwinimieme katiniuyurieni. Hikɨ neputiwaɨripi hetsiena mieme, kurieya meripaitɨ kenemɨtiuku'eiri hepaɨ.
EZE 23:19 Peru matsi mɨkɨ yɨmɨireme wahamatɨa kaniukahuni, 'ɨimariyari ku'eriwatɨ kepauka 'Ekipitu hipame wahamatɨa muhunekai hepaɨ.
EZE 23:20 Mana yemekɨ pɨkaheyuta'eriwakai peuyuyehɨakai mɨwanaki'erie wahiwe'erietɨ, waxieyame puxu xieyameya hepaɨ pɨ'anenekai meta memɨtewatinenetɨwa kawayutsixi memɨwatinenetɨwa hepaɨ pɨ'anekai.
EZE 23:21 Kanaye'erieni kepauka 'ɨimariyari, 'ekipitutari tsitsieya memɨkumaɨwakai me'ihiwe'erietɨ mɨkamayɨiyakaitsie.
EZE 23:22 »'Ayumieme, 'Ahuriwá 'aku, Yawé naimekɨmɨyɨwe mɨpaɨ kanaineni: “Yanekatiniyurimɨkɨ pemɨwanaki'eriekai mematsi'aye'unietɨ memakɨnekɨ, hikɨ pemɨwaxani'erie. Naitsarie mɨtiuyehanetsie 'ahetsɨa mekani'axɨakuni,
EZE 23:23 Wawiruniya kiekatari meta yunaime karireutsixi, Pekuri, Tsua meta Kuha kiekatari, meta 'atsiriyutsixi, mɨkɨ temari 'aixɨa memɨ'anene, kuwexinaruritsixi meta waparewiwamete, kuyaxi memeuyutakwiwawe 'aixɨa memɨ'anene meta teɨteri memɨmamariwawe, kawayutsixi wahetsie me'utetɨ.
EZE 23:24 Yumɨiretɨ mekani'axɨakuni 'ahetsɨa, kaxuri wahetsie meta kaxetatsixi, meta yumɨiretɨ kuyaxi, yuxupureru me'ana'uitɨatɨ meta tepɨa 'amɨyeyeu kɨmana memɨyukunarɨma me'u'ɨtɨ. Nepɨwahɨritɨani mematsihɨanikɨ mematsi'anutahɨanikɨ mɨkɨ wayeiyari kemɨ'ane.
EZE 23:25 'Ahetsie ne'ɨtetsarika nepanunɨ'ani, mɨkɨ mepɨmatekwinitɨani waɨkawa meha'atɨ. 'Atsuri mekanaxitekuni meta 'anakate, meta 'ahetsɨa miemete 'ixiparakɨ mekanikwi'iwakuni. 'Aniwema 'ukitsi 'ukari mekananuhapaniekuni, kemɨ'ane 'akuxi memɨtawikweni mekanititaiyariekuni.
EZE 23:26 'Ekɨta 'akamixate mekanititsanakuni meta 'akuka mɨraye'axe mekamaninawairiekuni.
EZE 23:27 Mɨpaɨ xɨari pepɨtihayewa petiyukahiwe'erietɨ, meta tuminikɨ peyumayɨinɨatɨ, 'Ekipitu pemɨtiukatsutɨatsie. 'Ari mɨpaɨri pepɨkayɨaneni meta 'Ekipitu kenatɨmaiyani.
EZE 23:28 »”Yawé naimekɨmɨyɨwe mɨpaɨ kanaineni: Pemɨwaxani'erie wahetsɨa nekamaniyetuamɨkɨ, kemɨ'ene pemɨkawarutanaki'eri.
EZE 23:29 Mɨkɨ mematsixani'erietɨ mepɨmatsixeiyani meta tinaime mekameteninawairiekuni tita pemɨrexeiya. Yuheyemekɨ pemaweme mepɨmatsihayewa, yunaitɨ mepɨtetamarieni tuminikɨ kepemɨtikumayɨiwakai. Kepemɨtiuyukahiwe'eriekai meta kepemɨyɨanekai,
EZE 23:30 mɨkɨ naitɨ katini'ahetsiemiemetɨni, pemɨwarukumayɨakɨ nuiwarite, meta 'axapekaniyuyurieni kakaɨyarixi 'axamemu'ɨatɨka wahekɨ.
EZE 23:31 'Ekɨta 'akuri pemanukuweikɨ, 'ayumieme hepaɨna pepɨtika'eniexɨani tekɨxieya pemanuhakɨ.
EZE 23:32 »”Yawé naimekɨmɨyɨwe mɨpaɨ kanaineni: »”'Ekɨta 'akuri tekɨxieyata pepenuhareni, tekɨxi 'amɨnena meta waɨka mɨtiukanake. Waɨkawamekɨ 'axapepɨtikuhɨawaruwani meta pepɨ'atsierieka waɨkawa. 'Atewinɨarika mɨhɨne meta nanaimarika,
EZE 23:33 waɨkawa pemɨtaweka hepaɨ pepɨyɨaneni meta petiukakukuinetɨ. Mɨkɨ marika tekɨxiyari kanihɨkɨtɨni meta nutuixiya, mɨkɨ 'akuri Tsamariya kanitekɨxieyatɨni.
EZE 23:34 'Ekɨri 'ahetsie pɨtinake pemenu'ienikɨ naime, tekɨxi nepɨtatara xeimiriyari nepayeitɨani, 'atsitsi pekanatsanaxɨamɨkɨ, mɨpaɨ nemutayɨkɨ.
EZE 23:35 »”'Ayumieme, Yawé naimekɨmɨyɨwe mɨpaɨ kanaineni: Kepemɨreuterixɨ penetsihatɨmaiyatɨ meta penetsiwarixiwiyatɨ, kepemɨtiuyurikɨ pepɨtiuka'eniwani, 'ahiwe'erikakɨ meta tuminikɨ peyumayɨinɨatɨ pematɨakɨ”».
EZE 23:36 Yawé mɨpaɨ kanetiniutahɨawe: «Tewi pemunu'aya, ¿kamɨtsɨ 'Ahurá meta 'Ahuriwá pekatiwaranutaxɨarieni? Matsi wahetsie ketinahɨwa kememɨte'uyurikɨ.
EZE 23:37 Mɨkɨ matsi kayukɨnama mekaniwarukumayɨani, mɨkɨri yumamatsie mekaneuxuxureni. 'Axamemɨte'uyurikɨ kakaɨyarixi 'axamemu'ɨatɨka wahekɨ, yuniwema mepɨwamawa nehetsiemieme memutinunuiwakai, mɨkɨ kakaɨyarixi mekaniwayetuiriwani 'ikwai hepaɨ.
EZE 23:38 'Imatɨrieka, netuki ka'itiyakame mekanayeitɨani, metatsiere xawati tukariyari kapatsiekame mekanayeitɨani.
EZE 23:39 'Ana tukaritsie yuniwema mewarutimawaka, yukakaɨyarixi 'axamemu'ɨatɨka mewayetuirieka, netukita mekaneutahaxɨani kapatsiekame mekanayeitɨani. Netukita mekateniuyurieni.
EZE 23:40 »Matsi waɨkawa mekateniuyurieni, teɨteri 'ateewa paitɨ kiekatari memɨ'atɨarienikɨ mekateniutanɨ'ani. Hikɨ teɨteri me'u'axɨaku, mɨkɨ mekaniuti'ɨwa, yuhɨxita mekatenayu'utɨaxɨani meta kuka mɨraye'atɨka mekanakatɨxɨani,
EZE 23:41 Manata 'ɨpari 'atewimetsie mekanayaxe witsitiyuxexeiyametsie, mexa hɨxie hakewa 'ɨkwa witsimu'ɨa metitaiyarɨwakai, meta hatseiti witsimu'ɨa mɨwaye'u nehetsiemieme.
EZE 23:42 Muwa yumɨireme waniuki mepɨ'eniekai, tsaweutsixi mekanihɨkɨtɨkaitɨni, makumawetsie memeyekɨnekai. Mekateniutiketɨarieni 'ukarawetsixi, wamamata mekatenayemanaxɨani, meta kuruna witsi'anenekame mekaniwaranutimaniriexɨani.
EZE 23:43 Hikɨ mɨpaɨ nepɨtiu'eri, mɨkɨ 'ukaratsi mɨyutaxɨtɨaxime hetsiemieme, hipatɨ me'ikumaɨwakaku: “Hikɨrita mekanitsutɨani mɨkɨ 'ukaratsi mekumaɨwatɨ”.
EZE 23:44 Hikɨ hamatɨana mekaniutihitɨkɨne, 'uka tuminikɨ mɨyuwitɨnɨa hepaɨ. Mɨpaɨ mekateniukahini, mɨkɨ 'ukarawetsixi memɨwakumayɨiwa wahamatɨa 'Ahurá meta 'Ahuriwá memɨtetetewa.
EZE 23:45 Peru teɨteri heitserie yamemɨtekahu 'ukari teyukwikate meta kayukɨnama memɨwakumaɨwa mekateniwakwinitɨakuni, kayukɨnama memɨwakumaɨwa memɨhɨkɨkɨ, teɨteri memɨwarukwikɨ yumamatetsie mekaneuxuxureni.
EZE 23:46 »Yurikɨ Yawé mɨpaɨ kanaineni: Yɨmɨiretɨ teɨteri mekeyukuxeɨrieni memeye'uniekakɨ, me'imariutatɨ meta naime mete'inawatsirietɨwetɨ.
EZE 23:47 Yumɨiretɨta mepɨwatituaxixɨani meta nawaxakɨ mepɨtixitekiexɨani, meta mekewarukwini niwemama 'ukitsi meta 'ukari, wakii meta ke'utitaiyarieni.
EZE 23:48 Neri 'ena kiekaritsie nepɨtiu'atɨani, kemɨtiyɨane 'axamɨti'ane mɨranayuhayewa. Yunaitɨ 'ukarawetsixi mɨpaɨ metehayemari'itɨariwatɨ mepakɨne, mɨpaɨ memɨkayɨakakɨ.
EZE 23:49 Hikɨ yuhutatɨ mekanekaxɨarieni yuhiwe'erikakɨ, mepɨte'ayukatuani ke'axamemɨte'uyuri kakaɨyarixi wahetsɨa. Hikɨ mɨpaɨ mekatenetimaikuni ne, Yawé naimekɨmɨyɨwe nemɨhɨkɨkɨ».
EZE 24:1 Hikɨ tamamata tukari 'umiekaku meta tamamata metseriyaritsie yaxeikɨa 'atanauka wiyaritsie, Yawé yuniuki kaneniutaxatɨani:
EZE 24:2 «Tewi pemunu'aya, 'ikɨ tukariyari kenaka'utɨa, 'ikɨ tukariyaritsie kwitɨwa, karikɨ Wawiruniya kwieyaritsie ti'aitame hikɨ 'ari kanayeyani Kerutsareme hepaɨtsita.
EZE 24:3 'Ikɨ teɨteri 'axamemɨteyurie 'inɨarikɨ ketiniwarutaxatɨa, keniwarayemari'itɨa Yawé naimekɨmɨyɨwe mɨpaɨ kanaineni: »“Taipa xari keneuyetsa meta haa keneukatuaka.
EZE 24:4 Wai 'etsipepekame keneukanɨitɨa, Teuri keneutiwiteki meta kutsuri, meta 'umete 'aixɨa mɨ'anene.
EZE 24:5 Muxa meta keneumi'a waɨkawa mɨwaiya, meta kɨyexi kenanutanetɨa hetɨana, para haa 'aixɨa mɨtikwanakɨ, meta 'umeyarieya 'aixɨa mɨtikwanikɨ.
EZE 24:6 »”Yawé naimekɨmɨyɨwe mɨpaɨ kanaineni: »”Xuriya kiekaritsie waɨkawa kanixuaweni. Mɨkɨ xari pewayukukwitama, mɨpaɨ mɨ'anene pɨkayɨwe muwaku'itienikɨ. Kenewatitɨki wai xexuime 'etsipepeme, tsepa ke'anenetɨ mɨwatitɨkirixɨ.
EZE 24:7 Kiekari hixɨapa katini'aneneni, xuriya mɨhɨne, mɨkɨ tete mɨharuanitsie kaneiyeurieni, kwiepa pɨka'itayeuri, tumuanari mɨkahenukananikɨ.
EZE 24:8 Tete mɨharuanitsie xuriyaya nekaniutayeurieni, kwiepa mɨka'anukayuyuipikenikɨ. Mɨpaɨ nekatiniyuriemɨkɨ nehaxɨakɨ, nekaneixeiyakamɨkɨ kenemɨtiyurieni.
EZE 24:9 »”Yawé naimekɨmɨyɨwe mɨpaɨ kanaineni: »”Xɨa'ui kiekari waɨkawa mɨrayukwitɨne, Neta tsiere kɨyexi nepukuxeɨrieni.
EZE 24:10 Hikɨmɨtɨka, kɨyexi 'axɨa xeketeneutuaka xekeneutitaiya, Wai xekeneuka'itsarita meta tupiriya 'aixɨa meyuruwa xekeneukanɨitɨa, meta 'umeyarieya naitɨ ke'utitani.
EZE 24:11 Xari tɨɨtsie xekenayetsa 'uyewakime, xɨkake purunitse mɨxeta 'uhekɨare xɨkatɨ. Kemɨtiwayukukwitama mɨkɨ pɨwaku'itiere, yukɨmana 'aixɨa pɨtayɨni.
EZE 24:12 Tsepanetɨ xari mɨwayukukwitama, tsepa taikɨ 'aixɨa mɨwakɨyɨni pɨkayɨwe.
EZE 24:13 »”Kerutsareme, ne nepɨmatsi'itimɨkɨkai 'aixɨa nematsiyurimɨkɨkai, ke'axapemɨtiyurienekai 'ahiwe'erikakɨ, peru pepɨka'uyutawaɨri 'aixɨa nematsiyurienikɨ. 'Ayumiemeri, peka'itiyatɨ pekanayeimɨkɨ, 'atsitake petikwineme nehaxɨakɨ.
EZE 24:14 Ne, Yawé mɨpaɨ nekanaineni, meta nekaneye'atɨamɨkɨ. Nekɨmana yanekatiniyurimɨkɨ, neka'ipatatɨ. Nepɨkamatsitinenimayata 'axakepemɨtiyuriene kemɨmatinake meta kepemɨtiuyeika. Yawé naimekɨmɨyɨwe mɨpaɨ nekanaineni”».
EZE 24:15 Yawé mɨpaɨ kanetiniutaxatɨani:
EZE 24:16 «Tewi pemunu'aya, 'a'ɨya nekamaninawairiemɨkɨ 'atsipekatimaikaku mɨmatsinake pemixeiyanikɨ. Peru pepɨkahatsuakani nimeta pepɨka'ahiwerieka, pepɨka'ipitɨaka meta 'a'ukai manayeneikani.
EZE 24:17 Ketineunewi xeikɨa kayuwatɨ, pepɨka'ahiwerieka mɨkite wahetsiemieme. 'Amu'utsie kenayuhɨa tuwaxakɨ, 'akakaitsie keneukexɨa, meta 'amɨxiya pɨkamatsiheukunaka meta paa pepɨkakwaka hiwerikapa mieme».
EZE 24:18 Ximeri nekatiniwaretaxatɨani teɨteri, peru taikai ne'ɨya kanemɨni. 'Uxa'arieka yanekatinekayani kemɨnetiu'aitɨa.
EZE 24:19 Teɨteri kiekatari mekaneneta'iwawiya: «¿Kamɨtsɨ pekatatitaxatɨani ketita mɨti'inɨariyari, 'ikɨ 'inɨari titahetsiemieme yapemɨtiyuriene?»
EZE 24:20 Ne mɨpaɨ netiwareta'ei: «Yawé neretaxatɨaka yuniukikɨ mɨpaɨ pɨneretahɨawixɨ,
EZE 24:21 keniwaraye'eritɨa 'Ixaheri teɨterimama, Yawé naimekɨmɨyɨwe mɨpaɨ kanaineni: “Ne netuki kapatsiekame nekanayeitɨamɨkɨ, tuki xexeiyatɨ xepauyɨ'ɨ witsixepɨte'ixeiya, waɨkawa xeminaki'erie. Xeniwema 'ukitsi meta 'ukari xemɨwaruku'eiri, 'ixiparakɨ mekanikwi'iwakuni,
EZE 24:22 xemeta yaxeikɨa xekateniyurikuni nehepaɨ, mɨxiya xepɨka'anuku'eima meta paa hiwerikapa mieme xepɨkatikwani.
EZE 24:23 Tuwaxakɨ yumu'utsie xekenayuhɨaxɨa, meta yukakaitsie xepeu'uixuani. Hawaikɨ xeka'utitsuatɨ xekayuhiwerietɨ, matsi pɨta xekanitipɨnikuni 'axamɨti'anekɨ xete'uka'eniwatɨ hipatɨta xehamatɨa.
EZE 24:24 'Etsekieri matsi kani'inɨaritɨkamɨkɨ, xemeta yaxeikɨa xepɨteyurieni mɨkɨ mɨtiuyuri hepaɨ. Kepauka mɨpaɨ mɨtiyɨni, 'ana mɨpaɨ xekatenetimaikuni ne Yawé naimekɨmɨyɨwe nemɨhɨkɨ”.
EZE 24:25 »'Ekɨ tewi pemunu'aya, tukari maye'anitsie tuki nemɨwanawairienitsie muwanake memixeiyanikɨ, yu'iyaritsie ketita memɨtehiwe'erie, ketitatsie memɨteuyɨ'ɨ, wananai meta watemawierika, meta waniwema 'ukitsi 'ukari,
EZE 24:26 xewitɨ yu'uname kamatinitaxatɨamɨkɨ kemɨreyɨ.
EZE 24:27 Mɨkɨ tukaritsie kwitɨ 'anení pukuyuani peniuwetɨ pepayani. Hikɨ 'anari pepɨtitaxata yu'uname hamatɨa, 'inɨari pepayani wahetsiemieme, hikɨ mɨpaɨ mepɨtehetimani ne, Yawé nemɨhɨkɨkɨ».
EZE 25:1 Yawé mɨpaɨ kanetiniutaxatɨani:
EZE 25:2 «Tewi pemunu'aya, 'amunitsixi wahɨxie keneuwetɨ ketiniwarutaxatɨa.
EZE 25:3 Mɨpaɨ ketiniwarutahɨawi Yawé naimekɨmɨyɨwe niukieya xekeneu'eni: “Xeme xemutinanaikɨ kepauka xemunenierixɨtsie netuki mɨpatsie kapatsietɨ mayeitɨarie, meta kepauka 'ixaheritsixi memutakwi'iwaxɨ, kepauka Kura kiekatari memehapanie,
EZE 25:4 ne nekanixeyetuamɨkɨ tau manatineika kiekatari wahetsɨa. Mɨkɨ mekaniyutixamarutɨakuni meta mekaniyutikitɨakuni xekie, xe'ikwaxi mepɨtikwani meta xeretsi mepɨ'ieka.
EZE 25:5 Xawaha kwieyari kameyutsixi wa'ɨxa makuma nepayeitɨani, 'Amuni kwieyari muxatsi wakuraru nepayeitɨani. Hikɨ 'ana xeme mɨpaɨ xepɨtehetimani kename ne Yawé nehɨkɨ.
EZE 25:6 »”Mɨpaɨ kanaineni Yawé naimekɨmɨyɨwe: Xeme 'amunitsixi xemɨte'utahutsunakaikɨ meta xemutitsunaxɨakɨ temawierikakɨ, meta xemutinanaikɨ 'Ixaheri hetsiemieme,
EZE 25:7 'ayumieme nepɨxetikwinitɨani, hipame nuiwarite wahetsɨa nepɨxeyetuani tita naime xemɨtehexeiya memɨxetenawairienikɨ. Nepɨxe'ayeweiya yuteɨterima watsata, nepɨxekumaweriya yunuiwarima watsata yuheyemekɨ nepɨxeka'una. Hikɨ 'ana mɨpaɨ xepɨtehetimani kename ne, Yawé nehɨkɨ”».
EZE 25:8 «Yawé naimekɨmɨyɨwe mɨpaɨ kanaineni: Muhawi meta Tsehixi hamatɨa mɨpaɨ memutiyuanekɨ: “Kura yaxeikɨa pɨ'ane hipame nuiwarite wahepaɨ”,
EZE 25:9 Muhawi naiparieya nepaukuxiteni. Naitɨ mɨkɨ kwieyari kemɨyewa pɨtakexiyarieni, pɨnawaiyarieni Weti-Yetsimuti kiekariyari, meta Wahari-Mekuni, metatsiere Kiriyatahini, mɨkɨ kiekarite witsimɨ'anene wahetsie mɨyutamariwekata.
EZE 25:10 Muhawi meta 'amunitsixi tau manatineika kiekatari wahetsɨa nekaniwayetuamɨkɨ, 'amunitsixi nixewitɨ pɨkayuhayewa.
EZE 25:11 Metatsiere, Muhawi nekatinikwinitɨamɨkɨ. 'Ana mɨpaɨ mepɨtehetimani ne, Yawé nemɨhɨkɨ».
EZE 25:12 «Yawé naimekɨmɨyɨwe mɨpaɨ kanaineni: 'Erumi Kura pɨrakapitɨani yuheyemekɨ, 'ayumieme matsi waɨkawa yuhetsie katinahɨani.
EZE 25:13 'Ayumieme Yawé naimekɨmɨyɨwe mɨpaɨ kanaineni: 'Erumi hetsiemieme ne'iwaɨyɨ nekananukuhanimɨkɨ, nekaniwakwimɨkɨ teɨteri meta tewaxi. Waki 'u'unime nekanayeitɨamɨkɨ. Temani kiekariyaritsie metsutɨtɨ 'atsita Rerani paitɨ ye'atɨ, yunaitɨ mekanikwikuni 'ixiparakɨ.
EZE 25:14 Nekiekari 'Ixaheri hetsiemieme 'Erumi nekatinikuhɨwiriemɨkɨ. Neteɨterima yamekateniyurikuni ne kenemɨreuha'a kenemaineni. 'Ana mɨpaɨ mepɨtehetimani kehepaɨ nemɨtiyukɨhɨpa. Yawé naimekɨmɨyɨwe mɨpaɨ kanaineni».
EZE 25:15 «Yawé naimekɨmɨyɨwe mɨpaɨ kanaineni: Piritsiteutsixi mekaniuyukɨhɨani waɨkawamekɨ meha'atɨ, waɨkawa mewareuxani'erietɨ Kura kiekariyari mekaniuka'una, meripai miemekɨ metewarapiniriekaku.
EZE 25:16 'Ayumieme, Yawé naimekɨmɨyɨwe mɨpaɨ kanaineni: Ne ne'iwaɨyɨ nekanitikweimɨkɨ piritsiteutsixi wahetsiemieme. Kereteutsixi nekaniwarakumaweriyamɨkɨ, meta haramara tetsita memuyuhayewaxɨ nekaniwareuyehɨamɨkɨ.
EZE 25:17 Kenemɨtiyukɨhɨani mariwemekɨ nekatiniyurimɨkɨ. Nekaniwatiwamɨkɨ nehaxɨakɨ. Kepauka mɨpaɨ nemɨtiyurieni, 'ana mɨpaɨ mepɨtehetimani ne, Yawé nemɨhɨkɨ».
EZE 26:1 Mexɨakame tukaritsie, mexɨakame metseritsie, tamamata heimana xewi wiyari 'anukamiekaku: Yawé mɨpaɨ kanetiniutahɨawe.
EZE 26:2 «Tiru mɨpaɨ kaniutayɨni, Kerutsareme hetsiemieme: “Nuiwarite wa'itupari peu'unixɨa. Wa'itupari peuxɨrɨwe hixɨata mumuritɨ, neta waɨkawa nerexeiyatɨ nerayeixime mexi mɨkɨ meta'unike”.
EZE 26:3 'Ayumieme Yawé naimekɨmɨyɨwe mɨpaɨ kanaineni: Tiru 'aku, ne mɨpaɨ nepaine 'ahepaɨtsita, haramaratsie hamewari kemɨtiuyekɨka, mɨpaɨ nepɨtiyurieni nuiwarite yuwaɨkawatɨ mematsi'aye'uniekame nepɨmatsihayeitɨani.
EZE 26:4 Tiru kuraruyari mekana'unatɨkɨnikuni, meta tuxiyuya mekanati'unaxɨakuni. Meta mɨti'u'uni nekanakumaweriyamɨkɨ, 'ayepari xeikɨa nekanihayewamɨkɨ.
EZE 26:5 Haramara hixɨapa maku'ayepariya payani, wipi mati'ɨxarɨwa hepaɨ. Ne Yawé naimekɨnemɨyɨwe mɨpaɨ nekanaineni. Nuiwarite Tirutari mekateninawairiekuni,
EZE 26:6 teɨteri 'auriena kiekatari mamanetɨkatsie, mekanikwi'iwakuni 'ixiparakɨ. Hikɨ 'ana mɨpaɨ mekatenetimaikuni ne, Yawé nemɨhɨkɨ.
EZE 26:7 »Yawé naimekɨmɨyɨwe mɨpaɨ kanaineni: Tayeta nekaneyenetɨamɨkɨ, Tiru hetsiemieme Nawukurunutsuxi, Wawiruniya ti'aitame, mɨkɨ te'aitamete tiwa'aitɨwame. Kaninuamɨkɨ yumɨireme wahamatɨa, meta kaxetate kuyaxa miemete meta kawayutsixi wahetsie memutei.
EZE 26:8 Kiekari 'a'aurie mamanetɨka 'akwietsie teɨteri mɨkɨ kiekaritsie mepɨkwi'iwa 'ixiparakɨ. Nawukurunutsuxi kuraru 'amatitɨtɨ kanatiwewimɨkɨ 'akiekaritsie mɨye'anikɨ, meta kanitiwewimɨkɨ makeme mɨmatsitamienikɨ, meta yuheima nunuwame 'amɨyeyeu mekananukɨ'ɨikuni.
EZE 26:9 'Akuraru 'amayetsuye 'uname tepɨate kani'atɨamɨkɨ kane'unatɨyeimɨkɨ, meta 'atuxiyute kanika'unaxɨamɨkɨ.
EZE 26:10 Kepauka ti'aitame Wawiruniya kiekame 'akitenie meutahani, kiekari ma'iwa hepaɨ, kawayutsiximama mepɨyumɨireni wakwauni 'amu'utsie pɨye'ani, 'akuraru pɨwatayuaneni kawayutsixi wayuarikakɨ meta kaxetate.
EZE 26:11 Kawayutsixi yuketatekɨ 'akaye mepɨtiketsini, yunaime teɨteri mepɨwakwini 'ixiparakɨ, 'ixumeri mɨtsetse'i patixɨriyani kwiepa.
EZE 26:12 Mepɨtexenawairieni tita mɨtixexikutɨriyakai, mepɨtexenawatsirieni xepiinite. 'Akuraru naime mepɨka'una, 'aparatsiyu witsimɨ'anene mepɨtitemɨxikita, 'atetexi haramaratsiepai mepeukaxɨrieni meta 'apikaxite naime tita mɨtiyuhayewa.
EZE 26:13 Mɨpaɨ netiyurieyu 'akwikari yuarikayari mana nepu'atɨani, 'aharipa yuarikayaya tawariri pɨka'enierieni.
EZE 26:14 'Ayepari makumawe wipi matiwatsiɨxarɨwa nepɨmatsi'ayeitɨani, tawariri hatsuaku pepɨka'anukuwewiyani. Ne, Yawé naimekɨnemɨyɨwe, mɨpaɨ nekanaineni.
EZE 26:15 »Yawé naimekɨmɨyɨwe Tiru mɨpaɨ katinahɨaweni: Nuiwarite haramara tetsita memɨtama mepɨtimamani pematiwenitsie tɨranarikɨ, pemɨtiuka'eniwakɨ 'akukuinarikɨ xemu'enierie meta 'ateɨterima memɨkwi'iwatɨwekɨ.
EZE 26:16 Yunaitɨ haramaratsie, te'aitamete mekananakakɨnikuni yu'uwenitsie, yupiinite mekatenanutihɨnakuni meta yukamixate mɨtixuiyatɨka. Kwiepa mekanitiyaxikuni yemekɨ memamatɨ mɨyamemɨte'anuyehukɨ, yamepɨte'uyɨyɨakatɨkani,
EZE 26:17 hikɨ 'ikɨ hiwerika kwikariyari mepɨtakwika 'ahetsiemieme: »“Kehepaɨtɨtɨri 'ekɨ pepuka'unarie, kiekari pemɨmariwa, haramaratsie te'uximayatamete wakiekari. 'Ekɨ haramaratsie pepɨtɨrɨkaɨyekai. 'Ateɨterima wahekɨ pepɨtiyurienekai, pemɨwamariutakai yunaime 'ena temɨtama.
EZE 26:18 Hikɨta, pematiwetsie, mepuyɨyɨakatɨka haramara tetsita kiekatari, meta haramaratsie kwie mɨyemanetsie kiekatari, mepɨmama yapemɨranuyetɨakɨ”.
EZE 26:19 »Yawé naimekɨmɨyɨwe mɨpaɨ kanaineni: Mɨraku'unarie nekamenayeitɨamɨkɨ, kiekari mana kiɨripa nekanayeitɨamɨkɨ. Yaxeikɨata nekatiniyurimɨkɨ haramara mɨmatsi'anukananikɨ.
EZE 26:20 Kemɨ'ane meukatewatsie memeukayuyuipike, mɨkɨ wahamatɨa nepɨmatsiheukanɨ'ani, kwieta 'ameukatewatsie kiekame nepɨmatsihayeitɨani, 'iya yuheyemekɨ mu'uni kwieyaritsie, kemɨ'ane meukatewatsie memeukakɨka wahamatɨa. Tawariri mana kiepa pɨkahayani meta pɨka'anukuwewiyani 'ena memu'uwa wakwieyaritsie.
EZE 26:21 Tixaɨtɨ hepaɨ pemakaxiwame nematsihayeitɨani, tawariri pepɨka'uyeikani. Pepɨtiwawieni, peru hatsuaku pepɨkakaxeiyarieni. Yawé naimekɨmɨyɨwe mɨpaɨ kanaineni».
EZE 27:1 Yawé mɨpaɨ kanetiniutahɨawe:
EZE 27:2 «Tewi pemunu'aya, 'ikɨ hiwerika kwikariyari Tiru hetsiemieme keneutakwika,
EZE 27:3 kiekari haramara tetsita memukuma mɨti'uximaya yumɨireme kiekarite wahamatɨa meta tewanarixi haramara tetsita mukumane. »Yawé naimekɨmɨyɨwe mɨpaɨ kanaineni: »“'Ekɨ, Tiru kiekariyari, witsipeti'axexeiyame pepɨ'a'erie meta 'aixɨa pe'anekame.
EZE 27:4 Haramaratsie mariwemekɨ pepɨti'aita, tewewiwamete 'aixɨa ti'anenekame mepɨte'utiwewi.
EZE 27:5 Huku mexayari Tsenixi hɨriyaritsie miemekɨ mepɨte'utiwewi. Meta kariuxa Riwanu miemekɨ kɨye 'apame hixɨapa nawiya heima mieme meputawewi.
EZE 27:6 Xiu Watsani miemekɨ tiwekemete meputiwewi, meta tsipɨrexi kɨyeyarikɨ Tsipɨre miemekɨ 'aheima muyema meputawewi, meta witsipuka'itɨarie witsimɨrekemakakɨ 'eripanite 'awateyakɨ.
EZE 27:7 Rinu 'ixurikiyari 'Ekipitu mieme mɨtixutɨkakɨ 'eka kwekwewiwame meputiwewi, mɨkɨkɨ 'apatera pepayeitɨa. Haramara tetsita 'Eritsaha kwieyaritsie mieme, 'ixuriki mɨyɨtsikimaɨye meta mɨxeta pɨ'atɨarie 'akiitsie meuwɨre.
EZE 27:8 Tiru 'aku, tewekemete Tsiruni mepanexɨa meta 'Axiwari. Wapaitɨ mepatitekai yemekɨ memɨmatsi'unɨ'axime, teɨteri memɨte'akumate haramaratsie timiemekɨ.
EZE 27:9 Kɨyekɨ 'aixɨa memɨteheutawewiwawe Kewari kiekatari 'aixɨa mepiyuri hakewa meumurikai kanuwa 'amɨpa. Haramaratsie kanuwa 'amɨpapatsie hauwemete yumɨiretɨ tita pemɨtituakai mepɨtetuakai.
EZE 27:10 Teɨteri Peritsiya kiekatari, Ririyatari meta Puti kiekatari 'akuyaxi wahamatɨa mepaye'ukai. 'Aixɨa mepɨmatsi'ukuyuri yuhetsie nunuwamekɨ meta kuya xupureruyakɨ, mɨkɨ mepihekɨatakai kepemɨtimariwekai.
EZE 27:11 »”'Axiwari kiekatari, meta 'akuyaxima wahamatɨa, mepi'ɨwiyakai 'akuraru 'awarita maka, meta Kamari kiekatari 'atuxiyute mepɨtahɨkai. 'Akuraru 'utɨma yuhetsie nunuwame mepukuwɨwɨtɨwakai, witsi'anekame mematsihayeitɨatɨ.
EZE 27:12 Pɨtimɨirekai kepemɨrexeiyakai Taritsi 'ahamatɨa ti'uximayakaku. Pemɨtituiriekaikɨ mɨkɨ pɨmatsixatɨakai pɨrata, tepɨa, 'etsitaniyu meta tepɨa mahete.
EZE 27:13 Metatsiere Kɨretsiya, Tuwari meta Metseki 'ahamatɨa mepɨte'uximayakai, pemɨtiwatuiriekaikɨ mepɨmatsixatɨakai te'uximayatamete meta purunitsekɨ mɨtiwewiyatɨka.
EZE 27:14 Teɨteri Weti-Tukaxima mepɨmatepitɨakai kawayutsixi te'uximayatametekɨ, kawayutsixi yeixamete meta muratsixi.
EZE 27:15 Xuraxi kiekatarita yaxeikɨa 'ahamatɨa mepɨte'uximayakai. Yuwaɨkawa pepɨtiwatuiriekai kwie haramaratsie mɨyemane wahamatɨa, mɨkɨ mepɨmetepitɨakai kɨye mayeyɨyɨwikɨ meta 'eripanite tameteyakɨ.
EZE 27:16 Waɨkawa piinite pemɨrexeiyakaikɨ, Tsiriya pɨmatinanairiekaita, pɨmatipatsiriekai tupatsiyukɨ, 'ixurikite muyuyuawikɨ, 'ixurikite tixutɨkaimekɨ rinu 'aixɨa mɨ'ane meta tetexi witsimɨ'anenekɨ.
EZE 27:17 Kura meta 'Ixaheri mepɨmatetuiriekai tɨriku Miniti miemekɨ, paa witsimɨ'anene, hatseiti meta waritsamu.
EZE 27:18 Waɨkawa piinitɨarika pemɨrexeiyakai, waɨkawa pemɨxikutɨkai, Ramatsiku tsiere pɨmatinanairiekai. Winu Keriwuni mieme meta Tsakaxi mieme muxa huxarieyakɨ mepɨmatekupitɨwakai.
EZE 27:19 Mematepatsirietɨ 'apiinitekɨ Rani nuiwarimama meta kɨriyekutsixi mepɨte'atɨwakai, 'Utsari mieme tepɨa 'aixɨa mɨ'ane, kanera meta 'uwá witsimu'ɨatɨka.
EZE 27:20 Rerani kiekatari mepɨmatsituiriekai xira yeixame.
EZE 27:21 'Ahetsɨa memɨtenanetɨwe mepɨhɨkɨtɨkai 'Arawiya meta yunaitɨ te'aitamete Tseraxi miemete, mɨkɨ mepɨmatepitɨakai muxatsi yakɨ memɨpapakɨ, muxatsi 'ukitsikɨ meta tsipuri wahekɨ.
EZE 27:22 Meta 'ahetsɨa mepɨtenanetɨwekai yunaitɨ tetuayamete, Tsawa miemete meta Xakama. Mɨkɨ mepɨmatepitɨakai hurukɨ, tetexi witsimɨ'anenekɨ meta witsimu'ɨatɨka 'aixɨa mɨ'anenekɨ.
EZE 27:23 Meta Karani, Kane, Hereni meta tetuayamete Tsawa kiekatari, 'Atsiriya meta Kirimari 'ahetsɨa mepɨtenanetɨwekai.
EZE 27:24 Waɨkawa pemɨrexeiyanikɨ mepɨmatsituiriekai 'ixuriki witsi'anenekame, matate mɨyɨtsikimawi, tixuiyatɨkaime, tiwiparietɨkaime yɨkɨ'anenemekɨ meta kaunarite 'aixɨa reukukakaunime.
EZE 27:25 Kanuwate 'amɨpapa Taritsi miemete 'apiinite mepɨte'anutuayakai. »”Piinitɨarika mɨraye'atɨka tihɨpɨneme peratɨtɨ, haramara 'amatiyewatsie pepɨyanekai.
EZE 27:26 'Awekemete haramara 'ameutatewatsie mepɨmatsihetɨ, haramara 'amatiyewatsie 'eka tau manatineika mieme pɨmatsi'utamuraxɨ.
EZE 27:27 Kepauka pemɨkayune pɨtikayunixɨani haramara 'ameukatewatsie, mɨmatixikutɨriyakai pemɨtituakai meta pemɨtiwewiekai, 'ahetsie mematitei meta memɨmatsi'unɨ'axime, kemɨ'ane 'akanuwa 'amɨpa 'aixɨa memɨtiyuruwa meta kemɨ'ane memɨmatetuiriekai, 'akuyaxima metatsiere yunaitɨ matsiparewiwamete.
EZE 27:28 Memɨmatsi'unɨ'axime me'utihiwakaku haramara tetsita memɨtama mepɨtimamani.
EZE 27:29 Yunaitɨ kanuwa 'amɨpapa wekemete mepɨwaku'eirieni, haramaratsie kɨkamete meta tenɨ'awamete kwiepa mepɨ'axɨani.
EZE 27:30 'Ahetsiemieme mepɨtihiwa mepɨtitsuani yemekɨ meyuhiwerietɨ, naxi yumu'utsie mepeuyutiwiwiriexɨani, meta hetsiena mepɨtikurupe.
EZE 27:31 'Ekɨ ya'ane pewiwiekaku yumu'utsie mepuyukaxini, hiwerika kamixayari mepanakatɨxɨani. 'Ahetsiemieme mepɨtitsuani meyuhiwerietɨ, 'aixɨa 'iyari meka'u'uwatɨ.
EZE 27:32 Hiwerika kwikariyari mepitikwika, yemekɨ kwinimieme mɨtinutuixiwetsie mɨpaɨ mepɨtiyuani: ‘Nixewitɨ haramara hixɨapa pumawekai Tiru hepaɨ 'anetɨ’.
EZE 27:33 Kepauka mɨti'atɨariwakai 'apiinite nuiwarite yumɨiretɨ mepɨtekunanakekai. Waɨkawa pemɨrexeiyakaikɨ meta piinitɨarikakɨ, pepɨwaxikutɨriyakai te'aitamete kwiepa memɨtama.
EZE 27:34 Peru hikɨ haramara pɨmatsi'utamuraxɨ, haramara 'ameukatewatsie pepɨyeka. 'Apiinite meta kemɨ'ane pemɨtiwa'aitɨakai 'ahamatɨa mepukayunixɨa.
EZE 27:35 'Ahetsiemieme mepɨmama yunaitɨ haramara tetsita kiekatari, te'aitamete marikakɨ mepuyɨyɨakatɨka, wahɨxie pɨmatsiɨkɨ kememɨtemama.
EZE 27:36 Waɨkawa mekanimamaka hipatɨ kwieyaritsie tenawemete, 'a'imatɨrieka tukari kanaye'ani, tawariri pepɨkanuani”».
EZE 28:1 Yawé mɨpaɨ kanetiniutahɨawe:
EZE 28:2 «Tewi pemunu'aya, mɨpaɨ ketinayehɨtɨa ti'aitame Tiru kiekame, Yawé naimekɨmɨyɨwe mɨpaɨ kanaineni: »“'Ataɨta pe'uyuta'ɨreka mɨpaɨ peputayɨ: ‘Ne kakaɨyari nepɨhɨkɨ. Haramara 'amatiyewatsie nepɨyeyeika, kakaɨyarixi wa'uwenitsie ne'akaitɨ’. Peru neuxei 'ekɨ pepɨkakakaɨyari, tsepa mɨpaɨ pemɨti'amate. 'Ekɨ tewi pemɨmɨwe xeikɨa pekanihɨkɨtɨni.
EZE 28:3 ¿Kamɨtsɨ Tanieri reuyeta petimaiwe? ¿Kamɨtsɨ naime tita mɨti'awie petimate?
EZE 28:4 'Ekɨ kepemɨtimaiwekɨ meta kepemɨtimatekɨ 'axikutɨriya pepɨtiukuxeɨri, 'akakuni pemexeiyatsie pepeikayatsaxɨ waɨkawa huru meta pɨrata.
EZE 28:5 Kwinimieme pemɨreyutaharerutawekɨ, 'ayumieme waɨkawa xiku pepa'ayeitɨa. Waɨkawa pemɨrexeiyakɨ kwinimieme petiuyu'ɨretɨ pepatɨa.
EZE 28:6 'Ayumieme, Yawé naimekɨmɨyɨwe mɨpaɨ kanaineni: »”Metsɨ xeniu kakaɨyari hepaɨ petimaiwetɨ pekanayuyeitɨwani,
EZE 28:7 yanepɨtiyurieni memɨ'axɨanikɨ 'ateewa kiekatari 'ahetsɨa, kwinimieme memɨtehayu'eririya: 'ixiparate mekaniwatihapakuni 'aixɨa ti'aneme witsikepemɨrexeiya meta kepemɨtimaiwe hepaɨtsita mieme, mɨkɨ kepemɨtimariwe 'axamekaniyurikuni.
EZE 28:8 Putsuta mekamenikayunitɨakuni, haramara 'amatiyewatsie petikwinetɨ pekanimɨmɨkɨ.
EZE 28:9 Hikɨ, metsimemiwamete wahɨxie, ¿petiyɨwe mɨpaɨ pemɨtayɨni: Ne nepɨkakaɨyari? Matsi metsimemiwamete wahɨxie, kakaɨyari pepɨkahɨkɨtɨni matsi tewi mɨmɨwe pekanihɨkɨtɨkamɨkɨ.
EZE 28:10 Teewatari mekametenikwinitɨakuni, mekamenimiekuni xitekiya 'inɨariyari memɨkahexeiya, ne mɨpaɨ nemainekɨ. Yawé naimekɨmɨyɨwe mɨpaɨ kanaineni”».
EZE 28:11 Yawé mɨpaɨ kanetiniutahɨawe:
EZE 28:12 «Tewi pemunu'aya, Tiru kiekariyaritsie ti'aitame hetsiemieme hiwerika kwikariyari keneutakwika, meta mɨpaɨ ketinayehɨtɨa, Yawé naimekɨmɨyɨwe mɨpaɨ kanaineni: »“Witsipepɨtiyuxexeiyakai, waɨkawa petimaiwetɨ meta 'aixɨa petiyuxexeiyatɨ.
EZE 28:13 'Ereni pepuyeikakai, Kakaɨyari harawerita, witsiperekuniɨtɨ tetexi witsimɨ'anenekɨ: Xuwi, kɨritsuritu, kare, tupatsiyu, kuxinarina, katsipe, tsapiru, kɨranate meta 'etsimerarita. 'Akuka meta 'akamixatetsie mɨranukuhe huru pɨwiriyarietɨkatei, wewiyatɨkaitɨ 'ahetsiemieme kepauka paitɨ pemutawewiyatsie.
EZE 28:14 Pepanayexeiyarie, Kakaɨyari teɨtameya ti'ɨwiyamekɨ, ne mɨpaɨ nemainekaikɨ. Kakaɨyari hɨrieya mɨpatsietsie pepukatei, tetexi tatɨkaimetsie pepuyeyeikakai.
EZE 28:15 Kepauka pemutawewiya 'aixɨa pepɨtiuyeikakai, 'atsita 'axamɨti'ane 'ahetsie mɨtiutixuawerixɨtsieke.
EZE 28:16 Waɨkawa perexeiyatɨ pematɨakɨ, 'axapetiuka'iyaritɨ pepatɨa, 'ana 'axapepɨtiuyuri. 'Ayumieme nepɨmatsihayewei Kakaɨyari hɨrieyatsie, tixaɨtɨ mɨkatipatsie hepaɨ. 'Ekɨ, Kakaɨyari 'ɨwiyame tihɨweme, tetexi mɨtatɨkatsie nekamenakumaweriyamɨkɨ.
EZE 28:17 Witsipemɨtitemaikɨkaikɨ pepu'ata'ɨrixɨ. Pemɨxawatɨriyatɨkaikɨ petimaiwetɨ pepɨkahatɨa. 'Ayumieme kwiepa nepɨmatsiheukahɨa, meta te'aitamete wahɨxie tewiyarika nepɨmatsihayeitɨa.
EZE 28:18 'Atukite mɨpatsietɨkatei kapatsietɨkaime pepayeitɨa, 'axamɨti'ane waɨkawa pemexeiyakɨ, 'axa'anemekɨ pemɨtituakaikɨ. 'Ayumieme 'ahetsie nepenayetua tai mɨmatsitaxɨtsitɨanikɨ. Yunaitɨ memɨmatsixeiya wahɨxie, kwiepa nepɨmatsi'ukahɨa meta naxi nepɨmatsihayeitɨa.
EZE 28:19 Mematsixeiyatɨ, mepɨmama yunaitɨ nuiwarite memɨmatsimate. 'Imatɨrieka tukaritsie 'axape'anetɨ pepe'ayeitɨa, tawariri 'apepɨka'uyeikani”».
EZE 28:20 Yawé mɨpaɨ kanetiniutaxatɨani:
EZE 28:21 «Tewi pemunu'aya, Tsiruni hɨxiena keneutakeka, hepaɨtsitana ketineutaxata.
EZE 28:22 Mɨpaɨ ketinayemari'itɨa, Yawé naimekɨmɨyɨwe mɨpaɨ kanaineni: »“'Ena nepuwe Tsiruni nematsitaxanetake, meta 'aixɨa nemɨtitahɨawarienikɨ 'ahetsiemieme. Kepauka 'ahetsie nemi'atɨani 'uximatɨarika heitserie mexeiya, 'ahetsie kenemɨtipatsie nematsiɨkɨme nepaneyeitɨani, 'ana mɨpaɨ pɨtimatsiɨkɨre kename ne, Yawé nehɨkɨ.
EZE 28:23 'Ahetsiemieme kwiniya nepanɨ'ani, 'akaye 'utɨma xuriya puhaneni, 'ixipara tiyurieyu, memɨwitekietɨka 'akaye 'utɨma mepɨkaxɨrieni, 'ana mɨpaɨ mepɨtehetimani kename ne, Yawé nehɨkɨ.
EZE 28:24 'Ixaheritsixi tawariri mepɨka'uximatɨarieka wa'aurie kiekatari 'aixɨa mekatewaxeiyakaku, kɨye manuyemɨtsɨkɨ 'anatseiwatɨ kemɨtiyukukuine hepaɨ, meta xuyakɨ hepaɨ, 'ana mɨpaɨ mepɨtehetimani kename ne, Yawé nehɨkɨ”.
EZE 28:25 »Yawé naimekɨmɨyɨwe mɨpaɨ kanaineni: “Kepauka nemɨwakuxeɨrieni 'ixaheritsixi 'ateewa memutetɨka hipame nuiwarite wahetsɨa, kenemɨtipatsie nuiwarite wahɨxie matsiɨkɨme nepaneyeitɨani. Hikɨ 'ana 'Ixaheri yukwieyaritsie pukani, neti'uximayatsiriwame Kakuwu nemɨyetuiritsie.
EZE 28:26 Mana 'aixɨa 'iyari mepu'uwani, mepuyutikitɨani, kaxie mepɨka'eni, netsɨ nekaniwa'uximatɨamɨkɨ kemɨ'ane 'Ixaheri kiekariyari memɨxani'erie. 'Ana mɨpaɨ mepɨtehetimani kename ne, Yawé wakakaɨyari nehɨkɨ”».
EZE 29:1 Tamamata wiyari 'anuyemiekaku, tamamata metseri 'anukamiekaku meta tamamata heimana huta tukaritsie, Yawé mɨpaɨ kanetiniutahɨawe:
EZE 29:2 «Tewi pemunu'aya, Parahuni ti'aitame hɨxie keneutakeka mɨpaɨ ketineutaxata, meta yunaime 'ekipitutari wahetsiemieme.
EZE 29:3 Mɨpaɨ ketinaye'eritɨa, kename Yawé naimekɨmɨyɨwe mɨpaɨ nehaine: »“'Ekɨ Parahuni 'Ekipitutsie ti'aitame, kuu pemɨmariwe 'ahapa pemɨyeyeika, mɨpaɨ pemutaine: ‘Niru hatuxameyari katininepiinitɨni, Niru ne nekaniutawewieni’, 'ayumieme yanekametinahɨaweni nekamanaye'unieka.
EZE 29:4 Ne 'atenitsie nekamenikwaitsɨpiyamɨkɨ, yanekatiniyurimɨkɨ 'ahapa tsapari memɨye'uwa memɨwerixɨanikɨ 'ahetsie. Hikɨ tsapari 'akararatsie mewetɨkaikaku 'ahapa nekamenanatihanimɨkɨ.
EZE 29:5 Makumawetsie nepɨmatsiku'eirieni, meta tsapari 'ahamatɨa mepuyuhayewa. Mana pepɨkaweni hayekɨa, pepɨka'anukukweiyani pepɨkakateukieni. Yeutari meta memɨte'awɨwawe wa'ikwai nepɨmatsihayeitɨani.
EZE 29:6 Hikɨ 'ana yunaitɨ 'ekipitutari mɨpaɨ mepɨtehetimani kename ne, Yawé nehɨkɨ. 'Uwakaxa 'itsɨyari xeikɨa pekanayani 'ixaheritsixi teɨteriyari wahetsiemieme.
EZE 29:7 Kepauka 'amamatsie memɨkawɨrixɨ, peukumurixɨ, wamamateta pepamuraxɨa, kepauka 'ahetsie memɨtehawi peputamurixɨ, hikɨ 'ana meputimama.
EZE 29:8 »”'Ayumieme, Yawé mɨpaɨ kanaineni: 'Ahetsiemieme 'ixipara nekani'atɨamɨkɨ, nekanipitɨamɨkɨ mɨwakwinikɨ teɨteri meta tewaxi.
EZE 29:9 'Ekipitu kwieyari 'akumawetɨ kaniyuhayewamɨkɨ. Hikɨ 'ana mɨpaɨ mepɨtehetimani kename ne, Yawé nehɨkɨ. 'Ekɨ mɨpaɨ pemutayɨ: ‘Niru hatuxameyari katininepiinitɨni, Niru ne nekaniutawewieni’.
EZE 29:10 'Ayumieme mɨpaɨ nepaine 'ahepaɨtsita, meta 'ahate hepaɨtsita. Mikiruri 'itsutɨame meta 'atsita 'Atsuhani, metatsiere 'atsita 'Etihupiya kwieyari mananiere paitɨ, 'Ekipitu kwieyari nekanika'unamɨkɨ meta 'akumaweme nekanayeitɨamɨkɨ.
EZE 29:11 Huta tewiyari wiyari kananuyeyeimɨkɨ mana mɨkakiepatɨni, teɨteri meta tewaxi mana mepɨkate'u'uwani.
EZE 29:12 'Ekipitu kwieyari matsi waɨkawa 'eiriyakame nepayeitɨani, huta tewiyari wiyari kiekariteya yuxaɨta puyuhayewa 'u'unitɨ. Ne 'ekipitutari nuiwarite watsata nepɨwataxɨriexɨani meta hipame kwieyaritsie.
EZE 29:13 »”Yawé naimekɨmɨyɨwe mɨpaɨ kanaineni: Huta tewiyari wiyari 'anukayayu 'ekipitutari nepɨwakuxeɨrieni hipame teɨteri watsata nemɨwareutaxuriexɨakai.
EZE 29:14 'Ekipitutari nepɨwaxɨna kememute'uka'eniexɨakɨ, Paturutsitsie neniwa'atɨamɨkɨ, watutsima wakwietsie. Mana mekanitsutɨakuni tawarita meteyu'aitɨatɨ, memariwetɨ mekahɨkɨtɨtɨ.
EZE 29:15 Mɨkɨ kwieyari waɨkawa pɨkaha'eriwani, hatsuaku hipame pɨkawa'iwamɨkɨni. Ne 'etsime'utɨkame nepɨwarayeitɨani hipame nuiwarite mepɨkatewata'aitɨani.
EZE 29:16 'Ixaheri kiekariyari tawariri 'Ekipitu hetsie mepɨkatehawiya. Matsi, 'Ekipitu pɨhɨkɨtɨni mɨwaraye'eritɨwani, ke'axamemɨte'uyuri me'iweiyatɨ. 'Ana mɨpaɨ mepɨtehetimani kename ne, Yawé nehɨkɨ”».
EZE 29:17 Xeitewiyari heimana 'atahuta wiyari 'anuyemiekaku, mexɨakame metseritsie meta mexɨakame tukaritsie, Yawé mɨpaɨ kanetiniutahɨawe:
EZE 29:18 «Tewi pemunu'aya, mɨpaɨ ketinemaika, ti'aitame Wawiruniya kiekame Nawukurunutsuxi, meta kuyaximama, Tiru hetsɨa mepɨ'axɨani. Yunaitɨ mɨkɨ yumu'utsie mepukametserixɨ meta yuwarita mepuwahaixɨa. Peru mɨya meteheyukuwaɨriyaku, ti'aitame meta kuyaximama, tixaɨtɨ mepɨkateha'iwaxɨ kememɨte'uximayakai Tiru hetsɨa.
EZE 29:19 'Ayumieme, Yawé naimekɨmɨyɨwe mɨpaɨ kanaineni: 'Ekipitu Nawukurunutsuxi nepɨyetuirieni, ti'aitame Wawiruniya kiekame, mɨkɨ tipiinieya katinanupimɨkɨ, katininawatsiriemɨkɨ, mɨraye'axe piinite mekani'axikuni kuyaximama wahetsiemieme mɨrayanikɨ.
EZE 29:20 Ti'aitame Wawiruniya kiekame hetsɨa 'Ekipitu nekaniyetuamɨkɨ, Tiru hepaɨtsita kemɨtiuyurikɨ, mɨkɨ nehetsiemieme katiniuyurieni. Yawé naimekɨmɨyɨwe mɨpaɨ kanaineni.
EZE 29:21 »'Iya tukaritsie 'ixaheritsixi nepɨwatɨrɨkariyatsitɨani, hikɨ 'ana 'ekɨ, 'Etsekieri, pepɨtiwataxatɨani 'aixɨa 'iyari. 'Ana mɨpaɨ mepɨtehetimani kename ne, Yawé nehɨkɨ».
EZE 30:1 Yawé mɨpaɨ kanetiniutahɨawe:
EZE 30:2 «Tewi pemunu'aya, mɨpaɨ ketineuxata kemɨtiyɨni, mɨpaɨ ketiniwaraye'eritɨa: »Yawé mɨpaɨ kanaineni: “Mɨpaɨ xeketeneutsuanani: ‘Xɨa'ui 'iya tukaritsie’.
EZE 30:3 Yawé tukarieya pehehurari, huu, 'ari tukari kanaye'aximeni. Haiwitɨri waɨkawa mɨyɨyɨwi tukariyari kanaye'amɨkɨ, nutuixiya tukariyari nuiwarite wahetsiemieme kanaye'amɨkɨ.
EZE 30:4 'Ekipitu kanitamieriemɨkɨ 'ixiparakɨ, meta 'Etihupiya kiekatari mepɨmamaka. Kepauka mema'iwarieni 'ekipitutari, wapiinite naitɨ katininawariemɨkɨ meta waki tenariyari naitɨ pɨtika'unarieni.
EZE 30:5 'Etihupiya meta Puti kiekatari, metatsiere naitɨ 'Arawiya meta Ririya kiekatari, mekanikwi'iwakuni 'ixiparakɨ, meta yaxeikɨa mekatenanuyekɨnikuni waniwema, tsepa tɨratu memexeiya.
EZE 30:6 »”Yawé mɨpaɨ kaniutaineni, Yawé naimekɨmɨyɨwe mɨpaɨ kanaineni: Mekanikwi'iwakunita 'Ekipitu matɨa memuyuxewi, kememɨteyutimariwekatakai mekaneiyehɨakuni. Mikiruri metsutɨtɨ 'atsita 'Atsuhani 'ixiparakɨ mekanikwi'iwakuni.
EZE 30:7 Wakiekarite naitɨ kanika'unariemɨkɨ, yemekɨ kwie mɨkaha'eriwa kanayeimɨkɨ.
EZE 30:8 Kepauka ne 'Ekipitu nemɨtairiya, meta yunaitɨ memiparewie mepɨkwi'iwa, 'ana mɨpaɨ mepɨtehetimani kename ne, Yawé nehɨkɨ.
EZE 30:9 »”'Iya tukaritsie nenɨ'arima texaxatamete mekanayekɨnikuni, kanuwa 'amɨpapatsie 'Etihupiya memɨtimariutakɨ, 'Ekipitu tukarieya 'ari kanaye'ani, hiwerika hetsɨana pɨtinake.
EZE 30:10 »”Yawé naimekɨmɨyɨwe mɨpaɨ kanaineni: »”Ti'aitame Wawiruniya kiekame hekɨ, Nawukurunutsuxi, 'Ekipitu kemɨtiyutamariwekata nekanika'unamɨkɨ.
EZE 30:11 Nawukurunutsuxi meta kuyaximama meyunɨtɨ, mekani'axɨakuni mɨkɨ kwieyari meka'unake, mɨkɨ yemekɨ mɨtɨrɨkaɨye nuiwarite mɨwara'iwa. Ne'ixipara nekaniwatihanimɨkɨ 'Ekipitu hetsiemieme, mɨkɨ kwieyaritsie mɨkite mekanitahɨnikuni.
EZE 30:12 Haa nenikawatsiɨxamɨkɨ, Niru hetsie mɨrawiwiya, mɨkɨ kwieyari nekaniyetuamɨkɨ teɨteri 'axamemɨte'u'iyari wahetsɨa. Tewanarixi meteyurieyu mɨkɨ kwieyari hakumaweme nekanayeitɨamɨkɨ. Ne, Yawé, mɨpaɨ nekaniutayɨni.
EZE 30:13 »”Yawé naimekɨmɨyɨwe mɨpaɨ kanaineni: »”Yunaime nekaniwaka'unamɨkɨ, Menipitsi kakaɨyarixi memɨtama, yunaime nekaniwareuyehɨamɨkɨ memɨkayuri kakaɨyarixi. Yunaitɨ memɨtimamanikɨ yanetiniyurimɨkɨ mɨkɨ kwieyaritsie, tawariri te'aitamete mepɨka'anuka'uni 'Ekipitu.
EZE 30:14 Paturutsi kiekariyaritsie yunaime nekaniwaka'unamɨkɨ, Tsuhani kiekariyari nekanitataiyamɨkɨ, meta Tewatsi hetsiemieme yanekanitayɨmɨkɨ mɨtikwinitɨarienikɨ.
EZE 30:15 »”Nehaxɨa Tsini kiekariyaritsie nekanikawiwimɨkɨ, 'Ekipitu mana mɨtɨrɨkaɨyekai, meta Tewatsi tita mɨrexeiya nekatinitaxɨriexɨamɨkɨ.
EZE 30:16 'Ekipitu nekanitataiyamɨkɨ, Tsini kukuiniya kanika'eniexɨamɨkɨ. Tewatsi hetsɨa mieme tetsariyari heutaxaxawame pexeiyani, meta Menipitsi paye'uniwani yuheyemekɨ.
EZE 30:17 'Uni kiekatari temari meta Wuwatsititsi kiekatari mekanikwi'iwakuni 'ixiparakɨ, 'ukarawetsixita mekananuhapaniekuni.
EZE 30:18 Kepauka ne, yuku 'Ekipitu mieme nemɨtamura, Tapinetsi kiekariyaritsie tukarikɨ kanikuyɨrimɨkɨ. Mɨpaɨ katineutiparimɨkɨ kemɨtiyukatawe'eriekai yutɨrɨkariyakɨ. 'Ekipitu hai kanenukanakamɨkɨ, waniwema 'ukari mekananuhapaniekuni.
EZE 30:19 Mɨpaɨ katinikwinitɨariemɨkɨ, hikɨ 'ana 'Ekipitu mɨpaɨ katinetimaimɨkɨ kename ne, Yawé nehɨkɨ”».
EZE 30:20 Tamamata heimana xewi wiyari 'anuyemiekaku, mexɨakame metseritsie, 'atahuta tukaritsie, Yawé mɨpaɨ kanetiniutahɨawe:
EZE 30:21 «Tewi pemunu'aya, ne Parahuni mamaya nekanamura, ti'aitame 'Ekipitu kiekame. Xewitɨ pɨka'i'uayemawe meta xewitɨ pɨka'enakuhɨiriewe, mɨtatɨrɨkaxɨanikɨ meta 'ixipara mɨkweiwenikɨ.
EZE 30:22 'Ayumieme Yawé mɨpaɨ kanaineni: “Parahuni nekanaye'unieka, ti'aitame 'Ekipitu kiekame. Hutame mamateya nekanamuraxɨamɨkɨ, 'aixɨa mɨ'ane meta muwayemuri, meta 'ixipara kakweiweme nekanayeitɨamɨkɨ.
EZE 30:23 'Ekipitutari nekaniwataxɨriexɨamɨkɨ nuiwarite watsata, meta hipame wakwieyaritsie paitɨ.
EZE 30:24 Matsi ti'aitame Wawiruniya kiekame mamateya nekanititseiriyamɨkɨ: 'ixipara nekanikweitɨamɨkɨ, matsi Parahuni mamateya nekanamuraxɨamɨkɨ. Hikɨ mɨkɨ kanitatsuamɨkɨ meye'unie hɨxie mɨmɨximeni hepaɨ.
EZE 30:25 Ti'aitame Wawiruniya kiekame mamateya nekanititseiriyamɨkɨ, matsi Parahuni mamateya katɨrɨkawime nepayeitɨani. Kepauka ne ti'aitame Wawiruniya kiekame 'ixipara nemɨkweitɨani, mɨkɨta xɨka 'Ekipitu heitatsera, 'ana mɨpaɨ pɨtimatsiɨkɨre kename ne, Yawé nehɨkɨ.
EZE 30:26 'Ekipitutari nekaniwataxɨriexɨamɨkɨ nuiwarite watsata, meta hipame kwieyaritsie paitɨ. Hikɨ 'ana mɨpaɨ mepɨtehetimani kename ne, Yawé nehɨkɨ”».
EZE 31:1 Tamamata heimana xewi wiyari 'anuyemiekaku, hairieka metseriyaritsie, mexɨakame tukaritsie, Yawé mɨpaɨ kanetiniutahɨawe:
EZE 31:2 «Tewi pemunu'aya, Parahuni mɨpaɨ ketineutahɨawi meta teɨterimama yunaime: »“Kemɨ'ane 'ahepaɨ timariwetɨ payuyeitɨawe,
EZE 31:3 'Atsiriya hetsie kene'a'ɨwiya, kariuxa Riwanu mieme kanihɨkɨtɨkaitɨni, witsitiyuxexeiyatɨ, waɨkawa tsiɨraɨye 'anuwietɨ, kɨtsimeyari hai kanikuyuitɨwakaitɨni.
EZE 31:4 Haa kanitaweriya, haa waɨkawa muhapanekɨ kaniutawere. Haixate nanariteya 'aurie kaniuhapanekaitɨni, hipame kɨyexite kemɨtihatuiyakai.
EZE 31:5 Mɨpaɨ kariuxa katiniutawere 'a'utewitɨ matsi kanayani hipame kɨyexi wara'iwatɨ. Pamɨpariyutsi haa waɨkawa pemexeiya, waɨkawa tsiɨraɨye pepanuwierixɨ.
EZE 31:6 Yunaitɨ memɨte'awɨwawe 'amamatetsie mepuyuti'ituatɨa. Yunaitɨ yeutari 'ahetɨa mepɨtiniweyakai. Yunaitɨ nuiwarite 'a'etɨritɨa mepu'uwakai.
EZE 31:7 Kɨye mɨtɨrɨkaɨye meta mɨmariwe pɨhɨkɨtɨkai, yumamatekɨ 'ayeutɨ panuyemakai, nanariteya 'upaitɨ peukayuyunekai haa tetɨata mɨyematsie.
EZE 31:8 Nixewitɨ kariuxa Kakaɨyari harawerita mɨpaɨ 'anetɨ pumawekai, nixewitɨ huku mɨpaɨ pɨkarexawarikai, mɨpaɨ pɨkatimariwekai. Nixewitɨ kɨye Kakaɨyari harawerita mieme hepaɨ witsipɨka'anekai.
EZE 31:9 Ne witsitiyuxexeiyame nekanayeitɨani tsiɨraɨyetɨ manuwiekakɨ mariwetɨ. 'Ereni, Kakaɨyari harawerita yunaitɨ kɨyexite mepi'ɨtetsaiyakai.
EZE 31:10 »”'Ayumieme Yawé naimekɨmɨyɨwe mɨpaɨ kanaineni: ‘'Iteɨri waɨkawa mutawerixɨkɨ 'a'utewitɨ, kaniuyuta'ɨre, yɨkɨtsimeyarikɨ hai mukuyuitɨwakaikɨ,
EZE 31:11 ne nekaneihɨani, manuyeka hetsɨa nekaniyetuani, ke'axamɨtiuka'iyari yamɨ'itɨarienikɨ.
EZE 31:12 Teewatari kwinimieme 'axamemɨte'u'iyari mekanewiteni, mekaniku'eirieni hawitekiekame. Xawarieya hɨritsie kaniukawiwieni, mayeweweritsie, naitsarie 'aki manuyehapanetsie tsatsanitɨ kaniukawiwieni. Mekaniuyuta'una mekaniku'eirieni yunaitɨ nuiwarite, 'etɨrieyatɨa memuyu'awietakai.
EZE 31:13 Hikɨ memɨte'awɨwawe mawitekie kɨyeyaritsie mepayaxike, meta yeutari xawaritsata mepeutahake.
EZE 31:14 'Ikɨ kani'ayumiemetɨni tawarita xewitɨ 'iteɨri hatetsita 'utiwetɨ kwinimieme mɨkatiwerenikɨ, para xewitɨ tawarita 'iteɨri 'aixɨa tihatuiyarietɨ, yukɨtsimeyarikɨ hai mɨkakuyuitɨwanikɨ. Yunaitɨ mekanikwikuni, yunaitɨ kwieta meukatewatsie mekanikayunikuni, meukatewatsie memɨkayuyuipike wahamatɨa.
EZE 31:15 »” ’Yawé naimekɨmɨyɨwe mɨpaɨ kanaineni: Kepauka kariuxa meukatewatsie mɨkayunixɨ, ne haramara kwieta mieme mɨkawanikɨ yanepɨtiuyuri, hiwerika mɨ'inɨariyaritɨnikɨ. Haa muhapane pukawaxɨa meta 'akite 'amatayeyeu, mɨkɨkɨ hiwerika Riwanu nepupitɨa, meta naitɨ 'iteɨrite yeuta timieme pɨtiutiwa.
EZE 31:16 Kepauka meukatewatsie nemeikanɨ'a, muwa memɨkayuyuipike wahamatɨa, kepauka matiwetsie tɨranarieyakɨ nuiwarite nepɨwarutimariu. Yunaitɨ 'iteɨrite 'Ereni miemete meta 'aixɨa mɨ'anene witsimɨ'anene Riwanu mieme, kemɨ'ane 'aixɨa memɨtehatuiyariekai, kwie hetɨa paitɨ mekaniyunɨtɨakuni.
EZE 31:17 Kemɨ'ane nuiwarite meminɨkai, kemɨ'ane memuyu'awietakai 'etɨriyayatɨa mɨkɨ hamatɨana mekanikayune meukatewatsie, meta kemɨ'ane 'ixiparakɨ memukwi'iwaxɨ.
EZE 31:18 Nixewitɨ 'iteɨri 'Ereni mieme mɨpaɨ pɨka'anekai kemɨtimariwekai. Peru mɨyatɨtɨ, kwieta kanikayune 'iteɨrite 'Ereni miemete wahamatɨa. Muwa kaniyuhayewa watsata, xitekiya 'inɨariyari memɨkahexeiya wahamatɨa, 'ixiparakɨ memukwi'iwaxɨ wahamatɨa. Mɨpaɨta Parahuni katinimɨmɨkɨ meta yunaitɨ meminɨ'ɨ. Yawé naimekɨmɨyɨwe mɨpaɨ kanaineni’”».
EZE 32:1 Mexɨakame tukaritsie tamamata heimana huta metseritsie, tamamata heimana huta wiyari 'anuyemiekaku, Yawé mɨpaɨ kanetiniutahɨawe:
EZE 32:2 «Tewi pemunu'aya, 'ikɨ hiwerika kwikariyari keneutakwika Parahuni mɨhetsiemieme, 'Ekipitutsie ti'aitame: »“Maye hepaɨ pepɨti'axexeiya nuiwarite watsata, kuu hata kiekame hepaɨ pepɨti'axexeiya haa pemɨwaikane, 'a'ɨkatekɨ pemitɨniriya meta muhane pemumuina.
EZE 32:3 »”Yawé naimekɨmɨyɨwe mɨpaɨ kanaineni: »” ‘Tsepanetɨ yumɨireme teɨteri watsata pemuyeika, ne nepɨmatsiwiniya, mana pepɨwiere.
EZE 32:4 Nepɨmatsitahatɨyani kwiepa, yeuta paitɨ nepɨmatsihehɨani. Nepɨwapitɨani muyuawitsie memɨte'uwɨtɨkɨka yunaitɨ 'ahetsie memɨ'axɨanikɨ. Nepɨwapitɨani yeutari 'awaiyarikɨ yunaitɨ memɨtihuxanikɨ.
EZE 32:5 'Awaiyari yeuta nepɨtaxɨrieni, meta kɨmana muyekukunitsie nepitihɨniyaxɨani.
EZE 32:6 'Axuriyakɨ kwie nepɨhawiya meta hɨrite 'amutɨtɨ naime, 'axuriya 'aki'utɨma haa hepaɨ muhapanenikɨ.
EZE 32:7 Kepauka naitɨ pemɨtaxɨtɨarieni, yanekatiniyurimɨkɨ muyuawitsie mukuyɨrekɨ meta xurawetsixi mepɨkahekɨariwieni, tau haiwitɨrikɨ nekaneukunamɨkɨ, meta metseriri pɨkaxawatɨxɨani.
EZE 32:8 'Ahetsiemieme mɨkuyɨrekɨ yanepɨtiyurieni, yunaitɨ xurawetsixi 'amemɨnene mepɨkahekɨariwieniri muyuawitsie, meta 'akwieyaritsie naitɨ pakuyɨre.
EZE 32:9 »” ’Kepauka neniuki nemuye'atɨani 'ateewa paitɨ pemɨkahewamarietsie kename peka'unarieni, 'ana yumɨireme nuiwarite nekaniwatimariutamɨkɨ.
EZE 32:10 Metatsiere yanekatiniyurimɨkɨ yumɨiretɨ teɨteri mekanihɨxiyakuni. Kepauka ne 'ixipara nemɨwatihana mɨkɨ wahɨxie, tewa'aitɨwamete mekanitimamakuni. Kepauka pemɨmierieni, yamepɨte'uyɨyɨakatɨkani memamatɨ mɨkɨta me'ukwi'iwakɨ.
EZE 32:11 »” ’Yawé naimekɨmɨyɨwe mɨpaɨ kanaineni: Ti'aitame Wawiruniya kiekame 'ixiparakɨ matsi'aye'unietɨ 'ahetsɨa kaninuamɨkɨ.
EZE 32:12 Yanepɨtiyurieni 'ateɨterima memɨyumɨire 'ixiparakɨ memɨkwi'iwakɨ mekawanenimayatɨ, kuyaxi waɨkawa memayu'eririya mekateniyurikuni. Mɨkɨ 'Ekipitu kemɨtiyukatawe'eriekai nekanikumaweriyamɨkɨ.
EZE 32:13 Yunaime tewaxi haa waɨkawa maxuawetsie memɨtekwatɨwe nekatiniwakwimɨkɨ, tawariri hatsuaku mɨkɨ haa pɨkatɨniriyarieni teɨteri wahekɨ meta tewaxi.
EZE 32:14 Hikɨ haa nekanipitɨamɨkɨ kayuwatɨ mɨtimakakɨ kayuwatɨ muhanenikɨ, hatseiti hepaɨ. Yawé naimekɨmɨyɨwe mɨpaɨ kanaineni.
EZE 32:15 Kepauka 'Ekipitu hakumaweme nemayeitɨani, meta naime mana mɨtixuawe nepɨrakuxɨtɨani, metatsiere yunaime mana kiekatari nemɨtiwakwinitɨani, hikɨ 'ana mɨpaɨ mepɨtehetimani kename ne, Yawé nehɨkɨ’”.
EZE 32:16 »'Ikɨ hiwerika kanihɨkɨtɨni kiekari mɨtama wanuiwarima memitakwikanikɨ, 'Ekipitu hetsiemieme meta memɨyumɨire wahetsiemieme. Yawé naimekɨmɨyɨwe mɨpaɨ kanaineni».
EZE 32:17 Tamamata heimana 'auxɨwi tukaritsie, tamamata heimana huta metseritsie tamamata heimana huta wiyari 'anuyemiekaku, Yawé mɨpaɨ kanetiniutahɨawe:
EZE 32:18 «Tewi pemunu'aya, xeime hiwerika kwikariyari keneutakwika, 'Ekipitu memɨyumɨire wahetsiemieme, meta nuiwarite memɨtɨrɨkawi wahamatɨa yunaime meukatewatsie keniwareukatua, kwiniemieme meukatewatsie paitɨ.
EZE 32:19 Keniwaruta'iwawiya: “¿Kamɨtsɨ xeme matsi waɨkawa witsiti'anekame xete'erie? Hikɨtsɨ meukatewatsie xekeneukayuni xitekiya memɨkahexeiya wahamatɨa xekeneyeheni”.
EZE 32:20 'Ixiparakɨ memukwi wahamatɨa xekanikayunikuni. 'Ari yu'ixipara mekaniu'ɨka: 'Ekipitu mekehakumaweriyarieni meta yunaitɨ mana memɨtama.
EZE 32:21 Meukatewatsie paitɨ, kuyaxi kwiniemieme memɨtetɨrɨkawi 'Ekipitu hetsiemieme meta kemɨ'ane hetsiena memɨtewiyakai wahetsiemieme mɨpaɨ mepɨtiyuani: “'Ari meukatewatsie mekanikayune. 'Ari kwiepa memɨtama 'ixiparakɨ memukwi xitekiya memɨkahexeiya wahamatɨa mekanikuheni”.
EZE 32:22 »'Atsiriya muwa kaniyekani, meta yunaitɨ memɨyumɨire teɨterimama wateukiyapa. Mɨkɨ yunaitɨ 'ixiparakɨ memukwi'waxɨ.
EZE 32:23 Yunaitɨ kemɨ'ane kwiepa memɨtama memɨwamariutakai 'ixiparakɨ mekaniukwi'iwa. Hikɨ mepɨteukie meukatewatsie, 'Atsiriya teukiyapa 'aurie.
EZE 32:24 »'Erami muwa kaniyekani, teɨterimama memɨyumɨire 'aurienata mekaniteukeni. Mɨkɨ yunaitɨ 'ixiparakɨ memukwi'iwaxɨ. Yunaitɨ kemɨ'ane memɨwamariutakai kwiepa memɨtama mekaniukwinitsiere, kwiepa memɨtama wahepaɨ meukatewatsie mekanikayune. Muwa mekaneyeheni mamariwawemete meka'eriwatɨ meukatewatsie memɨkayunixɨ wahamatɨa.
EZE 32:25 'Erami 'uta kaniukawiriyarieni mɨkite wahixɨapa, kwiepa memɨtama 'ixiparakɨ memukwi wahixɨapa. Mɨkɨ mekaniwamariutakaitɨni kwiepa memu'uwa, peru hikɨ meukatewatsie mekaniyeheni mekamamariwawetɨ meukatewatsie memɨkayunixɨa wahamatɨa. Muwa mekaniyuhayewani teɨteri memukwi'iwaxɨ wahamatɨa.
EZE 32:26 »Muwata mekaniyeheni Metseki meta Tuwari, wa'aurieta teɨterimama memɨyumɨire wateukiyapa. Mɨkɨ yunaitɨ xitekiya memɨkahexeiya mekanihɨkɨtɨni, memukwi'iwaxɨ 'ixiparakɨ kwiepa memu'uwa memɨwamariutakaikɨ.
EZE 32:27 Memɨtehayu'iwaxɨ wahamatɨa mepɨkatihe meripaitɨ memukwi'iwaxɨ xitekiya memɨkahexeiya watsata, meukatewatsie memukayunixɨa kuya kamixaya me'anakatɨtɨkaitɨ meta yu'ixipara memu'uritatɨ. Matsi ke'axamemɨte'uyurikɨ yamekateniupitɨarienita, mɨkɨ kwiepa memɨtama memɨwarutimariukɨ.
EZE 32:28 »'Ekipitu, muwata 'ekɨ pepɨkayune, xitekiya memɨkahexeiya watsata, pemuritɨ peteuketɨ 'ixiparakɨ memukwi'iwaxɨ watsata.
EZE 32:29 »'Erumi muwa kanatikani, te'aitametemama yunaitɨ. Tsepa memɨtɨrɨkawikai, mɨkɨta 'ixiparakɨ memukwi'iwakai wahamatɨa mekaniyeheni, xitekiya memɨkahexeiya wahamatɨa mekaniyeheni, kemɨ'ane meukatewatsie memɨkayunixɨ wahamatɨa.
EZE 32:30 »Muwata mekaniyeheni te'aitamete tayeta kiekatari, metatsiere Tsiruni miemete yunaitɨ. Tsepa mɨkɨ yutɨrɨkariyakɨ hipame memɨwamariutakai, mekaniutewiyatsitɨarieni, 'ixiparakɨ memukwi wahamatɨa, mekamamariwawetɨ. Mɨkɨ xitekiya memɨkahexeiya, hikɨ 'ixiparakɨ memukwi'iwaxɨ wahamatɨa mekaniyeheni, meukatewatsie memɨkayunixɨa wahamatɨa.
EZE 32:31 »Parahuni kaniwaxeiyamɨkɨ, kaniyunɨtɨamɨkɨ teɨterimama yunaitɨ mekwi'iwayu, yurikɨ Parahuni meta yunaitɨ teɨterimama 'ixiparakɨ mekanikwi'iwakuni. Yawé naimekɨmɨyɨwe mɨpaɨ kanaineni.
EZE 32:32 »Tsepa ne netiyurienekaku Parahuni kwiepa memɨtama mɨwamariutakai, Parahuni meta kuyaximama yunaitɨ mekanikateukiekuni xitekiya memɨkahexeiya watsata, 'ixiparakɨ memukwi wahamatɨa. Yawé naimekɨmɨyɨwe mɨpaɨ kanaineni».
EZE 33:1 Yawé mɨpaɨ kanetiniutahɨawe:
EZE 33:2 «Tewi pemunu'aya, 'ateɨterima ketiniwarutaxatɨa, mɨpaɨ ketiniwarutahɨawi: “Kepauka ne kuyaxa nematinetɨani xeime kwieyaritsie, mana kiekatari teɨteri xeime tewi mekananayexeiyakuni, mɨtaniere mayanikɨ,
EZE 33:3 xɨka mɨkɨ kuyaxi memɨwaraye'unie waruxeiya 'ame'ahukame wahepa, mɨkɨ kuxineta kanitahɨtsiemɨkɨ teɨterimama mɨpaɨ memɨtehetimanikɨ.
EZE 33:4 Hikɨ, xewitɨ xɨka tsepa kuxineta mu'eni xɨka kayukuha'aritɨani, tiyumemiwame 'ixiparakɨ kanimiemɨkɨ, yukɨmana yuhetsie rahɨame kanimieriemɨkɨ.
EZE 33:5 Kuxineta 'u'eniekatɨtɨ yuri mɨkarayeitɨa, mɨkɨ yukɨmana kaniyumiemɨkɨ, xɨka matsi yuri rayeitɨanike puyutawikwetsitɨanikekai.
EZE 33:6 »”Hikɨta, xɨka mɨtaniere waxeiyatɨtɨ memɨwaraye'unie 'ame'ahukaku xɨka kuxineta ka'utahɨtsieni teɨterimama mɨpaɨ memɨtehetimanikɨ, tiyumemiwame nuame xɨka xeime 'umieni, mɨkɨta kanimɨmɨkɨ mɨyamɨtiuyurikɨ, matsita ti'ɨwiyame mɨtaniere nekatinitawawiriemɨkɨ mɨkɨ mumieriekɨ”.
EZE 33:7 »'Ekɨ, tewi pemunu'aya, ne ti'ɨwiyamekɨ nekamenanukakeni 'ixaheritsixi wahetsiemieme. 'Ayumieme neniuki pekani'enimɨkɨ, pekaniwarayehɨtɨamɨkɨ nehetsiemieme mɨpaɨ memɨtemaikakɨ.
EZE 33:8 Kepauka ne xeime 'axatiyuruwame mɨpaɨ nemɨtitahɨawe: “Pekanimɨmɨkɨ”, xɨka 'ekɨ mɨpaɨ pekatitahɨawe mɨtihayewakɨ 'axakemɨtiyuriene, mɨkɨ 'axatiyuruwame kanimɨmɨkɨ 'axamɨti'anekɨ, matsi 'ekɨ nekamatinitawawiriemɨkɨ mumɨkɨ.
EZE 33:9 Matsi xɨka, 'ekɨ peheye'eritɨani mɨtihayewakɨ 'axatiyurienetɨ, xɨka mɨkɨ yakatikayani, mɨkɨ kanimɨmɨkɨ 'axamɨtiuyurikɨ peru 'ekɨ 'atukari pekanitawikweitsitɨamɨkɨ.
EZE 33:10 »Tewi pemunu'aya, 'ixaheritsixi mɨpaɨ ketiniwarutahɨawi: “Xeme mɨpaɨ xeputiyuane: ‘'Axateteyurietɨ meta 'inɨari niukiyari teheutitsanaxɨaku pahete tahetsie, 'ari tepɨkwixime te'ayenenieretɨ. ¿Pɨkayɨweri temu'uwani?’”
EZE 33:11 Mɨpaɨ ketiniwarutahɨawi: “Yawé naimekɨmɨyɨwe mɨpaɨ kanaineni: Ne yurikɨ mɨpaɨ nekanaineni, nepɨkanetemawie 'axatiyuruwame mɨmɨnikɨ, matsi 'axatiyurienetɨ ketiuhayewa meta 'ake'uyeikani. 'Ayumieme xeketeneuhayewa, 'ixaheritsixi teɨteriyari, xeketeneuhayewa 'axaxeteyurietɨ. ¿Titayari xetetakukuweni?”
EZE 33:12 »'Ekɨ, tewi pemunu'aya, 'ixaheritsixi waniwema mɨpaɨ ketiniwarutahɨawi: “Tewi 'aixɨa mɨtiuka'iyari xɨka 'axatiuyurieni xɨka yukɨmana 'aixɨa tiuyurieme yu'erieka pɨkatawikweni, meta 'axamɨtiyuruwame mɨkɨ pɨkatikuhana xɨka tiuhayewa 'axatiyurienetɨ. Xɨka tewi heitserie mexeiya 'axatiuyurieni, pɨkayɨwe mutawikweni meripaitɨ 'aixɨa mɨtiuyurikɨ.
EZE 33:13 Xɨka ne heitserie mexeiya mɨpaɨ netiutahɨawe: ‘Pekaniuyeikamɨkɨ’, peru xɨka mɨkɨ yukɨmana yu'ɨwiyame heitserie yatiyurieneni meta xɨka 'axatiuyurieni, ne heitseriemekɨ nepɨkaheye'erieni, matsi kanimɨmɨkɨ 'axamɨtiuyurikɨ.
EZE 33:14 Xɨkata 'axatiyuruwame mɨpaɨ netiutahɨawe: ‘Pekanimɨkɨ’, xɨka mɨkɨ yapauka tiuhayewa 'axatiyurienetɨ, xɨka 'aixɨa pɨta tiyurienetɨ hayani,
EZE 33:15 xɨka tita mɨtiupatakai ti'atɨani, meta tita mɨtiunawakai xɨka rayukatuani, xɨka 'aitsika tukari mexeiyatsie yatikayani, 'axakatiyurienetɨ yurikɨ 'akaniuyeikamɨkɨ meta pɨkamɨni.
EZE 33:16 Pɨkataxatsiyarieni 'axakemɨtiuyuri meripaitɨ miemekɨ, matsi 'apuyeikani heitseriemekɨ 'aixɨa tiyurienetɨ 'amuyeikakɨ”.
EZE 33:17 »'Ateɨterima 'ixaheritsixi waniwema mɨpaɨ meputiyuane: “Yawé heitseriemekɨ yapɨkatiyuriene”. Matsi yurikɨ nehaitɨ, mɨkɨ pɨta heitseriemekɨ yamepɨkateyurie.
EZE 33:18 Xɨka heitserie mexeiya tiuhayewa 'aixɨa tiyurienetɨ, xɨka 'axatiuyurieni, mɨkɨkɨ kanimɨmɨkɨ.
EZE 33:19 Xɨka 'axatiyuruwame tiuhayewa 'axatiyurienetɨ, xɨka heitserie 'aixɨa tiyurieneni, 'akaniuyeikamɨkɨ.
EZE 33:20 Mɨyatɨtɨ xeme 'akuxi mɨpaɨ xeputiyuane: “Yawé heitserie yapɨkatiyuriene”. Peru ne 'ixaheritsixi, nepɨxetahekɨata yuxexɨitɨ xeme kexemɨte'u'uwani».
EZE 33:21 'Auxɨwirieka tukari 'umiekaku tamamata metseriyaritsie, tamamata heimana huta wiyari 'anuyemiekaku kepauka temehapanie, 'ana xewitɨ kaninuani Kerutsareme heyuta'unaka, mɨpaɨ kanetiniutahɨawe: «Kiekari 'ari kana'iwarieni».
EZE 33:22 Tɨkaritsie meyuta'unaxɨ kanuawekaku 'akuxi, Yawé yutɨrɨkariya nehetsie kaniupitɨani nekaniuweme kanenayeitɨani, hikɨ 'uxa'arieka ximeri kepauka munua meyuta'unaxɨ 'ana Yawé neniuweme kanenayeitɨani.
EZE 33:23 Hikɨ Yawé mɨpaɨ kanetiniutahɨawe:
EZE 33:24 «Tewi pemunu'aya, teɨteri kii 'u'unimeta memayetei 'Ixaheri kwieyaritsie, mɨpaɨ mekanetiyuaneni: “'Apɨrahami matsi yuxaɨtatɨtɨ 'ikɨ kwieya naitɨ pɨhɨkɨtɨkai, tame matsi tepɨtawaɨkawa, 'aixɨa kani'aneni 'ikɨ takwie mɨhɨkɨtɨnikɨ”.
EZE 33:25 'Ayumieme, mɨpaɨ ketiniwaraye'eritɨa Yawé naimekɨmɨyɨwe kename mɨpaɨ nehaine: “Xeme wai 'ayexuxureme xekanikwa'ani, kakaɨyarixi memɨwewiyatɨka xekaniwarayexeiyani, meta xuriya xekanitayeuriwani, ¿Mɨya xeteyurietɨ mɨkɨ xekwie tihɨkɨtɨni?
EZE 33:26 Metatsiere, yu'ixiparatetsie xepauwawaɨre, 'axaxeteyurietɨ kemɨkanetinake, 'ahepaɨ tewi 'ɨyaya xepɨwakumaɨwa, ¿Mɨya xeteyurietɨ mɨkɨ xekwie tihɨkɨtɨni?”
EZE 33:27 »'Ayumieme, mɨpaɨ ketiniwaraye'eritɨa Yawé naimekɨmɨyɨwe kename mɨpaɨ nehaine: “Ne yurikɨ nekanayeniereni, kemɨ'ane kii 'u'unimeta memayeteni 'ixiparakɨ mekanikwi'iwakuni, kemɨ'aneta yeuta memu'uwani yeutari mekaniwatikwaikuni, meta kemɨ'ane kii 'aixɨa rekukurarutɨiyariekameta memayeteni meta terɨta kwiniyakɨ mekanikwikuni.
EZE 33:28 Mɨkɨ kwieyari kiɨripa nekanayeitɨamɨkɨ, kemɨtitɨrɨkaɨye meta kemɨtiyukatawe'erie nepɨtinawairieni. 'Ixaheri hɨriyaritsie 'akumawetɨ kaniyuhayewamɨkɨ, nixewitɨ mana pɨka'uyeikani.
EZE 33:29 Kepauka ne 'ikɨ kwieyari hakumaweme nemayeitɨani, yuxaɨta kumakame mana memu'uwakai kwinimieme 'axamemɨte'uyurikɨ, 'ana mɨpaɨ mepɨtehetimani kename ne, Yawé nehɨkɨ”.
EZE 33:30 »'Ekɨta, tewi pemunu'aya, 'ateɨterima 'ahepaɨtsita mepɨtekuxata kuraru 'aurie meta yukitenie metitetɨ, mɨpaɨ mepɨteyutahɨawe: “Hikɨmɨtɨka niuki tepɨ'enieyu Yawé mɨtatsi heyenɨ'airiwa”.
EZE 33:31 Mɨkɨ mekani'axeni yunaitɨ meyunɨtɨ 'ahɨxie, 'aniuki mekaniuti'eniwani mana metitetɨ, peru yamepɨkateyurie. Pɨwanake kepemɨtikuxata, peru 'ariketa tumini mepukuwautɨwe 'axa'anemekɨ meteyurietɨ mepi'iwa.
EZE 33:32 Yurikɨ nekanaineni, 'ekɨ wahetsiemieme kwikame xeikɨa pekanihɨkɨtɨni, naki'eriya kwikariyari pemuyemate witsipehanati'anetɨ pemutakwika, kanarikɨ 'aixɨa pepɨtiuyuitɨwa, 'aniuki mepɨ'enie peru yamepɨkatekahu.
EZE 33:33 Peru neuxei, naitɨ yakatinaye'aximeni, kepauka yamɨraye'ani, 'ana mɨpaɨ mepɨtehetimani kename tixaxatame wahamatɨa 'uyeikakai».
EZE 34:1 Yawé mɨpaɨ kanetiniutahɨawe:
EZE 34:2 «Tewi pemunu'aya, 'Ixaheritsie muxatsi wahɨwemete wahetsiemieme ketineutaxata, ketiniwarutaxatɨa, mɨpaɨ ketiniwaraye'eritɨa, Yawé naimekɨmɨyɨwe mɨpaɨ kanaineni: “Xɨa'ui xeme, 'Ixaheritsie muxatsi wahɨwemete, xeme xeikɨa yɨkɨmana xemɨyu'ɨwiya. ¿Kamɨtsɨ tehɨwemete muxatsi mekatewa'ɨwiyani?
EZE 34:3 Xeme waretsiyari xepɨ'ie, meta muxatsi wahuxari kamixayari xepanakatɨkɨ, meta xepɨwakwa'a muxatsi memɨwaiyatɨka, matsi muxatsi xepɨkawa'ɨwiya.
EZE 34:4 Kemɨ'ane muxa mɨwerani xepɨkaparewie, xɨkatikuyeni xepɨka'i'ɨwiya, mɨrekwinitɨarie xepɨka'uayema, meta meuyewe xepɨka'anukuwawa metatsiere huye memuku'eiri. Matsi pɨta muxatsi xepɨtewakwinitɨa xepɨwananaima.
EZE 34:5 'Ayumieme muxatsi mepeutaxuriexɨa: wahɨweme meuyewetsekɨ. 'Ayumieme teyukwa'amete watsata mekaniu'uwani.
EZE 34:6 Nemuxatsima meheuyexɨrieka 'ɨtsita mekaniu'uwani hɨritsiepai, kwiepa naitsarie mekaneutayeixɨani, nixewitɨ pɨkawara'eriwa pɨkawakuwaune.
EZE 34:7 »”'Ayumieme, muxatsi wahɨwemete Yawé niukieya xekeneu'eni:
EZE 34:8 Yurikɨ Yawé naimekɨmɨyɨwe mɨpaɨ kanaineni: Nemuxatsima wahɨweme hauyewekakaku, mekaninawarietɨweni meta mekanikwaiyaka. Muxatsi wahɨwemete nemuxatsima mepɨkawa'ɨwiya, yɨkɨmana xeikɨa mepɨyutahɨ matsi nemuxatsima mepɨkawara'eriwa.
EZE 34:9 'Ayumieme, muxatsi wahɨwemete, Yawé niukieya xekeneu'eni.
EZE 34:10 Yawé naimekɨmɨyɨwe mɨpaɨ kanaineni: Ne nemuxatsima wahɨwemete nekaniwaraye'unieka. Ne nekatinixetawawiriemɨkɨ nemuxatsi wahetsiemieme, muxatsi wahɨwemeteri xepɨkahakɨne, meta yɨkɨmanari mepɨkayu'ɨwiyani. Nemuxatsima nepɨxenawairieni xemɨkawakwakakɨri.
EZE 34:11 »”Yawé naimekɨmɨyɨwe mɨpaɨ kanaineni: Ne nekɨmana nekaniwatiwaumɨkɨ meta nemuxatsima nekaniwa'ɨwikamɨkɨ.
EZE 34:12 Muxatsi wa'ɨwiyame hepaɨ kemɨtiwata'ɨwiya meheuyexɨrieyu, mɨpaɨta ne nepɨtiwaxeiyani nemuxatsima meta naitsarie mɨpaɨ nepɨtiwatawikweitsitɨani, haiwitɨri mɨyɨyɨwi tukariyari 'aye'ayu meta tsepa kememɨteheutayeixɨakai.
EZE 34:13 Ne nuiwarite watsata nekaniwatiwaumɨkɨ, tsepa kemɨ'ane kwieyaritsie memu'uwa nekaniwakuxeɨrimɨkɨ, wakwietsie pɨta nekaniwa'atɨamɨkɨ. 'Ixaheri hɨriyaritsie nekaniwahɨnemɨkɨ, mayeweweritsie meta naitsarie kiekari mukumanetsie.
EZE 34:14 'Ɨxa waɨkawa maxuawetsie nepɨwatahɨni, wakii hɨri 'amutitɨtɨtsie 'Ixaheri kwieyaritsie puxuaweni. Mana mepɨka'uxipieni 'aixɨa 'anekɨa mehɨrietɨ meta 'ɨxa 'aixɨa mɨ'anene mepɨtikwani 'ixaheri hɨriyaritsie.
EZE 34:15 Neri nekaniwatahɨimɨkɨ nemuxatsima, meta nekaniwaruka'uxipitɨwamɨkɨ. Yawé naimekɨmɨyɨwe mɨpaɨ kanaineni.
EZE 34:16 Memeuyexɨri muxatsi nekaniwatiwaumɨkɨ, 'ateewa paitɨ memekɨ nekaniwa'atɨamɨkɨ, kemɨ'ane memɨte'uka'eniwani nekaniwati'uayemamɨkɨ, meta kemɨ'ane memɨwerarani nekaniwatitɨrɨkariyamɨkɨ, matsi memɨwaiyatɨka meta memɨtɨrɨkawi nekaniwakumaweriyamɨkɨ. Ne heitseriemekɨ nepɨwaruwitɨximeni.
EZE 34:17 »”Xemeta nemuxatsima, Yawé naimekɨmɨyɨwe mɨpaɨ kanaineni: Yuxexuime muxatsi watsata, yuxexuimeta muxatsi 'ukitsi watsata meta tsipuri watsata, nekaniwaranayexeiyamɨkɨ yuxexuitɨ kememɨte'uyuri mepanutaxɨriyani.
EZE 34:18 Xe'iyari 'aixɨa pɨka'ane 'ɨxa 'aixɨa mɨ'anene xemɨkwa'a, xepiketsina muyuhayewane. Haa 'aixɨa 'aneme xemɨhare xe'iyari 'aixɨa pɨka'ane, xepitɨniriya 'akuxi.
EZE 34:19 'Ayumieme nemuxatsima hikɨ 'ɨxa xemuketsi mepɨtikwani, meta haa mepɨtihareni xemitɨniriyaxɨ.
EZE 34:20 »”'Ayumieme Yawé naimekɨmɨyɨwe mɨpaɨ kanainene: Netɨtɨ 'aixɨa nepɨtiyurieni muxatsi memɨwaiyatɨka memɨwawaki wahamatɨa.
EZE 34:21 Xeme yu'etsama xemɨwaretaimakɨ meta yuwarima, meta xemɨwatsikɨpatɨwekɨ memɨwerarani, mɨpaɨ xewayurietɨ xepɨwareutaweiyaxɨa,
EZE 34:22 ne nekaniwatawikweitsitɨamɨkɨ nemuxatsima, tawariri xepɨkatewakwinitɨaka. Ne 'aixɨa nepɨtiyurieni yuxexuime muxatsi wahetsiemieme.
EZE 34:23 Hikɨ 'ana wahɨweme xeime wahetsɨa nepɨhɨani, neti'uximayatsiriwame Rawiri, mɨkɨ pɨwakɨhɨneni, mɨkɨ yuxewitɨ pɨwahɨwemetɨni.
EZE 34:24 Ne, Yawé, xekakaɨyari nepɨhɨkɨtɨni, Rawiri neti'uximayatsiriwame tixe'aitɨwame pɨhɨkɨtɨni. Ne, Yawé mɨpaɨ nekanaineni.
EZE 34:25 »”Wahamatɨa tɨratu nekaniwewimɨkɨ kayuwatɨ memu'uwanikɨ: wakwieyaritsie nekaniwakumaweriyamɨkɨ memɨteyukwa'a, nemuxatsima makumawetsie yu'iyarikɨ memu'uwanikɨ meta muhukuyatsie yu'iyarikɨ memeukukutsunikɨ.
EZE 34:26 Mɨkɨ meta wa'aurie mɨrahane nehɨritetsie 'aixɨa memɨ'itɨarie mepɨhɨkɨtɨni. Wahetsie wiyeri nepanɨ'ani 'aixɨa memɨ'itɨariekakɨ kepauka meuyeweka.
EZE 34:27 Neteɨterima wa'iteɨrite meta waharawerite kwiepa kwie pɨtiutixuawitɨwani, meta kayuwatɨ mepu'uwani yukwietsie. Kepauka ne wayuku nemɨtamura meta kepauka memɨtewa'aitɨa wahetsɨa nemɨwaxɨna, hikɨ 'ana mɨpaɨ xepɨtehetimani kename ne, Yawé nehɨkɨ.
EZE 34:28 Tawariri nuiwarite memɨtama mepɨkawatikwani, meta tawariri teyukwa'amete mepɨkawatikwani. 'Aixɨa 'iyari mepu'uwani, nixewitɨ pɨkawamariutani.
EZE 34:29 Kwie nepɨwayetuirieni waɨkawa tiutixuaweriyame yumɨiretɨ memimate. Mɨkɨ kwieyaritsie mepɨkahehaakakwini, meta hipatɨ nuiwarite mewarutate'akaku mepɨka'u'uwani.
EZE 34:30 Hikɨ 'ana mɨpaɨ xepɨtehetimani kename ne, Yawé xekakaɨyari, xehamatɨa ne'uyeika mɨkɨta 'ixaheritsixi mepɨneteɨterima. Ne Yawé naimekɨmɨyɨwe, mɨpaɨ nekanaineni,
EZE 34:31 ne yurikɨ mɨpaɨ nepaine ne xekakaɨyari nepɨhɨkɨ, xemeta nemuxatsima, muxatsi nekuraruta miemete”».
EZE 35:1 Yawé mɨpaɨ kanetiniutahɨawe:
EZE 35:2 «Tewi pemunu'aya, Tsehixi hɨriyari hepatsie keneutanieretɨ, hikɨ mɨpaɨ ketineutaxatɨa hepaɨtsitana:
EZE 35:3 Mɨpaɨ ketinaye'eritɨa, Yawé naimekɨmɨyɨwe mɨpaɨ kanaineni: »“'Ena nekaniuweni nematsi'aye'unietɨ, 'ekɨ Tsehixi hɨriyari. 'Ahetsie netɨrɨkariya nepɨkawiwieni, makumawe nepɨmatsihayeitɨani.
EZE 35:4 'Akiekarite yeuta puyuhayewa 'u'unitɨ, 'ekɨta 'axaɨta pepɨ'ahayewa. Hikɨ 'ana mɨpaɨ xepɨtehetimani kename ne, Yawé nehɨkɨ.
EZE 35:5 »”Kepauka 'ixaheritsixi 'imatɨrieka tukari maye'akai, kepauka memɨ'uximatɨariekai, 'ekɨ pekaniwarutakwini, meta pewaraye'unietɨ 'apekaniuyeikani yuheyemekɨ.
EZE 35:6 'Ayumieme, yurikɨ ne nekanayeniereni, ne 'axuriya nekanitaxɨrimɨkɨ, ne nepɨkamatsihayewa nematsi'uweiyatɨ. Yawé naimekɨmɨyɨwe mɨpaɨ kanaineni: Xeme xehetsie pɨrahɨiwa teɨteri yuwaɨkawa xemɨwarukwikɨ, peru mɨya xemɨte'uyurikɨ xekanikwikuni.
EZE 35:7 Tsehixi hɨriyari makumawe nepayeitɨani, yunaime nepɨtiwareuyehɨani kemɨ'ane mana muyeikani meta kemɨ'ane mana muyeyani.
EZE 35:8 'Ahɨritetsie mɨkite mepɨhɨpɨneni, naitsarie hɨritsie 'ixiparakɨ memukwi'iwaxɨ mepɨhekɨaka meta mayeweweritsie, metatsiere haa muhapanetsie.
EZE 35:9 Yuheyemekɨ pehakumaweme nepɨmatsihayeitɨani, 'akiekaritetsie kakiepatɨ payani. Hikɨ 'ana mɨpaɨ xepɨtehetimani kename ne, Yawé nehɨkɨ.
EZE 35:10 »”'Ekɨtsɨ mɨpaɨ pekaniutayɨni: ‘Tsepa Yawé mana mɨkiekame, mɨkɨ huta nuiwariyari huta kwieyari nehetsɨa pɨmiemetɨni, ne wakutsiyari nepɨhɨkɨtɨni’.
EZE 35:11 'Ayumieme, ne yurikɨ nemayenierekɨ nekanaineni, 'ahetsie mɨpaɨ nepɨtiyurieni kehepaɨ pereuha'atɨ kepetiwareuhekatɨ pemɨwarutakwi. Yawé mɨpaɨ kanaineni. Kepauka ne nemɨmatikwinitɨani, wahetsɨa nematsiɨkɨme nepaneyeitɨani.
EZE 35:12 Hikɨ 'ana mɨpaɨ pepɨretimani kename ne, Yawé, ne'u'enaxɨ kepemutayɨ 'Ixaheri hɨriyarite hepaɨtsita. 'Ekɨ mɨpaɨ peputayɨ pemɨrayu'iwani hepaɨ: ‘Mepu'uximatɨarie. Hikɨrixɨa nekaniwatikwaimɨkɨ’.
EZE 35:13 Xemɨnetsiha'iwani hepaɨ xeputiyua 'axaxe'utiyuatɨ nehepaɨtsita, nepɨxe'u'eni.
EZE 35:14 »”Yawé naimekɨmɨyɨwe mɨpaɨ kanaineni: Yunaitɨ kwiepa memɨtama memɨyutemamawiekakɨ, ne nepɨxeheuyehɨani.
EZE 35:15 Kehepaɨ xemɨteyutemamawiekai hepaɨ kepauka 'ixaheritsixi wa'imikieri mɨreuyehɨiyatsie, mɨpaɨta ne nepɨtiyukatemawieni 'ahetsiemieme. 'Ekɨ Tsehixi hɨriyari, meta naitɨ 'Erumi kwieyari pakumawere. Mɨpaɨke 'ana xepɨtehetimani kename ne, Yawé nehɨkɨ”.
EZE 36:1 »'Ekɨ, tewi pemunu'aya, 'Ixaheri hɨriteya wahetsiemieme ketineutahekɨata, mɨpaɨ ketiniwarutahɨawi: “'Ixaheri hɨriteya, Yawé niukieya xekeneu'eni.
EZE 36:2 Yawé naimekɨmɨyɨwe mɨpaɨ kanaineni: Mɨxe'aye'unie mɨpaɨ katiniuyuta'ɨre: ‘Hɨrite meripaitɨ mieme tahetsie kanimiemetɨniri’”.
EZE 36:3 'Ayumieme mɨpaɨ ketiniwarutaxatɨa keniwaraye'eritɨa, Yawé naimekɨmɨyɨwe mɨpaɨ kanaineni: “Xeme yunaime mepɨxe'uka'unaxɨ mepɨxeheuyehɨa yunaime, yunaitɨ nuiwarite wahetsɨa miemete xepakɨ, meta nanaimariwamete 'atsieriwamete xepakɨ yunaitɨ teɨteri wahetsiemieme.
EZE 36:4 'Ayumieme 'Ixaheri hɨriyari, Yawé naimekɨmɨyɨwe niukieya xekeneu'eni, hɨrite meta yemurite, mayeweweri meta 'akite, kiekari muti'unixɨ yuxaɨta mukumane, kiekari teɨteri memɨkawarexeiya, memeutanawariexɨa, teɨteri 'ahurawa kiekatari mepɨwa'atsekai.
EZE 36:5 Yawé naimekɨmɨyɨwe mɨpaɨ kanaineni: Waɨkawa ne'ɨtetsatɨ nekaniuyutaxata yunaime nuiwarite wahetsiemieme meta naime 'Erumi kwieyaritsie, waɨkawa meyutemamawietɨ meta waɨkawa meheinanaimatɨ nekwie mepuka'unaxɨ meta mekaneteniunawatsirieni”.
EZE 36:6 »'Ayumieme, 'Ixaheri kwieyari hepaɨtsita ketineutahekɨata, mɨpaɨ ketiniwarayehɨtɨa hɨrite meta yemurite, 'akite meta mayeweweritsie, mɨpaɨ kanaineni Yawé naimekɨmɨyɨwe: “Ne'ɨtetsatɨ neha'atɨ neputaniu, xeme xemɨte'uka'eniwakɨ nuiwarite wahetsiemieme nanaimariwamete xepakɨ.
EZE 36:7 'Ayumieme mɨpaɨ kanaineni Yawé naimekɨmɨyɨwe: Mɨpaɨ nekanaineni teikɨ nehemetɨ, nuiwarite memamanetɨka nanaimariwamete mekanakɨnikuni.
EZE 36:8 »”Matsi xeme, hɨrite 'Ixaheri kwieyaritsie miemete, xehetsie kɨyexi pɨtineni 'ikwaxi mepɨkaxuawitɨani neteɨterima 'ixaheritsixi wahetsiemieme, 'ariri mekanakunuaxɨaximeni.
EZE 36:9 Ne nekaniyu'iyaritɨaka xehetsiemieme, ne xehetsie nekaninuakamɨkɨ. Xeme hɨrite xehetsie katinika'etsitɨmɨkɨ katinika'itsanatɨmɨkɨ,
EZE 36:10 meta nekaniwatimɨiriyamɨkɨ 'ixaheritsixi. Kiekari mukumane tawari wahetsie teɨteri mekanitixuawerikuni, muti'unixɨ 'aixɨa mekanitiyurikuni.
EZE 36:11 Xehetsie teɨteri nepɨwatimɨiriya meta tewaxi, mɨkɨ meyumɨiriyatɨ mekanakɨnikuni. Waɨkawa kiepa nekanayeitɨamɨkɨ, mɨkɨ mana mekaniu'uwakuni, 'aixɨa'anemekɨ xekaniyekɨnikuni keyuri meripaitɨ. 'Ana mɨpaɨ xepɨtehetimani kename ne, Yawé nehɨkɨ.
EZE 36:12 Yanepɨtiyurieni neteɨterima 'ixaheritsixi xekwieyaritsie memuyekɨkanikɨ. Mɨkɨ mana mepɨkiekataritɨni, 'ekɨ pepɨwahetsiemiemetɨni, tawariri waniwema pepɨkawakunamirieni.
EZE 36:13 »”Yawé naimekɨmɨyɨwe mɨpaɨ kanaineni: Mɨpaɨ mepɨmatekumamate kename 'ekɨ teɨteri pewakwa'a meta waniwema yunaime,
EZE 36:14 Yawé naimekɨmɨyɨwe mɨpaɨ kanaineni: Tawariri 'ateɨterima pepɨkawatikwani meta waniwema pepɨkawaxɨtɨani.
EZE 36:15 Tawariri nuiwarite mɨpaɨ mepɨkametexata, tawarita teɨteri mepɨkamatsitatieni, 'ateɨterima 'ahetsie mepɨkahekaxɨrieni. Mɨpaɨ kanaineni Yawé naimekɨmɨyɨwe”».
EZE 36:16 Tawarita Yawé mɨpaɨ kanetiniutahɨawe:
EZE 36:17 «Tewi pemunu'aya, kepauka 'ixaheritsixi yukwieyaritsie memu'uwakai, mɨkɨ ka'itiyakame mekaneyeitɨani. Kememɨyɨakai nehɨxie, mɨpaɨ pɨtimatsiɨkɨkai, 'ukaratsi mɨka'itiya kepauka xuriyaya maye'a hepaɨ.
EZE 36:18 'Ayumieme, kwiepa waɨkawa xuriya mutayeurikɨ, yukakaɨyarixi wahekɨ ka'itiyakame mekanayeitɨani, ne nekaniuyeha'ani wahetsiemieme.
EZE 36:19 Nekaniwareutaxɨriexɨani nuiwarite watsata, hikɨ yumɨireme teɨteri watsata mekaniuyuhayewa. Yanepɨwaruyuri 'axakememɨte'uyurikɨ.
EZE 36:20 Peru kepauka yumɨireme nuiwarite watsata memɨye'axɨa, patsiekamekɨ kenemɨtitewa nekapatsiekame mekanayeitɨani, mɨpaɨ mepɨtekɨhɨawarɨwakai: “Yawé teɨterimama mepɨhɨkɨ, peru mɨyatɨtɨ yukwiepa waɨriyarika mepayehapanie”.
EZE 36:21 'Ayumieme nehetsie neputanua patsiekamekɨ kenemɨtitewakɨ, 'ixaheritsixi kapatsiekame nuiwarite watsata memayeitɨwakaikɨ tsepa hakewa meme'uwakai.
EZE 36:22 »'Ayumieme, 'ixaheritsixi mɨpaɨ ketiniwaraye'eritɨa Yawé naimekɨmɨyɨwe mɨpaɨ kanaineni: “Ne yanekatiniyurimɨkɨ, peru xehetsiemieme nepɨkatiyurieni matsi nehetsiemieme nepɨtiyurieni nemɨpatsiekɨ, xeme nekapatsiekame xemayeitɨa kemɨ'ane nuiwarite watsata xemu'uwakaitsie.
EZE 36:23 Kenemɨtimariwe mepɨnetsihetimani, nuiwarite watsata mɨpatsiekai kapatsiekame mekanayeitɨani, xemeta kemɨ'ane kapatsiekame xemayeitɨa. Kepauka nemɨnehekɨata kenemɨtimariwe xehɨxie, hikɨ nuiwarite 'ana mɨpaɨ mepɨtehetimani kename ne, Yawé nehɨkɨ. Yawé naimekɨmɨyɨwe mɨpaɨ kanaineni.
EZE 36:24 Nuiwarite watsata me'u'uwame nekaniwakuxeɨrimɨkɨ, hipame teɨteri watsata me'u'uwame nekaniwarayewitɨmɨkɨ, wakwiepa nekaniwa'atɨamɨkɨ.
EZE 36:25 Haa 'aixɨa mɨ'anekɨ nekaniwati'ɨyamɨkɨ, 'ana 'aixɨa me'itɨarietɨ mekanakɨnikuni. Nekaniwa'itimɨkɨ 'axamɨti'anekɨ meta hipame kakaɨyarixi memɨwarayexeiyakɨ.
EZE 36:26 'Iyari hekwame nepɨwayetuirieni, hekwame nepɨwapitɨani, hikɨ tete 'iyariyari memexeiya nepɨwanawairieni, wai 'iyariyari pɨta nepɨwarukayetsirieni.
EZE 36:27 Xehetsie ne'iyari nepɨpitɨani, meta yanepɨtiyurieni ne'aitsika xemuweiyanikɨ meta ne'inɨari niukiyaritsie yaxemɨtekahunikɨ.
EZE 36:28 Kwie xetutsima nemɨwayetuiritsie xepu'uwani, xeme neteɨterima xepɨhɨkɨtɨni neta xekakaɨyari nepɨhɨkɨtɨni.
EZE 36:29 Ne nepɨtixenawairieni naime mɨkati'itiya. Waɨkawa tɨriku xemexeiyanikɨ yanepɨtiyurieni, nepɨkaxepitɨani xemɨyehaakakwitɨweni.
EZE 36:30 'Iteɨritetsie waɨkawa 'ikwaxi nepɨkaxuawitɨani, meta xemaka'etsatsie timieme, tawariri xemɨkate'uka'eniwanikɨ nuiwarite watsata haakakɨ.
EZE 36:31 'Anake xepaye'erieni ke'axaxemɨteyuriekai meta 'axakexemɨte'u'uwakai, 'ana xepuyutitetewiya ke'axaxemɨte'uyurikɨ meta tita mɨtixani'eriwakɨ yaxete'uyurieka.
EZE 36:32 Mɨpaɨta xeketenemaika, 'ikɨ kenemɨtiyurieni xehetsiemieme nepɨkatiyurieni. Yawé mɨpaɨ kanaineni. 'Ixaheri teɨteriyari 'aku, xekeneyutetewiyani xekeneyɨhɨaweni kexemɨyɨakai.
EZE 36:33 »”Yawé naimekɨmɨyɨwe mɨpaɨ kanaineni: Kepauka ne nemɨxe'itieni naime 'axamɨti'anekɨ, kiekari kiepa nekanayeitɨamɨkɨ meta kiekari muka'unarie 'aixɨa nekanitiyurimɨkɨ.
EZE 36:34 Kwie muku'eiriwaxɨ kanika'etsiemɨkɨ, tawariri 'akumawetɨ pɨkahayani mana memuyekɨka wahɨxie.
EZE 36:35 Hikɨ mɨpaɨ pɨtitaniukieni: ‘'Ikɨ kwie meripaitɨ makumawe mɨhɨkɨtɨkai, hikɨ neuxei 'Ereni haraweriyari pɨhɨkɨ, meripaitɨ kiekarite yuxaɨta mukumanekai meta mu'u'unikai, hikɨ pɨkiepa meta 'aixɨa pɨrekukurarutsie’.
EZE 36:36 Hikɨ nuiwarite 'auriena mamanetɨka, mɨpaɨ mepɨtehetimani kename ne, ne'enukawewi mu'u'unikai meta ne'ika'iteɨtaxɨ makumaweriyariekai. Ne Yawé mɨpaɨ neputayɨ meta mɨpaɨ nepɨreye'atɨani”.
EZE 36:37 »Yawé naimekɨmɨyɨwe mɨpaɨ kanaineni: Meta nepɨnewaɨriya teɨteri 'ixaheritsixi memɨnetsitawawirienikɨ memuyutimɨirekɨ, muxatsi wahepaɨ memuyutipaɨmerekɨ.
EZE 36:38 Hikɨ kiekari yuxaɨta mukumane teɨteri wahekɨ mepɨtihɨne. Muxatsi wahepaɨ mepɨyɨni, kepauka patsiekamekɨ memuyukuxexeɨriwa 'ixɨarariyaritsie, memehapawa mawari memakɨnekɨ Kerutsareme kiekariyaritsie. Hikɨ 'ana mɨpaɨ mepɨtehetimani kename ne, Yawé nehɨkɨ».
EZE 37:1 Hikɨ Yawé tɨrɨkariyaya nehetsie kaninuani, 'iyarieya kanenewitɨni, 'ayewerikaku kaneni'atɨani mana 'umete pɨhɨnekai.
EZE 37:2 Mana mɨkɨ kaneniuwitɨtɨyani watsata, hikɨ nekaniune'ɨwiya mayeweritsie 'umete waɨkawa kaniyeheteitɨni, wawakitɨri.
EZE 37:3 Hikɨ Yawé mɨpaɨ kanetiniutahɨawe: «Tewi pemunu'aya 'aku, ¿'ikɨ 'umete manutanenierekɨ tiyɨwe?» Neta mɨpaɨ nekatinita'eiya: «Yawé naimekɨmɨyɨwe 'ekɨtsɨ pekatinimaika».
EZE 37:4 Merikɨte mɨpaɨ kanetiniutahɨawe: «'Ikɨ 'umete ketiniwarutahekɨatɨa, mɨpaɨ ketiniwarutahɨawi: “'Umete xemɨwawaki, Yawé niukieya xekeneu'eni.
EZE 37:5 Yawé naimekɨmɨyɨwe mɨpaɨ kanaineni 'umete hepaɨtsita: ‘Ne tukari 'iyayari xemexeiyanikɨ nekanixepitɨamɨkɨ, xeme tawarita xe'ayenenieretɨ xekanakɨnikuni.
EZE 37:6 Tatá xehexeiyame nekanixe'ayeitɨamɨkɨ, wai hetsiena mɨkanenikɨ yanetiniyurimɨkɨ, meta nawi nekanixekaweriexɨamɨkɨ, tukari 'iyayari xemexeiyanikɨ nekanixepitɨamɨkɨ, hikɨ 'ana xe'ayenenieretɨ xekanakɨnikuni hekwamekɨ. 'Ana mɨpaɨ xepɨtehetimani kename ne, Yawé nehɨkɨ’”».
EZE 37:7 Yawé kemɨnetiuta'aitɨakai, mɨpaɨ netiniuhekɨata. Mexi'akuxi netikuxatakai, yuariya nawetɨyani kwie kaniutayuani, hikɨ 'ana 'umete naitɨ kaniyutimɨani yukɨmana.
EZE 37:8 Ne nekaniune'ɨwiya, wahetsie tatá meta waiyari kanikaneikakaitɨni metatsiere wanawi kanikaweririkekaitɨni, peru 'akuxi tukari mepɨkahexeiyakai.
EZE 37:9 Hikɨ Yawé mɨpaɨ kanetiniutahɨawe: «Ketineutaxata tewi pemunu'aya, 'iya tukari mexeiya keneutahiwi, mɨpaɨ ketineutahɨawi: “Mɨpaɨ kanaineni Yawé naimekɨmɨyɨwe: ‘Nauka 'ekayaritsie kenaye'a, 'ikɨ 'umete mɨkwikwi'i tukari keniwarupitɨa tawarita memanutanenierekɨ’ ”».
EZE 37:10 Ne yanepɨtiutahekɨataxɨ Yawé kemɨnetiuta'aitɨa, tukari 'iyayari wahetsie kaninuani, hikɨ 'umete kananutaneniere meta 'amekaniti'uni. Kuyaxi mepɨhɨkɨtɨkai mepɨkayu'inɨatsinɨakai.
EZE 37:11 Mɨpaɨta kanetiniutahɨawe: «Tewi pemunu'aya, 'ikɨ 'umete 'ixaheritsixi teɨteriyari mekanihɨkɨtɨni. Mɨkɨ mɨpaɨ mekaniutiyuaneni: “Ta'umete kaniutiwaniri. Tixaɨtɨri tepɨkatetakwewie. 'Ari tepeuyexɨri”.
EZE 37:12 'Ayumieme, ketiniwarutaxatɨa meta mɨpaɨ ketiniwaraye'eritɨa Yawé naimekɨmɨyɨwe mɨpaɨ kanaineni: “Neteɨterima, hakewa xemeteuke nepɨxehewatiyepiexɨani, nepɨxehewatihapani, nekanixe'atɨamɨkɨ 'Ixaheri kwieyaritsie.
EZE 37:13 Kepaukari xeteukiya nemɨwatiyepiexɨani meta muwa nemɨxehewatihapani, hikɨ 'ana neteɨterima, mɨpaɨ xepɨtehetimani kename ne, Yawé nehɨkɨ.
EZE 37:14 Xehetsie ne'iya tukariyari nepɨxepitɨani, tawarita 'axepu'uwani. Xekwietsie nepɨxe'atɨani. Hikɨ mɨpaɨ xepɨtehetimani ne Yawé kenemutayɨ nepeye'atɨani. Yawé mɨpaɨ kanaineni”».
EZE 37:15 Yawé mɨpaɨ kanetiniutahɨawe:
EZE 37:16 «Tewi pemunu'aya, xeime 'itsɨ keneutikweka hetsiena ketina'utɨa: “Kura hetsiemieme meta hetsiena memɨtewiya 'ixaheritsixi”. Hikɨ tawarita xeime 'itsɨ petikweme hetsiena mɨpaɨ ketineu'utɨa: “Kutse hetsiemieme, 'Epɨrahini 'itsɨya, meta hetsiena memɨtewiya 'ixaheritsixi”.
EZE 37:17 Mɨkɨ hutame keneutinɨitɨa, yuxewitɨ 'itsɨ mayanikɨ 'amamatsie.
EZE 37:18 »Kepauka 'a'iwama mɨpaɨ memɨmateta'iwawiya: “¿Ketita mɨkɨ ti'inɨariyari?”,
EZE 37:19 'ekɨ mɨpaɨ pepɨtiwata'eiya, Yawé naimekɨmɨyɨwe mɨpaɨ kanaineni: “Ne 'itsɨ nekaninawairiemɨkɨ, 'Epɨrahini mekwe'e Kutse 'itsɨya, metatsiere nuiwarite 'ixaheritsixi hetsiena memɨtewiya, Kura 'itsɨyatsie pɨta mekateniwiyakuni. Mɨpaɨ netiyurieme xei'itsɨyari nepɨwarayeitɨani, meta nehetsɨa xei'itsɨyari mepɨhɨkɨtɨni”.
EZE 37:20 'Amamatsie kena'ɨka 'itsɨte mɨra'utɨka, mɨkɨ memixeiyanikɨ,
EZE 37:21 meta mɨpaɨ ketiniwaraye'eritɨa Yawé naimekɨmɨyɨwe mɨpaɨ kanaineni: “'Ixaheritsixi nekaniwakuxeɨrimɨkɨ, tsepa kemɨ'ane nuiwarite watsata memu'uwa meta nekaniwarakunuitɨamɨkɨ wakwietsie.
EZE 37:22 'Ena kwiepa, 'Ixaheri hɨriyaritsie, mɨkɨ xeinuiwari nekaniwarayeitɨamɨkɨ. Yuxewitɨ xeikɨa ti'aitame katiniwa'aitɨakamɨkɨ, tawariri huta nuiwariyari mepɨkahakɨne meta yuhutatɨri mepɨkate'aitani.
EZE 37:23 Tawariri meka'itiyatɨ mepɨkahayuyeitɨani yukakaɨyarixikɨ, meta 'axameteyurietɨ, meta tita mɨtixani'eriwa meteyurietɨ. Ne naime nepɨtiwanawairieni, nepɨwa'itieni ke'axamemɨteyuriekai. Mɨkɨ neteɨterima mepɨhɨkɨtɨni neta wakakaɨyari.
EZE 37:24 Rawiri neti'uximayatsiriwame tixe'aitɨwame pɨhɨkɨtɨni, yunaitɨ mɨkɨ xeime xeikɨa yukutsiyari mepexeiyani. Ne'inɨari niukiyari kemaine mɨpaɨ mepɨte'u'uwani, mepeye'atɨwani kemaine, yamepɨtekahuni.
EZE 37:25 Kakuwu neti'uximayatsiriwame kwie nemiyetuiritsie mepu'uwani, hakewa meripaitɨ watutsima meme'uwakai, mɨkɨ waniwema meta wateukarima yuheyemekɨ mana mekanikutekuni, Rawiri neti'uximayatsiriwame xeikɨa tiwa'aitɨwame pɨhɨkɨtɨni yuheyemekɨ.
EZE 37:26 Wahamatɨa tɨratu nepɨwewieni 'aixɨa 'anemekɨ memu'uwanikɨ. Mɨkɨ tɨratu yuheyemekɨ pɨmiemetɨni. Yanepɨtiyurieni memɨtimɨirekɨ, meta wahixɨapa netuki nepɨtakeni yuheyemekɨ.
EZE 37:27 Wahamatɨa nepuyeikani, ne wakakaɨyari nepɨhɨkɨtɨni mɨkɨta neteɨterima mepakɨne.
EZE 37:28 Kepauka netuki wahixɨapa muweni yuheyemekɨ, 'ana nuiwarite mɨpaɨ mepɨtehetimani kename ne Yawé, 'Ixaheri teɨteriyari mepatsiekame newarayeitɨa”».
EZE 38:1 Yawé mɨpaɨ kanetiniutaxatɨani:
EZE 38:2 «Tewi pemunu'aya, Kuki mɨpaɨ ketineutahɨawi Makuki kiekame, Metseki meta Tuwari wahetsie mɨti'aita. Ketineutahekɨata hetsiena mieme,
EZE 38:3 mɨpaɨ ketiniwaraye'eritɨa Yawé naimekɨmɨyɨwe mɨpaɨ kanaineni: “Kuki, ne nepɨmatsi'aye'unie, Metseki meta Tuwari pemɨti'aita.
EZE 38:4 Pemayeyanikɨ nepɨmatsi'ayewitɨni, tepɨa 'atenitsie nekaniuyekemɨkɨ, yanekatiniyurimɨkɨ yunaime 'akuyaxima pemɨwarayewitɨnikɨ, kawayutsixi, meta memanatei. Yunaitɨ mɨkɨ kuyaxi wahepaɨ meteheukukemaritɨ, mɨkɨ memuyumɨire, yuhetsie nunuwame me'u'ɨtɨ meta 'ixipara 'ari me'u'ɨtɨ.
EZE 38:5 Peritsiya, 'Etihupiya meta Puhuti mekaniwanɨkakuni, yunaitɨ mɨkɨ yuhetsie nunuwame me'u'ɨtɨ meta yumu'utsie nunuwame mete'upitɨ kuyaxa timieme.
EZE 38:6 Kumexi kiekatari mekaniwanɨkakuni, yunaitɨ kuyaximama, meta Weti-Tukaxima, mɨkɨ peteewa tayeta wakie, yunaitɨ kuyaximama meta hipatɨ kuyaxi memɨmatsinɨ'ɨ.
EZE 38:7 »”Keneuyukuha'aritɨa, kenayeniereni 'ekɨ meta yunaitɨ 'a'aurie memahane, mɨkɨ yunaime keniwakuyuitɨwani.
EZE 38:8 Karikɨ mɨixa tukari 'anukayayu pekanitanɨ'ariemɨkɨ pemuyutamienikɨ. Mɨixa wiyari 'anukayayu xeime kwieyari pekanitamiemɨkɨ 'ari manukuke, nuiwari mɨixa wiyari mu'unikai, peru 'ari memu'axɨa hipame nuiwarite watsata me'u'uwatɨ, 'Ixaheri hɨriyaritsie mekaniu'axɨani. Mekaniukuxeɨriyani hipame nuiwarite watsata me'u'uwatɨ, hikɨri 'aixɨa 'iyari mekaniu'uwani.
EZE 38:9 Peru 'ekɨ pekaniwatakwimɨkɨ wiyeri mɨtɨrɨkaɨye hepaɨ. 'Ekɨ pekatiniyurimɨkɨ meta 'akuyaxima meta kemɨ'ane 'ahetsie memɨtewiya, hai mɨyɨwi hepaɨ pepɨyɨni kwie pepanukanani.
EZE 38:10 »”Yawé naimekɨmɨyɨwe mɨpaɨ kanaineni: 'Uxa'atɨni warie yɨkɨ pepɨti'erieni meta pewaraye'unietɨ 'axa'anemekɨ.
EZE 38:11 Meta mɨpaɨ pekanitayɨmɨkɨ: ‘Xeime kwieyaritsie nekanitahamɨkɨ yuhetsie mɨkaheutanuawetsie, xeime nuiwari nekanitamiemɨkɨ kayuwatɨ memu'uwa kiekarite mɨkayukurarutɨiya, 'ituparite mɨkaheuwɨ meta mɨkaheuku'uwetɨka.
EZE 38:12 Naime piinite nekatiniwanawairiemɨkɨ, kiekarite mu'u'unikai 'aixɨa muti'itɨarie nekanitamiemɨkɨ, mɨkɨ teɨteri hipame nuiwarite watsata me'u'uwatɨ memuyukuxeɨri, mɨkɨ teɨteri kwiniemieme mekateneuxeiyani, tewaxi meta piinite, mɨkɨ mexɨakate mekaniyu'erieka’.
EZE 38:13 Tsawa meta Rerani kiekatari, metatsiere Taritsi tetuayamete meta yunaitɨ memɨtɨrɨkawi, mɨpaɨ mepɨmateta'iwawiya: ‘¿Kepetikuyuriene? ¿Petatikunawatsiriene? ¿'Ayumieme 'akuyaxima petiwarukuxeɨri? ¿Pɨrata meta huru petatsinawairienike petinua, meta tatewama tapiinite? ¿Pemɨyemiekɨ waɨkawa perapitɨ tapiinite?’ ”
EZE 38:14 »'Ayumieme, tewi pemunu'aya, ketineutaxata Kuki hetsiemieme, mɨpaɨ ketinaye'eritɨa Yawé naimekɨmɨyɨwe mɨpaɨ kanaineni: “'Iya tukaritsie, ¿kamɨtsɨ pekatimaika neteɨterima 'Ixaheri kayuwatɨ memu'uwa?
EZE 38:15 'Ateewa tayeta pekanakanemɨkɨ, hakewa paitɨ pemekiekame, hipameta teɨteri pewarawitɨtɨ meyumɨireme. Yunaitɨ mɨkɨ kawayutsixi wahetsie meputeni, mepuyumɨireni, kuyaxi memɨtɨrɨkawi mepɨhɨkɨtɨni.
EZE 38:16 'Imatɨrieka tukaritsie, neteɨterima 'ixaheritsixi pepɨwatakwini, haiwitɨri mɨyɨyɨwi hepaɨ naime kwieyari pepanukanani. Ne yanepɨtiyurieni 'ekɨ Kuki, nekwieyari pemɨtamienikɨ, nuiwarite memɨtama memɨnetsihetimanikɨ, 'ahetsie yanetiyurieyu, kenemɨtipatsie yamepɨtehetimani yunaitɨ.
EZE 38:17 »”Yawé naimekɨmɨyɨwe mɨpaɨ kanaineni: 'Ekɨ nepɨmatsixatakai meripaitɨ nete'uximayatsiriwamete wahetsie mɨpaɨ nemutayɨ, Kakaɨyari niukametemama 'Ixaheri kwieyaritsie. Mɨkɨ tukaritsie paitɨ, mɨixa wiyari, mɨkɨ mɨpaɨ mekatenihekɨatani kename ne nematsita'inienikekai 'ixaheritsixi pemɨwatakwinikɨ.
EZE 38:18 Peru kepauka Kuki 'Ixaheri mɨtamieni, ne nekaniyeha'amɨkɨ. Yawé naimekɨmɨyɨwe mɨpaɨ kanaineni.
EZE 38:19 Waɨkawamekɨ neha'atɨ, mɨpaɨ nekanaineni 'ana kwie kanitayuamɨkɨ 'Ixaheri kwieyaritsie.
EZE 38:20 Mekanenitimakakuni ketsɨte haramaratsie memuye'uwa, memɨte'awɨwawe, yeuta memɨte'u'uwa, kuterixi yuhukama memɨteku'uwa, meta yunaitɨ teɨteri kwiepa memu'uwa. Hɨri kanatikainixɨamɨkɨ, 'ai wamuneniere kananuka'unixɨamɨkɨ, meta naitɨ kuraru kanika'unixɨamɨkɨ.
EZE 38:21 Naitsarie hɨritsie nekaniwata'inimɨkɨ memitamienikɨ Kuki, kuyaxi yukɨmana mekaniyutakwikuni —Yawé mɨpaɨ kanaineni—.
EZE 38:22 Ne kwiniya Kuki nekanipitɨamɨkɨ meta xuriya, mɨkɨ hetsie meta kuyaximama, metatsiere yunaitɨ kemɨ'ane meminɨ'ɨ nuiwarite, tɨrɨkaɨyetɨ kanikawiyemɨkɨ, tee kanikaxɨriemɨkɨ, tai meta 'atsupɨre mɨtatɨka.
EZE 38:23 Mɨpaɨ netiyurieme nepɨnehekɨata kenemɨtimariwe kenemɨtipatsie, hipame yumɨireme nuiwarite wahɨxie mɨpaɨ nekatiniyuhekɨatamɨkɨ. Hikɨ 'ana mɨpaɨ mekatenetimaikuni kename ne, Yawé nehɨkɨ”.
EZE 39:1 »Tewi pemunu'aya, Kuki ketineutaxatɨa meta mɨpaɨ ketinaye'eritɨa, Yawé naimekɨmɨyɨwe mɨpaɨ kanaineni: “Ne nekamanaye'unieka Kuki, ti'aitame Metseki meta Tuwari kwieyaritetsie.
EZE 39:2 Pemayeyanikɨ nepɨmatsi'ayewitɨni, 'ateewa paitɨ tayeta nepɨmatsihakanetɨani, 'Ixaheri hɨriyaritsie nepɨmatsi'atɨani.
EZE 39:3 'A'utata tupi pemakwe'e nekanitamuramɨkɨ, meta 'atserieta 'ɨrɨte pema'ɨ xatsitsata nekaneikaxɨrimɨkɨ.
EZE 39:4 'Ixaheri hɨriyaritsie pekanimieriemɨkɨ, yunaitɨ 'akuyaxima wahamatɨa meta 'anuiwarite memɨmatsihaweiya. Wirɨkɨxi meta yeutari nepɨwaranɨnɨ'ani memɨxetikwanikɨ.
EZE 39:5 Yeuta paitɨ pekanikawemɨkɨ, ne mɨpaɨ nemainekɨ. Tai nekananunɨ'amɨkɨ Makuki hetsie meta yu'iyarikɨ haramara tetsita memukutei wahetsie. Hikɨ 'ana mɨpaɨ mepɨtehetimani kename ne, Yawé nehɨkɨ. Yawé naimekɨmɨyɨwe mɨpaɨ kanaineni.
EZE 39:7 »”Neteɨterima 'ixaheritsixi wahɨxie nepɨnehekɨata. Tawariri kenemɨtipatsie 'axanepɨkatikuxaxatsiwani, meta nuiwarite mɨpaɨ mepɨtehetimani kename ne, Yawé nehɨkɨ, mɨpatsie 'Ixaheri hetsiemieme.
EZE 39:8 'Ikɨ naitɨ katinaye'aximeni, 'ari mɨpaɨ katiniyɨximeni. 'Ikɨ tukari ne nemitaxataxɨ kanihɨkɨtɨni. Ne, Yawé, mɨpaɨ nekanaineni.
EZE 39:9 »”Hikɨ teɨteri 'Ixaheritsie kiekatari, mekanewayekɨnixɨakuni mɨratitaiyarɨwatsie, mana mekatenititaiyakuni, xepiinite kuyaxa timieme: yuhetsie nunuwamete meta 'etsimɨyeyeu, tupi meta 'ɨrɨ, hatsate meta tepɨa manuyemɨtsɨ. Mɨkɨkɨ mepɨteyuna'itsirieka 'atahuta wiyari.
EZE 39:10 'Ana mepɨkakukɨ'etɨweni 'ateewa paitɨ 'ɨtsita, meta kɨyexi 'amɨtipapa mepɨkatehawitekeni, kɨye memɨnaika xetupi pɨtihɨkɨtɨni. Meta mepɨtewanawairieni kemɨ'ane memɨtewarunawatsiriekai. Yawé mɨpaɨ kanaineni.
EZE 39:11 »”Mɨkɨ tukaritsie 'Ixaheri kwieyaritsie, mayeweri Kɨkamete memanuyekɨkatsie, haramara tetsita, nepɨwati'ine Kuki hetsiemieme. Mana kɨkamete wahetsiemieme pɨranunare. Mana Kuki pɨkateukieni, meta yunaitɨ kuyaximama, hikɨ mɨpaɨ mepɨte'iterɨwa Mayeweri Kuki kuyaximama memayehe.
EZE 39:12 Merikɨte memɨwakateukukɨ 'ixaheritsixi 'atahuta metseri mepɨyurieni yukwieyari memɨ'itienikɨ.
EZE 39:13 Yunaitɨ mɨkɨ kwieyaritsie kiekatari mepɨwakateuku. Hikɨ meta kepauka ne witsine'anetɨ nemaneyeitɨani, 'ana mɨkɨ tukaritsie mepɨku'eriwani. Ne, Yawé, naimekɨmɨyɨwe mɨpaɨ nekanaineni.
EZE 39:14 »”'Atahuta metseri 'anukayayu, 'ukitsi mekaniwaranayexeiyakuni mɨkɨ kwieyaritsie memɨtinierekɨ hipame mewarawitɨtɨ, xɨka 'akuxi xewitɨ kwiepa hawaikɨ hekani memɨwakateukukɨ, mɨpaɨke meteyurieme yukwieyari mekani'itikuni.
EZE 39:15 Xɨka mɨkɨ xewitɨ 'ume hetaxeiya pei'inɨaritɨani, 'arike teteukumete memikateukukɨ Mayeweritsie Kuki kuyaximama memayehe.
EZE 39:16 Mɨpaɨ meteyuriemeke yukwieyari 'itiyakame mepayeitɨani. Manata kiekari puyukamani Hamuna titewatɨ ‘Mɨmɨiremete’ manuyɨne ”.
EZE 39:17 »Tewi pemunu'aya, Yawé naimekɨmɨyɨwe mɨpaɨ kanaineni: Mɨpaɨ memɨte'awɨwawe yunaime ketiniwarutahɨawi, meta yunaime memɨteyukwa'a, naitsarie memu'uwa meke'uyukuxeɨrieni, meke'u'axɨani mawari nemɨwaraxatɨatsie, 'Ixaheri hɨriyaritetsie. Mana wai mepetikwani meta xuriya mepɨtihareni:
EZE 39:18 kuyaxi kwinimieme memɨte'ayu'iwa wawaiyari, te'aitamete kwiepa memɨtama waxuriya, muxatsi 'ukitsi memɨhɨkɨtɨni hepaɨ, tsipuri yatɨni tsikerutsixi, Watsani kwieyaritsie memɨwaiyatɨarietɨka hepaɨ.
EZE 39:19 Ne nemawari nemukuha'aritɨanitsie, wiya xepɨtikwani xe'iyari paye'ani meta xuriya xepanu'ieni kɨmana xepɨtitarɨweni.
EZE 39:20 Nemexatsie xepɨtihuxani kawayutsixi wahekɨ meta yaxikemete, kuyaxi kwinimieme memɨtehayu'iwa meta meyumɨireme kuyaxi. Ne Yawé, mɨpaɨ nekanaineni.
EZE 39:21 »Nexawatɨriya matsiɨkɨme nepayeitɨani nuiwarite wahɨxie. Yunaitɨ mɨkɨ mepɨneniere kehepaɨ 'aixɨa nemɨtiyurieni heitseriemekɨ meta kenemɨtiwakwinitɨakai.
EZE 39:22 Hikɨ mana mɨtiyeyani, 'ixaheritsixi mɨpaɨ mepɨtehetimani kename ne, Yawé nehɨkɨ wakakaɨyari.
EZE 39:23 Meta hipatɨ nuiwarite mɨpaɨ mepɨtehetimani kename 'ixaheritsixi me'ehapanie 'axameteyurietɨ, meta yamemɨkatekahukaikɨ nehetsɨa. 'Ayumieme ne nekaniwaruku'eirieni, nekaniwayetuani memɨwaraye'unie wahetsɨa, 'ixiparakɨ mekaniukwi'iwa.
EZE 39:24 Yanekatiniuyurieni wahetsie ke'axamemɨteyuriekai ka'itiyakamekɨ, 'ayumieme nepɨwarexɨri.
EZE 39:25 »'Ayumieme Yawé naimekɨmɨyɨwe mɨpaɨ kanaineni: Hikɨta yanekatiniyurimɨkɨ memakunuaxɨanikɨ Kakuwu nuiwarimama. Nekaniwatinenimayatamɨkɨ 'ixaheritsixi teɨteriyari yunaime, 'ana yunaitɨ 'aixɨa mepɨnetexeiyani kenemɨtipatsiekɨ.
EZE 39:26 Kepauka 'aixɨa 'iyari yukwietsie memu'uwani, xewitɨ kawa'uximatɨakaku, yutewiyarika mepatɨmaiyani naime 'axakememɨte'uyuri kemɨkanetinakekai.
EZE 39:27 Kepauka ne nemɨxekuxeɨrieni nuiwarite watsata nexehayewitɨme, teɨteri memɨxe'aye'unie watsata nekanixekuxeɨrimɨkɨ, yumɨireme nuiwarite wahɨxie mɨkɨkɨ kenemɨtipatsie nepɨnehekɨata.
EZE 39:28 Hikɨ 'ana mɨpaɨ mepɨtehetimani kename ne, Yawé wakakaɨyari nehɨkɨ, nemɨwarenɨ'a xeime kwieyaritsie paitɨ memanutaxɨriyanikɨ, peru 'ariketa nemɨxe'ukuxeɨri xekwieyaritsie, yunaime nixeime nekahayewatɨ.
EZE 39:29 Tawariri nepɨkaxeku'eirieni, ne'iyarikɨ 'Ixaheri nepɨtahɨniya. Ne, Yawé, mɨpaɨ nekanaineni».
EZE 40:1 Xeitewiyari heimana 'auxɨwime wiyari panuyemiekai kepauka temehapanie, 'ana Yawé tɨrɨkariyaya nehetsie punua, kanenewitɨni Kerutsareme paitɨ. 'Ikɨ katiniuyɨni hekwame wiyaritsie 'itsutɨakaku, mexɨakame metseritsie tamamata tukaritsie, tamamata heimana nauka wiyari kananuyemiekaitɨni kepauka Kerutsareme mɨtitahatɨxɨtsie.
EZE 40:2 Kakaɨyari mɨpaɨ kanetiniunieritɨani, 'Ixaheri kwieyaritsie kanenewitɨni, hikɨ hɨri 'amanutitewatsie kanenakeni. Mana, tatsutɨa neheukaniereka, mana nepixei kii 'a'utɨtɨme kiekari hepaɨ pɨtiyuxexeiyakai.
EZE 40:3 Kakaɨyari mana kanenewitɨni, mana tewi xeime nekaniuxeiya wurunitsekɨ mɨwewiyaka hepaɨ kani'anekaitɨni. Kitenie kaniuwekaitɨni, xeitapa yumamatsie pehuriekai rinu kaunariyari tapata kɨye ti'inɨnɨatame.
EZE 40:4 Mɨkɨ tewi mɨpaɨ kanetiniutahɨawe: «Tewi pemunu'aya, ketineuxeiya keneu'ena, naime ketita nemɨmetixeiyatsitɨani, 'ayumiemetsɨ 'uwa pekani'atɨarieni. Hikɨta kenemie, ketiniwarutaxatɨa 'ixaheritsixi naime tita pemɨtixeiya».
EZE 40:5 Hikɨ nekanixeiya kuraru tuki warie hakaikame waritana paitɨ. Mɨkɨ tewi kɨye kanakwekaitɨni haika meturuyari tewime, ti'inɨnɨatameya pɨhɨkɨtɨkai, hikɨ kuraru kaniu'inɨata, mɨkɨ kuraru haika meturuyari patayeukai meta haika meturuyari heutitewatɨ.
EZE 40:6 Hikɨ kaneyanita meukitenietsie tau manatineika hepa. Mana tete 'imɨmɨiyari 'amatayewatsie kaniutiyani, hikɨ mana kani'inɨata kitenie manutayanitsie, haika meturuyari kanatayeukaitɨni.
EZE 40:7 Kii meutahanitsie peutaxaxawakai naitsata, haika meturuyari 'ayetɨtɨtɨ yaxeikɨata 'atayeyeutɨ. Mɨkɨ huta meturuyari 'imeriyu puyeyeyeukai. Meutaxaxawakai huta meturuyari 'imeriyu 'ateewa pu'ukai. Kani'inɨatata hutarieka kitenietsie 'imatɨrieka kii meukuwewiyatsie haika meturuyari pexeiyakai.
EZE 40:8 'Imatɨrieka kii meukuwewiya takwa hepatsie 'amuyeyewa kaniu'inɨata, haika meturuyari kaniuyeyeukaitɨni.
EZE 40:9 Kani'inɨata kii meukuwewiya tuki hepatsie mieme, nauka meturuyari kaneutatewakaitɨni, mukawetɨka xeimeturuyari patayeyeukai.
EZE 40:10 Kitenie tau manatineika hepatsie mieme naitsata peutaxawatɨkatei yaxeikɨa 'uyeyeyeutɨ. Meta 'ixumeri mukawetɨkatei yaxeikɨa pɨpapakai.
EZE 40:11 'Iya tewi kani'inɨata meutahanitsie kitenietsie, mɨkɨ 'auxɨwime meturuyari kanatayeukaitɨni meta 'ataxewime meturuyari tewitɨ.
EZE 40:12 Kii meutawetɨkatsie hɨxie kuraru ya'atitewatɨ putaheitɨkatei meriu meturuyari 'atayeyeutɨ meta mɨpaɨ 'atitewatɨ. Yuxexuitɨ kii muyexaxawa haika meturuyari puyeyeyeukai naitɨ.
EZE 40:13 Kitenietsie kaniu'inɨata, xeime kii heimana muyematsie meta xeime kii heimana muyematsie, xewitɨ meutaxawatsie 'inɨaritɨ meta xewitɨta meutaxawatsie tamamata heimana huta meturuyari kanexeiyakaitɨni.
EZE 40:14 Hikɨ xamaru meukuwewiya kaniu'inɨata, mɨkɨ tamamata meturuyari pɨhɨkɨtɨkai. Xamaru takwa hepa kaniukuwewiyakaitɨni, mɨkɨ takwa waritana naitsarie pahanekai.
EZE 40:15 Kitenie paitɨ 'inɨaritɨ meta xamarutɨa paitɨ 'inɨaritɨ, xeitewiyari heimana 'auxɨwi meturuyari pexeiyakai.
EZE 40:16 Kii meutawetɨkatei meta mukawetɨkatei neniereme kanexeiyakaitɨni takwa 'anayeyeukaitɨni 'upaitɨta 'etsinayeyeukaitɨni. Metatsiere xamaru kaneixeiyakaitɨni neniereme 'upaitɨ kaneuwɨkaitɨni. Mukawetɨkatsie kana'utɨkateitɨni takɨ 'ɨkiyari.
EZE 40:17 Hikɨ 'iya tewi kanenewitɨnita takwa tuki warita makatsie. Muwata kii nekanexeiya meta takwa warita tetexi nikumanekaitɨni, kii mawetɨkatei xeitewiyari heimana tamamata nipaɨmekaitɨni tetexi makumane heuyenenieretɨ.
EZE 40:18 Mɨkɨ tetexi mukumanekai, kii kitenieyarite hɨxie katini'anekaitɨni meta yaxeikɨa heutitewatɨ kitenie hepaɨ.
EZE 40:19 Hikɨ kani'inɨata kemeutatewakai kitenie hetɨana mieme meta takwa 'upaitɨ mieme kitenieyaritsie paitɨ, meta kani'inɨata tayetatsie meta tau manatineika hepatsie huta tewiyari heimana tamamata meturuyari kanayani.
EZE 40:20 Mɨkɨ tewi kani'inɨata kemayetewikai meta kematayeukai kitenie mɨreutahakitɨretsie tayeta miemetsie, mɨkɨ takwa tuki warita makatsie katini'anekaitɨni.
EZE 40:21 Kii meutaxaxawa yaxeikɨa haikame pexeiyatɨkatei mɨpaɨ puyeyeyeukai, meta mukawetɨka meta xamaru meukuwewiya, yaxeikɨa papaɨmeme kanexeiyatɨkateitɨni matɨari kitenie mieme hepaɨ, xeitewiyari heimana 'auxɨwi meturuyari kanitewikaitɨni meta tamamata heimana huta meturuyari heimana 'imeriyu 'atayeutɨ.
EZE 40:22 Maxaxawa neniereme, meta xamaruya meukuwie metatsiere takɨ ma'utɨka yaxeikɨa meturuyari pɨrexeiyatɨkatei kitenie tau manatineika hepa meuwie hepaɨ. Mɨkɨ kitenie tete 'imumuiyari 'amatayewa kanexeiyakaitɨni 'atahutatɨ kananukuheteitɨni, mɨkɨ hɨxie xamaru kaniukuwewiyakaitɨni.
EZE 40:23 Takwa 'upaitɨ miemetsie kitenie kanexeiyakaitɨni mɨkɨta tayeta hepatsie kaneukuwewiyakaitɨni, yaxeikɨa tau manatineika hepa meuwewiya hepaɨ. Mɨkɨ tewi kani'inɨata hutame kitenietsie huta tewiyari heimana tamamata meturuyari kanexeiyakaitɨni.
EZE 40:24 Hikɨ kanenewitɨni tatsutɨa hepatsie, muwata kaneukiteniekaitɨni tatsutɨa hepatsie heuyetenitɨ. Kii meutawetɨka kaneti'inɨata, meta titutuikame mukawetɨka metatsiere xamaruyari meukuwewiya, mɨkɨ naitɨ yaxeikɨa katini'anenekaitɨni matɨari kiteniete kemɨ'anenekai.
EZE 40:25 Kitenie memeutahaketsie meta xamaru meukuwewiyakai yaxeikɨa naxaxawakaitɨni neniereme kanexeiyatɨkateitɨni yuwarita, hipatɨ kemɨ'anenekai, xeitewiyari heimana 'auxɨwime meturuyari kanayetɨtɨkaitɨni meta tamamata heimana huta meturuyari heimana 'imeriyu 'atayeyeutɨ.
EZE 40:26 Mɨkɨtatsiere kitenie meutahanitsie teikɨmana yeikame kanexeiyakaitɨni 'atahutatɨ kananukuheteitɨni, mɨkɨ hɨxieta xamaru kaniukuwewiyakaitɨni. Titutuikame mukawetɨkatei naitsata kaneixeiyakaitɨni takɨ 'inɨariyari heuku'utɨkaitɨ.
EZE 40:27 Takwa 'upaitɨ mieme kaneixeiyakaitɨni kitenie tatsutɨa heukaniereme. Mɨkɨ tewi kaniti'inɨata kepaɨ meturuyari meutatewakai xeime kitenietsie meta xeime kitenietsie tatsutɨa meukanieretsie, huta tewiyari heimana tamamata meturuyari kaneutatewakaitɨni.
EZE 40:28 Hikɨ kanenewitɨni kitenie tatsutɨa meukaniereta takwa 'upaitɨ mieme hepatsie. Kitenie tatsutɨa meukaniere kaniu'inɨata, mɨkɨ yaxeikɨa paɨmeme kanexeiyakaitɨni hipame wahepaɨ.
EZE 40:29 Kii meutawetɨka, mukawetɨka meta xamaru meukuwiyatɨka yaxeikɨa papaɨmeme 'inɨari pexeiyatɨkatei hipame wahepaɨ. Kitenie meta xamaru meukuwewiya kanaxaxawakaitɨni neniereme kanexeiyatɨkateitɨni, mɨkɨ xeitewiyari heimana 'auxɨwi meturuyari kanayetɨkaitɨni meta tamamata heimana huta meturuyari heimana 'imeriyu 'atayeyeutɨ.
EZE 40:30 Yutenie kaneixeiyakaitɨnita xamaru tamamata heimana huta meturuyari heimana 'imeriyu 'ayetɨtɨkame meta huta meturuyari heimana 'imeriyu 'atayeyeutɨ.
EZE 40:31 Xamaruyari takwa hetɨa mieme hepa peutanierekai, mukawetɨka mituikatɨka yaxeikɨa takɨ 'inɨariyari neukuwetɨkateitɨni. Mɨkɨ kitenietsie xɨka heutahani tete 'imɨmɨiyari 'amatayewatsie kaniutiyeimɨkɨ 'atahaika 'anukuheimetsie.
EZE 40:32 Metatsiere kanenewitɨni takwa 'upaitɨ miemetsie tau manatineika hepatsie, muwata kani'inɨata kitenie, yaxeikɨa kani'anekaitɨni hipame wahepaɨ.
EZE 40:33 Kii meutawetɨka, mukawetɨka meta xamaru meukuwie mɨkɨ naitɨ yaxeikɨa meturuyari kanipapaɨmekaitɨni hipame wahepaɨ. Kitenie meta xamaruyari kanaxaxawakaitɨni neniereme kanexeiyatɨkateitɨni. Mɨkɨ xeitewiyari heimana 'auxɨwi meturuyari payetewikai meta tamamata heimana huta heimana 'imeriyu meturuyari patayeukai.
EZE 40:34 Xamaruyari takwa hutarieka mieme hepa peuyenierekai. Mukawetɨka titutuikame naitsata peixeiyakai meta mana takɨ 'ɨkiyari pawetɨkatei, mɨkɨ kitenie xɨka heutahamɨkɨ teté 'imɨmɨiyari 'amatayewatsie kaniutiyeimɨkɨ 'atahaika 'anukuheimetsie.
EZE 40:35 Mɨkɨtsiere tewi kanenewitɨni kitenie tayeta miemetsie, hikɨ mɨkɨta kaniu'inɨata: mɨkɨta yaxeikɨa paɨmeme meturuyari kanexeiyakaitɨni hipame wahepaɨ.
EZE 40:36 Mɨkɨta tsiere kii meutaxaxawa kanexeiyakaitɨni, mukawetɨka, xamaru meukuwewiya meta paxaxawakai neniereme pexeiyakai yuwarita, meta xeitewiyari heimana 'auxɨwi meturuyari payetewikai meta tamamata heimana huta heimana 'imeriyu meturuyari patayeukai.
EZE 40:37 Xamaruyari takwa hutarieka mieme hepatsie peutanierekai. Mukawetɨka wahetsie pa'utɨkatei takɨ 'ɨkiyari. Mɨkɨ kitenie xɨka heutahamɨkɨ 'atahaikametsie 'utiyame peutahani.
EZE 40:38 Kii peukuwewiyatɨkatei kitenie xamaru meukuwewiyatɨka 'aurie. Muwa pɨtihauxinarɨwakai mawari mɨtitaiyarɨwakai.
EZE 40:39 Kitenie xamaruyari hetɨa naukatɨ puku'ukai mexa, hutatɨ tapa, tapata hutatɨ, mana mepɨtikwikwiwakai tewaxi mawari taiyariyari memayeitɨarieni, 'itiya mawariyari mayanikɨ, meta mɨrayukatuani mawariyari mayanikɨ.
EZE 40:40 Xamaru hɨxie kitenie heutahanike, manutiyanitsie kitenie tayeta miemetsie, muwata hutatɨ mexa puti'ukai meta xamaru hɨxie tapapɨtata tawarita hutatɨ mexa puti'ukai.
EZE 40:41 Mɨyatɨtɨ kitenie tserieta naukatɨ puti'ukai mexa meta 'utatana naukatɨ, naitɨ 'atahaikatɨ pɨhɨkɨtɨkai, mana memɨtikwikwiwakai tewaxi.
EZE 40:42 Mawari taiyariyari wewiwame mana puku'ukai naukatɨ tetexi mexayari, haika tewiyari heimana tamamata heimana 'auxɨwi xɨteyari payetɨkai meta haika tewiyari heimana tamamata heimana 'auxɨwi xɨteyari 'atayeyeutɨ, meta huta tewiyari heimana tamamata hatitetewatɨ. Mana pɨrapiwakai piinite tewaxi kɨmana memɨwakukukuya mawari taiyariyari memakɨne meta hipatɨ mawarite.
EZE 40:43 'Upaitɨ pɨwakuwɨtɨkatei, 'ixumeritsie, kwatsiturai 'ayehuhutatɨ, mɨkɨ xeitewiyari heimana 'auxɨwi xɨteyari pɨtɨkai. Mexatsie wai payatsarɨwakai mɨtimawarieni.
EZE 40:44 Takwa 'upaitɨ mɨyematsie, kitenie kiiyari 'aurie, hutatɨ kii puxuawekai. Xewitɨ kitenie tayeta mieme 'aurie kaneukuwewiyakaitɨni tatsutɨa meukateni 'aurie, xewitɨta kitenie tatsutɨa mieme 'aurie kaneukuwewiyakaitɨni tayeta meutiteni 'aurie.
EZE 40:45 'Iya tewi mɨpaɨ kanetiniutahɨawe: «Kii tatsutɨa meukateni mɨkɨ mawari wewiwamete tukita memɨte'uximaya kaniwahetsiemiemetɨni,
EZE 40:46 kii tayeta meutiteni mɨkɨ mawari wewiwamete kaniwahetsiemiemetɨni mawari taiyame hepaɨtsita memɨte'uximaya. Mɨkɨ Tsaruki niwemama mekanihɨkɨtɨni, mɨkɨ rewitsixi xeikɨa mekaniyɨwaweni Yawé hetsiemieme memɨteta'uximayata».
EZE 40:47 Tewi takwa kaniu'inɨata, yaxeikɨa kaneutatetewakaitɨni huta tewiyari heimana tamamata 'ayetewitɨ meta mɨpaɨtsiere 'atayeutɨ. Mawari taiyame tuki hɨxie kanikumakaitɨni.
EZE 40:48 Hikɨ kanenewitɨni tuki xamaruyaritɨa, mukawetɨka kaniuti'inɨata, xexuitɨ huta meturuyari heimana 'imeriyu kanipapakaitɨni. Kitenie 'atahuta meturuyari kanatayeukaitɨni, meta kitenie 'ixumeriyari xeimeturuyari heimana 'imeriyu kanatayeyeukaitɨni.
EZE 40:49 Xamaruyari 'ataxewime meturuyari payetewikai meta tamamata meturuyari 'atayeutɨ, meta mana pɨye'ani teté 'imɨmɨiyari 'amatayewatsie 'utiyame tamamata 'anukuheikametsie. Xexuitɨ mukawetɨka 'aurie kaniti'utɨkateitɨni tuxiyu.
EZE 41:1 Hikɨ tewi tukita kaneneutawitɨni, mukawetɨka kaniu'inɨata, mɨkɨ haika meturuyari kanexeiyakaitɨni meta tapata yaxeikɨa.
EZE 41:2 Kitenie meutahanitsie 'auxɨwi meturuyari kanatayeukaitɨni, 'ixumeriyari huta meturuyari heimana 'imeriyu kanatayeukaitɨni. Meta tuki 'amuyeyewa kaniu'inɨata, mɨkɨ xeitewiyari meturuyari payetewikai meta tamamata meturuyari 'atayeutɨ, mɨpaɨ puyeyeukai.
EZE 41:3 Hikɨta muyeniere paitɨ kaneutahani, mukawetɨka kaniuti'inɨata, mɨkɨ xexuitɨ xeimeturuyari kanexeiyatɨkateitɨni. Meutahanitsie haika meturuyari pexeiyakai, 'ixumeriyarita 'atahuta tsikuriyari kanexeiyatɨkateitɨni.
EZE 41:4 Hikɨ mutanierepai kani'inɨata kemuyeyeukai, tamamata meturuyari kaneutatewakaitɨni, meta mɨpaɨ kanatayeukaitɨni. Hikɨ mɨpaɨ kanetiniutahɨawe: «'Uwa Waɨkawa Muyepatsie katini'aneni».
EZE 41:5 Hikɨta tuki kuraruyari kaniu'inɨata, haika meturuyari kanitsuikaitɨni. Tuki warita kii mawewiyatɨkatei huta meturuyari kanexeiyatɨkateitɨni.
EZE 41:6 Mɨkɨ kiite 'auriena kanawewiyatɨkateitɨni yuheima haikatɨ 'a'utɨ. Xeikiiyarita xeitewiyari heimana tamamata kii pɨye'ukai. Tuki 'ixumeriyaritsie 'akananukuyeyeukaitɨni haikakɨa 'anakunetɨ kii yuheima ma'u mana muyu'utɨkanikɨ, tuki 'ixumeriyaritsie mɨkaheu'utɨkanikɨ.
EZE 41:7 Tuki warita kii mawetɨkatei naitɨ yuheima muyewetɨka naitsarie meutahani pɨyɨwekai, meta wapaitɨ manutiyani pɨyɨwekai, wapaitɨ kii manawewiyatɨkatei matsi 'etsiwa 'apuyeyeyeukai. 'Imɨmɨi 'amatayewa pexeiyakai kii mukananatɨtsie 'uwetɨ kii hairieka miemetetsie 'utinieretɨ.
EZE 41:8 Metatsiere tuki warita 'ixumeri 'a'atitewame nekaniuxeiya hanekame mɨkɨ pɨ'ayumiemetɨkai kii tuki warita mawetɨka mutuikatɨkanikɨ. Mɨkɨ 'ixumeri haika meturuyari kanexeiyakaitɨni.
EZE 41:9 Kii mawetɨka tuki warie mɨkɨ wawarita paitɨ 'ixumeriyari makatei huta meturuyari heima 'imeriyu pexeiyakai, metatsiere tuki waritatsie mutika
EZE 41:10 meta mawari wewiwamete wakii tuki warita ma'utɨka mɨkɨ wawarita panuyemawetɨkatei tamamata meturuyari 'atayeutɨ.
EZE 41:11 Kii tuki warie mawetɨkatei, wariena paitɨ manuyemawetɨkatsie hutakɨa kanatetenikaitɨni, xewitɨ tayeta hepatsie xewitɨta tatsutɨa hepatsie. Manuyemawetɨkatei kii mawetɨka warita huta meturuyari heimana 'imeriyu kanexeiyatɨkateitɨni.
EZE 41:12 Kii tau makayuyuipike muwekai takwa 'aurie, mɨkɨ xeitewiyari heima tamamata heimana 'auxɨwi meturuyari patayeukai, kuraruyari huta meturuyari heimana 'imeriyu putsuikai meta huta tewiyari heimana 'auxɨwi meturuyari payetewikai.
EZE 41:13 Tewi tuki kaniu'inɨata, mɨkɨ huta tewiyari heimana tamamata meturuyari kanitewikaitɨni. Meta takwa kaniu'inɨata meta kii metatsierie kuraru maka yaxeikɨa pautatewakai.
EZE 41:14 Meta takwa tuki kitenie hɨxie tau manatineika hepa mukuma, huta tewiyari heimana tamamata meturuyari pexeiyani.
EZE 41:15 Meta kemayetewi kii tau makayuyuipike muwekai takwa 'aurie pu'inɨataxɨ tuki warita meutayune yeikame naime, huta tewiyari heimana tamamata meturuyari pexeiyakai. Tukita 'amuyeyewatsie, kii meukuwewiyatɨka,
EZE 41:16 mɨranutakɨkatɨretsie, neniereme mayexaxawa meuwɨtɨka, meta kii yuheima haikakɨa mawetɨka yuyeikamete hexeiyatɨkaime, manutanenitsie tsutɨtɨ, naitɨ mɨkɨ mexa pɨkawerekai herie. Wapaitɨ meta hetɨana naitɨ pɨkawerekai metatsiere neniereme maxaxawa kɨyexi pɨhɨkɨtɨkai.
EZE 41:17 Metatsiere naitsarie tukita meutahanitsie meta mutanieretsie paitɨ Waɨkawa Muyepatsietsie, kuraru makatsie herie meta taɨtana paitɨ,
EZE 41:18 mepɨwaku'ukai Kakaɨyari teɨtametemama me'anuyutaxeiyatɨ meta takɨ yaxeikɨa. Yuxexuitɨ Kakaɨyari teɨtametemama huta nierikayari mepexeiyatɨkatei,
EZE 41:19 xewitɨ tewi hepaɨ pɨraka'eriekai xewitɨta maye hepaɨ. Yuxexuitɨ wanierika takɨ mepɨxeiyakai wa'aurie mɨti'ukai. Naitsarie tukita mepɨwakunekai Kakaɨyari teɨtametemama wa'ɨkiyarite.
EZE 41:20 Kwiepa paitɨ meta 'itupari meutitewatsie paitɨ wa'ɨkiyarite mepawetɨkatei Kakaɨyari teɨtametemama meta takɨ naitsarie tuki 'ixumeriyaritsie.
EZE 41:21 Tuki kitenieyaritsie muka'utɨka meuwetɨka mɨkɨ pɨpepetsawikai, meta yaxeikɨa peutatetewakai, hikɨ Waɨkawa Muyepatsietsie heutahaximetɨ mana pɨtiuwekai
EZE 41:22 kɨye mexayari mawari taiyame hepaɨ 'anetɨ, mɨkɨ xeimeturuyari heimana 'imeriyu kanawekaitɨni meta xeimeturuyari heutatewatɨ meta mɨpaɨ 'atayeutɨ. 'Itsikinayarite meta hetsiena mawekai meta tapana mɨkɨ naitɨ mexate pɨtihɨkɨtɨkai. Tewi mɨpaɨ kanetiniutahɨawe: «'Ikɨ mexa kanihɨkɨtɨni Yawé hɨxie muwe».
EZE 41:23 Tuki meta Waɨkawa Muyepatsietsie mexa 'itupariyari peuwɨkai 'ayehutatɨ.
EZE 41:24 Xexuitɨ kitenie huhutakatɨ peuwɨkai, naitɨ hutatɨ ta'aurie paxɨrɨwekai.
EZE 41:25 Tuki 'itupariyaritsie Kakaɨyari teɨtametemama wa'ɨkiyari mepa'ukai meta takɨ, tukita mema'utɨka hepaɨ. Kii meukuwewiya heimana mexakɨ xeikɨa panuyenakai.
EZE 41:26 Kii meukuwewiya naitsata neniereme peixeiyakai 'ayexaxawatɨ heumanetɨ meta takɨ 'ɨkiyari ha'utɨkaitɨ. Metatsiere kii tuki warie mawetɨkatei yuheima mexa xamaruyari pexeiyatɨkatei.
EZE 42:1 Mɨkɨ tewi kanenanuyewitɨni takwa hutarieka miemetsie tayeta hepatsie, muwa kii mati'utsie kaneneutahatɨani tayeta hepatsie, takwa hawaikɨ mɨkarayepietsie, kii tau makayuyuipike muwekai tuki waritatsie.
EZE 42:2 Naitɨ mɨkɨ huta tewiyari heimana tamamata meturuyari pɨtɨtɨkai tayeta hepatsie meta xeitewiyari heimana 'auxɨwi patayeyeukai.
EZE 42:3 Takwa hɨxie tamamata meturuyari heutewakaku, meta tetexi makumane hɨxie takwa 'amuyeyewatsie, mana kii pɨti'ukai, 'anuyutaxeiyatɨkaitɨ haikakɨa yuheima 'a'utɨ.
EZE 42:4 Kii muyewaɨkawa hɨxie huye puyekatei 'auxɨwi meturuyari 'atayeutɨ meta huta tewiyari heimana tamamata meturuyari tewitɨ, mɨkɨ kii 'etsimuyeyeyeu tayeta hepatsie pɨreutiyepierikekai.
EZE 42:5 Kii wapaitɨ manawewiyatɨkatei 'etsipuyeyeyeukai, mukananatɨ meta hixɨapa mieme yakɨ puyeyeyeukai, yeikame mikunatɨkateikɨ.
EZE 42:6 Kii hairiekatsie maka'ukai yututuikame pɨkahexeiyakai kii takwa mieme hepaɨ, 'ayumieme matsi mɨkɨ 'etsipuyeyeyeukai, matsi hixɨapa mieme 'apuyeyeyeukai meta mukananatɨkai.
EZE 42:7 Mana putikatei kuraru 'a'atitewatɨ kii mukananatɨ hɨxie, mɨkɨ xeitewiyari heimana 'auxɨwi meturuyari payetewikai.
EZE 42:8 Kii takwa hutarieka miemetsie meuyetetenikai, xeitewiyari heimana 'auxɨwi meturuyari pexeiyatɨkatei, hipatɨta tuki manuwe meuyetetenikai huta tewiyari heimana tamamata meturuyari kanexeiyatɨkateitɨni.
EZE 42:9 Kii mukananatɨtsie xɨka heutahamɨkɨ pɨyɨwekai xeikɨa takwa hutarieka miemetsie 'uyeikatɨ, tatsɨari tau manatineika hepatsie mukuma.
EZE 42:10 Tatsutɨa hepatsieta, takwa kuraruyari 'utɨma, tuki warita, muwata kii pukuwewiyatɨkatei.
EZE 42:11 Mɨkɨ wahɨxie yeikame puyekatei, kii tayeta miemete hepaɨ. Metatsiere, mɨpaɨ pɨtɨkai, mɨpaɨ patayeyeukai, mɨpaɨ pɨretetenikai, mɨpaɨ pɨre'ukai meta mɨpaɨ pɨrekitenietɨkatei.
EZE 42:12 Kii tatsutɨa meukanenierekai, kuraru tau manatineika meutayune 'utɨa, muwa xeikɨa matahani pɨyɨwekai.
EZE 42:13 Hikɨ tewi mɨpaɨ kanetiniutahɨawe: «Kii tayeta mieme meta tatsutɨa mieme takwa 'aurie muku'u, mɨkɨ kii mɨpatsietɨka kanihɨkɨtɨni. Mawari wewiwamete Yawé hɨxie 'ahurawa memukɨka muwa mekatenitikwa'akuni mawari waɨkawa mɨtipatsietɨka. Muwa mekateneutapikuni hatsi mawariyari, 'itiya mawariyari mayanikɨ meta mɨrayukatuani mawariyari mayanikɨ, muwa muyepatsiekɨ.
EZE 42:14 Kepauka mawari wewiwamete muwa memeutahaxɨani, muwa me'ayenexɨame yukamixate mete'anakatɨtɨ mɨpatsietɨka takwa 'amakuyewatsie mepɨka'anuyekɨne, mɨkɨ kamixate kanipatsietɨkani. Kepauka teɨteri hipame memɨwatahɨawe takwa, hipame kamixate mete'anakatɨxɨame mepɨyɨaka».
EZE 42:15 Kepauka tewi mɨtiutahayewaxɨ tuki 'inɨatanetɨ, kanenanuyewitɨni kitenie tau manatineika hepatsie, hikɨ kuraruyari kaniu'inɨata.
EZE 42:16 Kɨye kaniutikweni ti'inɨnɨatame mi'inɨatakɨ tau manatineika hepatsie muyeka, mɨkɨ huta tsienituyari heimana huta tewiyari heimana tamamata meturuyari kanexeiyakaitɨni.
EZE 42:17 Hikɨ 'arike tayeta muyeka kaniu'inɨata, mɨkɨtatsiere huta tsienituyari heimana huta tewiyari heimana tamamata meturuyari kanexeiyakaitɨni.
EZE 42:18 Hikɨ 'arike tatsutɨa muyekatsie, mɨkɨta huta tsienituyari heimana huta tewiyari heimana tamamata meturuyari kanexeiyakaitɨni.
EZE 42:19 Hikɨ kaneyani tau makayuyuipike hepatsie mutikatsie, mɨkɨta huta tsienituyari heimana huta tewiyari heimana tamamata meturuyari kanexeiyakaitɨni.
EZE 42:20 Tewi kaniti'inɨata naukakɨa kematewatɨka. Mɨkɨ kanikurarutɨiyariekaitɨni huta tsienituyari heimana huta tewiyari heimana tamamata meturuyari kanitewikaitɨni meta huta tsienituyari heimana huta tewiyari heimana tamamata meturuyari 'atayeutɨ. Mɨkɨ kuraru mɨtipatsie katinikunakaitɨ mɨkatipatsie tsata.
EZE 43:1 Hikɨ tewi kanenewitɨni kitenie tau manatineika hepa meuwietsie,
EZE 43:2 hikɨ nekanixeiya 'Ixaheri Kakaɨyarieya xawatɨriyaya tau manatineika 'atimieme, rɨrɨnari hayuanekaku, haa kwinimieme mutaineni hepaɨ, hikɨ kwiepa naitɨ kanakuxawatɨxɨani.
EZE 43:3 Mɨpaɨ yaxeikɨa nekatiniuniere kepauka Kerutsareme kiekariyari muka'unarie, meta kenemɨtiunierixɨ Kewaxi hatɨayari 'aurie. Kwiepa nekaniutihɨximakeni,
EZE 43:4 'ana Yawé xawatɨriyaya tukita kaneutahani, kitenietsie tau manatineika hepatsie.
EZE 43:5 Hikɨ 'Iyari kanenanuyewieni takwa 'upaitɨ kaneniuhɨani, hikɨ mana nekanixeiya Yawé xawatɨriyaya tukita kanihɨnekaitɨni.
EZE 43:6 Tewi ne'aurie 'utiwekaku, xeime nekaniu'enieni tukita paitɨ netsihahɨaweme.
EZE 43:7 Mɨpaɨ netikɨhɨawetɨ: «Tewi pemunu'aya, 'ena katini'aneni ne'uweni manuwe, hakewa ne nemeyuwetɨka, 'ena nepukani yuheyemekɨ 'ixaheritsixi wahamatɨa. Tawariri 'ixaheritsixi meta tewa'aitɨwamete kenemɨtitewa nekapatsiekame mepɨkanetsi'ayeitɨani, te'aitamete wateukiyapa meta hipame kakaɨyarixi mewarayexeiyatɨ.
EZE 43:8 'Ixaheritsixi kenemɨtitewa nekapatsiekame mepɨnetsi'ayeitɨa kemɨtiwanake meteyurietɨ, netuki 'aurie mepuyutikitɨa xeime kuraruyari xeikɨa me'anuyetekaka. 'Ayumieme neha'atɨ nekaniwarukwini.
EZE 43:9 Hikɨ mekete'uku'eirieni 'axakememɨteyurie, meta te'aitamete wateukiya, hikɨ ne wahamatɨa nekaniuyeikamɨkɨ yuheyemekɨ.
EZE 43:10 »Tewi pemunu'aya, 'ixaheritsixi ketiniwarutaxatɨa 'ikɨ tuki hepaɨtsita, kemɨreukuwewiya meta kemɨre'inɨatsie, memuyutitetewiyakɨ 'axakememɨte'uyuri.
EZE 43:11 Xɨka naime metehetitewiya kememɨteyurie, keniwaretahekɨatɨa tuki kemɨrekuwewiya, kemɨreukitenie meta hakewa memeutahake, naime nekanixatani ne'aitsikatsie, meta 'inɨari niukiyari ke'aneneme mexeiya. Naime 'ikɨ ketinaka'utɨa mɨkɨ wahɨxie, naime mɨkɨ 'aixɨa memɨteyuriekakɨ kenemɨmatiu'aitɨa ne'aitsika memaye'atɨakakɨ.
EZE 43:12 »'Ikɨ tuki niuki 'inɨariyari kanihɨkɨtɨni: naitɨ kwie waritana maka hɨri kemanutitewi, mɨkɨ Waɨkawa Muyepatsie kanihɨkɨtɨkamɨkɨ. Mɨkɨ tuki 'inɨari niukiyari kanihɨkɨtɨni».
EZE 43:13 'Ikɨ kanihɨkɨtɨni mawari taiyame 'inɨariteyari: Mawari taiyame warita pakunitɨkatei meriyu meturuyari heukatewatɨ meta mɨpaɨ 'atayeutɨ, tenimeyari pakatei xeitewiyari heimana 'auxɨwi xɨteyari hexeiyatɨ panakunekai. Mawari taiyame mɨpaɨ kanatitewakaitɨni:
EZE 43:14 Meukatewatsie paitɨ 'inɨaritɨ meta manutinieretsie paitɨ, xeimeturuyari kanexeiyakaitɨni meriyu meturuyari 'atayeutɨ, mukanieretsie paitɨ meta manutinieretsie paitɨ, huta meturuyari kaneutitewakaitɨni meta meriyu meturuyari 'atayeutɨ.
EZE 43:15 Mawari taiyametsie mɨreutanaitsitɨre huta meturuyari pexeiyakai, meta mana naukatɨ 'awate pa'ukai.
EZE 43:16 Mawari taiyametsie mɨreutanaitsitɨre yaxeikɨa peutatetewakai 'ataxewi meturuyari payetewikai meta 'ataxewi meturuyari 'atayeutɨ.
EZE 43:17 Manutinieretsieta muyema yaxeikɨa peutatetewakai naitsata, 'atahuta meturuyari payetewikai meta 'atahuta meturuyari 'atayeutɨ, mawari taiyame warita kanakateitɨni tenimeyari xeitewiyari heimana 'auxɨwi xɨteyari hexeiyatɨ. Mawari wewiwame warita neukatewakaitɨni meriyu meturuyari. Teikɨmana yeikame mexeiyakai tau manatineika hepatsie kaneukuwewiyakaitɨni.
EZE 43:18 Hikɨ tewi mɨpaɨ kanetiniutahɨawe: «Tewi pemunu'aya, Yawé naimekɨmɨyɨwe mɨpaɨ kanaineni: Kepauka mɨtawewiyani mawari taiyame mana mɨtiwewiwanikɨ mawari taiyariyari meta mana xuriya mɨtayeuriwanikɨ, 'ikɨ 'aitsikatsie mɨpaɨ mekatenikahukuni:
EZE 43:19 Mawari wewiwamete rewitsixi, Tsaruki nuiwarimama hurawa memakɨka nehetsiemieme meteta'uximayatake, xeime tsikeru pekaniwayetuiriemɨkɨ memitimawakɨ 'axamɨti'ane hetsiemieme. Yawé naimekɨmɨyɨwe mɨpaɨ kanaineni.
EZE 43:20 Hikɨ 'etsiwa xuriya pekananatihanɨimɨkɨ, mɨkɨ mɨnauka 'awate pekaniti'ɨyamɨkɨ, naukakɨa muta'etsikinatsie mawari wewiwametsie meta naime tenimeyaritsie maka. Mɨpaɨ patsiekame pekanayeitɨamɨkɨ mɨkɨ pekani'itiemɨkɨ.
EZE 43:21 Hikɨta tsikeru pekaniyetuiriemɨkɨ, memitimawakɨ 'axamɨti'ane hetsiemieme, mɨkɨ kanitataiyariemɨkɨ tuki muyepatsie takwayari 'ateewa.
EZE 43:22 »Hutarieka tukaritsie, 'ana pekanitimawamɨkɨ xeime tsipu 'aixɨa 'anekame 'axamɨti'ane hetsiemieme, mɨpaɨ yaxeikɨa mawari taiyame pɨ'itiyani tsikeru mawariyari hepaɨ.
EZE 43:23 Kepauka 'ari 'aixɨa pemɨtiyurieni, xeime tsikeru muwaiyatɨarie meta xeime muxa 'uki 'aixɨa 'anekame pekanitimawamɨkɨta
EZE 43:24 Yawé hɨxie, meta mawari wewiwamete mekaniwati'unamakuni, mawari taiyariyari Yawé hetsiemieme mayanikɨ.
EZE 43:25 'Atahuta tukari pekaniwayetuayamɨkɨ, yuxexuime tsipuri xeitukaritsie, memɨwatimawakɨ 'axamɨti'ane hetsiemieme, meta xeime tsikeru meta muxa 'uki, mɨkɨ 'aixɨa me'anenekame.
EZE 43:26 'Atahuta tukari mawari wewiwamete mawari taiyame mepɨ'itieka, mɨpaɨ 'aixɨa mepiyurieka, mɨpaɨ tiyɨyu patsietɨ kanayeimɨkɨ.
EZE 43:27 Mɨkɨ 'atahuta tukari tixɨyu, 'atahairieka tukaritsie, 'ana xepɨyɨwaweni mɨkɨ mawari taiyametsie xemiwewieni mawari taiyariyari meta ketemɨteyuxewi mawariyari. Hikɨ ne 'ana nepɨxetanaki'erieni. Yawé mɨpaɨ kanaineni».
EZE 44:1 Mɨkɨ tewi kanenewitɨni kitenie herie miemetsie tukita, tau manatineika hepa meuwietsie, peru muwa katineunakaitɨni.
EZE 44:2 Yawé mana mɨpaɨ kanetiniutahɨawe: «'Ikɨ kitenie katineunakamɨkɨ, pɨkaheuyepiyani, nixewitɨ mana pɨkaheutahani. Pɨreunaka mana meutahakɨ Yawé 'ixaheritsixi wakakaɨyari.
EZE 44:3 Ti'aitame xeikɨa kaniyɨweni kitenie 'aurie mayerɨni mɨtikwanikɨ Yawé hɨxie. Kitenie xamaru meukuwewiyata kaneutahamɨkɨ, meta yu'utɨma kanayenemɨkɨ».
EZE 44:4 Hikɨta tewi kanenewitɨni kitenie tayeta hepatsie, tuki hɨxie tekaniuyekɨne. Kepauka nemunierixɨ Yawé xawatɨriyaya tukita kanihɨnekaitɨni, hikɨ kwiepa nekaniutihɨximakeni.
EZE 44:5 Hikɨ Yawé mɨpaɨ kanetiniutahɨawe: «Tewi pemunu'aya, waɨkawamekɨ keneu'ena. Kwi yemekɨ keneu'a'ɨwiya, tinaime ketineu'eni kenemɨmatitahɨawe 'aitsika hetsiemieme, meta 'inɨari niukiyari hepaɨtsita 'ikɨ tuki hetsiemieme. Keneu'a'ɨwiya yemekɨ kemɨ'ane tukita mepeutahakeni meta kemɨ'ane memɨkapitɨarieni.
EZE 44:6 »Mɨpaɨ ketiniwarayemari'itɨa mɨkɨ teɨteri 'ixaheritsixi memɨkaheu'enana, kename Yawé naimekɨmɨyɨwe mɨpaɨ nehaine: “'Ixaheri teɨteriyari, 'ariri kakaɨyarixi memɨxani'eriwa xekeniwaruhayewa.
EZE 44:7 Xeme xepɨwarupitɨa netukita tewanarixi, yu'iyaritsie xitekiya 'inɨariyari memɨkahexeiya meta yuwaiyaritsie, netuki kapatsiekame memayeitɨanikɨ. Mexi'akuxi xeme 'ikwai xenetexatɨakai wiya meta xuriya, mɨpaɨ xeyɨatɨ netɨratu 'axa'itɨariekame xepayeitɨa 'axaxeteyurietɨ.
EZE 44:8 Xepɨkaheye'atɨa xeɨriya mɨpatsie, matsi pɨta tewanarixi xepɨwaruhɨritɨa tukita memɨte'uximayakakɨ.
EZE 44:9 Yawé naimekɨmɨyɨwe mɨpaɨ kanaineni: Xewitɨ teewatanaka netukita pɨkaheutahani yu'iyaritsie xitekiya 'inɨariyari mɨkahexeiya meta yuwaiyaritsie, meta pɨkayɨweni tsepa tewatanaka 'ixaheritsixi watsata muyeika.
EZE 44:10 »”Mekatenayukatuakuni 'axamemɨte'uyurikɨ, rewitsixi memɨnetsi'uku'eirikɨ kepauka 'ixaheritsixi meheuyexɨrieka hipame kakaɨyarixi memuwarayexeiyakaikɨ.
EZE 44:11 Mepɨyɨwawe netukita memɨte'uximayaka kitenie tehɨwemetekɨ xeikɨa, meta hakewa mɨreuyeweka netukita. Mɨkɨ tewaxi memɨwakwika mawari taiyariyari memakɨne, teɨteri memɨwayetuaya hipame mawarite, mɨkɨ mepɨyuwaɨriyani teɨteri wahetsiemieme memɨte'uximayakakɨ.
EZE 44:12 Peru neri nemamá nekananukuhana wahetsiemieme, memɨte'uta'uximayataxɨkɨ 'ixaheritsixi wahetsiemieme kakaɨyarixi kepauka memɨwarayexeiyakai, meta memɨwarekaxɨrikɨ, 'axamemɨte'uyurikɨ mekatenayukatuakuni. Ne Yawé, mɨpaɨ nekanaineni.
EZE 44:13 'Ahurawa memakɨne mepɨkayɨwaweni mawari wewiwamete meneteta'uximayatsirienike, meta nepiinite mɨtipatsietɨka memɨtekumaɨwanikɨ meta matsi mepɨkayɨwawe waɨkawa mɨtipatsietɨka memɨtekumaɨwani. Mekaniyutitetewiyakuni 'axamemɨte'uyurikɨ kakaɨyarixi wahekɨ.
EZE 44:14 Nekaniwahɨritɨamɨkɨ xeikɨa tuki memɨ'ɨwiyanikɨ, meta muwa kemɨti'uximayatsie.
EZE 44:15 »”Matsi xeikɨa mepɨneteta'uximayatsirieni mawari wewiwametekɨ rewitsixi Tsaruki nuiwarimama, mɨkɨ mepɨnete'uximayatsiriekai netukita kepauka 'ixaheritsixi memɨnetsi'uku'eiri, nehɨxie mekaniti'uikuni wiya menetsixatɨanike meta xuriya. Ne Yawé naimekɨmɨyɨwe mɨpaɨ nekanaineni.
EZE 44:16 Mɨkɨ xeikɨa netukita mekaneutahaxɨakuni meta mekaniyɨwaweni hurawa memakɨne nemexatsie meneteyetuirienike, meta mɨkɨ 'uximayatsika nehetsiemieme mepɨhɨritɨarieka.
EZE 44:17 Kepauka takwa 'upaitɨ mɨyemata memeutahakeni, rinu kamixayari mepanakatɨkɨni. Kepauka takwa 'upaitɨ memɨte'uximayaka, yatɨni tukita, muxa kamixayari mepɨka'anakatɨkɨni.
EZE 44:18 Rinu xikuriyarikɨ yumu'utsie mepanayɨkɨhɨatɨkani, waweruxi 'etsimɨnene yaxeikɨa rinu 'ixurikiyari pɨhɨkɨtɨni. Tixaɨtɨkɨ mepɨkatehayuhɨatɨkani me'utikwaxiyanikɨ.
EZE 44:19 Kepauka takwa hutarieka miemetsie memanuyekɨne teɨteri memanu'uwatsie, yukamixate mepɨte'anutihɨnani memɨte'uximayakatsie memenakatɨkɨkai, muyepatsieta mekaniku'eirikuni. Manata hipame yukamixate mepɨte'anakatɨkɨni, kapa yukamixatekɨ teɨteri 'aixɨa mewaruyurienikɨ.
EZE 44:20 »”Kepauka memuyukaxikani yemekɨ mepɨkayukametseriyani, peru kwinimieme mepɨka'akatɨni, matsi yakɨmepakatɨni.
EZE 44:21 »”Nixewitɨ mawari wewiwame winu pɨka'ieka takwa 'upaitɨ miemetsie 'uyeikatɨ.
EZE 44:22 »”Wiuraxi mepɨkawarutiwitɨkɨni yatɨni 'eiriyakate, pɨyɨwe xeikɨa xeime mutiwitɨni 'ixaheri nu'aya 'ɨimari, yatɨni xeime mawari wewiwame wiuraya.
EZE 44:23 »”Xepɨtewa'ɨkitɨaka neteɨterima memimaikakɨ tita mɨtipatsie meta mɨkatipatsie hepaɨtsita, wahɨxie yaxeketeneyurieka memeitimanikɨ tita mɨti'itiya meta mɨkati'itiya.
EZE 44:24 »”Tsepa tita 'uximatɨarikatsie, mawari wewiwamete mepɨte'uximayaka 'itsɨkate wahepaɨ, 'aixɨa mepɨteyurieni ne'aitsika mexeiyatɨ. Naime ne'ixɨarari matineikatsie mepexeiyani ne'aitsika meta ne'inɨari niukiyari, meta xawatikɨ tukariyari mepɨkahatɨtɨmaiyani, mɨkɨ tukarite mɨpatsietɨka pɨhɨkɨ.
EZE 44:25 »”Mawari wewiwame timɨkime 'aurie pɨka'uyeikani, ka'itiyatɨ mɨkahayuyeitɨwanikɨ. Pɨyɨweni xeikɨa ka'itiyatɨ mayuyeitɨanikɨ xɨka paapayatɨni, maamayatɨni, xɨka nu'ayatɨni 'uki yatɨni 'uka, xɨka 'iwayatɨni, yatɨni 'iwaya xɨka kawikieka.
EZE 44:26 Xɨka ka'itiyatɨ 'ayani, ke'uyu'itieni, manata 'atahuta tukari puyuta'ɨwiya.
EZE 44:27 Kepauka makunuani takwa 'upaitɨ mɨyemata tukita mɨtita'uximayatakɨ, katinitimawamɨkɨ 'axamɨti'ane hetsiemieme mawari kaniwewimɨkɨ. Yawé naimekɨmɨyɨwe mɨpaɨ kanaineni.
EZE 44:28 »”Mawari wewiwamete nitixaɨtɨ mepɨkateyetuiriyarieni, ne wahetsiemieme nemɨhɨkɨkɨ. Xeme nitixaɨtɨ xepɨkatewayetuirieni wapiini mɨrayanikɨ 'Ixaheri kwieyaritsie. Neri wahetsiemieme nekanihɨkɨtɨni.
EZE 44:29 Mɨkɨ mepitikwani hatsi mawariyari meta tewaxi memukukwikwiwa 'itiya mawariyari mayanikɨ, meta mɨrayukatuani mawariyari mayanikɨ. Metatsiere tinaime 'ixaheritsixi memɨteyetuaya, Yawé hetsiemieme mɨkɨ wahetsiemieme katinayeimɨkɨ.
EZE 44:30 Meta mekatenanupikuni 'ikwaxi mexɨakametsie timieme, meta naime 'imikierite xeme xemɨteyetuaya. Xekaniwayetuiriekuni mawari wewiwamete paa memexeiyanikɨ, yutɨxi 'aixɨa mɨ'ane. Mɨpaɨ 'aixɨa xepɨ'itɨarieka xemakutetɨkatsie.
EZE 44:31 Mawari wewiwamete mepɨkatewakwa'ani, memɨte'awɨwawe yatɨni yeutari mekwikwi'ime, meta xɨka hetaxeiyarieni 'ɨrawe 'itexierieya.
EZE 45:1 »”Kepauka memɨyetuiriyarieni kwie 'inɨarikɨ, xeime kwie yayeukame mekanihayewakuni, Yawé hetsiemieme patsietɨ kanayeimɨkɨ. Mɨkɨ kwie mɨpatsie tamamata heimana huta miriyari heimana 'auxɨwi tsienituyari (12.500) meturuyari pɨtewini meta tamamata miriyari (10.000) meturuyari 'atayeutɨ. Mɨkɨ naitɨ kwie pɨpatsieka.
EZE 45:2 Mɨkɨ hetsie pɨhayewire tuki hetsiemieme mayanikɨ, huta tsienituyari heimana huta tewiyari heimana tamamata (250) meturuyari yaxeikɨa heutatetewatɨ naitsata. Metatsiere mɨkɨ warita pahayewiretɨyani, xeitewiyari heimana 'auxɨwi meturuyari 'atayeutɨ.
EZE 45:3 Mɨkɨ kwie xemihayewaxɨtsie xepikunani, tamamata heimana huta miriyari heimana 'auxɨwi tsienituyari (12.500) meturuyari tewime meta 'auxɨwime miriyari (5.000) meturuyari 'atayeume, mana kaniuwemɨkɨ tuki, mana pɨti'aneni Waɨkawa Makupatsie.
EZE 45:4 Mɨkɨ kwie mɨpatsie mawari wewiwamete wahetsiemieme kanayeimɨkɨ, tukita memɨte'uximaya meta Yawé hɨxie hurawa memukɨka. Mana mepɨyutikiitɨani meta Yawé tukieya mepɨtawewieni.
EZE 45:5 Metatsiere, rewitsixi tukita memɨte'uximaya mekanikunamiyariekuni, tamamata heimana huta miriyari heimana 'auxɨwi tsienituyari (12.500) meturuyari tewime meta 'auxɨwime miriyari (5.000) meturuyari 'atayeume, yukiekari memeixeiyanikɨ mana memɨtitenikɨ.
EZE 45:6 Kiekari mayani kwieyari kanikunamiemɨkɨ, tuki kwieyari 'aurie kanikumarimɨkɨ, huta miriyari heimana 'auxɨwime tsienituyari (2.500) meturuyari 'atayeutɨ, meta tamamata heimana huta miriyari heimana 'auxɨwi tsienituyari (12.500) meturuyari tewime. Mɨkɨ kwie yunaitɨ 'ixaheritsixi wahetsiemieme payani.
EZE 45:7 »”Ti'aitame kwie pɨxatɨarieni, tuki kwieyari 'aurie meta kiekari mayani 'aurie. Tau makayuyuipike hepa haramara hepatsie kaneukayunekaitɨni, tau manatineika hepa Kurutani hepatsie kaneukayunekaitɨni. 'Ikɨ kwie yaxeikɨa pɨyeuka hipame nuiwarite wakwie kemɨyeyeu.
EZE 45:8 Mɨkɨ kwie hetsiena mieme pɨhɨkɨtɨni 'Ixaheri kwieyaritsie, mɨpaɨri 'ana te'aitamete nemɨwa'uitɨani tawarita teɨteri 'axamepɨkawayurieni, matsi mepɨwahayewa nuiwarite yukwietsie memu'uwanikɨ.
EZE 45:9 »”Yawé naimekɨmɨyɨwe mɨpaɨ kanaineni: 'Ariri xeketeneuhayewa. 'Ixaheritsie te'aitamete. Xeketeneuhayewa 'axaxeteyurietɨ meta xetenawatɨwetɨ. 'Aixɨa'anemekɨ meta heitseriemekɨ xekeneu'uwani. Xeketeneuhayewa neteɨterima xetewanawatsirietɨwetɨ. Yawé mɨpaɨ kanaineni.
EZE 45:10 Ti'inɨnɨatame 'aixɨa mɨ'anene xepexeiyani, mɨranuyewɨwɨtɨwa meta 'inɨari 'aixɨa reuku'inɨatsietɨkaime.
EZE 45:11 Piinite hetsiemieme meta mɨtihaxikitɨka hetsiemieme yaxeikɨa 'inɨari 'aneme mepexeiyani. Huta tsienituyari heimana xeitewiyari rituruyari pexeiyani, meta piti'inɨata tamamata mexɨa, xeitsienituyari payani.
EZE 45:12 Kemɨrahete 'inɨariyari: 'Auxɨwi kiruyari yaxeikɨa pɨ'aneni meta piti'inɨata huta tewiyari heimana tamamata paɨmexɨa xeimiriyari payani.
EZE 45:13 »”'Ikɨ kanihɨkɨtɨni 'imikierite kexemɨteyetuayani: tɨriku meta tsewara mɨkɨ haika tewiyari mexɨa xepitixeɨrieni yaxeikɨa nenekame, mɨkɨ xeime xepɨnetsi yetuirieni 'imikieri mayanikɨ.
EZE 45:14 Meta hatseiti hetsiemieme, xeitsienituyari rituruyaritsie, xeirituruyari xepɨnetsiyetuirieni 'imikieri mayanikɨ.
EZE 45:15 »”Muxatsi wahepaɨtsita, huta tsienituyaritsie xeime xepɨyetuani memɨtekwatɨwe witsimɨtiu'anetsie 'Ixaheri kwieyaritsie. Mɨkɨ hatsite 'imikieriyari matɨa putimawarɨwani, meta mawari taiyariyari meta 'aixɨa memɨteyuxeiyanikɨ mawariyari, mɨpaɨ 'itiya mawariyari xepɨtewewieni wahetsiemieme —Yawé mɨpaɨ kanaineni—.
EZE 45:16 Yunaitɨ kiekatari 'Ixaheri kwieyaritsie yemekɨ kaneuyeweka, memɨteyetuayanikɨ 'ikɨ 'imikieri 'iya ti'aitame hetsiemieme.
EZE 45:17 'Ixɨarari matineikatsie, metsa manatiwautsetsie meta xawatikɨ, naime 'Ixaheri kiekariyari kepaɨmeme mexeiya 'ixɨarari, 'iya ti'aitame naime katiniyetuamɨkɨ mawari taiyariyari mɨrayani, hatsite 'imikieriyarite, kaxie winuyari mɨtiyeuriwa mawariyari. Metatsiere katiniyetuamɨkɨ 'itiya mawariyari hetsiemieme, hatsite 'imikieriyari, mawari taiyariyari meta 'aixɨa memɨteyuxeiyanikɨ mawariyari, meta 'ixaheritsixi memɨteheuyehɨwiyarienikɨ.
EZE 45:18 »”Yawé naimekɨmɨyɨwe mɨpaɨ kanaineni: Mexɨakame tukaritsie meta mexɨakame metseritsie xeime tsikeru 'aixɨa 'anekame pekanitimawamɨkɨ, 'itiyatɨ mayanikɨ tuki hetsiemieme.
EZE 45:19 'Itiya mawariyari hetsiemieme mawari wewiwame 'etsiwa xuriya panati'ɨni, 'etsiwa tuki kitenie mukawetɨkatsie pewiriexɨani meta mawari taiyametsie naukakɨa muta'etsikinatsie metatsiere takwa 'upaitɨ mieme kitenieyaritsie mukawetɨkatsie.
EZE 45:20 Yaxeikɨa pepɨtiyurieni 'atahutarieka tukaritsie mɨkɨ metseritsie, yunaime wahetsiemieme kemɨ'ane 'axamemɨte'uyuri mɨpaɨ mekateha'eriwatɨ. 'Ana mɨpaɨ tuki 'itiyatɨ kanayeimɨkɨ.
EZE 45:21 »”Tamamata heimana nauka tukaritsie mexɨakame metseritsie, Patsikwa 'ixɨarariyari pekaniwewimɨkɨ. 'Atahuta tukaritsie paa pekanikwakamɨkɨ kakuxanariyariekame.
EZE 45:22 Mɨkɨ tukaritsie ti'aitame xeime tsikeru kanitimawamɨkɨ, 'axamɨti'ane hetsiemieme meta yunaime teɨteri wahetsiemieme.
EZE 45:23 Meta naime tukaritsie, 'atahuta tukari 'ixɨarariyaritsie ti'aitame mawari taiyariyari Yawé hetsiemieme puwewieni 'atahuta tsikerutsixi meta 'atahuta muxatsi 'ukitsi. Metatsiere naime tukaritsie xeime tsipu putimawani 'axamɨti'ane hetsiemieme.
EZE 45:24 Meta hatsite 'imikieriyari pɨwewieni xeitewiyari kiruyari raheteme, meta hatseiti haika rituruyari heimana 'imeriyu xeime tsikeru hetsiemieme, meta muxa 'uki hetsiemieme heuyutinɨkame.
EZE 45:25 »”'Atahuta tukari 'ixɨarariyaritsie, tamamata heimana 'auxɨwi tukaritsie kanitsutɨni, 'ana ti'aitame yaxeikɨa tipaɨmeme katiniyetuayamɨkɨ 'axamɨti'ane mawariyari hetsiemieme mɨrayanikɨ, mawari taiyariyari meta hatsite mawariyari metatsiere hatseiti.
EZE 46:1 »”Yawé naimekɨmɨyɨwe mɨpaɨ kanaineni: 'Itupari tau manatineika hepatsie meuwie katineunakamɨkɨ mɨka'uxipiya tukaritɨnitsie, pɨreuyepierikenike xawatikɨ meta kepauka metsa hekwatɨ manatiwenitsie.
EZE 46:2 Ti'aitame kitenie xamaruyaritɨa kaneutahamɨkɨ, kitenie mutuika 'aurie pɨtakeni, hikɨ mawari wewiwamete mawari taiyariyari mepɨwewieni, meta 'aixɨa memɨteyuxeiyanikɨ mawariyari. Mana kitenie ti'aitame kwiepa kanitihɨximakemɨkɨ, hikɨ 'anake kananuyeyeimɨkɨ, 'ana kitenie pɨkareunare kepaukake mukutaikaire.
EZE 46:3 »”Xawatikɨ meta kepauka metsa mɨhekwani teɨteri 'ena kwiepa memɨtama Yawé hɨxie mepɨkahɨxima'uni, mana mɨkɨ kitenietsie.
EZE 46:4 Mawari taiyariyari ti'aitame, Yawé mɨtitimawirieni xawatikɨ 'ataxewime muxatsi 'etsimemɨpepe meta xeime muxa 'uki, mɨkɨ meyunaitɨ nixewitɨ pɨkatikuyeni.
EZE 46:5 Hatsi mawariyari pɨhɨkɨtɨni xeitewiyari kiruyari, xeime muxa 'uki hetsiemieme, peru muxatsi 'etsimemɨpepe wahetsiemieme tsepa kepaɨmeme. Hatsi xeitewiyari kiruyaritsie hatseiti haika rituruyari heimana 'imeriyu mepanutinɨitɨani.
EZE 46:6 Metsa hekwatɨ manatiwenitsie pitimawa xeime tsikeru, me'ataxewime muxatsi 'etsimemɨpepe meta xeime muxa 'uki, yunaitɨ mɨkɨ mekatekukuyeme.
EZE 46:7 Tsikeru hetsiemieme xeitewiyari kiruyari hatsi pɨtimawa, meta muxa 'uki hetsiemieme. Muxatsi 'etsimemɨpepe wahetsiemieme tsepa kepaɨmeme hatsi muyuri, peru hatsi xeitewiyari kiruyaritsie haika rituruyari heimana 'imeriyu hatseiti pɨyɨni.
EZE 46:8 »”Kepauka ti'aitame meutahani, kitenie xamaruyaritɨa kaneutahamɨkɨ, meta yaxeikɨa muwa kanayenemɨkɨ.
EZE 46:9 Peru kepauka teɨteri Yawé hɨxie memɨti'uni 'ixɨarari matineikatsie, kemɨ'ane meutahani kitenie tayeta miemetsie tukita hetitunumakenike, kitenie tatsutɨa miemetsie pɨta kanayenemɨkɨ, kemɨ'aneta tatsutɨa miemetsie meutahani tayeta miemetsie pɨta kanayenemɨkɨ. Nixewitɨ hakewa meutaha muwata pɨkahayeneikani, matsi hɨxiena pɨta kanayenemɨkɨ.
EZE 46:10 Ti'aitame pɨwanɨka kepauka teɨteri memeutahaxɨani meta kepauka memɨwayekɨne.
EZE 46:11 'Ixɨarari matineikatsie kemɨre'inɨari, tsikeru hetsiemieme xeitewiyari kiruyari hatsi pɨyɨni, meta muxa 'uki hetsiemieme yaxeikɨa. Muxatsi 'etsimemɨpepe wahetsiemieme tsepa kepaɨmeme hatsi muyuri, peru hatsi xeitewiyari kiruyaritsie haika rituruyari heimana 'imeriyu hatseiti pɨyɨni.
EZE 46:12 »”Kepauka ti'aitame kemɨtiyuwaɨriya mawariyari mɨyetuani Yawé hetsiemieme, tsepa mawari taiyariyari yatɨni 'aixɨa memɨteyuxeiyanikɨ mawariyari, mɨkɨ pɨreuyepiyarieni kitenie tau manatineika hepa meuwietsie, piwewieni yumawari taiyariyari yatɨni memɨyuxewinikɨ mawariyari, yaxeikɨa kemikuyuruwa xawati tukariyaritsie. Hikɨ 'arike kaniwayeyeimɨkɨ, kwitɨta 'utɨana katineunarimɨkɨ.
EZE 46:13 »”Ximeri mawari taiyariyari peputiwewiwani Yawé hetsiemieme, xeime muxa xeiwiyari hexeiyakame katikuyeme.
EZE 46:14 Meta yaxeikɨa pepitimawani ximeri hatsi mawariyari 'atahuta kiruyari, meta hatseiti xeirituruyari, hatseiti harinatsie panutituare. Mɨkɨ mawari Yawé hetsiemieme pɨhɨkɨtɨni, yamɨtiutiwewiwani, 'aitsika yemekɨ kanihɨkɨtɨni.
EZE 46:15 Hikɨ kaniutiwewiwamɨkɨ ximeri, mawari taiyariyari yareuyuhanemekɨ, muxa, hatsi mawariyari meta hatseiti mawariyari.
EZE 46:16 »”Mɨpaɨ kanaineni Yawé naimekɨmɨyɨwe: Xɨka ti'aitame yuniwe tiumini yupiinitɨarika, mɨkɨ piinitɨarika mɨkɨta niwemama wapiini katinayeimɨkɨ, mɨkɨ wapiini mɨtihɨkɨkɨ.
EZE 46:17 Peru xɨka yupiinitɨarika tiyu'uximayatsiriwame tiumini, mɨkɨ hetsiena pɨtimiemetɨni peru kepauka mɨxɨnarieni, 'ana pɨtiyetuani. Ti'aitame mɨtipiinieya mɨkɨta nuiwarimama katiniwapiinitɨni.
EZE 46:18 Ti'aitame teɨteri tiwapiini pɨkatiwanawairieni, meta tita mɨtiwapiini pɨkatiwakunamirieni. Yuniwema pɨtiwayetuirieni tita mɨrexeiya xeikɨa, mɨpaɨ pɨ'aneni nixewitɨ neteɨterima yupiini pɨkatinawaiyarieni”».
EZE 46:19 Hikɨ tewi kanenewitɨni kitenie 'aurie, kii tayeta meutineniereta mawari wewiwamete wahetsiemieme mɨpatsie xeikɨa. Mana teti'utɨ kaneniuxeiyatsitɨani 'upaitɨ kemɨtiuye'anekai, tau makayuyuipike hepatsie.
EZE 46:20 Hikɨ mɨpaɨ kanetiniutahɨawe: «'Uwa katini'aneni hakewa mawari wewiwamete wai memuka'etsani, 'itiya mawariyari mayanikɨ, meta mɨrayukatuani mawariyari mayanikɨ. Metatsiere muwa puka'etsarɨwani hatsi mawari mayeitɨarie. 'Ikɨ mɨya pɨti'ane takwa hutarieka miemetsie memɨkate'anuyepinenikɨ, teɨteri mɨtipatsietɨka mete'utimayɨanikɨ».
EZE 46:21 Hikɨ kanenewitɨni takwa hutarieka miemetsie, kaneniuxeitsitɨani naukakɨa 'etsikinatsie. Naukakɨa 'etsikinatsie takwa 'etsiyeyeume nepuxei.
EZE 46:22 Naukakɨa muta'etsikinatsie takwa pukumanekai kurarutɨiyarietɨkaitɨ, naitɨ yaxeikɨa puyeyeukai, xeitewiyari meturuyari pɨtɨkai meta tamamata heimana 'auxɨwi 'atayeyeutɨ.
EZE 46:23 Mɨkɨ mɨnauka takwa, yuwarita pexeiyatɨkatei kuraru 'a'atitetewakame, hikɨ naitsarie mahanetsie kuraru yuhetɨa nanaiyame pexeiyakai.
EZE 46:24 Hikɨ mɨpaɨ kanetiniutahɨawe: «'Ikɨ ti'etsamete kanihɨkɨtɨni 'uwa memɨteti'etsani tukita memɨte'uximaya teɨteri wamawarika».
EZE 47:1 Merikɨtsɨ tawarita 'iya tewi kanenewitɨni, tuki kitenie meutahanitsie, hikɨ mana nekanixeiya haa kitenie hetɨa hatineikame, tau manatineika hepatsie kaneutakukekaitɨni, tuki meutanieretsie. Haa tatsutɨa kanayeneikakaitɨni tuki tserieta, mawari taiyame manuwe tsutɨa kanatineikakaitɨni.
EZE 47:2 Hikɨ 'iya tewi kanenanuyewitɨni kitenie tayeta miemetsie, kuraru 'amatitewa warita paitɨ kanenawitɨtɨyani, kitenie warie miemetsie paitɨ tekaniu'axɨani tau manatineika hepa meutanieretsie, manata haa nekaniuxeiya kitenie hatineikame tatsutɨa hepatsie.
EZE 47:3 'Iya tewi kaneyani tau manatineika hepatsie kaunari ti'inɨnɨatame 'ahurietɨ, kani'inɨata 'auxɨwime tsienituyari meturuyari, hikɨ hapa kaneniuwitɨtɨyani newatutetsie paitɨ kaniuku'atɨyani.
EZE 47:4 Hikɨ tawarita kani'inɨata 'auxɨwime tsienituyari meturuyari manata kaneniuwitɨtɨyani, netunutetsie haa kaniuku'atɨyani. Tawarita kani'inɨata 'auxɨwime tsienituyari meturuyari, manata hapa kaneniuwitɨtɨyani haa nemayuhɨayatsie kaniuku'atɨyani.
EZE 47:5 Tawarita kani'inɨata 'auxɨwime tsienituyari meturuyari, peru manari haa 'apɨtimariwekai neri mana nemuyani nepɨkayɨwekai. Haa 'apupakai 'uhauximetɨ xeikɨa manuyani pɨyɨwekai.
EZE 47:6 Hikɨ mɨpaɨ kanetiniuta'iwawiya: «¿Tewi pemunu'aya, petiunierixɨ?» Hikɨ 'ana hatetsita kanenewitɨni,
EZE 47:7 hikɨ mana nenuaka nekanixeiya haa mata'atɨkatsie 'iteɨrite waɨkawa ti'iteɨtsiekame.
EZE 47:8 Manata mɨpaɨ kanetiniutahɨawe: «'Ikɨ haa tau manatineika hepa kaneutayuneni, 'Arawa paitɨ kaneutayuneni, mɨkɨ haa Haramara Mɨmɨkitsie paitɨ kaneukayunimɨkɨ. Kepauka mɨkɨ haa haramaratsie mɨye'ani, mɨkɨ haa hakakatɨ kanayeimɨkɨ.
EZE 47:9 Tsepa kemɨreukuke 'ikɨ haa, titamexi mana memɨteye'uwani mepayeyuyurini. Tsapari 'ikɨ hatsie yumɨiretɨ mekanitixuawerikuni 'ikɨ haa ma'utsiwi haa makaka mayeitɨwakɨ, meta kehate mana memɨteye'uwani mekanayeyuyurikakuni.
EZE 47:10 Hatetsita mekaniuka'uikuni ketsɨteweiyamete, 'Enikari mɨrayetewatsie meta 'Enekɨrahini, muwa hatetsita mɨyɨwenikɨ yuwipi memɨtiwatsiɨxa. Tsapari mana yumɨiretɨ mepuxuaweni haramara Meritexaniyu hepaɨ.
EZE 47:11 Harakuna mɨyemanetukatsie meta haxu 'amuyeyeyeu haa makaka pɨkahexeiyani, 'una nenetɨwame xeikɨa pɨhɨkɨtɨni.
EZE 47:12 Hatetsita waɨkawa 'iteɨrite pɨtitiwawere 'ikwaxi muxuaweriyawe, waxawari hatsuaku pɨkahetiyɨnare, meta 'ikwaxi yapɨtixuaweni. Xeimetseri 'anukayeikakaku 'ikwaxi hehekwatɨ pɨkayaxikeni, mɨkɨ haa mihatuiya tukita mayeneikakɨ. Wa'ikwaxi pɨ'ikwaitɨni meta xawariyarita pu'uayetɨni.
EZE 47:13 »Yawé naimekɨmɨyɨwe mɨpaɨ kanaineni: 'Ikɨ kanihɨkɨtɨni kwie hakewa meye'atɨkani, memɨyetuiriyarieni tamamata heimana huta nuiwari 'Ixaheri niwemama, peru kaneuyeweka Kutse hetsiemieme hutame kwie xemɨyetuanikɨ.
EZE 47:14 Xetutsima mɨpaɨ nekatiniwarutahɨawe, kename 'ikɨ kwie newayetuirienikekai. Hikɨ 'ayumieme xeme xeyunaitɨ yaxeikɨa yeyeume xekanita'axixɨakuni, 'ikɨ kwie mɨxehetsiemiemekɨ.
EZE 47:15 »Kwie kaniye'atɨkaikamɨkɨ, tayeta hepatsie, kanitsutɨkamɨkɨ haramara Meritexaniyutsie, Heturuni kiekariyaritsie 'uyehanetɨ meta Tserari 'aye'aximetɨ, 'ikɨ kani'inɨaritɨkamɨkɨ kwie maye'atɨkani:
EZE 47:16 Kamati kiekariyari, Weruta, Tsiwɨrahini —Ramatsiku meta Kamati wahixɨapa mɨyema kiekari— meta Katsaxi-'Atikuni, Kahurani 'aurie mukuma.
EZE 47:17 Mɨpaɨ katinihuimɨkɨ kwie maye'atɨka tayeta mieme, kanitsutɨkamɨkɨ haramara Meritexaniyutsie meta 'ukanieretɨ Katsaxi-'Enahani. Kamati kwieyari meta Kahurani mɨkɨ yeta paitɨ pɨtinake.
EZE 47:18 »Tau manatineika hepatsie, kwie maye'atɨkani 'Ixaheri kwieyari katini'anemɨkɨ, 'anutaɨyeta Kahurani kwieyari, Ramatsiku, meta Karaha, Kurutani hatɨayari pɨ'inɨaritɨni kemɨrehane, Tamari kiekariyaritsie paitɨ ye'atɨ, Haramara Mɨmɨki 'aurie mukuma, mɨpaɨ pɨreu'atɨkani tau manatineika hepatsie.
EZE 47:19 »Tatsutɨa hepatsie, kwie maye'atɨkani kanitsutɨkamɨkɨ, Tamaxi kiekariyaritsie meta Meriwa-Karetsi paitɨ, 'Ekipitu 'akiyari 'utɨa, haramara Meritexaniyutsie heukawetɨ. Mana pɨye'atɨkani kwie tatsutɨa hepatsie.
EZE 47:20 »Tau makayuyuipike hepatsie, kwie hakewa meye'atɨkani haramara Meritexaniyu pɨ'inɨariyaritɨni, tatsutɨa mieme manuka'axetsie katsutɨtɨ 'atsita mukuweritsie paitɨ Rewu-Kamati. Mɨpaɨ pɨreu'atɨkani kwie tau makayuyuipike hepatsie.
EZE 47:21 »Xeme xepɨyuti'inɨatsirieni 'ikɨ kwie tamamata heimana huta nuiwari, 'Ixaheri niwemama xemɨhɨkɨ.
EZE 47:22 Xeme xepitawiyaxɨani 'inɨari xewewietɨ xeyunaitɨ, metatsiere tewanarixi xetsata memu'uwa, meta tɨɨri memɨwarayexei, yaxeikɨa mepɨtematiwani 'ixaheritsixi wahepaɨ mana memutinunuiwaxɨkɨ. 'Ayumieme mɨkɨ tewanarixi yaxeikɨa kwie mepɨyetuiriyarieni 'Ixaheri nuiwarimama watsata.
EZE 47:23 Mɨkɨ teewatanaka hakewa mekani kemɨ'ane nuiwaritsie, mana kwie pɨyetuiriyarieni. Yawé naimekɨmɨyɨwe mɨpaɨ kanaineni.
EZE 48:1 »'Ikɨ nuiwarite kememɨtetetewa mekanihɨkɨtɨni, tayeta hepatsie metsutɨtɨ meta Rani nuiwarieyatsie, tau manatineika tsutɨtɨ meta makayuyuipike ye'atɨkaitɨ, mɨpaɨ pɨreu'atɨkani haramara Meritexaniyutsie, meta Heturuni kiekariyaritsie, metatsiere Rewu-Kamati meta Katsaxi-'Enahani kiekariyaritsie, mɨkɨ Ramatsiku meta Kamati wahetɨa katini'aneni:
EZE 48:2 »Rani kwieyari hetɨa, tau manatineika tsutɨtɨ meta tau makayuyuipike ye'atɨkaitɨ, 'Atsexi kwieyari kanikumaka.
EZE 48:3 »'Atsexi kwieyari hetɨa, tau manatineika tsutɨtɨ meta tau makayuyuipike ye'atɨkaitɨ, Nepɨtahari kwieyari kanikumaka.
EZE 48:4 »Nepɨtahari kwieyari hetɨa, tau manatineika tsutɨtɨ meta tau makayuyuipike ye'atɨkaitɨ, Manatsexi kwieyari kanikumaka.
EZE 48:5 »Manatsexi kwieyari hetɨa, tau manatineika tsutɨtɨ meta tau makayuyuipike ye'atɨkaitɨ, 'Epɨrahini kwieyari kanikumaka.
EZE 48:6 »'Epɨrahini kwieyari hetɨa, tau manatineika tsutɨtɨ meta tau makayuyuipike ye'atɨkaitɨ, Xuweni kwieyari kanikumaka.
EZE 48:7 »Xuweni kwieyari hetɨa, tau manatineika tsutɨtɨ meta tau makayuyuipike ye'atɨkaitɨ, Kura kwieyari kanikumaka.
EZE 48:8 »Kura kwieyari hetɨa kanikumaka kwie manayuhayewaxɨ, tau manatineika tsutɨtɨ meta tau makayuyuipike ye'atɨkaitɨ. Tamamata heimana huta miriyari heimana 'auxɨwi tsienituyari (12.500) meturuyari patayeuka, meta yaxeikɨa peukatetewani hipatɨ nuiwarite kemɨyeyeu. 'Ikɨ kwieyaritsie hixɨapa puweni tuki muyepatsie.
EZE 48:9 »Kwie xemikunani Yawé hetsiemieme, tamamata heimana huta miriyari heimana 'auxɨwi tsienituyari (12.500) meturuyari pɨtewini, meta tamamata miriyari (10.000) meturuyari 'atayeutɨ.
EZE 48:10 Mɨkɨ kwieyari makupatsie, mawari wewiwamete wahetsiemieme pukunamieni, tamamata heimana huta miriyari heimana 'auxɨwi tsienituyari (12.500) meturuyari patayeuka tayeta hepatsie meta tatsutɨa hepatsie 'auxɨwi miriyari (5.000) meturuyari patayeuka. Mɨkɨ hixɨapa tuki muyepatsie Yawé hetsiemieme pɨtawewiyani.
EZE 48:11 'Ikɨ kwie mawari wewiwamete memɨpatsie pɨwahetsiemiemetɨni, Tsaruki nuiwarimama, kepauka 'ixaheritsixi memɨnetsi'uku'eiri meta rewitsixi, mɨkɨ mepɨkanetsi'uku'eiri nehetsiemieme mepɨte'uximayakai.
EZE 48:12 'Ayumieme mawari wewiwamete kwie mepɨ'axe waɨkawa makupatsie Yawé kwieya mɨpatsie, rewitsixi wa'aurie.
EZE 48:13 Metatsiere rewitsixi kwie mepɨ'axe, tamamata heimana huta miriyari heimana 'auxɨwi tsienituyari (12.500) meturuyari 'ayetewime meta 'auxɨwi miriyari (5.000) meturuyari 'atayeume, mawari wewiwamete wakwie 'aurie. Naitɨ kwie manayuhayewaxɨ mɨpatsie tamamata heimana huta miriyari heimana 'auxɨwi tsienituyari (12.500) meturuyari pɨtewini meta tamamata miriyari (10.000) meturuyari 'atayeutɨ.
EZE 48:14 Mɨkɨ kwie manayexeiyariekɨ mɨkɨ kwieyaritsie, mituani pɨkayɨweni, meta mipata, metatsiere xeime muxatɨani, mɨpatsiekɨ Yawé hetsiemieme.
EZE 48:15 »Kwie manayuhayewaxɨ tamamata heimana huta miriyari heimana 'auxɨwime tsienituyari (12.500) meturuyari tewitɨ meta huta miriyari heimana 'auxɨwi tsienituyari meturuyari 'atayeutɨ, mɨkɨ kwie pɨkapatsieka. Kiekatari wahetsiemieme pɨhɨkɨtɨni, mana kii mɨtiwewiyanikɨ, meta 'ɨxa maka'etsiwatsie mayanikɨ. Kiekari hixɨapa pɨyemaka,
EZE 48:16 huta miriyari heimana huta tsienituyari heimana huta tewiyari heimana tamamata (2.250) meturuyari pexeiyani tayeta hepatsie, yaxeikɨata tatsutɨa hepatsie, tau manatineika hepatsie meta makayuyuipike hepatsie.
EZE 48:17 'Ɨxa ma'etsietɨkani kiekari warita, mɨkɨ xeitsienituyari heimana xeitewiyari heimana 'auxɨwi meturuyari patayeuka.
EZE 48:18 Kiekari warita puyuhayewa kwie, kwie mɨpatsie Yawé hetsiemieme 'aurie, mɨkɨ 'auxɨwi miriyari meturuyari pexeiyani tau manatineika hepatsie meta yaxeikɨa makayuyuipiketsie. Naitɨ mana mɨtiutixuxuawereni mɨkɨ kiekaritsie te'uximayatamete pɨtiwa'ikwaitɨni.
EZE 48:19 Kiekaritsie te'uximayatamete mepika'etsani, tsepa kemɨ'ane nuiwaritsie memɨmiemetetɨni.
EZE 48:20 Naitɨ kwie mɨpatsie meta kiekaritsie mieme, naitɨ mɨkɨ yaxeikɨa heutatetewatɨ payani, tamamata heimana huta miriyari heimana 'auxɨwi tsienitiyari (12.500) meturuyari heutatetewatɨ.
EZE 48:21 »Kwie muyuhayewa naitsata kwie mɨpatsietsie meta kiekaritsie mieme, mɨkɨ 'iya mexɨakame hetsiemieme kanayeimɨkɨ. Mɨkɨ hetsiena mieme payani kwie tamamata heimana huta miriyari heimana 'auxɨwi tsienituyari (12.500) meturuyari tau manatineika hepatsie, kwie manuye'atɨkatsie, meta yaxeikɨa paɨmetɨ tau makayuyuipiketsie, kwie maye'atɨkatsie. Mɨkɨ kwie teikɨ pɨta panutihini hipame wahepaɨ pɨ'aneneni. Hixɨapa kwie mɨpatsie pɨyemaka meta tuki muyepatsie.
EZE 48:22 Yaxeikɨata rewitsixi wakwie meta kiekari kwieyari Kura kwieyari 'aurie pɨti'aneni meta Wenikamini, ti'aitame kwieya hixɨapa.
EZE 48:23 »Meta hipame nuiwarite wahetsiemieme, Wenikamini hetsiemieme, tau manatineika tsutɨtɨ meta tau makayuyuipike ye'atɨkaitɨ, hetsiena mieme payani.
EZE 48:24 »Wenikamini kwieyari hetɨa, Tsimehuni hetsiemieme pɨhɨkɨtɨni tau manatineika tsutɨtɨ meta tau makayuyuipike ye'atɨkaitɨ.
EZE 48:25 »Tsimehuni kwieyari hetɨa, 'Itsakaxi hetsiemieme pɨhɨkɨtɨni, tau manatineika tsutɨtɨ meta tau makayuyuipike ye'atɨkaitɨ.
EZE 48:26 »'Itsakaxi kwieyari hetɨa, Tsawuruni hetsiemieme pɨhɨkɨtɨni, tau manatineika tsutɨtɨ meta tau makayuyuipike ye'atɨkaitɨ.
EZE 48:27 »Tsawuruni kwieyari hetɨa, Kahari hetsiemieme pɨhɨkɨtɨni, tau manatineika tsutɨtɨ meta tau makayuyuipike ye'atɨkaitɨ.
EZE 48:28 »Kahari hetɨa, tau manatinekai hepa tsutɨtɨ meta manukayuyuipike hepa, manuye'atɨka pɨhɨkɨtɨni Tamaxi kiekariyaritsie tsutɨtɨ, manata Meriwa-Karetsi meta 'Ekipitu 'akiyaritsie, manata haramara Meritexaniyutsie.
EZE 48:29 »'Ikɨ kwieyari kanihɨkɨtɨni xeme xemitawiya 'inɨari xewewietɨ, 'Ixaheri nuiwaritemamatsie, mɨkɨ xehetsiemieme kanayeimɨkɨ. Mɨpaɨ mekateniyaxikuni 'ikɨ kwieyaritsie. Yawé naimekɨmɨyɨwe mɨpaɨ kanaineni.
EZE 48:30 »'Ikɨ kanihɨkɨtɨni kiekari kemɨreukitenie: »Tayeta hepatsie, huta miriyari heimana huta tsienituyari heimana huta tewiyari heimana tamamata (2.250) meturuyari kiekari peutatewani.
EZE 48:31 Kiekari kitenieyari pɨtetewaka, 'Ixaheri niwemama kememɨtetetewa. Tayeta haika kitenieyari pexeiyani: Xuweni, Kura meta Rewi.
EZE 48:32 »Tau manatineika hepatsie, huta miriyari heimana huta tsienituyari heimana huta tewiyari heimana tamamata (2.250) meturuyari kiekari peutatewani, muwata haika kitenieyari pexeiyani: Kutse, Wenikamini meta Rani.
EZE 48:33 »Tatsutɨa hepatsie, huta miriyari heimana huta tsienituyari heimana huta tewiyari heimana tamamata (2.250) meturuyari kiekari peutatewani, muwata haika kitenieyari pexeiyani: Tsimehuni, 'Itsakaxi meta Tsawuruni.
EZE 48:34 »Tau makayuyuipike hepatsie, huta miriyari heimana huta tsienituyari heimana huta tewiyari heimana tamamata (2.250) meturuyari kiekari peutatewani, muwata haika kitenieyari pexeiyani: Kahari, 'Atsexi meta Nepɨtahari.
EZE 48:35 »Mɨkɨ kiekari kuraruyari 'atanauka miriyari (9.000) meturuyari pexeiyani. »Mɨkɨ tukaritsie kiekari mɨpaɨ pɨtitewaka:
DAN 1:1 Merikɨtsɨ hairieka wiyari ti'aitame Kuhatsimi ti'aitakaku Kura kwieyaritsie, Nawukurunutsuxi Wawiruniyatsie ti'aitame, Kerutsareme kwieyaritsie nuaka kanikurarutɨiya.
DAN 1:2 Ti'aitame muyuawitsie makawe, Nawukurunutsuxi kaniupitɨani Kuhatsimi ma'iwakɨ meta miwiyakɨ. He'iwaka, Kakaɨyari tukieyata timieme piinite katinepinita yatipaɨmeme, Nawukurunutsuxi Wawiruniyatsie katinetɨni, mana yukakaɨyarixi watukita katineutapini.
DAN 1:3 Hikɨ ti'aitame, 'Atsipenatsi katiniuta'aitɨani te'uximayatamete wa'ukiyari hipame 'ixaheritsixi hɨxiena mɨwaranuwitɨnikɨ te'aitamete wanuiwari hetsiemiemete meta teɨteri wa'ukiyarima memɨhɨkɨtɨkai waniwema.
DAN 1:4 Temari mepɨhɨkɨtɨnikekai 'aixɨa memɨteyuxexeiya meta yuwaiyaritsie mekatekukuyeme, naime memɨtehetimanikɨ meyɨwaweme, metemaiwaweme meta paratsiyuta meteheuta'uximayatawaweme, mɨkɨ 'Atsipenatsi pɨtiwati'ɨkitɨanikekai wawiruniyutsixi waniukikɨ meta wa'utɨarikakɨ.
DAN 1:5 Ti'aitame tukarikɨ 'ikwai meta winu kaniwayetuiriwakaitɨni yumexatsie mieme. Mete'ɨkitɨarietɨ haika wiyari mekateneuterekekaitɨni, 'anake ti'aitame hɨxie mekatenita'uximayatakekaitɨni.
DAN 1:6 Mɨkɨ temari wahamatɨa mekanaye'ukaitɨni Tanieri, 'Ananiyaxi, Mitsaheri meta 'Atsariyaxi Kura kwieyaritsie kiekatari,
DAN 1:7 mɨkɨ te'uximayatamete wa'ukiyari kememɨtetetewakai kaniwarupatsirieni: Tanieri Werititsatsaxi katiniuterɨwa, 'Ananiyaxi Tsatɨraki katiniuterɨwa, Mitsaheri Metsaki katiniuterɨwa meta 'Atsariyaxi 'Awerineku katiniuterɨwa.
DAN 1:8 Matsi Tanieri pɨkayuwaɨri 'ikwaikɨ ka'itiyatɨ mayuyeitɨani meta ti'aitame winuyakɨ, 'ayumieme te'uximayatamete wa'ukiyari kaniutawawirieni waɨriyarika meka'itiyakame mɨkawarayeitɨwanikɨ.
DAN 1:9 Tsepanetɨ Kakaɨyari 'aixɨa mɨtiuyuriekai Tanieri hepaɨtsita, te'uximayatamete wa'ukiyari 'aixɨa mɨtixeiyakɨ,
DAN 1:10 mɨkɨ mɨpaɨ mɨti'aitɨariekaikɨ Tanieri mɨpaɨ katiniuta'eiya: «Neti'aitɨwame nepeumakaxe, mɨkɨtsɨ katiniuta'aita 'ikɨ 'ikwai xemɨkwakakɨ meta 'ikɨ kaxie winuyari xemɨ'iekakɨ. Xɨka ti'aitame kwinimieme petiwakime matsi'uxeiya, kehipatɨ temari 'ahepaɨ memɨyumate, 'ekɨtsɨ 'ahetsiemieme nekananutiwitekiemɨkɨ».
DAN 1:11 Te'uximayatamete wa'ukiyari xeime tihɨweme kaniuhɨritɨani Tanieri, 'Ananiyaxi, Mitsaheri, meta 'Atsariyaxi mɨwaxeiyanikɨ. Hikɨ Tanieri mɨkɨ tihɨweme hamatɨa katiniutixata mɨpaɨ katinitahɨawe:
DAN 1:12 «Neuxei ximɨxi nekamaniwawirieka, tame te'a'uximayatsiriwamete pepɨtatsita'inɨata tamamata tukari. Hatsite xeikɨa ketatinemikwani meta haa xeikɨa ketaneharitɨaka.
DAN 1:13 Mɨpaɨ paɨmexɨa tukari 'anukayayu, ketaneuxeiya ketaneu'inɨata 'iya temari 'ikwai 'aixɨa mɨ'ane memukwa'a wahamatɨa, 'ana kepemɨtatixeiya yapekanitayɨmɨkɨ».
DAN 1:14 Tihɨweme yakatiniutanaki'erieni kemɨtitahɨawixɨ meta tamamata tukari kaniwaruta'inɨata.
DAN 1:15 Haye'aku kepauka mɨwarutipiniriekai, 'ikɨ temari 'aixɨa mekateniyuxexeiyakaitɨni 'aixɨa memɨtekwaka hepaɨ, keyuri hipatɨ 'aixɨa ti'anekame memɨte'utikwa'akai.
DAN 1:16 Hikɨ tihɨweme 'ikwairi pɨkawarumi meta ti'aitame winuya, matsi hatsitekɨ xeikɨari katiniwamikwakaitɨni.
DAN 1:17 'Ikɨ temari yunaukatɨ, Kakaɨyari memɨtemaiwawenikɨ kaniwarupitɨani naime 'ɨkitsika memetimanikɨ 'utɨarika meta terɨwarika. Matsi Tanieri kaniyɨwekaitɨni meiti'enietɨyani heinɨtsika meta yɨkɨ xɨkatiunieritɨarieni.
DAN 1:18 Kepauka maye'a ti'aitame Nawukurunutsuxi kemutayɨ kemɨtiu'aitakai, te'uximayatamete wa'ukiyari hɨxiena kaniwa'atɨani.
DAN 1:19 Mana ti'aitame Tanieri, 'Ananiyaxi, Mitsaheri, 'Atsariyaxi wahamatɨa tiutixataka, tawarita nixeime pɨka'utaxei wahepaɨ 'aneme, 'ayumieme mɨkɨ yunaukatɨ hetsɨana mekateniuta'uximayata.
DAN 1:20 Ti'aitame kaniwaruti'iwawiya naime kememɨtemaiwawekai meta wa'inɨatanetɨ wahetsie kanikaxeiya tamamata mexɨa matsi kwinimieme mekatenimaiwawekaitɨni keyuri yunaitɨ memɨtemaiwawe meta memɨteyukewaiya mɨra'aitatsie memuxuawekai.
DAN 1:21 Mɨpaɨ tiuyɨku Tanieri Wawiruniyatsie kaniuyuhayewa 'atsita Tsiru ti'aitakaku mexɨakame wiyari.
DAN 2:1 Hutarieka wiyaritsie ti'aitatɨ, Nawukurunutsuxi yapaɨmexɨa katiniuheinɨni, mɨkɨkɨ waɨkawamekɨ kaniyu'iyaritɨakaitɨni meukuni pɨka'ipitɨakai.
DAN 2:2 Hikɨ katiniuta'aita temaiwawemete, mara'akate, memɨtehetimamateke meta muyuawitsie timieme memɨteyɨ'ɨkitɨa memɨyukuxeɨrienikɨ mɨra'aitatsie memɨtamakai, kemɨtiuheinɨkai memɨte'itaxatɨanikɨ. 'Ariri meyuxeɨriekaku ti'aitame hɨxie,
DAN 2:3 mɨkɨ mɨpaɨ katiniwarutahɨawe: ―Ne nepɨtiuheinɨ waɨkawa pɨnetsi'iyarimɨtsitɨa meta ne nepɨtimaimɨkɨ kehepaɨtɨtɨ mɨtiniumɨkɨ.
DAN 2:4 Muyuawitsie timieme memɨteyɨ'ɨkitɨa mɨpaɨ mekatenita'eiya: ―'Ekɨ ti'aitame 'aheyemekɨ peke'ayeniereni. 'Ena tekaniu'uwani temɨmate'uximayatsirie. 'Aheinɨtsika ketaneutaxatɨa, tameta kehepaɨtɨtɨ manuyɨne tekanitahekɨatakuni.
DAN 2:5 Peru Ti'aitame mɨpaɨ katiniwarutahɨawe: ―Neri 'ari yanekaniutayɨni: Xɨka kenemɨtiuheinɨ xekanetsi'utaxatɨani meta kehepaɨtɨtɨ mɨtiniumɨkɨ, ne nekatinita'aitamɨkɨ xemɨtiwitekiexɨanikɨ meta xekiite naxi mayeitɨarienikɨ.
DAN 2:6 Matsi xɨka kenemɨtiuheinɨ xenetsi'utaxatɨani meta xɨka xenetsi'utahekɨatɨani kehepaɨtɨtɨ manɨyɨne, ne waɨkawa 'imikierite nekatinixemimɨkɨ meta yanekatinita'aitamɨkɨ mariweme xemayeitɨariwanikɨ. 'Ayumieme hikɨri xekenetsutɨaka kenemɨtiuheinɨ xenetsikuxaxatɨwatɨ, manatari xekanenitahekɨatɨakuni kehepaɨtɨtɨ manuyɨne.
DAN 2:7 Muyuawitsie timiemekɨ memɨteyɨ'ɨkitɨa mɨpaɨ mekaniutiyuani: ―Matsi xɨka 'Ekɨ ti'aitame tame te'uximayatamete 'ahetsɨa miemete petatiutaxatɨani kepemɨtiuheinɨ, tame kehepaɨtɨtɨ manuyɨne tekanitahekɨatakuni.
DAN 2:8 Ti'aitame matsi mɨpaɨ katiniwaruta'eiya: ―Neri kenemɨtiyurieni 'ari yanekaniutayɨni. Xemeri mɨkɨ xekatenimaika, 'ayumieme xekanenikwewieka.
DAN 2:9 Xɨka kenemɨtiuheinɨ xekanetsi'utaxatɨani, xekatenimaika ketita mɨxetitakwewie. Xeme xekaniyu'enieni xemɨnete'itaiyakɨ meta 'axa'aneme xemɨnetsitaxatɨanikɨ. Xekeneneutaxatɨa kenemɨtiuheinɨ, 'ana mɨpaɨ nepɨretimani kename xeyɨwawe xemɨnetsitahekɨatɨanikɨ kehepaɨtɨtɨ manɨyɨne.
DAN 2:10 Hikɨ muyuawitsie timiemekɨ memɨteyɨ'ɨkitɨa mɨpaɨ mekatenita'eiya: ―Nixewitɨ tɨma 'ena kwiepa pɨka'uyeika 'Ekɨ ti'aitame kepemaine yamɨtiyurienikɨ. Hatsuaku ti'aitame xewitɨ mɨpaɨ pɨkarahɨaweni xeime mɨtimaiwe, tiyukewaiyame yatɨni muyuawitsie timiemekɨ memɨteyɨ'ɨkitɨa.
DAN 2:11 'Ekɨ ti'aitame kepemɨtatiwawirie pɨkayɨwe, nixewitɨ pɨkayɨwekaxɨani mɨmatsitahekɨatɨani, hɨrixɨa kakaɨyarixi. Peru mɨkɨ tahamatɨa mepɨka'u'uwa.
DAN 2:12 Ti'aitame waɨkawamekɨ kaniuyeha'ani muyuawitsie timiemekɨ memɨteyɨ'ɨkitɨa waniukikɨ kememɨte'itahɨawekai, katiniuta'aita temaiwawemete yunaitɨ Wawiruniyatsie memɨtamakai memɨkwi'iwakɨ.
DAN 2:13 Hikɨ xapa kaneutanɨ'ariexɨani temaiwawemete yunaitɨ memɨkwi'iwakɨ, yaxeikɨata Tanieri mɨtiwawienikɨ katiniuta'aita meta 'iwamama yunaitɨ memɨkwi'iwakɨ.
DAN 2:14 Kepauka ti'aitame kuyaximama tiwa'aitɨwame 'Arihuki mɨtitewakai, mayetɨa temaiwawete wawiruniyatari wakwinike, Tanieri kanitahɨawe waɨkawa timaiwemekɨ.
DAN 2:15 Mɨpaɨ katinitahɨawe: «¿Titayarikuta ti'aitame tiuta'aitaxɨ temaiwamete memɨkwi'iyanikɨ?» 'Arihuki matsi katinitaxatɨani ketitayari mɨya mɨtiuyuriekai,
DAN 2:16 Tanieri ti'aitame hetsɨa kaneyani, neitawawirieni mikwewienikɨ para heinɨtsikaya mitahekɨatɨirienikɨ.
DAN 2:17 'Ariketa yukiita kaninuani meta yuhamikuma katiniwarutaxatɨani 'Ananiyaxi, Mitsaheri meta 'Atsariyaxi kehepaɨtɨtɨ mɨtiyɨanekai.
DAN 2:18 'Ana kaniwarutawawirieni Kakaɨyari memɨtawawirienikɨ muwatinenimayatakɨ meta heinɨtsika mɨwatahekɨatɨanikɨ, mɨkɨ meta hamikumama wawiruniyatari temaiwawemete wahamatɨa memɨkakukwikwiwanikɨ.
DAN 2:19 Tɨkarikɨ, Tanieri kaniuxeitsitɨarieni kehepaɨtɨtɨ mɨtiniumɨkɨ heinɨtsika. Hikɨ Kakaɨyari 'aixɨa katiniutahɨawe muyuawitsie makawe
DAN 2:20 mɨpaɨ kaniutayɨni: «'Aixɨa kerahɨawarɨwani yuheyemekɨ Kakaɨyari kemɨtitewa. Kemɨtimaiweni meta tɨrɨkariya hetsɨana pɨmieme.
DAN 2:21 Mɨkɨ tukari pukupata naime kemɨtiyeyɨxime, pɨwaranuka'uitɨwa pɨwaranakaxɨrɨwa te'aitamete. Temaiwawemete memɨtemaiwawenikɨ pɨwapitɨa. Kwinie memɨteheutamaiwawe, memeitimaitɨkɨkanikɨ pɨwapitɨa.
DAN 2:22 Mɨkɨ meukatewatsie timieme pɨtihekɨata meta tita mɨti'awietɨ, yapɨtimate tita 'etɨripa mɨti'awietsie. Hetsiena hekɨariya pɨyeka.
DAN 2:23 'Ekɨ, ne'ukiyarima wakakaɨyari, nepɨmatsinɨawa meta pamɨpariyutsi nepɨmatsipitɨa. Nemɨtimaiwenikɨ pepɨnetsi'upitɨa meta tɨrɨkariya, pepɨnetsi'utahekɨatɨa tita temɨmate'utawawiri, pepɨnetsi'utahekɨatɨa ti'aitame heinɨtsikaya».
DAN 2:24 Hikɨ Tanieri 'Arihuki hetsɨa kaneyani, ti'aitame mɨtita'aitɨakai temaiwawemete muwakwinikɨ Wawiruniyatsie memɨtama, mɨpaɨ katinitahɨawe: ―Temaiwawete Wawiruniya kiekatari pepɨkawakukukuyani. Ti'aitame hɨxie kenenanuwitɨki, kemɨtiuheinɨ nekaneitahekɨatɨamɨkɨ.
DAN 2:25 Yapauka 'Arihuki Tanieri kanewitɨni ti'aitame hɨxie, mɨpaɨ katinitahɨawe: ―Kura kwieyaritsie memeyehapanie watsata xeime neputaxei yɨweme 'Ekɨ ti'aitame 'aheinɨtsika mɨtahekɨatakɨ.
DAN 2:26 Ti'aitame Tanieri kaniuta'iwawiya, wawiruniyatari Werititsatsaxi mekateniterɨwakaitɨni: ―¿Penetiutaxatɨawe neheinɨtsita tita nemɨtiuxei meta kehepaɨtɨtɨ manuyɨne?
DAN 2:27 Tanieri mɨpaɨ katinita'eiya: ―Xewitɨ 'ena timaiwetɨ pumawe, mɨtiyukewaiya, muyuawitsie timieme mɨtiyu'ɨkitɨa meta mɨretimamateke, 'Ekɨ ti'aitame titakɨ pemɨtiyu'iyaritɨa mɨmatsitahekɨatɨanikɨ.
DAN 2:28 Matsi xewitɨ Kakaɨyari 'akaniuyeikani mɨtihekɨatawe tita mɨti'awietsie. Mɨkɨ Kakaɨyari kametiniutahekɨatɨani kemɨtiyɨni tukarite 'umahutsie. Mɨpaɨ pekatiniuheinɨni meta mɨpaɨ pekatiniuniere 'ikɨ 'amu'utsie katiniye'ani mexi pekutsukai:
DAN 2:29 Muwa pemukahuputsie pekakaitɨ, 'ekɨ ti'aitame tukarite 'umahutsie pepɨtiuti'erietɨya, tita mɨti'awietsie mɨtihekɨatawe kametiniuxeitsitɨani kemɨtiyɨni.
DAN 2:30 Neta neputahekɨatsitɨiyarie, ne kwinimieme nemɨtimaiwekɨ keyuri kwiepa yunaitɨ memɨtama pɨkati'ane, matsi pɨta 'Ekɨ ti'aitame pemɨretimanikɨ kehepaɨtɨtɨ pemɨtiunierixɨ.
DAN 2:31 »'Ekɨ ti'aitame 'aheinɨtsita tewi pepɨxeiyakai wewiyakame kwinimieme 'utewime xawatɨme, pumariwekarekai xɨka 'ixeiya.
DAN 2:32 Tewi 'ɨkiyari mu'uya huru xeikɨa kanihɨkɨtɨkaitɨni, tawieya meta mamateya pɨrata xeikɨa pɨhɨkɨtɨkai, hukaya meta teuriteya wurunitse xeikɨa kanihɨkɨtɨkaitɨni,
DAN 2:33 'ɨkateya tepɨa kanihɨkɨtɨkaitɨni, yaxeikɨata tepɨa pɨhɨkɨtɨkai ketateya hixɨapa'atɨ, tapata hixɨapa'atɨ haxu taiyarietɨ kanihɨkɨtɨkaitɨni.
DAN 2:34 Yapauka 'Ekɨ ti'aitame mexi 'akuxi pe'ixeiyakai, muwa tete kanayeneni nixewitɨ muwa kahetahɨaku, tewi 'ɨkiyari 'ɨkayatsie kaniukaweni tepɨa meta haxu mɨhɨkɨtɨkai, 'etsipepetɨ kaneutanexɨani.
DAN 2:35 Naitɨ mɨkɨ tepɨa meta haxu tumuanari kanayani meta wurunitse, pɨrata metatsiere huru. Tewi 'ɨkiyari naitɨ tumuanari kanayani, kepauka tɨriku mutikatsiwatsie manuye'eke hepaɨ. 'Eka kaniukuyani tewi 'ɨkiyari naime kane'enitsitɨani, nitixaɨtɨ pɨkatiyuhayewaxɨ. Peru tete tewi 'ɨkiyari hetsie mukawe hɨri kanayani mariwetɨ kwie naime kanakuhɨniya.
DAN 2:36 »Mɨpaɨ 'Ekɨ ti'aitame pekatiniuheinɨni meta mɨpaɨta katini'inɨariyaritɨni:
DAN 2:37 'Ekɨ ti'aitame te'aitamete watsata pekatini'aitametɨni, Kakaɨyari muyuawitsie makawe mɨpaɨ kametiniupitɨani pemɨti'aitanikɨ, meta tɨrɨkariya pɨmetsi'upitɨa meta pemɨmariwenikɨ.
DAN 2:38 Meta matsi, 'Ekɨ ti'aitame yunaime teɨteri kwiepa memu'uwa kameniyetuirieni, yeutari meta muyuawitsie memɨte'uwɨtɨkɨka. Tsepa hakewa meme'uwa, Kakaɨyari kameniupitɨani yunaime mɨkɨ pemɨtiwa'aitɨwametɨnikɨ. 'Ekɨ ti'aitame, mɨkɨ mu'u hurukɨ mɨwewiya 'ekɨ pekanihɨkɨtɨni.
DAN 2:39 »'Ekɨ ti'aitame, 'a'utɨma nanukakemɨkɨ xewitɨ 'etsiwa xeikɨa mariwetɨ. Manata hairieka mieme ti'aitame 'ukanamieni manukakeni, mɨkɨ wurunitse tepɨayari kanihɨkɨtɨkamɨkɨ, meta kwie kemɨyewa naimetsie katinita'aitamɨkɨ.
DAN 2:40 'Imatɨrieka, naurieka mieme ti'aitame xewitɨ 'ukanamieni, tepɨa hepaɨ tse'itɨ. Tepɨa mɨtititsana naime hepaɨ, mɨtitimura meta tumuanari mɨrayeitɨwa, 'ikɨ naurieka mieme ti'aitame tumuanari hipame te'aitamete kaniwarayeitɨamɨkɨ.
DAN 2:41 »'Ekɨ ti'aitame mɨpaɨ pepɨtinierekai tewi 'ɨkiyari 'ɨkateya 'itɨwameteya hixɨata 'atɨ pɨtepɨatɨkai meta hixɨapa 'atɨ pɨhaxutɨkai taiyarietɨ. Tepɨa meta haxu yɨnɨkame 'ekɨ ti'aitame kepemɨtiuxei, 'ikɨ kani'inɨariyaritɨni 'ikɨ mɨtita'aitatsie teɨteri mepayehutani, tsepanetɨ tepɨa tɨrɨkariyaya mexeiyani.
DAN 2:42 Yaxeikɨata 'itɨwameteya 'etsimɨpepe hixɨapa 'atɨ mɨtepɨatɨkai meta hixɨapa 'atɨ mɨhaxutɨkai, 'ikɨ ti'aitame xeitapari tɨrɨkaɨyetɨ payani, xeitaparita weranitɨ.
DAN 2:43 'Ekɨ ti'aitame yunɨkame tepɨa meta haxu pemuxei, mɨkɨ hutatɨ mɨkayɨnɨiwe. Mɨpaɨta pɨtiyɨni, teɨteri mepanuyutinɨni meyuxewitɨ mepɨka'akɨne.
DAN 2:44 »Mɨkɨ te'aitamete memanuka'ukatsie, Kakaɨyari muyuawitsie makawe xeime ti'aitame nanukakemɨkɨ mɨkɨ hatsuaku tɨma pɨkaka'unarieni meta xeime kiekaritsie pɨkayetuiyani, matsi yuheyemekɨ 'akaniuwemɨkɨ xeikɨa meta 'ikɨ te'aitamete yunaime kaniwareuyehɨamɨkɨ.
DAN 2:45 Mɨpaɨ kananuyɨneni kepemɨtiuheinɨ tete xeime hɨritsie meyetɨa, tete nixewitɨ ka'iparewieku, tepɨa tumuanari kemɨrayeitɨa meta wurunitse, haxu, pɨrata metatsiere huru. Kakaɨyari mɨmariwe kametiniutahekɨatɨani kemɨtiyɨni 'uxa'atɨni warie. 'Ikɨ heinɨtsika kaniyuritɨni, meta kenemɨtihekɨataxɨ kaniyuritɨni».
DAN 2:46 Ti'aitame Nawukurunutsuxi 'u'enaka Tanieri hɨxie kaniutihɨximakeni waɨkawa kanitemawieritɨani, katiniuta'aita mawari mɨyetuiriyarienikɨ meta 'ɨkwa witsimu'ɨa,
DAN 2:47 mɨpaɨta katinitahɨawe: ―'Akakaɨyari kakaɨyarixi wakakaɨyari pɨhɨkɨ meta te'aitamete mɨtiwa'aitɨa pɨhɨkɨ. 'Akakaɨyari naime pɨtihekɨatawe, pemuyɨwekaxɨakɨ pemɨnetsitahekɨatɨanikɨ 'ikɨ heinɨtsika mɨkayumainɨakai mɨ'awietsiekai.
DAN 2:48 Hikɨ ti'aitame Tanieri kananukakeni mariwemetsie, meta waɨkawa 'imikierite katiniyetuirieni, kuwexinarurikɨ kanenukakeni naime wawiruniya kwieyaritsie 'aurie mamanetɨkatsie meta yunaime temaiwawemete wa'ukiyari kaneyeitɨani.
DAN 2:49 Yaxeikɨata, Tanieri ya'utayɨku, ti'aitame kaniwaranayexeiya Tsatɨraki, Metsaki meta 'Awenekuxi, Wawiruniya 'aurie mamanetɨkatsie memɨte'aitanikɨ. Tanieri manari kaniyuhayewa ti'aitame paratsiyuyata.
DAN 3:1 Merikɨtsɨ ti'aitame Nawukurunutsuxi tewi 'ɨkiyari hurukɨ mɨtawewiyanikɨ katiniuta'aita, xeitewiyari heimana 'atahuta meturuyari 'utewime meta huta meturuyari heimana 'imeriyu 'atayeukame, makuweritsie Rura mɨrakutewatsie Wawiruniya mɨrawiyatsie mɨtakerienikɨ katiniuta'aita.
DAN 3:2 Hikɨ mɨpaɨta katiniwaruta'aitɨani ti'aitame yuparewiwamete 'auriena memuti'u, kuyaxi wa'ukiyarima, kuwexinaruritsixi, 'ɨxatsitamete, tumini hɨwemete, 'itsɨkate, te'ɨkitamete meta yunaime te'uximayatamete kwie mamanetɨkatsie kiekatari, memayenexɨanikɨ 'ɨkiya muyetuiyanitsie mita'aitakai mutawewiyakai.
DAN 3:3 Mɨkɨ 'ixɨarari memɨwewienikɨ, ti'aitame 'aurie memuti'u, kuyaxi wa'ukiyarima, kuwexinaruritsixi, 'ɨxatsitamete, tumini hɨwemete, 'itsɨkate, te'ɨkitamete meta yunaitɨ te'uximayatamete kwie mamanetɨkatsie kiekatari 'ɨkiya mutawewiya hɨxie mekaniuyukuxeɨrieni.
DAN 3:4 Hikɨ niukamete mɨpaɨ mekateniuhiwa: «Xeme teɨteri, nuiwarite yunaitɨ meta tsepa kexemɨte'uniuka, mɨpaɨ xekateni'aitɨarieka:
DAN 3:5 Kepauka kuxinetate, kɨrautate, kanarite, xawerite meta hipatɨ kanarite 'ayuaneme xemɨ'enieni, ti'aitame Nawukurunutsuxi mita'ai 'ɨkiya hurukɨ mɨwewiya hɨxie xekanikahɨxima'uikuni.
DAN 3:6 Kemɨ'ane hɨxiena mɨka'akatutsita meta mɨkakatunumakeni yapauka mɨkɨ huxunuta mɨwatita'atsie kaneukahɨiyamɨkɨ».
DAN 3:7 'Ayumieme, kepauka yuariyate mekayua mɨkɨ naitɨ kanaritekɨ, teɨteri yunaitɨ, nuiwarite meta naimekɨ memutiniuka, ti'aitame Nawukurunutsuxi 'ɨkiya hurukɨ mɨwewiya muta'ai hɨxie mekaniutihɨxima'uni.
DAN 3:8 Peru hipatɨ matsi muyuawitsie timiemekɨ memɨteyɨ'ɨkitɨa ti'aitame hetsɨa mekaniu'axɨani huriyutsixi mekaniwarutaxaneta.
DAN 3:9 Mɨpaɨ mekaniutiyuani: ―'Ekɨ ti'aitame yuheyemekɨ peke'ayeniereni.
DAN 3:10 'Ekɨ 'aitsika pekaniutawewieni mɨpaɨ peti'aitatɨ, yunaitɨ kepauka memi'enieni kuxinetate, pirikɨxate, kanarite, xawerite meta hipame kanarite, wayuariya memɨ'enieni mɨkɨ 'ɨkiya hurukɨ mɨwewiya hɨxie meke'anakatutsitaxɨani meta meke'utitunuma'uni.
DAN 3:11 Yaxeikɨata mɨpaɨ pekatiniuta'aita kemɨ'ane 'ɨkiya mɨwewiya hɨxie mɨka'akatutsita meta mɨka'utitunumakeni mɨkɨ huxunu mɨwatita'ata kaneukahɨiyamɨkɨ.
DAN 3:12 Hipatɨ matsi huriyutsixi mepaye'u, ti'aitame pemɨwaranayexei Wawiruniya kwieyari pemɨwaruhɨritɨa, 'a'aitsika mepɨka'enie. 'Ekɨ ti'aitame 'akakaɨyarixi mepɨkawarayexeiya meta 'ɨkiya hurukɨ mɨwewiya pemuta'ai. Tsatɨraki, Metsaki meta 'Awenekuxi tekaniwaxatani.
DAN 3:13 Nawukurunutsuxi waɨkawamekɨ ha'atɨ katiniwarutanɨ'airieni. Kepauka mɨkɨ temari ti'aitame hɨxie memu'axɨa,
DAN 3:14 Nawukurunutsuxi mɨpaɨ katiniwarutahɨawe: ―¿Tiyuri waniu yuhaikatɨ xeme nekakaɨyarixi xekatewarayexeiya meta 'ɨkiya hurukɨ mɨwewiya nemuta'ai hɨxie xekate'ukatunuma'uwe?
DAN 3:15 Hikɨ kepauka kanarite yuariyaya xemɨ'enieni, 'ɨkiya nemuta'ai hɨxie xekenanakatutsitaxɨa meta hɨxiena xekeneutitunuma'uti. Mexɨka mɨpaɨ xɨka xeka'uyɨni, yapauka huxunu mɨwatita'atsie xekaneukaxɨriyakuni, 'ana pɨkayɨwekaxɨani xewitɨ kakaɨyari mɨxetawikweitsitɨani kenemɨxeyurieni.
DAN 3:16 Tsatɨraki, Metsaki meta 'Awenekuxi, Nawukurunutsuxi mɨpaɨ mekateniuta'eiya: ―Pɨkaheuyewetse 'Ekɨ ti'aitame 'ahɨxie tahetsie temɨtanuani.
DAN 3:17 Xɨka huxunuta mɨwatita'atsie teheukaxɨriyani, Kakaɨyari temeyexeiya kaniyɨweni mɨtatsitawikweitsitɨani huxunuta meta 'Ekɨ ti'aitame 'ahetsie.
DAN 3:18 Yatɨ takakaɨyari tsepa mɨpaɨ mɨkatiuyuri, 'ekɨ mɨpaɨ ketinemaika tame hatsuaku 'akakaɨyarixi wahɨxie tepɨkakahɨxima'uni meta yaxeikɨa 'ɨkiya pemuta'ai hɨxie tepɨkakatunuma'uni.
DAN 3:19 Tsatɨraki, Metsaki meta 'Awenekuxi, Nawukurunutsuxi waru'enieka kememutiyua matsi waɨkawa kaniuyeha'ani, yunierika kaniupata wahepaɨtsita mieme. Hikɨ katiniuta'aita huxunu 'atahutamexɨa mɨtaxɨriyarienikɨ kememɨkate'itaxɨriyakai,
DAN 3:20 meta hipatɨ kuyaxi waɨkawa memɨtɨrɨkawi mɨkɨ yuhaikame temari memɨwatihɨanikɨ meta huxunu muwatita'atsie memɨwareukaxɨrienikɨ.
DAN 3:21 Mɨpaɨ mekateniwareukaxɨrieni huxunuta meheu'ixurikimatɨkaime, yukakaitsie meheu'utɨkaime, meyukumu'ututɨkaime meta naime, tatsɨari kememɨteheukemaritɨkatei.
DAN 3:22 Yapauka ti'aitame kemɨtiuta'ai yakatiniuyɨni, kwinimieme katinixɨkakaitɨni huxunu, tai kaniwaru'axe meta kaniwarukwini kuyaxi kemɨ'ane muwa Tsatɨraki, Metsaki meta 'Awenekuxi memɨwareukaxɨri,
DAN 3:23 mɨkɨ yɨ'ɨkatetsie meta yumamatetsie mehɨatɨkaitɨ, huxunu muwatita'atsie mekaneukaxɨriyani.
DAN 3:24 'Ana kwitɨwa Nawukurunutsuxi kananukukeni, hikɨ hɨxiyatɨ 'ɨxatsitamete yuhetsɨa miemete mɨpaɨ katiniwaruta'iwawiya: ―¿Tamɨ teɨteri mekateyuhaikakai temɨwarutihɨa meta taipa temɨwareukaxɨri? Mɨkɨ mɨpaɨ mekatenita'eiya: ―Huu mɨpaɨ pɨ'ane 'Ekɨ ti'aitame.
DAN 3:25 Mɨpaɨ katiniuhiwa: ―Peru neuxei xekeneunenieri. Mana taipa yunaukame teɨteri nepuwaxeiya mana mepɨye'uwa, mekahɨatɨkaitɨ meta mekate'uka'eniwatɨ, matsi naurieka mieme kakaɨyari hepaɨ pɨtiyuxexeiya.
DAN 3:26 Mɨpaɨ 'utayɨka, Nawukurunutsuxi hurawa kaniuyani huxunu mɨta'a kitenieyaritsie meta mɨpaɨ katiniuhiwa: ―Tsatɨraki, Metsaki meta 'Awenekuxi, Kakaɨyari 'Amutewi te'uximayatsiriwamete, muwa xekenewayekɨni, 'ena xekenakɨni. Kepauka temari yuhaikatɨ huxunuta memɨwayekɨ,
DAN 3:27 ti'aitame 'aurie memuti'u, kuyaxi wa'ukiyarima meta 'ɨxatsitamete ti'aitame hetsɨa miemete wawarita mekanaketɨkɨne, mekaniwaruxeiya tai tɨma pɨkatiwarutikwinitɨakai, nixewitɨ tɨma wakɨpa pɨkata'ikai, meta matsi wa'ixurikite pɨkatata'ikai meta nitɨma pɨka'ukɨtsi'ɨatɨkatei.
DAN 3:28 'Ayumieme Nawukurunutsuxi mɨpaɨ kaniutayɨni: «'Aixɨa kerahɨawarɨwani 'ikɨ yuhaikatɨ temari wakakaɨyari, yuniuki tuayame meyenɨ'a mɨwarutawikweitsitɨa. Mɨkɨ yuri mepɨte'eriekai hetsiena, kenemɨtiu'aitakai yuri mekate'erietɨ, mɨkiriya hetsie mepuyuyetua, xeime kakaɨyari hɨxie mekatunuma'uikutɨ mɨkawakakaɨyari.
DAN 3:29 'Ayumieme, ne mɨpaɨ nepɨti'aita, keheutiwitekiexɨani kemɨ'ane Tsatɨraki, Metsaki meta 'Awenekuxi wakakaɨyari hepaɨtsita 'axamutayɨni, kiiya ke'utataiyarieni naxi kehayani, tsepa kemɨ'ane nuiwaritsie mumieme meta tsepa kemɨtiuniuka. Tawari xewitɨ Kakaɨyari pumawe mɨpaɨ tiyuwikweitsitɨwatɨ».
DAN 3:30 Mɨpaɨ tiuyɨku ti'aitame kaniwaranuka'uitɨani Tsatɨraki, Metsaki meta 'Awenekuxi 'uximayatsika waɨkawa meuyewetsetsie Wawiruniya kwieyaritsie.
DAN 4:1 Ti'aitame Nawukurunutsuxi,
DAN 4:2 Ne nepɨnewaɨriya nemɨxetaxatɨanikɨ xemeitimanikɨ 'inɨari meta mariwemekɨ kemɨtiyuriene nehetsiemieme Kakaɨyari 'Amutewi.
DAN 4:3 Waɨkawa 'inɨarieya pɨmamariwawe. Waɨkawamekɨ pɨtiyuhɨxiyatsitɨwa mariwemekɨ kemɨtiyurieni. Mɨra'aita kaheu'akamekɨ pɨti'aita. Kemɨti'itsɨkame tukari mɨyehane mɨkɨ 'apuwe.
DAN 4:4 Ne, Nawukurunutsuxi, neparatsiyuta nenayekateitɨni, nenetemawietɨ meta waɨkawa nerexeiyatɨ,
DAN 4:5 kepauka nemɨtiuheinɨ waɨkawa pɨnetsi'utimariu. Nemuwakahuputsie nekakaitɨ, kenemɨtiunierixɨ waɨkawa 'axanetiku'eriwame pɨnetsi'ayeitɨa.
DAN 4:6 Hikɨ nekatiniuta'aita yunaitɨ temaiwawemete Wawiruniyatari nehɨxie memɨ'axɨanikɨ neheinɨtsi memɨnetsitahekɨatɨanikɨ.
DAN 4:7 Kepauka temaiwawemete, mara'akate, muyuawitsie timiemekɨ memɨteyɨ'ɨkitɨa meta memɨtemaiwawe memu'axɨa, kenemɨtiuheinɨ nekaniwarutaxatɨani matsi mɨkɨ mepɨka'uyɨwekaxɨa memitahekɨatakɨ.
DAN 4:8 'Imatɨrieka Tanieri, nekakaɨyari hetsiemieme Werititsatsaxi mɨtitewa, nehɨxie kaniutakeni nekanitaxatɨani kenemɨtiuheinɨ, mɨkɨtsɨ kakaɨyarixi memɨpatsie wa'iyari kanexeiyani yuhetsie.
DAN 4:9 Ne mɨpaɨ nekatinitahɨawe: «Werititsatsaxi, temaiwawemete wa'ukiyari, ne mɨpaɨ nepɨtimate 'ahetsie kakaɨyarixi memɨpatsie wa'iyari pɨyeka meta 'ahepaɨtsita pɨkakwaniwe pemitahekɨata tita mɨranukaname. Kenemɨtiuheinɨ nekamanitaxatɨamɨkɨ, 'ekɨ pekanenitahekɨatɨamɨkɨ kehepaɨtɨtɨ manuyɨne.
DAN 4:10 Mɨpaɨ nekatiniuniere ne'utatsie mexi ne'uxipiekai: 'Iteɨri kwinimieme 'utewime nekaniuxeiya, kwie hixɨapa 'uwekame.
DAN 4:11 'Iteɨri kaniutawere meta tɨrɨkaɨyetɨ kanayani, kɨtsitana miemeyari muyuawi kanikuyuitɨwakaitɨni, kwiepa 'uyeikatɨ tsepa hakewa mixeiya kaniyɨwekaitɨni 'amutewikaikɨ.
DAN 4:12 Xawariteya witsikani'anenekaitɨni meta 'ikwaxi kwinie katinixuaweriyakaitɨni, yunaitɨ kwiepa memɨtetama yu'ikwai mekateniukaxexeiyakaitɨni hetsiena. 'Atsita yeutari hetɨana mekaniuti'etɨpiwekaitɨni meta wikixi mamateyatsie yu'itua mekaniwewietɨwekaitɨni. Mɨkɨ 'iteɨri yunaime memɨte'ayeyuyuri katiniwamikwakaitɨni.
DAN 4:13 »Metatsiere neheinɨtsita, niuki tuayame mɨpatsie nekaniuxeiya mexi ne'utatsie ne'uxipiekai nehɨxie muyuawitsie 'akamieme,
DAN 4:14 meta mɨpaɨ kanetiniuhiwiwakaitɨni karima: “'Iteɨri kenahɨwa meta mamateya kenawitexɨa, xawariteya keneukapini meta 'ikwaxiyari keneutaxɨri. Yaketineuyuri yeutari memɨyuta'unaxɨanikɨ hetɨana me'etɨpietɨ meta wikixi yu'itua memɨku'eiriexɨanikɨ.
DAN 4:15 Peru kutsunuyari meta nanayari keneuhayewa, tepɨakɨ meta wurunitsekɨ keneuhɨa tupiriyatsata keneuhayewa. Kanitihawiyamɨkɨ haɨtsi muyuawitsie makaneika, meta yeutari wahamatɨa ke'uyuhayewa 'ɨxa yeuta mieme tsata.
DAN 4:16 Tewi 'iyarieya mexeiya ke'uyupata, yeutanaka mɨtiyukɨhɨawe hepaɨ pɨta ke'uyɨni, 'atahuta wiyari ke'uyurieni”.
DAN 4:17 »Niuki tuayamete memɨpatsie yamekaniutiyuani kemɨtikwinitɨarieni, yunaitɨ kwiepa memɨtama mɨpaɨ memɨtehetimanikɨ kename Kakaɨyari 'Amutewi 'itsɨkame hɨkɨ yunaime te'aitamete kwiepa memɨtama wahetsie, mɨkɨ pɨyɨwe ti'aitame meyeitɨani kemɨ'ane manayexeiya, meta 'atsita tixaɨtɨ memɨkatehayuyeitɨa pɨwaranuka'uitɨwa memɨteta'aitakɨ teɨteri wahetsie.
DAN 4:18 »Ne, Nawukurunutsuxi, mɨpaɨ nekatiniuheinɨni. Hikɨta 'ekɨ, Werititsatsaxi, kenetineutaxatɨa kehepaɨtɨtɨ mɨti'inɨariyari, 'ikɨ nixewitɨ mɨtimaiwe nemɨra'aitatsie kiekame pɨkanetsi'utahekɨatɨa. Peru 'ekɨ pekaniyɨweni, kakaɨyarixi wa'iyari mɨpatsie 'ahetsie mɨyekakɨ».
DAN 4:19 Tanieri, yaxeikɨata Werititsatsaxi memɨte'iterɨwakai, yakatineutere ka'utaniutɨ, waɨkawa kanimakaitɨni yuhɨawetɨ, 'ayumieme ti'aitame mɨpaɨ katinitahɨawe: ―Werititsatsaxi, pepɨkayu'iyaritɨaka mɨkɨ heinɨtsikɨ, keneneutahekɨatɨa kehepaɨtɨtɨ manuyɨne. Hikɨ Tanieri kanita'eiya: ―Ne mɨpaɨ nepɨtiku'eriwakaku 'Ekɨ ti'aitame memɨmetsi'aye'unie wahetsiemieme pɨhɨkɨtɨnikeyu.
DAN 4:20 'Ekɨ ti'aitame 'iteɨri pemuxei kwinimieme 'utewime mariweme meta tse'ime, muyuawitsiepai ye'akame, naitsarie kwiepa mɨhekɨakai.
DAN 4:21 Mɨkɨ 'iteɨri xawarieya witsimɨ'anenekai meta 'ikwaxi waɨkawa mexeiyakai, meta yunaime kwiepa memɨtama mɨtiwamikwakai, hetɨana yeutari memɨti'etɨpiwekai meta wikixi muyuawitsie memu'uwa mamateyatsie memɨyu'ituatɨakai.
DAN 4:22 Mɨkɨ 'iteɨri 'Ekɨ ti'aitame pekanihɨkɨtɨni, petɨrɨkaɨyeme pema'ayeitɨa meta pemariweme, meta pemariwetɨ muyuawitsie paitɨ pekaneuti'ani. Pekatini'aitani naitsarie kwie manu'axetsie paitɨ.
DAN 4:23 »'Ekɨ ti'aitame xeime pepuxei niukituayame mɨpatsie muyuawitsie 'akamieme, mɨmetsi'aitɨakai 'iteɨri pemɨka'unakɨ meta pemikateukukekai hetsiena mɨkawiyekɨ, tsepanetɨ kutsunuyari tepɨakɨ pemutseiriyaxɨa meta wurunitsekɨ nanayari. Mɨpaɨ yeutari wahepaɨ mɨtiyuhayewakɨ 'atahuta wiyari.
DAN 4:24 »'Ipaɨtɨtɨ kananuyɨneni heinɨtsika, mɨpaɨ katiniu'aita Kakaɨyari 'Amutewi 'Ekɨ ti'aitame 'ahepaɨtsita:
DAN 4:25 'Ekɨ teɨteri watsata pekananayehaniemɨkɨ, yeutari wahamatɨa pe'uyeikatɨ pekanayeimɨkɨ, tewaxi wahepaɨ 'ɨxa pekanitikwaimɨkɨ, 'ahetsie haɨtsi kaniupaparemɨkɨ. 'Atahuta wiyari kananuyeyeimɨkɨ, kepaukake 'Ekɨ ti'aitame mɨpaɨ pemɨretimani kename Kakaɨyari 'Amutewi 'itsɨkame hɨkɨ yunaime kwiepa te'aitamete wahetsie, meta mɨkɨ pɨyɨwe ti'aitame meyeitɨani kemɨ'ane manayexeiya.
DAN 4:26 Kepemɨtiuta'aitɨarie pemihayewakɨ 'iteɨri kutsunuyari meta nanari mɨkɨta pɨ'inɨariyari 'Ekɨ ti'aitame hekwamekɨ ti'aitame pekanayeimɨkɨ, kepauka mɨpaɨ pemɨretimani kename yurikɨ ti'aita Kakaɨyari muyuawitsie makawe.
DAN 4:27 'Ayumieme, 'Ekɨ ti'aitame hikɨ ne waɨkawamekɨ nekamaniwawirieka yapemɨtikayanikɨ kenemɨmatitahɨawe: 'Axapetiyurienetɨ ketineuhayewa, 'aixɨa pɨta ketineyurieneni, 'axamɨti'ane kenehɨwa, memɨteheuyehɨwa wahetsiemieme 'aixɨa ketineuka'iyarini. Heiwatɨ 'ana 'aixɨa 'anemekɨ pe'uyeikamɨkɨ meta peyutemawietɨ».
DAN 4:28 Merikɨte, 'ikɨ naitɨ ti'aitame Nawukurunutsuxi hetsiena mɨpaɨ pɨtiuyɨ.
DAN 4:29 'Arike tamamata heimana huta metseri 'anukayaku, yuparatsiyu 'amupa heima mexi 'uyeikakai Wawiruniyatsie,
DAN 4:30 mɨpaɨ kaniutayɨni: «Wawiruniya xekeneuxeiya mɨmariwe nemitawewi nemɨra'aita kwieyaritsie wamu'u mɨhɨkɨtɨnikɨ. Nekanitawewieni netɨrɨkariya mɨmariwekɨ, ne 'aixɨa nemɨrahɨawarɨwanikɨ».
DAN 4:31 'Akuxi pɨkatitahayewawekai tikuxatatɨ, kepauka muyuawitsie, niuki mu'enierie mɨpaɨ 'utaitɨ: «'Ikɨ 'aitsika kanihɨkɨtɨni 'ahetsiemieme, ti'aitame Nawukurunutsuxi. 'Ena mɨtiyehane ti'aitame pepɨkahɨkɨtɨniri.
DAN 4:32 Teɨteri watsata pepanayehanieni, yeutari wahamatɨa pe'uyeikatɨ pekanayeimɨkɨ, tewaxi wahepaɨ 'ɨxa pekanikwakamɨkɨ, 'atahuta wiyari kananuyeyeimɨkɨ kepaukake mɨpaɨ pemɨretimani kename Kakaɨyari 'Amutewi 'itsɨkame hɨkɨ yunaime kwiepa te'aitamete wahetsie, meta kename mɨkɨ yɨwe ti'aitame meyeitɨani kemɨ'ane mɨkɨ manayexeiya».
DAN 4:33 Nawukurunutsuxi kemɨtiutaxatɨarie yapauka yakatinaye'ani. Teɨteri watsata kananayehanieni, tewaxi wahepaɨ 'ɨxa kaniutikwani. Haɨtsi muyuawitsie makaneika hetsiena kaniupaparekaitɨni, 'atsita huxarieya 'anɨ hepaɨ kaniutitɨre meta xɨteteya kwixɨ xɨteteya hepaɨ kaniutitɨre.
DAN 4:34 Mɨkɨ wiyari 'anuyekɨneku ne, Nawukurunutsuxi, neheima muyuawitsie nepenierixɨ, 'ana tewi hepaɨ netinekɨhɨawetɨ nepatɨa. Hikɨ 'ana Kakaɨyari 'Amutewi neputanɨawaxɨ, neputihɨximake meta 'aixɨa neputayɨ yuheyemekɨ 'amuyeika hepaɨtsita:
DAN 4:35 Yunaitɨ kwiepa memɨtama
DAN 4:36 Kepauka tewi hepaɨ netinekɨhɨawetɨ nematɨa, tawarita nekaniupitɨarieni mariwemekɨ kenemɨti'aitakai. Netsi'ɨxatsitɨwamete meta memanuyetei nemɨra'aitatsie miemete mekanenekuwauni, tawarita 'uweni nekaniuhanitɨarieni. Matsi waɨkawa netɨrɨkaɨyetɨ nekanayani keyuri meripaitɨ.
DAN 4:37 'Ayumieme ne, Nawukurunutsuxi, nekaninɨawani, mariweme nekaneyeitɨwani meta 'aixɨa nekanaineni Ti'aitame muyuawitsie makawe hepaɨtsita, yuheyemekɨ kemɨtiheitserie mɨtiyurienekɨ meta heitserie mexeiyakɨ, meta puyuwaɨriya memɨyuti'ɨre tixaɨtɨ mɨkatiwarayeitɨani.
DAN 5:1 Hikɨ ti'aitame Weritsatsaxi 'ikwai 'ixɨarariyari kaniuwewieni mariweme, kaniwaruta'inieni xeimiriyari teɨteri waɨkawa memeuyewetse mɨkɨ kwieyaritsie, mɨkɨ wahamatɨa winu kaniuti'ieni kaniutitaweni.
DAN 5:2 Mexi me'iekai, Weritsatsaxi katiniuta'aita huru meta pɨrata tekɨxiyari mɨ'atɨiyarienikɨ paapaya Nawukurunutsuxi, Kerutsareme tukita meiyehapakai. Mɨpaɨ katiniɨyɨni. Tekɨxite kani'atɨiyarieni, hikɨ mɨkɨ ti'aitame meta 'iparewiwametemama mɨkɨta mekateniuka'ieni, yɨ'ɨitama wahamatɨa meta yutuxexerima wahamatɨa.
DAN 5:4 'Ari metarɨwetɨ, yukakaɨyarixima mekaniwanɨawakaitɨni, huru, pɨrata, wurunitse, tepɨa, kɨye meta tetexi kakaɨyarixiyari.
DAN 5:5 'Ana kwitɨ, paratsiyuta memɨwayutixexeɨriwatsie mamá kaniuhekɨare, kɨxeme hekɨariwiekaku, 'ixumeri mutuxatsie yu'itɨwamekɨ katina'utɨwakaitɨni. Ti'aitame mexi mamá mɨra'utɨwa xeiyakai,
DAN 5:6 marikakɨ yuhɨxie kanayeture, tunuteya kaniutiyɨyɨakakaitɨni, waɨriyarika 'akaniuwekaitɨni.
DAN 5:7 Hikɨ katiniuta'aita mara'akate, muyuawitsie timiemekɨ memɨteyɨ'ukitɨa meta memɨtehetimamateke hɨxiena memɨ'axɨanikɨ, mɨkɨ temaiwawemete Wawiruniya kiekatari mɨpaɨ katiniwarutahɨawe: ―Kemɨ'ane huta ma'uxa makaterɨwa meta mɨnetsitahekɨatɨani kehepaɨtɨtɨ manɨyɨne, ne 'ixuriki mɨyɨtsikimaɨyekɨ nekanitikemaritɨamɨkɨ, huru kukayari nekanekatɨtɨamɨkɨ meta hairieka mieme kuwexinarurikɨ nekanenayexeiyamɨkɨ.
DAN 5:8 Temaiwawemete yunaitɨ mɨra'aita kiekatari mekaniu'axɨani, matsi mepɨka'uyɨwekaxɨa memekaterɨwa meta ti'aitame yamemɨtetahɨawe ketɨtɨ manɨyɨne.
DAN 5:9 'Ana matsi ti'aitame Weritsatsaxi waɨkawa matsi kaniutimani meta waɨkawa kanayeture yuhɨxie. Meta 'iparewiwametemama 'atsimepɨkatemaikai kememɨyɨnikeyu.
DAN 5:10 Ti'aitame meta 'iparewiwametemama kwinimieme me'utainekaku, 'uka ti'aitame 'u'enaka memɨwayetei heutahaka mɨpaɨ kaniutayɨni: ―'Ekɨ ti'aitame peke'ayeyurini yuheyemekɨ. Pepɨkayu'iyaritɨaka meta yɨkɨ pepɨkaraka'erieka 'ahɨxie pepɨka'ayetuxani.
DAN 5:11 'Ekɨ ti'aitame pemɨra'aitatsie xewitɨ 'apuyeika kakaɨyarixi memɨpatsie wa'iyari hexeiyatɨ. Kepauka ti'aitame 'amuyeikakai Nawukurunutsuxi, 'ekɨ 'apaapa, mɨkɨ tewi pukaxeiyarie timaiwetɨ, yapauka retimamateketɨ, kakaɨyarixi 'iyari memexeiya hepaɨ 'aneme hexeiyame. 'Ekɨ ti'aitame 'apaapa penukake temaiwawemete, mara'akate, muyuawitsie timiemekɨ memɨteyu'ukitɨa meta memɨtehetimamateke wa'ukiyari mɨhɨkɨtɨnikɨ.
DAN 5:12 Mɨkɨ tewi kwinimieme katinimaiweni, waɨkawa katinakumaika, meta katinimateni metatsiere kaniyɨweni heinɨtsika mɨtahekɨata, mɨranukaname mutaxata kaniyɨweni meta mɨtikwaniwetɨka 'aixɨa katinakayuruwani. Mɨkɨ tewi ketineutanɨ'airi, mɨkɨ yakametinitaxatɨamɨkɨ kehepaɨtɨtɨ mɨre'uxa. Tanieri katinitewaka, tsepanetɨ 'ekɨ ti'aitame 'apaapa Werititsatsaxi mɨtiterɨwakai.
DAN 5:13 Tanieri ti'aitame hɨxie kani'atɨarieni, mɨkɨ mɨpaɨ katinita'iwawiya: ―¿Kamɨtsɨ 'ekɨ Tanieri petihɨkɨ waniu, Kura kwieyaritsie nepaapa mɨxeheyehapa?
DAN 5:14 Mɨpaɨ nepɨtikuxaxatɨariwa kename 'ekɨ kakaɨyarixi wa'iyari pehexeiya, kename kwinimieme petimate meta waɨkawa perakumate.
DAN 5:15 Temaiwawemete meta mara'akate nehɨxie mepu'axɨa 'utɨarika me'akaterɨwake meta memɨnetsitahekɨatɨanikɨ kehepaɨtɨtɨ manuyɨne, matsi mepɨka'uyɨwekaxɨa.
DAN 5:16 Mɨpaɨ nepɨtikɨhɨawarɨwa kename 'ekɨ petihekɨatawe meta kename mɨtikwaniwetɨka 'aixɨa perakayuruwa. Xɨka pehekaterɨwa meta pe'itahekɨata huta kemɨre'uxa, 'ixuriki mɨyɨtsikimaɨye nepɨmetsi'anakatɨtɨani, huru kukayari nekamenakatɨtɨamɨkɨ, meta hairieka mieme kuwexinarurikɨ nekamenanukakemɨkɨ.
DAN 5:17 Tanieri mɨpaɨ katinita'eiya: ―'Ekɨ ti'aitame mɨkɨ 'imikieri ketineuti'uta, yanutsutɨni xeime keneyetuiri. 'Ekɨ ti'aitame, ne nepɨmatsi'akaterɨwirieni 'ixumeritsie kemɨxe'uxa meta nekamenitahekɨatɨamɨkɨ kehepaɨtɨtɨ manɨyɨne.
DAN 5:18 »Kakaɨyari 'Amutewi 'apaapa Nawukurunutsuxi kaniupitɨani, mɨmariwenikɨ, xawatɨriya mexeiyanikɨ, mɨti'aitanikɨ 'aixɨa rahɨawarɨwatɨ.
DAN 5:19 Kakaɨyari 'ipitɨaku mɨti'aitanikɨ, hɨxiena yunaitɨ teɨteri mekaniutiyɨyɨakakaitɨni, nuiwarite meta yunaitɨ yɨkɨ memɨte'uniuka. Kemɨ'ane meumiemɨkɨkai puwatakukuyakai, kemɨ'ane mɨreuyehɨwiriemɨkɨkai pɨtiwareuyehɨwiriwakai, kemɨ'ane mariweme mauyeitɨamɨkɨkai mariweme puwarayeitɨwakai, meta xɨka xeime tixaɨtɨ katihɨkɨtɨme heuyeitɨamɨkɨni, mɨkɨ tixaɨtɨ katihɨkɨtɨme payeitɨwakai.
DAN 5:20 Peru kepauka 'iyarieya matsi 'axatiuka'iyaritɨ matɨa meta muyuta'ɨrixɨ, ti'aitame 'uwenieya kaniunawaiyarieni, xawatɨriya kemɨrexeiyakai katiniunawaiyarieni,
DAN 5:21 teɨteri watsata kananayehanieni meta yeutanaka 'iyarieya kaniupitɨarieni, puxuri yeutari watsata kaniuyeikakaitɨni meta tewaxi wahepaɨ 'ɨxa kaniutikwani, tɨkarikɨ haɨtsiya hetsiena kaniupaparekaitɨni. Mɨkɨ naitɨ hetsiena mɨpaɨ katiniuyɨni, 'anake mɨpaɨ katinetimani kename Kakaɨyari 'Amutewi kwiepa yunaime te'aitamete kwiepa memɨtama tiwa'aitɨwame hɨkɨ meta kename mɨkɨ xeikɨa te'aitamete waranuka'uitɨwa.
DAN 5:22 »Peru mɨyatɨtɨ, 'ikɨ naime petimaitɨtɨtɨ, 'ekɨ, Nawukurunutsuxi nu'aya, tixaɨtɨ pekatihɨkɨtɨtɨ pepɨka'ayuyeitɨawe.
DAN 5:23 Matsi pɨta, Kakaɨyari muyuawitsie makawe pepaye'unie, pepɨtiuta'ai tekɨxite mɨhapaniemiekɨ tukitana mieme, hetana xemɨti'ienikɨ 'ekɨ meta 'aparewiwamete, meta xe'ɨitama metatsiere xetuxexerima. 'Ekɨ pepɨ'ayetua pewanɨawatɨ kakaɨyarixi memɨwewiyatɨka, hurukɨ, pɨratakɨ, tepɨakɨ, kɨyekɨ meta tetekɨ, mɨkɨ kakaɨyarixi memɨkaheuneniere, memɨkaheu'enana meta memɨkaheti'enatɨkɨka, matsi Kakaɨyari mariweme pepɨka'ayeitɨa tukari mɨmatsipitɨa meta kepemɨti'aitani mɨmatsipitɨa.
DAN 5:24 'Ayumieme Kakaɨyari mɨkɨ mamá peyenɨ'a mɨkɨ mɨra'utɨanikɨ,
DAN 5:25 huta ma'uxa: Meneni, Meneni, Tekeri, Paritsini.
DAN 5:26 »Mɨpaɨ kananɨyɨneni, huta ma'uxa: »Meneni: Kakaɨyari tukari puti'inɨataxɨ kepaɨmexɨa pemɨti'aitani 'ekɨ, 'ari penu'atɨa.
DAN 5:27 »Tekeri: 'Ekɨ ti'aitame ti'inɨnɨatametsie pekananɨyewiyani, kepemɨrahetenikeyu mɨpaɨ pepɨkareuhana.
DAN 5:28 »Paritsini: 'Ekɨ ti'aitame pemɨra'aita panutahutarixɨ, meta mepɨyetuiriyarie merutsixi meta peritsatsixi».
DAN 5:29 Hikɨ Weritsatsaxi katiniuta'aita Tanieri 'ixuriki mɨyɨtsikimaɨyekɨ mɨtikemaritɨarienikɨ, huru kukayari makatɨtɨarienikɨ meta hairieka mieme kuwexinarurikɨ manayexeiyarienikɨ.
DAN 5:30 Mɨkɨ tɨkariyaritsie Weritsatsaxi kaniumierieni, wawiruniyutsixi tiwa'aitɨwame, hikɨ Rariyu Peritsa kiekame pɨta mana katiniuta'aita.
DAN 5:31 'Ana, Rariyu haika tewiyari heimana huta wiyari kanexeiyakaitɨni.
DAN 6:1 Rariyu ti'aitame, timaiwetɨ yukweriwayurietɨ 'aixɨa mɨtita'aitakɨ xeitsienituyari heimana xeitewiyari meyupaɨmeme memiparewieka kaniwarutihɨawe
DAN 6:2 meta yuhaikame kaniwarutihɨawe memɨwaxeiyani kememɨte'uximayaka, mɨkɨ xewitɨ Tanieri pɨhɨkɨtɨkai. Mɨkɨ ti'aitame parewiwametemama mɨkɨ memɨwaxeiya mepɨtewayetuiriwakai kememɨte'uximayakai, mɨkɨ mepɨ'ayumiemetetɨkai naitɨ mɨti'ɨwiyariekakɨ nitixaɨtɨ 'atsimɨkati'anenikɨ.
DAN 6:3 Tanieri matsi waɨkawa kaniyɨwekaitɨni 'aixɨa katini'uximayakaitɨni, ti'aitame tiniku'eriwakaitɨni nenuyeyenikekaitɨni naime mɨra'aitatsie.
DAN 6:4 Hikɨ ti'aitame parewiwametemama meta waxexeiyamete tixaɨtɨ mekateniutiwauni Tanieri memɨtaxanetakɨ 'axa'uximayatsika hepaɨtsita ti'aitame mɨra'aitatsie mieme. Matsi tixaɨtɨ mepɨkate'ukaxei memitaxanetakɨ, Tanieri 'aixɨa mɨtiuka'iyarikaikɨ, nitixaɨtɨ pɨkatihiwe'eriekai meta pɨkaheuyewautsekai.
DAN 6:5 'Ayumieme mɨpaɨ mekaniutiyuani: «Hatsuaku Tanieri hetsie tepɨkatekaxeiya temitaxanetakɨ, hɨrixɨa pɨyɨwe Kakaɨyarieya 'aitsikaya kemaine hepaɨtsita».
DAN 6:6 Hikɨ ti'aitame parewiwamete meta waxexeiyamete hipame mekaniwarutanɨ'ani ti'aitame hamatɨa memɨtehetixatakɨ, hikɨ hɨxiena me'u'axɨaka mɨpaɨ mekatenitahɨawe: ―'Ekɨ, ti'aitame Rariyu, yuheyemekɨ peke'ayeyurini.
DAN 6:7 Tame ti'aitame 'ahetsiemieme te'uximayatamete, meta kuyaxi tewa'aitɨwamete, metsiparewiwamete, 'ɨxatsitamete meta kuwexinaruritsixi teyunaitɨ, mɨpaɨ tepɨtehexa 'Ekɨ ti'aitame 'aitsika hekwame pepɨtawewieni. Mɨpaɨ paineni mɨkɨ 'aitsika, xeimetseritsie xewitɨ pɨkayɨweni kakaɨyari mɨnenewiyani yatɨni xeime tewi, matsi 'ekɨ xeikɨa ti'aitame. Mɨkɨ 'aitsika naitsarie 'ikɨ kwieyaritsie pɨmiemetɨni, kemɨ'ane yamɨkatikayani 'ayenieretɨ putsuta mayetsi memuye'uwa keheukahɨiyani.
DAN 6:8 Hikɨ 'Ekɨ ti'aitame 'ikɨ 'aitsika keneutanaki'eri meta mɨpaɨ ketinaka'utɨa. Mɨpaɨ merutsixi meta peritsatsixi wa'aitsika kemaineni, xewitɨ mipata pɨkayɨweni.
DAN 6:9 Ti'aitame Rariyu yakatiniutanaki'erieni mɨpaɨ katinaka'utɨani.
DAN 6:10 Kepauka Tanieri 'aitsika hepaɨtsita mɨretima, yukie kaneyani meta muyehuputsie kaneutiyune, wapaitɨ Kerutsareme hepatsie katineuyepierikekaitɨni. Muwa 'utitunumakeka kaniuyutanenewieni meta yukakaɨyari hepaɨtsita 'aixɨa kanainekaitɨni, mɨkɨ haikakɨa tukarikɨ kaniyutinenewiwakaitɨni mɨpaɨ katini'iyamakaitɨni.
DAN 6:11 Kepauka 'iya teɨteri memu'axɨa, Tanieri mekaniutaxeiya yunenewiekame Kakaɨyari parewiya wawiriekame,
DAN 6:12 hikɨ 'ana ti'aitame hetsɨa mekanekɨne kemɨtiu'aitakai meteheitaxatɨanike: ―¿'Ekɨ ti'aitame kepemɨtiuta'aitaxɨ tamɨ katiyuri? Mɨpaɨ tekateniu'enanani, kemɨ'ane 'ikɨ xeimetseriyaritsie xeime kakaɨyari mɨnenewiyani yatɨni tewi, 'ekɨ kamatsi'ayexeiyatɨ, mɨkɨ mayetsi memuye'ɨne kaneukahɨiyamɨkɨ. Ti'aitame mɨpaɨ kaniutayɨni: ―Mɨkɨ 'aitsika matsi pɨhekɨa, merutsixi meta peritsatsixi xewitɨ wa'aitsika mupata pɨkayɨwe.
DAN 6:13 Mɨkɨ mɨpaɨ mekatenita'eiya: ―Tanieri, Kura kwieyaritsie meyehanie, 'Ekɨ ti'aitame tixaɨtɨ pɨkamarayeitɨwa meta kepemɨtiuta'aitaxɨ. Pɨkatihayewa yukakaɨyari nenewieri pitɨatɨ haikakɨa xeitukaritsie.
DAN 6:14 Kepauka ti'aitame mɨpaɨ mɨtiutahɨawarie, waɨkawa kaniuyukahiwerieni, hikɨ Tanieri mɨtawikweitsitɨanikɨ katiniutiwauni, tukarikɨ katiniwaunekaitɨni kehepaɨ mɨtiwikweitsitɨanikɨ.
DAN 6:15 Matsi 'iya teɨteri ti'aitame hetsɨa me'u'axɨaka mɨpaɨ mekatenitahɨawe: ―'Ekɨ ti'aitame pepɨkaratɨtɨmaiyani, merutsixi meta peritsatsixi wa'aitsika kemaine, 'aitsika ti'aitame mitawewi nixewitɨ pɨkayɨwe mipata.
DAN 6:16 Hikɨ 'ayumieme ti'aitame katiniuta'aita, Tanieri mayetsi memuye'ɨneta kaneukahɨiyani. 'Ana ti'aitame Tanieri mɨpaɨ katinikɨhɨawekaitɨni: ―'Akakaɨyari, yuheyemekɨ pemeyexeiya, kematsi'utawikweitsitɨani.
DAN 6:17 Hikɨ tete 'ayeukame mekani'atɨani mɨkɨkɨ mekateneunani putsu tenie. Ti'aitame yuhanirakɨ kaneitseyumani meta 'iparewiwamete watseyukɨ, memeye'atɨanikɨ 'aitsika kemaine Tanieri hetsie.
DAN 6:18 Hikɨ ti'aitame yuparatsiyuta kanakunuani, tɨkarikɨ pɨkatikwakai meta pɨkayutemawiekai, 'atsita pɨkaheukumɨkɨkai mɨkɨ tɨkariyaritsie.
DAN 6:19 Yapauka 'amɨtiukahekɨarixɨ, kananukukeni, hikɨ kaneyani mayetsi memuye'ɨnetsie.
DAN 6:20 Mana 'ahurawa 'umietɨ, yuhiwerietɨ mɨpaɨ katiniuhiwa: ―Tanieri, Kakaɨyari mayeyuri ti'uximayatsiriwame, ¿'Akakaɨyari, yuheyemekɨ pemeyexeiya, reyɨwekaxɨa mayetsi watsata mɨmatsihetawikweitsitɨani?
DAN 6:21 Hikɨ Tanieri mɨpaɨ katineita'eiya putsuta paitɨ: ―'Ekɨ ti'aitame yuheyemekɨ peke'ayeyurini,
DAN 6:22 Nekakaɨyari yuniuki tuayame kaneyenɨ'ani mayetsi watenie kaniuwiere. Yɨkɨ mepɨkanetsi'uyuri, Kakaɨyari yamɨtimatekɨ 'axanemɨkatiuyuri. Metatsiere 'Ekɨ ti'aitame 'ahepaɨtsita 'axanepɨkatiyuriwe.
DAN 6:23 Ti'aitame waɨkawamekɨ puyukatemawi, katiniuta'aita Tanieri muwatihanienikɨ. Kepauka muwatihanie, hawaikɨ tɨma pɨkahaxutsinikai, Tanieri yukakaɨyari hetsie yuri mɨti'eriekaikɨ.
DAN 6:24 Hikɨ ti'aitame katiniuta'aita 'itarikakɨ memitaxanetaxɨ memɨhapanieyukɨ meta kaniwaruta'aita mayetsi memuye'ɨneta memeukaxɨriyanikɨ, wa'ɨitama meta waniwema yunaime. Kwiepa meka'anutatexɨawawekaku 'akuxi mayetsi mekaniwaranutɨxɨani, wa'umete mekaniutikɨxauteni.
DAN 6:25 'Arike ti'aitame Rariyu 'aitsika mɨpaɨ haineme kananayetuani:
DAN 6:26 »Mɨpaɨ nepɨtiu'aitaxɨ naitsarie nemɨra'aitatsie teɨteri Tanieri Kakaɨyarieya mekehayexeiyani meta mariweme mekehayeitɨwani.
DAN 6:27 Mɨkɨ pɨtiyuwikweitsitɨwa,
DAN 6:28 Mɨpaɨ tiuyɨku Tanieri tewi waɨkawa meuyewetse kanihɨkɨtɨkaitɨni Rariyu mɨti'aitakaitsie meta Tsiru Peritsiya kiekame.
DAN 7:1 Mexɨakame wiyaritsie Weritsatsaxi Wawiruniyatsie ti'aitakaku, Tanieri katiniuheinɨni meta yakatiniunieritɨarieni mexi yu'itaritsie kakatei. Hikɨ katinaka'utɨani tita waɨkawa mɨreuyewekai yuheinɨtsita timieme,
DAN 7:2 'ikɨ kanihɨkɨtɨni kemɨraka'utɨa: «Tɨkarikɨ mɨpaɨ nekatiniuniere, haramara mɨmariwe nekaniuxeiya, kaniutayuanekaitɨni nauka 'ekayari muyuawitsie miemekɨ.
DAN 7:3 Haramaratsie mekanatinexɨani 'ɨrawetsixi yunaukatɨ 'ametemamariwawetɨ, yuxexuitɨ yɨkɨ meteyuxexeiyatɨ.
DAN 7:4 »Mexɨakame maye hepaɨ katiniyuxexeiyakaitɨni, matsi 'anateya kwixɨ 'anateya hepaɨ kani'anenekaitɨni. Mexi 'akuxi ne ne'ixeiyakai, 'anateya namuriyariexɨani, kwiepa kananukuhanieni, waɨriyarika mekanipitɨani yu'ɨkatekɨ 'amɨtakenikɨ, tewi mɨhɨkɨtɨni hepaɨ. Meta tewi 'iyarieya kaniupitɨarieni.
DAN 7:5 »Hutarieka mieme 'ɨrawe nemuxei hutse hepaɨ katiniyuxexeiyakaitɨni. Tapa yu'etsata kwinie kanetitewikaitɨni meta haikame 'aki 'umeteyari yuteta kanatɨkɨkaitɨni. Mɨkɨ 'ɨrawe mɨpaɨ katiniutahɨawarieni: “Kenanukukexi, wai keneutikwa'i waɨkawa”.
DAN 7:6 »Tawarita xeime 'ɨrawe nekaniuxeiya, mɨkɨ hatɨwe hepaɨ kani'anekaitɨni, peru 'anate naukame yuwaritsie pexeiyakai, memɨtekɨwɨtɨwe wa'anate hepaɨ 'aneneme. Mɨkɨ 'ɨrawe naukame mu'ute kanexeiyakaitɨni, meta tɨrɨkariya kaniupitɨarieni mɨtita'aitakɨ.
DAN 7:7 »Hikɨ tawarita, kenemɨtinieritɨariekaitsie naurieka mieme 'ɨrawe nekaniuxeiya, mɨkɨ matsi yemekɨ 'axakani'anekaitɨni, waɨkawamekɨ tɨrɨkaɨyetɨ. Tepɨa tameteyarikɨ 'amɨtɨtɨkɨ kaniwatipɨnakaitɨni meta kaniwatikwa'akaitɨni tita mɨtitakwani meta tita mɨtihayewa kanitiketsinakaitɨni. Tamamata paɨmeme 'awate kanexeiyakaitɨni, hipatɨ 'ɨrawetsixi kememɨteyuxexeiyakai wahepaɨ pɨkatiyuxexeiyakai.
DAN 7:8 »Mexi 'awateya kwinexeiyakai, xewitɨta 'awa 'etsipetɨ watsata kanatineni. Mɨkɨ muwatinekɨ haikatɨ mexɨakate 'awate kanamurariexɨani. 'Awa 'etsimupe tewi hɨxiteya mayatsani hepaɨ katiniyuxexeiyakaitɨni meta teni kanexeiyakaitɨni mutaniukakai tiyukatawe'eriekamekɨ.
DAN 7:9 »Ne mexi 'akuxi 'ikɨ netixeiyakai, yapaɨmetɨ 'uwenite mana 'aniku'uni, meta xewitɨ 'Ukiratsi mariwetɨ mana kanayerɨni. 'Ixurikieya kanituxakaitɨni 'ɨwi hepaɨ, meta kɨpateya, muxa huxarieya mutuxa hepaɨ kani'anenekaitɨni. 'Uwenieya meta xikɨrawime hexeiyatɨ tai hepaɨ katiniyuxexeiyakaitɨni.
DAN 7:10 Hɨxiena tai haixayari kanetineikakaitɨni. Miyuni meyupaɨmetɨ mekaneyexeiyakaitɨni, meyumɨiretɨ mekaniparewiekaitɨni. Kepauka 'itsɨkame 'amayerɨ, 'aixɨa mɨtiyɨnikɨ, xapate nanutayepiyaxɨani.
DAN 7:11 »Ne kwi ne'ixeiyatɨ nekaniuyuhayewa 'awa 'etsimɨpe mɨtikuxatakaikɨ 'uyuta'ɨretɨ. Ne nekanixeiyakaitɨni kepaukake mɨkɨ 'ɨrawe mumierie, 'etsipepetɨ neutixitekiexɨani meta tai 'anutitatawemetsie mekaneixɨrieni.
DAN 7:12 Hipatɨta 'ɨrawetsixi yutɨrɨkariya mekaniunawaiyarieni, peru yapaɨmexɨa memu'uwanikɨ mekaniupitɨarieni.
DAN 7:13 »Tɨkarikɨ mɨya netinieretɨ, xeime nekaniuxeiya tewi hepaɨ 'aneme muyuawitsie haitsata 'akamieme. 'Ukiratsi mɨmariwe hepa hurawa kanayani meta hɨxiena kanewitɨkieni,
DAN 7:14 mɨti'aitanikɨ kaniupitɨarieni, tɨrɨkariya meta xawatɨriya kaniupitɨarieni. Yunaitɨ teɨteri, nuiwarite meta yɨkɨ memɨte'uniuka me'eyexeiyatɨ mekanakɨne. Kemɨti'aita yuheyemekɨ pɨti'aitani, pɨka'anuyani, meta kemɨtita'aita hatsuaku pɨkaka'unarieni.
DAN 7:15 »Ne, Tanieri, waɨkawamekɨ nematɨ nekaniyuhayewa, meta mɨyanemɨtiunierixɨkɨ nenehɨawetɨ.
DAN 7:16 Hikɨ xewitɨ mana muwekai 'aurie 'ahurawa nekaniuyani, 'ikɨ yurikɨ kehepaɨtɨtɨ manuyɨne nekanita'iwawiya. Mɨpaɨ katinitahekɨata mɨkɨ:
DAN 7:17 “'Ɨrawetsixi memɨyunauka memɨmamariwawe yunaukatɨ te'aitamete mekanihɨkɨtɨni kwiepa mekatenita'aitakuni,
DAN 7:18 matsi Kakaɨyari 'Amutewi muwaranayexei memɨpatsie memɨteta'aitakɨ mekaniyetuiriyariekuni, yuheyemekɨ wahetsie pɨmiemetɨni, yemekɨ yuheyemekɨ”.
DAN 7:19 »Hikɨ naurieka mieme 'ɨrawe hetsiemieme yemekɨ nepɨtimaimɨkɨkai kehepaɨtɨtɨ manuyɨnekai, mɨwatitsanakai meta mɨwatikwa'akai tita mɨtitakwani, meta tita mɨtihayewa mɨtitiketsinakai. Yɨkɨ kani'anekaitɨni hipatɨ yuhaikatɨ kememɨka'anenekai, tepɨa tameteyari meta wurunitse xɨteteyari kanexeiyakaitɨni. Yɨkɨ pɨtiyuxexeiyakai yemekɨ pɨmariwekai.
DAN 7:20 Yaxeikɨata tamamata 'awate yumu'utsie meixeiyakai hepaɨtsita nekatinimaimɨkɨkaitɨni, meta xewitɨ muwa matine mɨkɨ tiuyurieku mɨkɨ haikatɨ mamurixɨa. Mɨkɨ 'awa matsi 'akanipakaitɨni keyuri hipatɨ, hɨxite kanexeiyakaitɨni meta pɨtikuxatakai 'uyuta'ɨretɨ.
DAN 7:21 »Ne mexi 'akuxi kwi ne'ixeiya, mɨkɨ 'awa kaniuyutamieni memɨpatsie kaniwarutakwini, kaniwara'iwa.
DAN 7:22 Hikɨ 'Ukiratsi kaninuani, 'aixɨa mɨtiyɨnikɨ 'Amutewi hetsɨa miemete memɨpatsie wahetsiemieme. 'Ana kwitɨ memɨpatsie memɨte'aitanikɨ mekaniupitɨarieni.
DAN 7:23 »'Ukiratsi mɨmariwe mɨpaɨ katinitahekɨata: »“'Ɨrawe naurieka mieme naurieka ti'aitame kanihɨkɨtɨni 'ena kwiepa mɨtikeni. Yɨkɨ kani'anemɨkɨ kememɨkate'aita hipatɨ, kwiepa memɨtama yunaime kaniwatikwaimɨkɨ, kaniwatipɨnamɨkɨ meta kaniwatiketsimɨkɨ.
DAN 7:24 Tamamata 'awate tamamata te'aitamete mekanihɨkɨtɨni mɨkɨ kwieyaritsie memɨtinexɨani. Xewitɨta ti'aitame panukakeni wa'ɨtɨma, meripai miemete kememɨ'anenekai yɨkɨ 'anetɨ, mɨkɨ te'aitamete yuhaikame kaniwaranakaxɨrimɨkɨ.
DAN 7:25 Kakaɨyari 'Amutewi hepaɨtsita kaneuniumɨkɨ memɨpatsie hetsɨana miemete kaniwa'uximatɨamɨkɨ, katinipataxɨamɨkɨ tita 'ixɨarari mɨratineika meta 'aitsika niukiyari, meta memɨpatsie katiniwata'aitɨamɨkɨ haika wiyari heimana 'ataxewime metseri.
DAN 7:26 'Itsɨkate 'ɨparitsie mekanayaxikuni, mɨkɨ 'awa tɨrɨkariya kaninawaiyariemɨkɨ meta yuheyeme kanika'unariemɨkɨ.
DAN 7:27 Hikɨ 'ana memɨpatsie pɨta mekaniyetuiriyariekuni, Kakaɨyari 'Amutewi teɨterimama memɨhɨkɨ, memɨte'aitanikɨ xawatɨriya mehexeiyatɨ meta tɨrɨkariya mete'aitatɨ naitsarie kwieyaritetsie. Kemɨti'aitani yuheyemekɨ katini'aitakamɨkɨ, mekaneyexeiyakakuni meta mehei'enietɨ yunaitɨ kuwexinaruritsixi kwiepa memɨtama”.
DAN 7:28 »Kenemɨtiunierixɨ 'ena pu'axe. Ne, Tanieri, nepɨkanemaiwekai 'iyaritɨarika kenemɨrexeiyakai nehetsie, yɨkɨ nepɨraka'eriekai marikakɨ. Matsi naime 'ikɨ nehetsie xeikɨa nekatiniuhɨni».
DAN 8:1 «Hikɨ Weritsatsaxi hairieka wiyaritsie ti'aitakaku, ne Tanieri, tawarita mɨpaɨ nekatiniuniere.
DAN 8:2 Mɨyanetinieretɨ, mɨpaɨ nepɨtinemaikai Tsutsa kiekariyaritsie nekaniuyeikakaitɨni, 'Erami kwieyaritsie, haa 'Urahi mɨtitewa manuyeka 'aurie.
DAN 8:3 Mɨpaɨ nekatininierekaitɨni, nehɨxie kaniuwekaitɨni muxa 'uki hutame 'awate ha'uitɨatɨ. Hatetsita kaniutiwekaitɨni meta kwinimieme tɨtɨme 'awate kana'uitɨakaitɨni. Xewitɨ matsi 'akanitewikaitɨni, 'arikeke tɨtɨ haneka.
DAN 8:4 »Ne'ixeiyatɨ nekaniyuhayewa kemɨtiwakwinekai tayeta meta tatsutɨa memɨtama. Nixewitɨ yeutanaka me'iwa pɨkayɨwekai meta nixewitɨ pɨkayɨwekai mitawikweiya. Muxa 'uki kemɨtinake yapɨtiyurienekai, matsi waɨkawa tɨrɨkaɨyetɨ kanayeiximekaitɨni.
DAN 8:5 »Ne mexi nene'iyaritɨakai mɨkɨ hepaɨtsita, yapauka tau makayuyuipiketsieta kanataneni xewitɨ tsipu 'ukitɨtɨ, yɨhɨxite mayatsatɨkatsie hixɨata 'awa kanakekaitɨni kwinimieme timariweme, meta naime kwie heima kaniuyeyani ka'anutateteketɨ tɨma.
DAN 8:6 Muxa 'uki hatetsita nemixeiyakai 'aurie kepauka munua, kanitamieni waɨkawa ha'atɨ.
DAN 8:7 Kemɨtitami meta 'awateya kemɨremuririexɨa ne nekaniuniere. Muxa 'uki mitamieni pɨka'uyɨwekaxɨa, matsi tsipu 'uki kanetihɨani meta kanitaketsini. Nixewitɨ muxa 'uki hetsie pɨka'utanua tsipu 'uki 'imienekaku.
DAN 8:8 »Tsipu 'uki matsi waɨkawa kaniutatɨrɨkaxɨani, peru kepauka matsi waɨkawa mutatɨrɨkaxɨa 'awaya 'amɨtewi kanamure, manata naukatɨ 'awate kananexɨani mamariwawetɨ nauka 'ekayari muyuawitsie mieme hepa kaneitatseratɨkateitɨni.
DAN 8:9 Xeime 'awatsieta xewitɨ 'awa kananeni, matɨari 'etsipupekai, tɨrɨkariyaya tatsutɨa kanikayune meta tau manatineikatsie, metatsiere takwiepa witsimɨraku'anetsie.
DAN 8:10 Kaniutawere kuyaxi muyuawitsie miemete memanu'uwa kaniye'ani, hipame xurawetsixi kaniwarakaxɨrieni meta kaniwarutiketsini,
DAN 8:11 matsi waɨkawa mariweme kaniyu'eriekaitɨni keyuri kuyaxi muyuawitsie miemete tiwa'aitɨwame. Mɨkɨ tiuyurieku mawari xexuime tukaritsie mieme kaneutipare meta tuki ka'itiyatɨ kanayani.
DAN 8:12 Tateɨterima ke'axamemɨte'uyurikɨ, kuyaximama tita yuri mɨraine mekaniuka'una meta mawari xexuime tukaritsie mieme mɨhayewarienikɨ katiniuta'aita. Mɨkɨ 'awa kemɨtinake pɨtiutawewi meta pɨtiuka'unaxɨ.
DAN 8:13 »Hikɨ mɨpaɨ nekatiniu'ena xewitɨ mɨpatsie kananiukakaitɨni, xewitɨta kaniku'iwawiyakaitɨni: “¿'Ikɨ mɨya temɨteneniere 'akuxi kereutere mawari xexuime tukaritsie mieme hepaɨtsita, meta mawari 'axamɨ'ane mɨkapatsie ka'itiyakame mayeitɨwa tuki, metatsiere kuyaxi tixaɨtɨ kememɨkate'ayeitɨarie?”
DAN 8:14 'Iya mɨpatsie mɨpaɨ kanetiniutahɨawe: “Huta miriyari heimana haika tsienituyari tukari meta tɨkari kaniyuriemɨkɨ. 'Anake mɨkɨ tukari 'anuyeyayu tuki 'aixɨa 'itɨarietɨ kanayeimɨkɨ”.
DAN 8:15 »Ne Tanieri, mexi kenemɨtiunierekai ne'iti'eriwakai ne'imaimɨtɨ, yapauka xewitɨ tewi hepaɨ tiyuxexeiyatɨ nehɨxie kaniutakeni.
DAN 8:16 Hikɨ haa 'Urahi mɨtitewa manuyekatsie paitɨ hiwari mɨpaɨ kanetayɨni: “Kɨrawieri, 'ikɨ tewi yaketineutaxatɨa kehepaɨtɨtɨ mɨtiunierixɨ”.
DAN 8:17 »Kepauka Kɨrawieri ne'aurie mutake, waɨkawa nekaniutimani netunuma nekaniukaweni. Peru mɨkɨ mɨpaɨ kanetiniutahɨawe: “Tewi, mɨpaɨ ketinemaika, 'ikɨ mɨya pemɨtiunierixɨ 'imatɨrieka tukari hepaɨtsita kanimiemetɨni”.
DAN 8:18 »Kɨrawieri mexi 'akuxi netikuxaxatɨwakai, kwi kauka neneuku, kwiepa netihɨximawetɨ. Peru mɨkɨ kanenanutahɨtɨani meta waɨriyarika kaneniupitɨani nemanukukenikɨ,
DAN 8:19 mɨpaɨ netikɨhɨawetɨ: “Nekamanitahekɨatɨamɨkɨ kemɨtiyɨni 'imatɨrieka tukari kepauka Kakaɨyari haxɨaya maye'ani, karikɨ 'imatɨrieka tukari kanaye'amɨkɨ kepauka mɨka'inɨari.
DAN 8:20 Muxa 'uki hutame 'awate hexeiyame pemuxei mɨkɨ kaniwa'inɨaritɨni yuhutatɨ te'aitamete Meriya kiekame meta Peritsiya.
DAN 8:21 Tsipu 'uki Kɨretsiya kwieyaritsie ti'aitame kanihɨkɨtɨni, kwinimieme timariweme 'awa maketsa yuhɨxite hixɨata mexɨakame ti'aitame kanihɨkɨtɨni.
DAN 8:22 'Awate naukatɨ manexɨa mamurarie hetsiemieme mɨkɨ yunaukatɨ te'aitamete kaniwa'inɨariyaritɨni mɨkɨ kwieyaritsie memanuka'uni, peru yaxeikɨa mepɨkatetɨrɨkawini.
DAN 8:23 »”'Imatɨrieka tukari mete'aitakaku, kepauka 'axateyuruwamete waɨkawari 'axamemɨteyurieni, 'ana xewitɨ ti'aitame nanukakemɨkɨ 'axatiniukitɨ meta waɨkawa tiyukwamanatɨ,
DAN 8:24 tɨrɨkariya waɨkawa hexeiyatɨ kanayeimɨkɨ, peru yuxaɨta pɨkaheixeiyani. Mɨkɨ ti'aitame yumɨireme pɨwaka'una, meta tsepa kemɨtiuyuri naitɨ 'aixɨa pɨtiyɨni hetsiena mieme. Memɨtɨrɨkawi pɨwaka'una meta teɨteri memɨpatsie kaniwaka'unamɨkɨ.
DAN 8:25 'Itarikakɨ ti'ɨkitame kanayeimɨkɨ, mariweme kaniyu'eriekamɨkɨ. Yumɨireme teɨteri kaniwaka'unamɨkɨ 'atsimekate'anuyekɨneke memɨyu'eriekai meta te'aitamete Tiwa'aitɨwame kanitamiemɨkɨ, peru kanika'unariemɨkɨ tewi tɨrɨkariyayakɨ pɨkatixaɨ.
DAN 8:26 'Ikɨ kepemɨtiunierixɨ tukari meta tɨkari hepaɨtsita, pemutaxatɨarie, mɨkɨ kaniyuritɨni. Peru xeikɨa mɨirikɨa pepɨka'ihekɨatani, karikɨ 'akuxi mɨixa tukari kaneuyeweka mɨpaɨ mɨtiyɨni”.
DAN 8:27 »Ne Tanieri, nekaheutɨrɨkaɨyetɨ nekanayani, mɨixa tukari ne'utatsie nekanikakateitɨni. Manakeri ne'anukukeka ti'aitame mɨra'aitatsie nekatiniparewiekaitɨni tita mɨranierekai. Matsi heinɨtsika waɨkawa pɨnetsi 'iyaritɨakai, 'atsinemɨkareitimaiwekaikɨ 'akuxi.
DAN 9:1 »Merikɨte mexɨakame wiyari Rariyu ti'aitakaku Keriketsi nu'aya, meru tewiyari wawiruniyutsixi tiwa'aitɨwame hamatɨa, 'ana ne Tanieri, mɨkɨ niuki 'utɨarika nekaneti'enietɨyani Yawé Keremiyaxi mɨpaɨ mɨtitahɨawixɨ kename Kerutsareme 'unitɨ yuhayewakekai haika tewiyari heimana tamamata wiyari.
DAN 9:3 Hikɨ 'ana nekaniuyutinenewietɨyani meta Yawé nekakaɨyari yanekatinahɨawekaitɨni. Neyunenewietɨ 'akuxita nekaniyuhakieni meta hiwerika kamixayari nekananakatɨni, meta naxipa nekaniutayerɨni.
DAN 9:4 'Ikɨ nenewieri kanihɨkɨtɨni meta kenemɨtiyutahekɨataxɨ: »“Yawé, Kakaɨyari pemɨmariwe meta meuyewetse pemɨmakaxiwani, 'atɨratu hepaɨtsita 'aixɨa pepɨtiuka'iyari pemeye'atɨwa memɨmatsinaki'erie meta kepemɨti'aita yamemɨtekahu wahetsie:
DAN 9:5 'Axatepɨte'uyuri kemɨkareuyewetse, meta temɨkaheu'enana tekanihɨkɨtɨni, 'a'aitsikate tepuku'eiri.
DAN 9:6 Tepɨkawa'enie te'a'uximayatsiriwamete 'aniukamete, pewanɨ'akaku memɨtewarutaxatɨa tate'aitɨwamete meta meripaitɨ kiekatari ta'ukiyarima meta yunaime kwiepa memɨtama.
DAN 9:7 »”'Ekɨ Yawé, heitseriemekɨ yapepɨtikamie. Tame matsi, tewiyarika xeikɨa tepexeiya 'ikɨ tukaritsie, tame Kura kiekatari, Kerutsareme kiekatari meta naitsarie 'Ixaheri kwieyaritsie kiekatari, 'ahurawa temu'uwa meta 'ateewa temu'uwa, naitsarie hipame kwieyaritsie hakewa pemɨtatsihetaxɨriexɨa temɨmatsi'uku'eirikɨ.
DAN 9:8 »”Yawé, tame meta tate'aitɨwamete meta 'iparewiwamete meta ta'ukiyarima, tepeutatetewiya 'ahepaɨtsita 'axatemɨte'uyurikɨ.
DAN 9:9 Peru mɨyatɨtɨ tsepa temɨmatsi'uku'eiriekai tematsi'aye'unietɨ temakɨ, 'ekɨ, Tati'aitɨwame, Kakaɨyari pemɨti'akanenimaya meta pemɨtareuyehɨwirieni pekanihɨkɨtɨni.
DAN 9:10 »”Yawé meta takakaɨyari, 'a'aitsika kemaine yatepɨkatekakɨniwawe meta tepɨka'iweiya, pemɨtatsiyetuiri te'a'uximayatsiriwamete 'aniukamete yametekuxatakaku.
DAN 9:11 Yunaitɨ 'ixaheritsixi 'a'aitsika mepuku'eiri, mepɨkayuwaɨri yamemɨtekahuni kepemaine. 'Ayumieme, 'axatemɨte'uyurikɨ 'ahepaɨtsita, tahetsie paye'a kepemutayɨ ketemɨtekwinitɨarienikekai, 'inɨari xapayaritsie kemɨre'uxa meti'uximayatsiriwame Muitsexi kemɨraka'utɨa.
DAN 9:12 »”'Ekɨ pepeye'atɨa kepemɨtarayemari'itɨa, tame meta tate'aitɨwamete, 'ekɨ tahetsie 'ikɨ 'uximatɨarika mɨmariwe pepɨ'atɨa. Hatsuaku 'ena kwiepa mɨpaɨ pɨkatiyɨwe Kerutsareme hetsiemieme kemɨtiuyɨ.
DAN 9:13 »”Yawé meta Kakaɨyari, naitɨ 'ikɨ 'uximatɨarika tahetsie kaninuani, Muitsexi xapayatsie 'inɨari niukiyaritsie kemɨre'uxa, mɨyatɨtɨ 'akuxi tepɨkatekuwautɨwe pemɨtatsitinenimayatakɨ. Tita'axamɨti'ane tepɨkateku'eiriwawe meta tepɨkayumexɨitɨa 'aniuki yuri maine temɨ'enienikɨ.
DAN 9:14 »”'Ekɨ, Yawé meta takakaɨyari, 'ikɨ 'uximatɨarika pepukuha'aritaxɨ meta pepipitɨa tahetsie mɨkawenikɨ, 'ekɨ kemɨtiheitserie yapepɨtiyuriene naimetsie kepemɨtiyuriene. Peru mɨyatɨtɨ, yatepɨkatekakɨniwawe kemɨmetinake.
DAN 9:15 »”Yawé meta takakaɨyari, 'atɨrɨkariyakɨ 'ateɨterima 'Ekipitutsie pepɨtatsi'ayewitɨ meta peputamariwaxɨ 'ateewa, hikɨ ketemɨteneniere: 'Axatepɨte'uyuri, tita 'axamɨti'anekɨ tepɨhɨpɨne.
DAN 9:16 Mɨpaɨ tepɨtemate waɨkawa 'aixɨa pepɨtiuka'iyari, 'ayumieme ketineuhayewari peha'atɨ Kerutsareme hetsiemieme, mɨkɨ pɨ'akiekari meta 'ahɨri mɨpatsie pɨhɨkɨ. 'Axatemɨte'uyurikɨ meta tatewarima 'axamemɨte'uyurikɨ, Kerutsareme meta tame 'ateɨterima mepɨtatsiyuriya ta'aurie kiekatari.
DAN 9:17 »”Hikɨta, Kakaɨyari meta Tati'aitɨwame, ne ti'a'uximayatsiriwame nenenewieri keneu'eni meta waɨkawamekɨ kenemɨmetiwawirie. 'Aixɨa petikɨhɨawarɨwame kenayuyeitɨa meta 'atuki keneuxeiya pe'inaki'erietɨ, muka'unarie.
DAN 9:18 Ketaneu'eni, takakaɨyari, kenanutanieri ketaneuxeiya ketemɨte'uka'unarie meta kiekari keneuxeiya hakewa pemahɨawarɨwa. 'Ikɨ mɨya temɨmatewawirie, 'aixɨa temɨte'u'iyarikɨ hetsie tetewiyatɨ tepɨkahaitɨka matsi kepemɨti'akanenimaya hetsie pɨta tetewiyatɨ.
DAN 9:19 Yawé, ketaneu'eni. Yawé, ketatineuyehɨwiri. Yawé, ketananu'eni meta yaketineuyuri. Nekakaɨyari, 'aixɨa pemɨtikuxaxatsiwanikɨ yaketineuyuri meta 'apepɨkareutewini tawarita matsi, pekanahɨawarɨwani 'akiekari meta 'ateɨterima wahetsiemieme”.
DAN 9:20 »Ne nepiyeweiyakai netikuxatatɨ meta neyunenewietɨ Yawé nekakaɨyari hamatɨa. Hɨxiena nepunetahekɨataxɨ ke'axanemɨtiuyuri meta 'ixaheritsixi ke'axamemɨte'uyuri, meta waɨkawa nepitawawiri hɨri mɨpatsie hetsɨana mɨmieme hetsiemieme.
DAN 9:21 Taikai mɨratimawatɨre naye'aximekaitɨni. Mexi 'akuxi ne neyunenewiekai, niuki tuayame Kɨrawieri, meripaitɨri nemixeiyakai, yumexɨitɨatɨ 'uwiximetɨ nehetsɨa kaninuani
DAN 9:22 hikɨ mɨpaɨ kanetiniutahekɨatɨani: »“Tanieri, hikɨ nepeyetɨa yapemɨretimanikɨ naime hekɨakamekɨ.
DAN 9:23 Kwitɨwa kepauka pemitsutɨa peyunenewietɨ, Kakaɨyari 'anenewieri kananu'enieni. Nemetitaxatɨanike nepeyetɨa 'ekɨ Kakaɨyari waɨkawa pɨmetsinaki'erie. Keneneu'eni kenemɨmetitahɨawe, ketɨtɨpemɨtiunierixɨ yapemɨretimanikɨ.
DAN 9:24 »”Haika tewiyari heimana tamamata tsemanayari mepupitɨarie 'ateɨterima meta 'akiekari mɨpatsie para memɨtehayewakɨ 'axameteyurietɨ, memitawaunikɨ memɨteheuyehɨwiyarienikɨ ke'axamemɨte'uyuri, memitsutɨanikɨ kemɨtiheitserie meteyurietɨ yuheyemekɨ, kepemɨtiunierixɨ meta 'uxa'a warie kemɨtiyɨni kepemɨtiutaxatɨarie maye'anikɨ, meta patsiekame memayeitɨanikɨ tukita Waɨkawa Muyepatsietsie.
DAN 9:25 »”'Aixɨa ketineu'ena kenemetitahɨawe: 'Atahuta tsemanayari kananukayeimɨkɨ tsutɨtɨ kepauka 'aitsika mutawewiya maine Kerutsareme ke'anukuketɨarieni 'atsita 'uti'atɨ munuanitsie ti'aitame manayexeiyarie. Mɨkɨ tukari 'anukayayu tawari kanahuni haika tewiyari heimana huta tsemanayari. Hikɨ 'ana Kerutsareme kananukuketɨariemɨkɨ, kayeyari meta kuraruyari 'amatayewa. Tukari waɨkawa kwaniwetɨ kanayeimɨkɨ,
DAN 9:26 haika tewiyari heimana huta tsemanayari 'anukayayu, 'ana ti'aitame manayexeiyarie tukarieya kaninawaiyariemɨkɨ. Mɨkɨ karekakiekaritɨ kaniyuhayewamɨkɨ meta tuki muyepatsie kahexeiyatɨ, karikɨ xewitɨ ti'aitame kananutikemɨkɨ mɨkɨ kanika'unamɨkɨ. 'Imatɨrieka tukari pɨkatixemaritɨani, wiyeri mɨtiyuhautsitɨwa hepaɨ, mekwi'iwatɨ pɨkatihayewarieni kepaukake kuyaxa meutipare.
DAN 9:27 Mɨkɨ ti'aitame 'atahuta tukari tɨratu kaniwewimɨkɨ yumɨireme wahamatɨa, peru hixɨapa tiuweiyatɨ 'atahuta tukari ka'aye'awekaku katinita'aitamɨkɨ mɨtihayewarienikɨ timawarienetɨ meta 'imikieri yetuiwatɨ tukita. Tuki 'amanutitewatsie waɨkawa 'axakatiniyuriemɨkɨ 'axati'aneme katipatsiekame katinitimawamɨkɨ, kepaukake hetsiena mieme kemɨre'uxa maye'ani kemɨtika'unarieni kemɨreutipare”».
DAN 10:1 Hairieka wiyaritsie Tsiru ti'aitakaku Peritsiya kiekame, Tanieri hɨxie matsiɨkɨtɨ katinayani kuyaxi meyumɨireme kaniwaruxeiya. Mɨkɨ kemɨtiunieritɨarie puyuritɨkai, Tanieri meta mɨkɨtɨtɨ mɨtitewakaitsiere Werititsatsaxi, kaneitimaitɨyani kehapaɨtɨtɨ manuyɨnekai kemɨtiunierixɨ.
DAN 10:2 «Mɨkɨ tukaritsie ne, Tanieri, haika tsemana nepuyuri nemɨnehiwerieka hepaɨ ne'anetɨ.
DAN 10:3 'Ana tukariyaritsie nepɨkatikwakai witsiti'aneme, wai nepɨkakwakai meta winu, metatsiere witsimɨtiu'ɨatɨka nepɨkanetawiri.
DAN 10:4 Mexɨakame metseritsie xeitewiyari heimana nauka tukariyaritsie, mexi ne Tikɨritsi hatuxameyari hatetsita ne'uyeikakai,
DAN 10:5 mɨpaɨ nekatiniuniere, xeime tewi rinu 'ixurikiyari 'anakatɨkɨme nekaniuxeiya, huru hɨiyameyarikɨ waɨkawa matsi 'aixɨa mɨ'anekɨ 'ayɨhɨakame.
DAN 10:6 Naitɨ pɨxawatɨkai tete tupatsiyu mɨtixawatɨ hepaɨ, meta kaniutimerɨkarekaitɨni nierikaya mimierikari hepaɨ, hɨxiteya hutatɨ tai mɨtatɨka hepaɨ pɨ'anenekai, meta mamateya metatsiere 'ɨkateya wurunitse mɨxawatɨ hepaɨ kani'anenekaitɨni, niukieya kaniwa'eiyakaitɨni yumɨiretɨ memutiyuaneni hepaɨ.
DAN 10:7 »Ne, Tanieri, nexeikɨa mɨya nepɨtiunierixɨ. Nehamatɨa memu'uwakai, tsepa tixaɨtɨ memɨkate'uxei, mekaniutimamani meta mekaniutinautsa mekaniyuti'awieta.
DAN 10:8 Nixewitɨ nehamatɨa pɨka'uyeikakai kepauka 'ikɨ mariwemekɨ mɨyanemɨtiunierixɨ. Neputaweranaxɨa, yɨkɨ nepɨraka'erietaxɨ, tixaɨtɨ nemɨkatinenaki'erieka hepaɨ nepɨtinemaikai.
DAN 10:9 'Ana ne mɨkɨ tewi nekaniu'enieni kanenikɨhɨawekaitɨni. Mexi ne'i'eniekai, kwi nekaneukuni, kwiepa netihɨximawetɨ.
DAN 10:10 'Ana mamá kaneniuwiya, netitunumaweme kaneniuhayewa kwiepa nemateikatɨkaime,
DAN 10:11 meta mɨpaɨ kanetiniutahɨawe: “Tanieri, kenanukukexi 'ahetsɨa nekaneyenɨ'arieni. Kakaɨyari mɨmetsinaki'erie pekanihɨkɨtɨni, 'ayumieme keneneu'eni kenemɨmetitahɨawe”. »Kepauka 'iya tewi mɨnetsi'utahɨawixɨ, 'anekaniutakeni ne'uyɨyɨakatɨ.
DAN 10:12 Hikɨ mɨpaɨ kanetiniutahɨawe: “Tanieri, pepɨkamaka. Kakaɨyari kepemɨtiutawawiri kameniu'enieni matɨari tukaritsie paitɨtɨ kepauka pemitsutɨa pe'imaimɨtɨ tita mɨtikwaniwekai meta kepauka tixaɨtɨ pemɨkarayuyeitɨa Kakaɨyari hɨxie. 'Ayumieme mɨya pemutainekɨ ne nepunua.
DAN 10:13 Xeitewiyari heimana xewi tukari Peritsiya kwieyaritsie ti'ɨwiyame pɨkanetsi'utanaki'eri, peru 'ayumieme Miyeri pɨnetsi'uparewi kanekuyeixɨani, mɨkɨ xewitɨ te'ɨwiyamete watsata waɨkawa meuyewetse kanihɨkɨtɨni. Mana nepunehayewaxɨ, Peritsiyatsie te'aitamete wahamatɨa.
DAN 10:14 Peru hikɨta nepeyetɨa nemɨmetitaxatɨanikɨ 'ateɨterima wahetsie kemɨtiyɨni 'uxa'awarietɨni, mɨkɨ kepemɨtiunierixɨ 'ana kemɨtiyɨni kanimiemetɨni”.
DAN 10:15 »Mexi mɨkɨ tewi mɨya netikɨhɨawekai, ne nekaniutihɨximakeni kwiepa meta kayuwatɨ nekatiniuyerɨni.
DAN 10:16 Hikɨ xewitɨ tewi hepaɨ tiyuxexeiyatɨ netenitsie kaneniutamayɨani, hikɨ 'ana ne ne'utaniutɨ nekanayani. Mɨpaɨ nekatinitahɨawe nehamatɨa mɨtikuxatakai: “Neti'aitɨwame, 'ikɨ mɨyanemɨtiunierixɨkɨ 'aixɨa nepɨkatinekɨhɨawe meta nepɨkaheutɨrɨkaɨye.
DAN 10:17 Nepɨkayɨwe, ne meti'uximayatsiriwame, 'ahamatɨa nemɨtikuxatani. Tɨrɨkariya nepɨkahexeiya, waɨriyarika xeikɨa neputa'iwe”.
DAN 10:18 »Tawarita, tewi hepaɨ mɨtiyuxexeiya kaneniumayɨani hikɨ tɨrɨkariya kaneniupitɨani,
DAN 10:19 kepauka mɨpaɨ mɨnetikɨhɨawekai: “Kayuwatɨ pekehexeiyani, tewi Kakaɨyari waɨkawa mɨmatsinaki'erie. Keneutatɨrɨkaxɨa, pepɨkaheumaka”. »Mexi mɨkɨ netikuxaxatɨwakai, ne nekaniutatɨrɨkaxɨani hikɨ mɨpaɨ nekatinitahɨawe: “'Ari pepɨnetsi'utatɨrɨkariyaxɨ, neti'aitɨwame, kenetineutaxatɨa”.
DAN 10:20 Hikɨ mɨpaɨ kanetiniutahɨawe: “¿Yapetimate titayari 'ahetsɨa nemɨtinua? Tamɨ Peritsiyatsie ti'ɨwiyame hamatɨa nemɨnetamienikɨ nekaniyɨaneni. Kepauka nemɨtitahayewa mɨkɨ hamatɨa nenemienetɨ, Kɨretsiyatsie ti'ɨwiyame kaninuamɨkɨ.
DAN 10:21 Peru neuxei, yanekametinitaxatɨamɨkɨ kemɨre'uxa yuri maine xapayaritsie. Kenemɨtinetamieni mɨkɨ wahamatɨa, Miyeri xeikɨa netsiparewiekaku nekaniyɨweni, mɨkɨ xeikɨa xeme mɨxe'ɨwiya kanihɨkɨtɨni.
DAN 11:1 »”Kepauka Rariyu Meru tewiyari mexɨakame wiyari mɨti'aitakai, mɨkɨta nekaniuparewieni, tɨrɨkariya nekanipitɨani.
DAN 11:2 »”Peru hikɨ nekamatinitaxatɨamɨkɨ 'ikɨ niuki yurikɨ kemaine pemeitimanikɨ. Peritsiya kwieyaritsie te'aitamete yuhaikatɨ 'akuxi mekananuku'uikuni, meta tawarita 'akuxi xewitɨ naurieka kananukakemɨkɨ, mɨkɨ matsi waɨkawa xiku kanayeimɨkɨ keyuri memɨyuhaika. Kepauka waɨkawa tɨrɨkariya hexeiyatɨ mayani yuxikutɨriyakɨ, yunaime kaniwata'inimɨkɨ Kɨretsiya kwieyaritsie ti'aitame memɨtamienikɨ.
DAN 11:3 Hikɨ xewitɨta ti'aitame nanutikemɨkɨ kwinimieme titɨrɨkaɨyetɨ, mɨkɨ katinita'aitamɨkɨ waɨkawa reukemakamekɨ meta yakatiniyurimɨkɨ kemɨtinake.
DAN 11:4 Peru yapauka 'ari kepauka mɨti'aitani, mɨra'aitani kanita'unimɨkɨ meta 'ayenaukatɨ kanayeimɨkɨ mɨra'aitakaitsie. 'Ikɨ ti'aitame mɨra'aitakai nuiwarimama mepɨkateta'aita, meta ti'aitatɨ kemɨtitɨrɨkaɨyekai mɨpaɨri pɨkatitɨrɨkaɨyeni, karikɨ Kakaɨyari kanititsanaxɨamɨkɨ meta hipame pɨta kaniwayetuiriemɨkɨ.
DAN 11:5 »”Ti'aitame tatsutɨa kiekame waɨkawa kanitatɨrɨkaxɨamɨkɨ, peru xewitɨ kuyaximama tiwa'aitɨwame mɨkɨ matsi waɨkawa tɨrɨkaɨyetɨ nayuyeitɨamɨkɨ keyuri mɨkɨ, waɨkawa tɨrɨkaɨyetɨ katinita'aitamɨkɨ yukwieyaritsie.
DAN 11:6 Yapaɨmexɨa wiyari 'anuyeyayu mekaniyutinɨikuni: tatsutɨa hepatsie ti'aitame niweya 'uka, ti'aitame tayeta kiekame kanitiwitɨmɨkɨ, 'aixɨa 'iyari memuyuxeiyanikɨ, peru 'uka tɨrɨkariya pɨnawaiyarieni, meta ti'aitame tɨrɨkariyaya pɨkareutere. Mɨkɨ 'uka kanika'unariemɨkɨ, meta memeweiyakai, meta nu'aya metatsiere kɨnaya. »”'Ana tukaritsie,
DAN 11:7 mɨkɨ 'uka 'iwaya xewitɨ ti'aitame 'uwenieya tatsutɨa miemetsie kanayerɨmɨkɨ, meta yukuyaxima warawitɨtɨ ti'aitame tayeta kiekame kanitamiemɨkɨ meta ti'aitame kiekarieya kuraruyari 'amatitewa, hikɨ kane'iwamɨkɨ.
DAN 11:8 Kakaɨyariximama tepɨakɨ memɨwewiyatɨka yuhetsiemieme katinayeitɨamɨkɨ, meta hurukɨ mɨtiwewiyatɨka meta pɨratakɨ, 'Ekipitu katinanutɨmɨkɨ, yapaɨmexɨa wiyari ti'aitame tayeta kiekame kayuwatɨ kanipitɨariemɨkɨ.
DAN 11:9 'Arike ti'aitame tayeta kiekame, ti'aitame tatsutɨa kiekame hakewa mɨre'aitanitsie kanitahamɨkɨ kanitamiemɨkɨ, peru waɨriyarika kanipitɨariemɨkɨ yukwieyaritsie makunuanikɨ.
DAN 11:10 Hikɨ niwemama mekaniyukuha'aritɨakuni memɨyukwiyukɨ, kuyaxi meyumɨireme mekaniwakuxeɨrikuni, haa waɨkawa muwayeneka hepaɨ, naime meteye'unarɨmetɨ mekaniyekɨnikuni kiekari kuraruyari 'ematitewatsie mekaniye'axɨakuni.
DAN 11:11 »”Hikɨ ha'atɨ, ti'aitame tatsutɨa kiekame ti'aitame tayeta kiekame kanitamiemɨkɨ, tsepa memɨyumɨireni kuyaximama kana'iwariemɨkɨ.
DAN 11:12 'Ikɨ rayu'iwame, ti'aitame tatsutɨa kiekame waɨkawa kaniyuta'ɨrimɨkɨ meta yumɨireme kaniwakwimɨkɨ, matsi rayu'iwatɨ pɨkareutere,
DAN 11:13 karikɨ ti'aitame tayeta kiekame hipameta kuyaxi kaniwakuxeɨrimɨkɨ, matsi meyumɨireme, meta 'aixɨa ti'aneneme kuyaxa timieme mete'upikame keyuri matɨari miemete, hikɨ yapaɨmexɨa wiyari 'anuyeyayu ti'aitame tatsutɨa kiekame tawarita kanitamiemɨkɨ.
DAN 11:14 »”Neuxei, Tanieri, mɨkɨ tukaritsie yuwaɨkawatɨ ti'aitame tatsutɨa kiekame teɨterimama me'eye'unietɨ pɨta mepakɨne, metatsiere mepɨwanɨka hipatɨ 'axamemɨte'u'iyari 'a'iwama 'ixaheritsixi, peru mepɨkatehayu'iwa. Mɨpaɨ katinaye'atɨariemɨkɨ 'ikɨ kepemɨtiunierixɨ.
DAN 11:15 Hikɨ ti'aitame kaninuamɨkɨ tayeta kiekame, tetsari 'imɨmɨiyari kanita'aitamɨkɨ kuraru 'amatitewa hetsiemieme, mɨpaɨ kiekari 'aixɨa mɨ'anetsie katineutahamɨkɨ, kuyaxi tatsutɨa kiekatari mepɨkayɨwekaxɨani, nitɨma kuyaxi 'aixɨa memɨ'anene mepɨkayɨwekaxɨani.
DAN 11:16 Kuyaxi tayeta kiekatari kemɨtiwanake mepɨteyurieni, xewitɨ mɨwara'iwa mɨkayɨwenikɨ, hikɨ takwie witsimɨraku'anetsie mekaniyuhayewakuni, mɨkɨ mana mekatenita'aitakuni.
DAN 11:17 Ti'aitame tayeta kiekame kaniyukuha'aritɨamɨkɨ naime mɨra'aitatsie tɨrɨkariyayakɨ muyutamienikɨ, peru ti'aitame tatsutɨa kiekame hamatɨa tɨratu kaniwewimɨkɨ: yuniwe 'uka kaniwitɨtɨamɨkɨ, 'ika'unamɨtɨ katiniyurimɨkɨ mɨra'aitatsie, peru yapɨkatiyunake kemɨtiku'eriwakai.
DAN 11:18 Hikɨ 'arike haramara tetsita kiekatari kaniwatakwimɨkɨ, mɨkɨ yuwaɨkawame kiekarite kana'iwamɨkɨ, peru xewitɨ kuyaxi tiwa'aitɨwame kayuwatɨ kanitamaritamɨkɨ teɨteri wananaimakaku, meta kanitewiyatsitɨamɨkɨ.
DAN 11:19 'Arike mɨpaɨ tiyɨyu, ti'aitame tayeta kiekame kanakunuamɨkɨ yukwieyaritsie yukiekaritetsie kuraruyari 'amatitɨtɨtsie, peru kanekawemɨkɨ katinikwinimɨkɨ hikɨ tawariri pɨkatamariwa.
DAN 11:20 »”'Ariketa ti'aitame tayeta kiekame 'utɨa, xewitɨ ti'aitame kananukakemɨkɨ, mɨkɨ waɨkawa mariwetɨ mayanikɨ xeime tumini wawame kanitanɨ'amɨkɨ. Peru yapaɨmexɨa tukari 'anukayayu mɨkɨ ti'aitame pɨmɨni, tsepanetɨ kuyaxa ka'uyeikatɨ.
DAN 11:21 »”Hetsiena mieme xewitɨ tewi 'axatiuka'iyaritɨ kananukakemɨkɨ, ti'aitame mɨkahɨkɨtɨniyari, kepauka teɨteri 'atsimemɨkateha'eriwanitsie, mɨkɨ kwieyaritsie katinita'aitamɨkɨ, tiwa'itaiyatɨ memɨkatehetimanikɨ.
DAN 11:22 Kaniwara'iwamɨkɨ yunaime kemɨ'ane memitamieni, metatsiere ti'aitame hamatɨana tɨratu muwewiekai.
DAN 11:23 Katiniwa'itaiyamɨkɨ kemɨ'ane hamatɨana tɨratu memɨwewieni, meta 'etsimeyupaɨmeme teɨteri warexeiyatɨ pɨrayu'i'iwani.
DAN 11:24 Kepauka kwie mukumane waɨkawa mɨxikutsixi 'atsimemɨkateha'eriwani, kaniwatakwimɨkɨ, paapamama meta teukarimama kememɨkate'uyuri katiniyurimɨkɨ. Katiniwatapitɨamɨkɨ yuteɨterima piinite tita memɨte'u'axixɨ tita memɨteha'iwaxɨ meyukwitɨwetɨ, meta katinitixatamɨkɨ kiekarite kuraruyari 'amatitɨtɨ memɨwatakwinikɨ. »”Peru mɨkɨ waɨkawa tukari pɨkayurieni.
DAN 11:25 Hikɨ waɨkawa yutɨrɨkariya hetsie tiwiyatɨ, ti'aitame tatsutɨa kiekame kanitamiemɨkɨ yumɨireme kuyaxi warawitɨtɨ. Ti'aitame tatsutɨa kiekame kuyaxi yumɨireme memɨtɨrɨkawi warawitɨtɨ kanitamiemɨkɨ, peru me'iwa pɨkayɨwekaxɨani, hipatɨ teɨteri mepiku'eirieni.
DAN 11:26 Hamatɨana memɨtetikwa'akai mekateniyurikuni memika'una, kuyaximama yemekɨ mekana'iwariekuni, meta yumɨiretɨ mekanikwi'iwakuni.
DAN 11:27 Yunaitɨ yuhutatɨ te'aitamete xeimexayaritsie me'utitetɨ, yunaitɨ kememɨteyunanaimani xeikɨa mekateniku'eriwakuni, meteyu'itaiyatɨwetɨ xeikɨa, peru mɨkɨ yakɨ xeikɨa katinayeimɨkɨ, 'akuxi 'imatɨrieka tukari mɨka'aye'awenikɨ.
DAN 11:28 Ti'aitame tayeta kiekame yukwieyaritsie kanakunuamɨkɨ waɨkawa piinite rexeiyatɨ, peru 'akuxi meri tuki mɨpatsie 'axakaniyurimɨkɨ, kemɨtiku'eriwakai yakatiniyurimɨkɨ, 'anake yukwieyaritsie kanakunuamɨkɨ.
DAN 11:29 »”'Aye'ayu tukari, ti'aitame tayeta kiekame, ti'aitame tatsutɨa kiekame kanitamiemɨkɨ tawarita, peru 'ana yaxeikɨari pɨkatiyɨni,
DAN 11:30 karikɨ kanuwa 'amupapa kuyaxa miemete tau makayuyuipike kiekatari mekanitamiekuni, 'ana kanitimamɨkɨ kanikunuamɨkɨ. Hikɨ kunuame tuki mɨpatsie kanixɨanatɨamɨkɨ hetsiena kanihaxɨapiemɨkɨ. Kepauka mɨyemie 'aixɨa katiniwaxeiyamɨkɨ kemɨ'ane tɨratu memɨku'eirieni.
DAN 11:31 Kuyaximama tuki kuraruyari 'axamekaniyurikuni meta mawari xexuime tukaritsie mieme mekanikunakuni, hetsiena mieme pɨta tixaɨtɨ mekateniyurikuni 'axati'aneme katipatsiekame mɨrayeitɨwa.
DAN 11:32 Kemɨ'ane tɨratu memɨku'eirieni katiniwa'itaiyamɨkɨ witsitiwakɨhɨawetɨ, matsi kemɨ'ane yukakaɨyari memɨmateni mepuyutɨrɨkariyani meta mepɨka'i'enieni.
DAN 11:33 »”Memɨtemaiwawe yumɨireme mepɨwata'ɨxatsitɨani, peru yapaɨmexɨa 'anuyeyayu 'ixiparakɨ mepɨkwi'iwa, yatɨni mepɨtitaiyarieni, yatɨni 'ateewa mepanuhapanieni xeime kwieyaritsie meta naime yupiinite mepɨtenawaiyarieni.
DAN 11:34 Kepauka memɨkaxɨrieni, 'etsiwa xeikɨa mepɨparewiyani, peru yumɨiretɨ teɨteri mepɨwatinɨnitɨtɨ peru yakɨ me'utiyuatɨ.
DAN 11:35 Hipatɨ temaiwawemete mepɨkaxɨriyani, peru mɨkɨ 'inɨatsikakɨ mepɨ'itiyani meta 'aixɨa puwatiyurieni, kepauka tukari maye'anitsie tɨniriya memɨkahexeiyanikɨ. Waɨkawa 'akuxi kaneuyewekani tukari maye'ani.
DAN 11:36 »”Mɨkɨ ti'aitame kemɨtinake pɨtiyurieni. Yuhetsiemieme 'aixɨa putaineni, yunaime kakaɨyarixi watsata mariweme puyu'erieka, meta yuri Kakaɨyari hepaɨtsita 'axapɨtayɨni nixewitɨ mɨkatayɨwe hepaɨ. Naitɨ 'aixɨa pɨtikɨyɨneni kemɨtiku'eriwani, mexi Kakaɨyari haxɨaya hetsɨana ka'uye'aweni, karikɨ kemɨtiyɨnikeyu yakatiniyɨmɨkɨ.
DAN 11:37 Mɨkɨ ti'aitame yututsima meripaitɨ kiekatari wakakaɨyarixi pɨkawarayexeiyani, nitɨma kakaɨyari 'ukarawetsixi memeyexeiya, nixeimetɨma kakaɨyari pɨkahayexeiyani, matsi pɨta mɨkɨ mariweme puyuxatani keyuri mɨkɨ kakaɨyarixi.
DAN 11:38 Peru, 'ikɨ ti'aitame kakaɨyari kiekarite kuraruyari 'amatitetewa mɨ'ɨwiya payexeiyani, xeime kakaɨyari tutsimama memɨkaheitima payexeiyani, hikɨ mawari kaniwewiriemɨkɨ waɨkawa raye'akame, huru, pɨrata, meta tetexi witsimɨ'anene.
DAN 11:39 Xewitɨ kakaɨyari mɨkamatiwa 'iparewiekaku, kiekarite waɨkawa 'aixɨa mɨreukukurarutɨiyarietɨka kaniwatakwimɨkɨ, kemɨ'ane hetsɨana memɨyuyetuani waɨkawa 'aixɨa katiniwaxeiyamɨkɨ, katiniwarakapitɨamɨkɨ yumɨireme teɨteri wakuwexinaruritsixi kaniwarayeitɨamɨkɨ meta kwie kaniwayetuiriemɨkɨ.
DAN 11:40 »”Kepauka tukari maye'ani, ti'aitame tatsutɨa kiekame tayeta kiekame kanitamiemɨkɨ, matsi mɨkɨta kanitamiemɨkɨ kaxetate kuyaxa miemete meta kawayutsixi metatsiere kanuwate kuyaxa miemete wakuha'aritɨame. Yumɨireme nuiwarite kaniwaka'unamɨkɨ, wahetsɨa kaninuamɨkɨ haa teɨteri mɨwahautsitɨwa hepaɨ.
DAN 11:41 Yaxeikɨata takwieyari witsimɨraku'anetsie kanitahamɨkɨ, yumɨiretɨ nuiwarite mekana'iwariekuni hetsɨana miemete mekanakɨnikuni, peru mekanitawikweikuni 'Erumi, Muhawi meta 'amunitsixi tewa'aitɨwamete.
DAN 11:42 Yuwaɨkawame nuiwarite kaniwara'iwamɨkɨ, meta tɨma 'Ekipitu pɨkatawikweni.
DAN 11:43 'Ekipitu timieme huru meta pɨrata yupiini katinayeitɨamɨkɨ, meta naime tita mɨrexeiyani, metatsiere riwiyutsixi meta 'etiupetsixi teɨteriyari katiniwata'aitɨamɨkɨ.
DAN 11:44 Matsi niuki hetsɨana kaninuamɨkɨ tayeta miemete meta tau manatineika miemete mekani'atɨiriekuni mɨkɨkɨ kanikumunuaxɨamɨkɨ, hikɨ waɨkawa ha'atɨ kanayeyeimɨkɨ yuwaɨriyatɨ muwaka'unakɨ meta muwakwinikɨ yumɨireme teɨteri.
DAN 11:45 Haramara meta witsimɨ'ane hɨri mɨpatsie wahixɨapa kanitayerɨmɨkɨ, peru mexi mana 'ukani, tukarieya kaneutiparimɨkɨ yapauka, xewitɨ hetsiena mɨtanuani pɨkayɨwekaxɨani.
DAN 12:1 »”Hikɨ Miyeri kaninuamɨkɨ, ti'aitame mɨmariwe 'ateɨterima wa'ɨwiyame. Yapaɨmexɨa tukari 'uximatɨarika kanitixuawerimɨkɨ, hatsuaku mɨkatiyɨwe hepaɨ nuiwarite memuyukama tsiepaitɨtɨ. 'Ateɨterima mekanitawikweitsitɨariekuni, xapatsie memaye'uxa kememɨtetetewa,
DAN 12:2 meta kwiepa tumuanaritsata mekananuku'uikuni yumɨiretɨ memukutsu, mɨkɨ hipatɨ yuheyemekɨ 'amemu'uwanikɨ, peru hipatɨta memɨtewiyatsitɨarienikɨ xeikɨa meta memɨte'uka'eniwanikɨ waɨkawa yuheyemekɨ.
DAN 12:3 Memɨtemaiwawe mepɨxawawatɨni xawatɨriya muyuawitsie miemekɨ, kemɨ'ane yumɨireme teɨteri memɨtewaruta'ɨkitɨa tita mɨtiheitserie hepaɨtsita xurawetsixi wahepaɨ meputimerɨkani yuheyemekɨ.
DAN 12:4 »”'Ekɨ, Tanieri, 'ikɨ 'awie ketineuti'uta meta xapa kenanutanama kepaukake tukari maye'ani, karikɨ yumɨiretɨ mepeu'uwani metekuwautɨwetɨ waɨkawa metemaikutɨ”.
DAN 12:5 »Ne, Tanieri, tawarita yuhutame teɨteri nehɨxie nekaniwaruxeiya, xewitɨ hatetsita 'anataɨye kaniutiwekaitɨni meta xewitɨta hatetsita 'anutaɨye.
DAN 12:6 Mɨkɨ xewitɨ mɨpaɨ katiniutahɨawe rinu kamixayari manakatɨkɨkai, haa heima muyewiekai: “¿Kepaɨmexɨa peuyewetse 'ikɨ naitɨ mɨraye'anikɨ mɨtimamariwawe?”
DAN 12:7 »Ne nekanixeiya meta nekani'enieni tewi rinu kamixayari manakatɨkɨ, haa heima muyewiekai, yuheima yumamate hetseraxɨaka hikɨ yakatiniyɨhɨritɨani kemɨ'ane mayeniere yuheyemekɨ hɨxie, mɨpaɨ kaniutayɨni: “Haika wiyari heimana 'ataxewi metseri kaneuyewekani. 'Ikɨ naitɨ katinaye'amɨkɨ kepauka teɨteri memɨpatsie watɨrɨkariya tawariri mɨkaka'unarieni”.
DAN 12:8 »Tsepa nemu'enakai mɨkɨ tewi kemainekai, nepɨkaheiti'enietɨya, 'ayumieme mɨpaɨ nepɨtita'iwawiyaxɨ: “Neti'aitɨwame, naitɨ 'ikɨ ranuyeyayu ¿manatari ketiyɨni?”
DAN 12:9 Mɨkɨ mɨpaɨ kanetiniuta'eiya: “Tanieri, keneumieni heitseriemekɨ, 'ikɨ naitɨ pɨranukanaka 'awie kepaukake tukari maye'ani.
DAN 12:10 Yumɨiretɨ 'aixɨa mekani'itɨariekuni meta mekanitaheitseritɨariekuni, meta me'itiyatɨ mekaniyuhayewakuni, peru 'axateyuruwamete yaxeikɨa 'axamekateniyuriekakuni. Mɨkɨ nixewitɨ pɨkaretimaitɨyani, peru memɨtemaiwawe naime mekatenetimaikuni.
DAN 12:11 Kepauka mɨhayewarieni mawari xexuime tukaritsie mieme, kepauka hetsiena mieme pɨta tixaɨtɨ memɨteyurieni 'axati'aneme katipatsiekame, xeimiriyari heimana huta tsienituyari heimana nauka tewiyari heimana tamamata (1.290) tukari kananuyeyeimɨkɨ.
DAN 12:12 'Aixɨa ke'itɨarieka kemɨ'ane mɨta'ikwewani xeimiriyari heimana haika tsienituyari heimana xeitewiyari heimana tamamata heimana 'auxɨwi (1.335) tukari.
DAN 12:13 Peru 'ekɨ, 'aheyemekɨ keneumieni kepaukake 'atukari maye'ani, hikɨ keneuka'uxipi, kepauka 'imatɨrieka tukari maye'ani pekananukukemɨkɨ pemɨtiyetuiriyarienikɨ tita pemɨra'iwaxɨ”».
HOS 1:1 'Ikɨ Yawé kaniniukieyatɨni 'Utseyaxi Weherí nu'aya kemɨtiyetuiri, 'Utsiyaxi, Kutani, 'Akatsi meta 'Etsekiyaxi kepauka memɨte'aitakai Kura kwieyaritsie, meta Keruwuhani Kuhatsi nu'aya ti'aitakaku 'Ixaheri kwieyaritsie.
HOS 1:2 Kepauka Yawé 'Utseyaxi hamatɨa matɨari mɨtiutaxa, mɨpaɨ katinitahɨawe: «Kenemie xeime 'ukaratsi tuminikɨ muyuwitɨnɨa kenetiwitɨki, hetsiena tɨɨri keniwarayexeiya, mɨkɨ kwieyaritsie mɨpaɨ memɨyɨakɨ yunaitɨ. Yawé me'uku'eirieka hipame kakaɨyarixi pɨta mekaniwarayexeiyakaitɨni».
HOS 1:3 Hikɨ 'Utseyaxi kaneyani, Kumexi titewakame kaniutiwitɨni Riwɨrahini niweya, mɨkɨ kaniutihukata nunutsi mekanayexeiya.
HOS 1:4 Hikɨ Yawé mɨpaɨ katinitahɨawe: «Ketsireri ketineuterɨwa, kwitɨwari Kehú nekatinakapitɨamɨkɨ nuiwarimama nekatiniwakwinitɨamɨkɨ, mana Ketsireri mɨrakutewatsie mɨkɨ teɨteri yɨwaɨkawa mɨwarekwikɨ. Mɨpaɨ nekatiniwaka'unamɨkɨ 'Ixaheri kwieyaritsie te'aitamete.
HOS 1:5 Mɨkɨ tukaritsie 'ixaheritsixi watupi nepɨtimuraxɨani mayeweritsie Ketsireri mɨrayetewatsie».
HOS 1:6 Kumexi tawarita kaniutihukata 'ukatɨme kaniutiniweni. Hikɨ Yawé 'Utseyaxi mɨpaɨ katiniutahɨawe: «Mɨpaɨ ketineuterɨwa Ruxuhama, taniukikɨ manuyɨne “Nepɨka'itinenimayatari”, nepɨkareiyehɨwiriekari 'Ixaheri mɨra'aitatsie, matsi nepɨka'itinenimayatari.
HOS 1:7 Matsi pɨta wahetsiemieme nekaniwatinenimayatamɨkɨ Kura nuiwarimama meta nekaniwatawikweitsitɨamɨkɨ, peru 'ɨrɨkɨ, 'ixiparakɨ, kuyaxakɨ meta kawayutsixi wahetsie me'anatetɨkaitɨ pɨkatiyɨni, matsi pɨta Yawé xekakaɨyari tɨrɨkariyayakɨ pɨtiyɨni».
HOS 1:8 Kepauka Kumexi niweya katsitsewetɨ matɨa «Nepɨka'itinenimayatari» mɨtitewa, tawarita kaniutihukata 'ukitɨme kaniutiniweni.
HOS 1:9 Hikɨ Yawé 'Utseyaxi mɨpaɨ katiniutahɨawe: «Mɨpaɨ ketineuterɨwa Ruhami, taniukikɨ panuyɨne “Mepɨkaneteɨterimari”, xemeri xepɨkaneteɨterima neta nepɨkaxekakaɨyari.
HOS 1:10 »Peru 'uxa'atɨni warie 'ixaheritsixi teɨteriyari, yumɨiretɨ mepakɨne xiekari haramaratetsita mɨtika mɨkayu'inɨatsinɨa hepaɨ. Kepauka tukari maye'ani xeme hakewa mɨpaɨ xemɨteheterɨwarie: “Mepɨkaneteɨterimari”, mana mɨpaɨ xepɨteterɨwarieni: “Kakaɨyari mayeyuri niwemama”.
HOS 1:11 Kura teɨterimama meta 'Ixaheri teɨterimama wahamatɨa mekaniyutaxewirikuni, xeime xeikɨa ti'aitame mehexeiyatɨ mepakɨne yukiekaritsie, 'ana Ketsireri mariwetɨ kanayeimɨkɨ.
HOS 2:1 »Kepauka memɨ'axɨani xe'iwama 'ukitsi mɨpaɨ xeketeniwaruterɨwa: Hami, taniukikɨ manuyɨne “Mepɨneteɨterimari”. Meta 'ukari Xuhama, taniukikɨ manuyɨne “Nepitinenimayatari”.
HOS 2:2 »Peru hikɨ yumaama hetsie xeketeneuhɨpani, mɨkɨri hikɨ pɨkane'ɨya neta nepɨkakɨnaya. Yuhɨxie mayuyewirie witsimɨtixeiyariekakɨ ke'ayuye'itieni 'axamɨtiuka'iyarikɨ, meta yutawie kemɨratikuka ketiuhayewa.
HOS 2:3 Ya mɨpaɨ pɨkatiuyuri, ne naime nekatininawairiemɨkɨ, ke'anetɨ mutinuiwaxɨ mɨpaɨ 'anekame nekanihayewamɨkɨ. Makuwakitsie nekanihɨamɨkɨ. Kwiepa tixaɨtɨ mɨkaraxuawe nenihayewamɨkɨ, yeharimɨnetɨ kanimɨmɨkɨ.
HOS 2:4 Niwemama nepɨkawatinenimayata, 'axamɨtiyuriene hetsie memɨmiemetekɨ.
HOS 2:5 Wamaama tuminikɨ muyuwitɨnɨa kanihɨkɨtɨni, Mɨwarutiniwexɨ ka'uyukatewiyatɨ. Mɨpaɨ kaniutayɨni: “Netuxexerima wahamatɨa nepukuyeikani, memɨnetemikwa memɨnetsiharitɨa, muxa huxarieya, rinu 'ixurikiyari, nehatseiti meta tita nemɨranuye'e”.
HOS 2:6 'Ayumieme ne huyetana nepɨranutanani xuyakɨ, muwa xeikɨa nepiyenaka huye mɨkataxeiyakɨ.
HOS 2:7 Waɨkawa tiuka'eniwatɨ yutuxexerima pɨwakuwauneni, kawataxeiyame mɨpaɨ pɨtayɨni: “Nekɨna matɨari nemitiwitɨ hetsɨa nepɨnuanikeyu, matsi meripaitɨ 'aixɨa nepɨtixeiyariekai keyuri hikɨ”.
HOS 2:8 Mɨkɨ mɨpaɨ pɨkaretimaiwe kename ne nehɨkɨ nemɨtimikwa, kaxie winuyari mɨhekwa meta hatseiti nemɨtiyetuirie. Ne waɨkawa nepɨtimɨiririe pɨrata meta huru, ¿ketiuyuri kɨmana? Memɨkayuri kakaɨyarixi pɨwarutiwewi.
HOS 2:9 »'Ayumieme kepauka tukarieya maye'ani ne tɨriku nepinawairieni kaxie winuyari mɨhekwa. Muxa kaheuhuxakame nepɨhayewa meta rinu 'ixurikiyari kahexeiyame nemɨtiyetuiriekai mawekaku kɨmana meuyukunakakɨ.
HOS 2:10 Nepitewiyatsitɨani mɨirikɨa tuxexerimama me'ixeiyakaku, nixewitɨ pɨkayɨweni hetsiena mutanuani.
HOS 2:11 Naitɨ mana pɨtiuye'atɨyani 'ixɨarari temawierikayari kemɨtiwewiekai. Meta kemɨtikuyeikakai metseri xikɨraɨyekaku, meta kepauka muka'uxipiwekai meta 'ixɨarari kemɨtiutiwewiwakai xeiwiyari 'aye'axekaku.
HOS 2:12 Kaxie haraweriyari kemɨrexeiyakai meta piní, kename mɨkɨ tuxexerimama mete'iyetuiriekai. Maku'ɨtsiya nepayeitɨani, yeuta memɨte'u'uwa mekanitikwaikuni xeikɨa.
HOS 2:13 Nepɨtikwinitɨani mɨkɨ tukaritsie hipame kakaɨyarixi mɨtiwarutimawiriwakaikɨ, kepauka witsitiyukukemaritɨwatɨ nakɨtsatekɨ meta kukakɨ ne kanetsiha'eriwatɨ, yutuxexerima wa'utɨma xeikɨa peyeikakai
HOS 2:14 »'Ayumieme hikɨ nekatini'irɨwiyamɨkɨ: makumawetsie nekanenuwitɨmɨkɨ mana witsi'anekamekɨ nekaneitahɨawimɨkɨ.
HOS 2:15 'Ana nekaniyetɨiriemɨkɨ kaxie haraweriyari, mayeweritsie waɨkawa Kemɨtiuka'eniwakai 'aixɨa 'aneme nepayeitɨani memanukɨka Mɨnetsitakwewiekɨ. Mana pɨnetsita'eiya temaikɨyari hepaɨ, kepauka 'Ekipitu mayetɨatsie hepaɨ.
HOS 2:16 »Yawé mɨpaɨ kanaineni: Kepauka maye'ani tukari mɨpaɨ pepɨkanetiuterɨwani: “neti'aitɨwame”, matsi pɨta: “nepɨmatsinaki'erie nekɨna”.
HOS 2:17 Ne nepɨmeratɨmaiyatsitɨani tawarita pemɨkawakuxatanikɨ memɨkayuri kakaɨyarixi, hatsuakuri pemɨkawatahɨawe.
HOS 2:18 Mɨkɨ tukaritsie tɨratu nepɨwewieni Yeutari wahamatɨa, muyuawitsie memɨte'uwɨtɨkɨka wahamatɨa kwiepa memɨteku'ɨretɨwe wahamatɨa. Kiekari mukumanetsie tupi nepɨwanawairieni, 'ixipara, kuyaxi meta para 'aixɨa 'anemekɨ xemu'uwanikɨ yunaitɨ.
HOS 2:19 Ne ne'ɨya nematsi'ayeitɨani yuheyemekɨ, nematsi'awitɨkɨni heitseriemekɨ 'aixɨa 'iyari, teyunaki'erietɨ teteheuyuyehɨwirietɨ.
HOS 2:20 Pepɨnetsihetimani heitseriemekɨ kenemɨtiuka'iyari hatsuaku nepɨkamatsiku'eirieni, hikɨ 'ana Yawé pekanetimaimɨkɨ.
HOS 2:21 »Yawé mɨpaɨ kanaineni: Mɨkɨ tukaritsie ne yanepɨtikamieni, ne muyuawitsie paitɨ nepɨxeku'eiyani, meta muyuawi kwie pɨ'enieka,
HOS 2:22 Kwieta 'imɨari pɨxuaweriyani, kaxie winuyari mɨhekwa huriwa hatseitiyari meta, mɨkɨkɨ mekaniwata'eiyakuni Ketsireri.
HOS 2:23 Ne nehetsiemieme kwiepa nepɨwaka'eni. “Nepɨka'itinenimayatari” mɨkɨ wahetsiemieme nepɨwatinenimayata. “Mepɨkaneteɨterimari” nepɨtiwaterɨwa, “Mepɨneteɨterimari”, mɨkɨta mɨpaɨ mepɨtiyuani, “Pɨtakakaɨyari”».
HOS 3:1 Tawarita Yawé mɨpaɨ kanetiniutahɨawe: «Kenemie tawarita mɨkɨ 'ukaratsi keneutiwitɨki tuminikɨ muyuwitɨnɨa, xeime pɨta mawitɨkɨ. Kenenaki'erieka ne Yawé kenemɨtiwanaki'erie 'ixaheritsixi, tsepa hipame kakaɨyarixi memɨtewarayexeiya tsepa kaxie patsaruyari tsuirayari memikwa'a mawariekame».
HOS 3:2 Ne mɨkɨ 'ukaratsi nepunanai tamamata heimana 'auxɨwime pɨrata tuminiyarikɨ meta tsewara xei'ikayari heimana 'imeriyu,
HOS 3:3 mɨpaɨ nekatinitahɨawe: «Mɨixa wiyari nehamatɨa pepukani peru 'axapekayɨanetɨ. Nixeime hamatɨa pepɨkakahuni. Ne meta nepɨkamatsi kumayɨani».
HOS 3:4 Yurikɨ mɨpaɨ mepɨyɨni 'ixaheritsixi mɨixa wiyari mepu'uwani tiyu'aitɨwame mekahexeiyatɨ, meta mekate'umawarɨmetɨ mawari matitaiyarɨwatsie, meta mekaheixeiyatɨ mawari wewiwame kamixaya meta memɨkayuri kakaɨyarixi.
HOS 3:5 Peru 'arike 'ixaheritsixi hekwamekɨ Yawé mepɨtiwauni yukakaɨyari, meta Rawiri ti'aitame mekani'eniekuni. 'Imatɨarieka tukaritsie Yawé hetsɨa mepɨ'axɨani memamatɨ mepɨtihɨxima'uni, waɨkawa 'aixɨa kemɨtiuka'iyari.
HOS 4:1 Xekeneu'enana 'ixaheritsixi, Yawé niukieya xekeneu'eni, 'ari Yawé yuxanetsika kanitsutɨamɨkɨ mɨkɨ mana kiekatari wahetsie: «Neteɨterima wahetsie pumawe 'aixɨa mɨti'ane meta naki'eriya mepɨkahexeiya, meta Kakaɨyari mepɨkamate.
HOS 4:2 Matsi mepɨtexuaweriya 'axamɨti'ane meta 'itarika. Waɨkawa mepɨtenawatɨwe, hipame wahamatɨa mepɨhitɨwe, mepɨteyumemiwa. Xewitɨ xɨka tiuyumieni mɨkɨta xewitɨ pimieni.
HOS 4:3 Hikɨ 'ayumieme kwiepa pukuwani pɨkatitixuawere, 'anari yunaitɨ mepukwini teɨteri. Yunaitɨ mepɨtekwini yeuta memɨte'u'uwa, memɨte'awɨwawe meta haramaratsie memɨteye'uwa.
HOS 4:4 »Xewitɨ yu'iwa pɨkaxanetani meta pɨka'itate'ani. 'Ateɨterima mawari wewiwame meputate'a.
HOS 4:5 Tukarikɨ tɨkarikɨ mepetiketamɨrike, Kakaɨyari niukametemama yaxeikɨata 'ahamatɨa mepekaxɨrɨwe, 'amaamari pɨka'uyeikani,
HOS 4:6 neteɨterima mepuka'unarie 'atsimekatehetimaika mepɨkwixime. »Metsɨ pepɨka'itanaki'eri tita yuri mɨraine, neta nepɨkametsinaki'erie mawari wewiwame pemɨhɨkɨtɨni. Kakaɨyari niukieya pematɨmaiyaxɨkɨ, netatsiere 'aniwema nekaniwaratɨmaiyamɨkɨ.
HOS 4:7 Kepauka mawari wewiwamete memɨyutimɨirixɨ, matsi waɨkawa 'axamepɨteyuriekai nehetsɨa, kemɨtimariwekai mekanipata mepɨtewinɨarieni yuhetsiemieme.
HOS 4:8 Mɨkɨ teɨteri 'axamɨti'ane mawariyari mawari wewiwamete pɨtiwa'ikwai, 'ayumieme mawari wewiwamete mepɨyutemamawie teɨteri 'axamemɨteyuriekɨ.
HOS 4:9 Mawari wewiwamete meta teɨteri yaxeikɨa mepɨ'anene. 'Ayumieme yanepɨtiwatawawirieni kememɨte'u'uximayataxɨ meta yuxexuime yanepɨtiwapitɨani kememɨte'uyuriexɨa.
HOS 4:10 »Tsepa memɨte'utikwa'a peru mepauhakakwikuni, tsepa tɨɨri yuwaɨkawa memɨwarayexeiyaku, peru hatsuaku mepɨkawarayexeiya, Yawé memuku'eirikɨ para memɨyuyetuanikɨ,
HOS 4:11 hipame 'ukarawetsixi wahamatɨa me'ietɨwetɨ, kaxie winuyari pɨwareuyexɨrɨwa wa'eriwametsie.
HOS 4:12 Neteɨterima kɨye kakaɨyariyari xeikɨa mepayexeiya, mɨkɨ kuta kɨye tiwaku'eiya, mepɨkayumaiwawe hipame 'ukarawetsixi wahamatɨa mehitɨwetɨ xeikɨa mepauyexɨrie, yukakaɨyari mepuku'eiri mɨyameyɨatɨ.
HOS 4:13 Hɨrite 'amutitɨtɨtsie meta yemuritetsie mana mawari taiyariyari mepɨtiwewiwa meta 'imikieri, tuaxa kɨyeyaritɨa meta haramu meta xiutɨa. 'Ayumieme waniwema tuminikɨ memuyuwitɨnɨa mepɨhɨkɨ meta wamu'e'ema hipame mepɨwakumaɨwa.
HOS 4:14 Peru nepɨkawaranutaxɨrieni hipame yumɨireme wahamatɨa memɨhitɨwekɨ, wakɨnamata tuminikɨ memuyuwitɨnɨa wahamatɨa memukahipitekɨ, metatsiere 'ukitsi 'ukari mawari wewiwamete tukita wahamatɨa 'ixɨarari mepɨwewie. 'Ayumieme 'ikɨ teɨteri mɨpaɨ mepɨteka'unarieni memɨka'u'enanakɨ.
HOS 4:15 »Xɨka 'ekɨ, 'Ixaheri, mɨpaɨ peyɨaneni, Kura hetsie pepɨkarahɨpani. »Kirikari xepɨkaheuhuni Weti-'Aweni tukita xepɨkaheutahakeni, mɨpaɨ xepɨkahaitɨkani xeyɨhɨritɨatɨ: “Yawé 'apuyeika”.
HOS 4:16 'Ixaheri tsikeru mɨma hepaɨ pɨ'ane. Ketsɨ Yawé tiwaru'ɨwiya yeuta 'a'uyeukaku, muxatsi wahepaɨ pɨka'ane.
HOS 4:17 'Epɨrahini memɨkayuri kakaɨyarixi pɨwarutinɨi, tsepatsɨ wahamatɨa mɨtiuyuhayewaxɨ.
HOS 4:18 Kepaukari winu memɨkahexeiya, hipame wahamatɨa mepukahipite, metatsiere te'aitamete pɨwanake 'axamɨti'ane.
HOS 4:19 'Ayumieme haikɨri mɨtɨrɨkaɨye pɨwataxɨriexɨani, mepɨyutitetewiya hipame kakaɨyarixi memɨwarayexeiyakaikɨ.
HOS 5:1 »'Ikɨ niuki xekeneu'eni xeme mawari wewiwamete. Xekeneu'enana 'ixaheritsixi. Xekene'enanaka ti'aitame nuiwarimama. Xehetsie pɨmieme kexemɨte'anutaxɨriyani. Mitsipa kiekariyaritsie xeme xekateni'irɨwiyarieka, Tawuxi hɨriyaritsie winiyari 'amɨtewi xekaniutawieka.
HOS 5:2 Tsitihini mɨrakutewatsie putsu muwatixawa xekaniutawewieni. 'Ayumieme ne netinixekwinitɨaka 'aixɨa nexeyurietɨ.
HOS 5:3 Ne 'Epɨrahini nekanimateni, meta 'Ixaheri nepɨkahatɨmaiyawe. Peru 'Epɨrahini tuminikɨ kaniyumayɨinɨaka, meta 'ixaheritsixi meka'itiyatɨ mepayuyeitɨwa.
HOS 5:4 »'Axakememɨteyurie pɨkawapitɨa Kakaɨyari hetsɨa memɨ'axɨani, mepɨkayumaiwawe 'axamemɨteyuriekɨ hipame wa'ɨitama memɨwakumaɨwakɨ mepɨkayɨwawe Yawé memetimanikɨ.
HOS 5:5 'Ixaheri 'uyuta'ɨretɨ 'uxa'atɨniwarie yuhetsie pɨrahɨani. 'Ixaheri meta 'Epɨrahini ke'axamemɨte'uyuri yukɨmana mepekaxɨrieni, Kura meta wahamatɨa kanekawemɨkɨ.
HOS 5:6 Yumuxatsima meta yuwakaitsixi metewara'arietɨ, Yawé mekanitiwaukuni, peru mepɨka'itaxeiya mɨkɨ mɨwaruku'eirikɨ.
HOS 5:7 Yawé xekaniuku'eirieni, yumɨiretɨ tɨɨri mekaniutinunuiwa hipame waniwema. Hikɨ 'ayumieme xekanika'unariekuni meta naitɨ xekwie.
HOS 5:8 »Kuxineta xekenetahɨtsi Kiweya kiekariyaritsie, Xamatsie paitɨ 'awa kehetahɨtsieni, Weti-'Aweni meta xekenetihiwa xemɨyutakwinikɨ, mɨpaɨ mete'uhiwatɨ: “Wenikamini, kene'a'ɨwiyani 'awarita”.
HOS 5:9 Kepauka memɨtekwinitɨarieni, 'Epɨrahini yuxaɨta puyuhayewa. 'Ixaheri nuiwaritemama watsata yanepɨtiwatahɨawe kemɨtiwayurieni.
HOS 5:10 'Itsɨkate te'aitamete Kura kwieyaritsie miemete kwie memɨnawatɨwe wahepaɨ mepɨ'anene. Wahetsie nehaxɨa nepɨtatuani haa nemɨwayenetɨani hepaɨ.
HOS 5:11 'Epɨrahini 'axapɨtixeiyarie, memeye'unie xeikɨa mepitsaipɨna, memɨkayuri kakaɨyarixi mɨwaruweiyakɨ.
HOS 5:12 'Epɨrahini tepaxi wahepaɨ nekaniwakwimɨkɨ, kɨye mɨkɨmie Kura teɨterimama mepɨhɨkɨtɨni.
HOS 5:13 »Kepauka 'Epɨrahini yukwiniya muxei, Kura katinetimani haiyayatsie, 'Epɨrahini kaneyani 'Atsiriyatsie mana parewiya kaniutawauni ti'aitame mɨmariwe hetsɨa. Peru ti'aitame mana kiekame pɨkayɨwekai menayehɨanikɨ, meta haiyaya mu'uayemani.
HOS 5:14 Ne maye nepayani 'Epɨrahini hetsiemieme, maye nunutsita Kura hetsiemieme. Ne nekɨmana nekaniwatitsanamɨkɨ, meta nekaniyemieni, nemiwiyaxɨ ne'atɨtɨ, nixewitɨ pɨkayɨweni mɨnetsi'unawairieni.
HOS 5:15 'Ana nepakunuani nemɨra'aitatsie, kepaukake mɨpaɨ memɨtehetimani kename 'axamete'uyuri. Mepitiwauni kehepaɨ meyɨakaku nemɨwatanaki'erieni, me'u'uxetɨ mepɨnetsitiwauni meyuwaɨriyatɨ».
HOS 6:1 Mɨpaɨ mekaniutiyuani: Hikɨmɨtɨka Yawé hetsɨa tepɨ'axɨani. Tsepa mɨkɨ mɨtatsi'utitsanaxɨ, peru 'aixɨa teteheu'eriekameta pɨtatsi'ayeitɨanita, mɨkɨ pɨtatiukwinitɨa peru pɨtatsiti'uayemani.
HOS 6:2 Huta tukari 'anukayayu tukari pɨtatsi pitɨani, hairieka tukari pɨtatsi 'anuku'uitɨani, 'ana mɨpaɨ hamatɨana tepu'uwani.
HOS 6:3 'Ana Yawé tepetimani, kemɨtiku'eriwa 'utɨmana tepuhuni. Yurikɨ tau manatineika hepaɨ, tahamatɨa matsiɨkɨtɨ payuyeitɨani, tahamatɨa punuani wiyeri xexerixa mieme hepaɨ, wiyeri witarita mieme hepaɨ kwie mukuhawiya.
HOS 6:4 «¿'Epɨrahini 'ahetsɨa kenetiyurieni? ¿Kura meta kenetiyurieni 'ahetsɨa? Xenaki'eriya hai ximeri mieme hepaɨ pɨ'ane, haɨtsi hepaɨ yapauka mɨtipaparike.
HOS 6:5 'Ayumieme nepɨxeheutaxɨriexɨa Kakaɨyari niukametemama newanɨ'akaku, nepɨxe'utiwa neniukikɨ. Kenemɨtixetaxaneta mimierɨkari hepaɨ pɨxeyurieni.
HOS 6:6 Ne naki'eriya nepɨxewawirie, mawarika pɨkatixaɨ, matsi Kakaɨyari pɨta xekene'enieka mawari taiyariyari pɨkatixaɨ.
HOS 6:7 Xeme 'Arani hepaɨ xepɨte'uyuri: tɨratu ketemɨte'uwewi yaxepɨkatekakɨ, xepɨnetsi'uku'eiri.
HOS 6:8 Karaha kiekariyari 'axamemɨte'u'iyari pɨwakiekari, yu'ɨkatekɨ xeikɨa xuriya mepɨtayeuriwa.
HOS 6:9 Mawari wewiwamete mepɨyuxeɨrie Tsikeni huyeri'utɨa 'awie metanenieretɨ, tenawayamete wahepaɨ mekaniwakwika mana memuyekɨka metewawawirietɨ.
HOS 6:10 'Ixaheri mɨra'aitatsie 'axati'aneme nepɨtixeiya. Mana 'Epɨrahini tuminikɨri puyumayɨinɨa meta 'Ixaheri ka'itiyatɨ payuyeitɨwa.
HOS 6:11 »'Ekɨtatsiere Kura, 'axamɨti'anekɨ pepɨka'itsana. »Kepauka ne neteɨterima wahetsie 'aixɨa nemɨtiyurieni,
HOS 7:1 ne kepauka 'Ixaheri nemu'uayema, 'Epɨrahini meta Tsamariya ke'axamemɨteyuriekai waɨkawa mɨkɨ naitɨ pɨtihekɨare. Mɨkɨ mepɨtewa'itaiyakai, kepauka mɨtinawarienekaitsie kiita, yumɨiretɨ kaye'utɨma mepɨtenawatɨwe.
HOS 7:2 Mɨpaɨ mepɨkateku'eriwani ne naime nekatinimaika 'axakememɨte'u'iyari. Ke'axamemɨteyurie mɨkɨ pɨwakunama, ne naime nepɨtimate.
HOS 7:3 »'Axamemɨteyuriekɨ ti'aitame mepɨtemawieritɨa, meta yaxeikɨa 'itsɨkate memɨtewa'itaiyakɨ.
HOS 7:4 Huxunu muwatita'a hepaɨ mepɨ'anene taitsie kɨyexi manunetɨani pɨkaheuyewetse kepauka paa wewiwame harina mɨhawiya kepauka 'aixɨa mɨyɨnike. Yunaitɨ mɨpaɨ mepɨ'anene kayu'ɨitama wahamatɨa memɨhitɨwe.
HOS 7:5 Ti'aitame 'ixɨarari matiwewiwatsie 'itsɨkate winukɨ mepɨtitarɨwewe, ti'aitame pɨreuyehɨpa kemɨtimariwe tɨratu wewietɨ yunaime meminanaima wahamatɨa.
HOS 7:6 Huxunu hepaɨ putiutatawe wa'iyari, 'axamɨti'ane ti'eriyakɨ. Tɨkarikɨ wahaxɨa peukukutsu, ximerita panutaneniere.
HOS 7:7 Yunaitɨ mɨkɨ huxunu mɨtixɨka hepaɨ mepɨtexɨxɨka, wahetsɨa memɨte'aita mepɨwatakukuya. Yunaime te'aitamete mepɨwaranakaxɨrɨwa, peru xewitɨ mɨkɨ pɨkanetsikuwaune nemiparewienikɨ.
HOS 7:8 »'Epɨrahini yumɨireme nuiwarite pɨwanɨ'ɨ, papa tapaxeikɨa mɨwakwani hepaɨ pɨ'ane.
HOS 7:9 Nuiwarite kiekatari tɨrɨkariyaya mepɨkɨme, perutsɨ mɨkɨ 'atsipɨkatiyumate. Kɨpateya putituxarixɨ, peru mɨkɨ 'atsipɨkatimate.
HOS 7:10 Mariwemekɨ 'Ixaheri pɨtihekɨata yuhepaɨtsita, peru mɨkɨ Yawé yukakaɨyari hetsɨa pɨkanuawe. Mɨyaranuyemietɨ, pɨka'ikuwaune tɨma.
HOS 7:11 »'Epɨrahini kukuru mautuxa mɨkatiyu'aitɨarinɨa meta mɨkatimaiwe hepaɨ pɨ'ane, heiwa parewiya puta'iwawa 'Ekipitu kwieyaritsie, heiwata 'Atsiriyatsie.
HOS 7:12 Peru kepauka mɨpaɨ memɨteyurieni yapauka newipi waheima nepuwiwieni, wikixi wahepaɨ nepɨtiwaxɨrieni, 'atahutamexɨa matsi nepɨwaranutaxɨrieni 'axamemɨte'uyurikɨ.
HOS 7:13 Xɨa'ui nepaine memɨnetsi'uku'eiri wahetsiemieme. Meke'uka'unarieni nehɨxie memɨnetsi'aye'uniekai. Ne yemekɨ nepɨwaranayexeiyawe, peru mɨkɨ hatsuaku yuri mehaitɨkaitɨ mepɨkanetsihahɨaweni.
HOS 7:14 Yu'iyarikɨ mepɨkanetsihahɨawe, yu'utatsie xeikɨa mekaheitɨ meputitsuana. Yu'iku mekuwaunike meta yuwinu 'axa'anekɨa mekanekɨkani nehepaɨtsita meheuniutɨ menakɨkani.
HOS 7:15 Ne'aixɨa nepɨtiwaru'ɨkitɨa meta wamamate neputitɨrɨkariyaxɨ, peru mɨkɨ 'axa xeikɨa mepɨteku'eriwakai nehepaɨtsita.
HOS 7:16 Kakaɨyari 'Amutewi hetsɨa mepɨka'axɨaku, tupi tiyu'irɨwiyame hepaɨ mepɨ'anene. Peru wa'itsɨkate 'ixiparakɨ mepɨka'unarieni waniuki 'axamanuyɨnekɨ, meta 'Ekipitu kiekatari mepuwatinanaimani.
HOS 8:1 »Kuxineta keneutahɨtsiri 'inɨari mayanikɨ. Kwixɨ hepaɨ 'akanamieni mɨkɨ waneɨkixiwi Yawé teɨterimama wahetsɨa. Tɨratu ketemɨte'uwewi mɨkɨtsie yamepɨkatekakɨ meta ne'inɨari niukiyari mɨkɨ mepuku'eiri,
HOS 8:2 hikɨta mɨyamenetekɨhɨawe: “'Ixaheri Kakaɨyarieya tepɨmatsimate”.
HOS 8:3 Peru 'Ixaheri 'aixɨa mɨti'ane pɨkatinaki'erie, 'ayumieme xewitɨ waneɨkixiwi pɨwaranukuweiya.
HOS 8:4 Yɨkɨmana mepɨwaranuka'uitɨwa te'aitamete ne yanekahainekaku, hipame 'itsɨkate mepɨwaranuka'uitɨwa nemɨkawamate. Pɨratakɨ meta hurukɨ yukakaɨyarixi memɨwatiwewiwa para mɨkɨkɨ memuyuka'unakɨ.
HOS 8:5 Tsamariya kiekatari tsikeru kakaɨyariyari xemayexeiya xekeneuku'eiri. Xehetsiemieme ne nepuyeha'a. 'Atsitake kepauka xeyu'itietɨ xemakɨne.
HOS 8:6 Neuxei keneu'ena 'Ixaheri: Mɨkɨ tsikeru Kakaɨyari pɨkahɨkɨ, mɨkɨ tewi pɨwewiyaya. Mɨkɨ tsikeru Tsamariya mieme kanitatarariemɨkɨ.
HOS 8:7 »'Eka xepuka'e, haikɨri 'amɨpa xepɨka'itsana. Tɨriku kɨyeyari yumɨayeyari pɨkahexeiya tɨriku pɨkatixuawere. Xɨka 'utixuawere, teewatari kɨkamete mepitikwani.
HOS 8:8 Metsɨ 'Ixaheri kananukaxɨwieni, hikɨri 'etsiwa xeikɨa nuiwarite mepɨmetsinaki'erie.
HOS 8:9 'Ixaheritsixi mekanekɨne 'Atsiriya paitɨ, mekaniuyupata puxuri yeutari memɨkaheu'enana wahepaɨ, meta 'Epɨrahini yutuxexerima katiniwayetuiriwakaitɨni.
HOS 8:10 Tsepa nuiwarite watsata naitsarie mɨwananene, ne mana neniwakuxeɨrimɨkɨ, 'ana mekatenita'aitɨariekuni xewitɨ ti'aitame waɨkawa mariwemekɨ katiniwata'aitɨamɨkɨ.
HOS 8:11 »'Epɨrahini waɨkawa mawarite taiyame kaniutiwewieni, para 'axamɨti'anekɨ memɨteheuyehɨwiyariekakɨ, peru mɨkɨ mawarite taiyame 'axamemɨteyuriekakɨ pɨta patɨa.
HOS 8:12 Ne nepeka'utɨawe ne'aitsika waɨkawamexɨa, peru mɨkɨ memɨka'imateni hepaɨ mepɨte'ixeiya.
HOS 8:13 Mepɨnetemawirie mawari taiyariyarikɨ meta 'imikierite, waiyari mekwatɨ, ne mɨkɨ pɨkanetsinake. Hikɨ ne ke'axamemɨteyurie naime nepɨkaratɨmaiya, ke'axamemɨte'uyurikɨ mɨkɨkɨ nepɨwaranutaxɨrieni, mekanakunuaxɨakuni 'Ekipitu.
HOS 8:14 'Ixaheri kemɨ'ane mitawewi patɨmai, meta yɨkɨmana paratsiyute puyutiwewiri, meta Kura kiekaritetsie waɨkawa kuraru 'amatitetewa kanawewietɨyani, peru ne wakiekarite 'aixɨa mɨreukunatɨkatsie tai nepaukaxɨriexɨani mɨwatixɨtsitɨanikɨ».
HOS 9:1 Merikɨte 'Ixaheri, pepɨka'atemawieka, 'ixɨarari pepɨkawewieka nuiwarite wahepaɨ. 'Axapekatiniuyurieni: 'Akakaɨyari pekaniuku'eirieni. Tɨriku tuminiyari kepaɨmeme pemukaxexeiya kakaɨyarixi pepuwayetuiriwa.
HOS 9:2 Tɨriku meta kaxie takari pɨkatixuawere, ni winu mɨhekwa pumaweni 'aixɨa ha'anetɨ.
HOS 9:3 Yawé kwieyatsie xepɨka'u'uwaniri, 'Epɨrahini 'Ekipitu kanakunuamɨkɨ meta 'Atsiriya timieme mɨkati'itiya pepɨtitikwani.
HOS 9:4 Tawariri Yawé winu xepɨkayetuirieni, mɨkɨri pɨka'inakeni xemawarika. Mɨkɨ paa pɨkaxetanaki'eririeni, 'ayumieme xepɨtitsuani, kemɨ'ane memitikwani mɨkɨ meka'itiyatɨ mepakɨne. Haaka nunuitɨwame xeikɨa pɨhɨkɨ, peru Yawé yutukita pɨka'inaki'erie.
HOS 9:5 ¿Kexeteyurieni 'ixɨarari matineikatsie, yatɨni Yawé hetsiemieme waɨkawa kɨkamete xemuyukuxexeɨriwatsie?
HOS 9:6 Tsepa xemuyuta'unaxɨ xemɨka'unarienitsie, 'ekipitutari mepɨxetiwiya, Menipitsi kiekariyaritsie mepɨxekateuku. Witsimɨti'anene xemɨtehexeiya pɨratakɨ, mɨtiwewiyatɨka tupiriyatsata pɨtiyuhayewa, xexamaru xuya penukanani.
HOS 9:7 'Uximatɨarika tukariyari paye'ari, meta tukari paye'a memɨte'ayukatuanikɨ. 'Ixaheri mɨpaɨ ketinemaika 'Ariri pɨwaɨkawa 'axakepemɨtiuyuri, mɨixari pepɨkaheu'ena, Kakaɨyari niukameya mɨka'uka'iyari xeikɨa pepɨxata, tewi Kakaɨyari 'iyarieya mɨkahexeiya pɨkaheyuta'eriwa.
HOS 9:8 Kakaɨyari meta niukameya, 'Epɨrahini mɨtaniere kanihɨkɨtɨni, peru naitsarie huyeta pepiwiniyane, pepitixani'eri Kakaɨyari kiitana.
HOS 9:9 Kemɨkatiheitserie xeteyurietɨ 'ari xepakɨ, Kiweya mɨtiuyɨ hepaɨ, Peru Kakaɨyari pɨkaratɨmaiya waɨkawa kexemɨte'uyuri 'uximatɨarika pɨxepitɨani 'axaxemɨte'uyurikɨ.
HOS 9:10 Mɨpaɨ kanaineni Yawé: «Kepauka 'Ixaheri nemutaxei, makumawetsie kaxie takari nemutaxeiya hepaɨ nepuyɨ, kepauka 'atutsima nemɨwaruxei meripai miemete, xapa takari yɨyɨrime nemuxeiya hepaɨ nepuyɨ. Peru mɨkɨ mepekɨ Wahari-Pehuxi kakaɨyariyari hetsɨa, mepɨnetsi'uku'eiri, tewiyarikatsie mepuyuyetua, 'anari wahepaɨ 'axame'anenetɨ mepakɨ menaki'eriwatɨ hepaɨna.
HOS 9:11 'Epɨrahini kemɨrexeiyakai 'aixɨa ti'anekame, mɨkɨri kanitawimɨkɨ wiki hepaɨ kanayeyeimɨkɨ, 'anari 'aniwema mepɨkatinunuiwa meta 'ukari mepɨkatihukataxɨani.
HOS 9:12 Tsepa tɨɨri memɨwaxeiya hipame mewawereme, ne nepɨwarakuyeitɨani 'ena kwiepa. Xɨa'ui kepauka mɨkɨ memɨxeku'eirieni.
HOS 9:13 'Epɨrahini mɨpaɨ nepɨtixeiya, Tiru kwieyari hepaɨ witsimɨraku'anetsie mɨye'etsieka hepaɨ. Peru 'Epɨrahini pɨwayetuaya yuniwema memɨkwi'iwakɨ».
HOS 9:14 Neuxei Yawé, ¿Ketita petiwayetuirieni? 'Uka 'anuye'ikwitɨwame meta tsitsi ka'ayemaneme.
HOS 9:15 «Kirikari mepikatsutɨa 'axameteyurietɨ, mana nepikatsutɨa newa'uxiwe'erietɨ. 'Axameteyuriekaku, nekiita nepɨwaranuyexɨrieni. Ne nepɨkawatanaki'erieniri, yunaitɨ wa'itsɨkate 'axamemɨteyuriekɨ meteyukahiwe'erietɨ.
HOS 9:16 'Epɨrahini kaniutayɨnare: nanari kaniutiwani takari pɨka'ukayaxixɨ. Tsepa mutiutihukataxɨ, nekanenuyemiemɨkɨ nunutsi tsepa witsimɨ'ane».
HOS 9:17 Xemɨkahenu'enikɨ, 'ayumieme ne Kakaɨyari pɨkaxetanaki'erieni, kɨkamete xepakɨne nuiwarite watsata.
HOS 10:1 'Ixaheri Kaxie takari waɨkawa meukatei hepaɨ pɨ'anekai putixuxuawerekai witsi'anenetɨ kayunewierinɨatɨ. Peru kepauka matsi waɨkawa mutixuxuawerekai, matsi waɨkawa mawari taiyamete mepɨtiwewiwakai, kepauka wakwiepa waɨkawa mɨtiutixuaweriyakai, waɨkawa matsi tetexi patsietɨkaime witsi'anenekame mepɨtiwewiwakai.
HOS 10:2 'Iyarieya pɨharuani, peru yɨkɨmana katinayukatuamɨkɨ kemɨtiuyuri. Yawé wamawari taiyamete kaniti'unamɨkɨ meta naime tetexi mɨpatsietɨka memeyexeiyakai.
HOS 10:3 Heiwatɨ mɨpaɨ me'utiyuani: «Yawé tepɨkahayemakaxe, 'ayumieme tati'aitɨwame tepɨkahexeiya». Peru xɨka teheixeiyanike, ¿Ketiyurienikekai tahetsiemieme?»
HOS 10:4 Mekatenikuxatani xeikɨa kememɨteyukuhɨawe, yuri hepaɨ me'utiyuatɨ peru yakɨxeikɨa tɨratu mekanikuwewiwani, 'ayumieme 'axamɨ'ane xeikɨa kanixuaweni watsata kanikaxutuweni tupiriya 'axamɨ'anene yeuta mieme hepaɨ.
HOS 10:5 Tsamariyatari waɨkawa mekanimamaka tsikeru Weti-'Aweni kakaɨyariyari memayexeiyakɨ. Tsikeru teteyari memayexeiya waɨkawa mepɨyutihiwerieni, yaxeikɨata mawari wewiwamete memɨwarayexeiya kakaɨyarixi. Waɨkawa meyuhiwerietɨ mepɨtihiwa mɨmariwekaikɨ, wakakaɨyari xeime kwieyaritsie manutɨkienikɨ.
HOS 10:6 Tsikeru nanutɨkiemɨkɨ 'Atsiriya paitɨ 'imikieri hepaɨ ti'aitame mɨmariwe mekaniyetuiriekuni. 'Epɨrahini kaniyutitewiyamɨkɨ, 'Ixaheri meta kaniyutitewiyamɨkɨ yukakaɨyarixi wahetsiemieme.
HOS 10:7 Tsamariya kiekariyari kanikumawerimɨkɨ meta ti'aitame, kɨye 'etsipetɨ mehautsitɨarieni hepaɨ.
HOS 10:8 Watukite 'etsimupepe kaniti'unariemɨkɨ kwiepa mieme, hakewa 'Ixaheri 'axatiyurienetɨ matɨa. Xuya meta tupiriya kanitiwawerimɨkɨ mawari taiyame matiwewiwakaitsie. Hikɨ hɨri mɨpaɨ mekatenitahɨawikuni: «Xeketananukanama», hɨrite 'etsimɨpepe: «Tahetsie keneukaxɨri mɨtatsikwinikɨ».
HOS 10:9 «'Ekɨ, 'Ixaheri, 'axapetiyurienetɨ pepumie Kiweya paitɨ mɨtiyukatsutɨatsietɨtɨ, pepɨkatihayewa 'axapetiyurienetɨ. Kiweya kanitamieriemɨkɨ 'axamɨtiuka'iyarikɨ.
HOS 10:10 Kepauka ne yanemɨra'eriwa, nepɨtiwakwinitɨani, 'ana nuiwarite meyukuxeɨrieme mekanitamiekuni, mewaranutaxɨrienike waɨkawari 'axamemɨte'uyurikɨ.
HOS 10:11 'Epɨrahini tsikeru mɨmaxiutɨarie pɨhɨkɨ, mɨkɨ pinake tɨriku mu'uneni, peru ne yuku nepɨka'enutitekiri. Peru hikɨ 'Epɨrahini yuku nekananutitekiriemɨkɨ, Kura kanitakwietsanamɨkɨ, Kakuwu kwie 'aixɨa kaniyurimɨkɨ».
HOS 10:12 Xekeneuka'etsa yuhetsiemieme kemɨtiheitserie, Naki'eriya takariyari xekeneuka'itsana, kwietsanaripa xeketene'uximayaka. 'Ari tukari paye'ari Yawé xema'eriwanikɨ, kepaukake munuani penɨ'ani heitserie mɨtiyupitɨwa wiyeriyari.
HOS 10:13 Peru xeme 'axamɨti'ane xepuka'e, 'ayumieme mɨkatiheitserie xepɨka'itsana, 'itarika takariyari xekaniutikwani, wakaxetatetsie xemeuwawaɨrekaikɨ meta wakuyaxi memɨyumɨirekaikɨ.
HOS 10:14 Kuyaxa payani tɨranari kemɨtiutayuane pɨti'eniɨriɨkɨni, kememɨteyuku'awietatɨka naitɨ pɨtiti'unarieni, kemɨtiuyuri Tsarimani Weti-'Axiweri kuyaxa matɨatsie, kepauka wamamama memutixitekie meta tɨɨri yunaitɨ.
HOS 10:15 'Ikɨ Weteri kiekatari mɨyamekanixe'uyurieni, 'axaxemɨteyuriekɨ kwinimieme. 'Ixaheri kwieyaritsie ti'aitame kanimieriemɨkɨ yuheyemekɨ 'amɨtikataretsie.
HOS 11:1 «Kepauka 'Ixaheri mununutsitɨkai 'anapai nepinaki'eriekai, 'Ekipitu 'uyeikakaku neniwe nepenayexei.
HOS 11:2 Kepauka matsi waɨkawa nemehɨawekai, matsi humapai kaniumiekaitɨni. Mawari taiyariyari pɨwamawirienekai memɨkayuri kakaɨyarixi, 'ɨkwa pɨwatairienekai.
HOS 11:3 Ne 'Epɨrahini muyeiwenikɨ nepɨtiti'ɨkitɨa, ne mamayatsie nemɨkawiekai nepɨhɨkɨ. Peru mɨkɨ pɨkanetsihetima kename ne 'aixɨa reu'eriekame neheyeitɨwakai kepauka mɨtikuyeni.
HOS 11:4 'Ahurawa nepuwaha kaunari witsimɨ'anenekɨ, 'ahurawa nepuwaha naki'eriya kaunariyarikɨ. Kemɨti'uximayakai mɨkɨ yuku nepinawairi, ne'inaki'erietɨ 'ahurawa neputɨa nemɨtitaminikɨ.
HOS 11:5 »'Ekipitu xepɨkahakunuaxɨaniri, 'Atsiriya pɨta xehetsie pɨtita'aita, nehetsɨa xemɨ'axɨanikɨ xemɨka'uyuwaɨrikɨ.
HOS 11:6 Xekiekaritetsie 'ixipara me'u'ɨtɨ mekani'axɨakuni, xekitenie mepɨteheuwitexɨani kememɨteku'eriwakai mepɨkaheye'atɨani.
HOS 11:7 Neteɨterima mepuyuwaɨriya memɨkanetsinaki'eriekakɨ kenemɨtitewa, 'ayumieme tsepa memɨnetsihahɨawe ne nepɨkawaparewieni.
HOS 11:8 »'Epɨrahini, nepɨkayɨwe nemetsiyetuani. 'Ixaheri, nepɨkayɨwe nemetsi'uku'eirieni. Ne nepɨkayɨwe nemetsiyetuani 'Arimaha kenemɨtiyetua hepaɨ. Ne nepɨkayɨwe nemetsi'uku'eirieni Tsewuhini hepaɨ. Netaɨta, ne'iyari pɨkarexeiya, metatsiere nekwinurite panukuyuane.
HOS 11:9 Peru ne tawarita nepɨkayeha'ani meta 'Epɨrahini tawarita nepɨkaka'una. 'Ahamatɨa tewi pɨka'uyeika, ne mana nemuyeikakɨ, Kakaɨyari nemɨpatsie, 'ayumieme kiekari nepɨkatamieni».
HOS 11:10 Yawé maye hepaɨ puyutahaxɨatɨani, mɨkɨta mepenukuweiya. Kepauka Yawé haxɨaya meme'enieni, niwemama tau makayuyuipiketsie hepa mepatinexɨani memamatɨ.
HOS 11:11 «'Ekipitu paitɨ mepanexɨani, wikixi wahepaɨ me'uyu'unarɨmetɨ. 'Atsiriya paitɨ mepanexɨani kukuruxi wahepaɨ memamatɨ, ne wakiita nekaniwareuta'ɨnaxɨamɨkɨ
HOS 11:12 »'Epɨrahini pɨneti'itaiyane, 'Ixaheri mɨra'aita 'itarikakɨ xeikɨa niuki pɨxɨatɨa, Kura kuyeikame pɨhɨkɨ, Kakaɨyari hetsɨa 'ateewa paitɨ puyeika. Kakaɨyari mɨpatsie yamɨtikamie hetsɨa 'ateewa paitɨ puyeika.
HOS 12:1 'Epɨrahini 'eka xeikɨa kanikwaka, tukarikɨ 'eka mɨxɨka 'utɨa pukuyeika, waɨkawa 'itarika kaniwewieka meta kaniyumieneni. 'Atsiriya ti'aitame hamatɨa tɨratu mepɨwewietɨwe, 'Ekipitu ti'aitame hetsɨa hatseiti kaniyetuayani mɨtiyutuaka hepaɨ».
HOS 12:2 Yawé Kura kanixanetani, pɨrayukatɨani Kakuwu naime kemuyuri, naime kemɨtiuyuri mɨkɨta mɨpaɨ pɨtipitɨarieni.
HOS 12:3 Yumaama hukayatsie paitɨ yekaitɨ yu'iwa putami, meta kepauka temaikɨ matɨa Kakaɨyari hamatɨa puyutami.
HOS 12:4 Niuki tuayame putami pe'iwaxɨ, putatsua pitawawiri 'aixɨa miyurienikɨ. Weteri pikaxei, mana hamatɨana pɨtiutixa,
HOS 12:5 Yawé Kakaɨyari Naimekɨmɨtɨrɨkaɨye hamatɨa pɨtiutixa, Yawé mɨtitewa.
HOS 12:6 Peru 'ekɨ kenenua 'akakaɨyari hetsɨa, peti'akanaki'erietɨ kemɨtiheitserie ketineyurieneni, hetsiena yuri peti'erietɨ.
HOS 12:7 Kanani ti'inɨnɨatameya 'aixɨa pɨka'anene, pinake hipame mɨtiwanawatsirieneni.
HOS 12:8 'Epɨrahini mɨpaɨ putaine yuta'ɨretɨ. «Waɨkawa nepɨrexeiya, waɨkawa ne'ukatewame pɨnetsi'ayeitɨa. Naime nemɨrana'iwaxɨtsie xɨka xete'utixeiya mana xepɨkatekaxeiya 'axamɨti'ane».
HOS 12:9 «Ne Yawé nekanihɨkɨtɨni 'akakaɨyari 'Ekipitu pe'uyeikakaku paitɨ, nekamanakunuitɨamɨkɨ 'ixuriki kiiyarita pekanayekaimɨkɨ, kepauka makumawetsie temutakaxei hepaɨ.
HOS 12:10 Ne Kakaɨyari niukametemama nepɨtiwarutaxatɨa, mamariwaweme 'inɨari nepɨtixe'uxeitsitɨa, ne ne'utainekaku 'ɨxatsikɨ mepɨtexekuxaxatɨwakai».
HOS 12:11 Karaha kiekatari 'axamekateniu'iyarini, Kanahekɨakari tixaɨ pɨkarayani. Kirikari paitɨ tuurutsixi mepɨwaretimawa, 'ayumieme mɨrayutimawatɨre tetexi kanitaxɨriexɨamɨkɨ, 'ɨtsita paitɨ.
HOS 12:12 Kakuwu kaniuyuta'una 'Arami hɨriyaritsie, 'Ixaheri katiniuta'uximayata muxatsi wahɨiyarikɨ yu'ɨya 'iwanetɨ.
HOS 12:13 'Ixaheri 'Ekipitu mayewitɨkienikɨ meta mita'ɨwiyakɨ, Yawé yuniukame kanenɨ'ani.
HOS 12:14 Peru 'Epɨrahini Yawé kaniuyehaxɨatɨani, 'ayumieme Kakaɨyari waɨkawa kaniwarutixani'erieni. Hikɨ Yawé pɨrekapitɨani ke'axamɨtiuyuri, kemɨtiuka'iyari mɨpaɨ katinanuyeyeimɨkɨ.
HOS 13:1 'Epɨrahini pɨmariwekai 'ixaheritsixi wahɨxie. Kepauka mɨtikuxatakai teɨteri mepɨmamakai me'i'enietɨ. Peru mɨkɨ Wahari hayexeiyatɨ patɨa, 'ayumieme 'axamɨti'anekɨ kaniumɨni.
HOS 13:2 Hikɨ yaxeikɨa 'axapɨtiyuriene, mɨkɨ katiniyuwewirieka kemɨtiyukɨhɨawe, kakaɨyarixi pɨratakɨ pɨtiwawewie, kakaɨyarixi memɨkwaniyarietɨka, mamakɨ memɨwewiyatɨka. Wahepaɨtsita meputiyuane: «Teɨteri mepɨtewamawirie meta mepɨwati'itsewe tsikerutsixi wahepaɨ me'aneneme».
HOS 13:3 'Ayumieme hai ximeri mieme hepaɨ me'anenetɨ mepakɨne, haɨtsi ximeri paitɨ manuku'eke hepaɨ, xatsi 'eka mei'enitsitɨwa hepaɨ, kɨtsi huxunuta matineika hepaɨ.
HOS 13:4 «Peru ne Yawé 'akakaɨyari nekanihɨkɨtɨni, 'Ekipitu paitɨ pe'uyeikakaku. 'Ayumieme tawarita xeime Kakaɨyari pepɨkahetimani ne xeikɨa, nixeime 'awikweitsitɨwame pepɨkakaxeiya ne xeikɨa.
HOS 13:5 Ne nepɨyɨanekai makumawetsie nemɨmatsihetima, mɨkahakawiwiye makuwakitsie.
HOS 13:6 Ne nepɨtixe'umi xeme xeputihuxai, peru xehuxatɨ xepuyuti'ɨrixɨ meta xepɨnetsihatɨmai.
HOS 13:7 'Ayumieme ne wakɨmana maye nepayani, nepɨwatihupieni huye tetsita, hatɨwe hepaɨ.
HOS 13:8 Nepɨwatakwini meta watawitsie nepɨwareuxutsixɨani hutse yuniwema wakwerietɨ mɨtiyuyuruwa hepaɨ. Maye hepaɨ nepɨtiwakwani. Yeutanaka 'ɨtsita mɨtiyutsana hepaɨ.
HOS 13:9 »'Ixaheri nepɨmatsika'una, kemɨ'ane mɨmatsiparewie pemaye'uniekɨ.
HOS 13:10 ¿Hakewa ti'a'aitɨwame, para naime 'akiekarite mɨtawikweitsitɨanikɨ? ¿Hakewa 'a'itsɨkate pemɨwaruta'iwau: “Ti'aitame meta 'itsɨkate keneneyetuiri”?
HOS 13:11 Neha'atɨ ti'aitame nemetsi yetuiri, neha'atɨ nemetsi'unawairi.
HOS 13:12 Ke'axamɨtiuyuri 'Epɨrahini kaniuti'utsieni, naitɨ paka'utɨarie ke'axamɨtiuyuri.
HOS 13:13 'Ukaratsi tiniwerɨmetɨ kukuiniyaya paye'axime, peru mɨkɨ nunutsi pɨkayɨkɨhɨawe: kepauka maye'ani manuyeyanikɨ, 'aixɨa pɨkatikuyeixa mɨpaɨ kani'aneni 'Ixaheri mɨkayuwaɨriyakɨ.
HOS 13:14 »¿Netixetawikweitsitɨani mɨkite wateukiyapa? ¿Ne mɨkite watsata netixe'ayehapani? ¿Kewari mɨya, kemɨtiyuruwa? ¿Kewari mɨki teukiyapa, kepemɨtiyuka'una? Xekenahuni, ne nepɨkaxetinenimayata».
HOS 13:15 Tsepa 'Epɨrahini rexeiyatɨ matɨa yu'iwama watsata, Yawé 'ekaya kaninuamɨkɨ, 'eka mɨxɨka makumawetsie mieme, hamuhapane meta haixate kanikawaxɨamɨkɨ. Tita memɨteheuxeiya katinika'unariemɨkɨ, naime tita witsiti'anenekame memɨtehexeiyakai katinikumawerimɨkɨ.
HOS 13:16 Teɨteri Tsamariya kiekatari yuhetsie mekatenahɨakuni, yukakaɨyari me'aye'unietɨ mepakɨ. 'Ixiparatekɨ mekanikwi'iwakuni, tɨɨri mekanititetseweiyakuni kwiepa, memayehukatɨka yuhukatsie mekaneuxitekiexɨakuni.
HOS 14:1 'Ixaheri, kenenua Yawé 'akakaɨyari hetsɨa. Ke'axapemɨtiyuriene mɨkɨ pɨmatsihekahɨpa.
HOS 14:2 'Aixɨa ketineu'ahɨawi kepemɨtayɨni, Yawé hetsɨa kenenua mɨpaɨ ketineutahɨawi: «Ketatineuyehɨwirieka ke'axaketemɨte'uyuri, 'aixɨa 'anemekɨ ketaneutanaki'eri mawari hepaɨ, tepɨmatetaxatɨani.
HOS 14:3 'Atsiriya pɨkatatsitawikweitsitɨani, kawayutsixi kuyaxa miemete wahetsie tepɨka'anutiyaxe. Tawariri tepɨka'itaterɨwani “'ekɨ takakaɨyari pepɨhɨkɨ” tixaɨtɨ tamamakɨ tiwewiyakame tepɨkate'ayexeiya, 'ahetsie nutui pikaxeiya kepemɨti'akanenimaya».
HOS 14:4 «Ne ke'axamemɨte'uyuri 'aixɨa nepɨwayurieni nepɨwanaki'erieka 'aixɨa 'anemekɨ, kenemɨtiha'akai wahetsiemieme nepɨtiuhayewaxɨ.
HOS 14:5 Ne wiyeri hepaɨ nepɨ'aneni 'Ixaheri hetsiemieme, yanepɨtiyurieni mɨkaxutunikɨ texuxuri tuturiyari hatetsita mieme hepaɨ. Nanayari tetɨata paitɨ ratiwiwiyame nepayeitɨani Riwanu kɨyeyari hepaɨ.
HOS 14:6 Yɨrariyari waɨkawa pɨtiwawere, huriwu kemɨtimamariwawe mɨpaɨ pɨtipapare meta witsimu'ɨa kariuxa Riwanu mieme hepaɨ.
HOS 14:7 Ne'etɨritɨa mepuyutikiitɨani, mepɨtiwawere tɨriku hepaɨ. Mepɨkayɨyɨrani kaxie hepaɨ, mepukuxaxatsiwani winu Riwanu mieme hepaɨ.
HOS 14:8 Neuxei 'Epɨrahini, kakaɨyarixi wa'ɨkiyari tixaɨtɨ pɨkatihɨkɨ. Ne nemetsiku'eiya nekanihɨkɨtɨni meta nemetsi'ɨwiya. Huku kɨyeyari yamɨtitsiɨraɨye nekanihɨkɨtɨni, kepemɨtiutixuxuawere ne nekatiniyurieneni».
HOS 14:9 Kemɨ'ane mɨtimaiwe kaneitimaitɨyeikani, kemɨ'ane waɨkawa mɨtiuyemate. Kaniyuritɨni Yawé huyeya kanixeuraɨyeni, mɨkɨ 'utɨma mekaniuhuni heitserie memexeiya, peru kemɨ'ane 'axamemɨteyurie mekanetiketamɨrikeni meteyukahiwe'erietɨ.
JOE 1:1 'Ikɨ Yawé niukieya kanihɨkɨtɨni, Kuheri hetsɨa munua Petuheri nu'aya.
JOE 1:2 Teɨteri 'ukirawetsixi 'ikɨ xekeneu'eni, Yemekɨ xekeneu'enana, yunaitɨ teɨteri 'ikɨ kwieyaritsie xemɨtitei. ¿Heiwamieme 'ipaɨ kapɨtiɨyɨ xeme xe'u'uwakaku yatɨni meripaitɨ kiekatari memu'uwakaitsie?
JOE 1:3 'Ikɨkɨ yuniwema xeketeniwarutaxatɨa, mɨkɨta yuniwema mepɨtewataxatɨani, yaxeikɨata mɨkɨ xetutsima memɨtewataxatɨanikɨ.
JOE 1:4 'Utsikari 'amemɨnene tita memɨte'utatexi 'utsikari yakɨmemɨnene naime mekaniutikwani, meta 'utsikari yakɨmemɨnene tita memɨte'uhayewaxɨ 'utsikari 'etsimemɨpepe naime mekateniutikwani, 'utsikari 'etsimemɨpepe tita memɨte'uhayewakai 'utsikari kwimemɨpepe mekateniutikwani.
JOE 1:5 Xemɨtarɨwe, xekenanutaneniereni xekeneutitsuanani. Yemekɨ xekeneuti'aiwani winutsie xemɨyuyetua, matsi kaxie winuyari makaka xekaniunawaiyarieni xemi'iekaikɨ.
JOE 1:6 Xewitɨ kiekari mɨtɨrɨkaɨye memɨkayu'inɨatsinɨa mekaniu'axɨani nekwietsie: Mɨkɨ mayetsi wahepaɨ mekateniutameni, maye 'uka tameteya 'emɨtɨtɨ hepaɨ.
JOE 1:7 Naime mepɨte'ukakɨmixɨ kaxie xawari, piní mepukamuraxɨ. Mamateya naime meputimetseriyaxɨ, naime mepukakarauxi 'ɨkaya meta xawari.
JOE 1:8 Neteɨterima meputitsuana 'uka 'ɨimari heiwerika 'iwiyari manahɨwa hepaɨ mitiwitɨnikekai 'umɨku hetsiemieme.
JOE 1:9 Hatsite mawariyari meta kaxie winuyari mɨtiyeuriwakai, mɨkɨri Yawé tukieyata pɨkareyetuiwa. Mawari wewiwamete mepuyuheiwerie, Yawé hetsiemieme te'uximayatamete.
JOE 1:10 Naitɨ 'ikwaxi pɨka'ukaxuxuawereri mɨraku'etsitɨretsie, naitɨri kwie kaniuwakini, hatsiteri naitɨ katineuyeweni, kaxie winuyariri mɨhekwa kaniukawani meta hatseiti kaniuxɨniri naitɨ.
JOE 1:11 Xemetatsiere xeke'utiwani, te'uximayatamete, xekeneutitsuanani meta te'etsamete, xemɨte'ekai tsewara meta tɨriku xemɨteheuyehɨakɨ, naitɨtsɨari mɨraku'etsitɨre mɨtiuka'etsiwakai katineuyeweni.
JOE 1:12 Kaxie naitɨ kaniutiyɨnare, piní kaniutawani, 'ikwaxi manitsana hepaɨ mɨ'anene kaniutiyɨnare, takɨ meta manitsana, naitɨ kɨyexite 'ɨtsita mɨreuka'u. Yaxeikɨa teɨteri watemawierika kaniutiyɨnare.
JOE 1:13 Xeme mawari wewiwamete, heiwerika kamixayari xekenanakatɨkɨni xe'utitsuatɨ. Xekeneyuheiwerieka, mawari taiyame te'uximayatamete. 'Ena xekenakɨni, xeme Kakaɨyari hetsɨa te'uximayatamete, tɨkarikɨ hiwerika kamixayari xekenanakatɨkɨni, hatsite mawariyari meta kaxie winuyari mɨka'atɨariwanikɨ Kakaɨyari kiitana mɨtiuta'imaritɨxɨkɨ.
JOE 1:14 Xekeneyuhakieka xeyuyetuatɨ, xekenewa'inieka teɨteri memayuxeɨrietsie. 'Ixaheritsixi teɨteriyari 'ukirawetsixi xekeniwaxeɨrieka Yawé xekakaɨyari kiita, yunaime teɨteri kiekari mɨtama xekeniwarukuxeɨri, meta Yawé xekeneutahɨawi.
JOE 1:15 Xɨa'ui 'iya tukaritsie, Yawé tukarieya maye'aximekɨ. Mɨkɨ tukaritsie naime katinika'unamɨkɨ Naimekɨmɨtɨrɨkaɨye.
JOE 1:16 Ta'ikwai kataniunawairieni tame tenenierekaku, te'utinawetɨ meta ketemɨteyutemamawiekai takakaɨyari tukieyata mieme.
JOE 1:17 'Imɨari kaniutipɨne muka'etsiekai. 'Imɨari muwati'utsiwatsie puyexɨ meta naitɨ puti'unixɨ kiiyari mɨtiuka'etsiekai mɨreuyewekɨ.
JOE 1:18 Tewaxi yemekɨ meputitsuana. Hau'erietɨ mepeu'uwa wakaitsixi hakewatsɨ metehetikwani katiniumaweni, yaxeikɨa muxatsi mekateniuka'eniwani.
JOE 1:19 'Ekɨ, Yawé, ne nepɨmetsiwawirie, 'ɨxatsɨ 'ayeparitsie meuka'ukai taikɨ mutitai, tai 'amanutiteterekɨ naime katiniutitaiya kɨyexite 'ɨtsita mɨreuka'ukai.
JOE 1:20 Tewaxi yeutari mepɨmetsikuwautɨwe meteheuyehɨatɨ, wahaa 'akiitsie naitsarie mukawaxɨakɨ tai 'ɨxa mutitaiyaxɨkɨ 'ayeparitsie.
JOE 2:1 Kerutsaremetsie kuxineta xekeneutahɨtsiwani, nehɨri mɨpatsie hetsie xekeneutihiwani mɨ'enieriekakɨ. Yunaitɨ teɨteri kwiepa xemɨtama xekenemamaka, 'aritsɨari Yawé tukarieya 'ukanamieni kaniyuritɨni kanehuraniri.
JOE 2:2 Yɨriya tukariyari kanaye'amɨkɨ, hai tukariyari mɨyɨyɨxawi kanaye'amɨkɨ. Hekɨariya kemɨtiyuhekɨa kahekɨarirɨmetɨ kwiepa, mɨpaɨ katinimakatsiukɨni kiekari mɨmariwe mɨtɨrɨkaɨye, meripaitɨ hatsuaku kemɨkatiɨyɨ, nuiwarite 'umemahu wahetsiemiemeri hatsuaku yapɨkatiyɨni.
JOE 2:3 Mexiyukukuyamete meka'aye'axɨawawe 'iya tai kaniwatixɨtsitɨwani, kepauka mɨpaɨ mɨraye'ani tai pɨtititaiya naime. Mexixi kahaye'awe kiekari 'Ereni haraweriyari witsimɨraku'ane hepaɨ pɨtiyuxexeiya, kepauka mɨpaɨ mɨtiyɨni yeuta makumawe payani. Tɨrɨkariyaya hepaɨtsita tixaɨtɨ pɨkatitawikweni.
JOE 2:4 Kawayutsixi wahepaɨ mepɨteyuxexeiya, kawayutsixi meha'atɨ meheuyukwiyuka wahepaɨ mepɨte'unanautsa.
JOE 2:5 Kepauka hɨri 'emutɨtɨtsie memeutatsukwaka, kaxetatsixi yukukuyamete wayuarika hepaɨ pɨtiyu'eniɨriɨkɨ, xatsi taipa taiyarietɨ mutatsipɨarɨka hepaɨ. Kuyaxi memɨtɨrɨkawi 'aixɨa memɨteheku'u meyutakwinike mɨpaɨ mepɨteyuhekɨa.
JOE 2:6 Teɨteri marikakɨ meputiyɨyɨaka, yunaitɨ mepunututuixietɨka.
JOE 2:7 Mepaye'axɨa memeuyutakwiwawe wahepaɨ, wapaitɨ mepeutimake kuyaxi wahepaɨ. Yuxexuitɨ mepuhu 'aixɨa meteheuku'utɨ kememɨteyu'uitɨakai.
JOE 2:8 Yuhetsie mepɨka'uyexɨrɨwe, heitserie mepuhu yuxexuitɨ. 'Ɨrɨtsata mekaniuhuni meka'anuyutaxɨrɨwatɨ.
JOE 2:9 Kiekaritsie mekanitahakeni, kuraru heima mepeukamake, kiitetsie mepɨtimake, 'etsimeuyeyeutsie mepeuhake tenawayamete wahepaɨ.
JOE 2:10 'Ikɨ kuyaxi wahɨxie kwie naitɨ puyuane meta muyuawi pukuyuane, tau meta metseri pɨyɨrixɨani, meta xurawetsixi mepɨtehayewa mehekɨariwietɨ.
JOE 2:11 Yawé niukieya kanekutɨrarɨkani yukuyaxima wahɨxie, mepɨkayu'inɨatsinɨa kuyaximama mepɨtɨrɨkawi niukieyatsie yamemɨtekahu. Yawé tukarieya waɨkawa kanimariweni kanimakaxiwani. Xewitɨ pɨkayɨwe mɨtinewirienikɨ.
JOE 2:12 Yawé mɨpaɨ kanaineni: «Merikɨ, yunaitɨ yu'iyarikɨ nehetsɨa xekeneu'axɨa, xe'utitsuatɨ, xeyuheiwerietɨ xekatekwatɨ».
JOE 2:13 Yu'iyaritsie xekeneuyukatsanani yukamixatsie pɨkatixaɨ. Yawé yukakaɨyari hetsɨa xekeneu'axɨa, mɨkɨ pɨtiuyukanenimaya pɨkahayu'eriya, naki'eriyakɨ pɨhɨne kwitɨwa pɨka'uyeha'arɨwe, pɨyuwaɨriya naime mɨreuyehɨwirienikɨ meta pɨkarakwinitɨani.
JOE 2:14 Heiwatɨ Kakaɨyari 'aixɨa mɨtinixe'uxei kemɨtiku'eriwakai mɨnipataxɨ, 'aixɨa mɨti'ane mɨtatiniuhayewi. 'Imikieri hatsite mɨkɨ meta kaxie winuyari mɨtiyeuriwa Yawé xekakaɨyari hetsɨa katinimiemetɨni.
JOE 2:15 Kerutsaremetsie kuxineta xekeneutahɨtsiwani, xeketeniwarukaxatɨa memɨyuhakienikɨ, xekeniwaruta'ini yunaime 'axeikɨa.
JOE 2:16 Kiekatari xekeniwarukuxeɨri, xekenepatsieka xeyuxeɨrietɨ 'ukirawetsixi mana kiekatari xekeniwarukuxeɨri, 'etsimemupepe meta xekeniwarukuxeɨri meta tɨɨri memɨtsitsewetɨka. Kewayeyani hekwamekɨ mutineɨkixɨ, meta 'uka mɨhekwawikie kewayeyani yukiita.
JOE 2:17 Xekeneutitsuanani te'uximayatamete mawari wewiwamete Yawé hetsɨa miemete, tuki mɨranutahakitɨre hɨxie meta mawari taiyame hɨxie xeti'utɨ, mɨpaɨ xe'utiyuatɨ: «Yawé 'ateɨterima ketiniwareuyehɨwirieka. Pepɨkatatsiyetuayani 'axatemɨka'itɨarienikɨ kapa nuiwarite tahetsiemieme 'axame'utiyuanikɨ. Hipatɨ mɨpaɨ memɨka'utiyuanenikɨ teɨteri: “¿Hakewa xekakaɨyari peyeika?”»
JOE 2:18 Merikɨtsɨ Yawé matsiɨkɨme kanayeitɨani kemɨtinaki'eriekai yukwie hetsiemieme, katiniwareuyehɨwirieni yuteɨterima.
JOE 2:19 Yawé mɨpaɨ katiniwaruta'eiya: «Neuxei nepɨtixeyetuirieni, hatsite, kaxie winuyari mɨhekwa meta hatseiti, waɨkawa nepɨxetihuxaitɨani 'aixɨa xeteyukuhɨaweme nepɨxehayewa. Nepɨkaxeyetuani tawari hipame kiekarite wahetsɨa xemɨnanaimarienikɨ.
JOE 2:20 »Nepɨkawapitɨani 'utsikari xeyeta 'amemayehu, kwie makumawetsie meta makuwakitsie nepɨwareukɨnɨ'ani: Haramara Mɨmɨkitsie nepɨwakayunitɨani wakuyaxi memanuyetei, wa'utɨmata memuhu Haramara Meritexaniyatsie. Wakaxari pɨtipɨne waɨkawa pɨtiukuri'ɨaka». Yawé waɨkawa mariwemekɨ katiniyurimɨkɨ.
JOE 2:21 Nekiekari pepɨkamaka, matsi kene'atemawieka kene'uxipieka, matsi Yawé waɨkawa mariweme katiniyuriemɨkɨ.
JOE 2:22 Tewaxi xepɨkamamaka 'ɨtsita xemu'uwa, 'ɨxa mumawekaitsie pɨtixuawere naitɨ pɨtiyɨra, 'iteɨrite yutakariri mɨtikwaiwa pɨtixuawitɨani, piní meta kaxie waɨkawa pɨtixuawere.
JOE 2:23 Xekeneyutemamawieka Tsiyuni tɨɨriyamama, temawierika xekenexeiyani Yawé yukakaɨyari hetsiemieme, kepauka maye'ani wiyeri pukuyuitɨani tukarieyatsie. Wiyeri pɨxehanɨ'airieni xekaka'ewawekaku meta xeka'itsanayu, meripaitɨ manukatɨatsie kemɨtiyurienekai hepaɨ.
JOE 2:24 Mɨrati'uritɨretsie tɨriku waɨkawa pɨtixuawere, kaxie mahinarietsie winu mɨhekwa waɨkawa puxuaweni meta hatseiti.
JOE 2:25 «Ne nepɨtixekɨhɨwirieni kepaɨmexɨa wiyari xemɨteheuyehɨa naime, 'iya kuyaxi memɨyumɨire tekɨmemete wahekɨ kenemɨtiwarenɨ'a xehetsɨa: 'amemɨnene, meta yakɨmemɨnene, 'etsimemɨpepe meta kwimemɨpepe.
JOE 2:26 Xeme waɨkawa xepɨte'utikwa'ani, kexemɨteheukwaikɨ, Yawé yukakaɨyari hetsiemieme 'aixɨa xeputiyuaneni, xehetsiemieme 'aixɨa kemɨtiyurieni. Tawariri hatsuaku neteɨterima nepɨkawatewiyatsitɨani.
JOE 2:27 Merikɨte 'ana mɨpaɨ mekatenetimaikuni kename ne 'ixaheritsixi wahamatɨa ne'uyeika, kename ne Yawé xekakaɨyari nehɨkɨ, xewitɨ tawari 'apɨka'uyeika kakaɨyaritɨtɨ ne'aurie. Tawari hatsuaku neteɨterima mepɨkatewiyatsitɨarieni.
JOE 2:28 »'Arike mɨpaɨ tiyɨyu, ne'iyari nepɨtatuani yunaime teɨteri wahetsie. Xeme xeniwema 'ukitsi 'ukari mepɨtetaxata, 'ukirawetsixi mepɨteheinɨni temarita mepɨtexeiyatsitɨarieni.
JOE 2:29 Mɨkɨ tukaritsie ne'iyari nepɨtatuani 'ukitsi meta 'ukari te'uximayatamete wahetsie.
JOE 2:30 Mɨyuawitsie meta kwiepa 'inɨari nepɨtiyurieni: xuriya, tai, meta kɨtsi 'e'utɨtɨme.
JOE 2:31 Tau yɨwitɨ kanayeimɨkɨ metserita xuriyapaɨ 'anetɨ kanayeimɨkɨ mexi Yawé tukarieya kahaye'aweni, kepauka mariwemekɨ mɨtiyurienitsie.
JOE 2:32 Yunaitɨ Yawé memahɨawe kemɨtimariwe yutukari mekanitawikweitsitɨakuni, hɨritsie xeikɨa Tsiyuni meta Kerutsaremetsie, pɨyɨweni muyuta'una, Yawé kemɨtiwarutahuawekai. Memayeneniere wahamatɨa xeikɨa mepu'uwani Yawé mɨwaruta'ini.
JOE 3:1 »'Iya tukaritsie, kemɨtika'inɨaritsie maye'anikɨ, kepauka ne Kura 'aixɨa nemɨwayurieni meta Kerutsareme newahekwariyatɨ,
JOE 3:2 yunaime nuiwarite nekaniwakuxeɨriemɨkɨ Kutsapati mayeweritsie nekaniwakanɨ'amɨkɨ. Mana nekaneutahamɨkɨ teɨteri nemɨtiwakwinitɨanikɨ neteɨterima 'Ixaheritsixi wahetsiemieme, 'ateewa nuiwarite watsata memɨwareutaweiyaxɨakɨ meta nekwie memuyutaxitekiexɨakɨ.
JOE 3:3 Neteɨterima mepuyuta'iwiri kemɨ'anetsie mɨtinakenikɨ, tɨɨri mepuwarupataxɨ 'ukari tuminikɨ memɨyuwitɨnɨa wahekɨ, meta memɨtitarɨwenikɨ, 'ukari tɨɨrixi winukɨ mepuwarutua.
JOE 3:4 »Merikɨte, Tiru meta Tsiruni, meta naitsarie mɨtiuyehane Piritsiteu kwieyari hetsie, ¿ketita kuta xetehayexeiya nehetsiemieme? ¿Xenetekɨhɨwirienike xeteyu'erie? Xɨka mɨpaɨ 'aneni, nematsi kwitɨ yanepɨtiyurieni xehetsie mɨtinakenikɨ kexemɨnetsiyuriku,
JOE 3:5 xemetsɨ nehuru meta nepɨrata xekaniunawani, yutukita paitɨ xekatenetɨni piinite waɨkawa nemɨreuyehɨwa.
JOE 3:6 Xeme kɨriyekutsixi wahetsɨa neteɨterima xekaniwarutuani Kerutsareme meta Kura memɨtama yukwiepa memɨka'u'uwanikɨ.
JOE 3:7 »Matsi mɨpaɨ xeketenemaika, ne nepuwarayewitɨni tsepa hakewa paitɨ memetuiyakai, ne yanepɨtiyurieni mɨkɨ 'axakexemɨte'uyuri xehetsie mɨtinakenikɨ.
JOE 3:8 Xeniwema 'ukitsi 'ukari Kura kiekariyaritsie nepɨwatuani, mɨkɨta yaxeikɨa tsaweutsixi wahetsɨa mekaniwatuakuni nuiwarite 'ateewa kiekatari wahetsɨa». Yawé mɨpaɨ kaniutayɨni.
JOE 3:9 Nuiwarite mɨpaɨ xeketeniwarutaxatɨa: Xekeneyuha'aritɨaka xemɨyutakwinikɨ. Kuyaxi xekeniwaxeɨrieka. Xekeneyuha'aritɨaka yunaitɨ 'ukitsi kuyaxa miemete xemuyutakwinikɨ.
JOE 3:10 Hatsaruni yu'ixipara xekenayeitɨa meta huxa tɨriku xikame tepɨa 'amɨtewi xekenayeitɨa. Kemɨ'ane meumaka mɨpaɨ ke'utayɨni: «Ne nepɨka'ukama».
JOE 3:11 Xeiya xekeneyumexɨitɨaka, nuiwarite xemɨtama ta'aurie, mana xekeneyuxeɨrieka mayeweritsie. Yawé, keniwaranɨ'a memayu'eririya 'ahetsɨa miemete.
JOE 3:12 «Nuiwarite xekeneyukuxeɨri, xekenehu Kutsapati muyeweri paitɨ, mana nekananukayerɨmɨkɨ teɨteri 'auriena kiekatari nemɨtiwakwinitɨanikɨ.
JOE 3:13 Keneukaxitekiri, tɨriku 'aixɨa mɨ'anene kanihɨkɨtɨni. Kaxie xekeneutiketsina, matiketsinarɨwatsie pɨhɨpɨne. Kaxie xariyariri panakayeuriwe: puwaɨkawari 'axakememɨteyurie».
JOE 3:14 Mekaniyɨmɨireni memɨyɨxeɨrie Mayeweri maye'atɨarienitsie. 'Ari Yawé tukarieya kanehuraniri Mayeweri maye'atɨarienitsie.
JOE 3:15 Tau meta metseri kaniyɨrixɨakuni, xurawetsixi mepɨkahekɨariwieniri.
JOE 3:16 Yawé puyutahaxɨatɨani Tsiyunitsie paitɨ, Kerutsareme paitɨ tɨranarieya kani'enieriemɨkɨ, kwie meta muyuawi kanitayuamɨkɨ. Matsi Yawé kemɨ'ane memɨteɨterimama pɨwa'awietani, 'ixaheritsixi pɨwatɨrɨkariya.
JOE 3:17 «Merikɨtsɨ xeme mɨpaɨ xekatenetimaikuni, ne Yawé xekakaɨyari, Tsiyuni nemukakɨ neyemuri mɨpatsietsie. Kerutsareme mɨpatsie kanayeimɨkɨ, tawari 'ateewa kiekatari waɨriyarika mepɨkawatahaxɨani mexenawairienike.
JOE 3:18 »'Iya tukaritsie kaxie winuyari makaka hɨritsie panexɨani, yemuritetsie retsi puhapaneni. Haa puwayenexɨani 'akite manuyehapanetsie kura kwieyaritsie. Yawé tukieyata haixa pɨtineikani, 'Akatsiya kɨyeyari pɨhatuiyani mayeweritsie mɨye'u.
JOE 3:19 'Ekipitu naime nepɨrakumaweriya, 'Erumi makumawe nepayeitɨani, 'axamemɨwaruyurikɨ Kura kwieyaritsie kiekatari, wakwiepa waxuriya memutayeurikɨ 'atsimekateyuriekame.
JOE 3:20 Kura kwieyaritsie meta Kerutsaremetsie kiepa payani yuheyemekɨ, yunaime nuiwari 'umemahu wahetsiemieme.
JOE 3:21 ¿Kamɨtsɨ netiwareuyehɨwirieni xuriya memutayeuri? Matsi hawaikɨ nepɨkatiwareuyehɨwirieni».
AMO 1:1 'Ikɨ 'Amuxi kaniniukieyatɨni. Mɨkɨ muxatsi wahɨweme pɨhɨkɨtɨkai Tekuha paitɨ. Mɨpaɨ katiniuniere 'ixaheritsixi teɨteriyari wahepaɨtsita. 'Ana 'Utsiyaxi pɨti'aitametɨkai Kura kwieyaritsie, meta Keruwuhani Kuhatsi nu'aya 'Ixaheri kwieyaritsie pɨti'aitametɨkai. Yakatinikuxatakaitɨni huta wiyari heuyewekakaku 'akuxi kepauka kwie mutayua.
AMO 1:2 'Amuxi mɨpaɨ kaniutayɨni: «Yawé kaniuyutahaxɨatɨwani Tsiyunitsie 'uyeikatɨ, Kerutsareme paitɨ hiwarieya pe'enierie. Muxatsi wa'ɨxa kaniutiyɨnare, meta Kaximeru hɨriyaritsie naitɨ katiniukuwaukeni».
AMO 1:3 Yawé mɨpaɨ kanaineni: «Ramatsiku kiekatari waɨkawa 'axamepɨte'uyuri, 'ayumieme ne nepɨkareiyehɨwirieni. Karaha kwieyari memakupɨnaxɨkɨ, tepɨa 'uwamekɨ.
AMO 1:4 'Ayumieme tai nepanunɨ'ani Katsaheri paratsiyuyata, Weni-'Arari kuraruya 'aixɨa mɨ'ane mɨtaxɨtsitɨanikɨ.
AMO 1:5 Ramatsiku kiekatari wa'ituparitsie meukuwe nepeumura, mayeweritsie 'Aweni mɨti'aitame nekanika'unamɨkɨ, meta Weti-'Ereni mieme 'itsɨ makwe'e. Tsiriya kiekatari waɨriyarika mepanuhapanieni 'ateewa Kixi paitɨ»,
AMO 1:6 Yawé mɨpaɨ kanaineni: «Kahatsa kiekatari waɨkawa 'axamepɨte'uyuri, 'ayumieme ne nepɨkatiwareuyehɨwirieni. Xei nuiwariyari yunaime memɨwarehapakɨ, 'Erumi kiekatari wahetsɨa mewatuanike,
AMO 1:7 'ayumieme tai nepanunɨ'ani Kahatsa kiekatari watetsariyatsie, kuraruya mɨtaxɨtsitɨanikɨ.
AMO 1:8 'Atsiruri kiekariyaritsie mɨti'aita nepɨka'una, meta 'Atsikaruni 'itsɨ makwe'e nepɨka'una. 'Ekuruni kiekatari nepɨwatihutsuni nemamakɨ, meta piritsiteutsixi yunaitɨ mepukumaweriyarieni»,
AMO 1:9 Yawé mɨpaɨ kanaineni: «Tiru kiekatari waɨkawa 'axamepɨte'uyuri 'ayumieme, ne nepɨkatiwareuyehɨwirieni: Yunaime kiekarite teɨteri memehapanie meha'atɨkaime 'Erumi xemutuirikɨ, mepɨkahaye'eri tsepa yu'iwama wahamatɨa kememɨte'uxatakai.
AMO 1:10 'Ayumieme tai nepanunɨ'ani Tiru kiekatari watetsariyatsie, kuraru 'aixɨa mɨ'ane mɨtaxɨtsitɨanikɨ».
AMO 1:11 Yawé mɨpaɨ kanaineni: «'Erumi kiekatari waɨkawa 'axamepɨte'uyuri, 'ayumieme ne nepɨkatiwareuyehɨwirieni, mepɨwareutaweiyaxɨa yu'iwama mewakwikutɨ 'ixiparakɨ, mepɨka'uyupitɨa memɨte'uyukanenimayakakɨ, 'amepɨteheuterixɨ meha'atɨ 'amepɨtitekai meha'atɨ.
AMO 1:12 'Ayumieme tai nepanunɨ'ani Temani kiekatari wahetsie, Wutsira kiekatari wakuraru 'aixɨa mɨ'ane mɨtaxɨtsitɨanikɨ».
AMO 1:13 Yawé mɨpaɨ kanaineni: «'Amunitsixi waɨkawa 'axamemɨte'uyuri, 'ayumieme ne nepɨkatiwareuyehɨwirieni. Karikɨ yukwie 'amemɨtayeuriyakɨ, Karaha kiekatari 'ukarawetsixi memayehukatɨkatei wahukatsie 'ixiparakɨ mepɨwareuxitexɨa.
AMO 1:14 'Ayumieme tai nepɨtaiya Xawaha kuraruyaritsie, wakuraru 'aixɨa mɨ'ane mɨtaxɨtsitɨanikɨ, 'ana meputihiwani meyukwitɨwetɨ, teɨka putatɨrarɨkani nepi'enieni.
AMO 1:15 Tiwa'aitɨwame 'ateewa paitɨ panuhanieni, meta 'iparewiwamete yunaitɨ»,
AMO 2:1 Yawé mɨpaɨ kanaineni: «Muhawi ke'axamɨtiuyuri waɨkawa katiniuyurieni, 'ayumieme nepɨkareiyehɨwirieni: 'Erumi kwieyaritsie ti'aitame 'umeteya memutitaiyaxɨkɨ, naxi memeyeitɨakɨ,
AMO 2:2 tai nekananunɨ'amɨkɨ Muhawi hetsie Keriuti kiekariyari 'aixɨa mɨ'ane mɨtaxɨtsitɨanikɨ, 'ana Muhawi kanimɨmɨkɨ waɨkawa tɨranariyatsata meta me'utihiwakaku yukukuyamete meta kuxineta hayuanekaku.
AMO 2:3 Ti'aitame wahetsɨa mieme nekanikumaweriyamɨkɨ, meta yunaitɨ memiparewie nepɨwakwini»,
AMO 2:4 Yawé mɨpaɨ paine: «Kura ke'axamɨtiuyuri waɨkawa katiniuyurieni, 'ayumieme nepɨkareiyehɨwirieni: Mɨkɨ yu'itarikatsie metewitɨ mepeuyexɨri, kememɨte'uyuri watutsima, mepiku'eiri Yawé 'aitsikaya mepɨkaheye'atɨa kemɨtiu'aitaxɨ.
AMO 2:5 'Ayumieme tai nepanunɨ'ani Kura hetsie, Kerutsareme kuraruya 'aixɨa mɨ'ane mɨtaxɨtsitɨanikɨ».
AMO 2:6 Yawé mɨpaɨ kanaineni: «'Ixaheritsixi waɨkawa 'axakememɨte'uyurikɨ, 'ayumieme, nepɨkatiwareuyehɨwirieni. Teɨteri 'aixɨa memɨte'u'iyari mepɨwatua tuminikɨ, tixaɨtɨ memɨkatehexeiya, kakai xeiparitsikɨ mepɨtepata.
AMO 2:7 Haweri memɨyɨa wamu'utsie mepa'uwe kwie tumuanariyari memɨhɨkɨtɨni hepaɨ, meta memɨteheuyehɨwa wahuye mepɨyeitɨa. Paapaya meta nu'aya xeime xeikɨa 'ukaratsi hamatɨa mepukahipite, mɨpaɨ meteyurietɨ kenemɨtipatsie nekapatsiekame mepɨnetsi'ayeitɨwa.
AMO 2:8 Tsepa kemɨ'ane mawari taiyame 'aurie mepahipite, 'ixuriki tixaɨtɨ mɨkarexeiya miku'eiri mɨtiupataxɨ mɨkɨ hetsie mekanahipiteni, meta winukɨ hipame mewarutiwiyaka memɨte'akapitɨariekɨ Kakaɨyari tukita kɨmana mekani'ieka.
AMO 2:9 »Mɨya mekateniyurieka, tsepanetɨ wahetsiemieme 'amuxeutsixi nemɨtiwaruka'unaxɨ, wa'ikwaxi nekaniukawani wapaitɨ meta wananari nekanatekixɨani wahetɨa, tsepanetɨ 'amemutɨkai kariuxa hepaɨ meta tsepa memɨtɨrɨkawikai xiu hepaɨ.
AMO 2:10 »Ne 'Ekipitu nekanixe'ayewitɨni, meta nekaniwaruwitɨximekaitɨni huta tewiyari wiyari makumawetsie, 'amuxeutsixi wakwiepa nemɨye'anikɨ xehetsiemieme.
AMO 2:11 Meta nekaniwarunetɨani Kakaɨyari niukametemama xeniwema watsata metatsiere 'aitsika memuyuhɨritɨa temari watsata. ¿'Ixaheritsixi 'aku, mɨpaɨ katiɨyɨ?
AMO 2:12 Peru xeme winu xepɨwaranu'itɨaxɨa 'aitsika memuyɨhɨritɨa meta Kakaɨyari niukametemama xepɨkawarupitɨa nehetsiemieme memɨtehekɨatanikɨ.
AMO 2:13 »'Aixɨa kani'aneni, hikɨri ne 'ari nekanixetipɨnarɨmeni, kemɨtiyupɨna kaxeta tɨriku 'atɨtɨ.
AMO 2:14 Hikɨ xewitɨ muyuta'una pɨkayɨweni kwinimieme mɨranautsawe, meta mɨtɨrɨkaɨye tɨrɨkariyaya hawaikɨ pɨkarenake, meta kwinimieme mɨreuyutamieme yutukari pɨkatawikweitsitɨani.
AMO 2:15 'Ɨrɨkɨ kwinimieme mɨreutamɨiwe pɨkayuta'una, meta kwinimieme mɨranautsawe pɨkatawikweni, meta kawayutsie meutayerɨwe pɨkayuta'una.
AMO 2:16 'Iya tukaritsie matsi tixaɨtɨ karapitɨ kaniyuta'unamɨkɨ, tsepanetɨ kuya kwinimieme mɨreuyutamiewe»,
AMO 3:1 Xekeneu'eni 'ixaheritsixi, 'ikɨ Yawé niukieya kemaine xehepaɨtsita, yunaime nuiwari hetsiemieme 'Ekipitu nemɨwarayewitɨ:
AMO 3:2 «Xeme xeikɨa nekanixe'anayexeiya yunaime kwiepa memɨtama watsata. 'Ayumieme, nekatinixe'akapitɨamɨkɨ naimekɨ ke'axaxemɨte'uyuri».
AMO 3:3 Pɨkayɨwe yuhutatɨ muhunikɨ yamekatexatawawetɨ.
AMO 3:4 Maye yeuta pɨkahayuhaxɨatɨwa xɨka tixaɨtɨ katikwaka. Maye nunutsi pɨkaha'a yuterɨta xɨka tixaɨtɨ katikwaka.
AMO 3:5 Wiki winiyaritsie pɨka'uyewiere xɨka mana katiuyewieka. Winiyari pɨkakuyuane xɨka tixaɨtɨ katiwieriweni.
AMO 3:6 Kuxineta kiekaritsie kaniutahɨtsieriwani kiekatari mɨpaɨ memɨteyu'ɨwiyanikɨ. Kiekaritsie yɨkɨ pɨkatiyɨni xɨka Yawé mɨpaɨ kahaineni.
AMO 3:7 Yurikɨ, Yawé naimekɨmɨyɨwe yɨkɨ pɨkatiyurieni yuniukamete katiwataxatɨawetɨ kemɨtiyurieni.
AMO 3:8 Maye xɨka heyutahaxɨatɨani, ¿kemɨ'ane pɨkatimani? Xɨka Yawé naimekɨmɨyɨwe haniukani, ¿kemɨ'ane niukameyatɨtɨ pɨkatitaxata?
AMO 3:9 'Ikɨ xeketenekuxatani kiekari 'aixɨa mɨrekukurarutɨiyarie 'Atsiruri meta kiekari 'aixɨa mɨ'anene 'Ekipitu mieme: «Tsamariya hɨriyaritetsie xekeneuyukuxeɨri meke'uneniere kememɨtemama, nanaimarika kemɨtixuawe mana».
AMO 3:10 «Yukii 'aixɨa mɨ'aneneta memɨtehɨniya 'inawari meta memɨtewanawairie hipame waɨriyarika mɨkɨ mepɨka'imate tita heitserie muyeikani mɨranɨyɨne»,
AMO 3:11 'Ayumieme, Yawé naimekɨmɨyɨwe mɨpaɨ kanaineni: «Xewitɨ mɨmetsi'aye'unie 'akiekari kanika'unamɨkɨ, kepemɨtitɨrɨkaɨye kamena'iwamɨkɨ meta 'apiinite kametininawairiemɨkɨ».
AMO 3:12 Yawé mɨpaɨ kanaineni: «Muxatsi wahɨweme maye kemɨtikunawairiwa heiwa hutame 'ɨkate ya naka 'etsiyeume, mɨpaɨ mekatenitawikweitsitɨariekuni 'ixaheritsixi, Tsamariyatsie kiekatari yu'utá 'etsikinayaritsie xeikɨa meta Ramatsikutsie».
AMO 3:13 Yawé naimekɨmɨyɨwe mɨpaɨ kanaineni, Kakaɨyari Naimekɨmɨtɨrɨkaɨye: «'Ikɨ xeketeneu'eni xeketenekuxatani Kakuwu tɨɨriyamama wahepaɨtsita.
AMO 3:14 »Kepauka nemɨrekapitɨani 'Ixaheri 'axamɨtiuyurikɨ, nekanika'unamɨkɨ mɨratimawatɨre Weteri, mɨratimawatɨre 'awateya kanakainixɨamɨkɨ, kwiepa kanikaxɨrimɨkɨ.
AMO 3:15 Nekaneti'unamɨkɨ kii muhaɨtɨnitsie mieme meta witarita mieme. Kanati'unixɨamɨkɨ kii maripirikɨ witsimɨreukuwewiyatɨka meta waɨkawa kii witsimɨ'anene kanika'unixɨamɨkɨ»,
AMO 4:1 'Ikɨ niuki xeme xekeneu'eni, wakaitsixi Watsani miemete, Tsamariya hɨriyaritsie xemu'uwa, haweri memɨ'anene xemɨwananaima meta tixaɨtɨ memɨkatehexeiya, yɨkɨnama mɨpaɨ xemɨtewakɨhɨawe: «Xeketatenahapaniri tepanu'ieni».
AMO 4:2 Yawé naimekɨmɨyɨwe mɨpaɨ kanaineni kemɨtipatsiekɨ: «Tukari kanaye'amɨkɨ xeme xenuiwaritsie, 'imatɨrieka mieme kananuhaniemɨkɨ tepɨa 'utakeitsitɨarietɨ.
AMO 4:3 Kuraru haxawakaku xekananetɨariekuni yu'utɨa xeheu'utɨ, Heximuni hɨriyaritsie xekanitiyunitɨariekuni
AMO 4:4 »Xekenehu Weteri mana 'axaxeketeneyurieka. Kirikari xekenehu manata yaxeikɨa 'axaxeketeneyurieka, ximeri xeketenemawatɨweni, meta hairieka tukaritsie tamamata hetsiemieme xeime xekeneyetuayani.
AMO 4:5 Paa mukuxanariyarie xekenetitaiyani pamɨpariyutsi mawariyari mɨhɨkɨtɨnikɨ meta hipame xeketeniwarutaxatɨa mawari memɨyetuanikɨ kememɨteyuwaɨriya. Yaxeketeneuyuri yunaitɨ 'ixaheritsixi yamemɨtehetimanikɨ, mɨkɨ xeme mɨxenakekɨ
AMO 4:6 »Ne haaka nekaniutixuawitɨani naitsarie xekiekaritetsie, paa memɨkakwakakɨ yanepɨtiuyuri xemukutetɨkatsie. Mɨyatɨtɨ, xeme nehetsɨa xepɨka'u'axɨa
AMO 4:7 »Ne yanepɨtiuyuri mɨkakawiyekɨ kepauka meuyewekai 'akuxi haika metseri mɨtika'itsanatɨtsie. Xeime kiekariyaritsie pukawiyexɨ, xaɨtsieta hawaikɨ, xeime 'etsarita xeikɨa pukawiyexɨ, xaɨtsie pɨka'ukawiyexɨ, 'ayumieme pɨtiutiwa.
AMO 4:8 Hau'erietɨ mekaneu'uwakaitɨni tsepa kemɨ'ane kiekaritsie teɨteri haa mekuwautɨwetɨ, peru yaxeikɨa mepɨteheuharikukai. Mɨyatɨtɨ, xeme nehetsɨa xepɨka'u'axɨa
AMO 4:9 »Wa'etsaripa 'utsikari wahekɨ nepɨwaru'uximatɨa meta mɨtitiwanikɨ, 'utsikari naime mepɨteheukuxɨxɨa waharawerita meta kaxie memɨwa'etsatsie, wapiní meta wahuriwu. Mɨyatɨtɨ, xeme nehetsɨa xepɨka'u'axɨa
AMO 4:10 »Waɨkawa 'uximatɨarika nepenɨ'a 'Ekipitu hepaɨ. Temari 'aixɨa memɨ'anene 'ixiparakɨ nepɨwarukwi, wakawayutsixi yunaitɨ meputiwiyarie. Yanepɨtiuyuri yutsurita memi'ɨkwekɨ mɨkite wa'ɨakariyari. Mɨyatɨtɨ, xeme xepɨkanetsihaye'eri
AMO 4:11 »Ne nepɨxe'uka'unaxɨ Tsuruma meta Kumuxa hepaɨ, tɨɨyari xeikɨa xepuyuhayewaxɨ tai mihayewaxɨ hepaɨ. Mɨyatɨtɨ, xeme xepɨkanetsi'aye'eri
AMO 4:12 »'Ixaheri, 'ayumieme hikɨta nepɨmetika'enitsitɨani, yanemɨtiyurienikɨ, 'Ixaheri, keneyukuha'aritɨwani, 'akakaɨyari pemanunakekɨ».
AMO 4:13 Ne nekanihɨkɨtɨni hɨri nemɨtiwewiwa, meta 'eka nemunenetɨwa, ne nekanihɨkɨtɨni tewi kemɨtiyurieni nemihekɨata, meta hekɨariya yɨriya nemunenetɨwa, meta kwie heima nemuyeika: Yawé Kakaɨyari Naimekɨmɨtɨrɨkaɨye nekatinitewaka.
AMO 5:1 'Ikɨ niuki xekeneu'eni, 'ixaheritsixi teɨteriyari, 'ikɨ heiwerika kwikariyari 'ahetsiemieme neminɨawa:
AMO 5:2 «'Ari 'Ixaheri 'uka 'ɨimari kanatiweni, tawariri pɨka'anukukeni, yukwiepa kaniukani, pumaweni kemɨ'ane menukuhana».
AMO 5:3 Yawé naimekɨmɨyɨwe mɨpaɨ 'Ixaheri kwieyari katinahɨaweni: «'Iya kiekari kuyaxa mɨwewienekai xeimiriyari warawitɨtɨ kuyaxi mɨkɨ xeitsienituyari warexeiyatɨ xeikɨa payani, meta xeitsienituyari kuyaxi warawitɨtɨ muyumienekai tamamata xeikɨa warexeiyatɨ kanayeimɨkɨ».
AMO 5:4 Yawé mɨpaɨ 'Ixaheri kwieyari katinahɨaweni: «Xekeneneutiwawa hikɨ 'ana xe'ayeyuyuritɨ xepakɨne.
AMO 5:5 Peru Weteri xepɨkaheta'axeni, meta Kirikari xepɨkahekɨkani, meta Weritsewa xepɨka'uyekɨkani, mɨkɨ Kirikari kananuhaniemɨkɨ 'ateewa paitɨ, meta Weteri, nitixaɨtɨ pɨkarayeitɨarieni».
AMO 5:6 Yawé xekeneutiwawa xe'ayeyuyuritɨ xemakɨnekɨ, kapa mɨkɨ tai hepaɨ 'anetɨ 'ukawenikɨ, Kutse nuiwarimama wahetsie, tai Weteri kaniutataiyaweni nixewitɨ pɨka'itɨwe.
AMO 5:7 Xeme tita mɨtiheitserie ratsiwime xepɨtehayeitɨwa meta 'aixɨa mɨti'ane kwiepa xepehɨpa.
AMO 5:8 Yawé Tsimanixi meta Terɨka puwarutiwewi, yɨriya xawatɨriya payeitɨwa meta tukari tɨkari payeitɨwa. Mɨkɨ haa haramaratsie mieme putahɨawe 'ana kwie pukahatuiya. Mɨkɨ Yawé katinitewaka.
AMO 5:9 Mɨkɨ, naime 'aixɨa mɨrekukurarutɨiyarie nitixaɨtɨ pɨkarayeitɨwa meta kii mɨmamariwawe 'u'unime payeitɨwa.
AMO 5:10 Xeme xepi'uxiwe'erie tita mɨtiheitserie hetsie munua 'itsɨkate wahɨxie meta xepixani'erie kemɨ'ane yurikɨ mɨtikuxata.
AMO 5:11 Haweri memɨ'anene xemɨwaketsitɨwekɨ meta waɨkawa 'anamanemekɨ xemɨtewawawirie 'ikukɨ meteyutuakaku, 'ayumieme xeme yutetexi kiiyarita xepɨka'ayeyaxe xemitiwewi, meta winu xepɨka'anu'ieni yukaxietsie mieme xemika'e.
AMO 5:12 Ne nepɨtimate kepaɨmeme xemɨte'apine, pɨmɨireri ke'axaxemɨte'uyuri. Xeme xepɨwananaima heitseriemekɨ yamemɨtekahu, waɨriyarika xepɨtewawawirie meta 'itsɨkate wahɨxie mɨreuyehɨwa xepekahɨpa.
AMO 5:13 'Ayumieme mɨya mɨ'anekɨ mɨtimaiwe kayuwatɨ pɨta puyeika, 'ikɨ tukari 'aixɨa mɨka'anenekɨri.
AMO 5:14 'Aixɨa mɨti'ane xeketenekuwawa 'axamɨti'ane xepɨkatewautɨweni, hikɨ 'ana xepu'uwani, mɨpaɨ xe'anenekaku Yawé Kakaɨyari Naimekɨmɨtɨrɨkaɨye xehamatɨa puyeikani, xeme kexemaitɨka.
AMO 5:15 'Axamɨti'ane xeketenexani'erieka matsi 'aixɨa mɨti'ane xeketenenaki'erieka. Tita mɨtiheitserie keti'aitani memati'iwawiyarɨwatsie, mɨpaɨ heiwatɨ Yawé, Kakaɨyari Naimekɨmɨtɨrɨkaɨye, Kutse nuiwarimama memuyuhayewatɨwe warutinenimayata.
AMO 5:16 'Ayumieme Yawé naimekɨmɨyɨwe, Kakaɨyari Naimekɨmɨtɨrɨkaɨye mɨpaɨ kanaineni: «Naitsarie teɨteri memayukuxexeɨriwatsie kani'enieriemɨkɨ hiwerika, meta naitsarie kayetetsie 'uximatɨarika hiwariyari puxuaweni. Memɨte'uximayatatɨwe yu'etsita mepɨta'inierieni memɨyuhiweriekakɨ, meta waɨkawa memeutatsuawawe mepɨta'inierieni memɨtitsuanikɨ memɨwahiweritɨanikɨ.
AMO 5:17 Pɨ'enierieni tsuari naitsarie kaxie haraweriyaritetsie kepauka ne mana 'ahetsɨa nemunuani»,
AMO 5:18 Xɨa'ui xeme, kekuta tekanitakwewieka, xemaitɨka Yawé munuanikɨ. 'Ana kuhekɨareke xepɨka'erieka matsi yɨriya kaninuamɨkɨ 'axa'anemekɨ.
AMO 5:19 Mɨpaɨ katiniyɨmɨkɨ xewitɨ maye 'umakarɨmetɨ matsi hutse pɨta mitakwani hepaɨ, yatɨni xewitɨ nuame yukie yukitenie mɨrawiyakekai kuu hetsie mumei mikei hepaɨ.
AMO 5:20 Yawé munuanitsie pɨkakuhekɨare matsi pɨkɨyɨre. Yurikɨ temawierika pɨkaxuaweni matsi pɨta nutuixiya puxuaweni.
AMO 5:21 «Ne nepi'uxiwe'erie 'ixɨarari kexemɨte'ayexeiya, nepɨkanaki'a tsepa patsiekamekɨ xemɨyukuxexeɨriwa nehetsiemieme.
AMO 5:22 Tsepa xemɨnetsi'atɨiriwa mawari taiyariyari meta hatsi mawariyari, ne nepɨka'itanaki'erieni, meta nepɨkaxe'enieni tsepa tsikeru xemɨnetsi'utimawiri 'aixɨa temɨteyuxeiyanikɨ mawariyari.
AMO 5:23 'Akwikari pepɨkanetsi'enitsitɨaka, 'akanari yuariyaya nepɨkaheu'enimɨkɨ.
AMO 5:24 Matsi pɨta 'aixɨa mɨti'ane kexuaweni, mɨtiheitserie ke'uhaneni haixa mɨka'ukawauke hepaɨ.
AMO 5:25 »Teɨteri 'ixaheritsixi, mawari xepɨkanetsi'uwewiri meta 'imikieri, makumawetsie xe'uhutɨ huta tewiyari wiyari.
AMO 5:26 Hikɨ xeme xekanititɨkuni Tsikuti 'ɨkiyari ti'aitame xemɨte'iterɨwa, metatsiere Kiyuni, xurawetsixi wa'ɨkiyari xemetɨtɨ xemɨwarutiwewi.
AMO 5:27 Hikɨ nekanixe'anunɨ'amɨkɨ xemanuhapanienikɨ Ramatsiku yeta paitɨ», Yawé mɨpaɨ kanaineni, Kakaɨyari Naimekɨmɨtɨrɨkaɨye mɨtitewa.
AMO 6:1 Xɨa'ui xeme Kerutsareme xemɨtama kayuwatɨ xemexeiya, xɨa'ui meta xeme Tsamariya hɨriyaritsie xemɨtama 'aixɨa 'iyari xemu'uwa. Xɨa'ui xeme xemɨmamariwawe 'ikɨ kwieyaritsie xemu'uwa, teɨteri 'ixaheritsixi memɨxe'ayexeiya xeikɨa.
AMO 6:2 Karine xekenehu, xekenexeiya, manata Kamati mɨmariwe hetsie xekenehu, metatsiere Kahati xekenehu piritsiteutsixi wakiekaritsie. ¿Kamɨtsɨ xeme matsi waɨkawa xetemamariwawe keyuri mɨkɨ te'aitamete, matsi xekwieyari 'atiyewa?
AMO 6:3 Xeme mɨpaɨ xepɨtemate 'uximatɨarika tukariyari xe'uku'eirieme xepuyu'erie, matsi te'aitamete memɨxekwinikɨ hurawa xekaniuhuni.
AMO 6:4 Xeme hupume witsimɨ'anenetsie xemahipite 'eripanite 'awateyakɨ ra'utɨkaime, xe'uheitɨ xepaka'iyuniwa, muxatsi 'aixɨa memɨ'anene xemɨwakwa'a meta tsikerutsixi memɨwaiyatɨarietɨka,
AMO 6:5 Rawiri hepaɨ xeikɨa, kwikari xepɨ'aita kaitsa hayuanekaku, meta xepinetɨa tiyuitɨwamete yukɨ 'aneneme,
AMO 6:6 winu xepɨye'e watsu 'amɨneneta meta witsimu'ɨa xepɨyutiwiriwa 'aixɨa mɨ'ane, xekayu'iyaritɨatɨ Kutse kemɨtika'unarieni,
AMO 6:7 xeme meri xe'anuyetetɨ xekananuhapaniekuni, mɨpaɨ katineutiparimɨkɨ 'ikwai memuxuawitɨa 'atsimekateyurietɨ.
AMO 6:8 Yawé naimekɨmɨyɨwe mɨpaɨ kaniutayɨni yɨhɨritɨatɨ, Yawé Kakaɨyari Naimekɨmɨtɨrɨkaɨye mɨpaɨ kanaineni: «'Ixaheritsixi kememɨteyuti'ɨre nepɨxani'erie, waparatsiyu nepu'uxiwe'erie, 'ayumieme wakiekari nepɨyetuani mɨwaraye'unie hetsɨa, meta naime mana mɨtiyepine».
AMO 6:9 Mɨpaɨ katiniyɨmɨkɨ xɨka xeikiiyarita tamamata teɨteri meyuhayewa, mɨkɨ yunaitɨ mekanikwikuni.
AMO 6:10 Kepauka memɨ'axɨani mɨkite mewaku'ɨtɨwetɨ mewatitaiyake, xewitɨ mɨpaɨ katinitahɨawimɨkɨ yu'iwa: «¿Xewitɨ 'akuxi 'ahamatɨa tiuyeika?» 'Iya mɨpaɨ katinita'eiyamɨkɨ: «Hawaikɨ». Hikɨta mɨpaɨ katinitahɨawimɨkɨ: «Kayuwatɨ». Yawé kemɨtitewa tepɨka'ikuxatani».
AMO 6:11 Neuxei, Yawé katini'aitani mɨta'unarienikɨ kii 'amɨpa 'etsipepetɨ kanitaxɨriexɨamɨkɨ meta kii 'etsimupepe kanika'unamɨkɨ.
AMO 6:12 ¿Kamɨtsɨ kawayutsixi 'aitsie mete'utinanautsa yatɨni 'ayeparitsie tuurutsixi metekwietsana? Peru xeme 'aixɨa mɨti'ane 'uaye mumɨya xepayeitɨa, meta tita mɨtiheitserie 'ikwaxi hatsiwime xepayeitɨa.
AMO 6:13 Xeme xepɨyutemamawie Ru-Rewaxi kiekariyari xema'iwaxɨkɨ, mɨpaɨ xeputiyuane: «¿Tatɨrɨkariyakɨ tepɨte'uyuri Kaxinahini tema'iwaxɨ?»
AMO 6:14 «'Ayumieme, 'ixaheritsixi xehetsɨa xeime nepanunɨ'ani mɨmatita'aitɨanikɨ waɨriyarika Rewu-Kamati xeyeta, meta 'Arawa 'akiyari manuyeka xehetɨapai ye'atɨkaime»,
AMO 7:1 Yawé naimekɨmɨyɨwe mɨpaɨ kanetiniunieritɨani: Tupiriya kanitineikakaitɨni 'ari ti'aitame hetsiemieme tiuka'itsanatɨku, hikɨ Ti'aitame nekaniuxeiya 'utsikari wakuha'aritɨwame.
AMO 7:2 Kepaukari 'utsikari tupiriya kwiepa memukaxɨkai mɨpaɨ nekatiniuhiwa: ―Yawé nekakaɨyari, waɨkawa nepɨmatsiwawirie ketiniwareuyehɨwiri Kakuwu nuiwarimama. Pɨkayɨwe xɨari memukuwikweni, 'etsimekaniyupaɨmeni.
AMO 7:3 Hikɨ Yawé kaniwarutinenimayata, mɨpaɨ kaniutayɨni: ―Matsi mɨpaɨ pɨkatiyɨni.
AMO 7:4 Meta Yawé naimekɨmɨyɨwe mɨpaɨ kanetiniunieritɨani: Mana Yawé kaniuwekaitɨni, mɨpaɨ haitɨ kename 'aixɨa tiyurienikekai taikɨ, mɨkɨ haramara meukatewatsie naime pɨtaxɨxɨtsitɨwakai metatsiere kwiepa mu'ɨtsiyatsie.
AMO 7:5 Hikɨ mɨpaɨ nekatiniuhiwa: ―Yawé nekakaɨyari, waɨkawa nepɨmatsiwawirie, mɨpaɨ pepɨkatiyurieneni. Xɨari mepɨkakuwikweni Kakuwu nuiwarimama, 'etsimepuyupaɨme.
AMO 7:6 Hikɨ Yawé kaniwarutinenimayata, mɨpaɨ kaniutayɨni: ―'Ikɨ mɨpaɨta pɨkatiyɨni.
AMO 7:7 Yawé tawarita kanetiniuxeitsitɨani: Mɨkɨ 'akaniuwekaitɨni kuraru 'amatayewa 'aurie, mɨkɨ kii 'inɨnɨatame mahete pahanakai.
AMO 7:8 Yawé mɨpaɨ kanetiniuta'iwawiya: ―¿'Amuxi, tita petixeiya? Mɨpaɨ nekatinita'eiya: ―Kii 'inɨnɨatame mahete pepahana. Hikɨ Ti'aitame mɨpaɨ kaniutayɨni: ―Keneuxeiya, 'ikɨ kii 'inɨnɨatame mahete neteɨterima 'ixaheritsixi wahixɨapa nekaneikahɨamɨkɨ, 'ari tawariri nepɨkatiwareuyehɨwirieni.
AMO 7:9 »'Itsahaki kakaɨyarixi mɨtiwaratimawiriwakaitsie naitɨ kaniti'unimɨkɨ, meta kaniti'unimɨkɨ 'ixaheritsixi watukite, nekaninuamɨkɨ 'ixipara nehakwetɨ Keruwuhani paratsiyuyata».
AMO 7:10 Hikɨ 'Amatsiyaxi, mawari wewiwame Weteri kiekame, Keruwuhani niuki kanenɨ'airieni 'Ixaheritsie ti'aitame: «'Amuxi 'axakametinikuxatani 'ixaheritsixi yunaime wahɨxie. 'Ari 'ena kiekatari mepɨwaɨripie me'i'enietɨ,
AMO 7:11 mɨpaɨ kaniutaineni: »“Keruwuhani 'ixiparakɨ kanimɨmɨkɨ, 'Ixaheri kwieyaritsie memɨtama mekananuhapaniekuni 'ateewa paitɨ kayukwietsie”».
AMO 7:12 Hikɨ 'Amatsiyaxi mɨpaɨ 'Amuxi katiniutahɨawe: ―Keneumieni 'ekɨ pemɨniere, mɨpaɨ petikuxatatɨ xɨka pereu'iwamɨkɨni, kenemie Kura kwieyaritsie.
AMO 7:13 Tawariri Weteri pepɨkarehekɨatani, 'ena ti'aitame tukieya manuwe kanihɨkɨtɨni, meta 'ikɨ kwieyaritsie tuki manuwe.
AMO 7:14 'Amuxi mɨpaɨ 'Amatsiyaxi katiniuta'eiya: ―Ne Kakaɨyari niukameya nepɨkahɨkɨ meta Kakaɨyari niukameya nu'aya nepɨkahɨkɨ, matsi ne muxatsi nepɨwahɨweme meta piní nekaniuka'etsani.
AMO 7:15 Peru Yawé muxatsi watsata kanenayewitɨni, mɨpaɨ kanetiniutahɨawe: “Kenemie neniukame pepayani ketiniwarutaxatɨa 'ixaheritsixi neteɨterima”.
AMO 7:16 'Ayumieme Yawé niukieya keneu'eni. 'Ekɨ mɨpaɨ peputaine: »“'Ixaheritsixi pepɨkatiwakuxaxatɨwani, 'Itsahaki nuiwarimama wahamatɨa petikuxatatɨ ketineuhayewa”.
AMO 7:17 »'Ayumieme, Yawé mɨpaɨ kanaineni: »“'A'ɨya tuminikɨ muyumayɨinɨa payani kiekaritsie, 'aniwema 'ukari meta 'ukitsi 'ixiparakɨ mepɨkwi'iwa. 'Akwie pɨti'inɨatsieni meta hipatɨ mepɨxatɨarieni, 'ekɨta pepɨmɨni kakaɨyarixi wakwieyaritsie. Metatsiere 'ixaheritsixi mepanuhapanieni 'ateewa paitɨ mepuyuhayewa kayukwieyaritsie”».
AMO 8:1 Yawé naimekɨmɨyɨwe kaneniuxeitsitɨanita xeitsikɨiwitiyari 'ikwaxi kwakwaxime,
AMO 8:2 hikɨ mɨpaɨ kanetiniuta'iwawiya: ―¿'Amuxi, tita petixeiya? Ne mɨpaɨ nekatinita'eiya: ―Xei tsikɨiwitiyari 'ikwaxi kwakwaxime. Hikɨ Yawé mɨpaɨ kanetiniutahɨawe: ―'Ari kanaye'ani 'Ixaheri makaweni 'ikwaxi mukwaxi makaweni hepaɨ, tawariri nepɨkareiyehɨwirieni.
AMO 8:3 »Yawé naimekɨmɨyɨwe mɨpaɨ kanaineni: ―'Iya tukaritsie, kwikari paratsiyuta mieme hiwerika kwikariyari kanayeimɨkɨ. Yuwaɨkawatɨ mepɨkwini naitsarie mɨkite mepeutiheni. 'Ayumieme kayuwatɨ».
AMO 8:4 'Ikɨ xekeneu'eni, xeme memɨteheuyehɨwa xemɨwatiketsina meta haweri memɨ'anene xemɨwakuya 'ena kwiepa.
AMO 8:5 Xeme mɨpaɨ xekaniutiyuaneni: «¿Kepaukari payeika metseri mɨhekwa 'ixɨarariyari 'iku 'uriyari temutuanikɨ, yatɨni, kepaukari 'uxipiya tukari paye'ani tɨriku temutuanikɨ?» Xeme xepiwautɨwe 'inɨari 'etsipeme xemeyeitɨanikɨ meta matsi 'amɨraye'akakɨ, tepɨa ti'inɨnɨatame tinawayame xemayeitɨakɨ
AMO 8:6 meta tɨriku meuyewexime xemutuakɨ, xepɨwanane teɨteri haweri memɨyɨa, meta memɨteheuyehɨwa, kakai xeiparitsikɨ xepɨtewapatsirie.
AMO 8:7 Yawé kaniyuhɨritɨani Kakuwu kemɨtiyuta'ɨrixɨkɨ: «Ne nepɨkaratɨmaiya kexemɨte'uyuri.
AMO 8:8 »'Ikɨ naimekɨ kwie kaniwatayuamɨkɨ. Mana kiekatari mekanitinutuixiekuni. Kwie kanitiyeimɨkɨ Niru hayari hepaɨ, kaniwatayuamɨkɨ meta kanikayeimɨkɨ, 'Ekipitu hatɨayari hepaɨ.
AMO 8:9 »Yawé naimekɨmɨyɨwe mɨpaɨ kanaineni: 'Iya tukaritsie, »tuka tau nepanukayunitɨani, meta naitsarie kwiepa kanikuyɨrimɨkɨ.
AMO 8:10 Memɨte'ayexeiya wa'ixɨarari hiwerika payani, meta wanɨawari hiwerika kwikariyari nekanayeitɨamɨkɨ. Nutuixiya kamixayari nekaniwaranakatɨtɨamɨkɨ meta wakɨpate nekanikaximɨkɨ. Kemɨtiyuhiwerieka raniwe muyuxewi tiumɨyu mɨpaɨ mekatenitsuakuni, 'imatɨrieka ratsiwitɨ pɨrayani.
AMO 8:11 »Yawé naimekɨmɨyɨwe mɨpaɨ kanaineni: Tukari kanaye'amɨkɨ, kepauka 'ikɨ kwieyaritsie haakaxa nemanɨ'ani, matsi paa haakaxayari pɨka'ayani meta hariya, Yawé niukieya mepɨ'eniekuni matsi pukumawere mɨkɨ haakaxayari pɨtixuawere.
AMO 8:12 Teɨteri mepeu'uwani xeime haramaratsie xeimetsieta, mepeu'uwani xeikɨa tayeta meta tau manatineika hepatsie, Yawé niukieya mekuwautɨwetɨ, peru mepɨka'itaxeiya.
AMO 8:13 »Mɨkɨ tukaritsie hariyakɨ mepɨ'amɨxɨani 'ukari witsimemɨte'ɨimarixi meta temari memɨtɨrɨkawi.
AMO 8:14 Meta mepatixɨrieni yuheyemekɨ 'iya Tsamariya kakaɨyariximama wahetsɨa memɨyuhɨritɨa, meta mɨpaɨ me'utiyuatɨ: “Rani kakaɨyariximama, me'ayeneniereme memɨwa'erie. Meta Weritsewa kakaɨyariximama pemɨwarayexeiya”».
AMO 9:1 Hikɨ Ti'aitame nekaniuxeiya mawari taiyame 'aurie 'uweme, mɨkɨ mɨpaɨ kaniutayɨni: «Keneutihutsuna memanutakɨkatsie mituikatɨka muwatayuanikɨ, wahetsie mɨkaxɨrienikɨ 'etsipepetɨ. Kemɨ'ane memuyuhayewa 'ixiparakɨ nekaniwakwimɨkɨ. Xewitɨ pɨkayuta'una, nixewitɨ 'ayenieretɨ pɨkayuhayewa.
AMO 9:2 Tsepa mɨki teukiyata 'upaitɨ memɨyuti'awietaxɨ, muwa nepɨwaratihapani. Tsepa muyuawitsie paitɨ memanutikɨ, manata nepɨwarakaxɨrieni.
AMO 9:3 Tsepa Kaximeru hɨriyaritsie memuyuti'awietaxɨ, mana nepɨwatiwauni nepɨwatiwiya. Tsepa menetsimakatɨ haramara tetɨatapai memɨyuti'awietaxɨ, mana kuu nepɨta'aitɨani mɨwatikenikɨ.
AMO 9:4 Tsepa mɨwaraye'unie mɨwarehapa xeikɨa, mana nepɨtita'aita 'ixiparakɨ memɨkwi'iwakɨ. 'Axanewayurienike meta 'aixɨa nemɨkawayuriekakɨ, nepɨwaxeiyani».
AMO 9:5 Yawé naimekɨmɨyɨwe, Naimekɨmɨtɨrɨkaɨye, kwie kanikumaɨwani, mɨkɨ kaneukupenikeni. Kanitiyeikani meta kanikayeikani kwie Niru hayari hepaɨ, 'Ekipitu muyeka, meta mana memɨteye'uwa meyuhiwerietɨ mekanakɨkani.
AMO 9:6 Kakaɨyari yuparatsiyu kaniutawewieni muyuawitsie meta kwiepa tsutɨmeyari kaniutsutɨani, haa haramaratsie mieme kaniutahɨaweni hikɨ kanitayeuriwani kwiepa: Yawé katinitewaka.
AMO 9:7 «Yawé mɨpaɨ kanaineni: 'Ixaheritsixi, ¿tamɨ xeme nehetsiemieme 'etiupetsixi wahepaɨ xekate'ane? ¿Tamɨ 'ixaheritsixi 'Ekipitu nekatiwarayewitɨ, Kɨretatsie piritsiteutsixi wakwiepa, meta Kixi tsiriyutsixi wakwiepa nekatiwarayewitɨ?
AMO 9:8 'Ayumieme Yawé naimekɨmɨyɨwe 'ena kwiepa 'axakemɨtiyɨane kanitaniereni. Nekaniwarakumaweriyamɨkɨ kwiepa Kakuwu nuiwarimama, tsepa yunaime nekawaruyuri,»
AMO 9:9 Nekatinita'aitamɨkɨ 'ixaheritsixi memɨtikatsienikɨ yunaime nuiwarite watsata, xiekari manuyekatsieni hepaɨ tikatsemetsie, xewitɨ tete kapitɨarietɨ kwiepa mɨkaweni.
AMO 9:10 'Ixiparakɨ mekanikwi'iwakuni yunaitɨ 'axamemɨteyurie neteɨterima, yunaitɨ mɨpaɨ memutiyuane: “Tame mɨkɨ 'uximatɨarika tahetsie pɨkanuani hatsuaku tɨma tahetsie pɨkaye'ani”.
AMO 9:11 »Mɨkɨ tukaritsie nekanenukuketɨamɨkɨ Rawiri kiiya matiwe. Kemɨtiukatsitsini 'aixɨa nekaniyurimɨkɨ, mɨti'u'uni 'aixɨa nekatinitiyurimɨkɨ 'aixɨa nekatinitiyurimɨkɨ meripaitɨ kemɨti'anenekai,
AMO 9:12 mɨkɨ wapiini katinayeimɨkɨ 'Erumi mɨtiyuhayewa meta hipame nuiwarite memɨnetsimate,»
AMO 9:13 »Yawé mɨpaɨ kanaineni: Tukari kanamieni, kemɨ'ane mukwietsanane mɨ'itsanane kananuku'aximɨkɨ meta kaxie mɨketsinane, mɨ'ene panuku'axe. Naitɨ hɨritetsie winu makaka paneikatɨkani, naitsarie mayeweweritsie puhapaneni.
AMO 9:14 'Aixɨa nekaniwayurimɨkɨ neteɨterima 'ixaheritsixi, tawarita nekaniwa'atɨamɨkɨ mɨkɨ kiekarite mu'u'uni 'aixɨa mekanitiyuriekuni mana mekanikutekuni. Kaxie mekanika'ekuni meta winuyari mekani'iekakuni, yuharaweri mepexeiyani meta mana mɨtiukaxuxuawereni mepɨtekwaka.
AMO 9:15 'Ixaheri yukwietsie nepɨka'iteɨta, para hatsuakuri mɨkahahunarienikɨ yukwieyaritsie nemiyetuiritsie»,
OBA 1:1 'Awiriyaxi kemɨtiunieritɨarie. Niuki tepu'eni Yawé hetsɨa mieme, xeime niuki tuayame kaneyenɨ'ani para mɨtiwataxatɨanikɨ naitsarie nuiwarite, mɨpaɨ tiwakɨhɨawetɨ: «Hikɨmɨ, tepayekɨne tekaniwaretakwikuni». Mɨpaɨ kanaineni Yawé naimekɨmɨyɨwe 'Erumi kiekariyaritsie mieme:
OBA 1:2 «Tixaɨtɨ pekatihɨkɨtɨme nekamanayeitɨamɨkɨ nuiwarite watsata, waɨkawamekɨ pekani'uxiwe'eriwakamɨkɨ,
OBA 1:3 kepemɨtiyuta'ɨre pekaniu'akwamana. 'Aita pemɨkiekɨ kwinimieme mutɨtɨtsie, 'akiita 'ateewa paitɨ pe'akanieretɨ, mɨpaɨ pekatini'akuhɨaweni: ¿Kemɨ'ane 'ena kwiepa pɨnetsi'a'iwa?
OBA 1:4 Peru tsepanetɨ wapaitɨ pemuwietɨyeika kwixɨ hepaɨ, tsepa xurawetsixi watsata paitɨ 'a'itua pemexeiya, mana paitɨ nekamanakahɨamɨkɨ
OBA 1:5 Xɨka tenawayamete me'u'axɨani tɨkarikɨ mɨkɨ naime mepɨkatenawani, naime mepɨkate'anutɨni ketita xeikɨa memɨteheuyehɨwa 'aixɨa mɨti'anene, peru 'ekɨri, kehepaɨ petika'unarieni. Xɨka 'itsanamete mematsi'utaxeiya, mɨkɨ tinaime mepɨkate'anupini.
OBA 1:6 Peru 'Etsahu kepemɨtiukaxeiyarie, tinaime pepɨtiunawatsiyarieri mɨraye'atɨka mɨti'awietsiekai paitɨ.
OBA 1:7 Memɨmatsiparewie mekamanitaweiyakuni kwie manu'atɨka paitɨ, mepɨmate'itaiya mepɨmatsiha'iwa mekamateni'irɨwiyakuni. 'Ahamatɨa mexatsie memutiyaxikekai mɨkɨ mekamanihupiekuni. 'Erumi 'ari tixaɨtɨ pɨkarexeiya pɨkatimaiwe.
OBA 1:8 'Iya tukaritsie nepɨwaka'una temaiwawemete 'Erumi kwieyaritsie kiekatari, 'Etsahu hɨriyaritsie miemete memɨtemaiwawe
OBA 1:9 Temani kiekatari, yukukuyamete 'ahetsɨa miemete marikakɨ mekanatixɨrikuni, nixewitɨ tewi pɨkayuhayewa 'Etsahu yemurieyatsie yunaitɨ mekanikwi'iwakuni.
OBA 1:10 »'A'iwa Kakuwu kepemɨtiunanaimakɨ, pekanitewiyatsitɨariemɨkɨ, meta 'aheyemekɨ pekanikumaweriyariemɨkɨ.
OBA 1:11 Kepauka pemɨyukuxaɨtametaxɨ, kepauka 'ateewa kiekatari kuyaximama memɨwarehapa 'ateewa memanutaxɨriyanikɨ, kepauka 'ateewa kiekatari Kerutsareme kitenie memeutahaxɨa, meta kepauka hetsiena mieme memuyuta'iwaxɨ, 'ekɨ 'ana mɨkɨ pekaniwanɨkaitɨni.
OBA 1:12 Pɨkaheuyewekai 'a'iwa hetsiemieme pemutanaweni pe'inanaimatɨ mɨtiuka'eniwakaitsie, kepauka waɨkawa mu'uximatɨariekai. Pɨkaheuyewekai 'ekɨ pemɨ'atemawieka kepauka Kura teɨterimama memakumaweriyarietsie. Hawaikɨ pɨkaheuyewekai 'axapemutaineni kepauka 'iya tukaritsie mete'uka'eniwakaku.
OBA 1:13 Pɨkaheuyewekai pemeutahanikɨ nekiekari kitenie kepauka 'iya tukaritsie memɨte'uka'eniwakai. Hawaikɨ pɨkaheuyewekai pe'utanawetɨ pemɨwaxeiyanikɨ me'uxiwe'eriwakaku meta 'iya tukaritsie mete'uka'eniwakaku. Tixaɨtɨ pepɨkatinawanikekai wapiini mɨkɨ tukaritsie me'uximatɨariekaku.
OBA 1:14 Pɨkaheuyewekai 'ekɨ huyeta tsimanuyeyeutsie pemɨwahupieni, para memɨyuta'unakai pemɨwakwinikɨ. Pɨkaheuyewekai pemɨwayetuani waneneɨkixiwima wahetsɨa 'iya tukaritsie mete'uka'eniwakaku.
OBA 1:15 »'Ari kanehuraniri Yawé tukarieya meye'atɨanikɨ yunaime nuiwarite wahetsiemieme. 'Erumi, kepemɨtiuyuri, yakatiniyɨmɨkɨ 'ahetsie katininakeni 'uximatɨarika.
OBA 1:16 Yaxeikɨata 'ixaheritsixi kexemɨte'ukwinixɨ, hɨri mɨpatsietsie netekɨxita kexemɨtehanu'i, mɨpaɨta yaxeikɨa mekatenenu'ikuni yunaitɨ nuiwarite mukumane mekatehayewatɨ. Hikɨ yunaitɨ mehenu'ieme mekanikumawerikuni, hikɨ mɨpaɨ pɨtimatsiɨkɨre kename hatsuaku meka'u'uwakai.
OBA 1:17 Matsi Tsiyuni hɨriyaritsie wikweitsitɨarika kanitixuawerimɨkɨ, meta kanipatsiekamɨkɨ. Kakuwu teɨterimama yupiinitɨarika mepɨtekaxeiya.
OBA 1:18 Kakuwu xiɨyarimama tai kemɨtititaiya mɨpaɨ mekani'anenekuni, Kutse hetsɨa miemete, nerɨkwari hepaɨ mepɨ'aneneni, peru 'Etsahu xiɨyarimama xatsi hepaɨ mekani'aneneni: taikɨ kanitataiyariemɨkɨ, mɨpaɨ tiyɨyɨ nixewitɨ 'ayenieretɨ pɨkayuhayewa yunaitɨ 'Etsahu hetsɨa miemete».
OBA 1:19 Nekexi kiekatari 'Etsahu hɨrieyatsie mekanitiyaxikuni, Tsapexi kiekatarita piritsiteutsixi wakwietsie mekanikuyaxikuni. Meta 'ixaheritsixi 'Epɨrahini meta Tsamariya wakwie kanayeimɨkɨ, Wenikamini xiɨyarimama Karaha kwieyari mekananunakikuni mana memɨtitenikɨ.
OBA 1:20 Memehapanieta, 'ixaheritsixi kuyaxiyari hikɨ kananeutsixi wahamatɨa memu'uwa, Tsareta wakwie kaniye'atɨkaimɨkɨ. Meta Kerutsaremetari, Tseparari memɨtitei, mekaniyuhayewakuni Nekexi kiekariyaritetsie,
OBA 1:21 memɨtehayu'iwaxɨta mekananutikɨnikuni Tsiyuni hɨriyaritsie paitɨ, 'Etsahu hɨriyaritsie memɨtama memɨtewata'aitɨanikɨ. Meta mana Yawé pɨti'aitametɨni.
JON 1:1 Merikɨtsɨ Yawé Kunatsi 'Amitahi nu'aya niuki kaniyetuirieni, mɨpaɨ katinitahɨawe:
JON 1:2 «Kenemie, Niniwe kiekariyaritsie 'amɨyewatsie, yaketiniwaretaxatɨa kenemɨtika'una, karikɨ nekaniwaruxeiyari ke'axamemɨteyurie teɨterimama».
JON 1:3 Hikɨ Kunatsi kanayeyani peru yuta'unake pɨta 'Itsipaniya paitɨ, Yawé hɨxie mɨka'uyeikanikɨ tewapɨta muyeikanikɨ. Kupe mɨtiyetewatsie kaninuani, muwa nawiya kaniyemieximekaitɨni Taritsi reyetewakaku 'erietɨ. Tiuyutuaka mana kanikayerɨni mɨkɨ kiekaritsie memeukɨnekai wahamatɨa, puyu'unarɨmekai Yawé ti'aitɨakaku.
JON 1:4 Hikɨ Yawé 'eka tɨrɨkaɨyeme kanenɨ'ani haramaratsie, meta wiyeri kanewayani waɨkawa tɨrɨkaɨyetɨ 'ekamatɨ, nawiya kanitatararɨmekaitɨni.
JON 1:5 Hikɨ nawiya nɨ'awamete, waɨkawa memamatɨ yuxexuitɨ mekaniwahiwiekaitɨni yukakaɨyarixi memɨwaparewienikɨ, meta haramaratsie meteneukaxɨrɨwakaitɨni nawiya tita mɨratɨkɨkai. Matsi Kunatsi yu'iyarikɨ pekutsukai 'ikate mɨtiuyepinetsie paitɨ heukayaka.
JON 1:6 Hikɨ nawiya mɨhɨritɨarie muwa heukayaka mɨpaɨ katinitahɨawe: ―¿Titayari 'ekɨ petikutsu? Kenanukukexi. 'Akakaɨyari keneutahɨawi. Heiwatɨ mɨkɨ tatsi'utawikweitsitɨani temɨkakwinikɨ.
JON 1:7 Hikɨ nawiya nɨ'awamete meyunaitɨ mɨpaɨ mekateniuxata: ―Neuxei, tsipara tepuyuta'iwa, kemɨ'ane rahetsie pɨtinake, mɨpaɨ temɨtehetimanikɨ kemɨ'ane rahetsiemieme temeuyehɨiyaxime. Mɨpaɨ mete'uyurieku, 'ana Kunatsi hetsie katiniunake.
JON 1:8 Hikɨ mɨpaɨ mekatenita'iwawiya: ―Ketatineutaxatɨa, ¿ketitayari 'ikɨ mɨyatete'anuyehu? ¿Ketitatsie peti'uximaya? ¿Hakewa pepeyetɨa? ¿Kemɨ'ane kwieyaritsie pepɨkiekame? ¿Tita petitewiyari?
JON 1:9 Mɨkɨ mɨpaɨ katiniwaruta'eiya: ―Ne hepɨrayu tewiyari nepɨhɨkɨ, Yawé nekanayexeiyani, Kakaɨyari muyuawitsie makawe, kemɨ'ane haramara meta kwie mutawewi.
JON 1:10 Hikɨ mɨpaɨ mete'u'enanaka matsi waɨkawa menimamakaitɨni nawiya nɨ'awamete Kunatsi mɨpaɨ tiwarahɨawekaku kename 'uyu'unarɨmekai Yawé hɨxie, hikɨ mɨpaɨ metenita'iwawiya: ―¿Titayari kuta mɨya pereyɨ?
JON 1:11 Peru matsi haramara waɨkawa kananatitsukwakakaitɨni, 'ayumieme mɨpaɨ mekatenita'iwawiya: ―¿Keri tematsiyurieni, haramara mɨtihayewakɨ tatsi'anutawayatɨ?
JON 1:12 Kunatsi mɨpaɨ katiniwarutahɨawe: ―Xekeneneuwiyaka haramaratsie xekeneneukahɨwa, hikɨ 'ana hamewari katinihayewamɨkɨ xe'anutawayatɨ. Ne mɨpaɨ nepɨtimate, ne ya'aneme newiwiekaku punua wiyeri kwinimieme mɨtitɨrɨkaɨye xehetsie.
JON 1:13 Hikɨ Nawiya nɨ'awamete meniyuta'inɨata kwiepa hatetsita paitɨ me'axɨanike, hikɨ karima meniyeweke, peru meniuyutatexieni haramara waɨkawari matsi mɨwaranutawayakaikɨ.
JON 1:14 Hikɨ 'ayumieme Yawé mekaniutahɨawe Kunatsi Kakaɨyarieya, karima mɨpaɨ me'utiyuatɨ: «Neuxei Yawé, 'ekɨ yapepɨtiyurieni kemɨmatinake. Pepɨkatatsipitɨaka tame temɨkwinikɨ 'ikɨ 'axamɨtiuyurikɨ xeikɨa meta tahetsie pepɨkarahɨpani 'ikɨ tewi xɨka tematsiyetuirieni xɨka hetsiena pemɨrahɨpa kahɨkɨtɨni».
JON 1:15 Hikɨ Kunatsi me'uwiyaka hapa mekaneikahɨani, 'ana panukanuatɨya hamewari.
JON 1:16 Mɨpaɨ mete'uneniereka Nawiya nɨ'awamete waɨkawa meniutimamani Yawé hepaɨtsita, mana mawari mekaniwewirieni meta yametenitahɨawe kename me'eyexeiyanikekai.
JON 1:17 Matsi Yawé ketsɨ 'amupa kaniukuha'aritɨakaitɨni Kunatsi makwanikɨ, mana haika tukari haika tɨkari kaniyekateitɨni ketsɨ yuriepa.
JON 2:1 Hikɨ Kunatsi Yawé yukakaɨyari kaniutahɨawe ketsɨ 'amupa yuriepa paitɨ yekaitɨ.
JON 2:2 Mɨpaɨ kaniutayɨni: «Waɨkawa neyuhiwerietɨ Yawé neputahiwi, hikɨ mɨkɨta pɨnetsi'uta'ei. Kepauka 'aritɨtɨri nemɨmɨkikai parewiya nekaniuta'iwauni, 'ana 'ekɨ nehiwari pepu'eni.
JON 2:3 'Emeukatewatsie pepɨnetsiheukahɨa, haramara hixɨapa, haa mɨtɨrɨkaɨye pɨnetsikurupanekai, naitɨ 'ahamewari neheima puyekɨkakai.
JON 2:4 'Ana mɨpaɨ nepɨtiu'eri: “'Ahɨxie nemɨka'uyeikanikɨ nepayeweiyarie. ¿Keneyɨanetɨ nepunuani tawari nemixeiyanikɨ 'atuki mɨpatsie?”
JON 2:5 Naitɨ nepukayunixɨ, haramara 'ameukatewa pɨnetsi'anukanakai, tupiriya hata mieme nemu'utsie pekutsetsewekai,
JON 2:6 nepukurupirɨmekai hɨri muyu'utɨkatsie hata paitɨ. Neheyemekɨ neheyame nepɨne'eriekai, nemanuani nepɨkaheyɨwekai. Yawé nekakaɨyari, peru 'ekɨ netukari peputawikweitsitɨa.
JON 2:7 »Kepauka 'ari nemɨmɨximekai, Yawé nepaye'eri, hikɨ 'ekɨta nenenewieri pepu'eni, 'atuki mɨpatsieta paitɨ pepi'eni.
JON 2:8 »Tetexi kakaɨyarixiyari memɨwarayexeiya 'anaki'eriya mepɨku'eiri.
JON 2:9 Ne matsi, mawarite nepɨmatsiwewirieni, meta nɨawari 'ahetsiemieme nepɨyetuani. Nepɨraye'atɨani kenemɨmatiutahɨawixɨ. 'Ekɨ xeikɨa, Yawé, wikweitsitɨarika pemexeiyakɨ».
JON 2:10 Hikɨ Yawé ketsɨ 'amɨpa katiniuta'aitɨani Kunatsi mɨhayanikɨ hatetsita paitɨ.
JON 3:1 Merikɨtsɨ Yawé hutarieka Kunatsi kaniutahɨawe, mɨpaɨ katinita'aitɨani:
JON 3:2 «Kenanukukexi, kenemie Niniwe kiekari 'emɨyewatsie, keniwaretaxatɨa 'ikɨ niuki kenemɨmatitahɨawe».
JON 3:3 Hikɨ Kunatsi kaneyani Niniwe hepa 'erietɨ, Yawé kemɨtitanɨ'a. Mɨkɨ kiekari Niniwe mɨtitewakai kwinimieme 'ekaniyeukaitɨni waɨkawa kanimariwakaitɨni.
JON 3:4 Kaneutahani Kunatsi kiekaritsie, xeitukari kaniuyurieni mana mɨpaɨ tikuxatatɨ: «Huta tewiyari tukari 'anukayayu, Yawé kanika'unamɨkɨ 'ikɨ Niniwe kiekariyari mɨmariwe».
JON 3:5 Hikɨ Niniwe kiekatari yuri mekatenita'eririeni Kakaɨyari, mɨkɨ mekateniyukaxatɨani memɨyuhakienikɨ, 'ukirawetsixi meta tɨɨri, hiwerika kamixayari mekananakatɨxɨani mɨpaɨ memɨtematsiɨkɨnikɨ kename mete'uhayewaxɨ 'axameteyurietɨ.
JON 3:6 Kepauka Niniwe kiekariyaritsie ti'aitame mɨretima mɨkɨ niuki hepaɨtsita, kananakayani yu'uwenitsie, ti'aitame tuwaxayari 'amɨyewa kanatixɨna, yuhiwerietɨ kanayani meta kaniyutanaximani.
JON 3:7 Hikɨ meta katiniuta'aita niuki mɨpɨa 'anetɨ mɨtaxatsienikɨ Niniwe kiekariyaritsie: «Ti'aitame 'aitsikaya meta 'iparewiwamete: »Nixewitɨ tewi meta tewa, muxa yatɨni wakaxi pɨkatikwaka, mepɨkate'iyakatɨma meta mepɨkahareka.
JON 3:8 Matsi, ti'aitame mɨpaɨ katatina'aitɨwani, yunaitɨ teɨteri yutewama meyunaitɨ mekeyuhiwerieka meta Kakaɨyari mekehahɨaweni karima. Meta mɨpaɨ katiniuta'aita yuxexuitɨ mekete'uhayewa 'axakememɨteyuriekai meta kememɨte'ayukwiwawiekai.
JON 3:9 'Atsitepɨkatemate. Heiwatɨ Kakaɨyari tareuyehɨwirieni, heiwatɨ 'uhaxɨapieni, mɨpaɨ 'ana temɨkakwinikɨ».
JON 3:10 Hikɨ Kakaɨyari waruxeiyaka kememɨyɨkai, tatsɨari, kememɨte'uhayewakai 'axameteyurietɨ, kaniwarutinenimayata, yapɨkatiuyuri pɨkawaruka'unaxɨ kemɨtiwarahɨawekai.
JON 4:1 Merikɨtsɨ Kunatsi waɨkawa pɨka'inakixɨ kemɨtiuyɨ, kaniuyeha'ani.
JON 4:2 'Ayumieme mɨpaɨ katiniuyunenewieni Yawé hahɨawetɨ: ―Neuxei Yawé. Ne 'ikɨ nepɨxatakai nekwiepa neheyeikatɨ 'akuxi. 'Ayumieme meripaitɨri nepuyuta'unakai 'Itsipaniya paitɨ, ne mɨpaɨ nemɨtimaikaikɨ Kakaɨyari 'aixɨa pemɨtiuka'iyari pemɨhɨkɨ pemɨtiyukanenimaya, pemɨkahayu'eriya meta waɨkawa pemɨtiyukanaki'erie, pemɨ'awaɨriya hipame pemɨtiwareuyehɨwirieni meta pemɨkawakwini.
JON 4:3 'Ayumieme hikɨ, nepɨmatsiwawirie kwerietɨ Yawé, netukari keneneunawairi. Nepumawenikeyu 'anepɨka'uyeikanikeyu.
JON 4:4 Yawé mɨpaɨ katinita'eiya: ―Xatsuni pepɨkahexeiya pemɨha'aka waɨkawa.
JON 4:5 Hikɨ Kunatsi kiekaritsie kanayeyani, kiekari manuniere tau manatineika hepa kaniutayerɨni. Mana kaniuyutaxamarutɨani mɨkɨ 'etɨripa kaniutayerɨni niereke kemɨtiyɨnikekai kiekaritsie.
JON 4:6 'Aixɨa tiyɨkɨhɨawetɨ mayanikɨ Kunatsi, Yawé naaná kaniutinetɨani, mɨkɨ mexɨima kaniutawere Kunatsi mu'uya kananukanakaitɨni yu'etɨrikɨ. Kunatsi waɨkawa kaniyukatemawieni mɨkɨ 'etɨpiwarikɨ.
JON 4:7 Hikɨ 'uxa'arieka 'ukatareku Kakaɨyari kwitsi kaneyenɨ'ani mekɨmekɨ, hikɨ 'ana 'etɨpiwari kaniutayɨnare.
JON 4:8 Meta tau 'anatineku Kakaɨyari 'eka xɨkame kaneyenɨ'ani tau manatineika hepa mieme. Metatsiere tau 'ixɨriwiyakaku Kunatsi mu'uyatsie kanimɨximekaitɨni. Hikɨ heumɨmɨtɨ mɨpaɨ kaniutayɨni: «Pɨnetsikunanake matsi nemumaweni nepɨka'uyeikanikeyu».
JON 4:9 Peru Kakaɨyari Kunatsi mɨpaɨ katiniutahɨawe: ―¿Xatsuni perexeiya pemɨha'akakɨ 'ikɨ naaná 'etɨpiwarikɨ? Kunatsi mɨpaɨ katinita'eiya: ―Ne huu xatsuni nepexeiya, ne haxɨakɨ nepɨmɨxime.
JON 4:10 Yawé mɨpaɨ katinitahɨawe: ―'Ekɨ pereinenimaya 'ikɨ 'etɨpiwari, peka'iparewiekaku, xeitɨkari 'utawereka hutariekatsie mutawa.
JON 4:11 Matsi ne nekatinenimayaka Niniwe, kiekari mɨmariwe memɨyumɨire wahetsiemieme, memeuyeweximekɨ xeitsienituyari heimana xeitewiyari miriyari (120.000) meyupaɨmetɨ, 'atsimekatemaitɨ kehepaɨ memɨteyutawikweitsitɨani, waɨkawa yutewama mewarexeiyatɨ.
MIC 1:1 'Ikɨ niuki kanihɨkɨtɨni Yawé Mikeyaxi Muretseti kiekame kemɨtiutaxatɨa, kepauka memɨte'aitakaitsie Kutani, 'Akatsi meta 'Etsekiyaxi, Kura kwieyaritsie te'aitamete. 'Ikɨ kanihɨkɨtɨni kemɨtiunieritɨarie mɨkɨ Tsamariya hepaɨtsita meta Kerutsareme hepaɨtsita.
MIC 1:2 Yunaitɨ teɨteri, xekeneu'enana, kwie keneu'ena meta yunaitɨ hetsiena xemɨte'u'uwa. Yutuki mɨpatsieta paitɨ Ti'aitame, Yawé naimekɨmɨyɨwe, kaninierekamɨkɨ xeme ke'axaxemɨteyurie.
MIC 1:3 Neuxei. Yawé yukiita kanayeyeiximeniri, 'akanakamieniri meta kaniumieni hɨri 'amanutitɨtɨtsie.
MIC 1:4 Hɨri heima makekatsie kanitipenikeni, xɨrɨka taikɨ mukwanani hepaɨ, kwie mayeweweri hixɨata kanitsanikeni, haa mɨtɨrɨkaɨye hixɨata mɨtsana hepaɨ.
MIC 1:5 'Ikɨ naitɨ mɨya katiniyɨmɨkɨ Kakuwu nuiwarimama 'axamemɨte'uyurikɨ, 'ixaheritsixi teɨteriyari 'axamemɨte'uyurikɨ. Tsamariya kanihɨkɨtɨni ya'aneme meutiwiwiexɨa 'Ixaheri 'axamɨtiyurienikɨ. Meta Kerutsareme kanihɨkɨtɨni kakaɨyarixi watukite 'etsimupepe mati'ukai hɨri 'amanutitɨtɨtsie Kura kwieyaritsie.
MIC 1:6 Tsamariya 'unimeyari kwinienetɨ 'uweme nepɨhayewa: kwietsanaripa payani kaxie maka'iteɨtsieni. Tetexiyari mayeweritsie nekaneukaxɨrimɨkɨ, meta tenariyari heyekɨa nekanihayewamɨkɨ.
MIC 1:7 Yunaitɨ kakaɨyariximama mekanititarariekuni, tuminikɨ memuyumayɨinɨa wa'iwarikakɨ memɨwewiyatɨkakɨ taipa katineuxɨriyamɨkɨ. Ne wakakaɨyarixi yunaime nepɨwatitemɨxikita. Naitɨ tita mɨtiyutiwewi tuminikɨ kumayɨiwatɨ me'iwakaikɨ, tuminikɨ muyumayɨinɨa mɨtipitɨarieni tawari payani.
MIC 1:8 'Ayumieme nekanititsuamɨkɨ meta kukuiniyakɨ nekaniutahiwamɨkɨ, neheumamawetɨ 'anepuyeikani meta neheumawetɨ. Yawi mayu'eriya hepaɨ nekatiniutsuakamɨkɨ, 'aru 'amɨnena hepaɨ nekatiniutsuakamɨkɨ.
MIC 1:9 Tsamariya kemɨtiukwinitɨarie pɨkayu'uayemarinɨa: Kura kwieyaritsie kaniye'ani. Neteɨterima wahetsiepai naime kanakɨnɨni, Kerutsareme kitenieyaritsie paitɨ.
MIC 1:10 Kahati kiekariyaritsie mɨkɨ xepɨkatehekuxatani, yemekɨ xepɨkahetitsuanani, xekenetikurupi kukuiniyakɨ Weti-Rehapɨra tumuanariyaritsie.
MIC 1:11 Tsahapixi kiekatari, xekenayekɨni xemamawetɨ meta tixaɨtɨ xekatehayuyeitɨatɨ. Tsanani memɨtama mepɨka'uyuwaɨri memɨwayekɨnekɨ. Weti-'Etseri kiekariyari kaniuta'aiwani, 'ari pɨkaxeparewieni.
MIC 1:12 'Aixɨa ti'aneme metetakwewietɨ mepɨte'ukakukuine, Maruti kiekatari, Yawé 'axamɨti'ane kaneyenɨ'ani Kerutsareme kitenieyaritsie paitɨ.
MIC 1:13 Rakixi kiekatari, kawayutsixi kaxetate xekeniwaranawɨtɨiri. Xeme xehetsɨa putsutɨrixɨ Tsiyuni niweya 'axamɨtiyurienikɨ, xeme meri xepɨte'utsutɨa ke'axamɨtiyurienekai 'Ixaheri.
MIC 1:14 'Ayumieme, Muretseti-Kahati kiekariyari xekeneutateutɨa. 'Akitsiwi kiekariyaritsie kii 'amutɨtɨ 'Ixaheri kwieyaritsie te'aitamete wawiniyari kanihɨkɨtɨni.
MIC 1:15 Maretsa kiekatari, ne xeime tiyu'uname muwara'iwa nekananunɨ'amɨkɨ xehetsɨa, 'ixaheritsixi yemekɨ memɨkamama 'Arurani paitɨ mekani'axɨakuni memuyuti'awietakɨ.
MIC 1:16 'Ayumieme 'amɨxiya kenanuyexika meta 'amu'utsie keneuyukametseriya, hiwerika keneuwewi 'aniwema pemɨwanaki'erie wahetsiemieme, waɨkawa keneuyukametseriya wirɨkɨ kemɨremu'u hepaɨ, karikɨ 'aniwema pekaninawaiyariemɨkɨ.
MIC 2:1 Xɨa'ui kemɨ'ane xeikɨa memɨyu'iyaritɨa 'axamemɨteyurienikɨ, me'uheitɨ 'akuxi ke'axamemɨteyurienikɨ memitiwewiwa. 'Amɨtikataretsie, mɨpaɨ mepɨte'eye'atɨwa mɨkɨ tɨrɨkariya memexeiyakɨ yuhetsie.
MIC 2:2 Kwie mɨraka'etsitɨre mehiwe'erietɨ, yupiini mekanayeitɨwani, meta kiite, mɨkɨta yukii mekanayeitɨwani. Waɨriyarika me'inanaimatɨ 'uki mekateni'aitɨaka meta tɨɨriyamama, tewi meta tita mɨrexeiyakai.
MIC 2:3 'Ayumieme, Yawé mɨpaɨ kanaineni: «Hikɨta nepɨta nekanihɨkɨtɨni nemɨne'iyaritɨa wahetsie nemi'atɨanikɨ 'axamɨtiwayuriekakɨ, mɨkɨ tsata memayuye'una mepɨkayɨwekaxɨani. Mepɨkaku'uwaniri heitserie meheutanenieretɨ meyuti'ɨretɨ, maye'akɨri tukari ke'axamemɨ'itɨarienikɨ.
MIC 2:4 'Ana tukaritsie hipatɨ mepɨwananaimaka, hikɨ 'ikɨ hiwerika kwikariyari wahetsiemieme pɨtakwikarieni: “Tepeuyexɨri. Neteɨterima wakwie memaka'etsa mekaniyutaxitekiwani. Kehepaɨtɨtɨ menetenawairietɨwe. Memɨtatsi'a'iwaxɨ takwie mekaniyetuiriyarɨwani”».
MIC 2:5 'Ayumieme xepɨkaheixeiyani Yawé teɨterimama watsata xeime kwie wayetuiriwame.
MIC 2:6 'Ikɨ Kakaɨyari niukametemama mɨpaɨ mepɨnetekɨhɨawe: «'Ari ketineuhayewa petihekɨatatɨ. Pepɨkataraxaxatɨwani kename teka'unarieni».
MIC 2:7 Kakuwu nuiwarimama mɨpaɨ mekaniutiyuaneni: «¿Kamɨtsɨ Yawé tinewatɨ 'ari tiuhayewaxɨ? ¿Kamɨtsɨ mɨyatiuka'iyari? ¿Tamɨ niukieya 'aixɨa katiyuyuruwa? ¿Tamɨ tame 'aixɨa mɨtiuka'iyari hepaɨ tekate'u'uwa?»
MIC 2:8 Takai xeme neteɨterima xepɨhɨkɨtɨkai, peru hikɨri xemɨnetsi'aye'unie xepakɨ. Hakewa mɨreyukwine memeyekɨka, kayuwatɨ me'uhukaku huyeta, wakamixa 'amɨtɨtɨ xepɨtewanawairietɨwe.
MIC 2:9 Neteɨterima 'ukarawetsixi wakiita 'aixɨa memɨtemateta xepɨwarayexɨrɨwa, meta watɨɨriyama yuheyemekɨ xepɨtewanawairie naime tita nemɨtiwayetuiri.
MIC 2:10 Xekenanuku'uti. Xekeneuhuni, 'ikɨ 'ena xema'uxipie pɨkahɨkɨ. Tita 'axamɨti'ane xepɨte'utahɨniyaxɨ, xepika'unaxɨ naime yemekɨ.
MIC 2:11 Xɨka xewitɨ tixe'itaiyamɨtɨ, xɨka nuani ti'itawatɨ mɨpaɨ tixe'utahɨawe: «Ne nepɨtixetahekɨatɨani kaxie winuyari meta kaxie hayari wahepaɨtsita», 'ikɨ teɨteri Kakaɨyari niukameya mepayeitɨani.
MIC 2:12 Kakuwu, yurikɨ mɨpaɨ nekanaineni, ne yunaime 'ateɨterima nekaniwakuxeɨrimɨkɨ. 'Ixaheri, yurikɨ mɨpaɨ nekanaineni, ne nekaniwakuteɨximɨkɨ memuyuhayewaxɨ. Nepuwakuxeɨrieni muxatsi kuraruta memeuta'ɨnarieni hepaɨ, muxatsi wahepaɨ, maku'ɨxaya hixɨapa, memɨyuwaɨkawani hepaɨ tɨranari mepɨwewieni.
MIC 2:13 Panuyekani kemɨ'ane muhuyetarɨmeni, meta mɨkɨtatsiere huye mepuyuwewirieximeni, kitenie mekaniuyekɨnikuni hikɨ mekaniyehuni, mexi tiwa'aitɨwame 'umieni 'anuyekaitɨ, mexi Yawé 'anuyekaitɨ 'umieni.
MIC 3:1 Hikɨ mɨpaɨ nekaniutayɨni: «Xekeneu'enana, Kakuwu nuiwarimama wakuwexinaruritsixi, xemɨ'itsɨkate 'ixaheritsixi wahetsiemieme: ¿Kareuyewetse xeme xemimaika tita mɨtiheitserie?
MIC 3:2 Xeme 'aixɨa mɨti'ane xekateni'uxieka, tita mɨkatiheitserie pɨtata xetenaki'erie, neteɨterima me'ayeneniereme wanawiyari xepɨkatsana meta wawaiyari wa'umeyaritsie,
MIC 3:3 xeme neteɨterima xepɨwakwa'a, wanawiyari xepɨkatsana, wa'umeteyari xepɨtimura, 'etsipepeme xepɨwatixiteke wai xarita mɨka'etsarieni hepaɨ, wai huxunuta mɨ'imaiyani hepaɨ».
MIC 3:4 'Uxa'atɨni Yawé mekanitahiwikuni parewiya mehewawiriwatɨ, matsi mɨkɨ pɨkawata'eiya, wahetsiemieme puyuti'awieta 'axamemɨte'uyurikɨ.
MIC 3:5 'Ipaɨ kanaineni Yawé xehepaɨtsita, Kakaɨyari niukametemama neteɨterima xemɨwareuyexɨrɨwa: «Kemɨ'ane 'ikwai memɨxemikwa, kename kayuwatɨ'uma xepɨtewakuxaxatɨwa, kemɨ'ane 'ikwai memɨkaxemikwa, kename kuyaxa 'ayani xepɨtewakuxaxatɨwa.
MIC 3:6 Hikɨ 'ayumieme, mepɨyɨriyarieni tawari tixaɨtɨkɨ mepɨkatexeiyatsitɨarieni, mepɨkayɨwekaxɨaniri memɨtetaxata kemɨtiyɨni 'arike». 'Ikɨ Kakaɨyari niukametemama wahetsiemieme tau pakayune, tukarikɨ wahetsiemieme yɨriya payani.
MIC 3:7 'Iyaritsie mieme memɨtaneniere mepɨyutitetewiya, kakaɨyarixi memɨwaruta'iwawiya kemɨtiyɨnikɨ tixaɨtɨ mepɨkate'ayeitɨarieni. Kakaɨyari wateta pɨreunani, mɨkɨ tawari pɨkawata'eiya.
MIC 3:8 Ne, matsi, tɨrɨkariyakɨ nekanihɨneni, nekanihɨneni Yawé 'iyarieyakɨ, meta nekanihɨneni tita mɨtiheitseriekɨ meta tɨrɨkariyakɨ, nekaniyɨweni Kakuwu nuiwarimama nemɨwarutaxatɨani ke'axamemɨtekahu nekaniyɨwenita 'ixaheritsixi nemɨwataxatɨani ke'axamemɨte'uyuri.
MIC 3:9 Xeme 'ikɨ xekeneu'eni, Kakuwu nuiwarimama wakuwexinaruritsixi, meta 'itsɨkate 'Ixaheri kwieyaritsie miemete, tita mɨtiheitserie xepɨxani'erie meta xepitituna niuki heitserie mɨtikuxata,
MIC 3:10 Kerutsareme meta netuki manuwe 'imieri meta kemɨkatiheitserie tukarikɨ yapɨtixuawe.
MIC 3:11 Wa'itsɨkate metepitɨarietɨ xeikɨa 'aixɨa mepɨteyurie, wamawari wewiwamete mepɨwa'ɨxatsitɨa meteyuwiyatɨ, meta wakakaɨyari niukametemama tuminikɨ xeikɨa mekatenikuxatani kemɨtiyɨni, 'imatɨrieka matsi, Yawé hetsie mekaniyutɨrɨkariyani, mɨpaɨ mekaniutiyuaneni: «¿Tamɨ Yawé tahamatɨa katiuyeika? Tame hawaikɨ 'axatepɨka'itɨarieni».
MIC 3:12 'Ayumieme, xeme ya'aneme xewiwiekaku Tsiyuni kwietsanaripa hepaɨ tiyuxexeiyatɨ kanayeimɨkɨ, Kerutsareme 'unimeyari xeikɨa kaniyuhekɨarimɨkɨ, meta yemuri tuki manuwekai 'ɨtsita kanayeimɨkɨ.
MIC 4:1 'Imatɨrieka tukari 'umahutsie, yemuri Yawé tukieya manuwekai hɨrite 'amutɨtɨ heima kanakayeriemɨkɨ meta mɨkɨ matsi yunaime hɨrite wara'iwatɨ kanayeimɨkɨ. Hikɨ teɨteri hepana mekaniukɨnikuni,
MIC 4:2 meta nuiwarite yumɨiretɨ hetsɨana mekani'axɨakuni, mɨpaɨ mekanitiyuakuni: «Xekenakɨni, tepanutikɨne Yawé yemurieyatsie, Kakuwu Kakaɨyarieya tukita. Kakaɨyari yukɨmana yu'aitsikate kataneta'ɨkitɨamɨkɨ, 'ana mɨpaɨ tepɨte'u'uwani». Karikɨ Tsiyunitsie kanayeneikani 'ɨkitɨarika, Kerutsareme hetsie, Yawé niukieya.
MIC 4:3 Kakaɨyari yɨkɨmana yumɨireme teɨteri wahetsiemieme 'aixɨa katinakayurimɨkɨ, meta tita mɨtiheitserie hepaɨtsita pɨtita'uximayata nuiwarite memɨtɨrɨkawi wahetsie meta 'ateewa kiekatari. Yu'ixiparate hatsarunite mepayeitɨaxɨani, meta yupitsikate 'ɨxa xikame mepayeitɨaxɨani. 'Ari nuiwarite mepɨkayukwitɨweniri, meta tawariri 'imieri kuyaxa mieme mepɨkayuti'ɨkitɨani.
MIC 4:4 Yuxexuitɨ kaxie meta piní 'iteɨriyari hetɨa xepɨtiyaxikeni, nixewitɨ 'axamatɨarietɨ pɨka'ayani —Yawé Naimekɨmɨtɨrɨkaɨye mɨpaɨ kaniutayɨni—.
MIC 4:5 Teɨteri yunaitɨ yukakaɨyarixi wahetsie metewiyatɨ mekaniuhuni, matsi tame Yawé hetsie tetewiyatɨ xeikɨa tekaniuhuni, takakaɨyari hetsie tetewiyatɨ, hikɨ 'ena mɨtiyehane meta yuheyemekɨ.
MIC 4:6 «Yawé mɨpaɨ kanaineni: 'Iya tukaritsie, muxatsi memɨte'utikwinitɨarie nekaniwakuxeɨrimɨkɨ, memeutaxɨriexɨa meta memɨnanaimarie.
MIC 4:7 Muxatsi memɨwitekietɨka memuyuhayewaxɨ nekaniwarayeitɨamɨkɨ, meta 'ateewa memehapanie, xeinuiwariyari metɨrɨkaɨyeme nepɨwarayeitɨani. Yawé mɨkɨ wahetsie katini'aitakamɨkɨ Tsiyuni hɨriyaritsie hikɨ 'ena mɨtiyehane meta yuheyemekɨ.
MIC 4:8 'Ekɨta, Muxatsi Watuxiyu, yemuri kuraru 'amatitetewa Tsiyuni kiekariyari: 'ahetsɨa kaninuamɨkɨ meripai tɨrɨkariya kepemɨrexeiyakai, mariwemekɨ kepemɨti'aitakai Kerutsareme kiekariyari».
MIC 4:9 Hikɨta, ¿ketitayari kwinimieme petiuhiwa? ¿Kamɨtsɨ ti'aitame pekarexeiya? ¿Titayari 'ukaratsi niweyame kukuiniyaya meti'axiya? ¿Kamɨtsɨ matsi'ɨxatsitɨwame tiumɨ?
MIC 4:10 Ketineukakukuineni meta keneu'atawawaɨriyani, neniwe 'uka Tsiyuni, 'ukaratsi mɨtiniwerɨmeni hepaɨ, karikɨ hikɨri 'akiekaritsie pekanayeyeimɨkɨ, meta yeuta pe'ukaitɨ pekanayeimɨkɨ. Wawiruniya pekaniyemieni, matsi mana pe'uyeikatɨ pekanixɨnariemɨkɨ, Yawé kamenixɨnamɨkɨ memɨmatsi'aye'unie kememɨmete'aitɨatsie.
MIC 4:11 Hikɨri nuiwarite yumɨiretɨ mepɨyukuxeɨri memetsi'aye'unietɨ. Mɨpaɨ meputiyuane: «Tsiyuni kapatsietɨ ke'ayeitɨarieni. Tenenieretɨ tepɨyutemamawieka».
MIC 4:12 Matsi mɨkɨ Yawé kemɨtiku'eriwa mepɨkatemate, meta mepɨkaheitimaitɨkɨka kemɨtiyurimɨkɨ 'arike, 'atsimepɨkatemate mɨkɨ mɨwarukuxexeɨriwa mɨwaka'itsanakɨ waxata hepaɨ.
MIC 4:13 Kenanukukexi, neniwe 'uka Tsiyuni. Kene'uneni. 'A'awate tepɨa nekanayeitɨaxɨamɨkɨ meta 'akarutsate wurunitse nekanayeitɨaxɨamɨkɨ, yumɨireme teɨteri tumuanari pemɨwarayeitɨanikɨ, meta Yawé pekatiniyetuiriemɨkɨ tita memɨte'a'iwaxɨ 'axa'anemekɨ, tita waɨkawa memɨteheuxeiya pekatiniyetuamɨkɨ, Ti'aitame mɨhɨkɨ naitsarie kwiepa.
MIC 5:1 Neniwe 'uka yumemiwame, 'akuyaxima keniwarukuxeɨri, takuraruri kananutinamieka. 'Iwaɨyɨkɨ yu'auritapa peutiweiyani 'Ixaheri kwieyaritsie ti'aitame.
MIC 5:2 Matsi 'ekɨ, Wereni 'Epɨrata, kiekari 'etsipemɨyewa Kura nuiwarimama watsata, 'ahetsie pɨyeyani 'Ixaheritsie mɨtita'aita, tsutɨa paitɨ kiekatari puwanuiwari, watukari mɨka'inɨari.
MIC 5:3 'Ayumieme Kakaɨyari kaniwayetuamɨkɨ mɨwaraye'unie hetsɨa, kepaukake 'ukaratsi mayehuka 'ukitɨme mɨtiniweni, hikɨ 'ixaheritsixi memehapaniekai yu'iwama 'ixaheritsixi wahetsɨa mepɨ'axɨani.
MIC 5:4 Peru xewitɨ kaninemɨkɨ muxatsi wahepaɨ wahɨweme mayani Yawé tɨrɨkariyayakɨ, mɨkɨ kemɨtimariwe 'ipitɨakaku Yawé kakaɨyarieya. 'Aixɨa 'iyari mepu'uwani, mɨkɨ mɨti'aitanikɨ kwie kemɨyewa naimetsie.
MIC 5:5 Mɨkɨ kayuwatɨ temu'uwanikɨ yapɨtiyurieni. Xɨka 'Atsiriya nuani takwieyaritsie takwieyari ka'unake takiekarite kuraruyari 'amatitetewa, tepitamieni yu'atahutame muxatsi wahɨwemete tewarawitɨtɨ, meta 'atahaika kuyaxi memanuyetei wahekɨ,
MIC 5:6 mɨkɨ 'Atsiriyatsie mepɨtetahɨni 'ixiparakɨ, Nimiruri kwieyatsie, nawaxakɨ mepɨteta'aita. Xɨka 'Atsiriya takwieyari 'uka'unake, xɨka takwieyaritsie watahanike, mɨkɨ pɨtatsitawikweitsitɨani.
MIC 5:7 Kakuwu nuiwarimama memuyuhayewa, teɨteri meyumɨireme watsata, haɨtsi Yawé hetsɨa mieme hepaɨ mepɨ'aneni, wiyeri 'amayetsuye tupiriya hetsie mɨkaxɨrɨwe hepaɨ, teɨteri memɨka'inɨ'a, meta tixaɨtɨ mɨkatiwarawawiriwa.
MIC 5:8 Kakuwu nuiwarimama memuyuhayewa nuiwarite watsata, yumɨireme teɨteri watsata, maye yeutarite watsata kemɨtiyumate mɨkɨ hepaɨ mepɨ'aneni, maye temaikɨ muxatsi watsata kemɨtiyumate hepaɨ, kepauka watsata meutahani puwatixutsina meta puwatikwa'a, nixewitɨ wahetsie mɨtanuani mɨkayɨwekɨ.
MIC 5:9 Memɨxe'aye'unie xepɨwatakwini, hikɨ yunaime xepɨwakwini memɨxekwitɨwe.
MIC 5:10 Yawé mɨpaɨ kanaineni: «Mɨkɨ tukaritsie 'akawayutsixi kuyaxa miemete nekaniwareuyehɨamɨkɨ, metatsiere 'akaxetate kuyaxa miemete.
MIC 5:11 Kiekarite 'akwieyaritsie miemete nekanakuxɨtɨamɨkɨ metatsiere naime 'akiekarite kuraruyari 'ematitɨtɨ.
MIC 5:12 Kepemɨtiyukewaiya nekaneitipariyamɨkɨ meta kakaɨyarixi memuwaruta'iwawiya kemɨtiyɨnikɨ pepɨkawarexeiyaniri.
MIC 5:13 'Akakaɨyarixi nekaniwareutipariyamɨkɨ meta 'atetexi memɨpatsietɨka 'amɨti'u, tawariri hatsuaku wahɨxie pepɨkatitunumakeni 'amamakɨ pemɨtiwawewie wahɨxie.
MIC 5:14 'Atserá 'ɨkiyarite nepatihunaxɨani, meta 'akiekarite 'unimeyari kwinieneme nekanikemɨkɨ,
MIC 5:15 neha'atɨ waɨkawa nekatiniwarakapitɨamɨkɨ kemɨ'ane nuiwarite memɨkanetsi'anu'eni».
MIC 6:1 Yawé kemutaine xekeneu'eni: «Kenanukukexi, hɨrite wahɨxie 'axanetsika keneyetua, yemurite 'aniuki meke'u'enieni».
MIC 6:2 Yemurite xekeneu'eni, Yawé xanetsikaya, kayuwatɨ xekeneu'enana, kwie tsutɨmeyari, Yawé kanitsutɨaka yuteɨterima waxanetatɨ, kanitsutɨani 'ixaheritsixi wahamatɨa 'aixɨa mɨtiyurienikɨ:
MIC 6:3 «Neteɨterima, ¿ne kenexe'uyuri? Yaxekeneteneutahɨawi kepauka nepɨxe'umuinaxɨ.
MIC 6:4 Ne nekatiniuyurieni 'Ekipitu kwieyaritsie nemɨxe'ayewitɨ, nemɨxe'uxɨnaxɨ mɨkɨ kwieyaritsie waɨriyarika xete'aitɨariekaku. Ne nekaniwarutanɨ'ani Muitsexi, 'Aruni meta Miriyami, memɨxe'uwitɨximenikɨ.
MIC 6:5 Neteɨterima, xekena'eriwani Waraki Muhawi kwieyaritsie ti'aitame kemɨtiyurimɨkɨkai, meta Warami Wehuxi nu'aya kemɨtita'ei. Xekena'eriwani kexemɨte'ukɨ Tsitini xemɨyekɨ Kirikari paitɨ xemu'axɨa, meta mɨpaɨ xeketenemaika Yawé kemɨtixe'utawikweitsitɨa».
MIC 6:6 ¿Kehepaɨ neyɨme Yawé hɨxie 'ahurawa nepunuani meta kehepaɨ Kakaɨyari Mɨmariwe hɨxie netikatunumakeni? ¿Netiyɨwe mawari taiyariyarikɨ yatɨni tsikeru xeiwiyari mexeiya neyetuatɨ?
MIC 6:7 ¿Yawé tiyukatemawieni miriyaritekɨ muxatsi 'ukitsi wahekɨ, yatɨni tamamata miriyari 'akiyarikɨ hatseiti muhapane? ¿Neniwe mexɨakame netiyetuani, nehetsie mɨyetɨa netiyetuani 'axanemɨtiuyurikɨ?
MIC 6:8 Yapekatiniutaxatɨarieniri tita 'aixɨa mɨti'ane. Pepɨtiutaxatɨarieri tita mɨtitakwewie 'ahetsiemieme Yawé: Yapepɨtiyurieneni tita mɨtiheitserie hepaɨtsita, pepinaki'erieka nenimayatsika, meta Kakaɨyari hɨxie mariweme pepɨka'ayuyeitɨwani.
MIC 6:9 Nuiwarite meta teɨteri kiekaritsie kiekatari, Yawé niukieya xekeneu'eni, pɨxeha'iniwa, xɨka xetemaiwaweni, Yawé xekenemakaxeni.
MIC 6:10 «'Axaxemɨte'u'iyari. ¿'Atsinekaraineni tumini xemexeiya 'axa'anemekɨ xeme'iwaxɨ, meta heuyewekamekɨ xemɨteku'inɨnɨata hepaɨtsita?
MIC 6:11 ¿Kename 'aixɨa 'ane nera'eriwani kirutame mɨtinawaya hepaɨtsita meta tepɨa mahete manuyeyaxike 'aixɨa mɨkareuku'inɨatsie?
MIC 6:12 Xikutsixi kiekaritsie kiekatari 'axamepɨte'u'iyari, kiekatari mepɨte'itawa, yuteta yuneni mepexeiya ti'itawame.
MIC 6:13 'Ayumieme ne, nekametinikwinitɨamɨkɨ nemetsitiwayatɨ, ne nepɨmetsika'una 'axapemɨtiuyurikɨ.
MIC 6:14 Pepɨtiutikwa'ani, matsi pepɨka'utahuxarɨweni, matsi yaxeikɨa pepɨhaakatɨarieka. Pemɨtiukaxexeiyani yapɨreuyeikani, meta tita 'etsiwa pemɨrexeiyani memɨmatsi'aye'unie nekaniwayetuiriemɨkɨ.
MIC 6:15 Tita pemɨtika'eni mɨkɨ pepɨkaka'itsana, huriwu takari tsepa pemutipɨnaxɨ hatseiti pepɨkahexeiyani, meta kaxie winuyari pepɨka'anu'ieni tsepanetɨ takariyari pemutiketsi.
MIC 6:16 'Ekɨ 'aixɨa 'anemekɨ 'Umiri 'aitsikaya pekaniuweiyani meta naime 'Akawi nuiwarimama kememɨteyurie, yapepɨtiuyeika 'ɨxatsieya kemutiyuane. 'Ayumieme pemɨka'unarienikɨ nekameniyetuamɨkɨ, meta 'ateɨterima nekaniwatewinɨamɨkɨ. Teɨteri 'axakemematekɨhɨaweni pepinewieka».
MIC 7:1 Xɨa'ui ne. Wiita 'ikwaxi muti'inɨiwatsie 'anutiyaku nepunua, pɨkayɨweri kaxie nemɨtiwauni, tsikere xeixatsimuyari nepɨkahexeiya nemitikwanikɨ, xapa takari yɨrime tɨma nepɨkahexeiya, kɨmana nemɨmɨxime.
MIC 7:2 Teɨteri Kakaɨyari memayexeiya 'ikɨ kwieyaritsie mekanakuxɨtɨarieniri, 'ena kwiepa mepumaweri teɨteri 'aixɨa memɨte'u'iyari. Yunaitɨ hipame mepɨwakwiku, meta yunaitɨ mekaniyuwiniyatɨweni.
MIC 7:3 Nixewitɨ pɨkawara'iwa ke'axamemɨteyuriekɨ, ti'aitame parewiwametemama meta 'itsɨkate mepiku'iwawa 'awie memɨtepitɨarienikɨ. Memɨtɨrɨkawi mekateniku'iwawani xeikɨa, meta yunaitɨ mekaniyutemawieritɨaka ketita memɨtehiwe'eriekɨ.
MIC 7:4 Watsata muyeika 'aixɨa mɨtiuka'iyari kwinimieme matsi katinihɨaka keyuri 'ɨtsi, kemɨ'ane heitserie 'amuyeika, matsi kanitunini keyuri xuya. Matsi kanaye'aximeniri memɨhɨxiyatɨarienitsie, kanehuraniri tukari memɨtekwinitɨarienitsie, kememutiyua memɨtaneniere 'ahetsɨa miemete.
MIC 7:5 Xeime 'ahepaɨ tewi yuri pepɨkati'eririeka, 'ahamikuma wahetsie pepɨkatiwiyani, kene'akweriwayurieka kepemɨtikuxaxatɨwa 'ahamatɨa mukahupu.
MIC 7:6 Nu'ayatɨtɨ yupapa pɨxani'erie, 'uka yumaama pɨkaheu'enie, meta mu'etsiekame yumu'e paye'unie, memɨxe'aye'unie xeme yuxexuitɨ xekiitatɨtɨ mepayetetɨka.
MIC 7:7 Matsi ne Yawé hetsie netiwiyatɨ nepɨta'ikwewa, nepɨta'ikwewani Kakaɨyari hetsie netsiwikweitsitɨwame. Nekakaɨyari kaneni'eniemɨkɨ.
MIC 7:8 Pemɨnetsi'aye'unie 'aku, 'axakemɨnetiyuriekɨ pepɨkayutemawieka. Nepatiwe, matsi nepanukukeni, yɨwipa nepuyeika, matsi Yawé nehekɨariya pɨhɨkɨ.
MIC 7:9 Yawé hepaɨtsita 'axanekatiniuyurieni, 'ayumieme nepinewieni haxɨaya kepaukake 'aixɨa mɨtiyurieni kenemɨtiuyurikɨ meta kemɨtiheitserie nehetsiemieme. Hikɨ 'ana hekɨaripa pɨnetsi'atɨani meta neyutemawietɨ nepayani wikweitsitɨarikayakɨ.
MIC 7:10 Mɨnetsi'aye'unie kepauka mɨniere, mɨpaɨ mɨnetikɨhɨawekai: «¿Hakewari 'akakaɨyari?», waɨkawamekɨ puyutitewiya. Nekanixeiyamɨkɨ kemɨtika'unarieni, karikɨ haxu huye 'utɨa mieme hepaɨ katiniketsinariemɨkɨ.
MIC 7:11 Kepauka 'akuraru 'amatayewa tawari mawewiyatɨyani 'ana kanihɨkɨtɨkamɨkɨ 'akwie 'apemɨtayeuriya.
MIC 7:12 Mɨkɨ tukaritsie 'ahetsɨa mepɨ'axɨani teɨteri, 'Atsiriya metsutɨtɨ meta 'Ekipitu kiekariteyaritsie paitɨ meye'atɨ, Niru hatuxameyari manuyeka metsutɨtɨ meta 'Eupɨrate hatuxameyaritsie meye'atɨ, haramaratsie metsutɨtɨ meta tapa haramaratsie paitɨ, meta teewanarixi xeime hɨritsietari.
MIC 7:13 Karikɨ mɨkɨ kwieyarite makumawe kanayeixɨamɨkɨ teɨterimama ya'aneme meheutiwiwiexɨaku, 'axamemɨteyuriekaikɨ.
MIC 7:14 'A'itsɨ pe'akwetɨ 'ateɨterima keniwahɨneni, muxatsi 'atewama, yuxaɨta 'ɨtsita memɨkie, 'ɨtsi hixɨapa. Watsani meta Karaha mu'ɨxayatsie ketiniwarutimikwa meripaitɨ hepaɨ.
MIC 7:15 Mariweme ketineuyuri wahɨxie, 'Ekipitu kwieyaritsie pemɨwarayewitɨtsie hepaɨ.
MIC 7:16 Hipatɨ nuiwarite mekaninenierikuni mariwemekɨ kepemɨtiyurieni, hikɨ yutɨrɨkariya mekanititewiyakuni, yutenie mekaniuwɨrikuni meta memɨkaheu'enana mekanayuyeitɨakuni.
MIC 7:17 Tumuanari mekanikutsenakuni kuuterixi wahepaɨ, kwiepa yutawima memɨteku'uwa wahepaɨ. Mepɨwayekɨne me'utiyɨyɨakatɨ hakewa memeyu'awietatɨka meta, memamatɨ 'ahɨxie, mekaniyuyetuakuni 'ahetsɨa, Yawé meta takakaɨyari.
MIC 7:18 Pumawe Kakaɨyari 'ahepaɨ tiuka'iyaritɨ, 'axamɨti'ane mɨtareuyehɨwiriwa meta tixaɨtɨ mɨkarayeitɨwa ke'axamemɨte'uyuri teɨterima memuyuhayewaxɨ. 'Aheyemekɨ pepɨkaha'a, naki'eriya mɨmatsinakekɨ pɨta.
MIC 7:19 Tawari ketaneutinenimayata. Ke'axatemɨte'uyuritsie kenakexi, meta naime 'axaketemɨte'uyuri haramara 'amatiyewatsie ketineukaxɨri.
MIC 7:20 Matsiɨkɨme kenayeitɨa Kakuwu pemɨkaku'eiriwe hatsuaku, meta 'Apɨrahami heitserie kepemɨtinaki'erie, meripaitɨ tsutɨa paitɨ kepemɨti'ahɨritɨa tatutsima wahamatɨa.
NAH 1:1 Kemɨtiyɨni niukiyari Niniwe hepaɨtsita mieme. 'Ikɨ xapa kanihɨkɨtɨni Nahumi 'Erikutsi kiekame kemɨtiunieritɨarie hepaɨtsita mɨtikuxata.
NAH 1:2 Yawé Kakaɨyari mɨtiuyukakwerie kanihɨkɨtɨni meta mɨyɨkɨhɨpa. Yawé mɨyɨkɨhɨpa, Ti'aitame mayu'eriya. Yawé pɨtiwarakapitɨwa kemɨ'ane memeye'unie, mɨwaraye'unie wahepaɨtsita pɨkayuhaxɨapitɨarinɨa.
NAH 1:3 Yawé yapauka muyeha'ani pɨkayɨwe, peru tɨrɨkariyaya pɨmariwe. Yawé tiwakwinitɨatɨ xeime tɨma pɨkahayewa. 'Eka meta wiyeri mɨtɨrɨkawitsata kaniumieni, hai tumuanari kanihɨkɨtɨni ketateya hetɨa mieme.
NAH 1:4 Kepauka mɨkɨ mɨtita'aita haramara kaniukawaukeni, meta haa muhapane kaniukawaukeni. Watsani meta Kaximeru hɨriyaritsie 'ɨxa 'aixɨa mɨ'anene pɨtiwauke, meta kɨyexi 'emɨpapa Riwanu mieme kanitiyɨnareni.
NAH 1:5 Kakaɨyari hɨxie hɨrite kaniutiyɨyɨakani, meta yemurite kanika'unikeni. Metatsiere hɨxiena kwie kaniutayuaneni, meta yunaitɨ hetsiena memɨte'u'uwa.
NAH 1:6 ¿Kemɨ'ane pɨyɨwe mɨtiunewieni haxɨaya hepaɨtsita? ¿Kemɨ'ane putawikweiwe haxɨaya mɨtiyukukuinetsie? Haxɨaya tai hepaɨ katiniyukukuineni, hɨxiena tetexi kanititarikeni.
NAH 1:7 Yawé 'aixɨa katiniuka'iyarini, 'uximatɨarika muxuawenitsie mɨkɨ tiyu'awietame kanihɨkɨtɨni, meta kemɨ'ane hetsiena memɨtewiya wahetsie nunuwame kanihɨkɨtɨni.
NAH 1:8 Peru Niniwe kanika'unamɨkɨ kaniwatihautsitɨamɨkɨ waɨkawa mekaneuyewekuni, tsepa makuyɨwitsie mɨwaraye'unie kaniwaranukuweiyamɨkɨ.
NAH 1:9 ¿Kemetekuxata Yawé hepaɨtsita? Mɨkɨ kememɨte'uxa katiniwamuririemɨkɨ. Xeimieme xeikɨa pɨtiwakwinitɨani.
NAH 1:10 Tupiriya mɨwawaki hepaɨ mekanitixɨtsitɨariekuni, xuya mayuyewiya hepaɨ, meta tarɨwekarixi winu 'iiyarikɨ memanutikɨ hepaɨ.
NAH 1:11 'Ekɨ, Niniwe, 'ahetsie pɨyetɨa Yawé hepaɨtsita 'axamɨtikuxata, 'axa'anemekɨ mɨ'ɨxatsita.
NAH 1:12 Yawé mɨpaɨ kanaineni: «Tsepanetɨ 'atsiriyutsixi memɨmɨire metɨrɨkawitɨ, mekanikwi'iwakuni meta mekanikumaweriyariekuni. 'Ekɨta, Kura tsepa nemɨmatsi'uhiweritɨa, tawariri nepɨkamatsihiweritɨani.
NAH 1:13 Yuku pemetɨkɨ nekanitamuramɨkɨ kepemɨrakuwie nekamanixɨnamɨkɨ».
NAH 1:14 Peru 'ekɨ Niniwe, 'ahepaɨtsita, Yawé 'ipaɨ katiniu'aita: «Tawari 'anuiwarima mepɨkatixuawere memɨmatsiha'eriwani kepemɨtitewa, watukita paitɨ nekaniwatitaramɨkɨ kakaɨyarixi memɨxixiyatɨka meta memɨkwaxiyarietɨka. 'Ateukiya nenikuha'aritɨamɨkɨ, 'axapemɨtiuka'iyari pemɨhɨkɨkɨ».
NAH 1:15 Neuxei. 'Ari hɨritetsie kanakamieni, niuki 'aixɨa manuyɨne matɨkɨ kememɨte'ayu'iwaxɨ titaxatake, kemɨ'ane mɨtatitaxatɨani kayuwatɨ temexeiyanikɨ. Kura, 'a'ixɨarari kenewewieneniri. Kepemutayɨ ketinaye'atɨwani. 'Axamemɨte'u'iyari tawari 'akwiepa mepɨkaheutahaxɨani, 'ari mekaniukwi'iwa yunaitɨ yemekɨ.
NAH 2:1 Niniwe, 'ahepa kanamieni mɨmatsika'una, 'ayumieme kuyaxi wapaitɨ keniwaranutinɨ'a memɨtanenierenikɨ, huye keneta'ɨwiyani, 'akuyaxima keniwaxeɨrieka, 'ahetsie titakɨ pemɨtitanuani ketineha'aritɨaka.
NAH 2:2 Karikɨ Yawé yakatiniyurimɨkɨ Kakuwu tawari witsimɨtixeiyarienikɨ, meta 'Ixaheri witsimɨtixeiyarienikɨ, teyu'unamete mekateninawatsirieni, 'iteɨri mukahurukarieni hepaɨ katinanuyeyani.
NAH 2:3 Kuyaximama memɨkamama kɨmana memeuyukunarɨma kanixetani, yaxeikɨa kuyaxi mekaneuxetani. Wakaxetate tepɨayari kaniutixawatɨreni tai hepaɨ mexi meyukuha'aritɨwa meyutakwinike meta kuyaximama yupitsikate teikɨ mekanetsetserani.
NAH 2:4 Kaxetate hau'erietɨ kaye'utɨa mekaniye'uwani, teɨteri memayukuxexeɨriwatsie mekani'axeni metewakwinitɨatɨ. Tai kɨxeme hepaɨ mekateniyuxexeiyatɨkani, meta mimierɨkari hepaɨ mekanikɨyɨaka.
NAH 2:5 Niniwe kiekariyaritsie ti'aitame yukuyaxima 'aixɨa memɨ'anene kaniwaruta'inieni, mɨkɨta mexɨitɨarikakɨ mekanekaxɨrɨweni. Kuraru 'amatitewatsie meyumexɨitɨatɨ mekani'axeni mana memɨte'anutananikɨ.
NAH 2:6 Peru haa manutaname kaneuyepierixɨani, paratsiyu pɨka'unirɨme.
NAH 2:7 Yakatiniu'aitsieniri: Niniwetari 'ateewa mekananuhapaniekuni. 'Ukari tewa'uximayatsiriwamete kukuruxi wahepaɨ mekateniutsuanani, meta yutawitsie mekaneuyuhutsunani hiwerikakɨ.
NAH 2:8 Niniwe kiekariyari haa manutaname mɨtari hepaɨ kani'aneni, teɨterimama mekanitayuruweni. «Xekeneukunuaxɨa» «Xekeneukunuaxɨarikɨ», mekateniuhiwieriwani, peru nixewitɨ tɨma pɨka'ukuneniere.
NAH 2:9 Pɨrata xekenewayetɨki. Huru xekenewayetɨki. Piinitɨarika mɨraye'atɨka pɨkati'inɨari, meta piinite pɨtimɨire witsimɨti'anene mɨraye'atɨka.
NAH 2:10 Kiekari katiniunawatsiyarieni, yuxaɨta kaniyuhayewa meta 'unitɨ. Wa'iyari kaniku'amɨwetɨkani, watunute niutiyɨyɨakatɨkani, wawaiyarite niutiyɨyɨakani, yuhɨxie mekanayetukwarawiniri.
NAH 2:11 ¿Mayetsi waterɨ keranuyetɨa meta mayetsi tɨɨrixi waterɨ, hakewa maye 'uki, maye 'ukaratsi meta waniwema memeyu'awietakai nixewitɨ kawa'uximatɨakakɨ?
NAH 2:12 ¿Maye keranuyetɨa, yuniwema wahetsiemieme 'etsitipepeme mɨtititsanakai meta maye 'ukaratsi hetsiemieme yuxɨ'erika kɨipitɨa mawiwierekai, yuterɨta yuxɨ'erika mɨtiutahɨniyakai meta wai mutahɨniyakai mɨwayuti'awiwietatsie?
NAH 2:13 «Peru ne hikɨ nekaninuani nematsi'aye'unietɨ —Yawé Mɨtɨrɨkaɨye mɨpaɨ kanaineni—. 'Akaxetate kuyaxa miemete naxi nekaniwarayeitɨamɨkɨ, meta 'ixiparakɨ 'aniwema mayetsi tɨɨrixi nekaniwakwimɨkɨ. 'Akwieyaritsie kiekatari memɨtenawaya nekaniwakumaweriyamɨkɨ, hatsuakuri tawarita 'atupiritsixima waniuki pɨka'enierieni».
NAH 3:1 Xɨa'ui, kiekari xuriya pemɨtayeuriwa, 'itarikakɨ pemɨhɨne, pemɨkatihayewa 'inawarikɨ, meta pemɨkatihayewamɨkɨ pe'amienetɨ.
NAH 3:2 Kaunari 'iwaɨyɨpame yuariyaya kana'eniɨriɨkɨni, meta kaxeta 'ɨkateya yuariyari, kawayutsixi watɨranari, kaxetate wayuariya,
NAH 3:3 kawayutsixi wanautsari, putimerɨka wa'ixiparate, pitsikate putixawatɨre, mepɨyumɨire mɨkite, kaxarite pukuxeɨrietɨka, kaxarite naitsarie kaneutiheni, yunaitɨ wahetsie mekanekaxɨrɨweni.
NAH 3:4 'Ikɨ naitɨ mɨyakatiniuyɨni waɨkawamexɨa muyutuakɨ, mɨkɨ 'ukaratsi tuminikɨ muyumayɨinɨa witsimɨti'ɨimari, mɨkɨ mɨrakumate kemɨtiwaru'irɨwiya. Kiekarite katiniwaru'irɨwiya wahamatɨa 'ukahuputɨ, meta nuiwarite wakewaiyatɨ.
NAH 3:5 «Ne nematsi'aye'unietɨ 'ena nekaniuweni —Yawé Naimekɨmɨtɨrɨkaɨye mɨpaɨ kanaineni—. 'Ahɨxie paitɨ 'a'iwi nenitihanimɨkɨ, nuiwarite memɨmatsixeiyakɨ kepemɨtimawe, meta te'aitamete 'atewiyarika memɨxeiyakɨ.
NAH 3:6 Mɨkati'itiya nekamanikawirimɨkɨ, nepɨmatsitewiyatsitɨani teɨteri wahɨxie nepɨmatsihɨani.
NAH 3:7 Yunaitɨ memɨmatsixeiya mekaniyuta'unaxɨakuni, mɨpaɨ menitiyuakuni: “Niniwe 'ari kaniuka'unarieni. ¿Kemɨ'ane puyuhiwerieka hetsiena mieme?” ¿Hakewa nepeikaxeiya kemɨ'ane minɨtɨani?»
NAH 3:8 ¿Kamɨtsɨ 'ekɨ matsi 'aixɨa peti'ane keyuri Tewatsi, kiekari haa hixɨapa mɨyema, Niru hatɨayari manuyehane 'aurie mukuma, haramara hetsiena munua mayeitɨa meta haa yukuraru mayeitɨa?
NAH 3:9 Kutsi meta 'Ekipitu mepiparewiekai yemekɨ, Puti meta Riwiya meminɨ'ɨ mepɨhɨkɨtɨkai.
NAH 3:10 Mɨyatɨtɨ, Tewatsi kiekariyari kanehanieni 'ateewa, 'ateewa paitɨ kananutahɨiyani. Niwemama mekaniutitetseweiyani kaye 'itsikinayaritsie. Teɨterimama waɨkawa memeuka'u meniyuta'iwirieni, meta mekaniwarutihɨani teɨteri wa'ukiyarima.
NAH 3:11 Yaxeikɨata 'ekɨ, Niniwe, pekanititawaimɨkɨ, peka'uka'iyaritɨ pekanayeimɨkɨ Yaxeikɨata 'ekɨ, mɨmatsi'aye'unie pemakatɨ, pekanitiwaumɨkɨ hakewa peme'ati'awieta.
NAH 3:12 'Akuraru 'amatitewa piní kanihɨkɨtɨni mexɨakame mieme takari mɨkwakwaxi: xɨka 'utakatsieni, kemɨ'ane mitikwani teta kaneukaxɨrɨweni.
NAH 3:13 Neuxei, kepauka memɨwaraye'unie memɨwatakwinitsie 'akuyaxima 'ukarawetsixi wahepaɨ mekaniyɨaka. 'Akwieyaritsie mieme 'ituparite heuyepietɨkaitɨ huhutatɨ kaniyuhayewamɨkɨ, karikɨ kɨmana mɨreunamirikekai tai kanitixɨtsitɨamɨkɨ.
NAH 3:14 Haa waɨkawa keneuxeɨri kuyaxi 'awarita memaketɨkɨnetsie mieme, 'akuraru 'akenatitɨriya. Haxupa kenekakexi, 'a'ɨkakɨ haxu 'aixɨa keneuyuri meta xɨnariya keneutiwewi.
NAH 3:15 Mana kwitɨ tai kamenitaxɨtsitɨamɨkɨ meta 'ixiparakɨ pekanimieriemɨkɨ, mɨmatsi'aye'unie 'utsika mɨtikɨme hepaɨ kametinikwaimɨkɨ. Kene'amɨiriyani 'utsikari wahepaɨ meta kene'axiɨtɨaka tekɨmemete wahepaɨ.
NAH 3:16 Tetuayamete 'ahetsɨa miemete pepɨwarutimɨiriyaxɨ xurawetsixi wareuyeta meyupaɨmeme
NAH 3:17 Matsiparewiwamete 'utsikari wahepaɨ mekani'aneni meta 'aparatsiyuta te'uximayatamete, 'etsimemɨtepepe memɨka'u'umeyari wahepaɨ, muhaɨtɨnitsie 'ixumeri 'amɨtɨtɨ hetsie menikayaxikeni, matsi tau manatinenitsie mekaniyuta'unani, xewitɨtɨma pɨkatimate hakewa memeyuti'awietaxɨa wataxeiyake.
NAH 3:18 'Atsiriyatsie ti'aitame, 'amuxatsi wahɨwemete karima meneukutsu, 'akuyaxima pemɨwaranayexie meneukutsixɨani. 'Ateɨterima hɨritetsie meneutaxɨriyaxɨani, pumawe xewitɨ muwakuxeɨrienikɨ.
NAH 3:19 Kepemɨtiukakukuine 'uayeyari pumawe, 'ahaiya pɨkayu'uayemarinɨa. Yunaitɨ memɨtehetimani kepemɨranuyetɨakɨ, 'ixɨarari mekaniwewikuni ke'axapemɨranuyetɨa hepaɨtsita. ¿Kemɨ'ane nutsɨ puyuhayewaxɨ katiuka'eniexɨaka waɨkawamekɨ 'axamɨti'ane hepaɨtsita? Nixewitɨ.
HAB 1:1 'Ikɨ kemɨtiyɨni niukiyari kanihɨkɨtɨni 'Awakuxi Kakaɨyari niukameya kemɨtiunieritɨarie.
HAB 1:2 Yawé, ne'utahiwatɨ parewiya nepɨmatsiwawirie, peru 'ekɨ pepɨkanetsi'enie, ¿Kepaukakeri pepɨnetsihanu'enieni? Waɨkawamekɨ nepɨmatsiwawiriekai mukumawerekɨ ketemɨtenanaimarie, peru 'ekɨ 'atsipepɨkara'eriwa.
HAB 1:3 ¿Titayari penetixeiyatsitɨa hipatɨ kememɨtenanaimarie? ¿Titayari netiwaxeiyani hipatɨ kememɨtehiweritɨarie? Naitsarie nepɨtixeiya kememɨteyuka'una meta kememɨteyunanaima, kememɨteyukwitɨwe meta kememɨte'ayuye'unie.
HAB 1:4 Nixewitɨ 'a'aitsika hetsie yapɨkatikamie meta nixewitɨ kemɨtiheitserie yapɨkatikamie yu'iwa hetsɨa. 'Axamemɨte'u'iyari kemɨtiheitserie memɨte'u'uwa mekaniwananaimaka, meta 'itsɨkame kemɨtiheitserie yapɨka'utaine.
HAB 1:5 «Xekeniwaruxeiya nuiwarite. Kwixekeniwaruxeiya meta xemamatɨ xekeneuyuhayewa. 'Ikɨ tukariyaritetsie yanepɨtiyurixime tixaɨtɨ yaxemɨkateha'eriwa tsepa xewitɨ mɨpaɨ mɨtixe'uxatɨa yuri xepɨkate'erieka.
HAB 1:6 Karireutsixi nekaniwayuitɨamɨkɨ, mɨkɨ teɨteri memayu'eririya memɨhɨkɨ meta memɨtɨrɨkawi, naitsarie kwiepa memuku'uwa hipame wakwie yuhetsiemieme meyeitɨakutɨ.
HAB 1:7 Mɨkɨ teɨteri mepɨmamariwawe meta mepɨmakaxiwa, yu'inɨari niukiyaritsie xeikɨa yamekatenikahuni.
HAB 1:8 Wakawayutsixi tɨwexi wareuyeta mepayɨwawe, 'ɨrawetsixi tɨkakɨta miemete wareuyeta mepɨte'u'iyari. Kawayutsixi wahetsie me'utetɨ yumɨiretɨ meputinanautsa, memutei 'atewapaitɨ mepaneika. Wirɨkɨxi kememɨte'uxɨrɨwe memɨtetakwanitsie mɨpaɨ mekateniyumateni.
HAB 1:9 Mekani'axɨakuni naime meteye'unarɨmetɨ, memɨyehunitsie marika puxuaweni, memɨwaranutaxɨrɨwa xiekari mɨranukutuiwa hepaɨ mekateniwaruxexeɨriwani.
HAB 1:10 Te'aitamete mekaniwatewiyatsitɨaka, kuwexinaruritsixi mekaniwananaimaka, mekaniutinaweni kiekari yukuraru 'amatitetewa memexeiyatɨka wahepaɨtsita, xiekari 'imɨmɨiyari mekaniutiwewiwani, hikɨ kiekaritsie mekaneutahakeni.
HAB 1:11 'Eka naime mɨtiye'unatɨyeika hepaɨ mekani'aneni, peru waɨkawa 'axamekateniuyurieni, yutɨrɨkariyatɨme yukakaɨyari memayeitɨakɨ».
HAB 1:12 'Ekɨ, Yawé, yuheyemekɨ 'apekaniuyeikani. 'Ekɨ, nekakaɨyari pemɨpatsie, hatsuakutɨma pemɨkamɨwe pekanihɨkɨtɨni. 'Ekɨ, Yawé, kemɨtiheitserie memɨteyurienikɨ pepɨwa'atɨani, 'ekɨ, ne'ai, pekaniwa'atɨamɨkɨ memɨtatsi'ayemari'itɨanikɨ.
HAB 1:13 'Ahɨxite yemekɨ pɨ'itiyatɨka 'axamɨti'ane pepɨkareuxeiyawe, pepɨkayɨwe pemɨwaxeiyani hipatɨ menanaimariekaku. ¿Titayari kamɨtsɨ 'axamemɨte'u'iyari 'atsipekatiwayuriwe? ¿Titayari kayuwatɨ petiuma mexi 'axamemɨte'u'iyari 'aixɨa memɨte'u'uwa mewakwa'a?
HAB 1:14 Teɨteri tsapari haramaratsie memɨye'uwa pepɨwarayeitɨa, kwiepa yuhukama memɨteku'uwa memɨkatehekakutsiyari pepɨwarayeitɨa.
HAB 1:15 Wawiruniya yukwaitsɨkɨ yunaime kaniwaranatihapanani, yuwipitekɨ yunaime kaniwakuyuruwani, yu'ataxayakɨ kaniwaranatitutuweni, mɨpaɨ meteyurietɨ mekaniyutemamawieka.
HAB 1:16 'Ayumieme wawiruniyutsixi yu'ixiparate yukakaɨyari mekanayeitɨwani, meta mekaniwarayexeiyani. 'Ixiparate waparewiekaku waɨkawa xikutsixi mekanayexɨrieni.
HAB 1:17 ¿Kamɨtsɨ petiwapitɨaka yuheyemekɨ mɨpaɨ memɨteyurieka? ¿Yuheyemekɨ metehayu'iwani hipame wakiekaritsie metahaketɨ mewakwitɨ mekawanenimayatɨ?
HAB 2:1 Netanieretɨ nekaniyuhayewamɨkɨ, wapaitɨ nenieremetsie ne'akakaitɨ, nepɨta'ikwewani kemɨnetitahɨawe, kemɨnetita'eiya mɨyanemɨtitahɨawixɨkɨ.
HAB 2:2 Hikɨ Yawé mɨpaɨ kanetiniuta'eiya: «Kepemɨtiunierixɨ ketinaka'utɨa, yuhekɨakamekɨ haxu 'etsitsutsuimetsie para xeiya mekaterɨwa mɨyɨwenikɨ.
HAB 2:3 Karikɨ kepemɨtiunierixɨ yakatiniyɨmɨkɨ yemekɨ kepauka tukaritsie yamɨtiyɨnikekai, tukari kaniyemieni maye'anikɨ, mɨkɨ tukari pɨkahayewarieni mɨka'aye'anikɨ. Tsepanetɨ 'amɨreɨtewini yakatiyɨwetɨ, keneta'ikwewani, mɨkɨ tukari kanaye'amɨkɨ kahauyewekamekɨ.
HAB 2:4 »Memuyuti'ɨre 'iyari heitseriekame mepɨkahexeiya, peru kemɨtiheitserie 'amuyeika yuri mɨti'eriekɨ payeyurini.
HAB 2:5 Matsi, xikutɨriya pɨtiyu'itaiya, 'ayumieme memuyuti'ɨre 'amepɨkateheutere. Yukɨipitsie 'emepanatiyeyeure, mɨki teukiya hepaɨ, meta mepɨkahuxaiwawe mɨki yɨwikame hepaɨ. Yu'aurie yunaime nuiwarite mekaniwarukuxexeɨriwani meta yunaime teɨteri mekaniwarehapanani.
HAB 2:6 Peru mɨkɨ hatsuakutɨni tixaɨtɨ mepɨkatehayeitɨarieni. Nuiwarite mepɨwatinanaimani hikɨ 'ikɨ kwikari wahetsiemieme mepɨtakwika: »Xɨa'ui waɨkawa rexeiyatɨ mayuyeitɨa hipame tiwapiinitekɨ, meta piinitɨarika waɨkawa mɨtiukuxeɨri 'itarikakɨ. ¿Kepaukakeri pɨtihayewa mɨyatiyurienetɨ?
HAB 2:7 Yapauka mekananuku'uikuni memɨmetehapinirie. Memetsi'aye'unietɨ mekanakɨnikuni tinaime mekameteninawairiekuni tita pemɨrexeiya, mexi 'ekɨ pe'uyɨyɨakani pekatɨrɨkaɨyetɨ.
HAB 2:8 Nuiwarite mekaniyumɨireni pemɨtiwarunawatsiri, keyupaɨmetɨ teɨteri memɨyutawikweitsitɨani mɨkɨta mepɨmetenawatsirieni, mɨmɨirekɨ xuriya pemutayeuri, meta 'ikɨ kwie hetsie waɨkawamekɨ pemɨtiunanaimakɨ, meta 'ikɨ kiekari hetsie meta mana kiekatari pemɨwarunanaimakɨ.
HAB 2:9 »Xɨa'ui kemɨ'ane yukiita mɨtihɨniya kwamanarikakɨ rana'iwaka yuniwema watawikweitsitɨanike wahetsie mɨkatinakenikɨ 'axamɨti'ane.
HAB 2:10 »Kepemɨtiu'eri 'akie kiekatari pepɨwarutewiyatsitɨa xeikɨa: yumɨireme nuiwarite pepɨwareuyehɨa, peru 'ekɨtɨtɨ pepɨ'ayuri.
HAB 2:11 'Ayumieme tetexitɨtɨ kuraru 'amatayewa hetsiemiemete mepahiwatɨka, meta kii pikaxiyaritetsie puwa'eiya wahiwari.
HAB 2:12 »Xɨa'ui kemɨ'ane kiekari mutawewiwa hipame wakwitɨ meta kemɨ'ane kiekari mukama hipame wananaimatɨ.
HAB 2:13 Yawé Naimekɨmɨtɨrɨkaɨye mɨpaɨ kanaineni, teɨteri tai hetsiemieme mekete'uximayaka meta nuiwarite yakɨ xeikɨa meketeyu'uxitɨaka.
HAB 2:14 Haa haramara kemɨranukanama hepaɨ, mɨpaɨta kwie hetsie mekateniyɨkuni teɨteri Yawé tɨrɨkariyaya memaitɨ.
HAB 2:15 »Xɨa'ui 'ekɨ, 'a'iwa pemutitawaitɨwa. Xɨa'ui 'ekɨ, winukɨ pemititawaitɨwa waiyarieya maweme pexeiyamɨtɨ.
HAB 2:16 Mɨkɨkɨ pepɨtewiyatsitɨarieni pɨta, hawaikɨ witsipepɨkatixeiyarieni. Kamɨtsɨ 'ekɨta kenanu'i, pemɨwaxeitsitɨanikɨ xitekiya 'inɨariyari kepemɨkarexeiya. Yawé yutekɨxi yutseriekɨ mehana 'ahetsie ke'itiyeurieni, meta witsikepemɨtixeiyariekai hetsiemieme, tewiyarika kematsi'upitɨani.
HAB 2:17 Riwanu hepaɨtsita kepemɨtiunanaima mɨkɨta kematsi'utapɨna. Tewaxi kepemɨtiwareuyehɨa mɨpaɨta peketiuka'unarieni. Karikɨ kanimɨireni xuriya pemitayeuri, meta pɨwaɨkawa 'ikɨ kwie hepaɨtsita kepemɨtiunanaima, meta 'ikɨ kiekari hetsie meta teɨterimama.
HAB 2:18 »¿Tita tiyunaki'erie kakaɨyari mɨwewiya, kemɨ'ane mitawewi tewi kɨyekɨ tiwewiwame xɨka hɨkɨtɨni? ¿Tita tiyunaki'erie kakaɨyari mukwaxiyarie, 'itarika xeikɨa mɨti'ɨkita? Tiwewiwame kakaɨyarixi mɨwawewie mekaniuwaweme mɨkɨ xeikɨa yuri katini'erieka yuwewiyatsie.
HAB 2:19 Xɨa'ui kemɨ'ane kɨye mɨpaɨ mɨtikɨhɨawe: “Kenanutanieri”, meta tete mɨkaniuwe: “Kenanukukexi”. Tsepanetɨ huru meta pɨrata memɨkawiriyarietɨka, tixaɨtɨ memɨxete'uta'ɨkitɨani mepɨkayɨwawe, memɨkahayeyuyurikɨ.
HAB 2:20 Peru, Yawé yutuki muyepatsieta kanayekani, naitsarie kwiepa mɨtiuyehane hɨxiena kayuwatɨ meke'umaka».
HAB 3:1 'Awakuxi Kakaɨyari niukameya nenewierieya. Mɨpaɨ katiniukwikarieni.
HAB 3:2 Yawé, ke'aixɨa pemɨtikuxaxatsiwa nekatinimarieka, tita pemɨtiutiwewi, Yawé, mɨkɨkɨ nepɨma. Hikɨta yaketineuyuri hekwamekɨ tame te'u'uwakaku, hikɨta tahetsiemieme yaketineuyuri temixeiyakɨ, 'ahaxɨatsie, kepemɨti'akanenimaya kena'eriwani.
HAB 3:3 Kakaɨyari Temani mɨrayetewatsie kanayemieni, Parani hɨriyaritsie Mɨpatsie kanakamieni. Tepɨ'uxipieni Xawatɨriyayakɨ muyuawitsie naitɨ puxawatɨ meta kwiepa naitsarie 'aixɨa pɨrahɨawarɨwa.
HAB 3:4 Xawatɨriyaya merɨkariya hepaɨ pɨtiyuxexeiya, mamateyatsie mimierɨkari kaneuneikatɨkani, mɨkɨ warita tɨrɨkariyaya kaniyu'awietani.
HAB 3:5 Kwiniya mɨyatɨ hɨxiena kananuyekani, tai kaniweiyani 'utɨmana.
HAB 3:6 Kepauka muwakeka, kwie kaniutimamaweni, kepauka mɨtaneniere, nuiwarite mekaniutiyɨyɨakani. Meripaitɨ mieme hɨrite kanikapenikeni meta yemurite meripaitɨ miemete kanati'unikeni, matsi Kakaɨyari huyeteya yuheyemekɨ 'atsipɨkayɨwe.
HAB 3:7 Nekaniwaxeiyani meyuhiweriekame Kutsani mɨrakutewa memɨkutei, meta Mariyani memɨkutei mekaniuyɨyɨakatɨkani.
HAB 3:8 ¿Petiha'akai, Yawé, kepauka pemiwa hatɨate? ¿Petiha'akai haa mɨtɨrɨkawi hepaɨtsita? ¿Waɨkawa petiha'akai haramara hepaɨtsita 'ayumieme 'akawayutsixi wahetsie peranutiya, meta 'akaxetate kuyaxa miemete memɨtehayu'iwa wahetsie?
HAB 3:9 'Atupi 'ari pepuhekɨataxɨ, 'ɨrɨ peputahɨniyaxɨ 'i'uitɨwameta. Tepɨ'uxipieni Kwie hetsie hatɨate pekaniukatuani,
HAB 3:10 hɨrite mematsixeiyatɨ mekaniutimamani. Waɨkawa wiyeri 'ekamatɨ kaniukaxɨrieni, meta hamewari 'amatiyewatsie mieme kaniuyutihaxɨatɨwani, hamewariyari 'anenetɨ muyuawitsie paitɨ kaneutimemeni.
HAB 3:11 Tau meta metseri matɨa muyuawitsie kanewa'uweni, 'a'ɨrɨte kwinie mayɨwawe xawatɨriyayakɨ, 'apitsika 'amɨtewi xawatɨriyayakɨ.
HAB 3:12 Peha'atɨ, naitsarie kwiepa pekaniuyeikani, waɨkawa peha'atɨ, nuiwarite pekaniwatipɨnani.
HAB 3:13 Pekanayeyani 'ateɨterima pewaxɨnake, pekanayeyani pemenayexei 'ahetsiemieme petawikweitsitɨanike. Ti'aitame pekaniutapɨna 'axateyuruwamete wanuiwari mɨhɨkɨtɨkai, maweme pekaniuhayewa 'ɨkateyatsie katsutɨme mu'uyatsie 'u'akame. Tepɨ'uxipieni
HAB 3:14 'Apitsika 'amɨtewikɨ kuyaximama wamu'ute pekananutixɨriexɨani, meha'atɨ mekatanitaxɨriexɨakukaitɨni, meyutemamawietɨ tahetsie kwinie netɨ mekaniukeni, mɨkayuhɨawexɨa kemɨ'itɨariwa hepaɨ.
HAB 3:15 Haramara pekaniutaketsini 'akawayutsixi wahekɨ, pewatayuitɨwatɨ haa mɨmariwe.
HAB 3:16 Kepauka 'ikɨ nemɨtiu'eni, netaɨta nekaniutimani, niukieyakɨ, netenite kaniutiyɨyɨaka, ne'umete mutikwaire hepaɨ nepɨreka'erietɨya, meta ne'ɨkate putiweranaxɨa. Peru ne netiukanewietɨ nekanita'ikwewani kepauka 'uximatɨarika tukari munuani 'iya nuiwari wahetsie hikɨ memɨtatsika'una.
HAB 3:17 Tsepanetɨ xapa mɨka'ukaxutuwe, meta tsepa kaxie takari mɨka'ukayaxikeni, tsepa huriwu takari mɨkatiukaxuawerixɨ, meta kwiepa tsepa 'ikwaxite mɨkatiutixuawerixɨ, tsepanetɨ muxatsi kuraruta memuyemaweni, meta tsepa kuraruta nixewitɨ tewa mɨkayeyeika,
HAB 3:18 tsepanetɨ mɨpaɨ mɨti'ane, ne Yawé hetsie nekaniyutemawiekamɨkɨ, nepɨnetemawieka Kakaɨyari hetsie netiwiyatɨ, netsiwikweitsitɨwame.
HAB 3:19 Yawé naimekɨmɨyɨwe netɨrɨkariya kanihɨkɨtɨni, maxa kemayɨwe mɨpaɨ ne'ɨkate katinipitɨaka meta 'ameutitewatsie paitɨ ne'uyeikame kanenayeitɨwani.
ZEP 1:1 'Ikɨ Yawé niukieya kanihɨkɨtɨni, Tsupuniyaxi kemɨtiutahɨawarie Kutsi nu'aya, mɨkɨta Kerariyaxi nu'aya, mɨkɨta 'Amariyaxi nu'aya, mɨkɨta 'Etsekiyaxi nu'aya, kepauka mɨti'aitakai Kutsiyaxi 'Amuni nu'aya, Kura kwieyaritsie:
ZEP 1:2 «Meteyunaime nepɨtiwareuyehɨani kemeteyupaɨmetɨ kwiepa memɨtexuawe
ZEP 1:3 Teɨteri meta tewaxi nekaniwareuyehɨamɨkɨ, meta memɨte'awɨwawe meta haramaratsie memɨteye'uwa, metatsiere kakaɨyarixi memɨwewiyatɨka metatsiere teɨteri 'axamemɨte'u'iyari yaxeikɨa. »Teɨteri nekaniwarakumaweriyamɨkɨ 'ena kwiepa naitsarie
ZEP 1:4 »Kura kwieyaritsie kiekatari nepɨtiwakwinitɨani, meta yunaime Kerutsareme kiekatari. Wahari huyerieya 'ɨarime naime nepakuyeitɨani, meta mawari wewiwamete hetsɨana miemete kememɨtetetewa naime,
ZEP 1:5 meta kemɨ'ane yukii heima memukatunuma'uwe, muyuawitsie miemete xurawetsixi mewarayexeiyatɨ, meta kemɨ'ane metitunuma'utɨ, kename Yawé me'ayexeiya memutiyuane, kwitɨwata kakaɨyari Muruki yaxeikɨa memɨtehahɨawe,
ZEP 1:6 meta kemɨ'ane Yawé memuku'e'eiriwa, meta memɨka'ikuwautɨwe meta memɨkahe'iwawiya.
ZEP 1:7 Kayuwatɨ xekeneumaka Yawé Naimekɨmɨyɨwe hɨxie, Yawé mɨtixekwinitɨanitsie pehurari, Yawé mawari kaniukuha'aritɨani meta yu'inierima kaniwaru'itieniri.
ZEP 1:8 'Iya tukaritsie Yawé yumɨireme muwakwinitsie nepɨtiwakwinitɨani ti'aitame parewiwametemama meta niwemama, meta kemɨ'ane kamixate hipame kwieyaritsie miemete memanakatɨtɨka.
ZEP 1:9 'Iya tukaritsie nekatiniwakwinitɨamɨkɨ kemɨ'ane hipame kakaɨyarixi memɨwarayexeiya, meta memɨtehɨniya yukakaɨyarixi watukita piinite, 'itarikakɨ memɨte'a'iwaxɨ meta hipame mewananaimatɨ.
ZEP 1:10 »Yawé mɨpaɨ kanaineni: 'Iya tukaritsie parewiya hiwariyari pɨ'enierieni, kitenie Tsapa mɨtitewatsie paitɨ, 'aiwari pɨ'enierieni Kiekari Hutarieka Mieme makumatsie, meta waɨkawa hiwari pa'eniɨriɨkɨni yemuritetsie paitɨ.
ZEP 1:11 »Xemeta xekeneutitsuanani, tetuayamete memakutei xemɨtama. Naitɨ tita xemɨtetua katineuyehɨiyamɨkɨ, xepeuyehɨiyani yunaitɨ kemɨ'ane pɨrata xemexeiyanikɨ xemɨyɨa.
ZEP 1:12 'Iya tukaritsie Kerutsareme nepayekexiya kɨxeme ne'akwetɨ, nemɨtiwakwinitɨanikɨ kemɨ'ane yu'iyarikɨ memɨ'uxipie, kaxie winuyari mɨkakuyuitɨariwa meuyewexime hepaɨ memɨ'ane, kemɨ'ane mɨpaɨ memutiyuane: “Yawé 'atsipɨkatiyurieni, ni'aixɨa pɨkatatsiyurieni ni'axa pɨkatatsiyurieni”.
ZEP 1:13 Xepiinitɨarika memɨxeka'una wa'iwarika pɨrayani, xekii yuxaɨta puyuhayewaxɨani: “Yukii xepɨtiwewieni, peru muwa xepɨka'ayeyaxe, kaxie xepɨka'iteɨta, peru winuyari xepɨkaha'inɨata”.
ZEP 1:14 »Yawé haxɨaya tukariyari paye'axime, kanaye'aximeni yapauka. Yawé tukarieyatsie pɨ'enierieni kwinimieme memɨte'uka'eniwa hiwariyari, meta kemɨ'ane mɨkama 'ana kanitatsuamɨkɨ.
ZEP 1:15 'Iya tukaritsie haxɨa tukariyari kanayeimɨkɨ, meta 'uximatɨarika meta hiwerika tukariyari, xemɨka'unarieni meta xemakumaweriyarieni tukariyari, yɨriya tukariyari, meta haiwitɨri mɨyɨyɨxawi tukariyari,
ZEP 1:16 kuxineta meta kuyaxa hiwariyari tukariyari kiekarite kuraruyari 'amatitɨtɨ hepaɨtsita mieme, meta tuxiyu 'amutɨtɨ hepaɨtsita mieme.
ZEP 1:17 Ne nepɨwaranukuweiya teɨteri nekawa'uxipitɨatɨ, memɨkaheuneniereni hepaɨ me'anenetɨ mepu'uwani, Yawé hepaɨtsita 'axamemɨte'uyurikɨ. Waxuriya nitayeuriyamɨkɨ tumuanari hepaɨ, meta wakwinurite kwitarai hepaɨ pɨtiyuxexeiyani.
ZEP 1:18 Wahuru meta wapɨrata pɨkawatawikweitsitɨani, Yawé haxɨaya tukariyaritsie. 'Ɨtetsarikaya taiyari naime kwie pakuxɨtsitɨani, yapauka kaniwarakumaweriyamɨkɨ yunaime teɨteri kwiepa memɨtama».
ZEP 2:1 Xekeneyuyetua, tixaɨtɨ xekatehɨmetɨtɨ xekenayuyeitɨa, teɨteri xemɨkayukatetewiya,
ZEP 2:2 yaxeketenekakɨni mexi kahaye'awe kenemutayɨ, mexi tukari xemɨkwewiyatsie xemɨtehayewakɨ xatsi yapauka kemɨre'enitsitɨariwa hepaɨ kayɨwe, mexi xehetsie kakawewe Yawé haxɨaya mɨta'a, mexi xehetsie ka'aye'awe Yawé haxɨaya tukariyari.
ZEP 2:3 Yawé xekeneutiwawa, yunaitɨ xeme tixaɨtɨ xemɨkatehayuyeitɨa 'ena kwiepa, yaxemɨteyurie 'aitsikateya kemaine. Xekeneutiwawa tita mɨtiheitserie meta 'axekeneu'uwani tixaɨtɨ xekatehayuyeitɨatɨ, heiwatɨ 'ana xe'uti'awieta, kepauka Yawé haxɨaya tukarieya maye'anitsie.
ZEP 2:4 Kahatsa kiekariyari yuxaɨtame kaniyuhayewamɨkɨ, meta yaxeikɨa 'Atsikaruni kiekariyari 'unitɨ kaniyuhayewamɨkɨ. 'Atsiruri kiekatari mekanayeweiyariekuni hekɨta, yaxeikɨata 'Ekuruni kiekatari mekanitaweiyariekuni.
ZEP 2:5 Xɨa'ui kereteutsixi teɨteriyari haramara tetsita memɨtama. Yawé niukieya xehepaɨtsita yakanaineni kemɨtixekwinitɨani, piritsiteutsixi Kanani kwieyaritsie xemɨtama: «Ne nekanixekwimɨkɨ nixeimetɨma mana nepɨkahayewa».
ZEP 2:6 Haramara tetsita 'uweritɨ 'utsiɨraɨyetɨ kanayeimɨkɨ, mɨratihɨriwa meta muxatsi wakuraru makumane.
ZEP 2:7 Mana muxatsi mekatenitikwaikuni Kura nuiwarimama memɨyuhayewa watewama. Taikai meputi'uxipiweni 'Atsikaruni kiekariyari muku'eiriwaxɨtsie, Yawé wakakaɨyari waparewienike mana kaninuamɨkɨ 'aixɨa wayurienike.
ZEP 2:8 «Ke'axamemutiyuane muhawitsixi nekaniwa'enieka, meta 'amunitsixi wayuriyarika, neteɨterima wahepaɨtsita kememɨteheuniuka meta wakwie mewanawairietɨwetɨ.
ZEP 2:9 Yurikɨ mɨpaɨ nekanaineni, —Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya—, Muhawi Tsuruma kwieyari hepaɨ 'anetɨ kanayeimɨkɨ, meta 'amunitsixi Kumuxa kiekariyari hepaɨ mepɨ'itɨarieni: witsaxa 'ɨtsiyari xeikɨa payani meta 'una maxuawe, yuheyemekɨ 'akumawetɨ payani. Neteɨterima memɨyuhayewa wapiini mepɨtewanawairieni, meta neteɨterima 'akuxi memu'uwani wakwie yupiini mepayeitɨani».
ZEP 2:10 'Ikɨkɨ mekatenakapitɨariekuni memuyuta'ɨrixɨkɨ, memɨwarutaniukimakɨ meta memɨwaxani'eriekaikɨ Yawé Naimekɨmɨtɨrɨkaɨye teɨterimama.
ZEP 2:11 Mepɨtimamani kepauka Yawé yunaime kakaɨyarixi kwiepa memɨtama muwaka'una, 'ana nuiwarite teewanarixitɨtɨ, mekanikatunuma'uikuni nenewieri me'ipitɨanike, yuxexuitɨ yukwieyaritsie paitɨ.
ZEP 2:12 «Yaxeikɨata xeme, 'etiupetsixi, ne'ixiparakɨ xekanikwi'iwakuni».
ZEP 2:13 Yawé yutɨrɨkariya kanitanɨ'amɨkɨ tayeta memukuma wahepa. 'Atsiriya kiekatari yunaime kaniwarakukwimɨkɨ, meta Niniwe 'akumaweme kanayeitɨamɨkɨ, xiekaripa makuwaki hepaɨ.
ZEP 2:14 Kiekari muyuta'ɨre maku'ɨxaya payani muxatsi memɨte'atikwa'ani meta hipatɨ tewaxi. Mana yukie mepayeitɨani meteyunaitɨ yeutari. Nɨpe hamatɨa mikɨri tuxiyu mu'u'uni hetsie mepakayaxikeni. Watsuari kii hixɨapa nenieremetsie mepayetsuatɨkani, kitenie mɨranutahakitɨretsie pɨranu'u'unini, kariuxa kɨyeyari kii hetsie manuyehe hayekɨa puyehini.
ZEP 2:15 'Ikɨ kiekari muyutemawiekai kanihɨkɨtɨni, yu'iyarikɨ 'aixɨa 'iyari 'amukumakai, yukɨmana mɨpaɨ mutainekai: «Ne xeikɨa nepɨhɨkɨ, xewitɨ tawari pumawe». Matsi neuxei puka'unarie meta yeutari wakie patɨa. Kehate mana memuyekɨne me'ixeiyame mepuyukatemamawieni me'inanaimatɨ.
ZEP 3:1 Xɨa'ui kiekari hipame pemɨwananaima, pemɨkaheu'ena meta tita 'axamɨti'ane pemɨrexeiya.
ZEP 3:2 Mɨkayu'ɨxatsitɨarinɨa, meta mɨkatiyuxatɨarinɨa. Yawé hetsie yuri mɨkati'erie, meta yukakaɨyari hetsɨa 'ahurawa mɨka'uyeika.
ZEP 3:3 'Itsɨkate mana memanuka'u mayetsi memɨtehaketɨkɨka wahepaɨ mepɨ'anene, wakuwexinaruritsixi 'ɨrawetsixi yɨwikɨta memuku'uwa mekanihɨkɨtɨni tita memɨtetakwani tixaɨtɨ mepɨkatekuhayeikawa memɨkakayeikienikɨ.
ZEP 3:4 Kakaɨyari niukametemama mana kiekatari mepɨte'itawa, Kakaɨyari mepuku'eiri. Mawari wewiwamete piinite netukita timieme katipatsiekame mepɨte'ayeitɨa, meta 'aitsika kemaine yamepɨkatekahu.
ZEP 3:5 Matsi Yawé mana muka kemɨtiheitserie yapɨtiyuriene, kemɨkatiheitserie pɨkatiyuriene. Xexuime tukari mukatataretsie kemɨtiheitserie yapɨtiyuriene, meta pɨkatihayewa tukari mɨyehane mukatataretsie, peru 'axatiyuruwame tewiyarika pɨkamate.
ZEP 3:6 «Nekaniwaruka'una nuiwarite, kanakumawere wakuraru meta watuxiyu. Nekanihayewa kaye 'utɨa teɨteri 'umaweme, nixewitɨ tɨma mɨkɨ 'utɨa pɨka'uyeika. Kaniuyuhayewa wakiekarite 'u'unitɨ, nixewitɨ pɨkayuhayewaxɨ mana mukanikɨ.
ZEP 3:7 Kiekari mɨpaɨ nepɨtiutahɨawixɨ: “Yurikɨ pepɨnetsi'ayemakaxeni, kenemɨmetita'ɨxatsitɨani pepeu'enani”. Hikɨ 'ayumieme wakiekari pɨkaka'unarienikekai, naimekɨ nemɨtita'aitɨakaikɨ. Peru mɨyatɨtɨ, meyumexɨitɨatɨ mekanakɨne pɨta 'axamemɨteyurienikɨ naime hepaɨtsita.
ZEP 3:8 'Ayumieme xekenenetakwewieka, yapauka nepɨrayu'iwa —Yawé mɨpaɨ kanaineni—, 'ari nuiwarite neniwakuxeɨrimɨkɨ, meta te'aitamete nemɨtiwakwinitɨanikɨ nehaxɨakɨ, meta naimekɨ kenemɨreuha'a. Ne'ɨtetsarika taiyariyarikɨ, naitɨ kwie kanakuxɨtsitɨariemɨkɨ.
ZEP 3:9 »Teɨteri 'aixɨa me'utiyuaneme nekaniwarayeitɨamɨkɨ, para yunaitɨ memɨnetsihahɨawenikɨ Yawé kenemɨtitewa meta memɨnetsi'ayexeiyanikɨ yaxeikɨa meteyukɨhɨawetɨ.
ZEP 3:10 Kutsi hatɨayari manuyehapane 'anutaɨye me'anexɨame, 'imikieri mekaneni'atɨiriekuni memɨnetsi'ayexeiya, neteɨterima memeutaxɨriexɨa.
ZEP 3:11 Mɨkɨ tukaritsie tewiyarika xepɨkapitɨarieniri, 'ari 'axaxeteyurietɨ nehepaɨtsita xepɨtehayewa. Nekaniwarayeweiyamɨkɨ xetsata mɨkɨ teɨteri mamariwemete memayuyeitɨwa, hikɨ 'ana mepukumawere memɨyuti'ɨre nehɨri makupatsietsie.
ZEP 3:12 Mekaniyuhayewakuni xeikɨa, tixaɨtɨ memɨkatehɨkɨ. Mɨkɨ Yawé hetsie memɨtewiya memɨhɨkɨkɨ,
ZEP 3:13 'etsimeyupaɨmetɨ memɨyuhayewaxɨ 'ixaheritsixi, tita 'axamɨti'ane mepɨkateyuriekari, 'itarikakɨ mepɨkatekuxatani, kwamanarikakɨ mepɨkatekuxatani. Mekateniutikwa'akuni meta mekaniuka'uxipiwekuni nixewitɨ kawamariutakaku».
ZEP 3:14 Keneutahiwani, neniwe 'uka Tsiyuni, temawierikakɨ, memɨtehayu'iwa wahepaɨ xeketeneuhiwani, 'ixaheritsixi. Xekeneutikwikani meta xekeneyutemamawieka yu'iyarikɨ, neniwe 'uka Kerutsareme.
ZEP 3:15 Yawé pɨkatixekwinitɨaniri, kaniwarutaweiya memɨmetsi'aye'unie. Yawé, 'Ixaheritsie ti'aitame, xetsata kaniukani: hatsuakuri pepɨkaheumaka.
ZEP 3:16 Mɨkɨ tukaritsie Kerutsareme mɨpaɨ pɨtitahɨawarieni: «Tsiyuni, pepɨkamaka meta pepɨka'utaweranareni,
ZEP 3:17 Yawé 'akakaɨyari 'ahamatɨa kaniukani mɨkɨ kuya mɨrayu'iwa pɨhɨkɨ. Pɨyutemawieka 'ahetsiemieme, pɨmetsihekwariyani yunaki'eriyakɨ, kaniutakwikamɨkɨ yutemawietɨ 'ahetsiemieme
ZEP 3:18 'ixɨarari mɨhɨkɨtɨni hepaɨ». «Ne xehetsie nepɨtanuani xemɨkahiweritɨarienikɨri, mɨixari kexemɨte'anuyehu xetewiyatsitɨarietɨ.
ZEP 3:19 Mɨkɨ tukaritsie ne nekaniwaranukuweiyamɨkɨ kemɨ'ane waɨriyarika memɨtexe'aitɨa, nepɨwatawikweitsitɨani muxatsi memɨ'ɨkamɨmɨri, meta nekaniwaranukuwaumɨkɨ memeuyexɨri. Xeme xemariwame waɨkawa nepɨxe'ayeitɨani 'iya nuiwarite watsata hakewa xemetewinɨarie.
ZEP 3:20 Mɨkɨ tukaritsie ne nekanixe'atɨamɨkɨ, mɨkɨ tukaritsie nepɨxekuxeɨrieni. Xeme xemariwame waɨkawa nepɨxe'ayeitɨani yunaime teɨteri kwiepa memɨtama watsata kepauka nemɨxehakunuitɨani mɨkɨ wahɨxie 'ateewa xehehapanieku».
HAG 1:1 Merikɨtsɨ Raríyu ti'aitakaku hutarieka wiyari, 'ataxewi metseri 'umiekaku mexɨakame tukaritsie, Yawé niukieya kaninuani 'Akehuxi hetsɨa Tsuruwaweri hetsiemieme Tsaratiheri nu'aya, Kura kwieyaritsie tatuwani mɨhɨkɨtɨkai meta mawari wewiwamete tiwa'aitɨwame Kutsuhexi Kutsaraki nu'aya:
HAG 1:2 «Yawé Naimekɨmɨtɨrɨkaɨye mɨpaɨ kanaineni: “'Ikɨ teɨteri mepɨniukixie mɨpaɨ meputiyuane kename 'akuxi ka'aye'awe tukari kepauka Yawé tukieya manukuketɨarieni tawari”».
HAG 1:3 Yaxeikɨata 'ikɨ Yawé niukieya kaninuani niukameya 'Akehuxi hetsɨa:
HAG 1:4 «¿Kamɨtsɨ xeme titayari kii 'aixɨa 'anenemeta xete'ayetetɨka xeikɨa mexi netuki 'unitɨ mana'uwe?»
HAG 1:5 Mɨpaɨ kanaineni hikɨ Yawé Naimekɨmɨtɨrɨkaɨye: «Xekeneuyutimaixɨa yurikɨ kexemɨteyuriku.
HAG 1:6 »Xeme waɨkawa xekaniuka'etsani, peru 'etsiwa xekaniuka'itsanani, xekateniutikwa'ani, peru xepɨka'utihuxarɨwe, xekatenanuye'eni, peru xepɨkahuxaiwawe, xepuyukemaritɨa, peru yaxeikɨa xepɨyexerikwitɨwe, meta ti'iwame tuminieya yapɨreuyeika kuxitari matsani hepaɨ».
HAG 1:7 Mɨpaɨ kanaineni Yawé Naimekɨmɨtɨrɨkaɨye: «Xekeneuyutimaixɨa yurikɨ kexemɨteyuriku.
HAG 1:8 »Xekenehu xeme hɨritsie, kɨyexi xekene'atɨa hikɨ netuki xekenanukuketɨa tawari. Tawari xe'iwewietɨwekaku ne ne'ixeiyatɨ nepɨnetemawieka, 'ana xekaninenierikuni ne kenemɨtimariwe
HAG 1:9 »Xeme waɨkawa xekatenitakwewieka, peru 'etsiwa xeikɨa xepuka'itsana, tita yukiita xemɨte'uti'uta, ne xeihɨtsieriyarikɨ nekanikumaweriyani. ¿Ketitayari? Netuki 'unitɨ 'amuwekɨ, mexi xeme yuhetsiemieme xeikɨa xetekuwautɨwe
HAG 1:10 »'Ayumieme, xeme ya'ane xewiwiekaku, pɨka'ukawiyexɨ, meta kwiepa 'ikwaxi pɨkatiutixuawerixɨ.
HAG 1:11 Ne yanekatiniuyurieni mɨtiwanikɨ 'ɨtsita meta hɨritsie, tɨrikutsata, kaxie haraweriyaritsata, meta huriwatsata, mɨraka'etsitɨretsie, tewaxi wahetsie meta teɨteri wahetsie, meta naime tewi 'uximayatsikayatsie».
HAG 1:12 Tsuruwaweri Tsaratiheri nu'aya, mawari wewiwamete tiwa'aitɨwame Kutsuhexi Kutsaraki nu'aya, meta yunaitɨ teɨteri, Yawé yukakaɨyari mepanu'eni, mɨyatɨtɨ, Kakaɨyari niukameya 'Akehuxi kemutayɨ mepenu'eni, Yawé wakakaɨyari meiyenɨ'akai, 'ana teɨteri Yawé me'ayemakatɨ mepakɨ.
HAG 1:13 Hikɨ 'Akehuxi, Kakaɨyari niukameya, tawari Yawé niukieya kaniwarutaxatɨani teɨteri: «Ne xehamatɨa nepuyeika. Ne, Yawé, mɨpaɨ nekanaineni».
HAG 1:14 Hikɨ Yawé kaniwarupitɨani memɨyuwaɨriyakɨ Tsuruwaweri Tsaratiheri nu'aya, kuwexinaruri mɨhɨkɨtɨkai Kura kwieyaritsie, meta mawari wewiwamete tiwa'aitɨwame Kutsuhexi Kutsaraki nu'aya, meta yunaitɨ Kakaɨyari teɨterimama memɨyuhayewatɨwekai, hikɨ mekanitsutɨani Kakaɨyari Yawé Naimekɨmɨtɨrɨkaɨye tukieya mewewietɨwetɨ.
HAG 1:15 Xeitewiyari heimana nauka tukariyaritsie mepɨyɨaka, 'ataxewi metseriyaritsie, hutarieka wiyari ti'aitakaku Raríyu.
HAG 2:1 Merikɨtsɨ xeitewiyari heimana xewi tukaritsie 'atahutarieka metseritsie, Yawé tawari niuki 'Akehuxi yuniukame kaneyenɨ'airieni:
HAG 2:2 «Tsuruwaweri Tsaratiheri nu'aya keneuta'iwawiya, mukuwexinaruri Kura kwieyaritsie, meta Kutsuhexi Kutsaraki nu'aya, mawari wewiwamete tiwa'aitɨwame mɨhɨkɨ, meta yunaime teɨteri keniwaruta'iwawiya:
HAG 2:3 “¿Xewitɨ hikɨ xeme xetsata tiuyeika tuki muxei meripai mieme kemɨtimariwekai? ¿Hikɨta kexete'ixeiya? ¿Wa'atɨ hepaɨna mɨka'ane?
HAG 2:4 Hikɨ —Yawé mɨpaɨ kanaineni— Kamɨtsɨ hikɨ Tsuruwaweri pepɨkamaka kene'awaɨriyani. Kutsuhexi Kutsaraki nu'aya pepɨkamaka kene'awaɨriyani. 'Ekɨ mawari wewiwamete tiwa'aitɨwame pekanihɨkɨtɨni. Xekeneyuwaɨriyani, teɨteri 'ena kiekatari. Xeketene'uximayaka, ne xehamatɨa nekaniuyeikani —mɨpaɨ kanaineni Yawé Naimekɨmɨtɨrɨkaɨye—.
HAG 2:5 Xetsata ne'iyari kaniuyeikamɨkɨ yuheyemekɨ, tɨratu kenemɨtiuwewi hepaɨ xehamatɨa kepauka 'Ekipitu xemayekɨ”. »Xepɨkamamaka,
HAG 2:6 Yawé mɨpaɨ kanaineni Naimekɨmɨtɨrɨkaɨye: “'Ena mɨtiyehanetsie kwitɨwa, muyuawi nekanitayuitɨamɨkɨ meta kwie, haramara meta kwie makuwaki,
HAG 2:7 yunaitɨ nuiwarite memɨtimamanikɨ yanepɨtiyurieni. Hikɨ yupiinite mɨraye'atɨka mekateni'atɨakuni 'ikɨ tukita, hikɨ witsimɨti'anene mɨkɨ netukita katinitahɨnimɨkɨ —Yawé Naimekɨmɨtɨrɨkaɨye mɨpaɨ kanaineni—.
HAG 2:8 Pɨrata katininepinitɨni, meta huru katininepinitɨni —kanaineni Yawé Naimekɨmɨtɨrɨkaɨye.
HAG 2:9 'Ikɨ tuki hutarieka mieme waɨkawa matsi mariwetɨ payani keyuri matɨari mieme —kanaineni Yawé Naimekɨmɨtɨrɨkaɨye—. Meta 'ena yanepɨtiyurieni kayuwatɨ mumakakɨ”, mɨpaɨ kanaineni Yawé Naimekɨmɨtɨrɨkaɨye».
HAG 2:10 Hikɨ xeitewiyari heimana nauka tukaritsie 'atanauka metseriyaritsie hutarieka wiyari Raríyu ti'aitakaku, Yawé niukieya kaninuani 'Akehuxi Kakaɨyari niukameya hetsɨa:
HAG 2:11 «Yawé Naimekɨmɨtɨrɨkaɨye mɨpaɨ kanaineni: “Mawari wewiwamete keniwaruta'iwawiya tita mɨtipatsietɨka hepaɨtsita”». Hikɨ 'ayumieme 'Akehuxi mɨpaɨ katiniwarutahɨawe:
HAG 2:12 —Xɨka xewitɨ wai mɨpatsie yukamixa 'emɨtewikɨ 'ita'eimame heyani, xɨkata mɨkɨ kamixa xeime paa heyuitɨani, yatɨni 'itsari, yatɨni winu, yatɨni hatseiti, yatɨni tsepa tita 'ikwai, ¿mɨkɨta metepatsieni? Mawari wewiwamete mɨpaɨ mekatenita'eiya: —Hawaikɨ.
HAG 2:13 Tawarita 'Akehuxi mɨpaɨ kaniutayɨni: —Xɨkata xewitɨ tewi ka'itiyatɨ mɨki memayɨakɨ, xɨka mɨkɨ tiukumayɨani hipame 'ikwaite, ¿mɨkɨta kati'itiyatɨ tiyuhayewa? Mawari wewiwamete mɨpaɨ mekaniutiyuani: —Huu.
HAG 2:14 Hikɨ 'Akehuxi mɨpaɨ katiniwaruta'eiya: «'Ikɨ teɨteri mɨpaɨ mekani'aneni, Ne nehepaɨtsita 'ikɨ nuiwari mɨpaɨ mekani'aneni —Yawé mɨpaɨ kanaineni—. Mɨpaɨ kani'aneni wa'uximayatsika naitɨ, metatsiere wamawari memɨteyetuaya pɨka'itiya.
HAG 2:15 »Hikɨri, hikɨ 'ena mɨtiyehane xekeneuyutimaixɨa. Meripaitɨ xeme Yawé tukieya tsutɨmeyari xemɨkatsutɨawekaitsie 'akuxi,
HAG 2:16 ¿ketixeyuriekai? Kepauka xeme xeitewiyari merirayari 'imɨari xeka'itsanake xemɨyu'eriekai, matsi xeikɨa tamamata merirayari xeniukaxexeiyakaitɨni. Kepaukata kaxie hayari huta tewiyari heimana tamamata rituruyari xekaxeiyake xemɨyu'eriekai, matsi xeikɨa xeitewiyari rituruyari xepukaxexeiyakai.
HAG 2:17 Ne xe'etsari nepeuyehɨa xɨrikɨ, meta tekɨmemetekɨ, meta tee kaniuxɨrieni, naime xe'uximayatsikatsie. Peru xeme mɨyatɨtɨ nehetsɨa xepɨkahanuaxɨa —Yawé mɨpaɨ kanaineni—.
HAG 2:18 Xekeneuyutimaixɨa hikɨ 'ena mɨtiyehane, xeitewiyari heimana nauka tukaritsie, 'atanauka metseritsie, kepauka Yawé tukieya tenariyari xemukatsutɨatsie. Yemekɨ xekenaye'eriwani:
HAG 2:19 Hikɨ yanepɨtayɨni kenemɨtiyurieni 'akuxi 'imɨari muye'ɨnetɨkatsie yetekaku. 'Akuxi kaxie takari kakayaxiwekaku meta xapa takari, meta kɨranaraxi meta huriwu pɨkatikaxuaweriwe, peru hikɨ 'ena mɨtiyehane ne 'aixɨa nepɨxeyurieka».
HAG 2:20 Xeitewiyari heimana nauka tukaritsie mɨkɨ metseriyaritsie, hutarieka Yawé niukieya 'Akehuxi hetsɨa kaninuani:
HAG 2:21 «Tsuruwaweri mɨpaɨ ketineutahɨawi Kura kwieyaritsie mɨkuwexinaruri: “Ne nekanitayuitɨaximeni muyuawi meta kwie.
HAG 2:22 Te'aitamete yunaitɨ kwiepa memɨtama watɨrɨkariya nekaniwanawairiemɨkɨ. Wakaxetate nepatixɨrieni wakutsiyarima yunaime, meta kawayutsixi mepatixɨrieni meta memanatei mepɨyutakwini yu'iwamatɨ 'ixiparakɨ mepɨyukwini.
HAG 2:23 Mɨpaɨ kanaineni Yawé Naimekɨmɨtɨrɨkaɨye: 'Iya tukaritsie ne 'ekɨ nepɨmetsita'inieni, neti'uximayatsiriwame Tsuruwaweri Tsaratiheri nu'aya —mɨpaɨ kanaineni Yawé— ne nepɨmetsi'anayexei, karikɨ hanira titseyumawame hepaɨ pe'aneme nekamanayeitɨamɨkɨ”, mɨpaɨ kanaineni Yawé Naimekɨmɨtɨrɨkaɨye».
ZEC 1:1 Merikɨtsɨ 'atahairieka metseriyaritsie, meta hutarieka wiyaritsie Raríyu ti'aitakaku, 'ana Yawé Tsakariyaxi kaniutahɨawe, Werekiyaxi nu'aya meta 'Iru teukarieya, mɨpaɨ katinitahɨawe:
ZEC 1:2 «Yawé kaniha'aka meripaitɨ kiekatari xetutsima wahepaɨtsita.
ZEC 1:3 'Ayumieme, mɨpaɨ ketiniwarayehɨtɨa yunaime teɨteri, mɨpaɨ kanaineni Yawé Naimekɨmɨtɨrɨkaɨye: »“Nehetsɨa xekeneu'axɨa, neta xehetsɨa nepunuani
ZEC 1:4 »”Xetutsima kememɨ'anenekai wahepaɨ xepɨka'aneneni, mɨpaɨ memɨtewakuxaxatɨwakai Kakaɨyari niukametemama meripai miemetexi, mɨpaɨ kanaineni Yawé Naimekɨmɨtɨrɨkaɨye: ‘'Axaxete'u'iyaritɨ xeketeneuhayewa meta 'axaxeteyurietɨ.’ Merikɨte kenemainekai mɨkɨ yamepɨkatekakɨ meta mepɨkanetsi'u'eni
ZEC 1:5 »”¿Hakewa mepe'uwa xetutsima? ¿Kakaɨyari niukametemamata mete'ayeyuyuri?
ZEC 1:6 ¿Kamɨtsɨ karaye'atɨarie xetutsima wahetsie niuki meta 'aitsikate nemɨwarupitɨa menete'uximayatsiriwamete neniukamete mɨpaɨ memɨtewataxatɨanikɨ? »”Hikɨ mɨkɨ Yawé hetsie metewiyatɨ mekanakɨne, meta mɨpaɨ mekaniutiyuani: ‘Yawé Naimekɨmɨtɨrɨkaɨye yapɨtatsi'uyuri kemɨtiu'eri: tahetsie kemɨreuyewekai 'axatete'u'iyarikaku 'axateteyuriekaku.’”»
ZEC 1:7 Hutarieka wiyaritsie ti'aitakaku Raríyu, xeitewiyari heimana naurieka tukaritsie tsewati metseriyaritsie, tamamata heimana xewi metseriyari mɨhɨkɨ, 'ana Yawé Tsakariyaxi kaniutahɨawe, Werekiyaxi nu'aya 'Iru teukarieya:
ZEC 1:8 Xeitɨkaritsie mɨpaɨ nepɨtiunierixɨ, tewi nepuxei kawayutsie 'anakaime heukɨtaxaɨyemetsie. Mɨkɨ tewi tsikwaitsata kaniyekeni 'etsiwa heukatewakaku 'aki 'utɨma. Waritanata mepɨti'ukai meheukɨtaxawimetsie me'utetɨ meta meheutɨtɨnimetsie meta meheutuxametsie.
ZEC 1:9 Ne 'ipaɨ nepɨtita'iwawiyaxɨ: «¿Neti'aitɨwame, 'ikɨri ketita mete'inɨariyari kawayutsixi wahetsie memutei?» Nehamatɨa mɨtikuxatakai niuki tuayame, mɨpaɨ kanetiniuta'eiya: «Nepɨmatitaxatɨani ketita memɨte'inɨariyarite».
ZEC 1:10 Hikɨ tewi tsikwaitsata muwekai pɨta mɨpaɨ kanetiniutahɨawe: «Yawé kaniwareyenɨ'ani 'ikɨ kawayutsixi wahetsie memutei, naitsarie kwiepa memakunierekɨ».
ZEC 1:11 Merikɨte mɨkɨ memutekai Yawé niuki tuayameya tsikwai tsata muwekai, mɨpaɨ mekateniutahɨawe: «Naitsarie tepukexiyaxɨri kwiepa. Yurikɨ yemekɨ naitsarie kayuwatɨ kaniumaka».
ZEC 1:12 Mɨpaɨ me'utiyuaku, niuki tuayame Yawé hetsɨa mieme, mɨpaɨ kaniutayɨni: «Yawé Naimekɨpemɨtɨrɨkaɨye, ¿kepaukake 'aixɨa pepɨtixeiya Kerutsareme meta Kura kiekariteyari, pemɨwaheka haika tewiyari heimana tamamata wiyari?»
ZEC 1:13 Niuki tuayame nehamatɨa mɨtikuxatakai Yawé kanita'eiya niuki 'aixɨa 'anemekɨ meta kayuwatɨ tiyupitɨwamekɨ,
ZEC 1:14 'ariketa niuki tuayame mɨpaɨ kanetiniutahɨawe: «Karima 'ikɨ niuki keneutaxata Yawé Naimekɨmɨtɨrɨkaɨye hetsɨa mieme: »“Neminaki'eriekɨ Kerutsareme meta Tsiyuni wahetsiemieme nepɨ'ɨtetsa.
ZEC 1:15 Matsi pɨta, waɨkawamekɨ nepɨha'a 'iya nuiwarite memuyutemamawie wahetsiemieme. Kepauka nemuyeha'a kwinimiemetɨtɨ nepɨkatiha'akai, peru matsi mɨkɨ kwinimieme mepɨte'ikwinitɨa”.
ZEC 1:16 »Peru hikɨ, mɨpaɨ kanaineni Yawé: “Tawarita 'ari nekanitinenimayatamɨkɨ Kerutsareme. Mana tawari netuki kananukuketɨariemɨkɨ, hikɨ kii wewiwame ti'inɨnɨatameya kanitahaniemɨkɨ,
ZEC 1:17 »Tawarita 'ikɨ karima ketineutaxata, Yawé Naimekɨmɨtɨrɨkaɨye hetsiemieme: »“Tawarita nekiekarite ranayuhayewame pɨrexeiyani 'aixɨa mɨti'ane, tawarita Yawé Tsiyuni pɨnɨtɨani, tawarita Kerutsareme panayexeiya”».
ZEC 1:18 Hikɨ kepauka nemeutanierixɨa, nehɨxie nauka 'awayari nekaniuxeiya.
ZEC 1:19 Hikɨ nenita'iwawiya niuki tuayame nehamatɨa mɨtikuxatakai: «¿'Ikɨ 'awate ketita ti'inɨariyarite?» Niuki tuayame mɨpaɨ kanetiniuta'eiya: «'Ikɨ 'awate tɨrɨkariyate kanihɨkɨtɨni kɨmana Kuratsie kiekatari, 'ixaheritsixi meta Kerutsaremetari memeutaweiyariexɨa».
ZEC 1:20 Hikɨ 'arike Yawé kaneniuxeiyatsitɨanita yunaukame tepɨa tsunamete.
ZEC 1:21 Mɨpaɨ nekatinita'iwawiya «¿'Ikɨta kemetekuyurie?» Hikɨ Yawé mɨpaɨ kanetiniuta'eiya: «'Ikɨ 'awate kaniwa'inɨaritɨni nuiwarite yutɨrɨkariyakɨ Kura nuiwarimama memɨwareutaweiyaxɨa, 'ana nitɨma mepɨka'uyɨwekaxɨa xewitɨ mɨyukɨhɨanikɨ. 'Ikɨta tepɨa tsunamete mepu'axɨa mɨkɨ memɨwatimariutakɨ yemekɨ, watɨrɨkariya memɨwanawairienikɨ kemɨ'ane nuiwarite Kura kwieyaritsie memɨtahaxɨa mana kiekatari memɨwareutaweiyaxɨa».
ZEC 2:1 Kepauka nemanukunierixɨta, xeimeta tewi nekaniuxeiya ti'inɨnɨatame 'ahuriekame.
ZEC 2:2 Ne nekanita'iwawiya: «¿Hakewa pepeutɨa?» Mɨkɨ mɨpaɨ kanetiniuta'eiya: «Kerutsareme nekaneu'inɨatamieni. Nepɨtimaimɨkɨ kehatayewa meta kehayetewi».
ZEC 2:3 Niuki tuayame pɨyemieximekairi nehamatɨa mɨtikuxatakai, yapauka xewitɨta niuki tuayame punua hetsɨana.
ZEC 2:4 Mɨpaɨ katinitahɨawe: «Yapauka mɨkɨ temaikɨ 'ipaɨ ketineutaxatɨa: »“Kerutsareme kiekariyaritsie waɨkawa teɨteri mepuxuaweni, meta tewaxi waɨkawa mepuxuaweni, 'ayumieme Kerutsareme yukuraru kahexeiyatɨ payani.
ZEC 2:5 Hikɨ kiekari warita —Yawé mɨpaɨ paine— tai kuraruyari nepɨhɨkɨtɨni, meta kiekari taɨta nepitahɨniya waɨkawa 'aixɨa mɨti'anekɨ”.
ZEC 2:6 »Xekenayekɨni, xekenayekɨni. Xekeneuyuta'una mɨkɨ kiekari tayeta mukumatsie —Yawé mɨpaɨ kanaineni—. »Ne nepɨtiuyuri nemɨxeheutaxɨriexɨa nauka 'ekayarikɨ mɨyuawitsie miemekɨ
ZEC 2:7 »Xeme Tsiyunitari, Wawiruniya xemu'uwa xekenayekɨni mana, xekeneyuta'una».
ZEC 2:8 Karikɨ Yawé Naimekɨmɨtɨrɨkaɨye mɨpaɨ kanaineni, mɨnetsiheyenɨ'a 'iya nuiwarite naime memɨxete'unawairi wahetsɨa: «Kemɨ'ane teɨteri neteɨterima memɨwa'uximatɨa, nehɨxita memeumemeni hepaɨ mekaniyɨaka.
ZEC 2:9 Ne nepɨyeha'ani mɨkɨ teɨteri wahepaɨtsita, hikɨ waɨriyarika tewa'uximayatsiriwametetɨtɨ mepɨtewanawatsirieni wapiinite. »'Ana mɨpaɨ mekatenetimaikuni kename Yawé Naimekɨmɨtɨrɨkaɨye netsiheyenɨ'a.
ZEC 2:10 »Xekeneutihiwani temawierikakɨ, Tsiyunitari. Ne nekaninuamɨkɨ xehamatɨa ne'ukaitɨ nekanayeimɨkɨ
ZEC 2:11 »Mɨkɨ tukaritsie, yuwaɨkawatɨ nuiwarite Yawé mekanitinɨikuni. Mɨkɨ neteɨterima mepakɨne, neta watsata nepuyeikani. »'Ana mɨpaɨ xekatenetimaikuni kename Yawé Naimekɨmɨtɨrɨkaɨye hɨkɨ mɨnetsiheyenɨ'a xehetsɨa.
ZEC 2:12 Tawarita Kura kwieyari Yawé yuhetsiemieme payeitɨani, kwieya mɨpatsie, meta tawarita Kerutsareme panayexeiya.
ZEC 2:13 Yunaitɨ kwiepa xemɨtama kayuwatɨ xekeneumaka Yawé hɨxie, 'ariri kanayeyani muyuawitsie yukii mupatsieta tahetsɨa nuanike».
ZEC 3:1 Hikɨ kaneniuxeiyatsitɨani Kutsuhexi, mawari wewiwamete tiwa'aitɨwame pɨhɨkɨtɨkai, Yawé niuki tuayameya hɨxie 'apuwekai, meta Kauyumarie nepuxei tserietana 'utiweme, 'ixanetamɨtɨ.
ZEC 3:2 Niuki tuayame Yawé hetsɨa mieme Kauyumarie mɨpaɨ katiniutahɨawe: «Yawé kemetsi'utatieni, Kerutsareme manayexei. Yawé kematsi'utatieni, Kauyumarie. 'Ikɨ tewi kɨye taxɨximetɨ taipa manayehanie hepaɨ kaniuyɨni».
ZEC 3:3 Kutsuhexi yukemari tɨtɨnime 'anakatɨtɨ niuki tuayame hɨxie puwekai.
ZEC 3:4 Hikɨ mɨpaɨ niuki tuayame katiniwarutahɨawe mana memɨti'ukai, me'iparewikutɨ: «Xekenanutihɨniri kemariteya mɨtɨtɨni». Hikɨ Kutsuhexi mɨpaɨta katiniutahɨawe: «Mɨpaɨ ketinemaika, tita 'axapemɨtiuyuri 'ari nekamatinanuyeitɨirieni, 'ayumieme hikɨri 'ixurikite nekamenanakatɨtɨamɨkɨ witsimɨ'anene».
ZEC 3:5 Hikɨ neta mɨpaɨ nekaniutayɨni: «Mukuretsi xekenanutiketsirita mɨ'itiya». Hikɨ mekanenutiketsirieni mukuretsi mɨ'itiya meta mekanitikemaritɨani, mexi niuki tuayame Yawé hetsɨa mieme mana 'uwekai.
ZEC 3:6 Hikɨ niuki tuayame Yawé hetsɨa mieme Kutsuhexi mɨpaɨ katinayehɨtɨani:
ZEC 3:7 «Mɨpaɨ kanaineni Yawé Naimekɨmɨtɨrɨkaɨye: »“Xɨka ne'aitsikatetsie yapetikamieni, meta xɨka mawari wewiwame pehɨkɨtɨtɨ peraye'atɨani, hikɨ 'ana netukita pepɨtita'aita meta netakwa hepaɨtsita mieme pepɨti'ɨwiyani. Ne 'ena tixaɨtɨ nepɨmatihɨritɨani 'ena memu'uwa 'ikɨ wahamatɨa.
ZEC 3:8 »”Kutsuhexi, keneneu'eni, mawari wewiwamete tiwa'aitɨwame, meta 'a'iwama meke'u'enanani, 'ahɨxie memayaxike, xeme xekani'inɨaritɨni kemɨtiyɨni: Neti'uximayatsiriwame nekani'atɨaximeni, nekani'atɨaximeni Meukuyɨraxɨ.
ZEC 3:9 Kutsuhexi, tete keneuxeiya 'ahɨxie nemitaye. Mɨkɨ hetsie hɨxite 'atahutatɨ patei, mɨkɨtsie nepɨreu'utɨani. Xeitukaritsie kwiepa memɨtama ke'axamemɨte'uyuri nepɨtiwaranuyeitɨirieni
ZEC 3:10 »”Mɨkɨ tukaritsie, yuxexuitɨ xekaniwata'iniexɨakuni yu'iwama kaxie hetɨa xemɨtitenikɨ meta piní hetɨa, mɨpaɨ kanaineni Yawé Naimekɨmɨtɨrɨkaɨye”».
ZEC 4:1 Merikɨtsɨ niuki tuayame nehamatɨa mɨtikuxatakai tawarita kaninuani, hikɨ kanenanutahɨtɨani, xewitɨ kutsutɨ manutahɨtɨarieni hepaɨ.
ZEC 4:2 Hikɨ mɨpaɨ kanetiniuta'iwawiya: «¿Tita petixeiya?» Ne mɨpaɨ nekatinita'eiya: «Xeime kɨxeme 'uitɨwame huru mɨtse'ikɨ wewiyakame nepɨxeiya, yuheima peixeiya xakɨ hepaɨ 'aneme 'e'akunime, kɨxeme 'uitɨwame heima puye'u 'atahutatɨ kɨxeme, meta yunanari pexeiya 'atahutame.
ZEC 4:3 'Aurienata pɨti'u hutatɨ huriwu, xewitɨ xakɨ hepaɨ mɨ'ane tserieta, xewitɨta 'utatana».
ZEC 4:4 Hikɨ niuki tuayame mɨpaɨ nekatiniuta'iwawiya nehamatɨa mɨtikuxatakai: «¿Neti'aitɨwame, tita ti'inɨariyari 'ikɨ naitɨ?»
ZEC 4:5 Niuki tuayame mɨpaɨ kanetiniutahɨawe: «¿Kamɨtsɨ 'atsipekatimate tita mɨti'inɨariyari?» Ne yaneputayɨ kename 'atsinekatimate.
ZEC 4:6 Hikɨ niuki tuayame mɨpaɨ kanetiniutahɨawe: «'Ikɨ Yawé kaniniukieyatɨni Tsuruwaweri hetsiemieme kanihɨkɨtɨni: »“Kuyaxi watɨrɨkariyakɨ pɨkatiyɨni meta nixeime tɨrɨkariyayakɨ, matsi Ne'iyari mupatsiekɨ pɨta —Yawé Naimekɨmɨtɨrɨkaɨye mɨpaɨ kanaineni—.
ZEC 4:7 ¿Ketita peti'a'erie 'ekɨ, hɨri 'apemutewi? Tsuruwaweri hɨxie makuweri pekanihɨkɨtɨni xeikɨa. Mɨkɨ tete pɨkayeni tsutɨmeyari mayani, teɨteri me'utihiwakaku hepaɨtsitana 'aixɨa mehaitɨkaitɨ witsimɨ'anekɨ”».
ZEC 4:8 Hikɨ Yawé niukieya nehetsɨa kaninuani:
ZEC 4:9 «Tsuruwaweri 'ikɨ tuki tenariyari kaniutsutɨani, meta mɨkɨtsiere 'iwewienetɨ kaninɨmɨkɨ. 'Ana mɨpaɨ xepɨtehetimani kename Yawé Naimekɨmɨtɨrɨkaɨye xehetsɨa netsiheyenɨ'a.
ZEC 4:10 Kepauka Tsuruwaweri xemɨxeiya tepɨa 'atukame ti'inɨnɨatame, 'anake mepuyukatemamawieni 'iya kemɨ'ane yuri memɨkate'i'eririekai 'etsiwa xeikɨa mɨtitsutɨakaitsie. 'Ikɨ 'atahuta Yawé hɨxiteya kanihɨkɨtɨni, naitsarie kwiepa mɨtaneniere».
ZEC 4:11 Hikɨta niuki tuayame mɨpaɨ nekatiniuta'iwawiya: «¿Tita ti'inɨariyari 'ikɨ huriwu hutatɨ xewitɨ kɨxeme tserieta mutiwe meta 'utatanata xewitɨ?»
ZEC 4:12 Metatsiere mɨpaɨ nekatinita'iwawiya: «¿Tita ti'inɨariyari 'ikɨ hutatɨ huriwu xawariteya hatseiti nanayari hurukɨ mɨwewiyatɨka muhuta 'aurie muti'u, taɨtana muhapane hatseiti hurumaɨyetɨ?»
ZEC 4:13 Niuki tuayame mɨpaɨ kanetiniuta'eiya: «¿Kamɨtsɨ 'atsipekatimate ketita mɨti'inɨariyarite?» Ne yanepetayɨ kename 'atsinekatimate.
ZEC 4:14 Hikɨ niuki tuayame mɨpaɨ kanetiniutaxatɨani: «'Ikɨ yuhutatɨ memanayexeiyarie mekanihɨkɨtɨni ti'aitame memɨte'uximayatsirie naitsarie kwiepa».
ZEC 5:1 Merikɨtsɨ tawarita neneutanierixɨani, hikɨ xapa kwikwiekame nekaniuxeiya nehɨxie 'u'enirɨmeme.
ZEC 5:2 Niuki tuayame kaneniuta'iwawiya: «¿Ketita petixeiya?» Neta mɨpaɨ nekatinita'eiya: «Xapa kwikwiekame nepɨxeiya 'u'enirɨmeme, tamamata meturuyari tewime 'auxɨwime meturuyari 'atayeume».
ZEC 5:3 Hikɨ niuki tuayame mɨpaɨ kanetiniutahɨawe: «'Ikɨ kanihɨkɨtɨni 'axakememɨtepitɨarieni 'inɨariyari naitsarie kwiepa kemɨtitaweni. Kemɨre'uxa mɨkɨ xapatsie, yunaime memɨtenawaya wahetsie katininakimɨkɨ meta memɨte'itawa.
ZEC 5:4 'Ayumieme 'ikɨ 'uximatɨarika neputatua mɨtinawaya kiita meutahanikɨ meta yakɨ mɨtikuxata netsihaterɨwatɨ kename yuri 'utaine. Kiitana kaneutahamɨkɨ hikɨ kanika'unamɨkɨ, meta naime 'ikitsaraɨteya meta tenariyari kanika'unamɨkɨ, mɨpaɨ kanaineni Yawé Naimekɨmɨtɨrɨkaɨye».
ZEC 5:5 Hikɨ niuki tuayame nehamatɨa mɨtikuxatakai newayani, mɨpaɨ kanetiniutahɨawe: «Keneutanierixɨa kene'a'ɨwiya 'ikɨ matsiɨkɨtɨ mɨratɨa hepaɨtsita».
ZEC 5:6 Mɨpaɨ nekatinita'iwawiya: «¿Ketita tihɨkɨ?» Mɨkɨ mɨpaɨ kanetiniuta'eiya: «Mɨkɨ ti'inɨnɨatame kanihɨkɨtɨni xeitewiyari heimana huta rituruyari katiniukanakeni. Mɨkɨ ke'axamemɨte'uyuri kani'inɨariyaritɨni teɨteri naitsarie 'ikɨ kwieyaritsie».
ZEC 5:7 Hikɨ kananuti'ɨiyani ti'inɨnɨatame kanamikieya purumu tepɨayarikɨ mɨwewiyakai, mɨkɨ taɨta 'uka pɨyekatei 'a'ukaitɨ.
ZEC 5:8 Niuki tuayame mɨpaɨ kaniutayɨni: «'Ikɨ kanihɨkɨtɨni tita 'axamɨti'ane», yapauka tawarita 'uka muwa kaneukataima ti'inɨnɨatameta, hikɨ kanenukanani purumu kanamikiyarikɨ.
ZEC 5:9 Tawarita neneutanierixɨani, hikɨ nekaniwaruxeiya nehɨxie yuhutame 'ukari mekanayekɨnekaitɨni yu'anatekɨ me'uwiwetɨ 'ekatsie. Mɨkɨ wa'anate wiuri 'anateya hepaɨ pɨ'anenekai, hikɨ mɨkɨ ti'inɨnɨatame mekanehana 'ekatsie.
ZEC 5:10 Ne nenita'iwawiya niuki tuayame nehamatɨa mɨtikuxatakai: «¿Hakewari mepeiha mɨkɨ ti'inɨnɨatame?»
ZEC 5:11 Mɨkɨ mɨpaɨ kanetiniuta'eiya: «Wawiruniya paitɨ mekaneihana, tuki muwa metawewiyarienikɨ. Kepauka tuki menɨrieni, muwa ti'inɨnɨatame peutayerieni, 'ɨkayari hetawewiyame mana peuyeyerieni».
ZEC 6:1 Merikɨte hekwamekɨ neneutanierixɨani, hikɨ nekaniwaruxeiya yunaukame kaxetate kuyaxa miemete hɨri hutame hixɨata mekanayenexɨani, mɨkɨ wurunitse tepɨayarikɨ mepɨwewiyatɨkatei.
ZEC 6:2 Mexɨakame kaxeta mekanehanakaitɨni kawayutsixi meheukɨtaxawitɨ, hutarieka mieme kawayutsixi meheuyɨyɨwitɨ mepehanakai,
ZEC 6:3 hairieka mieme kawayutsixi meheutuxatɨ, naurieka mieme kawayutsixi meheupipitutɨ. Mɨkɨ yunaitɨ kawayutsixi memɨtɨrɨkawi mepɨhɨkɨtɨkai.
ZEC 6:4 Hikɨ nekanita'iwawiya niuki tuayame nehamatɨa mɨtikuxatakai: «¿Ketita ti'inɨariyari 'ikɨ kaxetate, neti'aitɨwame?»
ZEC 6:5 Niuki tuayame mɨpaɨ kanetiniuta'eiya: «'Ikɨ yunaukatɨ 'iyarite mekanihɨkɨtɨni muyuawitsie miemete, mekanayekɨneri naitsarie kwiepa Ti'aitame hɨxie meheyukuxataka.
ZEC 6:6 Kaxeta kawayutsixi memeuyɨyɨwi memehana mɨkɨ kaniyemieni xeime kwieyaritsie tayeta hepatsie, kawayutsixi memeutuxa memehana kaniyemieni tau makayuyuipike hepatsie, memeupipitu memehana kaniyemieni tatsutɨa kwieyari mukumatsie».
ZEC 6:7 Mɨkɨ kawayutsixi memɨtɨrɨkawi menitsunatɨwekaitɨni naitsarie kwiepa mekɨnikutɨ. Hikɨ niuki tuayame mɨpaɨ katiniwarutahɨawe: «Xekenehu, kwiepa naime xekenakukexiya tapa xe'itsutɨame 'atsita tapa xekaninɨkuni». Hikɨ mɨkɨ mɨpaɨ mekatenikakɨne.
ZEC 6:8 Merikɨte niuki tuayame kaneniuta'inieni mɨpaɨ kanetiniutahɨawe: «Neuxei, mɨkɨ memekɨ tayeta kwieyaritsie mana nehaxɨa mekaneunɨtɨayuni mɨkɨ kwieyaritsie».
ZEC 6:9 Yawé niukieya nehetsɨa kaninuani, mɨpaɨ kanetiniutahɨawe:
ZEC 6:10 «Kenemie hikɨ kwitɨwa Kutsiyaxi kie Tsupuniyaxi nu'aya hetsɨa, mana mekane'axɨani Wawiruniya memehapaniekai Kerirahi, Tuwiyaxi meta Kerahiyaxi. Keniwaretanaki'eriri
ZEC 6:11 pɨrata meta huru mematɨkɨ, mɨkɨ hurukɨ meta mɨkɨ pɨratakɨ xeime kuruna keneutawewi, mɨkɨ kuruna pekanenutiketsiriemɨkɨ Kutsuhexi mawari wewiwamete tiwa'aitɨwame Kutsaraki nu'aya.
ZEC 6:12 Hikɨ mɨpaɨ Kutsuhexi pepɨtitahɨawe Yawé Naimekɨmɨtɨrɨkaɨye hetsiemieme: »“'Ikɨ kanihɨkɨtɨni 'iya Meukɨyɨraxɨ mɨtitewa, karikɨtsɨ yunanaritsie kanayɨraxɨamɨkɨ, meta mɨkɨ tuki pɨtawewieni Yawé hetsiemieme.
ZEC 6:13 Mɨkɨ tawari Yawé tukieya panukuketɨani, ti'aitame hepaɨ pɨtiyukemaritɨani, yu'uwenitsie payerɨni ti'aitatɨ. Meta xewitɨ mawari wewiwame 'uwenieyatsie 'apayerɨni, peru mɨkɨ yuhutatɨ mepɨyuxewini mepɨyunaki'erieka”.
ZEC 6:14 »Mɨkɨ kuruna Yawé tukieyata puyuhayewani temɨwara'eriwanikɨ Kerirahi, Tuwiyaxi, Kerahiyaxi meta Heni Tsupuniyaxi nu'aya.
ZEC 6:15 Xɨka xeme yaxetekahuni Yawé xekakaɨyari kemaine, 'ateewa memu'uwa mekani'axɨakuni mexeparewienike Yawé tukieya tawari xemɨtawewienikɨ. 'Ana mɨpaɨ xepɨtehetimani kename Yawé Naimekɨmɨtɨrɨkaɨye netsiheyenɨ'a».
ZEC 7:1 Naurieka wiyaritsie ti'aitakaku Raríyu, naurieka tukaritsie 'atanauka metseritsie, kitsirehu metseriyaritsie mɨyatɨtɨ, 'ana Yawé niukieya Tsakariyaxi hetsɨa kaninuani.
ZEC 7:2 Weteri kiekatari mekaniwareyenɨ'akaitɨni Tsaretsexi meta Xekeni-Mereki, metatsiere wateɨterima, memiwauyukɨ Yawé parewiyaya,
ZEC 7:3 meta memeta'iwaunikɨ mawari wewiwamete wahetsɨa memɨhɨritɨarie Yawé Naimekɨmɨtɨrɨkaɨye tukieya, metatsiere Kakaɨyari niukametemama: «¿Tetehe'eriwani 'akuxi 'auxɨwirieka metseriyaritsie xeitukari teteyuhiwerieka meta teteyuhakieka teyɨhɨtɨ, yaxeikɨa meripaitɨ wiyaritsie ketemɨ'anekai?»
ZEC 7:4 Hikɨ 'ikɨ niuki nehetsɨa kaninuani Yawé Naimekɨmɨtɨrɨkaɨye hetsɨa mieme:
ZEC 7:5 «Mɨpaɨ ketiniwarutahɨawi yunaime mɨkɨ kwieyaritsie memɨtama, metatsiere mawari wewiwamete: “Kepauka xeme xemuyutihakiwakai meta xemuyuhiweriekai 'auxɨwirieka metseriyaritsie meta 'atahutarieka metseriyaritsie haika tewiyari heimana tamamata wiyari manukatɨatsie, 'ana yurikɨ nehetsiemieme xepɨkayuhakiekai.
ZEC 7:6 Kepauka xeme xemɨtekwa'a xemɨte'ie, yuhetsiemieme xeikɨa xekaniyɨaka”».
ZEC 7:7 'Ikɨ niuki pɨhɨkɨ neniukamete meripaitɨ miemete ne Yawé yanetiwapitɨakaku memitaxataxɨ kepauka 'akuxi Kerutsareme meta kiekari 'auriena mamanetɨkatsie mɨkiepatɨkai meta kayuwatɨ memexeiyakaitsie, kepauka 'akuxi Nekexi meta muweritsie tau makayuyuipike hepa mɨkiepatɨkai.
ZEC 7:8 Yawé niukieya kaninuani hekwamekɨ Tsakariyaxi hetsɨa. Mɨpaɨ katineyehɨtɨani:
ZEC 7:9 «Mɨpaɨ kanaineni Yawé Naimekɨmɨtɨrɨkaɨye: »“Xeketeneheitseritɨaka yurikɨ kemɨtiheitserie, xekeneyunaki'erieka meta xekeneyunenimayaka xeyunɨtɨ yunaitɨ.
ZEC 7:10 Xepɨkawananaimaka wiuraxi meta nutuite, meta 'ateewa kiekatari metatsiere tixaɨtɨ memɨkateheuxeiya. 'Axamɨti'ane xepɨkawewieka yu'iyaritsie hipame wahetsiemieme”.
ZEC 7:11 »Peru mɨkɨ mepɨka'uyuwaɨri mɨpaɨ memɨtekakɨnekɨ. Me'i'inɨatatɨwetɨ mekanawaritaxɨani meta mepeuyukanaxɨa yunakata.
ZEC 7:12 Memɨka'i'enienikɨ niuki 'aitsika meripai miemetexi Kakaɨyari niukametemama Yawé Naimekɨmɨtɨrɨkaɨye muwareyenɨ'airiekai 'Iyari yuhetsɨa miemekɨ, 'ana yu'iyari mekaniutseiriya tete kwinimieme mɨtitse'i hepaɨ. Hikɨ 'ayumieme, Yawé Naimekɨmɨtɨrɨkaɨye yemekɨ kaniuyeha'ani.
ZEC 7:13 “Memɨkanetsi'u'enikɨ kepauka nemɨwarutahɨawixɨtsie, neta nepɨkawa'enieni kepauka memɨnetsitahɨawetsie —mɨpaɨ kanaineni Yawé Naimekɨmɨtɨrɨkaɨye—.
ZEC 7:14 Haikɨri waɨkawa mɨtɨrɨkaɨye hepaɨ, nekaniwareutaxɨriexɨani naitsarie hipame nuiwarite memɨkawamatekai wahetsɨa. Yukwie memiku'eiri yuxaɨta puyuhayewaxɨ nixewitɨ tɨma mana pɨka'uyeyeikakai. Mɨpaɨ me'ɨyɨka yukwie 'akumaweme mekanayeitɨani meripaitɨ witsimɨraku'anekai”».
ZEC 8:1 Tawarita Yawé Naimekɨmɨtɨrɨkaɨye niukieya nehetsɨa kaninuani. Mɨpaɨ kanetiniutahekɨatɨani:
ZEC 8:2 «Mɨpaɨ kanaineni Yawé Naimekɨmɨtɨrɨkaɨye: »“Ne waɨkawa nepɨ'ɨtetsa Tsiyuni hepaɨtsita. Waɨkawa yemekɨ nepikwerie hetsiena mieme nepuyeha'arɨwe”.
ZEC 8:3 »Mɨpaɨ kanaineni Yawé: »“Nepunuani tawarita Tsiyunitsie, meta Kerutsareme ne'ukaitɨ nepayani. Hikɨ Kerutsareme pɨmatiwani tita Yuri Mɨraine Kiekariyari, meta Yawé Naimekɨmɨtɨrɨkaɨye yemurieya Yemuri Mɨpatsie pɨtitewaka”.
ZEC 8:4 »Mɨpaɨ kanaineni Yawé Naimekɨmɨtɨrɨkaɨye: »“'Ukirawetsixi meta 'ukaraixi tawarita Kerutsareme kayeyari'utɨa metiyaxiketɨ mepakɨne, yuxexuitɨ yu'itsɨ me'u'ɨtɨ waɨkawa wiyari memexeiyatɨkanikɨ.
ZEC 8:5 Tɨɨri 'ukitsi meta 'ukari tawarita mekanitiwaikakuni mɨkɨ kiekari kayeyaritetsie”.
ZEC 8:6 »Mɨpaɨ kanaineni Yawé Naimekɨmɨtɨrɨkaɨye: »“Kemɨ'ane 'ana memuyuhayewatɨweni 'ana tukaritsie kayɨweme mepɨ'erieka mɨpaɨ mɨtiyɨni, peru ne nehepaɨtsita pɨtiyɨwe, mɨpaɨ kanaineni Yawé Naimekɨmɨtɨrɨkaɨye”.
ZEC 8:7 »Mɨpaɨ kanaineni Yawé Naimekɨmɨtɨrɨkaɨye: »“Neteɨterima nepɨwatawikweitsitɨani, tau manatineika hepatsie kiekatari wahetsɨa memu'uwa meta makayuyuipike hepatsie.
ZEC 8:8 Nepɨwarakunuitɨani Kerutsareme pɨta memɨkutenikɨ, mɨkɨ neteɨterima mepɨhɨkɨtɨni neta wakakaɨyari nepɨhɨkɨtɨni, yurikɨ nepɨtiyurieneni meta heitseriemekɨ”.
ZEC 8:9 »Mɨpaɨ kanaineni Yawé Naimekɨmɨtɨrɨkaɨye: »“Xekeneyuwaɨriyani, xeme, 'ikɨ tukaritsie xemi'eni Kakaɨyari niukametemama waniuki, mexi tenari wewiyane tuki hutarieka mieme manukuhanienikɨ Yawé Naimekɨmɨtɨrɨkaɨye hetsiemieme.
ZEC 8:10 Meripaitɨ mɨreukayunetsie teɨteri mepɨkatepitɨariekai yu'uximayatsikakɨ meta tewaxi yu'ikwai mepɨkakumikiwakai. Hipatɨ memɨxe'aye'uniekaikɨ kɨkamete 'aixɨa 'iyari mepɨkaku'uwakai, netsɨ yanekatiniwarupitɨani yunaime teɨteri yunaitɨ memayuye'uniekakɨ.
ZEC 8:11 Hikɨri mɨpaɨ nepɨkatiwapitɨani memɨyuhayewaxɨ 'ikɨ teɨteri meripaitɨ kenemɨtiwarupitɨa hepaɨ —mɨpaɨ kanaineni Yawé Naimekɨmɨtɨrɨkaɨye—.
ZEC 8:12 Kayuwatɨ mepexeiyani kepauka mɨtika'etsitɨ, meta kaxie yu'ikwaxi putixuaweriyani, kwie pɨtiutixuaweriyani tita mɨtika'etsieni meta muyuawi yuwiyeri panakanɨ'ani. Mɨkɨ naime nepɨtiwapitɨani mɨtiwahetsiemiemetɨnikɨ 'ikɨ teɨteri memɨyuhayewatɨwe.
ZEC 8:13 Kura kwieyaritsie kiekatari meta 'Ixaheritsie, xepɨkaheumamaka, matsi xekeneyuwaɨririyani. Xeme hipame nuiwarite watsata 'axaxemɨ'itɨarie xepɨhɨkɨtɨkai, ne peru nepɨxetawikweitsitɨani, hikɨ hipatɨta 'aixɨa mepɨ'itɨarieni xekɨmana”.
ZEC 8:14 »Mɨpaɨ kanaineni Yawé Naimekɨmɨtɨrɨkaɨye: »“Kepauka xetutsima memɨnetsi'uyehaxɨatɨa, ne yaneputayɨ nemɨwarakumaweriyakɨ nekawareunenimayatɨ —mɨpaɨ kanaineni Yawé Naimekɨmɨtɨrɨkaɨye—.
ZEC 8:15 Peru hikɨta nepɨnewaɨri Kerutsareme 'aixɨa nemɨyurienikɨ meta Kura kwieyari. 'Ayumieme xepɨkaheumamaka.
ZEC 8:16 »”Peuyewetse xeme 'ipaɨ xemɨtekahuni, yurikɨ xeketeneyukuxaxatɨwani, xekeneyuxanetani 'itsɨkate wahetsɨa yurikɨ meta kemɨtiheitserie. Mɨpaɨ xɨka xeteyurieka kayuwatɨ kaniumakamɨkɨ.
ZEC 8:17 'Axamɨti'ane xepɨkatewewieka yu'iwa hepaɨtsita, 'itarikakɨ xepɨkatekuxatani, karikɨ ne mɨkɨ naime nekatini'uxiwe'erieka, mɨpaɨ kanaineni Yawé”».
ZEC 8:18 Nehetsɨa kaninuani Yawé Naimekɨmɨtɨrɨkaɨye niukieya, mɨpaɨ kanetiniutahɨawe:
ZEC 8:19 «Mɨpaɨ kanaineni Yawé Naimekɨmɨtɨrɨkaɨye: »“Kura teɨteriyari wahetsiemieme, hakiya mematinenetɨwakai naurieka metseritsie meta 'auxɨwirieka, 'atahutarieka meta tamamata metseriyaritsie, hikɨri temawierika mepexeiyani, 'ixɨarari mepatinenetɨwani. Kamɨtsɨ, xekenenaki'erieka tita yuri mɨraine meta tita kayuwatɨ mɨtiyupitɨwa”.
ZEC 8:20 »Mɨpaɨ kanaineni Yawé Naimekɨmɨtɨrɨkaɨye: »“Mekani'axɨakuni teɨteri, waɨkawa kiekari mukumanetsie kiekatari,
ZEC 8:21 hipame kiekaritsie mekanitikɨnikuni mɨpaɨ metewakuxaxatɨwatɨ mana kiekatari: Hikɨmɨ tepuhu Yawé hetsɨa tepiwawirieyu 'aixɨa mɨtatsiheyurienikɨ. Tepiwauyu Yawé Naimekɨmɨtɨrɨkaɨye. Netatsiere nekaneiwaumieni.
ZEC 8:22 Meta yumɨiretɨ teɨteri metatsiere nuiwarite memɨtɨrɨkawi Kerutsareme mekani'axɨakuni me'ikuwautɨwetɨ Yawé Naimekɨmɨtɨrɨkaɨye meta 'aixɨa mɨwayurienikɨ”.
ZEC 8:23 »Mɨpaɨ kanaineni Yawé Naimekɨmɨtɨrɨkaɨye: “'Iya tukaritsie yuwaɨkawatɨ mepuxuaweni teɨteri, yɨkɨ memɨte'uniuka yunaitɨ, hipatɨ nuiwarite yunaitɨ, hikɨ xeime huriyu tewiyari kamixaya tetsimeyaritsie mekawɨreme mɨpaɨ mekatenitahɨawikuni: Neuxei tepɨmatsi'anuteɨta. Mɨpaɨ tepɨtehetima kename Kakaɨyari xehamatɨa 'uyeika”».
ZEC 9:1 'Ikɨ, kemɨtiyɨni niukiyari kanihɨkɨtɨni Yawé kemutayɨ, Karɨraki kwieyari hetsiemieme kanihɨkɨtɨni meta Ramatsiku. Yurikɨ Yawé teɨteri kwi kaniwataxeiyani metatsiere yunaime 'Ixaheri nuiwarimama,
ZEC 9:2 meta 'auriena mukuma Kamati kanitaxeiyani, metatsiere Tiru, Tsiruni mame, tsepa mɨkɨ kwinimieme memɨtemaiwawe.
ZEC 9:3 Tiru kiekatari yukiekari kuraruyari 'e'atitewame meputawewi, pɨrata mepukuxeɨri tumuanari mɨhɨkɨtɨni hepaɨ, meta huru haxu kaye 'utɨa mieme mɨhɨkɨtɨni hepaɨ.
ZEC 9:4 Peru Ti'aitame pɨtiwanawairieni wapiinitɨarika, haramaratsie kaneikaxɨrimɨkɨ tita mɨtiwaxikutɨriya, meta tai kanitixɨtsitɨamɨkɨ.
ZEC 9:5 'Atsikaruni kiekatari mepixeiya, hikɨ waɨkawa mepɨtimamani, Kahatsa kiekatari waɨkawa mepɨteka'eniexɨani, meta yaxeikɨa mepɨyɨni 'Ekuruni kiekatari kepauka kememɨteta'ikwewakai yamɨkatiyɨni. Kahatsa kiekatari ti'aitame mepɨnawaiyarieni, meta 'Atsikaruni kiekatari mepakumawere.
ZEC 9:6 Teɨteri memɨka'upapa 'Atsiruri kiekariyaritsie mepɨyutikiitɨani, meta ne piritsiteutsixi kememɨteyuti'ɨre nepɨwanawairieni.
ZEC 9:7 Wateta nepɨwanawairieni wai muxuxure, meta 'ikwai mɨka'itiya. Meta piritsiteutsixi yayupaɨmetɨ mepɨyuhayewa takakaɨyari hetsiemieme, Kura kwieyaritsie kuyaxi tewa'aitɨwamete mepakɨne, meta 'Ekuruni kiekatari kewutseutsixi wahepaɨ me'anetɨ mepakɨne.
ZEC 9:8 Hikɨri ne netuki nepɨta'ɨwiya xewitɨ mɨkaheutahakenikɨ meta xewitɨ mɨkahewayeyeikanikɨ. Hatsuakuri xewitɨ mɨtatsi'aye'unie pɨkawaka'una neteɨterima, karikɨ hikɨri ne nekatinita'ɨwiyani.
ZEC 9:9 Waɨkawa keneyutemawieka, neniwe 'uka Tsiyuni. Keneutahiwani temawierikakɨ, neniwe 'uka Kerutsareme. Neuxei, mana pamie 'ahepa meti'aitɨwame, heitserie yamɨtikamie, tiyuwikweitsitɨwame meta mariwetɨ mɨkahayuyeitɨwa. 'Akanamieni puxutsie 'anakaitɨ, puxu temaikɨ hetsie, puxu 'ukaratsi nu'ayatsie.
ZEC 9:10 'Epɨrahini kaxetamama kuyaxa mieme pukumaweriya meta kawayutsixi Kerutsareme miemete. Tupite kuyaxa miemete pɨtimura, hikɨ nuiwarite memɨyuxewinikɨ niukiyari pɨwataxatɨani. Pɨtita'aita haramaratsie ka'atɨkaime meta tapa haramaratsie paitɨ ye'atɨkaime, 'Eupɨrate hatuxameyaritsie tsutɨme 'atsita kwie manu'axe paitɨ.
ZEC 9:11 'Ekɨta, tɨratu nemuwewikɨ nexuriyakɨ 'ahamatɨa nepɨwaxɨna putsu muyewakita memati'u 'ahetsɨa miemete memanutaxɨriya.
ZEC 9:12 Xekenehu yukiekari 'aixɨa mɨrekukurarutuiyarietsie, xe'anutaxɨriyatɨ xemɨta'ikwewakai, karikɨ hikɨ mɨpaɨ nekanaineni mɨpaɨ xemɨtemaikakɨ nekatinixepitɨamɨkɨ hutakɨa tita xemɨteheuyehɨa.
ZEC 9:13 Kura netupi hepaɨ nekanikuha'aritɨamɨkɨ, meta 'Epɨrahini ne'ɨrɨ nekanayeitɨamɨkɨ. Tsiyuni, 'aniwema nepɨwayuitɨani, Kɨretsiya kiekatari waniwema memɨwatakwinikɨ, yumemiwame 'ixiparaya nepɨmatsihayeitɨani.
ZEC 9:14 Yawé matsiɨkɨtɨ payuyeitɨani wahetsie, meta 'ɨrɨteya mimierɨkari hepaɨ 'anenetɨ payekɨne. Yawé naimekɨmɨyɨwe pitahɨtsieni 'awa, hikɨ kanayeyeimɨkɨ 'eka mɨtɨrɨkaɨye tatsutɨa miemetsie yewetɨ.
ZEC 9:15 Yawé Naimekɨmɨtɨrɨkaɨye pɨwa'ɨwiyani yuteɨterima, mɨkɨ naime mekanititarakuni tetexi kɨmana memɨtituaxienikekai. Kwinie mepɨte'uhiwani winukɨ memɨtarɨweka hepaɨ, xuriyakɨ mepeu'ɨwatɨkani tekɨxi tukita mieme hepaɨ, meta mawari taiyame 'awateya hepaɨ.
ZEC 9:16 'Iya tukaritsie Yawé Kakaɨyari yuteɨterima puwatawikweitsitɨani muxatsi wahepaɨ, hikɨ Yawé kwieyatsie meputixawatɨreni tetexi witsimɨ'anene kuruna hetsie matei hepaɨ.
ZEC 9:17 'Aixɨa pɨti'aneni meta witsipɨti'aneni naitɨ. Tɨriku temari metɨrɨkawime puwarayeitɨani, meta kaxie winuyari mɨhekwa 'ukari 'ɨimarixi puwatemawieritɨani.
ZEC 10:1 Yawé xekeneutawawiri mɨkawiyekɨ witarita. Mɨkɨ kanihɨkɨtɨni hai mɨyɨyɨwi mɨtiwewiwa meta wiyeri meyenɨ'awa. Mɨkɨ kanihɨkɨtɨni yunaime teɨteri wahetsiemieme kwiepa tupiriyate mɨtiutinenetɨwa.
ZEC 10:2 Kakaɨyarixi memɨwewiyatɨka 'itarikakɨ mepɨtekuxata, temaiwawemete 'itarika mepɨteheinɨtsa, mepɨtekuxata 'itarikakɨ kememɨtenieritɨarie meta kememɨteyɨnɨtɨwa pɨtiyakɨ. 'Ayumieme xeme xepeuyexɨrie muxatsi memɨkatehekakutsiyari wahepaɨ.
ZEC 10:3 Nepɨha'a tehɨwemete wahepaɨtsita, nepɨwa'uximatɨani mɨkɨ memanuyetei. Yurikɨ Yawé Naimekɨmɨtɨrɨkaɨye Kura kwieyaritsie kiekatari kaniwa'ɨwiyani, mɨkɨ muxatsimama mekanihɨkɨtɨni, 'arike yukawayutsixima memɨtɨrɨkawi kaniwarayeitɨamɨkɨ kepauka muyutamieni.
ZEC 10:4 Kura hetsie mepɨyekɨne tete 'itsikina mieme meta kɨye 'ixuriki kiyari mukuhanani, tupi kuyaxa mieme meta yumɨiretɨ te'aitamete.
ZEC 10:5 Meyuxewitɨ yunaitɨ memɨte'ayu'iwa mepɨhɨkɨtɨni meyukwitɨwetɨ mepɨte'ayu'iwani kaye'utɨma muhaxuyatsie, kawayutsixi wahetsie memutei mepɨwaranakaxɨrɨwani, Yawé wahamatɨa muyeikanikɨ waparewietɨ.
ZEC 10:6 «Ne Kura nuiwarimama tɨrɨkariya nepuwapitɨani meta nepɨwatawikweitsitɨani Kutse nuiwarimama. Nepɨwarutinenimayataxɨ hikɨ 'ayumieme nepuwarakunuitɨani. Wa'atɨtɨ hatsuaku nepɨkatiwaruku'eiri nepɨ'aneni, Ne Yawé nemɨhɨkɨkɨ wakakaɨyari, nepuwata'eiya.
ZEC 10:7 'Epɨrahini kiekatari kuyaxi memɨte'ayu'iwa wahepaɨ mepɨ'aneni, wa'iyari puyutemamawieka winu memanu'ieni hepaɨ. Waniwema kepauka memɨwaxeiya mekaniyukatemamawikuni, wa'iyari puyutemawieka Yawé hetsiemieme.
ZEC 10:8 Ne nepuwatahɨawe hikɨ nepuwakuxeɨrieni. Kepauka nemɨwatawikweitsitɨani netinetuame, meyumɨiretɨ mepakɨne meripai hepaɨ.
ZEC 10:9 Tsepa nemɨwareutaxɨriexɨa hipame teɨteri watsata, 'ateewa paitɨ me'u'uwatɨ mepɨnetsihaye'erieni. Tsepa muwa meme'uwakai yuniwema yunaitɨ, mekani'axɨakuni yukwietsie.
ZEC 10:10 'Ekipitutsie nepɨwarayewitɨni, metatsiere 'Atsiriya kwieyaritsie, Karaha kwieyaritsie nepɨwa'atɨani meta Riwanu hɨriyaritsie, 'akuxi hipatɨ hakewa memetiyaxe kwie hauyewetɨ kanayeimɨkɨ.
ZEC 10:11 Haramara kayuwatɨ mɨkatimatsie mepɨkɨne, ne peru hamewari kayuwatɨ nepɨpitɨani, meta Niru hatuxameyari 'amatiyewa pakawani. 'Atsiriya kemɨtiyuta'ɨre nepeitiparitɨani, meta 'Ekipitu kemɨti'aita nepikumaweriya.
ZEC 10:12 Netɨtɨ nepɨhɨkɨtɨni nemɨwatɨrɨkariyani, hikɨ mɨkɨ mepuhuni nekɨmana»,
ZEC 11:1 Riwanu hɨriyari, keneupitɨa tai 'akariuxa mɨtitaiyakɨ.
ZEC 11:2 Keneutatsuakani 'ekɨ, huku kɨyeyari, kariuxa kɨyeyari matixɨriyakɨ meta kɨyexi mumamariwawekai matixɨrikɨ. Xekeneutitsuanani, tuaxa Watsani miemete. Mukumaweriyariekɨ kɨyexi wawemete.
ZEC 11:3 Xekeneu'eni muxatsi wahɨwemete watsuari, wa'ɨxa witsimɨtiu'anekai kanakuxɨtsitɨarieni. Xekeneu'eni mayetsi watsuari, Kurutani muweritsie 'ɨtsi 'amayetsuikai makumaweriyariekɨ.
ZEC 11:4 Mɨpaɨ kanaineni Yawé nekakaɨyari: «Keniwa'ɨwiyani muxatsi kemɨ'ane 'ari memɨyetuiya memɨkwi'iwakɨ.
ZEC 11:5 Kemɨ'ane memɨwanane mekaniwakwika mekawanenimayatɨ, meta kemɨ'ane memɨwatua mɨpaɨ meputiyuane: “'Aixɨa ke'itɨarieka Yawé, 'ari xiku nepatɨa”. Memɨwahɨtɨtɨ nenimayatsika mepɨkahexeiya wahepaɨtsita mieme.
ZEC 11:6 'Ayumieme 'ariri nepɨkawatinenimayata 'ikɨ kwieyaritsie memɨkiekatari —mɨpaɨ kanaineni Yawé—, pɨta nekaniwayetuamɨkɨ wa'aurie kiekatari wahetsɨa meta tiwa'aitɨwame hetsɨa. Tsepa wakwieyaritsie memɨtetahaxɨa meteyuniyatɨ, ne wahetsie nepɨkatanuani».
ZEC 11:7 Hikɨ newahɨnetɨ nekanayani muxatsi memɨkwi'iwakɨ memɨ'ayumiemetetɨkai. Hutame tihɨweme 'itsɨya nekaniuti'ɨni: xeime 'Aixɨa Mɨtiuka'iyari nekatiniuterɨwa, xeimeta Memɨyunɨ'ɨ, hikɨ newa'ɨwiyatɨ nepatɨa muxatsi.
ZEC 11:8 Kwitɨwa xeimetseritsie nepɨwaranayexɨri yuhaikame muxatsi wahɨwemete. Peru neputi'uxixɨ muxatsi wahekɨ, mɨkɨta muxatsi nekɨmana yaxeikɨa meputi'uxixɨ.
ZEC 11:9 'Ayumieme mɨpaɨ nepɨtiwarutahɨawixɨ: «Neri xehɨweme nepɨkahayani. Kehate xemɨkwini tsepatsɨ xemukwi, kehate xemɨkwi'iwa, tsepa xemukwi'iwaxɨ, kemɨ'aneta memɨyuhayewa, tsepa memɨyutikwai».
ZEC 11:10 Hikɨ 'itsɨ ne'utikweka 'Aixɨa Mɨtiuka'iyari nemɨtiterɨwaxɨ, nekanenumura. Mana memɨtanenierekai mɨpaɨ memɨtehetimanikɨ kename Kakaɨyari tɨratu nuiwarite wahamatɨa kemɨrexeiyakai 'enumurakai.
ZEC 11:11 'Ana tukaritsie kwitɨwa tɨratu kaneutipare, muxatsi wanawemete memɨnetsixeiyakai mɨpaɨ mekatenetimani kename Yawé niukieyatɨkai.
ZEC 11:12 Hikɨ mɨpaɨ nekatiniwarutahɨawe: «Xɨka 'aixɨa 'aneni xehepaɨtsita, xekeneteneupitɨa ne'uximayatsikakɨ, yatɨ pɨtikatixaɨ, tsepa xekena'ɨtɨ». Mekaneteniupitɨani xeitewiyari heimana tamamata pɨrata tuminiyarikɨ.
ZEC 11:13 Kenemɨtiupitɨarie 'etsipupaɨmekai. Hikɨ Yawé mɨpaɨ kanetiniutahɨawe: «Keneyetua tepɨa mɨtikwaxiya hetsɨa». Hikɨ pɨrata tuminiyari nene'ɨni xeitewiyari heimana tamamata, nekaneiyetuani tewi mitikwaxiya hetsɨa Yawé tukita.
ZEC 11:14 Hikɨ nekanenumurata hutarieka mieme 'itsɨ Memɨyunɨ'ɨ nemɨtiterɨwaxɨ, mɨpaɨ mɨtimatsiɨkɨnikɨ Kura 'Ixaheri hamatɨa kememɨteyuxewikai hikɨri mepeutaxɨriyaxɨakai.
ZEC 11:15 Yawé hikɨ mɨpaɨ kanetiniutahɨaweta: «Hikɨta 'iya muxatsi wahɨwemete memɨka'u'iyari wahepaɨ ketineuyukemaritɨa,
ZEC 11:16 karikɨ ne xeime muxatsi wahɨweme nekananukakemɨkɨ 'ikɨ kwieyaritsie, mɨkɨ pɨkayu'iyaritɨaka muxatsi memɨkwixime wahetsiemieme, meta pɨkawatiwauni 'etsimemɨpepe, meta pɨkawati'uayemani memɨti'ɨkamɨrike, meta 'aixɨa memɨ'anene pɨkatiwamini, matsi pɨwatikwani kemɨ'ane memɨwaiyatɨka meta wakarutsa panutihɨnaxɨani».
ZEC 11:17 Xɨa'ui tihɨweme nitixaɨtɨkɨ mɨkatiyunaki'erie mɨwaruku'eiri yumuxatsima. 'Ixipara pewiteni mamaya, meta hɨxieya tserietana mieme nawaxakɨ ke'uyetsekieni. Mamaya kayuawetɨ ke'ayani, meta hɨxieya tserietana mieme, kanieretɨ ke'ayani.
ZEC 12:1 'Ikɨ kemɨtiyɨni niukiyari Yawé niukieya kanihɨkɨtɨni, 'Ixaheri hepaɨtsita mieme. Mɨpaɨ kanaineni Yawé, muyuawi munetɨa, kwie tenariyari mukayatsaxɨ, meta tewi tukari 'iyayari mupitɨa:
ZEC 12:2 «Kerutsareme tekɨxi nepayeitɨani puwatitarɨwaitɨani yunaime 'auriena kiekatari. Kura kiekariteyari warita kuyaxi mepayaxetɨkɨne meta Kerutsareme warita,
ZEC 12:3 meta yunaitɨ nuiwarite kwiepa memɨtama mepɨyunɨni memika'unakɨ. »'Iya tukaritsie Kerutsareme tete mɨkayukemarinɨa nepayeitɨani yunaime teɨteri wahetsiemieme. Kemɨ'ane memikuyuitɨani mɨkɨ pɨwatipɨna.
ZEC 12:4 »'Iya tukaritsie nepɨwatimariuta yunaime kawayutsixi meta memanatei meka'u'iyarime nepɨwarayeitɨani —mɨpaɨ kanaineni Yawé—. 'Ana nepɨwa'ɨwiyani Kura kwieyaritsie kiekatari, matsi mekaheuneniereme nepɨwarayeitɨani yunaime nuiwarite wakawayutsixima.
ZEC 12:5 Hikɨ Kura kwieyaritsie kiekatari wa'ukiyarima mɨpaɨ mepɨtiyuani: “Kerutsaremetari hakewa temeyu'awietani takakaɨyari kanihɨkɨtɨni, Yawé Naimekɨmɨtɨrɨkaɨye”.
ZEC 12:6 »Mɨkɨ tukaritsie Kura kwieyaritsie kiekatari wa'ukiyarima tɨɨ yayatsame mɨta'a nekaniwarayeitɨamɨkɨ 'ɨtsi tsata, yatɨni kɨye manuta'a 'itsanari tsata. Yutserieta miemete meta yu'utata miemete mekaniwatitaiyakuni teɨteri yu'aurie kiekatari, peru Kerutsareme tawari kiepa payani.
ZEC 12:7 Yawé kuyaxi Kuratsie kiekatari wakimeri kaniwatawikweitsitɨamɨkɨ, Rawiri nuiwarimama meta Kerutsareme kiekatari mariweme memɨkahayuyeitɨwanikɨ.
ZEC 12:8 »'Iya tukaritsie ne, Yawé, Kerutsareme kiekatari wahetsie nepɨtanuani. Mana kiekame yemekɨ mɨkatɨrɨkaɨye Rawiri hepaɨ pɨtitɨrɨkaɨyeni, meta Rawiri nuiwarimama Kakaɨyari hepaɨ mepɨ'aneni, niuki tuayame Yawé hetsɨa mieme hepaɨ teɨteri muwaruwitɨxime.
ZEC 12:9 »'Iya tukaritsie nepuwaka'unani yunaime nuiwarite kemɨ'ane Kerutsareme memɨmietɨweni.
ZEC 12:10 Rawiri nuiwarimama wahetsie meta Kerutsareme kiekatari nepɨwapituani 'iyari mɨtiyukanenimaya meta nenewierikɨ mɨ'ayumieme, hikɨ 'ana mepɨnetsixeiya. Kemɨ'ane pitsikakɨ memutse hetsiemieme mepuyukahiwerieni, yuniwe matɨari mieme memutatɨmaiya hepaɨ mepɨteyuhiwerieka.
ZEC 12:11 »'Iya tukaritsie Kerutsareme kiekariyaritsie waɨkawa hiwerika puxuaweni, Harari-Ximuni hetsiemieme kemɨtiutitsuaritɨre hepaɨ Mekiru makuweritsie.
ZEC 12:12 Naitsarie 'ikɨ kwieyaritsie kiekatari mepuyuhiwerieka, yuxexuitɨ 'iwamarixi kememɨyukupapaɨme. »Rawiri nuiwarimama meta wa'ɨitama, Natani nuiwarimama meta wa'ɨitama,
ZEC 12:13 Rewi nuiwarimama meta wa'ɨitama, Tsimi nuiwarimama meta wa'ɨitama,
ZEC 12:14 meta hipatɨ 'iwamarixi kememɨyukupapaɨme meta yaxeikɨa wa'ɨitama.
ZEC 13:1 »'Iya tukaritsie haixa kaneuyepierimɨkɨ mɨkɨkɨ ke'axamemɨte'uyuri memɨhauxinarienikɨ meta memɨ'itiyanikɨ Rawiri nuiwarimama meta Kerutsareme kiekatari.
ZEC 13:2 »'Iya tukaritsie kakaɨyarixi memɨwewiyatɨka kememɨtetetewa nepikumaweriya, hatsuaku tawari me'ayexeiyarietɨ mepɨka'akɨne —mɨpaɨ kanaineni Yawé Naimekɨmɨtɨrɨkaɨye—. Metatsiere nepɨwakumaweriya Kakaɨyari niukametemama memɨyuxatakai meta 'iyari mɨka'itiya mɨwanɨkai.
ZEC 13:3 Xɨka 'akuxi xewitɨ Kakaɨyari niukame yuxatatɨ tixatamɨkɨni, paapamamatɨtɨ mɨpaɨ mepɨte'itahɨawe: “'Ekɨ Yawé hetsiemieme pepɨtiku'itawa. 'Ayumieme 'ekɨ pekanimieriemɨkɨ”. Hikɨ Kakaɨyari niukameya muyuxatakaikɨ, paapamamatɨtɨ mepitseni mepimieni.
ZEC 13:4 »'Iya tukaritsie Kakaɨyari niukametemama mepɨyutitetewiya kemɨtiyɨni kememɨtenieritɨarie hepaɨtsita. Hipameri mepɨkatewa'itaiya nawi kamixayari me'anakatɨkɨtɨ,
ZEC 13:5 matsi yunaitɨ mɨpaɨ mekaniutiyuanekuni: “Ne Kakaɨyari niukameya nepɨkahɨkɨ, ne nemuka'etsa nekanihɨkɨtɨni. Temaikɨyaritɨtɨ ne, mana kwiepa nekatini'uximayaka”.
ZEC 13:6 Xɨkata xewitɨ mɨpaɨ tiwaruta'iwawiya: “¿Ketitayari 'amamatsie peraxitekietɨka?”, mɨkɨ mɨpaɨ kanitayɨmɨkɨ: “Nehamikuma wakie neheyeikatɨ mɨya nepɨranuyetɨa”».
ZEC 13:7 Mɨpaɨ kanaineni Yawé Naimekɨmɨtɨrɨkaɨye: «'Ixipara, kenanukukexi, nemuxatsi wahɨweme kenaye'unietɨ, kenaye'unietɨ tewi 'aixɨa nemɨtimate. Muxatsi wahɨweme keneumi'a memɨtaxɨriexɨanikɨ muxatsi hikɨ neta muxatsi 'etsimemɨpepe nepɨtiwakwinitɨani».
ZEC 13:8 Mɨpaɨ kanaineni Yawé: «'Ikɨ kwieyaritsie kiekatari mepayehaikariyarieni me'ayehutatɨ mekanikwi'iwakuni, hairieka miemete mekaniyuhayewakuni.
ZEC 13:9 Peru mɨkɨ memuyuhayewaxɨ taipa nekaniwakayatsamɨkɨ, 'aixɨa nepɨwayurieni pɨrata ke'aixɨa mɨ'itɨariwa taipa hepaɨ, nepɨwata'inɨata huru taipa kemɨti'inɨatsiwa hepaɨ. Hikɨ 'ana menetsi'ayexeiyatɨ mepakɨne neta nepɨwata'eiya. Ne mɨpaɨ nepɨtayɨni: “Mɨkɨ mepɨneteɨterima”, mɨkɨta mɨpaɨ mepɨtiyuani: “Yawé takakaɨyari kanihɨkɨtɨni”».
ZEC 14:1 »Kerutsareme. Tukari kanaye'amɨkɨ Yawé yahainekaku, kepauka 'apiinite 'akaye'utɨma mɨtitapiyaxɨanitsie.
ZEC 14:2 Nekaniwayuitɨamɨkɨ yunaime nuiwarite 'ekɨ memɨmatsitamienikɨ. 'Akiekaritsie mekaneutahaxɨakuni, piinite kiita mɨrayepitɨka mekateninawakuni meta kiekatari wa'ɨitama mepɨwatinanaimani. 'Ateɨterima hixɨata me'atɨ mepanuhapanieni xeime kwieyaritsie, peru hipatɨ xeikɨa mepɨyuhayewa 'ahetsɨa.
ZEC 14:3 Hikɨ 'ana Yawé payeyani, kaniwatakwimɨkɨ mɨkɨ nuiwarite, kepauka kuyaxa muyutamemiwa hepaɨ.
ZEC 14:4 »Mɨkɨ tukaritsie Yawé Huriwa mati'u yemuriyaritsie kanitakexɨamɨkɨ, Kerutsareme 'aurie mekatsie tau manatineika hepatsie, hikɨ Huriwa mati'u yemuriyari hixɨata kanitsanimɨkɨ tau kemɨtiuyeika mɨpaɨ katinitsanimɨkɨ hutatɨ kanayexɨrimɨkɨ, xewitɨ tayeta kanitayunimɨkɨ xewitɨta tatsutɨa, hixɨapa waɨkawa 'ayeweritɨ kanayeimɨkɨ.
ZEC 14:5 Hikɨ xeme xekaniyuta'unakuni mayeweritsie, karikɨ mɨkɨ 'Atsari mɨrakutewa paitɨ kaniye'atɨyeimɨkɨ. Xekaniyuta'unakuni kexemɨteyuta'unaxɨ kwie mutayuatsie 'Utsiyaxi ti'aitakaku, Kura kwieyaritsie. Hikɨ 'ana Yawé kaninuamɨkɨ takakaɨyari, hetsɨana miemete memɨpatsie yunaime warawitɨtɨ.
ZEC 14:6 »Mɨkɨ tukaritsie hekɨariya pumaweni meta pɨka'uhaɨtɨni.
ZEC 14:7 'Ana mɨkɨ tukari yɨkɨ pɨ'aneni, Yawé xeikɨa mimate: tukari pɨkahexeiyani meta tɨkari, karikɨ kepauka taikai mayani, hekɨariya yaxeikɨa puxuaweni.
ZEC 14:8 »'Iya tukaritsie haa tukari tiyupitɨwame puhaneni Kerutsareme 'ayeneikatɨ, puhaneni witarita meta tsepa mɨtitaxata, hixɨata'atɨ yapaɨmetɨ peukakukeni Harakuna Mɨmɨkitsie, hixɨata'atɨta yapaɨmetɨ peukakukeni haramara Meritexaniyutsie.
ZEC 14:9 Yawé katinita'aitamɨkɨ naime kwie kemɨyewatsie. Mɨkɨ tukaritsie Yawé yuxewitɨ xeikɨa Kakaɨyari pɨhɨkɨtɨni, mɨkɨ mɨyamɨtitewa xeikɨa pɨhɨkɨtɨni.
ZEC 14:10 »Kehewa mɨtiyetewatsie 'atsita Ximuni mɨtiyetewatsie 'uyenieretɨ, Kerutsareme hetɨa meukayunetsie, mɨkɨ kwieyari naitɨ 'akuweritɨ kanayeimɨkɨ. Matsi Kerutsareme yuyemuritsie pɨyuhayewani, yaxeikɨa pɨreukumaka, ye'atɨkaitɨ Wenikamini 'itupariyari manuwietsie meta Mexɨakame mɨtitewa 'itupari manuwietsie, meta 'itupari 'Itsikina mɨtitewa manuwietsie ye'atɨkaitɨ, metatsiere Kananeri tuxiyuyari manuwe ye'atɨkaitɨ 'atsita kaxie pɨname ti'aitame tipiinieya matineniere paitɨ ye'atɨkaitɨ.
ZEC 14:11 Kerutsareme tawarita kiepa kanayeimɨkɨ, kayuwatɨ mepu'uwani, meta hatsuakuri pɨkaka'unarieni.
ZEC 14:12 »'Ikɨ kanihɨkɨtɨni 'uximatɨarika Yawé miyetuani kɨmana mɨtiwakwinitɨani nuiwarite kemɨ'ane Kerutsareme memutami: Me'ayeyuyurikaku wawaiyari pɨkapɨne, wahɨxite pɨtipɨne 'ayetetɨ wahetsie, meta waneni pɨtipɨne wateta.
ZEC 14:13 'Iya tukaritsie Yawé waɨkawa memɨtimamanikɨ puwapitɨani. Yunaitɨ me'ayuye'unietɨ mepakɨne, mepɨyutikwini yu'iwamatɨtɨ.
ZEC 14:14 Metatsiere Kura kwieyaritsie kiekatari mekaniyutakwikuni Kerutsareme kiekariyaritsie, hikɨ katinikuxeɨriyamɨkɨ yunaime hurawatari nuiwarite wapiinite mɨraye'atɨka, meta waɨkawa huru meta pɨrata meta kemarite.
ZEC 14:15 Kwiniya 'etsiwatɨkaku mɨpaɨ 'anetɨ pɨwata'axiyata kawayutsixi meta muratsixi, kameyutsixi meta puxuri, meta yunaitɨ tewaxi mɨkɨ mematiteitsie memu'uwani.
ZEC 14:16 »Hikɨ kemɨ'ane memutawikwei yunaitɨ nuiwarite Kerutsareme memutami, mepeta'axeni xeiwiyari 'anuyeyeikakaku Ti'aitame hɨxie memɨkatunuma'unikɨ, Yawé Naimekɨmɨtɨrɨkaɨye, meta Xamaru 'ixɨarariyari memɨwewienikɨ.
ZEC 14:17 Xɨka xewitɨ kiekari kaheuyani Kerutsareme Ti'aitame hɨxie ka'ukatunumakeni, Yawé Naimekɨmɨtɨrɨkaɨye hɨxie, mɨkɨ kiekaritsie pɨkahekawiye.
ZEC 14:18 Xɨka 'ekipitutari mekaheukɨne, mɨkɨta yaxeikɨa mepɨkakawiyerieni. Yawé penunɨ'ani kwiniya mɨtiwakwinitɨanikɨ nuiwarite kemɨ'ane memɨkahu Xamaru 'ixɨarariyari memɨwewienikɨ.
ZEC 14:19 Mɨpaɨ pɨtikwinitɨarieni 'Ekipitu meta yunaitɨ nuiwarite kemɨ'ane Xamaru 'ixɨarariyari memɨkawewiyu.
ZEC 14:20 »'Iya tukaritsie kawayutsixi wakapana 'etsimupepe 'ipaɨ pɨre'utɨkani: “Mɨpatsie Yawé Hetsie Mieme”. Xarite ti'etsame Yawé tukita mieme mɨkɨ pɨpatsietɨkani watsute 'amɨnene tewaxi mematikwikwiwa hɨxie mɨtitei hepaɨ.
ZEC 14:21 Naitɨ xarite Kerutsareme mieme meta Kura kwieyaritsie miemete pɨpatsietɨkani Yawé Naimekɨmɨtɨrɨkaɨye hetsiemieme, hikɨ kemɨ'ane mana mɨtimawamie mɨkɨ yapaɨmeme panuhapani hikɨ muwa pɨreka'etsa. 'Ana mɨkɨ tukaritsie tetuayameteri mepumaweni Yawé Naimekɨmɨtɨrɨkaɨye tukita».
MAL 1:1 'Ikɨ niuki kemɨtiyɨni niukiyari kanihɨkɨtɨni Yawé niukieya, Marakiyaxi kemɨtiutaxatɨa 'ixaheritsixi mɨpaɨ mɨtiwataxatɨanikɨ.
MAL 1:2 Yawé mɨpaɨ kanaineni: «Ne nekanixenaki'erieka». «Xemeta mɨpaɨ xeputiyuane: “¿Kehepaɨ petatinaki'erie?” »'Etsahu kanihɨkɨtɨkaitɨni Kakuwu matsikaya. Mɨyatɨtɨ Kakuwu pɨta nekaniutanaki'erieni,
MAL 1:3 matsi 'Etsahu nekaniuti'uxiwe'erieni meta hɨritsie manuyeikakai makumawe nekanayeitɨani, hikɨ kwieya yeutari memayu'eririya nekaniwayetuirieni».
MAL 1:4 'Erumi mɨpaɨ kaniutaineni: «Tsepanetɨ temuka'unarie, tawarita mana tekanitsutɨakuni tetakiitɨatɨwetɨ». Matsi Yawé Naimekɨmɨtɨrɨkaɨye mɨpaɨ kanaineni: «Xeme tawari yukiekari xɨka xe'anukuketɨani ne tawarita nekanika'unamɨkɨ. Xekwieyari 'axamɨ'itɨarie pɨtitewaka, teɨteri Yawé yuheyemekɨ mɨwaheka.
MAL 1:5 Xeme hekɨakamekɨ xekaninenierikuni, mɨpaɨ xekanitiyuakuni: “Yawé waɨkawamekɨ mariwame payuyeitɨa 'Ixaheri kwieyari kemɨreu'atɨka matsi humapaitɨ”.
MAL 1:6 »Yawé Naimekɨmɨtɨrɨkaɨye, mɨpaɨ katiniwarahɨaweni mawari wewiwamete: Nunutsi yupaapa kaneu'enieka meta ti'uximayatame yukutsiyari kaneu'enieka. Merikɨte ne xɨka nexe'ukiyaritɨni, ¿peru titayari yu'ukiyari hepaɨ xekanetexeiya? Merikɨte xɨka ne xekutsiyari nehɨkɨtɨni, ¿peru titayari xekutsiyari hepaɨ xekanetexeiya? Xeme tixaɨtɨ nekatihɨkɨtɨme xepɨnetsi'ayeitɨa. »Meta 'akuxi mɨpaɨ xete'utiyuane: “¿Kepauka kuta tixaɨtɨ pekatihɨkɨtɨme tepɨmatsihayeitɨa?”
MAL 1:7 »Tamɨ xeme nemawari taiyametsie 'ikwai mɨka'itiya xepɨte'atɨwa. »Meta 'akuxi mɨpaɨ xete'u'iwawa: “¿Kepauka mawari ka'itiyakame tepɨ'atɨa?” »Xeme mɨpaɨ xemutiyuanekɨ kename Yawé mexaya tixaɨtɨ katihɨkɨ.
MAL 1:8 Xeme tewaxi me'akɨkɨpeme xekaniwa'atɨwani mawari memayanikɨ, mɨpaɨ xepɨteku'eriwa kename mɨpaɨ 'axaka'ane, xepɨwamawa memɨ'ɨkatutuni meta memɨtekukuye, xeme mɨpaɨ xepɨteku'eriwa kename mɨpaɨ 'axaka'ane. ¿Tsiparatsɨ yukuwexinaruri mɨpaɨ 'aneme 'imikieri xekeneyetuiri? ¿Kamɨtsɨ tiyukatemawieni xekɨmana? ¿Kamɨtsɨ xenaki'erietɨ rayani? —mɨpaɨ kanaineni Yawé Naimekɨmɨtɨrɨkaɨye—.
MAL 1:9 »Hikɨri xekeneutawawiri Kakaɨyari mɨtatsitinenimayatakɨ. ¿Kamɨtsɨ mɨkɨ mawari mɨyamɨ'anenekɨ xetanaki'erienike xete'erie? —mɨpaɨ kanaineni Yawé Naimekɨmɨtɨrɨkaɨye—.
MAL 1:10 Yanepɨra'eriwakaku xewitɨ xeme netukita mɨreunanikɨ, yakɨ xeikɨa xemɨka'ikutaiyanikɨ tai nemawari taiyametsie mieme. Nepɨkayutemawie tɨma xehetsiemieme, meta xemawari xeime tɨma nepɨkatanaki'erieni —Yawé Naimekɨmɨtɨrɨkaɨye mɨpaɨ kanaineni—.
MAL 1:11 Karikɨ, nuiwarite watsata nekanayexeiyarieka, tau 'amɨranatineni 'atsita kepauka manukayune. Naitsarie 'ɨkwa witsimu'ɨa kanitaiyarieka meta mawari hɨkɨatɨ kaniwewiyaka nehetsiemieme, ne nemɨmariwekɨ nuiwarite watsata —mɨpaɨ kanaineni Yawé Naimekɨmɨtɨrɨkaɨye—.
MAL 1:12 Peru xeme nekapatsiekame xepɨnetsi'ayeitɨwa kepauka mɨpaɨ xemɨtiyuane kename nemexa ka'itiya meta kename ne'ikwai 'axa'anene.
MAL 1:13 Meta mɨpaɨ xeputiyuane: “Tepu'u'uxeri”. Meta xepɨnetsi'uxie —mɨpaɨ kanaineni Yawé Naimekɨmɨtɨrɨkaɨye—. ¿Kamɨtsɨ xeme newatanaki'erienike xete'erie tewaxi 'inawari, memɨ'ɨkatetutuni meta memɨtekukuye xemɨnetsi'atɨiriwa mawari memayanikɨ? —mɨpaɨ kanaineni Yawé—.
MAL 1:14 »'Axake'itɨarieka 'iya mɨtiyukwamana, xeime muxa 'uki 'aixɨa mɨ'ane hexeiyatɨ, xɨka ya'utayɨni kename 'iyetuani Yawé hetsɨa, 'ariketa mɨwitekie pɨta xɨka yetuani. Karikɨ ne ti'aitame mɨmariwe nekanihɨkɨtɨni, meta yunaime nuiwarite wahetsɨa nekanayexeiyarieka —Yawé Naimekɨmɨtɨrɨkaɨye mɨpaɨ kanaineni—.
MAL 2:1 »Hikɨri, xeme mawari wewiwamete 'ikɨ 'aitsika pɨxehetsiemieme.
MAL 2:2 Xɨka xekanetsihanu'enieni meta xɨka xekayuwaɨriya mariweme xemɨnetsi'ayeitɨani, xehetsɨa 'axamɨ'ane nepanunɨ'ani, ke'aixɨa nemɨxeyuriekai nepipata 'axanepɨxeyurieka. 'Ari matsi 'axanekanixe'uyurieni, xeme heitseriemekɨ xemɨkanetsi'ayexeiyakɨ —Yawé Naimekɨmɨtɨrɨkaɨye mɨpaɨ kanaineni—.
MAL 2:3 »'Ayumieme, nekaniwatatiemɨkɨ xenuiwari. Xehɨxita nepɨxe'anutawiwiriexɨani tewaxi mawari memakɨ xe'ixɨararipa miemete wakwita, meta hikɨ nepɨxehaku'itieni mɨkɨ kwita mame.
MAL 2:4 Hikɨ 'ana mɨpaɨ xekatenetimaikuni kename 'ikɨ 'aitsika nexeyetuiri, netɨratu Rewi hamatɨa nemiwewi mɨkaheuyewautsenikɨ —Yawé Naimekɨmɨtɨrɨkaɨye mɨpaɨ kanaineni—.
MAL 2:5 Netɨratu mɨkɨ wahamatɨa nepuwewi, tukari memexeiyanikɨ meta kayuwatɨ memexeiyanikɨ, 'ana mɨpaɨ nepɨtiwapitɨakai, meta tɨratu memɨnetsimakaxenikɨ pɨ'ayumiemetɨkai, hikɨ mɨkɨ mepɨnetsimakaxekai, meta waɨkawa mariweme mepɨnetsi'ayeitɨakai.
MAL 2:6 'Aixɨa 'anemekɨ mepɨtekuxatakai, hatsuaku 'axamɨti'ane wateta pɨkarayene. Nehamatɨa 'amepu'uwakai kayuwatɨ meta heitseriemekɨ, metatsiere hipame yumɨireme mekaniwarupata 'axamɨti'ane memɨkate'uweiyanikɨ.
MAL 2:7 »Mawari wewiwame niukieya 'aixɨa mɨti'ane waɨkawa katinexeiyani mɨtimaiwenikɨ, 'ayumieme teɨteri mekanikuwautɨweni mɨwata'ɨxatsitɨanikɨ, karikɨ mɨkɨ Yawé Naimekɨmɨtɨrɨkaɨye niukieya tuayame kanihɨkɨtɨni.
MAL 2:8 Peru neuxei xeme mɨkɨ huye xekaniuku'eirieni, meta xeme yu'ɨxatsikɨ yumɨireme xekaniwareuyexɨrieni, xeme tɨratu xepuku'eiri Rewitsixi wahamatɨa nemiwewi —Yawé Naimekɨmɨtɨrɨkaɨye mɨpaɨ kanaineni—.
MAL 2:9 Ne matsi, yanepɨtiuyuri xeme xemɨxani'eriwanikɨ meta tixaɨtɨ xemɨkate'eriwanikɨ yunaime teɨteri wahɨxie, ne'aitsikate xemuku'eirikɨ, hipame xeikɨa xepɨwakuxaxatɨwakai 'aitsikate».
MAL 2:10 ¿Tamɨ tanaitɨ tame xeime ta'ukiyari xeikɨa tekatehexeiya? ¿Yuxewitɨ xeikɨa Kakaɨyari katatiutawewi? ¿Ketitayaritsɨkamɨ tɨratu meripai kiekatari memiwewi kapatsiekame tete'ayeitɨwa kepauka teyu'iwamatɨ temɨteyu'itaiya?
MAL 2:11 Kura nuiwarimama 'axamepɨte'uyuri. 'Ixaheri kwieyaritsie meta Kerutsareme kiekariyaritsie 'axamekateniuyurieni: Hipame 'ukari mepɨwarutiwitɨ hipame kakaɨyarixi memɨwarayexeiya, mɨpaɨ meteyurietɨ tuki, Yawé minaki'erie, kapatsiekame mekanayeitɨani.
MAL 2:12 Kemɨ'ane tewi mɨpaɨ mɨtiyuriene, tsepa kemɨpaikɨ, Yawé Naimekɨmɨtɨrɨkaɨye 'Ixaheri kwieyaritsie ke'ekumaweriya, tsepanetɨ mawari mi'atɨiriwa.
MAL 2:13 'Ipaɨta xekateniyurieka xeme mawari taiyame Yawé hetsiemieme hɨxie kwinie xekateniutitsuanani, mɨkɨri mɨkaxe'eniekɨ meta xemawari mɨkanaki'eriekɨ, xemiyetuiriwa.
MAL 2:14 'Akuxita mɨpaɨ xete'u'iwawa, ¿titayarikuta? Yawé matsi yakatinimaika munierixɨ pɨhɨkɨ, 'ekɨ meta 'a'ɨya temaikɨyari pemitiwitɨ, pepiku'eiri tsepanetɨ 'aixɨa mɨtiuka'iyarikai mɨmatsiteɨtakai, 'a'ɨya hamatɨana tɨratu pemuwewi.
MAL 2:15 ¿Tamɨ Yawé xeiwaiyari katixe'ayeitɨa 'a'ɨya hamatɨa, xewaiyari meta xe'iyari? Meta ¿ketitayari tixe'utaxewiriyaxɨ? Mɨpaɨ xeteyuxewikaku xeniwema pɨwareuyehɨwa Kakaɨyari hetsiemiemete. 'Ayumieme yu'iyari xekene'ɨwiyani, yu'ɨitama xepɨkawaruku'e'eiriwani temariyari xemɨwarutiwitɨ.
MAL 2:16 Mɨpaɨ kanaineni Yawé, 'Ixaheri Kakaɨyarieya: «Ne xemuyuta'e'eiriwani pɨkanetsinake meta kemɨ'ane yu'ixuriki mɨtɨniriya yu'ɨya nanaimatɨ», Yawé Naimekɨmɨtɨrɨkaɨye kanaineni. 'Ayumieme yu'iyari xekene'ɨwiyani, yu'ɨitama xepɨkawaruku'e'eiriwani.
MAL 2:17 Yawé xeme xekateniuti'uxitɨani yuniukikɨ. 'Akuxita mɨpaɨ xete'u'iwawa: «¿Titakɨkuta tete'iti'uxitɨa?» Xeme mɨpaɨ xeputiyuane: «Yunaitɨ kemɨ'ane 'axamemɨteyurie 'aixɨa pɨtiwaxeiya Yawé, meta kaninaki'aka wahetsiemieme», meta mɨpaɨ xeputiyuane: «¿Hakewari Kakaɨyari kemɨtiheitserie yamɨtiyuriene?»
MAL 3:1 Yawé Naimekɨmɨtɨrɨkaɨye mɨpaɨ kaniutayɨni: «Ne neniuki tuayame nekananunɨ'amɨkɨ huye mukuha'aritɨanikɨ nehetsiemieme. Yapauka ti'aitame yutukitsie kaninuamɨkɨ kemɨ'ane xeme xemɨkuwautɨwe, tɨratu niuki tuayameya kaninuamɨkɨ, kemɨ'ane xeme waɨkawa xemeuyehɨwa».
MAL 3:2 Peru ¿kemɨ'ane pinewieni mɨkɨ tukari munuanitsie? ¿Kemɨ'ane hɨxiena mɨtakeni pɨyɨweni kepauka mɨkɨ mɨyuhekɨatatsie? Tai kemɨtitikwaxiya kemɨtiti'itiwa hepaɨ kani'anemɨkɨ, meta xapuni kemɨtitituriya hepaɨ.
MAL 3:3 'Apayerɨni pɨrata mɨtikwaxiya meta mi'itieni hepaɨ, rewitsixi kaniwa'itimɨkɨ, huru meta pɨrata kemɨtiti'itiwa taikɨ mɨpaɨ pɨtiwa'itieni. Hikɨ 'ana Yawé mawari mekani'atɨiriekuni kemɨtiheitserie,
MAL 3:4 metatsiere Kura meta Kerutsareme wamawari Yawé kaninaki'eriekamɨkɨ, meripaitɨ hepaɨ.
MAL 3:5 «Hikɨ ne nekaninuamɨkɨ nexetaxanetake. Ne nemunierixɨ nepaneyeitɨani memɨteyukewaiya wahetsiemieme, memɨwakumaɨwa kayu'ɨitama kayukɨnama, meta memɨte'itawa, teyu'uximayatsiriwamete memɨwakwamana, wiuraxi meta nutuite memɨwananaima, meta 'ateewa kiekatari heitserie memexeiyani memɨkawapitɨa, ne 'etsiwatɨma mekanetsi'ayemakatɨ —Yawé Naimekɨmɨtɨrɨkaɨye mɨpaɨ kanaineni—.
MAL 3:6 »Ne Yawé, nepɨkanepata. 'Ayumieme xeme Kakuwu nuiwarimama, xepɨkaheuyehɨiyawawe.
MAL 3:7 Meripaitɨ xe'ukiyarima memu'uwakaitsie paitɨtɨ ne'aitsikate xepuku'eiri meta xepɨka'eye'atɨawawe. 'Ayumieme hikɨ nehetsɨa xekenanuaxɨa, neta xehetsɨa nekaninuamɨkɨ —Yawé Naimekɨmɨtɨrɨkaɨye mɨpaɨ kanaineni—. »Peru xeme mɨpaɨ xeputiyuane: “¿Kehapaɨtɨtɨri titayari tetehanuaxɨani 'ahetsɨa?”
MAL 3:8 »¿Kamɨtsɨ tiyɨwe tewi Kakaɨyari mɨtiunawatsirieni? Xeme xekaneteninawatsirietɨweni. »'Akuxita mɨpaɨ xete'u'iwawa: “¿Titakuta tematenawatsirietɨwe?” »Tamɨ tamamatatsie mieme xeime meta 'imikieri xeneteyetuiriwatɨ xepɨte'uhayewaxɨ.
MAL 3:9 Xeme —yunaitɨ 'ixaheritsixi— waɨkawamekɨ 'axaxekani'itɨariekakuni, netsɨ xekaneteninawatsirieka.
MAL 3:10 »Xekene'atɨa 'aixɨa 'anemekɨ tamamatatsie mieme xeime tukita muyuhayewanikɨ, mɨpaɨ 'ikwai kanixuawekamɨkɨ netukita. Mɨkɨkɨ xekeneneuta'inɨata —mɨpaɨ kanaineni Yawé Naimekɨmɨtɨrɨkaɨye—, xekaninenierikuni muyuawitsie wiyeri nekaneuyepimɨkɨ meta 'aixɨa nekanixeyurimɨkɨ waɨkawa yemekɨ 'anutiyakamekɨ.
MAL 3:11 'Utsikari nekaniwakwimɨkɨ, xe'etsari memɨkakɨmenikɨ meta kaxie haraweriyari 'aixɨa 'anemekɨ mukaxuxuawerenikɨ —Yawé Naimekɨmɨtɨrɨkaɨye mɨpaɨ kanaineni—.
MAL 3:12 Hikɨ yunaitɨ nuiwarite 'aixɨa xemɨ'itɨarie xeme mekatenixe'uterɨwakuni, xeme yukwieyari witsi'aneme xemexeiyanikɨ —Yawé Naimekɨmɨtɨrɨkaɨye mɨpaɨ kanaineni—.
MAL 3:13 »Xeme 'axaxekaniutiyuaneni nehepaɨtsita —Yawé kanaineni—. »'Akuxita mɨpaɨ xete'u'iwawa: “¿Kehepaɨ kuta 'axateputiyua 'ahepaɨtsita?”
MAL 3:14 »Xeme mɨpaɨ xekaniutiyuani: “Kakaɨyari xɨka 'ayexeiyani yakɨ xeikɨa pɨtiyu'uxitɨaka. ¿Tita teteha'iwa xɨka 'aitsikateyatsie yatetekahuni meta Yawé Naimekɨmɨtɨrɨkaɨye hɨxie te'u'uwani hiwerika kamixayari te'anakatɨtɨkaitɨ?
MAL 3:15 Hikɨri 'aixɨa memɨ'itɨarie tepɨtewaruterɨwani mariweme memayuyeitɨwa, 'axateyuruwamete xikutsixi mepakɨka meta Kakaɨyari memɨ'iwatɨwe mɨtiwakwinitɨanikɨ ni'atsimepɨkate'anuyekɨka”».
MAL 3:16 Hikɨ kemɨ'ane Yawé memayemakaxekai mekateniutixata, mɨkɨta kaniwaru'enieni kememɨte'uxa. Hikɨ hɨxiena xapatsie mekanayuka'utɨani kemɨ'ane Yawé memayemakaxe meta memeyexeiya.
MAL 3:17 «Tukari nepexeiyari kepauka mɨkɨ neteɨterima memakɨne yemekɨ —Yawé Naimekɨmɨtɨrɨkaɨye mɨpaɨ kanaineni—. Mɨkɨ nepɨwatinenimayata, tewi yuniwe kemɨtinenimaya ti'uximayatsiriekaku hepaɨ.
MAL 3:18 Xeme 'ana xetemaitɨ xepakɨne keyɨkɨmɨ'ane 'aixɨa memɨteyurie wahetsiemieme meta 'axamemɨteyurie, Kakaɨyari memayexeiya wahetsiemieme meta memɨka'eyexeiya.
MAL 4:1 »Neuxei, tukari kanaye'aximeniri, teeka ha'aritsietɨ hepaɨ 'anetɨ. Yunaitɨ memɨteyukatawe'erie meta 'axateyuruwamete xatsi hepaɨ mepɨ'aneneni, hikɨ mɨkɨ tukaritsie mekanititaiyariekuni wananari tɨma pɨkayuhayewa —Yawé Naimekɨmɨtɨrɨkaɨye mɨpaɨ kanaineni—.
MAL 4:2 Peru xeme matsi xemɨnetsi'ayemakaxe xehetsiemieme, tita mɨtiheitserie nehetsɨa miemekɨ xepɨhekɨariyarieni, mɨkɨ hekɨariyakɨ xepanayexɨrieni. Hikɨ xeme xetixɨnarieme, xekanayekɨnikuni xe'utitsukwakatɨ tsikerutsixi memɨxɨxɨni hepaɨ 'ɨxapa.
MAL 4:3 Mɨkɨ tukaritsie nemikuha'aritɨwatsie xeme 'axateyuruwamete xekaniwatiketsikuni, xe'ɨkate hetɨa tumuanari mepɨhɨkɨtɨni —Yawé Naimekɨmɨtɨrɨkaɨye mɨpaɨ kanaineni—.
MAL 4:4 »Muitsexi neti'uximayatsiriwame 'aitsikate kemɨraka'utɨa xekena'eriwani. Xekena'eriwani 'aitsikate meta 'inɨari niukiyarite nemɨxeyetuiri Huré hɨriyaritsie yunaime 'ixaheritsixi wahetsiemieme.
MAL 4:5 »'Ari neniukame 'Eriyaxi nekananunɨ'amɨkɨ mexi 'akuxi Yawé tukarieya ka'aye'aweni, mɨkɨ tukari mɨmariwe meta mumariwekare.
MAL 4:6 Mɨkɨ yakatiniyurimɨkɨ hipatɨ yuniwema wahamatɨa memɨyutaxewirekɨ meta hipatɨ yupaapama wahamatɨa, xɨka mɨpaɨ me'uyɨni nepɨka'ayeneniri kwie 'axamɨ'ane ne'ipitɨanike meta naime netika'unake».
MAT 1:1 'Inɨari kanihɨkɨtɨni 'ikɨ. Nuiwarite mekani'inɨarini, Ketsutsi Kɨritsitu kemɨ'ane mɨxiɨyarieyatɨkai. Rawiri kanitutsieyatɨkaitɨni, meta 'Apɨrahami:
MAT 1:2 'Apɨrahami, 'Itsahaki, kanipaapayatɨkaitɨni. 'Itsahaki, Kakuwu, pɨpaapayatɨkai. Kakuwu, Kura pɨpaapayatɨkai meta 'iwamama.
MAT 1:3 Kura, Paretsi meta Tsara pɨwapaapatɨkai meta Tamaxi pɨwamaamatɨkai. Paretsi, Hetsirumi pɨpaapayatɨkai. Hetsirumi 'Arami pɨpaapayatɨkai.
MAT 1:4 'Arami 'Aminarawi pɨpaapayatɨkai. 'Aminarawi Nahatsuni pɨpaapayatɨkai. Nahatsuni Tsarimuni pɨpaapayatɨkai.
MAT 1:5 Tsarimuni Wuhutsi pɨpaapayatɨkai meta Xahawi pɨmaamayatɨkai. Wuhutsi Huweri pɨpaapayatɨkai meta Xuti pɨmaamayatɨkai. Huweri Kitsahi pɨpaapayatɨkai.
MAT 1:6 Kitsahi Rawiri ti'aitame pɨpaapayatɨkai. Rawiri Tsarumuni pɨpaapayatɨkai, Huriyaxi mɨ'ɨyayatɨkaitsie meyexei.
MAT 1:7 Tsarumuni Xuwuhani pɨpaapayatɨkai. Xuwuhani 'Awiyaxi pɨpaapayatɨkai. 'Awiyaxi 'Atsa pɨpaapayatɨkai.
MAT 1:8 'Atsa Kutsapati pɨpaapayatɨkai. Kutsapati Kurami pɨpaapayatɨkai. Kurami 'Utsiyaxi pɨpaapayatɨkai.
MAT 1:9 'Utsiyaxi Kutami pɨpaapayatɨkai. Kutami 'Akaxi pɨpaapayatɨkai. 'Akaxi 'Etsekiyaxi pɨpaapayatɨkai.
MAT 1:10 'Etsekiyaxi Manatsexi pɨpaapayatɨkai. Manatsexi 'Amuni pɨpaapayatɨkai. 'Amuni Kutsiyaxi pɨpaapayatɨkai.
MAT 1:11 Kutsiyaxi Kekuniyaxi pɨpaapayatɨkai, meta 'iwamama kepauka waɨriyarika memehapanie Wawiruniyatsie paitɨ.
MAT 1:12 Mehehapanieka Wawiruniyatsie, Kekuniyaxi Tsaratieri pɨpaapayatɨkai. Tsaratieri Tsuruwaweri pɨpaapayatɨkai.
MAT 1:13 Tsuruwaweri 'Awihuri pɨpaapayatɨkai. 'Awihuri 'Eriyakimi pɨpaapayatɨkai. 'Eriyakimi 'Atsuxi pɨpaapayatɨkai.
MAT 1:14 'Atsuxi Tsaruki pɨpaapayatɨkai. Tsaruki 'Akimi pɨpaapayatɨkai. 'Akimi 'Eriyuri pɨpaapayatɨkai.
MAT 1:15 'Eriyuri 'Eriyatsaxi pɨpaapayatɨkai. 'Eriyatsaxi Matani pɨpaapayatɨkai. Matani Kakuwu pɨpaapayatɨkai,
MAT 1:16 meta Kakuwu Kutse pɨpaapayatɨkai, Kutse Mariya pɨkɨnayatɨkai, hikɨ Mariya hetsie kaniyenuiwa Ketsutsi, Kɨritsitu mɨtitewa.
MAT 1:17 'Ikɨ 'Apɨrahami hetsie memɨyekɨ nuiwarite tamamata heimana nauka xiɨyariyari mekaniyupaɨmekaitɨni Rawiri 'amuyeikakaitsie. Tamamata heimana nauka xiɨyariyari mepɨyupaɨmekai Rawiri hetsie memɨyekɨ Wawiruniya paitɨ memehapanietsie, meta tamamata heimana nauka xiɨyariyari mepɨyupaɨmekai, Wawiruniya paitɨ memehapanietsie Kɨritsitu putinuiwaxɨ.
MAT 1:18 Merikɨtsɨ mɨpaɨ katiniuyɨni kepauka Ketsutsi Kɨritsitu mutinuiwaxɨ: Mariya mɨmamayatɨkai Kutse matɨa mepɨyutiwitɨnikekai, peru mekayutiwitɨwetɨ 'akuxi, mɨkɨ kaniutihukata, 'Iyari Mɨtiyupata ya'ane 'ipitɨaku.
MAT 1:19 Kutse kɨnaya mayanikekai, mɨkɨ heitseriemekɨ yakatinikamiekaitɨni, peru pɨkayuwaɨriyakai mixanetanikɨ. 'Ayumieme pi'eirimɨkɨkai 'awie.
MAT 1:20 Merikɨtsɨ mɨpaɨ tiku'eriwakaku, hikɨ Ti'aitame hetsɨa mieme niuki tuayame kaniuxeiya yuheinɨtsita mɨpaɨ 'utaineme: «Kutse 'aku Rawiri pemɨnu'aya, pepɨkamaka Mariya pemɨtiwitɨnikɨ 'a'ɨya mayani, 'Iyari Mɨtiyupata ya'ane 'ipitɨaku, hetsiena pɨyeya 'ikɨ nunutsi.
MAT 1:21 'Ukitɨme pɨtiniweni, Ketsutsi pɨtitewaka, mɨkɨ yuteɨterima kaniwatawikweitsitɨamɨkɨ ke'axamemɨteyurie».
MAT 1:22 'Ikɨ naitɨ mɨpaɨ katiniuyɨni, maye'anikɨ tita mɨtixatakai Ti'aitame, Kakaɨyari niukameya mɨpaɨ 'utainekaku:
MAT 1:23 «Kamɨtsɨ 'ɨimari mɨyuxewi pɨtihukata, 'ukitɨme pɨtiniweni, 'Emanuheri xepɨte'iterɨwa» (mɨkɨ mɨpaɨ panuyɨne «Kakaɨyari tahamatɨa muyeika»).
MAT 1:24 Merikɨtsɨ Kutse yatiheinɨtɨ kananutaniere, mɨpaɨ katiniuyurieni kemɨtita'aitɨa Ti'aitame hetsɨa mieme niuki tuayame, kanitiwitɨni 'ɨyaya mayanikɨ.
MAT 1:25 Peru pɨka'ikumaɨwakai, 'arikeke yumexɨakame nunutsi 'utinuiwitɨakuke, hikɨ Ketsutsi pɨtiterɨwaxɨ.
MAT 2:1 Merikɨtsɨ Ketsutsi Wereni paitɨ hetinuiwaku Kureya kwieyaritsie, kepauka Herurexi mana mɨti'aitametɨkai. 'Ana yukwiepa meheyekɨneka temaiwawemete tayeta mepayenexɨa, kiekaritsie Kerutsareme mekaniu'axɨani,
MAT 2:2 mɨpaɨ me'utiyuatɨ: ―¿Hakewari peka Huriyutsixi teɨteriyari tiwa'aitɨwame metinuiwaxɨ? Tame xurawe tepexei 'anatineximekaku, tepu'axɨa nenewieri te'ipitɨanike.
MAT 2:3 Kepauka ti'aitame Herurexi mɨtiutamari kaniuyeha'ani, meta yunaitɨ Kerutsareme kiekatari.
MAT 2:4 Hikɨ yunaime kiekatari kaniwarukuxeɨrieni mawari wewiwamete tewa'aitɨwamete, meta 'inɨarikɨ memɨte'ɨkitametetɨkai, teɨteri watsata miemete yunaime, kaniwaruta'iwawiya hakewa metinuiwakekai Kɨritsitu.
MAT 2:5 Mɨpaɨ mekatenitahɨawe: ―Wereni paitɨ Kureya kwieyaritsie, mɨpaɨ mɨtiu'ɨtɨakaikɨ Kakaɨyari niukameya:
MAT 2:6 »“Peru 'ekɨ, Wereni, Kureya kwieyaritsie mukuma, kepemɨtinenixeiyarie te'aitamete Kura kwieyaritsie watsata, kanimariwani xekiekari. 'Ahetsɨa pɨyenuiwa ti'aitametɨtɨ, neteɨterima 'ixaheritsixi wa'ɨwiyame kanayeimɨkɨ”».
MAT 2:7 Hikɨ Herurexi temaiwawemete kaniwaruta'inieni 'awie. Kaniwaruta'iwawiya heitseriemekɨ kepauka muyuhekɨataxɨ xurawe.
MAT 2:8 Hikɨ kaniwarenɨ'ani Wereni paitɨ, mɨpaɨ tiwarutahɨaweka: ―Mana xekenehu, heitseriemekɨ xekeneti'iwau nunutsi hepaɨtsita. Kepauka xemeitaxeiya yaxekeneteneutahɨawi, manata ne neminenewiyamiekɨ.
MAT 2:9 Ti'aitame me'u'enieka mekanekɨne, kamɨtsɨ xurawe memexeiyakai 'anatineximekaku, mɨkɨ wahɨxie kaniumiekaitɨni. Heta'aka hakewa meyekatei nunutsi, heimana kaniuyeyerɨni.
MAT 2:10 Me'ixeiyatɨ xurawe kwini mieme mekateniyutemamawiekaitɨni yemekɨ.
MAT 2:11 Hikɨ kiita meheutahaxɨaka, nunutsi mekaniuxeiya Mariya mɨmaamaya hamatɨa, hikɨ me'utihɨxima'uka nenewieri mekanipitɨani. Yupiinite metewatipika, 'imikieri mekatenimini huru, 'ɨkwa witsimu'ɨa meta mixaxi.
MAT 2:12 Hikɨ yuheinɨtsita mete'utaxatɨarieka kename Herurexi hetsɨa tawari mekaheuhuni, xeime huyeyari 'utɨa pɨta me'uhutɨ yukwiepapai mekanakunuaxɨani.
MAT 2:13 Merikɨtsɨ mehekɨnekuri mɨkɨ, Kutse yuheinɨtsita Ti'aitame hetsɨa mieme niuki tuayame kaniuxeiya, mɨpaɨ katinitahɨawe: «Kenanukukexi, keniwaranuwitɨki nunutsi meta maamaya, 'Ekipitu paitɨ xekeneuyuta'una. Mana xekenekuteni, kepaukake yanemɨtayɨni. Herurexi nunutsi kanitiwaumɨkɨ 'imienike».
MAT 2:14 Hikɨ 'anukukeka Kutse, yɨwikɨta kaniwarewitɨni nunutsi meta maamaya 'Ekipitu paitɨ.
MAT 2:15 Mana mekanikutekaitɨni mexi Herurexi kamɨwekai. Mɨpaɨ katinaye'atɨarieni Ti'aitame kemainekai Kakaɨyari niukameya mɨpaɨ mainekaikɨ: «'Ekipitu kwieyaritsie neniwe nekaniutahɨawe».
MAT 2:16 Hikɨ kepauka mɨtiutamari Herurexi kememɨte'ikwamanaxɨ temaiwawemete, kwinimieme katiniuyeha'ani. Hikɨ katiniuta'aita tɨɨri memɨwakwinikɨ yunaime huta wiyari memɨkahɨtɨka 'akuxi, Wereni memɨtitekai meta naitsarie 'auriena memɨtitekai, kememɨte'itahɨawixɨ temaiwawemete tukari hepaɨtsita.
MAT 2:17 Hikɨ mɨpaɨ katinaye'atɨarieni Keremiyaxi Kakaɨyari niukameya kemutayɨkai:
MAT 2:18 «Xewitɨ pe'enierie Xama kiekariyaritsie 'utatsuatɨ yuheiwerietɨ kwinimieme, Xakeri putatsuaka yuniwema wahekɨ kayunɨtɨarinɨatɨ 'amemɨka'u'uwakɨri».
MAT 2:19 Merikɨtsɨ 'arike Herurexi 'umɨku, Kutse yuheinɨtsita kanixeiya Ti'aitame hetsɨa mieme niuki tuayame 'Ekipitu kwieyaritsie heyeikatɨ,
MAT 2:20 mɨpaɨ katinitahɨawe: «Kenanukukexi, keniwaranuwitɨki nunutsi meta maamaya 'Ixaheri kwieyaritsie kenemie. Mekanekwiniri mɨkɨ nunutsi memɨmiekukai».
MAT 2:21 Hikɨ 'anukukeka kaniwarewitɨni nunutsi meta maamaya, mana kaneta'ani 'Ixaheri kwieyaritsie.
MAT 2:22 Merikɨ tiutamarieka kename 'Arikerau ti'aitametɨkai Kureya kwieyaritsie yupaapa hetsiemieme Herurexi, peumakai mana mɨye'anikɨ. Mɨpaɨ Kakaɨyari katinitahɨawe heinɨtsitana, Karereya kwieyaritsie pɨta kenemie,
MAT 2:23 mana kiekari Natsareti mɨrakutewatsie kaninuani. Mɨpaɨ katinaye'ani Ti'aitame kemutayɨ, Kakaɨyari niukametemama yame'utiyuanekaku kename: «Natsarenu titewakakekai».
MAT 3:1 Merikɨtsɨ mɨkɨ tukaritsie Kureya kwieyaritsie Wani Ti'ɨyame kaninuani tikuxatatɨ makumawetsie,
MAT 3:2 mɨpaɨ 'utaitɨ: «Xeketeneuhayewa ke'axaxemɨteyurie, kanehuraniri Kakaɨyari kemɨtita'aita».
MAT 3:3 Mɨkɨ Wani kanihɨkɨtɨni, Kakaɨyari niukameya Kitsariyaxi hepaɨtsitana mɨpaɨ mɨraka'utɨa: «Xewitɨ makumawetsie mɨpaɨ pɨrehiwa: “Xekeneukuha'aritɨa Ti'aitame huyeya, xexeurawime huyeya xekeneutiwewi”».
MAT 3:4 Wani kemarieya kameyu huxarieyakɨ pɨwewiyakai. Nawikɨ kananayukuhɨakaitɨni meta pɨti'ikwaiyatɨkai tɨpuxi meta xiete yeuta mieme.
MAT 3:5 Hikɨ teɨteri mekani'axekaitɨni hetsɨana Kerutsareme kiekatari, yunaitɨ Kureyatsie kiekatari, meta Kurutani hatuxame tetsita kiekatari.
MAT 3:6 Mɨkɨ meyuhekɨatakaku 'axakememɨteyuriekai, mɨkɨ kaniwaruka'ɨyakaitɨni Kurutani hatuxameyaritsie.
MAT 3:7 Hikɨ yumɨireme waxeiyatɨ paritseutsixi meta tsarutseutsixi hetsɨana memɨ'axekaikɨ mɨra'ɨyanekaitsie, mɨpaɨ katiniwarutahɨawe: «Kuterixi waniwema. ¿Kemɨ'ane mɨpaɨ pɨtixe'utahɨawixɨ xemɨyuta'unakɨ kapa 'uxa'atɨniwarie xe'uyehekarienikɨ?
MAT 3:8 Yaxeketeneu'uwani xematsiɨkɨtɨ xemɨte'uhayewaxɨkɨ 'axaxeteyurietɨ.
MAT 3:9 Mɨpaɨ xepɨkateku'eriwani kename xeyɨwawe xemɨteyukɨhɨawe: “Tame tepɨnaki'eriwa tapaapa 'Apɨrahami mɨhɨkɨkɨ”. Mɨpaɨ nepɨtixekɨhɨawe, Kakaɨyari kaniyɨweni 'ikɨ tetexi teɨteri mɨwarayeitɨanikɨ, 'Apɨrahami niwemama memakɨnekɨ.
MAT 3:10 Hatsa kaniha'aritsieka 'iteɨrite tsutɨana maxɨriyanikɨ. 'Ayumieme naitɨ 'iteɨri mɨka'ukaxuxuawere kanawitekiemɨkɨ, meta taipa kaneukahɨiyamɨkɨ.
MAT 3:11 »Ne nekanixe'uka'ɨyani hakɨkɨ, mɨpaɨ mɨtimatsiɨkɨnikɨ kename 'axaxeteyurietɨ xete'uhayewaxɨ. Peru ne'utɨma 'umamie mɨkɨ matsi waɨkawa kanitɨrɨkaɨyeni keyuri ne, 'aixɨa nepɨka'ane nehetsie mɨtinakenikɨ nemiparewienikɨ. Mɨkɨ pɨxeka'ɨya 'Iyari Mɨtiyupatakɨ meta taikɨ.
MAT 3:12 Ti'itiwame pakwe'e, yutɨriku xatsiyari panuyewiwieni, kaniti'utamɨkɨ takariyari kaxetunitsie, hikɨ xatsiyari pɨtitaiyarieni tai mɨkatɨwetsie».
MAT 3:13 Merikɨtsɨ 'ana Ketsutsi Karereya kwieyaritsie heyeyaka, Kurutani hatuxameyaritsie kaninuani Wani mika'ɨyakɨ.
MAT 3:14 Peru Wani kaniyuku'imawakaitɨni mɨpaɨ tikɨhɨawetɨ: ―Matsi kaneuyeweka 'ekɨpɨta pemɨnetsika'ɨyakɨ, 'ekɨtapɨta nehetsɨa petinua.
MAT 3:15 Ketsutsi mɨpaɨ katinitahɨawe: ―Mɨpaɨ pɨtiyɨni hikɨ, 'aixɨa kani'aneni yatemɨtekahunikɨ naime heitseriemekɨ. Hikɨ Wani yapɨtikatɨa.
MAT 3:16 Hikɨ Ketsutsi 'uka'ɨyarieka, kwitɨ hapa 'anatiyaku. 'Ana taheima muyuawitsie katineuyepiere, hikɨ mɨkɨ Kakaɨyari 'Iyarieya kaniuxeiya heimana 'akamiekame kukuru hepaɨ 'anetɨ, hetsiena yuhayewake.
MAT 3:17 Hikɨ xewitɨta muyuawitsie mɨpaɨ kanetayɨni: «'Ikɨ Neniwe kanihɨkɨtɨni neminaki'erie, mɨkɨkɨ nekaniyutemawieka».
MAT 4:1 Hikɨ 'Iyari Ketsutsi kanewitɨni makumawetsie paitɨ, mana Kauyumarie mita'inɨatakɨ.
MAT 4:2 Hikɨ huta tewiyari tukari, huta tewiyari tɨkari yuhakietɨ, kaneuhakamɨkɨkaitɨni.
MAT 4:3 Hikɨ tiyu'irɨwiyame nuaka mɨpaɨ katinitahɨawe: ―Kamɨtsɨ, xɨka 'ekɨ Kakaɨyari penu'ayatɨni, mɨpaɨ ketineutahɨawi 'ikɨ tetexi paa makɨnekɨ.
MAT 4:4 Ketsutsi mɨpaɨ katinita'eiya: ―'Utɨarika mɨpaɨ kanaineni: “Tewi paakɨ xeikɨa pɨka'ayeniereni, Kakaɨyari kemutayɨ, niukieya naitɨ peuyewetseta”.
MAT 4:5 Hikɨta kauyumarie Kerutsareme kiekariyaritsie paitɨ kaneiwitɨni, tuki yekɨrita 'amanutitewatsie kanenutiwitɨni.
MAT 4:6 Hikɨ mɨpaɨ katinitahɨawe: ―Xɨka 'ekɨ Kakaɨyari penu'ayatɨni, 'ena keneukatsuna. 'Utɨarika mɨpaɨ kanaineni: »“Niuki tuayamete pɨtiwa'aitɨaka 'ahepaɨtsita, yumamakɨ mepɨmatsituikani kapa tetetsie pe'uti'ɨkamɨrekɨ”».
MAT 4:7 Hikɨ Ketsutsi mɨpaɨ katinita'eiya: ―Mɨpaɨta kanaineni 'utɨarika: “Ti'aitame mɨ'akakaɨyari pepɨka'inɨataneni”.
MAT 4:8 Hikɨ tawari Kauyumarie kaneiwitɨni hɨri 'amanutitewatsie, kwiepa memɨte'aita wakwie xexuime kanixeiyatsitɨani witsimɨ'anene.
MAT 4:9 Mɨpaɨ tikuhɨawetɨ: ―'Ikɨ naime nepɨmatsiyetuirieni, xɨka pe'awaɨriyani pemɨnetsi'ayexeiyanikɨ.
MAT 4:10 Hikɨ Ketsutsi mɨpaɨ katinitahɨawe: ―Kenemie Kauyumarie. 'Utɨarika mɨpaɨ kanaineni: “Ti'aitame mɨ'akakaɨyari xeikɨa kenayexeiyani”.
MAT 4:11 Hikɨ Kauyumarie kanihayewa kaneyani, niuki tuayamete me'u'axɨaka mekaniparewiekaitɨni.
MAT 4:12 Kepauka Ketsutsi mɨtiutamari kename Wani hanutahɨiyakai, Karereya paitɨ kaneyani.
MAT 4:13 Natsaretitsie yeyaka, Kaperunaume kaneyani mana mekanikɨ harakuna tetsita mɨti'ane, Tsawuruni kwieyaritsie meta Nepɨtahari,
MAT 4:14 mɨpaɨ katinaye'ani Kakaɨyari niukameya Kitsariyaxi kemutayɨ:
MAT 4:15 «Tsawuruni kwieyari meta Nepɨtahari kwieyari, harakuna mananiere Kurutani 'anutaɨye meta, Karereya memɨkatateɨterima memakutei,
MAT 4:16 teɨteri makuyɨwitsie memɨtitei mɨkɨ hekɨariya kwimɨxawatɨ mekaniuxeiya, mɨkɨ yɨwipa memɨkutei hake memɨkwiximekai, mɨkɨ wahetsiemieme hekɨariya kaniuhekɨariwieni».
MAT 4:17 Merikɨtsɨ 'ana Ketsutsi kanitsutɨani mɨpaɨ tikuxatatɨ: «Xeketeneuhayewa ke'axaxemɨteyurie, karikɨ kanehuraniri Kakaɨyari kemɨtita'aita».
MAT 4:18 Kepauka harakuna tetsita muyemiekai Karereya kwieyaritsie, kaniwaruxeiya yuhutame yu'iwamakame: xewitɨ Tsimuni Pekuru mɨtitewakai, meta 'Atɨrexi. Mana wipikɨ mekateniwiwietɨwekaitɨni harakunatsie, mɨkɨ memɨketsɨweiyametetɨkaikɨ.
MAT 4:19 Hikɨ Ketsutsi mɨpaɨ katiniwarutahɨawe: «Hikɨmɨ, nehetsie xeketeneuwiya, teɨteri waxexeɨriwamete nekanixe'ayeitɨamɨkɨ».
MAT 4:20 'Ana yapauka wipi me'uku'eiriexɨaka, hetsiena mekateniuwiya.
MAT 4:21 Manata kwitɨwa ya'amietɨ kaniwaruxeiyata yuhutame yu'iwamakame: Kakuwu meta Wani, Tsewereu niwemama, kanuwatsie mekaniyetekaitɨni yupaapa hamatɨa yuwipi memanetsikitɨatɨ. Hikɨ kaniwaruta'inieni.
MAT 4:22 Hikɨ 'ana kwitɨwa kanuwa me'uku'eirieka meta yupaapa, mekaneiweiya.
MAT 4:23 Merikɨtsɨ Ketsutsi naitsarie Karereya kwieyaritsie kanikuyeikakaitɨni, tukiteta tiku'ɨkitanetɨ, niuki 'aixɨa manuyɨne taheima mieme hepaɨtsita tikuxatatɨ, 'aixɨa meteheu'eriekame warayeitɨwatɨ naime kwiniya hepaɨtsita meta kememɨte'uka'eniwakai teɨteri.
MAT 4:24 Naitsarie Tsiriya kwieyaritsie kaniutamariwa. Mekaniwa'atɨwakaitɨni kwiniya yukɨ 'anenemekɨ memɨtekukuyekai, kukuiniyakɨ waɨkawa memɨte'uka'eniwa, kakaɨyarixi 'axamemɨ'anene memɨwanɨ'ɨ, meta kierixiekate, meta huriekate, hikɨ mɨkɨ kaniwaranayexɨrɨwakaitɨni.
MAT 4:25 Yumɨiretɨ teɨteri mekaneweiyakaitɨni Karereyatari, Tamamata Kiekaritsietari meta Kerutsaremetari, Kureyatari, meta Kurutani 'anutaɨyetari.
MAT 5:1 Merikɨtsɨ teɨteri yumɨireme waxeiyatɨ, mana yemuritsie neutiyune, hikɨ nanukayerɨni. Teyɨ'ɨkitɨwametemama 'auriena mekaniu'axɨani,
MAT 5:2 mɨkɨ katiniwaruti'ɨkitɨani mɨpaɨ 'utaitɨ:
MAT 5:3 «'Aixɨa mekani'itɨarieka mɨkɨ waɨkawa memɨteheuyehɨwa yu'iyaritsie kememɨteyumate, kemɨ'ane taheima makawe mekanexeiyakakuni tiwa'aitɨwametɨme.
MAT 5:4 'Aixɨa mekani'itɨarieka mɨkɨ memɨyuheiwerie, mepɨnɨtɨarieni.
MAT 5:5 'Aixɨa mekani'itɨarieka mɨkɨ memɨka'ayu'eririya, wahetsie pɨtinake kwie naitɨ.
MAT 5:6 'Aixɨa mekani'itɨarieka mɨkɨ memɨyuwaɨriya heitseriemekɨ yamemɨtekahunikɨ yaxeikɨa tewi hepaɨ meuhakamɨkɨ meuharimɨkɨ hepaɨ, yamepɨtepitɨarieni mepɨtihuxani.
MAT 5:7 'Aixɨa mekani'itɨarieka mɨkɨ memɨteyukanenimaya, mepɨtinenimayatsieni.
MAT 5:8 'Aixɨa mekani'itɨarieka mɨkɨ memɨ'itiyatɨka wa'iyari mɨyuxewinikɨ, mepixeiya Kakaɨyari.
MAT 5:9 'Aixɨa mekani'itɨarieka mɨkɨ memɨwanɨtɨani teɨteri, 'aixɨa memɨteyuxeiyanikɨ, mepɨmatsiɨkɨni Kakaɨyari niwemama kememɨtehɨkɨ.
MAT 5:10 'Aixɨa mekani'itɨarieka mɨkɨ memuweiyarie memɨyuwaɨriyakɨ heitseriemekɨ yamemɨtekahunikɨ, kemɨ'ane taheima makawe mekanexeiyakuni tiwa'aitɨwametɨme.
MAT 5:11 »'Aixɨa xekani'itɨarieka xeme kepauka memɨxeta'uxiwe'erieni, kepauka memɨxe'uweiyani, kepauka mete'itawatɨ 'axamemutiyuaneni xehepaɨtsita naimekɨ nehetsie xemɨmiemetekɨ.
MAT 5:12 Xekeneyutemamawieka 'ana xekenenaki'aka mɨpaɨ xetemaitɨ, 'aixɨa 'aneme xekanipitɨariekuni waɨkawa taheima mieme. Mɨpaɨta meteniwaruweiyakaitɨni Kakaɨyari niukametemama meripaitɨ miemete.
MAT 5:13 »Xeme kwiepa memɨtama wa'una xekanihɨkɨtɨni. Xɨka 'una hamuritɨ 'ayani, ¿titakɨ ha'utsiwitɨ rayani? Pɨkatiyunaki'erieri, panuyewiwiyani xeikɨa, teɨteri hetsiena memu'uwanikɨ.
MAT 5:14 »Xeme kwiepa memɨtama wahekɨariwiwamete xekanihɨkɨtɨni. Yemuri heima kiekari mɨkama pɨkayɨwe mɨti'awietsieni.
MAT 5:15 Mɨkɨ meta, kɨxeme 'utaiyame kakunikɨ pɨka'enukanani. Matsi pɨta, wapaitɨ neitiyemɨkɨ mɨwahekɨariwiyakɨ yunaime kiita memayetei.
MAT 5:16 Yaxeikɨata xeme, hekɨariya xehetsɨa mieme mɨpaɨ ketihekɨaka teɨteri wahɨxie, memɨxexeiyanikɨ 'aixɨa kexemɨteyurie, 'aixɨa memutiyuanenikɨ xe'ukiyari taheima makawe hepaɨtsita.
MAT 5:17 »Mɨpaɨ xepɨkateku'eriwani kename nenua ne'ika'unake 'inɨari niukiyari, Kakaɨyari niukametemama waniukiyari. Kenemɨtinua, ne'ika'unake nekapunua, ne'eye'atɨanike pɨta nekaninuani.
MAT 5:18 Yurikɨ mɨpaɨ nepɨxerahɨawe, mexi kataxɨwe muyuawi meta kwie, xeihɨxiyari xeituniyari pɨkatatɨmaiyarieni 'inɨari niukiyaritsie mieme, naitɨ mexi karaye'awe.
MAT 5:19 Kemɨ'ane mitixani'erieni 'ikɨ 'aitsika tsepa 'imatɨme, yatiwa'ɨkitɨatɨ teɨteri, mɨkɨta 'imatɨme pɨtaterɨwarieni, kememɨtemariwa mɨkɨ memeixeiya kemɨ'ane taheima makawe tiwa'aitɨwametɨme. Perutsɨ kemɨ'ane yamɨtikamie yamɨti'ɨkita, mexɨakame pɨta pɨtaterɨwarieni.
MAT 5:20 Mɨpaɨ nepɨtixekɨhɨawe, xeme xepɨyuwaɨriya heitseriemekɨ yaxemɨtekahunikɨ. Mɨkɨ meta 'inɨarikɨ memɨte'ɨkitamete, paritseutsixi meta, mɨkɨ yaxeikɨa waniu mepɨteyuwaɨriya. Merikɨte, peuyewetse xeme matsi yemekɨ yaxemɨtekahunikɨ. Mexɨka katixaɨtɨni, tixaɨ xepɨkaheutahaxɨani hakewa mɨra'aita kemɨ'ane taheima makawe.
MAT 5:21 »Xepɨ'enana kename mɨpaɨ mete'utahɨawarie meripaitɨ xetutsima: “Pepɨkati'amemiwani, kemɨ'ane mɨtiyumemiwani, 'itsɨkame hetsiena 'apɨrahɨpani”.
MAT 5:22 Ne matsi mɨpaɨ nepɨtixekɨhɨawe, kemɨ'ane miheka yu'iwa, 'itsɨkame hetsiena pɨrahɨani. Kemɨ'ane 'axamɨtikɨhɨaweni yu'iwa, mɨkɨtsie mepɨte'uhɨpani ta'ukiyarima. Kemɨ'ane mɨpaɨ mɨtitahɨawe: “Kari pepɨka'amate”. Mɨkɨ panutahɨiyani tai yamɨtita'atsie.
MAT 5:23 »'Ayumieme xɨka 'a'imikieri pe'atɨani mɨrayutimawatɨre, mana xɨka pehaye'erieni kename 'a'iwa tixaɨtɨkɨ 'aixɨa kamatixeiya,
MAT 5:24 mana mɨrayutimawatɨre keneuku'eirieka 'a'imikieri. Kenemie meri, 'aixɨa xeteyuxeiyatɨ xekenakɨni yu'iwamatɨ, 'anake muwa pe'ayeneme keneutimawa.
MAT 5:25 »Kwitɨ kenehamikutani kemɨ'ane mɨmatsixaneta mexi huyeta pe'umie hamatɨana, kapa matsiyetuanikɨ 'itsɨkame hetsɨa matsixanetame, 'itsɨkame kapa matsiyetuanikɨ tupiri hetsɨa, kapa pe'anutahɨiyanikɨ.
MAT 5:26 Yurikɨ mɨpaɨ nekanaineni, muwa pepɨkawayeyani mexi pekati'atuawe naimekɨ.
MAT 5:27 »Xepɨ'enana kename mɨpaɨ mete'utahɨawarie: “Xeime 'ɨyaya kɨnaya pepɨkakumaɨwani”.
MAT 5:28 Ne matsi mɨpaɨ nepɨtixekɨhɨawe, kemɨ'ane mixeiya 'uka 'ihiwe'erietɨ, mɨkɨ kanikumaɨwani yu'iyaritsie.
MAT 5:29 'Ayumieme, xɨka 'ahɨxi 'atserieta miemekɨ xɨka 'axapetiyurieneni, keniwatitu'i meta kenehɨwa. Matsi 'aixɨa pɨyɨni tixaɨtɨ mɨreuyewenikɨ 'awaiyaritsie mieme, kapa pe'axewitɨ peheukahɨiyanikɨ xatsi taiyariyaritsie.
MAT 5:30 Meta, xɨka 'amamá 'atserieta mieme matsihekahɨpani, kenewayewiteki meta kenehɨwa. Matsi 'aixɨa kaniyɨmɨkɨ pemɨwayepurunikɨ, kapa pe'axewitɨ peheukahɨiyanikɨ xatsi taiyariyaritsie.
MAT 5:31 »Mɨpaɨta mepɨte'utahɨawarie meripaitɨ: “Kemɨ'ane yu'ɨya muku'eiri, 'eiriya xapayari ke'ihuritɨani”.
MAT 5:32 Peru ne matsi mɨpaɨ nepɨxerahɨawe, kemɨ'ane miku'eiri yu'ɨya, mɨkɨ xeime kɨnaya kumaɨwame kanayeitɨani yu'ɨya, mexɨka 'uka 'uki 'ukumayɨani mɨkayɨkɨna xeikɨa. Kemɨ'ane mitiwitɨni 'uka muku'eiriwaxɨ, mɨkɨta pikumaɨwani xeime 'ɨyaya.
MAT 5:33 »Mɨkɨ meta, xepɨ'enana kename meripai miemetexi mɨpaɨ metekɨhɨawarɨwakai: “Pepɨka'ahɨritɨani peti'itawatɨ, matsi kepemɨti'ahɨritɨa yapepɨtikamieni Ti'aitame matsixeiyakaku”.
MAT 5:34 Ne matsi mɨpaɨ nepɨtixekɨhɨawe: Yemekɨ xepɨkayɨhɨritɨaka. Taheima mieme muyuawi xexatatɨ xepɨkayɨhɨritɨaka Kakaɨyari muwa yu'uwenitsie 'akaitɨ mɨti'aitakɨ.
MAT 5:35 Kwie xexatatɨ xepɨkayɨhɨritɨaka kwie 'uwenieyatɨa mieme ketayatɨa mieme mɨhɨkɨkɨ. Kerutsareme xexatatɨ xepɨkayɨhɨritɨaka ti'aitame mɨtɨrɨkaɨye kiekarieya mɨhɨkɨkɨ.
MAT 5:36 'Amu'u pexatatɨ pepɨka'ahɨritɨaka pemɨkayɨwekɨ tuxame yɨwime pemeyeitɨanikɨ nixei kɨpayari.
MAT 5:37 Xɨka xeyuwaɨriyani, “huu” xekeneutiyuaneni xeikɨa, mexɨka xekayuwaɨriyani, “tixaɨ” xekeneutiyuaneni. Tawari xeiniukiyari panayuhayewa, kemɨ'ane 'axamɨtiyuruwa hetsɨa kanimiemetɨni.
MAT 5:38 »Xepu'enana kename mɨpaɨ metekɨhɨawarɨwakai: “Xɨka xeime hɨxieya watituni mɨkɨta hɨxieya kewatituiyani meta tameya xɨka 'anaye'una mɨkɨta ke'anaye'uniyarieni”.
MAT 5:39 Ne matsi mɨpaɨ nepɨtixekɨhɨawe: Mɨpaɨ xeteyurietɨ xepɨka'inenaka kemɨ'ane 'axamɨxeyurie. Matsi kemɨ'ane 'a'auritapatsie mɨmatsikuwaya 'atserieta, ta'aurie pe'aweme keneupitɨa tapata.
MAT 5:40 Kemɨ'ane matsixanetatɨ mɨmatsinawairiemɨkɨ 'akamixa, keneuhuritɨa meta 'a'ɨkari.
MAT 5:41 Kemɨ'ane mɨmatsiwiya hetsiena mieme tixaɨtɨ pemɨranutɨnikɨ xeimiriyari keyari, huta miriyari keyari keneumieni 'utɨana.
MAT 5:42 Kemɨ'ane tixaɨtɨ mɨmatiwawirie, ketineupitɨa, kemɨ'ane mɨmatiniɨwiriemɨkɨ pepɨkatikweririeka.
MAT 5:43 »Xepɨ'enana kename mɨpaɨ metekɨhɨawarɨwakai: “'Ahepaɨ tewi kenenaki'erieka, pepi'uxiwe'erieka kemɨ'ane mɨmatsi'aye'unie”.
MAT 5:44 Ne matsi mɨpaɨ nepɨtixekɨhɨawe: Xekeniwanaki'erieka mɨkɨ memɨxe'aye'unie, xekeneyunenewieka mɨkɨ memɨxe'uweiya wahetsiemieme.
MAT 5:45 Mɨpaɨ xeyɨatɨ puyuritɨni yu'ukiyari taheima makawe niwemama xemɨhɨkɨkɨ. Mɨkɨ kanenatinenetɨwani yutau 'axamemɨteyurie wahetsie 'aixɨa memɨteyurie wahetsie. Wiyeri panakanɨ'awa mɨkɨ heitseriemekɨ yamemɨtekahu wahetsie mɨkɨ heitseriemekɨ yamemɨkatekahu wahetsie yaxeikɨa.
MAT 5:46 Xɨka xewanaki'erieka mɨkɨ memɨxenaki'erie, ¿kexete'a'iwa mɨkɨkɨ? Kamɨ, 'atsita mɨkɨ kuwiyexinutsie mieme tewawamete yaxeikɨa mepɨteyurie.
MAT 5:47 Xɨka yu'iwamarixi xewawaɨritɨaka hɨkɨa, titatsɨ xeteyurie hipatɨ yamemɨkateyurie. Kamɨ, mɨkɨ memɨkatateɨterima yaxeikɨa mepɨteyurie.
MAT 5:48 Xeme pɨta heitseriemekɨ yaxeketenekahuni, xe'ukiyari taheima makawe heitserie yamɨtikamie hepaɨ.
MAT 6:1 »Xekeneyukweriwayurieka kapa kemɨtiheitserie xeteyurieka teɨteri wahɨxie, mɨkɨ memɨxexeiyakɨ xeikɨa. Mexɨka wahɨxie xeikɨa yaxeteyurieka, xe'ukiyari taheima makawe tixaɨtɨ pɨkatixepitɨani xe'iwarika.
MAT 6:2 »Kepauka pemiparewi tixaɨtɨ mɨkarexeiya, kuxineta pepɨka'aitani 'ahɨxie mɨhɨtsieriekakɨ pemɨxeiyarienikɨ, tukita kaye 'utɨa kememɨteyurie mɨkɨ memɨte'itawamete, teɨteri 'aixɨa memutiyuanenikɨ wahepaɨtsita. Yurikɨ mɨpaɨ nekanaineni, 'ari meheixeiyatɨ mepakɨ yu'iwarika.
MAT 6:3 Matsi 'ekɨ pɨta kepauka pemɨwaparewie tixaɨtɨ memɨkatehexeiya, 'atsipepɨkatayɨni, 'amamá 'a'utata mieme 'atsipɨkatimaika kemɨtiyuriene 'atserieta mieme,
MAT 6:4 kepemɨtiuparewi mɨ'awiekakɨ. 'Ana 'a'ukiyari 'ixeiyatɨ tita mɨti'awietsie pɨmatipitɨani 'a'iwarika yunaime wahɨxie.
MAT 6:5 »Kepauka xemɨyunenewie, mɨkɨ memɨte'itawamete wahepaɨ xepɨkayɨaka, pɨwanake tukipa memɨti'unikɨ meta 'itsikinatsie memɨti'unikɨ meyunenewietɨ teɨteri memɨwaxeiyanikɨ. Yurikɨ mɨpaɨ nekatinixehahɨaweni, 'ari meheixeiyatɨ mepakɨ yu'iwarika.
MAT 6:6 'Ekɨ pɨta kepauka pemɨ'anenewie 'akiita keneutahaka, kitenie pereuname, nenewieri kenepitɨaka 'a'ukiyari mana muyeika muye'awietsie. 'A'ukiyari 'ixeiyatɨ tita mɨti'awietsie pɨmatipitɨani 'a'iwarika yunaime wahɨxie.
MAT 6:7 Xeyunenewietɨ xepɨka'imɨiriyani niuki hipame nuiwarite wahepaɨ. Mɨkɨ waɨkawa me'utiniutɨ, me'enierienike mepɨyu'erie.
MAT 6:8 Wahepaɨ xe'anenetɨ xepɨka'akɨne. Kakaɨyari mɨxe'ukiyari yapɨtimate tita xemɨteheuyehɨwa, yaxekate'itawawiriewawekaku 'akuxi.
MAT 6:9 »'Ayumieme 'ipaɨ pɨta xeketeneyunenewieka xeme: »“Ta'ukiyari taheima pemakawe, yuhemekɨ mɨpatsie peke'ayeitɨariwani,
MAT 6:10 'enata keneutsutɨa peti'aitatɨ, yameketeyurieka kemɨmatinake 'ena kwiepa taheima kememɨteyurie.
MAT 6:11 'Ikwai ketaneumikwa hikɨ temeiyehɨwa.
MAT 6:12 Ketatineuyehɨwirieka 'axatemɨte'uyurikɨ tameta temɨtewareuyehɨwirikɨ mɨkɨ 'axamemɨtatsi'uyuri.
MAT 6:13 Pepɨkatatsipitɨaka temɨta'inɨatsienikɨ, matsi ketaneutawikweitsitɨa 'axatemɨka'itɨarienikɨ. 'Ekɨtsɨ 'aheyemekɨ pekatini'aitametɨni pekanitɨrɨkaɨyeni witsipekani'aneni 'aheyemekɨ. Mɨpaɨ xeikɨa kani'aneni”.
MAT 6:14 »Xɨka xetewareuyehɨwirieni teɨteri 'axamemɨxeyurie, xe'ukiyari muyuawitsie makawe pɨxereuyehɨwirieni xemeta.
MAT 6:15 Peru, xɨka xekatewareuyehɨwirieni teɨteri, xe'ukiyari pɨkaxereuyehɨwirieni xemeta 'axaxete'uyurieyu.
MAT 6:16 »Kepauka xemɨyuhakiwa mɨkɨ memɨte'itawamete wahepaɨ xepɨkayɨaka. Mɨkɨ yuheiweriekate wahepaɨ meteyuxexeiyame mepayuyeitɨwa, meta yuhakiwamete wahepaɨ teɨteri memɨwaxeiyakɨ. Yurikɨ mɨpaɨ nepɨxerahɨawe, mɨkɨ 'ari meheixeiyatɨ mepakɨ yu'iwarika.
MAT 6:17 'Ekɨ pɨta kepauka pemɨ'ahakiwa, kene'akawiri witsimu'ɨa 'amu'utsie, kenanaka'ɨtaima,
MAT 6:18 tiyuhakiwame hepaɨ pemɨkati'axexeiyanikɨ, teɨteri kemematexeiya. 'A'ukiyari mana muyeika muye'awietsie, mɨkɨ pɨta kematixeiya pepɨmatsiɨkɨni. 'A'ukiyari 'ixeiyatɨ tita mɨti'awietsie, mɨkɨ pɨmatipitɨaka 'a'iwarika yunaime wahɨxie.
MAT 6:19 »Xeketeneuhayewa kwiepa timieme piinitɨarika xetexeɨrietɨ xeikɨa. Kwiepa timieme tekɨmemete mepɨtetikɨme meta pɨtiyutikwitamawa, metatsiere tenawayamete mepɨyɨwawe mɨkɨ memɨtenawani.
MAT 6:20 Taheima mieme matsi piinitɨarika xeketenexeɨrieka. Mana tekɨmemete mepɨkatehetikɨme meta pɨkareyutikwitamawa, metatsiere tenawayamete mepɨkaheutahake memɨtenawanikɨ.
MAT 6:21 Hakewa pemɨrekuxeɨri piinitɨarika, manata 'a'iyari puyeikani.
MAT 6:22 »Tahɨxi tawaiyari kɨxemeya kanihɨkɨtɨni. 'Ayumieme xɨka 'ahɨxi yuxewini 'aixɨa 'aneni, 'awaiyaritsie naitɨ pepɨhekɨariwiyarieka.
MAT 6:23 Mexɨka 'ahɨxi 'axa'aneni peti'akahiwe'eriekaku, 'awaiyaritsie pekaniyɨriyariekamɨkɨ. Merikɨte, 'akɨxeme xɨka 'uyɨre, yemekɨ pepɨyɨriyarieni.
MAT 6:24 »Tewi pɨkayɨwe yuhutame yukutsiyarima wahetsie tiwiyatɨ mɨti'uximayaka. Ni'uxiwe'eriekamɨkɨ xeime 'inaki'erietɨ xeime, yatɨni matsi xeime waɨkawa ninaki'eriekamɨkɨ xeime xani'erietɨ. Pɨkayɨwe xemɨte'uximayaka Kakaɨyari hetsie xetewiyatɨ meta yupiinitɨarikatsie xetewiyatɨ.
MAT 6:25 »'Ayumieme mɨpaɨ nepɨtixekɨhɨawe: Xeketeneuhayewa xeyu'iyaritɨatɨ yutukari hepaɨtsita, tita tetekwani tita tete'ieni xeteyukɨhɨawetɨ, yuwaiyari hepaɨtsita xepɨkayu'iyaritɨaka tita tete'anakatɨxɨani xeteyukɨhɨawetɨ. ¿Tukari matsi waɨkawa kareuyewetse keyuri 'ikwai meta xewaiyari keyuri kemari?
MAT 6:26 Xekeniwaru'ixɨari wikixi taheima miemete: Mepɨka'uka'etsa mepɨka'uka'itsana, kaxetunitsie mepɨkateti'uta. Mɨyatɨtɨ, xe'ukiyari taheima makawe pɨtiwamikwa. Merikɨte, xeme matsi waɨkawa xepeuyewetse keyuri mɨkɨ.
MAT 6:27 ¿Xeme kemɨ'ane pɨyɨwe yu'iyaritɨatɨ 'a'utewitɨ mayuyeitɨani xɨka 'etsi'utewini, xeitsikuriyari manawere?
MAT 6:28 »¿Meta titayarikuta xeteyu'iyaritɨa 'ixuriki hepaɨtsita? Xekeneuxeiya tuturi texuxuri 'ɨtsita mieme kemɨtiuwawere. Pɨkati'uximaya pɨkawita,
MAT 6:29 peru mɨpaɨ nepɨxerahɨawe, Tsarumuni tsepa naimekɨ mariwetɨ mayuyeitɨwakai witsipɨkatiyukemaritɨwakai texuxuri hepaɨ.
MAT 6:30 Xɨka Kakaɨyari mɨpaɨ tikemaritɨaka tupiriya hikɨ 'ɨtsita meuti'u meta 'uxa'a huxunuta meukawiwiyani, matsi yemekɨ katixekemaritɨaka xeme, teɨteri 'etsiwa xeikɨa yuri xemɨte'erie.
MAT 6:31 'Ayumieme xepɨkayu'iyaritɨaka 'ipaɨ xe'utiyuatɨ: ¿Titari tetekwaka? ¿titari tete'ieka? ¿titakɨ tetetakemaritɨaka?
MAT 6:32 Mɨkɨ memɨkatateɨterima mepiwautɨwe mɨkɨ naime, peru xe'ukiyari taheima makawe yapɨtimate kename xeteuyehɨwa 'ikɨ naime.
MAT 6:33 Xeme matsi xekeneyuwaɨriyani mɨkɨ tixe'aitɨwame mɨhɨkɨtɨnikɨ, heitseriemekɨ yaxemɨtekahunikɨ, mɨpaɨ xeteyurietɨ, xepɨtemikienita mɨkɨ naime.
MAT 6:34 'Ayumieme xepɨkayu'iyaritɨaka 'uxa'a miemekɨ, 'uxa'ata peixeiyani 'iyaritɨarika. Xexuitɨ tukari peixeiyari 'axamɨti'ane.
MAT 7:1 »Hipame wahetsie xepɨkate'uhɨpani, xemeta xehetsie mɨkarahɨiwanikɨ.
MAT 7:2 Hipame wahetsie kexemɨte'uhɨpa, mɨpaɨta xeme xehetsie pɨrahɨiyani, kexemɨtewa'inɨatsirie hipame, yaxeikɨata xeme mɨpaɨ xepɨte'inɨatsiyarieni.
MAT 7:3 »¿Titayari kwi petixeiya xatsi 'a'iwa hɨxita meutawiwi, pekahe'eriwatɨ keuruwi 'ekɨ 'ahɨxita meutawe?
MAT 7:4 ¿Pepɨkayɨwe mɨpaɨ pemɨtitahɨawe 'a'iwa: “Xatsi 'ahɨxita meutawiwi nepɨmatsiwaye'itirieni”, keuruwi 'akuxi 'ekɨ 'ahɨxita yeyeikakaku?
MAT 7:5 Yakɨ peputaine xeikɨa. 'Ahɨxita meri keniwayehɨwa keuruwi, mɨpaɨke 'aixɨa pereunieretɨ pekanayeimɨkɨ pemiwaye'itirienikɨ xatsi 'a'iwa hɨxita meutawiwi.
MAT 7:6 »Tita Kakaɨyaritsie mieme mɨtipatsie xepɨkatewamikwani tsɨikɨri, kuka kwinie mɨraye'atɨka tuixuri wahɨxie xepɨkatixɨrɨwani, nɨka me'itiketsinikɨ, nɨka ta'aurie me'axɨrieme mexe'utitsanakɨ tsɨikɨri.
MAT 7:7 »Xekatehayewatɨ xɨka xete'uta'iwauni, yaxepɨtemikieni. Xɨka xetekuwautɨweni xekatehayewatɨ, yaxepɨte'itaxeiya, 'itupari xɨka xe'uyuitɨani xekatehayewatɨ, xepɨteheuyepiyarieni.
MAT 7:8 Kemɨ'ane mɨtiku'iwawa pɨtiyetuiriyarɨwa yu'iwaurika, kemɨ'ane mɨtikuwaune pɨtikaxeiya, kemɨ'ane 'itupari mukuyuitɨwa pɨreuyepiyarɨwa.
MAT 7:9 »Xewitɨ pɨkayuwaɨriya tete yuniwe mumini, mɨkɨ paa ha'iwawakaku.
MAT 7:10 Meta pɨkayuwaɨriya kuu mimini tsaapa ha'iwawakaku.
MAT 7:11 Xeme 'axaxete'u'iyaritɨtɨ, 'aixɨa 'anemekɨ xɨka xetewamikwani yuniwema, matsi waɨkawamekɨ xe'ukiyari taheima makawe 'aixɨa ti'aneme katiniwamimɨkɨ kemɨ'ane memɨte'itawawirieni.
MAT 7:12 'Ayumieme xeme hipame teɨteri yaxeketeniwaxeiyani, mɨkɨ kememɨtexexeiyanikeyu xeme. Mɨpaɨ tiyurienetɨ kanitaxewiriyamɨkɨ 'inɨari niukiyari meta Kakaɨyari niukametemama waniuki.
MAT 7:13 »Kitenie 'etsimayewatsie xekeneutahaxɨa. Karikɨ 'ekanayeuka kitenie, 'ekanatayeuka huye hakewa memeuyexɨrɨwe meukayune, mepɨyumɨire mana memeutahake.
MAT 7:14 Peru 'etsipayewa kitenie meta 'itsipatayewa huye tukaritsiepai meutiyune, hipatɨ xeikɨa mepikaxexeiya.
MAT 7:15 »Xekeneyukweriwayurieka Kakaɨyari niukametemama memɨte'itawa wahepaɨtsita. Xehetsɨa mepeutahake muxatsi wahepaɨ meteyuxexeiyatɨ, matsi yutaɨta mepɨ'ɨrawetsixi pɨta memɨtenawaya.
MAT 7:16 Kememɨte'ukaxuxuawere xepɨwaretimani kememɨ'anene. ¿Kaxie tika'inɨiwa xuyatsie. Piní takari tika'inɨiwa witsaxatsie?
MAT 7:17 Naitɨ 'iteɨri 'aixɨa mɨ'anene 'ikwaxi 'aixɨa 'anenetɨ pukaxuxuawere. Peru 'iteɨri 'axamɨ'anene 'ikwaxi 'axa'aneneme pexeiya.
MAT 7:18 'Iteɨri 'aixɨa mɨ'ane pɨkayɨwe 'axamɨtiutixuxuawereni, meta 'iteɨri 'axamɨ'ane pɨkayɨwe 'aixɨa mɨtiutixuxuawereni.
MAT 7:19 Naitɨ 'iteɨri 'aixɨa mɨkatiutixuxuawere kanawitewani, taipa kaneuxɨriwani.
MAT 7:20 'Ayumieme kememɨte'ukaxuxuawere xepɨwaretimani.
MAT 7:21 »Mɨkɨ mɨpaɨ memɨnetekɨhɨawe: “Ti'aitame, Ti'aitame 'aku”, yunaitɨ mɨkɨ mepɨkaheutahaxɨani hakewa mɨre'aita taheima makawe. Matsi xeikɨa kemɨ'ane yamemɨtekahu kemɨtinake ne'ukiyari taheima makawe.
MAT 7:22 Mɨkɨ tukaritsie yumɨiretɨ mɨpaɨ mepɨnetetahɨawe: “Ti'aitame, Ti'aitame 'aku, tame 'ahetsiemieme tetenikuxatakaitɨni, 'ahetsiemieme kakaɨyarixi 'axamemɨ'anene tepɨwarayenɨ'axɨa, 'ahetsiemieme mariwemekɨ tepɨteyuriekai”.
MAT 7:23 'Ana ne mɨpaɨ nepɨtiwatahɨawe: “Hatsuaku nepɨkaxehetima. Xekeneuyupata nehetsɨa xepɨka'u'uwani, xeme 'axateyuruwamete”.
MAT 7:24 »'Ayumieme, kemɨ'ane mi'enie 'ikɨ neniuki kenemutayɨ, meta yamɨtikatɨa mɨkɨ tewi mɨtimaiwepaɨ kani'aneni, mɨkɨ kaniyutakitɨani tetetsie.
MAT 7:25 'Ukawiyeku, hatuxame wayeneku, 'uku'ekaku, mɨkɨ kitsie 'ukexɨaku 'eka, kii pɨkahatiwe, tetetsie mutiwiyakaikɨ tsimiyenituyari.
MAT 7:26 Peru kemɨ'ane 'i'enietɨ neniuki yamɨkatikamie, mɨkɨ tewi 'atsimɨkatimate hepaɨ kani'aneni xiekaripa muyutakitɨa hepaɨ.
MAT 7:27 'Ukawiyeku, hatuxame wayeneku, 'uku'ekaku, mɨkɨ kitsie 'ukexɨaku, kanatiweni, naitɨ 'unitɨ 'anetɨ kaniukeni».
MAT 7:28 Hikɨ Ketsutsi kepauka minɨ 'ikɨ xatsika, teɨteri mekaniuhɨxiyani 'ɨkitsikayakɨ,
MAT 7:29 kemɨ'ane heitserie mexeiya hepaɨ mɨtiwa'ɨkitɨakaikɨ, mɨkɨ 'inɨarikɨ memɨte'ɨkitakai wahepaɨ pɨkati'ɨkitakai.
MAT 8:1 Merikɨtsɨ kepauka yemuritsie makane, teɨteri yumɨiretɨ mekaniweiyakaitɨni.
MAT 8:2 Hikɨ tewi nawi kwiniyayari mexeiyakai hetsɨana nuaka hɨxiena 'utitunumakeka mɨpaɨ katinitahɨawe: —Ti'aitame, xɨka pe'awaɨriyani, pepɨyɨwe pemɨnetsi'itieni.
MAT 8:3 Ketsutsi yumamá 'utatseraka kanimayɨani, mɨpaɨ 'utaitɨ: —Nepɨnewaɨriya. Pekaniu'itiyaniri. Hikɨ yapauka kwiniyaya neunuani, 'itiyatɨ kanayani.
MAT 8:4 Hikɨ Ketsutsi mɨpaɨ katinitahɨawe: —Neuxei, xeimetɨma pepɨkaraxaxatɨwani, mawari wewiwame hetsɨa pɨta kenemie kene'ahekɨata matsihexeiyakɨ, meta 'imikieri kenanutimawa kemɨtiu'aitaxɨ Muitsexi yapemɨtiwatahekɨatɨanikɨ.
MAT 8:5 Merikɨtsɨ Kaperunaume kiekariyaritsie heutahaku kuya hetsɨana kaninuani xeitsienituyari kuyaxi tiwa'aitɨwame, mɨkɨ waɨriyarika kanipitɨani
MAT 8:6 mɨpaɨ 'utaitɨ: —Ti'aitame 'aku, neti'uximayatsiriwame nekiita payeka hurietɨ kwiyɨanetɨ kwiniyakɨ.
MAT 8:7 Ketsutsi mɨpaɨ katinita'eiya: —Ne nekanimieni 'aixɨa reu'eriekame nemayeitɨanikɨ.
MAT 8:8 Kuya rehɨawe: —Ti'aitame, 'aixɨa nepɨka'ane nekiita pemeutahanikɨ, niukikɨ xeikɨa yakeneutayɨki, mɨkɨkɨ panayehɨiyani neti'uximayatsiriwame.
MAT 8:9 Netatsiere nekatini'aitɨarieka nekuyatɨtɨ, meta kuyaxi nepɨtiwa'aitɨwame. Xɨka mɨpaɨ netitahɨawe xeime: “Kenemie”, mɨkɨ pɨyemie. Xeimeta mɨpaɨ xɨka netiutahɨawe: “Kenaye'a”, mɨkɨ kanayeimɨkɨ. Xɨka mɨpaɨ netitahɨawe neti'uximayatsiriwame: “'Ipaɨ ketineyurieneni”, mɨkɨ mɨpaɨ pɨtiyurieni.
MAT 8:10 Ketsutsi 'i'enieka nihɨxiyakaitɨni, mɨpaɨ katiniwarutahɨawe mɨkɨ memikuweiyatɨwekai: —Yurikɨ mɨpaɨ nepɨxerahɨawe, nixeime tɨma 'ixaheritsixi watsata 'ikɨ hepaɨ 'aneme nepɨkakaxeiyawe yuri ti'eriekame.
MAT 8:11 Mɨpaɨ nepɨtixekɨhɨawe, yumɨiretɨ mekani'axɨakuni tau manatineika hepatsie kiekatari meta makayuyuipike hepatsie kiekatari, 'Apɨrahami, 'Itsahaki meta Kakuwu wahamatɨa mekaniutiyaxikuni hakewa mɨre'aita taheima makawe.
MAT 8:12 Peru mɨkɨ mana memeutahaxɨanikekai mɨpaɨ 'ayumieme memutinunuiwakai, mɨkɨ mekananuyexɨriyakuni takwa yɨwipa yemekɨ memu'uwanikɨ, mana meniutitsuanakuni meniyutakewekuni.
MAT 8:13 Hikɨ Ketsutsi mɨpaɨ kuyaxi tiwa'aitɨwame katiniutahɨawe: —Kenemie. Yuri kepemɨti'erie, mɨpaɨ pɨtiyɨni. 'Anatɨtɨ 'aixɨa reu'erietɨ kanayani ti'uximayatame mɨkɨ hurayaritsie.
MAT 8:14 Hikɨ kepauka Ketsutsi Pekuru kie munua, warɨkaɨya kaniuxeiya yu'utatsie kakaime hɨiyakame.
MAT 8:15 Mamayatsie kanimayɨani, hikɨ hɨiya kanihayewa. Hikɨ mɨkɨ 'anukukeka katiniwarumini.
MAT 8:16 Hikɨ taikai, mekani'atɨirieni yumɨireme teɨteri kakaɨyarixi 'axamemɨ'anene memɨwawiyakai, hikɨ kakaɨyarixi niwarayenɨ'ani xeiniukiyarikɨ, 'ana yunaime 'aixɨa meteheu'eriekame kaniwarayeitɨani memɨtekukuyekai.
MAT 8:17 Mɨpaɨ tiuyurieku, paye'a Kakaɨyari niukameya Kitsariyaxi kemutayɨ: «Mɨkɨtɨtɨ kataniunawairieni takwiniya, meta takukuiniya petɨ».
MAT 8:18 Merikɨtsɨ Ketsutsi waxeiyatɨ teɨteri kememɨteyuxeɨriekai 'auriena yumɨiretɨ, kaniuyuta'aita harakuna 'anutaɨye paitɨ manutuiyanikɨ.
MAT 8:19 Hikɨ xewitɨ 'inɨarikɨ mɨti'ɨkitametɨkai hetsɨana nuaka, mɨpaɨ katinitahɨawe: —Ti'ɨkitame 'aku, 'ahetsie nekatiniwiyamɨkɨ, hakewa pemeyemie neta nekaniyemieni 'a'utɨma.
MAT 8:20 Ketsutsi mɨpaɨ katinita'eiya: —Kauxaitsi yuterɨ mepexeiya, wikixi yu'itua mepexeiyata, peru ne, Yuri Tewi kenemɨtitewa, nepɨkaheixeiya hakewa nemeyukamuritɨani.
MAT 8:21 Xewitɨta tiyu'ɨkitɨwame mɨpaɨ katinitahɨawe: —Ti'aitame, keneneupitɨa meri nemɨyemiekɨ nepaapa nemɨteukimiekɨ.
MAT 8:22 Ketsutsi mɨpaɨ katinitahɨawe: —Nehetsie ketineuwiya, mɨkite keniwaruhayewa, mɨkɨ mɨkite yuhetsɨa miemete mekewarukateuku.
MAT 8:23 Merikɨtsɨ kanuwatsie kayerɨka Ketsutsi meta teyɨ'ɨkitɨwametemama yunaitɨ mekanekɨne.
MAT 8:24 Hikɨ harakunatsie me'uyehukaku kaniuyutawewieni 'eka waɨkawa tɨrɨkaɨyetɨ hikɨ hamewari kanuwatsie kanakayeuriwekaitɨni. Ketsutsi matsi kanikutsukaitɨni.
MAT 8:25 Hikɨ teyɨ'ɨkitɨwamete hetsɨana me'u'axɨaka mekanenutahɨtɨani, mɨpaɨ me'utiyuatɨ: —Ti'aitame, ketaneutawikweitsitɨa, tepeuyewexime.
MAT 8:26 Mɨkɨ mɨpaɨ katiniwarutahɨawe: ―Teɨteri 'etsiwa xeikɨa yuri xemɨte'erie, ¿titayari xetemama waɨkawa? Hikɨ 'anukukeka 'eka kaniutatieni meta hamewari, hikɨ naitɨ kayuwatɨ kaniutamare.
MAT 8:27 Hikɨ mɨkɨ teyu'ɨkitɨwamete mekanihɨxiyakaitɨni, mɨpaɨ me'utiyuatɨ: «¿Tita tewiyari tihɨkɨ 'ikɨ, 'atsita 'eka meta hamewari memei'enie?»
MAT 8:28 Merikɨtsɨ 'anutaɨye paitɨ heta'aku Ketsutsi, katarenatari wakwietsie paitɨ, yuhutatɨ teɨteri kakaɨyarixi 'axamemɨ'anene memɨwawiyakai teukiyapa mehayenexɨaka mekanenukunake. Kwinimieme metenayu'eririyakaitɨni, 'ayumieme hipatɨ mepɨkayuwaɨriyakai mana memuyekɨnekɨ.
MAT 8:29 Merikɨtsɨ mɨkɨ mɨpaɨ mekatenihiwieni: —¿Ketita perayexeiya, Kakaɨyari nu'aya? ¿'Ena petinua petatsi'uximatɨanike tukari ka'aye'awekaku 'akuxi?
MAT 8:30 Merikɨtsɨ mana memanu'uwakaitsie yatewa mekatenikwatɨwekaitɨni tuixuri yumɨiretɨ.
MAT 8:31 Kakaɨyarixi 'axamemɨ'anene menitawawirieni mɨpaɨ me'utiyuatɨ: —Xɨka petatsi'ayenɨ'amɨkɨ, ketaneupitɨa tuixuri temɨwawiyakɨ.
MAT 8:32 Mɨpaɨ katiniwarutahɨawe: —Xekenehu. Hikɨ mɨkɨ mekanayekɨne teɨteri wahetsie tuixuri wahetsie pɨta mekaneutahaxɨani, hikɨ yunaitɨ tuixuri mekaniutinautsa tekɨata mekaneukaxɨrieni harakunapa, hapa mekaniukwini.
MAT 8:33 Hikɨ tuixuri wahɨwemete mekaniyuta'una, hikɨ kiekaritsie me'uxɨaka naime mekateniutaxata meta kakaɨyarixi 'axamemɨ'anene memɨwawiyakai kememu'itɨariekai.
MAT 8:34 'Ayumieme yunaitɨ teɨteri kiekatari mekanayekɨne Ketsutsi me'anukunakeke. Hikɨ kepauka memixei waɨriyarika mekanipitɨani mɨyemiekɨ wakwiepa mɨka'uyeikanikɨ.
MAT 9:1 Merikɨtsɨ kanuwatsie kayerɨka 'anutaɨye paitɨ kaneyani, yukiekaritsie kaninuani.
MAT 9:2 Hikɨ mana hipatɨ teɨteri huriekame mekani'atɨirieni 'itaritsie yekaime. Ketsutsi waxeiyatɨ yuri kememɨte'eriekai mɨpaɨ huriekame katiniutahɨawe: —Yukɨ pepɨkati'akɨhɨaweni, nehamiku, 'ari pepɨreuyehɨwiyarie 'axapemɨtiuyurikɨ.
MAT 9:3 Hikɨ hipatɨ 'inɨarikɨ memɨte'ɨkitametetɨkai mɨpaɨ mekateniyukɨhɨawekaitɨni yu'iyaritsie: «'Ikɨ Kakaɨyari hepaɨtsita 'axaputaine.»
MAT 9:4 Ketsutsi wa'iyaritɨarika maitɨ, mɨpaɨ katiniwarutahɨawe: ―¿Titayari 'axaxeteyukɨhɨawe yu'iyaritsie?
MAT 9:5 ¿Tita matsi katikwaniwe: “Pepɨreuyehɨwiyarie 'axapemɨtiuyurikɨ”, xɨka'utayɨni, nutsu: “Kenanukukexi kenekuyeikani, xɨka'utayɨni”?
MAT 9:6 Hikɨtsɨ ya'aneme xekanetimaikuni kename heitserie nehexeiya kwiepa nemɨtiwareuyehɨwirienikɨ 'axamemɨte'uyuri, Yuri Tewi nehɨkɨtɨtɨ. Hikɨ mɨpaɨ katinitahɨawe huriekame: —Kenanukukexi, 'a'itari kenakwetɨ, 'akie kenemie.
MAT 9:7 Hikɨ tewi 'anukukeka yukie kaneyani.
MAT 9:8 Teɨteri me'ixeiyaka waɨkawamekɨ mekanimamakaitɨni, 'aixɨa mekaniutiyuanekaitɨni Kakaɨyari hepaɨtsita, heitserie mɨwarupitɨakɨ teɨteri mɨpaɨ memɨteyurienikɨ.
MAT 9:9 Hikɨ kepauka Ketsutsi mana mɨyetɨa, xeime tewi kaniuxeiya Mateu titewakame mana memɨte'ayutituayatsie 'akaime. Mɨpaɨ katinitahɨawe: «Nehetsie ketinewiyani». Mateu 'anukukeka hetsiena katiniuwiya.
MAT 9:10 Hikɨ Ketsutsi katinikwakaitɨni kiita, yumɨiretɨ kuwiyexinu hetsiemieme tewawamete meta 'axateyuruwamete, me'u'axɨaka Ketsutsi matɨa meta teyɨ'ɨkitɨwametemama wahamatɨa metenikwakaitɨni 'axeikɨa.
MAT 9:11 Kepauka paritseutsixi memɨwaruxei mɨkɨ, mɨpaɨ mekateniwarutahɨawe teyɨ'ɨkitɨwametemama: —¿Titayarikuta tewawamete meta 'axateyuruwamete wahamatɨa tixe'ɨkitɨwame tikwa'a?
MAT 9:12 'Ikɨ tiu'enieka, Ketsutsi mɨpaɨ katiniwarutahɨawe: —'Aixɨa memɨteheu'erie mepɨkaheiyehɨwa tiyu'uayemawame, mɨkɨ memɨtekukuye pɨta mekaneiyehɨaka.
MAT 9:13 Peuyewetse 'akuxi yaxemɨtehetimanikɨ kemaine mɨkɨ niuki mɨpaɨ manuyɨne: “Ne nepɨxewawirie xeketeneuyukanenimayaka, nepɨkaxewawirie mawari”. Ne nepɨkanua newata'inienike mɨkɨ heitseriemekɨ yamemɨtekahu, mɨkɨ 'axamemɨteyurie pɨta newata'inienike nekaninuani.
MAT 9:14 Hikɨ Wani hetsɨa miemete teyɨ'ɨkitɨwamete Ketsutsi hetsɨa me'u'axɨaka mɨpaɨ mekatenita'iwawiya: —¿Titayari tame meta paritseutsixi tete'utatihakiwa, peru 'ahetsɨa miemeteta teyɨ'ɨkitɨwamete titayari hawaikɨ?
MAT 9:15 Ketsutsi mɨpaɨ katiniwaruta'eiya: —¿Neɨkiyapa kemeteyɨwawe neneɨkeme 'inierimama memɨyuheiwerieka mexi neneɨkeme wahamatɨa 'uyeika? Tukari kanaye'amɨkɨ kepauka neneɨkeme mɨtihanieni watsata, hikɨ 'anake mekaniyuhakikuni.
MAT 9:16 Nixewitɨ tewi 'ixuriki mɨye'i pɨkamanetsikitɨwa 'ixuriki mɨhekwakɨ, 'ixuriki mɨhekwa xɨka yutatuni mɨye'i pɨtatsana, tsanimeyari matsi waɨkawa 'axa'anetɨ payeika.
MAT 9:17 Yaxeikɨata tsixai mɨyeye'itsie pɨkakatuariwa kaxie winuyari mɨhekwa mukwanakɨ. Mexɨka mɨpaɨ tiuyurieni, tsixai kanititsanikeni, winu kanitayeuriweni, meta tsixai kaneuyewautseni. Matsi kaxie winuyari mɨhekwa tsixai mɨhehekwatsie kanikatuariwani, mɨpaɨ naitɨ 'atsipɨkatiyɨni.
MAT 9:18 Mexi mɨpaɨ tiwakuxaxatɨwakai, xewitɨ kaninuani teɨteri wa'ukiyari, hɨxiena kaniutitunumakeni, mɨpaɨ tikɨhɨawetɨ: —Neniwe 'uka kanemɨni xike. Peru kenemie hetsiena keneutime'i, 'ana kananutanierimɨkɨ.
MAT 9:19 Ketsutsi 'anukukeka 'utɨmana kaneyani, teyu'ɨkitɨwamete warawitɨtɨ.
MAT 9:20 Hikɨ 'ana, 'uka mɨtikuyekai tamamata heimana huta wiyari mɨyuriekai xuriyaya kaheunuawekaku, 'ahurawa kaniuyani waritana 'uyemietɨ kanimayɨani 'ɨkarieya putuniyaritsie.
MAT 9:21 Mɨpaɨ katiniku'eriwakaitɨni: «Xɨka ne'imayɨani tsikere 'ɨkarieya xeikɨa, 'aixɨa nereu'erietɨ nepayani».
MAT 9:22 Peru Ketsutsi ta'aurie 'aweka 'ixeiyaka mɨpaɨ katinitahɨawe: —Pepɨka'a'iyaritɨakari, neniwe. Yuri pemɨti'eriekɨ 'aixɨa pereu'erietɨ pepatɨa. 'Anatɨtɨ 'aixɨa reu'erietɨ patɨa 'uka.
MAT 9:23 Hikɨ Ketsutsi teɨteri wa'ukiyari kie nuaka, kɨrautawiwamete meta teɨteri meniukixiekame waruxeiyaka,
MAT 9:24 mɨpaɨ katiniwarutahɨawe: —Xekeneutayeixɨa. 'Ɨimari pɨkamɨki, matsi pukutsu. Hikɨ mɨkɨ mekani'atsekaitɨni.
MAT 9:25 Peru kepauka memanuyenɨ'arie teɨteri, Ketsutsi kaneutahani, mamayatsie kawiereku, kananukukeni 'ɨimari.
MAT 9:26 Hikɨ mɨpaɨ pɨtiutamariwaxɨ mɨkɨ kwieyaritsie naitsarie.
MAT 9:27 Merikɨtsɨ kepauka Ketsutsi mana mɨyetɨa, yuhutatɨ memɨkaheuneniere mekanenukuweiya, mɨpaɨ mete'uhiwatɨ: —Ketaneutinenimayata, Rawiri pemɨnu'aya.
MAT 9:28 Kiita heutahaku mɨkɨ, memakɨkɨpe 'ahurawa mekaniukɨne, Ketsutsi mɨpaɨ katiniwarutahɨawe: —¿Yuri xete'erie kename neyɨwe? Mɨkɨ mɨpaɨ metenitahɨawe: —Huu, Ti'aitame.
MAT 9:29 Hikɨ kaniwaramayɨaxɨani wahɨxita, mɨpaɨ 'utaitɨ: —Xehetsie yaketiuyɨni yuri kexemɨte'erie.
MAT 9:30 Hikɨ meheunenieretɨ mekanakɨne. Peru memɨkatehaxaxatanikɨ Ketsutsi mɨpaɨ yemekɨ katiniwaruhɨritɨani: —Neuxei, 'ikɨ hepaɨtsita nixeime xepɨkatehaxaxatɨwani.
MAT 9:31 Peru, kepauka mɨkɨ memayekɨ, mekateniutaxata mɨkɨ hepaɨtsita naitsarie mɨkɨ kwieyaritsie.
MAT 9:32 Hikɨ mehewayekɨkakaku mɨkɨ, hetsɨana kani'atɨarieni tewi kaniuwetɨ kakaɨyari 'axamɨ'ane miwiyakai.
MAT 9:33 Hikɨ kepauka Ketsutsi kakaɨyari 'axamɨ'ane manuyenɨ'a, mɨkaniuwekai kaniutaniuni. Teɨteri mekanihɨxiyakaitɨni mɨpaɨ me'utiyuatɨ: «Hatsuaku mɨpaɨ tepɨkatenenieriwawe 'Ixaheri kwieyaritsie».
MAT 9:34 Peru paritseutsixi mɨpaɨ mekaniutiyuanekaitɨni: «Mɨkɨ kakaɨyarixi 'axamemɨ'anene tiwa'aitɨwame 'iparewiekaku kaniwarayenɨ'awani kakaɨyarixi 'axamemɨ'anene».
MAT 9:35 Merikɨtsɨ Ketsutsi naitsarie kiekaritetsie 'emɨyeyeutsie meta 'etsimɨyeyeutsie kanikuyeikakaitɨni tukiteta tiku'ɨkitanetɨ, niuki 'aixɨa manuyɨne taheima mieme kuxatatɨ, 'aixɨa meteheu'eriekame warayeitɨwatɨ naime kwiniyakɨ meta naime kememɨte'uka'eniwakai.
MAT 9:36 Hikɨ teɨteri yumɨireme waxeiyatɨ, kaniwarutinenimayata, yuxaɨtame memu'uwakaikɨ meta metaxɨrietɨkaitɨ muxatsi yɨhɨweme memɨkahexeiya wahepaɨ.
MAT 9:37 Hikɨ mɨpaɨ katiniwarutahɨawe yuhetsɨa miemete teyɨ'ɨkitɨwamete: «'Itsanari pɨwaɨkawa, peru 'itsanamete mepɨkayumɨire.
MAT 9:38 'Ayumieme xekeneutawawiri 'itsanari kutsiyari, 'itsanamete mɨwatanɨ'anikɨ yu'itsanarita».
MAT 10:1 Merikɨtsɨ teyɨ'ɨkitɨwamete yuhetsɨa miemete warukuxeɨrieka tamamata heimana huta, heitserie kaniwarupitɨani kakaɨyarixi 'axamemɨ'anene wahepaɨtsita memɨwaranuyenɨ'awanikɨ, meta 'aixɨa meteheu'eriekame memɨwarayeitɨwanikɨ naime kwiniyakɨ meta naime titakɨ memɨte'uka'eniwakai.
MAT 10:2 'Ikɨ nɨ'ariekate tamamata heimana huta mɨpaɨ mekatenitetewaka: Tsimuni meri Pekuru mɨtitewakai, meta 'iwaya 'Atɨrexi, Kakuwu meta 'iwaya Wani, mɨkɨ Tsewereu memɨniwemamatɨkai,
MAT 10:3 Peripe meta Wariturume, Tumaxi meta Mateu kuwiyexinutsie mieme tiwawame mɨhɨkɨtɨkai, Kakuwu 'Aripeu nu'aya, Reweu titewatɨ Tareu mɨtitewakaitatsiere,
MAT 10:4 Tsimuni (yuteɨterima wahetsie munuakai), meta Kura 'Itsikariutitanaka 'arike Ketsutsi mɨyetua.
MAT 10:5 Merikɨtsɨ Ketsutsi kaniwareutanɨ'axɨani tamamata heimana huta mɨpaɨ tiwaruta'aitɨaka: «Memɨkatateɨterima wahuyeta xepɨkaheuhuni meta Tsamariyatari wakiekaritetsie xepɨkaheutahakeni,
MAT 10:6 matsi muxatsi memeuyexɨrie wahetsɨa xekenehu, 'ixaheritsixi teɨteriyari wahetsɨa.
MAT 10:7 Tsepa hakewa xemekɨ, 'ikɨ niuki xekenekuxatani: “Kanaye'aximeniri kemɨ'ane taheima mɨti'aita 'enata mitsutɨani ti'aitatɨ”.
MAT 10:8 Tekwikwikate 'aixɨa meteheu'eriekame xekeniwarayeitɨwani, mɨkite xekeniwaranutanieritɨwani, xekeniwa'itieka mɨkɨ nawi kwiniyayari memexeiyatɨka, xekeniwarayenɨ'awani kakaɨyarixi 'axamemɨ'anene. Tita xeme xekawiyarietɨ xemɨteyetuiriyarie, xemeta xekateyuwiyatɨ xeketeneyetua.
MAT 10:9 Xepɨkahei'ɨweni huru, nipɨrata, nikuwɨre tuminiyari yutumini manameta.
MAT 10:10 Kɨtsiuri xepɨkahehuruwani huyeta mieme, huta kamixayari xepɨkahehuruwani, kakai xepɨkahe'ɨweni, meta 'itsɨ xepɨkahe'ɨweni, karikɨ ti'iwame heitserie kanexeiyani 'ikwai mɨmikienikɨ yu'iwarika.
MAT 10:11 »Kiekaritsie kepauka xemeutahaxɨani 'amɨyewatsie yatɨni 'etsimɨyewatsie, xekenekuwawa kemɨ'ane mana meka 'aixɨa mɨtiuka'iyari, hetsɨana xekeneyuhayewani 'atsita kepaukake xemɨyehu.
MAT 10:12 Kiita xeheutahaxɨaximetɨ waɨritsika xekenewapitɨaka kiekatari.
MAT 10:13 Xɨka kiekatari 'aixɨa mete'u'iyarini, xewaɨritsika keyuhayewani wahetsie, mexɨka 'aixɨa mekate'u'iyarini, xewaɨritsika ke'akunuani xehetsie.
MAT 10:14 Kemɨ'ane mɨkaxetanaki'erieni, kemɨ'ane mɨkayuwaɨriya xeniuki mɨ'enienikɨ, kiita xewayekɨneme yatɨni mɨkɨ kiekaritsie, tumuanari xekeneukatsixɨa yu'ɨkatetsie,
MAT 10:15 Yurikɨ mɨpaɨ nepɨxerahɨawe, tukari 'aye'ayu kepauka 'itsɨkame mɨwatahɨawe, Tsurumatari meta Kumuxatari 'etsiwa xeikɨa mekatenikwinitɨariekuni, peru mana kiekatari waɨkawa matsi mekatenikwinitɨariekuni.
MAT 10:16 Neri nepɨxeheutanɨ'axɨa muxatsi wahepaɨ 'ɨrawetsixi watsata. 'Ayumieme, xeketenemaiwaweni kuterixi wahepaɨ, peru xepɨka'inɨka tita 'axamɨti'ane kukuruxi wahepaɨ.
MAT 10:17 »Xekeneyukweriwayurieka teɨteri wahepaɨtsita, mɨkɨ mekanixeyetuakuni yu'itsɨkate wahetsɨa meta mepɨxetiwani yutukiteta.
MAT 10:18 Kuwexinaruritsixi meta te'aitamete wahɨxie xekananuhapaniekuni nehetsɨa xemɨmiemetekɨ, mɨpaɨ xe'itɨarietɨwetɨ xekaniwatahekɨatsitɨiyakuni mɨkɨ meta hipame memɨkatateɨterima.
MAT 10:19 Peru, kepauka memɨxetiwiya, xepɨkayu'iyaritɨaka kexemutiyuaneni hepaɨtsita meta kehapaɨ xemɨtewakɨhɨaweni. 'Anake yaxekatenipitɨariekuni kexemutiyuaneni,
MAT 10:20 xemetsɨ xepɨkahɨkɨtɨni kemɨ'ane yamɨtayɨni 'ana, matsi xe'ukiyari 'Iyarieya kanihɨkɨtɨkamɨkɨ kemɨ'ane mɨtaniuni xekuyuitɨwatɨ.
MAT 10:21 »'Iwamarixi xewitɨ yu'iwa kaniyetuamɨkɨ mɨmierienikɨ, meta nuariekame yuniwe kaniyetuamɨkɨ. Tɨɨri mekaniyeha'akuni yupaapama wahepaɨtsita meta mekatenita'aitakuni memɨkwi'iwakɨ.
MAT 10:22 Yunaitɨ mekanixe'uxiwe'eriekakuni nehetsɨa xemɨmiemetekɨ, peru kemɨ'ane tiuka'eniwatɨ 'amuyeikani heutipareyuke, mɨkɨ kanitawikweitsitɨariemɨkɨ.
MAT 10:23 Kepauka xemayeweiyarieni xeime kiekariyaritsie, xeimetsie pɨtata xekeneyuta'una. Yurikɨ mɨpaɨ nepɨxerahɨawe, kiekarite 'Ixaheri kwieyaritsie miemetetsie xeka'ayenɨwawekaku nepunuani, Yuri Tewi kenemɨtihɨkɨ.
MAT 10:24 »Tiyɨ'ɨkitɨwame pɨkamariwe keyuri ti'ɨkitame, meta ti'uximayatame pɨkamariwe keyuri kutsiyarieya.
MAT 10:25 'Aixɨa kani'aneni xɨka tiyɨ'ɨkitɨwame ti'ɨkitame hepaɨ 'anetɨ 'ayani xeikɨa, xɨka ti'uximayatame yukutsiyari hepaɨ 'anetɨ 'ayani xeikɨa. Merikɨte, kiekame Weheritsewu xɨka tiuterɨwarieni, matsi tɨɨriyamamata kemeteterɨwarieni.
MAT 10:26 »'Ayumieme xepɨkawamakaka. Karikɨ naitɨ tita mɨti'awietsie katinahekɨarimɨkɨ, meta naitɨ tita 'awie mɨtimieme katinitamariwamɨkɨ.
MAT 10:27 Kenemɨtixekɨhɨawe tahɨkɨate yɨwikɨta, xeme mɨpaɨ xeketenekuxatani hekɨta. Tita xenakata nemɨtixekuxaxatɨwa, kii heima paitɨ xe'aka'utɨ xe'utihiwatɨ yaxekeneutiyua.
MAT 10:28 Xepɨkawamakarɨka mɨkɨ memɨyɨwawe wai memumieni xeikɨa, peru mepɨkayɨwawe 'iyari memumieni. Matsi xekenemakarɨka kemɨ'ane mɨyɨwe mika'una 'iyari meta waiyari naime tai yamɨtita'atsie.
MAT 10:29 Wikixi yuhutatɨ mepɨnanaiya xeitsenitawuyari, peru nixewitɨ mɨkɨ kwiepa pɨkakaweni xe'ukiyari yakatimaikaku.
MAT 10:30 Xemeta xekɨpate xemu'utsie mieme xexuitɨ pɨ'inɨari kemɨpaɨme.
MAT 10:31 'Ayumieme xepɨkaheumamaka, xeme matsi waɨkawa xepɨte'aye'axe keyuri yumɨiretɨ wikixi.
MAT 10:32 »Kemɨ'ane mɨyuhekɨata teɨteri wahɨxie kename nehetsɨa mieme 'utaitɨ, neta kename hetsiena netiwiya nepɨnehekɨatani ne'ukiyari taheima makawe hɨxie.
MAT 10:33 Peru kemɨ'ane matsi muyuku'imawa teɨteri wahɨxie kename nehetsɨa kamieme 'utaitɨ, neta nepuyuta'imani kename nehetsie katiwiya nepɨtayɨni ne'ukiyari taheima makawe hɨxie.
MAT 10:34 »Mɨpaɨ xepɨkateku'eriwani kename ne nenua kwiepa memɨtama 'aixɨa meteyuxeiyame nemɨwarayeitɨanikɨ. 'Aixɨa meteyuxeiyame nemɨwarayeitɨanikɨ nepɨkanua, matsi memayuye'uniekakɨ pɨta nekaninuani.
MAT 10:35 Matsi nekaninuani memɨkayu'enienikɨ »“tewi yupaapa hamatɨa, 'uka yumaama hamatɨa, wikiwame yumu'e hamatɨa,
MAT 10:36 xeme memɨxe'aye'unie, xekie kiekataritɨtɨ mekanakɨnikuni”.
MAT 10:37 »Kemɨ'ane waɨkawa mɨwanaki'erie yupaapa meta yumaama 'etsiwa netsinaki'erietɨ ne, 'aixɨa pɨka'ane mɨnetsihexeiyani. Kemɨ'ane waɨkawa minaki'erie yuniwe 'uki yatɨ 'uka 'etsiwa netsinaki'erietɨ ne, mɨkɨta 'aixɨa pɨka'ane mɨnetsihexeiyani.
MAT 10:38 Kemɨ'ane yemekɨ mɨkayuwaɨriya 'atsita kuruxitsie mɨmierieni, tsepa nehamatɨa muyeika nehetsie tiwiyatɨ, mɨkɨta 'aixɨa pɨka'ane mɨnetsihexeiyanikɨ.
MAT 10:39 Kemɨ'ane yutukari hepaɨtsita muyu'iyaritɨa pitatɨmaiya. Peru kemɨ'ane miyetuani yutukari nehetsɨa mɨmiemekɨ, mɨkɨ tukari hexeiyatɨ payani.
MAT 10:40 »Kemɨ'ane mɨxetanaki'erieni neta pɨnetsitanaki'erieni, kemɨ'ane mɨnetsi'utanaki'eri kanitanaki'erienita 'iya mɨnetsiheyenɨ'a.
MAT 10:41 Kemɨ'ane mitanaki'eri Kakaɨyari niukameya, Kakaɨyari niukameya mɨhɨkɨkɨ xeikɨa, mɨkɨ Kakaɨyari niukameya hepaɨ pɨtipitɨarieni. Kemɨ'ane mitanaki'eri tewi heitseriemekɨ yamɨtikamie, yamɨtikamiekɨ xeikɨa, mɨkɨta tewi heitseriemekɨ yamɨtikamie hepaɨ yapɨtipitɨarieni.
MAT 10:42 Mɨkɨ tsepa memɨkamamariwawe, kemɨ'ane miharitɨani mɨkɨ xeime, tsepa xeiwatsuyari haɨtɨme xeikɨa miharitɨa, tiyɨ'ɨkitɨwame nehetsɨa mieme mɨhɨkɨkɨ, yurikɨ mɨpaɨ nepɨxerahɨawe, mɨkɨ yu'iwarika pɨkareuyehɨani pɨtipitɨarieni».
MAT 11:1 Merikɨtsɨ Ketsutsi kepauka mɨtiutahayewaxɨ tiwa'aitɨatɨ yuhetsɨa miemete teyɨ'ɨkitɨwamete tamamata heimana memuyuhuta, mana kanayeyani hipame kiekaritetsie mɨti'ɨkitanikɨta mɨtikuxatanikɨ meta.
MAT 11:2 Wani katsariyanata kanayewekaitɨni, tiutamarieka Kɨritsitu kemɨtiyurienekai, kaniwarutanɨ'ani yuhetsɨa miemete teyɨ'ɨkitɨwamete,
MAT 11:3 mɨpaɨ memɨte'ita'iwawiyakɨ: —¿'Ekɨ petihɨkɨ kemɨ'ane 'umamienikekai, nutsu xeime 'akuxi tepɨtakwewieka?
MAT 11:4 Ketsutsi mɨpaɨ katiniwaruta'eiya: —Xekenehu, xeketenetaxatɨa Wani tita xemɨte'u'eni tita xemɨte'uxei hepaɨtsita:
MAT 11:5 Memɨkaheuneniere meheunenieretɨ kememɨte'akɨka, huriekate kememɨte'anuku'uwe, mɨkɨ nawi kwiniyayari memexeiya me'itiyatɨ kememɨte'akɨka, memɨkaheu'enana meheu'enanatɨ kememɨte'akɨka, mɨkite kememɨte'anuku'uitɨariwa, tixaɨtɨ memɨkatehexeiya niuki 'aixɨa manuyɨne kememɨtekuxaxatɨariwa.
MAT 11:6 Meta 'aixɨa kani'itɨarieka kemɨ'ane nekɨmana mɨkakunuani.
MAT 11:7 Merikɨtsɨ mehekɨneku Wani hetsɨa miemete, Ketsutsi kanitsutɨani tiwakuxaxatɨwatɨ teɨteri Wani hepaɨtsita mɨpaɨ 'utaitɨ: «¿Tita xetehekuxei makumawetsie? ¿Haka 'ekakɨ 'uyuaneme xeteheku'ixɨari? Tixaɨ xɨari.
MAT 11:8 ¿Kamɨtsɨ tita xeteheku'ixɨari? ¿Xiku 'ixuriki mɨyumeni manakatɨkɨ xetehekuxei? Nekatixaɨtsietɨ. Matsi mɨkɨ mɨyumemeni memanakatɨkɨ te'aitamete wakiita mepayetei.
MAT 11:9 Kamɨtsɨ, ¿tita yemekɨ xeteheku'ixɨari? ¿Kakaɨyari niukameya xeteheku'ixɨari? Huu, mɨpaɨ nepɨtixekɨhɨawe, Kakaɨyari niukameya xepekuxei, yemekɨ Kakaɨyari niukameya keyuri hipatɨ.
MAT 11:10 'Ikɨ kanihɨkɨtɨni 'utɨarika hepaɨtsitana mɨpaɨ maine: »“Kamɨ, ne neniuki tuayame nekananunɨ'amɨkɨ 'ahɨxie paitɨ, mikuha'aritɨanikɨ 'ahuye pekanuawekaku 'akuxi”.
MAT 11:11 Yurikɨ mɨpaɨ nepɨxerahɨawe, 'akuxi pɨkatinuiwawe nixewitɨ Wani Ti'ɨyame hepaɨ timariwetɨ, peru matsi tewi tixaɨtɨ mɨkatihɨkɨ Kakaɨyari mɨra'aitatsie Wani reuyeta katinimariweni.
MAT 11:12 Wani Ti'ɨyame 'amɨtinua meta 'atsita hikɨ, Kakaɨyari kemɨti'aita tiuka'eniwatɨ kaniumieni 'apɨta waye'ekakaku meta wayetɨrɨkarekaku. Kemɨ'ane memɨte'ukanenewie meta yurikɨ memɨyɨa xeikɨa mepɨkɨyɨwekare hetsiena memɨtewiya.
MAT 11:13 Kakaɨyari niukametemama yunaitɨ meta 'inɨari niukiyari metenikuxatakaitɨni 'arike kemɨtiyɨnikekai 'atsita Wani munuatsie.
MAT 11:14 Xɨka xeyuwaɨriyani xemitanaki'erieni 'ikɨ neniuki, mɨkɨ Wani kanihɨkɨtɨni 'Eriyaxi 'umamiekai.
MAT 11:15 Xewitɨ netɨ mu'enaxɨ, ke'u'ena.
MAT 11:16 »¿Tita 'inɨari netitaxata hikɨ miemete teɨteri wahetsiemieme? Tɨɨri wahepaɨ mekani'aneneni kiekari hixɨapa memɨtitei memɨwahiwie yu'iwama mɨpaɨ me'utiyuatɨ:
MAT 11:17 »“Tepɨxekɨrautawiyakai, xemeta xepɨkate'ukanei. Hiwerika kwikariyari teputikwikaxɨ, xemeta xepɨka'utitsua”.
MAT 11:18 »Wani kaninuani, katikwa'atɨ meta kaye'etɨ, xemeta mɨpaɨ xeputiyuanekai: “Kakaɨyari 'axamɨ'ane kaninɨka”.
MAT 11:19 Neta Yuri Tewi nehɨkɨtɨtɨ nemunua, netikwa'atɨ meta netiye'etɨ, mɨpaɨta xeputiyuane: “'Ikɨ tewi 'ikwaikɨ xeikɨa pɨyɨane, winukɨ xeikɨa pɨyɨane, pɨwahamiku mɨkɨ kuwiyexinu hetsiemieme tewawamete meta 'axateyuruwamete”. Peru pɨmatsiɨkɨ kemɨ'ane mɨtimaiwe kemɨtiyurienekɨ».
MAT 11:20 Hikɨ kanitsutɨani warutate'atɨ teɨteri hipame kiekaritetsie kiekatari hakewa mariwemekɨ mɨreyuri mɨiremekɨ, memɨkatehayewakaikɨ kememɨteyuriekai.
MAT 11:21 Mɨpaɨ kaniutayɨni: «Xɨa'ui, Kuratsini kiekatari. Xɨa'ui Wetsaira kiekatari. Tirutsie meta Tsirunitsie xɨka mariwemekɨ tiuyɨnike kemɨtiuyɨ xehetsɨa, mana kiekatari meripaitɨri mepɨte'uhayewake kememɨteyuriekai, waɨkawa mepɨyuheiweriekakeyu maixa me'anakatɨtɨ heiwerika 'inɨariyari, naxi meyukawiriwatɨ.
MAT 11:22 Peru mɨpaɨ nepɨxerahɨawe Tiru meta Tsiruni kiekatari wahetsiemieme tukari 'aye'ayu kepauka 'itsɨkame mɨwatahɨawe 'etsiwa xeikɨa mekatenikwinitɨariekuni, peru xeme waɨkawa matsi xekatenikwinitɨariekuni.
MAT 11:23 Xemeta Kaperunaumetari, ¿muyuawitsie paitɨ xe'anuwitɨkienike xeteyu'erie? Hawaikɨ, mɨkite wahetsɨa xepeukaxɨriyani pɨta. Xɨka Tsurumatsie mariwemekɨ tiuyɨnike kemɨtiuyɨ xehetsɨa, mɨkɨ kiekari 'apukumakakeyu 'akuxi hikɨ.
MAT 11:24 Peru mɨpaɨ nepɨxerahɨawe, Tsuruma kiekatari tukari 'aye'ayu kepauka 'itsɨkame mɨwatahɨawe 'etsiwa xeikɨa mekatenikwinitɨariekuni, xeme waɨkawa matsi xekatenikwinitɨariekuni».
MAT 11:25 Merikɨtsɨ 'ana Ketsutsi mɨpaɨ kaniutayɨni: «Ne'ukiyari, taheima pemɨti'aita meta kwiepa, pamɨpariyutsi nepɨmatsipitɨa, pemɨtiuti'awietaxɨkɨ 'ikɨ naime memɨkaheitimanikɨ mɨkɨ memɨteyɨ'ɨkitɨawawe meta memɨtemaiwawe, tɨɨri pɨta wahetsiemieme matsiɨkɨme pemayeitɨakɨ.
MAT 11:26 Huu, ne'ukiyari, pepɨ'awaɨriyakai mɨpaɨ pemɨtiyurienenikɨ.
MAT 11:27 »Ne'ukiyari naime kanetiniyetuirieni. Nixewitɨ pɨka'imate Nu'aya 'Ukiyarieya xeikɨa pimate, meta nixewitɨ pɨka'imate 'Ukiyarieya Nu'aya xeikɨa pimate meta mexɨka nu'aya yuwaɨriyani matsiɨkɨme meyeitɨani peitimani 'ukiyarieya.
MAT 11:28 »Nehetsɨa xekeneu'axɨa xeme yunaitɨ xemu'u'uxe xete'uximayatɨ meta xemu'ika, ne nepɨxeka'uxipitɨani.
MAT 11:29 Neyuku xekenanuyetekani, xenetsi'enietɨ xeketeneyɨ'ɨkitɨaka, ne nepɨka'ane'eriya meta nepɨkatinekatawe'erie ne'iyaritsie, 'uxipiya xekanitaxeiyakuni yu'iyaritsie.
MAT 11:30 Neyuku 'aixɨa pɨ'ane meta ne'ika pa'exani».
MAT 12:1 Merikɨtsɨ 'ana tukaritsie Ketsutsi tɨriku ma'etsietsie kaniuyemiekaitɨni 'uxipiya tukaritsie, teyɨ'ɨkitɨwametemama meyunaitɨ. Hikɨ mepeuhakakwikukai teyɨ'ɨkitɨwamete, 'ayumieme mekanitsutɨani me'enutihurukatɨ tɨriku mɨayeyari meta me'ikwatɨ.
MAT 12:2 Hikɨ paritseutsixi mewaxeiyatɨ, Ketsutsi mɨpaɨ mekateniutahɨawe: —Neuxei. 'Ahetsɨa miemete teyɨ'ɨkitɨwamete kemɨkareuyewetse mepɨteyurie 'uxipiya tukaritsie.
MAT 12:3 Mɨkɨ mɨpaɨ katiniwarutahɨawe: —¿Kari xepɨka'ekaterɨwawawe kemɨtiuyuri Rawiri kepauka memuhakakwi mɨkɨ meta hamatɨana memu'uwakai?
MAT 12:4 Kakaɨyari kiyata kaneutahani, hikɨ mɨkɨ meta hamatɨana memu'uwakai mekanitikwani paa Kakaɨyari hɨxie mamanekai, mɨkɨ heitserie mepɨkahexeiyakai memitikwanikɨ, mawari wewiwamete xeikɨa heitserie mepexeiyakai.
MAT 12:5 ¿Mɨkɨ meta, xɨari xepɨka'ekaterɨwawawe kemaine 'inɨari niukiyari mawari wewiwamete keyamemɨkatekahu 'uxipiya tukari 'inɨariyari tukipa me'u'uwatɨ 'uxipiya tukaritsie peru wahetsie pɨkarahɨiwa mɨkɨkɨ?
MAT 12:6 Ne matsi mɨpaɨ nepɨxerahɨawe 'ena kaniuyeikani xewitɨ kwi mariwetɨ, tuki 'amɨpa kamariwekaku hepaɨna.
MAT 12:7 Xɨka xeme xe'imaikake 'ikɨ niuki mɨpaɨ manuyɨne: “Ne nepɨxewawirie xeketeneuyukanenimayaka, nepɨkaxewawirie mawari”. Xɨka xeheiti'enietɨkɨkanike, mɨkɨ 'atsimemɨkate'uyuri wahetsie xepɨkate'uhɨpanikeyu.
MAT 12:8 Karikɨ Yuri Tewi nehɨkɨtɨtɨ 'uxipiya tukari hetsie nekatini'aitani.
MAT 12:9 Hikɨ mana mɨyetɨa, tukita kaneutahani.
MAT 12:10 Hikɨ tewi muwa nayekateitɨni mamawakitɨ. Mɨkɨ mɨpaɨ Ketsutsi meteniuta'iwawiya, me'ixanetakutɨ: —¿Tiyɨwe 'uxipiya tukaritsie tikwikame 'aixɨa reu'eriekame mayeitɨani?
MAT 12:11 Mɨkɨ mɨpaɨ katiniwaruta'eiya: —Xewitɨ xeme xɨka muxa hexeiyani, xɨka 'uxipiya tukaritsie hewatixawakaku heukaweni, ¿katiwatihana? Xɨari puwatihana.
MAT 12:12 Matsi tewi kwini mieme karaye'axe, keyuri muxa. 'Ayumieme, pɨyɨwe 'aixɨa mɨtiyurieneni 'uxipiya tukaritsie.
MAT 12:13 Hikɨ mɨpaɨ tewi katiniutahɨawe: —'Amamá keneutatsera. Hikɨ mɨkɨ kanitatsera, 'ana 'aixɨa 'anetɨ kanayani yuxewitɨ tapa mieme hepaɨ.
MAT 12:14 Peru paritseutsixi mewayekɨneka mekanitsutɨani Ketsutsi hepaɨtsita metekuxatatɨ kememɨte'imienikɨ.
MAT 12:15 Kepauka Ketsutsi mɨretima, xaɨtsie kaneyani. Meta yumɨiretɨ teɨteri mekanenukuweiya, mɨkɨta yunaime tekwikwikate 'aixɨa meteheu'eriekame kaniwarayeitɨwakaitɨni,
MAT 12:16 peru kaniwaku'imaiyakaitɨni memɨka'ikuxatanikɨ kapa matsiɨkɨme meheyeitɨanikɨ.
MAT 12:17 Mɨpaɨ katinaye'ani Kakaɨyari niukameya Kitsariyaxi kemutayɨ:
MAT 12:18 «'Ikɨ neti'uximayatsiriwame kanihɨkɨtɨni, nemenayexei, neminaki'erie, hetsiena mieme nepɨnaki'a ne'iyaritsie, nekanipitɨamɨkɨ Ne'iyari, hikɨ nuiwarite katiniwataxatɨamɨkɨ tita mɨtiheitserie hepaɨtsita.
MAT 12:19 Mɨkɨ pɨkayumieneni niukikɨ meta pɨka'utahiwani, nixewitɨ pɨka'i'enieni kaye 'utɨa hiwarieya.
MAT 12:20 Haka mutapɨnarie pɨka'anumura, meta pɨka'itɨni kɨxeme witayari mɨkwauniyake, 'atsita yatiyuriemeke mɨrayu'iwakɨ tita mɨtiheitserie.
MAT 12:21 Meta mɨkɨ memɨkatateɨterima yuri mepɨteta'erieni hetsiena».
MAT 12:22 Merikɨtsɨ heiwa tewi hetsɨana kani'atɨarieni kakaɨyari 'axamɨ'ane minɨkai mɨkaheunierekai meta mɨkaniuwekai, hikɨ Ketsutsi 'aixɨa 'aneme kanayeitɨani, mɨkaniuwekai niuwetɨ kanayani meta heunieretɨ.
MAT 12:23 Yunaitɨ teɨteri mekanihɨxiyakaitɨni, meta mɨpaɨ mekaniutiyuanekaitɨni: «¿'Ikɨri Rawiri Nu'aya katihɨkɨ?»
MAT 12:24 Peru, paritseutsixi me'u'enanaka, mɨpaɨ mekaniutiyuani: «'Ikɨ kakaɨyarixi 'axamemɨ'anene puwarayenɨ'awa Weheritsewu tɨrɨkariyayakɨ, kakaɨyarixi 'axamemɨ'anene tiwa'aitɨwame».
MAT 12:25 Peru Ketsutsi wa'iyaritɨarika maitɨ, mɨpaɨ katiniwarutahɨawe: «Xɨka xeime kwieyaritsie kiekatari yuhixɨata xɨka meyutsana, mana pakumawere, meta kiekari yatɨni xeinuiwaritsixi xɨka yuhixɨata meyutsana, 'emepɨkateheutere.
MAT 12:26 Kauyumarie xɨka 'enuyenɨ'ani Kauyumarie, hixɨata kaniyutsanani yɨkɨmana. Xɨka mɨpaɨ 'aneni, pika'una yɨkɨmana hakewa mɨre'aita.
MAT 12:27 Merikɨte, xɨka ne Weheritsewu hetsie xeniu netiwiyatɨ newarayenɨ'awani kakaɨyarixi 'axamemɨ'anene, ¿xemeta xemɨtewa'ɨkitɨa kemɨ'anetsie metewiyatɨ mepɨwaranuyenɨ'awa? 'Ayumieme mɨkɨ xehetsie mepɨte'ahɨpani.
MAT 12:28 Peru xɨka Kakaɨyari 'Iyarieya hɨkɨtɨni kemɨ'ane mɨnetsiparewie nemɨwaranuyenɨ'awaniku kakaɨyarixi 'axamemɨ'anene, Kakaɨyari 'ari kanitsutɨani ti'aitatɨ xehetsɨa.
MAT 12:29 »Xɨka xewitɨ tinawamɨkɨni tewi mɨtɨrɨkaɨye tita yukiita mɨrexeiya, mɨkɨ tewi katiuhɨani meri, 'anake kaniyɨwemɨkɨ piiniteya naime mɨtiunawani.
MAT 12:30 »Kemɨ'ane nehetsie mɨkatiwiya, mɨkɨ pɨnetsi'aye'unie, kemɨ'ane nehamatɨa mɨkatiukuxexeɨriwa, mɨkɨ pitaxɨrɨwa.
MAT 12:31 'Ayumieme mɨpaɨ nepɨtixekɨhɨawe, teɨteri mepɨteheuyehɨwiyarieni naime 'axakememɨte'uyuri meta 'axakememutiyua, peru mepɨkateheuyehɨwiyarieni kemɨ'ane 'axamemutiyua 'Iyari hepaɨtsita.
MAT 12:32 Kemɨ'ane yɨkɨmɨtayɨni nehepaɨtsita, Yuri Tewi kenemɨtihɨkɨ, mɨkɨ pɨreuyehɨwiyarieni, peru kemɨ'ane 'axamɨtayɨni 'Iyari Mɨtiyupata hepaɨtsita mɨkɨ pɨkareuyehɨwiyarieni 'ena kwiepa meta 'umamietsie.
MAT 12:33 »'Iteɨri xɨka xehexeiyani 'aixɨa mɨ'ane, 'ikwaxi mexeiya 'aixɨa kani'aneni, mexɨka 'iteɨri 'axamɨ'ane hɨkɨtɨni, 'ikwaxi mexeiyata 'axakani'aneni. 'Iteɨri yu'ikwaxikɨ pɨmatsiɨkɨ.
MAT 12:34 Xeme kuterixi xepɨhɨkɨ, xeme xepɨkayɨwawe 'aixɨa xemɨtekuxatani, xeme 'axaxepɨte'u'iyari. Tita yu'iyaritsie mɨtihɨniyani, mɨpaɨ katinikuxatamɨkɨ.
MAT 12:35 Tewi 'aixɨa mɨtiuka'iyari 'ikuxeɨrieme tita 'aixɨa mɨti'ane yuhetsie, tita 'aixɨa mɨti'ane katinikuxatamɨkɨ, peru tewi 'axamɨtiuka'iyari 'ikuxeɨrieme tita 'axamɨti'ane yuhetsie, tita 'axamɨti'ane katinikuxatamɨkɨ.
MAT 12:36 Matsi yurikɨ mɨpaɨ nepɨtixekɨhɨawe, naime niuki yakɨ xeikɨa memutiniuka teɨteri, mɨkɨ hepaɨtsita mepɨtiniuni kepauka 'itsɨkame mɨwatahɨawe.
MAT 12:37 Karikɨ kepemutayɨkɨ, mɨkɨkɨ heitserie pekanipitɨariekamɨkɨ, meta kepemutayɨkɨ, mɨkɨkɨ pepanutahɨiyani».
MAT 12:38 Merikɨte 'ana hipatɨ 'inɨarikɨ te'ɨkitamete meta hipatɨ paritseutsixi, mɨpaɨ mekatenitahɨawe: —Ti'ɨkitame 'aku, tepɨmatsiheuxeiyaku 'inɨari mariweme keneuwewi.
MAT 12:39 Ketsutsi mɨpaɨ katiniwaruta'eiya: —Hikɨ miemete teɨteri 'axamemɨte'u'iyari, hipame memɨwakumaɨwa, 'inɨari mariweme mekaniku'iwawani. Peru 'inɨari mepɨkapitɨarieni, Kakaɨyari niukameya Kunatsi 'inɨarieya xeikɨa mekanipitɨariekuni.
MAT 12:40 Kunatsi ketsɨ 'amupatsie kemɨtiyekatei haika tukari haika tɨkari, mɨpaɨta yaxeikɨa Yuri Tewi kenemɨtitewa, kwieta nepɨyekani haika tukari haika tɨkari.
MAT 12:41 Niniwe hetsie kiekatari 'amepɨti'uni metetahekɨatake hikɨ miemete teɨteri wahepaɨtsita kepauka 'itsɨkame mɨwatahɨawe. Hikɨ miemete wahetsie pɨrahɨiyani 'ana, Niniwe kiekatari memɨte'uhayewaxɨkɨ kememɨteyuriekai, Kunatsi tiwarutaxatɨaku, matsi 'ena kaniuyeikani xewitɨ waɨkawa mariwetɨ keyuri Kunatsi.
MAT 12:42 Metatsiere 'uka ti'aitame Tsawa mekatei, mɨkɨ panukukeni titahekɨatake hikɨ miemete wahepaɨtsita, wahetsie pɨrahɨani 'ana, mɨkɨ meyetɨakɨ kwie manuniere paitɨ, mi'enienikɨ Tsarumuni kemɨtimaiwekai, matsi 'ena kaniuyeikani xewitɨ waɨkawa mariwetɨ keyuri Tsarumuni.
MAT 12:43 »Xewitɨ kakaɨyari 'axamɨ'ane tewi hetsie 'ayeyame, makumawetsie pɨkuyeikani 'uxipiya kuwaunetɨ, yutexienetɨ.
MAT 12:44 'Ana mɨpaɨ pɨtayɨni: “Nekie nepɨyemie nemɨwayekateitsie”. Nuame xɨka 'ixeiya 'uyemaweme waye'itiyakame 'aixɨa tiuye'aneme.
MAT 12:45 'Ana pɨyemie, hipame pɨwata'inieni kakaɨyarixi 'atahutame matsi kwini mieme 'axamemɨ'anene, meheutahaxɨame, muwa me'ayetetɨ mepakɨne yunaitɨ. 'Imatɨrieka mɨkɨ tewi matsi yemekɨ 'axa'anetɨ payani, mɨka'anekai hepaɨ matɨari paitɨ. Mɨpaɨta mekani'itɨariekuni 'ikɨ teɨteri hikɨ miemete 'axamemɨteyurie».
MAT 12:46 Ketsutsi tiwakuxaxatɨwakaku 'akuxi teɨteri yumɨireme, maamaya meta 'iwamama mekaniu'axɨani, takwa mekaniti'uni me'ihɨawikutɨ.
MAT 12:47 Xewitɨ mɨpaɨ katinitahɨawe: —Neuxei, 'amaama meta 'a'iwama takwa mekaneti'uka mematsihɨawikutɨ.
MAT 12:48 Ketsutsi mɨpaɨ katinita'eiya niukame: —¿Kemɨ'aneri pɨnemaama meta kehateri mepɨne'iwama?
MAT 12:49 Yumamá 'utatseratɨ yuhetsɨa miemete teyɨ'ɨkitɨwamete wahepa, mɨpaɨ kaniutayɨni: —Kamɨ 'ena nemaama meta ne'iwama.
MAT 12:50 Karikɨ kemɨ'ane yamɨtiyuriene kemɨtinake ne'ukiyari taheima makawe, mɨkɨ kanine'iwatɨni meta kaninemaamatɨni.
MAT 13:1 Merikɨtsɨ 'ana kiita hewayeyaka Ketsutsi, harakuna tetsita kaniukayerɨni.
MAT 13:2 Hikɨ teɨteri yumɨiretɨ mekaniuyukuxeɨrieni 'auriena, 'ayumieme kanuwatsie pɨta kanikayerɨni, mana 'atikaitɨ teɨteri xiekaripa meti'ukaku katini'ɨkitakaitɨni.
MAT 13:3 Waɨkawa katiniwaruta'ɨkitɨani 'ɨxatsi hepaɨtsita tikuxatatɨ, mɨpaɨ 'utaitɨ: «Merikɨtsɨ ti'iwiwame kanayeyani.
MAT 13:4 Merikɨtsɨ mexi 'imɨari 'iwienekaku, hipatɨ huye tetsita kaniukaxɨrieni, wikixi me'u'axɨaka mekanikuxɨni.
MAT 13:5 Hipatɨta mutetexiyatsie kaniukaxɨrieni waɨkawa mɨka'akukwieyatsie. Mɨkɨ kwitɨwa kaniutinexɨani kwie 'emɨkatsuikaikɨ,
MAT 13:6 peru, kepauka tau manatine maxɨrixɨ, kaniutiyɨnare, mɨkahananayatɨkateikɨ kaniutiwani.
MAT 13:7 Hipatɨta xuyatsata kaniukaxɨrieni, hikɨ kepauka xuya mutiwawerixɨ kanenukanani.
MAT 13:8 Matsi hipatɨta kwie 'aixɨa mɨraku'anetsie kaniukaxɨrieni, mɨkɨ putixuawerixɨ hipatɨ xeitsienituyari kanayani, hipatɨ haika tewiyari ratɨa, hipatɨ xeitewiyari heimana tamamata ratɨa.
MAT 13:9 Xewitɨ netɨ mu'enaxɨ, ke'u'ena».
MAT 13:10 Merikɨtsɨ teyɨ'ɨkitɨwamete 'ahurawa me'akɨneka mɨpaɨ metenita'iwawiya: —¿Titayari 'ɨxatsikɨ xeikɨa hepaɨtsita petikuxatatɨ teɨteri petiwa'ɨkitɨa?
MAT 13:11 Mɨkɨ mɨpaɨ katiniwaruta'eiya: —Xeme xekaniupitɨarieni xemimaikakɨ tita mɨti'awietsiekai Kakaɨyari mɨra'aitatsie timieme, peru mɨkɨ mɨpaɨ mepɨkatepitɨarie.
MAT 13:12 Kemɨ'ane tixaɨtɨ mɨrexeiya, tawari matsi pɨtimikieni, hikɨ ranayuhayewame pɨrexeiyani. Kemɨ'ane mɨkarexeiya, tsepa 'etsiwa mɨrexeiya katininawaiyariemɨkɨ.
MAT 13:13 'Ayumieme mɨkɨ nepɨtiwakuxaxatɨwa 'ɨxatsikɨ xeikɨa: »Tsepa memɨtaneniere, mepɨkaheuneniere, tsepa memɨta'enana, mepɨkaheu'enana ni mepɨkaheitimaitɨkɨka.
MAT 13:14 Wahetsie paye'atɨarie Kakaɨyari niukameya Kitsariyaxi kemutayɨ: »“Tsepa kwi xemɨta'enana, peru xepɨkaheitimaitɨkɨkani, tsepa kwi xemɨtaneniere, peru tixaɨtɨ xepɨkatexeiya.
MAT 13:15 'Ikɨ teɨteri yu'iyaritsie mepɨtsetse'i, yunakata mepeukanatɨka, meta yuhɨxita mepeunaname. Mexɨka mɨpaɨ meka'anenenike, yɨhɨxikɨ mepeunenierenikeyu, yunakakɨ mepeu'enanakakeyu, yu'iyaritsie mepɨtemaiwawenikeyu, meta mepɨtehayewakeyu ke'axamemɨteyurie, neta 'aixɨa me'aneneme nepɨwarayeitɨanikeyu”.
MAT 13:16 Xeme matsi 'aixɨa xepɨ'itɨarie xemeunenierekɨ yɨhɨxitekɨ, xemeu'enanakɨ yunakakɨ
MAT 13:17 Yurikɨ mɨpaɨ nepɨxerahɨawe, yumɨiretɨ Kakaɨyari niukametemama, yumɨiretɨ teɨteri heitseriemekɨ yamemɨtekahukai, mɨkɨ mepixeiyakukai tita xemɨtexeiya xeme, peru mepɨka'ixei, mepi'eniekukai tita xemɨte'enie, peru mepɨka'i'eni.
MAT 13:18 »Merikɨte, xekeneu'enana kemɨti'inɨari ti'iwiwame 'ɨxatsiyari:
MAT 13:19 Kemɨ'ane mi'eni 'ikɨ niuki Kakaɨyari mɨra'aitatsie mieme, peru 'atsimɨkaretimaiwe, 'axamɨ'ane nuame pinawairieni tita 'iyarieyatsie mɨtiuka'iwiya. Mɨpaɨ kani'itɨarieka huye tetsita muka'iwiya.
MAT 13:20 Makutetexiyatsie muka'iwiya, mɨkɨ kanihɨkɨtɨni kemɨ'ane mi'eni niuki, yutemawietɨ mitanaki'eri xeimieme,
MAT 13:21 peru, mɨkahananakaikɨ, 'apɨkareuterixɨ. 'Ayumieme kepauka mu'uximatɨarieni, kepauka mɨtaweiyarieni 'ikɨ niuki hepaɨtsita, hikɨ yapauka 'ikɨ niuki mɨkɨ niku'eirimɨkɨ.
MAT 13:22 Meta xuyatsata muka'iwiya, mɨkɨ kanihɨkɨtɨni kemɨ'ane mi'eni niuki, peru 'iyaritɨarika kwiepa timiemekɨ, tuminitɨarikakɨ ti'irɨwiyarietɨ, 'ayumieme mɨkɨ niuki kananukanamieni meta mɨkaxuawere pɨkapitɨarie.
MAT 13:23 Peru kwie 'aixɨa mɨraku'anetsie muka'iwiya, mɨkɨ kanihɨkɨtɨni kemɨ'ane niuki mu'eni meta meitima. Mɨkɨ niutixuxuawereni hipatɨ xeitsienituyari pakɨ, hipatɨta haika tewiyari pakɨ, meta hipatɨ xeitewiyari heimana tamamata pakɨ».
MAT 13:24 Merikɨtsɨ tawarita 'ɨkitsika kaniwayetuirieni 'ɨxatsi hepaɨtsita tikuxatatɨ, mɨpaɨ 'utaitɨ: «Kakaɨyari kemɨti'aita tewi hepaɨ kani'aneni 'imɨari 'aixɨa mɨ'anene muka'iwi yuwatsiyata.
MAT 13:25 Peru mekutsukaku te'uximayatamete, xewitɨ mana kaninuani 'eye'unietɨ, hamɨrixa 'uka'iwieka tɨrikutsata, kaneyani.
MAT 13:26 Kepauka tɨriku mutine meta mutixuawerixɨ, hikɨ 'anata matsiɨkɨtɨ kanayani hamɨrixa.
MAT 13:27 Hikɨ te'uximayatamete me'u'axɨaka yukutsiyari hetsɨa, mɨpaɨ mekatenitahɨawe: “Takutsiyari 'aku, ¿'imɨari 'aixɨa kati'anenekai pemika'iwi 'awatsiyata? Kamɨtsɨ, ¿keranexɨa hamɨrixa?”
MAT 13:28 Mɨkɨ mɨpaɨ pɨtiwaruta'ei: “Tewi xewitɨ mɨnetsi'aye'unie katineyurieni”. Te'uximayatamete mɨpaɨ metenitahɨawe: “¿Merikɨte, pekati'awaɨriya temuhu temenuyehuna?”
MAT 13:29 Mɨkɨ mɨpaɨ kaniutayɨni: “Tixaɨ, xɨka xe'enuyehuna hamɨrixa tɨriku 'ɨarime xepɨwatihunaxɨani.
MAT 13:30 Xekeneuhayewa 'axeikɨa mɨwawerenikɨ 'itsanaxake. 'Anake mɨpaɨ nepɨtiwatahɨawe 'itsanamete: Hamɨrixa meri xekeneukuxeɨri, xekenanahɨaxɨa xemititaiyakɨ, meta tɨriku xekeneuti'uta nekaxetunitsie”».
MAT 13:31 Hikɨ tawari 'ɨxatsi hepaɨtsita tikuxatatɨ 'ɨkitsika kaniwarutaxatɨani mɨpaɨ 'utaitɨ: «Kakaɨyari kemɨti'aita mutsitatsa 'imɨariyari hepaɨ kani'aneni tewi mika'e hepaɨ yuwatsiyata.
MAT 13:32 'Imɨarite pɨkaxuawe hepaɨna 'anenetɨ 'etsipepetɨ, peru kepauka mɨtineni, tupiriyate pɨkaxuawe hepaɨna 'anenetɨ 'epapatɨ, 'iteɨri payeika 'epatɨ, taheima miemete wikixi mepɨyɨwawe hetsiena memɨ'axɨani memɨyuti'ituatɨani».
MAT 13:33 Tawarita katiniwaruta'ɨkitɨani 'ɨxatsi hepaɨtsita tikuxatatɨ, mɨpaɨ 'utaitɨ: «Kakaɨyari kemɨti'aita, paa kuxanariyame hepaɨ kani'aneni, 'uka 'iwatituka nenutinɨitɨani harina tɨxiyari waɨkawametsie, hikɨ 'arike kaniutakuxanare naitɨ».
MAT 13:34 Mɨpaɨ naimekɨ Ketsutsi katiniwakuxaxatɨwakaitɨni teɨteri, 'ɨxatsi hepaɨtsita tikuxatatɨ tiwa'ɨkitɨatɨ. 'Ɨxatsi hepaɨtsita katikuxatatɨ, 'atsipɨkatiwakɨhɨawekai.
MAT 13:35 Mɨpaɨ pɨraye'a, Kakaɨyari niukameya kemutayɨ: «'Ɨxatsi hepaɨtsita netikuxatatɨ nepɨtaniuni, nepɨtitaxata tita mɨti'awietsiekai kwie munetɨarietsie paitɨ».
MAT 13:36 Hikɨ teɨteri warutateutɨaka kiita kaneutahani. Teyɨ'ɨkitɨwamete 'auriena mekaniu'axɨani, mɨpaɨ mekatenitahɨawe: —Ketaneutahekɨatsitɨiya 'a'ɨkitsika hamɨrixa watsita mieme hepaɨtsita.
MAT 13:37 Ketsutsi mɨpaɨ katiniwaruta'eiya: —Kemɨ'ane mika'iwi 'imɨari 'aixɨa mɨ'anene, Yuri Tewi kenemɨtihɨkɨ ne nekanihɨkɨtɨni.
MAT 13:38 Watsiya kwie naitɨ kanihɨkɨtɨni, 'imɨari 'aixɨa mɨ'anene, mɨkɨ mekanihɨkɨtɨni Kakaɨyari mɨra'aitatsie miemete. Hamɨrixa, mɨkɨ 'axamɨ'ane hetsɨa miemete mekanihɨkɨtɨni,
MAT 13:39 tewi kiekame maye'uniekai hamɨrixa muka'iwi, Kauyumarie kanihɨkɨtɨni. 'Itsanaxa, mɨkɨ kanihɨkɨtɨni kepauka tukari meutipare. 'Itsanamete meta niuki tuayamete mekanihɨkɨtɨni.
MAT 13:40 »Hamɨrixa kemɨtiukuxexeɨriwa kemɨtiutitaiyarɨwa taipa, mɨpaɨrita katiniyɨmɨkɨ kepauka kwie meutipare.
MAT 13:41 Yuri Tewi kenemɨtihɨkɨ, nepɨwatanɨ'ani neniuki tuayamete, mɨkɨ mepɨwakuxeɨrieni teɨteri hipame memɨwarukununuitɨwa 'axamemɨteyuriekakɨ, meta teɨteri kemɨkatiheitserie memɨteyurie.
MAT 13:42 Mɨkɨ huxunu mɨwatita'atsie mepeukaxɨriyani. Muwa meputitsuanani meta mepɨyutikeweni.
MAT 13:43 Mɨkɨ heitseriemekɨ yamemɨtekahu pɨta memamariwawetɨ mekanakɨnikuni 'ana hakewa wa'ukiyari mɨre'aita, tau kemɨtimerɨkaɨye. Xewitɨ netɨ mu'enaxɨ, ke'u'ena.
MAT 13:44 »Merikɨte Kakaɨyari kemɨti'aita waɨkawa tumini hepaɨ kani'aneni kwieta mɨ'awietsiekai hepaɨ. Tewi 'itaxeiyaka, tawari niti'awieta, hikɨ kwi yutemawietɨ heyaka, katiniutuani naime mɨrexeiyakai, hikɨ ninaneni mɨkɨ kwie.
MAT 13:45 »Metatsiere Kakaɨyari kemɨti'aita tituayame hepaɨ kani'aneni mikuwaunekai perɨra witsimɨ'anene.
MAT 13:46 Xeime perɨra hetaxeiyaka kwinie mɨraye'akai, hikɨ heyaka katinetuani naime mɨrexeiyakai, hikɨ mɨkɨ tuminiyarikɨ kaneinaneni mɨkɨ perɨra.
MAT 13:47 »Metatsiere Kakaɨyari kemɨti'aita wipi hepaɨ kani'aneni haramaratsie meukawiwiya hepaɨ, mɨkɨ ketsɨte yɨkɨ me'aneneme yutsata muwakuwiwiya.
MAT 13:48 Kepauka memutahɨnixɨ, ketsɨteweiyamete menenatihanani haramara tetsita, mana metitetɨ 'aixɨa memɨ'anene mekaniwaranuyeteɨxɨni kiriwatsie mekaniwareukaxɨrieni, meta 'axamemɨ'anene mepɨwarexɨrɨwa.
MAT 13:49 Mɨpaɨta katiniyɨmɨkɨ kepauka kwie meutipare. Niuki tuayamete mekani'axɨakuni, mekaniwaranuyeteɨxikuni 'axateyuruwamete mɨkɨ heitseriemekɨ yamemɨtekahu watsata,
MAT 13:50 huxunu mɨwatita'atsie mepɨwareukaxɨrieni, muwa meputitsuanani meta mepɨyutikeweni.
MAT 13:51 Hikɨ mɨpaɨ katiniwarutahɨawe: —¿'Ikɨ naime xeteheti'enietɨkɨ? Mɨkɨ mɨpaɨ metenitahɨawe: —Huu.
MAT 13:52 Mɨkɨ mɨpaɨ katiniwarutahɨawe: —Kemɨ'ane 'inɨarikɨ mɨti'ɨkitame kepauka yamɨretimani Kakaɨyari kemɨti'aita, mɨkɨ kii kutsiyari hepaɨ kaniyɨaneni, tita mɨtiuti'utaxɨtsata pɨtiwayepine mɨraye'atɨka mɨtihehekwa meta meripaitɨ timieme.
MAT 13:53 Kepauka Ketsutsi mɨtiutahayewaxɨ ti'ɨkitatɨ 'ɨxatsi hepaɨtsita, mana kanayeyani.
MAT 13:54 Hikɨ yukiekaritsie nuaka, tiniwa'ɨkitɨakaitɨni watukita. Mɨkɨ mekanihɨxiyakaitɨni, mɨpaɨ mekaniutiyuanekaitɨni: —¿'Ikɨ hakewa pɨretima mɨyamɨtimaiwe, meta tɨrɨkaɨyemekɨ kemɨtiyuriene?
MAT 13:55 ¿'Ikɨ kɨyekɨ mɨreutawewiwe katinu'aya? ¿Maamaya Mariya katitewa, 'iwamama Kakuwu, Kutse, Tsimuni meta Kura mekatehɨkɨ?
MAT 13:56 ¿'Iwamama 'ukari yunaitɨ 'ena mekatetitei tahetsɨa? ¿Kamɨtsɨ hakewa pɨretima 'ikɨ naime kemɨtiyuriene?
MAT 13:57 Mepɨkayɨwawekai yuri memɨte'i'eririekakɨ. Peru Ketsutsi mɨpaɨ katiniwarutahɨawe: —Kakaɨyari niukameya naitsarie we'eme kani'eriwani, peru yukwiepa meta yukie mariweme pɨka'eriwa.
MAT 13:58 Hikɨ mana waɨkawa mamariwaweme pɨkatiuyuri, mɨkɨ yuri memɨkate'eriekaikɨ.
MAT 14:1 Merikɨtsɨ kuwexinaruri Herurexi kanihɨritɨariekaitɨni Karereya kwieyari. Hikɨ kaniu'ena Ketsutsi hepaɨtsita kemɨraniuwakai,
MAT 14:2 mɨpaɨ katiniwarutahɨawe memiparewiekai: «Wani Ti'ɨyame kanihɨkɨtɨni, 'umɨka panukuke, 'ayumieme tɨrɨkariya kanexeiyani mariwemekɨ mɨtiyurienenikɨ».
MAT 14:3 Mɨkɨ Herurexi yatiuta'aitaku meripaitɨ, kaniuwiyarieni Wani. Kanihɨani meta kanenutahɨani katsariyanata, mɨpaɨ mɨtinakekaikɨ Heruriya, yu'iwa 'ɨyaya Peripe.
MAT 14:4 Meripaitɨ Wani kawiyariewetɨ 'akuxi, mɨpaɨ Herurexi katiniutahɨawe: «Pɨkayɨwe pemewitɨkɨni, 'inɨari niukiyari mɨpaɨ paine».
MAT 14:5 Herurexi Wani pɨmiemɨkɨkai, peru teɨteri pɨwamakarɨkai, kename Kakaɨyari niukameya hɨkɨtɨkai memɨteku'eriwakaikɨ.
MAT 14:6 Merikɨtsɨ Herurexi kepauka mutinuiwaxɨ 'ixɨarariyari wewiekaku, Heruriya niweya 'ukatɨtɨ katiniutineini wahɨxie, pinakixɨ Herurexi,
MAT 14:7 'ayumieme yurikɨ kaniyɨhɨritɨani, kename tita mɨtitawawirienike timinikekai.
MAT 14:8 'Iya maamaya yatitahɨaweku, mɨpaɨ katinitahɨawe: «Wani Ti'ɨyame mu'uya keneneu'ɨitɨa hikɨ xakɨtsie yekaime».
MAT 14:9 Hikɨ ti'aitame waɨkawa kaniuyukahiwerieni, peru mɨyɨhɨritɨakaikɨ teɨteri hamatɨana memɨtekwakai wahɨxie, katiniuta'aita mɨkɨ mɨtiyetuiriyarienikɨ,
MAT 14:10 hikɨ katiniutanɨ'ani Wani mu'uya manutixitekienikɨ katsariyanata.
MAT 14:11 Mu'uya kani'atɨarieni xakɨtsie yekaitɨ, hikɨ 'ɨimari kaniyetuiriyarieni, mɨkɨta yumaama kaniyetuirieni.
MAT 14:12 Hikɨ Wani teyɨ'ɨkitɨwametemama me'u'axɨaka meneikweni kaxarieya, mekanikateuku. 'Arike mekanekɨne Ketsutsi mekateniutaxatɨani.
MAT 14:13 Merikɨtsɨ Ketsutsi mɨkɨ tiutamarieka, kaneyani kanuwatsie kayerɨka makumawetsie paitɨ yuxaɨta. Teɨteri mete'utamarieka, yɨ'ɨkama mekanekɨne mekanenukuweiya yukiekaritetsie meyekɨneka.
MAT 14:14 Hikɨ kepauka Ketsutsi manatitɨa kanuwatsie, teɨteri kaniwaruxeiya yumɨireme, hikɨ kaniwarutinenimayata, 'aixɨa meteheu'eriekame kaniwarayeitɨani memɨtekukuyekai.
MAT 14:15 Hikɨ tau 'akayunirɨmekaku teyɨ'ɨkitɨwamete 'auriena mekaniuyukuxeɨrieni, mɨpaɨ me'utiyuatɨ: —'Ena kanakumaweni, kananukayaniri memɨtekwanikekai. Keniwarutateutɨari teɨteri, kiekaritetsie memɨtayeixɨanikɨ, 'ikwai memɨteheyutinanairienikɨ.
MAT 14:16 Ketsutsi mɨpaɨ katiniwaruta'eiya: —Pɨkaheuyewetse memɨyehukɨ. Xeme pɨta xeketeniwarumikwa.
MAT 14:17 Mɨkɨ mɨpaɨ mekatenita'eiya: —Ketɨri 'ena tixaɨtɨ tepɨkatehexeiya, paa 'auxɨwime meta tsapari yuhutame xeikɨa tepɨwarexeiya.
MAT 14:18 Mɨpaɨ katiniwarutahɨawe Ketsutsi: —'Ena nehetsɨa xeketenatua.
MAT 14:19 Hikɨ katiniwaruta'aitɨani teɨteri memɨkuyaxixɨanikɨ 'ɨxapa, paa 'auxɨwime 'anu'ɨka meta tsapari meyuhutame, taheima heutinieretɨ pamɨpariyutsi Kakaɨyari kaniupitɨani. Hikɨ paa 'utitaraka kaniwaru'ɨitɨani teyu'ɨkitɨwamete, mɨkɨta mekaniwaruta'ɨitɨani teɨteri.
MAT 14:20 Yunaitɨ mekateniukwani mekaniutihuxani, hikɨ teyu'ɨkitɨwamete mekanikuxeɨrieni tarimeyari muyuhayewaxɨ, mekanitihɨniya tamamata heimana huta tsikɨiwitiyari.
MAT 14:21 Memɨte'ukwai 'ukitsi 'auxɨwime miriyari yakɨtɨtɨ mekaniyupaɨmekaitɨni, meka'inɨaritɨ 'ukari meta tɨɨri.
MAT 14:22 Hikɨ Ketsutsi teyɨ'ɨkitɨwamete kaniwarutamexɨitɨani kanuwatsie memɨkayaxekɨ mɨkɨ meri memɨyehukɨ 'anutaɨye paitɨ, mexi mɨkɨ teɨteri wateutɨanekai.
MAT 14:23 'Arike warutateutɨaka teɨteri, yemuritsie kaneutiyune yuxaɨta yutanenewienike. Hikɨ kaniukuyɨre mana 'ukaiku yuxaɨta,
MAT 14:24 meta kanuwa haa hixɨapa paitɨri kaniuyemiekaitɨni, hamewari kanenutawayakaitɨni, hepana meuye'ekakaikɨ.
MAT 14:25 Merikɨte 'etsiwatɨkaku kahekɨarirɨmekaku, wahepa kanamiekaitɨni Ketsutsi haa heima 'umietɨ.
MAT 14:26 Kepauka teyɨ'ɨkitɨwamete memixei haa heima 'amieme, waɨkawa mekaniutimamani, marikakɨ mɨpaɨ mekateniuhiwa: —Mɨki pɨyɨane.
MAT 14:27 Peru kwitɨwa Ketsutsi mɨpaɨ katiniwarutahɨawe: —Kayuwatɨ xeketeneuyaxi. Ne nepɨyɨane. Xepɨkamamaka.
MAT 14:28 Hikɨ Pekuru mɨpaɨ katinita'eiya: —Ti'aitame, xɨka 'ekɨ peyɨaneni, kenetineuta'aitɨa mana nemɨmiekɨ 'ahetsɨa, haa heima ne'umietɨ.
MAT 14:29 Ketsutsi mɨpaɨ kaniutayɨni: —Kenaye'a. Pekuru kanuwatsie kananatiyani, hikɨ haa heima kaniumiekaitɨni Ketsutsi hepa.
MAT 14:30 Peru, kepauka 'eka mɨ'eni kemɨtitɨrɨkaɨyekai, kaniutimani, 'ana kanitsutɨani kayunirɨmetɨ. Hikɨ mɨpaɨ katiniuhiwa: —Ti'aitame, keneneutawikweitsitɨa.
MAT 14:31 Hikɨ Ketsutsi yumamakɨ 'iwiyaka, mɨpaɨ katinitahɨawe: —'E'e, kari 'ekɨ 'etsiwa xeikɨa yuri pepɨti'erie. ¿Titayari peti'a'iyaritɨakai?
MAT 14:32 Kepauka kanuwatsie memɨkayaxixɨ 'eka kaneunuani.
MAT 14:33 Mɨkɨ kanuwatsie memɨyetekai hɨxiena metitunuma'utɨ mɨpaɨ mekatenitahɨawe: —Yurikɨ Kakaɨyari nu'aya 'ekɨ pekanihɨkɨtɨni.
MAT 14:34 Hikɨ 'anutaɨye meheutanexɨaka, Kenetsareti kwieyaritsie mekaniye'axɨani.
MAT 14:35 Mana kiekatari Ketsutsi mekanetimani, hikɨ niuki mekaneutanɨ'axɨani yu'aurie kiekatari yunaime wahetsɨa. Mekani'atɨiriwakaitɨni tekwikwikate yunaime,
MAT 14:36 waɨkawa me'iwawirietɨ muwapitɨakakɨ tsikere 'ixurikieya tetsimeyaritsie memimayɨanikɨ, yunaitɨ kemɨ'ane memimayɨa 'aixɨa meteheu'erietɨ mepakɨkakai.
MAT 15:1 Merikɨtsɨ 'ana Ketsutsi hetsɨa mekaniu'axɨani paritseutsixi meta 'inɨarikɨ memɨte'ɨkitametetɨkai, Kerutsareme memeyekɨnekai, mɨpaɨ mekatenita'iwawiya:
MAT 15:2 —¿Titayari 'ahetsɨa miemete teyɨ'ɨkitɨwamete yamekatekahu yututsima wayeiyaritsie? Mepɨka'ukamaimawa kepauka memɨte'utikwa'a.
MAT 15:3 Ketsutsi mɨpaɨ katiniwaruta'eiya: —¿Titayarita xeme yaxekateyurie Kakaɨyari kemɨti'aita, yuyeiyaritsie xetewiyatɨ?
MAT 15:4 Kakaɨyari mɨpaɨ katiniuta'aita: “Yaketinekamieni kememaitɨka 'apaapa meta 'amaama”, metatsiere: “Kemɨ'ane 'axamutaineni yupaapa meta yumaama wahepaɨtsita, ke'umierieni”.
MAT 15:5 Xemeta, 'apɨta, mɨpaɨ xekateni'ɨkitani kename xewitɨ yɨwe mɨpaɨ mɨtitahɨawe yupaapa yatɨni yumaama: “Nepɨkayɨwe nemɨmatsi'uparewieni, naime nemɨrexeiya Kakaɨyari nemɨtiyetuirikɨri”.
MAT 15:6 Merikɨte kemɨ'ane mɨpaɨ mɨtayɨni, waɨriyarika pɨkapitɨarieri yupapama muwaparewienikɨ. Mɨpaɨ yuyeiyari xete'uweiyatɨ tixaɨtɨ katihɨkɨtɨme xepayeitɨa Kakaɨyari niukieya.
MAT 15:7 Xemɨte'itawamete. Kitsariyaxi 'aixɨa putayɨ tihekɨatatɨ xehepaɨtsita, mɨpaɨ 'utaitɨ:
MAT 15:8 »“'Ikɨ teɨteri yutenikɨ xeikɨa 'aixɨa meputiyuane nehepaɨtsita, peru wa'iyari 'ateewa puyeika.
MAT 15:9 Yakɨ xeikɨa mekanenayexeiyani, tita memɨte'ɨkita teɨteri wa'aitsika xeikɨa pɨhɨkɨ”».
MAT 15:10 Merikɨtsɨ Ketsutsi yu'aurie waruta'inieka teɨteri, mɨpaɨ katiniwarutahɨawe: —Xekeneu'enana meta xeketenemaiwaweni.
MAT 15:11 Tita ka'itiyakame tewi mɨrayeitɨwa, tetana mɨranukayeikakɨ mɨkɨkɨ 'axapɨka'itɨarieni. Matsi tita tetana mɨratineikakɨ, mɨkɨkɨ pɨta ka'itiyatɨ payeika.
MAT 15:12 Hikɨ teyɨ'ɨkitɨwamete 'ahurawa me'ukɨneka mɨpaɨ mekatenitahɨawe: —¿Mɨpaɨ petimate, paritseutsixi 'aniuki me'u'enieka mɨkawarunakixɨ?
MAT 15:13 Mɨkɨ mɨpaɨ katiniwaruta'eiya: —Naitɨ 'iteɨri ne'ukiyari taheima makawe mɨka'ika'e pɨwatihunaxɨani.
MAT 15:14 Xekeniwahayewani, me'akɨkɨpetɨ mepɨwarahapana hipame. 'Akɨpetɨ xeime makɨpe xɨka hehana, yuhutatɨ mewatixawatsie meneukaxɨriekuni.
MAT 15:15 Hikɨ Pekuru mɨpaɨ katinitahɨawe: —Ketaneutahekɨatsitɨiya 'ikɨ 'ɨkitsika.
MAT 15:16 Ketsutsi mɨpaɨ katiniwarutahɨawe: —Kari xemeta 'atsixepɨkatemate.
MAT 15:17 Tamɨ tita teta mɨranukayeika yuriepa nikayuyuipikeni, 'ariketa kanihɨamɨkɨ.
MAT 15:18 Peru tita teta mɨrayeneika 'iyaritsie patineika, mɨkɨkɨ tewi 'axakani'itɨarieka.
MAT 15:19 Karikɨ 'iyaritsie katinatineikani 'axa'iyaritɨarika, xeime kemɨtiumieni, xeime kemɨtiukumayɨani kayɨ'ɨya kayɨkɨna, kememɨteyukumaɨwa teɨteri kemɨkatiheitserie, 'inawari, 'itarika meta 'axaniuki hipame wahepaɨtsita.
MAT 15:20 'Ikɨ katinihɨkɨtɨni tewi ka'itiyakame memayeitɨwa, xɨka tiukwani kamaimatɨ mɨkɨkɨ tewi ka'itiyatɨ pɨkahayeika.
MAT 15:21 Merikɨtsɨ mana mɨyetɨa Ketsutsi, kaneyani Tiru kwieyaritsie meta Tsiruni.
MAT 15:22 Hikɨ mana 'uka Kanani kiekame, mɨkɨ kwieyaritsie heyeyaka, hepana kaniuyani mɨpaɨ 'utaitɨ: —Kenenenenimayaka, Ti'aitame, Rawiri pemɨnu'aya. Neniwe 'uka waɨkawamekɨ pɨtiuka'eniwa, kakaɨyari 'axamɨ'ane 'inɨkaku.
MAT 15:23 Peru Ketsutsi pɨka'ita'ei. Hikɨ 'ahurawa me'akɨneka teyɨ'ɨkitɨwamete, mɨpaɨ mekatenitahɨawe: —Kenanunɨ'a, pɨtatsi'uweiya xeikɨa 'utahiwatɨ.
MAT 15:24 Ketsutsi mɨpaɨ kaniutayɨni: —Ne Kakaɨyari muxatsimama memeuyexɨri wahetsɨa xeikɨa nekaneyenɨ'arieni, 'ixaheritsixi teɨteriyari wahetsɨa.
MAT 15:25 'Uka 'ahurawa 'ayaka kaniutihɨximakeni hɨxiena, hikɨ mɨpaɨ katinitawawirieni: —Ti'aitame 'aku, keneneuparewi.
MAT 15:26 Mɨkɨ mɨpaɨ katinita'eiya: —'Aixɨa pɨka'ane xɨka yuniwema paa warunawairieni, tsɨikɨri pɨta xɨka warumini.
MAT 15:27 'Uka mɨpaɨ katinitahɨawe: —Yuri peputaine Ti'aitame, peru 'atsita tsɨikɨri temɨxikiyari mepukukwa'a wakutsiyarima wamexatsie manakawiwike.
MAT 15:28 Hikɨ Ketsutsi mɨpaɨ katinita'eiya: —'Uka 'aku, waɨkawa yuri pepɨti'erie. Yakereyɨni tita pemɨra'iwawa. Hikɨ 'ana kwitɨwa 'aixɨa reu'erietɨ kanayani nu'aya.
MAT 15:29 Merikɨte Ketsutsi mana kaniyeyani, hikɨ Karereya harakunayari tetsita paitɨ kaninuani. Mana yemuritsie kanitiyune mana kanayerɨni.
MAT 15:30 Hikɨ hetsɨana mekaniu'axɨani yumɨiretɨ teɨteri, mekaniwa'atɨani memɨ'ɨkatetutuni, memɨkaheuneniere, memɨwaritutuni, memɨkaniuwawe meta hipame tekwikwikate, hɨxiena mekaniwa'atɨani, mɨkɨta 'aixɨa meteheu'eriekame kaniwarayeitɨani.
MAT 15:31 Hikɨ teɨteri mekanihɨxiyakaitɨni mewaxeiyatɨ memɨkaniuwawekai me'utiniukame, memɨwaritutunikai 'aixɨa me'aneneme, memɨ'ɨkatutunikai meku'uwame, meta memɨkaheunenierekai meheuneniereme mewaxeiyatɨ. 'Aixɨa mekaniutiyuanekaitɨni 'ixaheritsixi yukakaɨyari hepaɨtsita.
MAT 15:32 Hikɨ Ketsutsi yu'aurie waruta'inieka yuhetsɨa miemete teyɨ'ɨkitɨwamete, mɨpaɨ katiniwarutahɨawe: —Ne 'ikɨ teɨteri nepɨwareunenimaya, haika tukari mekaniyuriekari nehetsɨa meta 'ikwai mepɨkahexeiya. Nepɨkanewaɨriya mekatekwakame nemɨwarutateutɨani, kapa mehetiweranaxɨame mehekaxɨrieni huyeta.
MAT 15:33 Hikɨ teyɨ'ɨkitɨwamete mɨpaɨ mekatenita'eiya: —¿'Ena makumawetsie hakewa tepeikaxeiya paa mɨyapaɨmeme temɨtewaminikɨ teɨteri mɨyameyupaɨmeme?
MAT 15:34 Ketsutsi mɨpaɨ katiniwaruta'iwawiya: —¿Kepaɨmeme paa xepexeiya? Mɨkɨ mɨpaɨ mekaniutiyuani: —'Atahutame, meta tsapari yayupaɨmeme 'etsimepepeme.
MAT 15:35 Hikɨ katiniuta'aita teɨteri 'amemukuyaxixɨanikɨ kwiepa.
MAT 15:36 Paa 'atahutame 'anu'ɨka meta tsapari, pamɨpariyutsi Kakaɨyari kaniupitɨani, hikɨ kanititara paa meta kaniwayetuirieni teyɨ'ɨkitɨwamete. Mɨkɨta teyɨ'ɨkitɨwamete teɨteri mekaniwaruta'ɨitɨani.
MAT 15:37 Yunaitɨ mekateniukwani yemekɨ mekaniutihuxani. 'Arike teyɨ'ɨkitɨwamete mekanikuxeɨrieni tarimeyari muyuhayewaxɨ, 'atahuta tsikɨiwitiyari hɨpɨnetɨ patɨa.
MAT 15:38 Memɨte'ukwai 'ukitsi nauka miriyari mekaniyupaɨmekaitɨni, 'ukari meta tɨɨri meka'inɨaritɨ.
MAT 15:39 Hikɨ warutateutɨaka teɨteri, kanuwatsie kanikayerɨni, Makarani kwieyaritsie kaneyani.
MAT 16:1 Merikɨtsɨ paritseutsixi meta tsarutseutsixi Ketsutsi 'aurie mekaniu'axɨani, me'i'inɨatakutɨ, 'inɨari mekanitawawirieni muyuawitsie mieme memixeiyakɨ.
MAT 16:2 Mɨkɨ mɨpaɨ katiniwaruta'eiya: «Taikai, xeme mɨpaɨ xeputiyuane, 'uxa'a xɨari tsipɨreu'aneni, kamɨ haiwitɨri nixuxureni,
MAT 16:3 meta ximeri mɨpaɨ xeputiyuane, kename kawiye haiwitɨri 'aheutsuye. Xeme xepimate kemɨtiyuxexeiya haiwitɨri, peru xepɨkayɨwawe xemeitimani hikɨ kenemɨtiyuriene mɨkɨ Kakaɨyari 'inɨarieya kanihɨkɨtɨni.
MAT 16:4 Hikɨ miemete teɨteri 'axamemɨteyurie meta hipame memɨwakumaɨwa, 'inɨari mepɨkuwautɨwe memixeiyakɨ, peru 'inɨari mepɨkapitɨarieni, Kunatsi 'inɨarieya xeikɨa mekanipitɨariekuni». Hikɨ Ketsutsi waruku'eirieka kaneyani.
MAT 16:5 Merikɨte harakuna 'anutaɨye mekananukɨne, peru teyɨ'ɨkitɨwamete paa memanu'ɨnikekai mekatenatɨmaiyakaitɨni.
MAT 16:6 Hikɨ Ketsutsi mɨpaɨ katiniwarayehɨtɨani: —Yumarima 'aixɨa, xekeneyɨ'ɨwiyani tiyukuxanariyame paritseutsixi meta tsarutseutsixi wahetsɨa mieme hepaɨtsita.
MAT 16:7 Mɨkɨ mɨpaɨ mekateniyutahɨawekaitɨni: «Paa temɨkaheye'ɨikɨ 'ayumieme mɨya kanaineni».
MAT 16:8 Ketsutsi retimaika kememɨteyɨtahɨawekai, mɨpaɨ kaniutayɨni: —¿Titayari niuki xetexɨatɨa paa tepɨkahexeiya xeteyɨkɨhɨawetɨ? 'Etsiwa kari yuri xepɨte'erie.
MAT 16:9 ¿'Akuxi 'atsixekatehetimaiwawe? ¿Tamɨ xekatehe'eriwa 'auxɨwime payarikɨ yu'auxɨwime miriyari memɨte'ukwai, meta kepaɨmeme kiriwayari xemekuxeɨri?
MAT 16:10 ¿Meta xekatehe'eriwa 'atahuta payarikɨ nauka miriyari memɨte'ukwai, meta kepaɨmeme kiriwayari xemekuxeɨri?
MAT 16:11 ¿Titayari 'atsixekateheitimaitɨkɨka kename ne paa nekaxatakai? Tawarita mɨpaɨ nepɨxerahɨawe: Xekeneyukweriwayurieka tiyukuxanariyame paritseutsixi meta tsarutseutsixi wahetsɨa mieme hepaɨtsita.
MAT 16:12 'Anake yamekatenetimani kename memɨyɨ'ɨwiyanikɨ paa kuxanariyame hepaɨtsita kahainekai, matsi paritseutsixi meta tsarutseutsixi wa'ɨkitsika hepaɨtsita memɨyɨ'ɨwiyanikɨ pɨta hainekai.
MAT 16:13 Merikɨte kepauka Ketsutsi Tsetsareya Piripu kwieyaritsie munua, yuhetsɨa miemete teyɨ'ɨkitɨwamete mɨpaɨ katiniwaruta'iwawiya: —¿Teɨteri keme'utiyuane nehepaɨtsita, Yuri Tewi kenemɨtihɨkɨ? Mɨkɨ mɨpaɨ mekatenita'eiya:
MAT 16:14 —Hipatɨ mɨpaɨ meputiyuane kename Wani Ti'ɨyame pehɨkɨ, hipatɨta kename 'Eriyaxi pehɨkɨ, meta hipatɨta kename Keremiyaxi pehɨkɨ, yatɨni kename xewitɨ Kakaɨyari niukameya pepɨhɨkɨ.
MAT 16:15 Hikɨ mɨpaɨta katiniwarutahɨawe: —Xemeta, ¿kexe'utiyuane kemɨ'ane nepɨyɨane ne?
MAT 16:16 Tsimuni Pekuru mɨpaɨ katinita'eiya: —'Ekɨ Kɨritsitu pekanihɨkɨtɨni, Kakaɨyari mayeniere Nu'aya.
MAT 16:17 Hikɨ Ketsutsi mɨpaɨ katinitahɨawe: —'Aixɨa pepɨ'itɨarie 'ekɨ, Tsimuni Kunatsi pemɨnu'aya, tewi mɨmɨwe pɨkamatiutahekɨatɨa, matsi ne'ukiyari taheima makawe pɨta.
MAT 16:18 Netsɨ mɨpaɨ nekamatinahɨaweni 'ekɨ Pekuru pekanihɨkɨtɨni, 'ikɨ tetetsie nepɨwatsutɨani memɨyutixexeɨriwani nehetsɨa miemete, meta mɨkɨ mepɨka'a'iwarieni tsepa memukwi'iwaxɨ.
MAT 16:19 Yawi nepɨmatsitɨkitɨani mɨreuyepiwa hakewa Kakaɨyari mɨre'aita, tita pemɨtihɨani kwiepa taheimata pehɨiyani, meta tita kwiepa pemɨtixɨna taheimata pexɨnarieni.
MAT 16:20 Hikɨ 'ana kaniwaruhɨritɨani teyɨ'ɨkitɨwamete nixeime memɨkatehaxaxatɨwanikɨ kename mɨkɨ Kɨritsitu hɨkɨtɨkai.
MAT 16:21 Merikɨtsɨ 'ana Ketsutsi kanitsutɨani yuhetsɨa miemete teyɨ'ɨkitɨwamete mɨpaɨ tiwakuxaxatɨwatɨ: «Kaneuyeweka Kerutsareme nemɨmiekɨ, meta waɨkawa nemɨtikwinekɨ ta'ukiyarima meta mawari wewiwamete tewa'aitɨwamete wahetsɨa, meta 'inɨarikɨ memɨte'ɨkitamete wahetsɨa, mana nekanimieriemɨkɨ, matsi hairieka tukari nepanukukeni».
MAT 16:22 Hikɨ Pekuru yatewa heiwitɨka kanitsutɨani 'iku'imaiyatɨ, mɨpaɨ 'utaitɨ: —Tixaɨ Ti'aitame. Mɨpaɨ pepɨka'itɨarieni.
MAT 16:23 Ketsutsi kwi 'enutaxeiyatɨ mɨpaɨ Pekuru katiniutahɨawe: —Xaɨtsie keneuye'a, Kauyumarie. Pepɨnetsikunuitɨamɨkɨ, Kakaɨyari hepaɨ pepɨkare'iyari, teɨteri wahepaɨ pɨta pepɨre'iyari.
MAT 16:24 Hikɨ Ketsutsi mɨpaɨ katiniwarutahɨawe yuhetsɨa miemete teyɨ'ɨkitɨwamete: —Xɨka xewitɨ yuwaɨriyani tiyu'ɨkitɨwame nehetsɨa mieme mayani, ketihayewani kemɨtinake yuhetsiemieme tiyurienetɨ, yukuruxi ke'utitɨni, kenetsi'uweiyani.
MAT 16:25 Kemɨ'ane yutukari mɨwikweitsitɨamɨkɨ, kanitatɨmaiyamɨkɨ, peru kemɨ'ane yutukari mɨtatɨmaiya nehetsiemieme, kanikaxeiyamɨkɨ.
MAT 16:26 Tixaɨtɨ pɨkarayeika xɨka tewi kwiepa timieme naime ra'iwa, yaxeikɨa yutukari kanitatɨmaiyamɨkɨ. Nixewitɨ pɨkayɨwe mɨtiyutuani yutukari hetsiemieme.
MAT 16:27 Yuri Tewi kenemɨtihɨkɨ, nekaninuamɨkɨ ne'ukiyari hepaɨ nemariwetɨ neniuki tuayamete wahamatɨa, hikɨ 'ana nepɨtiwarakapitɨani, yuxexuitɨ kememɨte'uyuri.
MAT 16:28 Yurikɨ mɨpaɨ nepɨxerahɨawe, hipatɨ 'ena memu'uwa mepɨkakwini Yuri Tewi menetsixeiyameke neye'akaku nemɨra'aitatsie.
MAT 17:1 Merikɨtsɨ 'ataxewi tukari 'anukayaku, Ketsutsi kaniwarewitɨni Pekuru, Kakuwu, meta 'iwaya Wani, yemuri 'emutewitsie yɨhɨkɨame.
MAT 17:2 Hikɨ mana wahɨxie yɨkɨ 'anetɨ kanayani, yuhɨxie kanayexawatɨre tau hepaɨ, meta 'ixurikieya tuxatɨ xawatɨtɨ kanayani.
MAT 17:3 Hikɨ, me'ixeiyakaku Muitsexi meta 'Eriyaxi mekaniuyuhekɨata hamatɨana mekatenikuxatakaitɨni.
MAT 17:4 Hikɨ Pekuru mɨpaɨ Ketsutsi katiniutahɨawe: —Ti'aitame, 'aixɨa kani'aneni, 'ena temu'uwakɨ tame. Xɨka mɨpaɨ matinakeni, 'ena haikame xamaru nepɨtiwewieni: 'ahetsiemieme xeime, Muitsexi hetsiemieme xeime meta 'Eriyaxi hetsiemieme xeime.
MAT 17:5 Hikɨ 'utaniukakaku 'akuxi, yapauka haiwitɨri xawatɨtɨ kaniwaranukanani, hikɨ mɨkɨ haiwitɨritsata xewitɨ kanetaniuni mɨpaɨ 'utaitɨ: «'Ikɨ kanineniwetɨni neminaki'erie, mɨkɨkɨ waɨkawa nekaniyutemawieka. Xekene'enieka».
MAT 17:6 Me'i'enieka teyɨ'ɨkitɨwamete, mekaniutihɨxima'uni kwinimieme metemamatɨ.
MAT 17:7 Ketsutsi 'aurawa 'ayaka, warutimayɨaka mɨpaɨ katiniwarutahɨawe: —Xekenanuku'uti, xepɨkaheumamaka.
MAT 17:8 Kepauka memanukunenierixɨ, Ketsutsi xeikɨa mepuxei, tawari xeime mepɨka'uxei.
MAT 17:9 Hikɨ yemuritsie me'akahutɨ, Ketsutsi mɨpaɨ katiniwaruhɨritɨani: —Nixeime xepɨkatehaxaxatɨwani kexemɨte'unenierixɨ, kepaukake Yuri Tewi kenemɨtihɨkɨ, mɨkite watsata nemanukuketɨarieni.
MAT 17:10 Hikɨ teyɨ'ɨkitɨwamete mɨpaɨ mekatenitahɨawe: —¿Mɨkɨ 'inɨarikɨ memɨte'ɨkitamete titayari mɨpaɨ mete'utiyuane kename heuyewetse 'Eriyaxi meri munuani?
MAT 17:11 Ketsutsi mɨpaɨ katiniwaruta'eiya: —Kaniyuritɨni. 'Eriyaxi meri kaninuamɨkɨ, 'aixɨa mɨtiyurienikɨ tinaime.
MAT 17:12 Matsi ne mɨpaɨ nepɨxerahɨawe, 'Eriyaxi 'ari kaninuani, peru mepɨkaheitima me'ixeiyakatɨtɨ, matsi kemɨtiwanakekai yamepiyuri. Yaxeikɨata Yuri Tewi kenemɨtihɨkɨ mɨpaɨ nepɨtikwine mɨkɨ mepɨnetekwinitɨani.
MAT 17:13 'Ana mɨpaɨ mepɨtehetima teyɨ'ɨkitɨwamete, Wani Ti'ɨyame mɨxatakaikɨ.
MAT 17:14 Merikɨtsɨ kepauka memu'axɨa teɨteri yumɨiretɨ memanu'uwatsie, xewitɨ tewi 'ahurawa kaniuyani hetsɨana, 'utitunumakeka hɨxiena, mɨpaɨ kaniutayɨni:
MAT 17:15 —Ti'aitame 'aku, neniwe keneutinenimayata. Putarɨwewe meta waɨkawa yemekɨ pɨtiuka'eniwa. Heiwa taipa kaneuwautseni heiwata hapa.
MAT 17:16 Nekaniwa'atɨirieni 'ahetsɨa miemete teyɨ'ɨkitɨwamete, peru mepuyutatexi 'aixɨa reu'eriekame memayeitɨanikɨ.
MAT 17:17 Hikɨ Ketsutsi mɨpaɨ kaniutayɨni: —Xeme hikɨ xemɨmiemete yuri xepɨkate'erie meta kemɨkatiheitserie xepɨteyurie. ¿Kepaɨmexɨa peuyewetse 'akuxi xehamatɨa nemuyeikani? ¿kepaɨmexɨa 'akuxi nepɨxenewieka? Xekenawitɨki 'ena nehetsɨa.
MAT 17:18 Ketsutsi kakaɨyari 'axamɨ'ane kaniutatieni, hikɨ mɨkɨ kanayeyani temaikɨtsie, 'anatɨtɨ 'aixɨa reu'erietɨ kanayani temaikɨ.
MAT 17:19 Hikɨ 'arike teyɨ'ɨkitɨwamete 'ahurawa mekaniukɨne Ketsutsi 'aurie, yɨhɨkɨate, mɨpaɨ mekatenita'iwawiya: —¿Titayari tame teteyutatexi te'eyenɨ'anike?
MAT 17:20 Ketsutsi mɨpaɨ katiniwarutahɨawe: —'Etsiwa xeikɨa yuri xemɨte'eriekɨ, 'ayumieme xepitatexi. Yurikɨ mɨpaɨ nepɨxerahɨawe, xɨka mutsitatsa 'imɨariyari hepaɨ 'etsipemekɨ xɨka yuri xete'eriekake, xepɨyɨwawenike mɨpaɨ xemɨte'itahɨawe 'ikɨ yemuri: “Keneu'apata huma pɨta”, mɨkɨ kaniyupatakeyu. Xehetsiemieme katiyɨwetɨ pɨtiumawenike.
MAT 17:21 Peru yunenewietɨ yuhakietɨ xeikɨa kaniyɨweni meyenɨ'anikɨ mɨpaɨ mɨ'ane.
MAT 17:22 Merikɨtsɨ meyuxeɨrietɨ Karereyatsie, mɨpaɨ katiniwarutahɨawe Ketsutsi: «Yuri Tewi kenemɨtihɨkɨ, nekaniyetuiyamɨkɨ teɨteri wahetsɨa.
MAT 17:23 Mɨkɨ mekanenimiekuni, peru hairieka tukaritsie nekananukukemɨkɨ». Hikɨ teyɨ'ɨkitɨwamete waɨkawa mekaniyuhiweriekaitɨni.
MAT 17:24 Merikɨtsɨ Ketsutsi meta teyɨ'ɨkitɨwamete kepauka Kaperunaume memu'axɨa, mɨkɨ tuki 'amɨpatsie mieme tumini memukuxexeɨriwa meniu'axɨani Pekuru hetsɨa, mɨpaɨ mekatenitahɨawe: —¿Tixe'ɨkitɨwame tuki 'amɨpatsie mieme tiyukutuaya?
MAT 17:25 Pekuru mɨpaɨ kaniutayɨni: —Huu, pɨtiyukutuaya. Hikɨ kiita heutahaku 'atsikatayɨwekaku 'akuxi, Ketsutsi meri mɨpaɨ katinitahɨawe: —¿Kepetiku'eriwa 'ekɨ Tsimuni? Te'aitamete kwiepa memɨtama, ¿kemɨ'ane mepɨwakwetatɨa 'amemɨtewarapiniriekakɨ meta memɨteyutuakakɨ: yuniwema nutsu hipame?
MAT 17:26 Pekuru mɨpaɨ kaniutayɨni: —Hipatɨ mepɨteyukutuaya. Ketsutsi mɨpaɨ katinitahɨawe: —Merikɨte, waniwema mepɨkateyukutuaya.
MAT 17:27 Peru, temɨkawahaxɨatɨakakɨ 'ikɨ teɨteri, 'ayumieme harakunatsie kenemie, mana keneukawiwi kwaitsɨ. Ke'anetɨ meri manuwiere ketsɨ, mɨkɨ kenanatihani, pehenutatetapieme mana tumini pepetaxeiya 'auxɨwime 'inɨariyari. Mɨkɨ keniwaye'ɨi meta keneyetua nehetsiemieme meta 'ahetsiemieme.
MAT 18:1 Merikɨte 'ana Ketsutsi 'aurie 'ahurawa mekaniukɨne teyɨ'ɨkitɨwamete, mɨpaɨ me'utiyuatɨ: —¿Kemɨ'ane pɨhɨkɨ matsi waɨkawa meuyewetse, Kakaɨyari mɨra'aitatsie?
MAT 18:2 Ketsutsi nunutsi kaniuta'inieni, hikɨ wahixɨapa kanitakeni.
MAT 18:3 Mɨpaɨ kaniutayɨni: —Yurikɨ mɨpaɨ nepɨxerahɨawe, xɨka xekate'uhayewa 'axaxeteyurietɨ, tɨɨri wahepaɨ xe'anenetɨ xɨka xekahakɨne, xepɨkaheutahaxɨani Kakaɨyari mɨra'aitatsie.
MAT 18:4 Kemɨ'ane yuhepaɨtsita 'atsika'utaitɨ mayuyeitɨani 'ikɨ nunutsi hepaɨ, mɨkɨ kanihɨkɨtɨkamɨkɨ waɨkawa meuyewetse Kakaɨyari mɨra'aitatsie.
MAT 18:5 »Meta kemɨ'ane mitanaki'erieni xeime nunutsi 'ikɨ hepaɨ 'aneme, nehetsɨa mɨmiemekɨ, mɨkɨta ne pɨnetsitanaki'erieni.
MAT 18:6 Peru, kemɨ'ane yamɨtiyurieni 'axamɨtiyurienikɨ xewitɨ 'ikɨ tɨɨri yuri memɨte'erie nehetsie, 'aixɨa kaniyɨnikeyu matsi xɨka tete matayari mahete 'akatɨtɨarienike meta xɨka haramaratsie heukahɨiyanike meukatewatsie.
MAT 18:7 »Kwiepa waɨkawa pɨtixuawe kɨmana teɨteri 'axamemɨteyurie. Kaneuyewekatsɨ teɨteri memɨkunuitɨarienikɨ, peru xɨa'ui mɨkɨ tewi kemɨ'ane mɨwakunuitɨani.
MAT 18:8 Xɨka 'amamakɨ yatɨni 'a'ɨkakɨ 'axapetiyurieneni, kenawiteki kenehɨwa. 'Aixɨa kaniyɨmɨkɨ matsi pemeutahanikɨ tukari maxuawetsie pemamapurutɨ yatɨni pe'ɨkapurutɨ, keyuri huta mamayari meta huta 'ɨkayari pehexeiyatɨ xɨka peheukahɨiyani tai yuheyemekɨ mɨta'atsie.
MAT 18:9 Meta, xɨka 'ahɨxikɨ 'axapetiyurieneni, keniwayetu'i kenehɨwa. Matsi 'aixɨa kaniyɨmɨkɨ tapa xeikɨa peheunieretɨ pemeutahanikɨ tukari maxuawetsie, keyuri naitsata peheunieretɨ xɨka peheukahɨiyani mɨrataiyarietsie.
MAT 18:10 »Yumarima 'aixɨa xeime xepɨkananaimaka 'ikɨ tɨɨri. Mɨpaɨ nepɨxerahɨawe, mɨkɨ waniuki tuayamete yuheyemekɨ 'amekaniu'uwani ne'ukiyari taheima makawe hɨxie, mepɨte'ikuxaxatɨwa.
MAT 18:11 Karikɨ Yuri Tewi nehɨkɨtɨtɨ kenemɨtinua, memeuyexɨri newatawikweitsitɨanike nekaninuani.
MAT 18:12 »¿Kexeteku'eriwa? Xɨka tewi xeitsienituyari warexeiyani yumuxatsi, xɨka xewitɨ mɨkɨ heuyeweni, ¿katiwaku'eirieni hɨritsie nauka tewiyari heimana tamamata heimana 'atanauka memɨyupaɨme, katiwaumie meuyewe?
MAT 18:13 Yurikɨ mɨpaɨ nepɨxerahɨawe, xɨka 'aku heitaxeiya, mɨkɨ muxakɨ kaniyutemawieka matsi waɨkawa, kemɨkatiyutemawie memɨkaheuyexɨri wahekɨ nauka tewiyari heimana tamamata heimana 'atanauka memɨyupaɨme.
MAT 18:14 Mɨpaɨ yaxeikɨa, xe'ukiyari taheima makawe pɨkayuwaɨriya meuyeweni xewitɨ 'ikɨ tɨɨri.
MAT 18:15 »'A'iwa xɨka 'axa'utayɨni 'ahepaɨtsita, hetsɨana kenemie yaketineutahɨawi yɨhɨkɨate xeti'utɨ 'ekɨ mɨkɨ hamatɨa. Xɨka matsi'u'enieni, 'a'iwa pɨhɨkɨtɨni xepuyunaki'erieka.
MAT 18:16 Mexɨka kamatsi'u'enieni, xeime kenanuwitɨki yatɨni yuhutame memɨtetamarienikɨ, mɨkɨ “tsepa titakɨ mɨti'ayumieme 'aixɨa pɨtiyɨni yamehaitɨkaikaku yuhutatɨ yatɨni yuhaikatɨ memunenierixɨ”.
MAT 18:17 Xɨka mɨkɨ kawaru'enieni, yaketiniwarutahɨawi memɨyutixexeɨriwa, mexɨka kawaru'enieni memɨyutixexeɨriwa, kemɨ'ane tanuiwaritsie mɨkamieme hepaɨ ketineuxeiya yatɨni tiyukwamaname hepaɨ.
MAT 18:18 »Yurikɨ mɨpaɨ nepɨxerahɨawe, tita xemɨtehɨani 'ena kwiepa, mɨkɨ pɨrehɨiyani taheimata, meta tita xemɨtexɨna 'ena kwiepa, mɨkɨta pɨrexɨnarieni taheima.
MAT 18:19 »Tawarita mɨpaɨ nepɨxerahɨawe, yuhutatɨ xeme xeyu'enietɨ xɨka yaxeikɨa xeteyumaika 'ena kwiepa tita xemɨtetawauni hepaɨtsita, tsepa kemɨtitita, ne'ukiyari taheima makawe mɨpaɨ katinixepitɨamɨkɨ.
MAT 18:20 Karikɨ hakewa yuhutatɨ yuhaikatɨ memeyuxeɨrie menetsitahɨaweke, mana nepuyeikani watsata».
MAT 18:21 Pekuru Ketsutsi 'aurie 'ahurawa 'uyaka mɨpaɨ katinitahɨawe: —Ti'aitame, ¿kepaɨmexɨa nepɨreiyehɨwirieka ne'iwa, nehepaɨtsita xɨka 'axa'utayɨni? ¿'Atahutamexɨa wa'atɨ?
MAT 18:22 Ketsutsi mɨpaɨ katinitahɨawe: —Ne 'atahutamexɨa nepɨkahaine, matsi haika tewiyari heimana tamamata heimana 'atahutamexɨa pɨta.
MAT 18:23 »'Ayumieme nepaine, Kakaɨyari mɨra'aitatsie, mɨpaɨ kani'aneni, tewi yukwiepa mɨti'aitametɨkai hepaɨ, mɨpaɨ mɨtiuta'ai, te'uximayatametemama memɨte'ipitɨanikɨri kepaɨmeme memɨtehepiniriekai.
MAT 18:24 Merikɨtsɨ 'itsutɨaku wawawirietɨ, xewitɨ hetsɨana pɨ'atɨarie, mɨrepiniriekai xeimiriyari miriyari tumini 'inɨariyari.
MAT 18:25 Mɨkaheixeiyakaikɨ kɨmana mɨtiyutuani, mɨkɨ ti'aitame pɨtiuta'ai memɨtuiyanikɨ mɨkɨ tewi, 'ɨyaya meta tɨɨriyamama metatsiere piiniteya, mɨkɨ tuminiyarikɨ 'aixɨa mɨyɨnikɨ kemɨrapikai.
MAT 18:26 Hikɨ hetɨana kaniutihɨximakeni ti'uximayatame mɨpaɨ 'utaitɨ: “Kenenekwewieka kwerietɨ, naime nepɨmatipitɨani”.
MAT 18:27 Hikɨ mɨkɨ ti'uximayatame kutsiyarieya 'inenimayatɨ kanixɨna, pɨreiyehɨwiri kepaɨmeme mɨrepiniriekai.
MAT 18:28 »Merikɨtsɨ ti'uximayatame hewayeyaka kaneikaxeiya yuhepaɨ ti'uximayatame, mɨrepiniriekai xeitsienituyari tumini 'inɨariyari. 'Iwiyaka kɨipitɨana mɨpaɨ katinitahɨawe: “Keneneu'ɨitɨa kepaɨmeme pemɨnerapinirie”.
MAT 18:29 Hikɨ hetɨana kaniutihɨximakeni 'iwaya ti'uximayatame, mɨpaɨ 'utaitɨ: “Kenenekwewieka kwerietɨ, naime nepɨmatipitɨani”.
MAT 18:30 Peru mɨkɨ pɨkayuwaɨri. Matsi katiniuta'aita katsariyanata manutahɨiyanikɨ muwa muwayexɨnekɨ tiyutuameke.
MAT 18:31 Hikɨ kepauka hipatɨ te'uximayatamete memixei kemɨtiuyuri, kwini mieme mekaniyutihiwerieni, meta mekanekɨne kutsiyarieya hetsɨa mekateneitaxatɨani naime kemɨtiuyɨ.
MAT 18:32 Hikɨ kutsiyarieya 'itakwewieka mɨpaɨ katinitahɨawe: “Kari 'axapepɨtiuka'iyari. Kamɨ ne nepɨmareuyehɨwiri tita pemɨnerapiniriekai naimekɨ, 'ekɨ haweri pemutainekaikɨ.
MAT 18:33 ¿Mɨpaɨ kareuyewekai 'ekɨtari peminenimayakakɨ 'iya 'ahepaɨ ti'uximayatame, yaxeikɨa kenemɨmatiutinenimayataxɨ ne?”
MAT 18:34 Kutsiyarieya ha'atɨ yemekɨ kaniyetuani teyu'uximatɨwamete wahetsɨa 'atsita kepaukake mɨtiyutuanikekai.
MAT 18:35 »Yaxeikɨata ne'ukiyari taheima makawe pɨxeyurieni xɨka yuxexuitɨ 'aixɨa 'iyarikɨ xekatewareuyehɨwiriwani yu'iwama».
MAT 19:1 Merikɨtsɨ Ketsutsi tiutahayewaka tikuxatatɨ, Karereya kwieyaritsie kanayeyani, Kureya kwieyaritsie kaneyani Kurutani hatuxameyaritsie 'anutaɨye.
MAT 19:2 Teɨteri yumɨiretɨ mekaniweiyakaitɨni, meta mana tekwikwikate 'aixɨa meteheu'eriekame kaniwarayeitɨani.
MAT 19:3 Hikɨ paritseutsixi hetsɨana mekaniu'axɨani me'ita'inɨatake, mɨpaɨ mekatenitahɨawe: —¿Tiyɨwe tewi yɨ'ɨya muku'eirieni tsepa titakɨ?
MAT 19:4 Ketsutsi mɨpaɨ katiniwaruta'eiya: —¿Xekate'ekaterɨwawawe, mɨkɨ matɨaripai mɨwarunetɨa, “'uki meta 'uka mɨwarutiwewi”,
MAT 19:5 meta mɨpaɨ mutayɨ: “'Ayumieme 'uki kaniyupatamɨkɨ, yupaapa yumaama wahetsɨa kaniyeyeimɨkɨ, yɨ'ɨyatsie katiniwiyamɨkɨ pɨta, memɨyuhutakai xeiwaiyari mekanakɨnikuni meyuxewitɨ”?
MAT 19:6 'Ayumieme mepɨkayuhutari, matsi mekaniyuxewini xeiwaiyari mepɨhɨkɨ. 'Ayumieme, tita Kakaɨyari mɨtiutaxewiriyaxɨ, tewi pɨkawataxɨrɨwani.
MAT 19:7 Peru mɨkɨ mɨpaɨ mekatenitahɨawe: —Merikɨte, xɨka mɨpaɨ 'aneni, ¿titayari, Muitsexi mɨpaɨ tiu'aitaxɨ, kename yu'ɨya 'eiriya xapayari ke'ihuritɨani hikɨ 'ana ke'iku'eirieni?
MAT 19:8 Mɨkɨ mɨpaɨ katiniwarutahɨawe: —Muitsexi yu'iyaritsie xemɨtsetse'ikɨ kanixe'upitɨani xemɨwaku'e'eiriwanikɨ yu'ɨitama. Peru matɨari paitɨ mɨpaɨ pɨka'anekai.
MAT 19:9 Ne mɨpaɨ nepɨxerahɨawe, kemɨ'ane miku'eiri yu'ɨya, xeime pɨta mɨtiwitɨ, mɨkɨ xeime 'ɨyaya kanikumaɨwani, mexɨka 'ɨyaya meri 'ikumayɨani xeime mɨkayɨkɨna hɨrixɨa.
MAT 19:10 Hikɨ teyɨ'ɨkitɨwamete mɨpaɨ mekatenitahɨawe: —Xɨka mɨpaɨ 'aneni 'uki 'uka hamatɨa kemɨtiwayakɨ, 'aixɨa pɨ'ane matsi xɨka tewi kaneɨkenike.
MAT 19:11 Ketsutsi mɨpaɨ katiniwarutahɨawe: —'Ikɨ niuki yunaime wahetsie pɨkamieme, mɨkɨ mɨpaɨ memɨtepitɨarie wahetsie xeikɨa kanimiemetɨni.
MAT 19:12 Hipatɨ mepɨkaneɨkiwawe mɨpaɨ me'anenetɨ memutinunuiwaxɨkɨ, hipatɨta mepɨkaneɨkiwawe mɨpaɨ me'aneneme teɨteri memɨwarayeitɨakɨ, hipatɨta yɨkɨmana mepɨkaneɨkiwawe memɨte'uximayakakɨ xeikɨa Kakaɨyari hetsiemieme. Kemɨ'anetsie mɨmieme 'ikɨ, hetsiena ketinakeni.
MAT 19:13 Merikɨtsɨ 'ana tɨɨri mekani'atɨarieni Ketsutsi hetsɨa, wahetsie 'utimeme mɨyutanenewienikɨ, peru teyɨ'ɨkitɨwamete mekaniwarutate'akaitɨni memɨwa'atɨwakai.
MAT 19:14 Ketsutsi mɨpaɨ katiniwarutahɨawe: «Xekeniwapitɨaka tɨɨri nehetsɨa memɨ'axenikɨ, wahɨxie xepɨka'u'uka, mɨpaɨ memɨ'anene kaniwahetsiemiemetɨni Kakaɨyari mɨra'aita».
MAT 19:15 Hikɨ wahetsie 'utimeka kaneyani.
MAT 19:16 Hikɨ xewitɨ tewi hetsɨana kaninuani mɨpaɨ katinita'iwawiya: —Ti'aitame 'aku, ¿kehapaɨ 'aixɨa nepɨtiyurieni, tukari mɨkaxɨwe nehexeiyatɨ nemayanikɨ?
MAT 19:17 Ketsutsi mɨpaɨ katinita'eiya: —¿Titayari penetiku'iwawiya tita 'aixɨa mɨti'ane hepaɨtsita? Kemɨ'ane 'aixɨa mɨ'ane yuxewitɨ 'apuyeika Kakaɨyaritɨtɨ. Xɨka peheutahamɨkɨ tukari maxuawetsie, yaketinekamieni 'inɨari niukiyaritsie.
MAT 19:18 Tewi mɨpaɨ katinitahɨawe: —¿Kemɨ'ane 'aitsikate? Ketsutsi mɨpaɨ katinita'eiya: —“Pepɨkati'amemiwani, xeime 'ɨyaya kɨnaya pepɨkakumaɨwani, pepɨkatinawayani, peti'itawatɨ pepɨkatihekɨatani,
MAT 19:19 keniwareu'enieka meta keniwa'ɨwiyani 'apaapa meta 'amaama”, meta “'ahepaɨ tewi kenenaki'erieka kepemɨti'anaki'erie 'ekɨ”.
MAT 19:20 Hikɨ temaikɨ mɨpaɨ katinitahɨawe: —Mɨkɨ naimetsie yanepɨtikamie temaikɨyari paitɨ. ¿Tita 'akuxi reuyewetse?
MAT 19:21 Ketsutsi mɨpaɨ katinitahɨawe: —Xɨka pe'awaɨriyani naimekɨ yapemɨtikamienikɨ, kenemie ketinetua 'apiini, ketiniwarumikwa tixaɨtɨ memɨkatehexeiya, mɨpaɨ petiyurieme waɨkawa perexeiyatɨ pepayani taheima. 'Ana kenaye'a nehetsie ketineuwiya.
MAT 19:22 Kepauka temaikɨ 'ikɨ niuki mu'eni kaneyani yuhiwerietɨ, waɨkawa mɨrexeiyakaikɨ.
MAT 19:23 Hikɨ Ketsutsi mɨpaɨ katiniwarutahɨawe yuhetsɨa miemete teyɨ'ɨkitɨwamete: —Yurikɨ mɨpaɨ nepɨxerahɨawe, kanikwaniweni xiku meutahanikɨ Kakaɨyari mɨra'aitatsie.
MAT 19:24 Tawari mɨpaɨ nepɨxerahɨawe, pɨkakwaniwe kameyu 'iwipame hɨxieyatsie manuyehanikɨ matsi pɨkwaniwe xiku meutahanikɨ Kakaɨyari mɨra'aitatsie.
MAT 19:25 Me'u'enanaka teyɨ'ɨkitɨwamete yemekɨ meputimama mɨpaɨ memɨkatemaikaikɨ, mɨpaɨ mekaniutiyuanekaitɨni: —Kamɨtsɨ xɨka mɨpaɨ 'aneni, ¿kemɨ'ane pɨyɨwe mɨtawikweni?
MAT 19:26 Hikɨ Ketsutsi kwi waxeiyatɨ mɨpaɨ katiniwarutahɨawe: —Teɨteri mepɨkayɨwawe, peru Kakaɨyari naimekɨ kaniyɨweni.
MAT 19:27 Hikɨ Pekuru mɨpaɨ katinitahɨawe: —Neuxei, tame tepɨte'uku'eiri naime 'ahetsie temɨtewiyakɨ, merikɨte, ¿mɨkɨkɨ tita teteha'iwa?
MAT 19:28 Ketsutsi mɨpaɨ katiniwarutahɨawe: —Yurikɨ mɨpaɨ nepɨxerahɨawe, xeme nehetsie xemɨtewiya, kepauka kwie mɨhekwatsie temɨ'axɨani, Yuri Tewi nehɨkɨtɨtɨ kepauka ne'uwenitsie nemayerɨni neti'aitatɨ witsine'anetɨ, 'ana xemeta 'itsɨkate xekanakɨnikuni, tamamata heimana huta 'uweniyaritsie xe'ayaxeme xekateniwata'aitɨakuni teɨteri tamamata heimana huta 'Ixaheri nuiwarimama.
MAT 19:29 Kemɨ'ane nehetsɨa mɨmiemekɨ miku'eiri yukii, yu'iwama 'ukitsi 'ukari, yupaapa, yumaama, yuniwema, yukwie, mɨkɨ xeitsienituyari matsi warexeiyatɨ kanayeimɨkɨ, meta tukari mɨkaxɨwe hexeiyatɨ kanayeimɨkɨ.
MAT 19:30 Peru yumɨiretɨ hikɨ miemete memɨmexɨakate 'imatɨremete mekanakɨnikuni, meta yumɨiretɨ memɨ'imatɨremete mexɨakate mekanakɨnikuni.
MAT 20:1 »'Ipaɨ katini'aneni Kakaɨyari kemɨti'aita, tewi kiekame ximeri paitɨ mayetɨa hepaɨ kani'aneni wata'inienike te'iwamete haraweritana kaxie 'inɨiyarikɨ memɨteta'iwakɨ.
MAT 20:2 Yatiwarutahɨaweka xeitukaritsie mieme kemɨtiyutuanikekai, kaniwarenɨ'ani yuharawerita.
MAT 20:3 Hikɨ tau 'anatineku, heyaka kaniwaruxeiyata hipame kiekari hixɨapa metiteme mekate'iwatɨwetɨ.
MAT 20:4 Mɨpaɨ katiniwarutahɨawe: “Xemeta neharawerita xekenehu, kemɨtiheitserie nepɨtixepitɨani”.
MAT 20:5 Hikɨ mɨkɨ mekanekɨne. Merikɨte tawarita kanayeyani tuka, 'anata yaxeikɨa katiniuyurieni, meta tawarita tau kɨa kawiekaku.
MAT 20:6 'Akayunirɨmekakuta kanayeyani, hipame tawarita kaniwaretaxeiya mekate'uximayakame. Mɨpaɨ katiniwarutahɨawe: “¿Titayari 'ena xetetitei tukarikɨ xekate'iwatɨwetɨ?”
MAT 20:7 Mɨkɨ mɨpaɨ mekatenitahɨawe: “Xewitɨ pɨkatatsita'iniewe”. Mɨkɨ mɨpaɨ katiniwarutahɨawe: “Xemeta neharawerita xekenehu”.
MAT 20:8 »Hikɨ 'ukutaikaireku haraweri kutsiyari mɨpaɨ katinitahɨawe yuparewiwame: “Te'iwamete keniwarukuxeɨri meta ketiniwarupitɨa, xike miemetexi meri 'imatɨrieka ximeri miemetexi”.
MAT 20:9 Hikɨ mekaniu'axɨani 'akayunirɨmekaku memuta'inierie xeitukaritsie mieme meniuta'ɨitɨarieni yuxexuitɨ.
MAT 20:10 'Ayumieme kepauka matɨari memuta'inierie memu'axɨa, mɨpaɨ meteniku'eriwakaitɨni waɨkawa matsi me'ɨitɨarienike meniyu'eriekaitɨni, peru mɨkɨta yaxeikɨa xeitukaritsie mieme mekaniuta'ɨitɨarieni yuxexuitɨ.
MAT 20:11 Kepauka memenu'ɨi yu'iwarika, menitiniukimatɨkɨne harawerikame.
MAT 20:12 Mɨpaɨ me'utiyuatɨ: “Mɨkɨ 'imatɨriekake memuta'inierie xeihurayari mepuyuri xeikɨa, matsi yaxeikɨa pepɨtiwarupitɨa tahepaɨ tsepa tame temɨte'uka'eniwakai tukarikɨ meta tsepa temɨkwaxiyatɨkatei xɨripa tame”.
MAT 20:13 Peru mɨkɨ xeime mɨpaɨ katiniuta'eiya: “Nehamiku, kemɨkatiheitserie nepɨkatiuyuri 'ahepaɨtsita. ¿Pekatiu'awaɨri kenemainekai xeitukari hetsiemieme kenemɨmatipitɨanikekai?
MAT 20:14 'Ayumieme kenanu'ɨi 'atumini, hikɨ kenemie. Nepɨnewaɨriya nemi'ɨitɨanikɨ 'ikɨ 'imatɨreme kenemɨmatiupitɨa 'ekɨ.
MAT 20:15 ¿Katiyɨwe mɨpaɨ nemɨtiyurienenikɨ netuminikɨ kemɨnetinake? ¿Peti'ɨtetsa 'aixɨa nemɨtiuka'iyarikɨ hipame wahamatɨa?”
MAT 20:16 »Mɨpaɨ, mɨkɨ hikɨ memɨ'imatɨremete mexɨakate mekanakɨnikuni, meta memɨmexɨakate 'imatɨremete mekanakɨnikuni».
MAT 20:17 Merikɨtsɨ Ketsutsi Kerutsareme heyaka huyeta 'umietɨ, yatewa kaniwarewitɨni tamamata heimana memɨyuhuta yɨhɨkɨame, mɨpaɨ katiniwarutahɨawe:
MAT 20:18 «Neuxei, Kerutsareme tepɨtiyune hikɨ, Yuri Tewi kenemɨtihɨkɨ nekaniyetuiyamɨkɨ mawari wewiwamete tewa'aitɨwamete wahetsɨa meta 'inɨarikɨ memɨte'ɨkita wahetsɨa. Mɨkɨ yamekanitiyuakuni kename neke'umierieni,
MAT 20:19 meta mekaneniyetuakuni mɨkɨ memɨkahuriyutsixi wahetsɨa memɨnetsitewiyatsitɨanikɨ, memɨnetsikuwaxɨanikɨ meta kuruxitsie memɨnetsimienikɨ. Peru hairieka tukari 'aye'ayu nekananukuketɨariemɨkɨ».
MAT 20:20 Hikɨ Tsewereu niwemama wamaama, Ketsutsi 'aurie hurawa kaninuani yuniwema warawitɨtɨ, kaniutihɨximakeni hɨxiena, titawawirienike.
MAT 20:21 Ketsutsi mɨpaɨ katinitahɨawe: —¿Tita pereuyehɨwa? Mɨkɨ 'ukaratsi mɨpaɨ katinitahɨawe: —Mɨpaɨ keneutayɨki, 'ikɨ neniwema yuhutatɨ 'ameke'ayaxe xewitɨ 'atserieta xewitɨta 'a'utata kepauka peti'aitatɨ pemayani.
MAT 20:22 Ketsutsi mɨpaɨ katiniwarutahɨawe: —'Atsixepɨkatemate tita xemɨteku'iwawa. ¿Xeteyuwaɨriya xemɨteka'eniexɨani naimekɨ ne kenemɨtika'eniexɨani? Mɨkɨ mɨpaɨ mekatenitahɨawe: —Huu, tepɨyɨwawe.
MAT 20:23 Ketsutsi mɨpaɨ katiniwarutahɨawe: —Yurikɨtsɨ nehepaɨ xekatenikwinikuni ne kenemɨtikwine. Peru heitserie nepɨkahexeiya nemɨxepitɨanikɨ netserieta ne'utata xemayaxekɨ. Matsi mɨkɨ puwahetsiemieme ne'ukiyari kemɨ'ane wahetsiemieme mikuha'aritɨa.
MAT 20:24 Kepauka memu'enana hipatɨ tamamata, mekaniuyeha'ani mɨkɨ 'iwamarixi memuyuhuta wahepaɨtsita.
MAT 20:25 Ketsutsi yu'aurie waruta'inieka mɨpaɨ katiniwarutahɨawe: —Xeme mɨpaɨ xepɨtemate, mɨkɨ nuiwarite watsata memɨte'aitamete, mɨkɨ meteniwa'uxitɨaka yuteɨterima, meta ti'aitame hurawa parewiwametemama mepanutikɨka mete'aitatɨ kememɨtepitɨarie.
MAT 20:26 Peru mɨpaɨ pɨkatiyɨni xeme xetsata. 'Apɨta, xeme kemɨ'ane mariwetɨ mɨyeimɨkɨni, mɨkɨ yunaime xeparewiwame kehɨkɨtɨni,
MAT 20:27 meta kemɨ'ane mexɨakame mɨyeimɨkɨ xeme xewitɨ, hipame wahetsiemieme waɨriyarika ti'uximayatame kehɨkɨtɨni,
MAT 20:28 yaxeikɨa Yuri Tewi kenemɨtihɨkɨ, nepɨkanua nemɨparewiyakakɨ, matsi hipame newaparewienike nekaninuani meta netukari nemɨyetuanikɨ, yumɨireme nemɨwaxɨnakɨ.
MAT 20:29 Merikɨtsɨ Keriku me'ayekɨnirɨmekaku, yumɨiretɨ teɨteri mekaniweiyakaitɨni.
MAT 20:30 Yuhutatɨ memɨkaheuneniere huye tetsita mekanikatekaitɨni, hikɨ mete'utamarieka kename Ketsutsi mana 'uyemiekai, mɨpaɨ mekateniuhiwa: —Ti'aitame, Rawiri pemɨnu'aya, ketaneutinenimayata.
MAT 20:31 Teɨteri mekaniwarutite'akaitɨni kayuwatɨ memɨteyaxekɨ, peru matsi mɨkɨ karima mekaniutihiwatɨkɨne mɨpaɨ me'utiyuatɨ: —Ti'aitame 'aku, Rawiri pemɨnu'aya, ketaneutinenimayata.
MAT 20:32 Hikɨ Ketsutsi 'ukukeka kaniwarutahɨawe, mɨpaɨ kaniutayɨni: —¿Tita xeteheuyehɨwa kenetiyurieni xehetsiemieme?
MAT 20:33 Mɨkɨ mɨpaɨ mekatenitahɨawe: —Ti'aitame, tepeunenierenikeyu.
MAT 20:34 Hikɨ Ketsutsi kaniwarutinenimayata, kaniwaramayɨaxɨani wahɨxita. 'Ana kwitɨ meheunenieretɨ mekanakɨne, hikɨ hamatɨana mekanekɨne.
MAT 21:1 Kepauka Kerutsareme mehurakairi, meta Wetɨpake mɨrakutewatsie memu'axɨa, Huriwa Mati'u yemuriyari hetɨa, Ketsutsi teyɨ'ɨkitɨwamete yuhutame kaniwarutanɨ'ani,
MAT 21:2 mɨpaɨ tiwarutahɨaweka: «Kiekari 'anutaɨye mukumatsie xekenehu, kwitɨwa mana xekaneitaxeiyakuni puxu 'akuwiekame meta puxu temaikɨ hamatɨana. Xewarakuxɨname xekeniwarahapani nehetsɨa.
MAT 21:3 Xewitɨ xɨka yɨkɨ tixehetahɨawe, mɨpaɨ xepɨteheitahɨawe: Ti'aitame pɨwareuyehɨwa, kwitɨwata pɨwaranɨ'ani».
MAT 21:4 Mɨpaɨ katiniuyɨni maye'anikɨ Kakaɨyari niukameya kemutayɨ:
MAT 21:5 «Mɨpaɨ xeketenetahɨawi Tsiyuni mɨrakutewa kiekame: “Neuxei, mati'aitɨwame 'ahetsɨa kanamieni, tixaɨtɨ karayuyeitɨatɨ meta puxutsie 'anakaitɨ, puxu temaikɨ hetsie, ti'ikatɨariwame nu'ayatsie”».
MAT 21:6 Hikɨ teyɨ'ɨkitɨwamete mekanekɨne meta mɨpaɨ mekatenikakɨne kemɨtiwaru'aitɨa Ketsutsi.
MAT 21:7 Puxu mekaneyehana meta nu'aya temaikɨ, hikɨ yɨ'ɨkarite me'anuti'itaku, Ketsutsi kananutiyerɨni.
MAT 21:8 Yumɨiretɨ teɨteri huyeta mekani'itɨaximekaitɨni yɨ'ɨkarite, hipatɨ kɨye meheukuwiteketɨ mekani'itɨaximekaitɨni huyeta.
MAT 21:9 Teɨteri yumɨiretɨ memanuyetekai meta wa'utɨa memuhukai mekaniutihiwakaitɨni mɨpaɨ me'utiyuatɨ: —'Ari ketaneutawikweitsitɨa Rawiri Nu'aya. —'Aixɨa ke'itɨarieka kemɨ'ane 'umamie Ti'aitame hetsɨa miemetɨtɨ. —'Ari ketaneutawikweitsitɨa taheima pemakawe.
MAT 21:10 Kepauka Ketsutsi Kerutsareme meutaha, yunaitɨ kiekatari mekananuku'uni, mɨpaɨ me'utiyuatɨ: —¿Kemɨ'aneta pɨyɨane 'ikɨ?
MAT 21:11 Teɨteri mɨpaɨ mekateniwaku'eiyakaitɨni: —'Ikɨ Ketsutsi Kakaɨyari niukameya kaniyɨaneni, Natsareti kiekame Karereya kwieyaritsie.
MAT 21:12 Ketsutsi Kakaɨyari tukieya kuraruyarita kaneutahani, hikɨ muwa kaniwarayeweiya yunaime memɨtenanekai meta memɨtetuakai. Tumini patamete wamexate kanatixɨrieni meta kukuruxi watuayamete wa'ɨpari.
MAT 21:13 Mɨpaɨ katiniwarutahɨawe: «'Ipaɨ katine'uka: “Nekitsɨ mɨpaɨ katinitewakamɨkɨ nenewieri kiyari”. Peru xeme “tenawayamete waterɨ” xekanayeitɨani».
MAT 21:14 Hikɨ tuki kuraruyarita 'uyeikakaku, memɨkaheunenierekai meta memɨhurietɨkatei hetsɨana mekaniu'axɨani, hikɨ mɨkɨ 'aixɨa me'aneneme kaniwarayeitɨani.
MAT 21:15 Hikɨ mawari wewiwamete tewa'aitɨwamete meta 'inɨarikɨ memɨte'ɨkitakai me'ixeiyaka mariwemekɨ kemɨtiyurienekai, meta mewaxeiyatɨ tɨɨri mɨpaɨ memɨte'uhiwakai tuki manuwe: «'Ari ketaneutawikweitsitɨa Rawiri Nu'aya». Mɨkɨ mekaniuyeha'ani.
MAT 21:16 Mɨpaɨ mekatenitahɨawe: —¿Petiwa'enie 'iya kememutiyuane? Ketsutsi mɨpaɨ katiniwarutahɨawe: —Huu, ¿kamɨtsɨ xeme xekate'ekaterɨwawawe 'ikɨ: »“Tɨɨri 'etsimemutɨtɨ meta tɨɨri memɨtsitsewe pepɨwarupitɨa 'ahepaɨtsita 'aixɨa memaitɨkanikɨ”?»
MAT 21:17 Hikɨ kaniwaruku'eirieni, kiekaritsie kanayeyani, Wetaniya paitɨ kananuhuni.
MAT 21:18 Hikɨ ximeri paitɨ, tawari kiekaritsie yemieximetɨ, neuhakamɨkɨkaitɨni.
MAT 21:19 Xapa kɨyeyari 'uxeiyaka huye tetsita 'uweme, hepana kaneyani, peru tixaɨtɨ hetsiena pɨkatiukaxei xawari xeikɨa, hikɨ mɨpaɨ xapa katiniutahɨawe: —Tawari pepɨkatakaka. Hikɨ yapauka kaniutawani xapa.
MAT 21:20 Me'ixeiyaka teyɨ'ɨkitɨwamete mekanimamakaitɨni, mɨpaɨ me'utiyuatɨ: —¿Kepaɨtɨtɨri yapauka tiutawa xapa?
MAT 21:21 Ketsutsi mɨpaɨ katiniwarutahɨawe: —Yurikɨ mɨpaɨ nepɨxerahɨawe, xɨka yuri xete'erieka, xɨka xe'iyari kahutani, 'ikɨ xapa hepaɨtsita kenemɨtiuyuri mɨpaɨ xeikɨa xepɨkateyurieni, matsi xepɨyɨwaweni 'ikɨ hɨri mɨpaɨ xemɨte'utahɨawe: “Keneu'apata, haramaratsie keneukawetsi”, hikɨ mɨpaɨ pɨtiyɨni.
MAT 21:22 Meta tita xeme, xeyunenewietɨ, yuri xete'erietɨ xemɨteta'iwauni, mɨkɨ xepɨteyetuiriyarieni.
MAT 21:23 Hikɨ Ketsutsi tuki manuwe kaneutahani, mexi ti'ɨkitakai, mawari wewiwamete tewa'aitɨwamete meta teɨteri wa'ukiyarima hetsɨana 'ahurawa mekaniukɨne, mɨpaɨ mekatenita'iwawiya: —¿Hakewa miemekɨ heitserie pehexeiyatɨ mɨya pepɨtiyuriene? ¿Kemɨ'ane mɨkɨ heitserie pɨmatsi'upitɨa?
MAT 21:24 Ketsutsi mɨpaɨ katiniwaruta'eiya: —Netatsiere nepɨxeta'iwawiya. Xɨka xenetsi'uta'eiya, neta yanepɨtixetahɨawe kemɨ'ane heitserie mɨnetsi'upitɨa yanemɨtiyurienenikɨ 'ikɨ naime.
MAT 21:25 Wani kepauka mɨti'ɨyanekai, ¿hakewa pemiemetɨkai 'ɨyarikaya? ¿Taheima makawe tipitɨa, nutsu teɨteri mepipitɨa? Hikɨ mɨkɨ niuki mekaniutixɨatɨatɨkɨne mɨpaɨ meteyɨkɨhɨawetɨ yunaitɨ: «Xɨka tame mɨpaɨ te'utiyuani: “Taheima makawe pipitɨakai”, mɨkɨ mɨpaɨ pɨtatitahɨawe: “Merikɨte, ¿titayari yuri xekate'ita'eriri?”
MAT 21:26 Xɨkata mɨpaɨ te'utiyuani: “Teɨteri mepipitɨakai”, tepɨwamakaxe teɨteri, yunaitɨ Wani Kakaɨyari niukameya mepɨ'eriekai». Hikɨ Ketsutsi mɨpaɨ mekateniuta'eiya:
MAT 21:27 —'Atsitepɨkatemate. Mɨkɨta mɨpaɨ katiniwarutahɨawe: —Merikɨte, neta 'atsinepɨkatixetahɨawe kemɨ'ane heitserie mɨnetsi'upitɨa yanemɨtiyurienenikɨ 'ikɨ naime.
MAT 21:28 »¿Kexeteku'eriwa 'ikɨ hepaɨtsita? Tewi yuniwema kaniwarexeiyakaitɨni yuhutame. Xeime hetsɨa nuaka mɨpaɨ katinitahɨawe: “Neniwe, hikɨ ketine'uximayatamie kaxie haraweriyarita”.
MAT 21:29 Nu'aya rehɨawe: “Ne nepɨkaheuyeimɨkɨ”. Peru 'arikeke yɨkɨtiyutihɨaweka kaneyani.
MAT 21:30 Hikɨ wapaapa yuniwe xeime hetsɨa pɨtata nuaka yaxeikɨa katinitahɨawe. Mɨkɨ mɨpaɨ katinita'eiya: “'Au, nepaapa”, peru pɨkahetɨa.
MAT 21:31 Merikɨte, ¿kemɨ'ane mɨkɨ yapɨtikatɨa paapaya kemɨtinakekai?» Mɨkɨ mɨpaɨ mekatenitahɨawe: —Matɨari mutanɨ'arie. Ketsutsi mɨpaɨ katiniwarutahɨawe: —Yurikɨ mɨpaɨ nepɨxerahɨawe, mɨkɨ kuwiyexinu hetsiemieme tewawamete meta 'ukari tuminikɨ memɨyuwitɨnɨa meri mepeutahaxɨani Kakaɨyari mɨra'aitatsie keyuri xeme.
MAT 21:32 Karikɨ Wani xehetsɨa kaninuani huye xexeitsitɨanike, mɨtixetaxatɨanikɨ kemɨtiheitserie yaxemɨtekahunikɨ, xeme yuri xepɨkate'uta'eri hetsiena, peru mɨkɨ tewawamete meta 'ukari tuminikɨ memɨyuwitɨnɨa yuri mekateniuta'erieni hetsiena. Meta mɨkɨ xewaruxeiyakatɨtɨ, xemeta xepɨkate'uhayewaxɨ yuri xemɨteta'erienikɨ hetsiena.
MAT 21:33 »Xeimeta 'ɨxatsi xekeneu'eni 'inɨarikɨ mɨtikuxata: Merikɨtsɨ xewitɨ kiekame kaxie haraweriyari kaniutawewieni. Kanikurarutɨiya, kaxie pɨname kaniwati'inieni, tuxiyu kaniutawewieni ti'ɨwiyame hetsiemieme. Hikɨ te'ɨwiyamete waruhɨritɨaka wakwetatɨatɨ, 'ateewa kaneyani.
MAT 21:34 Kepauka tukari maye'a matikwakwaxetsie, yuhetsɨa miemete te'uximayatamete kaniwarenɨ'ani te'ɨwiyamete wahetsɨa memenutɨnikɨ 'ikwaxi kutsiyari hetsiemieme kepaɨmetɨ mɨtinakekai.
MAT 21:35 Te'ɨwiyamete matsi mekaniwarutiwiya mɨkɨ te'uximayatamete, xeime mekaneutiwaxɨani, xeimeta mete'umi, meta xeime meteheutituaxixɨa.
MAT 21:36 'Arike tawarita hipame kaniwareyenɨ'ani te'uximayatamete, yumɨireme matsi, mɨkɨta yaxeikɨa mepɨwaruyuri.
MAT 21:37 »'Imatɨrieka, kaniwarenɨ'airieni yuniwe, mɨpaɨ 'utaitɨ: “Neniwe hɨrixɨa mekanetimakakuni”.
MAT 21:38 Peru, kepauka te'ɨwiyamete nu'aya memuxei, mɨpaɨ mekateniuxata: “'Ikɨ hetsie 'arike katininakimɨkɨ kutsiyari tipiinieya. Hikɨmɨ tepimieni, tahetsie temɨtehɨnikɨ tita hetsiena mɨtinakekekai”.
MAT 21:39 Hikɨ mekaniwiya, haraweri warie mekaneikahɨani meta mekanimieni.
MAT 21:40 »Merikɨte, kepauka munuani haraweri kutsiyari, ¿kewayurieni mɨkɨ te'ɨwiyamete?»
MAT 21:41 Mɨpaɨ mekatenitahɨawe: —Mɨkɨ 'axamemɨte'u'iyari kaniwakwimɨkɨ kawanenimayatɨ, meta hipame pɨta kaniwahɨritɨamɨkɨ te'ɨwiyamete, 'ikwaxiyari kutsiyari memɨyetuirieni kepauka tukarieya maye'ani.
MAT 21:42 Hikɨ Ketsutsi mɨpaɨ katiniwarutahɨawe: —¿Xekate'ekaterɨwawawe 'utɨarika xapayaritsie: »“Mɨkɨ teté memitixani'eri kii wewiwamete mɨkɨ teté 'itsikina mieme kanayani, Ti'aitame mɨya katiniuyurieni, meta kanimariweni ketemɨte'ixeiya”?
MAT 21:43 »'Ayumieme mɨpaɨ nepɨtixekɨhɨawe, xeme xepɨnawaiyarieni Kakaɨyari kemɨti'aita, hikɨ hipatɨ pɨta teɨteri mekaniyetuiriyariekuni 'ikwaxi memɨtixuawitɨani hetsiena mieme.
MAT 21:44 Xɨka xewitɨ 'iya tetetsie 'ukaweni pɨtanexɨani, xɨka mɨkɨ teté xeime hetsie 'ukaweni, kwauni xeikɨa pɨtanexɨani».
MAT 21:45 Hikɨ mawari wewiwamete tewa'aitɨwamete meta paritseutsixi me'i'enieka 'ɨxatsieya, mɨpaɨ mekatenetimani mɨwaxatakaikɨ mɨkɨ.
MAT 21:46 Hikɨ mekatenikuwautɨwekaitɨni kememɨte'iwiyakɨ, peru 'atsimepɨkate'uyuri mewamakatɨ teɨteri, mɨkɨ mɨpaɨ memɨteku'eriwakaikɨ kename Kakaɨyari niukameya hɨkɨtɨkai Ketsutsi.
MAT 22:1 Merikɨtsɨ tawarita Ketsutsi 'ɨxatsikɨ katiniwa'ɨkitɨakaitɨni, mɨpaɨ 'utaitɨ:
MAT 22:2 «Kakaɨyari kemɨti'aita, tewi yukwiepa mɨti'aitametɨkai hepaɨ kani'aneni, neɨkiya 'ixɨarariyari muwewi yuniwe hetsiemieme.
MAT 22:3 Yuhetsɨa miemete te'uximayatamete kaniwarutanɨ'ani memɨwa'iniyukɨri mɨkɨ meripaitɨ memuta'inierie neɨkiyapa, peru mɨkɨ mepɨka'uyuwaɨri memayenexɨani.
MAT 22:4 Hikɨ tawari kaniwarutanɨ'ani te'uximayatamete hipame, mɨpaɨ tiwarutahɨaweka: “Memuta'inierie mɨpaɨ xeketeniwaretahɨawi kename 'ari ne'ikwai netiukawewi: 'Ari netuurutsixi mepukwi'iwaxɨ meta newakaitsixi memɨwaiyatɨka, 'ari naitɨ pɨtiha'aritsie. Xekenahu neɨkiya 'ixɨarariyaripa”.
MAT 22:5 Peru memuta'inierie mepɨkahanu'enana matsi meneutayeixɨani: xewitɨ kaneyani yukwie heuxeiyamieka, xewitɨta kaneyani mɨretuakakɨ.
MAT 22:6 Hipatɨta mekaniwarutiwiya te'uximayatamete, mekaniwarutiwani meta mekaniwarukwini.
MAT 22:7 Hikɨ ti'aitame kaniuyeha'ani. Yukuyaxima kaniwarutanɨ'ani memɨwakwinikɨ mɨkɨ teyumiekate meta wakiekari memɨtataiyakɨ.
MAT 22:8 Hikɨta mɨpaɨ katiniwarutahɨawe yuhetsɨa miemete te'uximayatamete: “Neɨkiya 'ixɨarariyari pɨkuha'aritsieri, peru 'iya memuta'inieriekai 'aixɨa pɨka'anekai memayenexɨanikekai.
MAT 22:9 'Ayumieme, xekenehu huyeta manuxexuitsie, hikɨ xekeniwareta'ini neɨkiya 'ixɨarariyaripa yunaime keyupaɨmeme xemɨwarekaxeiya”.
MAT 22:10 Hikɨ te'uximayatamete huyeta meheutayeixɨaka mekaniwarukuxeɨrieni yunaime keyupaɨmeme memɨwaretaxei, 'axamemɨte'u'iyari meta 'aixɨa memɨte'u'iyari, hikɨ mekaniutahɨne memuta'inierie hakewa neɨkiya mewewiyakai.
MAT 22:11 »Merikɨte ti'aitame kepauka meutaha waxeiyake memuta'inierie, xeime tewi kaniuxeiya muwa 'ayekaime neɨkiyapa mieme 'ixuriki mɨka'anakatɨkɨkai.
MAT 22:12 Mɨpaɨ katinitahɨawe: “Nehamiku, ¿kepetiuha 'uwa neɨkiyapa mieme 'ixuriki peka'anakatɨtɨ?” Mɨkɨ kayuwatɨ tinikateitɨni.
MAT 22:13 Hikɨ ti'aitame mɨpaɨ katiniwarutahɨawe yuparewiwamete: “Xekenanahɨa 'ɨkateyatsie meta mamateyatsie, xekenanuyehɨwa takwa yɨwipa, mana putatsuakani meta puyutikeweni”.
MAT 22:14 Karikɨ yumɨiretɨ meputa'inierie, peru hipatɨ xeikɨa mepanayexeiyarie».
MAT 22:15 Hikɨ paritseutsixi mekanekɨne meta mepuyu'eni kememɨte'iwiyakɨ niukieyatsie.
MAT 22:16 Mekaniwarenɨ'ani yuhetsɨa miemete teyɨ'ɨkitɨwamete hetsɨana meta hipame Herurexi hetsie memɨtewiyakai, mɨpaɨ memɨte'itahɨawekɨ: —Ti'ɨkitame, tame mɨpaɨ tepɨtemate yurikɨ yapepɨtikamie, meta Kakaɨyari huyeya hepaɨtsita pepɨti'ɨkita yurikɨ. Yunaime yaxeikɨa pepɨtiwaxeiya, yayupaɨmeme xeikɨa pepɨkawanaki'erie.
MAT 22:17 Kamɨtsɨ ketatineutaxatɨa kepetiku'eriwa: ¿Ti'aitame Tsetsaxi tumini kemɨtiwawa, 'aixɨa ti'ane temɨteyutuaka nutsu pɨkatixaɨ?
MAT 22:18 Ketsutsi timaitɨ 'axameteniukutɨ memutiyuanekaikɨ mɨpaɨ kaniutayɨni: —Xemɨte'itawamete. ¿Titayarikuta xenetewiniyatɨwe?
MAT 22:19 Tumini xeime xekeneneuxeitsitɨa kɨmana mɨtiuyutuani. Hikɨ xeituminiyari mekani'ɨitɨani.
MAT 22:20 Hikɨ mɨpaɨ katiniwarutahɨawe: —¿Kepai ramu'u pɨra'uxa, kepai pɨra'utɨarika 'ikɨ?
MAT 22:21 Mɨkɨ mɨpaɨ mekatenitahɨawe: —Tsetsaxi. Hikɨ mɨpaɨ katiniwarutahɨawe: —Kamɨtsɨ xeketeneyetua Tsetsaxi hetsɨa tita Tsetsaxi hetsɨa mɨtimieme, meta xeketeneyetua Kakaɨyari hetsɨa tita Kakaɨyari hetsɨa mɨtimieme.
MAT 22:22 Hikɨ me'i'enieka mekaniutimamani, meta mekanekɨne mekaniku'eirieni.
MAT 22:23 Mɨkɨ tukaritsietsiere tsarutseutsixi hetsɨana mekaniu'axɨani, mɨkɨ mɨpaɨ meputiyuanekai kename mɨkite meka'anuku'uwe, hikɨ mɨpaɨ mekatenita'iwawiya:
MAT 22:24 —Ti'ɨkitame, Muitsexi mɨpaɨ kaniutayɨni, tewi xɨka 'umɨni tɨɨri kawarayexeiyawetɨ, mutaya kanitiwitɨmɨkɨ yukwe, tɨɨri mɨwarayexeiya matsieya nuiwarieya memakɨnekɨ.
MAT 22:25 Merikɨte, tahetsɨa 'amenititekaitɨni 'iwamarixi 'atahuta meyupaɨmetɨ. Wamatsika 'utineɨkeka kaniumɨni, tɨɨri mɨkawarexeiyakaikɨ, yɨ'ɨya kaniuku'eirieni mutaya mitiwitɨnikɨ.
MAT 22:26 Mutaya yaxeikɨa katiniyurieni, 'itiwitɨka kaniumɨni, hairieka mieme meta, mɨpaɨ mekaniuyɨni yunaitɨ 'atahuta meyupaɨmetɨ.
MAT 22:27 'Imatɨrieka, kaniumɨni 'uka.
MAT 22:28 Merikɨte, kepauka xeniu memanuku'uni, ¿'atahuta meyupaɨmetɨ memitiwitɨ 'ikɨ 'uka, kemɨ'ane ra'ɨya pɨrayani?
MAT 22:29 Ketsutsi mɨpaɨ katiniwaruta'eiya: —Xeme xepeuyexɨri xemɨka'imatekɨ 'utɨarika xapayari kemaine meta Kakaɨyari kemɨtitɨrɨkaɨye.
MAT 22:30 Kepauka mɨkite memanuku'uni mepɨkatineɨkixɨani meta mepɨkatiwikitɨariexɨani, matsi Kakaɨyari niukieya tuayamete taheima miemete wahepaɨ mepɨ'aneneni.
MAT 22:31 Peru, mɨkite kememɨte'anuku'uni kemɨre'uxa ¿kauka xeka'ekaterɨwawawe Kakaɨyari kemɨtixe'utahɨawixɨ, mɨpaɨ 'utaitɨ:
MAT 22:32 “Ne 'Apɨrahami, 'Itsahaki meta Kakuwu wakakaɨyari nekanihɨkɨtɨni”? Mɨkɨ mɨkite pɨkawaxata, kename wakakaɨyari maine. Memayeneniere pɨta wakakaɨyari kaniyuxatani, tsepa memukwi.
MAT 22:33 Teɨteri me'u'enanaka, mekanimamakaitɨni 'ɨkitsikayakɨ.
MAT 22:34 Hikɨ paritseutsixi mekaniuyukuxeɨrieni me'u'enanaka kayuwatɨ kememɨte'uyatsariekai tsarutseutsixi.
MAT 22:35 Hikɨ xewitɨ mɨkɨ, 'inɨari niukiyari mɨmaikai, kanita'inɨata mɨpaɨ tiku'iwawiyatɨ:
MAT 22:36 —Ti'ɨkitame, ¿kemɨ'ane 'aitɨarika matsi peuyewetse 'inɨari niukiyari hetsiemieme?
MAT 22:37 Ketsutsi mɨpaɨ katinitahɨawe: —“Kenenaki'erieka Ti'aitame 'akakaɨyari, naimekɨ kepemɨtiuka'iyari, naimekɨ kepemɨti'amate, naimekɨ pemɨtimaiwekɨ”.
MAT 22:38 'Ikɨ 'aitɨarika mexɨakame kanihɨkɨtɨni meta yemekɨ matsi waɨkawa meuyewetse.
MAT 22:39 'Utɨmana mieme hepaɨna kananuyɨneni: “'Ahepaɨ tewi kenenaki'erieka kepemɨti'anaki'erie 'ekɨ”.
MAT 22:40 'Ikɨ 'aitɨarika hutametsie naitɨ 'inɨari niukiyari hetsiena katiniwiyani meta texaxatamete waniuki naitɨ.
MAT 22:41 Hikɨ mexi paritseutsixi meyuxeɨriekai, Ketsutsi mɨpaɨ katiniwaruta'iwawiya:
MAT 22:42 —¿Kexeteku'eriwa Kɨritsitu hepaɨtsita? ¿Kemɨ'ane pɨranuiwari? Mɨkɨ mɨpaɨ mekatenita'eiya: —Rawiri kaninuiwarieyatɨni.
MAT 22:43 Mɨkɨ mɨpaɨ katiniwarutahɨawe: —Titayaritsɨkamɨ, Kakaɨyari 'Iyarieya 'ikuyuitɨwakaku, Rawiri “Neti'aitɨwame” titerɨwaxɨ? Mɨpaɨ kaniutayɨni:
MAT 22:44 »“Ti'aitame mɨpaɨ katinitahɨawe kemɨ'ane Mɨneti'aitɨwame: ‘Netserieta kenakani, mexi mɨkɨ memɨmatsi'aka'unie, 'ahetɨapai newa'atɨani’ ”.
MAT 22:45 Merikɨte, xɨka Rawiri “Neti'aitɨwame” Kɨritsitu tiuterɨwani, ¿kehapaɨtɨtɨ nu'aya pɨhɨkɨtɨni?»
MAT 22:46 Nixewitɨ pɨkayɨwekai mita'eiyakɨ, tawari nixewitɨ pɨkayuwaɨri tixaɨtɨkɨ mɨtita'iwawiyakɨ.
MAT 23:1 Merikɨtsɨ Ketsutsi tiniwakuxaxatɨwakaitɨni teɨteri meta yuhetsɨa miemete teyɨ'ɨkitɨwamete, mɨpaɨ 'utaitɨ:
MAT 23:2 «Mɨkɨ 'inɨarikɨ memɨte'ɨkita meta paritseutsixi mekanihɨritɨarieka memihekɨatanikɨ 'inɨari niukiyari Muitsexi kemɨraka'utɨa.
MAT 23:3 'Ayumieme naime kememɨtexekɨhɨawe yaxeketeneyurieka yaxeketenekahuni, peru kememɨteyurie mɨkɨ yaxepɨkateyurieka xeme, karikɨ mɨkɨ kememɨtekuxata mɨpaɨ mepɨkateyurie.
MAT 23:4 'Ika mekaniukuha'aritɨani mahete mɨkwaniwetɨka, teɨteri wanaiparitsie mekaniwarutitɨtɨwani, peru mɨkɨ mepɨkayuwaɨriya niyu'itɨwamekɨ memɨwaparewienikɨ.
MAT 23:5 »Naime kememɨteyurie, yamepɨteyurie teɨteri memɨwaxeiyakɨ xeikɨa: Yukanata mepeyatsatɨka nawi kakuniyari 'aneneme hetsiena niuki mɨye'uxa, meta 'apɨnene wa'ɨkari putuniyari.
MAT 23:6 Pɨwanake kiekame 'aurie memayaxekɨ 'ikwai 'ixɨararipa meta teɨteri wahɨxie memayaxekɨ tuki 'etsimɨpepeta,
MAT 23:7 meta pɨwanake waɨritsika memɨpitɨarieka kiekari hixɨapa meta pɨwanake teɨteri “Ti'ɨkitame” memɨtewaruterɨwani.
MAT 23:8 »Peru xeme yaxepɨkatenaki'erieka “Ti'ɨkitame” xemɨte'uterɨwarɨwani, yuxewitɨ xeikɨa 'akaniuyeikani ti'ɨkitame, xemeta yunaitɨ xekaniyu'iwamaka.
MAT 23:9 Meta xeme “Ne'ukiyari” xeime xepɨkate'uterɨwani kwiepa, karikɨ xeime xeikɨa xekanexeiyani Yu'ukiyari, mɨkɨ taheima kanakaweni.
MAT 23:10 Metatsiere “te'ɨkitamete” xepɨkate'uterɨwarɨwani, karikɨ xewitɨ xeikɨa Tixe'ɨkitɨwame kanihɨkɨtɨni, Kɨritsitu kanihɨkɨtɨni.
MAT 23:11 Kemɨ'ane xeme xetsata mexɨakame mɨhɨkɨtɨni kaneuyeweka xeparewiwame mɨhɨkɨtɨni.
MAT 23:12 Karikɨ kemɨ'ane mariweme mayuyeitɨwa mɨkɨ tixaɨtɨ katihɨkɨtɨtɨ kanayeitɨariemɨkɨ, kemɨ'ane tixaɨtɨ katihɨkɨtɨtɨ mayuyeitɨwa mɨkɨ matsi mariweme kanayeitɨariemɨkɨ.
MAT 23:13 »Xɨa'ui xeme, 'inɨarikɨ xemɨte'ɨkitamete, meta xeme paritseutsixi, xemɨte'itawamete. Xepɨtewareunamiriwa teɨteri meheutahaxɨanikɨ Kakaɨyari mɨra'aitatsie, meta xemetɨtɨ xepɨkaheutahake meta mɨkɨ memanuyehaku xepɨkawapitɨa.
MAT 23:15 »Xɨa'ui xeme, 'inɨarikɨ xemɨte'ɨkita, meta xeme paritseutsixi, kexemɨ'itɨarieni xemɨte'itawamete. Naitsarie haramaratsie kwiepa xepɨku'uwa xeime xewautɨwetɨ yuhetsɨa mieme xemeyeitɨanikɨ. Kepauka xemitaxeiya, kwinimieme 'axatiuka'iyarime xepayeitɨwa keyuri xeme, meta yemekɨ hetsiena tinakeme mɨrataiyarietsie meukahɨiyanikɨ keyuri xeme.
MAT 23:16 »Xɨa'ui xeme, xe'akɨkɨpetɨ xemɨwarahapana hipame, mɨpaɨ xemutiyuane: “Kemɨ'ane tuki haxaxatatɨ mɨyɨhɨritɨa, mɨkɨ tixaɨtɨ pɨkatihɨkɨ, peru xɨka yɨhɨritɨani huru tepɨayari tukita mieme haxaxatatɨ, mɨkɨ peuyewetse yamɨtikayani kemutayɨ”.
MAT 23:17 Xeme 'atsixepɨkatemate, xepakɨkɨpe. ¿Kemɨ'ane matsi yemekɨ peuyewetse: huru, nutsu tuki peuyewetse huru patsiekame mayeitɨwa Kakaɨyari hetsɨa mieme mayanikɨ?
MAT 23:18 Metatsiere mɨpaɨ xeputiyuane xeme: “Xewitɨ xɨka mawari taiyame haxaxatatɨ 'uyɨhɨritɨani, mɨkɨ tixaɨtɨ pɨkatihɨkɨ, peru xɨka mawari heimana mɨrapine haxaxatatɨ 'uyɨhɨritɨani, mɨkɨ peuyewetse yamɨtikayani kemutayɨ”.
MAT 23:19 Xemakɨkɨpe. ¿Kemɨ'ane matsi yemekɨ peuyewetse: mawari, nutsu mawari taiyame peuyewetse patsiekame mayeitɨwa mawari Kakaɨyari hetsɨa mieme mayani?
MAT 23:20 'Ayumieme, kemɨ'ane mawari taiyame haxaxatatɨ mɨyɨhɨritɨa, mɨkɨ hetsiemieme xeikɨa pɨkayɨhɨritɨa, naitɨ heimana mɨrapine meta pɨtixata.
MAT 23:21 Kemɨ'ane mɨyɨhɨritɨa tuki haxaxatatɨ, mɨkɨ xeikɨa xatatɨ pɨkayɨhɨritɨa, kemɨ'ane tukita mayeka hetsiemiemeta pɨyɨhɨritɨa.
MAT 23:22 Kemɨ'ane muyuawi haxaxatatɨ mɨyɨhɨritɨa Kakaɨyari 'uwenieya xatatɨ pɨyɨhɨritɨa meta kemɨ'ane hetsiena maka.
MAT 23:23 »Xɨa'ui xeme, 'inɨarikɨ xemɨte'ɨkitamete meta paritseutsixi, xemɨte'itawamete. Tamamatatsie mieme xeime xepɨyuwaɨriya xemixatɨanikɨ Kakaɨyari: yerɨwawena, texuxuri meta kuminu, peru xepihayewa tita matsi mɨreuyewetse 'inɨari niukiyaritsie, kemɨtiheitserie hetsiemieme, kemɨtiuyukanenimayaka meta yaxemɨtekahunikɨ kexemutiyuane. Mɨpaɨ xemɨtekahunikekai peuyewekai xekatehayewatɨ 'iya kexemɨteyurie.
MAT 23:24 Xe'akɨkɨpetɨ xemɨwarahapana hipame. Yu'itsaritsie xepenatihɨpa xekɨi xehexɨnikɨ, peru xepexɨ kameyu 'amupa.
MAT 23:25 »Xɨa'ui xeme, 'inɨarikɨ xemɨte'ɨkita meta paritseutsixi, xemɨte'itawamete. Herie xeikɨa xepika'itiwa tekɨxi meta xakɨ, peru yutaɨta xepɨhɨpɨne 'inawarikɨ meta xeyutatuatɨ 'axaxemɨteyuriekakɨ.
MAT 23:26 Paritseu pemakɨpe. Taɨtana meri keniwaku'iti tekɨxi meta xakɨ, mɨpaɨ herieta 'itiyatɨ kanayeimɨkɨ.
MAT 23:27 »Xɨa'ui xeme, 'inɨarikɨ xemɨte'ɨkitamete meta paritseutsixi, xemɨte'itawamete, mɨki teukiya mutuxa mɨkawiriyarietɨka hepaɨ xekani'aneneni. Herie witsipɨtiyuxexeiya, peru pɨhɨne mɨkite wa'umeyari meta naitɨ tita mɨkati'itiya.
MAT 23:28 Xemeta yaxeikɨa herie xeikɨa mɨkɨ heitseriemekɨ yamemɨtekahu wahepaɨ xepɨteyuxexeiya, peru xepɨhɨpɨne yakɨ xeikɨa xeyɨatɨ meta 'axamɨti'anekɨ.
MAT 23:29 »Xɨa'ui xeme, 'inɨarikɨ xemɨte'ɨkitamete meta paritseutsixi, xemɨte'itawamete. Kakaɨyari niukametemama wateukiya xepɨtiwewiwa, meta mɨkɨ heitseriemekɨ yamemɨtekahukai wateukiya witsixeputiyuri.
MAT 23:30 Mɨpaɨta xete'utiyuane: “Tame xɨari xɨka 'ate'u'uwanike kepauka ta'ukiyarima 'amemu'uwakaitsie, tame tepɨkawaparewienikekai memitayeuritsie texaxatamete waxuriya”.
MAT 23:31 Peru xeme xekaniyuhekɨatani kename mɨkɨ Kakaɨyari niukametemama memɨwarukwi wanuiwari xehɨkɨ.
MAT 23:32 Kamɨtsɨ xetutsima kememɨte'itsutɨa xemeta xekeneunɨtsa.
MAT 23:33 »Kuterixi xepɨhɨkɨ. Kuterixi waniwema. ¿Kehepaɨ xeteyutawikweitsitɨani xemɨkaheukaxɨriyanikɨ mɨrataiyarietsie?
MAT 23:34 'Ayumieme xehetsɨa nepɨwaranunɨ'ani Kakaɨyari niukametemama, temaiwawemete meta te'ɨkitamete. Hipame mɨkɨ xeme xepɨwakwini meta kuruxitsie xepɨwakawɨtɨani, hipame mɨkɨ xepɨwatiwayani yutuki 'etsimupepeta meta kiekaritetsie xepɨwakuweiyatɨweni.
MAT 23:35 'Ayumieme xehetsie pɨrahɨiyani yunaime heitseriemekɨ yamemɨtekahu waxuriyakɨ kwiepa mɨtayeuri, 'Aweri heitseriemekɨ yamɨtikamiekai xuriyayakɨ meri, 'atsita Tsakariyaxi Werekiyaxi nu'aya xuriyayakɨ, xemimi tuki meta mawari taiyame wahixɨapa.
MAT 23:36 Yurikɨ mɨpaɨ nekanaineni, 'ikɨ naitɨ hikɨ miemete teɨteri wahetsie pɨrahɨiyani.
MAT 23:37 »Kerutsareme, Kerutsareme 'aku, 'ahetsɨa kiekatari mekaniwatakukuyani Kakaɨyari niukametemama meta mekaniwatituaxani Kakaɨyari nɨ'arimama 'ahetsɨa memɨ'axe. Mɨixa nepɨnewaɨriyakai nemɨwakuxeɨrienikɨ 'atɨɨriyama, wakana yuniwema kemɨtiwakuxexeɨriwa yu'anatɨa hepaɨ, peru mepɨkayuwaɨri.
MAT 23:38 Neuxei, xekii 'uyemawetɨ pɨyuhayewa.
MAT 23:39 Mɨpaɨ nepɨtixetahɨawe, tawari xepɨkanetsixeiya mexi ka'aye'awe kepauka mɨpaɨ xemutiyuaneni: “'Aixɨa ke'itɨarieka kemɨ'ane 'umamie Ti'aitame hetsɨa miemetɨtɨ”».
MAT 24:1 Ketsutsi tukita kaniwayeyani, hikɨ 'umiekaku, hetsɨana miemete teyɨ'ɨkitɨwamete 'ahurawa mekaniukɨne mekanixeitsitɨani kiite tuki kuraruyarita miemete.
MAT 24:2 Mɨkɨ mɨpaɨ katiniwarutahɨawe: —¿Xete'ixeiya 'ikɨ naime? Yurikɨ mɨpaɨ nepɨxerahɨawe, tete pɨkahayewarieni yuheima 'atetɨ, matsi naitɨ kanika'unariemɨkɨ.
MAT 24:3 Hikɨ Huriwu Mati'u yemuriyaritsie 'ukaiku, teyɨ'ɨkitɨwamete 'auriena mekaniu'axɨani yɨhɨkɨate, mɨpaɨ mekatenitahɨawe: —Ketatineutaxatɨa, ¿kepauka mɨpaɨ pɨtiyɨni kepemainekai, tita ti'inɨariyaritɨni kepauka pemunuani, meta kepauka kwie meutiparirɨmeni?
MAT 24:4 Hikɨ Ketsutsi mɨpaɨ katiniwarutahɨawe: —Xekeneyukweriwayurieka nɨka xewitɨ tixe'u'itaiyakɨ.
MAT 24:5 Yumɨiretɨ mepɨ'axɨani kename ne neyɨane, mɨpaɨ me'utiyuatɨ: “Neri Kɨritsitu nepɨhɨkɨ”, mepɨtewa'itaiya yumɨireme.
MAT 24:6 Xeme mɨpaɨ xepɨte'enanani kename xaɨtsie kuyaxa hexuawe meta kename xaɨtsie kiekatari hipame wahamatɨa 'ari meheyutakwini, peru xepɨkamamaka. Peuyewetse mɨpaɨ mɨtiyɨni, peru 'akuxi 'ana kwie naitɨ pɨkaheutipare.
MAT 24:7 Nuiwarite mekaniwatakwikuni hipame nuiwarite meta xexuime kwieyaritsie kiekatari hipame kwieyaritsie kiekatari. Naitsarie haka kanitawemɨkɨ metatsiere kwie kanitayuamɨkɨ.
MAT 24:8 Mɨkɨ naitɨ xɨka mɨpaɨ tiyɨaneni kukuiniya 'akuxi yutsutɨanetɨ pɨtiyɨaneni.
MAT 24:9 »'Ana xekaniyetuiyakuni xemɨ'uximatɨariekakɨ meta xemɨkwi'iwakɨ, metatsiere yunaitɨ nuiwarite mekanixe'uxiwe'eriekakuni nehetsɨa xemɨmiemetekɨ.
MAT 24:10 'Ana yumɨiretɨ mepɨtehayewa yuri mete'erietɨ, mepɨyuyetuani meta meyu'uxiwe'erietɨ mepakɨne,
MAT 24:11 meta yumɨiretɨ Kakaɨyari niukametemama meyuxatatɨ mepɨtixuawere mete'itawatɨ, mɨkɨ mepɨtewa'itaiya yumɨireme.
MAT 24:12 Waɨkawa 'axamɨti'ane pɨtitixuawere 'ayumieme yumɨiretɨ mepɨtiwaɨripiexɨani meteyukanaki'erietɨ,
MAT 24:13 peru kemɨ'ane tiuka'eniwatɨ mɨkatihayewa 'atsita 'imatɨrieka tukaritsie, mɨkɨ kanitawikweitsitɨariemɨkɨ.
MAT 24:14 Meta 'ikɨ niuki 'aixɨa manuyɨne Kakaɨyari mɨra'aitatsie mieme, kanitaxatsiemɨkɨ naitsarie kwiepa teɨteri watsata, yunaitɨ nuiwarite memi'enienikɨ, hikɨ 'anake tukari kanaye'amɨkɨ.
MAT 24:15 »Hikɨ kepauka xemixeiya muyepatsietsie “'axamɨti'ane mɨkatipatsie mawariyari”, Kakaɨyari niukameya Tanieri kemutayɨ (titerɨwame ketimaiweni tita mɨtixata),
MAT 24:16 kemɨ'ane 'ana Kureya kwieyaritsie memu'uwani hɨritetsie meke'uyuta'una.
MAT 24:17 Kemɨ'ane yukii heima makakani niyukiita pɨkaheutahakeni yupiini mɨtiwayepinikɨ.
MAT 24:18 Kemɨ'ane yeuta meyeikani yu'utɨma pɨka'akununuwani yɨ'ɨkari mahurimiekɨ.
MAT 24:19 Xɨa'ui mɨkɨ memuhukani meta memɨtetsitsitɨwani mɨkɨ tukaritsie.
MAT 24:20 Xekeneyunenewieka muhaɨtɨnitsie mɨpaɨ mɨkatiyɨnikɨ xemɨyuta'unatsie yatɨni 'uxipiya tukaritsie mɨkatiyɨnikɨ.
MAT 24:21 Karikɨ 'ana kwini mieme 'uximatɨarika 'anetɨ kanitixuawerimɨkɨ kemɨkatitixuaweriwe kwie munetɨarietsie paitɨtɨ 'atsita hikɨ, meta tawari pɨkatixuawere 'ariketa.
MAT 24:22 Mɨkɨ 'uximatɨarika xɨka 'etsika'utateriyarieni, nixewitɨ pɨkatawikweni, peru memanayexeiyarie wahekɨ, 'uximatɨarika 'etsipɨtateriyarieni.
MAT 24:23 Hikɨ, 'ana xeme xewitɨ xɨka mɨpaɨ tixekɨhɨaweni: “Kamɨ 'ena kaniuyeikani Kɨritsitu”, yatɨni “Kamɨ huma”, yuri xepɨkate'erieka.
MAT 24:24 Karikɨ yakɨ Kɨritsitutsixi mekanitixuawerikuni meta Kakaɨyari niukametemama meyuxatatɨ, mɨkɨ 'inɨari mepɨtiwewieni mamariwaweme metewa'itaiyake 'atsita mɨkɨ memanayexeiyarie xɨka tiyɨwenike.
MAT 24:25 Kamɨtsɨ nepɨxe'ayehɨtɨari xeme mɨpaɨ katiyɨwekaku 'akuxi.
MAT 24:26 »'Ayumieme, xɨka mɨpaɨ metexekɨhɨaweni: “Neuxei, makumawetsie kaneyeikani”, mana xepɨkahekɨkani. Xɨka mɨpaɨ metexekɨhɨaweni: “Neuxei, 'uwa kiita puyu'awieta”, yuri xepɨkate'erieka.
MAT 24:27 Merɨkariya naitsarie kemɨtimatsiɨkɨ muyuawitsie tahixɨata 'umerɨkatɨ tatsutɨa paitɨ, mɨpaɨta naitsarie katinimatsiɨkɨkamɨkɨ kepauka munuani Yuri Tewi.
MAT 24:28 Kanimatsiɨkɨni kaxari tsepa hakewa meeka, mana mekaniyukuxeɨrikuni wirɨkɨxi.
MAT 24:29 »'Ana kwitɨ 'uximatɨarika 'utɨmata, »“tau kaniyɨrimɨkɨ, meta metseri tawari pɨkahekɨariwieni, xurawetsixi mepɨkaxɨrieni muyuawitsie meta tɨrɨkariya memexeiya muyuawitsie miemete mepɨkuyuitɨarieni”.
MAT 24:30 »'Ana matsiɨkɨtɨ kanayeimɨkɨ Yuri Tewi 'inɨarieya taheima, 'ana yunaitɨ nuiwarite kwiepa memɨtama mekaniyutihiweriekuni. Mekanixeiyakuni Yuri Tewi muyuawitsie haitsata 'akamiekame tɨrɨkariya hexeiyakame meta waɨkawa xawatɨme.
MAT 24:31 Meta kuxineta hɨtsieriekaku pɨwatanɨ'axɨani yuniuki tuayamete, hikɨ mɨkɨ mepɨwakuxeɨrieni memanayexeiyarie, naitsarie kiekatari muyuawi hetɨa.
MAT 24:32 »Pinikɨ xeketeneyɨ'ɨkitɨaka: Kepauka mɨkaneika xawari meta xɨka yɨrani, xeme mɨpaɨ xepɨtemate tatsɨari 'ahurakaku.
MAT 24:33 Yaxeikɨata 'ikɨ, kepauka xemɨneniere mɨpaɨ naitɨ tiyɨaneme, mɨpaɨ xeketenemaika kename hehurari, kitenie mɨta'aximeni hepaɨ.
MAT 24:34 Yurikɨ mɨpaɨ nepɨxerahɨawe, 'ikɨ naitɨ yapɨtiyɨni mexi hikɨ miemete mekakwiwawe.
MAT 24:35 Muyuawi meta kwie pukumawere, peru neniuki pɨkakumawere.
MAT 24:36 »Peru, nixewitɨ 'atsipɨkatimate kepauka maye'ani mɨkɨ tukari, taheima miemete niuki tuayamete 'atsimepɨkatemate, meta Kakaɨyari Nu'aya 'atsipɨkatimate, 'ukiyarieya xeikɨa katinimaika.
MAT 24:37 Kemɨtiuyɨ Nuhexi 'amuyeikakaitsie, mɨpaɨta katiniyɨmɨkɨ kepauka Yuri Tewi munuani.
MAT 24:38 'Ana memɨkatihauwekaitsie 'akuxi, mepɨtekwatɨwekai, mepɨ'ietɨwekai, mepɨneɨketɨwekai meta mepɨtewikitɨatɨwekai, 'atsita kepauka Nuhexi meutaha kanuwatsie,
MAT 24:39 'atsimepɨkatemaikai, 'arikeke xeikɨa haa pɨtitɨa pɨwarehautsitɨa yunaime. Yaxeikɨata katiniyɨmɨkɨ kepauka Yuri Tewi munuani.
MAT 24:40 'Ana yuhutatɨ xɨka waxata me'u'uwani: xewitɨ panutiwitɨkieni xewitɨta pɨku'eiriwa.
MAT 24:41 Yuhutatɨ 'ukari mepɨtɨxɨni: xewitɨ panutiwitɨkieni xewitɨta kaniku'eiriwamɨkɨ.
MAT 24:42 »'Ayumieme, xekenayeneniereni 'atsixemɨkatematekɨ kemɨ'ane tukaritsie munuani xekutsiyari.
MAT 24:43 Peru 'ipaɨ xeketenemaika: xɨka kiekame yatimaikake kemɨ'ane hurayaritsie tɨkarikɨ munuani tinawayame, payenierenikeyu mɨka'ipitɨanikɨ kiita meutahani.
MAT 24:44 'Ayumiemeta xeme kaneuyeweka xemɨyuha'aritɨaka, karikɨ kepauka Yuri Tewi kanuaximeme xemɨ'erieka 'ana kaninuamɨkɨ.
MAT 24:45 »Ti'uximayatame yamɨtikamie meta mɨtimaiwe kanihɨkɨtɨni mɨyɨwe kutsiyarieya mɨtihɨritɨani mɨtiwa'aitɨakakɨ hipameta te'i'uximayatsiriwamete meta mɨtiwamikwanikɨ kepauka memeiyehɨwa.
MAT 24:46 'Aixɨa ke'itɨarieka mɨkɨ ti'uximayatame xɨka kutsiyarieya nuame 'itaxeiya yatiyurieneme kemɨtiuta'aitɨarie.
MAT 24:47 Yurikɨ mɨpaɨ nepɨxerahɨawe, pɨtihɨritɨani yupiinite tinaime.
MAT 24:48 Peru mexɨka mɨkɨ ti'uximayatame 'axatiuka'iyarini, mɨpaɨ tiuyɨhɨawe: “Nekutsiyari 'epɨreutere kwitɨ pɨkanuani”,
MAT 24:49 hikɨ xɨka warutiwatɨyani yuhepaɨ te'uximayatamete, meta xɨka tikwaneni meta 'ieneni tarɨwekarixi wahamatɨa.
MAT 24:50 Mɨkɨ ti'uximayatame kutsiyarieya kaninuamɨkɨ kepauka mɨka'ikwewie meta kemɨ'ane hurayaritsie yemekɨ mɨka'ikwewie.
MAT 24:51 Waɨkawa pi'uximatɨani meta mɨkɨ memɨte'itawamete wahepaɨ pɨtipitɨani. Manari putatsuakani puyutikeweni.
MAT 25:1 »Kakaɨyari mɨra'aitatsie 'ipaɨ katiniyɨmɨkɨ, kememɨyɨ mɨkɨ tamamata 'ɨimarixi yɨkɨxeme me'utihapaka memekɨ me'enunakeke neneɨkeme.
MAT 25:2 Yu'auxɨwitɨ mɨkɨ 'atsimemɨkatemate mepɨhɨkɨtɨkai, meta yu'auxɨwitɨ mepɨtemaiwawekai.
MAT 25:3 Mɨkɨ 'atsimemɨkatemaikai yɨkɨxeme mepehapakai, peru hatseitiyari tawari mepɨkahehapa.
MAT 25:4 Matsi, memɨtemaiwawekai hatseiti mekanehanɨni puteyutsie yɨkɨxeme hamatɨa.
MAT 25:5 Hikɨ neneɨkeme mɨkanuawekaikɨ, yunaitɨ mekanekakutsikutɨkɨne hikɨ mekaneukutsu.
MAT 25:6 Tɨkari hixɨapa xewitɨ mɨpaɨ katinehiwa: “Neuxei, neneɨkeme mana pamie. Xekenenakiyu”.
MAT 25:7 Hikɨ 'ɨimarixi yunaitɨ mekananuku'uni, mekanikuha'aritɨani yɨkɨxeme.
MAT 25:8 Mɨkɨ 'atsimemɨkatemaikai mɨpaɨ mekateniwarutahɨawe memɨtemaiwawekai: “Xeketaneumikwa 'etsiwa yuhatseiti tame takɨxeme mɨtɨxɨaximekɨ”.
MAT 25:9 Memɨtemaiwawekai mɨpaɨ mekateniwaruta'eiya: “Hauyewetɨ mɨkahayeikanikɨ tahetsiemieme meta xehetsiemieme, matsi xekenehu 'ituayamete wahetsɨa, xekenetinanai yuhetsiemieme”.
MAT 25:10 Peru mexi hatseiti mehenanetɨwekai neneɨkeme kaninuani, mɨkɨ 'ɨimarixi memuyukuha'aritɨakai 'utɨmana mekaneutahaxɨani neɨkiya 'ixɨararipa. Hikɨ kitenie katineunamieni.
MAT 25:11 'Arikeketa 'ɨimarixi memɨkatemaiwawekai mekaniu'axɨani mɨpaɨ me'utiyuatɨ: “Ti'aitame. Ti'aitame 'aku. Ketatineuyepiri”.
MAT 25:12 Mɨkɨ mɨpaɨ katiniwarutahɨawe: “Hawaikɨ, yurikɨ nepɨkaxemate”.
MAT 25:13 Ketsutsi mɨpaɨ kaniutayɨni: —'Ayumieme nepaine, xemeta xekenayeneniereni 'atsixemɨkatematekɨ kemɨ'ane tukaritsie kemɨ'ane hurayaritsie munuani.
MAT 25:14 »Kakaɨyari mɨra'aitatsie 'ipaɨ katini'anemɨkɨ, tewi 'ateewa yemieximetɨ kemɨtiuyuri hepaɨ, yuhetsɨa miemete te'uximayatamete kaniwarutakwewieni yuhɨxie, hikɨ yupiini katiniwaruhɨritɨani.
MAT 25:15 Xeime kaniu'ɨitɨani 'auxɨwime kiriwayari tumini, xeimeta huta kiriwayari tiu'ɨitɨa, xeimeta xeikiriwayari, kememɨteyɨwawekai yuxexuitɨ mɨpaɨ mepɨte'upitɨarie. Hikɨ kanayeyani.
MAT 25:16 Kemɨ'ane 'auxɨwime kiriwayari mu'ɨitɨarie tumini, kwitɨwa kaneyani, mɨkɨkɨ katinituakaitɨni, tawari 'auxɨwime kiriwayari pana'iwaxɨ tumini.
MAT 25:17 Yaxeikɨata, 'iya huta kiriwayari mu'ɨitɨarie tawari hutame pana'iwaxɨ.
MAT 25:18 Peru 'iya xeikiriwayari mu'ɨitɨarie kaneyani, kwieta kaniwati'ine kaniti'awieta yukutsiyari tuminieya.
MAT 25:19 »Hikɨ 'arike mɨixa heyurieka te'uximayatamete wakutsiyari kaninuani, katiniwarutawawirieni tita mɨtiwayetuiriekai.
MAT 25:20 Kemɨ'ane 'auxɨwime kiriwayari mu'ɨitɨariekai kaninuani, tawarita 'auxɨwime kiriwayari kani'atɨirieni, mɨpaɨ 'utaitɨ: “Neti'aitɨwame, 'ekɨ tumini 'auxɨwime kiriwayari pepɨnetsiyetuiri. Neuxei, mɨkɨkɨ tawari 'auxɨwime kiriwayari nepana'iwaxɨ”.
MAT 25:21 Ti'aitɨwameya mɨpaɨ katinitahɨawe: “'Aixɨa pepɨtiuyuri, ti'uximayatame 'aixɨa pemɨtiuka'iyari pekanihɨkɨtɨni meta yapemɨtikamie. 'Etsiwakɨtɨtɨ yapepɨtikatɨa, hikɨri waɨkawa nepɨmatihɨritɨani. Nepɨmatsi'inie teyunaitɨ mɨkɨkɨ temawierika temɨwewienikɨ”.
MAT 25:22 Hikɨ kaninuanita huta kiriwayari mu'ɨitɨariekai, mɨpaɨ kaniutayɨni: “Neti'aitɨwame, 'ekɨ tumini huta kiriwayari pepɨnetsiyetuiri. Neuxei, mɨkɨkɨ tawari huta kiriwayari nepana'iwaxɨ”.
MAT 25:23 Ti'aitɨwameya mɨpaɨ katinitahɨawe: “'Aixɨa pepɨtiuyuri, ti'uximayatame 'aixɨa pemɨtiuka'iyari pekanihɨkɨtɨni meta yapemɨtikamie. 'Etsiwakɨtɨtɨ yapepɨtikatɨa, hikɨri waɨkawa nepɨmatihɨritɨani. Nepɨmatsi'inie teyunaitɨ mɨkɨkɨ temawierika temɨwewienikɨ”.
MAT 25:24 »Peru 'iya xeikiriwayari muyetuiriyariekai kaninuanita, mɨpaɨ kaniutayɨni: “Neti'aitɨwame, nepɨmatsimate 'ekɨ pepa'a'eriya. Pepuka'itsana hakewa pemɨkaheka'e meta pepikuxexeɨriwa hakewa pemɨkaheikaxɨri.
MAT 25:25 'Ayumieme ne neputima, nekaneyani nekaniti'awieta 'atumini kwieta. Kamɨ neuxei 'apiini 'ena katinikupika”.
MAT 25:26 Hikɨ ti'aitɨwameya mɨpaɨ katinita'eiya: “Ti'uximayatame 'axapemɨtiuka'iyari meta pemɨ'a'ɨraxie pekanihɨkɨtɨni. 'Ekɨ pepɨnetsimaikai kenemɨtiuka'itsana hakewa nemɨkaheka'e, kenemɨtikuxexeɨriwa hakewa nemɨkaheikaxɨri.
MAT 25:27 Neuxei tsikere netumini pemɨniyetuakaitɨni tumini hɨwemete wahetsɨa, ne nenuame nemɨwaye'ɨnikekai netumini meta mena'iwaxɨ.
MAT 25:28 »”Xekeneunawairi tuminieya, xekeneɨ'ɨitɨa 'iya tamamata kiriwayari mexeiya.
MAT 25:29 Karikɨ kemɨ'ane tixaɨtɨ mɨrexeiya, tawari matsi pɨtimikieni, hikɨ ranayuhayewame pɨrexeiyani. Kemɨ'ane mɨkarexeiya, tsepa 'etsiwa mɨrexeiya katininawaiyariemɨkɨ.
MAT 25:30 Meta mɨkɨ ti'uximayatame tixaɨtɨ mɨkatiyunaki'erie xekenanuyehɨwa takwa, yɨwipa, mana putatsuakani puyutikeweni”.
MAT 25:31 »Kepauka munuani Yuri Tewi yuxawatɨriyatsie, yunaime yuniuki tuayamete warawitɨtɨ, 'ana 'apayerɨni yu'uweni mɨxawatɨtsie.
MAT 25:32 Yunaitɨ nuiwarite mekanikuxeɨriyakuni hɨxiena, mɨkɨta kaniwaranuyeteɨximɨkɨ hipame, muxatsi wahɨweme kemɨtiwaranuyeteɨxɨ muxatsi tsipuri watsata hepaɨ.
MAT 25:33 Muxatsi yutserieta kaniwati'uitɨamɨkɨ, meta tsipuri yu'utata.
MAT 25:34 »Hikɨ Ti'aitame mɨpaɨ pɨtiwatahɨawe mɨkɨ tserietana memɨti'uka: “Xeme xekenakɨni, ne'ukiyari 'aixɨa mɨxe'uyuri, ne'ukiyari mɨra'aita yuhetsiemieme xekenayeitɨa mukuha'aritsie kepauka kwie munetɨarietsie paitɨtɨ.
MAT 25:35 Ne neheuhakamɨkɨkaku xeme xepɨnete'umi, neheuharimɨkɨkaku xeme xepɨnetsi'uharitɨa, kuyeikame nehɨkɨtɨkaku yukie xepɨnetsi'utanaki'eri,
MAT 25:36 nemawekaku xepɨnetsi'utikemaritɨa, netikuyekaku xepɨnetsi'ɨwiyakai, meta ne'anutahɨiyaku xepɨnetsi'uyexeiyatɨkɨkakai”.
MAT 25:37 'Anari mɨkɨ heitseriemekɨ yamemɨtekahu mɨpaɨ mekatenitahɨawikuni: “Ti'aitame, ¿kepauka tepɨmatsi'uxei peheuhakamɨkɨme tepɨmate'umi? ¿kepauka tepɨmatsi'uxei peheuharimɨkɨme tepɨmatsi'uharitɨa?
MAT 25:38 ¿Kepauka tepɨmatsi'uxei kuyeikame pehɨkɨtɨkaku takie tepɨmatsi'utanaki'eri? ¿kepauka tepɨmatsi'uxei pemaweme tepɨmatsi'utikemaritɨa?
MAT 25:39 ¿Kepauka tepɨmatsi'uxei petikuyeme yatɨni pe'anutahɨiyakame tepɨmatsihekuxei?”
MAT 25:40 Hikɨ Ti'aitame mɨpaɨ katiniwatahɨawimɨkɨ: “Yurikɨ mɨpaɨ nepɨxerahɨawe, naime kexemɨte'uyuri 'ikɨ ne'iwama wahetsiemieme tsepa tixaɨtɨ mɨkatihɨkɨ hetsiemieme, mɨkɨ nehetsiemieme xepɨte'uyuri”.
MAT 25:41 »Hikɨ mɨpaɨ pɨtiwatahɨaweta mɨkɨ 'utatana memɨti'uka: “Xekenehu nehetsɨa xepɨkayuhayewani, xeme haxɨa xehetsie pɨtiunakixɨ, tai yuheyeme mɨta'atsie xekenehu Kauyumarie hetsiemieme meta niuki tuayametemama wahetsiemieme mukuha'aritsietsie.
MAT 25:42 Karikɨ ne nepeuhakamɨkɨkai xemeta xepɨkanete'umi, nepeuharimɨkɨkai xepɨkanetsi'uharitɨa,
MAT 25:43 kuyeikame nepɨhɨkɨtɨkai xepɨkanetsi'utanaki'eri yukie, nepɨmawekai xepɨkanetsi'utikemaritɨa, nepɨtikuyekai meta nepanutahɨiyakai xepɨkanetsihekuxei”.
MAT 25:44 Mɨkɨta mɨpaɨ mekatenitahɨawikuni: “Ti'aitame, ¿kepauka kuta tepɨmatsi'uxei peheuhakamɨkɨme, peheuharimɨkɨme, kuyeikame pehɨkɨtɨkaku, pemaweme, petikuyeme, pe'anutahɨiyaku, tepɨkamatsi'uparewi?”
MAT 25:45 Hikɨ mɨpaɨ katiniwatahɨawimɨkɨ: “Yurikɨ, mɨpaɨ nepɨxerahɨawe, naime kexemɨkate'uyuri 'ikɨ ne'iwama wahetsiemieme tsepa tixaɨtɨ mɨkatihɨkɨ hetsiemieme, neta nehetsiemieme yaxepɨkate'uyuri”.
MAT 25:46 »Mɨkɨ mekaniyehuni yuheyemekɨ mema'uximatɨariekatsie, meta mɨkɨ heitseriemekɨ yamemɨtekahu tukari 'atsimɨkayɨwe maxuawe mekaniyehuni».
MAT 26:1 Merikɨte kepauka Ketsutsi mɨtiutahayewaxɨ mɨpaɨ tiwakuxaxatɨwatɨ, mɨpaɨ katiniwarutahɨawe yuhetsɨa miemete teyɨ'ɨkitɨwamete:
MAT 26:2 «Xeme mɨpaɨ xepɨtemateri, huta tukari peuyewetse Patsikwa 'ixɨarariyari maye'anikɨ, meta Yuri Tewi nehɨkɨtɨtɨ nekaniyetuiyamɨkɨ kuruxitsie nemɨmierienikɨ».
MAT 26:3 Hikɨ 'ana mawari wewiwamete tewa'aitɨwamete meta teɨteri wa'ukiyarima mekaniuyukuxeɨrieni mawari wewiwamete tiwa'aitɨwame Kaipatsi mɨtitewakai hetsɨa,
MAT 26:4 mekaniuyu'enieni, Ketsutsi memɨwiyakɨ me'i'itame mɨpaɨ memɨte'imienikɨ.
MAT 26:5 Mɨpaɨ mekaniutiyuanekaitɨni: «Xeikɨa 'ixɨarari xuawekaku hawaikɨ, teɨteri me'uyeha'anikɨ waɨkawa me'uyukuxeɨrienikɨ».
MAT 26:6 Merikɨtsɨ Ketsutsi Wetaniya kiekariyaritsie kaniukateitɨni, Tsimuni hetsɨa meripaitɨ nawi kwiniyayari mexeiyakai hetsɨa,
MAT 26:7 hikɨ 'uka mana kaninuani tete puteyuyari witsimɨ'ane 'ahanatɨ witsimu'ɨa 'ayemakame kwinimieme mɨraye'axe, hikɨ kaneitituani Ketsutsi mu'uyatsie mexi mexatsie 'utikatei.
MAT 26:8 Hikɨ teyɨ'ɨkitɨwamete me'uneniereka mekaniuyeha'ani mɨpaɨ mekaniutiyuani: —¿Titayarikuta yakɨ xeikɨa mɨkɨ pɨreuyewe?
MAT 26:9 Pɨyɨwekai mɨkɨ witsimu'ɨa waɨkawamekɨ mutuiyanikekai, tuminiyari memɨmikienikɨ tixaɨtɨ memɨkateheuxeiya.
MAT 26:10 Ketsutsi retimaika kememutiyuanekai, mɨpaɨ katiniwarutahɨawe: —¿Titayari xete'i'uximatɨa 'ikɨ 'ukaratsi? 'Aixɨa katiniuyurieni nehetsiemieme.
MAT 26:11 'Uxa'atɨni warie 'amekaniu'uwakuni tixaɨtɨ memɨkateheuxeiya xehetsɨa, peru ne xehetsɨa 'anepɨka'uyeikani 'uxa'atɨni warie.
MAT 26:12 Kemɨreititua witsimu'ɨa nehetsie, netsikuha'aritɨwatɨ katiniuyurieni nemɨkateukienikɨ.
MAT 26:13 Yurikɨ mɨpaɨ nepɨxerahɨawe, tsepanetɨ hakewa 'ikɨ niuki 'aixɨa manuyɨne mekuxaxatsiwani naitsarie kwiepa, kanitaxatsiemɨkɨ kana'eriwamɨkɨ 'ikɨ 'uka kemɨtiuyuri.
MAT 26:14 Xewitɨ tamamata heimana memɨyuhuta mɨwanɨkai, Kura 'Itsikariutitanaka mɨtitewakai, kaneyani mawari wewiwamete tewa'aitɨwamete wahetsɨa.
MAT 26:15 Mɨpaɨ katiniwarutahɨawe: —¿Kepaɨmeme xepɨnetsi'ɨitɨani, neta Ketsutsi nekanixeyetuiriemɨkɨ? Mɨkɨ me'uyu'enieka xeitewiyari heimana tamamata pɨrata tuminiyari mekani'ɨitɨani.
MAT 26:16 'Ana kanitsutɨani tikuwaunetɨ kepauka 'aixɨa mɨyɨnikekai mɨwayetuirienikɨ.
MAT 26:17 Hikɨ mexɨakame tukaritsie Paa mɨkakuxanariyarietɨka 'ixɨarariyaritsie, teyɨ'ɨkitɨwamete Ketsutsi 'aurie mekaniuyukuxeɨrieni, mɨpaɨ mekatenita'iwawiya: —¿Hakewa matsihenake 'aixɨa temɨtehekuyurienikɨ, Patsikwa 'ikwaiyari pemekwanikɨ?
MAT 26:18 Mɨkɨ mɨpaɨ katiniwaruta'eiya: —Xeime hetsɨa xekenehu kiekaritsie, mɨpaɨ xeketenetahɨawi: «Ti'ɨkitame mɨpaɨ paine: “Netukari kaneutihuraniri, 'akiita Patsikwa 'ixɨarariyari nepɨwewieni nehetsɨa miemete teyɨ'ɨkitɨwamete wahamatɨa”».
MAT 26:19 Hikɨ Ketsutsi kemɨtiwaruta'aitɨa yamepɨte'uyuri, 'aixɨa mepikuyuri Patsikwa 'ikwaiyari.
MAT 26:20 Hikɨ 'ukuyɨreku mexatsie kaniutiyerɨni tamamata heimana yuhutame wahamatɨa.
MAT 26:21 Mexi metekwakai, mɨpaɨ katiniwarutahɨawe: —Yurikɨ mɨpaɨ nepɨxerahɨawe, xewitɨ xeme pɨnetsiyetuani.
MAT 26:22 Hikɨ kwinimieme meteyuhiwerietɨ yuxexuitɨ mɨpaɨ metenitihɨawetɨkɨne: —¿Ne netihɨkɨ, Ti'aitame?
MAT 26:23 Mɨkɨ mɨpaɨ katiniwarutahɨawe: —Xewitɨ kanihɨkɨtɨni nehamatɨa paa manati'ɨwe xakɨtsie, mɨkɨ kaneniyetuamɨkɨ.
MAT 26:24 Yuri Tewi kenemɨtitewa, nepɨyemie nemɨmierienikɨ kemɨre'uxa nehepaɨtsita, perutsɨ xɨa'ui kemɨ'ane mɨnetsiyetuani Yuri Tewi nehɨkɨtɨme. Matsi 'aixɨa kani'anenikeyu xɨka ka'utinuiwake mɨkɨ tewi.
MAT 26:25 Hikɨ miyetuanikekai Kura mɨpaɨ kaniutayɨni: —¿Ti'ɨkitame, ne netihɨkɨ? Ketsutsi mɨpaɨ katinita'eiya: —'Ekɨtsɨ mɨpaɨ pekanaineni.
MAT 26:26 Hikɨ metekwakaku Ketsutsi paa kananuku'ɨni, 'aixɨa 'utayɨka Kakaɨyari hepaɨtsita paa hepaɨtsita, kanititara kaniwarumini teyɨ'ɨkitɨwamete, mɨpaɨ tiwakɨhɨawetɨ: —Xekenanu'ɨi meta xekeneutikwa'i, 'ikɨ kaninewaiyaritɨni.
MAT 26:27 'Ariketa tekɨxi kananukuhana, pamɨpariyutsi 'ipitɨaka Kakaɨyari, kaniwaru'itɨani mɨpaɨ tiwakɨhɨawetɨ: —Yunaitɨ xekenanuti'iexɨa 'ikɨ.
MAT 26:28 'Ikɨ kaninexuriyatɨni, mɨkɨ tɨratu mɨhekwa 'aixɨa kaniyurimɨkɨ Kakaɨyari meta yuteɨterima wahamatɨa mieme. Yumɨireme wahetsiemieme kanitayeurimɨkɨ memɨteheuyehɨwiyarienikɨ ke'axamemɨte'uyurikɨ.
MAT 26:29 Mɨpaɨ nepɨxerahɨawe, tawari hawaikɨ nepɨka'enu'ieni 'ikɨ kaxie hayari, 'arikekeri tukari 'aye'ayu kepauka hekwamekɨ nemenu'ieni kaxie winuyari mɨhekwa xehamatɨa ne'ukiyari mɨra'aitatsie.
MAT 26:30 Hikɨ nɨawari Kakaɨyari hetsɨa mieme me'utikwikaka, mekanekɨne yemuritsie Huriwu Mati'u.
MAT 26:31 Mana Ketsutsi mɨpaɨ katiniwarutahɨawe: —'Ikɨ tɨkaritsie, xeme yunaitɨ xepɨnetsiku'eirieni, mɨpaɨ mɨre'uxakɨ: »“Nepimieni muxatsi wahɨweme, hikɨ muxatsi mɨwa'ɨwiyakai mekanitaxɨriexɨakuni”.
MAT 26:32 Peru ne'anukukeme, ne meri nepɨyemie Karereyatsie paitɨ».
MAT 26:33 Hikɨ Pekuru mɨpaɨ katinitahɨawe: —Tsepanetɨ yunaitɨ memɨmatsi'uku'eiri, ne hawaikɨ nepɨkakunuani.
MAT 26:34 Ketsutsi mɨpaɨ katinitahɨawe: —Yurikɨ mɨpaɨ nepɨmarahɨawe, 'ikɨ tɨkaritsie wakana 'ukiri katahiwawekaku 'akuxi, 'ekɨ haikakɨa pepɨ'aku'imawani, kename pekanetsimate pe'utaitɨ.
MAT 26:35 Pekuru tawari mɨpaɨ katinita'eiya: —Tsepanetɨ meuyeweka 'ahamatɨa nemɨmierieni, nepɨkaneku'imawani kename nekamatsimate ne'utaitɨ. Meta hipatɨta teyɨ'ɨkitɨwamete yaxeikɨa mekaniutiyuani.
MAT 26:36 Hikɨta Ketsutsi teyu'ɨkitɨwamete warawitɨtɨ kaneyani Ketitsemani reyetewakaku. Mɨpaɨ katiniwarutahɨawe: «'Ena xekenekuteni mexi huma nepɨyunenewimie».
MAT 26:37 Pekuru meta Tsewereu niwemama yuhutame kaniwarewitɨni mana paitɨ, hikɨ kanitsutɨani yuhiwerietɨ yu'iyaritɨatɨ.
MAT 26:38 Hikɨ mɨpaɨ katiniwarutahɨawe: «Ne'iyaritsie kwini mieme nekaninehiwerieka, mɨkɨkɨ nekanimɨximeni. 'Ena xekeneuyuhayewa meta xekenayeneniereni nehamatɨa».
MAT 26:39 'Etsiwa huma 'uyaka kaniutihɨximakeni, kaniyutanenewieni mɨpaɨ 'utaitɨ: «Ne'ukiyari, xɨka tɨma tiyɨwenike, yanepɨra'eriwakaku mɨka'aye'anikɨ kenemɨtikwinitɨarieni. Peru kemɨnetinake ne pɨkatixaɨ, 'ekɨ pɨta kemɨmatinake».
MAT 26:40 Hikɨ teyɨ'ɨkitɨwamete mematitekaitsie kaninuani, kaniwarutaxeiya mekutsume. Mɨpaɨ Pekuru katiniutahɨawe: «¿'E'e xekateyɨwawekai tsikere xeihurayari xemayeneniereni nehamatɨa?
MAT 26:41 Xekenetaneniereni, xekeneyunenewieka kapa 'axaxete'uyurienikɨ xemɨta'inɨatsienitsie. Xe'iyari kaniyuwaɨriyani, peru xewaiyari matsi puwerani».
MAT 26:42 Hikɨ hutarieka heyaka kaniyutanenewieni mɨpaɨ 'utaitɨ: «Ne'ukiyari, xɨka heuyeweka mɨpaɨ nemɨtikwinitɨarieni, kemɨmatinake yaketiuyɨni».
MAT 26:43 Tawarita kepauka munua, kaniwarutaxeiyata mekutsume, memɨkayɨwawekaikɨ memayeneniereni kutsikɨ.
MAT 26:44 Hikɨ kaniwaruku'eirieni, tawari heyaka hairieka kaniyutanenewieni yaxeikɨa 'utaitɨ.
MAT 26:45 Tawarita kaninuani teyɨ'ɨkitɨwamete mematitekaitsie, nuaka mɨpaɨ katiniwarutahɨawe: «¿Xetekutsu 'akuxi, xete'uxipie? Neuxei, kanaye'aximeniri, Yuri Tewi kenemɨtihɨkɨ, nemɨyetuiyani 'axateyuruwamete wahetsɨa.
MAT 26:46 Xekenanuku'uti, kɨmɨtɨkari. Kemɨ'ane mɨnetsiyetuani mana kanamieni».
MAT 26:47 Merikɨte 'utaniukakaku 'akuxi Kura mana kaninuani, tamamata heimana memɨyuhuta mɨwanɨkai. Yuwaɨkawame teɨteri yuhamatɨa kaniwarawitɨkɨkaitɨni 'ixiparate meta kɨyexi mete'u'ɨkame, mawari wewiwamete tewa'aitɨwamete meta teɨteri wa'ukiyarima mewareyenɨ'aku.
MAT 26:48 'Iya miyetuanikekai 'inɨari pɨwarutaxatɨakai, mɨpaɨ 'utaitɨ: «Kemɨ'ane nemɨtawaɨritɨani 'itsiyakɨ, mɨkɨ kanihɨkɨtɨkamɨkɨ, xekenewiya».
MAT 26:49 Hikɨ Ketsutsi hetsɨa nuaka mɨpaɨ kaniutayɨni: —Ke'aku Ti'ɨkitame. Hikɨ kani'itseni.
MAT 26:50 Hikɨ Ketsutsi mɨpaɨ katinitahɨawe: —Nehamiku, kepemɨtikuyuriene yaketineuyuri. Hikɨ teɨteri 'auriena me'aketɨkɨneka, Ketsutsi mekaniuwiya.
MAT 26:51 Mɨkɨ Ketsutsi hamatɨa memu'uwakai xewitɨ kaniwatihana yu'ixipara, ti'uximayatame mawari wewiwamete tiwa'aitɨwame hetsɨa mieme, nakaya kanawiteni.
MAT 26:52 Hikɨ Ketsutsi mɨpaɨ katinitahɨawe: —Keneuka'uta 'a'ixipara, karikɨ yunaitɨ 'ixiparakɨ memɨteyumemiwa, 'ixiparakɨta mekanikwi'iwakuni.
MAT 26:53 Kari mɨpaɨ pepɨkatimate, ne nekaniyɨweni nemitawawirieni ne'ukiyari, miriyari meyupaɨmeme niuki tuayametemama mɨkɨta kwitɨwa kaniwaranɨ'aweni.
MAT 26:54 Peru xɨka mɨpaɨ netiuyurieni, ¿kehepaɨ raye'ani 'utɨarika meuyewetse 'ipaɨ mɨtiyɨni manuyɨne?
MAT 26:55 Hikɨ 'ana Ketsutsi mɨpaɨ katiniwarutahɨawe teɨteri: —¿Kari xepeyekɨ 'ixiparate meta kɨyexite xete'u'ɨtɨ xenetsiwiyake, kemɨtiwiwiyarɨwa tinawayame? Mɨixa tukita nenayekateitɨni tukarikɨ neti'ɨkitatɨ, 'ana xepɨkanetsi'uwi.
MAT 26:56 Peru naitɨ 'ikɨ mɨya pɨtiyɨni, maye'anikɨ Kakaɨyari niukametemama kememutiyua 'utɨarika xapayaritsie. Hikɨ teyɨ'ɨkitɨwamete yunaitɨ mekaniku'eirieni meta mekaniyuta'una.
MAT 26:57 Mɨkɨ Ketsutsi memuwiyaxɨ Kaipatsi hetsɨa mekani'atɨani, mɨkɨ mawari wewiwamete tiwa'aitɨwame kanihɨkɨtɨkaitɨni, hetsɨana mekaniyuxeɨriekaitɨni 'inɨarikɨ te'ɨkitamete meta 'ukirawetsixi.
MAT 26:58 Peru Pekuru kaniweiyakaitɨni yatewa mawari wewiwamete tiwa'aitɨwame kiita paitɨ. Muwa kaneutahani tukita tehɨwemete wa'aurie kanayerɨni niereke kemɨ'itɨarienikekai.
MAT 26:59 Hikɨ mawari wewiwamete tewa'aitɨwamete meta 'itsɨkate yunaitɨ mekaniwawautɨwekaitɨni hipame memunenierixɨ memɨte'itani Ketsutsi hepaɨtsita, mɨpaɨ hetsiena memɨte'ahɨanikɨ memita'aitakɨ mɨmierienikɨ.
MAT 26:60 Peru mepɨyutatexi, tsepa yumɨiretɨ wahetsɨa memu'axɨa me'i'itatɨ. 'Imatɨrieka yuhutatɨ mekaniu'axɨani,
MAT 26:61 mɨpaɨ mekaniutiyuani: —'Ikɨ mɨpaɨ putayɨ: “Ne nekaniyɨweni nemika'una Kakaɨyari tukieya, tawarita netitawewiwe hekwamekɨ haika tukari”.
MAT 26:62 Hikɨ mawari wewiwamete tiwa'aitɨwame 'anukukeka mɨpaɨ katinitahɨawe: —¿Pekatitaniuni 'ahepaɨtsita? ¿ketitayari mɨya mete'utiyuane 'ikɨ 'ahepaɨtsita?
MAT 26:63 Peru Ketsutsi 'atsipɨkahainekai. Hikɨ mawari wewiwamete tiwa'aitɨwame mɨpaɨ katinitahɨawe: —Kakaɨyari mayeniere matsi'eniekaku yaketatineutahɨawi xɨka Kɨritsitu pehɨkɨtɨni, Kakaɨyari nu'aya.
MAT 26:64 Ketsutsi mɨpaɨ katinitahɨawe: —Metsɨ 'ekɨ mɨpaɨ pekanaineni. Peru ne mɨpaɨ nepɨxerahɨawe: 'Uxa'atɨni xekanenixeiyakuni Yuri Tewi kenemɨtihɨkɨ, 'ane'akaime Naimekɨmɨtɨrɨkaɨye tserieta, meta haitsata ne'akamiekame taheima.
MAT 26:65 Hikɨ mawari wewiwamete tiwa'aitɨwame yukamixa kaneukatsana mɨpaɨ 'utaitɨ karima: —Kakaɨyari hepaɨtsita 'axaputayɨ. Tawari tepɨkawareuyehɨwa memunenierixɨ. Neuxei, xeme hikɨ xepi'eni, Kakaɨyari hepaɨtsita 'axaputayɨ.
MAT 26:66 ¿Kexeteku'eriwa 'ikɨ hepaɨtsita? Mɨkɨ mɨpaɨ mekaniutiyuani: —Peuyewetse mɨmierieni.
MAT 26:67 Hikɨ mekaniti'aɨtsikawiyatɨkɨne hɨxitana meta mekanitihutsutɨkɨne. Hipatɨta 'auritapana mekaneitiwayakaitɨni
MAT 26:68 mɨpaɨ me'utiyuatɨ: —Ketatineutaxatɨa, Kɨritsitu, ¿kemɨ'ane pɨmatsiheutiwa?
MAT 26:69 Mexi mɨyatiyɨanekai, Pekuru takwa kaniukateitɨni, hikɨ ti'uximayatame hetsɨana nuaka 'ɨimaritɨtɨ, mɨpaɨ katinitahɨawe: —'Ekɨtatsiere Ketsutsi Karereya kiekame hamatɨa pekaniuyeikakaitɨni.
MAT 26:70 Peru mɨkɨ kaniyuta'imani yunaime wahɨxie mɨpaɨ 'utaitɨ: —'Atsinepɨkatimate kehapaɨtɨtɨ pemɨnerahɨawe.
MAT 26:71 Hikɨ mɨkɨ kaneyani kitenie hepa, xewitɨta kanixeiya 'uka, mɨpaɨ katiniwarutahɨawe mana memɨti'ukai: —'Ikɨtatsiere Ketsutsi natsaretitanaka hamatɨa kaniuyeikakaitɨni.
MAT 26:72 Peru mɨkɨ tawarita kaniyuta'imani, mɨpaɨ 'utaitɨ: —Kakaɨyari netsi'eniekaku nepaine, nepɨka'imate mɨkɨ tewi.
MAT 26:73 Hikɨ yareutewikaku mana memɨti'ukai hurawa me'akɨneka mɨpaɨ Pekuru mekateniutahɨawe: —Yurikɨ 'ekɨ xewitɨ mɨkɨ wa'iwa pekanihɨkɨtɨni, pepɨmatsiɨkɨ kepemɨtiuniuka.
MAT 26:74 Pekuru mɨpaɨ kaniutayɨni: —Kakaɨyari 'axakenetiupitɨani xɨka netiku'itawani, nepɨka'imate mɨkɨ tewi nepaine. Hikɨ 'ana yapauka kanetahiwa wakana.
MAT 26:75 Pekuru Ketsutsi niukieya kanaye'erieni kemɨtitahɨawixɨ: «Wakana katahiwawekaku 'akuxi, 'ekɨ haikakɨa pepɨ'aku'imawani kename pekanetsimate pe'utaitɨ». Hikɨ 'anuyeyaka kaniutatsuani kwinimieme tiyuhiwerietɨ.
MAT 27:1 Merikɨtsɨ ximeri, yunaitɨ mawari wewiwamete tewa'aitɨwamete meta teɨteri wa'ukiyarima yunaitɨ mekaniuyukuxeɨrieni meyu'enienike Ketsutsi hepaɨtsita, memimienikɨ.
MAT 27:2 Mekaneihana hɨakame, Piratu mekaniyetuirieni kuwexinaruri.
MAT 27:3 Kepauka Kura miyetua mɨtiutamari kename 'itsɨkate mete'uta'aitaxɨ mɨmierienikɨ, yɨkɨ katiniyɨkɨhɨawekaitɨni meta watumini kaniwarekɨ'ɨitɨani mawari wewiwamete tewa'aitɨwamete meta 'ukirawetsixi, xeitewiyari heimana tamamata pɨrata tuminiyari,
MAT 27:4 mɨpaɨ 'utaitɨ: —'Axanepɨtiuyuri nemiyetuakɨ tewi hetsiena mɨkarahɨiya, xuriyaya mɨtayeurienikɨ. Mɨkɨ mɨpaɨ mekatenitahɨawe: —Tame mɨkɨ tepɨkateha'iwawa, 'ekɨri katini'amaiyatɨni.
MAT 27:5 Hikɨ tukita heitaxɨrieka tumini kaniwayeyani, heyaka kaniuyukawieni.
MAT 27:6 Mawari wewiwamete tewa'aitɨwamete me'iti'ɨka tumini mɨpaɨ mekaniutiyuani: «'Ikɨ pɨkayɨwe tuki tuminiyari muyemanetsie temeikamana, tewi xuriyaya mɨtayeuriyanikɨ mɨyetuiyakɨ».
MAT 27:7 Me'uyu'enieka kwie mekaniunaneni mɨkɨ tuminikɨ xari wewiwame kwieya, mana 'ateewa kiekatari wateukiyapa mayanikɨ.
MAT 27:8 'Ayumieme mɨkɨ kwie Xuriya Mataxɨri katiniuterɨwarɨwani 'akuxi hikɨ.
MAT 27:9 'Ana kanaye'ani Keremiyaxi Kakaɨyari niukameya, mɨpaɨ kemutayɨ: «Mekanei'ɨni xeitewiyari heimana tamamata pɨrata tuminiyari, 'Ixaheritsixi teɨteriyari kememɨte'ika'inɨaritɨiri kemɨraye'akai,
MAT 27:10 mɨkɨkɨ 'iwewame kwieya mepunanai, Ti'aitame kemɨnetiuta'aitɨa».
MAT 27:11 Merikɨtsɨ Ketsutsi kuwexinaruri hɨxie kani'atɨarieni, mɨkɨ mɨpaɨ katinita'iwawiya: —¿'Ekɨ huriyutsixi teɨteriyari tiwa'aitɨwame petihɨkɨ? Ketsutsi kayuku'imawatɨ mɨpaɨ katinita'eiya: —'Ekɨ metsɨri mɨyapenaine.
MAT 27:12 Mawari wewiwamete tewa'aitɨwamete meta 'ukirawetsixi me'ixanetakaku 'atsipɨkatiuta'a.
MAT 27:13 Hikɨ Piratu mɨpaɨ katinitahɨawe: —¿Pekatiwa'enie kepaɨmemekɨ memɨmatsixaneta?
MAT 27:14 Peru Ketsutsi hawaikɨ pɨka'ita'ei, 'ayumieme waɨkawa ni'iyarixiekaitɨni kuwexinaruri.
MAT 27:15 Merikɨte, mɨkɨ 'ixɨararitsie kuwexinaruri kaniyeiyarieyatɨkaitɨni memanutaxɨriya xeime mɨxɨnakɨ teɨteri kemɨ'ane memanayexeiya.
MAT 27:16 'Ana 'anutahɨiyakame mekanexeiyakaitɨni waɨkawa mɨmariwakai Waxawaxi titewakame.
MAT 27:17 Hikɨ me'uyukuxeɨrieku teɨteri, Piratu mɨpaɨ katiniwarutahɨawe: —¿Kemɨ'ane pɨxenake nemɨxexɨnirieni: Waxawaxi nutsu Ketsutsi, Kɨritsitu mɨtiuterɨwarɨwa?
MAT 27:18 (Mɨkɨ mɨpaɨ pɨtimaikai, huriyutsixi wa'ukiyarima mepiyetuakai mete'ikwatsirietɨ).
MAT 27:19 Mexi Piratu 'itsɨkame 'uwenieyatsie 'akatei, 'ɨyaya niuki kaneinɨ'airieni mɨpaɨ 'utaitɨ: «Keneuhayewa mɨkɨ tewi heitseriemekɨ yamɨtikamie, kɨmana waɨkawa nepɨtiukwinixɨ neheinɨtsita hikɨ yɨwikɨta».
MAT 27:20 Peru mawari wewiwamete tewa'aitɨwamete meta 'ukirawetsixi mekaniwarukemakaxɨani teɨteri Piratu memɨtawawirienikɨ Waxawaxi mɨxɨnakɨ meta Ketsutsi mɨmierienikɨ.
MAT 27:21 Hikɨ mɨpaɨ katiniwarutahɨawe kuwexinaruri: —¿'Ikɨ yuhutame kemɨ'ane pɨxenake nemɨxexɨnirieni? Mɨkɨ mɨpaɨ meputiyua: —Waxawaxi keneuxɨna.
MAT 27:22 Piratu mɨpaɨ katiniwarutahɨaweta: —Merikɨte, ¿keta ne'iyurieni Ketsutsi, Kɨritsitu mɨtiuterɨwarɨwa? Yunaitɨ mɨpaɨ mekatenitahɨawe: —Kuruxitsie ke'umierieni.
MAT 27:23 Kuwexinaruri mɨpaɨ katiniwarutahɨawe: —¿Titayarikuta? ¿titakɨ 'axatiuyuri? Peru mɨkɨ kwinimieme matsi mekateniuhiwakaitɨni, mɨpaɨ me'utiyuatɨ: —Kuruxitsie ke'umierieni.
MAT 27:24 Kepauka Piratu mɨretima kename mekahei'eniekai, matsi waruxeiyaka kememɨteyutimɨirirɨmekai meniukixietɨ teɨteri, haa kaniuta'aita, hikɨ kaniukamaimani teɨteri wahɨxie mɨpaɨ 'utaitɨ: —Nehetsie pɨkarahɨiwani 'ikɨ xuriyayakɨ, xeme pɨta xehetsie kerahɨiyani.
MAT 27:25 Yunaitɨ teɨteri mɨpaɨ mekatenitahɨawe: —Xuriyayakɨ tahetsie kerahɨiyani, meta tatɨɨriyama wahetsie.
MAT 27:26 Hikɨ kaniwaruxɨnirieni Waxawaxi, peru Ketsutsi kaniuta'aita mɨkuweiyaxɨanikɨ, meta kaniyetuani kuruxitsie mɨmierienikɨ.
MAT 27:27 Kuwexinaruri hetsɨa miemete kuyaxi paratsiyu manuwe Ketsutsi mekanehana, meta mekaniwaruta'inieni yunaime kuyaxi waritana mekanaketɨkɨne.
MAT 27:28 Me'itikemaripieka, 'ɨkari xetame mekanenakuwirieni.
MAT 27:29 Meta xuya kurunayari me'utatsaka mu'uyatsie mekanenutimanirieni, meta haka 'itsɨyari mekanikweitɨani tserietana. Hikɨ hɨxiena metitunuma'uwetɨ me'inanaimatɨ mɨpaɨ mekatenikuhɨawekaitɨni: «Ke'aku huriyutsixi tiwa'aitɨwame».
MAT 27:30 Meta mekaniku'aɨtsikawiyakaitɨni, meta haka memikweitɨakaikɨ mɨkɨkɨ mu'uyatsie mekanitiwayakaitɨni.
MAT 27:31 'Arike mɨya mete'itinanaimaka mekaninawairieni 'ɨkari, mekanitikemaritɨani 'ixurikieyakɨ, hikɨ mekaneihana kuruxitsie mɨmierienikɨ.
MAT 27:32 Merikɨtsɨ mana me'uyehutɨ xeime mekaniutaxeiya Tsirene kiekame Tsimuni titewakame, mekaniwiya menutɨkirienikɨ kuruxieya.
MAT 27:33 Kurukuta mɨrakutewatsie mekaniu'axɨani (taniukikɨ «Mɨki Mu'uya Manuka» mɨrakutewatsie).
MAT 27:34 Mana mekani'itɨani kaxie winuyari tsiɨrika hepaɨ ma'ane nɨkame, peru he'inɨataka pɨkayuwaɨri menu'ieni.
MAT 27:35 Kuruxitsie mekanikawieni meta kuyaxi mekaniyuta'iwa kememɨte'itahuriexɨanikekai 'ixurikiteya.
MAT 27:36 Hikɨ mana mekutetɨ mekani'ɨwiyakaitɨni.
MAT 27:37 Mu'uya heima mekaneiwera xapa, titakɨ mɨtiutaxanetsie mɨpaɨ re'ukame: «'Ikɨ Ketsutsi Kanihɨkɨtɨni, Huriyutsixi Tiwa'aitɨwame».
MAT 27:38 Hamatɨana mekaniwarukawɨtɨani tenawayamete yuhutame kuruxitsie, tserietana xeime meta 'utatana xeime.
MAT 27:39 Hikɨ mana memuyekɨkakai 'axamekatenikɨhɨawekaitɨni yumu'u me'utitsiketɨ,
MAT 27:40 mɨpaɨ me'utiyuatɨ: —'Ekɨ, pepika'unakekai tuki, haika tukari 'anukayayu hekwamekɨ pepitawewienikekai. Keneu'atawikweitsitɨa xɨka Kakaɨyari penu'ayatɨni, kuruxitsie kenakaye'a.
MAT 27:41 Yaxeikɨata mawari wewiwamete tewa'aitɨwamete meta 'inɨarikɨ te'ɨkitamete meta 'ukirawetsixi yunaitɨ me'inanaimatɨ mɨpaɨ mekaniutiyuanekaitɨni:
MAT 27:42 —Hipame waniu kaniwatawikweitsitɨwakaitɨni, peru pɨkayɨwe mɨyutawikweitsitɨani yɨkɨmana. Meta 'ixaheritsixi katatini'aitɨwametɨni waniu. Merikɨte, hikɨ ke'akayani kuruxitsie, 'ana yuri temɨteta'erienikɨ tame hetsiena.
MAT 27:43 Mɨkɨ Kakaɨyaritsie yuri pɨti'erie, hikɨtsɨari xɨka 'inaki'erieka mɨkɨ ke'itawikweitsitɨani, mɨpaɨ mainekaikɨ: “Ne Kakaɨyari nekaninu'ayatɨni”.
MAT 27:44 Meta tenawayamete 'auriena kuruxitsie memuyewɨkai yaxeikɨa 'axamekatenikɨhɨawekaitɨni.
MAT 27:45 Merikɨte tuka kaniukuyɨre naitsarie mana kwiepa, tau kɨa kawiekakuke kaniukuhekɨare.
MAT 27:46 Hikɨ tau kɨa kawiekaku Ketsutsi karima kaniutahiwa mɨpaɨ 'utaitɨ: —Herí, Herí, ¿rama tsawatani? (taniukikɨ manuyɨne: “Nekakaɨyari, nekakaɨyari, ¿titayari penetiuku'eiri?”)
MAT 27:47 Kepauka hipatɨ mɨkɨ mana memɨti'ukai memu'enana mɨpaɨ mekaniutiyuani: —'Eriyaxi kaniutahɨawe.
MAT 27:48 Xewitɨ mɨkɨ 'unautsarɨmetɨ kaneyani, haa 'itsiweme 'utituka winu matsiwita heikahatsika, hakatsie 'iyeka kaneititserieni menu'ienikɨ.
MAT 27:49 Hipatɨ mɨpaɨ mekaniutiyuanekaitɨni: —Keneuhayewa, tepɨtaneniereni tsipara 'Eriyaxi kapunuani 'itawikweitsitɨanike.
MAT 27:50 Hikɨ Ketsutsi tawari karima 'utahiwaka kaniyetuani yu'iyari.
MAT 27:51 Hikɨ 'ixuriki 'emayetsuikai meuwiekai tukita hixɨata kanitsane heimana 'akayuaka. Kwie putayua meta tetexi kaniutitare.
MAT 27:52 Teukiya nanutiyepierixɨani, yumɨiretɨ Kakaɨyari teɨterimama memukwikairi mekananuku'uni.
MAT 27:53 Teukiyata mekanewatikɨne, 'arike Ketsutsi 'anukukeku, kiekari mɨpatsietsie mekaneutahaxɨani, meta yumɨiretɨ mepɨwaruxei.
MAT 27:54 Xeitsienituyari kuyaxi tiwa'aitɨwame meta hipatɨ hamatɨana Ketsutsi memɨ'ɨwiyakai, kepauka kwie memuxei 'uyuaneme meta naime kemɨtiuyɨ mete'uxeiyaka, waɨkawa mekanimamakaitɨni meta mɨpaɨ mekaniutiyuani: —Yurikɨ 'ikɨ Kakaɨyari punu'ayatɨkai.
MAT 27:55 Yumɨiretɨta 'ukari mana mekaniti'ukaitɨni 'ateewa metanenieretɨ, mɨkɨ Ketsutsi hamatɨa mekaneyekɨnekaitɨni Karereyatsie mekaniparewiekaitɨni.
MAT 27:56 Mariya Mararatanaka, xewitɨta Mariya Kakuwu Kutse mamaayatɨkai, meta Tsewereu niwemama wamaama, meta hipatɨ mana mekaniti'ukaitɨni.
MAT 27:57 Hikɨ 'akayunirɨmekaku, tewi mana kaninuani xikutɨtɨ 'Arimateya kiekame Kutse titewatɨ mɨtiyɨ'ɨkitɨwametɨkai Ketsutsi hetsɨa mieme mɨhɨkɨtɨkai.
MAT 27:58 Piratu hetsɨa nuaka kanitawawirieni Ketsutsi kaxarieya, hikɨ Piratu mɨpaɨ pɨtiuta'aitaxɨ mɨyetuiriyarienikɨ.
MAT 27:59 Hikɨ Kutse Ketsutsi kaxarieya kanekweni kanita'eima rinu tsawanayari 'itiyakamekɨ.
MAT 27:60 Yuteukiyapa kaneitateni mɨhekwakaitsie meripaitɨ mita'aitakai mɨwaye'inierienikɨ 'aitɨa. Meta tete 'amɨnena kaneukurupa kɨmana teukiya heunaka, kaneyani.
MAT 27:61 Mana mekanititekaitɨni Mariya Mararatanaka meta xewitɨ Mariya, teukiya hɨxie.
MAT 27:62 Merikɨtsɨ 'uxa'arieka, pienixi 'utaxɨku, mawari wewiwamete tewa'aitɨwamete meta paritseutsixi mekaniuyukuxeɨrieni Piratu hetsɨa,
MAT 27:63 mɨpaɨ me'utiyuatɨ: —Ti'aitame tame tepe'eriwa 'iya tiyu'itaiyame kemainekai 'ayeyuritɨ 'akuxi: “Haika tukari 'aye'ayu nepanukukeni”.
MAT 27:64 'Ayumieme ketineuta'aita teukiya mɨta'ɨwiyarienikɨ haika tukari, kapa teyɨ'ɨkitɨwamete yɨwikɨta me'u'axɨame me'inawanikɨ, mɨpaɨ kapa metewarutahɨawekɨ teɨteri: “Mɨkite watsata panukuke”. Xɨka mɨpaɨ mete'uyurieni, 'imatɨrieka mieme 'itarika pe'iwa matɨari mieme.
MAT 27:65 Piratu mɨpaɨ katiniwarutahɨawe: —Kuyaxi xekeniwaranuwitɨki, xekenehu yemekɨ 'aixɨa renakame xekenehayewa teukiya.
MAT 27:66 Hikɨ mɨkɨ mehekɨneka, teukiya mekaneunani tetekɨ, meta mekaniyu'inɨaritɨani, metatsiere kuyaxi mana mekaniwaru'uitɨani memihɨkakɨ.
MAT 28:1 Merikɨtsɨ 'uxipiya tukari 'utaxɨku, tumikuti ximeri yuimuana Mariya Mararatanaka meta xewitɨ Mariya matɨa mana mekaniu'axɨani me'ixeiyake teukiya.
MAT 28:2 Hikɨ kwie karima kaniutayuani, taheima kanakaneni niuki tuayame Ti'aitame hetsɨa mieme, hikɨ nuaka teté kaneukɨhɨani, meta hetsiena kanayerɨni.
MAT 28:3 Merɨkariya hepaɨ pɨtiyuxexeiyakai, 'ixurikiteya pɨtuxakai 'ɨwi hepaɨ.
MAT 28:4 Tehɨwemete kuyaxi me'imakatɨ meputiyɨyɨakaxɨ meta marikakɨ mekaniu'amɨxɨani.
MAT 28:5 Hikɨ niuki tuayame mɨpaɨ katiniwarutahɨawe 'ukari: —Xepɨkamamaka, ne mɨpaɨ nepɨtimate Ketsutsi xepɨkuwautɨwe, kuruxitsie mumierie.
MAT 28:6 'Uwa pɨkayeka, panukuketɨarie kemainekai. Xekenakɨni xekeneutanenieri hakewa matekiekai.
MAT 28:7 Hikɨ kwitɨwa xekenehu, mɨpaɨ xeketeniwaretahɨawi teyɨ'ɨkitɨwametemama: “Mɨkɨ panukuketɨarie mɨkite watsata, meta petɨari Karereyatsie paitɨ. Mana xekaneixeiyakuni”. Xekena'eriwani kenemɨtixe'utahɨawixɨ.
MAT 28:8 Hikɨ 'ukarawetsixi mekanayekɨne meyumexɨitɨatɨ teukiyapa meyekɨneka, memamatɨ peru waɨkawa meyutemamawietɨ, meta mekaniutinautsa memɨtewataxatɨanikɨ teyɨ'ɨkitɨwametemama.
MAT 28:9 Hikɨ mexi me'uhukai, Ketsutsi kaniwaranukunake, hikɨ kaniwarutawaɨritɨani. Hikɨ mɨkɨ hurawa mekaniukɨne, 'ɨkateya mekaniu'ɨni meta mekaniutihɨxima'uni hɨxiena.
MAT 28:10 Hikɨ mɨpaɨ katiniwarutahɨawe Ketsutsi: —Xepɨkaheumamaka, xekenehu, xeketeniwaretaxatɨa ne'iwama Karereya mekehekɨne, mana mekanenexeiyakuni.
MAT 28:11 Merikɨtsɨ mexi 'ukari huyeta me'uhukai, hipatɨ kuyaxi kiekaritsie mekanekɨne, kemɨtiuyɨ naime mekateniwarutaxatɨani mawari wewiwamete tewa'aitɨwamete.
MAT 28:12 Hikɨ mɨkɨ 'ukirawetsixi wahamatɨa me'uyukuxeɨrieka me'uyu'enieka yunaitɨ, tumini waɨkawa mekaniwaru'ɨitɨani kuyaxi,
MAT 28:13 mɨpaɨ metewarahɨawetɨ: «Xeme mɨpaɨ xekeneutiyuaneni: Mexi tekutsukai, teyɨ'ɨkitɨwametemama mekaniu'axɨani mekaninawani kaxari.
MAT 28:14 Xɨka kuwexinaruri tiutamarieni, tame 'aixɨa tepɨteyurieni xehetsie mɨkarahɨiyanikɨ».
MAT 28:15 Hikɨ mɨkɨ tumini me'anu'ɨka yamekaniutiyuanekaitɨni kememɨte'uta'aitɨariekai. Mɨpaɨ tiuyɨku mɨpaɨ pɨtikuxaxatsiwa naitsarie huriyutsixi watsata hikɨ 'akuxi.
MAT 28:16 Hikɨ teyɨ'ɨkitɨwamete tamamata heimana xewi Karereya mekanekɨne, mɨkɨ yemuritsie paitɨ Ketsutsi kemɨtiwarahɨawekai.
MAT 28:17 Me'ixeiyaka hɨxiena mekaniukatunuma'uni, peru hipatɨ mɨkɨ 'akuxi yuri mepɨkate'eriekai xɨka yuritɨkaitɨni.
MAT 28:18 Hikɨ Ketsutsi 'ahurawa kaniuyani, katiniwarutaxatɨani, mɨpaɨ 'utaitɨ: —Naimekɨ heitserie nepexeiya taheima meta kwiepa.
MAT 28:19 'Ayumieme, xekenehu, teyɨ'ɨkitɨwamete xekeniwarayeitɨa yunaime nuiwarite, xewaka'ɨyatɨ Ta'ukiyari meta Nu'aya meta 'Iyari Mɨtiyupata hetsiemieme,
MAT 28:20 xetewa'ɨkitɨatɨ yamemɨtekahunikɨ naime xeme kenemɨtixe'u'aitɨa. Yurikɨ mɨpaɨ xeketenemaika, netsietɨ tukarikɨ xehamatɨa nekaniuyeikamɨkɨ, kepaukake kwie meutipare. Mɨpaɨ xeikɨa kani'aneni.
MAR 1:1 Niuki 'aixɨa manuyɨne Ketsutsi Kɨritsitu Kakaɨyari nu'aya hepaɨtsita, 'ipaɨ katiniutsutɨarieni.
MAR 1:2 Mɨpaɨ katiniuyɨni Kitsariyaxi Kakaɨyari niukameya xapayatsie kemɨre'uxa: «Kamɨ, ne neniuki tuayame nekananunɨ'amɨkɨ 'ahɨxie paitɨ, mikuha'aritɨanikɨ 'ahuye».
MAR 1:3 «Xewitɨ makumawetsie mɨpaɨ pɨrehiwa: “Ti'aitame huyeya xekeneukuha'aritɨa, xexeurawime huyeya xekeneutiwewi”».
MAR 1:4 Mɨpaɨ Wani Ti'ɨyame katininuani, makumawetsie katini'ɨyanekaitɨni meta tikuxatatɨ teɨteri memɨtehayewakɨ 'axameteyurietɨ meta memɨka'ɨyarienikɨ mɨpaɨ mɨtimatsiɨkɨnikɨ kename mete'uhayewaxɨ 'axameteyurietɨ.
MAR 1:5 Yunaitɨ teɨteri Kureya kwieyaritsie kiekatari meta Kerutsareme kiekatari mekani'axekaitɨni hetsɨana. Mɨkɨ meyuhekɨatakaku 'axakememɨteyuriekai, mɨkɨ kaniwaruka'ɨyakaitɨni Kurutani hatuxameyaritsie.
MAR 1:6 Wani kemarieya kameyu huxarieyakɨ pɨwewiyakai. Nawikɨ kananayukuhɨakaitɨni meta pɨtikwa'akai tɨpuxi meta xiete yeuta mieme.
MAR 1:7 Kemɨtikuxatakai, mɨpaɨ kaniutainekaitɨni: «Xewitɨ 'ukanamieni ne'utɨma, mɨkɨ matsi waɨkawa kanitɨrɨkaɨyeni keyuri ne. Ne 'aixɨa nepɨka'ane nehetsie mɨtinakenikɨ ni nemiparewienikɨ kakaiya nemixɨnirienikɨ.
MAR 1:8 Ne hakɨ nekanixe'uka'ɨyani, matsi mɨkɨ pɨxeka'ɨya 'Iyari Mɨtiyupatakɨ».
MAR 1:9 Merikɨtsɨ, 'ana kaninuani Ketsutsi, Natsareti heyeyaka Karereya kwieyaritsie, hikɨ Wani kanika'ɨya Kurutani hatuxametsie.
MAR 1:10 Hikɨ Ketsutsi hapa 'anatiyeiximetɨ, muyuawi kaniuxeiya 'anakayepierirɨmeme, meta 'Iyari kaniuxeiya 'a'akamieme para hetsiena mɨyuhayewakɨ, kukuru hepaɨ 'anetɨ.
MAR 1:11 Xewitɨta kanetaniuni taheima, mɨpaɨ 'utaitɨ: «'Ekɨ pekanineniwetɨni nekamaninaki'erieka, 'akɨmana nekaniyutemawieka».
MAR 1:12 Hikɨ 'Iyari kaneinɨ'ani makumawetsie paitɨ,
MAR 1:13 mana kaniuyeikakaitɨni huta tewiyari tukari, Kauyumarie kani'inɨatanekaitɨni. Yeutari memɨwaxuawe kaniuyeikakaitɨni Ketsutsi, Kakaɨyari niukieya tuayametemama mekaniparewiekaitɨni.
MAR 1:14 Merikɨtsɨ 'arike Wani 'anutahɨiyaku, Ketsutsi Karereya paitɨ kaneyani, niuki kuxatatɨ 'aixɨa manuyɨne Kakaɨyari hetsɨa mieme,
MAR 1:15 mɨpaɨ 'utaitɨ: «Tukari kanaye'aniri. Kanehuraniri Kakaɨyari kemɨtita'aita. Xeketeneuhayewa ke'axaxemɨteyurie, niuki 'aixɨa manuyɨnetsie yuri xeketeneuta'eri».
MAR 1:16 Merikɨtsɨ, harakuna tetsita 'uyemietɨ Karereya kwieyaritsie, kaniwaruxeiya yu'iwamakame Tsimuni meta 'Atɨrexi, wipi mekaneukawiwiwakaitɨni harakunatsie, mɨkɨ memɨketsɨweiyametetɨkaikɨ.
MAR 1:17 Hikɨ Ketsutsi mɨpaɨ katiniwarutahɨawe: «Hikɨmɨ, nehetsie xeketeneuwiya, teɨteri waxexeɨriwamete nekanixe'ayeitɨamɨkɨ».
MAR 1:18 'Ana kwitɨwa wipi me'uku'eiriexɨaka, hetsiena mekateniuwiya.
MAR 1:19 Hikɨ kwitɨwa ya'amietɨ kaniwaruxeiyata yu'iwamakame Kakuwu meta Wani, Tsewereu niwemama, mɨkɨ kanuwatsie mekaniyetekaitɨni yuwipi memanetsikitɨatɨ.
MAR 1:20 'Iya kaniwaruta'inieni, hikɨ mɨkɨ, yupaapa Tsewereu me'uku'eirieka kanuwatsie yekaime meta te'iwamete wahamatɨa, Ketsutsi mekaneweiya.
MAR 1:21 Merikɨtsɨ Kaperunaume mekaneta'axɨani, hikɨ kwitɨwa 'uxipiya tukari 'aye'aku, huriyutsixi watukita heutahaka, katini'ɨkitakaitɨni.
MAR 1:22 Mekanihɨxiyakaitɨni tita mɨti'ɨkitakai hepaɨtsita, kemɨ'ane heitserie mexeiya hepaɨ katiniwaru'ɨkitɨwakaitɨni, mɨkɨ 'inɨarikɨ memɨte'ɨkitakai wahepaɨ pɨkati'ɨkitakai.
MAR 1:23 Merikɨtsɨ, yapauka tewi kaniutahiwa tukita kakaɨyari 'axamɨ'ane minɨkai:
MAR 1:24 —'Ai, ¿titayari 'uperamie tahetsɨa Ketsutsi Natsaretitanaka? ¿Petatsiheuyehɨanike petinua? Ne nepɨmatsimate kemɨ'ane pemɨhɨkɨ: Kemɨ'ane Kakaɨyari hetsiemieme mɨpatsie, 'ekɨ pekanihɨkɨtɨni.
MAR 1:25 Ketsutsi kanitatieni, mɨpaɨ tikɨhɨawetɨ: —Kayuwatɨ 'aixɨa, keneuxɨna mɨkɨ tewi.
MAR 1:26 Hikɨ mɨkɨ kakaɨyari 'axamɨ'ane tewi kaniutayuitɨani, karima 'utahiwaka hetsiena kanayeyani.
MAR 1:27 Yunaitɨ mekaniuhɨxiyani, 'ayumieme niuki mekaniutixɨatɨatɨkɨne mɨpaɨ me'utiyuatɨ: «¿Ketita tihɨkɨ 'ikɨ? 'Ɨkitsika mɨhekwa, mɨkɨ heitserie hexeiyatɨ katiniwa'aitɨaka. 'Atsita kakaɨyarixi 'axamemɨ'anene katiniwa'aitɨaka, meta mɨkɨ mekani'enieni»
MAR 1:28 Hikɨ kwitɨwa naitsarie Karereya kwieyaritsie kaniutamariwa kemɨtiuyuri.
MAR 1:29 Merikɨtsɨ tukita me'ayenexɨaka, Tsimuni meta 'Atɨrexi wakie mekanekɨne, Wani meta Kakuwu yunaitɨ.
MAR 1:30 Tsimuni warɨkaɨya yu'utatsie kanikakateitɨni hɨiyatɨ, hikɨ Ketsutsi kwitɨwa mekateniutaxatɨani kemɨ'anekai.
MAR 1:31 Hikɨ mɨkɨ 'ahurawa kaniuyani, mamayatsie kanikawiere kanenukuhana. Yapauka hɨiya kanihayewa, hikɨ katiniwarumini.
MAR 1:32 Hikɨ taikai, tau 'akayunekuri, teɨteri mekani'atɨirieni tekwikwikate yunaime, meta mɨkɨ kakaɨyarixi 'axamemɨ'anene memɨwawiyakai.
MAR 1:33 Yunaitɨ kiekatari mekaniyukuxeɨrieni kitenie hɨxie.
MAR 1:34 Yumɨireme 'aixɨa meteheu'eriekame kaniwarayeitɨani kwimemɨyɨakai mɨireme kwiniyakɨ. Metatsiere kakaɨyarixi kaniwarayenɨ'axɨani yuwaɨkawame, peru pɨkawapitɨakai kakaɨyarixi memɨtiniunikɨ, mɨkɨ memimaikaikɨ.
MAR 1:35 Hikɨ 'uxa'arieka ximeri meripaitɨ 'akuxi yɨwikɨta Ketsutsi kananukukeni, kiita wayeyaka kaneyani teɨteri memɨka'anu'uwatsie paitɨ, mana kaniuyutanenewieni.
MAR 1:36 Hikɨ Tsimuni, meta hipatɨ hamatɨana memu'uwakai Ketsutsi mekananukuyeike.
MAR 1:37 Me'itaxeiyaka mɨpaɨ mekatenitahɨawe: —Yunaitɨ teɨteri mepɨmatsikuwautɨwe.
MAR 1:38 Ketsutsi mɨpaɨ katiniwarutahɨawe: —Kɨmɨtsɨari huma pɨta tepɨyehu, hipame kiekaritetsie tepɨtayeixɨani, nemɨtiwaretaxatɨanikɨ manarita. 'Ayumieme nekaneyeyani.
MAR 1:39 Hikɨ naitsarie Karereya kwieyaritsie kanikuyeikakaitɨni, tikuxatatɨ watukiteta meta warayenɨ'awatɨ kakaɨyarixi 'axamemɨ'anene.
MAR 1:40 Merikɨtsɨ xewitɨ tewi nawi kwiniyayari mexeiyakai kaninuani hetsɨana, kwi 'iwawirietɨ, hɨxiena 'utitunumakeka, mɨpaɨ katinitahɨawe: —Xɨka pe'awaɨriyani, pepɨyɨwe pemɨnetsi'itieni.
MAR 1:41 'Inenimayatɨ, Ketsutsi yumamá 'utatseraka kanimayɨani, mɨpaɨ tikɨhɨawetɨ: ―Nepɨnewaɨriya. Pekaniu'itiyaniri.
MAR 1:42 Mɨpaɨ titahɨaweku yapauka kaneunuani nawi kwiniyayari. Tewi 'itiyatɨ kanayani.
MAR 1:43 Waɨkawamekɨ 'ihɨritɨatɨ, Ketsutsi kaneinɨ'ani kwitɨwa, mɨpaɨ tikɨhɨawetɨ:
MAR 1:44 ―Neuxei, xeimetɨma pepɨkaraxaxatɨwani, mawari wewiwame hetsɨa pɨta kenemie kene'ahekɨata matsihexeiyakɨ, 'aixɨa pereu'erietɨ pematɨakɨ, kenanutimawa kemɨtiu'aitaxɨ Muitsexi yapemɨtiwatahekɨatɨanikɨ.
MAR 1:45 Mɨkɨ matsi mana heyaka yatiniutixatatɨyani waɨkawa, naitsarie katinikuxatakaitɨni kemɨtiuyɨ. 'Ayumieme Ketsutsi pɨkayɨwekai kiekaritsie me'axeni yuhekɨatatɨ, matsi yeuta nekateitɨni makumawetsie. Mɨyatɨtɨ hetsɨana mekani'axekaitɨni naitsarie kiekatari.
MAR 2:1 Merikɨtsɨ yapaɨmexɨa tukari 'anukayaku, hutarieka kaninuani Kaperunaumetsie. Kaniutamariwa kename kiita hayekatei.
MAR 2:2 Yumɨiretɨ kwitɨwa mekaniyukuxeɨrieni, memɨyumɨirekaikɨ, nikitenie hɨxie mepɨkatenakekai, hikɨ mɨkɨ niuki kaniwakɨxaxatɨwakaitɨni.
MAR 2:3 Hikɨ hipatɨ huriekame mekani'atɨirieni, yunaukatɨ mehekwetɨ.
MAR 2:4 'Ahurawa me'ekwenike mekaniyutatexieni teɨteri memɨyumɨirekaikɨ. 'Ayumieme Ketsutsi manuwekaitsie kii heima mekaneuka'ine, 'ixumeri mewati'ineka muwa huriekame mekaneukatuani, 'itaritsie 'akaikame.
MAR 2:5 Ketsutsi waruxeiyaka yuri kememɨte'eriekai, mɨpaɨ huriekame katiniutahɨawe: —Neniwe, pepɨreuyehɨwiyarie 'axapemɨtiuyurikɨ.
MAR 2:6 Hikɨ hipatɨ 'inɨarikɨ memɨte'ɨkitametetɨkai muwa mekanayetekaitɨni, yu'iyaritsie mɨpaɨ mekateniyɨkɨhɨawekaitɨni:
MAR 2:7 «¿Titayarikuta mɨya tikɨhɨawe 'ikɨ? Kakaɨyari hepaɨtsita 'axaputaine. ¿Kepainetɨ pɨyɨwe mɨreiyehɨwirieni tewi 'axatiuyurieyu, xewitɨ xeikɨa kaniyɨweni Kakaɨyaritɨtɨ?»
MAR 2:8 Ketsutsi yu'iyaritsie timaitɨ mɨya memɨteyɨkɨhɨawekaikɨ, mɨpaɨ katiniwarutahɨawe: —¿Titayari mɨya xeteyɨkɨhɨawe yu'iyaritsie?
MAR 2:9 ¿Tita matsi katikwaniwe, mɨpaɨ mɨtitahɨawe muhurie: “Pepɨreuyehɨwiyarie 'axapemɨtiuyurikɨ”, nutsutɨ: “Kenanukukexi, 'a'itari kenanukukwe'i, kenekuyeikani, xɨka 'utayɨni”?
MAR 2:10 Hikɨtsɨ ya'aneme xekanetimaikuni kename heitserie nehexeiya kwiepa nemɨtiwareuyehɨwirienikɨ 'axamemɨte'uyuri, Yuri Tewi nehɨkɨtɨtɨ. Hikɨ huriekame mɨpaɨ katiniutahɨawe:
MAR 2:11 ―'Ekɨ nepɨmarahɨawe, kenanukukexi, 'a'itari kenakwetɨ, meta 'akie kenemie.
MAR 2:12 Hikɨ mɨkɨ kananukukeni, yu'itari kananukukweni kaneyani yunaime wahɨxie. 'Ayumieme yunaitɨ mekaniuhɨxiyani, hikɨ 'aixɨa mekaniutiyuanekaitɨni Kakaɨyari hepaɨtsita, mɨpaɨ me'utiyuatɨ: —Hatsuaku tepɨkanenieriwawekai 'ipaɨ tiyɨanekaku.
MAR 2:13 Merikɨtsɨ tawarita harakuna tetsita Ketsutsi kaneyani. Teɨteri yunaitɨ hetsɨana mekani'axekaitɨni, mɨkɨta katiniwa'ɨkitɨakaitɨni.
MAR 2:14 Hikɨ mana 'uyemietɨ Rewi 'Aripeu nu'aya kaniuxeiya teɨteri memɨte'ayutituayatsie 'akaime. Ketsutsi mɨpaɨ katinitahɨawe: —Nehetsie ketinewiyani. Hikɨ Rewi 'anukukeka hetsiena katiniuwiya.
MAR 2:15 Merikɨtsɨ tikwakaku Ketsutsi Rewi kiita, yumɨiretɨ kuwiyexinu hetsiemieme tewawamete, meta 'axateyuruwamete mekatenikwakaitɨni Ketsutsi hamatɨa meta teyɨ'ɨkitɨwametemama wahamatɨa, 'ari mekaniyumɨirekaitɨni memeweiyakai.
MAR 2:16 Hikɨ kepauka 'inɨarikɨ memɨte'ɨkitametetɨkai meta paritseutsixi memɨhɨkɨtɨkai me'ixeiyaka tikwakame 'axateyuruwamete wahamatɨa meta tewawamete wahamatɨa, mɨpaɨ mekateniwarutahɨawe teyɨ'ɨkitɨwametemama: —¿Neuxei, 'ikɨ tewawamete meta 'axateyuruwamete wahamatɨa tikwa'a?
MAR 2:17 Waru'enieka, Ketsutsi mɨpaɨ katiniwarutahɨawe: —'Aixɨa memɨteheu'erie mepɨkaheiyehɨwa tiyu'uayemawame, mɨkɨ memɨtekukuye pɨta mekaneiyehɨaka. Ne nepɨkanua newata'inienike mɨkɨ heitseriemekɨ yamemɨtekahu, mɨkɨ 'axamemɨteyurie pɨta newata'inienike nekaninuani.
MAR 2:18 Merikɨtsɨ Wani hetsɨa miemete teyɨ'ɨkitɨwamete meta paritseutsixi mewaxeiyatɨ memuyuhakiximekaikɨ, hipatɨ me'u'axɨaka, Ketsutsi mɨpaɨ mekateniuta'iwawiya: —¿Titayari Wani hetsɨa miemete teyɨ'ɨkitɨwamete meta paritseutsixi wahetsɨa miemete meteyuhakiwa, 'ahetsɨa miemeteta teyɨ'ɨkitɨwamete mekateyutihakiwa?
MAR 2:19 Ketsutsi mɨpaɨ katiniwaruta'eiya: —¿Kemeteyɨwawe memɨyuhakieka neneɨkeme 'inierimama, mexi neneɨkeme wahamatɨa 'uyeika? Mexi neneɨkeme watsata 'uyeika mepɨkayɨwawe memɨyuhakieka.
MAR 2:20 Peru tukari kanaye'amɨkɨ kepauka neneɨkeme mɨtihanieni watsata, hikɨ 'anake mekaniyuhakikuni.
MAR 2:21 Nixewitɨ tewi 'ixuriki mɨye'i pɨkamanetsikitɨwa 'ixuriki mɨhekwakɨ. Xɨka mɨpaɨ tiuyurieni, 'ixuriki mɨhekwa xɨka yutatuni mɨye'i pɨtatsana, tsanimeyari matsi waɨkawa 'axa'anetɨ payeika.
MAR 2:22 Meta nixewitɨ tsixai mɨyeye'itsie pɨka'ikatu'a kaxie winuyari mɨhekwa mɨkwanakɨ. Mexɨka mɨpaɨ tiuyurieni, winu tsixai kanititsanamɨkɨ, winu kaneuyewemɨkɨ meta tsixai. Matsi kaxie winuyari mɨhekwa tsixai mɨhehekwatsie kanikatuariwani.
MAR 2:23 Merikɨtsɨ 'uxipiya tukaritsie, Ketsutsi 'etsipa kaniuyeyani, teyɨ'ɨkitɨwametemama, mana me'uyehutɨ, mekanitsutɨani mewatihunatɨ tɨriku mɨayeyari.
MAR 2:24 Hikɨ paritseutsixi mɨpaɨ mekatenitahɨawe: —Neuxei, ¿titayarikuta mɨkɨ kemɨkareuyewetse meteyurie 'uxipiya tukaritsie?
MAR 2:25 Ketsutsi mɨpaɨ katiniwarutahɨawe: —¿Hatsuaku xekate'ititerɨwawawe kemɨtiuyuri Rawiri kepauka memuhakakwi mɨkɨ meta hamatɨana memu'uwakai meta kepauka meteheuyehɨatɨ memakɨ?
MAR 2:26 'Iya Kakaɨyari kiyata kaneutahani kepauka 'Awiyataxi mawari wewiwamete tiwa'aitɨwame mɨhɨkɨtɨkai, paa Kakaɨyari hɨxie mamanekai kaniutikwani, mawari wewiwamete xeikɨa heitserie mepexeiyakai memitikwanikɨ mɨkɨ paa. Metatsiere hamatɨana memu'uwakai kaniwarumini.
MAR 2:27 Mɨpaɨta Ketsutsi katiniwarutahɨawe: —'Uxipiya tukari kaniuti'utsieni teɨteri wahetsiemieme. Teɨteri kememɨte'uwewiya, 'uxipiya tukaritsie mieme xeikɨa mepɨka'utiwewiya.
MAR 2:28 'Ayumieme Yuri Tewi nehɨkɨtɨtɨ, 'uxipiya tukari hepaɨtsita tsiere nekatini'aitani.
MAR 3:1 Merikɨtsɨ tawarita tukita kaneutahani, tewi mɨmamawakikai muwa kanayekateitɨni.
MAR 3:2 Hipatɨ mɨkɨ mekanihupiekaitɨni 'aixɨa 'aneme kapayeitɨani 'uxipiya tukaritsie meteyɨkɨhɨawetɨ, me'ixanetakutɨ.
MAR 3:3 Hikɨ Ketsutsi mɨpaɨ katinitahɨawe tewi mɨmamawakikai: —Kenanukukexi, hixɨapa keneutakexi.
MAR 3:4 Mɨpaɨ Ketsutsi katiniwaruta'iwawiya: —¿'Uxipiya tukaritsie tiheitserie 'aixɨa mɨtiyurieneni, nutsutɨ 'axamɨtiyurieneni, tiheitserie mɨtiyutawikweitsitɨanikɨ, nutsutɨ mɨtiyumienikɨ? Mɨkɨ kayuwatɨ mekaniumakaitɨni.
MAR 3:5 Hikɨ yuhaxɨama waruxeiyaka, yuhiwerietɨ memɨtsetse'ikaikɨ yu'iyaritsie, mɨpaɨ tewi katiniutahɨawe: —'Amamá keneutatsera. Mɨkɨ kanitatsera, hikɨ mamaya 'aixɨa 'anetɨ kanayani.
MAR 3:6 Hikɨ paritseutsixi mewayekɨneka, mɨkɨ herurexitsie memɨtewiyakai wahamatɨa mekaniuyu'enieni Ketsutsi kememɨte'imienikekai.
MAR 3:7 Hikɨ Ketsutsi meta teyu'ɨkitɨwametemama yunaitɨ harakuna paitɨ mekanekɨne, meta yumɨiretɨ teɨteri mekanenukuweiya Karereyatari, Kureyatari,
MAR 3:8 Kerutsaremetari, 'Irumeyatari, Kurutani 'anutaɨyetari, Tiru 'aurie Tsiruni 'aurie kiekatari. Yuwaɨkawatɨ me'u'enanaka naime kemɨtiyurienekai, hetsɨana mekaniu'axɨani.
MAR 3:9 Hikɨ kaniwaruta'aitɨani teyɨ'ɨkitɨwamete 'ahurawa memehanakɨ kanuwa hetsiena mieme, kapa me'itsaipɨnakɨ, teɨteri memɨyumɨirekaikɨ.
MAR 3:10 Yumɨireme 'aixɨa meteheu'eriekame kaniwarayeitɨwakaitɨni. 'Ayumieme yunaitɨ kwiniya memexeiyakai metsaipɨnetɨ hetsɨana mekani'axekaitɨni me'imayɨanike, 'ayumieme kanuwa kaniuta'aita.
MAR 3:11 Kakaɨyarixi memɨka'itiyatɨka me'ixeiyatɨ, hɨxiena mekaniukaxɨrɨwekaitɨni, mɨpaɨ mete'uhiwatɨ: «'Ekɨ Kakaɨyari pekaninu'ayatɨni».
MAR 3:12 Matsi mɨkɨ kaniwaku'imaiyakaitɨni yemekɨ memɨka'ikuxatanikɨ kapa matsiɨkɨme meheyeitɨanikɨ.
MAR 3:13 Hikɨ hɨritsie kaneutiyune. Mɨme mɨwaranuyexei kaniwaruta'inieni hetsiena memɨtewiyanikɨ. Me'ayekɨneka teɨteri watsata, hetsiena mekateniuwiya.
MAR 3:14 Tamamata heimana yuhutame kaniwaranuyeteɨxɨ. 'Arike kaniwatanɨ'axɨanikekaitɨni memɨtekuxatanikɨ meta hamatɨana memu'uwanikɨ,
MAR 3:15 heitserie kaniwapitɨanikekaitɨni 'aixɨa meteheu'eriekame memɨwarayeitɨwanikɨ tekwikwikate, meta memɨwarayenɨ'axɨanikɨ kakaɨyarixi 'axamemɨ'anene.
MAR 3:16 'Ikɨ mepɨhɨkɨ tamamata heimana huta muwaranayexei: Tsimuni (Ketsutsi mɨtiterɨwaxɨ Pekuru),
MAR 3:17 Kakuwu Tsewereu nu'aya, Wani Kakuwu 'iwaya (Ketsutsi mɨtiwaruterɨwaxɨ Wuhaneriketsi, manuyɨne: Tɨrarɨkamete),
MAR 3:18 'Atɨrexi, Piripe, Wariturume, Mateu, Tumaxi, Kakuwu 'Aripeu nu'aya, Tareu, Tsimuni mɨkananitsitatɨkai,
MAR 3:19 meta Kura 'Itsikariutitanaka 'arike Ketsutsi mɨyetua. Hikɨ kiita mekaneutahaxɨani.
MAR 3:20 Tawarita yuwaɨkawatɨ teɨteri me'u'axɨaku mɨkɨ mepɨyutatexi metekwanike.
MAR 3:21 Hikɨ maremama me'u'enanaka, mekaniu'axɨani memenuhanakɨ. Mɨpaɨ mekateniyɨkɨhɨawekaitɨni: «'Atsipɨkatimate kemɨtiyuriene».
MAR 3:22 Mɨkɨ meta 'inɨarikɨ memɨte'ɨkitametetɨkai, Kerutsaremetsie memeyekɨnekai, mɨpaɨ mekaniutiyuanekaitɨni: «Weheritsewu pinɨ'ɨ. Kakaɨyarixi 'axamemɨ'anene tiwa'aitɨwame 'iparewiekaku kaniwarayenɨ'awani kakaɨyarixi 'axamemɨ'anene».
MAR 3:23 Hikɨ Ketsutsi yu'aurie warutakwewieka, 'ɨxatsikɨ mɨpaɨ katiniwaruta'ɨkitɨani: «¿Kauyumarie ketiyɨwe mayuyenɨ'anikɨ yɨkɨmana?
MAR 3:24 Yaxeikɨata, xeime kwieyaritsie kiekatari xɨka hixɨata meyutsana, xɨka me'ayuka'unieka, mɨkɨ wakuwiyexinu pɨkayɨweni 'emɨreutewinikɨ.
MAR 3:25 Xeime kie miemete hixɨata xɨka meyutsana, xɨka me'ayuka'unieka, mepɨkayɨwaweni 'ememɨteheutewinikɨ.
MAR 3:26 Yaxeikɨata, kauyumarie xɨka yuka'unarɨmenike, tɨrɨkariyaya hixɨata xɨka yutsanake, 'emɨreutewinikɨ pɨkayɨwenikeyu. Pɨtaxɨximenikeyu pɨta.
MAR 3:27 Merikɨte, xewitɨ pɨkayɨwe mɨtinawani tewi mɨtɨrɨkaɨye tita yukiita mɨrexeiya, mɨkɨ tewi katiuhɨani meri, 'anake kaniyɨwemɨkɨ piiniteya naime mɨtiunawani.
MAR 3:28 Yurikɨ mɨpaɨ nepɨxerahɨawe, naime 'axakememɨteyurie teɨteri, mepɨyɨwawe memɨteheuyehɨwiyarienikɨ naime 'axamemutiyuane.
MAR 3:29 Matsi kemɨ'ane 'axamɨtayɨni Kakaɨyari 'Iyarieya Mɨtiyupata hepaɨtsita, mɨkɨ hatsuaku pɨkareuyehɨwiyarieni mɨkɨkɨ. Hetsiena matsi katiniuhɨiwani, yuheyemekɨ 'emuwekɨ tita 'axamɨtiuyuri».
MAR 3:30 'Ipaɨ kaniutayɨni, mɨkɨ mɨpaɨ memutiyuanekaikɨ: «Kakaɨyari mɨka'itiya kaninɨka».
MAR 3:31 Hikɨ maamaya meta 'iwamama yunaitɨ mekaniu'axɨani. Takwa mekaniti'uni mekatenitanɨ'airieni yu'aurie me'ikwewietɨ.
MAR 3:32 Teɨteri yumɨiretɨ mekanayetekaitɨni hamatɨana, mɨpaɨ mekatenitahɨawe: —Neuxei, 'amaama meta 'a'iwama mepɨmatsiha'iwawa takwa paitɨ.
MAR 3:33 Mɨkɨ mɨpaɨ katiniwarutahɨawe: —¿Kehateri nemaama meta ne'iwama?
MAR 3:34 Waranuxeiyatɨyaka 'auriena mematekai, mɨpaɨ kaniutayɨni: —Kamɨ 'ena nemaama meta ne'iwama.
MAR 3:35 Kemɨ'ane yamɨtiyuriene kemɨtinake Kakaɨyari, mɨkɨ kanine'iwatɨni kaninemaamatɨni.
MAR 4:1 Merikɨtsɨ tawarita harakuna tetsita katiniuti'ɨkita. Hetsɨana mekaniyukuxeɨrieni teɨteri yuwaɨkawatɨ, 'ayumieme kanuwatsie nakayerɨni hapa yewiekametsie. Yunaitɨ teɨteri kwiepa pɨta mekaniti'ukaitɨni hatetsita.
MAR 4:2 Mana waɨkawa katiniwa'ɨkitɨakaitɨni 'ɨxatsi hepaɨtsita, hikɨ ti'ɨkitatɨ mɨpaɨ katiniwarutahɨawe:
MAR 4:3 «Xekene'enanaka. Merikɨtsɨ, ti'iwiwame kanayeyani.
MAR 4:4 Merikɨtsɨ 'imɨari 'iwienekaku, hipatɨ huye tetsita kaniukaxɨrieni, wikixi me'u'axɨaka mekanikuxɨni.
MAR 4:5 Hipatɨta mutetexiyatsie kaniukaxɨrieni waɨkawa mɨka'akukwieyatsie. Mɨkɨ kwitɨwa kaniutinexɨani kwie 'emɨkatsuikaikɨ,
MAR 4:6 peru, kepauka tau manatine maxɨrixɨ, kaniutiyɨnare, mɨkahananayatɨkateikɨ kaniutiwani.
MAR 4:7 Hipatɨta xuyatsata kaniukaxɨrieni, hikɨ kepauka xuya mutiwawerixɨ kanenukanani, takariyari pɨka'utixuawerixɨ.
MAR 4:8 Hipatɨta kwie 'aixɨa mɨraku'anetsie kaniukaxɨrieni. 'Utinexɨaka 'utiwawereka, kaniutixuawere, hipatɨ xeitewiyari heimana tamamata kanayani, hipatɨta haika tewiyari, hipatɨta xeitsienituyari».
MAR 4:9 Mɨpaɨta Ketsutsi kaniutayɨni: «Kemɨ'ane mu'enaxɨ, ke'u'ena».
MAR 4:10 Hikɨ yɨhɨkɨate metitetɨ, mɨkɨ 'auriena memɨtitekai meta tamamata heimana memɨyuhuta wahamatɨa mekanita'iwawiya 'ɨxatsi hepaɨtsita kemɨti'ɨkitakai.
MAR 4:11 Mɨpaɨ Ketsutsi katiniwarutahɨawe: «Xeme xekaniupitɨarieni tita mɨtiuti'awietsiekai, xemɨtemaikakɨ Kakaɨyari mɨra'aitatsie timieme, hipatɨ takwa memɨtitei pɨta, naimekɨ 'ɨxatsi hepaɨtsita xeikɨa mekaniupitɨarieni 'utɨarika manuyɨne hepaɨ,
MAR 4:12 para »“memɨka'ixeiyakɨ, tsepa yemekɨ memɨtanenierenike, para 'atsimemɨkatehetimanikɨ, tsepa yemekɨ memɨ'enanakake, kapa mete'uhayewame kememɨteyuriekai Kakaɨyari hetsie mete'uwiyakɨ, meta kapa meteheuyehɨwiyarienikɨ”».
MAR 4:13 Hikɨ Ketsutsi mɨpaɨ katiniwakɨhɨaweni: «¿Kari xeme 'ikɨ 'ɨxatsi hepaɨtsita xepɨka'u'enana? ¿Ketɨtɨri xete'enanani naime 'ɨxatsi hepaɨtsita?
MAR 4:14 Ti'iwiwame niuki kani'iwieneni.
MAR 4:15 Hipatɨ huye tetsita miemete mekanihɨkɨtɨni hakewa niuki meka'iwiya. Kepauka memi'enie, kwitɨwa Kauyumarie kani'axeni, niuki netɨkɨni wahetsɨa muka'iwiya.
MAR 4:16 Hipatɨta yaxeikɨa 'imɨari mekanihɨmetɨni makutetexiyatsie memuka'iwiya: Kepauka niuki memɨ'enie, yapauka mekanitanaki'erieni meyutemamawietɨ,
MAR 4:17 yɨkɨmana mepɨkahananatɨka, matsi 'emepɨkateheutere. Kepauka memɨ'uximatɨarie kepauka memutaweiyarie 'ikɨ niuki hepaɨtsita, yapauka mekaniukunuitɨarieni.
MAR 4:18 Hipatɨta 'imɨari mekanihɨkɨtɨni xuyatsata memuka'iwiya: Mɨkɨ niuki mekaniu'enieni,
MAR 4:19 peru 'iyaritɨarika kwiepa timiemekɨ, tuminitɨarikakɨ mete'irɨwiyarietɨ, meta hipame waɨkawame metehiwe'erietɨ 'axamɨti'anene, mɨkɨkɨ niuki kananukanamieni, 'ayumieme pɨka'utixuawerixɨ.
MAR 4:20 Hipatɨ 'imɨari mekanihɨmetɨni kwie 'aixɨa mɨraku'anetsie memuka'iwiya: Niuki mekaniu'enieni, mekaniuyuwaɨriya me'inaki'erietɨ, mekaniutixuxuawereni, hipatɨ xeitewiyari heimana tamamata, hipatɨta haika tewiyari, hipatɨta xeitsienituyari mekanakɨne».
MAR 4:21 Hikɨ mɨpaɨta katiniwakuxaxatɨwakaitɨni: «¿Kɨxeme 'atɨame kakunikɨ pɨka'enukanani, yatɨni 'utatɨa pɨkaheitayeni? ¿Wapaitɨ pɨta kaneitiyemɨkɨ?
MAR 4:22 Karikɨ naitɨ tita mɨti'awietsie katinihekɨarimɨkɨ, meta naitɨ tita 'awie mɨtimieme katinitamariwamɨkɨ.
MAR 4:23 Kemɨ'ane mu'enaxɨ, ke'u'ena».
MAR 4:24 Mɨpaɨta kaniutayɨni: «Xekeneuyu'ɨwiya tita xemɨte'enie hepaɨtsita. Keti'inɨarime hipame xemɨtewamini, yaxeikɨata xeme mɨpaɨ ti'inɨarime xepɨtemikieni, meta 'etsiwa matsi 'anatekame.
MAR 4:25 Kemɨ'ane tixaɨtɨ mɨrexeiya, tawarita matsi pɨtimikieni. Kemɨ'ane mɨkarexeiya, tsepa 'etsiwa mɨrexeiya katininawaiyariemɨkɨ».
MAR 4:26 Mɨpaɨta katiniwakuxaxatɨwakaitɨni: «'Ipaɨ katini'aneni Kakaɨyari ti'aitametɨkaku, kamɨ tewi 'imɨari kwiepa kaniuta'iwieni.
MAR 4:27 Niukahupuni nanukukekani tukarikɨ tɨkarikɨ. 'Imɨari kaniutineikani kaniutiwawereni, mɨkɨ 'atsikatimaikaku kemɨtineika kemɨtiuwawere.
MAR 4:28 Kwie yuxaɨta pitinenetɨwa kɨtsunuyari meri, 'arike mɨayeyari, 'arike takari.
MAR 4:29 Tikwayu, 'ana tɨriku xikamete kaniwaranunɨ'amɨkɨ, 'itsanari maye'akɨ».
MAR 4:30 Hikɨ mɨpaɨ kaniutayɨni: «¿Kete'utiyuaneni, tita hepaɨ ti'ane Kakaɨyari kemɨti'aita? ¿Kemɨ'ane 'ɨxatsi hepaɨtsita tepihekɨatani?
MAR 4:31 Mutsitatsa 'imɨariyari hepaɨ kani'aneni: Kwiepa muka'iwiwa, xewitɨ 'imɨari hepaɨna 'anetɨ pɨkaxuawe kwiepa 'etsipepetɨ.
MAR 4:32 'Uka'iwiyaka kaniutineikani, tupiriya mutineika, xewitɨ hepaɨna 'anetɨ pɨkaxuawe 'epapatɨ, mamateya neukunexɨani 'etɨɨtɨ, taheima miemete wikixi mekaniyɨwaweni memɨyuti'ituatɨanikɨ hetsiena 'etɨriyaritsie».
MAR 4:33 Waɨkawa 'ɨxatsi hepaɨtsita, 'inɨarite hepaɨ 'anenemekɨ niuki kaniwakuxaxatɨwakaitɨni, memɨyɨwawenikɨ memi'enienikɨ.
MAR 4:34 'Ɨxatsi hepaɨtsita katikuxatatɨ pɨkatiwakuxaxatɨwakai. Teyɨ'ɨkitɨwamete xeikɨa me'ayetetɨ yɨhɨkɨate, katiniwahekɨatɨakaitɨni yunaime.
MAR 4:35 Hikɨ mɨkɨ tukaritsie 'ukutaikaireku mɨpaɨ katiniwarutahɨawe teyɨ'ɨkitɨwamete: —Hikɨmɨtsɨari 'anutaɨye tepanukɨne.
MAR 4:36 Mɨkɨ mewaruku'eirieka teɨteri mana memɨti'ukai, mekanekɨne kanuwatsie manatikateitsie. Hipatɨta kanuwate mekanekɨne hamatɨana.
MAR 4:37 Hikɨ yapauka kaniuku'eka waɨkawa, hikɨ hamewari kanuwa kananutawayakaitɨni, yemekɨ kwinimieme kanikayunitɨaximekaitɨniri.
MAR 4:38 Ketsutsi kanuwa kɨtsapa kanakateitɨni, mu'uritaritsie 'utimu'utɨ kutsutɨ, mekanenutahɨtɨani mɨpaɨ mete'ikɨhɨawetɨ: —Ti'ɨkitame 'aku, ¿pekareu'akweriwayurie temeuyeweximekɨ?
MAR 4:39 Hikɨ 'anukukeka 'eka kaniutatieni, meta harakuna mɨpaɨ katiniutahɨawe: ―Kayuwatɨ. Ketineuhayewa. Hikɨ 'eka kaneunuani, naitɨ kayuwatɨ kaniutamare.
MAR 4:40 Mɨpaɨ teyu'ɨkitɨwamete katiniwarutahɨawe: —¿Titayari waɨkawa xetemama? ¿'Akuxi yuri xekate'erie?
MAR 4:41 Mɨkɨ kwinimieme mekatenimamakaitɨni, mɨpaɨ mekateniyutahɨawekaitɨni: —¿Kemɨ'ane pɨhɨkɨ 'ikɨ, 'atsita 'eka meta harakuna memei'enie?
MAR 5:1 Merikɨtsɨ harakuna 'anutaɨye mekaneta'axɨani Kataratari wakwiepa.
MAR 5:2 Kanuwatsie Ketsutsi 'anatiyaku, yapauka tewi kakaɨyari mɨka'itiya minɨkai nenukunake mɨkite wateukiyapa 'ayeneka.
MAR 5:3 Mɨkɨ tewi mɨkite wateukiyapa kanikiekaitɨni, teɨteri mekanitexiekaitɨni me'ihɨanike tepɨakɨ.
MAR 5:4 Mɨixa kanikuhɨiwakaitɨni tepɨakɨ yumamatetsie yɨ'ɨkatetsie, peru yumamakɨ tepɨa kananutekekaitɨni, yɨ'ɨkatsie mieme kanenuyeketsinakaitɨni, xewitɨ hepaɨna pɨkatɨrɨkaɨyekai mimaxiutakɨ.
MAR 5:5 Tukarikɨ meta tɨkarikɨ teukiyapa kanikuyeikakaitɨni yahɨritsie, kuhiwanetɨ, tetexikɨ yutitsunatɨ.
MAR 5:6 Hikɨ kepauka Ketsutsi 'uxeiyaka 'ateewa, hepana kaniutanautsa, meta hɨxiena kaniutitunumakeni
MAR 5:7 karima 'utahiwatɨ, mɨpaɨ 'utaitɨ: —¿Ketita perayexeiya, Ketsutsi, Kakaɨyari 'Amutewi pemunu'aya? Nepɨmatsiwawirie yanetihɨritɨatɨ Kakaɨyari, penɨkahɨrixɨa 'axanetsi'uyurieni.
MAR 5:8 Mɨpaɨ kaniutayɨni Ketsutsi mɨpaɨ mɨtitahɨawixɨkɨ: «'Ekɨ kakaɨyari pemɨka'itiya, keneuxɨna mɨkɨ tewi».
MAR 5:9 Hikɨ Ketsutsi mɨpaɨ katinita'iwawiya: —¿Kepetitewa? Mɨkɨ mɨpaɨ katinita'eiya: —Kuyaxi Xeiwaxayari netinitewaka, temɨtamɨirekɨ.
MAR 5:10 Waɨkawa waɨriyarika Ketsutsi kaniwawiriekaitɨni mɨkawaranuyenɨ'anikɨ mɨkɨ kwiepa.
MAR 5:11 Merikɨtsɨ yemuritsie mekatenikwatɨwekaitɨni tuixuri yuwaɨkawatɨ, kakaɨyarixi 'axamemɨ'anene mekanitawawirieni waɨriyarika, mɨpaɨ me'utiyuatɨ:
MAR 5:12 ―Ketaneupitɨa tuixuri wahetsie temeutahaxɨanikɨ.
MAR 5:13 Hikɨ Ketsutsi kaniwarupitɨani. Kakaɨyarixi memɨka'itiyatɨka me'ixɨnaka tewi, tuixuri wahetsie pɨta mekaneutahaxɨani, 'etsiwatɨkaku huta miriyari meyupaɨmeme. Hikɨ yunaitɨ tuixuri mekaniutinautsa tekɨata mekaneukaxɨrieni harakunapa, hikɨ mana mekaniukayunixɨani.
MAR 5:14 Hikɨ tuixuri wahɨwemete mekaniuyuta'una, hikɨ kiekaritsie mekateniutaxata meta yeuta memu'uwakai wahetsɨa, hikɨ teɨteri mekanekɨne meheunieriyuka kemɨtiuyɨ.
MAR 5:15 Ketsutsi hetsɨa me'u'axɨaka mekanixeiya tewi kakaɨyarixi meminɨkai, xeiwaxayari memiwiyakai, mekanixeiya mana 'akaime, heukemarimakame 'aixɨa re'iyarime, hikɨ mekaniutimamani.
MAR 5:16 Hikɨ kemɨ'ane memunenierixɨ mekateniwakuxaxatɨwakaitɨni kemu'itɨarie tewi, kemɨtiuyɨ tuixuri wahepaɨtsita.
MAR 5:17 'Ayumieme teɨteri mekanitsutɨani Ketsutsi waɨriyarika me'ipitɨatɨ wakwiepa mɨka'uyeikanikɨ.
MAR 5:18 Hikɨ kanuwatsie Ketsutsi kayerɨximekaku, 'iya tewi kakaɨyarixi meminɨkai waɨriyarika kanipitɨani hamatɨana muyeikanikɨ.
MAR 5:19 Ketsutsi pɨka'ipitɨa, mɨpaɨ pɨta katinitahɨawe: —'Akie kenemie 'amarema wahetsɨa, yaketiniwaretaxatɨa waɨkawa kemɨtiuyuri Ti'aitame 'ahetsiemieme, kemɨmatiutinenimayataxɨ.
MAR 5:20 Mɨkɨ kaneyani, hikɨ Tamamata Kiekarite mɨrakutewatsie kanitsutɨani tikuxatatɨ waɨkawa kemɨtiuyuri Ketsutsi hetsiena mieme. Yunaitɨ teɨteri mekanihɨxiyakaitɨni.
MAR 5:21 Merikɨtsɨ hutarieka 'anutaɨye 'anuyaku kanuwatsie, yuwaɨkawatɨ teɨteri mekaniyukuxeɨrieni 'auriena harakuna tetsita 'uwekaku.
MAR 5:22 Merikɨtsɨ tuki mɨhɨritɨarie xewitɨ, Kairu titewatɨ, mana kaninuani. Ketsutsi 'uxeiyaka kaniutihɨximakeni hɨxiena.
MAR 5:23 Waɨriyarika kanipitɨani mɨpaɨ 'utaitɨ: —Neniwe pemɨxime 'ukatɨtɨ. Kenemie hetsiena keneutime'i 'aixɨa reu'erietɨ mayanikɨ meta manutanierekɨ.
MAR 5:24 Ketsutsi 'utɨmana kaneyani, hikɨ mekaniweiyakaitɨni teɨteri yumɨiretɨ me'itsaipɨnatɨ.
MAR 5:25 Hikɨ mana kaniuyeikakaitɨni watsata, 'uka mɨtikuyekai tamamata heimana huta wiyari mɨyuriekai xuriyaya kaheunuawekaku.
MAR 5:26 Waɨkawa katiniuka'eniwakaitɨni yumɨireme teyu'uayemawamete wahetsɨa 'axetɨ, tita mɨrexeiyakai naime katiniutixɨtɨani tiyukutuayatɨ, yutatexieka kwinimieme matsi kaniɨyɨni.
MAR 5:27 'U'enaka Ketsutsi hepaɨtsita kemɨtikuxaxatsiwakai, 'ahurawa kaniuyani waritana teɨteri watsata, Ketsutsi 'ɨkarieya kaniumayɨani,
MAR 5:28 mɨpaɨ katiniku'eriwakaitɨni: «'Ixurikieya xɨka ne'umayɨani tsikere, 'aixɨa nereu'erietɨ nepayani».
MAR 5:29 Hikɨ yapauka xuriyaya kaneunuani, yuwaiyaritsie mɨpaɨ katiniyumani mɨkɨ kukuiniyaya kaneunuani.
MAR 5:30 Hikɨ Ketsutsi yu'iyaritsie retimaika yɨtɨrɨkariyakɨ mi'axixɨkɨ xeime, yapauka ta'aurie 'aweka teɨteri watsata mɨpaɨ kaniutayɨni: —¿Kemɨ'ane ne'ixuriki pumayɨa?
MAR 5:31 Teyɨ'ɨkitɨwametemama mɨpaɨ mekatenitahɨawe: —Pewaxeiyatɨ teɨteri naitsata mematsitsaipɨnakaku, “¿kemɨ'ane pɨnetsi'umayɨa?”, peraine.
MAR 5:32 'Iya kananieretɨyani, kemɨ'ane miyuri xeiyake.
MAR 5:33 'Uka 'uyɨyɨakatɨ marikakɨ, timaitɨ kemɨtiuyɨ yuhetsie, hɨxiena kaninuani, mana 'utihɨximakeka naime katiniutahekɨata kemɨtiuyɨ.
MAR 5:34 Hikɨ Ketsutsi mɨpaɨ katinitahɨawe: —Neniwe, yuri pemɨti'eriekɨ 'aixɨa pereu'erietɨ pepatɨa. 'A'iyaritsie peka'uximatɨarietɨ kenemie, 'aixɨa pereu'erietɨ pekatiukakukuinetɨ.
MAR 5:35 Hikɨ mɨpaɨ 'utainekaku 'akuxi, tuki mɨhɨritɨarie hetsɨa miemete mekaniu'axɨani mɨpaɨ mete'itahɨaweke: —'Aniwe 'ari pemɨ. ¿Titayari ti'ɨkitame peti'uximatɨa 'akuxi?
MAR 5:36 Ketsutsi waru'enieka mɨpaɨ mete'ikɨhɨaweme, tuki mɨhɨritɨarie mɨpaɨ katiniutahɨawe: —Pepɨkaheumaka, yuri ketine'erieka xeikɨa.
MAR 5:37 Hikɨ teɨteri pɨkawarupitɨa memenuweiyakɨ, Pekuru, Kakuwu yu'iwamakame Wani mame xeikɨa kaniwarupitɨani.
MAR 5:38 Hikɨ tuki mɨhɨritɨarie kie heta'aka teɨteri meniukixiekame kaniwaruxeiya, me'utitsuaname meta me'utihiwame yumɨireme.
MAR 5:39 Muwa heutahaka mɨpaɨ katiniwarutahɨawe: —¿Titayari xeteyuxamurie meta xete'utitsuana? 'Ɨimari pɨkamɨki, matsi pukutsu.
MAR 5:40 Hikɨ mɨkɨ mekani'atsekaitɨni, hikɨ yunaime waranuyenɨ'aka, 'ɨimari muyekatsie kaniwareutawitɨni paapaya meta maamaya meta mɨkɨ hamatɨana memu'uwakai.
MAR 5:41 Hikɨ mɨkɨ mamayatsie kawiereka, mɨpaɨ katinitahɨawe yuniukikɨ: —Tarita kumi ('arameukɨ panuyɨne: 'Ɨimari 'aku, kenanukukexi nekamatinahɨaweni).
MAR 5:42 Hikɨ 'ɨimari, tamamata heimana huta wiyari mexeiyakai, yapauka kananukukeni meta kuyeikatɨ kanayani. Mɨyamɨtiuyɨkɨ yunaitɨ mekaniutimamani yemekɨ.
MAR 5:43 Ketsutsi heitseriemekɨ yatiniwarutahɨawe xewitɨtɨma mɨkaretimanikɨ kemɨtiuyɨ meta kaniwaruta'aitɨani 'ɨimari memɨteminikɨ.
MAR 6:1 Merikɨtsɨ mana kaneyani, yukiekaritsie kaninuani, teyɨ'ɨkitɨwamete mekaneweiyakaitɨni.
MAR 6:2 Hikɨ 'uxipiya tukari 'aye'aku, tukita kanitsutɨani ti'ɨkitatɨ. Mɨkɨ memi'eniekai meyumɨiretɨ mekanihɨxiyakaitɨni mɨpaɨ me'utiyuatɨ: —¿'Ikɨ meixeiya, hakewa pemieme? ¿'Ikɨ ketiupitɨarie mɨtimaiwenikɨ? ¿Ketiupitɨarie 'inɨari mɨtɨrɨkawi mɨtiyurienekɨ?
MAR 6:3 ¿'Ikɨ kɨyekɨ mɨreutawewiwe katihɨkɨ, Mariya nu'aya, Kakuwu, Kutse, Kura, Tsimuni wa'iwa katihɨkɨ? ¿'Ena tahetsɨa mekatetitei 'iwamama 'ukari? Hikɨ mekanitixani'erieni.
MAR 6:4 Ketsutsi mɨpaɨ katiniwarutahɨawe: —Kakaɨyari niukameya naitsarie 'aixɨa pɨtixeiyarie, peru yukwiepa, yumarema watsata meta yukiita 'aixɨa pɨkatixeiyarie.
MAR 6:5 Mana pɨkayɨwekai xeime mariwemekɨ mɨtiyurienikɨ, hipame tekwikwikate xeikɨa yuxexuime wahetsie 'utimeka 'aixɨa meteheu'eriekame kaniwarayeitɨani.
MAR 6:6 Yuri memɨkate'eriekaikɨ, kani'iyarixiekaitɨni. Hikɨ kiekarite 'etsimɨyeyeutsie katiniku'ɨkitanekaitɨni.
MAR 6:7 Merikɨtsɨ tamamata heimana huta warukuxeɨrieka, hikɨ kaniwareutanɨ'axɨani yuhutatame, heitserie warupitɨaka kakaɨyarixi 'axamemɨ'anene wahepaɨtsita.
MAR 6:8 Meta kaniwaruta'imaiya tixaɨtɨ memɨkatehepinenikɨ huyeta timieme, 'inɨa pɨkatixaɨ, kɨtsiuri pɨkatixaɨ, tumini pɨkatixaɨ 'imanameta yemaneme, matsi xeikɨa 'itsɨ.
MAR 6:9 Yukakaitsie xeikɨa memeu'uixɨanikɨ, peru huta kamixayari memɨka'anakatɨkɨnikɨ katiniwaruta'aitɨani.
MAR 6:10 Mɨpaɨta katiniwarutahɨawe: «Hakewa xeme'axɨani kiita, muwa xekeneyuhayewani 'atsita kepaukake xemɨyehu.
MAR 6:11 Xɨka, xaɨtsie 'aixɨa 'anemekɨ xekahetanaki'eriwa, yatɨni xɨka mekayuwaɨriyani memɨxe'enienikɨ, mana xe'ayekɨneme, tumuanari xekeneukatsixɨa yu'ɨkatetsie, mɨpaɨ xeteyurietɨ xemɨtewatahekɨatɨanikɨ wahetsie kemɨrahɨiwani».
MAR 6:12 Hikɨ teyɨ'ɨkitɨwamete mekaneutayeixɨani, mɨpaɨ metekuxatatɨ, teɨteri memɨtehayewakɨ 'axakememɨteyuriekɨ.
MAR 6:13 Yaxeikɨata yuwaɨkawa kakaɨyarixi 'axamemɨ'anene memɨwanɨkai mekaniwarayenɨ'axɨani, meta tekwikwikate yuwaɨkawa 'aixɨa mekateniwaruka'eritɨani, hatseiti mewarukawiriwatɨ.
MAR 6:14 Hikɨ Herurexi mɨti'aitametɨkai mana kwiepa kaniu'ena. Naitsarie kaniutamariwa Ketsutsi kemɨ'ane mɨhɨkɨtɨkai. Mɨpaɨ mekaniutiyuanekaitɨni: «Wani Ti'ɨyame kaniyɨaneni, 'umɨka panukuke, 'ayumieme tɨrɨkariya kanexeiyani mariwemekɨ mɨtiyurienenikɨ».
MAR 6:15 Hipatɨta mɨpaɨ mekaniutiyuanekatɨni: «'Eriyaxi kanihɨkɨtɨni». Hipatɨta mekaniutiyuanekaitɨni: «Kakaɨyari niukameya kaniyɨaneni meripai miemete».
MAR 6:16 Herurexi matsi 'u'enaka mɨpaɨ kaniutayɨni: «Wani kanihɨkɨtɨni nemita'aitaxɨ mu'uya manutiwitekienikɨ, mɨkɨ kananukuketɨarieni».
MAR 6:17 Mɨkɨ Herurexi meripaitɨ kaniwarutanɨ'akaitɨni Wani memɨwiyakɨ, katsariyanata kanenutahɨani. Mɨpaɨ Heruriya mɨtinakekaikɨ, mɨpaɨ katiniuyɨni Herurexi mitiwitɨkɨ yu'iwa 'ɨyaya, Heruriya mɨtitewakai, Peripe 'ɨyaya.
MAR 6:18 Wani kawiyariewetɨ 'akuxi Herurexi mɨpaɨ katinikɨhɨawekaitɨni: «Pepɨkapitɨarie pemewitɨkɨnikɨ 'a'iwa 'ɨyaya».
MAR 6:19 Heruriya kani'uxiwe'eriekaitɨni, pɨtikuwaunekai Wani kehapaɨ mɨtimienikɨ.
MAR 6:20 Herurexi Wani kanimakarɨkaitɨni, 'imaitɨ tewi heitseriemekɨ yamɨtikamie mɨhɨkɨtɨkaikɨ, mɨpatsiekaikɨ Kakaɨyari hetsiemieme, kani'ɨwiyakaitɨni. 'I'enietɨ 'atsipɨkatimaikai keri mɨtiyurienikeyu, peru kaninakekaitɨni mi'eniekakɨ.
MAR 6:21 Merikɨtsɨ tukari kanaye'ani Heruriya Wani ma'iwakɨ, kepauka Herurexi 'ixɨarari muwewi matinuiwaxɨ tukariyaritsie. Te'aitamete, kuyaxi tewa'aitɨwamete, Karereyatari wa'ukiyarima kaniwaruta'inieni.
MAR 6:22 Heruriya niweya 'uka heutahaka katiniutineini, hikɨ Herurexi kaninakire meta hamatɨana memɨtekwakai yunaitɨ. Ti'aitame mɨpaɨ 'ɨimari katiniutahɨawe: —Tita mɨmatinake kenetineutawawiri, ne nepɨmatsimini.
MAR 6:23 Hikɨ yurikɨ kaniyɨhɨritɨani mɨpaɨ rehɨawetɨ: —Tita pemɨnetitawawirieni nepɨmatsimini, tsepa kwiepa nemɨra'aita hixɨata 'arɨkame pemɨnetiutawawiri.
MAR 6:24 Mɨkɨ 'ɨimari kaneyani mɨpaɨ yumaama katiniuta'iwawiya: —¿Ketita netitawawirieni? Mɨkɨ mɨpaɨ katinita'eiya: —Wani Ti'ɨyame mu'uya keneutawawiri.
MAR 6:25 Mexɨima heutahaka ti'aitame hetsɨa, kanitawawirieni mɨpaɨ 'utaitɨ: —'Ipaɨ kanetininakeni ne, hikɨ kwitɨwa pepɨnetsiyetuirieni Wani Ti'ɨyame mu'uya, xakɨtsie yekaime.
MAR 6:26 Hikɨ ti'aitame waɨkawa kaniyukahiwerieni, peru mɨyɨhɨritɨakaikɨ teɨteri hamatɨana memɨtekwakai wahɨxie, 'ayumieme pɨkayuwaɨriyakai mita'imaiyakɨ.
MAR 6:27 Ti'aitame kuya kaniutanɨ'ani kwitɨwa, Wani mu'uya kaniuta'aita mi'atɨirienikɨ.
MAR 6:28 Mɨkɨ heyaka, mu'uya kananutiwiteni katsariyanata. Xakɨtsie yekaime kani'atɨirieni, 'ɨimari kaniyetuirieni, meta 'ɨimari yumaama kaniyetuirieni.
MAR 6:29 Hikɨ mete'utamarieka, Wani teyɨ'ɨkitɨwametemama mekanekɨne, kaxarieya mekanekweni, teukiyapa mekaneitateni.
MAR 6:30 Merikɨtsɨ nɨ'ariekate Ketsutsi hetsɨa mekaniyukuxeɨrieni, kememɨte'uyuri kememɨte'ɨkitakai mete'itaxatɨanike.
MAR 6:31 'Iya mɨpaɨ katiniwarutahɨawe: —Kɨmɨtsɨ taxaɨta tepuhu makumawetsie, mana temeka'uxipienikɨ. Hipatɨ yuwaɨkawatɨ mekani'axekaitɨni meta mekanekɨkakaitɨni, 'ayumieme tukari mepɨkahɨkai memɨtekwanikɨ.
MAR 6:32 Hikɨ kanuwatsie mekanekɨne makumawetsie paitɨ meyuxaɨtame.
MAR 6:33 Peru yuwaɨkawatɨ mekaniwaruxeiya mekaniwaretimani memayekɨtsie. Naitsarie kiekaritsie kiekatari yuwaɨkawatɨ yɨ'ɨkama mekanekɨne me'unautsaxɨaximetɨ, me'anuyehaitɨtɨatɨ mekaneta'axɨani mɨkɨ meri.
MAR 6:34 Hikɨ kepauka Ketsutsi manatitɨa kanuwatsie, teɨteri kaniwaruxeiya yumɨireme, hikɨ kaniwarutinenimayata, muxatsi yɨhɨweme memɨkahexeiya wahepaɨ memɨ'anenekaikɨ. Mana kanitsutɨani tiwa'ɨkitɨatɨ waɨkawamekɨ.
MAR 6:35 Hikɨ tau 'akayunirɨmekaku, teyɨ'ɨkitɨwametemama hetsɨana mekaniyukuxeɨrieni mɨpaɨ mekatenitahɨawe: —'Ena kanakumaweni, tau kanakayunirɨmeniri.
MAR 6:36 Keniwarutateutɨari teɨteri 'ahurawa memɨtayeixɨanikɨ kiekarite 'etsimɨyeyeutsie meta 'emɨyeyeutsie, 'ikwai memɨteyutinanairienikɨ.
MAR 6:37 Ketsutsi mɨpaɨ katiniwaruta'eiya: —Xeme pɨta xeketeniwarumikwa. Mɨkɨ mɨpaɨ mekatenitahɨawe: —¿Tame tete'inanaiyu paa huta tsienituyari hetsie 'akame, temɨtewaminikɨ?
MAR 6:38 Mɨkɨ mɨpaɨ katiniwarutahɨawe: —¿Kepaɨmeme paa xepexeiya? Xekeneuti'iwau. Yametehetimaika, mɨpaɨ mekatenitahɨawe: —Paa 'auxɨwime meta tsapari yuhutame.
MAR 6:39 Hikɨ kaniwaruta'aitɨani yunaitɨ memukuyaxixɨanikɨ 'ɨxapa makutsiurauyetsie.
MAR 6:40 Merikɨte mekaneukuyaxixɨani xeitsienituyari meta huta tewiyari heimana tamamata meyupapaɨmetɨ.
MAR 6:41 Hikɨ paa 'auxɨwime 'anu'ɨka meta tsapari yuhutame, taheima heutinieretɨ pamɨpariyutsi Kakaɨyari kaniupitɨani. Hikɨ paa 'utitaraka kaniwaru'ɨitɨani teyu'ɨkitɨwamete mɨkɨta teɨteri memɨwaminikɨ. Meta tsapari memɨyuhuta kaniwarutimura yunaime wahetsiemieme.
MAR 6:42 Yunaitɨ mekateniukwani mekaniutihuxani,
MAR 6:43 hikɨ teyu'ɨkitɨwamete mekanikuxeɨrieni paa muyuhayewaxɨ tamamata heimana huta tsikɨiwitiyari hɨpɨneme, meta tsapari memuyuhayewaxɨ.
MAR 6:44 Mɨkɨ memɨte'ukwai 'ukitsi 'auxɨwime miriyari mekaniyupaɨmekaitɨni.
MAR 6:45 Hikɨ teyɨ'ɨkitɨwamete kaniwarutamexɨitɨani kanuwatsie memɨkayaxekɨ mɨkɨ meri memɨyehukɨ 'anutaɨye Wetsaira paitɨ, mexi mɨkɨ teɨteri wateutɨanekai.
MAR 6:46 Warutateutɨaka, hɨritsie kanitiyune heyutanenewienike.
MAR 6:47 Hikɨ 'ukuyɨreku, kanuwa harakuna hixɨapa kaniuyewiekaitɨni, peru Ketsutsi kwiepa 'akuxi kaniuyeikakaitɨni yuxaɨta.
MAR 6:48 Ximeri 'etsiwatɨkaku kahekɨarirɨmekaku, me'uximatɨariekame kaniwaruxeiya waɨriyarika kanuwa me'uwekirɨmeme, wahepa maye'ekakaikɨ. Ketsutsi wahepa kaniuyani harakuna heima 'umietɨ, wa'aurie kaniuyeyanikekaitɨni.
MAR 6:49 Mɨkɨ me'ixeiyaka haa heima 'amiekame, mɨki me'erietɨ mekaniutihiwa,
MAR 6:50 waɨkawa memamatɨ mɨyamemɨtenenierekaikɨ. Peru mɨkɨ kaniwarutahɨawe, mɨpaɨ kaniutayɨni: «Kayuwatɨ xeketeneuyaxi. Ne nepɨyɨane. Xepɨkamamaka».
MAR 6:51 Hikɨ wahamatɨa kanuwatsie kayerɨku, 'eka kaneunuani. Mɨkɨ yemekɨ kwinimieme mekatenihɨxiyakaitɨni,
MAR 6:52 paa hepaɨtsita kemɨtiuyɨ 'atsimepɨkatehetimaiwawekai, matsi yu'iyaritsie mepɨweraranikai.
MAR 6:53 Hikɨ 'anutaɨye me'anukɨneka Kenetsareti kwieyaritsie mekaniye'axɨani. Mana mekanekuwieni kanuwa.
MAR 6:54 Kanuwatsie me'anatikɨneku, yapauka kiekatari Ketsutsi mekanetimani.
MAR 6:55 Naitsarie mɨkɨ kwieyaritsie mekaneutayeixɨani, hikɨ mekanitsutɨani tekwikwikate mewa'atɨwatɨ 'itaritsie me'aheitɨkaime me'imarietɨ hakewa meyeikakai.
MAR 6:56 Naitsarie kemɨtikuyeikakai, kiekarite 'etsimɨyeyeutsie, 'emɨyeyeutsie, yeuta, tekwikwikate kiekari hixɨapa mekanikutuariwakaitɨni, waɨriyarika me'ipitɨatɨ tsikere 'ixurikieya tetsimeyaritsie memimayɨanikɨ, yunaitɨ kemɨ'ane memimayɨa 'aixɨa meteheu'erietɨ mepakɨkakai.
MAR 7:1 Merikɨtsɨ 'auriena mekaniyukuxeɨrieni paritseutsixi meta hipatɨta 'inɨarikɨ memɨte'ɨkitametetɨkai Kerutsareme memeyekɨnekai,
MAR 7:2 mekaniwaruxeiya teyɨ'ɨkitɨwametemama hipatɨ metekwakame wamamá ka'itiyakaku mekamaimatɨkaitɨ huriyutsixi wayeiyari kemɨ'ane. Mekaniniukixiekaitɨni mɨkɨ.
MAR 7:3 (Paritseutsixi meta hipatɨ huriyutsixi teɨteriyari yunaitɨ, xɨka kwinimieme meka'utimaimani, tixaɨtɨ mepɨkatekwaka, yututsima wayeiyaritsie yametekahutɨ.
MAR 7:4 Tetuayamete wakiita retinaneme, pɨkatikwaka katihauxinietɨkaime. Waɨkawata mɨiretɨ yeiyari kanixuaweni yamemɨtekahunikɨ, tekɨxite, xarite, katsute kememɨte'itie).
MAR 7:5 Hikɨ paritseutsixi meta 'inɨarikɨ te'ɨkitamete mɨpaɨ mekatenita'iwawiya: —¿Titayari yututsima wayeiyaritsie yamekatekahu 'ahetsɨa miemete teyɨ'ɨkitɨwamete, wamamate ka'itiyatɨkaikaku metekwa'a?
MAR 7:6 Mɨkɨ mɨpaɨ katiniwaruta'eiya: —Kitsariyaxi 'aixɨa putayɨ tihekɨatatɨ xeme xehepaɨtsita, xemɨte'itawa, mɨpaɨ katine'uka: »“'Ikɨ teɨteri yutenikɨ xeikɨa 'aixɨa meputiyuane nehepaɨtsita, peru wa'iyari 'ateewa puyeika.
MAR 7:7 Yakɨ xeikɨa mekanenayexeiyani, tita memɨte'ɨkita, teɨteri wa'aitsika pɨhɨkɨ xeikɨa”.
MAR 7:8 Tita mɨti'aitakai Kakaɨyari xete'uhayewaka, teɨteri wayeiyaritsie xeteniwiyani, tekɨxite harewemete kexemɨtehauxina, tawarita hepaɨna mɨireme kexemɨteyurie».
MAR 7:9 Mɨpaɨta katiniwarutahɨawe: —Xeme xeikɨa yuyeiyaritsie yaxetekahutɨ xekanakɨne, xe'ihayewaka tita Kakaɨyari mɨti'aita.
MAR 7:10 Muitsexi mɨpaɨ kanainekaitɨni: “Yaketinekamieni kememaitɨka 'apaapa meta 'amaama”. Tawarita mɨpaɨ kanaineni: “Kemɨ'ane 'axamutaineni yupaapa meta yumaama wahepaɨtsita, ke'umierieni”.
MAR 7:11 Xemetsɨ pɨta mɨpaɨ xekateni'ɨkitani: “Tewi pɨyɨwe mɨpaɨ mɨtikɨhɨaweni yupaapa yatɨni yumaama, nepiini naime kɨmana nemɨmatsiparewienikeyu, mɨkɨ kuruwani kanihɨkɨtɨni” (nepimini Kakaɨyari manuyɨne).
MAR 7:12 'Ana mɨkɨ waɨriyarika pɨkapitɨarie 'atsimɨtiyurienikɨ yupaapa yatɨni yumaama hetsiemieme.
MAR 7:13 Xekaneyeitɨani Kakaɨyari niukieya, yaxetekahutɨ yuyeiyaritsie, xemɨyukuxaxatɨwa. Waɨkawamekɨ xepɨteyurie 'ikɨ hepaɨ.
MAR 7:14 Tawarita yu'aurie waruta'inieka teɨteri, mɨpaɨ katiniwarutahɨawe: —Xekeneneu'eni yunaitɨ, meta xeketenemaiwaweni:
MAR 7:15 Tewi 'aurie tixaɨtɨ pɨkatixuawe hetsiena heutahame mɨyɨwe ka'itiyakame meyeitɨani. Tita taɨtana mɨratineika, mɨkɨ pɨta kanihɨkɨtɨni tewi ka'itiyakame mayeitɨwa.
MAR 7:16 Xewitɨnetɨ mu'enaxɨ ke'u'ena.
MAR 7:17 Hikɨ teɨteri waruku'eirieku, kiita heutahaku, teyɨ'ɨkitɨwametemama mekanita'iwawiya 'ɨxatsi hepaɨtsita kemɨti'ɨkitakai.
MAR 7:18 Mɨkɨ mɨpaɨ katiniwarutahɨawe: —¿Kari xemeta 'atsixepɨkatemaiwawe wahepaɨ? ¿Xeme mɨpaɨ xekatehetimaiwe, naitɨ tewi 'aurie mɨtixuawe hetsiena heutahame pɨkayɨwe ka'itiyakame meyeitɨani?
MAR 7:19 'Iyarieyatsie mɨkaheutahakekɨ, yuriepana pɨta kaneukahakeni, 'ariketa kanihɨamɨkɨ. Mɨpaɨ 'utaitɨ, naime 'ikwai 'itiyakame kanixatakaitɨni.
MAR 7:20 Tawarita mɨpaɨ kaniutayɨni: —Tita tewi taɨta mɨratineika, mɨkɨ pɨta kanihɨkɨtɨni tita ka'itiyakame meyeitɨa.
MAR 7:21 Karikɨ teɨteri wa'iyaritsie katinimiemetɨni, 'axa'iyaritɨarika, kememɨteyukumaɨwa teɨteri kemɨkatiheitserie,
MAR 7:22 'inawari, xeime kemɨtiumieni, xeime kemɨtiukumayɨani kayɨ'ɨya kayɨkɨna, katiyupini mɨtihiwe'erie, 'axakememɨteyurie, 'irɨmari, kememɨteyukahiwe'erie merukuyatɨwetɨ, kememɨteyukwatsirie, 'axaniuki hipame wahepaɨtsita, kememɨteyukatawe'erie meta yakɨ xeikɨa kememɨteyɨkɨhɨawe.
MAR 7:23 Mɨkɨ naitɨ 'axamɨti'ane, wataɨta katinimiemetɨni, meta tewi ka'itiyakame kanayeitɨwani.
MAR 7:24 Hikɨ mana yeyaka, Tiru kwieyaritsie kaneyani. Mana kiita kaneutahani, xewitɨ tɨma pɨka'imariekakekai pɨra'eriwakai Ketsutsi, peru pɨkayɨwekai mana mɨyuhayewakɨ kamariwatɨ.
MAR 7:25 Merikɨtsɨ, 'ukaratsi kaniu'ena hepaɨtsitana, kakaɨyari mɨka'itiya kaninɨkaitɨni mɨkɨ nu'aya 'ukatɨme, hikɨ 'ukaratsi kwitɨwa hetsɨana nuaka, hɨxiena kaniutihɨximakeni.
MAR 7:26 Mɨkɨ 'ukaratsi kanikɨriyekutɨkaitɨni, Tsirupenitsiyatsie kaninuiwametɨkaitɨni, waɨriyarika kanipitɨakaitɨni meyenɨ'anikɨ kakaɨyari 'axamɨ'ane mixɨnakɨ niweya.
MAR 7:27 Ketsutsi mɨpaɨ katinitahɨawe: —Kaneuyeweka tɨɨri meri memɨtihuxanikɨ, 'aixɨa pɨka'ane xɨka yuniwema paa warunawairieni, tsɨikɨri pɨta xɨka warumini.
MAR 7:28 'Ukaratsi mɨpaɨ katinita'eiya: —Yuri peputaine Ti'aitame, peru 'atsita tsɨikɨri mepitikwa'a tɨɨri memɨtekuhayeikawa mexatɨa mɨkawiwiwe temɨxikiyari.
MAR 7:29 Ketsutsi mɨpaɨ katinitahɨawe: —'Aixɨa pemutayɨkɨ, kenemieri 'aixɨa 'iyari, kamɨ kakaɨyari 'axamɨ'ane 'ari kanixɨna 'aniwe.
MAR 7:30 Hikɨ yukie heta'aka kanitaxeiya yuniwe 'utatsie kakaime, kakaɨyari 'axamɨ'ane 'ixɨnaku.
MAR 7:31 Hikɨ Tiru kwieyaritsie heyeyaka Tsiruni kwieyaritsie kaneuyeyune. Tamamata Kiekarite mɨrakutewatsie 'uyeyaka, Karereya harakunayaritsie kaneta'ani.
MAR 7:32 Mana mekani'atɨirieni tewi mɨkaheu'enakai mɨnenuriekai, waɨriyarika mekanipitɨani hetsiena mutimenikɨ.
MAR 7:33 Yatewa heiwitɨka yɨxaɨtame teɨteri memɨka'anu'uwatsie, nakatana yu'itɨwame kaneuka'uitɨani, meta 'uta'aɨtsikawieka nenieya kaniumayɨani.
MAR 7:34 Yuheima heutiniereka Ketsutsi kaniuka'ietɨyani, yuniukikɨ mɨpaɨ tewi katiniutahɨawe: «'Epata» (taniukikɨ kewatiyepietɨkani panuyɨne).
MAR 7:35 Yapauka yunakata kaniwatiyepierixɨani meta nenieya kaniuxɨnarieni, heitseriemekɨ 'utaniutɨ kanayani.
MAR 7:36 Hikɨ kaniwaruhɨritɨani xeime memɨkatehekuxaxatɨwanikɨ, peru kemɨtiwaruhɨritɨa, mɨme matsi yemekɨ mekatenikuxatakaitɨni naitsarie.
MAR 7:37 Waɨkawamekɨ mekanihɨxiyakaitɨni teɨteri yame'utiyuatɨ: «Naime 'aixɨa katiniuyurieni, mɨkɨ memɨkaheu'enanakai meheu'enanakame kaniwarayeitɨwani, mɨkɨ memɨkaniuwawekai meniuwaweme kaniwarayeitɨwani».
MAR 8:1 Merikɨtsɨ 'anapaitɨtɨ tawarita yumɨiretɨ teɨteri meyukuxeɨrieku, 'ikwai mekahexeiyakaku, Ketsutsi yu'aurie teyɨ'ɨkitɨwamete warutakwewieka, mɨpaɨ katiniwarutahɨawe:
MAR 8:2 —Ne 'ikɨ teɨteri nepɨwareunenimaya, haika tukariri mekaniyurieka nehetsɨa meta 'ikwai mepɨkahexeiya.
MAR 8:3 Meyehakakwitɨweme xɨka newareutanɨ'axɨani wakie, huyeta mepe'amɨxɨani, hipatɨ 'ateewa paitɨ mekanikiekataritɨni.
MAR 8:4 Hikɨ teyɨ'ɨkitɨwamete mɨpaɨ mekatenita'eiya: —¿Hakewa tepeikaxeiya paa mɨyapaɨmeme 'ena makumawetsie temɨtewaminikɨ?
MAR 8:5 Ketsutsi mɨpaɨ katiniwaruta'iwawiya: —¿Kepaɨmeme paa xepexeiya? Mɨkɨ mɨpaɨ mekaniutiyuani: —'Atahutame.
MAR 8:6 Hikɨ katiniuta'aita teɨteri memukuyaxixɨanikɨ kwiepa. Paa 'atahutame 'anu'ɨka, pamɨpariyutsi Kakaɨyari kaniupitɨani, hikɨ kanititara paa meta teyɨ'ɨkitɨwamete kaniwayetuirieni memɨwata'ɨitɨanikɨ teɨteri, hikɨ mɨkɨ mɨpaɨ mekatenikakɨne.
MAR 8:7 Yapaɨmemeta ketsɨte mekaniwarexeiyakaitɨni 'etsimemɨpepe. Pamɨpariyutsi 'ipitɨaka Kakaɨyari, meta katiniuta'aita ketsɨte memɨmikienikɨta.
MAR 8:8 Teɨteri mekateniukwani yemekɨ mekaniutihuxani. 'Arike teyɨ'ɨkitɨwamete mekanikuxeɨrieni tarimeyari muyuhayewaxɨ, 'atahuta tsikɨiwitiyari hɨpɨnetɨ patɨa.
MAR 8:9 Memɨte'ukwai 'etsiwatɨkaku nauka miriyari mekaniyupaɨmekaitɨni. Hikɨ warutateutɨaka,
MAR 8:10 teyɨ'ɨkitɨwamete wahamatɨa yunaitɨ kanuwatsie mekanikayaxe, Rarumanuta mɨrakutewatsie mekanekɨne.
MAR 8:11 Hikɨ paritseutsixi mekaniu'axɨani, mekanitsutɨani niuki mexɨatɨatɨ hamatɨana, me'iwawirietɨ 'inɨari memɨxeiyakɨ muyuawitsie mieme, me'i'inɨatakutɨ.
MAR 8:12 Mɨkɨ 'uka'ietɨyaka mɨpaɨ kaniutayɨni: «¿Titayari 'inɨari mamariwaweme meteku'iwawa hikɨ miemete? Yurikɨ mɨpaɨ nepɨtixekɨhɨawe, yemekɨ 'inɨari mepɨkapitɨarieni hikɨ miemete».
MAR 8:13 Waruku'eirieka hutarieka kanakayerɨni kanuwatsie, 'anutaɨye paitɨ kaneyani.
MAR 8:14 Merikɨtsɨ teyɨ'ɨkitɨwamete 'ikwai memanu'ɨnikekai mepɨtehatɨmai, xeime xeikɨa mepexeiyakai paa kanuwatsie.
MAR 8:15 Hikɨ Ketsutsi mɨpaɨ katiniwaraye'eritɨani: —Yumarima 'aixɨa xekeneyukweriwayurieka tiyukuxanariyame hepaɨtsita paritseutsixi wahetsɨa mieme meta Herurexi hetsɨa mieme hepaɨtsita.
MAR 8:16 Mɨkɨ mɨpaɨ mekateniyutahɨawekaitɨni: «Paa temɨkaheye'ɨikɨ mɨya kanaineni».
MAR 8:17 Ketsutsi retimaika kememɨteyɨtahɨawekai, mɨpaɨ katiniwarutahɨawe: —¿Titayari niuki xetexɨatɨa paa tepɨkahexeiya xeteyɨkɨhɨawetɨ? ¿Xekate'enana, xekatemaiwawe 'akuxi? ¿Xe'iyari 'akuxi titsetse'i?
MAR 8:18 ¿Xehahɨxitɨkaitɨtɨ xekateheuneniere, xe'unakatɨtɨ xekateheu'enana? ¿tixaɨtɨ xekateha'eriwa?
MAR 8:19 'Auxɨwime payari ne'utitaraku 'auxɨwime miriyari wahetsiemieme, ¿kepaɨmeme kiriwayari hɨpɨneme xepukuxeɨri muyuhayewaxɨ? Mɨkɨ mɨpaɨ mekaniutiyuani: —Tamamata heimana hutame.
MAR 8:20 Tawarita mɨpaɨ katiniwarutahɨawe: —Meta kepauka 'atahuta payari nemutitaraxɨ nauka miriyari wahetsiemieme ne'utitaraku, ¿kepaɨmeme kiriwayari xepukuxeɨri muyuhayewaxɨ? Mɨkɨ mɨpaɨ mekaniutiyuani: —'Atahutame.
MAR 8:21 Hikɨ mɨpaɨ katiniwarutahɨawe: —¿'Akuxi xekatehetimaiwawe?
MAR 8:22 Hikɨ mekaneta'axɨani Wetsaira paitɨ. Hikɨ mana teɨteri mekani'atɨirieni tewi kaheuniereme, waɨriyarika me'ipitɨatɨ mimayɨanikɨ.
MAR 8:23 Hikɨ mɨkaheunierekai mamayatsie tiwiereka, kiekari tetsita paitɨ kaneihana. He'aɨtsikamaxɨaka hɨxitana, hetsiena 'utimeka, mɨpaɨ katinita'iwawiya: —¿Hikɨri petiniere?
MAR 8:24 Hikɨ 'anieretɨyaka mɨpaɨ kaniutayɨni: —Teɨteri nepɨwaxeiya, meta 'iteɨri muku'uwani hepaɨ nepɨtiniere.
MAR 8:25 Hikɨ hutarieka hɨxitana neumeixɨani, tewi kananutaniere: 'aixɨa reunieretɨ kanayani, naime katiniuxeiya yemekɨ.
MAR 8:26 Hikɨ Ketsutsi kanitanɨ'ani kiena mɨpaɨ titahɨaweka: —Kiekaritsie pepɨkaheumieni, xeime pepɨkaraxaxatɨwani.
MAR 8:27 Hikɨ Ketsutsi teyɨ'ɨkitɨwamete wahamatɨa yunaitɨ mekanekɨne, kiekarite 'etsimɨyeyeutsie mekaniu'uwakaitɨni Tsetsareya Piripu 'aurie. Hikɨ huyeta me'uhutɨ, mɨpaɨ katiniwaruta'iwawiya teyɨ'ɨkitɨwamete: —¿Teɨteri keme'utiyuane kemɨ'ane nepɨhɨkɨ ne?
MAR 8:28 Mɨkɨ mɨpaɨ mekatenita'eiya: —Hipatɨ mɨpaɨ mekaniutiyuaneni, Wani Ti'ɨyame kename pehɨkɨ, hipatɨta 'Eriyaxi kename pehɨkɨ, hipatɨta xewitɨ Kakaɨyari niukameya kename pehɨkɨ.
MAR 8:29 Hikɨ mɨpaɨta mɨkɨ katiniwaruta'iwawiya: —¿Xemete kexe'utiyuane, kemɨ'ane nepɨhɨkɨ ne? Pekuru mɨpaɨ katinita'eiya: —'Ekɨ Kɨritsitu pekanihɨkɨtɨni.
MAR 8:30 Hikɨ kaniwaruhɨritɨani hepaɨtsitana nixeime memɨkatehaxaxatɨwanikɨ.
MAR 8:31 Hikɨ kanitsutɨani tiwa'ɨkitɨatɨ, mɨpaɨ 'utaitɨ: —Kaneuyeweka 'akuxi ne Yuri Tewi kenemɨtitewa waɨkawa nemɨtikwinekɨ, ta'ukiyarima, mawari wewiwamete tewa'aitɨwamete, meta 'inɨarikɨ memɨte'ɨkitamete mekanenitixani'eriekuni. Kaneuyeweka nemɨmierienikɨ, meta hairieka tukaritsie nemanukukenikɨ.
MAR 8:32 Mɨpaɨ katiniwakɨhɨawekaitɨni hahekɨakamekɨ katiwaranukanamirietɨ. Hikɨ Pekuru yatewa heiwitɨka kanitsutɨani 'iku'imaiyatɨ.
MAR 8:33 Ketsutsi ta'aurie 'aweka, hipame waruxeiyaka teyɨ'ɨkitɨwamete, Pekuru kaniuta'imaiya mɨpaɨ 'utaitɨ: —Xaɨtsie keneuye'a Kauyumarie. 'Ekɨ Kakaɨyari hepaɨ pepɨkare'iyari, teɨteri wahepaɨ xeikɨa pepɨre'iyari.
MAR 8:34 Hikɨ yu'aurie warutakwewieka teɨteri meta teyɨ'ɨkitɨwamete, mɨpaɨ katiniwarutahɨawe: —Tewi xɨka yuwaɨriyani nehamatɨa muyeikanikɨ, ketihayewani kemɨtinake yuhetsiemieme tiyurienetɨ, keyuwaɨriyani tsepa kuruxitsie mɨmierie, meta nehetsie ketiwiyani.
MAR 8:35 Kemɨ'ane yutukari mɨwikweitsitɨamɨkɨ kanitatɨmaiyamɨkɨ, peru kemɨ'ane yutukari mɨtatɨmaiya nehetsiemieme, niuki 'aixɨa manuyɨne hetsiemieme, mɨkɨ kanitawikweitsitɨamɨkɨ.
MAR 8:36 Tixaɨtɨ pɨkarayeika xɨka tewi kwiepa timieme naime ra'iwa, yaxeikɨa yutukari kanitatɨmaiyamɨkɨ.
MAR 8:37 Nixewitɨ pɨkayɨwe mɨtiyutuani yutukari hetsiemieme.
MAR 8:38 Hikɨ miemete hipame wa'ɨitama memɨwakumaɨwa 'axamemɨteyuruwa watsata 'uyeikatɨ, kemɨ'ane mɨnetsitewiya mitewiya neniuki, neta Yuri Tewi kenemɨtitewa nekanitewiyakamɨkɨ 'iya kepauka nemunuani ne'ukiyari hepaɨ nemariwetɨ, netupiritsixima memɨpatsie Kakaɨyaritsie mieme wahamatɨa.
MAR 9:1 Hikɨ mɨpaɨta katiniwarutahɨawe: —Yurikɨ mɨpaɨ nepɨxerahɨawe, hipatɨ 'ena memu'uwa mepɨkakwini mexi mekanenieriwawe kemɨtiyɨni kepauka Kakaɨyari munuani tɨrɨkaɨyemekɨ ti'aitatɨ.
MAR 9:2 Hikɨ 'ataxewime tukari 'anukayaku Ketsutsi kaniwarewitɨni Pekuru, Kakuwu meta Wani, yemuri 'amanutitewitsie yuhɨkɨame. Hikɨ mana wahɨxie yɨkɨ 'anetɨ kanayani.
MAR 9:3 Kemarieya xawatɨtɨ kanayani kwi tuxatɨ 'ɨwi hepaɨ, kwiepa muxuawe tituriyame mɨpaɨ 'aneme meyeitɨani pɨkayɨwe.
MAR 9:4 Mana 'Eriyaxi meta Muitsexi mekaniuyuhekɨata, mɨkɨ Ketsutsi hamatɨa mekatenikuxatakaitɨni.
MAR 9:5 Hikɨ Pekuru mɨpaɨ Ketsutsi katiniutahɨawe: —Ti'ɨkitame 'aku, 'aixɨa kani'aneni 'ena temu'uwakɨ. Kamɨtsɨ xamaru tepɨtiwewieni haikame, 'ahetsiemieme xeime, Muitsexi hetsiemieme xeime meta 'Eriyaxi hetsiemieme xeime.
MAR 9:6 'Atsipɨkatiyumaiwekai kemɨtayɨni, yunaitɨ waɨkawa memumamakaikɨ.
MAR 9:7 Hikɨ yapauka haiwitɨri kaniwaranukanani, hikɨ mɨkɨ haiwitɨritsata xewitɨ kanetaniuni mɨpaɨ 'utaitɨ: «'Ikɨ kanineniwetɨni neminaki'erie. Xekene'enieka».
MAR 9:8 Yapauka, mehanieretɨkɨneka naitsarie, xeime mepɨka'uxei wa'aurie 'uweme, Ketsutsi xeikɨa mekaniuxeiya.
MAR 9:9 Hikɨ yemuritsie me'akahutɨ, Ketsutsi kaniwaruhɨritɨani nixeime memɨkatehaxaxatɨwanikɨ kememɨte'unenierixɨ, kepaukake Yuri Tewi mɨkite watsata manukukeni.
MAR 9:10 Kemainekai yamepɨtekakɨ mepɨkate'utaxa, peru mɨkɨ niuki mekanixɨatɨakaitɨni tita mɨtixatakai «mɨkite watsata manukukeni».
MAR 9:11 Hikɨ mɨpaɨ mekatenita'iwawiya: —¿Mɨkɨ 'inɨarikɨ memɨte'ɨkitamete titayari mɨpaɨ mete'utiyuane kename heuyewetse 'Eriyaxi meri munuani?
MAR 9:12 Mɨkɨ mɨpaɨ katiniwaruta'eiya: —Kaniyuritɨni. 'Eriyaxi meri kaninuamɨkɨ, 'aixɨa mitiyurieni tinaime. ¿Matsi kere'uxa Yuri Tewi hepaɨtsita, kemɨreuyewetse waɨkawa mɨtikwinekɨ mɨxani'eriwanikɨ?
MAR 9:13 Peru ne mɨpaɨ nepɨxekɨhɨawe, 'Eriyaxi 'ari kaninuani, meta kemɨtiwanakekai yamepiyuri, mɨpaɨ kemɨre'uxa hepaɨtsitana.
MAR 9:14 Merikɨtsɨ kepauka memu'axɨa hipatɨ teyɨ'ɨkitɨwamete mematitekaitsie, yumɨireme teɨteri mekaniwaruxeiya wa'aurie meta 'inɨarikɨ memɨte'ɨkitametetɨkai niuki mexɨatɨakame wahamatɨa.
MAR 9:15 Hikɨ yapauka teɨteri me'ixeiyaka mekaniuhɨxiyani meta hepana mekaniutinautsa mekanitawaɨritɨani.
MAR 9:16 Mɨkɨ mɨpaɨ katiniwaruta'iwawiya mɨkɨ 'inɨarikɨ memɨte'ɨkitametetɨkai: —¿Titakɨ niuki xetexɨatɨakai wahamatɨa?
MAR 9:17 Xewitɨ tewi mɨpaɨ katinita'eiya: —Neuxei ti'ɨkitame, neniwe 'uki nepɨmatsi'atɨiri, kakaɨyari 'axamɨ'ane pinɨ'ɨ pɨka'ipitɨa mɨtaniunikɨ.
MAR 9:18 Kepauka mikuwiwiya, petihɨpa. Kwaimuxari putahewa, yutametekɨ pɨtiutakewe meta naranitɨ payeika. Ne nekaniwarutawawirieni teyɨ'ɨkitɨwamete 'ahetsɨa miemete 'aixɨa reu'eriekame memayeitɨanikɨ, peru mepɨka'uyɨwekaxɨa.
MAR 9:19 Hikɨ Ketsutsi mɨpaɨ kaniutayɨni: —Xeme hikɨ xemɨmiemete yuri xepɨkate'erie. ¿Kepaɨmexɨa peuyewetse 'akuxi xehamatɨa nemuyeikani? ¿Kepaɨmexɨa 'akuxi nepɨtixenewirieka? Xekenawitɨki mɨkɨ temaikɨ.
MAR 9:20 Hikɨ mekani'atɨirieni. Mɨkɨ kakaɨyari 'axamɨ'ane Ketsutsi 'uxeiyaka, yapauka temaikɨ kaniutanɨni kwiepa kanikahɨani meta kanikurupenekaitɨni 'atakwaimuxatɨ.
MAR 9:21 Ketsutsi mɨpaɨ katinita'iwawiya paapaya: —¿Kepaɨmexɨari mɨyapɨ'ane? Mɨkɨ mɨpaɨ kaniutayɨni: —Nunutsiyari paitɨ.
MAR 9:22 Heiwa taipa kaneihɨpani meta hapa 'imienike. 'Ekɨ xɨka peyɨweni tixaɨtɨ pemɨtiyurieni, ketaneutinenimayata meta ketaneuparewi.
MAR 9:23 Ketsutsi mɨpaɨ katinitahɨawe: —¿Ketitayari peraine, xɨka neyɨweni? Kemɨ'ane yuri mɨti'erie, hetsiena mieme naitɨ pɨtiyɨwe.
MAR 9:24 Hikɨ temaikɨ paapaya mɨpaɨ katiniuhiwa: —Huu yuri nepɨti'erie. Keneneuparewi xɨka 'etsiwa xeikɨa yuri neti'erieka.
MAR 9:25 Ketsutsi meyumɨireme teɨteri waruxeiyaka 'ame'anautsaxɨaximeme hepana meyukuxeɨrienike, 'iyari 'axamɨ'ane kaniutatieni, mɨpaɨ tikɨhɨawetɨ: —Keneu'ena 'iyari 'axamɨ'ane, pemɨka'ipitɨa mɨtaniunikɨ meta meu'enanikɨ, ne nekameninɨ'aka pemixɨnakɨ meta tawarita pemɨka'ikuwiwiyanikɨ.
MAR 9:26 'Iyari 'axamɨ'ane, kaniutahiwa meta karima hau'erietɨ kanetihɨani kanitayɨyɨakatsitɨani. Mɨki hepaɨ 'anetɨ kanayani temaikɨ, 'ayumieme 'etsiwatɨkaku yunaitɨ mɨpaɨ mekaniutiyuani: «Kaniumɨniri».
MAR 9:27 Peru Ketsutsi temaikɨ mamaya 'uwiyaka kanenukuhana, hikɨ temaikɨ 'akaniutakeni.
MAR 9:28 Hikɨ kiita heutahaku, teyɨ'ɨkitɨwametemama yɨhɨkɨate mɨpaɨ mekatenita'iwawiya: —¿Titayari tame teteyutatexi te'eyenɨ'anike?
MAR 9:29 Mɨkɨ mɨpaɨ katiniwarutahɨawe: —Yunenewietɨ xeikɨa kaniyɨweni meyenɨ'anikɨ 'ipaɨ 'aneme.
MAR 9:30 Hikɨ mana mekanekɨne, Karereya kwieyaritsie mekaniuyekɨne. Pɨka'inakekai xewitɨ mɨtitamarienikɨ,
MAR 9:31 teyɨ'ɨkitɨwamete katiniwa'ɨkitɨakaitɨni. Mɨpaɨ katiniwakɨhɨawekaitɨni: «Yuri Tewi kenemɨtihɨkɨ, nekaniyetuiyamɨkɨ teɨteri wahetsɨa. Mɨkɨ mekanenimiekuni, nemierieme hairieka tukari 'anukayayu nekananukukemɨkɨ».
MAR 9:32 Peru mɨkɨ 'ikɨ niuki mepɨkahetimaiwawekai, meta mekanimamakaitɨni me'ita'iwawiyake.
MAR 9:33 Merikɨtsɨ Kaperunaume mekaneta'axɨani. Kiita meheutahaxɨaku mɨpaɨ katiniwaruta'iwawiya: —¿Titakɨ niuki xetehexɨatɨakai huyeta?
MAR 9:34 Mɨkɨ kayuwatɨ xeikɨa mekaniumakaitɨni, niuki memɨxɨatɨakaikɨ huyeta kemɨ'ane mɨkɨ matsi waɨkawa meuyewekai.
MAR 9:35 Hikɨ 'a'ayerɨka, tamamata heimana yuhutame waruta'inieka yu'aurie, mɨpaɨ katiniwarutahɨawe: —Xewitɨ xɨka mexɨakame 'ayeimɨkɨni, kaneuyeweka yunaime waparewiwame mayuyeitɨanikɨ 'imatɨreme mayuyeitɨanikɨ.
MAR 9:36 Hikɨ nunutsi 'ahanaka wahixɨapa kanitakeni. Meta 'itituka mɨpaɨ katiniwarutahɨawe:
MAR 9:37 —Kemɨ'ane mitanaki'erieni xeime 'ikɨ tɨɨri nehetsɨa miemekɨ, kemɨ'ane mɨnetsitanaki'erieni, nexeikɨa pɨkanetsitanaki'erieni, matsi kemɨ'ane mɨnetsiheyenɨ'a kanitanaki'eriemɨkɨta.
MAR 9:38 Wani mɨpaɨ katinitahɨawe: —Ti'ɨkitame, xeime tahetsie mɨkatiwiya tekanexeiya warayenɨ'awame kakaɨyarixi 'axamemɨ'anene, 'ahetsɨa waniu miemetɨtɨ. Mɨkɨ tahetsie mɨkatiwiyakɨ, 'ayumieme tepɨkaheipitɨa.
MAR 9:39 Ketsutsi mɨpaɨ kaniutayɨni: —Xepɨkaheiku'imaiyani. Tewi xɨka tɨrɨkaɨyemekɨ 'inɨari tiyurieneni, mɨpaɨ 'utaitɨ kename nehetsɨa mieme, pɨkayɨwe nehepaɨtsita 'axamainenikɨ.
MAR 9:40 Kemɨ'ane mɨkatatsi'aye'unie, tahetsie katiniwiyani.
MAR 9:41 Kemɨ'ane xeitekɨxiyari mɨxeharitɨani Kɨritsitu hetsɨa miemete xemɨhɨkɨkɨ, mɨkɨ yu'iwarika pɨkareuyehɨani pɨtipitɨarieni.
MAR 9:42 »Peru, kemɨ'ane yu'iwa 'axamɨyurieni 'ikɨ tɨɨri yuri memɨte'erie nehetsie, 'aixɨa kaniyɨmɨkɨ matsi matá mahete xɨka 'akatɨtɨarienike kɨipieyatsie meta xɨka haramaratsie heukahɨiyanike.
MAR 9:43 Xɨka 'amamakɨ 'axapetiyurieneni, kenawiteki. 'Aixɨa kaniyɨmɨkɨ matsi xɨka peheutahani tukari maxuawetsie pemamapurutɨ, keyuri hutame mamayari pehexeiyatɨ yuheyemekɨ mɨta'atsie xɨka peheukahɨiyani.
MAR 9:44 Mana kwitsi mɨwakɨme pɨkamɨni tai pɨkatɨweni.
MAR 9:45 Xɨka 'a'ɨkakɨ 'axapetiyurieneni, kenawiteki. Matsi 'aixɨa pɨyɨni xɨka pe'ɨkapurutɨ peheutahani tukari maxuawetsie, keyuri hutame 'ɨkate pehexeiyatɨ tai yuheyemekɨ mɨta'atsie xɨka peheukahɨiyani.
MAR 9:46 Mana kwitsi mɨwakɨme pɨkamɨni tai pɨkatɨweni.
MAR 9:47 Meta, xɨka 'ahɨxikɨ 'axapetiyurieneni, keniwayetu'i. Matsi 'aixɨa kaniyɨmɨkɨ tapa xeikɨa peheunieretɨ pemeutahanikɨ Kakaɨyari mɨra'aitatsie, keyuri hutame hɨxite pehexeiyatɨ taipa peheukahɨiyanikɨ.
MAR 9:48 Mana »“kwitsi mɨwakɨme pɨkamɨni, meta tai pɨkatɨweni”.
MAR 9:49 Yunaitɨ mekani'itiyakuni taikɨ, naitɨ mawari kemɨti'itiwa 'unakɨ.
MAR 9:50 »'Una 'aixɨa kani'aneni, peru xɨka 'una hamuritɨ 'ayani, ¿titakɨ ha'utsiwime xeteheyeitɨanikeyu 'una? 'Una xekenexeiyani yuhetsie 'aixɨa xeteyuxeiyatɨ».
MAR 10:1 Merikɨtsɨ mana kaniyeyani, Kureya kwieyaritsie kaneyani, Kurutani hatuxameyaritsie 'anutaɨye. Mana tawari teɨteri hetsɨana mekaniyukuxeɨrieni, kemɨtiyeiyarieyatɨkai, mɨkɨta katiniwaruti'ɨkitɨatɨyani.
MAR 10:2 Hikɨ 'ana, paritseutsixi hetsɨana mekaniu'axɨani me'ita'inɨatake, mɨpaɨ mekatenita'iwawiya: —¿Tiyɨwe tewi yɨ'ɨya muku'eirieni?
MAR 10:3 Ketsutsi mɨpaɨ katiniwaruta'eiya: —¿Ketixe'u'aitɨa Muitsexi?
MAR 10:4 Mɨkɨ mɨpaɨ mekatenitahɨawe: —Muitsexi 'uki kaniupitɨani 'eiriya xapayari mitawewirienikɨ hikɨ 'ana miku'eirienikɨ.
MAR 10:5 Ketsutsi mɨpaɨ katiniwaruta'eiya: —Yu'iyaritsie xemɨtsetse'ikɨ 'ayumieme 'ikɨ 'aitɨarika kanixe'uta'utɨirieni.
MAR 10:6 Peru matɨaripaitɨ naitɨ mɨtiunetɨarietsie Kakaɨyari “kaniwarutiwewieni 'uki meta 'uka”.
MAR 10:7 “'Ayumieme 'uki kaniyupatamɨkɨ, yupaapa yumaama wahetsɨa kaniyeyeimɨkɨ, yɨ'ɨyatsie katiniwiyamɨkɨ pɨta,
MAR 10:8 memɨyuhutakai xeiwaiyari mekanakɨnikuni meyuxewitɨ”. 'Ayumieme mepɨkayuhutari, matsi mekaniyuxewini.
MAR 10:9 'Ayumieme, Kakaɨyari mɨtiutaxewiriyaxɨkɨ, tewi pɨkawataxɨriexɨani.
MAR 10:10 Hikɨ kiita me'ayetetɨ, teyɨ'ɨkitɨwamete tawari mekanita'iwawiya 'ikɨ hepaɨtsita kemutayɨ.
MAR 10:11 Ketsutsi mɨpaɨ katiniwarutahɨawe: —Kemɨ'ane miku'eiri yu'ɨya, xeime pɨta mutiwitɨ, mɨkɨ xeime 'ɨyaya kanikumaɨwani.
MAR 10:12 Meta 'uka xɨka yɨkɨna 'uku'eirieni, xeime pɨta xɨka 'utikɨnata, mɨkɨ kanikumaɨwani kemɨ'ane mɨkayukɨna.
MAR 10:13 Hikɨ hetsɨana mekaniwa'atɨwakaitɨni tɨɨri wahetsie mutimenikɨ, peru teyɨ'ɨkitɨwamete mekaniwarutate'akaitɨni memɨwa'atɨwakai.
MAR 10:14 Ketsutsi waruxeiyaka teyɨ'ɨkitɨwamete kememɨteyuriekai kaniuyeha'ani, mɨpaɨ katiniwarutahɨawe: «Xekeniwapitɨaka tɨɨri nehetsɨa memɨ'axenikɨ, wahɨxie xepɨka'u'uka, mɨpaɨ memɨ'anene kaniwahetsiemiemetɨni Kakaɨyari mɨra'aita.
MAR 10:15 Yurikɨ mɨpaɨ nepɨxerahɨawe, kemɨ'ane mɨka'itanaki'erieni Kakaɨyari kemɨti'aita nunutsi hepaɨ yuri ti'erietɨ pɨkayɨwe mana meutahani».
MAR 10:16 Hikɨ warutitɨkɨtɨ, wahetsie 'utimemetɨ 'aixɨa kaniwayuriekaitɨni.
MAR 10:17 Merikɨtsɨ Ketsutsi kepauka mɨyemieximekairi, hikɨ tewi 'unautsarɨmetɨ hetsɨana kaninuani, hɨxiena kaniutitunumakeni, mɨpaɨ tiku'iwawiyatɨ: —Ti'ɨkitame 'aixɨa pemɨtiuka'iyari 'aku, ¿kenetiyurieni nehetsie mɨtinakekɨ tukari mɨkaxɨwe?
MAR 10:18 Ketsutsi mɨpaɨ katinita'eiya: ¿Titayari 'aixɨa netiuka'iyarime penetixata? Tewi 'aixɨa mɨtiuka'iyari 'apɨka'uyeika, Kakaɨyari yuxewitɨ 'aixɨa pɨtiuka'iyari pɨta.
MAR 10:19 'Ekɨtsɨ 'aitsikate pekanimaika: “Pepɨkati'amemiwani, xeime 'ɨyaya kɨnaya pepɨkakumaɨwani, pepɨkatinawayani, xeimetsie pepɨkarahɨpani peti'itawatɨ, pepɨkati'akwamanani, 'apaapa meta 'amaama keniwareu'enieka”.
MAR 10:20 'Uki mɨpaɨ katinitahɨawe: —Ti'ɨkitame, mɨkɨ naimetsie yanepɨtikamie temaikɨyari paitɨ.
MAR 10:21 Ketsutsi kanixeiya 'inaki'erietɨ, hikɨ mɨpaɨ katinitahɨawe: —Xewitɨ xeikɨa peuyewetseri yapemɨtiyurieni: kenemie, ketinetua naime 'apiinitɨarika meta ketiniwarumikwa tixaɨtɨ memɨkatehexeiya, mɨpaɨ petiyurieme waɨkawa pekaneukakemɨkɨ muyuawitsie. Hikɨ kenaye'a meta nehetsie ketineuwiya.
MAR 10:22 'Ikɨ niuki 'u'enieka, tewi putanutuixi, hikɨ kaneyani yuhiwerietɨ waɨkawa mɨrexeiyakaikɨ.
MAR 10:23 Hikɨ Ketsutsi yu'aurie hanieretɨyaka mɨpaɨ katiniwarutahɨawe teyɨ'ɨkitɨwamete: —Pɨkwaniwe xikutsixi memeutahaxɨanikɨ Kakaɨyari mɨra'aitatsie.
MAR 10:24 Teyɨ'ɨkitɨwamete mekanihɨxiyakaitɨni niukieyakɨ. Ketsutsi hutarieka mɨpaɨ katiniwarutahɨawe teyɨ'ɨkitɨwamete: —Neniwema, pɨkwaniwe mɨkɨ yuri memɨte'erie tuminitsie memeutahaxɨanikɨ Kakaɨyari mɨra'aitatsie.
MAR 10:25 Pɨkakwaniwe kameyu 'iwipame hɨxieyatsie manuyehanikɨ matsi pɨkwaniwe xiku meutahanikɨ Kakaɨyari mɨra'aitatsie.
MAR 10:26 Mɨkɨ matsi waɨkawa mekanihɨxiyakaitɨni, mɨpaɨ mekateniyɨkɨhɨawekaitɨni: «Kamɨtsɨ, ¿kemɨ'ane pɨyɨwe mɨtawikweni?»
MAR 10:27 Hikɨ Ketsutsi kwi waxeiyatɨ mɨpaɨ katiniwarutahɨawe: —Teɨteri mepɨkayɨwawe, peru Kakaɨyari mɨpaɨ pɨka'ane, naimekɨ Kakaɨyari katiniyɨweni.
MAR 10:28 Hikɨ Pekuru kanitsutɨani mɨpaɨ tikɨhɨawetɨ: —Neuxei, tame naime tepɨte'uku'eiri, meta 'ahetsie tepɨte'uwi.
MAR 10:29 Ketsutsi mɨpaɨ kaniutayɨni: —Yurikɨ mɨpaɨ nepɨtixekɨhɨawe, kemɨ'ane nehetsiemieme meta niuki 'aixɨa manuyɨne hetsiemieme miku'eiri yukii, yu'iwama, yumaama, yupaapa, yuniwema, yukwie,
MAR 10:30 xeitsienituyari matsi warexeiyatɨ kanayeimɨkɨ hikɨ (kite, 'iwamarixi 'ukitsi 'ukari, yumaamama, yuniwema, kwie, tsepa 'uximatɨarietɨ 'uweiyarietɨ 'ena), meta tukari 'umamietsie kepauka maye'ani, tukari mɨkaxɨwe hexeiyatɨ kanayeimɨkɨ.
MAR 10:31 Peru yumɨiretɨ hikɨ miemete memɨmexɨakate 'imatɨremete mekanakɨnikuni, meta memɨ'imatɨremete mexɨakate mekanakɨnikuni.
MAR 10:32 Merikɨtsɨ huyeta mekaniuhukaitɨni Kerutsareme meutiyune 'utɨa, hikɨ Ketsutsi kananuyeyerɨni. Teyɨ'ɨkitɨwamete mekanihɨxiyakaitɨni, hipatɨ wa'ɨtɨma memuhukai mekanimamakaitɨni. Hikɨ tawarita yatewa kaniwarewitɨni tamamata heimana memɨyuhuta, kanitsutɨani tiwakuxaxatɨwatɨ kemɨ'itɨarienikekai.
MAR 10:33 «Neuxei, Kerutsareme tepɨtiyune hikɨ, Yuri Tewi kenemɨtihɨkɨ nekaniyetuiyamɨkɨ mawari wewiwamete tewa'aitɨwamete wahetsɨa, meta 'inɨarikɨ memɨte'ɨkita wahetsɨa. Mɨkɨ yamekanitiyuakuni kename neke'umierieni, meta mekaneniyetuakuni mɨkɨ memɨkahuriyutsixi wahetsɨa.
MAR 10:34 Mɨkɨ mekanenitewiyatsitɨakuni, mekaneniti'aɨtsikawiyakuni, mekanenikuwaxɨakuni meta mekanenimiekuni. Peru hairieka tukari 'aye'ayu, nekananukukemɨkɨ».
MAR 10:35 Hikɨ Tsewereu niwemama Kakuwu meta Wani yuhutatɨ 'ahurawa me'akɨneka, mɨpaɨ mekatenitahɨawe: —Ti'ɨkitame, pɨtatsinakekeyu tahetsiemieme yapemɨtiyurienikɨ, ketemɨmatetawawirieni.
MAR 10:36 Mɨkɨ mɨpaɨ katiniwaruta'eiya: —¿Kekutatixenake yanemɨtiyurienikɨ xehetsiemieme?
MAR 10:37 Mɨpaɨ mekatenita'eiya: —Ketaneupitɨa 'atemayaxekɨ xewitɨ 'atserieta xewitɨta 'a'utata, kepauka 'a'uweni witsimɨ'anetsie pemayerɨni.
MAR 10:38 Hikɨ Ketsutsi mɨpaɨ katiniwarutahɨawe: —'Atsixepɨkatemate tita xemɨteku'iwawa. ¿Xeteyuwaɨriya xemɨteka'eniexɨani naimekɨ ne kenemɨtika'eniexɨani, nehepaɨ xeteyɨwawe xema'iwarienikɨ tewi kemɨranukanamie hepaɨ hakɨ kepauka muka'ɨyarie?
MAR 10:39 Mɨkɨ mɨpaɨ mekaniutiyuani: —Huu, tepɨyɨwawe. Ketsutsi mɨpaɨ katiniwarutahɨawe: —Xemetsɨ nehepaɨ xekatenikwinikuni, meta nemɨka'ɨyarieni hepaɨ xekanika'ɨyariekuni,
MAR 10:40 peru heitserie nepɨkahexeiya nemɨxepitɨanikɨ netserieta meta ne'utata xemayaxekɨ. Matsi mɨkɨ wahetsiemieme mukuha'aritsie xeikɨa, mɨkɨ yamekatenipitɨariekuni.
MAR 10:41 Hipatɨ tamamata kepauka memu'enana kememutiyuanekai, mekanitsutɨani mewahekatɨ Kakuwu meta Wani.
MAR 10:42 Hikɨ Ketsutsi yu'aurie waruta'inieka, mɨpaɨ katiniwarutahɨawe: —Xeme mɨpaɨ xepɨtemate, mɨkɨ nuiwarite wa'ukiyarima memuyuxata mekateniwa'uxitɨaka yuteɨterima, meta ti'aitame hurawa parewiwametemama mepanutikɨka mete'aitatɨ kememɨtepitɨarie.
MAR 10:43 Peru mɨpaɨ pɨkatiyɨni xeme xetsata. Matsi pɨta, xeme kemɨ'ane mariwetɨ mɨyeimɨkɨni, mɨkɨ yunaime xeparewiwame kehɨkɨtɨni.
MAR 10:44 Meta kemɨ'ane mexɨakame mɨyeimɨkɨ xeme xewitɨ, yunaime xehetsiemieme waɨriyarika ti'uximayatame kehɨkɨtɨni.
MAR 10:45 Metsɨ Yuri Tewi kenemɨtihɨkɨ nepɨkanua nemɨparewiyanikɨ, matsi pɨta hipame newaparewienike nekaninuani meta netukari nemɨyetuanikɨ, yumɨireme nemɨwaxɨnakɨ.
MAR 10:46 Merikɨtsɨ Keriku mekaneta'axɨani. 'Arike, mana kanayeyani Ketsutsi teyɨ'ɨkitɨwametemama yunaitɨ meta yumɨiretɨ teɨteri hamatɨana. Xewitɨ tewi mɨkaheunierekai mana kaniukateitɨni huye tetsita tiwautɨ, Warutimeyu titewatɨ (Timeyu nu'ayatɨtɨ).
MAR 10:47 Hikɨ 'u'enaka kename Ketsutsi natsaretitanaka mana 'uyemiekai, kanitsutɨani mɨpaɨ tiuhiwatɨ: —Ketsutsi, Rawiri pemɨnu'aya, keneneutinenimayata kwerietɨ.
MAR 10:48 Yumɨiretɨ mekanitate'akaitɨni kayuwatɨ mɨtikanikɨ, peru matsi mɨkɨ karima mɨpaɨ katiniuhiwakaitɨni: —Rawiri pemɨnu'aya 'aku, keneneutinenimayata kwerietɨ.
MAR 10:49 Ketsutsi mana 'utakeka, mɨpaɨ kaniutayɨni: —Xekeneuta'ini. Mɨkɨ mehekɨneka mekanita'inieni mɨkaheunierekaikɨ, mɨpaɨ mete'ikɨhɨawetɨ: —Pepɨkamaka. Kenanukukexi. Ketsutsi pɨmatsiha'iniwa.
MAR 10:50 Mɨkɨ yɨ'ɨkari hewiwieka, 'anukukeka, Ketsutsi hetsɨa kaneyani.
MAR 10:51 Ketsutsi mɨpaɨ katinitahɨawe: —¿Tita pereuyehɨwa kenetiyurieni 'ahetsiemieme? Mɨkaheunierekai mɨpaɨ kaniutayɨni: —Ti'ɨkitame, nepeunierenikeyu.
MAR 10:52 Ketsutsi mɨpaɨ katinitahɨawe: —Kenemie, yuri pemɨtiuta'erikɨ 'aixɨa pepu'itɨarie. Hikɨ yapauka heunieretɨ kanayani, meta huyeta Ketsutsi 'utɨa kaneyani.
MAR 11:1 Kepauka Kerutsareme mehurakairi, meta Wetɨpake mɨrakutewatsie memu'axɨa metatsiere Wetaniya, Huriwa Mati'u yemuriyari hetɨa, Ketsutsi teyɨ'ɨkitɨwamete yuhetsɨa miemete yuhutame kaniwarutanɨ'ani,
MAR 11:2 mɨpaɨ tiwarutahɨaweka: «Kiekari 'anutaɨye mukumatsie xekenehu. Yapauka mana xemeutahaxɨanitsie, puxu temaikɨ xekanetaxeiyakuni hakuwiekame, tewi hetsiena mɨka'anutiyerɨwe 'akuxi. Xekenakuxɨna meta xekenahani 'ena.
MAR 11:3 Xewitɨ xɨka mɨpaɨ tixeku'iwawiyani: “¿Titayari mɨya xeteyurie?”, mɨpaɨ xeketenetahɨawi: “Ti'aitame peiyehɨwa, kwitɨwata kanenɨ'amɨkɨ”».
MAR 11:4 Merikɨte mehekɨneka kaye 'utɨa mekaneitaxeiya puxu temaikɨ 'akuwiekame kitenie 'aurie, hikɨ mekanekuxɨna.
MAR 11:5 Teɨteri mana memɨti'ukai hipatɨ mɨpaɨ mekateniwaruta'iwawiya: «¿Kexeteyurie? ¿Titayari puxu temaikɨ xete'akuxɨna?»
MAR 11:6 Hikɨ yamekateniwarutahɨawe kemɨtiwarutahɨawekai Ketsutsi, teɨteri mepɨwarupitɨa memekɨxɨnakɨ.
MAR 11:7 Puxu mekaneyehana Ketsutsi hetsɨa. Hikɨta yɨ'ɨkarite me'anuti'itaku, mɨkɨ hetsiena kananutiyerɨni.
MAR 11:8 Yumɨiretɨ huyeta mekani'itɨaximekaitɨni yɨ'ɨkarite, hipatɨta kɨye xawari me'uhapatɨ mekani'itɨaximekaitɨni.
MAR 11:9 Memanuyetekai meta wa'utɨa memuhukai mɨpaɨ mekateniuhiwakaitɨni: —'Ari ketaneutawikweitsitɨa. —'Aixɨa ke'itɨarieka kemɨ'ane 'umamie Ti'aitame hetsɨa miemetɨtɨ.
MAR 11:10 —'Aixɨa ke'itɨarieka kemɨ'ane Ti'aitame mayani tatewari Rawiri mɨti'aitakai hepaɨ. —'Ari ketaneutawikweitsitɨa taheima pemakawe.
MAR 11:11 Hikɨ Ketsutsi Kerutsareme kaneutahani meta tuki 'amɨpata kaneutahani. Hanieretɨyaka naitsarie kaniwayeyani 'akayunirɨmekaku, tamamata heimana memɨyuhuta wahamatɨa yunaitɨ mekanekɨne Wetaniya paitɨ.
MAR 11:12 Merikɨtsɨ 'uxa'arieka, kepauka Wetaniya memayekɨnirɨmekai, Ketsutsi kaneuhakamɨkɨkaitɨni.
MAR 11:13 Xapa kɨyeyari yɨrakame 'uxeiyaka 'ateewa paitɨ, hepana kaneyani 'ixeiyake, heiwatɨ xeime 'ikwaxi mɨnekaxei hetsiena. Mana nuaka tixaɨtɨ pɨkatiukaxei xawari xeikɨa, maxuxuawere mɨka'aye'awekaikɨ.
MAR 11:14 Ketsutsi hikɨ mɨpaɨ katinitahɨawe xapa: «Hatsuaku xewitɨ tɨma 'a'ikwaxi pɨkatikwani». Mekani'enieni teyɨ'ɨkitɨwametemama.
MAR 11:15 Hikɨ Kerutsareme mekaniuta'axɨani. Ketsutsi Kakaɨyari tukieya kuraruyarita kaneutahani, hikɨ kanitsutɨani waranuyeweweiyatɨ mɨkɨ memɨtenanekai meta memɨtetuakai. Tumini patamete wamexate kanatixɨrieni meta kukuruxi watuayamete wa'ɨparite.
MAR 11:16 Pɨkawapitɨakai tixaɨtɨ mete'apitɨ memanuyekɨkanikɨ tukita.
MAR 11:17 Meta katini'ɨkitakaitɨni mɨpaɨ tiwakɨhɨawetɨ: «¿'Ipaɨ tamɨ kare'uxa: »“Nekii nenewieri kiyari pɨtiuterɨwarɨwani yunaime nuiwarite wahetsiemieme”? Peru xeme terɨ xekaneyeitɨani “hakewa tenawayamete memeyu'awieta”».
MAR 11:18 Hikɨ mawari wewiwamete memɨhɨritɨariekai, mɨme 'inɨarikɨ memɨte'ɨkitametetɨkai wahamatɨa yunaitɨ mekani'enieni, 'ayumieme mekatenikuwautɨwekaitɨni kememɨte'imienikɨ, mekanimakarɨkaitɨni, teɨteri yunaitɨ memɨhɨxiyakaikɨ tita mɨti'ɨkitakai hepaɨtsita.
MAR 11:19 Hikɨ 'ukutaikaireku kiekaritsie kaniwayeyani.
MAR 11:20 Merikɨtsɨ ximeri mana me'uyehutɨ, xapa mekaniuxeiya wakime naitɨ nanayari paitɨ.
MAR 11:21 Pekuru, haye'erieka kemɨtiuyɨ, mɨpaɨ katinitahɨawe Ketsutsi: —Neuxei Ti'ɨkitame, 'iya xapa pemaxaxatakai 'axamɨ'itɨarienikɨ, mɨkɨ kaniutawaniri.
MAR 11:22 Ketsutsi mɨpaɨ katiniwarutahɨawe: —Kakaɨyari hetsie yuri xeketene'erieka.
MAR 11:23 Yurikɨ mɨpaɨ nepɨtixekɨhɨawe, kemɨ'ane mɨpaɨ mɨtitahɨawe 'ikɨ yemuri: “Keneu'apata, haramaratsie keneukawetsi”, xɨka yu'iyaritsie 'etsiwa ka'iyɨrieka, matsi xɨka yuri ti'erieka kename mɨpaɨ tiyɨni kemaine, mɨpaɨ katiniyɨmɨkɨ hetsiena mieme.
MAR 11:24 'Ayumieme nepɨtixekɨhɨawe: Tita xemɨtetawauni xeyunenewietɨ, yuri xeketene'erieka kename 'ari yaxete'upitɨarie naime tita xemɨte'utawau, mɨpaɨ yakatiniyɨmɨkɨ xehetsiemieme.
MAR 11:25 Kepauka xemɨyunenewie, xɨka xeime hamatɨa 'aixɨa xekateyuxeiyani xeketeneuyehɨwirieka, xemeta xe'ukiyari muyuawitsie makawe mɨtixeheuyehɨwiriekakɨ, 'axakexemɨteyurie.
MAR 11:26 Mexɨka teɨteri xekatewareuyehɨwirieni, xe'ukiyari muyuawitsie makawe pɨkatixeheuyehɨwirieni xemeta 'axaxeteyurieyu.
MAR 11:27 Merikɨtsɨ tawarita mekaniu'axɨani Kerutsaremetsie, mexi tuki kuraruyarita yeyeikakai, mawari wewiwamete tewa'aitɨwamete, meta 'inɨarikɨ memɨte'ɨkitametetɨkai meta 'ukirawetsixi yunaitɨ 'ahurawa mekaniukɨne.
MAR 11:28 Mɨpaɨ mekatenita'iwawiya: —¿Hakewa miemekɨ heitserie pehexeiyatɨ mɨyapepɨtiyuriene, meta kemɨ'ane heitserie pɨmatsi'upitɨa mɨyapemɨtiyurienenikɨ?
MAR 11:29 Hikɨ Ketsutsi mɨpaɨ katiniwaruta'eiya: —Neta nepɨxeta'iwawiya xeme. Xɨka xenetsi'uta'eiya, neta yanepɨtixetahɨawe kemɨ'ane heitserie mɨnetsi'upitɨa mɨyanemɨtiyurienenikɨ 'ikɨ naime:
MAR 11:30 Wani kemɨti'ɨyanekai, ¿taheima timiemetɨkai, nutsutɨ teɨteri wahetsɨa pɨmiemetɨkai? Xekeneneuta'eiya.
MAR 11:31 Hikɨ mɨkɨ niuki mekaniutixɨatɨatɨkɨne mɨpaɨ meteyɨkɨhɨawetɨ: «Xɨka tame mɨpaɨ te'utiyuani: “Taheima makawe pipitɨakai”, mɨkɨ mɨpaɨ pɨtatitahɨawe: “Merikɨte, ¿titayari yuri xekate'ita'eriri?”
MAR 11:32 Xɨkata mɨpaɨ te'utiyuani: “Teɨteri mepipitɨakai”...» Mekaniwamakarɨkaitɨni teɨteri, mɨkɨ yunaitɨ mɨpaɨ memutiyuanekaikɨ Wani hepaɨtsita kename yurikɨ Kakaɨyari niukameya hɨkɨtɨkai.
MAR 11:33 'Ayumieme mɨpaɨ mekatenita'eiya Ketsutsi: —'Atsitepɨkatemate. Mɨkɨta mɨpaɨ katiniwarutahɨawe: —Merikɨte, neta 'atsinepɨkatixetahɨawe kemɨ'ane heitserie mɨnetsi'upitɨa mɨyanemɨtiyurienenikɨ 'ikɨ naime.
MAR 12:1 Hikɨ kanitsutɨani tiwakuxaxatɨwatɨ, 'ɨxatsi hepaɨtsita ti'ɨkitatɨ, mɨpaɨ kaniutayɨni: «Tewi kaxie haraweriyari kaniutawewieni. Kanikurarutɨiya, kaxie pɨname kaniwati'inieni, tuxiyu kaniutawewieni ti'ɨwiyame hetsiemieme. Hikɨ te'ɨwiyamete waruhɨritɨaka, 'ateewa kaneyani.
MAR 12:2 Hikɨ tukari 'aye'aku matikwakwaxetsie, xeime ti'uximayatame kaniutanɨ'ani te'ɨwiyamete wahetsɨa, menutɨnikɨ 'ikwaxi yapaɨmeme kutsiyari hetsiemieme.
MAR 12:3 Peru mɨkɨ mekaniwiya, mekanitiwaxɨani, meta yumaweme mekanenɨ'ani.
MAR 12:4 Hikɨ hutarieka xeimeta ti'uximayatame kaniutanɨ'ani wahetsɨa, mɨkɨta mekanituaxa mu'uyatsie meta 'axamekatenitihɨawe.
MAR 12:5 Xeimeta kaniutanɨ'ani, mɨkɨta mekaniumieni. Kaniwarutanɨ'anita hipame yuwaɨkawame, mɨkɨ hipame mekaniwarutiwani, hipameta mekaniwarukwini.
MAR 12:6 »Xeime 'akuxi kanexeiyakaitɨni, yuniwe minaki'eriekai. 'Imatɨrieka, mɨkɨ kaniutanɨ'ani, mɨpaɨ 'utaitɨ: “Neniwe hɨrixɨa mekanetimakakuni”.
MAR 12:7 Peru 'iya te'ɨwiyamete mɨpaɨ mekateniuxata: “'Ikɨ hetsie 'arike katininakimɨkɨ kutsiyari tipiinieya. Hikɨmɨ tepimieni, tita hetsiena mɨtinakekekai tapiini pɨrayani”.
MAR 12:8 Hikɨ mekaniwiya meta mekanimieni, haraweri warie mekaneikahɨani.
MAR 12:9 »Merikɨte, ¿ketiyurieni haraweri kutsiyari? Kaninuamɨkɨ, te'ɨwiyamete kaniwakwimɨkɨ, meta hipame kaniwahɨritɨamɨkɨ pɨta yuharaweri.
MAR 12:10 ¿Xekate'ekaterɨwawawe xeme 'ikɨ niuki: »“Mɨkɨ teté memitixani'eri kii wewiwamete mɨkɨ teté 'itsikina mieme kanayani,
MAR 12:11 Ti'aitame mɨya katiniuyurieni, meta kanimariweni ketemɨte'ixeiya”?»
MAR 12:12 Mɨpaɨ metehetimaika mɨwaxatakaikɨ 'ɨxatsi hepaɨtsita ti'ɨkitatɨ, 'ayumieme mekatenikuwautɨwekaitɨni kememɨte'iwiyakɨ. Peru mekaniwamakarɨkaitɨni teɨteri, hikɨ me'iku'eirieka mekanekɨne.
MAR 12:13 Hikɨ hetsɨana mekaniwarutanɨ'ani paritseutsixi hipame meta Herurexi hetsie memɨtewiyakai meyɨnɨkame, niukieyatsie memiwiyakɨ.
MAR 12:14 Mana me'u'axɨaka mɨpaɨ mekatenitahɨawe: —Neuxei ti'ɨkitame, tame tepɨmatsimate 'ekɨ yuri pemutainekɨ, pemɨka'akweriwayuriekɨ tsepa xewitɨ kemɨtiyɨkɨhɨawe, yɨkɨ pemɨkatiwaxeiyakɨ teɨteri, matsi Kakaɨyari huyeya hepaɨtsita pepɨti'ɨkita yurikɨ. ¿Ti'aitame Tsetsaxi tumini kemɨtiwawa, 'aixɨa ti'ane temɨteyutuaka nutsutɨ pɨkatixaɨ?
MAR 12:15 ¿Teteyutuaka nutsutɨ hawaikɨ? Ketsutsi yatimaitɨ yakɨ memutiyuanekaikɨ, mɨpaɨ katiniwarutahɨawe: —¿Titayari xenete'inɨatatɨwe? Xumatari watumini xekenena'ɨiri nemixeiyakɨ.
MAR 12:16 Mɨkɨ xeime mekani'atɨirieni, hikɨ mɨpaɨ katiniwarutahɨawe: —¿Kemɨ'ane 'ikɨ pɨra'ɨkiya, kemɨ'ane pɨra'utɨarika 'ikɨ? Mɨkɨ mɨpaɨ mekatenita'eiya: —Tsetsaxi.
MAR 12:17 Ketsutsi mɨpaɨ katiniwarutahɨawe: —Tsetsaxi xeketeneyetuirieka tita Tsetsaxi hetsɨa mɨtimieme, meta Kakaɨyari xeketeneyetuirieka tita Kakaɨyari hetsɨa mɨtimieme. Hikɨ mɨkɨ mekaniuhɨxiyani mɨyamutayɨkɨ.
MAR 12:18 Hikɨ hetsɨana mekaniu'axɨani tsarutseutsixi, mɨkɨ mɨpaɨ meputiyuanekai kename mɨkite meka'anuku'uwe, hikɨ mɨpaɨ mekatenita'iwawiya:
MAR 12:19 —Ti'ɨkitame, Muitsexi mɨpaɨ katiniu'utɨani tahetsiemieme, tewi xɨka 'umɨni xɨka 'uka 'uku'eirieni tɨɨri kawarayexeiyawetɨ, mutaya kanitiwitɨmɨkɨ yukwe, tɨɨri mɨwarayexeiya matsieya nuiwarieya memakɨnekɨ.
MAR 12:20 Merikɨtsɨ 'amenititekaitɨni 'iwamarixi 'atahuta meyupaɨmetɨ. Wamatsika 'utineɨkeka kaniumɨni tɨɨri kawarayexeiyawetɨ.
MAR 12:21 Hutarieka mieme yu'iwa wiuraya kaniutiwitɨni, peru mɨkɨta kaniumɨni tɨɨri kawarayexeiyawetɨ. Hairieka mieme yaxeikɨa kaniuyɨni.
MAR 12:22 Yunaitɨ 'atahuta 'iwamarixi yaxeikɨa mekaniuyɨni, meta tɨɨri mepɨkawarayexei. 'Imatɨriekata, 'ukaratsi kaniumɨni.
MAR 12:23 Merikɨte, kepauka xeniu memanuku'uni, ¿'atahutatɨ memitiwitɨ kemɨ'ane ra'ɨya pɨrayani?
MAR 12:24 Hikɨ Ketsutsi mɨpaɨ katiniwaruta'eiya: —Xeme pɨta xekateheuyexɨri, xemɨka'imatekɨ 'utɨarika xapayari meta Kakaɨyari kemɨtitɨrɨkaɨye.
MAR 12:25 Kepauka mɨkite memanuku'uni, mepɨkatineɨkixɨani meta mepɨkatiwikitɨariexɨani, matsi Kakaɨyari niukieya tuayametemama taheima miemete wahepaɨ mepɨ'aneneni.
MAR 12:26 Mɨkite wahepaɨtsita kemɨre'uxa kememɨte'anuku'uni, ¿kaukatɨ xeka'ekaterɨwawawe Muitsexi xapayatsie hakewa 'ɨtsitsie mexaxata, Kakaɨyari kemɨtitahɨawixɨ: “Ne 'Apɨrahami, 'Itsahaki meta Kakuwu wakakaɨyari nekanihɨkɨtɨni”?
MAR 12:27 'Ayumieme mɨkite pɨkawaxata kename wakakaɨyari maine, memayeyuyuri pɨta wakakaɨyari kaniyuxatani tsepa memukwi. Xeme yemekɨ xepeuyexɨri.
MAR 12:28 Hikɨ xewitɨ 'inɨarikɨ mɨti'ɨkitametɨkai 'ahurawa 'ayaka, waru'enieka niuki mexɨatɨakame, katinimaikaitɨni 'aixɨa mɨtiwaru'eikɨ, mɨpaɨ Ketsutsi katiniuta'iwawiya: —Naitɨ 'inɨari niukiyarite, ¿kemɨ'ane 'aitɨarika matsi peuyewetse?
MAR 12:29 Ketsutsi mɨpaɨ katinita'eiya: —'Ipaɨ kananuyɨneni 'aitɨarika mɨmariwe: “Xekeneu'enana 'ixaheritsixi. Ti'aitame mɨtakakaɨyari, mɨkɨ Ti'aitame kaniyuxewini.
MAR 12:30 Peninaki'eriekamɨkɨ Ti'aitame mɨ'akakaɨyari naime 'a'iyarikɨ, naime kepemɨti'amatekɨ, naime 'a'eriwamekɨ, naime 'atɨrɨkariyakɨ”.
MAR 12:31 'Utɨmana mieme hepaɨna kananuyɨneni: “'Ahepaɨ tewi kenenaki'erieka kepemɨti'anaki'erie 'ekɨ”. Xewitɨ 'aitɨarika pɨkaxuawe tawarita matsi mariwetɨ, 'ikɨ hutatɨ xeikɨa.
MAR 12:32 Hikɨ 'iya ti'ɨkitame mɨpaɨ katiniutahɨawe: —'Aixɨa pɨ'ane ti'ɨkitame. Yuri pekaniutaineni, Kakaɨyari kaniyuxewini, xewitɨta 'apɨka'uyeika hepaɨna 'anetɨ, kepemaine.
MAR 12:33 Xɨka tewi 'inaki'erieka naime yu'iyarikɨ, naime kemɨtiyumatekɨ naime yutɨrɨkariyakɨ, xɨka yuhepaɨ tewi naki'erieka kemɨtiyunaki'erie hepaɨ, matsi mɨpaɨ 'aixɨa kani'aneni, keyuri mawari taiyariyari meta hipame mawarika.
MAR 12:34 Hikɨ Ketsutsi 'i'enieka timaiweme hepaɨ kemɨtita'ei mɨpaɨ katinitahɨawe: —'Ateewa pepɨka'uyeika pemaye'anikɨ, Kakaɨyari mɨra'aitatsie. 'Anatɨtɨ tawariri xewitɨ pɨkayuwaɨri tixaɨtɨkɨ mɨtita'iwawiyakɨ.
MAR 12:35 Ketsutsi mɨpaɨ kaniutayɨni tukita ti'ɨkitatɨ: —¿Titayari mɨpaɨ mete'utiyuane mɨkɨ 'inɨarikɨ memɨte'ɨkitamete, kename waniu Kɨritsitu Rawiri nuiwarieya hɨkɨtɨni?
MAR 12:36 Mɨkɨ Rawiri tɨtɨ mɨpaɨ kaniutayɨni 'Iyari Mɨtiyupata 'ikuyuitɨwakaku: »“Ti'aitame mɨpaɨ katinitahɨawe kemɨ'ane Mɨneti'aitɨwame: ‘Netserieta kenakani, mexi mɨkɨ memɨmatsi'aka'unie 'ahetɨapai newa'atɨani’”.
MAR 12:37 Xɨka Rawiri tɨtɨ “Neti'aitɨwame” titerɨwa, ¿kehapaɨtɨtɨ nu'aya pɨhɨkɨtɨni? Teɨteri meyutemamawietɨ mekani'eniekaitɨni yuwaɨkawatɨ.
MAR 12:38 Ti'ɨkitatɨ mɨpaɨ katiniwarutahɨawe: —Xekeneyukweriwayurieka mɨkɨ 'inɨarikɨ memɨte'ɨkitamete wahepaɨtsita. Mɨkɨ pɨwanake memeu'uwanikɨ 'etɨtɨme me'anakatɨtɨ meta kiekari hixɨapa waɨritsika memɨpitɨarienikɨ,
MAR 12:39 teɨteri wahɨxie memayaxekɨ tuki 'etsimɨpepeta meta kiekame 'aurie memayaxekɨ 'ixɨararipa.
MAR 12:40 Wiuratsixi wapiini mepɨtewarutixɨtɨiri meta 'amepɨteheutetere meyunenewietɨ mɨkamatsiɨkɨnikɨ kememɨteyurie. Mɨkɨ wahetsie matsi waɨkawa katinahɨiyamɨkɨ.
MAR 12:41 Hikɨ tumini makaxɨriwa kakuniyari hɨxie kaniutayerɨni Ketsutsi, teɨteri kaniwaxeiyakaitɨni tumini me'akaxɨrɨwame kakunitsie. Xikutsixi yumɨiretɨ waɨkawa mekaneukaxɨrɨwakaitɨni.
MAR 12:42 Merikɨtsɨ xewitɨ wiura kaninuani tumini kahexeiyatɨ, hutame kaneukaxɨrieni xeitsenitawuyari mɨraye'atɨka xeikɨa.
MAR 12:43 Hikɨ yu'aurie warutakwewieka teyɨ'ɨkitɨwamete, mɨpaɨ katiniwarutahɨawe Ketsutsi: «Niuki kanitseɨyeni kenemɨtixekɨhɨawe, 'ikɨ wiura tumini kahexeiyatɨ kakunitsie kaneukaxɨrieni waɨkawa, mɨkɨ yunaitɨ memeikaxɨrɨwa 'etsiwa xeikɨa mekaneikaxɨrieni.
MAR 12:44 Yunaitɨ mɨkɨ mekaneikaxɨrieni tita mɨranayuhayewa, peru 'iya yuhaweri mieme kaneukaxɨrieni, naime kɨmana mɨtiyumikwakai».
MAR 13:1 Hikɨ Ketsutsi tukita wayeyeikakaku, teyɨ'ɨkitɨwametemama xewitɨ mɨpaɨ katinitahɨawe: —Neuxei, ti'ɨkitame, tetexi ketimamariwawe meta kiite.
MAR 13:2 Ketsutsi mɨpaɨ katinitahɨawe: —¿'Ikɨ kii petixeiya 'amɨpapa? Tete pɨkahayewarieni yuheima 'atetɨ, naitɨ kanika'unariemɨkɨ.
MAR 13:3 Hikɨ Huriwu Mati'u yemuriyaritsie 'ukaiku, tuki 'amɨpa hɨxie, Pekuru, Kakuwu, Wani meta 'Atɨrexi yuxaɨta mɨpaɨ mekatenita'iwawiya:
MAR 13:4 —Ketatineutaxatɨa, ¿kepauka mɨpaɨ pɨtiyɨni kepemainekai? ¿Tita ti'inɨariyaritɨni kepauka mɨraye'aximeni 'ikɨ naitɨ?
MAR 13:5 Hikɨ Ketsutsi kanitsutɨani mɨpaɨ tiwakuxaxatɨwatɨ: —Xekeneyukweriwayurieka nɨkatɨ xewitɨ tixe'u'itaiya.
MAR 13:6 Yumɨiretɨ mepɨ'axɨani kename ne neyɨane, mɨpaɨ me'utiyuatɨ: “Neri nepɨhɨkɨ”, mepɨtewa'itaiya yumɨireme.
MAR 13:7 Kepauka mɨpaɨ xemɨtehetimani kename xaɨtsie kuyaxa hexuawe, meta kepauka mɨpaɨ xemɨte'enanani kename xaɨtsie kiekatari hipame wahamatɨa 'ari meheyutakwini, xepɨkamamaka. Peuyewetse mɨpaɨ mɨtiyɨnikɨ, peru 'akuxi 'ana kwie naitɨ pɨkaheutipare.
MAR 13:8 Nuiwarite mekaniwatakwikuni hipame nuiwarite meta xexuime kwieyaritsie kiekatari hipame kwieyaritsie kiekatari. Naitsarie kwie kanitayuamɨkɨ, metatsiere haka kanitawemɨkɨ. Xɨka mɨpaɨ tiyɨaneni kukuiniya 'akuxi yutsutɨanetɨ pɨtiyɨaneni.
MAR 13:9 »Peru xeme xekeneyukweriwayurieka. Mɨkɨ mekanixeyetuakuni yu'itsɨkate wahetsɨa meta mepɨxetiwani yutukiteta. Kuwexinaruritsixi meta te'aitamete wahɨxie xekaniti'iwawiyariekuni nehetsɨa xemɨmiemetekɨ, mɨpaɨ xe'itɨarietɨwetɨ xekaniwatahekɨatsitɨiyakuni mɨkɨ.
MAR 13:10 Kaneuyeweka 'ikɨ niuki 'aixɨa manuyɨne memɨtaxatɨarienikɨ yunaitɨ nuiwarite meri.
MAR 13:11 Kepauka memɨxetiwiya memɨxe'anuhapani 'itsɨkate wahɨxie, xeta'ikwewatɨ xepɨkayu'iyaritɨaka kexemutiyuaneni. Matsi kexemɨtepitɨarieni 'ana, mɨpaɨ xeputiyuaneni. Xemetsɨ xepɨkahɨkɨtɨni kemɨ'ane yamɨtayɨni, matsi 'Iyari Mɨtiyupata kanihɨkɨtɨkamɨkɨ kemɨ'ane mɨtaniuni.
MAR 13:12 »'Iwamarixi xewitɨ yu'iwa kaniyetuamɨkɨ mɨmierienikɨ, meta nuariekame yuniwe kaniyetuamɨkɨ. Tɨɨri mekaniyeha'akuni yupaapama wahepaɨtsita meta mekatenita'aitakuni memɨkwi'iwakɨ.
MAR 13:13 Yunaitɨ mekanixe'uxiwe'eriekakuni nehetsɨa xemɨmiemetekɨ, peru kemɨ'ane tiuka'eniwatɨ mɨkatihayewa 'atsita 'imatɨrieka tukaritsie, mɨkɨ kanitawikweitsitɨariemɨkɨ.
MAR 13:14 »Kepauka xemixeiya “'axamɨti'ane mɨkatipatsie mawariyari” hakewa 'aixɨa mɨkahe'ane mewewiyaka (titerɨwame ketimaiweni tita mɨtixata), 'ana hɨritsie mekeyuta'una mɨkɨ Kureya kwieyaritsie memu'uwani.
MAR 13:15 Kemɨ'ane yukii heima makakani, mɨkɨ 'anakayame yukiita pɨkaheutahakeni yupiini tiwayepinike.
MAR 13:16 Kemɨ'ane yeuta meyeikani, yu'utɨma pɨka'akununuwani yɨ'ɨkari mahurimiekɨ.
MAR 13:17 Xɨa'ui mɨkɨ memuhukani meta memɨtetsitsitɨwani mɨkɨ tukaritsie.
MAR 13:18 Xekeneyunenewieka muhaɨtɨnitsie mɨpaɨ mɨkatiyɨnikɨ.
MAR 13:19 Karikɨ mɨkɨ tukaritsie 'uximatɨarika kanitixuawerimɨkɨ kemɨkatitixuaweriwe tsutɨapaitɨ kepauka kwie Kakaɨyari munetɨatsie paitɨtɨ, meta tawariri pɨkatixuawere 'arike.
MAR 13:20 Xɨka Ti'aitame mɨkɨ tukari 'etsika'utateriya, nixewitɨ pɨkatawikweni. Peru mɨkɨ mɨwaranayexei wahekɨ, tukari yakɨ putipaɨmeriyaxɨ.
MAR 13:21 Hikɨ, 'ana xeme xewitɨ xɨka mɨpaɨ tixekɨhɨaweni: “Kamɨ, 'ena kaniuyeikani Kɨritsitu”, yatɨni “Kamɨ huma”, yuri xepɨkate'erieka.
MAR 13:22 Karikɨ yakɨ Kɨritsitutsixi mekanitixuawerikuni meta Kakaɨyari niukametemama meyuxatatɨ, mɨkɨ 'inɨari mepɨtiwewieni mamariwaweme metewa'itaiyake 'atsita mɨkɨ memanayexeiyarie xɨka tiyɨwenike.
MAR 13:23 Kamɨtsɨ xekeneyu'ɨwiyani, naime nepɨtixe'utaxatɨa yakatiyɨwekaku 'akuxi.
MAR 13:24 »Peru 'ana tukaritsie, mɨkɨ 'uximatɨarika heunuayu, »“tau kaniyɨrimɨkɨ, meta metseri tawariri pɨkahekɨariwieni,
MAR 13:25 xurawetsixi mepɨkaxɨrieni muyuawitsie, meta tɨrɨkariya memexeiya muyuawitsie miemete mepɨkuyuitɨarieni”.
MAR 13:26 »Hikɨ 'ana Yuri Tewi kenemɨtitewa mekanenixeiyakuni haitsata ne'akamiekame, waɨkawa netɨrɨkaɨyetɨ meta nexawatɨme.
MAR 13:27 Meta nekaniwatanɨ'axɨamɨkɨ neniuki tuayamete, mɨkɨ nemɨwaranayexei memɨwakuxeɨrienikɨ, tatserieta ta'utata tahixɨata tatsutɨa memu'uwa, naitsarie kwie manuniere muyuawi hetɨa.
MAR 13:28 »Pinikɨ xeketeneyɨ'ɨkitɨaka: Kepauka mɨkaneika xawari meta xɨka yɨrani, xeme mɨpaɨ xepɨtemate tatsɨari 'ahurakaku.
MAR 13:29 Yaxeikɨata, kepauka xemɨneniere kenemutayɨ mɨpaɨ tiyɨanekaku, mɨpaɨ xeketenemaika kename hehurari, kitenie mɨta'aximeni hepaɨ.
MAR 13:30 Yurikɨ mɨpaɨ nepɨxerahɨawe, 'ikɨ naitɨ yapɨtiyɨni mexi hikɨ miemete mekakwiwawe.
MAR 13:31 Muyuawi meta kwie pukumawere, peru neniuki hatsuaku pɨkakumawere.
MAR 13:32 »Peru, nixewitɨ 'atsipɨkatimate kepauka maye'ani mɨkɨ tukari, taheima miemete niuki tuayamete 'atsimepɨkatemate, meta Kakaɨyari Nu'aya 'atsipɨkatimate, 'ukiyarieya xeikɨa katinimaika.
MAR 13:33 Yaxetemaitɨ xekeneyuhayewa, xekenayeneniereni, 'atsixemɨkatematekɨ kepauka maye'ani mɨkɨ tukari.
MAR 13:34 'Ipaɨ kani'aneni, tewi 'ateewa paitɨ metɨa hepaɨ, yukii muku'eiri, te'uximayatamete muwaruhɨritɨa, yuxexuime 'uximayatsika wahɨritɨatɨ, meta kitenie tihɨweme katiniuta'aitɨani mɨtitahɨkakɨ.
MAR 13:35 »Xemeta 'ayumieme xekenayeneniereni, 'atsixemɨkatematekɨ kepauka munuani kii kutsiyari, xɨka taikai, yatɨ tɨkari hixɨapa, yatɨ wakana tahiwayu, yatɨ kahekɨareyu.
MAR 13:36 Xekenayeneniereni kapa xekutsume xe'utaxeiyakɨ yapauka nuame.
MAR 13:37 Kenemɨtixekɨhɨawe xeme, yunaime netiniwakɨhɨaweni wahetsie mɨtinakekɨ: Xekenayeneniereni».
MAR 14:1 Merikɨtsɨ huta tukari kaneuyewekaitɨni maye'anikɨ Patsikwa 'ixɨarariya meta paa mɨkakuxanariyarietɨka 'ixɨarariyari. Mawari wewiwamete tewa'aitɨwamete meta 'inɨarikɨ memɨte'ɨkitametetɨkai mekatenikuwautɨwekaitɨni Ketsutsi memɨwiyakɨ me'i'itame mɨpaɨ memɨte'imienikɨ.
MAR 14:2 'Ayumieme mɨpaɨ mekaniutiyuanekaitɨni: «Xeikɨa 'ixɨarari xuawekaku hawaikɨ, teɨteri me'uyeha'anikɨ waɨkawa me'uyukuxeɨrienikɨ».
MAR 14:3 Hikɨ Wetaniya kiekariyaritsie, mexi mɨkɨ mexatsie 'utikatei Tsimuni kiita kemɨ'ane meripaitɨ nawi kwiniyayari mexeiyakai, hikɨ muwa 'ukaratsi kaninuani teté puteyuyari witsimɨ'ane 'ahanatɨ witsimu'ɨa 'ayemakame kwinimieme mɨraye'axe naaru hɨkɨakamekɨ wewiyakame. Puteyu kɨipieya 'anumuraka, Ketsutsi mu'uyatsie kaneitiyeurieni witsimu'ɨa.
MAR 14:4 Hipatɨ mana memɨtanenierekai mɨpaɨ mekaniutiyuanekaitɨni meha'atɨ: —¿Titayarikuta yakɨ xeikɨa mɨkɨ reuyewe witsimu'ɨa?
MAR 14:5 Pɨyɨwekai mɨkɨ waɨkawamekɨ mutuiyanikekai, tuminiyari memɨmikienikɨ tixaɨtɨ memɨkatehexeiya. Hikɨ 'ukaratsi mekaniutate'akaitɨni.
MAR 14:6 Peru Ketsutsi mɨpaɨ kaniutayɨni: —Xekeneuhayewa, titayari xete'i'uximatɨa. 'Aixɨa katiniuyurieni nehetsiemieme.
MAR 14:7 'Uxa'atɨni warie 'amekaniu'uwakuni tixaɨtɨ memɨkatehexeiya xehetsɨa. Kepauka xemɨyuwaɨriya xekaniyɨwawekuni xemɨwaparewienikɨ, neri xehetsɨa 'anepɨka'uyeikani 'uxa'atɨni warie.
MAR 14:8 'Ikɨ ketitakɨ mɨtiyɨwekai mɨpaɨ katiniuyurieni. Ne'ayeyurikaku 'akuxi kaneniukawirieni witsimu'ɨa nemɨkateukienikɨ.
MAR 14:9 Yurikɨ mɨpaɨ nepɨxekɨhɨawe, tsepanetɨ hakewa 'ikɨ niuki 'aixɨa manuyɨne mekuxaxatsiwani naitsarie kwiepa, kanitaxatsiemɨkɨ kana'eriwamɨkɨ 'ikɨ 'ukaratsi kemɨtiuyuri.
MAR 14:10 Hikɨ Kura 'Itsikariutitanaka, tamamata heimana memɨyuhuta mɨwanɨkai, kaneyani mawari wewiwamete tewa'aitɨwamete wahetsɨa Ketsutsi yetuanike.
MAR 14:11 Mɨkɨ me'i'enieka mekaniyutemamawiekaitɨni. Mɨpaɨ mekatenitahɨawe kename tumini me'i'ɨitɨanikekai. Hikɨ mɨkɨ katinikuwaunekaitɨni kepauka 'aixɨa mɨyɨnikekai miyetuanikɨ.
MAR 14:12 Merikɨtsɨ mexɨakame tukaritsie Paa mɨkakuxanariyarietɨka 'ixɨarariyaritsie, kepauka memɨwakukukuyakai muxatsi tɨrixi Patsikwa 'ixɨarariyari hetsiemieme, teyɨ'ɨkitɨwametemama mɨpaɨ mekatenitahɨawe: —¿Hakewa matsihenake mana temuhukɨ 'aixɨa temɨtehekuyurienikɨ, Patsikwa 'ikwaiyari pemekwanikɨ?
MAR 14:13 Hikɨ yuhutame teyɨ'ɨkitɨwamete kaniwarutanɨ'ani mɨpaɨ tiwarutahɨaweka: —Kiekaritsie xekenehu, tewi mana pɨxe'anukunake ye'ɨ 'ahanatɨ hekuhanɨka. Mɨkɨ xekenanuweiya,
MAR 14:14 hakewa menuani, mɨpaɨ xeketenetahɨawi kiekame: “Ti'ɨkitame mɨpaɨ paine: ¿Hakewa kii mɨkɨ muwa nemɨyɨwe nemɨtiwa'ɨkitɨa wahamatɨa Patsikwa 'ikwaiyari nemɨkwani?”
MAR 14:15 Mɨkɨ kii taɨta pɨxeheutiwitɨni pɨxexeitsitɨani kii 'a'uyeyeukame naitɨ 'ureyepikame 'aixɨa tiha'aritɨariekame. Muwa 'aixɨa xeketeneyuri tahetsiemieme.
MAR 14:16 Hikɨ mana mekanekɨne teyɨ'ɨkitɨwamete, kiekaritsie mekaneta'axɨani, kemɨtiwarutahɨawixɨ mekateniutaxeiya. Muwa Patsikwa 'ikwaiyari hetsiemieme 'aixɨa mekateniukuyurieni.
MAR 14:17 Merikɨte 'ukutaikaireku, Ketsutsi, tamamata heimana yuhutame wahamatɨa yunaitɨ mekaniu'axɨani.
MAR 14:18 'Ame'utitekaku metekwakaku, Ketsutsi mɨpaɨ kaniutayɨni: —Yurikɨ mɨpaɨ nepɨtixekɨhɨawe, xewitɨ xeme, nehamatɨa mɨtikwa'a, pɨnetsiyetuani.
MAR 14:19 Hikɨ mekaniyuhiwerietɨkateitɨni, yuxexuitɨ mɨpaɨ mekateniku'iwawiyakaitɨni: —¿Ne netihɨkɨ?
MAR 14:20 Mɨkɨ mɨpaɨ katiniwaruta'eiya: —Xeme tamamata heimana yuhutatɨ xewitɨ kanihɨkɨtɨni, kemɨ'ane paa manati'ɨwe nehamatɨa 'ikɨ xakɨtsie.
MAR 14:21 Yuri Tewi kenemɨtitewa, nepɨyemie nemɨmierienikɨ kemɨre'uxa nehepaɨtsita, perutsɨ xɨa'ui kemɨ'ane mɨnetsiyetuani Yuri Tewi nehɨkɨtɨme. Matsi 'aixɨa kani'anenikeyu xɨka ka'utinuiwake mɨkɨ tewi.
MAR 14:22 Hikɨ metekwakaku, Ketsutsi paa kananuku'ɨni 'aixɨa 'utayɨka Kakaɨyari hepaɨtsita paa hepaɨtsita, 'ititaraka paa, kaniwarumini, mɨpaɨ 'utaitɨ: —Xekenanu'ɨi, 'ikɨ kaninewaiyaritɨni.
MAR 14:23 Tekɨxi 'anukuhanaka pamɨpariyutsi 'ipitɨaka Kakaɨyari kaniwaru'itɨani, yunaitɨ mekanenuti'iexɨani mɨkɨ.
MAR 14:24 Mɨpaɨ katiniwarutahɨawe: —'Ikɨ kaninexuriyatɨni, mɨkɨ tɨratu mɨhekwa kanihɨkɨtɨni yumɨireme wahetsiemieme kanitayeurimɨkɨ.
MAR 14:25 Yurikɨ mɨpaɨ nepɨtixekɨhɨawe, tawarita kaxie hayari nepɨka'anu'ieni mexi ka'aye'awe kepauka hekwamekɨ nemenu'ieni hakewa Kakaɨyari mɨre'aita.
MAR 14:26 Hikɨ nɨawari Kakaɨyari hetsɨa mieme me'utikwikaka, mekanekɨne yemuritsie Huriwu Mati'u.
MAR 14:27 Ketsutsi mɨpaɨ katiniwarutahɨawe: ―Xeme yunaitɨ xepɨnetsiku'eirieni, mɨpaɨ mɨre'uxakɨ: »“Nepimieni muxatsi wahɨweme, hikɨ muxatsi mɨwa'ɨwiyakai mekanitaxɨriexɨakuni”.
MAR 14:28 Peru ne'anukukeme, ne meri nepɨyemie Karereyatsie paitɨ».
MAR 14:29 Hikɨ Pekuru mɨpaɨ katinitahɨawe: —Tsepanetɨ yunaitɨ memɨmatsi'uku'eiri, ne hawaikɨ.
MAR 14:30 Ketsutsi mɨpaɨ katinitahɨawe: —Yurikɨ mɨpaɨ nepɨmerahɨawe, 'ikɨ tɨkaritsie wakana 'ukiri hutakɨa katahiwawekaku 'akuxi, 'ekɨ haikakɨa pepɨ'aku'imawani, kename pekanetsimate pe'utaitɨ.
MAR 14:31 Pekuru tawarita kwinimieme matsi mɨpaɨ katinita'eiya: —Tsepanetɨ meuyeweka 'ahamatɨa nemɨmierieni, hatsuaku nepɨkaneku'imawani kename nekamatsimate ne'utaitɨ. Hipatɨta yaxeikɨa mekaniutiyuani.
MAR 14:32 Hikɨ mekanekɨne Ketitsemani reyetewakaku. Mɨpaɨ katiniwarutahɨawe teyɨ'ɨkitɨwamete: «'Ena xekenekuteni mexi ne nepɨyunenewimie».
MAR 14:33 Pekuru, Kakuwu meta Wani kaniwarewitɨni yatewa, hikɨ kanitsutɨani mana haumatɨ meta yuhiwerietɨ.
MAR 14:34 Hikɨ mɨpaɨ katiniwarutahɨawe: «Ne'iyaritsie kwinimieme nekaninehiwerieka, mɨkɨkɨ nekanimɨximeni. 'Ena xekeneuyuhayewa meta xekenetaneniereni».
MAR 14:35 'Etsiwa huma 'uyaka kaniutihɨximakeni kwiepa hikɨ kanitsutɨani mɨpaɨ tiyunenewietɨ, xɨka tɨmaxɨa tiyɨwenike mɨka'aye'anikɨ kemɨtiyɨnikekai.
MAR 14:36 Mɨpaɨ kaniutainekaitɨni: «Ne'ukiyari 'aku, naimekɨ pepɨyɨwe 'ekɨ. Yanepɨra'eriwakaku mɨka'aye'anikɨ kenemɨtikwinitɨarieni, peru kemɨnetinake ne pɨkatixaɨ, 'ekɨ pɨta kemɨmatinake».
MAR 14:37 Hikɨ kaninuani teyɨ'ɨkitɨwamete mematitekaitsie, kaniwarutaxeiya mekutsume. Mɨpaɨ Pekuru katiniutahɨawe: «Tsimuni 'aku, ¿petikutsu? ¿Pekatiyɨwekai pemayeniereni xeihurayari?
MAR 14:38 Xekenetaneniereni, xekeneyunenewieka kapa 'axaxete'uyurienikɨ xemɨta'inɨatsienitsie. Xe'iyari kaniyuwaɨriyani, peru xewaiyari matsi puwerani».
MAR 14:39 Hikɨ hutarieka heyaka kaniyutanenewieni yaxeikɨa 'utaitɨ.
MAR 14:40 Tawarita kepauka munua, kaniwarutaxeiyata mekutsume, memɨkayɨwawekaikɨ memayeneniereni kutsikɨ. Mepɨkayɨwawekai kememɨte'ita'eiya.
MAR 14:41 Hikɨ hairieka mana nuaka mɨpaɨ katiniwarutahɨawe: «¿Xetekutsu 'akuxi, xete'uxipie? 'Ariri. Paye'ari. Neuxei, Yuri Tewi nehɨkɨtɨtɨ 'axateyuruwamete wamamatsie nepɨyetuiyani.
MAR 14:42 Xekenanuku'uti, kɨmɨtɨkari. Kemɨ'ane mɨnetsiyetuani mana kanamieni».
MAR 14:43 Merikɨte 'utaniukakaku 'akuxi yapauka Kura mana kaninuani, tamamata heimana memɨyuhuta mɨwanɨkai. Yuwaɨkawame teɨteri yuhamatɨa kaniwarawitɨkɨkaitɨni 'ixiparate meta kɨyexi mete'u'ɨkame, mawari wewiwamete tewa'aitɨwamete, 'inɨarikɨ memɨte'ɨkitametetɨkai meta 'ukirawetsixi.
MAR 14:44 'Iya miyetuanikekai 'inɨari pɨwarutaxatɨakai, mɨpaɨ 'utaitɨ: «Kemɨ'ane ne nemɨtawaɨritɨani 'itsiyakɨ, mɨkɨ kanihɨkɨtɨkamɨkɨ, xekenewiya, xekenanuhani 'aixɨa rehɨakame».
MAR 14:45 Hikɨ nuaka yapauka, Kura 'ahurawa kaniuyani Ketsutsi hetsɨa, mɨpaɨ katinitahɨawe: «Ke'aku, Ti'ɨkitame». Hikɨ kani'itseni.
MAR 14:46 Hikɨ teɨteri Ketsutsi mekaniuwiya.
MAR 14:47 Peru 'ahurawa memɨti'ukai, xewitɨ kaniwatihana yu'ixipara, ti'uximayatame mawari wewiwamete tiwa'aitɨwame hetsɨa mieme, nakaya kanawiteni.
MAR 14:48 Ketsutsi mɨpaɨ katiniwarutahɨawe: —¿Xeme kari xepeyekɨ 'ixiparate meta kɨyexite xete'u'ɨtɨ xenetsiwiyake, kemɨtiwiwiyarɨwa tinawayame?
MAR 14:49 Mɨixa xetsata nekaniuyeikakaitɨni tukarikɨ tukita neti'ɨkitatɨ, xepɨkanetsi'uwi. Peru paye'ani 'utɨarika kemaine.
MAR 14:50 Hikɨ yunaitɨ mekaniku'eirieni meta mekaniyuta'una.
MAR 14:51 Xewitɨ temaikɨ kaniweiyakaitɨni rinu tsawanayarikɨ yu'eimatɨ mɨmawekaikɨ. Temaikɨ mekaniuwiya,
MAR 14:52 peru mɨkɨ yutsawana 'uku'eirieka kaniyuta'una mawetɨ.
MAR 14:53 Hikɨ mawari wewiwame tiwa'aitɨwame hetsɨa Ketsutsi mekanehana, mana mekaniyukuxeɨrieni mawari wewiwamete tewa'aitɨwamete, 'ukirawetsixi meta 'inɨarikɨ memɨte'ɨkitametetɨkai yunaitɨ.
MAR 14:54 Pekuru kaniweiyakaitɨni yatewa mawari wewiwamete tiwa'aitɨwame kiita takwa paitɨ kaninuani. Muwa tehɨwemete wahamatɨa 'akanayerɨni tai 'aurie kɨxetɨ.
MAR 14:55 Hikɨ mawari wewiwamete tewa'aitɨwamete meta 'itsɨkate yunaitɨ mekaniwawautɨwekaitɨni hipame memunenierixɨ memɨte'itani Ketsutsi hepaɨtsita, mɨpaɨ hetsiena memɨte'ahɨanikɨ memita'aitakɨ mɨmierienikɨ, peru mepɨyutexietɨwekai.
MAR 14:56 Yumɨiretɨ mete'itawatɨ mekanihekɨatakaitɨni kewaniu memɨte'unenierixɨ peru waniuki pɨkayuxewikai.
MAR 14:57 Hikɨ hipatɨ me'anuku'uka mekanitahekɨata mete'itawatɨ kememɨte'unenierixɨ waniu, mɨpaɨ me'utiyuatɨ:
MAR 14:58 —Tame tekani'enieni 'ipaɨ haineme: “'Ikɨ tuki mamakɨ muwewiya nekanika'unamɨkɨ, meta haika tukari 'anukayayu xeimeta nekanitawewimɨkɨ mamakɨ kawewiyakame”.
MAR 14:59 Nimɨpaɨ kememɨtehekɨatakai, waniuki pɨkataxewiriwekai.
MAR 14:60 Hikɨ mawari wewiwamete tiwa'aitɨwame wahixɨapa 'utakeka, Ketsutsi kaniuta'iwawiya mɨpaɨ tikɨhɨawetɨ: —¿'Atsipekatita'ani? ¿Ketitayari mɨya mete'utiyuane 'ikɨ 'ahepaɨtsita?
MAR 14:61 Peru Ketsutsi 'atsipɨkahainekai, matsi kayuwatɨ mana kaniuwekaitɨni. Mawari wewiwamete tiwa'aitɨwame hutarieka mɨpaɨ katinita'iwawiya: —¿'Ekɨ petikɨritsitu? ¿'Ekɨ 'aixɨa mɨtikuxaxatsiwa petinu'aya?
MAR 14:62 Ketsutsi mɨpaɨ katinita'eiya: —Huu, ne nekanihɨkɨtɨni. Xemeta xekanixeiyakuni Yuri Tewi kenemɨtihɨkɨ, 'ane'akaime Naimekɨmɨtɨrɨkaɨye tserieta, meta haitsata ne'akamiekame taheima.
MAR 14:63 Hikɨ mawari wewiwamete tiwa'aitɨwame yukamixa heukatsanaka mɨpaɨ kaniutayɨni: —Tawariri tepɨkawareuyehɨwa memunenierixɨ.
MAR 14:64 Xeme xekani'enieni Kakaɨyari hepaɨtsita ke'axamutayɨ. ¿Kexeteyɨkɨhɨawe? Mɨkɨ yunaitɨ mɨpaɨ mekaniutiyuanekaitɨni kename mɨpaɨ reuyewekai mɨmierienikɨ.
MAR 14:65 Hipatɨ mekanitsutɨani me'iti'aɨtsikawiyatɨ me'inanaimatɨ. Meheikɨhɨaka hɨxiena, mekanitihutsutɨkɨne mɨpaɨ mete'ikɨhɨawetɨ: —Ketineutahekɨata kemɨ'ane pɨmatsi'uhutsu. Meta tehɨwemete tsiere mekaneitihutsunakaitɨni.
MAR 14:66 Hikɨ Pekuru watipaitɨ 'uwekaku kii 'aurie takwa, 'ukaratsi kaninuani mɨti'uximayatametɨkai mawari wewiwamete tiwa'aitɨwame hetsɨa mieme.
MAR 14:67 Pekuru 'uxeiyaka kɨxekame, heutaniereka, mɨpaɨ kaniutayɨni: —'Ekɨta Ketsutsi natsaretitanaka hamatɨa pekaniuyeikakaitɨni.
MAR 14:68 Mɨkɨ kaniyuku'imawakaitɨni, mɨpaɨ 'utaitɨ: —Ne hawaikɨ nepɨka'imate, matsi 'atsinepɨkatimate kepemaine. Mɨpaɨ 'utayɨka kitenie kananuyeyani. Hikɨ 'ana wakana kaniutahiwa.
MAR 14:69 Hikɨ 'iya 'ukaratsi hutarieka 'ixeiyaka kanitsutɨani mɨpaɨ tiwakɨhɨawetɨ mɨkɨ mana memɨti'ukai: —'Ikɨta xewitɨ wa'iwa kanihɨkɨtɨni.
MAR 14:70 Mɨkɨ tawarita kaniyuku'imawakaitɨni. Yareutewikakuta mɨkɨ mana memɨti'ukai tawarita mɨpaɨ Pekuru mekateniutahɨawe: —Yurikɨ 'ekɨ xewitɨ mɨkɨ wa'iwa pekanihɨkɨtɨni, kamɨ Karereya kiekame pekanihɨkɨtɨni.
MAR 14:71 Hikɨ kanitsutɨani mɨpaɨ 'utaitɨ: —Kakaɨyari 'axakenetiupitɨani xɨka netiku'itawani, yemekɨ nepaine, tixaɨ mɨkɨ tewi nepɨkamate xemexaxata.
MAR 14:72 Kwitɨwa hutarieka wakana kanetahiwa. Pekuru Ketsutsi niukieya kanaye'erieni kemɨtitahɨawixɨ: «Wakana hutarieka katahiwawekaku 'akuxi, 'ekɨ haikakɨa pepɨ'aku'imawani kename pekanetsimate pe'utaitɨ». Hikɨ 'ikɨ naime ra'eriwatɨ kaniutatsuani.
MAR 15:1 Hikɨ 'ukatareku kwitɨwa mawari wewiwamete tewa'aitɨwamete, 'ukirawetsixi, meta 'inɨarikɨ memɨte'ɨkitametetɨkai, meta hipatɨ 'itsɨkate yunaitɨ meyukuxeɨrieka meyu'enieka, Ketsutsi mekanehana hɨakame, Piratu mekaniyetuirieni.
MAR 15:2 Piratu mɨpaɨ katinita'iwawiya: —¿'Ekɨ huriyutsixi teɨteriyari tiwa'aitɨwame petihɨkɨ? Mɨkɨ kayuku'imawatɨ mɨpaɨ katinita'eiya: —'Ekɨtsɨ mɨpaɨ pekanaineni.
MAR 15:3 Mawari wewiwamete tewa'aitɨwamete mekanixanetakaitɨni waɨkawa.
MAR 15:4 Tawarita Piratu mɨpaɨ katinita'iwawiya: —¿Kamɨtsɨ pekanetita'eiya? Kamɨ kemɨreupaɨme mepɨmetsixaneta.
MAR 15:5 Ketsutsi mɨka'iku'eiyakaikɨ, 'ayumieme Piratu kaniuhɨxiyani.
MAR 15:6 Merikɨte, mɨkɨ 'ixɨararitsie mɨkɨ kaniyeiyarieyatɨkaitɨni memanutaxɨriya xeime mɨwaxɨnirienikɨ, kemɨ'ane teɨteri memiwawirieka.
MAR 15:7 Xewitɨ kananutahɨiyakaitɨni Waxawaxi titewatɨ, 'iya kuwiyexinu 'unamete wahamatɨa kananutahɨiyakaitɨni meta mete'uyumieka.
MAR 15:8 Hikɨ yumɨiretɨ teɨteri me'u'axɨaka mekanitawawirieni, yamɨtiyurienikɨ yaxeikɨa kemɨtiyurienekai xexuime witsie wahetsiemieme.
MAR 15:9 Piratu mɨpaɨ katiniwarutahɨawe: —¿Xeme tixenake nemɨxe'anayexɨnirienikɨ huriyutsixi tiwa'aitɨwame?
MAR 15:10 Mɨkɨ mɨpaɨ katinimaikaitɨni memiyetuakɨ mete'ikwatsirietɨ mawari wewiwamete tewa'aitɨwamete.
MAR 15:11 Mawari wewiwamete tewa'aitɨwamete mekaniwarukuyuitɨani teɨteri memitawaunikɨ pɨta Waxawaxi manayexɨnarienikɨ.
MAR 15:12 Piratu tawarita mɨpaɨ katiniwaruta'iwawiya: —Merikɨte, ¿keri ne'iyurieni 'ikɨ huriyutsixi tixe'aitɨwame xemɨte'iterɨwa?
MAR 15:13 Mɨkɨ me'ita'eiyatɨ mɨpaɨ mekateniuhiwa: —Kuruxitsie ke'ukawiyani.
MAR 15:14 Piratu mɨpaɨ katiniwarutahɨawe: —¿Titayarikuta? ¿Titakɨ 'axatiuyuri? Peru mɨkɨ kwinimieme matsi mekateniuhiwakaitɨni, mɨpaɨ me'utiyuatɨ: —Kuruxitsie ke'ukawiyani.
MAR 15:15 Hikɨ Piratu wanaki'aritɨamɨtɨ teɨteri, kaniwaruxɨnirieni Waxawaxi, hikɨ Ketsutsi kaniuta'aita mɨkuweiyaxɨanikɨ meta kaniyetuani kuruxitsie mɨmierienikɨ.
MAR 15:16 Hikɨ kuyaxi paratsiyu taɨta 'upaitɨ Ketsutsi mekanehana (paratsiyu Pɨreturiu mɨtiuyetewatsie), meta kuyaxi yunaime mekaniwarukuxeɨrieni.
MAR 15:17 'Ɨkari yɨtsikimaɨyeme mekanenakuwirieni, meta xuya kurunayari me'utatsaka mu'uyatsie mekanenutimanirieni.
MAR 15:18 Mekanitsutɨani me'iwaɨritɨatɨ mɨpaɨ me'utiyuatɨ: —Ke'aku, huriyutsixi tiwa'aitɨwame.
MAR 15:19 Hakakɨ mekanitiwayakaitɨni mu'uyatsie, meta mekaniku'aɨtsikawiyakaitɨni. Me'utitunuma'uwetɨ yakɨ nenewieri mekanipitɨakaitɨni.
MAR 15:20 'Arike mɨyamete'itinanaimaka mekaninawairieni 'ɨkari, mekanitikemaritɨani 'ixurikieyakɨ. Merikɨtsɨ mekaneihana kuruxitsie me'imienike.
MAR 15:21 Xeime mana 'uyemiekame me'uwiyaka mekanita'aitɨani kuruxieya menɨtɨkirienikɨ, Tsimuni tsirenetanaka katinitewakaitɨni, Herekanituru meta Xupu kaniwa'ukiyaritɨkaitɨni, xaɨtsie 'anuyaka kiekaritsie kanaye'aximekaitɨni.
MAR 15:22 Hikɨ Ketsutsi mekanehana Kurukuta mɨrakutewatsie paitɨ (panɨyɨne: Mɨki Mu'uya Manuka, mɨrakutewatsie).
MAR 15:23 Hikɨ kaxie winuyari mixaxi nɨkame matsiwi mekanenu'itɨanikekaitɨni meuyuyehɨakakɨ, peru Ketsutsi pɨka'enu'i.
MAR 15:24 Merikɨte kuruxitsie mekanikawieni. Kuyaxi mekaniyuta'iwa kememɨte'itahuriexɨanikekai 'ixurikiteya, yamemɨtehetimanikɨ tita memɨte'anuhurienikekai yuxexuitɨ.
MAR 15:25 Merikɨtsɨ ximeri 'atanauka hurayari 'upaukakaku kuruxitsie mekanikawieni.
MAR 15:26 Kemɨtiuxanetsie yakatiniu'utɨarieni: «Huriyutsixi Tiwa'aitɨwame».
MAR 15:27 Hamatɨana mekaniwarukawɨtɨani tenawayamete yuhutame kuruxitsie, tserietana xeime meta 'utatana xeime.
MAR 15:28 'Anakanaye'ani 'utɨarikayari mɨpaɨ mɨre'uxa: «Mɨkɨ memititsana 'inɨari niukiyari, xewitɨ kani'eriwakaitɨni».
MAR 15:29 Hikɨ mana memuyekɨkakai 'axamekatenikuhɨawekaitɨni, yumu'u me'utitsiketɨ, mɨpaɨ me'utiyuatɨ: —'E'e, 'ekɨ tuki pemɨka'unakekai, meta haika tukari 'anukayayu hekwame pemɨtawewienikekai.
MAR 15:30 Kuruxitsie kenakaye'a meta keneu'atawikweitsitɨa.
MAR 15:31 Yaxeikɨata mawari wewiwamete tewa'aitɨwamete meta 'inɨarikɨ te'ɨkitamete yunaitɨ me'inanaimatɨ mɨpaɨ mekaniutiyuanekaitɨni: —Hipame kaniwarutawikweitsitɨani, peru pɨkayɨwe mɨyutawikweitsitɨanikɨ yɨkɨmana.
MAR 15:32 Mɨkɨ Kɨritsitu, 'ixaheritsixi tiwa'aitɨwame, kuruxitsie ke'akayani, temixeiyakɨ yuri temɨteta'erienikɨ. Meta 'auriena kuruxitsie memuyewɨkai yaxeikɨa 'axamekatenikɨhɨawekaitɨni.
MAR 15:33 Merikɨte tuka kaniukuyɨre naitsarie kwiepa, tau kɨakamiekaku kaniukuhekɨare.
MAR 15:34 'Anari Ketsutsi karima mɨpaɨ katiniuhiwa waniukikɨ: —'Eruhi, 'Eruhi, ¿rama tsawatani? (taniukikɨ manuyɨne: “Nekakaɨyari, nekakaɨyari, ¿titayari penetiuku'eiri?”).
MAR 15:35 Kepauka hipatɨ mɨkɨ mana hurawa memɨti'ukai memu'enana mɨpaɨ mekaniutiyuani: —Neuxei, 'Eriyaxi kaniutahɨawe.
MAR 15:36 Xewitɨ tewi 'utanautsaka, haa 'itseweme kaniutahɨniya winu matsinakɨ, hakatsie 'iyeka kaneititserieni mɨpaɨ 'utaitɨ: —Xekeneuhayewa, tepɨtaneniereni tsipara 'Eriyaxi kapunuani 'ekaxɨnake.
MAR 15:37 Hikɨ Ketsutsi karima 'utahiwaka, kaniumɨni.
MAR 15:38 Hikɨ 'ixuriki tukita meuwiekai hixɨata kanitsane heimana 'akayuaka.
MAR 15:39 Xeitsienituyari kuyaxi tiwa'aitɨwame Ketsutsi hɨxie muwekai, hiwarieya 'u'enieka mɨpaɨ kaniutayɨni: —Yurikɨ 'ikɨ tewi Kakaɨyari punu'ayatɨkai.
MAR 15:40 Merikɨtsɨ 'ukari mekanitanenierekaitɨni yatewa meti'utɨ, Mariya Mararatanaka, Mariya Kakuwu 'etsimutewi meta Kutse mɨwamamatɨkai, meta Tsarume.
MAR 15:41 Mɨkɨ mekanikuweiyatɨwekaitɨni kepauka Karereyatsie muyeikakai mekatenimikwakaitɨni. Hipatɨta yuwaɨkawatɨ 'ukari 'utɨmana memu'axɨakai Kerutsaremetsie mana mekaniti'ukaitɨni.
MAR 15:42 Tukari memayukuha'aritɨwakaitsie, 'uxa'arieka 'uxipiya tukari maye'anikekaikɨ. Hikɨ 'akayunirɨmekaku
MAR 15:43 Kutse 'arimateyatanaka kaninuani, mɨkɨ 'itsɨkate kaniwanɨkaitɨni 'aixɨa katinimatiwakaitɨni, meta kanita'ikwewakaitɨni Kakaɨyari ti'aitametɨtɨ mayanikɨ. Kaniyuwaɨriya Piratu hetsɨa mɨye'anikɨ, Ketsutsi kaxarieya mitawawirienikɨ.
MAR 15:44 Piratu kaniuhɨxiyani 'ari mumɨkɨ, xeitsienituyari kuyaxi tiwa'aitɨwame kaniutakwewieni yu'aurie, nuaku, Piratu kanita'iwawiya kemɨreutewikai Ketsutsi hemɨka.
MAR 15:45 Kuyaxi tiwa'aitɨwame yatitahɨaweku, kaxari Kutse kaniyetuiriyarieni.
MAR 15:46 Mɨkɨ rinu tsawanayari hekunaneka, 'ekakweka kaxari, tsawanakɨ kanita'eima, teukiyapa kaneitateni 'aitɨa mɨwaye'inieriekaitsie, meta tete kaneumani teukiya kitenietsie.
MAR 15:47 Mariya Mararatanaka meta Mariya Kutse mɨmamayatɨkai matɨa mekanixeiya hakewa meutatekie.
MAR 16:1 Merikɨtsɨ 'uxipiya tukari 'utaxɨku, Mariya Mararatanaka meta Mariya Kakuwu maamaya meta Tsarume yunaitɨ, 'uaye witsimu'ɨa mekaniunaneni, memɨyehukɨ Ketsutsi kaxarieya mehetawirienike.
MAR 16:2 Ximeri kwitɨwa tau 'anatineku tsemana mexɨakame tukaritsie, teukiyapa mekanekɨne.
MAR 16:3 Mɨpaɨ mekateniyuku'iwawiyakaitɨni: «¿Kemɨ'ane tete pɨtatsiheuhɨwirieni teukiyata kitenie meuma?»
MAR 16:4 Mɨkɨtsɨ teté 'akaninekaitɨni. Peru kepauka memunenierixɨ mekanixeiya teté heuhɨiyakame.
MAR 16:5 Hikɨ teukiyapa mekaneutahaxɨani, watserieta 'akaime temaikɨ mekaniuxeiya, mutuxa 'amɨtewi 'anakatɨkɨme, hikɨ mekaniutimamani.
MAR 16:6 Mɨkɨ mɨpaɨ katiniwarutahɨawe: —Xepɨkamamaka. Xeme Ketsutsi xepɨkuwautɨwe natsaretitanaka kuruxitsie mukawiya. Kananukuketɨarieniri, 'uwa pɨkayeka. Paratsɨ xekeneutanenieri hakewa meutatekie.
MAR 16:7 Hikɨ xekenehu, mɨpaɨ xeketeniwaretahɨawi teyɨ'ɨkitɨwametemama meta Pekuru: “Mɨkɨ petɨari Karereyatsie paitɨ. Mana xekaneixeiyakuni, yemekɨ kemɨtixe'utahɨawixɨ”.
MAR 16:8 Hikɨ teukiyapa mewayekɨneka mekaniyuta'una, me'utiyɨyɨakatɨ meta memamatɨ. Xeimetɨma 'atsimepɨkate'utahɨawixɨ memɨmamakaikɨ.
MAR 16:9 Hikɨ tsemana mexɨakame tukaritsie 'anutaniereka Ketsutsi ximeri, matsiɨkɨtɨ kanayuyeitɨani meri Mariya Mararatanaka 'ixeiyakaku. Meripaitɨ kakaɨyarixi 'axamemɨ'anene 'atahutatɨ memiwiyakai, Ketsutsi mɨwarayenɨ'a, mɨkɨ Mariya kanihɨkɨtɨkaitɨni mixei.
MAR 16:10 Mɨkɨ heyaka, yakatiniwarutaxatɨani mɨkɨ hamatɨana memu'uwakai, memuyuhiweriekai meta memutitsuanakai.
MAR 16:11 Peru mɨkɨ me'u'enanakatɨtɨ kename 'ayenierekai, kename mɨkɨ 'ixeiyakai, yuri mepɨkate'ita'eriri.
MAR 16:12 'Arike matsiɨkɨtɨ yɨkɨ'anetɨ kanayuyeitɨani, yuhutatɨ mɨkɨ yeutapai me'uyehukaku wahɨxie.
MAR 16:13 Mɨkɨ yu'utɨma mekanekɨne, hipame teyɨ'ɨkitɨwamete mekateniwarutaxatɨani kemɨtiuyɨ. Mɨkɨta 'akuxi yuri mepɨkatewaruta'eriri.
MAR 16:14 'Imatɨriekata matsiɨkɨtɨ kanayuyeitɨani tamamata heimana xewi teyɨ'ɨkitɨwamete me'ixeiyakaku metekwakaku. Kaniwarutatieni yuri memɨkate'eriekaikɨ, yu'iyaritsie memɨtsetse'ikaikɨ, yuri memɨkatewaruta'eririkɨ mɨkɨ memixei 'anukukeku.
MAR 16:15 Hikɨ mɨpaɨ katiniwarutahɨawe: «Naitsarie kwiepa xekeneutayeixɨa, niuki 'aixɨa manuyɨne xekeniwakuxaxatɨwani yunaime keyupaɨmetɨ memunetɨarie.
MAR 16:16 Kemɨ'ane yuri mɨtita'erieni mɨka'ɨyarieni, mɨkɨ kanitawikweitsitɨariemɨkɨ, kemɨ'ane yuri mɨkati'erie, 'itsɨkame kanitakwewimɨkɨ hetsiena mɨrahɨiyanikɨ.
MAR 16:17 'Ipaɨ 'anenetɨ 'inɨarite kanitixuawerimɨkɨ hakewa meme'uwa mɨkɨ yuri memɨte'erie, nehetsɨa memɨmiemetekɨ mekaniwarayenɨ'axɨakuni kakaɨyarixi 'axamemɨ'anene, mekanitiniukuni niuki mɨhehekwakɨ,
MAR 16:18 kuterixi xɨka mewaranuku'ɨni, mɨmɨya xɨka me'anu'ieni, tixaɨtɨ 'atsipɨkatiwayurieni, tekwikwikate wahetsie xɨka me'utimeni mɨkɨ 'aixɨa meteheu'erietɨ mepakɨne».
MAR 16:19 Merikɨtsɨ Ti'aitame Ketsutsi mɨpaɨ tiwarutahɨaweka, taheima kananutiwitɨkieni, Kakaɨyari tserieta kanayerɨni.
MAR 16:20 Naitsarie mekaneutayeixɨani mɨkɨ metekuxatatɨ, Ti'aitame waɨkawa kaniwaparewiekaitɨni kememɨte'uximayakai waniuki tseiriyatɨ 'inɨari kemɨtiwapitɨakai. Mɨpaɨ xeikɨa kani'aneni.
LUK 1:1 Yumɨiretɨ mekaniuyuwaɨriya memɨteti'utɨanikɨ naime hepaɨtsita kemɨtiuyɨ kemɨraye'a tatsata,
LUK 1:2 yemekɨ kememɨtate'uxatɨa mɨkɨ matɨari paitɨ memunenierixɨ, nɨ'aritsixi memakɨ niuki 'aixɨa manuyɨne memɨkuxata.
LUK 1:3 Neta, naitɨ kemɨtiuyɨ matɨari paitɨ nekatiniutiwauni kemɨtiwayakɨ neyukweriwayurietɨ. 'Ayumieme, pemɨmariwe Teukiru 'aku, nepɨnewaɨriya xexuime naime nemɨmaraka'utɨirienikɨ,
LUK 1:4 mɨpaɨ yurikɨ yapemɨretimanikɨ kemɨtiyuri 'ikɨ niuki pemuta'ɨkitɨarie.
LUK 1:5 Merikɨtsɨ kepauka Herurexi mɨti'aitametɨkai Kureya kwieyaritsie, mawari wewiwame 'akaniuyeikakaitɨni Tsakariyaxi titewatɨ, mawari wewiwame 'Awiyaxi teɨterimama wahamatɨa katini'uximayakaitɨni. 'Ɨyaya 'Eritsaweti mɨkɨta 'Aruni nuiwarieyatsie mieme kanihɨkɨtɨkaitɨni.
LUK 1:6 Yunaitɨ heitseriemekɨ yamekateniyuriekaitɨni Kakaɨyari hɨxie. Yamekatenikahukaitɨni Ti'aitame kemɨti'aitakai naimetsie, wahetsie karahɨiwakaku.
LUK 1:7 Nunutsi mepɨkahexeiyakai 'Eritsaweti mɨkayɨwekaikɨ meta mekani'ukirawetsixitɨkaitɨniri.
LUK 1:8 Merikɨtsɨ heiwa Tsakariyaxi mawari wewiwametɨtɨ katini'uximayakaitɨni Kakaɨyari hɨxie kepauka 'Awiyaxi teɨterimama wahetsie mɨtiunakixɨ.
LUK 1:9 Mawari wewiwamete kemɨtiwayeiyaritɨkai, hetsiena katiniunake heiwa Ti'aitame tukita meutahanikɨ pɨtsi mɨtaiyakɨ.
LUK 1:10 Kepauka maye'a pɨtsi mɨtaiyakɨ tukita, yunaitɨ teɨteri takwa mekaniyunenewiekaitɨni.
LUK 1:11 Hikɨ 'ana Tsakariyaxi niuki tuayame kaniuxeiya Ti'aitame hetsɨa mieme mana 'utiweme mexa pɨtsi taiyame tserieta.
LUK 1:12 Tsakariyaxi 'ixeiyatɨ kaniuyuitɨarieni yu'iyaritsie, kaniutimani.
LUK 1:13 Hikɨ niuki tuayame mɨpaɨ katinitahɨawe: —Pepɨkamaka, Tsakariyaxi 'aku, 'anenewieri kaniu'enierieni. 'A'ɨya 'Eritsaweti nunutsi kanayexeiyamɨkɨ 'aniwetɨme, Wani pekatiniterɨwamɨkɨ.
LUK 1:14 Pekani'atemawiekamɨkɨ waɨkawa, 'a'iyari kwini mieme ninaki'akamɨkɨ, yumɨiretɨ mekaniyutemamawiekakuni kepauka mɨtinuiwa,
LUK 1:15 kanimariwemɨkɨ Kakaɨyari hɨxie. Kaxie winuyari yatɨni xeime winu pɨkaye'eni, 'Iyari Mɨtiyupata kaniwiyamɨkɨ mɨtinuiwatsie paitɨtɨ.
LUK 1:16 'Ixaheritsixi teɨteriyari yumɨireme ta'aurie kaniwaraxɨriemɨkɨ, Ti'aitame memayexeiyanikɨ yukakaɨyari.
LUK 1:17 Mɨkɨ meri kananuyeyerɨmɨkɨ, Ti'aitame hɨxie, 'Eriyaxi hepaɨ tiuka'iyaritɨ tɨrɨkariyaya hexeiyatɨ, wa'ukiyarima ta'aurie kaniwaraxɨriemɨkɨ yɨtɨriyama memɨwara'eriwanikɨ meta mɨkɨ memɨkaheu'enana ta'aurie kaniwaraxɨriemɨkɨ mɨkɨ heitseriemekɨ yamemɨtekahu wahepaɨ memɨteyɨkɨhɨawenikɨ. Mɨpaɨ katiniwakuha'aritɨamɨkɨ teɨteri, Ti'aitame memɨkwewiekakɨ.
LUK 1:18 Hikɨ Tsakariyaxi mɨpaɨ niuki tuayame katiniutahɨawe: —¿Ke'aneme 'inɨarikɨ yanepɨtimaika? Nekani'ukiratsitɨniri meta ne'ɨya tukarieya ranutitɨari.
LUK 1:19 Hikɨ niuki tuayame mɨpaɨ katinitahɨawe: —Ne Kɨrawieri nekanihɨkɨtɨni, Kakaɨyari hɨxie nekaniuweni. Yanemɨmatitahɨawekɨ nekaneyenɨ'arieni, nemɨmatsitaxatɨanikɨ 'ikɨ niuki 'aixɨa manuyɨne.
LUK 1:20 Peru, 'ekɨ yuri pemɨkatiuta'erikɨ neniukitsie, kayuwatɨ pepɨtiyerɨni, pekaniuwetɨ pekanayeimɨkɨ mexi ka'aye'aweni. Pepɨka'utaniukani kepaukake tukari maye'ani naitɨ yamɨtiyɨni.
LUK 1:21 Merikɨtsɨ teɨteri Tsakariyaxi mekanikwewiekaitɨni, mekani'iyarixiekaitɨni 'emɨreutewikaikɨ tukita.
LUK 1:22 Hikɨ kepauka muwayetɨa kaniyutatexieni warahɨawetɨ, hikɨ mɨkɨ yamekatenetimani kename tixaɨtɨ tiuxei tukita, yumamakɨ xeikɨa kaniwaku'inɨaritɨwakaitɨni, 'aniukateitɨni kaniuwetɨ.
LUK 1:23 Hikɨ heutipareku 'uximayatsikaya, yukie kaneyani.
LUK 1:24 Hikɨ 'ana reutiyetana 'ɨyaya 'ayehukatɨ kanayani 'Eritsaweti, hikɨ kaniyu'awietakaitɨni 'auxɨwi metseri mɨpaɨ 'utaitɨ:
LUK 1:25 «Kamɨ, 'ipaɨ katiniuyurieni Ti'aitame, yuwaɨriyatɨ 'aixɨa mɨnetsiyurienikɨ, teɨteri memɨkanetsinanaimakakɨ».
LUK 1:26 Merikɨtsɨ 'ataxewirieka metseritsie Kakaɨyari yuniuki tuayame Kɨrawieri kaniutanɨ'ani, Karereya kwieyaritsie kiekari Natsareti mɨrakutewatsie,
LUK 1:27 'ɨimari mɨyuxewikai hetsɨa kanitanɨ'ani Mariya mɨtitewakai hetsɨa, kanitiwikieximekaitɨni, 'uki Kutse titewatɨ kanitiwitɨnikekaitɨni, Kutse Rawiri kaninuiwarieyatɨkaitɨni.
LUK 1:28 Hikɨ Mariya hetsɨa heutahaka niuki tuayame, mɨpaɨ katinitahɨawe: —Ke'aku. Ti'aitame 'aixɨa katiniuka'iyarini 'ahetsiemieme, 'ahamatɨa puyeika.
LUK 1:29 Mɨkɨ yu'iyaritsie kaniuyuitɨarieni, yatiniku'eriwakaitɨni titayari mɨpaɨ mɨtiwaɨritɨa.
LUK 1:30 Niuki tuayame mɨpaɨ katinitahɨawe: —Pepɨkamaka, Mariya 'aku. Kakaɨyari 'aixɨa pɨtiuka'iyari 'ahetsiemieme.
LUK 1:31 Hikɨri pe'ayehukatɨ pekanayeimɨkɨ, 'ukitɨme pekanitiniwemɨkɨ meta Ketsutsi pekatiniterɨwamɨkɨ.
LUK 1:32 Mɨkɨ mariwetɨ kanayeimɨkɨ, 'Amutewi Nu'aya katiniuterɨwarɨwamɨkɨ. Ti'aitame Kakaɨyari kanipitɨamɨkɨ Rawiri 'uwenieyatsie mayerɨnikɨ, tutsieya.
LUK 1:33 'Ixaheritsixi teɨteriyari katiniwata'aitɨamɨkɨ yuheyemekɨ. Kemɨtita'aita pɨkaheutipare hatsuaku.
LUK 1:34 Hikɨ Mariya mɨpaɨ niuki tuayame katiniutahɨawe: —Merikɨte, ¿kepaɨtɨtɨ mɨpaɨ pɨtiyɨni, 'uki nepɨkamate?
LUK 1:35 Niuki tuayame mɨpaɨ katinitahɨawe: —'Iyari Mɨtiyupata 'ahetsie kaninuamɨkɨ, kemɨ'ane 'Amutewi yutɨrɨkariyakɨ kamani'etɨriwiyamɨkɨ. 'Ayumieme nunutsi mɨtinuiwa kanipatsiemɨkɨ Kakaɨyaritsie mieme, Kakaɨyari Nu'aya katiniuterɨwarɨwamɨkɨ.
LUK 1:36 Kamɨ, 'a'iwa yatewa 'Eritsaweti 'ayehukatɨ kanayani 'ukaratsitɨtɨri, 'ataxewime metseri kaniyurieka 'iya kaniweweme memɨxatakai.
LUK 1:37 Kakaɨyari pɨkayutatexieni, naimekɨ kaniyɨweni.
LUK 1:38 Mariya mɨpaɨ katinitahɨawe: —Merikɨte, ne Ti'aitame nekatini'uximayatameyatɨni. Kepemaine yaketiuyɨni. Hikɨ niuki tuayame kaneyani.
LUK 1:39 Hikɨ mɨixa tukari ka'anukayeiwekaku yukuha'aritɨaka kaneyani Mariya, yumexɨitɨatɨ kiekaritsie kaneta'ani mɨhɨriyatsie Kureya kwieyaritsie.
LUK 1:40 Tsakariyaxi kiita heutahaka 'Eritsaweti kaniutawaɨritɨani.
LUK 1:41 Merikɨtsɨ 'Eritsaweti kepauka Mariya waɨritsikaya mu'eni, nunutsi neukuyuaxɨani yuriepana. Hikɨ 'Iyari Mɨtiyupata kaniwiya 'Eritsaweti.
LUK 1:42 Mɨpaɨ kaniutayɨni karima: —Waɨkawa 'ekɨ 'aixɨa pepɨ'itɨarie, hipatɨ 'ukari temɨka'itɨarie hepaɨ, meta 'aixɨa kani'itɨariemɨkɨ kemɨ'ane pemɨtinuiwitɨani.
LUK 1:43 ¿Nehetsie ketinake neti'aitɨwame warutsieya mɨnetsi'iwatamiekɨ?
LUK 1:44 Kamɨ, 'awaɨritsika ne'u'enieku, nunutsi yutemawietɨ neukuyuaxɨani neyuriepa.
LUK 1:45 'Aixɨa pekani'itɨariemɨkɨ yuri pemɨtiuta'erikɨ kename 'aye'ani naitɨ kepemɨtiutahɨawarie, Ti'aitame kemɨmaretahɨawixɨ.
LUK 1:46 Hikɨ Mariya mɨpaɨ kaniutayɨni: —Ne'iyari mɨpaɨ paine, Ti'aitame kanitɨrɨkaɨyeni,
LUK 1:47 ne'iyari kaniyutemawieka Kakaɨyari hetsie Netsiwikweitsitɨwame,
LUK 1:48 kaneniuxeiya ti'uximayatameya kenemɨtihɨkɨ hetsiena mieme tsepa tixaɨtɨ nemɨkatihɨkɨ. Kamɨ, 'uxa'a warie yunaitɨ nuiwarite 'aixɨa ne'itɨariekame mekaneni'eriekakuni,
LUK 1:49 kemɨ'ane mɨtɨrɨkaɨye mariwemekɨ kaneniuyurieni. Mɨkɨ Patsiekame kanixatsiwani.
LUK 1:50 Kaniwanenimayaka yunaitɨ memeyemakaxe, meta waniwema kaniwanenimayaka.
LUK 1:51 Yɨkɨmana kemɨtiyuriene kanimatsiɨkɨni kemɨtitɨrɨkaɨye, kaniwareutaweiyaxɨani mɨkɨ memɨteyukatawe'erie yu'iyaritsie kememɨteku'eriwa.
LUK 1:52 Kwiepa te'aitamete kaniwarunawairieni tita memɨte'aita, mɨkɨ tixaɨ memɨkatehɨme pɨta kaniwaruhɨritɨani waɨkawa.
LUK 1:53 Memeuhakakwikukai kaniwarutihɨniya 'aixɨa mɨti'anekɨ, peru memeuka'ukai kaniwareutanɨ'axɨani memamaweme.
LUK 1:54 Kanitsutɨani tatsiparewietɨ 'ixaheritsixi teɨteriyari hetsɨana mieme temɨte'uximayatamete, he'eriwatɨ kemɨtiwarutahɨawixɨ ta'ukiyarima, 'Apɨrahami kaninenimayaka, meta kataninenimayaka yuheyemekɨ tame hetsiena temɨyekɨ.
LUK 1:56 Merikɨtsɨ Mariya 'Eritsaweti hetsɨa kaniukateitɨni 'etsiwatɨkaku haika metseri, 'arike yukie kaneyani.
LUK 1:57 Merikɨtsɨ tukari kanaye'ani 'Eritsaweti mɨtiniwenikɨ, 'ukitɨme kaniutiniweni.
LUK 1:58 Hikɨ 'ahurawatari maremama yunaitɨ mete'utamarieka Ti'aitame waɨkawa kemɨtitanenimayataxɨ, hamatɨana mekaniyutemamawiekaitɨni.
LUK 1:59 Hikɨ 'atahairieka tukaritsie mekaniu'axɨani me'i'inɨaritɨanike nu'etsi huriyutsixi waxitekiyakɨ. Tsakariyaxi mekateniterɨwakekaitɨni 'ukiyarieya hepaɨ,
LUK 1:60 'ana warutsieya mɨpaɨ kaniutayɨni: —Tixaɨtsietɨ. Wani katinitewakamɨkɨ pɨta.
LUK 1:61 Mɨkɨ mɨpaɨ mekatenitahɨawe: —Peru 'amare mɨpaɨ titewatɨ pumawe.
LUK 1:62 Yumamakɨ mekanitahɨawe paapaya, kemɨtinake mɨpaɨ mɨtiterɨwarienikɨ.
LUK 1:63 Xapa 'uta'iwauka, mana mɨpaɨ katiniu'utɨani: «Wani katinitewaka». Yunaitɨ mekaniuhɨxiyani.
LUK 1:64 Hikɨ yapauka nenieya kaniuxɨnarieni, kaniutaniuni, hikɨ 'aixɨa 'utaitɨ Kakaɨyari hepaɨtsita kanayani.
LUK 1:65 'Ahurawatari yunaitɨ mekanimamakaitɨni, meta naitsarie Kureya hɨriyaritsie kemɨtiuyɨ mɨpaɨ katinikuxaxatsiwakaitɨni.
LUK 1:66 Yunaitɨ memɨ'enanakai mekaniyu'iyaritɨakaitɨni mɨpaɨ meteyɨkɨhɨawetɨ: «¿Ke'anetɨ payani 'ikɨ nunutsi?» Mɨkɨ meta, Ti'aitame yɨtɨrɨkariyakɨ kaniparewiekaitɨni.
LUK 1:67 'Ana Kakaɨyari 'Iyarieya Mɨtiyupata 'iwiyakaku nunutsi 'ukiyarieya Tsakariyaxi kaniutaniuni Kakaɨyaritsie mieme mɨpaɨ 'utaitɨ:
LUK 1:68 «'Aixɨa ketikɨhɨawarɨwani Ti'aitame, kemɨ'ane 'ixaheritsixi mɨtakakaɨyari. Kanitsutɨani yuteɨterima wa'ɨwiyatɨ, 'aixɨa 'iyurienetɨ memɨxɨnarienikɨ.
LUK 1:69 Tatsiwikweitsitɨwame tɨrɨkaɨyeme kataneyenɨ'airieni, Rawiri kie mieme, ti'uximayatsiriwame
LUK 1:70 (meripaitɨ kemutayɨkai yametekuxatakaku niukametemama memɨpatsie hetsiena mieme),
LUK 1:71 mɨtatsitawikweitsitɨanikɨ mɨkɨ memɨtatsi'aye'unie memɨkatatsi'a'iwakɨ, meta mɨkɨ memɨtatsi'uxiwe'erie memɨkatatsi'a'iwakɨ,
LUK 1:72 mɨpaɨ mɨtiwatinenimayatakɨ ta'ukiyarima kemɨraye'eri tɨratu mɨpatsie kemɨtiuwewi.
LUK 1:73 Kemɨtiuyuhɨritɨa yatikɨhɨawetɨ ta'ukiyari 'Apɨrahami:
LUK 1:74 Kename tatsipitɨanikekai tekamamatɨ 'atemu'uwanikɨ, tatsi'utawikweitsitɨaka mɨkɨ memɨtatsi'aye'unie wahetsɨa, temeyexeiyanikɨ kemɨtinake,
LUK 1:75 hetsiena mieme tepatsietɨ, heitseriemekɨ yatetekahutɨ, hɨxiena te'u'uwatɨ mexi te'ayeneniereni.
LUK 1:76 'Ekɨ meta, nunutsi 'aku, kemɨ'ane 'Amutewi niukameya pekatiniuterɨwarɨwamɨkɨ. Karikɨ Ti'aitame pepanukuhaitɨiya huyeya 'aixɨa pemɨyurienikɨ.
LUK 1:77 Teɨterimama wikweitsitɨarika pekaniwatahekɨatɨamɨkɨ, kemɨtiwareuyehɨwirieni mɨkɨ 'axamemɨte'uyuri pehaitɨ.
LUK 1:78 Mɨpaɨ katiniyuriemɨkɨ takakaɨyari mɨtiyukanenimayakɨ. Mɨpaɨ kemɨ'ane taheima mɨmieme kaninuamɨkɨ.
LUK 1:79 Mɨwahekɨariwiyakɨ mɨkɨ yɨwipa memu'uwa, meta mɨkɨ mekwi'iwarɨmetɨ memɨyɨriyarie niwahekɨariwiyamɨkɨ, ta'ɨkate katanitseiriyamɨkɨ temeu'uwanikɨ hake 'aixɨa temɨtetaxeiyanikɨ Kakaɨyari matɨa».
LUK 1:80 Merikɨtsɨ nunutsi kaniwerekaitɨni, 'Iyarieya tɨrɨkaɨyetɨ kanayani, makumawetsie kaneyeikakaitɨni mexi tukarieya ka'aye'awekai 'akuxi matsiɨkɨtɨ mayanikɨ 'ixaheritsixi wahɨxie.
LUK 2:1 Merikɨtsɨ 'ana 'aitsika neutanɨ'ariexɨani Tsetsaxi 'Akutsitu hetsɨa mieme, mɨpaɨ 'utaitɨ, yunaitɨ kwiepa memɨtama xapatsie memayuka'utɨanikɨ.
LUK 2:2 (Mɨkɨ matɨari teɨteri kememɨte'aka'utsie pɨtiuyɨ kepauka Tsireniyu mɨhɨritɨariekai Tsiriya kwieyaritsie).
LUK 2:3 Hikɨ yunaitɨ mekaneutayeixɨani memayuka'utɨaxɨanikɨ yuxexuitɨ yukiekaritsie.
LUK 2:4 Hikɨ Kutse Karereya kwieyaritsie Natsareti mɨrakutewatsie kanayeyani. Kureya kwieyaritsie kaninuani Rawiri kiekariena Wereni mɨrakutewatsie. Rawiri kie kanimiemetɨkaitɨni, Rawiri nuiwarieya kanihɨkɨtɨkaitɨni.
LUK 2:5 Maka'utɨarienikɨ kaneyeyani Mariya 'awitɨtɨ mɨkɨ mayehukakaikɨ. 'Ɨyaya kanayanikekaitɨni.
LUK 2:6 Mana mexi me'u'uwakai, tukarieya kanaye'ani mɨtiniwenikɨ.
LUK 2:7 Hikɨ yumatɨari kaniutiniweni. Tuwaxatekɨ kaniku'eima, wakaitsixi wakanuwatsie kanikateni mɨkaxuawekaikɨ wahetsiemieme memɨwa'axɨanikekaitsie.
LUK 2:8 Merikɨtsɨ 'ana muxatsi wahɨwemete mana mekaniu'uwakaitɨni, yeuta meniwahɨtɨwekaitɨni yumuxatsi yɨwikɨta.
LUK 2:9 Hikɨ wahɨxie niutakeni niuki tuayame Ti'aitame hetsɨa mieme. Wa'aurie nakuxawatɨkaitɨni Ti'aitame hekɨariyayakɨ, waɨkawa mekaniutimamani.
LUK 2:10 Peru niuki tuayame mɨpaɨ katiniwarutahɨawe: «Xepɨkamamaka. Hikɨ nenixetaxatɨamɨkɨ niuki 'aixɨa manuyɨne, waɨkawa kanixuawekamɨkɨ temawierika yunaime teɨteri wahetsiemieme.
LUK 2:11 'Ikɨ tɨkaritsie tiyuwikweitsitɨwame kanetinuiwa xehetsiemieme, Rawiri kiekariena katineyɨni, Kɨritsitu kanihɨkɨtɨni, Ti'aitame kanihɨkɨtɨni.
LUK 2:12 'Ikɨ 'inɨarikɨ xekaneitimaikuni: Nunutsi xekanexeiyakuni tuwaxatekɨ 'eimeme, wakaitsixi wakanuwatsie heyekaime».
LUK 2:13 Hikɨ yapauka niuki tuayame 'aurie mekaniuti'uni muyuawitsie miemete yumɨiretɨ, 'aixɨa me'utiyuatɨ Kakaɨyari hepaɨtsita, mɨpaɨ me'utiyuatɨ:
LUK 2:14 «Taheima witsikatinikɨhɨawarɨwani Kakaɨyari, kwiepa 'aixɨa mekatenixeiyariekuni teɨteri mɨkɨ wakɨmana mɨnaki'a».
LUK 2:15 Merikɨtsɨ niuki tuayamete muyuawitsie meheutiyunixɨaku, mɨpaɨ mekateniyɨkɨhɨawekaitɨni muxatsi wahɨwemete: «Hikɨmɨtsɨari tepɨyehu Wereni paitɨ, tepi'ixɨariyu kemainekai, Ti'aitame kemɨtatiutahɨawixɨ».
LUK 2:16 Meyumexɨitɨatɨ mekanekɨne, mewaruta'iwauka Mariya mame Kutse mekaniwarutaxeiya, nunutsi meta wakaitsixi wakanuwatsie yekaime.
LUK 2:17 Mewaruxeiyaka mekatenikuxatakaitɨni kememɨte'utahɨawarie nunutsi hepaɨtsita.
LUK 2:18 Yunaitɨ memɨ'enanakai mekanihɨxiyakaitɨni kememɨtewarutahɨawixɨkɨ muxatsi wahɨwemete.
LUK 2:19 Matsi Mariya ni'ɨwiyakaitɨni yu'iyaritsie 'ikɨ naime, yu'iyaritɨatɨ hepaɨtsitana.
LUK 2:20 Hikɨ mekanekɨne muxatsi wahɨwemete 'aixɨa metekuxatatɨ Kakaɨyari hepaɨtsita naime kememɨte'uxeikɨ naime kememɨte'u'enikɨ, naitɨ yakatiniuyɨni kememɨte'utahɨawariekai.
LUK 2:21 Merikɨtsɨ 'atahairieka tukari mekani'inɨaritɨani huriyutsixi teɨteriyari waxitekiyakɨ. 'Ana Ketsutsi katiniuterɨwarieni, niuki tuayame kemɨtiterɨwaxɨ yumaamatsie ka'ayekaiku 'akuxi.
LUK 2:22 Metatsiere kepauka tukari maye'a, Muitsexi kemɨtiu'aitakai niwekame hepaɨtsita memɨyu'itienikɨ, Kerutsareme mekanekɨne nunutsi meheyetuanike Ti'aitame hetsɨa.
LUK 2:23 Mɨpaɨ katine'uka 'inɨari xapayaritsie, Ti'aitame meripaitɨ kemainekai: «Yunaitɨ 'ukitsi matɨari memɨtinunuiwa, mɨkɨ mekanipatsiekakuni Ti'aitame hetsiemieme».
LUK 2:24 Meta mekaniwarutimawa Ti'aitame kemainekai 'inɨari xapayaritsie kemɨre'uxa: «Kukuruxi xeiparitsi yatɨni weuraixi tɨrixi yuhutame».
LUK 2:25 Hikɨ tewi Kerutsareme kaniukateitɨni Tsimiyuni titewatɨ, mɨkɨ heitseriemekɨ yatikamietɨ Kakaɨyari kanayexeiyakaitɨni, kanikwewiekaitɨni 'ixaheritsixi teɨteriyari wanɨtɨwame. 'Iyari Mɨtiyupatakɨ kanihɨnekaitɨni,
LUK 2:26 mɨpaɨ katiniuhekɨatsitɨiyariekaitɨni 'Iyari Mɨtiyupatakɨ, kename kwitɨ kamɨnikekai, 'ixeiyameke Ti'aitame hetsɨa mieme Kɨritsitu, 'anarike kanimɨnikekaitɨni.
LUK 2:27 Hikɨ 'Iyari 'inɨku, huriyutsixi watukita kaninuani. Kepauka Ketsutsi nunutsi paapamama memeutahaxɨa me'eye'atɨanike kemɨtiwayeiyaritɨkai, huriyutsixi kemɨtiwayeiyari, 'inɨari niukiyaritsie kemɨre'uxa.
LUK 2:28 'Ana Tsimiyuni kanenutuni, 'aixɨa kaniutayɨni Kakaɨyari hepaɨtsita, mɨpaɨ 'utaitɨ:
LUK 2:29 «Hikɨrixɨa nekutsiyari 'aku, pepeye'atɨa 'aniuki, ne'iyaritsie neka'uximatɨariekame keneneuka'uxipitɨa ti'a'uximayatsiriwame.
LUK 2:30 Hikɨrixɨa nekɨmana nepɨtiuxei kepemɨtiwawikweitsitɨani teɨteri,
LUK 2:31 nepixei tita pemɨtiha'aritɨa yunaime teɨteri wahɨxie:
LUK 2:32 Kaniwahekɨariwiyamɨkɨ hipame nuiwarite meta witsite'aneneme katanayeitɨamɨkɨ 'ateɨterima 'ixaheritsixi».
LUK 2:33 Hikɨ paapaya meta maamaya mekaniyu'iyaritɨakaitɨni mɨpaɨ mainekaikɨ hepaɨtsitana.
LUK 2:34 'Aixɨa xepɨ'itɨarieka kaniutayɨnita Tsimiyuni, mɨpaɨ Mariya katiniutahɨawe nunutsi maamaya: «Kamɨ 'ikɨ nunutsi yumɨiretɨ 'ixaheritsixi mematixɨrienikɨ meta yumɨiretɨ memanuku'unikɨ kani'ayumiemetɨni, 'inɨari kaniyɨmɨkɨ kaniniukimariekamɨkɨ,
LUK 2:35 'Ekɨta 'a'iyaritsie pekanitsekiemɨkɨ hiwerikakɨ, kumu 'ixipara kemɨtiyutsewe. Mɨkɨ kemɨtiyurieneni, yumɨiretɨ mematsiɨkɨtɨ mekanakɨnikuni kememɨteyɨkɨhɨawe yu'iyaritsie».
LUK 2:36 Xewitɨta 'akaniuyeikakaitɨni 'ukaratsitɨtɨ Hana titewatɨ, mɨkɨ Kakaɨyari niukameya kanihɨkɨtɨkaitɨni, Penuheri kaninu'ayatɨkaitɨni, 'Atsexi nuiwarieyatɨtɨ. Kanitseɨyekaitɨni, nauka tewiyari heimana nauka wiyari kanihɨkaitɨni, 'utiwikieka 'atahuta wiyari piteɨtakai yɨkɨna,
LUK 2:37 'umɨku yuxaɨta 'eniukateitɨni. Tuki kuraruyarita pɨkawayeyeikakai matsi yuhakietɨ yunenewietɨ pɨ'ayumiemetɨkai tukarikɨ tɨkarikɨ.
LUK 2:38 Hikɨ 'ahurawa 'uyaka pamɨpariyutsi kanipitɨani Kakaɨyari, Ketsutsi hepaɨtsita tiniwakuxaxatɨwakaitɨni Kerutsaremetari memɨta'ikwewakai memɨxɨnarienikɨ yunaitɨ.
LUK 2:39 Hikɨ meheye'atɨaka naime kemɨre'uxa 'inɨari xapayaritsie, Ti'aitame kemainekai meripaitɨ, Karereyatsie mekanekɨne, yukiekaritsie mekaneta'axɨani Natsareti mɨrakutewatsie.
LUK 2:40 Merikɨtsɨ nunutsi kaniwerekaitɨni tɨrɨkaɨyetɨ timaiwetɨ kanayeiximekaitɨni, Kakaɨyari 'aixɨa pɨtiuka'iyarikai hetsiena mieme.
LUK 2:41 Merikɨtsɨ xexuime wiyaritsie paapamama Kerutsareme mekaneta'axekaitɨni 'ixɨararipa kepauka meme'eriwakai, Kakaɨyari kemɨtiwarayewitɨ yuteɨterima.
LUK 2:42 Hikɨ kepauka tamamata heimana huta wiyari mɨhɨkai, mana mekaneutiyune, teɨteri kemɨtiwayeiyaritɨkai 'ixɨararipa.
LUK 2:43 Hikɨ heutipareku, yu'utɨma mehahuximekaku, Ketsutsi Kerutsareme kaniyuhayewa, 'atsimekatemaikaku paapamama.
LUK 2:44 Teɨteri watsata 'uyeikame me'erietɨ, xeitukari mekaniuhukaitɨni. 'Ana yu'iwama yumarema wahetsɨa mekanitiwautɨkɨne.
LUK 2:45 Meka'itaxeiyawawetɨ, Kerutsareme mekanakunuaxɨani me'ikuwautɨwetɨ.
LUK 2:46 Hikɨ hairieka tukari menitaxeiya tuki kuraruyarita 'ayekaime, te'ɨkitamete wahixɨapa 'ukaime. Kaniwa'eniekaitɨni kaniwaku'iwawiyakaitɨni.
LUK 2:47 Yunaitɨ memi'eniekai mekanihɨxiyakaitɨni timaiwemekɨ kemɨtiwaku'eiyakai.
LUK 2:48 Hikɨ paapamama me'ixeiyatɨ mekani'iyarixiekaitɨni, maamaya mɨpaɨ katinitahɨawe: —Neniwe, titayari mɨya petatiuyuri. Tepɨmatsikuwautɨwe tetahiwerietɨ 'apaapa matɨa.
LUK 2:49 Mɨpaɨ katiniwarutahɨawe: —'E'e, kari xepɨnetsikuwautɨwekai. ¿Tamɨ, 'atsixekatemaikai, meuyewetse ne'ukiyari kiya hepaɨtsita nemɨ'ayumiemetɨnikɨ?
LUK 2:50 Mɨkɨ 'atsimepɨkateheitima niukieyatsie kemainekai.
LUK 2:51 Hikɨ wahamatɨa kaneyani, Natsareti mekaneta'axɨani, kememaitɨkatei yakatinikamiekaitɨni. Maamaya yu'iyaritsie ni'ɨwiyakaitɨni 'ikɨ naime.
LUK 2:52 Ketsutsi timaiwetɨ kanayeiximekaitɨni, kaniwerekaitɨni, Kakaɨyari meta teɨteri matsi waɨkawa 'aixɨa mekatenixeiyakaitɨni.
LUK 3:1 Merikɨtsɨ 'ana Tiweriyu Tsetsaxi tamamata heimana 'auxɨwi wiyari kaniyuriekaitɨni ti'aitatɨ, Punitsiyu Piratu kuwexinaruri kanihɨkɨtɨkaitɨni Kureya kwieyaritsie, Herurexi kanihɨritɨariekaitɨni Karereya kwieyaritsie mɨti'aitanikɨ, Peripe Herurexi mɨ'iwayatɨkai katini'aitakaitɨni 'Itureya kwieyaritsie meta Tɨrakuniti kwieyaritsie, meta Ritsaniyaxi katini'aitakaitɨni 'Awiriniyatsie,
LUK 3:2 'Anátsi meta Kaipátsi mekanihɨritɨariekaitɨni mawari wewiwamete. 'Ana Kakaɨyari yuniuki Wani kaniupitɨani Tsakariyaxi nu'aya, makumawetsie 'uyeikakaku.
LUK 3:3 Wani naitsarie Kurutani hatuxameyari manuyeka kaniuyeikakaitɨni, mɨpaɨ tikuxatatɨ teɨteri memɨtehayewakɨ 'axameteyurietɨ meta memɨka'ɨyarienikɨ mɨpaɨ mɨtimatsiɨkɨnikɨ kename mete'uhayewaxɨ 'axameteyurietɨ.
LUK 3:4 Yakatiniyurienekaitɨni kemɨre'uxa Kitsariyaxi xapayaritsie, Kakaɨyari niukieyakɨ kemɨtikuxatakai: «Xewitɨ makumawetsie mɨpaɨ pɨrehiwa: “Xekeneukuha'aritɨa Ti'aitame huyeya, xexeurawime huyeya xekeneutiwewi.
LUK 3:5 Naitɨ 'aki kananuparekutɨariexɨamɨkɨ, naitɨ yemuri 'emutɨtɨ 'etsimutɨtɨ 'akuweritɨ kanayeitɨariemɨkɨ. Tita mɨtitutune xexeurawitɨ katinayeimɨkɨ, tita mɨrakutetexiya 'akuharuanitɨ katinayeimɨkɨ.
LUK 3:6 Yunaitɨ teɨteri mepixeiya kemɨtiyuwikweitsitɨwa Kakaɨyari”».
LUK 3:7 Wani mɨpaɨ katiniwakuxaxatɨwakaitɨni teɨteri memɨ'axekai mɨwaka'ɨyakɨ: —Kuterixi waniwema. ¿Kemɨ'ane mɨpaɨ pɨtixe'utahɨawixɨ xemɨyuta'unakɨ kapa 'uxa'atɨniwarie xe'uyehekarienikɨ?
LUK 3:8 Mɨkɨ memɨte'uhayewaxɨ kememɨteyurie wahepaɨ xeketeneyurieka, kemɨreuyewetse. Xepɨka'itsutɨaka yu'iyaritsie mɨpaɨ xeteyɨkɨhɨawetɨ: “Tepɨnaki'eriwa ta'ukiyari temexeiyakɨ 'Apɨrahami”. Mɨpaɨ nepɨtixekɨhɨawe, Kakaɨyari kaniyɨweni 'ikɨ tetexi teɨteri mɨwarayeitɨani 'Apɨrahami niwemama.
LUK 3:9 'Ari hatsa kaniukuha'aritɨarieni kɨyexi maxɨrienikɨ, 'ayumieme naitɨ kɨye 'aixɨa 'anenetɨ mɨka'utixuxuawere kanaxɨriyamɨkɨ, taipa kaneuxɨriyamɨkɨ.
LUK 3:10 Teɨteri mɨpaɨ mekateniku'iwawiyakaitɨni: —¿Kamɨtsɨ keteteyurieka?
LUK 3:11 Mɨpaɨ katiniwarutahɨawe Wani: —Kemɨ'ane huta kamixayari mexeiya, kemɨ'ane mɨkaheixeiya ke'umini, kemɨ'ane 'ikwai mexeiya yaxeikɨa ketiyurieneni.
LUK 3:12 Meta kuwiyexinu hetsiemieme tewawamete mekaniu'axɨani, memɨka'ɨyarienikɨ. Mɨpaɨ mekatenita'iwawiya: —Ti'ɨkitame 'aku, ¿keteteyurieka tame?
LUK 3:13 Mɨkɨ mɨpaɨ katiniwarutahɨawe: —Kexemɨte'u'aitɨarie, heimana mieme xepɨkatewauka.
LUK 3:14 Meta kuyaxi mɨpaɨ mekatenita'iwawiya: —Tameta, ¿keteteyurieka? Mɨkɨ mɨpaɨ katiniwarutahɨawe: —Xepɨkatenawayani, 'itarikakɨ xepɨkawatawiwiyani. Xekenenaki'aka yu'iwarikakɨ.
LUK 3:15 Merikɨtsɨ 'ana teɨteri mekanita'ikwewakaitɨni yu'iyaritsie meyu'iyaritɨatɨ yunaitɨ Wani hepaɨtsita, xɨka mɨkɨ Kɨritsitu hɨkɨtɨni mexɨka katixaɨtɨni, me'utiyuatɨ.
LUK 3:16 Peru Wani mɨpaɨ katiniwarutahɨawe yunaime: —Neri hakɨ nepɨxe'uka'ɨya. Peru 'ukanamieni kemɨ'ane waɨkawa mɨtɨrɨkaɨye, nekatɨrɨkaɨyekaku ne. 'Aixɨa nepɨka'ane nehetsie mɨtinakenikɨ nemiparewiekakɨ ninemenakuwenirienikɨ kakaiya kwitaxiyari. Mɨkɨ pɨta kanixeka'ɨyamɨkɨ 'Iyari Mɨtiyupatakɨ meta kanixe'itimɨkɨ tai kemɨtiyu'itiwa.
LUK 3:17 Kuxari 'itiwame pakwe'e, tɨriku mɨti'itienikɨ kuxari manuyewiwienikɨ, tɨriku kaniti'utamɨkɨ kaxetunitsie, peru kuxariyari pɨta pɨtitaiya tai mɨkatɨwetsie.
LUK 3:18 Matsi waɨkawa kaniwatuikakaitɨni teɨteri, niuki 'aixɨa manuyɨne kaniwakuxaxatɨwakaitɨni.
LUK 3:19 Hikɨ Herurexi mɨkɨ kwieyari kanihɨritɨariekaitɨni mana mɨti'aitanikɨ. Yu'iwa kaniu'ɨyapieni, Heruriya titewakame kaniutiwitɨni, waɨkawa katiniyurienekaitɨni Herurexi 'axatiyurienetɨ, 'ayumieme Wani kanitate'akaitɨni.
LUK 3:20 Hikɨ Herurexi nayuye'atɨani 'axakemɨtiyurienekai, Wani kananutahɨani katsariyanata.
LUK 3:21 Merikɨtsɨ kepauka yunaitɨ teɨteri memuka'ɨyarie, Ketsutsi kaniuka'ɨyarienita. Mexi yunenewiekai, taheima kananakatenire,
LUK 3:22 'Iyari Mɨtiyupata heimana kanakaneni hetsiena kaninuani, kukuru hepaɨ katiniyuxexeiyakaitɨni. Hikɨ xewitɨta taheima mɨpaɨ kanetayɨni: «'Ekɨ pekanineniwetɨni nekamaninaki'erieka, 'akɨmana nekaniyutemawieka».
LUK 3:23 Merikɨtsɨ Ketsutsi xeitewiyari heimana tamamata wiyari yakɨtɨtɨ kanihɨkaitɨni kepauka mitsutɨa mɨpaɨ tiyurienetɨ. Kutse kaninu'ayatɨkaitɨni, mekateniku'eriwakaitɨni, mɨkɨta 'Eri kaninu'ayatɨkaitɨni,
LUK 3:24 mɨkɨta Matati kaninu'ayatɨkaitɨni, mɨkɨta Rewi kaninu'ayatɨkaitɨni, mɨkɨta Meriki kaninu'ayatɨkaitɨni, mɨkɨta Kanahi kaninu'ayatɨkaitɨni, mɨkɨta Kutse kaninu'ayatɨkaitɨni,
LUK 3:25 mɨkɨta Matatiyaxi kaninu'ayatɨkaitɨni, mɨkɨta 'Amuxi kaninu'ayatɨkaitɨni, mɨkɨta Nahumi kaninu'ayatɨkaitɨni, mɨkɨta 'Etsirie kaninu'ayatɨkaitɨni,
LUK 3:26 mɨkɨta Nakahi kaninu'ayatɨkaitɨni, mɨkɨta Mahati kaninu'ayatɨkaitɨni, mɨkɨta Matatiyaxi kaninu'ayatɨkaitɨni, mɨkɨta Tsemehi kaninu'ayatɨkaitɨni, mɨkɨta Kutse kaninu'ayatɨkaitɨni, mɨkɨta Kura kaninu'ayatɨkaitɨni,
LUK 3:27 mɨkɨta Kuhana kaninu'ayatɨkaitɨni, mɨkɨta Xetsa kaninu'ayatɨkaitɨni, mɨkɨta Tsuruwaweri kaninu'ayatɨkaitɨni, mɨkɨta Tsaratieri kaninu'ayatɨkaitɨni, mɨkɨta Nerie kaninu'ayatɨkaitɨni,
LUK 3:28 mɨkɨta Meriki kaninu'ayatɨkaitɨni, mɨkɨta 'Arie kaninu'ayatɨkaitɨni, mɨkɨta Kutsani kaninu'ayatɨkaitɨni, mɨkɨta 'Erimurami kaninu'ayatɨkaitɨni, mɨkɨta 'Eri kaninu'ayatɨkaitɨni,
LUK 3:29 mɨkɨta Kutsuhe kaninu'ayatɨkaitɨni, mɨkɨta 'Eriyetsexi kaninu'ayatɨkaitɨni, mɨkɨta Kurimi kaninu'ayatɨkaitɨni, mɨkɨta Matati kaninu'ayatɨkaitɨni, mɨkɨta Rewi kaninu'ayatɨkaitɨni,
LUK 3:30 mɨkɨta Tsimiyuni kaninu'ayatɨkaitɨni, mɨkɨta Kura kaninu'ayatɨkaitɨni, mɨkɨta Kutse kaninu'ayatɨkaitɨni, mɨkɨta Kunani kaninu'ayatɨkaitɨni, mɨkɨta 'Eriyakimi kaninu'ayatɨkaitɨni,
LUK 3:31 mɨkɨta Mereya kaninu'ayatɨkaitɨni, mɨkɨta Mainani kaninu'ayatɨkaitɨni, mɨkɨta Matata kaninu'ayatɨkaitɨni, mɨkɨta Natani kaninu'ayatɨkaitɨni, mɨkɨta Rawiri kaninu'ayatɨkaitɨni,
LUK 3:32 mɨkɨta Kitsahi kaninu'ayatɨkaitɨni, mɨkɨta 'Uweri kaninu'ayatɨkaitɨni, mɨkɨta Wuhutsi kaninu'ayatɨkaitɨni, mɨkɨta Tsarimuni kaninu'ayatɨkaitɨni, mɨkɨta Nahatsuni kaninu'ayatɨkaitɨni,
LUK 3:33 mɨkɨta 'Aminarawi kaninu'ayatɨkaitɨni, mɨkɨta 'Aramini kaninu'ayatɨkaitɨni, mɨkɨta Hetsirumi kaninu'ayatɨkaitɨni, mɨkɨta Paretsi kaninu'ayatɨkaitɨni, mɨkɨta Kura kaninu'ayatɨkaitɨni,
LUK 3:34 mɨkɨta Kakuwu kaninu'ayatɨkaitɨni, mɨkɨta 'Itsahaki kaninu'ayatɨkaitɨni, mɨkɨta 'Apɨrahami kaninu'ayatɨkaitɨni, mɨkɨta Teraki kaninu'ayatɨkaitɨni, mɨkɨta Nakuxi kaninu'ayatɨkaitɨni,
LUK 3:35 mɨkɨta Tseruki kaninu'ayatɨkaitɨni, mɨkɨta Rakau kaninu'ayatɨkaitɨni, mɨkɨta Pereki kaninu'ayatɨkaitɨni, mɨkɨta 'Ewexi kaninu'ayatɨkaitɨni, mɨkɨta Tsara kaninu'ayatɨkaitɨni,
LUK 3:36 mɨkɨta Kainani kaninu'ayatɨkaitɨni, mɨkɨta 'Aripatsari kaninu'ayatɨkaitɨni, mɨkɨta Tsemi kaninu'ayatɨkaitɨni, mɨkɨta Nuhexi kaninu'ayatɨkaitɨni, mɨkɨta Rameki kaninu'ayatɨkaitɨni,
LUK 3:37 mɨkɨta Matutsareni kaninu'ayatɨkaitɨni, mɨkɨta 'Enuki kaninu'ayatɨkaitɨni, mɨkɨta Kareri kaninu'ayatɨkaitɨni, mɨkɨta Maharareri kaninu'ayatɨkaitɨni, mɨkɨta Kainani kaninu'ayatɨkaitɨni,
LUK 3:38 mɨkɨta 'Enuxi kaninu'ayatɨkaitɨni, mɨkɨta Tseti kaninu'ayatɨkaitɨni, mɨkɨta 'Arani kaninu'ayatɨkaitɨni, mɨkɨta Kakaɨyari kaninu'ayatɨkaitɨniri.
LUK 4:1 Merikɨtsɨ, Ketsutsi 'Iyari Mɨtiyupatakɨ hɨnetɨ mana kaneyeyani Kurutani hatuxameyaritsie, meta 'Iyari Mɨtiyupata kaneiwitɨni makumawetsie.
LUK 4:2 Mana huta tewiyari tukari kaniuyurieni, meta kauyumarie kanita'inɨata. Mɨpaɨpaɨmexɨa tukari pɨkatikwakai, hikɨ 'anarike kanekahakamɨkatɨyani.
LUK 4:3 Hikɨ Kauyumarie mɨpaɨ katinitahɨawe: —Kamɨtsɨ, 'ekɨ xɨka Kakaɨyari penu'ayatɨni, 'ikɨ tete mɨpaɨ ketineutahɨawi, paa payuyeitɨani.
LUK 4:4 Ketsutsi mɨpaɨ katinita'eiya: —'Utɨarika mɨpaɨ paine: “Tewi xɨka paa xeikɨa kwaka, mɨkɨkɨ pɨka'ayeyurini”.
LUK 4:5 Hikɨ Kauyumarie wapaitɨ heiwitɨka, kwiepa memɨtama wakwie naime kanixeitsitɨani xeinieriyarikɨ.
LUK 4:6 Kauyumarie mɨpaɨ katinitahɨawe: —Heitserie nepɨmatsipitɨaka 'ikɨ naime hepaɨtsita, yunaitɨ witsimemɨmatekɨhɨawenikɨ nepɨmatsipitɨaka, 'ikɨ naime nekaniyetuiriyarieni, heitserie nepexeiya nemiminikɨ kemɨ'ane mɨnetsinake.
LUK 4:7 'Ayumieme 'ekɨ nenewieri xɨka penetsi'upitɨani, 'ikɨ naitɨ 'apini pɨrayani.
LUK 4:8 Hikɨ Ketsutsi mɨpaɨ katinitahɨawe: —Kenemie Kauyumarie, 'utɨarika mɨpaɨ paine: “Nenewieri pepipitɨani Ti'aitame 'akakaɨyari, mɨkɨ hɨkɨame xeikɨa pepayexeiyani”.
LUK 4:9 Hikɨ Kauyumarie kaneiwitɨni Kerutsareme, watuki yekɨrita kanenutiwitɨni, mɨpaɨ katinitahɨawe: —'Ekɨ Kakaɨyari xɨka penu'ayatɨni, 'ena keneukatsuna.
LUK 4:10 'Utɨarika mɨpaɨ paine: »“Yuhetsɨa miemete niuki tuayamete pɨtiwa'aitɨaka 'ahepaɨtsita memɨmatsi'ɨwiyanikɨ. Yumamakɨ mepɨmatsituikani,
LUK 4:11 kapa tetetsie pe'uti'ɨkamɨrekɨ”».
LUK 4:12 Ketsutsi mɨpaɨ katinitahɨawe: —Mɨpaɨ paineta: “Pepɨka'i'itsipaneni Ti'aitame mɨ'akakaɨyari”.
LUK 4:13 Hikɨ Kauyumarie naimekɨ 'ita'inɨataka kaneyani 'ariketa 'ita'inɨatake.
LUK 4:14 Merikɨtsɨ Ketsutsi yu'utɨma kaneyeyani Karereya paitɨ, 'Iyari 'itɨrɨkariyakaku, naitsarie kaniutamariwa hepaɨtsitana.
LUK 4:15 Katiniku'ɨkitanekaitɨni tukiteta, hikɨ yunaitɨ 'aixɨa mekatenikuxatakaitɨni hepaɨtsitana.
LUK 4:16 Hikɨ Natsareti kiekariyaritsie kaninuani, matawerixɨtsie, hikɨ kemɨtiyeiyarieyatɨkai, tukita kaneutahani 'uxipiya tukaritsie. Kananukukeni tititerɨwake,
LUK 4:17 hikɨ xapa kaniuhuritɨarieni Kakaɨyari niukieya maye'uxa, Kitsariyaxi kemɨraka'utɨa. 'Itaweraka kanitaxeiya niuki hakewa mɨpaɨ maine:
LUK 4:18 «Ti'aitame 'Iyarieya kaneniuwiya, Kaneniuhɨritɨani niuki 'aixɨa manuyɨne nemɨwakuxaxatɨwanikɨ tixaɨtɨ memɨkateheuxeiya. Kaneneyenɨ'ani nemɨwaranayexɨrienikɨ mɨkɨ memɨyuhiwerie yu'iyaritsie, yanemɨtiwatahɨawekɨ mɨkɨ memanutaxɨriya kename me'utixɨnarie, meta yanemɨtiwatahɨawekɨ mɨkɨ memakɨkɨpe kename me'anutaneniere, nemɨwaxɨnakɨ mɨkɨ memɨwiyarietɨka,
LUK 4:19 nemɨtikuxatanikɨ kename tukari 'aye'a kepauka Ti'aitame muyuwaɨriya 'aixɨa mɨtatixeiyakɨ».
LUK 4:20 Hikɨ 'itakwikwieka xapa, 'iyetuirieka tiyuparewiwame, mana kanayerɨni ti'ɨkitame 'uwenieyatsie. Yunaitɨ tukita memayetekai kwi mekanixeiyakaitɨni,
LUK 4:21 hikɨ kanitsutɨani mɨpaɨ tiwakuxaxatɨwatɨ: «'Ikɨ tukaritsie kanaye'ani 'ikɨ 'utɨarika kemaine, xe'i'eniekaku xeme».
LUK 4:22 Yunaitɨ mekatenihekɨatakaitɨni me'i'enieka, mekanihɨxiyakaitɨni niuki witsimanuyɨne tetana mayeneikakaikɨ. Mɨpaɨ mekaniutiyuanekaitɨni: «¿'Ikɨ Kutse nu'aya katihɨkɨ?»
LUK 4:23 Mɨpaɨta katiniwarutahɨawe: «Patsɨ yurikɨ xeme 'ikɨ niukiyari xekanenitaxatɨakuni: “Tiyu'uayemawame 'aku, 'akɨmana keneuyu'uayema. Ketemɨte'u'enana Kaperunaume kepemɨreyuri, 'enata 'akiekaritsie yaxeikɨa ketineuyuri”.
LUK 4:24 Tawarita mɨpaɨ kaniutayɨni: Yurikɨ mɨpaɨ nepɨxerahɨawe, nixewitɨ Kakaɨyari niukameya pɨkanaki'eriwa yukiekaritsie.
LUK 4:25 Yuri nepaine, 'Ixaheri kwieyaritsie yumɨiretɨ wiuraxi mekaniu'uwakaitɨni kepauka 'Eriyaxi 'amuyeikakai, kepauka muyuawitsie mɨreunamie haika wiyari heimana 'ataxewi metseri, kepauka haka mutawe naitsarie kwiepa.
LUK 4:26 Mɨkɨ wahetsɨa pɨka'utanɨ'arie 'Eriyaxi nixeime hetsɨa, Tsiruni kwieyaritsie pɨta kaniutanɨ'arieni Tsarepɨta mɨrakutewatsie wiura hetsɨa.
LUK 4:27 Mɨkɨ meta, yumɨiretɨ 'amekaniu'uwakaitɨni 'Ixaheri kwieyaritsie kwiniyakɨ meka'itiyatɨkaitɨ kepauka 'Eritseu 'amuyeikakai Kakaɨyari niukameya, nixewitɨ tɨma pɨka'u'itiya mana kiekatari, tsiriyatanaka pɨta kaniu'itiyani Nahamani titewatɨ».
LUK 4:28 Hikɨ me'i'enieka kemɨtikuxatakai, mekaniuyeha'ani yunaitɨ tukita memayetekai.
LUK 4:29 Me'anuku'uka, kiekaritsie mekaneyeweiya, yemuritsie mekaneihana kiekari hetsiena mawewiyakaitsie, mana tekɨa memekahɨanikɨ.
LUK 4:30 Peru mɨkɨ wahixɨata heutayuneka kaneyani.
LUK 4:31 Merikɨtsɨ kiekaritsie kaninuani Kaperunaume mɨrakutewatsie Karereya kwieyaritsie, mana 'uxipiya tukaritsie tiniwa'ɨkitɨakaitɨni.
LUK 4:32 Mɨkɨ mekanihɨxiyakaitɨni 'ɨkitsikayakɨ, heitserie hexeiyatɨ mɨtaniukakaikɨ.
LUK 4:33 Hikɨ tukita nayekateitɨni tewi kakaɨyari mɨka'itiya 'iwiyakaku.
LUK 4:34 Karima kaniutahiwa mɨpaɨ 'utaitɨ: —'Aii, kepetati'uximatɨa Ketsutsi natsaretitanaka. ¿Petatsika'unake kari pepunua? Ne nepɨmatsimate kepemɨpaikɨ: 'Ekɨ pepɨhɨkɨ Kakaɨyaritsie mieme pemɨpatsie.
LUK 4:35 Hikɨ Ketsutsi kanitatieni mɨpaɨ 'utaitɨ: —Kayuwatɨ. Keneuxɨna mɨkɨ tewi. 'Iya kakaɨyari tewi 'atihɨaka wahixɨapa, kanixɨna katikwinitɨaka.
LUK 4:36 Yunaitɨ mekaniutimamani, meteyukuxaxatɨwatɨ mɨpaɨ mekaniutiyuanekaitɨni: «¿Ke'aneme niuki pexeiya? Heitserie hexeiyatɨ kaniwarutate'ani kakaɨyarixi memɨka'itiyatɨka tɨrɨkariya hexeiyatɨ, mɨkɨta mekaniwatixɨnani».
LUK 4:37 Naitsarie kiekari 'aurie kanikuxaxatsiwakaitɨni, Ketsutsi kemɨtiyurienekai.
LUK 4:38 Merikɨtsɨ tukita wayeyaka Tsimuni kie kaninuani, hikɨ hɨiya yemekɨ kaniwiyakaitɨni Tsimuni warɨkaɨya. Ketsutsi mekaniutawawirieni miparewienikɨ.
LUK 4:39 'Auriena 'utakeka, hɨiya kaniutatieni, hikɨ hɨiya kanihayewa. Yapauka 'anukukeka kaniwarutiparewietɨyani.
LUK 4:40 Hikɨ tau 'akayuneku, yunaitɨ memɨwarexeiyakai tekwikwikate mɨireme kwiniyakɨ memɨtekukuyekai hetsɨana mekaniwa'atɨani, yuxexuime wahetsie 'utimeka 'aixɨa meteheu'eriekame kaniwarayeitɨani.
LUK 4:41 Kakaɨyarixi 'axamemɨ'anene kaniwaruta'aitɨani memɨwatixɨnakɨ yumɨireme memɨtewakwinitɨakai, mɨkɨ mekaniutihiwakaitɨni mɨpaɨ me'utiyuatɨ: «'Ekɨ Kakaɨyari pekaninu'ayatɨni». Peru Ketsutsi warutate'atɨ kakaɨyarixi pɨkawapitɨakai memɨtiniunikɨ memimaikaikɨ kename Kɨritsitu hɨkɨtɨkai heitserie mupitɨarie.
LUK 4:42 Hikɨ 'ukatareku kaneyani teɨteri memɨkahaxuawetsie. Teɨteri yumɨiretɨ mekanikuwautɨwekaitɨni, me'itaxeiyaka mepikuhanakai mɨkaheyeikanikɨri.
LUK 4:43 Peru mɨkɨ matsi mɨpaɨ katiniwarutahɨawe: «Kaneuyeweka hipame kiekaritetsieta niuki 'aixɨa manuyɨne nemɨkuxatanikɨ, kemɨtiyɨni Kakaɨyari ti'aitakaku, peuyewetse nemɨtikuxatanikɨ, 'ayumieme nepeyenɨ'arie».
LUK 4:44 Hikɨ kaniyeweiyakaitɨni tikuxatanetɨ huriyutsixi watukiteta.
LUK 5:1 Merikɨtsɨ Ketsutsi Kenetsareti harakunayari tetsita kaniuyeikakaitɨni tikuxatatɨ, yumɨiretɨ mekanitsaipɨnakaitɨni Kakaɨyari niukieya me'eniekutɨ.
LUK 5:2 Hikɨ kanuwa kaniuxeiya hutame hatetsita 'aheikame ketsɨteweiyamete wakanuwa, ketsɨteweiyamete me'anatikɨneka yuwipi mekani'ekwakaitɨni.
LUK 5:3 Hikɨ xeimetsie kayerɨka Tsimuni kanuwayatsie, kanitawawirieni harakunatsie 'etsiwa meutahanikɨ. Kanuwatsie yekaitɨ katiniwa'ɨkitɨakaitɨni teɨteri.
LUK 5:4 Hikɨ yuxatsika 'unɨka, mɨpaɨ katinitahɨawe Tsimuni: —'Emeukatewatsie keneuyeye'a, mana wipi xeneukawiwiexɨa tsapari xemɨwaratixɨrienikɨ.
LUK 5:5 Hikɨ Tsimuni mɨpaɨ katinitahɨawe: —Ti'ɨkitame 'aku, tɨkakɨta naime tepayekexi, tepɨteta'uxitɨa yakɨ xeikɨa, tixaɨ tepɨkate'umi. Matsi mɨya pemainekɨ, wipi nekaneukawiwiexɨamɨkɨ.
LUK 5:6 Mɨpaɨ mekateniuyurieni, hikɨ mekaniwaratixɨrieni ketsɨte kwini mieme meyupaɨmeme, wipi kanititsanikekaitɨni.
LUK 5:7 Hikɨ yu'iwama xeime kanuwatsie memɨyetekai yumamakɨ mekaniwarumawiya memakɨnekɨ memɨwaparewienikɨ. Mɨkɨ mekaniu'axɨani, yukanuwate mekaniutihɨniyaxɨani hutame, 'etsiwatɨkaku mekaniukayunixɨani.
LUK 5:8 Hikɨ naime tiuxeiyaka Tsimuni Pekuru mɨtitewakai, kaniutitunumakeni Ketsutsi hɨxie mɨpaɨ 'utaitɨ: —Ti'aitame, keneneuhayewa, ne 'axanepɨtiyuruwame.
LUK 5:9 Kaniutimakaitɨni mɨkɨ meta yunaitɨ hamatɨana memu'uwakai mekaniutimamani mɨya yupaɨmeme memɨwaratixɨrikɨ tsapari.
LUK 5:10 Yaxeikɨata Tsewereu niwemama mekaniutimamani Kakuwu meta Wani, Tsimuni hamatɨa memɨte'uximayakai. Hikɨ Ketsutsi mɨpaɨ Tsimuni katiniutahɨawe: —Pepɨkamaka. Hikɨtsɨ 'ena mɨtiyehane teɨteri pɨta pekaniwakuxeɨrimɨkɨ.
LUK 5:11 Hikɨ kanuwa me'anatihapaka kwiepa, naime mete'uku'eirieka, Ketsutsi hetsie mekateniuwiya mekaneiweiya.
LUK 5:12 Merikɨtsɨ xeime kiekaritsie kaniuyeikakaitɨni Ketsutsi, tikwikame mana kaniukateitɨni mɨka'itiyakai naitɨ heupɨnitɨ. Hikɨ Ketsutsi 'uxeiyaka, kaniutihɨximakeni, mɨpaɨ titawawirienike: ―Ti'aitame, xɨka pe'awaɨriyani, pepɨyɨwe pemɨnetsi'u'itieni.
LUK 5:13 Ketsutsi yumama 'utatseraka kanimayɨani mɨpaɨ 'utaitɨ: —Nepɨnewaɨriya, pe'itiyatɨ peke'uyuhayewa. Yapauka kwiniya kanihayewa.
LUK 5:14 Hikɨ Ketsutsi mɨpaɨ katinita'aitɨani 'atsimɨkatitahɨawekɨ xeime. Mɨpaɨ katinitahɨawe: —Kenemie mawari wewiwame matsixeiyakɨ, pemu'itiyakɨ ketineutimawa Muitsexi kemɨtiu'aitaxɨ pemɨtiwatahekɨatɨanikɨ.
LUK 5:15 Perutsɨ matsi kwini mieme katinikuxaxatsiwakaitɨni hepaɨtsitana, teɨteri yumɨiretɨ mekaniyutixexeɨriwakaitɨni memi'enienikɨ 'aixɨa memɨte'uka'eritɨariwanikɨ kwiniya kememɨtehexeiyakai.
LUK 5:16 Ketsutsi matsi makumawetsie kaneyeikakaitɨni yutanenewienike yuxaɨta.
LUK 5:17 Merikɨtsɨ xeime tukaritsie katini'ɨkitakaitɨni, mana menayetekaitɨni huriyutsixi teɨteriyari yuyeiyarikɨ memɨpatsiekai paritseutsixi memɨteyuterɨwakai, hipatɨta huriyutsixi wa'inɨarikɨ memɨte'ɨkitametetɨkai. Naime kiekaritetsie Karereya kwieyaritsie Kureya kwieyaritsie mekaneyekɨnekaitɨni meta Kerutsaremetsie. Kakaɨyari tɨrɨkariyaya kanixuawekaitɨni Ketsutsi 'aixɨa mɨtiwaruka'eritɨwanikɨ.
LUK 5:18 Hikɨ teɨteri mekaniu'axɨani me'ehanatɨ huriekame 'itaritsie yekaime. Ketsutsi mɨwakateitsie mekani'atɨanikekaitɨni hɨxiena me'itenike,
LUK 5:19 peru mekaniyutatexieni meheutahaxɨanike teɨteri memɨyumɨirekaikɨ, 'ayumieme kii heima meneutimamake, tekayari meha'unaka, Ketsutsi hɨxie mekaneikatuani tewi 'itari naime teɨteri wahixɨapa paitɨ.
LUK 5:20 Hikɨ waruxeiyaka yuri kememɨte'eriekai, mɨpaɨ kaniutayɨni: —'Ekɨ 'aku, 'axakepemɨtiuyuri pekatineuyehɨwiyarieni.
LUK 5:21 Hikɨ paritseutsixi meta 'inɨarikɨ memɨte'ɨkitametetɨkai, mɨkɨ mekanitsutɨani mɨpaɨ meteyɨkɨhɨawetɨ: «¿Kepɨpaikɨ 'ikɨ 'axamutaine Kakaɨyari hepaɨtsita? ¿Kepaikɨ pɨyɨwe mɨtiwareuyehɨwirieni 'axamete'uyurieyu, Kakaɨyari xeikɨa pɨyɨwe?»
LUK 5:22 Ketsutsi retimaika kememɨteyɨkɨhɨawekai mɨpaɨ katiniwarutahɨawe: —¿Titayaritsɨ mɨya xeteyɨkɨhɨawe yu'iyaritsie?
LUK 5:23 ¿Tita matsi katikwaniwe, ketikwaniwe mɨpaɨ xɨka 'utayɨni: “Ke'axapemɨtiuyuri pepɨreuyehɨwiyarie”, katikwaniwe matsi mɨpaɨ mutayɨni, “Kenanukukexi kenekuyeikani”?
LUK 5:24 Peuyewetse mɨpaɨ xemɨtemaikakɨ, Yuri Tewi kenemɨtitewa, heitserie nekanexeiyani kwiepa nemɨtiwareuyehɨwirienikɨ mɨkɨ 'axamemɨte'uyuri. 'Ana mɨpaɨ katinitahɨawe huriekame: —'Ekɨ 'aku nepɨmarahɨawe, kenanukukexi, 'a'itari kenanukwe'i, 'akie kenemie.
LUK 5:25 Yapauka kananukukeni yunaime wahɨxie, titatsie mɨrakatei kaneikweni, yukie kaneyani 'aixɨa 'utaitɨ Kakaɨyari hepaɨtsita.
LUK 5:26 Hikɨ yunaitɨ mekanihɨxiyakaitɨni, 'aixɨa mekaniutiyuanekaitɨni Kakaɨyari hepaɨtsita. Waɨkawamekɨ mekanimamakaitɨni mɨpaɨ me'utiyuatɨ: «Mamariwaweme tepɨte'uxei hikɨ».
LUK 5:27 Merikɨtsɨ kaneyani, tewi kuwiyexinutsie mieme tiwawame kaniuxeiya Rewi titewakame memɨte'ayutituayatsie 'akaime. Ketsutsi mɨpaɨ katinitahɨawe: —Nehetsie ketineuwiya.
LUK 5:28 Hikɨ Rewi 'anukukeka, naime tiuku'eirieka, hetsiena katiniuwiya.
LUK 5:29 'Ana Rewi 'ikwai kaniuwewieni yukiita Ketsutsi hetsiemieme, yumɨiretɨ kuwiyexinu hetsiemieme tewawamete, meta hipatɨ teɨteri mekatenikwakaitɨni hamatɨana.
LUK 5:30 Peru paritseutsixi meta 'inɨarikɨ memɨte'ɨkitametetɨkai memɨyɨnɨkai, mɨkɨ mekaniniukixiekaitɨni mɨpaɨ metewakɨhɨawetɨ hetsɨana miemete teyɨ'ɨkitɨwamete: —¿Titayarikuta mɨkɨ tewawamete meta 'axateyuruwamete wahamatɨa xetekwa'a meta xete'ie?
LUK 5:31 Hikɨ Ketsutsi mɨpaɨ katiniwarutahɨawe: —Mɨkɨ 'aixɨa memɨteheu'erie mepɨkaheiyehɨwa tiyu'uayemawame, mɨkɨ memɨtekukuye pɨta mekaneiyehɨaka.
LUK 5:32 Nepɨkanua newata'inienike mɨkɨ heitseriemekɨ yamemɨtekahu, mɨkɨ 'axamemɨteyurie pɨta newata'inienike nekaninuani memɨtehayewakɨ ke'axamemɨteyurie.
LUK 5:33 Merikɨtsɨ mɨpaɨ mekatenitahɨawe: —Wani hetsɨa miemete teyɨ'ɨkitɨwamete mepuyuhakixime meta mepɨyunenewixime mɨixa, meta paritseutsixi wahetsɨa miemete yaxeikɨa mepɨteyurie. ¿Peru 'ahetsɨa miemete titayari yametekwa'a yamete'ie?
LUK 5:34 Hikɨ Ketsutsi mɨpaɨ katiniwaruta'eiya: —¿Ketiyɨwe mɨwahakieka neneɨkeme 'inierimama mexi neneɨkeme wahamatɨa 'uyeika?
LUK 5:35 Tukari kanaye'amɨkɨ kepauka neneɨkeme mɨtihanieni watsata, mɨkɨ tukaritsieke mekaniyuhakikuni.
LUK 5:36 'Ikɨ 'ɨxatsi hepaɨtsita tikuxatatɨ tiniwaruti'ɨkitɨatɨyani mɨpaɨ 'utaitɨ: —Tewi kapitatsana 'ixuriki hekwame, mimanetsikitɨanikɨ mɨye'i. Xɨka mɨpaɨ tiuyurieni, hekwame pɨtatsanekeyu, mɨhekwa matɨa mɨye'i 'axapɨtiyuxexeiyanikeyu.
LUK 5:37 Meta nixewitɨ tsixai mɨyeye'itsie pɨka'ikatu'a kaxie winuyari mɨhekwa mɨkwanakɨ. Mexɨka mɨpaɨ tiuyurieni, winu mɨhekwa tsixai kanititsanamɨkɨ, winu kanitayeuriweni, meta tsixai kaneuyewautseni.
LUK 5:38 Matsi kaxie winuyari mɨhekwa kaneuyeweka tsixai mɨhehekwatsie mɨkatuarieni mɨkwanakɨ.
LUK 5:39 Tewi meripai mieme 'anieku 'anuti'ieme, kwaname pɨkaheu'imɨkɨni, mɨpaɨ paineni: “Meripai mieme 'aixɨa kana'aneni”.
LUK 6:1 Merikɨtsɨ 'uxipiya tukaritsie Ketsutsi tɨriku ma'iwiyatsie kaniuyeyani, teyɨ'ɨkitɨwamete tɨriku mɨayeyari mekananutihurukakaitɨni, yumamatsie me'ititɨminatɨ mekanikwakaitɨni.
LUK 6:2 Hikɨ paritseutsixi hipatɨ mɨpaɨ mekaniutiyuani: —¿Titayarikuta xeme kemɨkareuyewetse xeteyurie 'uxipiya tukaritsie?
LUK 6:3 Ketsutsi mɨpaɨ katiniwarutahɨawe: —¿Kari, tɨma xepɨka'ekaterɨwawawe kemɨtiuyuri Rawiri kepauka memuhakakwi mɨkɨ meta hamatɨana memu'uwakai?
LUK 6:4 Kakaɨyari kiyata kaneutahani, paa muwa Kakaɨyari hɨxie mamanekai 'anaka'ɨka, kanitikwani, mɨkɨ heitserie pɨkahexeiyakai mitikwanikɨ, mawari wewiwamete xeikɨa heitserie mepexeiyakai. Metatsiere kaniwarumini mɨkɨ 'utɨmana memeu'uwakai.
LUK 6:5 Mɨpaɨta katiniwarutahɨawe: —Heitserie nekanexeiyani 'uxipiya tukari hepaɨtsitata Yuri Tewi nehɨkɨtɨtɨ.
LUK 6:6 Merikɨtsɨ tawari 'uxipiya tukaritsie tukita kaneutahani, hikɨ kanitsutɨani ti'ɨkitatɨ. Tewi muwa kanayekateitɨni mɨmamawakikai yutserieta,
LUK 6:7 mɨkɨ 'inɨarikɨ memɨte'ɨkitametetɨkai meta paritseutsixi mekanihupiekaitɨni, tsiparatsɨ xɨka 'uxipiya tukaritsie 'enayehɨanike tɨma, me'utiyuatɨ, mɨkɨkɨ memitaxanetakɨ.
LUK 6:8 Timaitɨ kememɨteyɨkɨhɨawekai, mɨpaɨ katinitahɨawe tewi mɨmamawakikai: —Kenanukukexi, tahixɨapa keneutakexi. 'Anukukeka mana kaniutakeni.
LUK 6:9 Hikɨ Ketsutsi mɨpaɨ katiniwarutahɨawe: —'Ipaɨ nepɨtixeku'iwawiya: ¿'Uxipiya tukaritsie tiheitserie 'aixɨa mɨtiyurieneni, nutsu 'axamɨtiyurieneni? ¿Tiheitserie para tewi mutawikweitsitɨani, nutsu mika'unakɨ pɨta?
LUK 6:10 Yunaime waranuxeiyatɨyaka, mɨpaɨ tewi katiniutahɨawe: —'Amama keneutatsera. Mɨpaɨ tiuyurieku mamaya 'aixɨa 'anetɨ kanayani.
LUK 6:11 Mɨkɨ kwinimieme mekateniuyeha'ani, hikɨ mekanitsutɨani metekuxatatɨ Ketsutsi kememɨyurienikekai.
LUK 6:12 Merikɨtsɨ 'ana hɨritsie kaneutiyune yutanenewienike, xeitɨkari nenewieri kanipitɨakaitɨni yukakaɨyari.
LUK 6:13 Hikɨ 'ukatareku, yu'aurie kaniwarutahɨawe yuhetsɨa miemete teyɨ'ɨkitɨwamete, watsata kaniwaranuyeteɨxɨ tamamata heimana yuhutame, nɨ'ariekate katiniwaruterɨwa mɨkɨ:
LUK 6:14 Tsimuni ('arike Pekuru mɨtiterɨwaxɨ), 'Atɨrexi Tsimuni 'iwaya, Kakuwu, Wani, Piripe, Wariturume,
LUK 6:15 Mateu, Tumaxi, Kakuwu 'Aripeu nu'aya, Tsimuni tserutitsita mɨtitewakai,
LUK 6:16 Kura Kakuwu nu'aya, Kura 'Itsikariutitanaka 'arikeke miyetua.
LUK 6:17 Hikɨ wahamatɨa 'ukateka, makuweritsie kaniwakeni. Yumɨiretɨ hetsɨana miemete teyɨ'ɨkitɨwamete, meta yumɨiretɨ teɨteri naitsarie Kureyatsie Kerutsaremetsie memeyekɨ, hipatɨ haramara tetsita memeyekɨ Tiru 'aurie Tsiruni 'aurie,
LUK 6:18 mana mekaniu'axɨakaitɨni memi'enienikɨ, 'aixɨa meteheu'erietɨ memayeitɨarienikɨ kwiniya kememɨtehexeiyakai. Mɨkɨ kakaɨyarixi 'axamemɨ'anene memɨwanɨkai 'aixɨa meteheu'erietɨ mepayeitɨarie,
LUK 6:19 teɨteri yunaitɨ mekanimayɨakukaitɨni tɨrɨkariya hetsiena mayeneikakaikɨ yunaime 'aixɨa meteheu'eriekame muwarayeitɨwakai.
LUK 6:20 Merikɨtsɨ yuhetsɨa miemete teyɨ'ɨkitɨwamete waxeiyatɨ mɨpaɨ kaniutayɨni: «'Aixɨa xekani'itɨarieka xeme tixaɨtɨ xemɨkatehexeiya, Kakaɨyari xekanexeiyani tixe'aitɨwametɨme.
LUK 6:21 'Aixɨa xekani'itɨarieka xeme hikɨ xemeuhakakwiku, xekanitihuxaikuni. 'Aixɨa xekani'itɨarieka xeme hikɨ xemutitsuana, xekaniutinawekuni.
LUK 6:22 'Aixɨa xekani'itɨarieka xeme kepauka teɨteri memɨxe'uxiwe'erie, kepauka memɨkaxenaki'erie yuhetsɨa, kepauka 'axamemutiyuane xehepaɨtsita, kepauka memɨxexani'erie 'axaxemɨ'anene me'utiyuatɨ, Yuri Tewi hetsie xemɨtewiyakɨ.
LUK 6:23 »Xekeneyutemamawieka waɨkawa 'iya tukaritsie, xeketeneuye'ani, waɨkawa taheima mieme xekana'iwakuni. Wa'ukiyarima yaxeikɨa mepɨwaruyuri Kakaɨyari niukametemama.
LUK 6:24 »Matsi xɨa'ui, xeme xemɨxikutsixi, 'ariri yunaki'eriya xekanaye'atɨani.
LUK 6:25 Xɨa'ui xeme hikɨ xemɨhuxa, xepeuhakakwikuni. Xɨa'ui xeme hikɨ xemutinawe, xepɨyuhiwerieka xeputitsuanani.
LUK 6:26 Xɨa'ui xeme kepauka yunaitɨ teɨteri witsimemutiyuane xehepaɨtsita. Xe'ukiyarima yaxeikɨa mepɨwaruyuri Kakaɨyari niukametemama memɨte'itawakai.
LUK 6:27 »Matsi mɨpaɨ nepɨtixekɨhɨawe xeme xemɨ'enana: Xekeniwanaki'erieka mɨkɨ memɨxe'aye'unie, 'aixɨa xekeniwayurieka mɨkɨ memɨxe'uxiwe'erie,
LUK 6:28 mɨkɨ 'axamemutiyuane xehepaɨtsita wahepaɨtsita 'aixɨa xekeneutiyuaneni xeme, xekeneyunenewieka mɨkɨ memɨxetsewixima wahetsiemieme.
LUK 6:29 Kemɨ'ane 'a'aurita mɨmatsiheutiwani, ta'aurie kenawetsi tapata mɨmatsiheutiwanikɨ. Kemɨ'ane mɨmatsinawairieni 'a'ɨkari, pepɨka'ikweririeka 'akamixata mɨmatsinawairienikɨ.
LUK 6:30 Kemɨ'ane tixaɨtɨ mɨmatiutawawiri, ketineupitɨa, kemɨ'ane 'apini mɨmatinawairieni, pepɨka'iwiyani.
LUK 6:31 Kemɨtixenake, teɨteri yamemɨxeyurienikɨ xeme, kemɨtixenake xeme, mɨkɨ kanixe'inɨaritɨkamɨkɨ, yaxemɨwayurienikɨ hipame meri.
LUK 6:32 »Xɨkate xewanaki'erieka mɨkɨ memɨxenaki'erie, ¿titakɨ 'aixɨa xetekuxaxatsiwani? 'Axateyuruwamete mekaniwanaki'erieka mɨkɨ memɨwanaki'erie.
LUK 6:33 Xɨkata 'aixɨa xewayurieka mɨkɨ 'aixɨa memɨxeyurie, ¿titakɨ 'aixɨa xetekuxaxatsiwani? 'Axateyuruwametetɨtɨ mɨpaɨ mepɨteyurie.
LUK 6:34 Xɨkata xetewaniɨtɨaka mɨkɨ kemɨ'ane memɨte'ayukatuawawe xeikɨa, ¿titakɨ 'aixɨa xetekuxaxatsiwani? 'Axateyuruwameteta mepɨteyuniɨtɨa tawari memɨte'apiniyariekakɨ.
LUK 6:35 Matsitsɨ xekeniwanaki'erieka mɨkɨ memɨxe'aye'unie, 'aixɨa xeketeneyurieka, xeketeneyuniɨtɨaka 'atsixekateyu'iyaritɨatɨ. Mɨpaɨ xeteyurietɨ kwini mieme xekatena'iwakuni, kemɨ'ane taheima makawe niwemama xekanihɨkɨtɨkakuni, mɨkɨ 'aixɨa pɨtiuka'iyari mɨkɨ pamɨpariyutsi memɨkateyupitɨwa wahetsiemieme, mɨkɨ 'axamemɨteyurie wahetsiemieme meta.
LUK 6:36 Xeketeneyukanenimayaka, xe'ukiyari kemɨtiyukanenimaya.
LUK 6:37 »Hipame wahetsie xɨka xekate'ahɨpani, xehetsieta pɨkarahɨiwani. Xɨka xekateyuxanetani, xemeta xepɨkaxanetsieka. Xɨka xekawaranutaxɨrɨwani, xemeta xepɨka'anutaxɨriyani. Xɨka xetewareuyehɨwirieka, xemeta xepɨteheuyehɨwiyarieni.
LUK 6:38 Xɨka xetewarini, xemeta xepɨtemikieni: 'Aixɨa ti'inɨatsiekame 'anukapɨnariekame, 'anutakatsiekame, 'anakaxɨrɨweme xepɨmikieni. Karikɨtsɨ hipame kexemɨtewaru'inɨatsiri mɨpaɨta xeme xepɨte'inɨatsiyarieni».
LUK 6:39 Merikɨtsɨ 'ikɨ 'ɨxatsi hepaɨtsita tikuxatatɨ katiniwaruta'ɨkitɨani mɨpaɨ 'utaitɨ: «¿Makɨpe ketiyɨwe menuhana xeime makɨpe? ¿Yuhutatɨ mewatixawatsie mekateheukaxɨrieni?
LUK 6:40 Tiyɨ'ɨkitɨwame pɨkawe'eme keyuri ti'ɨkitame, peru 'aye'atɨarieme kemɨ'ane mɨti'ɨkitɨa hepaɨ timaiwetɨ kanayeimɨkɨ.
LUK 6:41 »¿Titayari petixeiya xatsi 'a'iwa hɨxita meutawiwi, pekahe'eriwatɨ keuruwi 'ahɨxita meutawe?
LUK 6:42 ¿Kepaɨtɨtɨ petiyɨwe mɨpaɨ pemɨtitahɨawekɨ 'a'iwa: “Neuxei ne'iwa, nepiwaye'itieni xatsi 'ahɨxita meutawiwi”, peka'ixeiyatɨ keuruwi 'ahɨxita meutawe? Yakɨtsɨ peputaine xeikɨa. Keniwaye'iti meri mɨkɨ keuruwi 'ahɨxita meutawe, 'ana 'aixɨa 'anemekɨ peheunieretɨ pekanayeimɨkɨ pemiwaye'itirienikɨ xatsi 'a'iwa hɨxita meutawiwi.
LUK 6:43 »Nixewitɨ kɨyexi 'aixɨa mɨ'anene 'ikwaxi 'axa'aneneme pɨkakaxuawitɨwa, mɨkɨ meta kɨye 'axamɨ'ane 'ikwaxi 'aixɨa 'aneneme pɨkakaxuawitɨwa.
LUK 6:44 Xexuitɨ kɨye yu'ikwaxikɨ kanimatsiɨkɨni. Xuyatsie pɨkaka'inɨiwa piní takari, witsaxatsie pɨkaka'inɨiwa kaxie.
LUK 6:45 Tewi 'iti'utame tita 'aixɨa mɨti'ane yu'iyaritsie, niwayehanimɨkɨ tita 'aixɨa mɨti'ane, tewi 'axamɨtiyuriene pɨta 'iti'utame tita 'axamɨti'ane, niwayehanimɨkɨ tita 'axamɨti'ane. Karikɨ tita yu'iyaritsie mɨtihɨniyani, mɨpaɨ katinikuxatamɨkɨ.
LUK 6:46 »¿Titayarikuta xeme: “Ti'aitame, Ti'aitame 'aku”, xenetekɨhɨawe, 'atsixekateyurietɨ kenemɨtixekɨhɨawe?
LUK 6:47 Yunaitɨ nehetsɨa memɨ'axe, neniuki memɨ'enie yametekahutɨ, kememɨ'anene nepɨtixetaxatɨani:
LUK 6:48 Tewi kii mutawewi hepaɨ kani'aneni, heukatewame wati'ineka, tetetsiepai netiwewieni tsimiyenituyari. 'Ana haa kaniwayeneni, kitsie kaniukexɨani, peru kaniuyutatexieni 'iwatayuitɨanike, 'aixɨa 'anemekɨ mɨwewiyakaikɨ pɨkawatayua.
LUK 6:49 Perutsɨ kemɨ'ane mɨnetsi'enie yakatikamietɨ, mɨkɨ xewitɨ tewi kii mutawewi hepaɨ kani'aneni, kwiepa 'akaime kaniutawewieni xeikɨa, tenariyari pɨka'utawewi. 'Ana hetsiena kaniukexɨani haa, xeimieme nekaina, karima kaniukaweni kii».
LUK 7:1 Hikɨ 'inɨka 'ikɨ niuki naime teɨteri me'i'enieku, Kaperunaume kaneyani.
LUK 7:2 Merikɨtsɨ kuya mana kaniuyeikakaitɨni xeitsienituyari kuyaxi mɨwanɨ'a, ti'uximayatame kanexeiyakaitɨni minaki'eriekai, mɨkɨ katinekuyekaitɨni kanemɨximekaitɨni.
LUK 7:3 Hikɨ kuya, 'u'enaka Ketsutsi hepaɨtsita, kaniwarenɨ'ani huriyutsixi teɨteriyari wa'ukiyarima memeita'inienikɨ mamiekɨ 'aixɨa reu'eriekame ti'uximayatame mayeitɨanikɨ.
LUK 7:4 Mɨkɨ Ketsutsi hetsɨa me'u'axɨaka kwini mieme mekateni'iniekaitɨni mɨpaɨ me'utiyuatɨ: —'Aixɨa kaniyɨmɨkɨ pemeiparewienikɨ, hetsiena katininakeni:
LUK 7:5 Kataninaki'erieka tanaime tame, tuki kataniutawewirieni yɨkɨmana.
LUK 7:6 Hikɨ Ketsutsi wa'utɨma kaneyani. Yatewa 'umiekaku, kuya yuhamikuma kaniwarutanɨ'ani mɨpaɨ memɨte'itahɨawekɨ: —Ti'aitame pepɨkati'a'uxitɨaka, ne 'aixɨa nepɨka'ane 'ekɨ pematahanikɨ nekita.
LUK 7:7 Meta 'ayumieme matsi 'ahetsɨa nepɨkahetɨa nekɨmana, 'aixɨa neka'aneme nene'erietɨ 'ahetsɨa nemɨmiekɨ. Peru 'ekɨ xeiniukiyari xɨka yapehetayɨni, 'aixɨa pɨtika'erieni ti'uximayatame.
LUK 7:8 Netsɨ nekatini'aitɨarieka nekuyatɨtɨ meta kuyaxi nepɨtiwa'aitɨwame. Xɨka mɨpaɨ netitahɨawe xeime: “Kenemie”, mɨkɨ pɨyemie, xeimeta xɨka mɨpaɨ netitahɨawe: “Kenaye'a”, mɨkɨ 'akanayeimɨkɨ. Xɨka mɨpaɨ netitahɨawe nehetsɨa mieme ti'uximayatame: “'Ipaɨ ketineyurieneni”, mɨpaɨ pɨtiyurieneni.
LUK 7:9 Hikɨ Ketsutsi 'i'enieka niukieya, kaniuhɨxiyani, ta'aurie 'aweka mɨpaɨ katiniwarutahɨawe teɨteri memeweiyakai: —Mɨpaɨ nepɨtixekɨhɨawe, 'ixaheritsixi watsata 'ikɨ hepaɨ 'aneme nepɨkahetaxeiyawe yuri ti'eriekame.
LUK 7:10 Hikɨ mɨkɨ memenɨ'arie kepauka memakunuaxɨa kitana me'u'axɨaka, mekaneitaxeiya ti'uximayatame 'aixɨa reu'eriekame.
LUK 7:11 Merikɨtsɨ 'arike kaneyani kiekari Nahini mɨrakutewatsie paitɨ, hetsɨana miemete teyɨ'ɨkitɨwamete mekaniteɨtakaitɨni, hipatɨta teɨteri yumɨiretɨ.
LUK 7:12 Kiekari kitenie heutahaximekaku, mɨki kaniwayekweiyani, temaikɨ mumɨɨkai puyuxewikai xeikɨa maamaya pɨwiuratɨkai, kɨnaya meripaitɨ pukumawerekai. Kiekatari yumɨiretɨ mekaniteɨtakaitɨni.
LUK 7:13 Hikɨ Ti'aitame 'ixeiyatɨ kanitinenimayata, mɨpaɨ katinitahɨawe: —Pepɨka'utatsuakani.
LUK 7:14 Hikɨ mana 'uyaka mɨki kakunieya kaniumayɨani. Mɨki kwekwewemete mekaniti'uni. Ketsutsi mɨpaɨ kaniutayɨni: —Temaikɨ 'aku, kenanukukexi nepaine.
LUK 7:15 Tewi mɨmɨkikai kananukuyerɨni kaniutiniutɨyani, hikɨ Ketsutsi kaniyetuani maamaya hetsɨa.
LUK 7:16 Hikɨ yunaitɨ mekaniutimamani, 'aixɨa mekaniutiyuanekaitɨni Kakaɨyari hepaɨtsita mɨpaɨ me'utiyuatɨ: —Kakaɨyari niukameya mɨtɨrɨkaɨye tatsata kaninuani, Kakaɨyari kaninuani kanitsutɨani tatsiparewietɨ yuteɨterima.
LUK 7:17 Hikɨ kemɨtiuyuri kanikuxaxatsiwakaitɨni naitsarie Kureya kwieyaritsie meta 'auriena mamanetɨkatsie.
LUK 7:18 Merikɨtsɨ Wani hetsɨa miemete teyɨ'ɨkitɨwamete Wani mekateniutaxatɨani naime kemɨtiuyɨ hepaɨtsita. Hikɨ 'ana Wani waruta'inieka yuhutame yuhetsɨa miemete,
LUK 7:19 Ti'aitame hetsɨa kaniwarenɨ'ani mɨpaɨ memɨte'ita'iwawiyakɨ: —¿'Ekɨ petihɨkɨ kemɨ'ane 'umamienikekai, nutsu xeime 'akuxi tepɨtakwewieka?
LUK 7:20 Hikɨ hetsɨana me'u'axɨaka mɨkɨ, mɨpaɨ mekatenitahɨawe: —Wani Ti'ɨyame 'ahetsɨa katanetanɨ'ani mɨpaɨ temɨmateta'iwawiyakɨ: “¿'Ekɨ petihɨkɨ kemɨ'ane 'umamiekai, nutsu xeime 'akuxi tepɨtakwewieka?”
LUK 7:21 'Ana mana kwitɨwa Ketsutsi yuwaɨkawame 'aixɨa katiniwaruka'eritɨani, mɨkɨ kakaɨyarixi 'axamemɨ'anene memɨwarexeiyakai, hipame meta waɨkawa kwiniyakɨ memɨ'uximatɨariekai, meta yuwaɨkawame memɨkaheunenierekai kaniwaranutanieritɨaxɨani.
LUK 7:22 Hikɨ memeyenɨ'arie mɨpaɨ katiniwarutahɨawe: —Xekenehu, xeketenetaxatɨa Wani tita xemɨte'uxei tita xemɨte'u'eni hepaɨtsita: Memɨkaheuneniere meheunenieretɨ kememɨte'akɨka, huriekate kememɨte'anuku'uwe, mɨkɨ nawi kwiniyayari memexeiya me'itiyatɨ kememɨte'akɨka, memɨkaheu'enana meheu'enanatɨ kememɨte'akɨka, mɨkite kememɨte'anuku'uitɨariwa, tixaɨtɨ memɨkatehexeiya niuki 'aixɨa manuyɨne kememɨtekuxaxatɨariwa.
LUK 7:23 Mɨkɨ meta, 'aixɨa kani'itɨarieka kemɨ'ane mɨkakunuani nekɨmana.
LUK 7:24 Hikɨ Wani hetsɨa miemete mehekɨneku, Ketsutsi kanitsutɨani tiwakuxaxatɨwatɨ teɨteri Wani hepaɨtsita mɨpaɨ 'utaitɨ: «¿Tita xetehekuxei makumawetsie? ¿Haka 'ekakɨ 'uyuaneme xeteheku'ixɨari? Tixaɨ xɨari.
LUK 7:25 ¿Kamɨtsɨ tita xeteheku'ixɨari? ¿Xiku 'ixuriki mɨyumeni manakatɨkɨ xetehekuxei? Nekatixaɨtsietɨ. Matsi mɨkɨ witsimɨ'anene memanakatɨtɨka xikutsixi wahepaɨ memɨyɨa, mɨkɨ te'aitamete wakiita mepayetei.
LUK 7:26 Kamɨtsɨ, ¿tita yemekɨ xeteheku'ixɨari? ¿Kakaɨyari niukameya xeteheku'ixɨari? Huu, mɨpaɨ nepɨtixekɨhɨawe, Kakaɨyari niukameya xepekuxei, yemekɨ Kakaɨyari niukameya keyuri hipatɨ.
LUK 7:27 'Ikɨ kanihɨkɨtɨni 'utɨarika mexaxata mɨpaɨ 'utaitɨ: »“Kamɨ, ne neniuki tuayame nekananunɨ'amɨkɨ 'ahɨxie paitɨ, mikuha'aritɨanikɨ 'ahuye pekanuawekaku 'akuxi”.
LUK 7:28 Mɨpaɨ nepɨxerahɨawe, 'akuxi pɨkatinuiwawe nixewitɨ Wani hepaɨ timariwetɨ, peru matsi tewi tixaɨtɨ mɨkatihɨkɨ Kakaɨyari mɨra'aitatsie, Wani reuyeta katinimariweni».
LUK 7:29 Mɨpaɨ mete'u'enanaka, yunaitɨ teɨteri, meta kuwiyexinu hetsiemieme tewawamete yunaitɨ Wani me'u'enieka mekatenihekɨatakaitɨni Kakaɨyari hepaɨtsita heitserie kemɨrexeiya, kepauka memuka'ɨyarie Wani hetsɨa.
LUK 7:30 Peru paritseutsixi meta hipatɨ 'inɨari niukiyari memɨmate, mɨkɨ mekanitixani'erieni Kakaɨyari kemɨtiyurienikekai wahetsiemieme, Wani hetsɨa mepɨka'uka'ɨyarie.
LUK 7:31 «'Ayumieme nepaine, ¿Tita 'inɨari netitaxata hikɨ miemete teɨteri wahetsiemieme?
LUK 7:32 Tɨɨri wahepaɨ mekani'aneneni kiekari hixɨapa memɨtitei mɨpaɨ memɨte'uyuhiwiwa: »“Tepɨxekɨrautawiyakai, xemeta xepɨkate'ukanei. Hiwerika kwikariyari teputakwikaxɨ, xemeta xepɨka'utitsua”.
LUK 7:33 Wani Ti'ɨyame kaninuani, paa kakwa'atɨ kaxie winuyari kaye'etɨ, xemeta mɨpaɨ xeputiyuanekai: “Kakaɨyari 'axamɨ'ane kaninɨka”.
LUK 7:34 Neta Yuri Tewi nehɨkɨtɨtɨ nemunua netikwa'atɨ meta netiye'etɨ, mɨpaɨta xeputiyuane: “'Ikɨ tewi 'ikwaikɨ xeikɨa pɨyɨane, winukɨ xeikɨa pɨyɨane, pɨwahamiku mɨkɨ kuwiyexinu hetsiemieme tewawamete meta 'axateyuruwamete”.
LUK 7:35 Peru yunaitɨ yurikɨ memɨtemaiwawe kememɨteyurie kanimatsiɨkɨni heitserie kemɨrexeiya Kakaɨyari timaiwetɨ».
LUK 7:36 Merikɨtsɨ xewitɨ paritseu kanita'inieni hetsɨana mɨtikwanikɨ, paritseu kiita heutahaka mana kanayerɨni.
LUK 7:37 Hikɨ 'uka mana mɨkiekametɨkai mɨmariwakai 'axamɨtiyuruwametɨkai, tiutamarieka paritseu kiita kename Ketsutsi hayekatei, kaninuani tete puteyuyari 'ahanatɨ witsimu'ɨa hɨneme.
LUK 7:38 Ketateya 'aurie kaniutakeni 'utatsuatɨ, 'ukaiya kanikaxɨrɨwekaitɨni ketateyatsie kanitihawiyakaitɨni, meta yɨkɨpakɨ kanitiwatsiɨxa, metatsiere kaniku'itsewekaitɨni ketateyatsie meta witsimu'ɨa kanitiwiriwakaitɨni.
LUK 7:39 Hikɨ 'iya paritseu mita'ini mɨpaɨ katiniyɨkɨhɨawekaitɨni yu'iyaritsie: «Kari 'ikɨ xɨka yurikɨ Kakaɨyari niukameyatɨni, pimaikakeyu 'ikɨ 'uka mikumaɨwa, kemɨtiyuriene pɨtimaikakeyu, 'axatiyuruwame kemɨtihɨkɨ».
LUK 7:40 Hikɨ Ketsutsi mɨpaɨ katinitahɨawe: —Tsimuni 'aku, 'etsiwa nepɨmatitaxatɨani. Mɨkɨ mɨpaɨ tita'ei: —Tita 'aku, Ti'ɨkitame.
LUK 7:41 Ketsutsi mɨpaɨ kaniutayɨni: —Merikɨtsɨ heiwa kaneuyewekaitɨni yuhutatɨ memɨte'ipitɨanikɨ xeime, meripai kemɨtiwaruniɨtɨa. Xewitɨ 'auxɨwime tsienituyari 'inɨariyari kani'ɨitɨanikekaitɨni, xewitɨta huta tewiyari heimana tamamata 'inɨariyari kani'ɨitɨanikekaitɨni.
LUK 7:42 Tixaɨtɨ memɨkatehexeiyakaikɨ memɨte'ipitɨanikɨ, mɨkɨ katiniwareuyehɨwirieni yuhutame. Merikɨte, ¿kemɨ'ane mɨkɨ matsi waɨkawa pɨnaki'erie tewi mɨtiwareuyehɨwiri?
LUK 7:43 Tsimuni mɨpaɨ katinita'eiya: —Xɨari kemɨ'ane matsi waɨkawamekɨ mɨreuyehɨwiyarie, mɨkɨ matsi waɨkawa kaninaki'eriekamɨkɨ. Ketsutsi mɨpaɨ katinitahɨawe: —Heitseriemekɨ pepɨti'akuhɨawe.
LUK 7:44 Hikɨ ta'aurie 'aweka, 'ukaratsi 'uxeiyaka, mɨpaɨ Tsimuni katiniutahɨawe: —¿Keneuxeiya 'ikɨ 'ukaratsi? Ne 'ahetsɨa nenuaku 'akiita, 'ekɨ haa pepɨkanetsi'uhanitɨa neketate nemɨtihauxinikɨ, mɨkɨ pɨta yu'ukaikɨ kanitihawiyatɨyani neketate, meta yɨkɨpatekɨ kanitiwatsiɨxa.
LUK 7:45 'Ekɨ penetsitapatɨ pepɨkanetsi'utawaɨritɨa, mɨkɨ pɨta ne'atahaku hikɨ 'akuxi pɨkatihayewa netsiku'itsewetɨ neketatetsie.
LUK 7:46 'Ekɨ pepɨkanetsi'ukawiri nemu'utsie, mɨkɨ pɨta witsimu'ɨa pɨnetsi'utiwiri neketatetsie.
LUK 7:47 'Ayumieme nepɨmatikɨhɨawe, kemɨtiyukanaki'erie kanimatsiɨkɨni waɨkawa kemɨreuyehɨwiyarie 'axatiuyurieka. Kemɨ'ane 'etsiwa xeikɨa mɨreuyehɨwiyarie, mɨkɨ 'etsiwa xeikɨa katiniyukanaki'erieka.
LUK 7:48 Hikɨ 'ukaratsi mɨpaɨ katiniutahɨawe: —'Axakepemɨtiuyuri pepɨreuyehɨwiyarieri.
LUK 7:49 Hikɨ hipatɨ 'auriena mematekai mɨpaɨ yu'iyaritsie mekateniyɨkɨhɨawekaitɨni: «¿Kemɨ'ane pɨhɨkɨ 'ikɨ mɨtiwareuyehɨwirie 'axakememɨte'uyuri?»
LUK 7:50 Peru Ketsutsi 'ukaratsi mɨpaɨ katiniutahɨawe: —Yuri pemɨtiuta'erikɨ peputawikweitsitɨarie, 'a'iyaritsie peka'uximatɨarietɨ kenemie.
LUK 8:1 Merikɨtsɨ 'ariketa, Ketsutsi kanikuyeikakaitɨni kiekari 'emɨyeyeutsie meta 'etsimɨyeyeutsie, kanikuxatanekaitɨni niuki 'aixɨa manuyɨne, tiwakuxaxatɨwatɨ kemɨti'ane Kakaɨyari mɨra'aitatsie. Tamamata heimana yuhutatɨ hamatɨana mekaniu'uwakaitɨni,
LUK 8:2 hipatɨta 'ukari 'aixɨa meteheu'erietɨ memayeitɨarie kakaɨyarixi 'axamemɨteyurie mewarunɨku, meta metekukuyekaku: xewitɨ mɨkɨ Mariya Mararatanaka katinitewakaitɨni, meripai muxɨnarie kakaɨyarixi 'axamemɨ'anene me'inɨkaku 'atahutatɨ,
LUK 8:3 xewitɨta Wana katinitewakaitɨni Tsutsa mɨ'ɨyayatɨkai, mɨkɨ Tsutsa mɨhɨritɨariekai Herurexi mɨtimikwanikɨ, xewitɨta Tsutsana, hipatɨta yumɨiretɨ, mɨkɨ mekaniwaparewiekaitɨni tita memɨteheuxeiyakaikɨ.
LUK 8:4 Merikɨtsɨ yumɨiretɨ teɨteri hetsɨana mekaniyuxeɨriekaitɨni, mɨireme kiekaritetsie meheyekɨneka, hikɨ 'ɨxatsi hepaɨtsita tikuxatatɨ katiniwaruti'ɨkitɨatɨyani mɨpaɨ 'utaitɨ:
LUK 8:5 «Ti'iwiwame kanayeyani 'imɨari ka'iwienike. Merikɨtsɨ 'imɨari 'iwienekaku, hipatɨ huye tetsita kaniukaxɨrieni, hikɨ kaniutiketsinarieni, meta wikixi mekanikuxɨni.
LUK 8:6 Hipatɨta mutetexiyatsie kaniukaxɨrieni, 'utineka kaniutiwani mɨka'akuhawirekaikɨ.
LUK 8:7 Hipatɨta xuyatsata kaniukaxɨrieni, hamatɨana 'utinexɨaka xuya kanenukanani.
LUK 8:8 Hipatɨta kaniukaxɨrieni 'aixɨa mɨraku'anetsie, 'utineka kaniutixuawere xeitsienituyari payeixɨa». Mɨpaɨ 'utayɨka karima mɨpaɨ kaniutayɨni: «Xewitɨ netɨ mu'enaxɨ, ke'u'ena».
LUK 8:9 Hikɨ hetsɨana miemete teyɨ'ɨkitɨwamete mekaniku'iwawiyakaitɨni keri haine mɨkɨ 'ɨxatsi.
LUK 8:10 Mɨpaɨ kaniutayɨni: «Xeme xekanipitɨarieka xemimaikakɨ tita mɨtiuti'awietsiekai, xemɨtemaikakɨ Kakaɨyari mɨra'aitatsie timieme, hipatɨ pɨta 'ɨxatsikɨ xeikɨa mekanipitɨarieka, »“para meheunenieretɨ memɨka'ixeiyakɨ, meheu'enanatɨ, memɨka'i'enienikɨ”.
LUK 8:11 »'Ɨxatsikɨ 'ipaɨ katinimatsiɨkɨni: 'Imɨari, Kakaɨyari niukieya kanihɨkɨtɨni.
LUK 8:12 Huye tetsita miemete, mɨkɨ mekanihɨkɨtɨni memɨ'enana, peru kwitɨwa kani'axeni Kauyumarie, wa'iyaritsie kaninawani niuki kapa me'utawikweitsitɨarienikɨ yuri mete'uta'eriekaxɨame.
LUK 8:13 Makutetexiyatsie miemete, mɨkɨ mekanihɨkɨtɨni memitanaki'eri niuki meyutemamawietɨ me'u'enanaka, peru mɨkɨ mepɨkahananatɨka. Yatewimekɨ yuri mekateni'erieka, peru kepauka memɨta'inɨatsienitsie mekatenikuhayeikawani.
LUK 8:14 Xuyatsata mukaxɨri, mɨkɨ mekanihɨkɨtɨni memɨ'enana, peru 'iyaritɨarika, tuminikɨ, hikɨ mieme tukari naki'eriyayakɨ meyɨatɨ mekananukanaka, meta mepɨka'aye'axɨani.
LUK 8:15 'Aixɨa mɨraku'anetsie miemete, mɨkɨ mekanihɨkɨtɨni niukitsie memɨtewiya 'aixɨa 'iyarikɨ meyuwaɨriyatɨ me'u'enanaka. Mɨkɨ mekaniutixuxuawereni mete'uka'eniwatɨ.
LUK 8:16 »Kɨxeme 'utaiyame pɨka'iti'awieta, xarita pɨkaheikayeni, 'utatɨa pɨkaheitayeni, matsi wapaitɨ kaneitiyemɨkɨ, mɨkɨ memɨwatahaxɨaxime hekɨariyaya memɨxeiyakɨ.
LUK 8:17 Karikɨ naitɨ tita mɨti'awietsie katinahekɨarimɨkɨ, meta naitɨ tita mɨti'awietsiekai katinitamariwamɨkɨ.
LUK 8:18 'Ayumieme, yemekɨ xekeneu'enana. Kemɨ'ane tixaɨtɨ mɨrexeiya, tawari matsi pɨtimikieni, kemɨ'ane mɨkarexeiya, tsepa 'etsiwa rexeiyame muyu'erie mɨkɨ katininawaiyariemɨkɨ».
LUK 8:19 Merikɨtsɨ maamaya meta 'iwamama mekaniu'axɨani hetsɨana, mekaniyutatexieni me'itahɨaweke, teɨteri yuwaɨkawatɨ memayetekaikɨ.
LUK 8:20 Hikɨ mɨpaɨ katiniutahɨawarieni: —'Amaama meta 'a'iwama takwa mekaneti'uka mematsixeiyakutɨ.
LUK 8:21 Peru mɨkɨ mɨpaɨ katiniwaruta'eiya: —'Ikɨ Kakaɨyari niukieya memɨ'enie yamemɨtekahu, mɨkɨ mekanihɨkɨtɨni nemaama meta ne'iwama.
LUK 8:22 Merikɨtsɨ heiwa kanuwatsie kanikayerɨni, hetsɨana miemete teyɨ'ɨkitɨwamete wahamatɨa. Mɨpaɨ katiniwarutahɨawe: —Harakuna 'anutaɨye tepanukɨne. Hikɨ mekanayekɨne,
LUK 8:23 hapa me'uhukaku Ketsutsi kaneukuni. Hikɨ 'eka kaniuyutawewieni tɨrɨkaɨyetɨ wiyerimatɨ harakuna hetsie, hikɨ kanuwatsie haa kanitahɨnirɨmekaitɨni meta mekanikayunirɨmekaitɨni.
LUK 8:24 Hikɨ mekanenutahɨtɨani mɨpaɨ me'utiyuatɨ: —Ti'ɨkitame, Ti'ɨkitame, tepɨkayunirɨme. Ketsutsi 'anukukeka kanitatieni 'eka hamewari meta, hikɨ kaneunuani, kayuwatɨ kaniutamare.
LUK 8:25 Hikɨ mɨpaɨ katiniwarutahɨawe teyu'ɨkitɨwamete: —¿Keri yuri xete'erie? Meheumamatɨ mekanihɨxiyakaitɨni mɨpaɨ meteyɨkɨhɨawetɨ: «¿Ketsɨ pɨpaikɨ 'ikɨ, pɨtiwa'aitɨa 'eka meta hamewari haa, yamepɨtekahu kemaine?»
LUK 8:26 Hikɨ Katarenatsixi wakwieyaritsie mekaneta'axɨani kanuwatsie meyetetɨ, Karereya 'anutaɨyetsie.
LUK 8:27 Heukakeximekaku kwiepa, tewi nenukunake mana mɨkiekametɨkai, kakaɨyarixi 'axamemɨ'anene meminɨkai mɨixa. 'Ayumieme mɨkɨ 'ixurikite pɨka'anakatɨkɨkai, kiita pɨka'ayekatei, matsi teukiyatsata kaniuyeikakaitɨni.
LUK 8:28 Ketsutsi 'uxeiyaka, 'utahiwaka kanatiweni hetɨana mɨpaɨ tiuhiwatɨ: —¿Kepeneti'uximatɨa Ketsutsi, Kakaɨyari taheima makawe pemɨnu'aya? Nepɨmatsiwawirie kwerietɨ, penɨkahɨrixɨa netsi'uximatɨaka.
LUK 8:29 Mɨpaɨ kaniutayɨni mɨkɨ, Ketsutsi mɨtita'aitɨakɨ kakaɨyari mɨka'itiya, mixɨnakɨ tewi. Mɨixa wiyari kaniwiyakaitɨni kakaɨyari 'axamɨ'ane, tewi nanutahɨiwakaitɨni tepɨakɨ 'akuwietɨ yumamatsie yɨ'ɨkatsie, kanititekekaitɨni tepɨa karenayari meta kakaɨyari 'axamɨ'ane kaneiwitɨkɨkaitɨni makumawetsie paitɨ.
LUK 8:30 Merikɨtsɨ Ketsutsi mɨpaɨ katinita'iwawiya: —¿Kepetitewa 'ekɨ? 'Iya yumɨiretɨ kakaɨyarixi meminɨkaikɨ mɨpaɨ kaniutayɨni: —Xeiwaxayari nekatinitewaka.
LUK 8:31 Mɨkɨ kwerietɨ waɨkawamekɨ mekaniwawiriekaitɨni Ketsutsi mɨkawatanɨ'anikɨ meukatewatsie memɨkayehukɨ.
LUK 8:32 Merikɨtsɨ mana hura yumɨiretɨ tuixuri mekatenikwatɨwekaitɨni yemuritɨa, mekanitawawirieni kakaɨyarixi mɨpaɨ mɨtiwapitɨanikɨ memɨwatiwiyakɨ tuixuri. Mɨpaɨ yakatiniwarupitɨani.
LUK 8:33 Hikɨ kakaɨyarixi 'axamemɨ'anene me'ixɨnaka tewi, mekaniwarutiwiya tuixuri, hikɨ tuixuri yunaitɨ mekaniutinautsa. 'Axa'anekɨa mekaneukanautsaxɨani, harakunapa mekaneuxɨrieni.
LUK 8:34 Hikɨ tuixuri wahɨwemete me'uneniereka kemɨtiuyɨ mekaniyuta'unaxɨani, kiekaritsie mekatenikuxatakaitɨni kiekari 'aurie meta,
LUK 8:35 mana mekaneyekɨne me'ixeiyake kemɨtiuyɨ. Ketsutsi hetsɨa me'u'axɨaka tewi mekaniutaxeiya kakaɨyarixi memixɨnaxɨ. 'Aixɨa reukemaritɨ Ketsutsi hetɨa kaniukateitɨni heuyumarietɨ, hikɨ mekaniutimamani.
LUK 8:36 Hikɨ memunenierixɨ mekateniwarutaxatɨani kemɨtiutawikweitsitɨarie tewi kakaɨyarixi meminɨkai.
LUK 8:37 Hikɨ yunaitɨ Katarenatsixi wakwietsie memɨtamakai meyumɨiretɨ mekanitawawirieni mana mayeyanikɨ, kwinimieme memɨtemamakaikɨ. Ketsutsi kanuwatsie kayerɨka kaneyani yu'utɨma.
LUK 8:38 Hikɨ 'iya tewi kakaɨyarixi memixɨnaxɨ kanitawawirieni hamatɨana mɨkuyeikanikɨ, matsi Ketsutsi kanitateutɨani mɨpaɨ katinitahɨawe:
LUK 8:39 —'Akie kenemie, mana ketiniwaretaxatɨa naime Kakaɨyari kemɨmatsi'uyuri. Kaneyani naitsarie kiekaritsie tikuxatatɨ kemɨtitawikweitsitɨa Ketsutsi.
LUK 8:40 Merikɨtsɨ Ketsutsi 'anutaɨye heta'aku, yumɨiretɨ teɨteri mekanitawaɨritɨani me'ikwewietɨ.
LUK 8:41 Hikɨ tewi mana kaninuani Kairu titewatɨ, tuki mɨhɨritɨarie kanihɨkɨtɨkaitɨni. Ketsutsi hetɨa 'utihɨximakeka waɨriyarika kanitawawirieni kiena mɨmiekɨ.
LUK 8:42 Xeime xeikɨa kanexeiyakaitɨni yuniwe 'ukatɨme, tamamata heimana huta wiyari yakɨtɨtɨ hɨkame, kanemɨximekaitɨni. Merikɨtsɨ 'ayeyaku yumɨiretɨ teɨteri mekanitsaipɨnakaitɨni.
LUK 8:43 Hikɨ mana kaniuyeikakaitɨni watsata, 'uka mɨtikuyekai tamamata heimana huta wiyari mɨyuriekai xuriyaya kaheunuawekaku, teyu'uayemawamete wahetsɨa yupiini katiniutixɨtɨakaitɨni naime, nixewitɨ pɨkayɨwekai menayehɨanikɨ.
LUK 8:44 Mɨkɨ 'ahurawa kaniuyani waritana 'uyemietɨ kanimayɨani 'ɨkarieya putuniyaritsie, hikɨ yapauka kaneunuani xuriyaya.
LUK 8:45 Hikɨ Ketsutsi mɨpaɨ kaniutayɨni: —¿Kepaikɨ pɨnetsi'umayɨa? Yunaitɨ meyuku'imawakaku, mɨpaɨ kaniutayɨni Pekuru: —Ti'ɨkitame, yunaitɨ teɨteri 'a'aurie mepɨyukuxeɨri mepɨmatsitsaipɨna, ¿kepai pɨnetsi'umayɨa peraine?
LUK 8:46 Ketsutsi mɨpaɨ kaniutayɨni: —Xewitɨ pɨnetsi'umayɨa. Tɨrɨkariya nehetsie payene yanepɨretima.
LUK 8:47 Hikɨ 'uka yatimaitɨ 'awie mɨkayɨanekaikɨ, 'utayɨyɨakatɨ kaninuani, hetɨana 'atiweka yunaime teɨteri wahɨrɨpa kanitaxatɨani kemɨtimayɨa meta yapauka kemɨranayehɨiya.
LUK 8:48 Ketsutsi mɨpaɨ katinitahɨawe: —Neniwe, yuri pemɨti'eriekɨ 'aixɨa pereu'erietɨ pepatɨa. 'A'iyaritsie peka'uximatɨarietɨ kenemie.
LUK 8:49 Merikɨtsɨ mɨpaɨ 'utainekaku 'akuxi, xewitɨ tuki mɨhɨritɨarie kie meyetɨa mana kaninuani mɨpaɨ titahɨaweke tuki mɨhɨritɨarie: —'Ari 'aniwe kanemɨni yemekɨ. Ti'ɨkitame pepɨkati'uxitɨaka.
LUK 8:50 Hikɨ Ketsutsi 'u'enaka mɨpaɨ katinitahɨawe: —Pepɨkaheumaka, yuri ketineuta'eri xeikɨa, kanitawikweitsitɨariemɨkɨ.
LUK 8:51 Hikɨ Kepauka Ketsutsi Kairu kiita meutaha, hipame pɨkawarupitɨa hamatɨana memeutahaxɨanikɨ mɨwayekateitsie, Pekuru, Wani meta Kakuwu xeikɨa, 'ɨimari paapaya meta maamaya xeikɨa kaniwarupitɨani.
LUK 8:52 Yunaitɨ mekaniutitsuanakaitɨni mekane'eriwakaitɨni meyuhiwerietɨ. Ketsutsi mɨpaɨ katiniwarutahɨawe: —Xepɨka'utitsuanani, pɨkamɨki, matsi pukutsu.
LUK 8:53 Hikɨ mɨkɨ mekani'atsekaitɨni metemaitɨ yeme mɨmɨkikaikɨ.
LUK 8:54 Peru mɨkɨ mamayatsie kawiereka, mɨpaɨ katinitahɨawe: —'Ɨimari 'aku, kenanukukexi.
LUK 8:55 Hikɨ 'iyarieya kaninuani, yapauka kananukukeni. Ketsutsi mɨpaɨ katiniuta'aita mɨtimikienikɨ.
LUK 8:56 Hikɨ 'ukiyarimama mekaniuhɨxiyani, peru Ketsutsi mɨpaɨ katiniwarutahɨawe, nixeime tɨma memɨkatehaxaxatɨwanikɨ kemɨtiuyɨ hepaɨtsita.
LUK 9:1 Merikɨtsɨ warukuxeɨrieka tamamata heimana yuhutame, tɨrɨkariya kaniwarupitɨani meta heitserie memexeiyanikɨ kakaɨyarixi 'axamemɨ'anene yunaime wahepaɨtsita meta kwiniyakɨ 'aixɨa meteheu'eriekame memɨwarayeitɨwanikɨ.
LUK 9:2 Kaniwareutanɨ'axɨani memɨtekuxatanikɨ kemɨti'ane Kakaɨyari mɨra'aitatsie, meta 'aixɨa meteheu'eriekame memɨwarayeitɨwanikɨ teɨteri.
LUK 9:3 Mɨpaɨ katiniwarutahɨawe: «Tixaɨ xepɨkatehetɨkɨni huyeta mieme: mumuxi, xerai, 'inɨa, tumini, huta kamixayari xepɨka'anakatɨkɨni meta.
LUK 9:4 Hakewa kiita xemeye'axɨani, muwa xekeneyuhayewani 'atsita kepaukake xemɨyehu.
LUK 9:5 Hakewa xemɨkahetanaki'eriwa, mɨkɨ kiekaritsie xe'ayekɨneme, tumuanari xekeneukatsixɨa yu'ɨkatetsie xemɨtewatahekɨatɨanikɨ mana kiekatari wahetsie kemɨrahɨiwani».
LUK 9:6 Mɨkɨ meheutayeixɨaka kiekaritetsie mekaniku'uwakaitɨni metekuxatatɨ 'aixɨa meteheu'eriekame mewarayeitɨwatɨ tekwikwikate naitsarie.
LUK 9:7 Hikɨ Herurexi mɨhɨritɨariekai mɨkɨ kwieyaritsie mɨti'aitanikɨ, mɨkɨ katiniutamarieni kemɨtiyurienekai Ketsutsi naime. 'Atsipɨkatimaikai kemɨtiyurienikekai hipatɨ mɨpaɨ memaitɨkateikɨ kename waniu Wani mɨkite watsata 'anukuketɨarie,
LUK 9:8 hipatɨta kename 'Eriyaxi matsiɨkɨtɨ 'atɨa, hipatɨta kename xewitɨ 'anukuke meripai miemete Kakaɨyari niukametemama.
LUK 9:9 Perutsɨ Herurexi mɨpaɨ kanainekaitɨni: «Wani mu'uya nanutiwitekieni yanetiuta'aitaku ne. ¿Peru kepɨpaikɨ 'ikɨ hepaɨtsitana mɨya 'anuyɨneme nemɨ'enie?» Nixeiyamɨkɨkaitɨni Ketsutsi.
LUK 9:10 Merikɨtsɨ nɨ'ariekate me'u'axɨaka, Ketsutsi naime mekateniutaxatɨani kememɨteheyuri. Hikɨ mɨkɨ warawitɨtɨ kaneyani yɨhɨkɨame kiekari Wetsaira mɨrakutewa 'aurie makumawetsie.
LUK 9:11 Peru teɨteri yamete'utamarieka mekanenukuweiya. Mɨkɨ waranunakeka katiniwakuxaxatɨwakaitɨni Kakaɨyari kemɨti'aita hepaɨtsita. Meta 'aixɨa meteheu'eriekame kaniwarayeitɨani kemɨ'ane memɨteheuyehɨakai.
LUK 9:12 Hikɨ tau 'akayunirɨmekaku tamamata heimana yuhutatɨ hetsɨana meyukuxeɨrieka mɨpaɨ mekatenitahɨawe: —Keniwarutateutɨari teɨteri, 'ahurawa memɨyehukɨ kiekarite 'emɨyeyeu 'etsimɨyeyeutsie muwa memeyehenikɨ 'ikwai memekaxeiyakɨ, 'ena makumawetsie tekaniu'uwani.
LUK 9:13 'Iya mɨpaɨ katiniwarutahɨawe: —Xeme pɨta xeketeniwarumikwa. Mɨkɨ mɨpaɨ mekaniutiyuani: —Waɨkawa 'ikwai tepɨkahexeiya, paa 'auxɨwime meta tsapari yuhutame xeikɨa, mexɨka hɨrixɨa 'ikwai tenanaiyuni 'ikɨ teɨteri yunaime wahetsiemieme.
LUK 9:14 'Auxɨwime miriyari yakɨtɨtɨ mekaniyupaɨmekaitɨni 'ukitsi. Peru Ketsutsi mɨpaɨ katiniwarutahɨawe yuhetsɨa miemete teyɨ'ɨkitɨwamete: —Yaxeketeniwarutahɨawi memɨkuyaxixɨanikɨ huta tewiyari heimana tamamata meyupapaɨmetɨ.
LUK 9:15 Mɨkɨ mɨpaɨ mekateniuyurieni, yunaime mepɨwareukuyatsaxɨa.
LUK 9:16 Hikɨ 'enu'ɨka paa 'auxɨwime meta tsapari yuhutame, taheima heutinieretɨ pamɨpariyutsi Kakaɨyari kaniupitɨani. Hikɨ 'ititaratɨ kaniwata'ɨitɨwakaitɨni teyɨ'ɨkitɨwamete memɨwamikwanikɨ teɨteri.
LUK 9:17 Yunaitɨ mekateniukwani mekaniutihuxani, tarimeyari kaniukuxeɨriyani manuyuhayewaxɨ, tamamata heimana huta tsikɨiwitiyari paɨmetɨ kanayani.
LUK 9:18 Merikɨtsɨ Ketsutsi kaniyunenewiekaitɨni yuxaɨta, teyɨ'ɨkitɨwamete mana me'u'uwakaku, mɨpaɨ katiniwaruta'iwawiya: —¿Teɨteri kemetekuxata kemɨ'ane nepɨhɨkɨ ne?
LUK 9:19 Mɨkɨ mɨpaɨ mekatenita'eiya: —Hipatɨ mɨpaɨ mekaniutiyuaneni, kename Wani Ti'ɨyame pehɨkɨ, hipatɨta kename 'Eriyaxi pehɨkɨ, hipatɨta kename xewitɨ Kakaɨyari niukameya meripai miemete pehɨkɨ pemanukuke.
LUK 9:20 Hikɨ mɨpaɨta katiniwaruta'iwawiya: —¿Xemete kexe'utiyuane, kemɨ'ane nepɨyɨane ne? Pekuru mɨpaɨ katinita'eiya: —Kɨritsitu Kakaɨyari hetsɨa mieme.
LUK 9:21 Ketsutsi kwinimieme katiniwaruhɨritɨani, xeime memɨkatehaxaxatɨwanikɨ 'ikɨ hepaɨtsita.
LUK 9:22 Mɨpaɨ kaniutayɨni: —Kaneuyeweka 'akuxi ne Yuri Tewi kenemɨtitewa waɨkawa nemɨtikwinekɨ, ta'ukiyarima, mawari wewiwamete tewa'aitɨwamete, meta 'inɨarikɨ memɨte'ɨkitamete mekanenitixani'eriekuni. Kaneuyeweka nemɨmierieni, meta nemanukukeni hairieka tukaritsie.
LUK 9:23 Mɨpaɨta katiniwakuxaxatɨwakaitɨni yunaime: —Tewi xɨka yuwaɨriyani nehamatɨa muyeikanikɨ, ketihayewani kemɨtinake yuhetsiemieme tiyurienetɨ, keyuwaɨriyani tukarikɨ tsepa kuruxitsie mumierie, nehetsie ketiwiyani.
LUK 9:24 Kemɨ'ane yutukari mɨwikweitsitɨamɨkɨ kanitatɨmaiyamɨkɨ, peru kemɨ'ane yutukari mɨtatɨmaiya nehetsiemieme, mɨkɨ kanitawikweitsitɨamɨkɨ.
LUK 9:25 ¿Tewi naime kwiepa mɨtixuawe xɨka ra'iwake, tita ra'iwakeyu xɨka yutatɨmaiya meta xɨka yuka'una yuxaɨta?
LUK 9:26 Kemɨ'ane mɨnetsitewiya mitewiya neniuki, neta Yuri Tewi kenemɨtitewa nepitewiyani 'iya kepauka nemunuani nemariwetɨ, ne'ukiyari hepaɨ witsine'anetɨ, niuki tuayamete memɨpatsie Kakaɨyaritsie mieme wahamatɨa.
LUK 9:27 Meta, yurikɨ mɨpaɨ nepɨxerahɨawe, hipatɨ 'ena memu'uwa mepɨkakwini mexi mekanenieriwawe Kakaɨyari kemɨti'aita.
LUK 9:28 Merikɨtsɨ 'inɨka 'ikɨ niuki, 'atahaika tukari yakɨtɨtɨ 'anukayaku, yemuritsie kanitiyune yutanenewienike, Pekuru, Wani, Kakuwu warawitɨtɨ.
LUK 9:29 Hikɨ yunenewiekaku yuhɨxie yɨkɨ tiyuxexeiyatɨ kanayani, 'ixurikiteya tuxatɨ xawawatɨtɨ kanayani.
LUK 9:30 Hikɨ yuhutatɨ 'ukitsi hamatɨana mekateniutixatatɨkɨne ―Muitsexi meta 'Eriyaxi― mekanihɨkɨtɨkaitɨni.
LUK 9:31 Witsi meteyuxexeiyatɨ Ketsutsi hepaɨ mekatenikuxatakaitɨni kemɨtiyemiekai, kemɨraye'anikekai Kerutsareme hetsie.
LUK 9:32 Merikɨtsɨ Pekuru hipatɨta hamatɨana memu'uwakai yunaitɨ mekanikutsukaitɨni, kwini mieme mekateneukutsikukaitɨni, me'anutaneniereka mekanixeiya witsi'aneme, 'ukitsi mekaniwaruxeiya yuhutame 'auriena meti'ukame.
LUK 9:33 Mɨkɨ Ketsutsi meku'eiriximekaku, Pekuru mɨpaɨ katinitahɨawe: ―Ti'ɨkitame 'aixɨa kani'aneni 'ena temu'uwakɨ. Hikɨmɨ haika xamaruyari tepɨtiwewieni, 'ahetsiemieme xeime, Muitsexi hetsiemieme xeime meta 'Eriyaxi hetsiemieme xeime. Mɨpaɨ kaniutayɨni 'atsikatimaitɨ kemainekai.
LUK 9:34 Tikuxatakaku 'akuxi yapauka haiwitɨri kaniwaranukanani, mɨkɨkɨ mekaniutimamani.
LUK 9:35 Hikɨ haiwitɨritsata xewitɨ mɨpaɨ kanetayɨni: «'Ikɨ kanineniwetɨni, nemenayexei, xekene'enieka».
LUK 9:36 Niuki heunuatɨyaku, Ketsutsi yuxaɨta kaniuyuhayewa. Hikɨ mɨkɨ 'atsimepɨka'utiyua, 'ana mɨtiyehane nixeime mepɨkatehaxaxatɨwakai tita memɨte'uxei hepaɨtsita.
LUK 9:37 Merikɨtsɨ 'uxa'arieka, kepauka yemuritsie memakanexɨa, yumɨiretɨ teɨteri mekaniwaranunake.
LUK 9:38 Hikɨ xewitɨ tewi teɨteri watsata 'uwetɨ mɨpaɨ katiniuhiwa: —Ti'ɨkitame 'aku, kwerietɨ xɨa neniwe 'uki keneuxeiya, mɨkɨ xeikɨa kanihɨkɨtɨni.
LUK 9:39 Kakaɨyari 'axamɨ'ane pikuwiwiya, meta yapauka 'utahiwatɨ payeika, metatsiere hau'erietɨ petihɨpa meta kwaimuxari 'uhewame payeitɨwa. Kepauka mikuwiwiya haweri mieme pikuhayeikawa.
LUK 9:40 Nekaniwarutawawirieni 'ahetsɨa miemete teyɨ'ɨkitɨwamete memenuyenɨ'anikɨ peru mepuyutatexi.
LUK 9:41 Hikɨ Ketsutsi mɨpaɨ kaniutayɨni: —Xeme hikɨ xemɨmiemete yuri xepɨkate'erie meta kemɨkatiheitserie xepɨteyurie. ¿Kepaɨmexɨa peuyewetse 'akuxi xehamatɨa nemuyeikani meta nemɨxenewieka? 'Ena kenahani 'aniwe.
LUK 9:42 Kepauka temaikɨ hurawa mamiekai kakaɨyari 'axamɨ'ane kaniwiya, kanetihɨani meta kanitayɨyɨakitsitɨani karima. Peru Ketsutsi kakaɨyari 'axamɨ'ane kaniutatieni, temaikɨ 'aixɨa reu'erietɨ kanayani, meta 'ukiyarieya kaniyetuirieni.
LUK 9:43 Yunaitɨ mekani'iyarixiekaitɨni Kakaɨyari mɨya mɨtitɨrɨkaɨyekaikɨ. Hikɨ yunaitɨ mehɨxiyakaku naime kemɨtiyurienekaikɨ, mɨpaɨ katiniwarutahɨawe yuhetsɨa miemete teyɨ'ɨkitɨwamete:
LUK 9:44 —Xeme 'ikɨ niuki yemekɨ xekeneu'eni: Yuri Tewi kenemɨtihɨkɨ nekaniyetuiyamɨkɨ teɨteri wahetsɨa.
LUK 9:45 Mɨkɨ mepɨkaheitimaiwawekai 'ikɨ niuki. Wahetsiemieme ni'awiekaitɨni, ya'ayumieme yamepɨkatehetimaiwawekai, memamatɨ mepɨkayuwaɨriyakai memita'iwawiyakekai 'ikɨ niuki hepaɨtsita.
LUK 9:46 Merikɨtsɨ teyu'ɨkitɨwamete niuki mekaniutixɨatɨatɨkɨne, kemɨ'ane mɨkɨ matsi waɨkawa meuyewetse mayanikekai.
LUK 9:47 Ketsutsi timaitɨ kememɨteyɨkɨhɨawekai yu'iyaritsie, nunutsi 'ahanaka yu'aurie kanitakeni.
LUK 9:48 Mɨpaɨ katiniwarutahɨawe: —Kemɨ'ane mitanaki'erieni 'ikɨ nunutsi nehetsɨa mɨmiemekɨ, mɨkɨta ne pɨnetsitanaki'erieni, meta kemɨ'ane mɨnetsitanaki'erieni, kemɨ'ane mɨnetsiheyenɨ'a kanitanaki'erimɨkɨta. Kemɨ'ane yunaime xetsata matsi waɨkawa tixaɨ mɨkatihɨkɨ, mɨkɨ matsi kanimariweni.
LUK 9:49 Hikɨ Wani mɨpaɨ katinitahɨawe: —Ti'ɨkitame, xeime tepuxei 'ahetsɨa waniu miemetɨtɨ mɨtiwa'aitɨakai kakaɨyarixi 'axamemɨ'anene memɨwaxɨnakɨ teɨteri, peru tekanita'imaiya 'ahetsie mɨkatiwiyakɨ tahepaɨ.
LUK 9:50 Ketsutsi mɨpaɨ katinitahɨawe: —Xepɨkahe'imaiyani, xɨka katatsi'aye'unieka kataniparewieka.
LUK 9:51 Merikɨtsɨ tukari 'aye'aximekaku manutiwitɨkienikɨ, 'ana Ketsutsi kaneyani Kerutsareme kayukunuitɨanɨatɨ.
LUK 9:52 Niuki tuayamete kaniwaranukuhaitsitɨiya, mɨkɨ mana me'uyehutɨ Tsamariyatari wakiekaritsie mekaniu'axɨani tixaɨtɨ memɨtekuha'aritɨanikɨ hetsiena mieme,
LUK 9:53 kiekatari mepɨkaheitanaki'eri yemekɨ, Kerutsareme tamietɨ mɨyɨanekaikɨ.
LUK 9:54 Teyɨ'ɨkitɨwamete Kakuwu, Wani matɨa mete'utamarieka mɨpaɨ mekatenitahɨawe: —Ti'aitame, ¿kamatinake temɨtaniunikɨ 'Eriyaxi kemɨtiuyuri, tai taheima makanenikɨ mɨkɨ mɨwatitaiyakɨ?
LUK 9:55 Peru Ketsutsi ta'aurie 'aweka kaniwarutatieni.
LUK 9:56 Hikɨ xeime kiekaritsie pɨta mekanekɨne.
LUK 9:57 Merikɨtsɨ huyeta me'uyehukaku, xewitɨ mɨpaɨ katinitahɨawe: —Ti'aitame, 'ahetsie nekatiniwiyamɨkɨ, hakewa pememie, neta nekanimieni.
LUK 9:58 Hikɨ Ketsutsi mɨpaɨ katinitahɨawe: —Kauxaitsi yuterɨ mekanexeiyani meta wikixi taheima miemete yu'itua metehexeiya, perutsɨ ne Yuri Tewi netitewatɨ tixaɨ nepɨkarexeiya hakewa nemɨnetamuritaritɨani.
LUK 9:59 Hikɨ xeimeta mɨpaɨ katiniutahɨawe: —Nehetsie ketinewiyani. Mɨkɨta mɨpaɨ katinitahɨawe: —Keneneupitɨa meri nemɨyemiekɨ, ne'ukiyari nemɨkateukukɨ hemɨyuke.
LUK 9:60 Ketsutsi mɨpaɨ katinita'eiya: —Mɨkite keniwaruhayewa mɨkɨ pɨta memɨwakateukukɨ yuhetsɨa miemete mɨkite, 'ekɨ pɨtatsɨ kenemie, ketinekuxatani kemɨti'ane Kakaɨyari ti'aitametɨkaku.
LUK 9:61 Hikɨ xewitɨta mɨpaɨ katinitahɨawe: —'Ahetsie nekatiniwiyamɨkɨ Ti'aitame, keneneupitɨa xeikɨa ne'iwama nemɨwatateutɨanikɨ meri.
LUK 9:62 Ketsutsi mɨpaɨ katinitahɨawe: —'Ikumayɨame hararu, xɨka yu'utɨma 'ukuniere, 'aixɨa pɨkayɨni, Kakaɨyari yakɨ xeikɨa kanexeiyakamɨkɨ ti'aitɨwametɨme.
LUK 10:1 Merikɨtsɨ 'arike Ti'aitame hipameta waruhɨritɨaka haika tewiyari heimana tamamata heimana huta meyupaɨmeme, yuhutatame kaniwareutanɨ'axɨani memanukuhaitɨtɨanikɨ naime kiekaritsie naime kiepa hakewa mɨkɨ meta'anikekai.
LUK 10:2 Mɨpaɨ katiniwarutahɨawe: «'Itsanari pɨwaɨkawa, peru 'itsanamete mepɨkayumɨire. 'Ayumieme xekeneutawawiri 'itsanari kutsiyari, 'itsanamete mɨwatanɨ'anikɨ yu'itsanarita.
LUK 10:3 Xekenehu xeme. Kamɨ kenemɨtixetanɨ'axɨani, muxatsi tɨrixi wahepaɨ xekaniyɨakakuni 'ɨrawetsixi watsata xe'u'uwatɨ.
LUK 10:4 Tumini maname xepɨkahehuruwani, kɨtsiuri, kakai, huyeta xeime xepɨkawaɨritɨaka.
LUK 10:5 »Hakewa xeme'axɨani kiita, mɨpaɨ meri xekeneutiyuaneni: “'Uwa kiekatari 'aixɨa xeketexeiyarieka”.
LUK 10:6 Xɨka mana 'ukani kemɨ'ane mɨyuwaɨriya 'aixɨa mɨtixeiyarienikɨ, hetsiena tinaketɨ kanayeimɨkɨ xewaɨritsika, mexɨka mɨpaɨ 'anetɨ ka'ukani, xewaɨritsika kaninuamɨkɨ xehetsie.
LUK 10:7 Mana mɨkɨ kiita xekeneyuhayewani xetekwatɨ xete'ietɨ tita memɨtexemikwani, ti'iwame hetsie katininakeni 'iwarikaya. Xepɨkayupatatɨweni hipame wakiita.
LUK 10:8 »Hakewa kiekaritsie xeme'axɨani, hakewa memɨxetanaki'erieni, xeketenekwaka tita xemɨtemikieka.
LUK 10:9 'Aixɨa meteheu'eriekame xekeniwarayeitɨa tekwikwikate mana miemete, mɨpaɨ xeketeniwakuxaxatɨwani: “Hikɨrixɨa kanaye'aniri, Kakaɨyari kanitsutɨani 'ena ti'aitatɨ”.
LUK 10:10 Peru, kepauka xeime kiekaritsie xeheutahaxɨayu xemɨkahetanaki'eriwa, memayukuxexeɨriwatsie xe'axɨame mɨpaɨ xekeneutiyua:
LUK 10:11 “'Atsita tumuanari xekiekaritsie mieme mɨtatsikwiema ta'ɨkatetsie, tepeikatsixɨani texehekɨatɨatɨ. Tsepanetɨ xemɨkatatsi'utanaki'eri, 'ipaɨ xeketenemaika, tukari maye'akɨ Kakaɨyari mitsutɨakɨ ti'aitatɨ”.
LUK 10:12 'Ipaɨ nepɨxerahɨawe, tukari 'aye'ayu 'etsiwa xeikɨa mekatenikwinitɨariekuni Tsuruma kiekatari, mɨkɨ kiekari waɨkawa matsi mekatenikwinitɨariekuni».
LUK 10:13 Mɨpaɨ kaniutayɨni: «Xɨa'ui, Kuratsini kiekatari. Xɨa'ui Wetsaira kiekatari. Tirutsie meta Tsirunitsie xɨka mariwemekɨ tiuyɨnike kemɨtiuyɨ xehetsɨa, mana kiekatari meripaitɨri mepɨte'uhayewake kememɨteyuriekai, waɨkawa yemekɨ mepɨyuheiweriekakeyu maixa me'anakatɨtɨ heiwerika 'inɨariyari, naxi meyukawiriwatɨ.
LUK 10:14 Peru kepauka 'itsɨkame muwatahɨawe Tiru meta Tsiruni kiekatari 'etsiwa xeikɨa mekatenikwinitɨariekuni, xeme waɨkawa matsi xekatenikwinitɨariekuni.
LUK 10:15 Xemeta Kaperunaumetari, ¿muyuawitsie paitɨ xe'anuwitɨkienike xeteyu'erie? Hawaikɨ, mɨkite wahetsɨa xepeukaxɨriyani pɨta.
LUK 10:16 »Kemɨ'ane mɨxe'enie, ne pɨnetsi'enie, kemɨ'ane mɨxexani'erie, ne pɨnetsixani'erie, kemɨ'ane ne mɨnetsixani'erie, kemɨ'ane mɨnetsiheyenɨ'a pɨxani'erie».
LUK 10:17 Merikɨtsɨ haika tewiyari heimana tamamata heimana huta kepauka memakunuaxɨa, mɨpaɨ mekaniutiyuani meyutemamawietɨ: —Ti'aitame 'aku, 'atsita kakaɨyarixi 'axamemɨ'anene yamepɨtekahu ketemɨtewa'aitɨa 'ahetsɨa temɨmiemetekɨ.
LUK 10:18 Mɨpaɨ katiniwarutahɨawe mɨkɨ: —Netsɨ nekanixeiya Kauyumarie muyuawitsie 'anakahɨiyaku merɨkariya hepaɨ.
LUK 10:19 Neuxei, heitserie nekanixe'upitɨani kuterixi terɨkaxi xemɨwatiketsinanikɨ, 'iya mɨtatsi'aye'unie tɨrɨkariyaya naime xema'iwakɨ heitserie nekanixe'upitɨani, tixaɨtɨ 'atsipɨkatixeyurieni.
LUK 10:20 Mɨkɨkɨ xepɨkayutemamawieka, kakaɨyarixi yamemɨtekahukɨ kexemɨtewa'aitɨa xeikɨa, matsi xekeneyutemamawieka xemaka'utɨariekɨ taheima kexemɨtetetewa.
LUK 10:21 Merikɨtsɨ 'ana Ketsutsi kaniyutemawiekaitɨni 'Iyari Mɨtiyupata yatipitɨakaku, mɨpaɨ kaniutayɨni: «Ne'ukiyari, taheima pemɨti'aita meta kwiepa, pamɨpariyutsi nepɨmatsipitɨa, pemɨtiuti'awietaxɨkɨ 'ikɨ naime memɨkaheitimanikɨ mɨkɨ memɨteyɨ'ɨkitɨawawe meta memɨtemaiwawe, tɨɨri pɨta wahetsiemieme matsiɨkɨme pemayeitɨakɨ. Huu, ne'ukiyari, pepɨ'awaɨriyakai mɨpaɨ pemɨtiyurienenikɨ.
LUK 10:22 »Ne'ukiyari naime netiniyetuirieni. Xewitɨ 'atsipɨkatimate kemɨpaikɨ Nu'aya, 'ukiyarieya xeikɨa mɨpaɨ katinimaika, xewitɨ 'atsipɨkatimate kemɨpaikɨ 'ukiyarieya, nu'aya xeikɨa mɨpaɨ katinimaika, meta nu'aya xɨka yuwaɨriyani mixeitsitɨanikɨ xeime, mɨkɨta mɨpaɨ katinimaikamɨkɨ».
LUK 10:23 Hikɨ ta'aurie 'aweka mɨpaɨ katiniwarutahɨawe teyɨ'ɨkitɨwamete yɨhɨkɨate metitekaku: «Mɨkɨ memunenierixɨ kexemɨte'unenierixɨ xeme, 'aixɨa mekani'itɨarieka mɨkɨ.
LUK 10:24 Mɨpaɨ nepɨtixekɨhɨawe, yumɨiretɨ Kakaɨyari niukametemama meta te'aitamete, mepixeiyakukai tita xemɨte'uxei xeme, peru mepɨka'ixei, mepi'eniekukai tita xemɨte'u'eni, peru mepɨka'i'eni».
LUK 10:25 Merikɨtsɨ xewitɨ 'inɨarikɨ mɨti'ɨkitametɨkai kananukukeni 'i'inɨatamɨtɨ, mɨpaɨ kaniutayɨni: —Ti'ɨkitame, ¿tita reuyewetse kenetiyurieni, nehetsie mɨtinakekɨ tukari mɨkaxɨwe?
LUK 10:26 Ketsutsi mɨpaɨ rehɨawe: —¿'Inɨari niukiyaritsie kere'uxa? ¿Kepetikuterɨwa?
LUK 10:27 Mɨkɨ mɨpaɨ katinitahɨawe: —“Pekaninaki'eriekamɨkɨ Ti'aitame mɨ'akakaɨyari naime 'a'iyarikɨ, naime kepemɨti'amatekɨ, naime 'atɨrɨkariyakɨ, meta naime 'a'eriwamekɨ”, metatsiere: “'ahepaɨ tewi kenenaki'erieka 'ekɨ kepemɨti'anaki'erie”.
LUK 10:28 Ketsutsi mɨpaɨ katinita'eiya: —Heitseriemekɨ peputa'a. Mɨpaɨ xɨka petiyurieneni, pekanayeyurikamɨkɨ.
LUK 10:29 Peru mɨkɨ heitseriemekɨ yatikamiekame yuhekɨatamɨtɨ mɨpaɨ Ketsutsi katiniutahɨawe: —¿Merikɨte, kepɨpaikɨ nehepaɨ tewi?
LUK 10:30 Hikɨ 'ita'eiyaka, Ketsutsi mɨpaɨ kaniutayɨni: —Heiwa tewi Kerutsareme heyeyaka Keriku neukamiekaitɨni, merikɨtsɨ tenawayamete mekanenukunake. Me'itikemaripieka me'ikuwaxɨaka mekanekɨne mɨximeme me'uku'eirieka.
LUK 10:31 Merikɨte 'atsikatimaitɨ kemɨtiuyɨ mana neukamiekaitɨni mawari wewiwame mɨkɨ huyeta, 'ixeiyaka mana kaniuyeyani yatewa.
LUK 10:32 Yaxeikɨata Rewi nuiwarieyatsie mieme xewitɨ tukita mɨtiparewiwametɨkai mana kaniuyeyani yatewa kaniuyeyani.
LUK 10:33 Perutsɨ xewitɨ tsamariyatanakatɨtɨ mana 'uyemietɨ hetsɨana kaninuani, 'ixeiyaka kanitinenimayata.
LUK 10:34 'Ahurawa 'uyaka 'ixuriki kaneiwerieni xuriya maneikakaitsie, hatseitikɨ winukɨ 'i'uayemaka, 'enuti'ikataka yupuxutsie metsuni paitɨ kani'atɨani, mana kani'ɨwiyakaitɨni.
LUK 10:35 Hikɨ 'uxa'arieka xeitewiyari 'inɨariyari wati'ɨka kani'ɨitɨani metsuni kutsiyari mɨpaɨ tikɨhɨawetɨ: “Kene'ɨwiyani, hetsiena mieme xɨka tixaɨtɨ petinanaimɨkɨ, xɨka 'akuxi heuyeweka, nepɨtinetuani kepauka nemayeneni”.
LUK 10:36 Hikɨ Ketsutsi mɨpaɨ mi'inɨatanekai katiniutahɨawe: —¿Merikɨte kepetiku'eriwa, 'ikɨ yuhaikatɨ kemɨ'ane yuhepaɨ tewi hepaɨ pɨtixei, tenawayamete memenukunakixɨ mɨkɨ tewi?
LUK 10:37 Mɨkɨ mɨpaɨ katinita'eiya: —Kemɨ'ane mitinenimayataxɨ, mɨkɨ pɨhɨkɨtɨkai. Hikɨ Ketsutsi mɨpaɨ katinitahɨawe: —'Ekɨtari kenemie, hepaɨna ketineyurieneni.
LUK 10:38 Merikɨtsɨ mana mekaniu'uwakaitɨni, hikɨ Ketsutsi xeime kiekaritsie kaneutahani, mana 'uka Marita titewatɨ kanita'inieni yukiita.
LUK 10:39 Yu'iwa 'ukatɨme pexeiyakai Mariya titewakame, mɨkɨ Ketsutsi hetɨa 'ukaitɨ kani'eniekaitɨni niukieya.
LUK 10:40 Merikɨtsɨ Marita pɨyuxamuriekai waɨkawa tikumaɨwatɨ mɨtiwaminikɨ. Mana 'utakeka mɨpaɨ kaniutayɨni: —Ti'aitame, ¿yapekara'eriwa ne'iwa nexaɨta mɨnetsi'uku'eirikɨ nemɨtixeminikɨ? Yaketineutahɨawi pɨnetsiparewieni.
LUK 10:41 Ketsutsi mɨpaɨ katinitahɨawe: —Neuxei Marita, tiwaɨkawamekɨ pepɨti'a'iyaritɨa pepɨ'amuina,
LUK 10:42 tixewitɨ xeikɨa peuyewetse. Mariya kanenuyexeiya tita matsi 'aixɨa mɨti'ane, pɨkanawaiyarieni.
LUK 11:1 Merikɨtsɨ heiwa 'aniukateitɨni yunenewietɨ. Yunenewieri 'unɨku, hetsɨana miemete teyɨ'ɨkitɨwamete xewitɨ mɨpaɨ katinitahɨawe: —Ti'aitame, ketatine'ɨkitɨaka temɨtanenewiekakɨ, Wani kemɨtiwaru'ɨkitɨa yuhetsɨa miemete teyɨ'ɨkitɨwamete.
LUK 11:2 Mɨkɨ mɨpaɨ katiniwarutahɨawe: —Kepauka xemɨyunenewie 'ipaɨ xekeneutiyuaneni: »“Ta'ukiyari taheima pemakawe, kepemɨtitewa patsietɨ kehayeitɨariwani. 'Enata keneutsutɨa peti'aitatɨ. Kwiepa yameketeyurieka kemɨmatinake, taheima kememɨteyurie.
LUK 11:3 'Ikwai tukarikɨ ketemɨteheiyehɨwa, tukarikɨ yaketatinemikwani.
LUK 11:4 'Axaketemɨte'uyuri ketatineuyehɨwirieka, tameta temɨtewareuyehɨwiriekaku mɨkɨ 'axamemɨtatsiyurie yunaime. Pepɨkatatsipitɨaka temɨta'inɨatsienikɨ”.
LUK 11:5 »Mɨpaɨta katiniwarutahɨawe: Xɨka xewitɨ xeme yuhamiku hexeiyani, mɨkɨ xɨka hetsɨana nuani tɨkari hixɨapa mɨpaɨ xɨka titahɨawe: “Nehamiku 'aku, haika payari keneneuniɨtɨa,
LUK 11:6 neuxei xewitɨ nehamiku nehetsɨa kanenuani tewa hanuyaka, tixaɨtɨ nekarexeiyakaku, tita netimini”.
LUK 11:7 Kiita mayeka xɨka mɨpaɨ tita'eiya: “Ketinehayewa. Kitenie pɨreuname, netɨriyama tanaitɨ tepuhe, nepɨkayɨwe nemanukukeni nemɨmatiniɨtɨanikɨ”.
LUK 11:8 Mɨpaɨ nepɨtixekɨhɨawe, kanihamikuyatɨni, peru mɨkɨ 'ayumiemeyarikɨ xeikɨa pɨka'anukukeni pɨka'iniɨtɨani, 'iya mɨkatihayewakɨ matsi tiwawirietɨ 'ayumieme naime pɨtiniɨtɨani tita mɨreuyehɨwa.
LUK 11:9 »'Ayumieme nepɨtixekɨhɨawe ne: Xɨka xe'ita'iwauni xekatehayewatɨ xekanimikiekuni, xɨka xe'ikuwauni xepitaxeiya, 'itupari xɨka xe'uyuitɨani xepɨteheuyepiyarieni.
LUK 11:10 Yunaitɨ memita'iwau, mepɨyetuiriyarɨwa yu'iwaurika, yunaitɨ memikuwautɨwe, mepitaxeiya yunaitɨ, 'itupari memɨkuyuitɨwa, mepɨteheuyepiyarɨwa.
LUK 11:11 »¿Kemɨ'ane xeme yuniwe tsapa ha'iwawakaku, kuu pimiwe pɨta?
LUK 11:12 Yatɨni tawari ha'iwawakaku, ¿kemɨ'ane terɨka pimiwe pɨta?
LUK 11:13 Xɨka xeme 'axaxeteyuruwametetɨtɨ 'aixɨa ti'aneme xetewamikwani yɨtɨriyama, matsi xe'ukiyari taheima makawe matsi yemekɨ 'Iyari Mɨtiyupata taheima mɨmieme kaniwamimɨkɨ mɨkɨ memitawawiri».
LUK 11:14 Merikɨtsɨ Ketsutsi kaneyenɨ'ani kakaɨyari 'axamɨ'ane tewi mɨxɨnakɨ kaniuweme kanayeitɨakaitɨni. Hikɨ kakaɨyari 'axamɨ'ane 'ayeyaku, tewi niuwetɨ kanayani, hikɨ teɨteri mekanihɨxiyakaitɨni.
LUK 11:15 Peru hipatɨ mɨkɨ mɨpaɨ mekaniutiyuani: «Mɨkɨ kakaɨyarixi 'axamemɨ'anene tiwa'aitɨwame 'iparewiekaku kaniwarayenɨ'awani kakaɨyarixi 'axamemɨ'anene».
LUK 11:16 Hipatɨta, me'i'inɨatakutɨ 'inɨari mekanitawawirieni muyuawitsie mieme.
LUK 11:17 Mɨkɨ wa'iyaritɨarika maitɨ mɨpaɨ katiniwarutahɨawe: «Xɨka kiekatari hixɨata meyutsana, mana pakumawere, xeime kie kiekatari xɨka hixɨata meyutsana mekanita'unikuni.
LUK 11:18 Kauyumarie xɨka hixɨata yutsana, ¿kereuteriwe ti'aitametɨtɨ? Xemetsɨ xeputiyuane kename Weheritsewutsie netiwiyatɨ newaranuyenɨ'awa kakaɨyarixi 'axamemɨ'anene.
LUK 11:19 Merikɨte, xɨka ne Weheritsewu hetsie xeniu netiwiyatɨ newarayenɨ'awani kakaɨyarixi 'axamemɨ'anene, ¿xemeta xemɨtewa'ɨkitɨa kemɨ'anetsie metewiyatɨ mepɨwaranuyenɨ'awa? 'Ayumieme mɨkɨ xehetsie mepɨte'ahɨpani.
LUK 11:20 Mexɨka Kakaɨyari tɨrɨkariyayakɨ pɨta newaranuyenɨ'awani kakaɨyarixi 'axamemɨ'anene, Kakaɨyari 'ari kanitsutɨani ti'aitatɨ xehetsɨa.
LUK 11:21 »Tewi mɨtɨrɨkaɨye kuya tepɨaya ma'ɨ mexi 'i'ɨwiya yukii, kayuwatɨ puma piiniteya.
LUK 11:22 Kemɨ'ane matsi yemekɨ mɨtɨrɨkaɨye nuame 'e'iwame, pinawairieni kuya tepɨaya hetsiena yuri mɨti'eriekai, meta yu'iwama pɨwamini tepɨateya.
LUK 11:23 »Kemɨ'ane nehetsie mɨkatiwiya, mɨkɨ pɨnetsi'aye'unie, kemɨ'ane nehamatɨa mɨkatiukuxexeɨriwa, mɨkɨ pitaxɨrɨwa.
LUK 11:24 »Kakaɨyari 'axamɨ'ane tewi hetsie 'ayeyame, makumawetsie pɨkuyeikani 'uxipiya kuwaunetɨ. Yutexienetɨ mɨpaɨ paineni: “Nepɨyemie nekita nemɨwayetɨatsie”.
LUK 11:25 Nuame pitaxeiya waye'itiyakame 'aixɨa tiuye'aneme.
LUK 11:26 'Ana pɨyemie hipame pɨwata'inieni kakaɨyarixi matsi kwini mieme 'axamemɨ'anene 'atahutame, meheutahaxɨame, muwa me'ayetetɨ mepakɨne. 'Imatɨrieka mɨkɨ tewi matsi yemekɨ 'axa'itɨarietɨ payani, kemɨka'itɨariekai matɨari paitɨ».
LUK 11:27 Merikɨtsɨ mɨpaɨ tikuxatakaku, 'uka teɨteri watsata muyeikakai kaniutahiwa mɨpaɨ 'utaitɨ: —'Aixɨa ke'itɨarieka kemɨ'anetsie pemɨyekatei, kemɨ'ane mɨmatsi'utsitsitɨa.
LUK 11:28 Ketsutsi mɨpaɨ kaniutayɨni: —Matsitsɨ pɨta, 'aixɨa meke'itɨarieka mɨkɨ Kakaɨyari niukieya memɨ'enie meta yamemɨtekahu.
LUK 11:29 Hikɨ teɨteri meyukuxeɨrieximekaku mɨpaɨ katiniutixatatɨyani: «Hikɨ miemete teɨteri 'axateyuruwamete mekanihɨkɨtɨni. Mekanikuwautɨweni 'inɨari, peru 'inɨari mepɨkapitɨarieni, Kunatsi 'inɨarieya xeikɨa mekanipitɨariekuni.
LUK 11:30 Kunatsi 'inɨari kemɨratɨa Niniwetari wahetsiemieme, neta Yuri Tewi kenemɨtitewa 'inɨari nekanayeimɨkɨ hikɨ miemete teɨteri wahetsiemieme.
LUK 11:31 Metatsiere 'uka ti'aitame Tsawa mekatei, mɨkɨ panukukeni titahekɨatake hikɨ miemete teɨteri wahepaɨtsita, wahetsie pɨrahɨani 'ana, mɨkɨ meyetɨakɨ kwie manuniere paitɨ, mi'enienikɨ Tsarumuni kemɨtimaiwekai, matsi 'ena kaniuyeikani xewitɨ waɨkawa mariwetɨ keyuri Tsarumuni.
LUK 11:32 Niniwe kiekatari mepanuku'uni metetahekɨatake hikɨ miemete wahepaɨtsita, wahetsie pɨrahɨiyani, Niniwetari memɨte'uhayewaxɨkɨ kememɨteyuriekai Kunatsi tiwarutaxatɨaku, matsi 'ena kaniuyeikani xewitɨ waɨkawa mariwetɨ keyuri Kunatsi.
LUK 11:33 »Kɨxeme 'utaiyame pɨka'iti'awieta, kakunikɨ pɨka'enukanani, matsi wapai pɨta pekayeni, teɨteri me'atahaxɨaximetɨ memixeiyakɨ hekɨariyaya.
LUK 11:34 Merikɨte, hɨxite tawaiyari kɨxemeya kanihɨkɨtɨni. Xɨka 'ahɨxi 'aixɨa reu'erieka, 'awaiyaritsie naitɨ pekanihekɨariwiyarieka. Mexɨka 'axa'aneneni 'ahɨxite, 'awaiyaritsie naitɨ pekaniyɨriyarieka.
LUK 11:35 'Ayumieme kene'akweriwayurieka, 'ahetsɨa mieme kɨxeme kapa 'uyɨrekɨ.
LUK 11:36 Xɨka 'awaiyaritsie pehekɨariwiyarieka naimetsie, mɨtiyɨwi xɨka tiumaweni, naitɨ kanihekɨakamɨkɨ, kɨxeme kemɨmatihekɨariwiya xawatɨtɨ».
LUK 11:37 Merikɨtsɨ tikuxatatɨ tiutahayewaku, paritseutɨtɨ kanita'inieni hetsɨana mɨtikwanikɨ, muwa heutahaka mana kanayerɨni.
LUK 11:38 Peru paritseu 'ixeiyaka kaniuhɨxiyani mɨka'ukamaimakɨ meri katikwaiwetɨ.
LUK 11:39 Hikɨ Ti'aitame mɨpaɨ katinitahɨawe: —Kari xeme paritseutsixi tekɨxi xakɨ herie xepɨka'itiwa, peru yutaɨta xepɨhɨpɨne xetenawakutɨ 'axaxeteyurietɨ.
LUK 11:40 'Atsixepɨkatemate. ¿Kemɨ'ane mitawewi herie taɨtanata katitawewi?
LUK 11:41 Matsi taɨtana miemekɨ xeketeneyumikwani xeteyukanenimayatɨ, mɨkɨkɨ naitɨ 'itiyatɨ kanayeimɨkɨ xehetsiemieme.
LUK 11:42 »Xɨa'ui xeme, paritseutsixi, tamamatatsie mieme xeime xepɨyuwaɨriya xemixatɨanikɨ Kakaɨyari yeruwawena, xura meta naime tupiriyate mukwaiwa, peru xepɨkayuwaɨriya heitseriemekɨ yaxemɨtekahunikɨ, xepɨkayuwaɨriya xeminaki'eriekakɨ Kakaɨyari. Mɨpaɨ xemɨtekahunikekai peuyewekai xekatehayewatɨ 'iya kexemɨteyurie.
LUK 11:43 »Xɨa'ui xeme paritseutsixi. Pɨxenake yunaime wahɨxie xemayaxekɨ tuki 'etsimɨpepeta meta xemɨwaɨritɨarieka kiekari hixɨapa.
LUK 11:44 »Xɨa'ui xeme, mɨki teukiyaya mɨkayuhekɨa herie xepɨhɨkɨ, hetsiena teɨteri memu'uwa 'atsimekatemaitɨ».
LUK 11:45 Merikɨte xewitɨ 'inɨarikɨ mɨti'ɨkitametɨkai mɨpaɨ katinitahɨawe: —Ti'ɨkitame, mɨya pe'utaitɨ pepɨtatsiniukima tameta.
LUK 11:46 Ketsutsi mɨpaɨ katinita'eiya: —Xɨa'ui xemeta 'inɨarikɨ xemɨte'ɨkita, 'ika mukwaniwe teɨteri xepɨwaruti'ikatɨwa, peru wa'ika xemɨkumaɨwani niyu'itɨwamekɨ xepɨkayuwaɨriya xemɨwaparewienikɨ.
LUK 11:47 »Xɨa'ui xeme, Kakaɨyari niukametemama wateukiya 'inɨariyari xemɨtiwewiwa, xe'ukiyarima memɨwarukwi.
LUK 11:48 'Ayumieme xepɨyuhekɨata, xe'iyari yakani'aneneni xe'ukiyarima kememɨte'uyuri, mɨkɨ mepɨwarukwi Kakaɨyari niukametemama, xemeta wa'inɨari xete'utiwewi.
LUK 11:49 Kakaɨyari timaiwetɨ 'ayumieme mɨpaɨ kaniutayɨni: “Kakaɨyari niukametemama meta nɨ'ariekate ne nepɨwaranunɨ'airieni, hipame mɨkɨ mepɨwakwini meta hipame mepɨwataweiya”.
LUK 11:50 'Ayumieme hikɨ miemete teɨteri wahetsie katinahɨiyamɨkɨ yunaime Kakaɨyari niukametemama waxuriyakɨ kwie munetɨarietsie paitɨtɨ mieme,
LUK 11:51 'Aweri xuriyayakɨ meri 'atsita Tsakariyaxi xuriyayakɨ mɨkareutewike, mumierie mɨrayutimawatɨre yeyaka tukita kaheta'awetɨ. Huu, yurikɨ mɨpaɨ nepaine hikɨ miemete teɨteri wahetsie katinahɨiyamɨkɨ.
LUK 11:52 »Xɨa'ui xeme 'inɨarikɨ xemɨte'ɨkitamete, xepinawa kitenie yawiyari kɨmana teɨteri metemaiwawetɨ memakɨnekekai. Xemetɨtɨ xepɨkaheutahaxɨawawe, meta hipame xepɨkawapitɨa memeutahaxɨani».
LUK 11:53 Merikɨtsɨ wayeyaku, mɨkɨ 'inɨarikɨ memɨte'ɨkitametetɨkai meta paritseutsixi yunaitɨ mekanitixeɨmatɨkɨne kwini mieme, mekaniti'iwawiyatɨkɨne mɨtikuxatanikɨ waɨkawa hepaɨtsita.
LUK 11:54 Me'ihupietɨ memiwiniyakɨ niukieyakɨ.
LUK 12:1 Merikɨtsɨ 'ana teɨteri waɨkawa miriyari meyupaɨmetɨ meyukuxeɨrieku yuketatsie me'a'uwekaku. Kanitsutɨani mɨpaɨ tiwakuxaxatɨwatɨ yuhetsɨa miemete teyɨ'ɨkitɨwamete: «Xekeneyukweriwayurieka matsi paritseutsixi wahetsɨa mieme tiyukuxanariyame hepaɨtsita, wa'itarika yuri hepaɨ memɨte'ikuxata hepaɨtsita.
LUK 12:2 Karikɨ naitɨ tita mɨti'awietsie katinahekɨarimɨkɨ, meta naitɨ tita 'awie mɨtimieme katinitamariwamɨkɨ.
LUK 12:3 'Ayumieme mɨpaɨ nepaine, naime tita xemɨtekuxata yɨwikɨta, hekɨaripa kani'enieriemɨkɨ, meta tita kiita yu'inɨkai xemɨtekuxata, kii heima paitɨ kanitahekɨatsiemɨkɨ hiwarikɨ.
LUK 12:4 »Mɨpaɨ nepɨtixekɨhɨawe xeme, nehamikuma, xepɨkawamakarɨka mɨkɨ memɨyɨwawe tawaiyari memɨmieni xeikɨa, peru 'arike tawarita mepɨkayɨwawe yɨkɨ memɨte'uyurieni.
LUK 12:5 Nepɨtixetaxatɨani kemɨ'ane matsi xemɨmakarɨka: xekenemakarɨka kemɨ'ane, ramieme, heitserie mexeiya tai yamɨtita'atsie mɨreukahɨani. Huu, mɨpaɨ nepɨtixekɨhɨawe, mɨkɨ xekenemakarɨka.
LUK 12:6 Wikixi yu'auxɨwitɨ huta tsenitawuyari mepɨte'aye'axe, peru nixewitɨ mɨkɨ pɨkatɨmaiyarie Kakaɨyari hɨxie.
LUK 12:7 Mɨpaɨta yaxeikɨa xeme: xekɨpate xemu'utsie mieme naitɨ pɨti'inɨatsie. Xepɨkaheumamaka, yumɨiretɨ wikixi kememɨte'aye'atɨka, xeme matsi waɨkawa xepɨte'aye'atɨka.
LUK 12:8 »Mɨpaɨ nepɨtixekɨhɨawe, kemɨ'ane mɨyuhekɨata teɨteri wahɨxie kename nehetsɨa mieme, neta Yuri Tewi kenemɨtitewa nekaninehekɨatamɨkɨ kename hetsiena netiwiya Kakaɨyari hetsɨa miemete niuki tuayamete wahɨxie.
LUK 12:9 Peru kemɨ'ane muyuku'imawa teɨteri wahɨxie kename nehetsɨa kamieme 'utaitɨ, mɨkɨta pɨkamatiwani Kakaɨyari niuki tuayametemama wahɨxie.
LUK 12:10 Yunaitɨ memɨniukixie Yuri Tewi hepaɨtsita, mekaniyɨwaweni memɨteheuyehɨwiyarienikɨ, perutsɨ kemɨ'ane 'axamɨtayɨni 'Iyari Mɨtiyupata hepaɨtsita, mɨkɨ pɨkayɨweni mɨreuyehɨwiyarienikɨ.
LUK 12:11 »Kepauka xemanuhapanieni tukiteta, kuwexinaruritsixi meta 'itsɨkate wahɨxie, xepɨkayu'iyaritɨaka kexemutiyuaneni yuhetsiemieme meta kehapaɨ xemutiyuaneni,
LUK 12:12 karikɨ 'ana 'Iyari Mɨtiyupata pɨtixeta'ɨkitɨani kexemutiyuaneni».
LUK 12:13 Hikɨ teɨteri watsata 'uwetɨ xewitɨ mɨpaɨ katinitahɨawe: —Ti'ɨkitame, yaketineutahɨawi ne'iwa mɨnetsi'ɨitɨanikɨ tita nehetsie mɨtinake tapaapa tita mɨtatiuku'eiriri.
LUK 12:14 Ketsutsi mɨpaɨ katinitahɨawe: —Neuxei, ¿kemɨ'ane xe'itsɨkame pɨnetsi'ayeitɨa xepiini hixɨata nemɨtitsananikɨ?
LUK 12:15 Hikɨ mɨpaɨ katiniwarutahɨawe: —Xekeneyukweriwayurieka naimekɨ, xekeneyɨ'ɨwiyani kapa xete'ukahiwe'erieka, rapiinite ranayuhayewakaku pɨkatukari.
LUK 12:16 Hikɨ 'ɨxatsi hepaɨtsita tikuxatatɨ katiniwaruti'ɨkitɨatɨyani mɨpaɨ 'utaitɨ: —Tewi mɨxikutɨkai kwie kanexeiyakaitɨni kwini mieme katiniutixuaweriyakaitɨni.
LUK 12:17 Hikɨ mɨpaɨ katiniyɨkɨhɨawekaitɨni yu'iyaritsie: “¿Ketsɨ netiyurieni? Nepɨkaheixeiya hakewa nemeiti'uta netɨriku”.
LUK 12:18 Hikɨ mɨpaɨ kaniutayɨni: “Tsipara 'ipaɨ nepɨtiyurieni: Nepika'una nekaxetunite, 'epapame matsi nepɨtiwewieni, mana nepiti'uta netɨriku meta hipame nepiinitɨarika.
LUK 12:19 'Anari ne'iyaritsie mɨpaɨ nepɨtinekɨhɨaweni: Ne'iyari 'aku, waɨkawa piinite pekatiniuti'uta mɨixa wiyaritsie mieme. Kene'uxipieka ketinekwaka ketine'ieka pe'atemawietɨ”.
LUK 12:20 Perutsɨ Kakaɨyari mɨpaɨ katinitahɨawe: “Kari 'atsipepɨkatimate. Hikɨ tɨkarikɨ 'a'iyari pepɨtawawiyarieni. ¿Tita pemɨtiuti'utaxɨ, kemɨ'ane piiniteya pɨrayani 'ana?”
LUK 12:21 »Mɨpaɨ katinikɨyɨneni kemɨ'ane yuhetsiemieme waɨkawa mɨtiyuti'utsiri hetsie, peru pɨkaxiku Kakaɨyari hetsiemieme».
LUK 12:22 Hikɨ mɨpaɨ katiniwarutahɨawe yuhetsɨa miemete teyɨ'ɨkitɨwamete: —'Ayumieme mɨpaɨ nepɨtixekɨhɨawe: Xepɨkayu'iyaritɨaka yutukari hepaɨtsita, kexemɨtekwani, yuwaiyari hepaɨtsita, kexemɨteyutikemaritɨani.
LUK 12:23 Tukari matsi waɨkawa pɨraye'axe keyuri 'ikwai, meta xewaiyari keyuri 'ixuriki.
LUK 12:24 Xekeneyɨ'ɨwiya kwatsari wahetsie: mepɨka'uka'etsa mepɨka'uka'itsana, kaxetuni 'iki mepɨkahexeiya, mɨyatɨtɨ Kakaɨyari katiniwamikwani. Wikixi kememɨte'aye'axe, xeme kwini mieme matsi xekate'aye'axe.
LUK 12:25 ¿Kemɨ'ane xeme waɨkawa yu'iyaritɨatɨ pɨyɨwe 'e'utewitɨ mayuyeitɨani xɨka 'etsi'utewini?
LUK 12:26 Merikɨ 'etsiwa xeikɨa xɨka xekayɨwaweni, ¿titayari xeteyu'iyaritɨa naimekɨ?
LUK 12:27 »Tuturi xekena'eriwani, kemɨkatiwita kemɨkatitsa'a, peru 'ipaɨ nepɨtixekɨhɨawe, Tsarumuni kwini mieme witsikemɨ'anekai, witsipɨkaranakatɨkɨkai wahepaɨ nixeime hepaɨ 'ikɨ tuturi.
LUK 12:28 Merikɨ xɨka Kakaɨyari mɨpaɨ tikemaritɨaka 'ɨxa 'ɨtsita mieme hikɨ muxuawe 'uxa'a huxunuta meukaxɨriyani, matsi yemekɨ katixekemaritɨaka xeme. Kari 'etsiwa xeikɨa yuri xepɨte'erie.
LUK 12:29 'Ayumieme xeme xepɨkayu'iyaritɨaka yu'ikwaikɨ meta tita xemɨte'ienikɨ, xeketeneuhayewa xe'iyarixietɨ.
LUK 12:30 Teɨteri naitsarie kwiepa miemete mɨpaɨ ti'aneneme naime mepɨtekuwautɨwe, xeme xe'ukiyari matsi mɨpaɨ pɨtimate xemeiyehɨwakɨ 'ikɨ.
LUK 12:31 Xemetsɨ xekeneyuwaɨriyani Kakaɨyari tixe'aitɨwame mɨhɨkɨtɨnikɨ, mɨpaɨ xeteyurietɨ, mɨkɨ naime xepɨtemikienita.
LUK 12:32 »Nemuxatsima, tsepa xemɨkayumɨire, xepɨkaheumamaka, xe'ukiyari kaniyuwaɨriyani mɨtixepitɨanikɨ tita mɨrexeiya ti'aitametɨtɨ.
LUK 12:33 Xeketenetuaka yupiinite, xeteyuparewietɨ xeketeneyumikwani. Xekenanuhuri tumini maname mɨkaye'iriwe, taheima xekeneuti'uta tita mɨkatixɨwe, hakewa tinawayame 'ahurawa mɨkaheyeika hakewa kwitsi mɨkaretikwitamawa.
LUK 12:34 Hakewa xemɨteheti'uta yupiinite mɨraye'atɨka, manata miemekɨ xe'iyari yakani'anemɨkɨ.
LUK 12:35 »Xekeneyuha'aritɨaka xe'ayɨhɨatɨkaitɨ xekɨxeme takaku.
LUK 12:36 Xemeta teɨteri wahepaɨ xekeneyɨaka yukutsiyari memɨkwewie, 'atsimekatemaitɨ kepauka neɨkiya 'ixɨararipa mayeyani, mekanikwewieka kwitɨwa memɨteheuyepienikɨ nuayu 'itupari heyuitɨayu.
LUK 12:37 'Aixɨa mekani'itɨariekakuni mɨkɨ te'uximayatamete xɨka wakutsiyari nuame waretaxeiya me'ayeneniereme. Yurikɨ nepɨtixekɨhɨawe, panayɨhɨani, mexatsie pɨwarutiyatsa, mana 'uyeikatɨ pɨtiwamini.
LUK 12:38 Tsepa tɨkari hixɨapa tsepa yuimuana munua, mɨya meteyuriekaku xɨka waretaxeiya, 'aixɨa mekani'itɨariekakuni mɨkɨ.
LUK 12:39 Peru 'ipaɨ xeketenemaika, xɨka kiekame yatimaikake kemɨ'ane hurayaritsie munuani tinawayame, pɨta'ikwewanikeyu mɨka'ipitɨanikɨ kiita meutahani.
LUK 12:40 Mɨpaɨta xeme kaneuyeweka xemɨyuha'aritɨaka, karikɨ kepauka Yuri Tewi kanuaximeme xemɨ'erieka 'ana kaninuamɨkɨ».
LUK 12:41 Hikɨ Pekuru mɨpaɨ kaniutayɨni: —Ti'aitame, ¿'ikɨ 'ɨxatsi hepaɨtsita peti'ɨkitatɨ tame petatixata, nutsu pepɨwaxata yunaime?
LUK 12:42 Ti'aitame mɨpaɨ katinita'eiya: —Ti'uximayatame yamɨtikamie meta mɨtimaiwe kanihɨkɨtɨni mɨyɨwe kutsiyarieya mɨtihɨritɨani mɨtiwa'aitɨakakɨ hipameta te'i'uximayatsiriwamete meta mɨtiwamikwanikɨ kepauka memeiyehɨwa.
LUK 12:43 'Aixɨa ke'itɨarieka mɨkɨ ti'uximayatame xɨka kutsiyarieya nuame 'itaxeiya yatiyurieneme kemɨtiuta'aitɨarie.
LUK 12:44 Yurikɨ mɨpaɨ nepɨxerahɨawe, pɨtihɨritɨani yupiinite tinaime.
LUK 12:45 Peru mexɨka mɨkɨ ti'uximayatame mɨpaɨ tiuyɨhɨawe: “Nekutsiyari 'epɨreutere kwitɨwa pɨkanuani”, hikɨ xɨka warutiwatɨyani te'uximayatamete 'ukitsi meta 'ukari, meta xɨka tikwaneni meta 'ieneni meta taweneni.
LUK 12:46 Mɨkɨ ti'uximayatame kutsiyarieya kaninuamɨkɨ kepauka mɨka'ikwewietsie, meta kemɨ'ane hurayaritsie yemekɨ mɨka'ikwewietsie. Hikɨ waɨkawa pi'uximatɨani meta yuri memɨkate'erie wahepaɨ katinipitɨamɨkɨ.
LUK 12:47 »Mɨkɨ ti'uximayatame yamɨtimaikai kemɨtinakekai kutsiyarieya, peru mɨkayukuha'aritɨa 'atsimɨkatiuyuri kemɨtinakekai, mɨkɨ kwini mieme kanikuweiyaxɨamɨkɨ.
LUK 12:48 Kemɨ'ane pɨta 'atsikatimaitɨ yamɨtiuyuri para mɨkuweiyaxɨanikɨ, 'etsiwa xeikɨa pɨkuweiyaxɨani. Kemɨ'ane waɨkawa mɨtiumikie, mɨkɨ waɨka pɨtitawawiyarieni, kemɨ'ane waɨkawa mɨhɨritɨarie, waɨkawa matsi pɨtitawawiyarieni.
LUK 12:49 »Ne nekaninuani tai nemeukahɨanikɨ kwiepa, yanepɨra'eriwakaku 'ari xɨka takake.
LUK 12:50 Peuyewetse nema'iwarienikɨ nemɨmierienikɨ, tewi kemɨranukanamiepaɨ hakɨ kepauka muka'ɨyarie, haweri mieme nepɨtiuka'eniwa mexi ka'aye'awe.
LUK 12:51 ¿Xeme mɨpaɨ xeteku'eriwa kename nenua newapitɨanike kwiepa memɨtama 'aixɨa memɨteyuxeiyanikɨ? Hawaikɨ, hixɨata nemɨwatsanakɨ pɨta nepunua.
LUK 12:52 Hikɨ 'uxa'atɨni yu'auxɨwitɨ xeikiyarita miemete hixɨata mepɨyutsanani yuhaikatɨ yuhutame mewaraye'unietɨ, yuhutatɨ yuhaikame mewaraye'unietɨ.
LUK 12:53 Mepɨkayuxewini nuariekame yuniwe paye'unieka meta nu'aya yupaapa paye'unieka, niwekame yuniwe 'uka paye'unieka meta 'uka yumaama paye'unieka, niwekame yumu'e paye'unieka meta wikiekame yumu'e paye'unieka».
LUK 12:54 Hikɨ mɨpaɨ katiniwarutahɨawe teɨteri: —Kepauka hai xemɨxeiya tau makayuyuipike hepatsie hatineikame, kwitɨ 'ana mɨpaɨ xeputiyuane: pɨkawiye, mɨpaɨta pɨtikɨyɨne.
LUK 12:55 Meta kepauka 'eka tatsutɨa hepatsie mieme mu'eka, mɨpaɨ xeputiyuane: pukɨxɨre, mɨpaɨta pɨtikɨyɨne.
LUK 12:56 Xemɨte'itawamete. Xepi'inɨatawawe kwie kemɨtiyuxexeiya muyuawi meta. ¿Titayari xekate'i'inɨatawawe 'ikɨ tukaritsie mieme?
LUK 12:57 »¿Titayarita yɨkɨmana xekateheitimaiwawe tita mɨtiheitserie?
LUK 12:58 Kepauka 'itsɨkame hetsɨa pemanuhanieni, huyeta xe'uhutɨ keneunɨtɨa 'axanetame matsixɨnakɨ, kapa 'itsɨkame hɨxie matsihe'atɨanikɨ, 'itsɨkame kapa matsiyetuanikɨ tupiri hetsɨa, tupiri kapa matsi'anutahɨani katsariyanata.
LUK 12:59 Mɨpaɨ nepɨmatikɨhɨawe, muwa pepɨkawayeyani kepaukake naimekɨ pemɨti'atuani».
LUK 13:1 Merikɨtsɨ hipatɨ 'ana me'u'axɨaka mekatenitaxatɨani karereyatari wahepaɨtsita, Piratu mɨtiuta'aitaxɨ memɨkwi'iwakɨ mexi metemawatɨwekai.
LUK 13:2 Ketsutsi mɨpaɨ katiniwarutahɨawe: «¿Kexeteku'eriwa, mɨya memɨte'ukwinixɨkɨ kemetematsiɨkɨ, kename mɨkɨ matsi yemekɨ 'axameteyuriekai, hipatɨ karereyatari yunaitɨ 'axakememɨkate'uyuri?
LUK 13:3 Pɨkatixaɨ. Matsi mɨpaɨ nepɨtixekɨhɨawe, xɨka xekate'uhayewa kexemɨteyurie xeme, wahepaɨ xekanikwi'iwakuni yunaitɨ.
LUK 13:4 ¿Mɨkɨ meta tamamata heimana 'atahaika memɨyupaɨmekai wahetsie mukawe Tsiruhe tuxiyuyari mɨwarukwi, kexeteku'eriwa mɨkɨ wahepaɨtsita, kemetematsiɨkɨ kename matsi kwinimieme wahetsie rahɨiwakai, hipatɨ teɨteri Kerutsareme memɨtama yunaime wahetsie kemɨkarahɨiwakai?
LUK 13:5 Pɨkatixaɨ. Matsi mɨpaɨ nepɨtixekɨhɨawe, xɨka xekate'uhayewa kexemɨteyurie, yaxeikɨa xekanikwi'iwakuni yunaitɨ».
LUK 13:6 Hikɨ 'ikɨ 'ɨxatsi hepaɨtsita tikuxatatɨ katini'ɨkitakaitɨni: «Tewi 'aniukateitɨni kɨye muka'iteɨritaxɨ yuharawerita, mana kani'axekaitɨni 'ikwaxi kuwaunetɨ kɨyetsie mieme, kakanitaxexeiyakaitɨni.
LUK 13:7 Hikɨ harawerita mɨhɨritɨariekai mɨpaɨ katiniutahɨawe: “Neuxei haika wiyari nepeukuyeixɨa 'ikwaxi nekuwaunetɨ 'ikɨ kɨyetsie mieme, nepɨka'itaxeiyawe. Kenahɨwa, ¿titayari kwie titsewixima xeikɨa?”
LUK 13:8 Peru tihɨweme mɨpaɨ katinitahɨawe: “Nekutsiyari, 'ikɨ witsie keneuhayewa xeikɨa, ne hetɨana nepa'inetɨyani, meta kwie 'aixɨa mɨ'ane nepawiwietɨyani.
LUK 13:9 Heiwatɨ mɨpaɨ 'utixuawere, mexɨka katixaɨtɨni, tepewiteni kepemaine”».
LUK 13:10 Merikɨtsɨ 'uxipiya tukaritsie katini'ɨkitakaitɨni heiwa xeime tukita,
LUK 13:11 'uka muwa kanayekateitɨni kakaɨyari 'axamɨ'ane miwiyakai tamamata heimana 'atahaika wiyari 'iweranariyatɨ. Nanakatutsikaitɨni, pɨkayɨwekai mɨyutatseiriyakɨ naime.
LUK 13:12 Hikɨ Ketsutsi 'ixeiyaka yu'aurie 'itahɨaweka mɨpaɨ katinitahɨawe: —'Uka pepuxɨnarie kepemɨtiweranikai.
LUK 13:13 Hetsiena 'utimeku yapauka kaniutatseire, 'aixɨa nainekaitɨni Kakaɨyari hepaɨtsita.
LUK 13:14 Hikɨ tuki mɨhɨritɨarie ha'atɨ Ketsutsi menayehɨakɨ 'uxipiya tukaritsie, mɨpaɨ katiniwarutahɨawe teɨteri: —'Ataxewi tukari puxuawe kepauka meuyewetse yamɨti'uximayakakɨ, mɨkɨ tukaritsie 'ayumieme xekene'axeni 'aixɨa xemɨte'uka'eritɨariwanikɨ, peru 'uxipiya tukaritsie pɨkatixaɨ.
LUK 13:15 Hikɨ Ti'aitame mɨpaɨ katinita'eiya: —Xemɨte'itawamete. ¿Yuxexuitɨ xeme 'uxipiya tukariyaritsie xekatewaxɨna yutuurutsixi kwietsanamete yupuxurima hakewa memakuwɨ, xekatewarehapana xekatewaharitɨwa?
LUK 13:16 'Ikɨ 'uka 'Apɨrahami kaninu'ayatɨni, peru Kauyumarie kanekuwiekaitɨni tamamata heimana 'atahaika wiyari, ¿kareuyewetse 'uxipiya tukaritsie mɨxɨnarienikɨ 'akuwietɨ?
LUK 13:17 Mɨpaɨ 'utayɨku mekaniuyutitetewiya yunaitɨ memeye'uniekai, peru hipatɨ teɨteri yunaitɨ mekaniyutemamawiekaitɨni waɨkawa mariweme mɨtiyurienekaikɨ.
LUK 13:18 Hikɨ mɨpaɨ kaniutayɨni: —¿Tita hepaɨ ti'ane Kakaɨyari kemɨti'aita? ¿Ke'aneme 'ɨkitsikayari nexatatɨ nepihekɨatani?
LUK 13:19 Mutsitatsa 'imɨariyari hepaɨ kani'aneni tewi xei 'imɨariyari 'anutɨka yuharawerita meika'e. 'Utawereka kɨye kanayani, wikixi taheima miemete mekaniyuti'ituatɨatɨkɨne mamateyatsie.
LUK 13:20 Hikɨ tawari mɨpaɨ kaniutayɨni: —¿Ke'aneme 'ɨkitsikayarikɨ nepihekɨatani Kakaɨyari kemɨti'aita?
LUK 13:21 Paa kuxanariyame hepaɨ kani'aneni, 'uka 'iwatituka kanitimuina paa mɨtɨxiyaritsie waɨkawametsie, 'arikeke naitɨ kaniutikuxanare.
LUK 13:22 Hikɨ kiekarite 'emɨyeyeutsie 'etsimɨyeyeutsie kaniye'axekaitɨni ti'ɨkitatɨ, Kerutsareme tamietɨ.
LUK 13:23 Merikɨtsɨ xewitɨ mɨpaɨ katinita'iwawiya: —Ti'aitame, ¿yakɨ yupaɨmetɨ xeikɨa metetawikweitsitɨarieni? Ketsutsi mɨpaɨ katinita'eiya:
LUK 13:24 —Waɨriyarika xekeneyupitɨaka xemeutahaxɨanikɨ kitenie 'etsimayewatsie, mɨpaɨ nepɨxerahɨawe, karikɨ yumɨiretɨ mepɨhakuni peru mepɨyutatexieni.
LUK 13:25 Kepauka kiekame 'anukukeme mɨreunani kitenie, xeme takwa xemu'uwa, 'itupari xekaniyuitɨakuni, mɨpaɨ xe'utiyuatɨ: “Ti'aitame 'aku, ketatineuyepiri”. Peru mɨkɨ mɨpaɨ katinixeta'eiyamɨkɨ: “Ne nepɨkaxemate meta nepɨkatimate hakewa xemeyekɨ”.
LUK 13:26 Hikɨ 'ana xekanitsutɨakuni mɨpaɨ xe'utiyuatɨ: “Tame tepɨte'ukwai meta tepɨte'u'i 'ahamatɨa, meta 'ekɨ takaye 'utɨa pepɨti'ɨkitakai”.
LUK 13:27 Peru mɨkɨ mɨpaɨ katinixeta'eiyamɨkɨ: “Nepɨkaxematerikɨ meta nepɨkatimate hakewa xemeyekɨ. Xekeneuyupata nehetsɨa xepɨka'u'uwani, xeme xeyunaitɨ kemɨkatiheitserie xemɨteyurie”.
LUK 13:28 »Mana xekaniutitsuanakuni xekaniyutakewekuni, kepauka xemɨwaxeiya 'Apɨrahami, 'Itsahaki, Kakuwu meta texaxatamete yunaime mana me'u'uwame hakewa Kakaɨyari mɨre'aita, xeme pɨta xe'anuyexɨriyayu.
LUK 13:29 Tau matineikatsie miemete makayuyuipiketsie miemete mekani'axɨakuni, tatserieta miemete meta ta'utata miemete, mexa 'aurie mekanayaxikuni hakewa Kakaɨyari mɨre'aita.
LUK 13:30 Mana, hikɨ miemete 'imatɨremete 'ana hipatɨ mexɨakate mekanakɨnikuni, hikɨ miemete mexɨakate meta hipatɨ mɨkɨ 'imatɨremete mekanakɨnikuni».
LUK 13:31 Merikɨtsɨ 'ana paritseutsixi hipatɨ hetsɨana mekaniu'axɨani mɨpaɨ mete'ikɨhɨawetɨ: —Xaɨtsie pɨta kenemie, Herurexi pɨmatsimiemɨkɨ.
LUK 13:32 'Iya mɨpaɨ katiniwarutahɨawe: —Mɨpaɨ xeketenetahɨawi netsimariutame: “Neuxei, ne hikɨ 'uxa'a nepɨwaranuyenɨ'awani kakaɨyarixi 'axamemɨ'anene memɨwatixɨnakɨ teɨteri, nepɨwaranayexɨrieni tekwikwikate, 'ayeimana nepaye'atɨarienitɨtɨ”.
LUK 13:33 Mɨkɨ xeikɨa neuyeweka hikɨ, 'uxa'a meta warie nemɨkuyeikanikɨ, peuyewetse yemekɨ yunaitɨ texaxatamete memɨkwi'iwakɨ Kerutsaremetsie, xaɨtsie pɨkatixaɨ.
LUK 13:34 »Kerutsareme, Kerutsareme 'aku, 'ahetsɨa kiekatari mekaniwatakukuyani Kakaɨyari niukametemama meta mekaniwatituaxani Kakaɨyari nɨ'arimama 'ahetsɨa memɨ'axe. Mɨixa nepɨnewaɨriyakai nemɨwakuxeɨrienikɨ 'atɨriyama, wakana yuniwema kemɨtiwakuxexeɨriwa yu'anatɨa hepaɨ, peru mepɨkayuwaɨri.
LUK 13:35 Neuxei, xekii 'uyemawetɨ pɨyuhayewa. Mɨpaɨ nepɨtixetahɨawe, tawari xepɨkanetsixeiya mexi tukari ka'aye'awe kepauka mɨpaɨ xemutiyuaneni: “'Aixɨa ke'itɨarieka kemɨ'ane 'umamie Ti'aitame hetsɨa miemetɨtɨ”».
LUK 14:1 Merikɨtsɨ Ketsutsi xeime hetsɨa kaninuani 'uxipiya tukaritsie tikwanike. Mita'ini xewitɨ teɨteri wa'ukiyarima kanihɨkɨtɨkaitɨni meta paritseutɨtɨ, mɨkɨ mekanihupiekaitɨni.
LUK 14:2 Hikɨ tewi meuhatɨkatei hɨxiena kanakateitɨni.
LUK 14:3 Ketsutsi mɨpaɨ katiniwaruta'iwawiya 'inɨarikɨ memɨte'ɨkitametetɨkai meta paritseutsixi: —¿Tiyɨwe nutsu pɨkayɨwe 'uxipiya tukaritsie tewi 'aixɨa muyurienikɨ?
LUK 14:4 Peru mɨkɨ kayuwatɨ mekaniumakaitɨni. Hikɨ tikwikame 'umayɨaka 'aixɨa reu'eriekame hayeitɨaka kaneinɨ'ani.
LUK 14:5 Meta mɨpaɨ katiniwarutahɨawe: —Xewitɨ xeme xɨka niweya heukaweni muwatixawatsie yatɨni tuuruya, ¿kwitɨwa katiwatihana tsepa 'uxipiya tukaritsie?
LUK 14:6 Mepɨkayɨwawekai tixaɨ memutiyuanenikɨ 'ikɨ hepaɨtsita.
LUK 14:7 Hikɨ waruxeiyaka kememɨtehenuyexeiyakai hakewa matsi 'aixɨa mɨ'anenekai memayaxekɨ, 'ɨxatsi hepaɨtsita tikuxatatɨ katiniwaruti'ɨkitɨatɨyani mɨkɨ memuta'inierie, mɨpaɨ katiniwarutahɨawe:
LUK 14:8 —Kepauka tewi mɨxeta'inieni neɨkiya 'ixɨararipa, hakewa matsi 'aixɨa mɨ'ane mana xepɨka'ayaxikeni, kapa xeime matsi we'eme 'uta'inieni, 'ekɨ 'etsiwa pewe'emetɨkaku xeikɨa.
LUK 14:9 'Ahetsɨa nuame kemɨ'ane mɨxe'uta'ini mɨpaɨ pɨmatikɨhɨaweni: “Keneupitɨa 'ikɨ pɨta 'ena mayerɨnikɨ”. 'Ana 'ekɨ pe'atewiyatɨ 'imatɨreme 'ɨparieyatsie pe'akaitɨ pepayani.
LUK 14:10 Matsi kepauka pemɨta'inierieni, mana kenayexi 'imatɨreme 'ɨparitsie, kepauka munuani kemɨ'ane mɨmatsi'uta'ini, mɨpaɨ pɨmatitahɨawe: “Nehamiku, huma pɨta kenayexi 'ahurawa”. 'Ana witsipɨraniuwani 'ahepaɨtsita yunaime 'ahamatɨa memuta'inierie wahɨxie.
LUK 14:11 Yunaitɨ yuxaɨta mariweme memayuyeitɨwa tixaɨtɨ mekatehɨkɨtɨtɨ mekanayeitɨariekuni, peru kemɨ'ane tixaɨtɨ katihɨkɨtɨme mayuyeitɨwa mɨkɨ mariweme kanayeitɨariemɨkɨ.
LUK 14:12 Meta kemɨ'ane mita'ini mɨpaɨ katiniutahɨawe: —Kepauka 'ikwai pemɨwewieka tuka ya taikai, pepɨkawa'inieka 'ahamikuma, 'a'iwama, 'amarema, 'aurawatari memeuka'u xeikɨa, mɨkɨta kapa mematsi'uta'inienikɨ, kapa mɨpaɨ perakapitɨarienikɨ.
LUK 14:13 Matsi kepauka 'ikwai pemɨwewieka, keniwa'inieka mɨkɨ tixaɨtɨ memɨkatehexeiya, memɨmamawawaki, memɨhurietɨka meta memakɨkɨpe.
LUK 14:14 Mɨkɨ tixaɨtɨ mepɨkatehexeiya kɨmana tawarita memɨmate'apiniriekakɨ, mɨpaɨ petiyurienetɨ 'aixɨa pekani'itɨariekamɨkɨ, tawari pepɨrapiniyarieka kepauka memanuku'uni mɨkɨ heitseriemekɨ yamemɨtekahu.
LUK 14:15 Hikɨ memuta'inierie xewitɨ, 'ikɨ 'u'enieka, mɨpaɨ katinitahɨawe: —'Aixɨa kani'itɨarieka kemɨ'ane mɨrekwani hakewa Kakaɨyari mɨre'aita.
LUK 14:16 Ketsutsi mɨpaɨ katinitahɨawe: —Xewitɨ tewi 'ikwai 'ixɨarariyari kaniuwewieni mariweme, yumɨireme kaniwaruta'inieni.
LUK 14:17 Hikɨ tukari 'aye'aku memɨtekwanikɨ, yuhetsɨa mieme ti'uximayatame kaniutanɨ'ani mɨpaɨ mɨtiwatahɨawekɨ memuta'inierie: “Xekenakɨniri, 'ari naitɨ pɨrekuha'aritsie”.
LUK 14:18 Hikɨ yuxexuitɨ yunaitɨ mekaniuyuti'imatɨkɨne. Xewitɨ meri mɨpaɨ katinitahɨawe: “Kwie nepenanai, peuyewetse nemixeiyamiekɨ, nepɨkayɨwe nemɨmiekɨ, kenetineuyehɨwiri”.
LUK 14:19 Xewitɨta mɨpaɨ titahɨawixɨ: “Tuurutsixi kwietsanamete nepɨwaretinanai 'auxɨwime paritsiyari, newareta'inɨatake nepɨmie, kenetineuyehɨwiri”.
LUK 14:20 Xewitɨta mɨpaɨ titahɨawixɨ: “'Uka nepuwitɨtɨarie, 'ayumieme nepɨkayɨwe nemɨmiekɨ”.
LUK 14:21 Hikɨ ti'uximayatame nuaka mɨpaɨ katinitahɨawe yukutsiyari. Hikɨ kiekame 'uyeha'aka mɨpaɨ katinitahɨawe yuhetsɨa mieme ti'uximayatame: “Kwitɨ kiekaritsie kenemie kaye'utɨa huyeta, tixaɨtɨ memɨkateheuxeiya, memɨmamawawaki, memakɨkɨpe meta memɨhurietɨka keniwarawitɨki 'uwa”.
LUK 14:22 'Ariketa mɨpaɨ kaniutayɨni ti'uximayatame: “Nekutsiyari, kepemɨtiuta'aitaxɨ yanepɨtiuyuri, peru mepɨkahɨne 'akuxi”.
LUK 14:23 Hikɨ kutsiyarieya mɨpaɨ katinitahɨawe yuhetsɨa mieme ti'uximayatame: “Huyeta kenemie tetsariya kemɨtiukumane, waɨriyarika keniwarepitɨa memahukɨ nekita memɨtahɨnekɨ.
LUK 14:24 'Ipaɨ nepɨtixekɨhɨawe, mɨkɨ memuta'inierie, nixewitɨ mɨkɨ pɨkahe'inɨata ne'ikwai”.
LUK 14:25 Merikɨtsɨ yumɨiretɨ teɨteri 'utɨmana mekaniuhukaitɨni, ta'aurie 'aweka mɨpaɨ katiniwarutahɨawe:
LUK 14:26 «Xɨka xewitɨ nehetsɨa nuani, xɨka kawa'uxiwe'erieka yupaapa meta yumaama, yɨ'ɨya, yɨtɨriyama, yu'iwama, meta xɨka ka'i'uxiwe'erieka yutukari, pɨkayɨwe nehetsɨa mieme tiyɨ'ɨkitɨwame mayuyeitɨwanikɨ.
LUK 14:27 Kemɨ'ane mɨkayuwaɨriya kuruxitsie mɨmierieni, tsepa nehamatɨa muyeika nehetsie tiwiyatɨ, mɨkɨ pɨkayɨwe nehetsɨa mieme tiyɨ'ɨkitɨwame muhɨkɨtɨnikɨ.
LUK 14:28 »Xewitɨ xeme xɨka tuxiyu tawewimɨkɨni, ¿mana karayerɨni meri titi'inɨatake kemɨraye'aka, xɨka heixeiyani kɨmana minɨni, mexɨka katixaɨtɨni?
LUK 14:29 Tenariyari xɨka 'utawewieni, xɨka yutatexieni minɨnikɨ, 'aixɨa pɨkayɨni, yunaitɨ mekanitinanaimatɨkɨnikuni memɨneniere
LUK 14:30 mɨpaɨ me'utiyuatɨ: “'Ikɨ tewi kii kaniutsutɨani, pɨyutatexi pɨka'inɨ”.
LUK 14:31 »Yatɨni xewitɨ kwiepa ti'aitame xɨka yemieximeni xeime ti'aitame matɨa memɨyutakwinikɨ. ¿Mana meri karayerɨni, mɨpaɨ tiyɨkɨhɨawetɨ tamamata miriyari warawitɨtɨ xɨka 'aku yɨweni menukunakekɨ 'iya xeitewiyari miriyari warawitɨtɨ hepana mamie?
LUK 14:32 Mexɨka katixaɨtɨni, 'ateewa heyeikakaku 'akuxi meye'unie, nɨ'ariekate penunɨ'airieni, pitawawirieni 'aixɨa memɨteyuxeiyanikɨ.
LUK 14:33 Yaxeikɨatari yunaitɨ xeme xɨka yupiinite nai xekate'uku'eirieni, xepɨkayɨwawe nehetsɨa miemete teyɨ'ɨkitɨwamete xemayuyeitɨwanikɨ.
LUK 14:34 »'Una 'aixɨa kani'aneni, xɨkate 'una hamuritɨ 'ayanike, ¿titakɨ ra'utsiɨrekeyu 'unatɨtɨ?
LUK 14:35 'Aixɨa pɨka'ane kwie hetsiemieme meta 'iteɨrite wahetsiemieme, tewa paitɨ xeikɨa kanewiwiyamɨkɨ. »Xewitɨ netɨ mu'enaxɨ, ke'u'ena».
LUK 15:1 Merikɨtsɨ yuwaɨkawatɨ kuwiyexinu hetsiemieme tewawamete meta 'axateyuruwamete hetsɨana mekani'axekaitɨni yunaitɨ me'i'enienike kemɨtikuxatakaikɨ.
LUK 15:2 Hikɨ paritseutsixi meta mɨkɨ 'inɨarikɨ memɨte'ɨkitametetɨkai, mekaniniukixiekaitɨni mɨpaɨ me'utiyuatɨ: «'Ikɨ 'axateyuruwamete kaniwanaki'erieka, wahamatɨa katinikwaka».
LUK 15:3 Hikɨ mɨkɨ 'ɨxatsi hepaɨtsita tikuxatatɨ katiniwaruta'ɨkitɨani mɨpaɨ 'utaitɨ:
LUK 15:4 «Xewitɨ xeme xɨka xeitsienituyari warexeiyani yumuxatsi, xewitɨ mɨkɨ xɨka heuyeweni, ¿mana 'ɨxapa katiwaku'eirieni nauka tewiyari heimana tamamata heimana 'atanauka memɨyupaɨme, katiwaumie meuyewe, 'itaxeiyameke xeikɨa katihayewa?
LUK 15:5 Hikɨ, kepauka meitaxeiya, waɨkawa yutemawietɨ yunaiparitetsie neikutemɨkɨ.
LUK 15:6 Yukie nuame kaniwakuxeɨrimɨkɨ yumarema 'ahurawatari yunaime mɨpaɨ tiwakɨhɨawetɨ: “Xemeta xekeneyutemamawieka nehepaɨ, nemeitaxeikɨ nemuxa meuyewekai”.
LUK 15:7 Mɨpaɨ nepɨxerahɨawe, mɨpaɨta katine'aneni muyuawisie: kwini mieme mekateniyutemamawieka taheima kepauka xewitɨ mɨtihayewa 'axatiyurienetɨ, keyuri nauka tewiyari heimana tamamata heimana 'atanauka memɨyupaɨme heitseriemekɨ yamemɨtekahu memɨkaheiyehɨwa memɨtehayewakɨ 'axameteyurietɨ.
LUK 15:8 »'Uka xɨka tamamata tuminiyari hexeiyani pɨrata tuminiyari, xeituminiyari xɨka heuyehɨani. ¿Katitaiya kɨxeme, katiuye'itieni yukiita, 'aixɨa 'anemekɨ katikuwauni 'itaxeiyameke katihayewa?
LUK 15:9 'Itaxeiyame kaniwakuxeɨrimɨkɨ yumarema 'ahurawatari yunaime mɨpaɨ 'utaitɨ: “Xemeta xekeneyutemamawieka nehepaɨ, netumini nemutaxeikɨ nemeiyehɨakai”.
LUK 15:10 Mɨpaɨ nepɨtixekɨhɨawe, yaxeikɨa Kakaɨyari hetsɨa miemete niuki tuayamete temawierika mekanexeiyani, kepauka xewitɨ mɨtihayewa 'axatiyurienetɨ».
LUK 15:11 Mɨpaɨ kaniutayɨnita: »Tewi yuhutame kaniwarexeiyakaitɨni yuniwema.
LUK 15:12 Hikɨ mutaya mɨpaɨ katinitahɨawe yu'ukiyari: “Ne'ukiyari, 'apiinitɨarikatsie timieme mɨkɨ kenetineyetuiri nehetsiemieme mayanikɨ kepaɨmetɨ nehetsie mɨtinake mɨti'apinitɨkai”. 'Ana yupiinitɨarika katiniwayetuirieni yuhutame yuniwema.
LUK 15:13 Hikɨ yapaɨmexɨa 'anukayaku mutaya naime tiukuxeɨrieka tewa kaneyani xeime kwieyaritsie, yupiini katineuyehɨani mana yakɨ xeikɨa.
LUK 15:14 »Merikɨtsɨ naime tiutixɨtɨaku, haka kaniutaweni kwini mieme mɨkɨ kwieyaritsie, hikɨ 'ana reuyehɨatɨ kanayani.
LUK 15:15 Hikɨ mana kiekame hetsɨa nuaka hetsiena katiniuwiya, mɨkɨ kaneinɨ'ani tuixuri mɨtiwaremikwanikɨ kwiepana.
LUK 15:16 Huxaimɨtɨ kanihiwe'eriekaitɨni ketita memɨtekwakai tuixuri, peru nixewitɨ pɨkatimi.
LUK 15:17 Merikɨtsɨ 'uka'iyaritɨ kanayani, mɨpaɨ kaniutayɨni: “Ne'ukiyari hetsɨa miemete te'iwamete paa mepexeiya 'anayuhayewakame, ne matsi 'uwa nepɨmɨxime hakakɨ.
LUK 15:18 Nepɨyemie mekuxi ne'ukiyari hetsɨa, mɨpaɨ nepɨreitahɨawe: Ne'ukiyari, 'axanepɨtiuyuri, taheima makawe yamɨkahainetsie, 'ekɨta yapemɨkahainetsie nepɨtiuyuri.
LUK 15:19 'Aixɨa nepɨkatiuka'iyari, heitserie nepɨkahexeiya para hutarieka 'aniwe nemayanikɨ, 'ahetsɨa miemete te'iwamete wahepaɨ xeikɨa kenetinepitɨaka nemɨnehayewakɨ”.
LUK 15:20 Hikɨ yukuha'aritɨaka yupaapa hetsɨa kaneyani. »'Ateewa 'akuxi 'amiekaku paapaya kanixeiya, kanitinenimayata, 'utanautsaka 'enukunakeka 'enakawiyatɨkaitɨ kani'itseni.
LUK 15:21 Hikɨ nu'aya mɨpaɨ katinitahɨawe: “Nepaapa, 'axanepɨtiuyuri, taheima makawe kemɨkatinaketsie, 'ekɨta kepemɨkahainetsie nepɨtiuyuri. 'Aixɨa nepɨkatiuka'iyari, heitserie nepɨkahexeiya para hutarieka 'aniwe nemayanikɨ”.
LUK 15:22 Paapaya matsi mɨpaɨ katiniwarutahɨawe te'uximayatamete: “Xeiya 'aixɨa, 'ixuriki matsi 'aixɨa mɨ'ane xekenanakatɨtɨa, hanira xekenakamaniri mamayatsie, meta xekeneukakaitɨaxɨa.
LUK 15:23 Xekenehaniyu tsikeru mɨwaiya 'aixɨa mɨ'ane, xekeneumi'a, tetekwatɨ tepɨtatemamawieka.
LUK 15:24 'Ikɨ neniwe 'umɨme nekani'eriekaitɨni peru kananutaniere, kaneuyewekaitɨni peru kaniutaxeiyarieni”. Hikɨ 'ana meyutemamawietɨ mekanakɨne yunaitɨ.
LUK 15:25 »Merikɨtsɨ matsikaya xaɨtsie kaneyeikakaitɨni. 'Akunuaka, kii 'aurie 'ayemietɨ, yuitɨarika kaniu'enieni meta neiya.
LUK 15:26 Yu'aurie 'itahɨaweka ti'uximayatame xeime, kanita'iwawiya kemɨreyɨanekai.
LUK 15:27 Mɨkɨ mɨpaɨ katinitahɨawe: “'A'iwa kaninuani, 'apaapa kanimieni tsikeru mɨwaiya 'aixɨa mɨ'ane mitanaki'erikɨ 'aixɨa reu'eriekame”.
LUK 15:28 Hikɨ matsikaya kaniuyeha'ani, pɨkayuwaɨriyakai meutahanikɨ. Paapaya wayeyaka kanikunɨtɨwakaitɨni.
LUK 15:29 Mɨpaɨ yupaapa katiniutahɨawe: “Neuxei, mɨixa wiyari nekatini'uximayaka 'ahetsɨa, ne hatsuaku nepɨkamatsiku'imaiyakai, yanepɨtikamiekai, peru ne hatsuaku kapɨra nunutsi pepɨkanetsimiwe, nemarema wahamatɨa nemɨnetemawiekakɨ.
LUK 15:30 Hikɨri 'ikɨ 'aniwe kaninuani 'atumini naime hetixɨtɨaka 'ukarawetsixi wahetsie, ¿kari tsikeru mɨwaiya pepumi hetsiena mieme?”
LUK 15:31 »Hikɨ paapaya mɨpaɨ katinitahɨawe: “Neniwe, 'aheyemekɨ nehetsɨa pekaniukani, nepiini naitɨ katini'apinitɨni.
LUK 15:32 Kaneuyewekaitɨni temɨtatemamawiekakɨ, karikɨ 'ikɨ 'a'iwa 'umɨme nekani'eriekaitɨni, peru 'ari panutanierixɨ punua, meuyewekai kaniutaxeiyarieni”».
LUK 16:1 Mɨpaɨta katiniwarutahɨawe teyɨ'ɨkitɨwamete: «Tewi mɨxikutɨkai kaneixeiyakaitɨni ti'uximayatame naime mɨtihɨritɨakai yupiinitɨarika, mɨpaɨ katiniutahɨawarieni kename ti'uximayatame piinite reuyehɨaximekai.
LUK 16:2 Hikɨ yu'aurie 'itahɨaweka mɨpaɨ katinitahɨawe: “¿Titayari niuki neti'enie 'ahepaɨtsita? 'Inɨari keneneutawewiri 'ahɨritɨarika hepaɨtsita mieme, nepɨkamatsipitɨani tawari pemɨhɨritɨariekakɨ”.
LUK 16:3 Hikɨ yu'iyaritsie mɨpaɨ katiniyɨkɨhɨawekaitɨni ti'uximayatame: “¿Kenetiyurieneni, nekutsiyari nehɨritɨarika 'ari mɨnetsinawairieni? Nepɨkatɨrɨkaɨye nemɨti'iwanenikɨ ne'inenetɨ, meta nepɨnetewiya 'ikwewarikɨ.
LUK 16:4 Hikɨrixɨa nepɨretima kenemɨtiyurieneni kepauka nemɨpatsieni kepauka nemɨkatihɨritɨarieka para hipame wakiita nemɨnaki'eriwanikɨ”.
LUK 16:5 »Hikɨ yuxexuime kaniwarutakwewieni mɨkɨ memɨte'apitɨkatei kutsiyarieya hetsɨa. Mexɨakame mɨpaɨ katiniutahɨawe: “¿Kepaɨmeme pepɨrapine nekutsiyari hetsɨa?”
LUK 16:6 Mɨkɨ mɨpaɨ katinitahɨawe: “Xeitsienituyari kɨxauriyari hatseiti”. Hikɨ mɨpaɨ katinitahɨawe: “Ka'i 'axapa kenanuhuri kepaɨmemekɨ pemaye'uxa, kwitɨ mana kenayexi, xeime pɨta kenaka'utɨa huta tewiyari heimana tamamata maine”.
LUK 16:7 Mɨpaɨta katinitahɨawe xeime: “'Ekɨta, ¿kepaɨmetɨ peuyewetse pemɨrapikakɨ?” 'Iya rehɨawe: ”Xeitsienituyari nekayari tɨriku”. Mɨpaɨ katinitahɨawe: “Ka'i 'axapa kenanuhuri kepaɨmemekɨ pemaye'uxa maine, xeime pɨta kenaka'utɨa nauka tewiyari maine”.
LUK 16:8 »Hikɨ kutsiyarieya 'aixɨa kanainekaitɨni ti'uximayatame hepaɨtsita tsepa heitseriemekɨ mɨkayɨanekai, timaitɨ mɨyɨanekaikɨ. Hikɨ miemete matsi metemaitɨ mekaniyɨaka yuteɨterima wahepaɨtsita, hekɨaripa miemete yamekayɨakaku wahepaɨ.
LUK 16:9 Neta mɨpaɨ nekatinixe'utahɨawe xeme, teɨteri yupinikɨ yamekateniyurieka kemɨkatiheitserie, peru xeme yupinikɨ hipame xekeniwatemawieritɨaka, mɨpaɨ xeteyurietɨ, kepauka pini mɨreutipare, xemeta xekanetanaki'eriwakuni hakewa kii mɨkahexɨwetsie.
LUK 16:10 »Kemɨ'ane yamɨtikamie 'etsitipaɨmeme tihɨritɨarietɨ, mɨkɨ yakatinikamiemɨkɨ xɨka waɨkawa hɨritɨarieka, kemɨ'ane heitseriemekɨ yamɨkatikamie 'etsitipaɨmeme tihɨritɨarietɨ, mɨkɨta yapɨkatikamieni xɨka waɨkawa tihɨritɨarieka.
LUK 16:11 Hipatɨ pinitɨarika yamekateniyurieka kemɨkatiheitserie, xeme xɨka yaxekatekahuni mɨpaɨ 'aneme piinite hepaɨtsita xetehɨritɨarietɨ, ¿kepaikɨ pɨtixehɨritɨani tita yurikɨ mɨtipiinite hepaɨtsita, yaxetekahume'erietɨ? Hakewatsɨ.
LUK 16:12 Xɨka yaxekatekahuni xeime piiniteya hepaɨtsita xetehɨritɨarietɨ, ¿kemɨ'ane tita mɨtixepini pɨtixemini? Hakewatsɨ.
LUK 16:13 »Ti'uximayatame pɨkayɨwe yuhutame yukutsiyarima wahetsiemieme mɨti'uximayakakɨ. Xeime kani'uxiwe'eriekamɨkɨ xeimeta naki'erietɨ, yaxeimetsie katiniwiyamɨkɨ xeimeta xani'erietɨ. Xepɨkayɨwawe xemɨte'uximayakakɨ Kakaɨyari hetsiemieme yupiinitetsieta xetewiyatɨ».
LUK 16:14 Merikɨtsɨ paritseutsixi 'ikɨ naime mekateniu'enieni, mɨkɨ tumini memɨhiwe'eriekaikɨ mekanitawe'eriekaitɨni.
LUK 16:15 Hikɨ Ketsutsi mɨpaɨ katiniwarutahɨawe: «Xeme yuri xekateniwa'eritɨaka teɨteri kename heitserie xeyɨa xe'utiyuatɨ, peru Kakaɨyari pimate xe'iyari. Tita teɨteri mamariwaweme memɨtexeiya, mɨkɨ pɨtixani'eriwa, Kakaɨyari kemɨtixeiya.
LUK 16:16 »'Inɨari niukiyari meta texaxatamete waniuki mekani'eniekaitɨni teɨteri 'atsita Wani munuatsie. 'Ana mɨtiyehane niuki 'aixɨa manuyɨne pɨta kanikuxaxatsiwani Kakaɨyari kemɨti'aitatsie mieme, hikɨ yunaitɨ kwini mieme mekaniyuwaɨriyani hetsiena memɨtewiyanikɨ.
LUK 16:17 Matsi pɨkakwaniwe muyuawi meta kwie meutiparekɨ, peru kwini mieme pɨkwaniwe xei'utɨarikayari xeihɨxiyari mɨka'aye'anikɨ 'inɨari niukiyari kemaine.
LUK 16:18 »Kemɨ'ane 'iku'eirieme yɨ'ɨya, xeime pɨta mɨtiwitɨni, mɨkɨ xeime pɨta kanikumaɨwani, meta kemɨ'ane mitiwitɨni 'uka muku'eiriwaxɨ, mɨkɨta kanikumaɨwani xeime 'ɨyaya.
LUK 16:19 »Merikɨtsɨ tewi 'aniuyeikakaitɨni xikutɨtɨ, tataɨrawime kananakatɨkɨkaitɨni, rinu 'ixurikiyari meta tukarikɨ 'aixɨa ti'anemekɨ katinikwakaitɨni.
LUK 16:20 Xewitɨ tixaɨtɨ mɨkarexeiya Ratsaru titewatɨ mana kani'atɨariwakaitɨni xiku kitenie, kaneu'etsakaitɨni.
LUK 16:21 Kanihuxaimɨkɨkaitɨni, tikwaimɨtɨ tita mɨranakawiwiwekai xiku mexayatsie. Tsɨikɨri 'ahurawa me'akɨkatɨ mekanikatsenakaitɨni 'etsaya.
LUK 16:22 »Merikɨtsɨ tixaɨtɨ mɨkarexeiya kaniumɨni, Kakaɨyari hetsɨa miemete niuki tuayamete mekanenutiwitɨni 'Apɨrahami 'aurie. Metatsiere xiku tiumɨ tiukateukie.
LUK 16:23 Mɨkite watsata 'ukaitɨ xiku kananukuniere 'uximatɨarietɨ, 'ateewa paitɨ kanixeiya 'Apɨrahami meta Ratsaru 'auriena 'utikaime.
LUK 16:24 Hikɨ mɨpaɨ katiniuhiwa: “Nepaapa 'Apɨrahami, kenenenenimayaka, Ratsaru kenanɨ'a yu'itɨwame kɨtsimeyari tahawiyame mɨnetsixeriyakɨ nenenitsie, nemɨtiuka'eniwakɨ 'ena taipa”.
LUK 16:25 Hikɨ 'Apɨrahami mɨpaɨ kaniutayɨni: “Neniwe, kena'eriwani 'aixɨa 'anemekɨ pepuyeikakai kepauka pemayeyurikai, peru Ratsaru 'aixɨa 'anemekɨ pɨka'uyeikakai, hikɨri mɨkɨ 'uwa kaninɨtɨarieka, 'ekɨ pɨta pepɨ'uximatɨarie.
LUK 16:26 Mɨkɨ meta, xeme tame tahixɨata 'aki 'emeukatewa putseiriyarie, para 'ena memɨkayɨwawenikɨ tsepa memanukɨniku xehetsɨa paitɨ, meta para muwa memɨye'uwa tahetsɨa paitɨ memɨka'anakɨnekɨ”.
LUK 16:27 »Hikɨ xiku mɨpaɨ kaniutayɨni: “Nepaapa, nepɨmatsiwawirie Ratsaru pemanunɨ'anikɨ nepaapa hetsɨa,
LUK 16:28 yu'auxɨwime nepɨwarexeiya ne'iwama, mɨwaraye'eritɨanikɨ, kapa mɨkɨta 'uwa me'u'axɨanikɨ 'uximatɨarika maxuawe”.
LUK 16:29 Peru 'Apɨrahami mɨpaɨ katinita'eiya: “Muitsexi xapaya mekanexeiyani, texaxatamete waxapa, mekewa'enieka mɨkɨ kememutiyuane”.
LUK 16:30 Xiku mɨpaɨ katinitahɨawe: “Tixaɨ nepaapa 'Apɨrahami, matsi xɨka xewitɨ mɨkite watsata mieme wahetsɨa henuani, mepɨtehehayewa kememɨteheyurie”.
LUK 16:31 'Apɨrahami mɨpaɨ katinitahɨawe: “Xɨka mekawa'enieka Muitsexi meta texaxatamete, tsepa xewitɨ manukukenike mɨkite watsata, mepɨkayuwaɨriyanikeyu”».
LUK 17:1 Mɨpaɨta katiniwarutahɨawe yuhetsɨa miemete teyɨ'ɨkitɨwamete: —Peuyewetse teɨteri memɨkunuitɨarienikɨ, peru xɨa'ui kemɨ'ane mɨwakunuitɨani.
LUK 17:2 Hetsiena mieme matsi 'aixɨa pɨyɨni xɨka matá 'akatɨtɨarieme yukɨipitɨa, xɨka haramaratsie heukahɨiyanike, kapa 'ikunuitɨanikɨ xeime 'ikɨ tsepa waɨkawa memɨkamamariwawe.
LUK 17:3 Xekeneyɨ'ɨwiyani xeme. »Xɨka 'a'iwa 'axatiuyurieni, keneutati'a, xɨka tiuhayewa kemɨtiyurienekai, ketineuyehɨwiri.
LUK 17:4 Tsepa xeitukaritsie mɨixa 'axamatsi'uyurieni 'atahutamexɨa, tawarita xɨka 'atahutamexɨa nuanike 'ahetsɨa, mɨpaɨ 'utaitɨ: “Nepɨtihayewa kenetineuyehɨwiri”, 'ekɨta ketineuyehɨwiri».
LUK 17:5 Hikɨ nɨ'ariekate Ti'aitame mɨpaɨ mekatenitahɨawe: —Ketanepitɨaka matsi waɨkawa yuri temɨte'eriekakɨ.
LUK 17:6 Ti'aitame mɨpaɨ katiniwarutahɨawe: —Xɨka xeme mutsitatsa 'imɨariyari hepaɨ 'etsipemekɨ yuri xete'eriekake, xepɨyɨwawenike mɨpaɨ xemɨte'itahɨawe 'ikɨ xapa mana muwe: “Keniwatihuni, haramaratsie pɨta keneuka'iteɨtsie”, yapɨtikamienikeyu kexemutiyuane.
LUK 17:7 »Xewitɨ xeme xɨka ti'uximayatame hexeiyani mukwietsanane, yamuxatsi mɨwahɨne, xɨka nuani ti'uximayatame retahayewame, ¿mɨpaɨ titahɨawe: “Kenaye'a xeiya, ketinekwaka”?
LUK 17:8 Pɨkatixaɨ, ¿mɨpaɨ matsi kutsiyari katitahɨawe: “'Aixɨa ketineuyuri para nemɨtikwanikɨ ne, kene'atikemaritɨa kena'ahɨa kenetineumikwa mexi netikwa'a mexi neti'ie, hikɨ 'ariketa pepɨtikwani pepɨti'ieni 'ekɨtari?
LUK 17:9 ¿Pamɨpariyutsi tipitɨani ti'uximayatame yatiyurienekaku kemɨtiu'aitɨarie? Tixaɨ xɨari.
LUK 17:10 Xemetari yaxeikɨa, kepauka yaxemɨteyurieka naime kexemɨte'u'aitɨarie, mɨpaɨ xekeneutiyuaneni: “Te'uximayatamete tekanihɨkɨtɨni xeikɨa, tixaɨtɨ tahetsie pɨkatinake, kemɨreuyewekai xeikɨa tepɨte'uyuri”».
LUK 17:11 Merikɨtsɨ Kerutsareme tamietɨ, Tsamariya kwieyari Karereya kwieyari mayunakekaitsie kaniuyemiekaitɨni.
LUK 17:12 Xeime kiekaritsie ta'aximekaku tamamata teɨteri menenukunake kwiniyakɨ memɨka'itiyatɨkatei. Tewa meti'utɨ
LUK 17:13 mekaniutihiwakaitɨni mɨpaɨ me'utiyuatɨ: —Ketsutsi 'aku, Ti'ɨkitame 'aku, ketaneutinenimayata.
LUK 17:14 Waruxeiyaka mɨpaɨ katiniwarutahɨawe: —Xekenehu mawari wewiwamete memɨxexeiyakɨ. Hikɨ me'uhutɨ me'itiyatɨkaitɨ mekanakɨne.
LUK 17:15 Hikɨ xewitɨ mɨkɨ 'uniereka kemɨranayehɨiya, pukunua 'aixɨa 'utaitɨ Kakaɨyari hepaɨtsita, karima 'utaniutɨ.
LUK 17:16 Kaniutihɨximakeni Ketsutsi hetɨa pamɨpariyutsi 'ipitɨatɨ, mɨkɨ Tsamariya kanikiekametɨkaitɨni.
LUK 17:17 Hikɨ Ketsutsi mɨpaɨ kaniutayɨni: —¿Tamamata mekate'u'itiya? ¿'Atanaukatɨ kemeteheuyunixɨ?
LUK 17:18 ¿Xewitɨ tawari katiukunua para 'aixɨa mɨtayɨnikɨ Kakaɨyari hepaɨtsita, 'ikɨ xeikɨa xaɨtsie kiekametɨtɨ?
LUK 17:19 Hikɨ mɨpaɨ katinitahɨawe: —Kenanukukexi kenemie, yuri pemɨtiuta'erikɨ 'ayumieme peputawikweitsitɨarie.
LUK 17:20 Merikɨtsɨ paritseutsixi mekaniku'iwawiyakaitɨni kepauka maye'anikekai tukari para Kakaɨyari mitsutɨanikɨ ti'aitatɨ. Mɨpaɨ katiniwarutahɨawe: —Tanieretɨ xeikɨa 'atsipɨkaretimani kepauka mitsutɨani ti'aitatɨ Kakaɨyari.
LUK 17:21 Pɨkayɨweni mɨpaɨ mɨtayɨni: “Kamɨ 'ena. Kamɨ huma”. Kemɨti'ane Kakaɨyari ti'aitametɨkaku, 'ari xetsata kanitsutɨani ti'aitatɨ.
LUK 17:22 Hikɨ mɨpaɨ katiniwarutahɨawe teyɨ'ɨkitɨwamete: —Tukari kanaye'amɨkɨ kepauka mɨpaɨ xemutiyuaneni: “Xɨka tɨma 'aye'anike Yuri Tewi tukarieya tsikere xewitɨ”. Peru xepɨka'ixeiya mɨkɨ tukari.
LUK 17:23 Mɨpaɨ mepɨtexetahɨawe: “Kamɨ huma peyeika. Kamɨ 'ena”. Muwa xepɨkaheuhuni, xepɨkawareweweiyani.
LUK 17:24 Merɨkariya muyuawitsie naitsarie kemɨtihekɨariwie 'umerɨkatɨ tatserieta ta'utata paitɨ, mɨpaɨta yaxeikɨa nepɨtimatsiɨkɨre naitsarie netukari 'aye'ayu ne Yuri Tewi.
LUK 17:25 Perutsɨ kaneuyeweka meri waɨkawa nemɨtikwinekɨ, memɨnetsitixani'erienikɨ hikɨ miemete teɨteri.
LUK 17:26 Kemɨtiuyɨ kepauka Nuhexi 'amuyeikakaitsie, mɨpaɨta yaxeikɨa katiniyɨmɨkɨ kepauka Yuri Tewi munuani.
LUK 17:27 'Ana mepɨtekwatɨwekai, mepɨ'ietɨwekai, mepɨneɨketɨwekai meta mepɨtewikitɨatɨwekai, kepauka Nuhexi meutaha kanuwatsie, 'ana haa tiyaka yunaime katiniwareuyehɨani.
LUK 17:28 »Mɨpaɨrita kemɨtiuyɨ kepauka Ruti 'amuyeikakai yapɨtiyɨni: 'Ana mepɨtekwatɨwekai meta mepɨ'ietɨwekai, mepɨtenanekai meta mepɨtetuakai, mepuka'etsakai meta mepɨkitɨwekai.
LUK 17:29 Tukari 'aye'aku kepauka Ruti meyetɨa Tsurumatsie, 'ana muyuawitsie tai 'atsupɨreyari kaniukawiye, yunaime kaniwareuyehɨani.
LUK 17:30 »Mɨpaɨta katiniyɨmɨkɨ kepauka nematsiɨkɨtɨ nemayani, Yuri Tewi kenemɨtitewa.
LUK 17:31 'Iya tukaritsie, kemɨ'ane yukii heima makakani, yupiinite yukiita xɨka tiyepika, mɨkɨ 'anakayame pɨkatiwayepineni. Yaxeikɨata kemɨ'ane yuwaxata meyeika yu'utɨma pɨkahakununuwani.
LUK 17:32 Xekena'eriwani Ruti 'ɨyaya kemu'itɨarie.
LUK 17:33 Kemɨ'ane yutukari yemekɨ mɨwikweitsitɨamɨkɨ kanitatɨmaiyamɨkɨ, kemɨ'ane mitatɨmaiya, mɨkɨ kanitawikweitsitɨariemɨkɨ.
LUK 17:34 Mɨpaɨ nepɨxerahɨawe, 'iya tɨkaritsie yuhutatɨ mepɨkahini xei'utayaritsie: xewitɨ kananutiwitɨkiemɨkɨ, xewitɨta kaniku'eiriwamɨkɨ.
LUK 17:35 Yuhutatɨ 'ukari mepɨtɨxɨni 'axeikɨa: xewitɨ panutiwitɨkieni xewitɨta kaniku'eiriwamɨkɨ.
LUK 17:36 Yuhutatɨ waxata mepe'uwani: xewitɨ panutiwitɨkieni, xewitɨta pɨku'eiriwa».
LUK 17:37 Mɨpaɨ mekatenitahɨawe: —Ti'aitame, ¿hakewa mɨpaɨ pɨreyɨni? Mɨpaɨ katiniwarutahɨawe: —Kanimatsiɨkɨni kaxari tsepa hakewa meka, mana mekaniyukuxeɨrikuni wirɨkɨxi.
LUK 18:1 Merikɨtsɨ 'ikɨ 'ɨxatsi hepaɨtsita tikuxatatɨ mɨpaɨ katiniwaruta'ɨkitɨani kename heuyewetse yuheyemekɨ mɨyunenewiekakɨ, kawaɨripietɨ.
LUK 18:2 Mɨpaɨ kaniutayɨni: «'Itsɨkame xeime kiekaritsie kanekateitɨni, Kakaɨyari pɨkamakarɨkai, pɨkawa'eniekai teɨteri.
LUK 18:3 Merikɨtsɨ 'uka kɨnaya mumɨ mana kanekateitɨni mɨkɨ kiekaritsie, 'itsɨkame hetsɨa kani'axekaitɨni mɨpaɨ 'utaitɨ: “Heitserie keneneupitɨa mɨnetsi'aye'unie yamɨkatiyurienenikɨ”.
LUK 18:4 Mɨixa pɨkayuwaɨriyakai 'itsɨkame, peru 'arike mɨpaɨ katiniyɨkɨhɨawekaitɨni: “Tsepa nemɨka'imakaxe Kakaɨyari, tsepa nemɨkawa'enie teɨteri,
LUK 18:5 'ikɨ 'ukaratsi kɨnaya mumɨ kanetini'uxitɨaka, mekuxi heitserie nekanipitɨamɨkɨ, tawariri mɨkanetsi'uximatɨakakɨ”».
LUK 18:6 Merikɨtsɨ Ti'aitame mɨpaɨ kaniutayɨni: «Xekani'enieni niukieya kemutayɨ mɨkɨ 'itsɨkame heitseriemekɨ yamɨkatiyurienekai.
LUK 18:7 ¿Kakaɨyari matsi heitserie katiwapitɨani mɨkɨ mɨwaranayexei tukarikɨ tɨkarikɨ memihiwie? ¿'Areutere kawaparewimɨtɨ?
LUK 18:8 Yanepɨtixekɨhɨawe, kwitɨ heitserie kaniwapitɨamɨkɨ. Matsi, kepauka nemunuani Yuri Tewi nehɨkɨtɨtɨ, ¿yuri mete'eriekame netiwataxeiya kwiepa 'aku?»
LUK 18:9 'Ipaɨta katini'ɨkitakaitɨni 'ɨxatsi hepaɨtsita tikuxatatɨ, hipatɨ yuhetsie yuri memɨte'eriekaikɨ kename heitseriemekɨ yametekahukai, mewaxani'erietɨ hipame, mɨkɨ mɨpaɨ katiniwarutahɨawe:
LUK 18:10 «Teɨteri tukipa mekaneutiyune meyutanenewienike yuhutatɨ, xewitɨ paritseu pɨhɨkɨtɨkai, xewitɨta tewi kuwiyexinu hetsiemieme tiwawame pɨhɨkɨtɨkai.
LUK 18:11 Merikɨtsɨ paritseu mana 'utakeka nenewieri kaniyupitɨakaitɨni mɨpaɨ 'utaitɨ: “Kakaɨyari, pamɨpariyutsi nekamanipitɨaka hipame teɨteri wahepaɨ nemɨka'anekɨ ne ―mɨkɨ mepɨtenawaya, heitseriemekɨ yamepɨkatekahu, hipame wa'ɨitama mepɨwakumaɨwa― meta nitsikere 'ikɨ tiwawame hepaɨ nepɨka'ane.
LUK 18:12 Ne matsi hutakɨa nepunetihakiwa xexuime tsemanatsie, ne'iwarika tamamatatsie mieme xeime nepɨyetuaya tukita”.
LUK 18:13 Hikɨ tiwawame yatewa 'uwetɨ pɨkayuwaɨriyakai tsikere yuheima meutinierekɨ, matsi yutawitsie yukuhutsunatɨ hiwerikakɨ mɨpaɨ kaniutainekaitɨni: “Kakaɨyari 'aku, kene'awaɨriya 'aixɨa pemɨnetixeiyakɨ, 'axanetiyuruwametɨme”.
LUK 18:14 »Mɨpaɨ nepɨtixekɨhɨawe, mɨkɨ matsi yukie kaneyani heitserie hexeiyatɨ, paritseu pɨkatixaɨ. Yunaitɨ yuxaɨta mariweme memayuyeitɨwa tixaɨtɨ mekatehɨkɨtɨtɨ mekanayeitɨariekuni, peru kemɨ'ane tixaɨtɨ katihɨkɨtɨme mayuyeitɨwa mɨkɨ mariweme kanayeitɨariemɨkɨ».
LUK 18:15 Merikɨtsɨta tɨɨri mekaniwa'atɨwakaitɨni hetsɨana wahetsie mutimenikɨ. Mewaruxeiyaka, teyɨ'ɨkitɨwamete mekaniwarutate'akaitɨni memɨwa'atɨwakai.
LUK 18:16 Peru Ketsutsi yu'aurie kaniwarutahɨawe tɨɨri mɨpaɨ 'utaitɨ: «Xekeniwapitɨaka tɨɨri nehetsɨa memɨ'axenikɨ, wahɨxie xepɨka'u'uka, mɨpaɨ memɨ'anene kaniwahetsiemiemetɨni Kakaɨyari mɨra'aita.
LUK 18:17 Yurikɨ mɨpaɨ nepɨxerahɨawe, kemɨ'ane mɨka'itanaki'erieni Kakaɨyari kemɨti'aita nunutsi hepaɨ yuri ti'erietɨ, pɨkayɨwe mana meutahani».
LUK 18:18 Merikɨtsɨ xewitɨ teɨteri watsata mexɨakametɨtɨ mɨpaɨ katinita'iwawiya: —Ti'ɨkitame 'aixɨa pemɨtiuka'iyari, ¿tita reuyewetse kenetiyurieni, nehetsie mɨtinakekɨ tukari mɨkaxɨwe?
LUK 18:19 Ketsutsi mɨpaɨ katinita'eiya: ¿Titayari 'aixɨa netiuka'iyarime penetixata? Tewi 'aixɨa mɨtiuka'iyari 'apɨka'uyeika, Kakaɨyari yuxewitɨ 'aixɨa pɨtiuka'iyari pɨta.
LUK 18:20 'Ekɨtsɨ 'aitsikate pepɨmate: “Xeime 'ɨyaya kɨnaya pepɨkakumaɨwani, pepɨkati'amemiwani, pepɨkatinawayani, xeimetsie pepɨkarahɨpani peti'itawatɨ, 'apaapa meta 'amaama keniwareu'enieka”.
LUK 18:21 'Iya mɨpaɨ katinitahɨawe: —Mɨkɨ naimetsie yanepɨtikamie temaikɨyari paitɨ.
LUK 18:22 Ketsutsi 'u'enaka mɨpaɨ katinitahɨawe: —'Akuxi xewitɨ xeikɨa peuyewetse yapemɨtiyurieni: ketinetua 'apiinitɨarika naime, ketiniwarutamikwa haweri memɨ'anene, mɨpaɨ petiyurieme waɨkawa perexeiyatɨ pepayani taheima. 'Ana kenaye'a nehetsie ketineuwiya.
LUK 18:23 Kepauka tewi 'ikɨ niuki mu'eni, waɨkawa kaniyukahiwerieni waɨkawa mɨrexeiyakaikɨ.
LUK 18:24 Hikɨ Ketsutsi 'ixeiyaka waɨkawa yuheiweriekame, mɨpaɨ kaniutayɨni: —Kanikwaniweni xikutsixi memeutahaxɨanikɨ Kakaɨyari mɨra'aitatsie.
LUK 18:25 Yurikɨ matsi, pɨkakwaniwe kameyu 'iwipame hɨxieyatsie manuyehanikɨ matsi pɨkwaniwe xiku meutahanikɨ Kakaɨyari mɨra'aitatsie.
LUK 18:26 Memɨ'enanakai mɨpaɨ mekaniutiyuani: —Kamɨtsɨ, ¿kemɨ'ane pɨyɨwe mɨtawikweni?
LUK 18:27 Ketsutsi mɨpaɨ kaniutayɨni: —Teɨteri titatsie memɨkateyɨwawe, Kakaɨyari hetsiemieme katiniyɨweni.
LUK 18:28 Hikɨ Pekuru mɨpaɨ kaniutayɨni: —Neuxei, tame tapiini tepɨte'uku'eiri naime 'ahetsie temɨtewiyakɨ.
LUK 18:29 Ketsutsi mɨpaɨ katiniwarutahɨawe: —Yurikɨ mɨpaɨ nepɨxerahɨawe, kemɨ'ane mɨtiuku'eiri Kakaɨyari kemɨti'aita hetsiemieme yukii, yɨ'ɨya, yu'iwama, yupaapama yatɨni yɨtɨriyama,
LUK 18:30 mɨkɨ kwini mieme matsi waɨkawa warexeiyatɨ kanayeimɨkɨ hikɨ, meta tukari 'umamietsie kepauka maye'ani, tukari mɨkaxɨwe hexeiyatɨ kanayeimɨkɨ.
LUK 18:31 Hikɨ tamamata heimana memɨyuhuta yatewa warewitɨka mɨpaɨ katiniwarutahɨawe: «Neuxei, Kerutsareme tekanitahuni hikɨ, naitɨ kemɨre'uxa Kakaɨyari niukametemama waxapatsie Yuri Tewi hepaɨtsita, naitɨ katinaye'amɨkɨ.
LUK 18:32 Nekaniyetuiyamɨkɨ mɨkɨ memɨkahuriyutsixi wahetsɨa. Nekanitewiyatsitɨariemɨkɨ, 'axanekatinitahɨawariemɨkɨ,
LUK 18:33 mekaneniti'aɨtsikawiyakuni meha'atɨ, hikɨ menetsikuwaxɨame mekanenimiekuni. Peru hairieka tukari 'aye'ayu nekananukuketɨariemɨkɨ».
LUK 18:34 Mɨkɨ 'atsimepɨkatemaikai tita mɨtixatakai. Niukieya matsi pɨ'awietsiekai wahetsiemieme, 'atsimepɨkatehetima kemɨtikuxatakai.
LUK 18:35 Merikɨtsɨ Keriku kiekariyaritsie 'aye'aximekaku Ketsutsi, xewitɨ tewi mɨkaheuniere mana huye tetsita kaniukateitɨni tiwautɨ.
LUK 18:36 Hikɨ waru'enieka yumɨireme teɨteri me'anuyekɨkame kaniuta'iwauni kemɨtiyɨanekai.
LUK 18:37 Mɨpaɨ mekatenitahɨawe kename Ketsutsi natsaretitanaka mana 'uyemiekai.
LUK 18:38 Hikɨ mɨkaheuniere karima kaniutahiwa mɨpaɨ 'utaitɨ: —Ketsutsi, Rawiri pemɨnu'aya, keneneutinenimayata kwerietɨ.
LUK 18:39 Memanuyetekai mekanitate'akaitɨni kayuwatɨ mɨtikanikɨ, peru matsi mɨkɨ karima mɨpaɨ katiniuhiwakaitɨni: —Rawiri pemɨnu'aya 'aku, keneneutinenimayata kwerietɨ.
LUK 18:40 Hikɨ Ketsutsi mana 'utakeka kanita'aita mahanienikɨ hetsɨana. Nuaku 'auriena mɨpaɨ katinitahɨawe:
LUK 18:41 —¿Tita pereuyehɨwa kenetiyurieni 'ahetsiemieme? Mɨkɨ rehɨawe: —Ti'aitame, nepeunierenikeyu.
LUK 18:42 Hikɨ Ketsutsi mɨpaɨ katinitahɨawe: —Peheunieretɨ kenaye'a. Yuri pemɨti'eriekɨ 'aixɨa pe'anetɨ pepatɨa.
LUK 18:43 Yapauka heunieretɨ kanayani. Hikɨ 'aixɨa 'utaitɨ Kakaɨyari hepaɨtsita, Ketsutsi 'utɨa kaneyani, meta yunaitɨ teɨteri memixei witsimekaniutiyuanekaitɨni Kakaɨyari hepaɨtsita.
LUK 19:1 Hikɨ heutahaka Kerikutsie hixɨata kaniuyemiekaitɨni.
LUK 19:2 Merikɨtsɨ tewi mana kaniukateitɨni Tsakeu titewatɨ, mɨkɨ tewawamete katiniwa'aitɨwametɨkaitɨni kuwiyexinu hetsiemieme, pɨxikutɨkai.
LUK 19:3 Kanixeiyamɨkɨkaitɨni Ketsutsi kemɨpaikɨtɨkai, peru 'etsimutewikaikɨ puyutatexi teɨteri memɨyumɨirekaikɨ.
LUK 19:4 Wahɨxie 'utanautsaka wapaitɨ kanitimake xapatsie mixeiyakɨ, mana muyeyanikekaikɨ.
LUK 19:5 Hikɨ Ketsutsi mana 'uyemietɨ kaneutiniere, mɨpaɨ katinitahɨawe: —Tsakeu, kenakamaki xeiya. Peuyewetse 'akita nemenuanikɨ hikɨ.
LUK 19:6 Kwitɨwa kanakamake, yutemawietɨ kanitanaki'erieni yukiita.
LUK 19:7 Me'ixeiyaka yunaitɨ mekaniniukixiekaitɨni hepaɨtsitana mɨpaɨ me'utiyuatɨ: «Tewi 'axatiyuruwame hetsɨa punua».
LUK 19:8 Peru Tsakeu mana 'uwetɨ mɨpaɨ katinitahɨawe Ti'aitame: —Neuxei, Ti'aitame: Nepiinite hixɨata 'arɨkame nepɨtiwamini tixaɨtɨ memɨkatehexeiya, 'itarikakɨ kenemɨtiwakwamanakai hipame, naukamekɨ nepɨrapika.
LUK 19:9 Hikɨ Ketsutsi mɨpaɨ katinitahɨawe: —Kamɨ, 'ikɨ kie kiekatari meputawikweitsitɨarie hikɨ, 'ikɨta 'Apɨrahami kanixiɨyarieyatɨni.
LUK 19:10 Yuri Tewi kenemɨtitewa, nekaninuani nemɨwakuwaunenikɨ mɨkɨ memeuyexɨrie nemɨwatawikweitsitɨanikɨ.
LUK 19:11 Merikɨtsɨ 'ikɨ me'eniekaku tawari 'ɨxatsi hepaɨtsita tikuxatatɨ katiniwaruta'ɨkitɨani, Kerutsareme mehurakaikɨ, meta teɨteri mɨpaɨ memɨteku'eriwakaikɨ kename kwitɨ 'itsutɨanikekai ti'aitatɨ Kakaɨyari matsiɨkɨtɨ 'ayame.
LUK 19:12 Mɨpaɨ kaniutayɨni: «Tewi we'eme mɨnu'ayatɨkai tewa kaniyemiekaitɨni xeime kwieyaritsie, mana ti'aitame mayeitɨarienikɨ, 'arikeke kaninuanikekaitɨni.
LUK 19:13 Hikɨ tamamata yuhetsɨa miemete te'uximayatamete warutakwewieka yuhɨxie, tumini kaniwaru'ɨitɨani xeitsienituyari yuxexuime. Mɨpaɨ katiniwarutahɨawe: “Xekenemɨiriyani 'ikɨ tumini mexi nekanuawe”.
LUK 19:14 Merikɨtsɨ hetsɨana miemete kiekatari mekani'uxiwe'eriekaitɨni, niukamete mekaniwarenɨ'ani 'utɨmana mɨpaɨ me'utiyuatɨ: “Tame tepɨka'inaki'erie 'ikɨ mɨtati'aitɨakakɨ”.
LUK 19:15 »Peru mɨyatɨtɨ, ti'aitame kanayeitɨarieni. Kepauka makunua yukwieyaritsie, katiniuta'aita hetsɨana memɨ'axɨanikɨ te'uximayatamete tumini mɨwaru'ɨitɨakai, yamɨretimanikɨ yuxexuitɨ kememɨte'itimɨiriyaxɨa.
LUK 19:16 Merikɨtsɨ mexɨakame kaninuani mɨpaɨ 'utaitɨ: “Neti'aitɨwame, 'atumini xeitsienituyarikɨ, tamamata tsienituyari nepana'iwaxɨ”.
LUK 19:17 Ti'aitame mɨpaɨ katinitahɨawe: “'Aixɨa pepɨtiuyuri, ti'uximayatame 'aixɨa pemɨtiuka'iyari pekanihɨkɨtɨni, 'etsitipaɨmeme petiuhɨritɨarieka yapemɨtikatɨakɨ, heitserie nekamenipitɨamɨkɨ tamamata kiekariyaritsie kuwexinaruri pemayanikɨ”.
LUK 19:18 Hikɨ xewitɨ kaninuani mɨpaɨ 'utaitɨ: “Neti'aitɨwame, 'atumini xeitsienituyarikɨ, 'auxɨwi tsienituyari nepana'iwaxɨ”.
LUK 19:19 Ti'aitame mɨpaɨ katinitahɨawe: “'Ekɨta nekamanihɨritɨamɨkɨ 'auxɨwime kiekariyari”.
LUK 19:20 »Hikɨ xewitɨta kaninuani mɨpaɨ 'utaitɨ: “Neti'aitɨwame, kamɨ 'atumini, nepi'utakai tuwaxakɨ 'eimeme.
LUK 19:21 Nematsimakatɨ tewi pemɨti'akawawiriemɨkɨ pemɨhɨkɨkɨ: pemenu'ɨwe tita pemɨkatiyetua meta pemika'itsana tita pemɨkatiuka'e”.
LUK 19:22 Ti'aitame mɨpaɨ katinita'eiya: “Ti'uximayatame 'axapemɨtiuka'iyari, 'ahetsie pepɨrahɨpa 'akɨmana kepemutayɨ. 'Ekɨtsɨ mɨpaɨ pepɨtimaikai kenemɨtiuyukawawiriemɨkɨ, nemenu'ɨwe tita nemɨkatiyetua meta nemuka'itsana tita nemɨkatiuka'e.
LUK 19:23 Kamɨtsɨ, ¿titayari tsikere netumini pekatiyetua tumini hɨwemete wahetsɨa, ne nenuame nemɨwaye'ɨnikekai mena'iwaxɨ?”
LUK 19:24 Hikɨ mɨpaɨ katiniwarutahɨawe mana memɨtanenierekai: “Mɨkɨ tumini xekeneunawairi, meta xekeneu'ɨitɨa 'iya tamamata tsienituyari mexeiya”.
LUK 19:25 Mɨpaɨ mekatenitahɨawe: “Ti'aitame, tamamata kanexeiyaniri mɨkɨ”.
LUK 19:26 Mɨpaɨ katiniwarutahɨawe ti'aitame: “Mɨpaɨ nepɨxerahɨawe, kemɨ'ane tixaɨtɨ mɨrexeiya, tawari matsi pɨtimikieni, peru kemɨ'ane mɨkarexeiya, tsepa 'etsiwa mɨrexeiya katininawaiyariemɨkɨ.
LUK 19:27 Mɨkɨ meta memɨnetsi'aye'uniekai memɨkanetsinaki'eriekai netiwa'aitɨwame nemayanikɨ, xekeniwarahapaka, nehɨxie xekeniwarukuya”».
LUK 19:28 Merikɨtsɨ mɨpaɨ 'utayɨka kaneyani Kerutsareme tiyuneke.
LUK 19:29 Kepauka Wetɨpake meta Wetaniya kiekariyaritetsie mɨta'aximekai, yemuri Huriwa Mati'u mɨrakutewatsie hetɨa, teyɨ'ɨkitɨwamete yuhetsɨa miemete yuhutame kaniwarutanɨ'ani,
LUK 19:30 mɨpaɨ haitɨ: «Kiekari 'anutaɨye mukumatsie xekenehu, meta mana xemeutahaxɨanitsie, xepeitaxeiya puxu temaikɨ hakuwiekame, tewi hetsiena mɨka'anutiyerɨwe 'akuxi. Xekenakuxɨna meta xekenahani 'ena.
LUK 19:31 Xewitɨ xɨka mɨpaɨ tixeku'iwawiyani: “¿Titayari xete'ekuxɨna?”, mɨpaɨ xeketenetahɨawi: “Ti'aitame peiyehɨwa”».
LUK 19:32 Hikɨ memutanɨ'arie mekanekɨne, mekaneitaxeiya kemɨtiwarutahɨawixɨ.
LUK 19:33 Puxu temaikɨ me'akuxɨnakaku, kutsiyarimama mɨpaɨ mekateniwarutahɨawe: —¿Titayari xete'ekɨxɨna puxu temaikɨ?
LUK 19:34 Mɨkɨ mɨpaɨ mekateniwarutahɨawe: —Ti'aitame peiyehɨwa.
LUK 19:35 Hikɨ Ketsutsi hetsɨa mekaneihana. Hikɨta yɨ'ɨkarite me'anuti'itaka puxu temaikɨ hetsie, Ketsutsi mekananutiyeni.
LUK 19:36 Kepauka mumiekai, teɨteri mekani'itɨaximekaitɨni yɨ'ɨkarite huyeta.
LUK 19:37 Hikɨ Huriwa Maku'u yemuriyari hetɨa wiyeta me'ukahutɨ, yunaitɨ teyɨ'ɨkitɨwamete meyumɨiretɨ meyutemamawietɨ mekanitsutɨani karima 'aixɨa me'utiyuatɨ Kakaɨyari hepaɨtsita, naime kememɨte'uxei tɨrɨkaɨyemekɨ kemɨtiuyɨ hepaɨtsita, mɨpaɨ me'utiyuatɨ:
LUK 19:38 —'Aixɨa ke'itɨarieka Ti'aitame 'umamie Tati'aitɨwame hetsɨa miemetɨtɨ. —Taheima 'aixɨa meketeyuxeiyani, wapaitɨ witsimeke'utiyuaneni.
LUK 19:39 Hikɨ paritseutsixi hipatɨ memu'uwakai teɨteri watsata mɨpaɨ mekatenitahɨawe: —Ti'ɨkitame, 'ahetsɨa miemete keniwarutati'a teyɨ'ɨkitɨwamete.
LUK 19:40 Mɨpaɨ mɨkɨ katiniwarutahɨawe: —Mɨpaɨ nepɨxerahɨawe, 'ikɨ xɨka kayuwatɨ me'umakake, tetexi pɨta mepɨtihiwakeyu.
LUK 19:41 Merikɨtsɨ 'ahurawa 'umietɨ 'ixeiyaka kiekari, kaniutatsuani he'eriwatɨ,
LUK 19:42 mɨpaɨ 'utaitɨ: —'Ekɨtɨtɨ tsikere 'ikɨ tukaritsie xɨka tɨma peheitimanike tita mɨreuyewetse para 'aixɨa pemɨtixeiyariekakɨ. Matsi kaniuti'awietsieni hikɨ 'ahɨxikɨ pemɨka'ixeiyakɨ.
LUK 19:43 Tukari kanaye'amɨkɨ, 'ana mɨkɨ memɨmatsi'aye'unie kuya tetsariyayari mekaniti'uitɨakuni 'a'aurie, 'ana 'a'aurie mekaniti'uikuni, para teɨteri memɨkawayekɨnekɨ.
LUK 19:44 Mekamanatihɨakuni kwiepa 'ekɨ meta 'ateɨterima 'ahetsie memɨyetei mepatixɨriyani kwiepa. 'Ahetsie tete xewitɨ pɨkaku'eiriwa yuheima 'atetɨ, mɨpaɨ katiniyɨmɨkɨ 'ekɨ yuri pemɨkatiuta'erikɨ kepauka Kakaɨyari munua matsitawikweitsitɨanike.
LUK 19:45 Meta Kakaɨyari tukieya kuraruyarita kaneutahani hikɨ kanitsutɨani waranuyeweweiyatɨ muwa memɨtetuakai,
LUK 19:46 mɨpaɨ katiniwarutahɨawe: «'Ipaɨ katine'uka: “Nekii nenewieri kiyari pɨhɨkɨtɨni”. Peru xeme terɨ xekanayeitɨani “hakewa tenawayamete memeyu'awieta”».
LUK 19:47 Merikɨtsɨ tukarikɨ katini'ɨkitakaitɨni tuki kuraruyarita, mawari wewiwamete tewa'aitɨwamete, meta 'inɨarikɨ memɨte'ɨkitametetɨkai, meta teɨteri wa'ukiyarima yunaitɨ mekanikuwautɨwekaitɨni me'imienike.
LUK 19:48 Peru mɨkɨ mekaniyutatexieni mɨpaɨ meteyurienike, yunaitɨ teɨteri memi'eniekaikɨ me'ihiwe'erietɨ niukieya.
LUK 20:1 Merikɨtsɨ heiwa teɨteri tiwa'ɨkitɨakaku tuki 'amɨpa kuraruyarita, niuki 'aixɨa manuyɨne wakuxaxatɨwakaku, mawari wewiwamete tewa'aitɨwamete meta 'inɨarikɨ memɨte'ɨkitametetɨkai meta 'ukirawetsixi hurawa mekaniukɨne.
LUK 20:2 Mɨpaɨ mekatenita'iwawiya: —Ketatineutaxatɨa, ¿Hakewa miemekɨ heitserie pehexeiyatɨ mɨya pepɨtiyuriene? ¿Kemɨ'ane mɨkɨ heitserie pɨmatsi'upitɨa?
LUK 20:3 Ketsutsi mɨpaɨ katiniwaruta'eiya: —Netatsiere nepɨxeta'iwawiya xeme. Yaxekeneteneutahɨawi:
LUK 20:4 Wani kemɨti'ɨyanekai, ¿taheima timiemetɨkai, nutsu teɨteri wahetsɨa pɨmiemetɨkai?
LUK 20:5 Mɨkɨ, mɨpaɨ mekateniyutahɨawekaitɨni: «Xɨka tame mɨpaɨ te'utiyuani: “Taheima makawe pipitɨakai”, mɨkɨ mɨpaɨ pɨtatitahɨawe: “Merikɨte, titayari yuri xekate'ita'eriri”.
LUK 20:6 Xɨkata mɨpaɨ te'utiyuani: “Teɨteri mepipitɨakai”, yunaitɨ teɨteri tetekɨ mepɨtatsitituaxa, yuri memɨte'eriekɨ kename Wani Kakaɨyari niukameya hɨkɨtɨkai».
LUK 20:7 Hikɨ mɨpaɨ mekatenita'eiya: —'Atsitepɨkatemate hakewa mieme mepitɨariekai.
LUK 20:8 Mɨkɨta mɨpaɨ katiniwarutahɨawe: —Merikɨte, neta 'atsinepɨkatixetahɨawe kemɨ'ane heitserie mɨnetsi'upitɨa yanemɨtiyurienenikɨ 'ikɨ naime.
LUK 20:9 Merikɨtsɨta kaniwarutaxatɨani teɨteri 'ikɨ 'ɨxatsi 'inɨarikɨ mɨtikuxata mɨpaɨ 'utaitɨ: —Tewi kaxie haraweriyari kaniutawewieni, te'ɨwiyamete kaniwaruhɨritɨani wakwetatɨatɨ, hikɨ 'ateewa paitɨ kaneyani mɨixa heuyehunike.
LUK 20:10 Hikɨ tukari 'aye'aku matikwakwaxetsie, xeime ti'uximayatame kaniutanɨ'ani te'ɨwiyamete wahetsɨa memiyetuirienikɨ harawerita timieme yapaɨmeme kutsiyari hetsiemieme. Peru te'ɨwiyamete mekanitiwaxɨani meta yumaweme mekanenɨ'ani.
LUK 20:11 Hikɨ tawarita xeime ti'uximayatame kaniutanɨ'ani, peru mɨkɨta mekaneitiwaxɨani, mekanititieni meta yumaweme mekanenɨ'ani.
LUK 20:12 Tawari hairieka xeime kaniutanɨ'ani, mɨkɨta mekanixuritɨani meta mekaneyeweiya.
LUK 20:13 »Hikɨ kaxie haraweriyari kutsiyari mɨpaɨ kaniutayɨni: “¿Keri netiyurieni? Neniwe nepanunɨ'ani neminaki'erie, yurikɨ mɨkɨ hɨrixɨa mekanetimakakuni”.
LUK 20:14 Peru, kepauka te'ɨwiyamete memixei, niuki mekaniutixɨatɨatɨkɨne mɨpaɨ me'utiyuatɨ: “'Ikɨ hetsie 'arike katininakimɨkɨ kutsiyari tipiinieya. Hikɨmɨ tepimieni, tita hetsiena mɨtinakekekai tapiini pɨrayani”.
LUK 20:15 Hikɨ haraweri warie mekaneikahɨani meta mekanimieni. »¿Kewayurieni haraweri kutsiyari?
LUK 20:16 Kaninuamɨkɨ, kaniwakwimɨkɨ mɨkɨ te'ɨwiyamete, hipame pɨta kaniwahɨritɨamɨkɨ yuharaweri». Mɨkɨ memɨ'enanakai mɨpaɨ mekaniutiyuani: —Mɨpaɨ mɨkatiniuyɨnike.
LUK 20:17 'Iya waxeiyatɨ mɨpaɨ kaniutayɨni: —Merikɨte, xɨka mɨpaɨ katiuyɨni, ¿titayari 'ipaɨ raine 'utɨarika: »“Mɨkɨ teté memitixani'eri kii wewiwamete, mɨkɨ teté 'itsikina mieme kanayani”?
LUK 20:18 Yunaitɨ mɨkɨ tetetsie memɨkaxɨrieni mepɨtanexɨani, xɨka mɨkɨ teté xeime hetsie 'ukaweni, kwauni xeikɨa pɨtanexɨani».
LUK 20:19 Merikɨtsɨ 'ana mɨkɨ 'inɨarikɨ memɨte'ɨkitametetɨkai meta mawari wewiwamete tewa'aitɨwamete mekatenikuwautɨwekaitɨni kememɨte'iwiyakɨ, mɨpaɨ metehetimaika mɨkɨ mɨwaxatakaikɨ mɨkɨ 'ɨxatsi hepaɨtsita ti'ɨkitatɨ, peru mekaniwamakarɨkaitɨni teɨteri.
LUK 20:20 Hikɨ me'itihupienike mekaniwarutanɨ'ani 'awie nenieremete teɨteri heitseriemekɨ yamemɨtekahu wahepaɨ meteyumaikame. Me'iwiyame niukieyakɨ mekaniyetuanikekaitɨni, kuwexinaruri mita'iwawiyakɨ 'itsɨkame.
LUK 20:21 Hikɨ mɨkɨ mekaniku'iwawiyakaitɨni mɨpaɨ me'utiyuatɨ: —Ti'ɨkitame, tame tepɨtemate 'ekɨ heitseriemekɨ pepɨtikuxata, heitseriemekɨ pepɨti'ɨkita. Yɨkɨ pepɨkatiwaxeiya teɨteri, matsi Kakaɨyari huyeya hepaɨtsita pepɨti'ɨkita yurikɨ.
LUK 20:22 ¿Ti'aitame Tsetsaxi tumini kemɨtiwawa, 'aixɨa ti'ane temɨteyutuaka nutsu pɨkatixaɨ?
LUK 20:23 Timaitɨ kememɨte'i'irɨwiyakai, mɨpaɨ katiniwarutahɨawe: —Titayari xenete'inɨatatɨwe.
LUK 20:24 Tumini xekeneneuxeitsitɨa. ¿Kepai ramu'u pɨra'uxa, kepai pɨra'utɨarika? Mɨkɨ mɨpaɨ mekatenitahɨawe: —Tsetsaxi mu'uya kanihɨkɨtɨni meta pɨ'utɨarikaya.
LUK 20:25 Mɨpaɨ katiniwarutahɨawe: —Kamɨtsɨ xeketeneyetua Tsetsaxi hetsɨa tita Tsetsaxi hetsɨa mɨtimieme, meta xeketeneyetua Kakaɨyari hetsɨa tita Kakaɨyari hetsɨa mɨtimieme.
LUK 20:26 Mepɨyutatexi niukieyatsie me'iwiyakutɨ teɨteri wahɨxie, mehɨxiyatɨ mɨya mɨtiwarutahɨawixɨkɨ, kayuwatɨ mekaniutamare.
LUK 20:27 Merikɨtsɨ hipatɨ tsarutseutsixi mekaniu'axɨani, mɨpaɨ memutiyuanekai kename mɨkite meka'anuku'uwe, hikɨ mɨpaɨ mekatenita'iwawiya:
LUK 20:28 —Ti'ɨkitame, Muitsexi mɨpaɨ katiniu'utɨani tahetsiemieme, tewi xɨka 'umɨni xɨka 'uka 'uku'eirieni tɨɨri kawarayexeiyawetɨ, mutaya kanitiwitɨmɨkɨ yukwe, tɨɨri mɨwarayexeiya matsieya nuiwarieya memakɨnekɨ.
LUK 20:29 Merikɨtsɨ 'amenititekaitɨni 'iwamarixi 'atahuta meyupaɨmetɨ. Wamatsika 'utineɨkeka kaniumɨni tɨɨri kawarayexeiyawetɨ.
LUK 20:30 Hikɨ hutarieka mieme
LUK 20:31 meta hairieka mieme mekanitiwitɨni mɨkɨ 'uka, mɨpaɨ yaxeikɨa 'atahutatɨ yunaitɨ mekaniukwini tɨɨri mekawarayexeiyaka.
LUK 20:32 'Imatɨrieka, kaniumɨnita 'uka.
LUK 20:33 Merikɨte, kepauka xeniu memanuku'uni, 'atahutatɨ memitiwitɨ, ¿kemɨ'ane ra'ɨya pɨrayani?
LUK 20:34 Hikɨ Ketsutsi mɨpaɨ katiniwarutahɨawe: —Hikɨ miemete teɨteri mepɨneneɨke mepɨwikie.
LUK 20:35 Mɨkɨ wahetsie mɨtinake mɨkɨ kwie mɨhekwatsie memaye'axɨanikɨ, wahetsie mɨtinake memanuku'unikɨ mɨkite watsata, mɨkɨ mepɨkatineɨkixɨani meta mepɨkatiwikitɨariexɨani.
LUK 20:36 Mɨkɨ meta, 'ana mepɨkayɨwaweni tawari memɨkwinikɨ, Kakaɨyari niukieya tuayametemama wahepaɨ mepɨ'aneneni. Matsi Kakaɨyari niwemama mekanihɨkɨtɨni, mɨkɨ memanuku'uikɨ.
LUK 20:37 Mɨkite kememɨte'anuku'uni, mɨpaɨta Muitsexi katiniu'ɨkita, yuxapatsie hakewa 'ɨtsi maxaxata, mana Ti'aitame mɨpaɨ pɨrahɨawe: “'Apɨrahami, 'Itsahaki meta Kakuwu wakakaɨyari”.
LUK 20:38 'Ayumieme mɨkite pɨkawaxata kename wakakaɨyari maine, memayeyuyuri pɨta wakakaɨyari kaniyuxatani, tsepa memukwi, yunaitɨ mɨkɨ mepayeneniere hepaɨtsitana.
LUK 20:39 Hikɨ mɨkɨ 'inɨarikɨ memɨte'ɨkitametetɨkai hipatɨ mɨpaɨ mekatenitahɨawe: —Ti'ɨkitame, 'aixɨa pepaine.
LUK 20:40 Hikɨ tawariri mepɨkayuwaɨri tixaɨtɨkɨ memɨte'ita'iwawiyakɨ.
LUK 20:41 Hikɨ mɨpaɨ katiniwarutahɨawe Ketsutsi: —¿Titayari mɨpaɨ mete'utiyuane kename Kɨritsitu Rawiri nuiwarieya hɨkɨ?
LUK 20:42 Mɨkɨ Rawiri tɨtɨ kwikari xapayaritsie mɨpaɨ kanaineni: »“Ti'aitame mɨpaɨ katiniutahɨawe Neti'aitɨwame: ‘Netserieta kenakani,
LUK 20:43 ne nekaniwaka'unamɨkɨ memɨmatsi'aye'unie, 'ahɨxie nekaniwa'atɨamɨkɨ’ ”.
LUK 20:44 Rawiri “Neti'aitɨwame” Kɨritsitu katiniuterɨwani, ¿kehapaɨtɨtɨ nu'aya pɨhɨkɨtɨni?»
LUK 20:45 Merikɨtsɨ yunaitɨ teɨteri me'i'eniekaku mɨpaɨ katiniwarutahɨawe teyɨ'ɨkitɨwamete:
LUK 20:46 —Xekeneyukweriwayurieka mɨkɨ 'inɨarikɨ memɨte'ɨkitamete wahepaɨtsita. Mɨkɨ pɨwanake 'etɨtɨme me'anakatɨtɨ memeu'uwanikɨ, meta yemekɨ pɨwanake waɨritsika memɨpitɨarienikɨ kiekari hixɨapa meta teɨteri wahɨxie memayaxekɨ tuki 'etsimɨpepeta, meta kiekame 'aurie memayaxekɨ 'ixɨararipa.
LUK 20:47 Mɨkɨ wiuratsixi wapiini mepɨtewarutixɨtɨiri, meta 'emepɨteheutetere meyunenewietɨ mɨkamatsiɨkɨnikɨ kememɨteyurie. Mɨkɨ wahetsie matsi waɨkawa katinahɨiyamɨkɨ.
LUK 21:1 Merikɨtsɨ heutaniereka kaniwaruxeiya xikutsixi tumini mawariyari me'akaxɨrɨwame tumini kakuniyaritsie tukita.
LUK 21:2 Meta 'uka tiuxei kɨnaya mumɨ tuminikɨ mɨmawekai mana heikaxɨrɨwame huta tsenitawuyari.
LUK 21:3 Mɨpaɨ kaniutayɨni: —Yurikɨ mɨpaɨ nepɨxerahɨawe, 'ikɨ wiura tuminikɨ mawetɨ kakunitsie kaneikaxɨrieni waɨkawa, mɨkɨ yunaitɨ 'etsiwa xeikɨa mekaneikaxɨrieni.
LUK 21:4 Mɨkɨ yunaitɨ manayuhayewa mekaneukaxɨrieni Kakaɨyari hetsiemieme 'imikieri. 'Ikɨ 'uka yuhaweri mieme pɨta neukaxɨrieni kɨmana mɨtiyumikwakai naime.
LUK 21:5 Merikɨtsɨ hipatɨ teyɨ'ɨkitɨwametemama tuki 'amɨpa hepaɨtsita mekatenikuxatakaitɨni, kemɨtikemaritɨariekai tete witsi'anenemekɨ mawari witsi'anenemekɨ. Peru mɨpaɨ kaniutayɨni Ketsutsi:
LUK 21:6 —Xepixeiya 'ikɨ, tukari kanaye'amɨkɨ kepauka mɨkahayewarieni tete yuheima 'atetɨ, naitɨ kanika'unariemɨkɨ.
LUK 21:7 Mɨkɨ mɨpaɨ mekatenita'iwawiya: —Ti'ɨkitame, ¿kepauka mɨpaɨ pɨtiyɨni kepemaine, tita ti'inɨariyaritɨni maye'aximenitsie mɨpaɨ mɨtiyɨnitsie?
LUK 21:8 Hikɨ mɨpaɨ kaniutayɨni: —Xekeneyukweriwayurieka nɨka xete'u'itaiyarieni. Yumɨiretɨ mepɨ'axɨani kename ne neyɨane, mɨpaɨ me'utiyuatɨ: “Neri nepɨhɨkɨ. Tukari kanaye'aniri”. Wa'utɨma xepɨkahekɨkani.
LUK 21:9 Kepauka mɨpaɨ xemɨte'enanani kename xaɨtsie kuyaxa hexuawe, meta kepauka xemɨtetamarieni kename hipatɨ me'anuku'uixime kuyakɨ, xepɨkamamaka. Peuyewetse mɨpaɨ mɨtiyɨnikɨ meri, peru 'akuxi 'ana kwitɨ kwie pɨkaheutipare.
LUK 21:10 'Ana mɨpaɨ katiniwarutahɨawe: —Nuiwarite mekaniwatakwikuni hipame nuiwarite meta xexuime kwieyaritsie kiekatari hipame kwieyaritsie kiekatari.
LUK 21:11 Kwie karima kanitayuamɨkɨ, haka kanitawemɨkɨ meta waɨkawa kwiniya naitsarie mɨtiuyehane, muyuawitsie 'inɨari mamariwawetɨ kanitixuawerimɨkɨ kɨmana xekanimamakakuni.
LUK 21:12 »Peru 'ikɨ yakatiyɨwekaku 'akuxi, mepɨxetiwiya xeme meta mepɨxe'anuyeweiya. Mepɨxeyetuani tukiteta meta katsariyanata xemanutaxɨriyanikɨ, meta nehetsɨa xemɨmiemetekɨ xepanuhapanieni te'aitamete meta kuwexinaruritsixi wahɨxie.
LUK 21:13 Mɨpaɨ xe'itɨarieme xeme xekaniyɨwawekuni xemɨtetahekɨatakɨ mɨkɨ wahɨxie.
LUK 21:14 'Ayumieme yu'iyari xekenetseiriyani, xetiwiyarieme xepɨkayu'iyaritɨaka kexemutiyuaneni,
LUK 21:15 ne pɨta temaiwawemete nekanixe'ayeitɨamɨkɨ, xemɨtiniunikɨ, 'ayumieme yunaitɨ memɨxe'aye'unie mekaniyutatexikuni mexe'a'iwakutɨ mexeniukimakutɨ.
LUK 21:16 'Atsita xe'ukiyarima, xe'iwama, xemarema, xehamikuma mekanixeyetuakuni, meta hipatɨ xeme xekanikwi'iwakuni.
LUK 21:17 Yunaitɨ mekanixe'uxiwe'eriekakuni nehetsɨa xemɨmiemetekɨ.
LUK 21:18 Peru nixei kɨpayari pɨkaheuyeweni xemu'utsie mieme.
LUK 21:19 Xɨka xeme heitseriemekɨ xe'uhuni, xekaniyutawikweitsitɨakuni.
LUK 21:20 »Kepauka xemɨwaxeiya kuyaxi Kerutsareme 'aurie meyukuxeɨrieximekaku, 'ana mɨpaɨ xekatenimaikakuni kename 'ari hehura kepauka 'akumawetɨ mayani.
LUK 21:21 Hikɨ 'ana mɨkɨ Kureya kwieyaritsie memu'uwani meke'uyuta'una hɨritsie, kemɨ'ane kiekaritsie memɨtiteni mekewayekɨne, meta kemɨ'ane yeuta memu'uwani mepɨkahakununuwani kiekaritsie.
LUK 21:22 Mɨkɨ tukaritsie heitseriemekɨ mepɨte'apiniyarieni kiekatari, 'ana katinaye'amɨkɨ naitɨ kemɨre'uxa.
LUK 21:23 Xɨa'ui mɨkɨ memuhukani meta memɨtetsitsitɨwani mɨkɨ tukaritsie. Karikɨ 'uximatɨarika waɨkawa kanitawemɨkɨ kwiepa, meta haxɨa kanitixuawerimɨkɨ 'ikɨ teɨteri wahepaɨtsita.
LUK 21:24 'Ixiparakɨ mekanitakwi'iwakuni, yunaime nuiwarite wahetsɨa mekananuhapaniekuni waɨriyarika. Nuiwarite memɨkatateɨterima mepika'una Kerutsareme mexi mɨkɨta watukari katapariwe.
LUK 21:25 »'Inɨarite pɨtixuawere, tautsie, metsatsie meta xurawetsixi wahetsie. Kwiepa, nuiwarite mepɨyuhiwerieka meta mekanimamakakuni haramara yuarikaya me'enietɨ meta hamewari.
LUK 21:26 Marikakɨ teɨteri mepɨ'amɨxɨani metemaitɨ kwiepa memɨtama kememɨ'itɨarieni, karikɨ tɨrɨkariya memexeiya muyuawitsie miemete mepɨkuyuitɨarieni.
LUK 21:27 Hikɨ 'ana Yuri Tewi kenemɨtitewa mekanenixeiyakuni haitsata ne'akamieme netɨrɨkaɨyeme meta waɨkawa nexawatɨme.
LUK 21:28 Yatitsutɨarieximekaku xekeneutineniereni 'aixɨa xeketeneyumaika, 'ana paye'aximeni kepauka xemɨtixɨnarieni».
LUK 21:29 Hikɨ 'ɨxatsi hepaɨtsita tikuxatatɨ katiniwaruta'ɨkitɨani mɨpaɨ 'utaitɨ: —Xekeneu'ixɨari pini meta hipame kɨyexi.
LUK 21:30 Kepauka mɨtixawata, xe'i'ixɨarietɨ yɨkɨmana xepɨtemaika tatsɨari 'ahurakaku.
LUK 21:31 Yaxeikɨata 'ikɨ, kepauka xemɨneniere kenemutayɨ tiyɨaneme, mɨpaɨ xeketenemaika Kakaɨyari kemɨtita'aita 'ari kanehuraniri.
LUK 21:32 »Yurikɨ mɨpaɨ nepɨxerahɨawe, 'ikɨ naitɨ yapɨtiyɨni mexi hikɨ miemete mekakwiwawe.
LUK 21:33 Muyuawi meta kwie pukumawere, peru neniuki pɨkakumawere.
LUK 21:34 »Xekeneyɨ'ɨwiyani kapa xe'iyari 'u'itutuperekɨ xeku'ixɨaratɨwekaku xetarɨwekaku kwiepa mieme tukarikɨ xeyu'iyaritɨakaku. Xɨka mɨpaɨ xeteyuriekake, 'iya tukari yapauka pɨxe'axe,
LUK 21:35 winiyari hepaɨ, mɨkɨ tukaritsie mekanita'axiyariekuni yunaitɨ kwiepa memɨtama naitsarie.
LUK 21:36 Xekenayeneniereni 'aixɨa, yuheyemekɨ xeyunenewietɨ para xemɨyɨwawenikɨ, Yuri Tewi hɨxie xemaye'axɨanikɨ xetawikweme 'uximatɨarikatsata 'umɨramie».
LUK 21:37 Merikɨtsɨ tukarikɨ tuki 'amɨpa kuraruyarita kaniuyeikakaitɨni ti'ɨkitatɨ, tɨkarikɨ wayeyeikatɨ Huriwa Maku'u yemuriyaritsie nehupukaitɨni.
LUK 21:38 Yunaitɨ teɨteri ximeri yuimuana mekani'axekaitɨni hetsɨana me'i'enienike tukipa.
LUK 22:1 Merikɨtsɨ Paa mɨkakuxanariyarietɨka 'ixɨarariyari kanahurakaitɨni, Patsikwa 'ixɨarariyari mɨtitewakai.
LUK 22:2 Hikɨ mawari wewiwamete tewa'aitɨwamete meta 'inɨarikɨ memɨte'ɨkitametetɨkai tixaɨtɨ mekatenikuwautɨwekaitɨni Ketsutsi kememɨtemienikekai, teɨteri mewamakatɨ.
LUK 22:3 Hikɨ Kauyumarie Kura 'Itsikariutitanaka hetsie kaneutahani, mɨkɨ tamamata heimana memɨyuhuta mɨwanɨkai.
LUK 22:4 Heyaka mawari wewiwamete tewa'aitɨwamete meta wakuyaxima wahetsɨa, katiniwarutaxatɨani Ketsutsi kemɨtiwayetuirienikekai.
LUK 22:5 Mɨkɨ mekaniyutemamawiekaitɨni, mekaniuyu'enieni kename tumini me'i'ɨitɨanikekai.
LUK 22:6 Mɨkɨta yakatiniutanaki'erieni, hikɨ katinikuwaunekaitɨni kepauka 'aixɨa mɨyɨnikekai mɨwayetuirienikɨ teɨteri me'umawekaku.
LUK 22:7 Merikɨtsɨ kepauka Paa mɨkakuxanariyarietɨka 'ixɨarariyari maye'a, kepauka muxa nunutsi mutimemieriwa Patsikwa 'ikwaiyari hetsiemieme.
LUK 22:8 Hikɨ Ketsutsi kaniwarutanɨ'ani Pekuru meta Wani mɨpaɨ tiwarahɨawetɨ: —Xekenehu 'aixɨa xeketenekuyuri Patsikwa 'ikwaiyari temekwanikɨ.
LUK 22:9 Mɨkɨ mɨpaɨ mekatenitahɨawe: —Hakewa pɨmatsihenake 'aixɨa temɨtehekuyurienikɨ.
LUK 22:10 Mɨpaɨ katiniwarutahɨawe: —Xeme xeheutahaxɨaximekaku kiekaritsie tewi mana pɨxe'anukunake ye'ɨ 'ahanatɨ hekuhanɨka. Mɨkɨ xekenanuweiya kiita hakewa meutahani.
LUK 22:11 Mɨpaɨ xeketenetahɨawi kiekame: “Ti'ɨkitame mɨpaɨ paine: ¿Hakewa kii mɨkɨ muwa nemɨtiwa'ɨkitɨa wahamatɨa Patsikwa 'ikwaiyari nemukwani?”
LUK 22:12 Mɨkɨ kii taɨta xeheutiwitɨme kanixexeitsitɨamɨkɨ hipame kii 'amuyeyewa naitɨ 'ureyepikame. Muwa 'aixɨa xeketeneyuri.
LUK 22:13 Hikɨ mekanekɨne, mekaneitaxeiya kemɨtiwarutahɨawixɨ. Muwa Patsikwa 'ikwaiyari hetsiemieme 'aixɨa mekateniukuyurieni.
LUK 22:14 Hikɨ 'aye'aku, mexatsie kaniutiyerɨni meta nɨ'arimama yaxeikɨa.
LUK 22:15 Hikɨ mɨpaɨ katiniwarutahɨawe: —Kwinimieme nepihiwe'eriekai xehamatɨa 'ikɨ 'ixɨarari 'ikwaiyari nemɨkwanikɨ nekatikwiniwetɨ 'akuxi.
LUK 22:16 Yanepɨtixekɨhɨawe, tawari 'ikɨ nepɨkakwani mexi ka'aye'awe tita 'ixɨarari mɨti'inɨariyari Kakaɨyari ti'aitametɨkaku.
LUK 22:17 Hikɨ tekɨxi 'anuhanaka pamɨpariyutsi 'ipitɨaka Kakaɨyari mɨpaɨ kaniutayɨni: —Xekenanuhani 'ikɨ, yuxexuitɨ xekenanuti'inɨataxɨa.
LUK 22:18 Mɨpaɨ nepɨxerahɨawe, tawari kaxie hayari nepɨka'anu'ieni mexi ka'aye'awe Kakaɨyari mitsutɨani ti'aitatɨ.
LUK 22:19 Hikɨ paa 'anu'ɨka pamɨpariyutsi 'ipitɨaka Kakaɨyari 'ititaraka kaniwarumini mɨpaɨ 'utaitɨ: —'Ikɨ kaninewaiyaritɨni xehetsiemieme mɨyetuiyani, 'ipaɨ xeketeneyurieka xemɨnetsiha'eriwanikɨ.
LUK 22:20 Yaxeikɨata katiniuyurieni tekɨxi hepaɨtsita mete'ukwaku, mɨpaɨ kaniutayɨni: —'Ikɨ tekɨxita mieme tɨratu mɨhekwa kanihɨkɨtɨni nexuriyakɨ 'aixɨa mɨ'itɨarieni, xehetsiemieme kemɨtitayeuriyani.
LUK 22:21 Perutsɨ kemɨ'ane mɨnetsiyetuani 'ena paka, mamaya mexatsie pama hakewa nemaka.
LUK 22:22 Yuri Tewi kenemɨtitewa, nekaniyemieni nemɨmierienikɨ, kemɨti'aitsie yamɨtiyɨnikɨ, perutsɨ xɨa'ui kemɨ'ane mɨnetsiyetuani.
LUK 22:23 Mɨkɨ mekanitsutɨani niuki mexɨatɨatɨ kemɨ'ane mɨkɨ mɨxatakai kename mɨya tiyurienikekai 'utaitɨ.
LUK 22:24 Metatsiereta meyuniukimatɨ mekanakɨne kemɨ'ane mɨkɨ matsi waɨkawa meuyewetse mayanikekai.
LUK 22:25 Ketsutsi mɨpaɨ katiniwarutahɨawe: —Nuiwarite tewa'aitɨwamete mekateniwa'uxitɨaka yuteɨterima, meta mɨkɨ wahetsie 'itsɨkate memɨhɨkɨ yuhetsiemieme mɨpaɨ mekaniutiyuaneni kename 'aixɨa meteyuruwamete.
LUK 22:26 Xeme pɨta mɨpaɨ xepɨkayɨaka. 'Apɨta, kemɨ'ane xeme mɨmariwe mɨkɨ kemɨ'ane tixaɨtɨ mɨkatihɨkɨ hepaɨ keyɨaneni, meta kemɨ'ane mɨtixe'aitɨa mɨkɨ kemɨ'ane xehetsiemieme mɨti'uximaya hepaɨ keyɨaneni.
LUK 22:27 Kexeteku'eriwa, ¿kemɨ'ane matsi pumariwe, kemɨ'ane kiekametɨtɨ mɨtikwa'a, kemɨ'ane miparewie timikwatɨ, mɨkɨ nutsu pumariwe? Xɨari kiekame matsi pumariwe. Perutsɨ ne xetsata nepuyeika xehetsiemieme neti'uximayatɨ pɨta.
LUK 22:28 Xeme nehetsie xekateniwiyakaitɨni xekatehayewatɨ ne'inɨatsienekaku.
LUK 22:29 Ne'ukiyari kemɨnerayeitɨa ti'aitame, neta yaxeikɨa te'aitamete nekanixe'ayeitɨamɨkɨ.
LUK 22:30 Nehamatɨa xekatenikwaikuni xekateni'ikuni mexa 'aurie ne'akaime neti'aitametɨkaku, 'itsɨkate xekanakɨnikuni, 'uwenitsie xe'ayaxeme xekateniwa'aitɨakakuni teɨteri tamamata heimana huta 'Ixaheri nuiwarimama.
LUK 22:31 »Neuxei, Tsimuni, yumarima 'aixɨa, Kauyumarie pɨxe'uta'iwau, pɨxeta'inɨata, pɨxetikatse tɨriku hepaɨ.
LUK 22:32 Ne matsi nepɨnetanenewi 'ahetsiemieme pemɨkatihayewakɨ yuri peti'erietɨ. 'Ekɨta kepauka pemɨtihayewa peheuyewautsetɨ keniwatuikani 'a'iwama».
LUK 22:33 Mɨkɨ mɨpaɨ katinitahɨawe: —Ti'aitame, nepɨnewaɨriya 'ahetsie nemɨtiwiyani tsepa nemanutahɨiya tsepa nemumierie.
LUK 22:34 Ketsutsi mɨpaɨ katinitahɨawe: —Pekuru 'aku, mɨpaɨ nepɨmatikɨhɨawe, wakana katahiwawekaku 'akuxi hikɨ, 'ekɨ haikakɨa pekani'aku'imawamɨkɨ, kename pekanetsimate pe'utaitɨ.
LUK 22:35 Hikɨ mɨpaɨta katiniwarutahɨawe: —Kepauka nemɨxeheutanɨ'axɨa kɨtsiuri, xerai, kakai xekate'upikame, ¿tixaɨ xeteheuyehɨakai 'aku? Mɨkɨ mɨpaɨ mekatenitahɨawe: —Tixaɨ.
LUK 22:36 Mɨpaɨ katiniwarutahɨawe: —Hikɨtsɨ pɨta mɨpaɨ pɨkatiyɨni, kemɨ'ane kɨtsiuri mexeiya keheihurieni, xerai meta yaxeikɨa. Kemɨ'ane mɨkaheixeiya kuya kutsiraya yɨ'ɨkari ke'utuani ke'inaneni.
LUK 22:37 Yanepɨtixekɨhɨawe, peuyewetse nehetsie maye'atɨarienikɨ mɨpaɨ kemɨre'uxa: “'Inɨari niukiyari tsanamete wahepaɨ kaniu'itɨarieni”. Naitɨ nehepaɨtsita kemɨre'uxa kanaye'atɨarieximeni.
LUK 22:38 Hikɨ mɨkɨ mɨpaɨ mekaniutiyuani: —Ti'aitame, neuxei 'ena kutsirate hutatɨ. Ketsutsi mɨpaɨ katiniwarutahɨawe: —Neuxei 'ariri.
LUK 22:39 Merikɨtsɨ wayeyaka kaneyani hakewa me'axekai Huriwa Maku'u yemuriyaritsie, teyɨ'ɨkitɨwamete mekaniweiyakaitɨni.
LUK 22:40 Hikɨ muwa heta'aka mɨpaɨ katiniwarutahɨawe: «Xekeneyunenewieka, kapa 'axaxete'uyurienikɨ xemɨta'inɨatsienitsie».
LUK 22:41 Hikɨ yuxaɨta kananayeyani memakutekaitsie yatewa kaniuyani tete kemɨrehɨiwa yakɨtɨtɨ, 'utitunumakeka kaniyutanenewieni,
LUK 22:42 mɨpaɨ 'utaitɨ: «Ne'ukiyari, xɨka pe'awaɨriyani, yanepɨra'eriwakaku mɨka'aye'anikɨ kenemɨtikwinitɨarieni, matsi kemɨnetinake ne pɨkatixaɨ, kemɨmatinake 'ekɨ pɨta yaketiuyɨni».
LUK 22:43 Hikɨ niuki tuayame matsiɨkɨtɨ kanayuyeitɨani hɨxiena taheima mieme 'itɨrɨkariyatɨ.
LUK 22:44 Hikɨ kwiyɨanetɨ hiwerikakɨ, matsi kwini mieme yutatuatɨ kaniyunenewiekaitɨni, kwaxiyaya xuriya tsuniriyari hepaɨ kani'anenekaitɨni kwiepa kaxɨrɨwetɨ.
LUK 22:45 Kepauka mɨtiutahayewaxɨ yunenewietɨ 'anukukeka teyɨ'ɨkitɨwamete wahetsɨa nuaka mana kaniwarutaxeiya mekutsume hiwerikakɨ.
LUK 22:46 Mɨpaɨ katiniwarutahɨawe: —¿Titayari xetekutsu? Xekenanuku'uti xekeneyunenewieka kapa 'axaxete'uyurienikɨ xemɨta'inɨatsienitsie.
LUK 22:47 Merikɨte 'utaniukakaku 'akuxi yumɨiretɨ teɨteri mekaniu'axɨani, xewitɨ kaniwarawitɨkɨkaitɨni tamamata heimana memɨyuhuta mɨwanɨkai Kura titewatɨ. Ketsutsi 'aurie kaniutakeni 'i'itsenike.
LUK 22:48 Peru Ketsutsi mɨpaɨ katinitahɨawe: —Kura, ¿penetsi'itseme penetiyetuani Yuri Tewi kenemɨtitewa?
LUK 22:49 Teɨterimama metemarietɨ kemɨtiyɨanekai mɨpaɨ mekaniutiyuani: —Ti'aitame, ¿takutsiratekɨ tetewatakwini?
LUK 22:50 Xewitɨ mɨkɨ tewi mawari wewiwamete tiwa'aitɨwame hetsɨa mieme ti'uximayatame nakaya kanawiteni tserietana mieme.
LUK 22:51 Peru Ketsutsi mɨpaɨ kaniutayɨni: —'Ari xeketeneuhayewa. Hikɨ 'imayɨaka nakaya 'aixɨa kaniuyurieni.
LUK 22:52 Hikɨ Ketsutsi mɨpaɨ katiniwarutahɨawe mawari wewiwamete tewa'aitɨwamete, kuyaxi tukipa miemete, meta 'ukirawetsixi memeyekɨ me'iwiyake: —¿Kari xepeyekɨ 'ixiparate meta kɨyexite xete'u'ɨtɨ xenetsiwiyake, kemɨtiwiwiyarɨwa tinawayame?
LUK 22:53 Tukarikɨ xehetsɨa ne'uyeikakaku tukipa xepɨkanetsi'umayɨa. Peru hikɨ xetukari kanihɨkɨtɨni yamɨtiyɨnikɨ, Yɨwikame heitserie pexeiya hikɨ.
LUK 22:54 Merikɨte me'iwiyaka mekaneihana mawari wewiwamete tiwa'aitɨwame kiita mekani'atɨani. Pekuru kaniweiyakaitɨni yatewa.
LUK 22:55 Hikɨ takwa hixɨapa metinaika mana mekaniutiyaxe meta Pekuru wahamatɨa kaniutiyerɨni.
LUK 22:56 Hikɨ xewitɨ 'ɨimari mana mɨti'uximayakai 'ixeiyaka hekɨaripa 'ukaime 'ixeiyatɨ mɨpaɨ kaniutayɨni: —'Ikɨta hamatɨana kaniuyeikakaitɨni.
LUK 22:57 Mɨkɨ kaniyuku'imawakaitɨni mɨpaɨ 'utaitɨ: —'Uka 'aku, ne nepɨka'imate.
LUK 22:58 Yareutewikakuta xewitɨ 'ixeiyaka mɨpaɨ kaniutayɨni: —'Ekɨtsɨ xewitɨ mɨkɨ wa'iwa pekanihɨkɨtɨni. Pekuru mɨpaɨ kaniutayɨni: —Tewi, ne nepɨkahɨkɨ.
LUK 22:59 Hikɨ xeihurayari 'aye'aku yakɨtɨniketɨ xewitɨta heitseriemekɨ mɨpaɨ kaniutayɨni: —Yurikɨ 'ikɨ hamatɨana kaniuyeikakaitɨni, neuxei Karereya kiekame kanihɨkɨtɨni.
LUK 22:60 Pekuru mɨpaɨ kaniutayɨni: —Tewi, ne 'atsinepɨkatimate kepemaine. Yapauka haniukakaku 'akuxi, wakana kenetahiwa.
LUK 22:61 Ti'aitame ta'aurie 'aweka kaneutaniere Pekuru kaniuxeiya. Hikɨ Pekuru Ti'aitame niukieya kanaye'erieni kemɨtitahɨawixɨ: «Wakana katahiwawekaku 'akuxi hikɨ, 'ekɨ haikakɨa pepɨ'aku'imawani kename pekanetsimate pe'utaitɨ».
LUK 22:62 Wayeyaka kaniutatsuani kwini mieme tiyuhiwerietɨ.
LUK 22:63 Hikɨ teɨteri Ketsutsi memɨ'ɨwiyakai mekanitsutɨani me'inanaimatɨ meta mekanikuwayakaitɨni.
LUK 22:64 Hɨxiena meheikɨhɨaka, mekanikuwayakaitɨni, meta mɨpaɨ mekateniku'iwawiyakaitɨni: —Ketatineutahekɨatɨa, kemɨ'ane pɨmatsi'uwa.
LUK 22:65 Waɨkawa matsi mɨpaɨ mekatenikɨhɨawekaitɨni 'axame'utiyuatɨ.
LUK 22:66 Merikɨtsɨ 'ukatareku mekaniyukuxeɨrieni teɨteri wa'ukiyarima meta mawari wewiwamete tewa'aitɨwamete, meta 'inɨarikɨ memɨte'ɨkitametetɨkai, mɨkɨ mekani'atɨani memayuxeɨriekaitsie.
LUK 22:67 Mɨpaɨ mekatenitahɨawe: —Ketatineutaxatɨa, xɨka 'ekɨ Kɨritsitu pehɨkɨtɨni. Mɨpaɨ katiniwaruta'eiya: —Xɨka yanetixe'utahɨawe, yuri xepɨkaneteta'eririeni.
LUK 22:68 Xɨka nexeku'iwawiyanike xepɨkanetsita'eiyakeyu, meta xepɨkanetsixɨnakeyu.
LUK 22:69 Peru hikɨtɨtɨ Yuri Tewi kenemɨtitewa Kakaɨyari Naimekɨmɨtɨrɨkaɨye tserieta nepakani.
LUK 22:70 Yunaitɨ mɨpaɨ mekatenitahɨawe: —'Aa, ¿'ekɨ xeniu Kakaɨyari petinu'aya? Mɨkɨ mɨpaɨ katiniwarutahɨawe: —Xemetsɨ mɨpaɨ xekaniutiyuaneni kename nehɨkɨ.
LUK 22:71 Hikɨ mɨkɨ mɨpaɨ mekaniutiyuani: —¿Ketitayari 'akuxi tetewareuyehɨwa tehekɨatamete? tametsietɨ tepi'eni tetana mieme.
LUK 23:1 Hikɨ yunaitɨ mekananuku'uni mekaneihana mɨta'iwawiyarienikɨ Piratu hetsɨa.
LUK 23:2 'Ana menitsutɨani me'ixanetatɨ mɨpaɨ me'utiyuatɨ: —Te'iku'iwawiyatɨ 'ipaɨ tekatenimaika, kwamanarika wewietɨ tiniwa'ɨkitɨaka tateɨterima, pɨkawapitɨa memɨteyukutuayanikɨ Tsetsaxi kuwiyexinuya hetsiemieme, mɨpaɨ kanaineni kename heitserie 'upitɨarie Kɨritsitutɨtɨ, ti'aitame yuxatatɨ.
LUK 23:3 Hikɨ Piratu mɨpaɨ katinita'iwawiya: —¿'Ekɨ huriyutsixi teɨteriyari tiwa'aitɨwame petihɨkɨ? Mɨkɨ mɨpaɨ katinita'eiya: —'Ekɨtsɨ mɨpaɨ pekanaineni.
LUK 23:4 Hikɨ Piratu mɨpaɨ katiniwarutahɨawe mawari wewiwamete tewa'aitɨwamete meta teɨteri memɨyukuxeɨri: —Kenemɨtimate, tixaɨ pɨkareuyewetse 'ikɨ tewi mɨxanetsiekakɨ.
LUK 23:5 Mɨkɨ matsi kwini mieme meniku'imawakaitɨni yame'utiyuatɨ: —Kaniwaxamurieneni teɨteri, ti'ɨkitatɨ naitsarie Kureya kwieyaritsie, Karereya kwieyaritsie heitsutɨaka 'uwapaitɨta.
LUK 23:6 Merikɨtsɨ Piratu 'u'enaka kaniku'iwawakaitɨni xɨka karereyatanaka hɨkɨtɨkaitɨni tewi.
LUK 23:7 Tiutamarieka Herurexi mehɨritɨariekaitsie mɨkiekametɨkaikɨ, hetsɨana neinɨ'ani, Herurexi Kerutsareme muyeikakaikɨ 'ana.
LUK 23:8 Merikɨtsɨ Herurexi Ketsutsi xeiyatɨ kaniyutemawiekaitɨni waɨkawa, mɨixa kanixeiyamɨkɨkaitɨni mɨ'enakaikɨ hepaɨtsitana, mɨpaɨ katiniku'eriwakaitɨni, Ketsutsi tixaɨtɨ mɨtiyurienikekaikɨ 'inɨari, 'ixeiyamɨtɨ.
LUK 23:9 Waɨkawa kaniku'iwawiyakaitɨni, peru Ketsutsi 'atsipɨkatita'ei.
LUK 23:10 Manata mekaniku'ukaitɨni mawari wewiwamete tewa'aitɨwamete meta 'inɨarikɨ memɨte'ɨkitametetɨkai, mɨkɨ mepɨkatehayewakai me'ixanetatɨ.
LUK 23:11 Hikɨ Herurexi yukuyaxima wahamatɨa tixaɨtɨ mekate'eyeitɨatɨ me'inanaimatɨ, 'ixuriki witsi'aneme me'enakuwirieka tawari mekaneinɨ'ani Piratu hetsɨa.
LUK 23:12 Mɨkɨ tukaritsie Herurexi meta Piratu mekaniyutemawiekaitɨni, mepayuka'uniekai mɨixa, 'anake 'aixɨa mepɨteyuxeiyakai.
LUK 23:13 Hikɨ Piratu warukuxeɨrieka mawari wewiwamete tewa'aitɨwamete, 'itsɨkate meta teɨteri yunaime,
LUK 23:14 mɨpaɨ katiniwarutahɨawe: —Nehetsɨa xepi'atɨa 'ikɨ tewi, kename kwamanarika wewietɨ tiwa'ɨkitɨa teɨteri xe'utiyuatɨ, kamɨ, xehɨxie ne'ita'iwawiyaka ne, kenemɨtimate, tixaɨ pɨkareuyewetse 'ikɨ tewi hetsie mɨrahɨiyanikɨ kexemɨte'ixaneta.
LUK 23:15 Herurexi meta yaxeikɨa kaniutayɨni, nexe'utanɨ'aku hetsɨana, tawari nehetsɨa kaneiyenɨ'ani. 'Atsipɨkatiuyuri hetsiena mɨtinakenikɨ mɨmierienikɨ.
LUK 23:16 'Ayumieme nepɨtita'aita mɨkuweiyaxɨanikɨ, 'arike nepixɨna.
LUK 23:17 Merikɨtsɨ 'ixɨararipa kaneuyewekaitɨni xeime mɨwaxɨnirienikɨ 'anutahɨiyakame.
LUK 23:18 'Ana yunaitɨ yaxeikɨa mekateniuhiwa mɨpaɨ me'utiyuatɨ: —Keneumi'a mɨkɨ, ketaneuxɨniri Waxawaxi.
LUK 23:19 Mɨkɨ mɨyumienekaikɨ kiekaritsie, meta xeime mumikɨ katsariyanata kananutahɨiyakaitɨni.
LUK 23:20 Piratu tawari kaniwarutahɨawe, Ketsutsi xɨnamɨtɨ.
LUK 23:21 Mɨkɨ matsi mekaniutihiwakaitɨni mɨpaɨ me'utiyuatɨ: —Kuruxitsie keneukawi, Kuruxitsie keneukawi.
LUK 23:22 Hairieka mɨpaɨ katiniwarutahɨawe: —¿Titakɨ 'axatiuyuri 'ikɨ tewi? Kenemɨtimate ne, tixaɨtɨ 'atsipɨkatiuyuri pɨkaheuyewetse mɨmierienikɨ, 'ayumieme kuweiyaxɨayu nepixɨna.
LUK 23:23 Mɨkɨ matsi karima mekaniwawiriekaitɨni kuruxitsie mɨmierienikɨ. Teɨteri meta mawari wewiwamete memɨhɨritɨariekai hiwarikɨ mekane'iwa.
LUK 23:24 Hikɨ Piratu mɨpaɨ katiniuta'aita yamɨtiyɨnikɨ kememɨte'iwawiriekai mɨkɨ.
LUK 23:25 Kanixɨna kemɨ'ane memɨwaukai, kemɨ'ane manutahɨiyakai katsariyanata mɨyumienekaikɨ meta xeime mumikɨ, meta Ketsutsi kaniyetuani wahetsɨa kemɨtiwanakekai.
LUK 23:26 Merikɨtsɨ kepauka memiwitɨximekai meheimienike, xeime mekaniuwiya Tsimuni titewakame Tsirenetanaka, mɨkɨ xaɨtsie hanuyaka kiekaritsie kanaye'aximekaitɨni, hikɨ mekanititɨtɨani kuruxi Ketsutsi 'utɨma menutɨnikɨ.
LUK 23:27 'Ana yumɨiretɨ teɨteri meniweiyakaitɨni, 'ukari meta me'utitsuatɨ me'itsuariwiyatɨ.
LUK 23:28 Hikɨ ta'aurie 'aweka mɨpaɨ Ketsutsi tiniwarutahɨawe: —Xeme 'ukari Kerutsaremetari xepɨka'utitsuanani nehepaɨtsita, yuhepaɨtsita pɨta meta yuniwema wahepaɨtsita xekeneutitsuanani.
LUK 23:29 Tukari kanaye'amɨkɨ kepauka mɨpaɨ memutiyuaneni: “Mɨkɨ memɨkayɨwawe tɨɨri memɨwarexeiyanikɨ, mɨkɨ 'aixɨa mepɨ'itɨarie, mɨkɨ memɨkatiniwewawe mɨkɨ memɨkatetsitsitɨawawe 'aixɨa mepɨ'itɨarie”.
LUK 23:30 'Anari mekanitsutɨakuni: »“Mɨpaɨ meteniwatahɨawikuni hɨrite: ‘Taheima kenanakaxɨri’, yemurite meta mɨpaɨ meteniwatahɨawikuni: ‘Xeketaneuti'awieta’”.
LUK 23:31 Hikɨ mɨpaɨ xɨka mete'uyurieni kɨye yurikaku, ¿ketsɨ tiyɨni tawayu?»
LUK 23:32 Hipatɨta yuhutatɨ mepehapanie 'axateyuruwamete memɨkwi'iwakɨ hepaɨna.
LUK 23:33 Merikɨte kepauka memu'axɨa Mɨki Mu'uya Manuka mɨrakutewatsie, mana kuruxitsie mekanikawieni meta tenawayamete wahamatɨa, tserietana xeime meta 'utatana xeime.
LUK 23:34 Hikɨ Ketsutsi mɨpaɨ kaniutayɨni: —Ne'ukiyari, ketiniwareuyehɨwirieka, 'atsimemɨkatematekɨ kememɨteyurie. 'Ana kuyaxi mekaniyuta'iwa 'ixurikiteya meyutahuritɨanike.
LUK 23:35 Teɨteri mana mekaniti'ukaitɨni metanenieretɨ, 'itsɨkate mekanitawe'eriekaitɨni mɨpaɨ me'utiyuatɨ: —Hipame waniu kaniwatawikweitsitɨwakaitɨni, yɨkɨmana keyutawikweitsitɨani xɨka 'aku Kɨritsitu hɨkɨtɨni Kakaɨyari hetsɨa mieme, kemɨ'ane manayexeiyarie.
LUK 23:36 Meta kuyaxi yaxeikɨa mekaninanaimakaitɨni hurawa me'ukɨneka, matsina mekanixatɨakaitɨni menu'ienikɨ,
LUK 23:37 mɨpaɨ me'utiyuatɨ: —'Ekɨ huriyutsixi tiwa'aitɨwame xɨka pehɨkɨtɨni, keneu'atawikweitsitɨa.
LUK 23:38 Meta mu'uya heima mekaneimani 'utɨarika, mɨpaɨ pɨre'ukai: «'Ikɨ Huriyutsixi Tiwa'aitɨwame Kanihɨkɨtɨni».
LUK 23:39 Hikɨ teyukwikate mana memutiwɨkai xewitɨ 'axakatinikɨhɨawekaitɨni, mɨpaɨ 'utaitɨ: —¿'Ekɨ pekatihɨkɨ Kɨritsitu? Merikɨte, kene'atawikweitsitɨa, meta tame ketaneutawikweitsitɨa.
LUK 23:40 Xewitɨ pɨta tapa mutiwiekai nitatieni mɨpaɨ 'utaitɨ: —¿Kari 'ekɨ Kakaɨyari pepɨkamakaxe tsepa hepaɨna pemɨ'itɨariene yaxeikɨa petiutahɨawarieka?
LUK 23:41 Peru kaniheitserietɨni tahetsie kemɨtiunakixɨ, kemɨreuyewetse xeikɨa tepɨ'itɨarietɨwe yatemɨteyuriekaikɨ. 'Ikɨ matsi tixaɨ 'atsipɨkatiyuriewe.
LUK 23:42 Mɨpaɨ meta kaniutayɨni: —Ketsutsi 'aku, kenena'eriwani kepauka pemunuani ti'aitame pehɨkɨtɨtɨ.
LUK 23:43 Hikɨ Ketsutsi mɨpaɨ katinitahɨawe: —Yurikɨ mɨpaɨ nepɨmarahɨawe, hikɨtɨtɨ nehetsɨa pepeyeikani witsimɨraku'anetsie.
LUK 23:44 Merikɨte tuka kaniukuyɨre yemekɨ naitsarie kwiepa tau kɨa kawiekakuke kaniukuhekɨare.
LUK 23:45 Tau 'uyɨreku 'ixuriki meuwiekai tuki 'amɨpata hixɨata kanitsane.
LUK 23:46 Hikɨ Ketsutsi karima 'utahiwaka mɨpaɨ kaniutayɨni: —Ne'ukiyari, ne'iyari nepɨmatsihɨritɨa. Mɨpaɨ 'utayɨka kaniumɨni.
LUK 23:47 Xeitsienituyari kuyaxi tiwa'aitɨwame 'uniereka kemɨtiuyɨ 'aixɨa kaniutayɨni Kakaɨyari hepaɨtsita, mɨpaɨ 'utaitɨ: —Yurikɨ 'ikɨ tewi heitserie pexeiyakai.
LUK 23:48 Yunaitɨ teɨteri meneniereke memɨyukuxeɨri, me'uneniereka kemɨtiuyɨ, yu'utɨma mekanekɨne yutawitsie meyukuhutsunatɨ hiwerikakɨ.
LUK 23:49 Peru yunaitɨ memimatekai mana mekaniti'ukaitɨni yatewa, meta 'ukari hamatɨana memeyekɨ Karereyatsie, mɨkɨ mana mekaniti'ukaitɨnita menenieretɨ.
LUK 23:50 Merikɨtsɨ tewi 'akaniuyeikakaitɨni Kutse titewatɨ, 'itsɨkate muwanɨ'ɨ kanihɨkɨtɨtɨkaitɨni, 'aixɨa pɨtiuka'iyarikai heitseriemekɨ yapɨtikamiekai, mɨkɨ yapɨkara'eriwakai kememɨteyu'eni kememɨte'uyuri. 'Arimateya kanikiekametɨkaitɨni Kureya kwieyaritsie, yuri katini'eriekaitɨni ta'ikwewatɨ Kakaɨyari mitsutɨanikɨ ti'aitatɨ.
LUK 23:52 Mɨkɨ Piratu hetsɨa nuaka kanitawawirieni Ketsutsi kaxarieya.
LUK 23:53 Hekakweka kanita'eima rinu tsawanayarikɨ, kaneikuteuku teukiyapa 'aitɨa muwaye'inieriekaitsie hakewa tewi hatsuaku mɨkaheutatekiewekaitsie.
LUK 23:54 Merikɨtsɨ pɨpienixitɨkai 'ana, 'uxipiya tukari pɨtsutɨarieximekai.
LUK 23:55 Mekaneiweiya 'ukari Karereyatsie memeyekɨ 'utɨmana, mekanixeiya teukiya, meta kaxarieya mekaniuxeiya kemɨtiutekie.
LUK 23:56 Yu'utɨma mehekɨneka 'aixɨa meniyurieni witsimu'ɨa mixaxi nɨkame 'uaye. Merikɨtsɨ 'uxipiya tukaritsie mekani'uxipiekaitɨni 'aitsika kemaine.
LUK 24:1 Tsemana mexɨakame tukaritsie ximeri kwitɨwa, teukiyapa mekanekɨne 'ukarawetsixi witsimu'ɨa me'ahapatɨ memikuha'aritakai.
LUK 24:2 Hikɨ teté mekaniutaxeiya heuhɨiyakame kitenie meukatei.
LUK 24:3 Meheutahaxɨaka teukiyapa, mepɨka'itaxei Ti'aitame Ketsutsi kaxarieya.
LUK 24:4 'Atsimepɨkatemaikai kememɨteyurienikekai mɨpaɨ mɨtiuyɨkɨ, hikɨ 'ukitsi yuhutatɨ wa'aurie mekaniti'uni merɨkawime me'anakatɨtɨ.
LUK 24:5 Memamatɨ kwiepa mekaniukahɨxima'uni, peru mɨkɨ mɨpaɨ mekateniwarutahɨawe: —¿Titayari mɨkite watsata xete'iwautɨwe mɨkɨ mayeniere?
LUK 24:6 'Uwa pɨkayeka, kananukuketɨarieni. Xekena'eriwani kemɨtixe'utahɨawixɨ Karereyatsie 'uyeikatɨ 'akuxi,
LUK 24:7 kexemɨte'utahɨawarie: “Yuri Tewi hepaɨtsita, kemɨreuyewekai mɨyetuiyanikɨ 'axateyuruwamete memiwiyakɨ, kuruxitsie mɨmierienikɨ, hairieka tukaritsie manukukenikɨ kemɨreuyewekai”.
LUK 24:8 Hikɨ 'ana Ketsutsi niukieya menaye'erieni.
LUK 24:9 Hikɨ teukiyapa mewayekɨneka mekanekɨne, 'ikɨ naime mekateniwarutaxatɨani tamamata heimana xeime, meta hipame yunaime.
LUK 24:10 'Ukari Mariya Mararatanaka, Wana, Mariya Kakuwu mɨwarutsieyatɨkai metenitetewakaitɨni meta hipatɨta wahamatɨa memu'uwakai 'ukari yunaitɨ yamekateniwarutaxatɨani nɨ'ariekate.
LUK 24:11 Peru mɨkɨ yakɨ me'utiyuaneme mekani'eriekaitɨni metekuxatakaku, yuri mepɨkatewaruta'eriri.
LUK 24:12 Perutsɨ Pekuru kaneyani teukiyapa 'unautsarɨmetɨ. 'Anahuka nixeiya 'ixuriki mana 'akateme 'uyemaweme. Yukie kaneyani waɨka 'iyarixietɨ kemɨtiunierixɨ hepaɨtsita.
LUK 24:13 Merikɨtsɨ mɨkɨ tukaritsie yuhutatɨ mɨkɨ huyeta menekɨne, kiekaritsie meneta'axɨanikekaitɨni 'Emahu mɨrakutewatsie, Kerutsareme nehurakaitɨni, yanetewakaitɨni tamamata heimana huta kirumetɨruyari xeikɨa.
LUK 24:14 Metenikuxatakaitɨni naitɨ kemɨtiuyɨ hepaɨtsita.
LUK 24:15 Merikɨtsɨ metekuxatakaku niuki mexɨatɨakaku Ketsutsitɨtɨ niwaranuku'axe me'uhukaku, wahamatɨa niumiekaitɨni,
LUK 24:16 peru mepɨkapitɨariekai memeitimanikɨ.
LUK 24:17 Mɨpaɨ katiniwarutahɨawe: —¿Ketitita 'ikɨ niuki xemɨxɨatɨa xe'uhutɨ, titayari xeteyuhiwerie? Mɨkɨ mana meniti'uni me'ayexɨxɨnitɨ yɨhɨxie,
LUK 24:18 xewitɨ mɨkɨ Kɨreupaxi mɨtitewakai mɨpaɨ katinitahɨawe: —¿Kari 'ekɨ 'atsipepɨkatimate Kerutsareme kemɨreyɨ takai 'atu, 'atsita kɨkamete mɨpaɨ mepɨtemate?
LUK 24:19 'Iya mɨpaɨ katiniwarutahɨawe: —¿Kereyɨkuta? Mɨkɨ mɨpaɨ mekatenitahɨawe: —Ketsutsi Natsaretitanaka, kemɨranayetɨa pekatimate. Mɨkɨ tewi Kakaɨyari hetsiemieme katinixaxatametɨkaitɨni, kemɨtiyurienekai kemɨtikuxatakai, kanitɨrɨkaɨyekaitɨni Kakaɨyari hɨxie yunaime teɨteri wahɨxie.
LUK 24:20 Mawari wewiwamete tewa'aitɨwamete ta'itsɨkate meta mekaniyetuani hetsiena mɨrahɨiyanikɨ mɨmierienikɨ, 'arike kuruxitsie mepeimi.
LUK 24:21 Tametsietɨ tekanita'ikwewakaitɨni yuri tete'erietɨ 'iya mɨhɨkɨtɨkaikɨ kemɨ'ane mɨtatsitixɨnakekai 'ixaheritsixi teɨteriyari. Mɨkɨ meta, haika tukari kaniyuriekari hikɨ, mɨya reyɨku.
LUK 24:22 Matsi meta 'ukari tatsata miemete mepɨtatsi'ɨhɨxiyatsitɨa hikɨ, ximeri waniu menekukɨnixɨani teukiyapa,
LUK 24:23 peru kaxarieya mepɨkahexei. Mekaniu'axɨani mɨpaɨ me'utiyuatɨ kename niuki tuayamete mewarexei meteheinɨme meyu'erietɨ, mɨkɨ waniu kename Ketsutsi 'ayeniere mekateniwaretahɨawe.
LUK 24:24 'Ana hipatɨta tahamatɨa memu'uwa teukiyapa mekanekɨne, 'ukari kememaitɨkatei, mɨpaɨ 'aneme mepetaxei, peru Ketsutsi mepɨkahexei.
LUK 24:25 Hikɨ Ketsutsi mɨpaɨ katiniwarutahɨawe: —Kari 'atsixepɨkatemate, yu'iyaritsie xepu'itutupe, 'akuxi yuri xepɨkateta'eriwawe texaxatamete kememɨtekuxatakaitsie naime.
LUK 24:26 ¿Kareuyewekai Kɨritsitu mɨpaɨ mɨtikwinekɨ, 'arike mɨkake witsi'anetɨ karayanikekai?
LUK 24:27 'Ana Muitsexi xapaya xatatɨ meri yunaime texaxatamete waxapa xatatɨ, kanitsutɨani tiwahekɨatsitɨiyatɨ kemɨre'ukai hepaɨtsitana naime 'utɨarikatsie.
LUK 24:28 Merikɨtsɨ kiekaritsie hakewa memeta'axɨanikekai mekaneta'axɨani, 'iya matsi 'ateewa kaniumiekaitɨni.
LUK 24:29 Mɨkɨ kwinimieme mekani'iniekaitɨni mɨpaɨ me'utiyuatɨ: —Tahamatɨa kene'ahayewa, 'etsiwatɨkaku putaikai pakayunirɨme. Hikɨ muwa kaneutahani wahamatɨa mɨyuhayewakɨ.
LUK 24:30 Hikɨ wahamatɨa 'ayerɨka mexa 'aurie, 'enu'ɨka paa, 'aixɨa kaniutayɨni Kakaɨyari hepaɨtsita paa hepaɨtsita, 'ititaraka kaniwarumini.
LUK 24:31 'Ana wahɨxie katineukuyepiere hikɨ mekaneitimani, peru mɨkɨ kamatsiɨkɨtɨ kanayuyeitɨani tawari mepɨka'ixei.
LUK 24:32 Hikɨ mɨpaɨ mekateniyɨkɨhɨawekaitɨni: —'E'e, 'ayumieme ta'iyaritsie kwini mieme tepɨtayetuakai mexi tatikuxaxatɨwakai huyeta te'uhukaku, mexi tatsihekɨatsitɨiyakai 'utɨarika kemaine.
LUK 24:33 Hikɨ me'anuku'uka kwitɨ, Kerutsareme mekanekɨne yu'utɨma. Tamamata heimana xeime hipameta mekaniwaretaxeiya meyuxeɨriekame.
LUK 24:34 Mɨkɨ mɨpaɨ mekaniutiyuanekaitɨni: «Kaniyuritɨni, Ti'aitame panukuke. Matsiɨkɨtɨ kanayuyeitɨani Tsimuni 'ixeiyakaku».
LUK 24:35 Mɨkɨ meta mekateniwarutaxatɨani huyeta kemɨreyɨ, kememɨteheitima paa 'utitaraku.
LUK 24:36 Merikɨtsɨ metekuxatakaku 'akuxi, 'iya wahixɨata kaniutakeni, mɨpaɨ kaniutayɨni: —'Aixɨa 'aku.
LUK 24:37 Mɨkɨ mekaniutimamani, mɨki mexeiyame meyu'erietɨ.
LUK 24:38 Mɨkɨtsɨ mɨpaɨ katiniwarutahɨawe: —¿Titayari xeteyuxamurie? ¿Titayari xete'itsutɨa niuki xexɨatɨatɨ yu'iyaritsie?
LUK 24:39 Xekeneu'ixɨari nemamate ne'ɨkate, ne nekanihɨkɨtɨni, xekeneneumayɨa xekeneneuxeiya, 'iyari 'ume pɨkahexeiya wai pɨkahexeiya nehapaɨ.
LUK 24:40 Mɨpaɨ 'utayɨka yumamate yɨ'ɨkate kaniwaruxeitsitɨani.
LUK 24:41 Meyutemamawietɨ mehɨxiyatɨ, kayuritɨme mepɨ'eriekai 'akuxi, hikɨ mɨpaɨ katiniwarutahɨawe: —¿Tixaɨ xekatehexeiya 'ena tikwaiwame?
LUK 24:42 Tsaapa waiyari yayeukame mekanimini warikime.
LUK 24:43 'Enu'ɨka kanitakwani wahɨxie.
LUK 24:44 Merikɨtsɨ mɨpaɨ katiniwarutahɨawe: —'Ikɨ niuki nekanixekuxaxatɨwakaitɨni xehamatɨa ne'uyeikatɨ 'akuxi, mɨpaɨ ne'utaitɨ kename heuyewekai maye'atɨarienikɨ naitɨ nehepaɨtsita kemɨre'uxa Muitsexi 'inɨarieya niukiyaritsie, texaxatamete waxapatsie meta kwikari xapayaritsie ne'utaitɨ.
LUK 24:45 'Ana wa'iyari kaniwatiyepieni memeitimanikɨ tita 'utɨarika xapayari mɨtixatakai.
LUK 24:46 Mɨpaɨta katiniwarutahɨawe: —Mɨpaɨ pɨre'uxa, kemɨreuyewekai Kɨritsitu nehɨkɨtɨtɨ mɨya nekatinikwinekekaitɨni, hairieka tukaritsie nekananukukenikekaitɨni mɨkite watsata.
LUK 24:47 Mɨkɨ meta, yunaitɨ nuiwarite mɨpaɨ mekatenitahɨawariekuni, xɨka xete'uhayewa kexemɨteyuriekai, xɨka pɨta xenetsihahɨaweni kemɨ'ane nemɨhɨkɨ, xepɨteheuyehɨwiyarieni 'axaxemɨte'uyurikɨ, Kerutsareme meri, 'ariketa xaɨtsie yakatinikuxaxatsiwamɨkɨ.
LUK 24:48 Xeme xekanihɨkɨtɨni xemunenierixɨ xemihekɨata 'ikɨ kemɨtiuyɨ hepaɨtsita.
LUK 24:49 Ne meta nepɨtixehanɨ'airieni tita ne'ukiyari mɨrainekai mɨtixeminikekaikɨ, xeme kiekaritsie xekeneyuhayewani tukari 'aye'ayuke kepauka tɨrɨkariya xemɨpitɨarieni taheima mieme, 'anake xepayekɨne.
LUK 24:50 Hikɨ kaniwarayewitɨni Wetaniya 'aurie, yumamá teikɨ hetseratɨ kaniutaniuni 'aixɨa memɨ'itɨarienikɨ.
LUK 24:51 Mexi 'utaniukakai wahetsɨa kanayeyani, muyuawitsie kananutiwitɨkieni.
LUK 24:52 Mɨkɨ nenewieri me'ipitɨaka Kerutsareme mekanekɨne kwini mieme meyutemamawietɨ.
LUK 24:53 Tukarikɨ tuki kuraruyarita mekaniu'uwakaitɨni 'aixɨa me'utiyuatɨ Kakaɨyari hepaɨtsita. Mɨpaɨ xeikɨa kani'aneni.
JOH 1:1 Tsutɨapai Niuki kaniyɨanekaitɨni, Niuki Kakaɨyari hetsɨa kaniuyeikakaitɨni, Niukitɨtɨ Kakaɨyari kanihɨkɨtɨkaitɨni.
JOH 1:2 Mɨkɨtɨtɨ niuki tsutɨapai Kakaɨyari hamatɨa kaniuyeikakaitɨni.
JOH 1:3 Naitɨ katiniuneni mɨkɨ 'inetɨaku, xɨka mɨkɨ ka'inetɨanike, pɨkanenikeyu nixewitɨ.
JOH 1:4 Mɨkɨ hetsie tukari kanixuawekaitɨni, tukari teɨteri wahekɨariwiyame kanihɨkɨtɨkaitɨni.
JOH 1:5 Hekɨariya yɨwipa kanihekɨariwieka, yɨriya pɨkahe'iwawe.
JOH 1:6 Merikɨtsɨ tewi Kakaɨyari meiyenɨ'a 'aniuyeikakaitɨni Wani titewatɨ.
JOH 1:7 Mɨkɨ mɨtitahekɨatakɨ, hekɨariya hepaɨtsita, yunaitɨ yuri memɨteta'erienikɨ mɨkɨ tihekɨatakaku.
JOH 1:8 Wani hekɨariya pɨkahɨkɨtɨkai, titahekɨatake hekɨariya hepaɨtsita xeikɨa kaninuani.
JOH 1:9 Tita yurikɨ mɨtihekɨariya, tita mɨtiwahekɨatɨa yunaime teɨteri, mɨkɨ kwiepa kaninuaximekaitɨni.
JOH 1:10 Kwiepa kaniuyeikakaitɨni, kwie kaniuneni mɨkɨ 'inetɨaku, matsi kwiepa memɨtama mepɨkaheitima.
JOH 1:11 Yukie kaninuani, teɨterimama mepɨka'itanaki'eri.
JOH 1:12 Matsi keyupaɨmetɨ memitanaki'eri, mɨkɨ yuri memɨte'erie kemɨ'ane mɨhɨkɨtsie, mɨkɨ heitserie kaniwarupitɨani Kakaɨyari niwemama memakɨnekɨ.
JOH 1:13 Teɨteri kememɨte'ununuiwatsie mepɨkayekɨ, wapaapama meyuhiwe'eriekaku teɨteri kememɨteyurie, mana mepɨkayekɨ, 'uki tɨɨri wawewimɨkɨkaku, mana mepɨkayekɨ, Kakaɨyaritsie pɨta mepɨyekɨ.
JOH 1:14 Mɨkɨ niukitɨtɨ tewi kanayani, tatsata 'ukaitɨ ratɨa. Tame tekanixeiya witsikemɨ'anekai, 'ukiyarieya witsikemɨtipitɨa yuniwe muyuxewi, kanaye'ani 'aixɨa tiuka'iyaritɨ yuri tikuxatatɨ.
JOH 1:15 Wani katinihekɨatakaitɨni hepaɨtsitana, kanahiwakaitɨni mɨpaɨ 'utaitɨ: «'Ikɨ kanihɨkɨtɨni nemikuxatakai mɨpaɨ ne'utaitɨ: “Mɨkɨ ne'utɨa 'umamie kanimariweni ne hepaɨna neka'anekaku meripaitɨ mɨmiemekɨ, ne meripaitɨ nekamiemetɨkaku”».
JOH 1:16 Mɨkɨ tinaime kemɨrexeiya, 'aixɨa tiuka'iyaritɨ teyunaime tame waɨkawa katatiniumini.
JOH 1:17 'Inɨari niukiyari tekaniupitɨarieni Muitsexi tatsi'upitɨaku. Peru matsi tepupitɨarie naki'eriya meta tita yuri mɨraine temɨtehexeiyanikɨ, Ketsutsi Kɨritsitu 'aixɨa tiuka'iyaritɨ yatatiupitɨaku.
JOH 1:18 Xewitɨ hatsuaku pɨka'ixeiyawe Kakaɨyari, Nu'aya muyuxewi, Kakaɨyari mɨhɨkɨ kemɨ'ane yu'ukiyaritsie mɨtiwiya, mɨkɨ katanihekɨatsitɨiyani.
JOH 1:19 'Ikɨ kanihɨkɨtɨni Wani kemɨtiutahekɨataxɨ kepauka huriyutsixi hetsɨana memɨwareyenɨ'a mawari wewiwamete meta rewitsixi Kerutsareme memeyekɨ memita'iwawiyakɨ kemɨ'ane mɨyɨanekai.
JOH 1:20 Mɨkɨ puyutahekɨataxɨ, pɨkayuku'imawakai, matsi puyutahekɨataxɨ mɨpaɨ 'utaitɨ: —Neri Kɨritsitu nepɨkahɨkɨ.
JOH 1:21 Hikɨ mɨpaɨ mekatenita'iwawiya: —¿Kamɨtsɨ kemɨ'ane pepɨyɨane? ¿Kamɨtsɨ 'Eriyaxi petiyɨane? Mɨkɨ mɨpaɨ kaniutayɨni: —Ne mɨkɨ nepɨkahɨkɨ. —¿Kakaɨyari niukameya petiyɨane? Mɨkɨ tiwaruta'ei: —Hawaikɨ.
JOH 1:22 Mɨkɨ 'ayumieme mɨpaɨ mekatenitahɨawe: —¿Kamɨtsɨ kepaikɨ pepɨyɨane? Xatsunikɨ yatemɨtewaretahɨawekɨ mɨkɨ memɨtatsiheyenɨ'a. ¿Kepetayɨni 'ahepaɨtsita?
JOH 1:23 Mɨkɨ mɨpaɨ kaniutayɨni, Kitsariyaxi Kakaɨyari niukameya kemutayɨ hepaɨ: —Netsɨ nekanihɨkɨtɨni kemɨ'ane mahiwa makumawetsie: “Xeuraɨyeme xekeneutawewi Ti'aitame huyeya”.
JOH 1:24 Mɨkɨ memeyenɨ'arie paritseutsixi wahetsɨa mekanimiemetetɨkaitɨni.
JOH 1:25 Hikɨ mɨkɨ mɨpaɨ mekatenita'iwawiya: —Merikɨte, xɨka Kɨritsitu pekahɨkɨtɨni, xɨka 'Eriyaxi pekahɨkɨtɨni, xɨka Kakaɨyari niukameya pekahɨkɨtɨni, ¿titayari peti'ɨyane?
JOH 1:26 Wani mɨpaɨ katiniwarutahɨawe: —Neri nekatini'ɨyaneni hakɨ, peru xetsata 'akaniuweni xewitɨ, xemɨka'imate xeme,
JOH 1:27 mɨkɨ ne'utɨma 'ukanamieniri, ne 'aixɨa nepɨkatiuka'iyari nehetsie mɨtinakenikɨ yatɨni nemixɨnirienikɨ kakaiya kwitaxiyari.
JOH 1:28 Mɨpaɨ katiniuyɨni Wetaniyatsie Kurutani hatuxame 'anutaɨye, mana katini'ɨyanekaitɨni Wani.
JOH 1:29 Merikɨtsɨ 'uxa'arieka Wani kanixeiya Ketsutsi 'a'amiekame hepana, mɨpaɨ kaniutayɨni: «Kamɨ muxa nunutsi Kakaɨyari hetsɨa mieme, kwiepa memɨtama tita 'axamemɨteyurie kaniwakunawairiwani mɨkɨ.
JOH 1:30 Mɨkɨ kanihɨkɨtɨni kemɨ'ane hepaɨtsita mɨpaɨ nemainekai: “Xewitɨ tewi ne'utɨma 'ukanamieni kanimariweni ne hepaɨna neka'anekaku meripaitɨ mɨmiemekɨ, ne meripaitɨ nekamiemetɨkaku”.
JOH 1:31 Netsɨari nepɨkaheitimaitɨyeikakai, peru mɨmatsiɨkɨnikɨ 'ixaheritsixi wahɨxie, 'ayumieme nekaninuani hakɨ netiuka'ɨyatɨ».
JOH 1:32 Hikɨ Wani katiniutahekɨata mɨpaɨ 'utaitɨ: «Ne nekanixeiya 'Iyari taheima 'akamieme kukuru 'amakamieni hepaɨ tiyuxexeiyame meta hetsiena kaniyuhayewa.
JOH 1:33 Ne nepɨka'imatekai 'akuxi, matsi kemɨ'ane mɨnetsiheyenɨ'a nemɨtiuka'ɨyanikɨ hakɨ, mɨkɨtɨtɨ mɨpaɨ pɨnetiutahɨawixɨ: “Kemɨ'ane heima pemixeiya 'Iyari 'a'akamieme hetsiena yuhayewame, mɨkɨ kanihɨkɨtɨni kemɨ'ane mɨtiuka'ɨya 'Iyari Mɨtiyupata rapitɨatɨ”.
JOH 1:34 Netsɨ nekaniuniere, nekatiniutahekɨata 'ikɨ Kakaɨyari Nu'aya kanihɨkɨtɨni».
JOH 1:35 Hikɨ 'uxa'arieka tawarita mana kaniutiwekaitɨni Wani, teyɨ'ɨkitɨwametemama yuhutatɨ mana meteti'ukaita.
JOH 1:36 'Ixeiyaka Ketsutsi mana 'uyemiekaku, mɨpaɨ kaniutayɨni: —Kamɨ muxa nunutsi Kakaɨyari hetsɨa mieme.
JOH 1:37 Yuhutatɨ teyɨ'ɨkitɨwametemama me'i'enieka mɨpaɨ haineme, Ketsutsi mekaneweiya.
JOH 1:38 Hikɨ Ketsutsi ta'aurie 'aweka, waruxeiyaka 'utɨana me'uhukaku, mɨpaɨ katiniwarutahɨawe: —¿Tita xetekuwautɨwe? Mɨkɨ mɨpaɨ mekatenitahɨawe: —¿Xawi, hakewa pepeka? (Xawi taniukikɨ Ti'ɨkitame panuyɨne).
JOH 1:39 Mɨkɨ mɨpaɨ katiniwarutahɨawe: —Xekenakɨni xepɨneniere. Hikɨ mana mekaniu'axɨani, mekaniuneniere hakewa mekatei. Mɨkɨ tukaritsie hamatɨana mekaniuyuhayewa, memenuweiyakɨ tau kɨa heuwiekaku.
JOH 1:40 Merikɨtsɨ yuhutatɨ memu'enana Wani kemainekai, Ketsutsi memewei, xewitɨ 'Atɨrexi katinitewakaitɨni Tsimuni Pekuru mɨ'iwayatɨkai.
JOH 1:41 'Atɨrexi yu'iwa Tsimuni kanetaxeiya meri, mɨpaɨ katinitahɨawe: —Tekaneitaxeiya Metsiyaxi (taniukikɨ Kɨritsitu heitserie mupitɨarie maine).
JOH 1:42 Ketsutsi hetsɨa kaneiwitɨni, Ketsutsi 'ixeiyaka mɨpaɨ kaniutayɨni: —'Ekɨ Tsimuni pekanihɨkɨtɨni, Wani pemɨnu'aya. Tsepaxi pepɨtiterɨwarieni (taniukikɨ Pekuru Tete manuyɨne).
JOH 1:43 Hikɨ Ketsutsi 'uxa'arieka Karereya paitɨ kaniyeimɨkɨkaitɨni. Kanitaxeiya Peripe, mɨpaɨ katinitahɨawe: —Kenenanuweiya.
JOH 1:44 Peripe Wetsaira kanikiekametɨkaitɨni 'Atɨrexi meta Pekuru wakiekaritsie.
JOH 1:45 Hikɨ Peripe Natanaheri hetaxeiyaka, mɨpaɨ katinitahɨawe: —Kemɨ'ane xatatɨ Muitsexi mɨtiuta'utɨa 'inɨari niukiyaritsie, meta Kakaɨyari niukametemama memɨte'uti'utɨa me'ixatatɨ, mɨkɨ tekanetaxeiya, Ketsutsi kanihɨkɨtɨni Kutse nu'aya natsaretitanaka.
JOH 1:46 Natanaheri mɨpaɨ katinitahɨawe: —¿Ketiyɨwe Natsareti hetsie 'aixɨa ti'anetɨ mɨrayeneni? Peripe mɨpaɨ katinitahɨawe: —Patsɨ kenenierimie.
JOH 1:47 Kepauka Ketsutsi Natanaheri muxei 'a'amiekame hetsɨana, mɨpaɨ kaniutayɨni hepaɨtsitana: —Kamɨ, 'ikɨ yurikɨ 'ixaheri tewiyari kanihɨkɨtɨni, hetsiena 'irɨmari pumawe.
JOH 1:48 Natanaheri mɨpaɨ katinitahɨawe: —¿Hakewa pepɨnetsihetima 'ekɨ? Ketsutsi mɨpaɨ katinitahɨawe: —Peripe kamatitaxatɨawekaku 'akuxi, kepauka pini hetɨa pe'ukaiku, 'ana nepɨmatsi'uxei.
JOH 1:49 Natanaheri mɨpaɨ katinita'eiya: —Ti'ɨkitame, 'ekɨ Kakaɨyari pekaninu'ayatɨni, 'ixaheritsixi tati'aitɨwame pekanihɨkɨtɨni.
JOH 1:50 Ketsutsi mɨpaɨ katinitahɨawe: —¿Pini hetɨa pe'ukaime nepɨmetsi'uxei, nemutayɨkɨ yuri pepɨtiuta'eri? 'Ipaɨ 'aneneme matsi waɨkawa mamariwaweme pekatinixeiyamɨkɨ. Mɨpaɨta katinitahɨawe:
JOH 1:51 —Yurikɨ mɨpaɨ nekanaineni, xekanixeiyakuni muyuawitsie reuyepiyakame, Niuki tuayamete Kakaɨyari hetsɨa miemete xetewaxeiyata me'anutikɨkame meta me'anakakɨkame Yuri Tewi hetsie.
JOH 2:1 Merikɨtsɨ hairieka tukari 'aye'aku mekaneitineɨkitɨani xeime, mɨkɨ 'ixɨarari mepewewiekai Kanaha kiekariyaritsie Karereya kwieyaritsie, Ketsutsi maamaya mana kaniuyeikakaitɨni.
JOH 2:2 Ketsutsi neɨkiyapa kaniuta'inierieni, teyɨ'ɨkitɨwamete meta mete'uta'inierie.
JOH 2:3 Hikɨ kaxie winuyari 'uyexɨxɨaku Ketsutsi maamaya mɨpaɨ katinitahɨawe: —Kaxie winuyari mepɨkahexeiyari.
JOH 2:4 Ketsutsi mɨpaɨ katinitahɨawe: —Nemaama, ¿ketita mɨkɨkɨ tetehexeiya? Netukari 'akuxi pɨka'aye'awe.
JOH 2:5 Hikɨ maamaya mɨpaɨ katiniwarutahɨawe teparewiwamete: —Mɨkɨ kemɨtixetahɨawe yaxeketenekahuni.
JOH 2:6 Merikɨtsɨ mana pɨtitekai tete ye'ɨrɨteyarite 'ataxewi paɨmetɨ huriyutsixi memukamaimawa memɨ'itiyanikɨ. Xexuimetsie katinakananakekaitɨni nauka tewiyari yatɨni xeitsienituyari rituruyari.
JOH 2:7 Hikɨ Ketsutsi mɨpaɨ katiniwarutahɨawe: —Haa xekeneutihɨniya tete ye'ɨrɨteyariteta. Hikɨ kɨtsitana paitɨ mekanitihɨniya.
JOH 2:8 Mɨpaɨta katiniwarutahɨawe Ketsutsi: —Hikɨtari xekeniwatihapani, 'ixɨarari mɨhɨritɨarie hetsɨa xekenanuhapani. Hikɨ mɨkɨ mekaneihapanirieni.
JOH 2:9 Mɨhɨritɨarie kepauka menuti'inɨataxɨ haa kaxie winuyari matɨa, 'atsikatimaitɨ hakewa memiemetɨkai, tsepa teparewiwamete yamemɨtemaikai haa memɨwatihanakaikɨri, 'ixɨarari mɨhɨritɨariekai neneɨkeme kaniutahɨawe.
JOH 2:10 Mɨpaɨ katinitahɨawe: —Yunaitɨ teɨteri kaxie winuyari 'aixɨa ma'ane mekaniwa'itɨaka meri, kepauka memɨtitarɨweni 'axamɨ'ane 'ana mepɨwa'itɨa. 'Ekɨtsɨ pɨta pekanitikwerieni kaxie winuyari 'aixɨa ma'ane hikɨkeri temenu'ienikɨ.
JOH 2:11 'Ipaɨ matɨari katiniuyurieni Ketsutsi Kanahatsie Karereya kwieyaritsie 'itsutɨatɨ 'inɨari kemɨtiyurienekai. Matsiɨkɨtɨ kanayuyeitɨani kemɨtimariwekai, teyɨ'ɨkitɨwamete yuri mekateniuta'erieni hetsiena.
JOH 2:12 Merikɨtsɨ 'arikeke Kaperunaume mɨkɨ kaneuyeyune, maamaya, 'iwamama, meta teyɨ'ɨkitɨwametemama, mana mɨixa mepɨka'uyuri.
JOH 2:13 Merikɨtsɨ huriyutsixi wa'ixɨarari Patsikwa mɨtitewa kanahurakaitɨni, Ketsutsi Kerutsareme kaneutiyune.
JOH 2:14 Mana tuki kuraruyarita kaniwaretaxeiya tuurutsixi memɨwatuakai, muxatsi, kukuruxi meta tumini patamete tiwaretaxei muwa me'ayeteme.
JOH 2:15 Kaunari tiyuwayame 'utawewieka tuki kuraruyarita meyunaime kaniwaranuyeweiya, muxatsi meta tuurutsixi wahamatɨa. Tumini patamete watumini kananakaxɨrieni, wamexate kanatixɨriexɨani.
JOH 2:16 Kukuruxi memɨwatuakai mɨpaɨ katiniwarutahɨawe: —'Ikɨ xekenanuye'ɨi takwa paitɨ. Ne'ukiyari kiiya tetuayamete wakii xepɨka'ayeitɨwani.
JOH 2:17 Teyɨ'ɨkitɨwamete mekaneye'erieni niuki mɨpaɨ mɨre'uxa: «'Akii nemɨkweriekɨ netaɨta nepɨtaxɨtsitɨariexime».
JOH 2:18 Hikɨ huriyutsixi mɨpaɨ mekatenita'eiya: —¿Ketita 'inɨariyari petatixeiyatsitɨani mɨyapemɨtiyurienekɨ?
JOH 2:19 Ketsutsi mɨpaɨ katiniwaruta'eiya: —'Ikɨ tuki xekeneuka'una, ne hairieka tukari 'anukayayu nekanenukuketɨamɨkɨ hutarieka.
JOH 2:20 'Ayumieme huriyutsixi mɨpaɨ mekaniutiyuani: —'Ikɨ tuki wewiyanetɨ huta tewiyari heimana 'ataxewime wiyari mekaniuyurieni. 'Ekɨri haika tukari perenukuketɨani.
JOH 2:21 Matsi mɨkɨ yuwaiyari kanixatakaitɨni tukitɨme.
JOH 2:22 Kepaukari mɨkite watsata manukuketɨarie, teyɨ'ɨkitɨwametemama mekane'eriwakaitɨni mɨpaɨ mutayɨkɨ. 'Ana 'utɨarika yuri mekateniuta'eririeni, meta Ketsutsi niukieya yuri mete'uta'eriri.
JOH 2:23 Merikɨtsɨ Kerutsareme 'uyeikakaku Patsikwa 'ixɨararipa, yumɨiretɨ yuri mekateniuta'erieni hetsiena me'ixeiyaka 'inɨarite mɨkɨ kemɨtiyurienekai.
JOH 2:24 Matsi Ketsutsi yuri pɨkatiwa'eririekai, mɨkɨ yunaime mɨwamaikaikɨ,
JOH 2:25 xewitɨ tewi hepaɨtsita mɨtitahekɨatɨanikɨ pɨkaheuyehɨakai, mɨkɨ yɨkɨmana mɨtimaikaikɨ tita tewi 'iyarieyatsie mɨtiyeka.
JOH 3:1 Merikɨtsɨ tewi 'aniuyeikakaitɨni paritseu mɨhɨkɨtɨkai Nikuremu titewatɨ, huriyutsixi tiwa'aitɨwamete mɨhɨkɨtɨkai.
JOH 3:2 Mɨkɨ Ketsutsi hetsɨa kaninuani yɨwikɨta, mɨpaɨ katinitahɨawe: —Ti'ɨkitame, tame mɨpaɨ tekatenimaika, 'ekɨ Kakaɨyari hetsɨa pemiemetɨtɨ pemunuakɨ peti'ɨkitametɨtɨ, xewitɨ pɨkayɨwe 'ikɨ 'inɨarite mɨtiwewienikɨ kepemɨtiyuriene hepaɨ xɨka Kakaɨyari hamatɨana ka'uyeikanike.
JOH 3:3 Ketsutsi mɨpaɨ katinita'eiya: —Yurikɨ mɨpaɨ nekanaineni, xɨka hutarieka ka'utinuiwa tewi, pɨkayɨwe mixeiya tita Kakaɨyari mɨra'aita.
JOH 3:4 Nikuremu mɨpaɨ katinitahɨawe: —¿Tewi kehepaɨ tiyɨwe mutinuiwakɨ 'ukiratsitɨtɨri? ¿Tiyɨwe hutarieka yumaama hetsie meutahani mutinuiwakɨ?
JOH 3:5 Ketsutsi mɨpaɨ katinita'eiya: —Yurikɨ mɨpaɨ nekanaineni, hatsie meta 'iyaritsie xɨka ka'utinuiwa, pɨkayɨwe meutahani Kakaɨyari mɨra'aitatsie.
JOH 3:6 Tita tewitsie mɨtiyenuiwa kanitewitɨni, tita 'iyaritsie mɨtiyenuiwa kani'iyaritɨni.
JOH 3:7 Pepɨkahɨxiyaka mɨyanemetikɨhɨawekɨ: “Peuyewetse xeme hutarieka xemɨtinunuiwa”.
JOH 3:8 Kemɨtinake kaniu'ekani, pekani'enieka yuariyaya, perutsɨ 'atsipepɨkatimate kemɨraneika meta kemɨreumie. Mɨpaɨ mekani'aneneni yunaitɨ 'iyaritsie memɨyenunuiwa.
JOH 3:9 Nikuremu mɨpaɨ katinita'eiya: —¿Ketiyɨwe kuta mɨpaɨ mɨtiyɨnikɨ?
JOH 3:10 Ketsutsi mɨpaɨ katinita'eiya: —'Ekɨ 'ixaheritsixi pekatiniwa'ɨkitɨwametɨni, ¿kari 'ikɨ pepɨkatimate?
JOH 3:11 Yurikɨ mɨpaɨ nekanaineni, tekatenikuxatani tita temɨtemate hepaɨtsita, tekatenihekɨatani tita temɨte'uxei hepaɨtsita. Xemetsɨ xepɨka'inaki'erie tita temɨtehekɨata.
JOH 3:12 Xɨka yuri xekate'erieka tita kwiepa mɨtimieme netixekuxaxatɨwakaku, ¿kehepaɨ yuri xepɨte'uta'eriwawe xɨka netixekuxaxatɨwani tita taheima mɨtimiemekɨ?
JOH 3:13 Xewitɨ taheima pɨka'anutiyeiwe, mɨkɨ taheima makane Yuri Tewitɨtɨ xeikɨa pemarie.
JOH 3:14 »Muitsexi makumawetsie 'uyeikatɨ kuu muyete hepaɨ, mɨpaɨrita kaneuyewekani Yuri Tewi muyetekienikɨ
JOH 3:15 yunaitɨ yuri memɨte'erie hetsiena tukari mɨkaxɨwe memexeiyanikɨ.
JOH 3:16 »Kakaɨyari 'ipaɨ katiniwanaki'erieka kwiepa memɨtama. Yuniwe muyuxewi kaniyetuani memɨkatatɨmaiyarienikɨ, yunaitɨ yuri memɨte'erie hetsiena, tukari mɨkaxɨwe memexeiyanikɨ pɨta.
JOH 3:17 Kakaɨyari kwiepa kemɨreiyenɨ'a yuniwe, mɨpaɨ pɨkatiuyuri mɨwaranutaxɨrienikɨ kwiepa memɨtama. Matsi kwiepa memɨtama memɨtawikweitsitɨarienikɨ kɨmana, 'ayumieme pɨta kaneiyenɨ'ani.
JOH 3:18 Kemɨ'ane yuri mɨti'erie hetsiena, pɨka'anutahɨiyani. Kemɨ'ane yuri mɨkati'erie 'ari kananutahɨiyaniri, yuri mɨkatita'eriwekɨ kemɨ'ane Kakaɨyari Nu'aya muyuxewi mɨhɨkɨtsie.
JOH 3:19 'Ipaɨ katiniwaranutaxɨrɨwani 'itsɨkame: Hekɨariya kwiepa kaninuaniri, teɨteri yɨriya mekaninaki'eriekaitɨni, hekɨariya mekanaki'erietɨ, 'axamemɨteyuriekaikɨ.
JOH 3:20 Yunaitɨ 'axamemɨteyurie mekani'uxieka hekɨariya, hekɨaripa mepɨkakɨniku kapa me'utahekɨatsienikɨ kememɨteyurie.
JOH 3:21 Kemɨ'ane yamɨtiyuriene tita yuri mɨrainetsie, hekɨaripa paye'axe mɨmatsiɨkɨnikɨ kemɨtiyuriene Kakaɨyari hetsie tiwiyatɨ».
JOH 3:22 Merikɨtsɨ mɨpaɨ tiuyɨku Ketsutsi meta teyɨ'ɨkitɨwametemama mekanekɨne Kureya kwieyaritsie. Mana wahamatɨa 'ekatineutere ti'ɨyanetɨ.
JOH 3:23 Wani meta katini'ɨyanekaitɨni 'Enunitsie Tsarimi 'aurie, haa mana waɨkawa muhanekaikɨ. Mekaniu'axekaitɨni mekaniuka'ɨyarɨwakaitɨni.
JOH 3:24 (Wani katsariyanata pɨka'anutahɨiyawekai 'akuxi).
JOH 3:25 'Ayumieme Wani hetsɨa miemete teyɨ'ɨkitɨwamete hipatɨ huriyutsixi wahamatɨa niuki mekanixɨatɨakaitɨni 'itiya hepaɨtsita.
JOH 3:26 Wani hetsɨa me'u'axɨaka mɨpaɨ mekatenitahɨawe: —Ti'ɨkitame, 'iya 'ahamatɨa meyeikakai hatuxame Kurutani 'anutaɨye, kemɨ'ane hepaɨtsita pemɨtihekɨatakai, katine'ɨyaneni hikɨ, meta yunaitɨ hetsɨana mekani'axeni.
JOH 3:27 Wani mɨpaɨ katiniwarutahɨawe: —Tewi pɨkayɨwe tixaɨtɨ mɨtiutanaki'erieni, xɨka taheima miemekɨ yatipitɨarieka xeikɨa pɨyɨwe.
JOH 3:28 Xemetɨtɨ xekatenihekɨatani nehepaɨtsita kenemainekai: “Ne Kɨritsitu nepɨkahɨkɨ, matsi hɨxiena nemetanɨ'arie nepɨhɨkɨ”.
JOH 3:29 Kemɨ'ane 'uka wikiwame yuhetsiemieme mexeiya, 'uki neneɨkeme kanihɨkɨtɨni. Neneɨkeme teɨtameya 'auriena mutiwe mi'enie, mɨkɨ kaniyutemawieka neneɨkeme 'enietɨ. 'Ayumieme 'ikɨ netemawierika kanaye'aniri.
JOH 3:30 Kaneuyeweka mɨkɨ mariwatɨ mayeiximenikɨ, ne pɨta nekamariwatɨ nemayanikɨ.
JOH 3:31 »Kemɨ'ane taheima makane kanimariweni, kemɨ'ane kwiepa mutine kwiepa kanimiemetɨni, katinikuxatani tita kwiepa mɨtimieme. Kemɨ'ane muyuawitsie makane kanimariweni.
JOH 3:32 Tita mɨtiuxei, tita mɨtiu'eni, mɨkɨ hepaɨtsita katinihekɨatani. Xewitɨ pɨka'itanaki'eri tita mɨtiutahekɨataxɨ.
JOH 3:33 Kemɨ'ane mitanaki'eri tita mɨtiutahekɨataxɨ, mɨkɨri matsiɨkɨme kanayeitɨani mɨpaɨ 'utaitɨ Kakaɨyari yuri mainekɨ.
JOH 3:34 Kemɨ'ane Kakaɨyari meiyenɨ'a, mɨkɨ Kakaɨyari niukieyakɨ katinikuxatani, Kakaɨyari kanipitɨani yu'iyari, kemɨreupaɨme kati'inɨatatɨ.
JOH 3:35 'Ukiyarieya yuniwe kaninaki'erieka, naime katiniyetuirieni mamayatsie.
JOH 3:36 Kemɨ'ane nu'ayatsie yuri mɨti'erie tukari mɨkaxɨwe kanexeiyani, kemɨ'ane yamɨkatikamie nu'aya kemaine, pɨkaheitimani tukari, matsi Kakaɨyari 'ihekakaku pɨyuhayewa».
JOH 4:1 Merikɨtsɨ Ti'aitame katiniutamarieni paritseutsixi memu'enanakɨ kename Ketsutsi yumɨireme teyɨ'ɨkitɨwamete warayeitɨwakai meta wa'ɨyanekai, Wani yakɨ meyɨpaɨmeme xeikɨa wa'ɨyanekaku.
JOH 4:2 (Ketsutsi yɨkɨmana pɨkawaruka'ɨyakai, teyɨ'ɨkitɨwametemama pɨta mepɨwaruka'ɨyakai).
JOH 4:3 Mɨpaɨ tiumarieka Kureya kanayeyani, hutarieka Karereya kaninuani.
JOH 4:4 Kaneuyewekaitɨni Tsamariya kwieyaritsie meutayunekɨ.
JOH 4:5 Hikɨ kiekaritsie kaninuani Tsamariya kwieyaritsie Tsikari mɨtiuyetewatsie, mana kanehurakaitɨni kwie Kakuwu yuniwe Kutse mɨyetuiritsie.
JOH 4:6 Putsu Kakuwu mɨwati'inixɨ mana kanitinierekaitɨni. Merikɨtsɨ Ketsutsi 'uxetɨ yeiyakɨ mana kanayerɨni putsu 'aurie tuka. Tuka 'ayeiximekaku.
JOH 4:7 Teyɨ'ɨkitɨwametemama kiekari hixɨapa mekane'uwakaitɨni 'ikwai meheunanaiyuka. Merikɨtsɨ 'ukaratsi mana kaninuani Tsamariya kiekame kuhanɨnetɨ, hikɨ Ketsutsi mɨpaɨ katinitahɨawe: —'Etsiwa keneneuharitɨa.
JOH 4:9 Huriyutsixi tsamariyatari wahamatɨa 'aixɨa memɨkateyuxeiyakaikɨ. 'Ayumieme 'ukaratsi tsamariyatanaka mɨpaɨ katinitahɨawe: —¿Kehepaɨtɨtɨri 'ekɨ pehuriyutɨtɨ, neta 'ukaratsi nemɨtsamariyatanaka, haa pepɨnetsiwawirie?
JOH 4:10 Hikɨ Ketsutsi mɨpaɨ katinita'eiya: —Xɨka pe'imatenike tita Kakaɨyari mɨtiyumikwa, meta xɨka pe'imaikake kepaikɨ haa mɨmetsiwawirie, 'ekɨtsɨ pɨta pepɨnetsitawawirienikeyu, nepɨmatsiharitɨanikeyu haa muhanetsie mieme.
JOH 4:11 'Ukaratsi mɨpaɨ katinitahɨawe: —Neuxei, hanɨweme pepɨkahexeiya, putsu 'apeukatewa, ¿hakewa pepeixeiya mɨkɨ haa tukari mɨtiyupitɨwa?
JOH 4:12 Tapaapa Kakuwu kanimariwekaitɨni 'ikɨ putsu mɨtatsi'umi, 'ena kanitiharewekaitɨni mɨkɨ meta niwemama meta tewamama. ¿'Ekɨ matsi kepetimariwe keyuri mɨkɨ?
JOH 4:13 Ketsutsi mɨpaɨ katinita'eiya: —Yunaitɨ 'ikɨ haa memɨtihareni tawarita mepeuharikuni,
JOH 4:14 peru kemɨ'ane manuhareni ne ne'iharitɨayu tawariri hatsuaku pɨkaheuharimɨkɨni, matsi mɨkɨ haa nemiharitɨani, mɨkɨ haixa kanayeimɨkɨ hetsiena 'atineikatɨ tukari mɨkaxɨwe 'ipitɨatɨ.
JOH 4:15 'Ukaratsi mɨpaɨ katinitahɨawe: —Ti'aitame, mɨkɨ haa keneneuharitɨa tawari nemɨkaheuharimɨkɨnikɨ, 'uwa paitɨ nemɨkahanɨnenikɨ.
JOH 4:16 Ketsutsi mɨpaɨ katinitahɨawe: —Merikɨte, 'akɨna kene'inimie, 'ena xekenakɨni.
JOH 4:17 'Ukaratsi mɨpaɨ katinita'eiya: —Nepɨkarekakɨna. Ketsutsi mɨpaɨ katinitahɨawe: —Herite, 'aixɨa pekanaineni nepɨkarekakɨna pemaine.
JOH 4:18 Yu'auxɨwime pepɨwarexeiyakai 'akɨnama. Mɨkɨ meta, hikɨ pemeixeiya, mɨkɨ pɨka'akɨna. 'Ayumieme yurikɨ peputaine.
JOH 4:19 'Ukaratsi mɨpaɨ katinitahɨawe: —Ti'aitame, nekamenetimaniri 'ekɨ Kakaɨyari niukameya pekanihɨkɨtɨni.
JOH 4:20 Tame tatutsima 'ikɨ yemuritsie mekaniyutinenewiwakaitɨni. Peru xeme huriyutsixi xekaniutiyuaneni kename heuyewetse Kerutsareme temuyutinenewiwanikɨ.
JOH 4:21 Ketsutsi mɨpaɨ katinita'eiya: —Neuxei 'ukaratsi, yuri kenetine'eririeka, tukari kanaye'amɨkɨ kepaukari nenewieri xemɨka'ipitɨaka yu'ukiyari 'ikɨ yemuritsie meta Kerutsareme.
JOH 4:22 Xeme nenewieri xepipitɨa kemɨ'ane xemɨkamate. Tame pɨta nenewieri tekanipitɨaka kemɨ'ane temɨmate, wikweitsitɨarika mayeneikakɨ huriyutsixi tahetsie.
JOH 4:23 Matsi tukari kanaye'amɨkɨ, hikɨ kanaye'aniri, kepauka mɨkɨ yurikɨ memɨyutinenewiwa nenewieri memipitɨani yu'ukiyari yu'iyarikɨ yuri me'utiyuatɨ. Mɨkɨ meta, ne'ukiyari mɨya me'aneneme kaniwakuwauneni nenewieri memipitɨanikɨ.
JOH 4:24 Kakaɨyari kani'iyaritɨni, kaneuyeweka mɨkɨ nenewieri memipitɨa yu'iyarikɨ memipitɨanikɨ yuri me'utiyuatɨ.
JOH 4:25 'Ukaratsi mɨpaɨ katinitahɨawe: —Ne nekatinimaika kename 'uhamie Metsiyaxi, Kɨritsitu mɨtitewa. Kepauka mɨkɨ munuani, naime katatinitahekɨatɨamɨkɨ.
JOH 4:26 Ketsutsi mɨpaɨ katinita'eiya: —Netsɨ nekanihɨkɨtɨni 'ahamatɨa nemɨtikuxata.
JOH 4:27 Hikɨ teyɨ'ɨkitɨwamete mekaniu'axɨani, mekaniuhɨxiyani 'ukaratsi hamatɨa mɨtikuxatakaikɨ. Nixewitɨ mɨpaɨ pɨkatitahɨawixɨ: «¿Ketitakɨ petiku'iwawiya?» yatɨni «¿Ketitakɨ petikuxata hamatɨana?»
JOH 4:28 Hikɨ 'ukaratsi yuye'ɨ 'uku'eirieka kiekaritsie kaneyani, teɨteri mɨpaɨ katiniwaretahɨawe:
JOH 4:29 —Xekenakɨni xekenexeiyayu tewi mɨneretahekɨatɨa naime kenemɨtiuyuri. ¿Katikɨritsitu 'ikɨ?
JOH 4:30 Teɨteri kiekaritsie mekanayekɨne, hepana mekanahukaitɨni.
JOH 4:31 Merikɨtsɨ mexi 'ame'ahukai, teyɨ'ɨkitɨwamete mekanita'inieni mɨpaɨ me'utiyuatɨ: —Ti'ɨkitame, ketineukwakari.
JOH 4:32 Ketsutsi mɨpaɨ katiniwarutahɨawe: —Ne 'ikwai nekanexeiyani xemɨka'imate xeme.
JOH 4:33 'Ayumieme mɨpaɨ mekateniyɨkɨhɨawekaitɨni teyɨ'ɨkitɨwamete: «Xewitɨ kati'atɨiri katiukwairi».
JOH 4:34 Ketsutsi mɨpaɨ katiniwarutahɨawe: —Kenemɨtikamie tita mɨtinake 'iya mɨnetsiheyenɨ'a, 'uximayatsikaya kenemɨtinɨxime, mɨkɨ kanine'ikwaitɨni.
JOH 4:35 ¿Xeme mɨpaɨ xekate'utiyuane: “Nauka metseri tixɨyu 'itsanaxa kanaye'amɨkɨ”? Kamɨ mɨpaɨ nepɨtixekɨhɨawe: Xekeneutanierixɨa, waxa xekeneuxeiya. Kaniwawakiniri xemɨka'itsanakɨ.
JOH 4:36 Hikɨ 'itsaname katini'iwaneniri, kanikuxeɨrieni tita mɨtiutixuawerixɨ, tukari mɨkaxɨwe memexeiyanikɨ, 'etsame 'itsaname hamatɨa yaxeikɨa memɨyutemamawiekakɨ.
JOH 4:37 'Ikɨ hepaɨtsita niuki yuri paine: “Xewitɨ kani'etsametɨni, xewitɨta ti'itsaname”.
JOH 4:38 Ne nepɨxeheutanɨ'axɨa xemɨka'itsanakɨ xemɨkateha'uximayakaitsie. Hipatɨ mekateni'uximayakaitɨni. Wa'uximayatsika xehetsie katiniunake.
JOH 4:39 Merikɨtsɨ yumɨiretɨ mana kiekatari Tsamariyatari yuri mekateniuta'erieni hetsiena 'ukaratsi tiutahekɨataku yuniukikɨ mɨpaɨ 'utaitɨ: «Naime kenemɨtiuyuri kanetiniutahekɨatɨani».
JOH 4:40 'Ayumieme Tsamariyatari hetsɨana me'u'axɨaka mekanita'inieni wahetsɨa muyuhayewakɨ. Mana huta tukari kaniyuhayewa.
JOH 4:41 Hipatɨta yumɨiretɨ yuri mekateniuta'erieni niukieyakɨ.
JOH 4:42 Mɨpaɨ 'ukaratsi mekateniutahɨawe: —Hikɨrixɨa 'aniukikɨ xeikɨa yuri tepɨkate'erie, tameri tekani'enieni, tekatenimaika 'ikɨ yurikɨ kwiepa memɨtama wawikweitsitɨwame mɨhɨkɨkɨ.
JOH 4:43 Merikɨtsɨ huta tukari 'anukayaku mana kaniyeyani, Karereya kaninuani.
JOH 4:44 (Ketsutsi yɨkɨmana katiniutahekɨata kename nixewitɨ Kakaɨyari niukameya yukwiepa 'aixɨa katixeiyarie).
JOH 4:45 Peru kepauka Karereya munua Karereyatari mekanitanaki'erieni naime mete'uxeiyaka kemɨreyurienekai Kerutsareme 'ixɨararipa. Mɨkɨta memeku'ixɨarakaikɨ.
JOH 4:46 Merikɨtsɨ hutarieka Kanahatsie kaninuani Karereya kwieyaritsie haa kaxie winuyari mayeitɨatsie. Xewitɨ kwiepa ti'aitame mɨparewiwameyatɨkai mana kaniuyeikakaitɨni, nu'aya katinekuyekaitɨni Kaperunaumetsie.
JOH 4:47 Tiutamarieka kename Ketsutsi Kureya heyeyaka Karereya nuakai, hetsɨana kaneyani, kanitawawirieni meukayanikɨ nu'aya 'aixɨa reu'eriekame mayeitɨanikɨ. Mɨkɨ kanemɨximekaitɨni.
JOH 4:48 Ketsutsi 'ayumieme mɨpaɨ katinitahɨawe: —Xɨka 'inɨarite xeka'uxeiya, mamariwaweme, yuri xepɨkateta'erieni.
JOH 4:49 Mɨkɨ ti'aitame parewiwameya mɨpaɨ katinitahɨawe: —Ti'aitame, mana keneukayuni neniwe mexi 'akuxi kahemɨwe.
JOH 4:50 Ketsutsi mɨpaɨ katinitahɨawe: —Kenemie, 'aniwe kanayeniereniri. Hikɨ mɨkɨ tewi yuri katiniuta'erieni niukieyatsie Ketsutsi kemɨtitahɨawixɨ. Kaneyani.
JOH 4:51 Mana heukamiekaku te'uximayatametemama mekanenukunake mɨpaɨ mekatenitahɨawe kename nu'aya 'ayenierekairi.
JOH 4:52 Mɨkɨ kaniuta'iwauni ya'utaitɨ ke'upaukakaku 'aixɨa reu'erietɨ matɨa. Mɨkɨ mɨpaɨ mekatenitahɨawe: —Takai tau 'etsiwa kɨa heuwiekaku kahɨiyatɨ kanayani.
JOH 4:53 Hikɨ paapaya katinetimani 'ana mɨya'upaukakaku Ketsutsi mɨpaɨ mɨreitahɨawixɨ: «'Aniwe kanayeniereniri». Hikɨ mɨkɨ yuri katiniuta'erieni, meta yunaitɨ kiena kiekatari.
JOH 4:54 'Ipaɨ hutarieka 'inɨari katiniuwewieni Ketsutsi Kureya heyeyaka Karereya nuaka.
JOH 5:1 Merikɨtsɨ 'arike mɨyatiuyɨku huriyutsixi wa'ixɨarari kanaye'ani, Ketsutsi Kerutsareme kaneutiyune.
JOH 5:2 Kerutsareme haa mana kaniyemakaitɨni Muxatsi Wakitenie hehurakaku, hepɨrayutsixi waniukikɨ Wetetsita katiniuyetewakaitɨni haa mayemakai, 'auxɨwitɨ kitenie waritana pawetɨkatei 'etɨpiwari hexeiyatɨkaitɨ.
JOH 5:3 Mɨkɨ kiteniete 'etɨpiwariyari hetɨa mekanayeheteitɨni yumɨiretɨ tekwikwikate, memɨkaheuneniere, memɨhurietɨka, memɨmamawawaki, meta'ikwewatɨ haa mɨkuyuitɨarienikɨ.
JOH 5:4 Heiwa mana kaniuta'axekaitɨni niuki tuayame, haa kanikuyuitɨwakaitɨni, kemɨ'ane meri mana meuweni haa kuyuitɨarieyu yukuiniya kaniku'itiyarɨwakaitɨni tsepa ketitakɨ mɨtikuyekai.
JOH 5:5 Merikɨtsɨ xewitɨ tewi mana kanayekateitɨni xeitewiyari heimana tamamata heimana 'atahaika wiyari mɨtikuyekai.
JOH 5:6 Ketsutsi 'ixeiyaka mana 'ukaikame, heitimaika mɨixa mɨyuriekaikɨ, mɨpaɨ katinitahɨawe: —¿Peti'awaɨriya 'aixɨa pereu'erietɨ pemayanikɨ?
JOH 5:7 Tikwikame mɨpaɨ katinita'eiya: —Neuxei Ti'aitame, netsiparewiwame nepɨkahexeiya hapa mɨnetsiheukahɨanikɨ kepauka haa mukuyuitɨarienitsie, mana ne'ukamiekaku xewitɨ meri mana kaneuwautseni.
JOH 5:8 Ketsutsi mɨpaɨ katinitahɨawe: —Kenanukukexi, 'a'itari kenanukukwe'i, kenekuyeikani.
JOH 5:9 Yapauka tewi 'aixɨa reu'erietɨ kanayani, hikɨ yu'itari kananukukweni, kuyeikatɨ kanayani. Merikɨtsɨ 'ana tukaritsie 'uxipiya tukari kanihɨkɨtɨkaitɨni.
JOH 5:10 'Ayumieme huriyutsixi mɨpaɨ mekatenitahɨawe 'aixɨa reu'erietɨ mayeitɨarie: —Hikɨ 'uxipiya tukari kanihɨkɨtɨni, heitserie pepɨkahexeiya 'a'itari pemanukukwenikɨ.
JOH 5:11 Mɨkɨ mɨpaɨ katiniwaruta'eiya: —Kemɨ'ane 'aixɨa nereu'eriekame mɨnetsi'ayeitɨa, mɨkɨ mɨpaɨ kanetinetahɨawe: “'A'itari kenanukukwe'i, kenekuyeikani”.
JOH 5:12 Mɨkɨ mɨpaɨ mekatenita'iwawiya: —¿Kepaikɨ pɨhɨkɨ mɨkɨ tewi mɨya mɨmetiutahɨawixɨ: “'A'itari kenanukukwe'i, kenekuyeikani”?
JOH 5:13 'Aixɨa reu'erietɨ mayeitɨarie 'atsipɨkatimaikai kemɨ'ane mɨhɨkɨtɨkai, Ketsutsi metɨakɨ yumɨiretɨ mana me'u'uwakaku watsata.
JOH 5:14 Hikɨ 'arikeke Ketsutsi kanitaxeiya tuki kuraruyarita, mɨpaɨ katinitahɨawe: —Kamɨ, 'aixɨa pereu'erietɨ pekanayaniri. Tawariri 'axapepɨkareyurieneni kapa waɨkawa pe'u'itɨarienikɨ matsi.
JOH 5:15 Tewi kaneyani, mɨpaɨ katiniwarutahɨawe huriyutsixi kename Ketsutsi hɨkɨtɨkai kemɨ'ane 'aixɨa reu'eriekame meyeitɨa.
JOH 5:16 'Ayumieme huriyutsixi mekaniweiyakaitɨni Ketsutsi mɨpaɨ mɨtiyurienekaikɨ 'uxipiya tukaritsie.
JOH 5:17 Peru Ketsutsi mɨpaɨ katiniwakɨhɨawekaitɨni: —Ne'ukiyari hikɨ mɨyakatini'uximayaka, neta 'ayumieme yanekatini'uximayaka.
JOH 5:18 'Ayumieme matsi kwinimieme mekanikuwautɨwekaitɨni huriyutsixi me'imienike, 'uxipiya tukari 'inɨariyari mɨtitsanakaikɨ xeikɨa hawaikɨ, matsitsɨ 'akuxi Kakaɨyari mɨxatakaikɨ yu'ukiyaritɨme, Kakaɨyari hepaɨ 'anetɨ 'ayuyeitɨwatɨ.
JOH 5:19 Hikɨ 'ayumieme Ketsutsi heitseriemekɨ mɨpaɨ katiniwarutahɨawe: —Yurikɨ mɨpaɨ nekanaineni, nu'aya 'atsimɨtiuyurieni pɨkayɨwe yɨkɨmana, kemɨtixeiya yu'ukiyari yatiyurieneme xeikɨa pɨyɨwe. Tita 'ukiyarieya mɨtiyuriene, mɨpaɨta katiniyurieneni nu'aya.
JOH 5:20 Ne'ukiyari yuniwe pɨnaki'erie. Naime katinixeiyatsitɨani kemɨtiyuriene mɨkɨ. 'Ikɨ kemɨtiyuriene 'etsiwa mariwemekɨ xeikɨa, matsi yemekɨ kanixeiyatsitɨamɨkɨ waɨkawa mamariwawemekɨ, xemɨhɨxiyanikɨ xeme.
JOH 5:21 Ne'ukiyari mɨkite mɨtiwaranuku'uitɨwa hepaɨ, tukari mɨtiwarupitɨwa hepaɨ nu'ayata mɨpaɨ tukari pɨtiwakupitɨwa kemɨ'ane mɨkɨ mɨwareupitɨamɨkɨ.
JOH 5:22 Mɨkɨ meta, ne'ukiyari xeime heitserie pɨkapitɨani 'itsɨkame hepaɨ, matsi heitserie kanipitɨani yuniwe 'itsɨkame hepaɨ naime 'aixɨa mɨtiyurienikɨ,
JOH 5:23 yunaitɨ 'aixɨa memɨtehehɨawenikɨ nu'aya, yaxeikɨa 'aixɨa kememɨtehahɨawe hepaɨ 'ukiyarieya yuniwe meyenɨ'a. Kemɨ'ane nu'aya 'aixɨa mɨkarahɨawe, mɨkɨ 'ukiyarieyata 'aixɨa pɨkarahɨawe meiyenɨ'a.
JOH 5:24 »Yurikɨ mɨpaɨ nekanaineni, kemɨ'ane neniuki mɨ'enie, yuri ti'eririetɨ 'iya mɨnetsiheyenɨ'a, mɨkɨ tukari mɨkaxɨwe kanexeiyani. 'Itsɨkame hɨxie pɨkatakwewiyaniri, matsi kaniuyupatari, kemɨtimɨkikai, 'ayenieretɨri pɨta kanayani.
JOH 5:25 Yurikɨ mɨpaɨ nekanaineni, tukari kanaye'amɨkɨ, hikɨ kanaye'aniri, kepauka mɨkite memi'enieni Kakaɨyari Nu'aya 'utaniukame. Mɨkɨ memɨ'enanani mekanayenenierekakuni.
JOH 5:26 Ne'ukiyari yɨkɨmana tukari kemɨrexeiya, mɨpaɨ yaxeikɨa katinipitɨani yuniwe tukari mexeiyanikɨ yɨkɨmana.
JOH 5:27 Heitserie kanipitɨanita 'itsɨkame hepaɨ 'aixɨa mɨtiyurienikɨ Yuri Tewi mɨhɨkɨkɨ.
JOH 5:28 »Xepɨkahɨxiyaka 'ikɨkɨ, tukari kanaye'amɨkɨ kepauka yunaitɨ memukateukie memi'enieni 'iya 'utaniukame,
JOH 5:29 meta mepɨwatikɨne. Mɨkɨ 'aixɨa memɨteyuriekai mekananuku'uikuni tukari memɨpitɨarienikɨ, peru 'axamemɨteyuriekaita mete'anuku'uni memanutaxɨriyanikɨ.
JOH 5:30 Ne nekɨmana 'atsinepɨkatiyɨwe, kenemɨti'ena, mɨpaɨ heitserie nepɨtiyuriene 'itsɨkame hepaɨ neyɨanetɨ, kemɨtiheitseriekɨ nepɨwayuriene nemɨka'ikuwaunekɨ tita mɨnetinake ne, tita mɨtinake 'iya mɨnetsiheyenɨ'a pɨta nemɨkuwaunekɨ.
JOH 5:31 »Ne xɨka nehepaɨtsita netihekɨatanike, yurikɨ nepɨkatihekɨatanikeyu.
JOH 5:32 Xewitɨ 'akaniuyeikani mɨtihekɨata nehepaɨtsita, nekatinimaika mɨkɨ yuri mɨtihekɨatakɨ nehepaɨtsita kemɨtihekɨata.
JOH 5:33 »Xeme Wani hetsɨa xekaniwarenɨ'ani memita'iwawiyakɨ, mɨkɨ tita yuri mɨraine hepaɨtsita katiniutahekɨata.
JOH 5:34 Ne matsi nepɨka'itanaki'eri tita teɨteri memɨtehekɨata nehepaɨtsita, perutsɨ 'ipaɨ nekaniutaineni xemɨtawikweitsitɨarienikɨ xeme.
JOH 5:35 Wani kɨxeme kanihɨkɨtɨkaitɨni tatɨ hekɨariwietɨ. Xeme xekaniyuwaɨriyakaitɨni xemɨyutemamawiekakɨ mɨkɨ yatixehekɨariwiyakaku yapaɨmexɨa.
JOH 5:36 »Ne matsi waɨkawa nekatinihekɨatani Wani 'etsiwa xeikɨa tihekɨatakaku. Tita nemɨtiyuriene, ne'ukiyari kemɨnetiupitɨa nemeye'atɨanikɨ, 'ikɨ 'uximayatsika kenemɨtiyuriene, 'ikɨ nehepaɨtsita katinihekɨatani kename ne'ukiyari netsiheyenɨ'a.
JOH 5:37 Mɨkɨrita ne'ukiyari mɨnetsiheyenɨ'a, mɨkɨtɨtɨ nehepaɨtsita katinihekɨatani. Xeme hatsuaku xepɨka'i'eniewawe 'utaniukame, meta xepɨka'ixeiyawawe kemɨtiyuxexeiya.
JOH 5:38 Niukieya xepɨkahexeiya yuhetsie yuri xemɨkate'i'eririekɨ kemɨ'ane mɨkɨ meyenɨ'atsie.
JOH 5:39 Xeme 'utɨarikatsie xepɨtekuwautɨwe xeyukweriwayurietɨ, mɨpaɨ xemɨteku'eriwakɨ kename mɨkɨkɨ tukari mɨkaxɨwe xehexeiyatɨ xe'akɨne. Mɨkɨtɨtɨ kanihɨkɨtɨni tita nehepaɨtsita mɨtihekɨata.
JOH 5:40 Peru xepɨkayuwaɨriya nehepa xemakɨnekɨ tukari xemexeiyanikɨ.
JOH 5:41 »Tita teɨteri memɨtexata witsimenetexeiyatɨ, mɨkɨ nepɨkanaki'erie.
JOH 5:42 Matsi nepɨxehetima xeme, Kakaɨyari heitseriekamekɨ xemɨkanaki'eriekɨ.
JOH 5:43 Ne nekaninuani ne'ukiyari hetsɨa nemiemetɨtɨ. Xemeri xepɨkanetsi'utanaki'eri. Xɨka xewitɨ pɨta nuani yuhetsɨa mieme tikuxatatɨ, mɨkɨ xekanitanaki'erikuni.
JOH 5:44 ¿Kexeteyɨwawe yuri xemɨteta'erienikɨ xɨka xe'itanaki'erieni tita xemɨtexata witsixeteyuxeiyatɨ, xɨkarita xekatekuwautɨweni 'iya muyuxewi Kakaɨyaritɨtɨ witsimɨtixexeiyanikɨ xeme?
JOH 5:45 »Mɨpaɨ xepɨkateku'eriwani kename nexetaxaneta ne'ukiyari hɨxie. Xewitɨ 'akaniuyeikani mɨxexaneta. Muitsexi kanihɨkɨtɨni, kemɨ'ane hetsie yuri xemɨte'erie.
JOH 5:46 Xɨkatsɨ yuri xete'eriekake Muitsexi hetsie, nehetsieta yuri xepɨte'eriekake, mɨkɨ nehepaɨtsita mɨraka'utɨakɨ.
JOH 5:47 Xɨka mɨkɨ 'utɨarikayatsie yuri xekate'erieka, ¿keri yuri xeteta'erieni tita nemɨtikuxatatsie?»
JOH 6:1 Merikɨtsɨ yapaɨmexɨa 'anukayaku Ketsutsi kaneyani, Karereya harakunayaritsie Tiweriya mɨrakutewatsie 'anutaɨye kaneta'ani.
JOH 6:2 Yumɨiretɨ mekanikuweiyatɨwekaitɨni teɨteri 'inɨarite memɨxeiyakaikɨ kemɨtiyurienekai tekwikwikate wahetsie.
JOH 6:3 Hikɨ Ketsutsi hɨritsie kaneutiyune, mana kanetayerɨni, teyɨ'ɨkitɨwametemamata hamatɨana mekanetitekaitɨni.
JOH 6:4 Merikɨtsɨ huriyutsixi wa'ixɨarari Patsikwa mɨtitewa kanahurakaitɨni.
JOH 6:5 Hikɨ kepauka Ketsutsi munierixɨ, meta yumɨireme muwaruxei hepana me'ahume, mɨpaɨ Peripe katiniutahɨawe: —¿Hakewa tepeinanaiyu paa 'ikɨ memɨtekwanikɨ?
JOH 6:6 Mɨpaɨ kaniutayɨni 'i'inɨatanetɨ, mɨkɨ tsietɨ katinimaikaitɨniri kemɨtiyurienikekai.
JOH 6:7 Hikɨ Peripe mɨpaɨ katinita'eiya: —Paa huta tsienituyari 'inɨariyaritsie 'atɨ pɨkatinake wahetsiemieme yuxexuitɨ 'etsiwa xeikɨa memita'ɨixɨanikɨ.
JOH 6:8 Xewitɨ teyɨ'ɨkitɨwametemama 'Atɨrexi mɨtitewakai Tsimuni Pekuru 'iwaya mɨpaɨ katinitahɨawe:
JOH 6:9 —'Ena puyeika xewitɨ temaikɨ tsewara payari 'auxɨwime hexeiyatɨ meta tsapari yuhutame. ¿Perutsɨ 'ikɨ tixaɨtɨ pɨkatihɨkɨ yumɨireme wahetsiemieme?
JOH 6:10 Hikɨ Ketsutsi mɨpaɨ kaniutayɨni: —Xekeniwaranukayatsa teɨteri. Mana waɨkawa kanaku'ɨxayakaitɨni. Hikɨ 'ukitsi mekananukayaxe 'auxɨwime miriyari meyupaɨmetɨ 'etsiwatɨkaku.
JOH 6:11 Hikɨ Ketsutsi kanenu'ɨni paa, pamɨpariyutsi 'ipitɨaka Kakaɨyari katiniwarumini mana memɨtitekai. Yaxeikɨata tsapari kaniwarumini kememɨtewareukwaikukai.
JOH 6:12 Hikɨ me'utihuxaku mɨpaɨ katiniwarutahɨawe teyɨ'ɨkitɨwamete: —Xekeneukuxeɨri tarimeyari muyuhayewaxɨ kapa reuyewenikɨ.
JOH 6:13 'Ayumieme mekanikuxeɨrieni, tamamata heimana huta tsikɨiwitiyari mekaniutihɨniya tarimeyari tekwa'amete memiku'eiri 'auxɨwime tsewara payaritsie mieme.
JOH 6:14 Merikɨtsɨ teɨteri me'ixeiyaka 'inɨarikɨ kemɨtiuyuri mɨpaɨ mekaniutiyuanekaitɨni: «Kaniyuritɨni 'ikɨ kanihɨkɨtɨni Kakaɨyari niukameya kwiepa 'umamiekai».
JOH 6:15 Hikɨ retimaika Ketsutsi kename me'axɨanikekai me'iwiyake tiwa'aitɨwame memayeitɨanikɨ, tawarita yuxaɨta mana hɨritsie kaneutiyune.
JOH 6:16 Merikɨtsɨ kepauka tau makayunixɨ teyɨ'ɨkitɨwamete mana mekaniukanexɨani harakuna mayema paitɨ.
JOH 6:17 Kanuwatsie mekayaxeka harakunatsie me'uhukaku 'anutaɨye mehanɨkɨneke Kaperunaume paitɨ meye'axɨanike. Hikɨ kaniukuyɨrekaitɨniri Ketsutsi 'akuxi wahetsɨa pɨkanuawekai.
JOH 6:18 Karima mu'ekakaikɨ harakunatsie hamewari waɨkawa kanixuawekaitɨni.
JOH 6:19 Hikɨ yateewa 'auxɨwi yatɨni 'ataxewi kirumeturuyari me'uhutɨ kanuwa me'uwekirɨmetɨ mekanixeiya Ketsutsi harakunatsie 'umiekame kanuwatsie 'aye'aximeme, hikɨ mekaniutimamani.
JOH 6:20 Peru mɨkɨ mɨpaɨ katiniwarutahɨawe: «Ne nepɨyɨane. Xepɨkamamaka».
JOH 6:21 Hikɨ mekanipitɨani kanuwatsie mɨkayerɨnikɨ. Yapauka kanuwa kaneutaneni kwiepa hakewa memeukɨnekai.
JOH 6:22 Merikɨtsɨ 'uxa'arieka teɨteri harakuna 'anutaɨye memɨti'ukai mekaniuneniere mana mukateikɨ xewitɨ kanuwa xeikɨa. Mepunenierixɨ Ketsutsi mɨka'akayerɨwekai mɨkɨ kanuwatsie teyɨ'ɨkitɨwamete wahamatɨa, matsi teyɨ'ɨkitɨwamete yuxaɨtame memekɨnekaikɨ.
JOH 6:23 Hipatɨta kanuwate mekaneyekɨne Tiweriya. Mana 'ahurawa mekaniu'axɨani hakewa paa memetikwaitsie Ti'aitame pamɨpariyutsi 'ipitɨaku Kakaɨyari.
JOH 6:24 Me'uneniereka teɨteri Ketsutsi mana mɨka'uyeikakaikɨ, meta teyɨ'ɨkitɨwametemama mana memɨka'u'uwakaikɨ, mɨkɨtari kanuwatetsie mekayaxeka mekanekɨne Kaperunaume paitɨ Ketsutsi mekuwautɨwetɨ.
JOH 6:25 Harakuna 'anutaɨye meheitaxeiyaka mɨpaɨ mekatenitahɨawe: —Ti'ɨkitame, ¿kepauka pepunua 'uwapaitɨ?
JOH 6:26 Ketsutsi mɨpaɨ katiniwaruta'eiya: —Yurikɨ mɨpaɨ nekanaineni, xepɨkanetsikuwautɨwe 'inɨarite xemuxeikɨ. Paa xemetikwaikɨ xemetihuxaikɨ pɨta xepɨnetsikuwautɨwe.
JOH 6:27 Xepɨkate'uximayaka 'ikwai mɨtipɨniwe xema'iwakɨ xeikɨa. Xeketene'uximayaka pɨta xeme'iwakɨ 'ikwai 'amɨtiteriwe tukari mɨkaxɨwe mɨxepitɨatsie Yuri Tewi mɨtixemini. 'Ukiyarieya Kakaɨyaritɨtɨ mɨkɨ kaniu'inɨaritɨani.
JOH 6:28 'Ayumieme mɨpaɨ mekatenita'iwawiya: —¿Keri teteyurieka Kakaɨyari 'uximayatsikayatsie temɨte'uximayakakɨ?
JOH 6:29 Ketsutsi mɨpaɨ katiniwaruta'eiya: —'Ikɨ kanihɨkɨtɨni Kakaɨyari 'uximayatsikaya: yuri xemɨte'eriekakɨ mɨkɨ meiyenɨ'atsie.
JOH 6:30 Mɨkɨ mɨpaɨ mekatenitahɨawe: —Merikɨte, tita 'inɨari petiyuriene, temixeiyakɨ, yuri temɨmeteta'eririenikɨ. Kepemɨtiu'uximayata.
JOH 6:31 Tame tatutsima manana payari mekanikwakaitɨni makumawetsie, kemɨre'uxa: “Hatsi muyuawitsie mieme kaniwarumini”.
JOH 6:32 Hikɨ Ketsutsi mɨpaɨ katiniwarutahɨawe: —Yurikɨ mɨpaɨ nekanaineni, Muitsexi pɨkahɨkɨtɨkai kemɨ'ane mɨxe'umi mɨkɨ paa taheima mieme. Ne'ukiyari pɨta katinixemikwani tita yurikɨ paa mɨtihɨkɨ taheima mieme.
JOH 6:33 Kemɨ'ane taheima makaneika, tukari mɨwamikwa kwiepa memɨtama, mɨkɨtɨtɨ paa kanihɨkɨtɨni Kakaɨyari hetsɨa mieme.
JOH 6:34 Mɨkɨ mɨpaɨ mekatenitawawirieni: —Ti'aitame, 'aheyemekɨ yaketatineumikwani mɨkɨ paa.
JOH 6:35 Ketsutsi mɨpaɨ katiniwarutahɨawe: —Ne nekanihɨkɨtɨni paa tukari tiyupitɨwame. Kemɨ'ane nehetsɨa mɨye'ani pɨkaheuhakamɨkɨni meta kemɨ'ane nehetsie yuri mɨti'erie hawaikɨ pɨkaheuharimɨkɨni hatsuaku.
JOH 6:36 Matsi yanepɨtixekɨhɨawekai, xepɨnetsixeiya peru yuri xepɨkate'erie.
JOH 6:37 Naime ne'ukiyari mɨnetipitɨa nehetsɨa pɨye'ani. Kemɨ'ane nehetsɨa mɨye'ani, takwa nepɨka'enuyehɨani.
JOH 6:38 Ne taheima nepɨka'akane tita mɨnetinake yanemɨtiyurienenikɨ, matsi tita mɨtinake 'iya mɨnetsiheyenɨ'a pɨta yanemɨtiyurienenikɨ.
JOH 6:39 'Ipaɨ katininakeni 'iya mɨnetsiheyenɨ'a, naime mɨnetiupitɨa nixeime nemɨkaheuyehɨanikɨ, matsi nemenukuketɨanikɨ tukari 'aye'ayu kepauka mɨtapare.
JOH 6:40 'Ipaɨrita katininakeni ne'ukiyari, yunaitɨ memixeiya nu'aya, yuri memɨte'erie hetsiena, tukari mɨkaxɨwe memexeiyanikɨ. Ne nepɨwaranuku'uitɨani tukari 'aye'ayu kepauka mɨtapare.
JOH 6:41 Hikɨ huriyutsixi mekaniniukixiekaitɨni hepaɨtsitana mɨpaɨ mutayɨkɨ: «Ne paa nekanihɨkɨtɨni taheima makane».
JOH 6:42 Mɨpaɨ mekaniutiyuanekaitɨni: «¿'Ikɨ Ketsutsi katihɨkɨ Kutse nu'aya? Tame paapaya meta maamaya tepɨwamate. ¿Ketɨtɨ putaine: “Ne taheima nepakane”?»
JOH 6:43 Ketsutsi mɨpaɨ katiniwaruta'eiya: —Xepɨkaniukixieka yutsata.
JOH 6:44 Xewitɨ pɨkayɨwe nehetsɨa mɨye'ani, xɨka ne'ukiyari mɨnetsiheyenɨ'a 'enayexeiya xeikɨa pɨyɨwe. Ne tukari 'aye'ayu kepauka mɨtapare nekanenukuketɨamɨkɨ.
JOH 6:45 Kakaɨyari niukametema waxapatsie mɨpaɨ katine'uka: “Kakaɨyari katiniwa'ɨkitɨaka yunaime”. Yunaitɨ memɨ'enana ne'ukiyari kemaine, memɨteyɨ'ɨkitɨa, mɨkɨ nehetsɨa mekaniye'axɨakuni.
JOH 6:46 Perutsɨ xewitɨ pɨka'ixeiyawe ne'ukiyari. Kemɨ'ane Kakaɨyari hetsɨa miemetɨtɨ 'amuyeika, mɨkɨ xeikɨa kanixeiyaweni ne'ukiyari.
JOH 6:47 Yurikɨ mɨpaɨ nekanaineni, kemɨ'ane nehetsie yuri mɨti'erie, tukari mɨkaxɨwe kanexeiyani.
JOH 6:48 Ne paa tukari tiyupitɨwame nekanihɨkɨtɨni.
JOH 6:49 Xetutsima manana payari mekanikwakaitɨni makumawetsie, peru mɨkɨ mekaniukwini.
JOH 6:50 Peru 'ikɨ kanihɨkɨtɨni paa mayeniere taheima makane tewi mitikwanikɨ mɨkamɨnikɨ.
JOH 6:51 Ne nekanihɨkɨtɨni paa mayeniere taheima makane. Xɨka tewi 'ikɨ paa 'utikwani, yuheyemekɨ payeniereni. 'Ikɨ paa nemɨyetuani ne, newaiyari kanihɨkɨtɨni, kwiepa memɨtama watukari mɨhɨkɨtɨnikɨ.
JOH 6:52 Hikɨ huriyutsixi mekaniyuxamurietɨwekaitɨni yameteyɨkɨhɨawetɨ: «¿Ketiyɨwe 'ikɨ yuwaiyari mɨtatsiminikɨ temitikwanikɨ?»
JOH 6:53 Ketsutsi 'ayumieme mɨpaɨ katiniwarutahɨawe: —Yurikɨ mɨpaɨ nekanaineni, xɨka xeka'itikwani Yuri Tewi waiyarieya, xɨka xuriyaya xeka'anu'ieni, tukari yuhetsie xepɨkahexeiya.
JOH 6:54 Kemɨ'ane newaiyari mɨkwa'a nexuriya mɨ'ie, tukari mɨkaxɨwe kanexeiyani. Tukari 'aye'ayu kepauka mɨtapare, nekanenukuketɨamɨkɨ.
JOH 6:55 Ne newaiyari yurikɨ kani'ikwaitɨni, nexuriya yurikɨ kananu'iwani.
JOH 6:56 Kemɨ'ane newaiyari mɨkwa'a nexuriya mɨ'ie, mɨkɨ nehetsie tiwiyatɨ kaniyuhayewamɨkɨ, neta hetsiena netiwiyatɨ netinehayewa.
JOH 6:57 Ne'ukiyari mayeniere kwiepa kemɨnerenɨyenɨ'a hepaɨ, ne kenemɨrayeniere ne'ukiyarikɨ, mɨpaɨrita yaxeikɨa kemɨ'ane mɨnetsikwa'a, mɨkɨta kanayenierekamɨkɨ nekɨmana.
JOH 6:58 'Ikɨ kanihɨkɨtɨni paa taheima makane. Xetutsima manana me'utikwaka memukwi, mɨpaɨ pɨka'ane. Kemɨ'ane 'ikɨ paa mɨkwa'a yuheyemekɨ kanayenierekamɨkɨ.
JOH 6:59 Mɨpaɨ kaniutayɨni Kaperunaumetsie ti'ɨkitatɨ tukita.
JOH 6:60 Hikɨ 'ayumieme teyɨ'ɨkitɨwametemama yumɨiretɨ me'u'enanaka mɨpaɨ mekaniutiyuani: «'Ikɨ niuki kanikwaniweni. Kepaikɨ pɨyɨwe mi'enienikɨ».
JOH 6:61 Ketsutsi yu'iyaritsie retimaika memɨniukixiekaikɨ teyɨ'ɨkitɨwametemama 'ikɨ hepaɨtsita, mɨpaɨ katiniwarutahɨawe: —¿'Ikɨkɨ xetetiketamɨrike?
JOH 6:62 ¿Ketiɨyɨwetsɨ xɨka xe'ixeiyanike Yuri Tewi mana 'utimiekame hakewa meripaitɨ mekateitsie?
JOH 6:63 'Iyari kanihɨkɨtɨni tukari tiyupitɨwame, waiyari 'atsipɨkatiuyuriwe. Tita nemɨtixekuxaxatɨwa ne, mɨkɨ kani'iyaritɨni kanitukaritɨni.
JOH 6:64 Peru hipatɨ xeme yuri xepɨkate'erie. Ketsutsi matɨari paitɨ kaniwamaikaitɨni kehate mɨkɨ yuri memɨkate'eriekai, meta katimaikaitɨni kemɨ'ane miyetuanikekai.
JOH 6:65 'Ayumieme tawarita mɨpaɨ kaniutayɨni: —'Ayumieme nepɨtixekɨhɨawe, xewitɨ mɨkayɨwe nehetsɨa mɨye'ani xɨka ne'ukiyari mɨpaɨ katipitɨaka.
JOH 6:66 Mɨkɨkɨ yumɨiretɨ teyɨ'ɨkitɨwametemama yukutama mekanitakɨne, hamatɨana mepɨka'u'uwakairi.
JOH 6:67 'Ayumieme Ketsutsi mɨpaɨ katiniwarutahɨawe tamamata heimana memɨyuhuta: —¿Xemerita xeteyuwaɨriya xemɨyehu?
JOH 6:68 Tsimuni Pekuru mɨpaɨ katinita'eiya yuku'imawatɨ: —Ti'aitame, ¿kepaikɨ rahetsɨa tepɨteyehu? 'Ekɨtsɨ tukari mɨkaxɨwe niukiyari pekanexeiyani.
JOH 6:69 Tameri yuri tekateniuta'erieni, tekamenetimani 'ekɨ Mɨpatsie pekanihɨkɨtɨni Kakaɨyari hetsɨa mieme.
JOH 6:70 Ketsutsi mɨpaɨ katiniwaruta'eiya: —Xeme nekanixe'anayexei tamamata heimana yuhutame. Perutsɨ xewitɨ xeme kauyumarie hepaɨ kani'aneni.
JOH 6:71 Mɨkɨ Kura Tsimuni nu'aya 'Itsikariutitanaka kanixatakaitɨni, mɨkɨ kaniyetuanikekaitɨni tamamata heimana memuyuhuta mɨwanɨkai.
JOH 7:1 Merikɨtsɨ 'arikeke Ketsutsi Karereya kaniuyeikakaitɨni. Pɨkayuwaɨriyakai Kureya muyeikani huriyutsixi memikuwautɨwekaikɨ me'imienike.
JOH 7:2 Hikɨ huriyutsixi wa'ixɨarari kanahurakaitɨni kepauka xamaru memutiwewiwatsie.
JOH 7:3 'Iwamama 'ayumieme mɨpaɨ mekatenitahɨawe: —'Uwa peyeyame Kureya kenemie, 'ahetsɨa miemete teyɨ'ɨkitɨwamete memixeiyakɨ kepemɨtiyuriene.
JOH 7:4 Xewitɨ tewi kemɨ'ane mɨtikuwaɨne yunaime wahɨrɨpa muyuhekɨatakɨ 'awie yapɨkatiyuriene. Xɨka mɨpaɨ petiyurieneni, pematsiɨkɨme kene'ayeitɨa kwiepa memɨtama wahɨxie.
JOH 7:5 Peru yurikɨ 'iwamama yuri mepɨkate'eriekai hetsiena.
JOH 7:6 'Ayumieme Ketsutsi mɨpaɨ katiniwarutahɨawe: —Ne netukari pɨka'aye'awe 'akuxi, xeme xehetsiemieme tsepa ke'aneme tukaritsie 'aixɨa pɨ'ane.
JOH 7:7 Kwiepa memɨtama mepɨkayɨwawe memɨxe'uxiwe'erieka, nepɨta mekaneni'uxiwe'erieka wahepaɨtsita nemɨtihekɨatakɨ, tita kememɨteyurie 'axapɨ'ane nemutainekɨ.
JOH 7:8 Xemeri xekene'ixɨarayu. Ne 'akuxi nepɨka'ixɨaramie 'ikɨtsie, netukari mɨka'aye'awekɨ 'akuxi.
JOH 7:9 Mɨpaɨ tiwarutahɨaweka Karereya kaniyuhayewa.
JOH 7:10 Hikɨ 'iwamama meheu'ixɨarayukaku mɨkɨta kaneyani 'arikeke, 'awie xeikɨa kayuhekɨatatɨ.
JOH 7:11 Hikɨ huriyutsixi mekanikuwautɨwekaitɨni 'ixɨararipa mɨpaɨ me'utiyuatɨ: «¿Hakewari peyeika 'iya?»
JOH 7:12 Teɨteri waɨkawa mepɨtekuxatakai hepaɨtsitana, 'awie xeikɨa. Hipatɨta mɨpaɨ mekaniutiyuanekaitɨni: «Matsi 'aixɨa pɨtiuka'iyari». Hipatɨta mete'utiyuanekai: «Tixaɨtsietɨ, pɨwareuyexɨrɨwa matsi teɨteri».
JOH 7:13 Matsi xewitɨ teɨteri wahɨrɨpa pɨkatikuxatakai hepaɨtsitana yunaitɨ memɨwamakaxekaikɨ huriyutsixi.
JOH 7:14 Hikɨ 'ixɨarari hixɨapariekake Ketsutsi tukipa kaneutiyune, mana katini'ɨkitakaitɨni.
JOH 7:15 Huriyutsixi mehɨxiyatɨ mɨpaɨ mekaniutiyuanekaitɨni: «Keri 'utɨarika 'ikɨ retimaika putaine. Pɨkatiyuti'ɨkitɨawe».
JOH 7:16 Ketsutsi 'ayumieme mɨpaɨ katiniwarutahɨawe: —Tita nemɨti'ɨkita nehetsɨa pɨkamieme. Kemɨ'ane mɨnetsiheyenɨ'a hetsɨa pɨta kanimiemetɨni.
JOH 7:17 Xɨka tewi yuwaɨriyani yamɨtikamienikɨ tita mɨtinake Kakaɨyari, katinimaikamɨkɨ tita nemɨti'ɨkita hepaɨtsita, xɨka Kakaɨyari hetsɨa miemetɨni, yanutsutɨni nekɨmana ne'utaineni xeikɨa.
JOH 7:18 Kemɨ'ane yɨkɨmana mutaine katinikuwauneni witsimɨtikɨhɨawarɨwanikɨ. Kemɨ'ane mɨtikuwauneni witsimɨtikɨhɨawarɨwanikɨ pɨta 'iya meiyenɨ'a, mɨkɨ yuri paine, tita mɨkatiheitserie pumawe hetsiena.
JOH 7:19 ¿Tamɨ Muitsexi katixe'upitɨa 'inɨari niukiyari xemeixeiyanikɨ? Perutsɨ nixewitɨ xeme yapɨkatikamie 'inɨari niukiyaritsie. ¿Kamɨtsɨ titayari xenetekuwautɨwe xenetsimienike?
JOH 7:20 Teɨteri mɨpaɨ mekatenita'eiya: —Kakaɨyari 'axamɨ'ane kameninɨka. ¿Kepaikɨ metsikuwaune metsimienike?
JOH 7:21 Ketsutsi mɨpaɨ katiniwaruta'eiya: —Ne 'uxipiya tukaritsie heiwa xeikɨa tixaɨtɨ nepɨtiuyuri, peru yunaitɨ xekanihɨxiyaka.
JOH 7:22 'Ayumieme meta Muitsexi kanixe'upitɨani xitekiya 'inɨariyari. Muitsexi hetsɨa pɨkamieme, tatutsima wahetsɨa pɨta kanimiemetɨni, peru 'uxipiya tukaritsie xeime 'uki nunutsi xepɨ'inɨaritɨa.
JOH 7:23 Xɨka 'uki 'uxitekieni 'uxipiya tukaritsie Muitsexi hetsɨa mieme 'inɨari niukiyari maye'atɨarienikɨ, ¿ketitayari xeneteheka ne naime 'aixɨa reu'eriekame nemayeitɨakɨ xeime tewi 'uxipiya tukaritsie?
JOH 7:24 Kemɨtiyuxexeiyakɨ xeikɨa niuki xepɨkawewieka, kemɨtiheitseriekɨ pɨta niuki xekenewewieka.
JOH 7:25 Hikɨ Kerutsaremetari hipatɨ 'ayumieme mɨpaɨ mekaniutiyuanekaitɨni: «¿'Ikɨ katihɨkɨ memikuwautɨwe me'imienike?
JOH 7:26 Kamɨ yunaime wahɨrɨpa katinikuxatani, 'atsimepɨkatehehɨawe. Tahetsɨa miemete memanuyetei xɨari yurikɨ 'ikɨri Kɨritsitu mepɨ'erie.
JOH 7:27 Perutsɨ tame tekatenimaika 'ikɨ hakewa memieme. Peru kepauka munuani Kɨritsitu, xewitɨ 'atsipɨkatimaika hakewa memieme».
JOH 7:28 Hikɨ 'ayumieme Ketsutsi mɨpaɨ katiniuhiwa tuki kuraruyarita ti'ɨkitatɨ: —Xeme xenetemate 'aku, hakewa nememieme xetemate. Ne nekɨmana nepɨkanua. Matsi yuri kanaineni 'iya mɨnetsiheyenɨ'a. Xeme xepɨka'imate.
JOH 7:29 Peru ne nekanimaika hetsɨana nemɨmiemekɨ, mɨnetsiheyenɨ'akɨ.
JOH 7:30 Hikɨ mekanikuwautɨwekaitɨni me'iwiyake. Xewitɨ pɨka'iwi tukarieya mɨka'aye'awekaikɨ 'akuxi.
JOH 7:31 Teɨteri yumɨiretɨ yuri mekateniuta'erieni hetsiena, mɨpaɨ mekaniutiyuanekaitɨni: «Kepauka munuani Kɨritsitu, ¿kamɨtsɨ matsi waɨkawa tiyurieni 'inɨarite, 'e'iwatɨ 'ikɨ kemɨtiyuriene?»
JOH 7:32 Hikɨ paritseutsixi teɨteri mekaniwa'eniekaitɨni hepaɨtsitana waɨkawa metekuxatame. Mawari wewiwamete tewa'aitɨwamete meta paritseutsixi mekaniwaretanɨ'ani tukita tehɨwemete memiwiyakɨ.
JOH 7:33 Hikɨ Ketsutsi mɨpaɨ kaniutayɨni: —Yapaɨmexɨa 'akuxi xehamatɨa nekaniuyeikamɨkɨ. 'Arikeke 'iya mɨnetsiheyenɨ hetsɨa nepɨyemie.
JOH 7:34 Xepɨnetsikuwautɨweni peru xepɨkanetsitaxeiya. Mɨkɨ meta, hakewa nemeyeikani xepɨkayɨwawe xemeta'axɨani.
JOH 7:35 Huriyutsixi mɨpaɨ mekateniyɨkɨhɨawekaitɨni: —Ketiyune 'ikɨ temɨka'itaxeiyakɨ. Kɨriyekutsixi watsata memeutayeixɨa wahetsɨa katiyemie, kɨriyekutsixi tiwareti'ɨkitɨanike.
JOH 7:36 ¿Kehepaɨtɨtɨri 'ikɨ paine mɨya mutaine “xepɨnetsikuwautɨweni, xepɨkanetsitaxeiya”, “hakewa nemeyeikani xepɨkayɨwawe xemeta'axɨani”, maine?»
JOH 7:37 Hikɨ patsiekamekɨ memuyukuxexeɨriwa tukariyaritsie 'ixɨarari heutiparirɨmekaku, Ketsutsi mana 'utakeka, kanahiwakaitɨni mɨpaɨ 'utaitɨ: —Xɨka tewi heuharimɨkɨni, nehetsɨa kenuani, ke'anuhareni.
JOH 7:38 Kemɨ'ane nehetsie yuri mɨti'erie, 'utɨarika manuyɨne hepaɨ, hatɨa hepaɨ 'anenetɨ kaniuhanekamɨkɨ taɨtana haa muhanetsie mieme hepaɨ 'anenetɨ.
JOH 7:39 Mɨpaɨ kaniutayɨni 'Iyari xatatɨ memitanaki'erienikekai mɨkɨ yuri memɨteta'erienikekai hetsiena. Mɨkɨ 'Iyari mepɨkatanaki'eriwawekai 'akuxi Ketsutsi 'akuxi witsi'anetɨ mɨka'ayeitɨariewekaikɨ.
JOH 7:40 Hikɨ teɨteri hipatɨ 'ikɨ niukite me'u'enieka mɨpaɨ mekaniutiyuanekaitɨni: «Yurikɨ 'ikɨ Kakaɨyari niukameya kanihɨkɨtɨni».
JOH 7:41 Hipatɨta mete'utiyuanekai: «'Ikɨ Kɨritsitu kanihɨkɨtɨni». Hipatɨta mete'utiyuanekai: «Matsi Kɨritsitu Karereya kiekame pɨka'ayani.
JOH 7:42 Tamɨ 'utɨarika mɨpaɨ karanuyɨne, Kɨritsitu Rawiri pɨxiɨyarieyatɨni, kiekaritsie Rawiri manukateitsie pɨtinuiwa Werenitsie».
JOH 7:43 'Ayumieme teɨteri hixɨata mekaniyutsana Ketsutsi hetsiemieme.
JOH 7:44 Hipatɨta mɨkɨ mekaniwiyakukaitɨni, perutsɨ xewitɨ pɨka'iwi.
JOH 7:45 Hikɨ tukita tehɨwemete mekaniu'axɨani mawari wewiwamete tewa'aitɨwamete wahetsɨa meta paritseutsixi wahetsɨa. Mɨkɨri mɨpaɨ mekateniwaruta'iwawiya: —¿Titayari xekate'i'atɨa?
JOH 7:46 Tukita tehɨwemete mɨpaɨ mekateniwaruta'eiya: —Tewi xewitɨ hatsuaku mɨpaɨ pɨkarekuxatani 'ikɨ tewi mɨtikuxata hepaɨ.
JOH 7:47 Hikɨ paritseutsixi mɨpaɨ mekateniwaruta'eiya: —¿Kari xemeta xepeuyexɨriya?
JOH 7:48 ¿Kamɨtsɨ kuwexinaruritsixi meta paritseutsixi mɨkɨ hetsie xewitɨ yuri tiuta'eri?
JOH 7:49 Hawaikɨ. Peru 'ikɨ teɨteri 'inɨari niukiyari memɨkamate 'axamepɨtekɨhɨawarɨwa.
JOH 7:50 Hikɨ 'iya meripaitɨ Ketsutsi hetsɨa munua yɨwikɨta Nikuremu mɨpaɨ katiniwarutahɨawe mɨkɨ wahetsɨa mɨmiemetɨkaikɨ:
JOH 7:51 —Ta'inɨari niukiyarikɨ tepɨka'enutahɨani tewi xɨka meri teka'i'enieni kemutaine, xɨka teka'imaika kemɨtiyuriene.
JOH 7:52 Mɨkɨ mɨpaɨ mekatenita'eiya: —¿Kamɨtsɨ 'ekɨtari petikarereyatanaka? Ketinekuwawa, yapekatinetimaimɨkɨ Karereyatsie nixewitɨ mɨka'ayenewekɨ Kakaɨyari niukameya.
JOH 7:53 Hikɨ yuxexuitɨ yukie mekaneutayeixɨani.
JOH 8:1 Hikɨ Ketsutsi yemuritsie kaneyani Huriwa Mati'u mɨrakutewatsie.
JOH 8:2 Ximerita tawari tukipa kaninuani. Yunaitɨ teɨteri hetsɨana mekani'axekaitɨni, mana 'ayerɨka katiniwa'ɨkitɨakaitɨni.
JOH 8:3 Hikɨ 'inɨarikɨ te'ɨkitamete meta paritseutsixi mekani'atɨirieni 'ukaratsi muwiyarie xeime kɨnaya hamatɨa meyukumaɨwakaku, hixɨapa me'itakeka
JOH 8:4 mɨpaɨ mekatenitahɨawe: —Ti'ɨkitame, 'ikɨ 'ukaratsi kaniuwiyarieni xeime kɨnaya hamatɨa meyukumaɨwatɨ.
JOH 8:5 'Inɨari niukiyaritsie Muitsexi mɨpaɨ katatiniu'aitɨani tetexikɨ temɨwatituaxanikɨ mɨkɨ 'ukarawetsixi mɨya memɨyɨa. ¿Kamɨtsɨ kepetayɨni 'ekɨ?
JOH 8:6 Mɨpaɨ mekaniutiyuani me'i'inɨatatɨwetɨ memitaxanetakɨ. Peru Ketsutsi 'anakatutsireka, kwiepa katiniuta'utɨani yu'itɨwamekɨ.
JOH 8:7 Mɨkɨ 'ameteheutewitɨ me'iku'iwawiyatɨ, Ketsutsi kananukukeni, mɨpaɨ katiniwarutahɨawe: —Kemɨ'ane xeme 'axamɨkatiyuriwe, mɨkɨ meri pitatuaxa tetekɨ.
JOH 8:8 Tawari 'anakatutsireka, kwiepa katiniuta'utɨani.
JOH 8:9 Hikɨ mɨkɨ memu'enana, wa'iyari warutate'akaku, mekaneutayeixɨani yuxexuitɨ me'ayekɨkatɨ, 'ukirawetsixi meri. Ketsutsi yuxaɨtame kaniuyuhayewa, 'ukaratsi hixɨapa muwekai kaniuyuhayewata hamatɨana.
JOH 8:10 Hikɨ 'anukukeka Ketsutsi, 'ukaratsi mɨpaɨ katiniuta'iwawiya: —Neuxei, 'ukaratsi, ¿hakewari mɨkɨ metsixanetamete? ¿Xewitɨ 'ahetsie karahɨa?
JOH 8:11 Mɨkɨ mɨpaɨ kaniutayɨni: —Ti'aitame, hawaikɨ. Ketsutsi mɨpaɨta katinitahɨawe: —Neta 'ahetsie nepɨkatiuhɨani. Kenemie, tawari 'axapepɨkareyurieneni.
JOH 8:12 Merikɨtsɨ Ketsutsi tawari teɨteri katiniwarutixatɨani mɨpaɨ 'utaitɨ: —Ne kwiepa memɨtama wahekɨariwiwame nekanihɨkɨtɨni. Kemɨ'ane mɨnetsi'anuweiya yɨwipa pɨka'uyeikani, matsi hekɨariya kanexeiyakamɨkɨ tukaritɨme.
JOH 8:13 Paritseutsixi 'ayumieme mɨpaɨ mekatenitahɨawe: —'Ekɨ 'ahepaɨtsita xeikɨa pekatinihekɨatani. Tita pemɨtihekɨata pɨkayuri.
JOH 8:14 Ketsutsi mɨpaɨ katiniwaruta'eiya: —Tsepatsɨ nehepaɨtsita nemɨtihekɨata, tita nemɨtihekɨata puyuri nemɨtimatekɨ hakewa nemeyetɨa meta hakewa nemeyemie. Peru xeme 'atsixepɨkatemate hakewa nemeyetɨa meta hakewa nemeyemie.
JOH 8:15 Xeme teɨteri wahepaɨ xepɨteyu'inɨata. Nepɨta tewi nepɨka'inɨata.
JOH 8:16 Matsitsɨ xɨka ne'ita'inɨatake, nepihekɨatɨanikeyu tita yurikɨ mɨti'inɨari nehexeiyatɨ, nexaɨta nemɨka'uyeikakɨ, 'iya mɨnetsiheyenɨ'a nehamatɨa muyeikakɨ.
JOH 8:17 Mɨkɨ meta, xe'inɨari niukiyaritsie mɨpaɨ katine'uxani: Yuhutatɨ teɨteri tita memɨtetahekɨata puyuri.
JOH 8:18 Merikɨte, ne nekanihɨkɨtɨni kemɨ'ane nehepaɨtsita nemɨtihekɨata, ne'ukiyari mɨnetsiheyenɨ'a nehepaɨtsita katinihekɨatanita.
JOH 8:19 Mɨkɨ mɨpaɨ mekatenitahɨawe: —¿Hakewari 'a'ukiyari? Ketsutsi mɨpaɨ katiniwaruta'eiya: —Xeme xepɨkanetsimate, ne'ukiyari meta xepɨkamate. Xɨka xenetsimatenike, ne'ukiyarita xepɨmatenikeyu.
JOH 8:20 'Ikɨ niukikɨ katinikuxatakaitɨni Ketsutsi tumini makamanarɨwatsie tuki kuraruyarita ti'ɨkitatɨ. Xewitɨ pɨka'iwi tukarieya mɨka'aye'awekaikɨ 'akuxi.
JOH 8:21 Hikɨ tawari mɨpaɨ katiniwarutahɨawe: —Netsɨ nepɨyemie, xeme xepɨnetsikuwautɨweni, tita 'axaxemɨteyurietsie xetewiyatɨ xekanikwikuni. Hakewa ne nemeyemie xeme xepɨkayɨwawe mana xemɨyehukɨ.
JOH 8:22 Huriyutsixi 'ayumieme mɨpaɨ mekatenikuxatakaitɨni: «¿Yɨkɨmana katiyumieni?, mɨpaɨ mutayɨkɨ: “Hakewa ne nemeyemie xeme xepɨkayɨwawe mana xemɨyehukɨ”».
JOH 8:23 Ketsutsi mɨpaɨ katiniwarutahɨawe: —Xeme 'ena xepɨmiemete. Nepɨta taheima nekanimiemetɨni. Xeme 'ena kwiepa xepɨmiemete. Ne 'ena kwiepa nepɨkamieme.
JOH 8:24 'Ayumieme yanepɨtixe'utahɨawixɨ xemɨkwinikɨ tita 'axaxemɨteyurietsie xetewiyatɨ. Xɨka yuri xekate'uta'erieni kename ne nehɨkɨ, xekanikwikuni tita 'axaxemɨteyurietsie xetewiyatɨ.
JOH 8:25 Mɨkɨ mɨpaɨ mekatenita'iwawiya: —¿'Ekɨ kemɨ'ane pepɨyɨane? Ketsutsi mɨpaɨ katiniwaruta'eiya: —Yemekɨ nepɨhɨkɨ tita tsutɨapai nemɨtixekuxaxatɨwa.
JOH 8:26 Waɨkawa nekatinexeiyani xehepaɨtsita nemɨtikuxatanikɨ, xehetsie nemɨtiuhɨpanikɨ. 'Iya mɨnetsiheyenɨ'a matsi yuri kanaineni. Tita nemɨtiu'eni 'iya yahainekaku, mɨkɨ nepɨtiwataxatɨani kwiepa memɨtama.
JOH 8:27 Mɨkɨ 'atsimepɨkatehetima yu'ukiyari mɨwakuxaxatɨwakaikɨ.
JOH 8:28 Hikɨ Ketsutsi 'ayumieme mɨpaɨ kaniutayɨni: —Kepauka xemenutihana Yuri Tewi, 'anari xepɨtehetimani ne nemɨhɨkɨkɨ, nekɨmana 'atsinemɨkatiyurienekɨ. Ne'ukiyari mɨnetiu'ɨkitɨa hepaɨ, mɨpaɨ xeikɨa nepɨtikuxata.
JOH 8:29 Mɨkɨ meta, 'iya mɨnetsiheyenɨ'a nehamatɨa kaniuyeikani. Pɨkanetsi'uku'eiri nexaɨtame, neheyemekɨ yanemɨtiyurienekɨ tita mɨtinake.
JOH 8:30 'Ipaɨ tikuxatakaku yumɨiretɨ yuri mekateniuta'erieni hetsiena.
JOH 8:31 Ketsutsi 'ayumieme mɨpaɨ katiniwarutahɨawe mɨkɨ yuri memɨte'ita'eriri huriyutsixi: —Xeme neniukitsie xetewiyatɨ xɨka xeyuhayewa, yurikɨ nehetsɨa miemete teyɨ'ɨkitɨwamete xekanakɨnikuni.
JOH 8:32 Tita yuri mɨraine xekanetimaikuni. Mɨkɨ yuri maine kanixetixɨnamɨkɨ.
JOH 8:33 Mɨkɨ mɨpaɨ mekatenita'eiya: —Tame 'Apɨrahami tekanixiɨyarimamatɨni. Xeimetsie mieme waɨriyarika tepɨkate'uti'uximayataxɨ hatsuaku. ¿Kehepaɨtɨtɨ pehaine, xexɨxɨnitɨ xepakɨne pemaine?
JOH 8:34 Ketsutsi mɨpaɨ katiniwaruta'eiya: —Yurikɨ mɨpaɨ nekanaineni, yunaitɨ 'axamemɨteyurie waɨriyarika mekateni'uximayaka tita 'axamɨti'anetsie mieme.
JOH 8:35 Merikɨte, waɨriyarika mɨti'uximaya yuheyemekɨ 'apɨka'uka kiekame hepaɨ. Kiekame nu'aya pɨta 'apuka yuheyemekɨ.
JOH 8:36 'Ayumieme xɨka nu'aya xe'utixɨna, xeme yurikɨ xexɨxɨnitɨ xekanakɨnikuni.
JOH 8:37 Ne nepɨtimate 'Apɨrahami xemɨxiɨyarimama. Peru xekanenikuwautɨweni xenetsimienike neniuki yuhetsie xemɨkapitɨakɨ.
JOH 8:38 Tita nemɨtiuxei ne'ukiyari hetsɨa yanepɨtikuxata. Xemetsɨari tita xemɨte'u'eni yu'ukiyari hetsɨa yaxepɨtekahu.
JOH 8:39 Mɨkɨ mɨpaɨ mekatenita'eiya: —Tame ta'ukiyari 'Apɨrahami kanihɨkɨtɨni. Ketsutsi mɨpaɨ katiniwarutahɨawe: —'Apɨrahami xɨka xexiɨyarimamatɨnike, 'Apɨrahami kemɨtiyurienekai mɨpaɨ xepɨteyuriekakeyu.
JOH 8:40 Matsi hikɨ xepɨnetsikuwautɨwe xenetsimienike. Ne tewitɨtɨ tita yuri mɨraine nemɨxekuxaxatɨwa kenemɨtiu'enaxɨ Kakaɨyari hetsɨa. 'Apɨrahami mɨpaɨ pɨkatiuyuri.
JOH 8:41 Xeme xepaapa kemɨtiyuriene mɨpaɨ xekateniyurieka. Mɨkɨ mɨpaɨ mekatenitahɨawe: —Tame tamaama kemɨ'ane mɨkakɨnayatɨkai, mɨkɨ pɨkatapaapa. Xeime ta'ukiyari xeikɨa tekanexeiyani Kakaɨyaritɨme.
JOH 8:42 Ketsutsi mɨpaɨ katiniwarutahɨawe: —Xɨka Kakaɨyari xe'ukiyaritɨnike, ne xekaneninaki'eriekakeyu. Ne Kakaɨyari hetsɨa nekaneyeyani nekaninuaniri. Mɨkɨ meta, nekɨmana nepɨkanua. 'Iya pɨta kaneneyenɨ'ani.
JOH 8:43 ¿Titayari xekateheitimaiwawe tita nemɨtixata? Xemɨkayuwaɨriyakɨ neniuki xemɨ'enieni.
JOH 8:44 Xeme yu'ukiyari hetsɨa xekanimiemetetɨni Kauyumarie hetsɨa. Xekaniyuwaɨriyani yaxemɨteyuriekakɨ tita mɨtiheiwe'erie xe'ukiyari. Mɨkɨ meripaitɨ katiniyumemiwani. Tita yuri mɨrainetsie tiwiyatɨ 'apɨka'uwe, tita yuri mɨraine mumawekɨ hetsiena. Kepauka 'itarikakɨ mɨtikuxata, yɨkɨmana katinikuxatani mɨti'itawakɨ, memɨte'itawa mɨwa'ukiyarikɨ.
JOH 8:45 Ne pɨta yuri nemainekɨ, yuri xepɨkanete'eririe.
JOH 8:46 ¿Kemɨ'ane xeme nehetsie pɨrahɨani, kename 'axanetiuyuri 'utaitɨ? Mexɨka yuri nehaineni, ¿titayari yuri xekanete'eririe?
JOH 8:47 Kemɨ'ane Kakaɨyari hetsɨa mɨmieme kani'enani tita Kakaɨyari mɨtikuxata. 'Ayumieme xepɨkaheu'enana, Kakaɨyari hetsɨa xemɨkamiemetekɨ.
JOH 8:48 Huriyutsixi mɨpaɨ mekatenita'eiya: —'Aixɨa tekaniutiyuaneni kename 'ekɨ tsamariyatanaka pehɨkɨ, kename kakaɨyari 'axamɨ'ane metsinɨ'ɨ.
JOH 8:49 Ketsutsi mɨpaɨ katiniwaruta'eiya: —Ne kakaɨyari 'axamɨ'ane pɨkanetsinɨ'ɨ. Matsi ne'ukiyari 'aixɨa mɨrahɨawarɨwanikɨ neputaine, xemetsɨ pɨta 'axanemɨrahɨawarɨwanikɨ xeputiyuane.
JOH 8:50 Ne tixaɨtɨ nepɨkatikuwaune witsinemɨtikɨhɨawarɨwanikɨ. Xewitɨ pɨta 'akaniuyeikani mɨtikuwaune witsinemɨtikɨhɨawarɨwanikɨ, kemɨ'ane 'itsɨkame hepaɨ mɨwa'inɨata, mɨkɨ xeikɨa kanihɨkɨtɨni.
JOH 8:51 Yurikɨ mɨpaɨ nekanaineni, xɨka tewi neniukitsie yatikamieni, hatsuaku pɨkamɨni.
JOH 8:52 Huriyutsixi mɨpaɨ mekatenitahɨawe: —Hikɨrixɨa tepɨtehetima kakaɨyari 'axamɨ'ane mɨmetsinɨ'ɨ. Kamɨ 'Apɨrahami kaniumɨni, meta Kakaɨyari niukametemama mekaniukwini. 'Ekɨtsɨ mɨpaɨ pekanaineni, xɨka tewi neniukitsie yatikamieni, hatsuaku pɨkamɨni.
JOH 8:53 ¿Kamɨtsɨ 'ekɨ matsi waɨkawa petimariwe keyuri tapaapa 'Apɨrahami? Mɨkɨ kaniumɨni, meta Kakaɨyari niukametemama mekaniukwini. ¿Ketita 'ekɨ peti'a'erie?
JOH 8:54 Ketsutsi mɨpaɨ katiniwaruta'eiya: —Xɨka ne witsinehainenike nehepaɨtsita, tixaɨtɨ pɨkatihɨkɨtɨnikeyu witsinetikɨhɨawarɨwatɨ. Ne'ukiyari kanihɨkɨtɨni kemɨ'ane witsimaine nehepaɨtsita. Xeme yaxemutiyuane kename xekakaɨyari.
JOH 8:55 Matsi xepɨkaheitimaiwawe. Netsɨ pɨta nekanimaika. Xɨka nehainenike kename neka'imate, xehepaɨ neti'itawatɨ nepayanikeyu. Peru matsi nekanimaika, niukieyatsie yanepɨtikamie.
JOH 8:56 Xepaapa 'Apɨrahami kwinimieme katiniyutemawiekaitɨni netukari ha'eriwatɨ mixeiyakɨ. 'Ixeiyaka, kaniyukatemawieni.
JOH 8:57 Huriyutsixi 'ayumieme mɨpaɨ mekatenitahɨawe: —'Ekɨ huta tewiyari heimana tamamata wiyari 'akuxi pepɨkahexeiya. ¿Kepetixei 'Apɨrahami?
JOH 8:58 Ketsutsi mɨpaɨ katiniwarutahɨawe: —Yurikɨ mɨpaɨ nekanaineni, 'Apɨrahami katinuiwawekaku 'akuxi, 'anekaniuyeikani ne.
JOH 8:59 Hikɨ 'ayumieme tetexi mekaniutitɨkɨ me'ituaxake. Ketsutsi kaniyuti'awieta, tuki kuraruyarita kaniwayeyani watsata 'umietɨ.
JOH 9:1 Hikɨ mana 'uyemietɨ tewi kaniuxeiya kaheunieretɨ mutinuiwaxɨ.
JOH 9:2 Teyɨ'ɨkitɨwametemama mɨpaɨ mekatenita'iwawiya: —Ti'ɨkitame, ¿kepaikɨ 'axapɨtiuyuri, 'ikɨ 'axatiuyuri, paapamama nutsu 'axamepɨte'uyuri, kaheunieretɨ mutinuiwaxɨkɨ?
JOH 9:3 Ketsutsi mɨpaɨ katiniwaruta'eiya: —'Ikɨ 'axamɨtiuyurikɨ pɨka'ane, meta paapamama 'axamemɨte'uyurikɨ pɨka'ane. Matsi Kakaɨyari kemɨtiyurieni hetsiena mɨmatsiɨkɨrekɨ pɨta kani'aneni.
JOH 9:4 Kaneuyeweka 'iya mɨnetsiheyenɨ'a kemɨti'uximaya, yanemɨtiyurienenikɨ ne 'uhekɨakaku 'akuxi. Yɨriya 'ukanamieni kepauka xewitɨ mɨkayɨwe mɨti'uximayaka.
JOH 9:5 Mexi kwiepa ne'uyeikani, nekanihekɨariyatɨni kwiepa memɨtama wahetsiemieme.
JOH 9:6 Mɨpaɨ 'utayɨka kaniuta'aɨtsikawieni kwiepa, haxu 'uhawiyaka yu'aɨrikakɨ, hɨxitana haxu kanewiriexɨani,
JOH 9:7 mɨpaɨ katinitahɨawe: —Kenemie, kene'ɨtaimamie haa mayema Tsiruhe mɨrakutewatsie (taniukikɨ Mutanɨ'arie mɨrakutewatsie). Hikɨ mana kaneyani, kananaka'ɨtaima, heunieretɨ 'ayaka, kanakunuani.
JOH 9:8 Hikɨ 'aurawatari, mɨkɨri meripaitɨ memixeiyakai rimutsinawieneme, mɨpaɨ mekaniutiyuanekaitɨni: «¿'Ikɨ katihɨkɨ mana mutiyeixakai mɨtiku'iwawakai?»
JOH 9:9 Hipatɨta mete'utiyuanekai: «Huu, mɨkɨ pɨhɨkɨ». Hipatɨta mete'utiyuanekai: «Hawaikɨ, hepaɨna pɨtiyuxexeiya xeikɨa». Peru mɨkɨ mɨpaɨ putainekai: «Ne nepɨhɨkɨ».
JOH 9:10 Hikɨ mɨpaɨ mekatenita'iwawiya: —¿Kehepaɨ petiunieritɨarie?
JOH 9:11 Mɨkɨ mɨpaɨ katiniwaruta'eiya: —Mɨkɨ tewi Ketsutsi mɨtitewa haxu 'uhawiyaka nehɨxita kanenawiriexɨani, hikɨ mɨpaɨ kanetiniutahɨawe: “Tsiruhe kenemie kene'ɨtaimamie”. Neheyaka ne'anaka'ɨtaimaka nepanutanierixɨ.
JOH 9:12 Mɨkɨ mɨpaɨ mekatenita'iwawiya: —¿Hakewari mɨkɨ? Mɨkɨ mɨpaɨ katiniwaruta'eiya: —'Atsinepɨkatimate.
JOH 9:13 Merikɨtsɨ paritseutsixi wahetsɨa mekaneiwitɨni mɨkaheunierekai.
JOH 9:14 'Uxipiya tukari kanihɨkɨtɨkaitɨni kepauka Ketsutsi haxu muhawiyaxɨ menutanieritɨa.
JOH 9:15 'Ayumieme tawari paritseutsixi mekanita'iwawiya kehepaɨ ranutanieritɨariekai, mɨkɨ mɨpaɨ katiniwarutahɨawe: —Haxu pɨnetsi'awiriexɨa nehɨxita, nepanaka'ɨtaimaxɨ, hikɨ nepeuniere.
JOH 9:16 Paritseutsixi hipatɨ 'ayumieme mɨpaɨ mekaniutiyuanekaitɨni: «Xɨari 'iya tewi Kakaɨyari hetsɨa pɨkamieme, 'uxipiya 'inɨariyaritsie yamɨkatikamiekɨ». Hipatɨta mete'utiyuanekai: «¿Kehepaɨ tiyɨwe tewi 'axatiyurienetɨ 'inɨari 'ipaɨ 'aneneme mɨwewienenikɨ?». Hixɨata mepuyutsanaxɨ.
JOH 9:17 'Ayumieme tawari mɨkaheunierekai mɨpaɨ mekateniuta'iwawiya: —¿Kepe'utaine 'ekɨ mɨkɨ hepaɨtsita mɨmatsi'anutanieritɨa? Mɨkɨ mɨpaɨ katiniwaruta'eiya: —Kakaɨyari niukameya kanihɨkɨtɨni.
JOH 9:18 Peru huriyutsixi yuri mepɨkate'eriekai kename kaheunieretɨ 'anutanieritɨariekai, hikɨri meunierekaikɨ, 'arikeke yuri mepɨte'uta'eri manutanierixɨ paapamama mewarutahɨawekake,
JOH 9:19 mɨpaɨ mekateniwaruta'iwawiya: —¿'Ikɨ tixeniwe, xeme hepaɨtsitana mɨpaɨ xemutiyuane kename kaheunieretɨ 'utinuiwaxɨ? ¿Keyɨanetɨ hikɨ peuniere?
JOH 9:20 Paapamama mɨpaɨ mekateniwaruta'eiya: —Tame tepɨtemate 'ikɨ taniwe pɨhɨkɨ kaheunieretɨ mutinuiwaxɨ.
JOH 9:21 Matsi hikɨ keyɨanetɨ meuniere 'atsitepɨkatemate, kepaikɨ menutanieritɨa 'atsitepɨkatemate. Mɨkɨ xekeneuta'iwawiya, 'ekaniyumaikari, yɨkɨmana kaniyutaxatamɨkɨ.
JOH 9:22 Paapamama mɨpaɨ mekaniutiyuanekaitɨni huriyutsixi memɨwamakarɨkaikɨ. Huriyutsixi meyu'enieka mɨpaɨ mekateniyɨkɨhɨawekaitɨni, kename xɨka xewitɨ yutahekɨatake Kɨritsitutsie tiwiyatɨ, tukita kapitɨarienikekai.
JOH 9:23 'Ayumieme paapamama mekaniutiyuani: «'Ekaniyumaikari, xekeneuta'iwawiya mɨkɨ».
JOH 9:24 Hikɨ hutarieka mekanitahɨawe tewi mɨkaheunierekai, mɨpaɨ mekatenitahɨawe: —'Aixɨa keneutayɨki Kakaɨyari hepaɨtsita. Tame tepɨtemate mɨkɨ tewi 'axakatiniyuruwametɨni.
JOH 9:25 Mɨkɨ mɨpaɨ katiniwaruta'eiya: —'Atsinepɨkatimate xɨka 'axatiyurieneni. 'Ikɨ xeikɨa ne nekatinimaika. Nepɨkaheunierekai, hikɨrixɨa nepeuniere.
JOH 9:26 Hikɨ mɨpaɨ mekatenitahɨawe: —¿Kemetsi'uyuri, kemetiunieritɨa?
JOH 9:27 Mɨpaɨ katiniwaruta'eiya: —Meripaitɨri yanepɨtixe'utahɨawixɨ, xepɨkanetsihanu'eni. ¿Ke'akuxi tawari xete'enaku? ¿Xemeta teyɨ'ɨkitɨwametemama xete'akɨniku?
JOH 9:28 Hikɨ mɨkɨ 'axamepɨte'itahɨawixɨ mɨpaɨ mete'ikɨhɨawetɨ: —'Ekɨtsɨ hetsɨana mieme tiyɨ'ɨkitɨwame pepɨhɨkɨ. Tame pɨta Muitsexi hetsɨa miemete teyɨ'ɨkitɨwamete tepɨhɨkɨ.
JOH 9:29 Tame tekatenimaika Kakaɨyari Muitsexi mutahɨawixɨkɨ. Matsi 'ikɨ hepaɨtsita 'atsitepɨkatemate hakewa memieme.
JOH 9:30 Tewi mɨpaɨ katiniwaruta'eiya: —Kamɨ, 'ikɨ pɨmariwe. Xeme 'atsixepɨkatemate hakewa memieme, peru pɨnetsi'anutanieritɨa ne.
JOH 9:31 Tepɨtemate Kakaɨyari mɨkawa'enie 'axamemɨteyurie. Matsi xɨka tewi Kakaɨyari 'ayexeiyani, xɨka yatikamieni tita mɨtinake Kakaɨyari, mɨkɨ kani'eniekamɨkɨ.
JOH 9:32 Tsutɨa paitɨ meta hikɨke pɨkahaxaxatsiwa kename xewitɨ tewi 'anutanieritɨa kemɨ'ane kaheunieretɨ mutinuiwaxɨ.
JOH 9:33 Xɨka 'ikɨ Kakaɨyari hetsɨa kamiemetɨnike, pɨkayɨwenikeyu 'atsimɨtiuyurieni.
JOH 9:34 Mɨkɨ mete'ita'ei: —'Ekɨ 'axapetiyurienetɨ pemutinuiwaxɨ yemekɨ. ¿'Ekɨta tame petatita'ɨkitɨani? Hikɨ takwa mekanenuyehɨani.
JOH 9:35 Merikɨtsɨ kaniu'ena Ketsutsi kename takwa mehenuyehɨakai. 'Itaxeiyaka mɨpaɨ katinita'iwawiya: —'Ekɨ yuri peti'erie kemɨ'ane Yuri Tewi mɨhɨkɨtsie.
JOH 9:36 Mɨkɨ mɨpaɨ katinita'eiya: —Ti'aitame, ¿kemɨ'ane pɨhɨkɨ yuri nemɨtita'erienikɨ hetsiena?
JOH 9:37 Ketsutsi mɨpaɨ katinitahɨawe: —Pepixeiri, kemɨ'ane 'ahamatɨa mɨtikuxata, mɨkɨ kanihɨkɨtɨni.
JOH 9:38 Mɨkɨ mɨpaɨ kaniutayɨni: —Yuri nepɨti'erie, Ti'aitame 'aku. Hikɨ 'ukatunumakeka nenewieri kanipitɨani.
JOH 9:39 Hikɨ Ketsutsi mɨpaɨ kaniutayɨni: —Ne nekaninuani 'ena kwiepa nemɨwapatakɨ, memɨkaheuneniere memanutanenierenikɨ, memeuneniere mekaheunenieretɨ memakɨnekɨ.
JOH 9:40 Merikɨtsɨ paritseutsixi hipatɨ hamatɨana memu'uwakai mekaniu'enanani. Mɨpaɨ mekatenitahɨawe: —¿Tamerita tekateheuneniere?
JOH 9:41 Ketsutsi mɨpaɨ katiniwaruta'eiya: —Xɨka xekaheunenierenike, mɨkɨkɨ xehetsie pɨkarahɨiwanikeyu. Matsi hikɨ mɨpaɨ xeputiyuane kename xeheuneniere. 'Ayumieme 'apuwe xehetsie kemɨrahɨiwa.
JOH 10:1 »Yurikɨ mɨpaɨ nekanaineni, kemɨ'ane kitenie mɨkaheutahani muxatsi wakuraruta, huteikɨ pɨta meutimake, mɨkɨ tinawayame kanihɨkɨtɨni katininawamɨkɨ.
JOH 10:2 Kemɨ'ane kitenie meutahani, muxatsi kaniwahɨwemetɨni.
JOH 10:3 Kitenie tihɨweme katineiyepiriwani. Muxatsi niukieya mekani'enieka, yuxexuime pɨwarahɨawe yumuxatsi kememɨtetetewa, kaniwaranuyewitɨni wakuraruta.
JOH 10:4 Kepauka yumuxatsima yunaime mɨwaranuyewitɨni, mɨkɨ 'anuyekaitɨ kaniumieni. Muxatsi 'utɨmana mekaniweiyani niukieyatsie memimatekɨ.
JOH 10:5 Peru kuyeikame mepɨka'anukuweiya, mekaniyuta'unakuni pɨta ku'uwamete waniukitsie memɨkawamatekɨ».
JOH 10:6 Ketsutsi 'ikɨ 'ɨkitsika xatatɨ mɨpaɨ katiniwakuxaxatɨwakaitɨni, mɨkɨ 'atsimepɨkatehetima tita mɨtihɨkɨtɨkai mɨtiwakuxaxatɨwakai.
JOH 10:7 'Ayumieme tawarita mɨpaɨ kaniutayɨni Ketsutsi: «Yurikɨ mɨpaɨ nekanaineni, ne muxatsi nekaniwakitenietɨni.
JOH 10:8 Yunaitɨ memu'axɨa nekanuawekaku 'akuxi ne, tenawayamete mekanihɨkɨtɨni, mekaniwanawatɨweni. Peru muxatsi mepɨkawaru'eni.
JOH 10:9 Ne nekanikitenietɨni, nekɨmana xɨka tewi heutahani, kanitawikweitsitɨariemɨkɨ. Kaneutahamɨkɨ kaniwayeyeikamɨkɨ, makutsiɨraɨye kanetamariekaxɨamɨkɨ.
JOH 10:10 Tinawayame wanawamɨtɨ wakwimɨtɨ wata'unamɨtɨ xeikɨa kani'axeni. Ne pɨta nekaninuani tukari memexeiyanikɨ, 'anayuhayewame memexeiyanikɨ.
JOH 10:11 »Ne muxatsi wahɨweme 'aixɨa nemɨtiuka'iyari nekanihɨkɨtɨni. Muxatsi wahɨweme 'aixɨa mɨtiuka'iyari yutukari kaniyetuani muxatsi wahetsiemieme.
JOH 10:12 Ti'iwame, kemɨ'ane muxatsi mɨkawahɨweme, muxatsi mɨkawakutsiyari, mɨkɨ kepauka 'ɨrawe mɨxeiya 'a'amiekame, mɨkɨ muxatsi kaniwaruku'e'eiriwani kaniyuta'unani. 'Ɨrawe kaniwatiwiyamɨkɨ kaniwataxɨriexɨamɨkɨ.
JOH 10:13 Mɨkɨ mɨti'iwamekɨ xeikɨa muxatsi wahekɨ pɨkayu'iyaritɨa, puyuta'una.
JOH 10:14 »Ne muxatsi wahɨweme 'aixɨa nemɨtiuka'iyari nekanihɨkɨtɨni, nemuxatsima nepɨwamate, mɨkɨta menetemate,
JOH 10:15 yaxeikɨa ne'ukiyari mɨnetimate hepaɨ, neta ne'ukiyari kenemɨtimate hepaɨ. Netukari nekaniyetuani muxatsi wahetsiemieme.
JOH 10:16 Hipameta muxatsi nepɨwarexeiya 'ikɨ xeikuraruyarita memɨkamiemete. Kaneuyeweka mɨkɨta nemɨwa'atɨanikɨ. Neniuki mekani'eniekuni, xeikuraruyari mehexeiyatɨ mekanakɨnikuni meta muxatsi wahɨweme xeime xeikɨa mehexeiyatɨ.
JOH 10:17 'Ayumieme ne'ukiyari kaneninaki'erieka netukari nemɨyetuakɨ tawari nemitanaki'erienikɨ.
JOH 10:18 Xewitɨ pɨkanetsinawairieni, nekɨmana pɨta nekaniyetuamɨkɨ. Heitserie nekanexeiyani nemiyetuanikɨ, heitserie nerexeiyata tawari nemitanaki'erienikɨ. 'Ipaɨ ne'ukiyari kanetiniu'aitɨani».
JOH 10:19 Merikɨtsɨ tawari hixɨata mekaniyutsana huriyutsixi 'ikɨ niukieyakɨ.
JOH 10:20 Yumɨiretɨ mɨkɨ mɨpaɨ mekaniutiyuanekaitɨni: «Kari kakaɨyari 'axamɨ'ane kaninɨka, pɨkayumate. ¿Titayari xete'i'enie?»
JOH 10:21 Hipatɨta mete'utiyuanekai: «'Ikɨ niukieya, kakaɨyari 'axamɨ'ane minɨ'ɨ kapɨniukieya. ¿Kakaɨyari 'axamɨ'ane ketiyɨwe mɨwaranutanieritɨani memɨkaheuneniere?»
JOH 10:22 Merikɨtsɨ 'ana 'ixɨarari kanaye'ani kepauka tuki mu'itiyatsie Kerutsareme. 'Ana kaniuhaɨtɨkaitɨni,
JOH 10:23 Ketsutsi tuki kuraruyarita kaniyeyeikakaitɨni Tsarumuni kiiya hetsie meukuwewiyakai hetɨa.
JOH 10:24 Hikɨ huriyutsixi 'auriena mekaniyukuxeɨrieni, mɨpaɨ mekatenitahɨawe: —¿Kepaɨmexɨa pepɨtatsi'iyarimɨtsitɨaka? 'Ekɨ xɨka Kɨritsitu pehɨkɨtɨni, heitseriemekɨ ketatineutaxatɨa.
JOH 10:25 Ketsutsi mɨpaɨ katiniwaruta'eiya: —Yanepɨtixe'utahɨawixɨri, yuri xepɨkate'erie. 'Ikɨ tita nemɨtiyuriene ne'ukiyari hetsɨa nemiemetɨtɨ, mɨkɨ nehepaɨtsita katinihekɨatani.
JOH 10:26 Matsi xeme yuri xepɨkate'erie, nemuxatsi wahetsie xemɨkamiemetekɨ.
JOH 10:27 Nemuxatsi mepɨnetsi'enie, neta nepɨwamate, mekaneniuweiyani.
JOH 10:28 Tukari mɨkaxɨwe nekaniwapitɨaka. Hatsuakuri mepɨkata'unarieni. Xewitɨ pɨkawatiwiya netsinawairienike nemamatsie.
JOH 10:29 Ne'ukiyari mɨkɨ mɨnetsiyetuiri, mɨkɨ yemekɨ kanitɨrɨkaɨyeni, hipatɨ yunaitɨ mekatɨrɨkawikaku. Xewitɨ pɨkayɨwe mɨwatiwiya 'inawairienike ne'ukiyari mamayatsie.
JOH 10:30 Ne ne'ukiyari hamatɨa tekanitaxewini.
JOH 10:31 Hikɨ huriyutsixi tawari tetexi mekaniutitɨkɨ me'ituaxake.
JOH 10:32 Ketsutsi mɨpaɨ katiniwarutahɨawe: —Kamɨ waɨkawa nepɨxe'uxeitsitɨa 'uximayatsika 'aixɨa mɨ'anene ne'ukiyari hetsɨa mɨmieme. ¿Ke'aneme 'uximayatsikakɨ xepɨnetsituaxa?
JOH 10:33 Huriyutsixi mɨpaɨ mekatenita'eiya: —'Uximayatsika 'aixɨa mɨ'anekɨ tepɨkamatsituaxa, 'axapemutainekɨ pɨta tepɨmatsituaxa. 'Ekɨ tewi pehɨkɨtɨtɨ Kakaɨyari peme'ayeitɨwakɨ.
JOH 10:34 Ketsutsi mɨpaɨ katiniwaruta'eiya: —Tamɨ mɨpaɨ kare'uxa xe'inɨari niukiyaritsie: “Ne mɨpaɨ nepɨtixekɨhɨawe: Xeme xepɨmamariwawe”.
JOH 10:35 Xɨkari memɨmamariwawe tiwaruterɨwa mɨkɨ wahetsɨa munua Kakaɨyari niukieya, mɨkɨ 'utɨarika xɨka kayɨweni mayeyeitɨarienikɨ,
JOH 10:36 'iya ne'ukiyari mipataxɨ yuhetsiemieme, meta kwiepa meiyenɨ'a, xeme hepaɨtsitana mieme xeputiyuane kename 'axa'utaine mɨpaɨ nemutayɨkɨ: “Kakaɨyari nu'aya nekanihɨkɨtɨni”.
JOH 10:37 Xɨka yanekatiyurieneni ne'ukiyari kemɨtiyuriene, yuri xepɨkanete'eririeka.
JOH 10:38 Peru xɨka yanetiyurieneni, tsepa yuri xemɨkanete'eririe, tita nemɨtiyurienetsie pɨta yuri xeketene'erieka mɨpaɨ xemɨtehetimanikɨ kename ne'ukiyari nehetsie tiwiya, neta ne'ukiyari hetsie netiwiya.
JOH 10:39 Hikɨ tawari mekanikuwautɨwekaitɨni me'iwiyake, mɨkɨ kaneyani meka'iwiyawekaku.
JOH 10:40 Merikɨtsɨ Ketsutsi kaneyani tawari Kurutani 'anutaɨye hakewa Wani meripaitɨ mɨre'ɨyanekai, mana kaniyuhayewa.
JOH 10:41 Yumɨiretɨ hetsɨana mekani'axekaitɨni, mɨpaɨ mekaniutiyuanekaitɨni: «Wani 'inɨari pɨka'uwewi, peru naime kemɨtikuxatakai Wani 'ikɨ tewi hepaɨtsita, yuri kanainekaitɨni».
JOH 10:42 Mana yumɨiretɨ yuri mekateniuta'erieni hetsiena.
JOH 11:1 Merikɨtsɨ tewi katinekuyekaitɨni Ratsaru titewatɨ, Wetaniya mekatei, Mariya kiekariena meta Marita mɨ'iwayatɨkai.
JOH 11:2 Mariya kanihɨkɨtɨkaitɨni kemɨ'ane Ti'aitame witsimu'ɨa mukawiri, ketateya mukawatsiɨxaxɨ yɨkɨpakɨ. 'Iwaya Ratsaru katinekuyekaitɨni.
JOH 11:3 Hikɨ 'iwamama 'ukari niuki Ketsutsi mekanenɨ'airieni mɨpaɨ me'utiyuatɨ: «Ti'aitame neuxei, 'iya kemɨ'ane peminaki'erie katinikuyeni».
JOH 11:4 Ketsutsi 'u'enaka mɨpaɨ kaniutayɨni: «'Ikɨ kwiniya mɨmɨnikɨ pɨka'ayumieme, matsi Kakaɨyari witsi'anetɨ mayeitɨarienikɨ pɨhɨkɨ, Kakaɨyari Nu'aya witsi'anetɨ mayeitɨarienikɨ mɨkɨ kwiniyakɨ».
JOH 11:5 Ketsutsi kaniwanaki'eriekaitɨni Marita, 'iwayata Mariya meta Ratsaru.
JOH 11:6 Mɨyatɨtɨ kepauka mu'enaxɨ kename Ratsaru rekuyekai, mana kaniyuhayewa huta tukari 'akuxi hakewa meyeikakai.
JOH 11:7 'Arikeke mɨpaɨ katiniwarutahɨawe teyɨ'ɨkitɨwamete: —Kɨmɨ tawari Kureya tepuhu.
JOH 11:8 Teyɨ'ɨkitɨwamete mɨpaɨ mekatenitahɨawe: —Ti'ɨkitame, xike huriyutsixi mepɨmetsikuwautɨwekai memetsituaxake. ¿Tawari petimie mana?
JOH 11:9 Ketsutsi mɨpaɨ katiniwaruta'eiya: —¿Tamɨ tamamata heimana huta hurayari karexeiya xeitukari? Xɨka hekɨaripa 'uyeikani tewi, pɨkati'ɨkamɨre, 'ena kwiepa mieme hekɨariya mɨxeiyakɨ.
JOH 11:10 Xɨka yɨwipa 'uyeikani pɨtiketamɨre hekɨariya mɨmawekɨ hetsiena.
JOH 11:11 Mɨpaɨ 'utayɨka, tawarita mɨpaɨ katiniwarutahɨawe: —Teminaki'erie Ratsaru kanekutsuni, peru ne nepɨmie nemenutahɨtɨanikɨ.
JOH 11:12 Teyɨ'ɨkitɨwamete mɨpaɨ mekatenitahɨawe: —Ti'aitame, xɨka hekutsuni 'aixɨa reka'erietɨyani.
JOH 11:13 Ketsutsi mɨpaɨ putayɨ Ratsaru memɨkaikɨri, peru mɨkɨ kutɨ pe'uxipie haineme mepɨ'eriekai.
JOH 11:14 Hikɨ 'ayumieme Ketsutsi mɨpaɨ katiniwarutahɨawe heitseriemekɨ: —Ratsaru kanemɨkini,
JOH 11:15 mana nemɨkaheyeikakaikɨ ne'iyari 'aixɨa puyɨ xehetsiemieme, yuri xemɨteta'erienikɨ. Peru matsi tepuhu hetsɨana.
JOH 11:16 Hikɨ Tumaxi Kwate mɨtitewakai mɨpaɨ katiniwarutahɨawe hipame teyɨ'ɨkitɨwamete: —Hikɨmɨtɨka tepuhu tameta, hamatɨana temekwinikɨ.
JOH 11:17 Merikɨtsɨ Ketsutsi henuaka mɨpaɨ katiniumarieni kename Ratsaru nauka tukari yuriekairi teukiyapa yekaitɨ.
JOH 11:18 Wetaniya Kerutsareme kanehurakaitɨni, haika kirumeturuyari xeikɨa petewakai.
JOH 11:19 Huriyutsixi yumɨiretɨ mekaniu'axɨani Marita, Mariya wahetsɨa memɨwanɨtɨanikɨ wa'iwa hepaɨtsita.
JOH 11:20 Hikɨ Marita kepauka mɨtiutamari kename Ketsutsi nuaximekai, kaneikunake, peru Mariya kiita kaniyuhayewa.
JOH 11:21 Hikɨ Marita Ketsutsi mɨpaɨ katiniutahɨawe: —Ti'aitame, xɨka 'ena pe'uyeikanike, ne'iwa pɨkamɨnikekai.
JOH 11:22 Peru hikɨ mɨpaɨ nepɨtimate naime kepemɨtitawawirieni Kakaɨyari pɨmetipitɨani.
JOH 11:23 Ketsutsi mɨpaɨ katinitahɨawe: —'A'iwa kananukukemɨkɨ.
JOH 11:24 Marita mɨpaɨ katinita'eiya: —Ne nepɨtimate manukukeni tukari 'aye'ayu kepauka mɨtapare, kepauka memanuku'unitsie.
JOH 11:25 Ketsutsi mɨpaɨ katinitahɨawe: —Ne nekanihɨkɨtɨni wa'uitɨwame, tukari netihɨkɨta. Kemɨ'ane nehetsie yuri mɨti'erie, tsepa mɨmɨki, kanayenierekamɨkɨ.
JOH 11:26 Yunaitɨ memayeneniere, nehetsie yuri memɨte'erie, hatsuakuri mepɨkakwini. ¿'Ipaɨ yuri peti'erie 'ekɨ?
JOH 11:27 Mɨpaɨ katinitahɨawe: —Huu, Ti'aitame. Ne yuri nekatini'erieka 'ekɨ Kɨritsitu pepɨhɨkɨ, 'ekɨ Kakaɨyari Nu'aya kwiepa 'umamiekai pepɨhɨkɨ.
JOH 11:28 Mɨpaɨ 'utayɨka kaneyani, yɨhɨkɨate me'ayetekaku kanitahɨawe yu'iwa Mariya, mɨpaɨ katinitahɨawe 'awie: —Ti'ɨkitame kaninuani, pɨmatsitahɨawe.
JOH 11:29 Mɨkɨ 'u'enaka kwitɨwa kananukukeni, hetsɨana kaneyani.
JOH 11:30 Ketsutsi kiekaritsie pɨkanuawekai 'akuxi, mana 'akuxi kaniutiwekaitɨni Marita menukunakixɨtsie.
JOH 11:31 Hikɨ huriyutsixi Mariya hamatɨa memayetekai kiita, meminɨtɨakai, me'ixeiyaka Mariya kwitɨwa 'anukukeka metɨakɨ, mekaneiweiya, teukiyapa petɨa mana tatsuanike meteku'eriwatɨ.
JOH 11:32 Hikɨ Mariya kepauka munua Ketsutsi manutiwekaitsie, 'ixeiyaka, hetɨana kaniutitunumakeni mɨpaɨ tikɨhɨawetɨ: —Ti'aitame, xɨka 'ena pe'uyeikanike ne'iwa pɨkamɨnikekai.
JOH 11:33 Ketsutsi kepauka mixei Mariya 'utatsuakame huriyutsixi hamatɨana memu'axɨa me'utitsuaname, yu'iyaritsie kaniyumuinanekaitɨni, kaniyu'uximatɨakaitɨni.
JOH 11:34 Mɨpaɨ kaniutayɨni: —¿Hakewa xepeikateukixɨ? Mɨpaɨ mekatenitahɨawe: —Ti'aitame kenaye'a keneuxeiya.
JOH 11:35 Ketsutsi kaniutatsuani.
JOH 11:36 Huriyutsixi 'ayumieme mɨpaɨ mekaniutiyuanekaitɨni: —Neuxei ketinaki'eriekai.
JOH 11:37 Hipatɨ mɨkɨ mɨpaɨ mekaniutiyuanekaitɨni: —'Ikɨ makɨpe manutanieritɨa, ¿katiyɨwekaita Ratsaru mɨmɨnikɨ mɨkapitɨanikekaikɨ?
JOH 11:38 Hikɨ Ketsutsi tawarita yumuinatɨ yu'iyaritsie teukiyapa kaninuani, mɨkɨ terɨ kanihɨkɨtɨkaitɨni, tetekɨ katineunakaitɨni kitenie.
JOH 11:39 Ketsutsi mɨpaɨ kaniutayɨni: —Xekeneuhɨwa tete. Mɨki 'iwaya Marita mɨpaɨ katinitahɨawe: —Ti'aitame, xɨari pukuri'ɨari, nauka tukari panukamie.
JOH 11:40 Ketsutsi mɨpaɨ katinitahɨawe: —¿Mɨpaɨ nekametiutahɨawixɨ, xɨka yuri peti'erieka pekanixeiyamɨkɨ kemɨtimariwe Kakaɨyari?
JOH 11:41 Hikɨ tete mekaneuhɨani. Ketsutsi yuheima heutiniereka mɨpaɨ kaniutayɨni: —Ne'ukiyari, pamɨpariyutsi nekamanipitɨaka pemɨnetsi'u'enikɨ.
JOH 11:42 Netsɨ nepɨtimaikai 'aheyemekɨ pemɨnetsi'enie, matsi teɨteri ne'aurie memɨti'u wahetsiemieme, mɨpaɨ neputayɨ, yuri memɨteta'erienikɨ kename penetsiheyenɨ'a 'ekɨ.
JOH 11:43 Mɨpaɨ 'utayɨka karima kaniutahiwa: —Ratsaru, kenewayeye'a.
JOH 11:44 Hikɨ mɨmɨkikai kaniwayeyani 'ixurikitekɨ 'eimetɨ ketateyatsie mamateyatsie. Yuhɨxie tuwaxakɨ panakɨhɨakai. Ketsutsi mɨpaɨ katiniwarutahɨawe: —Xekeneuxɨna. Xekeneupitɨa mɨyemiekɨ.
JOH 11:45 Hikɨ huriyutsixi yumɨiretɨ Mariya hetsɨa memu'axɨa memunenierixɨ kemɨtiuyuri, yuri mekateniuta'erieni hetsiena.
JOH 11:46 Matsi hipatɨ mɨkɨ paritseutsixi wahetsɨa mekanekɨne, mekateniwaretaxatɨani kemɨtiuyuri Ketsutsi.
JOH 11:47 'Ayumieme mawari wewiwamete tewa'aitɨwamete paritseutsixi wahamatɨa mekaniyukuxeɨrieni meyu'enienike, mɨpaɨ mekateniyutahɨawe: —¿Keteteyurieni? 'Ikɨ tewi waɨkawa 'inɨari katiniyurieneni.
JOH 11:48 Xɨka te'ipitɨaka mɨpaɨ mɨtiyurienenikɨ, yunaitɨ yuri mekatenita'erikuni hetsiena. 'Anari Xumatari mekani'axɨakuni, mepɨtatsinawairieni tuki mɨpatsie, meta tateɨterima mepɨtatsinawairieni.
JOH 11:49 Xewitɨ mɨkɨ Kaipatsi mɨtitewakai, mawari wewiwamete tiwa'aitɨwame mɨhɨkɨtɨkai mɨkɨ wiyaritsie, mɨpaɨ katiniwarutahɨawe: —Xeme 'atsixepɨkatemate.
JOH 11:50 Mɨpaɨ xepɨkatehetimaiwawe matsi 'aixɨa mɨyɨnikɨ tahetsiemieme, xewitɨ tewi mɨmɨnikɨ teɨteri wahetsiemieme, kapa meheuyewenikɨ tateɨterima.
JOH 11:51 Mɨpaɨ pɨka'utayɨ yɨkɨmana, mɨkɨ wiyaritsie mawari wewiwamete tiwa'aitɨwame mɨhɨkɨtɨkaikɨ yakatinikuxatakaitɨni kename Ketsutsi wateɨterima wahetsiemieme mɨnikekai.
JOH 11:52 Mɨkɨ wateɨterima wahetsiemieme xeikɨa pɨkamɨnikekai, matsi pɨmɨnikekai mɨwakuxeɨrienikɨ Kakaɨyari niwemama memeutaxɨriexɨa memɨyutaxewirekɨ.
JOH 11:53 Hikɨ mɨkɨ tukaritsie mekanitsutɨani meyu'enietɨ memimienikɨ.
JOH 11:54 'Ayumieme Ketsutsi teɨteri wahɨxie pɨka'uyeikakairi huriyutsixi watsata. Xeime kwieyaritsie pɨta makumawe 'aurie kaneyani, kiekari 'Epɨraini mɨrakutewatsie. Mana kaniyuhayewa teyɨ'ɨkitɨwamete wahamatɨa.
JOH 11:55 Merikɨtsɨ huriyutsixi wa'ixɨarari Patsikwa mɨtitewa kanahurakaitɨni. Yumɨiretɨ 'etsimɨyeyeutsie kiekatari mekanekɨne Kerutsareme 'ixɨarari katsutɨariewekaku 'akuxi memɨyu'itienikɨ.
JOH 11:56 Ketsutsi mekanikuwautɨwekaitɨni. Tuki kuraruyarita me'aye'utɨ mɨpaɨ mekateniyɨkɨhɨawekaitɨni: «¿Kexeteku'eriwa, xɨka mɨkɨ ha'ixɨaramieni?»
JOH 11:57 Mawari wewiwamete tewa'aitɨwamete meta paritseutsixi mɨpaɨ mekateniuta'aita, xɨka xewitɨ tewi retimanike hakewa meyeika, ketiutaxatake memiwiyakɨ.
JOH 12:1 Hikɨ 'ataxewi tukari heuyewekaku Patsikwa maye'anikɨ, Ketsutsi Wetaniya kaninuani hakewa Ratsaru manukatei, Ketsutsi menukuketɨa mɨkite watsata.
JOH 12:2 Hikɨ mana mekaniwarukuxeɨrieni hamatɨana memɨtekwanikɨ. Marita kaniwaparewiekaitɨni, hamatɨana mematekai, xewitɨ Ratsaru kanihɨkɨtɨkaitɨni.
JOH 12:3 Hikɨ Mariya naaru witsimu'ɨa hɨkɨame waɨkawa mɨraye'axe kane'ɨni, meriyu kiruyari hepaɨ paɨmeme, Ketsutsi ketateyatsie kanikawirieni. Ketateya kaniukawatsiɨxa yɨkɨpakɨ. Naitsarie kiita witsikatiniuye'ɨakaitɨni naarukɨ.
JOH 12:4 Hikɨ teyɨ'ɨkitɨwametemama xewitɨ, Kura 'Itsikariutitanaka, miyetuanikekai, mɨpaɨ kaniutayɨni:
JOH 12:5 —¿Titayariri katiutuiya 'ikɨ witsimu'ɨa haika tsienituyari 'inɨariyarikɨ, temɨwa'ɨitɨanikɨ tixaɨtɨ memɨkatehexeiya?
JOH 12:6 Mɨpaɨ kaniutayɨni tixaɨtɨ memɨkatehexeiya mɨwara'eriwakaikɨ pɨkatixaɨ, matsi mɨtinawayametɨkaikɨ pɨta mɨpaɨ kaniutayɨni. Mɨkɨ watumini maname mahananikɨ mɨhɨritɨariekaikɨ, kaniwati'ɨwekaitɨni muwa memeikamanakai.
JOH 12:7 Ketsutsi mɨpaɨ kaniutayɨni: —Keneuhayewa. Mɨkɨ mɨpaɨ katiniuyurieni neteukiya tukaritsie mieme maye'aximekɨ.
JOH 12:8 Yuheyemekɨ yuhetsɨa xekaniwarexeiyani tixaɨtɨ memɨkatehexeiya. Matsi ne xepɨkanetsihexeiya yuheyemekɨ.
JOH 12:9 Hikɨ huriyutsixi yumɨiretɨ mekateniutamarieni kename muwa Ketsutsi hayekatei, Ketsutsi xeikɨa mepɨkahekuxei, Ratsaru mexeiyakutɨta mɨkite watsata menukuketɨakɨ mekani'axekaitɨni.
JOH 12:10 Hikɨ mawari wewiwamete tewa'aitɨwamete meyu'enieka 'axeikɨa mɨpaɨ mekaniutiyuani kename Ratsaruta memienikekai
JOH 12:11 yumɨiretɨ huriyutsixi kɨmana memekɨkɨ, Ketsutsi hetsie yuri memɨte'uta'erikɨ.
JOH 12:12 Merikɨtsɨ 'uxa'arieka yumɨiretɨ teɨteri 'ixɨaramete mekaniu'enanani kename Ketsutsi 'uhamiekai Kerutsareme.
JOH 12:13 Parapa mamateya me'uhapatɨ mekanekɨne meheinakiyuka, mɨpaɨ mete'uhiwatɨ: —Ketaneutawikweitsitɨa 'aixɨa. —'Aixɨa ketikɨhɨawarɨwani kemɨ'ane Ti'aitame hetsɨa miemetɨtɨ 'umamie hepaɨtsita. —'Aixɨa ketikɨhɨawarɨwani 'Ixaheritsie Ti'aitame hepaɨtsita.
JOH 12:14 Hikɨ Ketsutsi puxu 'utaxeiyaka hetsiena kananutiyerɨni, kemɨre'uxa:
JOH 12:15 «Pepɨkaheumaka, neniwe 'uka Tsiyuni, neuxei, 'ena kaniumieni meti'aitɨwame, puxu temaikɨ hetsie 'anakaitɨ».
JOH 12:16 Teyɨ'ɨkitɨwametemama 'ikɨ mepɨkahetimaiwawekai meripaitɨ. Kepaukake witsi'anetɨ mayeitɨarie Ketsutsi, 'anake mekanaye'erieni mɨpaɨ mɨre'uxakai hepaɨtsitana, mɨpaɨ mɨreye'atɨakaikɨ.
JOH 12:17 Mɨkɨ teɨteri hamatɨana meme'uwakai kepauka Ratsaru mutahɨawixɨtsie mɨwayeyanikɨ teukiyata, kepauka menukuketɨa mɨkite watsata, mɨkɨta mekanihekɨatakaitɨni.
JOH 12:18 'Ayumieme teɨteri mekaneikunake memu'enanakɨ kename 'ikɨ 'inɨari tiuyuri.
JOH 12:19 Hikɨ paritseutsixi mɨpaɨ mekateniyɨkɨhɨawekaitɨni: «Xepɨneniere 'atsitepɨkateyurieni. Kamɨ yunaitɨ kwiepa memɨtama 'utɨmana mekanekɨne».
JOH 12:20 Merikɨtsɨ teɨteri memu'axɨa 'ixɨararipa meyutanenewienike, hipatɨ mɨkɨ mekanikɨriyekutsixitɨkaitɨni.
JOH 12:21 Mɨkɨ Peripe hetsɨa mekaniu'axɨani Wetsairatsie Karereya kwieyaritsie mekatei hetsɨa, mɨpaɨ mekatenita'iwawiya: —Neuxei, Ketsutsi tepeuxeiyaku.
JOH 12:22 Peripe kaneyani, 'Atɨrexi mɨpaɨ katiniutahɨawe, hikɨ 'Atɨrexi Peripe hamatɨa mekanekɨne, mɨkɨ Ketsutsi mɨpaɨ mekateniutahɨawe.
JOH 12:23 Ketsutsi mɨpaɨ katiniwaruta'eiya: —Tukari kanaye'aniri Yuri Tewi nehɨkɨtɨtɨ witsine'anetɨ nemayanikɨ.
JOH 12:24 Yurikɨ mɨpaɨ nekanaineni, xɨka tɨriku 'imɨariyari ka'anukateukieni kwiepa 'ukaweka, yuxaɨta kaniyuhayewa xeikɨa, mexɨka 'anukateukieni, waɨkawa kanititakaimɨkɨ.
JOH 12:25 Kemɨ'ane yutukari mɨnaki'erie kanitatɨmaiyamɨkɨ, matsi kemɨ'ane 'ena kwiepa yutukari mɨ'uxiwe'erie, kanitawikweitsitɨamɨkɨ, tukari mɨkaxɨwe hexeiyatɨ kanayeimɨkɨ.
JOH 12:26 Xɨka tewi neti'uximayatsiriwame 'ayeimɨkɨni, kenetsiheweiya. Hakewa nemeyeikani, manarita kaniuyeikamɨkɨ neti'uximayatsiriwame. Xɨka tewi neti'uximayatsiriwame hɨkɨtɨni, ne'ukiyari 'aixɨa pɨtixeiyani.
JOH 12:27 »Hikɨri ne'iyari kaniyumuinaneni, ¿keri ne'utaineni: “Ne'ukiyari, keneneutawikweitsitɨa 'ikɨ tukaritsie nerainenikeyu”? Matsi hikɨ 'ayumieme nekaninuani 'ena kwiepa.
JOH 12:28 Ne'ukiyari, witsipetikɨhɨawarɨwatɨ kene'ayeitɨa». Hikɨ xewitɨ kaniutaniuni taheima mɨpaɨ 'utaitɨ: «Neri witsinetikɨhɨawarɨwatɨ nepaneyeitɨa, tawarita mɨpaɨ nekatiniyurimɨkɨ».
JOH 12:29 Teɨteri yumɨiretɨ mana memɨti'ukai memu'enana mɨpaɨ mekaniutiyuanekaitɨni, kename tɨranari heyɨ, hipatɨta mete'utiyuanekai, kename niuki tuayame 'itahɨawixɨ.
JOH 12:30 Hikɨ Ketsutsi mɨpaɨ katiniwaruta'eiya: —Mɨkɨ nehetsiemieme pɨka'utaniu, xehetsiemieme pɨta putaniu.
JOH 12:31 Hikɨrixɨa 'ena kwiepa memɨtama kaniwatahɨawimɨkɨ 'itsɨkame, hikɨrixɨa kwiepa memɨtama mɨtiwa'aitɨa takwa kananuyehɨiyamɨkɨri.
JOH 12:32 Peru ne xɨka kwie heima ne'anukuhanieni, yunaime nekaniwarahapamɨkɨ nehepa.
JOH 12:33 Mɨpaɨ kaniutainekaitɨni tihekɨatatɨ kemɨtimierienikekai.
JOH 12:34 Teɨteri 'ayumieme mɨpaɨ mekatenita'eiya: —Tame 'inɨari niukiyari tekaniu'enieni kename Kɨritsitu yuheyemekɨ yuhayewa, ¿ketitayari petiutaine kename heuyewetse Yuri Tewi manukuhanienikɨ pe'utaitɨ? ¿Kemɨ'ane pɨhɨkɨ Yuri Tewi mɨtitewa?
JOH 12:35 Ketsutsi 'ayumieme mɨpaɨ katiniwarutahɨawe: —Yapaɨmexɨa xeikɨa hekɨariya xetsata kaniuyeikamɨkɨ. Mexi hekɨariya xehexeiya xekeneu'uwani, yɨriya kapa xeha'iwakɨ. Kemɨ'ane yɨwipa muyeika 'atsipɨkatimate kemɨtimie.
JOH 12:36 Mexi hekɨariya xehexeiya, yuri xeketene'erieka hekɨariyatsie, hekɨaripa miemete xemakɨnekɨ. Mɨpaɨ katinikuxatakaitɨni Ketsutsi, 'arike heyaka kaniyuti'awieta memɨkaheitaxeiyakɨ.
JOH 12:37 Tsepanetɨ waɨkawa 'inɨarite mɨtiyurienekai wahɨxie, yuri mepɨkate'uta'eri hetsiena.
JOH 12:38 Mɨpaɨ katinaye'ani Kitsariyaxi Kakaɨyari niukameya niukieya mɨpaɨ mutayɨkɨ: «Ti'aitame, ¿kemɨ'ane taniukitsie yuri pɨtiuta'eri, kemɨ'ane Ti'aitame tɨrɨkariyaya puxeiyatsitɨarie?»
JOH 12:39 'Ayumieme mepɨkayɨwawekai yuri memɨteta'erienikɨ, tawarita mɨpaɨ mutayɨkɨ Kitsariyaxi:
JOH 12:40 «Kaniwarakɨpiriya wahɨxita, meta wa'iyari kaniutse'iriya, kapa yuhɨxikɨ me'unenierekɨ, meta yu'iyarikɨ meheitimaixɨanikɨ, kapa mete'uhayewayu 'aixɨa meteheu'eriekame newarayeitɨanikɨ».
JOH 12:41 Mɨpaɨ kaniutayɨni Kitsariyaxi kepauka mixei witsikemɨ'anekai, kepauka hepaɨtsitana mɨtikuxatakai.
JOH 12:42 Peru mɨyatɨtɨ, hipatɨ teɨteri wa'ukiyarima yumɨiretɨ yuri mekateniuta'erieni hetsiena, paritseutsixi mewamakatɨ mepɨkayuhekɨatakai kapa tukita me'anuyeweiyarienikɨ.
JOH 12:43 Waɨkawa kaniwanakekaitɨni teɨteri 'aixɨa memɨtewakɨhɨawenikɨ, 'etsiwa xeikɨa wanakekaku Kakaɨyari pɨta 'aixɨa mɨtiwakɨhɨawenikɨ.
JOH 12:44 Hikɨ Ketsutsi mɨpaɨ katiniuhiwa: —Kemɨ'ane nehetsie yuri mɨti'erie, nehetsie xeikɨa yuri pɨkati'erie, matsi kemɨ'ane mɨnetsiheyenɨ'a hetsie yuri katini'erieka.
JOH 12:45 Kemɨ'ane mɨnetsixeiya, mɨnetsiheyenɨ'ata kanixeiyani.
JOH 12:46 Ne hekɨariya nehɨkɨtɨtɨ kwiepa nekaninuani, yunaitɨ yuri memɨte'erie nehetsie yɨwipa memɨkayuhayewanikɨ.
JOH 12:47 »Xɨka tewi kenemɨtikuxata 'u'enieme, xɨka yakatikayani, ne nepɨka'ixaneta, kwiepa memɨtama newataxanetake nemɨkanuakɨ, kwiepa memɨtama newatawikweitsitɨanike pɨta nemunuakɨ.
JOH 12:48 Kemɨ'ane mɨnetsixani'erie, neniuki mɨka'utanaki'eri, kaneixeiyaniri kemɨ'ane mitaxaneta. Mɨkɨ neniuki kenemutayɨ, mɨkɨ kanitaxanetamɨkɨ, tukari 'aye'ayu kepauka mɨtapare.
JOH 12:49 Ne nekɨmana 'atsinepɨkatikuxata, matsi mɨnetsiheyenɨ'a ne'ukiyaritɨtɨ, kanetiniuta'aitɨani kenemutaineni kenemɨtikuxatani.
JOH 12:50 Ne nekatinimaika tita mɨti'aita, tukari mɨkaxɨwe mɨhɨkɨkɨ. Tita nemɨtikuxata ne, ne'ukiyari kemɨnetiutahɨawixɨ, mɨpaɨ nekatinikuxatani».
JOH 13:1 Merikɨtsɨ Patsikwa 'ixɨarariyari pɨkatsutɨariewekai 'akuxi. Ketsutsi katinimaikaitɨni tukarieya maye'akaikɨri mɨyupatakɨ 'ena kwiepa mɨyemiekɨ yu'ukiyari hetsɨa. Yuhetsɨa miemete kwiepa memu'uwa kemɨtiwanaki'eriekai, 'aye'arɨkamekɨ kaniwanaki'eriekaitɨni.
JOH 13:2 Hikɨtsɨari mekatenikwakaitɨni. Kauyumarie 'ari mɨpaɨ Kura 'Itsikariutitanaka Tsimuni nu'aya katiniu'iyaritɨakaitɨni Ketsutsi mɨyetuanikɨ.
JOH 13:3 Merikɨtsɨ Ketsutsi mɨpaɨ katinimaikaitɨni 'ukiyarieya naime mɨtiyetuiri mamayatsie. Kakaɨyari hetsɨa meyetɨakɨ timaitɨ, meta Kakaɨyari hetsɨa mɨyemiekɨ timaitɨ,
JOH 13:4 kananukukeni mexa 'aurie makatei. Herie mieme yu'ixuriki 'anutihɨnaka watsiɨxame 'anuhurieka kanayɨhɨani.
JOH 13:5 Haa 'akatuaka pateyutsie, kanitsutɨani wahauxinatɨ teyɨ'ɨkitɨwamete waketatetsie, wakawatsiɨxatɨ watsiɨxamekɨ kɨmana mayɨhɨakaikɨ.
JOH 13:6 Hikɨ Tsimuni Pekuru manukatei kepauka munua, mɨkɨ mɨpaɨ katinitahɨawe: —¿Ti'aitame, 'ekɨ neketate petitihauxini?
JOH 13:7 Ketsutsi mɨpaɨ katinita'eiya: —Ne tita nemɨtiyuriene 'atsipepɨkatimate hikɨ, peru 'arikeke pekaneitimaimɨkɨ.
JOH 13:8 Pekuru mɨpaɨ katinitahɨawe: —Hatsuaku pepɨkanetsihauxinani neketatetsie. Ketsutsi mɨpaɨ tita'ei: —Xɨka nekametsihauxinani, nehetsɨa mieme pepɨka'ayani.
JOH 13:9 Tsimuni Pekuru mɨpaɨ katinitahɨawe: —Ti'aitame, neketatetsie xeikɨa pepɨkanetsihauxinani, matsi nemamatetsieta meta nemu'utsieta.
JOH 13:10 Ketsutsi mɨpaɨ katinitahɨawe: —Kemɨ'ane meku'ɨwaxɨ pɨkaheiyehɨwa hauxinarika, yuketatsie xeikɨa. Matsi naitɨ kaneu'itiyaka. Xemerita xekani'itiyatɨkani, peru yunaitɨ pɨkatixaɨ.
JOH 13:11 Mɨkɨri kanimaikaitɨni kepaikɨ miyetuanikekai, 'ayumieme yunaitɨ xemɨka'itiyatɨka kaniutayɨni.
JOH 13:12 Waketatetsie waruhauxika, yu'ixuriki herie mieme 'anakatɨka, mana 'ayerɨka, hutarieka mɨpaɨ katiniwarutahɨawe: —¿Xetemate tita nemɨtiuyuri xehetsiemieme?
JOH 13:13 Xeme Ti'ɨkitame Ti'aitame xepɨnete'uterɨwa. 'Aixɨa xepaitɨka ne mɨhɨkɨkɨ.
JOH 13:14 Merikɨte, ne Ti'ɨkitame Ti'aitame nehɨkɨtɨtɨ xɨka xeketatetsie nexe'uhauxini, kaneuyeweka xemeta yunaitɨ xemɨyutihauxinani yuketatetsie.
JOH 13:15 Xemɨnetsi'ɨkenikɨ 'inɨari nekanixe'upitɨani xemeta mɨpaɨ xemɨteyuriekakɨ nemɨxe'uyuri hepaɨ.
JOH 13:16 Yurikɨ, mɨpaɨ nekanaineni, nixewitɨ waɨriyarika ti'uximayatame pɨkamariwe keyuri kutsiyarieya, meta nixewitɨ nɨ'ariekame pɨkamariwe keyuri meinɨ'a.
JOH 13:17 Xɨka 'ipaɨ xetemaika, xekaniyutemamawiekakuni xɨka yaxetekahuni.
JOH 13:18 »Yunaime xehepaɨtsita nepɨkatikuxata. Ne nepɨxemate kehate nemɨxe'anuyexei. Matsi mɨpaɨ nekatiniuyurieni 'utɨarika maye'anikɨ mɨpaɨ maine: “'Iya ne'ikwai mɨkwakai yukeputsakɨ pɨnetsi'uketsi”.
JOH 13:19 »Hikɨri nekatinixetaxatɨamɨkɨ yakatiyɨwekaku 'akuxi, yuri xemɨteta'erienikɨ kename ne nehɨkɨ kepauka mɨpaɨ mɨtiyɨnitsie.
JOH 13:20 Yurikɨ, yurikɨ mɨpaɨ nekanaineni, kemɨ'ane mitanaki'erieni kemɨ'ane nemanunɨ'ani, mɨkɨ ne kanenitanaki'erimɨkɨ, kemɨ'ane ne mɨnetsi'utanaki'eri, kemɨ'ane mɨnetsiheyenɨ'a kaniutanaki'erienita».
JOH 13:21 Mɨpaɨ 'utayɨka Ketsutsi kaniuyukahiwerieni yu'iyaritsie, katiniutahekɨata, mɨpaɨ kaniutayɨni: —Yurikɨ mɨpaɨ mekanaineni, xewitɨ xeme kaneniyetuamɨkɨ.
JOH 13:22 Teyɨ'ɨkitɨwamete mekaniuyuxexeiyakaitɨni me'iyarixietɨ 'atsimekatemaitɨ kemɨ'ane mɨraxatakai.
JOH 13:23 Xewitɨ tiyɨ'ɨkitɨwame Ketsutsi 'aurie kaniukateitɨni Ketsutsi minaki'eriekai.
JOH 13:24 Tsimuni Pekuru 'ayumieme kanimawiya, mɨpaɨ katinitahɨawe: —Kepai pepɨraxata ketineutahɨawi.
JOH 13:25 Mɨkɨ Ketsutsi 'aurie 'ukaitɨ ta'aurie 'aweka mɨpaɨ katinitahɨawe: —Ti'aitame, ¿kepaikɨ pɨhɨkɨ?
JOH 13:26 Ketsutsi mɨpaɨ katinita'eiya: —'Iya kanihɨkɨtɨni paa tarimeyari nemi'ɨitɨani ne'itihawiyame xakɨtsie. Hikɨ paa 'utihawiyaka kanenuku'ɨni, Kura 'Itsikariutitanaka Tsimuni nu'aya kaniu'ɨitɨani.
JOH 13:27 Mɨkɨ paa 'anu'ɨku, 'ana Kauyumarie kaniwiya. Ketsutsi mɨpaɨ katinitahɨawe: —Kepemɨtiyurieni, xeiya yaketineuyuri.
JOH 13:28 Mɨkɨ mana mematekai nixewitɨ 'atsipɨkatimaikai titayari mɨrehɨawekai.
JOH 13:29 Kura watumini maname mahanakaikɨ, hipatɨ mɨpaɨ mekateniku'eriwakaitɨni Ketsutsi mɨpaɨ rehɨaweme mekani'eriekaitɨni: Tita temɨteuyehɨwa 'ixɨararipa ketinenanaimie, yatɨni tumini mɨwa'ɨitɨanikɨ tixaɨtɨ memɨkatehexeiya meteku'eriwatɨ.
JOH 13:30 Kura paa 'anu'ɨka kaneyani. Kaniɨyɨwikaitɨniri.
JOH 13:31 Merikɨtsɨ kepauka metɨa, Ketsutsi mɨpaɨ kaniutayɨni: —Hikɨrixɨa Yuri Tewi witsi'anetɨ kanayeitɨarieni, Kakaɨyarita witsi'anetɨ kanayeitɨarieni hetsiena tiwiyatɨ.
JOH 13:32 Xɨka Kakaɨyari witsi'anetɨ 'ayeitɨarieni hetsiena tiwiyatɨ, Kakaɨyarita yɨkɨmana witsi'aneme kaneyeitɨamɨkɨ Yuri Tewi, kwitɨwa witsi'aneme kaneyeitɨamɨkɨ.
JOH 13:33 »Neniwema, yapaɨmexɨa xeikɨa xehamatɨa nekaniuyeikamɨkɨ. Xekanenikuwautɨwekuni. Kenemɨtiwakɨhɨawekai huriyutsixi, hakewa nemeyemie xepɨkayɨwawe xemeta'axɨanikɨ ne'utaitɨ, yaxeikɨata nekatinixehahɨaweni xeme hikɨ.
JOH 13:34 »Hekwamekɨ nekatinixe'aitɨaka, xekeneyunaki'erieka. Ne kenemɨtixenaki'eriekai hepaɨ, xekeneyunaki'erieka yunaitɨ.
JOH 13:35 'Ikɨkɨ yunaitɨ mekatenimaikakuni nehetsɨa miemete teyɨ'ɨkitɨwamete xemɨhɨkɨkɨ, xɨka xeyunaki'erieka yunaitɨ».
JOH 13:36 Tsimuni Pekuru mɨpaɨ katinitahɨawe: —Ti'aitame, ¿hakewa pepeyemie? Ketsutsi mɨpaɨ katinita'eiya: —Hakewa nemeyemie pepɨkayɨwe pemɨnetsi'anuweiya hikɨ, 'arikeke pepɨnetsi'anuweiya.
JOH 13:37 Pekuru mɨpaɨ katinitahɨawe: —Ti'aitame, ¿titayari nekatiyɨwe nemɨmatsi'anuweiyakɨ hikɨ? Netukari nepɨyetuani 'ahetsiemieme.
JOH 13:38 Ketsutsi mɨpaɨ katinita'eiya: —¿'Atukari nehetsiemieme petiyetuani? Yurikɨ mɨpaɨ nekanaineni, wakana 'akuxi katahiwawekaku, 'ekɨ haikakɨa pepɨ'aku'imawani, kename pekanetsimate pe'utaitɨ.
JOH 14:1 »Yu'iyaritsie xepɨkayumuinani. Kakaɨyari hetsie yuri xeketene'erieka, meta nehetsie yuri xeketene'erieka.
JOH 14:2 Ne'ukiyari kiekariena waɨkawa kanexuaweni kii, xɨka mɨpaɨ kare'anenike, mɨpaɨ nepɨkatixekɨhɨawenikeyu. Nepɨyemie xehetsiemieme 'aixɨa nemɨreyurienikɨ mana.
JOH 14:3 Xɨka neheyani, xɨka xehetsiemieme 'aixɨa nereyurieni mana, tawarita nekaninuamɨkɨ, nehetsɨa nekanixe'anuwitɨmɨkɨ, hakewa nemeyeikani xemeta mana xeme'uwanikɨ.
JOH 14:4 Hakewa nemeyemie xekatenimaikari, huye xetemateta».
JOH 14:5 Hikɨ Tumaxi mɨpaɨ katinitahɨawe: —Ti'aitame, tame 'atsitepɨkatemate hakewa pemeyemie, ¿ketete'imani huye?
JOH 14:6 Ketsutsi mɨpaɨ katinita'eiya: —Ne nekanihɨkɨtɨni huye, tita yurikɨ mɨraine netihɨkɨta, tukari netihɨkɨta. Xewitɨ ne'ukiyari hetsɨa pɨka'aye'awe yuxaɨtame, nekɨmana xeikɨa paye'awe.
JOH 14:7 Xɨka xenetsihetimanike, ne'ukiyarita xepɨmatenikeyu. Hikɨrixɨa xekaneitimani xekanixeiya.
JOH 14:8 Peripe mɨpaɨ katinitahɨawe: —Ti'aitame, ketaneuxeiyatsitɨa 'a'ukiyari, mɨkɨkɨ tepɨnaki'aka.
JOH 14:9 Ketsutsi mɨpaɨ katinitahɨawe: —Mɨixa xehamatɨa ne'uyeikakaku pekaneretimaiwe 'akuxi, Peripe 'aku. Kemɨ'ane mɨnetsixeiya, ne'ukiyarita kanixeiyani. ¿Kehepaɨtɨtɨ peputaine: “Ketaneuxeiyatsitɨa 'a'ukiyari” pehaitɨ?
JOH 14:10 ¿Yuri pekati'erie kename ne ne'ukiyaritsie netiwiya, ne'ukiyarita nehetsie mɨtiwiya? Kenemɨtixekuxaxatɨwa, nekɨmana nepɨkatikuxata, ne'ukiyari nehetsie mɨtiwiya, mɨkɨ yakatiniyurieneni.
JOH 14:11 Yuri xekenetene'eririeka ne'ukiyaritsie nemɨtiwiyakɨ, ne'ukiyarita nehetsie mɨtiwiyakɨ. Mexɨka mɨpaɨ yuri xekate'erieka, yanemɨtiyurienekɨ pɨta yuri xeketene'erieka.
JOH 14:12 Yurikɨ mɨpaɨ nekanaineni, kemɨ'ane nehetsie yuri mɨti'erie yakatiniyurienemɨkɨ kenemɨtiyuriene ne. Kanena'iwamɨkɨ yatiyurienetɨ, ne ne'ukiyari hetsɨa nemɨyemiekɨ.
JOH 14:13 Tsepanetɨ ketita xemɨnetetawawirieni nehetsɨa xemiemetetɨtɨ, ne mɨpaɨ nekatiniyuriemɨkɨ, ne'ukiyari witsi'anetɨ mayeitɨarienikɨ yuniwetsie tiwiyatɨ.
JOH 14:14 Xɨkari tixaɨtɨ xenete'utawawirieni nehetsɨa xemiemetetɨtɨ, ne mɨpaɨ nekatiniyuriemɨkɨ.
JOH 14:15 »Xɨka xenetsinaki'erieka, yaxeketenekahuni kenemɨti'aita.
JOH 14:16 Neta nepitawawirieni ne'ukiyari, mɨkɨ xeime kanixeyetuiriemɨkɨ Tiyuparewiwame xehamatɨa muyeikanikɨ yuheyemekɨ.
JOH 14:17 'Iyari yuri maine nekanixatani, kwiepa memɨtama mepɨkayɨwawe memitanaki'erieni memɨka'ixeiyawawekɨ memɨka'imatekɨ. Xemeri xekanimaikatɨtɨ, xehetsie kaniyuhayewani, xehetsie katiniwiyani.
JOH 14:18 Ne nepɨkaxeku'eirieni nepɨkaxenutuita, xehetsɨa nekaninuamɨkɨ.
JOH 14:19 Yapaɨmexɨa 'anukayayu kwiepa memɨtama tawariri mepɨkanetsixeiya, xeme pɨta xepɨnetsixeiya. Ne nemayenierekɨ, xemerita xekanayenenierekakuni.
JOH 14:20 'Iya tukari 'aye'ayu, mɨpaɨ xekatenimaikakuni ne ne'ukiyaritsie nemɨtiwiyakɨ, xemeta nehetsie xemɨtewiyakɨ, neta xehetsie nemɨtiwiyakɨ.
JOH 14:21 Kemɨ'ane tita nemɨti'aita mumate, meta yamɨtikamie, mɨkɨ kanihɨkɨtɨni kemɨ'ane mɨnetsinaki'erie. Kemɨ'ane mɨnetsinaki'erie, ne'ukiyarita kaninaki'eriekamɨkɨ. Neta nepinaki'erieka, nematsiɨkɨme nepaneyeitɨani hetsiena».
JOH 14:22 Xewitɨ Kura (mɨka'itsikariutitanakatɨkai) mɨpaɨ katinitahɨawe: —¿Ti'aitame, titayari pematsiɨkɨtɨ pere'ayeitɨani tame tahetsɨa, kwiepa memɨtama wahɨxieta hawaikɨ?
JOH 14:23 Ketsutsi mɨpaɨ katinita'eiya: —Xɨka tewi netsinaki'erieka, neniukitsie yakatinikamiemɨkɨ, ne'ukiyari mɨkɨ kaninaki'eriekamɨkɨta, hetsɨana tekani'axekuni, hetsɨana tekanitakikuni.
JOH 14:24 Kemɨ'ane mɨkanetsinaki'erie, neniukitsie yapɨkatikamie. 'Ikɨ niuki xemɨ'enie, nehetsɨa pɨkamieme. Ne'ukiyari mɨnetsiheyenɨ'a hetsɨa kanimiemetɨni pɨta.
JOH 14:25 »'Ikɨ nekatinixe'utaxatɨani xehetsɨa ne'uyeikatɨ.
JOH 14:26 Tiyuparewiwame xehamatɨa muyeikani, 'Iyari Mɨtiyupata ne'ukiyari menɨ'ani nehetsɨa miemetɨme, mɨkɨ tinaime katinixeta'ɨkitɨamɨkɨ. Katinixehaye'eritɨamɨkɨ naime kenemɨtixekuxaxatɨwakai ne.
JOH 14:27 Mɨpaɨ nepɨtixe'uhayewi, yu'iyaritsie xemɨka'uximatɨariekakɨ, nehepaɨ yu'iyaritsie xemɨka'uximatɨariekakɨ nepɨxepitɨa. Kwiepa memɨtama kememɨteyupitɨwa mɨpaɨ nepɨkatixepitɨa, xe'iyari pɨkayumuinaneni, meta pɨkamamaka.
JOH 14:28 »Xekaneniu'enieni mɨpaɨ nexerahɨaweme: “Nekaniyemieni, peru xehetsɨata nekanayenemɨkɨ kenemɨtixe'utahɨawixɨ”. Xɨka xenetsinaki'erieka, xekaniyutemamawiekakuni ne'ukiyari hetsɨa nemɨyemiekɨ. Ne'ukiyari yemekɨ kanimariweni, ne hepaɨna nekamariwekaku.
JOH 14:29 Hikɨ yanepɨtixe'utahɨawixɨ yakatiyɨwekaku 'akuxi, yuri xemɨteta'erienikɨ kepauka mɨpaɨ mɨtiyɨnitsie.
JOH 14:30 Hikɨ xehamatɨa waɨkawa nepɨkatikuxataniri. Kemɨ'ane mɨtiwa'aitɨa kwiepa memɨtama 'ukanamieni. Tixaɨtɨ pɨkarexeiya nehetsie timieme,
JOH 14:31 matsi kwiepa memɨtama memɨtehetimanikɨ ne'ukiyari nemɨnaki'erie, ne'ukiyari kemɨnetiu'aitɨa, mɨpaɨ nekatiniyurieneni. »Xekenanuku'uti, kɨmɨ tepɨyehuri.
JOH 15:1 »Ne nana nekanihɨkɨtɨni, tita yurikɨ mɨtinanayari, ne'ukiyari katini'ɨwiyametɨni.
JOH 15:2 Yunaitɨ nana mamateya nehetsie memɨtewiya xɨka meka'utixuxuawereni, kaniwaranuyexɨrimɨkɨ. Yunaitɨ memutixuxuawere, kaniwati'itimɨkɨ matsi waɨkawa memɨkaxuawerekɨ.
JOH 15:3 Hikɨri xeme xekaniu'itiyani neniukikɨ nemɨtixekuxaxatɨwakaikɨ.
JOH 15:4 Nehetsie xetewiyatɨ xekeneyuhayewani, neta xehetsie netiwiyatɨ nepuyuhayewa. Mamateya pɨkayɨwe yɨkɨmana mɨtixuawere xɨka nanayaritsie tiwiyatɨ kayuhayewani. Yaxeikɨa xemerita xepɨkayɨwawe xemɨtixuawere xɨka nehetsie xetewiyatɨ xekayuhayewani.
JOH 15:5 »Ne nanayari nekanihɨkɨtɨni, xeme mamateya xetehɨkɨ. Kemɨ'ane nehetsie tiwiyatɨ mɨyuhayewa, neta hetsiena netiwiyakaku, mɨkɨ waɨkawa kanitixuawerimɨkɨ, nehetsie xekatewiyatɨ 'atsixepɨkateyɨwawe xeme.
JOH 15:6 Xɨka tewi nehetsie tiwiyatɨ kayuhayewa, nana mamayari hepaɨ kananuyehɨiyamɨkɨ, kanitawamɨkɨ. Kuxeɨriyame taipa kaneuxɨriyamɨkɨ, kanititaiyariemɨkɨ.
JOH 15:7 Xɨka nehetsie xetewiyatɨ xeyuhayewa, xɨkari tita nemɨtikuxata xehetsie tiwiyatɨ yuhayewa, tita mɨtixenake xeketeneuta'iwau, mɨpaɨ katiniyɨmɨkɨ xehetsiemieme.
JOH 15:8 Ne'ukiyari witsi'anetɨ kanayeitɨariwani kepauka waɨkawa xemutixuxuawere, kepauka nehetsɨa miemete teyɨ'ɨkitɨwamete xemakɨka.
JOH 15:9 »Ne'ukiyari mɨnetinaki'eriekai hepaɨ, mɨpaɨta nekatinixenaki'eriekaitɨni. Xekeneyuhayewa nehetsie xetewiyatɨ, ne nexenaki'eriekaku.
JOH 15:10 Xɨka yaxetekahuni kenemɨti'aita, xekaniyuhayewakuni nehetsie xetewiyatɨ, nexenaki'eriekaku ne, ne'ukiyari 'aitsikayatsie yanemɨtikamie hepaɨ, meta naki'eriyaya hetsie netiwiyatɨ.
JOH 15:11 'Ipaɨ nekatinixekuxaxatɨwakaitɨni netemawierika xehetsie mɨyuhayewanikɨ, xetemawierika maye'atɨarienikɨ.
JOH 15:12 'Ipaɨ nekatini'aitani, xekeneyunaki'erieka kenemɨtixenaki'eriekai ne.
JOH 15:13 Tewi kemɨkatiyukanaki'erie hepaɨ, waɨkawa matsi pɨtiyukanaki'erie yutukari yetuatɨ mɨkɨ mɨwanaki'erie wahetsiemieme.
JOH 15:14 Xeme nenaki'erima xekanihɨkɨtɨni xɨka yaxetekahuni kenemɨtixe'aitɨa.
JOH 15:15 Te'uximayatameteri nepɨkatixe'uterɨwa. Ti'uximayatame 'atsipɨkatimate kemɨtiyuriene kutsiyarieya. Ne matsi nenaki'erima nepɨtixe'uterɨwa, naime ketita nemɨtiu'eni ne'ukiyari hetsɨa nepɨtixe'uta'ɨkitɨa.
JOH 15:16 Xeme xepɨkanetsi'anayexei. Nepɨta nekanixe'anayexeiya. Nepɨxe'uhɨritɨa xemɨyehukɨ, xemutixuxuawerenikɨ, xehetsɨa mieme 'ikwaxi yuheyemekɨ mɨyuhayewanikɨ, tsepanetɨ ketita xemɨte'itawawirieni ne'ukiyari nehetsɨa xemiemetetɨtɨ katinixepitɨamɨkɨ.
JOH 15:17 'Ipaɨ nekatinixe'aitɨaka: xekeneyunaki'erieka yunaitɨ.
JOH 15:18 »Xɨka kwiepa memɨtama mexe'uxiwe'erieka, yaxeketenemaika, memɨnetsi'uta'uxikɨ ne meri.
JOH 15:19 Xɨka kwiepa xemiemetetɨnike xeme, kwiepa memɨtama mekanixenaki'eriekakeyu yuteɨterima wahepaɨ. Xemeri kwiepa xepɨkamiemete, ne matsi nekanixe'anayexeiya kwiepa memɨtama watsata. 'Ayumieme kwiepa memɨtama mekanixe'uxiwe'erieka.
JOH 15:20 Neniuki xekena'eriwani kenemɨtixe'utahɨawixɨ: “Nixewitɨ waɨriyarika ti'uximayatame pɨkamariwe keyuri kutsiyarieya”. Kememɨnete'ayeweweiyakai ne, xemeta mekanixetaweiyakuni. Xɨka neniuki me'u'enieni yametekakɨne, yaxeikɨa xeniuki mepɨ'enieni yamepɨtekakɨne.
JOH 15:21 Matsi mɨpaɨ naimekɨ katiniyɨmɨkɨ xehetsiemieme nehetsɨa xemɨmiemetekɨ, memɨka'imatekɨ kemɨ'ane mɨnetsiheyenɨ'a.
JOH 15:22 Xɨka nekanuanike, xɨka nekawarutaxatɨanike, tita 'axamɨti'ane mepɨkatehexeiyanikeyu. Hikɨri tixaɨtɨ mepɨkatehexeiya memiti'awietakɨ tita 'axamemɨteyurie.
JOH 15:23 Kemɨ'ane ne'ukiyari mɨ'uxiwe'erie, netari kaneni'uxiwe'erieka.
JOH 15:24 Watsata xɨka yanekatiuyurienike xewitɨ kemɨkatiyuriwe hepaɨ, mɨkɨ tita 'axamɨti'ane mepɨkatehexeiyanikeyu. Hikɨri mekaniuneniere, mekatani'uxiwe'erieka ne meta ne'ukiyari.
JOH 15:25 Matsi niuki kanaye'atɨarieni 'inɨari niukiyaritsie mɨpaɨ mɨre'uxa: “Tsepa 'atsinemɨkatiuyuri, mekaneni'uxiwe'eriekaitɨni”.
JOH 15:26 »Kepauka munuani Tiyuparewiwame xehamatɨa muyeikanikɨ nemɨxehanɨ'airieni ne'ukiyari hetsɨa mieme, 'Iyari yuri maine ne'ukiyaritsɨa mayeneika kepauka munuani, mɨkɨ nehepaɨtsita katinitahekɨatamɨkɨ.
JOH 15:27 Xemetari xekatenitahekɨatakuni nehamatɨa xemu'uwakɨ matɨari paitɨ.
JOH 16:1 »'Ipaɨ nepɨtixekuxaxatɨwakai xemɨkatiketamɨrekɨ.
JOH 16:2 Mɨkɨ mepɨkaxepitɨani tukita, metatsiere tukari kanaye'amɨkɨ kepauka yunaitɨ memɨxekwini Kakaɨyari me'ayexeiyakame mepɨyu'erieka.
JOH 16:3 Mɨpaɨ mekateniyurikuni memɨka'imatekɨ ne'ukiyari, meta memɨkanetsimatekɨ ne.
JOH 16:4 Matsi 'ipaɨ nekatinixekuxaxatɨwakaitɨni, xeme'eriwanikɨ neniuki kepauka maye'ani tukariyari, mɨpaɨ nemɨtixe'utahɨawixɨ xeha'eriwatɨ. Matɨari paitɨ 'ipaɨ nepɨkatixe'utahɨawixɨ xehamatɨa nemuyeikakaikɨ.
JOH 16:5 »Hikɨri nekaniyemieni kemɨ'ane mɨnetsiheyenɨ'a hetsɨa, xewitɨ xeme pɨkanetsita'iwawiyawe: “¿Hakewa pepeyemie?” 'utaitɨ.
JOH 16:6 Mɨpaɨ nemɨtixekuxaxatɨwakaikɨ xe'iyari kanihɨpɨneni hiwerikakɨ.
JOH 16:7 Ne nepɨtixekuxaxatɨwa tita yuri mɨraine, matsi 'aixɨa kaniyɨmɨkɨ xehetsiemieme nemɨyemiekɨ, mexɨka nekaheyani, Tiyuparewiwame xehamatɨa muyeikani pɨkanuani xehetsɨa, matsitsɨ xɨka neheyani, nekanixehanɨ'airiemɨkɨ.
JOH 16:8 'Iya nuame kaniwatatiemɨkɨ kwiepa memɨtama tita 'axamemɨteyurie hepaɨtsita, tita mɨtiheitserie hepaɨtsita, titakɨ mɨranutahɨiyani hepaɨtsita.
JOH 16:9 Tita 'axamemɨteyurie hepaɨtsita pɨwatatieni yuri memɨkate'eriekɨ nehetsie.
JOH 16:10 Tita mɨtiheitserie hepaɨtsita kaniwatatiemɨkɨta ne'ukiyari hetsɨa nemɨyemiekɨ, tawariri xekanetsixeiyakaku.
JOH 16:11 Titakɨ mɨranutahɨiyani hepaɨtsita tiwatatienita, kwiepa memɨtama tiwa'aitɨwame kemɨranutahɨiyakɨ.
JOH 16:12 »Waɨkawa 'akuxi nekaneixeiyani nemɨtixetaxatɨanikɨ, peru xeme xepɨkayɨwawe 'akuxi xemi'enieni hikɨ.
JOH 16:13 Kepauka munuani 'Iyari yuri maine, mɨkɨ kanixehekɨatɨamɨkɨ xemeitimanikɨ naitɨ yuri maine. Yɨkɨmana pɨkatikuxatani, tita mɨti'enie katinitaxatamɨkɨ, tita 'umɨramie katinixetaxatɨamɨkɨ.
JOH 16:14 Mɨkɨ witsine'aneme kanenayeitɨamɨkɨ. Tita nehetsɨa mɨtimieme katinanupimɨkɨ katinixetaxatɨamɨkɨ.
JOH 16:15 Ketipaɨmeme mɨrexeiya ne'ukiyari, naitɨ katininepiinitɨni. 'Ayumieme neputayɨ, tita nehetsɨa mɨtimieme katinanupimɨkɨ katinixetaxatɨamɨkɨ.
JOH 16:16 »Yapaɨmexɨa 'anukayayu xepɨkanetsixeiya, tawarita yapaɨmexɨa 'anukayayu xekanenixeiyakuni».
JOH 16:17 'Ayumieme teyɨ'ɨkitɨwamete hipatɨ mɨpaɨ mekateniyɨkɨhɨawekaitɨni: «¿Titayari yatatikɨhɨawe, “yapaɨmexɨa 'anukayayu xepɨkanetsixeiya”, tawarita “yapaɨmexɨa 'anukayayu xepɨnetsixeiya” mutaine, meta “ne'ukiyari hetsɨa nepɨyemie”?
JOH 16:18 Meta mete'utiyuanekai, «¿Tita 'ikɨ tixata “yapaɨmexɨa” maine? 'Atsitepɨkatemate ketɨtɨ mutaine».
JOH 16:19 Ketsutsi mɨpaɨ katinetimani memi'iwawiyakukaikɨ, 'ayumieme mɨpaɨ katiniwarutahɨawe: —¿'Ikɨkɨ niuki xetexɨatɨa, mɨya nemutayɨkɨ: “Yapaɨmexɨa 'anukayayu xepɨkanetsixeiya”, tawarita “yapaɨmexɨa 'anukayayu xepɨnetsixeiya” nemainekaikɨ?
JOH 16:20 Yurikɨ mɨpaɨ nekanaineni, xekaniutitsuanakuni xekaniyuhiweriekakuni. Kwiepa memɨtama pɨta mekaniyutemamawiekakuni. Xeme xekaniyuhiweriekakuni, peru xeyutihiwerieme matsi xeyutemamawietɨ xekanakɨnikuni.
JOH 16:21 'Uka tiniwerɨmetɨ kaniyuhiweriekamɨkɨ tukarieya maye'akɨ, peru nunutsi tinuiwayu 'uximatɨarika pɨkaha'eriwa mɨyutemawiekɨ tewi mutinuiwitɨakɨ kwiepa.
JOH 16:22 'Ayumieme xemeta hiwerika xekanexeiyani hikɨ: tawarita nekanixexeiyamɨkɨ, 'ana xe'iyari kaniyutemamawiekamɨkɨ, xewitɨ pɨkaxenawairieni xetemawierika.
JOH 16:23 'Iya tukaritsie tixaɨtɨkɨri xepɨkaneteku'iwawiyani. Yurikɨ mɨpaɨ nekanaineni, tsepa kemɨtitita xemɨte'itawawirieni ne'ukiyari nehetsɨa xemiemetetɨtɨ, yakatinixepitɨamɨkɨ.
JOH 16:24 Hikɨke tixaɨtɨ xepɨkate'itawawiriewawe nehetsɨa xemiemetetɨtɨ. Xekeneutawawiriri, xekanitanaki'erikuni xetemawierika maye'anikɨ.
JOH 16:25 »'Ikɨ ha'awiekamekɨ nekatinixe'utaxatɨakaitɨni, peru tukari kanaye'amɨkɨ kepauka nemɨkatixetaxatɨani ha'awiekamekɨ, matsi heitseriemekɨ nekatinixetaxatɨamɨkɨ ne'ukiyari hepaɨtsita.
JOH 16:26 'Iya tukaritsie xekanitawawiriekuni nehetsɨa xemiemetetɨtɨ. Ne mɨpaɨ nepɨkahaine kename xehetsiemieme ne'itawawirieni ne'ukiyari.
JOH 16:27 Ne'ukiyaritɨtɨ kanixenaki'erieka, xeme xemɨnetsinaki'eriekaikɨ, yuri xemɨte'uta'erikɨ kename Kakaɨyari hetsɨa neheyetɨa.
JOH 16:28 Ne ne'ukiyari hetsɨa nemiemetɨtɨ nekaneyeyani, kwiepa nekaninuani, hikɨrita kwie nekaniku'eirimɨkɨ, ne'ukiyari hetsɨa nekaniyemieni».
JOH 16:29 Teyɨ'ɨkitɨwamete mɨpaɨ mekaniutiyuani: —Kamɨ hikɨrixɨa heitseriemekɨ pekatinaxaxatani, ha'awiekamekɨ pepɨkatikuxata.
JOH 16:30 Hikɨ mɨpaɨ tepɨtemate naime pemɨtimate, tixaɨtɨ pɨkareuyewetse xewitɨ mɨmatsiku'iwawiyanikɨ. 'Ayumieme mɨpaɨ yuri tekateni'erieka Kakaɨyari hetsɨa pemeyetɨakɨ.
JOH 16:31 Ketsutsi mɨpaɨ katiniwaruta'eiya: —¿Yuri xete'erie hikɨ 'aku?
JOH 16:32 Neuxei tukari kanaye'amɨkɨ, kanaye'aniri, kepauka xemɨtaxɨriyaxɨani yuxexuitɨ yukie. Xepɨnetsiku'eirieni nexaɨtame. Matsi nexaɨtame nepɨka'uyeika, ne'ukiyari nehamatɨa puyeika.
JOH 16:33 'Ipaɨ nekatinixekuxaxatɨwakaitɨni yu'iyaritsie xemɨka'uximatɨariekakɨ nehetsie xetewiyatɨ. Kwiepa 'uximatɨarika xekanexeiyakakuni, yu'iyari xekeneukayetsa matsi, ne nekane'iwa tita kwiepa mɨtimieme.
JOH 17:1 Merikɨtsɨ mɨpaɨ katinikuxatakaitɨni Ketsutsi, yuheima heutiniereka mɨpaɨ kaniutayɨni: «Ne'ukiyari, tukariri kanaye'ani. Witsi'aneme kenayeitɨa 'aniwe, mɨkɨta 'aniwe witsipe'aneme mɨmatsi'ayeitɨanikɨ,
JOH 17:2 heitserie pemipitɨa hepaɨ yunaime teɨteri wahepaɨtsita, mɨkɨ tukari mɨkaxɨwe mɨwapitɨakakɨ yunaime pemiyetuirie 'ekɨ.
JOH 17:3 'Ikɨ tukari mɨkaxɨwe kanihɨkɨtɨni, memɨmatsimaikakɨ 'ekɨ pe'axewitɨ yuri pemɨkakaɨyari, memɨnetsimaikakɨ neta Ketsutsi Kɨritsitu pemɨnetsiheyenɨ'a.
JOH 17:4 Ne kwiepa witsipe'aneme nekamenayeitɨani. Kepemɨnetiuhɨritɨa yanemɨtiyurienenikɨ, nekatinaye'atɨaniri.
JOH 17:5 Hikɨri ne'ukiyari, 'ahetsɨa witsine'aneme kenenayeitɨa, witsinemɨ'anekai hepaɨ kwie kaxuawekaku 'akuxi.
JOH 17:6 »Ne nepɨmatsi'utahekɨataxɨ 'ekɨ kepemɨ'ane mɨkɨ teɨteri wahɨxie, kwiepa memɨtama watsata miemete pemɨnetsiyetuiri wahɨxie, mepɨ'ateɨterimatɨkai, pepɨnetsiyetuiri mɨkɨ, 'aniukitsie yamekatenikahuni.
JOH 17:7 Hikɨrixɨa mɨpaɨ mekatenetimani kename 'ahetsɨa timieme, tinaime pemɨnetiyetuiri.
JOH 17:8 Niuki pemɨnetsiyetuiri nekaniwayetuirieni, mɨkɨrita mekanitanaki'erieni. Mɨpaɨ mekatenetimani, yurikɨ 'ahetsɨa nemeyetɨakɨ. Yuri mekateniuta'erieni kename penetsiheyenɨ'a.
JOH 17:9 Wahetsiemieme nepɨmatsiwawirie. Kwiepa memɨtama wahetsiemieme nepɨkamatsiwawirie, mɨkɨ pemɨnetsiyetuiri wahetsiemieme pɨta nepɨmatsiwawirie, 'ateɨterima memɨhɨkɨkɨ.
JOH 17:10 Naitɨ nepiini 'apiini katinihɨkɨtɨni, 'apiini nepiini tihɨkɨta. Wahetsie netiwiyatɨ witsine'anetɨ nekanayeitɨariwani.
JOH 17:11 'Ari kwiepa nepɨka'uyeika, 'ikɨ matsi kwiepa mekaniu'uwani, ne 'ahetsɨa nekaniyemieni. »Ne'ukiyari pemɨpatsie, keniwa'ɨwiyani mɨkɨ pemɨnetsiyetuiri 'ahetsɨa memɨmiemetekɨ, memɨyutaxewirekɨ ketemɨtetaxewi tame.
JOH 17:12 Mexi wahamatɨa ne'uyeikakai nekaniwa'ɨwiyakaitɨni mɨkɨ pemɨnetsiyetuiri 'ahetsɨa memɨmiemetetɨkaikɨ. Nekaniwakweriekaitɨni, xewitɨ mɨkɨ pɨka'uta'unarie, 'iya xeikɨa 'unarikakɨ mɨ'ayumiemetɨkai kaniuta'unarieni 'utɨarika maye'anikɨ.
JOH 17:13 »Hikɨ 'ahetsɨa nekaniyemieni, 'ipaɨ nekatinikuxatani kwiepa, yuhetsie netemawierika memexeiyanikɨ 'aye'arɨkame.
JOH 17:14 Ne 'aniuki nekaniwayetuirieni, kwiepa memɨtama mekaniwaruti'uxiwe'erietɨkɨne kwiepa memɨkamiemetekɨ, ne kwiepa nemɨkamieme hepaɨ.
JOH 17:15 Nepɨkamatsiwawirie pemɨwaranuwitɨnikɨ kwiepa memɨka'u'uwanikɨ, matsi nepɨmatsiwawirie pemɨwa'ɨwiyanikɨ tita 'axamɨti'ane hepaɨtsita.
JOH 17:16 Kwiepa mepɨkamiemete ne kwiepa nemɨkamieme hepaɨ.
JOH 17:17 Tita yuri mɨrainekɨ keniwapatani 'ahetsiemieme, 'aniuki kanihɨkɨtɨni tita yuri mɨraine.
JOH 17:18 Kwiepa pemɨnetsiheyenɨ'a hepaɨ, neta nepɨwareutanɨ'axɨa kwiepa.
JOH 17:19 Wahetsiemieme nepatsietɨ nepɨyɨane, mɨkɨrita 'ahetsiemieme memɨpatsienikɨ tita yuri mɨrainetsie metewiyatɨ.
JOH 17:20 »'Ikɨ xeikɨa wahetsiemieme nepɨkamatsiwawirie. Matsi mɨkɨ nehetsie yuri memɨteta'erieni waniukikɨ, mɨkɨ wahetsiemieme nepɨmatsiwawirieta,
JOH 17:21 yunaitɨ memɨyuxewinikɨ, ne'ukiyari 'aku, 'ekɨ nehetsie pemɨtiwiya hepaɨ, neta 'ahetsie nemɨtiwiya hepaɨ, mɨkɨrita tahetsie memɨtewiyanikɨ, kwiepa memɨtama yuri memɨteta'erienikɨ kename 'ekɨ penetsiheyenɨ'a.
JOH 17:22 Witsine'aneme pemɨnetsi'ayeitɨa hepaɨ, neta mɨpaɨ me'aneneme nekaniwarayeitɨani memɨyuxewinikɨ tame temɨtetaxewi hepaɨ,
JOH 17:23 ne wahetsie netiwiyakaku, 'ekɨta nehetsie petiwiyakaku, me'aye'atɨ memɨyutaxewirekɨ, kwiepa memɨtama memɨtemaikakɨ kename penetsiheyenɨ'a, kename mɨpaɨ petiwarutanaki'eri ne pemɨnetiutanaki'eri hepaɨ.
JOH 17:24 »Ne'ukiyari, keyupaɨmeme pemɨnetsiyetuiri, mɨpaɨ pɨnetinake, hakewa nemeyeikani, mɨkɨta nehamatɨa meme'uwanikɨ, memɨnetsixeiyakɨ witsine'aneme kepemɨnerayeitɨa. Karikɨ 'ekɨ pekaneninaki'eriekaitɨni kwie 'akuxi kanewekaku.
JOH 17:25 »Ne'ukiyari yapemɨtiyuriene kemɨtiheitserie, tsepa kwiepa memɨtama memɨkamatsihetimaiwawe, ne hɨrixɨa nepɨmatsimate. 'Ikɨ mɨpaɨ mekatenetimani kename penetsiheyenɨ'a.
JOH 17:26 Ne nekaniwarutahekɨatɨani memɨmatsimaikakɨ 'ekɨ kepemɨ'ane, yaxeikɨa nekatiniwatahekɨatɨamɨkɨ, pemɨ'ahayewakɨ 'ekɨ pewanaki'erietɨ kepemɨnetinaki'eriekai ne, neta wahetsie nemɨtiwiyanikɨ».
JOH 18:1 Mɨpaɨ 'utayɨka kaneyani Ketsutsi teyɨ'ɨkitɨwamete wahamatɨa, Kiruni 'akiyaritsie mekaniukɨne haraweri muyemakaitsie paitɨ, mana kaneutahani teyɨ'ɨkitɨwamete wahamatɨa.
JOH 18:2 Kura miyetuanikekai muwa kanemariekaitɨni, mɨixa Ketsutsi teyɨ'ɨkitɨwamete wahamatɨa muwa memɨyukuxexeɨriwakaikɨ.
JOH 18:3 Kura kuyaxi warawitɨtɨ, tukita tehɨwemete mawari wewiwamete tewa'aitɨwamete wahetsɨa miemete meta paritseutsixi wahetsɨa miemete warawitɨtɨ, mana kaninuani 'utsikɨ me'ukɨxetɨ, meta tekɨxiteta watitataweme me'utɨkɨtɨ meta kutsirate mete'u'ɨtɨ.
JOH 18:4 Ketsutsi naime timaitɨ kemɨtiwiyarienikekai, wahepa kaneyani. Mɨpaɨ katiniwarutahɨawe: —¿Kepaikɨ xepɨtehakuwautɨwe?
JOH 18:5 Mɨkɨ mɨpaɨ mekatenita'eiya: —Ketsutsi natsaretitanaka. Mɨkɨ mɨpaɨ katiniwarutahɨawe: —Netsɨ nepɨhɨkɨ. Kura miyetuanikekai mana kaniuwekaitɨni wahamatɨa.
JOH 18:6 Hikɨ «ne nepɨhɨkɨ» tiwarutahɨaweku yukutama mekaniyekɨne, mekanatixɨrieni kwiepa.
JOH 18:7 'Ayumieme tawarita Ketsutsi mɨpaɨ katiniwaruta'iwawiya: —¿Kepaikɨ xepɨtehakuwautɨwe? Mɨkɨ tawarita mɨpaɨ mekaniutiyuani: —Ketsutsi natsaretitanaka.
JOH 18:8 Ketsutsi mɨpaɨ katiniwaruta'eiya: —Yanepɨtixehahɨawe, ne nepɨhɨkɨ. Xɨkari xenetsikuwautɨweni ne, xekeniwaruhayewa 'ikɨ memɨyehukɨ.
JOH 18:9 Maye'anikɨ niukieya kemainekai: «Mɨkɨ pemɨnetsiyetuiri nixeime nepɨkaheuyehɨa».
JOH 18:10 Hikɨ Tsimuni Pekuru 'ixipara watihanaka, mawari wewiwamete tiwa'aitɨwame ti'uximayatameya katiniukwinitɨani, tserietana mieme nakaya kanawiteni. (Ti'uximayatame Maruku katinitewakaitɨni).
JOH 18:11 Hikɨ Ketsutsi mɨpaɨ Pekuru katiniutahɨawe: —'A'ixipara keneuka'uta huyeritana. ¿Kamɨtsɨ ne nekarenu'ieni tekɨxita mieme ne'ukiyari mɨnetsi'itɨani yanemɨranayeyanikɨ?
JOH 18:12 Hikɨ kuyaxi meta kuyaxi tiwa'aitɨwame meta huriyutsixi watukita tehɨwemete Ketsutsi mekaniuwiya. Mekanihɨani,
JOH 18:13 'Anatsi hetsɨa meri mekani'atɨani, mɨkɨ Kaipatsi munieya kanihɨkɨtɨkaitɨni, Kaipatsi mawari wewiwamete tiwa'aitɨwame kanihɨkɨtɨkaitɨni mɨkɨ wiyaritsie.
JOH 18:14 Kaipatsi kanihɨkɨtɨkaitɨni kemɨ'ane mɨwaruti'imaiyaxɨ huriyutsixi matsi 'aixɨa mɨyɨnikɨ xewitɨ tewi mɨmɨnikɨ teɨteri wahetsiemieme, 'utaitɨ.
JOH 18:15 Merikɨtsɨ Tsimuni Pekuru Ketsutsi kaniuweiyakaitɨni, xewitɨta tiyɨ'ɨkitɨwame tiweiyakai, mawari wewiwamete tiwa'aitɨwame mɨkɨ tiyɨ'ɨkitɨwame kanimatekaitɨni, Ketsutsi hamatɨa kaneutahani mawari wewiwamete tiwa'aitɨwame kurarutana paitɨ.
JOH 18:16 Matsi Pekuru mana kaniutiwekaitɨni takwa kitenie 'aurie. Hikɨ mɨkɨ tiyɨ'ɨkitɨwame mawari wewiwamete tiwa'aitɨwame mimatekai mana kaneyani, kitenie tihɨweme kaniutahɨawe, hikɨ kuraruta paitɨ Pekuru kani'atɨani.
JOH 18:17 'Ɨimari kitenie mɨtihɨwemetɨkai mɨpaɨ Pekuru katiniutahɨawe: —¿'Ekɨta 'ikɨ tewi teyɨ'ɨkitɨwametemama wahetsɨa mieme pekatihɨkɨ? Pekuru mɨpaɨ kaniutayɨni: —Ne nepɨkahɨkɨ.
JOH 18:18 Hikɨ te'uximayatamete tukita tehɨwemete wahamatɨa mana mekaniuti'ukaitɨni mekɨɨxetɨ me'atinaika, muhaɨtɨkaikɨ. Pekuru wahamatɨata kaniutiwekaitɨni kɨɨxetɨ.
JOH 18:19 Merikɨtsɨ mawari wewiwamete tiwa'aitɨwame Ketsutsi kaniuta'iwawiya teyɨ'ɨkitɨwametemama wahepaɨtsita, tita mɨti'ɨkitakai hepaɨtsita.
JOH 18:20 Ketsutsi mɨpaɨ katinita'eiya: —Ne teɨteri wahɨxie nekatinikuxatakaitɨni kwiepa, ne neheyemekɨ nekatini'ɨkitakaitɨni tukiteta, tuki 'amɨpatata, hakewa yunaitɨ huriyutsixi memɨyutixexeɨriwa. Ne tixaɨtɨ nepɨkatikuxatakai 'awie.
JOH 18:21 ¿Ketitayari penetiku'iwawiya ne? Keniwaruta'iwawiya mɨkɨ memɨnetsi'eniekai pɨta tsiparatsɨ kenemɨtiwakuxaxatɨwakai. Mɨkɨ mekatenimaika kenemutayɨ.
JOH 18:22 Mɨpaɨ 'utayɨku, xewitɨ tukita tihɨweme mana mutiwekai Ketsutsi 'aurita kaneukuwani mɨpaɨ 'utaitɨ: —¿Mɨpaɨ petiku'eiya mawari wewiwamete tiwa'aitɨwame?
JOH 18:23 Ketsutsi mɨpaɨ katinita'eiya: —Xɨkatsɨ 'axane'utayɨni, ketineutahekɨata ketitakɨ 'axanemɨtiutayɨ. Mexɨka 'aixɨa ne'utaineni, ¿ketitayari penetikuwaya?
JOH 18:24 Hikɨ 'Anatsi kaneinɨ'ani hɨakame Kaipatsi hetsɨa mawari wewiwamete tiwa'aitɨwame hetsɨa.
JOH 18:25 Merikɨtsɨ Tsimuni Pekuru mana kaniutiwekaitɨni kɨɨxetɨ. Hikɨ mɨpaɨ katiniuta'iwawiyarieni: —¿'Ekɨ teyɨ'ɨkitɨwametemama wahetsɨa mieme pekatihɨkɨ? Mɨkɨ kaniyuta'imani, mɨpaɨ kaniutayɨni: —Ne nepɨkahɨkɨ.
JOH 18:26 Xewitɨ mawari wewiwamete tiwa'aitɨwame te'uximayatametemama, Pekuru nakaya meukuwitekai kanimarieyatɨkaitɨni, mɨkɨ mɨpaɨ katinitahɨawe: —¿Tamɨ ne nekamerexei harawerita hamatɨana peheyeikame?
JOH 18:27 Tawarita kaniuyuta'imani Pekuru, hikɨ yapauka kaniutahiwa wakana.
JOH 18:28 Hikɨ Kaipatsi hetsɨa meheyekɨneka Ketsutsi mekani'atɨani 'itsɨkame kie, kaniuyuimuanatɨkaitɨniri. Mɨkɨri mepɨkaheutahaxɨa 'itsɨkame kiita kapa meka'itiyatɨ me'akɨnekɨ, matsi Patsikwa 'ikwaiyari memɨtekwanikɨ.
JOH 18:29 'Ayumieme Piratu takwa kaniwayeyani wahɨxie, mɨpaɨ kaniutayɨni: —¿Ketitakɨ 'ikɨ tewi xetexaneta?
JOH 18:30 Mɨkɨ mɨpaɨ mekatenita'eiya: —Xɨka 'ikɨ 'axakatiyurienenike, tepɨkamatsiyetuirienikeyu.
JOH 18:31 Hikɨ Piratu mɨpaɨ katiniwarutahɨawe: —Xekenanuwitɨki, xekeneuta'inɨata xe'inɨari niukiyari kemaine. Huriyutsixi mɨpaɨ mekatenitahɨawe: —Tame heitserie tepɨkahexeiya tewi temumienikɨ.
JOH 18:32 Mɨkɨkɨ mɨpaɨ katinaye'ani Ketsutsi niukieya, kemutainekai kemɨtimɨnikekai tikuxatatɨ.
JOH 18:33 Hikɨ tawarita Piratu 'itsɨkame kiita kaneutahani, hikɨ Ketsutsi kaniutahɨawe, mɨpaɨ katinitahɨawe: —¿'Ekɨ huriyutsixi petiwa'aitɨwame?
JOH 18:34 Ketsutsi mɨpaɨ katinita'eiya: —¿'Akɨmana mɨpaɨ petiutaine, hipatɨ nutsu mɨpaɨ memete'utahɨawixɨ nehepaɨtsita?
JOH 18:35 Piratu mɨpaɨ katinita'eiya: —¿Ne netihuriyu? 'Ateɨterima, mawari wewiwamete tewa'aitɨwamete mepɨmatsiyetua nehetsɨa. ¿Kepetiuyuri?
JOH 18:36 Ketsutsi mɨpaɨ katinita'eiya: —'Ena kwiepa pɨkamieme kenemɨti'aita. Xɨka 'ena kwiepa miemetɨnike kenemɨti'aita, nehetsɨa miemete tehɨwemete mekaniyukwitɨwenikeyu nemɨkayetuiyanikɨ huriyutsixi wahetsɨa. Matsi hikɨ kenemɨti'aita 'ena pɨkamieme.
JOH 18:37 Piratu mɨpaɨ katinitahɨawe: —Kaukatsɨ peti'aitame 'ekɨ. Ketsutsi mɨpaɨ katinita'eiya: —'Ekɨtsɨ mɨpaɨ pekaniutaineni kename ne ti'aitame nehɨkɨ. Ne 'ayumieme nekaniutinuiwa, 'ayumieme kwiepa nekaninuani, nemɨtitahekɨatakɨ tita yuri mɨraine hepaɨtsita. Yunaitɨ yuri mɨraine hetsiemiemete mekaneni'enieka ne'utaniukame.
JOH 18:38 Piratu mɨpaɨ katinitahɨawe: —¿Ketita tihɨkɨ yuri mɨraine? Hikɨ mɨpaɨ 'utayɨka tawari kaniwayeyani huriyutsixi wahɨxie, mɨpaɨ katiniwarutahɨawe: —Ne tixaɨtɨ nepɨkatiukaxei hetsiena nemɨtiuhɨpanikɨ.
JOH 18:39 'Ipaɨ kani'aneni xeyeiyari, xeime nemɨxexɨnirienikɨ Patsikwa 'ixɨararipa. Merikɨte, ¿xekateyuwaɨriya nemɨxexɨnirieni “huriyutsixi tixe'aitɨwame”?
JOH 18:40 Hikɨ yunaitɨ mekaniutihiwa mɨpaɨ me'utiyuatɨ: —Mɨkɨ pɨkatixaɨ, Waxawaxi pɨta. 'Iya Waxawaxi katininawayametɨkaitɨni.
JOH 19:1 Hikɨ Piratu Ketsutsi kanewitɨni, katiniuta'aita mɨkuweiyaxɨanikɨ.
JOH 19:2 Kuyaxi xuya kurunayari me'utatsaka mu'uyatsie mekanenutimanirieni, meta herie mieme 'ixuriki mɨtaɨraɨyekɨ mekanenakuwirieni.
JOH 19:3 Hɨxiena mekani'axekaitɨni mɨpaɨ me'utiyuatɨ: —Ke'aku huriyutsixi tiwa'aitɨwame. Mɨpaɨ mete'ikɨhɨawetɨ mekanenutawayakaitɨni.
JOH 19:4 Hikɨ tawarita takwa kaniwayeyani Piratu, mɨpaɨ katiniwarutahɨawe: —Kamɨ 'ena takwa paitɨ nepɨxe'atɨirieni xemɨtemaikakɨ tixaɨtɨ nemɨkatiukaxeikɨ hetsiena nemɨtiuhɨpanikɨ.
JOH 19:5 Hikɨ Ketsutsi kaniwayeyani xuya kurunayari 'anamatɨ, herie mieme 'ixuriki mɨtaɨraɨye 'anakuwietɨ. Piratu mɨpaɨ katiniwarutahɨawe: —Kamɨ tewi.
JOH 19:6 Hikɨ mawari wewiwamete tewa'aitɨwamete meta tehɨwemete kepauka memixei mekaniutihiwa mɨpaɨ me'utiyuatɨ: ―Kuruxitsie keneumi'a, kuruxitsie keneumi'a. Piratu mɨpaɨ katiniwarutahɨawe: —Xemetsɨ xekenanuwitɨki, kuruxitsie xekenemi'a. Neri tixaɨtɨ nepɨkatiukaxei hetsiena nemɨtiuhɨpanikɨ.
JOH 19:7 Huriyutsixi mɨpaɨ mekatenita'eiya: —Tame 'inɨari niukiyari tekanexeiyani, mɨkɨ 'inɨari kemaine, kaneuyeweka 'ikɨ mɨmɨnikɨ Kakaɨyari nu'aya mayuyeitɨakɨ.
JOH 19:8 Piratu 'ikɨ niuki 'u'enieka matsi waɨkawa kanimakaitɨni.
JOH 19:9 Tawari 'itsɨkame kiita heutahaka mɨpaɨ Ketsutsi katiniutahɨawe: —Hakewa pepemieme 'ekɨ. Ketsutsi pɨka'ita'ei:
JOH 19:10 Piraturi mɨpaɨ katinitahɨawe: —¿Pekanetita'eiya? Pekatimate ne heitserie nemexeiya nemɨmatsixɨnakɨ, heitserie nerexeiyata kuruxitsie nemɨmatsimienikɨ.
JOH 19:11 Ketsutsi mɨpaɨ katinita'eiya: —'Ekɨ heitserie pepɨkahexeiyanikeyu nehepaɨtsita taheima miemekɨ xɨka pekapitɨariekake. 'Ayumieme kemɨ'ane mɨnetsiyetua 'ahetsɨa, mɨkɨ matsi waɨkawa 'axakatiniuyurieni.
JOH 19:12 Piratu 'ayumiemeri katinikuwaunekaitɨni kemɨtixɨnakɨ. Peru huriyutsixi mekaniutihiwa mɨpaɨ me'utiyuatɨ: —Xɨka 'ikɨ pe'uxɨna, Ti'aitame Tsetsaxi pepɨkanaki'erie. Yunaitɨ te'aitamete memayuyeitɨwa Tsetsaxi mekanaye'unieka.
JOH 19:13 Hikɨ Piratu 'ikɨ waniuki 'u'enieka Ketsutsi kaniwayehana. Mana kaniukayerɨni Piratu yu'uwenitsie Makutenutsariya mɨrakutewatsie (hepɨrayutsixi waniukikɨ Kawata mɨrakutewatsie).
JOH 19:14 'Iya tukaritsie mekaniha'aritɨakaitɨni Patsikwa 'ixɨarariyari. 'Etsiwatɨkaku tuka kanayeiximekaitɨniri, mɨpaɨ katiniwarutahɨawe huriyutsixi: —Kamɨ tixe'aitɨwame.
JOH 19:15 Mɨkɨ matsi mɨpaɨ mekateniuhiwa: —Kenanuwitɨki, kenanuwitɨki, kuruxitsie kenemi'a. Piratu mɨpaɨ katiniwarutahɨawe: —¿Kamɨtsɨ kuruxitsie netimieni tixe'aitɨwame? Mawari wewiwamete tewa'aitɨwamete mɨpaɨ mekatenita'eiya: —Tame xeime tepɨkahexeiya tati'aitɨwame, Tsetsaxi xeikɨa pɨtati'aitɨwame.
JOH 19:16 Hikɨ kaniwayetuirieni kuruxitsie mɨmierienikɨ. Hikɨ Ketsutsi mekanehana.
JOH 19:17 Yukuruxi 'atɨtɨ mana kaneyani Mɨki Mu'uya Manuka mɨrakutewatsie (hepɨrayutsixi waniukikɨ Kurukuta mɨrakutewatsie).
JOH 19:18 Mana kuruxitsie mekanitiwieni, meta yuhutame hamatɨana mekaniwarutiwɨtɨani tapa xeime tapata xeime, Ketsutsi wahixɨata.
JOH 19:19 Meta Piratu 'inɨari kaniuta'utɨani, kuruxitsie kaneimani, mɨpaɨ katine'ukaitɨni: «Ketsutsi natsaretitanaka huriyutsixi tiwa'aitɨwame».
JOH 19:20 Huriyutsixi yumɨiretɨ 'utɨarika mekanakaterɨwa, kiekari mehurakaikɨ Ketsutsi mamierietsie. Hepɨrayutsixi, xumatari, kɨriyekutsixi waniukitekɨ pɨraye'uxakaita.
JOH 19:21 Hikɨ huriyutsixi mawari wewiwamete tewa'aitɨwamete mɨpaɨ Piratu mekateniutahɨawe: —“Huriyutsixi tiwa'aitɨwame” pepɨkatiku'utɨwani, matsi pɨta ketineu'utɨa “Huriyutsixi tiwa'aitɨwame muyuxatakai”.
JOH 19:22 Piratu mɨpaɨ katiniwaruta'eiya: —Kenemɨtiu'utɨa nekatiniuta'utɨaniri.
JOH 19:23 Hikɨ kuyaxi Ketsutsi kuruxitsie me'utiwieka, 'ixurikiteya mekaneutahuriexɨani. Naukame mekanayeitɨani, yuxexuitɨ kuyaxi xei'ixurikiyari memexeiyanikɨ. Tetɨata mieme 'ixurikieya pɨkawipekai, 'ayexewimekɨ xeikɨa pɨ'itsekai naitɨ.
JOH 19:24 Hikɨ mɨpaɨ mekateniyutahɨawe: —Tepɨka'ititsanani, matsi tepɨtata'iwa, tsiparatsɨ kemɨ'ane pe'iwa. Merikɨtsɨ mɨpaɨ mekateniuyurieni kuyaxi. Mɨpaɨ katinaye'atɨarieni 'utɨarika mɨpaɨ maine: «Ne'ixurikite mepɨyutahuritɨa, meta mekaniyuta'iwa ne'ixɨrikikɨ».
JOH 19:25 Ketsutsi kuruxieya 'aurie Ketsutsi maamaya mekaniti'ukaitɨnita, maamaya 'iwaya, Mariya Kɨreupa 'ɨyaya, Mariya Mararatanaka yunaitɨ.
JOH 19:26 Kepauka Ketsutsi yumaama muxei meta tiyɨ'ɨkitɨwame mɨnaki'eriekai 'auriena 'uweme, yumaama mɨpaɨ katiniutahɨawe: —'Ukaratsi 'aku, mana 'aniwe kaniuweni.
JOH 19:27 Meta tiyɨ'ɨkitɨwame mɨpaɨ katiniuhɨritɨani: —Kamɨ 'amaama. Mɨkɨ tukaritsietɨtɨ tiyɨ'ɨkitɨwame yukie kanitanaki'erieni.
JOH 19:28 'Anari Ketsutsi mɨpaɨ timaitɨ naitɨ 'ari maye'atɨariekɨ, 'utɨarika maye'atɨarienikɨ mɨpaɨ kaniutayɨni: —Nepeuharimɨkɨ.
JOH 19:29 Xari mana kaniukateitɨni winu matsina hɨnetɨ, hikɨ haa 'itseweme mukuxani me'utahɨniyaka winu matsinakɨ, hitsupu kɨyeyaritsie me'iyeka, teniena mekaneititserieni.
JOH 19:30 Ketsutsi he'inɨataka winu matsina mɨpaɨ kaniutayɨni: —Kanaye'aniri. Yumu'utsie 'anakatutsireka yu'iyari kaniyetuani.
JOH 19:31 Merikɨtsɨ 'iya tukaritsie 'ixɨarari mekaniha'aritɨakaitɨni. 'Ayumieme huriyutsixi Piratu mekaniutawawirieni wawatute memɨtitarakɨ memɨwaraka'ɨnikɨ, kaxarite memɨkayuhayewakɨ kuruxitsie me'uyewɨtɨ 'uxipiya tukaritsie. 'Iya 'uxipiya tukaritsie yemekɨ patsiekamekɨ memuyukuxexeɨriwakaikɨ.
JOH 19:32 'Ayumieme kuyaxi mana mekaniu'axɨani, kuruxitsie memuyewɨkai hamatɨana xeime watuteya mekaniutitara, xeimetatsiere watuteya mete'utitaraxɨ.
JOH 19:33 Ketsutsi hetsɨa me'u'axɨaka watuteya mepɨka'utitaraxɨ memixeikɨ mɨkime.
JOH 19:34 Matsi xewitɨ kuya pitsikakɨ 'akitana kaneititseni, hikɨ yapauka kananeni xuriya meta haa.
JOH 19:35 Kemɨ'ane munierixɨ katiniutahekɨata, tita mɨtitahekɨata kaniyuritɨni. Mɨkɨta katinimaika yuri mutainekɨ, yuri xemɨte'eriekakɨ xemeta.
JOH 19:36 Mɨpaɨ katiniuyɨni 'utɨarika maye'atɨarienikɨ mɨpaɨ mutaine: «'Umeyarieya pɨka'akamurarieni».
JOH 19:37 Tawarita xewitɨ 'utɨarika 'ipaɨ kanaineni: «Mekanixeiyakuni kemɨ'ane memutse».
JOH 19:38 Merikɨtsɨ 'arike Kutse 'Arimateya kiekame Piratu kaniutawawirieni menukwenikɨ Ketsutsi kaxarieya. Kutse Ketsutsi hetsɨa mieme katiniyɨ'ɨkitɨwametɨkaitɨni 'awie, mɨwamakaxekaikɨ huriyutsixi. Piraturi kanipitɨani, hikɨ kaneyani, kaxarieya kanekweni.
JOH 19:39 Nikuremu manata kaninuani meripaitɨ hetsɨana munua yɨwikɨta. Mɨkɨ mixaxi meta 'aruhe witsimu'ɨa yunɨkame kani'atɨani merieneka hepaɨ paɨmeme.
JOH 19:40 Hikɨ Ketsutsi kaxarieya mekanekweni, mekaniku'eima 'ixurikitekɨ witsimu'ɨa me'ikawirieka. Mɨpaɨ kani'aneni huriyutsixi wayeiyari teukiyakɨ.
JOH 19:41 Mana kuruxitsie mamierietsie haraweri kaniyemakaitɨni. Harawerita teukiyapa hekwamekɨ mɨwaye'inierie kanikumakaitɨni. Xewitɨ 'akuxi mɨkɨ teukiyapa pɨkakateukiewekai.
JOH 19:42 Muwa 'ayumieme Ketsutsi mekaneutateni, huriyutsixi memɨyuha'aritɨakaikɨ 'iya tukaritsie, teukiyapa mehurakaikɨ.
JOH 20:1 Merikɨtsɨ mexɨakame tukariyaritsie tsemanayaritsie Mariya Mararatanaka teukiyapa kaninuani yuimuana 'uyɨwikaku 'akuxi, tete teukiyapa heuhɨiyakame kaniuxeiya hɨxiena meukatei.
JOH 20:2 Hikɨ 'unautsarɨmetɨ kaneyani, Tsimuni Pekuru hetsɨa kaninuani meta xeime hetsɨa tiyɨ'ɨkitɨwame Ketsutsi minaki'eriekai hetsɨa, mɨpaɨ katiniwarutahɨawe: —Ti'aitame teukiyapa mekaniwayekweni, 'atsitepɨkatemate hakewa memeite.
JOH 20:3 Hikɨ Pekuru kaneyani xewitɨ tiyɨ'ɨkitɨwame hamatɨa, teukiyapa mekanekɨne.
JOH 20:4 Yu'aurie me'uhutɨ mekaniunautsaxɨaximekaitɨni. Xewitɨ tiyɨ'ɨkitɨwame matsi waɨkawa kaniutanautsa, Pekuru kananuku'iwa, kanaye'ani mɨkɨmeri teukiyapa.
JOH 20:5 'Anahuka kanixeiya 'ixurikite mana 'akateme, peru muwa pɨkaheutaha.
JOH 20:6 Hikɨ Tsimuni Pekuru 'utɨmanake kaninuani, teukiyata kaneutahani. 'Ixurikite kaniuxeiya mana 'akateme.
JOH 20:7 Tuwaxata kaniuxeiya mu'uya mɨ'eimekai 'ixurikite 'aurie pɨkatikatei, yateewa pɨta pɨtikatei tunitɨ.
JOH 20:8 'Anaketa kaneutahani tiyɨ'ɨkitɨwame 'umexɨatɨ munua teukiyapa, hikɨ 'ixeiyaka, yuri katiniuta'erieni.
JOH 20:9 Mɨkɨ 'akuxi mepɨkaheitimaiwawekai 'utɨarika meuyewekaikɨ mɨkite watsata manukukeni maine.
JOH 20:10 Hikɨ teyɨ'ɨkitɨwamete yukie mekanekɨne,
JOH 20:11 merikɨtsɨ Mariya teukiya hɨxie kaniutiwekaitɨni takwa 'utatsuatɨ. Hikɨ 'utatsuatɨ kananahuni teukiyata kaneutaniere,
JOH 20:12 mana kaniwaruxeiya niuki tuayamete yuhutame me'anakatuxame. Xewitɨ Ketsutsi mu'uya manukatei kanakateitɨni, xewitɨta manuka'ɨkakai rakatei hakewa Ketsutsi kaxarieya manutekiekai.
JOH 20:13 Mɨkɨ mɨpaɨ mekatenitahɨawe: —¿Neuxei, 'ukaratsi, titayari petiutatsuaka? Mɨkɨ mɨpaɨ katiniwaruta'eiya: —Neti'aitɨwame mepekwei, 'atsinepɨkatimate hakewa memeite.
JOH 20:14 Mɨpaɨ 'utayɨka ta'aurie kanaweni, hikɨ Ketsutsi kaniuxeiya mana 'utiweme, matsi 'atsipɨkatimaikai xɨka Ketsutsi hɨkɨtɨkaitɨni.
JOH 20:15 Ketsutsi mɨpaɨ katinitahɨawe: —¿Neuxei, 'ukaratsi, titayari petiutatsuaka? ¿Kepaikɨ pepɨrakuwaune? Mɨkɨ harawerikame 'erietɨ mɨpaɨ katinitahɨawe: —Neuxei, 'uki, xɨka 'ekɨ peheikweni, kenetineutaxatɨa hakewa pepeihɨa. Neri nekanenukweimɨkɨ.
JOH 20:16 Ketsutsi mɨpaɨ katinitahɨawe: —Mariya 'aku. Mɨkɨ hepana 'aniereka mɨpaɨ katinitahɨawe 'arameu niukiyarikɨ: —Xawuni (taniukikɨ Ti'ɨkitame manuyɨne).
JOH 20:17 Ketsutsi mɨpaɨ katinitahɨawe: —Pepɨkanetsikuwiwiyani, ne'ukiyari hetsɨa nepɨka'anutiyeiwe 'akuxi. Matsi ne'iwama wahetsɨa kenemie. Mɨpaɨ ketiniwaretahɨawi: “Ne'ukiyari hetsɨa mɨxe'ukiyari hetsɨa nekananutiyeimɨkɨ, nekakaɨyari hetsɨa mɨxekakaɨyari hetsɨa neranutiyanita”.
JOH 20:18 Hikɨ Mariya Mararatanaka mana kaninuani teyɨ'ɨkitɨwamete mɨpaɨ tiwakuxaxatɨwatɨ: «Ti'aitame muxeikɨ», mɨpaɨ mɨrehɨawekaikɨ.
JOH 20:19 Merikɨtsɨ 'akayuneku mɨkɨ mexɨakame tukariyari tsemanayaritsie, teyɨ'ɨkitɨwamete meyuxeɨriekaku kiteniete reunatɨkaikaku memɨwamakaxekaikɨ huriyutsixi, Ketsutsi kaninuani. Wahixɨapa kaniutakeni, mɨpaɨ katiniwarutahɨawe: —Xɨka xeka'uximatɨarieka yu'iyaritsie.
JOH 20:20 Mɨpaɨ 'utayɨka kaniwaruxeitsitɨani yumamate meta yu'aki. Teyɨ'ɨkitɨwamete mekaniyutemamawiekaitɨni Ti'aitame mexeiyatɨ.
JOH 20:21 Hikɨ Ketsutsi tawarita mɨpaɨ katiniwarutahɨawe: —Xɨka xeka'uximatɨarieka yu'iyaritsie. Ne'ukiyari mɨnereyenɨ'a hepaɨ, neta mɨpaɨ nekatinixeheutanɨ'axɨani.
JOH 20:22 Mɨpaɨ 'utayɨka kaniwaruhɨtsieni, mɨpaɨ katiniwarutahɨawe: —Xekeneutanaki'eri 'Iyari Mɨtiyupata.
JOH 20:23 Tsepa kemɨ'ane xemɨtewareuyehɨwirieni tita 'axamemɨteyurie, mekateneuyehɨwiyariekuni. Tsepa kemɨ'ane xemɨkateheuyehɨwiri tita 'axamemɨteyurie, mepɨkateheuyehɨwiyarieni.
JOH 20:24 Merikɨtsɨ Tumaxi Kwate mɨtitewakai tamamata heimana yuhutame wahetsɨa mieme kanihɨkɨtɨkaitɨni. Mɨkɨ wahamatɨa pɨka'uyeikakai kepauka Ketsutsi munua.
JOH 20:25 Hikɨ hipatɨ teyɨ'ɨkitɨwamete mɨpaɨ mekatenikuxaxatɨwakaitɨni: —Ti'aitame tekaniuxeiya. Tumaxi mɨpaɨ katiniwarutahɨawe: —Xɨka mamayatsie neka'ixeiyani kɨrapuxi 'uxayari, xɨka ne'itɨwamekɨ neka'imayɨani kɨrapuxi 'uxayari, meta 'akieya xɨka nemamakɨ neka'umayɨani, yuri nepɨkatita'erieniri.
JOH 20:26 Merikɨtsɨ 'atahairieka tukari 'anukayaku tawarita teyɨ'ɨkitɨwametemama kiita mekanayetekaitɨni, Tumaxi wahamatɨa kanayekateitɨni. Hikɨ kiteniete reunatɨkaikaku Ketsutsi kaninuani, wahixɨapa kaniutakeni, mɨpaɨ katiniwarutahɨawe: —Xɨka xeka'uximatɨarieka yu'iyaritsie.
JOH 20:27 Hikɨ mɨpaɨ Tumaxi katiniutahɨawe: —Kenaye'a, 'a'itɨwamekɨ keneneumayɨa nemamatetsie, 'amamakɨ keneneumayɨani ne'akita. Yuri pekati'erietɨ pepɨka'ayuyeitɨwani, matsi pɨta yuri peti'erietɨ kenaye'a.
JOH 20:28 Tumaxi mɨpaɨ katinita'eiya: —Neti'aitɨwame meta nekakaɨyari 'aku.
JOH 20:29 Ketsutsi mɨpaɨ katinitahɨawe: —Yuri pepɨtiuta'eri pemɨnetsi'uxeikɨ. Mɨkɨ memɨkanetsixeiyawawe peru yuri memɨte'erie, mɨkɨ mekaniyutemamawieka.
JOH 20:30 Merikɨte, 'inɨari yɨkɨ 'aneneme mɨireme yakatiniyurienekaitɨni Ketsutsi teyɨ'ɨkitɨwamete wahɨxie, kemɨkare'utɨarie 'ikɨ xapatsie.
JOH 20:31 Peru 'ikɨ kanaka'utɨarieni yuri xemɨte'eriekakɨ kename Ketsutsi Kɨritsitu hɨkɨ, Kakaɨyari Nu'aya, yuri xete'erietɨ tukari xemexeiyanikɨ hetsɨana xemiemetetɨtɨ.
JOH 21:1 Merikɨtsɨ 'arike tawarita Ketsutsi matsiɨkɨtɨ kanayuyeitɨani teyɨ'ɨkitɨwamete wahɨxie Tiweriya harakunayaritsie. 'Ipaɨ matsiɨkɨtɨ katinayuyeitɨani:
JOH 21:2 'Axeikɨa mekaniu'uwakaitɨni Tsimuni Pekuru, Tumaxi Kwate mɨtitewakai, Natanaheri Kanaha kiekame Karereya kwieyaritsie mieme, Tsewereu niwemama, meta hipatɨ teyɨ'ɨkitɨwametemama yuhutatɨ.
JOH 21:3 Tsimuni Pekuru mɨpaɨ katiniwarutahɨawe: —Ne nepɨketsɨweiyamie. Hipatɨta mɨpaɨ mekatenitahɨawe: —Tameta 'ahamatɨa tepuhu teyunaitɨ. Mana mekanekɨne, kanuwatsie mekanikayaxe, mɨkɨ tɨkaritsie tixaɨtɨ mepɨkate'u'axixɨ.
JOH 21:4 Merikɨtsɨ 'etsiwa 'uhekɨakaku mana kaniutakeni Ketsutsi harakuna tetsita, peru teyɨ'ɨkitɨwamete mepɨka'imatekai Ketsutsi mepɨka'eriekai.
JOH 21:5 Hikɨ Ketsutsi mɨpaɨ katiniwarutahɨawe: —Neuxei, temari, ¿'ikwai xekatehexeiya? Mɨpaɨ mekatenita'eiya: —Hawaikɨ.
JOH 21:6 Hikɨ mɨpaɨ katiniwarutahɨawe: ―Wipi kanuwa tserieta xekeneukawiwi, mana xekaniwakaxeiyakuni. Hikɨ mana mekaneikawiwieni, mepɨyutatexi me'ihanatɨ memɨyuwaɨkawakaikɨ tsapari.
JOH 21:7 Hikɨ tiyɨ'ɨkitɨwame Ketsutsi minaki'eriekai mɨpaɨ Pekuru katiniutahɨawe: —Ti'aitame pɨyɨane. Hikɨ Tsimuni Pekuru 'u'enaka kename Ti'aitame hɨkɨtɨkai, yu'ixuriki herie mieme 'ewakuwieka muyutikemaripiekaikɨ, hapa kaneukatsuna.
JOH 21:8 Hipatɨ teyɨ'ɨkitɨwamete kanuwatsie meyetetɨ mekaniu'axɨani wipi me'uhaximetɨ tsapari mehɨneme. Hatetsita pɨkahetewakai, xeitsienituyari meturuyari xeikɨa petewakai.
JOH 21:9 Kwiepa me'u'axɨaka tɨɨ mekaniuxeiya tatɨkaime, tsaapa tɨɨpa 'akaikame mete'uxei meta paa.
JOH 21:10 Ketsutsi mɨpaɨ katiniwarutahɨawe: —Tsapari xike xemɨwarutiwi xekeniwara'ɨi.
JOH 21:11 Tsimuni Pekuru mana kaneutimake, wipi kaniuhana kwiepa. Tsapari 'amepapatɨ mekanihɨnekaitɨni, xeitsienituyari heimana huta tewiyari heimana tamamata heimana yuhaikatɨ mekaniyupaɨmekaitɨni. Tsepanetɨ memɨyuwaɨkawakai, pɨka'utatsanixɨ wipi.
JOH 21:12 Ketsutsi mɨpaɨ katiniwarutahɨawe: —Xekenakɨni xeketeneukwakari. Teyɨ'ɨkitɨwamete nixewitɨ pɨkayuwaɨriyakai «¿'ekɨ kepaikɨ pepɨyɨane?» mɨtitahɨawe, memɨtemaikaikɨ Ti'aitame mɨhɨkɨtɨkai.
JOH 21:13 Hikɨ Ketsutsi mana kaninuani, paa kananuku'ɨni kaniwarumini, yaxeikɨata tsaapa kaniwarumini.
JOH 21:14 'Ana hairieka matsiɨkɨtɨ kanayuyeitɨani Ketsutsi teyɨ'ɨkitɨwamete wahɨxie mɨkite watsata 'anukukeka.
JOH 21:15 Merikɨtsɨ mete'ukwaku Ketsutsi mɨpaɨ Tsimuni Pekuru katiniutahɨawe: —Tsimuni 'aku, Wani nu'aya, ¿waɨkawa penetinaki'erie, mɨkɨ 'etsiwa xeikɨa menetsinaki'eriekaku? Pekuru mɨpaɨ katinita'eiya: —Huu, Ti'aitame. 'Ekɨ pepɨtimate nemɨmatsinaki'erie. Hikɨ Ketsutsi mɨpaɨ katinitahɨawe: —Merikɨte, nemuxatsima tɨɨrixi ketiniwarumikwa.
JOH 21:16 Hikɨ hutarieka mɨpaɨ katinitahɨawe: —Tsimuni 'aku, Wani nu'aya, ¿penetinaki'erie? Mɨkɨ mɨpaɨ katinita'eiya: —Huu, Ti'aitame. 'Ekɨ pepɨtimate nepɨmatsinaki'erie. Ketsutsi mɨpaɨ katinitahɨawe: —Nemuxatsima keniwa'ɨwiyani.
JOH 21:17 Hairiekari Ketsutsi mɨpaɨ katinitahɨawe: —Tsimuni 'aku, Wani nu'aya, ¿penetinaki'erie? Pekuru kaniyuhiweriekaitɨni hairieka «¿Penetinaki'erie?» mɨtitahɨawixɨkɨ. 'Ayumieme mɨpaɨ katinitahɨawe: —Ti'aitame, 'ekɨ naime pekatinimaika, pepɨtimate nemɨmatsinaki'eriekɨ. Ketsutsi mɨpaɨ katinitahɨawe: —Nemuxatsima ketiniwarumikwa.
JOH 21:18 Yurikɨ mɨpaɨ nekanaineni, kepauka pemɨtemaikɨtɨkaitsie 'akɨmana pekane'ahɨayakaitɨni petikuyeikakaita hakewa pemeuyeimɨkɨkai. Kepauka 'ukiratsi pemayanitsie, xewitɨ kamenanahɨamɨkɨ meranuhanata hakewa pemɨkaheuyeimɨkɨtsie, 'amamá pekanitatseraxɨamɨkɨ.
JOH 21:19 Mɨpaɨ kaniutayɨni tihekɨatatɨ Pekuru kemɨtimɨnikekai witsi'aneme Kakaɨyari 'ayeitɨanike. Mɨpaɨ 'utayɨka mɨpaɨ katinitahɨawe: —Kenenanuweiya ne'utɨma.
JOH 21:20 Pekuru ta'aurie 'aweka tiyɨ'ɨkitɨwame Ketsutsi minaki'eriekai kaniuxeiya waruweiyakame, mɨkɨ memɨte'ukwaitsie 'auriena mukatei mɨpaɨ mɨtitahɨawixɨ: «Ti'aitame, ¿kepaikɨ pɨmatsiyetuani?»
JOH 21:21 Pekuru mɨkɨ 'uxeiyaka, mɨpaɨ Ketsutsi katiniutahɨawe: —Ti'aitame, ¿'ikɨta ketiyurieni?
JOH 21:22 Ketsutsi mɨpaɨ katinitahɨawe: —Xɨka netsi'unakire 'ikɨ mɨyuhayewakɨ nemunuanitsieke, ¿ketsɨ pe'anenikeyu 'ekɨ? 'Ekɨtsɨ ne'utɨma keneumieni.
JOH 21:23 'Ayumieme ta'iwama watsata 'ikɨ niuki kanixatsiwakaitɨni, kename 'iya tiyɨ'ɨkitɨwame kamɨnikekai. Matsi Ketsutsi mɨpaɨ pɨkatitahɨawixɨ mɨkamɨnikekaikɨ, pɨta pɨtitahɨawixɨ: «Xɨka netsi'unakire mɨyuhayewakɨ nemunuanitsieke, ¿ketsɨ pe'anenikeyu 'ekɨ?»
JOH 21:24 Mɨkɨ tiyɨ'ɨkitɨwame kanihɨkɨtɨni kemɨ'ane mɨtihekɨata 'ikɨ hepaɨtsita, kemɨ'ane 'ikɨ mɨtiuti'utɨa. Tepɨtemate tita mɨtihekɨata yuri maine.
JOH 21:25 Waɨkawa 'akuxi yɨkɨ 'anenetɨ kanixuaweni kemɨtiuyuri Ketsutsi, xɨka xexuitɨ tiuti'utɨarienike, mɨpaɨ nepɨtiku'eriwa, 'ena kwiepa pɨkatinakenike xapate mɨti'utɨarieni. Mɨpaɨ xeikɨa kani'aneni.
ACT 1:1 Neuxei Teukiru, matɨari paitɨ xapa neputawewi naitɨ kemɨtiuyɨ hepaɨtsita tikuxatame, Ketsutsi kemɨtitsutɨa yatiyurienetɨ meta ti'ɨkitatɨ,
ACT 1:2 mɨpaɨ tiuyurieka 'ana kananutiwitɨkieni, 'aitsika warupitɨaka nɨ'ariekate mɨwaranayexei, 'Iyari Mɨtiyupata yati'aitakaku.
ACT 1:3 Hikɨta tiukwineka mɨkɨ, wahetsɨa 'uyeikatɨ puyuhekɨatakai kemɨrayenierekai mamariwawemekɨ tiyurienetɨ. Huta tewiyari tukari mepixeiyakai. Tiwakuxaxatɨwame kemɨreuyewetse Kakaɨyari ti'aitametɨkaku.
ACT 1:4 Hikɨ wahamatɨa tikwatɨ mɨpaɨ katiniwaruta'aitɨani: —Kerutsaremetsie xepɨka'ayekɨkani, matsi xekeneta'ikwewani tita ne'ukiyari mɨtixatakai kename tixehanɨ'airieni, ketita xemɨte'u'eni netikuxatakaku:
ACT 1:5 Wani hakɨ xeikɨa katini'ɨyanekaitɨni, xeme matsi 'Iyari Mɨtiyupatakɨ xepɨka'ɨyarieni yapaɨmexɨa tukari 'anukayayu.
ACT 1:6 Hɨkɨ mɨkɨ hamatɨana memuyukuxeɨri mɨpaɨ mekateniku'iwawiyakaitɨni: —Ti'aitame, ¿hikɨri petihekwatɨani 'Ixaheri mɨra'aitakaitsie?
ACT 1:7 Ketsutsi mɨpaɨ katiniwarutahɨawe: —Xeme xehetsie pɨkatinake xemɨtemaikakɨ kepauka tukari mɨtinake. Ne'ukiyari xeikɨa yakatini'aitani.
ACT 1:8 Matsi xekanitɨrɨkariyariekuni 'Iyari Mɨtiyupata yuhetsie xehexeiyatɨ. Xemunenierixɨ xepɨhɨkɨtɨni xetehekɨatatɨ nehepaɨtsita Kerutsareme, naitsarie Kureyatsie, Tsamariyatsie meta naitsarie kwie manuniere paitɨ.
ACT 1:9 Mɨpaɨ tikuxatakaku, mɨkɨ me'ixeiyakaku, kananutiwitɨkieni, hai kaniukuyani memɨka'ixeiyakɨ.
ACT 1:10 Hikɨ yuheima mehautinenierekaku mexi 'a'utimiekai, yapauka 'ukitsi yuhutatɨ wa'aurie mekaniti'uni mehautuxatɨ.
ACT 1:11 Mɨkɨ mɨpaɨ mekateniwarutahɨawe: —Karereyutari, ¿titayari mana xeteti'u muyuawitsie xeheutinenieretɨ? Mɨkɨ Ketsutsi xetsata 'uwetɨ manutiwitɨkie, kexemɨte'ixei muyuawitsie heutimieme, yaxeikɨata tiyuxexeiyatɨ kaninuamɨkɨ.
ACT 1:12 Hikɨ Kerutsareme mekaniu'axɨani yemuri Huriwu mati'u mɨrakutewatsie meheyekɨneka, 'uxipiya tukaritsie tewi kemɨtipitɨarie mana muyeikanikɨ, xeikirumeturuyari petewakai Kerutsareme.
ACT 1:13 Hikɨ me'u'axɨaka, kiita mekaneutihaxɨani wapaitɨ memayukuxexeɨriwatsie. Muwa mepayetekai Pekuru, Kakuwu, Wani, 'Atɨrexi, Peripe, Tumaxi, Waxiturume, Mateu, Kakuwu 'Aripeu nu'aya, Tsimuni Tseruti kiekame meta Kura Kakuwu nu'aya.
ACT 1:14 Mɨkɨ yunaitɨ xei'iyariyari mepexeiyakai, meyuxewitɨ nenewierikɨ mepɨ'ayumiemetetɨkai, 'ukarawetsixi yunaitɨ, Mariya Ketsutsi maamaya meta 'iwamama.
ACT 1:15 Hikɨ mɨkɨ tukaritsie Pekuru yu'iwama wahixɨapa kaniutakeni, teɨteri memuyuxeɨriekai xeitsienituyari heimana xeitewiyari mekaniyupaɨmekaitɨni,
ACT 1:16 mɨpaɨ Pekuru katiniwarutahɨawe: «Ne'iwama, kaneuyewekaitɨni 'utɨarika maye'anikɨ, meripaitɨ kemutayɨ 'Iyari Mɨtiyupata, Rawiri mɨpaɨ 'utayɨku Kura hepaɨtsita, mɨkɨ kemɨ'ane mɨwarewitɨ Ketsutsi mɨwiyarienikɨ.
ACT 1:17 Kura tahamatɨa puyeikakai, meta tahamatɨa pɨti'uximayakai.
ACT 1:18 (Hikɨ tumini mu'ɨitɨariekɨ kwie kaniunaneni, mana 'atiweka yumu'ukɨ kaniukaweni kaniutatsane, kwinurieya naitɨ kanawiwieni.
ACT 1:19 Kerutsareme memɨtama yunaitɨ mepɨte'utamari, 'ayumieme mana kwiepa 'Atserirama katinakutewaka waniukikɨ, manɨyɨne “Xuriya Mataxɨri” katinakutewaka).
ACT 1:20 »Karikɨ Nɨawari xapayari puta'utɨarie mɨpaɨ 'anuyɨtɨ: »“Kiiya 'uyemawetɨ ke'ayani, muwa nixewitɨ pɨka'ayekani”. Metatsiere mɨpaɨ pɨre'uxa: »“Kemɨtihɨritɨariekai xewitɨ pɨta hetsiena mieme kerayani”.
ACT 1:21 'Ayumieme, kaneuyeweka xeime temanayexeiya munierixɨ tahamatɨa memu'uwakai tukarikɨ kepauka Ti'aitame Ketsutsi tahetsɨa muyeikakaitsie,
ACT 1:22 mɨkɨ tukaritsie Wani meka'ɨyaxɨtsie, meta kepauka tatsata manutiwitɨkietsie, peuyewetse mɨkɨ xewitɨ memunenierixɨ tahamatɨa tihekɨatatɨ mayanikɨ kemɨranukuke».
ACT 1:23 Hikɨ yuhutame mekaniwaranayexeiya Kutse Waritsawaxi mɨtitewakai meta Kutsitu mɨtimatiwakai, metatsiere Matiyaxi panayexeiyarie.
ACT 1:24 Hikɨ mɨpaɨ mekateniyutanenewieni: «'Ekɨ Ti'aitame yunaime wa'iyari pemɨmate. Ketaneuxeitsitɨa kemɨ'ane pemanuyexeiya 'ikɨ yuhutame wahetsie,
ACT 1:25 hetsiena mɨtinakenikɨ 'ikɨ hepaɨtsita mɨhɨritɨarienikɨ mɨtanɨ'arienikɨ, Kura mɨtiuhayewaxɨkɨ yu'ɨtɨma metɨakɨ».
ACT 1:26 'Inɨari mepuwewi kemɨ'ane rahetsie mɨtinakekekai. Matiyaxi hetsie katiniunake. Mɨkɨ nɨ'ariekate wahamatɨa matiwatɨ patɨa tamamata heimana xewi.
ACT 2:1 Hikɨ 'atahutarieka Tsemana 'ixɨarariyari 'aye'aku, yunaitɨ mepɨyuxeɨriekai yameteyurienike 'auxeikɨa.
ACT 2:2 Yapauka taheima mieme 'eka hepaɨ 'anetɨ kaniukuyani tɨrɨkaɨyetɨ yemietɨ, mɨkɨ yuariya kiita putahɨnixɨ memuwayetekaitsie.
ACT 2:3 Hikɨ tai hepaɨ 'anenetɨ puyuhekɨarixɨ yuxexuime wahetsie.
ACT 2:4 Yunaitɨ 'Iyari Mɨtiyupatakɨ meputihɨnixɨ, meta mepitsutɨa me'utiniutɨ hipame niukiyarikɨ, 'Iyari kemɨtiwapitɨakai memɨtiniunikɨ.
ACT 2:5 Hikɨ Kerutsareme mepɨtitekai huriyutsixi Kakaɨyari memayexeiya, yunaime nuiwarite watsata memɨ'ayumiemetetɨkai naitsarie muyuawitɨa.
ACT 2:6 Kepauka yuariya memu'eni yunaitɨ mepuyuxeɨri, mepɨyuxamuriekai yuxexuitɨ yuniukikɨ memɨwa'eniekaikɨ me'utiniukame.
ACT 2:7 Mepɨ'iyarixiekai meta mepɨhɨxiyakai mɨpaɨ me'utiyuatɨ: «¿Neuxei, 'ikɨ yunaitɨ memutiniuka mekatekarereyutari?
ACT 2:8 ¿Ketɨtɨri 'ikɨ tetewa'enie taxexuitɨ taniukikɨ meputiniuka ketemɨte'ununuiwaxɨ?
ACT 2:9 Parutiyatari, meriyatari, 'eramitatari, Metsuputamiya kiekatari, Kureyatsie, Kaparutsiyatsie, Punitutsie meta 'Atsiyatsie,
ACT 2:10 Pɨrikiyatsie, Pamɨpiriyatsie, 'Ekipitutsie, Riwiya 'aurie mukumatsie Tsirene temɨtama, xumatari memɨ'iwatatɨwe,
ACT 2:11 huriyutsixi, hipatɨ huriyutsixi memayuyeitɨa, kɨretatari, 'arawiyatari, tanaitɨ tepɨwa'enie taniukikɨ memutiniuka, Kakaɨyari kemɨtimariwe mekuxatame».
ACT 2:12 Yunaitɨ mekani'iyarixiekaitɨni, 'atsimekatemaitɨ ketɨtɨ mɨtiyɨanekai, yuxexuitɨ mɨpaɨ meteyɨkɨhɨawetɨ: «¿Ketɨtɨ 'ikɨ pɨtiyɨane?»
ACT 2:13 Hipatɨ mewananaimatɨ xeikɨa mɨpaɨ mekaniutiyuanekaitɨni: «Winu makakakɨ xeikɨa mepuhuxa».
ACT 2:14 Hikɨ Pekuru 'anukukeka tamamata heimana xewi wahamatɨa, karima kaniutaniuni, mɨpaɨ katiniwarutahɨawe: «Neuxei huriyutsixi, yunaitɨ Kerutsareme xemɨtama, xeketenemaika ketɨtɨ mɨtiyɨane, hikɨ xekeneneu'eni kenemɨtayɨni.
ACT 2:15 'Ikɨ mepɨkatarɨwe xeme xemɨteku'eriwa hepaɨ, matsi puximeri 'akuxi 'etsiwa xeikɨa puxɨka.
ACT 2:16 'Ikɨtsɨ kanihɨkɨtɨni tita mɨtixatsiwakai, tixaxatame Kuheri ya'utainekaku:
ACT 2:17 »Mɨpaɨ paine Kakaɨyari: “Tukari 'aye'ayu kepauka mɨtaparirɨmeni mɨpaɨ pɨtiyɨni, ne'iyari nepɨtatuani teɨteri yunaime wahetsie. Xeniwema 'ukitsi meta 'ukari mepɨtetaxata, meta temari heinɨtsi hepaɨ 'anekame mepɨtexeitsitɨarieni, 'ukirawetsixi mepɨteheinɨni.
ACT 2:18 Mɨkɨ tukaritsie ne'iyari nepɨtatuani, mɨkɨ nete'uximayatsiriwamete 'ukitsi meta 'ukari wahetsie, mepɨtetaxata nehetsiemieme.
ACT 2:19 Nepɨwahɨxiyatsitɨani waheima muyuawitsie meta kwiepa 'inɨari nepɨtiyurieni, xuriyakɨ, taikɨ meta haiwitɨri kɨtsiyarikɨ.
ACT 2:20 Tau kaniyɨrimɨkɨ, meta metseri xuriya hepaɨ 'anetɨ kanayeimɨkɨ mexi 'akuxi Ti'aitame kanuaweni, kepauka mariwemekɨ mɨtiyurienitsie.
ACT 2:21 Yunaitɨ kemɨ'ane Ti'aitame memahɨawe, mɨkɨ mekanitawikweitsitɨariekuni”.
ACT 2:22 »'Ixaheri teɨteriyari, 'ikɨ niuki xekene'enieka: Kakaɨyari xetsata pitahekɨataxɨ Ketsutsi natsaretitanaka mariwemekɨ tiyurienetɨ tɨrɨkaɨyemekɨ, wahɨxiyatsitɨatɨ meta 'inɨarikɨ tiyurienetɨ mɨkɨ hetsiemieme, Kakaɨyari kemɨtiuyuri xeme xekatenimaika.
ACT 2:23 'Ikɨ kaniyetuiyani yamɨraye'anikɨ Kakaɨyari mɨpaɨ timaitɨ, matɨaripaitɨ, kaneiyenɨ'ani mɨyetuiyanikɨ, teɨteri 'axateyuruwamete xetewaruta'aitɨaka xekaniwiya, kuruxitsie xe'ikawieka xekanimieni.
ACT 2:24 Matsi Kakaɨyari kanenukuketɨani, 'ixɨnaka kemɨrehɨiyakai mɨkitɨ, mɨkɨ pɨkayɨwekai mɨkitɨ muyuhayewakɨ.
ACT 2:25 Rawiri mɨpaɨ paine hepaɨtsitana: »“Ti'aitame yuheyemekɨ nehɨxie nepɨxeiyakai, mɨkɨ netserieta mutiwekɨ ne nepɨkahatiweni.
ACT 2:26 'Ayumieme ne'iyari puyutemawie, nenetemawietɨ neputakwika, yaxeikɨata newaiyari 'apuyeikani ta'ikwewatɨ.
ACT 2:27 'Ekɨ pepɨkanetsiku'eirieni mɨkite wateukiyapa muyuhayewakɨ, 'ekɨ pepɨka'ipitɨani 'iyari mɨpatsie mɨkatiuka'eniwanikɨ.
ACT 2:28 Pepɨnetsi'uxeiyatsitɨa huye tukariyari nemexeiyanikɨ, waɨkawa pepɨnetsihetemawieritɨani kepauka 'ahɨxie nemeta'ani”.
ACT 2:29 »Neuxei 'iwamarixi, 'aixɨa kani'aneni heitseriemekɨ mɨtixekuxaxatɨwanikɨ tatewari Rawiri hepaɨtsita, kaniumɨni meta tiukateukie, makateukietsie mana kaniukani tatsata hikɨ 'akuxi.
ACT 2:30 Tixaxatame pɨhɨkɨtɨkai meta katinimaikaitɨni kename Kakaɨyari 'ɨyɨhɨritɨa heitseriemekɨ mɨpaɨ 'utaitɨ, xewitɨ Rawiri hetsie mɨyeyanikekai heitserie pɨpitɨarienikekai Kɨritsitutɨtɨ, pikayenikekai 'uwenieya mɨra'aitatsie.
ACT 2:31 Matɨaripaitɨ 'ixeiyatɨ mɨpaɨ kaniutayɨni, Kɨritsitu kemɨranukuke tikuxatatɨ, mɨpaɨ 'utaitɨ: »“Tukarieya mɨkitɨ pɨka'uku'eiriwaxɨ, waiyarieya pɨka'utapɨnixɨ”.
ACT 2:32 Hikɨ Kakaɨyari Ketsutsi panukuketɨa, tame tanaitɨ temunenierixɨ tepɨhɨkɨ.
ACT 2:33 'Anutiwitɨkieka mariwetɨ patɨa, Kakaɨyari tserieta, kanitanaki'erieni tita 'ukiyarieya mɨtiyetuirienikekai, 'Iyari Mɨtiyupata hɨkɨtɨme. Mɨkɨ kaniutatuani hikɨ kexemɨte'ixeiya meta kexemɨte'i'enie.
ACT 2:34 Rawiri muyuawitsie pɨka'anutitɨa, matsi yaputayɨ: »“Ti'aitame mɨpaɨ katiniutahɨawe neti'aitɨwame: Netserieta kenayexi,
ACT 2:35 mɨkɨ memɨmetsi'aye'unie 'ahɨxie nekaniwa'atɨamɨkɨ”.
ACT 2:36 »'Ayumieme heitseriemekɨ mɨpaɨ xeketenemaika yunaitɨ 'Ixaheri xemɨtama, kemɨ'ane xeme kuruxitsie xemukawi, Kakaɨyari Ti'aitame meta Kɨritsitu peyeitɨa».
ACT 2:37 Kepauka 'ikɨ niuki memu'eni yunaitɨ yu'iyaritsie mepuhiweritɨarie, Pekuru meta hipame nɨ'ariekate mɨpaɨ mekateniwarutahɨawe: —'Iwamarixi, ¿keri teteyurieka?
ACT 2:38 Pekuru mɨpaɨ katiniwaruta'eiya: —Xeketeneuhayewa 'axakexemɨteyurie, meta yuxexuitɨ xepɨka'ɨyarieni Ketsutsi Kɨritsitu hetsie, tita 'axaxemɨte'uyuri, xemɨteheuyehɨwiyarienikɨ, meta 'Iyari Mɨtiyupata xehexeiyatɨ xepakɨne.
ACT 2:39 'Ikɨ kemutayɨ xehetsie pɨmieme, xetɨriyama wahetsie meta yunaitɨ teewa kɨkamete, tatsɨari, mɨkɨ yunaitɨ Ti'aitame takakaɨyari mɨwaranayexeiya.
ACT 2:40 Hipame mɨireme niukikɨ kaniwawawiriekaitɨni mɨpaɨ tiwakɨhɨawetɨ: —Xekeneyutawikweitsitɨa hikɨ miemete 'axamemɨte'u'iyari watsata.
ACT 2:41 Hikɨ mɨkɨ niukieya memutanaki'eri mekaniuka'ɨyarieni, mɨkɨ tukaritsie mepɨwarutinɨi teɨteri haika miriyari meyupaɨmetɨ.
ACT 2:42 Yamepɨ'ayumiemetetɨkai nɨ'ariekate kememɨte'ɨkitakai, meyuxewitɨ meyuparewietɨ paa metitaratɨ meta meyunenewietɨ.
ACT 2:43 Yunaitɨ yu'iyaritsie meheumamatɨ mekanakɨne, waɨkawa mamariwawemekɨ meta 'inɨarikɨ memɨteyuriekaikɨ nɨ'ariekate.
ACT 2:44 Yunaitɨ yuri memɨte'erie 'axeikɨa mekanikutekaitɨni yunaitɨ meyuxewitɨ, 'axeikɨa naime mepɨtehexeiyakai:
ACT 2:45 yukwie meta yupiinite mepɨtetuakai, mepɨtewayetuiriwakai yuxexuitɨ memɨteheuyehɨwa.
ACT 2:46 Tukarikɨ tukita meyukuxexeɨriwatɨ mepɨkatehayewakai. Paa kii meuti'uta mepɨtekwakai meyutemamawietɨ, meta 'aixɨa mete'u'iyaritɨ,
ACT 2:47 Kakaɨyari hepaɨtsita 'aixɨa meputiyuanekai meta yunaitɨ teɨteri 'aixɨa mepɨteku'eriwakai wahepaɨtsita. Tukarikɨ Ti'aitame waxewiriyatɨ mɨkɨ pɨwaxeɨriekai memɨtawikweitsitɨariwakai.
ACT 3:1 Hikɨ Pekuru meta Wani tuki manuwe mekanekɨne tau kɨa kawiekaku, nenewieri hurayari 'aye'aku.
ACT 3:2 'Uki hurietɨ mutinuiwaxɨ mana kani'atɨariwakaitɨni, tukarikɨ tuki kitenie Witsimɨ'ane mɨrakutewatsie mekanitiyetsakaitɨni parewiya mɨwaukakɨ, mana tukita memeutahakekai.
ACT 3:3 Kepauka Pekuru meta Wani mɨwaruxei tukita meheutahaxɨaximekaku, parewiya pɨwawawiriekai.
ACT 3:4 Pekuru meta Wani me'ixeiyatɨ, Pekuru mɨpaɨ katinitahɨawe: —Ketaneuxeiya.
ACT 3:5 Mɨkɨ kaniwaruxeiya tixaɨ mete'iminike 'erietɨ.
ACT 3:6 Pekuru mɨpaɨ kaniutayɨni: —Pɨrata meta huru nepɨkahexeiya, matsi ketita nemɨrexeiya, mɨkɨ nepɨmatiyetuirieni. Ketsutsi Kɨritsitu natsaretitanaka hetsɨa nemɨmiemekɨ mɨpaɨ nepaine, kenanukukexi meta kenekuyeikani.
ACT 3:7 Tserietana mamayatsie tiwiereka kanenukuhana. Yapauka 'ɨkateya meta turuteya kaniutitɨrɨkaxɨani.
ACT 3:8 'Anukutsunaka kaniutakeni, kuyeikatɨ kanayani. Wahamatɨa kaneutahani tukita 'utitsukwakatɨ 'aixɨa 'utaitɨ Kakaɨyari hepaɨtsita.
ACT 3:9 Kepauka yunaitɨ teɨteri memixei kuyeikame Kakaɨyari hepaɨtsita 'aixɨa 'utaineme,
ACT 3:10 mekaneitimani kename mɨkɨ hɨkɨtɨkai tuki kitenie Witsimɨ'ane mɨrakutewatsie mutiyeixakai parewiya wautɨ, waɨkawa mepɨhɨxiyakai mɨyamemɨtenenierekaikɨ.
ACT 3:11 Hikɨ mɨkɨ tewi Pekuru meta Wani pɨkawatauniekai, yunaitɨ teɨteri me'unautsaxɨaximetɨ mehɨxiyatɨ wahetsɨa mepu'axɨa, Tsarumuni 'Etɨpiwarieya meukuwewiya hetɨa.
ACT 3:12 Pekuru waruxeiyaka mɨpaɨ teɨteri katiniwarutahɨawe: «'Ixaheri teɨteriyari, ¿titayari xetehɨxiya mɨyamɨtiuyɨkɨ? ¿titayari xetatexeiya mɨpaɨ xeteku'eriwatɨ, tatɨrɨkariyakɨ temɨte'uyurieni hepaɨ 'ikɨ tewi 'uyeiweme temayeitɨakɨ?
ACT 3:13 'Apɨrahami, 'Itsahaki meta Kakuwu tatutsima wakakaɨyari, mariweme yuniwe Ketsutsi mayeitɨa. Xeme xepiyetua meta xepitixani'eri Piratu hɨxie kepauka mɨkɨ mixɨnakekai.
ACT 3:14 Xeme Mɨpatsie meta Heitserie mexeiya xeputixani'eri, xepitawawiri tiyumemiwame pɨta mɨxɨnarienikɨ.
ACT 3:15 Tukari tiyupitɨwame xepumi, matsi Kakaɨyari kanenukuketɨani mɨkite watsata, mɨkɨkɨ tame temunenierixɨ tepɨhɨkɨ.
ACT 3:16 Yuri mɨtiuta'erikɨ Ketsutsi hetsie, mɨkɨ 'ayumieme pitatseiriyaxɨ 'ikɨ xemɨxeiya meta xemimate. 'Ikɨ tewi yuri kemɨti'erie Ketsutsi 'iparewiekaku, mɨpaɨ naime 'aixɨa reu'eriekame kaneyeitɨani yunaime xehɨxie.
ACT 3:17 »Hikɨ ne'iwama, ne nepɨtimate xeme meta te'aitamete memanuyetei mɨpaɨ xepɨte'uyuri 'atsixekatemaitɨ.
ACT 3:18 Kakaɨyari meripaitɨ mɨpaɨ putayɨkai yunaitɨ Kakaɨyari niukametemama mɨpaɨ me'utiyuanekaku: kename Kɨritsitu tikwinekekai, mɨpaɨ katinaye'atɨarieni.
ACT 3:19 'Ayumieme xeketeneuhayewa kexemɨteyurie, ta'aurie xekenaxɨrieka manuyeitɨarienikɨ tita 'axaxemɨte'uyuri, xehetsɨa 'uxipiya maye'anikɨ Ti'aitame hetsɨa mieme,
ACT 3:20 menɨ'anikɨ mɨkɨ Kɨritsitu kemɨ'ane xehetsiemieme mukayerie, Ketsutsi heitserie mupitɨarie.
ACT 3:21 Peuyewetse mɨtanaki'eriwa, taheima mexi tukari ka'aye'awe kepauka 'aixɨa mɨtiyurieni naime, kememɨtekuxatakai Kakaɨyari niukametemama hetsiena mieme memupatsie meripaitɨ miemete yame'utiyuanekaku.
ACT 3:22 Muitsexi yurikɨ mɨpaɨ kaniutayɨni: “Ti'aitame xekakaɨyari tixexaxatɨwame payeitɨani xeime xe'iwama watsata mieme nehepaɨ 'anekame. Xeme xepi'enieka naime kemɨtixetaxatɨani.
ACT 3:23 Kemɨ'ane mɨkɨ tixaxatame mɨka'enieka, yuteɨterima watsata kanikumaweriyariemɨkɨ”.
ACT 3:24 »Kamɨtsɨ yunaitɨ texaxatamete, Tsamueri pɨtiukatsutɨa meri, 'arike yunaitɨ memɨtekuxatakai, 'ikɨ tukari hepaɨtsita mekatenihekɨatakaitɨni.
ACT 3:25 Xeme texaxatamete xepɨwaniwema, xehetsie katiniunake mɨkɨ tɨratu Kakaɨyari mitawewi xetutsima wahamatɨa, Kakaɨyari 'Apɨrahami mɨpaɨ katiniutahɨawe: “Kemɨ'ane 'ahetsie mɨyeyani 'aixɨa mepɨ'itɨarieka yunaitɨ nuiwarite kwiepa memɨtama”.
ACT 3:26 Kepauka, Kakaɨyari yuniwe 'anukuketɨaka, xehetsɨa meri kaneinɨ'ani 'aixɨa mɨxeyurienikɨ, yuxexuitɨ ta'aurie xemaxɨrienikɨ tita 'axaxemɨteyurie xeteku'eirieme».
ACT 4:1 Mexi'akuxi Pekuru meta Wani teɨteri metewakuxaxatɨwakai, yapauka mawari wewiwamete wahetsɨa mekaniu'axɨani, tuki mɨhɨritɨarie meta Tsarutseutsixi wahamatɨa.
ACT 4:2 Waɨkawa mepɨha'akai teɨteri memɨtewa'ɨkitɨakaikɨ, memɨtewakuxaxatɨwakaikɨ kemɨranukuketɨarie mɨkite watsata, me'utiyuatɨ Ketsutsi mexatatɨ.
ACT 4:3 Pekuru meta Wani meputiwiyarie mɨkɨyɨrirɨmekaikɨri, mepɨwaranutaxɨri muwa me'ayetetɨ mepukatariyarie.
ACT 4:4 Yumɨiretɨ niuki memu'eni yuri mepɨte'uta'eri, 'ukitsi xeikɨa me'inɨaritɨ 'auxɨwime miriyari mepɨhɨkɨtɨkai.
ACT 4:5 Hikɨ 'uxa'arieka Kerutsaremetsie mepɨyukuxeɨri wa'ukiyarima, 'ukirawetsixi meta 'inɨari niukiyarikɨ memɨte'ɨkitametetɨkai.
ACT 4:6 Mana 'Anatsi mawari wewiwamete tiwa'aitɨwame meta Kaipatsi, Wani, 'Arekanituru meta yunaitɨ 'iwamama.
ACT 4:7 Mana yuhixɨapa mewati'uitɨaka mekaniwaku'iwawiyakaitɨni mɨpaɨ mekateniwaku'iwawiyakaitɨni: —¿Ke'anekame tɨrɨkariya xehexeiyatɨ, kemɨ'ane hetsɨa xemiemetɨtɨ mɨya xepɨteyurie xeme?
ACT 4:8 Hikɨ Pekuru 'Iyari Mɨtiyupatakɨ hɨnetɨ mɨpaɨ katiniwarutahɨawe: —Neuxei teɨteri wa'ukiyarima meta 'ukirawetsixi:
ACT 4:9 Hikɨ xemɨtatsiku'iwawiya 'aixɨa temiyurikɨ tewi huriekame, mɨkɨ 'aixɨareu'erietɨ matɨakɨ.
ACT 4:10 Mɨpaɨ xeketenemaika yunaitɨ xeme meta yunaitɨ 'Ixaheri teɨteriyari yameketemaika Ketsutsi Kɨritsitu natsaretitanaka hetsɨa mɨmiemekɨ, mɨkɨtsie tiwiyatɨ 'ena puwe xehɨxie 'aixɨa reu'erietɨ, xeme kuruxitsie xemikawi Ketsutsi, peru Kakaɨyari nenukuketɨani mɨkite watsata.
ACT 4:11 'Ikɨ Ketsutsi Kɨritsitu kanihɨkɨtɨni: »“Xeme kii wewiwamete tete xemutixani'eri, matsi mɨkɨ tete 'itsikina mieme kanayani”.
ACT 4:12 Nixewitɨ tawarita 'apɨka'uyeika tatsitawikweitsitɨanike. Xewitɨ mumawekɨ muyuawitɨa tame teɨteri tatsata kɨmana temɨtawikweitsitɨarienikɨ, mɨkɨ xeikɨa pukayerie».
ACT 4:13 Hikɨ wa'ukiyarima mewaxeiyatɨ kememɨtekuxatakai Pekuru meta Wani mekamamakame, mɨpaɨ metehetimaika hatsuaku memɨkateyɨ'ɨkitɨakaikɨ meta tixaɨtɨ memɨkatehɨmetɨkaikɨ, mekanihɨxiyakaitɨni, mekaniwaretimani Ketsutsi hamatɨa memu'u'uwakaikɨ.
ACT 4:14 Me'ixeiyatɨ mɨkɨ tewi 'aixɨamu'itɨariekai wa'aurie 'uweme, mepɨkayɨwawekairi memɨwaniukimakakɨ.
ACT 4:15 Hikɨ mekaniwarutanɨ'ani memanuyekɨnekɨ 'itsɨkate wahɨxie, mɨkɨ mekaniuyu'enieni mɨpaɨ me'utiyuatɨ:
ACT 4:16 «¿Keteteyurieni 'ikɨ teɨteri wahepaɨtsita? Yurikɨ wakɨmana 'inɨari pɨreyɨ, yunaitɨ kememɨtemate, kemɨtimatsiɨkɨ yunaitɨ Kerutsareme memɨtama wahɨxie. Tame tepɨkayɨwawe tema'imawani.
ACT 4:17 Matsi tawariri mukakuxaxatsiwanikɨ teɨteri watsata, kɨmɨ tepɨwata'imaiya mɨkɨ hepaɨtsita xeime memɨkatekuxaxatɨwanikɨ».
ACT 4:18 Yuhetsɨa mewarutakwewieka mɨpaɨ mekateniwaruta'imaiya memɨkatekuxatanikɨri meta memɨkate'ɨkitanikɨ Ketsutsi hetsiemieme.
ACT 4:19 Peru Pekuru meta Wani mɨpaɨ mekateniwaruta'eiya: —¿'Aixɨa ti'ane Kakaɨyari hɨxie xeme pɨta temɨxe'enieka mɨkɨ teka'enietɨ? Xekeneutimaixɨa kemɨ'ane heitserie mexeiya.
ACT 4:20 Tame tepɨkayɨwawe temɨtehayewa tetekuxatatɨ tita temɨte'uxei meta tita temɨte'u'eni hepaɨtsita.
ACT 4:21 Mɨkɨ tawarita yametewaruta'imaiyaku mekaniwarutatuani memɨyehukɨ. Teɨteri wahetsie tixaɨtɨ mepɨkate'ukaxei memɨwa'uximatɨakakɨ, yunaitɨ 'aixɨa Kakaɨyari hepaɨtsita memutiyuanekaikɨ mete'utamarieka kemɨtiuyɨ.
ACT 4:22 Mɨkɨ tewi huta tewiyari heimana yapaɨmeme wiyari pexeiyakai 'inɨarikɨ 'aixɨa mu'itɨarie.
ACT 4:23 Hikɨ Pekuru meta Wani me'utatuiyaka yuteɨterima wahetsɨa mekaniu'axɨani, mekateniwarutaxatɨani naime kememɨtewarekɨhɨawekai mawari wewiwametekɨ memɨhɨritɨarie meta 'ukirawetsixi.
ACT 4:24 Kepauka mewaru'enieka 'axeikɨa meyuxewitɨ Kakaɨyari nenewieri mekaniupitɨani: «Ti'aitame Naitsarie pemɨti'aita, muyuawi meta kwie pemutawewi, haramara meta naime wahetsie mɨtixuawe,
ACT 4:25 'ekɨ 'Iyari Mɨtiyupata hekɨ, Rawiri tatutsi mɨpaɨ petitaxatɨaku, ti'a'uximayatsiriwame mɨpaɨ putayɨ: »“¿Titayari nuiwarite meteyuti'ɨre, meta titayari teɨteri yakɨ xeikɨa metekuxata?
ACT 4:26 Kwiepa te'aitamete mekaneye'unieka, meta kuwexinaruritsixi Ti'aitame mepɨkaha'eriwa, meta kemɨ'ane manayexeiyarie mepɨkaha'eriwa”.
ACT 4:27 Yurikɨ 'ikɨ kiekaritsie mekaniyukuxeurieni Herurexi meta Punitsiyu Piratu, teɨteri memɨkahuriyutsixiri meta 'Ixaheri teɨteriyari, 'aniwe mɨpatsie 'ahetsiemieme Ketsutsi me'aye'unietɨ, kemɨ'ane pemanayexei,
ACT 4:28 mekaniyukuxeɨrieni yameteyurienike tita pemɨtiyurienikekai meripaitɨ yapɨtiyɨnikekai.
ACT 4:29 Hikɨ Ti'aitame keniwaru'eni 'axakememutiyuane, ketaneparewieka tame te'a'uximayatsiriwamete tixaɨtɨ tekateheumakatɨ 'aniuki temukuxatanikɨ.
ACT 4:30 'Ayumieme 'ekɨta 'amamakɨ keniwaparewieka teɨteri memanayexɨriyanikɨ meta 'inɨarikɨ mamariwaweme petiyurienetɨ 'aniwe Ketsutsi mɨpatsie hetsiemieme».
ACT 4:31 Hikɨ me'uyutanenewieku mana memayuxeɨrietsie kaniutayuani, yunaitɨ 'Iyari Mɨtiyupatakɨ mekaniutihɨne, Kakaɨyari niukieya mekanikuxatakaitɨni tixaɨtɨ mekateheumakatɨ.
ACT 4:32 Yunaitɨ yuri memɨte'erie xei'iyariyari mekanexeiyakaitɨni meta yaxeikɨa mepɨteku'eriwakai. Nixewitɨ piinitɨarika yupiini pɨkarayeitɨwakai, matsi 'axeikɨa naime mekatenexeiyakaitɨni.
ACT 4:33 Nɨ'ariekate tɨrɨkaɨyemekɨ mekatenihekɨatakaitɨni Ti'aitame Ketsutsi kemɨranukuke hepaɨtsita. Kakaɨyari 'aixɨa katiniyuriekaitɨni yunaime mɨkɨ wahetsie,
ACT 4:34 xewitɨ reuyehɨatɨ mana pɨka'ukatei. Kemɨ'ane kwie meta kii, memexeiyakai mekanikutuayakaitɨni, kememɨte'ituani tuminiyari mekani'atɨwakaitɨni,
ACT 4:35 nɨ'ariekate wahetɨa mekanitimanakaitɨni, mɨkɨ yuxexuime kememɨteheuyehɨwa memɨtewayetuiriwanikɨ.
ACT 4:36 Hikɨ Kutse, rewi tewiyari pɨhɨkɨtɨkai, Tsipɨretsie kiekame, nɨ'ariekate Werunawe mekateniterɨwa (taniukikɨ Tiyɨnɨtɨwame panuyɨne),
ACT 4:37 mɨkɨ kwie mexeiyakai kaneituani, tuminiyari nɨ'ariekate wahetsɨa kani'atɨani.
ACT 5:1 Xewitɨta tewi 'Ananiyaxi titewatɨ yɨ'ɨitatɨ Tsapira hamatɨa yukwie mekaniutuani,
ACT 5:2 'ɨyayata yatimaikaku, 'etsiwa kaniyuhayewieni kemɨreituakai, yapaɨmeme xeikɨa, nɨ'ariekate wahetsɨa kani'atɨani.
ACT 5:3 Hikɨ Pekuru mɨpaɨ katinitahɨawe: —Neuxei, 'Ananiyaxi, ¿titayari kauyumarie 'a'iyari tinɨ'ɨ, 'Iyari Mɨtiyupata pemɨtiu'itaikɨ, yapaɨmeme pemauku'ɨikɨ kwie pemetua hetsiemieme?
ACT 5:4 Kepauka mɨ'akwietɨkai katini'apiinitɨkaitɨni. Peheituaka 'akuxi heitserie pepexeiyakai hepaɨtsitana. ¿Ketitayari 'a'iyaritsie mɨyapetiu'ahɨawixɨ? 'Ekɨ teɨteri pepɨkatiwaru'itai, matsi pɨta Kakaɨyari pekatiniu'itaiya.
ACT 5:5 'Ikɨ niuki 'u'enieka, 'Ananiyaxi 'atiweka pumɨ. Mepɨmamakai yemekɨ yunaitɨ me'u'enanaka.
ACT 5:6 Hikɨ temari me'anuku'uka hipatɨ me'iku'eimaka mekaneikweni me'ikateukuke.
ACT 5:7 Hikɨ haika hurayari 'aye'aku 'ɨyaya kaninuani 'atsikatimaitɨ kemɨtiuyɨkai.
ACT 5:8 Pekuru mɨpaɨ katinita'iwawiya: —¿Yakenetineutahɨawi, yukwie mɨyapaɨmemekɨ xeikɨa xetehetua? Mɨkɨ mɨpaɨ katinita'eiya: —Huu, mɨpaɨ kanipaɨmekaitɨni.
ACT 5:9 Pekuru mɨpaɨ katinitahɨawe: —¿Titayari xeteyu'eni xemita'inɨatakɨ Ti'aitame 'Iyarieya? Neuxei 'akɨna teukumete mana kitenie mekaniuti'uka, 'ekɨta mekamenanukweikuni.
ACT 5:10 Yapauka mɨkɨ kanatiweni Pekuru hɨxie kaniumɨni. Hikɨ temari meheutahaxɨaka mɨkime mekaniutaxeiya. Meheikweka kɨnaya 'aurie mekaneikateuku.
ACT 5:11 Waɨkawa mepɨmamakai mana memɨyutixexeɨriwakai, yunaitɨ metehetimaika 'ikɨ kemɨtiuyɨ.
ACT 5:12 Nɨ'ariekate wamamakɨ waɨkawa 'inɨarikɨ meta mamariwaweme katiniuyɨni teɨteri wahɨxie, yunaitɨ yurimemɨte'erie 'axeikɨa mekaniu'uwakaitɨni Tsarumuni 'Etɨpiwarieya meukuwewiya hetɨa.
ACT 5:13 Hipatɨ teɨteri mewamakatɨ wahamatɨa mepɨka'u'uwakai, tsepatɨtɨ yemekɨ 'aixɨa memutiyuanekai wahepaɨtsita.
ACT 5:14 Yumɨiretɨ mepakɨnirɨmekai yuri memɨte'uta'eriwakaikɨ Ti'aitame hetsie.
ACT 5:15 Mepɨyuwaɨkawakairi 'ukitsi meta 'ukarawetsixi yaxeikɨata tekwikwikate huyeta meputuarieximekai 'utatsie meta 'itsitsie me'aheitɨ, Pekuru tsikeretsɨ 'etɨrieya mana wahetsie tiunakeke.
ACT 5:16 Yumɨiretɨta Kerutsareme 'aurie kiekatari tekwikwikate mekaniwa'atɨwakaitɨni, meta kakaɨyarixi 'axamemɨ'anene memɨwa'uximatɨakai, yunaitɨ 'aixɨa meteheu'erietɨ mepakɨ.
ACT 5:17 Hikɨ mawari wewiwame tiwa'aitɨwame meta mana memɨhɨritɨarie me'anuku'uka, yunaitɨ mɨkɨ memɨtsarutseutsixitɨkai, mekaniwaruti'uxiwe'erieni.
ACT 5:18 Hikɨ nɨ'ariekate mekaniutiwiyarieni, katsariyanata mepɨwaranutaxɨri.
ACT 5:19 Matsi tɨkarikɨ niuki tuayame Yawe hetsɨa mieme katsariyanata pɨreuyepiexɨa, pɨwaranuyewitɨ.
ACT 5:20 Mɨpaɨ tiwakɨhɨawetɨ: «Xekenehu, tuki manuwe muwa xeketeniwakuxaxatɨwani teɨteri naime tewi tukari kemɨrexeiyani hepaɨtsita».
ACT 5:21 Mɨkɨ me'u'enanaka kememɨte'utahɨawarie, tukita ximeripaɨtɨ mekaneutahaxɨani, muwa mekateni'ɨkitakaitɨni. Kepauka mawari wewiwame tiwa'aitɨwame meta mana memɨhɨritɨarie, meta wahamatɨa memu'uwakai me'u'axɨaka, 'itsɨkate yunaime 'Ixaheri xiɨyarimama 'ukirawetsixi mekaniwarutaxatɨani. Tupiritsixi mekaniwarutanɨ'ani katsariyanata paitɨ memɨwahapayukɨ.
ACT 5:22 Tupiritsixi me'u'axɨaka mepɨkawarutaxei katsariyanata. Yu'utɨa me'akunuaxɨaka, mɨpaɨ mekateniwarutaxatɨani:
ACT 5:23 «Neuxei katsariyana tepetaxei 'aixɨa rekunakame, tehɨwemete kitenie mepeti'ukai, perutsɨ teteheuyepieka nixeime tepɨkahetaxei kiita».
ACT 5:24 Tupiritsixi tiwa'aitɨwame tukita tihɨweme, meta mawari wewiwamete tewa'atɨwamete me'u'enanaka mekaniuhɨxiyani, 'atsimepɨkatemaikai wahepaɨtsita kemɨtiuyɨ.
ACT 5:25 'Ana xewitɨ nuaka katiniwarutahekɨatɨani mɨpaɨ 'utaitɨ: «Neuxei mɨkɨ 'ukitsi xemɨwaranutaxɨri, mɨkɨ tuki kuraruyarita mepɨtehekuxata teɨteri meteware'ɨkitɨatɨ».
ACT 5:26 Hikɨ tehɨwemete tiwa'aitɨwame kaneyani meta 'iparewiwametemama, hau'erietɨ mekawarahapatɨ mekaniwa'atɨani, teɨteri memɨwamakarɨkaikɨ tetekɨ mewarutituaxakɨ.
ACT 5:27 Hikɨ mewa'atɨaka 'itsɨkate wahɨxie mekaniwati'uitɨani, mawari wewiwame mɨhɨritɨarie
ACT 5:28 mɨpaɨ katiniwarutatieni: —Tame tamɨ tepɨtexe'uta'imaiyakai xemɨkate'ɨkitanikɨ mɨkɨ kemɨtitewa hetsiemieme. Matsi pɨta, xeme Kerutsareme yɨ'ɨkitɨarikakɨ xepɨte'utihɨniyaxɨ, xeme tahetsie xepɨte'ahɨpa mɨkɨ tewi xuriyayakɨ.
ACT 5:29 Pekuru meta nɨ'ariekate mɨpaɨ mekateniwaruta'eiya: —Peuyewetse matsi Kakaɨyari temɨ'eniekakɨ, keyuri teɨteri memɨtate'aitɨakakɨ.
ACT 5:30 Tatutsima wakakaɨyari Ketsutsi kananukuketɨani, xeme xekanimieni kɨyetsie xe'ikuwieka.
ACT 5:31 Kakaɨyari yɨtɨrɨkariyakɨ kanenutiwitɨni yutserieta kaneyeni Ti'aitame meta Tiyuwikweitsitɨwame, mɨxepitɨanikɨ 'ixaheritsixi xemɨtehayewanikɨ kexemɨteyurie, xemɨteheuyehɨwiyarienikɨ.
ACT 5:32 Tame tekanihɨkɨtɨni temunenierixɨ temɨtehekɨata 'ikɨ kemɨtiuyɨ hepaɨtsita, mɨpaɨta katinihekɨatani 'Iyari Mɨtiyupata Kakaɨyari mɨwarupitɨa mɨkɨ memi'enie.
ACT 5:33 Mɨkɨ me'u'enanaka mekaniuyeha'ani mekaniwakwikukaitɨni.
ACT 5:34 Peru xewitɨ 'anukukeka memayuxeɨrietsie paritseu mɨhɨkɨtɨkai, Kamarieri mɨtitewakai, 'inɨari niukiyarikɨ ti'ɨkitame mɨhɨkɨtɨkai, mariweme memɨ'eriekai yunaitɨ teɨteri, katiniuta'aita memɨwaranuyenɨ'anikɨ takwa paitɨ mɨkɨ teɨteri,
ACT 5:35 mɨpaɨ katiniwarutahɨawe: «Neuxei 'ixaheritsixi, yumarima 'aixɨa kexemɨteyurieni 'ikɨ teɨteri wahepaɨtsita.
ACT 5:36 Meripaitɨ panukuke Teuraxi, ya'utaitɨ kename yɨwemetɨkai, nauka tsienituyari 'ukitsi yakɨtɨtɨ hetsiena mekateniwiyakaitɨni. Peru mɨkɨ pumierie, yunaitɨ memi'eniekai mepeutaxɨriexɨa, tixaɨ mepɨkate'akɨ.
ACT 5:37 'Arikeketa kananukukeni Kura karereyatanaka kepauka memaka'utsie, teɨteri yumɨireme kaniwarewitɨni yu'utɨma. Mɨkɨta pumierie, yunaitɨ memi'eniekai mepeutayeixɨa.
ACT 5:38 Hikɨri mɨpaɨ nepaine, xekeniwaruhayewa 'ikɨ teɨteri, xekeniwarutixɨna. Kememɨteku'eriwa meta kememɨteyurie xɨka teɨteri wahetsɨa miemetɨni mekatenihayewakeyu.
ACT 5:39 Mexɨka Kakaɨyari hetsɨa miemetɨni, xepɨkayɨwawe xemɨwata'imaiya, tietɨtsɨ Kakaɨyari xe'aye'unieka». Merikɨtsɨ mekani'enieni.
ACT 5:40 Yuhetsɨa mewarutahɨaweka nɨ'ariekate mewarutiwaka mɨpaɨ mekateniwaruta'aitɨani memɨkatiniunikɨ Ketsutsi hetsɨa memiemetetɨtɨ. Mekaniwarutixɨna.
ACT 5:41 'Itsɨkate wahetsɨa mekaniwayenexɨani meyutemamawietɨ, Kakaɨyari meyɨwaweme mɨwa'eriekaikɨ memɨtawe'eriwanikɨ hetsɨana memɨmiemetetɨkaikɨ.
ACT 5:42 Tukarikɨ tukita yukiiteta mepɨkatehayewakai mete'ɨkitatɨ metekuxatatɨ niuki 'aixɨa manuyɨne kename Ketsutsi heitserie hexeiya Kɨritsitutɨtɨ me'utiyuatɨ.
ACT 6:1 Hikɨ 'ana mepɨtetamɨiriyarɨmekai teyɨ'ɨkitɨwamete. Mɨkɨ kɨriyekutsixi waniukikɨ memutiniukakai mepɨniukixiekai mɨkɨ hepɨrayutsixi waniukikɨ memutiniukakai wahepaɨtsita, wiuratsixi wahetsɨa miemete memɨwaratɨmaiyakaikɨ tukarikɨ kepauka memɨwaparewiekai.
ACT 6:2 Tamamata heimana yuhutatɨ mewarukuxeɨrieka teyɨ'ɨkitɨwamete mɨpaɨ mekateniwarutahɨawe: «'Aixɨa pɨka'anenikeyu tame Kakaɨyari niukieya xɨka tehayewake mexatsie xeikɨa temɨte'apinenikɨ.
ACT 6:3 Hikɨ ta'iwama, xekeniwakuwawa yutsata 'ukitsi 'atahutame 'aixɨa memɨtehekɨatsie 'Iyarikɨ memɨhɨpɨne memɨtemaiwawe, mɨkɨ tepɨwahɨritɨani 'ikɨ hepaɨtsita kemɨreuyewetse.
ACT 6:4 Tametsɨ tetanenewietɨ niukikɨ texeparewietɨ tepɨ'ayumiemetetɨni».
ACT 6:5 Hikɨ 'ikɨ niuki pɨwarunakixɨ yunaitɨ memɨyuxeɨriekai. Mepɨwaranuyexei 'Etsitewani, 'uki yuri mɨti'eriekai 'Iyari Mɨtiyupatakɨ mɨhɨnekai, Peripe, Purukuru, Nikanuxi, Timuni, Parumenaxi, Nikuraxi huriyu mayuyeitɨa 'Anutiyukiya kiekame.
ACT 6:6 Nɨ'ariekate wahɨxie mekaniwati'uitɨani, mɨkɨ meyunenewietɨ yamekateniwaruhɨritɨani waheima me'utimetɨ.
ACT 6:7 Hikɨ Kakaɨyari niukieya kanikuxaxatsiwakaitɨni: Teyɨ'ɨkitɨwamete mepɨtetimɨiriyarɨmekai waɨkawa Kerutsaremetsie meta mawari wewiwamete yumɨiretɨ me'u'enanaka yuri mekateniuta'erieni.
ACT 6:8 Hikɨ 'Etsitewani 'aixɨa tiuka'iyaritɨ tɨrɨkaɨyemekɨ tiyurienetɨ waɨkawa katiniyurienekaitɨni teɨteri watsata, 'inɨari mamariwaweme tiyurienetɨ.
ACT 6:9 Hikɨ tuki 'epuwekai Xɨnariekate titewatɨ, mɨkɨ tsirenetari, 'arekanitɨriya kiekatari, Tsiritsiya meta 'Atsiya miemete hamatɨa mepanuku'ui mehe'iwarɨmetɨ niuki mexɨatɨatɨ 'Etsitewani matɨa.
ACT 6:10 Mepitexiekai kemɨtikuxatakai mɨtimaiwekaikɨ, 'Iyari miparewiekaikɨ.
ACT 6:11 Mepɨtewa'aitɨakai hipame teɨteri memɨtekuxatanikɨ 'itarikakɨ: «Tame tepi'enie 'axa'utaineme Muitsexi hepaɨtsita Kakaɨyari hepaɨtsita».
ACT 6:12 Mepɨwaxamuriekai teɨteri, 'ukirawetsixi, mɨkɨ 'inɨari niukiyarikɨ memɨte'ɨkitakai. Yapauka me'u'axɨaka mekaniwiya, mekaneiwitɨni 'itsɨkate wahetsɨa.
ACT 6:13 Mana mepɨwaruti'uitɨa hipame memɨtehekɨatanikɨ mete'itawatɨ yame'utiyuatɨ: «'Ikɨ tewi pɨkatihayewa 'axa'utaitɨ 'ikɨ 'ena Kakaɨyari hetsiemieme mɨpatsie hepaɨtsita, ta'inɨari niukiyari hepaɨtsita.
ACT 6:14 Tepi'enie mɨpaɨ 'utaineme kename 'ikɨ Ketsutsi natsaretitanaka 'ikɨ tuki ka'una, kename 'ipata tayeiyari Muitsexi mɨtatsi'upitɨa».
ACT 6:15 Me'i'ixɨarietɨ yunaitɨ mana memɨtitekai memayuxeɨrietsie, mekanixeiya nierikaya taheima mieme niuki tuayame nierikaya hepaɨ 'anekame.
ACT 7:1 Hikɨ mawari wewiwamete tiwa'aitɨwame mɨpaɨ katinita'iwawiya: —¿Mɨpaɨ ti'ane 'ikɨ?
ACT 7:2 Mɨkɨ mɨpaɨ kaniutayɨni: —Neuxei 'iwamarixi meta ne'ukiyarima, xekeneu'enana. Tatutsi 'Apɨrahami 'ixeiyakaku Kakaɨyari witsimɨ'ane matsiɨkɨtɨ kanayuyeitɨani Metsuputamiya 'akuxi 'uyeikakaku Haranitsie kaheyeiwekaku,
ACT 7:3 Kakaɨyari mɨpaɨ katinitahɨawe: “Keneuku'eiri 'akwie, 'amarema meta 'apaapa kie, kenemie kemɨ'ane kwie nemɨmetsixeitsitɨanitsie”.
ACT 7:4 »Hikɨ Kariteyutsixi wakwietsie heyeyaka Haranitsie kaniutayerɨni. Manata paapaya 'umɨku Kakaɨyari nipata 'ikɨ kwiepa hakewa xeme'uwa hikɨ.
ACT 7:5 Kakaɨyari pɨka'imi 'ena mɨtinakeni niyɨ'ɨkakɨ mɨkatakenikɨ, matsi Kakaɨyari mɨpaɨ katinitahɨawe kename 'ipitɨanikekai mɨkɨ, piinieya mɨrayanikɨ, 'arike hetsiena memɨyekɨnekekaita wapiini mɨrayanikɨ, tsepa yuniwe mɨkahexeiyakai 'akuxi.
ACT 7:6 Kakaɨyari mɨpaɨ katinitahɨawe: “'Anuiwarima xeime kwieyaritsie mepɨtiteni yapaɨmexɨa, mana waɨriyarika mepɨteta'aitɨarieka meta 'aixɨa mekatexeiyarietɨ, nauka tsienituyari wiyari mepuyurieni.
ACT 7:7 Nekaniwataxanetamɨkɨ 'iya nuiwari waɨriyarika mepɨtewata'uximayatsitɨani. 'Arikemɨkake mekanayekɨnikuni, ne'uximayatsika mekanexeiyakakuni 'ena”.
ACT 7:8 Xitekiya 'inɨariyari 'ipitɨatɨ kanitawewirieni tɨratu. Hikɨ kepauka 'Apɨrahami 'Itsahaki memayexei, 'atahairieka tukaritsie pi'inɨaritaxɨ 'ixitetɨ, 'Itsahaki meta Kakuwu pu'inɨaritɨa, Kakuwu meta mɨpaɨ tiwaruyuri tamamata heimana yuhutame tatewarima.
ACT 7:9 »Mɨkɨ tatewarima me'ita'uxieka Kutse mekaniutuani 'Ekipitutsie manuwitɨkienikɨ, peru Kakaɨyari hamatɨana puyeikakai.
ACT 7:10 Nitawikweitsitɨani naime kemɨti'uximatɨariekai, pipitɨa 'aixɨa mɨtixeiyarienikɨ mɨtimaiwenikɨ Parahuni hɨxie 'ekipitutari mɨtiwa'aitɨwametɨkai hɨxie. Mɨkɨri 'itsɨkame kaneyeitɨani Kutse 'Ekipitu kwieyari hepaɨtsita naime yukiita mieme hepaɨtsita 'ihɨritɨatɨ.
ACT 7:11 »Hikɨ pɨhakaxatɨkai naitsarie 'Ekipitutsie Kananitsie, me'uximatɨarieximekaku waɨkawa. 'Ikwai mepɨka'ukaxexeiyakai tatewarima.
ACT 7:12 'U'enaka Kakuwu kename 'ikwai hexuawekai tɨriku 'Ekipitutsie, kaniwarenɨ'ani tatewarima heiwa.
ACT 7:13 Hutarieka me'u'axɨaku Kutse puyuhekɨataxɨ yu'iwama wahɨxie. Meta Parahuni kaniwaretimani Kutse maremama.
ACT 7:14 Kutse tiutanɨ'aka kaniwaruta'inieni yupaapa Kakuwu yunaime yumarema haika tewiyari heimana tamamata heimana 'auxɨwi meyupaɨmeme teɨteri.
ACT 7:15 Mɨkɨ Kakuwu kaneyani 'Ekipitutsie, mana kanemɨni, tatewarima manata mekanekwini.
ACT 7:16 Mana Tsikenitsie paitɨ mepewitɨkie, mepukateukiexɨa teukiyapa 'Apɨrahami minanai pɨrata tuminiyarikɨ 'Emuri niwemama tsikenitari me'ituirieku.
ACT 7:17 »Hikɨ 'ayehurakaku mɨkɨ tukari maye'atɨarienikɨ tita Kakaɨyari yɨhɨritɨatɨ 'Apɨrahami mɨtiutahɨawixɨ kemɨtiyɨnikekai, mɨkɨ teɨteri mepɨtetimɨiriyarɨmekai 'Ekipitutsie.
ACT 7:18 'Anari panukuke xewitɨ 'ekipitutari tiwa'aitɨwametɨtɨ, mɨkɨ pɨka'imaikai Kutse.
ACT 7:19 Mɨkɨ kwiepa ti'aitame tateɨterima pɨtiwa'itaiyakai. Waɨriyarika pɨwarupitɨa tatutsima 'ɨtsita memɨwareku'eirienikɨ tɨɨri memutinunuiwaxɨ, memɨkwinikɨ.
ACT 7:20 »Hikɨ 'ana Muitsexi kaniutinuiwa. Witsipɨ'anekai nunutsi Kakaɨyari hɨxie, mɨkɨ haika metseri puwerekai yupaapa kie.
ACT 7:21 Kepauka muku'eiriwaxɨ, ti'aitame Parahuni niweya kanitaxeiya, munu'ayatɨni hepaɨ pɨtiweriyaxɨ.
ACT 7:22 Pɨtiuti'ɨkitɨarie Muitsexi naime kememɨtemaiwawekai 'ekipitutari. Kemɨtixata yapɨtiyurienekai pɨyɨwemetɨkai.
ACT 7:23 »Hikɨ huta tewiyari wiyari hexeiyatɨ puyuwaɨri mɨwa'iwatamiekɨ yu'iwama 'ixaheritsixi.
ACT 7:24 Xeime 'uxeiyaka mierieneme, heimana kaniutanuani, 'aixɨa pɨtiuyuri hetsiena mieme, 'ekipitutanaka kaniumieni.
ACT 7:25 Mɨpaɨ katiniku'eriwakaitɨni kename 'iwamama metemaikakekai Kakaɨyari kemɨtiwatawikweitsitɨanikekai 'iya waparewiekaku, mɨkɨtsɨ mɨpaɨ mepɨkatemaikai.
ACT 7:26 Hikɨ 'uxa'ariekata kaniwaruxeiya meyukwitɨweme yuhutame 'ixaheritsixi. Niwanɨtɨamɨkɨkaitɨni 'aixɨa memɨteyuxeiyanikɨ mɨpaɨ 'utaitɨ: “Neuxei, xeme xekaniyu'iwamaka. ¿Titayari 'axaxeteyuyurie?”
ACT 7:27 »Kemɨ'ane yu'iwa 'axamɨyurienekai Muitsexi petaimaxɨ mɨpaɨ 'utaitɨ: “¿Kemɨ'anekuta 'ekɨ metsi'utahɨawixɨ 'itsɨkamekɨ tahetsie pemɨti'aitanikɨ?
ACT 7:28 Kaukatsɨta ne penetsimiemɨtɨ pe'utaine, takai 'ekipitutanaka pemɨtiumi hepaɨ”.
ACT 7:29 Hikɨ 'i'enieka mɨkɨ niuki Muitsexi kaniyuta'una. Kuyeikame kanayani Mariyani kwieyaritsie. Mana mekaniutinunuiwa niwemama yuhutatɨ.
ACT 7:30 »Hikɨ huta tewiyari wiyari 'aye'aku, makumawetsie kanixeiya niuki tuayame taipa 'uweme tupiriya matitatawekaitsie yemuri 'aurie Tsinahi mɨrakutewatsie.
ACT 7:31 Mɨkɨ Muitsexi 'ixeiyaka heinɨtsika hepaɨ 'anekame kanihɨxiyakaitɨni. 'Ahurawa 'ayaku mɨretimanikɨ kemɨtiyɨanekai, Ti'aitame putaniu mɨpaɨ 'utaitɨ:
ACT 7:32 “Ne 'atutsima nekaniwakakaɨyaritɨni, 'Apɨrahami, 'Itsahaki meta Kakuwu”. Mɨkɨ Muitsexi 'uyɨyɨakatɨ pɨkayuwaɨriyakai mɨnierenikɨ.
ACT 7:33 »Ti'aitame mɨpaɨ katinitahɨawe: “'Akakai kenanuyexɨnaxɨa 'a'ɨkatetsie, mana pemanuwe kwiepa kanakupatsieka.
ACT 7:34 Yemekɨ nekaniwaxeiyani neteɨterima kememɨte'uximatɨarie 'Ekipitutsie. Wa'aiwari nekani'enieka, nekaniyuhekɨata mana nemɨwarayewitɨnikɨ. Hikɨtsɨari nepɨmatsi'anunɨ'ani 'a'utɨma 'Ekipitutsie”.
ACT 7:35 »Mɨkɨ Muitsexi memutixani'eri mɨpaɨ me'utiyuatɨ: “¿Kepai tati'aitɨwame ta'itsɨkame pɨmatsi'ayeitɨa?”, mɨkɨtɨme Kakaɨyari kaneyenɨ'ani tiwa'aitɨwame wawikweitsitɨwame, niuki tuayame muxei tupiriyatsie 'uweme 'iparewiekaku yutɨrɨkariyakɨ.
ACT 7:36 Mɨkɨri kaniwarayewitɨni 'inɨari tiuyurieka mamariwaweme tiuyurieka 'Ekipitu kwieyaritsie, Haramara Mɨxetatsie, makumawetsieta yatiyurienetɨ huta tewiyari wiyari.
ACT 7:37 »'Ikɨ Muitsexi kanihɨkɨtɨni kemɨ'ane mɨpaɨ mɨtiwarutahɨawixɨ 'ixaheritsixi: “Ti'aitame mɨxekakaɨyari tixexaxatɨwame nanukuketɨamɨkɨ xe'iwama watsata nehepaɨ 'anekame, mɨkɨ hɨrixɨa xepɨ'enieka”.
ACT 7:38 'Ikɨ Muitsexi kanihɨkɨtɨni kemɨ'ane meyeikakai memɨyuyexexeɨriwakai wahetsɨa makumawetsie, niuki tuayame matɨa meyeikakai mitahɨawixɨ yemuritsie Tsinahi mɨrakutewatsie, tatutsima wahamatɨa meyeikakai. Mɨkɨta niuki mayeyuri putanaki'eri tatsipitɨanike.
ACT 7:39 »Mɨkɨ tatewarima mepɨka'i'eniekukai, matsi mepenuyehɨakukai. Yu'iyaritsie ta'aurie mepaxɨrikukai 'Ekipitutsie,
ACT 7:40 mɨpaɨ 'Aruni metekɨhɨawetɨ: “Peuyewetse kakaɨyarixi temutatiwewirieni memɨtatsi'uwitɨximenikɨ, Muitsexi 'Ekipitu mɨtatsi'ayewitɨ, 'atsitepɨkatemate kemeyɨ kemɨreyunixɨ”.
ACT 7:41 »'Ana kakaɨyari tsikeru 'ɨkiyari meputawewi, mawari mepiwewiri. Mekaniyutemamawiekaitɨni tita yumamakɨ memɨte'utawewi me'ayexeiyatɨ.
ACT 7:42 Hikɨ Kakaɨyari pɨwaruku'eiri, pɨwayetua muyuawitsie memɨteheukatei memɨtewarayexeiyanikɨ. Mɨpaɨ kemɨraka'utɨarie Kakaɨyari niukametemama waxapayaritsie mɨpaɨ 'anuyɨtɨ: »“Teɨteri 'ixaheritsixi, mawari xepɨkanetsi'uwewiri meta 'imikieri, makumawetsie xe'uhutɨ huta tewiyari wiyari.
ACT 7:43 Matsi xepeyexeiyakai Muruki xirikieya, Xemɨpani yukakaɨyari xuraweyari, wahepaɨ tiyuxexeiyame xepɨyuwewiriekai nenewieri xemɨwapitɨanikɨ. 'Ayumieme nekanixe'anunɨ'amɨkɨ xemanuhapanienikɨ” Wawiruniya yeta paitɨ.
ACT 7:44 »Hikɨ 'ixuriki tukiyari hakewa hekɨatsika mayekatei mana kaniuwekaitɨni tatutsima wahetsɨa makumawetsie, kemɨtiu'aitaxɨ mɨkɨ mitahɨawixɨ Muitsexi kename hepaɨna 'anekame ta'aitakekai 'ixuriki tukiyari, 'inɨari muxei hepaɨ 'anekame.
ACT 7:45 Mɨkɨ tuki meputanaki'eri tatewarima. Kutsuhexi matɨa mekani'atɨani kepauka memɨwareutaweiyaxɨa 'ena memɨtitekai hipame nuiwarite. 'Arikeketa 'aniuyeikakaitɨni Rawiri.
ACT 7:46 Kakaɨyari 'aixɨa katiniuka'iyarikaitɨni hetsiena mieme. Mɨkɨ Kakaɨyari putawawiri tuki mɨtawewienikɨ hake Kakuwu Kakaɨyarieya mayekanikɨ.
ACT 7:47 Peru Tsarumuni pɨta kii pitawewiri.
ACT 7:48 »Tsepanetɨ mɨkɨ 'Amutewi kiita mɨkahayeka mamakɨ mɨwewiyata. Kemaine tixaxatame:
ACT 7:49 »“Muyuawi kanine'uwenitɨni, kwie meta hetsiena nemɨnewetɨka kanihɨkɨtɨni. ¿Keri 'anekame kii xepɨnetsitawewirieni? ―Ti'aitame kanaineni―. ¿Hakewa nemeka'uxipienikɨ?
ACT 7:50 ¿Kamɨtsɨ, ne nemamakɨ 'ikɨ naime nemɨtiutiwewi katihɨkɨ?”
ACT 7:51 »Xeme xekɨipi pɨtsetse'i, yu'iyaritsie yunakata xepɨka'inɨaritɨariewawe Kakaɨyari 'inɨarieyakɨ, xeme yuheyemekɨ xepeye'unie 'Iyari Mɨtiyupata yututsima wahepaɨ.
ACT 7:52 ¿Kemɨ'ane Kakaɨyari niukameya xetutsima memɨka'ayewei 'atiuyeika? Mepɨwarukwi mɨkɨ meripai memitahekɨataxɨ 'iya Heitserie Mexeiya 'umamienikekai. Mɨkɨri xepɨyetua, teyukukuyamete xepakɨ hikɨ.
ACT 7:53 'Inɨari niukiyari xeputanaki'eri niuki tuayamete metexe'aitɨakaku, yaxepɨkatekahu».
ACT 7:54 Hikɨ me'i'enieka 'ikɨ, yu'iyaritsie mepuyeha'a. Mepɨyutakewekai me'ihekatɨ.
ACT 7:55 Peru 'Etsitewani hɨnetɨ 'Iyari Mɨtiyupatakɨ, yuheima heutinieretɨ, Kakaɨyari kaniuxeiya witsi'anekame, meta Ketsutsi tiuxei Kakaɨyari tserieta 'utiweme.
ACT 7:56 Mɨpaɨ kaniutayɨni: —Kamɨ, muyuawi nepɨxeiya 'anakayepiekame, Yuri Tewi Kakaɨyari tserieta 'utiweme netixeiya.
ACT 7:57 Karima me'utihiwatɨ yunakateta mekaneuyukanaxɨani. Mekaniwiya 'axeikɨa.
ACT 7:58 Kiekaritsie mekanenuyehɨani, mekaneitituaxixɨani tetekɨ. Memixanetakai yu'ixuriki temaikɨ Tsauru hetɨa mekaniuku'eirieni.
ACT 7:59 Mexi'akuxi me'itituaxakai, 'Etsitewani kaniyunenewiekaitɨni. Mɨpaɨ 'utaitɨ: —Ti'aitame Ketsutsi 'aku, ne'iyari keneutanaki'eri.
ACT 7:60 'Utitunumakeka karima kaniutahiwa: —Ti'aitame 'aku, 'ikɨ 'axakememɨteyuriekɨ wahetsie pepɨkarahɨpani. Mɨpaɨ 'utayɨka kaniumɨni.
ACT 8:1 Hikɨ Tsauru 'iyarieya 'aixɨa pɨ'anekai 'Etsitewani mumieriekɨ. Hikɨ 'ana Kerutsaremetsie memɨyutixexeɨriwakai waɨkawamekɨ mekaneutaweiyariexɨani memu'uximatɨariekaikɨ, yunaitɨ mekaneutayeixɨani naitsarie kiekari mukumanetsie Kureyatsie meta Tsamariyatsie, nɨ'ariekate xeikɨa mekaniuyuhayewa.
ACT 8:2 Hipatɨ teɨteri Kakaɨyari memayexeiyakai 'Etsitewani mekanekuteuku, waɨkawamekɨ meyuhiwerietɨ hetsiena mieme.
ACT 8:3 Tsauru kwini mieme pɨwa'uximatɨakai memɨyutixexeɨriwakai: wakiita peutahakekai, warayehapanatɨ 'ukitsi 'ukari kaniwaranutaxɨrɨwakaitɨni.
ACT 8:4 Hikɨ memeutaxɨriexɨa naitsarie mekaneutayeixɨani niuki 'aixɨa manuyɨne mekuxatatɨ.
ACT 8:5 Hikɨ Peripe nuaka Tsamariya kiekaritsie katiniwahekɨatɨakaitɨni Kɨritsitu heitserie mupitɨarie hepaɨtsita.
ACT 8:6 Mekani'enieni yunaitɨ kemutainekai Peripe 'axeikɨa me'i'enietɨ me'ixeiyatɨ 'inɨari kemɨtiyurienekai.
ACT 8:7 Kakaɨyarixi 'axamemɨ'anene karima me'utihiwatɨ mepɨwarutixɨnaxɨ yumɨireme memɨwawiyakai. Yuwaɨkawatɨ wa'ɨkate mɨtutunikai meta memɨhurietɨkatei 'aixɨa me'anenetɨ mekanakɨne.
ACT 8:8 Mɨkɨ kiekaritsie yemekɨ mekaniyutemamawiekaitɨni.
ACT 8:9 Hikɨ xewitɨ tewi Tsimuni mɨtitewakai mana puyeikakai mɨkɨ kiekaritsie meripaitɨ wakewaiyatɨ tsamariyatari tiwa'irɨwiyatɨ mɨpaɨ putainekai kename tɨrɨkaɨyekai.
ACT 8:10 Yunaitɨ 'ukirawetsixi tɨɨri meta mepi'eniekai mɨpaɨ me'utiyuatɨ: «'Ikɨ Kakaɨyari tɨrɨkariyaya kanihɨkɨtɨni, Mɨmariwe mɨtitewa».
ACT 8:11 Mepi'eniekai mɨixa mɨtiwa'irɨwiyakaikɨ wakewaiyatɨ.
ACT 8:12 Kepauka yuri memɨte'ita'eriri Peripe tiwakuxaxatɨwame niuki 'aixɨa manuyɨne, kemɨti'ane Kakaɨyari ti'aitametɨkaku tikuxatatɨ, kemɨ'ane Ketsutsi Kɨritsitu mɨhɨkɨ kuxatatɨ, 'ukitsi 'ukari mepuka'ɨyarie.
ACT 8:13 Mɨkɨta Tsimuni yuri katiniuta'erieni, 'uka'ɨyarieka Peripe pɨparewiekai. 'Ixeiyatɨ 'inɨari tɨrɨkaɨyemekɨ waɨkawamekɨ kemɨtiyurienekai pɨ'iyarixiekai.
ACT 8:14 Hikɨ me'u'enanaka nɨ'ariekate Kerutsareme meme'uwakai kename tsamariyatari me'itanaki'eri Kakaɨyari niukieya, wahetsɨa mepɨwarenɨ'a Pekuru Wani hamatɨa.
ACT 8:15 Mɨkɨ meheta'axɨaka mekaniyutanenewieni wahetsiemieme 'Iyari Mɨtiyupata mehexeiyatɨ memakɨnekɨ.
ACT 8:16 'Akuxi 'Iyari mɨkɨ nixewitɨ pɨkahexeiyakai. Mepuka'ɨyariekai xeikɨa Kɨritsitu hetsɨa memɨmiemetetɨnikɨ.
ACT 8:17 Hikɨ Pekuru meta Wani wahetsie mekaneutimeni, mɨkɨ 'Iyari Mɨtiyupata mehexeiyatɨ mekanakɨne.
ACT 8:18 Hikɨ Tsimuni kaniwaruxeiya 'Iyari kememɨte'upitɨarie nɨ'ariekate waheima me'utimeku. Tumini kaniwaranu'ɨirienikekaitɨni,
ACT 8:19 mɨpaɨ 'utaitɨ: —Xekeneneupitɨa neta 'ikɨ tɨrɨkariya, kemɨ'ane heima nemutimeni 'Iyari Mɨtiyupata hexeiyatɨ mayanikɨ.
ACT 8:20 Pekuru mɨpaɨ katinitahɨawe: —'Atumini 'ahamatɨa ke'ukumawere, tuminikɨ Kakaɨyari 'imikierieya pemɨnanaimɨkɨkaikɨ.
ACT 8:21 'Ikɨ hepaɨtsita 'ekɨ heitserie pepɨkahexeiya, 'ahetsie pɨkatinakeni. 'A'iyari mɨkaheitseriekɨ Kakaɨyari hɨxie.
ACT 8:22 Ketineuhayewa kepemɨtiyuriene, pe'iku'eirieme 'ikɨ tita 'axapemɨtiyuriene, Ti'aitame keneutawawiri tsiparatsɨ xɨka pereuyehɨwiyariemɨkɨ mɨpaɨ pemɨti'akɨhɨawekɨ.
ACT 8:23 Ne nepɨmatsixeiya tsiɨrika hepaɨ pehatsiwime, tita mɨkatiheitseriekɨ penɨkame.
ACT 8:24 Hikɨ Tsimuni mɨpaɨ katinita'eiya: —Xemetsɨ Ti'aitame xekeneutawawiri nehetsiemieme, 'atsinemɨka'itɨarienikɨ kexemutiyuane.
ACT 8:25 Hikɨ mɨkɨri mewarutahekɨatɨaka me'itaxataka Ti'aitame niukieya, ta'aurie mepaxɨri, Kerutsareme mekanekɨne. Niuki 'aixɨa manuyɨne mekanikuxatakaitɨni naitsarie tsamariyatari wakiekaritetsie.
ACT 8:26 Hikɨ Ti'aitame niukieya tuayame Peripe mɨpaɨ katinitahɨawe: «Kenanukukexi, tatserieta kenemie huyeta Kerutsareme mayehane 'utɨma kiekari Kahatsa mɨrakutewatsie mɨye'axe, hakewa makumawe».
ACT 8:27 Peripe 'anukukeka kaneyani. Tewi 'etihupiyatanaka ti'uximayatame ti'aitame hetsiemieme mɨkaneɨke kananukunake, waɨkawamekɨ mɨhɨritɨariekai 'uka ti'aitame Kanaratse mɨtitewakai hetsiemieme. Katinihɨritɨariekaitɨni naime piiniteya hepaɨtsita. Mɨkɨ tewi Kerutsareme kanekuyeixɨakaitɨni heyukunenewieka,
ACT 8:28 yukaxetatsie hatikaitɨ, titerɨwatɨ tixaxatame Kitsariyaxi xapaya.
ACT 8:29 Kakaɨyari 'Iyarieya Peripe mɨpaɨ katinitahɨawe: «Mana kenemie, 'ahurawa keneuye'a mɨkɨ kaxeta 'aurie».
ACT 8:30 Peripe 'unautsarɨmetɨ, kani'enieni tixaxatame Kitsariyaxi xapaya terɨwakame. Mɨpaɨ katinita'iwawiya: —¿Pereiti'enietɨyeika 'aku tita pemɨtiterɨwa?
ACT 8:31 Mɨkɨ mɨpaɨ katinita'eiya: —¿Ketsɨnereitimani, xɨka xewitɨ kanetsi'utahekɨatɨani? Hikɨ Peripe kaniuta'inieni manutimakekɨ, 'auriena mayerɨnikɨ.
ACT 8:32 Mɨpaɨ panuyɨne 'utɨarika pemiterɨwakai: «Muxa hepaɨ kanehanieni mɨmierienikɨ, muxa kaxiriwatɨ mɨka'utatsuaka hepaɨ mɨpaɨta yaxeikɨa pɨka'utatsua.
ACT 8:33 Tixaɨ mɨkaratɨakɨ, heitserie pɨka'upitɨarie kemɨreuyewekai kepauka muta'inɨatsie. ¿Kepaikɨ pɨwamaika nuiwarimama? Tukarieya munawaiyariekɨ kwiepa».
ACT 8:34 Hikɨ tewi mɨhɨritɨarie Peripe mɨpaɨ katiniutahɨawe: —Yakenetineutaxatɨa 'ekɨ ximɨxi, ¿kepaikɨ pɨraxata tixaxatame, pɨyuxata, nutsu xeime pɨta pɨxata?
ACT 8:35 Hikɨ Peripe, kanitsutɨani mɨkɨ 'utɨarikatsie tihekɨatɨatɨ tikuxaxatɨwatɨ niuki 'aixɨa manuyɨne Ketsutsi hepaɨtsita.
ACT 8:36 Huyeta me'uhutɨ haa maxuawe mekaniu'axɨani, mɨpaɨ tewi mɨhɨritɨarie kaniutayɨni: —Neuxei kamɨ haa 'ena. ¿Titari reuyewetse nemɨka'ɨyarienikɨ?
ACT 8:37 Mɨpaɨ Peripe katinita'eiya: —Xɨka 'a'iyaritsie yemekɨ yuri peti'erieka, 'aixɨa kaniyɨmɨkɨ. Mɨkɨta mɨpaɨ katinita'eiya: —Ne yuri nekatini'erieka Kakaɨyari Nu'aya Ketsutsi Kɨritsitu mɨhɨkɨ.
ACT 8:38 Katiniuta'aita kaxeta mana mɨtakerienikɨ. Yuhutatɨ mekaneukakɨne haapa Peripe mɨkɨ tewi mɨhɨritɨarie kaniuka'ɨya.
ACT 8:39 Haapa me'anatikɨneku Ti'aitame 'Iyarieya Peripe kanitihana. Tewi mɨhɨritɨarie tawariri pɨka'ixei, yutemawietɨ yuhuyeta kaniumiekaitɨni.
ACT 8:40 Matsi Peripe 'Atsutu paitɨ kaniuyeikakaitɨni, niuki 'aixɨa manuyɨne kanikuxatakaitɨni naitsarie kuyeikatɨ kiekaritetsie, 'arike peta'a Tsetsareya paitɨ.
ACT 9:1 Hikɨ Tsauru 'uxiwa'atɨ 'akuxi mɨpaɨ 'utaitɨ mɨwakwinikekai Ti'aitame teyɨ'ɨkitɨwametemama, kaninuani mawari wewiwamete tiwa'aitɨwame hetsɨa,
ACT 9:2 kanitawawirieni xapate mɨtiwati'utɨirienikɨ tukita miemete Ramatsikutsie, mɨpaɨ 'utaineme: «Xɨkatsɨ 'ikɨ waretaxeiya hipame mɨkɨ huyeta miemete 'ukitsi 'ukari, kaniwarahapamɨkɨ mehɨatɨkaime Kerutsareme paitɨ».
ACT 9:3 Hikɨ huyeta 'uyemiekaku, Ramatsiku 'aye'aximekaku, 'auriena kaniukumerɨka taheima miemekɨ.
ACT 9:4 Kwiepa 'ukaweka kani'enieni xeime mɨpaɨ haineme: —Tsauru 'aku, Tsauru, ¿titayari penetikuweiyane 'ekɨ?
ACT 9:5 Mɨkɨ rehɨawe: —¿'Ekɨ Ti'aitame kemɨ'ane pepetaine? Mɨkɨ mɨpaɨ kaniutayɨni: —Netsɨ Ketsutsi nekanihɨkɨtɨni pemɨnetsikuweiyane. Pɨmatsi'ukukuine pemɨka'awaɨriyakɨ, pemɨti'aketsinakɨ pe'anatseiwatɨ titsewemekɨ.
ACT 9:6 Tsauru 'uyɨyɨakatɨ matɨ mɨpaɨ kaniutayɨni: —Ti'aitame, tita matinake yanemɨtiyurieni. Ti'aitame rehɨawe: —Hikɨ kenanukukexi, kiekaritsie keneutahaki. Manari yapepɨretahɨawarieni kemɨreuyewetse yapemɨtiyurienenikɨ.
ACT 9:7 Teɨteri hamatɨana memuhukai mehɨxiyatɨ 'ameniti'uni me'i'enietɨ kemɨ'ane mutaniu, peru meka'ixeiyatɨ.
ACT 9:8 Hikɨ Tsauru kwiepa kananukukeni, yuhɨxita 'anutaniereka tixaɨ pɨkatiuxei, mamayatsie metiwɨtɨ mepeiha, Ramatsiku paitɨ mekani'atɨani.
ACT 9:9 Haika tukari puyuri kaheunieretɨ katikwatɨ kaharetɨ.
ACT 9:10 Hikɨ xewitɨ mana kaniuyeikakaitɨni Ramatsikutsie tiyɨ'ɨkitɨwame 'Ananiyaxi titewatɨ, tɨkarikɨ heinɨtsita Ti'aitame mɨpaɨ katinitahɨawe: —'Ananiyaxi. Mɨkɨ mɨpaɨ kaniutayɨni: —Ti'aitame, ne nekanihɨkɨtɨni.
ACT 9:11 Ti'aitame mɨpaɨ rehɨawe: —Kenanukukexi, kenemie kaye Mɨxeuraɨye mɨtitewa 'utɨa, Kura kiita keneta'iwau tarutsutanaka Tsauru mɨtitewa. Mana peyunenewie.
ACT 9:12 Mɨkɨta heinɨtsita kanixeiya tewi 'Ananiyaxi titewakame mana ye'arɨkame heimana 'utimekame manutanierekɨ.
ACT 9:13 'Ananiyaxi mɨpaɨ katinita'eiya: —Ti'aitame, nepɨwaru'eni yumɨireme metekuxatame 'ikɨ tewi hepaɨtsita, naime 'axakemɨwayurienekai mɨkɨ 'ateɨterima Kerutsaremetsie.
ACT 9:14 'Enata heitserie mekanipitɨani mawari wewiwamete tiwa'aitɨwame mɨwaranutaxɨrɨwanikɨ yunaime memɨmatsi'ayexeiya.
ACT 9:15 Ti'aitame mɨpaɨ katinitahɨawe: —Kenemietsɨ. Ne 'ikɨ nepenayexei, mɨtihekɨatanikɨ nehepaɨtsita nuiwarite wahɨxie, kwiepa te'aitamete meta 'ixaheritsixi wahɨxie.
ACT 9:16 Nekatinita'ɨkitɨamɨkɨ kemɨreuyewetse mɨtikwinekɨ nehetsiemieme.
ACT 9:17 Hikɨ 'Ananiyaxi kaneyani, kiita kaneutahani. Heimana 'utimeka mɨpaɨ kaniutayɨni: «Ne'iwa Tsauru, Ti'aitame ne kaneneyenɨ'ani, mɨkɨ Ketsutsi pemuxei huyeta pe'aye'aximetɨ, mɨkɨ kaneneyenɨ'ani peheunieretɨ pemayanikɨ, 'Iyari Mɨtiyupatakɨ pemɨhɨnenikɨ».
ACT 9:18 Yapauka panayexɨri hɨxitana kunieri hepaɨ 'anenetɨ, heunieretɨ kanayani. 'Anukukeka kaniuka'ɨyarieni,
ACT 9:19 tiukwakari tɨrɨkaɨyetɨ kanayani. Hikɨ Ramatsikutsie puyeikakai yapaɨmexɨa tukari teyɨ'ɨkitɨwamete wahamatɨa.
ACT 9:20 Kwitɨwa huriyutsixi watukiteta katinihekɨatakaitɨni Ketsutsi hepaɨtsita: «'Iya Kakaɨyari kaninu'ayatɨni» 'utaitɨ.
ACT 9:21 Mekanihɨxiyakaitɨni yunaitɨ memi'eniekai, mɨpaɨ mekaniutiyuanekaitɨni: «'Ikɨ kanihɨkɨtɨni kemɨ'ane mɨwaraye'uniekai mɨkɨ memehɨawe mɨkɨ kemɨ'ane mɨhɨkɨ Kerutsareme kiekatari, 'uwata 'ayumieme kaninuani, mɨwaranuwitɨnikɨ mehɨatɨkaime mawari wewiwamete memɨhɨritɨarie wahetsɨa».
ACT 9:22 Tsauru yemekɨ kanitɨrɨkariyarieximekaitɨni. Kaniwa'iyarixitɨakaitɨni huriyutsixi Ramatsikutsie memɨtamakai, kaniwarutahekɨatɨani kename Ketsusi Metsiyaxi hɨkɨ.
ACT 9:23 Hikɨ mɨixa tukari 'utixɨku huriyutsixi mekaniyu'enieni me'imienike.
ACT 9:24 Tsauru katinetimani kememɨteyurienikekai. Kiekari kitenitetsie tukarikɨ meta tɨkarikɨ mekanihupiekaitɨni me'imienike.
ACT 9:25 Teyɨ'ɨkitɨwamete yɨwikɨta kiriwatsie me'ikayeka tetsariya warie mekaneikatuani.
ACT 9:26 Hikɨ Kerutsareme nuaka pɨtiwiyamɨkɨkai teyɨ'ɨkitɨwamete wahetsie. Yunaitɨ mepimakarɨkai yuri mekate'erietɨ kename tiyɨ'ɨkitɨwametɨkai.
ACT 9:27 Werunawe heiwitɨka kani'atɨani nɨ'ariekate wahetsɨa. Kaniwarutahekɨatɨani ya'utaitɨ kename huyeta Ti'aitame 'uxei, meta 'itahɨawixɨ, kename Ramatsikutsie kamatɨ tikuxatakai Ketsutsi hetsɨa miemetɨtɨ kemɨtixɨnakai.
ACT 9:28 Hikɨ wahetsɨa kaniuyuhayewa Kerutsaremetsie naitsarie kuyeikatɨ, hekɨakamekɨ tikuxatatɨ Ti'aitame hetsiemieme.
ACT 9:29 Pɨkamakai mɨtaniunikɨ Ti'aitame hetsɨa mɨmiemetɨkaikɨ. Niuki kanixɨatɨakaitɨni kɨriyekutsixi waniukikɨ memutiniukakai wahamatɨa. Mɨmetsɨ mekanimiekukaitɨni.
ACT 9:30 'Iwamama yametehetimaika mekaneiwitɨni Tsetsareyatsie paitɨ, Tarutsu paitɨ mekaneitanɨ'ani.
ACT 9:31 Hikɨ memɨyutixexeɨriwakai naitsarie Kureyatsie, Karereyatsie, Tsamariyatsie mepɨka'uximatɨariekai. Mepɨtɨrɨkariyariekai, Ti'aitame me'ayemakatɨ 'amekaniu'uwakaitɨni, 'Iyari Mɨtiyupata mɨiremekɨ kaniwatuikakaitɨni.
ACT 9:32 Hikɨ Pekuru naitsarie pukuyeikakai, manata penua Kakaɨyari teɨterimama wahetsɨa Riratsie memɨtamakai.
ACT 9:33 Mana kanikaxeiya xeime tewi 'Eneyaxi mɨtitewakai 'atahaika wiyari mɨyuriekai yu'utatsie kakaitɨ mɨhuriekaikɨ.
ACT 9:34 Mɨpaɨ Pekuru katinitahɨawe: «'Eneyaxi 'aku, Ketsutsi Kɨritsitu 'aixɨa pɨmatsi'uyuri. Kenanukukexi, 'a'itsi keneutatuna». Yapauka kananukukeni.
ACT 9:35 Yunaitɨ Riratsie Tsarunitsie memɨtamakai mekanixeiyakaitɨni, mɨkɨta mete'uhayewaka ke'axamemɨteyuriekai Ti'aitametsie mekateniuwiya.
ACT 9:36 Hikɨ tiyɨ'ɨkitɨwame 'uka Kupetsie nekateitɨni Tawita titewatɨ (taniukikɨ Rurukaxi titewatɨ, Maxama titewatɨ). Mɨkɨ 'aixɨa ti'aneneme katiniyurienekaitɨni kwini mieme, katiniyukanenimayakaitɨni.
ACT 9:37 Hikɨ 'ana tiutakwineka kaniumɨni. Me'itahauxika kii taɨta mekaneitateni.
ACT 9:38 Hikɨ Riratsie pehurakai Kupe, teyɨ'ɨkitɨwamete me'u'enanaka kename Pekuru mana heyeikakai, hetsɨana mekaniwarenɨ'ani 'ukitsi yuhutame mɨpaɨ mete'itawawirienike: «Penɨkahɨrixɨa 'areutewini tahetsɨa pemɨnuanikɨ».
ACT 9:39 Pekuru 'anukukeka wahamatɨa petɨa, nuaku kii taɨta mekaneitiwitɨni. 'Auriena mekaniu'axɨani yunaitɨ 'ukari wakɨnama memukwi, me'utitsuatɨ me'ixeitsitɨatɨ 'ixurikite tetɨata miemete herie miemete miwewiekai Maxama wahetsɨa 'uyeikatɨ.
ACT 9:40 Yunaime Pekuru kaniwaranuyenɨ'ani, 'utitunumakeka kaniyutanenewieni. Ta'aurie 'aweka kaxari manukatei mɨpaɨ kaniutayɨni: «Tawita 'aku, kenanukukexi». Mɨkɨ kananutaniere. Pekuru 'uxeiyaka 'aniutayerɨni.
ACT 9:41 'Iya mamayatsie tiwiereka kanenukuhana. Yuhetsɨa kaniwarutahɨawe Kakaɨyari teɨterimama 'ukari meta wakɨnama memukwi wahamatɨa, kaniyetuani 'ayeniereme.
ACT 9:42 Naitsarie Kupetsie kaniutamariwa, yuwaɨkawatɨ yuri mekateniuta'erieni Ti'aitame hetsie.
ACT 9:43 Mɨixa tukari Kupetsie pekatei Tsimuni hetsɨa nawi 'uayame hetsɨa.
ACT 10:1 Hikɨ tewi Tsetsareyatsie pukatei Kuxineriyu titewatɨ xeitsienituyari kuyaxi tiwa'aitɨatɨ. Mɨkɨ kuyaxi 'Itariyatsie mepɨkiekataritɨkai.
ACT 10:2 Mɨkɨ Kakaɨyari 'ayemakatɨ yakatinikamiekaitɨni, meta yunaitɨ kiena kiekatari. Waɨkawa katiniyurienekaitɨni teɨteri wahetsiemieme wanenimayatɨ, Kakaɨyari nenewieri pɨpitɨakai yuheyemekɨ.
ACT 10:3 Hikɨ xeitukaritsie tau kɨa kakaiku heinɨtsi hepaɨ 'aneme kaniuxeiya. Kakaɨyari niukieya tuayame hepana 'amiekame kaniuxeiya, mɨpaɨ tikɨhɨaweme: —Kuxineriyu 'aku.
ACT 10:4 Kuxineriyu 'ixeiyatɨ waɨkamekɨ kanimakaitɨni mɨpaɨ katinita'iwawiya: —¿Ketita 'aku neti'aitɨwame? Niuki tuayame mɨpaɨ katinita'eiya: —Kakaɨyari 'anenewieri kaniu'enieni 'anenimayatsika meta 'a'uximayatsikatsie kepemɨtiyuriene mawari pewewietɨ.
ACT 10:5 Hikɨ teɨteri Kupe paitɨ keniwaranunɨ'a Tsimuni Pekuru mɨtitewa memɨwitɨyukɨ.
ACT 10:6 Mɨkɨ Tsimuni nawi 'uayame hetsɨa kanekani, kiya haramara tetsita kaneweni. Mɨkɨ kamatinitaxatɨamɨkɨ kemɨreuyewetse yapemɨtiyurienenikɨ.
ACT 10:7 Hikɨ niuki tuayame tiutaxataka heyaku, Kuxineriyu yuhutame yunɨ'arima yu'aurie pɨwarutahɨawixɨ meta kuya Kakaɨyari mayexeiyakai, memiparewiekai yuheyemekɨ.
ACT 10:8 Naime tiwarutahekɨatɨaka kemɨtiuyɨkai, Kupe paitɨ kaniwarenɨ'ani.
ACT 10:9 'Uxa'arieka mexi'akuxi huyeta me'uhukaku kiekari 'aurie me'aye'axɨaximekaku Pekuru kii heima manawerikaitsie kaneutiyani tuka yutanenewienike.
ACT 10:10 Kanekahakamɨkatɨyani, mexi'akuxi 'ikwai wewiyakai, katiniuheinɨni.
ACT 10:11 Muyuawi 'anakayepiekame kaniuxeiya meta tsawana hepaɨ ti'anekame katiniuxeiya 'arakamieme, tetsitana naukakɨa tiwiwietɨkaime kwiepa paitɨ kanakatuiyani.
ACT 10:12 Mɨkɨtsie mekanati'ukaitɨni yunaitɨ kwiepa memɨte'u'uwa nauka 'ɨkayari memexeiyatɨka, kuterixi meta memɨte'awɨwawe.
ACT 10:13 Xewitɨ mɨpaɨ katinitahɨawe: —Pekuru kenanukukexi, keniwarukwika meta keniwarutikwa'i.
ACT 10:14 Pekuru mɨpaɨ katinita'eiya: —Ti'aitame pɨkatixaɨxuari. Hatsuaku nepɨkatitikwaiwe 'axamɨti'anene mɨkati'itiyatɨka.
ACT 10:15 Hutarieka mɨkɨ mɨpaɨ katinitahɨawe: —Tita Kakaɨyari mɨti'itie 'axati'anenekame pepɨkati'erieka.
ACT 10:16 Haikakɨa mɨpaɨ katiniuyɨni, hikɨta kwitɨwa tsawana panutihanie taheima.
ACT 10:17 Pekuru 'atsipɨkaretimaitɨyeikakai titakɨ mɨti'ayumiemetɨkai heinɨtsi. Hikɨ mexi'akuxi teɨteri Kuxineriyu mɨwareyenɨ'akai, kitenie me'u'axɨaka Tsimuni kiya hepaɨtsita mekaniuta'iwauni.
ACT 10:18 Meku'iwawatɨ mekaniutiniere xɨka Tsimuni Pekuru mɨtitewa muwa 'ayekateitɨni.
ACT 10:19 Mexi'akuxi Pekuru yu'iyaritɨakai kemɨtiunierekai hepaɨtsita, 'Iyari mɨpaɨ katinitahɨawe: «Neuxei Tsimuni, teɨteri yuhaikatɨ mepɨmatsiwautɨwe.
ACT 10:20 Mexuima, mana keneukaye'a, wahamatɨa kenemie peka'a'iyaritɨatɨ, netsɨ nepɨwareyenɨ'a».
ACT 10:21 Pekuru 'anakayaka hake memeti'ukai teɨteri mɨpaɨ katiniwarutahɨawe: —Ne nekanihɨkɨtɨni, xeme xemɨnetsiwautɨwe. ¿Tita xetehayexeiyatɨ xetekɨyɨa?
ACT 10:22 Mɨkɨ mɨpaɨ mekatenita'eiya: —Kuxineriyu xeitsienituyari kuyaxi mɨtiwa'aitɨwame tatsiheyenɨ'aku tepeyekɨ, mɨkɨ heitseriemekɨ yapɨtiyuriene meta Kakaɨyari kanayemakaxeni, yunaitɨ huriyutsixi mekaneyemakaxekaitɨni. Kakaɨyari niukieya tuayame mɨpaɨ katinita'aitɨani 'ekɨ kiena pemɨmiekɨ, mɨmatsi'enienikɨ niuki 'ekɨ pemitaxatɨanikɨ.
ACT 10:23 Hikɨ Pekuru kiita kaniwareuta'inieni, muwa memayehenikɨ. 'Uxa'arieka 'anukukeka wahamatɨa kaneyani. Hipatɨta 'iwamarixi Kupetsie kiekatari wahamatɨa mekanekɨne.
ACT 10:24 'Uxa'ariekake Tsetsareya paitɨ mekaneta'axɨani. Kuxineriyu kaniwakwewiekaitɨni yumarema meta yuhamikuma mɨwanaki'eriekai wahamatɨa.
ACT 10:25 Pekuru 'aye'aximekaku kiena, Kuxineriyu kanayeyani 'enunakeke. Hetɨana 'ukatunumakeka nenewieri kanipitɨani.
ACT 10:26 Matsi Pekuru kanenukuketɨani mɨpaɨ tikɨhɨawetɨ: —Kenanukukexi. Netsɨ 'ahepaɨ nekanitewitɨni.
ACT 10:27 Pekuru hamatɨana tikuxatatɨ kitana kaneutahani, kaniwaretaxeiya yuwaɨkawa meyuxeɨriekame.
ACT 10:28 Mɨpaɨ katiniwarutahɨawe: —Xeme mɨpaɨ xepɨtemate, kemɨ'ane huriyu tewiyari mɨhɨkɨ pɨkatauniwa mɨtiwiyanikɨ xeime nuiwaritsie, wa'aurie mamienikɨ. Perutsɨ Kakaɨyari mɨpaɨ pɨnetiutahekɨatɨa tewi mɨkayɨwe mɨpaɨ mɨtayɨni kename tewi 'axa'ane kename ka'itiya.
ACT 10:29 'Ayumieme nekaneku'imawatɨ nekaninuani kepauka nemeyewitɨkie. Hikɨ nekanixeku'iwawiyanikeyu ¿titayari xenete'utanɨ'airi?
ACT 10:30 Kuxineriyu mɨpaɨ katinitahɨawe: —Ranuka'atu nepɨnehakiekai 'epauka. Tau kɨa kakaiku ne ninenenewiekaitɨni nekiita. Yapauka xewitɨ nehɨxie putake 'ixuriki merɨkaɨyeme 'anakatɨtɨ
ACT 10:31 mɨpaɨ kanetiniutahɨawe: “Kuxineriyu 'aku, Kakaɨyari 'anenewieri pu'eni meta yapɨretima kepemɨti'uximaya peti'akanenimayatɨ.
ACT 10:32 'Ayumieme, ketineutanɨ'a Kupe paitɨ. Tsimuni Pekuru mɨtitewa munuanikɨ. Mɨkɨ Tsimuni nawi 'uayame kie kanekani haramara tetsita. Nuame pɨmatitaxatɨani”.
ACT 10:33 Hikɨ kwitɨwa nekatiniutanɨ'ani. 'Ekɨtsɨ 'aixɨa pekatiniuyurieni pemunuakɨ. Hikɨtsɨari tanaitɨ 'uwa tepɨtaxeɨrie Kakaɨyari hɨxie, temi'enienikɨ naime Ti'aitame kemɨmati'aitɨa yapemɨtatitaxatɨanikɨ.
ACT 10:34 Hikɨ Pekuru mɨpaɨ kaniutayɨni: —Yurikɨ hikɨrixɨa mɨpaɨ nepɨretima, Kakaɨyari teɨteri yɨkɨ pɨkatiwaxeiya,
ACT 10:35 matsi yuxexuime nuiwarite watsata kemɨ'ane me'eyemakatɨ meta kemɨ'ane heitseriemekɨ yameteyurietɨ memu'uwa mɨkɨ pɨwaxeiya.
ACT 10:36 Kakaɨyari yuniuki 'aixɨa manuyɨne kaneyenɨ'ani 'ixaheritsixi wahetsiemieme, mɨpaɨ hainekame kename Ketsutsi Kɨritsitu yu'iyaritsie memɨka'uximatɨariekakɨ wapitɨani. Mɨkɨ Ketsutsi yunaime tiwa'aitɨwame mɨhɨkɨ.
ACT 10:37 Xemeri xepɨtemate naitsarie Kureyatsie kemɨtiuyɨ, Karereyatsie tiutsutɨarieku kepauka Wani mɨtihekɨatakai kememɨteka'ɨyarienikekai.
ACT 10:38 Ketsutsi natsaretitanaka kanihɨkɨtɨni, kemɨ'ane Kakaɨyari mikawiri 'Iyari Mɨtiyupata meta 'itɨrɨkariyatɨ. Mɨkɨ 'aniuyeikakaitɨni 'aixɨa tiyurienetɨ, yunaime Kauyumarie mɨwa'uximatɨakai 'aixɨa meteheu'eriekame kaniwarayeitɨwakaitɨni, Kakaɨyari hamatɨana muyeikakaikɨ.
ACT 10:39 Tame tepɨhɨkɨ temunenierixɨ temɨtehekɨata naime hepaɨtsita kemɨtiuyuri huriyutsixi wakwiepa Kerutsaremetsie. Mɨkɨ mekanimieni kɨyetsie me'ikawiwatɨ.
ACT 10:40 Kakaɨyari kanenukuketɨani hairieka tukaritsie, kanipitɨani matsiɨkɨtɨ mayanikɨ,
ACT 10:41 yunaitɨ teɨteri meka'ixeiyakaku, tehekɨatamete xeikɨa Kakaɨyari mɨwaranuyexei matɨari paitɨ mekanixeiya, tame hamatɨana tekateniukwani meta tekateniu'ieni mɨkite watsata 'anukukeku.
ACT 10:42 Mɨkɨ pɨtatiuta'aitɨa teɨteri temɨtewakuxaxatɨwanikɨ, temɨtehekɨatanikɨ kename 'ikɨ hɨkɨ kemɨ'ane Kakaɨyari mikaye memayeneniere meta mɨkite wa'itsɨkame mayanikɨ.
ACT 10:43 Hepaɨtsitanata yunaitɨ Kakaɨyari niukametemama mekatenihekɨatani mɨpaɨ me'utiyuatɨ, mɨkɨ hetsiena yuri memɨte'erie katiniwareuyehɨwirieni tita 'axamemɨte'uyurikɨ hetsɨana memɨmiemetetɨnikɨ.
ACT 10:44 Hikɨ Pekuru mexi'akuxi niuki kuxatakaku, 'Iyari Mɨtiyupata wahetsie katiniuwiya, yunaitɨ niukieya memu'eni wahetsie.
ACT 10:45 Yuri memɨte'eriekai Pekuru hamatɨa memu'axɨa memɨhuriyutsixitɨkai mekanihɨxiyakaitɨni memɨkahuriyutsixi mɨpaɨ memɨte'umikiekɨ, 'Iyari Mɨtiyupata wahetsie mutatuiyakɨ.
ACT 10:46 Mepɨwa'eniekai niukitekɨ metekuxatame, 'aixɨa me'utiyuaneme Kakaɨyari hepaɨtsita.
ACT 10:47 Hikɨ Pekuru mɨpaɨ katiniwarutahɨawe: —¿Kepaitsɨ haa pɨwatikweririeni, 'ikɨ memɨka'ɨyarienikɨ? 'Iyari Mɨtiyupata meputanaki'eriexɨa tahepaɨ.
ACT 10:48 Katiniuta'aita memɨka'ɨyarienikɨ Ketsutsi Kɨritsitu hetsiemieme. Hikɨ mekaniwarutawawirieni wahetsɨa 'akuxi yapaɨmexa tukari memuyuhayewanikɨ.
ACT 11:1 Hikɨ nɨ'ariekate meta 'iwamarixi Kureyatsie memu'uwakai mekateniutamarieni kename mɨkɨ memɨkahuriyutsixi Kakaɨyari niukieya me'utanaki'eriekai.
ACT 11:2 Kepauka Pekuru Kerutsaremetsie meutiyunixɨ, mɨkɨ xitekiya 'inɨariyaritsie miemekɨ mekaniniukimakaitɨni
ACT 11:3 mɨpaɨ me'utiyuatɨ: —¿Titayari 'ekɨ teɨteri xitekiya 'inɨariyari memɨkahexeiya wahetsɨa petinua meta wahamatɨa perekwakai?
ACT 11:4 Pekuru katiniwarutixatɨatɨyani xexuime kemɨreyɨkai hepaɨtsita:
ACT 11:5 —Ne kiekari Kupe mɨrakutewatsie nehekaitɨ. Nekaneyunenewiekaitɨni, heinɨtsi hepaɨ 'anekame nekanexeiya, taheima 'akamieme tetsitana naukakɨa hawiwietɨkaime tsawana 'amɨyewa hepaɨ tiyuxexeiyame, nemanukateitsie 'aurie kaniuteni.
ACT 11:6 Nekaniwaxeiyakaitɨni mana memɨte'atitekai, nauka 'ɨkateyari memexeiya kwiepa miemete, yeutari, kuterixi meta memɨte'awɨwawe nekaniwaruxeiya.
ACT 11:7 Hikɨ xeime nekaniu'enieni mɨpaɨ netikɨhɨaweme: “Pekuru kenanukukexi, keniwarukwika keniwarutikwa'i”.
ACT 11:8 Ne mɨpaɨ nekaniutayɨni: “Ti'aitame pɨkatixaɨ, tita 'axamɨti'anene mɨkati'itiyatɨka hatsuaku neteta pɨkareutahawe”.
ACT 11:9 Hutarieka mɨpaɨ kanetiniuta'eiya kemɨ'ane taheima mutaniukakai: “Tita Kakaɨyari mɨti'itie 'ekɨ 'axati'anenekame pepɨkati'erieka”.
ACT 11:10 Haikakɨa mɨpaɨ katiniuyɨni, hikɨta naitɨ taheima kananutihanieni.
ACT 11:11 »Hikɨ 'ana yuhaikatɨ teɨteri nekie nemɨwayekateitsie mekaniu'axɨani, nehetsɨa memeyenɨ'arie Tsetsareyatsie meheyekɨneka.
ACT 11:12 'Iyari mɨpaɨ pɨnetiutahɨawixɨ: “Wahamatɨa kenemie tixaɨtɨkɨ pekati'a'iyaritɨatɨ”. Meta ta'iwama 'ataxewitɨ nehamatɨa mekanekɨne, mɨkɨ tewi kiita tekaneutahaxɨani.
ACT 11:13 Mɨkɨ katatiniutahekɨatɨani niuki tuayame kemɨtiuxei yukiita mɨpaɨ tikɨhɨaweme: “Xeime keneutanɨ'a Kupe paitɨ Tsimuni Pekuru mɨtitewa mɨwitɨkiemiekɨ.
ACT 11:14 Mɨkɨ niuki pɨmatsitaxatɨani kɨmana 'ekɨ meta 'akie kiekatari yunaitɨ xemɨtawikweitsitɨarienikɨ”.
ACT 11:15 »Kepauka netiutsutɨaku netikuxatatɨ, 'Iyari Mɨtiyupata wahetsie pɨtiuwiyaxɨ tahepaɨ tsutɨapai tahetsie mɨtiuwiyaxɨ hepaɨ.
ACT 11:16 Hikɨ ne nepaye'eri Ti'aitame niukieya kemainekai: “Wani hakɨ pɨtiuka'ɨyakai, xeme pɨta 'Iyari Mɨtiyupatakɨ xepɨka'ɨyarieni”.
ACT 11:17 'Ayumieme, xɨka Kakaɨyari wayetuirieni mɨkɨ 'imikieri yaxeikɨa tame kemɨtatiupitɨa Ti'aitame Ketsutsi Kɨritsitu hetsie yuri tete'uta'erieku, ¿Ne ketsɨ netiyɨwekai Kakaɨyari nema'imaiyanikɨ?
ACT 11:18 Hikɨ 'ikɨ me'u'enieka, kayuwatɨ mekaniutamare, 'aixɨa mekaniutiyuanekaitɨni Kakaɨyari hepaɨtsita mɨpaɨ me'utiyuatɨ: —Mɨkɨta Kakaɨyari katiniwarupitɨani memɨkahuriyutsixi memɨtehayewanikɨ kememɨteyuriekai matsi tukari memexeiyanikɨ.
ACT 11:19 Hikɨ mɨkɨ memeutaweiyariexɨakai 'umierieku 'Etsitewani, Penitsiyatsie, Tsipɨretsie meta 'Anutiyukiyatsie mekaneta'axɨani, hipame niuki mepɨkawakuxaxatɨwakai, huriyutsixi xeikɨa.
ACT 11:20 Hipatɨ mɨkɨ Tsipɨre meta Tsirene mekanikiekataritɨkaitɨni, mɨkɨ 'Anutiyukiya me'u'axɨaka niuki 'aixɨa manuyɨne mekaniwakuxaxatɨwakaitɨni kɨriyekutsixi Ti'aitame Ketsutsi hepaɨtsita.
ACT 11:21 Mɨkɨ Ti'aitame tɨrɨkariyaya kaniwaparewiekaitɨni, yuwaɨkawatɨ yuri mekateniuta'erieni, Ti'aitame hetsie mekateniuwiya.
ACT 11:22 Hikɨ wahepaɨtsita mepu'enana mɨkɨ Kerutsaremetsie memɨyutixexeɨriwakai, Werunawe 'Anutiyukiya paitɨ mekanenɨ'ani.
ACT 11:23 Nuaka, nieretɨ Kakaɨyari 'aixɨa kemɨtiuka'iyarikai, kaniyutemawiekaitɨni. Yunaime kaniwatuikakaitɨni Ti'aitame hetsie memɨtewiyanikɨ, wa'iyari ya'anekaku.
ACT 11:24 Mɨkɨ tewi 'aixɨa pɨtiyurienekai, 'Iyari Mɨtiyupatakɨ pɨhɨnekai, meta yuri pɨti'eriekai. Yumɨiretɨ teɨteri Ti'aitame hetsie mekateniuwiya.
ACT 11:25 Manata Werunawe Tarutsu paitɨ kaneyani Tsauru kuwaunetɨ, kepauka mitaxei 'Anutiyukiya paitɨ kaneiwitɨni.
ACT 11:26 Mana xeiwiyari mepuyuri memɨyutixexeɨriwakai wahamatɨa meyukuxexeɨriwatɨ. Yumɨireme mekateniwa'ɨkitɨakaitɨni, 'Anutiyukiyatsie teyɨ'ɨkitɨwamete “Kɨritsitiyanutsixi” mepɨte'utaterɨwarie matɨari.
ACT 11:27 Hikɨ 'ana Kakaɨyari niukametemama kerutsaremetari 'Anutiyukiya paitɨ mekanakanexɨani.
ACT 11:28 Mɨkɨ xewitɨ 'anukukeka 'Akawu mɨtitewakai katiniutahekɨata, 'Iyari mɨpaɨ titahekɨatɨaku kename hakaxa 'ayanikekai waɨkawa naitsarie teɨteri mematitekaitsie, mɨpaɨ pɨtiuyɨ kepauka Kɨrauriyu mɨti'aitametɨkai mɨkɨ kwieyaritsie.
ACT 11:29 Yuxexuitɨ teyɨ'ɨkitɨwamete kememɨteheixeiyakai, mekaniyuwaɨriyakaitɨni tixaɨtɨ memɨte'anunɨ'anikɨ memɨwaparewienikɨ yu'iwama Kureyatsie memɨtamakai.
ACT 11:30 Mɨpaɨtsɨ mepɨte'uyuri, 'imikieri mawariyari mepukuxeɨri, Werunawe meta Tsauru mekaniwaru'ɨitɨani 'ukirawetsixi memɨwareyetuirienikɨ.
ACT 12:1 Hikɨ 'ana Herurexi mɨti'aitametɨkai mɨkɨ kwiepa, kanitsutɨani memɨyutixexeɨriwakai 'aixɨa katiwaxeiyatɨ.
ACT 12:2 Kakuwu Wani 'iwaya, kaniuta'aita 'ixiparakɨ mɨmierienikɨ.
ACT 12:3 Retimaika kememɨteyutemamawiekai huriyutsixi, mɨpaɨta 'arike Pekuru kaniuwiya. 'Ikɨ pɨtiuyɨ paa mɨkakuxaxani 'ixɨarariyari mewewiekaku.
ACT 12:4 Hikɨ Pekuru 'uwiyaka kanenutahɨani, kuyaxi kaniwaruhɨritɨani tamamata heimana 'ataxewime yunanaukakatɨ memi'ɨwiyanikɨ. Patsikwa 'ixɨarariyari 'aye'ayu teɨteri wahɨxie mekani'atɨarienikekaitɨni Pekuru mɨmierienikɨ.
ACT 12:5 Mɨkɨ ni'ɨwiyariekaitɨni katsariyanata. Memɨyutixexeɨriwakai mekatehayewatɨ nenewieri mepipitɨakai Kakaɨyari hetsiena mieme.
ACT 12:6 Hikɨ kepauka Herurexi Pekuru mɨwayehanakekaitsie teɨteri wahɨxie mɨmierienikɨ, mɨkɨ tɨkaritsie Pekuru kanikutsukaitɨni yuhutatɨ kuyaxi naitsata me'uti'ukaku, meta huta tepɨayarikɨ 'akuwietɨ. Hipatɨta tehɨwemete katsariyana kitenie hɨxie mekanihɨkaitɨni.
ACT 12:7 Yapauka Ti'aitame niukieya tuayame mana kaniutakeni. Kiita paitɨ pukumerɨkaxɨ. 'Akitana 'iwaka Pekuru kananutahɨtɨani mɨpaɨ rehɨawetɨ: «Xeiya kenanukukexi». Tepɨa puxɨnixɨa Pekuru mamateyatsie.
ACT 12:8 Mɨpaɨta niuki tuayame katinitahɨawe: «Kene'atikemaritɨa meta 'akakaitsie keneukexɨa». Mɨpaɨ pɨtiuyuri. Mɨpaɨta katinitahɨawe: «'A'ɨkarikɨ kenanayuku'eimaka kenenanuweiya».
ACT 12:9 Pekuru 'utɨmana kaneyani, 'atsikatimaitɨ xɨka yuritɨkaitɨni niuki tuayame kemɨtiyurienekai. Heinɨtsika xeikɨa 'erietɨ.
ACT 12:10 Xeimetsie meri mekaniuyekɨne, hutariekata tehɨwemete wa'aurie, tepɨa 'itupariyaritsie meuwietsie mekaniye'axɨani kiekari muyenenatsie. 'Itupari yɨkɨmana kaneuyepiere wahetsiemieme. Mana xeime kayetsie me'anuyenexɨaka. Yapauka niuki tuayame kaneyani yuxaɨtame 'iku'eirieka.
ACT 12:11 Hikɨ Pekuru yutamaixɨaka mɨpaɨ kaniutayɨni: «Hikɨrixɨa yurikɨ nepɨretima Ti'aitame yuniuki tuayame meyenɨ'a mɨnetsitawikweitsitɨanikɨ, Herurexi mɨkanetsimienikɨ meta huriyutsixi yunaitɨ kememɨteta'ikwewakai».
ACT 12:12 Hikɨ kepauka mɨpaɨ mɨretima, Mariya kie kaninuani Wani Marikuxi mɨtitewa maamaya. Muwa yumɨiretɨ mekaniyuxeɨriekaitɨni meyunenewietɨ.
ACT 12:13 Takwa 'utiwetɨ 'itupari kaneyuitɨani. 'Ɨimari Xute mɨtitewakai kaneyani hei'enimieka.
ACT 12:14 Pekuru mɨniukieyatɨkaikɨ heitimaika, waɨkawa kaniyukatemawieni kareuyepieka kaniutanautsa yu'utɨma pɨta. Mɨpaɨ katiniwarutaxatɨani: —Pekuru kitenie petiwe.
ACT 12:15 Mɨkɨ mɨpaɨ mekatenitahɨawe: —Yakɨ pekaniutaineni. Matsi mɨkɨ pehɨkɨ, mɨkɨ katiniwakɨhɨawekaitɨni. Mɨkɨta mɨpaɨ mekaniutiyuanekaitɨni: —Niuki tuayameya kaneyɨaneni.
ACT 12:16 Matsi Pekuru pɨkatihayewakai 'itupari heuyuitɨwatɨ. Kepaukake memɨteheuyepi mekanixeiya, mekaniuhɨxiyani.
ACT 12:17 Pekuru yumamakɨ kaniwaru'inɨaritɨani kayuwatɨ memɨtamarekɨ, katiniwarutahekɨatɨani Ti'aitame katsariyanata kemɨtiwayewitɨ. Mɨpaɨ katiniwarutahɨawe: —Kakuwu meta ta'iwamarixi xeketeniwaretahekɨatɨa kemɨtiuyɨ hepaɨtsita. 'Anuyeyaka xaɨtsie kaneyani.
ACT 12:18 Hikɨ 'ukatareku kuyaxi yemekɨ mekaniyuxamurietɨwekaitɨni keri tiuyunixɨ Pekuru me'utiyuatɨ.
ACT 12:19 Herurexi heikuwauka pɨkaheitaxei. 'Ayumieme kaniwaruta'iwawiya tehɨwemete, katini'aitakaitɨni memɨkwi'iwakɨ. Hikɨ Herurexi Kureya heyeyaka Tsetsareyatsie yapaɨmexɨa mana kaniukateitɨni.
ACT 12:20 Hikɨ Herurexi Tiru kiekatari meta Tsiruni kiekatari wahetsiemieme pɨha'akai, mɨkɨ matsi mete'utaxataka hetsɨana mekaniu'axɨani, Puratsitu me'itihamikutaka kemɨ'ane kwiepa ti'aitame kiita mɨhɨritɨariekai, 'aixɨa memɨteyuxeiyanikɨ mekanitawawirieni, wakwieyari mɨra'aitatsie mɨrawiyakaikɨ yu'ikwaite memɨtehexeiyanikɨ.
ACT 12:21 Tukari ma'inɨaritakaitsie Herurexi ti'aitame 'aixɨa tiyukemaritɨaka, yu'uweniesie kanayerɨni, teɨteri wahɨxie katiniutaxata.
ACT 12:22 Teɨteri mɨpaɨ mekateniuhiwakaitɨni: «Tewi pɨka'utaine, kakaɨyari putaine».
ACT 12:23 'Ana yapauka Ti'aitame niukieya tuayame katinikwinitɨani, Kakaɨyari hepaɨtsita 'aixɨa mɨka'utainekaikɨ, hikɨ Herurexi 'utakwitsieka kaniumɨni.
ACT 12:24 Peru Ti'aitame niukieya naitsarie pɨ'enieriekai mepɨtamɨirirɨmekai.
ACT 12:25 Kepauka Werunawe meta Tsauru yu'uximayatsika memaye'atɨa, Kerutsareme mekanakunuaxɨani, Wani me'awitɨtɨ Marikuxi mɨtitewakai.
ACT 13:1 Hikɨ 'Anutiyukiyatsie memɨyutixexeɨriwakai hipatɨ Kakaɨyari niukametemama mekanihɨkɨtɨkaitɨni meta mekateni'ɨkitametetɨkaitɨni Werunawe, Tsimuni Nikeri mɨtitewakai, Rutsiyu tsirenetanaka, Manaheni ti'aitame Herurexi hamatɨa memutiwawerixɨ meta Tsauru.
ACT 13:2 Mexi'akuxi mɨkɨ mana me'u'uwakai meyuhakietɨ meta Ti'aitame 'uximayatsikayatsie yameteyurietɨ, 'Iyari Mɨtiyupata mɨpaɨ kaniutayɨni: «Nehetsiemieme xekeniwarupata Werunawe meta Tsauru, mɨpaɨ memɨte'uximayakakɨ kenemɨtiwatahɨawe».
ACT 13:3 Hikɨ me'uyuhakieka mekaniyutanenewieni waheima me'utimetɨ, mekaniwarutateutɨani.
ACT 13:4 Hikɨ Werunawe meta Tsauru 'Iyari Mɨtiyupata kaniwarewitɨni, Tsereutsiyatsie mekaniye'axɨani, manata Tsipɨre paitɨ kanuwa 'amɨpatsie mekanekɨne.
ACT 13:5 Tsaramina me'u'axɨaka Kakaɨyari niukieya mekanikuxatakaitɨni huriyutsixi watukiteta. Meta Wani mepa'iniekai mɨwaparewiekakɨ.
ACT 13:6 Hapa kwie mɨyematsie Papuxi paitɨ mekaniuyekɨne. Mana xeime huriyu mɨtiyukewaiya mekaniutaxeiya, ti'itawatɨ mɨtixaxatametɨkai, Waxiketsutsi mutitewakai,
ACT 13:7 mɨkɨ Tserikiyu Pauru mɨtitewakai hetsɨa kaniukateitɨni. Kuwexinaruri mɨrakumate, Werunawe meta Tsauru katiniwarutanɨ'airieni, Kakaɨyari niukieya kani'enimɨkɨkaitɨni.
ACT 13:8 Peru mɨkɨ tiyukewaiyame 'Erimatsi (kɨriyekutsixi waniukikɨ panuyɨne) wahepaɨtsita kani'uxiwa'akaitɨni kanikununuitɨwakaitɨni kemɨ'ane kwiepa mɨhɨritɨariekai yuri mɨkatita'erienikɨ.
ACT 13:9 Hikɨ Tsauru, Papuru mɨtitewa meta, 'Iyari Mɨtiyupatakɨ hɨnetɨ, 'ixeiyatɨ mɨpaɨ katinitahɨawe:
ACT 13:10 «Kari 'ekɨ pepɨhɨne naime 'irɨmarikɨ meta 'axamɨti'anekɨ. Kauyumarie nu'aya pekanihɨkɨtɨni, naime mɨtiheitserie pekanaye'unieka, ¿pekatihayewa 'ekɨ pe'itunatɨ Ti'aitame huyeya mɨxexeurawi?
ACT 13:11 Hikɨ Ti'aitame yumamakɨ 'axapɨmetsiyurieni. Pekaheunieretɨ pekanayeimɨkɨ tau hekɨariyaya pekaxeiyatɨ yapaɨmexɨa». Yapauka puku'etɨrixɨ meta pukuyɨrixɨ hetsiena. Kumenetɨ xeime kanikuwaunekaitɨni menuhanakɨ.
ACT 13:12 Mɨpaɨ tiuniereka kuwexinaruri yuri katiniuta'erieni, Ti'aitame 'ɨkitsikaya hepaɨtsita kanihɨxiyakaitɨni.
ACT 13:13 Hikɨ Papuru meta hamatɨana memu'uwakai Papuxitsie mekanekɨne, Perɨke Pamɨpiriya kwieyaritsie mekaniye'axɨani. Wani mana kananayeyani wahamatɨa 'uyeikatɨ, yu'ɨtɨma pɨta Kerutsareme kaneyani.
ACT 13:14 Mɨkɨtsɨ Perɨke mekaniyekɨne, 'Anutiyukiyatsie Pitsiriya kwieyaritsie mekaniu'axɨani. 'Uxipiya tukaritsie huriyutsixi watukita meheutahaxɨaka muwa mekanayaxe.
ACT 13:15 'Utiterɨwarieku 'inɨari xapayari meta Kakaɨyari niukametemama waxapayari, tukita te'aitamete niuki mekanenɨ'ani wahetsɨa mɨpaɨ me'utiyuatɨ: «Ta'iwama xɨka niuki xehexeiyani teɨteri xemɨwaparewienikɨ, xeketeneutaxata».
ACT 13:16 Papuru 'anukukeka yumamakɨ waru'inɨaritɨaka mɨpaɨ kaniutayɨni: «Neuxei xekeneu'enana 'ixaheritsixi, xeme meta xemɨkahuriyutsixi Kakaɨyari xemayemakaxe:
ACT 13:17 'Ikɨ 'Ixaheritsixi teɨteriyari wakakaɨyari kaniwaranuyeteɨxɨ tatutsima. Teɨteri wahetsiemieme 'aixɨa pɨtiuyuri kepauka ku'uwamete 'Ekipitu kwieyaritsie. Yɨtɨrɨkariyakɨ kaniwarayewitɨni mɨkɨ kwieyaritsie.
ACT 13:18 Huta tewiyari wiyari yakɨtɨtɨ katiniwamikwakaitɨni makumawetsie me'u'uwakaku.
ACT 13:19 Manata 'atahutame nuiwariyari waruka'unaka Kanani kwieyaritsie kaniwayetuirieni wakwie mɨhɨkɨtɨnikɨ.
ACT 13:20 'Ikɨ naitɨ nauka tsienituyari heimana huta tewiyari heimana tamamata wiyari katineutere. »Manaketa 'itsɨkate kaniwarupitɨani Tsamuheri tixaxatame hɨkɨtɨkaku.
ACT 13:21 Hikɨ 'ana kwiepa ti'aitame mekanitawawirieni. Kakaɨyari kaniwayetuirieni Tsauri Tsixi nu'aya Wenikamini nuiwarieyatsie mieme. Huta tewiyari wiyari 'anukayaku
ACT 13:22 Kakaɨyari kanipata. Rawiri pɨta kananukakeni, kwiepa ti'aitame mayanikɨ wahetsiemieme. Mɨpaɨ katiniutahekɨata hepaɨtsitana: “Rawiri Kitsahi nu'aya nekaniutaxeiya, tewi kenemɨre 'iyari hepaɨ yatikamieme. Naime kemɨnetinake yakatiniyuriemɨkɨ”.
ACT 13:23 »'Ikɨ nuiwarieyatsie, Kakaɨyari kemainekai 'ixaheritsixi wawikweitsitɨwame Ketsutsi kaneyenɨ'ani.
ACT 13:24 Meripaitɨ mɨkɨ 'akuxi kanuawekaku, Wani katiniwahekɨatɨakaitɨni yunaime 'ixaheritsixi teɨteriyari metehayewatɨ 'axakemɨteyurie memɨka'ɨyarienikɨ.
ACT 13:25 Kepauka Wani yu'uximayatsika nɨximetɨ, mɨpaɨ kaniutainekaitɨni: “¿Kexeteku'eriwa kemɨ'ane nepɨhɨkɨ? Netsɨ nepɨkahɨkɨ. Kamɨ xewitɨ ne'utɨma 'upamie. Ne 'aixɨa nepɨkatiuka'iyari nehetsie mɨtinakenikɨ meta kakaiteya nemenuyehunieriexɨanikɨ”.
ACT 13:26 »Neuxei 'iwamarixi, 'Apɨrahami xemɨxiɨyarimama, meta xeme xemɨkahuriyutsixi Kakaɨyari xehayemakatɨ xemu'uwa, xehetsiemieme peyenɨ'arie 'ikɨ niuki kexemɨtetawikweitsitɨarieni manuyɨne.
ACT 13:27 Kerutsareme memɨtama meta wakuwexinarurima Ketsutsi mepɨkahetima, 'ayumieme mepɨkaheye'atɨa Kakaɨyari niukametemama waniuki 'uxipiya tukaritsie mutiterɨwarɨwakai, matsi mepeye'atɨa mɨkɨ niuki me'enutahɨatɨ.
ACT 13:28 Tsepanetɨ tixaɨtɨ memɨkate'ukaxei hetsiena, Piratu mekaniutawawirieni mɨmierienikɨ.
ACT 13:29 Mete'aye'atɨaka naime hepaɨtsitana kemɨre'ukai, kuruxitsie me'ekaxɨnaka teukiyapa mekaneikateuku.
ACT 13:30 Peru Kakaɨyari mɨkite watsata kanenukuketɨani.
ACT 13:31 Mɨixa tukari mɨkɨ hamatɨana Karereyatsie memɨyekɨ Kerutsareme paitɨ mepɨye'axɨa, mɨkɨ mekanihɨkɨtɨni. Memunenierixɨ hikɨ mekanihekɨatani teɨteri wahɨxie.
ACT 13:32 »Tameta niuki 'aixɨa manuyɨne xeme tepɨxekuxaxatɨwa, mɨpaɨ mɨtiuyɨkɨ tatutsima kemɨtiwarutahɨawekai.
ACT 13:33 Kakaɨyari Ketsutsi 'anukuketɨaka mɨpaɨ pɨraye'atɨa tame temɨnuiwarimama. Mɨpaɨta hutarieka mieme Nɨawari Xapayaritsie mɨpaɨ pɨre'uxa: »“'Ekɨ neniwe pekanihɨkɨtɨni, hikɨ nekameniutinuiwitɨani”.
ACT 13:34 Kakaɨyari penukuketɨa mɨkite watsata, hatsuakuri tawarita mɨkatapɨnekɨ. Mɨpaɨ katinaye'ani 'ikɨ niuki: »“Ne 'aixɨa nekanixeyurimɨkɨ xemɨpatsiekakɨ yurikɨ Rawiri kenemɨtiutahɨawixɨ”.
ACT 13:35 'Ayumieme xeime kwikaritsie mɨpaɨ paine: »“Kemɨ'ane 'ahetsiemieme pemipataxɨ, mɨkɨ pepɨkapitɨani mɨtapɨnekɨ”.
ACT 13:36 »Hikɨ Rawiri yatiuyurieka yunuiwarima wahetsiemieme, Kakaɨyari kemɨtinake kemɨtiyɨkɨhɨawekai, Rawiri kaniumɨni, yututsima wahamatɨa kaniukateukieni, waiyarieya kaniutapɨne.
ACT 13:37 Peru mɨkɨ matsi kemɨ'ane Kakaɨyari menukuketɨa, mɨkɨ yuwaiyaritsie pɨka'utapɨnixɨ.
ACT 13:38 »'Ayumieme mɨpaɨ xeketenemaika xeme ne'iwama, Ketsutsi hetsiemieme mɨpaɨ tepɨtexehekɨatɨa, tita 'axaxemɨteyurie xemɨteheuyehɨwiyarienikɨ,
ACT 13:39 'aitsika Muitsexi hetsɨa mieme pɨka'ɨyɨwekaxɨa 'aixɨa mɨxeyurienikɨ 'axaxeteyuriekaku, peru yunaitɨ Ketsutsi hetsie yuri memɨte'erie 'aixɨa mekani'itɨarieka.
ACT 13:40 Yumarima 'aixɨa Kakaɨyari niukametemama kememaitɨkatei mɨpaɨ tiuyɨni:
ACT 13:41 »“Neuxei teyukatawe'eriekate. Xekenemamaka meta xekenekwi'ini. Kenemɨtiyurieni ne mexixe'u'uwa, xeme hatsuaku yuri xepɨkateta'erieni, tsepanetɨ xewitɨ mɨtixe'utahekɨatɨa”».
ACT 13:42 Hikɨ huriyutsixi watukiiteta me'ayenexɨaka, mɨkɨ mekaniwarutawawirieni 'ikɨ niuki memɨkuxatanikɨ tawarita 'uxipiya tukaritsie.
ACT 13:43 Mete'utahayewaku xeɨripa, yumɨiretɨ huriyutsixi meta waɨkawa memɨte'ayexeiyakai Papuru meta Werunawe mekaniwareweiya, mɨkɨ mekaniwatuikakaitɨni yuri mete'erietɨ memuyuhayewanikɨ Kakaɨyari 'aixɨa tiuka'iyarikaku wahetsiemieme.
ACT 13:44 Hikɨ tawarita 'uxipiya tukaritsie yunaitɨ kiekatari mekaniyukuxeɨrieni Kakaɨyari niukieya memɨ'enienikɨ.
ACT 13:45 Huriyutsixi mewaruxeiyaka mɨkɨ memɨyukuxeɨri yɨmɨireme, mekaniwaruti'uxiwe'erieni. Papuru niukieya hepaɨtsita 'axamekaniutiyuanekaitɨni.
ACT 13:46 Papuru meta Werunawe mɨpaɨ mekateniwaruta'eiya mekamamatɨ: «Peuyewekai xeme meri Kakaɨyari niukieya temɨxetaxatɨanikɨ. Xeme xepɨka'itanaki'eri, tukari mɨkaxɨwe xehetsie mɨtinakenikɨ. 'Ayumiemeri 'ikɨ, memɨkatanuiwari wahetsɨa tekaniyehuni.
ACT 13:47 Mɨpaɨ Ti'aitame pɨtatiuta'aitɨa: »“Ne hekɨariwiwame nepɨmatsi'ayeitɨa nuiwarite wahetsiemieme, Pemɨwatawikweitsitɨanikɨ naitsarie kwie manunieretsie paitɨ”».
ACT 13:48 Hikɨ memɨkahuriyutsixi me'i'enieka mekaniyutemamawiekaitɨni. 'Aixɨa mekaniutiyuanekaitɨni Kakaɨyari niukieya hepaɨtsita. Yunaitɨ tukari mɨkaxɨwe memupitɨariekɨ yuri mete'uta'erieka.
ACT 13:49 Mɨkɨ kwiepa naitsarie Ti'aitame niukieya pɨ'enieriekai.
ACT 13:50 Huriyutsixi mepɨwarutaxamuri 'ukari memɨtehayexeiyakai memɨmariwakai, kiekatari memanuyetei yukwiepa Papuru meta Werunawe mekaniwarayeweiya.
ACT 13:51 Mɨkɨ mekaneikatsixɨani tumuanari yu'ɨkatetsie 'inɨari meyurietɨ wahepaɨtsita, 'Ikuniyu pɨta mekanekɨne.
ACT 13:52 Teyɨ'ɨkitɨwamete waɨkawa mekaniyutemamawiekaitɨni, 'Iyari Mɨtiyupatakɨ mekanihɨpɨnekaitɨni.
ACT 14:1 Hikɨ 'Ikuniyutsie Papuru meta Werunawe mekaneutahaxɨani huriyutsixi watukita kememɨte'iyamakai, muwa mekatenikuxatakaitɨni, 'ayumieme yuri mekateniuta'erieni yumɨiretɨ huriyutsixi meta kɨriyekutsixi.
ACT 14:2 Huriyutsixi yuri memɨkate'eriekai mepɨwarukunuitɨa mepɨwahaxɨatɨakai mɨkɨ memɨkahuriyutsixitɨkai ta'iwama wahepaɨtsita.
ACT 14:3 Mɨkɨ matsi mɨixa 'amepɨtitekai mekamamatɨ Ti'aitame hetsɨa memɨmiemetetɨkaikɨ. 'Iya katinihekɨatakaitɨni niuki 'aixɨa kemɨtiuka'iyari manuyɨne hepaɨtsita. Pɨwarupitɨaxɨa yumamakɨ 'inɨari mamariwaweme memɨteyurienikɨ.
ACT 14:4 Hikɨ kiekatari hixɨata mepɨyutsanaxɨ: hipatɨ huriyutsixi wahetsie mekateniwiyakaitɨni, hipatɨta nɨ'ariekate wahetsie mepɨtewiyakai.
ACT 14:5 Mɨkɨ memɨkahuriyutsixitɨkai huriyutsixi wahamatɨa wa'ukiyarima wahamatɨa mekanitsutɨani 'axamewayuriekutɨ mewatuaxikutɨ.
ACT 14:6 Nɨ'ariekate yametehetimaika, mekaniyuta'una kiekaritetsie Ritsitɨratsie meta Rerɨwetsie mana hurawa Rikahuniya kwieyaritsie.
ACT 14:7 Mana mepu'uwakai niuki 'aixɨa manuyɨne mekuxatatɨ.
ACT 14:8 Hikɨ tewi Ritsitɨratsie pekatei nunutsiyari paitɨ ka'uyeiwetɨ mutinuiwaxɨ. Muwa kaniutikateitɨni,
ACT 14:9 Papuru tikuxatame kani'eniekaitɨni. Mɨkɨ 'ixeiyatɨ, yatimaitɨ yuri mɨti'eriekaikɨ 'aixɨa tiuyeikatɨ mayanikɨ,
ACT 14:10 karima mɨpaɨ katinitahɨawe: —Kenanukukexi, 'a'ɨkate keneutixutsera. Mɨkɨ kaniutitsuna, kuyeikatɨ kanayani.
ACT 14:11 Teɨteri me'ixeiyaka Papuru kemɨtiuyuri, me'utihiwatɨ rikahuniyatari waniukikɨ, mɨpaɨ mekaniutiyuani: —Kakaɨyarixi tahetsɨa mepu'axɨa teɨteri wahepaɨ meteyuxexeiyatɨ.
ACT 14:12 Werunawe Tsehuxi mepute'uterɨwaxɨ, meta Papuru 'Eximetsi mɨkɨmeri niuki mukuxatakaikɨ.
ACT 14:13 Kupiteri tukieya kiekari 'aurie manuwe, mawari wewiwameya turutsixi kaniwa'atɨani wa'awate xuturiyatɨkaime kitenietsie kaniuku'uitɨani. Teɨteri yumɨireme wahɨxie, mɨkɨ mawari kaniwaweriemɨkɨkaitɨni.
ACT 14:14 Me'u'enanaka nɨ'ariekate Werunawe meta Papuru, yu'ixuriki metitsanatɨ me'unautsaxɨaximetɨ mekaniu'axɨani teɨteri wahetsɨa me'utihiwatɨ, mɨpaɨ me'utiyuatɨ:
ACT 14:15 —Xeme teɨteri 'aku ¿titayari mɨpaɨ xeteyurie? Tame xehepaɨ tekaniteɨteritɨni, xehepaɨ tekateniu'iyarini. Niuki 'aixɨa manuyɨne temɨxekuxaxatɨwa xemɨtehayewakɨ yakɨ xeikɨa xemɨteyurie, Kakaɨyari mayeyuritsie xemɨtewiyanikɨ. Mɨkɨ muyuawi, kwie meta haramara putiwewi, meta naime wahetsie memɨtexuawetɨka.
ACT 14:16 Meripaitɨ xeteɨterima mepɨwarupitɨa nuiwarite yuhuye memanukuweiyakɨ.
ACT 14:17 Tsiere pɨkayuhayewakai kaheixeiyatɨ kemɨ'ane mitahekɨatake. 'Aixɨa katiniyurienekaitɨni, wiyeri muyuawitsie mieme pɨtatsipitɨakai, meta 'ikwaxi puxuaweriyakai. Xe'iyari muyutemawiekakɨ xetekwakaku.
ACT 14:18 Mɨpaɨ me'utiyuaka hawerimiemete xeikɨa mekaniwarukunuitɨani, teɨteri mawari memɨkawawewirienikɨ.
ACT 14:19 Hikɨ huriyutsixi mana mekaniu'axɨani 'Anutiyukiyatsie meta 'Ikuniyutsie meheyekɨneka. Teɨteri mekaniwarukunuitɨani. Papuru mekaniutituaxixɨani. Mekaneihana kiekari tetsie mɨkime me'erietɨ.
ACT 14:20 Teyɨ'ɨkitɨwamete 'auriena mehaketɨkɨneku, kananukukeni. Kiekaritsie kaneyani. 'Uxa'ariekata Werunawe hamatɨa Rerɨwe mekanekɨne.
ACT 14:21 Mana niuki 'aixɨa manuyɨne mekaniwakuxaxatɨwakaitɨni kiekatari, yuwaɨkawame mekateniwa'ɨkitɨakaitɨni. 'Ariketa me'akunuaxɨaka, Ritsitɨratsie, 'Ikuniyutsie meta 'Anutiyukiyatsie meniuyekɨne.
ACT 14:22 Teyɨ'ɨkitɨwamete wa'iyari mekaniutuikaxɨani metewakuxaxatɨwatɨ para yuri mete'erietɨ memɨyuhayewanikɨ, mɨpaɨ me'utiyuatɨ: «Peuyewetse waɨkawa te'uximatɨarieme temeutahaxɨanikɨ Kakaɨyari mɨra'aitatsie».
ACT 14:23 Naitsarie memɨyutixexeɨriwatsie wa'ukiyarima mekananayexeiyarieni. Meyutanenewieka me'uyuhakieka mepihɨritɨa Ti'aitame, mɨkɨ yuri memɨte'uta'erikɨ hetsiena.
ACT 14:24 Hikɨ Pitsiriya kwieyaritsie me'uyekɨneka, Pamɨpiriya kwieyaritsie paitɨ mekaniu'axɨani.
ACT 14:25 Mete'utahayewaka niuki me'utaxataka Perɨketsie, 'Atahariyatsie mekaneukayune.
ACT 14:26 Mana kanuwa 'amɨpatsie mekanekɨne 'Anutiyukiyatsie paitɨ hakewa memayenɨ'arie Kakaɨyari 'aixɨa mɨtiuka'iyarinikɨ wahetsiemieme, memɨte'uximayakakɨ kememɨteheye'atɨa.
ACT 14:27 Me'u'axɨaka mekaniwarukuxeɨrieni memɨyutixexeɨriwa. Mekateniwarutaxatɨani kehepaɨ mɨreyuriekai Kakaɨyari wahamatɨa 'uyeikatɨ, mɨpaɨta yuri mekateneta'erieni nuiwarite memɨkahuriyutsixi.
ACT 14:28 Mɨkɨ teyɨ'ɨkitɨwamete wahetsɨa mɨixa tukari mana mekaneyuhayewa.
ACT 15:1 Hikɨ hipatɨ Kureya meheyekɨneka mekateniwa'ɨkitɨakaitɨni ta'iwama mɨpaɨ me'utiyuatɨ: «Xeme xɨka xitekiyakɨ xeka'u'inɨaritɨarieni kemaine Muitsexi yeiyarieya, xepɨkayɨwawe xemɨtawikweitsitɨarienikɨ».
ACT 15:2 Papuru meta Werunawe yemekɨ mekaniniukixiekaitɨni mɨiremekɨ wahepaɨtsita. 'Aixɨa mekaniyurieni Papuru Werunawe hamatɨa meta hipatɨ yuri memɨte'erie mɨkɨ yunaitɨ Kerutsareme mekanekɨne, nɨ'ariekate meta 'ukirawetsixi wahetsɨa 'ikɨ niuki hepaɨtsita memɨtehetixatakɨ.
ACT 15:3 Mana memɨyutixexeɨriwakai mepɨwarenɨ'a. Penitsiyatsie meta Tsamariyatsie mepuyekɨ metekuxatatɨ memɨkahuriyutsixi wahepaɨtsita kename yuri mete'uta'eriwakai. Mɨkɨ niuki me'enietɨ yuri memɨte'erie 'iwamarixi waɨkawamekɨ mekaniyutemamawiekaitɨni.
ACT 15:4 Kerutsareme me'uta'axɨaku, mana memɨyutixexeɨriwakai, nɨ'ariekate meta 'ukirawetsixi yunaitɨ mekaniwarutanaki'erieni. Memɨtewarutaxatɨakɨ naime Kakaɨyari kemɨtiyurienekai wahamatɨa 'uyeikatɨ.
ACT 15:5 Hikɨ hipatɨ paritseutsixi wahepaɨ memɨteku'eriwakai mekananuku'uni mɨpaɨ me'utiyuatɨ: —Peuyewetse memɨkahuriyutsixi temɨwata'aitɨanikɨ memɨ'inɨaritɨarienikɨ xitekiyakɨ, 'inɨari niukiyari Muitsexi 'aitsikayatsie yamemɨtekahunikɨ.
ACT 15:6 Hikɨ nɨ'ariekate meta 'ukirawetsixi mekaniyukuxeɨrieni 'aixɨa meteyurienike 'ikɨ niuki hepaɨtsita.
ACT 15:7 Waɨkawa niuki mexɨatɨakaku, Pekuru 'anukukeka mɨpaɨ katiniwarutahɨawe: —Neuxei 'iwamarixi, xeme mɨpaɨ xepɨtemate, Kakaɨyari meripaitɨ pɨnetsi'anayexei xetsata, mɨkɨ memɨkahuriyutsixi niuki 'aixɨa manuyɨne memi'enienikɨ ne ne'utaniukakaku, mɨkɨkɨ memɨtawikweitsitɨarienikɨ.
ACT 15:8 Kakaɨyari ta'iyari mɨmatekɨ katiniwarutahekɨatɨani wapitɨatɨ 'Iyari Mɨtiyupata tame tahepaɨ.
ACT 15:9 Yɨkɨ katatixeiyatɨ mɨkɨ meta tame. Yuri mete'uta'erieku wa'iyaritsie kaniwaru'itieni.
ACT 15:10 Hikɨ kamɨtsɨ, ¿ketitayari Kakaɨyari xete'inɨatatɨwe, yuyeiyari xetewaranuyetekirie teyɨ'ɨkitɨwamete turutsixi kwietsanamete wahepaɨ? Tatutsima meta tameta tepɨtatexiekai yuku temanuyetenikɨ.
ACT 15:11 Matsi Ti'aitame Ketsutsi 'aixɨa tiuka'iyarikaku tame yuri tepɨte'erie temɨtawikweitsitɨarienikɨ.
ACT 15:12 Hikɨ yunaitɨ muwa memuyuxeɨriekai kayuwatɨ meputamarixɨ, memɨwa'enienikɨ Werunawe meta Papuru metehekɨatame 'inɨari mamariwaweme Kakaɨyari kemɨtiyurienekai memɨkahuriyutsixi watsata mɨkɨ metekuxatakaku.
ACT 15:13 Mete'utahayewaka metekuxatatɨ, Kakuwu mɨpaɨ katiniwaruta'eiya: —Ne'iwamarixi xekeneneu'eni.
ACT 15:14 Tsimuni katiniutahekɨata Kakaɨyari meripaitɨ kemɨtiyuwaɨri menuyexeiyakɨ memɨkahuriyutsixi watsata hetsɨana memɨmiemetetɨnikɨ.
ACT 15:15 Yaxeikɨa paine Kakaɨyari niukametemama waniuki, mɨpaɨ kemɨre'utɨarie hepaɨ:
ACT 15:16 »“'Arike mana nepɨnuani, Rawiri kiiya nepɨtawewieni mu'unikai. Kɨyexiyari mana meutihe naime nepanuku'uitɨani, nepitseiriya,
ACT 15:17 teɨteri memɨyuhayewa Ti'aitame memukuwaunikɨ, yunaitɨ nuiwarite nemɨwaranayexei nehetsɨa memɨmiemetetɨnikɨ.
ACT 15:18 Ti'aitame mɨpaɨ paine” matsiɨkɨme meyeitɨa 'ikɨ matɨari paitɨ.
ACT 15:19 »'Ayumieme ne mɨpaɨ nepɨtiku'eriwa, tepɨkawa'uximatɨaka mɨkɨ memɨkahuriyutsixi Kakaɨyaritsie yuri memɨte'uta'erikɨ.
ACT 15:20 Matsi 'aixɨa pɨyɨni temɨtewata'utɨirienikɨ memɨyukweriwayuriekakɨ, tita kakaɨyarixi memɨtemawiyarie mɨkɨ hepaɨtsita, memɨkawakumaɨwanikɨ mɨkayɨ'ɨya mɨkayɨkɨna, 'ukawiyayu waiyarieya hepaɨtsita memɨyukweriwayuriekakɨ meta xuriya memɨkakwa'anikɨ.
ACT 15:21 'Iya Muitsexi meripaitɨ hikɨke pɨwarexeiya mɨkɨ memitahekɨata kiekari mukumanetsie watukiteta yamemɨte'ititerɨwa 'uxipiya tukaritsie.
ACT 15:22 Hikɨ nɨ'ariekate meta 'ukirawetsixi wahamatɨa yunaitɨ memɨyutixexeɨriwakai wahamatɨa 'aixɨa 'anekame mekani'eriekaitɨni yutsata memɨwaranuyexeiyakɨ hipame, memɨwaranunɨ'anikɨ 'Anutiyukiya paitɨ Papuru meta Werunawe wahamatɨa. Mekaniwaranuyexeiya Kura Warɨtsawaxi mɨtitewakai, meta Tsiraxi. Mɨkɨ mepɨte'aitametetɨkai yu'iwama watsata.
ACT 15:23 Mɨpaɨ mete'u'utɨaka xapatsie mekaneinɨ'ani: Nɨ'ariekate meta 'ukirawetsixi 'iwamarixi, Tekanixewaɨritɨaka, meta ta'iwamarixi xemɨkahuriyutsixi 'Anutiyukiyatsie, Tsiriyatsie meta Tsiritsiyatsie xemɨtama.
ACT 15:24 Tepu'enana kename hipatɨ tahetsɨa miemete mexexamurietɨwekai yuniukikɨ xe'iyari meyuitɨatɨwetɨ mexe'aitɨatɨ xemɨyu'inɨaritɨanikɨ xitekiyakɨ, 'inɨari niukiyaritsie yaxemɨtekahunikɨ. Tame tepɨkatewa'aitɨa.
ACT 15:25 Hikɨ, 'axeikɨa te'uta'enieka temɨwaranayexeiyakɨ hipame 'iwamarixi xehetsɨa temɨwaranunɨ'anikɨ Werunawe meta Papuru temɨwanaki'erie wahamatɨa.
ACT 15:26 Mɨkɨ yutukari mekaniyetuakaitɨni Ketsutsi Kɨritsitu Tati'aitɨwame hetsɨa memɨmiemetekɨ.
ACT 15:27 'Ayumieme, tepɨwarenɨ'a Kura meta Tsiraxi. Mɨkɨta yuniukikɨ yaxeikɨa mepɨtexehekɨatɨani.
ACT 15:28 'Aixɨa pɨtiyurie, 'Iyari Mɨtiyupata, meta tame waɨriyarika temɨkaxepitɨakakɨ, 'ikɨ hepaɨtsita kemɨreuyewetse:
ACT 15:29 xemɨka'ikwakakɨ tita kakaɨyarixi memɨtemawiyarie, xuriya, mukawiya waiyarieya, kemɨ'ane mɨkaxe'ɨya mɨkaxekɨna xemɨkawakumaɨwanikɨ. Xeme xɨka mɨkɨ xeka'umayɨani, 'aixɨa xepɨyɨaka. Mɨpaɨ xeikɨa kani'aneni.
ACT 15:30 Hikɨ mɨkɨ memeyenɨ'arie 'Anutiyukiyatsie mekaniu'axɨani. Yunaime mewarukuxeɨrieka xapa mekaniyetuani.
ACT 15:31 'Iwamarixi me'itaterɨwaka mekaniyutemamawiekaitɨni memɨtuikariekaikɨ.
ACT 15:32 Kura meta Tsiraxi Kakaɨyari niukametemama mekanihɨkɨtɨkaitɨni, waɨkawa metekuxatatɨ mekaniwatuikakaitɨni yu'iwama, mekaniwatseiriyakaitɨni.
ACT 15:33 Yapaɨmexɨa tukari me'uyurieka, yu'iwama wahetsɨa mekanekɨne 'aixɨa metewaxeiyatɨ. Mɨkɨ memɨwareyenɨ'a wahetsɨa mekaniu'axɨani.
ACT 15:35 Papuru meta Werunawe 'Anutiyukiyatsie mekaniuyuhayewa mete'ɨkitatɨ, Ti'aitame niukieya 'aixɨa manuyɨne mekuxatatɨ meta hipame yumɨireme wahamatɨa.
ACT 15:36 Hikɨ yapaɨmexɨa tukari 'anukayaku, Papuru Werunawe mɨpaɨ katiniutahɨawe: «Kɨmɨtsɨari hutarieka tepɨyehu, ta'iwamarixi tepɨwa'iwatayu naime kiekaritetsie hakewa Ti'aitame niukieya temetaxatsie, kemetehe'uwa tepɨwaxeiyayu».
ACT 15:37 Werunawe Wani Marikuxi mɨtitewakai kani'iniekaitɨni.
ACT 15:38 Papuru hepaɨtsita 'aixɨa pɨka'anekai memenuwitɨnikɨ mɨwareku'eiriekaikɨ Pamɨpiriyatsie, wahamatɨa mɨkahetɨakɨ mɨti'uximayakakɨ.
ACT 15:39 'Ayumieme mepɨka'uyu'eniexɨa, mepautayeixɨa yuxexuitɨ. Werunawe Marikuxi hawitɨtɨ kanuwa 'amɨpatsie Tsipɨre paitɨ mekanekɨne.
ACT 15:40 Matsi Papuru Tsiraxi 'anayexeiyaka kaneyani. Ta'iwamaxi Ti'aitame mekaniuhɨritɨani 'aixɨa mɨtiuka'iyarinikɨ mɨkɨ hetsiemieme.
ACT 15:41 Tsiriyatsie meta Tsiritsiyatsie puyetɨa watuikatɨ mana memɨyutixexeɨriwakai.
ACT 16:1 Hikɨ Papuru Rerɨwe kaniye'ani meta Ritsitɨratsie, mana tiyɨ'ɨkitɨwame Timuteu titewakame pukaxei. Maamaya huriyu yuri mɨti'erie kanihɨkɨtɨkaitɨni, paapaya kɨriyeku tihɨkɨtɨkai.
ACT 16:2 'Iwamarixi ritsitɨratari meta 'ikuniyutari Timuteu 'aixɨa mekatenihekɨatakaitɨni.
ACT 16:3 Papuru kanita'inieni hamatɨana mɨyemiekɨ. 'Inɨari xitekiyari kaniwewirieni huriyutsixi wayeiyari kemaine, yunaitɨ memimaikaikɨ paapaya kɨriyeku mɨhɨkɨtɨkaikɨ.
ACT 16:4 Meku'uwatɨ kiekaritetsie mekaniwahɨritɨakaitɨni yamemɨtekahunikɨ, 'aitsikatsie kememɨte'aitakai nɨ'ariekate 'ukirawetsixi kerutsaremetari.
ACT 16:5 Memɨyutixexeɨriwakai mekanitɨrɨkariyariekaitɨni yuri mete'erietɨ. Tukarikɨ mekanitamɨirirɨmekaitɨni.
ACT 16:6 Hikɨ Pɨrikiyatsie meta Karatsiya kwieyaritsie mekaniuyekɨne. 'Iyari Mɨtiyupata pɨwaruta'imaiyakai 'Atsiyatsie niuki memɨkakuxatanikɨ.
ACT 16:7 Mitsiya kwieyari tetsita me'u'axɨaka Witiniyatsie mekaneuyeyunekekaitɨni. Ketsutsi 'Iyarieya pɨkawarupitɨa.
ACT 16:8 Mitsiya kwieyari tetsita me'uyekɨneka Tɨruhatsi paitɨ mekaneukakɨne.
ACT 16:9 Yɨwikɨta Papuru yuheinɨtsita tewi kaniuxeiya matseruniyatanaka, muwa 'utiwekame 'iwawiriekame mɨpaɨ 'utaitɨ: «Kenanaye'a 'anataɨye Matseruniya paitɨ, ketaneparewieka».
ACT 16:10 Yuheinɨtsita tiuxeiyaka kwitɨwa tekaniyukuha'aritɨani ketemɨte'anukɨnekɨ 'anutaɨye Matseruniya paitɨ, mɨpaɨ tetehetimaika Kakaɨyari mɨtatsi'uta'ini niuki 'aixɨa manuyɨne temɨwaretaxatɨanikɨ.
ACT 16:11 Hikɨ Tɨruhatsi tehekɨneka heitseriemekɨ tekaneta'axɨani Tsamutɨratsiyatsie, 'uxa'arieka Kiekari mɨhekwatsie paitɨ tekaneta'axɨani,
ACT 16:12 manaketa Piriputsie paitɨ tekanekɨne. Mɨkɨ kiekari 'amɨyewa kanihɨkɨtɨkaitɨni 'etsimɨyeyeu hetsiena mɨtiwiya Matseruniya kwieyaritsie. Xumatari kaniwakuruniyatɨkaitɨni. Yapaɨmexɨa tukari tekaniuyurieni mɨkɨ kiekaritsie.
ACT 16:13 'Uxipiya tukaritsie kiekari tetsita paitɨ tepanuyekɨ. Mana hatɨa tetsita mɨrayutinenewitɨre puwekai. Mana tetiyaxeka 'ukarawetsixi tekateniwarutaxatɨani mana memɨyuxeɨriekai.
ACT 16:14 Mɨkɨ xewitɨ Ririya mɨtitewakai, Kakaɨyari kanayexeiyakaitɨni. Tiyatira kiekariyaritsie kanikiekametɨkaitɨni meta 'ixuriki mɨyɨtsikimawi kanituakaitɨni. Ti'aitame kanenutiyepieni 'iyarieya mexi mɨkɨ ta'enakai, mi'enienikɨ Papuru kemɨtikuxatakai.
ACT 16:15 Mɨkɨ puka'ɨyarie meta kiena kiekatari. Hikɨ kataniuta'inieni mɨpaɨ 'utaitɨ: «Xeme xɨka Ti'aitame hetsie yuri neti'eriekame xenetsihayeitɨani, hikɨmɨ nekiita, xemayehenikɨ». Mɨpaɨ 'utaitɨ waɨriyarika kataniupitɨani.
ACT 16:16 Hikɨ mɨrayutinenewitɨre teheukɨneka, 'ɨimari waɨriyarika mɨti'uximayatame katananukunake, 'iyari 'axamɨ'ane minɨkai kɨmana mɨtimaiwekai. Mɨkɨ tikuxatatɨ kemɨtiyɨnikekai waɨkawa pɨti'iwakai yukutsiyarima wahetsiemieme.
ACT 16:17 Mɨkɨ pɨtatsi'uweiyakai Papuru meta tame. Putahiwakai mɨpaɨ 'utaitɨ: —'Ikɨ teɨteri Kakaɨyari 'Amutewi te'uximayatsiriwamete mepɨhɨkɨ, mɨkɨ wikweitsitɨarika huyeyari xeme mepɨxekuxaxatɨwa.
ACT 16:18 Mɨpaɨ mɨixa tukari katiniyurienekaitɨni. Hikɨ Papuru 'uxiwa'atɨ, ta'aurie 'aweka mɨpaɨ katinitahɨawe 'iyari 'axamɨ'ane kaniutatieni: —Ketsutsi Kɨritsitutsie netiwiyatɨ nepɨmetsi'aitɨa, hetsiena pemayeyanikɨ. Hikɨ 'ana kwitɨwa 'iyari 'axamɨ'ane kanihayewa.
ACT 16:19 Kepauka kutsiyarimama mɨpaɨ memɨtehetima mɨwaruku'eiriekaikɨ kɨmana memɨte'iwakai, 'ayumieme Papuru meta Tsiraxi mekaniutiwiyarieni, meta kiekari hixɨapa mepɨwarehapa hakewa 'itsɨkate memɨteha'aitatsie.
ACT 16:20 'Itsɨkate wahɨxie mewa'atɨaka, mɨpaɨ mekaniutiyuani: —'Ikɨ teɨteri mekanihuriyutsixitɨni, mepɨwaxamurietɨwe tahetsɨa kiekatari.
ACT 16:21 Yeiyari mekani'ɨkitani tame xumatari temukunamiyarie temitanaki'erieni yatɨni yatemɨteyuriekakɨ.
ACT 16:22 Yunaitɨ mekaniyukuxeɨrieni wahepaɨtsita. 'Itsɨkate mekateniuta'aita wa'ixuriki memanutihɨniyariexɨanikɨ, meta kɨyekɨ memɨtiweiyanikɨ.
ACT 16:23 Waɨkawamekɨ mewarutiwaka, katsariyanata mekaniwaranutaxɨrieni, meta tihɨweme mekaniuhɨritɨani 'aixɨa mɨtiwa'ɨwiyanikɨ.
ACT 16:24 Mɨkɨ mɨpaɨ tiuta'aitɨarieka, mutanieretsie paitɨ kaniwaranutaxɨrieni. Wa'ɨkate tiyɨxɨrɨwametsie kaniuye'uitɨani.
ACT 16:25 Hikɨ tɨkari hixɨapa yakɨtɨtɨ Papuru meta Tsiraxi meyunenewietɨ Kakaɨyari mekaninɨawakaitɨni. Wahamatɨa memanutaxɨriyakai mekaniwa'eniekaitɨni.
ACT 16:26 Yapauka kwie karima kaniutayuani, katsariyana tenariyari kaniutayuani. Naitɨ kiteniete pɨreuyepierixɨa. Yunaitɨ pɨretsutsixi watepɨate kanakaxɨnixɨani wamamatetsie wa'ɨkatetsie.
ACT 16:27 Tihɨweme 'anutaniereka, katsariyana kitenie heuyepiekame 'uxeiyaka, yunawaxa kaniwatihana yumienike, memanutaxɨriyakai meyuta'unaxɨame 'erietɨ. Papuru karima kanitahiwieni mɨpaɨ rehɨawetɨ:
ACT 16:28 ―Penɨkahɨrixɨa peti'akwinitɨani. Tame tanaitɨ 'uwa tekanayeteni.
ACT 16:29 Hikɨ tihɨweme kɨxeme kaniuta'iwauni, yumexuitɨatɨ kiita kaneutaweni 'uyɨyɨakatɨ. Papuru meta Tsiraxi wahetɨa kaniukaweni.
ACT 16:30 Takwa waranuyewitɨka mɨpaɨ katiniwaruta'iwawiya: —Neuxei, ¿titari reuyewetse yanemɨtiyurienikɨ nemɨtawikweitsitɨarienikɨ?
ACT 16:31 Mɨkɨ mɨpaɨ mekatenita'eiya: —Ti'aitame Ketsutsi hetsie, yuri ketineuta'eri mɨkɨkɨ pekanitawikweitsitɨariemɨkɨ 'ekɨ meta 'akie kiekatari.
ACT 16:32 Kakaɨyari niukieya mekanitaxatɨani mɨkɨ, meta yunaime kitana memɨye'uwakai hamatɨana.
ACT 16:33 Mɨkɨ yɨwikɨta warewitɨka, kaniwarahauxixɨani memaweiyatɨkateitsie. Kwitɨwata puka'ɨyarie mɨkɨ, meta yunaitɨ kiena kiekatari.
ACT 16:34 Tihɨweme yukie warewitɨka katiniwaremini, meta yunaitɨ yuri memɨte'uta'eri Kakaɨyari hetsie 'axeikɨa yunaitɨ mekaniyutemamawiekaitɨni.
ACT 16:35 Hikɨ 'ukatareku 'itsɨkate yutupiritsixi mekaniwarenɨ'ani tihɨweme mɨpaɨ memɨteta'aitɨanikɨ: «Keniwarutixɨna mɨkɨ teɨteri».
ACT 16:36 Hikɨ tihɨweme Papuru mɨpaɨ katiniutaxatɨani: —'Itsɨkate mɨpaɨ mekateneta'aita xemɨtixɨnarienikɨ. Hikɨtsɨari xekenehu, xeka'uximatɨarietɨ.
ACT 16:37 Papuru tehɨwemete mɨpaɨ katiniwaruta'eiya: —Mɨkɨ mepɨtatsi'utiwa yunaime wahɨxie tsepanetɨ 'itsɨkame mɨkatatsi'uta'iwawiyaxɨ, tsepanetɨ temɨxumanutsixi. Mepɨtatsi'anutaxɨri. Kaukatsɨari hikɨ 'awie metatsi'anuyenɨ'ani. Pɨkatixaɨtsietɨ, 'uwa me'u'axɨame, mɨkɨ meketatsi'anuyewitɨni.
ACT 16:38 Tupiritsixi 'itsɨkate mekateniwarutaxatɨani kememetiyua. Kepauka mɨkɨ memu'enana kename Papuru meta Tsiraxi Xumanutsixi mehɨkɨtɨkai mekaniutimamani.
ACT 16:39 Me'u'axɨaka mekaniwanɨtɨakaitɨni, mewaranuyewitɨka mekaniwarutawawirieni memɨyehukɨ mɨkɨ kiekaritsie.
ACT 16:40 Hikɨ katsariyanata mewayekɨneka Ririya hetsɨa mekaniu'axɨani. Mewaruxeiyaka 'iwamarixi mekaniwatuikakaitɨni. 'Arikeketa mekanekɨne.
ACT 17:1 Hikɨ 'Amipipuritsie meta 'Apuruniyatsie me'uyekɨneka Papuru meta Tsiraxi Tetsarunikatsie paitɨ mekaneta'axɨani, huriyutsixi watuki mana kaniuwekaitɨni.
ACT 17:2 Papuru kemɨtiyeiyarieyatɨkai, muwa tukita kaneutahani, haikakɨa 'uxipiya tukaritsie katiniwakuxaxatɨwakaitɨni
ACT 17:3 'utɨarikatsie mieme wahekɨatɨatɨ watuikatɨ kename heuyewekai mɨkɨ Kɨritsitu heitserie mupitɨarie mɨtikwinekɨ mɨkite watsata manukukenikɨ, mɨpaɨ 'utaitɨ: «'Ikɨ nemɨxehekɨatɨa, 'ikɨ kemɨ'ane heitserie mupitɨarie Kɨritsitu kanihɨkɨtɨni».
ACT 17:4 Hipatɨ huriyutsixi yuri mekateniuta'erieni, Papuru meta Tsiraxi mekaniwarutinɨni, yumɨiretɨ 'ukarawetsixi waɨkawa memeuyewetse meta kɨriyekutsixi Kakaɨyari memayexeiyakai.
ACT 17:5 Huriyutsixi yuri memɨkate'eriekai mewa'uxietɨ, hipame 'axamemɨteyurie kiekari hixɨapa memu'uwa mekaniwaruta'inieni, mewaruxeɨrieka yumɨireme kiekatari mekaniwareutaxamuriexɨani. Katsuni kiita mekateniunawani Papuru meta Tsiraxi mewawautɨwetɨ memɨwaranuhapanikɨ yumɨireme wahɨxie.
ACT 17:6 Memɨkawarutaxeikɨ, Katsuni meta hipame 'iwamama mepɨwarehapa 'itsɨkate wahɨxie mɨpaɨ mete'uhiwatɨ: «'Ikɨ naitsarie teɨteri mekaniwaxamurietɨweni, 'uwata mekaniu'axɨani.
ACT 17:7 Katsuni yukiita kaniwarupitɨani. Mɨkɨ yunaitɨ yamepɨkatekahu Tsetsaxi kemɨti'aita, mɨpaɨ me'utiyuatɨ kename xewitɨ ti'aitame 'a'uyeika Ketsutsitɨtɨ».
ACT 17:8 Mɨpaɨ mete'u'enanaka, teɨteri memɨyumɨire meta 'itsɨkate kiekatari mekaniuyeha'ani,
ACT 17:9 Katsuni meta hipatɨ mekaniukwetatɨarieni 'uxa'atɨni warie 'atsimemɨkatiyuanikɨ, mekaniutixɨnarieni.
ACT 17:10 Hikɨ kwitɨwa 'ukuyɨreku teyɨ'ɨkitɨwamete Papuru meta Tsiraxi mepɨwarenɨ'a Wereyatsie paitɨ. Mana me'u'axɨaka huriyutsixi watukita mekaneutahaxɨani.
ACT 17:11 Mana memɨtamakai huriyutsixi yemekɨ 'aixɨa mepɨte'u'iyarikai, tetsarunikatari yamekate'u'iyarikaku. Mekanitanaki'erieni niuki waɨkawa meyuwaɨriyatɨ. Tukarikɨ mekateniwautɨwekaitɨni 'utɨarika xapayaritsie, yamemɨtehetimanikɨ xɨka'aku yuritɨni kememɨtekuxatakai.
ACT 17:12 Yumɨiretɨ huriyutsixi yuri mekateniuta'erieni, meta yuwaɨkawatɨ kɨriyekutsixi, 'Ukarawetsixi waɨkawa memeuyewetse, meta 'ukitsi yuwaɨkawatɨ yuri mepɨte'uta'eri.
ACT 17:13 Hikɨ kepauka memɨte'utamari huriyutsixi tetsarunikatari, kename Papuru Wereyatsie Kakaɨyari niukieya hekuxatakai. Mana mekanekɨne mewaxamurienike teɨteri yumɨireme.
ACT 17:14 Kwitɨwata 'iwamarixi Papuru haramara tetsita mekanitanɨ'ani mɨyemiekɨ. Tsiraxi meta Timuteu Wereyatsie mekaniyuhayewa.
ACT 17:15 Mɨkɨ Papuru memaweiyakai 'Atenaxi paitɨ mekaneiwitɨni. Mana mekanitinuaxɨani mɨkɨ mɨpaɨ tiwaruta'aitɨaku, Tsiraxi meta Timuteu hetsɨana memɨ'axɨanikɨ mexɨima xɨka tiyɨwenike memɨyehukɨ.
ACT 17:16 Hikɨ Papuru wakwewietɨ 'Atenaxitsie, yu'iyaritsie kaniyɨhɨawekaitɨni waxeiyatɨ kiekaritsie kakaɨyarixi waɨkawa memayexeiyariekaikɨ.
ACT 17:17 Tukita niuki kanixɨatɨakaitɨni huriyutsixi wahamatɨa, meta kɨriyekutsixi Kakaɨyari memayexeiyakai wahamatɨa. Kiekari hixɨapata tukarikɨ niuki kanikuxatakaitɨni mana memu'uwakai wahamatɨa.
ACT 17:18 Hipatɨ 'Epikureyutsixi meta 'Etsituikutsixi temaiwawemete mekaniti'eiyarɨmekaitɨni. Hipatɨ mɨpaɨ mekaniutiyuanekaitɨni: «¿Titakuta tixatanikeyu 'ikɨ niukiwiwame?» Hipatɨta mɨpaɨ mete'utiyuanekai: «Wa'atɨtɨ kakaɨyarixi xaɨtsie miemete puwakuxata». Mɨpaɨ mekaniutiyuanekaitɨni Papuru Ketsutsi niukieya 'aixɨa manɨyɨne mukuxatakaikɨ, meta mɨkite kememɨte'anuku'uni.
ACT 17:19 Hikɨ mekaneiwitɨni 'itsɨkate 'Arexi yemuriyaritsie memɨyutixexeɨriwakai wahɨrɨpa, mɨpaɨ mete'iku'iwawiyatɨ: —¿Tsipara 'ikɨ 'ɨkitsika mɨhekwa pemukuxata tihɨkɨ, tame tepeitimani?
ACT 17:20 Ketemɨkateheye'enakare pepɨtikuxata. 'Ayumieme tekatenetimaikuni ketɨtɨ manɨyune.
ACT 17:21 'Atenaxitari yunaitɨ, meta ku'uwamete mana memɨ'iwatatɨwe 'atsimepɨkateyuriekai, tixaɨtɨ mɨtihekwa mepɨtexatakukai meta mepɨte'eniekukai xeikɨa.
ACT 17:22 Hikɨ Papuru 'itsɨkate wahixɨapa 'utakeka mɨpaɨ kaniutayɨni: —Neuxei 'atenaxitari. Nekanixexeiyani xeme waɨkawamekɨ xekateniwarayexeiyani.
ACT 17:23 Mana ne'uyemietɨ nekatiniuxeiya tita xemɨtewarayexeiya, xeime nekaniutaxeiya mɨrayutimawatɨre, hetsiena mɨpaɨ re'uxame: KAKAƗYARI MƗKAMATIWATSIE 'IKƗ PƗMIEME. Hikɨ, kemɨ'ane xemayexeiya xeka'imaitɨ, ne mɨkɨ hepaɨtsita nekatinixekuxaxatɨwani.
ACT 17:24 »Mɨkɨ Kakaɨyari kwie mutawewi, meta naitɨ hetsiena mɨtixuawe, mɨkɨ Ti'aitame muyuawi meta kwie pɨtipiinieya. Mɨkɨ tuki mamakɨ mɨwewiyata pɨka'ayeka,
ACT 17:25 teɨteri yumamakɨ mepɨka'eyexeiya, tixaɨtɨ mɨkareuyehɨwakɨ. Mɨkɨ yunaime tukari pɨwapitɨa, wa'iya meta naitɨ mɨtixuawe.
ACT 17:26 Xeime tewi wapaapa 'ayeitɨaka, pɨwarutiwewi yunaime nuiwarite naitsarie kwie manuniere memɨtamakakɨ. Wakwie 'inɨariyari tiukaye meta memeixeiyanikɨ hakewa meuye'atɨka.
ACT 17:27 'Ikɨ Kakaɨyari mɨyakatiniuyurieni yunaitɨ memikuwaunikɨ, tsikeretsɨ mekumetɨwetɨ memitaxeiyakɨ. Yurikɨ, mɨkɨ 'ateewa pɨka'uyeika tame taxexuime tahetsɨa.
ACT 17:28 “Mɨkɨtsie tetewiyatɨ tekanayeneniereni, tekanikuyuaneni meta tekaniu'uwani”. Mɨpaɨ kememutiyuane hepaɨ hipatɨ teyɨnɨnɨawamete xehetsɨa miemete: “Mɨkɨ tame nuiwarimama tepɨhɨkɨ, me'utiyuatɨ”.
ACT 17:29 »Hikɨ, xɨka Kakaɨyari hetsie teyekɨne, 'aixɨa pɨka'ane para mɨpaɨ temɨte'ixeiyani huru hepaɨ, pɨrata hepaɨ yatɨni tete hepaɨ 'anekame: tewi wewiyaya hepaɨ 'anekame, tita tewi mɨtiyɨkɨhɨawe hepaɨ 'anekame.
ACT 17:30 Hikɨ Kakaɨyari 'axapɨkatixeiyakai tita memɨteyuriekai kepauka 'atsimemɨkatemaikai, peru hikɨri pɨwahekɨatsitɨa yunaime teɨteri naitsarie memɨtama memɨtehayewanikɨ kememɨteyurie.
ACT 17:31 Xeime tukari pukaye mɨwa'inɨatanikɨ kwiepa memɨtama heitseriemekɨ yɨanetɨ, 'iya 'uki manuyexei yatiyurienekaku. Kakaɨyari yurikɨ niwarutahekɨatɨani yunaime, 'enukuketɨaka mɨkɨ mɨkite watsata».
ACT 17:32 Hikɨ me'u'enanaka mɨkite kememɨte'anuku'uni, hipatɨ mekaninanaimakaitɨni, hipatɨta mɨpaɨ mekatenikɨhɨawekaitɨni: —Hutarieka 'arikeketa tepɨmatsi'enieni 'ikɨ hepaɨtsita petikuxatame.
ACT 17:33 Hikɨ Papuru tiutahayewaka xeɨripa, kanewayeyani.
ACT 17:34 Hipatɨ Papuru mekaniutinɨni meta yuri mekateniuta'erieni. Riyunitsiyu mɨ'itsɨkametɨkai 'Arexi yemuriyaritsie miemetɨtɨri, meta xewitɨ 'ukaratsi Ramaritsi mɨtitewakai, metatsiere hipatɨ yuri memɨte'eriekai.
ACT 18:1 Manaketa 'Atenaxi yeyaka Kurinitutsie kaniye'ani.
ACT 18:2 Mana xeime huriyu 'Akira titewakame kananukunake, Punitutsie metinuiwaxɨ meta 'ɨyaya Pɨritsira mɨtitewa. 'Apɨkareutewikai 'akuxi 'Itariya kwieyaritsie heyeyaka, Kɨrauriyu pɨtiuta'aitakai yunaitɨ huriyutsixi Xumatsie memɨtitekai memɨtaweiyarienikɨ. Papuru mɨkɨ wahetsɨa kaninuani,
ACT 18:3 mɨkɨta wahepaɨ 'ixuriki kiyari pɨwewiwametɨkai, wahamatɨa kaniuyuhayewa memɨteta'uximayatakɨ yunaitɨ.
ACT 18:4 Xexuime 'uxipiya tukaritsie tukita katinikuxatakaitɨni, huriyutsixi meta kɨriyekutsixi yuri katiniwa'eritɨamɨkɨkaitɨni.
ACT 18:5 Hikɨ Tsiraxi meta Timuteu Matseruniyatsie meheyekɨneku, me'u'axɨaku, Papuru niukikɨ 'ayumiemetɨtɨ kanayani xeikɨa, tiwahekɨatɨatɨ huriyutsixi kename Ketsutsi hɨkɨ kemɨ'ane heitserie mupitɨarie Kɨritsitutɨtɨ.
ACT 18:6 Kepauka huriyutsixi Papuru memiti'uxiwe'eri meta 'axamekatenikɨhɨawekaitɨni, Papuru yu'ixuriki 'utakatseka 'inɨari 'ayeitɨaka, mɨpaɨ katiniwarutahɨawe: «Xeme yuhetsie xepɨtehahɨpa xɨka xe'ukwini. Ne pɨta nepɨ'itiya. Hikɨri 'ena nemɨyeyani memɨkahuriyutsixi wahetsɨa nepɨyemie».
ACT 18:7 Hikɨ Papuru tukita wayeyaka xeime kie kaninuani Kutsitu mɨtitewakai hetsɨa. Kakaɨyari mɨkɨ kanayexeiyakaitɨni, meta kiena pehurakai tuki manuwekai.
ACT 18:8 Kɨritsipu tukita mɨti'aitakai yuri katiniuta'erieni Ti'aitametsie, meta yunaitɨ kiena kiekatari. Yumɨiretɨ kurinitutari me'u'enanaka Papuru kemɨtikuxatakai yuri mekateniuta'erieni meta mekaniuka'ɨyarieni.
ACT 18:9 Xeitɨkaritsie Ti'aitame Papuru heinɨtsitana mɨpaɨ katinitahɨawe: «Pepɨkaheumaka, matsi ketinekuxatani pekatihayewatɨ,
ACT 18:10 ne 'ahamatɨa nepuyeika, nixewitɨ 'axapɨkamatsiyurieni. 'Ikɨ kiekaritsie yuwaɨkawame teɨteri nekaniwarexeiyani».
ACT 18:11 'Ayumieme Papuru xeiwiyari heimana 'ataxewime metseri mana kaniuyurieni, Kakaɨyari niukieya wa'ɨkitɨatɨ.
ACT 18:12 Hikɨ, Kareuni kuwexinaruri, 'Akaiya kwieyaritsie mɨhɨritɨariekai, huriyutsixi 'axeikɨa me'uyukuxeɨrieka Papuru me'iniukimatɨ, mekaneiwitɨni 'itsɨkame mɨrewa'aitatsie.
ACT 18:13 Mɨpaɨ me'utiyuatɨ: —'Ikɨ tewi yuri katiniwa'eritɨaka teɨteri Kakaɨyari memayexeiyanikɨ 'inɨari niukiyari kemɨkahaine.
ACT 18:14 Papuru 'ari taniuximekaku, Kareuni mɨpaɨ katiniwarutahɨawe: —Neuxei huriyutsixi, 'ikɨ xɨka kwinimieme 'axareyurienike, yurikɨ nepɨxe'enienikeyu.
ACT 18:15 Mexɨka yakɨ xeikɨa xe'utiyuaneni yuhetsiemieme, niuki hepaɨtsita xe'inɨari hepaɨtsita xeikɨa, 'aixɨa xeketeneuyuri xemetɨtɨ. 'Itsɨkame nepɨkahɨkɨ mɨpaɨ ti'anekamekɨ.
ACT 18:16 Hikɨ katiniuta'aita memɨwayeweiyarienikɨ mɨrewayutixanetsiwatsie.
ACT 18:17 Mɨkɨ yunaitɨ Tsutsitenexi tukita ti'aitame mɨhɨkɨtɨkai mekaniuwiya, meta mekaneikuwaxɨani 'itsɨkame 'uwenieya hɨxie. Kareuni 'atsipɨkahainekai mɨkɨ hepaɨtsita.
ACT 18:18 Hikɨ Papuru mɨixa tukari mana puyuhayewaxɨ. Manaketa yu'iwama warutateutɨaka Tsiriya kwieyaritsie kaneyani kanuwa 'amɨpatsie. Pɨritsira meta 'Akira hamatɨana mekanekɨne. Meripaitɨ mɨyɨhɨritɨakaikɨ, 'ayumieme Tsenikɨreyatsie paitɨ pukaxiriekai yumu'utsie.
ACT 18:19 Hikɨ 'Epetsutsie me'uta'axɨaka, mana Papuru memeweiyakai kaniwareku'eirieni, mɨkɨ tukita kaneutahani muwa niuki kaniutaxata huriyutsixi wahamatɨa.
ACT 18:20 Mɨkɨ mekanitawawirieni yapaɨmexɨa tukari mɨyurienikɨ wahetsɨa 'akuxi, mɨkɨ pɨkayuwaɨriyakai.
ACT 18:21 Matsi wateutɨatɨ mɨpaɨ pɨtiuyɨhɨritɨa: «Xɨka Kakaɨyari mɨpaɨ tinakeni nepayeneni». Hikɨ 'Epetsutsie kaneyani.
ACT 18:22 Hikɨ Tsetsareya paitɨ nuaka, Kerusareme neutiyune memɨyutixexeɨriwa watahɨaweke, manaketa 'Anutiyukiyatsie kanakayune.
ACT 18:23 Yapaɨmexɨa tukari mana 'uyurieka Papuru kaneyani, wareu'iwatamieka memayutixexeɨriwatɨkatsie Karatsiya kwieyaritsie meta Pɨrikiyatsie yunaime teyɨ'ɨkitɨwamete watuikatɨ.
ACT 18:24 Hikɨ huriyu tewiyari kaniuyeikakaitɨni 'Apuruxi titewatɨ 'Arekanitɨriya metinuiwaxɨ. 'Epetsutsie kaninuani. 'Aixɨa pɨ'anekai niukamekɨ. 'Utɨarika xapayaritsie waɨkawa pɨrayemaikai.
ACT 18:25 Mɨkɨ Ti'aitame huyeya hepaɨtsita katiniuti'ɨkitɨariekaitɨni. 'Aixɨa 'iyarikɨ yuwaɨriyatɨ, katinikuxatakaitɨni ti'ɨkitatɨ heitseriemekɨ Ketsutsi hepaɨtsita, tsepanetɨ mɨtimaikai Wani kemɨtiu'ɨyakai xeikɨa.
ACT 18:26 Tukita kanitsutɨani tikuxatatɨ kaheumatɨ. Me'i'enieka Pɨritsira meta 'Akira mekanita'inieni, heitseriemekɨ matsi mekateni'ɨkitɨakaitɨni Kakaɨyari huyeya hepaɨtsita.
ACT 18:27 Mɨkɨ kaniyeimɨkɨkaitɨni 'Akaiya kwieyaritsie. 'Iwamarixi me'ituikatɨ mekateniwaruta'utɨirieni teyɨ'ɨkitɨwamete memitanaki'erienikɨ. Henuaka waɨkawa kaniwaparewiekaitɨni mɨkɨ yuri memɨte'uta'eri Kakaɨyari 'aixɨa tiuka'iyarikaku.
ACT 18:28 Yunaime huriyutsixi wahɨxie tɨrɨkaɨyemekɨ katinikuxatakaitɨni, 'utɨarika xapayaritsie tiwahekɨatɨatɨ kemɨ'ane heitserie mupitɨarie Ketsutsi metsiyaxi mɨhɨkɨ.
ACT 19:1 Hikɨ 'Apuruxi Kurinitutsie 'akuxi 'uyeikakaku, Papuru hɨri 'utɨa 'uyeyaka 'Epetsutsie kaneta'ani. Hipame teyɨ'ɨkitɨwamete mana kaniwaretaxeiya.
ACT 19:2 Mɨpaɨ katiniwaruta'iwawiya: —¿Xeme 'Iyari Mɨtiyupata xete'utanaki'eri yuri xemɨte'uta'eritsie? Mɨkɨ mɨpaɨ mekatenita'eiya: —Hawaikɨ matsi 'Iyari Mɨtiyupata hepaɨtsita tepɨka'enanawawe.
ACT 19:3 Hikɨ mɨpaɨ katiniwaruta'iwawiya: —¿Titatsie xetewiyatɨ xete'uka'ɨyarie? Mɨkɨ mɨpaɨ mekatenita'eiya: —Wani kemɨtiuka'ɨyakai xeikɨa teniuka'ɨyarieni tame.
ACT 19:4 Papuru mɨpaɨ katiniwarutahɨawe: —Wani kaniwaruka'ɨyakaitɨni metehayewakaku ke'axamemɨteyuriekai, mɨpaɨ tiwakuxaxatɨwatɨ teɨteri yuri memɨteta'erienikɨ kemɨ'ane 'utɨmana 'umamiekaitsie. Mɨkɨ Ketsutsi kanixatakaitɨni Kɨritsitu.
ACT 19:5 Me'u'enanaka mekaniuka'ɨyarieni Ti'aitame Ketsutsi hetsiemieme.
ACT 19:6 Papuru waheima kaniutimeni, 'ana 'Iyari Mɨtiyupata mehexeiyatɨ mekanakɨne, hipame niukitekɨ me'utiniutɨ mekanakɨne meta Kakaɨyari niukieya mekanikuxatakaitɨni.
ACT 19:7 Yunaitɨ teɨteri tamamata heimana huta mepɨyupaɨmekai.
ACT 19:8 Hikɨ Papuru huriyutsixi watukita kani'axekaitɨni tikuxatatɨ kamatɨ haika metseri puyuri. Niuki kanikuxatakaitɨni, yuri memɨteta'erienikɨ, Kakaɨyari ti'aitametɨkaku tikuxatatɨ.
ACT 19:9 Hipatɨ mekanitsetse'ikaitɨni, yuri mepɨkate'uta'eri, 'axame'utiyuatɨ mɨkɨ huye hepaɨtsita yumɨireme wahɨxie. Papuru waruku'eirieka teyɨ'ɨkitɨwamete kaniwaranuyewitɨni. Tukarikɨ Tiranu mɨti'ɨkitakaitsie niuki kanikuxatakaitɨni.
ACT 19:10 Mɨpaɨ huta wiyari katiniyurienekaitɨni, yunaitɨ 'Atsiyatsie memɨtamakai huriyutsixi meta kɨriyekutsixi Ti'aitame niukieya mekaniu'enieni.
ACT 19:11 Hikɨ Kakaɨyari 'inɨari tɨrɨkawime katiniyurienekaitɨni Papuru yatiyurienekaku.
ACT 19:12 Tekwikwikate watuwaxate meta wapetserate mepɨwarehuririwakai Papuru mimayuanikɨ, mɨkɨkɨ yukwiniyakɨ 'aixɨameteheu'erietɨ mepakɨkakai, meta kakaɨyarixi 'axamemɨ'anene wahetsie mepayekɨkakai.
ACT 19:13 Hipatɨ ku'uwamete huriyutsixi kakaɨyarixi memɨwaranuyenɨ'awakai, mɨkɨ Ti'aitame Ketsutsi mekanitixatatɨkɨne, kakaɨyarixi 'axamemɨ'anene memɨwanɨkai teɨteri wahepaɨtsita, mɨpaɨ me'utiyuatɨ: «Ne nepɨxe'aitɨa Ketsutsi hetsiemieme Papuru mikuxata hetsɨa, nepɨxewawirie xemayekɨnekɨ».
ACT 19:14 'Ikɨ huriyu 'Itsikewa mɨtitewakai mawari wewiwamete tiwa'aitɨwame, mɨkɨ 'atahutame yuniwema kaniwarexeiyakaitɨni mɨpaɨ meteyuriekame.
ACT 19:15 Hikɨ 'iyari 'axamɨ'ane mɨpaɨ katiniwaruta'eiya, Ketsutsi nepɨmate: «Meta Papuru nepetima, peru xeme, ¿kemɨ'ane xepɨyɨa?»
ACT 19:16 Mɨkɨ tewi 'iyari 'axamɨ'ane miwiyakai waheima kaniutiweni, kaniwara'iwa yunaime tɨrɨkaɨyetɨ. Mɨkɨtsɨ memamawetɨ meheuxitekietɨkaitɨ mekaniyuta'una kiita.
ACT 19:17 Kepauka memɨte'utamari kemɨtiuyɨ yunaitɨ huriyutsixi meta kɨriyekutsixi 'Epetsutsie memɨtamakai. Waɨkawa yunaitɨ mekanimamakaitɨni. Kemɨ'ane Ti'aitame Ketsutsi mɨhɨkɨ 'aixɨa tikuxaxatsiwatɨ kanayani.
ACT 19:18 Yumɨiretɨ yuri memɨte'uta'eri mekaniu'axɨani meyuhekɨatatɨ 'axakememɨteyuriekai.
ACT 19:19 Yumɨiretɨ mɨkɨ memɨteyukewaiyakai, yuxapate me'ukuxeɨrieka yunaime wahɨxie mekanititaiya. Hikɨ mekaniti'inɨata 'axeikɨa kepaɨmemetsie naitɨ mɨ'akai xapayari, huta tewiyari heimana tamamata miriyari pɨrata tuminiyari kanayani.
ACT 19:20 Mɨpaɨ tiuyɨku, Ti'aitame niukieya tɨrɨkaɨyemekɨ kaniutimɨire, kaniutɨrɨkare.
ACT 19:21 Hikɨ mɨya tiuyɨku, Papuru yu'iyaritsie kaniyuwaɨriya Matseruniyatsie meta 'Akaiyatsie 'uyeyame Kerutsaremetsie meta'anikɨ, mɨpaɨ 'utaitɨ: «Mana neheta'ame, peuyewetse Xumatsie nemeumiekɨ».
ACT 19:22 Hikɨ yuhutame yuparewiwamete Timuteu meta 'Eratsitu Matseruniyatsie kaniwarenɨ'ani, mexi'akuxi 'Atsiyatsie yapaɨmexɨa tukari 'ukatei.
ACT 19:23 Hikɨ 'ana waɨkawamekɨ mepɨyumuinakai teɨteri mɨkɨ huye hepaɨtsita.
ACT 19:24 Xewitɨ Remetɨriyu mɨtitewakai pɨrata wewiwame mɨhɨkɨtɨkai, pɨrata kakaɨyarixiyari pɨwawewiekai Riyana hepaɨ tiyuxexeiyame. Mɨkɨ mɨpaɨ tiyurienetɨ waɨkawa 'iwarika kaniwapitɨakaitɨni tewewiwamete.
ACT 19:25 Hikɨ warukuxeɨrieka mɨkɨ, wahepaɨ te'uximayatamete wahamame, mɨpaɨ kaniutayɨni: —Neuxei, xeme xekatenimaika tame temɨte'iwa 'ikɨ ta'uximayatsikakɨ.
ACT 19:26 Mɨpaɨ xepɨtexeiya, mɨpaɨ xepɨte'enana, Papuru yuri kemɨtiwa'eritɨa kemɨtiwarukunuitɨa yumɨireme teɨteri, 'ena 'Epetsutsie xeikɨa pɨkatixaɨ, matsi naitsarie 'Atsiyatsie. Mɨpaɨ katinikuxatani, mɨkɨ mamakɨ memɨwewiyatɨka kakaɨyarixi mepɨkahɨkɨ 'utaitɨ.
ACT 19:27 Mɨkɨ meta, tita temɨtehexeiya tame pɨkweriwa'ane kapa yakɨ'ayanikɨ. Matsi meta, 'ikɨ kakaɨyari mɨtɨrɨkaɨye Riyana tukieya, tixaɨ katihɨkɨtɨme teɨteri me'erietɨ. Yunaitɨ 'atsiyatari, naitsarie kwiepa memɨtamata, kemɨ'ane memayexeiya, 'ikɨ tɨrɨkariyaya pɨka'unariexime.
ACT 19:28 Hikɨ me'u'enanaka mepuyeha'a. Mekaniutihiwakaitɨni mɨpaɨ me'utiyuatɨ: —Kanitɨrɨkaɨyeni 'epetsutari takakaɨyari Riyana.
ACT 19:29 Naitsarie kiekaritsie mepuyuxamurietɨwekai. 'Axeikɨa mepekɨ me'unautsaxɨaximetɨ xeɨripa, mewarutiwiyaka Kayu meta 'Aritsitariku matseruniyatari Papuru teɨtametemama memɨhɨkɨtɨkai.
ACT 19:30 Papuru kanihamɨkɨkaitɨni yumɨiretɨ teɨteri memayuxeɨrie wahɨxie, peru teyɨ'ɨkitɨwamete mepɨka'ipitɨa.
ACT 19:31 Hipatɨ 'Atsiya kwieyaritsie kiekatari 'itsɨkate, hamikumama memɨhɨkɨtɨkai, xapa mekaneinɨ'airieni waɨkamekɨ me'iwawirietɨ xeɨripa mɨkamiekɨ.
ACT 19:32 Hikɨ hipatɨ yɨkɨ mete'uhiwatɨ hipatɨta yɨkɨ pɨta mekateniuhiwakaitɨni. Mana xeikɨa mekaniyukuxeɨrieni yunaitɨ, yumɨiretɨ 'atsimepɨkatemaikai titayari muwa memɨte'u'axɨakai.
ACT 19:33 'Amemu'uwakai watsata mekanenuyexeiya 'Arekanituru, huriyutsixi me'itakeku wahɨxie. 'Arekanituru yumamakɨ waru'inɨaritɨaka kaniniumɨkɨkaitɨni yuhetsiemieme memɨyukuxeɨri wahɨxie.
ACT 19:34 Meheitimaika Huriyu mɨhɨkɨtɨkaikɨ, karima mekaniutihiwakaitɨni 'axeikɨa yunaitɨ huta hurayari mepuyuri mɨpaɨ mete'uhiwatɨ: —Kanitɨrɨkaɨyeni 'epetsutari takakaɨyari Riyana.
ACT 19:35 Hikɨ kiekaritsie ti'aitame ti'utɨwame waku'imaiyatɨ mɨpaɨ katiniwarutahɨawe memuyuxeɨriekai: —Neuxei 'epetsutari, ¿hakewatsɨ tewi 'atsimɨkatimate kename 'Epetsu kiekatari Riyana mɨtɨrɨkaɨye tukita temɨte'aita, Kupiteritsɨa makane tete kakaɨyariyari hɨwemetemama?
ACT 19:36 Hikɨ, xɨka mɨpaɨ 'aneni, xɨka kayuxamurieka 'ikɨ niuki, kaneuyeweka kayuwatɨ xemɨtamarekɨ 'axaxemɨkateyu'eniwanikɨ.
ACT 19:37 Xekaniwa'atɨani 'ikɨ teɨteri, tsepa 'axamemɨkate'uyuri tuki hepaɨtsita, tsepa 'axamemɨkatekuxata xekakaɨyari hepaɨtsita.
ACT 19:38 'Ayumieme Remetɨriyu, tewewiwamete hamatɨana memu'uwa xɨka tixaɨ metehexeiya xeime hepaɨtsita, tukari puxuawe kepauka 'itsɨkate 'amemɨtiteni, mɨkɨ kwiepa memɨhɨritɨarie 'amekaniu'uwani. Mana yuxanetsika mekehe'atɨani.
ACT 19:39 Xɨkatsɨ matsi 'akuxi xetekuwauni, 'aixɨa pɨyɨni kepauka kiekatari memɨyuxeɨrie, 'inɨari niukiyari kemaine.
ACT 19:40 Hikɨmɨtsɨari tepɨkweriwa'aka kapa tahetsie rahɨiyanikɨ 'axatemɨtewakɨhɨawekɨ hikɨ, tsepa mɨkareuyewekai. Tame tepɨkayɨwawe yɨkɨ temaitɨkani tahetsiemieme 'ikɨ xamurikakɨ.
ACT 19:41 Mɨpaɨ 'utayɨka memayuxeɨrietsie kaniwaranuyenɨ'ani memɨyehukɨ.
ACT 20:1 Hikɨ xamurika kayuwatɨ 'utamareku, Papuru teyɨ'ɨkitɨwamete yu'aurie katiniwarutanɨ'airieni, waruparewieka memɨkatehayewanikɨ 'imatɨrieka warutateutɨaka Matseruniya paitɨ kaneyani.
ACT 20:2 Mana 'uyeikatɨ wahetsɨa, kaniwatuikakaitɨni waɨkawa niukikɨ. 'Ariketa Kɨretsiya kwieyaritsie kaneta'ani.
ACT 20:3 Haika metseri yuriekaku, huriyutsixi mekaniyu'enieni me'imienike kepauka Tsiriya paitɨ mɨyemiekai. 'Ayumieme mɨpaɨ katiniyumaikaitɨni Matseruniya pɨta muyeyunekɨ.
ACT 20:4 'Atsiyapaitɨ hamatɨana mekaniu'uwakaitɨni Tsupateri wereyatanaka, 'Aritsitariku meta Tsekunitu memɨtetsarunikataritɨkai, Kayu rerɨwetanaka, Timuteu, Tikiku meta Tɨrupimu memɨ'atsiyataritɨkai.
ACT 20:5 Mɨkɨ meripaitɨ mehekɨneka Tɨruhatsi paitɨ mekatanekwewiekaitɨni.
ACT 20:6 Tametsɨ Piriputsie kanuwa 'amɨpatsie tekaneyekɨne, paa mɨkakuxanariyarie 'ixɨarariyari 'anutiyaku. Wahetsɨa tekaneta'axɨani Tɨruhatsi paitɨ 'auxɨwime tukari 'anukayaku. Mana 'atahuta tukari tepuyuri.
ACT 20:7 Hikɨ mexɨakame tukari tsemanatsie tekanitakuxeɨrieni paa temɨtitarakɨ. Papuru katiniwakuxaxatɨwakaitɨni, 'uxa'arieka mɨyemiekaikɨ, 'ayumieme 'apɨreuterixɨ tikuxatatɨ tɨkari hixɨapake.
ACT 20:8 Waɨkawa kɨxemete pɨti'ukai kii taɨta haikakɨa heutitewakaku temɨwayuxeɨriekaitsie.
ACT 20:9 Xewitɨ temaikɨ 'Eutiku titewatɨ 'etsimayewa mɨranenieritɨretsie kanayekateitɨni. Mɨkɨ kanekakumɨkatɨyani. Papuru waɨkawa tikuxatakaku, kepauka yemekɨ waɨkawa meuku, haikatɨ kii yuheima 'a'ukametsie kaneukaweni, mɨkitɨ kaniutikweiyani.
ACT 20:10 Papuru 'anukayaka, temaikɨ hepa heyaka 'itapatɨ, mɨpaɨ kaniutayɨni: «Kayuwatɨ xepɨkayumuinani. 'Iyarieya 'upɨyeka».
ACT 20:11 Hikɨta Papuru kaneutiyani. Paa 'utitaraka, tiukwaka, mana katinikuxatakaitɨni waɨkawa. Tau 'anatinekuke kaneyani.
ACT 20:12 Temaikɨ 'ayeniereme mekanewitɨni kiena, waɨkawamekɨ yunaitɨ mekaniunɨtɨarieni.
ACT 20:13 Hikɨ tame kanuwatsie tepekɨ te'anuhaitɨtɨatɨ, 'Atsunitsie tekaniye'axɨani. Papuru hamatɨa mɨpaɨ temɨte'uxatakaikɨ. Mɨkɨ yu'ɨkama kaneta'anikekaitɨni.
ACT 20:14 Kepauka mɨtatsi'anukunakixɨ 'Atsunitsie, kanuwatsie tekaneitɨni, Mitirene paitɨ tekanekɨne.
ACT 20:15 Manata 'uxa'arieka tekanekɨne teheta'axɨanike Kiuxi hɨxie, 'uxa'ariekaketa Tsamutsie tepeta'axɨa, 'arike Turukiriyu teheta'axɨaka 'uxa'arieka Miretu paitɨ tekaneta'axɨani.
ACT 20:16 Papuru yapɨtiu'eriekairi, 'Epetsu 'aurie xekɨa temuyekɨnekekai, muixa tukari mɨkayurienikekaikɨ 'Atsiya kwieyaritsie. Kaniyumexɨitɨakaitɨni xɨka yɨwenike Kerutsareme meyeikanikɨ 'ixɨarari 'atahutarieka tsemanatsie mieme 'aye'ayu.
ACT 20:17 Hikɨ Papuru Miretutsie 'uyeikatɨ, 'ukirawetsixi 'Epetsutsie memuyutixexeɨriwa, katiniwarutanɨ'airieni.
ACT 20:18 Kepauka memu'axɨa mɨpaɨ katiniwarutahɨawe: «Xeme xepɨtemate kenemɨtiuyeikakai xehamatɨa ne'uyeikatɨ, matɨari paitɨ nenuaka 'Atsiya kwieyaritsie.
ACT 20:19 Ti'aitame hetsiemieme nekatini'uximayaka tixaɨtɨ nekarayuyeitɨatɨ, ne'utatsuatɨ, ne'inɨatsienetɨ, huriyutsixi kememɨteyu'eniekai nehepaɨtsita.
ACT 20:20 Nepɨkaneku'imawakai, nepɨnewaɨriyakai nemɨtixetahekɨatɨanikɨ tita mɨreuyewekai, teɨteri wahɨxie meta xekiiteta nekatinixe'ɨkitɨakaitɨni.
ACT 20:21 Huriyutsixi meta kɨriyekutsixi mɨpaɨ nepɨtixehekɨatɨakai xetehayewame kexemɨteyurie Kakaɨyaritsie xemɨtewiyanikɨ, yuri xemɨteta'erienikɨ Tati'aitɨwame Ketsutsi hetsie.
ACT 20:22 »Hikɨ ne Kerutsareme nepɨyemie 'Iyari waɨriyarika netsipitɨakaku. 'Atsinekatimaitɨ mana keneme'itɨarieni.
ACT 20:23 Mɨpaɨ xeikɨa nekatinimaika, 'Iyari Mɨtiyupata mɨpaɨ netihekɨatɨakaku naime kiekaritetsie, kename kaunarite meta 'uximatɨarika mana netsihetakwewie.
ACT 20:24 Matsi, netukari raye'akame nepɨka'erie nehetsiemieme. Nepinɨni xeikɨa nehɨritɨarika nenetemawietɨ, 'uximayatsikatsie yanepɨtiyurieni Ti'aitame Ketsutsi kemɨnetiuhɨritɨa, nemɨtihekɨatanikɨ niuki 'aixɨa manuyɨne hepaɨtsita Kakaɨyari 'aixɨa kemɨtiuka'iyari.
ACT 20:25 »Hikɨ ne nepɨtimate yunaitɨ xeme hatsuakuri nenierika xepɨkaxeiya, Kakaɨyari ti'aitametɨkaku nehekɨatatɨ kenemutiuyeikakai xetsata.
ACT 20:26 'Ayumieme 'ikɨ tukaritsie nekatinixe'utahekɨatɨani kename ne ne'itiya, nixeime xuriyayakɨ nehetsie karahɨiwa.
ACT 20:27 Hatsuaku nepɨkaneku'imawakai, nepɨnewaɨriyakai nemɨtixetaxatɨanikɨ naime Kakaɨyari mɨtiutsutɨa.
ACT 20:28 Xekeneyukweriwayurieka xeme, xekeniwakweriwayurieka mɨkɨta muxatsi wakɨmana 'Iyari Mɨtiyupata xehɨritɨariekame mɨxe'ayeitɨa, xemɨwa'ɨwiyanikɨ mɨkɨ yunaime Ti'aitame hetsɨa miemete memɨyutixexeɨriwa, mɨkɨ mɨwarunanai yuxuriyakɨ.
ACT 20:29 Netsɨ nekatinimaika neyemieyu 'arike 'ɨrawetsixi xetsata mekaneutahaxɨakuni teyu'uximatɨwamete. Muxatsi mekaniwatixɨtɨakuni.
ACT 20:30 Xetsatatɨtɨ mekananuku'uikuni hipatɨ tutunimekɨ me'utiniutɨ, yu'utɨma memɨwaranuhapanikɨ teyɨ'ɨkitɨwamete.
ACT 20:31 'Ayumieme xekenayeneniereni, xekena'eriwani haika wiyari tukarikɨ tɨkarikɨ kenemɨkatihayewakai nexeku'imaiyatɨ yuxexuime, ne'utatsuatɨ.
ACT 20:32 »Hikɨ xehepaɨtsita Kakaɨyari nekanihɨritɨaka, niukiyarita. Mɨkɨ niuki 'aixɨa mɨtiuka'iyari manuyɨne, mɨkɨ kaniyɨweni mɨxetseiriyani, mɨxepitɨani xehetsie mɨtinakenikɨ yunaime Kakaɨyari mɨwarupataxɨ yuhetsiemieme, mɨkɨ wahetsie kemɨtinakeni.
ACT 20:33 Ne xeime tuminieya pɨrataya, huruya meta 'ixurikieya nepɨka'ihiwe'eririekai.
ACT 20:34 Matsi xeme xekatenimaika 'ikɨ nemamakɨ nepɨtinepitɨakai tita ne nemɨreuyehɨakai, meta nehamatɨa memu'uwakai tita memɨteheuyehɨakai nepɨtiwapitɨakai.
ACT 20:35 Ne 'ɨkitsika ne'ayuyeitɨatɨ nekatinixehekɨatɨakaitɨni mɨpaɨ xete'uximayatɨ xemɨwaparewienikɨ mɨkɨ memɨkatɨrɨkawi, xeme xeme'eriwanikɨ Ti'aitame Ketsutsi niukieya kemutayɨ: “Kemɨ'ane ti'uximayatɨ mɨtiyetua kaniyutemawieka, kemɨ'ane mɨtimikie 'etsiwa xeikɨa kaniyutemawieka”».
ACT 20:36 Hikɨ mɨpaɨ 'utayɨka, Papuru 'utitunumakeka, yunaime wahamatɨa kaniyutanenewieni.
ACT 20:37 Yunaitɨ waɨkawa mekaniutitsuanakaitɨni me'ikutapatɨ meta me'iku'itsewetɨ
ACT 20:38 meyuhiwerietɨkaitɨ yemekɨ niukieya kemainekaikɨ, kename nierikaya mekaxeiyanikekai tawariri. Kanuwa 'amɨpatsie paitɨ mekaneikutuani.
ACT 21:1 Hikɨ tewarutateutɨaka tekanekɨne, heitserie te'erietɨ kanuwa 'amɨpatsie Kuhutsi paitɨ tekaneta'axɨani, 'uxa'arieka Ruraxitsie paitɨ, manaketa Pataratsie paitɨ tekaneta'axɨani.
ACT 21:2 Mana kanuwa 'amɨpa 'ayeyeiximekame tekaniuxeiya Penitsiyatsie heyaka. Te'akayaxeka tenekɨne.
ACT 21:3 Tsipɨre kwieyari haramara hixɨapa mɨyeka te'uxeiyaka ta'utata te'uku'eirieka, Tsiriyatsie tekaneta'axɨani. Mana Tirutsie tekaniuyekɨne kanuwa 'amɨpa mana mɨti'ikapiyanikekaikɨ.
ACT 21:4 Mana teyɨ'ɨkitɨwamete tekaniwaretaxeiya, 'atahuta tukari tekaniuyurieni mɨkɨ wahamatɨa. Mɨkɨ mɨpaɨ Papuru mekateneye'eritɨani 'Iyari mɨpaɨ tiwa'ɨkitɨakaku Kerutsareme paitɨ mɨkaye'axenikɨ.
ACT 21:5 Yapaɨmexɨa tukari te'uyurieka wahamatɨa, tekanekɨne ketemɨtehukai. Yunaitɨ teyu'ɨkitɨwamete, 'ukarawetsixi meta tɨɨri mepɨtatsi'uweiyakai kiekari manu'axe paitɨ, mana haramara tetsita te'utitunuma'uka, tekaniyutanenewieni,
ACT 21:6 hikɨta tetatateutɨaxɨaka, tame kanuwa 'amɨpatsie tekanatiyaxe, mɨkɨta yukie mekaneutayeixɨani.
ACT 21:7 Tirutsie teheyekɨneka mɨkɨ kanuwa 'amɨpatsie, tawarita tekanekɨne, Turemaira tekaneta'axɨani. Mana tewarutawaɨritɨaka 'iwamarixi, xeitukari tepuyuri wahamatɨa.
ACT 21:8 Tehayekɨneka Papuru hamatɨa, 'uxa'arieka Tsetsareya tekaneta'axɨani. Peripe niuki 'aixɨa manuyɨne mukuxata hetsɨa tekaniu'axɨani, mɨkɨ xewitɨ kanihɨkɨtɨkaitɨni 'atahuta meyupaɨmetɨ memɨte'uximayakai.
ACT 21:9 Mɨkɨ yunaukame yuniwema pɨwarexeiyakai 'ɨimarixi texaxatamete.
ACT 21:10 Hikɨ yapaɨmexɨa tukari teyuriekaku, xewitɨ Kureyatsie heyeyaka mana kaninuani, Kakaɨyari niukameya 'Akawu titewatɨ.
ACT 21:11 Tahetsɨa nuaka, Papuru hɨiyameya 'utihurieka, yɨ'ɨkate meta yumamate kaniuhɨaxɨani mɨpaɨ 'utaitɨ: —'Iyari Mɨtiyupata mɨpaɨ kanaineni: “'Ikɨ hɨiyame kutsiyarieya, huriyutsixi Kerutsaremetsie mɨpaɨ mekatenihɨakuni, mɨkɨ memɨkahuriyutsixi mekaniwayetuiriekuni”.
ACT 21:12 Mɨyatete'u'enanaka, tame meta mana kiekatari wahamatɨa Papuru tekaniwawiriekaitɨni Kerutsareme mɨka'uyeyeikanikɨ.
ACT 21:13 Papuru mɨpaɨ katatiniuta'eiya: —¿Titayari xe'utitsuatɨ ne'iyari xeteweranariya? Ne nepɨha'aritsie Kerutsaremetsie nemɨhɨiyanikɨ meta nemɨmɨnikɨ Ti'aitame Ketsutsi hetsiemieme.
ACT 21:14 Yamɨkatinaki'eriekaikɨ temikununuitɨwani, tekateniuhayewa mɨpaɨ tete'ikɨhɨawetɨ: —Kamɨtsɨ yaketiuyɨni Ti'aitame kemɨtinake.
ACT 21:15 Hikɨ yapaɨmexɨa tukari 'utixɨku tetakuha'aritɨaka Kerutsaremetsie tekaneutiyune.
ACT 21:16 Hipatɨ teyu'ɨkitɨwamete Tsetsareya kiekatari tahamatɨa mepekɨ, mɨkɨ mekatanewitɨni Mɨnatsuni kie mana temukuhenikɨ, tsipɨretanaka mɨkɨ tiyɨ'ɨkitɨwame kanihɨkɨtɨkaitɨni matɨari mieme.
ACT 21:17 Kepauka Kerutsaremetsie temu'axɨa, 'iwamarixi mekataniutanaki'erieni meyutemamawietɨ.
ACT 21:18 'Uxa'arieka Papuru tahamatɨa kaneyani Kakuwu metahɨawekɨ, meta yunaitɨ 'ukirawetsixi mana mekaniyuxeɨriekaitɨni.
ACT 21:19 Hikɨ warutawaɨritɨaka, katiniwahekɨatɨakaitɨni naime kemɨtihɨritɨariekai hepaɨtsita Kakaɨyari kemɨtiuyuri memɨkahuriyutsixi watsata.
ACT 21:20 Mɨkɨ me'u'enanaka 'aixɨa Kakaɨyari hepaɨtsita mekaniutiyuanekaitɨni. Papuru mɨpaɨ mekateniutahɨawe: «Neuxei ta'iwama, pekaniwaxeiyani keyupaɨmetɨ miriyari huriyutsixi yuri memɨte'erie, mɨkɨ yunaitɨ yemekɨ 'inɨari niukiyaritsie mepɨtewiya.
ACT 21:21 Hikɨtsɨari, mɨpaɨ mekateni'enanaka 'ahepaɨtsita, kename mɨpaɨ peti'ɨkita Muitsexi 'inɨarieya yunaitɨ huriyutsixi meke'iku'eirieni memɨkahuriyutsixi watsata memu'uwa. Yapetiwakɨhɨawetɨ memɨka'inɨaritɨarienikɨ tɨɨri xitekiyakɨ, yuyeiyaritsie yamemɨkatekahunikɨri.
ACT 21:22 ¿Keriteteyurieka? Yumɨiretɨ xɨari mepɨyukuxeɨrieni. Mepɨ'enanani pemunuakɨ.
ACT 21:23 'Ayumieme, mɨpaɨ ketineuyuri ketemɨmetetahɨawe. 'Uwa tatsata 'ukitsi yunaukatɨ mepɨye'uwa, paye'axime memeye'atɨanikɨ kememɨteyɨhɨritɨakai.
ACT 21:24 Keniwaranuwitɨki, keneu'a'itieka wahamatɨa, ketineuyutua wakɨpa mɨkaxirienikɨ 'inɨari mayanikɨ hɨritɨarika maye'akɨ. Mɨpaɨ petiyurieyu yunaitɨ mepɨtehetimani kename katiyuri kememɨtekɨhɨawarɨwa 'ahepaɨtsita, matsi 'inɨari niukiyaritsie yapetikamietɨ 'apemuyeika.
ACT 21:25 Mɨkɨtsɨ memɨkahuriyutsixi yuri memɨte'uta'eri, niuki tepɨwarenɨ'airi tewa'aitɨatɨ mɨpaɨ 'anenemetsie yamemɨkatekahunikɨ, matsi memɨka'ikwakakɨ tita tetexi memɨtexatɨarie, xuriya, tewá yukawieyu waiyarieya meta kemɨ'ane mɨkayɨ'ɨya mɨkayɨkɨna memɨkawakumaɨwanikɨ».
ACT 21:26 Hikɨ 'uxa'arieka Papuru mɨkɨ 'ukitsi kaniwarewitɨni, mɨkɨta wahamatɨa yu'itieka tukita kaneutahani, mɨpaɨ tihekɨatatɨ kename tukari 'aye'a memuyu'itienitsie, meta mɨkɨ yuxexuitɨ wamawari pɨyetuiyani.
ACT 21:27 Kepaukari 'atahuta tukari 'aye'aximekaku, huriyutsixi 'Atsiya kiekatari Papuru tukita mekaniuxeiya. Mekaniwaruxamurieni yunaime mana memu'uwakai meta mekaniwiya,
ACT 21:28 mɨpaɨ mete'uhiwatɨ: «'Ixaheritsixi xeketaneuparewi. 'Ikɨ tewi kanihɨkɨtɨni kemɨ'ane yunaime teɨteri naitsarie 'axamɨtiwa'ɨkitɨa, 'inɨari niukiyari hepaɨtsita meta 'ena takiekaritsie. Matsi 'akuxi kɨriyekutsixi 'uwa tukita kaniwaratahatɨwani, 'ikɨ 'ena ka'akupatsiekame kanayeitɨani».
ACT 21:29 Meripaitɨri Tɨrupimu Papuru hamatɨa 'uyeikame kiekaritsie mepuxeiyakai 'epetsutanaka, tukita Papuru hetawitɨme mepɨ'eriekai.
ACT 21:30 Yunaitɨ kiekatari mepuyuxamuri. Teɨteri me'unautsaxɨaximetɨ mekaniu'axɨani, Papuru mekaniuwiya, mekanenuyehana tuki takwa, yapauka 'itupari meuwɨtsie kaneunarixɨani.
ACT 21:31 Hikɨ 'ari me'imieximekaku, kepauka niuki munua xeimiriyari kuyaxi tiwa'aitɨwame hetsɨa kename yunaitɨ Kerutsareme kiekatari meyuxamuriekai.
ACT 21:32 Kwitɨwa kuyaxi xeitsienituyari tewa'aitɨwamete yukuyaxima mewaruwitɨkɨme pɨwarewitɨ, meta mɨkɨ mana kaniutanautsa wahetsɨa. Kuyaxi tiwa'aitɨwame me'uxeiyaka meta kuyaximama, Papuru metiwayatɨ mekateniuhayewa.
ACT 21:33 'Ahurawa 'ayaka kuyaxi tiwa'aitɨwame, kaniwiya meta katiniuta'aita memihɨanikɨ huta tepɨayarikɨ. Manata kaniwaruta'iwawiya kemɨ'ane mɨhɨkɨtɨkai meta kemɨtiuyuriekai.
ACT 21:34 Hipatɨ yɨkɨ mekateniuhiwakaitɨni, hipatɨta yɨkɨ me'utiyuatɨ. 'Atsimɨkaretimaiwekaikɨ meyuxamurietɨ kememutiyuanekai kemɨ'ane yuri mutainenikeyu, 'ayumieme katiniuta'aita kuyaxi wakie memenuhanakɨ.
ACT 21:35 Kepauka Papuru 'imumuitɨa mɨye'a, peuyewekai kuyaxi me'enuyewietɨ memenuhanakɨ waɨriyarika, teɨteri memɨtsaipɨnekaikɨ.
ACT 21:36 Yumɨiretɨ mekaniweiyakaitɨni mɨpaɨ mete'uhiwatɨ: «Ke'umierieni».
ACT 21:37 Hikɨ kepauka kuyaxi wakiita meheitahatɨaximekaku, Papuru kuyaxi tiwa'aitɨwame mɨpaɨ katiniuta'iwawiya: —Pekanetipitɨa nemɨmetitaxatɨanikɨ. Mɨkɨ mɨpaɨ katinita'eiya: —'Ekɨ kuta kɨriyekutsixi waniukikɨ petiniuwe.
ACT 21:38 ¿Mɨkɨ 'ekipitutanaka pekatihɨkɨ meripaitɨ kuya pematɨa, meta makumawetsie nauka miiriyari yukukuyamete pemɨwarewitɨ?
ACT 21:39 Papuru mɨpaɨ katinita'eiya: —Netsɨ nekanihuriyutɨni, Tarutsu nepɨnuiwakame Tsiritsiya kwieyaritsie nemiemetɨtɨ, kiekari 'amɨyewatsie nekanikiekametɨni. Hikɨ nepɨmatsiwawirie, keneneupitɨa teɨteri nemɨtiwataxatɨanikɨ.
ACT 21:40 Kuyaxi tiwa'aitɨwame 'ipitɨaku, Papuru 'imumuitsie 'utiwetɨ teɨteri yumamakɨ kaniwaru'inɨaritɨani. Kepauka yunaitɨ kayuwatɨ me'utamareku, 'arameu niukiyarikɨ kaniutaniuni, mɨpaɨ 'utaitɨ:
ACT 22:1 «Neuxei 'iwamarixi meta ta'ukiyarima. Xekeneneu'eni nehetsiemieme hikɨ xehɨxie kenemɨtitaniuni».
ACT 22:2 Hikɨ me'i'enieka 'arameu niukiyarikɨ tikuxatame, matsi waɨkawa kayuwatɨ mepumakai. Mɨpaɨ kaniutayɨni:
ACT 22:3 «Ne nekanihuriyutɨni, Tarutsutsie Tsiritsiya kwieyaritsie nekanetinuiwa. Matsi 'ikɨ kiekaritsie nekaniutawere, Kamarieri hetsɨa netinineta'ɨkitɨani heitseriemekɨ tatutsima wa'inɨari niukiyari hepaɨtsita, ne yemekɨ Kakaɨyari hepaɨtsita nepɨ'ɨtetsakai, hikɨ xeme hipatɨ xemutiyuane hepaɨ.
ACT 22:4 'Ikɨ huye memuweiyakai newaranukuweweiyatɨ nepɨwatakukuyakai, newatihɨayatɨ 'ukitsi meta 'ukari katsariyanata nepɨwaranutaxurɨwakai,
ACT 22:5 mawari wewiwamete tiwa'aitɨwame, meta naime 'ukirawetsixi kememɨtehekɨata. Mɨkɨ menetsi'uhuritɨaku xapa ta'iwama wahetsiemieme, Ramatsikutsie nekaneyani newarahapanike Kerutsaremetsie mehɨatɨkaime kemɨ'ane nemɨwaretaxeiya, memanutaxɨriyanikɨ.
ACT 22:6 »Hikɨ tuka mana ne'uyemiekaku, kepauka Ramatsiku ne'aye'aximekaku, taheima mieme hekɨariya ne'aurie waɨkawa kaniukuxawatɨre.
ACT 22:7 Kwiepa nekaniukaweni. Meta xeime nekaniu'enieni mɨpaɨ netikɨhɨaweme: “Tsauru, Tsauru titayari penetiuweiya”.
ACT 22:8 Netsɨ mɨpaɨ nekatinita'iwawiya: “¿Ti'aitame kemɨ'ane pepɨhɨkɨ?” Mɨkɨ mɨpaɨ kanetiniuta'eiya: “Netsɨ Ketsutsi natsaretitanaka nekanihɨkɨtɨni pemɨnetsi'uweiya”.
ACT 22:9 Nehamatɨa memu'uwakai hekɨariya me'uxeiyaka mekaniutimamani. Matsi mepɨka'i'eni kemɨ'ane mɨnetsikɨhɨawekai.
ACT 22:10 Ne mɨpaɨ nekatinita'iwawiya: “¿Ti'aitame kereuyewetse yanemɨtiyurienikɨ?” Ti'aitame mɨpaɨ kanetiniutahɨawe: “Kenanukukexi, Ramatsikutsie kenemie. Manari yapepɨtitahɨawarieni naime kemɨti'aitsie yapemɨtikayanikɨ”.
ACT 22:11 Nepɨtauruxiekai xawatɨriyakɨ. Mɨkɨ nehamatɨa memuhukai menetsi'ahanatɨ, Ramatsikutsie mekaneni'atɨani.
ACT 22:12 »Hikɨ xewitɨ 'Ananiyaxi mɨtitewa mana peyeikakai, tewi 'aixɨa mɨtikamie 'inɨari niukiyaritsie. Yunaitɨ huriyutsixi mana memɨtamakai 'aixɨa mepɨte'imaikai.
ACT 22:13 Hikɨ nehetsɨa nuaka, ne'aurie 'utikeka, mɨpaɨ kanetiniutahɨawe: “Ne'iwa Tsauru, kenanutanieri”. 'Anari kwitɨwa nekananutaniere meta nehaunieretɨ nepatɨa.
ACT 22:14 Mɨkɨ mɨpaɨta kaniutayɨni: “Tatutsima wakakaɨyari matɨari paitɨ kamenanayexeiya yapemɨretimanikɨ ketita mɨtinake, mɨkɨ Heitserie mexeiya pemɨxeiyakɨ meta niukieya pemɨ'enienikɨ 'utaniukame.
ACT 22:15 'Ekɨ kepemɨtiunierixɨ meta kepemɨtiu'enaxɨ yunaime teɨteri pekatiniwatahekɨatɨamɨkɨ.
ACT 22:16 Hikɨtsɨari, ¿tita 'akuxi petitakwewie? Kenanukukexi, keneuka'ɨwa, meta 'axapemɨtiuyurikɨ keneu'ahauxina pehehɨawetɨ kemɨ'ane mɨhɨkɨ”.
ACT 22:17 »Hikɨ Kerutsareme nenuaka, mexi'akuxi tuki kuraruyarita neyunenewiekai, heinɨtsi hepaɨ 'anekame nekaniuxeiya,
ACT 22:18 meta Ti'aitame nekaniuxeiya mɨpaɨ netikɨhɨaweme: “Kene'akumexɨitɨa, Kerutsareme kenayeye'a, 'aniuki mepɨkatanaki'erieni nehepaɨtsita kepemɨtihekɨata”.
ACT 22:19 Netsɨ mɨpaɨ nekatinita'eiya: “Ti'aitame, mɨkɨ mekatenimaika tukiteta ne kenemɨtitahakekai newaranutaxɨrɨwatɨ newatiwayatɨ mɨkɨ yuri memɨte'eriekai 'ahetsie,
ACT 22:20 meta kepauka 'Etsitewani xuriyaya mutaxɨri 'ahepaɨtsita mɨtihekɨatakai, ne mana nepuwekai ne'iyari ya'anekaku meta wa'ixurikite ne'ihɨtɨ mɨkɨ memimienikekai”.
ACT 22:21 Matsi Ti'aitame mɨpaɨ kanetiniutahɨawe: “Kenemie, ne 'ateewa paitɨ nekamenanunɨ'amɨkɨ memɨkahuriyutsixi wahetsɨa”».
ACT 22:22 Hikɨ teɨteri yumɨiretɨ Papuru mekani'eniekaitɨni kepaukari mɨkɨ niuki mutaxa, 'ana karima meputihiwaxɨ mɨpaɨ me'utiyuatɨ: «Kwiepa ke'umaweni. 'Aixɨa pɨka'ane mɨkɨ tewi 'ayenieretɨ muyeikani».
ACT 22:23 Me'utihiwatɨ yu'ixuriki teikɨ mehewiwiwatɨ meta tumuanari teikɨ mehewiwiwatɨ,
ACT 22:24 kuyaxi tiwa'aitɨwame katiniuta'aita Papuru kuyaxi wakiita manuhanienikɨ. —Tepita'inɨata 'ariwatsini 'ikuwaxɨayu, yanemɨretimanikɨ titayari mɨya memɨte'uhiwakai hepaɨtsitana.
ACT 22:25 Kepauka me'ikuhɨayakaku karena kaunariyarikɨ, Papuru xeitsienituyari kuyaxi tiwa'aitɨwame mɨpaɨ katiniutahɨawe mana 'utiwekaku: —¿Xeme 'aitsikatsie xetepitɨarie tewi Xumatsie kiekame xemukuwaxɨani 'itsɨkame ka'ita'iwawiyawekaku?
ACT 22:26 Kuyaxi xeitsienituyari tiwa'aitɨwame 'u'enaka kuyaxi tiwa'aitɨwame hetsɨa kaneyani, mɨpaɨ katinitahekɨatɨani: —¿'Ekɨ kepetiyurieni? 'Ikɨ tewi Xumatsie kanikiekametɨni.
ACT 22:27 Kuyaxi tiwa'aitɨwame Papuru hetsɨa kaniye'ani, mɨpaɨ katinitahɨawe: —Yakenetineutahɨawi, ¿'ekɨ Xumatsie petikiekame? Papuru mɨpaɨ kaniutayɨni: —Huu, mɨkɨ nepɨhɨkɨ.
ACT 22:28 Kuyaxi tiwa'aitɨwame mɨpaɨ katinita'eiya: —Karikɨ ne waɨkawa netininetuani kiekame nemayanikɨ. Papuru mɨpaɨ katinitahɨawe: —Ne, matsi mana nuiwakame nekanihɨkɨtɨni.
ACT 22:29 'Ayumieme hetsɨana memu'axɨakai me'ita'iwawiyake yapauka mekaneutayeixɨani. Kuyaxi tiwa'aitɨwame yaretimaika Papuru Xumatsie mɨkiekametɨkaikɨ, kanimakaitɨni mihɨakaikɨ.
ACT 22:30 Hikɨ 'uxa'arieka, kuyaxi tiwa'aitɨwame heitseriemekɨ katinimaimɨkɨkaitɨni ketitayari huriyutsixi memɨteniukixiekai Papuru hepaɨtsita. Kanixɨna meta katiniuta'aita memɨyukuxeɨrienikɨ mawari wewiwamete memɨtewa'aitɨa meta 'itsɨkate yunaitɨ. Hikɨ mana wahɨxie Papuru kani'atɨani.
ACT 23:1 Hikɨ Papuru 'itsɨkate waxeiyatɨ, mɨpaɨ kaniutayɨni: —Ne'iwamarixi, ne'iyari 'aixɨa 'anekaku kanetsi'utate'akaku Kakaɨyari hɨxie nekaniuyeikani meripaitɨ hikɨ 'akuxi.
ACT 23:2 Hikɨ 'Ananiyaxi mawari wewiwamete tiwa'aitɨwame mɨkɨ 'auriena 'ahurawa memɨti'ukai katiniwaruta'aitɨani teniena memitawanikɨ.
ACT 23:3 Hikɨ Papuru mɨpaɨ katinitahɨawe: —Kakaɨyari 'ekɨta pɨmatsiwani, yakɨ xeikɨa pepɨti'aitame. 'Ekɨ 'apekanakani 'aitsika kemɨkahaine peti'aitatɨ nemukuweiyaxɨanikɨ.
ACT 23:4 Papuru 'aurie memuti'ukai mɨpaɨ mekaniutiyuani: —Peti'awaɨri 'aku 'ekɨ Kakaɨyari mawari wewiwamete tiwa'aitɨwame pemɨtatienikɨ.
ACT 23:5 Papuru mɨpaɨ kaniutayɨni: —Ne'iwama, 'atsinepɨkatimaikai mawari wewiwamete tiwa'aitɨwame hɨkɨtɨme nepɨka'eriekai. 'Ayumieme mɨpaɨ pɨre'uxa: “'Axapepɨkarenutahɨaweni teɨteri wahetsiemieme manuyeka”.
ACT 23:6 Hikɨ Papuru timaitɨ hixɨata me'atɨ tsarutseutsixi memɨhɨkɨtɨkai meta hixɨata me'atɨ paritseutsixi memɨhɨkɨtɨkai, 'itsɨkate wahɨxie mɨpaɨ katiniuhiwa: —Ne'iwamarixi ne paritseu nekanihɨkɨtɨni. Xepɨnetsixaneta nemɨta'ikwewakɨ yuri nemɨti'eriekɨ mɨkite kememɨte'anuku'uitɨarieni hepaɨtsita.
ACT 23:7 Mexi 'akuxi 'utaniuka, paritseutsixi meta tsarutseutsixi mekaniyutiniukimatɨkɨne, mana memuyuxeɨriekai hixɨata mekaniyutsana.
ACT 23:8 (Tsarutseutsixi mɨpaɨ meputiyuane kename mɨkite meka'anuku'uni, niuki tuayamete meta 'iyarite tixaɨtɨ mekatehɨkɨ, matsi paritseutsixi mɨpaɨ mekatenimaika 'ikɨ naimekɨ).
ACT 23:9 Hikɨ waɨkawamekɨ mekaniuyuxamɨrieni, hikɨ hipatɨ 'inɨarikɨ memɨte'ɨkitametetɨkai paritseutsixi me'anuku'uka, mɨpaɨ mekaniutiyuani: «Tame tixaɨtɨ tepɨkate'ukaxei 'axati'anekame 'ikɨ tewi hepaɨtsita. Xɨaritsɨ 'iyari kanitahɨawe yanutsutɨni niuki tuayame».
ACT 23:10 Waɨkawari meha'akaku, kuyaxi tiwa'aitɨwame kanimakaitɨni kapa Papuru me'umienikɨ. Hikɨ kuyaxi katiniwaruta'aitɨani waɨriyarika me'ipitɨatɨ memenuhanakɨ, kuyaxi wakiita.
ACT 23:11 'Uxa'arieka yɨwikɨta Ti'aitame Papuru 'auriena kaniuyuhekɨata mɨpaɨ katinitahɨawe: «Pepɨkamaka. Kerutsaremetsie kepemɨnetihekɨatakai, kaneuyewekata Xumatsie mɨpaɨ pemɨnetihekɨatanikɨ».
ACT 23:12 Hikɨ tau 'anatineku, huriyutsixi hipatɨ mekaniyu'enieni. Mekaniyuhɨritɨani mɨpaɨ me'utiyuatɨ: «Tepɨkatekwani meta tepɨka'anuhareni kepaukake Papuru temɨmieni».
ACT 23:13 Huta tewiyari meyupaɨmetɨ mɨpaɨ mekateniyɨhɨritɨakaitɨni.
ACT 23:14 Mawari wewiwamete memɨhɨritɨariekai wahetsɨa meta 'ukirawetsixi wahetsɨa me'u'axɨaka mɨpaɨ mekateniwarutahɨawe: —Tame mɨpaɨ tepɨtetahɨritɨa, tixaɨtɨ tepɨkatekwaka Papuru temiemeke.
ACT 23:15 Hikɨ 'ayumieme xeme 'itsɨkate wahamatɨa yaxeketeneutahɨawi kuyaxi tiwa'aitɨwame xehetsɨa mewitɨnikɨ, 'aixɨa 'anemekɨ matsi xemɨtehetimanikɨ hepaɨtsitana. Tame kanuawekaku 'akuxi tekaniyuha'aritɨaka huyeta temeimienikɨ.
ACT 23:16 Hikɨ Papuru matsuya kaniu'ena kememɨte'imienikekai. Mana nuaka kuyaxi wakiita heutahaka, Papuru katiniutaxatɨani.
ACT 23:17 Papuru yu'aurie xeime 'utakwewieka xeitsienituyari kuyaxi tewa'aitɨwamete, mɨpaɨ katinitahɨawe: —'Ikɨ temaikɨ kuyaxi tiwa'aitɨwame hetsɨa kenanuwitɨki. Mɨkɨ pɨrayexeiya mɨreitaxatɨanikɨ.
ACT 23:18 Mɨkɨ kuyaxi tiwa'aitɨwame hetsɨa kaneiwitɨni. Mɨpaɨta katinitahɨawe: —Papuru manutahɨiya yu'aurie netsi'utahɨaweka pɨnetsi'utawawiri 'ahɨxie 'ikɨ temaikɨ nemɨ'atɨanikɨ. Pɨrayexeiya 'ahamatɨa.
ACT 23:19 Kuyaxi tiwa'aitɨwame temaikɨ mamayatsie tiwiereka, yɨhɨkɨate yateewa mehekɨneka mɨpaɨ katinita'iwawiya: —¿Ketita kuta perayexeiya?
ACT 23:20 Mɨkɨ mɨpaɨ kaniutayɨni: —Huriyutsixi mepɨtehekuxata, memetsitawawirienike 'uxa'a Papuru pemanuwitɨnikɨ 'itsɨkate wahetsɨa, yemekɨ memɨtemaikakɨ hepaɨtsitana.
ACT 23:21 'Ekɨ mɨkɨ pepɨkawa'enieka, huta tewiyari meyupaɨmetɨ teɨteri wahetsɨa miemete mepikwewie, mɨpaɨ meteyɨhɨritɨatɨ memɨkatekwakakɨ meta memɨkaharekakɨ me'imiemeke. Hikɨ mekaniyuha'aritɨaka mematsikwewietɨ pemɨ'awaɨriyakɨ.
ACT 23:22 Hikɨ kuyaxi tiwa'aitɨwame temaikɨ kanenɨ'ani mɨpaɨ re'imaiyatɨ: —Xeime tɨma pepɨkaraxaxatɨwani 'ikɨ hepaɨtsita kepemɨnetiutaxatɨa.
ACT 23:23 Hikɨ kuyaxi tiwa'aitɨawame xeitsienituyari kuyaxi tewa'aitɨwamete yuhutame yu'aurie warutahɨaweka, mɨpaɨ katiniwaruta'aitɨani: —Huta tsienituyari kuyaxi xekeniwarukuha'aritɨa, kawayutsixi wahetsie memautayaxiwawe haika tewiyari heimana tamamata, meta huta tsienituyari tepɨakɨ memɨteheutamɨiwawe Tsetsareyatsie memɨyehukɨ tɨkarikɨ 'atanauka hurayari 'aye'ayu.
ACT 23:24 Kawayutsixi xekeniwaranuhapani, Papuru manutiyerɨnikɨ 'aixɨa reu'erietɨ meta'anikɨ Perixi kuwexinaruri hetsɨa.
ACT 23:25 Meta xapatsie mɨpaɨ katineka'utɨirieni:
ACT 23:26 Ne Kɨrauriyu Ritsiyaxi, kuwexinaruri pemɨtɨrɨkaɨye Perixi: Nepɨmatsiwaɨritɨa.
ACT 23:27 'Ikɨ tewi huriyutsixi mekaniwiya, 'ari mekanimienikekaitɨni, ne nekuyaxima wahamatɨa hetsiena nekaniutanuani, mɨpaɨ nemɨretimaikaikɨ Xumatsie mɨkiekamekɨ.
ACT 23:28 Ne nepɨtimaimɨkɨkai titayari memɨteniukixiekai hepaɨtsitana, nekaneiwitɨni huriyutsixi wa'itsɨkate wahetsɨa.
ACT 23:29 Nepɨwaretaxei meniukixiekame kemaine wa'aitsika hepaɨtsita. Tixaɨtɨ 'atsipɨkati'anekai hetsiena mɨrahɨiwani mɨmierienikɨ meta manutahɨiyanikɨ.
ACT 23:30 Mɨpaɨ netiutahɨawarieka 'ikɨ tewi memimienikekaikɨ, kwitɨwa nekaneinɨ'ani 'ahetsɨa. Nepɨtiwaruta'aitɨa mɨkɨ hepaɨtsitana memɨniukixie 'ahɨxie memitahɨawekɨ. Mɨpaɨ xeikɨa.
ACT 23:31 Hikɨ kuyaxi kememɨte'uta'aitɨariekai, Papuru yɨwikɨta mekanewitɨni 'Anutipatɨritsie paitɨ.
ACT 23:32 'Uxa'arieka kawayutsixi wahetsie memutei mekaniwaruku'eirieni mɨkɨ hamatɨana memɨyehukɨ, kuyaxi yɨ'ɨkama memuhukai yukiita mekanakunuaxɨani.
ACT 23:33 Kepauka Tsetsareya paitɨ memuta'axɨa, kuwexinaruri xapa mekaniyetuirieni meta Papuru mekaniyetuani.
ACT 23:34 Perixi xapa 'akaterɨwaka, Papuru kaniuta'iwawiya kemɨ'ane kwieyaritsie mɨmiemetɨkai. Retimaika Tsiritsiyatsie mɨkiekametɨkaikɨ,
ACT 23:35 mɨpaɨ katinitahɨawe: «Kamɨtsɨ, nepɨmatsi'enieni me'axɨayu mɨkɨ 'ahepaɨtsita memɨniukixie». Katiniuta'aita Herurexi paratsiyuyata me'ɨwiyariekakɨ.
ACT 24:1 Hikɨ 'auxɨwi tukari 'anukamiekaku, mawari wewiwamete tiwa'aitɨwame 'Ananiyaxi mɨtitewa mana kaninuani, hipame 'ukirawetsixi wahamatɨa meta xewitɨ Terituru titewatɨ mɨniukametɨkai mekaniu'axɨani. Kuwexinaruri hetsɨa memɨtetaxatakɨ Papuru hepaɨtsita.
ACT 24:2 Kepauka mɨxanetsie wahetsɨa mɨ'atɨarie, Terituru kanitsutɨani 'ixanetatɨ Perixi hɨxie, mɨpaɨ 'utaitɨ: —'Ekɨ Pemɨmariwe pekatanipitɨaka, timaiweme pemɨhɨkɨkɨ waɨkawa pekataniheitseritɨaka tateɨterima tahetsiemieme.
ACT 24:3 Neuxei Perixi pemɨtɨrɨkaɨye, naitsarie kwiepa pekanimariwani naime 'aixɨa kepemɨtiyuriene.
ACT 24:4 Matsi pemɨkawaɨripiekakɨ waɨkawa niukikɨ, 'ayumieme nepɨmetsiwawirie pemɨtatsi'enienikɨ 'etsiwa tepɨmatetaxatɨani 'aixɨa kepemɨtiuka'iyarikɨ.
ACT 24:5 'Ikɨ tewi tekanetaxeiya yunaime huriyutsixi waxamurieneme naitsarie kwiepa. Natsaretitanaka hetsie memɨtewiya katiniwa'aitɨwametɨni.
ACT 24:6 Meta tukita kaneutahakekaitɨni ka'itiyakame 'ayeitɨatɨ, 'ayumieme tekaniwiya.
ACT 24:7 Matsi Ritsiyaxi nuaka kuyaxi tiwa'aitɨwame mɨhɨkɨ, waɨriyarika kataniunawairieni.
ACT 24:8 Katatineta'aitɨani tame hepaɨtsitana temɨniukixie 'ahetsɨa temahukɨ. 'Ekɨta pe'ita'iwawiyame pekaniyɨweni pemɨretimani naime ketemɨteniukixie hepaɨtsitana.
ACT 24:9 Meta huriyutsixi mekaniniukimakaitɨni, mɨpaɨ me'utiyuatɨ kename naitɨ tiyuritɨkai.
ACT 24:10 Kepauka kuwexinaruri yumu'ukɨ 'i'inɨaritɨaku mɨtaniunikɨ, Papuru mɨpaɨ kaniutayɨni: —Yanetimaitɨ 'ekɨ mɨixa wiyari kepemɨtiuyuri 'ena 'ikɨ teɨteri wakuwexinaruri pehɨkɨtɨtɨ, 'ayumieme 'aixɨa 'iyarikɨ nehetsiemieme nepɨtaniuni kemɨtikuxaxatsiwa nehepaɨtsita.
ACT 24:11 'Ekɨ pekaniyɨweni pemɨtimaikakɨ, tamamata heimana huta tukari pɨka'anukayeiwe 'akuxi kepauka Kerutsaremetsie nemeutiyunixɨ neyutanenewienike.
ACT 24:12 Netsixanetamete tukita mepɨkanetsi'utaxei 'axanetikuxatame, tukite 'etsimɨpepeta meta xaɨtsie kiekaritsie.
ACT 24:13 Mepɨkayɨwawe memitseiriyani yuniuki kememɨteniukixie nehepaɨtsita hikɨ.
ACT 24:14 Mɨpaɨ nepɨmatitahekɨatɨanikeyu: ne 'ikɨ huye ne'uweiyatɨ nepɨti'uximaya tatutsima wakakaɨyari hetsiemieme, tsepanetɨ netsixanetamete 'ikɨ huye xaɨtsie tiwiyakame memɨxata, yanepɨra'eriwa 'inɨari niukiyari kemɨti'ɨkita meta yuri nepɨti'erie naitɨ kemɨraka'utɨarie Kakaɨyari niukametemama waxapayaritsie.
ACT 24:15 Kakaɨyari hetsie nepɨta'ikwewa 'ikɨ teɨteri kememɨteta'ikwewa wahepaɨ, kename me'anuku'uitɨarieni yamemɨtekahu meta yamemɨkatekahu.
ACT 24:16 'Ikɨ naime hepaɨtsita yanekatiniyurieneni ne'iyari kanetsi'utate'akaku, Kakaɨyari hɨxie meta teɨteri wahepaɨtsita.
ACT 24:17 »Hikɨ ne tumini nekaniuxeɨrieni neteɨterima Kerutsareme kiekatari wahetsiemieme, yapaɨmexɨa wiyari mɨpaɨ nekatiniyurienekaitɨni. Manaketa 'imikieri ne'a'ɨtɨ nekaninuani.
ACT 24:18 'Itiya mawariyari newewiekaku hipatɨ huriyutsixi 'atsiyatari mekanenetaxeiya tukita. Yumɨiretɨ teɨteri 'amepɨka'u'uwakai ne'aurie, nepɨkawaxamuriekai.
ACT 24:19 Memɨnetsi'uxei hipatɨ huriyutsixi 'Atsiya kiekatari mepɨyɨakai, neuyeweka mɨkɨ memɨ'axɨani 'ahɨxie, meta peuyewetse yamemɨtiyuanikɨ kememɨnetexaneta, xɨkatsɨ nehetsiemieme mete'ayexeiyani.
ACT 24:20 Hikɨtsɨ, 'ena yameke'utiyuaneni tita memɨte'ukaxei nehetsie mɨkatiheitserie kepauka ne 'itsɨkate wahɨxie nemuwekai,
ACT 24:21 tita memɨte'ukaxei xeime neniukitsie karima ne'utaniuku mɨkɨ wahɨxie mɨpaɨ ne'utaitɨ: “Mɨkite memanuku'uni mɨpaɨ yuri nemɨti'eriekɨ, 'ayumieme mɨkɨkɨ hikɨ xehɨxie nekanixeɨriyaka”».
ACT 24:22 Hikɨ Perixi heitseriemekɨ katinimaikaitɨni mɨkɨ huye hepaɨtsita. 'Ayumieme mɨpaɨ katiniwaruta'eiya: —Ritsiyaxi kuyaxi tiwa'aitɨwame nuayuke, xeniuki hepaɨtsita yanepɨtixetahɨawe.
ACT 24:23 Xeitsienituyari kuyaxi tiwa'aitɨwame kaniuhɨritɨani mi'ɨwiyanikɨ, matsitsiere kanihɨritɨani mipitɨakakɨ yu'iwama wahamatɨa muyeikanikɨ meta mɨkɨ memiparewiekakɨ tita mɨreuyehɨwakɨ.
ACT 24:24 Hikɨ yapaɨmexɨa tukari 'anukayaku, Perixi yɨ'ɨya hamatɨa Rutsira huriyu tewiyari mɨhɨkɨtɨkai mana nuaka. Papuru yu'aurie kaniutakwewieni, meta kani'enieni tikuxatame yuri kemɨti'erie Kɨritsitu Ketsutsi hetsie.
ACT 24:25 Tikuxatakaku tita mɨtiheitserie hepaɨtsita, tewi kemɨtiyɨnɨ'a hepaɨtsita meta tewi kemɨtita'iwawiyarieni 'uxa'atɨniwarie, Perixi kaniutimani, mɨpaɨ katinitahɨawe: «Hikɨri mɨpaɨ xeikɨa kenemie. Kepaukaketa tukari nemɨhɨka nepɨmatitanɨ'airieni».
ACT 24:26 Perixi kanita'ikwewakaitɨni Papuru tumini 'i'ɨitɨanike 'erietɨ. 'Ayumieme mɨixa yu'aurie pitakwekwewiwakai, tikuxatatɨ hamatɨana.
ACT 24:27 Huta wiyari 'anuyeyaku Perixi kaniuyupata, Purutsiyu Petsitu kuwexinaruri kanayani. Perixi huriyutsixi wanaki'atsitɨamɨtɨ, 'ayumieme Papuru katsariyanata kananutahɨani.
ACT 25:1 Hikɨ Petsitu nuaka hakewa mehɨritɨariekai, hairieka tukari 'aye'aku, Tsetsareya heyeyaka Kerutsaremetsie kaninuani.
ACT 25:2 Mawari wewiwamete tewa'aitɨwamete meta huriyutsixi wa'ukiyarima hɨxiena mekaniu'axɨani metehekɨatatɨ Papuru hepaɨtsita.
ACT 25:3 Mekanitawawirieni mɨpaɨ me'utiyuatɨ: «'Aixɨa petiuka'iyaritɨ Kerutsaremetsie Papuru kenanunɨ'a». Mɨkɨri yamepɨte'uxatakai huyeta kememɨte'imienikekai.
ACT 25:4 Petsitu mɨpaɨ katiniuta'ani: «Papuru Tsetsareya paitɨ kananutahɨiyaka, ne yareutewitɨ mana nepɨyemie.
ACT 25:5 Xetsata miemete memanuyetei nehamatɨa mekehekɨne, mɨkɨ yamekehetiyuani hepaɨtsitana, xɨkatsɨ kwinimieme 'axatiuyurieni».
ACT 25:6 Mɨixa pɨka'uyuri huriyutsixi watsata 'uyeikatɨ, 'atahaika tukari yatɨni tamamata tukari xeikɨa puyuri. Manaketa Tsetsareyatsie kaneyani. 'Uxa'arieka mɨrewa'aitatsie, Papuru mɨ'atɨarienikɨ katiniuta'aita.
ACT 25:7 Mana mɨkɨ nuaku 'auriena mekaniyukuxeɨrieni huriyutsixi, Kerutsaremetsie memakanexɨa, waɨkawa tɨrɨkawimekɨ 'axamekaniutiyuanekaitɨni memɨniukixienikɨ hepaɨtsitana. Mepɨyutatexi tixaɨ mepɨkate'ukaxei yuniukikɨ.
ACT 25:8 Papuru yuhetsie nuatɨ mɨpaɨ kaniutayɨni: —'Atsinepɨkatiuyuri 'axati'anemekɨ huriyutsixi wa'inɨari niukiyari hepaɨtsita, watuki meta Tsetsaxi hepaɨtsita.
ACT 25:9 Petsitu wanaki'aritɨamɨtɨ huriyutsixi Papuru mɨpaɨ katiniuta'eiya: —¿Peti'awaɨriya Kerutsareme pemɨyemie mana pemɨta'iwawiyarienikɨ nehɨxie 'ikɨ xanetsika hepaɨtsita?
ACT 25:10 Papuru mɨpaɨ kaniutayɨni: —Ne Tsetsaxi 'uwenieya hɨxie nekaniuweni nemɨta'iwawiyarienikɨ. Mana xeikɨa temɨta'iwawiyarienikɨ xɨka 'axanetiuyurieni. 'Axanepɨkawaruyuri huriyutsixi, heitseriemekɨ 'ekɨ kepemɨtimate.
ACT 25:11 'Axa xɨka netiuyurienike, tixaɨ xɨka netiuyurienike kemɨreuyewetse nemɨmɨnikɨ, nepɨkaneku'imawa nemɨmɨnikɨ. Metsɨ xɨka katiyuritɨni 'ikɨ kememɨteniukixie nehepaɨtsita, xewitɨ pɨkayɨwe mɨkɨ wahetsɨa mɨnetsiyetuanikɨ wanaki'aritɨamɨtɨ. Tsetsaxi hɨxie nekanitaniumɨkɨ.
ACT 25:12 Hikɨ Petsitu 'imawamete wahamatɨa tiutaxataka meri mɨpaɨ katinita'eiya: —Tsetsaxi hetsɨa 'aku petimie. Hikɨ, Tsetsaxi hetsɨa pekaniyemieni.
ACT 25:13 Hikɨ mɨixa tukari 'anukayaku, kwiepa ti'aitame 'Akɨripa mɨtitewa meta Werenitse hamatɨa Petsitu Tsetsareya paitɨ mekaneiku'iwata.
ACT 25:14 Yapaɨmexɨa tukari mana mepuyuri. Petsitu ti'aitame katinikuxaxatɨwakaitɨni Papuru hepaɨtsita, mɨpaɨ 'utaitɨ: —Xewitɨ tewi 'uwa puku'eiriwaxɨ Perixi menutahɨa.
ACT 25:15 Kerutsaremetsie neheta'aku, hepaɨtsitana mekateniutahekɨata mawari wewiwamete memɨhɨritɨarie, huriyutsixi wa'ukiyarima, menetsiwawirietɨ manutahɨiyanikɨ.
ACT 25:16 Netsɨ mɨpaɨ nekatiniwaruta'eiya, xumatari tayeiyari mɨpaɨ pɨka'ane, tewi tepɨka'iyetuani, hɨxiena meka'axɨawawekaku 'akuxi mɨkɨ hepaɨtsitana memɨniukixie, kayɨwekaku 'akuxi yuhetsiemieme mɨtaniuni waniukixiya hepaɨtsita.
ACT 25:17 'Uwa me'u'axɨaku, 'ayumieme 'anepɨkareuterixɨ. 'Uxa'arieka 'itsɨkame 'uwenieyatsie nemɨra'aitatsie ne'ayerɨka, nekatiniuta'aita mɨkɨ tewi mɨ'atɨarienikɨ.
ACT 25:18 Me'anuku'uka memɨtiniunikɨ, 'ixanetamete tixaɨtɨ 'axati'anekame mepɨkate'ukaxei hetsiena, ne kenemɨtita'ikwewakai.
ACT 25:19 Matsi xeikɨa niuki mekanixɨatɨakaitɨni tita memɨte'ayexeiya hepaɨtsita xeime Ketsutsi mɨmɨkikai hepaɨtsita, Papuru 'ayeniereme mɨxatakai, mɨkɨkɨ pɨta mekaniniukixiekaitɨni hepaɨtsitana.
ACT 25:20 Netsɨ 'atsinepɨkatimaikai 'ikɨ niuki hepaɨtsita. 'Ayumieme mɨpaɨ nekatinitahɨawe, ¿peti'awaɨriya Kerutsaremetsie pemɨyemie mana pemeta'iwawiyarienikɨ 'ikɨ hepaɨtsita?
ACT 25:21 Papuru kaneniutawawirieni nemi'ɨwiyanikɨ, ti'aitame 'Aukutsitu mi'enienike. 'Ayumieme nekatiniwaruta'aitɨani memi'ɨwiyanikɨ Tsetsaxi hetsɨa Xumatsie ne'enunɨ'ayuke.
ACT 25:22 'Akɨripa Petsitu mɨpaɨ katiniutahɨawe: —Netatsiere mɨkɨ tewi nekani'eniemɨkɨ. Petsitu mɨpaɨ kaniutayɨni: —Karikɨ 'ekɨ 'uxa'a pekani'eniemɨkɨ.
ACT 25:23 'Uxa'arieka 'Akɨripa Werenitse hamatɨa mekaniu'axɨani 'aixɨa mete'uyukemaritɨaka mariwemekɨ. Mana mɨrayutixexeɨritɨre mekaneutahaxɨani xeimiriyari kuyaxi tewa'aitɨwamete wahamatɨa, meta kiekatari memɨmatiwa wahamatɨa. Petsitu katiniuta'aita Papuru mawitɨkienikɨ.
ACT 25:24 Hikɨ Petsitu mɨpaɨ kaniutayɨni: —Ti'aitame 'Akɨripa, meta xeme yunaitɨ tahamatɨa xemuyuxeɨrie, manari 'ikɨ tewi xekanixeiyani kemɨ'ane hepaɨtsita waɨriyarika xemɨnetsi'upitɨa yunaitɨ teɨteri huriyutsixi Kerutsaremetsie, mɨpaɨ mete'uhiwatɨ kename 'aixɨa ka'ane mayeniereni.
ACT 25:25 Ne tixaɨtɨ nepɨkatiukaxei kemɨtiuyuri kemɨreuyewetse mɨmierienikɨ. Mɨkɨtsɨ 'Aukutsitu yamɨtiutahɨawixɨkɨ, ne yanepɨtimaikai Xuma nemenunɨ'anikɨ.
ACT 25:26 Niuki mɨheitserie nepɨkahexeiya ti'aitame nemititi'utɨirienikɨ. 'Ayumieme nekani'atɨani xehetsɨa, meta 'ahetsɨa ti'aitame 'Akɨripa, pe'ita'iwawiyame tixaɨtɨ nemɨrexeiyanikɨ nemɨtiti'utɨanikɨ.
ACT 25:27 Timaiweme hepaɨ nepɨkayɨnikeyu xɨka xeime nehenɨ'anike hɨakame, nekatihekɨatatɨ ketitakɨ mɨtiniukimarie.
ACT 26:1 Hikɨ 'Akɨripa Papuru mɨpaɨ katiniutahɨawe: —Pekanipitɨarieka 'ahetsiemieme pemɨtaniunikɨ. Papuru yumamakɨ waru'inɨaritɨaka mɨpaɨ kaniutayɨni:
ACT 26:2 —Neuxei ti'aitame 'Akɨripa, nepɨnetemawie 'ahɨxie nemɨtaniunikɨ hikɨ naime huriyutsixi kememɨneteniukima hepaɨtsita.
ACT 26:3 Huriyutsixi naime wayeiyari meta mɨkɨ niuki kememɨtexɨatɨa pekatinimaika. 'Ayumieme nepɨmatsiwawirie pemɨnetsi'enienikɨ petinewietɨ.
ACT 26:4 »Yunaitɨ huriyutsixi mekatenimaika kenemɨtiuyeikakai nunutsiyari, neteɨterima watsata temaikɨyari paitɨ meta Kerutsaremetsie.
ACT 26:5 Mɨkɨ matɨari paitɨ memɨnetsimaikai xɨka metehekɨatanike, mɨkɨ mɨpaɨ mekaniutiyuanenikeyu ne kenemɨtikuyeikakai paritseutsixi wahetsie netiwiyatɨ. Paritseutsixi tita temɨtehayexeiyatsie yemekɨ yamepɨtekahu.
ACT 26:6 Hikɨ nepɨxanetsie yuri neti'erietɨ kenemɨtita'ikwewa meta Kakaɨyari tatutsima kemɨtiwarutahɨawekai meye'atɨanikɨ.
ACT 26:7 Yunaitɨ tateɨterima tamamata heimana huta nuiwarite temɨhɨkɨ tukarikɨ meta tɨkarikɨ 'uximayatsikaya te'eyexeiyatɨ kwini mieme tenitakwewieka Kakaɨyari. Neuxei ti'aitame, ne yuri kenemɨti'erie mɨpaɨ netita'ikwewatɨ, 'ayumieme huriyutsixi nehepaɨtsita mepɨniukixie.
ACT 26:8 ¿Ketitayari xeme xekateyɨwawe yuri xemɨte'erieka kename Kakaɨyari mɨkite waranuku'uitɨani?
ACT 26:9 »Neri heuyewekame nepɨ'eriekai waɨkawa 'axanemiyurienikɨ kemɨ'ane Ketsutsi natsaretitanaka mɨhɨkɨ.
ACT 26:10 Mɨpaɨ yaxeikɨa nekatiniyurienekaitɨni Kerutsaremetsie. Yumɨireme Kakaɨyari teɨterimama katsariyanata nepɨwaranutaxɨrɨwakai, mawari wewiwamete memɨhɨritɨarie heitserie menetsi'upitɨaku. Ne yanera'eriwakaku mepɨtakwikwiwakai.
ACT 26:11 Naime tukiteta mɨixa nepɨwaranutaxɨrɨwakai, waɨriyarika nepɨwapitɨakai 'axamemɨtiyuanikɨ Ketsutsi hepaɨtsita. Waɨkawa newahekatɨ nekaniwataweweiyakaitɨni hipame kiekaritetsie.
ACT 26:12 »Hikɨ mawari wewiwamete tewa'aitɨwamete heitserie menetsi'upitɨaku kememɨtehɨritɨariekai Ramatsikutsie nekaneyani.
ACT 26:13 Hikɨ tuka mana ne'uyemiekaku, neuxei ti'aitame, mexi'akuxi huyeta ne'uyemietɨ nekanixeiya hekɨariya taheima mieme, tau reuyeta tixawatɨme ne'aurie kaniukuhekɨare meta nehamatɨa memuhukai.
ACT 26:14 Tanaitɨ kwiepa tepatixɨri, meta ne xeime nepɨ'eni mɨpaɨ netikɨhɨaweme 'arameutsixi waniukikɨ: “Tsauru, Tsauru, ¿ketitayari penetiuweiya?” Pepɨtiuka'eniwa pemɨka'awaɨriyakɨ, pemɨti'amemiwakɨ pe'anatseiwatɨ titsewemekɨ.
ACT 26:15 Netsɨ mɨpaɨ nekatinita'iwawiya: “¿Ti'aitame kepepɨpaikɨ?” Ti'aitame mɨpaɨ katinita'eiya: “Netsɨ Ketsutsi nekanihɨkɨtɨni pemɨnetsi'uweiya.
ACT 26:16 Hikɨri kenanukukexi, meta keneneu'eni. 'Ayumieme hikɨ nepɨnehekɨataxɨ 'ahɨxie, pemanayexeiyariekɨ ti'uximayatame pemayanikɨ, meta pemɨtihekɨatanikɨ nehetsiemieme kepemɨnetiuxei meta kenemɨmatitahekɨatɨani 'akuxi.
ACT 26:17 'Ateɨterima watsata nepɨmatsixɨna meta memɨkahuriyutsixi watsata, nekamenanunɨ'amɨkɨ
ACT 26:18 meheunenieretɨ memakɨnekɨ, yɨriya meku'eirieme hekɨariyatsie memɨtewiyanikɨ, kauyumarie tɨrɨkariyaya meku'eirieme Kakaɨyari hetsie memɨtewiyanikɨ, tita 'axamemɨteyurie memɨteheuyehɨwiyarienikɨ nehetsie yuri mete'erietɨ, wahetsie mɨtinakenikɨ tita memɨtetanaki'erieni mɨkɨ nemɨwarupataxɨ nehetsiemieme”.
ACT 26:19 »Neuxeitsɨ ti'aitame 'Akɨripa, yanetikamietɨ nepatɨa kenemɨtixei taheima mieme.
ACT 26:20 Nekanitsutɨani Ramatsiku kiekatari wahetsɨa meri, kwitɨwa Kerutsareme meta naitsarie Kureya kwieyaritsie, yaxeikɨata memɨkahuriyutsi watsata nekatiniwahekɨatɨakaitɨni memɨtehayewanikɨ 'axakememɨteyurie Kakaɨyari hetsie memɨtewiyanikɨ, yameteyurietɨ kememɨte'uhayewaxɨ wahetsie mɨmatsiɨkɨnikɨ.
ACT 26:21 'Ayumieme mɨkɨkɨ huriyutsixi tukita menetsi'uwiyaka meta mekanenimiekukaitɨni.
ACT 26:22 Matsi Kakaɨyari kaneniparewieka hikɨ 'akuxi, mɨpaɨ nekatiniyuwaɨriyani netiwahekɨatɨatɨ teɨteri 'ukirawetsixi meta tɨɨri yunaime. Kakaɨyari niukametemama meta Muitsexi kememutiyua yamɨtiyɨnikekaikɨ:
ACT 26:23 Kɨritsitu mɨtikwinekɨ heuyewekai, kename mɨkɨ meri 'anukukeka mɨkite watsata, watahekɨatɨanikekai yuteɨterima meta memɨkahuriyutsixi hekɨariya hepaɨtsita».
ACT 26:24 Merikɨtsɨ Papuru mɨpaɨ 'utayɨku yuhetsie nuatɨ, Petsitu karima mɨpaɨ katinitahɨawe: —Papuru pepɨka'uka'iyariri. Waɨkawa 'ɨkitɨarikakɨ pɨmatsiheuyehɨa.
ACT 26:25 Papuru mɨpaɨ katinita'eiya: —Matsi ne 'aixɨa nepɨtinekɨhɨawe Petsitu pemɨmariwe. Kenemɨtikuxata kaniyuritɨni meta timaiweme niukieya pɨhɨkɨ.
ACT 26:26 Ti'aitame 'ikɨ naime pɨtimate, 'ayumieme nekamatɨ yanekatinikuxatani. 'Ikɨ kenemɨtikuxata hikɨke pɨkamieme, 'awie pɨkatiuxatsie.
ACT 26:27 Neuxei ti'aitame 'Akɨripa, ¿'ekɨ yuri peti'erie Kakaɨyari niukametemama waniukitsie? Ne nekatinimaika yuri pekatini'erieka.
ACT 26:28 'Akɨripa Papuru mɨpaɨ katiniutahɨawe: —'Ariri Kɨritsitiyanu penerayeitɨanikeyu.
ACT 26:29 Papuru mɨpaɨ katinitahɨawe: —Kakaɨyari nenewieri nepupitɨa, tsepa 'etsimɨtipaɨme yatɨni mɨtiwaɨkawa, 'ekɨri meta yunaitɨ xemɨnetsi'enie hikɨ, xɨkatɨma nehepaɨ xe'anenetɨ xehakɨneke, 'ikɨ tepɨa xeikɨa xekahexeiyatɨ kɨmana nemɨhɨa.
ACT 26:30 Hikɨ mɨpaɨ 'utayɨku, ti'aitame kananukekeni meta kuwexinaruri, Werenitse meta wahamatɨa mematekai mekananuku'uni.
ACT 26:31 Me'anuyekɨneka yunaitɨ yamekateniyɨkɨhɨawekaitɨni mɨpaɨ me'utiyuatɨ: —'Ikɨ tewi 'atsipɨkatiuyuri pɨkaheuyewetse mɨmɨerinikɨ meta manutahɨiyanikɨ.
ACT 26:32 'Akɨripa Petsitu mɨpaɨ katiniutahɨawe: —'Ikɨ tewi pɨyɨwenikeyu mɨxɨnarieni, xɨka Tsetsaxi ka'utahɨaweke xeikɨa.
ACT 27:1 Merikɨtsɨ kepauka Petsitu yamɨtiuyuma temɨyehukɨ kanuwa 'amɨpa 'Itariya paitɨ, Papuru meta hipatɨ pɨretsutsixi wahamatɨa mekaniyetuiyani. Xeitsienituyari kuyaxi tiwa'aitɨwame Kuriyu mɨtitewakai hetsɨa, 'Aukutsitu kuyaximama mɨwara'iniekai.
ACT 27:2 Kanuwa 'amɨpa 'Aruramitiyu pɨmiemetɨkai. 'Atsiya kwieyaritsie tetsita kaniuyeyeikakaitɨni. Mana te'akayaxeka tekanekɨne. Tahamatɨata kaneyani 'Aritsitariku tetsarunika kiekame Matseruniya kwieyaritsie mɨmiemetɨkai.
ACT 27:3 'Uxa'arieka Tsiruni tekaneta'axɨani. Kuriyu Papuru waɨkawa naki'erietɨ. Kanipitɨani yuhamikuma wahetsɨa meta'anikɨ mɨkɨ memiparewiekakɨ.
ACT 27:4 Tsiruni temɨyekɨ, Tsipɨre warita tekaniuyekɨne tahepa meuye'ekakaikɨ.
ACT 27:5 Haramara 'utɨa tekaniuyekɨne Tsiritsiya meta Pamɨpiriya. Mana tekaneta'axɨani Mira Ritsiya kwieyaritsie.
ACT 27:6 Xeitsienituyari kuyaxi tiwa'aitɨwame kanuwa 'amɨpa mana kaniuxeiya 'Arekanitɨriya mieme 'Itariyatsie mɨyemiekai, mɨkɨtsie tekaneutiyaxe.
ACT 27:7 Mɨixa tukari mana tepuhukai tepɨka'ayekɨniwawekai. Haweri mieme tekaneta'axɨani Kɨniru hɨxie. 'Eka mɨkatatsipitɨakaikɨ, mana teyekɨneka. Kɨreta hetɨa tekaniuyehukaitɨni, hɨri manukaniere Tsarimuna mɨrakutewa 'aurie tekaniuyekɨne.
ACT 27:8 Mana haweri mieme xeikɨa tekananuyenexɨani, 'ariketa hatetsita 'Aixɨa Mɨtiuku'ane mɨrakutewatsie tekaneta'axɨani. Mana Ratseya kiekariyari kanehurakaitɨni.
ACT 27:9 Hikɨ mɨixa tukari tekaneuyehɨani, kanuwa 'amɨpa kanikweriwa'anekaitɨni, manutiyakaikɨ huriyutsixi wahakiya. Papuru mɨpaɨ katiwaraye'eritɨani, mɨpaɨ tiwakɨhɨawetɨ:
ACT 27:10 «Neuxei, mɨpaɨ nepɨtimate, xɨka te'uhuni kanuwa 'amɨpatsie meta xe'ikate pɨreuyeweni, meta tame tepɨtatɨmaiyarieni».
ACT 27:11 Xeitsienituyari tiwa'aitɨwame Papuru kemainekai pɨka'u'eni, matsi pɨta kanuwa 'amɨpa mɨkuyuitɨwa meta kanuwa kutsiyarieya kaniwaru'enieni.
ACT 27:12 Mɨrati'ikapiwa pɨkuhahautɨrekai. 'Ayumieme yumɨiretɨ mepuyu'eni memɨyehukɨ, Penitse paitɨ memɨye'axɨanikɨ, mana memɨtitenikɨ muhaɨtɨtsie. Penitsi katinakutewaka hake mɨrati'ikapiwa Kɨretatsie, tatsutɨa meta ta'utata paye'eka tahepa.
ACT 27:13 Hikɨ tatsutɨa hepatsie 'eka kanatineni ketemɨtehu, kememɨteku'eriwakai tiu'ekame mepɨ'eriekai. Kanuwa mukuhana me'anatihanaka mekanekɨne, Kɨreta 'aurie mekaniuyekɨne.
ACT 27:14 Yareutewikaku karima 'eka pitsutɨa tɨrɨkaɨyetɨ, Tayeta Mieme titewatɨ, kwie 'esimɨyewatsie paitɨ mayene.
ACT 27:15 Hikɨ kanuwa 'amɨpa pɨkayɨwekai 'ekakɨ, tepɨkayɨwawekai temuhunikɨ tahepa maye'ekakaikɨ, te'ihayewaku 'eka mɨtɨrɨkaɨye katane'enitsitɨani.
ACT 27:16 Kwie hapa mɨyema hetɨa Kɨraura mɨrakutewa tekanakunexɨani, haweri mieme xeikɨa kanuwa 'etsimɨpe temɨwiyakɨ tepɨyɨwawekai.
ACT 27:17 Me'enatihanaka mekanenakahɨaxɨani kaunarikɨ mɨtatseirekɨ. Mekanimamakaitɨni Tsirite xiekariyaritsie mete'utawaxɨanikɨ, mɨtikuhapatɨka mekaxɨrieka, mɨpaɨ me'anetɨ kanuwa 'amɨpatsie mekaniu'enixɨaximekaitɨni.
ACT 27:18 Witari yemekɨ pɨtatsi'utayuitɨwakai. 'Uxa'arieka yu'ika kanuwatsie mekananatixɨrieni.
ACT 27:19 Hairieka tukaritsie tamamakɨ kanuwa 'amɨpa piiniteya tekatenanatixɨrieni.
ACT 27:20 Mɨixa tukari tau meta xurawetsixi tepɨkawaruxei, witari tɨrɨkaɨyetɨ pɨkatihayewakai, kataneuyexɨrieni ketemɨteta'ikwewakai temɨtawikwenikɨ.
ACT 27:21 Hikɨ mɨixa tukariri tekatekwakaku, 'ana Papuru wahixɨapa 'utakeka mɨpaɨ kaniutayɨni: «Neuxei, xɨka xenetsi'u'enienike yanemainekaitsie Kɨretatsie temɨkaheyekɨnekɨ, mɨpaɨ hikɨ tepɨkateheuyehɨanikekai meta tepɨkate'uka'eniwanikekai.
ACT 27:22 Hikɨtsɨari nekaxenaye'eritɨwani xemuyuwaɨriyanikɨ, xewitɨ xeme yutukari pɨkatatɨmaiya, kanuwa 'amɨpa xeikɨa tepɨtatɨmaiya.
ACT 27:23 Tɨkarikɨ Kakaɨyari niukieya tuayame kaneyuhekɨata nehɨxie kemɨ'ane hetsie nemɨtiwiya meta nemɨti'uximayatsirie,
ACT 27:24 mɨpaɨ kanetiniutahɨawe: “Papuru, pepɨkamaka. Kaneuyeweka Tsetsaxi hɨxie pemɨtakenikɨ, meta Kakaɨyari pɨmatsi'upitɨa watukari yunaime 'ahamatɨa memuhu kanuwa 'amɨpatsie”.
ACT 27:25 'Ayumieme nepaine, xekeneyuwaɨriyani. Kakaɨyari hetsie ne yuri nepɨti'erie mɨpaɨ mɨtiyɨnikɨ kenemɨtiutahɨawarie.
ACT 27:26 Matsi xeikɨa tame kwie hapa mɨyematsie tepɨtixɨriyani».
ACT 27:27 Hikɨ tamamata heimana nauka tɨkariyari 'anukamiekaku 'eka mɨtɨrɨkaɨye, haramara 'Aruriyatiku mɨrakutewa hepa katane'enitsitɨani, tɨkari hixɨapa kanuwa nɨ'awamete kwiepa heukahurame mepɨ'eriekai.
ACT 27:28 Kaunari hapa mekaneukawiwieni, mekaniti'inɨata xeitewiyari heimana tamamata heimana 'atahuta meturuyari kaneukatewakaitɨni. Yame'ahutɨ hutariekata mekaneikawiwieni, xeitewiyari heimana 'atahuta meturuyari kaneukatewakaitɨni.
ACT 27:29 Mekanimamakaitɨni tetetsie me'anutatenike me'erietɨ. Naukame mekaneukaxɨrieni tiyuhapaname kɨtsapana mehewɨtɨaka, meta mekaniyutanenewieni mɨkahekɨarekɨ.
ACT 27:30 Kanuwa 'amɨpa nɨ'awamete mekatenikuwautɨwekaitɨni kememɨteyuta'unakɨ kanuwatsie, tenɨ'awamete kanuwa 'etsimɨpepe mekaneukatuani haramaratsie mɨwatawikweitsitɨanikɨ, mɨtikuhapatɨka kanuwa hɨxie memeukaxɨrɨwani hepaɨ mekateniyuriekaitɨni.
ACT 27:31 Papuru mɨpaɨ katiniwaraye'eritɨani xeitsienituyari kuyaxi tiwa'aitɨwame meta kuyaxi: «'Ikɨ xɨka kanuwatsie mekayuhayewa, xeme xepɨkatawikweni».
ACT 27:32 'Ayumieme kuyaxi kanuwa 'etsimɨpepe kaunariyari mekanaxitexɨani, hapa paitɨ kaneukaxɨrieni.
ACT 27:33 Kahekɨarirɨmekakuri, kepauka Papuru yunaime kaniwatuikakaitɨni memɨtekwanikɨ: «Hikɨri tamamata heimana nauka tukari xepuyurie xekatekwatɨ.
ACT 27:34 'Ayumieme nepɨxewawirie, xemɨtekwanikɨ, kaneuyeweka xemayenenierenikɨ, nixewitɨ xeme xeikɨpayari yumu'utsie pɨkatatɨmaiya».
ACT 27:35 Mɨpaɨ 'utayɨka paa 'uti'ɨka Kakaɨyari pamɨpariyutsi kaniupitɨani yunaime wahɨxie. Kanititara, kanitsutɨani 'ikwatɨ.
ACT 27:36 Yunaitɨ mɨkɨta mekaniuyuwaɨriya, memitikwanikɨ.
ACT 27:37 Kanuwa 'amɨpatsie temɨyetekai huta tsienituyari heimana haika tewiyari heimana tamamata heimana 'ataxewi teɨteri tekanitapaɨmekaitɨni.
ACT 27:38 Te'utihuxakari 'ikwaikɨ, kanuwa tekana'exanariya tɨriku haramaratsie teheukaxɨrieka.
ACT 27:39 Hikɨ kepauka mukuhekɨarixɨ, kwie mepɨkamaiwawekai, matsi kwie mekaniuxeiya 'ahakuyeukame, hakewa kanuwa memeye'atɨanikekai xɨka meyɨwawenike.
ACT 27:40 Mɨtikuhapatɨka mekanaxitexɨani, haramaratsie mekaneikaxɨrieni, 'inɨ'awame kaunariyari mekaniuxɨna. Karɨpa 'etsimɨyewa metixɨraka, kwiepa mekaniuyenexɨaximekaitɨni.
ACT 27:41 Matsi kanuwa xiekaripa kananutateni. Muwa kwiepa mekanatinexɨani. Tsurieya kwiepa kaneuhani, mana kaniyuhayewa kaniutseni, kɨtsapana kanita'unikekaitɨni tɨrɨkariyakɨ.
ACT 27:42 Hikɨ kuyaxi mekaniwakwikukaitɨni hipame pɨretsutsixi, xewitɨ 'uhauximetɨ mɨkatawikwenikɨ.
ACT 27:43 Matsi xeitsienituyari kuyaxi tiwa'aitɨwame Papuru pɨwikweitsitɨamɨkɨkai, 'ayumieme kaniwaruta'imaiya mɨpaɨ memɨkateyuriekakɨ. Katiniwaruta'aitɨani mana memeukatsunaxɨanikɨ meri memahauwawekai, kwiepa memɨtinexɨanikɨ,
ACT 27:44 hipatɨta kɨyexitetsie hipatɨta kanuwa tarimeyaritsie mehawɨtɨ mekaneutanexɨani. Mɨpaɨ tete'uhauxɨaka teyunaitɨ 'aixɨa teteheu'erietɨ teputawikwei kwiepa paitɨ.
ACT 28:1 Merikɨtsɨ te'utawikweka, 'anake tekatenetimani kwie hapa mɨyemakai Marita katinitewakaitɨni.
ACT 28:2 Teɨteri mana kiekatari yemekɨ 'aixɨa mekateniu'iyarikaitɨni tahepaɨtsita. Me'atinaika, mekatani'iniekaitɨni 'ahurawa temukɨnekɨ, mɨwiyekaikɨ meta muhaɨtɨkaikɨ.
ACT 28:3 Hikɨ Papuru nekukɨ'eni, taipa menutixɨrienikɨ. Kuu tai makatɨ yuta'unake, mamayatsie kanitakeni.
ACT 28:4 Teɨteri mana kiekatari me'ixeiyatɨ kuu mamayatsie hawiekame, mɨpaɨ mekateniyukɨhɨawekaitɨni yunaitɨ: «Xɨari 'ikɨ tewi tiyumiekame pɨhɨkɨ, tsepanetɨ haramaratsie mutawikwei, heitserie pɨkapitɨarie 'ayenieretɨ mɨyuhayewanikɨ».
ACT 28:5 Matsi Papuru yumama kaniutatsike, kuu taipa kaneuweni, mɨkɨ 'atsipɨka'uyɨ pɨkatiukwinixɨ.
ACT 28:6 Mɨkɨ teɨteri mepikwewiekai mɨpaɨ meteku'eriwatɨ: «Tietɨtsɨ tahaimɨkɨ, yatɨni yapauka mɨmɨkɨ». Yamekateneutere me'itaxeiyatɨ 'atsipɨka'uyɨ, 'ayumieme yɨkɨ pɨta mekateniuyɨhɨawe, mɨpaɨ mekaniutiyuani: «Xɨari 'ikɨ kanikakaɨyaritɨni».
ACT 28:7 Hikɨ mana hurawa kwie kanikumakaitɨni, Pupiriyu naitɨ kwie haramara hixɨapa mɨyema katinipinieyatɨkaitɨni. Mɨkɨ yukie 'aixɨa tatixeiyatɨ kataniutanaki'erieni hikɨ haika tukari mana tekanikutekaitɨni hetsɨana.
ACT 28:8 Pupiriyu paapaya hɨiyakɨ meta hakwitsikɨ tikuyetɨ yu'itaritsie kanikakateitɨni. Papuru kaneikuxeiya, meta kaniyutanenewieni heimana 'utimetɨ 'ana mɨkɨ 'aixɨa reu'erietɨ kanayani.
ACT 28:9 Mɨyatiuyɨku, hipatɨta tekwikwikate haramara hixɨapa kwie mɨyematsie memɨtamakai mekani'axekaitɨni, mɨkɨta 'aixɨa meteheu'erietɨ mepakɨkakai.
ACT 28:10 Mɨkɨ waɨkawa 'aixɨa metatexeiyatɨ metatenimikwakaitɨni, meta teyehuximekaku mepɨtateyetuiri ketita temɨteheuyehɨakai.
ACT 28:11 Hikɨ haika metseri te'uyurieka haramara hixɨapa kwie mɨyematsie, kanuwa 'amɨpatsie teyetekaku kaniukuhaɨtɨre. 'Arekanitɨriya miemetsie, kakaɨyarixi memuyuhuta wa'ɨkiyari mamakai.
ACT 28:12 Tsirakutsa teheta'axɨaka, haika tukari mana tekaniuyurieni.
ACT 28:13 Manata temɨyekɨ, Rekiyu tekaniye'axɨani. Xeitukari 'anukayaku, tatsɨtɨa 'eka kanatineni, meta hutarieka tukaritsie Putehuri tekaneta'axɨani.
ACT 28:14 Mana ta'iwamarixi tekaniwaretaxeiya, mɨkɨ mepɨtatsi'uta'ini 'atahuta tukari temɨyurienikɨ wahetsɨa. 'Imatɨrieka Xumatsie tekaniuta'axɨani.
ACT 28:15 Ta'iwamarixi Xuma kiekatari, mete'utamarieka tahepaɨtsita ketemeyɨkai, mɨrayutixexeɨritɨre paitɨ 'Apiyu huyeyari 'utɨma meta Haikatɨ mɨti'u mɨtiuyehipitɨretsie me'ayenexɨaka mekatananunake. Papuru waruxeiyaka, Kakaɨyari pamɨpariyutsi kaniupitɨani, meta waɨkawa kaniyuwaɨriyakaitɨni.
ACT 28:16 Kepauka Xumatsie temu'axɨa, Papuru kaniupitɨarieni yuxaɨtame kiita mayekanikɨ, xeime kuya hamatɨa mi'ɨwiyanikɨ.
ACT 28:17 Merikɨtsɨ hairieka tukaritsie Papuru huriyutsixi wa'ukiyarima yuhetsɨa kaniwaruta'inieni. Me'u'axɨaku mɨpaɨ katiniwarutahɨawe: —Neuxei 'iwamarixi, tsepanetɨ 'atsinemɨkatiuyuri teɨteri wahepaɨtsita, tatutsima wayeiyari hepaɨtsita neka'uxiwa'atɨ, Kerutsaremetsie nehɨatɨ nepɨyetuiya xumatari wahetsɨa.
ACT 28:18 Mɨkɨ menetsi'uta'iwawiyaka mekanenixɨnakukaitɨni, ne 'axanemɨkatiuyuriekaikɨ nemɨmierienikɨ.
ACT 28:19 Huriyutsixi neniuki hepaɨtsita memɨniukixiekai, 'ayumieme waɨriyarika Tsetsaxi hetsɨa nekaniye'ani, tsepanetɨ neteɨterima wahepaɨtsita tixaɨtɨ nemɨkarayexeiyakai.
ACT 28:20 Hikɨ 'ayumieme nekanixe'uta'inieni temɨtaxeiyaxɨanikɨ meta xehamatɨa nemɨtitaxatakɨ. Mɨpaɨ yuri nemɨti'eriekɨ 'Ixaheri teɨteriyari kememɨteta'ikwewa 'ayumieme tepɨakɨ hikɨ nekanihɨaka.
ACT 28:21 Mɨkɨ mɨpaɨ mekatenita'eiya: —Tame xapate tepɨka'anuhuriwawe Kureyatsie mieme 'ahepaɨtsita tikuxatame, meta xewitɨ ta'iwa pɨkanuawe 'axatatihekɨatɨatɨ yanɨtsɨtɨni 'axatikuxatatɨ 'ahepaɨtsita.
ACT 28:22 Matsi tekani'eniekuni kepemɨtiku'eriwa, mɨkɨtsie memɨtewiya wahepaɨtsita 'ikɨ xeikɨa tepɨtemate, naitsarie 'axamekatenikuxaxatsiwani.
ACT 28:23 Hikɨ xeitukari mekananayexeiya Papuru hetsɨa memɨyukuxeɨrienikɨ, 'ana yumɨiretɨ mekaniu'axɨani kiitana mɨwayekatsie. Ximeripaitɨ 'itsutɨaka taikaike katiniutahayewa, tiwakuxaxatɨwatɨ meta tiwahekɨatɨatɨ kemɨreuyewetse Kakaɨyari ti'aitametɨkaku hepaɨtsita, yuri tiwa'eritɨamɨtɨ Ketsutsi hetsie, Muitsexi 'inɨarieyakɨ, meta Kakaɨyari niukametemama waxapayaritsie mɨkɨkɨ yuniuki tseiriyatɨ.
ACT 28:24 Hipatɨ yuri mekatenita'eririeni kemɨtikuxatakai, hipatɨta yuri mepɨkate'uta'eri.
ACT 28:25 Yunaitɨ yaxeikɨa meteyɨkɨhɨawetɨ mepɨkaheutayeixɨa, mekanitakɨkakaitɨni kepauka 'imatɨrieka Papuru mɨpaɨ mutayɨ: «Yurikɨ 'Iyari Mɨtiyupata 'aixɨa kaniutayɨni, Kitsariyaxi Kakaɨyari niukameya mɨpaɨ tatutsima tiwarutahɨaweku:
ACT 28:26 »“'Ikɨ teɨteri wahetsɨa kenemie, mɨpaɨ ketiniwaretahɨawi: ‘Tsepanetɨ waɨkawa xemɨ'enana, matsi xepɨkaheitimaitɨkɨne, tsepanetɨ waɨkawa xemeuneniere, matsi tixaɨtɨ xepɨkatexeiya’.
ACT 28:27 'Ikɨ teɨteri wa'iyari mɨtsetse'ikɨ, yunakata mepeukanatɨka, meta yuhɨxita mepakɨkɨpe. Xɨka mɨpaɨ meka'anenenike, mepeunenierenikeyu, mepeu'enanakakeyu, yu'iyaritsie mepɨtemaiwawenikeyu, meta nehetsɨa mepɨ'axɨanikeyu, ne 'aixɨa meteheu'eriekame nepɨwarayeitɨawe”.
ACT 28:28 »'Ayumieme xeme yaxeketenemaika, Kakaɨyari 'ikɨ wikweitsitɨarika kaneyenɨ'ani memɨkahuriyutsixi wahetsɨa, mɨkɨ hɨrixɨa mekani'eniekuni».
ACT 28:29 Hikɨ mɨpaɨ 'utayɨku huriyutsixi mekanekɨne niuki waɨkawa mexɨatɨatɨ.
ACT 28:30 Hikɨ huta wiyari kaniuyurieni muwa 'ayekaitɨ yɨkɨmana tiyutuatɨ. Yunaitɨ hetsɨana memɨ'axekai 'aixɨa katiniwaxeiyakaitɨni.
ACT 28:31 Kamatɨ katinikuxatakaitɨni kemɨreuyewetse Kakaɨyari ti'aitametɨkaku, meta katini'ɨkitakaitɨni Ti'aitame Ketsutsi Kɨritsitu hepaɨtsita, xewitɨ ka'iku'imaiyakaku meta xeime kaheumakatɨ.
ROM 1:1 Ne, Papuru, nekanixewaɨritɨaka Kɨritsitu Ketsutsi hetsiemieme nemɨti'uximayatame, nemuta'inierie nɨ'ariekame nemayanikɨ, nemupatsie Kakaɨyari niukieya 'aixɨa manuyɨne nemukuxatanikɨ.
ROM 1:2 Meripaitɨ Kakaɨyari mɨpaɨ kaniutayɨkaitɨni temeixeiyanikekaikɨ, Kakaɨyari niukametemama yametekuxatakaku niuki mɨpatsietsie,
ROM 1:3 yuniwe xatatɨ, tewi hɨkɨtɨtɨ, nu'aya kaniutinuiwa Rawiri hetsie mɨyetɨa.
ROM 1:4 Mɨkite watsata manukukekɨ, tɨrɨkariyakɨ kaniukayerieni Kakaɨyari Nu'ayatɨtɨ, 'Iyari Kakaɨyaritsie mieme mɨtatsipata kemɨtikaye. Ketsutsi Kɨritsitu kanixatakaitɨni mɨtati'aitɨwame.
ROM 1:5 Mɨkɨkɨ 'aixɨa tepɨ'itɨarie mɨkɨ 'aixɨa tiuka'iyarikaku, tepeutanɨ'ariexɨata para yunaitɨ nuiwarite yuri mete'erietɨ yamemɨtekahunikɨ, kemɨtitewakɨ me'eyexeiyatɨ.
ROM 1:6 Xemeta nuiwarite xekanihɨkɨtɨni xemuta'inierie Ketsutsi Kɨritsitu teɨterimama xemakɨnekɨ.
ROM 1:7 Nekatinixe'uta'utɨirieni yunaime Xumatsie xemɨtama Kakaɨyari mɨxenaki'erie, xemuta'inierie hetsiena mieme xemɨpatsienikɨ. Kakaɨyari mɨta'ukiyari meta Ti'aitame Ketsutsi Kɨritsitu, 'aixɨa mekete'u'iyarini xehetsiemieme, mekexepitɨaka yu'iyaritsie xemɨka'uximatɨariekakɨ.
ROM 1:8 Merikɨtsɨ Ketsutsi Kɨritsitu netsiparewiekaku pamɨpariyutsi nekanipitɨaka nekakaɨyari meri yunaime xehetsiemieme, naitsarie kwiepa mɨkuxaxatsiwakɨ yuri kexemɨte'erie.
ROM 1:9 Ne'iyarikɨ Kakaɨyari hetsiemieme nepɨti'uximaya, niuki nu'aya hetsiemieme 'aixɨa manuyɨne nekuxatatɨ. Mɨkɨ Kakaɨyari mɨpaɨ pɨtihekɨata, kenemɨtixeha'eriwa nekatihayewatɨ kepauka nemɨnenenewie neheyemekɨ,
ROM 1:10 ne'iwawirietɨ nehuye 'aixɨa ke'uyurieni 'uxa'atɨni xehetsɨa nemumiekɨ, xɨka mɨpaɨ tinakekani Kakaɨyari.
ROM 1:11 Waɨkawa nepɨnewaɨriya nexexeiyamɨtɨ, 'Iyaritsie mieme nemɨtixeminikɨ xemɨtuikariekakɨ,
ROM 1:12 neta yakɨtɨtɨ xehamatɨa nemɨnewaɨriyanikɨ yuri xemɨte'eriekɨ xeme, neta yuri nemɨti'eriekɨ.
ROM 1:13 Ne'iwama mɨpaɨ pɨnetinakenikeyu mɨpaɨ xemɨtemaikakɨ mɨixa kenemɨtinekuha'aritɨwakai xehetsɨa nemɨmiekɨ, tsepa nemɨkapitɨariekai hikɨke. 'Ikwaxi nemɨkaxeiyakɨ xehetsɨa, hipame nuiwarite wahetsɨa nemeixeiya hepaɨ.
ROM 1:14 Kaneuyeweka nemɨtiwataxatɨanikɨ kɨriyekutsixi yatɨni memɨkakɨriyekutsixi, temaiwawemete yatɨni memɨkatemaiwawe.
ROM 1:15 'Ayumieme ne'iyari yapɨ'ane nemɨxetaxatɨanikɨ niuki 'aixɨa manuyɨne xemeta Xuma xemɨtama.
ROM 1:16 Nepɨka'itewiya niuki 'aixɨa manuyɨne, tɨrɨkariya kanihɨkɨtɨni Kakaɨyari hetsɨa mieme, yunaitɨ yuri memɨte'erie memɨtawikweitsitɨarienikɨ kani'ayumiemetɨni, huriyutsixi meri, kɨriyekutsixi meta.
ROM 1:17 Xɨka yuri ti'erieka, mɨkɨ niukitsie kanimatsiɨkɨkamɨkɨ Kakaɨyari heitserie kemɨtiyupitɨwa, para yuri mɨti'eriekakɨ, kemɨre'uxa: «Kemɨ'ane heitseriemekɨ yamɨtikamie, mɨkɨ kanayenierekamɨkɨ yuri mɨti'eriekɨ».
ROM 1:18 Matsi haxɨa kanimatsiɨkɨni, Kakaɨyari taheima makawe kemɨtiheka naime teɨteri kememɨteyurie mekaheyexeiyatɨ heitseriemekɨ yamekatekahutɨ, mɨkɨ memɨka'ihekɨata tita yuri mɨraine heitseriemekɨ yamekatekahutɨ.
ROM 1:19 Tita mɨtiyɨwe mɨtimaika Kakaɨyari hepaɨtsita, mɨkɨ kanimatsiɨkɨni wahetsɨa, Kakaɨyari yakatiniwaruxeiyatsitɨani.
ROM 1:20 Kwie munetɨarietsie paitɨ hikɨke, tita mɨkatixeiyariewe hepaɨtsitana, yuheyemekɨ kemɨtitɨrɨkaɨye kemɨtikakaɨyari, mɨkɨ katinihekɨaka metimatiwakɨ tita mɨtiutiwewi hepaɨtsita. 'Ayumieme 'atsimepɨkateyɨwawe yuhetsiemieme memɨtiniunikɨ.
ROM 1:21 Kakaɨyari mehetimaika, 'aixɨa mepɨka'utiyuanekai hepaɨtsitana Kakaɨyari hepaɨtsita temutiyuane hepaɨ. Pamɨpariyutsi mepɨka'ipitɨakai, matsi yakɨ metekuxatatɨ mekanakɨne mexi niuki mexɨatɨakai, wa'iyari 'atsikatimaiwekaku, kaniukuyɨre wa'iyaritsie.
ROM 1:22 Temaiwawemete meyuxatatɨ 'atsimekatemaiwawetɨ mekanakɨne.
ROM 1:23 Kakaɨyari mɨkapɨniwe witsimɨ'ane, mekanipata tewi mɨpɨniwe hepaɨ tiyuxexeiyame memayexeiyanikɨ pɨta, wikixi wahepaɨ, yeutari wahepaɨ meta kuterixi wahepaɨ tiyuxexeiyame.
ROM 1:24 'Ayumieme Kakaɨyari kaniwayetuani yu'iyaritsie mete'ukahiwe'eriekaku, para meka'itiyatɨ memakɨnekɨ, memitsewiximanikɨ yuwaiyari hipame wahamatɨa.
ROM 1:25 Kakaɨyari yuri kemaine, mɨkɨ mekanipata 'itarika memexeiyanikɨ pɨta. Tita mɨtiwewiya mepayexeiyakai, hetsiena mieme mepɨte'uximayatakai, mekaheyexeiyatɨ kemɨ'ane mitiwewi. 'Aixɨa yemekɨ ketikɨhɨawarɨwani mɨkɨ yuheyemekɨ, mɨpaɨ xeikɨa kani'aneni.
ROM 1:26 'Ayumieme Kakaɨyari kaniwayetuani memihiwe'eriekakɨ tita mɨtitewiyɨkɨ. 'Ukariri me'iku'eirieka tita 'ukari memɨteyuruwa, 'uka hepaɨ mekateyurietɨ mepakɨ.
ROM 1:27 'Ukitsi meta yaxeikɨa me'iku'eirieka 'ukari memɨwakumaɨwanikɨ, mepɨyutaiyakai meyuhiwe'erietɨ, 'ukitsi 'ukitsi wahamatɨa yamepɨteyuriekai kemɨtitewiyɨkɨ. Yuwaiyaritsie mieme mepɨte'akapitɨarie kemɨreuyewekai mɨyamete'uyurieka.
ROM 1:28 Mɨpaɨ memɨkateku'eriwakaikɨ kename 'aixɨa 'ane Kakaɨyari ma'eriwanikɨ, 'ayumieme Kakaɨyari kaniwayetuani kemɨkatinake yamemɨteku'eriwanikɨ, kemɨkatinake memɨteyuriekakɨ.
ROM 1:29 Mekanaye'axɨani kemɨkatiheitserie meyɨatɨ, mewakumaɨwatɨ kemɨ'ane mɨkayɨ'ɨya meta mɨkayɨkɨna, 'axametekuyuruwatɨ, naime metehiwe'erietɨ, 'axamete'u'iyaritɨ. Mekanihɨpɨnekaitɨni me'ɨtetsatɨ, meyukwitɨ, meha'atɨ, meteyu'irɨwiyatɨ, niuki peraixi memɨhɨkɨtɨkaikɨ.
ROM 1:30 'Awie niuki mekaniwewieka, mekaniniukixieka, Kakaɨyari mekani'uxieka, mekatenitawe'erieka naime, mekananuyehaitɨrɨweni, mekateniyukatawe'erieka, mekatenikuwautɨweni 'axakemɨtiuyurienikɨ, yupaapama mepɨkawa'enie.
ROM 1:31 Yu'iyari mepɨka'enie warutate'akaku, yamepɨkatekahu kememutiyuane, mepɨtsetse'i, mepɨkayunɨtɨarinɨa, mepɨkateyukanenimaya.
ROM 1:32 Mɨkɨ metehetimaika tita Kakaɨyari mɨtixata tiheitserietɨme, kename yunaitɨ mɨya memɨteyurie wahetsie tinake memɨkwinikɨ 'utaitɨ, mɨkɨ matsi mɨya mekateniyurieka, matsipaitɨ mekaninaki'aka hipatɨ mɨpaɨ meteyuriekaku.
ROM 2:1 'Ayumieme, 'ekɨ tsepa kepemɨpaikɨ pemɨniukixie, 'ahetsiemieme pepɨkataniuni. Xeime kepemɨtiniukima, mɨkɨkɨ pepɨ'aniukima, karikɨ yaxeikɨata 'ekɨ pekatiniyurieneni kepemɨtiniukixie hekɨ.
ROM 2:2 Tame mɨpaɨ tepɨtemate, Kakaɨyari yuri haitɨ mɨwaranutaxɨrɨwakɨ mɨkɨ mɨya memɨteyurie.
ROM 2:3 ¿Kamɨtsɨ 'ekɨ pemɨwaniukima mɨkɨ mɨya memɨteyurie, wahepaɨ petiyurienetɨ keri petiku'eriwa 'ekɨ pemɨtawikwenikɨ kepauka Kakaɨyari matsi'anutahɨanitsie?
ROM 2:4 ¿Kauka pe'ixani'erie kwini mieme 'aixɨa kemɨtiuka'iyari, kemɨtita'ikwewa, kemɨkatiyumexɨitɨa. Kauka 'atsipekatimate Kakaɨyari 'aixɨa mɨtiuka'iyarikɨ para pemɨtihayewanikɨ kepemɨtiyuriene?
ROM 2:5 'Ekɨtsɨ 'a'iyari mɨtse'ikɨ pemɨka'awaɨriyakɨ pemɨtihayewanikɨ kepemɨtiyuriene, 'ahetsiemieme haxɨa pepu'utane, 'iya tukaritsieke kepauka pemɨyehekarienitsie, kepauka matsiɨkɨtɨ mayani heitseriemekɨ kemɨtiwaranutaxɨrɨwa Kakaɨyari.
ROM 2:6 Karikɨ Kakaɨyari «mɨkɨ kememɨteyurie katiniwarakapitɨamɨkɨ yuxexuime».
ROM 2:7 Mɨkɨ mete'uka'eniwatɨ 'aixɨa meteyurietɨ memɨtekuwautɨwe witsime'anenetɨ kememɨte'akɨnekɨ, 'aixɨa memɨtexeiyariekakɨ meta kememɨkatetipɨnekɨ, mɨkɨ kaniwapitɨamɨkɨ yuheyemekɨ memayenenierenikɨ.
ROM 2:8 Mɨkɨtsɨ yuhetsiemieme xeikɨa memɨ'ayumiemete, yamemɨkatekahu tita yuri mɨraine hetsie, yamemɨtekahu tita mɨkatiheitserietsie pɨta, mɨkɨ haxɨa kaniwapitɨamɨkɨ wahekatɨ.
ROM 2:9 Kaniwahiweritɨamɨkɨ meta kaniwa'uximatɨamɨkɨ yunaime teɨteri yu'iyaritsie 'axamemɨteyurie, huriyutsixi meri, kɨriyekutsixi meta.
ROM 2:10 Kaniwapitɨamɨkɨ witsime'anenetɨ memakɨnekɨ, 'aixɨa memɨtexeiyariekakɨ meta yu'iyaritsie memɨka'uximatɨariekakɨ katiniwapitɨamɨkɨ yunaime 'aixɨa memɨteyurie, huriyutsixi meri, kɨriyekutsixi meta.
ROM 2:11 Kakaɨyari yɨkɨ pɨkatiwaxeiya teɨteri.
ROM 2:12 Keyupaɨmetɨ 'inɨari niukiyari mekahexeiyatɨ 'axamemɨte'uyuri, mɨkɨ mepɨkwini 'inɨari niukiyari mekahexeiyatɨ. Keyupaɨmetɨ 'inɨari niukiyari mehexeiyatɨ 'axamemɨteyurie, mɨkɨ 'inɨari niukiyari manuyɨne hepaɨ mepanutaxɨriyani.
ROM 2:13 Mɨkɨ memi'enie xeikɨa 'inɨari niukiyari, mɨkɨ heitserie mepɨkahexeiya Kakaɨyari hɨxie. Mɨkɨ yamemɨtekahu 'inɨari niukiyari kemaine, mɨkɨ pɨta heitserie mekanipitɨariekuni.
ROM 2:14 Mɨkɨ memɨkahuriyutsixi 'inɨari niukiyari memɨkahexeiya, kepauka yɨkɨmana yamemɨteyurie kemaine 'inɨari niukiyari, tsepa 'inɨari niukiyari memɨkahexeiya, 'inɨari niukiyari mehexeiyatɨ mepakɨne yɨkɨmana.
ROM 2:15 Mɨkɨri mepɨyuhekɨata tita 'inɨari niukiyarikɨ yamɨtiyuriene metehexeiyatɨ yu'iyaritsie mɨraye'uxa. Wa'iyari kememɨteyumate katinihekɨatani wahepaɨtsita. Yukɨmana yatiku'eriwatɨ, yuhetsie katinahɨpani, yatɨni yuhetsie mɨtanuanikɨ.
ROM 2:16 Mɨpaɨ katiniyɨmɨkɨ 'iya tukaritsie kepauka Kakaɨyari mɨwata'iwawiyatsie teɨteri tita memɨte'uti'awietaxɨ hepaɨtsita Kɨritsitu Ketsutsi warahɨawekaku, neniuki 'aixɨa manuyɨne kemaine.
ROM 2:17 Merikɨte 'ekɨ huriyu pemɨtiuterɨwarie, yuri pemɨti'erie 'inɨari niukiyaritsie, pemɨ'ata'ɨre Kakaɨyari hetsie petiwiyatɨ,
ROM 2:18 pemimate tita mɨtinake, pemɨtimaiwe tita 'aixɨa mɨti'ane pemɨtiuta'ɨkitɨariekɨ 'inɨari niukiyari hetsiemiemekɨ,
ROM 2:19 pewaranukuhapame memakɨkɨpe pemɨ'a'erie, hekɨariwiwame pemɨ'a'erie, yɨwipa memu'uwa wahetsiemieme,
ROM 2:20 ti'ɨkitame pemɨ'a'erie 'atsimemɨkatemate wahetsiemieme, tɨɨri tiwa'ɨkitɨwame pemɨ'a'erie, 'inɨari niukiyari pehexeiyatɨ pemɨtiuyemate meta tita yuri mɨraine,
ROM 2:21 kamɨtsɨ 'ekɨ xeime pemɨti'ɨkitɨa, ¿pekati'a'ɨkitɨata 'ekɨ? 'Ekɨ mɨpaɨ pepɨtikuxata kename 'aixɨa ka'ane xɨka tinawayani, merikɨte ¿petinawaya 'ekɨ?
ROM 2:22 'Ekɨ mɨpaɨ pemɨtikuxata kename 'aixɨa ka'ane xeime 'ɨyaya mukumaɨwanikɨ meta xeime kɨnaya, merikɨte, ¿petikumaɨwa 'ekɨ? 'Ekɨ mɨpaɨ pemaine kename pewaxani'erie tetexi kakaɨyarixiyari, merikɨte, ¿watukiteta petiunawa?
ROM 2:23 'Ekɨ pemɨ'ata'ɨre 'inɨari niukiyari pemexeiyakɨ, merikɨte, ¿pe'ititsanatɨ 'inɨari niukiyari Kakaɨyari mariweme pekarayeitɨa?
ROM 2:24 Kamɨtsɨ, kemɨre'uxa: «Kemɨ'ane Kakaɨyari mɨhɨkɨ 'axakatinikuxaxatsiwani nuiwarite watsata xekɨmana».
ROM 2:25 Xitekiya 'inɨariyari kamaniparewieka xɨka 'inɨari niukiyaritsie yapetikamieni, matsi xɨka 'inɨari niukiyari petitsanatɨ peyɨaneni, tsepa xitekiya 'inɨariyari pemexeiya, peka'inɨaritɨariekame pepa'ayeitɨa.
ROM 2:26 Matsitsɨ xɨka kemɨ'ane 'inɨari mɨkahexeiya yatikamieni kemɨtiheitserie 'inɨari niukiyari kemainetsie, 'inɨari tsepa mɨkahexeiya, ¿'inɨaritɨariekame kati'eriwani mɨkɨ?
ROM 2:27 Kemɨ'ane yuwaiyaritsie xitekiyakɨ mɨka'inɨatsie, peru meye'atɨwa 'inɨari niukiyari kemaine, mɨkɨ 'ahetsie pɨrahɨpani 'inɨari niukiyari pemɨtitsanakɨ, tsepa 'utɨarikayari pemexeiya yatɨni tsepa 'inɨariyari pemexeiya.
ROM 2:28 Kemɨ'ane herie xeikɨa huriyu tewiyari mɨhɨkɨ, mɨkɨ huriyu pɨkahɨkɨ, kemɨ'ane herie xeikɨa yuwaiyaritsie mɨ'inɨaritɨarie xitekiyakɨ, mɨkɨ pɨka'inɨaritɨarie.
ROM 2:29 Matsi kemɨ'ane yutaɨta mɨhuriyu, mɨkɨ pɨta huriyu kanihɨkɨtɨni, kemɨ'ane yu'iyaritsie mɨ'inɨaritɨarie, mɨkɨ 'Iyari maine hepaɨ pɨta pɨ'inɨaritɨarie, tsepa mɨka'inɨaritɨarie 'utɨarika mɨti'eniɨriɨkɨ hepaɨ. Kemɨ'ane mɨpaɨ mɨ'ane, teɨteri witsimepɨka'utiyuaneni hepaɨtsitana, Kakaɨyari pɨta witsipaineni hepaɨtsitana.
ROM 3:1 Merikɨte, ¿tita rexeiya huriyu hipatɨ memɨkaheixeiya? ¿Ketiparewie xitekiya 'inɨariyari?
ROM 3:2 Waɨkawamekɨ piparewie, naimekɨ. Kamɨtsɨ meri, huriyutsixi niuki Kakaɨyari hetsɨa mɨmieme hepaɨtsita mepuhɨritɨarie.
ROM 3:3 Kete'aneni xɨka hipatɨ yamekatekahukaitɨni. ¿Kakaɨyari yakatikamietɨ rayeitɨarieni mɨkɨ yamemɨkatekahukaikɨ?
ROM 3:4 Pɨkatixaɨtsietɨ. Matsi Kakaɨyari tita yuri mɨrainetsie yaketikamieni, tsepa yunaitɨ teɨteri memɨte'itawa, kemɨre'uxa: «Para 'aniukikɨ pemɨmatsiɨkɨnikɨ heitserie kepemɨrexeiya, para pemɨre'a'iwakɨ kepauka pemɨtaxanetsienitsie».
ROM 3:5 Merikɨtsɨ tame heitseriemekɨ yatekatekahukaku xɨka matsiɨkɨtɨ 'ayani Kakaɨyari heitseriemekɨ kemɨtikamie, ¿kete'utiyuanenitsɨari tame? ¿Kakaɨyari kemɨkatiheitserie tiyɨane haxɨakɨ tarapinirienike? (Tewi hepaɨ nepɨtikuxata).
ROM 3:6 Pɨkatixaɨtsietɨ. Xɨka mɨpaɨ 'anenike, ¿Kakaɨyari kehepaɨ tiwata'iwawiyakeyu kwiepa memɨtama 'itsɨkame hepaɨ?
ROM 3:7 Perutsɨ neti'itawakaku xɨka matsiɨkɨni Kakaɨyari kemɨtikamie tita yuri mɨrainetsie, matsi yeme witsi'anetɨ mayanikɨ Kakaɨyari, ¿titayari neranutahɨiyani ne 'axatiyuruwame hepaɨ?
ROM 3:8 Mɨpaɨ kati'anenikeyu matsi: 'axatemɨtekɨhɨawarɨwa hepaɨ, hipatɨ memutiyuane hepaɨ kename mɨpaɨ tehaitɨka tame: «Kɨmɨ 'axatepɨteyurieni 'aixɨa 'anetɨ mayanikɨ te'utiyuatɨ waniu». Heitseriemekɨ mekanixani'eriwani mɨkɨ mɨpaɨ memutiyuane.
ROM 3:9 ¿Merikɨte keti'ane? ¿Tame matsi 'aixɨa tete'anene? Tixaɨ yemekɨ. Tekateniutahekɨata huriyutsixi kɨriyekutsixi meta yunaitɨ tita 'axamɨti'anetsie kememɨtewiya,
ROM 3:10 kemɨre'uxa: «Kemɨ'ane heitseriemekɨ yamɨtikamie 'apɨka'uyeika, nixewitɨ tɨma,
ROM 3:11 kemɨ'ane mɨtimaiwe 'apɨka'uyeika, kemɨ'ane Kakaɨyari mɨkuwaune 'apɨka'uyeika.
ROM 3:12 Yunaitɨ mepeuyexɨri, 'axameteyurietɨ mepakɨ. Kemɨ'ane 'aixɨa ti'aneme mɨtiyuriene 'apɨka'uyeika, xewitɨ tɨma pumawe».
ROM 3:13 «Waxɨrɨwame mɨki terɨya kanihɨkɨtɨni reutenitɨ, mepɨte'irɨma yunenikɨ». «Xaye 'uayeya wateta payeka».
ROM 3:14 «Wateta pɨhɨne 'axa'anuyɨtɨ hatsiwitɨ».
ROM 3:15 «Yɨ'ɨkatekɨ mepɨyumexɨitɨa xuriya memɨtayeurienikɨ,
ROM 3:16 yuhuyeta mepɨte'uka'una mepɨteyuhiweritɨa,
ROM 3:17 huye hakewa mɨkatiyu'uximatɨa mepɨkahemaririe».
ROM 3:18 «Kakaɨyari mepɨkahayemakaxe yuhetsɨa».
ROM 3:19 Hikɨ tame mɨpaɨ tepɨtemate, naime 'inɨari niukiyari kemaine, pɨtiwarutaxatɨa mɨkɨ 'inɨari niukiyaritsie memɨtewiya, yunaime wateni muwaranunamirienikɨ, Kakaɨyari mɨwataxanetakɨ yunaime kwiepa memɨtama.
ROM 3:20 Kakaɨyari hɨxie 'inɨari niukiyari kemaine yamɨtiuyurikɨ, mɨkɨkɨ nixewitɨ tewi heitserie pɨkapitɨarieni. Matsi 'inɨari niukiyarikɨ tita 'axamɨti'ane temɨtehetimanikɨ pɨ'ayumieme.
ROM 3:21 Hikɨri matsi, matsiɨkɨtɨ kanayani Kakaɨyari heitserie kemɨtiyupitɨwa, tsepa 'inɨari niukiyari mumawenike. 'Inɨari niukiyari, Kakaɨyari niukametemama waxapayari meta yakatinihekɨatani.
ROM 3:22 Kakaɨyari heitserie kemɨtiyupitɨwa yuri ti'eriekaku Ketsutsi Kɨritsitu hetsie, mɨkɨ kanimatsiɨkɨni, heitserie kemɨtiwapitɨa yunaime yuri memɨte'erie, yɨkɨ pɨkatiwaxeiya.
ROM 3:23 'Axamepɨte'uyuri yunaitɨ, yunaitɨ mepɨka'aye'axɨawawe Kakaɨyari witsimɨtiwaxeiyakɨ,
ROM 3:24 heitserie mepupitɨarie mekate'utawawiyarieka 'aixɨa mɨtiuka'iyarikɨ mɨkɨ, Kɨritsitu Ketsutsi mɨwatixɨnakɨ.
ROM 3:25 Kakaɨyari kanikayeni 'itiya mawariyari mayanikɨ xuriyayakɨ temɨteheuyehɨwiyarienikɨ xɨka yuri tete'erieka. Mɨpaɨ tiuyurieka matsiɨkɨme kanayeitɨani heitserie kemɨrexeiya, wahetsie pɨkatiɨhɨa tita meripaitɨ 'axamemɨte'uyuri hepaɨtsita, Kakaɨyari mɨtinewiekaikɨ.
ROM 3:26 Kanikayeni matsiɨkɨme mayeitɨanikɨ hikɨ, heitserie kemɨrexeiya. 'Ayumieme mɨkɨ heitserie kanexeiyani, heitserie kanipitɨanita kemɨ'ane 'amuyeika yuri ti'erietɨ Ketsutsi hetsie.
ROM 3:27 ¿Hikɨri kehepaɨ tiyuta'ɨreni yuhepaɨtsita? Hawaikɨ pɨkayɨwe. ¿Merikɨte ke'aneme 'inɨariyarikɨ pɨyɨwe xeikɨa? ¿Kemɨtiyurienekɨ, mɨkɨ ti'inɨariyari? Pɨkatixaɨtsietɨ. Yuri kemɨti'erie, mɨkɨ kani'inɨariyaritɨni pɨta.
ROM 3:28 Tame 'ipaɨ tekatenitamaika, teɨteri heitserie mekaniupitɨarieni yuri memɨte'eriekɨ, tsepa yamemɨkate'uyurienike 'inɨari niukiyari kemaine.
ROM 3:29 ¿Kamɨtsɨ Kakaɨyari huriyutsixi xeikɨa tiwakakaɨyari? ¿Memɨkahuriyutsixita katiwakakaɨyari? Huu, memɨkahuriyutsixita kaniwakakaɨyaritɨni.
ROM 3:30 Merikɨte, Kakaɨyari kaniyuxewini. Heitserie kaniwapitɨamɨkɨ mɨkɨ xitekiya 'inɨariyari memexeiya, mɨkɨ yuri memɨte'eriekɨ. Heitserie kaniwapitɨamɨkɨta mɨkɨ xitekiyakɨ memɨka'inɨaritɨarie, mɨkɨ yuri memɨte'eriekɨ.
ROM 3:31 'Ayumieme nepaine, ¿Tixaɨtɨ katihɨkɨtɨme tetehayeitɨa 'inɨari niukiyari xɨka yuri tete'erieka? Pɨkatixaɨtsietɨ. Tepitseiriya pɨta 'inɨari niukiyari.
ROM 4:1 Merikɨte, ¿kete'utiyuaneniri tita 'Apɨrahami mɨtiukaxei hepaɨtsita? Mɨkɨ yateewa kanitapaapatɨni hetsiena temɨyekɨ.
ROM 4:2 'Ipaɨ teputiyuane, xɨka 'Apɨrahami heitserie 'upitɨarienike tixaɨtɨ mɨtiuyurikɨ, kaniyɨwenikeyu muyuta'ɨrenikɨ yuhepaɨtsita. Matsi Kakaɨyari hɨxie pɨkayɨwe.
ROM 4:3 ¿Kehaine 'utɨarika xapayari? «'Apɨrahami Kakaɨyari yuri katiniuta'eririeni, 'ayumieme Kakaɨyari heitserie hexeiyakame kanayeitɨani» paine.
ROM 4:4 Kemɨ'ane mɨtiuta'uximayataxɨ, tita mɨti'iwa 'imikieri pɨka'eriwa, peuyewetse matsi mɨtipitɨarienikɨ.
ROM 4:5 Kemɨ'ane pɨta 'atsikatiyurienetɨ yuri mɨti'erie 'iyatsie, heitserie muwapitɨatsie kemɨ'ane Kakaɨyari memɨkahayexeiya, mɨkɨ heitserie hexeiyatɨ kanimariwani yuri mɨti'eriekɨ.
ROM 4:6 Rawirita mɨpaɨ kanaineni tewi kemɨtiyutemawie hepaɨtsita, kepauka Kakaɨyari heitserie hexeiyame mayeitɨa, tsepa tixaɨtɨ mɨkatiuyurienike:
ROM 4:7 «Mekaniyutemamawieka kemɨ'ane memɨteheuyehɨwiyarieni 'inɨari kememɨte'utitsanaxɨkɨ, meta kepauka tita 'axamemɨte'uyuri mɨranukanamieni.
ROM 4:8 Kaniyutemawieka mɨkɨ tewi, Ti'aitame xɨka 'axatiyurieneme ka'erieka».
ROM 4:9 Merikɨte, ¿'ipaɨ meteyutemamawie mɨkɨ xitekiya 'inɨariyari memexeiya xeikɨa? ¿Mɨkɨ memɨka'inɨaritɨarieta, mɨpaɨ mekateyutemamawie? Mɨpaɨ teputiyuane, 'Apɨrahami yuri mɨti'eriekaikɨ, 'ayumieme heitserie hexeiyatɨ kanimariwakaitɨni.
ROM 4:10 ¿Ketiyurienetɨ mɨpaɨ pɨtimatiwakai? ¿Xitekiya 'inɨariyari rexeiyakai 'ana, pɨkaheixeiyakai nutsu? Xitekiya 'inɨariyari pɨkahexeiyakai, matsi pɨka'inɨaritɨariewekai 'akuxi.
ROM 4:11 Xitekiya kaniutanaki'erieni 'inɨari mɨhɨkɨtɨnikɨ. Kaniutseyumarieni heitserie mupitɨariekɨ yuri tiuta'erieka mexi xitekiya 'inɨariyari kahexeiyakai. 'Ayumieme yunaitɨ yuri memɨte'erie xitekiya 'inɨariyari mekahexeiyatɨ, mɨkɨ wapaapa kanayani, mɨkɨ heitserie mehexeiyatɨ memɨmariwanikɨ.
ROM 4:12 Mɨkɨta xitekiya 'inɨariyari memexeiya wapaapa kanayani, mɨkɨ xitekiya 'inɨariyari memexeiya xeikɨa pɨkatixaɨ, matsi mɨkɨ yamemɨtekahuta tapaapa 'Apɨrahami huyetana yuri kemɨti'eriekai xitekiya 'inɨariyari kahexeiyatɨ.
ROM 4:13 Kepauka 'Apɨrahami mɨpaɨ mɨtiutahɨawarie, niwemamata, kename wahetsie tinakekekai naitɨ kwie, 'inɨari niukiyari hexeiyatɨ mɨpaɨ pɨkatiutahɨawarie. Heitserie 'upitɨarieka pɨta yuri mɨtiuta'erikɨ, mɨpaɨ pɨtiutahɨawarie.
ROM 4:14 Xɨkari mɨkɨ 'inɨari niukiyaritsie memɨtewiya wahetsie tinakenike, xɨanakɨ xeikɨa yuri tepɨte'eriekakeyu, yakɨ xeikɨa mɨpaɨ pɨtiutahɨawarienikeyu mɨkɨ.
ROM 4:15 'Inɨari niukiyari haxɨa pɨtiyupitɨwa. 'Inɨari niukiyari kaxuawekaku, pɨkatitsanarɨwa.
ROM 4:16 'Ayumieme yuri ti'eriekaku mɨpaɨ kani'aneni, para mɨpaɨ mɨtiyɨnikɨ mɨkɨ 'aixɨa tiuka'iyarikaku, tita mɨtitaxatɨa mɨtseiriyarienikɨ yunaime niwemama wahetsiemieme, mɨkɨ 'inɨari niukiyaritsie memɨtewiya wahetsiemieme xeikɨa pɨkatixaɨ, matsita mɨkɨ 'Apɨrahami hepaɨ yuri memɨte'erie wahetsiemieme, mɨkɨ tanaime kanitapaapatɨni,
ROM 4:17 kemɨre'uxa: «Ne yumɨireme nuiwarite wapaapa nepɨmatsi'ayeitɨa». Kakaɨyari hɨxie yuri pemɨtiuta'erikɨ, kemɨ'ane mɨkite mɨwaranutanieritɨwa, meta kemɨ'ane mɨtititerɨwa tita 'emɨkatiuwe mɨtinenikɨ, mɨkɨ hetsie.
ROM 4:18 Mɨkɨ kemɨkatiyɨwekai yuri mɨti'eriekakɨ ta'ikwewatɨ, ta'ikwewatɨ yuri katini'eriekaitɨni. 'Ayumieme yumɨireme nuiwarite wapaapa kanayani, mɨpaɨ kemɨtiutahɨawariekai: «Mɨpaɨ meyupaɨmetɨ mekanakɨnikuni 'aniwema».
ROM 4:19 Pɨka'utaweranaxɨa yuri ti'erietɨ, tsepa me'eriwakai yuwaiyari kemɨtimɨximekai 'etsiwatɨkaku xeitsienituyari wiyari mexeiyakaikɨ, yatɨni tsepa me'eriwakai Tsara mɨkayɨwekai mɨtiniwenikɨ.
ROM 4:20 Pɨka'u'iyɨri yɨkɨ tiku'eriwatɨ tita Kakaɨyari mɨtitaxatɨa hetsiena mɨtinakekekaikɨ, mɨkɨ hepaɨtsita, yuri kati'erietɨ pɨkahatɨa. Matsi yuri kemɨti'eriekai pɨtɨrɨkariyariekai, Kakaɨyari mariweme 'ayeitɨatɨ.
ROM 4:21 Mɨpaɨ pɨtiyumaikai, Kakaɨyari mɨyɨwekaikɨ kemɨtitahɨawixɨ yamɨtiyurienikekaikɨ.
ROM 4:22 'Ayumieme heitserie pitɨariekame kani'eriwakaitɨni, yuri mɨti'eriekaikɨ.
ROM 4:23 Kemɨti'eriwakaikɨ 'Apɨrahami, hetsiena mieme xeikɨa pɨkaraka'utɨarie,
ROM 4:24 matsi tahetsiemiemeta mɨpaɨ pɨtiu'utɨarie. Mɨpaɨta tame tepɨtematiwa yuri temɨte'erie kemɨ'ane mɨkite watsata menukuketɨa Tati'aitɨwame Ketsutsi, mɨkɨ hetsie.
ROM 4:25 Mɨkɨ pɨyetuiya mumierienikɨ tita 'axatemɨte'uyurikɨ meta panukuketɨarie heitserie temɨpitɨarienikɨ.
ROM 5:1 Merikɨte heitserie temupitɨariekɨ yuri tete'erietɨ, 'ayumieme 'aixɨa tekatenitaxeiyani Kakaɨyari hamatɨa, Tati'aitɨwame Ketsutsi Kɨritsitu yatatipitɨakaku.
ROM 5:2 Mɨkɨ yatatipitɨakakuta, yuri tete'erietɨ mɨpaɨ tekani'itɨarieka, Kakaɨyari 'aixɨa katiniuka'iyarini tahetsiemieme. 'Atepɨti'u 'iya 'aixɨa tiuka'iyarikaku. 'Aixɨa tepɨtetakɨhɨawe yuri temɨte'eriekɨ teta'ikwewatɨ Kakaɨyari witsimɨtatixeiyanikɨ.
ROM 5:3 Mɨkɨ meta, 'aixɨa tepɨtetakɨhɨawe temɨ'uximatɨariekɨ mɨpaɨ tetemaitɨ, xɨka te'uximatɨarieka, tete'uka'eniwatɨ tepɨtseiriyarieka.
ROM 5:4 Xɨka tete'uka'eniwatɨ tetseiriyarieka, te'inɨatsietɨ tepakɨne. Xɨka te'inɨatsieka, teyɨwawetɨ tepakɨne yuri temɨte'eriekakɨ teta'ikwewatɨ.
ROM 5:5 Mɨpaɨ teteta'ikwewatɨ xɨka yuri tete'erieka, tepɨkatewiyatsitɨarieni, Kakaɨyari ta'iyaritsie mɨtihɨniyakɨ tatsinaki'erietɨ, 'Iyari Mɨtiyupata temupitɨarie yatiyurienekaku.
ROM 5:6 Kɨritsitu, kepauka tame temuweraranikai 'akuxi, kaniumɨni tame Kakaɨyari temɨka'ayexeiya tahetsiemieme, tukari 'aixɨa mɨ'ane 'anuyeyaku.
ROM 5:7 Kanikwaniweni haweri mieme xeikɨa xewitɨ mɨmɨnikɨ tewi heitseriemekɨ yamɨtikamie hetsiemieme. Pɨkari yuwaɨriyanikeyu 'atsita mumɨnikɨ tewi 'aixɨa mɨtiuka'iyari hetsiemieme.
ROM 5:8 Matsi Kakaɨyari 'ipaɨ tiuyurieka matsiɨkɨme kanayeitɨani kemɨtatinaki'erie, Kɨritsitu tahetsiemieme mumɨkɨ tame 'axateteyuriekaku 'akuxi.
ROM 5:9 Xuriyayakɨ heitserie temupitɨariekɨ hikɨ, matsi waɨkawa mɨkɨ pɨtatsitawikweitsitɨani temɨkahekariekakɨ.
ROM 5:10 Te'eye'uniekaku Kakaɨyari nu'aya mumɨkɨ, tepupatsie 'aixɨa temɨtetaxeiyanikɨ Kakaɨyari hamatɨa. 'Ayumieme 'aixɨa tetetaxeiyatɨ, matsi waɨkawa tepɨtawikweitsitɨarieni mɨkɨ mayenierekɨ.
ROM 5:11 Mɨkɨ meta, 'aixɨa tepɨtetakɨhɨawe Kakaɨyari teha'eriwatɨ Tati'aitɨwame Ketsutsi Kɨritsitu yamɨtiuyurikɨ. Mɨkɨ kanihɨkɨtɨni kemɨ'ane mɨtatsi'upataxɨ 'aixɨa temɨtetaxeiyanikɨ.
ROM 5:12 Merikɨtsɨ tita 'axamɨti'ane katiniuneni kwiepa tewi mɨyuxewikai 'axamɨtiuyurikɨ, 'axamɨtiuyurikɨ kaniumɨni, mɨpaɨrita 'ayumieme yunaitɨ teɨteri mekwi'itɨ mekanakɨne, yunaitɨ 'axamemɨte'uyurikɨ.
ROM 5:13 'Inɨari niukiyari kaxuawekaku 'akuxi, kwiepa memɨtama 'axamepɨteyuriekai. Peru 'inɨari niukiyari kaxuawekaku, tewitsie pɨkarahɨiwa 'axaxɨkatiuyurieni.
ROM 5:14 Matsi 'Arani 'amuyeikakaitsie paitɨ meta Muitsexi, yunaitɨ yamete'upitɨarieka mepukwi, tsepa hepaɨna 'aitsika memɨka'utitsanaxɨakai 'Arani hepaɨ. Mɨkɨ 'Arani kemɨ'ane 'umamienikekai kani'inɨarieyatɨkaitɨni.
ROM 5:15 Peru 'axamɨtiuyurikɨ, mɨpaɨta yaxeikɨa tepɨkate'umikie. Mɨkɨ mɨyuxewikai 'axamɨtiuyurikɨ, hipatɨ mepukwi, peru matsi waɨkawa 'aixɨa pɨtiuka'iyari Kakaɨyari, matsi waɨkawa mepɨte'umikie, xewitɨ tewi Ketsutsi Kɨritsitutɨtɨ 'aixɨa tiuka'iyaritɨ kemɨtitimɨiriyaxɨ 'imikieri hipame wahetsiemieme.
ROM 5:16 Tita mɨtiwarumi, mɨkɨ mɨpaɨ pɨka'ane kemɨtiuyɨ kepauka mɨkɨ mɨyuxewikai 'axamɨtiuyuri. Yuxewitɨ 'axamɨtiuyurikɨ, kananutahɨiyani hetsiena rahɨiyaku. Matsi kemɨtiwarumi mɨixa 'axamete'uyurieku, heitserie mekaniupitɨarieni pɨta.
ROM 5:17 Yuxewitɨ 'axamɨtiuyurikɨ, yunaitɨ mepuyuitɨarie memɨkwi'inikɨ xeimekɨ. Matsi waɨkawa mɨkɨ memɨyuwaɨriya memitanaki'erienikɨ kwinimieme 'aixɨa kemɨtiuka'iyari 'iya, kemɨtimɨiriyaxɨ yu'imikieri heitserie wapitɨatɨ, mɨkɨ me'ayenenieretɨ mepɨte'aitani tewi mɨyuxewi Ketsutsi Kɨritsitutɨtɨ mɨpaɨ mɨtiuyurikɨ.
ROM 5:18 'Ayumieme, xewitɨ 'axamɨtiuyurikɨ kememɨte'anutaxɨriya yunaitɨ teɨteri, mɨpaɨrita yaxeikɨa yunaitɨ teɨteri heitserie mekaniupitɨarieni memayenenierenikɨ, xewitɨ heitseriemekɨ yamɨtiuyurikɨ.
ROM 5:19 Xewitɨ tewi yakatikamietɨ, hipame 'axateyuruwamete kemɨtiwarayeitɨa, mɨpaɨrita yaxeikɨa xewitɨ yamɨtikatɨakɨ hipame heitserie mehexeiyame kaniwarayeitɨamɨkɨ.
ROM 5:20 'Inɨari niukiyariri punua matsi yemekɨ mɨtamɨirekɨ tita 'axamɨti'ane. Peru matsi yemekɨ tiutamɨiriyaku tita 'axamɨti'ane, 'anata Kakaɨyari matsi kwinimieme 'akuxi 'aixɨa pɨtiuka'iyarikai,
ROM 5:21 tita 'axamɨti'ane kemɨtiwakuyuitɨwakai wakwitɨ, mɨpaɨrita yaxeikɨa Kakaɨyari 'aixɨa tiuka'iyaritɨ kaniwayuitɨamɨkɨ heitserie wapitɨatɨ, tukari mɨkaxɨwe wapitɨatɨ, Tati'aitɨwame Ketsutsi Kɨritsitu yatiwapitɨakaku.
ROM 6:1 ¿Merikɨte kete'utiyuaneniri? ¿Mɨpaɨ 'axateteyurietɨ tetetahayewani, 'iya matsi kwinimieme 'aixɨa mɨtiuka'iyarinikɨ?
ROM 6:2 Pɨkatixaɨtsietɨ. Tameri temukwi para 'axatemɨkateyuriekakɨ, ¿keri tete'ayeneniereni mɨpaɨ teteyurietɨ?
ROM 6:3 ¿Kari 'atsixepɨkatemate, tame ketapaɨmetɨ temuka'ɨyarie Kɨritsitu Ketsutsi hetsie temɨtewiyanikɨ, tame tekate'uka'ɨyarie hepaɨna temɨkwinikɨ?
ROM 6:4 'Ayumieme hamatɨana tepukateukiexɨa mɨpaɨ tete'uka'ɨyarieka temɨkwinikɨ, para yaxeikɨa hepaɨna temu'uwanikɨ te'utihekwariyarieme ketemɨteyurie te'ayenenieretɨ tameta, mɨpaɨta Kɨritsitu manukuke hepaɨ mɨkite watsata ta'ukiyari witsimɨ'ane 'enukuketɨaka.
ROM 6:5 Kepauka hepaɨna temukwi hamatɨanata tekaniyutaxewire. 'Ayumieme matsita hepaɨna tekananuku'uikuni.
ROM 6:6 'Ipaɨ tepɨtemate, ketemɨ'anenekai matɨari paitɨ, tekaniukwi'iwa hamatɨana kuruxitsie, mɨka'unarienikɨ tita 'axatemɨte'uyuri tawaiyaritsie, tawari waɨriyarika temɨkate'uximayakakɨ tita 'axamɨti'anetsie mieme.
ROM 6:7 Kemɨ'ane mɨmɨki, mɨkɨ heitserie pexeiya 'axamɨkatiyurienenikɨ.
ROM 6:8 Tame Kɨritsitu hamatɨa temukwikɨ, 'ayumieme yuri tekateni'erieka hamatɨana temayenenierenikɨ.
ROM 6:9 Mɨpaɨ tepɨtemate, Kɨritsitu mɨkite watsata 'anukukeka hutarieka pɨkamɨni. Pɨkayɨwe mɨkuyuitɨarienikɨ mumɨnikɨ.
ROM 6:10 Kemɨtiumɨ, tita naime 'axamɨti'ane hepaɨtsita kaniumɨni xeimieme. Kemɨrayeniere, Kakaɨyari hetsiemieme kanayeniereni.
ROM 6:11 Xemeta yaxeikɨa mɨkite xekeneyu'erieka 'axaxemɨkateyuriekakɨ, xe'ayenenieretɨ pɨta xekeneyu'erieka Kakaɨyari hetsiemieme, Tati'aitɨwame Kɨritsitu Ketsutsitsie xetewiyatɨ.
ROM 6:12 'Ayumieme xewaiyari mumɨximetsie xe'u'uwatɨ, xepɨkakuyuitɨarieni 'axaxemɨteyuriekakɨ yaxemɨtekahunikɨ kemɨtiukahiwe'erie xewaiyari.
ROM 6:13 Xepɨka'iyetuaniri yuwaiyari para kɨmana 'axaxemɨteyuriekakɨ heitseriemekɨ yaxekatekahutɨ. Matsitsɨ mɨkɨ memanutanenierixɨ mɨkite watsata wahepaɨ xeyɨatɨ, xekeneyuyetuaka Kakaɨyari mɨxekuyuitɨirienikɨ xewaiyari, heitseriemekɨ yatiyurienetɨ.
ROM 6:14 Xepɨkayɨwaweni xemɨkuyuitɨarienikɨ 'axaxemɨteyuriekakɨ, 'inɨari niukiyari mɨtixe'aitɨakɨ xepɨkayɨa. Kemɨ'ane 'aixɨa mɨtiuka'iyari mɨtixe'aitɨakɨ pɨta xekaniyɨaka.
ROM 6:15 ¿Kamɨtsɨ ke'aneni? ¿'Inɨari niukiyari mɨkatati'aitɨakɨ, kemɨ'ane 'aixɨa mɨtiuka'iyari pɨta mɨtati'aitɨakɨ, 'ayumieme 'axateteyurieka? Pɨkatixaɨtsietɨ.
ROM 6:16 ¿Kari 'atsixepɨkatemate, kemɨ'ane hetsɨa xemɨyuyetua xemɨte'uximayakakɨ 'iyatsie mieme yaxemɨtekahunikɨ kemaine, waɨriyarika te'uximayatamete xepɨhɨkɨ kemɨ'anetsie mieme yaxemɨtekahu kemaine? Xɨka tita 'axamɨti'anetsie mieme xete'uximayaka, xekanikwikuni, mexɨka xete'uximayaka yaxetekahutɨ Kakaɨyari kemaine, heitserie xehexeiyatɨ xekanakɨnikuni.
ROM 6:17 Pamɨpariyutsi nepipitɨa Kakaɨyari, tsepa tita 'axamɨti'anetsie mieme xemɨte'uximayakai, yu'iyarikɨ yaxetekahutɨ xekanakɨne kexemɨteyetuiriyarie yaxete'ɨkitɨarietɨ.
ROM 6:18 Xe'utixɨnarieka 'axaxemɨkateyuriekakɨ, tita mɨtiheitserie hetsiemieme xete'uximayatɨ xekanakɨne.
ROM 6:19 Tewi hepaɨ nepɨtikuxata xemɨweraranikɨ teɨteri wahepaɨ xete'u'iyaritɨ. Xepɨyuyetuakai xewaiyari mɨti'uximayakakɨ tita mɨkati'itiyatsie mieme tita 'inɨari mɨtititsanatsie mieme, 'inɨari xemɨtitsananikɨ. Hikɨrita yaxeikɨa xekeneyuyetua xewaiyari mɨti'uximayakakɨ tita mɨtiheitserietsie mieme, Kakaɨyari hetsiemieme xemɨpatsienikɨ.
ROM 6:20 Kepauka tita 'axamɨti'anetsie mieme xemɨte'uximayakai, xepuxɨxɨnikai tita mɨtiheitserie hepaɨtsita.
ROM 6:21 ¿Kexete'utixuxuawerekai 'ana? Hikɨ xepɨyutetewiya mɨkɨ hepaɨtsita, kemɨ'ane mɨpaɨ mɨtiyuriene, mɨkɨ mɨkitɨ kanayeimɨkɨ.
ROM 6:22 Hikɨ pɨta xe'utixɨnarieka 'axaxemɨkateyuriekakɨ, Kakaɨyaritsie mieme xete'uximayatɨ, 'ayumieme xeputixuxuawere xemɨpatsienikɨ 'iyatsie mieme. Kemɨ'ane mɨpaɨ mɨtiyuriene, mɨkɨ tukari mɨkaxɨwe hexeiyatɨ kanayeimɨkɨ.
ROM 6:23 Kamɨtsɨ, kemɨ'ane 'axamɨtiuyuri, mɨkɨ mɨɨyakɨ 'apɨrapiniyarieni, peru 'imikieri Kakaɨyari mɨtatsiyetuirie, tukari mɨkaxɨwe kanihɨkɨtɨni Tati'aitɨwame Kɨritsitu Ketsutsi hetsie tetewiyakaku.
ROM 7:1 Ne'iwamarixi, xeme xemɨtemate kemɨtitita 'inɨari niukiyari, nepɨtixetaxatɨanikeyu. ¿Kari 'atsixepɨkatemate, 'inɨari niukiyari pɨti'aitɨa tewi mexi 'ayeniere xeikɨa?
ROM 7:2 'Inɨari niukiyari kemaine, peuyewetse 'uka mɨrekakɨna yɨkɨnatsie mɨtiwiyanikɨ mexi 'ayeniere kɨnaya, peru xɨka kɨnaya 'umɨni, pɨxɨne, 'inɨari niukiyari rakɨna mɨxata 'atsipɨkahaine hepaɨtsitana.
ROM 7:3 Merikɨte, xɨka xeime 'uki hetsie tiwiyani mexi kɨnaya 'ayeniere, “'uka mikumaɨwa kemɨ'ane mɨkayɨkɨna” katinitaterɨwariemɨkɨ. Peru xɨka 'umɨni kɨnaya, puxɨnarie, 'inɨari niukiyari 'atsipɨkahaineri hepaɨtsitana, 'ana xɨka xeime 'uki 'utiwitɨni, 'uka mikumaɨwa kemɨ'ane mɨkayɨkɨna pɨkahɨkɨtɨniri.
ROM 7:4 Mɨpaɨta yaxeikɨa, xeme ne'iwama, Kɨritsitu yuwaiyaritsie mumieriekɨ, xemeta xekaniukwi'iwa 'inɨari niukiyari 'atsimɨkahainenikɨ xehepaɨtsita. 'Ayumieme xeimetsie xepɨtewiya, kemɨ'ane mɨkite watsata manukuketsie, Kakaɨyari hetsiemieme temutixuxuawerenikɨ.
ROM 7:5 Kepauka teɨteri wahepaɨ temɨte'u'iyarikai, 'axaketemɨteyuriekai tetetakahiwe'erietɨ, tawaiyari kaniukuyuitɨariwakaitɨni, 'inɨari niukiyari yatatikuyuitɨwakaku, mɨpaɨ teteyurietɨ temɨkwinikɨ tekateniyuriekaitɨni.
ROM 7:6 Hikɨri tekanixɨxɨnini, 'inɨari niukiyari 'atsipɨkahaine tahepaɨtsita temukwikɨ tita mɨtatiwiyakai mɨkatatsiwiyakɨri. 'Ayumieme hekwamekɨ 'Iyari kemaine tekateni'uximayaka, 'utɨarika ye'imekɨ kemɨti'eniɨriɨkɨ pɨta tepɨkate'uximaya.
ROM 7:7 ¿Kamɨtsɨ keri te'utiyuaneni? ¿'Inɨari niukiyari 'axamɨti'ane tihɨkɨ? Pɨkatixaɨtsietɨ. Matsi xɨka 'inɨari niukiyari kaxuawenike, ne nepɨkaretimanikeyu 'axakenemɨtiyuriene. Hiwe'erika nepɨkahetimanikeyu xɨka 'inɨari niukiyari mɨpaɨ ka'anuyɨnenike: «Pepɨkati'akahiwe'erieka».
ROM 7:8 'Aitsikayari muxuawekaikɨ, tita 'axanemɨtiuyuri kanitsutɨani netsikuyuitɨwatɨ para naimekɨ nemɨtinekahiwe'eriekakɨ. Xɨka 'inɨari niukiyari 'umawenike, tita 'axamɨti'ane pɨmɨkinikeyu.
ROM 7:9 Netsɨ heiwa 'inɨari niukiyari nekahexeiyatɨ 'anepuyeikakai. Kepauka 'aitsika mɨnetsi'u'axixɨ, tita 'axanemɨtiyurienekai kananutaniere. Neri nekaniumɨni.
ROM 7:10 Mɨkɨ 'aitsika mɨnetsi'anutanieritɨanikekai, kenemɨtitaxei, mɨkɨ kaneniumieni pɨta.
ROM 7:11 Peru 'aitsika muxuawekaikɨ, tita 'axanemɨtiuyuri kanitsutɨani neti'irɨwiyatɨ, mɨkɨ 'aitsikakɨ kaneniumiemi.
ROM 7:12 'Ayumieme 'inɨari niukiyari Kakaɨyari hetsɨa kanimiemetɨni, 'aitsikata hetsɨana pɨmieme, pɨheitserie, 'aixɨa pɨ'ane.
ROM 7:13 Kamɨtsɨ, ¿mɨkɨ tita 'aixɨa mɨti'ane nehetsiemieme nemɨmɨnikɨ 'ayumiemeyari ratɨa? Pɨkatixaɨtsietɨ. Matsi, para mɨmatsiɨkɨnikɨ 'axakemɨti'ane, tita 'axanemɨtiuyuri kaneniumieni, 'ikuyuitɨwatɨ tita 'aixɨa mɨti'ane. 'Ayumieme 'aitsika muxuawekaikɨ, kwinimieme 'axa'anetɨ kanayani tita 'axanemɨtiuyuri.
ROM 7:14 Tame tepɨtemate, 'inɨari niukiyari 'iyaritsie pɨmieme. Ne pɨta teɨteri wahepaɨ nepɨtiuka'iyari xeikɨa. Tita 'axamɨti'ane pɨnetsi'unanai.
ROM 7:15 Nepɨka'imate tita nemɨtiyuriene. Tita mɨnetinake yanepɨkatiyuriene, matsi tita pɨta nemɨti'uxie yanepɨtiyuriene.
ROM 7:16 Hikɨ merikɨ, xɨka tita mɨkanetinake yanetiyurieneni, 'ayumieme 'aixɨa nepɨtixeiya 'inɨari niukiyari, kename 'aixɨa'ane ne'utaitɨ.
ROM 7:17 Hikɨ neri nepɨkahɨkɨ kemɨ'ane mɨpaɨ mɨtiyuriene, matsi tita 'axamɨti'ane nehetsie mɨtiyeka, mɨkɨ yapɨtiyuriene.
ROM 7:18 Ne nepɨtimate, nehetsie tita 'aixɨa mɨti'ane mɨkatiyeka, teɨteri wahepaɨ kenemɨtiuka'iyari. 'Aixɨa nepɨtiyurienenikeyu peru nepɨnetexie 'aixɨa kenemɨtiyurienikeyu.
ROM 7:19 'Aixɨa kenemɨtiyurienikeyu, mɨpaɨ nepɨkatiyuriene. Matsi 'axakenemɨkatiyurienikeyu, mɨpaɨ pɨta nepɨtiyuriene.
ROM 7:20 Merikɨte xɨka yanetiyurieneni kemɨkanetinake, neri mɨpaɨ nepɨkatiyuriene, tita 'axamɨti'ane nehetsie mɨtiyeka pɨta yapɨtiyuriene.
ROM 7:21 'Ipaɨ nepɨretima 'inɨari hepaɨtsita: kepauka nemɨnewaɨriya 'aixɨa nemɨtiyurienikɨ, tita 'axamɨti'ane nehetsie 'apuwe.
ROM 7:22 Kenemɨtinemate ne'iyaritsie, nepɨnetemawie Kakaɨyari 'inɨari niukiyarieya hepaɨtsita,
ROM 7:23 peru 'inɨari yɨkɨ 'aneme nepɨxeiya newaiyaritsie tiwiyame. Mɨkɨ 'inɨari, kenemɨtinemate 'inɨariyari hamatɨa mepuyukwitɨwe. Mɨkɨ 'inɨari 'axamɨ'ane newaiyaritsie mɨtiwiya pɨnetsi'uwi.
ROM 7:24 Ne xɨa'ui nepɨ'uximatɨarie. ¿Kemɨ'ane pɨnetsitawikweitsitɨani 'ikɨ kaxari kemɨtiumɨ?
ROM 7:25 Pamɨpariyutsi nepipitɨa Kakaɨyari, Ketsutsi Kɨritsitu mɨtati'aitɨwame netsiparewiekaku. 'Ayumiemeri, kenemɨtinemate, nepɨti'uximaya Kakaɨyari 'inɨarieyatsie miemekɨ, teɨteri wahepaɨ kenemɨtiuka'iyari pɨta, nepɨti'uximaya 'inɨari 'axamɨ'anetsie mieme.
ROM 8:1 'Ayumieme hikɨrixɨa mɨkɨ Kɨritsitu Ketsutsi hetsie memɨtewiya mepɨka'anutaxɨriyaniri, mɨkɨ 'amemɨka'u'uwa teɨteri wahepaɨ mete'u'iyaritɨ, 'Iyari pɨta kemaine 'amemu'uwa.
ROM 8:2 Mɨkɨ 'inɨari kɨmana 'Iyari tukari mipitɨa kemɨ'ane Kɨritsitu Ketsutsi hetsie mɨtiwiya, mɨkɨ pɨnetsi'uxɨnaxɨ, mɨkanetsikuyuitɨwanikɨ mɨkɨ 'inɨari kɨmana 'axanemɨtiyurienekai, kɨmana nemumɨ.
ROM 8:3 'Inɨari niukiyari kemɨkatiyɨwekai, kemɨtiweranikai temɨteɨterikɨ, Kakaɨyari pɨta kanenutahɨani tita 'axamɨti'ane kememɨteyurie teɨteri wahepaɨ mete'u'iyaritɨ. Kanenutahɨani yuniwe heyenɨ'aka teɨteri 'axamemɨteyuruwa wahepaɨ 'aneme, heiyenɨ'aka tita 'axamɨti'ane hepaɨtsita.
ROM 8:4 Mɨpaɨ katiniuyurieni, tita mɨtiheitserie 'inɨari niukiyari kemaine maye'atɨarienikɨ tahetsie, tame 'atemɨka'u'uwa teɨteri wahepaɨ tete'u'iyaritɨ, 'Iyari pɨta kemaine 'atemu'uwa tahetsie.
ROM 8:5 Mɨkɨ teɨteri wahepaɨ mete'u'iyaritɨ 'amemu'uwa, mɨkɨ teɨteri wahepaɨ mepɨteyumate. Mɨkɨ 'Iyari pɨta kemaine 'amemu'uwa, mɨkɨ 'Iyari hepaɨ mepɨteyumate.
ROM 8:6 Xɨka teɨteri wahepaɨ tiyumaika, kanimɨmɨkɨ. Xɨka 'Iyari hepaɨ tiyumaika, kanayenierekamɨkɨ, yu'iyaritsie pɨka'uximatɨarieka.
ROM 8:7 Kemɨ'ane teɨteri wahepaɨ mɨtiyumate, mɨkɨ Kakaɨyari kani'uxieka. Yapɨkatikamie Kakaɨyari 'inɨarieyatsie, meta mɨpaɨ pɨkayɨwe.
ROM 8:8 Mɨkɨ teɨteri wahepaɨ memɨte'u'iyari, mɨkɨ Kakaɨyari memɨnaki'atsitɨanikɨ mepɨkayɨwawe.
ROM 8:9 Xemeri teɨteri wahepaɨ xepɨkate'u'iyari. 'Iyaritsie pɨta xepɨtewiya, xɨkate Kakaɨyari 'Iyarieya xehetsie yekani. Xɨka xewitɨ Kɨritsitu 'Iyarieya kahexeiyani, mɨkɨ Kɨritsitu hetsɨa pɨkamieme.
ROM 8:10 Xɨka Kɨritsitu xehetsie tiwiyani, xewaiyari kanimɨkini 'axaxemɨte'uyurikɨ, xe'iyari matsi kanayeniereni heitserie xemupitɨariekɨ.
ROM 8:11 Kemɨ'ane menukuketɨa Ketsutsi mɨkite watsata, mɨkɨ 'Iyarieya xɨka xehetsie yekani, kemɨ'ane menukuketɨa Kɨritsitu Ketsutsi mɨkite watsata, mɨkɨtɨtɨ kanenutanieritɨamɨkɨ xewaiyari kwikwi'ime, 'Iyarieya xehetsie mɨyeka yatiyurienekaku.
ROM 8:12 'Ayumieme ne'iwama, tixaɨtɨ pɨreuyewetse yatemɨteyuriekakɨ. Peru pɨkaheuyewetse teɨteri wahepaɨ temɨyɨakakɨ kememɨte'u'iyari, 'ate'u'uwatɨ teɨteri kememɨte'u'iyari.
ROM 8:13 Xɨka 'axe'u'uwani teɨteri kememɨte'u'iyari, xepɨkwini. 'Iyari xeparewiekaku xɨka xe'imieni tita yuwaiyaritsie mɨtiyuriene tewi, xekanayenenierekakuni.
ROM 8:14 Keyupaɨmeme Kakaɨyari 'Iyarieya mɨwarawitɨkɨ, mɨkɨ Kakaɨyari niwemama mekanihɨkɨtɨni.
ROM 8:15 Xeme 'iyari xepɨka'utanaki'eri waɨriyarika xemɨte'uximayakakɨ hetsiena mieme, tawari xemɨmamakakɨ. Xekanitanaki'erieni 'Iyari Kakaɨyari niwemama mɨxe'ayeitɨa pɨta. Mɨkɨtsie tetewiyatɨ mɨpaɨ tepɨte'uhiwa: «Nepaapa».
ROM 8:16 Mɨkɨ 'Iyari ta'iyari hamatɨa 'axeikɨa mepɨtehekɨata kename Kakaɨyari tɨɨriyamama tehɨkɨ.
ROM 8:17 Xɨka teniwemamatɨni, tixaɨtɨ tahetsie pɨtinakeni. Tita Kakaɨyari mɨtatimini tahetsie pɨtinakeni, Kɨritsitutsie kemɨtinakenita, xɨkate hamatɨana tete'ukwine, hamatɨanatari witsite'anenetɨ temayeitɨarienikɨ.
ROM 8:18 'Ipaɨ nepɨtiku'eriwa, ketemɨtekwine hikɨ, mɨkɨ tixaɨtɨ katihɨkɨtɨme tepɨ'erieka kepauka temɨxeitsitɨarieni witsimɨti'ane 'uxa'atɨni timieme.
ROM 8:19 Naitɨ mɨtiunetɨarie pɨta'ikwewa Kakaɨyari niwemama mematsiɨkɨtɨ memakɨnekɨ, kwiwaxeiyamɨtɨ.
ROM 8:20 Tita mɨtiunetɨarie witsikemɨ'anekai kaneuyehɨani, mɨkɨ mɨpaɨ mɨtiyuwaɨriyakaikɨ mɨpaɨ pɨkatiuyɨ. Kemɨ'ane mɨpaɨ 'aneme meyeitɨa yamɨtiuyurikɨ pɨta putiuyɨ. Ta'ikwewatɨ xeikɨa yuri katini'erieka.
ROM 8:21 Tita mɨtiunetɨarie 'ayumieme pɨxɨnarieni, tita mɨtipɨniwe mɨkati'aitɨakakɨri, matsi Kakaɨyari niwemama witsimemɨ'anene wahepaɨ xɨnitɨ mayeitɨarienikɨ.
ROM 8:22 Mɨpaɨ tepɨtemate tinaitɨ mɨtiunetɨarie yaxeikɨa yunaitɨ mepa'aiwatɨka, hukame mɨtiukakukuine hepaɨ tiniwerɨmetɨ.
ROM 8:23 Mɨkɨ xeikɨa hawaikɨ, matsi tameta 'Iyari temexeiya tita 'umɨramietsie miemetɨme, tsiere tataɨta tekana'aiwatɨkani teta'ikwewatɨ Kakaɨyari niwemama temakɨnekɨ kepauka tawaiyari mɨxɨnarieni.
ROM 8:24 Mɨpaɨ yuri tete'erietɨ teta'ikwewatɨ teputawikweitsitɨarie. Peru xɨka 'ixeiya tita mɨtitakwewie, matsi pɨka'itakwewieri. ¿Keri titakwewieka tita mɨtixeiya?
ROM 8:25 Peru xɨka te'itakwewieka tita temɨkatexeiya, tekanita'ikwewani tete'uka'eniwatɨ.
ROM 8:26 Mɨpaɨrita yaxeikɨa 'Iyari pɨtatsiparewie ketemɨtewerarani. 'Atsitepɨkatemate tita temɨte'itawawirieni kemɨreuyewetse. Mɨkɨ 'Iyari matsi tahetsiemieme kanitawawiriwani Kakaɨyari, ha'aiwatɨ niukiyari kemɨkatixuawe.
ROM 8:27 Kemɨ'ane ta'iyari mɨta'inɨata, mɨkɨ katinimaika kemɨtiku'eriwa 'Iyari, mɨkɨ 'Iyari mɨtitawawiriwakɨ Kakaɨyari kemɨtinake, Kakaɨyari hetsiemieme memupatsie wahetsiemieme.
ROM 8:28 Tame mɨpaɨ tekatenimaika, kemɨ'ane Kakaɨyari memɨnaki'erie, mɨkɨ kaniwaparewieka, naime tikuyuitɨwatɨ para 'aixɨa memɨ'itɨarienikɨ mɨkɨ memuta'inierie, mɨkɨ kemɨtiyuriemɨkɨkaikɨ meripaitɨ.
ROM 8:29 Mɨkɨ meripaitɨ mɨwamaikai, mɨkɨ nu'aya hepaɨ me'aneneme pɨwarayeitɨamɨkɨkai meripaitɨ, 'iya yumɨireme 'iwamarixi wamatsika mayanikɨ.
ROM 8:30 Mɨkɨ meripaitɨ mɨya me'aneneme mɨwarayeitɨamɨkɨkai, mɨkɨ kaniwaruta'inieni. Mɨkɨ mɨwaruta'ini, heitserie kaniwarupitɨani. Mɨkɨ heitserie mɨwarupitɨa, witsime'aneneme kaniwarayeitɨani.
ROM 8:31 ¿Keri te'utiyuaneni xɨka mɨpaɨ 'aneni? Xɨka Kakaɨyari tatsinaki'erieka, ¿kepaikɨ pɨtatsi'uxiwe'erieka?
ROM 8:32 Kemɨ'ane yuniwe mɨka'utawikweitsitɨa, miyetua pɨta tanaime tahetsiemieme, mɨkɨ hamatɨata naime pɨtatimini.
ROM 8:33 ¿Kepaikɨ pɨwaxanetani mɨkɨ Kakaɨyari mɨwaranuyexei? Kakaɨyari kanihɨkɨtɨni kemɨ'ane heitserie mɨwarupitɨa.
ROM 8:34 ¿Kepaikɨri pɨwaranutaxɨrieni? Kɨritsitu Ketsutsi kanihɨkɨtɨni kemɨ'ane mumɨ, kemɨ'ane matsi manukuke, kemɨ'ane Kakaɨyari tserieta makaka, kemɨ'aneta tahetsiemieme mitawawiriwa.
ROM 8:35 ¿Kepaikɨ pɨtatsipata Kɨritsitu mɨkatatsinaki'eriekakɨ? Xɨka te'uximatɨarieka, xɨka tete'uka'eniwani, xɨka te'utaweiyarieni, xɨka teheuhaakakwikuni, xɨka teka'ukemarini, xɨka teyekweriwa'itɨarietɨweni meta xɨka tekwi'iwarɨmeni, mɨkɨ naitɨ pɨkayɨwe.
ROM 8:36 Kemɨre'uxa: «'Ahetsie temɨtewiyakɨ tepɨtakwikwiwa yuheyemekɨ, muxatsi memɨkwaiya wahepaɨ tepɨte'anuyehu memehapawa mehekwi'iwake».
ROM 8:37 Mɨyatɨtɨ naime, kwini mieme tekatene'iwani 'ikɨ tinaime 'iya mɨtatsinaki'erie yatatipitɨakaku.
ROM 8:38 Ne mɨpaɨ nepɨtinemate, tsepa temɨkwi, tsepa temayeneniere, tsepa niuki tuayamete, tsepa te'aitamete memɨyɨaka, tsepa tita hikɨ mɨtimieme, tsepa tita 'uxa'atɨni mɨtimieme, tsepa memɨtɨrɨkawi,
ROM 8:39 tsepa 'amautitewa, tsepa 'amaukatewa, tsepa kemɨtitita mɨtiunetɨarie, mɨkɨ pɨkayɨweni mɨtatsipatakɨ Kakaɨyari mɨkatatsinaki'eriekakɨ, Kɨritsitu Ketsutsi mɨtati'aitɨwame kemɨtatinaki'erie.
ROM 9:1 Yuri nepaine Kɨritsitu hetsie netiwiyatɨ. Nepɨkati'itawa, ne'iyari nehamatɨa yakatinihekɨatani 'Iyari Mɨtiyupata hetsie netiwiyakaku.
ROM 9:2 Mɨpaɨ nepaine, yemekɨ nepɨnehiwerie, ne'iyaritsie nepɨtikwine nekatihayewatɨ.
ROM 9:3 'Axanemɨ'itɨarienikɨ Kɨritsitu hetsie nekatiwiyatɨ nemayanikɨ, ne'iwama wahetsiemieme, mɨkɨ memɨnemarema kememɨte'utinunuiwa, mɨkɨ wahetsiemieme.
ROM 9:4 Mɨkɨ mekani'ixaheritsixitɨni. Mɨkɨ Kakaɨyari niwemama mepayeitɨarie, witsiti'aneme mepɨte'upitɨarie, tɨratute mepupitɨarie, 'inɨari niukiyari mepupitɨarie, Kakaɨyaritsie mieme 'uximayatsika mepexeiya, yamepɨte'utahɨawarie kememɨtemikienikekai.
ROM 9:5 Tapaapama mepɨwa'ukiyarima, watsatata kanimiemetɨni kemɨ'ane heitserie mupitɨarie Kɨritsitu hɨkɨtɨtɨ, kemɨtiunuiwaxɨ. Mɨkɨ naime ti'aitame Kakaɨyari kanihɨkɨtɨni. 'Aixɨa ketikuxaxatsiwani yuheyemekɨ. Mɨpaɨ xeikɨa pɨ'ane.
ROM 9:6 Perutsɨ Kakaɨyari niukieya pɨkayutexie. Yunaitɨ 'Ixaheritsie memɨyekɨ, mɨkɨ mepɨka'ixaheritsixi.
ROM 9:7 'Apɨrahami hetsie memɨyekɨkɨ xeikɨa, yunaitɨ mepɨkatɨɨriyamama. Matsi mɨpaɨ paine: «'Itsahaki hetsie memɨyekɨne, mɨkɨ 'aniwema mekanitaterɨwariekuni».
ROM 9:8 'Ipaɨ kani'aneni, tɨɨri waiyarieyatsie memɨyekɨ, mɨkɨ Kakaɨyari niwemama mepɨkahɨkɨ, matsi pɨta memutinunuiwaxɨ Kakaɨyari kemɨtitahɨawixɨ mɨtiminikekaitsie, mɨkɨtɨtɨ niwemama mepɨte'uterɨwarie.
ROM 9:9 Kemɨtiminikekai mɨpaɨ katinitahɨawe: «Hepaɨna pauka nepayeneni, 'ana Tsara yuniwe pexeiyaniri».
ROM 9:10 Yaxeikɨata 'ana Xewekatsie yamepɨte'inɨarikai tɨɨri, tapaapa 'Itsahaki muyuxewikai wapaapatɨkaku.
ROM 9:11 Mekatinunuiwawekaku 'akuxi, tita 'aixɨa mɨti'ane yatɨni 'axamɨti'ane yamepɨkateyuriewawekai 'akuxi para mɨtseiriyarienikɨ tita Kakaɨyari mɨtiyuriemɨkɨkai yatiwaranuyeteɨxɨka,
ROM 9:12 kemɨ'ane mɨwaruta'ini yatiyurienekaku, tewi kemɨtiyuruwakɨ pɨkatixaɨ. 'Ana Xeweka mɨpaɨ pɨtiutahɨawarie: «Matsikaya katini'uximayakamɨkɨ yumutatsie mieme».
ROM 9:13 Kemɨre'uxa: «Nepinaki'eriekai Kakuwu, 'Etsahu pɨta nepu'uxiekai».
ROM 9:14 Merikɨte, ¿kete'utiyuaneni? ¿Kakaɨyari kemɨkatiheitserie tiyuriene? Matsi pɨkatixaɨ.
ROM 9:15 Mɨpaɨri Muitsexi pɨtiutahɨawixɨ: «Nepinenimaya kemɨ'ane nemɨnenimayatamɨkɨ, nepi'ɨwiya kemɨ'ane nemɨ'ɨwiyamɨkɨ».
ROM 9:16 'Ayumieme tsepa xewitɨ yamɨtiyuwaɨriyakɨ yatɨni yamɨtiunanautsakɨ pɨka'ayumieme, Kakaɨyari mɨtiyukanenimayakɨ kanihɨkɨtɨni kemɨ'ane mɨpaɨ mɨtiyuriene.
ROM 9:17 'Utɨarika niukiyari Parahuni mɨpaɨ pɨtikɨhɨawe: «'Ayumieme nepɨmatsi'anukuketɨa, 'ahetsie nemɨtihekɨatanikɨ kenemɨtitɨrɨkaɨye, naitsarie kwiepa nemɨkuxaxatsiwanikɨ kemɨ'ane nemɨhɨkɨ».
ROM 9:18 'Ayumieme kaninenimayaka kemɨ'ane mɨnenimayatamɨkɨ, tse'ime kanayeitɨani kemɨ'ane tse'ime mayeitɨamɨkɨ.
ROM 9:19 Peru 'ekɨ mɨpaɨ pepɨnetikɨhɨaweni: «Merikɨte, ¿titayarikuta tahetsie rahɨpa 'akuxi? ¿Kepaikɨ pi'uxiwe'erieka tita mɨkɨ mɨtiyuriemɨkɨ?»
ROM 9:20 Neuxei: ¿'Ekɨtsɨari kepaikɨ pepɨhɨkɨ pemita'eiyakɨ Kakaɨyari? «¿Tita mɨtiutawewiya ketitahɨawiwe kemɨ'ane mita'iwewaxɨ: “¿Titayari mɨyane'aneme penetiutawewi?” 'utaitɨ?»
ROM 9:21 ¿Tamɨ 'iwewame heitserie karexeiya haxu hepaɨtsita, xeitapuriyarikɨ mɨtitiwewienikɨ xeime xari witsimɨtixeiyariekakɨ, xeimeta 'axamɨtixeiyariekakɨ?
ROM 9:22 Yaxeikɨatatsiere, Kakaɨyari matsiɨkɨme 'ayeitɨamɨtɨ kemɨtiha'a, meta tihekɨatamɨtɨ kemɨtitɨrɨkaɨyekɨ, pɨtiunewi waɨkawa tiuka'eniwatɨ mɨhekarienikɨ mɨ'ayumiemetɨkai hetsiemieme meta mɨka'unarienikɨ mɨha'aritsiekai hetsiemieme.
ROM 9:23 Mɨpaɨ pɨtiuyuri mɨtihekɨatanikɨ waɨkawamekɨ witsikemɨti'ane, witsi'aneme 'ayeitɨatɨ minenimaya, meripai mikuha'aritɨa witsi'anetɨ mayanikɨ.
ROM 9:24 Tametsɨ tekanihɨkɨtɨni. Pɨtatsi'uta'ini, huriyutsixi watsata xeikɨa pɨkatixaɨ, matsi memɨkahuriyutsixi watsatata pɨtatsi'uta'ini.
ROM 9:25 Kemaine 'Utseyaxi xapayaritsie: «Mɨkɨ memɨkaneteɨterimatɨkai, “neteɨterima” nepɨtiwaterɨwa. 'Iya mɨkanaki'eriwakai, “mɨnaki'eriwa” nepɨtiterɨwa».
ROM 9:26 «Hakewa mɨpaɨ memɨte'utahɨawarie: “Xeme xepɨkaneteɨterima”, mana “Kakaɨyari mayeniere niwemama” mepɨteterɨwarieni».
ROM 9:27 Kitsariyaxi mɨpaɨta katiniuhiwa 'Ixaheri hepaɨtsita: «Tsepanetɨ 'Ixaheri xiɨyarimama memɨyumɨire haramaratsie mieme xiekari hepaɨ memɨyupaɨme, yayupaɨmetɨ xeikɨa mekanitawikweitsitɨariekuni.
ROM 9:28 Heye'atɨatɨ kemɨtiwataxanetakekaikɨ, meta 'imexɨitɨatɨ Ti'aitame yakatiniyurimɨkɨ kwiepa».
ROM 9:29 Meripaita kemainekai Kitsariyaxi: «Ti'aitame Naimekɨmɨtɨrɨkaɨye hipame taxiɨyarima kawaruhayewake, hikɨ xɨari Tsuruma hepaɨ pɨraku'anenike, meta xɨari Kumuxa hepaɨ tepeuyewenike».
ROM 9:30 ¿Merikɨte, kete'utiyuaneni? Mɨkɨ memɨkahuriyutsixi memɨkayumexɨitɨakaikɨ heitserie memexeiyanikɨ me'ikuwaɨtɨwetɨ, mɨkɨ heitserie mekaniupitɨarieni. Heitserie mupitɨarienikɨ yuri ti'erietɨ nekanixatani.
ROM 9:31 'Ixaheritsixi pɨta memɨyumexɨitɨakai heitserie memexeiyanikɨ 'inɨari niukiyaritsie metewiyatɨ, mɨkɨ mepɨka'i'axixɨ.
ROM 9:32 ¿Titayariri? Yuri mepɨkate'eriekai, matsi kememɨteyuriekaikɨ mepɨyumexɨitɨakai, 'ayumieme mepɨka'i'axixɨ. Mepetiketamɨrixɨa «tete mɨwati'ɨkamɨratsie»,
ROM 9:33 kemɨre'uxa: «Neuxei Tsiyuni hetsie nepikaye tete mɨwati'ɨkamɨra, tete kɨmana memekaxɨrɨwe, peru kemɨ'ane yuri mɨti'erie hetsiena pɨkayutewiyani».
ROM 10:1 Ne'iwama, ne'iyarikɨ 'ipaɨ nepɨreixeiyanikeyu, 'ipaɨ nepɨtiwawirie Kakaɨyari mɨkɨ 'ixaheritsixi wahetsiemieme, memɨtawikweitsitɨarienikɨ.
ROM 10:2 Nekatinihekɨatani kwinimieme Kakaɨyari hetsiemieme kememɨteyumexɨitɨa, matsi 'aixɨa metemaitɨ mepɨkayumexɨitɨa.
ROM 10:3 'Atsimepɨkatemate heitserie kemɨtiyupitɨwa Kakaɨyari, yɨkɨmana pɨta mepɨtekuwautɨwe heitserie kememɨteyupitɨanikɨ. 'Ayumieme yamepɨkatekahu Kakaɨyari kemaine, heitserie mɨwapitɨanikɨ.
ROM 10:4 Kɨritsitu kanitaparitɨani 'inɨari niukiyari, yunaitɨ yuri memɨte'erie heitserie memɨpitɨarienikɨ.
ROM 10:5 Muitsexiri mɨpaɨ katiniu'utɨani, 'inɨari niukiyarikɨ heitserie kemɨrexeiya xatatɨ, mɨpaɨ 'utaitɨ: «Kemɨ'ane tewi mɨpaɨ mɨtiyurieni, mɨkɨ kanayenierekamɨkɨ kɨmana».
ROM 10:6 Peru yuri ti'erietɨ heitserie kemɨrexeiya, 'ipaɨ pɨta paine: «'A'iyaritsie mɨpaɨ pepɨkati'akɨhɨaweni: “¿Kepaikɨ taheima panutiyeiwe?” (Kɨritsitu manakawitɨnikɨ petiku'eriwatɨ),
ROM 10:7 yatɨni “¿Kepaikɨ meukatewatsie peukayeiwe?”» (Kɨritsitu manatiwitɨnikɨ mɨkite watsata petiku'eriwatɨ).
ROM 10:8 ¿Matsi kehaine? «Niukiyari kanehuraniri 'atenitsie meta 'a'iyaritsie». Tita temɨtekuxata yuri kemɨti'erie hepaɨtsita, mɨkɨ kanihɨkɨtɨni.
ROM 10:9 Mɨpaɨ paine: xɨka 'atenikɨ peti'ahekɨatɨaka Ketsutsi hetsie petiwiyatɨ Ti'aitame kemɨtihɨkɨ, xɨka 'a'iyarikɨ yuri peti'erieka kename Kakaɨyari henukuketɨa mɨkite watsata, pekanitawikweitsitɨariemɨkɨ.
ROM 10:10 Yu'iyarikɨ tewi yuri pɨti'erie heitserie mɨpitɨarienikɨ. Yutenikɨ pɨtiyuhekɨatɨa mɨtawikweitsitɨarienikɨ.
ROM 10:11 'Ipaɨ paine 'utɨarika xapayari: «Yunaitɨ hetsiena yuri memɨte'erie mepɨkayutetewiyani».
ROM 10:12 Huriyutsixi meta kɨriyekutsixi yɨkɨ mepɨka'anene. Yunaime Tiwa'aitɨwame kaniyuxewini, waɨkawa pɨtiwamikwa yunaitɨ memitahɨawe.
ROM 10:13 Karikɨ «yunaitɨ memitahɨawe Ti'aitame mepɨtawikweitsitɨarieni».
ROM 10:14 Merikɨte, ¿kemɨ'anetsie yuri memɨkate'uta'eri kerimete'itahɨaweni? ¿Kehepaɨri yuri meteta'erieni kemɨ'anetsie 'atsimemɨkatehetimaiwawe hepaɨtsitana? ¿Kehepaɨri meteheitimani xɨka 'umaweni kemɨ'ane mɨtiwakuxaxatɨwani?
ROM 10:15 ¿Kehepaɨ metekuxatani xɨka mekaheutanɨ'ariexɨani? Kemɨre'uxa: «Mɨkɨ memɨtekuxata kemɨkati'uximatɨarieka yu'iyaritsie, niuki 'aixɨa manuyɨne memukuxata, witsike'aneneni wa'ɨkate».
ROM 10:16 Matsi yunaitɨ yamepɨkatekakɨ niuki 'aixɨa manuyɨne kemaine. Kitsariyaxi mɨpaɨ paine: «Ti'aitame, ¿kepaikɨ yuri pɨtita'eriri tita mɨtiu'eni yatetekuxatakaku tame?»
ROM 10:17 Tita mɨtiu'eni mi'axixɨkɨ, 'ayumieme tewi yuri pɨtiuta'eri, mɨpaɨ katini'enani, tita mɨtikuxaxatsiwa Kɨritsitu hepaɨtsita mi'axixɨkɨ.
ROM 10:18 Matsitsɨ mɨpaɨ nepaine: ¿Kamɨtsɨ mekate'utaxatɨarie? Huu mepɨte'utaxatɨarie. «Naitsarie kwiepa peutayeixɨa waniuki, kwie manuniere paitɨ kaneta'axɨani waxatsika».
ROM 10:19 Merikɨte, mɨpaɨ nepaineta: ¿Kamɨtsɨ 'ixaheritsixi yamekatehetima? Merikɨtsɨ Muitsexi meri 'ipaɨ paine: «Xe'ɨtetsakame nepɨxe'ayeitɨani mɨkɨ nuiwari memɨkahɨkɨ xemɨwa'ɨtetsaiyanikɨ, xewahekame teɨteri 'atsimemɨkatemaiwawe nepɨxe'ayeitɨani».
ROM 10:20 'Arike Kitsariyaxi kamatɨ 'ipaɨ paine: «Mɨkɨ memɨkanetsikuwautɨwekai mepɨnetsi'utaxei, mɨkɨ nehepaɨtsita memɨkaku'iwawakai wahɨxie nematsiɨkɨtɨ nekanayuyeitɨani».
ROM 10:21 Matsi mɨpaɨta paine 'ixaheritsixi wahepaɨtsita: «Tukarikɨ nemamá nepeutatserakai teɨteri yamemɨkatekahu memɨ'uxiwa'a wahepa».
ROM 11:1 Merikɨtsɨ 'ayumieme 'ipaɨ nepaine: ¿Kakaɨyari tiwarutixani'eri yuteɨterima? Pɨkatixaɨtsietɨ. Netɨtɨ 'ixaheritsixi nekanihɨkɨtɨni. 'Apɨrahami hetsie nepɨyetɨa, Wenikamini nuiwarieyatsie nepɨmieme.
ROM 11:2 Kakaɨyari pɨkawarutixani'eri yuteɨterima meripaitɨ mɨwamaikai. Kamɨtsɨ ¿'atsixekatemate kemaine 'utɨarika xapayari 'Eriyaxi xatatɨ? Mɨkɨ kanitawawirieni Kakaɨyari 'ixaheritsixi wahepaɨtsita, mɨpaɨ 'utaitɨ:
ROM 11:3 «Ti'aitame, 'ahetsɨa miemete 'aniukamete mekaniwarukwini meta mawari taiyame 'ahetsɨa mieme mekaniuti'una. Ne xeikɨari nekaniuyeikani nexaɨtame, hikɨta ne mekaneniwautɨweni menetsimienike».
ROM 11:4 ¿Peru Kakaɨyari ketita'ei? Mɨpaɨ pɨtita'ei: «Nehetsiemieme 'atahuta miriyari nepuwatiyatsa teɨteri, memɨkakatunuma'uiwawe Wahari hɨxie».
ROM 11:5 Mɨpaɨri yaxeikɨa hikɨta mepɨyuhayewaxɨ hipatɨ memanayexeiyarie Kakaɨyari 'aixɨa kemɨtiuka'iyarikɨ.
ROM 11:6 Xɨka 'aixɨa mɨtiuka'iyarikɨ mehanayexeiyarieni, tixaɨtɨ memɨte'uyurikɨ mepɨka'anayexeiyarie. Metsɨ, 'aixɨa kemɨtiuka'iyari, xɨka tixaɨtɨ mete'uyurieka me'anayexeiyarienike, mɨkɨ pɨta 'aixɨa pɨkatiuka'iyarinikeyu. Xɨkate me'anayexeiyarienike tixaɨtɨ memɨte'uyurikɨ, 'aixɨa tiuka'iyaritɨ pɨkawaranayexeiyakeyu. Metsɨ, kememɨte'uyurikɨ, xɨka 'aixɨa tiuka'iyaritɨ waranayexeiyake, mɨkɨ pɨta tixaɨtɨ mepɨkateyurienikeyu.
ROM 11:7 ¿Keti'aneniri? 'Ixaheritsixi mepɨka'itaxei tita memɨtekuwautɨwekai. Mɨkɨ memanayexeiyarie pɨta mekanitaxeiya. Hipatɨ mɨkɨ metsetse'itɨ mekanakɨne,
ROM 11:8 kemɨre'uxa: «Kakaɨyari 'iyari mɨyɨ'ɨraxie kaniwarupitɨani, hɨxi tiwarupitɨata kɨmana memɨkaheunenierenikɨ, naka tiwarupitɨata kɨmana memɨkaheu'enanakakɨ, hikɨta yaxeikɨa».
ROM 11:9 Meta Rawiri mɨpaɨ paine: «Mexatsie kepauka memɨte'apika, 'ipari ke'ayani, winiyari ke'ayani wahetsiemieme, Meke'utiketamɨrixɨani muwa, 'amemɨte'apine hepaɨ mekete'epinirieni.
ROM 11:10 Wahɨxi ke'akɨpire memɨkaheunenierenikɨ, me'anakatututsitɨ meke'akɨne yuheyemekɨ».
ROM 11:11 Merikɨtsɨ mɨpaɨ nepaine, ¿Kamɨtsɨ mehetiketamɨrixɨaka mehekaxɨrieka yuheyemekɨ mekate'anuku'uiwawe? Pɨkatixaɨtsietɨ. Matsi mɨkɨ 'axamemɨte'uyurikɨ, mɨkɨ memɨkahuriyutsixi mepɨtawikweitsitɨarieni, huriyutsixi memɨ'ɨtetsanikɨ.
ROM 11:12 'Axamemɨte'uyurikɨ, kwiepa memɨtama waɨkawa kememɨte'upitɨarie, mɨkɨ memɨka'uyɨwekaxɨakɨ memɨkahuriyutsixi waɨkawa kememɨte'upitɨarie, matsi waɨkawa mekatenipitɨariekuni 'akuxi kepauka memaye'axɨani huriyutsixi.
ROM 11:13 Ne mɨpaɨ nepɨtixekɨhɨawe xeme xemɨkahuriyutsixi, ne kenemɨrenɨ'arie memɨkahuriyutsixi wahetsɨa, 'aixɨa nepaine nehɨritɨarika hepaɨtsita,
ROM 11:14 tsiparatsɨ xɨka neyɨweni nemɨwa'ɨtetsatɨanikɨ ne'iwamarixi, para mɨpaɨ nemɨtiwatawikweitsitɨanikɨ hipame mɨkɨ.
ROM 11:15 Mɨkɨ memɨxani'eriwakɨ, kwiepa memɨtama mekaniupatsieni 'aixɨa memɨtexeiyarienikɨ. ¿Matsi waɨkawa 'akuxi katiyɨni kepauka memɨtanaki'eriwatsie? kwiepa memɨtama mepanutaneniere mɨkite watsata.
ROM 11:16 Xɨka mexɨakame paa Kakaɨyaritsie mieme 'upatsieni, yaxeikɨata naitɨ paa yakatinipatsiemɨkɨ. Nanayari xɨka Kakaɨyaritsie mieme 'upatsieni, mamateyata kanipatsiemɨkɨ.
ROM 11:17 Hikɨ hipatɨ mamateya mekaneukumurixɨani, 'ekɨ huriwa yeuta mieme pehɨkɨtɨtɨ, watsata pekaneukuyerieni, hikɨri huriwa kɨyeyari nanayaritsie mieme hayari kemɨrakaka pe'ietɨ pekanayani wahepaɨ.
ROM 11:18 'Ayumieme mamateya pepɨkawatawe'erieka. Xɨkari pewatawe'erieka, yaketinemaika 'ekɨ nanayari pepɨka'ayenieritɨa, nanayari pɨta pɨmetsi'ayenieritɨa 'ekɨ.
ROM 11:19 'Ekɨri mɨpaɨ pepɨtayɨni: «Mamateya peukumurariexɨa nemeukuyerienikɨ ne».
ROM 11:20 Merikɨte. Peru mɨkɨ yuri memɨkate'eriekaikɨ, 'ayumieme mepeukumurariexɨa. 'Ekɨtsɨ yuri pemɨti'eriekɨ pepeukuyerie. Pepɨkayuta'ɨreni kepemɨti'amate, matsi keneumaka.
ROM 11:21 Kakaɨyari xɨkari mamateya yɨkɨmana meukunexɨa kawaruhayewa nanayaritsie memɨtewiyanikɨ, tietɨta 'ekɨ mɨkameniuhayewaxɨ mɨkɨ nanayaritsie pemɨtiwiyanikɨ.
ROM 11:22 'Ayumieme kene'a'ɨwiya Kakaɨyari 'aixɨa kemɨtiuka'iyarikɨ meta kemɨtitse'ikɨ: Kanitse'ikaitɨni memakaxɨri wahepaɨtsita, 'aixɨa katiniuka'iyarini 'ahepaɨtsita xɨka pe'ahayewani 'aixɨa tiuka'iyarikaku Kakaɨyari. Me xɨka katixaɨtɨni, pekananuwitekiemɨkɨ 'ekɨta.
ROM 11:23 Mɨkɨrita xɨka yuri mekate'erietɨ mekayuhayewani, mɨkɨ mepeukuyatsarieni. Kakaɨyari tɨrɨkariya kanexeiyani tawari mɨwareukuyatsakɨ.
ROM 11:24 'Ekɨri huriwa yeuta mieme mutinuiwaxɨtsie pemiemetɨtɨ pekananuwitekieni, harawerita mieme huriwa hetsie pekaneukuyerieni kepemɨkatiunuiwaxɨ. Matsi yemekɨ mɨkɨ mamateya mɨkɨ huriwatsie memɨmiemete mekaneukuyatsariekuni yɨkɨyeyaritsie.
ROM 11:25 Ne'iwama, yakɨ xeikɨa kapa temaiwawemete xeyu'eriekakɨ, pɨkanetsinakenikeyu xɨka xekaheitimanike 'ikɨ niuki muti'awietsiekai. Hipatɨ xeikɨa 'ixaheritsixi metsetse'itɨ mekanakɨne, mexi yunaitɨ memɨkahuriyutsixi meka'aye'axɨawawe.
ROM 11:26 Mɨpaɨ tiyɨyu, yunaitɨ 'ixaheritsixi mekanitawikweitsitɨariekuni, kemɨre'uxa: «Tiyuwikweitsitɨwame Tsiyunitsie kaniyeyeimɨkɨ, Kakuwu 'axamɨtiyurienekɨ kanipatamɨkɨ.
ROM 11:27 'Ipaɨ nekatiniwawewiriemɨkɨ tɨratu kepauka nemɨwanawairieni tita 'axamemɨte'uyuri».
ROM 11:28 Niuki 'aixɨa manuyɨne kemɨtikuxaxatsiwa, mɨkɨ mekaniu'uxiwa'ani, xeme 'aixɨa xemɨ'itɨarienikɨ. Peru kememɨte'anayexeiyarie, Kakaɨyari pɨwanaki'erie wapaapama mɨwanaki'eriekaikɨ.
ROM 11:29 Kakaɨyari pɨkayupata kemɨtiwamikwa meta kemɨtiwa'inie.
ROM 11:30 Xemetsɨ meripaitɨ keyaxemɨkatekahukai Kakaɨyari hetsie, peru hikɨ kexemɨtenenimayatsie mexi mɨkɨ yamekatekahu,
ROM 11:31 yaxeikɨa mɨkɨ hikɨ yamepɨkatekahu mexi xenenimayatsie xeme, mɨkɨrita hikɨrixɨa memɨnenimayatsiekakɨ.
ROM 11:32 Kakaɨyari yunaime kaniwayetuani yamemɨkatekahunikɨ, yunaimeta mɨwanenimayakakɨ.
ROM 11:33 Ketimariwe, Kakaɨyari waɨkawa kemɨrexeiya, kemɨtimaiwe, waɨkawa kemɨtimate. Ketiyutexie tewi 'i'inɨatatɨ kemɨtiyɨkɨhɨawe yamɨtiyurienikɨ Kakaɨyari, yatɨni huyeteya metimani pɨkayɨwe.
ROM 11:34 «¿Kepaikɨ pɨtimate Ti'aitame kemɨtiyumate, yatɨni kepaikɨ 'i'ɨxatsitɨwameya payeiwe?»
ROM 11:35 «¿Kepaikɨ Kakaɨyari pɨtimikwa meri, Kakaɨyari mɨrekapitɨanikɨta?»
ROM 11:36 Naitɨ hetsɨana katinayeneikani, 'akatiniuweni mɨkɨ tikuyuitɨwakaku, meta hetsiena katinimiemetɨni. Mɨkɨ 'aixɨa ketikuxaxatsiwani yuheyemekɨ. Mɨpaɨ xeikɨa kani'aneni.
ROM 12:1 'Ayumieme, ne'iwama, Kakaɨyari mɨtiyukanenimayakɨ, mɨpaɨ nekatinixewawirieka, xemiyetuanikɨ yuwaiyari mawari mayanikɨ mayeniere, mɨpatsie, minake Kakaɨyari. Mɨkɨ 'uximayatsikakɨ xekaneyexeiyakakuni 'iyaritsie mɨmiemekɨ.
ROM 12:2 Mɨkɨ hikɨ kwiepa memɨtama xepɨkawa'ɨkeni, matsi yɨkɨ xe'anenetɨ xekenakɨni xetihehekwareme kexemɨteku'eriwa. Mɨpaɨ xeteyurietɨ heitseriemekɨ xekaneitimaikuni tita mɨtinake Kakaɨyari, tita 'aixɨa mɨti'ane, titakɨ mɨtinaki'a meta naimekɨ 'aye'atɨ.
ROM 12:3 Kakaɨyari 'aixɨa mɨtiuka'iyarikɨ nehetsiemieme, 'ayumieme mɨpaɨ nepɨtixekɨhɨawe yuxexuitɨ yuhetsɨa xemetitei, xepɨka'anuyehaitɨrɨweni yaxeteyɨkɨhɨawetɨ yuhepaɨtsita kemɨkareuyewetse yaxemɨteyɨkɨhɨawenikɨ. Matsi yaxeketeneyɨkɨhɨaweni para 'aixɨa xemɨteyumaikakɨ pɨta, yuxexuitɨ Kakaɨyari kemɨtixe'u'inɨatsiri yuri xemɨte'eriekakɨ.
ROM 12:4 Tawaiyari kaniyuxewiriyani, peru hetsiena mɨtimieme katinimɨireni. Xexuitɨ yɨkɨ pɨti'ayumiemete.
ROM 12:5 Tameta temɨtamɨire, xeiwaiyari tekanihɨkɨtɨni Kɨritsitu hetsie tetewiyatɨ. 'Axeikɨa taxexuitɨ hetsiena tekateniwiyani.
ROM 12:6 Yɨkɨ tekateniumikiwani, Kakaɨyari 'aixɨa kemɨtiuka'iyarikɨ taxexuime tahetsiemieme. Xɨka mɨpaɨ tete'umikieni texaxatamete temakɨnekɨ, kepaɨmemekɨ yuri ketemɨte'erie yatepɨtekuxata.
ROM 12:7 Xɨka teteparewiwametetɨni, 'aixɨa tepɨtewaparewieka, xɨka tete'ɨkitametetɨni, 'aixɨa tepɨte'ɨkitani,
ROM 12:8 xɨka tetetutuikametetɨni, tepɨwatuikani. Kemɨ'ane mɨtiwamikwa, 'aixɨa 'iyarikɨ ketiwamikwani, kemɨ'ane mɨti'aita, yapɨtiyumexɨitɨa, kemɨ'ane mɨwanenimaya hipame, yutemawietɨ yaketiyurieneni.
ROM 12:9 Yakɨ xeikɨa xekayɨatɨ xeketeneyukanaki'erieka. Xe'ixeɨmatɨ tita 'axamɨti'ane, tita 'aixɨa mɨti'anetsie xeketenewiyani.
ROM 12:10 Kexemɨtewanaki'erie yu'iwamarixi, yu'iyarikɨ xekeniwahiwe'erieka. Yuxexuitɨ matsi 'aixɨa xeketeneyuxeiyani meta 'aixɨa xeketenayɨhɨaweni.
ROM 12:11 Xepɨkayɨ'ɨraraxieka kexemɨteyumexɨitɨa. 'Aixɨa 'iyarikɨ xekeneyuwaɨriyani. Xeketene'uximayaka Ti'aitame hetsiemieme.
ROM 12:12 Yuri kexemɨte'erie xeta'ikwewatɨ, xekeneyutemamawieka. Kexemɨte'uximatɨarie, xeketeneuka'eniwani. Kexemɨteyunenewie, xepɨkatehayewani.
ROM 12:13 Kakaɨyari teɨterimama kememɨteheiyehɨwa, xekeniwaparewieka. 'Aixɨa 'anemekɨ xekeniwapitɨaka memɨxe'iwata.
ROM 12:14 'Aixɨa xekeneutiyuaneni mɨkɨ memɨxe'uweiya wahepaɨtsita 'aixɨa memɨ'itɨarienikɨ. 'Aixɨa xekeneutiyuaneni, tixaɨ para 'axamemɨ'itɨarienikɨ.
ROM 12:15 Memɨyutemamawie wahamatɨa xekeneyutemamawieka. Memutitsuana wahamatɨa xekeneutitsuanani.
ROM 12:16 Yaxeikɨa xeketeneyɨkɨhɨaweni yuhepaɨtsita yuxexuitɨ. Xepɨka'anuyehaitɨrɨweni kexemɨteyumate, matsi tixaɨtɨ memɨkatehɨkɨ wahamatɨa xekeneu'uwani. Yakɨ xeikɨa xeteku'eriwatɨ, xetemaiwawemete xepɨkayu'erieka.
ROM 12:17 Nixeime 'axaxepɨkate'apinirieka mɨkɨ 'axaxe'uyurieku. Xeketenekuwawa 'aixɨa xemɨteyuriekakɨ yunaime teɨteri wahɨxie.
ROM 12:18 Xɨka xeyɨwaweni, kexemɨteyurie xeme, kayuwatɨ xeketeneteni yunaime teɨteri wahamatɨa.
ROM 12:19 Nenaki'erima, yuhetsiemieme xepɨkayukwitɨweni, matsi xeketenehayewani Kakaɨyari pɨta mɨwahekanikɨ. Mɨpaɨ pɨre'uxa: «Ne xehetsiemieme nepɨnemieneni, 'anepɨrapika ne,» kanaineni Ti'aitame.
ROM 12:20 Matsitsɨ, «Kemɨ'ane mɨmatsi'aye'unie xɨka heuhaakamɨkɨni, ketineumikwa, xɨka heuharimɨkɨni, keneuharitɨa. Mɨpaɨ petiyurienetɨ pekanihiweritɨamɨkɨ mɨpaɨ mɨtiyumaikakɨ kemɨ'ane mutewiyatsitɨarie hepaɨ».
ROM 12:21 Xepɨka'ipitɨaka tita 'axamɨti'ane mɨxeha'iwanikɨ, matsi tita 'axamɨti'ane xekena'iwani, 'aixɨa xeteyurietɨ pɨta.
ROM 13:1 Yunaitɨ yameketekahuni kememɨte'aita mɨkɨ heitserie memexeiya memɨte'aitanikɨ, mɨkɨ waheima memukayatsarie. Tewi heitserie pɨkahexeiyanikeyu mɨti'aitanikɨ, xɨka Kakaɨyari ka'ipitɨanike. Mɨkɨ heitserie memexeiya hikɨ memɨte'aitanikɨ mekateni'aitɨarieka, Kakaɨyari tiwa'aitɨakaku.
ROM 13:2 'Ayumieme kemɨ'ane meye'unie kwiepa ti'aitame, mɨkɨ kaneye'unieka tita Kakaɨyari mɨtiuta'aitaxɨ. Mɨkɨ memeye'unie yɨkɨmana mekananuyutaxɨrikuni.
ROM 13:3 'Itsɨkate mepɨkahɨkɨ kemɨ'ane 'aixɨa mɨtiyuriene memɨmariutanikɨ, matsi kemɨ'ane 'axamɨtiyuriene pɨta memɨmariutanikɨ mepɨ'ayumiemete. ¿Pereuyeimɨkɨ peka'imakatɨ kemɨ'ane heitserie mexeiya ti'aitakaku? Merikɨte, 'aixɨa ketineyurieneni. Mɨkɨri 'aixɨa paineni 'ahepaɨtsita.
ROM 13:4 Kakaɨyari parewiwameya kanihɨkɨtɨni 'aixɨa pemɨ'itɨarienikɨ. Mexɨka 'axapetiyurieneni, keneumaka. Yakɨ pɨkahekwe'e 'ixipara. Kakaɨyari parewiwameya kanihɨkɨtɨni haxɨakɨ mɨrepinirienikɨ kemɨ'ane 'axamɨtiyuriene.
ROM 13:5 'Ayumieme peuyewetse yamɨtikamienikɨ mɨkɨ kemɨti'aita, pemɨkatiuka'eniwanikɨ xeikɨa pɨkatixaɨ, matsi yu'iyaritsie 'aixɨa mɨtiyumaikakɨta pɨta.
ROM 13:6 'Ayumiemerita xepɨteyutua xemɨxɨxɨninikɨ. Mɨkɨ Kakaɨyari parewiwametemama mekanihɨkɨtɨni, mɨkɨkɨ mekani'ayumiemetetɨni.
ROM 13:7 Xeketeneyutuaka xexuime hetsiemieme kemɨti'ayumiemekɨ. Xekene'ɨitɨa kemɨ'ane meuyewetse xemi'ɨitɨanikɨ xemɨxɨxɨninikɨ. Xekene'ɨitɨa kemɨ'ane meuyewetse kuwiyexinu tuminieya xemi'ɨitɨanikɨ. 'Aixɨa xeketenexeiyani kemɨ'ane meuyewetse 'aixɨa xemɨte'ixeiyanikɨ. 'Aixɨa xeketenahɨaweni kemɨ'ane meuyewetse 'aixɨa xemɨtehehɨawenikɨ.
ROM 13:8 Xeime xepɨkate'apinirieka. Peuyewetse xeikɨa xemɨyunaki'eriekakɨ pɨta. Kemɨ'ane minaki'erie xeime, mɨkɨ kaneye'atɨaniri 'inɨari niukiyari.
ROM 13:9 Mɨkɨ niuki: «Xeime 'ɨyaya pepɨkakumaɨwani», «Pepɨkati'amemiwani», «Pepɨkatinawayani», «Peti'itawatɨ pepɨkatihekɨatani», «Pepɨkati'akahiwe'erieka», xewitɨ 'aitsika xɨka xuawenita, mɨkɨ naitɨ kaniyutaxewireni 'ikɨ niukikɨ: «'Ahepaɨ tewi kenenaki'erieka kepemɨti'anaki'erie 'ekɨ».
ROM 13:10 Xɨka 'inaki'erieka yuhepaɨ tewi, pɨka'i'uximatɨa. 'Ayumieme naki'eriya kaneye'atɨwani 'inɨari niukiyari.
ROM 13:11 Mɨkɨ meta, xekanimaikari 'ikɨ tukari. Hikɨrixɨa kanaye'aniri xemanutanenierekɨ xekutsutɨ. Hikɨ kanehuraniri temɨtawikweitsitɨarieni, kepauka yuri temɨte'uta'eri pɨkahehurakai hikɨ hepaɨ.
ROM 13:12 Tɨkari pɨtixɨxime, tukari kanehuraniri. Hikɨ 'ayumieme teke'iku'eirieni tita teɨteri memɨteyurie yɨwipa timieme. Kuya kemarieya teke'anakatɨkɨni hekɨaripa mieme.
ROM 13:13 'Aixɨa 'anemekɨ teke'u'uwani hekɨaripa memu'uwa wahepaɨ teyɨatɨ, teka'ixɨaratɨwetɨ, tekatarɨwetɨ, hipame tekawakumaɨwatɨ, tekarukutsixitɨtɨ, tekaheta'eririyatɨ meta teka'ɨtetsatɨ.
ROM 13:14 Matsi xekenanakatɨkɨni kemɨ'ane Ti'aitame Ketsutsi Kɨritsitu mɨhɨkɨ. Xepɨkayuha'aritɨaka yaxemɨteyuriekakɨ kememɨte'ukahiwe'erie teɨteri wahepaɨ xete'u'iyaritɨ.
ROM 14:1 Xekeneutanaki'erie kemɨ'ane mɨwerani yuri kemɨti'erie, peru niuki xemɨxɨatɨakakɨ kemɨtiku'eriwa hepaɨtsita pɨkatixaɨ.
ROM 14:2 Xewitɨ yuri katini'erieka kename yɨwe naime mɨtikwakakɨ, xewitɨta mɨwerani titsitsiɨrawime xeikɨa pɨtikwa'a.
ROM 14:3 Kemɨ'ane naime mɨtikwa'a pɨka'itawe'erieka kemɨ'ane naime mɨkatikwa'a. Kemɨ'aneta naime mɨkatikwa'a pɨka'iniukimaka kemɨ'ane naime mɨtikwa'a, Kakaɨyari yunaime mɨwarutanaki'erikɨ.
ROM 14:4 ¿'Ekɨtsɨ kemɨ'ane pepɨhɨkɨ peminiukimanikɨ kemɨ'ane xeimetsie mieme mɨti'uximaya? Yukutsiyari hɨrɨpa 'axɨka'uweni yatɨni xɨka 'atiweni. Matsi 'apuwenikeyu. Kutsiyarieya tɨrɨkariya mexeiya 'amitaketɨanikɨ.
ROM 14:5 Mɨkɨ meta, xewitɨ tukarite yɨkɨ 'aneneme kani'erieka, xewitɨta naitɨ tukari yaxeikɨa 'aneneme kani'erieka. Yuxexuitɨ yu'iyaritsie heitseriemekɨ mɨpaɨ meketeyumaika.
ROM 14:6 Kemɨ'ane tukari waɨkawa meuyewetse ma'eriwa, Ti'aitame hetsiemieme yɨanetɨ kana'eriwani. Kemɨ'ane mɨtikwa'a, Ti'aitame hetsiemieme yɨanetɨ katinikwaka, pamɨpariyutsi Kakaɨyari kanipitɨaka. Kemɨ'ane mɨkatikwa'a, mɨkɨta Ti'aitame hetsiemieme yɨanetɨ pɨkatikwa'a, pamɨpariyutsi Kakaɨyari kanipitɨaka.
ROM 14:7 Xewitɨ tame yuhetsiemieme xeikɨa pɨka'ayeniere, yuhetsiemieme xeikɨa pɨkamɨni.
ROM 14:8 Xɨka te'ayeneniereni, Ti'aitame hetsiemieme tekanayeneniereni. Xɨka te'ukwini, Ti'aitame hetsiemieme tekanikwikuni. 'Ayumieme tsepa temayeneniere yatɨni tsepa temukwi, Ti'aitame hetsɨa tekanimiemetetɨni.
ROM 14:9 'Ayumiemeta Kɨritsitu kaniumɨni meta kananutaniere, mɨkɨ memukwi meta memayeneniere tiwa'aitɨwame mayanikɨ.
ROM 14:10 ¿'Ekɨri titayari petiniukima 'a'iwa? ¿'Ekɨtari, titayari petitawe'erie 'a'iwa? Tanaitɨ Kakaɨyari 'uwenieya hɨxie tekaniuti'uikuni.
ROM 14:11 Mɨpaɨ pɨre'uxa: «Ne nekanayeniereni ―kanaineni Ti'aitame―, nehɨxie yunaitɨ mepɨkatunuma'uni, meta yunaitɨ yutetakɨ 'aixɨa Kakaɨyari mekatenihekɨatakakuni».
ROM 14:12 Hikɨ 'ayumieme taxexuitɨ tahetsiemieme tepɨtiniuni Kakaɨyari hɨxie.
ROM 14:13 'Ayumieme tepɨkataniukimatɨweni. Matsi 'ipaɨ pɨta xeketeneyumaika, xemɨkaheikahɨanikɨ titatsie mɨtitiketamɨre xe'iwa, meta titakɨ mɨratiweni.
ROM 14:14 'Ipaɨ nepɨtimate, Ti'aitame Ketsutsi hetsie netiwiyatɨ 'ipaɨ yuri nepɨti'erie, tixaɨtɨ xɨka kati'itiyaka, yɨkɨmana mɨpaɨ pɨka'ane. Matsi xeikɨa, kemɨ'ane ka'itiyakame mɨ'erie, mɨkɨ hetsiemieme pɨka'itiya.
ROM 14:15 Xɨka 'a'iwa 'uheiweritɨarieni 'a'ikwaikɨ, 'ekɨ pe'inaki'erietɨ pepɨkayɨane. 'A'ikwaikɨ pepɨka'ika'unani kemɨ'ane hetsiemieme Kɨritsitu mumɨ.
ROM 14:16 Tita xehetsiemieme 'aixɨa mɨti'ane, xepɨka'ipitɨaka 'axamɨtikuxaxatsiwanikɨ.
ROM 14:17 Kakaɨyari 'i'aitɨakaku xɨka tewi 'a'uyeikani, tsepa mɨtikwa'a tsepa mɨranuye'e, heitserie kaniupitɨarieni, yu'iyaritsie pɨka'uximatɨarie, kaniyutemawieka 'Iyari Mɨtiyupata hetsie tiwiyatɨ.
ROM 14:18 Kemɨ'ane mɨpaɨ tiyurienetɨ mɨti'uximaya Kɨritsitu hetsiemieme, Kakaɨyari kaninaki'akamɨkɨ mɨkɨ hepaɨtsita, teɨterita mekaneitimaikuni 'aixɨa kemɨtiyuriene.
ROM 14:19 'Ayumieme tame tekanitamexɨitɨaka kɨmana ta'iyaritsie temɨka'uximatɨariekakɨ, kɨmana 'axeikɨa temɨtatseiriyanikɨ tanaitɨ.
ROM 14:20 'Ikwaikɨ pepɨka'ika'unani tita Kakaɨyari mɨtiuyuri. Naitɨri katini'itiyaka, peru 'axapɨyɨni xɨka tewi tikwatɨ 'itiketamɨra xeime.
ROM 14:21 'Aixɨa pɨyɨnikeyu matsi xɨka wai pekakwa'anike xɨka winu peka'anuye'enike, xɨka tixaɨtɨ pekatiyurienenike kɨmana 'a'iwa matiwautsenikɨ mɨtiketamɨrekɨ mɨtaweranarekɨ.
ROM 14:22 Yuri kepemɨti'erie, 'akɨmana yaketineku'eriwani Kakaɨyari hɨxie. Kaniyutemawieka kemɨ'ane yuhetsie mɨkarahɨpa mɨpaɨ 'aixɨa 'aneme 'erietɨ.
ROM 14:23 Kemɨ'ane muyuxamurie yɨkɨ tiku'eriwatɨ, mɨkɨ tita mɨtikwa'a hepaɨtsita kananutahɨiyamɨkɨ, yuri ti'erietɨ mɨkayɨanekɨ. Naime mɨtiyurienekɨ yuri kemɨkati'erie, 'axakatiniyurieneni.
ROM 15:1 Kaneuyewekani tame temɨyɨwawemete teminewienikɨ titakɨ memɨkateyɨwawe mɨkɨ memɨwerarani. Taxaɨtame xeikɨa temɨnaki'akakɨ tepɨkayɨaka.
ROM 15:2 Taxexuitɨ tekeyɨaka tahepaɨ tewi pɨta mɨnaki'akakɨ, 'aixɨa mɨ'itɨarienikɨ mɨtseiriyarienikɨ.
ROM 15:3 Kɨritsitu yuxaɨtame xeikɨa mɨnaki'akakɨ pɨkayɨanekai, matsi kemɨre'uxa: «Nehetsie xeikɨa katininakeni memɨmatsi'aye'unie watierika».
ROM 15:4 Naitɨ meripaitɨ mɨtiuti'utɨarie, temɨteti'ɨkitɨarienikɨ katiniuti'utɨarieni, para tete'uka'eniwatɨ 'utɨarika xapayari tatsinɨtɨakaku yuri temɨte'eriekakɨ teta'ikwewatɨ.
ROM 15:5 Mɨkɨ Kakaɨyari mɨpaɨ mɨtatikupitɨwa temɨte'uka'eniwanikɨ temɨnɨtɨarienikɨ, mɨkɨ kexepitɨaka yaxeikɨa xemɨteyumaikakɨ yunaitɨ, Kɨritsitu Ketsutsi xe'ɨketɨ,
ROM 15:6 'axeikɨa xeitetayarikɨ xe'utiniutɨ 'aixɨa xemutiyuanenikɨ kemɨ'ane Tati'aitɨwame Ketsutsi Kɨritsitu mɨkakaɨyarieya mɨ'ukiyarieya hepaɨtsita.
ROM 15:7 'Ayumieme xekeneyutanaki'eri yunaitɨ, Kɨritsitu mɨxe'utanaki'eri hepaɨ, Kakaɨyari 'aixɨa mɨtikɨhɨawarɨwanikɨ.
ROM 15:8 'Ipaɨ nepaine, Kɨritsitu mɨkɨ xitekiya 'inɨariyari memexeiya waparewiwame kanayani, matsiɨkɨme meyeitɨanikɨ yuri kemaine Kakaɨyari, mitatseiriyakɨta meripaitɨ tatutsima kemɨtiwarutahɨawixɨ kename metemikienikekai,
ROM 15:9 mɨkɨta memɨkahuriyutsixi 'aixɨa memutiyuanenikɨ Kakaɨyari hepaɨtsita muwanenimayakɨ, kemɨre'uxa: «'Ayumieme ne 'aixɨa nepaine 'ahepaɨtsita nuiwarite watsata, meta nɨawari 'ahetsiemieme nepɨtikwika kepemɨtitewakɨ».
ROM 15:10 Tawari mɨpaɨ paine: «Nuiwarite xekeneyutemamawieka Kakaɨyari teɨterimama wahamatɨa».
ROM 15:11 Tawarita: «Nuiwarite yunaitɨ kwiepa xemɨtama, Ti'aitame 'aixɨa xeketenahɨaweni. Yunaitɨ teɨteri kwikari hetsiena mieme xekeneutikwikani».
ROM 15:12 Tawari Kitsariyaxi mɨpaɨ paine: «'Itsahi nanarieya kanetiyɨramɨkɨ, mɨkɨ kananukukemɨkɨ nuiwarite mɨtiwata'aitɨanikɨ, hetsiena teɨteri meta'ikwewatɨ mekanakɨnikuni».
ROM 15:13 Kakaɨyari mɨtiyupitɨwa tita xemɨtetakwewie yuri xete'erietɨ, mɨkɨ kexehɨniyani naimekɨ xemɨyutemamawiekakɨ yu'iyaritsie xemɨka'uximatɨariekakɨ mexi yuri xete'erie, matsi waɨkawa yuri xemɨte'eriekakɨ xeta'ikwewatɨ, 'Iyari Mɨtiyupata xetɨrɨkariyakaku.
ROM 15:14 Neri yuri nepɨti'erie ne'iwama xehepaɨtsita, kename yɨkɨmana xehɨpɨne 'aixɨa xeteyurietɨ, kename naime xetemate, kename xeyɨwawe xemɨyu'imaiyanikɨ.
ROM 15:15 Hipame xapayaritetsie nekweriwa'anetɨ nepɨtixe'uta'utɨiri, tawari nexehaye'eritɨwatɨ hepaɨtsitana, Kakaɨyari 'aixɨa tiuka'iyaritɨ mɨpaɨ mɨnetiumikɨ,
ROM 15:16 Kɨritsitu Ketsutsi parewiwameya nemayanikɨ memɨkahuriyutsixi wahetsiemieme, mawari wewiwame hepaɨ neti'uximayatɨ Kakaɨyari niukieya 'aixɨa manuyɨne hetsiemieme, mɨkɨ memɨkahuriyutsixi mawari memakɨnekɨ memɨtanaki'eriwakɨ, Kakaɨyari hetsiemieme memɨpatsienikɨ 'Iyari Mɨtiyupata yatiwapatakaku.
ROM 15:17 Hikɨtsɨri Kɨritsitu Ketsutsi hetsie netiwiyatɨ nekaniyɨweni 'aixɨa nemɨtinekɨhɨawenikɨ nehepaɨtsita, tita Kakaɨyari mɨtiyuriene nexatatɨ.
ROM 15:18 Nepɨma tixaɨtɨ nemɨtikuxatanikɨ, tita Kɨritsitu mɨtiuyuri yanetiyurienekaku ne mɨkɨ xeikɨa nepɨkuxatani. Yanetiyurienekaku, mɨkɨ memɨkahuriyutsixi yametekahutɨ mekanakɨne, ne'utaniukakaku meta neti'uximayakaku,
ROM 15:19 tɨrɨkariya nehexeiyakaku 'inɨarite mamariwawemekɨ mɨtiyɨnikɨ, tɨrɨkariya nehexeiyakaku Kakaɨyari 'Iyarieya hetsɨa miemekɨ. Kerutsareme neheyeyaka 'Iririku paitɨ neheuyeyuneka nekanaye'ani yemekɨ netikuxatatɨ niuki 'aixɨa manuyɨne Kɨritsitu hepaɨtsita,
ROM 15:20 'ipaɨ netinemexɨitɨatɨ, niuki 'aixɨa manuyɨne nemukuxatanikɨ hakewa kemɨ'ane Kɨritsitu mɨhɨkɨ mɨkahetaxatsiewetsie xeikɨa, kapa ne xeime tenarieya heima ne'anukiinikɨ.
ROM 15:21 Matsi mɨpaɨ kemɨre'uxa: «Mɨkɨ 'atsimemɨkate'utahɨawarie hepaɨtsitana, mɨkɨ mekanixeiyakuni, hepaɨtsitana memɨka'u'enana mekaneitimaikuni».
ROM 15:22 'Ayumieme mɨixa nepukunuitɨarie nemɨkaxe'iwatamiekɨ.
ROM 15:23 Hikɨri 'uwa pumaweri hakewa nemɨre'uximayaka. Mɨixa wiyari waɨkawa nepeuyeimɨkɨ nemɨxe'iwatamiekɨ
ROM 15:24 kepauka 'Itsipaniya nemɨmietsie. Ne'uyemietɨ nepɨxexeiyamiekaku. Xemeta mana xemɨnetsiparewienikɨ nemeta'anikɨ, yapaɨmexɨa 'etsiwa xehetsɨa netemawieritɨarieyu.
ROM 15:25 Matsi hikɨ Kerutsareme nepɨyemie parewiya newayetuirienike Kakaɨyari teɨterimama.
ROM 15:26 Matseruniyatari 'akaiyatari mekaniyuwaɨriya 'axeikɨa tixaɨtɨ memɨtewaminikɨ mɨkɨ tixaɨtɨ memɨkateheuxeiya Kakaɨyari teɨterimama Kerutsareme memetitei.
ROM 15:27 Mɨpaɨ mekateniyuwaɨriyani, kaneuyewekata mɨpaɨ memɨtewarapinirienikɨ. Memɨkahuriyutsixi mɨkɨ wahepaɨ meheixeiyatɨ memakɨkɨ 'Iyaritsie timieme. Peuyewetse mɨkɨtari memɨwaparewienikɨ wawaiyaritsie timieme hepaɨtsita.
ROM 15:28 'Ayumieme 'ikɨ ne'aye'atɨame, 'ikɨ wa'imikieri newayetuirieme, nekanayeyeimɨkɨ, xehetsɨa nekanekuyeimɨkɨ 'Itsipaniya nemeta'anikɨ.
ROM 15:29 Xehetsɨa kepauka nemeta'ani, nepɨtimate nemunuani nehɨnetɨ niuki Kɨritsitu hepaɨtsita 'aixɨa manuyɨne hetsie timiemekɨ 'aixɨa xemɨ'itɨarienikɨ.
ROM 15:30 Ketsutsi Kɨritsitu mɨtati'aitɨwamekɨ, 'Iyari mɨtatsipitɨakɨ temɨtetakanaki'eriekakɨ, mɨpaɨ nekatinixewawirieka ne'iwama, xemɨnetsiparewiekakɨ nenewieri xe'ipitɨatɨ Kakaɨyari nehetsiemieme
ROM 15:31 nemɨtawikweitsitɨarienikɨ, Kureya memɨtama yamemɨkatekahu 'axamemɨkanetsiyurienikɨ, 'aixɨa 'anemekɨ memenunakekɨ Kakaɨyari teɨterimama, kenemɨtiwaparewieni Kerutsareme hetsie,
ROM 15:32 para xehamatɨa nemɨ'uxipiekakɨ kepauka nenetemawietɨ nemeta'ani xehetsɨa, kemɨtinake Kakaɨyari.
ROM 15:33 Mɨkɨ Kakaɨyari mɨtatsipitɨa ta'iyaritsie temɨka'uximatɨariekakɨ, mɨkɨ ke'uyeikani yunaime xehamatɨa. Mɨpaɨ xeikɨa nepaine.
ROM 16:1 Nekanixehekɨatɨaka ta'iwa 'uka Pewe mɨtitewa, mɨkɨ tiparewiwame kanihɨkɨtɨni Tsenikɨreyatsie memɨyutixexeɨriwa wahetsɨa.
ROM 16:2 Xekeneutanaki'eri Ti'aitame hetsie xetewiyatɨ, kemɨreuyewetse Kakaɨyari teɨterimama memɨyutanaki'erienikɨ. Xekeneuparewi xɨka tixaɨtɨ reuyehɨaka xehetsɨa. Mɨkɨ tiparewiwametɨtɨ kaniwaparewieka yumɨireme, neta kaneniuparewieni.
ROM 16:3 Xekeniwawaɨritɨaka Pɨritsira meta 'Akira mame. Nehamatɨa mepɨte'uximaya Kɨritsitu Ketsutsi hetsie tetewitɨ.
ROM 16:4 Nemayenierenikɨ ne, mekaniukweriwa'itɨarieni mekaniukwi'iwatɨma. Ne nexaɨtame pamɨpariyutsi nepɨkawapitɨa, matsi yunaitɨ memɨyutixexeɨriwa memɨkahuriyutsixi pamɨpariyutsi mepɨwapitɨata nehamatɨa.
ROM 16:5 Wakiita memɨyutixexeɨriwata xekenewawaɨritɨaka. Xekenewaɨritɨaka 'Epainetu neminaki'erie. Mɨkɨ meri 'atsiyatari watsata peu'itsanarie Kɨritsitu hetsiemieme.
ROM 16:6 Xekenewaɨritɨaka Mariya, waɨkawa mɨti'uximayakai xehetsiemieme.
ROM 16:7 Xekenewawaɨritɨaka 'Anituruniku meta Kuniyaxi mame, nenuiwari hetsie memɨmiemete nehamatɨa memanutaxɨriya. Mɨkɨ 'aixɨa mepɨtematiwakai nɨ'ariekate watsata. Kɨritsitu hetsie mepɨtewiyakai ne hetsiena nekatiwiyawekaku 'akuxi.
ROM 16:8 Xekenewaɨritɨaka 'Amupɨriyatu neminaki'erie Ti'aitame hetsie netiwiyatɨ.
ROM 16:9 Xekenewawaɨritɨaka 'Uruwanu, tahamatɨa mɨti'uximaya Kɨritsitu hetsie tetewiyakaku, 'Itsitaki mame neminaki'erie.
ROM 16:10 Xekenewaɨritɨaka 'Aperexi, waɨkawa mɨ'inɨatsie Kɨritsitu hetsie tiwiyatɨ. Xekeniwawaɨritɨaka 'Aritsitupuru kie miemete.
ROM 16:11 Xekenewaɨritɨaka Heruriyuni, nenuiwaritsie mɨmieme. Xekeniwawaɨritɨaka Narutsitsu kie miemete, keyupaɨmetɨ Ti'aitame hetsie memɨtewiya.
ROM 16:12 Xekeniwawaɨritɨaka Tɨripina meta Tɨriputsa, mame Ti'aitame hetsie metewiyatɨ memɨte'uximaya. Xekenewaɨritɨaka Perɨtsira mɨnaki'eriwa, waɨkawa mɨti'uximayakai Ti'aitame hetsie tiwiyatɨ.
ROM 16:13 Xekeniwawaɨritɨaka Xupu, manayexeiyarie Ti'aitame hetsie tiwiyatɨ, maamaya mame nemaama hepaɨ mɨnetixeiyakai.
ROM 16:14 Xekeniwawaɨritɨaka 'Atsinikɨritu, Pɨrekuni, Herɨmexi, Patɨruwa, Herɨma meta hipame 'iwamarixi wahamatɨa memu'uwa.
ROM 16:15 Xekeniwawaɨritɨaka Pirurukuxi, Kuriya, Nereya meta 'iwaya 'uka, 'Urimipa meta yunaitɨ Kakaɨyari teɨterimama wahamatɨa memu'uwa.
ROM 16:16 Xekeneyuwaɨritɨaka Kakaɨyari hetsɨa kexemɨtemiemete. Yunaitɨ Kɨritsitu hetsɨa miemete naitsarie memɨyutixexeɨriwa mepɨxewaɨritɨa.
ROM 16:17 Ne'iwama, mɨpaɨ nekatinixewawirieka, xekeniwaxeiyani mɨkɨ hixɨata memɨxetsana memɨxeti'ɨkamɨra, mɨkɨ keyaxemɨkate'uta'ɨkitɨarie meteyurietɨ. Xekeneyupata mɨkɨ wahepaɨtsita.
ROM 16:18 Tati'aitɨwame Kɨritsitu hetsiemieme mepɨkate'uximaya mɨya memɨ'anene, yuhuriepa mieme pɨta mepɨte'uximaya. 'Aixɨa me'utiyuatɨ peru yakɨ xeikɨa, witsimete'uniutɨ mepɨtewa'irɨwiya mɨkɨ tita 'axamɨti'ane memɨkateku'eriwa wa'iyari.
ROM 16:19 Xeme kexemɨtekahu mekatenetimaniri yunaitɨ. 'Ayumieme xehepaɨtsita nepɨnetemawie. Mɨpaɨ pɨnetinake, xemɨtemaiwawenikɨ 'aixɨa xeteyurietɨ, xemɨka'inɨkakɨ tita 'axamɨti'ane.
ROM 16:20 Mɨkɨ Kakaɨyari mɨtatsipitɨa ta'iyaritsie temɨka'uximatɨariekakɨ, mɨkɨ Kauyumarie xe'ɨkatɨa kanitaketsimɨkɨ kwitɨwa. Tati'aitɨwame Ketsutsi 'aixɨa ketiuka'iyarini xehetsiemieme.
ROM 16:21 Timuteu, nehamatɨa mɨti'uximaya kanixewaɨritɨaka, meta Rutsiyu, Katsuni, Tsutsipateri, nenuiwaritsie memɨmiemete.
ROM 16:22 Ne, Terɨtiyu, 'ikɨ xapa nemaka'utɨa, nepɨxewaɨritɨa Ti'aitame hetsie netiwiyatɨ.
ROM 16:23 Kayu kanixewaɨritɨaka, kemɨ'ane hetsɨa ne nemɨ'axe meta yunaitɨ memɨyutixexeɨriwa hetsɨana. 'Eratsitu meta kanixewaɨritɨaka, kiekatari watumini hɨweme, ta'iwa Kwarutumatɨ kanixewaɨritɨaka.
ROM 16:24 Yunaime xehetsiemieme Tati'aitɨwame Ketsutsi Kɨritsitu 'aixɨa ketiuka'iyarini.
ROM 16:25 Mɨkɨ kaniyɨweni mɨxetuikanikɨ, kemaine niuki 'aixɨa manuyɨne nemɨkuxata, xatsika Ketsutsi Kɨritsitu hepaɨtsita kemaine. Katinikuxaxatsiwani kemaine niuki 'iya mitahekɨataxɨ. Mɨkɨ niuki mɨixa kaniuti'awietsiekaitɨni,
ROM 16:26 hikɨrixɨa matsiɨkɨtɨ kanayani. Kakaɨyari niukametemama wa'utɨarika ya'utainekaku, kemɨtiuta'aitaxɨ mɨkɨ Kakaɨyari yuheyemekɨ 'amuyeika, kaniwarutahekɨatɨani yunaime nuiwarite para yamemɨtekahunikɨ yuri mete'erietɨ.
ROM 16:27 Mɨkɨ Kakaɨyari muyuxewi mɨtimaiwe, witsiketikɨhɨawarɨwani Ketsutsi Kɨritsitu hetsiemieme yuheyemekɨ. Mɨpaɨ xeikɨa kani'aneni.
1CO 1:1 Ne Papuru, ta'iwa Tsutsitenexi hamatɨa, tekanixewaɨritɨaka kurinitutari. Kɨritsitu Ketsutsi kaneniuta'inieni nɨ'ariekame nemayanikɨ, mɨpaɨ Kakaɨyari mɨtinakekaikɨ.
1CO 1:2 Kurinitutari xemeyutixexeɨriwa Kakaɨyaritsɨa xemiemetetɨtɨ, tekanixewaɨritɨaka. Kɨritsitu Ketsutsitsie xetewiyatɨ, xekaniupatsieni Kakaɨyaritsie mieme. Xekaniuta'inierieni yaxemɨtepatsienikɨ, kememɨte'uta'inierie yunaitɨ naitsarie memehɨawe kemɨ'ane Tati'aitɨwame Ketsutsi Kɨritsitu mɨhɨkɨ, kemɨ'ane mɨkɨ tiwa'aitɨwame mɨhɨkɨ tameta tati'aitɨwame mɨhɨkɨ.
1CO 1:3 Kakaɨyari mɨta'ukiyari, Ketsutsi Kɨritsitu mɨtati'aitɨwame, 'aixɨa mekete'u'iyarini xehetsiemieme, mekexepitɨaka xemɨka'uximatɨariekakɨ yu'iyaritsie.
1CO 1:4 Neheyemekɨ pamɨpariyutsi nekanipitɨaka Kakaɨyari xehepaɨtsita, 'aixɨa tiuka'iyaritɨ mɨtixe'umikɨ Kɨritsitu Ketsutsitsie xetewiyakaku.
1CO 1:5 Naime katinitimɨiriyarɨmeni xehetsiemieme, hetsiena xetewiyakaku. Naimekɨ xekaniyɨwaweni xemɨtiniunikɨ, meta naime xekatenimaika,
1CO 1:6 xehetsie kemɨtiutseiriyarie mɨkɨ niuki mɨtihekɨata Kɨritsitu hepaɨtsita.
1CO 1:7 'Ayumieme naime xekatenikumikiwani, tixaɨtɨ pɨkareuyewetse mexi xe'ikwewie Tati'aitɨwame Ketsutsi Kɨritsitu, matsiɨkɨtɨ mayeitɨarienike.
1CO 1:8 Mɨkɨ xeme kanixetseiriyamɨkɨ, tapareyuke, xehetsie mɨkarahɨiwanikɨ 'iya tukaritsie kepauka munuani Tati'aitɨwame Ketsutsi Kɨritsitu.
1CO 1:9 Kakaɨyari kemaine yakatinikamieni. Mɨkɨ kanihɨkɨtɨni kemɨ'ane mɨxe'uta'ini xemɨyutaxewirekɨ nu'aya hamatɨa Ketsutsi Kɨritsitu mɨtati'aitɨwame.
1CO 1:10 Perutsɨ ne'iwama, waɨriyarika tsiepɨre nekanixepitɨanikeyu, Tati'aitɨwame Ketsutsi Kɨritsitutsɨa temiemetetɨtɨ 'ipaɨ ne'utaitɨ, xeniuki yuxewikaku yaxeikɨa xeketeneku'eriwani, hixɨata xepɨkayutsanani. Matsi xekenɨtɨarieka yaxeikɨa xeteyumaitɨ, yaxeikɨa xeteku'eriwatɨ.
1CO 1:11 Hipatɨ Kuruhe hetsɨa miemete mɨpaɨ mekaneteniuhekɨatɨani xehepaɨtsita ne'iwama, kename waniu, hipatɨ xeme xeyukwitɨwe.
1CO 1:12 'Ipaɨ nepaine, xeme yuxexuitɨ 'ipaɨ xeputiyuane: «Ne Papuru hetsie nekatiniwiyani», xewitɨta: «Netsɨ 'Apuruxi hetsie pɨta nekatiniwiyani», xewitɨta: «Netsɨ Tsepaxi hetsie pɨta nekatiniwiyani», xewitɨta: «Netsɨ Kɨritsitu hetsie pɨta nekatiniwiyani».
1CO 1:13 ¿Kamɨtsɨ Kɨritsitu titsaniwe? ¿Ne Papuru kamɨtsɨ xehetsiemieme netiumierie kuruxitsie? ¿Papuru hetsɨa xemiemetetɨtɨ kexete'uka'ɨwaxɨ?
1CO 1:14 Pamɨpariyutsi Kakaɨyari nepɨpitɨa, xeime tɨma nemɨka'uka'ɨyaxɨkɨ xeme, Kɨritsipu xeikɨa, meta Kayu,
1CO 1:15 kapa 'uxa'atɨni warie xewitɨ mɨpaɨ hainenikɨ, kename xeme xe'uka'ɨyarie nehetsɨa xemiemetetɨtɨ.
1CO 1:16 Metsɨ nekaniwaruka'ɨyata 'Etsitepanaxi kie kiekatari, mɨkɨ xeikɨa, nepɨkaha'eriwa tawari xɨka hipame newaruka'ɨya.
1CO 1:17 Kɨritsitu kemɨnereyenɨ'a, pɨkanetsiheyenɨ'a nemɨti'ɨyanenikɨ xeikɨa. Niuki 'aixɨa manuyɨne nemɨkuxatanikɨ kaneneyenɨ'ani pɨta, peru nemɨtikuxatanikɨ tewi kemɨtimaiwe hepaɨ nekati'enierietɨ yakɨ xeikɨa netikuxatatɨ. Mexɨka mɨpaɨ netiuniukanike, yakɨ xeikɨa katinikuxaxatsiwanikeyu kemɨtiumierie Kɨritsitu kuruxitsie.
1CO 1:18 'Ikɨ niuki kemɨtiumierie kuruxitsie manuyɨne, yakɨ haineme mekani'erieka mɨkɨ memeuyewexime. Tameri pɨta temɨtawikweitsitɨariexime ketemɨte'i'enie, mɨkɨ niuki tɨrɨkariya kanihɨkɨtɨni Kakaɨyari hetsɨa mɨmieme.
1CO 1:19 'Ipaɨ katine'uka: «Tita memɨtemate temaiwawemete, mɨkɨ nekanika'unamɨkɨ, tita memɨte'akumate yɨwemete, mɨkɨ nekanixani'eriekamɨkɨ».
1CO 1:20 ¿Hakewari timaiweme peyeika? ¿Hakewari 'inɨarikɨ mɨti'ɨkita peyeika? ¿Hakewari niuki xɨxɨatɨwamete hikɨ miemetexi? ¿Kamɨtsɨ, tita memɨtemaiwawe kwiepa memɨtama, yakɨ xeikɨa haineme karayeitɨa Kakaɨyari?
1CO 1:21 Waɨkawa timaiwetɨ, mɨpaɨ katiniuta'aita Kakaɨyari, kwiepa memɨtama kememɨtemaiwawe memɨyutatexienikɨ meheitimanike Kakaɨyari. Matsi Kakaɨyari kaniyuwaɨriya niuki mɨkuxaxatsiwakɨ mɨwatawikweitsitɨanikɨ mɨkɨ yuri memɨte'erie, tsepa mɨkɨ niuki yakɨ xeikɨa haineme memɨ'erie hipatɨ.
1CO 1:22 Huriyutsixi teɨteriyari 'inɨarite mekaniwauka, kɨriyekutsixi timaiweme niukieya mekanikuwautɨweni.
1CO 1:23 Tame Kɨritsitu pɨta tekanikuxatani, kemɨ'ane kuruxitsie mumierie kemɨtihɨkɨ. Mɨkɨkɨ huriyutsixi mekaniutiketamɨrixɨani, yakɨ xeikɨa tikuxaxatsiwame mekani'erieka hipatɨ memɨkahuriyutsixi.
1CO 1:24 Tame pɨta temuta'inierie, tsepa huriyutsixi tsepa kɨriyekutsixi, mɨpaɨ tekatenitamaika, Kɨritsitu kanihɨkɨtɨni kemɨ'ane tɨrɨkariya mɨtatsipitɨa Kakaɨyari hetsɨa miemetɨtɨ, kemɨ'ane temaiwawemete mɨtatsi'ayeitɨa Kakaɨyari kemɨtimaiwe.
1CO 1:25 Tsepanetɨ xɨka Kakaɨyari yakɨ xeikɨa hainenike, mɨkɨtsiere matsi yemekɨ katinimaiwenikeyu, teɨteri hepaɨna 'atsimekatemaiwawekaku. Tsepa xɨka Kakaɨyari katɨrɨkaɨyenike, matsi yemekɨ kanitɨrɨkaɨyenikeyu, teɨteri hepaɨna mekatɨrɨkawikaku.
1CO 1:26 Xeketena'eriwani kexe'anenetɨ xemuta'inierie ne'iwama. Kamɨtsɨ, hipatɨ xeikɨa xeme xekatenimaiwawemetetɨni, teɨteri kememɨteku'eriwa. Hipatɨ xeikɨa xepɨtɨrɨkawi, hipatɨ xeikɨa mamariwawemete xepɨwaniwema, kexemɨte'uta'inierie.
1CO 1:27 Matsi 'ena kwiepa miemete tita yakɨ haineme memɨte'erie kananuyeteɨxɨ Kakaɨyari, para mɨwatewiyatsitɨanikɨ temaiwawemete. Tita mɨkatitɨrɨkawi 'ena kwiepa kananuyeteɨxɨ, mɨwatewiyatsitɨanikɨ mɨkɨ memɨtɨrɨkawi.
1CO 1:28 Kakaɨyari tita tixaɨtɨ mɨkatihɨkɨ kananuyeteɨxɨ, tita mɨtixani'eriwa, tita meta 'amɨkatiuwe, para tixaɨtɨ katihɨkɨtɨme xeikɨa meyeitɨanikɨ tita mɨtixuawe,
1CO 1:29 kapa xewitɨ tewi mariweme yuxatanikɨ Kakaɨyari hɨxie.
1CO 1:30 Matsi Kakaɨyari mɨxe'unetɨakɨ, 'ayumieme 'axekaniu'uwani, Kɨritsitu Ketsutsi hetsie kexemɨtewiya. Kɨritsitu kanihɨkɨtɨni kemɨ'ane Kakaɨyari mikaye, temaiwawemete mɨtatsi'ayeitɨanikɨ, tatsipitɨatɨ heitseriemekɨ yatemɨtekahunikɨ, tatsipatatɨ Kakaɨyari hetsiemieme, tatsixɨnatɨ.
1CO 1:31 'Ayumieme mɨpaɨ kani'aneni kemɨre'uxa: «Kemɨ'ane mariweme muyuxatamɨkɨ, Ti'aitame kexatani mariwemetɨme».
1CO 2:1 Yaxeikɨa neta ne'iwama, kepauka xehetsɨa nemunua, waɨkawa nereutaxatawetɨ nepɨkayɨanekai kenemɨtiuniukakai, kenemɨtimaiwekai, kepauka nemɨtixekuxaxatɨwakai ne'ihekɨatatɨ Kakaɨyari kemɨ'ane.
1CO 2:2 'Ipaɨ nekatininemaikaitɨni pɨta, tixaɨtɨ nepɨkara'eriwanikekai xehetsɨa ne'uyeikatɨ, Ketsutsi Kɨritsitu xeikɨa nekana'eriwanikekaitɨni, kemɨ'ane kuruxitsie mumierie kemɨtihɨkɨ.
1CO 2:3 Netsɨari nekatɨrɨkaɨyetɨ matsi nekaninuani xehetsɨa, neheumatɨ waɨkawa, ne'uyɨyɨakatɨ.
1CO 2:4 Kenemɨtiuniukakai, tita nemɨtikuxatakai, timaiweme hepaɨ nemɨti'enierienikɨ xeikɨa nepɨkayɨanekai, witsinetiuniutɨ xeikɨa yuri nemɨtixeta'eritɨanikɨ nepɨkayɨanekai. Matsi nekanixehekɨatɨakaitɨni 'Iyari kemɨ'ane, Kakaɨyari kemɨtitɨrɨkaɨye,
1CO 2:5 kapa heuyewekakɨ tita teɨteri memɨtemaiwawekɨ yuri xemɨte'eriekakɨ xeme, matsi Kakaɨyari tɨrɨkariyayatsie pɨta yuri xemɨte'eriekakɨ.
1CO 2:6 Tetemaiwawetɨ matsi tekatenikuxatani mɨkɨ memɨtsetseɨye watsata. Peru ketemɨtemaiwawe, hikɨ miemetexi mɨpaɨ mepɨkatemaiwawe. Hikɨ miemetexi tewa'aitɨwameteta mɨpaɨ mepɨkatemaiwawe, mɨkɨ memamariwawetɨ mepɨka'akɨne.
1CO 2:7 Matsi ketemɨtekuxata tame, tekanihekɨatani tita mɨti'awietsiekai, kemɨtimaiwe Kakaɨyari tetekuxatatɨ. Timaiwetɨ kemɨtiyurienikekai 'arikeke, witsite'aneneme kemɨtarayeitɨani, mɨkɨ 'ana pɨkamatsiɨkɨkai hikɨke, tsepa Kakaɨyari mɨpaɨ mɨtiyumaikai kwie kanetɨariewekaku 'akuxi.
1CO 2:8 Hikɨ miemetexi tewa'aitɨwamete hatsuaku nixewitɨ mɨpaɨ mepɨkatehetimaiwawekai. Xɨka mɨpaɨ metehetimanike, kuruxitsie mepɨka'imienikekai Ti'aitame witsimɨ'ane.
1CO 2:9 Matsi kemɨre'uxa: «Tita tewi mɨkatixeiyawe yɨhɨxikɨ, mɨkati'eniewe yunakakɨ, titakɨ mɨkatiyu'iyaritɨawe tewi, mɨya'aneneme Kakaɨyari kaniwarukuha'aritɨirieni mɨkɨ meminaki'erie».
1CO 2:10 Matsi hikɨ mɨya'aneneme Kakaɨyari matsiɨkɨme kanayeitɨani, 'Iyari yatatixeitsitɨakaku. Mɨkɨ 'Iyari katinimaika naitsarie kemɨti'ane, naitɨ kemɨtiyumate Kakaɨyari.
1CO 2:11 Tewi, ketita tihɨkɨ tewitsie mieme yamɨtimate tewi kemɨtiyumate. Tewi 'iyarieya hetsiena mɨyeka kanihɨkɨtɨni tita mɨpaɨ mɨtimate. Yaxeikɨata tewi 'atsipɨkatimate Kakaɨyari kemɨtiyumate. Kakaɨyari 'Iyarieya xeikɨa mɨpaɨ katinimaika.
1CO 2:12 Tame kwiepa mieme 'iyari tepɨka'utanaki'eri. 'Iyari Kakaɨyari hetsɨa mɨmieme pɨta tekaniutanaki'erieni, temɨtemaikakɨ tita Kakaɨyari mɨtatiumi.
1CO 2:13 Tita 'Iyaritsie mɨtimieme tekateniwahekɨatsitɨiyani mɨkɨ 'Iyari memexeiya. 'Ayumieme kepauka temikuxata tita Kakaɨyari mɨtatiumi, tepɨkatekuxata ketemɨte'u'ɨkitɨarie tewa'enietɨ mɨkɨ teɨteri wahepaɨ xeikɨa memɨtemaiwawe. Yatekatenikuxatani 'Iyari kemɨtati'ɨkitɨa pɨta.
1CO 2:14 Tewi mɨkɨ 'Iyari mɨka'uyeyetsa pɨkayuwaɨriya mitanaki'erienikɨ tita Kakaɨyari 'Iyarieyatsie mɨtimieme. Yakɨ xeikɨa haineme kani'eriekamɨkɨ. Pɨkayɨwe yamɨretimanikɨ, metsɨ 'Iyari 'iparewiekaku xeikɨa kaniyɨwemɨkɨ mita'inɨatakɨ kemɨti'ane tita 'Iyaritsie mɨtimieme.
1CO 2:15 Kemɨ'ane mɨkɨ 'Iyari mexeiya pɨta, naime katinita'inɨatamɨkɨ, peru xewitɨ 'Iyari mɨkahexeiya hepaɨna pɨka'ita'inɨata kemɨ'ane meixeiya, kemɨre'uxa:
1CO 2:16 «¿Kemɨ'ane pɨtimate kemɨtiku'eriwa Ti'aitame, kemɨ'ane pɨtita'ɨkitɨani?» Peru tame Kɨritsitu hepaɨ tekateniku'eriwani.
1CO 3:1 Neri ne'iwama, 'ana nepɨkayɨwekai nemɨtixekuxaxatɨwanikɨ kenemɨtiwakuxaxatɨwa mɨkɨ 'Iyari memexeiya. Mɨkɨ wai xeikɨa memɨhɨkɨ, tɨɨri Kɨritsitu hetsie memɨtewiya kenemɨtiwakuxaxatɨwa, mɨpaɨ pɨta nekatinixekuxaxatɨwakaitɨni xeme.
1CO 3:2 Retsi nekanixe'itɨakaitɨni, 'ikwai nepɨkaxe'umi, xemɨka'ikemakaikɨ. Peru hikɨ 'akuxi xepɨka'ikema,
1CO 3:3 waitsie xemɨtewiyakɨ 'akuxi. Mexi xeyumexɨitɨa hipame wahepaɨtsita, mexi xeyukwitɨwe 'akuxi. ¿Kamɨtsɨ waitsie xekatewiya xeikɨa, teɨteri wahepaɨ xekateyɨa?
1CO 3:4 Xewitɨ kepauka mɨpaɨ maine: «Netsɨ Papuru hetsie nekatiniwiyani», xewitɨta: «Netsɨ 'Apuruxi hetsie nekatiniwiyani», ¿tamɨ teɨteri xeikɨa xekatehɨkɨ?
1CO 3:5 Merikɨte, ¿'Apuruxi ketita tihɨkɨ? ¿Ne Papuru ketita netihɨkɨ? Kakaɨyari parewiwametemama tekanihɨkɨtɨni, takɨmana yuri xekateniuta'erieni. Ti'aitame kemɨtatiumi taxexuime,
1CO 3:6 ne nekaniuka'eni, 'Apuruxi kani'ipanekaitɨni. Peru Kakaɨyari kanihɨkɨtɨni mitinetɨa.
1CO 3:7 'Ayumieme 'etsame tixaɨtɨ pɨkatihɨkɨ, 'ipawame tixaɨtɨ pɨkatihɨkɨ. Mitinetɨa xeikɨa tixaɨtɨ katinihɨkɨtɨni Kakaɨyaritɨtɨ.
1CO 3:8 'Etsame meta 'ipawame hamatɨa mekaneuyuyehɨaka. Yuxexuitɨ yu'iwarikatsie mekateni'iwakakuni kememɨtekumaɨwakaikɨ.
1CO 3:9 Kakaɨyari hetsɨa tekateni'uximayaka. Xemeri waxa Kakaɨyari hetsɨa mieme xekanihɨkɨtɨni, meta kii Kakaɨyari mɨwewiene xekanihɨkɨtɨni.
1CO 3:10 Kakaɨyari 'aixɨa tiuka'iyaritɨ kemɨnetiumi, mɨpaɨ nepɨtitawewi tenari kiitɨa mieme, kii wewiwamete tiwa'aitɨwame mɨtimaiwe hepaɨ neyɨanetɨ. Xewitɨ kii pɨtawewieni heimana. Yuxexuitɨ mekeyukweriwayurieka kememɨte'iwewiwa.
1CO 3:11 Tenari kiitɨa mɨmieme 'apukuma yuxewitɨ. Xewitɨri pɨkayɨwe tawari mitawewieni xeime. Ketsutsi Kɨritsitu kanihɨkɨtɨni tenari 'amukuma.
1CO 3:12 Hurukɨ, pɨratakɨ, tetexi witsimɨ'anenekɨ xɨka 'utakini heimana, yatɨni kɨyexikɨ, 'ɨxakɨ, mɨaxakɨ,
1CO 3:13 yuxexuitɨ wawewiya kanihekɨakamɨkɨ. Tukari 'aye'ayu hekɨatɨ kanayeimɨkɨ, tukari matsiɨkɨtɨ kemɨrayani tai xuawekaku. Tai kanita'inɨatamɨkɨ yuxexuime wawewiya, 'aixɨa kemɨti'anene.
1CO 3:14 Tita mɨtiutawewi xɨka yuhayewa, 'iwewiwame katinipitɨariemɨkɨ.
1CO 3:15 Mexɨka 'utitani, 'iwewiwame katinitatɨmaiyamɨkɨ. 'Iwewiwame xeikɨa kanitawikweimɨkɨ, peru kemɨ'ane taipa mutawikweni hepaɨ.
1CO 3:16 ¿Kamɨtsɨ xeme mɨpaɨ xekatemate, Kakaɨyari tukieya xemɨhɨkɨkɨ hakewa Kakaɨyari 'Iyarieya meyeka?
1CO 3:17 Tewi xɨka 'ika'una Kakaɨyari tukieya, Kakaɨyari mɨkɨta kanika'unamɨkɨ. Kakaɨyari tukieya kanipatsieka hetsiena mieme. Xemeri xepɨhɨkɨ tuki.
1CO 3:18 Xepɨkateyu'irɨwiyani. Xɨka xewitɨ xeme timaiweme yu'erieka, temaiwawemete kememɨteyu'erie hikɨ miemetexi, 'atsikatimaitɨ pɨta ke'ayani, yuri timaiwetɨ mayanikɨ.
1CO 3:19 Kwiepa memɨtama kememɨtemaiwawe, Kakaɨyari hɨxie memɨka'u'iyarini hepaɨ mekani'aneneni. Mɨpaɨ katine'uka: «Memɨtemaiwawe Kakaɨyari yakatiniwakupitɨwani kememɨteku'eriwakaitsie memuyukaxɨrienikɨ».
1CO 3:20 Tawarita mɨpaɨ katine'uka: «Ti'aitame, memɨtemaiwawe kememɨteyɨkɨhɨawe kaniwamaika, mɨpaɨ katinimaika kename tixaɨtɨ mekatehɨkɨ».
1CO 3:21 'Ayumieme 'aixɨa pɨka'ane memamariwaweme mɨwaxatanikɨ teɨteri. Matsi naitɨ xehetsɨa katinimiemetɨni.
1CO 3:22 Tsepa Papuru, tsepa 'Apuruxi, tsepa Tsepaxi, tsepa kwie, tsepa xemayeneniere, tsepa xemukwi, tsepa hikɨ mieme xemɨtehexeiya, tsepa 'uxa'atɨni warie mieme xemɨtehexeiya, naitɨ xehetsɨa katinimiemetɨni.
1CO 3:23 Xemeta Kɨritsitu hetsɨa xekanimiemetetɨni, Kɨritsitu meta Kakaɨyari hetsɨa kanimiemetɨni.
1CO 4:1 'Ipaɨta tekete'eriwani tame, Kɨritsitu te'uximayatsiriwamete ketemɨtehɨkɨ, ketemɨte'uhɨritɨarie temihekɨatanikɨ tita mɨti'awietsiekai Kakaɨyari hepaɨtsita.
1CO 4:2 Kamɨtsɨ kemɨ'ane 'ena mɨtiuhɨritɨarie, kaneuyeweka yamɨtikamienikɨ.
1CO 4:3 Peru xɨka xeme xenetsixanetanike 'itsɨkate wahepaɨ, xɨka 'itsɨkate memɨteɨteri xeikɨa menetsiku'iwawiyanike, matsi nepɨkane'iyaritɨakakeyu mɨkɨkɨ. Ninekɨmana nepɨkayɨwe nemɨyuku'iwawiyanikɨ.
1CO 4:4 Ne mɨpaɨ nepɨtiku'eriwa nehetsie pɨkarahɨiwa, mɨkɨkɨ xeikɨa heitserie nepɨkapitɨarie. Ti'aitame pɨta kanihɨkɨtɨni kemɨ'ane 'itsɨkametɨtɨ mɨnetsiku'iwawiyani.
1CO 4:5 'Ayumieme xepɨka'i'inɨatani tukariyari ka'aye'awekaku 'akuxi, Ti'aitame 'akuxi kanuawekaku. Mɨkɨ katinihekɨatamɨkɨ tita mɨtiuti'awietsie yɨwipa. Matsiɨkɨme kaneyeitɨamɨkɨ kememɨteyuriekɨ teɨteri yu'iyaritsie. 'Anakeri yuxexuitɨ 'aixɨa mekatenikɨhɨawarɨwakuni, Kakaɨyari yatiwayetuiriekaku ketita mɨtiwahetsiemiemetɨkai.
1CO 4:6 Yanemɨtixehekɨatɨanikɨ ne'iwama, 'ayumieme nekaninexatakaitɨni, 'Apuruxi nekanixatakaitɨnita, para xetatsiha'eriwatɨ xemeitimanikɨ 'ikɨ 'inɨari, kemɨre'uxa: «pɨka'anuyehaitɨrɨweni, manuyɨne». Kapa xewitɨ 'uyuta'ɨrekɨ, xeimekɨ naki'atɨ, xeime pɨta xani'erietɨ.
1CO 4:7 ¿Kamɨtsɨ kepaikɨ pe'anuyehaitɨrɨweme pɨmatsi'ayeitɨa? ¿Tita perexeiya pekatimikiewetɨ? Merikɨte, xɨka petiumikieni, ¿ketitayariri pemariweme peti'axata, pekatikumikiwame pe'axatatɨ?
1CO 4:8 Xemeri xɨari xeputihuxai, naime xetehexeiyatɨ xepakɨ. Xekanaye'axɨani te'aitamete xemakɨnekɨ, tame xetatsitawe'erietɨ. Xɨka yurikɨ te'aitamete xe'akɨneke tɨma, tametari xehamatɨa tete'aitatɨ temakɨnekɨ.
1CO 4:9 'Ipaɨ nekatiniku'eriwani, Kakaɨyari pɨtatsi'ukayatsaxɨ tame nɨ'ariekate, 'imatɨremete temɨhɨkɨtɨnikɨ, mɨkɨ memanutaxɨriya mekwi'iwake wahepaɨ temɨ'anenenikɨ. Tetaxeiyarietɨ tekanakɨne kwiepa memɨtama wahɨxie, Kakaɨyari niuki tuayametemama meta teɨteri wahɨxie.
1CO 4:10 Tame 'atsitemɨkatemate tekani'eriwani Kɨritsitu hetsiemieme, matsi xeme pɨta xekatenimaiwaweni Kɨritsitutsie xetewiyatɨ. Tameri tepɨkatɨrɨkawi, matsi xeme xekanitɨrɨkawini. 'Aixɨa xekatenikuxaxatsiwani xeme, tame pɨta tekanixani'eriwani.
1CO 4:11 Hikɨke tekaneuhakakwikuni, tekaneuharikuni, takemarite tepɨteheuyehɨwa, tekaniutiweiyani, tepɨkaheixeiya hakewa temekuyaxe.
1CO 4:12 Tekatenita'uxitɨaka tamamákɨ tete'uximayatɨ. 'Axatetekɨhɨawarɨwatɨ, 'aixɨa teputiyuane wahepaɨtsita. Te'uweiyarietɨ tepɨte'ukanenewie.
1CO 4:13 'Axame'utiyuanekaku tahepaɨtsita, tepɨwanɨtɨa. Xatsi kwiepa mieme hepaɨ tekani'aneneni, naime temɨxikiyari hepaɨ tekani'aneneni hikɨke.
1CO 4:14 'Ikɨ nepɨkatixe'utɨirie nemɨxetewiyatsitɨanikɨ, matsi nepɨxenɨtɨamɨkɨ neniwema xemɨhɨkɨkɨ nemɨxenaki'eriekɨ.
1CO 4:15 Tsepa tamamata miriyari xemɨwarexeiyanike texe'ɨkitɨwamete Kɨritsitutsie xetewiyakaku, yumɨireme xepɨkawarexeiya yupaapama. Kɨritsitu Ketsutsi hetsie netiwiyatɨ, niuki 'aixɨa manuyɨne nekuxatatɨ, nekanixe'utinuiwitɨani.
1CO 4:16 'Ayumieme waɨriyarika nekanixepitɨaka, xenetsi'ɨketɨ xemakɨnekɨ.
1CO 4:17 Mɨpaɨ xemɨtekahunikɨ, 'ayumieme xehetsɨa nepeitanɨ'a Timuteu. Mɨkɨta kanineniwetɨni, nekaninaki'erieka, yakatinikamieni Ti'aitame hetsie tiwiyatɨ. Mɨkɨ kanixe'aye'eritɨamɨkɨ kenemɨtiuyeika Kɨritsitu Ketsutsi hetsie netiwiyatɨ, yaxeikɨa kenemɨti'ɨkita naitsarie memeyutixexeɨriwa wahetsɨa.
1CO 4:18 Hipatɨ waniu mekaniuyuti'ɨreni, xehetsɨa nekamieme me'erietɨ.
1CO 4:19 Neri kwitɨwa nekanimieni xehetsɨa, xɨka mɨpaɨ tinakeni Ti'aitame. 'Anari nepɨretimani mɨkɨ kememɨtekuxata, meta kememɨtetɨrɨkawi mɨkɨ memuyuti'ɨre.
1CO 4:20 Kakaɨyari ti'aitametɨkaku, pɨkaheuyewetse waɨkawa xeikɨa mɨtikuxatanikɨ. Mɨkɨ ti'aitametɨkaku, tɨrɨkariya puxuawe pɨta.
1CO 4:21 ¿Ketixenake? ¿Xehetsɨa netita'ani nexetawayatɨ? ¿Nepeta'ani nutsu nexenaki'erietɨ neka'ayu'eriyatɨ?
1CO 5:1 Mɨpaɨ katinikuniuwani, kename xeniu, xewitɨ xeme 'ikumaɨwa kemɨ'ane mɨkayɨ'ɨya. Kememɨkateyurie nuiwarite, yakatiniyurieneni mɨkɨ 'ikumaɨwatɨ. Yupaapa 'ɨyaya xeniu kaniutiwitɨni.
1CO 5:2 Kari xeme xepuyuti'ɨre. Kaneuyeweka matsi xemutitsuananikɨ, yutsata xemenuyenɨ'anikɨ mɨyamɨtiyuriene.
1CO 5:3 Netsɨ tsepa newaiyaritsie 'ateewa nemuyeika, ne'iyarikɨ xehetsɨa nemuyeikani hepaɨ nekatininemaika, 'ariri nepitaxanetaxɨ xehetsɨa nemuyeikani hepaɨ, kemɨ'ane mɨyamɨtiuyuri.
1CO 5:4 'Ipaɨ xeketeneuyuri Ti'aitame Ketsutsi xehahɨawetɨ. Xekeneuyukuxeɨri, neta xehamatɨa ne'uyeikakaku ne'iyarikɨ yakɨtɨtɨ. Tati'aitɨwame Ketsutsi xetɨrɨkariyakaku,
1CO 5:5 xekeneyetua kemɨ'ane mɨyamɨ'ane, Kauyumarie mika'unakɨ waiyarieya, 'iyarieya pɨta mɨtawikweitsitɨarienikɨ 'iya tukaritsie kepauka munuani Ti'aitame.
1CO 5:6 Xemamariwaweme kexemɨteyuxata, mɨkɨ 'aixɨa pɨka'ane. ¿Mɨpaɨ xekatemate, 'etsipemekɨ paa naitɨ kaniutakuxaniriyarieni tikuxanariyamekɨ?
1CO 5:7 Xekeneuyu'iti tikuxanariyame mɨye'i mumawenikɨ, tɨxi mɨhekwa xemakɨnekɨ, paa mɨkakuxanariyarietɨka, hikɨ kexemɨ'anene. Karikɨ Kɨritsitu, muxa patsikwa mawariyari 'ari kaniumierieni tahetsiemieme.
1CO 5:8 'Ayumieme tame temɨ'ixɨaramete yakɨtɨtɨ, ye'imekɨ kuxaxanimekɨ tepɨkayɨaka, 'axa'aneneme tehexeiyatɨ 'axateteyurietɨ. Matsi paa kakuxaxanitɨ kemɨtikwaiwa 'ixɨararipa, tameta 'aixɨa teketehekɨatsieka, yuri teke'utiyuaneni.
1CO 5:9 Mɨpaɨ nekatinixe'u'utɨirieni xeime xapatsie, xemɨkawanɨkakɨ rukutsixi ne'utaitɨ.
1CO 5:10 Netsɨ nepɨkawaxatakai 'ena kwiepa memɨrukutsixi, mɨkɨ naime memɨtehiwe'erie yuhetsiemieme, memɨteyukwamana tuminikɨ, mɨkɨ meta tetexi memɨwarayexeiya. Mɨkɨ yemekɨ xɨka xekawanɨkake, kaneuyewekakeyu matsi kwiepa xemɨkayuhayewakɨ, xemanuyekɨnekɨ pɨta.
1CO 5:11 Peru hikɨ 'ipaɨ nekanaineni, kenemɨtixe'u'utɨiri 'ana, ta'iwa yuxatatɨ xɨka rukuyaneni, xɨka naime tihiwe'erieka yuhetsiemieme, xɨka tetexi warayexeiyani, xɨka 'axa'utaineni hipame wahepaɨtsita, xɨka taweneni, xɨka tinawayani, mɨpaɨ nepaine, mɨpaɨ 'aneme xepɨkanɨka, nihamatɨana xepɨkatekwaka.
1CO 5:12 Ne nemɨwataxaneta nepɨkayɨwe yuri memɨkate'erie. Xeme xekanihɨkɨtɨni xemɨwataxaneta muwa memuyutixexeɨriwa.
1CO 5:13 Kakaɨyari pɨta mɨ'itsɨkamekɨ mɨwaku'iwawiyakɨ yuri memɨkate'erie. «Yutsata xekenanuyenɨ'a xeme kemɨ'ane 'axamɨtiyuriene».
1CO 6:1 Xewitɨ xeme xɨka 'ixanetamɨkɨni yu'iwatɨme, ¿kari pɨka'ukama menuhanakɨ 'itsɨkate yuri memɨkate'erie wahɨxie, Kakaɨyari teɨterimama wahɨxie pɨta kayuwaɨriyatɨ?
1CO 6:2 Mɨpaɨ xekatemate, Kakaɨyari teɨterimama 'itsɨkate tekanakɨnikuni kwiepa memɨtama temɨwataxanetakɨ. Xɨkatsɨ xeme xehɨkɨtɨni xemɨwataxaneta kwiepa memɨtama, ¿titayari xekateyɨwawe xemɨtexanetanikɨ 'etsitipeme hepaɨtsita?
1CO 6:3 Mɨpaɨ xekatemate, tame tepɨwataxaneta Kakaɨyari niuki tuayametemama. Piini hepaɨtsita titayari xekateyɨwawe matsi yemekɨ.
1CO 6:4 Mexɨkari piini hepaɨtsita xeyuxanetani, ¿ketitayari 'aixɨa xeteyuriku 'itsɨkate yuri memɨkate'erie wahetsɨa tixaɨtɨ memɨkatehɨkɨ memɨyutixexeɨriwa watsata?
1CO 6:5 Nexetewiyatsitɨanike 'ipaɨ nekatinikuxatani. ¿Nixewitɨ 'akatiuyeika xetsata waɨkawa timaiwetɨ, yɨwetɨ mɨwaxanetanikɨ 'iwamama kememɨteyuxaneta?
1CO 6:6 Matsitsɨ yu'iwamatɨ xepɨyuxaneta, mɨyaxeteyurietɨ mɨkɨ yuri memɨkate'erie wahɨxie.
1CO 6:7 Matsiri mexi xeyuxaneta, yemekɨ xehetsie waɨkawa pɨrahɨiwa. ¿Titayari matsi xekatewapitɨaka hipame, 'axamemɨxeyurienikɨ? ¿Titayari matsi xekateyutaunie xemɨtenawaiyarienikɨ?
1CO 6:8 Peru xeme pɨta 'axaxekaniyuyurieni. Xekaniyunawatɨweni yu'iwamatɨ.
1CO 6:9 Mɨpaɨ xekatemate, mɨkɨ 'axamemɨteyurie wahetsie pɨkatinakeni memaye'axɨanikɨ Kakaɨyari tiwa'aitɨwame mayanikɨ. Xepɨkateyu'irɨwiyaniri. Xɨka 'ikumaɨwani kemɨ'ane mɨkayɨ'ɨya mɨkayɨkɨna, tetexi xɨka warayexeiyani, xɨka 'ikumaɨwani xeime 'ɨyaya, kɨnaya, xɨka 'ukitɨtɨ 'ukari wahepaɨ yɨaneni, 'ukitɨtɨ xɨka 'ikumaɨwani xeime 'uki,
1CO 6:10 xɨka tinawayani, xɨka naime tihiwe'erieka yuhetsiemieme, xɨka taweneniri, xɨka 'axa'utaineni hipame wahepaɨtsita, xɨka tiyukwamanani tuminikɨ, hetsiena pɨkatinakeni maye'anikɨ, Kakaɨyari ti'aitɨwame mayanikɨ.
1CO 6:11 Mɨpaɨ xe'anenetɨ xekanihɨkɨtɨkaitɨni hipatɨ xeme. Perutsɨ hikɨrixɨa xekaniu'itiyani matsi. Xekaniupatsieni Kakaɨyaritsie mieme. Heitserie xekaniupitɨarieni, Ti'aitame Ketsutsi Kɨritsitu hetsɨa xemiemetetɨtɨ, takakaɨyari 'iyarieyatsie xetewiyatɨ.
1CO 6:12 Heitserie nekanexeiyani naime nemɨtiyurienenikɨ, kepemaine. Xatsunikɨ, peru naime netiyurienetɨ nepɨkaparewiyani. Kepemaine, heitserie nepexeiya naime nemɨtiyurienenikɨ, peru nepɨkanewaɨriya tixaɨtɨ heitserie mexeiyanikɨ nehepaɨtsita.
1CO 6:13 'Ikwai rayuriepa kani'ayumiemetɨni, rayuriepa 'ikwaitsie kani'ayumiemetɨnita, kepemaine. Huu, peru Kakaɨyari 'uxa'atɨni warie kanitaxɨtɨamɨkɨ rayuriepa 'ikwaimame. Peru rawaiyari para mikumaɨwanikɨ kemɨ'ane mɨkayɨ'ɨya, mɨkayɨkɨna, mɨkɨkɨ pɨka'ayumieme. Ti'aitametsie mieme pɨta katini'ayumiemetɨni, Ti'aitame tawaiyaritsie mieme kani'ayumiemetɨnita.
1CO 6:14 Kakaɨyari kanenukuketɨani Ti'aitame. Katananuku'uitɨamɨkɨ tameta yɨtɨrɨkariyakɨ.
1CO 6:15 ¿Mɨpaɨ xekatemate, xewaiyari Kɨritsitu waiyarieya hetsie kanimiemetɨni? ¿Merikɨte, tita Kɨritsitu waiyarieyatsie mɨtimieme, ne kenetinawairieni Kɨritsitu, para 'uka tuminikɨ muyuwitɨnɨa tipiinieya mɨrayanikɨ? Pɨkayɨwe yemekɨ.
1CO 6:16 ¿Mɨpaɨ xekatemate, kemɨ'ane 'uka tuminikɨ muyuwitɨnɨatsie mɨtiwiya, yuhamatɨa xeiwaiyari mekanakɨkani meyuxewitɨ? Kemaine 'utɨarikayari: «Yuhutatɨ xeiwaiyari mekanakɨnikuni meyuxewitɨ».
1CO 6:17 Matsi kemɨ'ane Ti'aitametsie mɨtiwiya, yuhamatɨa xei'iyariyari mekanakɨkani meyuxewitɨ.
1CO 6:18 Xekeneyuta'una kapa xe'imayɨanikɨ kemɨ'ane mɨkayɨ'ɨya mɨkayɨkɨna. Naime 'axakemɨtiyuriene tewi, pɨkayutsewixima yuwaiyaritsie, peraine. Pɨkatixaɨ, matsi kemɨ'ane mikumaɨwa kemɨ'ane mɨkayɨ'ɨya, mɨkayɨkɨna, mɨkɨ pɨyutsewixima yuwaiyaritsie.
1CO 6:19 ¿Mɨpaɨ xekatemate, xewaiyari tuki mɨhɨkɨkɨ 'Iyari Mɨtiyupata hetsiemieme, xehetsie mɨyekakɨ? Kakaɨyari kanixepitɨaka mɨkɨ 'Iyari. Xeme yɨkɨmana xepɨkayukutsiyarima.
1CO 6:20 Xewitɨ pɨta 'uyutuaku xepunanaiya. 'Ayumieme yuwaiyaritsie witsitikuxaxatsiwame Kakaɨyari xekenayeitɨa, meta yu'iyaritsie, Kakaɨyari mukutsiyarieyakɨ.
1CO 7:1 Nepɨtixetaxatɨanikeyu yuxapatsie kexemɨnete'uta'iwawiyaxɨ: «'Aixɨa kani'aneni xɨka 'uki 'uka kakumaɨwani».
1CO 7:2 Peru rukutsixi memɨyumɨirekɨ, 'ukitsi yuxexuitɨ yɨ'ɨitama mekewarexeiyani, 'ukarita yuxexuitɨ yɨkɨnama mekewarexeiyani.
1CO 7:3 'Uki ke'ipitɨaka yɨ'ɨya kemɨreuyewetse, yaxeikɨata 'uka ke'ipitɨaka yɨkɨna.
1CO 7:4 'Uka heitserie pɨkahexeiya yuwaiyari hepaɨtsita, kɨnaya pɨta heitserie kanexeiyani. Yaxeikɨata 'uki heitserie pɨkahexeiya yuwaiyari hepaɨtsita, 'ɨyaya pɨta heitserie kanexeiyani.
1CO 7:5 Xepɨkatekuhayeikawani xeyukumaɨwatɨ, xeyu'enietɨ xekeneyɨaka 'etsiwa xɨka yaxeteheuterikuni, xemuyunenewiekakɨ xemɨ'ayumiemetetɨnikɨ, mɨixa xepɨkayurieka tawari xeyuxewitɨ xe'akɨneke, kapa Kauyumarie xe'uta'inɨatakɨ, xekayɨwawekaku xemɨyukumaɨwanikɨ.
1CO 7:6 'Ipaɨ nepaine xemɨtemaikakɨ kexemɨte'upitɨarie. Netixe'aitɨatɨ nepɨkahaine.
1CO 7:7 Mɨpaɨ pɨnetinakenikeyu, xɨka yunaitɨ teɨteri nehepaɨ me'anenenike. Matsitsɨ Kakaɨyari 'aixɨa tiuka'iyaritɨ yɨkɨ katiniwapitɨaka yuxexuime, xeime 'ipaɨ, xeimeta mɨpaɨ.
1CO 7:8 'Ipaɨ nekatiniwarutahɨawe mɨkɨ memɨkaneneɨke memɨkawikie, meta wiuratsixi. 'Aixɨa kaniyɨmɨkɨ xɨka nehepaɨ me'anenetɨ meyuhayewa.
1CO 7:9 Mexɨka mɨpaɨ mekayɨwaweni, meke'utineneɨke meke'utiwikieni. Matsi 'aixɨa kani'aneni mɨtineɨkekɨ, mɨtiwikienikɨ, kapa 'utatanikɨ.
1CO 7:10 Peru mɨkɨ memɨneneɨke memɨwikie, mɨpaɨ nekatiniwa'aitɨaka, matsi ne pɨkatixaɨ, Ti'aitame pɨta mɨpaɨ katiniwaruta'aitɨani, 'uka yɨkɨna pɨkaku'eirieni.
1CO 7:11 Mexɨka 'iku'eirieni, kaneuyeweka kawikietɨ mɨyuhayewakɨ, yatɨni kaneuyeweka hutarieka munuanikɨ yɨkɨna hetsɨa. 'Ukita yɨ'ɨya pɨkaku'eirieni.
1CO 7:12 Hipameri mɨpaɨ nekatiniwarutahɨawe, Ti'aitame 'atsimɨka'utayɨkɨ 'ikɨ hepaɨtsita, xewitɨ ta'iwatɨtɨ yɨ'ɨya xɨka 'awitɨkɨni yuri kati'eriekame, xɨka 'ɨyaya yuwaɨriyani hamatɨana mukanikɨ, mɨkɨ pɨka'iku'eirieni yɨ'ɨya.
1CO 7:13 'Uka meta yɨkɨna xɨka hexeiyani yuri kati'eriekame, xɨka kɨnaya yuwaɨriyani hamatɨana mukanikɨ, mɨkɨ pɨka'iku'eirieni yɨkɨna.
1CO 7:14 'Uki yuri mɨkati'erie kanipatsieka yɨ'ɨyatsie tiwiyatɨ. 'Uka yuri mɨkati'erieta kanipatsieka yɨkɨnatsie tiwiyatɨ. Metsɨ xɨka mɨpaɨ ka'anenike, xeniwema mepɨka'itiyatɨkanikeyu, peru mɨpaɨ mɨ'anekɨ, mekanipatsieka Kakaɨyaritsie miemekɨ.
1CO 7:15 Peru kemɨ'ane yuri mɨkati'erie xɨka 'i'eirimɨkɨni yuri ti'eriekame, ke'iku'eirieni. Pɨkaheuyewetse yuri mɨti'erie 'ukitɨtɨ 'ukatɨtɨ hetsiena tiwiyatɨ mɨyuhayewakɨ xɨka mɨpaɨ 'aneni. Kakaɨyari kemɨtatiuta'ini, kataniuta'inieni hetsiena temɨtewiyanikɨ teka'uximatɨarietɨ ta'iyaritsie.
1CO 7:16 'Uka ¿keripetimate, xɨka pe'itawikweitsitɨani 'akɨna. 'Ukita kepetimate xɨka pe'itawikweitsitɨani 'a'ɨya?
1CO 7:17 Mɨkɨ xeikɨari, Ti'aitame kemɨtiwarupitɨa yuxexuime, keme'anenetɨ 'amemu'uwakai yuxexuitɨ kepauka Kakaɨyari mɨwaruta'initsie, mɨpaɨ me'anenetɨ meke'u'uwani. 'Ipaɨ nekatiniwa'aitɨaka yunaitɨ memeyutixexeɨriwa naitsarie.
1CO 7:18 ¿Huriyutsixi waxitekiya 'inɨariyarikɨ 'inɨatsietɨ xɨka 'uta'inierieni, pɨkaheyeitɨwani wa'inɨari? Ka'inɨatsietɨ waxitekiyakɨ xɨka 'uta'inierieni, pɨkayu'aitani mɨ'inɨaritɨarienikɨ.
1CO 7:19 Tsepa mu'inɨatsie, tsepa mɨka'u'inɨatsie, xɨka yatikamieni kemɨti'aita Kakaɨyari, mɨkɨ xeikɨa kaneuyeweka.
1CO 7:20 Yuxexuitɨ keme'anenetɨ memuta'inierie, mɨpaɨ meteyurietɨ mekeyuhayewa.
1CO 7:21 ¿Waɨriyarika peti'uximayakai kepauka pemuta'inierietsie? Tsepatsɨ pepɨka'a'iyaritɨaka mɨkɨkɨ. Mexɨka peyɨweni pemɨxɨnekɨ, 'aixɨa kaniyɨmɨkɨ matsi.
1CO 7:22 Kemɨ'ane muta'inierie Ti'aitametsie mɨtiwiyanikɨ, waɨriyarika ti'uximayatame hɨkɨtɨtɨ, xɨnariekame kanayani Ti'aitame hetsiemieme. Mɨpaɨta yaxeikɨa, kemɨ'ane muta'inierie xɨnitɨ, mɨkɨ Kɨritsitu hetsiemieme katini'uximayatametɨni.
1CO 7:23 Xewitɨ 'uyutuaku xepunanaiya. Teɨteri wahetsiemieme te'uximayatamete xepɨkahayuyeitɨwani.
1CO 7:24 Yuxexuitɨ keme'anenetɨ memuta'inierie, mɨpaɨ meteyurietɨ mekeyuhayewa Kakaɨyari hetsie metewiyatɨ. Mɨpaɨ nepaine ne'iwama.
1CO 7:25 Mɨkɨ 'ɨimarixi wahepaɨtsita tixaɨtɨ nepɨkarexeiya Ti'aitame yatiu'aitaku. Peru kenemɨtiku'eriwa nekatinixetaxatɨamɨkɨ mɨpaɨ netimaitɨ, Ti'aitame kaneninenimayaka neniuki 'aixɨa mɨ'anenikɨ.
1CO 7:26 'Ayumieme 'ipaɨ 'aixɨa 'aneme nekani'erieka hikɨ temu'uximatɨariekɨ, 'aixɨa kani'aneni xɨka tewi yuhayewa kemɨ'ane.
1CO 7:27 ¿Petineɨke 'aku? Merikɨte, pepɨkatikuwauneni pemɨ'axɨnakɨ. ¿Pekatineɨke 'aku? 'Uka pepɨkakuwauneni.
1CO 7:28 Mexɨka pe'utineɨke, 'aixɨa kani'aneni, 'axapetiuyurieme pepɨka'a'erieka. 'Ɨimari xɨka 'utiwikieni, 'aixɨa kani'aneni, 'axatiuyurieme pɨkayu'erieka. Matsi mɨkɨ, memutineneɨkɨxɨ memutiwiki mekani'uximatɨariekuni mexi yuwaiyaritsie me'u'uwa. Ne matsi nepɨnaki'akakeyu xɨka xeka'uximatɨariekake.
1CO 7:29 'Ipaɨ nepaine ne'iwama, tukari kanaye'aximeniri. Mexikuxi, mɨkɨ memɨwarawitɨkɨ yɨ'ɨitama, yaxeikɨa mɨkɨ memɨkawarawitɨkɨ wahepaɨ meke'aneneni,
1CO 7:30 mɨkɨta memutitsuana mɨkɨ memɨka'utitsuana wahepaɨ meke'aneneni, mɨkɨta memuyutemamawie mɨkɨ memɨkayutemamawie wahepaɨ meke'aneneni, mɨkɨ memɨtenanetɨwe, mɨkɨ memɨka'atɨiyariewawe wahepaɨ meke'aneneni,
1CO 7:31 mɨkɨ 'ena kwiepa timieme memɨte'ayexeiya, yaxeikɨa mɨkɨ memɨkate'ayexeiyani wahepaɨ meke'aneneni. 'Ikɨ kwie kemɨ'ane 'epɨkareutere.
1CO 7:32 Pɨnetsinake xemɨkayu'iyaritɨakakɨ waɨkawa xeteha'eriwatɨ. Kemɨ'ane mɨkareka'ɨya, Ti'aitametsie timiemekɨ kaniyu'iyaritɨaka, kemɨtinaki'atsitɨanikɨ Ti'aitame.
1CO 7:33 Kemɨ'ane mɨreka'ɨya kwiepa timiemekɨ kaniyu'iyaritɨaka, kemɨtinaki'atsitɨanikɨ yɨ'ɨya.
1CO 7:34 Hutamekɨ mɨpaɨ katinimaika. 'Uka 'ɨimari meta kaniyu'iyaritɨaka Ti'aitame hetsie timiemekɨ, hetsiena mieme mɨpatsienikɨ yuwaiyaritsie yu'iyaritsieta. Kemɨ'ane mɨrekakɨna kaniyu'iyaritɨaka kwiepa timiemekɨ, kemɨtinaki'atsitɨanikɨ yɨkɨna.
1CO 7:35 'Ipaɨ nekatinikuxatani xemɨparewiyanikɨ. Nexeha'imaiyatɨ nepɨka'utaine. 'Aixɨa 'anemekɨ xemɨmatsiɨkɨnikɨ kemɨreuyewetse neputaine, Ti'aitame hetsiemieme xemɨ'ayumiemetetɨnikɨ.
1CO 7:36 Mexɨka yutuxeri 'ɨimaritɨme hexeiyani, 'aixɨa kemɨkati'anekɨ 'iyurieneme xɨka yu'erieka, xɨka 'ayumaikari, xɨka yuwaɨriyani mɨtineɨkekɨ, kemɨtinake yaketiuyurieni. 'Aixɨa kaniyɨmɨkɨ, 'axamete'uyurieme mepɨkayu'erieka.
1CO 7:37 Peru kemɨ'ane mɨkaheuneɨkimɨkɨ 'ɨimari hamatɨa, xɨka yu'iyaritsie mɨpaɨ tiyumaika mɨyɨ'ɨwiyanikɨ, 'aixɨa katiniyuriemɨkɨ.
1CO 7:38 'Ayumieme kemɨ'ane mitiwitɨ 'ɨimari yutuxeri, mɨkɨ 'aixɨa katiniyuriemɨkɨ, kemɨ'ane mɨka'itiwitɨ matsi waɨkawa 'aixɨa katiniyuriemɨkɨ.
1CO 7:39 Kaneuyeweka 'uka yɨkɨnatsie mɨtiwiyanikɨ mexi 'ayeniere 'uki. Xɨka kɨnaya 'umɨni, kanixɨnariemɨkɨ. Kaniyɨwemɨkɨ mɨtiwikienikɨ kemɨtinake, peru Ti'aitame hetsie tiwiyatɨ xeikɨa kanitiwitɨmɨkɨ.
1CO 7:40 Ne kenemɨtiku'eriwa, kaniyutemawiekamɨkɨ matsi xɨka mɨpaɨ 'anetɨ yuhayewa. Mɨpaɨta nekatiniku'eriwani, neta Kakaɨyari 'Iyarieya nepexeiya.
1CO 8:1 Tita kakaɨyarixi memɨtemawiyarie hepaɨtsita nekatinixetaxatɨanikeyu. Mɨpaɨ tekatenimaika, kename tanaitɨ tetemate ketemɨteku'eriwa. Peru yatetemaitɨ ketemɨteku'eriwa, mɨkɨkɨ tekateniyukatawe'erieka xeikɨa. Tetetakanaki'erietɨ pɨta tekanitseiriyariekuni matsi.
1CO 8:2 Tixaɨtɨ timaiweme xɨka yu'erieka, 'akuxi 'atsipɨkatimaiwe kemɨreuyewetse yamɨtimaikakɨ.
1CO 8:3 Matsi xɨka Kakaɨyari naki'erieka, Kakaɨyari kanimatekamɨkɨ mɨyamɨ'ane.
1CO 8:4 Merikɨte, 'ikwai hepaɨtsita kakaɨyarixi kememɨtemawiyarie, mɨpaɨ tepɨtemate, tete pɨkaxuawe kwiepa yuri mɨkakaɨyari, xewitɨ pɨkaxuawe kakaɨyaritɨtɨ. Kakaɨyari yuxewitɨ 'akaniuweni xeikɨa.
1CO 8:5 Peru tsepa 'amemu'uwa mɨkɨ kakaɨyarixi memɨte'uterɨwarɨwa taheima meta kwiepa (kakaɨyarixi kememɨteyumɨire, te'aitamete kememɨteyumɨire),
1CO 8:6 matsi tame ketemɨtemate, Kakaɨyari kaniyuxewini ta'ukiyaritɨtɨ. Naitɨ hetsiena katinayeneikani, tame hetsiena mieme tekani'ayumiemetetɨni. Ti'aitameta kaniyuxewini Ketsutsi Kɨritsitu hɨkɨtɨtɨ. Naitɨ katiniunetɨarieni mɨkɨ 'inetɨaku, tameta tekanayeneniereni mɨkɨ tatsi'unetɨaku.
1CO 8:7 Peru yunaitɨ 'ipaɨ mepɨkatemate. Hipatɨ 'akuxi mepɨkawaratɨmaiyawawe, kakaɨyarixi 'akuxi mepɨwarayexeiya. Mɨkɨ kepauka memikwa'a tete mawarieya, mɨkɨ kakaɨyariyari mekana'eriwani. Mɨpaɨ meteku'eriwatɨ mekaniyutsewiximaka yu'iyaritsie, memɨkatsetseɨyekɨ kememɨteyumate.
1CO 8:8 Merikɨte, ta'ikwai pɨkatatsi'aye'atɨani Kakaɨyari hetsɨa. Tsepa temɨka'ikwa'a, yaxeikɨa tixaɨtɨ tepɨkateheuyehɨwa. Meta tsepa temikwa'a, mɨkɨkɨ tepɨkaparewiya.
1CO 8:9 Xekeneyukweriwayurieka, kapa xewarutiketamɨrakɨ mɨkɨ memɨkatsetseɨye, xetekwatɨ heitserie kexemɨtehexeiya.
1CO 8:10 'Ekɨ mɨpaɨ pemɨtimate, xɨka xewitɨ katseɨyetɨ metsixeiyani mana petikwakame xeime kakaɨyari tukieyatsie, ¿mɨkɨ kemɨtiyumate katiyutawaɨriyawe mitikwanikɨ tita memɨtemawiyarie kakaɨyarixi?
1CO 8:11 Hikɨ mɨkɨ ta'iwa mɨkatseɨye Kɨritsitu hetsiena mieme mumɨ, kanitatɨmaiyariemɨkɨ 'ekɨ mɨpaɨ pemɨtimatekɨ.
1CO 8:12 Mɨpaɨ 'axaxewayurietɨ yu'iwama, xewatawayatɨ mɨkɨ kememɨteyumatekɨ, 'axaxekaniyurieka Kɨritsitu.
1CO 8:13 'Ayumieme xɨka 'ikwaikɨ 'utiketamɨre ne'iwa, nepɨka'itikwani wai neheyemekɨ, kapa ne'itiketamɨrakɨ ne'iwa.
1CO 9:1 ¿Kamɨtsɨ nekatixɨni? ¿Nekatinɨ'ariekame? ¿Ketsutsi nekatiuxei Tati'aitɨwame? ¿Xeme xekatehɨkɨ tita mɨtiutixuawerixɨ netikumaɨwakaku ne, Ti'aitame hetsie netiwiyatɨ?
1CO 9:2 Tsepa hipatɨ nɨ'ariekame memɨkanetsi'erie, xeme xekanenimateni nɨ'ariekame kenemɨtihɨkɨ. Ne'inɨari xekanihɨkɨtɨni, xekɨmana kanimatsiɨkɨni nɨ'ariekame kenemɨtihɨkɨ Ti'aitametsie netiwiyatɨ.
1CO 9:3 'Ipaɨ nepaine ne'utaniutɨ nehetsiemieme, newaku'eiyatɨ mɨkɨ memɨnetsixaneta:
1CO 9:4 ¿Kamɨtsɨ, heitserie tekatehexeiya temɨtemikienikɨ para temɨtekwanikɨ meta temɨte'ienikɨ?
1CO 9:5 ¿Heitserie tekatehexeiya ta'ɨitama temɨwarawitɨkɨnikɨ tahamatɨa, 'iwamarixi mehɨkɨtɨme, kememɨteyurie hipatɨ nɨ'ariekate, Ti'aitame 'iwamama kememɨtewarawitɨkɨ, meta Tsepaxi kemɨtiyuriene?
1CO 9:6 ¿Ne xeikɨa meta Werunawe xɨari mɨpaɨ tepɨkatepitɨarie, temɨtehayewakɨ tete'iwatɨ?
1CO 9:7 Kamɨtsɨ, ¿kepaikɨ kuya payani yuxaɨtame tiyupitɨatɨ? ¿Kepaikɨ haraweri 'uka'iteɨtame 'ikwaxiyari pɨkatikwani? ¿Kepaikɨ wa'ɨwiyatɨ muxatsi, waretsiyari pɨka'anu'ieni?
1CO 9:8 Tewi hepaɨ xeikɨa nepɨtikuxata, 'ipaɨ ne'utaitɨ. ¿'Inɨari niukiyari yaxeikɨa karaine?
1CO 9:9 Karikɨ mɨpaɨ katine'uka Muitsexi 'inɨari niukiyaritsie: «Tuuru kwietsaname xepɨkatsurihɨaka kepauka tɨriku mu'utsipiene». ¿Tuurutsixi wahɨtɨ xeikɨa tikuxata Kakaɨyari,
1CO 9:10 matsi tahetsiemieme katikuxata? Tahetsiemieme yemekɨ mɨpaɨ pɨraka'utɨarie, meuyewetsekɨ kwietsaname mɨkwietsananenikɨ yuri ti'erietɨ mexi ta'ikwewa, 'uwameta mɨti'unikɨ yuri ti'erietɨ kename 'ikwaxiyari hexeiyatɨ 'ayani.
1CO 9:11 Tame 'iyaritsie timieme tekaniuka'eni xehetsɨa. ¿'Aixɨa katiyɨni waitsie timieme xɨka te'uka'itsanani yaxetatemikwakaku?
1CO 9:12 Hipame xekaniwapitɨaka heitserie memexeiyanikɨ xehepaɨtsita. ¿Tame matsi yemekɨ heitserie tekatehexeiya temɨtemikienikɨ? Peru tsepa heitserie temexeiya mɨkɨkɨ, mɨpaɨ tepɨkayɨa. Naime tepɨtenewie matsi, te'ixamurienikɨ niuki 'aixɨa manuyɨne Kɨritsitu hepaɨtsita.
1CO 9:13 ¿Mɨpaɨ xekatemate, mɨkɨ tukita memɨte'uximaya, mɨkɨ tukita timieme mekatenikwaka, mɨkɨ mawari taiyametsie memɨ'ayumiemete, mawari taiyametsie timieme mekatekwa'a?
1CO 9:14 Ti'aitame yaxeikɨa katiniwaruta'aitɨani mɨkɨ niuki 'aixɨa manuyɨne memukuxata, mɨkɨ memɨte'iwanikɨ yametekuxatatɨ.
1CO 9:15 Ne xeikɨa nepɨkanewaɨriya mɨpaɨ nemɨtiyurienenikɨ. Kenemɨtiu'utɨa meta, mɨpaɨ nepɨka'utaine yanemɨtimikienikɨ. Nepuyuta'ɨre niuki 'aixɨa manuyɨne nekuxatatɨ nekati'iwatɨ, xɨka mɨkɨ ne'unawaiyarieni nepɨmɨnikeyu.
1CO 9:16 Tsepa niuki 'aixɨa manuyɨne nemɨkuxata, matsi mɨkɨkɨ nepɨkayɨwe 'aixɨa nemɨtikuxatanikɨ nehepaɨtsita. Waɨriyarika matsi nepitɨarietɨ nekatinikuxatani. Xɨa'ui, nehetsiemieme 'aixɨa pɨka'anenikeyu, xɨka niuki 'aixɨa manuyɨne nekakuxatanike.
1CO 9:17 Xɨka nenewaɨriyatɨ mɨpaɨ neti'uximayaka, peuyewetse nemɨti'iwanikɨ. Matsi waɨriyarika nekanipitɨarieka hɨritɨarika xeikɨa nemaye'atɨanikɨ nepɨyɨane.
1CO 9:18 ¿Ketita neti'iwanikeyu? Niuki 'aixɨa manuyɨne xɨka nekuxatani nekatiwawawirietɨ, mɨkɨ kanine'iwarikatɨni. Tsepa heitserie nemexeiya nemɨtiwaukakɨ.
1CO 9:19 Tsepa nemɨxɨni, yunaime wahetsiemieme waɨriyarika ti'uximayatame nepaneyeitɨwa, yumɨireme matsi nemɨwarahapanikɨ Kɨritsitu hetsiemieme.
1CO 9:20 Huriyutsixi netiwakuxaxatɨwatɨ, huriyu nepaneyeitɨwa, nemɨwata'inienikɨ huriyutsixi. Mɨkɨ 'inɨari niukiyaritsie mepɨtewiya, 'ayumieme wahepaɨ ne'anetɨ nepaneyeitɨwa nemɨwarahapanikɨ mɨkɨ 'inɨari niukiyaritsie memɨtewiya (tsepa wa'inɨari niukiyaritsie nemɨkatiwiya ne).
1CO 9:21 Mɨkɨ 'inɨari niukiyari memɨkahexeiya newakuxaxatɨwatɨ, wahepaɨ ne'anetɨ nepaneyeitɨwa, nemɨwata'inienikɨ mɨkɨ 'inɨari niukiyari memɨkahexeiya (tsepa Kakaɨyari hɨxie 'inɨari niukiyari hetsie nemɨtiwiya, Kɨritsitu 'inɨarieya hetsie yanepɨtiyuhɨritɨa).
1CO 9:22 Mɨkɨ memɨkatsetseɨye newakuxaxatɨwatɨ, nekatseɨyetɨ nepayuyeitɨwa, nemɨwata'inienikɨ mɨkɨ memɨkatsetseɨye. Yunaime newakuxaxatɨwatɨ, naime nekanayuyeitɨwani xɨka 'aku naimekɨ newatawikweitsitɨamɨkɨ hipame.
1CO 9:23 'Ipaɨ naime yanekatiniyurieneni niuki 'aixɨa manuyɨnetsie mieme, neta nehetsie mɨtinakenikɨ kemaine mɨkɨ niukiyari 'aixɨa nemɨ'itɨarienikɨ.
1CO 9:24 ¿Mɨpaɨ xekatemate, mɨkɨ pareku memɨte'unanautsa, yunaitɨ metinautsame, xewitɨ xeikɨa heixeiyatɨ karayani 'iwarikatsie mieme? Yaxeikɨata xeme, xeketeneunanautsani para xeheixeiyatɨ xemakɨnekɨ.
1CO 9:25 Yunaitɨ waikamete mekateniyɨ'ɨkitɨaka naimekɨ meyɨ'ɨwiyatɨ. Mɨpaɨ mekateniyurieka mɨkɨ kuruna mɨxainiwe memɨ'ɨitɨarienikɨ. Tame matsi kuruna mɨkaxainiwe tekani'ɨitɨariekuni.
1CO 9:26 Netsɨ kenemɨtiunanautsa, 'aixɨa nekatininemaika kenemɨtimie. Kenemɨtinemiene, 'eka nepɨkakuwaxɨaxime.
1CO 9:27 Matsi newaiyari nepɨkuwaya. Nepɨnemaxiuta kapa ne'utixani'eriwakɨ ne, netiwarutaxatɨaku hipame.
1CO 10:1 Yaxeikɨa ne'iwama, kaneuyeweka mɨpaɨ xemɨtemaikakɨ, tatewarima yunaitɨ mɨkɨ haiwitɨritɨa kepauka memu'uwakai, yunaitɨ mana haramaratsie kepauka memanukɨ,
1CO 10:2 yunaitɨ mɨkɨ Muitsexi hetsie metewiyatɨ mekaniuka'ɨyarieni haiwitɨritsie meta haramaratsie.
1CO 10:3 Yunaitɨ 'axeikɨa 'iyaritsie mieme mekatenikwakaitɨni,
1CO 10:4 yunaitɨ 'axeikɨa 'iyaritsie mieme mekaniharekaitɨni. 'Iyaritsie mieme tete mɨwaruweiyakai, mɨkɨ kaniwaharitɨakaitɨni. Mɨkɨ tete Kɨritsitu kanihɨkɨtɨkaitɨni.
1CO 10:5 Tsepanetɨ, Kakaɨyari pɨkanaki'akai yumɨireme wahepaɨtsita, makumawetsie kaniutixɨriyani wakaxarite.
1CO 10:6 Merikɨtsɨ, mɨkɨ 'inɨari katiniuyɨni tahetsiemieme, kapa tetehiwe'eriekakɨ tita 'axamɨti'anene, mɨkɨ memɨtehiwe'eriekai hepaɨ.
1CO 10:7 Yaxeikɨa tetexi xewarayexeiyatɨ xepɨka'akɨkani, mɨkɨ hipatɨ kememɨte'uyuri wahepaɨ. Mɨpaɨ katine'uka: «Teɨteri yunaitɨ mekananukayaxe mekateniukwani mekaniuti'ieni, kemɨtiwanake memɨteneitɨwenikɨ».
1CO 10:8 Yaxeikɨata, kemɨ'ane mɨkata'ɨya mɨkaxekɨna tepɨkawakumaɨwani, hipatɨ mɨkɨ kememɨte'uyuri. Mewarukumayɨaka, mekaniukwini xeitukaritsie, xeitewiyari heimana haika miriyari meyupaɨmetɨ.
1CO 10:9 Mɨkɨ meta, tepɨkate'i'uxitɨaka Ti'aitame te'i'inɨatatɨwetɨ, hipatɨ mɨkɨ kememɨte'uyuri. Mɨkɨ me'i'inɨatatɨwetɨ, kuuterixi mewarutikeku mekaniukwini.
1CO 10:10 Mɨkɨ meta, xepɨkaniukixieka, yaxeikɨa hipatɨ mɨkɨ kememɨte'uyuri, me'uniukixieku, ti'uname kaniwaruka'una.
1CO 10:11 Merikɨte, kememu'itɨarie mɨkɨ, 'inɨari katiniuyɨni. Yakatinaka'utɨarieni kemɨtiuyɨ, temaye'eritɨarienikɨ tame, tahetsie mɨtinakenikɨ tukari 'aye'aximekaku.
1CO 10:12 'Ayumieme kemɨ'ane 'a'uweme muyu'erie, mɨkɨ keyɨ'ɨwiyani kapa 'atiwenikɨ.
1CO 10:13 Teɨteri kememɨte'inɨatsie xeikɨa xekateni'inɨatsieka xeme. Kakaɨyari matsi yakatinikamieni kemaine. Mɨkɨ pɨkaxepitɨani xemɨ'inɨatsiekakɨ kexemɨkateyɨwawe. Xe'inɨatsiekaku matsi kanixepitɨamɨkɨta kexemɨtewikwekakɨ, xepitɨatɨ xemɨyɨwawenikɨ xete'uka'eniwatɨ.
1CO 10:14 'Ayumieme nenaki'erima, xekeneyuta'una kapa tetexi xewarayexeiyanikɨ.
1CO 10:15 Temaiwawemete nemɨtiwakuxaxatɨwa hepaɨ, mɨpaɨ nekatinixekuxaxatɨwani xeme. Yɨkɨmana xekeneu'inɨata tita nemɨtikuxata.
1CO 10:16 Tekɨxi hepaɨtsita kepauka 'aixɨa temutiyuane Kakaɨyari hepaɨtsita, ¿mɨkɨ tekɨxikɨ tekatetaxewi Kɨritsitu hamatɨa yuxuriya kemɨtiutayeuri? Paa kepauka temititara, ¿mɨkɨ pakɨ tekatetaxewi Kɨritsitu hamatɨa, yuwaiyaritsie kemɨtiumierie?
1CO 10:17 Mɨkɨ paa kemɨtiyuxewi, tameta tamɨiretɨ xeiwaiyari tekanihɨkɨtɨni. Teyunaitɨ 'axeikɨa xeipayaritsie tekatenikwaka.
1CO 10:18 Mɨkɨ meta 'Ixaheri nuiwarieyatsie memɨtinunuiwa xekeniwara'eriwani. ¿Mɨkɨ mawari taiyametsie mieme mawari memɨkwa'a, mekateyuxewi hamatɨana?
1CO 10:19 ¿Merikɨte, kehepaɨtɨtɨri nehaine? ¿Tita tete mɨtimawiyarie tixaɨtɨ mɨtihɨkɨkɨ neraine, tete kakaɨyariyari tixaɨtɨ mɨtihɨkɨkɨ neraine?
1CO 10:20 Matsitsɨari 'ipaɨ nekanaineni, tita memɨtemawa nuiwarite, kakaɨyarixi 'axamemɨ'anene wahetsiemieme mekatenimawani, kemɨ'ane yuri kakaɨyari mɨkahɨkɨ hetsiemieme. Pɨkanetsinake xemɨyutaxewirekɨ kakaɨyarixi 'axamemɨ'anene wahamatɨa.
1CO 10:21 Xepɨkayɨwawe Ti'aitame tekɨxieyata mieme xemanu'ieni, mexi xe'enuye'e kakaɨyarixi 'axamemɨ'anene watekɨxita mieme. Xepɨkayɨwawe Ti'aitame 'ikwaiya xemɨtekwani, mexi xetekwa'a kakaɨyarixi 'axamemɨ'anene wa'ikwai.
1CO 10:22 ¿Nutsɨ Ti'aitame tepɨyehaxɨatɨani? ¿Kamɨtsɨ tame waɨkawa tetetɨrɨkawi, Ti'aitame tahepaɨ katitɨrɨkaɨyekaku?
1CO 10:23 Xeme mɨpaɨ xeputiyuane: «Heitserie tekanexeiyani naime temɨteyuriekakɨ», peru naime teteyurietɨ tepɨkaparewiyani. «Heitserie tekanexeiyani naime temɨteyurienikɨ», peru naime teteyurietɨ tepɨkatseiriyarieni.
1CO 10:24 Xewitɨ yuhetsiemieme pɨkatikuwaɨneni 'aixɨa mɨ'itɨarienikɨ. Matsi hipatɨ pɨta 'aixɨa memɨ'itɨarienikɨ.
1CO 10:25 Wai muwatuiyatsie timieme xeketenekwaka, tixaɨtɨkɨ xekateyu'iyaritɨatɨ kexemɨteyumate.
1CO 10:26 «Kwie Ti'aitame tipiinieya katinihɨkɨtɨni, naitɨ kwiepa mɨtixuawe katinipiinieyatɨnita».
1CO 10:27 Peru xewitɨ yuri kati'erietɨ xɨka xe'uta'inieni xemɨtekwanikɨ kiena, xɨka xeyuwaɨriyani xemuhukɨ, naime kexemɨtemikieni xeketeneutikwa'i, tixaɨtɨkɨ xekateyu'iyaritɨatɨ kexemɨteyumate.
1CO 10:28 Peru xewitɨ xɨka mɨpaɨ tixe'utahɨawe: «'Ikɨ tete mawarieya kanihɨkɨtɨni», matsi xepɨka'ikwaka, xehe'eriwatɨ kemɨ'ane yamɨtixe'utahekɨatɨa, xehe'eriwatɨ kemɨtiyumate, kapa yuti'iyaritɨanikɨ.
1CO 10:29 Xeme kexemɨteyumate, nepɨkahaine. Matsi xewitɨ pɨta kemɨtiyumate hetsiemieme nepaine. Xewitɨ xehetsie mɨtiuhɨani pɨkayɨwe xɨka 'aixɨa xeteyurieka yatɨni pɨtikatixaɨ.
1CO 10:30 Xɨka ne'itikwani pamɨpariyutsi ne'ipitɨatɨ Kakaɨyari, titayariri 'axanetikɨhɨawarɨwa ne'ikwatɨ, Kakaɨyari hepaɨtsitana pamɨpariyutsi nemipitɨakɨ.
1CO 10:31 Merikɨtsɨ, tsepa xemɨtekwa'a, tsepa xemɨte'ie, tsepa tita xemɨteyurie, naime xeketeneyurieka Kakaɨyari witsimɨtikuxaxatsiwanikɨ.
1CO 10:32 Xepɨkawatiketamɨrani huriyutsixi, meta mɨkɨ memɨkahuriyutsixi, yaxeikɨata mɨkɨ memuyutixexeɨriwa Kakaɨyari hetsɨa miemete.
1CO 10:33 Naimekɨ nekatiniyurieneni memɨparewiyanikɨ yunaitɨ. 'Aixɨa nemɨ'itɨarienikɨ ne, mɨkɨkɨ nepɨkayɨane. Yumɨiretɨ 'aixɨa memɨ'itɨarienikɨ pɨta nekaniyɨaneni, mɨkɨ memɨtawikweitsitɨarienikɨ.
1CO 11:1 Xenetsi'ɨketɨ xekenakɨni, neta Kɨritsitu kenemɨti'ɨke.
1CO 11:2 'Aixɨa nepaine xehepaɨtsita naimekɨ xemɨnetsiha'eriwakɨ, yaxemɨtekahukɨ yeiyaritsie kenemɨtixeyetuiri.
1CO 11:3 Peru kaneuyeweka mɨpaɨ xemɨtemaikakɨ, Kɨritsitu yunaime 'ukitsi kaniwamu'utɨni, 'uki meta 'uka kanimu'uyatɨni, meta Kakaɨyari Kɨritsitu kanimu'uyatɨni.
1CO 11:4 'Uki xɨka yutanenewieni, xɨka tikuxatani, yukumu'ututɨ, kaniyutewiyatsitɨaka yumu'ukɨ.
1CO 11:5 'Uka pɨta xɨka yutanenewieni, xɨka tikuxatani, kayukumu'ututɨ, kaniyutewiyatsitɨaka yumu'ukɨ. Yumu'utsie mumu'uxirieka hepaɨ kani'aneni.
1CO 11:6 Xɨka 'uka kayukumu'utuka, keyukaxikani. Kamɨtsɨ 'uka xɨka yutewiyani mu'uxirietɨ, mu'umetsetɨ, keyukumu'utuka matsi.
1CO 11:7 Pɨkaheuyewetse 'uki mɨyukumu'utukakɨ, Kakaɨyari hepaɨ mɨ'anekɨ, hetsiena mɨmatsiɨkɨkɨ kemɨ'ane Kakaɨyari. 'Ukatsie matsi kanimatsiɨkɨni kemɨ'ane 'uki.
1CO 11:8 Tsutɨapai 'uki 'ukatsie pɨka'ayene, 'uka 'ukitsie payene pɨta.
1CO 11:9 Mɨkɨ meta, 'uki pɨka'unetɨarie 'uka hetsiemieme, 'uka 'uki hetsiemieme kaniunetɨarieni pɨta.
1CO 11:10 'Ayumieme kaneuyeweka 'uka yumu'utsie, kɨmana mɨmatsiɨkɨnikɨ heitserie kemɨrexeiya, Kakaɨyari niuki tuayametemama wara'eriwatɨ.
1CO 11:11 Peru Ti'aitame hetsie metewiyatɨ kememɨte'u'uwa, 'uka 'apɨka'uyeika 'uki kaheuyehɨatɨ, 'ukita 'apɨka'uyeika 'uka kaheuyehɨatɨ.
1CO 11:12 'Uka 'uki hetsie mayenekɨ, 'ayumieme 'ukita 'uka hetsie kaniyenuiwamɨkɨ. Naitɨ matsi Kakaɨyaritsie katinayenexɨani.
1CO 11:13 Yɨkɨmana xekeneuyu'inɨata kexemɨteyumate. Xɨka 'aku 'aixɨa 'aneni 'uka nenewieri mipitɨani Kakaɨyari kayukumu'ututɨ.
1CO 11:14 ¿Ketemɨ'anene kanitewiweni 'uki xɨka kɨpateya 'atɨtɨni,
1CO 11:15 'uka pɨta witsikatiniyuxexeiyani xɨka kɨpateya 'atɨtɨni? Yɨkɨpa kaniumikieni manuyukanakakɨ.
1CO 11:16 Mexɨka xewitɨ niukixiemɨkɨni, mɨpaɨ ketimaika, tame tepɨkaheixeiya yeiyari mɨpaɨ 'aneme, Kakaɨyari hetsɨa miemete memuyutixexeɨriwa, mɨkɨta mɨkɨ yeiyari mepɨkahexeiya.
1CO 11:17 'Ipaɨ kenemɨtixe'aitɨa, nepɨkayɨwe 'aixɨa nemutainenikɨ xehepaɨtsita, kexemɨteyutixexeɨriwa. 'Aixɨa xepɨka'itɨarie yaxeteyutiyexexeɨriwatɨ, 'axaxekani'itɨarieka pɨta.
1CO 11:18 Mɨkɨ meri, kemɨraniuwa, 'axeikɨa kepauka xemɨyuxeɨrietsie, yuhixɨata xekaniyutsanani. Yapaɨmemekɨ mɨpaɨ yuri nepɨti'erie kemɨraniuwa.
1CO 11:19 Tsɨrikɨ kaneuyeweka yuxexuime wahetsie xemɨtewiyanikɨ, xetsata mɨmatsiɨkɨnikɨ mɨkɨ kemɨ'ane memɨ'inɨatsie.
1CO 11:20 'Axeikɨa kepauka xemɨyuxeɨrietsie kexemɨtekwa'a, Ti'aitame 'Ikwaiya pɨkahɨkɨ.
1CO 11:21 Karikɨ yuxexuitɨ xekaniyumexɨitɨaka yu'ikwai xemɨtikwanikɨ kepauka xemɨtekwa'a. Hipatɨ mekaneuhakakwikuni, mexi hipatɨ metarɨweka.
1CO 11:22 ¿Kamɨtsɨ kiite xekatehexeiya hakewa xemɨtehekwanikɨ meta xemɨtehe'ienikɨ? Nutsɨ xepuwatewiyatsitɨaku mɨkɨ tixaɨtɨ memɨkatehexeiya, xewaxani'erietɨ mɨkɨ memɨyutixexeɨriwa Kakaɨyari hetsɨa miemete. ¿Keri netixetahɨawe? ¿'Aixɨa netiutaineni xehepaɨtsita? 'Ipaɨ kexemɨteyurie, matsi 'aixɨa nepɨka'utaineni xehepaɨtsita.
1CO 11:23 Kenemɨtixeyetuiri, neta nekaniyetuiriyarieni Ti'aitame hetsɨa mieme. Mɨpaɨ katiniuyɨni. Mɨkɨ tɨkaritsie kepauka mɨyetuiyanikekai, Ti'aitame Ketsutsi paa kananuku'ɨni.
1CO 11:24 Pamɨpariyutsi 'ipitɨaka Kakaɨyari, paa kaniutitara, mɨpaɨ 'utaitɨ: «'Ikɨ newaiyari kanihɨkɨtɨni, xehetsie kanimiemetɨni. 'Ipaɨ xeketeneyurieka xemɨnetsiha'eriwanikɨ ne».
1CO 11:25 Yaxeikɨata katiniuyurieni tekɨxi 'anukuhanaka mete'ukwaku, mɨpaɨ 'utaitɨ: «'Ikɨ tekɨxita mieme tɨratu mɨhekwa kanihɨkɨtɨni, nexuriyakɨ 'aixɨa kani'itɨariemɨkɨ. Kepauka xemi'ieka, 'ipaɨ xeketeneyurieka xemɨnetsiha'eriwanikɨ».
1CO 11:26 Kepauka 'ikɨ paa xemutikwa'ani, 'ikɨ tekɨxi kepauka xemanuye'eni, xekatenihekɨatakakuni kemɨtiumɨ Ti'aitame, mexi kanuawe.
1CO 11:27 'Ayumieme kemɨ'ane 'ikɨ paa mɨtikwani 'ikɨ tekɨxi manu'ieni, hetsiena katinakekaku 'iyarieya yaka'anekaku, hetsiena pɨrahɨiyani mitsewiximakɨ Ti'aitame waiyarieya meta xuriyaya.
1CO 11:28 Tewi keyu'inɨatani. Mɨpaɨ tiyurienetɨ, 'ikɨ paa kehekwaka, 'ikɨ tekɨxita mieme ke'anuye'eni.
1CO 11:29 Karikɨ kemɨ'ane mitikwa'a meta menuye'e xɨka heitseriemekɨ katimaika tita waiyarieya mɨtihɨkɨ, yuhetsie rahɨpatɨ katinikwakamɨkɨ kani'iekamɨkɨ.
1CO 11:30 Mɨpaɨ xemɨteyuriekɨ, 'ayumieme xekaneuweraranini yumɨiretɨ xeme, xekatenikukuyeni, yuwaɨkawatɨri mekaneukutsu.
1CO 11:31 Xɨka takɨmana teta'inɨatake, tahetsie pɨkatinakenikeyu 'uximatɨarika.
1CO 11:32 Peru Ti'aitame kepauka mɨtatsita'inɨata, tekateni'ɨkitɨarieka 'uximatɨarikakɨ, kapa te'anutaxɨriyanikɨ kwiepa memɨtama wahamatɨa.
1CO 11:33 'Ayumieme ne'iwama, kepauka xemɨyuxeɨrie xetekwanike, xekeneyukwewieka.
1CO 11:34 Xɨka heuhakamɨkɨni, yukiita ketiukwani, kapa xete'uka'enienikɨ xeyukuxeɨrieme. Hipatɨ mɨraneniere 'aixɨa nekatineyuriemɨkɨ kepauka nemumietsie.
1CO 12:1 Ne'iwama, kaneuyeweka 'ipaɨ xemɨtemaikakɨ tita 'Iyaritsie mɨtimieme hepaɨtsita.
1CO 12:2 Xeme mɨpaɨ xekatenimaika kemɨti'anekai kepauka Ti'aitame xemɨka'ayexeiyakaitsie. Xekanikuhapanietɨwekaitɨni tetexi memɨkaniuwawe wahetsɨa, kexemɨtekɨhɨawarɨwakai.
1CO 12:3 'Ayumieme 'ipaɨ nekatinixetahekɨatɨanikeyu, tewi xɨka mɨpaɨ 'utayɨni: «Ketsutsi 'axaketikuxaxatsiwani», 'utaitɨ, mɨkɨ Kakaɨyari 'Iyarieyatsie tiwiyatɨ pɨka'utaine. Mɨkɨ meta, tewi xɨka mɨpaɨ 'utayɨni: «Ketsutsi katini'aitametɨni», 'utaitɨ, 'Iyari Mɨtiyupatatsie tiwiyatɨ xeikɨa kaniyɨweni mɨpaɨ mutayɨni.
1CO 12:4 Yɨkɨ tepɨte'umikiwa, 'Iyari yuxewikaku.
1CO 12:5 Yɨkɨ tepɨte'uhɨritɨariwa, Ti'aitame yuxewikaku.
1CO 12:6 Yɨkɨ tepɨtekuyuitɨariwa, Kakaɨyari yuxewikaku. Mɨkɨ kanihɨkɨtɨni kemɨ'ane yunaime mɨwakuyuitɨwa naimekɨ.
1CO 12:7 Taxexuime tahetsie, 'Iyari matsiɨkɨtɨ kanayeitɨariwani, 'aixɨa temɨ'itɨarienikɨ tanaitɨ.
1CO 12:8 Xewitɨ kanipitɨarieka mɨtaniunikɨ timaiweme hepaɨ, 'Iyari yatipitɨakaku. Xewitɨta kanipitɨarieka waɨkawa mɨrakumaikakɨ, mɨkɨtɨtɨ 'Iyari yuxewitɨ kemɨtipitɨa.
1CO 12:9 Xewitɨta kanipitɨarieka yuri mɨti'eriekakɨ, mɨkɨ 'Iyaritsie tiwiyatɨ. Xewitɨta kanipitɨarieka 'aixɨa meteheu'eriekame muwarayeitɨanikɨ tekwikwikate, mɨkɨ 'Iyari muyuxewitsie tiwiyatɨ.
1CO 12:10 Xewitɨta kanipitɨarieka mariwemekɨ yamɨtiyurienenikɨ, xewitɨta mɨtikuxatanikɨ, xewitɨta 'iyarite mɨ'inɨatanikɨ, xɨka 'aixɨa 'aneneni yatɨni xɨka 'axa'aneneni. Xewitɨta hipame niukiyarikɨ mɨtaniunikɨ kanipitɨarieka, xewitɨta hipame niukiyarite kemɨtikuxaxatsiwa mɨhekɨatanikɨ.
1CO 12:11 Mɨkɨ 'Iyari yuxewitɨ kanihɨkɨtɨni kemɨ'ane mɨwakuyuitɨwa yunaime. Yɨkɨ katiniwapitɨaka yuxexuime, kemɨtiyuwaɨriya.
1CO 12:12 Yaxeikɨa tawaiyari kaniyuxewini, tamamate, ta'ɨkate, tateni naitɨ timɨirekaku. Naitɨ tawaiyaritsie timieme timɨirekaku muyuxewi hepaɨ waiyari, mɨpaɨta kani'aneni Kɨritsitu.
1CO 12:13 'Iyari muyuxewi kemɨtatiutaxewiriyaxɨ, xeiwaiyari tekanakɨne kepauka temuka'ɨyarie, tsepa Huriyutsixi Kɨriyekutsixi temɨhɨkɨ, tsepa waɨriyarika temɨte'uximaya, tsepa temɨxɨxɨni. Teyunaitɨ tekaniuharitɨarieni, 'Iyari yuxewikaku.
1CO 12:14 Mɨkɨ meta, rawaiyari xeimamayari xei'ɨkayari pɨkahɨkɨ. Pɨmɨire pɨta.
1CO 12:15 Ra'ɨka xɨka mɨpaɨ hainenike: «Ne ramama nemɨkahɨkɨkɨ, 'ayumieme rawaiyaritsie nepɨkamieme», mɨpaɨ 'utayɨka xeikɨa rawaiyaritsie kamiemetɨtɨ pɨka'ayanikeyu.
1CO 12:16 Ranaka xɨka mɨpaɨ hainenike: «Ne rahɨxite nemɨkahɨkɨkɨ, 'ayumieme rawaiyaritsie nepɨkamieme», rawaiyaritsie kamiemetɨtɨ pɨka'ayanikeyu, mɨpaɨ 'utayɨka xeikɨa.
1CO 12:17 Rawaiyari naitɨ xɨka hɨxitetɨnike, ¿keti'enanikeyu? Naitɨ xɨka nakatɨnike, ¿keri reu'ɨkwenikeyu?
1CO 12:18 Peru hikɨ Kakaɨyari rawaiyaritsie kanikayatsa xexuime kemɨtinake.
1CO 12:19 Xɨka naitɨ xeipaɨriyaritɨnike, ¿keri tihɨkɨtɨnikeyu rawaiyari?
1CO 12:20 Matsi pɨmɨire, peru rawaiyari kaniyuxewini.
1CO 12:21 Rahɨxi pɨkayɨwe mɨpaɨ mɨtitahɨawe ramama: «Nepɨkamatsiheuyehɨwa», 'utaitɨ. Yaxeikɨata ramu'u pɨkayɨwe mɨpaɨ mɨtitahɨawe ra'ɨkate: «Nepɨkaxeheuyehɨwa», 'utaitɨ.
1CO 12:22 Matsi tita katitɨrɨkawime temɨte'erie, mɨkɨ yemekɨ tepeuyehɨwa.
1CO 12:23 Tawaiyaritsie timieme, tita 'aixɨa kati'aneneme temɨxata, mɨkɨ tekanikemaritɨaka matsi. Tawaiyaritsie tita witsimɨkatixeiyarie, witsi'anenetɨ matsi kanayeitɨariwani,
1CO 12:24 tita witsimɨtixeiyarie mɨpaɨ mɨkareuyewetsekɨ. Matsi Kakaɨyari kanitaxewiriyani tawaiyari, 'aixɨa 'iyurienetɨ matsi tita tixaɨtɨ mɨreuyehɨwa,
1CO 12:25 tawaiyari kapa hixɨata tsaninikɨ, matsi tita tawaiyaritsie mɨtimieme yaxeikɨa mɨtiyɨ'ɨwiyanikɨ naitɨ.
1CO 12:26 Xeipaɨriyari xɨka tikuyeni, naitɨ hamatɨana katinikuyekamɨkɨ. Xeipaɨriyari xɨka witsi'u'itɨarieni, naitɨ hamatɨana kaniyutemawiekamɨkɨ.
1CO 12:27 Xemeri Kɨritsitu waiyarieya xekanihɨkɨtɨni. Yuxexuitɨ waiyarieyatsie timieme xeipaɨriyari xekanihɨkɨtɨni, kexemɨte'upitɨarie.
1CO 12:28 Mɨkɨ memeyutixexeɨriwatsie, Kakaɨyari hipame meri kaniwarukayatsa nɨ'ariekate, 'ariketa Kakaɨyari niukametemama, 'ariketa te'ɨkitamete, 'anariketa mɨkɨ mariwemekɨ memɨteyurie, 'ariketa mɨkɨ memɨte'umikie 'aixɨa meteheu'eriekame tekwikwikate memɨwarayeitɨwanikɨ, teparewiwamete meta te'aitamete, mɨkɨta hipame niukitekɨ memutiniuka.
1CO 12:29 ¿Yunaitɨ nɨ'ariekate kemetehɨkɨ? ¿Yunaitɨ Kakaɨyari niukametemama kemetehɨkɨ? ¿Yunaitɨ te'ɨkitamete kemetehɨkɨ? ¿Yunaitɨ mariwemekɨ kemeteyurie?
1CO 12:30 ¿Yunaitɨ kemete'umikiwa 'aixɨa meteheu'eriekame memɨwarayeitɨwanikɨ tekwikwikate? ¿Yunaitɨ hipame niukiyaritekɨ kemete'utiniuka? ¿Yunaitɨ kemete'ihekɨata tita mɨtikuxaxatsiwa hipame niukiyarikɨ metekuxatakaku?
1CO 12:31 Xekeneyuwaɨriyani 'aixɨa 'aneneme matsi xemɨtemikienikɨ. 'Akuxi huye yemekɨ 'aixɨa mɨ'ane nekanixetahekɨatɨamɨkɨ.
1CO 13:1 Xɨka hipame niukiyarikɨ ne'utaniukanike teɨteri kememɨteniuwawe meta Kakaɨyari niuki tuayametemama, peru xɨka nekatinekanaki'eriekake, tepɨa mukuyuane hepaɨ nekani'anenikeyu, tirinari mutatiriurɨka hepaɨ.
1CO 13:2 Xɨka netiumikienike Kakaɨyari niukieya nemɨkuxatanikɨ, xɨka netimaikake naime kemɨti'awie, naime kenemɨtimatekɨ, naimekɨ yuri neti'erietɨ xɨka neyɨwenike yemurite nemɨwatayuitɨanikɨ, peru xɨka nekatinekanaki'eriekake, tixaɨtɨ nepɨkatihɨkɨtɨnikeyu.
1CO 13:3 Xɨka tixaɨtɨ memɨkatehexeiya nepiinite naime netiwaruminike, xɨka neneyetuanike newaiyari mɨtataiyarienikɨ, peru xɨka nekatinekanaki'eriekake, tixaɨtɨ nepɨkara'iwakeyu.
1CO 13:4 Tiyukanaki'erietɨ 'akatineutewini kaha'atɨ. 'Aixɨa katiniuka'iyarini tiyukanaki'erietɨ, pɨkayumexɨitɨa hipame wahepaɨtsita wara'iwamɨtɨ. Tiyukanaki'erietɨ mariwetɨ pɨkahayuyeitɨwa, meta pɨkayuta'ɨre.
1CO 13:5 Yapɨkatiyuriene kemɨtiyutewiyatsitɨa. Pɨkatikuwaune tita yuhetsie mɨtimieme xeikɨa, pɨkayuhaxɨatɨa, 'axamɨti'anene pɨkara'eriwa.
1CO 13:6 Pɨkayutemawie yameteyuriekaku hipatɨ kemɨkatiheitserie, matsi tita yuri mɨraine hepaɨtsita kaniyutemawieka.
1CO 13:7 Naime katininewieka, naimekɨ yuri katini'erieka, naimekɨ kanita'ikwewani yuri ti'erietɨ, naimekɨ katiniuka'eniwani.
1CO 13:8 Kemɨtiyukanaki'erie, hatsuaku pɨkatapare. Ketemɨtekuxata, mɨkɨ kanitaparimɨkɨ. Hipame niukiyaritekɨ ketemɨte'utiniuka, mɨkɨ katineuyewemɨkɨ. Ketemɨtemaiwawe, mɨkɨta kanitaparimɨkɨ.
1CO 13:9 Yapaɨmemekɨ xeikɨa tekatenimaika, yapaɨmemekɨ xeikɨa tekatenikuxatani.
1CO 13:10 Kepauka munuani kemɨ'ane tixaɨtɨ mɨkareuyehɨwa, tita yapaɨmeme hetsie mɨtimieme katinitaparimɨkɨ.
1CO 13:11 Kepauka nemɨnunutsitɨkaitsie, nunutsi hepaɨ nekatinikuxatakaitɨni, nunutsi hepaɨ nekatininemaikaitɨni, nunutsi hepaɨ nekatiniku'eriwakaitɨni. Kepauka 'aneyumaitɨ nematɨa, nekatiniuhayewa nunutsi hepaɨ neyɨanetɨ.
1CO 13:12 Hikɨ kahekɨakamekɨ tekanineniereni, kemɨ'ane xikɨri mayeyɨwitsie mɨkaniere hepaɨ. 'Anari tahɨxie tekaniutinenierikuni pɨta. Yapaɨmemekɨ nekatinimaika hikɨ, 'anari pɨta nekatinetimaimɨkɨ, yaxeikɨa 'iya mɨnetimate hepaɨ.
1CO 13:13 Merikɨtsɨ, yuri ketemɨte'erie, ketemɨteta'ikwewa, ketemɨtetakanaki'erie, mɨkɨ haikatɨ 'ekatineuterimɨkɨ. Ketemɨtetakanaki'erie, mɨkɨ matsi kaneuyeweka.
1CO 14:1 Xekeneyumexɨitɨaka xemɨteyukanaki'eriekakɨ. Mɨkɨ meta, xekeneyuwaɨriyani 'Iyaritsie timieme xemɨtehexeiyanikɨ, peru matsi yemekɨ xekeneyuwaɨriyani Kakaɨyari niukieya xemukuxatanikɨ.
1CO 14:2 Kemɨ'ane hipame niukiyaritekɨ mutaniuka, mɨkɨ teɨteri pɨkawatahɨawe. Kakaɨyari pɨta kaniutahɨaweni. Tewi pɨka'i'enie, katinikuxatani tita mɨti'awie 'Iyari 'ikuyuitɨwakaku.
1CO 14:3 Kemɨ'ane kakaɨyari niukieya mukuxata, mɨkɨ matsi teɨteri kaniwarutahɨaweni, watseiriyatɨ, watuikatɨ meta wanɨtɨatɨ.
1CO 14:4 Kemɨ'ane hipame niukiyaritekɨ mutaniuka, mɨkɨ kaniyutseiriyani yuxaɨtame, peru kemɨ'ane Kakaɨyari niukieya mukuxata, mɨkɨ kaniwatseiriyani memɨyutixexeɨriwa.
1CO 14:5 Kaneninakeni yunaitɨ hipame niukiyaritekɨ xemutiniukanikɨ, peru pɨnetsinakenikeyu matsitsɨ xɨka Kakaɨyari niukieya xekuxatanike. Kemɨ'ane Kakaɨyari niukieya mukuxata 'aixɨa kaniyɨaneni, kemɨ'ane hipame niukiyaritekɨ mutaniuka 'aixɨa kayɨanekaku hepaɨna, mexɨka xewitɨ tihekɨatani kemutaine xeikɨa, 'aixɨa kaniyɨaneni, mɨkɨ memɨyutixexeɨriwa memɨtseiriyarienikɨ.
1CO 14:6 Hikɨri ne'iwama, xɨka xehetsɨa neheuyanike hipame niukiyaritekɨ ne'utaniutɨ, ¿tita netixepitɨanikeyu, xɨka nekaxehetahɨaweke netihekɨatatɨ tita mɨti'awietsiekai hepaɨtsita, xɨka kenemɨtiuyematekɨ nekarekuxatanike, xɨka kakaɨyari niukieya nekahekuxatanike yatɨni nekare'ɨkitanike?
1CO 14:7 Kamɨtsɨ, tita mɨkarayeniere kaniniuweni kɨrautatɨtɨ, kanaritɨtɨ. ¿Xɨka 'aixɨa karekɨpɨnarieka, ketimatsiɨkɨniri tita mɨtikɨrautatsieka tita mɨtikanaritsieka?
1CO 14:8 Kuxineta xɨka hɨtsierieka 'aixɨa karekuyuaneni, ¿kuya kepaikɨ puyukuha'aritɨani?
1CO 14:9 Xemerita yaxeikɨa, yunenikɨ xɨka niuki 'aixɨa tihekɨakamekɨ xeka'utiniukani, ¿ketimatsiɨkɨni kexemutiyuane? 'Eka xeikɨa xemɨtekɨhɨaweni hepaɨ kani'aneni.
1CO 14:10 Xɨari teɨteri waniuki kanimɨireni 'ena kwiepa. Yuxexuitɨ yuniukikɨ me'utiniutɨ mekani'enierieka.
1CO 14:11 Matsi xɨka 'atsinekatimaika kemutaine niukame, yeikame nemɨka'enie hepaɨ katini'eniuriɨkɨni niukame, mɨkɨta yaxeikɨa kanetini'eniekamɨkɨ ne.
1CO 14:12 Xemeta xemuyuwaɨriyakɨ xemɨtehexeiyanikɨ tita 'Iyaritsie mɨtimieme, xeketenekuwawa kwini mieme xemɨwatseiriyanikɨ mɨkɨ memɨyutixexeɨriwa.
1CO 14:13 'Ayumieme kemɨ'ane hipame niukiyaritekɨ mɨtikuxata, keyutanenewieni mɨyɨwenikɨ mihekɨatanikɨ kemutaine.
1CO 14:14 Xɨka nenetanenewieni hipame niukiyaritekɨ, ne'iyarikɨ nepɨnenenewie, peru tixaɨtɨ pɨkatitixuxuawere kenemɨtinemate hetsiemieme.
1CO 14:15 ¿Kamɨtsɨ kenetiyurieni? Ne'iyarikɨ nepɨnenenewieka, peru yanetinemaitɨta kenemutaine, mɨpaɨta nekatininenenewiekamɨkɨ. Ne'iyarikɨ nekanitakwikamɨkɨ, peru yanetinemaitɨtatsiere kenemutaine.
1CO 14:16 Kamɨtsɨ xɨka 'a'iyarikɨ xeikɨa 'aixɨa pehaineni Kakaɨyari hepaɨtsita, 'iya mana muka 'enakaremete mematiteitsie, ¿kepaikɨri mɨpaɨ pɨtayɨni, «Niuki kaniyuritɨni», 'utaitɨ, kepauka 'ekɨ pamɨpariyutsi pemɨtayɨnitsie? 'Atsipɨkatimate kepemutaine.
1CO 14:17 'Ekɨ 'aixɨa 'anemekɨ pamɨpariyutsi pe'ipitɨakaku Kakaɨyari, 'iya pɨta pɨkatseiriyarie mɨkɨkɨ.
1CO 14:18 Ne pamɨpariyutsi nekanipitɨaka Kakaɨyari, kwinimieme nemɨyɨwekɨ hipame niukiyarikɨ ne'utaniutɨ, nexeha'iwatɨ xeme yunaime.
1CO 14:19 Peru xeɨripa nekaninewaɨriyani matsi 'auxɨwime niukiyari nemɨtaniunikɨ yanetinemaitɨ kenemutaine, yanemɨtiwa'ɨkitɨanikɨ hipame, tsepa tamamata miriyari niukiyari nemɨkataniunikɨ hipame niukiyarikɨ ne'utaniutɨ.
1CO 14:20 Ne'iwama, tɨɨri wahepaɨ xepɨkateyumaika. 'Aixɨa kani'aneni xɨka tɨɨri wahepaɨ 'atsixekatemaika tita 'axamɨti'ane hepaɨtsita, peru xetsetseɨyetɨ pɨta kexemɨteyumate.
1CO 14:21 'Inɨari niukiyaritsie mɨpaɨ katine'uka: «Mɨkɨ waniuki yɨkɨ mɨ'anene, watenikɨ nekanitayɨmɨkɨ, hipatɨ yɨkɨ memɨte'uniuka yametewakuxaxatɨwakaku, nekaniwatahɨawimɨkɨ 'ikɨ teɨteri, tsepa mɨpaɨ nemɨtiyurieni mepɨkayuwaɨriyani memɨnetsi'enienikɨ», kanaineni Ti'aitame.
1CO 14:22 'Ayumieme hipame niukiyaritekɨ 'utaniutɨ 'inɨari pɨkahɨkɨ mɨkɨ yuri memɨte'erie wahetsiemieme. Mɨkɨ yuri memɨkate'erie pɨta wahetsiemieme kani'inɨaritɨni. Kakaɨyari niukieya mukuxata niukieya 'inɨari pɨkahɨkɨ mɨkɨ yuri memɨkate'erie wahetsiemieme. Mɨkɨ yuri memɨte'erie pɨta wahetsiemieme kani'ayumiemetɨni.
1CO 14:23 Hikɨ 'axeikɨa xɨka meyukuxeɨrieni yunaitɨ memɨyutixexeɨriwa, yunaitɨ hipame niukiyaritekɨ me'utiniutɨ, xɨka mana meheutahaxɨani hipatɨ 'enakaremete yatɨni yuri memɨkate'erie, 'ana mɨkɨ mɨpaɨ mekanitiyuakuni, kename xekayumate xeme.
1CO 14:24 Mexɨka yunaitɨ Kakaɨyari niukieya mekuxatani pɨta, xɨka mana heutahani xewitɨ 'enakareme yatɨni yuri kati'erietɨ, yunaitɨ mekanitahekɨatakuni kemɨtiuyuri, yunaitɨ mekani'inɨatakuni.
1CO 14:25 Tita mɨti'awietsiekai 'iyarieyatsie matsiɨkɨtɨ kanayeimɨkɨ. Mɨpaɨ ti'ename, tihɨximakeme, nenewieri Kakaɨyari kanipitɨamɨkɨ, mɨpaɨ 'utaitɨ: «Yurikɨ Kakaɨyari xetsata kaniuyeikani».
1CO 14:26 ¿Ne 'iwama kamɨtsɨ keri'aneni? Kepauka xemɨyukuxexeɨriwatsie, yuxexuitɨ matsi kwikari xekanexeiyani, yatɨni 'ɨkitɨarika, yatɨni xekaniha'aritsieka xemɨtehekɨatanikɨ tita xemɨte'uxeiyatsitɨarie, yatɨni hipame niukiyaritekɨ xemɨtiniunikɨ, yatɨni xemɨtehekɨatanikɨ tita mɨtikuxaxatsiwa hipame niukiyaritekɨ tikuxaxatsiwakaku.
1CO 14:27 Naitɨ matsi ketiyɨni xemɨtseiriyarienikɨ. Xɨka hipame niukiyaritekɨ xetiniukuni, yuhutatɨ xeikɨa yatɨni yuhaikatɨ, xewitɨ meri, xewitɨta 'arike, mɨpaɨ meketeyurieka. Xewitɨta ke'ihekɨatani waniuki.
1CO 14:28 Mexɨka ka'ayekani kemɨ'ane mɨtihekɨatani hipame niukiyaritekɨ xetekuxatakaku, niukame kayuwatɨ ke'umaka xeɨripa. Matsi keyutaxatɨani yɨkɨmana, Kakaɨyari ketiutaxatɨani.
1CO 14:29 Kakaɨyari niukametemama yuhutatɨ yatɨni yuhaikatɨ meketekuxatani, hipatɨta meke'i'inɨatani tita memɨte'utaxa.
1CO 14:30 Xɨka xewitɨ mana 'akaitɨ tixaɨtɨ tiuhekɨatsitɨiyarieni mɨtihekɨatanikɨ, kemɨ'ane mɨtikuxata ketiuhayewa.
1CO 14:31 Xekaniyɨwaweni xemɨtekuxatanikɨ yuxexuitɨ, xewitɨ meri, xewitɨta 'arike, yunaitɨ memɨteta'ɨkitɨarienikɨ, meta yunaitɨ memɨtuikarienikɨ.
1CO 14:32 Kakaɨyari niukametemama yu'iyari mekateni'aitɨaka,
1CO 14:33 Kakaɨyari tiyuxamuriekame mɨkahɨkɨkɨ, kayuwatɨ tiyupitɨwame mɨhɨkɨkɨ pɨta. Kememɨteyurie naitsarie hakewa Kakaɨyari teɨterimama memeyutixexeɨriwa,
1CO 14:34 kayuwatɨ meke'umaka 'ukari xeɨripa, mepɨkapitɨarie memɨtiniunikɨ. Mekete'aitɨarieka matsi, yaxeikɨa 'inɨari niukiyari kemaine hepaɨ.
1CO 14:35 Xɨka tixaɨtɨ meteheumaikuni, yɨkɨnama mekewaku'iwawiyani yukiita. 'Aixɨa pɨka'ane xɨka 'uka 'utaniuni xeɨripa.
1CO 14:36 ¿Kamɨtsɨ xehetsɨa xeikɨa rayene Kakaɨyari niukieya? ¿Xehetsɨa xeikɨa tinua?
1CO 14:37 Xɨka xewitɨ Kakaɨyari niukameya yu'erieka, 'Iyari hexeiyame xɨka yu'erieka, mɨpaɨ ketimaika, tita nemɨtixe'utɨirie, mɨkɨ Ti'aitame 'aitɨarikaya kanihɨkɨtɨni.
1CO 14:38 Mexɨka tewi xɨka mɨpaɨ katimaika, mɨkɨta pɨkamatiwani.
1CO 14:39 'Ayumieme ne'iwama, xekeneyumexɨitɨaka xemɨtehekɨatanikɨ, peru xepɨkawakunamirieka hipame niukiyaritekɨ memutiniuka.
1CO 14:40 Naitɨ heitseriemekɨ ketiuyɨni, xewitɨ meri, xewitɨta 'arike.
1CO 15:1 Ne'iwama, nekanixetahekɨatsitɨiyamɨkɨ niuki 'aixɨa manuyɨne, kenemɨtixekuxaxatɨwakai. Xekanitanaki'erieni mɨkɨ niuki, hetsiena xetewiyatɨ xekaniuti'uni.
1CO 15:2 Xɨka kwi xe'eyexeiyani tita nemɨtixekuxaxatɨwakai, mɨkɨ niukikɨ xekanitawikweitsitɨarieximeni, mexɨka yakɨ xeikɨa yuri xete'uta'erieni.
1CO 15:3 Ne nekanixeyetuirieni tita matsi mɨreuyewetse, kenemɨtiyetuiriyarie neta, kename Kɨritsitu 'umɨ tame 'axatemɨte'uyurikɨ, 'utɨarikate maine hepaɨ,
1CO 15:4 kename 'ukateukie, kename 'anukuketɨarie hairieka tukari 'aye'aku, 'utɨarikate maine hepaɨ,
1CO 15:5 kename Tsepaxi 'ixei, 'arike tamamata heimana yuhutatɨ me'ixei.
1CO 15:6 'Arike 'auxɨwime tsienituyari heimana yameyupaɨmetɨ mekanixeiya 'axeikɨa 'iwamarixi. Yumɨiretɨ mɨkɨ 'amekaniu'uwani hikɨ 'akuxi, hipatɨri mekaneukutsu.
1CO 15:7 'Arike Kakuwu kanixeiya, 'ariketa nɨ'ariekate yunaitɨ mekanixeiya.
1CO 15:8 'Imatɨrieka neta nekanixeiya, kemɨ'ane nunutsi yɨritɨ mutinuiwaxɨ hepaɨ ne'anetɨ.
1CO 15:9 Nɨ'ariekate watsata nekani'imatɨremetɨni, 'aixɨa nepɨkatiuka'iyari nehetsie mɨtinakenikɨ nɨ'ariekame nemɨtaterɨwarienikɨ, nemɨwareutaweiyaxɨakaikɨ mɨkɨ memeyutixexeɨriwa Kakaɨyari hetsɨa miemete.
1CO 15:10 Peru Kakaɨyari 'aixɨa mɨtiuka'iyarikɨ, 'ayumieme mɨpaɨ nekani'aneni kenemɨ'ane. Yakɨ xeikɨa pɨka'uyɨ, 'aixɨa kemɨtiuka'iyarikai nehetsiemieme. Ne matsi kwinimieme nekatini'uximayaka, mɨkɨ yunaitɨ kememɨkate'uximayatawawe. Peru ne nepɨkahɨkɨ kemɨ'ane mɨpaɨ mɨtiyuriene. Kakaɨyari pɨta 'aixɨa tiuka'iyaritɨ nehamatɨa yakatini'uximayaka.
1CO 15:11 Merikɨte, tsepa ne, yatɨni mɨkɨ, mɨpaɨ tekatenihekɨatani, xemeta mɨpaɨ yuri xekateniuta'erieni.
1CO 15:12 Kɨritsitu xɨka kuxaxatsiwani mɨkite watsata manukuketɨarie, keme'utiyuane xeme hipatɨ, kename waniu, mɨkite meka'anuku'uni.
1CO 15:13 Mɨkite xɨka meka'anuku'uni, meta Kɨritsitu pɨka'anukuketɨarienikeyu.
1CO 15:14 Merikɨte, xɨka Kɨritsitu ka'anukuketɨarieni, yakɨxeikɨa kanayani tita temɨtehekɨata, yakɨxeikɨa yuri xekateniuta'erieni.
1CO 15:15 Xɨka mɨkite meka'anuku'uni, kanimatsiɨkɨni ketemɨte'itawa tameta, 'axatemɨtehekɨatakɨ Kakaɨyari hepaɨtsita, kename henukuketɨa Kɨritsitu te'utiyuatɨ, mɨkɨ kahenukuketɨaku, xɨka mɨpaɨ 'aneni.
1CO 15:16 Merikɨtsɨ, mɨkite xɨka meka'anuku'uni, Kɨritsitu pɨka'anukuketɨarieweta.
1CO 15:17 Xɨka Kɨritsitu ka'anukuketɨarieni, yakɨxeikɨa yuri xekateniuta'erieni, tita 'axaxemɨteyuriekaitsie xekateniwiyani 'akuxi.
1CO 15:18 Mɨkɨ meta, mɨkɨ memeukutsixɨa Kɨritsitutsie metewiyatɨ, mɨkɨ mekaniutatɨmaiyarieniri.
1CO 15:19 Hikɨ mexi te'ayeneniere, xɨka yuri tete'eriekake Kɨritsitu hetsie teta'ikwewatɨ xeikɨa, yunaime teɨteri watsata tame matsi kaneuyewekakeyu temɨnenimayatsiekakɨ.
1CO 15:20 Peru mɨpaɨ pɨka'ane. Kɨritsitu kananukuketɨarieniri mɨkite watsata, mɨkɨ memeukutsixɨa wamatɨari hɨkɨtɨtɨ.
1CO 15:21 Tewi kemɨtiuyuri, tame tekanitakukuweni. Yaxeikɨata xewitɨ tewi kemɨtiuyuri, mekananuku'uikuni mɨkite.
1CO 15:22 'Arani hetsie metewiyatɨ yunaitɨ kememɨtetakukuwe, mɨpaɨrita Kɨritsitu hetsie metewiyatɨ yunaitɨ mekananutanieritɨariekuni,
1CO 15:23 yuxexuitɨ wahetsiemieme kemɨreuyewetse. Kɨritsitu wamatɨaritɨtɨ kananukukeniri. 'Ariketa mɨkɨ Kɨritsitu hetsɨa memɨmiemete mekananuku'uikuni kepauka munuani.
1CO 15:24 'Arike naitɨ katinitaparimɨkɨ, kepauka Kɨritsitu kemɨti'aita mɨyetuanitsie, 'ukiyarieya mɨti'aitanikɨ Kakaɨyaritɨtɨ. Yakatiniyetuiriemɨkɨ waka'uname yunaitɨ memɨte'aita, yunaitɨ heitserie memexeiya tɨrɨkariya memexeiya.
1CO 15:25 Kaneuyeweka Kɨritsitu mɨti'aitanikɨ mexi wara'iwa yunaime memi'uxie.
1CO 15:26 'Imatɨrieka kemɨrayu'iwa, katanixɨnamɨkɨ temɨkatakukuwenikɨri.
1CO 15:27 Kakaɨyari naime katiniyetuirieni mɨti'aitanikɨ, kemaine 'utɨarika. Kepauka mɨpaɨ maine, naime katiniyetuirieni 'utaitɨ, kanihekɨaka Kakaɨyari mɨkaxatakɨ kemɨ'ane naime mɨtiukayatsaxɨ, Kɨritsitu mɨti'aitanikɨ.
1CO 15:28 Kepauka mɨkɨ naime mɨti'aitani, 'anari mɨkɨta yɨkɨmana kaniyuyetuamɨkɨ, 'ukiyarieya pɨta mɨti'aitɨakakɨ, 'ukiyarieya naime mukayatsaxɨkɨ nu'aya mɨti'aitanikɨ. 'Anari Kakaɨyari naitɨ hetsiena mieme katinayeimɨkɨ.
1CO 15:29 Xɨka meka'anuku'uitɨariwani, ¿kemeteyurieni mɨkɨ memuka'ɨyarie mɨkite wahetsiemieme? Xɨka yemekɨ mɨkite meka'anuku'uitɨarieni, ¿titayari wahetsiemieme mete'uka'ɨyarie?
1CO 15:30 Tameta, ¿titayari kweriwa'anekɨa tete'u'uwa tukarikɨ?
1CO 15:31 Tukarikɨ 'etsiwatɨkaku nekanikɨmɨmɨkɨni tɨma. 'Ipaɨ nepaine 'aixɨa nemutainekɨ xehepaɨtsita ne'iwama, kenemɨtinetemawie nexeha'eriwatɨ Kɨritsitu Ketsutsi mɨtati'aitɨwame hetsie.
1CO 15:32 ¿Teɨteri kememɨteniniuki, 'Epetsutsie xɨka ne yeutari wahamatɨa neyumienenike, ketitatsɨkuta nera'iwakekai? Xɨka mɨkite meka'anuku'uitɨarieni, «tepɨtekwaka meta tepɨte'ieka, 'uxa'a temɨkwinikɨ».
1CO 15:33 Xepɨkate'irɨwiyarieka: «'Axamemɨte'u'iyari wahamatɨa 'uyeikatɨ, huye 'aixɨa mɨ'ane kaneuyehɨamɨkɨ».
1CO 15:34 Xekeneyuta'eriwani heitseriemekɨ kemɨreuyewetse, 'axaxepɨkateyurieka. Hipatɨ xeme 'atsixepɨkatehetimaiwawe Kakaɨyari hepaɨtsita. 'Ipaɨ nepaine nexetewiyatsitɨanike.
1CO 15:35 Matsi xewitɨ kanita'iwaumɨkɨ: «¿Kehepaɨ mɨkite mete'anuku'uitɨarieni? ¿Kehepaɨ wawaiyari 'aneneni?»
1CO 15:36 Kari 'atsipepɨkatimate mɨpaɨ pehaitɨ. Tita pemɨtiuka'e, mɨkɨ xɨka ka'umɨni, pɨka'anutanieritɨarieni.
1CO 15:37 Mɨkɨ meta, tita pemɨtiuka'e, tita mɨtitineika hepaɨ 'aneme pepɨka'uka'e. 'Imɨari mɨmawe xeikɨa pekaniuka'eni, tɨriku 'imɨariyari yatɨni xeime 'imɨariyari.
1CO 15:38 Kakaɨyari kanikemaritɨaka kemɨtinake, meta xexuime 'imɨari kemɨ'anene yɨkɨ tikemaritɨatɨ.
1CO 15:39 Naitɨ waiyari yaxeikɨa pɨka'anene. Teɨteri wawaiyari pɨxewitɨ, meta yeutari wawaiyari yɨkɨ pɨ'anene, ketsɨte wawaiyari yɨkɨ pɨ'anene, meta wikixi wawaiyari yɨkɨ pɨ'anene.
1CO 15:40 Taheima miemete, kwiepa miemete, yunaitɨ yɨkɨ mekani'aneneni. Taheima mieme witsipɨ'anene, kwiepa mieme witsi'anenetɨ yɨkɨ pɨ'anene.
1CO 15:41 Tau witsikani'aneni, metsa witsipɨ'ane yɨkɨ 'anetɨ, meta xurawetsixi witsimepɨ'anene yɨkɨ me'anenetɨ. Yuxexuitɨ xurawetsixi yɨkɨ 'aneneme yuxawatɨriya mekanexeiyani.
1CO 15:42 Mɨpaɨrita katiniyɨmɨkɨ kepauka mɨkite memanuku'uitɨarieni. Tita titipɨnirɨmetɨ mɨtiuka'etsie, mɨkɨ katipɨniwetɨ katinanukuketɨariemɨkɨ,
1CO 15:43 tita 'axatikɨhɨawarɨwatɨ mɨtiuka'etsie, mɨkɨ witsi'anetɨ kananukuketɨariemɨkɨ, tita katɨrɨkaɨyetɨ mɨtiuka'etsie, mɨkɨ tɨrɨkaɨyetɨ kananukuketɨariemɨkɨ.
1CO 15:44 Waitɨtɨ tita mɨtiuka'etsie, mɨkɨ 'iyaritsie miemetɨtɨ kananukuketɨariemɨkɨ. Xɨka rawaiyari xuaweni wai xeikɨa hɨkɨtɨtɨ, meta rawaiyari kanixuaweni 'iyaritsie miemetɨtɨ.
1CO 15:45 Mɨpaɨ katine'uka: «Mexɨakame tewi, 'Arani mɨtitewakai, 'ayenieretɨ kanayani». Mɨkɨ 'imatɨreme 'Arani pɨta, 'iyari tukari tiyupitɨwame kanayani.
1CO 15:46 Peru tewi 'iyaritsie mieme meri pɨkahexeiya. Wai xeikɨa meri kanexeiyani, 'arike 'iyaritsie mieme kanexeiyakamɨkɨ.
1CO 15:47 Mexɨakame tewi kwiepa kanimiemetɨkaitɨni, kwiekɨ mutawewiyakɨ, hutarieka mieme tewi taheima pɨta kanimiemetɨni.
1CO 15:48 Kemɨ'ane mɨkɨ kwiekɨ mutawewiya, mɨpaɨta mekani'aneneni kwiepa miemete. Kemɨ'ane mɨkɨ taheima mɨmieme, mɨpaɨta mekani'aneneni taheima miemete.
1CO 15:49 Ketemɨte'u'uwakai mɨkɨ kwiekɨ mutawewiya hepaɨ tekemaritɨarietɨ, yaxeikɨa 'atekaniu'uwakuni mɨkɨ taheima mɨmieme hepaɨ tekemaritɨarietɨ.
1CO 15:50 'Ipaɨ nepaine ne'iwama, tita mɨtiwai mɨtixuriya, mɨkɨ pɨkayɨweni heixeiyatɨ mayanikɨ tita Kakaɨyari mɨra'aita. Tita mɨtipɨniwe pɨkayɨwe mɨkatipɨniwe heixeiyatɨ mayanikɨ.
1CO 15:51 Kamɨtsɨ netinixetahekɨatɨamɨkɨ tita mɨti'awietsiekai. Tanaitɨ tepɨkaheukutsu, peru tanaitɨ tekanipatsiekuni
1CO 15:52 yapauka, xeikɨpiyarikɨ, 'imatɨrieka kuxineta tahɨtsierieyu. Kanitahɨtsieriemɨkɨ, mɨkite mekananuku'uitɨariekuni mekatipɨniwawetɨ, tameta tekanipatsiekuni.
1CO 15:53 Kaneuyeweka 'ikɨ mɨtipɨniwe menakatɨni tita mɨkatipɨniwe, 'ikɨ mumɨxime menakatɨni tita mɨkatimɨwe.
1CO 15:54 'Anari, kepauka 'ikɨ mɨtipɨniwe menakatɨni tita mɨkatipɨniwe, kepauka 'ikɨ mumɨxime menakatɨni tita mɨkatimɨwe, 'ana kanaye'amɨkɨ mɨkɨ niuki mɨpaɨ mɨre'uxa: «Mɨɨya kaniukumaweriyarieni 'a'iwarieka».
1CO 15:55 «¿Hakewa 'aku pepɨrayu'iwa, 'ekɨ pemɨtatsikwikai? ¿Hakewa 'aku pepɨtatsihetseni, 'ekɨ pemɨtatsikwikai?»
1CO 15:56 'Axatemɨteyuriekɨ tekanikutseiwani tekwi'itɨ. 'Inɨari niukiyari kanitɨrɨkariyani tita 'axatemɨteyurie.
1CO 15:57 Peru pamɨpariyutsi Kakaɨyari tekanipitɨaka, mɨkɨ mɨtatsipitɨakɨ temɨte'ayu'iwanikɨ, Tati'aitɨwame Ketsutsi Kɨritsitu tatsiparewiekaku.
1CO 15:58 'Ayumieme ne'iwama nemɨxenaki'erie, xetseiriyarietɨ xekenakɨni, xepɨkayuyuitɨarinɨaka. Kwini mieme xeketene'uximayaka Ti'aitame hetsiemieme yuheyemekɨ, mɨpaɨ xetemaitɨ, Ti'aitame hetsie xetewiyatɨ tsepa xemɨteyu'uxitɨa, yakɨ xeikɨa pɨkarayani.
1CO 16:1 Tumini hepaɨtsita nepɨtixetaxatɨani, kexemɨte'ikuxexeɨriwani Kakaɨyari teɨterimama wahetsiemieme. Kenemɨtiwaruta'aitɨa Karatsiya kwieyaritsie memeyutixexeɨriwa, xemeta yaxeikɨa xeketeneyurieka.
1CO 16:2 Mexɨakame tukaritsie xexuime tsemanatsie, yuxexuitɨ xeme xekeneuti'uta yuhetsɨa, xe'ixeɨrietɨ 'aixɨa kexemu'itɨarie, 'ana xemɨka'ikuxexeɨriwanikɨ kepauka nemɨnuani.
1CO 16:3 Manata kepauka nemeta'ani, mɨkɨ memɨ'inɨatsie kemɨ'ane xemɨwaranuyexei, mɨkɨ xapa newahuritɨame nekaniwaranunɨ'amɨkɨ, meta xe'imikieri memanu'ɨnikɨ Kerutsareme paitɨ.
1CO 16:4 'Aixɨa pɨ'ane neta nemɨyemiekɨ, teyunaitɨ tekaniyehuni.
1CO 16:5 Manata Matseruniya neyeyame, xehetsɨa nekaneta'amɨkɨ, nemɨxe'iwatamiekɨ.
1CO 16:6 'Aixɨa pɨyɨni yapaɨmexɨa xehetsɨa nemɨnehayewakɨ, mukuhahaɨtɨretsie mana nepɨnehayewani. Manaketa xeme xekanenanunɨ'akuni hakewa nemeyemie.
1CO 16:7 Hikɨ yanetimiekamekɨ xeikɨa nepɨkaxeta'iwata, matsi yapaumexɨa nekanaka'iyuniemɨkɨ xehamatɨa, xɨka Ti'aitame mɨpaɨ netiupitɨanike.
1CO 16:8 Peru 'Epetsutsie nepɨnehayewa 'ixɨarari 'ayehurakaku 'atahutarieka tsemanatsie mieme 'aye'ayuke,
1CO 16:9 kitenie katineuyepiyani 'amuyeyewatsie nemɨti'uximayakakɨ 'aixɨa 'anemekɨ, tsepanetɨta yumɨiretɨ me'uxiwa'akaku.
1CO 16:10 Timuteu xɨka henuani, xekeneyumexɨitɨaka 'aixɨa xemɨteheixeiyakɨ mɨkɨta 'aixɨa 'iyarikɨ xehetsɨa muyeikanikɨ, mɨkɨ katini'uximayaka Kakaɨyari hetsiemieme nehepaɨ.
1CO 16:11 'Ayumieme xewitɨ pɨkaheitawe'erieka. Xekeneparewi nehetsɨa mɨta'anikɨ 'aixɨa 'anemekɨ, ne nekanikwewieka 'iwamarixi wahamatɨa.
1CO 16:12 Ta'iwa 'Apuruxi hepaɨtsita nepɨtixetaxatɨani, waɨriyarika nekanipitɨakaitɨni xehetsɨa mɨyemiekɨ 'iwamarixi wahamatɨa. Mɨkɨ pɨka'uyuwaɨri mɨyemiekɨ, peru kepaukake mɨpitɨarieni pɨyɨweni mana meyeikanikɨ.
1CO 16:13 Xekenayeneniereni. Yuri xete'erietɨ xekeneti'uka, xepɨkamamaka meta xekenetɨrɨkawini.
1CO 16:14 Naime yaxeketeneyurieka xeteyukanaki'erietɨ.
1CO 16:15 Xepɨtemate 'Etsitepanaxi kie kiekatari mɨkɨ meri yuri memɨte'uta'eri 'Akaiya kwieyaritsie, 'ayumieme yuri memɨte'erie waparewiwamete mekanayuyeitɨaka. Ne'iwama nekanixewawirieka,
1CO 16:16 mɨkɨ wahepaɨ xemɨteyuriekakɨ, meta naimekɨ xete'uximayatɨ.
1CO 16:17 Nekaniyukatemawieni 'Etsitepanaxi, Purutunatu meta 'Akahiku me'u'axɨaku, mɨkɨ mepɨnetsi'uparewi xeme xekanetsiparewiwawekaku, tsepanetɨ memɨkayɨwawekai yunaitɨ memahukɨ,
1CO 16:18 ne'iyaritsie 'aixɨa netiku'eriwame mekanenayeitɨaka, yaxeikɨata xeme xe'iyaritsie. 'Ayumieme 'aixɨa xeketenewaxeiyani mɨkɨ mɨyamemɨte'uximaya.
1CO 16:19 'Atsiya memeyutixexeɨriwa mekanixewaɨritɨaka. 'Akira meta Pɨritsira Ti'aitame hetsie metewiyatɨ mekanixewaɨritɨaka, meta mɨkɨ wakiita memɨyutixexeɨriwa wahamatɨa.
1CO 16:20 Yunaitɨ 'iwamarixi mekanixewaɨritɨaka. Xekeneyuwaɨritɨaka xemeta xepatsietɨ.
1CO 16:21 Ne Papuru, mɨpaɨ nekatinixewaɨritɨaka nemamakɨ neti'utɨatɨ.
1CO 16:22 Xɨka xewitɨ Ti'aitame kanaki'erieka, 'axake'u'itɨarieni. Marana ta.
1CO 16:23 'Aixɨa ketiuka'iyarini Ti'aitame Ketsutsi xehetsiemieme.
1CO 16:24 Yunaime nekanixenaki'erieka, Kɨritsitu Ketsutsi hetsie netiwiyatɨ. Mɨpaɨ xeikɨa keni'aneni.
2CO 1:1 Ne, Papuru, nekanixewaɨritɨaka. Kɨritsitu Ketsutsi nɨ'ariekame pɨnetsi'ayeitɨa, kaneneyenɨ'ani mɨpaɨ mɨtinakekɨ Kakaɨyari, ta'iwa Timuteu hamatɨa, tekanixewaɨritɨaka Kurinitutsie xemɨtama xemɨyutixexeɨriwa, Kakaɨyari teɨterimama xemɨhɨkɨ. Yunaitɨ xemupatsie hetsiena mieme naitsarie 'Akaya kwieyaritsie xemɨtama tekanixewaɨritɨaka:
2CO 1:2 Kakaɨyari mɨta'ukiyari Ti'aitame Ketsutsi Kɨritsitu hamatɨa, 'aixɨa mekete'u'iyarini xehetsiemieme, mekexepitɨaka xemɨka'uximatɨariekakɨ yu'iyaritsie.
2CO 1:3 Kemɨ'ane Tati'aitɨwame Ketsutsi Kɨritsitu mɨkakaɨyarieya mu'ukiyarieya, mɨkɨ hepaɨtsita 'aixɨa ketikuxaxatsiwani. Mɨkɨ ta'ukiyari katiniyukanenimayaka, meta naimekɨ katiniyunɨtɨwametɨni.
2CO 1:4 Mɨkɨ taheyemekɨ kataniparewieka te'uximatɨariekaku, tameta temɨyɨwawenikɨ naimekɨ temɨwaparewiekakɨ hipame tsepa kememɨte'uximatɨarie, Kakaɨyari kemɨtatiparewie hepaɨ.
2CO 1:5 Mɨpaɨ yemekɨ ketemɨtekwine Kɨritsitu mɨtiukwinixɨ hepaɨ, mɨpaɨta yemekɨ tekateninɨtɨarieka Kɨritsitu yatatipitɨakaku.
2CO 1:6 Tsepa temɨ'uximatɨarie, mɨkɨkɨ xeme xekaninɨtɨariekuni, meta xekanitawikweitsitɨariekuni. Meta xɨka tenɨtɨarieka, mɨkɨkɨta xeme xekaninɨtɨariekakuni kepauka xemɨte'uka'eniwa xete'ukakukuinetɨ ketemɨte'uka'eniwa tame.
2CO 1:7 Yuri ketemɨte'erie xehepaɨtsita, tepɨtɨrɨkariyarie. Mɨpaɨ tepɨtemate, xeme tahamatɨa ketemɨtetaxewi yaxeikɨa tete'ukakukuinetɨ, mɨpaɨta xeme tame tekatenitaxewini tanaitɨ teparewiyatɨ.
2CO 1:8 Ta'iwama peuyewetse mɨpaɨ xemɨtemaikakɨ, waɨkawa tepe'uximatɨariekai 'Atsiya kwieyaritsie te'u'uwatɨ. Kwini mieme pɨtihetekai yemekɨ, tepɨka'ikemakai. 'Atsitepɨkatemaikai xɨka tetawikwenikekaitɨni yatɨ tepɨtekwinikekai:
2CO 1:9 'atsita ta'iyaritsie mɨpaɨ tepɨtetakɨhɨawekai, tepɨkwinikekai. Peru mɨpaɨ katiniuyɨni tahetsie yuri temɨkate'eriekakɨ, Kakaɨyari hetsie pɨta, yuri temɨte'eriekakɨ putiuyɨ mɨkite mɨwaranuku'uitɨwa.
2CO 1:10 Mɨkɨ kataniutawikweitsitɨani kapa mɨpaɨ tete'ukwinikɨ. Meta 'uxa'atɨni warie pɨtatsitawikweitsitɨani, kemɨ'anetsie yuri temɨte'erie. Tawarita katanitawikweitsitɨamɨkɨ,
2CO 1:11 xeme xetatsiparewiekaku xe'iwawirietɨ Kakaɨyari tahetsiemieme. Mɨpaɨ xeteyurieyu, yumɨiretɨ pamɨpariyutsi mekanipitɨakakuni tahepaɨtsita, yametemaitɨ ketemɨtemikie yumɨiretɨ memɨyunenewiekɨ.
2CO 1:12 'Aixɨa temutiyuanenikɨ mɨpaɨ tepaitɨka tahepaɨtsita, ta'iyaritsie 'aixɨa tepɨtetamate ketemɨyɨa 'ena kwiepa. Mɨpaɨ tepɨtemate, Kakaɨyari hetsiemieme tepatsietɨ tepɨyɨa, 'aixɨa tetehekɨatsietɨ Kakaɨyari kemɨtatipitɨa. Teɨteri wahepaɨ kememɨtemaiwawe tepɨkayɨa, matsi Kakaɨyari yatatipitɨakaku 'aixɨa kemɨtiuka'iyari, mɨpaɨ 'ayumieme tekaniyɨaka kwiepa memɨtama wahetsɨa, xehetsɨa matsi yemekɨ mɨpaɨ tekaniyɨaka.
2CO 1:13 Taxapa kemɨti'eniɨriɨkɨ xeikɨa, kexemɨtatemate, mɨpaɨ xeikɨa te'utiyuatɨ tepɨtexe'utɨirie. Tsikeretsɨ xepɨtatsihetima peru 'etsiwa xeikɨa,
2CO 1:14 'aixɨa pɨyɨnikeyu xɨka naimekɨ pɨta xetatsihetimanike, mɨpaɨ xetemaitɨ, mɨkɨ tukaritsie kepauka munuani Tati'aitɨwame Ketsutsi, 'ana xepɨyɨwaweni 'aixɨa xemutiyuanenikɨ xetatsiha'eriwatɨ, yaxeikɨa 'aixɨa temutiyuanenikɨ tame texeha'eriwatɨ.
2CO 1:15 Mɨpaɨ yuri nemɨti'eriekaikɨ xehepaɨtsita, 'ayumieme mɨpaɨ nepɨtinemaikai, hutakɨa xehetsɨa nepunuanikekai xaɨtsie nekaye'awetɨ meri, waɨkawamekɨ 'aixɨa nemɨxeyurienikɨ.
2CO 1:16 Xehetsɨa neheta'ame Matseruniya kwieyaritsie nepɨyemie, tawarita Matseruniya neheyeyame xehetsɨa nepunuani xemɨnetsi'anunɨ'anikɨ Kureya kwieyaritsie paitɨ.
2CO 1:17 Kexeteku'eriwa, ¿mɨpaɨ netinemaitɨ yakɨ xeikɨa netinepatakai? ¿Teɨteri wahepaɨ neyɨanetɨ mɨpaɨ netinemaitɨ, huu ne'utaitɨ, kenetinepata tixaɨ ne'utaitɨ?
2CO 1:18 Yapɨtikamie Kakaɨyari kemaine. Yaxeikɨa tame ketemɨtexetahɨawe, taniuki pɨkahuta, pɨyuxewi. Xɨka mɨpaɨ reuyeweka «huu» temutiyuanenikɨ, «tixaɨ» tepɨka'utiyuane, yatɨni «tixaɨ» xɨka reuyeweka temutiyuanenikɨ, «huu» tepɨka'utiyuane.
2CO 1:19 Kakaɨyari nu'aya Kɨritsitu Ketsutsi xehetsɨa kanikuxaxatsiwakaitɨni tetekuxatakaku ne, Tsiriwanu meta Timuteu. Niuki mɨkɨ hepaɨtsita manuyɨne pɨkahuta, pɨyuxewi mɨpaɨ 'anetɨ mɨhɨkɨkɨ Kɨritsitu.
2CO 1:20 Naime kemutayɨ Kakaɨyari kename yatiyurieni, mɨkɨta niuki pɨkahuta, pɨyuxewi Kɨritsitu meye'atɨakɨ. 'Ayumieme kepauka 'aixɨa temutiyuane Kakaɨyari hepaɨtsita, tepɨyɨwawe mɨpaɨ temutiyuanenikɨ, «mɨpaɨ kani'aneni», te'utiyuatɨ, Kɨritsitu mɨpaɨ mɨtiuyurikɨ.
2CO 1:21 Mɨkɨ Kakaɨyari kanihɨkɨtɨni kemɨ'ane mɨtatsitseiriya xeme tame Kɨritsitutsie temɨtewiyanikɨ. Mɨkɨ heitserie pɨtatsi'upitɨa,
2CO 1:22 yuhetsiemieme pɨtatsi'u'inɨaritɨa, ta'iyaritsie yu'iyari pɨtatsi'upitɨa 'inɨaritɨme mɨmatsiɨkɨnikɨ tita tahetsie mɨtinake.
2CO 1:23 Ne nepitahɨawe Kakaɨyari netukari mɨnetsinawairienikɨ xɨka neti'itawani kenemaine. Nepakunua 'axanemɨkaxeretahɨawekɨ. 'Ayumieme Kurinitu nepɨkahetɨa tawarita.
2CO 1:24 Mɨpaɨ tepɨkahaitɨka tetexe'aitɨakutɨ yuri kexemɨte'erie. 'Aixɨa xekeneti'uka yuri xete'erietɨ. Matsi mɨpaɨ tepaitɨka xehamatɨa tete'uximayatɨ xemɨyutemamawiekakɨ.
2CO 2:1 Mɨpaɨ nepɨtinewaɨri 'ana, 'aixɨa pɨkayɨnikeyu xɨka tawarita nenuanike xehetsɨa nexeheiweritɨatɨ, xemɨte'uka'eniwanikɨ.
2CO 2:2 Xɨka nexeheiweritɨakake xeme, ¿kepaikɨ pɨnetsitemawieritɨanikeyu ne nexeheiweritɨakaku kexenetetemawieritɨanikeyu?
2CO 2:3 'Ayumieme xapa mɨpaɨ nepɨtiu'utɨa, kapa nenuayu menetsi'uheiweritɨanikɨ mɨkɨ meuyewetse matsi memɨnetsitemawieritɨanikɨ pɨta. 'Ipaɨ yuri nepɨti'erie yunaime xehepaɨtsita, xɨka nenetemawieka ne xemeta xepɨyutemamawieka.
2CO 2:4 Kwinimieme ne'uximatɨarietɨ 'ana, netsaipɨnarietɨ ne'iyaritsie mɨpaɨ netinixe'u'utɨirieni waɨkawa ne'utatsuatɨ. Peru xemɨheiweritɨariekakɨ yanepɨkatiu'utɨa, matsi mɨpaɨ xemɨtemaikakɨ waɨkawa kenemɨtixenaki'erie yanepɨtiu'utɨa.
2CO 2:5 Xewitɨ xɨka heiweritɨarika heutiwiwiexɨani, ne xeikɨa pɨkanetsiheiweritɨani, matsi neka'anuhaitɨamɨtɨ nepaine xeme yunaime pɨxe'uheiweritɨa.
2CO 2:6 Mɨkɨtsie katiniunake kexemɨte'iyetua mu'uximatɨarienikɨ xe'uyu'enieka.
2CO 2:7 'Ayumieme xepɨyɨwawe matsi xemɨteheiyehɨwirienikɨ hikɨ, xepɨyɨwawe xeminɨtɨanikɨ mɨkɨ tewi, kapa 'utaxɨtɨarienikɨ yuheiwerietɨ 'anayuhayewamekɨ.
2CO 2:8 'Ayumieme nekanixewawirieka xemihekɨatsitɨiyanikɨ kexemɨte'inaki'erie.
2CO 2:9 'Ayumieme mɨpaɨ nepɨtixe'u'utɨiri, yanemɨtimaikakɨ nexe'inɨatake xɨka naime hepaɨtsita yaxetekahuni.
2CO 2:10 Kemɨ'ane xemɨteheuyehɨwiri, neta yaxeikɨa nepɨreiyehɨwiri. Kenemɨreiyehɨwiri, tsepa hetsiena nemɨkatiuhɨpakai ne, nexeha'eriwatɨ yanepɨreiyehɨwiri Kɨritsitu netsixeiyakaku,
2CO 2:11 kapa Kauyumarie tatiu'itaiyakɨ. Mɨpaɨ temɨtematekɨ kemɨtiyuruwa mɨkɨ.
2CO 2:12 Merikɨtsɨ, Tɨruhatsi nekaninuani niuki 'aixɨa manuyɨne Kɨritsitu hepaɨtsita para nemɨtikuxatanikɨ, peru kitenie tsepa mɨreuyepiyakai nehetsiemieme Ti'aitame hetsie kenemɨtiwiya nemɨtikuxatanikɨ,
2CO 2:13 nepɨka'uxipiekai ne'iyaritsie, ne'iwa Titu nemɨkahetaxeiyawekaikɨ. Newarutateutɨaka matsi nekaneyeyani Matseruniya kwieyaritsie paitɨ.
2CO 2:14 Matsi Kakaɨyari pamɨpariyutsi kepitɨarieka. Mɨkɨ yuheyemekɨ pɨtatsihekɨatɨa Kɨritsitutsie ketemɨtewiya, teɨteri wahɨxie tatsikuwitɨnetɨ yu'utɨma. Takɨmana naitsarie mɨpaɨ katinihekɨatani witsikemɨ'itɨarie xɨka Kɨritsitu maika.
2CO 2:15 Tame 'inɨari tekanihɨkɨtɨni 'ɨkwa witsimu'ɨa hepaɨ Kakaɨyari kemɨtatixeiya, temɨwaraye'eritɨwakɨ Kɨritsitu kemɨ'ane. Mɨkɨ memɨtawikweitsitɨariexime kememɨtatexeiya, meta memɨkwixime kememɨtatexeiya tekani'inɨaritɨni.
2CO 2:16 Memɨkwixime wahekɨ tepumɨki'ɨa temɨwaraye'eritɨwakɨ kememɨtekwini, peru mɨkɨ memɨtawikweitsitɨariexime wahekɨ teputukari'ɨa temɨwaraye'eritɨwakɨ kememɨte'ayeneniereni. ¿Merikɨte, kepaikɨ pikema 'ikɨ naime?
2CO 2:17 Tame yumɨireme wahepaɨ tepɨka'anene. Harerutsixi wahepaɨ tepɨkateta'itaiya Kakaɨyari niukieya tekuxatatɨ. Matsi 'aixɨa tetehekɨatsietɨ, Kakaɨyari kemɨtareyenɨ'a, Kakaɨyari tatsixeiyakaku teyɨatɨ, Kɨritsitutsie tetewiyatɨ mɨpaɨ tetenikuxatani.
2CO 3:1 Mɨpaɨ te'utiyuatɨ tawarita tepɨka'itsutɨa para temɨtatahekɨatakɨ xemɨtatsimaikakɨ 'aku. Hipame wahepaɨ keteteheiyehɨwa xapa mɨtatsihekɨatɨakakɨ temɨmariwanikɨ, yaxemɨte'utɨiyarienikɨ yaxemɨteti'utɨanikɨ nutsu.
2CO 3:2 Xeme taxapa xekanihɨkɨtɨni ta'iyaritsie mɨra'utɨarie. Yunaitɨ teɨteri mepɨyɨwawe memititerɨwanikɨ mɨpaɨ memɨtehetimanikɨ mexexeiyatɨ.
2CO 3:3 Xekanimatsiɨkɨni xeme Kɨritsitu xapaya xehɨkɨtɨtɨ yatetehɨritɨariekaku tame. Mɨkɨ xapa tauxikɨ pɨka'utɨarie, Kakaɨyari mayeniere 'iyarieyakɨ pɨta kani'utɨarieka. Tetetsie pɨkara'uxa, tewi mayeniere 'iyarieyatsie katina'uka.
2CO 3:4 Kɨritsitu yatatipitɨakaku, mɨpaɨ tetetamaitɨ, yuri tekateni'erieka Kakaɨyari hetsie.
2CO 3:5 Mɨpaɨ tepɨkateku'eriwa kename takɨmana teyɨwawe tixaɨtɨ temɨtetsutɨani. Matsi Kakaɨyari yatatipitɨakaku tepɨyɨwawe.
2CO 3:6 Mɨkɨri kemɨtatiupitɨa, pɨtatsi'uhɨritɨa tɨratu hekwame hepaɨtsita, peru 'utɨarika hepaɨtsita xeikɨa pɨkatatsi'uhɨritɨa, matsi 'iyaritsie mieme pɨta pɨtatsi'uhɨritɨa. 'Utɨarika hexeiyatɨ xeikɨa kanimɨmɨkɨ, peru yu'iyaritsie heixeiyatɨ tukari kanipitɨariekamɨkɨ.
2CO 3:7 Mɨkɨ tɨratu kɨmana mumɨni witsi'anetɨ kaninuani tetetsie mɨra'uxakai Muitsexi kemɨtiuhɨritɨarie. 'Ixaheritsixi teɨteriyari mepɨkayɨwawekai Muitsexi nierikaya memɨxeiyakɨ, witsimɨrayexawatɨkaikɨ tsepa mayeyeitɨrirɨmekai.
2CO 3:8 Merikɨte, ¿matsi waɨkawa witsikati'aneni tɨratu 'iyaritsie mɨmieme xɨka hepaɨtsitana hɨritɨarieka?
2CO 3:9 Xɨka witsi'u'itɨarieni yatihɨritɨariekaku tɨratu hepaɨtsita kɨmana teɨteri memɨtixani'eriwa, matsi waɨkawamekɨ 'anayuhayewamekɨ witsipɨtiyɨni yatihɨritɨariekaku tɨratu hepaɨtsita kɨmana heitserie memɨpitɨarieka.
2CO 3:10 Mɨkɨ meta, tita witsimɨti'anekai witsipɨkatiyuxexeiya hikɨ, mɨkɨ pɨta kwinimieme witsi'anetɨ me'iwakɨ.
2CO 3:11 Tita mɨrayeyeitɨrirɨmekai witsipɨ'anekai, peru matsi waɨkawa witsikani'aneni tita mɨkatixɨwe.
2CO 3:12 Mɨpaɨ yuri temɨte'eriekɨ, 'ayumieme kwiteyuyetuatɨ tepɨtekuxata.
2CO 3:13 Muitsexi hepaɨ tepɨkayɨa, 'ixurikikɨ kemɨreuyukunakai 'ixaheritsixi teɨteriyari yuheyemekɨ memɨka'ixeiyakɨ, kemɨrayeyeitɨrirɨmekai.
2CO 3:14 Mɨkɨ teɨteri me'u'itutupetɨ mekanakɨne kememɨteyu'iyaritɨakai. Hikɨke yaxeikɨa mɨkɨkɨ 'ixurikikɨ heuyukunatɨ kaniyuhayewa kepauka mutiterɨwarɨwa tɨratu meripaitɨ mieme xapayari. Pɨkaheukuyepiwa, Kɨritsitu hetsie tiwiyakaku xeikɨa pɨka'unarɨwa.
2CO 3:15 Matsi hikɨke Muitsexi xapaya 'akaterɨwarɨwakaku, mɨkɨ 'ixurikikɨ wa'iyari kaneukunaka.
2CO 3:16 Peru kepauka kemɨ'ane Ti'aitame hetsɨa munuani, 'ana kaneukuyepiyamɨkɨ.
2CO 3:17 Matsi Ti'aitame kani'iyaritɨni, hakewa Ti'aitame 'iyarieya meyeika, tewi mana kaniyɨnɨ'aka.
2CO 3:18 Tame tanaitɨ tahɨxie kaheukunakaku tepihekɨata Ti'aitame witsikemɨ'ane, tsepa yɨxaɨyemekɨ, xikɨritsie tewi kemɨtihekɨata. 'Ayumieme tepɨkupatsiwa, witsite'anenetɨ tepakɨnirɨme, hepaɨna teteyuxexeiyatɨ tete'akɨnirɨme. Ti'aitame 'iyaritɨtɨ mɨpaɨ katiniyurieneni.
2CO 4:1 'Ayumieme mɨpaɨ tetehɨritɨarietɨ tepɨkawaɨripie, matsi ketemɨtenenimayatsie tepɨyɨa.
2CO 4:2 Peuyewetse hipatɨ memɨyutetewiyanikɨ 'awie kememɨteyurie, peru tame tekateniutixani'erieni mɨkɨ naime. 'Atepɨka'u'uwa teteta'irɨwiyatɨ, haa tepɨka'inɨitɨa Kakaɨyari niukieya, 'aixɨa 'anemekɨ pɨta tekatenikuxatani. Matsiɨkɨme tepeyeitɨa tita yuri mɨraine, Kakaɨyari tatsixeiyakaku tepɨtahekɨata, yunaitɨ teɨteri yu'iyaritsie mɨpaɨ memɨtemaikakɨ kename yuri.
2CO 4:3 Taniuki 'aixɨa manuyɨne tsepa meukuname, memɨtatɨmaiyariexime kememɨte'i'enie xeikɨa wahetsiemieme kaneukunaka.
2CO 4:4 Hikɨ miemete wakakaɨyari kaniwarakɨpiriyaxɨani mɨkɨ yuri memɨkate'erie kememɨteyumate yu'iyaritsie, kapa hekɨariya me'uxeiyakɨ, niuki 'aixɨa manuyɨne Kɨritsitu kemɨtimariwe kemɨtiwahekɨariwiyakeyu. Mɨkɨ Kɨritsitu Kakaɨyari kani'inɨarieyatɨni, hepaɨna pɨtiyuxexeiya.
2CO 4:5 Mɨkɨ meta, tame tepɨkatekuxata tahepaɨtsita, matsi mɨpaɨ pɨta tepɨtekuxata, Kɨritsitu Ketsutsi ti'aitame kemɨtihɨkɨ te'utiyuatɨ, tame xeparewiwamete tepɨhɨkɨ Kɨritsitu hetsɨa mieme.
2CO 4:6 Matsi Kakaɨyari mɨpaɨ mutayɨ: «Hekɨariya yɨwipa ke'uneni», 'utaitɨ, mɨkɨ katanihekɨariwiyani ta'iyaritsie. 'Ayumieme yatetemaitɨ Kakaɨyari kemɨtimariwe, Kɨritsitu hetsie kemɨtimatsiɨkɨ, tekanihekɨariwiyarieka.
2CO 4:7 'Ikɨ waɨkawa mɨraye'axe, haxu xariyarita tekaneixeiyani 'ikɨ tɨrɨkariya, mɨmatsiɨkɨnikɨ Kakaɨyari hetsɨa mɨmiemekɨ, tahetsɨa mɨkamiemekɨ.
2CO 4:8 Tsepa naimekɨ temu'uximatɨarie, tepɨkaha'iwarie. Tsepa 'atsitemɨkatemate ketemɨteyurieni, tepɨkawaɨripie.
2CO 4:9 Tsepa temeutaweiyariexɨa, tepɨkaku'eiriwa. Tsepa tematixɨriya, tepɨka'utatɨmaiyarie.
2CO 4:10 Taheyemekɨ tepɨkwixime tawaiyaritsie, Ketsutsi kemɨtiumɨ. 'Ayumieme tukari kanimatsiɨkɨni tawaiyaritsie, Ketsutsi kemɨrayeniere kanimatsiɨkɨni.
2CO 4:11 Tame temayeneniere taheyemekɨ tekaniyetuiyani temɨkwinikɨ Ketsutsi hetsɨa temɨmiemetekɨ, mɨmatsiɨkɨnikɨ tawaiyaritsie kemɨrayeniere Ketsutsi, tsepa temɨkwixime.
2CO 4:12 'Ayumieme tekwiximetɨ tekaniyɨaka, xemetsɨ xe'ayenenieretɨ xepɨyɨa.
2CO 4:13 Kemɨre'uxa: «Yuri nepɨtiuta'eri, 'ayumieme neputaniu». Tameta yaxeikɨa tepɨte'u'iyari. Yuri tepɨte'erie, 'ayumieme teputiniuka,
2CO 4:14 mɨpaɨ tetemaitɨ, kemɨ'ane menukuketɨa Ti'aitame Ketsutsi, mɨkɨ katananuku'uitɨamɨkɨ tameta Ketsutsi hepaɨ, xehamatɨa meta katanaye'atɨamɨkɨ yuhetsɨa.
2CO 4:15 Mɨpaɨ naitɨ katiniyɨmɨkɨ xehetsiemieme. 'Ayumieme mɨkɨ yemekɨ 'aixɨa tiuka'iyaritɨ yumɨireme wahetsiemieme, pamɨpariyutsi kanipitɨariekamɨkɨ. Mɨkɨkɨ Kakaɨyari witsikemɨ'ane kanikuxaxatsiwamɨkɨ.
2CO 4:16 'Ayumieme tepɨkawaɨripie. Tsepa herie temɨtipɨnirɨme, tataɨta tekanihekwariyarieka tukarikɨ.
2CO 4:17 Pɨkahahete, ketemɨte'uximatɨarie hikɨ, 'epɨkareutere. Peru yatete'uximatɨarieme, taheyemekɨ witsi'anemekɨ tepɨ'ikatɨarieka mɨkaxɨwekɨ.
2CO 4:18 Peru tepɨkatekuwautɨwe tita temɨtexeiya, tita temɨkatexeiyawawe pɨta tekanikuwautɨweni. Tita temɨtexeiya 'apɨkatiteriwe, tita temɨkatexeiyawawe pɨta yuheyemekɨ 'apɨtiteriwe.
2CO 5:1 Mɨpaɨ tekatenimaika, xɨka 'uka'unarieni 'ikɨ xamaru hakewa temayetei 'ena kwiepa, kii tekanexeiyani Kakaɨyari mɨtatsipitɨa mamakɨ mɨkawewiya yuheyemekɨ 'amuwe muyuawitsie.
2CO 5:2 Mɨkɨ meta, mɨpaɨ te'anenetɨ tekaniuti'aiwani temenakatɨnikɨ hakewa temayeteni taheima mieme.
2CO 5:3 Mɨpaɨ tete'enakatɨme yemekɨ tepɨkamamaweni.
2CO 5:4 Hikɨ xamarutɨa te'ayetetɨ tekaniuti'aiwani tetsaipɨnetɨ. Tatsɨari tekaheutakemaripiekutɨ, matsi tepenakatɨkɨni, tita mɨrayeniere yuhetsie mixewiriyanikɨ tita mɨtimɨxime.
2CO 5:5 Merikɨte, Kakaɨyari kanihɨkɨtɨni kemɨ'ane mɨtatsi'utiwewi mɨpaɨ mɨtiyɨnikɨ. Mɨkɨta yu'iyari kataniupitɨani 'inɨaritɨme mɨmatsiɨkɨnikɨ tita tahetsie mɨtinake.
2CO 5:6 'Ayumieme ta'iyari tepukayetsa taheyemekɨ. Mɨpaɨ tepɨtemate, mexi tawaiyaritsie te'u'uwa, Ti'aitame hetsɨa tepɨka'u'uwa.
2CO 5:7 Yuri tete'erietɨ tekaniu'uwani, te'ixeiyatɨ tepɨka'u'uwa.
2CO 5:8 'Ayumieme ta'iyari tepukayetsa, tepɨtawaɨriya matsi temiku'eirienikɨ tawaiyari, Ti'aitame hetsɨa pɨta teme'uwanikɨ.
2CO 5:9 'Ayumieme tekanitamexɨitɨaka teminaki'aritɨanikɨ tsepa 'ena temu'uwa tsepa hetsɨana teme'uwa.
2CO 5:10 Kaneuyewekani tanaitɨ tematsiɨkɨtɨ temayeitɨarienikɨ Kɨritsitu 'uwenieya hɨxie hakewa mɨtatsiheta'iwawiya, taxexuitɨ temɨte'apiniyarienikɨ 'aixɨa ketemɨte'uyuri meta 'axaketemɨte'uyuri, tawaiyaritsie te'u'uwatɨ.
2CO 5:11 'Ayumieme mɨpaɨ tetemaitɨ, mɨpaɨ kemɨreuyewetse Ti'aitame te'ayemakatɨ, yuri teɨteri tekateniwa'eritɨaka. Tekanimatsiɨkɨni Kakaɨyari kemɨtatixeiya. Yuri tepɨte'erie kename tematsiɨkɨ xemeta kexemɨtatexeiya, kexemɨteyumate yu'iyaritsie.
2CO 5:12 Mɨpaɨ te'utiyuatɨ tawarita tepɨka'itsutɨa tetahekɨatatɨ xemɨtatsimaikakɨ. Matsi mɨpaɨ te'utiyuatɨ tekanixepitɨaka 'aixɨa xemutiyuanenikɨ xetatsiha'eriwatɨ, niuki xemexeiyanikɨ kɨmana xemɨwata'eiyakɨ mɨkɨ herie mieme xeikɨa meha'eriwatɨ 'aixɨa memutiyuane yuhepaɨtsita, 'iyaritsie mieme memɨkaha'eriwa 'aixɨa me'utiyuatɨ yuhepaɨtsita.
2CO 5:13 Tsepa 'atsitemɨkatemate, Kakaɨyaritsie mieme tekaniyɨaka. Meta tsepa temɨtemaiwawe, xehetsiemieme tepɨyɨa.
2CO 5:14 Kɨritsitu mɨtatsinaki'eriekɨ, 'ayumieme tinakemekɨ tepɨyɨa, tepɨkayɨwawe yɨkɨ temɨteyuriekakɨ. Mɨpaɨ matsi tepɨtehetima, xewitɨ yunaime wahetsiemieme kaniumɨni, 'ayumieme yunaitɨ mepukwi.
2CO 5:15 Mɨkɨ meta, yunaime wahetsiemieme kaniumɨni, mɨkɨ memayeneniere yuhetsiemieme memɨka'ayenenierenikɨ, kemɨ'ane wahetsiemieme mumɨ manukuketɨarie, mɨkɨtsie miemekɨ pɨta memɨyɨakakɨ.
2CO 5:16 'Ayumieme hikɨ xeime tepɨkamate teɨteri kememɨte'imate. Tsepa temimaikai Kɨritsitu teɨteri kememɨtehe'eriwa, hikɨ mɨpaɨ tetehe'eriwatɨ tepɨka'imate.
2CO 5:17 'Ayumieme xɨka Kɨritsitutsie tiwiyani, yɨkɨ 'anetɨ katiniunetɨarieni. Tita meripaitɨ mɨtimieme kananuyeyani. Kamɨ, naitɨ hekwatɨ katinayani.
2CO 5:18 'Ikɨ naime Kakaɨyari katiniutsutɨani. Mɨkɨ pɨtatsi'upitɨa 'aixɨa temɨtetaxeiyanikɨ hamatɨana, Kɨritsitu mɨpaɨ mɨtiuyurikɨ. Kataniuhɨritɨani temɨtekuxatanikɨ, hipatɨta hamatɨana 'aixɨa memɨteyuxeiyanikɨ:
2CO 5:19 mɨpaɨ te'utiyuatɨ, Kakaɨyari Kɨritsitu hetsie tiwiyatɨ mɨpaɨ pɨtiwapitɨa kwiepa memɨtama hamatɨana 'aixɨa memɨteyuxeiyanikɨ, wahetsie pɨkatiuhɨpa 'axamemɨte'uyurikɨ, matsi pɨtatsiyetuiri mɨkɨ niuki 'aixɨa ketemɨtetaxeiya wahamatɨa manuyɨne, te'utiyuatɨ.
2CO 5:20 'Ayumieme Kɨritsitu nɨ'arimama tekanihɨkɨtɨni, hetsiena mieme tekaniutiniukani, mɨpaɨ tetemaitɨ, Kakaɨyari kanixetuikani mɨpaɨ te'utiyuanekaku: «Kɨritsitu hetsiemieme te'utiniutɨ waɨriyarika tekanixepitɨaka, Kakaɨyari hamatɨa 'aixɨa xemɨteyuxeiyanikɨ».
2CO 5:21 Kemɨ'ane 'axamɨkatiyuriwekai Kakaɨyari 'axatiyuruwame hepaɨ pɨtixei, tame mɨkɨ hetsie tetewiyatɨ Kakaɨyari heitserie kataniupitɨani.
2CO 6:1 Tame Kakaɨyari te'uximayatsiriwamete, tekanixewawirieka xeme, xe'itanaki'erieme tita Kakaɨyari mɨtixemikwa 'aixɨa tiuka'iyaritɨ, yakɨxeikɨa xemɨka'itanaki'erienikɨ.
2CO 6:2 Mɨkɨ mɨpaɨ mainekɨ: «Yemekɨ kepauka yanemɨra'eriwakai 'ana nepɨmetsi'u'eni, kepauka newikweitsitɨarika maye'a 'ana nepɨmetsi'uparewi». Kamɨ hikɨ tukari 'aixɨa mɨ'ane kanihɨkɨtɨni, kamɨ hikɨ tukari kanaye'ani xemɨtawikweitsitɨarienikɨ.
2CO 6:3 Nixeime tepɨka'ukununuitɨwa tixaɨtɨ hepaɨtsita, 'ikɨ hɨritɨarika kapa 'axatikuxaxatsiwanikɨ ketemɨtehɨritɨarie.
2CO 6:4 Matsi Kakaɨyari te'uximayatsiriwamete tehɨkɨtɨtɨ naimekɨ tepɨtahekɨata: waɨkawa tete'uka'eniwatɨ, teteheuyehɨatɨ, tetatexietɨwetɨ,
2CO 6:5 tetiweiwatɨ, te'anutaxɨriwatɨ meta teɨteri meyuxamurietɨwekaku, waɨkawamekɨ tete'uximayatɨ, tetahɨtɨatɨ meta teyehakakwitɨwetɨ.
2CO 6:6 'Aixɨa 'anemekɨ tekateni'uximayaka, tetemaitɨ kemɨreuyewetse, tete'ukanenewietɨ meta 'aixɨa tete'u'iyaritɨ, 'Iyari Mɨtiyupata tehexeiyatɨ meta yurikɨ teteyukanaki'erietɨ,
2CO 6:7 yurikɨ tetekuxatatɨ meta Kakaɨyari tɨrɨkariyaya tehexeiyatɨ, heitserie temupitɨarie kuya tepɨayakɨ, naitsata miemekɨ kɨmana temɨtakwitɨwenikɨ.
2CO 6:8 Witsitetexeiyarietɨ meta 'axatetexeiyarietɨ, 'axatetekuxaxatsiwatɨ meta 'aixɨa tetekuxaxatsiwatɨ. Tete'itawamete tepɨxatsiwa peru yuri tepɨtekuxata,
2CO 6:9 kename tekamatiwa meputiyuane peru yunaitɨ mepɨtatsimate, kename tekwixime meputiyuane peru tepayeneniere, tepɨtiweiwa peru mepɨkatatsikwiwawe,
2CO 6:10 tsepa temunututuixie, peru taheyemekɨ tepɨyutemamawie, tixaɨtɨ tekatehexeiyatɨ, peru xikutsixi tepɨwarayeitɨwa yumɨireme, tixaɨtɨ tepɨkatehexeiya, peru naitɨ pɨtitapiini.
2CO 6:11 Ta'iwama kurinitutari, ta'iyari ya'anekaku 'aixɨa 'anemekɨ tepɨtexekuxaxatɨwa xexuimekɨ.
2CO 6:12 Ketemɨtexexeiya, ta'iyaritsie 'aixɨa tepɨteku'eriwa, peru xeme 'aixɨa xepɨkatatexeiya yuhetsie.
2CO 6:13 Merikɨte, netɨɨriyama xemɨhɨkɨtɨni hepaɨ nekatinixekɨhɨaweni, yaxeikɨata xeme xeketeneyurieka, xe'iyari 'aixɨa 'anekaku xexuimekɨ.
2CO 6:14 Yuri memɨkate'erie wahamatɨa xepɨkayuxewiriyani. ¿Titari rexeiya mɨtiheitserie meta tita 'aitsika mɨtititsana hamatɨa? ¿Ketiyuxewi hekɨariya yɨriya hamatɨa?
2CO 6:15 ¿Kemeteyu'enie Kɨritsitu meta tsatanaxi hamatɨa? ¿Kemeteyuxewi tewi yuri mɨti'erie meta yuri mɨkati'erie hamatɨa?
2CO 6:16 ¿Kakaɨyari tukitana kemetenake tetexi kakaɨyarixi? Pɨkayɨwetsietɨ. Tame Kakaɨyari mayeniere tukieya tekanihɨkɨtɨni, kemutayɨ Kakaɨyari: «Wahetsɨa nekaniukaimɨkɨ, watsata nekaniuyeikamɨkɨ. Wakakaɨyari nepɨhɨkɨtɨni, mɨkɨta neteɨterima mepɨhɨkɨtɨni». 'Ayumieme mɨpaɨta putayɨ:
2CO 6:17 «Watsata xekenayekɨneka, xekeneuyupata. Ketita mɨkati'itiya xepɨkatekumaɨwani, ne 'ana nekanixetanaki'erimɨkɨ».
2CO 6:18 «Ne xe'ukiyari nekanihɨkɨtɨkamɨkɨ, xemeta neniwema 'ukitsi 'ukari xepɨhɨkɨtɨni,
2CO 7:1 Merikɨte ne'iwama nenaki'erima, mɨpaɨ temɨte'utahɨawariekɨ kename mɨpaɨ tiyurieni, tepɨta'itieka naimekɨ tita tawaiyaritsie 'axamɨtiyurie meta ta'iyaritsie, tepaye'axɨaximeni Kakaɨyari te'ayemakatɨ tete'uximayatɨ tepatsietɨ hepaɨna.
2CO 7:2 Yu'iyarikɨ xeketaneutanaki'eri tame. Nixeime 'axatepɨka'uyuri, tixaɨtɨ xeime tepɨkate'unawairi, nixeime tepɨkate'u'itaiyaxɨ.
2CO 7:3 Mɨpaɨ kenemaine, xehetsie nemɨtiuhɨpanikɨ nepɨka'utaine. Meripaitɨ mɨpaɨ nepɨtixekɨhɨawekai kename ta'iyaritsie texeha'eriwa, kename 'axeikɨa tetaxewi tsepa temɨkwini tsepa temayeneniereni.
2CO 7:4 Waɨkawamekɨri nepɨkane'iyaritɨa xehepaɨtsita, yemekɨ 'aixɨa nepɨtikuxata xehepaɨtsita. Waɨkawa xepɨnetsitɨrɨkariya, tsepa naimekɨ kenemɨti'uximatɨariekai, nepɨnɨtɨarie, hikɨ netemawierika panayuhayewa.
2CO 7:5 Kepauka Matseruniya kwieyaritsie temu'axɨa tepɨkaka'uxipiwawekai tawaiyaritsie, naimekɨ matsi tekani'uximatɨariekaitɨni. Ta'aurie pɨtiyukwinekai, tataɨta tepɨmamakai.
2CO 7:6 Peru kemɨ'ane Kakaɨyaritɨtɨ mɨwanɨtɨa mɨkɨ memɨyuheiwerie, tameta mɨkɨ kataniunɨtɨani, Titu munuakɨ,
2CO 7:7 munuakɨ xeikɨa pɨkatixaɨ, matsi mɨkɨ munɨtɨariekɨ xehepaɨtsita tepunɨtɨarie tameta, tatikuxaxatɨwakaku Titu kexemɨtatexeiyakukai, kexemɨteyuhiweriekai, kexemɨteyumexɨitɨa nehetsiemieme. 'Ayumieme ne matsi yemekɨ nepɨnetemawiekai.
2CO 7:8 Nexapakɨ tsepa nemɨxe'uheiweritɨa, yɨkɨ nepɨkatinekɨhɨawe. Tsepa yɨkɨ nemɨtinekɨhɨawekai 'ana, mɨpaɨ netimaitɨ mɨkɨ xapa tsikeretsɨ yapaɨmexɨa mɨxe'uheiweritɨakɨ,
2CO 7:9 peru hikɨ matsi nepɨnetemawie. Xemuheiweritɨariekɨ, mɨkɨkɨ nepɨkanetemawie. Matsi yaxete'uheiweritɨarieka xemɨte'uhayewaxɨkɨ kexemɨteyuriekai, 'ayumieme nepɨnetemawie. Kakaɨyari yatixepitɨakaku xekaniuheiweritɨarieni, 'ayumieme tixaɨtɨkɨ tepɨkatexe'ukwinitɨa mɨpaɨ temɨte'uyurikɨ.
2CO 7:10 Xɨka yuheiwerieka Kakaɨyari yatipitɨakaku, pɨtihayewa kemɨtiyurienekai, meta pɨtawikweitsitɨarieni. Tihayewame kemɨtiyurienekai, tawarita 'axapɨkatiyɨkɨhɨaweni mɨtiuhayewaxɨkɨ. Mexɨka yuheiwerieka kwiepa memɨtama wahepaɨ xeikɨa, pɨpitɨarieni mumɨnikɨ.
2CO 7:11 Neuxei kemɨtiuyɨ kepauka Kakaɨyari mɨxe'upitɨa xemɨyuheiweriekakɨ. Mɨkɨkɨ xepuyuwaɨri, mɨkɨ meta, xepɨyutahekɨataxɨ yuniukikɨ, xepɨyuyehekaxɨa, xeputimama. 'Ana xepɨnetsixeiyakukai, xepɨyumexɨitɨakai, 'aixɨa xepiyuri naime. Naimekɨ xekaniyuhekɨatani xemɨ'itiyakɨ mɨkɨ kemɨtiuyɨkɨ.
2CO 7:12 Merikɨte, mɨpaɨ nepɨtixe'u'utɨiri, peru kemɨ'ane yu'iwa 'axamuyuri meta 'axamu'itɨarie neha'eriwatɨ xeikɨa nepɨkatiu'utɨa. Xeme yɨkɨmana mɨpaɨ xemɨtemaikakɨ kexemɨteyuwaɨriya tahetsiemieme Kakaɨyari xexeiyakaku, 'ayumieme yanepɨtiu'utɨa.
2CO 7:13 Mɨpaɨ mɨtiuyɨkɨ, 'ayumieme tepunɨtɨarie tame. Mɨkɨ meta, tame mɨpaɨ tete'unɨtɨarieka, matsi waɨkawa tekanitatemamawiekaitɨni Titu mɨyutemawiekaikɨ, yunaitɨ kayuwatɨ xemipitɨakɨ 'iyarieyatsie.
2CO 7:14 'Aixɨa kenemɨtitaxatɨa xehepaɨtsita, nepɨka'utewiyatsitɨarie neniuki hepaɨtsita. Matsi yaxeikɨa yuri ketemɨtexekuxaxatɨwakai naimekɨ, mɨpaɨta kaniyuritɨkaitɨni Titu 'aixɨa ketemɨte'itaxatɨa.
2CO 7:15 Mɨkɨta kwinimieme matsi kanixenaki'erieka xeha'eriwatɨ yaxemɨtekahukɨ yunaitɨ, xeha'eriwatɨ kexemɨte'itanaki'eri xeheumamatɨ meta xe'utiyɨyɨakatɨ.
2CO 7:16 Neta nepɨnetemawie nemɨyɨwekɨ nemɨnenɨtɨanikɨ xehepaɨtsita naimekɨ.
2CO 8:1 Hikɨ ta'iwama tepɨtexetaxatɨanikeyu, Kakaɨyari 'aixɨa tiuka'iyaritɨ kemɨtiwarupitɨa mɨkɨ memeyutixexeɨriwa Matseruniya kwieyaritsie.
2CO 8:2 Waɨkawa mepɨ'inɨatsietɨwe me'uximatɨarietɨ, peru watemawierika panayuhayewa. Tsepa yemekɨ tixaɨtɨ memɨkatehexeiyakai, mepitimɨiriyaxɨ 'aixɨa 'iyarikɨ kememɨtewamikwakai.
2CO 8:3 Kenemɨtiunierixɨ yanepɨtihekɨata. Kememɨteyɨwawekai xeikɨa nepɨkahaine, matsi yemekɨ mepɨka'uyutikweri kememɨtewamikwakai hipame. Yɨkɨmana
2CO 8:4 waɨriyarika metatsipitɨatɨ mekataniutawawirieni mɨpaɨ temɨtewataunienikɨ, mewaparewietɨ memɨyuxewinikɨ Kakaɨyari teɨterimama wahamatɨa.
2CO 8:5 Ketemɨteku'eriwakai mɨpaɨ memɨteyurienikekaikɨ yamepɨkate'uyuri. Matsi mekaniyuyetuani meri Ti'aitame mɨtiwata'aitɨanikɨ, tameta temɨtewata'aitɨanikɨ Kakaɨyari mɨpaɨ mɨtinakekɨ.
2CO 8:6 'Ayumieme Titu tekaniutawawirieni 'ikɨ 'imikierikɨ mɨraye'atɨanikɨ xeme xehetsɨa mɨkɨ meripaitɨ mitsutɨakɨ 'ixeɨrietɨ.
2CO 8:7 Waɨkawa naitɨ katinitimɨirirɨmeni xehetsiemieme kexemɨteyurie, yuri xete'erietɨ, xetekuxatatɨ, xetemaitɨ tita mɨreuyewetse, naimekɨ xeyuwaɨriyatɨ texenaki'eriekaku. Merikɨte, yaxeikɨata 'ikɨ 'imikieri xekeneutimɨiriya.
2CO 8:8 Netixe'aitɨatɨ hikɨ nepɨkatixekɨhɨawe. Matsi hipatɨ mɨpaɨ memɨteyuwaɨriyakɨ, nexe'inɨatatɨ nepaine, xɨka xehekɨatsieka xemeta mɨkɨ wahepaɨ kename xeteyukanaki'erie.
2CO 8:9 Xeme mɨpaɨ xepɨtehetima 'aixɨa kemɨtiuka'iyari Tati'aitɨwame Ketsutsi Kɨritsitu. Mɨkɨ tsepa mɨxikutɨkai, xehetsiemieme tixaɨtɨ karexeiyatɨ payuyeitɨa, xeme xikutsixi xemakɨnekɨ, mɨkɨ tixaɨtɨ karexeiyatɨ matɨakɨ.
2CO 8:10 'Ikɨ hepaɨtsita kenemɨtiku'eriwa mɨpaɨ nekatinixe'utaxatɨani. 'Aikɨ xepuyuwaɨri xemitsutɨanikɨ mɨpaɨ xeteyurietɨ. Merikɨte, hikɨ 'aixɨa kaniyɨmɨkɨ xehetsiemieme xɨka mɨpaɨ xete'uyurieni,
2CO 8:11 xɨka mɨpaɨ xete'aye'atɨani kexemɨteyurie. Xe'iyari kemɨ'anenekai mɨpaɨ xemɨteyuwaɨriyanikɨ, mɨpaɨta xeketenaye'atɨaka, kexemɨteyɨwawe.
2CO 8:12 Xɨka xewitɨ yatiyurieneni 'iyarieya ya'anekaku, tita mɨrexeiya mɨtiyetuani mɨkɨ pɨnaki'eriyarieka, tita mɨkarexeiya pɨkatixaɨ.
2CO 8:13 Perutsɨ ne mɨpaɨtɨtɨ nepɨkahaine hipame xewaparewietɨ xemɨhakakwinikɨ nepɨka'utaine,
2CO 8:14 matsi waɨkawa xemɨtehexeiyakɨ hikɨ nepaine. Tita hikɨ xehetsɨa mɨranuyuhayewa, mɨkɨkɨ xekeniwaparewieka memɨteheuyehɨwa, mɨkɨta 'uxa'atɨni warie wahetsɨa ranayuhayewakaku memɨxeparewienikɨ xeme kepauka xemɨteheuyehɨaka mɨpaɨ 'ana yunaitɨ tepɨtehexeiyani,
2CO 8:15 yaxeikɨa kemɨre'uxa: «Kemɨ'ane waɨkawa mɨtiukuxeɨri, pɨka'anayuhayewaxɨ. Kemɨ'ane 'etsiwa mɨtiukuxeɨri, tixaɨtɨ pɨkareuyehɨakai».
2CO 8:16 Pamɨpariyutsi Kakaɨyari nekanipitɨaka Titu mupitɨakɨ nehepaɨ mɨtiku'eriwanikɨ ne xehetsiemieme kenemɨtiku'eriwa.
2CO 8:17 Kataniu'enieni ketemɨte'iwawiriekai xehetsɨa mɨmiekɨ, mɨkɨ matsi yemekɨ kaniyuwaɨriyakaitɨni, yɨkɨmana mɨyemie.
2CO 8:18 Hamatɨanata tekananɨnɨ'akuni ta'iwa mɨmatiwa niuki 'aixɨa manuyɨne mɨkuxata, yunaitɨ naitsarie memɨyutixexeɨriwa memeitima.
2CO 8:19 Mɨkɨ meta, memɨyutixexeɨriwa mekanenayexeiya tahamatɨa mɨyemiekɨ 'ikɨ 'imikieri temanɨ'ɨnitsie ketemɨtehɨritɨarie, Ti'aitame hepaɨtsita 'aixɨa mɨtikuxaxatsiwanikɨ, temɨmatsiɨkɨnikɨ tameta ketemɨtetawaɨriya.
2CO 8:20 Mɨpaɨ tepɨtetakweriwayurie, xewitɨ kapa niukixiekakɨ 'ikɨ 'imikieri hepaɨtsita kemɨtiwaɨkawa kɨmana temɨhɨritɨarie.
2CO 8:21 Tita 'aixɨa mɨti'ane, mɨkɨkɨ tepɨtamexɨitɨa Ti'aitame kemɨtatixeiya, meta teɨteri kememɨtatexeiya.
2CO 8:22 Wahamatɨa ta'iwa tekananunɨ'akuni. Mɨixamexɨa te'ita'inɨataka, tepeitima kemɨtiyuwaɨriya. Hikɨ matsi waɨkawa pɨyuwaɨriya, waɨkawamekɨ yuri mɨtixe'eririekɨ xeme.
2CO 8:23 Titu hepaɨtsita, mɨpaɨ nepɨtixekɨhɨawe ne'iwa pɨhɨkɨ meta ti'uximayatame xehetsɨa, ta'iwamata hipame wahepaɨtsita, mɨkɨ memɨyutixexeɨriwa wanɨ'arima mepɨhɨkɨ, wakɨmana Kɨritsitu mariwemekɨ mɨkuxaxatsiwakɨ.
2CO 8:24 'Ikɨ xekeniwahekɨatsitɨiyani kename yurikɨ kexemɨteyukanaki'erie, kename yuri 'aixɨa ketemɨtewakɨhɨawe xehepaɨtsita, xaɨtsie memeyutixexeɨriwa mexexeiyakaku.
2CO 9:1 Merikɨtsɨ, mɨpaɨ kexemɨte'ikuxeɨri Kakaɨyari teɨterimama wahetsiemieme, tawarita niuki pɨkaheuyewetse mɨkɨ hepaɨtsita para nemɨtixe'utɨiriekakɨ.
2CO 9:2 Ne mɨpaɨ nepɨtimate kexemɨteyuwaɨriya, 'ayumieme 'aixɨa nepɨtiwakuxaxatɨwa matseruniyatari xehepaɨtsita. Mɨpaɨ nepɨtiwakɨhɨawe, 'akaiyatari 'aikɨ mepɨha'aritsiekai mɨpaɨ memɨteyuriekakɨ. Mɨpaɨ meteyuwaɨriyatɨ mɨkɨta yuwaɨkawatɨ mɨpaɨ memɨteyumexɨitɨakɨ.
2CO 9:3 Nekaniwaranunɨ'amɨkɨ ta'iwama nɨkatɨ yakɨxeikɨa rayanikɨ tita 'aixɨa nemɨtiwakuxaxatɨwa xehepaɨtsita, tita xemɨte'ukuxeɨri, mɨkɨ nexatatɨ. Peuyewetse matsi xemɨyuha'aritɨakakɨ yaxeikɨa kenemɨtiwakɨhɨawekai xehepaɨtsita.
2CO 9:4 Matseruniyatari ne'utɨma xɨka me'u'axɨanike, mɨkɨ xɨka mexe'utaxeiyake xekaha'aritsiekame, xepɨtatsitewiyatsitɨanikeyu tame 'atsitekatexe'utahɨaweyu xehetsiemieme ketemɨtehekɨata.
2CO 9:5 'Ayumieme mɨpaɨ netiu'erieka meuyewetsekɨ 'iwamarixi nekaniwarutawawirieni mɨkɨ meri memɨyehukɨ xehetsɨa, memɨxekuha'aritsitɨanikɨ mɨpaɨ 'aixɨa kexemɨteyuriekukai meripaitɨ xemɨtewamikwanikɨ hipame. Peuyewetse mɨkuha'aritsienikɨ xe'iyari ya'anekaku, yuhetsiemieme xe'ikweriekaku pɨkatixaɨ.
2CO 9:6 'Ikɨ xekena'eriwani: Kemɨ'ane 'etsipaɨmeme muka'e yu'imɨari 'ikwerietɨ, 'etsiwa xeikɨa kanika'itsanamɨkɨ meta kemɨ'ane waɨkawa mika'eni, mɨkɨ 'anayuhayewame kanika'itsanamɨkɨ.
2CO 9:7 Yuxexuitɨ matɨaripaitɨ yɨkɨmana kememɨteyɨhɨawixɨ yu'iyaritsie, mɨpaɨ meketeheyurieka, mekayuheiwerietɨ mewiyariekame mekayu'erietɨ, mɨpaɨ pɨta meketewamikwani. Kakaɨyari kaninaki'erieka kemɨ'ane yutemawietɨ mɨtiyetuaya.
2CO 9:8 Kakaɨyari kaniyɨweni mitimɨiriya tita mɨtixepitɨa 'aixɨa tiuka'iyaritɨ, manayuhayewanikɨ. Xɨka mɨpaɨ 'aneni, yuheyemekɨ naitɨ mɨreuyewetse xepɨtehexeiyani, xepɨyɨwaweni 'aixɨa xemɨteyuriekakɨ naimetsie.
2CO 9:9 Kemɨre'uxa: «Naitsarie katiniwayetuirieni yupiinite, katiniwarumini tixaɨtɨ memɨkatehexeiya, heitseriemekɨ yatikamietɨ tita mɨtiuyuri yuheyemekɨ 'epɨtiteriwe».
2CO 9:10 Kemɨ'ane 'imɨari mimikwa 'etsame, 'ikwai mɨtatsimikwa mɨtikwaiyanikɨ, mɨkɨta xeme pɨxemikwani, pɨtimɨiriyani tita xemɨte'uka'etsa pɨtitixuawitɨani tita mɨtiutixuxuawere heitseriemekɨ yaxemɨtekahukɨ.
2CO 9:11 Naime hepaɨtsita xikutsixi xepayeitɨarieni yemekɨ 'aixɨa 'iyarikɨ xemɨtewamikwanikɨ hipame. Ketemɨteyurie, mɨpaɨ xetewamikwakaku, Kakaɨyari pamɨpariyutsi kanipitɨariekamɨkɨ.
2CO 9:12 Mɨpaɨ xetewaparewiekaku yu'uximayatsikakɨ kememɨteheuyehɨwa xeikɨa Kakaɨyari teɨterimama xepɨkatewamikwa, matsita waɨkawamekɨ meyutemamawietɨ Kakaɨyari hepaɨtsita 'aixɨa mepaitɨkani.
2CO 9:13 Xeme xepɨmatsiɨkɨ kexemɨte'u'inɨatsie mɨpaɨ xemɨtewaparewiekɨ. 'Ayumieme 'aixɨa mekaniutiyuaneni Kakaɨyari hepaɨtsita yaxemɨtekahukɨ, yaxeikɨa kexemɨteyuhekɨata niuki 'aixɨa manɨyɨne hetsie xetewiyatɨ Kɨritsitu hepaɨtsita mɨtikuxata, 'aixɨa 'iyarikɨ xemɨwarumikɨ mɨkɨ hipameta yunaime.
2CO 9:14 Yaxeikɨata xehetsiemieme kepauka memɨyutinenewiwa mekanixeheiwe'eriekakuni, Kakaɨyari kwinimieme 'aixɨa mɨtiuka'iyarikɨ xehetsiemieme.
2CO 9:15 Pamɨpariyutsi Kakaɨyari kepitɨarieka, mɨpaɨ mɨtatiumikɨ ketemɨkateyɨwawe yatemɨtehekɨatanikɨ.
2CO 10:1 Hikɨ ne Papuru nekanixewawirieka, kemɨtiyukanaki'erie meta 'aixɨa kemɨtiuka'iyarikɨ Kɨritsitu, mɨpaɨ nepaine. Tahɨxie te'utinierekaku tixaɨtɨ nepɨkatihɨkɨ xeniu xehetsɨa ne'uyeikatɨ, 'ateewa ne'uyeikatɨ pɨta nepɨnewaɨriya kenemɨtixe'utahɨawe.
2CO 10:2 Merikɨte, nepɨxewawirie mɨkaheuyewekanikɨ nemɨxetahɨawekɨ ne'ane'eriyatɨ xehetsɨa nenuame, tsepa mɨpaɨ nemɨtimate, xɨka 'aixɨa 'anekame ne'erieka nemɨyɨwekɨ nemane'eriyanikɨ hipame wahepaɨtsita, waitsie tetewiyatɨ te'u'uwame memɨtatsi'erie, mɨkɨ wahepaɨtsita.
2CO 10:3 Tsepa 'atemu'uwa kwiepa, waitsie tetewiyatɨ tepɨkatakwitɨwe.
2CO 10:4 Waitsie pɨkamieme kuya tepɨaya kɨmana temɨtakwitɨwe, matsi pɨta pɨtɨrɨkawi Kakaɨyari hetsiemieme, temika'unaxɨanikɨ kuyaxi waki.
2CO 10:5 'Iyaritɨarika tekanika'unarɨmeni teɨteri kememɨteyɨkɨhɨawe, tsepa kemɨtitita Kakaɨyari mɨraye'unie memɨkamaikakɨ, mɨkɨ tekanika'unarɨmeni. Naime 'iyaritɨarika tepanutahɨwa yamɨtikamienikɨ Kɨritsitu kemaine.
2CO 10:6 Taheyemekɨ tepɨha'aritsie temɨwa'uximatɨanikɨ yunaime memɨkayuwaɨriya yamemɨtekahunikɨ, xe'aye'atɨarieyu xeme yaxetekahutɨ.
2CO 10:7 Xekeneuyɨ'ɨwiya tita xehɨxie mɨtixuawe. Xewitɨ xɨka yu'iyaritsie Kɨritsitu hetsɨa mieme yu'erieka, mɨpaɨta matsi yu'iyaritsie ketiyɨkɨhɨaweni, mɨkɨ Kɨritsitu hetsɨa kemɨtimieme, tameta hetsɨana temɨmiemetekɨ.
2CO 10:8 'Ikɨ heitserie temexeiya tame, Ti'aitame mɨpaɨ pɨnetiupitɨa nemɨxetɨrɨkariyanikɨ, nemɨxeka'unaxɨanikɨ nepɨka'utaine. Merikɨte, xɨka 'etsiwa ne'anuyehaitɨrɨweni mariweme nexatatɨ 'ikɨ heitserie temexeiyakɨ, nepɨkanetewiya mɨpaɨ ne'utaitɨ.
2CO 10:9 'Aixɨa pɨkayɨni xɨka nexemariutame ne'eriwani xapakɨ.
2CO 10:10 Mɨpaɨ pɨraniuwa: «Xapakɨ kemaine pahete pɨtɨrɨkawi, peru yuwaiyaritsie 'uwa 'uyeikatɨ pɨkayɨwe, yuniukitsie pɨxani'eriwa».
2CO 10:11 Mɨpaɨ ketiyɨkɨhɨaweni kemɨ'ane mɨya maine, ketemɨ'anene taniukitsie xapa tewewietɨ 'ateewa te'u'uwatɨ, mɨpaɨ yaxeikɨa tepɨteyurieni 'ate'u'uwatɨ.
2CO 10:12 Mɨkɨ meta, tame tepɨkatawaɨriya temanuyukayayatsanikɨ wa'aurie, temɨta'inɨatanikɨ wahepaɨ te'anenetɨ, mɨkɨ yuhetsiemieme memɨyuhekɨata memɨmariwanikɨ. Mɨkɨ matsi memɨyuti'inɨatakɨ yu'inɨarikɨ, yɨkɨmana memɨyuxeiyakɨ meyu'inɨatatɨwetɨ, 'atsimepɨkatemaiwawe.
2CO 10:13 Tame pɨta mariwemekɨ ketemɨtetaxata, kemɨreyɨ hakewa temɨkahe'aitɨarie 'atsitepɨkahaitɨka. Matsi Kakaɨyari kemɨtare'inɨatsiri, mana kemɨreyɨ tepɨtekuxata tetaxatatɨ. 'Atsita xehetsɨa paitɨ tepu'inɨatsiyarie.
2CO 10:14 Xɨka xehetsɨa tekahɨritɨariekake, tepanuyehaitɨrɨwenikeyu mɨpaɨ te'utiyuatɨ, peru tame meri tepu'axɨa xehetsɨa niuki Kɨritsitu hepaɨtsita 'aixɨa manuyɨne tekuxatatɨ.
2CO 10:15 'Ayumieme tahetsiemieme ketemɨtekuxata, kemɨreyɨ hakewa temɨkahe'aitɨarie 'atsitepɨkatekuxata. Hipatɨ kememɨte'uximaya hepaɨtsita, 'atsitepɨkahaitɨka kename tame pɨta mɨpaɨ tete'uyuri te'utiyuatɨ. Mɨkɨ meta, mɨpaɨ yuri tekateni'erieka xehepaɨtsita, kepauka xemutixuxuawereni yuri xete'erietɨ, 'ana tepɨkatsaipɨneni xehetsɨa xeikɨa temɨte'uximayakakɨ. Naitsarie pɨta hakewa teme'inɨatsiyarie, mana tepɨte'uximayaka.
2CO 10:16 Hikɨ xe'aurie paitɨ niuki 'aixɨa manuyɨne tepɨkuxatani. Hakewa xewitɨ mɨkara'uximayatsie, mɨpaɨ 'anari xewitɨ mɨpaɨ pɨkara'eriwani kename mɨra'uximayatsie teteyurie.
2CO 10:17 Matsitsɨ niuki kemaine, «Kemɨ'ane mariweme mɨxatamɨkɨ, Ti'aitame mariweme kexatani».
2CO 10:18 Kemɨ'ane yɨkɨmana mɨyuhekɨata, mɨkɨ pɨkamatsiɨkɨ kemɨtiu'inɨatsie, matsi kemɨ'ane Ti'aitame hetsiemieme mɨtiyuriene, mɨkɨ pɨta pɨmatsiɨkɨ kemɨtiu'inɨatsie.
2CO 11:1 Xɨka xete'unewienike tewi 'atsimɨkatimate hepaɨ nemɨtikuxata. 'Ayumieme xekeneteneunewiri.
2CO 11:2 Hikɨ kenemɨti'ɨtetsa xeme xehetsiemieme, mɨkɨ Kakaɨyari hetsɨa kanimiemetɨni. Nepɨxeyetua xeime hetsɨa, Kɨritsitu hamatɨa xemɨyuxewinikɨ, yaxeikɨa 'ɨimari kemɨtiwikitɨariwa 'uki yuxewitɨ xeikɨa mitiwitɨnikɨ.
2CO 11:3 Peru nepeuma kapa xete'u'itaiyarienikɨ kexemɨteyɨkɨhɨawe yu'iyaritsie, yaxeikɨa mɨkɨ kuu 'Ewa kemɨtiu'itaiyaxɨ. Mexɨka mɨpaɨ tiuyɨnike, xe'iyari pɨkayuxewinikeyu, Kɨritsitu hetsie xeikɨa xepɨkatewiyanikeyu, xepɨka'itiyakakeyu.
2CO 11:4 Kari 'aixɨa 'anemekɨ xekanitanewieni xɨka xewitɨ nuani xeime Ketsutsi yɨkɨ mɨ'ane kuxatatɨ tame ketemɨkatexe'uxatɨa, mexɨka xekuxaxatɨwani xeime 'iyari yɨkɨ mɨ'ane xeheixeiyatɨ xemakɨnekɨ xemɨka'itanaki'eriwawe, mexɨka niuki 'aixɨa manuyɨne yɨkɨ mɨ'ane xekuxaxatɨwani xemɨka'itanaki'eriwawekai. Xɨari xepɨwanewie mɨya memɨtekuxata.
2CO 11:5 Ne mɨpaɨ nepɨtiku'eriwa, mɨkɨ kwinimieme waniu memɨnɨ'ariekate, mɨkɨ tixaɨtɨ mepɨkatehexeiya neta kenemɨkareixeiya.
2CO 11:6 Tsepa kemɨ'ane mɨkaniuwe hepaɨ nemɨtikuxata, tewi 'atsimɨkatimate hepaɨ nepɨka'ane kenemɨtimaiwe. Matsi naimekɨ, ketemɨ'anene yatepɨtexehekɨatsitɨiya, yunaitɨ kememɨtatexeiya.
2CO 11:7 ¿Ne keri'axanetiuyuri kepauka tixaɨtɨ nekatihɨkɨtɨtɨ nemaneyeitɨa xeme pɨta tixaɨtɨ xetehɨkɨtɨtɨ xemayeitɨarienikɨ, keri'axanetiuyuri nekatixewawirietɨ nemɨxekuxaxatɨwanikɨ Kakaɨyari niukieya 'aixɨa manuyɨne?
2CO 11:8 Xaɨtsie memeyutixexeɨriwa nekaniwanawanekaitɨni yakɨtɨtɨ, watumini nenaki'erietɨ, xehetsiemieme nemɨti'uximayakakɨ.
2CO 11:9 Xehetsɨa ne'uyeikatɨ kepauka nemɨreuyehɨakai, nepɨkaxe'uximatɨakai xeme. Kenemɨreuyehɨakai mepɨnetemikwakai ta'iwama Matseruniyatsie memeyekɨ. Mɨpaɨ netiyurienetɨ naimekɨ nepɨkanetauniekai nemɨxe'uximatɨanikɨ, mɨpaɨta yaxeikɨa nepɨtiyurieneni.
2CO 11:10 Yuri kemaine Kɨritsitu, neta yuri nepaine. 'Ayumieme mɨpaɨ nepaine, yemekɨ mɨpaɨ nepɨtihekuatsieka naitsarie 'Akaiya kwieyaritsie.
2CO 11:11 ¿Titayari mɨpaɨ netinemate? Nemɨxenaki'eriekɨ 'ayumieme mɨpaɨ nepɨtinemate. Kakaɨyari mɨpaɨ pɨtimate kenemɨtixenaki'erie.
2CO 11:12 Kenemɨtiyuriene, yaxeikɨa mɨpaɨ nepɨtiyurieneni. Mɨkɨ memitsutɨanikeyu tahepaɨ metexeiyarietɨ, mamariwawemete kememɨteyuxatanikeyu, mɨpaɨ netiyurienetɨ nekaniwatewiyatsitɨamɨkɨ.
2CO 11:13 Mɨya memɨ'anene yakɨ xeikɨa nɨ'ariekate mekanihɨkɨtɨni. Te'uximayatamete memɨteyu'itaiya, tsepa memuyupata Kɨritsitu nɨ'arimama wahepaɨ memɨteyuxexeiyanikɨ.
2CO 11:14 Mɨkɨkɨ tepɨkahɨxiyaka. 'Atsita Tsatanaxi puyupata hekɨaripa mieme niuki tuayame hepaɨ mɨtiyuxexeiyanikɨ.
2CO 11:15 'Ayumieme mariweme tepɨka'erie xɨka mɨkɨ hetsiena mieme memɨte'uximaya me'uyupata, mɨkɨ tita mɨtiheitserietsie mieme memɨte'uximaya wahepaɨ memɨteyuxexeiyanikɨ. Mɨpaɨ mepɨte'aye'axɨani, kememɨte'uximaya mɨpaɨ mepɨte'akapitɨarieni.
2CO 11:16 Tawarita mɨpaɨ nepɨtayɨni, kapa xewitɨ 'atsinekatimaikame netsi'eriekakɨ. Mexɨka mɨpaɨ 'aneme xenetsi'erieka, tsepa 'atsinemɨkatimate, tsikeretsɨ xekeneneutanaki'eri, mariweme nemɨnexatanikɨ 'etsiwa yakɨtɨtɨ.
2CO 11:17 Kenemɨtikuxata hikɨ, Ti'aitame kemɨtikuxata 'atsinepɨkahaine, matsi kemɨ'ane 'atsimɨkatimate hepaɨ, kemɨ'ane mɨmariwe mɨyuxata hepaɨ mɨpaɨ yuri ti'erietɨ yuhepaɨtsita, mɨpaɨ pɨta nepaine.
2CO 11:18 Yumɨiretɨ mamariwawemete mepɨyuxata tita yuwaiyaritsie mɨtimieme meteha'eriwatɨ xeikɨa. Merikɨte neta xɨari wahepaɨ yakɨtɨtɨ mariweme nepɨnexatani.
2CO 11:19 Kari xeme xepɨtemaiwawe, 'ayumieme xeyutemamawietɨ xepɨwanewie mɨkɨ 'atsimemɨkatemate.
2CO 11:20 Xepinewie tsepa xewitɨ mɨxewiya xemɨte'uximayakakɨ waɨriyarika, tsepa xepiini mɨtixe'utixɨtɨiri, tsepa mɨxe'anawiwiya, tsepa mɨxetawe'erie, tsepa mɨxetawaya xehɨxie.
2CO 11:21 Tame xeikɨa mɨpaɨ temɨkaxeyuriekaikɨ xɨari xeniu tepɨweraranikai, 'ayumieme xɨari xeniu peuyewetse nenetewiyatɨ nemɨtaniuni. Merikɨte, tewi 'atsimɨkatimate hepaɨ netikuxatatɨ 'akuxi mɨpaɨ nepaine, xewitɨ kemɨtiyuwaɨriya tsepa kweriwa'anemekɨ, neta mɨpaɨ nepɨyɨwe tsepa kweriwa'anemekɨ.
2CO 11:22 ¿Hepɨrayutsixi teɨteriyari metehɨkɨ? Neta mɨkɨ nepɨhɨkɨ. ¿'Ixaheritsixi teɨteriyari metehɨkɨ? Neta mɨkɨ nepɨhɨkɨ. ¿'Apɨrahami metenuiwarimama? Neta mɨkɨ nepɨhɨkɨ.
2CO 11:23 ¿Kɨritsitu hetsiemieme mete'uximaya? 'Atsimɨkatimate hepaɨ nepaine, ne matsi waɨkawa yanepɨti'uximaya. Ne nepɨwara'iwa mɨixa neti'uximayatɨ, mɨixa ne'anutahɨiwatɨ, waɨkawa nekuweiwatɨ, mɨixa nekweriwa'itɨarienetɨ nemɨmɨnikɨ.
2CO 11:24 'Auxɨwimexɨa nepɨtiukwinixɨ huriyutsixi mete'aitakaku, xeitewiyari heimana tamamata heimana 'atanauka paɨmexɨa nepaukuweiyaxɨa.
2CO 11:25 Haikakɨa kɨyekɨ nepeukuweiyaxɨa. Heiwa mieme nepeutituaxiexɨa tetexikɨ. Haikakɨa haramaratsie ne'uyeikakaku kanuwa 'amɨpa pukayunixɨ. Xeitukari meta xeitɨkari nepuhauximekai 'amatiyewatsie.
2CO 11:26 Mɨixa nekuyeikatɨ huyeta nepɨnekweriwayuriekai, hatuxametsie neyukweriwayurietɨ, tenawayamete wahekɨ neyukweriwayurietɨ, neteɨterima wahekɨ neyukweriwayurietɨ, teɨteri memɨkahuriyutsixi wahekɨ neyukweriwayurietɨ, kiekaritsie neyukweriwayurietɨ, makumawetsie neyukweriwayurietɨ, haramaratsie neyukweriwayurietɨ, mɨkɨ 'iwamarixi memɨteyuterɨwa mete'itawatɨ wahepaɨtsita neyukweriwayurietɨ.
2CO 11:27 Neti'uximayatɨ meta waɨkawamekɨ ne'uxetɨ, mɨixa tukari nekakutɨ, neheuhakamɨtɨ meta neheuharimɨtɨ, mɨixa tukari nekatikwatɨ, neyexerimɨnetɨ meta nekaheukemaritɨ nepɨyɨane.
2CO 11:28 Mɨkɨ pɨkanaitɨ, peru manata tukarikɨ nepuyɨhɨawe yunaime memeyutixexeɨriwa wahetsiemieme.
2CO 11:29 Xewitɨ xɨka weranini, neta neweranitɨ nepaneyeitɨwa. Xɨka xewitɨ 'ukunuitɨarieni, mukunuitɨariekɨ nepɨha'a neta.
2CO 11:30 Merikɨte xɨka xeniu heuyeweka mariweme mɨyuxatanikɨ, ne xɨari mariweme nepɨnexatani, kenemɨtiwerani netikuxatatɨ.
2CO 11:31 Kemɨ'ane Ti'aitame Ketsutsi mɨkakaɨyarieya mɨ'ukiyarieya, kemɨ'ane hepaɨtsita 'aixɨa mɨtikuxaxatsiwa, mɨkɨ mɨpaɨ pɨtimate nemɨkati'itawakɨ kenemaine.
2CO 11:32 Ramatsiku kiekaritsie 'Aretaxi kepauka mɨti'aitametɨkai, hetsɨana mieme 'itsɨkame kuyaximama mepɨtehɨkai ramatsikutari wakiekari kitenie memɨnetsiwiyakɨ.
2CO 11:33 Ne nepɨneta'unaxɨ memɨkanetsiwiyakɨ, tetsariya tenieyatsie neheukatuiyaka kiriwatsie neyekaitɨ tetsariya warita.
2CO 12:1 Merikɨte, xɨari peuyewetse mariweme nemɨnexatanikɨ, 'aixɨa kapɨyɨni tsiepɨre. Peru heinɨtsipaɨ kenemɨtiunierixɨ, tita Ti'aitame matsiɨkɨme mɨrayeitɨa, mɨkɨ hepaɨtsita nepɨtikuxatani.
2CO 12:2 Ne nepimate tewi Kɨritsitu hetsie mɨtiwiya. Tamamata heimana nauka wiyari 'anuyeyaku, kananutiwitɨkieni mɨkɨ muyuawitsie Kakaɨyari hetsɨa yemekɨ. ('Atsinepɨkatimate xɨka 'iyarieya xeikɨa 'anutiwitɨkieni, mexɨka waiyarieya naitɨ 'anutihanieni, Kakaɨyari mɨpaɨ pɨtimate).
2CO 12:3 Merikɨtsɨ, mɨya 'aneme tewi nepɨmate (xɨka 'iyarieya xeikɨa 'utihanieni, mexɨka waiyarieya naitɨ 'utihanieni 'atsinepɨkatimate, Kakaɨyari mɨpaɨ pɨtimate)
2CO 12:4 panutiwitɨkie witsimɨraku'ane tsiepaitɨ. Niuki kane'enieni mɨpatsie tewi mɨpaɨ mɨkatayɨnikɨ, tewi heitserie mɨkahexeiyakɨ mɨpaɨ mainenikɨ.
2CO 12:5 Merikɨte mɨya 'aneme hepaɨtsita netikuxatatɨ mariweme nepɨxatani, peru nekɨmana mariweme nepɨkanexatani, mexɨka nenexatani kenemɨtiwerani nehaitɨ xeikɨa.
2CO 12:6 Tsɨrikɨte xɨka nenewaɨriyanike mariweme nemɨnexatanikɨ, tewi 'atsimɨkatimate hepaɨ nepɨkatayɨnikeyu, yuri nepainenikeyu pɨta. Perutsɨ nepɨkanewaɨriya mariweme nemɨnexatanikɨ, kapa xewitɨ mɨpaɨ tiku'eriwanikɨ kename yɨkɨ ne'ane, kemɨnetixeiya kemɨneti'enie, mɨpaɨ neka'aneme kapa 'eriekakɨ.
2CO 12:7 Kapa ne'anuyehaitɨrɨwenikɨ temawierika nera'eriwatɨ ne'iyaritsie, nera'eriwatɨ mariwemekɨ matsiɨkɨtɨ kemɨrayeitɨarie nehetsiemieme, 'ayumieme nepupitɨarie newaiyaritsie nemɨkutseiwanikɨ. Tsatanaxi tupirieya nepanayenɨ'aiyarie mɨnetsikuwayanikɨ, kapa ne'anuyehaitɨrɨwenikɨ temawierika nera'eriwatɨ.
2CO 12:8 Haikakɨa Ti'aitame nekaniwawiriekaitɨni, nehetsie mayeyanikɨ.
2CO 12:9 Peru mɨkɨ mɨpaɨ pɨnetiutahɨawixɨ: «'Aixɨa netiuka'iyaritɨ kenemɨmatsiyuriene, tawarita tixaɨtɨ pepɨkareuyehɨaka. Peweranikaku netɨrɨkariya paye'atɨariwa». 'Ayumieme nenetemawietɨ matsi nepɨnexatani kenemɨtiwerani, Kɨritsitu tɨrɨkariyaya nehetsie muyuhayewanikɨ.
2CO 12:10 'Ayumieme nepeunaki'a neweranitɨ, 'axanetikɨhɨawarɨwatɨ, nereuyehɨatɨ, netaweiyarietɨ, nenetexienetɨ, Kɨritsitu hetsɨa nemɨmiemekɨ. Mɨpaɨ nepɨtimate, kepauka nemɨwerani, 'anari nekanitɨrɨkaɨyeni.
2CO 12:11 Merikɨtsɨ tewi 'atsimɨkatimate hepaɨ netikuxatatɨ nekanayani. Xeme xekɨmana peuyewekai mɨpaɨ nemɨtiyurienikɨ. Peuyewekai matsi xemɨnetsihekɨatanikɨ xeme pɨta kenemɨtimariwa. Hakewari mɨkɨ kwini mieme waniu memɨnɨ'ariekate tixaɨtɨ mepɨkatehexeiya, neta kenemɨkareixeiya, tsepa tixaɨtɨ nemɨkatihɨkɨ.
2CO 12:12 Tsikeretsɨ 'inɨari kɨmana Kakaɨyari nɨ'arieya mɨmatsiɨkɨ puyɨ xehetsɨa, naimekɨ netiuka'eniwakaku, naimetsie 'inɨari newewiekaku mamariwawemekɨ tɨrɨkaɨyemekɨ.
2CO 12:13 Ne nekɨmana nepɨkaxe'uximatɨa tumini hepaɨtsita. Mɨpaɨ netiyurienetɨ nepɨkaxe'uximatɨakai, 'axanepɨxe'uyuri, yanetiwawawirietɨ hipame xaɨtsie memeyutixexeɨriwa, 'axanepɨkawaruyuri. Xekeneteneuyehɨwiri xɨka 'axanexe'uyurieni.
2CO 12:14 Kamɨtsɨ hikɨ hairieka nepɨha'aritsie xehetsɨa nemɨyemiekɨ, tawarita nepɨkaxe'uximatɨani. Nepɨkatiheiwe'erie xepiini, tukari xemexeiyanikɨ pɨta nepɨtihiwe'erie. Waɨriyarika pɨkaheuyewetse tɨɨri memi'utanikɨ yupaapama wahetsiemieme, wapaapama pɨta yutɨriyama wahetsiemieme memi'utanikɨ peuyewetse.
2CO 12:15 Netsɨ nenetemawietɨ nepɨtitixɨtɨani naime nemɨrexeiya, meta nepunetaxɨtɨani xehetsiemieme, xeme xe'iyari 'aixɨa mɨ'itɨarienikɨ. Perutsɨ xɨka waɨkawa nexenaki'erieka, ¿xeme 'etsiwa xeikɨa xepɨnetsinaki'erie?
2CO 12:16 Merikɨte kwini mieme nepɨkaxewiyakai. Perutsɨ xeniu ti'itawame nemɨhɨkɨkɨ nekanixetawiniyani netixe'itaiyatɨ.
2CO 12:17 ¿Merikɨ mɨkɨ nemɨwareutanɨ'axɨa xehetsɨa, keri ne nexera'iwaxɨ wakɨmana? Pɨkatixaɨtsietɨ.
2CO 12:18 Ne Titu nekaniutawawirieni, hamatɨana xeime ta'iwa nekanenɨ'ani. ¿Merikɨte, nɨtsɨtɨ Titu 'axapɨretiyuriexɨa xehetsɨa? Hawaikɨ. ¿Matsi tame yaxeikɨa tekateniku'eriwani meta huye yaxeikɨa 'anekame tekaniuweiyani?
2CO 12:19 Xɨari mɨpaɨ xepɨteku'eriwa kename 'ikɨ niukikɨ naimekɨ tahetsiemieme te'utiniuka xemɨtatsi'enienikɨ xeme. Pɨkatixaɨri. Matsi Kakaɨyari tatsixeiyakaku, Kɨritsitu hetsie tetewiyatɨ, mɨpaɨ pɨta tepɨtekuxata. Tanaki'erima naime ketemɨteyurie, xemɨtɨrɨkariyarienikɨ pɨ'ayumieme.
2CO 12:20 Nepɨma xeikɨa kapa nenuame nexe'ukaxeiyakɨ kemɨkanetinake xe'aneneme, xemerita kapa xenetsi'ukaxeiyakɨ kemɨkatixenake ne'anekame. Nepɨma kapa xeyukwitɨwenikɨ, xeyɨ'ɨtetsaiyanikɨ, xeyuhekatɨwenikɨ, xetekuwautɨwenikɨ hipame xemɨwara'iwanikɨ, xewaruniukimanikɨ hipame, yunakata xeyuniukimanikɨ, xeteyukatawe'eriekakɨ, xeyuxamuriekakɨ.
2CO 12:21 Nepɨma nenuayu tawarita nekakaɨyari tixaɨtɨ nekatihɨkɨtɨme netsi'ayeitɨanikɨ xehetsɨa ne'uyeikakaku, neneheiweriekakɨ newara'eriwatɨ yumɨireme 'ana meripai 'axamemɨteyuriekai memɨkate'uhayewaxɨ 'axameteyurietɨ meka'itiyatɨkaitɨ, mewakumaɨwatɨ kemɨ'ane mɨkayɨ'ɨya mɨkayɨkɨna, meyutatuatɨ memɨrukuyatɨwenikɨ kememɨteyukahiwe'erie.
2CO 13:1 Hairiekari nekaniyemieximeni xehetsɨa hikɨ. «Yuhutatɨ yatɨni yuhaikatɨ memunenierixɨ waniukikɨ naitɨ 'aixɨa katiniyɨmɨkɨ».
2CO 13:2 Meripaitɨ mɨpaɨ nepɨtiwarutahɨawixɨ mɨkɨ 'ana 'axamemɨteyuriekai xehetsɨa ne'uyeikakaku hutarieka nemunua, hikɨta xehetsɨa neka'uyeikatɨ yaxeikɨa mɨpaɨ nepɨtiwakɨhɨawe hipameta yunaime, tawarita xɨka nenuani nepɨkawahayewa.
2CO 13:3 'Inɨari xepɨwawa kename Kɨritsitu 'u'inɨatsie maniuka netikuxatakaku ne, 'ayumieme nepɨkawahayewa. Mɨkɨri pɨkawerani kemɨxeyuriene, matsi kanitɨrɨkaɨyeni xehetsie tiwiyatɨ.
2CO 13:4 Tsepa kuruxitsie mumierie mɨweranikaikɨ, Kakaɨyari mɨtɨrɨkaɨyekɨ kanayeniereni matsi. Tameta tsepa hetsiena temɨtewiya tepɨwerarani, matsi Kakaɨyari mɨtɨrɨkaɨyekɨ hetsiena tetewiyatɨ tepayeneniereni texeparewienike.
2CO 13:5 Xekeneuyu'inɨata xɨka 'aku 'axe'u'uwani yuri xete'erietɨ mexɨka katixaɨtɨni. Xekeneyu'iyaritɨaka xɨka 'aku mɨpaɨ xete'u'inɨatsieni. ¿Yuxexuitɨ yu'iyaritsietɨ mɨpaɨ xemɨkatenetimaiwawe kexemɨ'anene, Ketsutsi Kɨritsitu xehetsie mɨtiwiyakɨ? Xɨka Kɨritsitu hetsie yurikɨ xekatewiyani, mɨpaɨ katinimatsiɨkɨni xehetsie pɨkayeka.
2CO 13:6 Neri nepɨta'ikwewa yuri neti'erietɨ kename mɨpaɨ xetehetimani, kename tame tekaxani'eriwa.
2CO 13:7 Nenewieri tepipitɨa Kakaɨyari, xeme 'axaxemɨkateyuriekakɨ. Mɨpaɨ tepɨkate'iwawirie teɨteri memɨ'inɨatsie wahepaɨ temɨtetaxexeiyanikɨ xeikɨa, matsi xeme 'aixɨa xemɨteyuriekakɨ pɨta mɨpaɨ tepɨte'iwawirie, tsepa tame xani'eriwamete temɨ'eriwa.
2CO 13:8 Tame tɨrɨkariya tepɨkahexeiya temeye'uniekakɨ tita yuri mɨraine, tita yuri mɨraine hetsiemieme temɨte'uximayakakɨ xeikɨa tɨrɨkariya tepexeiya.
2CO 13:9 'Ayumieme tepɨtatemamawie kepauka temɨwerarani tame, xeme pɨta xetɨrɨkawikaku. Mɨpaɨta tepɨtetanenewiwa, xemaye'atɨarienikɨ xeme.
2CO 13:10 'Ayumieme mɨpaɨ nepɨtiuti'utɨa xehetsɨa neka'uyeikatɨ, xehetsɨa nenuame tɨrɨkaɨyemekɨ nemɨkatiyurienenikɨ, tsepa heitserie nemexeiya mɨpaɨ nemɨtiyurienenikɨ. Ti'aitame mɨkɨ heitserie pɨnetsi'upitɨa nemɨxetɨrɨkariyanikɨ, nemɨxeka'unakɨ mɨpaɨ pɨkanetiupitɨa.
2CO 13:11 Merikɨte ne'iwama, xekeneyutemamawieka. Xekenaye'axɨaka xemɨmanetsikitɨarienikɨ. Xekenene'enieka kenemɨtixetuika. Xekeneyuxewini kexemɨteyɨkɨhɨawe yu'iyaritsie. 'Aixɨa xeketeneyuxeiyani. Mɨpaɨ xɨka xeteyurieka, Kakaɨyari mɨtatsipitɨa temɨtetakanaki'eriekakɨ temɨka'uximatɨariekakɨ ta'iyaritsie, mɨkɨ xehamatɨa kaniuyeikamɨkɨ.
2CO 13:12 Xekeneyuwaɨritɨaka xeyuwiyatɨ Kakaɨyari teɨterimama xemɨhɨkɨkɨ.
2CO 13:13 Kakaɨyari teɨterimama yunaitɨ mekanixewaɨritɨaka.
2CO 13:14 Ti'aitame Ketsutsi Kɨritsitu 'aixɨa ketiuka'iyarini yunaime xehetsiemieme, Kakaɨyari kexenaki'erieka, 'Iyari Mɨtiyupata kexe'utaxewiriya yunaime.
GAL 1:1 Ne, Papuru, nɨ'ariekame nekanixewaɨritɨaka. Kenemɨtiuhɨritɨarie, teɨteri mepɨkanetsiheyenɨ'a, tewi pɨkanetsi'anayexei. Ketsutsi Kɨritsitu pɨta kanenanayexeiya nɨ'ariekame nemayanikɨ. Kemɨ'ane 'umierieku menutanieritɨa, Kakaɨyari mɨta'ukiyari, mɨkɨ mɨpaɨ kanetiniuhɨritɨani.
GAL 1:2 Ta'iwama nehamatɨa memu'uwa teyunaitɨ tekanixewaɨritɨaka, xeme Karatsiya kwieyaritsie xemeyutixexeɨriwa:
GAL 1:3 Kemɨ'ane mɨta'ukiyari Kakaɨyari meta kemɨ'ane mɨti'aitame Ketsutsi Kɨritsitu, 'aixɨa mekete'u'iyarini xehetsiemieme, mekexepitɨaka xemɨka'uximatɨariekakɨ yu'iyaritsie.
GAL 1:4 Mɨkɨ Ketsutsi kanihɨkɨtɨni kemɨ'ane mɨyuyetua, tame 'axatemɨteyurie temɨxɨnarienikɨ. 'Ayumieme pɨtatsitawikweitsitɨani, hikɨ miemetexi 'axamemɨteyurie watsata te'u'uwakaku. Mɨpaɨ katininakeni takakaɨyari ta'ukiyari.
GAL 1:5 Witsiketikuxaxatsiwani mɨkɨ hepaɨtsita yuheyemekɨ. Mɨpaɨ xeikɨa kani'aneni.
GAL 1:6 Nepɨ'iyarixie yanetimaitɨ yapauka xemɨyupatarɨmekɨ. Xekaniku'eirieni kemɨ'ane mɨxe'uta'ini, Kɨritsitu 'aixɨa tiuka'iyarikaku. Niuki yɨkɨ manuyɨnetsie pɨta xekateniuwiya.
GAL 1:7 'Iya niuki pɨkahɨkɨ 'aixɨa manuyɨne. Matsi hipatɨ 'amepu'uwa mexexamurietɨ me'ipatakutɨ niuki 'aixɨa manuyɨne Kɨritsitu hepaɨtsita.
GAL 1:8 Tsepanetɨ tame, tsepa taheima mieme tupiri, xɨka xekuxaxatɨwanike niuki 'aixɨa waniu manuyɨne, xɨka niuki temɨxekuxaxatɨwakai hepaɨ ka'anuyɨnenike, mɨkɨ 'axake'u'itɨarienike.
GAL 1:9 Ketemutiyuanekai meripaitɨ, tawarita hikɨ kenemaine, xɨka xewitɨ xekuxaxatɨwani, xɨka niukieya xemitanaki'eri hepaɨ ka'anuyɨneni, kexani'eriwani.
GAL 1:10 ¿Merikɨte, 'ipaɨ netikuxatatɨ, keri netikuwaune teɨteri memɨnetsinaki'eriekakɨ? Kakaɨyari pɨta mɨnetsinaki'eriekakɨ nepɨtikuwaune. ¿Kenetiwanaki'atsitɨamɨkɨ teɨteri? Xɨka newarunaki'atsitɨanike teɨteri hikɨ, Kɨritsitu hetsiemieme ti'uximayatame nepɨkahɨkɨtɨnikeyu.
GAL 1:11 Ne'iwama, mɨpaɨ nepɨtixetahekɨatɨanikeyu 'ikɨ niuki 'aixɨa manuyɨne nemɨkuxata hepaɨtsita. Mɨkɨ niuki tewi pɨkawewiyaya.
GAL 1:12 Neri kepauka nemitanaki'eri, tewi pɨkanetsiyetuiri. Nepeitima tewi kaneti'ɨkitɨakaku. Ketsutsi Kɨritsitu matsiɨkɨtɨ 'ayaku pɨta nekanitanaki'erieni.
GAL 1:13 Kamɨtsɨ, xemeri xepu'enana kenemɨtiuka'iyarikai meripaitɨ, huriyutsixi wayeiyaritsie netiwiyatɨ. Ne kwini mieme nepɨwataweweiyakai Kakaɨyari teɨterimama memɨyutixexeɨriwakai. Nepɨwaruka'unakai.
GAL 1:14 Huriyutsixi wayeiyaritsie netiwiyatɨ nepanuyehaitɨrɨwekai yumɨireme ne'iwama wahɨxie nehepaɨ paɨmeme wiyari memɨhɨtɨkatei nenuiwaritsie miemete, matsi yemekɨ nenewaɨriyatɨ netutsima wayeiyarikɨ.
GAL 1:15 Matsi kemɨ'ane mɨnetsi'upataxɨ nekatinuiwawekaku 'akuxi, kemɨ'ane 'aixɨa tiuka'iyaritɨ mɨnetsi'uta'ini, mɨkɨ Kakaɨyari, 'ana kaninakekaitɨni
GAL 1:16 yuniwe matsiɨkɨme mayeitɨanikɨ yanetimaikaku, hepaɨtsitana nemɨtikuxatanikɨ nuiwarite memɨkahuriyutsixi watsata. 'Ana teɨteri memɨwaite memɨxuriyate xeikɨa 'atsinepɨkatiwarahɨawekai.
GAL 1:17 Mɨkɨ nɨ'ariekate memɨhɨkɨtɨkai yanekatihɨritɨariewekaku 'akuxi, mɨkɨ wahetsɨa nepɨkahetɨa Kerutsaremetsie. Matsi 'Arawiya kwieyaritsie nekaneyani kwitɨwa. 'Arike tawarita Ramatsiku nekaninuani.
GAL 1:18 'Arike haika wiyari 'utixɨku, Kerutsareme nekaneyani, nemeitimanikɨ Tsepaxi. Tamamata heimana 'auxɨwime tukari nepuyuri hetsɨana.
GAL 1:19 Hipame nɨ'ariekate nepɨkawarexei, Kakuwu xeikɨa Ti'aitame 'iwaya nepexei.
GAL 1:20 Kamɨ, Kakaɨyari hɨxie, nepɨkati'itawa kenemɨtixe'u'utɨiri.
GAL 1:21 'Arike nepetɨa Tsiriya kwieyaritsie meta Tsiritsiya kwieyaritsie.
GAL 1:22 Mɨkɨ Kɨritsitu hetsie metewiyatɨ memɨyutixexeɨriwakai Kureya kwieyaritsie, mɨkɨ mepɨkanetsihetimaiwawekai 'akuxi.
GAL 1:23 Mɨpaɨ mepɨte'enanakai xeikɨa kename waniu: «Kemɨ'ane mɨtatsitaweweiyakai meripaitɨ, mɨkɨ tikuxata hikɨ niuki 'aixɨa manuyɨne tita yuri temɨte'erie hepaɨtsita, kename waniu tikuxata tita 'anapai mɨtika'unamɨkɨkai hepaɨtsita».
GAL 1:24 'Aixɨa mekaniutiyuanekaitɨni Kakaɨyari hepaɨtsita nekɨmana.
GAL 2:1 'Arike tamamata heimana nauka wiyari 'utixɨku, tawarita nekaneyani Kerutsareme Werunawe hamatɨa, meta Titu ne'awitɨtɨ.
GAL 2:2 Mana nepetɨa Kakaɨyari matsiɨkɨme mayeitɨakɨ mana nemɨmiekɨ. Wa'ukiyarima memɨmatiwakai wahamatɨa tepɨtakuxeɨri taxaɨtame, meta niuki 'aixɨa manuyɨne nekaniwarutahekɨatsitɨiya, kenemɨtikuxata nuiwarite memɨkahuriyutsixi watsata, yakɨxeikɨa mɨkarayanikɨ ne'uximayatsika kenemɨtimie.
GAL 2:3 Matsi Titu, tsepa nehamatɨa muyeikakai, tsepa kɨriyeku mɨhɨkɨtɨkai, pɨkaheuyewekai mɨkɨ mɨ'inɨaritɨarienikɨ huriyutsixi waxitekiyakɨ,
GAL 2:4 tsepa memi'inɨaritɨakukai hipatɨ yakɨ 'iwamarixi tahepaɨ memɨteyukemaritɨwa. Mɨkɨ mekanatahaxɨani tatsata kememɨtatehupienikɨ tame ketemɨtetanɨ'a Kɨritsitu Ketsutsi hetsie tetewiyatɨ. Mepɨtatsiwiyakukai wayeiyaritsie mieme temɨte'uximayakakɨ.
GAL 2:5 Tame mɨkɨ xɨka tewaru'enienike kememɨtate'aitɨakukai, xeme xeheixeiyatɨ xepɨkayuhayewakekai niuki 'aixɨa manuyɨne.
GAL 2:6 Peru wa'ukiyarima, Kakaɨyari yɨkɨ mɨkatiwaxeiyakɨ teɨteri, 'ayumieme neta 'atsinepɨkatine'iyaritɨa kememɨ'anenekai meripaitɨ. Mɨkɨ wa'ukiyarima tixaɨtɨkɨ neniuki hetsie mepɨkate'ɨhɨa.
GAL 2:7 Matsitsɨ mɨpaɨ mekatenimaikaitɨni nemuhɨritɨariekɨ niuki 'aixɨa manuyɨne nemɨwataxatɨanikɨ mɨkɨ xitekiyakɨ memɨka'inɨatsie, yaxeikɨa Pekuru kemɨtiuhɨritɨarie mɨtiwataxatɨanikɨ hɨriyutsixi xitekiya 'inɨariyari memexeiya.
GAL 2:8 Mɨpaɨ mekatenimaikaitɨni, kemɨ'ane mikuyuitɨwa Pekuru mɨtanɨ'arienikɨ mɨkɨ memɨxitekie wahetsɨa, mɨkɨta kanenikuyuitɨwani ne, nuiwarite memɨkahuriyutsixi wahetsiemieme.
GAL 2:9 Mɨpaɨ metemaitɨ kenemɨtiumikiwa Kakaɨyari 'aixɨa tiuka'iyarikaku, Kakuwu, Tsepaxi meta Wani, memɨtetuika mekanihɨkɨtɨkaitɨni, mɨkɨ tahetsie meputimei ne meta Werunawe, tepɨtaxewini me'utiyuatɨ, xeme nuiwarite memɨkahuriyutsixi wahetsɨa xemɨyehukɨ, tameri huriyutsixi memɨxitekie wahetsɨa temɨyehukɨta me'utiyuatɨ,
GAL 2:10 xemɨwara'eriwanikɨ xeikɨa tixaɨtɨ memɨkatehexeiya me'utiyuatɨ. Netsietɨ 'aixɨa 'iyarikɨ mɨpaɨ nemɨtiyurienenikɨ nepɨnewaɨriya.
GAL 2:11 Matsi kepauka Pekuru munua 'Anutiyukiyatsie, peuyewekai hɨxiena ne'utinieretɨ yanemɨtitahɨawekɨ, kemɨtiuhɨritɨariekai yamɨkatiyurienekaikɨ.
GAL 2:12 Hipatɨ Kakuwu hetsɨa miemete meka'axɨawawekaku 'akuxi, nuiwarite memɨkahuriyutsixi wahamatɨa pɨtiutikwa'akai. Matsi me'u'axɨaku mɨkɨ, kaniyuti'imatɨyani. Pɨyupatanekai waniukixiya makatɨ mɨkɨ xitekiya 'inɨariyaritsie memɨtewiyakaikɨ.
GAL 2:13 Hipatɨ huriyutsixi yakɨxeikɨa mepɨte'uyuri hepaɨna. Yaxeikɨa Werunawe pɨtiu'itaiyarie yakɨxeikɨa meteyuriekaku.
GAL 2:14 Perutsɨ kepauka ne mɨpaɨ nemɨtiwaruxei, mete'uhayewaku, heitseriemekɨ meka'u'uwakaku niuki 'aixɨa manuyɨne hepaɨtsita, mɨpaɨ Pekuru yunaime wahɨxie nepɨtiutahɨawixɨ: «'Ekɨ huriyu pehɨkɨtɨtɨ, xɨka pe'uyeikani nuiwarite memɨkahuriyutsixi wahepaɨ peyɨanetɨ, huriyu hepaɨ pekayɨanetɨ 'ekɨ, ¿titayarikuta waɨriyarika petiwapitɨa nuiwarite memɨkahuriyutsixi, huriyutsixi wahepaɨ memɨyɨakakɨ?
GAL 2:15 »Tame nunuiwakate, huriyutsixi tekanihɨkɨtɨni, tame “'axateyuruwamete kakaɨyarixi temɨwarayexeiya tepɨkahɨkɨ”.
GAL 2:16 Peru tame mɨpaɨ tepɨtehetima, tewi xɨka yatiyurieneni 'inɨari niukiyari kemɨti'aita, mɨkɨkɨ heitserie pɨkapitɨarieni. Matsi xeikɨa xɨka yuri ti'erieka Kɨritsitu Ketsutsi hetsie, mɨkɨkɨ pɨta heitserie kanipitɨariemɨkɨ. 'Ayumieme tameta yuri tepɨte'uta'eri Kɨritsitu Ketsutsi hetsie. Xɨka yatete'uyurienike 'inɨari niukiyari kemɨti'aita, mɨkɨkɨ matsi heitserie tepɨkapitɨarienikeyu.
GAL 2:17 »Tameri mɨpaɨ tepɨtetawaɨriya, heitserie temɨpitɨarienikɨ. 'Ayumieme Kɨritsitu hetsie tekateniwiyani. Merikɨte, xɨka mɨpaɨ tetetawaɨriyani, ketsɨyɨni xɨka wahepaɨ tematsiɨkɨni yatemɨkateyuriekɨ, 'inɨari niukiyari kemɨti'aita. ¿Kɨritsitu 'axateyuruwamete tarayeitɨa? Pɨkatixaɨtsietɨ.
GAL 2:18 Xɨka tawarita ne'enukitɨanike tita nemɨtiuka'unakai, 'axatiyuruwame hepaɨ matsi nepɨtinehekɨatanikeyu.
GAL 2:19 Neri yanetiuyurieka kemɨti'aita 'inɨari niukiyari, ne'iku'eirieka, nekaniumɨni. 'Ayumieme 'inɨari niukiyari tawarita pɨkanetita'aitɨaniri Kakaɨyari hetsiemieme pɨta nemayenierenikɨ.
GAL 2:20 Kɨritsitu hamatɨa kuruxitsie nekaniumierieni. Hikɨri ne nekɨmana nepɨka'ayeniere, matsi Kɨritsitu nehetsie payeniere. Hikɨri newaiyaritsie kenemɨrayeniere, nepayeniere yuri neti'erietɨ Kakaɨyari nu'ayatsie, kemɨ'ane mɨnetsinaki'erie, meta muyuyetua nehetsiemieme.
GAL 2:21 Nepɨka'ixani'erie Kakaɨyari 'aixɨa kemɨtiuka'iyari. Xɨka heitserie 'upitɨarienike yatiyurienetɨ 'inɨari niukiyari kemaine, Kɨritsitu yakɨxeikɨa kanimɨnikeyu».
GAL 3:1 Karatsiyatari kari 'atsixepɨkatemate. ¿Kemɨ'ane pɨxe'ukewaiyaxɨ xeme? Meripaitɨri netixe'utaxatɨaku, Ketsutsi Kɨritsitu kuruxitsie kemɨtiumierie.
GAL 3:2 Karikɨ, 'ipaɨ xeikɨa nepɨtixeta'iwawiyakeyu: ¿'Iyari xete'utanaki'eri yaxemɨte'uyurikɨ 'inɨari niukiyari kemɨti'aita, nutsɨtɨ xepitanaki'eri yuri xemɨte'uta'erikɨ niuki xe'u'enieka?
GAL 3:3 ¿'Atsixemɨkatemate xepɨhɨkɨ? 'Iyaritsie xetewiyatɨ, xepitsutɨa yuri xete'erietɨ. ¿Hikɨta waitsie pɨta xetewiyatɨ, kexete'aye'axɨani?
GAL 3:4 ¿Kamɨtsɨ waɨkawamekɨ kexemɨte'ukwinixɨ, yakɨ xeikɨa ratɨa? Xɨari xehetsiemieme tixaɨtɨ pɨkaratɨa.
GAL 3:5 Hikɨmɨtsɨari, 'iya kemɨ'ane 'Iyari mɨxemikwa, kemɨ'ane tɨrɨkaɨyemekɨ mɨxekuyuitɨwa, ¿mɨpaɨ tiyuriene 'inɨari niukiyari kemɨti'aita, nutsɨtɨ xepitanaki'eri yuri xemɨte'uta'erikɨ niuki xe'u'enieka?
GAL 3:6 Yaxeikɨata 'Apɨrahami hetsie katiniuyɨni: «Kakaɨyari hetsie yuri katiniuta'erieni, 'ayumieme heitserie hexeiyame kani'eriwakaitɨni».
GAL 3:7 'Ayumieme mɨpaɨ xeketenemaika, 'amemu'uwa yuri mete'erietɨ, mɨkɨ 'Apɨrahami mekanixiɨyarimamatɨni.
GAL 3:8 'Utɨarikayaritsie meripaitɨ mɨpaɨ katinimatsiɨkɨkaitɨni, nuiwarite memɨkahuriyutsixi yuri mekatenita'erienikekaitɨni, mɨkɨkɨ Kakaɨyari heitserie kaniwapitɨanikekaitɨni. 'Ayumieme niuki 'aixɨa manuyɨne 'Apɨrahami meripaitɨ mɨpaɨ katiniutahɨawarieni: «'Akɨmana yunaitɨ nuiwarite mepɨtemawieritɨarieni».
GAL 3:9 'Ayumieme 'amemu'uwa yuri mete'erietɨ, mɨkɨ mepɨtemawieritɨarie, 'Apɨrahami hamatɨa, mɨkɨ yuri mɨti'eriekɨ.
GAL 3:10 Mɨkɨ pɨta 'amemu'uwa yameteyurietɨ kemɨti'aita 'inɨari niukiyari, mɨkɨtsie metewiyatɨ, mɨkɨ mekanixani'eriwani. Mɨpaɨ katine'uka: «Mekanixani'eriwani yunaitɨ yamemɨkatekahu, naitɨ kemɨre'uxa 'inɨari xapayaritsie».
GAL 3:11 Mɨpaɨ katinihekɨaka, Kakaɨyari hɨxie nixewitɨ heitserie pɨkapitɨarie 'inɨari niukiyaritsie tiwiyatɨ. Mɨpaɨ pɨta panuyɨne: «Kemɨ'ane heitserie yamɨtikamie yuri ti'erietɨ kanayenierekamɨkɨ».
GAL 3:12 Peru kemɨ'ane 'inɨari niukiyaritsie mɨtiwiya, mɨkɨ 'apɨka'uyeika yuri ti'erietɨ. Mɨpaɨ panuyɨne matsi: «Kemɨ'ane yamɨtiyuriene kemaine, mɨkɨ kanayenierekamɨkɨ xɨka yatiyurieneni».
GAL 3:13 Kɨritsitu 'ari kataniunaneni, kataniuxɨna temɨkaxani'eriwanikɨ 'inɨari niukiyari kemaine hepaɨ. Mɨkɨ pɨta kaniutixani'eriwa tahetsiemieme, kemɨre'uxa: «Yunaitɨ kɨyetsie memɨkawɨtɨarieni mekanixani'eriwani».
GAL 3:14 Mɨpaɨ katiniuyurieni, nuiwarite memɨkahuriyutsixi 'aixɨa memɨ'itɨarienikɨ hepaɨna, 'Apɨrahami kemɨtiutahɨawarie, mɨkɨta meyutemamawietɨ memakɨnekɨ, Ketsutsi Kɨritsitu hetsie metewiyatɨ. Mɨpaɨta katiniuyurieni temitanaki'erienikɨ 'Iyari yuri tete'erietɨ, ketemɨte'utahɨawarie temeixeiyanikɨ.
GAL 3:15 Ne'iwama nepɨtixetaxatɨani, kememɨteyurie teɨteri netikuxatatɨ: tewi xɨka tiyuta'utɨirieni, tita tɨriyamama wahetsie mɨtinakeni 'utaitɨ, xɨka 'aixɨa 'aneni kemaine, xewitɨ matsi pɨkayɨwe menuyexɨrienikɨ meta menutiyatsakɨ tɨratu, hetsiena pɨkatiuhɨpani.
GAL 3:16 Merikɨte, 'Apɨrahami, meta kemɨ'ane hetsiena mɨyeyanikekai, kemaine 'utɨarikayari, mɨkɨ mɨpaɨ mepɨte'utahɨawarie tita wahetsie mɨtinakenikekai. Mɨkɨ yumɨireme pɨkawaxatakai hetsiena memɨyekɨnekekai. Yuxewime pɨta kanixatakaitɨni hetsiena mɨyeyanikekai, Kɨritsitu xatatɨ.
GAL 3:17 Merikɨtsɨ kenemaine: Kakaɨyari tɨratu kaniutawewieni Kɨritsitu hepaɨtsita. 'Inɨari 'arikeke kaninuani, nauka tsienituyari heimana xeitewiyari heimana tamamata wiyari 'anuyeyaku. 'Ayumieme pɨkayɨwe yakɨxeikɨa meyeitɨanikɨ niuki, Kakaɨyari kemɨtitahɨawixɨ hetsiena mɨtinakenikekaikɨ.
GAL 3:18 Xɨka hetsiena tinakenike 'inɨari niukiyaritsie tiwiyakaku, yaxeikɨa pɨtitahɨawekeyu kename 'iminikekai. Perutsɨ Kakaɨyari 'aixɨa tiuka'iyaritɨ katiniunakitsitɨani 'Apɨrahami hetsie, mɨpaɨ titahɨaweka hetsiena mɨtinakenikekaikɨ.
GAL 3:19 Merikɨtsɨ, ¿ketitayari tixuawe 'inɨari niukiyari? Mɨkɨ kaniutinɨitɨarieni niukitsie, mɨmatsiɨkɨnikɨ teɨteri keyamemɨkatekahu. Niukitsie katiniuhɨiyani mexi kanuawekai kemɨ'ane 'Apɨrahami hetsie mɨyeyanikekai, kemɨ'ane mɨpaɨ mɨtiutahɨawarie kemɨtimikienikekai. Kakaɨyari tupiritsiximama mepuhɨritɨarie memiyetuanikɨ 'inɨari. Niukameta kaniyetuiriyarieni teɨteri wahetsiemieme, mɨkɨ meheixeiyatɨ memakɨnekɨ.
GAL 3:20 Hikɨ tewi xɨka yɨkɨmana yɨaneni, pɨkaheiyehɨwa niukame, matsi Kakaɨyari kaniyuxewini.
GAL 3:21 Merikɨte, ¿'inɨari niukiyari meta Kakaɨyari kemɨtitahɨawixɨ mɨkɨ hamatɨa mekateheyuye'unie? Pɨkatixaɨtsietɨ. Xɨka 'inɨari niukiyari te'upitɨarienike, mɨyɨwe tukari mɨtatsipitɨanikɨ, heitseriemekɨ tepexeiyanikeyu 'inɨari niukiyaritsie tetewiyatɨ.
GAL 3:22 'Utɨarikayari matsi kaniwaranutaxɨrɨwani yunaime, wahekɨatɨatɨ kememɨtexani'eriwa 'axamemɨte'uyurikɨ. Mɨpaɨ mɨtiwaranutaxɨrɨwakɨ, 'ayumieme kaneuyeweka yuri memɨteta'erienikɨ Ketsutsi Kɨritsitu hetsie, para mɨkɨ yuri memɨte'erie mɨpaɨ memɨtepitɨarienikɨ, Kakaɨyari kemutayɨ kemɨtiwaminikekaikɨ.
GAL 3:23 Titatsie yuri temɨte'erie 'akuxi kanuawekaku, tekananutaxɨriyakaitɨni, 'inɨari niukiyari tatsi'ɨwiyakaku. Tepanutanamiekai yuri temɨteta'erienikɨ 'arike, matsiɨkɨtɨ mɨrayanikekaikɨ titatsie yuri temɨteta'erienikekai.
GAL 3:24 'Ayumieme 'inɨari niukiyari ti'uximayatame hepaɨ kani'anekaitɨni, tahepaɨtsita mɨhɨritɨariekai mexi'akuxi tetɨritɨkai, Kɨritsitu hetsie tetewiyatɨ temakɨnekɨ, heitserie temɨpitɨarienikɨ yuri tete'erietɨ.
GAL 3:25 Hikɨrixɨa kaninuani titatsie yuri temɨte'erie. 'Ayumieme ti'uximayatame 'ari pɨkahɨritɨarie tahepaɨtsita.
GAL 3:26 Yuri xekateni'erieka, 'ayumieme Kakaɨyari niwemama xekanihɨkɨtɨni, Kɨritsitu Ketsutsi hetsie xekateniwiyani.
GAL 3:27 Keyupaɨmetɨ xemuka'ɨyarie Kɨritsitu hetsie xetewiyatɨ, xeme xekaniyupata, Kɨritsitu hepaɨ xe'anenetɨ xemakɨnekɨ.
GAL 3:28 Hikɨrixɨa tsepa muhuriyu, mɨkɨriyeku, ti'uximayatame, muyɨnɨ'a, 'uki meta 'uka, yunaitɨ xekaniyuxewini Kɨritsitu Ketsutsi hetsie xetewiyatɨ.
GAL 3:29 Hikɨri, Kɨritsitu hetsɨa xekanimiemetetɨni. 'Ayumieme kemɨ'ane 'Apɨrahami hetsie mɨyeyanikekai, xeme xekanihɨkɨtɨni. Xehetsie pɨtiunakixɨ mɨkɨ kemɨtiutahɨawarie.
GAL 4:1 'Ipaɨ nepaine, kiekame nu'aya mexi'akuxi nunutsitɨni, ti'uximayatame hepaɨ kani'aneni, tsepa naitɨ mɨtipinieya, hetsiena mɨtiunakixɨ.
GAL 4:2 Hipatɨ matsi mekani'aitɨaka mexi'akuxi, heitserie mekanexeiyani piiniteya hepaɨtsita. 'Arike tukarieya kanaye'amɨkɨ, 'ukiyarieya kemutayɨ.
GAL 4:3 Tameta yaxeikɨa, kepauka temɨtɨritɨkai, waɨriyarika tekateniyuriekaitɨni kemɨtatiu'aitɨwakai 'ɨkitɨarika kwiepa mieme, hekwamete kememɨte'ɨkitɨarie.
GAL 4:4 Peru kepauka tukari 'aixɨa mɨ'ane maye'a, 'ana Kakaɨyari yuniwe kaneyenɨ'ani, 'uka hetsie mɨyenuiwaxɨ, mɨti'aitɨariekai 'inɨari niukiyari kemɨti'aita.
GAL 4:5 Kaneiyenɨ'ani mɨwananenikɨ mɨkɨ memɨte'aitɨarie 'inɨari niukiyari kemɨti'aita, waxɨnake, meta kaneiyenɨ'ani, tame niwemama temakɨnekɨ.
GAL 4:6 Mɨkɨ meta, Kakaɨyari yuniwe 'iyarieya kaneyenɨ'ani, ta'iyaritsie mɨyekanikɨ mɨpaɨ tiuhiwatɨ, «Nepaapa, ne'ukiyari». Mɨkɨkɨ kanimatsiɨkɨni xemɨniwemamakɨ.
GAL 4:7 Merikɨ hikɨrixɨa ti'uximayatame pepɨkahɨkɨ. Pekaninu'ayatɨni pɨta. Xɨka penu'ayatɨni, tita Kakaɨyari hetsɨa mɨtimieme katiniunake 'ahetsie, mɨpaɨ pe'aneme Kɨritsitu mɨmatsi'ayeitɨakɨ.
GAL 4:8 'Anapaitɨ xemɨka'imaikaikɨ kemɨ'ane mɨkakaɨyari, waɨriyarika xekateniyuriekaitɨni kememɨtexe'aitɨakai mɨkɨ memɨkayurikakaɨyarixi.
GAL 4:9 Hikɨrixɨa xekaneitimani kemɨ'ane mɨyuri Kakaɨyari, matsitsɨ pɨta, Kakaɨyari kanixehetimani xeme. Merikɨte, ketitayari xetehayewaku, tawarita mɨkɨ 'ɨkitɨarikatsie xetewiyakutɨ, hekwamete kememɨte'ɨkitɨarie, mɨwerani, tixaɨtɨ mɨkarexeiya. Titayari xeteyuwaɨriya, tawarita waɨriyarika xemɨteyuriekakɨ kemɨtixe'aitɨa mɨkɨ 'ɨkitɨarika.
GAL 4:10 Kari 'akuxi tukari xepayexeiya, tsemanatsie, metseritsie, 'ixɨarari matineikatsie, wiyaritsie.
GAL 4:11 Nekanimaka, mɨpaɨ netiku'eriwatɨ, xɨari yakɨxeikɨa kanayani kenemɨtiune'uxitɨa xehetsɨa.
GAL 4:12 Ne'iwama, 'ipaɨ nepɨtixetawawirienikeyu. Nehepaɨ xeteyurietɨ xekenayuyeitɨa, ne xehepaɨ netiyurienetɨ nemaneyeitɨakɨ. Xeme tixaɨtɨkɨ 'axaxepɨkanetsi'uyuri.
GAL 4:13 Matsi mɨpaɨ xepɨtemate, kepauka matɨaripaitɨ nemɨxe'utaxatɨa niuki 'aixɨa manuyɨne, mɨpaɨ nepɨtiuyuri nemɨtikuyekaikɨ newaiyaritsie.
GAL 4:14 Tsepa nemɨxe'u'uximatɨa mɨpaɨ ne'anetɨ newaiyaritsie, xeme xepɨkanetsi'utitawe'eri xepɨkanetsi'utixani'eri, matsi pɨta xepɨnetsi'utanaki'eri, Kakaɨyari tupirieya hepaɨ, Kɨritsitu Ketsutsi nemɨyɨaneni hepaɨ.
GAL 4:15 Xeyutemamawiekame xekaniyu'eriekaitɨni 'ana. ¿Keri 'uyɨ? Ne nepɨtihekɨata kexemɨteyumaikai kexemɨteyuwaɨriyakai. 'Atsita xɨari xepɨyuwaɨriyakai, yuhɨxi xemɨwatitunikɨ 'ana, xemɨnetsiminikɨ.
GAL 4:16 Hikɨri xeneɨkixiwi neratɨa, tita yuri mɨraine nemɨtixe'utahekɨatɨakɨ.
GAL 4:17 Mɨkɨ mekaniyumexɨitɨaka mexehiwe'erietɨ, peru mɨpaɨ kememɨteyuriekɨ, 'aixɨa xepɨka'itɨarieni. Matsi mɨkɨ xeikɨa mekaniyɨaka tahamatɨa xemɨkayuxewinikɨ xemɨnetsihatɨmaiyakɨ, mɨkɨ xeikɨa xemɨwahiwe'eriekakɨ.
GAL 4:18 Merikɨtsɨ 'aixɨa kani'aneni yuheyemekɨ xɨka hiwe'eriewani para 'aixɨa mɨ'itɨarienikɨ, tsepa xehetsɨa nemɨkaheyeikanike ne.
GAL 4:19 Xeme xepɨneniwema, peru xehetsiemieme tawarita nekatinikwineni 'ukaratsi mɨtiniwerɨme hepaɨ, mexi'akuxi Kɨritsitu hepaɨ xe'anenetɨ xetiwerirɨme.
GAL 4:20 Xɨka tɨma xehetsɨa ne'uyeikanike hikɨ. Xɨari yɨkɨ nepɨti'eniɨriɨkɨnikeyu kenemɨtikuxata. 'Atsinepɨkatimate kenemɨtiyurieni xehepaɨtsita.
GAL 4:21 Merikɨte, yaxekeneteneutahɨawi, xeme xemɨyuwaɨriya xemɨte'aitɨariekakɨ 'inɨari niukiyari hepaɨtsita. Xekateheitimaiwawe 'inɨari niukiyari kemaine.
GAL 4:22 Mɨpaɨ katine'uka, 'Apɨrahami yuhutame kaniwarexeiyakaitɨni yuniwema. Xewitɨ ti'uximayatameya hetsie kaniyenuiwa, xewitɨta muyɨnɨ'atsie tiyenuiwaxɨ.
GAL 4:23 Kemɨ'ane ti'uximayatame hetsie mɨyenuiwaxɨ, mɨkɨ kaniutinuiwa tewi kemɨtiyunɨ'a xeikɨa. Kemɨ'ane muyɨnɨ'atsie mɨyenuiwaxɨ, mɨkɨ Kakaɨyari kemutayɨ maye'anikɨ kaniutinuiwa.
GAL 4:24 Merikɨtsɨ, mɨkɨ naitɨ kemɨtiuyɨ, 'ɨkitsika kanayani. 'Ikɨ 'ukarawetsixi kemɨtiwaxata, tɨratute kanixatani hutame. Xewitɨ, Hakari yemuritsie katiniutaxatɨarieni, Tsinahi mɨtitewatsie. Mɨkɨ tɨratutsie memɨyenunuiwa, waɨriyarika te'uximayatamete mekanakɨnikuni. 'Ukaratsi Hakari mɨtitewakai kanixatani.
GAL 4:25 Meta Hakari, yemuri kanihɨkɨtɨni 'Arawiya kwieyaritsie, Tsinahi mɨtitewa. Yaxeikɨata Kerutsareme kanihɨkɨtɨni, mɨkɨ kiekari hikɨ 'emuwe. Waɨriyarika katini'uximayaka, niwemamata waɨriyarika mekateni'uximayaka.
GAL 4:26 Xewitɨ pɨta Kerutsareme taheima mieme, mɨkɨ muyɨnɨ'a kanihɨkɨtɨni, tame kanitamaamatɨni.
GAL 4:27 Mɨpaɨ katine'uka: «Kene'atemawieka 'ukaratsi pemɨkaniwewe, tɨɨri pemɨkawarexeiya, keneutakwika. Keneutahiwa 'ukaratsi pemɨkatiukwinixɨ, kemɨ'ane tɨɨri mɨkawarexeiya, mɨkɨ matsi yumɨireme pɨwarexeiyani yuniwema, kemɨ'ane mɨrekakɨna, hipame xeikɨa pɨwarexeiyani».
GAL 4:28 Xeme ta'iwama, Kakaɨyari mɨpaɨ mutayɨkɨ 'ayumieme xeniutinunuiwa, yaxeikɨa 'Itsahaki kemɨtiutinuiwaxɨ.
GAL 4:29 Merikɨtsɨ, 'anapaitɨ kemɨ'ane mutinuiwaxɨ teɨteri kememɨteyɨnɨ'a xeikɨa, mɨkɨ kaniweiyakaitɨni kemɨ'ane mutinuiwaxɨ 'Iyari kemutayɨ. Hikɨta yaxeikɨa kani'aneni.
GAL 4:30 Peru, ¿kehaine 'utɨarikayari? Mɨpaɨ paine: «Keniwarayenɨ'a ti'uximayatame meta nu'aya hamatɨa. Ti'uximayatame nu'ayatsie tixaɨtɨ pɨkatinake. Muyɨnɨ'a nu'ayatsie pɨta katininakimɨkɨ naitɨ».
GAL 4:31 'Ayumieme ne'iwama, ti'uximayatame tepɨkaniwemama. Muyɨnɨ'a pɨta tekaniniwemamatɨni.
GAL 5:1 Kɨritsitu kataniuxɨna, texɨxɨnitɨ temu'uwanikɨ. 'Ayumieme xekeneti'uka, tawariri kɨye xepɨka'anuyetekiyarieka, waɨriyarika xemɨte'aitɨariekakɨ.
GAL 5:2 Yemekɨ xekeneneu'eni, ne Papuru mɨpaɨ nepɨtixetahɨawe, xɨka xitekiya 'inɨariyari xe'uyuwewirieni, Kɨritsitu tixaɨtɨkɨ pɨkatixeparewieni.
GAL 5:3 Tawarita nepɨwahekɨatɨa yunaime teɨteri memɨyu'aita xitekiya 'inɨariyari memɨwewiyarienikɨ, kaneuyeweka yamemɨtekahunikɨ naime kemɨti'aita 'inɨari niukiyari.
GAL 5:4 Xeme mɨxenake heitserie xemɨpitɨarienikɨ 'inɨari niukiyaritsie xetewiyatɨ, xekaniupatsieni, Kɨritsitu hetsie xepɨkatewiya. Kakaɨyari 'aixɨa kemɨtiuka'iyari xekaneuyehɨani.
GAL 5:5 Tame pɨta teta'ikwewatɨ mɨpaɨ yuri teteni'erieka, tepaye'axɨani heitserie temɨpitɨarienikɨ xɨka yuri tete'erieka, 'Iyari tatsiparewiekaku.
GAL 5:6 Kɨritsitu Ketsutsi hetsie xɨka tiwiyani, yatɨni xitekiya 'inɨariyari tsepa mexeiya, matsi pɨta kaneuyeweka yuri mɨti'erieka xeikɨa, tiyukanaki'erietɨ muyeikanikɨ.
GAL 5:7 Xeme 'aixɨa xepɨte'unanautsakai. ¿Kepaikɨ pɨxe'utiketamɨraxɨ, kemɨ'ane pɨxe'ukunuitɨa yaxemɨkatekahunikɨ tita yuri mɨrainetsie?
GAL 5:8 Mɨpaɨ yuri kexemɨte'uta'eritɨarie, mɨkɨ kemɨ'ane mɨxe'inietsie pɨkamieme.
GAL 5:9 «Tikuxanariyame 'etsipemekɨ kaniutakuxanariyarieni paa naitɨ».
GAL 5:10 Ne mɨpaɨ yuri nekatini'erieka Ti'aitame hetsie xehepaɨtsita, kename xekayupata, yaxeikɨa xemɨteyumaikakɨ meripaitɨ hepaɨ. Matsi kemɨ'ane mɨxexamurie, 'uximatɨarika ke'upitɨarieni, tsepa kemɨ'ane mɨhɨkɨ.
GAL 5:11 Ne'iwama, xɨka mɨpaɨ kuxi netikuxatanike, kename heuyewetse xitekiya 'inɨariyari, ketitayari netitaweiyarieni 'akuxi. Xɨka Niuki Kɨritsitu kemɨtiumierie kuruxitsie kemanuyɨne nekuxatani, mɨkɨ 'ari teɨteri pɨkawarukununuitɨwani.
GAL 5:12 Xɨka tiyɨwenike mɨkɨ memɨxe'uximatɨa mɨkɨ pɨta yukɨmana meyuxitekenike 'aixɨa pɨyɨnikeyu.
GAL 5:13 Xeme ne'iwama, xekaniuta'inierieni xemɨyunɨ'akakɨ. Perutsɨ xeikɨa, kexemɨteyunɨ'a, xepɨka'ipitɨani yuwaiyari mitsutɨanikɨ xekuyuitɨwatɨ. Matsi xeteyukanaki'erietɨ xeketene'uximayaka yuxexuitɨ, yunaime wahetsiemieme.
GAL 5:14 Kaneye'atɨamɨkɨ 'inɨari niukiyari naime, xɨka xeiniukiyaritsie yatikamieni. Mɨkɨ niuki mɨpaɨ panuyɨne: «'Ahepaɨ tewi kenenaki'erieka 'ekɨ kepemɨti'anaki'erie».
GAL 5:15 Matsi xɨka xeyukɨmeni, xɨka xeyutikwaiximeni, yumarima 'aixɨa xeyutixɨtɨani.
GAL 5:16 'Ipaɨ nepɨtixekɨhɨawe, xekeneu'uwani 'Iyari xekuyuitɨwakaku. Mɨpaɨ xɨka xete'u'uwani, xepɨkaheye'atɨani tita xewaiyari mɨtihiwe'erie.
GAL 5:17 Tawaiyari katiniyukahiwe'erieka mɨkɨ 'Iyari kemɨkatiyukahiwe'erie. Meta 'Iyari katiniyukahiwe'erieka tawaiyari kemɨkatiyukahiwe'erie. Mekanayuye'unieka, yaxemɨkateyurienikɨ kexemɨteyuwaɨriya.
GAL 5:18 Perutsɨ xɨka 'Iyari xekuwitɨneni, xepɨkate'aitɨarieka 'inɨari niukiyari kemɨti'aita.
GAL 5:19 Katinimatsiɨkɨni kemɨtiyurieneni yuwaiyaritsie tiwiyatɨ. Tewi 'ipaɨ katiniyurienemɨkɨ: kemɨ'ane mɨkayɨ'ɨya mɨkayɨkɨna kaniwakumaɨwamɨkɨ, kemɨkati'itiya katiniyurienemɨkɨ, kemɨtiyukahiwe'erie meta kanirukuyanemɨkɨ,
GAL 5:20 tetexi kaniwarayexeiyakamɨkɨ, katiniyukewaiyamɨkɨ, katinayuye'uniekamɨkɨ, kaniyumienemɨkɨ, kani'ɨtetsakamɨkɨ, kaniyuhaxɨatɨakamɨkɨ, yuhetsiemieme xeikɨa kaniyɨanemɨkɨ, kaniyuxamuriekamɨkɨ, yuxexuime wahetsie katiniwiyakamɨkɨ,
GAL 5:21 katinayu'iwakamɨkɨ, katiniyumemiwamɨkɨ, kanitawenemɨkɨ, kaniku'ixɨaranemɨkɨ, mɨpaɨ 'aneneme katiniyurienemɨkɨ. Mɨkɨ hepaɨtsita, kenemɨtixeku'imaiyakai, yaxeikɨa nekatinixeku'imaiyani, mɨkɨ mɨpaɨ memɨteyurie, wahetsie pɨkatinakeni Kakaɨyari tiwa'aitɨwame mɨhɨkɨtɨnikɨ.
GAL 5:22 Matsita 'Iyari kemɨtixuaweriya, 'ipaɨ pɨta tewi katiniyurienemɨkɨ. Katiniyukanaki'eriekamɨkɨ, kaniyutemawiekamɨkɨ, yu'iyaritsie pɨka'uximatɨarieka, katiniuka'eniwamɨkɨ, 'aixɨa katiniuka'iyarikamɨkɨ, 'aixɨa kaniwayurienemɨkɨ hipame, yakatinikamiemɨkɨ kemaine,
GAL 5:23 yu'iyaritsie tixaɨtɨ pɨkareuyehɨaka, kanitseɨyekamɨkɨ tiyu'aitɨatɨ. 'Inɨari pɨkaxuawe mixani'erie, xɨka mɨpaɨ tiyurieneni.
GAL 5:24 Mɨkɨ Kɨritsitu Ketsutsi hetsɨa memɨmiemete, kuruxitsie mekanimieni yuwaiyari, mete'uhayewaka kememɨteyumaikai yuwaiyaritsie metewiyatɨ.
GAL 5:25 Xɨka 'Iyari tukari tatsipitɨaka, 'Iyari tatsikuwitɨnekaku teke'u'uwani.
GAL 5:26 Yakɨxeikɨa tetetamaitɨ tepɨkahakɨne, meta tetahaxɨatɨatɨ tetehata'iwakutɨ tepɨkahakɨne.
GAL 6:1 Peru ne'iwama, xɨka xewitɨ 'axatiuyurieme 'utaxeiyarieni, xeme 'axemu'uwa 'Iyaritsie xetewiyatɨ, xekeneheitseritɨaka kemɨ'ane mɨpaɨ mɨtiuyuri, tixaɨtɨ xekate'ayuyeitɨatɨ yu'iyaritsie. Matsi xeyukweriwayurietɨ, kapa xemeta xe'uta'inierienikɨ 'axaxemɨteyurienikɨ.
GAL 6:2 Yuxexuitɨ xekeneyuparewieka yu'ikakɨ, mɨpaɨ xeteyurietɨ Kɨritsitu 'inɨarieya xekanaye'atɨakuni.
GAL 6:3 Xɨka xewitɨ tixaɨtɨ tihɨkɨtɨme yu'erieka, matsi xɨka tixaɨtɨ katihɨkɨtɨni, yɨkɨmana katiniyu'itaiyamɨkɨ.
GAL 6:4 Yuxexuitɨ mekeyu'inɨatani kememɨteyurie, mɨkɨkɨ kaniyutemawiekamɨkɨ yuhepaɨtsita, yuta'inɨatame kemɨtiuyuri yuxaɨtame, hipatɨ kememɨte'uyuri yakara'eriwatɨ.
GAL 6:5 Yuxexuitɨ yu'ikakɨ kememɨte'uhɨritɨarie meke'etɨkɨni.
GAL 6:6 Kemɨ'ane mɨti'ɨkitɨarie niuki hepaɨtsita, mɨkɨ keyuxewini kemɨ'ane mɨti'ɨkitɨa hamatɨa, naime 'aixɨa mɨti'anekɨ 'iparewietɨ.
GAL 6:7 Xepɨkateyu'itaiyani, Kakaɨyari pɨkayunanaimarinɨa. Tewi kemɨtiuka'e, mɨpaɨ pɨtiu'itsana.
GAL 6:8 Kemɨ'ane yuwaiyaritsie xeikɨa mɨtiuka'e, waiyarieya pitixuawitɨirieni pɨniya, 'ika'itsanayu. Kemɨ'ane 'Iyaritsie mɨtiuka'e, 'Iyari pitixuawitɨirieni tukari mɨkaxɨwe, 'ika'itsanayu.
GAL 6:9 Tepɨka'u'uxeni 'aixɨa teteyurietɨ, tukari 'aye'ayu tepɨ'itsanani xɨka tekate'uhayewa mexi'akuxi ka'aye'awe.
GAL 6:10 'Ayumieme, ketemɨteyɨwawe 'aixɨa tekewayurieka yunaime, matsi yemekɨ mɨkɨ Kakaɨyari niwemaama yuri memɨte'erie.
GAL 6:11 Neuxei, nepɨtixe'utuirie nemamakɨ 'utɨarika 'apapamekɨ.
GAL 6:12 Mɨkɨ 'aixɨa memɨtexeiyarienikɨ xekɨa memɨyɨa, mɨkɨ mekanihɨkɨtɨni waɨriyarika memɨxepitɨa xitekiya 'inɨariyari xemɨwewiyarienikɨ. Peru mɨpaɨ xeikɨa mekateniyurieka, memɨkataweiyariexɨanikɨ Kɨritsitu Ketsutsi kuruxieya hepaɨtsita.
GAL 6:13 Mɨkɨ memɨyu'aita xitekiya 'inɨariyari memɨwewiyarienikɨ, yamepɨkatekahu 'inɨari niukiyari kemɨti'aita. Kaniwanakeni xeikɨa xeme xemɨ'inɨaritɨarienikɨ, mɨkɨkɨ memɨyutemamawiekakɨ, meha'eriwatɨ herie kexemɨte'u'inɨaritɨarie.
GAL 6:14 Perutsɨ ne pɨkatixaɨ, yemekɨ nepɨkanetemawieka hipame waɨkawame nera'eriwatɨ, Tati'aitɨwame Ketsutsi Kɨritsitu kemɨtiumierie kuruxitsie nehe'eriwatɨ, mɨkɨkɨ xeikɨa nepɨnetemawieka. Neta nepumierie 'anemɨka'uyeikanikɨ tita kwiepa mɨtimieme hetsie netiwiyatɨ.
GAL 6:15 Tsepa xitekiya 'inɨariyari muwewiyarie, yatɨni tsepa mɨka'uwewiyarie, matsi pɨta kaneuyeweka hekwamekɨ xeikɨa mɨtinuiwa.
GAL 6:16 Keyupaɨmetɨ 'amemu'uwa 'ikɨ 'inɨarikɨ, xɨka meka'uximatɨarieka yu'iyaritsie, xɨka menenimayatsieka, mɨkɨ Kakaɨyari 'Ixaheritsixi mɨtiwaruterɨwa.
GAL 6:17 'Uxa'atɨni warie xewitɨ pɨkanetsi'uximatɨaka. Newaiyaritsie 'iwaɨyɨ 'inɨariyari nepexeiya Ketsutsi hepaɨ.
GAL 6:18 Ne'iwama, Tati'aitɨwame Ketsutsi Kɨritsitu 'aixɨa kemɨtiuka'iyari yuxexuime xe'iyaritsie keyekani. Mɨpaɨ xeikɨa kani'aneni.
EPH 1:1 Ne Papuru, Kakaɨyari kemɨtinakekɨ nekananayexeiyarieni, nɨ'ariekame nemayanikɨ Kɨritsitu Ketsutsi hetsiemieme. Kakaɨyari teɨterimama nekanixewaɨritɨaka 'Epetsutsie xemɨtama yuri xemɨte'erie Kɨritsitu Ketsutsi hetsie.
EPH 1:2 Kakaɨyari mɨta'ukiyari, meta Ketsutsi Kɨritsitu mɨti'aitame 'aixɨa mekete'u'iyarini xehetsiemieme, mekexepitɨaka yu'iyaritsie xemɨka'uximatɨariekakɨ.
EPH 1:3 'Aixɨa ketikuxaxatsiwani Kakaɨyari, kemɨ'ane Tati'aitɨwame Ketsutsi Kɨritsitu mu'ukiyarieya. Kɨritsitu hetsie tetewiyakaku mɨkɨ 'aixɨa kataniuyurieni tatsi'upitɨaka naime 'aixɨa mɨ'ane 'iyaritsie mieme, meta muyuawi hetsiemieme.
EPH 1:4 Kwie kanetɨariewekaku 'akuxi, Kɨritsitu ha'eriwatɨ 'aixɨa kataniuyurieni tatsi'anayexeiyaka hetsiena mieme temɨpatsiekakɨ, tahetsie mɨkarahɨiwanikɨ tatsixeiyakaku.
EPH 1:5 Tatsinaki'erietɨ, meripaitɨ yatiyɨhɨaweka, yuniwema pɨtatsi'ayeitɨa, Ketsutsi Kɨritsitu hetsiemieme. Kemɨkɨ mɨtatsiyurimɨkɨkai.
EPH 1:6 Kataniupitɨani 'aixɨa temutiyuanenikɨ hepaɨtsitana, witsikemɨtatimikwa. Mɨpaɨ pɨtatiumi, kemɨ'ane mɨnaki'eriwatsie temɨtewiyakɨ.
EPH 1:7 Mɨkɨ xuriyaya mutayeuriyakɨ, hetsiena tetewiyatɨ tekaniuxɨnarieni. Tekateneuyehɨwiyarieni 'axaketemɨte'uyuri. Mɨpaɨ katatineuyehɨwirieni kwinimieme 'aixɨa tiuka'iyaritɨ.
EPH 1:8 Tinimɨiriyakaitɨni tita mɨtiyurienekai tahetsiemieme 'aixɨa tiuka'iyaritɨ. Naimekɨ temaiwawemete katanayeitɨani katanipitɨaka 'aixɨa temɨteku'eriwanikɨ naime hepaɨtsita,
EPH 1:9 katatinihekɨatsitɨaka tita mɨtinake. Meripai pɨkatimatsiɨkɨkai tita mɨtinake, peru Kɨritsitu ha'eriwatɨ yapɨtiyuwaɨriya mɨtatihekɨatsitɨanikɨ.
EPH 1:10 Mɨpaɨ katinaye'atɨanikekaitɨni kepauka tukari 'aixɨa mɨ'ane maye'anikekai, nitaxewiriyakekaitɨni naime Kɨritsitu hetsie tiwiyakame, naime taheima mieme kwiepa mieme.
EPH 1:11 Mɨkɨ meta, mɨkɨtsie tetewiyatɨ tekananayexeiyarieni. Mɨpaɨ tepɨte'ukayatsarie teɨterimama temakɨnekɨ, mɨpaɨ katiniyuriemɨkɨkaitɨni meripai, mɨpaɨ tiniyɨkɨhɨawekaitɨni kemɨ'ane naime mɨtikuyuitɨwa yatiyɨkɨhɨawetɨ kemɨtinake.
EPH 1:12 Tame meri yuri temɨte'uta'eri Kɨritsitu hetsie, tame tekananayexeiyarieni 'aixɨa temutiyuanenikɨ 'iya hepaɨtsita witsikemɨ'ane.
EPH 1:13 Xemeta xekani'enieni niuki yuri maine, mɨkɨ niuki kexemɨtetawikweitsitɨarieni maine. Hetsiena yuri xeteniuta'erieni. 'Ana xepu'inɨaritɨarie, 'Iyari Mɨtiyupatakɨ xeputseyumarie. Kakaɨyari mɨpaɨ putayɨ xemeixeiyanikekaikɨ mɨkɨ 'Iyari,
EPH 1:14 mɨkɨta kanihɨkɨtɨni tita temɨtepitɨarie hikɨ mieme, mɨmatsiɨkɨnikɨ tita tahetsie mɨtinake kepauka mɨtatsitaxɨna yuteɨterima. 'Ana 'aixɨa tekaniutiyuanekuni 'iya hepaɨtsita witsikemɨ'ane.
EPH 1:15 'Ayumieme ne neretimaika yuri kexemɨte'erie Ti'aitame Ketsutsi hetsie, ne'u'enaka kexemɨtewanaki'erie yunaime Kakaɨyari teɨterimama,
EPH 1:16 nepɨkatihayewa pamɨpariyutsi ne'ipitɨatɨ Kakaɨyari xehetsiemieme. Nenenenewietɨ nepehɨawe xehetsiemieme,
EPH 1:17 mɨpaɨ netinenenewietɨ, Tati'aitɨwame Ketsutsi Kɨritsitu Kakaɨyarieya, ta'ukiyari witsimɨ'ane, mɨpaɨ ketixepitɨaka yu'iyaritsie xemɨtemaiwawenikɨ, naitɨ mɨtimatsiɨkɨnikɨ xehetsiemieme xe'imaikaku.
EPH 1:18 Mɨpaɨta nepɨtiyunenewie, yu'iyaritsie xeke'uhekɨariwiyarieni xe'imaitɨ tita temɨtekwewie mɨkɨ tatsi'uta'inieku, xemɨtemaikakɨ tita mɨtatipitɨani, waɨkawa kemɨtipaɨme witsikemɨti'ane tita tahetsie mɨtinake Kakaɨyari teɨterimama wahamatɨa,
EPH 1:19 xemɨtemaikakɨ meta mariwemekɨ kemɨtitɨrɨkaɨye tatsiparewienike tame yuri temɨte'erie. Yɨtɨrɨkariyakɨ mɨpaɨ kaniyɨweni, yemekɨ tɨrɨkaɨyetɨ,
EPH 1:20 yaxeikɨa kemɨtiuyuri Kɨritsitu hetsiemieme 'enukuketɨatɨ mɨkite watsata, yutserieta 'ikayetɨ muyuawitsie.
EPH 1:21 Mana yunaime waheima nakaweni tewa, mɨkɨ memɨte'aita heitserie memexeiya memɨtɨrɨkawi memɨwa'ukiyarima, tsepa kememɨtetetewa, yunaime waheima nakaweni, hikɨ miemete waheima, tukari 'umamietsie miemete waheima.
EPH 1:22 Mɨpaɨta pɨtiuyuri naime ra'iwatɨ mɨtita'aitakɨ, mɨpaɨ tinipitɨani naime mɨtikuyuitɨanikɨ memɨyutixexeɨriwa wahetsiemieme, tewi mu'uya mikuyuitɨwa hepaɨ yuwaiyari.
EPH 1:23 Memɨyutixexeɨriwa waiyarieya mekanihɨkɨtɨni, mɨkɨ mekaniutihɨniyarieni, wahɨniyakaku kemɨ'ane nai mɨtihɨniya naitsarie.
EPH 2:1 Xemeta hepaɨna kanixe'anutanieritɨani tsepa xemɨmɨkitetɨkai xeheuyexɨrietɨ 'axaxeteyurietɨ.
EPH 2:2 'Anapaitɨ xeniu'uwakaitɨni mɨpaɨ xeteyurietɨ kememɨteyurie hikɨ miemete kwiepa memɨtama, kemɨtiyuriene kemɨ'ane mɨtiwa'aitɨa mɨkɨ heitserie memexeiya 'ekapa memanukuneniere. Kemɨtiyuriene mɨkɨ kakaɨyari hikɨ mɨwakuyuitɨwa mɨkɨ memɨkayuwaɨriya yamemɨtekahunikɨ, mɨpaɨ xekateniyuriekaitɨni xeme.
EPH 2:3 Mɨkɨ tewanɨtɨ 'anapai tekaniu'uwakaitɨni tanaitɨ ketemɨte'ukahiwe'eriekai waitsie tetewiyatɨ. Kemɨtinakekai tawaiyari, ketemɨtetakɨhɨawekai, yatekateniyuriekaitɨni. Ketemɨ'anenekai takɨmana, tahetsie katininakekekaitɨni temɨhekarienikɨ, yaxeikɨa hipame wahepaɨ.
EPH 2:4 Matsi Kakaɨyari waɨkawa kataninaki'eriekaitɨni, niyutatuakaitɨni tatsinenimayatɨ.
EPH 2:5 'Ayumieme tsepa temɨmɨkitetɨkai teheuyexɨrietɨ, mɨkɨ Kɨritsitu mame katananutanieritɨani. 'Aixɨa mɨtiuka'iyarikɨ xeputawikweitsitɨarie.
EPH 2:6 Hamatɨana katananuku'uitɨani, kataniukayatsa muyuawitsie Kɨritsitu Ketsutsi hetsie tetewiyakaku.
EPH 2:7 Tukari 'umamietsie mɨtihekɨatanikɨ kemɨtiyutatua 'aixɨa tiuka'iyaritɨ, 'ayumieme mɨpaɨ katiniuyurieni. Yatinihekɨatamɨkɨkaitɨni 'aixɨa tatsiyurienetɨ Kɨritsitu Ketsutsi hetsie temɨtewiyakɨ.
EPH 2:8 Mɨpaɨ 'aixɨa mɨtiuka'iyarikɨ, 'ayumieme xeputawikweitsitɨarie yuri xete'erietɨ. Peru kexemɨte'utawikweitsitɨarie, yɨkɨmana xepɨka'utawikweitsitɨarie. Kakaɨyari pɨta yakatinixe'upitɨani.
EPH 2:9 Tixaɨtɨ xemɨte'uyurikɨ xepɨka'utawikweitsitɨarie. 'Ipaɨ nepaine kapa xewitɨ naki'akakɨ yɨkɨmana.
EPH 2:10 Mɨkɨ 'iwewarimama tekanihɨkɨtɨni. Kɨritsitu Ketsutsi hetsie tetewiyatɨ tekaniunetɨarieni 'aixɨa temɨteyuriekakɨ, Kakaɨyari meripaitɨ kemɨtikaye mɨpaɨ teteyurietɨ temu'uwanikɨ.
EPH 2:11 'Ayumieme xeketena'eriwani xeme 'anapai kexemɨ'anenekai. Xepɨkahuriyutsixitɨkai herie kexemɨ'anenekai. Mɨkɨ 'inɨatsiekate memɨte'uyuterɨwa, mɨkɨ mekanixetawe'eriekaitɨni mɨpaɨ me'utiyuatɨ kename xeme wahepaɨ xeka'inɨatsiewawe, mɨkɨ yuwaiyaritsie memeixeiyakaikɨ huriyutsixi wa'inɨari, mamakɨ kemɨtiuxiteke.
EPH 2:12 'Anapai xepɨkaheixeiyakai Kɨritsitu. Xepɨyupatakai 'ixaheritsixi teɨteriyari wahepaɨ heitserie xekahexeiyatɨ. Kiekame heitserie kemɨrexeiya, xeme xaɨtsie miemete wahepaɨ xepɨ'anenekai. 'Atsixepɨkatemaikai tɨratute hepaɨtsita, Kakaɨyari kemainekai kemɨtiwapitɨanikekai. Tixaɨ xepɨkatekwewiekai, Kakaɨyari xepɨkahexeiyakai 'ena kwiepa.
EPH 2:13 Hikɨrixɨa Kɨritsitu Ketsutsi hetsie xetewiyatɨ 'ahura xekanakɨne xeme tewa xemu'uwakai 'ana, Kɨritsitu xuriyaya mutayeurikɨ.
EPH 2:14 Mɨkɨ kanihɨkɨtɨni kemɨ'ane mɨtatsipitɨa 'aixɨa temɨtetaxeiyanikɨ. Huriyutsixi, meta memɨkahuriyutsixi, niwarutaxewiriya yunaime. Kepauka temataka'uniekai, tetsariya warita temuti'uka hepaɨ tekani'anenekaitɨni, peru Kɨritsitu nenuta'una tetsariya.
EPH 2:15 Ketemɨte'ataka'uniekai, kataniunɨtɨani kepauka mumierie. 'Inɨari niukiyari kananuyeitɨani ketemɨte'aitɨariekai xexuime 'aitsikakɨ. Mɨpaɨ katiniuyurieni nuiwari yɨkɨ mɨ'ane mɨnetɨanikɨ, tatsi'utaxewiriyaka tame meta xeme hetsiena tetewiyakaku, kemɨtatipitɨa 'aixɨa temɨtetaxeiyanikɨ.
EPH 2:16 Mɨpaɨ katiniuyurieni meta Kakaɨyari hamatɨa 'aixɨa temɨtetaxeiyanikɨ xeiwaiyari tehɨkɨtɨtɨ. Mɨpaɨ katinaye'atɨani kuruxitsie 'umierieka, tatsinɨtɨatɨ temataka'uniekaikɨ.
EPH 2:17 'Ana nuaka niuki 'aixɨa manuyɨne kanixekuxaxatɨwakaitɨni, xeme tewapai xemu'uwakai 'aixɨa kexemɨtexeiyarie tameta 'ahurawa temu'uwakai katanikuxaxatɨwakaitɨni 'aixɨa ketemɨtexeiyarie.
EPH 2:18 Mɨpaɨ mɨtiuyurikɨ, tanaitɨ heitserie tekanexeiyani temaye'axɨanikɨ ta'ukiyari hetsɨa xei'iyariyaritsie tetewiyatɨ.
EPH 2:19 Hikɨrixɨa 'ayumieme xaɨtsie xepɨkakiekatari, kɨkamete xepɨkahɨkɨ. Matsi Kakaɨyari teɨterimama wahamatɨa heitserie xepexeiya, Kakaɨyari kie xepɨkiekatari.
EPH 2:20 Nɨ'aritsixi texaxatamete kememɨtekuxatakai, tetsariya kitɨa mieme hepaɨ 'aneme mekaniutawewieni. Wahetsie xetewiyatɨ xekanakɨne, kii kemɨtiwewiwa tetsariya heima. Kɨritsitu Ketsutsitɨtɨ kanihɨkɨtɨni tsikurita mieme tete 'amɨnena.
EPH 2:21 Mɨkɨtsie tiwiyatɨ kanixewiriyarieka naitɨ mɨwewiya, Ti'aitame hetsie kemɨtiwiya tuki payeika Kakaɨyari hetsiemieme mɨpatsie.
EPH 2:22 Xemeta hetsiena xetewiyatɨ xekaniti'uitɨarieximeni xeikiyari xemakɨnekɨ 'axeikɨa, Kakaɨyari xetaɨta mayekanikɨ yu'iyarikɨ.
EPH 3:1 'Ayumieme nenewieri Kakaɨyari nekaniupitɨani. Ne Papuru nekanihɨkɨtɨni kemɨ'ane Kɨritsitu Ketsutsi hetsiemieme nemanutahɨiya xeme xemɨkahuriyutsixi xehetsiemieme.
EPH 3:2 Xɨari xepu'enana kenemɨtiuhɨritɨarie, Kakaɨyari 'aixɨa tiuka'iyarikaku. Mɨpaɨ nepɨtiupitɨarie xehetsiemieme.
EPH 3:3 Xepu'enana kemɨtiuyɨ kepauka nemɨtiuta'ɨkitɨarie tita mɨti'awietsiekai hepaɨtsita. Kakaɨyari yɨkɨmana matsiɨkɨme kanayeitɨani. Mɨpaɨ ne'utaitɨ 'etsiwa nepɨtixe'uta'utɨiri.
EPH 3:4 Kenemainekai, xe'iterɨwatɨ xekaniyɨwaweni xemɨtemaikakɨ kenemɨtimaiwe 'ikɨ niuki mɨ'awietsiekai Kɨritsitu mukuxata hepaɨtsita.
EPH 3:5 Meripai teɨteri memanutikɨ wa'utɨma miemete, 'ana mɨpaɨ mepɨkate'ɨkitɨariekai teɨteri, hikɨ matsi nɨ'ariekate memupatsie, meta Kakaɨyari niukametemama, mɨkɨ mɨpaɨ mepɨte'ɨkitɨarie 'Iyari yatiwahekɨatɨakaku.
EPH 3:6 Mɨpaɨ mepɨtehetima, teɨteri memɨkahuriyutsixi huriyutsixi wahamatɨa yaxeikɨa wahetsie pɨtinake, xeiwaiyari mepakɨ huriyutsixi wahamatɨa, 'axeikɨa mepeixeiya tita huriyutsixi memɨte'utahɨawarie kename meheixeiyanikekai mɨkɨ. Kɨritsitu Ketsutsi hetsie metewiyatɨ mɨpaɨ mepu'itɨarie niuki 'aixɨa manuyɨnekɨ.
EPH 3:7 Neri mɨkɨ niuki hepaɨtsita nepuhɨritɨarie Kakaɨyari kemɨnetiumi 'aixɨa tiuka'iyaritɨ, yɨtɨrɨkariyakɨ kemɨnetiuyuitɨa.
EPH 3:8 Merikɨ tsepa yunaime Kakaɨyari teɨterimama wahepaɨ nemɨkamariwe, 'aixɨa tiuka'iyarikaku mɨpaɨ nepɨtiumikie, niuki 'aixɨa manuyɨne nemɨwakuxaxatɨwanikɨ hipame nuiwarite mɨpaɨ ne'utaitɨ, Kɨritsitu waɨkawa kemɨrexeiya, katiyu'inɨatsinɨakame.
EPH 3:9 Mɨpaɨta nepɨtiumikie, nemɨtiwahekɨatsitɨiyanikɨ yunaime tita Kakaɨyari mɨtiyurienikekai. Mɨpaɨ pɨkatimatsiɨkɨkai, katini'awietsiekaitɨni matsi matɨaripaitɨ. Kakaɨyari naime mutiunetɨa, mɨkɨ xeikɨa mɨpaɨ katinimaikaitɨni kemɨtiyurienikekai, yakatini'awietakaitɨni
EPH 3:10 matsiɨkɨtɨ mayanikɨ hikɨ, memɨyutixexeɨriwa yametehekɨatakaku, mɨkɨ muyuawitsie memɨte'aita heitserie memexeiya yamemɨtehetimanikɨ, mɨiremekɨ kemɨtimaiwe Kakaɨyari, tahetsie yatimatsiɨkɨkaku.
EPH 3:11 Mɨpaɨ tiyurienike, yapɨtiyɨkɨhɨawekai meripaitɨ, mɨpaɨta katinaye'atɨani Tati'aitɨwame Kɨritsitu Ketsutsi yatiyurienekaku.
EPH 3:12 Mɨkɨtsie tetewiyatɨ heitserie tekanexeiyani temitahɨawekɨ teyutatuatɨ, 'aixɨa 'iyarikɨ temaye'axɨanikɨ hɨxiena, yuri temɨte'eriekɨ hetsiena.
EPH 3:13 'Ayumieme nepɨxewawirie xemɨkawaɨripiekakɨ ne'uximatɨariekaku xehetsiemieme. Mɨpaɨ nemɨ'itɨariekɨ, 'ayumieme xepaye'axɨani witsixe'anenetɨ xemakɨnekɨ.
EPH 3:14 'Ayumieme nekaniutitunumakeni nenewieri ne'ipitɨanike Tati'aitɨwame Ketsutsi Kɨritsitu 'ukiyarieya.
EPH 3:15 Mɨkɨ meha'eriwatɨ yunaitɨ nuiwarite yamekatenitetewaka kwiepa memɨtama meta muyuawitsie memɨtama.
EPH 3:16 Nepinenewiya, mɨkɨ waɨkawa kemɨrexeiya witsiti'aneneme, mɨxepitɨanikɨ yemekɨ xemɨtɨrɨkariyarienikɨ yuhetsie 'Iyarieya yatixetɨrɨkariyakaku,
EPH 3:17 mɨkɨ meta, kexepitɨaka Kɨritsitu xe'iyaritsie mɨyekanikɨ yuri xete'eriekaku. Xeteyukanaki'erietɨ xekenetseiriyarieka, kɨye kemɨtitse'i hananatɨ, kii kemɨtitse'i tetsariyatsie wetɨ.
EPH 3:18 Mɨpaɨ xeteyukanaki'erietɨ 'axeikɨa xekaniyɨwawekuni xemɨtehetimanikɨ, yunaime Kakaɨyari teɨterimama wahamatɨa, kemakuyewa, kemeutatewa, kemeutitewa meta kemeukatewa, Kɨritsitu kemɨtiyukanaki'erie,
EPH 3:19 xemimaikakɨ Kɨritsitu naki'eriyaya, tsepa tewi mɨkayɨwe yamɨretimanikɨ. Xeke'utihɨniyarieni, hepaɨna xemɨ'anenenikɨ, Kakaɨyari kemɨ'ane.
EPH 3:20 Kemɨ'ane mɨyɨwe matsi kwinimieme mɨtiyurienenikɨ tsepa kemɨtitita, tame matsi ketemɨkate'iwawiriewawe ketemɨkateta'iyaritɨawawe, tɨrɨkariyaya kemɨtatikuyuitɨwa,
EPH 3:21 mɨkɨ hepaɨtsita 'aixɨa meke'utiyuaneni metatsiha'eriwatɨ tame temɨtatixexeɨriwa Kɨritsitu Ketsutsi meha'eriwatɨ, yunaitɨ teɨteri mexi me'anutikɨka tsepanetɨ xeitsienituyari wiyari manuyekɨka. Mɨpaɨ xeikɨa kani'aneni.
EPH 4:1 'Ayumieme neri Ti'aitame hetsie netiwiyatɨ nekananutahɨiyaka, waɨriyarika nekanixepitɨaka, 'aixɨa 'anemekɨ xemu'uwanikɨ, kemɨreuyewetse yamɨtikamienikɨ kemɨ'ane muta'inierie kexemɨte'uta'inierie xeme.
EPH 4:2 Tixaɨtɨ xekatehɨkɨtɨtɨ xekeneyu'erieka naimekɨ, xepɨka'ayu'eririyani, 'axeketeneutewini xekaha'atɨ, xekeneyunewieka matsi xeyunaki'erietɨ.
EPH 4:3 'Iyari kemɨtatixewiriya, xekeneyumexɨitɨaka xemɨyuhayewakɨ xeyuxewitɨ 'aixɨa xeteyuxeiyatɨ.
EPH 4:4 Xeiwaiyari tekanihɨkɨtɨni, meta 'Iyari kaniyuxewini. Yaxeikɨa xeme kepauka xemuta'inierie, tita xetekwewietɨ xemɨte'akɨ, mɨkɨta kaniyuxewini.
EPH 4:5 Ti'aitame kaniyuxewini, xeimetsie yuri tekateni'erieka, xeime hetsie tetewiyatɨ tekaniuka'ɨyarieni.
EPH 4:6 Kakaɨyari yunaime mɨwa'ukiyari mɨkɨta kaniyuxewini, mɨkɨ yunaime katiniwa'aitɨaka, yunaime kaniwakuyuitɨwani, yunaime wahetsie katiniwiyani.
EPH 4:7 Matsitsɨ taxexuitɨ yatepɨtemikie ketemɨte'inɨatsiyarie, Kɨritsitu kemɨtatimikwa.
EPH 4:8 'Ayumieme mɨpaɨ paine 'utɨarika: «Wapaitɨ 'anutiyaka, me'anutaxɨriyakame kaniwarehapani yumɨireme, meta teɨteri 'imikieri kaniwarumini».
EPH 4:9 (¿Merikɨte ketita tixata «wapaitɨ 'anutiyaka» maine, mɨpaɨ xɨari paine, peukayune meri 'emeukatewatsie kwiepa paitɨ?
EPH 4:10 Kemɨ'ane meukayunixɨ, mɨkɨ kanihɨkɨtɨnita kemɨ'ane muyuawi heima manutitɨa 'ateewa, naime mɨhɨniyanikɨ).
EPH 4:11 Mɨkɨ mɨpaɨ pɨtiwarumi, hipatɨ nɨ'ariekate memakɨnekɨ, hipatɨta texaxatamete, hipatɨ tehekɨatamete, hipatɨta te'ɨwiyamete meta te'ɨkitamete.
EPH 4:12 Yakatiniwarumini waraye'atɨanike yuteɨterima yamemɨte'uximayakakɨ kememɨte'uhɨritɨarie. Wakɨmana Kɨritsitu waiyarieya kaniweriyariekamɨkɨ.
EPH 4:13 Mɨpaɨ tekatenipitɨarieka mexi te'aye'axɨaxime tanaitɨ temɨtaxewinikɨ yuri ketemɨte'erie Kakaɨyari nu'ayatsie, ketemɨteheitima. Mɨpaɨ tekatenipitɨarieka tewi maye'awe temakɨnekɨ, temɨtsetseɨyenikɨ Kɨritsitu kemɨraye'awe hepaɨ, mɨkɨ Kɨritsitu ta'inɨaritɨkaku.
EPH 4:14 'Ana tepɨtehayewani tɨɨri wahepaɨ teyɨatɨ. Tepɨkakuyuitɨariwani naime 'ɨkitsikakɨ, hamewari kemɨtiuyuane 'ekakɨ, teɨteri kememɨteyukwamana, kememɨteyu'iyaritɨa mete'irɨmatɨ memeuyexɨrienikɨ.
EPH 4:15 Matsi yuri te'utiyuatɨ tetetakanaki'erietɨ, tekanitiwerikuni 'iya hepaɨ te'anenetɨ temakɨnekɨ naimekɨ. 'Iya kanitamu'utɨni Kɨritsitutɨtɨ.
EPH 4:16 Tanaitɨ hetsiena tetewiyatɨ tekanitawerirɨmeni, tewi waiyarieya yumu'utsie tiwiyatɨ kemɨtiwere naitɨ. Waiyarieya nawɨtɨarieni kaniutaxewiriyarieni, turuyari naitɨ 'ixewiriyakaku, xexuitɨ waiyariteya yatiyurienekaku kemɨreuyewetse. Yaxeikɨa tewi waiyarieya kemɨtiyuweriya yɨkɨmana, tameta tetetakanaki'erietɨ tekanitɨrɨkariyarieka waiyarieya tehɨkɨtɨtɨ.
EPH 4:17 'Ayumieme 'ipaɨ nepaine, Ti'aitame hetsie netiwiyatɨ 'ipaɨ nepɨtihekɨata. Xepɨka'u'uwani hipatɨ kememɨyɨa memɨkatateɨterima. Yakɨ xeikɨa mekateniku'eriwani mɨkɨ,
EPH 4:18 mekaniuyɨriyarieni kememɨteyumate yu'iyaritsie, heitserie mepɨkahexeiya Kakaɨyari tukari mɨwapitɨanikɨ, mɨkɨ 'atsimemɨkatematekɨ wa'iyari mɨtsetse'ikɨ.
EPH 4:19 Kememɨ'anene, mɨkɨ yu'iyaritsie mekaniximɨmɨanini, mepɨyuwaɨriya memɨrukuyatɨwenikɨ kememɨteyukahiwe'erie, yamemɨteyuriekakɨ naime tita mɨkati'itiya yuhetsiemieme metehiwe'erietɨ.
EPH 4:20 Peru xeme mɨpaɨ xepɨkate'u'ɨkitɨarie Kɨritsitu hepaɨtsita.
EPH 4:21 Xɨari hepaɨtsitana xepɨ'enana, hetsiena xetewiyatɨ xepɨte'uta'ɨkitɨarie tita yuri mɨraine, Ketsutsi hetsie kemɨtimatsiɨkɨ.
EPH 4:22 'Ayumieme kexemɨte'u'ɨkitɨarie, xekenanutihɨna tita mɨtiye'i, xeketeneuhayewa kexemɨyɨakai meripaitɨ. Kemɨ'ane mɨpaɨ mɨtiyuriene, mɨkɨ kanitapɨnirɨmeni 'irɨmari kemɨtihiwe'eritɨa.
EPH 4:23 Xehekwariyarietɨ xekenakɨni, yu'iyaritsie 'aixɨa xeteyɨkɨhɨawetɨ.
EPH 4:24 Xekenanakatɨki tita 'aixɨa mɨti'ane, tita mɨtiunetɨarie Kakaɨyari hepaɨ 'anetɨ. Mɨkɨ tita yuri mɨrainetsie memɨmiemete wahepaɨ heitseriemekɨ yaxeketenekahuni, Kakaɨyari xe'ayexeiyatɨ xekeneyɨaka.
EPH 4:25 'Ayumieme xeketeneuhayewa xete'itawatɨ, yuxexuitɨ yuri xeketeneyutahɨawi, tanaitɨ 'axeikɨa temɨtaxewinikɨ xeiwaiyaritsie temɨmiemekɨ.
EPH 4:26 Xɨka xeha'aka, perutsɨ 'axaxepɨkateyurieni, xepɨka'ipitɨaka xeitukari xemɨha'akakɨ.
EPH 4:27 Meta, Kauyumarie xepɨkapitɨaka xehetsie muyuhayewanikɨ.
EPH 4:28 Kemɨ'ane mɨtinawayakai ketiuhayewa tinawanetɨ, ketikumaɨwani matsi yumamakɨ 'aixɨa tiyurienetɨ, mɨrexeiyanikɨ mɨkɨ memɨteheuyehɨwa mɨtiwayetuiriwanikɨ.
EPH 4:29 Niuki 'axamanɨyɨne xɨka xeteta 'atineni, 'aixɨa pɨkayɨni, matsi pɨta xɨka 'aixɨa 'anemekɨ xe'utiniukani watseiriyatɨ kemɨ'ane meiyehɨwa, mɨpaɨ xekeneutiyuaneni pɨta, 'aixɨa xemɨwayurienikɨ 'enakaremete.
EPH 4:30 Xepɨka'ihiweritɨaka Kakaɨyari 'Iyarieya Mɨtiyupata. Mɨkɨ kanixetseyutɨni kɨmana xemu'inɨatsie mexi tukari ka'aye'awe kepauka temɨxɨnarieni.
EPH 4:31 Xeketeneuhayewa xehayutsiɨriyatɨ xeteyuka'uxiwe'erietɨ xeyuhaxɨawiyatɨ xe'utihiwatɨ 'axaxe'utiyuatɨ. Mɨkɨ naitɨ ketixani'eriwani xehetsɨa, meta naitɨ 'axamɨti'ane.
EPH 4:32 'Aixɨa xete'u'iyaritɨ xekenakɨni, xekeneyunenimayaka, xeketeneuyuyehɨwirieka, xeme Kakaɨyari kemɨtixeheuyehɨwiri Kɨritsitu hetsie xetewiyakaku.
EPH 5:1 'Ayumieme Kakaɨyari xe'ɨketɨ xekenakɨni. Kemɨ'ane mɨxenaki'erie niwemama wahepaɨ xekeneyɨaka.
EPH 5:2 Xeteyukanaki'erietɨ xekeneu'uwani, yaxeikɨa Kɨritsitu kemɨtatinaki'erie, kemɨtiyuyetua tahetsiemieme mɨmierienikɨ. Mawaritɨtɨ kaniyuyetuani 'ixatɨatɨ Kakaɨyari, 'inaki'atsitɨatɨ.
EPH 5:3 Hipatɨ mekaniwakumaɨwani kemɨ'ane mɨkawa'ɨya mɨkawakɨna, mepɨka'itiyatɨka, yuhetsiemieme mekatenihiwe'erieka naime. Matsi kememɨteyurie, mɨkɨ xepɨkakuxatani xeme, meuyewetsekɨ mɨkɨ Kakaɨyari hetsiemieme memupatsie mɨpaɨ memɨkateyuriekakɨ.
EPH 5:4 Hipatɨ mɨpaɨ mekateniyurieka, ketemɨtetewinɨarienikekai xɨka wahepaɨ teteyuriekake. Yakɨ xeikɨa mekaniutiyuaneni, mekaniyunanaimaka 'axamɨ'anekɨ. 'Aixɨa pɨka'ane mɨpaɨ xemɨteyuriekakɨ, matsi peuyewetse Kakaɨyari pamɨpariyutsi xemipitɨakakɨ.
EPH 5:5 Teɨteri mepɨwakumaɨwa kemɨ'ane mɨkawa'ɨya mɨkawakɨna, mepɨka'itiyatɨka, naime mepɨtehiwe'erie yuhetsiemieme. Tita mɨtihiwe'erie, mɨkɨ payexeiya yukakaɨyaritɨme. 'Ipaɨ xeketenemaika, yunaitɨ mɨya memɨteyurie, mɨkɨ wahetsie pɨkatinake memaye'axɨanikɨ Kɨritsitu tiwa'aitɨwame mayanikɨ, meta Kakaɨyari.
EPH 5:6 Nɨkatɨ xewitɨ tixe'u'itaiya 'eka niuki wewietɨ. Mɨya memɨteyuriekɨ, 'ayumieme Kakaɨyari pɨwaheka mɨkɨ memɨkayuwaɨriya yamemɨtekahunikɨ.
EPH 5:7 Merikɨte, xepɨkayuxewiriyani wahamatɨa kememɨteyurie.
EPH 5:8 Meripaitɨ yɨwipa xepɨmiemetetɨkai, hikɨri matsi hekɨaripa miemete xekanakɨne Ti'aitame hetsie xetewiyatɨ. Hekɨaripa miemete wahepaɨ xekeneyɨaka.
EPH 5:9 (Hekɨariya kemɨtixuaweriya, 'ipaɨ katiniyurienemɨkɨ tewi. Naimekɨ 'aixɨa katiniyurienemɨkɨ, heitseriemekɨ yakatinikamiemɨkɨ, yuri kaniutainemɨkɨ).
EPH 5:10 Xekeneyɨ'ɨwiya yaxemɨtehetimanikɨ tita Ti'aitame mɨtinake.
EPH 5:11 Xepɨkayuxewiriyani mɨkɨ yɨwipa timieme kememɨteyurie wahamatɨa. Tixaɨtɨ pɨkatitixuawere kememɨteyurie. Matsi xekeniwahekɨatani kememɨteyurie.
EPH 5:12 'Awie kememɨteyurie mɨkɨ, putewiuyɨkɨre mɨwakuxatanikɨ.
EPH 5:13 Peru mɨkɨ naitɨ hekɨatsietɨ, matsiɨkɨtɨ kanayeitɨariwani hekɨaripa. Hekɨariya kanihɨkɨtɨni tita matsiɨkɨme mɨrayeitɨa naime.
EPH 5:14 'Ayumieme mɨpaɨ paine: «'Ekɨ pemɨkutsu, kenanutanieri, mɨkite watsata kenanukukexi, meta Kɨritsitu kamanihekɨariyamɨkɨ».
EPH 5:15 'Ayumieme xekeneyukweriwayurieka 'aixɨa kexemɨte'u'uwa. 'Atsimemɨkatemate wahepaɨ xepɨkayɨaka, memɨtemaiwawe wahepaɨ pɨta xekeneyɨaka,
EPH 5:16 xekeneyukumexuitɨaka 'aixɨa xemɨteyurienikɨ, mexi tukari xepitɨarie hipatɨ tukari 'axamɨ'anenekɨ.
EPH 5:17 'Ayumieme 'atsimemɨkatemate wahepaɨ xepɨkayɨaka, matsi pɨta xekenemaika tita Ti'aitame mɨtinake.
EPH 5:18 Xepɨkatarɨwetɨweni winukɨ. Mɨpaɨ tiyurienetɨ pɨrukuyaneni xeikɨa. Matsi 'Iyarikɨ pɨta xekenehɨpɨneni.
EPH 5:19 Yuxexuitɨ xekeneyutuikani, nɨawari hepaɨtsita meta Kakaɨyari kwikarieyakɨ, kwikari 'Iyaritsie timieme hepaɨtsita manuyɨne xekeneutikwika, xe'inɨawatɨ Ti'aitame yu'iyaritsie.
EPH 5:20 Yuheyemekɨ naimekɨ pamɨpariyutsi xekenepitɨaka Kakaɨyari mɨta'ukiyari, Tati'aitɨwame Ketsutsi Kɨritsitu hetsɨa xemɨmiemetekɨ.
EPH 5:21 Xeyuxewitɨ yaxeketenekahuni Kɨritsitu xe'ayemakatɨ.
EPH 5:22 'Ukari yaxeketenekahuni xekɨnama kememaitɨka, yaxeikɨa kexemɨtekahu Ti'aitame ti'aitakaku.
EPH 5:23 'Uki 'uka mu'uya kanihɨkɨtɨni, yaxeikɨata Kɨritsitu memɨyutixexeɨriwa wamu'u kanihɨkɨtɨni, mɨkɨ kanihɨkɨtɨni kemɨ'ane yuwaiyari mutawikweitsitɨa.
EPH 5:24 Memɨyutixexeɨriwa yamekatenikahuni kemɨti'aita Kɨritsitu, yaxeikɨata 'ukari yameketekahuni kememaitɨka wakɨnama naimekɨ.
EPH 5:25 Xeme 'ukitsi xekeniwanaki'erieka yɨ'ɨitama, Kɨritsitu mɨtiwanaki'erie hepaɨ memɨyutixexeɨriwa, mɨyuyetua hepaɨ mɨmierienikɨ wahetsiemieme.
EPH 5:26 Yuhetsiemieme mɨwapatakɨ mɨpaɨ katiniuyurieni, wa'itietɨ hakɨ niukikɨ.
EPH 5:27 Mɨpaɨ pɨtiuyuri yɨkɨmana, yɨhɨxie mɨwati'uitɨanikɨ memɨyutixexeɨriwa witsime'aneneme, mekaheukuyɨyɨwime, mekaheuwiwirawime, tsepa tixaɨtɨ mɨpaɨ mɨti'ane, matsi memɨpatsiekakɨ pɨta wahetsie mɨkarahɨiwanikɨ.
EPH 5:28 Yaxeikɨa kaneuyeweka 'ukitsi memɨwanaki'eriekakɨ yɨ'ɨitama, yuwaiyari memɨtenaki'erie hepaɨ. Kemɨ'ane yɨ'ɨya minaki'erie, mɨkɨ kaniyunaki'erieka.
EPH 5:29 Tewi hatsuaku yuwaiyari pɨka'uxie, matsi piweriya pikemaritɨa. Kɨritsitu yaxeikɨa pɨwayurie memɨyutixexeɨriwa,
EPH 5:30 waiyarieya temɨhɨkɨkɨ. Waiyarieya 'umeyarieya tepɨhɨkɨ tame.
EPH 5:31 Kemaine: «'Ayumieme 'uki kaniyupatamɨkɨ, yupaapa yumaama wahetsɨa kanayeyeimɨkɨ, yɨ'ɨyatsie pɨta katiniwiyamɨkɨ, memɨyuhutakai xeiwaiyari mekanakɨnikuni meyuxewitɨ».
EPH 5:32 'Ikɨ niuki matsi kanitɨrɨkaɨyeni, tsepa mɨ'awietsiekai, Kɨritsitu hetsiemieme memɨyutixexeɨriwa wahepaɨtsita nepaine.
EPH 5:33 Merikɨte xemeta yuxexuitɨ yunaitɨ yɨ'ɨitama xekeniwanaki'erieka kexemɨteyunaki'erie hepaɨ, meta 'ukari yɨkɨnama 'aixɨa meketewaxeiyani.
EPH 6:1 Tɨɨri xekeniwa'enieka yupaapama Ti'aitame hetsie xetewiyatɨ, mɨpaɨ xɨka xeteyurieka pɨheitserie.
EPH 6:2 «'Apaapa meta 'amaama keniwareu'enieka ―kemaine, mɨkɨ 'aitsika mexɨakame kanihɨkɨtɨni, mɨpaɨta paine kename tixaɨtɨ tiupitɨarieni―
EPH 6:3 mɨpaɨ petiyurienetɨ 'aixɨa pepɨ'itɨarieni 'apepɨreutere kwiepa, pe'uyeikatɨ».
EPH 6:4 Xemeta xemɨwapaapama xepɨkawahaxɨatɨaka yutɨɨriyama. Matsi xekeniwawaweriyani xewakuwayatɨ meta xetewa'ɨkitɨatɨ yamɨtikamienikɨ Ti'aitame hetsie tiwiyatɨ.
EPH 6:5 Te'uximayatamete, xekeniwa'enieka mɨkɨ memɨxekutsiyarima kwiepa, xeheumamatɨ xe'utiyɨyɨakatɨ, 'aixɨa 'iyarikɨ xete'uximayatɨ, Kɨritsitu hetsiemieme matsi xekateni'uximayakakuni.
EPH 6:6 Wahɨxie xeikɨa xepɨkate'uximayaka teɨteri xewanaki'aritɨanike, matsi Kɨritsitu hetsɨa miemete te'uximayatamete xemɨhɨkɨkɨ, yu'iyarikɨ yaxeketeneyurieka tita Kakaɨyari mɨtinake.
EPH 6:7 Xeyuwaɨriyatɨ xeketene'uximayaka, kemɨ'ane Ti'aitame hetsiemieme mɨti'uximaya hepaɨ xeyɨatɨ, teɨteri wahetsiemieme pɨkatixaɨ.
EPH 6:8 Mɨpaɨ xeketenemaika, yuxexuitɨ 'aixɨa kememɨteyurie, mɨpaɨ mekatenipitɨariekuni Ti'aitame yatiwapitɨakaku, tsepa te'uximayatamete memɨhɨkɨ, tsepa memɨyunɨ'a.
EPH 6:9 Xemeta, xemɨwakutsiyarima, yaxeikɨa xekeniwayurieka, xeketeneuhayewa xewamariutatɨ. Mɨpaɨ xetemaitɨ, kemɨ'ane mɨwakutsiyari mɨxekutsiyari xemeta, mɨkɨ Ti'aitame taheima pakawe, yɨkɨ teɨteri pɨkatiwaxeiya.
EPH 6:10 'Imatɨrieka ne'iwama, Ti'aitame hetsie xetewiyatɨ xekenetɨrɨkariyarieka, kemɨ'ane mɨtɨrɨkaɨye xetɨrɨkariyakaku.
EPH 6:11 Kakaɨyari kemɨtiwa'ixiparatɨa yukuyaxima, mɨkɨkɨ xekeneyukuha'aritɨaka kuyakɨ, xemɨyɨwawenikɨ xemɨti'ukakɨ xekakuyuitɨarietɨ Kauyumarie 'irɨmarieyatsata.
EPH 6:12 Tameri teɨteri tewaraye'unietɨ tepɨkatakwitɨwe. Matsi te'aitamete, heitserie hexeiyamete, mɨkɨ memɨte'aita 'ena yɨwipa naitsarie kwiepa, 'iyarite memɨyukwitɨwe tita 'axamɨti'anetsie mieme muyuawitsie memuxuawe, mɨkɨ tewaraye'unietɨ pɨta tepɨtakwitɨwe.
EPH 6:13 'Ayumieme xekenanu'ɨi Kakaɨyari kuyaximama watepɨa naime. Mɨkɨkɨ xekaniyɨwaweni xemeye'uniekakɨ tsepa tukari 'axamɨ'ane, xekaniyɨwawekuni xemɨti'unikɨ xekakuyuitɨariwatɨ, naime xe'aye'atɨame.
EPH 6:14 'Ayumieme 'axekeneti'uka 'aixɨa. Kuya kemɨrayuhɨa, xemeta tita yuri mɨraine xekenekuxatani. Kuya tepɨa kemɨranakatɨkɨ yutawie kapa 'u'axienikɨ, xemeta heitseriemekɨ yaxeketenekahuni.
EPH 6:15 Yukakaitsie kemɨreukexɨa, xemeta xekeneyukuha'aritɨaka niuki 'aixɨa manuyɨnetsie xetewiyatɨ, 'aixɨa ketemɨtexeiyarie manuyɨnetsie.
EPH 6:16 Mɨkɨ meta, 'eyeume kemɨrakaxu'u kɨmana mɨyukunarɨma, xemeta yuri xeketene'erieka. Mɨpaɨ xepɨyɨwaweni xemitɨnikɨ naime 'axamɨtiuka'iyari 'ɨrɨteya mɨtaiwawe.
EPH 6:17 Kuya yumu'utsie tepɨa kemɨranaketsa, xemeta mɨpaɨ xeketenemaika, xemutawikweitsitɨariekɨ. 'Ixipara kemɨrakwe'e, Kakaɨyari niukieya xehexeiyatɨ xekeneyukwitɨweni, 'Iyari kemɨtiyumiene mɨkɨkɨ.
EPH 6:18 Naimekɨ xekeneyunenewieka xekenewawirieka. Yuheyemekɨ nenewieri xekenepitɨaka 'Iyaritsie xetewiyatɨ. Mɨpaɨ xemɨteyuriekakɨ, xekeneyɨhɨtɨaka, yemekɨ xepɨkatehayewani xe'iwawirietɨ Kakaɨyari yunaime teɨterimama wahetsiemieme.
EPH 6:19 Nehetsiemiemeta xekeneyunenewieka, niuki nemɨpitɨariekakɨ kepauka nemɨtaniuni, nenetatuatɨ nemihekɨatanikɨ tita mɨti'awietsiekai niuki 'aixɨa manuyɨne hepaɨtsita.
EPH 6:20 Mɨkɨtsie mieme nekaniniukametɨni tsepa tepɨakɨ nemanutahɨiya. Xekeneyunenewieka nemɨnetatuanikɨ niukitsie mieme, kemɨreuyewetse nemɨtaniunikɨ.
EPH 6:21 Yaxemɨtemaikakɨ xemeta kenemɨranayemie kenemɨtiyuriene, naime yakatinixetaxatɨamɨkɨ Tikiku. Mɨkɨ kanita'iwatɨni teminaki'erie. Tiparewiwame yamɨtikamie kanihɨkɨtɨni Ti'aitametsie mɨtiwiya.
EPH 6:22 'Ayumieme xehetsɨa nepenunɨ'ani yaxemɨtemaikakɨ ketemɨte'anayekɨ, xe'iyari mɨtuikariekakɨ.
EPH 6:23 Kakaɨyari mɨta'ukiyari meta Ti'aitame Ketsutsi Kɨritsitu mekewapitɨaka 'iwamarixi memɨka'uximatɨariekakɨ yu'iyaritsie, meta mekewapitɨaka memɨyunaki'eriekakɨ yuri mete'erietɨ.
EPH 6:24 Kakaɨyari 'aixɨa ketiuka'iyarini kemɨ'ane yuheyemekɨ Tati'aitɨwame Ketsutsi Kɨritsitu memɨnaki'erie wahetsiemieme.
PHI 1:1 Papuru Timuteu hamatɨa, temɨte'uximayatamete Kɨritsitu Ketsutsi hetsiemieme, yunaitɨ xemupatsie Kɨritsitu Ketsutsi hetsie xetewiyatɨ Piriputsie xemɨtama, te'ɨwiyamete meta teparewiwamete yunaime tekanixewaɨritɨaka:
PHI 1:2 Kakaɨyari mɨta'ukiyari, meta Ti'aitame Ketsutsi Kɨritsitu 'aixɨa mekete'u'iyarini xehetsiemieme, meta yu'iyaritsie mekexepitɨaka xemɨka'uximatɨariekakɨ.
PHI 1:3 Ne nekakaɨyari pamɨpariyutsi nekanipitɨaka kepauka nemɨxeha'eriwa.
PHI 1:4 Kepauka nemiwawirie yunaime xehetsiemieme, neyutemawietɨ nekaniyunenewieka neheyemekɨ,
PHI 1:5 pamɨpariyutsi nekanipitɨaka temɨtaxewikɨ 'ikɨ niuki tekuxatatɨ 'aixɨa manuyɨne matɨari hepaɨ hikɨta yaxeikɨa.
PHI 1:6 Mɨpaɨ yuri nekatini'erieka: kemɨ'ane mitsutɨa xekuyuitɨwatɨ 'aixɨa 'anemekɨ ti'uximayatɨ xehetsie, mɨkɨ katinaye'atɨakamɨkɨ kepaukake Kɨritsitu Ketsutsi munuani.
PHI 1:7 Mɨkɨ kaniheitserietɨni mɨpaɨ nemɨtiku'eriwanikɨ xehetsiemieme, ne'iyaritsie nemɨxeku'eriwakɨ, tsepa nemanutahɨiya yatɨni nehetsiemieme nehaniukakaku, meta niuki 'aixɨa manuyɨne nehekɨatakaku, xeme yunaitɨ nehamatɨa xepɨte'uximaya Kakaɨyari 'aixɨa tiuka'iyarikaku nehetsiemieme.
PHI 1:8 Kakaɨyari katinimaika kenemɨtixenaki'erie yunaime, nexeku'eriwatɨ Kɨritsitu Ketsutsi hetsiemieme.
PHI 1:9 Mɨpaɨ nepɨtiwawirie neyunenewietɨ: xeme yemekɨ xenaki'eriya ketimɨirirɨmeni heitseriemekɨ xetemaiwawetɨ, naimekɨ kemɨreuyewetse yaxemɨteyuriekakɨ,
PHI 1:10 xemɨyɨwawenikɨ xemipatanikɨ 'aixɨa mɨti'ane meta 'axamɨti'ane kexemɨte'imate. Mɨpaɨ xeteyuriekaku, kepauka Kɨritsitu munuani kanimatsiɨkɨkamɨkɨ kexemɨkatetsewiximarieka, xehetsie karahɨiwakaku,
PHI 1:11 'aixɨa mɨti'anekɨ xekenehɨpɨneni Ketsutsi Kɨritsitu xepitɨakaku, 'aixɨa mɨtikuxaxatsiwanikɨ meta Kakaɨyari nɨawarieyakɨ.
PHI 1:12 Ne'iwamarixi, nepɨtixetaxatɨani kenemɨranayetɨa hepaɨtsita, mɨpaɨ xemɨtemaikakɨ, matsi waɨkawa 'aixɨa puyɨ niuki 'aixɨa manuyɨne mɨ'enierienikɨ.
PHI 1:13 'Uwa yunaitɨ paratsiyuta tehɨwemete meta hipatɨ yunaitɨ mɨpaɨ mepɨtehetima Kɨritsitu hetsiemieme nepanutahɨiya hikɨ.
PHI 1:14 'Iwamarixi yumɨiretɨ menetsiha'eriwatɨ kenemɨranutahɨiya, Ti'aitame hetsie metewiyatɨ mekaniyuwaɨriyani hikɨ matsi waɨkawa Kakaɨyari niukieya memɨkuxatanikɨ mekaheumamatɨ.
PHI 1:15 Kaniyuritɨni hipatɨ mekatenikuxatani Kɨritsitu hepaɨtsita meniukixietɨ meta metehayu'iwakutɨ, matsi hipatɨta 'aixɨa 'anemekɨ mekatenikuxatani.
PHI 1:16 Mɨkɨ 'imatɨrieka yurikɨ mekatenikuxatani menetsinaki'erietɨ, mɨpaɨ metemaitɨ nemanayexeiyariekɨ niuki 'aixɨa manuyɨne hetsiemieme nemutaniukanikɨ.
PHI 1:17 Hipatɨ pɨta mepɨtehekɨata Kɨritsitu hepaɨtsita mewara'iwakutɨ hipame, wa'iyari kayuxewikaku, mɨpaɨ mepɨteku'eriwa, matsi waɨkawa nemɨ'uximatɨariekakɨ ne'anutahɨiyatɨ.
PHI 1:18 Tsepanetɨ kememɨteyurie Kɨritsitu kanikuxaxatsiwani, ne 'ayumieme nepɨnetemawie, tsepa yakɨ memɨtekuxata, tsepa yurikɨ meyuwaɨriyatɨ memɨyɨa. Matsi neyutemawietɨ nepɨkatihayewani.
PHI 1:19 Mɨpaɨ nepɨtimate, 'aixɨa pɨtiyɨni pamɨpariyutsi xeme nehetsiemieme xeyunenewiekaku, meta Ketsutsi Kɨritsitu 'Iyarieya netsiparewiekaku, 'ikɨ naitɨ 'aixɨa pɨtiyɨni nepɨxɨne.
PHI 1:20 Mɨpaɨ yemekɨ yuri nekatini'erieka meta mɨpaɨ netita'ikwewatɨ 'uxa'atɨni warie nepɨkatewiyatsitɨarieni, tsepa nemayeniere tsepa nemumɨ, matsi Kɨritsitu kemɨtimariwe kanimatsiɨkɨkamɨkɨ yaxeikɨa meripai hepaɨ.
PHI 1:21 Ne nehetsiemieme nepɨka'ayeniere, Kɨritsitu kanihɨkɨtɨni mayeniere, mexɨka ne'umɨni matsi nekatina'iwamɨkɨ.
PHI 1:22 Hikɨ 'akuxi, xɨka newaiyaritsie ne'uyeikatɨ neyuhayewani 'ena kwiepa tixaɨtɨ nemɨtiyurienikɨ neti'uximayatɨ, ke'anekame nepanukuweiya. 'Atsinepɨkatimate kemɨ'ane matsi 'aixɨa mɨyɨnikeyu.
PHI 1:23 Hutamekɨ nenehɨawetɨ nepɨ'iyarixie. Nepɨnewaɨriya nemɨyemiekɨ Kɨritsitu hamatɨa mana nemeyeikanikɨ, mɨpaɨ matsi waɨkawamekɨ 'aixɨa pɨ'anekaku.
PHI 1:24 Perutsɨ xehetsiemieme kaneuyeweka matsi 'ena nemɨnehayewakɨ newaiyaritsie netiwiyatɨ.
PHI 1:25 Hikɨrixɨa nepɨretima kenemɨtiyurieni, mɨpaɨ nekatinimaika nemɨnehayewanikɨ. Yunaime xehetsɨa nekaninehayewamɨkɨ nexeparewietɨ matsi waɨkawa xemɨyɨwawenikɨ, xemɨyutemamawiekakɨ yuri xete'erietɨ.
PHI 1:26 Xɨka tawarita xehetsɨa nehenuani, xeme waɨkawa xepuyutemamawieka Kɨritsitu Ketsutsi hetsie xetewiyatɨ, nehetsiemieme mɨkɨ waɨkawa 'aixɨa kemɨtiyuriene.
PHI 1:27 Tsepa xemu'uximatɨarie, yaxeikɨa xeketeneyurieka, kemɨreuyewetse yamɨtiyurienenikɨ heixeiyatɨ niuki 'aixɨa manuyɨne Kɨritsitu hepaɨtsita, mɨpaɨ xeketeneu'uwani. Xɨka mɨpaɨ xeteyurieka, tsepa xehetsɨa nemeyeika nexexeiyatɨ, tsepa 'ateewa paitɨ nemeyeika ne'enatɨ xehepaɨtsita, mɨpaɨ nekatinimaikamɨkɨ xemɨyutseiriyakɨ 'iyari xehexeiyatɨ mɨyuxewi, yaxeikɨa xeteku'eriwatɨ yunaitɨ xemɨyukwitɨwekɨ kapa xe'unawaiyarienikɨ titatsie yuri xemɨte'erie niuki 'aixɨa manuyɨne kemaine,
PHI 1:28 memɨxe'aye'unie xepɨkawarayemakaxeni kepauka mɨkɨ memɨxemariutani. Mɨpaɨ xeteyurietɨ 'inɨari xenakɨnikuni wahepaɨtsita, kememɨteheuyehɨiyani. Xemeta yuhetsiemieme 'inɨari xepakɨne Kakaɨyari kemɨtixe'utawikweitsitɨa.
PHI 1:29 Kɨritsitu hetsɨa xemɨmiemetekɨ xepupitɨarie yuri xemɨte'eriekakɨ, matsitsɨ 'akuxi xepɨpitɨarieni xemɨtekwinekɨ hetsiena mieme,
PHI 1:30 yaxeikɨa nehepaɨ xeketeneyukwitɨweni hikɨ, meripaitɨ kexemɨnetexeiyakai yanetinemieneme, hikɨta kexemɨte'enana kename yanetinemiene.
PHI 2:1 'Ayumieme, xɨka 'aixɨa xeteyumaika yuhetsie Kɨritsitu hetsie xetewiyatɨ, xɨka tenɨtɨarieka ketemɨteyukanaki'erie, xɨka 'Iyari hamatɨa xeyuxewini yunaitɨ, xɨka xeteyukanenimayaka kexemɨte'u'iyari,
PHI 2:2 xɨkatsɨ mɨpaɨ 'aneni, neyutemawiekame xekenenaye'atɨa, yaxeikɨa xeteku'eriwatɨ, yaxeikɨa xeketeneyukanaki'erietɨ, yuhepaɨ xeteyukɨhɨawetɨ, xekeneyuwaɨriyani yu'iyaritsie xemɨyuxewinikɨ.
PHI 2:3 Hipame xewara'iwakutɨ xepɨkayɨaka, teɨteri xehepaɨtsita 'aixɨa memutiyuanenikɨ xeikɨa xepɨkayɨaka, mamariwawemete xekeniwa'erieka hipame, xeme pɨta tixaɨtɨ xekatehɨkɨtɨme xekeneyu'erieka yɨkɨmana.
PHI 2:4 Yuxexuitɨ xeme xepɨkatekuwautɨweni tita xehetsie mɨtimieme xeikɨa, tita hipame wahetsie mɨtimieme pɨta xeketenekuwautɨweni.
PHI 2:5 Kexemɨte'u'uwa Kɨritsitu Ketsutsi hepaɨ xeketeneyumaika,
PHI 2:6 Tsepa mɨkakaɨyaritɨkai Kakaɨyari hepaɨ 'anetɨ pɨka'ayuyeitɨa, peru mɨpaɨ pɨkatiku'eriwakai kename 'aixɨa yɨnikeyu xɨka Kakaɨyari hepaɨ mariwetɨ 'ayuyeitɨanike, tsepa mɨyɨwekai.
PHI 2:7 Katiniuhayewa heitserie hexeiyatɨ, kemɨ'ane waɨriyarika mɨti'uximaya hepaɨ 'anetɨ kanayuyeitɨani, Teɨteri wahepaɨ 'anetɨ kanayani.
PHI 2:8 Merikɨtsɨ xeiyarietɨ tewi hepaɨ 'anetɨ, tixaɨtɨ katihɨkɨtɨtɨ kanayuyeitɨani, Yakatinikamiekaitɨni tsepa mumɨ, kuruxitsie kaniumierieni.
PHI 2:9 'Ayumieme Kakaɨyari mariweme kaneyeitɨani, kanipitɨani witsimɨtimariwanikɨ kemɨ'ane mɨhɨkɨ, hipatɨ kememɨkatemariwa hepaɨ.
PHI 2:10 'Uxa'atɨni warie kepauka Ketsutsi mɨtahɨawarieni kemɨ'ane mɨhɨkɨ, mɨpaɨ kemɨtimariwa, 'ana yunaitɨ mekanikatunuma'uikuni nenewieri mekanipitɨakuni, taheima memɨtama, kwiepa memɨtama, meta kwie hetɨa memɨtama,
PHI 2:11 Yunaitɨ mekaniyutahekɨatakuni, kememɨteheitima Ketsutsi Kɨritsitu kename Ti'aitame hɨkɨ, me'utiyuatɨ, 'ana 'aixɨa katinikuxaxatsiwamɨkɨ Kakaɨyari mɨta'ukiyari.
PHI 2:12 Xemeta nenaki'erima, mɨpaɨ nepɨtixetahɨawe, yuheyemekɨ yaxekatenikahukaitɨni xehetsɨa neheyeikakaku. Hikɨ 'ateewa paitɨ neheyeikakaku matsi waɨkawa peuyewetse yaxemɨtekahunikɨ Kɨritsitu hepaɨ. Yaxeketeneyurieka kemɨreuyewetse yaxemɨteyuriekakɨ mexi xetawikweitsitɨariexime, peru xeheumamatɨ xe'utiyɨyɨakatɨ.
PHI 2:13 Kakaɨyari kanihɨkɨtɨni kemɨ'ane yamɨtiyuriene xetsata, xekuyuitɨwatɨ xemɨyuwaɨriyanikɨ, 'arike meta yaxemɨteyuriekakɨ, kemɨtixekuyuitɨwa yakatiniyɨmɨkɨ kemɨtinake.
PHI 2:14 Mɨpaɨ naimekɨ yaxeketenekahuni, xekaniukixietɨ niuki xekaxɨatɨatɨ.
PHI 2:15 Mɨpaɨ xeteyuriekaku, xehetsie pɨkarahɨiwani, xepɨka'inɨka tita 'axamɨti'ane. Matsi Kakaɨyari niwemama xekanakɨnikuni, xepɨkatsewiximarieka teɨteri watsata xe'u'uwatɨ wa'iyari mututuni memeuyexɨrie. Watsata xe'u'uwatɨ xekaniwahekɨariwiyani, kwiepa xurawetsixi kememɨtehekɨariwie wahepaɨ.
PHI 2:16 Niuki xekanexeiyani waranutanieritɨwame. 'Ayumieme 'aixɨa nekatiniyumaikamɨkɨ nexeha'eriwatɨ kepauka tukari maye'anitsie, kepauka Kɨritsitu munuanitsie. Xehetsie katinimatsiɨkɨkamɨkɨ 'ana, yakɨ xeikɨa nepɨka'utananautsakai meta kenemɨti'uximayakai yakɨ pɨkarayani.
PHI 2:17 Tsepanetɨ netukari mawari mayeitɨarie, hetsiena mieme xekateni'uximayaka, xɨka ne'umierieni mɨpaɨ yuri xemɨte'eriekakɨ, nexuriyakɨ xɨka xemawari 'uxurimarieni, mɨkɨkɨ nekaninaki'akamɨkɨ, xeme yunaitɨ kexemɨteyutemamawie, neta xehepaɨ nekaninetemawieka.
PHI 2:18 Merikɨte xemerita yaxeikɨa xekeneyutemamawieka, 'axeikɨa temɨtatemamawiekakɨ.
PHI 2:19 Ti'aitame Ketsutsi hetsie netiwiyatɨ mɨpaɨ nepɨtiku'eriwa, kwitɨwa xehetsɨa nepenunɨ'ani Timuteu, ne'iyaritsie nemɨtɨrɨkariyarienikɨ neretimaime xehepaɨtsita.
PHI 2:20 Xeime nepɨkahexeiya hepaɨna tiuka'iyarime, mɨkɨ xeikɨa 'aixɨa 'iyarikɨ kaniyu'iyaritɨaka xehetsiemieme.
PHI 2:21 Hipatɨ yunaitɨ tita wahetsie mɨtimieme xeikɨa metenikuwautɨweni, tita Kɨritsitu Ketsutsi hetsie mɨtimieme mepɨkatekuwautɨwe.
PHI 2:22 Xeme xepimate 'iya, kemɨti'inɨatsie kemɨtimatsiɨkɨ, xepɨtemate nehamatɨa kemɨti'uximaya niuki 'aixɨa manuyɨne tekuxatakaku, raniwe yupaapa hamatɨa mɨti'uximaya hepaɨ.
PHI 2:23 'Ayumieme mɨpaɨ nepɨtiku'eriwa, nepenunɨ'ani kwitɨ neretimaime kemɨtiyɨni nehepaɨtsita.
PHI 2:24 Ti'aitame hetsie netiwiyatɨ yuri nepɨti'erie kwitɨwa neta nemɨyemiekɨ.
PHI 2:25 Mɨpaɨta nekatiniku'eriwani, peuyewetse ta'iwa nemanunɨ'anikɨ xehetsɨa 'Epapɨruritu, mɨkɨ nehamatɨa katini'uximayaka, tahamatɨa tekanikuyaxitɨni. Xeme xekaneiyenɨ'ani nehetsɨa mɨnetsiparewiekakɨ kemɨreuyewekai.
PHI 2:26 Yunaime kanixexeiyamɨkɨni, kaniyuhiweriekaitɨni xemu'enanakɨ kemɨtikuyekai.
PHI 2:27 Kaniyuritɨni katinikuyekaitɨni, 'etsiwatɨkaku kaniumɨni. Matsi Kakaɨyari kanitinenimayata, yaxeikɨa neta netsinenimayatɨ, kapa nenetihiwerieme tawarita nenutuixiekakɨ.
PHI 2:28 'Ayumieme nekaninewaɨriyani nemenunɨ'anikɨ xemɨyutemamawiekakɨ xeme tawarita xe'ixeiyatɨ, neta nekanehiwerietɨ nemayanikɨ.
PHI 2:29 Hikɨri xekeneutanaki'eri Ti'aitame hetsie xemɨtewiyakɨ, waɨkawa xekeneyutemamawieka xehe'eriwatɨ. Mɨya memɨ'anene mamariwawemete xekeniwa'erieka.
PHI 2:30 Kɨritsitu hetsiemieme ti'uximayatɨ kaniumɨni tɨma. Yɨkɨmana kaniyukweriwayuriekaitɨni meye'atɨanikɨ kemɨreuyewekai xemɨnetsiparewienikekaikɨ.
PHI 3:1 Mɨkɨ meta, ne'iwama, xekeneyutemamawieka Ti'aitame hetsie xetewiyatɨ. Tawarita mɨpaɨ netixe'utɨirietɨ, nepɨnewaɨriya, niukikɨ nepɨka'uxiwe, 'aixɨa kaniyɨmɨkɨ matsi xehetsiemieme xekweriwa'anekaku.
PHI 3:2 Xekeneyukweriwayurieka mɨkɨ nemɨwaxatakai 'axamemɨteyurie wahepaɨtsita, mɨkɨ tsɨikɨri wahepaɨ memɨka'itiyatɨka, mɨkɨ wahepaɨtsita, xekeneyukweriwayurieka kememɨtexe'inɨaritɨaku xitekiyakɨ.
PHI 3:3 Tame pɨta Kakaɨyari 'inɨarieya tepexeiya, tame pɨta tepɨhɨkɨ Kakaɨyari temayexeiya 'Iyari kemaine, tame taheyemekɨ tekaninaki'aka Kɨritsitu Ketsutsi hetsie temɨtewiyakɨ, mɨkɨ meta, yuri tepɨkate'erie herie miemetsie.
PHI 3:4 Mɨkɨ kememɨ'anene herie mieme hetsie yuri memɨte'erie, neta mɨpaɨ nekani'aneni. Xɨka xewitɨ mɨpaɨ tiku'eriwani kename yɨwe herie miemetsie yuri mɨti'eriekakɨ, ne matsi waɨkawa nekaniyɨwenikeyu.
PHI 3:5 Ne'utinuiwaka 'atahairieka tukaritsie nekaniu'inɨaritɨarieni huriyutsixi waxitekiyakɨ, 'ixaheri teɨteriyari wahetsie Wenikamini nuiwariyari hetsie nekaniyeyani, hepɨrayu tewiyari nekanihɨkɨtɨni hepɨrayutsixi wahetsie nemɨyetɨa, 'inɨari niukiyaritsie kenemɨtiwiyakai, paritseu nekanihɨkɨtɨkaitɨni.
PHI 3:6 Kenemɨtinewaɨriyakai yanetikamietɨ, nekaniwataweweiyakaitɨni memɨyutixexeɨriwakai, heitserie kenemɨrexeiyakai 'inɨari niukiyaritsie yanetikamietɨ, nehetsie pɨkarahɨiwakai yemekɨ.
PHI 3:7 Perutsɨ Kɨritsitu hetsie nemɨtiwiyakɨ mɨpaɨ nepɨtinemate, mɨkɨ naime nekatiniutatɨmaiya, naime kɨmana 'aixɨa nemɨ'itɨarienikekai.
PHI 3:8 Mɨkɨ meta, tsepa kemɨtitita, naitɨ katiniutatɨmaiyarieni kenemɨtixeiya, mɨpaɨ nemɨtinematekɨ, matsi yemekɨ 'aixɨa nekani'itɨariemɨkɨ ne'imaitɨ neti'aitɨwame Kɨritsitu Ketsutsi. Mɨkɨtsie nemɨmiemekɨ 'ari naime nekatiniutatɨmaiya, tsepanetɨ, mɨkɨ naitɨ xatsi xeikɨa kanihɨkɨtɨni kenemɨtixeiya. Nekaninewaɨriyani matsi Kɨritsitu nehexeiyatɨ nemayanikɨ,
PHI 3:9 hetsiena netiwiyatɨ yanepɨtixeiyariekakeyu xeikɨa. Nekɨmana heitserie nepɨkahexeiya, 'inɨari niukiyaritsie yanetikamietɨ heitserie nepɨkanepitɨa nekɨmana. Matsi heitserie kenemɨrexeiya, Kɨritsitu hetsie yuri nemɨti'eriekɨ pɨta heitserie nekanexeiyani, Kakaɨyari heitserie kemɨnetipitɨa yuri nemɨti'eriekɨ.
PHI 3:10 Mɨpaɨ xeikɨa nepɨtinewaɨriya, nemimaikakɨ Kɨritsitu, nehetsie nemimaikakɨ tɨrɨkariyaya kɨmana manukuketɨarie, ne hamatɨana temɨtaxewinikɨ kemɨtiukwinixɨ netimaitɨ, hepaɨna ne'anetɨ nemayanikɨ mɨkɨ ke'anetɨ matɨa 'umierieka.
PHI 3:11 Nekanaye'anikeyu xeikɨa nemanukuketɨarienikɨ mɨkite watsata.
PHI 3:12 'Akuxi mɨpaɨ nepɨka'ane, 'akuxi nepɨka'aye'awe. Kɨritsitu Ketsutsi pɨnetsi'u'axixɨ, neta nemi'axenikɨ tita mɨnetimini. 'Ayumieme nepɨnemexɨitɨa, yanemɨraye'anikɨ.
PHI 3:13 Ne'iwama, ne'aye'ame nepɨkane'erie 'akuxi. Peru tsikeretsɨ mɨpaɨ nekatiniyurieneni, nekanetɨmaiya netsutɨa mieme, nekaninetatuani matsi hikɨ nemi'axenikɨ neyeta mieme.
PHI 3:14 Yanetiunanautsatɨ nepɨnemexɨitɨa neme'iwakɨ, Kakaɨyari kemɨnetiuta'ini taheima miemekɨ nemɨ'ayumiemetɨnikɨ Kɨritsitu Ketsutsi hetsie netiwiyatɨ.
PHI 3:15 Ketapaɨmetɨ temɨtsetseɨye mɨpaɨ teketeku'eriwani. Xɨka yɨkɨ xeteku'eriwani, Kakaɨyari yakatinixehekɨatɨamɨkɨ.
PHI 3:16 Ketemɨte'aye'axɨawawe, mɨpaɨ yateketekahuni.
PHI 3:17 Ne'iwama, yaxeikɨa xekenene'ɨkeni ne kenemɨtiyuriene, tame 'inɨari tekanihɨkɨtɨni, mɨkɨ tahepaɨ memɨte'u'uwa, mɨkɨ xekeniwaxeiyani.
PHI 3:18 Yumɨiretɨ kememɨte'u'uwa, mekaneye'unieka Kɨritsitu kemɨtiumierie kuruxitsie. Wahepaɨtsita mɨixa netinixekuxaxatɨwakaitɨni, hikɨta yaxeikɨa nepaine ne'utatsuatɨ.
PHI 3:19 Mɨkɨ mekanika'unariekuni xeikɨa, yuhuka mekanayexeiyani yukakaɨyari hepaɨ. Witsime'aneneme mekaniyuxatani kepauka mɨpaɨ memɨyɨa ketemɨtetewiyatsitɨarie. Kwiepa timiemekɨ xeikɨa mekatena'eriwani.
PHI 3:20 Tame pɨta muyuawitsie tekanikiekataritɨni, 'ayumieme tekanikwewieka tatsiwikweitsitɨwame Ti'aitame Ketsutsi Kɨritsitu 'umamiekɨ.
PHI 3:21 Mɨkɨ yɨkɨ 'anekame tawaiyari kaneyeitɨamɨkɨ, hikɨ tixaɨtɨ tekatehɨkɨtɨtɨ 'ikɨ tawaiyaritsie tekaniu'uwani, peru 'ana yuwaiyari hepaɨ 'anekame kaneyeitɨamɨkɨ, witsi'anetɨ kemɨtiuyeika mɨkɨ, mɨpaɨ katiniyuriemɨkɨ yɨtɨrɨkariyakɨ, mɨpaɨ titɨrɨkaɨyetɨ kaniyɨweni naime yatikamieme mayeitɨanikɨ, mɨkɨ kemɨti'aita.
PHI 4:1 'Ayumieme, ne'iwama nenaki'erima, nexexeiyamɨtɨ nemɨxenaki'erie mɨpaɨ nepɨtixekɨhɨawe, xeme xemɨnetsitemawieritɨa xepɨhɨkɨ meta nekuruna, Ti'aitame hetsie xetewiyatɨ xekakuyuitɨariwatɨ xekeneuti'uti.
PHI 4:2 Neuxei 'Euhuriya, neuxei Tsinitike, waɨriyarika nekanixepitɨanikeyu yaxeikɨa xemɨteyumaikakɨ Ti'aitame hetsie xetewiyatɨ.
PHI 4:3 'Ekɨ meta nehamatɨa yurikɨ pemɨti'uximayatame, nepɨmatsiwawirie 'ekɨ pemɨwaparewiekakɨ mɨkɨ 'ukarawetsixi, nehamatɨa 'axeikɨa tepɨtakwitɨwekai niuki 'aixɨa manuyɨne tekuxatatɨ, Kɨremeniti hamatɨa hipameta wahamatɨa nehepaɨ te'uximayatamete, mɨkɨ mepaka'utɨarie xapatsie tukari memexeiya manuyɨnetsie.
PHI 4:4 Merikɨte, yuheyemekɨ xekeneyutemamawieka Ti'aitame hetsie xetewiyatɨ. Tawarita nepaine: Xekeneyutemamawieka.
PHI 4:5 Yunaitɨ teɨteri mekexexeiyani xeka'ayu'eririyakaku. Ti'aitame 'ahurawa kaniuyeikani.
PHI 4:6 Xepɨkayu'iyaritɨaka tixaɨtɨ hepaɨtsita, matsi naimekɨ xeyunenewietɨ xe'iwawirietɨ pamɨpariyutsi xe'ipitɨatɨ, yaxeketeneutahɨawi Kakaɨyari tita xemɨte'iwawirie.
PHI 4:7 'Ana Kakaɨyari kanixepitɨakamɨkɨ yu'iyaritsie xemɨka'uximatɨariekakɨ, mɨpaɨ tixepitɨatɨ xe'iyari kani'ɨwiyakamɨkɨ, tsepa xeme 'atsixemɨkatemate kemɨtiyɨweni mi'ɨwiyanikɨ, kexemɨteyɨkɨhɨawetsie kanixe'ɨwiyakamɨkɨ Kɨritsitu Ketsutsi hetsie xetewiyakaku.
PHI 4:8 'Imatɨrieka ne'iwama, naitɨ yuri mɨraine, naitɨ mɨreuyehɨwiyarie, naitɨ mɨtiheitserie, naitɨ mɨti'itiya, naitɨ witsimɨ'ane, naitɨ 'aixɨamaine, tsepa kemɨtitita xɨka 'aixɨa 'aneni, xɨka 'aixɨa tikuxaxatsiwani, mɨkɨ hepaɨtsita yaxeketeneyɨkɨhɨaweni xeme.
PHI 4:9 Kexemɨte'u'ɨkitɨarie, kexemɨteyetuiriyarie, kexemɨnete'u'eni, kexemɨnete'uxei yanetiyurienekaku, mɨpaɨ yaxeketeneyurieka, kemɨ'ane mɨxepitɨa yu'iyaritsie xemɨka'uximatɨariekakɨ, mɨkɨ Kakaɨyari xehamatɨa kaniuyeikamɨkɨ.
PHI 4:10 Ti'aitame hetsie netiwiyatɨ waɨkawa nepɨnetemawie, tawarita xemitsutɨakɨ xenetsiha'eriwatɨ. Tsɨrikɨ xepɨnetsiha'eriwakai, matsi pumawekai xewitɨ xeme mɨyɨwekai tixaɨtɨ mɨtiyurienikɨ.
PHI 4:11 Ne nereuyehɨatɨ nepɨkahaine, nepɨ'iyamate ne'iyari 'aixɨa mɨyɨnikɨ nekɨmana, tsepanetɨ kenemɨranayemie.
PHI 4:12 Nepɨ'iyamate tixaɨtɨ nekarexeiyatɨ, meta waɨkawa nerexeiyatɨ. Naimekɨ yanepɨtimate nemɨtahuxanikɨ meta nemɨhakamɨnikɨ waɨkawa nemɨrexeiyanikɨ tixaɨtɨ nemɨkarexeiyanikɨ nepɨ'iyamate.
PHI 4:13 Naime nekatinikemaka Kɨritsitutsie netiwiyatɨ, mɨkɨ netsitɨrɨkariyakaku.
PHI 4:14 Matsi 'aixɨa xepɨte'uyuri nehamatɨa xeyuxewitɨ kenemɨti'uximatɨariekai.
PHI 4:15 Xeme, piriputari, mɨpaɨ xepɨtemate kemɨtiuyɨ kepauka niuki 'aixɨa manuyɨne mutsutɨarie kuxaxatsiwatɨ, Matseruniya kepauka nemeyetɨa, mana memɨyutixexeɨriwakai mepɨkanetsiparewiekai tuminikɨ, nemɨtinetuakakɨ meta nemɨtinanekakɨ, xeme xeikɨa xepɨnetemikwakai.
PHI 4:16 Tetsarunika paitɨ neheyeikakaku tita nemɨreuyehɨakai xepɨnetehenɨ'airi heiwa meta hutarieka.
PHI 4:17 Netikuwaunetɨ tawarita yaxemɨneteminikɨ nepɨkahaine, matsi nepɨtikuwaune tita mɨtixe'imikieri timɨiretɨ mɨrayanikɨ.
PHI 4:18 Nekanitanaki'erieniri xe'imikieri naime, kananuyuhayewani, katinaye'ani tita nemɨreuyehɨakai, 'Epapɨruritu netsi'u'ɨitɨaku tita xemɨteheyenɨ'a. Kexemɨte'uyuri, mɨkɨ 'imikieri witsimu'ɨa hepaɨ kaninaki'eriwani, mɨkɨ mawarika Kakaɨyari kaninaki'erieka.
PHI 4:19 'Ayumieme, nekakaɨyari katinixeyetuiriemɨkɨ tita naime xemɨteheuyehɨaka hepaɨtsita, waɨkawa mɨrexeiyakɨ witsiti'anenekame, mɨpaɨ kemɨtimatsiɨkɨ Kɨritsitu Ketsutsitsie.
PHI 4:20 Kakaɨyari mɨta'ukiyari witsiketikuxaxatsiwani yuheyemekɨ, tsepanetɨ xeitsienituyari wiyari manuyekɨka yaxeikɨa ketikuxaxatsiwani. Mɨpaɨ xeikɨa kani'aneni.
PHI 4:21 Xekeniwawaɨritɨaka teɨteri memɨpatsie yunaime, Kɨritsitu Ketsutsi hetsie memɨtewiya. Nehamatɨa memu'uwa ta'iwama mekanixewaɨritɨaka.
PHI 4:22 Yunaitɨ xekaniwaɨritɨarieka xemɨpatsie, meta matsi yemekɨ Tsetsaxi hetsɨa miemete te'uximayatamete.
PHI 4:23 Ti'aitame Ketsutsi Kɨritsitu 'aixɨa ketiyurieka yu'iyarikɨ. Mɨpaɨ xeikɨa kani'aneni.
COL 1:1 Ne Papuru, ta'iwa Timuteu matɨa, tekanixewaɨritɨaka, nɨ'ariekame nekanihɨkɨtɨni Kɨritsitu Ketsutsi hetsiemieme, mɨpaɨ mɨtinakekɨ Kakaɨyari,
COL 1:2 tekanixewaɨritɨaka ta'iwama yuri xemɨte'erie kurutsetari, Kakaɨyari teɨterimama xemɨhɨkɨ Kɨritsitu hetsie xetewiyatɨ, 'ipaɨ teputiyuane: Kakaɨyari mɨta'ukiyari Tati'aitɨwame Ketsutsi Kɨritsitu matɨa 'aixɨa mekete'u'iyarini xehetsiemieme, mekexepitɨaka yu'iyaritsie xemɨka'uximatɨariekakɨ.
COL 1:3 Tetanenewietɨ, taheyemekɨ xehepaɨtsita pamɨpariyutsi tekanipitɨaka Kakaɨyari, Tati'aitɨwame Ketsutsi Kɨritsitu 'ukiyarieya,
COL 1:4 tekatenimarieka yuri kexemɨte'erie Kɨritsitu Ketsutsi hetsie, kexemɨtewanaki'erie Kakaɨyari teɨterimama yunaime,
COL 1:5 mɨpaɨ xekateniyurieka 'amuwekɨ tita xehetsiemieme mɨti'ɨwiyarie taheima, yaxete'ikwewietɨ. Xeme meripai xekaniu'enanani kemɨti'ɨwiyarie, kuxaxatsiwakaku niuki 'aixɨa manuyɨne kemɨtiyuri,
COL 1:6 mɨkɨ niuki xehetsɨapaitɨ kaninuani. Naitsarie kwiepa katinitixuawerirɨmeni, kanitawerirɨmeni yaxeikɨa kemɨtiuyɨ xehetsɨa, niuki kaniutsutɨarieni 'iya tukaritsie kepauka xemu'enana, kepauka xemɨtehetima yurikɨ 'aixɨa kemɨtiuka'iyari Kakaɨyari.
COL 1:7 'Epapɨraxi kemɨtixe'uta'ɨkitɨa, mɨkɨ tahepaɨ katini'uximayatametɨni, tekaninaki'erieka, yakatinikamieni Kɨritsitu parewiwameya hɨkɨtɨtɨ xehetsiemieme.
COL 1:8 Mɨkɨ katatiniutaxatɨani kexemɨteyukanaki'erie 'Iyaritsie xetewiyatɨ.
COL 1:9 Yatetehetimaika 'anapaitɨ hikɨke, tame 'ayumieme tepɨkatehayewa tetanenewietɨ xehetsiemieme, mɨpaɨ tete'iwawirietɨ Kakaɨyari, xemɨhɨpɨnenikɨ yaxetemaitɨ tita mɨtinake Kakaɨyari, naimekɨ xetemaiwawetɨ, 'Iyaritsie timieme xetemaitɨ naimekɨ,
COL 1:10 'axemu'uwanikɨ meta kemɨreuyewetse Ti'aitame hetsɨa miemete kememɨte'u'uwa, xe'inaki'atsitɨatɨ naimekɨ. Tepiwawirie mɨtiutixuxuawerenikɨ 'aixɨa xeteyuriekaku naimekɨ, xemɨtiwawerirɨmenikɨ kexemɨte'imate Kakaɨyari.
COL 1:11 Tepiwawirie xemɨtɨrɨkariyarienikɨ, naimekɨ xetɨrɨkawitɨ, 'iya kemɨtitɨrɨkaɨye mariwetɨ, para xemɨyɨwawenikɨ xemɨte'uka'eniwanikɨ, xemɨte'ukanenewiekakɨ naime hepaɨtsita,
COL 1:12 xeyutemamawietɨ pamɨpariyutsi xemipitɨakakɨ ta'ukiyari. Mɨkɨ yɨwemete katanayeitɨani, tahetsie mɨtinakenikɨ tita Kakaɨyari teɨterimama wahetsie mɨtinakeni hekɨaripa memu'uwa.
COL 1:13 Kataniutawikweitsitɨani Kakaɨyari, yɨriya heitserie mɨkahexeiyanikɨ tahepaɨtsita. Kataniupata, kemɨ'ane mɨnaki'erie tati'aitɨwame mayanikɨ, nu'ayatɨtɨ.
COL 1:14 Mɨkɨtsie tetewiyatɨ tekaniuxɨnarieni, kemɨtareuyehɨwiri 'axatemɨte'uyurikɨ.
COL 1:15 Tepɨkayɨwawe temixeiyakɨ Kakaɨyari, peru mɨkɨ kani'ɨkitsikayatɨni, kanimexɨakametɨni heitserie hexeiyatɨ tita mɨtiunetɨarie hepaɨtsita.
COL 1:16 Hetsiena tiwiyatɨ, naitɨ katiniunetɨarieni, tita taheima mɨtimieme, tita kwiepa mɨtimieme, tita temɨtexeiya, tita temɨkatexeiya, meta mamariwawemete, mɨkɨ memɨtɨrɨkawi, te'aitamete, mɨkɨ heitserie memexeiya: mɨkɨ naitɨ katiniunetɨarieni 'iya 'inetɨaku, hetsiena mieme tiniunetɨarienita.
COL 1:17 Mɨkɨ 'akaniuyeikakaitɨni tixaɨtɨ katinetɨariewekaku 'akuxi, naitɨ katiniyuxewini mɨkɨtsie tiwiyatɨ.
COL 1:18 Mɨkɨ kanitamu'utɨni, tewi waiyarieya hepaɨ te'anenekaku, tame temɨtatixexeɨriwa. Titsutɨwame hɨkɨtɨtɨ, mɨkɨ mɨkite memanuku'uni wamexɨakame kanihɨkɨtɨni, naimekɨ mexɨakame mayanikɨ.
COL 1:19 Kakaɨyari kemɨtiyuwaɨriya, naitɨ ke'anetɨ mɨhɨkɨ Kakaɨyari, mɨkɨ Kɨritsitu hetsie 'akaniuweni.
COL 1:20 Mɨpaɨta katiniuyuwaɨriya, naime 'aixɨa mɨtiyurienikɨ Kɨritsitu yatiyurienekaku, para naitɨ 'aixɨa mɨtixeiyarienikɨ mɨkɨ kemɨtixeiya, kuruxitsie yuxuriya kemɨtiutayeuri, pipitɨa tita kwiepa mɨtimieme tita taheima mɨtimieme hamatɨana 'aixɨa memɨteyuxeiyanikɨ.
COL 1:21 Xemeta 'ana paitɨ xepɨyupatakai xaɨtsie miemete xe'ayuyeitɨatɨ, kexemɨteyɨkɨhɨawekai, xekani'uxiwe'eriekaitɨni mexi 'axaxeteyuriekai.
COL 1:22 Hikɨrixɨa 'aixɨa xetexeiyarietɨ xekanayeitɨarieni, mɨkɨ tewitɨtɨ yuwaiyaritsie mumɨkɨ, mɨpaɨ katiniuyurieni mɨxe'aye'atɨanikɨ Kakaɨyari hɨxie, hetsiena mieme xepatsiekaku, 'aixɨa xe'anenekaku, xehetsie karahɨiwakaku.
COL 1:23 Mɨpaɨ katiniyɨmɨkɨ xɨkate xeyuhayewa yuri xete'erietɨ, xetetsariya tɨrɨkaɨyekaku xehetɨa, xetseiriyarietɨ xekakuyuaximetɨ, matsi xe'ikwewietɨ tita mɨtixata niuki 'aixɨa manuyɨne. Xekani'enieni mɨkɨ niuki, kanihekɨatsieka naitsarie kemɨranetɨarie muyuawi hetɨa, ne Papuru nekaniuhɨritɨarieni hepaɨtsitana.
COL 1:24 Hikɨtsɨari ne nekaninetemawieka tsepa nemu'uximatɨarie xehetsiemieme, nekaneye'atɨani tita mɨreuyewetse nemu'uximatɨariekakɨ, Kɨritsitu kemɨtiu'uximatɨarie, newaiyaritsie mɨpaɨ nekatiniyurieneni mɨkɨ waiyarieyatsie mieme, memɨyutixexeɨriwa mehɨkɨtɨkaku.
COL 1:25 Ne waparewiwame nekanayani, Kakaɨyari kemɨnetiuhɨritɨa xehetsiemieme, 'aye'arɨkamekɨ nemikuxatanikɨ Kakaɨyari niukieya,
COL 1:26 mɨkɨ niuki kani'awietsiekaitɨni, tukari manukatɨatsie pɨkamatsiɨkɨkai, teɨteri kepauka memanutikɨ mɨpaɨ mepɨkatemaikai, matsi hikɨ matsiɨkɨtɨ kanayani, Kakaɨyari teɨterimama mɨpaɨ memɨtemaikakɨ.
COL 1:27 Kakaɨyari kaniuyuwaɨriya mɨpaɨ mɨtiwa'ɨkitɨanikɨ mɨkɨ, waɨkawamekɨ witsikemɨti'ane 'ikɨ niuki mɨ'awietsiekai, kemɨtimariwe nuiwarite watsata. Kɨritsitu xehetsie katiniwiyani, 'ayumieme xekanikwewieka witsimɨti'ane, mɨkɨ kanihɨkɨtɨni niuki mɨ'awietsiekai.
COL 1:28 Tame tekanihekɨatani Kɨritsitu, ketemɨtewaku'imaiya yunaime teɨteri, ketemɨtewa'ɨkitɨa yunaime teɨteri tetemaiwawetɨ naimekɨ, temɨwaraye'atɨanikɨ yunaime teɨteri me'aye'arɨkame Kɨritsitu hetsie metewiyame.
COL 1:29 'Ayumieme netinine'uxitɨaka, yemekɨ neti'uximayatɨ, 'iya tɨrɨkaɨyemekɨ kemɨnetikuyuitɨwa.
COL 2:1 Kaneuyeweka xemɨtemaikakɨ waɨkawa kenemɨtine'uxitɨa xehetsiemieme, rautitseyatari wahetsiemieme meta, hipameta keyupaɨmetɨ memɨkanetsixeiyawawe wahetsiemieme.
COL 2:2 Wa'iyari mɨtuikarienikɨ, memɨyutaxewirekɨ meyunaki'erietɨ, memeuka'unikɨ yemekɨ yametemaitɨ kemɨtiheitserie, memeitimanikɨ tita Kakaɨyari mɨti'awietakai, mɨkɨ Kɨritsitu kanihɨkɨtɨniri,
COL 2:3 hetsiena mɨti'awietsiekɨ naitɨ kemɨreukawe Kakaɨyari, mɨtimaiwenikɨ mɨ'ayumieme meta mɨtiuyemaikakɨ.
COL 2:4 'Ipaɨ nepaine, xewitɨ mɨkatixe'irɨwiyanikɨ witsitiuniutɨ xeikɨa.
COL 2:5 Tsepa newaiyaritsie xehetsɨa nemɨka'uyeika, ne'iyaritsie pɨta xehetsɨa nekaniuyeikani nenetemawietɨ, nexexeiyatɨ 'aixɨa xete'aitɨariekame, xetsetse'ime yuri xete'erietɨ Kɨritsitu hetsie.
COL 2:6 'Ayumieme, Ketsutsi kexemɨte'utanaki'eri Kɨritsitu Ti'aitame tɨme, yaxeikɨa hetsiena xetewiyatɨ 'axekeneu'uwani.
COL 2:7 Hetsiena xeketenewiyani kɨye kemɨtiwiya yunanayaritsie, kii kemɨtiwiya tetsariyatsie, heitseriemekɨ xekenetseiriyarieka yuri xete'erietɨ, xemɨte'u'ɨkitɨarie hepaɨ, pamɨpariyutsi xekenepitɨaka Kakaɨyari.
COL 2:8 Xekeneyukweriwayurieka kapa xewitɨ xe'unawanikɨ, timaiweme hepaɨ tikuxatatɨ, yakɨ xeikɨa tixe'irɨwiyatɨ teɨteri wayeiyarikɨ, hekwamekɨ kwiepa memɨtama kememɨte'ɨkitɨarie, peru Kɨritsitu kemaine katikuxatatɨ.
COL 2:9 Mɨkɨ waiyarieyatsie 'akaniuweni naitɨ ke'anetɨ mɨhɨkɨ Kakaɨyari.
COL 2:10 Xemeta hetsiena xetewiyatɨ xekanaye'atɨarieni, yunaitɨ memɨte'aita heitserie memexeiya kaniwamu'utɨni.
COL 2:11 Hetsiena xetewiyatɨ xekaniu'inɨaritɨarieni mɨyatɨniketɨ, peru mamá kemɨtiyuxiteke pɨkatixaɨ, Kɨritsitu pɨta kemɨtixe'u'inɨaritɨa, kanixe'upitɨani xemɨtehayewakɨ yaxeteyurietɨ teɨteri wawaiyari kemɨtiwakuyuitɨwa.
COL 2:12 Xeme xepu'inɨaritɨarie kepauka xemuka'ɨyarie hamatɨana xemukateukie. Mɨkɨ meta, kepauka xemuka'ɨyarie, xekananuku'uitɨarieni yuri xete'erietɨ Kakaɨyari tɨrɨkariyayatsie, yaxeikɨa kemɨrenukuketɨa Kɨritsitu mɨkite watsata.
COL 2:13 Tsepa xemɨmɨkitetɨkai xeheuyexɨrɨwetɨ xeka'inɨaritɨariewawetɨ kexemɨteteɨteri, mɨkɨ kanixe'anutanieritɨani Kɨritsitu mame, katatineuyehɨwirieni naime ketemɨteheuyexɨrɨwekai.
COL 2:14 Ketemɨte'ataka'utɨa yakɨtɨtɨ 'aitɨarikatsie yatemɨtekahunikɨ, mɨkɨ 'utɨarika hixɨapa 'uwetɨ kemɨtatika'unakekai, Kɨritsitu kaneyeitɨani heihurieka yakɨtɨtɨ, yukuruxitsie 'ikɨrapuximaka.
COL 2:15 'Ixuriki mɨye'i hepaɨ kaniwarewiwieni mɨkɨ memɨte'aita heitserie memexeiya, wahekɨatɨatɨ yunaime wahɨxie, kuruxitsie 'uyewietɨ, kaniwarehapani yu'utɨma, wara'iwaka.
COL 2:16 Xewitɨ 'ayumieme pɨkaxexanetani tita xemɨtekwa'akɨ meta tita xemɨte'iekɨ, xemiwewiekɨ 'ixɨarari, yatɨni metsa mɨhekwa 'ixɨarariyari, yatɨni 'uxipiya tukari kexemɨkate'iwewiekɨ.
COL 2:17 Mɨkɨ tita 'umɨramie 'etɨriyaya katinihɨkɨtɨni, peru kemɨ'ane 'umamie, Kɨritsitu kanihɨkɨtɨni.
COL 2:18 Xewitɨ pɨkaxetawe'erieka, tsepa 'iya mɨyuwaɨriya tixaɨtɨ karayuyeitɨatɨ, tsepa mɨyuwaɨriya mɨwarayexeiyanikɨ Kakaɨyari niuki tuayametemama, tsepa waɨkawa mɨyu'iyaritɨa yuheinɨtsi hepaɨtsita. Kemɨ'ane mɨya mɨ'ane kaniyuta'ɨreni, tita waiyarieyatsie mɨtimieme xeikɨa kana'eriwani,
COL 2:19 tamu'utsie katiwiyatɨ. Peru mɨkɨ tamu'utɨtɨ kanihɨkɨtɨni kemɨ'ane mɨtimikwa yuwaiyari, turuyarikɨ tatayarikɨ kanitaxewiriyani yuwaiyari mɨtawerekɨ, Kakaɨyari kemɨtiweriya.
COL 2:20 Merikɨte, Kɨritsitu matɨa xɨka xe'ukwini, para tawari xemɨkakuyuitɨarienikɨ hehekwamete kwiepa memɨtama kememɨte'ɨkitɨarie, ¿titayari 'aumɨ 'axete'u'uwa kwiepa memɨtama kememɨtexe'aitɨa:
COL 2:21 «Tixaɨ pepɨka'ikumaɨwani 'ikɨ, pepɨka'ikwaka 'iya, pepɨka'imayɨani 'ikɨ»?
COL 2:22 Mɨkɨ 'aitsikate naitɨ teɨteri kememɨte'aita kememɨte'ɨkita kanihɨkɨtɨni, mɨkɨ naitɨ katinitixɨmɨkɨ tikumayɨiwatɨ.
COL 2:23 Kememɨteyurie, timaiweme niukieya hepaɨ katini'eniɨriɨkɨni, kememɨteyumaiwe'erie, tiku'itawatɨ tixaɨtɨ mɨkarayuyeitɨa, karima kememiyurie yuwaiyari. Peru kememɨteyurie, tixaɨtɨ pɨkatiyunaki'erie wai tita mɨreuhiwe'erie hepaɨtsita.
COL 3:1 Xɨka Kɨritsitu matɨa xe'anuku'uitɨarieni, taheima timiemekɨ xekeneyuwaɨriyani, hakewa meka Kɨritsitu, Kakaɨyari tserieta 'akaitɨ.
COL 3:2 Taheima timiemekɨ xekeneyu'iyaritɨaka, kwiepa timiemekɨ pɨkatixaɨ.
COL 3:3 Xeme xekaniukwiniri, kexemɨte'ayeneniere, xekani'awietsieka Kɨritsitu hamatɨa, Kakaɨyari hetsie xemɨtewiyakɨ.
COL 3:4 Kɨritsitu kanitatukaritɨni, kepauka matsiɨkɨtɨ mayani, 'anata xeme hamatɨana xematsiɨkɨtɨ xekanakɨnikuni witsimɨraku'anetsie.
COL 3:5 'Ayumieme mɨkite xekenayuyeitɨaka kexemɨtekumaɨwakai yuwaiyaritsie kwiepa timiemekɨ: xepɨka'ikumaɨwani kemɨ'ane mɨkaxe'ɨya mɨkaxekɨna, xepɨkateyukahiwe'erieka, xepɨkatehiwe'erieka tita 'aixɨa mɨkati'anene, tita mɨkatixepini, kemɨ'ane mɨtihiwe'erie tita mɨkatipinieya tetexi muwarayexeiya hepaɨ kaniyɨanemɨkɨ.
COL 3:6 Mɨpaɨ memɨteyuriekɨ, 'ayumieme Kakaɨyari haxɨa kaniwapitɨamɨkɨ mɨkɨ yamemɨkatekahu.
COL 3:7 Xemeri kepauka mɨpaɨ xeteyurietɨ 'axemu'uwakai 'anapaitɨ, yaxeikɨa xekateniyuriekaitɨni kememɨte'u'uwa.
COL 3:8 Peru hikɨ matsi xeketeneuhayewa 'ikɨta naime: kexemɨteyuka'uxiwe'eriekai, kexemɨteyuhaxɨatɨakai, 'axakexemɨteyuriekukai, 'axakexemutiyuanekai hipame wahepaɨtsita, niuki 'axamanuyɨne kexemɨtexɨatɨakai yutetakɨ.
COL 3:9 Xepɨkateyu'itaiyani, xekenehɨwa mɨkɨ tewi mɨye'i, xekahe'eriwatɨ kexemɨteyuriekai meripaitɨ.
COL 3:10 Mɨhekwa pɨta xekenanakatɨki, xehekwariyarieximetɨ yemekɨ kexemɨteyurie hikɨ, xemimaikakɨ Kakaɨyari, mɨxe'utawewi hepaɨ xe'anenetɨ xemakɨnekɨ.
COL 3:11 'Iyatsie tiwiyatɨ tsepanetɨ mɨkɨriyeku, mɨhuriyu, tsepa mu'inɨatsie huriyutsixi waxitekiyakɨ, tsepa mɨka'u'inɨatsie, tsepa 'ateewa kiekatari, tsepa waɨriyarika mɨti'uximaya, tsepa mɨyunɨ'a, Kɨritsitu naitɨ kanihɨkɨtɨni, yunaime wahetsie katiniwiyani.
COL 3:12 'Ayumieme nepaine, Kakaɨyari mɨxe'anuyexeikɨ, teɨterimama xemɨhɨkɨkɨ, xemɨnaki'eriwakɨ, xeteyukanenimayatɨ xekenakɨni yu'iyaritsie, mɨhekwa xe'anakatɨtɨ, 'aixɨa xeketeneu'iyarini, xepɨkateyukatawe'erieka, xeketeneuyukanaki'erieka meta 'axeketeneutewini xekaha'atɨ.
COL 3:13 Xekeneyunewieka, xeketeneuyuyehɨwirieka xɨka xewitɨ 'itaniukimani xeime. Ti'aitame kemɨtixeheuyehɨwiri, xemeta hepaɨna xekeneyɨaka.
COL 3:14 Xe'ixewiriyatɨ naime, xeketeneyukanaki'erieka, mɨkɨ kanihɨkɨtɨni xemuyuxewiriyanikɨ mɨ'ayumieme.
COL 3:15 Kɨritsitu kemɨtixepitɨa yu'iyaritsie xemɨka'uximatɨariekakɨ, ketixe'aitɨaka xe'iyaritsie, xekaniuta'inierieni yu'iyaritsie xemɨka'uximatɨariekakɨ, xeiwaiyari xemɨhɨkɨkɨ. Mɨkɨ meta, pamɨpariyutsi teyupitɨwamete xekenakɨni.
COL 3:16 Kɨritsitu niukieya xehetsie keheyekani waɨkawa, naimekɨ xetemaiwawekaku: Mɨkɨkɨ xeketeneyɨ'ɨkitɨaka meta xekeneyutuikani, Kakaɨyari kwikarieyakɨ, nɨawari Kakaɨyari hepaɨtsita manuyɨnekɨ, kwikari 'Iyaritsie timieme hepaɨtsita manuyɨnekɨ xeteyɨkɨhɨawetɨ, xekeneutikwikani, yu'iyaritsie xe'inɨawatɨ Kakaɨyari, pamɨpariyutsi xe'ipitɨatɨ.
COL 3:17 Naime tsepa tita xemɨteyurie, tsepa xemutiniuka tsepa xemɨtekumaɨwa, naime xeketeneyurieka Ti'aitame Ketsutsi hetsɨa xemiemetetɨtɨ, mɨkɨ xeparewiekaku, pamɨpariyutsi xekenepitɨaka Kakaɨyari mɨta'ukiyari.
COL 3:18 'Ukari xekeniwareu'enieka yɨkɨnama, kemɨreuyewetse Ti'aitame hetsie xetewiyatɨ.
COL 3:19 'Ukitsi meta, xekeniwanaki'erieka yɨ'ɨitama, 'axaxepɨkatewakɨhɨaweni.
COL 3:20 Tɨɨri meta, yaxeketenekahuni naime kememɨtexekɨhɨawe xepaapama, mɨpaɨ pɨreuyewetse, mɨpaɨ xeteyuriekaku kaninaki'aka Ti'aitame.
COL 3:21 Xeme meta xemɨwapaapama, xepɨkawahaxɨatɨaka yuniwema, kapa me'utiwaɨripienikɨ.
COL 3:22 Xeme waɨriyarika te'uximayatamete, yaxeketenekahuni naime kememɨtexe'aitɨa xekutsiyarima kwiepa memɨtama. Wahɨxie xeikɨa yaxepɨkateyurieka xewanaki'atsitɨanike teɨteri, 'aixɨa 'iyarikɨ pɨta xeketene'uximayaka Ti'aitame xe'ayemakatɨ.
COL 3:23 Tsepa tita xemɨteyurie, yu'iyarikɨ yaxeketeneyurieka Ti'aitame hetsiemieme, teɨteri wahetsiemieme pɨkatixaɨ,
COL 3:24 mɨpaɨ xetemaitɨ Ti'aitame pɨxetipitɨani tita xehetsie mɨtinakenikɨ. Xeme Kɨritsitu hetsiemieme xekateni'uximayaka Ti'aitame.
COL 3:25 Kemɨ'ane 'axamɨtiuyuri mɨkɨ 'axamɨti'anekɨ katinakapitɨariemɨkɨ kemɨtiuyuri, Kakaɨyari yɨkɨ pɨkatiwaxeiya yunaime teɨteri.
COL 4:1 Xemeta xemɨwakutsiyarima, kemɨtiheitserie xeketeniwapitɨaka te'uximayatamete, yaxeikɨa xewayurietɨ, mɨpaɨ xetemaitɨ, xemeta taheima xemeixeiyakɨ yukutsiyari.
COL 4:2 Xepɨkatehayewani xeyunenewietɨ: nenewierikɨ xekenayeneniereni, pamɨpariyutsi xe'ipitɨatɨ.
COL 4:3 Kepauka xemɨyunenewie, tahetsiemiemeta xekeneyunenewieka, Kakaɨyari kitenie mɨreuyepienikɨ tahetsiemieme, niuki temɨkuxatanikɨ, tita mɨti'awietsiekai Kɨritsitu hepaɨtsita temɨtekuxatanikɨ, mɨpaɨ nemɨtiyurienekɨ nepanutahɨiya hikɨ.
COL 4:4 Xekeneyunenewieka nemihekɨatanikɨ tita mɨti'awietsiekai, kemɨreuyewetse yanemɨtikuxatanikɨ.
COL 4:5 Xetemaiwawetɨ xekeneyɨaka yuri memɨkate'erie xewakɨhɨawetɨ, kepauka xemɨyɨwawe 'aixɨa xemɨteyurienikɨ, yemekɨ mɨpaɨ xeketeneuyuri.
COL 4:6 Kexemɨtekuxata, 'aixɨa xete'u'iyaritɨ xeketenekuxatani 'aixɨa ha'anemekɨ, xeniuki kahamurimekɨ. 'Ana mɨpaɨ xepɨyɨwaweni kehepaɨ 'aixɨa mɨyɨni xemɨwata'eiyakɨ yuxexuime.
COL 4:7 Naime kenemɨtiuyuri katinixetaxatɨamɨkɨ Tikiku, mɨkɨ kanita'iwatɨni teminaki'erie, tiparewiwame yamɨtikamie kanihɨkɨtɨni, tahepaɨ katini'uximayaka Ti'aitame hetsiemieme.
COL 4:8 Xemɨtemaikakɨ tahepaɨtsita, xe'iyari mutuikarienikɨ, 'ayumieme nekanenunɨ'amɨkɨ xehetsɨa,
COL 4:9 'Unetsimu mame, mɨkɨta kanita'iwatɨni teminaki'erie, yakatinikamieni, xehetsɨa miemetɨtɨ. 'Ena kemɨtiyɨane naime mekatenixetaxatɨakuni.
COL 4:10 Kanixewaɨritɨaka 'Aritsitariku nehepaɨ muwiyarie, Marikuxi Werunawe 'iwaya yatewa pɨxewaɨritɨa. Xepɨte'aitɨarie hepaɨtsitana, xɨka xehetsɨa nuani, xekeneutanaki'eri.
COL 4:11 Ketsutsi meta Kutsitu mɨtitewa kanixewaɨritɨaka, huriyutsixi watsata 'ikɨ xeikɨa nehamatɨa mekateni'uximayaka Kakaɨyari 'ena ti'aitatɨ mayanikɨ, mekaneninɨtɨaka nemɨnewaɨriyanikɨ mɨkɨ.
COL 4:12 'Epapɨraxi xehetsɨa mɨmieme kanixewaɨritɨaka, Kɨritsitu Ketsutsi hetsiemieme ti'uximayatɨ, yuheyemekɨ xehetsiemieme katiniyu'uxitɨaka yunenewietɨ, mɨpaɨ 'utaitɨ, xemɨkakuyuitɨarienikɨ xe'aye'atɨ, yemekɨ xeyuwaɨriyatɨ naimekɨ kemɨtinake Kakaɨyari.
COL 4:13 Nekanihekɨatanikeyu ka'uxetɨ kemɨti'uximaya xehetsiemieme, rautitseyatari wahetsiemieme meta hierapuritari wahetsiemieme.
COL 4:14 Rukaxi kanixewaɨritɨaka tiyu'uayemawame neminaki'erie, Remaxi meta pɨxewaɨritɨa.
COL 4:15 Xekeniwawaɨritɨaka 'iwamarixi rautitseyatari, metatsiere Nimɨpatsi meta mɨkɨ memɨyutixexeɨriwa kiitana yunaime.
COL 4:16 Kepauka 'ikɨ xapa mɨtiterɨwarieni xehɨxie, xekeniwaruhuritɨa rautitseyatari memɨyutixexeɨriwa mɨkɨta memititerɨwanikɨ, meta xeme Rautitseya mieme xapa xekeneutiterɨwa.
COL 4:17 'Ipaɨ xeketeneutahɨawi 'Arukipu, kene'akweriwayurieka pemeye'atɨanikɨ 'ahɨritɨarika, kepemɨtiuhɨritɨarie Ti'aitame hetsie petiwiyatɨ.
COL 4:18 Ne Papuru nemamakɨ neti'utɨatɨ nekanixewaɨritɨaka. Xekenena'eriwani kenemɨranutahɨiya. 'Aixɨa ketiuka'iyarini xehetsiemieme.
1TH 1:1 Papuru, Tsiriwanu meta Timuteu, tekanixewaɨritɨaka xemɨyutixexeɨriwa tetsarunikatari Kakaɨyari mɨta'ukiyaritsie xetewiyatɨ, Ti'aitame Ketsutsi Kɨritsitu hetsieta xetewiyatɨ: 'Aixɨa mekete'u'iyarini xehetsiemieme, mekexepitɨaka yu'iyaritsie xemɨka'uximatɨariekakɨ.
1TH 1:2 Taheyemekɨ pamɨpariyutsi tekanipitɨaka Kakaɨyari yunaime xehetsiemieme, texehaxaxatatɨ kepauka temɨtatinenewiwa.
1TH 1:3 Tekatehayewatɨ yatetena'eriwani kexemɨteyurie yuri xete'erietɨ, kexemɨte'uximaya xeteyukanaki'erietɨ, kexemɨte'uka'eniwa xe'ikwewietɨ Tati'aitɨwame Ketsutsi Kɨritsitu, takakaɨyari ta'ukiyari hɨxie.
1TH 1:4 Neuxei ne'iwama Kakaɨyari mɨxenaki'erie, tepɨtemate mɨkɨ pɨxe'anayexei,
1TH 1:5 mɨpaɨ tepɨtemate taniuki 'aixɨa manuyɨne xehetsɨa pɨkanua niukikɨ xeikɨa, matsi meta tɨrɨkariyakɨ punua, 'Iyari Mɨtiyupatakɨ punua, yurikɨ tetetamaikaku punua. Xeme xepɨtemate xetsata ketemɨ'anenekai xehetsiemieme.
1TH 1:6 Xeme xetatsi'ɨketɨ xenakɨne, Ti'aitame meta xe'ɨketɨ xepakɨ, xepitanaki'eri niuki waɨkawa xe'uximatɨarietɨwetɨ, xeyutemamawietɨ tsiepɨre 'Iyari Mɨtiyupata kemɨtixetemawieriya.
1TH 1:7 Mɨpaɨ xeyɨatɨ 'ɨkitsika xekanakɨne yunaime yuri memɨte'erie Matseruniya meta 'Akaiya kiekatari wahetsiemieme.
1TH 1:8 Xehetsɨa putiraurɨka Ti'aitame niukieya, Kakaɨyari hetsie yuri kexemɨte'erie xeme, Matseruniyatsie 'Akaiyatsie xeikɨa pɨkatikuxaxatsiwa, matsi naitsarie katinikuxaxatsiwani, 'ayumieme tixaɨri pɨkareuyewetse tame temɨtiniunikɨ.
1TH 1:9 Mɨkɨtɨtɨ tahepaɨtsita mekatenikuxatani ketɨtɨ reyɨ kepauka tame xehetsɨa temeta'axɨa, kereyɨ kepauka xemɨte'uhayewaxɨ, kepauka Kakaɨyari hetsie xemɨte'uwiyaxɨ kakaɨyarixi xewaruku'eirieka, xemɨte'uximayakakɨ Kakaɨyari mayeyuri yurikɨ 'amuyeika hetsiemieme,
1TH 1:10 xemikwewiekakɨ Nu'aya taheima makaneni, Kakaɨyari yuniwe manukuketɨa mɨkite watsata, Ketsutsi kanihɨkɨtɨni kemɨ'ane mɨtatsi'utawikweitsitɨa haxɨa maye'axime mɨkatatsi'axekɨ.
1TH 2:1 Neuxei 'iwamarixi, xeme mɨpaɨ xepɨtemate xɨanakɨa tepɨka'anukɨ kepauka xehetsɨa temu'axɨa.
1TH 2:2 Meta xepɨtemate, tsepa temɨte'ukwinixɨ xehetsɨa tekata'axɨawawetɨ 'akuxi, tsepa 'axatemɨtekɨhɨawarɨwakai Piriputsie, takakaɨyari hetsie tetewiyatɨ tepɨkamamakai, 'ayumieme tekanixe'utaxatɨani Kakaɨyari niukieya 'aixɨa manuyɨne waɨkawa te'uximatɨarietɨ.
1TH 2:3 Ketemɨtexetuika, temeuyexɨrɨwekɨ temɨka'itiyatɨkakɨ tepɨkatekuxata meta xeime tete'itaiyakutɨ hawaikɨ.
1TH 2:4 Matsi, Kakaɨyari kemɨtatiuta'inɨataxɨ temɨhɨritɨariekakɨ niuki 'aixɨa manuyɨne hepaɨtsita, mɨpaɨ pɨta tekatenikuxatani. Teɨteri tewatemawieritɨakutɨ tepɨkatekuxata, kemɨ'ane ta'iyari makumate tetemawieritɨakutɨ tekatenikuxatani pɨta Kakaɨyari.
1TH 2:5 Tame hatsuaku witsitete'uniutɨ 'irɨmarikɨ tepɨkayɨakai, kexemɨtemate xeme, tixaɨ tepɨkatehiwe'eriekai 'awie, Kakaɨyari munierixɨ yakatinihekɨatani.
1TH 2:6 Tepɨkatekuwautɨwekai teɨteri tahepaɨtsita 'aixɨa memutiyuanenikɨ, nixeme nihipatɨ.
1TH 2:7 Tsepa temɨyɨwawekai waɨriyarika temɨxepitɨanikɨ Kɨritsitu nɨ'arimama temɨhɨkɨkɨ, matsitsɨari xetsata tepɨyɨakai karima tekateyurietɨ, tsitsiwame yuniwema mɨwaweriya hepaɨ tekaniyɨakaitɨni.
1TH 2:8 Tame yaxeikɨa texehiwe'erietɨ tenitawaɨriyakaitɨni temɨxeyetuirienikɨ Kakaɨyari niukieya 'aixɨa manuyɨne, matsitsɨ 'akuxi tenitawaɨriyakaitɨni temɨxeyetuirienikɨta ta'iyari, waɨkawa texenaki'erietɨ tekanakɨne.
1TH 2:9 'Iwamarixi, xekana'eriwani ketemɨte'uximayakai, tukarikɨ tɨkarikɨ ketemɨte'uximayakai nixeime temɨkate'uxitɨakakɨ, mɨpaɨ tetenixekuxaxatɨwakaitɨni Kakaɨyari niukieya 'aixɨa manuyɨne.
1TH 2:10 Xeme meta Kakaɨyari xemunenierixɨ xekatenihekɨatani ketemɨyɨakai xeme yuri xemɨte'erie xehetsiemieme, Kakaɨyari hetsiemieme yatetekahutɨ, heitseriemekɨ teteyurietɨ, tahetsie karahɨiwakaku.
1TH 2:11 Mɨpaɨta yaxeikɨa xekatenimaika ketemɨtexetuikakai, nuariekame yuniwema mɨwatuika hepaɨ, texetuikatɨ texe'imaiyatɨ yuxexuime,
1TH 2:12 texehɨritɨatɨ 'axemu'uwanikɨ kemɨreuyewetse 'amuyeikanikɨ Kakaɨyari hetsiemieme, mɨkɨ kanixe'inieka 'axemu'uwanikɨ 'iya tixe'aitɨakaku, mɨxe'inie witsixe'anenetɨ xemayeitɨarienikɨ hepaɨna.
1TH 2:13 'Ayumieme tameta tekatehayewatɨ pamɨpariyutsi tekanipitɨaka Kakaɨyari 'ikɨkɨ, kepauka xemitanaki'eri Kakaɨyari niukieya xetatsi'u'enieka, teɨteri waniuki xe'erietɨ xemɨka'itanaki'erikɨ, yurikɨ Kakaɨyari niukieya kemɨtihɨkɨ pɨta xemitanaki'erikɨ, mɨkɨ kanixekuyuitɨwani xeme yuri xemɨte'erie.
1TH 2:14 Xeme 'iwamarixi, te'ɨkemete xenakɨne xewa'ɨketɨ mɨkɨ Kakaɨyari hetsiemieme memɨyutixexeɨriwa Kureya kwieyaritsie Ketsutsi Kɨritsitu hetsie memɨtewiya, xekateniukwine xeteɨterima mexe'uximatɨakaku, yaxeikɨa huriyutsixi memɨwa'uximatɨakai hepaɨ mɨkɨ 'iwamarixi.
1TH 2:15 Huriyutsixi Ti'aitame mekaniumieni Ketsutsi meta mekaniwarukwini Kakaɨyari niukametemama, meta tame mepɨtatsi'ayewei. Kakaɨyari mepɨkanaki'aritɨa mepɨwaraye'unie yunaime teɨteri,
1TH 2:16 mepɨkatatsitaunie temɨtewakuxaxatɨwani mɨkɨ memɨkahuriyutsixi memɨtawikweitsitɨarienikɨ. Mɨpaɨ mekateniuyurieni yuheyemekɨ memeye'atɨanikɨ tita 'axamemɨteyurie. Peru 'imatɨrieka haxɨa niwaru'axixɨani mɨkɨ.
1TH 2:17 'Iwamarixi, tame tsepa yapaɨmexɨa temɨxenutuita xehamatɨa temɨka'u'uwa, peru ta'iyaritsie tepɨxeha'eriwa, matsi kwini mieme tenitamexɨitɨakaitɨni temixeiyakɨ xenierika, waɨkawa texehiwe'erietɨ.
1TH 2:18 'Ayumieme xehetsɨa tepeukɨnikukai ―ne Papuru heiwari tawarita nepeuyeimɨkɨkai―, peru Kauyumarie pɨkatatsi'upitɨa.
1TH 2:19 ¿Tita tetekwewie, titakɨ teteyutemamawie, kuruna kɨmana temutati'ɨre Tati'aitɨwame Ketsutsi hɨxie kepauka munuani? ¿Xemeri xekatehɨkɨ?
1TH 2:20 Xeme xekɨmana witsitekatenixeiyarieka, xeme xekatanitemawieritɨaka.
1TH 3:1 'Ayumieme, kepauka temɨkayɨwawekairi texexeiyakutɨ, 'aixɨa tetenitamaikaitɨni 'Atenaxi temɨku'eiriwakɨ taxaɨta.
1TH 3:2 Timuteu tekanetanɨ'ani, mɨkɨ kanita'iwatɨni, Kakaɨyari kaniparewiwameyatɨni, tahamatɨa katini'uximayaka niuki Kɨritsitu hepaɨtsita 'aixɨa manuyɨne kuxatatɨ, tekaneinɨ'ani mɨxetseiriyanikɨ mɨxewaɨriyanikɨ yuri xemɨte'eriekakɨ 'aixɨa,
1TH 3:3 nixewitɨ mɨkakunuitɨarienikɨ xe'uximatɨariekaku hikɨ. Xemetɨtɨ mɨpaɨ xepɨtemate, tepukayatsarie 'uximatɨarikakɨ,
1TH 3:4 xehetsɨa te'u'uwatɨ yakatiyɨwekaku 'akuxi, mɨpaɨ tetenixe'utahɨawe kename te'uximatɨariekakekai. Mɨpaɨ katiniuyɨni, mɨpaɨ xekatenimaika xeme.
1TH 3:5 Netsɨ 'ayumieme, nekayɨwetɨri nepɨretanɨ'a yanemɨretimanikɨ yuri kexemɨte'erie, kapa tiyu'itsipawame xehehapani 'axaxemɨteyurienikɨ netiku'eriwatɨ, nɨka yakɨ xeikɨa 'ayani tete'uta'uxitɨaku netiku'eriwatɨ.
1TH 3:6 Hikɨrixɨa Timuteu xehetsɨa heyeyaka tahetsɨa kaninuani, 'aixɨa katatiniutahekɨatɨani yuri kexemɨte'erie, kexemɨteyukanaki'erie, 'aixɨa kexemɨtateku'eriwa yuheyemekɨ xetatsixeiyakutɨ tame temɨxexeiyaku hepaɨ.
1TH 3:7 'Ayumieme tekaniutuikarieni xehepaɨtsita yuri xemɨte'eriekɨ 'iwamarixi, tsepa temɨteheuyehɨwa temɨ'uximatɨarie naimekɨ.
1TH 3:8 Hikɨtsɨari tekanayeneniereni, yatetehetimaika kename xeme Ti'aitame hetsie xetewiyatɨ 'axeti'u.
1TH 3:9 ¿Keri teteyɨwawe temɨtehepinirieni Kakaɨyari pamɨpariyutsi te'ipitɨatɨ xehepaɨtsita, temawierika xemɨtatsi'upitɨakɨ waɨkawame takakaɨyari hɨxie?
1TH 3:10 Tukarikɨ tɨkarikɨ panuyuhayewa ta'iwaurika, te'iwawiriekaku temixeiyakɨ xenierika, temɨxe'aye'atɨirienikɨ tita mɨreuyewetse yuri xete'eriekaku.
1TH 3:11 Mɨkɨtɨtɨ Kakaɨyari mɨta'ukiyari, Ketsutsi mɨtati'aitɨwame, 'aixɨa ke'iyurieni tahuye xehetsɨa temeta'axɨanikɨ.
1TH 3:12 Xemeta xɨka Ti'aitame xeheweriyani xeteyukanaki'eriekaku, xenaki'eriya manuyuhayewanikɨ xeyunaki'eriekaku yunaitɨ, xewanaki'eriekaku yunaime, yaxeikɨa ketemɨtexenaki'erie.
1TH 3:13 Mɨpaɨ xeyɨakaku xe'iyari kanitɨrɨkariyariemɨkɨ, xehetsie karahɨiwakaku, xemeta Kakaɨyari hetsiemieme xepatsieyu Kakaɨyari mɨta'ukiyari hɨxie, kepauka munuani Tati'aitɨwame Ketsutsi yunaime Kakaɨyari hetsɨa miemete wahamatɨa.
1TH 4:1 'Imatɨrieka ta'iwama tepɨxewawirie, Tati'aitɨwame Ketsutsi hetsɨa temiemetetɨtɨ tepɨxetuika 'axemu'uwanikɨ kexemɨtehetima tame tetexekuxaxatɨwakaku kemɨreuyewetse 'axemu'uwanikɨ xeminaki'aritɨanikɨ Kakaɨyari, mɨpaɨtɨtɨ kwini mieme yaxemɨte'u'uwanikɨ, yaxemɨte'u'uwa hepaɨ.
1TH 4:2 Xeme xepɨtemate ketemɨtexe'uta'aitɨa Ti'aitame Ketsutsi tatsiparewiekaku.
1TH 4:3 'Ipaɨ pɨtinake Kakaɨyari hetsiena mieme xemɨpatsienikɨ, 'ayumieme xepɨkawakumaɨwani kemɨ'ane mɨkayɨ'ɨya mɨkayɨkɨna,
1TH 4:4 xeme yuxexuitɨ xeketenemaika xemɨwarawitɨkɨnikɨ yu'ɨitama, Kakaɨyari hetsiemieme xepatsietɨ, we'eme xe'erietɨ,
1TH 4:5 xekateyukahiwe'erietɨ kemɨtixenake xeikɨa, nuiwarite Kakaɨyari memɨkamate wahepaɨ.
1TH 4:6 Xepɨka'anuyehaitɨrɨweni, xepɨka'ikwamana yu'iwa kexemɨteyurie. Ti'aitame 'apɨrapika mɨkɨ naimekɨ, meripai ketemɨtexe'utahɨawixɨ, ketemɨtexekuhekɨatsitɨiya.
1TH 4:7 Kakaɨyari pɨkatatsi'uta'ini teka'itiyatɨkaitɨ temakɨnekɨ, hetsiena mieme temɨpatsienikɨ pɨta pɨtatsi'uta'ini.
1TH 4:8 'Ayumieme, kemɨ'ane mixani'erie 'ikɨ tewi pɨkaxani'erie, matsi Kakaɨyari pɨta pɨxani'erie, kemɨ'ane mɨtatimikwa Yu'iyari Mɨtiyupata.
1TH 4:9 Xeme tixaɨ xepɨkateheuyehɨwa nemɨtixeta'utɨirienikɨ tewi kemɨtiwanaki'erie yu'iwama ne'utaitɨ, Kakaɨyari katinixe'ɨkitɨaka xeme xemɨyunaki'eriekakɨ.
1TH 4:10 Mɨpaɨ xekateniwanaki'erieka yunaime yu'iwama naitsarie Matseruniyatsie memɨtama. Peru 'iwamarixi, tekanixewawirieka mɨpaɨ xemɨteyunaki'eriekakɨ 'akuxi matsi waɨkawa,
1TH 4:11 waɨkawa xemɨtekuwaunikɨ kayuwatɨ xemexeiyanikɨ, yuxexuitɨ yu'uximayatsikakɨ xemɨyɨakakɨ, yumamakɨ xemɨte'uximayakakɨ ketemɨtexe'uta'aitɨa,
1TH 4:12 mɨpaɨ xeteyurietɨ 'aixɨa xeteniu'uwakuni kemɨreuyewetse mɨkɨ wanamemɨku'u wahepaɨtsita, tixaɨ xepɨkateheuyehɨaka.
1TH 4:13 'Iwamarixi, pɨkatatsinake 'atsixemɨkatemaika mɨkɨ memɨkutsu wahepaɨtsita, pɨkatatsinake xemɨyuheiwerieka hipatɨ yuri memɨkate'erie memɨkata'ikwewa wahepaɨ.
1TH 4:14 Tame yuri tekateni'erieka Ketsutsi mumɨ peru manukuke. 'Ayumieme Kakaɨyari yaxeikɨa kaniwa'atɨamɨkɨ Ketsutsi mame mɨkɨ memeukutsixɨa Ketsutsi hetsie metewiyatɨ.
1TH 4:15 'Ipaɨ tetenixekɨhɨaweni Ti'aitame niukieya mɨhɨkɨkɨ, tame temɨtahayewa te'ayeyuyuritɨ 'akuxi Ti'aitame munuanike, tame tepɨkawaranuyehaitɨiyaxɨani mɨkɨ memeukutsixɨa.
1TH 4:16 Mɨkɨ Ti'aitame taheima pakaneni 'utaniutɨ ti'aitatɨ, niuki tuayamete tiwa'aitɨwame 'utaniukakaku, Kakaɨyari kuxinetaya hɨtsiriekaku, mɨkɨ memeukutsixɨa Kɨritsitu hetsie metewiyatɨ mekananuku'uikuni meri.
1TH 4:17 Hikɨ tameta temayeyuyuri, temɨtahayewatɨweni, 'ana kwitɨ tekananutiwitɨkiekuni wahamatɨa 'axeikɨa haitsata, Ti'aitame temanunakekɨ taheima, mɨpaɨ tiyɨyu, taheyemekɨ 'ateniu'uwakuni Ti'aitame matɨa.
1TH 4:18 'Ayumieme xekeneyunɨtɨaka yuxexuitɨ 'ikɨ niukikɨ.
1TH 5:1 'Iwamarixi, witarite tukarite hepaɨtsita tixaɨ xepɨkateheuyehɨwa xemɨteta'utɨiyarienikɨ,
1TH 5:2 xeme heitseriemekɨ mɨpaɨ xepɨtemate, Ti'aitame tukarieya mɨpaɨ katinaye'amɨkɨ tinawayame tɨkakɨta mɨ'axe hepaɨ.
1TH 5:3 Kepauka mɨpaɨ memutiyuaneni: «Kayuwatɨ tepexeiya, tepɨkakweriwa'a», 'ana mekanika'unariekuni, yapauka pɨwa'axe 'uka mɨtiniwerɨme kwiniyaya mi'axe hepaɨ. Mepɨkatawikweni.
1TH 5:4 Xeme pɨta ta'iwama, yɨwipa xepɨka'u'uwa, 'iya tukari pɨkaxe'axe tinawayame hepaɨ.
1TH 5:5 Xeme yunaitɨ hekɨaripa xekanimiemetetɨni, tukaritsie xepɨmiemete kexemɨte'ununuiwa. Tɨkakɨta tepɨkamiemete, yɨwipa tepɨkamiemete.
1TH 5:6 Merikɨte, 'ayumieme tepɨka'u'itutupeni hipame wahepaɨ, tepayeneniereni pɨta, tepɨtamaika.
1TH 5:7 Kukutsumete tɨkakɨta mekanikutsuni, tarɨwekarixi tɨkakɨta mekanitarɨweka.
1TH 5:8 Tame tukaritsie pɨta temɨmiemete tenitamaikakuni, yuri ketemɨte'erie, ketemɨtetakanaki'erie, mɨpaɨ tetenenakatɨkɨkuni kuya kamixaya hepaɨ temɨtakwerienikɨ tatawitsie, tamu'utsie kuya xupureruya hepaɨ tepenakeni ketemɨteta'ikwewakɨ temɨtawikweitsitɨarienikɨ,
1TH 5:9 Kakaɨyari 'ena pɨkatatsi'ukaye temɨhekarienikɨ, pɨtatsi'ukaye temaye'axɨanikɨ pɨta ketemɨtetawikweitsitɨarieni, Tati'aitɨwame Ketsutsi Kɨritsitu yatatipitɨakaku.
1TH 5:10 Mɨkɨ tahetsiemieme pumɨ, tame 'axeikɨa temayeyuyurinikɨ hamatɨana, tsepa temayeneniere tsepa temukwi.
1TH 5:11 'Ayumieme xekeneyuwaɨriyani, xekeneyutseiriyani xemɨyutaxewirekɨ, yaxeikɨa kexemɨteyurie.
1TH 5:12 'Iwamarixi, 'ipaɨ tetenixewawirieka, xemɨwamatenikɨ mɨkɨ memɨte'uximaya xetsata, mɨkɨ memɨxe'ukiyarima Ti'aitame hetsie metewiyatɨ, mɨkɨ memɨxe'imaiya.
1TH 5:13 Waɨkawa memɨmamariwawe xekeniwa'erieka xewanaki'erietɨ mɨpaɨ memɨte'uximayakɨ. 'Aixɨa xeketeneyuxeiyani yunaitɨ.
1TH 5:14 'Iwamarixi, 'ipaɨta tetenixetawawirienikeyu, xekeniwaruta'imaiya mɨkɨ memi'ɨraxie 'aitsika, xekeniwawaɨriyani mɨkɨ memɨkatɨrɨkawi yu'iyaritsie, xekeniwatuikani mɨkɨ memɨwerarani, mɨixa xeketeneukanenewieka yunaime wahetsiemieme.
1TH 5:15 Xekeneyukweriwayurieka kapa xewitɨ 'axarekapitɨani xeime 'iya 'axamiyurikɨ, matsi yuheyemekɨ xeketenekuwawa 'aixɨa xemɨyuyuriekakɨ yuxexuitɨ, 'aixɨa xemɨwayuriekakɨ yunaime.
1TH 5:16 Xekeneyutemamawieka yuheyeme.
1TH 5:17 Xekatehayewatɨ xekeneyunenewieka.
1TH 5:18 Pamɨpariyutsi xekenepitɨaka Kakaɨyari naime hepaɨtsita, mɨpaɨ katininakeni Kakaɨyari yaxemɨteyuriekakɨ Kɨritsitu Ketsutsi hetsie xetewiyatɨ.
1TH 5:19 'Iyari xepɨkakutɨtsani,
1TH 5:20 xepɨka'itawe'erieka Kakaɨyari niukametemama waniuki,
1TH 5:21 matsi xeketeneuta'inɨata naime, tita 'aixɨa mɨti'anetsie xeketenewiyani,
1TH 5:22 tinaime 'axamɨti'anene tsepa kemɨ'ane xeketeneuhayewa.
1TH 5:23 Mɨkɨtɨtɨ Kakaɨyari mɨtatsipitɨa ta'iyaritsie temɨka'uximatɨariekakɨ, mɨkɨ kexe'aye'atɨani xepatatɨ naime yuhetsiemieme ―xe'iyaritsie, kexemɨteyumate meta xewaiyari― xehetsie karahɨiwakaku kepauka Tati'aitɨwame Ketsutsi Kɨritsitu munuani.
1TH 5:24 Kemɨ'ane mɨxe'uta'ini yakatinikamieni, mɨpaɨ katiniyuriemɨkɨ.
1TH 5:25 'Iwamarixi, tahetsiemiemeta xekeneyunenewieka.
1TH 5:26 Xekeniwawaɨritɨaka yunaime 'iwamarixi patsiekate kememɨteyuwaɨritɨa.
1TH 5:27 Ne nepɨxehɨritɨa Ti'aitame netsi'eniekaku, yunaitɨ 'iwamarixi memakaterɨwiyarienikɨ 'ikɨ xapa.
1TH 5:28 Tati'aitɨwame Ketsutsi Kɨritsitu 'aixɨa ketiuka'iyarini xehetsiemieme. Mɨpaɨ xeikɨa kani'aneni.
2TH 1:1 Papuru, Tsiriwanu meta Timuteu, tekanixewaɨritɨaka tetsarunikatari xemɨyutixexeɨriwa Kakaɨyari mɨta'ukiyari hetsie xetewiyatɨ, Ti'aitame Ketsutsi Kɨritsitu hetsie xetewiyatɨ.
2TH 1:2 Kakaɨyari mɨta'ukiyari, Ketsutsi Kɨritsitu mɨti'aitame, 'aixɨa mekete'u'iyarini xehetsiemieme, mekexepitɨaka yu'iyaritsie xemɨka'uximatɨariekakɨ.
2TH 1:3 Neuxei 'iwamarixi, kaneuyeweka tame taheyemekɨ pamɨpariyutsi temipitɨakakɨ Kakaɨyari xehepaɨtsita, kemɨreuyewetse yatemɨteyuriekakɨ xeme keyuri xemɨte'erie xemɨtaweriyarɨmekɨ, meta yuxexuitɨ yunaitɨ xemɨtetamɨiriyarɨmekɨ xeteyukanaki'erietɨ.
2TH 1:4 'Ayumieme tameri 'aixɨa te'utiyuatɨ xehepaɨtsita yatekateniwakuxaxatɨwani mɨkɨ memɨyutixexeɨriwa Kakaɨyari hetsie metewiyatɨ, mɨpaɨ teteniwakɨhɨaweni, kexemɨte'uka'eniwa, yuri kexemɨte'erie mexi xetaweweiyarɨwa, mexi xe'uximatɨarie, meta naime kexemɨ'itɨarietɨwe.
2TH 1:5 Yaxe'itɨariekaku kanimatsiɨkɨni Kakaɨyari heitseriemekɨ kemɨti'inɨata 'itsɨkametɨtɨ, mɨpaɨ xeteta'inɨatsieme xemeta xekanimariwakakuni, xehetsie kemɨtinakeni 'axemu'uwanikɨ Kakaɨyari tixe'aitɨwametɨkaku, mɨpaɨ mɨtiyɨnikɨ xetenikwineni xemeta.
2TH 1:6 Kamɨtsɨ, Kakaɨyari heitseriemekɨ katiniyuriemɨkɨ kemɨtiwapinirieni wa'uximatɨatɨ mɨkɨ memɨxe'uximatɨa,
2TH 1:7 kemɨtixepinirieni xemeta xe'uxipitɨatɨ xeme xemɨ'uximatɨarie, yatati'uxipitɨatɨ tameta, kepauka matsiɨkɨtɨ mayani Ti'aitame Ketsutsi taheima 'akamietɨ, yuniuki tuayamete memɨtɨrɨkawi wahamatɨa 'akamietɨ, taipaɨ merɨkaɨyetɨ.
2TH 1:8 Heitseriemekɨ kaniwaranutaxɨriemɨkɨ mɨkɨ memɨka'imate Kakaɨyari, mɨkɨ yamemɨkatekahu Tati'aitɨwame Ketsutsi niukieya 'aixɨa manuyɨne hetsie.
2TH 1:9 Mɨkɨ mɨpaɨ memɨ'anene kememɨte'anutaxɨriyani, wahetsie tininakimɨkɨ memɨka'unarienikɨ yuheyemekɨ, Ti'aitame hɨxieya mekaxeiyatɨ meta tɨrɨkaɨyetɨ kemɨtimariwe meka'ixeiyatɨ
2TH 1:10 kepauka munuani, kaninuamɨkɨtsɨ witsimɨtixeiyarienikɨ yuteɨterima wahetsie tiwiyatɨ, yunaitɨ yuri memɨte'uta'eri memɨhɨxiyanikɨ me'i'ixɨarietɨ 'iya tukaritsie, mɨpaɨ katiniyɨmɨkɨ yuri xemɨte'ita'eririkɨ tita temɨtehekɨatakai xehetsɨa.
2TH 1:11 Mɨpaɨ mɨtiyɨnikɨ, xehetsiemieme tekanitanenewieka taheyemekɨ, takakaɨyari mɨpaɨ mɨtixemaikakɨ xeme xe'u'uwame kemɨreuyewetse 'amuyeikanikɨ Kakaɨyari 'ita'inieyu, tepɨtanenewieta takakaɨyari yɨtɨrɨkariyakɨ meye'atɨanikɨ naime kexemɨteyuwaɨriya 'aixɨa xeteyuriekutɨ, naime kexemɨteyurie yuri xete'erietɨ.
2TH 1:12 Mɨpaɨ tiyɨyu, kemɨ'ane Tati'aitɨwame Ketsutsi mɨhɨkɨ witsikatinixeiyariemɨkɨ xehetsie tiwiyatɨ, xemeta witsixekatenixeiyariekuni hetsiena xetewiyatɨ, takakaɨyari Tati'aitɨwame Ketsutsi Kɨritsitu 'aixɨa mɨtiuka'iyarikɨ.
2TH 2:1 Hikɨ 'iwamarixi, Tati'aitɨwame Ketsutsi Kɨritsitu kemɨtinuani hepaɨtsita meta hetsɨana ketemɨtekuxeɨriyani, mɨpaɨ tepɨtexewawirie,
2TH 2:2 yapauka xepɨkaheuyuyexɨrɨwani yumu'utsie meta xepɨkamamaka hipame kemɨtiyɨni niukiyarikɨ, yatɨni xewitɨ mɨpaɨ tikuxatakaku, yatɨni xapa tahetsɨa kename miemekɨ, mɨpaɨ 'ayetaineme: «Ti'aitame tukarieya paye'ari».
2TH 2:3 Xepɨkatepitɨaka nɨkahɨrixɨa xewitɨ xe'ukwamana, karikɨ meri hipatɨ Kakaɨyari me'aye'unietɨ mekanakɨnikuni meta matsiɨkɨme kanayuyeitɨamɨkɨ mɨkɨ tewi 'axamɨtiyuruwame, kemɨ'ane mɨka'unarieni.
2TH 2:4 Mɨkɨ neye'uniekamɨkɨ kanitawe'eriekamɨkɨ naime Kakaɨyari mɨtitewa meta naime mɨrayexeiyarie, yɨkɨmana kanayerɨmɨkɨ Kakaɨyari tukieyata meta Kakaɨyari puyuxatani.
2TH 2:5 ¿Xekateha'eriwa mɨpaɨ nemɨtixe'utaxatɨakairi kepauka xehetsɨa nemeyeikakai 'akuxi?
2TH 2:6 Hikɨri xekatenimaika ketita mɨkatipitɨa mɨkɨ tewi, matsiɨkɨtɨ mayanikɨ tukarieya 'aye'ayuke.
2TH 2:7 Tita 'axamɨti'ane 'awie 'ari kanitsutɨaka yutɨrɨkariya, kaneuyeweka xeikɨari kemɨ'ane mɨka'ipitɨa manukuyani.
2TH 2:8 'Anakeri, matsiɨkɨtɨ kanayeimɨkɨ 'iya 'axamɨtiyuruwame, mɨkɨ Ti'aitame Ketsutsi kanimiemɨkɨ yu'iyakɨ yuteta miemekɨ meta kanika'unamɨkɨ matsiɨkɨtɨ mayuyeitɨanitsie kepauka munuanitsie.
2TH 2:9 Mɨkɨ 'axatiyuruwame kaninuamɨkɨ, Kauyumarie 'iparewiekaku, naimekɨ pɨtɨrɨkaɨyeni, mariweme pɨtiyurieneni meta 'inɨarite pɨtiwewieni tiyu'itaiyamekɨ.
2TH 2:10 Naime ketita 'axamɨti'anekɨ pɨwakwamana mɨkɨ memeuyexɨrie memɨkayuwaɨrikɨ tita yuri mɨraine memɨtanaki'erienikɨ meta mɨpaɨ mɨkɨ niukikɨ memɨtetawikweitsitɨarienikekai.
2TH 2:11 'Ayumieme Kakaɨyari pɨwapitɨa memɨte'irɨwiyarienikɨ, yuri memɨteta'erienikɨ 'itarikatsie,
2TH 2:12 mɨpaɨ mekatenikwinitɨariekuni yunaitɨ yuri memɨkate'ita'eriri tita yuri mɨraine, matsi memɨnaki'akai kemɨkatiheitserietsie.
2TH 2:13 Meta tame, kaneuyeweka taheyemekɨ pamɨpariyutsi temipitɨakakɨ Kakaɨyari xehepaɨtsita, 'iwamarixi Ti'aitame mɨxenaki'erie, tsutɨapai Kakaɨyari kanixe'anayexeiya xemɨtawikweitsitɨarienikɨ, hetsiena mieme xepatsietɨ 'Iyari kemɨtixepata meta yuri xete'erietɨ tita yuri mɨrainetsie.
2TH 2:14 'Ayumieme kanixe'uta'inieni tame niuki 'aixɨa manuyɨne texekuxaxatɨwakaku, Tati'aitɨwame Ketsutsi Kɨritsitu hepaɨ witsixe'anenetɨ xemakɨnekɨ.
2TH 2:15 Hikɨtsɨari, 'iwamarixi, xekeneti'uka 'aixɨa meta xepɨka'iku'e'eiriwani tita xemɨteyetuiriyarie xemɨte'uta'ɨkitɨarie niukikɨ meta xapakɨ.
2TH 2:16 Tati'aitɨwame Ketsutsi Kɨritsitutɨtɨ meta Kakaɨyari mɨta'ukiyari, kemɨ'ane mɨtatsi'utanaki'eri meta 'aixɨa mɨtiuka'iyarikɨ mɨtatsinɨtɨa yuheyeme meta mɨtatsipitɨa 'aixɨati'aneme temɨtetakwewiekakɨ,
2TH 2:17 mekexetuikani meta tɨrɨkariya mekexepitɨaka xe'iyaritsie, 'aixɨa xemutiyuanenikɨ meta 'aixɨa xemɨteyuriekakɨ.
2TH 3:1 Merikɨte 'iwamarixi, xekeneyunenewieka tahetsiemieme, Ti'aitame niukieya kwitɨwa mɨ'enierienikɨ naitsarie, mɨkuxaxatsiwanikɨ kemɨtiuyɨ xehetsɨa,
2TH 3:2 tameta temɨtawikweitsitɨarienikɨ mɨkɨ teɨteri yamemɨteyurie kemɨkareuyewetse, 'axamemɨte'u'iyari 'atsimemɨkatatsiyurienikɨ, yunaitɨtsietɨ yuri mepɨkate'erie.
2TH 3:3 Matsi Ti'aitame kemaine yakatinikamieni, mɨkɨ kanixetseiriyamɨkɨ, kanixe'ɨwiyakamɨkɨ kemɨ'ane 'axamɨtiuka'iyari 'atsimɨkaxeyurienikɨ.
2TH 3:4 Ti'aitame hetsie tetewiyatɨ 'ipaɨ yuri teteni'erieka xehepaɨtsita, mɨpaɨ xeteniuyurieni ketemɨte'aita, mɨpaɨ xeteniyuriekakunita.
2TH 3:5 Ti'aitame 'aixɨa ke'iyurieni xe'iyari Kakaɨyari hepaɨ xemɨteyukanaki'eriekakɨ meta Kɨritsitu hepaɨ xemɨte'uka'eniwanikɨ.
2TH 3:6 'Iwamarixi, Tati'aitɨwame Ketsutsi Kɨritsitu hetsɨa temɨmiemetekɨ 'ipaɨ tetenixe'aitɨaka, xemɨwahayewakɨ yunaime ta'iwama 'amemu'uwa meyɨ'ɨraxietɨ yamekatekahutɨ ketemɨtexe'ɨkitɨa.
2TH 3:7 Xeme yɨkɨmana xekatenimaika kemɨreuyewetse xemɨtatsi'ɨkenikɨ tame. Xehetsɨa te'u'uwatɨ tepɨkata'ɨraxiekai.
2TH 3:8 Nixeime hetsɨa paa tepɨkatekwakai tekatetatuatɨ. Matsi tete'uximayatɨ teteta'uxitɨatɨ tukarikɨ tɨkarikɨ tekateni'uximayakaitɨni xeme temɨkatexe'uxitɨakakɨ nixeime.
2TH 3:9 Heitserie tekahexeiyatɨ tepɨkayɨakai, heitserie tekanexeiyanitɨtɨ temɨtexe'uxitɨanikɨ, peru mɨpaɨ tekateni'uximayakaitɨni matsi 'ɨkitsika tematayeitɨanikɨ, xemɨtatsi'ɨkenikɨ.
2TH 3:10 Mɨkɨ meta, kepauka xehetsɨa teme'uwakai mɨpaɨ tetenixe'aitɨakaitɨni: «Xɨka xewitɨ kayuwaɨriyani mɨti'uximayakakɨ, mekuxi mɨkɨ tixaɨ mɨkatikwani».
2TH 3:11 Tepɨ'enana kename hipatɨ 'ame'u'uwa xetsata meyu'ɨraxietɨ, mekate'uximayatɨ, yakɨ xeikɨa meniukixietɨ pɨta.
2TH 3:12 Mɨpaɨ tepɨtewa'aitɨa mɨkɨ mɨpaɨ memɨ'anene, Ti'aitame Ketsutsi Kɨritsitu hetsɨa temɨmiemetekɨ mɨpaɨ tepɨtewatuika, kayuwatɨ metitetɨ mete'uximayatɨ yu'ikwai memɨtekwanikɨ.
2TH 3:13 Xemeta ta'iwama, xepɨka'u'uxeni 'aixɨa xeteyurietɨ.
2TH 3:14 Xewitɨ xɨka ka'i'enieni tita temɨte'utiyuane 'ikɨ xapatsie tete'utɨatɨ, xekenetimati 'iya, hamatɨana xepɨkayɨnɨka, 'iya mɨtewiyatsitɨarienikɨ.
2TH 3:15 Xepɨkateku'eriwani hepaɨtsitana xemɨteku'eriwa hepaɨ kemɨ'ane mɨxe'aye'unie hepaɨtsita, matsi xekene'imaiyani xemi'imaiya hepaɨ yu'iwa pɨta.
2TH 3:16 Matsi kemɨ'ane yu'iyaritsie mɨka'uximatɨarie Ti'aitametɨtɨ, yuheyemekɨ kexepitɨaka yu'iyaritsie xemɨka'uximatɨariekakɨ tsepa naimekɨ. Ti'aitame yunaime xehamatɨa ke'uyeikani.
2TH 3:17 Ne Papuru nekanixewaɨritɨaka nemamakɨ neti'utɨatɨ. 'Ikɨ kanine'inɨaritɨni naime xapatsie, 'ipaɨ nepɨtiu'utɨa.
2TH 3:18 Tati'aitɨwame Ketsutsi Kɨritsitu 'aixɨa ketiuka'iyarini yunaime xehetsiemieme. Mɨpaɨ xeikɨa kani'aneni.
1TI 1:1 Ne Papuru Kɨritsitu Ketsutsi nɨ'arieya nekanihɨkɨtɨni mɨpaɨ mɨtiu'aitaxɨkɨ tatsiwikweitsitɨwame Kakaɨyari, meta kemɨ'anetsie yuri temɨte'erie mexi teta'ikwewa Kɨritsitu Ketsutsi mɨpaɨ mɨtiu'aitaxɨkɨ,
1TI 1:2 nekamaniwaɨritɨaka Timuteu, yurikɨ neniwe pekanihɨkɨtɨni yuri temɨte'eriekɨ: Kakaɨyari mɨta'ukiyari meta Kɨritsitu Ketsutsi mɨtati'aitɨwame 'aixɨa mekete'u'iyarini 'ahetsiemieme, mekematsinenimayaka, meta mekematsipitɨaka 'a'iyaritsie pemɨka'uximatɨariekakɨ.
1TI 1:3 Matseruniya kwieyaritsie kepauka nemɨyemieximekai, mɨpaɨ nepɨmatiuhɨritɨa 'Epetsutsie pemɨ'ahayewakɨ, pemɨtiwata'aitɨanikɨ hipame kapa yɨkɨ mete'ɨkitanikɨ
1TI 1:4 meta kapa mewaru'enienikɨ yakɨ xeikɨa kememɨte'u'ɨxatsita meta niuki mɨkapariwekɨ xeime ramare hepaɨtsita. Kemɨ'ane mɨpaɨ mɨti'ɨkita niuki xɨatɨarika pɨwewie xeikɨa, pɨkaheye'atɨa tita Kakaɨyari mɨtihɨritɨa para yuri ti'erietɨ yamɨtiyurienenikɨ.
1TI 1:5 'Ikɨ 'ayumieme pukuyɨane xatsika mɨtiyukanaki'eriekakɨ 'iyarieya 'itiyakaku, ka'itate'akaku meta yuri ti'erietɨ peru huta 'iyariyari kahexeiyatɨ.
1TI 1:6 Hipatɨ xaɨtsie meheukuyuneka mɨkɨ hepaɨtsita ta'aurie mekanaxɨrieni, 'ayumieme yakɨ xeikɨa mekatenikuxatani.
1TI 1:7 Pɨwanake 'inɨari niukiyari hepaɨtsita memɨte'ɨkitanikɨ, peru 'atsimepɨkatemate tita memɨtekuxata meta mepɨkaheitimaiwawe tita memɨtexata tsepa tɨrɨkaɨyemekɨ mɨpaɨ memɨtekuxata.
1TI 1:8 Tsɨrikɨte mɨpaɨ tepɨtemate, 'inɨari niukiyari 'aixɨa kani'aneni, tewi xɨka yatikamieni he'eriwatɨ 'inɨari mɨhɨkɨkɨ.
1TI 1:9 Mɨpaɨ timaitɨ, 'inɨari pɨkaheuyewetse xɨka tewi heitseriemekɨ yatikamieni hetsiena, mɨkɨ 'inɨari memɨtitsana wahepaɨtsita pɨta pɨkuxaxatsiwa, mɨkɨ memɨka'enana wahepaɨtsita meta mɨkɨ Kakaɨyari memɨka'ayexeiya 'axamemɨteyurie wahepaɨtsita, mɨkɨ 'axamemɨ'anene Kakaɨyari memɨxani'erie wahepaɨtsita, mɨkɨ memɨwakuya yupaapama meta memɨteyumemiwa wahepaɨtsita,
1TI 1:10 memɨwakumaɨwa kemɨ'ane mɨkawa'ɨya mɨkawakɨna meta 'ukitsi hipame 'ukitsi memɨwakumaɨwa wahepaɨtsita, mɨkɨ memɨwanawatɨwe teɨteri wahepaɨtsita, mɨkɨ memɨteyu'itaiya meta memɨyɨhɨritɨa mete'itawatɨ mɨkɨ wahepaɨtsita. Hipatɨ yunaitɨ memeye'unie 'ɨkitsika 'aixɨa mɨ'ane, mɨkɨ wahepaɨtsita pɨkuxaxatsiwa 'inɨari,
1TI 1:11 kemaine mɨkɨ niuki mɨpaɨ manuyɨne witsikemɨtimariwa Kakaɨyari yutemawietɨ, kenemɨtiuhɨritɨarie yanemɨtikuxatanikɨ ne.
1TI 1:12 Pamɨpariyutsi nekanipitɨaka kemɨ'ane mɨnetsitɨrɨkariya Ketsutsi Kɨritsitu mɨtati'aitɨwame, mɨkɨ yanetikamieme mɨnetsi'eriekɨ, mɨnetsi'anayexeikɨ mɨpaɨ nemɨti'uximayakakɨ,
1TI 1:13 tsepa ne meripaitɨ 'axanemutainekai hepaɨtsitana, tsepa nemitaweiyaxɨ, tsepa nemitawe'eriekai, neputinenimayatsie matsi mɨpaɨ nemɨtiyurienekaikɨ 'atsinekatimaitɨ kepauka yuri nemɨkati'eriekai.
1TI 1:14 Tati'aitɨwame kwinimieme 'aixɨa pɨtiuka'iyarikai nehetsiemieme, pɨnetsi'upitɨa yuri nemɨti'eriekakɨ nemɨtinekanaki'eriekakɨ Kɨritsitu Ketsutsi hetsie netiwiyatɨ.
1TI 1:15 'Ikɨ niuki yurikɨ paine meta kaneuyeweka mɨnaki'eriwanikɨ yemekɨ: kename Kɨritsitu Ketsutsi kwiepa nua 'axateyuruwamete watawikweitsitɨanike, ne mɨkɨ 'axateyuruwamete watsata mexɨakame nepɨhɨkɨ.
1TI 1:16 Peru 'ayumieme neputinenimayatsie, Ketsutsi Kɨritsitu matsi waɨkawamekɨ matsiɨkɨme mayeitɨanikɨ nehetsie, naimekɨ kemɨreuteriwe tiuka'eniwatɨ, 'inɨari nemayanikɨ mexɨakame nehɨkɨtɨtɨ, memɨnetsiha'eriwanikɨ mɨkɨ 'arike hetsiena yuri memɨteta'erieni yuheyemekɨ tukari mɨkaxɨwe memexeiyanikɨ.
1TI 1:17 Kemɨ'ane kwiepa naime mɨti'aitame yuheyemekɨ, kemɨ'ane mɨkapɨniwe, mɨkaxeiyariewe, yuxewitɨ timaiwetɨ Kakaɨyari, mɨkɨ mariweme kexatsiwani meta witsiketixeiyarieka yuheyemekɨ tsepanetɨ xeitsienituyari wiyari manuyekɨka. Mɨpaɨ xeikɨa kani'aneni.
1TI 1:18 Neuxei neniwe Timuteu, 'ipaɨ nepɨmati'aitɨa, nepɨmatsihɨritɨa yaxeikɨa niuki 'ahepaɨtsita kemɨtiutaxatsie meripaitɨ kename mɨpaɨ petiyurienikekai. Kepemɨtihekɨatsiekai, kuya hepaɨ keneyɨaneni, 'aixɨa 'anemekɨ kene'amieneni yuri peti'erietɨ 'a'iyari kamatsi'utate'akaku.
1TI 1:19 Hipatɨ memitixani'erikɨ wa'iyari warutate'akaku, yuri kememɨte'eriekai mepukayunixɨ.
1TI 1:20 Mɨpaɨ mekani'aneneni Himeneu meta 'Arekanituru, mɨkɨ nepɨwayetua Kauyumarie hetsɨa, mɨkɨkɨ mɨpaɨ memɨteta'ɨkitɨarienikɨ 'axamemɨkatekuxatanikɨ.
1TI 2:1 'Ayumieme mɨpaɨ nepɨmatituika mɨpaɨ yemekɨ mɨreuyewetsekɨ, xekenewawirieka Kakaɨyari, nenewieri xekenepitɨaka, xeketenewawirieka meta pamɨpariyutsi xekenepitɨaka yunaime teɨteri wahetsiemieme,
1TI 2:2 kwiepa te'aitamete wahetsiemieme meta yunaime 'itsɨkate wahetsiemieme, tame kayuwatɨ te'umatɨ teka'uximatɨarietɨ 'atemu'uwanikɨ, naimekɨ Kakaɨyari te'ayexeiyatɨ 'aixɨa tetekahutɨ.
1TI 2:3 Xɨka mɨpaɨ 'aneni 'aixɨa kaniyɨmɨkɨ meta mɨpaɨ katininakeni tatsiwikweitsitɨwame Kakaɨyari.
1TI 2:4 Mɨpaɨ pɨtinake yunaitɨ teɨteri memɨtawikweitsitɨarienikɨ meta tita yuri mɨraine metemaitɨ memakɨnekɨ.
1TI 2:5 Kakaɨyari kaniyuxewini meta niukame puyuxewi kemɨ'ane Kakaɨyari mɨkɨhɨawe meta teɨteri, tewitɨtɨ Kɨritsitu Ketsutsi,
1TI 2:6 mɨkɨ pɨyuyetua yunaime wahetsiemieme waxɨnake. Mɨpaɨ pɨtiuhekɨatsie tukaritsie yemekɨ meuyewekaitsie 'aye'aku,
1TI 2:7 neta 'ayumieme nepukerie tixaxatame nɨ'ari. Yuri nepaine, nepɨkati'itawa: Nepukerie memɨkahuriyutsixi nemɨtiwata'ɨkitɨanikɨ tita yuri temɨte'erie hepaɨtsita tita yuri mɨraine hepaɨtsita.
1TI 2:8 'Ayumieme mɨpaɨ pɨnetinake, hakewa memeyutixexeɨriwa 'ukitsi mekeyunenewieka yumamate muyuawitsie meheutitseratɨkaitɨ mepatsietɨ, tixaɨ mekaha'atɨ meta niuki mekaxɨatɨatɨ yu'iyaritsie.
1TI 2:9 'Ukari meta, mekeyukemaritɨaka kemɨtiheitserie, memɨxeiyariekakɨ mekayɨatɨ meta meyumaiwawetɨ, kwinimieme mepɨkateyukutsatsaweni, huru, perɨra meta 'ixuriki kwinie mɨraye'atɨkakɨ xeikɨa mepɨkayukemaritɨaka.
1TI 2:10 'Aixɨa kememɨte'u'iyarikɨ pɨta mekeyukemaritɨaka, 'aixɨa kaniyɨmɨkɨ mɨpaɨ memɨteyurieka 'ukari mɨpaɨ memutiyuane kename Kakaɨyari me'ayexeiya.
1TI 2:11 'Uka kayuwatɨ 'umatɨ ketiyɨ'ɨkitɨaka, keyuwaɨriyani mɨti'aitɨariekakɨ.
1TI 2:12 Nepɨka'ipitɨa 'uka mɨti'ɨkitanikɨ 'uki mɨti'aitɨakakɨ, matsi peuyewetse kayuwatɨ mumakakɨ pɨta.
1TI 2:13 'Arani meri putawewiya, 'arike 'Ewa.
1TI 2:14 'Arani meta pɨkatiu'irɨwiyarie, peru 'uka tiu'irɨwiyarieka 'aitsika tsaname patɨa.
1TI 2:15 Kanitawikweitsitɨariemɨkɨ kepauka mɨtiniweni, yuri mete'erietɨ, meteyukanaki'erietɨ meta mepatsietɨ xɨka meyuhayewani meyumaiwawetɨ.
1TI 3:1 'Ikɨ niuki yurikɨ paine, kemɨ'ane ti'ɨwiyame mayeimɨkɨ, mɨkɨ 'uximayatsika 'aixɨa mɨ'ane pɨhiwe'erie.
1TI 3:2 'Ayumieme kaneuyeweka ti'ɨwiyame hetsie tixaɨtɨ mɨkarahɨiwanikɨ tsepa mutaxanetsie, xeime hɨkɨa 'ukaratsi pawitɨkɨni, pɨyumaika, pɨtimaiweni, 'aixɨa pɨtixeiyarieka, pɨwanaki'erieka tewanarixi, pɨti'ɨkitaweni,
1TI 3:3 tawekame pɨkahɨkɨtɨni meta pɨkawatiwayani, tumini pɨkahiwe'erieka, matsi pɨka'ayu'eriyani, pɨkayumieneni,
1TI 3:4 'aixɨa 'anemekɨ pɨtiwa'aitɨaka yukie kiekatari meta yɨtɨriyama pɨwarexeiyani tiwa'aitɨatɨ naimekɨ meta 'aixɨa 'anemekɨ mepei'enieka,
1TI 3:5 kemɨ'ane 'atsimɨkatimate yukie kiekatari mɨtiwa'aitɨakakɨ, ¿keri tiwa'ɨwiyani memɨyutixexeɨriwa Kakaɨyari hetsɨa miemete?
1TI 3:6 Xike yuri mɨtiuta'eri pɨkahɨkɨtɨni, kapa 'uyuta'ɨreme kauyumarie hepaɨ 'uximatɨarika 'upitɨarieni.
1TI 3:7 Kaneuyeweka yuri memɨkate'erie 'aixɨa memɨte'ihekɨatanikɨ kapa 'axatiuxeiyarieme kauyumarie winiyarieyatsie 'uyukahɨani.
1TI 3:8 Yaxeikɨata teparewiwamete, peuyewetse mɨpaɨ memɨ'anenenikɨ, 'aixɨa mepɨtekahuni, yurikɨ mepɨtekuxatani, mepɨkatarɨwetɨweni, tumini mepɨkahiwe'erieka meteyukwamanakutɨ,
1TI 3:9 wa'iyari 'itiyatɨkaikaku kawatate'akaku mepi'ɨwiyani niuki matsiɨkɨtɨ mayeitɨarie titatsie yuri temɨte'erie.
1TI 3:10 Mɨkɨta yaxeikɨa wahepaɨ meke'uta'inɨatsieni meri xɨka meyɨwaweni, 'arike teparewiwamete meke'akɨne xɨka wahetsie karahɨiwani.
1TI 3:11 Yaxeikɨata wa'ɨitama 'aixɨa mepɨtekahuni, niuki peraixi mepɨkayɨaka, mepɨyukemaka meta heitseriemekɨ yamepɨtekahuni naimekɨ.
1TI 3:12 Tiparewiwame xeime hɨkɨa yɨ'ɨya pawitɨkɨni, meta 'aixɨa 'anemekɨ yɨtɨriyama ketiwa'aitɨaka meta yukie kiekatari.
1TI 3:13 Kemɨ'ane tiparewiwamekɨ yemekɨ memeye'atɨa yɨhɨritɨarika, mɨkɨ mepɨte'iwa 'aixɨa memɨtexeiyarienikɨ, meta meyuyetuatɨ yuri memɨte'eriekɨ Kɨritsitu Ketsutsi hetsie.
1TI 3:14 Tsepanetɨ kwitɨwa 'ahetsɨa nemeyeikani, 'ipaɨ nepɨmati'utɨirie,
1TI 3:15 mexɨka nekahenuaweni, ketinemaika kemɨreuyewetse kehepaɨ mɨtiuyeikani Kakaɨyari kie kiekatari watsata, mɨkɨ mekanihɨkɨtɨni memɨyutixexeɨriwa Kakaɨyari mayeniere hetsɨa miemete, muka'utɨka meta tsutɨmeyari tita yuri mɨraine.
1TI 3:16 Mɨpaɨ katinihekɨaka, pɨmariwe mɨkɨ niuki matsiɨkɨtɨ matɨa, ketemɨteheyexeiya Kakaɨyari manuyɨne: Mɨkɨ matsiɨkɨtɨ kanayani yuwaiyaritsie 'uyeikatɨ, heitserie pupitɨarie 'Iyari hexeiyatɨ, niuki tuayamete mepixei, pɨkuxaxatsiwakai nuiwarite watsata, yuri mepɨte'uta'eri hetsiena kwiepa memɨtama, witsi'anetɨ panutiwitɨkie.
1TI 4:1 Yakatinihekɨaka 'Iyari kemaine, 'imatɨrieka 'aye'aximekaku, hipatɨ mekatenihayewakuni yuri mete'erietɨ, 'iyarite memɨte'itawa mepɨwa'enieni meta kakaɨyarixi yakɨxeikɨa kememɨte'ɨkita,
1TI 4:2 mete'ɨkitatɨ yakɨ xeikɨa metekuxatatɨ, Kauyumarie 'inɨarieyakɨ mepɨtepɨatɨarieni yu'iyaritsie, 'ayumieme pɨkawarutate'ani wa'iyari.
1TI 4:3 Mɨpaɨ mepɨte'aitani memɨkaneneɨkenikɨ memɨkawikiekakɨ meta memɨtehayewanikɨ hipame 'ikwaite metekwatɨ, tsepa Kakaɨyari minetɨa 'ikwaite memenu'ɨnikɨ pamɨpariyutsi me'ipitɨatɨ mɨkɨ yuri memɨte'erie, mɨkɨ tita yuri mɨraine memɨtehetima.
1TI 4:4 Naime Kakaɨyari mɨtiunetɨa 'aixɨa katini'aneni, tixaɨtɨ pɨkatixani'eriwa xɨka ranupini pamɨpariyutsi 'ipitɨatɨ Kakaɨyari,
1TI 4:5 Kakaɨyari niukieyakɨ meta nenewierikɨ kanitipatsiwani.
1TI 4:6 Mɨpaɨ xɨka petiwaruta'ɨkitɨani 'iwamarixi, Kɨritsitu Ketsutsi parewiwameya 'aixɨa mɨ'ane pekaniyɨanemɨkɨ, peweretɨ niuki yuri ketemɨte'erie pe'enietɨ, 'ɨkitsika mɨtseɨye pe'enietɨ kepemɨtiweiya 'inɨaritɨme.
1TI 4:7 Kememɨte'u'ɨxatsita Kakaɨyari meka'ayexeiyatɨ 'ɨxatsi meripaimieme, mɨkɨ kenexani'erieka. Matsi ketine'a'ɨkitɨaka pemɨ'iyamakakɨ Kakaɨyari pemayexeiyanikɨ tɨrɨkaɨyemekɨ.
1TI 4:8 Xɨka tiyɨ'ɨkitɨaka waiyari mɨ'iyamakakɨ mɨkɨ 'etsiwa pɨtiyunaki'erie, peru xɨka Kakaɨyari 'ayexeiyani, naimekɨ pɨtiyunaki'erie, tukari mexeiyakɨ ketemɨte'utahɨawarie temeixeiyanikɨ hikɨ meta tukari 'umamietsieta.
1TI 4:9 Mɨkɨ niuki yurikɨ paine meta kaneuyeweka mɨnaki'eriwanikɨ yemekɨ.
1TI 4:10 Mɨpaɨ mɨ'anekɨ, 'ayumieme tepɨte'uximaya meta 'axatepɨtekɨhɨawarɨwa, yuri temɨte'uta'erikɨ Kakaɨyari mayenieretsie teta'ikwewatɨ, mɨkɨ yunaime teɨteri kaniwawikweitsitɨwametɨni, matsi yemekɨ yuri memɨte'erie.
1TI 4:11 Mɨpaɨ ketiniwahɨritɨaka meta mɨpaɨ ketine'ɨkitani.
1TI 4:12 Xewitɨ pɨkamatsitawe'erieka temaikɨ 'akuxi pemɨhɨkɨkɨ. Matsi mɨkɨ yuri memɨte'erie mɨpaɨ memɨ'anenenikɨ 'inɨari kena'ayeitɨwani kepemɨtiutaniuka, kepemɨtiuyeika, kepemɨti'akanaki'erie, keyapemɨtikamie 'aniukikɨ meta kepemɨti'itiya.
1TI 4:13 Mexi nekahenuawe, kene'ayumiemetɨni petiterɨwatɨ niuki memɨ'enienikɨ, pewatuikatɨ meta peti'ɨkitatɨ.
1TI 4:14 Ketineuhayewa pe'itɨmaiyatɨ tita pemɨtiupitɨarie 'iyaritsie timieme, mɨpaɨ pepɨtiupitɨarie tixaxatame tikuxatakaku, kepauka 'ukirawetsixi 'axeikɨa 'ahetsie memutimeixɨa.
1TI 4:15 Mɨkɨkɨ kene'ayumiemetɨni, mɨkɨtsie keneuyeikani yunaitɨ memɨmatsixeiyakɨ kepemɨraye'axime.
1TI 4:16 Kene'a'ɨwiyani meta kene'ɨwiyani 'ɨkitsika. Mɨpaɨ petiyurienetɨ kene'ahayewa, mɨkɨkɨ pepɨ'atawikweitsitɨani meta pepɨwatawikweitsitɨani mɨkɨ memɨmatsi'enie.
1TI 5:1 'Ukiratsi pepɨkatatieni, matsi pepinɨtɨani 'apaapa hepaɨ. Temari 'a'iwama wahepaɨ ketiniwakɨhɨaweni.
1TI 5:2 'Ukarawetsixi 'amemuyumate 'amaama hepaɨ ketiniwaxeiyani, 'ɨimarixi 'a'iwama wahepaɨ ketiniwakɨhɨaweni, naimekɨ pe'itiyatɨ.
1TI 5:3 'Aixɨa ketiniwaxeiyani wiuraxi xɨka yemekɨ meyuxewini.
1TI 5:4 Kemɨ'ane wiura yuniwema meta yuteukarima mɨwarexeiya, matsi yemekɨ kaneuyeweka mɨkɨ mɨpaɨ memɨtehetimanikɨ 'aixɨa memɨtewaxeiyanikɨ yukie kiekatari, 'amemɨte'apikakɨ mewaparewietɨ yupaapama, mɨpaɨ Kakaɨyari mɨtinakekɨ.
1TI 5:5 Kemɨ'ane wiura yuxaɨta 'amuka yemekɨ, mɨkɨ kemɨtita'ikwewa Kakaɨyari hetsie, 'iwawirietɨ meta nenewieri 'ipitɨatɨ tukarikɨ tɨkarikɨ.
1TI 5:6 Peru wiura kemɨ'ane kemɨtiyɨkɨhɨawe xeikɨa 'amuyeika hiwe'erikakɨ, mɨkɨ mɨkitɨ 'apuyeika tsepa mayeniere.
1TI 5:7 Mɨpaɨ ketiniwa'aitɨaka tixaɨtɨ wahetsie mɨkarahɨiwanikɨ.
1TI 5:8 Kemɨ'ane mɨkatiwamikwa yuniwema, meta yukie kiekatari, mɨkɨ puyuku'imawa yuri ti'erietɨ, kwinimieme matsi 'axapɨyɨane keyuri yuri mɨkati'erie.
1TI 5:9 Wiura xɨka haika tewiyari wiyari hexeiyani ke'aka'utuarieni, xɨka yɨkɨna xeimetsie xeikɨa tiwiyakaitɨni,
1TI 5:10 xɨka 'aixɨa timariwani 'aixɨa mɨtiyurienekɨ, xɨka tɨɨri waweriyaweni, xɨka tewanarixi wanaki'erieka, xɨka Kakaɨyari teɨterimama wa'ɨkate hauxinaweni, xɨka waparewiweni mɨkɨ memɨ'uximatɨarie meta xɨka yatikamiekaitɨni naimekɨ 'aixɨa tiyurienetɨ.
1TI 5:11 Wiuraxi yakɨ memuyumate pepɨkawaraka'utɨani, 'uxa'atɨni warie mepɨwikiekuni, yunaki'eriyakɨ mepɨkunuaxɨani. Mɨkɨkɨ yuhetsie mepɨte'ahɨpani yamemɨkatekahukɨ kememɨte'uyuhɨritɨa Kɨritsitu hetsiemieme.
1TI 5:13 Mɨkɨ meta mɨpaɨ mepɨteyu'iyamatɨani meyɨ'ɨraraxietɨ kieta meku'u'uwatɨ xeikɨa. Mepɨkayu'ɨraraxie xeikɨa matsi niukiperaixi mepakɨka meta tita 'aixɨa mɨkati'ane metekuxatatɨ.
1TI 5:14 'Ayumieme mɨpaɨ nepɨtiwaraye'eritɨwa, peuyewetse mɨkɨ yakɨ memɨyumate wiuraxi memɨtiwikienikɨ, yukiita memɨte'aitanikɨ, xɨka mɨpaɨ meteyurieka tixaɨtɨ mepɨkatepitɨani, kemɨ'ane mɨtatsi'aye'unie 'axapɨkatiyurieka.
1TI 5:15 Matsi hipatɨri mepɨte'uhayewaxɨ Kauyumarie pɨta me'anuweiyake.
1TI 5:16 Xɨka xewitɨ yuri ti'erietɨ 'ukitɨtɨ 'ukaratsitɨtɨ xɨka yumarema warexeiyani wiuraxi, mɨkɨ kewaparewieka, pɨkawa'uximatɨaka memɨyutixexeɨriwa, mɨkɨ pɨta wiuraxi yemekɨ yuxaɨta memu'uwa mepɨwaparewieka.
1TI 5:17 'Ukirawetsixi 'aixɨa 'anemekɨ memɨte'uximaya mɨkɨ matsi waɨkawa 'aixɨa mekete'uxeiyarieni, yemekɨ matsi mɨkɨ naimekɨ meyutatuatɨ memɨtekuxata meta memɨte'ɨkita.
1TI 5:18 'Utɨarika xapayari mɨpaɨ paine: «Pepɨka'itsurihɨaka túuru kepauka tɨriku mɨketsinane mɨtihenarienikɨ», mɨpaɨ meta paine «Ti'uximayamete heitserie kanexeiyani mɨtipitɨarienikɨ».
1TI 5:19 Yuri'utaineme pepɨka'erieka xɨka 'ixanetani mɨhɨritɨarie, mexɨka yuhutatɨ yuhaikatɨ memunenierixɨ metehekɨatani xeikɨa pepuwa'enieka.
1TI 5:20 Mɨkɨ 'axamemɨteyurie keniwarutati'a yunaitɨ mematsi'eniekaku hipatɨta marika memexeiyanikɨ.
1TI 5:21 Nekamenihɨritɨaka Kakaɨyari hɨxie meta Kɨritsitu Ketsutsi hɨxie niuki tuayamete memanayexeiyarie mematsixeiyakaku, mɨpaɨ yaketinekamieni, kwitɨwa pepɨka'itahɨawe tewi petimarietɨ xeikɨa peru peka'i'eniewetɨ, 'atsipepɨkatiyurieneni xeime xeikɨa 'aixɨa petixeiyatɨ.
1TI 5:22 Kwitɨwa xeimetsie pepɨka'utimemeni, mɨkɨ meta 'axakememɨteyurie hipatɨ 'ahetsieta rahɨiwanikɨ. Pe'itiyatɨ kene'a'ɨwiyani.
1TI 5:23 Peru ketineuhayewa haa xeikɨa peharetɨ, matsi 'etsiwata winu kenanuye'eni 'ayuriepa pemɨtikuyekɨ mɨixa.
1TI 5:24 'Axamemɨteyurie hipatɨ mepanuyehaitɨrɨwe, kwitɨwa mepɨmatsiɨkɨ tsepa 'itsɨkame mɨkawatahɨawiwe, hipatɨ 'axakememɨteyurie mepu'imatɨ mepɨkawiyariewawe kwitɨwa.
1TI 5:25 Yaxeikɨa mɨkɨ 'aixɨa memɨteyurie kwitɨwa mepɨmatsiɨkɨ, meta tsepa memɨkamatsiɨkɨ, mepɨkayɨwawe memɨ'awietsiekakɨ yuheyemekɨ.
1TI 6:1 Waɨriyarika te'uximayatamete kɨye memanuyetekiyarie, yemekɨ wawemete mekewa'erieka yukutsiyarima, xɨka mɨpaɨ meteyurieka 'axapɨkatikuxaxatsiwani kemɨ'ane Kakaɨyari mɨhɨkɨ meta 'ɨkitsika 'axapɨkatikuxaxatsiwani.
1TI 6:2 Memɨwakutsiyarima xɨka yuri mete'erieka, mepɨkawatawe'erieka yu'iwama mewaxeiyatɨ, matsi 'aixɨa 'iyarikɨ mekete'uximayaka wahetsiemieme yuri memɨte'eriekɨ memɨnaki'eriwakɨ mɨkɨ 'aixɨa memɨ'itɨarie mete'uximayakaku. Mɨpaɨ ketine'ɨkitani mɨpaɨ ketiniwatuikani.
1TI 6:3 Xɨka yɨkɨ ti'ɨkitani xewitɨ, xɨka yaka'aneni, 'ɨkitsika 'aixɨa mɨ'ane ka'eniemɨtɨ Tati'aitɨwame Ketsutsi Kɨritsitu mɨniukieya ka'i'eniemɨtɨ 'ikɨ 'ɨkitsika kɨmana Kakaɨyari temayexeiya,
1TI 6:4 mɨkɨ pɨhɨtsierie, 'atsipɨkatimate. Katinikuyeni niuki xɨatɨarika kuwaunetɨ xeikɨa, niuki hepaɨtsita yumiemɨtɨ, mɨkɨtsie payeneika kememɨte'ɨtetsa, kememɨteyuheka, kememɨtewatsewixima hipame 'axame'utiyuatɨ wahepaɨtsita, 'axakememɨteyɨkɨhɨawe,
1TI 6:5 kememɨkatehayewa meniukixietɨ, mɨpaɨ mepɨteyurie teɨteri memɨtipɨnirɨme kememɨteyumate memeiwiwi tita yuri mɨraine. Mɨpaɨ mekateniku'eriwani, kemɨ'ane mɨrayexeiya 'iwarika pexeiya.
1TI 6:6 Tsiepɨre xɨka Kakaɨyari 'ayexeiyani tixaɨtɨ kareuyehɨatɨ, yemekɨ pɨti'iwa.
1TI 6:7 Tixaɨtɨ tepɨkate'atɨkɨkai kwiepa temu'axɨa, 'ayumieme tepɨkayɨwawe tixaɨtɨ temɨte'anutɨni temɨyehu.
1TI 6:8 'Ayumieme, 'ikwai meta kemari xɨka tehexeiyani, mɨkɨkɨ tekenaki'aka.
1TI 6:9 Mɨkɨ memeuka'unikɨ xeikɨa memɨyɨa, mɨkɨ mepekaxɨrieni me'inɨatsietɨ, winiyarikɨ mepɨwiyarieni, waɨkawa mepɨteyukahiwe'erieka 'atsimekatemaitɨ, meteyukwinitɨatɨ. Mɨkɨ hiwe'erika teɨteri pɨwakatuika memɨka'unarienikɨ memɨtatɨmaiyarienikɨ.
1TI 6:10 Teɨteri kememɨte'ihiwe'erie tumini, mɨkɨ nanaritsie kaniutineikani naitɨ 'axamɨti'anene, hipatɨ me'ihiwe'erietɨ, mepeuyexɨri yuri mekate'erietɨ mepakɨ, meta mepɨte'uka'eniexɨa waɨkawa hiwerikakɨ.
1TI 6:11 'Ekɨtsɨ, Kakaɨyari tewiyari pekanihɨkɨtɨni, kene'ata'una mɨkɨkɨ, mɨpaɨ pɨta ketine'amexɨitɨaka, heitseriemekɨ yapemɨtikamienikɨ, Kakaɨyari pemayexeiyanikɨ, yuri pemɨti'eriekakɨ, pemɨti'akanaki'eriekakɨ, pemɨtiuka'eniwanikɨ meta pemɨkahayu'eriyanikɨ.
1TI 6:12 'Aixɨa 'anemekɨ pe'atatuatɨ keneutananautsani yuri peti'erietɨ, keneuwiya tukari mɨkaxɨwe, mɨkɨ 'ayumieme peputa'inierie meta yumɨiretɨ tehekɨatamete mematsixeiyakaku 'aixɨa 'anemekɨ pepɨ'ahekɨatakai yape'anetɨ.
1TI 6:13 Kakaɨyari naime mɨrayenieritɨa matsixeiyakaku, Kɨritsitu Ketsutsi 'aixɨa 'anemekɨ muyuhekɨata ya'anetɨ Punitsiyu Piratu hɨxie, mɨkɨta matsixeiyakaku, mɨpaɨ nepɨmati'aitɨa
1TI 6:14 yaketinekamieni kepemɨtiu'aitɨarie, peka'itsewiximatɨ 'aitsika, hetsiena pekarahɨpatɨ, Tati'aitɨwame Ketsutsi Kɨritsitu matsiɨkɨtɨ mayanike.
1TI 6:15 Tukari 'aixɨa mɨ'ane 'aye'ayu, matsiɨkɨme kanayeitɨamɨkɨ. Kemɨ'ane yutemawietɨ yuxewitɨ Ti'aitame mɨhɨkɨ, kemɨ'ane te'aitamete mɨtiwa'aitɨwame, kutsiyarima mɨwakutsiyari,
1TI 6:16 kemɨ'ane yuxewitɨ mɨkamɨwe, hekɨaripa meka hakewa mɨkayɨwe 'ahurawa mayanikɨ xewitɨ, kemɨ'ane tewi mɨka'ixeiyawe mɨkayɨwe mixeiyakɨ, mɨkɨ mariweme kexatsiwani, kehetɨrɨkaɨyeni yuheyemekɨ. Mɨpaɨ xeikɨa kani'aneni.
1TI 6:17 Mɨpaɨ ketiniwa'aitɨaka mɨkɨ memeuka'u hikɨ kwiepa, mepɨkateyukatawe'erieka, yuri mepɨkate'erieka yupinitsie, 'atsimɨkatimatsiɨkɨkɨ xɨka xuawekamɨkɨ, matsi yuri mekete'erieka Kakaɨyari hetsie pɨta, mɨkɨ naime pɨtatipitɨa yemekɨ matsi temɨtatemamawiekakɨ.
1TI 6:18 Mɨpaɨ ketiniwa'aitɨaka meta 'aixɨa memɨte'uximayakakɨ, memeuka'unikɨ 'aixɨa meteyurietɨ, 'aixɨa memɨte'u'iyarinikɨ, hipame wahamatɨa memɨyuxewinikɨ.
1TI 6:19 Mɨpaɨ meteyurietɨ mepɨyutatenaritɨani 'aixɨa 'aneme 'uxa'a warie maye'anitsie mieme, tita yurikɨ mɨtitukari metehexeiyatɨ mepakɨne.
1TI 6:20 Neuxei Timuteu, kene'ɨwiyani 'ahɨritɨarika. Ta'aurie kenawetsi pemɨkawa'enienikɨ yakɨ xeikɨa kememutiyuane mekate'ayexeiyatɨ, waniukitsie pepɨkatiwiyani metatsi'aye'unietɨ kememutiyuane mɨkɨ temaiwawemete memɨyuxata mete'itawatɨ.
1TI 6:21 Hipatɨ mɨkɨtsie mete'uwiyaka xaɨtsie mekaneukuyunixɨani yuri kememɨte'eriekai. 'Aixɨa ketiuka'iyarini xehetsiemieme.
2TI 1:1 Ne Papuru Kɨritsitu Ketsutsi nɨ'arieya nekanihɨkɨtɨni mɨpaɨ mɨtinakekɨ Kakaɨyari, mɨpaɨ mutayɨkɨ meripaitɨ kename tukari xuaweni Kɨritsitu Ketsutsi hetsie tiwiyakaku,
2TI 1:2 nekamaniwaɨritɨaka Timuteu pemɨneniwe nemɨmatsinaki'erie: Kakaɨyari mɨta'ukiyari meta Kɨritsitu Ketsutsi mɨtati'aitɨwame 'aixɨa mekete'u'iyarini 'ahetsiemieme, mekematsinenimayaka meta mekematsipitɨaka 'a'iyaritsie pemɨka'uximatɨariekakɨ.
2TI 1:3 Mɨkɨ Kakaɨyari nepayexeiya ne'iyari 'itiyakaku, ne'ukiyarimata kememɨteheyexeiyakai. Mɨkɨ pamɨpariyutsi nekanipitɨaka nematsiha'eriwatɨ nekatihayewatɨ tukarikɨ tɨkarikɨ kepauka nemɨnenenewie.
2TI 1:4 Yuheyemekɨ nepɨmatsiheuxeiyamɨkɨ nematsiha'eriwatɨ kepemɨtiutatsuakakai pe'ahiwerietɨ, xɨka nematsi'uxeiyake nepɨnetemawiekakeyu yemekɨ.
2TI 1:5 Nepɨmatsiha'eriwa yuri kepemɨti'erie yakɨ pekatikuxatatɨ, mɨpaɨ yuri tiuta'erieka meri 'apukatei 'akutsi Ruhira meta 'awarutsi 'Eunitsi. Yuri nepɨti'erie 'ekɨta wahepaɨ yuri pemɨti'eriekɨ.
2TI 1:6 'Ayumieme mɨpaɨ nepɨmaraye'eritɨwa pemɨkaratɨtɨmaiyanikɨ, pe'atatuatɨ yaketineyurieneni Kakaɨyari kemɨmatiupitɨa 'ahetsie ne'utimeku.
2TI 1:7 Kakaɨyari kemɨtatiumi pɨkatatsi'upitɨa ta'iyaritsie temɨmamakakɨ, matsi pɨta 'iyari pɨtatsi'umi mɨtɨrɨkaɨye, tatsipitɨatɨ temɨtetakanaki'eriekakɨ meta temɨtsetseɨyenikɨ.
2TI 1:8 'Ayumieme pepɨka'atewiyani petihekɨatatɨ Tati'aitɨwame hepaɨtsita, meta ne pepɨkanetsitewiyani, tsepa nemanutahɨiya hetsɨana nemɨmiemekɨ. 'Apɨta, 'ekɨta niuki 'aixɨa manuyɨnetsie mieme matsi ketinekwineni, petinewietɨ Kakaɨyari matsitɨrɨkariyakaku.
2TI 1:9 Mɨkɨ kanihɨkɨtɨni kemɨ'ane mɨtatsi'utawikweitsitɨa, mɨtatsi'uta'ini temɨpatsiekakɨ hetsiena miemekɨ, tita temɨteyuriekai tame mɨkɨkɨ 'atsipɨkatiuyuri, matsi mɨpaɨ mɨtiyuwaɨriyakaikɨ yɨkɨmana meta 'aixɨa mɨtiuka'iyarikɨ. Mɨpaɨ katiniuka'iyarikaitɨni tahetsiemieme tukari kaxuawekaku 'akuxi, tatsiha'eriwatɨ Kɨritsitu Ketsutsi hetsie ketemɨtewiyanikekaikɨ.
2TI 1:10 Hikɨri matsiɨkɨme kanayeitɨani 'aixɨa kemɨtiuka'iyari, munuakɨ tatsiwikweitsitɨwame Kɨritsitu Ketsutsi, mɨkɨ kemɨtiuyuri, taheyemekɨ temɨkakwi'inikɨ yakatiniuyurieni meta katiniutahekɨata ketemɨte'ayeyuyurini ketemɨkatetipɨne niuki 'aixɨa manuyɨnekɨ.
2TI 1:11 Ne nepukayerie mɨkɨ niuki hepaɨtsita nemɨtikuxatanikɨ, nɨ'ariekame meta nuiwarite tiwa'ɨkitɨwame nemayanikɨ.
2TI 1:12 Mɨpaɨ nemɨ'anekɨ, 'ayumieme mɨya nepɨtiuka'eniwa, peru nepɨkanetewiya nemimatekɨ kemɨ'anetsie yuri nemɨtiuta'eri, yuri nekatini'erieka mɨkɨ mɨyɨwekɨ mi'ɨwiyanikɨ tita mɨnetiyetuiri 'iya tukari mexi ka'aye'awe.
2TI 1:13 Para pemimaikakɨ 'ɨkitsika 'aixɨa mɨ'ane, pemi'eni yanetikuxatakaku kenexeiyani 'a'inɨaritɨme, yuri peti'erietɨ peti'akanaki'erietɨ Kɨritsitu Ketsutsi hetsie tiwiyatɨ kemɨtiyɨweni.
2TI 1:14 Kene'ɨwiyani tita 'aixɨa mɨti'ane pemɨyetuiriyarie, 'Iyari Mɨtiyupata tahetsie mɨyeka matsiparewiekaku.
2TI 1:15 Mɨpaɨ pepɨtimate, yunaitɨ 'Atsiya kwieyaritsie miemete mepɨnetsi'uku'eirie, me'aye'utɨ Pikeru meta Herumukenexi.
2TI 1:16 Ti'aitame kewanenimayaka 'Unetsipuru kie kiekatari, mɨkɨ mɨixa pɨnetiutaxatɨa nemɨka'ukawautsenikɨ, pɨkanetsitewiyakai tsepa nemanutahɨiyakai,
2TI 1:17 matsi Xumatsie 'uyeikatɨ pɨyumexɨitɨakai netsikuwaunetɨ 'atsita pɨnetsi'utaxei.
2TI 1:18 Ti'aitame ke'ipitɨaka mɨnenimayatsiekakɨ 'iya tukari 'aye'ayu Ti'aitame kemɨtixeiyani. Naime kemɨtatiparewiekai 'Epetsutsie heyeikatɨ, 'ekɨ matsi yapepɨtimate.
2TI 2:1 Merikɨte neniwe, kenetɨrɨkaɨyeni Kɨritsitu Ketsutsi yamatipitɨakaku 'aixɨa mɨtiuka'iyarikɨ.
2TI 2:2 Tita pemɨtiu'eni netikuxatakaku tehekɨatamete yumɨireme wahɨxie, mɨkɨ keniwayetuiri teɨteri yamemɨtekahu, mɨkɨta memɨyɨwawenikɨ mɨpaɨ memɨtewati'ɨkitɨanikɨ hipame.
2TI 2:3 Ketinekwineni 'ekɨta pe'amienetɨ Kɨritsitu Ketsutsi hetsiemieme, kuya 'aixɨa mɨtiuka'iyari hepaɨ peyɨanetɨ.
2TI 2:4 Kemɨ'ane mɨkuya pɨkayuwiyanɨa yu'uximayatsika kuwewienetɨ yɨkɨmana, matsi ninaki'aritɨamɨkɨni kemɨ'ane mitahɨawixɨ kuya mayanikɨ.
2TI 2:5 Yaxeikɨa nanautsame, kuruna pɨka'anutiketsiyarieni xɨka 'inɨari kemɨtiupitɨarie xɨka mɨpaɨ katiunautsa.
2TI 2:6 Mɨkɨ meta, kemɨ'ane mɨ'etsame mɨti'uximaya, kaneuyeweka mɨkɨ meri mɨtipitɨarienikɨ tita mɨtitixuawere.
2TI 2:7 Yaketine'akɨhɨaweni kenemaine mɨkɨ hepaɨtsita, Ti'aitame pɨmatsipitɨaka pemɨtimaiwenikɨ naime hepaɨtsita.
2TI 2:8 Kena'eriwani Ketsutsi Kɨritsitu, mɨkɨ mɨkite watsata nanukuketɨarieni, Rawiri nuiwarieya. Mɨpaɨ paine niuki 'aixɨa manuyɨne kenemɨtikuxata ne.
2TI 2:9 Mɨpaɨ nemɨtikuxatakɨ 'axanepɨ'itɨariexime, 'atsita nepanutahɨiya 'axatiyuruwame hepaɨ. Peru Kakaɨyari niukieya tixaɨ pɨka'anutahɨiwa.
2TI 2:10 'Ayumieme ne naime nepɨtinewie memanayexeiyarie wahetsiemiemekɨ, mɨkɨta memaye'axɨanikɨ memɨtawikweitsitɨarienikɨ Kɨritsitu Ketsutsi hetsie metewiyatɨ, mɨpaɨ memɨtepitɨariekakɨ meta yuheyemekɨ witsime'anenetɨ memakɨnekɨ.
2TI 2:11 'Ikɨ niuki yurikɨ paine: Xɨka hamatɨana te'ukwini, hamatɨanata tepayeyuyurini,
2TI 2:12 xɨka tete'uka'eniwani, hamatɨanata tepɨte'aitametetɨni. Xɨka tetaku'imawani kename teka'imate te'utiyuatɨ, mɨkɨrita pɨyuku'imawani kename katatsimate 'utaitɨ.
2TI 2:13 Xɨka tetehayewani yatetekahutɨ, mɨkɨ yatikamietɨ 'apuwe kayupatatɨ, pɨkayɨwe yamɨtiyurienenikɨ kemɨkatiuka'iyari.
2TI 2:14 'Ikɨ hepaɨtsita keniwaraye'eritɨwani, keniwahɨritɨaka Kakaɨyari hɨxie memɨkayukwitɨwenikɨ niuki hepaɨtsita, mɨpaɨ tiyurienetɨ 'atsipɨkayɨni 'aixɨa mɨ'anekɨ, pɨwaka'unaxɨani memɨ'enana xeikɨa.
2TI 2:15 Kene'amexɨitɨaka Kakaɨyari hɨxie pemɨmatsiɨkɨnikɨ kepemɨti'inɨatsie, ti'uximayatame hepaɨ peyɨanetɨ mɨkaheuyewetse mɨyutewiyanikɨ 'aixɨa mɨti'uximayakɨ meta heitseriemekɨ peti'ɨkitatɨ niuki yuri maine hepaɨtsita.
2TI 2:16 Yakɨ xeikɨa kememɨtekuxata mekate'ayexeiyatɨ, mɨkɨ hepaɨtsita kene'akweriwayurieka, mɨpaɨ metekuxatatɨ matsi yemekɨ Kakaɨyari metɨmaiyatɨ mepayuyeitɨaximeni xeikɨa.
2TI 2:17 Waniuki pɨyemie pɨniya hepaɨ. Mɨpaɨ mepɨ'anene Himeneu meta Piretu,
2TI 2:18 mɨkɨ mɨpaɨ memɨyɨa xaɨtsie meneukuyunixɨani tita yuri mɨraine hepaɨtsita, mɨpaɨ memutiyuanekɨ kename 'ari te'anuku'ui, hipame mepɨwamuina 'aixɨa mɨ'anekɨ yuri memɨkate'eriekakɨ.
2TI 2:19 Tsepatsɨ mɨpaɨ memɨteyurie, Kakaɨyari yutetsariya kaniutawewieni kii tutuikame, 'apuwe tse'itɨ 'uxaya matsiɨkɨkaku mɨpaɨ manuyɨne: «Ti'aitame pɨwamate yuteɨterima,» 'ipaɨ meta manuyɨne: «Yunaitɨ memehɨawe Ti'aitame mekeyukweriwayurieka tita mɨkatiheitserie hepaɨtsita».
2TI 2:20 Kii 'amupata huru pɨrata xakɨrɨteyari puxuawe, peru kɨye haxu xakɨrɨteyari puxuaweta, hipatɨ witsimɨ'anekɨ pɨ'ayumieme, hipatɨta 'axamɨ'anekɨ pɨ'ayumieme.
2TI 2:21 Merikɨtsɨ xɨka 'uyu'itieni mɨpaɨ memɨ'anene wahetsie mɨkatiwiyanikɨ, xakɨ witsimɨ'anekɨ mɨ'ayumieme payani patsietɨ, 'aixɨa tinaki'eriwatɨ kutsiyari kepauka meiyehɨwa, ha'aritsietɨ 'aixɨa mɨtiyurienenikɨ naimekɨ tsepa kemɨtitita.
2TI 2:22 Kene'ata'una pemɨkati'akahiwe'eriekakɨ temari wahepaɨ, mɨpaɨ pɨta ketine'amexɨitɨaka, heitseriemekɨ yapemɨtikamienikɨ, kepemaine yapemɨtiyurienenikɨ, pemɨti'akanaki'eriekakɨ, mɨkɨ memehɨawe Ti'aitame wa'iyari 'itiyatɨkaikaku, mɨkɨ wahamatɨa 'axeikɨa yaxeketeneyurieka 'aixɨa xemɨteyuxeiyanikɨ.
2TI 2:23 Memɨkatemaiwawe niuki kememɨtexɨatɨa 'atsimekatemaitɨ, mɨkɨ kenexani'erieka mɨpaɨ petimaitɨ, niuki metixɨatɨame mepɨyutakwini xeikɨa.
2TI 2:24 Kaneuyeweka kemɨ'ane Ti'aitame hetsiemieme mɨti'uximayatame mɨkayumieneni, matsi 'aixɨa pɨtiuka'iyarini yunaime wahamatɨa, pɨti'ɨkitawenikɨ meta mɨtiukanewie pɨhɨkɨtɨni,
2TI 2:25 'iyarieya 'aixɨa 'anekaku pɨwatiheitseriyani mɨkɨ memeye'unie, mɨpaɨ ra'eriwatɨ Kakaɨyari mɨwapitɨanikɨ memɨtehayewakɨ kememɨteyuriekai, tita yuri mɨraine memetimanikɨ,
2TI 2:26 memanutahɨtɨarienikɨ memɨtawikwenikɨ Kauyumarie winiyarieyatsie kɨmana memuwiyarie yamemɨtekahunikɨ kemɨtinake 'iya.
2TI 3:1 'Ipaɨ ketinemaika, tukari taparirɨmekaku 'ana kwaniwemekɨ mepɨyɨaka.
2TI 3:2 Teɨteri yuhetsiemieme mepɨtenaki'erieka xeikɨa, tumini mepɨhiwe'erieka, mepɨyuxeɨmakani, mepɨyuxani'erieka, mepɨwatsewiximani hipame 'axame'utiyuatɨ wahepaɨtsita, mepɨkawa'enieni yu'ukiyarima, pamɨpariyutsi mepɨka'ipitɨani xeime, 'axamepɨ'aneneni,
2TI 3:3 mepɨkayunaki'erieka, mepɨkayuhaxɨapitɨaka, mepɨyuniukimani, mepɨkateyu'aitɨaka, mepayu'eririyani, mepihekani tita 'aixɨa mɨti'ane,
2TI 3:4 mepɨwayetuani hipame, mepuyuti'ɨreni meta meka'itimamateketɨ yamepɨteyurieka, mepinaki'erieka tita mɨtiwanake peru mepɨka'inaki'erieka Kakaɨyari.
2TI 3:5 Kakaɨyari mayexeiya hepaɨ mepɨteyuhekɨaka, peru mepɨyuhekɨatani katɨrɨkaɨyeme memɨ'eriekɨ tita memɨte'ayexeiya. Ta'aurie kenawetsi mɨya memɨ'anene wahetsɨa pemɨka'uyeikanikɨ.
2TI 3:6 Mɨpaɨ mekani'aneneni mɨkɨ teɨteri kieta memeuhatɨka, metewa'irɨwiyatɨ 'ukarawetsixi 'atsimemɨkatemate 'axamemɨteyurie, memɨkayɨwawe wawaiyari kemɨtiyukahiwe'erie memɨnewieni.
2TI 3:7 'Ukarawetsixi mɨpaɨ memɨ'anene yuheyemekɨ mepɨteyɨ'ɨkitɨatɨwe, peru hatsuaku mepɨkayɨwawe memeitimanikɨ tita yuri mɨraine.
2TI 3:8 Yaxeikɨa Kanetsi meta Kamɨpɨretsi kememɨteheye'uniekai Muitsexi, 'ikɨta mekaneye'unieka tita yuri mɨraine. 'Ikɨ teɨteri mekanitipɨnirɨmeni kememɨteyumate, mepɨxani'eriwa yuri kememɨte'erie, matsi yuri memɨkate'eriekɨ.
2TI 3:9 Perutsɨ matsi waɨkawamekɨ 'atsimepɨkateyurieni, 'atsimemɨkatematekɨ mematsiɨkɨtɨ mekanayuyeitɨakuni yunaime wahɨxie, meripaitɨ miemetexi metematsiɨkɨtɨ memakɨ wahepaɨ.
2TI 3:10 'Ekɨ pɨta peniweiyani ne'inɨari tita nemɨti'ɨkitatsie petiwiyatɨ, kenemɨtikuyeika yapetiyurienetɨ, kenemɨtiyuriemɨkɨ, keyanemɨtikamie, kenemɨreuteriwe netiuka'eniwatɨ, kenemɨtinekanaki'erie, kenemɨtiuka'eniwa,
2TI 3:11 kenemɨtiuweiyarie, kenemɨtiukwinixɨ naime kenemu'itɨarie 'Anutiyukiyatsie, 'Ikuniyutsie meta Ritsitɨratsie, tsepa kenemɨtiukwinixɨ ne'uweiyarietɨ, Ti'aitame kaneniutawikweitsitɨani naimekɨ.
2TI 3:12 Metatsiere mekanitaweiyariexɨakuni yunaitɨ memɨyuwaɨriya Kakaɨyari me'ayexeiyatɨ memu'uwanikɨ Kɨritsitu Ketsutsi hetsie metewiyatɨ.
2TI 3:13 Matsi teɨteri 'axamemɨteyuriku memɨteyukwamana, waɨkawa 'axame'anenetɨ mepakɨnirɨmeni mete'irɨmatɨ mete'irɨwiyarietɨ meta.
2TI 3:14 Peru 'ekɨ titatsie pemɨti'a'ɨkitɨa tita pemɨretima mɨtiyurikɨ, mɨkɨtsie petiwiyatɨ kene'ahayewani. Pepɨwamate kehate mɨpaɨ memate'ɨkitɨakaku mɨpaɨ pemɨretima.
2TI 3:15 Mɨpaɨ pepɨtimate nunutsiyari paitɨ pemɨtimaikaikɨ kemaine 'utɨarika xapayari mɨpatsie, mɨkɨ pɨyɨwe petimaiweme mɨmatsi'ayeitɨanikɨ pemɨtawikweitsitɨarienikɨ yuri peti'erietɨ, mɨpaɨ kemɨtiyɨwe Kɨritsitu Ketsutsi hetsie tiwiyatɨ.
2TI 3:16 Naitɨ 'utɨarika xapayaritsie maye'uxa Kakaɨyari 'inetɨaku pɨre'uxa, mɨkɨ peuyewetse mɨti'ɨkitanikɨ, mɨtatieriwanikɨ, mɨtaheitseriyarienikɨ ti'ɨkitɨarietɨ mayanikɨ kepaɨ heitseriemekɨ yamɨtikamieni.
2TI 3:17 Mɨkɨ 'utɨarikakɨ Kakaɨyari tewiyari paye'ani pɨha'aritsieka 'aixɨa mɨtiyurienenikɨ naimekɨ tsepa kemɨtitita.
2TI 4:1 Kakaɨyari hɨxie, Kɨritsitu Ketsutsi hɨxie kemɨ'ane 'itsɨkametɨtɨ mɨwatahɨawe memayeyuyuri mɨkite yunaime, mɨkɨ munuaximekɨ ti'aitametɨtɨ, mɨpaɨ nematinihɨritɨaka:
2TI 4:2 Niuki kenekuxatani. Mɨkɨkɨ kene'ayumiemetɨni penaki'eriwatɨ pekanaki'eriwatɨ. Keniwarutati'a keniwaku'imaiyani keniwatuikani. Naimekɨ 'eketineutewini petiuka'eniwatɨ, naimekɨ ketine'ɨkitani.
2TI 4:3 Tukari kanaye'amɨkɨ kepauka memɨkahei'eniekuni 'ɨkitsika 'aixɨa mɨ'ane, matsi kemɨtiwanake mepɨwarukuxexeɨriwani te'ɨkitamete, tita memɨteheu'eniku xeikɨa memɨtewakuxaxatɨwanikɨ.
2TI 4:4 Ta'aurie mepaxɨrieni meka'i'eniekutɨ tita yuri mɨraine, xaɨtsie mepeukuyunixɨani yɨ'ɨxatsitsie memɨtewiyanikɨ.
2TI 4:5 'Ekɨtsɨ naimekɨ kene'amaika. Ketineukanewieka tsepa 'axapemɨ'itɨariene. Ketine'uximayaka petikuxatatɨ niuki 'aixɨa manuyɨnekɨ, 'ahɨritɨarika kenaye'atɨa yemekɨ.
2TI 4:6 Neri mawari nepayeitɨariexime, tukari kanahuraniri nemɨyemiekɨ.
2TI 4:7 'Aixɨa 'anemekɨ nenetatuatɨ nepɨnemienekai, kenemɨtiunautsarɨmekai nepeta'a, nepɨkatiuhayewaxɨ yanetikamietɨ.
2TI 4:8 Hikɨ nepe'utsiyarie kuruna nemɨmariwakɨ heitseriemekɨ yanemɨtikatɨakɨ, ti'aitame 'itsɨkame kanihɨkɨtɨni heitseriemekɨ yamɨtikamie, mɨkɨ mɨpaɨ pɨnetipitɨani 'iya tukari 'aye'ayu, ne xeikɨa mɨpaɨ pɨkanetipitɨani, matsi yunaitɨ memɨnaki'a munuaximekɨ mɨpaɨ pɨtiwapitɨani mɨkɨ.
2TI 4:9 Kene'amexɨitɨaka kwitɨ nehetsɨa pemɨnuanikɨ.
2TI 4:10 Remaxi pɨnetsi'uku'eiri kwiepa timieme tinaki'erietɨ, Tetsarunika paitɨ kaneyani. Kɨretseniti Karatsiya kwieyaritsie petɨa, Titu Tarɨmatsiyatsie paitɨ retɨa.
2TI 4:11 Rukaxi yuxaɨta nehamatɨa puyeika. Kenawitɨki Marikuxi, 'a'utɨma kene'atɨa, mɨkɨ 'aixɨa pɨ'ane mɨnetsiparewiekakɨ.
2TI 4:12 Tikiku nepenɨ'a 'Epetsu paitɨ.
2TI 4:13 Mɨkɨ 'ɨkari Tɨruhatsi paitɨ nemeiku'eiri Karɨpu hetsɨa, kenahuri pemamiekɨ, xapate kenahuri nawitsie mɨraye'utɨka matsi.
2TI 4:14 Herekanituru tepɨakɨ tiwewiwame 'axapɨnetsi'uyuri waɨkawa. Ti'aitame 'epɨrepinirieni mɨpaɨ 'axamɨnetsi'uyurikɨ.
2TI 4:15 'Ekɨta kene'akweriwayurieka hepaɨtsitana, yemekɨ peye'uniekai taniuki.
2TI 4:16 Matɨari nehetsiemieme nemutaniutsie, nixewitɨ neheima pɨka'utanua, yunaitɨ mepɨnetsi'uku'eiri. Merikɨte wahetsie pɨkatiuhɨiwani mɨkɨkɨ.
2TI 4:17 Ti'aitame matsi ne'aurie puwekai netsitɨrɨkariyatɨ 'ikɨ xatsikaya yemekɨ mɨkuxaxatsiwanikɨ yanetikuxatakaku, yunaitɨ nuiwarite memi'enienikɨ. Neputawikweitsitɨarie maye pɨkanetsi'utakwai.
2TI 4:18 Ti'aitame pɨnetsitawikweitsitɨani tsepa kememɨteyurie 'axamenetsiyuriekutɨ. 'Atsineka'itɨariewekaku pɨnetsi'aye'atɨani hakewa mɨre'aita muyuawitsie, mana nemaye'anikɨ. Hepaɨtsitana 'aixɨa ketikuxaxatsiwani yuheyemekɨ. Mɨpaɨ ketiuyɨni.
2TI 4:19 Keniwawaɨritɨaka Pɨritsira 'Akira mame, 'Unetsipuru kie kiekatari meta.
2TI 4:20 'Eratsitu mana peyuhayewaxɨ Kurinitu kiekariyaritsie, Tɨrupimu nepeku'eiri Miretutsie tikuyekaku.
2TI 4:21 Kene'amexɨitɨaka pemɨnuanikɨ ka'uhaɨtɨkaku 'akuxi. 'Eupuruxi, Purenitsi, Rinu, Kɨrauriya meta yunaitɨ ta'iwama mepɨmatsiwaɨritɨa.
2TI 4:22 Ti'aitame 'a'iyari keteɨtani. 'Aixɨa ketiuka'iyarini xehetsiemieme.
TIT 1:1 Ne Papuru ti'uximayatame nekanihɨkɨtɨni Kakaɨyari hetsiemieme, Ketsutsi Kɨritsitu nɨ'arieya nekanihɨkɨtɨni, yuri neti'erietɨ yaxeikɨa yuri kememɨte'erie mɨkɨ Kakaɨyari mɨwaranayexei, mɨpaɨta netimaitɨ tita yuri mɨraine, kemɨreuyewetse yamɨtimaikakɨ Kakaɨyari xɨka 'ayexeiyani.
TIT 1:2 Mɨpaɨ nekatiniyurieneni nemitakwewiekɨ tukari mɨkaxɨwe nemexeiyanikɨ, Kakaɨyari pɨkati'itawa, meripaitɨ tukari kaxuawekaku 'akuxi mɨpaɨ putayɨ tukari mɨtatsipitɨanikekaikɨ.
TIT 1:3 Hikɨrixɨa tukari 'aixɨa mɨ'ane 'aye'aku, matsiɨkɨme kanayeitɨani yuniuki, teɨteri yametekuxatakaku, nekaniuhɨritɨarieni mɨpaɨ nemɨtikuxatanikɨ ne, mɨpaɨ mɨtiuta'aikɨ tatsiwikweitsitɨwame Kakaɨyari.
TIT 1:4 Ne nekamaniwaɨritɨaka Titu, yurikɨ pekanineniwetɨni, yuri ketemɨte'erie tanaitɨ: Kakaɨyari mɨta'ukiyari, Kɨritsitu Ketsutsi mɨtatsiwikweitsitɨwame, 'aixɨa mekete'u'iyarini 'ahetsiemieme, 'a'iyaritsie mekematsipitɨaka pemɨka'uximatɨariekakɨ.
TIT 1:5 Mɨkɨkɨ nekameneku'eirieni Kɨretatsie, tita mɨreuyewekai pemɨrenɨnikɨ, pemɨwakuyatsaxɨanikɨ 'ukirawetsixi xexuime kiekaritsie, yaxeikɨa kenemɨmatiutahɨawixɨ,
TIT 1:6 kemɨ'ane mɨkaniukimarie, kemɨ'ane xeihɨkɨame mɨ'ɨya, kemɨ'ane yɨtɨriyama mɨwarexeiya yuri mete'eriekame wahetsie karahɨiwakaku, kename merukuyatɨwe kename mekahei'enie mɨpaɨ karaniuwakaku.
TIT 1:7 Kakaɨyari hetsiemieme mɨhɨritɨariekɨ, kaneuyeweka kemɨ'ane ti'ɨwiyame mɨhɨkɨ mɨkaniukimariekakɨ, yuhetsiemieme xeikɨa pɨkayɨaneni, mayu'eriya pɨkahɨkɨtɨni, tawekame pɨkahɨkɨtɨni, pɨkawatiwayani, tumini pɨkahiwe'erieka kwamanarikakɨ.
TIT 1:8 Matsi peuyewetse yukie mɨwatanaki'erienikɨ 'iwatamete, pinaki'erieka tita 'aixɨa mɨti'ane, pɨtimaiweni, heitseriemekɨ yapɨtikamieni, Kakaɨyari payexeiyani kwinimieme, pɨtseɨyeni yu'iyaritsie kemɨtiyu'aitɨa.
TIT 1:9 Peuyewetse mɨtiwiyanikɨ niuki yuri mainetsie, 'ɨkitsika kemɨtiuta'ɨkitɨarie hepaɨ, mɨyɨwenikɨ mɨwatuikani ti'ɨkitatɨ 'ɨkitsika 'aixɨa mɨ'anekɨ yemekɨ, meta pɨyɨweni mɨwatahekɨatakɨ memɨniukixie.
TIT 1:10 Yumɨiretɨ 'ameniu'uwani mekaheu'enanatɨ, yakɨ xeikɨa metekuxatatɨ, meteyukwamanatɨ, mɨkɨ xitekiya 'inɨariyaritsie memɨtewiya matsi yemekɨ mɨya mepɨ'anene.
TIT 1:11 Peuyewetse memanunamiyarienikɨ kememɨtekuxata, mepɨwamuina 'atsita xeime kie kiekatari yunaime, mepɨte'ɨkita tita 'aixɨa mɨkati'ane, mete'iwakutɨ xeikɨa 'axamɨti'anekɨ.
TIT 1:12 Wahetsɨa mieme tixaxatame xewitɨ mɨpaɨ kaniutayɨni: «Kɨretatari yuheyemekɨ mekateni'itawani, yeutari memayu'eririya mekanihɨkɨtɨni, mekaniyu'ɨraraxieka yuyuriepa metewiyatɨ xeikɨa».
TIT 1:13 Mɨkɨ yemekɨ yurikɨ kaniutayɨni. 'Ayumieme keniwarutati'a tɨrɨkaɨyemekɨ, mɨkɨ memɨtsetseɨyenikɨ, yuri mete'erietɨ 'aixɨa 'anemekɨ,
TIT 1:14 mekawa'enietɨ huriyutsixi yakɨ xeikɨa kememɨte'ɨxatsita meta tita memɨte'aita teɨteri memixani'erie tita yurikɨ mɨraine.
TIT 1:15 Kememɨte'ixeiya mɨkɨ memɨ'itiyatɨka, naitɨ katini'itiyaka, peru mɨkɨ memɨka'itiyatɨka yuri memɨkate'erie kememɨte'ixeiya, tixaɨ pɨkatixuawe mɨti'itiya, matsi mekanitsewiximarieka kememɨteyumate meta yu'iyaritsie.
TIT 1:16 Mekaniyuhekɨatani kename waniu me'imate Kakaɨyari me'utiyuatɨ, peru kememɨteyurie mepɨyuhekɨata matsi kename meka'imate, mekanixani'eriwani, yamepɨkatekahu, meta mepɨkayɨwawe 'aixɨa memɨte'uyurieni.
TIT 2:1 'Ekɨ matsi pɨta mɨpaɨ ketinekuxatani kemɨreuyewetse, 'ɨkitsika 'aixɨa mɨ'anekɨ.
TIT 2:2 'Ukirawetsixi mekeyumateni, 'aixɨa meketehekahuni, meketehemaiwaweni kemɨreuyewetse yamɨtiyurienenikɨ, meketsetseɨyeni yuri kememɨte'erie, kememɨteyukanaki'erie, kememɨte'uka'eniwa.
TIT 2:3 Yaxeikɨa 'ukarawetsixi kememɨte'u'uwa, mɨpaɨ meketeyurieka kemɨreuyewetse yamɨtiyurienenikɨ Kakaɨyari hetsɨa miemetɨtɨ, mepɨkatehayuye'unieka, winukɨ mepɨka'u'uwani xeikɨa. Tita 'aixɨa mɨti'anekɨ xeikɨa mekete'ɨkitani,
TIT 2:4 mɨpaɨ metewa'ɨkitɨatɨ 'ukari memɨwanaki'eriekakɨ yɨkɨnama meta yɨtɨɨriyama,
TIT 2:5 memɨtemaiwawenikɨ kemɨreuyewetse yamɨtiyurieni meta yɨkɨnama wahetsie memɨtewiyanikɨ me'itiyatɨkaitɨ, yukie memɨte'uximayakakɨ, 'aixɨa memɨte'u'iyarinikɨ, memɨteyu'aitɨarinɨakakɨ wakɨnama kememaitɨka, xɨka mɨpaɨ me'aneneni, Kakaɨyari niukieya 'axapɨkatikuxaxatsiwani.
TIT 2:6 Mɨpaɨ yaxeikɨa ketiniwatuikani 'ukitsi memɨtemaiwawenikɨ kemɨreuyewetse yamɨtiyurienenikɨ.
TIT 2:7 Naime hepaɨtsita 'inɨari kena'ayeitɨwani 'aixɨa petiyurienetɨ. Kepemɨti'ɨkita, 'a'iyaritsie 'aixɨa peti'akɨhɨawetɨ ketine'ɨkitani 'aixɨa petikamietɨ.
TIT 2:8 Mɨpaɨ ketinekuxatani 'aniuki 'aixɨa 'anemekɨ meta xewitɨ mɨkayɨwenikɨ mitawe'eriekakɨ, kemɨ'ane mɨxe'aye'unie mɨtewiyatsitɨarienikɨ matsi, kayɨwetɨ mayanikɨ 'axamainenikɨ xehepaɨtsita.
TIT 2:9 Mɨkɨ waɨriyarika memɨte'uximaya meketeyu'aitɨarinɨaka wakutsiyarima kememaitɨka naimekɨ, mekewanaki'aritɨaka matsi, mepɨkayu'ariwawieka.
TIT 2:10 Mepɨkatewanawatsirieka, matsi mekewahekɨatsitɨiyani yamemɨtekahukɨ, tatsiwikweitsitɨwame Kakaɨyari 'ɨkitsikaya witsimɨtixeiyariekakɨ naimekɨ.
TIT 2:11 'Ari matsiɨkɨtɨ kanayani 'aixɨa kemɨtiuka'iyari Kakaɨyari, mɨpaɨ mɨ'anekɨ, yunaitɨ teɨteri mekaniyɨwaweni memɨtawikweitsitɨarienikɨ,
TIT 2:12 'ayumieme mɨpaɨ tekateni'ɨkitɨarieka temɨtahekɨatanikɨ kename mɨkɨ Kakaɨyari memɨka'ayexeiya wahetsɨa tekamiemete, kename tame teka'ihiwe'erie tita kwiepa memɨtama memɨtehiwe'erie. Matsi yeme 'ipaɨ pɨta tepɨte'ɨkitɨarie ketemɨte'u'uwanikɨ, tetemaiwawetɨ kemɨreuyewetse yatemɨteyuriekakɨ, heitseriemekɨ yatetekahutɨ, Kakaɨyari te'ayexeiyatɨ hikɨ temu'uwanikɨ 'ena kwiepa,
TIT 2:13 meta temikwewiekakɨ kemɨ'ane yemekɨ mɨtatsitemawieritɨani. Hikɨ tepikwewie, matsiɨkɨtɨ mayanikɨ witsi'anetɨ kemɨ'ane Kakaɨyari mɨhɨkɨ mɨmariwe tatsiwikweitsitɨwame Kɨritsitu Ketsutsi hɨkɨtɨtɨ.
TIT 2:14 Mɨkɨ kaniyuyetuani tahetsiemieme, mɨtatsixɨnakɨ 'inɨari temeutitsanaxɨaku, meta mɨtatsi'itienikɨ yuhetsiemieme teɨterimama temanayexeiyarie temakɨnekɨ, tetawaɨriyatɨ 'aixɨa temɨteyuriekakɨ.
TIT 2:15 Mɨpaɨ ketinekuxatani meta waɨriyarika keniwapitɨaka, keniwahekɨatɨaka heitserie petiwa'aitɨatɨ, xewitɨ mɨkamatsitawe'eriekakɨ.
TIT 3:1 Keniwaraye'eritɨwani yamemɨtekahunikɨ te'aitamete heitserie memexeiya kememaitɨka, memɨteyu'aitɨarinɨakakɨ, memɨyuwaɨriyanikɨ 'aixɨa memɨteyuriekakɨ tsepa kemɨtitita 'aixɨa mɨti'ane:
TIT 3:2 hipame wahepaɨtsita 'axamemɨka'utiyuanenikɨ, memɨkayukwitɨwenikɨ, memɨka'ayu'eririyanikɨ, mɨmatsiɨkɨnikɨ kename tixaɨtɨ mekatehɨkɨ kememɨtewaxeiya yunaime teɨteri.
TIT 3:3 Tameri tanaitɨ meripaitɨ 'atsitekatemaitɨ tekaniu'uwakaitɨni meta yatepɨkatekahukai. Tepeuyexɨriekai waɨriyarika tepɨte'uximayakai tita temɨtehiwe'eriekaitsie mieme xeikɨa, mɨiremekɨ temɨnaki'akakɨ xeikɨa tepɨyɨakai. 'Atepu'uwakai 'axateteyuriekutɨ meta te'ɨtetsatɨ. Tepɨxani'eriwakai, tepɨta'uxiwe'eriekai tanaitɨ.
TIT 3:4 Peru kepauka matsiɨkɨtɨ matɨa 'aixɨa kemɨtiuka'iyari meta Kakaɨyari naki'eriyaya tatsiwikweitsitɨwame,
TIT 3:5 mɨkɨ kataniutawikweitsitɨani, tame heitseriemekɨ yatemɨtekahukaikɨ pɨkatiuyuri, matsi mɨkɨ mɨtatsinenimayakaikɨ pɨta. Pɨtatsi'utawikweitsitɨa tatsi'itietɨ hutarieka tatsi'utinuiwitɨaka, 'Iyari Mɨtiyupatakɨ tatsihekwariyatɨ.
TIT 3:6 Mɨkɨ 'Iyari kaniutatuani tahetsie waɨkawamekɨ temeixeiyanikɨ, tatsiwikweitsitɨwame Ketsutsi Kɨritsitu yatatiumiku.
TIT 3:7 Heitserie tepupitɨarie mɨkɨ 'aixɨa mɨtiuka'iyarikɨ, 'ayumieme tahetsie katininakeni tukari mɨkaxɨwe temexeiyanikɨ, mɨpaɨ yuri tete'erietɨ tepɨta'ikwewa.
TIT 3:8 Mɨkɨ niuki yurikɨ paine, mɨpaɨ nepɨtiku'eriwa, peuyewetse tɨrɨkaɨyemekɨ mɨpaɨ pemɨtiwatahɨawekɨ, peuyewetse mɨkɨ yuri memɨte'uta'eriwa Kakaɨyaritsie memɨyu'iyaritɨakakɨ kehepaɨ 'aixɨa memɨteyurieka. 'Aixɨa kani'anemɨkɨ kaniwaparewiekamɨkɨ teɨteri, mɨpaɨ memɨteyuriekakɨ.
TIT 3:9 Peru niuki kememɨtexɨatɨa 'atsimekatemaitɨ, kememɨtekuwautɨwe yunuiwari hepaɨtsita, kememɨteyuheka, 'inɨari niukiyari hepaɨtsita kememɨteyukwitɨwe, mɨkɨ hepaɨtsita kene'akweriwayurieka, 'axa'anetɨ payeika kememɨteyurie meta xɨanakɨa payeika.
TIT 3:10 Kemɨ'ane yuhetsie mɨtiwawiyatsitɨa 'iwamarixi, mɨkɨ hutakɨa pe'ita'imaiyame, kenanuyehɨwa.
TIT 3:11 Mɨpaɨ petimaitɨ, kemɨ'ane mɨpaɨ mɨtiyuriene kaneutunini, 'axakatiniyurieneni, yɨkɨmana yuhetsie katiniuhɨpani.
TIT 3:12 'Ahetsɨa kepauka menuani 'Arɨtema yatɨni Tikiku nehenunɨ'ayu, kene'amexɨitɨa nehetsɨa pemɨmiekɨ Nikupuri paitɨ, mɨpaɨ nepɨtiku'eriwa, mana nepekani muhaɨtɨnitsie.
TIT 3:13 Tsenaxi 'inɨarikɨ mɨti'ɨkitame meta 'Apuruxi keniwareparewieka naimekɨ, 'aixɨa 'iyarikɨ pe'atatuatɨ, huyeta tixaɨtɨ memɨkateheuyehɨakakɨ.
TIT 3:14 Tateɨterima mɨpaɨ meketeyɨ'ɨkitɨaka 'aixɨa memɨteyuriekakɨ memeixeiyanikɨ tita mɨreuyewetse, kapa meka'utixuxuaweretɨ me'akɨnekɨ.
TIT 3:15 Yunaitɨ nehetsɨa memu'uwa mekamaniwaɨritɨaka. 'Ekɨta keniwawaɨritɨaka mɨkɨ memɨtatsinaki'erie yuri mete'erietɨ. 'Aixɨa ketiuka'iyarini yunaime xehetsiemieme takakaɨyari. Mɨpaɨ xeikɨa.
PHM 1:1 Ne Papuru, ne'anutahɨiyatɨ Kɨritsitu Ketsutsi hetsiemieme, ta'iwa Timuteu hamatɨa tekanixewaɨritɨaka, 'ekɨ Kirimuni temɨmatsinaki'erie tahamatɨa pemɨti'uximaya,
PHM 1:2 meta ta'iwa 'Apiya mɨtitewa teminaki'erie, meta 'Arukipu ta'iwa tahepaɨ mɨti'uximayatame, yaxeikɨata yuri memɨte'erie 'akiita memuyutixexeɨriwa.
PHM 1:3 Kakaɨyari mɨta'ukiyari meta Tati'aitɨwame Ketsutsi Kɨritsitu, mɨkɨ 'aixɨa 'anemekɨ mekexepitɨaka yu'iyaritsie xemɨka'uximatɨariekakɨ.
PHM 1:4 Yuheyemekɨ pamɨpariyutsi nekakaɨyari nekanipitɨaka, kepauka nemuyunenewie nemetsiha'eriwatɨ,
PHM 1:5 'ahetsiemieme nemɨtimariekɨ kepemɨtiwanaki'erie Kakaɨyari teɨterimama yunaime, Ti'aitame Ketsutsi hetsie yuri peti'erietɨ.
PHM 1:6 Mɨpaɨ Kakaɨyari nekatiniwawirieka, yaxeikɨa temɨpitɨariekakɨ matsi yemekɨ mɨhekɨakakɨ Kɨritsitu hetsie tetewiyatɨ temakɨnekɨ, teyunaitɨ temɨtaxewikɨ yuri tete'erietɨ, xɨka 'aixɨa teteyurieka tita temɨtehexeiya 'aixɨa mɨti'anekɨ naime.
PHM 1:7 Ne'iwa nepɨnetemawie 'ahetsiemieme 'ekɨ kepemɨti'akanaki'eriekɨ meta nepɨnɨtɨarie waɨkawa, Kakaɨyari teɨterimama memɨpatsie mekanitseiriyarieka yu'iyaritsie, 'ekɨ kepemɨtiyuriene.
PHM 1:8 'Ayumieme, Kɨritsitu hetsie netiwiyatɨ tsepanetɨ heitserie nemexeiya nekamatɨ nemɨmati'aitɨakakɨ kemɨreuyewetse,
PHM 1:9 matsi temɨtetakanaki'eriekɨ, 'ayumieme waɨriyarika nekamenipitɨaka. Ne Papuru hikɨri, ne'ukiratsitɨtɨ, nepanutahɨiya Kɨritsitu Ketsutsi hetsiemieme,
PHM 1:10 nekameniwawirieka neniwe 'Unetsimu hetsiemieme, kemɨ'ane neniwe matɨa mexi'akuxi ne'anutahɨiyakai.
PHM 1:11 Meripaitɨ pɨkatiyunaki'eriekai 'ahetsiemieme, matsi hikɨ tekaneiyehɨaka waɨkawa ne meta 'ekɨ teyunaitɨ.
PHM 1:12 Tawarita 'ahetsɨa nekanenunɨ'amɨkɨ, 'aixɨa 'anekamekɨ kenetanaki'eri ne nemeyɨaneni hepaɨ.
PHM 1:13 Nehetsɨa puyuhayewanikeyu, 'ahetsiemieme mɨnetsiparewienikɨ mexi'akuxi ne'anutahɨiyaka niuki 'aixɨa manuyɨne hetsiemieme.
PHM 1:14 Matsi 'ekɨ 'atsipekatimaikaku, nepɨkanewaɨri nemikunuitɨanikɨ, 'aixɨa kepemɨtiyuriene waɨriyarika pemɨkayɨanenikɨ, matsi pɨta waɨkawamekɨ pe'awaɨriyatɨ.
PHM 1:15 Xɨari 'ayumieme 'Unetsimu yapaɨmexɨa 'ahamatɨa pɨka'uyeikakai, hikɨrixɨa yuheyemekɨ pepitanaki'erieni,
PHM 1:16 waɨriyarika mɨti'aitɨarieri pɨkahɨkɨtɨni, matsi pɨta waɨkawa meuyewetse: ta'iwa mɨnaki'eriwa, ne yemekɨ nehetsiemieme pɨtiyunaki'erie, 'ekɨ matsi waɨkawamekɨ pekaneiyehɨaka, tewitɨme meta 'a'iwatɨme Ti'aitame hetsiemieme.
PHM 1:17 'Ayumieme xɨka tetaxewini tete'uximayatɨ, kenetanaki'eri ne nemɨyɨaneni hepaɨ.
PHM 1:18 Xɨka 'axatiuyurieni, yatɨni xɨka merapinirieka, yakenetineutahɨawi ne nepɨrayukatuani.
PHM 1:19 Ne Papuru nemamakɨ mɨpaɨ nepɨtiu'utɨa: ne nepɨrayukatuani, ne yanepɨkametitahɨawe 'ekɨ pemɨnerapiniriekɨ 'atukarikɨ.
PHM 1:20 Huu ne'iwa, nepɨmetsiwawirie yapemɨtiyurienikɨ Ti'aitame hetsie 'ikɨ hepaɨtsita, ne'iyari kenɨtɨarieka Kɨritsitu hetsiemieme.
PHM 1:21 Nepɨmeti'utɨirie nemɨtimatekɨ yapemɨtikamiekɨ, mɨpaɨ netimaitɨ, kenemɨkametiwawirie matsi 'ekɨ waɨkawa pekatiniyurimɨkɨ.
PHM 1:22 Matsi 'ayumieme, kenenetiwawiri hakewa nemayekani, mɨpaɨ nepɨtita'ikwewa Kakaɨyaritsie yuri neti'erietɨ, xeyunenewiekaku nemɨpitɨarienikɨ xehetsɨa hutarieka nemuyeikanikɨ.
PHM 1:23 'Epapɨraxi kameniwaɨritɨaka, nehepaɨ manutahɨiya Kɨritsitu Ketsutsi hetsiemieme,
PHM 1:24 meta Marikuxi, 'Aritsitariku, Remaxi meta Rukaxi, nehamatɨa te'uximayatamete.
PHM 1:25 Ti'aitame Ketsutsi Kɨritsitu 'aixɨa ketiuka'iyarini yuxexuime xe'iyaritsie. Mɨpaɨ xeikɨa kani'aneni.
HEB 1:1 Kakaɨyari, meripaitɨ katiniwakuxaxatɨwakaitɨni tapaapama, Kakaɨyari niukametemama yametekuxatakaku, yuxexuitɨ kememɨte'upitɨarie niuki yɨkɨ mɨ'anene hepaɨtsita.
HEB 1:2 Hikɨ tukari taparirɨmekaku pɨtatiutaxatɨa tame, kemɨ'ane nu'aya mɨhɨkɨ pɨta yatikuxatakaku. Mɨkɨ yuniwe kaniukayeni hetsiena mɨtinakenikɨ naitɨ, mɨkɨ hetsie Kakaɨyari tita 'amɨtikuma katiniunetɨani.
HEB 1:3 Mɨkɨ hetsie Kakaɨyari kemɨtixawatɨ kanimatsiɨkɨni meta kemɨtimariwe, Kakaɨyari kani'inɨarieyatɨni kaniyuritɨni. Naime meta pɨratɨkɨ yuniuki mɨtɨrɨkaɨyekɨ, mɨkɨ yɨkɨmana 'aixɨa 'iyurieka tita 'axatemɨte'uyuri hepaɨtsita mɨtatsi'itienikɨ, 'ana kemɨ'ane mɨmariwe tserieta kanayerɨni muyuawitsie.
HEB 1:4 Mɨkɨ kaniupitɨarieni yemekɨ mɨmariwanikɨ kemɨ'ane mɨhɨkɨ, peru taheima miemete niuki tuayamete hepaɨna mepɨkate'upitɨarie, yaxeikɨata mariwetɨ kanayani, mɨkɨ hepaɨna mekamamariwawekaku.
HEB 1:5 ¿Kakaɨyari kemɨ'ane mɨpaɨ pɨtiutahɨawixɨ niuki tuayamete xeime heiwa: «'Ekɨ pepɨneniwe, hikɨri nekamaniutinuiwitɨani», 'utaitɨ, nutsu keri 'utayɨ: «Ne 'ukiyarieya nepayani, mɨkɨ neniwe payani»?
HEB 1:6 Matsi tukari hepaɨtsita tikuxatatɨ kepauka kwiepa mi'atɨani yumatɨari mɨpaɨ pɨta kanaineni: «Yunaitɨ Kakaɨyari hetsɨa miemete niuki tuayamete meke'eyexeiyani».
HEB 1:7 Niuki tuayamete wahepaɨtsita mɨpaɨ paine: «Yuniuki tuayamete 'eka kaniwarayeitɨwani, te'i'uximayatsiriwamete meta tai nerɨkwari kaniwarayeitɨwani».
HEB 1:8 Yuniwe pɨta xatatɨ mɨpaɨ paine: «'Ekɨ, Kakaɨyari, 'a'uweni hakewa pemɨra'aita yuheyemekɨ 'apuwe, kanixeuraɨyeni 'a'itsɨ pemakwe'e pemɨti'aitamekɨ 'inɨari kanihɨkɨtɨni heitseriemekɨ kepemɨtikamie 'ekɨ.
HEB 1:9 Pepinaki'erie tita mɨtiheitserie, pepi'uxiwe'erie tita 'aitsika mɨtititsana, Kakaɨyari 'aku kemɨ'ane mɨ'akakaɨyari pɨmatsi'anayexei, temawierika metsipitɨatɨ, 'inɨaritɨme 'ahamikuma kawaranayexeiyaka».
HEB 1:10 Mɨpaɨ paineta: «'Ekɨ, Ti'aitame, tsutɨapai kwie pepukama, muyuawi peputawewi 'amamakɨ.
HEB 1:11 Mɨkɨ pukumawere, 'ekɨ pɨta 'apeniuwemɨkɨ. 'Ixuriki hepaɨ mɨkɨ naitɨ kanitaye'irimɨkɨ.
HEB 1:12 Muyuawi pepɨtatuna 'ɨkari hepaɨ, kamixa hepaɨ pɨpatsieni, matsi 'ekɨ yaxeikɨa pe'anetɨ pepɨ'ahayewa, 'atukari pɨkatixɨni».
HEB 1:13 ¿Keri hatsuaku titahɨawiwe niuki tuayamete xeime mɨpaɨ tikɨhɨawetɨ: «Netserieta kenayexi, ne nekaniwaka'unamɨkɨ memɨmetsi'aye'unie, 'ahɨxie nekaniwa'atɨamɨkɨ»?
HEB 1:14 ¿Kamɨtsɨ niuki tuayamete yunaitɨ 'iyarite mekatehɨkɨ, Kakaɨyari memɨte'uximayatsiriwamete, memɨtanɨ'ariwa memɨwaparewienikɨ kemɨ'ane wahetsie mɨtinakirɨme memɨtawikweitsitɨarienikɨ?
HEB 2:1 Mɨpaɨ mɨ'anekɨ, 'ayumieme kaneuyeweka matsi waɨkawa teme'eriwanikɨ tita temɨte'u'eni kapa yakɨ xeikɨa teyɨatɨ 'ateewa te'u'uwanikɨ.
HEB 2:2 Kamɨ mɨkɨ niuki mutaxatsie niuki tuayamete taheima miemete yametekuxatakaku, mɨkɨ kaniyuritɨkaitɨni, yunaitɨ memititsanaxɨa meta yunaitɨ memɨka'i'eniekai mekatenakapitɨarieni, wahetsie kemɨtinakekai, kemɨreuyewekai.
HEB 2:3 ¿Merikɨte, xɨka mɨpaɨ 'aneni, ketsɨ tetetawikweni tame xɨka te'itawe'erieka 'ikɨ wikweitsitɨarika mɨya mɨtitɨrɨkaɨye? Mɨkɨ kaniutsutɨarieni Ti'aitame yatikuxatakaku ketemɨtetawikweitsitɨarieni haitɨ, niukieya meputseiriyaxɨ mɨkɨta memi'eniekai mɨpaɨ temɨtemaikakɨ tame.
HEB 2:4 Kakaɨyari meta 'axeikɨa wahamatɨa mɨpaɨ katinihekɨatakaitɨni 'inɨari wewietɨ mamariwaweme, tɨrɨkaɨyemekɨ tiyurienetɨ mɨiremekɨ, 'Iyari Mɨtiyupata yatiwapitɨakaku yuxexuime, kemɨtinakekai Kakaɨyari.
HEB 2:5 Kemɨtiu'aitaxɨ mɨkɨ kwie 'umamie hepaɨtsita, niuki tuayamete memɨte'aitanikɨ muwa 'atsipɨka'utayɨ, mɨkɨ kwie kanihɨkɨtɨni tita hepaɨtsita temɨtekuxata.
HEB 2:6 Hekɨatsika kanixuaweni xapatsie mɨpaɨ manuyɨne: «¿Teɨteri ketita metehɨkɨ pemɨwara'eriwanikɨ? ¿Teɨteri waniwema ketita metehɨkɨ pemɨ'awaɨrikɨ wahetsiemieme?
HEB 2:7 Pekaniwarukayatsa niuki tuayamete wahepaɨ memɨkatɨrɨkawinikɨ, kuruna pekaniwaranutimanirieni witsime'anenetɨ memakɨnekɨ 'aixɨa memɨtexeiyariekakɨ,
HEB 2:8 naime pepɨtiyetuiri mɨtiwata'aitɨanikɨ, xɨka Kakaɨyari naime hetɨana titipini». Merikɨtsɨ, tixaɨtɨ pɨkaranuyuhayewa hetsiena mɨkati'aitanikɨ. Peru hikɨ 'akuxi ketemɨtewaxeiya teɨteri, naitɨ 'akuxi pɨkaha'iwariewe mɨkɨ mɨti'aitanikɨ.
HEB 2:9 Ketsutsi xeikɨa ketemɨte'ixeiya, mɨkɨ yapaɨmexɨa kaniukayerieni niuki tuayamete wahepaɨ mɨkatɨrɨkaɨyenikɨ, mɨkɨ mɨtiukwinixɨkɨ kepauka mumɨ, kananutikurunatɨarieni witsi'anetɨ mayanikɨ meta 'aixɨa mɨtixeiyariekakɨ. Kakaɨyari 'aixɨa mɨtiuka'iyarikɨ mɨpaɨ katiniuyɨni, mumɨnikɨ tanaime tahetsiemieme.
HEB 2:10 Mɨkɨ naime katiniutsutɨani, 'inetɨaku katiniuneni naitɨ, 'aixɨa katiniuyurieni Kakaɨyari, warawitɨtɨ yumɨireme yuniwema witsime'anenetɨ memakɨnekɨ, meye'atɨakɨ kemɨ'ane mitsutɨa memɨtawikweitsitɨarienikɨ, yatipitɨatɨ mɨtikwinekɨ para maye'anikɨ.
HEB 2:11 Kemɨ'ane mɨwapata, meta memupatsie, xeimetsie mekaniyekɨne yunaitɨ, 'ayumieme pɨkayutewiya yu'iwama tiwaruterɨwatɨ
HEB 2:12 mɨpaɨ 'utaitɨ: «Ne'iwama nepɨtiwataxatɨani kepemɨtiuka'iyari, 'ahetsɨa miemete memayuxeɨrie wahixɨapa ne'uwetɨ nepɨmetsitanɨawa».
HEB 2:13 Mɨpaɨ paine meta: «Ne yuri nepɨti'erieka hetsiena». Mɨpaɨ meta paine: «'Ena xepɨnetsixeiya, neniwema Kakaɨyari mɨnetsiyetuiri».
HEB 2:14 Merikɨtsɨ, raniwema 'axeikɨa mekaniyuxewini xeixuriyayari meta xeiwaiyari mehɨtɨtɨtɨ, 'ayumieme mɨkɨta yaxeikɨa tahamatɨa yuxewitɨ kanayani, tahepaɨ yemekɨ, mɨpaɨ mɨtiuyurikɨ mumɨkɨ meta pɨyɨwekai mika'unanikɨ kemɨ'ane tɨrɨkariya mexeiya yemekɨ mɨtatsikwinikɨ Kauyumarietɨtɨ.
HEB 2:15 Pɨyɨwekai meta mɨwaxɨnakɨ mɨkɨ mexi me'ayenenierekai meuyewekai waɨriyarika memɨte'uximayakakɨ mehe'eriwatɨ kememɨtekwinekekai.
HEB 2:16 Kanimatsiɨkɨni niuki tuayamete mɨwaparewienikɨ pɨkanua, matsi 'Apɨrahami xiɨyarimama pɨta mɨwaparewienikɨ.
HEB 2:17 'Ayumieme peuyewekai yu'iwama wahepaɨ 'anetɨ mayeitɨarienikɨ naime hepaɨtsita, mɨpaɨ 'anetɨ kaniyɨwekaitɨni mawari wewiwamete tiwa'aitɨwame mayanikɨ yatikamietɨ meta tiyukanenimayatɨ, Kakaɨyaritsie mieme hɨritɨarietɨ, 'itiya mɨwewienikɨ tita teɨteri 'axamemɨte'uyuri hepaɨtsita.
HEB 2:18 Mɨkɨ mɨtiukwinixɨkɨ mu'inɨatsiekɨ, kaniyɨweni mɨwaparewienikɨ hipame mexi me'inɨatsie.
HEB 3:1 Merikɨte, ne'iwama xemupatsie Kakaɨyaritsie mieme, 'axeikɨa xemuta'inierie kemɨ'ane taheima makawe xehahɨawekaku, mɨpaɨ mɨ'anekɨ 'ayumieme mɨpaɨ nepaine, xekena'eriwani Ketsutsi, mɨkɨ nɨ'ariekame kanayani meta mawari wewiwamete tiwa'aitɨwame kwinimieme mɨtiuhɨritɨarie, mɨkɨ kanihɨkɨtɨni hetsiena tetewiyatɨ temɨtahekɨata.
HEB 3:2 Mɨkɨ yakatinikamieni kemaine kemɨ'ane mihɨritɨa, yaxeikɨa kemɨtikamiekai Muitsexi, Kakaɨyari kie kiekatari wahepaɨtsita hɨritɨarietɨ.
HEB 3:3 Peru 'ikɨtsie pɨtiunakixɨ matsi yemekɨ mariwemekɨ mɨxeiyarienikɨ, Muitsexi hepaɨna katixeiyariewekaku, yaxeikɨa kii wewiwame waɨkawa mariwetɨ kemɨtikuxaxatsiwa, wewiyaya hepaɨna katikuxaxatsiwakaku.
HEB 3:4 Kii naitɨ tewi pɨtiwewiyaya, peru kemɨ'ane tinaime mɨtiutiwewi, mɨkɨ Kakaɨyari kanihɨkɨtɨni.
HEB 3:5 Merikɨtsɨ, Muitsexi yapɨtikamiekai Kakaɨyari kie kiekatari yunaime wahepaɨtsita kemɨtiuhɨritɨarie, peru tiparewiwame kanihɨkɨtɨkaitɨni xeikɨa mukayerie mɨtihekɨatanikɨ tita 'arike mɨtikuxaxatsiwanikekai hepaɨtsita.
HEB 3:6 Kɨritsitu pɨta yapɨtikamie kiekame nu'aya hɨkɨtɨtɨ, Kakaɨyari kiya hepaɨtsita kemɨtihɨritɨarie. Merikɨtsɨ tame kii tepɨhɨkɨ xɨka tetahayewa tekamamatɨ 'aixɨa te'utiyuatɨ tita temɨtekwewie hepaɨtsita tekakuyuitɨariwatɨ kepauka mɨtapareke.
HEB 3:7 'Ayumieme kemaine 'Iyari Mɨtiyupata: «Hikɨ xɨka xe'i'enieni 'utaniukakaku,
HEB 3:8 yu'iyari xepɨkatse'iriyani, kememɨte'akɨ mɨkɨ 'ana kepauka memɨyukwitɨwekai nehamatɨa kememɨte'uyuri mɨkɨ tukaritsie kepauka memɨnetsi'uta'inɨataxɨ, makumawetsie me'u'uwatɨ.
HEB 3:9 Hakewa xetutsima memɨnetsihe'inɨatatɨwekai, tsepanetɨ ne'uximayatsika memɨxeiyakai huta tewiyari wiyari.
HEB 3:10 'Ayumieme nepuyeha'a 'ana miemetexi wahepaɨtsita, mɨpaɨ neputayɨ: “Yuheyemekɨ yu'iyaritsie mekaneuyexɨrɨweni, nehuye, 'atsimepɨkatehetimaiwawe”.
HEB 3:11 'Ayumieme mɨpaɨ nepɨtinehɨritɨa neha'atɨ, mɨpaɨ ne'utaitɨ: “Yemekɨ mepɨka'aye'axɨani hakewa nemɨwareka'uxipitɨani”».
HEB 3:12 Xekeneyukweriwayurieka, xeme ne'iwama, kapa xewitɨ xeme 'iyarieya 'axa'anenikɨ, kapa yuri kati'eriekakɨ 'ihayewamɨtɨ Kakaɨyari mayeniere.
HEB 3:13 Matsitsɨ xexuime tukaritsie xekeneyutuikani mexi 'akuxi hikɨ tukari xuawe, kapa xewitɨ xeme yu'iyari 'utse'iriyakɨ, tita 'axamɨti'ane xekwamanakaku.
HEB 3:14 'Axeikɨa tepɨtaxewi Kɨritsitu hamatɨa xɨka yuri tete'erietɨ tetahayewa, matɨaripai yuri ketemɨte'uta'eri, tekakuyuitɨariwatɨ kepauka mɨtapareke,
HEB 3:15 mɨpaɨ kemanuyɨne: «Hikɨ xɨka xe'i'enieni 'utaniukakaku, yu'iyari xepɨkatse'iriyani kememɨte'akɨ mɨkɨ 'ana kepauka memɨyukwitɨwekai nehamatɨa».
HEB 3:16 ¿Kehate mepɨyukwitɨwekai hamatɨana tsepa memi'eniekai? Mɨkɨ mekanihɨkɨtɨkaitɨni yunaitɨ 'Ekipitu kwieyaritsie memeyekɨ Muitsexi warawitɨkɨkaku.
HEB 3:17 ¿Merikɨte, kehate wahepaɨtsita pɨha'akai huta tewiyari wiyari? Mɨkɨ mekanihɨkɨtɨkaitɨni 'axamemɨte'uyuri 'ana, mɨkɨ wakaxari makumawetsie puyuhayewaxɨ me'ukwiku.
HEB 3:18 ¿Merikɨte, kehate tiwarahɨawetɨ puyuhɨritɨa, mɨpaɨ 'utaitɨ kename meka'aye'axɨanikekai yemekɨ hakewa mɨwareka'uxipietɨanikekai? Mɨkɨ mekanihɨkɨtɨkaitɨni yuri memɨkate'eriekai.
HEB 3:19 Merikɨte 'ayumieme mɨpaɨ tepɨtemate, mepuyutatexi me'aye'axɨanike yuri memɨkate'eriekaikɨ mɨkɨ.
HEB 4:1 Merikɨtsɨ niukieya puxuawe 'akuxi kemutayɨ kename tewi yɨwe maye'anikɨ hakewa meika'uxipitɨani, 'ayumieme tekemamaka kapa xewitɨ xeme ka'aye'aweme hepaɨ tixeiyariekakɨ.
HEB 4:2 Tametsietɨ niuki 'aixɨa manuyɨnekɨ tepɨte'utaxatɨarie yaxeikɨa mɨkɨ wahepaɨ, peru mɨkɨ niuki memu'eni 'atsipɨkawaruyuri, memɨkayutaxewiriyaxɨkɨ mɨkɨ memi'eniekai wahamatɨa yuri memɨkate'uta'erikɨ.
HEB 4:3 Tame pɨta yuri temɨte'uta'eri tepaye'axɨaxime hakewa mɨtatsiheka'uxipitɨani, mɨpaɨ kemutayɨ: «Hikɨ neha'atɨ, mɨpaɨ neputayɨ: “Hatsuaku nehetsɨa mepɨkaye'axɨani hakewa nemɨwareka'uxipitɨanikekaitsie”». Mɨpaɨ putayɨ tsepanetɨ 'uximayatsikaya mɨnɨriekai kwie munetɨarietsie paitɨ,
HEB 4:4 xapatsie niuki puxuawe mɨkɨ 'atahutarieka mieme tukari mɨxata mɨpaɨ 'anuyɨtɨ: «Kakaɨyari 'atahutarieka tukaritsie kaniuka'uxipieni 'inɨka yu'uximayatsika naime».
HEB 4:5 Mɨpaɨ paine meta: «Yemekɨ mepɨka'aye'axɨani mɨkɨ hakewa nemɨwareka'uxipitɨanitsie».
HEB 4:6 Merikɨtsɨ 'uxipiya 'akuxi puxuawe hipatɨ yamemɨte'aye'axɨanikɨ, peru mɨkɨ matɨari niuki 'aixɨa manuyɨnekɨ mɨpaɨ memɨtekɨhɨawarɨwakai mepɨka'aye'axɨa yuri memɨkate'eriekaikɨ.
HEB 4:7 Tawarita xeime tukari kaniupata: «Hikɨ mɨterɨwarie», Rawiri xapayatsie mɨpaɨ putayɨ mɨixa wiyari 'anuyeyaku, yaxeikɨa meripai kemutayɨ mɨpaɨ 'utaitɨ: «Xɨka xeme hikɨ niukieya xe'i'enieni, yu'iyari xepɨkatse'iriyani».
HEB 4:8 Xɨka mɨkɨ Kutsuhexi wareka'uxipitɨanike 'ana, Kakaɨyari 'atsipɨkahainenikeyu xeime tukari hepaɨtsita 'arike maye'anikekaikɨ.
HEB 4:9 'Ayumieme 'uxipiya tukari puxuawe 'akuxi Kakaɨyari teɨterimama wahetsiemieme.
HEB 4:10 Kemɨ'ane maye'a hakewa meika'uxipitɨa, mɨkɨ pu'uxipie yu'uximayatsika 'unɨka, yaxeikɨa Kakaɨyari kemɨtiuka'uxipi yu'uximayatsika 'unɨka.
HEB 4:11 'Ayumieme teketamexɨitɨaka temaye'axɨanikɨ hakewa mɨtatsiheka'uxipitɨani, xewitɨ kapa 'atiwenikɨ kapa matsiɨkɨnikɨ hetsiena yuri kemɨkati'erie yaxeikɨa mɨkɨ wahepaɨ.
HEB 4:12 Kakaɨyari niukieya payeniere meta pɨtɨrɨkaɨye, 'aixɨa pɨreutikekema, hepaɨna kareutikekemakaku 'ixipara tsepa naitsata meutixikakauni. Pitixiteke 'ipatatɨ ratukari meta ra'iyari, raturuyari meta ratutanayari naime, pi'inɨata tewi kemɨtiyumate kemɨtiyu'iyaritɨa yu'iyaritsie.
HEB 4:13 Tsepa kemɨtitita munetɨarie pɨkayɨwe mɨ'awietsiekakɨ mɨkɨ kemɨtixeiya, naitɨri matsi pɨmatsiɨkɨ panutiyepiya kemɨ'ane mɨtatsitahɨawe 'ixeiyakaku.
HEB 4:14 Merikɨtsɨ tepeixeiya mawari wewiwamete tiwa'aitɨwame kwinimieme mɨhɨritɨarie mɨmariwe muyuawi heima manutitɨa Ketsutsitɨtɨ Kakaɨyari mɨnu'aya, 'ayumieme tekeyuhayewani yatetetahekɨatatɨ hetsiena ketemɨtewiya.
HEB 4:15 Mawari wewiwamete tiwa'aitɨwame ketemɨte'ayexeiya, tepɨkaheixeiya kemɨ'ane mɨkayɨwe tahepaɨ mɨtiyumaikakɨ ketemɨtewerarani tame, tepeixeiya pɨta kemɨ'ane naime hepaɨtsita mu'inɨatsie yaxeikɨa tahepaɨ, peru 'axakatiyuriewetɨ.
HEB 4:16 'Ayumieme tekamamatɨ 'ahurawa teke'akɨne kemɨ'ane 'aixɨa mɨtiuka'iyari 'uwenieya manuwe 'aurie, temɨnenimayatsiekakɨ, temɨparewiyanikɨ kepauka mɨpaɨ temɨteheuyehɨwa, mɨkɨ 'aixɨa tiuka'iyarikaku.
HEB 5:1 Mawari wewiwamete tewa'aitɨwamete teɨteri watsata mekananuyexexeiyarɨwani yunaitɨ, mekaniukayatsarieni Kakaɨyari hetsiemieme memɨhɨritɨariekakɨ, teɨteri wahetsiemieme memixatɨanikɨ 'imikieri mawariyari, meta mawarite tita 'axamemɨteyurie hepaɨtsita.
HEB 5:2 Kaniyɨweni 'atsimemɨkatemate meta memeuyexɨrɨwe wanenimayatɨ mɨwatahɨawekɨ, mɨkɨta weranitɨ 'amuyeikakɨ wahepaɨ.
HEB 5:3 Mɨpaɨ mɨ'anekɨ 'ayumieme kaneuyeweka mawari Kakaɨyari mɨxatɨanikɨ teɨteri tita 'axamemɨteyurie hepaɨtsita, mɨpaɨta pɨreuyewetse mawari mɨwewienikɨ yɨkɨmana tita 'axamɨtiuyuri hepaɨtsita 'aixɨa miyurienikɨ.
HEB 5:4 Mɨkɨ meta, tewi yɨkɨmana pɨka'uyukaye 'ipaɨ mɨtihɨritɨariekakɨ, matsi Kakaɨyari yarenayexeiyaku xeikɨa pukayerie 'Aruni hepaɨ.
HEB 5:5 Yaxeikɨata Kɨritsitu witsi'anetɨ pɨka'ayuyeitɨa yɨkɨmana mawari wewiwamete tiwa'aitɨwame mayanikɨ, matsitsɨ mɨpaɨ pɨtipitɨa kemɨ'ane mɨpaɨ mɨtitahɨawixɨ: «'Ekɨ pepɨneniwe. Hikɨri nekamaniutinuiwitɨani».
HEB 5:6 Kemaine xeime xapatsieta: «'Ekɨ mawari wewiwame pekanihɨkɨtɨni yuheyemekɨ mieme, Merikitsereki hepaɨ».
HEB 5:7 Kɨritsitu mexi tewitɨtɨ 'a'uyeikakai karima kaniyutanenewieni hahiwatɨ 'utatsuatɨ, kanitawawirieni kemɨ'ane mɨyɨwekai mitawikweitsitɨanikɨ kapa 'umɨnikɨ, pu'enierie Kakaɨyari mariweme mayeitɨakɨ.
HEB 5:8 Tsepa nu'aya mɨhɨkɨtɨkai, tiukwineka yapɨretima yamɨtikamienikɨ,
HEB 5:9 mɨpaɨ raye'atɨarieka, yuheyemekɨ memɨtawikweitsitɨarienikɨ wapitɨatɨ kanayani, yunaitɨ yamemɨtekahu kemaine,
HEB 5:10 Kakaɨyari kanenayexeiya mawari wewiwamete tiwa'aitɨwame mayanikɨ Merikitsereki kemɨtiuhɨritɨarie hepaɨ.
HEB 5:11 Mɨkɨ Merikitsereki hepaɨtsita waɨkawame niuki mɨkwaniwe tepeixeiya yatemɨtexehekɨatsitɨiyanikɨ, xeme xemɨyu'ɨraraxiekɨ kexemɨte'u'enana.
HEB 5:12 Kamɨtsɨ, mɨpaɨ pɨreuyewetse matsi te'ɨkitamete xemɨhɨkɨtɨnikɨ, mɨixa manuyetɨakɨri yuri xemɨte'uta'eri, peru xekaneiyehɨaka kemɨ'ane hutarieka mitsutɨani tixe'ɨkitɨatɨ tsutɨapai mieme 'ɨkitsika Kakaɨyari kemaine, hekwamete kememɨte'ɨkitɨarie. Retsi xeheuyehɨatɨ xekanakɨne, 'ikwai mɨtɨrɨkaɨye xekematɨ xepɨka'akɨniwawe.
HEB 5:13 Yunaitɨ retsi memɨtsitse mepɨka'iyamatɨka niuki mɨheitserie hepaɨtsita, mepɨtɨɨri 'akuxi.
HEB 5:14 'Ikwai mɨtɨrɨkaɨye 'amemuyumate wahetsie kanimiemetɨni, mɨkɨ memɨ'iyamatɨkakɨ yu'iyaritsie memɨteyɨ'ɨkitɨawawekɨ para memipatanikɨ tita 'aixɨa mɨti'ane tita 'axamɨti'ane, mɨkɨ wahetsie pɨmieme.
HEB 6:1 Merikɨtsɨ peuyewetse temɨtehayewanikɨ hikɨ tetekuxatatɨ tsutɨa mieme niuki hepaɨtsita Kɨritsitu hepaɨtsita manuyɨne xeikɨa, tepuhuni pɨta temaye'axɨanikɨ. Tawari tenari tepɨkatawewieni kitɨa mieme, mɨpaɨ tepɨkatekuxatani kemɨreuyewetse tewi mɨtihayewanikɨ kemɨtiyurienekai kɨmana mɨmɨnikekai, kemɨreuyewetse yuri mɨtita'erienikɨ Kakaɨyari hetsie.
HEB 6:2 Mɨpaɨ tepɨkate'ɨkitani hikɨ 'ɨyarika hepaɨtsita, tewitsie kememɨte'utimeme hepaɨtsita, mɨkite kememɨte'anuku'uni hepaɨtsita, yuheyemekɨ 'itsɨkame kemɨtiwaranutaxɨrieni hepaɨtsita.
HEB 6:3 Merikɨte, temaye'axɨanikɨ tepuhuni, xɨka Kakaɨyari mɨpaɨ tatitaunieka.
HEB 6:4 Mɨkɨ heiwamieme memuhekɨariyarie, yuhetsiemieme memeitima mɨkɨ 'imikieri taheima mɨmieme, 'Iyari Mɨtiyupata mehexeiyatɨ memakɨ 'axeikɨa tahepaɨ,
HEB 6:5 yɨkɨmana mɨpaɨ memɨtehetima 'aixɨa kemɨti'ane Kakaɨyari niukieyatsie meta tɨrɨkariya memetima tukari 'umamietsie mieme,
HEB 6:6 mɨkɨ xɨka mete'uhayewa 'axakememɨteyuriekai, mepɨkayɨwawe tawari memɨhekwariyarienikɨ para memɨtehayewanikɨ kememɨteyuriekai. Mɨkɨ matsi kuruxitsie mepimi Kakaɨyari nu'aya yɨkɨmana, matsiɨkɨme mepeyeitɨwa mɨnanaimarienikɨ.
HEB 6:7 Kamɨtsɨ, kwie xɨka wiyeri yatihareka hetsiena mukawiwiye, xɨka 'itinetɨani tupiriya 'aixɨa mɨ'anene 'etsamete wahetsiemieme, Kakaɨyari 'aixɨa pɨtipitɨa.
HEB 6:8 Mexɨka kwie xɨka xuya witsaxa 'utinetɨani pɨxani'eriwa pɨta, pɨkweriwa'ane hepaɨtsitana mɨtikuxaxatsiwanikɨ para 'axamɨ'itɨarienikɨ, mɨtataiyarienikɨ pɨ'ayumieme xeikɨa.
HEB 6:9 Perutsɨ tsepa mɨpaɨ temaitɨka, matsi 'aixɨa 'anemekɨ kename xeteyurie yuri tepɨte'erie xehepaɨtsita tanaki'erima, kename xetawikweitsitɨariexime.
HEB 6:10 Kakaɨyariri mɨpaɨ pɨkayɨane kemɨ'ane heitseriemekɨ yamɨkatikamie hepaɨ, pɨkaxetɨmaiya kexemɨte'uximayakai kexemɨteyuhekɨatakai xeteyukanaki'erietɨ xeme'eriwakaikɨ, kexemɨteyukanaki'eriekai pɨmatsiɨkɨkai xemɨwaparewiekaikɨ teɨterimama, hikɨta kexemɨtewaparewie.
HEB 6:11 Mɨpaɨ pɨtatinake, yuxexuitɨ xeme xemɨyuhekɨatanikɨ yaxeikɨa xeyumexɨitɨatɨ yemekɨ yuri kexemɨte'erie, xeta'ikwewatɨ kepauka mɨtapareke.
HEB 6:12 Peuyewetse xemɨkayu'ɨraraxiekakɨ, matsi peuyewetse xemɨwa'ɨkenikɨ mɨkɨ yuri mete'eriekaku 'emeteutewikaku mekawaɨripietɨ, mɨkɨ wahetsie mɨtinakirɨme tita memɨtehahɨawarɨwakai kename meheixeiyanikekai.
HEB 6:13 Kakaɨyari kepauka mɨpaɨ 'Apɨrahami mɨtiutahɨawixɨ tita mɨrexeiyanikekai hepaɨtsita, xewitɨ matsi waɨkawa mɨtɨrɨkaɨyekai 'apɨka'uyeikakai Kakaɨyari mixatanikɨ yɨhɨritɨatɨ, 'ayumieme yuxatatɨ yɨkɨmana puyɨhɨritɨa mɨpaɨ 'utaitɨ:
HEB 6:14 «Yemekɨ 'aixɨa nekameniyuriekamɨkɨ, 'anuiwarima yumɨireme nekaniwarayeitɨamɨkɨ».
HEB 6:15 Mɨpaɨ 'ereutereka ta'ikwewatɨ kawaɨripietɨ 'Apɨrahami, kemɨtiutahɨawarie, heixeiyatɨ kanayani.
HEB 6:16 Teɨteri kepauka memɨyɨhɨritɨa, mepixata kemɨ'ane matsi waɨkawa mɨtɨrɨkaɨye, naimekɨ xɨka yuhɨritɨani, mɨkɨkɨ pɨtseiriyarie niuki, mɨkɨkɨ pɨnɨrie niuki xɨatɨarika.
HEB 6:17 'Ayumieme Kakaɨyari yaxeikɨa pɨtiuyuri kepauka muyuwaɨri matsi heitseriemekɨ mɨwahekɨatsitɨiyanikɨ mɨkɨ wahetsie mɨtinakenikekai tita memɨtehahɨawaruwakai, mɨpaɨ memɨtemaikakɨ kemɨkatipatsiewe tita mɨtiyuriemɨkɨ, 'ayumieme pitaxewiriyaxɨ yuniuki yɨhɨritɨatɨ.
HEB 6:18 Tame 'ayumieme tita mɨkatipatsiewe tepexeiya hutame, mɨkɨ hepaɨtsita Kakaɨyari pɨkayɨwe mɨtati'itaiyanikɨ, mɨkɨkɨ 'ayumieme tɨrɨkaɨyemekɨ tekanituikarieka, tame temɨtata'unaxɨ te'iwiyatɨ tita temɨtekwewie.
HEB 6:19 Mɨpaɨ xɨka teteta'ikwewani yuri tete'erietɨ, tepeixeiya tiyuhaname tatukaritsie mieme mɨtatsitseiriyanikɨ, pɨkahateke pɨtse'i, Kakaɨyari manuwetsie pɨtiwiya, tukieyatsie mieme 'ixuriki reunakame warie peutahawe,
HEB 6:20 hakewa tahetsiemieme meutaha Ketsutsi tatsi'anuyehaitɨiyatɨ, mawari wewiwamete tiwa'aitɨwame 'ayaka yuheyemekɨ, Merikitsereki hepaɨ mɨtiuhɨritɨarie.
HEB 7:1 Mɨkɨ Merikitsereki, tsaremetari pɨtiwa'aitɨwametɨkai, Kakaɨyari 'Amutewi mawari wewiwameya pɨhɨkɨtɨkai. Kepauka 'Apɨrahami 'akunuaku te'aitamete wara'iwaka, mɨkɨ manukunakixɨ, 'aixɨa putayɨ hepaɨtsitana para 'aixɨa mɨ'itɨarienikɨ.
HEB 7:2 Mɨkɨ 'Apɨrahami tita mɨtiwarunawairi naimetsie mieme yapaɨmeme tamamatatsie mieme xeime pɨtimi. Merikitsereki taniukikɨ «ti'aitame heitseriemekɨ yamɨtikamie» kananuyɨyeni, «tsaremetari tiwa'aitɨwame» kananuyɨneni meta, «ti'aitame 'aixɨa memɨteyuxeiyanikɨ mɨtiwapitɨa» kananuyɨneni.
HEB 7:3 Yupaapa yumaama yumarema pɨkawarexeiya, pumawe niuki kemɨtitsutɨa 'ayenieretɨ, kemɨtiutixɨ tukarieya hepaɨtsita, Kakaɨyari nu'aya hepaɨ kani'aneni, mawari wewiwame hɨkɨtɨtɨ 'akaniuweni katihayewatɨ yuheyemekɨ.
HEB 7:4 Merikɨte, xekena'eriwani mawari wewiwame kemɨtihɨkɨtɨkai mɨkɨ, 'atsita kemɨ'ane mɨtatutsitɨkai 'Apɨrahamitɨtɨ tamamatatsie timieme xeime pɨtimi tita kuyaxi mɨtiwarunawairitsie timieme.
HEB 7:5 Merikɨtsɨ, hipatɨ Rewi xiɨyarimama mawari wewiwamekɨ memɨhɨritɨarie, mɨkɨ 'aitɨarika mekanexeiyani tamamatatsie mieme xeime memɨwawawiriekakɨ teɨteri yu'iwama 'inɨari niukiyari kemaine, tsepa mɨkɨta yu'iwama wahepaɨ 'Apɨrahami hetsie memɨyekɨ yunaitɨ.
HEB 7:6 Merikitsereki matsi 'atsipɨkatiwamaretɨkai, peru 'Apɨrahami tamamatatsie mieme xeime pɨtimi, mɨkɨta 'aixɨa putayɨ hepaɨtsitana para 'aixɨa mɨ'itɨarienikɨ, kemɨ'ane mɨtiutahɨawarie tita mɨtipitɨarienikekai, mɨkɨ hepaɨtsita mɨpaɨ putayɨ.
HEB 7:7 Niuki pɨkayu'uxinɨa, kemɨ'ane matsi mɨtɨrɨkaɨye kanihɨkɨtɨni 'aixɨa maine kemɨ'ane hepaɨna mɨkatɨrɨkaɨye hepaɨtsita, mɨkɨ 'aixɨa mɨ'itɨarienikɨ.
HEB 7:8 Mɨkɨ meta, 'ikɨ teɨteri memɨkwiwawe mepitanaki'eri tamamatatsie mieme xeime, mɨkɨ pɨta mɨpaɨ xeikɨa pɨtihekɨatsie kename 'ayeniere.
HEB 7:9 Pɨyɨwe mɨpaɨ mɨtayɨni, Rewi xiɨyarimama kemɨ'ane hikɨ tamamatatsie mieme xeime memɨkɨ'ɨitɨariwa, mɨkɨta yakatinayukatuani 'Apɨrahami hetsiemieme.
HEB 7:10 Rewi yupaapatsie pɨkayeyeiwekai 'akuxi kepauka Merikitsereki menunakixɨ.
HEB 7:11 Merikɨtsɨ teɨteri 'inɨari niukiyari memupitɨarie Rewi xiɨyarimama mawari wewiwamete memɨhɨkɨtɨkai, xɨka tewi yɨwenike maye'anikɨ mawari wewiwamete mehɨkɨtɨkaku mɨkɨ, ¿titayari reuyewekakeyu xewitɨ mawari wewiwame yɨkɨ 'anetɨ manukukenikɨ Merikitsereki hepaɨ tihɨritɨarietɨ, 'Aruni hepaɨ katihɨritɨarietɨ mɨtahɨawarienikɨ?
HEB 7:12 Mawari wewiwamete wa'inɨari xɨka 'upatsieni, peuyewetseta 'inɨari niukiyari mɨpatsienikɨ.
HEB 7:13 Kemɨ'ane hepaɨtsita mɨpaɨ mɨtikuniuwa, mɨkɨ xeime nuiwaritsie kanimiemetɨkaitɨni, mɨkɨ nuiwaritsie mieme xewitɨ mawari pɨkawewiwe hatsuaku.
HEB 7:14 Kanimatsiɨkɨni Tati'aitɨwame Kuratsie mɨyetɨakɨ, tsepa mɨkɨ nuiwari hepaɨtsita Muitsexi 'atsimɨkahainekai kename memawari wewiwametetɨnikeyu.
HEB 7:15 Mɨkɨ meta, matsi 'akuxi mɨpaɨ katinimatsiɨkɨni xɨka mawari wewiwame 'anukukeni yɨkɨ mɨ'ane Merikitsereki hepaɨ 'anetɨ.
HEB 7:16 Mɨkɨ pɨka'ukerie 'inɨari mɨpaɨ mɨtiuta'aitaxɨkɨ kename raniwetɨtɨ heitserie hexeiyani, matsi pukerie mɨtɨrɨkaɨyekɨ tukarieya mɨkaxɨwekɨ.
HEB 7:17 Mɨpaɨ pɨtihekɨatsie: «'Ekɨ mawari wewiwame pekanihɨkɨtɨni yuheyemekɨ mieme, Merikitsereki hepaɨ».
HEB 7:18 'Aitsika meripaitɨ mɨmieme payeyeitɨarie mɨweranikaikɨ tixaɨtɨ mɨkatiyunaki'eriekaikɨ,
HEB 7:19 'inɨari niukiyari hatsuaku tewi 'aixɨa pɨka'uyuri. 'Utixani'eriwaku tepupitɨarie tita matsi 'aixɨa mɨti'ane mɨpaɨ pɨta temɨteta'ikwewanikɨ. Mɨpaɨ teteta'ikwewatɨ 'ahurawa tepakɨka Kakaɨyari hetsɨa.
HEB 7:20 Mɨkɨ Kakaɨyari mɨpaɨ pɨtiyuhɨritɨa kename xeime mawari wewiwame tehexeiyanikekai yɨkɨ'aneme. Hipatɨ mawari wewiwamete mepukayatsarie Kakaɨyari yakatiwahɨritɨakaku,
HEB 7:21 peru mɨkɨ kemɨtiukayerie, kemɨ'ane mitahɨawixɨ kaniyɨhɨritɨani mɨpaɨ 'utaitɨ: «Ti'aitame yaputayɨ kename yatikayani, mɨkɨ pɨkatihayewa meta pɨka'ipata: “'Ekɨ yuheyemekɨ pekanimawari wewiwametɨni”».
HEB 7:22 'Ayumieme yaxeikɨa Ketsutsi kanitatseiriya xeime tɨratu matsi mɨtɨrɨkaɨye.
HEB 7:23 'Ana miemete mawari wewiwamete mekaniyumɨirekaitɨni, peru mekwikwi'itɨ mepɨkapitɨariekai memɨyuhayewanikɨ.
HEB 7:24 Peru Ketsutsi mɨkɨ yuheyemekɨ 'amuyeikakɨ kanimawari wewiwametɨni, hɨritɨarikaya mɨkayupatakɨ.
HEB 7:25 'Ayumieme kaniyɨweni mɨwatawikweitsitɨanikɨ yuheyemekɨ mɨkɨ 'ahurawa memakɨka Kakaɨyari hetsɨa mɨkɨ waparewiekaku, yuheyemekɨ 'ayenieretɨ pɨyɨwe yamɨtiwawiriekakɨ wahetsiemieme.
HEB 7:26 'Aixɨa kaniuyɨnita temeixeiyakɨ mawari wewiwame mɨpaɨ mɨ'ane. Patsietɨ, 'axakatiyurienetɨ, katsewiximarietɨ, 'axateyuruwamete wahamatɨa kayuxewiriyatɨ, muyuawi heima hanutiyeikatɨ.
HEB 7:27 Mɨkɨ mawari wewiwamete tewa'aitɨwamete wahepaɨ pɨka'ane, pɨkahauyewetse tukarikɨ mawari mɨtiwewienikɨ yuhetsiemieme meri 'axamɨtiuyurikɨ, 'ariketa teɨteri 'axamemɨte'uyurikɨ. Matsi xeimieme 'aixɨa piyuri kepauka mawari mayuyeitɨa yɨkɨmana.
HEB 7:28 'Inɨari niukiyarikɨ mekaniukayatsarieni mawari wewiwamete tewa'aitɨwamete peru memɨwerarani. Mɨkɨ niuki kɨmana muyuhɨritɨa, 'inɨari niukiyari tsepa mutaxatsie meri, mɨkɨkɨ pɨta kaniukayerieni nu'ayatɨtɨ maye'atɨariewe yuheyemekɨ 'amuwe.
HEB 8:1 Merikɨtsɨ matsi 'akuxi kaneuyeweka yamɨtayɨnikɨ, mɨpaɨta mɨ'ane tekanexeiyani mawari wewiwamete tiwa'aitɨwame, mɨkɨ mana paya muyuawitsie, hakewa mɨre'aita kemɨ'ane mɨmariwe, mɨkɨ tserieta paya.
HEB 8:2 Hakewa miemekɨ mepatsie, pɨti'uximaya mana, kemɨ'ane yurikɨ tuki mɨhɨkɨta, kemɨ'ane Ti'aitame mitawewi, tewi pɨka'itawewi, mana pɨta pɨti'uximaya mɨkɨ.
HEB 8:3 Merikɨtsɨ yunaitɨ mawari wewiwamete mekaniuti'uitɨarieni mawari memɨyetuayanikɨ, 'ayumieme kaneuyeweka mɨkɨta tixaɨtɨ mɨrexeiyanikɨ mɨtixatɨanikɨ.
HEB 8:4 Matsi xɨka kwiepa 'uyeikanike, mawari wewiwame pɨkahɨkɨtɨnikeyu, 'amemu'uwakɨ hipatɨ pɨta mawari memɨwewienikɨ kemaine 'inɨari niukiyari.
HEB 8:5 Peru mɨkɨ hakewa memɨtehetimawa, mɨkɨ pi'ɨke xeikɨa tita taheima mɨtimieme, peru pɨkahɨkɨ, 'etɨriyaya hepaɨ xeikɨa pɨ'ane, yaxeikɨa pɨ'ane hikɨ, kemɨtiutahɨawarie Muitsexi kepauka mitaketɨanikekai 'ixuriki tukiyari, yatikɨhɨawekaku: «Kene'akweriwayurieka pemitiwewienikɨ naime yaxeikɨa peti'ɨketɨ 'inɨari kepemɨtiuta'ɨkitɨarie yemuritsie pe'uwetɨ».
HEB 8:6 Hikɨ matsi Kɨritsitu tɨratu 'aixɨa mɨ'ane kaniyetuiriyarieni kani'atɨani, tɨratu meripaitɨ mieme 'aixɨa mɨka'anekaikɨ hepaɨna. 'Ayumieme mawari wewiwame kemɨtihɨkɨ, witsipɨtihɨritɨarie, meripaitɨ miemete witsimemɨkatehɨritɨariekaikɨ hepaɨna, tɨratuya meta niuki mɨtse'itsie pɨtiwiya, Kakaɨyari tɨrɨkaɨyemekɨ mɨpaɨ mutayɨkɨ kemɨtiyurieni, peru meripai mieme tɨratu hepaɨna pɨkatse'ikai.
HEB 8:7 Mɨkɨ tɨratu meripaitɨ mieme xɨka 'aixɨa 'anenike, xɨka kareuyewekake mɨniukimariekakɨ, tawari pɨkahauyewekakeyu xewitɨ.
HEB 8:8 Tsiepɨre kaniwaniukimaka teɨteri mɨpaɨ mainekɨ: «Kamɨ tukari kanaye'amɨkɨ ―mɨpaɨ kanaineni Ti'aitame―, 'ana tɨratu mɨhekwa nepɨwapitɨani 'Ixaheri xiɨyarimama meta Kura xiɨyarimama.
HEB 8:9 Mɨkɨ tɨratu wapaapama nemɨwarutawewiri hepaɨ pɨka'aneni meripaitɨ kenemɨtitawewi kepauka wamamatsie nemɨwaruwiyaxɨa newareyewitɨnike 'Ekipitu kwieyaritsie, mɨkɨ netɨratutsie yamepɨkatekahukai, 'ayumieme neta nepɨwaratɨmaiyaxɨ
HEB 8:10 Peru mɨpaɨ paineta Ti'aitame: «Tɨratu kenemɨtiwatawewirieni 'Ixaheri xiɨyarimama: Mɨkɨ tukari 'aye'ayu ne'inɨari niukiyari wa'eriwametsie nepɨwapitɨani, meta wa'iyaritsie nekanika'utɨamɨkɨ. Ne wakakaɨyari nekanihɨkɨtɨkamɨkɨ, mɨkɨta neteɨterima mepɨhɨkɨtɨni.
HEB 8:11 Pɨkayɨweniri xewitɨ yuhepaɨ tewi mɨti'ɨkitɨakakɨ, meta yu'iwa mɨpaɨ haitɨ: “Ti'aitame kenetimati”. Karikɨ yunaitɨ, 'etsimemuyumate meta 'amemuyumate mekanenimatekakuni.
HEB 8:12 Ne nepɨtiwareuyehɨwirieni 'axakememɨte'uyurikɨ, tawari nepɨkaheye'erieni ke'axamemɨte'uyurikɨ».
HEB 8:13 Merikɨte «tɨratu yɨkɨ mɨ'ane» xatatɨ, meripaitɨ mieme putayeitɨa, tita mɨtitaye'itɨre mɨtiwerani meripaitɨ mɨtimieme, mɨkɨ kwitɨ pɨtaxɨni.
HEB 9:1 Mɨkɨ tɨratu meripaitɨ miemetsie metewiyatɨ, mepeixeiyakai 'inɨari kememɨte'eyexeiyanikɨ manuyɨnekai, tukita mepexeiyakai mɨpatsiekai 'ena kwiepa.
HEB 9:2 Mɨkɨ 'ixuriki tukiyarita, Muyepatsieta muwa puwekai kɨxeme 'uitɨwame, 'akatsiya mexayari meta paa mɨpatsietɨka.
HEB 9:3 'Ixuriki hutarieka meuwiekai warita, Waɨkawa Muyepatsie katiniuyetewakaitɨni.
HEB 9:4 Muwa putiwekai 'ɨkwa witsimu'ɨa mexayari hurukɨ wewiyatɨ, kakuni meta tɨratu mɨ'inɨariyaritɨkai hurukɨ heuwetsitɨarietɨ herie. Kakunitsieta mana pɨyekatei huru xariyari manana payari muyemanekai, 'Aruni 'itsɨya mutaxutui kakunitsie pɨyekateita, tete 'etsimɨtsuye mana pɨyekatei tɨratukɨ mɨraye'uxakai.
HEB 9:5 Kakunitsie mepa'ukai Kakaɨyari teɨtamete Kakaɨyari xawatɨriyaya mehexeiyatɨ, mɨkɨ mekani'etɨriwiyakaitɨni 'inɨari kɨmana mɨxɨnarienikɨ. Pɨkayɨwe naimekɨ hikɨ temɨtekuxatanikɨ mɨkɨ hepaɨtsita.
HEB 9:6 Mɨkɨ naitɨ mɨpaɨ tiunɨrieku, mawari wewiwamete 'ixuriki tukiyarita matɨari 'ixuriki meuwieta tukarikɨ mekaneutahakeni yametekahutɨ yu'uximayatsikatsie.
HEB 9:7 Peru 'ixuriki hutarieka meuwieta xeiwiyari 'aye'axekaku xeikɨa kaneutahakeni yuxaɨtame mawari wewiwamete tiwa'aitɨwame, kepauka mana meutahake, xuriya 'a'ɨtɨ xeikɨa pɨyɨwe, pitimawa meri 'aixɨa miyurienikɨ yuhetsiemieme, 'ariketa pitimawa 'aixɨa mɨtiyurienikɨ teɨteri wahetsiemieme 'axamemɨte'uyurikɨ 'atsimekatemaitɨ, 'anarike tiutimawaka mana peutahake.
HEB 9:8 'Iyari Mɨtiyupata mɨpaɨ katinihekɨatani, huye 'akuxi pɨkamatsiɨkɨ tewi maye'anikɨ hakewa Waɨkawa Muyepatsieta mexi 'a'uwe mɨkɨ tuki.
HEB 9:9 Mɨkɨ tuki 'inɨari patɨa, tita hikɨ mɨtimieme, mɨkɨ pɨtihekɨata, mɨkɨ tuki kemɨ'ane, 'imikieri mawariyari yapɨtiuxatɨariwa, tsepa mɨkayɨwe kemɨ'ane mɨtiutimawa 'aixɨa muyurienikɨ, 'iyarieya mɨka'itate'anikɨ.
HEB 9:10 Kememɨte'ayexeiya, yamepɨtekahu kemɨtiu'aitsie rawaiyari hepaɨtsita, mepe'eriwa kememɨte'utikwa'a, kememɨte'utiye'e, kememɨteyukananaima, kemɨtiuka'ɨwa xeikɨa, 'aitsika mɨpaɨ mɨti'aita putaxatsie mexi tukari ka'aye'awekai naitɨ mɨtihekwarekɨ.
HEB 9:11 Peru Kɨritsitu kaninuani, mawari wewiwamete tiwa'aitɨwame hɨkɨtɨtɨ, kani'atɨani tita 'umɨramiekai 'aixɨa mɨti'ane, tukita peutaha, peru tukieya 'aixɨa pɨ'ane matsi, paye'axe, mamakɨ pɨkawewiya ('ena kwiepa pɨkamieme),
HEB 9:12 mɨkɨ tukita kepauka meutaha, tsipuri tsikerutsixi waxuriya 'a'ɨtɨ pɨkayɨanekai, yuxuriya pɨta 'a'ɨtɨ xeimieme xeikɨa mana kaneutahani Waɨkawa Mɨpatsieta. Mɨpaɨ tiuyurieka pɨtatsi'utixɨnaxɨ taheyemekɨ temɨxɨxɨninikɨ.
HEB 9:13 Meripaitɨ tsipuri tuurutsixi waxuriyakɨ, tsikeru mumierie mutataiyarie naxiyari kwamariyarikɨ, mɨkɨkɨ mepɨkɨ'ɨyarɨwakai teɨteri, kemɨ'ane mɨka'itiya, mɨkɨkɨ mepɨpatsiekai, yuwaiyaritsie memɨ'itiyatɨkanikɨ.
HEB 9:14 Merikɨtsɨ xɨka mɨpaɨ 'anekaitɨni, matsi waɨkawamekɨ katati'itieni Kɨritsitu xuriyaya, mɨkɨ mawari 'aixɨa mɨ'ane kanayuyeitɨani mixatɨanikɨ Kakaɨyari, 'Iyari yuheyemekɨ 'amuyeika mɨpaɨ tipitɨakaku, mɨkɨ xuriyaya katani'itieka ta'iyari mɨkatatsi'utate'anikɨ kemɨtatiutate'akai kepauka mɨpaɨ temɨteyuriekai kɨmana temɨtekwinekekai, te'u'itiyaka, Kakaɨyari mayenieretsie mieme tete'uximayatɨ tepakɨ.
HEB 9:15 'Ayumieme mɨkɨ kanihɨkɨtɨni kemɨ'ane mi'atɨa tɨratu hekwame, mɨkɨ memuta'inierie meheixeiyatɨ memakɨnekɨ tita yuheyemekɨ wahetsie mɨtinake kememɨte'utahɨawarie, mɨpaɨ katiniuyurieni kepauka mumɨ, pɨwarunanai mɨwaxɨnakɨ teɨteri memititsanaxɨkɨ 'inɨari mexi 'a'uwekai meripai mieme tɨratu.
HEB 9:16 Tewi xɨka tɨratu 'utawewieni yupiinite hepaɨtsita, keyupaɨmeme mɨtiwamini kepauka mumɨnitsie, kaneuyeweka mɨhekɨarekɨ kename 'umɨ, 'arikeke kanitseirimɨkɨ mɨkɨ tɨratuya.
HEB 9:17 Tɨratu mɨpaɨ mɨ'ane 'aixɨa mɨyɨnikɨ, peuyewetse tewi mɨmɨnikɨ meri, mɨkɨ niukieya 'atsipɨkayɨwe mexi 'akuxi 'ayeniere kemɨ'ane mitawewi.
HEB 9:18 'Atsita mɨkɨ tɨratu meripai mieme kepauka mutawewiya, xuriya putayeuriya.
HEB 9:19 Muitsexi 'ana katiniwarutaxatɨani yunaime teɨteri naime 'aitsika kemɨtiu'aitsie 'inɨari niukiyarikɨ, 'arike tsikerutsixi tsipuri waxuriya haa kaniunɨitɨani, hitsupu xawari 'anahɨaka wita mɨtaɨraɨyekɨ, mɨkɨ xuriyakɨ kaniwaru'ɨya teɨteri yunaime, meta 'inɨari niukiyari xapayari,
HEB 9:20 mɨpaɨ 'utaitɨ: «'Ikɨ xuriya tɨratu 'inɨariyari kanihɨkɨtɨni, kemɨtixe'utawewiri Kakaɨyari».
HEB 9:21 Yaxeikɨa xuriyakɨ 'ixuriki tukiyari kaniu'ɨya, xakɨrɨte meta naime, mɨkɨtsie mɨtiutimawarɨwa.
HEB 9:22 'Inɨari niukiyari kemaine, naitɨ xuriyakɨ katiniti'itiwani, xɨka xuriya katayeuriweni pɨkareuyehɨwiyarieni.
HEB 9:23 Merikɨtsɨ, kaneuyewekakaitɨni mɨ'itiyanikɨ tita mɨti'ɨkitsika, mi'ɨkekɨ tita taheima mɨtimieme, peru tita taheima mɨtimieme, mɨkɨ mawari matsi yemekɨ 'aixɨa mɨ'anekɨ kaniu'itiyani pɨta.
HEB 9:24 Kɨritsitu Tuki Mɨpatsieta pɨkaheutaha mamakɨ mɨwewiyata, yuri tuki 'ɨkiyarita, mɨkɨ 'ɨkitsikayarita pɨkaheutaha, matsi muyuawitsie miemeta pɨta kaneutahani, hikɨ Kakaɨyari hɨxie kaniuyeikani, tahetsiemieme mɨtaniunikɨ.
HEB 9:25 Mɨkɨ meta, kepauka mana meutaha mɨixa mawari 'ayuyeitɨwatɨ pɨkayɨanekai, mawari wewiwamete tiwa'aitɨwame kemɨreutahake Tuki Waɨkawa Muyepatsieta xeiwiyari 'anuyeyeikakaku, xeime xuriyaya 'a'ɨtɨ.
HEB 9:26 Xɨka 'aku mɨpaɨ 'anenike, mɨixa pɨmɨnikeyu kwie munetɨarietsie paitɨ. Hikɨ matsi xeimieme xeikɨa matsiɨkɨtɨ kanayani tukari taxɨximekaku, mitayeitɨanikɨ tita 'axamɨti'ane, mawari mayuyeitɨakɨ.
HEB 9:27 Teɨteri wahetsie katininakimɨkɨ xeimieme memɨkwinikɨ, 'ariketa 'itsɨkame kaniwatahɨawimɨkɨ.
HEB 9:28 Yaxeikɨata Kɨritsitu mekanixeiyakuni mɨkɨ memikwewie, kaniwatawikweitsitɨamɨkɨ. Kemɨ'ane xeimieme mawari mayeitɨarie hetsiena mɨtiuhɨiwanikɨ tita 'axamemɨte'uyuri yuwaɨkawatɨ, mɨkɨ 'arike mekanixeiyakuni tita 'axamɨti'ane kaxuawekaku.
HEB 10:1 Mɨkɨ 'inɨari niukiyaritsie kanimatsiɨkɨni tita 'aixɨa ti'anetɨ 'umɨramie, peru 'etɨriyari hepaɨ katinimatsiɨkɨni xeikɨa, yemekɨ hepaɨna pɨka'ane ke'aixɨa mɨ'anekɨ. Mɨkɨ mawari yuheyemekɨ mukuxatɨariwa xeiwiyari 'anuyeyeikakaku, mɨkɨ hatsuaku pɨkayɨwe mɨwaraye'atɨanikɨ mɨkɨ 'ahurawa memakɨka.
HEB 10:2 Mexɨka waraye'atɨanike, ¿mekatehayewakeyu memɨtemawatɨwekai? Wa'iyari puwarutate'anikeyu tita 'axamemɨte'uyuri hepaɨtsita, xɨka xeimieme me'u'itiyanike mɨkɨ mɨya memɨte'ayexeiya.
HEB 10:3 Matsi mɨkɨ mawarikɨ xexuime wiyaritsie mepaye'eritɨariwa 'axamemɨte'uyurikɨ.
HEB 10:4 Tuurutsixi meta tsipuri waxuriya pɨkayɨwe tewi tita 'axamɨtiuyuri menuyeitɨirienikɨ.
HEB 10:5 'Ayumieme kepauka kwiepa munuanikekai mɨpaɨ kaniutayɨni: «Mawari pepɨkanaki'erie kepemɨtixatɨarie, matsi, pepɨnetsi'ukuha'aritɨiri newaiyari.
HEB 10:6 Mawari taiyariyarikɨ pepɨkanaki'a, meta mawari menuyeitɨanikɨ tita tewi 'axamɨtiuyuri, mɨkɨ pɨkamatsinake.
HEB 10:7 'Ana mɨpaɨ neputayɨ: “Kamɨtsɨ ne ―kemɨre'uxa xapa mɨkwikwiyatsie nehepaɨtsita―. Nekaninuani yanemɨtiyurienenikɨ kemɨmatinake 'ekɨ Kakaɨyari”».
HEB 10:8 Merikɨtsɨ matɨari mɨpaɨ paine: «Mawari meta 'imikieri pepɨkanaki'erie kepemɨtixatɨarie, mawari taiyariyari, meta mawari tita tewi 'axamɨtiuyuri mɨranuyeitɨani, mawari mɨxatɨarie kemaine 'inɨari, mɨkɨkɨ pepɨkanaki'a».
HEB 10:9 'Ana kwitɨta mɨpaɨ kaniutayɨni: «Kamɨtsɨ ne nekaninuani yanemɨtiyurienenikɨ kemɨmatinake». Kanitayeitɨani matɨari mieme, mitatseiriyakɨ hutarieka mieme.
HEB 10:10 Mɨpaɨ mɨtinakekɨ, 'ayumieme tepupatsie tame, mawari mayeitɨariekɨ xeimieme Ketsutsi Kɨritsitu yuwaiyaritsie 'uyeikatɨ.
HEB 10:11 Yunaitɨ mawari wewiwamete tukarikɨ mana mekaniuti'uka mete'uximayatɨ, mawari yaxeikɨa 'aneme me'ixatɨatɨ, mɨkɨ mawari hatsuaku mɨkayɨwe mɨtatsi'anuyeitɨirienikɨ tita 'axatemɨte'uyuri.
HEB 10:12 Peru Kɨritsitu, mawari 'uwewieka xeimieme mɨta'anuyeitɨirienikɨ tita 'axatemɨte'uyuri, mawarieya yuheyemekɨ 'aixɨa miyurikɨ, 'ayumieme mɨkɨ Kakaɨyari tserieta kanayerɨni.
HEB 10:13 Hikɨ xeikɨari pɨta'ikwewa mexi me'a'iwariexime mɨkɨ memeye'unie, mexi me'ahapawa hɨxiena.
HEB 10:14 Xeimieme mawari mayeitɨariekɨ, yuheyemekɨ pɨwaraye'atɨa mɨkɨ memɨkupatsiwa yuxexuitɨ.
HEB 10:15 'Iyari Mɨtiyupata pɨtatsihekɨatɨa yaxeikɨa 'utaitɨ. Mɨpaɨ kanaineni:
HEB 10:16 «Tɨratu mɨpaɨ 'aneme nekaniwatawewiriemɨkɨ, mɨkɨ tukari 'aye'ayu 'arike ―mɨpaɨ paineta Ti'aitame―: Ne'inɨari niukiyari wa'iyaritsie nepɨwapitɨani, meta wa'eriwametsie nepita'utɨani».
HEB 10:17 Mɨpaɨtatsiere paine: «'Axakememɨte'uyuri, 'Inɨari kememɨte'utitsanaxɨa, mɨkɨ nepɨkara'eriwaniri».
HEB 10:18 Merikɨte mɨkɨ hepaɨtsita xɨka reuyehɨwiyarieni, tawari mawari pɨkaxatɨarieni, menuyeitɨanikɨ tita 'axamɨtiuyuri.
HEB 10:19 'Ayumieme nepaine ne'iwama, Ketsutsi xuriyaya mutaxɨriyakɨ, heitserie tepexeiya tekamamatɨ temeutahakenikɨ Waɨkawa Muyepatsieta.
HEB 10:20 Huye hikɨke mɨmieme mɨkɨkɨ temayenenierenikɨ, mɨkɨ tekanexeiyani, mɨkɨ mutahuyetaxɨkɨ tahetsiemieme, kemu'itɨarie yuwaiyaritsie, tahuye patɨa, temeutahakenikɨ tame hakewa mɨreunamekai mɨkɨ 'ixurikikɨ.
HEB 10:21 Mɨkɨ meta, tekaneixeiyani mawari wewiwame mɨtɨrɨkaɨye Kakaɨyari kiiya mɨhɨritɨarie.
HEB 10:22 Merikɨtsɨ mɨpaɨ mɨ'anekɨ 'ahurawa teke'akɨkani, ta'iyari yemekɨ yuxewikaku, yemekɨ yuri tete'erietɨ, ta'iyari 'itiyakaku 'axatekateyurietɨ kapa ta'iyari tatsi'utatienikɨ tita 'axatemɨte'uyuri hepaɨtsita, tawaiyari meta hauxinariekaku haa 'aixɨa mɨ'anekɨ.
HEB 10:23 Yateketekahuni, mɨpaɨ tetetahekɨatatɨ ketemɨte'ikwewie tekatehayewatɨ, mɨpaɨ tetemaitɨ, kemɨ'ane mɨpaɨ mɨtatiutahɨawixɨ tita mɨtatimini, mɨkɨ yakatinikamieni kemaine.
HEB 10:24 Tekehetata'eritɨwani tanaitɨ, temɨtawaɨriyanikɨ temɨtetakanaki'eriekakɨ 'aixɨa temɨteyuriekakɨ.
HEB 10:25 Tepɨkatehayewani tepɨtakuxexeɨriwani, hipame wahepaɨ tepɨkatehayewani, tepɨtatuikani matsi, kexemɨte'imate mɨkɨ tukari maye'aximekɨ.
HEB 10:26 Ta'iyari ya'anekaku xɨka tetawaɨriyani 'axatemɨteyuriekakɨ teheitimaime tita yuri mɨraine, mawari pɨkaxuawe tawari menuyeitɨanikɨ tita 'axatemɨte'uyuri.
HEB 10:27 Xɨkari mɨpaɨ 'aneni temamatɨ tepɨta'ikwewa temɨta'iwawiyarienikɨ xeikɨa, yuhaxɨakɨ kepauka mɨwataxɨtsitɨani mɨkɨ memeye'unie, yumexɨitɨatɨ taikɨ.
HEB 10:28 Xɨka 'itixani'erieni 'inɨari niukiyari Muitsexi mi'atɨa, mekanitakwikwiwakaitɨni mekanenimayatsietɨ, yuhutatɨ yatɨni yuhaikatɨ mɨpaɨ metetahekɨatayu.
HEB 10:29 ¿Kexeteku'eriwa, matsi yemekɨ hetsiena katinake mu'uximatɨarienikɨ, kemɨ'ane Kakaɨyari nu'aya mɨnanaima, kemɨ'ane tsewiximariekame mɨ'erie mɨkɨ xuriyaya tɨratu mutatseiriyarie kɨmana, mɨpatsie kɨmana, kemɨ'ane mitawe'erie 'Iyari 'aixɨa mɨtatipitɨa?
HEB 10:30 Tame tepimate kemɨ'ane mɨpaɨ mutayɨ: «Nekɨmana nepɨnemieneni, 'anepɨrapika ne», tawari mɨpaɨ putayɨ: «Ti'aitame yuteɨterima pɨwa'uximatɨani».
HEB 10:31 Pɨmariweni kepauka Kakaɨyari mayeniere miwiyani.
HEB 10:32 Xekena'eriwani matsi meripai kemɨtiuyɨ, 'ana kwitɨ xe'uhekɨariyarieka, kwinimieme xepɨte'ukakukuinekai peru xepɨtenewiekai.
HEB 10:33 Tsepa yunaime wahɨxie xemɨtewinɨariekai 'axaxetekɨhɨawarɨwatɨ xe'uximatɨarietɨ, tsepata hipame xemɨwaparewiekai kepauka mɨpaɨ memu'itɨarie, xeme xepɨtenewiekai.
HEB 10:34 Memanutaxɨriyakai kememɨte'ukwinitɨarie, xemeta wahepaɨ xepɨteyumaikai. Xeyutemamawietɨ xepɨwanewiekai kepauka memɨxete'unawairi xepiinite, mɨpaɨ xetemaitɨ, yupiinite matsi 'aixɨa mɨti'anene 'emɨtiteriwe xemɨtehexeiyakɨ xeme muyuawitsie.
HEB 10:35 'Ayumieme nepaine, xepɨkaheiwiwiwani tita xemɨtehexeiya, heitserie xepexeiya xekamamatɨ xemɨyɨakakɨ, mɨkɨkɨ waɨkawa xepɨte'iwa.
HEB 10:36 Kaneuyeweka xemɨte'ukanenewiekakɨ, xeheixeiyatɨ xemakɨnekɨ kexemɨte'utahɨawarie kename mɨpaɨ tixepitɨani, yaxeteyurieyu kemɨtinake Kakaɨyari.
HEB 10:37 'Etsiwa yareutewikaku 'akuxi, «kemɨ'ane 'umamie kaninuamɨkɨ, 'epɨkareutere.
HEB 10:38 Mɨkɨ heitserie mexeiya nehetsɨa miemetɨtɨ mɨkɨ kanayenierekamɨkɨ yuri mɨti'eriekɨ. Xɨka waɨripieka, ne'iyaritsie nepɨkanaki'aka kenemɨtixeiya».
HEB 10:39 Peru tame mɨpaɨ tepɨka'anene, tepɨkawaɨripietɨka, tepɨkatatɨmaiyarieni, matsi yuri tepɨte'erie tatukari temɨkatatɨmaiyakɨ.
HEB 11:1 Kemɨ'ane yuri mɨti'erie mɨpaɨ pɨtimate, peixeiyani tita mɨtikwewie, mɨpaɨta katiniyumaika, 'apuwe tita mɨkatixeiyariewe.
HEB 11:2 Mɨpaɨ yuri memɨte'eriekaikɨ mekanimariwakaitɨni tatutsima meripaitɨ miemete 'aixɨa memɨteyuriekaikɨ.
HEB 11:3 Yuri temɨte'eriekɨ mɨpaɨ tepɨtemate, kwie munetɨariekɨ Kakaɨyari mɨpaɨ 'utayɨku. Tita mɨtixeiyariewe kemɨtiuwewiya, tita mɨkarahekɨakɨ katiniutiwewiyani.
HEB 11:4 Yuri mɨti'eriekaikɨ 'Aweri mawari 'aixɨa mɨ'ane Kakaɨyari puxatɨa, Kaini mawarieya 'aixɨa ka'anekaku hepaɨna, mɨpaɨ mɨtiutimawaxɨkɨ putahekɨatsie kename heitserie hexeiyakai, Kakaɨyari mɨpaɨ tihekɨatakaku 'imikierieya hepaɨtsita. 'Ayumieme tsepa mɨmɨki, 'inɨarieya pɨtikuxata 'akuxi.
HEB 11:5 Yuri mɨti'eriekaikɨ, 'Enuki pewitɨkie mɨki mɨka'ayanikɨ, pumawekai Kakaɨyari heiwitɨku. Kahewitɨkiewetɨ 'akuxi, mɨpaɨ pɨtihekɨatsiekai Kakaɨyari mɨnaki'aritɨakaikɨ.
HEB 11:6 Tewi yuri xɨka kati'erieka, pɨkayɨwe minaki'aritɨanikɨ, kaneuyeweka mɨpaɨ yuri mɨti'eriekakɨ kemɨ'ane Kakaɨyari 'aurie maye'amɨkɨ, kename 'a'uyeika, kename tiwa'iwitsitɨa mɨkɨ memikuwautɨwe.
HEB 11:7 Yuri mɨti'eriekaikɨ, Nuhexi yukweriwayurietɨ, kanuwa kaniutawewieni mɨwatawikweitsitɨanikɨ yukie kiekatari, mɨpaɨ tiutahɨawarieka tita teɨteri 'akuxi memɨkatexeiyawawekai hepaɨtsita. Mɨpaɨ mɨtiuyurikɨ, kwiepa memɨtama wahetsie pɨtiuhɨiya, mɨkɨtsie pɨta pɨtiunakixɨ heitserie mexeiyanikɨ yuri ti'erietɨ.
HEB 11:8 Yuri mɨti'eriekaikɨ, 'Apɨrahami kepauka muta'inierie, yatikamietɨ mana paitɨ kaneyani hakewa hetsiena mɨrenakenikekai, kaneyani 'atsikatimaitɨ hakewa menuanikekai.
HEB 11:9 Yuri ti'erietɨ mana kaniuyupata mɨkɨ kwieyaritsie paitɨ kemɨtiutahɨawarie hetsiena mɨtinakenikekaikɨ, peru xeime kwieya hepaɨ pɨtimaikai. 'Ixuriki kiiyarita mekanayetekaitɨni mɨkɨ 'Itsahaki hamatɨa meta Kakuwu hamatɨa, mɨkɨta wahetsie mɨtinakenikekai kememɨte'utahɨawarie, yaxeikɨa 'Apɨrahami hepaɨ.
HEB 11:10 Kiekari kanikwewiekaitɨni mɨkɨ kii hetɨa mieme tenari mɨtse'i mexeiya, Kakaɨyari kii 'inɨnɨatame meta 'iwewiwame mɨhɨkɨ.
HEB 11:11 'Apɨrahami yuri mɨti'eriekaikɨta, Tsara hamatɨa tɨrɨkariya mepupitɨarie nunutsi mehexeiyatɨ memakɨnekɨ, tsepa tukarieya manutitɨa tsepa mɨ'ukaratsitɨkai, mɨpaɨ pɨtiuyɨ yatikamiekame mɨ'eriekaikɨ kemɨ'ane mɨpaɨ mɨtitahɨawixɨ kename mɨpaɨ tipitɨanikekai.
HEB 11:12 'Ayumieme xeimetsie xeikɨa mekaniyekɨne, tsepa mɨkɨ mumɨximekai, taheima miemete xurawetsixi wahepaɨ meyupaɨmetɨ mekanakɨne, meta xiekari haramara tetsita mieme hepaɨ meyupaɨmetɨ mekanakɨne mɨkayu'inɨatsinɨa hepaɨ.
HEB 11:13 Yuri mete'erietɨ mekaneutakwixɨani mɨkɨ yunaitɨ, meheixeiyatɨ mepɨka'akɨ kememɨte'utahɨawariekai, matsi 'ateewa paitɨ mepixei yuri mete'erietɨ, mepitawaɨritɨa, mɨpaɨ mepɨteyuhekɨatakai kename xaɨtsie miemete kɨkamete mehɨkɨtɨkai xeikɨa 'ena kwiepa me'u'uwatɨ.
HEB 11:14 Mɨpaɨ me'utiyuatɨ, mɨkɨ pɨyuhekɨata kename kwie mekuwautɨwekai.
HEB 11:15 Xɨka me'iku'eriwanike mɨkɨ kwie hakewa memeyekɨtsie, mepɨyɨwawenikekai memɨkunuaxɨanikɨ mana.
HEB 11:16 Matsi mepihiwe'eriekai kwie 'aixɨa mɨ'ane taheima mieme. Kakaɨyari 'ayumieme pɨkayutewiya mɨkɨ wakakaɨyari mɨramamatiwanikɨ, kiekari puwarukuha'aritsitɨiri.
HEB 11:17 Yuri mɨti'eriekaikɨ 'Apɨrahami kepauka muta'inɨatsie, 'Itsahaki mawari payeitɨa tɨma, kemɨ'ane mɨpaɨ mɨtiutahɨawarie kemɨrexeiyanikekaikɨ, mɨkɨ mawari peyeitɨanikekai yuniwe muyuxewikai.
HEB 11:18 'Apɨrahami mɨpaɨ tsepa mɨtiutahɨawariekai meripaitɨ: «'Itsahaki xiɨyarimama mepɨte'uterɨwarɨwani mɨkɨ 'ahetsie memɨyekɨne».
HEB 11:19 'Apɨrahami mɨpaɨ katiniyɨkɨhɨawekaitɨni, Kakaɨyari mɨyɨwekaikɨ tawari menukuketɨanikɨ mɨkite watsata, 'ayumieme hutarieka heixeiyatɨ kemɨratɨa, 'inɨari kanayani.
HEB 11:20 Yuri mɨti'eriekaikɨ 'Itsahaki 'aixɨa kaniutayɨni Kakuwu meta 'Etsahu wahepaɨtsita, 'aixɨa memɨ'itɨarienikɨ tita 'umɨramiekaikɨ wahetsiemieme.
HEB 11:21 Yuri mɨti'eriekaikɨ Kakuwu kepauka mɨmɨximekai 'aixɨa kaniutayɨni yuxexuime Kutse niwemama wahepaɨtsita, mɨkɨ 'aixɨa memɨ'itɨarienikɨ, puyutanenewi yutuikatɨ yu'itsɨkɨ.
HEB 11:22 Yuri mɨti'eriekaikɨ Kutse mɨximetɨ mɨpaɨ putayɨ 'Ekipitu kwieyaritsie memɨyekɨnekekaikɨ 'Ixaheri xiɨyarimama, puyuta'aitaxɨ 'umeteya manutɨkienikɨ.
HEB 11:23 'Utinuiwaku Muitsexi yuri memɨte'eriekaikɨ paapaya mekaniti'awieta haika metseriyari nunutsi witsimemɨte'ixeiyakaikɨ, mepɨka'utimama kwiepa ti'aitame kemɨtiuta'aitakai.
HEB 11:24 Yuri mɨti'eriekaikɨ Muitsexi 'e'utewitɨ, mɨkɨ kwiepa ti'aitame tewarieya mɨtiuterɨwarɨwani pɨka'inakirixɨ, pɨka'uyuwaɨri Parahuni niweya nu'aya mɨxatsiwanikɨ.
HEB 11:25 Puyuwaɨri matsi 'axamɨ'itɨarienikɨ Kakaɨyari teɨterimama wahamatɨa, kayuwaɨriyatɨ mɨnaki'akakɨ 'axatiyurienetɨ yapaɨmexɨa wiyari.
HEB 11:26 He'eriwatɨ tita mɨra'iwakekai xeikɨa, mɨpaɨ pɨtiku'eriwakai, kename matsi waɨkawa rexeiyanikekai 'axatikɨhɨawarɨwatɨ Kɨritsitu hepaɨ, kenameta tixaɨtɨ karexeiyanikekai piinite xɨka rexeiyanike 'Ekipitutsie timieme waɨkawa.
HEB 11:27 Yuri mɨti'eriekaikɨ 'Ekipitu kwieyaritsie kaneyeyani ka'imakatɨ kwiepa ti'aitame tsepa mɨha'akai. Pɨtiukanewiekai, kemɨ'ane Kakaɨyari mɨxeiya hepaɨ pɨyɨanekai, tsepa mɨkɨ mɨkaxeiyariewe hatsuaku.
HEB 11:28 Yuri mɨti'eriekaikɨ Patsikwa 'ixɨarariyari putsutɨa meta kitenie pu'ɨyaxɨa xuriyakɨ, kemɨ'ane wamatɨarima mɨwaka'unakai mɨkawamayɨanikɨ 'Ixaheritsixi wamatɨarima.
HEB 11:29 Yuri memɨte'eriekaikɨ Haramara Mɨxetatsie mekananukɨne makuwaki hepaɨ 'anekaku, peru 'ekipitutari mɨpaɨta meyɨnike mekanehauxɨani haramaratsie.
HEB 11:30 Yuri memɨte'eriekaikɨ, kerikutari watetsariya kananaka'une 'atahutamexɨa 'auriena me'akɨneku.
HEB 11:31 Yuri mɨti'eriekaikɨ Xahawi pɨka'utatɨmaiyarie teɨteri yuri memɨkate'eriekai wahamatɨa, mɨkɨ 'uka tuminikɨ mɨyuwitɨnɨakai kanihɨkɨtɨkaitɨni, kuyaxi 'awie nenieremete yukiita 'aixɨa 'anemekɨ muwarutanaki'erikɨ.
HEB 11:32 Merikɨte, ¿tita 'akuxi netitaxata? Kerehuni, Waraki, Tsanitsuni, Ketexi, Rawiri, Tsamuheri, meta Kakaɨyari niukametemama yunaime xɨka mɨkɨ newarutaxata, tukari peuyewekayeyu nehetsiemieme.
HEB 11:33 Mɨkɨ yuri memɨte'eriekaikɨ mepɨwara'iwaxɨ kwiepa te'aitamete, heitseriemekɨ mepɨte'aitakai, meheixeiyatɨ mepakɨ kememɨte'utahɨawarie, mekaniwaruta'imaiya mayetsi memɨkawatikwanikɨ,
HEB 11:34 mekanitɨni tai tsepa mɨtɨrɨkaɨyekai, mekaniutawikweni kutsirakɨ memɨkakwi'iwakɨ, tsepa memuweraranikai meputɨrɨkariyarie, kuyakɨ memɨyɨwawe mekanakɨne, mekaniwaranukuweiya kuyaxi xaɨtsie miemete.
HEB 11:35 'Ukari tawari mekaniwarutanaki'erieni yuhetsɨa miemete, me'ukwiku me'anuku'uku. Hipatɨ mekanitiweiwakaitɨni mekayuwaɨriyatɨ memɨxɨnarienikɨ, mɨpaɨ mepɨteyuriekai memɨpitɨarienikɨ matsi 'aixɨa 'anemekɨ memanuku'unikɨ.
HEB 11:36 Hipatɨta kememɨte'upitɨarie, mekaninanaimariekaitɨni mekanitiweiwakaitɨni, meta mepɨtihɨiwakai mepanutaxɨriyakai.
HEB 11:37 Mepɨtituaxiwakai tetexikɨ, tsexutsukɨ mepɨtixitewakai, mepɨ'inɨatsietɨwekai, mepɨkwi'iwakai kutsirakɨ, mekaniku'uwakaitɨni muxa nawiyari meta tsipu nawiyari me'anakatɨtɨkaitɨ me'ikuteɨxɨtɨwetɨ, meteheuyehɨatɨ, me'uximatɨarietɨ, 'axame'itɨarietɨwetɨ.
HEB 11:38 Kwiepa memɨtama 'aixɨa mepɨkate'u'iyarikai watsata memɨxuawenikɨ teɨteri mɨya memɨ'anenekai. Makumawetsie, hɨritsie, mekaniku'uwakaitɨni meheuyexɨrietɨ, terɨta meta meukatewatsie meyetetɨkaitɨ.
HEB 11:39 Mɨkɨ yunaitɨ tsepa memɨhekɨatsiekai yuri memɨte'eriekaikɨ, 'akuxi tita memɨte'utaxatɨarie metehexeiyatɨ mepɨka'akɨ.
HEB 11:40 Kakaɨyari meripaitɨ tixaɨtɨ pɨtiutawewi matsi 'aixɨa mɨti'ane tahetsiemieme, mɨkɨ memaye'axɨanikɨ 'ate'u'uwakaku tame xeikɨa.
HEB 12:1 'Ayumieme, tameta hikɨ ta'aurie meyuxeɨriekaku tehekɨatamete meyuwaɨkawatɨ, tepeihɨani naime mɨrahete, naime 'axamɨti'ane mɨtatsikuhapana. Tekawaɨripietɨkaitɨ tepuhuni, tepɨtanautsaxɨani temeta'axɨanikɨ hakewa temekwewiya,
HEB 12:2 kwinimieme Ketsutsi teha'eriwatɨ, kemɨ'ane mitsutɨa meta meye'atɨa titatsie yuri temɨte'erie. Mɨkɨ mɨpaɨ ra'eriwatɨ kemɨtiyutemawiekakekai 'arikeke, kuruxi punewi tsepa mutewinɨarie. Hikɨ mana kanakani Kakaɨyari 'uwenieya tserieta.
HEB 12:3 Xekena'eriwani mɨkɨ kemɨtiukanewiekai 'axateyuruwamete kwinimieme meheye'uniekaku. Kapa xe'u'uxenikɨ xeme, yu'iyaritsie kapa xewaɨripiekakɨ.
HEB 12:4 Xeme kexemɨteyukwitɨwe tita 'axamɨti'ane hamatɨa, 'akuxi xexuriya pɨka'uhane.
HEB 12:5 Xɨari xepetɨmai kemɨtixetuika tewi yuniwe mɨtikuxaxatɨwa hepaɨ, mɨpaɨ 'utaitɨ: «Neuxei neniwe, pepɨkatiukatawe'erieka ti'aitame mati'ɨkitɨakaku kwinimieme 'uximatɨarikakɨ, pepɨkawaɨripieka mɨkɨ matsi'utate'akaku.
HEB 12:6 Ti'aitame 'uximatɨarikakɨ pɨti'ɨkitɨa kemɨ'ane mɨnaki'erie, yunaime pɨwakuwaya yuniwema mɨwarutanaki'eri».
HEB 12:7 Kepauka xemɨte'uka'eniwa, xete'ɨkitɨarietɨ xemakɨnekɨ 'uximatɨarikakɨ xepɨyɨa, Kakaɨyari pɨxeyuriene kemɨwayurie yuniwema. ¿Kepaikɨ raniwetɨkaku, mɨkɨ paapaya pɨkati'ɨkitɨa 'uximatɨarikakɨ?
HEB 12:8 Mexɨka 'uximatɨarikakɨ xekate'uta'ɨkitɨarieni yunaitɨ 'axeikɨa kememɨtepitɨarie, kari 'awienuari xepɨniwemama, Kakaɨyari xepɨkaniwemama.
HEB 12:9 Mɨkɨ meta, tepɨwarexeiyakai tapaapama memɨteɨteritɨkai, mɨkɨ metate'ɨkitɨakaku 'uximatɨarikakɨ tepɨwareu'eniekai. Hikɨ matsi yemekɨ peuyewetse temi'enieka 'iyarite wa'ukiyari para temayenenierenikɨ.
HEB 12:10 Mɨkɨ yapaɨmexɨa tukari mepɨtate'ɨkitɨakai kemɨtiwanakekai 'uximatɨarikakɨ, matsi Kakaɨyari 'aixɨa temɨ'itɨariekakɨ pɨtati'ɨkitɨa 'uximatɨarikakɨ, hepaɨna tepatsietɨ temakɨnekɨ.
HEB 12:11 'Uximatɨarikakɨ mexi tete'ɨkitɨarie, tetatemamawiekame tepɨkata'erie, matsi tetahiweriekame tepɨta'erie, 'arikeke mɨkɨ mɨpaɨ memɨ'itɨarie mekanipitɨarieka heitseriemekɨ yamemɨtekahunikɨ, yu'iyaritsie meka'uximatɨarietɨ.
HEB 12:12 'Ayumieme yumamá xekeneutseiriyaxɨa mɨweraranikɨ, yutunuteta mɨkatɨrɨkawikɨ xekeneutitseiriya mɨtitɨrɨkaxɨanikɨ.
HEB 12:13 «Huye mɨxexeurawi xekeneutiwewi yɨ'ɨkatsie mieme,» mɨ'ɨkatuni mɨkahekawaɨtsenikɨ meta mɨkatikukukuinenikɨ.
HEB 12:14 'Aixɨa xemɨtewaxeiyanikɨ yunaime xekeneyumexɨitɨaka, meta xemɨpatsiekakɨ Kakaɨyari hetsiemiemekɨ. Xɨka mɨpaɨ katipatsieka, hatsuaku Ti'aitame pɨka'uxeiya.
HEB 12:15 Xekeneyɨ'ɨwiyani xewitɨ ka'aye'awetɨ mɨka'ayanikɨ, Kakaɨyari 'aixɨa tiuka'iyaritɨ kemɨtiminikeyu, xekeneyɨ'ɨwiyani xewitɨ kapa xemuinanenikɨ, nana kwiepa mutineika hatsiwimekɨ mutixuxuawere hepaɨ yɨanetɨ, mɨpaɨ xɨka tiyurieneni, yumɨiretɨ mekanitsewiximariekakuni.
HEB 12:16 Xekeneyɨ'ɨwiyani kapa xewitɨ 'ikumaɨwanikɨ kemɨ'ane mɨkayɨ'ɨya meta mɨkayɨkɨna, kapa Kakaɨyari ka'ayexeiyatɨ yɨanenikɨ 'Etsahu hepaɨ, mɨkɨ xei'ikwaiyarikɨ kanipata heitserie mexeiyakaikɨ mɨmatɨaritɨkaikɨ.
HEB 12:17 Mɨpaɨ xepɨtemate, 'arike kepauka heixeiyatɨ mayeimɨkɨkai tita hetsiena mɨtiutaxatsie 'aixɨa mɨ'itɨarienikɨ, pɨxani'eriwakai. Mɨpaɨ pɨkatiupitɨarie muyupatanikɨ tawari, tsepa 'utatsuatɨ mɨpaɨ mɨtiwaukai.
HEB 12:18 Hakewa xeme'axɨa xeme, mana xepɨka'u'axɨa meripaitɨ miemetexi wahepaɨ hakewa tewi mɨyɨwe mimayɨanikɨ yemuri, hakewa tai mɨta'a, hakewa meyɨwi, teɨka hakewa meyeika,
HEB 12:19 kuxineta hakewa mehɨtsierie, hakewa xewitɨ me'enierie 'utaniukakaku, mɨkɨ kepauka memi'eni mepitawawiri tawari xeime niukikɨ memɨkatahɨawarienikɨ.
HEB 12:20 Mepɨka'ikemakai tita memɨte'uta'aitɨarie mɨpaɨ metekɨhɨawarɨwatɨ: «Tsepa yeutanaka mimayɨa yemuri, tetexikɨ pɨmierieni tituaxiwatɨ».
HEB 12:21 Yemekɨ mariwetɨ mɨtiyuxexeiyakaikɨ, 'atsita Muitsexi mɨpaɨ kaniutayɨni: «Ne marikakɨ nepuyɨyɨaka».
HEB 12:22 Xeme matsi xepu'axɨa Tsiyuni yemuriyari hakewa mewe, Kakaɨyari mayeniere kiekariena, Kerutsareme taheima mieme hakewa maniere, yumɨireme wahetsɨa xepu'axɨa, taheima miemete niuki tuayamete wa'ixɨararipa,
HEB 12:23 mana matɨarixi memutinunuiwa muyuawitsie memaka'utɨarie hakewa memeyutixexeɨriwa, mana xepu'axɨa. Kemɨ'ane 'itsɨkametɨtɨ yunaime mɨwata'iwawiya Kakaɨyaritɨtɨ, mɨkɨ hetsɨa xekaniu'axɨani, mɨkɨ heitseriemekɨ yamemɨtekahukai memaye'axɨawawe yu'iyaritsie memu'uwa, mɨkɨ wahetsɨa xekaniu'axɨani,
HEB 12:24 kemɨ'ane tɨratu hekwame mɨ'atɨa Ketsutsitɨtɨ, mɨkɨ hetsɨa xekaniu'axɨani, hakewa xuriyakɨ mɨre'ɨyarie kɨmana tewi mɨ'itiyanikɨ mana xekaniu'axɨani. Mɨkɨ xuriya matsi 'aixɨa 'anemekɨ katinihekɨatani, 'Aweri xuriyaya hepaɨna katihekɨatakaku.
HEB 12:25 Xekeneyukweriwayurieka xemɨka'ixani'eriekakɨ kemɨ'ane maniuka. Mɨkɨ mepɨka'utawikwei me'itixani'erieka kemɨ'ane 'ena kwiepa mɨpaɨ mɨtiwarutahɨawixɨ kememɨ'itɨarienikekai, tame matsi yemekɨ tepɨkatawikweni xɨka ta'aurie te'axɨrieni temɨka'i'enienikɨ kemɨ'ane taheima maniuka.
HEB 12:26 Mɨkɨ 'utaniukakaku 'ana kwie kaniutayuani, hikɨta kemɨtiyurieni mɨpaɨ paine ya'utaitɨ: «Xeimieme 'akuxi kwie hɨkɨame nepɨkatayuitɨani, matsi muyuawita nepɨtayuitɨani naime».
HEB 12:27 «Xeimieme 'akuxi» 'utaitɨ, mɨpaɨ pɨtihekɨata, tita mɨtitayuitɨariewe pɨtitayeitɨarieni, tita mɨtiutiwewiya xatatɨ, peru pɨtiyuhayewa tita mɨkatitayuitɨarieni.
HEB 12:28 'Ayumieme pamɨpariyutsi teke'ipitɨaka mɨkatayuitɨarieni tati'aitɨwame temupitɨariekɨ, hakewa mɨre'aita mɨkɨ, mana pɨkatayuitɨarieni, mɨpaɨ tekete'uximayaka Kakaɨyari hetsiemieme pamɨpariyutsi te'ipitɨatɨ. 'Aixɨa 'anemekɨ kemɨtinake, teheyexeiyatɨ meta teheyemakatɨ.
HEB 12:29 Metsɨ «Takakaɨyari tai naime mɨtitixɨtsitɨwa hepaɨ kani'aneni».
HEB 13:1 Xepɨkatehayewani xewanaki'erietɨ 'iwamarixi.
HEB 13:2 Xepɨkatehatɨtɨmaiyani xemɨwatanaki'erienikɨ 'ateewa kiekatari, mɨpaɨ meteyurietɨ hipatɨ mepɨwarutanaki'eri niuki tuayamete 'atsimekatemaitɨ.
HEB 13:3 Xekeniwara'eriwani kemɨ'ane memanutaxɨriya, wahamatɨa xemanutaxɨriya hepaɨ xeteyumaitɨ, xekeniwara'eriwani mɨkɨ 'axamemɨ'itɨarietɨwe mɨpaɨ xetemaitɨ, xemeta yuwaiyaritsie wahepaɨ xemɨ'itɨarietɨweni hepaɨ.
HEB 13:4 Teɨteri xɨka meneneɨkeni, 'aixɨa meketexeiyarieka naime hepaɨtsita, peru yɨ'ɨya meta yɨkɨna hamatɨa xeikɨa mepɨyukumaɨwani, metsɨ, Kakaɨyari 'uximatɨarika kaniwapitɨamɨkɨ mɨkɨ memikumaɨwa kemɨ'ane mɨkawa'ɨya meta mɨkawakɨna.
HEB 13:5 Mɨpaɨ xeketeneu'uwani tumini xekahiwe'erietɨ, xekenenaki'aka xeheixeiyatɨ tita xemɨtehexeiya. Mɨkɨ kanihɨkɨtɨni kemɨ'ane mɨpaɨ mutayɨ: «Ne yemekɨ 'axaɨtame nepɨkamatsihayewani, nepɨkamatsiku'erieni hatsuaku».
HEB 13:6 'Ayumieme tekamamatɨ mɨpaɨ teputiyuane: «Ti'aitame kanihɨkɨtɨni kemɨ'ane mɨnetsiparewie, nepɨkamaka. ¿Kekuta netsi'uyuriwe tewi?»
HEB 13:7 Xekeniwara'eriwatɨ mɨkɨ memanuyetekai, kememɨ'anenekai, Kakaɨyari niukieyakɨ mepɨtexe'utaxatɨa. Xewara'eriwatɨ mɨpaɨ kememɨte'u'uwakai, xekeniwa'ɨkeni yuri kememɨte'eriekai.
HEB 13:8 Ketsutsi Kɨritsitu meripaitɨ hikɨta yaxeikɨa kani'aneni, tsepanetɨ xeitsienitu wiyari manuyekɨka.
HEB 13:9 Xepɨkayuwaɨriyani xemeuyexɨriyanikɨ, 'ɨkitsika yɨkɨ 'aneneme xepɨka'enietɨweni hipame wayeiyaritsie mieme. 'Aixɨa kaniyɨmɨkɨ yu'iyaritsie mɨtseiriyarienikɨ 'iya 'aixɨa tiuka'iyarikaku, peru 'ikwaikɨ hatsuaku pɨkatseiriyarieni, mɨkɨ 'ikwaitsie metewiyatɨ memu'uwa hawaikɨ mepɨka'uparewiya.
HEB 13:10 Tame mawari taiyame tekanexeiyani, mana mieme memɨtekwakakɨ heitserie mepɨkahexeiya mɨkɨ mawari wewiwamete 'ixuriki tukiyarita memɨte'uximayatamete.
HEB 13:11 Mawari wewiwamete tiwa'aitɨwame Waɨkawa Muyepatsieta kepauka mi'atɨwa watewama waxuriya 'aixɨa miyurienikɨ tita 'axamemɨte'uyuri, wakaxarite kiekari tetsita pɨtitaiyarɨwa.
HEB 13:12 'Ayumiemeta Ketsutsi kitenie 'aurie pɨtiukwinixɨ takwa, Kakaɨyari hetsiemieme mɨwapatanikɨ teɨteri yuxuriyakɨ.
HEB 13:13 Hikɨmɨ hetsɨana tepɨyehu kiekari tetsita paitɨ, niukimarika tenewietɨ hepaɨna.
HEB 13:14 'Ena kwiepa tepɨkaheixeiya kiekari 'amɨtiteriwe. Tepitakwewie pɨta kiekari xewitɨ 'umamie.
HEB 13:15 'Ayumieme mɨkɨ tatsiparewiekaku, tamawari teke'iwewirieka Kakaɨyari taheyemekɨ, 'aixɨa te'utiyuatɨ hepaɨtsitana, tateta mayeneikakɨ teketahekɨatani hetsɨana temiemetɨtɨ kemɨ'ane mɨhɨkɨ, mɨkɨ kanihɨkɨtɨni tamawari.
HEB 13:16 Mɨkɨ meta, xepɨkatehatɨtɨmaiyani 'aixɨa xemɨteyuriekakɨ xemɨteyumikwanikɨ, mawari mɨpaɨ mɨ'ane pinake Kakaɨyari.
HEB 13:17 Yaxeketenekahuni kememutiyuane mɨkɨ memɨtexe'aitɨa, xewa'enietɨ. Mɨkɨ mepi'ɨwiya xe'iyari mɨpaɨ metemaitɨ, yɨhɨritɨarika hepaɨtsita memɨta'iwawiyarienikɨ. Mɨpaɨ xeketeniwa'enieka, mɨkɨ mɨpaɨ memɨte'uximayakakɨ meyutemamawietɨ, me'uti'aiwatɨ memɨkayɨakakɨ, mexɨka xewahiweritɨaka, xeme matsi xepɨkaparewiyani.
HEB 13:18 Tahetsiemieme xekeneyunenewieka, tame mɨpaɨ tepɨtetamate, ta'iyari 'aixɨa pɨ'ane 'atsipɨkahaine, naimekɨ temɨtawaɨriyakɨ 'aixɨa 'anemekɨ temeu'uwanikɨ.
HEB 13:19 Nepɨxetuika mɨpaɨ xemɨteyuriekakɨ matsi yemekɨ, kwitɨwa xemɨpitɨarienikɨ tahɨxie temutinenierekɨ.
HEB 13:20 Kemɨ'ane Kakaɨyaritɨtɨ mɨtatsipitɨa ta'iyaritsie temɨka'uximatɨariekakɨ, kemɨ'ane mɨkite watsata menayewitɨ muxatsi wahɨweme mɨmariwe Tati'aitɨwame Ketsutsi, mɨkɨ 'itatseiriyaka tɨratu yuheyemekɨ 'amuwe mɨkɨ xuriyayakɨ,
HEB 13:21 mɨkɨ xɨka xe'aye'atɨani kemɨtinake yaxemɨteyuriekakɨ naimekɨ 'aixɨa xeteyurietɨ, mɨkɨ xɨka xe'uyuitɨani xeminaki'aritɨanikɨ kemɨtixexeiya, Ketsutsi Kɨritsitu xeparewiekaku. Mɨkɨ hepaɨtsita 'aixɨa ketikuxaxatsiwani yuheyemekɨ. Mɨpaɨ xeikɨa kani'aneni.
HEB 13:22 Ne'iwama nepɨxetuika, xekeneuyuwaɨriya xemi'enienikɨ neniuki kenemɨtixetuika, yapaɨmemekɨ nepɨtixe'uta'utɨiri.
HEB 13:23 Mɨpaɨ xeketenemaika, ta'iwa Timuteu 'anutahɨiyaka muxɨnariekɨ. Kwitɨwa xɨka nuani tepɨxexeiyayu tanaitɨ.
HEB 13:24 Xekeniwawaɨritɨaka yunaime memɨtexe'aitɨa, yunaime Kakaɨyari teɨterimama. 'Itariya kwieyaritsie miemete mepɨxewaɨritɨa.
HEB 13:25 'Aixɨa ketiuka'iyarini yunaime xehetsiemieme. Mɨpaɨ xeikɨa.
JAM 1:1 Ne, Tsatiyaku, Kakaɨyari ti'uximayatsiriwame meta Ti'aitame Ketsutsi Kɨritsitu hetsiemieme. Nuiwarite tamamata heimana huta xemeutayeixɨa naitsarie: Nekanixewaɨritɨaka.
JAM 1:2 Ne'iwama nemɨxenaki'erie, xekeneyutemamawieka kepauka xemɨta'inɨatsieni 'inɨari yɨkɨ mɨ'anenekɨ,
JAM 1:3 mɨpaɨ xetemaitɨ, mɨpaɨ xete'inɨatsieme yuri xɨka xete'erieka yemekɨ, mɨkɨkɨ xeyɨwawetɨ xepakɨne.
JAM 1:4 Xekeneyuwaɨriyani xete'uka'eniwatɨ mɨpaɨ xemɨtematsiɨkɨnikɨ, mɨkɨkɨ 'aixɨa mɨti'ane mɨtitixuawerekɨ, tixaɨ mɨkareuyewekakɨ.
JAM 1:5 Mexɨka xeme xewitɨ mɨtimaiwenikɨ reiyehɨaka, Kakaɨyari ke'utawawirieni, mɨkɨ katinayetuiriemɨkɨ, matsi Kakaɨyari yunaime katiniwamikwani 'aixɨa 'anekamekɨ nixeime tɨma 'axakatixeiyatɨ.
JAM 1:6 Mɨpaɨ ketitawawirieni yuri ti'erietɨ xeikɨa, tixaɨ kayu'iyaritɨatɨ, matsi kemɨ'ane muyu'iyaritɨa mɨkɨ haramara hamewarieya hepaɨ kaniuyɨneni, 'ekakɨ mukuyuitɨariwa.
JAM 1:7 Kemɨ'ane mɨpaɨ mɨ'ane mɨpaɨ pɨkatiku'eriwani kename Ti'aitame tixaɨtɨ tiyetuirieni,
JAM 1:8 huta 'iyariyari mexeiyakɨ, meu'eriene naimekɨ kemɨtiyuriene.
JAM 1:9 Ta'iwa tixaɨtɨ mɨkarexeiya waɨkawa rexeiyame keyu'erieka, mɨpaɨ ra'eriwatɨ Kakaɨyari mariweme kemɨreyeitɨani,
JAM 1:10 meta xiku tixaɨtɨ karexeiyame keyu'erieka mɨpaɨ timaitɨ. Mɨkɨ xiku tuturi 'ɨtsita mieme hepaɨ kanitayɨnarimɨkɨ.
JAM 1:11 Tau, kepauka manatineika xɨkatɨ, 'iteɨri pɨtiwatsiɨxa. Xuturiyari pɨkawiwike, witsimɨtiyuxexeiyakai putiyɨnarixɨ. Mɨpaɨta yaxeikɨa tewi mɨxiku pɨtayɨnare naimekɨ tsepa kemɨrexeiya.
JAM 1:12 'Aixɨa kani'itɨarieka kemɨ'ane tiuka'eniwatɨ mumie, mɨkɨ mɨpaɨ tita'inɨatsieme, tukari kurunayari kaniyetuiriyariemɨkɨ Kakaɨyari kemutayɨ kemɨ'ane meminaki'erie wahetsiemieme.
JAM 1:13 Xewitɨ kepauka mɨ'inɨatsiene mɨpaɨ pɨkahaineni: «Kakaɨyari kaniyɨaneni mɨnetsi'inɨatane». Kakaɨyari pɨkayɨwe 'axamɨtiyurienenikɨ, yaxeikɨata mɨkɨ tewi mita'inɨata 'axamɨtiyurienenikɨ pɨkayɨwe.
JAM 1:14 Matsi pɨta, yuxexuitɨ yɨkɨmana kemɨtiwanake 'axamemɨteyurienikɨ mepɨyɨa. Meteyukahiwe'erietɨ mepɨyuwiyanɨa mepɨyuhapaninɨa yɨkɨmana.
JAM 1:15 Mɨya meteku'eriwatɨ 'axamekateniyurieka, kepauka mɨpaɨ xeikɨa memɨteyurie, 'axamɨti'ane mɨrayu'iwaxɨkɨ mɨɨya kaniwapitɨamɨkɨ.
JAM 1:16 Ne'iwama nenaki'erima xepɨkate'irɨwiyarieka.
JAM 1:17 Naitɨ 'imikieri 'aixɨa mɨ'ane, meta naime temɨte'umikie mɨraye'axe mɨkɨ taheima kanimiemetɨni, hakewa makawe wa'ukiyari taheima miemete hekɨariwiwamete mɨwarutiwewi, mɨkɨ pɨkayupata, 'etɨriya hepaɨ, tau 'akayunirɨmekaku.
JAM 1:18 Yɨkɨmana mɨpaɨ tiuyɨhɨaweka pɨtatsi'utinuiwitɨa niuki yuri mainetsie, 'imikieri matɨari mieme hepaɨ witsitemɨtexeiyarienikɨ, meta 'ikwaxi 'aixɨa mɨ'anene mɨkaxuawitɨanikɨ.
JAM 1:19 'Ipaɨ xeketenemaika ne'iwama nenaki'erima: Yunaitɨ teɨteri mekeyumexɨitɨaka memɨ'enananikɨ, 'emeketeheutewini memɨtiniunikɨ meta memɨyeha'anikɨ,
JAM 1:20 tewi ha'atɨ yapɨkatiyuriene heitseriemekɨ, Kakaɨyari kemɨtinake.
JAM 1:21 'Ayumieme, xekenewiwi naime tita mɨkati'itiya meta tita 'axamɨti'ane, naitsarie manayuhayewa, xemɨyɨwawenikɨ Kakaɨyari niukieya xehetsie muka'iteɨtsie xemɨtanaki'erienikɨ tixaɨtɨ xekatehɨkɨtɨtɨ, mɨkɨ kaniyɨweni xe'iyari mɨtawikweitsitɨani.
JAM 1:22 Niuki xe'enietɨ xeikɨa xepɨkayuwaɨriyani, mɨpaɨ xeyɨatɨ kapa xeteyu'irɨwiyakɨ yɨkɨmana. Mɨpaɨ xeketeneyurieka kemaine.
JAM 1:23 Kemɨ'ane niuki 'enietɨ xeikɨa mɨyɨane, mɨpaɨ yakatikamietɨ, tewi xikɨritsie muyuxeiyane hepaɨ kaniyɨanemɨkɨ kemɨraka'eriekai,
JAM 1:24 yu'ixɨarieme kaniyemieni, meta yapauka pɨratɨmaiya kemɨtiyuxexeiyakai.
JAM 1:25 Matsi kemɨ'ane yemekɨ mi'enieni 'aitsika mɨraye'axe mɨtatsixɨnatsie, mɨkɨtsie mɨ'ayumieme, kemɨti'ena mɨkaratɨtɨmaiya, matsi mɨpaɨ tiyurienetɨ, mɨkɨ 'aixɨa kani'itɨariekamɨkɨ yatikamietɨ.
JAM 1:26 Tewi xɨka rayexeiyame yu'erieka, matsi xɨka yuneni kapirenutɨaka, mɨkɨ matsi yɨkɨmana katiniyu'itaiyaneni, yakɨ xeikɨa katinayexeiyani.
JAM 1:27 Matsi xɨka rayexeiyani 'itiyatɨ meta hetsiena karahɨiwakaku Kakaɨyari mɨta'ukiyari kemɨtixeiya, mɨpaɨ pɨta kaniyɨanemɨkɨ: nutuite kaniwanenimayakamɨkɨ meta wiuraxi kememɨte'uximatɨarie kaniwaparewiekamɨkɨ, meta yukweriwayurietɨ tita kwiepa mɨtimieme hepaɨtsita.
JAM 2:1 Ne'iwama nemɨxenaki'erie, Ketsutsi Kɨritsitu Tati'aitɨwame witsimɨ'anetsie yuri kexemɨte'erie, xeketeneuhayewa hipame xeikɨa teɨteri 'aixɨa xetewaxeiyatɨ.
JAM 2:2 'Ipaɨtɨtɨ 'ikɨ katini'inɨarini xɨka tewi mana heutahani xemɨyutixexeɨriwatsie huru hanirayari heumanatɨkaitɨ yumamatsie meta witsirekemaritɨ, xɨkarita muwa heutahani xewitɨ 'aixɨa karekemaritɨ heutsanitɨ.
JAM 2:3 Xɨka witsimɨrekemari 'aixɨa xete'uxeiya, mɨpaɨ xete'ikɨhɨawetɨ: «'Ekɨ 'enapaitɨ kenayexi 'aixɨa mɨ'anetsie», xɨkata tewi 'aixɨa mɨkarekemari mɨpaɨ xetekɨhɨaweni: «'Ekɨ mana paitɨ keneuweni» yatɨni «Mana keneukani kwiepa»,
JAM 2:4 ¿kari xeme hipame xeikɨa 'aixɨa xepɨtewaxeiya, hipameta pɨkatixaɨ, peru 'axaxeteyɨkɨhɨawetɨ?
JAM 2:5 Xekeneu'enana ne'iwama nenaki'erima: ¿Kakaɨyari tamɨ katiwaranuyexei tixaɨ memɨkatehexeiya 'ena kwiepa, mɨkɨ matsi metehexeiyakame mɨwarayeitɨanikɨ yuri mete'erietɨ, para wahetsie mɨtinakenikɨ mɨkɨ tiwa'aitɨwame mayanikɨ, kemutayɨ kemɨ'ane mɨkɨ meminaki'erie wahetsiemieme?
JAM 2:6 Xeme pɨta tixaɨ mɨkarexeiya xekaniutixani'erieni. ¿Mɨkɨ xikutsixi mekatehɨkɨ memɨtexe'uxitɨa, meta mɨkɨ mekatehɨkɨ memɨxe'ehapana 'itsɨkate wahɨxie?
JAM 2:7 ¿Tamɨtsɨ mɨkɨ mekatehɨkɨ 'axamemutiyuane Ketsutsi hepaɨtsita xeme hetsiena xemɨtewiya?
JAM 2:8 'Aixɨa xekateniyurieka xɨka 'aku yuheyemekɨ 'aitsika xe'aye'atɨaka, 'utɨarika kemaine: «'Ahepaɨ tewi kenenaki'erieka kepemɨti'anaki'erie 'ekɨ»,
JAM 2:9 matsi xɨka teɨteri hipame xeikɨa 'aixɨa xetewaxeiyani, 'axaxekateniyurieka meta xehetsie pɨrahɨiwani, 'inɨari niukiyari pɨxehekɨata kexemɨte'ititsana.
JAM 2:10 Kemɨ'ane naimetsie yamɨtikamie 'inɨari niukiyari kemaine, matsi xɨka xeiniukiyaritsie yakatikayani, naime hetsie 'axakatiniyurimɨkɨ.
JAM 2:11 Matsi kemɨ'ane mɨpaɨ maine: «Xeime 'ɨyaya pepɨkakumaɨwani», mɨpaɨta kaniutayɨni: «Pepɨkati'amemiwani». Xɨka tsepa xeime 'ɨyaya pemɨka'ukumayɨa, matsi xɨka peti'amemiwani, 'inɨari niukiyari pekaneutitsanaxɨani.
JAM 2:12 Kexemutiyuane, kexemɨteyurie, mɨpaɨ xeketenemaika, 'itsɨkame kanixeta'iwawiyamɨkɨ 'inɨari niukiyari mɨtatsixɨna kemaine.
JAM 2:13 Kemɨ'ane mɨkatiyukanenimaya, 'itsɨkame ka'inenimayatɨ pitahɨawe. Matsi kemɨ'ane mɨtiyukanenimaya, Kakaɨyari 'inenimayatɨ kanitahɨawimɨkɨ.
JAM 2:14 Ne'iwama nemɨxenaki'erie, ¿tewi xɨka yuri ti'eriekame yuxatani, matsi tixaɨtɨ 'atsikatiyurienetɨ? ¿Keri tiyɨweni mɨtawikweitsitɨarienikɨ yuri ti'erietɨ xeikɨa?
JAM 2:15 Xɨka ta'iwa 'uki meta 'uka yu'ixuriki kahexeiyani mɨranakatɨnikɨ, meta 'ikwaite xɨka reuyehɨaka mɨrexeiyanikɨ,
JAM 2:16 xɨka xewitɨ xeme mɨpaɨ tikɨhɨaweni: «'Aixɨa pekereumieni, 'aixɨa pereyukemaritɨatɨ, meta ketineukwaka 'utahuxame», matsi xɨka katimini tita mɨreuyehɨwa waiyarieya hetsie timieme, mɨkɨ ketsɨkuta 'uyɨni, yakɨ xeikɨa mɨrehɨawekɨ.
JAM 2:17 Mɨpaɨ yaxeikɨata xɨka yuhetsie yuri ti'erieka, peru xɨka tixaɨtɨ 'atsikatiyurieneni, yuri kemɨti'erie kanimɨkini.
JAM 2:18 Matsi xewitɨ xɨari mɨpaɨ kanitayɨmɨkɨ: «'Ekɨ yuri pekatini'erieka, neta yanekatiniyurieneni». Kamɨtsɨ kene'ahekɨata yuri kepemɨti'erie tixaɨtɨ 'atsipekatiyurienetɨ, neta nekamenixeitsitɨamɨkɨ keyuri nemɨti'erie 'aixɨa netiyurienetɨ.
JAM 2:19 ¿'Ekɨ yuri peti'erie Kakaɨyari yuxewitɨ xeikɨa muyeika? 'Aixɨa pepaine. Yaxeikɨata kakaɨyarixi yuri mepɨte'erie, 'ayumieme mepuyɨyɨakatɨka marikakɨ.
JAM 2:20 Kari pemɨka'akɨhɨawe pepɨhɨkɨ. ¿Tietɨtsɨ pe'awaɨriyani mɨpaɨ pemɨretimanikɨ, tewi 'atsimɨkayɨwekɨ xɨka yuri ti'erieka tixaɨ 'atsikatiyurienetɨ?
JAM 2:21 Merikɨte tapaapa 'Apɨrahami heitserie pupitɨarie yamɨtiuyurikɨ kepauka yuniwe 'Itsahaki mɨyetua mawari taiyariyaritsie.
JAM 2:22 Mɨpaɨ pekatinetimaniri, yuri ti'erietɨ mɨkɨ, meta kemɨtiyurienekai 'axeikɨa, yuri kemɨti'eriekai, yuheyemekɨ hekɨakamekɨ yapɨtiuyuri.
JAM 2:23 Mɨpaɨ tiuyurieku 'utɨarika kanaye'ani mɨpaɨ manuyɨne: «'Apɨrahami Kakaɨyari yuri katiniuta'eririeni, 'ayumieme heitserie hexeiyame kani'eriwakaitɨni». Kakaɨyari hamikuya katiniuterɨwarieni.
JAM 2:24 Mɨpaɨ xɨari xepɨtemate, yatiyurienetɨ tewi xeikɨa heitserie pɨpitɨarieni, yuri ti'erietɨ xeikɨa pɨkatixaɨ.
JAM 2:25 Yaxeikɨata pɨtiuyuri Xahawi 'uka tuminikɨ muyuwitɨnɨa, tixaɨtɨ mɨtiuyurikɨ heitserie kaniupitɨarieni, kepauka kuyaxi mɨwarutanaki'eri 'awie nenieremete, kepauka xaɨtsie mɨwarenɨ'a xeime huyeyari 'utɨa.
JAM 2:26 Mɨpaɨ rawaiyari ka'uye'iyaritɨ kanimɨkini. Yaxeikɨata yuri ti'erietɨ, matsi yakatiyurienetɨ, kanimɨkini yuri kemɨti'erie.
JAM 3:1 Ne'iwama nemɨxenaki'erie, te'ɨkitamete xepɨka'akɨne yunaitɨ, hipatɨ xeikɨa, mɨpaɨ xetemaitɨ, tame temɨte'ɨkitamete tahetsie matsi waɨkawa pɨrahɨiwani.
JAM 3:2 Tanaitɨ waɨkawamekɨ tepekaxɨrɨwe. Xɨka xewitɨ niukitsie kahekawautseni, mɨkɨ tewi kanaye'aweni, yaxeikɨata kaniyɨwemɨkɨ yuwaiyaritsie naime mɨyupirenutɨanikɨ.
JAM 3:3 Kepauka kawayutsixi pirenu temɨwarutakeitsitɨwa memɨtatsi'anu'enienikɨ, mɨkɨkɨ wawaiyari naime tepukuhana.
JAM 3:4 Xekeneuxeiya kanuwa 'amɨpapa. Tsepa memu'eketɨka 'eka mɨtɨrɨkaɨyekɨ, ta'aurie mepaxɨriwa titunitsitɨwame 'etsimɨyewakɨ, kemɨtiyuwaɨriya ta'aurie mehɨanikɨ 'inɨ'awame.
JAM 3:5 Yaxeikɨata tawaiyaritsie taneni pɨyuxewi 'etsipetɨ, matsi mariweme mɨtiuyurieni kaniyɨweni. Xɨka makukɨyexiyatsie 'utinaini tai 'etsipemekɨ, mɨkɨ kaniyɨweni 'ahakuyeukame mutataiya.
JAM 3:6 Yaxeikɨata taneni tai hepaɨ kani'aneni, kwiepa timieme tikuxatatɨ 'apɨyeka tawaiyaritsie, tita mɨkatiheitserie naime tixatatɨ, tawaiyari naime kanitsewiximaka, pɨtatsixɨrimɨtsitɨa tatukari naime, xatsi taiyariyaritsie mieme panunetɨarie mɨtakakɨ.
JAM 3:7 Tewitɨtɨ yunaime katiniwamaxiutɨaweni, yeutari memayu'eririya, wikixi, kuuterixi, haramaratsie kiekatari, yunaitɨ mekanimaxiutsiewaweni,
JAM 3:8 matsi tewi pɨkayɨwe yuneni mɨmaxiutani. 'Axakaniutaineni xeikɨa 'uaye mɨmɨyakɨ kanihɨneni.
JAM 3:9 Tanenikɨ 'aixɨa teputiyuane Ti'aitame mɨta'ukiyari hepaɨtsita, meta tanenikɨ teɨteri tepɨwaruxaxata 'axamemɨ'itɨarienikɨ, tsepa Kakaɨyari hepaɨ me'anenetɨ memutiwewiya.
JAM 3:10 Xeitetayarita pɨwayeneika niuki 'aixɨa mɨ'itɨarienikɨ meta 'axamɨ'itɨarienikɨ. Ne'iwama nemɨxenaki'erie, mɨpaɨ pɨkareuyewetse.
JAM 3:11 ¿Kamɨtsɨ kuta tiyɨwe haixa maneikani 'axeikɨa, haa 'akakatɨ meta hatsiwitɨ?
JAM 3:12 Ne'iwama nemɨxenaki'erie, ¿xapatsie ketiyɨwe huriwa takariyari mɨkaxuawere, meta kaxie nanayaritsie ketiyɨwe xapa takari mɨkaxuawere? Yaxeikɨata haixa ha'utsiwitɨ maneikatsie haa 'akakatɨ maneni pɨkayɨwe.
JAM 3:13 Kemɨ'ane xeme mɨtimaiwe, xɨka waɨkawa timaika, 'aixɨa 'anemekɨ tiyurienetɨ keyuhekɨatani, tixaɨtɨ karayuyeitɨatɨ, kemɨreuyewetse mɨpaɨ mɨtiyurienenikɨ timaiwetɨ.
JAM 3:14 Mexɨka hatsiwimekɨ xeyu'uxiwe'erietɨ xeyɨaka meta yu'iyaritsie xehayuye'unietɨ, xeketeneuhayewa xete'itawatɨ meta xeheye'unietɨ tita yuri mɨraine.
JAM 3:15 Mɨkɨ mɨtimaiwenikɨ pɨkahɨkɨ taheima makaneika, kwiepa pɨta kanimiemetɨni tewi kemɨtimaiwe meta kakaɨyarixi 'axamemɨ'anene wahetsie mayeneika.
JAM 3:16 Hakewa memeyu'uxiwe'erie meta mehayuye'unietɨ memexuawe, manata mekaniyuxamurieka meta 'axamɨti'anekɨ xeikɨa mepɨyɨa.
JAM 3:17 Matsi taheima miemekɨ mɨtimaiwenikɨ mɨ'ayumieme naimekɨ kani'itiyaka, meta 'aixɨa pɨtixeiyarie, pɨtiyukanaki'erie, pɨtiyu'aitɨarinɨa, yuheyemekɨ pɨtiyukanenimaya, 'aixɨa pɨtiyuriene, 'uximayatsika kemɨreuyewetse, huta 'iyariyari pɨkahexeiya, meta yakɨ xeikɨa pɨkayɨane.
JAM 3:18 Mɨkɨ teɨteri 'aixɨa memɨtewaxeiyatsitɨa, yu'uximayatsikakɨ kememɨte'u'etsa yu'iyaritsie kayuwatɨ mehexeiyatɨ, kemɨtitixuawere mɨkɨkɨ heitserie mekanipitɨariekuni.
JAM 4:1 ¿Hakewa kuyaxa peyukutsutsutɨwa meta 'imieri mɨkɨ hakewa pemieme? Kari yuhetsiemieme xeikɨa xepɨyɨa, 'ayumieme mɨpaɨ xepɨteyurie, mɨkɨ naki'eriya mɨyumienekɨ xewaiyaritsie.
JAM 4:2 Tixaɨtɨ xepɨtehiwe'erie peru xepɨka'ikaxeiya. 'Ayumieme xepɨteyumemiwa, meta xepɨyumexɨitɨa hipame xewara'iwakutɨ, xepɨkayɨwawe tixaɨtɨ xetehexeiyatɨ xemakɨnekɨ, 'ayumieme xepɨyukwitɨwe xepɨyukuyatatɨwe. Xepɨkatehexeiya xemɨkateku'iwawakɨ.
JAM 4:3 Meta kepauka memɨteku'iwawa, tixaɨtɨ mepɨkateyetuiriyarɨwa, 'axa'anemekɨ memɨtewawakɨ, yuhetsiemieme xenaki'akutɨ xeikɨa xemɨyɨakɨ.
JAM 4:4 Neuxei teɨteri hipame wa'ɨitama xemɨwakumaɨwa. ¿Kari mɨpaɨ xepɨkatemate, xɨka tinaki'erieka tita kwiepa mɨtimieme, Kakaɨyari kani'uxiwe'eriekamɨkɨ? 'Ayumieme kemɨ'ane mɨyuwaɨriya tita kwiepa mɨtimieme mɨtinaki'eriekakɨ, mɨkɨ Kakaɨyari 'aye'unietɨ payuyeitɨwa.
JAM 4:5 ¿Nutsutɨ 'utɨarika yakɨ haineme xepɨ'erie, Kakaɨyari 'ɨtetsatɨ kaninaki'erieka mɨkɨ 'iyari mɨtatsiyetuiri tataɨta mɨyekanikɨ?
JAM 4:6 Peru mɨkɨ waɨkawamekɨ matsi 'aixɨa tiuka'iyaritɨ pɨtatsiparewie. 'Ayumieme 'utɨarikaya mɨpaɨ kanaineni: «Kakaɨyari kaniwaraye'unieka mɨkɨ memɨyuti'ɨre, matsi tixaɨtɨ memɨkatehayuyeitɨa 'aixɨa katiniuka'iyarini wahetsiemieme».
JAM 4:7 'Ayumieme xekeneyuwaɨriyani Kakaɨyari mɨtixe'aitɨakakɨ. Xekenaye'unieka kauyumarie, mɨkɨ pɨyuta'una xehetsɨa.
JAM 4:8 Kakaɨyari hetsɨa 'ahurawa xekeneukɨni, mɨkɨta xehetsɨa 'ahurawa payani. 'Axateyuruwamete yumamatetsie xekeneuyu'itiexɨa. Xekeneyu'itieka yu'iyaritsie huta 'iyariyari xemexeiyatɨka.
JAM 4:9 Mɨpaɨ xeketenemaika kexemɨte'uximatɨarie, xekeneutitsuanani meta xekeneyuhiwerieka. Xenanai hiwerika ke'ayani, meta xetemawierika nutuixiya kehɨkɨtɨni.
JAM 4:10 Ti'aitame hɨxie, tixaɨtɨ xekatehɨkɨtɨtɨ xekenayuyeitɨaka, mɨkɨ mamariwawemete pɨxe'ayeitɨani.
JAM 4:11 Ne'iwama, hipame xepɨkawaniukimaka. Kemɨ'ane yu'iwa hetsie mɨtiuhɨpa, mɨpaɨ tiyurienetɨ piniukima 'inɨari niukiyari, meta 'inɨari niukiyari pɨ'uxiwe'erieka, merikɨ xɨka 'inɨari niukiyaritsie petiuhɨpani, kemɨ'ane 'inɨari niukiyaritsie yamɨkatikamie hepaɨ pepɨyɨane, 'itsɨkame hepaɨ xeikɨa pepɨyɨane.
JAM 4:12 Xewitɨ tawarita pɨmawe 'inɨari niukiyari munetɨa, meta kemɨ'ane mɨ'itsɨkame, mɨkɨ kaniyɨweni mɨtatsitawikweitsitɨanikɨ meta mɨtiyuka'unanikɨ. ¿Ketita 'ekɨ peti'a'erie 'ahepaɨ tewi hetsie pemɨtiuhɨpanikɨ?
JAM 4:13 Neuxei hikɨ xeme xekeneu'enana mɨpaɨ xemutiyuane: «Hikɨri yatɨ 'uxa'a tepɨyehu mɨkɨ kiekaritsie yanutsu muwa tepe'uwani, xeiwiyari tepeyurieni, mana tepeyuharerutani meta tepɨtehe'iwatɨweni».
JAM 4:14 Xeme 'atsixepɨkatemate 'uxa'a kemɨtiyɨni. ¿Tita kuta yutukari xete'erie? 'Aɨxi xeikɨa xekanihɨkɨtɨni. Mɨkɨ 'epɨkareutere xeiyarietɨ, kwitɨwa kaniukumamawereni.
JAM 4:15 Matsi peuyewetse mɨpaɨ pɨta xemutiyuaneni: «Xɨka Ti'aitame mɨpaɨ tinakeni, tekaniu'uwakuni meta mɨpaɨ tekateniyuriekakuni».
JAM 4:16 Hikɨ matsi xepɨtekuxata xeikɨa kexemɨte'uyuti'ɨre. Naime mɨpaɨ kexemutiyuane yuhepaɨtsita, 'axaxepɨteyurie.
JAM 4:17 Kemɨ'ane yamɨkatiyuriene timaitɨtɨtɨ, mɨkɨ 'axakatiniyurieneni.
JAM 5:1 Hikɨtsɨ xekeneu'enana, xeme xikutsixi: xekeneutitsuanani xekeneutihiwani mɨpaɨ xeteha'eriwatɨ 'uximatɨarika mɨxe'axirɨmekɨ.
JAM 5:2 Ketita xemɨtehexeiya katiniutipɨne, xe'ixurikite tepaxi mekaniutikɨme.
JAM 5:3 Xehuru meta xepɨrata tepɨayari pɨtixaxainiri. Xainimeyari pɨtihekɨata xehepaɨtsita, tai hepaɨ xewaiyari kanitixɨtsitɨamɨkɨ. Tsepa waɨkawa xemɨte'ukuxeɨri xemɨtehexeiyanikɨ, mɨkɨ kanixeka'unamɨkɨ tukari tapareyu.
JAM 5:4 Xekeniwaru'eni memutihiwa xehepaɨtsita, xewaxata mete'uta'uximayataku xemɨkatewarupitɨa. Te'uximayatamete wahiwari Ti'aitame Naimekɨmɨtɨrɨkaɨye kaniu'enieni.
JAM 5:5 Xemeri xete'ukahiwe'erietɨ xeikɨa kwiepa xepu'uwakai, kemɨxetinake xeikɨa xepɨteyuriekai. Xepɨyuwaiyatɨakai xeikɨa xemɨkwi'iwakɨ.
JAM 5:6 Xepɨwaxanetakai meta xepɨwakwikai kemɨ'ane heitseriemekɨ memu'uwakai, mɨkɨ mepɨkayɨwawekai yuhetsie memɨtanuanikɨ.
JAM 5:7 'Ayumieme ne'iwama, xete'uka'eniwatɨ xepɨkawaɨripietɨkani, mexi Ti'aitame xetakwewieka. Kamɨ kwiepa muka'etsa xekeneuxeiya, mɨkɨ 'ikwaxi takwewietɨ pɨkawaɨripie kepaukake mɨtikaxuawere, kawaɨripietɨ pɨta'ikwewa kepauka mukawiwiyetsie.
JAM 5:8 Xemeta yaxeikɨa xekeneti'uka xeta'ikwewatɨ, xepɨkawaɨripietɨkani Ti'aitame munuanitsie kanaye'aximeniri.
JAM 5:9 Neuxei ne'iwama, niuki xepɨkaxɨatɨaka yu'iwama wahepaɨtsita, kapa xe'anutaxɨriyanikɨ. Mɨkɨ 'itsɨkame kitenie kaniutiweniri.
JAM 5:10 Ne'iwama Kakaɨyari niukametemama xekeniwa'ɨkeni, mete'uka'eniwatɨ meta mekawaɨripietɨ, Ti'aitame hetsiemieme kememɨtekuxatakai.
JAM 5:11 Yurikɨ 'aixɨa mepɨ'itɨarie kemɨ'ane mete'uka'eniwatɨ memu'uwa. Xepu'enana Kuwi kemɨtiuka'eniwakai, mɨpaɨta xepɨtehetima 'arike Ti'aitame kemɨtiyetuiri, Ti'aitame kwini mieme mɨtiyukanenimaya meta mɨreuyehɨwirieni kanihɨkɨtɨni.
JAM 5:12 Tsepa naimekɨ ne'iwama, xepɨkayɨhɨritɨaka, taheima miemekɨ, kwiepa miemekɨ, tsepa kemɨtititakɨ xexatatɨ. Xɨka xeyuwaɨriyani, «huu» xekeneutiyuaneni xeikɨa. Mexɨka xekayuwaɨriyani «hawaikɨ» xekeneutiyuaneni xeikɨa, kapa xehetsie tiuhɨiwatɨ 'ayanikɨ.
JAM 5:13 Xɨka xeme xewitɨ tiuka'eniwani, keyutanenewieni. Mexɨka xewitɨ yutemawieka, ke'utakwikani.
JAM 5:14 Xɨkata xeme xewitɨ tikuyeni, 'ukirawetsixi memuyutixexeɨriwa kewarutakwewieni memuyutanenewienikɨ hetsiena mieme, hatseiti meke'itawirieni Ti'aitame me'ahɨawetɨ.
JAM 5:15 Kememɨteyunenewie yuri mete'erietɨ, tikwikame 'aixɨa reu'erietɨ kanayeimɨkɨ, meta Ti'aitame kanenukuketɨamɨkɨ. Yaxeikɨata, xɨka 'axatiuyurieni, mɨkɨkɨ pɨreuyehɨwiyarieni.
JAM 5:16 'Ayumieme hipatɨ mexe'eniekaku xekeneyuhekɨatani xɨka 'axaxete'uyurieni, xemɨyunenewiekakɨ yuxexuitɨ yuhetsiemieme yunaitɨ, mɨpaɨ 'aixɨa xeteheu'erietɨ xemakɨnekɨ. Kemɨ'ane heitseriemekɨ yamɨtikamie, mɨkɨ nenewierieya waɨkawa katinikemaka meta kani'enierieka.
JAM 5:17 'Eriyaxi tahepaɨ tewi hɨkɨtɨtɨ. Matsi kepauka, waɨkawamekɨ yuwaɨriyatɨ puyutanenewi mɨkakawiyekɨ, meta 'ana kwiepa pɨka'ukawiyexɨ haika wiyari heimana 'ataxewi metseri.
JAM 5:18 Tawarita 'uyutanenewieku 'ana kaniukawiye, meta kwiepa 'ikwaxite katiniutixuawere.
JAM 5:19 Ne'iwama nemɨxenaki'erie, xɨka xewitɨ xeme niuki yuri maine hetsie tiwiyatɨ tiuhayewa, meta xewitɨ xɨka hutarieka 'i'atɨani,
JAM 5:20 mɨpaɨ xeketenemaika, kemɨ'ane hutarieka mi'atɨa 'axatiyuruwame kemɨtiuhayewakai, mɨkɨ tukarieya kaniutawikweitsitɨani mɨkamɨnikɨ, meta waɨkawamekɨ 'axakemɨtiuyuriekai hetsiena kaniutanuani.
1PE 1:1 Ne Pekuru nɨ'ariekame, Ketsutsi Kɨritsitu hetsɨa mieme. Nekanixewaɨritɨaka xeme xemanayexeiyarie xemeukuyaxixɨa teɨteri watsata, punitutari, karatsiyatari, kaparutsiyatari, 'atsiyatari meta witiniyatari watsata xemetitei hikɨ.
1PE 1:2 Xekananayexeiyarieni Kakaɨyari mɨta'ukiyari kemɨtimaikai meripaitɨ, 'Iyarieya xepatakaku xekaniyɨaka, Ketsutsi Kɨritsitu mumieriekɨ, xemeta xekaniu'itiyani xuriyayakɨ, xemɨyuwaɨriyanikɨ yaxemɨtekahunikɨ kemaine: Kwinimieme 'aixɨa ketiuka'iyarini xehetsiemieme, kexepitɨaka yu'iyaritsie xemɨka'uximatɨariekakɨ.
1PE 1:3 'Aixɨa ketikuxaxatsiwani Kakaɨyari, Tati'aitɨwame Ketsutsi Kɨritsitu mu'ukiyarieya, waɨkawamekɨ kemɨtiuyukanenimaya, hutarieka kataniutinuiwitɨani Ketsutsi Kɨritsitu mɨkite watsata manukuketɨariekɨ, tukari temexeiyanikɨ mexiteta'ikwewa yuri tete'erietɨ, yuniwema katanayeitɨani,
1PE 1:4 'ayumieme tahetsie katininakimɨkɨ tita 'asimɨkatiyɨwe, mɨkatipɨniwe meta mɨkatiyeiwe, tita muyuawitsie mɨre'ɨwiyarie xehetsiemieme.
1PE 1:5 Xemetsɨ yuri xete'erietɨ xekani'ɨwiyarieka Kakaɨyari tɨrɨkariyayakɨ. 'Ayumieme xekanitawikweitsitɨariekuni, kemɨtimatsiɨkɨni xewikweitsitɨatɨ tukari 'aye'ayu kepauka mɨtapare.
1PE 1:6 Mɨpaɨ xetemaitɨ xekaniyutemamawieka, tsepanetɨ hikɨ 'ayewaɨkawamekɨ xemɨte'ukakukwine xe'inɨatsietɨwetɨ yapaɨmexɨa.
1PE 1:7 Huru, tsepanetɨ mɨxɨwe, taikɨ kwaxiyarietɨ waɨkawa kanixawatuni. Xemeta yuri kexemɨte'erie mɨpaɨ pɨ'ane, huru kemɨkaraye'axe matsi mɨkɨ waɨkawa katinaye'aka, mɨpaɨ xete'inɨatsietɨ matsi xeyɨwawetɨ xekanakɨnikuni, Kakaɨyari 'aixɨa pɨtayɨni xehepaɨtsita, meta witsipɨtixexeiya kepauka Ketsutsi Kɨritsitu matsiɨkɨtɨ mayani.
1PE 1:8 Xeme xepinaki'erie tsepa hatsuaku xemɨka'ixeiyawawe, tsepanetɨ hikɨ xemɨka'ixeiya, hetsiena yuri xemɨte'erie, 'ayumieme xepɨyutemamawie 'anayuhayewakamekɨ meta witsi'aneme kexemɨtepitɨarie,
1PE 1:9 'ayumieme yuri xekateni'erieka, mɨpaɨ xe'itɨarietɨ xekaniutawikwetsitɨarieni.
1PE 1:10 Kakaɨyari niukametemama, mɨkɨ wikweitsitɨarika hepaɨtsita mepɨte'utiwau meyukweriwayurietɨ kepauka memɨtekuxatakai kexemɨtemikienikekai hepaɨtsita.
1PE 1:11 Mepɨtewautɨwekai kepauka mɨxatakai, kemɨ'ane tukari mɨhekɨatakai Kɨritsitu 'Iyarieya wahetsie mɨtiwiyakai, yakatiyɨwekaku 'akuxi 'Iyari pɨtihekɨatakai Kɨritsitu kemɨtikwinekekai, 'arike witsi'anetɨ kemɨrayanikekai.
1PE 1:12 Mɨkɨri mɨpaɨ mepɨte'u'ɨkitɨarie, yuhetsiemieme mɨpaɨ mepɨkayɨakai kememɨtehɨritɨariekai, tame pɨta tahetsiemieme mepɨyɨakai mɨkɨ hepaɨtsita. Xemetsɨ hikɨ wikweitsitɨarika hepaɨtsita xepɨte'utahɨawarie wahepaɨ, texaxatamete yametenixekuxaxatɨwakaitɨni, 'Iyari Mɨtiyupata hetsie metewiyatɨ taheima meyenɨ'arie. Kakaɨyari niuki tuayametemama mɨpaɨ mepɨtemaikakeyu kexemɨte'utahɨawarie.
1PE 1:13 'Ayumieme xekeneyuha'aritɨaka yu'iyaritsie 'aixɨa 'anemekɨ xeteku'eriwatɨ, xeketeneyu'aitɨaka, naimekɨ xeta'ikwewatɨ 'aixɨa kexemɨ'itɨarieni kepauka Ketsutsi Kɨritsitu matsiɨkɨtɨ mayani.
1PE 1:14 Tɨɨri yamemɨtekahu wahepaɨ xeyɨatɨ, meripai hepaɨ xepɨkateyumaika, kexemɨteyukahiwe'eriekai 'atsixekatemaitɨ 'ana.
1PE 1:15 Kemɨ'ane mɨxe'uta'ini kanipatsieka, 'ayumieme xemeta mɨkɨ hepaɨ xe'anenetɨ xekenakɨni, hetsiena mieme xekenepatsieka naimetsie kexemɨte'u'uwa,
1PE 1:16 mɨpaɨ mɨre'uxakɨ: «Xeme xekenepatsieka nehetsiemieme, ne nemupatsiekɨ».
1PE 1:17 Mɨkɨ yɨkɨ katiwaxeiyatɨ kaniwa'inɨatani kememɨteyurie yuxexuitɨ, mɨya mɨ'ane xɨka xe'utahɨawe yu'ukiyaritɨme, xe'eyemakatɨ 'aixɨa xete'ixeiyatɨ xekeneyɨaka mexi'akuxi 'ena xe'u'uwa
1PE 1:18 mɨpaɨ xetemaitɨ, tita mɨtipɨniwekɨ pɨratakɨ, huru hepaɨ, mɨkɨkɨ xepɨka'unanaiya kepauka xemuxɨnarie 'uxa'atɨni warie yakɨ xeikɨa xemɨka'u'uwanikɨ, xetutsima kememɨtexe'ɨkitɨakai,
1PE 1:19 xepuxɨnarie Kɨritsitu xuriyayakɨ kwini mieme matsi mɨraye'axekɨ, mɨkɨ mawari hepaɨ muxa nunutsi hepaɨ kaniumierieni, hetsiena karahɨiwakaku, 'aixɨa 'anetɨ mawari mayanikɨ.
1PE 1:20 Kwie kanetɨariewekaku 'akuxi, Kakaɨyari yakatinimaikaitɨni kemɨtiyurienikekai mɨkɨ. Tukari 'aye'aximekaku, xeiyarietɨ kanayani xehetsiemieme.
1PE 1:21 Yuri xepɨte'erie Kakaɨyari Kɨritsitu hetsie yatixepitɨakaku, xeme xehetsiemieme, Kakaɨyari kanenukuketɨani mɨkite watsata, witsi'aneme kanayeitɨani yuri xemɨte'eriekakɨ, meta kexemɨteta'ikwewani.
1PE 1:22 Xekaniyu'itirieni yu'iyari, tita yuri mɨrainetsie yaxetekahutɨ 'Iyarieya xeparewiekaku, 'ayumieme yu'iwama yurikɨ xekeniwanaki'erieka, 'aixɨa 'iyarikɨ xekeneyunaki'erieka waɨkawamekɨ.
1PE 1:23 Xemetsɨ hekwamekɨ xekaniutinunuiwa, 'imɨari mɨpɨniwe hetsie xepɨka'utinexɨa. Mɨkapɨniwetsie pɨta xeputinexɨa, Kakaɨyari niukieya mayeniere yatixepitɨakaku yuheyemekɨ 'amɨtiteriwe.
1PE 1:24 «Yunaitɨ teɨteri tupiriya hepaɨ mekani'aneneni, naitɨ witsikememɨ'anene tuturi 'ɨxapa mieme, tupiriya pɨtiwauke meta tuturiyari pɨkawiwike,
1PE 1:25 Perutsɨ Ti'aitame niukieya yuheyemekɨ 'apɨtiteriwe». Mɨkɨ niuki mɨxata, niuki 'aixɨa manuyɨne kanihɨkɨtɨni xemutaxatɨarie.
1PE 2:1 'Ayumieme, xeketeneuhayewa 'axaxeteyurietɨ naime meta xete'itawatɨ, yakɨxeikɨa xepɨkatekuxatani, xepɨkateyukananaimaka, hipame xepɨkawaniukimaka,
1PE 2:2 tɨɨri xike memutinunuiwaxɨ wahepaɨ pɨta xekenehiwe'erieka retsi 'iyaritsie mieme mɨkahatuiyarie. Mɨkɨkɨ xekanitiwawerikuni, xewikweitsitɨarietɨ xekanakɨnikuni,
1PE 2:3 Hikɨri xekane'inɨata, Ti'aitame 'aixɨa kemɨtiuka'iyari.
1PE 2:4 Kɨritsitu tete mayeniere kanihɨkɨtɨni, teɨteri memitixani'eri, peru Kakaɨyari kanenayexeiya. Mariwemekɨ 'aixɨa mɨtixeiyarienikɨ. Kepauka hetsɨana xemɨye'axe
1PE 2:5 xemeta tetexi kemɨtiu'uitɨariwa kii mayanikɨ yaxeikɨa xeme xe'ayenenieretɨ xepɨti'uitɨarieni kii xemakɨnekɨ 'iyaritsie mieme. Mawari wewiwamete xekenakɨni Kakaɨyari hetsiemieme xepatsietɨ, xemixatɨanikɨ mawari 'iyaritsie mieme kemɨtinake Kakaɨyari, Ketsutsi Kɨritsitu xeparewiekaku.
1PE 2:6 'Ayumieme mɨpaɨ pɨre'uxa: «Neuxei, Tsiyunitsie nekanitakeni tete manayexeiyarie tsikurita mieme, waɨkawa mariwetɨ kemɨ'ane yuri mɨti'erie hetsiena hatsuaku pɨkatiyutewinɨaka».
1PE 2:7 Kwinimieme mariwemekɨ witsixepɨte'ixeiya, xeme yuri xemɨte'erie, peru yuri memɨkate'erie wahepaɨtsita pɨta kemaine, «Kii wewiwamete tete memutixani'eri, matsi mɨkɨ tete 'itsikina mieme kanayani»,
1PE 2:8 metatsiere mɨpaɨ paine: «mɨkɨ tetetsie mepɨtiketamɨre meta tete mɨwarekaxɨrieni kanihɨkɨtɨni». Mɨkɨ mekaniutiketamɨreni niukitsie yamemɨkatekahukɨ, mɨpaɨ memɨteyurienikɨ memɨ'ayumiemetetɨkaikɨ.
1PE 2:9 Xeme pɨta xeime nuiwari xekanihɨkɨtɨni xemanayexeiyarie, Mawari wewiwamete ti'aitamete hetsɨamiemete, nuiwari xemɨpatsie, Kakaɨyari yuteɨterima mɨxe'ayeitɨa, xemɨtehekɨatanikɨ mariwemekɨ kemɨtiyuriene kemɨ'ane mɨxe'uta'ini xemɨtehayewakɨ yɨwipa xe'u'uwatɨ, mɨkɨ hekɨariyayatsie pɨta xemu'uwanikɨ mɨmariwetsie.
1PE 2:10 Meripaitɨ nuiwari xepɨkahɨkɨtɨkai, hikɨri Kakaɨyari teɨterimama xekanihɨkɨtɨni, meripaitɨ xepɨkanenimayatsiekai, hikɨri xeputinenimayatsie.
1PE 2:11 Nenaki'erima kɨkamete xekanihɨkɨtɨni ku'uwamete xekanihɨkɨtɨni, 'ayumieme mɨpaɨ nekatinixetuikani, xemɨtehayewakɨ yaxeteyurietɨ kemɨtiyukahiwe'erie waitsie tiwiyatɨ, mɨkɨ hiwe'erika ta'iyari hamatɨa kaniyukwitɨweni.
1PE 2:12 Hipame nuiwarite watsata 'aixɨa 'anemekɨ xekeneyɨaka, xɨka mɨpaɨ xeteyurieka, tsepa memɨxeniukima 'axaxemɨteyurie me'utiyuatɨ, 'aixɨa 'anemekɨ xemɨteyuriekɨ mexexeiyatɨ 'aixɨa me'utiyuatɨ Kakaɨyari hepaɨtsita mekanakɨnikuni, mɨkɨ tukari 'aye'ayu kepauka mɨwatawikweitsitɨani.
1PE 2:13 Ti'aitame hetsɨa xemɨmiemetekɨ, yaxeketenekahuni kememutiyuane 'itsɨkate heitserie memexeiya teɨteri watsata, yaxeketenekahuni kwiepa ti'aitame kemaine mɨkɨ mɨmariwekɨ.
1PE 2:14 Yaxeketenekahuni kuwexinaruritsixi kememutiyuane, kwiepa ti'aitame mɨwareyenɨ'axɨakɨ memɨwaraye'eritɨanikɨ mɨkɨ 'axamemɨteyurie, 'aixɨa memɨtewatahɨawekɨ mɨkɨ 'aixɨa memɨteyurie.
1PE 2:15 'Ipaɨ kani'aneni tita Kakaɨyari mɨtinake, xeme 'aixɨa xeteyurietɨ xemenukanakakɨ yakɨ xeikɨa kememutiyuane teɨteri 'atsimemɨkatemate.
1PE 2:16 Xekanixɨxɨnini, peru xexɨxɨnitɨ heitserie xehexeiyame 'axaxemɨteyuriekakɨ xepɨkayu'erieka, Kakaɨyari te'uximayatametemama pɨta xekanihɨkɨtɨni.
1PE 2:17 Waɨkawamekɨ 'aixɨa xeketeniwaxeiyani yuxexuime: xekeniwanaki'erieka 'iwamarixi, Kakaɨyari xekenayemakaxeni, kwiepa ti'aitame mariwemekɨ 'aixɨa xeketenexeiyani.
1PE 2:18 Te'uximayatamete, yaxeketenekahuni kememutiyuane xekutsiyarima naimekɨ xetewareuyehɨwirietɨ, 'aixɨa memɨte'u'iyari memɨka'ayu'eririya nepɨkawaxata xeikɨa, matsi memɨtsetse'ita kememutiyuane yaxeketenekahuni.
1PE 2:19 'Aixɨa pɨtikɨhɨawarɨwani xɨka hiweritɨarieka Kakaɨyari ha'eriwatɨ, xɨka tiukakukuineni heitseriemekɨ ka'itɨarietɨ.
1PE 2:20 Peru, ¿titakɨ 'aixɨa xetekɨhɨawarɨwani xɨka xete'uka'eniwani, 'axaxete'uyurieka xeikɨa xe'utiweiyani? Matsi pɨta 'aixɨa xeteyurietɨ xɨka xe'utiweiyani xete'uka'eniwani, Kakaɨyari 'aixɨa pɨtixetahɨawe.
1PE 2:21 Mɨpaɨ 'ayumieme xeputa'inierie, Kɨritsitu pɨtiukwinixɨ xehetsiemieme, 'inɨari xepitɨatɨ, xemiweiyanikɨ mɨkɨ kemɨtiyurienekai.
1PE 2:22 «Mɨkɨ 'axapɨkatiuyuri, nanaimarika tetana pɨkaxuawekai».
1PE 2:23 'Axatikɨhɨawarɨwatɨ 'axapɨkatiwarutahɨawixɨ, tikwinetɨ 'atsipɨkahainekai kename 'axawayurienikekai, matsi kaniyuyetuani kemɨ'ane heitseriemekɨ mɨwa'inɨata 'aixɨa miyurienikɨ.
1PE 2:24 Mɨkɨ yuwaiyaritsie kanititɨni tita 'axatemɨte'uyuri kɨyetsie mukawiyatsie, tame te'utixɨnarieme 'axatemɨkateyuriekakɨ 'uxa'atɨni warie, temayenenierenikɨ pɨta heitseriemekɨ yatetekahutɨ. Mɨkɨ mɨtiukwinitɨariekɨ, xeme 'aixɨa xeteheu'erietɨ xepayeitɨarie.
1PE 2:25 Matsi muxatsi memeuyexɨri hepaɨ xepɨyɨakai, hikɨrixɨa ta'aurie xe'axɨrieka muxatsi wahɨwemetsie xepɨte'uwi, kemɨ'ane xe'iyari mɨ'ɨwiya hetsɨa.
1PE 3:1 'Ukari yaxeikɨa, yaxeketenekahuni kememutiyuane xekɨnama, mɨpaɨ xeteyuriekaku, tsepa hipatɨ yamemɨkatekahu niuki kemaine, wa'ɨitama 'aixɨa 'anemekɨ xe'u'uwakaku yuri mepɨteta'eritɨarieni 'atsixeka'utiyuanekaku,
1PE 3:2 mexexeiyatɨ kexemɨte'u'uwa Kakaɨyari xehayemakatɨ xe'itiyatɨkaitɨ.
1PE 3:3 Kexemɨteyukemaritɨa, herie miemekɨ xeikɨa xepɨkamariwani, kexemɨteyutsa'a yɨkɨpatsie, hurukɨ kexemɨte'atikuka, kexemɨte'enakatɨkɨ 'ixuriki.
1PE 3:4 Matsi xekenemariwani kexemɨ'anene yutaɨta hakewa mɨkahematsiɨkɨ herie, yu'iyaritsie pɨta. Xɨka xe'iyari ka'ayu'eriyani xɨka kayuwatɨ 'umaka, mɨkɨ matsi witsipɨrekemari mɨkapɨniwekɨ, kemɨ'ane mɨpaɨ mɨ'ane, Kakaɨyari kwinimieme mariwemekɨ 'aixɨa pɨtixeiya.
1PE 3:5 'Ukari meripaitɨ 'amemu'uwakai memɨpatsiekai Kakaɨyaritsie miemekɨ, memɨta'ikwewakai yuri mete'erietɨ hetsiena, mɨkɨ mɨpaɨ mepɨteyukemaritɨakai yametekahutɨ kememutiyuanekai wakɨnama.
1PE 3:6 Tsara meta yakatinikamiekaitɨni 'Apɨrahami kemainekai, ti'aitame katinitamare. Xemeta niwemama xekanakɨne hepaɨna 'aixɨa xeteyurietɨ, xekamamatɨ xɨka xemariutsieka.
1PE 3:7 'Ukitsi meta yaxeikɨa, xetemaiwawetɨ yu'ɨitama wahamatɨa xekeneutiteni, mɨpaɨ xetemaitɨ, xehepaɨ memɨkatɨrɨkawikɨ yuwaiyaritsie, mariwemekɨ 'aixɨa xeketeniwaxeiyani, mɨpaɨ xetemaitɨ, mexeteɨtakaku wahetsieta pɨtinake tukari memɨmikienikɨ xehamatɨa. Mɨpaɨ xɨka xeteyurieka xenenewieri pɨka'anunamieni.
1PE 3:8 'Imatɨrieka yunaitɨ xekeneyuxewini kexemɨteyɨkɨhɨawe, xekeneyuxewini 'axeikɨa xeyutemamawietɨ xeyuhiwerietɨ nutsu, xekeniwanaki'erieka 'iwamarixi, xeketeneyukanenimayaka, xepɨka'ayu'eririyani.
1PE 3:9 'Axaxete'upitɨarieme 'axaxepɨkawayurieni, 'axaxete'utahɨawarieme 'axaxepɨkatewakɨhɨaweni, matsitsɨ xekeneutawawiri Kakaɨyari 'aixɨa memɨ'itɨarienikɨ pɨta, 'ayumieme xeputa'inierie, xehetsie mɨtinakenikɨ 'aixɨa xemɨ'itɨarienikɨ.
1PE 3:10 «Kemɨ'ane minaki'erimɨkɨ tukari, kemɨ'ane mixeiyamɨkɨ tukari 'aixɨa mɨ'ane, ketihayewani 'axa'utaitɨ yunenikɨ, ketihayewani yutetakɨ 'itarikakɨ tikuxatatɨ.
1PE 3:11 Ke'iku'eirieni tita 'axamɨti'ane, 'aixɨa ketiyurieneni pɨta, ketikuwauni 'aixɨa mɨtiwaxeiyanikɨ teɨteri, keyumexɨitɨaka mɨkɨkɨ.
1PE 3:12 Ti'aitame kaniwaxeiyani mɨkɨ heitseriemekɨ yamemɨtekahu, meta wanenewieri kani'enieka, matsi 'axapɨtiwaxeiya mɨkɨ 'axamemɨteyurie».
1PE 3:13 Mɨkɨ meta, ¿kepaikɨtsɨ 'axapɨxeyurieni xɨka xeyuwaɨriyani hikɨ xemɨyumexɨitɨakakɨ tita 'aixɨa mɨti'ane hepaɨtsita?
1PE 3:14 Metsɨ xɨka xete'ukakukwineni heitseriemekɨ yaxemɨtekahukɨ, xekeneyutemamawieka matsi. «Xepɨkawamakarɨka, xepɨkayuxamurieka».
1PE 3:15 Matsi yu'iyaritsie xekenayemakaxeni Ti'aitame Kɨritsitu kemɨtiupatsie. Yuheyemekɨ xekeneha'aritsieka xemɨtiniunikɨ tita xemɨtekwewietsie mieme, yaxete'ikɨhɨawetɨ kemɨ'ane mɨxeta'iwawiya. Mɨpaɨ xetekuxatatɨ xepɨka'ayu'eririyani xeikɨa, matsi xekenayemakaxeni kemɨ'ane mɨxeta'iwawiya,
1PE 3:16 xe'iyari 'aixɨa 'anekaku kaxetate'akaku. Mɨpaɨ kememɨtexeniukima, mɨkɨ hepaɨtsita mepɨyutetewiyani mɨkɨ memɨxeniukima kexemɨteyurie 'aixɨa 'anemekɨ, Kɨritsitutsie xetewiyatɨ kexemɨyɨa.
1PE 3:17 'Aixɨa kaniyɨmɨkɨ xɨka xete'ukakukwineni 'aixɨa xemɨteyuriekɨ, xɨkate mɨpaɨ tinakeni Kakaɨyari, peru 'axaxemɨteyuriekɨ pɨkatixaɨ.
1PE 3:18 Kɨritsitu xeimieme xeikɨa kaniumɨni tita teɨteri 'axamemɨteyurie hepaɨtsita, kemɨ'ane heitseriemekɨ yamɨtikamiekai, mɨkɨ kaniumɨni tame heitseriemekɨ yatemɨkatekahu tahetsiemieme, mɨtatsi'aye'atɨanikɨ Kakaɨyari hetsɨa. Kemɨtitewitɨkai, kaniumierieni, yu'iyari kemɨrexeiyakai, panutanieritɨarie.
1PE 3:19 Mɨpaɨ 'anetɨ kaneyani, pɨwarutaxatɨa 'iyarite memanutaxɨriyakai.
1PE 3:20 Mɨkɨ meripai mepɨkayuwaɨriyakai yamemɨtekahunikɨ kepauka Kakaɨyari mɨta'ikwewakai tiuka'eniwatɨ 'ana Nuhexi 'amuyeikakaitsie, mexi'akuxi kanuwa 'amɨpa wewiekai. Mɨkɨtsie meyetetɨ meyu'atahaikatɨ meputawikwei memutihautsie.
1PE 3:21 Mɨkɨ 'inɨari kanayani, 'ɨyarika kani'inɨaritɨni. 'Ɨyarikakɨ xewaiyari xepɨkahauxina kemɨtikwiema, mɨkɨkɨ matsi xe'iyari kaxetate'akaku xepɨyuhɨritɨa Kakaɨyari xe'eniekaku. Mɨpaɨ xepɨteyuwikweitsitɨa hikɨ, Ketsutsi Kɨritsitu manukukekɨ.
1PE 3:22 Mɨkɨ Kakaɨyari tserieta 'apuwe muyuawitsie paitɨ heyaka, niuki tuayamete, heitserie hexeiyamete meta tɨrɨkariya hexeiyamete yunaitɨ yamepɨtekahu kemaine.
1PE 4:1 'Ayumieme, Kɨritsitu yuwaiyaritsie kemɨtiukwinixɨ tahetsiemieme, xemeta xekeneyuha'aritɨaka xemɨtekwinitɨarienikɨ, hepaɨna xeteyumaitɨ, tamɨtsɨ kemɨ'ane yuwaiyaritsie mɨtiukwinixɨ katiniuhayewa 'axatiyurienetɨ.
1PE 4:2 'Ayumieme mexi'akuxi yuwaiyaritsie 'ayeniereni, tiukahiwe'erietɨ pɨkayɨaneni, teɨteri kememɨte'ukahiwe'erie, matsi pɨta Kakaɨyari kemɨtinake katiniyurienemɨkɨ.
1PE 4:3 'Ariri tukari manuyetɨatsie tukari xeputsewixima yaxeteyurietɨ kemɨtiwanake nuiwarite, xekaniku'uwani xerukuyatɨwetɨ xeikɨa, xete'ukahiwe'erietɨ, xetarɨwetɨwetɨ, xeku'ixɨaratɨwetɨ, xeku'ietɨwetɨ, meta tetexi xewarayexeiyatɨ memɨxani'eriwa.
1PE 4:4 Mɨpaɨ xemɨkateyuriekɨ hikɨ mekanihɨxiyaka, xeme wahamatɨa xemɨka'utananautsakɨ wahepaɨ xeyutatuatɨ xemɨtɨmaiyarienikɨ, 'ayumieme 'axamekatenixekɨhɨaweni.
1PE 4:5 Kaneuyewekamɨkɨ mɨkɨ memɨtiniunikɨ yuhetsiemieme kepauka mɨwata'iwawiya kemɨ'ane 'amuwe ha'aritsietɨ memayeneniere meta mɨkite yunaitɨ.
1PE 4:6 'Ayumieme teɨteri memukwi mekaniutaxatɨarieni hepaɨtsitana niuki 'aixɨa manuyɨnekɨ, memɨta'iwawiyarienikɨ yuwaiyaritsie teɨteri kememɨ'itɨariwa, yu'iyaritsie pɨta memayenenierenikɨ Kakaɨyari kemɨrayeniere.
1PE 4:7 'Ariri kanehuraniri naitɨ yamɨraye'anikɨ. 'Ayumieme xekeneyunenewieka 'aixɨa 'anemekɨ xetemaiwawetɨ xekeneyɨaka, mɨkɨkɨ xeyɨkɨhɨawetɨ.
1PE 4:8 'Ikɨ naimekɨ, xekeneyunaki'erieka yuheyemekɨ, naki'eriya naime katinanuyeitɨwani waɨkawa 'axamɨti'anene.
1PE 4:9 Yukie xekeneyunaki'erieka xekaniukixietɨ.
1PE 4:10 Kakaɨyari kemɨtixepitɨa yuxexuime, mɨpaɨ xeketeneyuparewieka, kexemɨte'uhɨritɨarie Kakaɨyari 'imikierieya hepaɨtsita mɨmɨire hepaɨtsita, mɨpaɨ 'aixɨa xeketene'uximayaka.
1PE 4:11 Xɨka niukametɨni, Kakaɨyaritsie mieme 'utaniutɨ ketikuxatani. Xɨka tiparewiwametɨni, mɨpaɨ ketiwaparewieka Kakaɨyari kemɨtitɨrɨkariya. Mɨpaɨ xeteyuriekaku, Ketsutsi Kɨritsitu yatixepitɨakaku, Kakaɨyari witsikatinikuxaxatsiwamɨkɨ naimekɨ. Mɨkɨ witsiketikɨhɨawarɨwani, tɨrɨkariya kepitɨarieka yuheyemekɨ tsepanetɨ xeitsienituyari wiyari manuyekɨka. Mɨpaɨ xeikɨa kani'aneni.
1PE 4:12 Nenaki'erima, xepɨkahɨxiyaka xe'inɨatsietɨwetɨ tsepa taikɨ, kexemɨtenewiekɨ mɨpaɨ xemɨ'itɨarieximekɨ.
1PE 4:13 Matsitsɨ, kexemɨteyuxewi Kɨritsitu hamatɨa, xete'ukakukwinetɨ mɨkɨ mɨtiukwinixɨ hepaɨ, mɨkɨkɨ xekeneyutemamawieka, mɨkɨ meta, xɨka mɨpaɨ 'aneni, kwinimieme xekaniyutemamawiekakuni kepauka matsiɨkɨtɨ mayani witsi'anetɨ.
1PE 4:14 Xɨka 'axaxetekuhɨawarɨwani Kɨritsitu hetsɨa xemɨmiemetekɨ, xekeneyutemamawieka, mɨpaɨ xetemaitɨ, 'Iyari witsimɨ'ane xehetsie pɨtiwiya, Kakaɨyari 'Iyarieya hɨkɨtɨtɨ, wahetsɨa 'axapɨtikuxaxatsiwa, xehetsɨa matsi 'aixɨa pɨtikuxaxatsiwa.
1PE 4:15 'Aixɨa pɨkayɨni xɨka xewitɨ xeme tiukakukwineni mɨtiyumemiwakɨ, mɨtinawayakɨ, 'axamɨtiyurienekɨ, maniuwekɨ.
1PE 4:16 Matsi xɨka tiukakukwineni Kɨritsitu hetsie mɨtiwiyakɨ, pɨkayutewiyani, Kɨritsitu hetsɨa miemetɨtɨ mɨpaɨ ke'itɨarieni matsi, Kakaɨyari 'aixɨa mɨtikuxaxatsiwanikɨ.
1PE 4:17 Tukari kanaye'ani 'iwaurika mɨtsutɨarienikɨ, Kakaɨyari kiie kiekatari meri temɨta'inɨatsienikɨ, xɨka tahetsie tsutɨarieni meri 'iwaurika, ketsɨ me'u'itɨarieni mɨkɨ memɨkayuwaɨriya yamemɨtekahunikɨ niuki kemaine Kakaɨyari hepaɨtsita 'aixɨa manuyɨne.
1PE 4:18 «Mɨkɨ heitseriemekɨ yamemɨtekahu xɨka haweri mieme xeikɨa me'utawikweitsitɨarieni, hakewari mɨkɨ Kakaɨyari memɨka'ayexeiya, hakewari mɨkɨ 'axamemɨteyurie».
1PE 4:19 'Ayumieme mɨkɨ memɨte'ukakukwine mɨpaɨ mɨtinakekɨ Kakaɨyari, mɨkɨ kaneuyeweka 'aixɨa meteyurietɨ memɨyuyetuanikɨ, kemɨ'ane mɨwarunetɨa mɨwa'ɨwiyanikɨ wa'iyari, mɨkɨ yakatinikamieni kemaine.
1PE 5:1 'Ayumieme 'ipaɨ 'ukirawetsixi nepɨtiwatuika, neta wahepaɨ nekani'ukiratsitɨni, nekaniuniere Kɨritsitu tiukwineku, neta neheixeiyatɨ nekanayani tita 'umɨramie witsiti'aneme ketemɨtexeitsitɨarieni, 'ayumieme nepaine.
1PE 5:2 Kakaɨyari muxatsimama xemɨhɨritɨarie xekeniwa'ɨwiyani, waɨriyarika xekayɨatɨ. Tumini xehiwe'erietɨ xeikɨa xepɨkayɨaka, matsi pɨta xeyuwaɨriyatɨ xeketene'uximayaka, Kakaɨyari kemɨtinake.
1PE 5:3 Mamariwawemete xepɨkahayuyeitɨaka xemɨhɨritɨarie wahetsiemieme, matsi 'inɨari xekenehɨkɨtɨni muxatsi wahɨxie.
1PE 5:4 Kepauka muxatsi wahɨwemete wa'ukiyari xeiyarietɨ mayani, kuruna witsimɨ'ane mɨkayeiwe xekaniyetuiriyariekuni.
1PE 5:5 Mɨpaɨta xeme temari yaxeikɨa, kememutiyuane 'ukirawetsixi yaxeketenekahuni. Tixaɨtɨ xekatehayuyeitɨatɨ xekeneyɨaka yunaime wahepaɨtsita, «Kakaɨyari kaniwaraye'unieka mɨkɨ memuyuti'ɨre, matsi pɨta 'aixɨa pɨtiuka'iyari tixaɨtɨ memɨkatehɨkɨ wahetsiemieme».
1PE 5:6 'Ayumieme tixaɨtɨ xekatehɨkɨtɨme xepɨkahayuyeitɨaka, Kakaɨyari yɨtɨrɨkariyakɨ xetuikakaku, mɨkɨ yemekɨ tixaɨtɨ xekatehɨkɨtɨme mɨxe'ayeitɨanikɨ tukari 'aye'ayu.
1PE 5:7 Kexemɨteyu'iyaritɨa, xeketeneyetuiri naime, mɨkɨta mɨxe'ɨwiyakɨ.
1PE 5:8 Xekeneyuta'eriwani meta xekenayeneniereni. Xeneɨkixiwi kauyumarie pɨkuyeika maye mahiwa hepaɨ 'ikuwaunetɨ kemɨ'ane mɨtakwanikɨ.
1PE 5:9 Xekenaye'unieka, xekeneyutseiriyani yuri xete'erietɨ, mɨpaɨ xetemaitɨ, kaneuyeweka yaxeikɨa memɨte'ukakukwinenikɨ yunaitɨ 'iwamarixi naitsarie kwiepa.
1PE 5:10 Mɨkɨ meta, Kakaɨyari naimekɨ 'aixɨa katiniuka'iyarini, mɨkɨ kanixe'uta'inieni hepaɨna witsixe'aneneme mɨxe'ayeitɨanikɨ yuheyemekɨ Kɨritsitutsie xetewiyakaku, mɨkɨri yapaɨmexɨa xetekwineyu kanixehekwariyamɨkɨ, meta xetɨrɨkawime kanixe'ayeitɨamɨkɨ, kanixetseiriyamɨkɨ, xekitɨa mieme tetsariya kanitakemɨkɨ.
1PE 5:11 Mɨkɨ tɨrɨkariya kepitɨarieka yuheyemekɨ tsepanetɨ xeitsienituyari wiyari manuyekɨka. Mɨpaɨ xeikɨa kani'aneni.
1PE 5:12 Tsiriwanu ta'iwa yamɨtikamie kenemɨtiku'eriwa netsiparewiekaku, yapaɨmemekɨ 'ipaɨ netinixe'uta'utɨirieni nexetuikatɨ netixehekɨatɨatɨ kename yurikɨ 'ipaɨ 'aixɨa tiuka'iyari Kakaɨyari. Mɨkɨ 'aixɨa tiuka'iyarikaku xehetsiemieme xekeneti'uka.
1PE 5:13 Mɨkɨ Wawiruniya memɨyutixexeɨriwa xehepaɨ memanayexeiyarie mekanixewaɨritɨaka, meta neniwe Marikuxi kanixewaɨritɨaka.
1PE 5:14 Xekeneyuwaɨritɨaka xeyunaki'erietɨ. Yunaitɨ Kɨritsitu hetsie xemɨtewiya kayuwatɨ xekepitɨarieka. Mɨpaɨ xeikɨa kani'aneni.
2PE 1:1 Ne Tsimuni Pekuru, Ketsutsi Kɨritsitu hetsiemieme nekatini'uximayatametɨni meta nekaninɨ'ariekametɨni, nekanixewaɨritɨaka xeme xemupitɨarie yuri xemɨte'eriekakɨ tahepaɨ, takakaɨyari tatsiwikweitsitɨwame Ketsutsi Kɨritsitu kemɨtixepitɨa heitseriemekɨ yamɨtikamiekɨ.
2PE 1:2 Kwinimieme 'aixɨa ketiuka'iyarini xehetsiemieme waɨkawamekɨ, kexepitɨaka yu'iyaritsie xemɨka'uximatɨariekakɨ, kexemɨte'imate Kakaɨyari, Ketsutsi meta Tati'aitɨwame.
2PE 1:3 Mɨkɨ Kakaɨyari mɨtɨrɨkaɨye, pɨtatsi'upitɨa naime kemɨreuyewetse temɨtemaikakɨ 'aixɨa 'anemekɨ temɨte'ayexeiyanikɨ. Mɨpaɨ tekateniupitɨarieni temeitimanikɨ kemɨ'ane mɨtatsi'uta'ini witsi'anemekɨ mariwetɨ.
2PE 1:4 Mɨpaɨ mɨ'anekɨ 'iya pɨtatsi'umi tita mɨtatiutahɨawixɨ temeixeiyanikɨ kwini mieme raye'arɨkame mariweme, mɨpaɨ pɨtatiumi, mɨkɨkɨ hamatɨana xemɨyutaxewirekɨ kemɨti'ane Kakaɨyaritɨtɨ, kepauka xemɨtawikweni kapa xetsewiximariekakɨ, kwiepa memɨtama kememɨteyutsewixima memɨte'ukaheiwe'eriekɨ.
2PE 1:5 Mɨkɨ 'ayumiemeyarikɨ yuri xete'erietɨ kwini mieme xekeneyumexɨitɨaka 'aixɨa xe'anenetɨ xemayuyeitɨanikɨ, 'aixɨa xe'anenetɨ, tita mɨreuyewetse xetematetɨ xekenakɨni.
2PE 1:6 Yaxetemaitɨ, xetsetseɨyetɨ xekenakɨni yu'iyaritsie kexemɨteyu'aitɨa, xetsetseɨyetɨ kexemɨteyu'aitɨa yu'iyaritsie, yaxeikɨa xekayupatatɨ xekenakɨni tsepa 'axaxemɨ'itɨarie, xekayupatatɨ, xete'ayexeiyatɨ xekenakɨni.
2PE 1:7 Xete'ayexeiyatɨ, yu'iwama xewanaki'erietɨ xekenakɨni, yemekɨ xeteyukanaki'erietɨ.
2PE 1:8 Mɨpaɨ xɨka xeteyurieka, xekanitiwawerikuni xetemaitɨ, yakɨ xeikɨa xete'uximayatɨ xepɨka'ayeitɨarieni, matsi pɨtitixuawere pɨta kexemɨte'imate Tati'aitɨwame Ketsutsi Kɨritsitu.
2PE 1:9 Kemɨ'ane mɨpaɨ mɨka'ane, mɨkɨ 'ahurawa xeikɨa kaniniereni, matsi kanakɨpeni, katinatɨmaiya kemɨtiu'itiyakai, meripaitɨ 'axatiuyurieka.
2PE 1:10 'Ayumieme ne'iwama matsi waɨkawa xekeneyumexɨitɨaka xemitɨrɨkariyakɨ mɨkɨ 'uximayatsika para mɨnɨrekɨ kexemɨte'uta'inierie kexemɨte'anayexeiyarie, mɨpaɨ xɨka xeteyurieka hatsuaku xepɨkaheuyexɨrieni.
2PE 1:11 Mɨpaɨ xeteyurietɨ, yemekɨ matsi xekanipitɨariekakuni xemaye'axɨanikɨ hakewa yuheyemekɨ mɨre'aita Tati'aitɨwame Tatsiwikweitsitɨwame Ketsutsi Kɨritsitu.
2PE 1:12 'Ayumieme ne tsepa mɨpaɨ xemɨtemate, 'ikɨ hepaɨtsita neheyemekɨ nekanixeha'eritɨwamɨkɨ, tsepa xemutɨrɨkariyarie tita yuri mɨraine mɨxe'u'axixɨkɨ.
2PE 1:13 Mɨpaɨ nepɨtiku'eriwa, mexi'akuxi ne'ayeniere pɨheitserie para nemɨxe'anutahɨtɨanikɨ mɨpaɨ xemɨteha'eriwanikɨ
2PE 1:14 mɨpaɨ netimaitɨ, kwitɨwa 'ikɨ newaiyari nepuku'eirieni, kemɨnetiuhekɨatsitɨa Tati'aitɨwame Ketsutsi Kɨritsitu.
2PE 1:15 Nepɨnemexɨitɨa yuheyemekɨ xemɨyɨwawenikɨ mɨpaɨ xemɨteha'eriwanikɨ neyemieyu.
2PE 1:16 'Ɨxatsi kwamanarika mutawewiyatsie, mɨkɨtsie tepɨkatewiyakai tame kepauka temɨtexe'utaxatɨa, mɨpaɨ te'utiyuatɨ kemɨtitɨrɨkaɨye Tati'aitɨwame Ketsutsi Kɨritsitu, kemɨtinuani meta, matsi tame temunenierixɨ tepɨhɨkɨ, temixeikɨ kemɨtimariwe mɨkɨ.
2PE 1:17 Kepauka Kakaɨyari mɨta'ukiyari mariweme mɨxatakai, witsi'aneme mayeitɨa, kepauka xewitɨ mutaniu witsi'anemetsie mariwemetsie 'ayewetɨ mɨpaɨ 'utaitɨ hetsiena mieme: «'Ikɨ neniwe kanihɨkɨtɨni neminaki'erie, mɨkɨkɨ waɨkawa nekaniyutemawieka».
2PE 1:18 'Ana tame tekani'enieni 'utaniukakaku taheima, kepauka hamatɨana temu'uwakai yemuri mɨpatsietsie Kakaɨyari hetsiemieme.
2PE 1:19 Mɨkɨ meta, tita matsi waɨkawa mɨtitse'i tekanexeiyanita texaxatamete waniukitɨme, 'aixɨa xepɨteyurie xɨka xe'i'enieka, makuyɨwitsie mɨhekɨariwie hepaɨ kani'aneni, xepi'enieka mexi'akuxi kakatariwe, tuxakɨta mieme xurawe mexi'akuxi ka'atinewe xe'iyaritsie.
2PE 1:20 Yemekɨ peuyewetse mɨpaɨ xemɨtemaikakɨ, texaxatamete waniuki naitɨ 'utɨarika xapayaritsie mɨre'uxa, tewi pɨkayɨwe yɨkɨmana mihekɨatanikɨ.
2PE 1:21 Mɨkɨ niuki kepauka munua, tewi mɨpaɨ mɨtinakekaikɨ xeikɨa hatsuaku pɨka'atɨarie, matsi pɨ'atɨarie 'Iyari Mɨtiyupata wakuyuitɨwakaku teɨteri memɨpatsiekai, mɨkɨ yamekatenikuxatakaitɨni Kakaɨyari hetsɨa miemekɨ.
2PE 2:1 Hipatɨ texaxatamete memɨte'uyuterɨwakai peru memɨkahɨkɨtɨkai meripaitɨ mepanuku'ui teɨteri watsata, yaxeikɨata hikɨ xeme xetsata hipatɨ te'ɨkitamete mepɨte'uyuterɨwani, peru mɨkɨ mepɨkahɨkɨtɨni, niuki mekani'atɨakuni 'awie kɨmana teɨteri memɨtatɨmaiyarienikɨ yɨkɨ manuyɨnekɨ, 'atsita mepɨyuku'imawani, mɨpaɨ me'utiyuatɨ kename meka'imate yukutsiyari kemɨ'ane mɨwaruxɨnaxɨ mɨwarunanai. Yapauka meyutɨmaiyatɨ mekanayuyeitɨakuni.
2PE 2:2 Yumɨiretɨ wahetsie mekateniwiyakuni wahepaɨ memɨyutatuanikɨ merukuyatɨwetɨ xeikɨa, mɨkɨ wakɨmana, tita yuri mɨraine huyeyari pɨtsewiximarieka 'axatikuxaxatsiwakaku hepaɨtsitana.
2PE 2:3 Piinite metehiwe'erietɨ, yakɨ xeikɨa mete'ɨkitatɨ xekɨmana mepɨte'itaka. Tsepa meripaitɨ 'amemu'uwa, xɨanakɨ pɨkayɨane 'itsɨkame 'arike mɨwatahɨawe, kemɨ'ane mɨwaka'una pɨkakutsu.
2PE 2:4 Kamɨtsɨ, Kakaɨyari pɨkatiwareuyehɨwiri niuki tuayamete taheima miemete 'axamemɨte'uyurikɨ, matsi pɨwayetua 'uximatɨarika mɨwaxuawetsie, meukatewatsie mɨwatiyɨwitsie kaniwareukaxɨrieni mexi'akuxi kawatahɨawiwe 'itsɨkame.
2PE 2:5 Yexeikɨata meripaitɨ 'amemu'uwakai pɨkatiwareuyehɨwiri, kepauka wiyeri meyenɨ'a 'axateyurɨwamete watsata, tsepanetɨ 'atahaikame pɨwaruta'ɨwiyaxɨ Nuhexi mɨkɨ pɨtiwakuxaxatɨwakai heitseriemekɨ.
2PE 2:6 Mɨkɨ meta, 'uximatɨarika kaniwarupitɨani memɨka'unarienikɨ Tsurumatsie Kumuxatsie kiekatari, naxi kanayeitɨani wakiekarite, 'inɨari kaniwarayeitɨani, mɨkɨ 'arike 'amemu'uwanikekai Kakaɨyari meka'ayexeiyatɨ memɨwara'eriwanikɨ kememɨte'anayekɨ.
2PE 2:7 Yaxeikɨata tewi heitseriemekɨ yamɨtikamiekai kaniutawikweitsitɨani Ruti titewakame, mɨkɨ kwini mieme katiniuti'uxitɨariwakaitɨni, 'inɨari tsanamete kememɨte'u'uwakai merukuyatɨwetɨ.
2PE 2:8 Mɨkɨ heitseriemekɨ yakatinikamiekaitɨni, peru kemɨtinierekai kemɨti'enakai mexi watsata 'ayekatei, tukarikɨ yu'iyaritsie pɨ'uximatɨariekai waxeiyatɨ kememɨteyuriekai 'inɨari memɨtitsanakaikɨ.
2PE 2:9 Kaniyɨweni Ti'aitame mɨwatawikweitsitɨanikɨ mɨkɨ Kakaɨyari memayexeiya kepauka memɨta'inɨatsieni, pɨyɨweta mɨkɨ heitseriemekɨ yamemɨkatekahu mɨwata'ɨwiyakɨ wa'uximatɨatɨ, 'itsɨkame 'arike mɨwata'iwawiyakɨ.
2PE 2:10 Mɨkɨ matsi pɨwakema, mɨkɨ 'amemu'uwa yuwaiyaritsie metewiyatɨ, mete'ukahiwe'erietɨ memɨtsewiximarienikɨ, me'ixani'erietɨ kemɨ'ane ti'aitame mɨhɨkɨ. Mɨkɨri mepɨkayukweriwayurie, matsi yuhetsiemieme xeikɨa mepɨyutatua, mepɨkamama tsepa memɨwatsewixima mamariwawemete 'axame'utiyuatɨ.
2PE 2:11 Taheima miemete niuki tuayamete tsepa matsi kwini mieme memɨmamariwawe meyɨwawetɨ metɨrɨkawitɨ, peru mɨkɨ mepɨkawatsewixima kepauka yamemutiyua, mewaxanetatɨ mɨya memɨ'anene Ti'aitame hɨxie.
2PE 2:12 Mɨkɨ tatewama memɨkate'u'iyari wahepaɨ me'anenetɨ, yɨkɨmana xeikɨa mepɨte'u'iyari, mepɨtinunuiwa memɨtiwiyarienikɨ memɨkwi'iwakɨ xeikɨa, mɨkɨ 'axame'utiyuatɨ mepitsewixima tita 'atsimemɨkatemate hepaɨtsita. Merikɨte, tatewama wahepaɨ mepɨtatɨmaiyarieni mɨkɨ.
2PE 2:13 'Axame'itɨarietɨ yamepɨte'akapitɨarieni 'axamemɨwaruyurikɨ hipame. Naki'eriya mepɨ'erie hekɨta merukuyatɨwetɨ mɨkɨ. Mepɨyutsewixima mepɨyuyɨriya tsepa xehamatɨa memɨtekwa'a xeikɨa, memɨnaki'akɨ mete'itatɨwetɨ.
2PE 2:14 Yɨhɨxikɨ 'ukarawetsixi memɨwakuwautɨwenikɨ pɨwanake xeikɨa memɨwakumaɨwanikɨ tsepa hipame wa'ɨitama, mepɨkatehayewa metekuwautɨwetɨ 'axakememɨteyurienikɨ, mepɨtewa'irɨwiya mepɨwawiya mɨkɨ wa'iyari mɨkatsetse'i, mɨkɨ matsi yu'iyaritsie mepɨ'iyamate hipame wapiinite memɨtehiwe'eriekakɨ, wahetsie pɨtinake 'axamemɨtetahɨawarienikɨ para 'axamemɨ'itɨarienikɨ.
2PE 2:15 Huye me'uku'eirieka mɨxeuraɨye, mekaneuyexɨrieni, Warami Wehuri nu'aya huyetana mekaneukuyune matsi, mɨkɨ pihiwe'eriekai tita mɨti'iwanikekai tsepa mɨkaheitseriekai,
2PE 2:16 peru kaniutatierieni 'inɨari mɨtitsanakaikɨ: puxuya ―tsepanetɨ mɨkaniuwekai― tewi niukieyarikɨ kaniutaniuni puxu pɨka'ipitɨa tixaxatame kemɨtiyurienekai kayumaitɨ.
2PE 2:17 Mɨkɨtɨtɨ haixa hepaɨ mekani'aneneni peru memayewawaki, 'aɨxi hepaɨ mekani'aneneni teɨkakɨ mu'eketɨka hepaɨ. Yɨriya kwi mɨyɨwi wahetsiemieme kani'ɨwiyariekamɨkɨ.
2PE 2:18 Mariwemekɨ kememɨtekuxata peru yakɨ xeikɨa me'utiyuatɨ, mepɨtewa'itaiya mepɨwawiya mɨkɨ haweri mieme memutawikwei, teɨteri memeuyexɨrie wahepaɨ 'amemu'uwakai. Mepɨtewa'irɨwiya mewahiwe'erikatsitɨatɨ, teɨteri yuwaiyaritsie metewiyatɨ kememɨte'ukahiwe'erie, para memɨrukuyatɨwenikɨ xeikɨa.
2PE 2:19 Mɨpaɨ mepɨtewakuxaxatɨwa kename waniu meyɨwaweni memɨyunɨ'akakɨ yɨkɨmana me'utiyuatɨ, peru mɨkɨtɨtɨ mɨya memutiyua matsi yemekɨ waɨriyarika mepɨte'uximaya tita mɨtipɨpɨnitsie miemekɨ, tita mɨre'iwa tewi, mɨkɨtsie mieme waɨriyarika katini'uximayakamɨkɨ.
2PE 2:20 Mɨkɨ memutawikwei mepɨte'uhayewaxɨ kememɨteyutsewixima kwiepa memɨtama, memeitimakɨ Ti'aitame Tiyuwikweitsitɨwame Ketsutsi Kɨritsitu, peru mɨkɨ xɨka me'a'iwarieni tawari me'uwiniyarieni meripai hepaɨ, 'imatɨrieka matsi yemekɨ 'axame'itɨarietɨwetɨ mekanakɨnikuni, memɨka'itɨarietɨwekai hepaɨ matɨari paitɨ.
2PE 2:21 Matsi 'aixɨa pɨyɨnikeyu xɨka mekaheitimanike huye kemɨ'anetsie 'uyeikatɨ heitseriekamekɨ yamɨtikamienikɨ, peru 'aixɨa pɨkayɨnikeyu xɨka me'ukunuaxɨanike meheitimaime, me'iku'eirieme 'aitsika memɨyetuiriyarie mɨpatsie Kakaɨyaritsie mieme.
2PE 2:22 Mɨpaɨ mekaniuyɨni, mɨkɨ xatsika kemaine: «Tsɨkɨ pukunua yuhayari mɨtikwanikɨ». Meta: «Tuixu 'uti'ɨwame tawarita kaniyutahaxumamɨkɨ». Yuri paine xatsika.
2PE 3:1 Hikɨri nenaki'erima 'ikɨ pɨhɨkɨ hutarieka mieme xapa nemutawewi nemɨxe'uta'utɨiri. 'Ikɨtsie mieme 'iyatsie mieme yanepɨtixe'utaxatɨa tita xemɨteha'eriwa, nexe'anutahɨtɨatɨ nexe'iyaritsitɨatɨ xe'iyari mɨyuxewikɨ,
2PE 3:2 xeme'eriwanikɨ kememutiyuanekai texaxatamete Kakaɨyari hetsiemieme memɨpatsiekai, yakatiyɨwekaku 'akuxi, xeme'eriwanikɨ meta Ti'aitame tiyuwikweitsitɨwame kemɨti'aitakai mɨkɨ memenɨ'arie xehetsɨa kememɨtexekuxaxatɨwakai.
2PE 3:3 Yemekɨ peuyewetse xemɨtemaikakɨ, tukari 'aye'aximekaku te'itawamete mekanitixuawerikuni, 'amekaniu'uwakuni kememɨte'ukahiwe'erie xeikɨa,
2PE 3:4 mɨpaɨ me'utiyuatɨ: «¿Hakewatsɨ pɨka'aye'awe 'akuxi mɨkɨ kemutayɨ kename nuani? Tapaapama memukwitsie paitɨtɨ, hikɨ yaxeikɨa 'anetɨ 'akanitamaka kemɨti'anekai tsutɨa paitɨ kepauka munetɨarie, me'utiyuatɨ».
2PE 3:5 Mɨpaɨ me'utiyuatɨ, mepɨyuwaɨriya mɨpaɨ memɨtehatɨmaiyakɨ, Kakaɨyari ya'utayɨku muyuawi matɨari paitɨ 'apuyemakai, meta kwie hapa pune, hakɨ putawewiya.
2PE 3:6 Mɨkɨkɨ meta 'ana miemete kwiepa memɨtamakai mekaniutatɨmaiyarieni haa 'utahɨneku.
2PE 3:7 Mɨkɨ mɨpaɨ mutayɨkɨ, hikɨ mieme muyuawi meta kwie kani'ɨwiyarieka mɨtataiyarienikɨ, tukari 'aye'ayu kepauka teɨteri memɨkaheyexeiya Kakaɨyari memɨta'iwawiyarieni memɨtatɨmaiyarieni.
2PE 3:8 Mɨpaɨ xeikɨa xepɨkatehatɨtɨmaiyani xeme nenaki'erima, Ti'aitame kemɨtixeiya, xeitukari xeimiriyari wiyari hepaɨ kani'aneni, xeimiriyari wiyari meta xeitukari hepaɨ pɨ'ane.
2PE 3:9 Ti'aitame 'ereutewitɨ pɨkayɨane yuniuki hepaɨtsita kemutayɨ kename mɨpaɨ tiyurieni, tsepa hipatɨ kaheye'atɨaweme memɨ'erie. Matsi pɨkawaɨripie 'emɨreuterekɨ xekwewietɨ xeme, yapɨkara'eriwa nixewitɨ tɨma mɨtatɨmaiyarienikɨ, matsi pɨyuwaɨriya yunaitɨ memaye'axɨanikɨ para memɨtehayewanikɨ kememɨteyuriekai.
2PE 3:10 Peru tukari kanaye'amɨkɨ kepauka Ti'aitame munuani, tinawayame mɨ'axe hepaɨ yɨwikɨta. 'Ana muyuawi kanitayeimɨkɨ karima 'utayuanekaku, tita mɨtiutiwewiya naitɨ katinikumaweriyariemɨkɨ taikɨ, meta tita kwiepa naitɨ mɨtixɨawe, naitɨ katinititaiyariemɨkɨ.
2PE 3:11 Merikɨte, naitɨ mɨpaɨ xɨka tiukumaweriyarieni, ¿kehepaɨtari reuyewetse kexemɨ'anenenikɨ xeme, naimekɨ xepatsietɨ Kakaɨyari hetsiemieme kexemɨte'u'uwa, xeheyexeiyatɨ,
2PE 3:12 xe'ikwewietɨ mɨkɨ tukari, xe'imexɨitɨatɨ kwitɨwa maye'anikɨ para Kakaɨyari munuanikɨ? 'Anatsɨ muyuawi tana'iyarieme pɨtaxɨtsitɨarieni, tita mɨtiutiwewiya mana naitɨ katinitikwaniyariemɨkɨ taikɨ.
2PE 3:13 Mɨkɨ tame tekanikwewieka muyuawi mɨhekwa meta kwie mɨhekwa, mɨkɨ kemɨtatiutahɨawixɨ, mana kiekatari heitseriemekɨ yamemɨteyurie.
2PE 3:14 'Ayumieme, nenaki'erima, mexi xeta'ikwewa mɨya mɨtiyɨnikɨ, xekeneyumexɨitɨaka 'aixɨa xete'u'uwatɨ mɨkɨ mɨxexeiyakɨ xekatsewiximariekame, xekayɨyɨwime meta 'aixɨa xeteyuxeiyakame pɨta.
2PE 3:15 Yatepɨtemaika Tati'aitɨwame kawaɨripietɨ kemɨtiwatawikwetsitɨamɨkɨ, meta ta'iwa Papuru teminaki'erie yaxeikɨa 'utaitɨ katinixe'uta'utɨirieni, timaiwetɨ Kakaɨyari kemɨtipitɨa.
2PE 3:16 Naime xapatsie yaxeikɨa paine 'ikɨ xatatɨ. Xapateyatsie niuki kanixuaweni mɨkwaniwe, mɨkɨ memɨkaheiti'enietɨkɨka memɨkatsetseɨye mekaneitatunani niukieya, yaxeikɨa kememɨte'ituna 'utɨarika hipame, peru mɨpaɨ meteyurietɨ yɨkɨmana mepɨyutatɨmaiya xeikɨa.
2PE 3:17 Merikɨtsɨ nenaki'erima, mɨpaɨ xepɨtemate yakatiyɨwekaku 'akuxi, 'ayumieme xekeneyukweriwayurieka kapa xekatsetseɨyetɨ xe'akɨnekɨ, 'inɨari tsanamete metexe'u'itaiyakɨ kememɨteheuyexɨri mɨkɨ.
2PE 3:18 Matsitsɨ xekenewawereni waɨkawa matsi 'aixɨa xete'u'iyaritɨ xemakɨnirɨmenikɨ, xe'imatetɨ Tati'aitɨwame Tatsiwikweitsitɨwame Ketsutsi Kɨritsitu. Mɨkɨ mariwemekɨ kekuxaxatsiwani hikɨ, tukari mɨkaxɨwe mexi ka'aye'awe. Mɨpaɨ xeikɨa kani'aneni.
1JO 1:1 Tita matɨari paitɨ mɨtimieme, tita temɨte'u'eni, tita temɨte'uxei tahɨxikɨ, tita 'ahurawa temɨtexeiyakai, tita tamamakɨ temɨte'umayɨa, mɨkɨ tekanixekuxaxatɨwani niuki tukari tiyupitɨwame hepaɨtsita.
1JO 1:2 Tukari matsiɨkɨtɨ kanayani. Tame tekanixeiya, tekanihekɨatani, meta tekatenixe'utaxatɨani mɨkɨ tukari mɨkaxɨwe hepaɨtsita, mɨkɨ yu'ukiyari kaniteɨtakaitɨni meta tepuxeitsitɨarie tame.
1JO 1:3 Tita temɨte'uxei, tita temɨte'u'eni, mɨkɨ tekanixekuxaxatɨwani xemeta tanaitɨ temɨtaxewinikɨ. Ketemɨtetaxewi tame, ta'ukiyari hamatɨa tepɨtaxewi nu'aya hamatɨa meta Ketsutsi Kɨritsitu hamatɨa tepɨtaxewi.
1JO 1:4 'Ipaɨ tekateniu'utɨani maye'anikɨ tatemawierika.
1JO 1:5 'Ipaɨ panuyɨne niuki hetsɨana mɨmieme temi'eni meta temɨxekuxaxatɨwa: Kakaɨyari hekɨariya kanihɨkɨtɨni, yɨriya pumawe hetsiena.
1JO 1:6 Xɨka yate'utiyuani kename hamatɨana tetaxewi, yɨwipa xɨka te'u'uwani, tepɨte'itawa, yuri yatepɨkatekahu.
1JO 1:7 Matsitsɨ hekɨaripa xɨka te'u'uwani mɨkɨ hekɨaripa makawe hepaɨ, tanaitɨ tekanitaxewikakuni, mɨkɨ meta, Ketsutsi Kakaɨyari nu'aya xuriyaya naime 'axatemɨteyurie katani'itirieka.
1JO 1:8 Xɨka yate'utiyuani kename tita 'axamɨti'ane tekatehexeiya, takɨmana tepeutayexɨrɨwa, tita yuri mɨraine tahetsie pumawe.
1JO 1:9 Mexɨka te'itahekɨata tita 'axatemɨte'uyuri, mɨkɨ kemaine yapɨtikamie, kemɨtiheitserie yapɨtiyuriene, tita 'axatemɨte'uyuri pɨtareuyehɨwirieni, katani'itirieka naime mɨkatiheitserie.
1JO 1:10 Xɨka yate'utiyuani kename 'axatekateyuriwawe, mɨkɨ ti'itawame tekanayeitɨwani, niukieya tahetsie pumawe.
1JO 2:1 Neniwema 'ikɨ nepɨxe'utɨirie 'axaxemɨkateyuriekakɨ. Mexɨka 'axatiuyurieni xewitɨ, tame tepeixeiya kemɨ'ane tahetsiemieme mɨtaniuni yu'ukiyari hɨxie, Ketsutsi Kɨritsitu hɨkɨtɨtɨ kemɨtiheitserie yamɨtiyuriene.
1JO 2:2 Mɨkɨ kanihɨkɨtɨni kemɨ'ane 'aixɨa mɨtiuyuri 'aixɨa temɨtexeiyariekakɨ tame 'axatemɨteyurie, tita tame temɨteyuriekɨ xeikɨa pɨka'uyɨ, matsi yunaitɨ kwiepa memɨtama wahetsiemieme puyɨ.
1JO 2:3 Xɨka yatetekahuni kemɨti'aita, mɨpaɨ tekatenimaika temeitimakɨ.
1JO 2:4 Kemɨ'ane ne nemeitima maine, yakatikamietɨ kemɨti'aita, mɨkɨ katini'itawani, tita yuri mɨraine hetsiena pumawe.
1JO 2:5 Kemɨ'ane yamɨtikamie mɨkɨ niukieyatsie, yurikɨ mɨkɨ kanaye'ani tiyukanaki'erietɨ Kakaɨyari hepaɨ. 'Ipaɨ tekatenimaika hetsiena temɨtewiya.
1JO 2:6 Kemɨ'ane hetsiena tiwiyatɨ 'emuyeika maine, kaneuyeweka hepaɨna mɨyɨaneni mɨkɨ mɨyɨanekai hepaɨ.
1JO 2:7 Nenaki'erima, hekwamekɨ netixe'aitɨatɨ nepɨkatixe'utɨirie, 'aitsika meripaitɨ kanimiemetɨni pɨta matɨari paitɨ xemeixeiya. 'Ikɨ 'aitsika meripaitɨ mɨmieme, niuki kanihɨkɨtɨni matɨari paitɨ xemi'eni.
1JO 2:8 Peru 'apɨta, nekatinixe'utɨirieka 'aitsiaka hekwame, tita yuri mɨraine Kɨritsitu hetsie kanimatsiɨkɨni xehetsieta kanimatsiɨkɨni, yɨriya makuyeiximekɨ, tita yurikɨ mɨtihekɨariya mɨhekɨariyakɨri.
1JO 2:9 Kemɨ'ane hekɨaripa muyeika maine, peru yu'iwa 'uxietɨ, mɨkɨ yɨwipa 'akuxi kaniuyeikani.
1JO 2:10 Kemɨ'ane yu'iwa mɨnaki'erie hekɨaripa kaniuweni, hetsiena pɨtiumawe kɨmana metiketamɨrekɨ.
1JO 2:11 Kemɨ'ane yu'iwa mu'uxie yɨwipa kaniuweni, meta yɨwipa kaniuyeikani, 'atsipɨkatimate kemɨtimie yɨriya mekɨpiriyakɨ.
1JO 2:12 Neniwema nepɨtixe'utɨirie, tita 'axaxemɨte'uyuri xemɨteheuyehɨwiyariekɨ Kɨritsitu hetsɨa xemɨmiemetekɨ.
1JO 2:13 Xeme xemɨwapaapama nepɨtixe'utɨirie, xemeitimakɨ mɨkɨ tsutɨapai 'amuyeika. Temari nepɨtixe'utɨirie, xeme'iwaxɨkɨ 'axamɨtiyuriene. Tɨɨri nepɨtixe'uta'utɨiri, yu'ukiyari xemetimakɨ.
1JO 2:14 Xeme xemɨwapaapama nepɨtixe'uta'utɨiri, xemeitimakɨ mɨkɨ tsutɨapai 'amuyeika. Temari nepɨtixe'uta'utɨiri, xemɨtɨrɨkawikɨ, Kakaɨyari niukieya xehetsie mɨtiwiyakɨ, meta 'axamɨtiyuriene xema'iwaxɨkɨ.
1JO 2:15 Tita kwiepa mɨtimieme xepɨkatenaki'erieka, kepaɨmetɨ kwiepa mɨtixuawe xepɨkatenaki'erieka. Tita kwiepa mɨtimieme xɨka tinaki'erieka, mɨkɨ yu'ukiyari pɨkanaki'erie.
1JO 2:16 Kamɨtsɨ naitɨ kwiepa mɨtixuawe, ―tewitɨtɨ tita mɨtihiwe'erie, tita yɨhɨxikɨ mɨtihiwe'erie, yakɨ xeikɨa kemɨtiyukatawe'erie yupiini hepaɨtsita― mɨkɨ ta'ukiyari hetsɨa pɨkatimieme, mɨkɨ kwiepa pɨtimieme pɨta.
1JO 2:17 'Ikɨ kwie kanakuyeiximeni meta tita kwiepa memɨtama memɨtehiwe'erie kanakuyeiximeni, peru kemɨ'ane yamɨtikamie kemɨtinake Kakaɨyari, mɨkɨ kaniyuhayewani yuheyemekɨ.
1JO 2:18 Neuxei tɨɨri, hikɨ tukari kanaye'aniri kepauka mɨtapare, kexemɨte'enanakai kename xewitɨ 'uhamie Kɨritsitu 'aye'unietɨ, hikɨtɨtɨri yumɨiretɨ Kɨritsitu memaye'unie mekanixuaweni. 'Ayumieme tepɨtemate tukariri paye'a kepauka mɨtapare.
1JO 2:19 Tatsata mepayekɨ, matsiri tahetsɨa mepɨkamiemetetɨkai, xɨka tahetsɨa memiemetetɨnike, tahamatɨa mepuyuhayewakeyu. Mekanayekɨnetsɨari memɨmatsiɨkɨnikɨ tahetsɨa memɨkamiemetekɨ.
1JO 2:20 Mɨkɨ mɨpatsie heitserie kanixe'upitɨani xeyunaime, yunaitɨ xepɨtemate.
1JO 2:21 Nepɨkatixe'uti'utɨiri tita yuri mɨraine xemɨkamatekɨ, tita yuri mɨraine xemɨmatekɨ pɨta nepɨtixe'uti'utɨiri, naitɨ 'itarika tita yuri mɨrainetsie mɨka'ayeneikakɨ.
1JO 2:22 ¿Kepaikɨ pɨti'itawa? Kemɨ'ane mɨyuhekɨata mɨpaɨ 'utaitɨ kename Ketsutsi heitserie kahexeiya Kɨritsitutɨtɨ, mɨkɨ katini'itawani. Kemɨ'ane mɨyuhekɨata 'ukiyarieya kahexeiyatɨ meta nu'aya, mɨkɨ Kɨritsitu maye'unie kanihɨkɨtɨni.
1JO 2:23 Yunaitɨ nu'aya mekahexeiyatɨ memɨyuhekɨata, 'ukiyarieyata mepɨkahexeiya. Kemɨ'ane mɨkɨ nu'aya hexeiyatɨ muyuhekɨata, mɨkɨta 'ukiyarieya kanexeiyani.
1JO 2:24 Xeme tita xemɨte'u'eni tsutɨa paitɨ, xehetsie tiwiyatɨ keyuhayewani, xɨka xehetsie tiwiyatɨ 'uyuhayewa tita tsutɨa paitɨ xemɨte'u'eni, xemerita nu'ayatsie meta 'ukiyarieyatsie xetewiyatɨ xekaniyuhayewakuni.
1JO 2:25 Tukari mɨkaxɨwe kanihɨkɨtɨni tita mɨkɨ mɨtatiutahɨawixɨ temeixeiyanikɨ.
1JO 2:26 'Ikɨ 'ipaɨ nepɨtixe'u'utɨiri memɨxeheuyexɨrɨwa wahepaɨtsita.
1JO 2:27 Xemeri heitserie mɨkɨ kemɨtixe'upitɨa, mɨkɨ heitserie xemexeiya xehetsie tiwiyatɨ kaniyuhayewa, xeimeri xepɨkaheuyehɨwa mɨtixeti'ɨkitɨanikɨ. Mɨkɨ heitserie xemupitɨarie mɨkɨ hetsɨa mieme mɨtixe'ɨkitɨa hepaɨ naime hepaɨtsita, yuri maine, mɨkati'itawa, mɨtixe'uti'ɨkitɨa, mɨpaɨ hetsiena xetewiyatɨ xekeneyuhayewa.
1JO 2:28 Hikɨtsɨari neniwema hetsiena xetewiyatɨ xekeneyuhayewa, xɨka mɨpaɨ xeteyurieka, kepauka matsiɨkɨtɨ mayani mɨkɨ, 'aixɨa tepɨtetamaika tekatatetewiyatɨ hɨxiena kepauka munuani.
1JO 2:29 Xɨka xetemaika mɨkɨ yamɨtiyuriene kemɨtiheitserie, yaxeketenemaikata yunaitɨ yamemɨteyurie kemɨtiheitserie hetsiena mekaniyekɨne.
1JO 3:1 Neuxei ta'ukiyari ketatinaki'erie, mɨkɨkɨ Kakaɨyari niwemama teputaterɨwarie, niwemama tepɨhɨkɨ. 'Ayumieme kwiepa memɨtama mepɨkatatsimate mɨkɨ memɨkaheitimaiwawekaikɨ.
1JO 3:2 Nenaki'erima, hikɨtɨtɨri Kakaɨyari tekaniniwemamatɨni, peru 'akuxi pɨkamatsiɨkɨ ketemɨ'aneneni. Mɨpaɨ tepɨtemate, kepauka matsiɨkɨtɨ mayani Kɨritsitu, mɨkɨ kemɨ'ane, hepaɨna tepɨ'aneneni, tekaneixeiyakuni mɨkɨ kemɨ'ane.
1JO 3:3 Yunaitɨ mɨpaɨ memɨte'ikwewie mepuyu'itie yɨkɨmana mɨkɨ kemɨti'itiya hepaɨ.
1JO 3:4 Yunaitɨ 'axamemɨteyurie 'aitsika mekanititsanani, tita 'axamɨti'ane 'aitsika tsaname kanihɨkɨtɨni.
1JO 3:5 Xeme mɨpaɨ xepɨtemate Ketsutsi Kɨritsitu matsiɨkɨtɨ matɨakɨ mɨtatsinawairienikɨ tita 'axatemɨteyurie. Tita 'axamɨti'ane pumawe hetsiena.
1JO 3:6 Yunaitɨ hetsiena memɨtewiya 'axamepɨkateyurie. Yunaitɨ 'axamemɨteyurie mepɨka'ixeiyawawe meta mepɨkaheitimaiwawe.
1JO 3:7 Neniwema xɨka tɨma xewitɨ kaxeheuyexɨrienike. Kemɨ'ane yamɨtiyuriene kemɨtiheitserie, mɨkɨ heitserie kanexeiyani mɨkɨ heitserie mexeiya hepaɨ.
1JO 3:8 Kemɨ'ane 'axamɨtiyuriene Kauyumarie hetsɨa kanimiemetɨni, Kauyumarie 'axamɨtiyurienekɨ tsutɨa paitɨ. Kakaɨyari nu'aya 'ayumieme matsiɨkɨtɨ kanayani mita'unakɨ Kauyumarie tita mɨtiyuriene.
1JO 3:9 Yunaitɨ Kakaɨyaritsie memɨyekɨ 'axamepɨkateyurie mɨkɨ 'imɨarieya wahetsie mɨyekakɨ, 'axamemɨteyurieni mepɨkayɨwawe Kakaɨyaritsie memɨyekɨkɨ.
1JO 3:10 'Ipaɨ mepɨtematsiɨkɨ Kakaɨyari niwemama meta Kauyumarie niwemama: Kemɨ'ane yamɨkatiyuriene kemɨtiheitserie meta kemɨ'ane yu'iwa mɨkanaki'erie, mɨkɨ Kakaɨyari pɨkanu'aya.
1JO 3:11 Mɨpaɨ kanaineni niuki tsutɨa paitɨ xemi'eni: Tanaitɨ tepɨtanaki'erieka maine.
1JO 3:12 Kahini hepaɨ tepɨkayɨaka, mɨkɨ 'axamɨtiyuriene hetsɨa kanimiemetɨkaitɨni, yumuta kaniumieni. ¿Titayari timi? Tita mɨtiyurienekai 'axamɨti'anekaikɨ, mutaya tita mɨtiyurienekai mɨheitseriekaikɨ.
1JO 3:13 Ne'iwama xepɨkahɨxiyaka xɨka kwiepa memɨtama mexe'uxieka.
1JO 3:14 Tame ta'iwamarixi temɨwanaki'eriekɨ 'ayumieme tepɨtemate temɨtapataxɨ tekamɨkitetɨtɨri te'ayenenieretɨ pɨta. Kemɨ'ane mɨkatiyukanaki'erie mɨkitɨ 'apuyeika 'akuxi.
1JO 3:15 Yunaitɨ yu'iwama memɨwa'uxie teyumemiwamete mekanihɨkɨtɨni, xeme xepɨtemate tiyumemiwame yɨkɨmana tukari mɨkaxɨwe pɨkahexeiya.
1JO 3:16 'Ikɨkɨ tepeitima naki'eriya, Ketsutsi Kɨritsitu tahetsiemieme yutukari mɨyetuakɨ. Kaneuyeweka tameta ta'iwama wahetsiemieme tatukari temɨyetuani.
1JO 3:17 Kemɨ'ane yupiini kwiepa timieme mɨrexeiya, mixeiya yu'iwa reuyehɨakame, xɨka yu'iyari 'anunaka hepaɨtsitana, ¿keri timatsiɨkɨ kename Kakaɨyari naki'eriyaya hexeiya?
1JO 3:18 Neuxei neniwema, tepɨkatanaki'erieka niukikɨ xeikɨa yakɨ xeikɨa. Ketemɨteyuriekɨ pɨta yurikɨ tepɨtanaki'erieka.
1JO 3:19 Mɨpaɨ tekatenimaikakuni tita yuri mɨrainetsie temɨmiemetekɨ, Kakaɨyari hɨxie mɨpaɨ ta'iyari tepɨtenɨtɨaka:
1JO 3:20 xɨka ta'iyari tatsi'utate'ani tita ta'iyari mɨkatimate hepaɨtsita, Kakaɨyari pɨta matsi kanimariweni keyuri ta'iyari meta naime katinimaika.
1JO 3:21 Nenaki'erima, ta'iyari xɨka katatsi'utatieni, 'aixɨa tepɨtemaika Kakaɨyari hɨxie,
1JO 3:22 meta naime tita temɨte'itawawiriwa pɨtatiyetuiriwa yatemɨtekahukɨ kemɨti'aita meta tita mɨtinake yatemɨteyuriekɨ.
1JO 3:23 'Ipaɨ katini'aitani: yuri temɨteta'erienikɨ kemɨ'ane Kakaɨyari nu'aya mɨhɨkɨtsie Ketsutsi Kɨritsitu hetsie, temɨtanaki'eriekakɨ tanaitɨ mɨkɨ kemɨtatiu'aitɨa.
1JO 3:24 Kemɨ'ane yamɨtikamie kemɨti'aita, Kakaɨyari hetsie tiwiyatɨ puyuhayewa, Kakaɨyari meta hetsiena tiwiyatɨ kaniyuhayewamɨkɨ. 'Ipaɨ tekatenimaika tahetsie tiwiyatɨ muyuhayewa, yu'iyari mɨtatsi'umikɨ.
1JO 4:1 Nenaki'erima yunaime 'iyarite yuri xepɨkatewa'eririeka, matsi xekeniwaruta'inɨata 'iyarite tsiparatsɨ xɨka Kakaɨyari hetsɨa memiemetetɨni, yumɨiretɨ Kakaɨyari niukametemama meyuxatatɨ mekaneutayeixɨani kwiepa.
1JO 4:2 'Ipaɨ xepɨteheitimani Kakaɨyari 'Iyarieya: Yunaitɨ 'iyarite memɨtehekɨata Ketsutsi Kɨritsitu kename tewitɨtɨ hɨkɨtɨkai, mɨkɨ Kakaɨyari hetsɨa mekanimiemetetɨni.
1JO 4:3 Yunaitɨ 'iyarite Ketsutsi memɨkahekɨata mɨkɨ Kakaɨyari hetsɨa mepɨkamiemete, matsi Kɨritsitu memaye'unie hetsɨa mekanimiemetetɨni. Xeme xepu'enana kename mɨkɨ 'uhamie, hikɨri kwiepa kaniuyeikani.
1JO 4:4 Neniwema, xeme Kakaɨyari hetsɨa xekanimiemetetɨni meta Kakaɨyari niukametemama memuyuxata xekaniwara'iwa, mɨkɨ xehetsie mɨtiwiya kanitɨrɨkaɨyeni keyuri mɨkɨ kwiepa memɨtama wahetsie mɨtiwiya.
1JO 4:5 Mɨkɨ kwiepa mekanimiemetetɨni, 'ayumieme kwiepa mieme mekatenikuxatani meta kwiepa memɨtama mekaniwa'enieka.
1JO 4:6 Tametsɨ Kakaɨyari hetsɨa tekanimiemetetɨni, kemɨ'ane Kakaɨyari mɨmate katani'enieka, kemɨ'ane Kakaɨyari mɨkamate pɨkatatsi'enie. 'Ikɨkɨ tepɨwamate 'iyari yuri maine meta 'iyari mɨtiyu'itaiya.
1JO 4:7 Kamɨtsɨ nenaki'erima, tepɨtanaki'erieka tanaitɨ, naki'eriya Kakaɨyari hetsɨa kanimiemetɨni, yunaitɨ memɨteyukanaki'erie Kakaɨyari hetsie mekaniyenuiwa, Kakaɨyari mekanimateni.
1JO 4:8 Kemɨ'ane mɨkatiyukanaki'erie Kakaɨyari pɨkahetimaiwe, Kakaɨyari mɨtiyukanaki'eriekɨ.
1JO 4:9 'Ikɨkɨ tahetsie matsiɨkɨtɨ kanayani Kakaɨyari kemɨtatinaki'erie, Kakaɨyari yuniwe muyuxewi meyenɨ'akɨ kwiepa, mɨkɨkɨ temayenenierenikɨ.
1JO 4:10 Mɨpaɨ kani'aneni naki'eriya: Tameri tepɨka'inaki'eriekai Kakaɨyari, mɨkɨ pɨta pɨtatsinaki'eriekai, yuniwe kaneyenɨ'ani mawari mayanikɨ temɨteheuyehɨwiyarienikɨ tita 'axatemɨte'uyuri.
1JO 4:11 Nenaki'erima Kakaɨyari xɨka mɨpaɨ tatinaki'eriekaitɨni, kaneuyeweka tameta mɨpaɨ temɨtetanaki'eriekakɨ tanaitɨ.
1JO 4:12 Xewitɨ pɨka'ixeiyawe Kakaɨyari hatsuaku, xɨka tetanaki'erieka tanaitɨ, Kakaɨyari tahetsie tiwiyatɨ kaniyuhayewa, mɨkɨ kemɨtiyukanaki'erie, naki'eriya kanimatsiɨkɨni tahetsie.
1JO 4:13 'Ipaɨ tepɨtemate hetsiena temɨtewiya mɨkɨrita tahetsie mɨtiwiya, yu'iyari mɨtatsi'umikɨ taxexuime.
1JO 4:14 Tame tepunenierixɨ tekatenihekɨatani ta'ukiyari yuniwe meyenɨ'akɨ kwiepa memɨtama wawikweitsitɨwame.
1JO 4:15 Kemɨ'ane mɨyuhekɨata mɨpaɨ 'utaitɨ kename Ketsutsi Kakaɨyari nu'aya hɨkɨ, Kakaɨyari hetsiena tiwiyatɨ kaniyuhayewa, mɨkɨta Kakaɨyari hetsie tiwiyatɨ puyuhayewa.
1JO 4:16 Tame tekatenetimani kemɨtatinaki'erie Kakaɨyari, yuri teteniuta'erieni naki'eriyayatsie kemɨtatinaki'erie. Kakaɨyari katiniyukanaki'erieka. Kemɨ'ane tiyukanaki'erietɨ muyuhayewa, mɨkɨ Kakaɨyaritsie tiwiyatɨ kaniyuhayewamɨkɨ, Kakaɨyari meta hetsiena tiwiyatɨ puyuhayewa.
1JO 4:17 Naki'eriya mɨpaɨ katinaye'ani tahetsie 'aixɨa temɨtetamaikakɨ mɨkɨ tukaritsie kepauka 'itsɨkame mɨtatsita'inɨata, hepaɨna temɨ'anenekɨ tame 'ena kwiepa mɨkɨ mɨ'ane hepaɨ.
1JO 4:18 Xɨka tiyukanaki'erieka marika pɨkaxɨawe. Naki'eriya 'aixɨa mɨ'ane marika payeweweiya. Kemɨ'ane mɨma kani'uximatɨarieka, kemɨ'ane mɨma pɨka'aye'awe tiyukanaki'erietɨ.
1JO 4:19 Tame tepɨtetakanaki'erie mɨkɨ meri mɨtatsi'utanaki'erikɨ.
1JO 4:20 Xɨka xewitɨ ya'utayɨni: «Ne Kakaɨyari nepɨnaki'erie» haitɨ, peru xɨka yu'iwa 'uxieka, mɨkɨ katini'itawani. Kemɨ'ane yu'iwa xeiyatɨ mɨka'inaki'erie, pɨkayɨwe Kakaɨyari minaki'erieka mɨka'ixeiyawe.
1JO 4:21 Mɨkɨ 'ikɨ 'aitsika kataniyetuirieni hetsɨana mɨmieme: kemɨ'ane Kakaɨyari mɨnaki'erie, yu'iwata kenaki'erieka.
1JO 5:1 Yunaitɨ yuri memɨte'erie Ketsutsi kename Kɨritsitu hɨkɨ heitserie mupitɨarie Kakaɨyari hetsie mekaniyekɨne, kemɨ'ane mɨkɨ 'ukiyarieya mɨnaki'erie, niwemamata kaniwanaki'erieka.
1JO 5:2 Tame 'ipaɨ tepɨtemate Kakaɨyari niwemama temɨwanaki'erie, kepauka Kakaɨyari temɨnaki'erie, kepauka yatemɨtekahu kemɨti'aita.
1JO 5:3 'Ipaɨ tekateniyurieka xɨka Kakaɨyari tenaki'erieka: yatepɨtekahuni kemɨti'aita. 'Aitsikaya pɨkahahete,
1JO 5:4 naitɨ Kakaɨyari hetsie mɨyetɨa kwiepa mieme katina'iwani. Tita yuri temɨte'erie, mɨkɨ kanihɨkɨtɨni tita 'ari mɨre'iwa kwiepa timieme.
1JO 5:5 ¿Kepaikɨ pɨhɨkɨ kwiepa mieme ma'iwarɨme? 'Ikɨri pɨhɨkɨ, kemɨ'ane yuri mɨti'erie kename Ketsutsi Kakaɨyari nu'aya hɨkɨ.
1JO 5:6 'Ikɨ Ketsutsi Kɨritsitu kanihɨkɨtɨni kemɨ'ane haa xuriya 'inɨariyarikɨ munua, haa 'inɨariyari hexeiyatɨ xeikɨa pɨkanua, matsi haa xuriya 'inɨariyari hexeiyatɨ punua. 'Iyari mɨpaɨ katinihekɨatanita, 'Iyari yuri maine.
1JO 5:7 Mepɨyuhaika memɨtehekɨata taheima, Ta'ukiyari, Nu'aya, 'Iyarieya Mɨtiyupata mepɨhɨme. 'Ikɨ yuhaikatɨ mekaniyuxewini.
1JO 5:8 Mepɨyuhaika memɨtehekɨata kwiepa: Kakaɨyari 'Iyarieya, haa, meta xuriya. Yuhaikatɨ 'axeikɨa mepɨtehekɨata.
1JO 5:9 Teɨteri kememɨtehekɨata tekaniwa'enieka, merikɨte, Kakaɨyari kemɨtihekɨata matsi kaniheitserietɨni, 'ipaɨ katinihekɨatani Kakaɨyari, yuniwe hepaɨtsita katiniutahekɨata.
1JO 5:10 Kemɨ'ane yuri mɨti'erie Kakaɨyari Nu'ayatsie mɨkɨ kemɨtiutahekɨataxɨ pexeiya yuhetsie. Kemɨ'ane Kakaɨyari yuri mɨkati'eririe, mɨkɨ Kakaɨyari ti'itawame kanayeitɨwani, yuri mɨkatiuta'erikɨ kemɨtiutahekɨataxɨ Kakaɨyari yuniwe hepaɨtsita.
1JO 5:11 Mɨpaɨ paine tita mɨtihekɨata: Kakaɨyari kataniupitɨani tukari mɨkaxɨwe, nu'ayatsie kanixuaweni mɨkɨ tukari.
1JO 5:12 Kemɨ'ane nu'aya mexeiya, tukari pexeiya, kemɨ'ane Kakaɨyari Nu'aya mɨkahexeiya, tukari pɨkahexeiya.
1JO 5:13 'Ikɨ nepɨtixe'uti'utɨiri xeme yuri xemɨte'erie kemɨ'ane Kakaɨyari nu'aya mɨhɨkɨtsie, xemɨtemaikakɨ tukari mɨkaxɨwe xepexeiya.
1JO 5:14 'Ipaɨ 'aixɨa tepɨtetamate hɨxiena: Xɨka tixaɨtɨ tete'itawawirieni kemɨtinake, pɨtatsi'enie.
1JO 5:15 Mɨkɨ meta, xɨka mɨpaɨ tetemaika mɨtatsi'enie tita temɨte'iwawirie, tepɨtemate 'ari temeixeiya tita temɨte'iwawirie.
1JO 5:16 Xɨka xewitɨ 'ixeiya yu'iwa 'axatiyurieneme kemɨkatimɨni, kanitawawiriemɨkɨ yu'iwatsie mieme, mɨkɨ Kakaɨyari tukari kanipitɨamɨkɨ. Tita 'axamɨti'ane nekanixatani 'axaxɨkatiuyurieni mɨka'umɨnikɨ. Kanixuaweni xewitɨ mɨmɨnikɨ xɨka 'axatiuyurieni, mɨkɨtsie mieme xemitawawirienikɨ 'atsinepɨkahaine.
1JO 5:17 Naitɨ mɨkatiheitserie 'axakani'aneneni, peru tita 'axamɨti'ane puxuawe 'axaxɨkatiuyurieni mɨkamɨnikɨ.
1JO 5:18 Tame tepɨtemate yunaitɨ Kakaɨyaritsie memɨyekɨ 'axamepɨkateyurie: Ketsutsi Kɨritsitu Kakaɨyaritsie mɨyetɨa kaniwa'ɨwiyani, meta 'axamɨtiyuriene pɨkawamayɨa.
1JO 5:19 Tepɨtemate Kakaɨyari temɨniwemama, meta naitɨ kwiepa mɨtimieme 'axamɨtiyuriene hetsie tiwiyatɨ 'apuwe.
1JO 5:20 Tepɨtemateta Kakaɨyari nu'aya munua, mɨtatsi'enatɨa temimaikakɨ mɨkɨ muyuri Kakaɨyari. Tame mɨkɨ muyuritsie tepɨtewiya nu'ayatsie Ketsutsi Kɨritsitu hetsie. Mɨkɨ yurikɨ kanikakaɨyaritɨni, tukari mɨkaxɨwe kanihɨkɨtɨni.
1JO 5:21 Neniwema, xekeneyukweriwayurieka kakaɨyarixi wahepaɨtsita.
2JO 1:1 Ne nemɨxe'ukiyari, nekanixewaɨritɨaka 'uka pemanayexeiyarie 'aniwema meta, yurikɨ nekanixenaki'erieka ―ne xeikɨa pɨkatixaɨ, matsi tanaitɨ temeitima tita yuri mɨraine tepɨxenaki'erie―,
2JO 1:2 tita yuri mɨraine tahetsie mɨyekakɨ meta, mɨtatsiteɨtakɨ yuheyemekɨ:
2JO 1:3 Kakaɨyari ta'ukiyari, Ketsutsi Kɨritsitu ta'ukiyari nu'aya, yurikɨ me'utiyuatɨ meteyukanaki'erietɨ, 'aixɨa mekete'u'iyarini xehetsiemieme, mekexenenimayaka, mekexepitɨaka yu'iyaritsie xemɨka'uximatɨariekakɨ.
2JO 1:4 Waɨkawa nepɨnetemawiekai nemɨtimariekɨ 'aniwema hipatɨ tita yuri mɨrainetsie metewiyatɨ memu'uwakɨ, 'aitsika ta'ukiyari hetsɨa mieme ketemɨte'upitɨarie.
2JO 1:5 Hikɨri 'uka hekwamekɨ nemati'aitɨatɨ nepɨkamati'utɨirie, mɨkɨ 'aitsika tsutɨapai temeixeiyakai nepɨmati'utɨirie pɨta. 'Ipaɨ nepɨmatiwawirie, tanaitɨ temɨtanaki'eriekakɨ.
2JO 1:6 'Ipaɨ tekateniyurieka xɨka teteyukanaki'erieka: yatepɨteyurieka kemɨti'aita. 'Ikɨ kani'aitsikatɨni: xeteyukanaki'erietɨ xemu'uwanikɨ, tsutɨapai kexemɨte'u'enana.
2JO 1:7 Yumɨiretɨ te'itawamete mekaneutayeixɨani kwiepa, mɨkɨ mepɨkatehekɨata kename Ketsutsi Kɨritsitu tewi matɨatsie metewiya. Kemɨ'ane mɨpaɨ mɨtiyuriene mɨkɨ ti'itawame meta Kɨritsitu maye'unie kanihɨkɨtɨni.
2JO 1:8 Xekeneyukweriwayurieka kapa xeheiyehɨanikɨ ta'uximayatsika, matsi yu'iwarika naime xemɨpitɨarienikɨ.
2JO 1:9 Yunaitɨ memanuyehaitɨrɨwe, tita Kɨritsitu mɨti'ɨkitatsie metewiyatɨ memɨkayuhayewa, mɨkɨ Kakaɨyari mepɨkahexeiya. Kemɨ'ane tita mɨti'ɨkitatsie tiwiyatɨ mɨyuhayewa, mɨkɨ yu'ukiyari pexeiya meta nu'aya.
2JO 1:10 Xewitɨ xɨka xehetsɨa nuani 'ikɨ 'ɨkitsika kahexeiyatɨ, xepɨka'i'inieka yukie meta xepɨka'iwaɨritɨaka.
2JO 1:11 Kemɨ'ane mitawaɨritɨani, mɨkɨ 'uximayatsikaya 'axakemɨ'anene, mɨpaɨ 'anetɨ kanayeimɨkɨ.
2JO 1:12 Tsepanetɨ waɨkawa nemɨtixetaxatɨanikeyu, nepɨkanewaɨriya xapatsie nemɨtixehaka'utɨirienikɨ. Matsitsɨ xehetsɨa nepeuyeimɨkɨ pɨta, tahɨxie te'utinenieretɨ temɨtetaxatakɨ maye'anikɨ tatemawierika.
2JO 1:13 'A'iwa 'uka manayexeiyarie niwemama mepɨmatsiwaɨritɨa. Mɨpaɨ xeikɨa kani'aneni.
3JO 1:1 Ne nemɨ'a'ukiyari, nepɨmati'utɨirie nemɨmatsinaki'erie Kayu, yurikɨ nepɨmatsinaki'erie.
3JO 1:2 Neuxei, 'ekɨ nemɨmatsinaki'erie, nepɨnenenewie naimekɨ 'aixɨa pemɨreumienikɨ meta 'aixɨa pemɨreu'eriekakɨ, 'a'iyari 'aixɨa mɨtimie hepaɨ.
3JO 1:3 Waɨkawa nepɨnetemawiekai me'u'axɨaku ta'iwama meta metehekɨatakaku 'ahepaɨtsita yuri kepemaine, yaxeikɨa 'ekɨ tita yuri mɨrainetsie yapetiyurienetɨ pemuyeikakɨ.
3JO 1:4 Keyanemɨkatinetemawie, waɨkawa matsi nepɨnetemawie yanetimaitɨ kename neniwema hipatɨ me'u'uwa tita yuri mɨrainetsie metewiyatɨ.
3JO 1:5 Neuxei, 'ekɨ nemɨmatsinaki'erie, yamɨtikamie hepaɨ pekaniyɨaneni naime ta'iwama wahetsiemieme kepemɨtiyuriene, tsepa pemɨkawamate.
3JO 1:6 Mɨkɨ mekateniutahekɨata meyukuxeɨrieku kepemɨti'akanaki'erie. 'Aixɨa pekaniwayuriemɨkɨ pewaparewietɨ wahuyeta, Kakaɨyari kemɨtinake petiuka'iyaritɨ.
3JO 1:7 Kemɨ'ane Ketsutsi Kɨritsitu mɨhɨkɨtsie mieme meteta'uximayatake mekanayekɨne, tixaɨtɨ mepɨkatewarutanaki'eriri hipame nuiwarite.
3JO 1:8 'Ayumieme kaneuyeweka tame temɨwatanaki'erienikɨ takie mɨkɨ mɨyamemɨ'anene meta tanaitɨ tita yuri mɨrainetsie mieme temɨte'uximayakakɨ.
3JO 1:9 Ne 'etsiwa nepɨtiwaruta'utɨiri memɨyutixexeɨriwa, peru mɨkɨ Riyutɨrepexi manuyehaitɨa mayuyeitɨamɨkɨ pɨkatatsi'upitɨa.
3JO 1:10 'Ayumieme xɨka nehenuani nekaneye'eritɨamɨkɨ kemɨtiyuriene niuki 'axamɨ'anenekɨ tatsiniukimatɨ. Mɨkɨkɨ xeikɨa pɨkanaki'a, matsi mɨireme pɨtiyurienikeyu. Ta'iwama pɨkawapitɨa, pɨkawataunie mɨkɨ memɨwapitɨaku, memɨyutixexeɨriwa watsata pɨwaranuyenɨ'awa.
3JO 1:11 Neuxei, 'ekɨ nemɨmatsinaki'erie, 'axamɨti'ane pepɨka'ɨkeni, 'aixɨa mɨti'ane pɨta kene'ɨkeni. Kemɨ'ane 'aixɨa mɨtiyuriene Kakaɨyari hetsɨa kanimiemetɨni, kemɨ'ane 'axamɨtiyuriene Kakaɨyari pɨkaxeiyawe.
3JO 1:12 Yunaitɨ mepɨtehekɨata Remetɨriyu hepaɨtsita meta tita yuri mɨraine pɨtiutahekɨataxɨ hepaɨtsitana. Tameta tepɨtehekɨata hepaɨtsitana 'ekɨ pepɨtimate ketemɨtehekɨata muyurikɨ.
3JO 1:13 Netsɨ waɨkawa nepɨmatitaxatɨanikeyu, peru nepɨkanewaɨriya xapatsie nemɨmeraka'utɨirienikɨ.
3JO 1:14 Nepɨmatsixeiyamɨkɨkaku pɨta kwitɨwa, tahɨxie te'utinenieretɨ tepɨtetaxata.
3JO 1:15 'A'iyaritsie pepɨka'uximatɨarieka. 'Ahamikuma 'ena mepɨmetsiwaɨritɨa. 'Ekɨta muwa paitɨ keniwarewaɨritɨaka yuxexuime mɨkɨ temɨwanaki'erie.
JUD 1:1 Ne Kura, Ketsutsi Kɨritsitu hetsiemieme nekatini'uximayatametɨni meta Kakuwu 'iwaya nekanihɨkɨtɨni. Nekanixewaɨritɨaka xeme xemɨnaki'eriwa Kakaɨyari mɨta'ukiyaritsie xetewiyatɨ, Ketsutsi Kɨritsitu mɨxe'ɨwiya xemuta'inierie xemɨtawikweitsitɨarienikɨ:
JUD 1:2 Xekenenimayatsieka, xekepitɨarieka yu'iyaritsie xemɨka'uximatɨariekakɨ meta xekenaki'eriwani waɨkawa.
JUD 1:3 Nenaki'erima, kwini mieme nekaninemexɨitɨakaitɨni nemɨtixeti'utɨirienikɨ tanaitɨ 'axeikɨa ketemɨtetawikweitsitɨariexime hepaɨtsita, peru kaneuyeweka yanemɨtixeti'utɨirienikɨ hikɨ waɨriyarika nexepitɨatɨ xemɨyukwitɨwenikɨ tita yuri temɨte'erie hetsiemieme, tita Kakaɨyari teɨterimama xeimieme temɨteyetuiriyarie hetsiemieme.
JUD 1:4 Hipatɨ teɨteri tatsata mekanatahaxɨani 'awie, meripai mekaniukayatsariexɨani mɨpaɨ memɨtemari'itɨarienikɨ. Kakaɨyari mepɨka'ayexeiya, mekanipata tita Kakaɨyari mɨtiwamikwa 'aixɨa tiuka'iyaritɨ, para memɨyutatuanikɨ merukuyatɨwetɨ xeikɨa. Mekaniyuku'imawani mɨpaɨ me'utiyuatɨ kename meka'imate kemɨ'ane hɨkɨatɨ mɨtakutsiyari mɨtati'aitɨwame Ketsutsi Kɨritsitu.
JUD 1:5 Tsepanetɨ xeme mɨpaɨ xemɨtehetima naimekɨ, nekanixehaye'eritɨamɨkɨ kemɨtiuyɨ hepaɨtsita kepauka Ti'aitame mɨwarutawikweitsitɨa 'Ixaheritsixi teɨteriyari 'Ekipitu kwieyaritsie wareyewitɨka, warutawikweitsitɨaka 'arike kaniwaruka'una mɨkɨ yuri memɨkate'eriekai.
JUD 1:6 Niuki tuayamete memɨkayɨ'ɨwiyakai kememɨtehɨritɨariekai, matsi yukie memuku'eiri, mɨkɨ Kakaɨyari kaniwaranutaxɨrieni yuheyemekɨ yɨriyatsie memɨtaxanetsienikɨ tukari mɨmariwe 'aye'ayu.
JUD 1:7 Yaxeikɨata Tsuruma meta Kumuxa meta kiekarite 'auriena mamanetɨkatei, 'inɨari memakɨnekɨ memari'itɨarietɨwetɨ, mete'uka'eniexɨaka taipa yuheyemekɨ mɨtaiwetsie, 'amemu'uwakaikɨ mɨkɨ mewakumaɨwatɨ kemɨ'ane mɨkawa'ɨyatɨkai mɨkawakɨnatɨkai, me'ikumaɨwatɨ titakɨ memɨteyutsewiximakai.
JUD 1:8 Peru hikɨ miemeteta yaxeikɨa mekani'aneneni, kememɨteheinɨtsa mekanitsewiximaka yuwaiyari, mekanixani'erieka kemɨ'ane ti'aitame mɨhɨkɨ, mekaniwatsewiximaka mamariwawemete 'axame'utiyuatɨ wahepaɨtsita.
JUD 1:9 Mɨkɨ Miyeri niuki tuayamete tiwa'aitɨwame mɨhɨkɨ, kepauka Kauyumarie hamatɨa mɨkɨ niuki memɨxɨatɨakai Muitsexi kaxarieya hepaɨtsita, mɨkɨ pɨkayuwaɨriyakai 'axamɨtitahɨawekɨ Kauyumarie hetsie tiuhɨpatɨ, matsi mɨpaɨ kaniutayɨni: «Ti'aitame kematsi'utatieni».
JUD 1:10 'Ikɨ pɨta matsi 'axamekaniutiyuaneni tita 'atsimemɨkatemate hepaɨtsita, kememɨtemate, yɨkɨmana xeikɨa mepɨtemate tatewama memɨka'u'iyari wahepaɨ, mɨpaɨ metemaitɨ 'ayumieme mekaniyuka'unani.
JUD 1:11 Xɨa'ui kemɨ'ane Kahini huyeta memeukayunixɨ hepaɨna meteyurietɨ. Tuminikɨ mekaniyutatuani memeuyexɨrienikɨ Warami hepaɨ mɨti'iwamɨkɨkai hepaɨ, mekaneuyeweni kepauka Kure Muitsexi maye'uniekaitsie.
JUD 1:12 'Ikɨ mekanitsewiximaka xe'ikwai kepauka xeyunaki'erietɨ xemɨtekwa'a, memɨkateheuyuyehɨwiriekɨ kepauka xehamatɨa memɨtekwa'a, muxatsi wahɨwemete mehayuyeitɨatɨ mepɨteyumikwa xeikɨa. Haiwitɨri mayewawaki hepaɨ mekani'aneneni 'ekakɨ meku'enetɨwetɨ, kɨyexi hepaɨ mekani'aneneni memɨka'utixuxuawere tukari maye'axetsie, hutakɨa mepukwi, mepɨwatihunarietɨka.
JUD 1:13 Mematsiɨkɨtɨ mepayuyeitɨwa kememɨteyurie meyutewiyatsitɨatɨ, yaxeikɨa hamewari mayu'eriya mɨkwaimuxa matsiɨkɨme kemɨrayuyeitɨwa haramaratsie. Xurawetsixi memeuyexɨrɨwe wahepaɨ mekani'aneneni, yɨriya kwi mɨyɨwi kaniu'ɨwiyarieni wahetsiemieme yuheyemekɨ.
JUD 1:14 Mɨya memɨ'anene meripai katiniwakuxaxatɨwakaitɨni 'Enuki 'Arani mɨxiɨyarieyatɨkai 'atahutarieka mieme, mɨpaɨ 'utaitɨ: «Ti'aitame nekaniuxeiya nuaximeme yuteɨterima warawitɨtɨ yumɨireme miriyari meyupaɨmeme,
JUD 1:15 yunaime wataxanetake, yunaitɨ Kakaɨyari memɨka'ayexeiya wahetsie tiuhɨanike naime hepaɨtsita kememɨte'uyuri Kakaɨyari meka'ayexeiyatɨ watahɨaweke, naime niuki mɨhaxɨaya hepaɨtsita, kememɨte'iniukima Kakaɨyari 'axateyuruwamete Kakaɨyari memɨka'ayexeiya».
JUD 1:16 Mɨkɨ mekanihɨkɨtɨni niuki xɨatɨakate niukixiwiwamete, kememɨte'ukahiwe'erie xeikɨa 'amekaniu'uwani, waɨkawa mepɨtekuxata meteyukatawe'erietɨ, niukikɨ me'utiniutɨ mekaniwatemawieritɨaka teɨteri memɨwara'iwanikɨ.
JUD 1:17 Xemetsɨ nenaki'erima, niuki xekena'eriwani meripaitɨ kememutiyua Tati'aitɨwame Ketsutsi Kɨritsitu nɨ'arimama yakatiyɨwekaku 'akuxi.
JUD 1:18 Mɨpaɨ mekatenixekɨhɨawekaitɨni: «Tukari taparirɨmekaku mekanitixuawerikuni teyunanaimawamete, 'amekaniu'uwakuni kememɨte'ukahiwe'erie xeikɨa Kakaɨyari meka'ayexeiyatɨ».
JUD 1:19 Mɨkɨ mekanihɨkɨtɨni kemɨ'ane teɨteri yuhetsie memɨtewawiyatsitɨa, 'iyaritsie memɨtewiya meta 'iyaritsie memɨkatewiya, peru yuri 'Iyari memɨkahexeiya.
JUD 1:20 Peru xeme nenaki'erima, xekeneyutseiriyani yunaitɨ, yuri kexemɨte'erie tita mɨtipatsietsie, xekeneyunenewieka 'Iyari Mɨtiyupatatsie xetewiyatɨ.
JUD 1:21 Xekeneyɨ'ɨwiyani Kakaɨyari xenaki'eriekaku, xekeneuta'ikwewani maye'anikɨ Tati'aitɨwame Ketsutsi Kɨritsitu kepauka mɨxetinenimayata mɨxepitɨani tukari mɨkaxɨwe.
JUD 1:22 Xekeniwanenimayaka hipame memeu'erietɨwe,
JUD 1:23 xekeniwawikweitsitɨaka mɨkɨ xewaranayehapanatɨ taipa. Hipame meta kexemɨtewanenimaya xekeneumamaka matsi, xekenexani'erieka 'atsita wa'ixuriki xɨka tsewiximarieka kememɨte'uyuri yuwaiyaritsie metewiyatɨ.
JUD 1:24 Kakaɨyari muyuxewi, tatsiwikweitsitɨwame, mɨyɨwe mɨxe'ɨwiyani xemɨka'atixɨrɨwenikɨ, meta mɨyɨwe mɨxe'aye'atɨanikɨ kemɨ'ane witsimɨ'ane hɨxie xehetsie katiuhɨiwakaku meta xeyutemamawiekaku,
JUD 1:25 mɨkɨ witsiketixeiyarieka, kemariweni, ketɨrɨkaɨyeni meta keti'aitani, Ketsutsi hetsie tiwiyatɨ tati'aitɨwame, tukari katsutɨariewekaku, hikɨ tukari meta yuheyemekɨ mieme. Mɨpaɨ xeikɨa kani'aneni.
REV 1:1 Ketsutsi Kɨritsitu matsiɨkɨme kanayeitɨani, Kakaɨyari mɨpaɨ katinipitɨani mɨpaɨ mɨtiwahekɨatɨakakɨ mɨkɨ hetsiena mieme memɨte'uximaya, mɨpaɨ memɨtemaikakɨ kwitɨwa kemɨtiyɨni. Ketsutsi Kɨritsitu yuniuki tuayame kaneyenɨ'ani Wani tiyu'uximayatsiriwame hɨxie matsiɨkɨtɨ mayuyeitɨanikɨ.
REV 1:2 Kakaɨyari niukieya kemaine, mɨpaɨ nekatinihekɨatani, Ketsutsi Kɨritsitu kemɨtihekɨata, kenemɨtixei yanekatinaka'utɨani.
REV 1:3 'Aixɨa kani'itɨarieka kemɨ'ane mititerɨwa, meta memi'enieka 'ikɨ niuki kemɨtiuhekɨatsie, xɨka yametekakɨne kemɨre'uxa 'ikɨtsie, tukari kaneutihuraniri yamɨtiyɨnikɨ.
REV 1:4 Ne, Wani, nekatinixe'utɨirieka 'atahuta kiekariyaritsie xemɨyutixexeɨriwa 'Atsiya kwieyaritsie: 'Aixɨa ketiuka'iyarini xehetsiemieme, meta kexepitɨaka yu'iyaritsie xemɨka'uximatɨariekakɨ. Mɨpaɨ pɨtiyurieneni kemɨ'ane 'amuyeikakai meta 'amuyeika meta 'umamie, yaxeikɨata 'atahuta 'iyarite mɨkɨ 'uwenieya hɨxie memɨti'u,
REV 1:5 meta Ketsutsi Kɨritsitu hepaɨtsita kemɨ'ane yatikamietɨ muyuhekɨatakai, kemɨ'ane mɨkite memanuku'uni wamexɨakame mɨhɨkɨ, kemɨ'ane kwiepa te'aitamete mɨtiwa'aitɨa. Mɨkɨ mɨtatsinaki'erie kanihɨkɨtɨni, meta yuxuriyakɨ mɨtatsi'utixɨnaxɨ 'axatemɨte'uyurikɨ,
REV 1:6 te'aitamete mɨtatsi'ayeitɨa, mawari wewiwamete Kakaɨyari 'ukiyarieyatsie mieme temɨte'uximayakakɨ mɨtatsi'ayeitɨa, mɨkɨ witsiketikuxaxatsiwani meta kemɨtitɨrɨkaɨye, tsepanetɨ xeitsienituyari wiyari manuyekɨka. Mɨpaɨ xeikɨa kani'aneni.
REV 1:7 Kamɨ, haitsata pakaneni. Yunaitɨ yuhɨxikɨ mekanixeiyakuni, meta yunaitɨ memeititseixɨa mekanixeiyakuni, mekaniyutiheiweriekuni me'ixeiyatɨ yunaitɨ nuiwarite kwiepa memɨtama.
REV 1:8 Ti'aitame Kakaɨyari mɨpaɨ kanaineni: «Ne Mexɨakame meta 'Imatɨreme nekanihɨkɨtɨni, kemɨ'ane mitsutɨa meta minɨni, kemɨ'ane 'amuyeika, kemɨ'ane mɨhɨkɨ meta 'umamie Naimekɨmɨtɨrɨkaɨye, nekanihɨkɨtɨni».
REV 1:9 Ne, Wani, xe'iwa nepɨhɨkɨ, xehepaɨ nemɨti'uximatɨarie, ketemɨte'aitɨarie tete'uka'eniwatɨ Ketsutsi hetsie teyuxewitɨ, kwie Patɨmuxi mɨrakutewatsie haramara hixɨapa mɨyematsie nekaneyeikakaitɨni Kakaɨyari niukieyatsie nemɨtiwiyakɨ meta Ketsutsi hepaɨtsita netihekɨatatɨ.
REV 1:10 Ti'aitame tukarieyatsie 'Iyari nehetsie kaninuani, meta newarita xeime nekaniu'enieni karima 'utaniukame kuxineta hepaɨ ti'eniɨriɨkɨtɨ.
REV 1:11 Mɨpaɨ kaniutayɨni: «Tita pemɨtixeiya xapatsie ketinaka'utɨa, meta keneutanɨ'axɨa 'atahuta kiekariyari memɨyutixexeɨriwa wahetsɨa: 'Epetsutsie, 'Etsimirɨnatsie, Perɨkamutsie, Tiyatiratsie, Tsarɨtixitsie, Piratepiyatsie meta Rautitseyatsie».
REV 1:12 Hikɨ ta'aurie nekanaweni metaniukakai nexeiyake, hikɨ kɨxeme 'uitɨwame nekaniuxeiya 'atahutame huru tepɨayarikɨ wewiyatɨkaime.
REV 1:13 Kɨxeme hixɨapa mana xewitɨ puwekai «Yuri Tewi hepaɨ tiyuxexeiyatɨ», 'etewime kamixa panakatɨkɨkai, meta huru hɨiyameyarikɨ panayɨkɨhɨakai.
REV 1:14 Kɨpateya putixawatɨrekai pututuxakai muxa huxarieya hepaɨ, 'ɨwi hepaɨ meta hɨxiteya tai mɨtatɨkani hepaɨ pɨtuyuxexeiyakai.
REV 1:15 Ketateya tepɨa mɨxawatɨ hepaɨ pɨtiyuxexeiyakai huxunuta xɨriyariekame, niukieya waɨkawa haa hepaɨ putatɨrarɨkakai.
REV 1:16 Yutserieta xurawetsixi 'atahutame kaniwaratɨkɨkaitɨni, meta tetana pɨwayeneikakai 'ixipara naitsata heutixikakaunitɨ. Nierikaya tau kemɨtixawatɨ hepaɨ pɨtiyuxexeiyakai.
REV 1:17 Kepauka nemixei, hetɨana nekaniukaweni nemumɨni hepaɨ ne'anetɨ, mɨkɨ yutseriekɨ nehetsie kaneutimeni mɨpaɨ 'utaitɨ: «Pepɨkamaka. Ne mexɨakame meta 'imatɨreme nekanihɨkɨtɨni,
REV 1:18 meta nemayeniere nepɨhɨkɨ. Tsepa nemumɨkai, matsi hikɨ nepayeniere tsepa xeitsienituyari wiyari manuyekɨka, meta tiyepiwame nekana'ɨka memɨtakukuwe wahetsiemieme meta mɨkite wateukiyapa hetsiemieme.
REV 1:19 »'Ayumieme nepaine, ketinaka'utɨa tita pemɨtixeiya, hikɨ kemɨtiyɨane, meta 'arike kemɨtiyɨni.
REV 1:20 'Ipaɨ katinimatsiɨkɨni niuki mɨ'awietsiekai 'atahuta xurawetsixi netserieta newaratɨkɨme pemɨnetsi'uxei hepaɨtsita, meta 'atahutame kɨxeme 'uitɨwame hurukɨ wewiyatɨkaime pemuxei hepaɨtsita: Mɨkɨ xurawetsixi 'atahutame pemɨwaruxei, niuki tuayamete mekanihɨkɨtɨni 'atahuta kiekariyaritsie memɨyutixexeɨriwa puwahetsiemieme, meta kɨxeme 'uitɨwame mɨkɨ memɨyutixexeɨriwa 'atahuta kiekaritetsie mepɨhɨkɨ.
REV 2:1 »Mɨpaɨ ketineu'utɨiri niuki tuayame 'Epetsutsie memɨyutixexeɨriwa wahetsiemieme: Mɨpaɨ paine kemɨ'ane yutserieta mɨwaratɨkɨ xurawetsixi 'atahutame, meta kemɨ'ane 'atahutame kɨxeme 'uitɨwame hurukɨ mɨwewiyatɨka wahixɨapa muyeika:
REV 2:2 Neri mɨpaɨ nepɨtimate kepemɨtiyuriene peti'a'uxitɨatɨ petiuka'eniwatɨ. Mɨpaɨta nepɨtimate, 'axamemɨteyurie pepɨtiwanewirie, pepɨwaruta'inɨataxɨ mɨkɨ nɨ'ariekate memuyuxata peru memɨkahɨkɨ, pepɨwaretima memɨte'itawakɨ.
REV 2:3 Pepɨtiuka'eniwa, waɨkawamekɨ pepɨtiukanewie nehetsɨa pemɨmiemekɨ, pekatihayewatɨ.
REV 2:4 Peru matsi 'ahepaɨtsita tixaɨtɨ nepɨtixani'erie, matɨari kepemɨtiyukanaki'eriekai pemɨtiuhayewaxɨkɨ.
REV 2:5 'Ayumieme nepaine, kenayuye'eri kepemɨ'anekai matɨari hepaɨ, 'arike kepemɨtiuhayewaxɨ. Hikɨri mɨpaɨ ketinetimati kepemɨtiyurienekai, matɨari hepaɨ pɨta ketine'uximayaka. Mexɨka pekatiuhayewa, nepunuani 'ahetsɨa, 'akɨxeme 'uitɨwame nepɨwatihana huyeritana.
REV 2:6 Tsiere tixaɨtɨ pepɨrexeiya pewa'uxiwe'erietɨ tita memɨteyurie mɨkɨ nikuraitatsixi wahetsie, neta mɨkɨ nepi'uxiwe'erie.
REV 2:7 Kemɨ'ane mu'enaxɨ, ke'u'ena 'Iyari kemɨtiwatahɨawe memɨyutixexeɨriwa. Kemɨ'ane mɨrayu'iwa, heitserie nepipitɨani 'iteɨri tukari tiyupitɨwame metikwanikɨ, Kakaɨyari harawerita mewe.
REV 2:8 »Mɨpaɨ ketineu'utɨiri niuki tuayame 'Etsimirɨnatsie memɨyutixexeɨriwa wahetsiemieme: Mɨpaɨ kanaineni kemɨ'ane Mexɨakame meta 'Imatɨreme mɨhɨkɨ, meta kemɨ'ane mumɨkai manutanierixɨta:
REV 2:9 Neri mɨpaɨ nepɨtimate kepemɨti'uximatɨarie, meta tixaɨtɨ pemɨkarexeiya. Matsitsɨ 'ekɨ pekanixikutɨni. Mɨpaɨ nepɨtimate kememɨtexetsewixima huriyutsixi memɨte'uyuterɨwa, matsi yurikɨ mepɨkahuriyutsixi, mɨkɨ Kauyumarie tukita mepɨmiemete pɨta.
REV 2:10 Pepɨkaheumaka tsepa kepemɨtikwinitɨarieni. Nepɨmatsihaye'eritɨani xeme hipatɨ kauyumarie katsariyanata pɨxe'anutaxɨrieni mɨxeta'inɨatakɨ, meta xepɨtekwine xetaweiyariexɨame tamamata tukari. Matsi yuri ketine'erieka tsepa pemumɨ, ne kuruna tukari mɨtiyupitɨwa nekameniyetuiriemɨkɨ.
REV 2:11 Kemɨ'ane meu'ena, ke'u'ena 'Iyari kemɨtiwatahɨawe memɨyutixexeɨriwa. Kemɨ'ane memɨtehayu'iwa, mɨkɨ hutarieka tiuka'eniwatɨ pɨkamɨni.
REV 2:12 »Mɨpaɨ ketineu'utɨiri niuki tuayame Perɨkamutsie memɨyutixexeɨriwa wahetsiemieme: Mɨpaɨ kanaineni kemɨ'ane 'ixipara naitsata meutixikakauni mexeiya:
REV 2:13 Neri nepɨtimate hakewa pemeka: mana Kauyumarie 'uwenieya pewe hakewa mɨre'aita. Matsi, 'ekɨ pepɨka'aku'imawa yuri peti'erietɨ nehetsie meta pepɨkatiuhayewaxɨ, tsepa mɨkɨ tukaritsie kepauka 'Anɨtipa mɨyuhekɨatakai yatikamietɨ kenemainekai, mɨkɨ nehetsɨa miemetɨtɨ tiukwineka pumierie mɨkɨ kiekaritsie Kauyumarie manuka.
REV 2:14 Perutsɨ ne nepɨrayexeiya 'ahepaɨtsita: muwa pemɨwarexeiyakɨ mɨkɨ Warami 'ɨkitsikayatsie memɨtewiya, mɨpaɨ pɨtita'ɨkitɨa Waraki mɨwakunuitɨanikɨ 'ixaheritsixi, kakaɨyarixi memɨtemawiyarie memɨtekwakakɨ mɨwa'iniekakɨ, meta hipame wakɨnama wa'ɨitama memɨwakumaɨwanikɨ.
REV 2:15 Yaxeikɨa 'ekɨ pepɨwarexeiya hipame nikuraitatsixi wa'ɨkitsikatsie memɨtewiya.
REV 2:16 'Ayumieme nepaine, ketineuhayewa kepemɨtiyuriene. Mexɨka pekatiuhayewa, kwitɨwa nepunuani wahetsɨa nepɨnemieneni ne'ixipara neteta mayeneikakɨ.
REV 2:17 Kemɨ'ane mu'enaxɨ, ke'u'ena 'Iyari kemɨtiwatahɨawe memɨyutixexeɨriwa. Kemɨ'ane mɨrayu'iwa, ne manana payari mɨ'awietsie nepimini, meta tete mɨtuxa nepiyetuirieni ra'utɨariekame hekwamekɨ kemɨtitewaka. Xewitɨ mɨpaɨ pɨkatimaika, kemɨ'ane xeikɨa mitanaki'erieni.
REV 2:18 »Mɨpaɨ ketineu'utɨiri niuki tuayame Tiyatiratsie memɨyutixexeɨriwa wahetsiemieme: Mɨpaɨ kanaineni Kakaɨyari Nu'aya, kemɨ'ane yɨhɨxie tai mɨtaka hepaɨ maye'ane, meta kemɨ'ane tepɨa hepaɨ 'ɨkateya mɨxawawatɨ:
REV 2:19 'A'uximayatsikate nepɨtimate, 'anaki'eriya, meta yuri kepemɨti'erie, kepemɨtiwaparewie hipame, meta kepemɨtiuka'eniwa, mɨpaɨ nepɨtimate, 'imatɨrieka matsi waɨkawa pepɨtiyuriene, matɨaripai 'etsiwa xeikɨa pepɨtiyurienekai.
REV 2:20 Perutsɨ ne nepɨrayexeiya 'ahepaɨtsita, 'ukaratsi Ketsaweri pemɨpitɨakɨ yamɨtiyurienenikɨ kemɨtinake, niukame pɨyuxata Kakaɨyari hetsɨa mieme. Peru kemɨti'ɨkita, pɨtiwa'itaiya nehetsɨa miemete te'uximayatamete memɨwakumaɨwanikɨ kemɨ'ane mɨkayɨkɨna mɨkayɨ'ɨya, meta memikwakakɨ tita kakaɨyarixi memɨtemawiyarie.
REV 2:21 Ne tukari nepipitɨa mɨtihayewanikɨ kemɨtiyuriene, peru pɨkayuwaɨriya mɨtihayewakɨ wakumaɨwatɨ memɨkayɨkɨnama.
REV 2:22 'Ayumieme nepɨtikwinitɨani, 'utayatsie nepeikahɨani, meta memikumaɨwakai kawa'ɨyatɨkaku hamatɨana nepɨtiwakwinitɨani waɨkawamekɨ, xɨka mekatehayewani hepaɨna meteyurietɨ.
REV 2:23 Niwemama nepɨwakwini. Mɨpaɨ netiyurieyu yunaitɨ naitsarie memɨyutixexeɨriwa mɨpaɨ mepɨtemaika, ne nepɨhɨkɨ xe'iyari nemɨmate kexemɨteyɨkɨhɨawe. Yuxexuime nepɨtixe'apinirieni kexemɨte'uyuri.
REV 2:24 Peru hipatɨ xeme Tiyatiratsie xemɨtama, keyupaɨmetɨ 'ikɨ 'ɨkitsikatsie xemɨkatewiya, keyupaɨmetɨ 'ateewa xemɨkaheutahaxɨawawe xeteyɨ'ɨkitɨatɨ Kauyumarie 'ɨkitsikayakɨ kememɨteniniuki, mɨpaɨ nepɨtixekɨhɨawe xeme, tawariri kwinimieme nepɨkaxe'ikatɨaka.
REV 2:25 Mɨkɨtsie xeikɨa, xeketenewiyani ketitari xemɨtehexeiya, kepaukake nemunuani.
REV 2:26 Kemɨ'ane mɨrayu'iwa, meta mɨkatihayewani nehepaɨ tiyurienetɨ tapareyuke, mɨkɨ heitserie nekanipitɨamɨkɨ nuiwarite mɨtiwa'aitɨakakɨ
REV 2:27 ―neta heitserie kemɨnetiupitɨa ne'ukiyari― “tepɨa 'itsɨyari 'akwetɨ pɨtiwa'aitɨaka, haxu xariyari hepaɨ pɨwatitara”.
REV 2:28 Metatsiere nepiyetuirieni xurawe ximeripaitɨ manatineika.
REV 2:29 Kemɨ'ane mu'enaxɨ, ke'u'ena 'Iyari kemɨtiwatahɨawe memɨyutixexeɨriwa.
REV 3:1 »Mɨpaɨ ketineu'utɨiri niuki tuayame Tsarɨtixitsie memɨyutixexeɨriwa wahetsiemieme: Mɨpaɨ kanaineni kemɨ'ane Kakaɨyari 'iyariteya 'atahutame mɨwarexeiya, meta xurawetsixi 'atahutame: Neri mɨpaɨ nepɨtimate kepemɨtiyuriene. Tsepa pe'ayenieretɨ pemɨxatsiwa, peru pepɨmɨki.
REV 3:2 Kenanutahɨtɨa, keneutatɨrɨkariya tita mɨkatimɨwe mɨtiuyuhayewaxɨ mɨkɨ mɨmɨximekɨ, nekakaɨyari kemɨmetixeiya, nematsixeiyakaku ne, kepemɨtiyuriene peuyewetse 'akuxi pemɨraye'atɨanikɨ.
REV 3:3 'Ayumieme nepaine, ketina'eriwani kepemɨtiupitɨarie kepemɨtiu'enaxɨ, mɨpaɨ yaketinekamieni, ketineuhayewa kepemɨtiyuriene hikɨ. Mexɨka peka'enutahɨtɨani, tinawayame hepaɨ nepunuani, 'atsipepɨkatimaika kepaukatɨkaku 'ahetsɨa nemunuani.
REV 3:4 Tsiereta hipame pepɨwarexeiya teɨteri Tsarɨtixitsie memɨtama yu'ixuriki memɨkatɨniriya. Mɨkɨ 'aixɨa memɨte'u'iyarikɨ nehamatɨa mekaniu'uwakuni me'anakatuxatɨ.
REV 3:5 Kemɨ'ane mɨrayu'iwa, mɨkɨ wahepaɨ pɨtikemaritɨarieni 'ixuriki mutuxakɨ. Hatsuaku kemɨtitewa nepɨkaheyeitɨani hakewa maka'utsie kename tukari hexeiya. Nepɨnehekɨatani kename ne'imate, mɨpaɨ ne'utaitɨ ne'ukiyari hɨxie meta hetsɨana miemete niuki tuayamete wahɨxie.
REV 3:6 Kemɨ'ane mu'enaxɨ, ke'u'ena 'Iyari kemɨtiwatahɨawe memɨyutixexeɨriwa.
REV 3:7 »Hikɨ mɨpaɨ ketineu'utɨiri niuki tuayame Piratepiyatsie memɨyutixexeɨriwa wahetsɨa mɨmieme: Mɨpaɨ kanaineni kemɨ'ane Kakaɨyaritsie mieme mɨpatsie, kemɨ'ane yuri maine, kemɨ'ane Rawiri yawieya makwe'e. Mɨkɨ reuyepieyu xewitɨ pɨkareunani, reunayu xewitɨ pɨkareuyepieni:
REV 3:8 Neri mɨpaɨ nepɨtimate kepemɨtiyuriene. Kamɨtsɨ, kitenie mɨreuyepie nepɨmatsi'uxeiyatsitɨa. Xewitɨ pɨkayɨwe mɨreunanikɨ. 'Etsiwa xeikɨa tɨrɨkariya pepexeiya peru neniukitsie yapepɨtikamie, pepɨka'aku'imawa kename pekanetsimate pe'utaitɨ.
REV 3:9 Kamɨtsɨ mɨpaɨ nepɨtiwapitɨaka mɨkɨ Kauyumarie tukitana memɨmiemete, mɨkɨ huriyutsixi teɨteriyari memɨte'uyuterɨwa peru memɨkahɨkɨ, memɨte'itawa xeikɨa, kamɨtsɨ mɨkɨ nepɨwarahapani, me'a'iwarieme memɨtihɨxima'unikɨ 'ahetɨa. 'Ana mɨpaɨ mepɨtehetimani, nemɨmatsinaki'eriekɨ 'ekɨ.
REV 3:10 Neniukitsie yapemɨtikatɨakɨ petiuka'eniwatɨ nehepaɨ, neta nepɨmatsi'ɨwiyani kepauka tukari maye'ani kwiepa naitsarie, kepauka kwiepa memɨtama memɨ'inɨatsieni.
REV 3:11 Kwitɨ nepunuani. Keneuwiya tita pemɨrexeiya, xewitɨ 'akuruna kamatsi'unawairienikɨ 'a'inɨari.
REV 3:12 Kemɨ'ane mɨrayu'iwa, nekakaɨyari tukitana nepikakeni 'ikitsaraɨtɨme, yuheyemekɨ pɨkawayeyani hatsuaku. Hetsiena nepɨra'utɨani nekakaɨyari kemɨtitewa, nekakaɨyari kiekarieya Kerutsareme mɨhekwa taheima makaneni nekakaɨyari hetsɨa miemetɨtɨ kemɨtitewa, neta hekwamekɨ kenemɨtitewa.
REV 3:13 Xewitɨ netɨ mu'enaxɨ, ke'i'enieka tita 'Iyari mɨtiwatahɨawe memɨyutixexeɨriwa.
REV 3:14 »Hikɨ mɨpaɨ ketineu'utɨiri niuki tuayame Rautitseyatsie memɨyutixexeɨriwa: 'Ipaɨ kanaineni kemɨ'ane Niukieya Mɨtse'i mɨtitewa, kemɨ'ane yatikamietɨ yuri haitɨ mɨyuhekɨata, kemɨ'ane mitsutɨa tita Kakaɨyari mɨtiunetɨa:
REV 3:15 Neri 'a'uximayatsika nepɨmate. Pepɨkahaɨtɨ meta nitɨma pepɨkaxɨka, xɨkatiyɨwenike pehaɨtɨnike meta pexɨkanike.
REV 3:16 Hikɨ matsi pemɨkahaɨtɨkɨ meta pemɨkaxɨkakɨ, matsi xeikɨa 'etsiwa mɨxɨka hepaɨ pemɨ'anekɨ, 'ayumieme 'ari nekamenanatihayaximeni.
REV 3:17 'Ekɨ mɨpaɨ pekaniutaineni: “Ne nepɨxiku, waɨkawa nerexeiyatɨ nepaneyeitɨa, tixaɨtɨ nepɨkareuyehɨwa”, pe'utaitɨ, 'atsipepɨkatimate kepemɨ'ane, 'axapepɨ'itɨarie tixaɨtɨ pepɨkarexeiya, pepɨkaheuniere, meta 'ixurikikɨ pepɨmawe.
REV 3:18 'Ayumieme nepɨmatitaxatɨani, nehetsɨa keneunanai huru tuminiyari taipa kwaxiyariekamekɨ, mɨkɨkɨ xiku pemayanikɨ, 'ixuriki mɨtuxa keneunanai pemenakatɨnikɨ, mɨkɨkɨ pɨkamatsiɨkɨni kepemɨti'atewiya pemawetɨ, meta hɨxita mieme kwiniya 'uayeyari keneunanai pema'awiriexɨanikɨ, mɨkɨkɨ peheunieretɨ pepayani.
REV 3:19 Keyupaɨmeme nemɨwanaki'erie, mɨkɨ nepɨwatate'a nepɨtiwa'ɨkitɨa newa'uximatɨatɨ. 'Ayumieme 'aixɨa 'anemekɨ kene'awaɨriyani, ketineuhayewa kepemɨtiyuriene hikɨ.
REV 3:20 Neuxei 'itupari warita neputiwe neheihutsunatɨ. Tewi xɨka netsi'u'enieni ne'utaniukakaku, xɨka reuyepieni, nepeutahani hetsɨana, hamatɨana nepɨtikwani, mɨkɨta nehamatɨa pɨtikwani.
REV 3:21 Kemɨ'ane mɨrayu'iwa, mɨkɨ nekanipitɨamɨkɨ nehamatɨa mayerɨnikɨ ne'uwenitsie hakewa nemɨre'aita, neta ne'ukiyari hamatɨa kenemɨraya 'uwenieyatsie nerane'iwaka.
REV 3:22 Xewitɨ netɨ mu'enaxɨ, ke'u'ena tita 'Iyari mɨtiwatahɨawe memɨyutixexeɨriwa».
REV 4:1 Merikɨtsɨ mɨkɨ ne'uxeiyaka, tawarita nekaneutaniere, mana muyuawi nekaniuxeiya reuyepiekame. Kemɨ'ane nemu'eni matɨari paitɨ kuxineta hepaɨ ti'eniɨriɨkɨme nehamatɨa tikuxatame, mɨkɨ mɨpaɨ kanetiniutahɨawe: «'Uwa kenatiye'a: nepɨmetsixeiyatsitɨani kemɨtiyɨni 'arike».
REV 4:2 Yapauka 'Iyari nehetsie punua, meta 'uweni nepuxei muyuawitsie, xewitɨ mɨkɨtsie kanakateitɨni.
REV 4:3 Kemɨ'ane mana makatei, katsɨpe teteyari hepaɨ katiniyuxexeiyakaitɨni meta kurunarina teteyari hepaɨ. 'Uweni warita kuwiwi kanakateitɨni 'etsimerarɨta teteyari hepaɨ tiyuxexeiyatɨ.
REV 4:4 'Uweni 'aurie kana'utɨkateitɨni 'uwenite xeitewiyari heimana naukatɨ, 'uwenitetsie 'ukirawetsixi mekanatekaitɨni xeitewiyari heimana yunaukatɨ me'anakatuxatɨ, yumu'utsie huru kurunayari me'anamanatɨ.
REV 4:5 Mɨkɨ 'uweni manuwekaitsie mana kaniwayemerɨkarekaitɨni, kaneyeyuanekaitɨni meta kaneyetɨrarɨkakaitɨni. 'Uweni hɨxie 'atahutatɨ kɨxemete kanikutatawekaitɨni, 'atahutatɨ Kakaɨyari 'iyariteya mɨhɨkɨtɨkai,
REV 4:6 meta hɨxiena haramara xikɨri hepaɨ tiyuxexeiyatɨ kanikumakaitɨni tete manuyehekɨa hepaɨ tiyuxexeiyatɨ. 'Uweni 'aurie mana mekaniu'uwakaitɨni yunaukatɨ memayeneniere, mehahɨxitɨkaitɨ yuhɨxie meta yuwarita naitsarie.
REV 4:7 Mexɨakame maye hepaɨ pɨtiyuxexeiyakai, hutarieka mieme tuuru hepaɨ pɨtiyuxexeiyakai, hairieka mieme tewi hepaɨ pɨraka'eriekai, naurieka mieme kwixu mɨtawixime hepaɨ pɨtiyuxexeiyakai.
REV 4:8 Mɨkɨ yunaukatɨ memayeneniere yuxexuitɨ 'ataxewime 'anate mepexeiyakai, meta naitsarie yu'anatetɨa paitɨ mekanahɨxitɨkateitɨni. Tukarikɨ meta tɨkarikɨ mepɨkatehayewakai mɨpaɨ me'utiyuatɨ:
REV 4:9 Kepauka mɨpaɨ memutiyuanekai mɨkɨ memayeneniere, 'aixɨa ketikuxaxatsiwani, mariwetɨ kemariwani, pamɨpariyutsi kepitɨarieka kemɨ'ane 'uwenitsie maka, tsepanetɨ xeitsienituyari wiyari manuyekɨka ke'ayeniereni yuheyemekɨ me'utiyuatɨ,
REV 4:10 xeitewiyari heimana nauka 'ukirawetsixi hɨxiena mepukahɨxima'uwekai meta nenewieri me'ipitɨatɨ kemɨ'ane 'uwenitsie maka, tsepanetɨ xeitsienituyari wiyari manuyekɨka ke'ayeniereni yuheyemekɨ. Yukurunate hɨxiena mekanitimanakaitɨni mɨpaɨ me'utiyuatɨ:
REV 4:11 «Tati'aitɨwame Takakaɨyari 'aku, 'aixɨa pepɨtiuka'iyari, 'ahetsie mɨtinakenikɨ 'aixɨa pemɨtikuxaxatsiwanikɨ mariwemekɨ pemɨmariwanikɨ, meta kepemɨtitɨrɨkaɨye, 'ekɨ naime pepɨtiunetɨa, mɨpaɨ mɨmatinakekɨ pɨtixuawe, naitɨ 'ayumieme pɨtiutiwewiya».
REV 5:1 Merikɨtsɨ kemɨ'ane 'uwenitsie makatei yutserieta xapa kwikwiekame 'akwekame nekaniuxeiya naitsata ra'utɨkaime meta 'atahuta tseyuyari pamanekai.
REV 5:2 Yaxeikɨata niuki tuayame mɨtɨrɨkaɨye nekaniuxeiya mɨpaɨ 'utaineme karima: «¿Kepaikɨ 'aixɨa pɨtiuka'iyari hetsiena mɨtinakenikɨ tseyu maxɨnaxɨanikɨ, meta xapa manutayepienikɨ?»
REV 5:3 Muyuawitsie kwiepa meta kwietɨa nixewitɨ pɨkayɨwekai xapa manutayepienikɨ, mixeiyakɨ ketɨtɨ mɨreku'ukai.
REV 5:4 Ne waɨkawa neputatsuakakai xewitɨ mɨkataxeiyariewekaikɨ 'aixɨa tiuka'iyaritɨ hetsiena mɨtinakenikɨ xapa manutayepienikɨ, mixeiyakɨ mekaterɨwakɨ.
REV 5:5 Mɨkɨ 'ukiratsi xewitɨ mɨpaɨ kanetiniutahɨawe: «Pepɨka'utatsuakani, neuxei maye hepaɨ mariwetɨ Kura nuiwarieyatsie mieme Rawiri kie Nana mutine, mɨkɨ pɨrayu'iwaxɨ, mɨkɨtsɨ kaniyɨweni xapa manutayepienikɨ, meta 'atahutame tseyuyari maxɨnaxɨanikɨ».
REV 5:6 Hikɨ mana nekaneutaniere. 'Uweni 'aurie yunaukatɨ memayeneniere wahixɨapa 'ukirawetsixi wahixɨapa nekanixeiya Muxa Nunutsi mana 'uweme. Mumierie hepaɨ pɨtiyuxexeiyakai, 'atahuta 'awayari 'atahuta hɨxiyari pexeiyakai, hɨxiteya Kakaɨyari 'iyariteya kanihɨkɨtɨni 'atahutatɨ, naitsarie kwiepa meutanɨ'ariexɨa.
REV 5:7 'Iya 'ahurawa kanayani, kemɨ'ane 'uwenitsie makatei yutserieta mehuriekai xapa kanihuritɨani.
REV 5:8 Kepauka xapa muhuritɨarie, yunaukatɨ memayeneniere xeitewiyari heimana yunaukatɨ 'ukirawetsixi yunaitɨ mekaniutihɨxima'uni Muxa hɨxie. Yuxexuitɨ haripa mekaniu'ɨkaitɨni huru xakɨyari mepu'ɨkai 'ɨkwakɨ hɨpɨneme, 'ɨkwa Kakaɨyari teɨterimama wanenewieri kanihɨkɨtɨni.
REV 5:9 Hikɨ kwikari hekwame mekaniutakwika mɨpaɨ me'utiyuatɨ: «'Aixɨa pepɨtiuka'iyari 'ahetsie mɨtinakenikɨ pemenuhurienikɨ xapa pemexɨnaxɨanikɨ tseyuyari, 'ekɨ pemumieriekɨ, 'axuriya mutayeurikɨ Kakaɨyaritsie mieme pepɨwarutinanai teɨteri pewaxɨnake, yunaime nuiwarite wahetsɨa miemete naime niukikɨ memutiniuka, naitsarie kwiepa kiekatari yunaime teɨteriyari wahetsɨa miemete.
REV 5:10 Takakaɨyari teɨterimama pepɨtatsi'ayeitɨa te'aitamete, mawari wewiwamete pepɨtatsi'ayeitɨa, kwiepa tepɨte'aitani».
REV 5:11 Hikɨ neheutaniereka nekani'enieni tita yumɨireme niuki tuayamete waniuki hepaɨ mɨti'eniɨriɨkɨkai, 'uweni 'aurie memayeneniere wa'aurie 'ukirawetsixi wa'aurie mekaniti'ukaitɨni mɨireme miyuniyari meyupaɨmetɨ.
REV 5:12 Mɨpaɨ karima mekaniutiyuanekaitɨni: «Muxa mumierie, 'aixɨa katiniuka'iyarini, hetsiena mɨtinakenikɨ, tɨrɨkaɨyetɨ waɨkawa rexeiyatɨ, timaiwetɨ yɨwetɨ, mɨmariwanikɨ 'aixɨa mɨraniuwanikɨ, 'aixɨa mɨtikuxaxatsiwanikɨ witsimɨtikɨhɨawarɨwanikɨ».
REV 5:13 Hikɨ naitɨ mɨtiunetɨarie muyuawitsie, kwiepa, kwie hetɨa meta haramaratsie, naitɨ mana mɨtitama, yunaime nekatiniwaru'enieni mete'inɨawame: «Kemɨ'ane 'uwenitsie maka, meta muxa, witsimeketekɨhɨawarɨwani, mariwemekɨ mekekuxaxatsiwani, witsimeketekuxaxatsiwani, tɨrɨkaɨyemekɨ, tsepanetɨ xeitsienituyari wiyari manuyekɨka».
REV 5:14 Memayeneniere yunaukatɨ mɨpaɨ mekaniutiyuanekaitɨni: «Mɨpaɨ ketiɨyɨni» me'utiyuatɨ, meta 'ukirawetsixi metihɨxima'utɨ nenewieri mekanipitɨakaitɨni kemɨ'ane yuheyemekɨ mayeniere.
REV 6:1 Merikɨtsɨ nekaneutaniere kepauka Muxa Nunutsi mexɨnaxɨ xeime 'atahuta tseyuyaritsie mieme, yunaukatɨ memayeneniere xeime nekaniu'enieni mɨpaɨ haineme tɨranari hepaɨ ti'eniɨriɨkɨme: «Kenaye'a, keneuxeiya».
REV 6:2 Hikɨ nekaneutaniere, mana kawayu heutuxatɨ kaniuwekaitɨni. Kemɨ'ane hetsiena makatei tupi pakwekai, kuruna kananutimaniyarieni, kanayeyani rayu'iwaka, mɨwara'iwanikɨ hipame.
REV 6:3 Hikɨ kepauka Muxa tseyu hutarieka mieme maxɨnaxɨ, mayeniere hutarieka mieme nekaniu'enieni mɨpaɨ 'utaineme: «Kenaye'a keneuxeiya».
REV 6:4 Hikɨ xewitɨ kawayu kaniwayeyani heuxuretɨ. Kemɨ'ane hetsiena makatei mɨpaɨ katiniupitɨarieni mɨwamuinanikɨ kwiepa memɨtama 'aixɨa memɨkateyuxeiyanikɨ, memɨyukwinikɨ, 'ixipara 'amɨtewi pukweitɨarie.
REV 6:5 Hikɨ kepauka Muxa tseyu hairieka mieme maxɨnaxɨ, mayeniere nekaniu'enieni hairieka mieme mɨpaɨ 'utaineme: «Kenaye'a keneuxeiya». Hikɨ nekaneutaniere. Kawayu heuyɨwitɨ mana kaniuwekaitɨni. Kemɨ'ane hetsiena makatei kiru ti'inɨnɨatame kanahapakaitɨni yumamatsie.
REV 6:6 Hikɨ xeime nekaniu'enieni yunaukatɨ memayeneniere memati'ukai wahixɨapa heyeniukame. Mɨpaɨ hetaineme: «Tɨriku merie kakuniyari mɨpaɨ ketinaye'atɨa xeitukari tewi kemɨti'iwa, tsewara meta xeikakuniyari yaxeikɨa raye'arɨkame, 'axapepɨka'iyurieka wiya meta kaxie winuyari».
REV 6:7 Hikɨ kepauka Muxa tseyu naurieka mieme maxɨnaxɨ, mayeniere nekaniu'enieni naurieka mieme mɨpaɨ 'utaineme: «Kenaye'a keneuxeiya».
REV 6:8 Hikɨ nekaneutaniere, kawayu 'etsiwa heutaxaɨyetɨ mana kaniuwekaitɨni. Kemɨ'ane hetsiena manakatei Mɨɨya pɨtitewakai meta Tai mɨkatɨwe kanihuraweiyakaitɨni. Heitserie mekaniupitɨarieni kwiepa memɨtama naukame hetsie mieme xeime wahepaɨtsita, kememɨteyupaɨme memɨwakwinikɨ 'ixiparakɨ, hakakɨ, kwiniyakɨ meta kwiepa miemete yeutari wahekɨ.
REV 6:9 Hikɨ kepauka Muxa tseyu 'auxɨwirieka mieme maxɨnaxɨa, mawari taiyame hetɨa 'iyarite me'atekame nekaniwaruxeiya, mɨkɨ memukwi'iwaxɨ Kakaɨyari niukieyatsie memɨtewiyakaikɨ, hetsiena metewiyatɨ memɨyuhekɨatakaikɨ.
REV 6:10 Karima mekaniutihiwakaitɨni mɨpaɨ me'utiyuatɨ: «¿Kutsiyari 'aku pemɨpatsie, yuri pemaine, kepaukake pepɨwatakwewieni, kepaukake 'uximatɨarika pepɨwapitɨani kwiepa memɨtama taxuriya memutayeurikɨ?»
REV 6:11 Hikɨ yuxexuitɨ mekaniutahuritɨarieni 'ixuriki mɨtuxa memanakatɨnikɨ, mɨpaɨ mepɨte'utahɨawarie memɨ'uxipiekakɨ, te'uximayatamete memɨkayunaitɨtɨkaikɨ 'akuxi wa'iwama memɨkwi'iwakekai wahepaɨ.
REV 6:12 Hikɨ kepauka Muxa nemuxei tseyu 'ataxewirieka mieme kanaxɨna, 'ana kwie karima kaniutayuanekaitɨni. Tau puyɨrixɨ 'ɨkari mɨyɨwi hepaɨ, metseri naitɨ xuriya hepaɨ 'anetɨ kanayani.
REV 6:13 Xurawetsixi muyuawitsie memeukatekai mekaniukaxɨrieni kwiepa, xapa takariyari kemɨtikaxɨrɨwe hepaɨ waɨkawa 'uku'ekakaku.
REV 6:14 Muyuawi hixɨapa putsanixɨ xapa mɨtakwikwiyani hepaɨ, naitɨ yemurite meta haramara hixɨapa mɨyetekai xaɨtsie pɨta pupatsie, hakewa metinierekai pumawekai.
REV 6:15 Hikɨ kwiepa te'aitamete, wawemete, kuyaxi wa'ukiyarima, xikutsixi, memɨtɨrɨkawikai, meta hipatɨ, yunaitɨ waɨriyarika memɨte'uximayatametetɨkai, meta memɨyɨnɨ'akai, yunaitɨ mekaniuyuti'awietaxɨani terɨta, 'aita, meta hɨritetsie.
REV 6:16 Mɨpaɨ hɨrite meta 'aite mekateniuhiwiwakaitɨni: «Ketananukanama, ketaneuti'awieta mɨkatatsixeiyakɨ kemɨ'ane 'uwenitsie maka Muxa nunutsi mɨkatatsihekanikɨ.
REV 6:17 Karikɨ tukari mɨmariwe kanaye'aniri kepauka memɨyeha'ani. ¿Kepaikɨ pɨyɨwe 'amuweni?» meputiyuanekai.
REV 7:1 Merikɨtsɨ 'ana niuki tuayamete yunaukame nekaniwaruxeiya, tatserieta, ta'utata, tahixɨapa, tatsutɨa naitsata 'etsikinatsie meti'utɨ 'eka mepɨkapitɨakai, naitsarie mɨka'uyeikanikɨ kwiepa, haramaratsie meta naime kɨyexitetsie.
REV 7:2 Hikɨ xeime nekaniuxeiya niuki tuayame tau manatineika 'utimiekame, Kakaɨyari mayeniere tseyuya 'akwetɨ. Hikɨ karima kaniwarutahiwieni niuki tuayamete yunaukame, mɨkɨ mɨpaɨ memɨtepitɨariekai 'axamemiyurienikɨ kwiepa meta haramara:
REV 7:3 «'Akuxi 'axaxepɨka'iyurieka kwie, haramara meta naime kɨyexite, tekawatitseyumawekaku takakaɨyari te'uximayatametemama wakanata».
REV 7:4 Hikɨ 'inɨarite nekaniu'enieni, kememɨyupaɨmekai memutseyumarie: Xeitsienituyari heimana huta tewiyari heimana nauka miriyari (144.000) meyupaɨmetɨ mekaniutseyumarieni 'Ixaheri nuiwarimama. Xexuitɨ nuiwarite mepuxuawekai.
REV 7:5 Kura nuiwarieyatsie miemete tamamata heimana huta miriyari mekaniutseyumarieni, Xuweni nuiwarieyatsie miemete tamamata heimana huta miriyari, Kari nuiwarieyatsie miemete tamamata heimana huta miriyari,
REV 7:6 'Atseri nuiwarieyatsie miemete tamamata heimana huta miriyari, Nepɨtahari nuiwarieyatsie miemete tamamata heimana huta miriyari, Manatsexi nuiwarieyatsie miemete tamamata heimana huta miriyari,
REV 7:7 Tsimiyuni nuiwarieyatsie miemete tamamata heimana huta miriyari, Rewi nuiwarieyatsie miemete tamamata heimana huta miriyari, 'Itsakaxi nuiwarieyatsie miemete tamamata heimana huta miriyari,
REV 7:8 Tsawuruni nuiwarieyatsie miemete tamamata heimana huta miriyari, Kutse nuiwarieyatsie miemete tamamata heimana huta miriyari, Wenikamini nuiwarieyatsie miemete tamamata heimana huta miriyari mekaniutseyumarieni.
REV 7:9 Merikɨtsɨ 'ana nekaneutaniere, teɨteri yumɨireme nekaniwaruxeiya naitsarie kiekatari, nuiwarite, kiekari mukumanetsie meta kememɨte'uniukakai, tewi pɨkayɨwekai mɨwaruti'inɨatakɨ. Mana 'uweni hɨxie meta Muxa hɨxie mekaniti'ukaitɨni me'anakatuxatɨ, takɨ me'upitɨ.
REV 7:10 Karima mɨpaɨ mekateniuhiwakaitɨni: «Wikweitsitɨarika takakaɨyari hetsɨa kanayeneikani, 'uwenitsie maka, meta Muxa».
REV 7:11 Yunaitɨ niuki tuayamete mana mekaniti'ukaitɨni 'uweni 'aurie, 'ukirawetsixi wa'aurie, meta yunaukatɨ memayeneniere wa'aurie. Hikɨ mekaniutihɨxima'uni 'uweni hɨxie, Kakaɨyari nenewieri mekaniupitɨani
REV 7:12 mɨpaɨ me'utiyuatɨ: «Mɨpaɨ ketiuyɨni. Witsiketikɨhɨawarɨwani, 'aixɨa ketikuxaxatsiwani, timaiwetɨ kemariwani, pamɨpariyutsi kepitɨarieka, mariwetɨ kexatsiwani, tɨrɨkaɨyetɨ yɨwetɨ kexatsiwani, takakaɨyari tsepanetɨ xeitsienituyari wiyari manuyekɨka. Mɨpaɨ ketiuyɨni».
REV 7:13 Merikɨtsɨ xewitɨ 'ukiratsi mɨpaɨ kanetiniuta'iwawiya: —Mɨkɨ memanakatuxa, ¿kehate mepɨyɨa, hakewa mepeyekɨ?
REV 7:14 Ne mɨpaɨ nekatinita'eiya: —Neuxei, matsi 'ekɨ yapepɨtimate. Mɨkɨ mɨpaɨ kanetiniutahɨawe: —Mɨkɨ mekanihɨkɨtɨni memu'axɨa waɨkawa metehekwineka. Yu'ixuriki mekaniuti'ekwa, meta mekanitituriya Muxa Nunutsi mumierie xuriyayakɨ.
REV 7:15 'Ayumieme Kakaɨyari 'uwenieya hɨxie mekaniti'uka, tukarikɨ meta tɨkarikɨ hetsiena mieme tukitana mekateni'uximayaka, meta kemɨ'ane 'uwenitsie maka, pɨwateɨtani wa'ɨwiyatɨ yutukita.
REV 7:16 Hatsuakuri mepɨkaheuhakakwikuni, mepɨkaheuharikuni. Tau pɨkawaxɨrimɨtɨaka, xɨri pɨkawa'uximatɨaka.
REV 7:17 Karikɨ Muxa yu'uwenitsie 'akaitɨ mɨkɨ pɨwa'ɨwiyani muxatsi wahɨweme hepaɨ yɨanetɨ, pɨwarewitɨkɨni naitsarie haixa mukunenieretsie mana meharetɨ memayenenierenikɨ, meta Kakaɨyari naime wa'ukai kana'itiexɨamɨkɨ wahɨxita.
REV 8:1 Merikɨtsɨ kepauka Muxa 'atahutarieka mieme tseyu maxɨnaxɨ, muyuawitsie kayuwatɨ putamarixɨ merie hurayari pɨreuterixɨ.
REV 8:2 Hikɨ niuki tuayamete 'atahutame Kakaɨyari hɨxie memɨti'u nekaniwaruxeiya, mɨkɨ kuxineta yuxexuitɨ mekaniuta'ɨitɨarieni.
REV 8:3 Hikɨ xewitɨ niuki tuayame 'ahurawa kaniuyani, meta mawari taiyame 'aurie kaniutakeni pɨtsiwiwame hurukɨ wewiyakame 'ahanatɨ meta 'ɨkwa witsimu'ɨa kaniyetuiriyarieni mimawanikɨ, yunaime Kakaɨyari teɨterimama wanenewieritsie mieme, mawari taiyame hetsie hurukɨ muwewiya 'uweni hɨxie muwekai.
REV 8:4 Hikɨ 'ɨkwa kwauniyari meta Kakaɨyari teɨterimama wanenewieri, niuki tuayame 'etukaku Kakaɨyari hetsie kaniye'ani.
REV 8:5 Hikɨ niuki tuayame 'enuhanaka pɨtsiwiwame, tɨɨ 'utahɨniyaka mawari taiyame hetsie, kwiepa kaneihɨani, pekutɨrarɨkakai putayuanekai, pukumerɨkakai meta kwie putayua.
REV 8:6 Hikɨ niuki tuayamete 'atahutatɨ, kuxineta memɨ'ɨkai mekaniuyukuha'aritɨani memitihɨtsienikɨ.
REV 8:7 Hikɨ mexɨakame yukuxineta kaniutahɨtsieni. Tee taimatɨ xuriya nɨtɨ kwiepa kaneukaxɨriyani. Kwie hairieka miemetsie xewitɨ kaniutatani kɨyexite meta 'ɨxa mɨtsitsiɨrawi naitɨ katiniutitani.
REV 8:8 Hikɨ hutarieka mieme niuki tuayame yukuxineta kaniutahɨtsieni. Yemuri hepaɨ tiyuxexeiyatɨ 'anetɨ tatɨ haramaratsie kaneukahɨiyani, haramara hairieka miemetsie xewitɨ xuriya kanayani.
REV 8:9 Haramaratsie memɨteye'uwa hairieka miemetsie xewitɨ mekateniukwini, yaxeikɨata kanuwate 'amɨpapa hairieka miemetsie xewitɨ kaneuyehuiyani.
REV 8:10 Hikɨ hairieka mieme niuki tuayame yukuxineta kaniutahɨtsieni. Taheima 'akaneka xurawe 'anetɨ kwiepa kaniukaweni kɨxeme hepaɨ tatɨ. Hatuxame meta haixa mukunenieretsie hairieka miemetsie xewitɨ kaniukaweni.
REV 8:11 Xurawe Matsiwi katinitewakaitɨni. Haa hatsiwitɨ kanayani, yumɨiretɨ teɨteri mekaniukwini haa matsiɨrixɨkɨ.
REV 8:12 Hikɨ naurieka mieme niuki tuayame yukuxineta kaniutahɨtsieni. Tau hairieka miemetsie xewitɨ pɨkahekɨariwiekai, yaxeikɨata metseri, meta xurawetsixi, kaniukuyɨre, mɨpaɨ hairieka miemetsie xewitɨ tukarikɨ meta tɨkarikɨ pɨka'uhekɨakai.
REV 8:13 Hikɨ nekaneutaniere, kwixu nekaniu'enieni muyuawi hixɨapa 'awiximeme, karima mɨpaɨ 'utaineme: «Xɨa'ui, xɨa'ui, xɨa'ui keme'itɨarieni kwiepa memɨtama, kepauka niuki tuayamete 'imatɨremete yuhaikatɨ yukuxineta memɨtihɨtsienitsie».
REV 9:1 Hikɨ 'auxɨwirieka mieme niuki tuayame yukuxineta kaniutahɨtsieni. Xurawe nekaniuxeiya taheima mieme kwiepa 'ukaweku, mɨwatixawatsie mieme yawiyari kaniukweitɨarieni kɨmana mɨreuyepienikɨ meukatewatsie.
REV 9:2 Hikɨ katineuyepieni mɨwatixawatsie, hikɨ meukatewatsie kwauni kanewatineni teka 'amɨpa kwauniyari hepaɨ 'anetɨ, tau kahekɨakaku pukuyɨrixɨ, ka'anuyehekɨatɨ patɨa kwauni mɨwatineikakaikɨ mɨwatixawatsie.
REV 9:3 Hikɨ kwaunitsata mehatinexɨaka, kwiepa mekaniwakɨne 'utsikari, tɨrɨkariya mekaniupitɨarieni terɨkaxi kwiepa miemete kememɨtetɨrɨkawi wahepaɨ.
REV 9:4 Mɨpaɨ mekateniutahɨawarieni, 'atsimemɨka'iyurienikɨ kwiepa mieme 'ɨxa, naime mɨtsitsiɨrawi naime kɨye, matsi 'axamemɨwayurienikɨ teɨteri Kakaɨyari tseyuya memɨkahexeiya yukanata.
REV 9:5 Mɨpaɨ mekateniupitɨarieni, memɨkawakwinikɨ, matsi memɨwa'uximatɨakakɨ 'auxɨwime metseri. Kememɨtewa'uximatɨakai, yaxeikɨa mekaniyɨakaitɨni kepauka tewi terɨka mikei hepaɨ.
REV 9:6 Mɨkɨ tukaritsie teɨteri mepeukwikuni matsi mepɨyutatexieni memɨkwinikɨ, mepɨyuwautɨweni memɨkwinikɨ, peru mɨɨya puyuta'una, wahetsie pumaweni.
REV 9:7 'Utsikari kememɨteyuxexeiyakai, kawayutsixi memɨkuha'aritsie kuyaxa miemete wahepaɨ mekani'anenekaitɨni. Yumu'utsie huru kurunayari hepaɨ 'aneneme mekananamanakaitɨni, meta yɨhɨxie teɨteri kememɨtehaka'erie mɨpaɨ mepɨteyuxexeiyakai.
REV 9:8 'Ukarawetsixi wahepaɨ mepɨte'ukɨpakai, meta watamete mayetsi watamete hepaɨ pɨ'anenekai.
REV 9:9 Tepɨa hepaɨ 'aneneme mepanakatɨtɨkatei yutawitsie, yu'anakɨ meputixuwarɨkakai, kawayutsixi kuyaxa meheuyukwiyuka mɨkɨ wahepaɨ mepɨteyu'eniɨriukɨkai.
REV 9:10 Mekaniukwaxikaitɨni, terɨkaxi wakwaxi hepaɨ kani'anenekaitɨni 'anuyemɨmɨtsɨtɨ, meta yukwaxitsie tɨrɨkariya mekanexeiyakaitɨni, 'auxɨwime metseri teɨteri memɨwa'uximatɨakakɨ.
REV 9:11 Kemɨ'ane mɨtiwa'aitɨakai niuki tuayame kanihɨkɨtɨkaitɨni, mana mɨre'aitakai meukatewatsie, hepɨrayutsixi waniukikɨ 'Awaruni katinitewakaitɨni, meta kɨriyekutsixi waniukikɨ Tiyuka'uname titewatɨ.
REV 9:12 Kananuyeyaniri, xɨa'ui matɨari mieme, peru 'akuxi hutatɨ xɨa'ui kaneuyeweka.
REV 9:13 Hikɨ 'ataxewirieka mieme niuki tuayame yukuxineta kaniutahɨtsieni, meta yuariya nekaniu'enieni mawari taiyame nauka 'awayari mexeiya hurukɨ mɨwewiyata 'atineikame Kakaɨyari hɨxie muwe.
REV 9:14 'Ikɨ niuki tuayame kuxineta makwe'e mɨpaɨ katinitahɨawe: «Niuki tuayamete memuyunauka keniwarutixɨna hatuxame 'amɨpatsie 'Eupɨrate hatetsita memɨtihe».
REV 9:15 Hikɨ niuki tuayamete memuyunauka memukuha'aritsiekai mɨkɨ hurayari, mɨkɨ tukari, mɨkɨ metseri, mɨkɨ wiyaritsie mekaniutixɨnarieni, hairieka miemetsie xewitɨ teɨteri memɨwakwinikɨ.
REV 9:16 Wakuyaxima kawayutsixi wahetsie mematekai huta tsienituyari miyuniyari (200.000.000) mekaniyupaɨmekaitɨni.
REV 9:17 Hikɨ heinɨtsika hepaɨ nepɨtiwaruxei, kawayutsixi meta memeutayaxiwawe: Yutawitsie tepɨa mekanenakatɨtɨkateitɨni mayetaimaɨyetɨkatei, mayekwauniyatɨkatei, mayetataxawi 'atsupɨre hepaɨ. Kawayutsixi wamu'u mayetsi wamu'u hepaɨ kani'anenekaitɨni, wateta tai kaniwayeneikakaitɨni, kwauni meta 'atsupɨre.
REV 9:18 Haika kwiniyayarikɨ hairieka tsiemieme xewitɨ teɨteri mekaniukwini, taikɨ, kwaunikɨ meta 'atsupɨrekɨ wateta muwayeneikakaikɨ.
REV 9:19 Kawayutsixi yɨtɨrɨkariya mekanexeiyakaitɨni yuteta meta yukwaxitsie, wakwaxi kuterixi wahepaɨ kani'anenekaitɨni 'anutimu'utɨkaitɨ, mɨkɨkɨ 'axamepɨwayuriekai.
REV 9:20 Hipatɨ teɨteri memɨka'ukwi'iwaxɨ mewakwikaku, mɨkɨ mepɨkatehayewakai mete'ayexeiyatɨ tita yumamakɨ memɨtewewie. Mepɨkatehayewakai nenewieri mewapitɨatɨ kakaɨyarixi 'axamemɨ'anene, huru, pɨrata, wurunitse, tete, kɨye kakaɨyarixiyari tsepa memɨkaheuneniere, memɨkaheu'enana, meta memɨka'ukɨniwawe.
REV 9:21 Mepɨkatehayewakai meteyumemiwatɨ, meteyukewaiyatɨ, mɨkayɨ'ɨya meta mɨkayɨkɨna mewakumaɨwatɨ meta metenawayatɨ.
REV 10:1 Hikɨ xeime niuki tuayame nekaniuxeiya tɨrɨkaɨyeme taheima 'akamiekame, haiwitɨri tsata yeweme. Kuwiwi mu'uya heima kaniuyekateitɨni, yɨhɨxie tau hepaɨ kanayexawatɨkaitɨni, meta 'ɨkateya tai 'amanutitetere hepaɨ pɨtiyuxexeiyakai.
REV 10:2 Yumamatsie xapa kanahuriekaitɨni 'etsiyeume werime. Yutserie yɨ'ɨkakɨ haramaratsie kaneutakeni, yu'utakɨta kwiepa.
REV 10:3 Hikɨ karima kaniutahiwa maye kemɨtiutahiwa hepaɨ. 'Utaniuku, 'atahuta tɨranariyari kaniuyuani.
REV 10:4 Kepauka muyua 'atahuta tɨranariyari ne nepɨtiti'utɨanikekai, peru xeime nekaniu'enieni taheima mɨpaɨ haineme: «Ketine'awietani 'atahuta tɨranariyari, kememutiyua meta pepɨkaraka'utɨwani».
REV 10:5 Hikɨ mɨkɨ niuki tuayame nemuxeiyakai haramaratsie heutaweme meta kwiepa, yutseriekɨta muyuawitsie paitɨ kaneutimeni.
REV 10:6 Kaniuyuhɨritɨani mayeniere hɨxie tsepanetɨ xeitsienituyari wiyari manuyekɨka, kemɨ'ane muyuawi, kwie, haramara meta tita naitɨ mana mɨtixɨawe, meta mɨpaɨ kaniutayɨni: «'Ari tukari kananayexɨni.
REV 10:7 Matsi kepauka 'atahutarieka mieme niuki tuayame mɨtaniuni, kepauka yukuxineta mitahɨtsieni, 'ana tita Kakaɨyari mɨtiuti'awietakai kanaye'amɨkɨ mɨtahekɨatsienikɨ, kemɨtiwarutaxatɨakai yuniukamete hetsiena mieme memɨte'uximayakai».
REV 10:8 Hikɨ kemɨ'ane nemu'eniekai taheima 'utaniukame, mɨkɨ tawarita pɨnetsi'utahɨawixɨ mɨpaɨ 'utaitɨ: «Huma kenemie, kenahuri 'iya xapa 'etsimɨyewa muweri, niuki tuayame mehurie haramaratsie heutawetɨ meta kwiepa».
REV 10:9 Hikɨ niuki tuayame hetsɨa nekaniuyani meta xapa mɨkwikwie nekanitawawirieni. Mɨkɨta mɨpaɨ kanetiniutahɨawe: «Kenanuhuritsɨ meta keneutakwa'i. 'Ayuriepa patsiɨre, peru 'ateta xiete hepaɨ pakakare».
REV 10:10 Hikɨ xapa 'etsimɨyewa ne'anuhurieka niuki tuayame mehuriekai, nekanitakwani. Neteta xiete hepaɨ pakakarixɨ, kepauka nemitakwai, peru neyuriepa hatsiwitɨ kanayani.
REV 10:11 Mɨkɨ mɨpaɨ pɨnetiutahɨawixɨ: «Kaneuyeweka 'ekɨ tawarita Kakaɨyari hetsiemieme pemɨtiwataxatɨanikɨ mɨireme kiekarite, nuiwarite, yuniukikɨ memutiniuka meta te'aitamete wahepaɨtsita».
REV 11:1 Merikɨtsɨ haka nekaniukweitɨarieni ti'inɨnɨatame mɨhɨkɨtɨkai, mɨpaɨta nekatiniutahɨawarieni: «Kenanukukexi, Kakaɨyari tukieya keneuti'inɨata meta mawari taiyame, yaxeikɨata keyupaɨmetɨ muwa memeyutinenewiwa tukita keniwaruti'inɨata.
REV 11:2 Tuki takwa keneuhayewa xeikɨa, pepɨka'iti'inɨata, mana memupitɨariekɨ nuiwarite hipatɨ, mɨkɨ mekaniketsikuni Kakaɨyari kiekariena huta tewiyari heimana huta metseri.
REV 11:3 Neri yuhutame nekaniwarexeiyani tehekɨatamete, mɨkɨ kememɨte'unenierixɨ mɨpaɨ memɨtekuxatanikɨ xeimiriyari heimana huta tsienituyari heimana haika tewiyari tukari, hiwerika kamixayari me'anakatɨtɨkaitɨ».
REV 11:4 Huriwa kɨyeyari hutatɨ, kɨxeme hutatɨ kwie kutsiyari hɨxie mɨti'u, mɨkɨ mekanihɨkɨtɨni.
REV 11:5 Xɨka xewitɨ tiwakwinitɨamɨkɨni, mɨkɨ tai yuteta mepɨwayenenetɨwa, meta mepɨwatixɨxɨtsitɨwa mɨkɨ memɨwaraye'unie. Mɨpaɨ katinimieriemɨkɨ kemɨ'ane mɨtiwakwinitɨamɨkɨni.
REV 11:6 Mɨkɨ tehekɨatamete heitserie mekanexeiyani muyuawitsie mɨkakawiyekɨ mexi metekuxata, heitserie meta mekanexeiyani haa hepaɨtsita, xuriya memayeitɨanikɨ, memɨtewakwinitɨanikɨ kwiepa memɨtama naime kwiniyakɨ tsepa kepaɨmexɨa kemɨtiwanake.
REV 11:7 Kepauka meminɨni mɨpaɨ metehekɨatatɨ, yeutanaka meukatewatsie matine wara'iwamɨtɨ pɨwakwineni, wara'iwame kaniwakwimɨkɨ.
REV 11:8 Wakaxarite kiekari hixɨapa pɨtiheni kiekari 'amakuyewatsie. 'Iyari kemɨtimate 'inɨarikɨ, Tsuruma katinakutewaka, 'Ekipitu meta rakutewa mɨkɨ kiekari, mana Tati'aitɨwame kuruxitsie kaniumierieni.
REV 11:9 Hipatɨ kiekarite mukumane, nuiwari, hipame niukitekɨ memutiniuka meta naitsarie kiekarite mukumane yunaitɨ mekanixeiyakuni wakaxari haika tukari heimana merie tuka. Mepɨkawapitɨani wakaxari mɨkateukienikɨ.
REV 11:10 Kwiepa memɨtama mepɨyutemamawieka wakaxarite mexeiyatɨ, 'imikieri mepɨyutamikwani, texaxatamete yuhutatɨ memɨwa'uximatɨakaikɨ kwiepa memɨtama.
REV 11:11 Hikɨ haika tukari heimana merie tuka 'anukayaku 'iyari nieritɨwame kaniwaruwiya Kakaɨyari heiyenɨ'aku. Mekananuku'uni, mɨkɨ memɨwaruxei kwinimieme mekateniutimamani.
REV 11:12 Hikɨ xeime mekaniu'enieni taheima 'utaniukame mɨpaɨ tiwakɨhɨaweme: «'Ena xekenanatikɨni». Muyuawitsie mekananutikɨne haiwitɨritsata, mɨkɨ memɨwaraye'uniekai mewaxeiyakaku.
REV 11:13 'Ana kwitɨwa kwie karima kaniutayuani. Kiekari tamamatatsie mieme xewitɨ kaneuku'une. 'Atahuta miriyari meyupaɨmetɨ teɨteri mekaniukwini, peru memuyuhayewaxɨ waɨkawamekɨ memamatɨ, Kakaɨyari taheima makawe hepaɨtsita 'aixɨa mekatenikuxatakaitɨni.
REV 11:14 Kanaye'ani xɨa'ui hutarieka mieme. Hairieka miemeta kanehurani.
REV 11:15 Hikɨ 'atahutarieka mieme niuki tuayame yukuxineta kaniutahɨtsieni. Hikɨ karima mekanetiniukakaitɨni muyuawitsie mɨpaɨ me'utiyuatɨ: «Hikɨtsɨari kwiepa memɨtama wahetsie katinanuyeyani, Kɨritsitu pɨtari pɨtita'aita tahetsiemieme, tsepa xeitsienituyari wiyari manuyekɨka».
REV 11:16 Hikɨ 'ukirawetsixi xeitewiyari heimana nauka Kakaɨyari 'uwenieya hɨxie mematekai, mɨkɨ mekaniutihɨxima'uni, Kakaɨyari nenewieri mekaniupitɨani
REV 11:17 mɨpaɨ me'utiyuatɨ: «'Ekɨ Ti'aitame Kakaɨyari Naimekɨpemɨtɨrɨkaɨye, kemɨ'ane 'amuyeika meta 'amuyeikakai, pamɨpariyutsi tepɨmatsipitɨa mariwemekɨ tɨrɨkariya pemupitɨarie, meta pekanitsutɨani peti'aitatɨ.
REV 11:18 Nuiwarite mekaniha'akaitɨni, peru 'ahaxɨa kanaye'ani pemɨtiwakwinitɨanikɨ, tukari raye'a mɨkite pemɨwatahɨawekɨ, wa'iwarika pemɨwaminikɨ 'ahetsɨa miemete te'uximayatamete, Kakaɨyari niukametemama, Kakaɨyari teɨterimama memɨpatsie, mɨkɨ memɨmatsi'ayemakaxe kepemɨtitewakɨ, tɨɨri meta 'ukirawetsixi yunaitɨ, meta kanaye'ani pemɨwakwinikɨ kemɨ'ane kwie memɨtsewiximakai».
REV 11:19 Merikɨtsɨ Kakaɨyari tukieya kaneuyepiere muyuawitsie, kakuni tɨratuya mɨ'inɨariyari kanimatsiɨkɨkaitɨni tukita yekaitɨ, kaniwayemerɨkakaitɨni kaneyeyuanekaitɨni kaneyetɨrarɨkakaitɨni kwie kaniutayuani meta tee 'anenetɨ kaniukaxɨrieni.
REV 12:1 Merikɨtsɨ 'inɨari matsiɨkɨtɨ kanayani muyuawitsie mariwetɨ: 'Ukaratsi mana kaniuwekaitɨni tau kamixayari 'anakatɨtɨ metseritsie 'awetɨ, meta yumu'utsie kuruna 'anamatɨ tamamata heimana huta xurawetsixi me'anakutetɨkaime
REV 12:2 meta 'ayehukatɨ, kaniutahiwakaitɨni 'ikukuinekaku meta tiuka'eniwatɨ.
REV 12:3 Xewitɨta kaniuyuhekɨata 'inɨari muyuawitsie: kuu 'atimariwetɨ heuxetatɨ 'atahuta mu'ute hexeiyatɨ, meta tamamata 'awate hexeiyatɨ, yaxeikɨata yumu'utetsie 'atahuta kurunayari me'anamanatɨkaitɨ.
REV 12:4 Yukwaxikɨ kaniwaranakahapani xurawetsixi muyuawitsie hairiekatsie xeime, kwiepa kaniwareukaxɨrieni. Kepauka 'ukaratsi mɨtiniwerɨmekai, kuu 'amɨtimariwe hɨxiena kaniuhuni nu'aya kwaimɨtɨ.
REV 12:5 Hikɨ 'ukitɨme kaniutiniweni, yunaime nuiwarite tiwa'aitɨwame mayani, tepɨa 'itsɨyari mɨtikweni. Nu'aya panutiwitɨkie Kakaɨyari 'uwenieya manuwetsie paitɨ.
REV 12:6 Hikɨ 'ukaratsi kaniuyuta'una makumawetsie paitɨ, hakewa Kakaɨyari meikuha'aritɨiri mana me'ɨwiyariekakɨ xeimiriyari heimana huta tsienituyari heimana haika tewiyari tukari.
REV 12:7 'Ana kuyaxa kaniutaweni muyuawitsie: Miyeri meta niuki tuayamete yunaitɨ mekanitsutɨani kuu 'amɨtimariwe memietɨwetɨ. Kuu 'amɨtimariwe kaniyumienekaitɨni, meta niuki tuayametemama hepaɨna,
REV 12:8 peru mepɨyutatexi, huyeri pumawekai muyuawitsie memɨtenakenikɨ.
REV 12:9 Hikɨ mɨkɨ kuu 'amɨtimariwe mɨpaɨ katinayeweiyarieni, mɨkɨ kuu matɨari paitɨ mieme Kauyumarie mɨtitewa meta Tsatanaxi, mɨtiwa'irɨwiya yunaime kwiepa memɨtama, mɨkɨ kananuyehɨiyani mana, kwiepa paitɨ kaneukahɨiyani, niuki tuayametemama 'utɨmanata mekaneukaxɨriyani.
REV 12:10 Hikɨ xeime nekaniu'enieni mɨpaɨ haineme karima: «Hikɨrixɨa wikweitsitɨarika kanaye'ani, kemɨtitɨrɨkaɨye meta kemɨti'aita takakaɨyari, kanaye'ani Kɨritsitu heitserie kemɨrexeiya hetsɨana mieme. Kemɨ'ane mɨwaxaneta ta'iwamarixi, mɨkɨ kananuyehɨiyani, takakaɨyari hɨxie mɨwaxanetakai tukarikɨ meta tɨkarikɨ.
REV 12:11 Mɨkɨri mekane'iwa Muxa xuriyayakɨ, meta memɨtekuxatakaikɨ meyuhekɨatatɨ, yutukari memɨka'utikwerikɨ tsepa memukwi'iwaxɨ.
REV 12:12 'Ayumieme xekeneyutemamawieka muyuawi, meta xeme muyuawitsie xemetitei. Peru xɨa'ui kwiepa xemɨtama meta haramaratsie. Kauyumarie xehetsɨa kaneukahɨiyani waɨkawa ha'atɨ mɨpaɨ timaitɨ, yapaɨmexɨa xeikɨa mɨpitɨariekɨ».
REV 12:13 Merikɨtsɨ kepauka kuu 'amɨtimariwe kwiepa paitɨ maukahɨiya, 'ukaratsi kaniuweiyakaitɨni 'ukitɨme mutiniwekai.
REV 12:14 Hikɨ 'ukaratsi kaniupitɨarieni ma'anatɨkanikɨ kwixu 'amɨnena hepaɨ, makumawetsie paitɨ manuwienikɨ yuhuyeripa, mana kuu 'amɨtimariwe mɨka'ixeiyakɨ, hakewa xeiwiyari mɨremikieka, 'ariketa huta wiyari, 'ariketa merie wiyari.
REV 12:15 Hikɨ kuu 'amɨtimariwe 'ukaratsi mɨkuweiyanekai hatuxame hepaɨ pame haa kananatihayani 'ukaratsi manuhautsitɨanikɨ.
REV 12:16 Peru kwie 'ukaratsi kaniuparewiekaitɨni, kaniwatixaware, haa muwa kaneukayeurieni hatuxame kuu 'amɨtimariwe yuteta menatihaya.
REV 12:17 Hikɨ kuu 'amɨtimariwe kaniuyeha'ani 'ukaratsi hepaɨtsita, kaneyani mɨyumienenikɨ, hipame hetsiena memɨyenunuiwa mɨwaraye'uniekakɨ, mɨkɨ yamemɨtekahu Kakaɨyari kemɨti'aita, memɨyuhekɨata Ketsutsi hetsɨa memiemetetɨtɨ.
REV 13:1 Merikɨtsɨ mana ne'uwetɨ haramara tetsita, yeutanaka nekaniuxeiya haramaratsie 'anatiyeiximeme. Tamamata 'awayari kanexeiyakaitɨni, meta 'atahuta mu'ute, xexuime 'awatetsie kuruna kananamanakaitɨni. Xexuime mu'utetsie pɨra'utɨkatei Kakaɨyari kemɨtitsewixima.
REV 13:2 Mɨkɨ yeutanaka nemuxei tɨwe hepaɨ katiniyuxexeiyakaitɨni, hutse hepaɨ re'ɨkatɨ, meta maye hepaɨ retenitɨ. Hikɨ kuu 'amɨtimariwe yɨtɨrɨkariya kanipitɨani, heitserie kanipitɨani mɨti'aitanikɨ 'uwenitsie 'akaitɨ hakewa kuu 'amɨtimariwe mɨre'aitakai, meta heitserie waɨkawamekɨ kanipitɨani.
REV 13:3 Mu'uya xewitɨ mumierie hepaɨ pɨtiyuxexeiyakai, peru kemɨtiukwinixɨ 'aixɨa reu'erietɨ kanayani tsepa mɨmɨximekai. Yunaitɨ kwiepa memɨtama mekani'iyarixiekaitɨni me'ixeiyatɨ yeutanaka, hetsiena mepɨtewiyakukai.
REV 13:4 Nenewieri kuu 'amɨtimariwe mekanipitɨakaitɨni, yeutanaka tɨrɨkariya mɨpitɨakɨ. Yeutanakata nenewieri mekanipitɨakaitɨni mɨpaɨ me'utiyuatɨ: «¿Kepaikɨ mɨkɨ yeutanaka hepaɨ pɨ'ane, kepaikɨ pɨyɨwe hamatɨana mɨyumieneni?»
REV 13:5 Hikɨ niuki kaniupitɨarieni waɨkawa mɨtikuxatanikɨ, mitsewiximakakɨ Kakaɨyari hepaɨtsita 'axa'utaitɨ, meta heitserie kaniupitɨarieni huta tewiyari heimana huta metseri mɨpaɨ mɨtiyurienenikɨ.
REV 13:6 Hikɨ kanitsutɨani 'axa'utaitɨ Kakaɨyari hepaɨtsita, 'itsewiximatɨ kemɨ'ane mɨhɨkɨ, meta kiekariena, yaxeikɨata muyuawitsie memɨtexuawe watsewiximatɨ kanitsutɨani.
REV 13:7 Hikɨ mɨpaɨta katiniupitɨarieni mɨyumienenikɨ Kakaɨyari teɨterimama mɨwaraye'uniekakɨ, meta mɨwara'iwanikɨ, heitserie pupitɨarie yunaime nuiwarite wahepaɨtsita, naime kiekari mukumane, hipame niukiyarikɨ memutiniuka, meta nuiwarite yunaime wahepaɨtsita.
REV 13:8 Yunaitɨ kwiepa memɨtama nenewieri mekanipitɨakakuni, mɨkɨ xapatsie memɨka'aka'utɨarie tukari memexeiyanikɨ, Muxa mawari mayeitɨarie xapayatsie, kwie mutawewiyatsie paitɨ.
REV 13:9 Kemɨ'ane meu'ena, ke'u'ena.
REV 13:10 Kemɨ'ane teɨteri 'ateewa paitɨ mɨwaranuhapani, mɨkɨta kananuhaniemɨkɨ 'ateewa paitɨ. Kemɨ'ane 'ixiparakɨ mɨtiyumemiwa, mɨkɨta 'ixiparakɨ kanimieriemɨkɨ. Mɨpaɨ metemaitɨ Kakaɨyari teɨterimama mepɨte'uka'eniwani yuri mete'erietɨ.
REV 13:11 Kwitɨwata xeime nekaniuxeiya yeutanaka kwieta matine. Hutame 'awate kana'uitɨakaitɨni muxa hepaɨ, peru kuu 'amɨtimariwe hepaɨ katiniuxaxatakaitɨni.
REV 13:12 Yeutanaka matɨari mɨyɨanekai heitserie kemɨrexeiyakai, 'ikɨ naimekɨ yaxeikɨa katiniyurieneni hɨxiena 'uwetɨ, kanikuyuitɨani kwie, mɨkɨ kwiepa memɨtamata kaniwarukuyuitɨani nenewieri memipitɨanikɨ mɨkɨ yeutanaka matɨari mieme mɨhɨkɨtɨkai, kemɨ'ane 'aixɨa reu'erietɨ mayeitɨarie mɨximetɨ.
REV 13:13 'Inɨari pɨwewie mamariwaweme, tai pɨtita'aitɨani taheima makanenikɨ kwiepa teɨteri me'ixeiyakaku.
REV 13:14 Kwiepa memɨtama katiniwa'irɨwiyani mɨiremekɨ 'inɨari tiyurienetɨ, yeutanaka hɨxie 'uwetɨ. Mɨpaɨ katiniwaruta'aitɨani kwiepa memɨtama 'ɨkiya memɨtawewienikɨ yeutanaka hepaɨ tiyuxexeiyame, kemɨ'ane manutanierixɨ tsepa 'ixiparakɨ mɨtiukwinixɨ, mɨkɨ hepaɨ 'anekame.
REV 13:15 Hikɨ mɨpaɨ katiniupitɨarieni 'iyari mipitɨanikɨ yeutanaka 'ɨkiyari, mɨkɨ mɨtikuxatanikɨ, mɨpaɨ mɨti'aitanikɨ memɨkwi'iwakɨ keyupaɨmetɨ nenewieri memɨka'ipitɨa yeutanaka 'ɨkiyari.
REV 13:16 Hikɨ mɨpaɨ katiniwaruta'aitɨani tɨɨri meta 'ukirawetsixi yunaime, xikutsixi meta tixaɨtɨ memɨkatehexeiya, memɨxɨxɨni meta waɨriyarika memɨte'uximaya yunaime, mɨkɨ yunaitɨ yumamatsie yutserieta mekaniu'inɨaritɨarieni meta yukanata.
REV 13:17 Tewi pɨkayɨweni tixaɨtɨ mɨtinanenikɨ meta mɨtituanikɨ xɨka ka'inɨaritɨarieka, xɨka yeutanaka kaha'utɨaka kemɨtitewa, kemɨti'inɨatsie terɨwarikaya 'inɨariyari.
REV 13:18 'Ikɨkɨ yapɨretimani, kemɨ'ane mɨtimaiwe ke'iti'inɨata yeutanaka 'inɨarieya, tewi mɨpaɨ paɨmemekɨ mɨ'inɨarikɨ, 'ataxewime tsienituyari heimana haika tewiyari heimana 'ataxewi (666) kanipaɨmeni.
REV 14:1 Merikɨtsɨ manata nekaneutaniere, Muxa nekaniuxeiya, Tsiyuni yemuriyaritsie kanawekaitɨni. Hamatɨana mana mekaniti'ukaitɨni xeitsienituyari heimana huta tewiyari heimana nauka miriyari meyupaɨmetɨ, yukanata mete'a'utɨkaitɨ Muxa kemɨtitewa meta 'Ukiyarieya.
REV 14:2 Yuariya nekaniu'enieni muyuawitsie 'akaneikame, haa mariwetɨ kemɨti'eniɨriɨkɨ, tɨranari mɨtɨrɨkaɨye hepaɨ ti'eniɨriɨkɨme. Yuariya nemu'eni, kanariwiwamete wakwikari kanihɨkɨtɨkaitɨni.
REV 14:3 Kwikari mɨhekwa mekanikwikakaitɨni 'uweni hɨxie meti'utɨ, yunaukatɨ memayeneniere wahɨxie, meta 'ukirawetsixi wahɨxie. Xewitɨ pɨkayɨwekai meitimanikɨ mɨkɨ kwikari, mɨkɨ xeitsienituyari heimana huta tewiyari heimana nauka miriyari memɨyupaɨmekai xeikɨa mepimaikai, keyupaɨmetɨ memutixɨnarie me'utinanaiyaka kwiepa memɨtama watsata.
REV 14:4 Mɨkɨ mekanihɨkɨtɨni memɨkayutsewixima, 'ukarawetsixi memɨkawarukumayɨa. Muxa 'utɨma memuku'uwa tsepa hakewa meutɨa. Mɨkɨ teɨteri memutinanaiya mexɨakame 'ikwaxi hepaɨ, Kakaɨyari meta Muxa nuiwarieya memakɨnekɨ.
REV 14:5 Wateta 'itarika pumawekai, wahetsie pɨkarahɨiwakai.
REV 14:6 Hikɨ xeimeta nekaniuxeiya niuki tuayame muyuawi hixɨapa 'awiximeme, meta niuki 'aixɨa manuyɨne yuheyemekɨ mɨwataxatɨanikɨ kwiepa memɨtama, naitsarie kiekatari, tsepa kehate, kememɨte'uniukakai, meta kiekari mukumane.
REV 14:7 Kaniutahiwakaitɨni karima: «Kakaɨyari xekenayemakaxeni, meta 'aixɨa xekeneutiyuaneni hepaɨtsitana, 'ari kanaye'ani mɨwatahɨawekɨ 'itsɨkametɨtɨ. Xekenayexeiyani naime mɨtiutiwewi muyuawi, kwie, haramara meta haixate».
REV 14:8 Kaniweiyakaitɨnita hutarieka mieme niuki tuayame mɨpaɨ tiuhiwatɨ: «'Ari kaniuka'une. Wawiruniya mɨmariwe 'ari kaniuka'une, yunaime nuiwarite winu mɨwa'itɨakai memikumaɨwanikɨ».
REV 14:9 Manata hairieka mieme niuki tuayame wa'utɨma kaniumiekaitɨni karima 'utahiwatɨ: «Xɨka xewitɨ yeutanaka 'ayexeiyani meta 'ɨkiyari, meta tseyuya yukanata meta yumamatsie mutanaki'erieni,
REV 14:10 yaxeikɨata Kakaɨyari haxɨaya winuyari mekananu'ikuni tekɨxieyata muyema hɨkɨatɨ tixaɨtɨ katinuitɨarietɨ. Kani'uximatɨariemɨkɨ taikɨ, meta 'atsupɨrekɨ, niuki tuayamete memɨpatsie wahɨxie meta Muxa hɨxie.
REV 14:11 'Uximatɨarika kɨtsiyari panutineikani tsepanetɨ xeitsienituyari wiyari manuyekɨka. 'Uxipiya mepɨkahexeiyani tukarikɨ tɨkarikɨ keyupaɨmetɨ yeutanaka memayexeiya meta 'ɨkiyari, 'inɨarieya memutanaki'eri kemɨtitewa».
REV 14:12 Mɨpaɨ metemaitɨ Kakaɨyari teɨterimama mepɨte'uka'eniwani, mɨkɨ yamemɨtekahu Kakaɨyari kemɨti'aita meta yuri memɨte'erie Ketsutsi hetsie.
REV 14:13 Hikɨ xeime muyuawitsie hetaniukame nekaniu'enieni: «Ketinaka'utɨa: 'Aixɨa mekani'itɨariekakuni mɨkɨ Ti'aitame hetsie metewiyatɨ memɨkwini 'ena mɨtiyeyani». «Huu ―'Iyari kanaineni―, mɨkɨ mekani'uxipiekakuni kememɨte'u'uximayakai, tita memɨte'uyuri pɨmatsiɨkɨni tsepa hakewa meme'uwani».
REV 14:14 Hikɨ nekaneutaniere, 'ana haiwitɨri tuxame nekaniuxeiya, mɨkɨ hetsie xewitɨ kanakateitɨni «Yuri Tewi hepaɨ tiyuxexeiyatɨ». Yumu'utsie huru kurunayari 'anamatɨ, meta yumamatsie kutsira makatutsi 'atamɨariekame 'akwetɨ.
REV 14:15 Hikɨ xewitɨta niuki tuayame tukita 'ayeneka, haiwitɨri hetsie makatei kaniutahiwieni: «Kutsira makatutsikɨ keneukaxiteki. 'Ari kanaye'ani mɨka'inɨiyanikɨ, 'aixɨari kani'aneneni».
REV 14:16 Hikɨ haiwitɨri hetsie makatei kutsira makatutsikɨ katinakuxiteni, kwiepa naitɨ katiniuka'itsanarieni.
REV 14:17 Hikɨ xewitɨta niuki tuayame muyuawitsie tukita kaniwayeneni, mɨkɨta kutsira makatutsi 'ataxikaunime kanakwekaitɨni.
REV 14:18 Xewitɨta mawari taiyame hetsie kanayeneni niuki tuayame heitserie mexeiyakai tai hepaɨtsita, meta kutsira makatutsi 'ataxikaunime makwe'e karima kaniutahiwieni: «'Akutsira mataxikaunikɨ kaxie takariyari kwiepa keneukuxeɨri, 'ari 'aixɨa kani'aneneni».
REV 14:19 Hikɨ mɨkɨ niuki tuayame yukutsirakɨ kwiepa kanikuxeɨrieni, kaxie 'ukuxeɨrieka meta 'ipɨname 'amɨyewata kaneikaxɨrieni, Kakaɨyari haxɨayata.
REV 14:20 Hikɨ kaxie takariyari kiekari warie paitɨ kaniutiketsinarieni, meta kaxie pɨnameta xuriya kaniwayeneikakaitɨni, kawayutsixi wapirenu hetsie kaniye'ani, haika tsienituyari kirumetɨruyari 'akuyeukaku.
REV 15:1 Xeime tawarita 'inɨari mariweme nekaniuxeiya muyuawitsie tiyɨhɨxiyatsitɨwame: 'atahuta niuki tuayamete nekaniwaruxeiya 'atahutame kwiniyayari memexeiyakai 'imatɨrieka miemete, mɨkɨkɨ Kakaɨyari haxɨaya memaye'atɨanikɨ.
REV 15:2 Yaxeikɨata haramara xikɨri mutitatawe hepaɨ 'anekame nekaniuxeiya. Mɨkɨ meta nepɨwaruxei haramara tetsita me'uti'ukame yeutanaka mema'iwaxɨ, 'ɨkiyari meta 'inɨariyari kemɨtitewa. Haripa mekaniu'ɨkaitɨ Kakaɨyari mɨwayetuiriekai,
REV 15:3 meta Muitsexi nɨawarieya mekwikatɨ Kakaɨyari ti'uximayatsiriwame, meta Muxa nɨawarieya: «Pepɨmariwe meta 'a'uximayatsika pɨtiyuhɨxiyatsitɨwa, Ti'aitame, Kakaɨyari Naimekɨmɨtɨrɨkaɨye. Heitseriemekɨ meta 'ahuye kaniyuritɨni, nuiwarite Tiwa'aitɨwame.
REV 15:4 Kamɨtsɨ Ti'aitame, mekamenayemakaxekakuni. Kamɨtsɨ 'aixɨa petikuxaxatsiwame mekamenayeitɨakakuni. 'Ekɨ xeikɨa pekanipatsieka. Yunaitɨ nuiwarite mekani'axɨakuni, nenewieri memetsipitɨanike 'a'uximayatsika heitseriemekɨ mɨhekɨakɨ».
REV 15:5 Mɨya tiuyɨku mɨpaɨta nekatiniuniere, muyuawitsie tuki muwe kaneuyepiere, hakewa Kakaɨyari mehekɨatsie.
REV 15:6 Muwa tukita mekanayenexɨani niuki tuayamete 'atahutatɨ memi'atɨa 'atahuta kwiniyayari. Rinu 'ixurikiyari mɨ'itiya mepanakatɨtɨkatei xawatɨmekɨ, meta huru hɨiyameyarikɨ yutawitsie mepayuhɨatɨkatei.
REV 15:7 Hikɨ yunaukatɨ memayeneniere, xewitɨ mɨkɨ kaniwarutahapatɨani niuki tuayamete xexuime huru kupayari Kakaɨyari haxɨaya hɨpɨneme, yuheyemekɨ mayeniere tsepanetɨ xeitsienituyari wiyari manuyekɨka.
REV 15:8 Hikɨ tukita kɨtsi kaniuyehɨne, Kakaɨyari xawatɨriyaya meta kemɨtitɨrɨkaɨye, xewitɨ pɨkayɨwekai tukita meutahanikɨ kepaukake meutipare 'atahuta kwiniyayari, 'atahutatɨ niuki tuayamete memi'atɨa.
REV 16:1 Merikɨtsɨ xeime nekaniu'enieni tukita paitɨ karima warahiwiwame niuki tuayamete: «Mana xekenehu, meta kwiepa xekeneukayeuri 'atahuta tekɨxiyari Kakaɨyari haxɨaya mɨhɨpɨne».
REV 16:2 Hikɨ mexɨakame kaneyani, kwiepa yutekɨxi kaneukayeurieni, meta yunaitɨ teɨteri yeutanaka 'inɨarieya memexeiyakai meta 'ɨkiyari memayexeiyakai mɨkɨ kwinimieme 'axa'anemekɨ mekaniuti'etsata meta 'axame'ukɨ'ɨaretɨ.
REV 16:3 Hikɨ hutarieka mieme yutekɨxi haramaratsie kaneukayeurieni, xuriya kanayani mɨkite waxuriya hepaɨ 'anetɨ, yunaitɨ mekateniukwini haramaratsie memuteye'uwakai.
REV 16:4 Hikɨ hairieka mieme hatuxametetsie meta haixatetsie yutekɨxi kaneukayeurieni, mɨkɨta xuriya kanayani.
REV 16:5 Hikɨ niuki tuayame haakɨ mɨhɨritɨarie nekaniu'enieni mɨpaɨ 'utaineme: «'Ekɨ heitserie pekanexeiyani, Pemɨpatsie, pemɨhɨkɨ meta yuheyemekɨ 'apemuyeika mɨya 'anekamekɨ pepɨtiwarakapitɨwa.
REV 16:6 Mɨkɨ 'ateɨterima meta 'aniukamete waxuriya memutayeuri, 'ekɨta xuriya pepɨwaranu'itɨa, mɨyamemɨte'uyurikɨ mɨkɨkɨ pepɨtiwarakapitɨa».
REV 16:7 Xeimeta nekaniu'enieni mawari taiyame mɨpaɨ 'utaineme: «Mɨpaɨ pɨ'ane, Ti'aitame Kakaɨyari Naimekɨmɨtɨrɨkaɨye, yurikɨ pehaitɨ meta heitseriemekɨ yapetikamietɨ pepɨti'amari'itɨwa».
REV 16:8 Hikɨ naurieka mieme niuki tuayame yutekɨxi tau hetsie kaneikayeurieni, tau mɨpaɨ katiniupitɨarieni teɨteri taikɨ mɨwatixɨtsitɨwanikɨ.
REV 16:9 Yunaitɨ teɨteri mekaniti'iwarikirekaitɨni, peru mɨyatɨtɨ mepɨkate'uhayewaxɨ, Kakaɨyari hepaɨtsita 'aixɨa memaitɨkaniyari, heitserie mexeiyakaikɨ mɨpaɨ mɨtiwakwinitɨanikɨ, kemɨtitewa hepaɨtsitana 'axameputiyua.
REV 16:10 Hikɨ 'auxɨwirieka mieme niuki tuayame yutekɨxi yeutanaka 'uwenieya hetsie kaneikayeurieni, naitsarie mɨra'aitakaitsie kanakuyɨre. Teɨterimama yuneni mekanikukewekaitɨni kukuiniyakɨ,
REV 16:11 meta mete'ukakukuinetɨ haiyakɨ Kakaɨyari muyuawitsie makawe hepaɨtsitana 'axameputiyuanekai, mepɨkatehayewakai 'axameteyurietɨ.
REV 16:12 Hikɨ 'ataxewi mieme yukupa hatuxame 'amɨpatsie 'Eupɨrate mɨtitewatsie kaneikayeurieni, haa mana kanakawani manutayepierekɨ te'aitamete mana memukɨnekɨ tau manatineika kiekatari.
REV 16:13 Hikɨ kuu 'amɨpa tetana nekatiniuxeiya, meta yeutanaka teta, meta tixaxatame mɨti'itawa teta, nekatiniuxeiya haikame 'iyarite mɨka'itiyatɨka, temutsi wahepaɨ meteyuxexeiyame.
REV 16:14 Mɨkɨ 'iyarite 'axamɨ'anene kanihɨkɨtɨni, 'inɨari mamariweme memɨteyurie, meta mekanayekɨkani yunaime kwiepa te'aitamete wahetsɨa, memɨyutakwinikɨ Kakaɨyari Naimekɨmɨtɨrɨkaɨye mariwemekɨ tukarieya maye'anitsie.
REV 16:15 «Neuxei yumarima, tinawayame hepaɨ nekaninuamɨkɨ. 'Aixɨa pɨ'itɨarieni kemɨ'ane mɨyɨhɨtɨa, mɨha'aritsie yu'ixuriki mɨkawaune, kapa mawetɨ 'uyeikanikɨ meta yutewiyatɨ».
REV 16:16 Hikɨ 'iyarite 'axamemɨ'anene te'aitamete mekaniwarukuxeɨrieni, hepɨrayukɨ 'Arɨmakeruni mɨrakutewatsie.
REV 16:17 Hikɨ 'atahutarieka mieme yutekɨxi 'ekapa kaneukayeurieni meta tukita 'uweni manuwe yuariya karima kanayeneni mɨpaɨ 'utaitɨ: «'Ari kaneutipare».
REV 16:18 Meta katiniukamimiwakaitɨni, karima 'utatɨrarɨkatɨ, meta kwie karima kaniutayuani. Hatsuaku kemɨkatitayuawekai tewi kwiepa mutawewiyatsie paitɨtɨ, kwinimieme tiutayuatɨ mariwemekɨ kanayani.
REV 16:19 Hikɨ kiekari mɨmariwe kaniutaxɨne haikatɨ kanayani, meta nuiwarite wakiekarite kaniuka'unixɨani. Kakaɨyari Wawiruniya kiekariyari mɨmariwe kanaye'erieni, meta yutekɨxita yuhaxɨa hɨneme kaniwaru'itɨani memɨ'uximatɨarienikɨ.
REV 16:20 Hikɨ naitɨ kwie haramara hixɨapa mɨyemane, meta hɨrite kaniukumawerixɨani.
REV 16:21 Muyuawitsie tee 'anenetɨ kanakanexɨani teɨteri wahetsie kaniukaxɨrieni, huta tewiyari kiruyari rahetetɨ. Meta teɨteri Kakaɨyari hepaɨtsitana 'axamekaniutiyuanekaitɨni, mariwemekɨ mɨtiwakwinitɨakaikɨ.
REV 17:1 Merikɨtsɨ mɨkɨ xewitɨ niuki tuayamete 'atahuta memɨhɨkɨ tekɨxi memuhapakai, 'ahurawa kanayani, mɨpaɨ kanetiniutahɨawe: «Kenaye'a, nepɨmatsixeitsitɨani 'ukaratsi mɨmariwe kemɨtikwine tuminikɨ mɨyumayɨinɨa, haa waɨkawame hetsie 'akaitɨ.
REV 17:2 Mɨkɨ mekanikumaɨwakaitɨni kwiepa te'aitamete, meta teɨteri mana memɨtamakai winukɨ mekanitarɨwetɨwekaitɨni, memikumayɨanikɨ».
REV 17:3 Hikɨ niuki tuayame 'Iyari nehetsie nuaku kanenewitɨni makumawetsie paitɨ. Mana 'ukaratsi nekaniuxeiya yeutanaka meuyɨtsikimaɨyetsie 'akaime. Yeutanaka naitsarie hetsiena pɨra'utɨkatei 'axa'anɨyɨnemekɨ Kakaɨyari hepaɨtsita, 'atahuta mu'ute pexeiyakai, meta tamamata 'awate.
REV 17:4 'Ukaratsi mɨyɨtsikimaɨyekɨ meta mɨxetakɨ puyukemaritɨakai, huru heukatekame, tetexi witsimɨ'anene meta perɨrakɨ. Huru tekɨxiyari pahanakai mɨtixani'eriwa meta kemɨtikumayɨiwakai tihɨneme.
REV 17:5 Yukanata pɨra'utɨakai kayumainɨakamekɨ:
REV 17:6 Hikɨ mɨkɨ 'ukaratsi nekaniuxeiya tawekame Kakaɨyari teɨterimama waxuriyakɨ, meta mɨkɨ memɨyuhekɨatakai Ketsutsi hetsɨa memiemetetɨtɨ waxuriyakɨ. Hikɨ ne'ixeiyatɨ kwinimieme nekanihɨxiyakaitɨni.
REV 17:7 Hikɨ niuki tuayame mɨpaɨ kanetiniutahɨawe: «¿Ketitayari petihɨxiya? Nepɨmetsitahekɨatɨani 'ukaratsi hepaɨtsita meta yeutanaka 'atahuta mu'ute mexeiya meta tamamata 'awate mexeiya hepaɨtsita.
REV 17:8 Mɨkɨ yeutanaka pemɨxeiya, mɨkɨ meripaitɨ kaniuyeikakaitɨni, hikɨri pɨka'uyeika, meukatewata kanewatiyeiximeni, peru mamierienitsie kaniu'erieka. Kwiepa memɨtama keyupaɨmetɨ memɨka'aka'utuarie kwie munetɨarietsie paitɨ xapatsie tukari memexeiya manuyɨnetsie, mɨkɨ mekanihɨxiyakuni yeutanaka mexeiyatɨ, meripaitɨ 'amuyeikakai, hikɨri 'amɨka'uyeika, matsita kaninuamɨkɨ.
REV 17:9 »'Ena kaneuyeweka meiti'enietɨyani meta meitimaitɨyani. 'Atahuta mu'ute, mɨkɨ 'atahuta yemurite kanihɨkɨtɨni 'ukaratsi hetsiena maka.
REV 17:10 Yaxeikɨata 'atahuta te'aitamete 'atahutatɨ mekanihɨkɨtɨni: Yu'auxɨwitɨ 'ari mekaniukwini, xewitɨ katini'aitani, meta xewitɨ 'akuxi pɨkanuawe, peru kepauka munuani yapaumexɨa xeikɨa kaniuyeikamɨkɨ.
REV 17:11 Mɨkɨ yeutanaka meripaitɨ 'amuyeikakai matsi pɨkahɨkɨri, mɨkɨ ti'aitame 'atahairieka mieme kanihɨkɨtɨni. 'Atahutatɨ wahetsɨa kanimiemetɨni, mɨkɨta kaniyemieni mamierienitsie.
REV 17:12 »Tamamata 'awate pemuxei, mɨkɨ tamamata te'aitamete mekanihɨkɨtɨni, memɨka'itsutɨawawe 'akuxi mete'aitatɨ, peru kwitɨwa heitserie mekanipitɨariekuni memɨteta'aitakɨ yeutanaka hamatɨa.
REV 17:13 Mɨkɨ yaxeikɨa mekateniku'eriwakuni, yɨtɨrɨkariya mekaniyetuiriekuni yeutanaka watɨrɨkariya mexeiyanikɨ.
REV 17:14 Mɨkɨ Muxa mekanitamiekuni, peru Muxa kaniwara'iwamɨkɨ kutsiyarite mɨwakutsiyarikɨ meta te'aitamete mɨtiwa'aitɨwamekɨ, meta mɨkɨ hamatɨana memu'uwa meputa'inierie, mepanayexeiyarie yamemɨtekahu».
REV 17:15 Hikɨta niuki tuayame mɨpaɨ kanetiniutahɨawe: «Haa pemuxeiyakai, 'ukaratsi tuminikɨ muyumayɨinɨa hetsiena 'akaime, mɨkɨ kiekarite mekanihɨkɨtɨni, mɨmɨiremete memɨhɨkɨ meta hipame niukitekɨ memutiniuka.
REV 17:16 Tamamata 'awate pemuxei, meta yeutanaka, mɨkɨ 'ukaratsi tuminikɨ mɨyumayɨinɨa mekanitixani'erikuni. Yuxaɨtame mekaniku'eirikuni meta heumaweme, waiyarieya mekanitakwaikuni, meta mekanitataiyakuni.
REV 17:17 Kakaɨyari mɨpaɨ pɨtiwa'iyaritɨani mɨpaɨ memɨteyuriekakɨ mɨkɨ pɨta kemɨtiyuriemɨkɨ wa'iyari yuxewikaku me'ipitɨakaku yeutanaka mɨkɨ pɨta mɨti'aitametɨnikɨ wahetsiemieme, mɨpaɨ meteyurieyu katinaye'atɨariemɨkɨ naitɨ Kakaɨyari kemutayɨ.
REV 17:18 'Ukaratsi pemuxei, mɨkɨ kiekari mɨmariwe kani'inɨariyaritɨni mɨtɨrɨkaɨye mɨti'aitanikɨ kwiepa te'aitamete wahetsɨa».
REV 18:1 Merikɨtsɨ xeimeta niuki tuayame nekaniuxeiya muyuawitsie 'akamieme. Waɨkawa tɨrɨkariya hexeiyatɨ, meta kwiepa yuhekɨariyakɨ kaniuhekɨariwieni.
REV 18:2 Hikɨ karima kaniutahiwa mɨpaɨ 'utaitɨ: «Kaniuka'une. Kaniuka'une Wawiruniya mɨmariwe. Kakaɨyarixi 'axamemɨ'anene wakie kanayani, meta yunaitɨ 'iyarite 'axamɨ'anene waterɨta kanayani, yunaitɨ wikixi memɨka'itiyatɨka wa'itua kanayani, meta 'aixɨa mɨkatixeiyarie.
REV 18:3 Yunaitɨ nuiwarite memuti'ikɨ memikumaɨwanikɨ kawa'ɨyatɨkaku, mana kiekatari te'aitamete yunaitɨ mɨkɨ mekanikumaɨwakaitɨni, meta tetuayamete mana kiekatari, xikutsixi mekanakɨne witsi'aneme muyupitɨakaikɨ 'anayuhayewamekɨ».
REV 18:4 Hikɨ xeimeta nekaniu'enieni muyuawitsie mɨpaɨ hetaineme: «Kiekaritsie xekenewayekɨni neteɨterima, wahepaɨ xemɨkayɨakakɨ mɨkɨ 'axakememɨteyurie, 'uximatɨarika xehetsie mɨkatinakenikɨ,
REV 18:5 tita 'axamemɨte'uyuri kaniukuxeɨriyani muyuawitsie paitɨ, meta Kakaɨyari pɨkahetɨmai heitseriemekɨ kememɨkate'uyuri.
REV 18:6 Tuminieyakɨ xeketenakapitɨa, tawarita matsi hepaɨna paɨmemekɨ ke'axamɨtiuyurikɨ, meta tekɨxita yuwinu hakewa meikatu'akai tawarita hepaɨna paɨmeme xekeneukawewiri.
REV 18:7 Mariwetɨ kemɨrayuyeitɨakai meta witsimɨtikuhɨawarɨwanikɨ, yaxeikɨata 'uximatɨarika heiwerika xekenepitɨaka. Yu'iyaritsie mɨpaɨ paine: “'Ena nepaka neti'aitatɨ, wiura nepɨkahɨkɨ, hatsuaku nepɨkatikwine”.
REV 18:8 'Ayumieme kwiniya xeitukaritsie hetsiena kaninuamɨkɨ: mɨyakɨ, kwiniyakɨ meta hakakɨ pɨpitɨarieni. Taikɨ kanitataiyariemɨkɨ, kanitɨrɨkaɨyeni kemɨ'ane mitamari'itɨani Ti'aitame Kakaɨyaritɨtɨ».
REV 18:9 Kepauka kwiepa te'aitamete memikumaɨwakai kawa'ɨyatɨkaku meta witsiti'aneme memɨte'iyetuiriwakai, mɨkɨ mekaniutitsuanakuni me'ixeiyatɨ kwauni 'atineikame tai 'itaxɨtsitɨaximekaku.
REV 18:10 Waɨkawa memamatɨ kemɨtikwinitɨariekai, 'ateewa paitɨ mekaniti'uikuni meta mɨpaɨ mekatenihiwakuni: «Xɨa'ui, xɨa'ui, kiekari mɨmariwe, Wawiruniya, kiekari mɨtɨrɨkaɨye, xeihurayaritsie 'a'uximatɨarika munuakɨ».
REV 18:11 Tetuayamete kwiepa memɨtama mekaniutitsuanakuni meta mehe'eriwatɨ mepuyuhiwerieka, mɨpaɨ metemaitɨ, xewitɨ tawariri mɨkatiwananairienikekaikɨ:
REV 18:12 huru, pɨrata, tete witsimɨ'anene, meta perɨra, rinu 'ixurikiyari, 'ixuriki mɨyɨtsikimaɨye, tsera 'ixurikiyari, meta 'ixuriki mɨxeta, naime kɨye witsimu'ɨa, naitɨ mutiwewiya herepanite tameyarikɨ, naitɨ mutiwewiya kɨye witsimɨ'anene, wurunitse tepɨayari, tepɨa mɨmerɨkawi, meta marɨmuri teteyari,
REV 18:13 kanera witsimu'ɨatɨka, witsimɨtiu'ɨatɨka, 'ɨkwa witsimu'ɨa, mixaxi, meta witsimu'ɨa, winu meta hatseiti, harina 'aixɨa mɨ'ane meta tɨriku, wakaitsixi meta muxatsi, kawayutsixi meta kaxetate metatsiere teɨteri, waɨriyarika te'uximayatamete.
REV 18:14 Meta mɨpaɨ mepɨte'ikuhɨaweni: «Tita pemɨtiheiwe'eriekai naimekɨ 'a'iyaritsie, 'ahetsɨa kaniumaweniri. Naimeri pekatineuyehɨani 'apiinite mɨraye'atɨka meta witsimɨti'anene, meta hatsuakuri pepɨkatikaxeiya».
REV 18:15 Tetuayamete mɨyati'aneneme memɨtetuakai, mɨkɨ xikutsixi memayuyeitɨakai kɨmana, yunaitɨ 'ateewa paitɨ mekaniti'uikuni, waɨkawa memamatɨ kemɨtikwinitɨarieka. Mekaniutitsuanakuni meta meyuheiwerietɨ
REV 18:16 mɨpaɨ me'utiyuatɨ: «Xɨa'ui, xɨa'ui, pumaweri kiekari mɨmariwe. Rinu 'ixurikiyari witsimɨ'anene, mɨyɨtsikimaɨye meta mɨxeta manakatɨkɨkai, meta hurukɨ, tetexi witsimɨ'anene meta perɨra kaneukayatsakaitɨni.
REV 18:17 Xeihurayaritsie katiniukumawere naitɨ 'apiinite mɨraye'atɨka». Yunaitɨ kanuwa 'amɨpa nɨ'awamete, 'ateewa kɨkamete, kanuwa wekemete, keyupaɨmetɨ haramaratsie memɨte'iwakai, mɨkɨ meta 'ateewa paitɨ mekaniyuhayewakuni.
REV 18:18 Tai kɨtsiyari mexeiyatɨ taiyariekaku, mɨpaɨ mekateniuhiwakaitɨni: «¿Pumawekai kiekari hepaɨna 'anetɨ, 'ikɨ kiekari kemɨtimariwekai hepaɨ?»
REV 18:19 Tumuanari yumu'utsie mekaneutiwiwiwakaitɨni me'utitsuatɨ meta meyuheiwerietɨ mekaniutihiwakuni: «Xɨa'ui, xɨa'ui, kiekari mɨmariwekai. Mana xikutsixi memayuyeitɨa yunaitɨ kanuwa 'amɨpapa wakutsiyarima, mɨkɨ xeihurayaritsie katiniukumaweriyarieni.
REV 18:20 Kene'atemawieka muyuawi, mɨyamɨtiuyɨkɨ. Xekeneyutemamawieka xemeta Kakaɨyari teɨterimama, nɨ'ariekate, Kakaɨyari niukametemama. Kakaɨyari miyetuakɨ xeme pɨta heitserie xemexeiyanikɨ».
REV 18:21 Hikɨ niuki tuayame mɨtɨrɨkaɨye tete murinayari xikɨraɨyeme kananuku'ɨni, haramaratsie kaneikahɨani mɨpaɨ 'utaitɨ: «Yaxeikɨata 'ekɨ, Wawiruniya, kiekari mɨmariwe, pekatinikwinitɨariemɨkɨ, meta mɨpaɨ pekatinakumaweriyariemɨkɨ 'ena kwiepa.
REV 18:22 Hatsuakuri kanariwiwamete haripakɨ, kɨrautakɨ meta kuxinetakɨ mepɨka'enierieni 'ahetsie. Hatsuakuri tewewiwamete 'ahetsɨa mepɨkaxuaweni. Hatsuakuri tɨxɨme mɨxikɨraɨye pɨka'enierieni 'ahetsɨa.
REV 18:23 Hatsuaku kɨxeme 'ahetsɨa pɨkahekɨariwieni. Hatsuaku pɨka'enierieni neneɨkeme meta wikiwame watemawierika 'ahetsie. 'Ahetsɨa kiekatari memɨtetuakai kwiepa memɨtama wa'itsɨkate mekanihɨkɨtɨkaitɨni. Pewakewaiyatɨ kepemɨtiwa'itaiyakai yunaime nuiwarite.
REV 18:24 'Ahetsie Kakaɨyari niukametemama meta Kakaɨyari teɨterimama waxuriya pemutayeurikɨ, meta yunaitɨ kwiepa memukwi'iwaxɨ».
REV 19:1 Merikɨtsɨ manata muyuawitsie yuariya nekaniu'enieni yumɨireme teɨteri waniuki hepaɨ ti'eniɨriɨkɨme. Mɨpaɨ me'utiyuatɨ: «Kakaɨyari hepaɨtsita 'aixɨa xekeneutiyuaneni. Wikweitsitɨarikaya, witsikemɨtikuxaxatsiwa meta tɨrɨkariyaya takakaɨyari pɨhetsiemieme,
REV 19:2 kemɨtiyuheitseritɨwa kaniyuritɨni meta 'aixɨa ketiniuka'iyarini. 'Ukaratsi tuminikɨ muyumayɨinɨa mɨmatiwa kaniutaxaneta, kayukɨnama wamayɨanetɨ kwie 'axa'anekame payeitɨa. Kakaɨyari te'uximayatsiriwamete waxuriya metayeurikɨ».
REV 19:3 Hikɨ hutarieka mɨpaɨ mekaniutiyuani: «Kakaɨyari hepaɨtsita 'aixɨa xekeneutiyuaneni. Mɨkɨ kɨtsiyari kananutineikani tsepanetɨ xeitsienituyari wiyari manuyekɨka».
REV 19:4 Hikɨ 'ukirawetsixi xeitewiyari heimana nauka meta yunaukatɨ memayeneniere mekaniutihɨxima'uni meta nenewieri Kakaɨyari mekaniupitɨani 'uwenitsie maka, mɨpaɨta mete'ikɨhɨawetɨ: «Mɨpaɨ ketiuyɨni. Kakaɨyari hepaɨtsita 'aixɨa xekeneutiyuaneni».
REV 19:5 Hikɨta 'uweni manuwe niuki kanayeneni mɨpaɨ 'utaitɨ: «'Aixɨa xekeneutiyuaneni takakaɨyari hepaɨtsita, yunaitɨ te'i'uximayatsiriwamete, tɨɨri meta 'ukirawetsixi, yunaitɨ xeheyemakatɨ xemeyexeiya».
REV 19:6 Hikɨta niukite waɨkawa nekaniu'enieni, haa 'amɨpa hepaɨ ti'eniɨriɨkɨme, tɨranari mɨtɨrɨkaɨye hepaɨ. Mɨpaɨ mekaniutiyuanekaitɨni: «Kakaɨyari hepaɨtsita 'aixɨa xekeneutiyuaneni. Ti'aitame 'ari kanitsutɨani ti'aitatɨ takakaɨyari, Naimekɨmɨtɨrɨkaɨye.
REV 19:7 Tepɨtatemamawieka meta temawierika tepexeiyani, meta witsitikuxaxatsiwame tepayeitɨaka. 'Ari tukari kanaye'ani Muxa mɨtineɨkekɨ. 'Ɨyaya mayani puyukuha'aritɨa,
REV 19:8 rinu 'ixurikiyari 'aixɨa mɨ'ane kaniyetuiriyarieni menakatɨkɨnikɨ, mɨ'itiya meta mutimerɨka». (Rinu 'ixurikiyari kani'inɨariyaritɨni, heitseriemekɨ me'u'uwatɨ memɨte'uximaya mepatsietɨ).
REV 19:9 Hikɨ niuki tuayame mɨpaɨ pɨnetiutahɨawixɨ: «'Aixɨa mekani'itɨarieka kemɨ'ane memuta'inierie, Muxa mɨtineɨketsie memɨtekwanikɨ». Mɨpaɨta kanetiniutahɨawe: «'Ikɨ Kakaɨyari niukieya kaniyuritɨni».
REV 19:10 Hikɨ hetɨana nekaniutihɨximakeni nenewieri ne'ipitɨanike. Mɨkɨ matsi mɨpaɨ pɨnetiutahɨawixɨ: «Tixaɨ yumarima. 'Ahepaɨ ne nekatini'uximayatametɨni, 'a'iwama memɨyuhekɨata Ketsutsi hetsɨa memiemetetɨtɨ wahepaɨ nepɨti'uximayatame. Kakaɨyari xeikɨa nenewieri kenepitɨaka. Kemɨ'ane mɨyuhekɨata Ketsutsi hetsɨa miemetɨtɨ, mɨkɨ 'iyari kanexeiyani katinihekɨatani».
REV 19:11 Manata muyuawi nekaniuxeiya reuyepiekame, meta kawayu heutuxatɨ mana kaniuwekaitɨni. Manakatei Yamɨtikamie meta Yurimaine katinitewakaitɨni. Heitseriemekɨ yatikamietɨ kaniwaranutaxɨrɨwani meta kuyaxa kaniwewieka.
REV 19:12 Hɨxiteya tai mɨtaka hepaɨ pɨtiyuxexeiyakai, yumu'utsie waɨkawa kuruna panamanakai, meta kemɨtitewa kana'utɨakaitɨni, peru xewitɨ 'atsipɨkatimaikai kemɨtitewa, mɨkɨ xeikɨa yapɨtimaikai.
REV 19:13 'Ixuriki xuriyamakame 'anakatɨtɨ. «Kakaɨyari Niukieya» katinitewaka.
REV 19:14 Kuyaximama muyuawitsie miemete mekaneweiyakaitɨni, kawayutsixi memeutuxa wahetsie me'utetɨ meta rinu 'ixurikiyari, mutuxa meta mɨ'itiyatɨka me'anakatɨtɨkaitɨ.
REV 19:15 Tetana 'ixipara meutixikakauni kaniwayeneikakaitɨni, kɨmana mɨwatiwitenikɨ nuiwarite. «Pɨtiwa'aitɨa tepɨa 'itsɨyari 'akwetɨ». Mɨkɨtɨtɨ kanihɨkɨtɨni kaxie takari mitiketsini kaxie pɨnameta, Kakaɨyari Naimekɨmɨtɨrɨkaɨye haxɨaya mayanikɨ.
REV 19:16 Kamixayatsie meta teurieyatsie mɨpaɨ pɨre'ukai kemɨtitewa:
REV 19:17 Merikɨtsɨ xeime niuki tuayame nekaniuxeiya tau hetsie 'aweme, yunaime wikixi muyuawitsie memuwɨtɨkɨka kaniwahiwiekaitɨni mɨpaɨ tiwakuhɨawetɨ: «Xekenakɨni, xekeneuyukuxeɨri, Kakaɨyari 'ikwai waɨkawa pɨwewieni,
REV 19:18 te'aitamete wawaiyari xekeneutikwa'i, kuyaxi wa'ukiyarima wawaiyari, memɨtɨrɨkawi wawaiyari, wakawayutsixi wawaiyari, mɨkɨ wahetsie memutekai wawaiyari, yunaitɨ memuyunɨ'a memɨte'uximayatamete tɨɨri 'ukirawetsixi yunaime wawaiyari».
REV 19:19 Hikɨ yeutanaka nekaniuxeiya, meta kwiepa te'aitamete yukuyaxima mewaruwitɨtɨ, mekaniyukuxeɨrieni memitamienikɨ mɨkɨ kawayu hetsie manaka meta kuyaximama wahepaɨtsita.
REV 19:20 Hikɨ yeutanaka meta tixaxatame mɨti'itawakai hamatɨana kaniuwiyarieni, kemɨ'ane 'inɨari mɨtiwewiwakai yeutanaka hɨxie, kɨmana mɨtiwa'irɨwiyakai mɨkɨ memitanaki'eri yeutanaka tseyuya mɨkɨ nenewieri memipitɨakai meta 'ɨkiyari memayexeiyakai. Mɨkɨ yuhutatɨ me'ayenenieretɨ harakuna mɨta'atsie 'atsupɨrekɨ mekaneukaxɨriyani.
REV 19:21 Hipatɨ yunaitɨ mekaniukwi'iwa kawayutsie manaka tetana 'ixipara wayeneikakaku, meta yunaitɨ memɨte'awɨwawe mɨkɨ wawaiyarikɨ mekaniutihuxani.
REV 20:1 Merikɨtsɨ manata niuki tuayame nekaniuxeiya muyuawitsie 'akamiekame yawi 'akwekame para mɨrewatiyepienikɨ meukatewatsie, meta karena kaunariyari 'amɨpa 'ahurietɨ.
REV 20:2 Hikɨ mɨkɨ kuu kaniuwiya meripaitɨ mieme Kauyumarie meta Tsatanaxi mɨhɨkɨ, kanekuwieni xeimiriyari wiyari.
REV 20:3 Meukatewatsie kaneikahɨani kanenunani, kiteniena kanitseyumani, mɨkatiwa'irɨwiyanikɨ nuiwarite mexi'akuxi ka'aye'awekai xeimiriyari wiyari. 'Anake kaniyɨwemɨkɨ mɨxɨnarienikɨ yapaɨmexɨa.
REV 20:4 Hikɨ te'aitamete wa'uwenite nekaniuxeiya mana 'a'ukame. Hetsiena mekanayaxe mɨkɨ heitserie memupitɨarie. Mekani'itsɨkatetɨkaitɨni kememɨte'upitɨarie. Hikɨ hipameta nekaniwaruxeiya, mɨkɨ wamu'u manutiwitekiexɨa memɨyuhekɨatakaikɨ Ketsutsi hetsɨa memiemetetɨtɨ, meta Kakaɨyari niukieya memɨkuxatakaikɨ. Nenewieri yeutanaka memɨkapitɨakai meta 'ɨkiyari, tseyuya memɨka'utanaki'eri yukanata meta yumamatsie, mɨkɨ wa'iyarite nekaniuxeiya. Mɨkɨ me'anutaneniereka, meta Kɨritsitu hamatɨa te'aitamete mekanakɨne xeimiriyari wiyari.
REV 20:5 'Ikɨ matɨarie miemete memanuku'uitɨarie mekanihɨkɨtɨni, 'ana 'akuxi hipatɨ mɨkite mepɨka'anutanenierixɨ, xeimiriyari wiyari 'aye'akuke mekananutaneniere 'imatɨremete.
REV 20:6 'Aixɨa mekani'itɨarieka, meta mekanipatsieka kemɨ'ane matɨari miemetsie memanuku'uitɨarie. Hutarieka mɨɨya tɨrɨkariya pɨkahexeiya wahepaɨtsita, mɨkɨ matsi mawari wewiwamete mepɨhɨkɨtɨni Kakaɨyari hetsiemiemete meta Kɨritsitu hetsiemiemete, hamatɨana te'aitamete mepɨhɨkɨtɨni xeimiriyari wiyari.
REV 20:7 Merikɨtsɨ kepauka haye'ayu xeimiriyari wiyari, Kauyumarie kanixɨnariemɨkɨ manutahɨiyatsie,
REV 20:8 meta kaniwatiyeimɨkɨ nuiwarite mɨtiwa'irɨwiyanikɨ tatserieta ta'utata tahixɨata tatsutɨapai memetitei kwiepa ―kukitari meta makukitari―, yunaime kaniwakuxeɨrimɨkɨ memɨyutakwinikɨ, haramara tetsita xiekari mɨtika hepaɨ meyupaɨmetɨ.
REV 20:9 Hikɨ kwie manuye'atɨkatsie paitɨ mekaneutayeixɨani, meta Kakaɨyari teɨterimama memakuteitsie warita mekanikutekaitɨni, kiekari mɨnaki'eriwa. Peru tai muyuawitsie kanakanemɨkɨ mɨkɨ kaniwatixɨtsitɨamɨkɨ yunaime.
REV 20:10 Kauyumarie mɨtiwa'irɨwiyakai mana kaneukahɨiyamɨkɨ harakuna 'atsupɨrekɨ mɨta'atsie, manata yeutanaka meta tixaxatame mɨti'itawa hamatɨa mekaneukaxɨriyakuni. Mana tukarikɨ meta tɨkarikɨ mekateniuka'eniwakuni yuheyemekɨ tsepanetɨ xeitsienituyari wiyari manuyekɨka.
REV 20:11 Hikɨ 'uweni mɨtuxa mɨmariwe nekaniuxeiya, xewitɨ mɨkɨtsie makatei. Hɨxiena kwie meta muyuawi naitɨ kaniyupataxɨani mana memɨkatitenikɨ, huyeri pukumawerixɨa.
REV 20:12 Hikɨta mɨkite nekaniwaruxeiya 'ukirawetsixi meta tɨɨri yunaime, 'uweni manuwe hɨxie meti'ukame. Xapate kananutayepiyaxɨani, meta xewitɨ, tukari memexeiyanikɨ xapayari, hikɨ mɨkite mekaniuta'iwawiyarieni kememɨte'uyuri hepaɨtsita, kemɨre'utɨariekai xapatetsie.
REV 20:13 Mana haramara yɨmɨkite kaniwayetuani, mɨɨya meta tai mɨta'a mɨkɨta mekaniwayetuani, Yuxexuitɨ mekaniuta'iwawiyarieni kememɨte'uyuriexɨa hepaɨtsita.
REV 20:14 Mɨɨya meta tai mɨta'a harakuna mɨta'a hetsie mekaneukaxɨriyani. 'Ikɨ harakuna mɨta'a, hutarieka mieme mɨɨya kanihɨkɨtɨni.
REV 20:15 Kemɨ'ane tukari mexeiyani xapayaritsie mɨka'aka'utsieni, mɨkɨ harakuna mɨta'atsie kaneukahɨiyamɨkɨ.
REV 21:1 Hikɨta muyuawi mɨhekwa meta kwie mɨhekwa nekaniuxeiya, meripaitɨ mieme muyuawi meta kwie kaneutayeixɨani, yaxeikɨata haramara pukumawerixɨ.
REV 21:2 Metatsiere kiekari mɨpatsie nekaniuxeiya, Kerutsareme mɨhekwa, muyuawitsie hakamiekame, Kakaɨyari manukatsie heyeyaka, wikiwame hepaɨ witsireyɨkɨniutɨatɨ mitiwitɨni hetsiemieme.
REV 21:3 Hikɨ niuki nekaniu'enieni 'uweni manuwe 'ayeneikame karima mɨpaɨ hetaineme: «Hikɨrixɨa Kakaɨyari yuteɨteri watsata kaniuyeikamɨkɨ. Wahamatɨa 'ukaitɨ kanayeimɨkɨ. Mɨkɨta teɨterimama mekanihɨkɨtɨkakuni, Kakaɨyaritɨtɨ wahamatɨa puyeikani meta pɨwakakaɨyaritɨni.
REV 21:4 Mɨkɨ naime wa'ukai kana'itiexɨamɨkɨ. Hatsuakuri mepɨkakwini, mepɨka'utitsuanani, mepɨkayuhiwerieka meta mepɨkate'ukakukuineni, tita meripaitɨ mɨtimiemetɨkai katiniumaweniri».
REV 21:5 Hikɨ 'uwenitsie makatei mɨpaɨ kaniutayɨni: «Ne naime hekwame nepɨrayeitɨani». Mɨpaɨta kanetiniutahɨawe: «Ketinaka'utɨa, 'ikɨ niuki kaniyuritɨni meta hetsiena yuri mɨti'eriekakɨ».
REV 21:6 Mɨpaɨta pɨnetiutahɨawixɨ: «'Ari naitɨ katinaye'ani. Ne Mexɨakame meta 'Imatɨreme nekanihɨkɨtɨni, nemitsutɨa meta neminɨni. Kemɨ'ane meuharimɨkɨ, ne neka'ituirietɨ nekaniharitɨamɨkɨ nehaixakɨ kɨmana tukari mexeiyanikɨ.
REV 21:7 Kemɨ'ane mɨrayu'iwa, hetsiena katininakimɨkɨ 'ikɨ naitɨ, neta Kakaɨyarieya nekanihɨkɨtɨkamɨkɨ, mɨkɨta neniwe kanihɨkɨtɨkamɨkɨ.
REV 21:8 Peru memamatɨ memukunuaxɨa, yuri memɨkate'erie, memɨyutsewixima, memɨteyumemiwa, memɨwakumaɨwa memɨkawa'ɨitama meta memɨkawakɨnama, memɨteyukewaiya, tetexi memɨwarayexeiya, meta yunaitɨ memɨte'itawa, mɨkɨ yunaime wahetsie pɨtinakeni harakuna 'atsupɨrekɨ mɨta'atsie memeukaxɨriyanikɨ, hakewa hutarieka memekwinitsie».
REV 21:9 Hikɨ 'atahuta niuki tuayamete 'atahuta tekɨxi memahapakai 'atahuta kwiniyayari 'imatɨrieka mieme hɨpɨneme, xewitɨ mɨkɨ 'ahurawa 'ayaka mɨpaɨ pɨnetiutahɨawixɨ: «Kenaye'a, wikiwame nepɨmatsixeitsitɨani Muxa 'ɨyaya mayani».
REV 21:10 Hikɨ 'Iyari hɨri 'amɨnenatsie meta 'amutewitsie kanenewitɨni, meta kiekari mɨpatsie kaneniuxeitsitsitɨani, Kerutsareme, muyuawitsie hakamiekame, Kakaɨyari manukatsie heyeyaka.
REV 21:11 Witsipɨtiyuxexeiyakai Kakaɨyari xawatɨriyayakɨ, meta tete witsimɨ'ane hepaɨ katiniyuxexeiyakaitɨni katsɨpe teteyari manuyehekɨa hepaɨ.
REV 21:12 Yutetsariya 'ahatayeukame meta 'ahautitewame kanexeiyakaitɨni, tamamata heimana huta kitenieyari pexeiyakai meta xexuime kitenietsie yuxexuitɨ niuki tuayamete mekatenihɨtɨkateitɨni, manata kitenietsie mepa'utɨkatei kememɨtetetewa nuiwarite 'Ixaheri niwemama tamamata heimana huta.
REV 21:13 Tau manatineika hepatsie haikakɨa kanakiteniekaitɨni, ta'utata haikakɨa, tatserieta haikakɨa, meta tatsutɨa paitɨ haikakɨa.
REV 21:14 Kiekari tetsariyayari tamamata heimana hutame tsutɨmeyari kanexeiyakaitɨni, xexuimetsie kememɨtetetewa tamamata heimana huta nɨ'ariekate Muxa hetsiemieme mekana'utɨkateitɨni.
REV 21:15 Niuki tuayame nehamatɨa mɨtikuxatakai huru hakayari kanakwekaitɨni kiekari mɨ'inɨatakɨ, kiteniete, meta tetsariyayari naime.
REV 21:16 Kiekari puta'itsikinatɨkatei, yaxeikɨa heutatetewatɨ meta 'ahakuyeutɨ. Hikɨ niuki tuayame kiekari hakakɨ kaniti'inɨata, huta miriyari heimana huta tsienituyari kirumeturuyari peutatetewakai: kemayetewi kematayewa meta kemeutitewa yaxeikɨa papaɨmeme pexeiyatɨkatei 'inɨari.
REV 21:17 Yaxeikɨata tetsariyayari kaniuti'inɨata, haika tewiyari heimana 'auxɨwi meturuyari pexeiyakai tewi kemɨtiu'inɨnɨata, niuki tuayame mɨkɨ hepaɨ katiniu'inɨata.
REV 21:18 Tetsariyayari katsɨpe teteyarikɨ pɨwewiyakai, kiekari naitɨ huru xeikɨa pɨhɨkɨtɨkai, xikɨri maye'itiya hepaɨ tiyuxexeiyatɨ.
REV 21:19 Kiekari tetsariyayari tsutɨmeyari naitɨ tetexi witsimɨ'anenekɨ kanitetsekaitɨni: mexɨakame katsipekɨ, hutarieka mieme tsapirukɨ, hairieka mieme 'akatakɨ, naurieka mieme 'etsimerarɨtakɨ,
REV 21:20 'auxɨwirieka mieme 'unitsekɨ, 'ataxewirieka mieme kurunarinakɨ, 'atahutarieka mieme kɨritsuritukɨ, 'atahairieka mieme werirukɨ, 'atanaurieka mieme tupatsiyukɨ, tamamata mieme kɨritsupɨratsukɨ, tamamata heimana xewi mieme katsinitukɨ, meta tamamata heimana hutariekamieme 'amatitsɨtakɨ.
REV 21:21 Tamamata heimana huta kiteniete perɨrakɨ kaniwewiyatɨkateitɨni, xexuitɨ 'itupari perɨra puwiriyarietɨkatei. Mexɨakame kaye kiekaritsie muyekatei huru xeikɨa pɨhɨkɨtɨkai, xikɨri mayehekɨa hepaɨ tiyuxexeiyatɨ.
REV 21:22 Mana tuki nepɨka'uxei kiekaritsie, Ti'aitame Kakaɨyari Naimekɨmɨtɨrɨkaɨye meta Muxa tukieya kanihɨkɨtɨni.
REV 21:23 Kiekari tau meta metseri mɨhekɨariwiekakɨ pɨkaheiyehɨwa, Kakaɨyari yuxawatɨrɨyakɨ pɨwahekɨariwiya, meta Muxa wahekɨariwiwame kanihɨkɨtɨni.
REV 21:24 Nuiwarite 'amekaniu'uwakuni mɨpaɨ metehekɨariyarietɨ, kwiepa te'aitamete tita memɨtehexeiya witsiti'aneneme mana mekateni'atɨakuni.
REV 21:25 Wakiteniete tukarikɨ yapɨreuyepietɨkani, manari pɨkahekuyɨyɨreni.
REV 21:26 Tita memɨtehexeiya witsiti'aneneme raye'atɨkaime nuiwarite mekateni'atɨiriekuni.
REV 21:27 Hatsuaku hetsɨana pɨkaheutahani tita mɨkati'itiya, kakaɨyarixi memɨwarayexeiya meta memɨte'itawa, matsi kemɨ'ane xeikɨa Muxa xapayatsie memaka'utɨarie tukari mexeiyatsie.
REV 22:1 Merikɨtsɨ manata niuki tuayame hatuxame pɨnetsi'uxeitsitɨa kɨmana tukari memexeiyanikɨ, manuyehekɨa hepaɨ tihekɨatɨ, Kakaɨyari 'uwenieya manuwe kanayeneikakaitɨni meta Muxa,
REV 22:2 meta kaye hixɨata kiekaritsie kaniuyehanekaitɨni. Hatuxame tetsita 'anataɨye meta 'anutaɨye 'iteɨri kaniutiwekaitɨni kɨmana tukari mexeiyani, tamamata heimana huta mexɨa kaniukaxuxuawereni, xexuime metseritsie, meta 'iteɨri xawariyari nuiwarite 'aixɨa meteheu'erietɨ memakɨkanikɨ kani'ayumiemetɨni.
REV 22:3 Hatsuakuri 'axamepɨka'itɨarieka. Kakaɨyari 'uwenieya meta Muxa kiekaritsie mana puweni. Te'i'uximayatsiriwamete mepeyexeiyani,
REV 22:4 hɨxiena mekanixeiyakuni, meta kemɨtitewa yukanata mekane'utɨatɨkaikuni.
REV 22:5 Pɨkahekɨyɨyɨreniri mana, kɨxeme meta tau mɨwahekɨariwiyanikɨ mepɨkaheuyehɨaka, matsi Ti'aitame Kakaɨyari pɨwahekɨariwiyani. Yuheyemekɨ pɨti'aitametɨni tsepanetɨ xeitsienituyari wiyari manuyekɨka.
REV 22:6 Hikɨ niuki tuayame mɨpaɨ kanetiniutahɨawe: «'Ikɨ niuki kaniyuritɨni meta kaneuyeweka yuri mɨti'eriekakɨ. Ti'aitame, Kakaɨyari 'iyari mɨwapitɨa yuniukamete, mɨkɨ kaneiyenɨ'ani yuniuki tuayame yamɨtiwaxeitsitɨanikɨ yuhetsɨa miemete te'uximayatamete, mɨkɨ mɨpaɨ memɨtemaikakɨ kemɨreuyewetse yamɨtiyɨnikɨ kwitɨwa».
REV 22:7 «Neuxei kwitɨwa nepunuani. 'Aixɨa kani'itɨariekamɨkɨ kemɨ'ane yamɨtikamie 'ikɨ xapatsie kemaine».
REV 22:8 Ne, Wani, nemɨtiuxei meta nemɨtiu'eni 'ikɨ naime hepaɨtsita nekanihɨkɨtɨni. Kepauka nemunierixɨ meta nemu'enaxɨ, nekaniutihɨximakeni niuki tuayame nenewieri ne'ipitɨanike naime 'ikɨ mɨnetixeiyatsitɨakai.
REV 22:9 Peru mɨkɨ mɨpaɨ pɨnetiutahɨawixɨ: «Yumarima 'aixɨa. Ne 'ahepaɨ nekatini'uximayatametɨni, 'a'iwama Kakaɨyari niukametemama wahepaɨ, meta mɨkɨ yunaitɨ yamemɨtekahu 'ikɨ xapa kemaine wahepaɨ. Kakaɨyari xeikɨa nenewieri kenepitɨaka».
REV 22:10 Hikɨ mɨpaɨ tawarita kanetiniutahɨawe: «Pepɨka'i'awietani niuki tita mɨtikuxata 'ikɨ xapatsie, tukari kanehuraniri maye'anikɨ.
REV 22:11 Kemɨ'ane 'axamɨtiuka'iyari 'axaketiyurieneni, kemɨ'ane mɨyutsewixima yaxeikɨa ketiyutsewiximaka, kemɨ'ane heitseriemekɨ yamɨtikamie heitseriemekɨ yaketikamieni, kemɨ'ane mɨpatsie, patsietɨ ke'uyeikani».
REV 22:12 «Neuxei kwitɨwa nepunuani. Ne wa'iwarika nepɨrapine, meta yuxexuime nekatiniwayetuiriemɨkɨ kememɨte'uyuriexɨa.
REV 22:13 Ne Mexɨakame 'Imatɨreme nekatinitewaka, kemɨ'ane mitsutɨa meta minɨni.
REV 22:14 »'Aixɨa mekani'itɨariekakuni kemɨ'ane yu'ixuriki memɨ'ekwa, heitserie mekanexeiyakakuni mɨkɨ 'iteɨri tukari mexeiya hepaɨtsita, meta memɨpitɨarienikɨ kiekari kitenie memeutahaxɨanikɨ.
REV 22:15 Peru Kiekari warie tsɨikɨri mekaniu'uwakuni, mɨkɨ memɨteyukewaiya, mɨkawa'ɨya mɨkawakɨna memɨwakumaɨwa, memɨteyumemiwa, tetexi memɨwarayexeiya, meta naitɨ mɨtiwanake, meta memɨte'itawa.
REV 22:16 »Ne, Ketsutsi, neniuki tuayame nekanenɨ'ani mɨpaɨ mɨtixehekɨatɨanikɨ hakewa xemeyutixexeɨriwa. Ne nana nekanihɨkɨtɨni Rawiri hetsie nemɨyenuiwaxɨ, xurawe mɨxawatɨ ximeri paitɨ manatineika».
REV 22:17 'Iyari meta wikiwame mɨpaɨ mekaniutiyuaneni: «Kenaye'a». Kemɨ'ane mɨ'ena mɨpaɨ ke'utayɨni: «Kenaye'a». Kemɨ'ane meuharimɨkɨ, mɨkɨ ke'ayani, meta kemɨ'ane mɨyuwaɨriya, katuiriyarietɨ ke'anuhareni kɨmana tukari mexeiyanikɨ.
REV 22:18 Ne yunaime 'ipaɨ nepɨtiwaraye'eritɨwa 'ikɨ xapatsie niuki kemaine memɨ'enie: Xɨka xewitɨ 'ikɨ niuki 'anutiyatsa, yaxeikɨata Kakaɨyari penutiyatsirieni kwiniya 'ipitɨatɨ 'ikɨ xapatsie kemɨre'uxa.
REV 22:19 Meta xɨka xewitɨ 'ikɨ xapatsie kemaine niuki xɨka 'anakatɨkɨ, Kakaɨyari kaninawairiemɨkɨ mɨkɨ tukari mexeiya hepaɨtsita meta kiekari mɨpatsie, 'ikɨ xapatsie kemɨre'uxa.
REV 22:20 Kemɨ'ane mɨpaɨ mɨtihekɨata mɨpaɨ kanaineni: «Huu, kwitɨwa nepunuani». Mɨpaɨ ketiɨyɨni. Kenaye'a Ti'aitame Ketsutsi.
REV 22:21 Ti'aitame Ketsutsi 'aixɨa ketiuka'iyarini yunaime xehetsiemieme. Mɨpaɨ ketiɨyɨni.
