﻿Kitsariyaxi.
34.
Nuiwarite, 'ahurawa xekenewakɨni xemɨ'enananikɨ. Teɨteri, kayuwatɨ xekeneu'enana. Kwie ke'i'enieni, meta naitɨ mana mɨtixuawe, kwiepa kemakuyewa, meta tita mɨtixuaweriya. 
Yawé kaniha'aka yunaime nuiwarite wahamatɨa, meta yunaime kuyaxi wahamatɨa. Mɨkɨ kaniwaruka'una yunaime memɨkwi'iwakɨ kaniwayetuani. 
Wakaxarite kanexɨriyamɨkɨ, wawaiyari 'ukuri'ɨatɨkaitɨ kanitipɨnimɨkɨ, waxuriya hɨrite kanitixɨtɨaximeni. 
Xurawetsixi muyuawitsie memeukatei mekanitaxɨriexɨakuni, meta muyuawi kaniyutakwikwiemɨkɨ xapa hepaɨ, yunaitɨ xurawetsixi yuxawatɨriya meneuyehɨakuni, kaxie xawari wakitɨ kemɨrakawiwike, meta xapa takari wawakitɨ kemɨtikaxɨrɨwe. 
Ne'ixipara muyuawitsie kaniutitaweni, 'ari 'akanakamieni 'Erumi hetsie tiwakwinitɨanike, mɨkɨ teɨteri 'ari yanepɨtiwarutahɨawixɨ nemɨwareuyehɨanikɨ. 
Yawé 'ixiparaya kanixuriyamaka, tsipuri meta muxatsi waxuriyakɨ, kaniwiyamaka, muxatsi 'ukitsi wamumé wiyayari xiteyarikɨ. Yawé mawarika puwewie Wutsira paitɨ, meta puwarukwi 'Erumi kwieyaritsie yumɨireme. 
Wahamatɨa mekanikwikuni tuurutsixi yeutari wahepaɨ memɨ'anene, meta tsikerutsixi metatsiere tuurutsixi. Wakwietsie xuriya kanitayeurimɨkɨ, wiya tumuanaritsie kanakɨnɨmɨkɨ. 
Yawé mɨyɨkɨhɨanikɨ kanitukarieyatɨni, mɨrayukatuani wiyari kanihɨkɨtɨni Tsiyuni hetsie tanuanike. 
'Erumi 'akiyaritetsie kwetsɨka muwitsɨani hayari kaniuhapanekamɨkɨ, kwauniyari hatsupure mɨta'a kanayeimɨkɨ meta tiyutaiyatɨ kwetsɨka muwitsɨani kanayeimɨkɨ mɨkɨ kwieyari. 
Tukarikɨ meta tɨkarikɨ pɨkakutɨtɨtseni, kɨtsi yapɨretineikani. Yuheyemekɨ 'akumawetɨ payani waxiɨyari, hatsuaku xewitɨ mana pɨka'uyeyani. 
Piwame meta naika 'ɨtsita kiekatari mana mepɨkiekataritɨni mana mikɨri meta kwatsa hamatɨa mepuyuti'ituatɨani. Kakaɨyari 'Erumi kwieyaritsie pɨtitamɨiriya ti'inɨnɨatamekɨ yuxamuriekame payeitɨwa tepɨa mahete hirukɨ mɨwiwiekɨ pɨrakumaweriya. 
Memanuyetei mana mepɨka'u'uwani meta mana xewitɨ pɨkati'aitani, yunaitɨ mana te'aitamete mekanikumawerikuni. 
Waparatsiyuta xuya pɨtinexɨani, meta wakii 'aixɨa mɨ'aneneta 'ɨtsi pɨtinexɨani. Yawixi memayu'eririya wakii payani meta 'aruxi 'amemɨnene wa'itua. 
Teyukwa'amete makumawetsie miemete mepuyutinɨni tsɨikɨri yeutari wahamatɨa, tsipuri yeutari mepuyɨkɨhɨaweni hipame wahamatɨa, metatsiere mana mepɨkiekataritɨni memawɨwawe tɨkarikɨ miemete mekanikaxeiyakuni yu'uxipiweme. 
Mana mikɨri puyuta'ituatɨani pɨtitixɨrieni, yu'anatetɨa yupixɨxɨitsi puwata'ɨwiya. Manatatsiere mepuyukuxeɨrieni wirɨkɨxi, meyu'iwamatɨkaitɨ. 
Yawé xapaya xekenakaxeiya, hikɨ xekenakaterɨwa: Nixewitɨ 'ikɨ yeutanaka pɨkaheuyeweka, yunaitɨ yu'iwama mepɨwareuxeiyani. Yawé mɨpaɨ katiniu'aita, meta 'Iyarieya kaniwakuxeɨrimɨkɨ. 
Mɨkɨ kaniwaranuyexeirieni hakewa memeyuhayewa, yumamakɨ kaniwaru'itɨirieni wakwie. Mɨkɨ mana yukie mekanayeitɨakuni yuheyemekɨ, mana mekaniyuhayewakuni waxiɨyarima yuheyemekɨ. 
