﻿Kitsariyaxi.
13.
Niuki Wawiruniya hepaɨtsita Kitsariyaxi 'Amuxi nu'aya kemɨtiuhekɨatsitɨiyarie: 
Xeime hɨri metsekame hetsie patera xekeneuyuitɨwani, kuyaxi xekeniwarutahɨawi xe'utihiwatɨ, yumamakɨ xekeniwaru 'inɨaritɨa 'itupari meuwietsie memɨxikutsixi wakitenie memeutahaxɨanikɨ. 
Memɨpatsie nehetsɨa miemete nekatiniwaruta'aitɨaniri, nekuyaxima nekaniwaruta'inieni, memuyutemamawie nemɨrayu'iwakɨ, memɨnetsiparewienikɨ 'iya nemɨtiwakwinitɨanikɨ. 
Neuxei xekeneu'enana. Hɨritsie meyuwaɨkawatɨ wayuariya pa'eniɨriɨkɨ, yuwaɨkawatɨ wa'atɨ muwa mepɨtehahu. Neuxei xekeneu'enana. Yuwaɨkawatɨ te'aitamete wayuarika pa'eniɨriɨkɨ, nuiwarite memuyukuxeɨri. Yawé Naimekɨmɨtɨrɨkaɨye kaniwakuha'aritɨamɨkɨ kuyaxi memuyukwiyutsie. 
'Ateewa kwieyaritsie mekaneyekɨne, kwie manuye'atɨkatsie paitɨ. Yawé yuhaxɨakɨ yuha'aritɨatɨ 'ukanamieni naime kwie mɨka'unakɨ. 
Xekeneutitsuanani, Yawé munuanikɨ kanehuraniri. Naimekɨmɨtɨrɨkaɨye hetsie yeyaka kaniwareuyehɨamɨkɨ. 
'Ayumieme mamate naitɨ kanitiweranareni, teɨteri yunaitɨ mekayuwaɨriyatɨ mekaniyukuhayeikawani. 
Yunaitɨ mekanimamaka, kukuiniya meta hiwerika kaniwawiyani: kukuiniyakɨ mekaniyu'uimɨratɨweni, memɨniwetuweni hepaɨ. Me'akamamatɨ, yuxexuitɨ mekananuyutaxexeiyani, yuhɨxie me'ayexetatɨ. 
Neuxei. Yawé 'ari tukarieya kanaya'aximeni ―tukari 'axamɨ'ane, haxɨa tukariyari―, kwie 'akumaweme kanayeitɨamɨkɨ meta 'axateyuruwamete kaniwarakumaweriyamɨkɨ. 
Xurawetsixi meta taheima temiemete mehekɨariewietɨ mekatenihayewakuni, tau 'anatineximetɨ kaniyɨrimɨkɨ meta metseri pɨkahekɨariwieni. 
Kwiepa memɨtama 'axakememɨteyuriekɨ nepɨtiwakwinitɨani, meta 'axateyuruwamete 'axamemɨteyuriekɨ. Memɨteyukananaima kememɨte'uyuti'ɨre nekaneutiparitɨamɨkɨ memamariwaweme memuyuxata memuyuti'ɨre tixaɨtɨ nepɨkatiwarayeitɨani. 
Teɨteri yakɨ meyupaɨmeme nekaniwarayeitɨamɨkɨ keyuri huru 'aixɨa mɨ'ane, teɨteri memɨkwiwawe yakɨ mepɨyupaɨmeni huru matsi 'apɨpaɨmeni 'Upixi mieme. 
'Ayumieme yanepɨtiyurieni muyuawi mɨtayuanikɨ meta kwie hakewa meuyema mɨtayuanikɨ, Yawé Naimekɨmɨtɨrɨkaɨye haxɨayakɨ kepauka mɨyeha'ani tukariyaritsie. 
Maxa 'ɨimari yeutanaka muweiyarieka hepaɨ, muxatsi memɨkatehekakutsiyari hepaɨ, yukie yuxexuitɨ mekani'axɨakuni, yuxexuitɨ yukwietsie mekaniyuta'unaxɨakuni. 
Kemɨ'ane mɨwiyarieni mɨkɨ kananuyetsekiemɨkɨ, kemɨ'ane manutahɨiyani 'ixiparakɨ kanemieriemɨkɨ. 
Menenierekaku, waniwema mekanititetseweiyakuni, wakiita katininawariemɨkɨ meta wa'ɨitama wahamatɨa waɨriyarika mewapitɨatɨ mekanikahikuni. 
Neuxei. Ne merutsixi nekaniwata'inimɨkɨ mɨkɨ wahepaɨtsita, teɨteri pɨrata memɨkaheuyehɨwa meta hurukɨ memɨkayutemamawiekai. 
Yutupikɨ temari mekaniwaranuyemɨixɨakuni, nunutsi hukatsie mɨyeka mepɨkatinenimayata meta tɨɨri mepɨkawatinenimayata. 
Wawiruniya, witsimɨtiyuxexeiya te'aitamete wahetsiemieme, karireutsixi memiheiwe'erie meta memuyuta'ɨrenikɨ mɨ'ayumieme, Tsuruma meta Kumuxa wahepaɨ katinanuyeyeimɨkɨ kepauka mɨkɨ Kakaɨyari mɨwaruka'unaxɨ. 
Tawariri teɨteri mana mepɨkayutikitɨani, meta 'uxa'atɨni mana pɨkatikuyaxitɨ. Harawe tewiyari mukatewa tɨma mana yu'ixuriki kiiyari pɨkatawewieni, nimana tɨma muxatsi wahɨweme yumuxatsi pɨkawaka'uxipitɨani. 
Mana teyukwa'amete makumawetsie kiekatari mekanika'uxipikuni, wakiita mikɨrixi mepɨtahɨne. Mana 'aruxi 'amemɨnene wakie payani meta tsipuri yeutari mana mepɨtitsuna. 
Wakiita 'aixɨa mɨ'aneneta tsɨikɨri yeutari mepɨtitsuani, meta waparatsiyu witsimɨ'aneneta yawixi memayu'eririya mepɨtitsuani. Mɨkɨ huraya kanaye'aximeni, mɨkɨ tukarieya 'apɨkareutere. 
