﻿Kitsariyaxi.
10.
Xɨa'ui kemɨ'ane 'aitsika 'axa'aneneme memɨtiwewiwa te'utɨwamete me'eka'utɨwatɨ mewananaimatɨ. 
Tixaɨ memɨkatehexeiya wahetsie heitserie kememɨtehexeiya memukunama, meta kemɨtiheitserie memɨkawapitɨa neteɨterima memɨte'uka'eniwa. Wiuraxi wa'ikwai mepɨtewanawairie meta nutuite mepɨwanawatɨwe. 
¿Kemeteyurieni kepauka memɨta'iwawiyarienitsie, kepauka 'ateewa paitɨ wiyeri tɨrɨkaɨyetɨ muwayanitsie? ¿Kemɨ'ane mepanukuwauni xɨka parewiya meheuyehɨaka? ¿Hakewa yupiinite waɨkawa memɨtehexeiya mepɨteheti'uta? 
Tawariri yɨkɨ memɨte'uyurieni mepɨkayɨwaweni tixaɨtɨ memɨkatehɨkɨ mekanayuyeitɨakuni xeikɨa memanuhapanieni wahamatɨa yatɨni mekanikwikuni hipatɨ memɨkwi'iwa wahamatɨa. Tsepanetɨ 'ikɨ naitɨ mɨyamɨtiɨyɨ, Kakaɨyari haxɨaya pukaheunuawe, matsi 'akuxi yumamá kanitatseratɨkani. 
«Xɨa'ui 'Atsiriya, nehaxɨa kɨyeyari. Nehaxɨa 'iwaɨyɨyari wamamatsie katini'aneni. 
Nekanitanɨ'amɨkɨ xeinuiwariyaritsie 'axamemɨteyurie wahetsɨa, nekanitanɨ'amɨkɨ teɨteri memɨnetsihaxɨatɨa wehetsɨa, memɨtewanawatsirienikɨ meta tita waɨkawa memɨtehexeiya, meta memuwatiketsinikɨ haxu kaye 'utɨa mɨtikani hepaɨ. 
Matsi 'Atsiriya mɨpaɨ pɨkatiyɨkɨhɨawekai yamɨtiyurienikɨ 'ikɨ hepaɨtsita, meta tsikere pɨka'iti'eriexɨa. Xeikɨatɨ pɨtiutiwau mɨtiyuka'unakɨ meta yɨmɨireme nuiwarite muwarakumaweriyakɨ. 
Mɨpaɨ xeikɨa 'utaitɨ: “Yunaitɨ memanuyetei nehetsɨa miemete te'aitamete mekanihɨkɨtɨni. 
Karinu Karikemitsi hepaɨ kani'aneni. Kamati 'Axipari hepaɨ kani'aneni, meta Tsamariya Ramatsiku hepaɨ kani'aneni. 
Kehepaɨ netɨrɨkariyakɨ nemɨtiwara'iwaxɨ hipame te'aitamete kakaɨyarixi yuwaɨkawame mewarexeiyakame, wakakaɨyarixi 'ɨkiyari meyumɨireme keyuri Kerutsareme meta Tsamariya kiekatari, 
Tsamariya kenemuyuri meta kakaɨyariximama, mɨpaɨta Kerutsareme nekaniyurimɨkɨ meta kakaɨyariximama”». 
Kepauka Yawé mɨtitahayewa Tsiyuni hɨriyaritsie kemɨtiyurienikɨ meta Kerutsareme hetsie, mɨkɨ mɨpaɨ kanitayɨmɨkɨ: «'Atsiriyatsie Ti'aitame nekatinikwinitɨamɨkɨ 'iyarieya kwinimieme mɨtiyuta'ɨrekɨ, meta kwinimieme mɨtiyukatawe'eriekɨ hɨxiteya». 
Mɨpaɨtsɨ kaniutaineni: «'Ikɨ netɨrɨkariyakɨ nekatiniuyurieni, kenemɨtimaiwe nekatiniuyurieni, netsɨ kwinimieme nekatineuta'eriweni. Hipame teɨteri wakwie manuka'atɨkatsie nekaniupataxɨani, kwinimieme mɨraye'atɨka memɨtehexeiyakai nekatiniwarunawairieni, kwinimieme mɨreuyutamiewe hepaɨ ne'anetɨ tewa'aitɨwamete nekaniwaruka'una. 
Xewitɨ 'itua hetsie meukamemeni hepaɨ, teɨteri tita memɨteheuxeiyakai nehetsie timieme pɨratɨa, tawári 'uku'eiriwaku xewitɨ menatitɨkɨ hepaɨ, naime kwie nepiini nepayeitɨa, xewitɨ tɨma pɨka'utawerikixɨ nitɨma yuyekarau pɨka'anutayepi mɨtatsuanikɨ». 
¿Kamɨtsɨ tiyɨwe hatsa yɨweme muyuxatani keyuri mikumaɨwa, yatɨni tixitekeme yɨweme muyuxatani keyuri kemɨ'ane mikumaɨwa? 'Itsɨ mɨyɨweni hepaɨ mikuhananenikɨ kemɨ'ane mekwe'e, yatɨni kɨye mɨkaxani mɨyɨweni hepaɨ menukukwenikɨ waɨkawa matsi haheteme keyuri mexa. 
'Ayumieme Ti'aitame kanenunɨ'amɨkɨ Yawé Naimekɨmɨtɨrɨkaɨye, kwiniya mɨyakame panunɨ'ani kuyaximama memɨtɨrɨkawi wahetsie. Mamariwaweme mɨwarayeitɨaniyari, matsi pɨta kanatinaimɨkɨ wahetsiemieme, tai nerɨkwariyari mɨtiyukukuine hepaɨ. 
'Ixaheri hekɨariyari tai kanayeimɨkɨ, wahetsie Mɨpatsie nerɨkwari kanayeimɨkɨ. Xeitukaritsie xuyayari kanititaiyamɨkɨ, meta wa'ɨtsite kanitixɨtsitɨamɨkɨ. 
Katinika'unamɨkɨ naime hakewa meuye'atɨka muhukuya witsikemɨtiyuxexeiya meta harawerieya mukumane, mɨtikukuyeni hepaɨ kwaiyatɨkaime kanihayewamɨkɨ. 
'Etsiwa xeikɨa kɨyexi hɨritsie kaniyuhayewakɨmɨ nunutsitɨtɨ kaniyɨwemɨkɨ miti'inɨatakɨ. 
'Iya tukaritsie 'ixaheri nuiwarimama memuyuhayewaxɨ meta Kakuwu kie kiekatari memukuwikwei tawariri hetsiena mepɨkatewiya kemɨ'ane tiwakwinitɨatɨ mɨwarukwi, matsi yurikɨ waparewiwame Yawé, Mɨpatsie 'Ixaheri hetsiemieme, kanihɨkɨtɨkamɨkɨ. 
Memuyuhayewaxɨ mekani'axɨakuni, Kakuwu nuiwarieya memuyuhayewaxɨ mekani'axɨakuni Kakaɨyari Mɨtɨrɨkaɨye hetsɨa. 
'Ixaheri, tsepanetɨ 'ateɨterima xiekari haramara tetsita mɨtika hepaɨ memɨyupaɨme, memuyuhayewaxɨ xeikɨa mekani'axɨakuni. 'Ari yakatiniutaniukieni memɨka'unarienikɨ, heitseriemekɨ katiniyɨmɨkɨ yuheyemekɨ. 
Karikɨ Ti'aitame, Yawé Naimekɨmɨtɨrɨkaɨye, yakatinaye'atɨamɨkɨ mika'unakɨ kemutayɨ mɨkɨ nuiwari. 
'Ayumieme, Ti'aitame mɨpaɨ paine, Yawé Naimekɨmɨtɨrɨkaɨye: «Neteɨterima, Tsiyuni xemɨtama, 'Atsiriya pepɨkamakaka. Tsepanetɨ yu'itsɨkɨ mɨmatsi'uwa meta tsepa kɨye 'iwaɨyɨpame manukukwei, 'Ekipitu mɨtiuyuri hepaɨ. 
'Ena mɨtiyehane yapaɨmexɨa tukari 'anukayayu neha'atɨ 'ahepaɨtsita nepɨtihayewa, meta nehaxɨa memɨmetsi'aye'unie kaniwaka'unamɨkɨ». 
Yawé Naimekɨmɨtɨrɨkaɨye kawayatsixi wawayamekɨ kaniwatiwamɨkɨ, Mariyani kemɨtiuka'unaxɨ hepaɨ 'Urewi 'aiyaritsie. Haramara hetsie yu'itsɨ kaneutatseramɨkɨ, 'Ekipitu kemɨtiuyuri. 
'Iya tukaritsie mɨkɨ 'ika 'anaiparitsie pemetɨkɨ pekaninawairiemɨkɨ meta waɨkawa pemɨtawaiyatakɨ yuku 'akwipitɨa pemateka kananumurimɨkɨ. 
'Ayati paitɨ kaninuamɨkɨ rayuye'uniekame, Mikuruni kaniuyeyeimɨkɨ, meta yupiinite Mikimatsi katiniku'eirimɨkɨ. 
Mayekuni 'uyaka, mɨpaɨ kanaineni: «Kehewa tekananukutsikuni». Xama kaniuyɨyɨakani marikakɨ, meta Kiweya kiekatari, Tsahuri kiekarieya mepuyuta'unaxɨ. 
Karini niweya witsipemɨti'ɨimari, karima keneutahiwa. Rahitsi, keneu'ena. Xɨa'ui 'Anatuti. 
Marimena kaniuyuta'una, Kewini kiekatari hakewa memeyuti'awieta mekaniwautɨweni. 
Hikɨtɨtɨ Nuwi mekaniwa'uikuni, yumamá kanitakatsimɨkɨ hɨri hepaɨtsita Tsiyuni niweya witsimɨti'ɨimari kiekariyaritsie, Kerutsareme hɨriyaritsie. 
Xekeneuxeiya. Ti'aitame, Yawé Naimekɨmɨtɨrɨkaɨye, kɨyexi pɨtimura yemekɨ waɨkawa tɨrɨkaɨyemekɨ. Kɨyexi 'amɨtɨtɨ kanawitekiexɨamɨkɨ, matsi waɨkawa 'amutɨtɨ kanatixɨriwani. 
Hatsakɨ 'ɨtsi 'amayetsuye kanayewitewani, meta Riwanu witsimɨtiyuxexeiyakai puwakapenixɨ. 
