﻿Nɨawari.
140.
Teyuitɨwamete wa'ukiyari. Rawiri nɨawarieya. Neuxei Yawé, 'axateyuruwamete watsata keneneutawikweitsitɨa, kenene'ɨwiyani memɨteyukananaima wahepaɨtsita, 
memɨyu'iyaritɨa xeikɨa hipame ke'axamemɨwayurieni meta tsepa kepauka kwi memayukwiwawe. 
Yuneni kuu nenieya hepaɨ xeikɨa mepimɨwa, kuu 'uayeya mɨmɨya mepexeiya yutenitsie. 
Yawé, kenene'ɨwiyani 'axateyuruwamete wahepaɨtsita, kenene'ɨwiyani memɨteyumemiwa wahepaɨtsita, mɨkɨ memɨnetsihatihɨaximekɨ xeikɨa. 
Mɨkɨ memɨyuti'ɨre winiyari mepɨnetsi'uketsiri, kaunari nehɨxie mepɨtiye, nemekawenikɨ nehɨxie mepɨte'u'una. 
Ne mɨpaɨ Yawé nepɨrahɨawe: «'Ekɨ pepɨnekakaɨyari. Yawé, keneneu'eni kenemetiwawirie waɨkawa». 
Yawé Ti'aitame, netsiwikweitsitɨwame pemɨtɨrɨkaɨye, kepauka nemɨmierienenitsie pemɨnetsiparewie: 
Yawé, pepɨkawapitɨaka 'axateyuruwamete memɨtehayu'iwanikɨ, pepɨkawapitɨaka kememɨteku'eriwa mɨpaɨ memɨteyurienikɨ, kapa me'uyuti'ɨrenikɨ. 
Memɨnetsi'uweiya wahetsie pɨta kenanunɨ'a 'axamɨti'ane nehetsiemieme memeiyenɨ'akai. 
Tɨɨ wiyeriyari ke'ukaxɨrieni wahetsie, taipa mekeheukaxɨriyani, meta putsu meukatetewata, para hatsuaku tawarita memɨkawatikɨkanikɨ. 
Meke'ukumawere 'ena kwiepa teɨteri memɨte'itawa, 'uximatɨarikakɨ mete'uka'eniwatɨ meke'ukwini yunaitɨ teɨteri memɨteyukananaima. 
Ne mɨpaɨ nepɨtimate Yawé teɨteri 'aixɨa memɨte'u'uwa meta tixaɨtɨ memɨkatehexeiya puwaparewie, meta wahetsie punua heitserie kememɨtehexeiya. 
Yurikɨ 'aixɨa memɨte'u'uwa mepɨmetsinɨawani meta 'ahɨxie mekaniu'uwakuni. 
