﻿Nɨawari.
119.
'Aixɨa mekani'itɨarieka kemɨ'ane huye 'aixɨa mɨ'ane 'utɨa memuhu, Yawé 'aitsikaya kemaine mɨpaɨ memɨte'u'uwa. 
'Aixɨa mekani'itɨarieka kemɨ'ane 'a'inɨari niukiyari memu'uta meta yu'iyarikɨ memikuwautɨwe. 
Hatsuakutɨma 'axamepɨkateheyurie, matsi pɨta Kakaɨyari huyeya mepuweiya. 
'Ekɨ 'aitsika pekaniyetuani, heitseriemekɨ maye'atɨariwanikɨ. 
Waɨkawamekɨ nepɨnewaɨriya nehuye 'aixɨa nemuyurienikɨ, nemeye'atɨanikɨ 'a'aitsika. 
Hatsuaku nepɨkatewiyatsitɨarieni kepauka naime 'a'aitsika nemaye'atɨaka. 
Ne ne'iyarikɨ nepɨmetsitanɨawa, kepauka nemeitimani ke'aixɨa pemɨti'aitakɨ. 
'A'inɨari niukiyari nepaye'atɨani, pepɨkanetsi'uku'e'eiriwani naimekɨ. 
¿Kehepaɨ 'anetɨ temaikɨ pɨ'itiyaka? Yatikamietɨ 'aniuki kemaine. 
Ne naime ne'iyarikɨ nepɨmetsikuwaɨne, pepɨkanetsipitɨaka 'a'aitsika nemuku'e'eiriwanikɨ. 
Ne'iyaritsie 'aniuki nepu'uta kapa 'ahetsiemieme 'axanetiuyurienikɨ. 
Yawé, 'aixɨa pemɨrayurieni pepɨhɨkɨ. Keneneuta'ɨkitɨa 'a'aitsika nemetimanikɨ. 
Ne naime 'a'aitsika yanekatinikuxatani pemɨtatsi'uta'ɨkitɨa. 
Waɨkawamekɨ nepɨnetemawie 'aniuki kemaine mɨpaɨ netiuyeikatɨ keyuri waɨkawa nerexeiyatɨ. 
'A'aitsika nepuku'eriwa, meta 'ahuye'utɨa xeikɨa nepɨne'ɨwiya. 
'A'aitsikatsie temawierika nepukaxexeiya, hatsuaku nepɨkahetɨmaiya 'aniuki. 
Ne ti'a'uximayatsiriwame 'aixɨa kenetinexeiyani, mɨpaɨ nemɨtiuyeikanikɨ meta 'aniukitsie yanemɨtikamienikɨ. 
Neheuniereme kenenayeitɨa, nemixeiyakɨ 'a'ɨkitsikate mɨmamariwawe. 
Ne kuyeikame nekanihɨkɨtɨni 'ena kwiepa, 'a'aitsika pepɨkanetsi'awitsirieka. 
Mɨixa nekɨipitsie pɨrekaka, ke'aixɨa pemɨti'aita neheumaimɨtɨ. 
'Ekɨ pepɨwarutate'a memuyuti'ɨre, 'axameke'itɨarieka kemɨ'ane yamemɨkatekahu 'a'aitsikatsie. 
'Ekɨ pepɨkawapitɨaka hipatɨ memɨnetsiyuriyani, ne matsi 'a'aitsikatsie yanemɨtikamiekɨ. 
Kemɨ'ane tɨrɨkariya memexeiya nehetsiemieme mepɨtekuxata kememɨnetsiyurienikɨ, peru matsi ne ti'a'uximayatsiriwame 'a'aitsika xeikɨa nepuku'eriwa. 
'A'aitsika pɨnetsitemawieritɨa, meta mɨkɨ netsi'ɨxatsitɨwamete mepɨhɨkɨ. 
Kwiepa nekanitihɨximaweni, tukari keneneupitɨa 'aniukitsie kepemaine. 
Kepauka nemɨmetsi'utaxatɨa kenemɨtiyurienikɨ, 'ekɨ pepɨnetsi'uta'ei. 'A'aitsika keneneuti'ɨkitɨa. 
Keneneupitɨa 'a'aitsika hepaɨtsita nemɨtimaikakɨ, mariwemekɨ kepemɨtiuyuri nemuku'eriwanikɨ. 
Hiwerikakɨ ne'iyari pɨtaxɨxime: ne'iyari ketinemikwani 'aniuki kemainekɨ. 
Pepɨkanetsipitɨaka huye mututuni nemanukuweweiyanikɨ, 'aniuki kemaine netimaikame kenenayeitɨaka. 
Nepɨnewaɨriya huye mɨheitserie nemuweiyanikɨ, meta 'a'aitsika nepanayexei nemiweiyanikɨ. 
Yawé, ne 'a'aitsikatsie nepɨtiwiya, pepɨkanetsipitɨaka nemɨtewiyatsitɨarienikɨ. 
'A'aitsika huyeyari 'utɨma nekaniunautsarɨmeni, 'ekɨtsɨ waɨkawa nemɨnekɨhɨawenikɨ pekaneniupitɨani. 
Yawé, kenetineuti'ɨkitɨa 'a'aitsika nemuweiyanikɨ, hikɨ ne yanekatinikayeimɨkɨ kemaine kenemɨreutere ne'uyeikatɨ. 
Nemɨtimaiwenikɨ keneneupitɨa 'a'aitsikatsie yanemɨtiyurienikɨ, naime ne'iyarikɨ nekaneye'atɨakamɨkɨ. 
'A'aitsika huyeyari 'utɨma keneneuwitɨximeni, mɨkɨtsie temawierika nepukaxexeiya. 
Ne'iyari 'a'aitsikatsie yɨkɨhɨaweme kenayeitɨa, matsi tumini 'iwarikayarikɨ 'axamɨ'anetsie pɨkayɨhɨaweni. 
Nitixaɨtɨ mɨkatihɨkɨ hetsie nenekɨ'ɨwiyame pepɨkanetsihayeitɨaka, matsi tukari keneneupitɨa 'aniukitsie kepemaine. 
'Aniuki kenaye'atɨa 'ikɨ ti'a'uximayatsiriwame hetsie, kepemɨtiyuriene memɨmetsihayemakaxe wahetsie. 
'Uximatɨarika tewiweme kenemɨrexeiya, mɨkɨ hepaɨtsita keneneɨxɨna, 'ekɨ matsi 'itsɨkame 'aixɨa pemɨtiuka'iyari pepɨhɨkɨ. 
Ne 'a'aitsika niukiyari nepɨnaki'erie. Tukari keneneupitɨa heitseriemekɨ 'ekɨ kepemɨtiyupitɨwa. 
Yawé, 'anaki'eriya mɨmariwe kenenanɨ'airi meta wikweitsitɨarika 'ahetsɨa miemekɨ kepemutayɨ. 
'Ana nepɨyɨweni nemɨwaruta'eiya 'axamemɨnetekɨhɨawe, ne 'aniukitsie nemɨtiwiyakɨ. 
Yuri netikuxatame xeikɨa kenenayeitɨaka, 'a'aitsika hetsie xeikɨa nekanita'ikwewani. 
Yuheyemekɨ 'a'aitsikatsie heitseriemekɨ yanepɨtikamieni. 
'Aixɨa 'anemekɨ nepukuyeikani 'atsinekatiku'eriwatɨ, ne 'a'aitsika nemuweiyakɨ. 
Ne te'aitamete nepɨtiwataxatɨani 'a'aitsika hepaɨtsita, hawaikɨ nepɨkanetitewiya, 
matsi 'a'aitsika nemɨnaki'eriekɨ, meta mɨkɨkɨ ne nekaniyutemawieka. 
Ne 'a'aitsika nekaninaki'erieka, mɨkɨkɨ nekaniyutemawieka, 'a'aitsika nemuku'eriwani pɨnetsinake. 
Kena'eriwani 'ikɨ ti'a'uximayatsiriwame ke'aneme niuki pemiyetuiri, mɨkɨ niukikɨ neta'ikwewame pemɨnetsi'ayeitɨa. 
'Ikɨ netsinɨtɨwame kanihɨkɨtɨni kepauka nemɨtiuka'eniwa: 'aniukitsie kepemaine tukari kanenipitɨaka. 
Memɨyuti'ɨre kwinimieme 'axamepɨnetekɨhɨawe, ne peru 'a'aitsika nepɨka'uku'e'eiriwa. 
Yawé, ne 'a'aitsika nepa'eriwa meripaitɨ mieme, mɨkɨtsie nɨtɨarika nepukaxexeiya. 
'Axateyuruwamete wahepaɨtsita nepɨha'a, 'a'aitsika memuku'eirikɨ. 
'A'aitsika nekwikari pɨhɨkɨ, 'ena yapaɨmexɨa nemanuyeikatsie. 
Yawé, yɨwikɨta nepɨmetsihahɨawe kepemɨtitewakɨ, nepɨnewaɨriya 'a'ɨkitsika nemaye'atɨanikɨ. 
Ne 'a'aitsika memaye'atɨwanikɨ nehɨritɨarika kanihɨkɨtɨni. 
Yawé, 'ekɨ tita nemɨrexeiya pekanihɨkɨtɨni. 'Aniuki kemaine nepeye'atɨani, mɨpaɨ nepaine. 
Ne'iyarikɨ yemekɨ yanepɨtikamienikeyu kemɨmetinake, keneneutinenimayata kepemutayɨ. 
'Ari netukari nepeutimaixɨa, mɨpaɨ nepɨtinewaɨriya nemeye'atɨanikɨ 'a'aitsika. 
Nepɨnemexɨitɨa, xeiya nepɨrayeitɨwa 'a'aitsika nemaye'atɨanikɨ. 
Tsepanetɨ 'axamemɨte'u'iyari memɨnetsiwiniyaku, ne matsi 'a'aitsika nepɨkahatɨtɨmaiya. 
Tɨkari hixɨapa nepanukukeka pamɨpariyutsi nemetsipitɨanike, 'a'aitsika heitseriemekɨ mɨtikuxatakɨ. 
Kemɨ'ane memɨmetsihayemakaxe nekaniwahamikutɨni, meta 'a'aitsikatsie yamemɨtekahu. 
Yawé, 'a'aitsika keneneuti'ɨkitɨa, kwiepa waɨkawa puxuawe 'anaki'eriya mɨmariwe. 
Yawé, ti'a'uximayatsiriwame 'aixɨa ketinexeiyani, 'aniuki kemainekɨ. 
Kenenepitɨaka nemɨtimaiwenikɨ meta nemeitimaitɨyeikanikɨ, ne 'a'aitsikatsie yuri nekatini'erieka. 
Meripaitɨ mexixi nekatikwiniwekai, 'ateewa nepuyeikakai, peru hikɨ 'aniukitsie yanepɨtikamie. 
'Ekɨ 'aixɨa pepɨtiuka'iyari, meta 'aixɨa pepɨtiyuriene, 'a'aitsikate keneneuti'ɨkitɨa. 
Tsepanetɨ memuyuti'ɨre nehetsiemieme 'axakememutiyuane, ne nepeye'atɨwa 'a'aitsika yemekɨ ne'iyarikɨ. 
Mɨkɨ mepɨka'u'iyari yemekɨ, peru ne nepuyutemawie 'a'aitsikakɨ. 
'Aixɨa pɨ'ane pemɨnetiukwinitɨa, 'a'aitsika mɨkɨkɨ nepetima. 
'A'ɨkitsika matsi waɨkawa pɨraye'axe nehetsiemieme, keyuri pɨrata meta huru tuminiyari waɨkawatɨ. 
'Atɨrɨkariyakɨ pepɨnetsi'utawewi, kenemɨ'aneni yapepɨnetiuwewi. Nemeitimaitɨyeikanikɨ keneneupitɨa 'a'aitsika nemɨmaikakɨ. 
Kemɨ'ane memɨmetsihayemakaxe kepauka memɨnetsixeiya mekaniyutemamawieka, 'aniukitsie yuri nemɨti'eriekɨ neta'ikwewatɨ. 
Yawé, ne nepɨtimate 'a'aitsika 'aixɨa pɨ'ane, meta pɨheitserie kepemɨnetikuwaya. 
'Anaki'eriya mɨmariwe kehɨkɨtɨni mɨnetsinɨtɨani, 'ikɨ ti'a'uximayatsiriwame kepemɨtiutahɨawixɨ. 
'Anenimayatsika kenuani tukari kenetsi'upitɨani, 'a'aitsikatsie nemuyutemawiekɨ. 
Memuyuti'ɨre meke'utewiyatsitɨarieni yakɨ xeikɨa memɨnetsiniukimakɨ, ne matsi, 'a'aitsika nepuku'eriwani. 
Kemɨ'ane memɨmetsi'ayemakaxe mekenetsi'utinɨni, kemɨ'ane 'a'aitsika memɨmate. 
Ne'iyari heitseriemekɨ keyukɨhɨaweni 'a'aitsikatsie, ne nemɨkatewiyatsitɨarienikɨ hatsuaku. 
'Awikweitsitɨarika netakwewietɨ netukari pɨtixɨxime. 'Aniuki kemaine mɨpaɨ nekatinita'ikwewani. 
Kepemutayɨkɨ neta'ikwewatɨ nepɨkaheuniereri, meta mɨpaɨ nekaniutaineni: «¿Kepaukari pepunuani penetsinɨtɨanike?» 
Nawi kɨxauriyari hepaɨ nepɨtiyuxexeiya kɨtsikɨ mɨyɨxaɨye, peru 'a'aitsika kemaine nepɨkahatɨmaiya. 
¿Kepaɨmexɨa 'akuxi 'ikɨ ti'a'uximayatsiriwame 'apuyeikani? ¿Kepauka memɨnetsi'aye'unie pepɨtiwarakapitɨani? 
Putsu mekaniutiwewieni memuyuti'ɨre muwa nemeukawenikɨ, 'a'aitsika kemaine mɨpaɨ memɨkatekahu. 
Naitɨ 'a'aitsika yuri paine, keneneuparewi 'atsinekatiyurienekaku, memɨnetsi'uweiyakɨ menetsi'itatɨ. 
'Etsiwatɨkaku kwiepa mepɨnetsi'ukumaweriyaxɨ nemɨka'uyeikanikɨ, peru ne 'a'aitsika nepɨka'uku'e'eiriwa. 
'Anaki'eriya mɨmariwekɨ tukari keneneupitɨa, hikɨ 'ana 'a'aitsika nepaye'atɨani. 
Yawé, 'aniuki yuheyemekɨ pɨ'ayumieme, meta muyuawitsie 'aniuki pɨ'enierie. 
'Ekɨ 'aheyemekɨ yapepɨtikamie, kepauka kwie pemutawewi, heitseriemekɨ 'aixɨa pɨyɨ. 
Hikɨ naitɨ pɨtixuawe, kepemɨtiu'aitaxɨ, yunaitɨ mematsi'enietɨ yamekateniyurieka. 
Xɨka 'a'aitsika kanetsitemawieritɨakake, hiwerikakɨri nekaniumɨnike. 
'A'aitsika hatsuaku nepɨkahatɨmaiya, mɨkɨkɨ tukari pemɨnetsi'upitɨakɨ. 
'Ahetsɨa nepɨmieme, keneneutawikweitsitɨa, meta 'a'aitsika nemukuwaunekɨ neheye'atɨanike. 
'Axateyuruwamete mepɨnetsihupietɨwe menetsimienike, peru ne tawarita 'a'aitsikakɨ nepɨtɨrɨkariyarieni. 
Mɨpaɨ nepɨretima tita mɨtiheitserie 'apu'axe, peru 'a'aitsikate hawaikɨ pɨkahau'atɨka. 
Yemekɨ ne waɨkawa 'a'ɨkitsika nepɨnaki'erie. Tukarikɨ mɨkɨ xeikɨa nepuku'eriwa. 
'A'aitsikate waɨkawa netimaiweme pɨnetsi'ayeitɨa keyuri memɨnetsi'aye'unie, matsi mɨkɨ yuheyemekɨ nehetsiemieme mɨhɨkɨkɨ. 
Matsi waɨkawa nepɨtimaiwe nete'ɨkitɨwamete nepɨwara'iwa, 'a'aitsika xeikɨa nemuku'eriwakɨ. 
Ne matsi waɨkawa nepɨtiuyemate keyuri 'ukirawetsixi, 'a'aitsika kemaine mɨpaɨ nemɨtikamiekɨ. 
Ne huye 'axamɨ'anene nepɨka'uweiya, 'aniuki nemaye'atɨwanikɨ. 
'A'ɨkitsika nepɨka'uku'e'eiriwa, 'ekɨ mɨpaɨ pemɨneti'ɨkitɨakɨ. 
'Aniuki nenenitsie witsipɨrakaka. Waɨkawa matsi pakaka keyuri xiete kemɨrakaka neteta. 
'A'aitsikatsie netimaiwetɨ nepatɨa, 'ayumieme naime mɨti'itawa huyeyari nepɨxani'erie. 
'Aniuki ne'ɨkatsie kɨxeme kanihɨkɨtɨni, nehuyeta mɨhekɨariwie. 
Ne tɨratu nepuwewi nekɨmana, meta yanepɨra'eriwa: kename 'a'aitsikatsie yanetikayani. 
Yawé, pɨtimɨireri kenemɨtiuka'eniwa, tukari keneneupitɨa 'aniuki kemainekɨ. 
Yawé, kenenaki'erieka 'ikɨ temawierika mawariyari neteta mayeneika, 'a'aitsika keneneuti'ɨkitɨa. 
Netukari kaunari 'etsimɨpe hepaɨ pɨ'ane, peru 'a'aitsika nepɨkahatɨtɨmaiya. 
'Axamemɨte'u'iyari mepɨnetsiwiniyatɨwe, peru ne 'a'aitsikate nepɨka'uku'e'eiriwa. 
'A'aitsika nehetsiemieme pɨhɨkɨ yuheyemekɨ, mɨkɨ ne'iyari mepɨtemawieritɨa. 
Nepɨnewaɨriya ne'iyarikɨ 'a'aitsika nemaye'atɨakakɨ, yuheyemekɨ meta kepaɨmexɨa nemɨyurieni. 
Memɨkate'aye'atɨa nepɨwaxani'erie, peru 'a'ɨkitsika nepɨnaki'erie. 
'Ekɨ netsi'awiwietame pepɨhɨkɨ meta kɨmana nemuyukunarɨma pepɨhɨkɨ, 'aniuki kemaine mɨpaɨ nekatinita'ikwewani. 
Xekeneutayeixɨa, 'axaxemɨte'u'iyari, ne Kakaɨyari 'aitsikaya nepaye'atɨani. 
Kepemutayɨ keneneparewieka, mɨpaɨ nepɨtiwikweka, 'ahetsie kenemɨtitakwewie pepɨka'ikupatani. 
Nehetsie kenenuaka, ne mɨpaɨ netiwikwetɨ, yuheyemekɨ 'ana 'a'aitsikatsie yanepɨtikamieni. 
'Ekɨ pepɨkawanaki'erie kemɨ'ane 'a'aitsika memuku'eiri, 'iyaritɨarika kwamanarika memuwewiekɨ xeikɨa. 
Kwiepa memɨtama memɨkametsihetimaiwawe xatsi hepaɨ pekatiniwaxeiyani, ne 'ayumieme 'a'aitsika nepɨnaki'erie. 
Marikakɨ 'ahɨxie nepɨyɨyɨaka, yaxeikɨata 'a'aitsika ne'ayemakatɨ. 
Ne heitseriemekɨ yanekatinikamieni kehepaɨ 'aixɨa mɨ'ane, pepɨkanetsi'eirieka memɨnetsi'aye'unie memɨnetsi'axekɨ. 
'Ikɨ ti'a'uximayatsiriwame 'aixɨa mɨtikanikɨ yaketineuyuri, memuyuti'ɨre mepɨkanetsi'uximatɨaka. 
Nemetsitakwewietɨ pemɨnetsitawikweitsitɨanikɨ nepɨkaheuniere, neta'ikwewatɨ pemeye'atɨanikɨ ke'aixɨa pemɨti'aitakɨ. 
Ti'a'uximayatsiriwame hetsie yaketineuyuri waɨkawa kepemɨtiuyukanaki'eriekɨ, 'a'aitsika keneneuti'ɨkitɨa. 
Ne ti'a'uximayatsiriwame nepɨhɨkɨ: nemɨreutamaiwenikɨ keneneupitɨa, 'ana 'a'aitsika nekanetimaimɨkɨ. 
Yawé, 'ari tukari paye'a yapemɨtiyurienikɨ, matsi 'a'aitsika nixewitɨ pɨka'aye'atɨa. 
Nitixaɨtɨ 'ena kwiepa timieme nepɨkatinaki'erie, matsi 'a'aitsika xeikɨa nepɨnaki'erie, huru kenemɨkatinaki'erie, huru 'aixɨa mɨ'itɨarie reuyeta. 
'Ayumieme 'a'aitsikate nepuku'eriwa peru kwamanarika nepɨtixani'erie. 
Naitɨ 'a'aitsikate pɨmamariwawe, 'ayumieme naime nepaye'atɨa. 
Kepauka 'aniuki mukuxaxatsiwa mɨkɨ katanihekɨariwiyani, meta 'atsimɨkatimate kaneitimaitɨyeikani. 
Waɨkawa nehauharimɨtɨ nepikuwaune, neteni nepanutayepiwa nehanatiwakitɨ, yemekɨ nemeimaimɨkɨkɨ 'a'aitsika. 
Kenenaye'eri, keneneutinenimayata yaxeikɨa kepemɨtiwanenimaya memɨmetsinaki'erie. 
Keneneuwitɨximeni kepemutayɨ 'aniukikɨ, pepɨkanetsipitɨaka 'axamɨti'ane mɨnetikuyuitɨwanikɨ. 
Keneneɨxɨna teɨteri kememɨnetenanaimakɨ, karikɨ ne nepeye'atɨani 'a'aitsika. 
Nehetsie pematsiɨkɨtɨ kene'ayeitɨa ke'aixɨa pemɨtiuka'iyari, 'a'aitsika keneneuti'ɨkitɨa. 
Haa hepaɨ ne'ukai pɨtiuhapane, 'a'aitsika mɨka'aye'atɨariwakɨ. 
'Ekɨ Yawé, heitseriemekɨ pepɨti'uximaya, meta 'a'aitsikate pɨheitserietɨka. 
'A'aitsikate 'aixɨa pɨ'anene kepemɨtiuta'aitaxɨ, 'aixɨa pɨ'ane hetsiena temɨtewiyanikɨ. 
Ne'ɨtetsatɨ nepɨha'a, memɨnetsi'aye'unie 'aniuki memɨka'eniekɨ. 
Kepemutayɨ 'aniukikɨ puta'inɨatsie waɨkawa, 'ayumieme ne nepinaki'erie. 
Tsepa ne nitixaɨtɨ nemɨkatihɨkɨ meta nemɨxani'eriwa, peru ne 'a'aitsika nepɨkahatɨtɨmaiya. 
Heitseriemekɨ kepemɨtiyuriene 'aixɨa peti'aitatɨ yuheyemekɨ, 'a'aitsika yuri kanaineni. 
'Uximatɨarika meta hiwerika nepexeiya, peru 'a'aitsika pɨnetsitemawieritɨa. 
'A'aitsikate yuheyemekɨ heitseriemekɨ pɨtikuxata, nereutamaiwetɨ nemuyeikanikɨ keneneupitɨa. 
Yemekɨ naime ne'iyarikɨ nekamenahɨaweni, Yawé, keneneuta'eiya, 'ana 'a'aitsika nepaye'atɨani. 
Nepɨmetsihahiwiwa: «Keneneutawikweitsitɨa». 'A'aitsikate nepaye'atɨani. 
Ximeri paitɨ nepanukukeka nemetsitawawirienike parewiya, ne 'aniukitsie nepaɨwaɨre neta'ikwewatɨ. 
Tɨkarikɨ nepɨkatikukutsu, 'aniuki neku'eriwatɨ kepemutayɨ. 
'Anaki'eriya mɨmariwekɨ neniuki keneu'eni, Yawé, kepemɨti'aitakɨ tukari keneneupitɨa. 
Memɨnetsi'aye'unie 'axamemɨte'u'iyari 'ahurawa mekaniu'uwaniri, peru 'a'aitsika hepaɨtsita 'ateewa mekaniu'uwani. 
Yawé, 'ekɨta 'ahurawa pekaniuyeikani, meta naitɨ 'a'aitsikate kemutiyuane kaniyuritɨni. 
Mɨixa nepuyurieri 'a'aitsika nematetɨ, peminetɨa yuheyemekɨ mɨ'ayumiemetɨnikɨ. 
Keneneuxeiya kenemɨtiuka'eniwa, keneneutawikweitsitɨa, ne matsi 'a'aitsika kemaine nepɨkahatɨmaiyawe. 
Nehetsie keneutanua, keneneutawikweitsitɨa, kepemutayɨkɨ tukari kenenepitɨaka. 
'Axateyuruwamete wahetsiemieme 'apeteewa wikweitsitɨarika, mɨkɨ 'a'aitsika memɨkakuwautɨwekɨ. 
Yawé, waɨkawamekɨ pepɨtiyukanenimaya, tukari keneneupitɨa kepemɨti'aitakɨ. 
Memɨnetsi'aye'unie mepɨyumɨire meta memɨnetsi'uweiya, peru ne 'a'aitsikate nepɨka'uku'e'eiriwa. 
Kepauka memɨteyukwamana nemɨwakuxexeiya nepekahayamɨkatɨyeika, 'aniuki memɨkahaye'atɨakɨ. 
Yawé, neuxei keneneuxeiya 'a'aitsikate waɨkawa kenemɨtinaki'erie, waɨkawa kepemɨtiyukanaki'eriekɨ, tukari keneneupitɨa. 
Naitɨ 'aniuki heitseriemekɨ yurikɨ pɨtikuxata xeikɨa, kepemɨti'aita yuheyemekɨ kani'ayumiemetɨni. 
Yakɨ xeikɨa mepɨnetsi'uweiya teɨteri memamariwawetɨ, matsi 'aniuki xeikɨa nepayemakaxe. 
Ne nepɨnetemawie 'aniukikɨ kepemutayɨ, tewi waɨkawa mɨtiukaxei kemɨtiyutemawie hepaɨ. 
Yemekɨ nepixani'erie naime 'itarika, matsi waɨkawa 'a'aitsika nepɨnaki'erie. 
Xeitukaritsie 'atahutamexɨa nepɨmetsinɨawani, ke'aixɨa pemɨti'aitakɨ. 
Kemɨ'ane 'a'aitsika memɨnaki'erie yemekɨ 'aixɨa 'iyari mekaniu'uwani, nitixaɨtɨtsie mepɨkatehekaxɨrɨwe. 
Yawé, ne 'awikweitsitɨarika nepɨtakwewie meta yanepɨtiyuriene 'a'aitsikate kemaine. 
Naime ne'iyarikɨ 'a'aitsikate nepaye'atɨa. Waɨkawa nepeinaki'erie. 
'A'aitsikate nepeu'enie, 'ekɨ naime nehuye pemɨmatekɨ. 
Nehiwerika hiwariyari pekehe'enieni, Yawé, nereutamaiweme kenenayeitɨa, 'aniuki kemainekɨ. 
Waɨkawa kenemɨmetiwawirie pekenetsihe'enieni, keneneuxɨna, kepemutayɨkɨ. 
Ne nemetsinɨawatɨ nepɨkatihayewani, 'ekɨtsɨ 'a'aitsikate pekaneni'ɨkitɨaka. 
'Aniuki 'aixɨa manɨyɨne nepitakwika, naitɨ 'a'aitsikate heitseriemekɨ mɨtikuxatakɨ. 
'Atɨrɨkariyakɨ keneneuparewi, ne 'a'aitsikate nemanayexeikɨ. 
Yawé, ne 'awikweitsitɨarika yemekɨ nepeuyehɨwa. 'A'aitsikate pɨnetemawierika. 
Tukari 'akuxi keneneupitɨa nemetsinɨawatɨ 'anemuyeikanikɨ, kepemɨti'aita kenetsi'uparewieni. 
Muxa meuyewe hepaɨ nekaniuyɨni, kenaye'a ti'a'uximayatsiriwame kenawaumie, 'a'aitsikate nemɨkahatɨmaiyawekɨ. 
