﻿Nɨawari.
116.
Ne Yawé nepɨnaki'erie mɨkɨ mɨnetsi'eniekɨ waɨkawamekɨ nehehɨawekaku. 
Mɨkɨ nenenewieri mɨ'eniekɨ, yuheyemekɨ yanepɨrehɨawe. 
Mɨki yuwiniyarikɨ pɨnetsihɨakai, 'uximatɨarika pɨnetsi'umi tɨma, 'anari waɨkawa nepɨtiuka'eniexɨa. 
Hikɨ 'ana Yawé waɨkawamekɨ mɨpaɨ nekatiniutahɨawe: «Yawé, waɨkawamekɨ nepɨmetsiwawirie, netukari keneutawikweitsitɨa». 
Yawé pɨtiyukanenimaya heitserie pɨtiyuriene, takakaɨyari naimekɨ witsipɨtiuka'iyari. 
Teɨteri yuhetsie memɨkaheutanuawawe Yawé wahetsie kaninuaka, ne nepɨkayɨwekairi mɨkɨ pɨnetsi'utawikweitsitɨa. 
Ne'iyari, kayuwatɨ kenexeiyaniri, 'ahetsiemieme Yawé 'aixɨa katiniuka'iyarini. 
'Ekɨ pepɨnetsi'utawikweitsitɨa nemɨximekaku, ne'ukai pepa'itiexɨa, nemekawautsenikɨ pepɨkanetsipitɨa. 
'Ayumieme yuheyemekɨ Yawé hɨxie nepuyeikani, mexixi 'ena kwiepa mɨranu'uwatɨka ne'uyeika. 
Tsepa mɨpaɨ nemɨmatikɨhɨawe: «Waɨkawa nepɨtiuka'eniwa ne'iyaritsie», peru Kakaɨyari hetsie yuri nepɨti'erie. 
Mɨpaɨ neputayɨ newaɨripietɨ: «Yunaitɨ memɨte'itawa mepɨhɨkɨ». 
Nepɨkayɨwe kenemɨrekapitɨani Yawé, waɨkawa 'aixɨa mɨti'ane mɨnetiupitɨakɨ. 
Nepɨyɨwe xeikɨa pamɨpariyutsi nemɨmetsipitɨaka 'awikweitsitɨarikakɨ, meta nemetsinuawatɨ neyunenewietɨ Yawé. 
Metatsiere neraye'atɨatɨ xeikɨa Yawé kenemɨrahɨawe yunaime teɨterimama wahɨxie. 
Yawé puyukahiwerɨwa kepauka hetsiena yamemɨtekahu memɨtakukuwe. 
Yawé, ne ti'a'uximayatsiriwame nepɨhɨkɨ, nemaamata ti'a'uximayatsiriwame pɨhɨkɨtɨkai. Kepauka tepɨa kaunariyarikɨ nemɨhɨakai, 'ekɨ pepeitekixɨa. 
Kenemɨtiyutemawie mawariyari nepɨmetsiwewirieni meta nepɨmetsikuxatani Yawé. 
Yawé nepɨraye'atɨirieni kenemutayɨ, yunaime teɨterimama wahɨxie, 
Yawé kiita hɨxie takwa, Kerutsareme 'ahixɨapa. Yawé kenɨawarieka. 
