﻿Nɨawari.
110.
Rawiri nɨawarieya. Yawé mɨpaɨ katiniutahɨawe Neti'aitɨwame: «Netserieta kenayexi ne nekaniwaka'unamɨkɨ memɨmetsi'aye'unie, 'ahɨxie nekaniwa'atɨamɨkɨ». 
Yawé kemetsi'uparewieni pemɨtita'aitakɨ naitsarie Kerutsareme pe'ukaitɨ. Mana 'ekɨ ketine'aitani memɨmetsi'aye'unie wahixɨata. 
'Akuyaxima mepuyuwaɨriyani tukaritsie kepauka xemuyutakwini, hɨrite mɨpatsietɨkatsie me'u'uwatɨ. Tau 'ɨrɨya manatinexɨanitsie, kepauka 'ahetsie mɨtinake hekwamekɨ pɨmatsitɨrɨkariya. 
Yawé yaputayɨ kename yatikayani mɨkɨ pɨkatihayewa pɨkatipata: «'Ekɨ mawari wewiwame pekanihɨkɨtɨni yuheyemekɨ mieme, Merikitsereki hepaɨ». 
Tati'aitɨwame 'atserieta kanakani, te'aitamete kaniwatipɨnamɨkɨ kepauka mɨyeha'ani tukariyaritsie. 
Nuiwarite yakatiniwarakapitɨamɨkɨ, mɨkite kaniwakuxeɨrimɨkɨ, mu'ute kanitipɨnamɨkɨ naitsarie kwiepa. 
Huyeta 'umietɨ tati'aitɨwame 'akitsie kanitiharimɨkɨ, hikɨ mɨpaɨ tawarita kanitatɨrɨkaxɨamɨkɨ. 
