﻿Nɨawari.
103.
Rawiri nɨawarieya. Ne'iyarikɨ Yawé nepɨnɨawani, ke'inɨawani naitɨ newaiyari patsietɨ kemɨtitewakɨ. 
Ne'iyarikɨ Yawé nepɨnɨawani, meta nepɨkaratɨtɨmaiyani 'aixɨa kemɨtiyuparewiwakɨ. 
Mɨkɨ pɨmereuyehɨwirie naime 'axakepemɨtiuyuri meta kepemɨtiuka'eniwa naime 'aixɨa kameniyurieka, 
mɨkɨ pitawikweitsitɨwa 'atukari mɨkite watsata meta metsinaki'erietɨ payeika meta metsinenimayatɨ, 
mɨkɨ waɨkawa pɨmetsiparewie pe'uyeikakaku tita pemɨreuyehɨwa meta kwixɨ hepaɨ pɨmetsihekwariya metsitɨrɨkariyatɨ. 
Yawé kemɨtiheitserie yapɨtiyuriene meta memɨnanaimarie wahetsie kaninuaka. 
Muitsexi yuhuye kaniuxeitsitɨani, 'ixaheritsixi kaniwarutahekɨatɨani yu'uximayatsika. 
Yawé 'aixɨa katiniuka'iyarini meta katiniyukanenimayaka, yapauka pɨka'uyeha'arɨwe meta waɨkawa naki'eriya pexeiya. 
Yapɨkatarate'a tukarikɨ meta yuheyeme tatsihekatɨ pɨkahayeika. 
Ke'axatemɨte'uyuri mɨpaɨ yeme pɨkatatsiyuriene meta mɨpaɨ pɨkatarakapitɨwa ke'axatemɨte'uyuri. 
Kanimariweni naki'eriyaya kemɨ'ane memeyemakaxe wahetsiemieme, taheima kemeutitewa hepaɨ. 
Tita ke'axatemɨte'uyuri mɨkɨ 'ateewa katinewiwieni, kemeteewa tau manatineikatsie 'atsita makayuyuipiketsie hepaɨ. 
Yawé waɨkawa pɨwanenimaya kemɨ'ane memeyemakaxe wahetsiemieme, nuariekame yuniwema wahetsiemieme kemɨtiuka'iyari hepaɨ. 
Ketemɨte'u'iyari mɨkɨ katanimaika, katinimaika tame haxu temɨhɨkɨkɨ. 
Tewi tupiriya hepaɨ kani'aneni, tukarieya pɨtixutuwe tuturi 'ɨtsita mieme hepaɨ: 
kepauka mɨ'ekawarieni, pukumamawere huyerieyatɨma pɨkayukuhekɨkɨare. 
Peru Yawé naki'eriyaya hawaikɨ pɨkaheu'axe, yuheyemekɨ pɨtiwiya kemɨ'ane memeyemakaxe wahetsie, waniwema meta mɨkɨ waniwema wahetsie 'aixɨa mɨti'ane puxuawe, 
kemɨ'ane tɨratuya memaye'atɨa wahetsie meta meme'eriwa 'aitsikaya mɨpaɨ memɨteyuriekakɨ. 
Yawé muyuawitsie yu'uweni kaniukakeni, kemɨti'aita yakatiniyɨaneni yunaime wahetsie. 
Yawé xekenenɨawani, xeme niukieya tuayametemama, xemɨtɨrɨkawi niukieya xemaye'atɨa meta kemɨti'aita yaxemɨtekahu. 
Yunaitɨ kuyaximama, Yawé xekenenɨawani, te'i'uximayatsiriwamete kemɨtinake yaxemɨtekahu. 
Yawé xekenenɨawani, yunaitɨ keyupaɨmeme mɨxe'utawewi naitsarie mɨra'aita xemɨtama. Ne'iyarikɨ Yawé nepɨnɨawani. 
