﻿Nɨawari.
91.
Kemɨ'ane 'Amutewi hetɨa muyu'awieta 'akaniuyeikamɨkɨ Naimekɨmɨtɨrɨkaɨye 'i'etɨriwiyakaku. 
Yawé ne mɨpaɨ nepɨrahɨawe: «'Ekɨ 'ahetsɨa nemɨne'awieta pepɨhɨkɨ, 'ahetsie nemɨtiwiya, Kakaɨyari kemɨ'ane yuri nemɨti'eririe netsiparewiekaku». 
Mɨkɨ xeikɨa metsi'uxɨna pɨyɨwe tiyumemiwame winiyarieyatsie meta kwiniya mɨtiyumemiwatsie, 
metsɨ yu'anakɨ kamenanukanakamɨkɨ meta 'anateyatɨa muyuti'awieta pɨyɨwe. Yuri kemaine, mɨkɨ 'ahetsie nunuwame payani. 
Tɨkari mumariwetsie pepɨkaheumaka, meta 'ɨrɨkɨ tukarikɨ mɨtimɨiyanekɨ, 
meta kwiniya 'etɨriyapa mɨtatsihupienekɨ meta tukarikɨ mɨɨya mɨwaka'unakɨ. 
Tsepa xeimiriyari 'a'utata mukaxɨri, meta tamamata miriyari 'atserieta, peru 'ekɨ pepɨka'atiweni. 
Yurikɨ pekaninierimɨkɨ, pekaniwaxeiyamɨkɨ Kakaɨyari memɨka'ayexeiya kepauka memɨte'akapitɨarieni. 
Metsɨari Yawé hetsɨa pekaniyu'awietani, meta 'ahetsie nunuwame 'Amutewi kanihɨkɨtɨni, 
nitixaɨtɨ 'uximatɨarika 'ahetsie pɨkatinuani, nitixaɨtɨ kwiniya 'akie pɨkatinuani. 
Mɨkɨtsɨ yuniuki tuayamete kaniwatanɨ'amɨkɨ naime 'ahuyeta memetsi'ɨwiyanikɨ. 
Mɨkɨ yumamatekɨ mekamenanukuhanikuni, pemɨkahekawautsenikɨ tetetsie. 
Mayetsi watsata pepuyeikani, 'ɨrawetsixi meta kuuterixi pepɨwatiketsini. 
«Ne nepixɨna, mɨkɨ nehamatɨa muyeikakɨ, hetsiena nepunuaka, kenemɨtitewa mɨnetsimatekɨ. 
Mɨkɨ pɨnetsitahɨawe, neta nepita'eiya, hamatɨana nepuyeikani kepauka 'uximatɨarika mexeiyani, nekanixɨnamɨkɨ 'aixɨa nekatinitahɨawimɨkɨ. 
Waɨkawa wiyari nepipitɨani, newikweitsitɨarikatsie nepitemawieritɨani». 
