﻿Nɨawari.
90.
Muitsexi nenewierieya, Kakaɨyari nɨ'arieya. Ti'aitame, 'ekɨ tatsi'awiwietame pepɨhɨkɨ tsepa tanuiwari memanuyekɨka. 
Hɨri katinunuiwawekaku meta kwie pekatawewiwekaku, meripaitɨtɨ metatsiere 'uxa'a warietɨni, 'ekɨ Kakaɨyari pepɨhɨkɨ. 
'Ekɨ yapepɨtiyuriene teɨteri tumuanari memakɨkanikɨ, kepauka mɨpaɨ pemutaine: «Xemɨkwiwawe, tumuanari xeke'akɨne». 
Xeimiriyari xɨka 'anuyeyani, 'ahetsiemieme, xeitukari hepaɨ pepɨtixeiya, tɨkarikɨ yapaɨmexɨa hurayari maye'axeni hepaɨ pepɨtixeiya. 
Pepɨwarakumaweriya teɨteri. Heinɨtsika hepaɨ mepɨ'ane. Ximeri mepɨtinunuiwa, tupiriya hepaɨ 
ximeri witsi'anetɨ yɨratɨ mɨtineika taikaita 'ari pɨyɨna pɨwaki. 
'Ahaxɨa yurikɨ pɨtatsikwa'a, pemɨha'akɨ pepɨtatsimariuta. 
'Ahɨxie tita 'axatemɨte'uyuri pepɨtixeiya, 'ahekɨaripa pɨti'ane 'axatemɨte'uyuri ketemɨte'anukanama. 
'Ahaxɨakɨ tatukari peyeika naitɨ, xei'itukariyari pɨreutetere tawiyari ketemɨteheutetere. 
Hipatɨ haika tewiyari heimana tamamata wiyari mepɨtihipite, heiwa tepanuti'axe nauka tewiyari wiyari, xɨka tɨrɨkariya 'akuxi tehexeiyani. 'Apɨpaɨme mɨkɨ wiyari, mɨyatɨtɨ, waɨkawa 'uximayatsika pɨtiuyɨne meta 'uximatɨarika: yapauka kananuyekɨkani, tameta wahamatɨa tekaniuhuni. 
¿Kemɨ'ane 'ahaxɨa mɨtɨrɨkaɨye petimaiwe? 'Ahaxɨa pɨmariwe ketemɨteheumama temetsimakaxetɨ. 
Ketatineuta'ɨkitɨa tatukari 'aixɨa 'anemekɨ temɨ'inɨatanikɨ, ta'iyari mɨtimaiwenikɨ. 
Yawé, ¿kepauka tahetsɨa pepɨnuani? Keniwanenimayaka mate'uximayatsiriwamete. 
'Anaki'eriyakɨ ketanehɨniyani ximeri, kepaɨmexɨa tukari temu'uwani teputikwikani teyutemamawietɨ. 
Kepaɨmexɨa wiyari temɨte'uka'eniwakai petatsihiweritɨatɨ, mɨkɨ tukari hikɨ temawierika pɨta kenayeitɨa. 
Yaketatineuxeiyatsitɨa 'a'uximayatsikakɨ, witsikepemɨ'anekɨ tanuiwarite wahetsiemieme. 
Tati'aitɨwame takakaɨyari ketatsiparewieka. 'Aixɨa kenaineni ta'uximayatsika hetsiemieme, huu, 'aixɨa kenaineni ta'uximayatsika hetsiemieme. 
