﻿Nɨawari.
71.
Yawé, ne 'ahetsɨa nepɨne'awieta, nemɨtewinɨarieka pepɨkanetsipitɨaka. 
Heitserie pemɨtiyurienekɨ, nehetsie keneutanua keneneɨxɨna, keneneu'eni, keneneutawikweitsitɨa. 
'Ekɨ kenehɨkɨtɨni neterɨ muwa nemuyuti'awiwieta, muwa xeikɨa yuheyemekɨ nemeta'axeni kenehɨkɨtɨni, ketineuta'aita nemɨtawikweitsitɨarienikɨ, 'ekɨ 'ai nehetsie nunuwame pemɨhɨkɨkɨ. 
Nekakaɨyari, keneneɨxɨna, 'axateyuruwamete memɨnetsiwiyakɨ, 'axateyuruwamete meta memɨteyukananaima watɨrɨkariyatsie. 
Yawé, 'ekɨ Ti'aitame, nepɨmetsitakwewie, temaikɨyari paitɨtɨ 'ahetsie nepɨtiwiya. 
'Ahetsie xeikɨa nepɨtiwiya nemutinuiwaxɨtsie paitɨtɨ, 'ukaratsitsie pepɨnetsiyenuiwitɨa. Yuheyemekɨ nepɨmetsinɨawani. 
Yuwaɨkawame wahepaɨtsita, 'inɨari nepɨhɨkɨ, matsi 'ekɨ nehetsie nunuwame pepɨhɨkɨ pemɨkawatayuane. 
Ne nepɨmetsinɨawa yemekɨ waɨkawa, tukarikɨ kepemɨtimariwekɨ nepɨtikuxata. 
Kepauka 'ukiratsi nemayani pepɨkanetsihehɨpani, kepauka nemɨkayɨweni pepɨkanetsi'uku'e'eiriwani. 
Metsɨ memɨnetsi'aye'unie nehepaɨtsita mieme mekatenikuxatani, kemɨ'ane memɨnetsihupie mekanenikuxatani. 
Mɨpaɨ mekaniutiyuaneni: «Kakaɨyari kaniku'eirieni. Xekenanukuweiya xekenewiya, xewitɨ hetsiena pɨkahetanuani». 
Nekakaɨyari, pepɨkanetsi'uku'e'eiriwani, Nekakaɨyari, xeiya kenaye'a pemɨnetsiparewienikɨ. 
Nehetsie memɨte'ahɨpa tixaɨtɨ mekatehɨkɨtɨtɨ meke'ukwini, keniwarutewiyatsitɨa kemɨ'ane memɨnetsi'atihɨanikɨ memukuwaɨtɨwe. 
Netsietɨ nemenitakwewieka, matsi waɨkawa nemeninɨawani waɨkawa nekaniyutemawieka. 
Tukarikɨ nepikuxatani ke'aixɨa pemɨtiyuriene meta 'awikweitsitɨarika, tsepanetɨ yemekɨ naime nemɨtitaxata nemɨkayɨwe. 
Yawé Ti'aitame, nepitaxata 'a'uximayatsika mɨmamariwawe, nepaye'erieni heitserie kepemɨtiyuriene, heitserie xeikɨa kepemɨtiyuriene. 
Kakaɨyari 'aku, 'ekɨ pepɨnetiuti'ɨkitɨa temaikɨyari paitɨ, hikɨ 'akuxi nepikuxata mariweme kepemɨtiyuriene. 
Kepauka 'ukiratsi nemayani, kepauka nemumutuxakari, Kakaɨyari 'aku, pepɨkanetsi'uku'e'eiriwani, 'umemahu 'atɨrɨkariya newataxatɨayuke, memɨkatinunuiwawawe 'akuxi kepemɨtiuyuri newataxatɨayuke. 
Kakaɨyari 'aku, 'ekɨ mariweme pepɨtiuyuri, heitserie kepemɨtiyuriene meutitewatsie pɨye'axe. ¿Kakaɨyari 'aku, kemɨ'ane 'aku 'ahepaɨ pɨtiuka'iyari? 
Waɨwaka 'uximatɨarikatsie pepɨnetsi'atiwitɨxime, matsi tawarita tukari pepɨnetsipitɨani, kwieta meukatewatsie paitɨ tawarita muwa pepɨnetsi'atihana. 
Tawarita waɨkawa netɨrɨkaɨyeme pepɨnetsi'ayeitɨani 'ana pepɨnetsinɨtɨani. 
Nekakaɨyari, ke'aixɨa pemɨtikamiekɨ, nepɨmetsinɨawani kanaritsie, nepɨmetsinɨawani, 'ixaheritsixi wakakaɨyari mɨpatsie, xawerikɨ nepɨmetsinɨawani. 
Kepauka nɨawari 'ahetsiemieme nemɨtikwika neputahiwani neyutemawietɨ, 'ekɨtsɨ netukari pekaniutawikweitsitɨani. 
Tukarikɨ yaxeikɨa nepɨtikuxatani keheitserie pemɨtiyuriene, karikɨ kemɨ'aneri memɨnetsika'unakukai mekaniutewiyatsitɨarieni mekaneuyuyexɨrieni. 
