﻿Nɨawari.
42.
Teyuitɨwamete wa'ukiyari. Kure niwemama wa'ɨkitsika. Maxa yeutanaka heuharimɨtɨ haa kemɨtikuwaune, neta mɨpaɨ nepɨmetikuwaune Kakaɨyari. 
Nepeuharimɨkɨ Kakaɨyari hetsie timiemekɨ, Kakaɨyari mayeyuri hetsie. ¿Kepauka Kakaɨyari hɨxie nepɨtakeni? 
Tukarikɨ tɨkarikɨ tsuarikɨ xeikɨa nepayeniere, mɨpaɨ neranutahɨawarɨwatɨ tsepa kepauka: «¿Hakewa tamɨ 'akakaɨyari?» 
Mɨpaɨ neti'erieme nepɨtikuhayeikawa ne'utatsuatɨ: Ne nepayeyeikakai yumɨireme wahamatɨa, nepɨwarewitɨkɨkai Kakaɨyari tukita. Temawierika hiwariyari meta pamɨpariyutsi 'ixɨarariyari tepatinenetɨwakai. 
¿Titayari yɨkɨ netinekɨhɨaweni? ¿Titayari netine'uximatɨaka? Kakaɨyari hetsɨa timieme matsi nepɨtitakwewieka meta nepinɨawani. Mɨkɨ pɨnetsiwikweitsitɨwame meta pɨnekakaɨyari. 
Hikɨ yemekɨ nepɨtiuka'eniwa, nekakaɨyari, 'ayumieme nemetsiku'eriwa Kurutani kwieyaritsie paitɨ, Heximuni hɨriyaritsie meutitewatsie paitɨtɨ, Mitsaxi hɨriyaritsie paitɨ. 
Xeime terɨtsie puwa'eiya haa manukaxɨrɨwe kwinimieme mutainetsie, naitɨ 'ahamewari nehetsie pɨkaxɨrɨwe. 
'Ikɨ nenewieri pɨhɨkɨ Kakaɨyari tukari mɨnetsi'upitɨa hetsiemieme: tukarikɨ Yawé yunaki'eriya kenetsiheyenɨ'airiwani, tɨkarikɨta kwikarieya nepuku'eriwani. 
Nekakaɨyari mɨpaɨ nekatinahɨaweni, Ne'ai: «¿Titayari peneratɨmai? ¿Titayari nenehiwerietɨ 'ena netiuyeikani nenanaimarietɨ memɨnetsi'aye'unie wahetsiemieme?» 
Mɨki ne'umeyarita paitɨ kaniuhakeni menetsinanaimakaku memɨnetsi'aye'unie, mɨpaɨ neranutahɨawarɨwatɨ nehɨxie tsepa kepauka: «¿Hakewa tamɨ 'akakaɨyari?» 
¿Titayari yɨkɨ netinekɨhɨaweni? ¿Titayari netine'uximatɨaka? Kakaɨyari hetsɨa timieme matsi nepɨtitakwewieka, meta nepinɨawani. Mɨkɨ netsiwikweitsitɨwame kanihɨkɨtɨni meta nekakaɨyari. 
