﻿Halelu.
34.
E HOOMAIKAI aku au ia Iehova i na manawa a pau; E mau ana i kuu waha ka hoolea nona. 
E hauoli kuu uhane ia Iehova; E lohe mai ka poe hoohaahaa a e olioli no hoi. 
E hoonui hoi oukou ia Iehova me au nei, A e hapai pu kakou i kona inoa. 
Ua imi aku au ia Iehova a ua hoolohe mai ia ia'u; Ua hoopakele mai oia ia'u i ka'u mau mea e makau ai a pau. 
Nana aku la lakou ia ia a malamalama iho la lakou; Aole hilahila ko lakou mau maka. 
Kahea aku la keia kanaka ilihune, A hoolohe mai la o Iehova ia ia, A hoopakele oia i kona popilikia a pau. 
Hoomoana mai ka anela o Iehova a puni ka poe weliweli ia ia, A ua hoopakele hoi ia lakou. 
E hoao oukou a e ike hoi he maikai no Iehova; Pomaikai ke kanaka i paulele ia ia. 
E weliweli aku ia Iehova, e ka poe haipule a pau; No ka mea, aole e nele ka poe weliweli ia ia. 
Ua nele a ua pololi na liona opiopio; Aka, o ka poe imi ia Iehova, aole e nele i ka mea maikai. 
E hele mai, e na kamalii, e hoolohe mai ia'u; A e ao aku au ia oukou i ka weliweli ia Iehova: 
Owai ke kanaka i makemake i ke ola, I makemake hoi i na la he nui i ike ai oia i ka maikai? 
E kaohi i kou alelo mai ka hewa, A me kou mau lehelehe i ole e olelo ino. 
E haalele i ka hewa a e haua ma ka pono; E imi i ka maluhia, a malaila e hahai ai. 
Kau pono na maka o Iehova i ka poe pono, A me kona mau pepeiao i ko lakou kahea ana. 
Ku e ka maka o Iehova i ka poe hewa, E hoonalo loa ia lakou mai ka honua aku. 
Kahea na mea pono, a hoolohe mai no hoi o Iehova; A hoakea mai no oia ia lakou i ko lakou popilikia a pau. 
Kokoke mai no o Iehova i ka poe naau palupalu; A hoola no hoi oia i na mea uhane mihi. 
He nui no ka pilikia ana o ka mea pono: A hoakea mai no hoi o Iehova ia ia, mai ia mea a pau. 
Malama no hoi oia i kona mau iwi, Aohe mea o lakou i haki. 
E hoomake no ka hewa i ke kanaka aia; A e hoopaiia ka poe inaina i ka poe pono. 
Hoola o Iehova i ka uhane o kana poe kauwa: Aohe mea paulele ia ia o lilo i ka hoopaiia. 
