﻿ዕብራውያን ኤድንከስካንታ ኦይትምሳን ክታ.
1.
ሳብ ኤና እሪ ስለናር Ꮊክ Ꮊክ ጎግካ፥ ሳብዘንካ ኤሰርሶ ኬዝድባብከስጎካ ዎንታ ባቤንከስካንታ በድᎺይካ ኬዝድ Ꮊቄ፥ 
ታ ማቼ ኮ በእንታ ስለናር ሙዳ ሪን ክታ ይንቺንጎካ ከኬን ተይድንግንዳ ይስስባብጎካ ዎካንታ ኬዜ፥ ፍጫ ሙደንመረ ክት ፍዛንዳ ክትኬ። 
ኖ ሳብታ ቦንቼንም ሮጵስሶ ሰችዝድባቤ፥ ኖይንታ እዘንካ ሳብካ ክክን ኖ ገታ የኬ። ይንታ ዎልቃ ቃለንካ ፍጫ ሙደን ዳቅስሶ ኖ የቴ፥ ኤድንከስመረ ከታ ጎመናርንካ ይ ጭልሳንደታ ቡሪ ጭላር አንድር ሳብንታ ምዝዘን ዶቅቴ። 
ክትካንታ ዎድምሳንዳ ላምና ክታይንችንታ ላምንዘንካ ስግ ማቻንከካ ሳብታ ይንቺና ክታይንችንዘንካ አንድር ስግዬ። 
ሳብ ቦድሶ ክታይንችንታ ዎክያርንካ፥ “የና እስታ ይንቼዬ፥ ታካ የስም አእትቴ” አነረ “እታ ክታ ባቤና ማድቴ፥ ኖየረ እስታ ይንቺ ማተረ” ጋይሳንዳ Ꮊየንካንተረ ካዬ። 
ሳብ ይንታ ዳነዝ ይንቺንም ኮ ፍጫሙደንካንታ ኦይቻንደትካ “ሳብታ ክታይንችንከስ ሙደና ክትካንታ ጎስታጋካ” ጋይቴ። 
ይንታ ክታይንችንጎካ “ክታይንችንከስም አያን፥ ሳብታ ፍክስንባብከስመረ ኖሄታ ሎግንችንግንዳ ማዝድቴ” ጋይዴ 
ይንታ ይንቺንጎካ ማቼ፥ “ሳብዮ! የስታ ዶቅንት ጎንገና ስለንክንደታ ዶቅተሬ፥ የስታ ባንችምንመረ ዶፈንካ ገችዝዳዬ፥ 
ጭለትችንም ሶልምሳዬ፥ ዳቀልስን ቦሳዬ፥ ኮጎካ ሳብ የስታ ሳብና የስም እጄ፥ የስታ ላኮይትንከዘንከረ ስግስሶ ጉርም እምድን ሳየርድንደትካ የስም ሳይሴ” ጋይዴ። 
ኮትኮግንደረ “ጮይስዮ! የና እሪምሳዮ ፍጨንም ፍዘዬ፥ ጭለንከሰረ የስታ አንንካ ፍዛዬ፥ 
ከታ ሙዳ ካይደኬ፥ የና ማቼ ዶቅተራዬ፥ ከታ ሙዳ አፍላ ግንዳ ገሰርደኬ። 
ዳኬንግንዳ ቁርተራዬ፥ ከተረ ገሳ አፍለን ክለካ ኦከርድንግንዳ ኦክምደኬ። የና ማቼ ሙዳᎺይካ የነተዬ፥ የስታ ስለንተረ በእንታ ካዬ” ጋይዴ። 
ሳብ ይንታ ክታይንችንታ ዎክያርንካ፥ “የስታ ይምኤንባብከስም የስታ ገችንታ ኤረንታ ጎያር ማስተርን የለልታ እስታ ምዝንዘን ዶእካ” ጋይሳንዳ Ꮊይካንተረ ካዬ። 
ይና፥ ክታይንችና ሙዳ አቅድባብ ኤድንከስካንታ ከት ፍክሳባብ ኦይትምድባብከስ ሳብታ ፍግዝድባብ አያንንከሰኬ። 
