﻿EZabbuli.
136.
Mwebalye oMusengwa olwʼokubba musa, 
Mwebalye oKibbumba afuga abakibbumba, 
Mwebalye oMusengwa wʼabasengwa, 
Mumwebalye iye yenkani akola ebyamagero ebyʼamaani, 
Iye oyo eyakolere eigulu nʼamalabukige, 
Iye oyo eyaalire ekyalo oku maizi, 
Iye oyo eyakolere ebyaka ebinene, 
Iye oyo eyakolere eisana okufuganga omusana, 
Iye oyo eyakolere omweri nʼenkota bifugenge obwire, 
Iye oyo eyaitire ebibere ebyʼe Misiri, 
Era iye oyo eyatoiryemu aBaisirairi omu Bamisiri, 
Iye oyo eyakoleserye obwezyebwe, 
Iye oyo eyayawiiremu eNyanza eNtukuliki aakati, 
Era nʼabitya aBaisirairi aakati waayo, 
Neye iye nʼasaanyawo oFalaawo nʼamajeege omu Nyanza eyo eNtukuliki. 
Iye oyo yakubbembeire abantube okubabitya omwidungu. 
Iye oyo eyaitire abakabaka abʼamaani, 
Iye oyo eyaitire abakabaka abatutumuki, 
Eyaitire oSikoni okabaka wʼaBamooli, 
nʼOgi okabaka wa Bbasani, 
Nʼekyalo kyabwe nʼakiwaayo ngʼobusika, 
nʼakiwa oIsirairi omuweereryawe. 
Iye oyo eyatwebukiirye nga tuli omu bunafu, 
nʼatununula eeri abalabe baiswe. 
Iye oyo awa ebibbumbe byonabyona ebyomi ebyokulya. 
Mwebalye oKibbumba owʼomwigulu. 
